Bible

John

¹Нырысь ик вал Кыл, но Кылыз вал Инмарлэн, но Кыл вал Инмар.

²Со вал нырысь ик Инмарлэн.

³Ваньмыз Со пыртӥ ӧдъяз луыны, но Сотэк номыре но ӧй вал, мар ӧдъяз луыны.

⁴Со пуӵкын вал улон, но улон вал югдыт калыкёслы.

⁵ Югыт югдытэ пеймытын, но пеймыт ӧз басьты сое.

⁶Инмарлэсь келямын вал адями, кудызлэн нимыз Иоанн.

⁷ Со лыктӥз ивортыны, ивортон понна Югыт сярысь, ваньмыз мед оскозы шуыса со пыртӥ.

⁸Со ӧй вал югыт, но келямын вал, вераны Югыт сярысь.

⁹Вал землыко Югыт, Кудыз котькудзэ дышетэ, кин лыктэ дунне вылэ.

¹⁰Со вал дунне вылын, дунне кылдӥз Со пыртӥ, нош дунне ӧз тодма Сое.

¹¹Со лыктӥз аслазъёсыз доры, но аслазъёсыз Сое доразы оз лэзе.

¹²Нош соослы, кин лэзиз Сое дораз, оскисьёслы Солэн нимызлы, сётӥз власть луыны Инмарлэн нылпиез шуыса,

¹³кудъёсыз ӧз вордӥське вирлэсь но мугорлэн мылпотэмезлэсь но пиосмуртлэн мылпотэмезлэсь но, нош вордӥськизы Инмарлэсь.

¹⁴Кыл луиз мугор но асьменым ӵош вал, тырмыса благодатен но шонерлыкен. Ми адӟимы Солэсь данлыксэ, Атайлэсь Одиг гинэ вордискем Пиезлэсь данзэ кадь.

¹⁵Иоанн вералляз Со сярысь но шуылӥз: «Та Со, Кудыз сярысь мон верай, мон сьӧры Мынӥсез мынам азьпалам луиз, малыке шуоно со вал мынам азьпалам.

¹⁶Солэн тырмеменыз ми ваньмы басьтӥмы благодать вылэ благодать,

¹⁷малыке шуоно Моисей пыртӥ сётэмын закон, нош благодать но шонерлык лыктӥзы Иисус Христос пыртӥ.

¹⁸Инмарез нокин но ноку но ӧвӧл адӟем – Сое возьматӥз Одиг гинэ вордскем Пиез, кудыз улэ Атаезлэн пуӵказ».

¹⁹Тӥни сыӵе вал веранэз Иоаннлэн, куке иудейёс келязы вал Иерусалимысь священникъёсты но левитъёсты юаны сое: «Кин тон?»

²⁰Со ялӥз, но ӧз но куштӥськы, но валэктыса вераз :"мон Христос ӧвӧл"

²¹Солэсь юазы: «Кин бен тон? Илия?» Со шуиз: «Ӧвӧл». «Пророк?» Со шуиз: «Ӧвӧл»

²²Соку соос шуизы: «Кин бен тон? Мар милеем верано, милемды келясьёслы : мар тон вералод ачид сярысь?»

²³Со шуиз : «Мон пустыняысь кесяськыса верась куара: «Лэсьтэ шонер сюрес Кузё Инмарлы» - кызьы шуиз пророк Исаия».

²⁴Келямёс вал фарисейёс пӧлысь.

²⁵Соос юазы солэсь: «Тон ӧвӧл ке Христос но Илия но пророк но ке ӧвӧл, малы соку крестить кариськод?»

²⁶Иоанн шуиз соослы: «Мон вуын крестить карисько, но тӥ пӧлын вань Кинке, Кудзэ тӥ уд тодӥське.

²⁷Со, мон бӧрсьы Лыктӥсь, мынам азьпалам луиз. Мон Солэсь пыдкутчетэзлэсь езэ но пертчыны ярано ӧвӧл»

²⁸Та вал Вифаниын, Иордан шур дурын, кытын крестить каре вал Иоанн.

²⁹Мукет нуналаз Иоанн адӟиз со доры лыктӥсь Иисусэз но шуиз: «Тани Инмарлэн Ыжпиез, Кудыз басьтэ Вылаз дуннелэсь сьӧлыксэ.

³⁰Со сярысь мон верай вал: «Мон сьӧры лыктэ Соиз, Кудыз султӥз мынам азьпалам, малыке шуоно Со вал нӥ мынам азьпалам»

³¹Мон уг тодӥськы вал Сое, нош мон лыктӥ крестить карыны Сое вуын со понна, Со Израильлы мед тодмо луоз шуыса».

³²Иоанн юнматыса вераз: «Мон адӟи Духез, кудыз ваське вал инмысь, дыдык музэн, но кылӥз Со вылын.

³³Мон уг тодӥськы вал Сое, нош монэ Келясь, крестить карыны вуын, вераз мыным:" Куке адӟёд Духез, Кудыз Кинке вылэ ваське но Со вылын луэ, Со вань Святой Духен крестить карись"

³⁴Но мон адӟи но ивортӥ, Со Инмарлэн Пиез шуыса".

³⁵Мукет нуналэ нош ик Иоанн аслаз кык дышетскисьёсыз сылэ вал.

³⁶Но, адӟиз Иисуслэсь лыктэмзэ но шуиз :"Тӥни Инмарлэн Ыжпиез"

³⁷Солэсь верамзэ кылыса, кыкез ик дышетскисьёсыз Иисус сӧры мынӥзы.

³⁸Нош Иисус, берытскыса адӟиз соос сӧраз мыно шуыса, но юаз соослэсь:"Мар тӥлед кулэ?" Соос шуизы Солы:"Равви (дышетӥсь), кытын улӥськод?"

³⁹"Лыктэ но адӟёды", - вераз соослы. Соос мынӥзы но адӟизы, кытын Со улэ, но улӥзы Со дорын со нуналзэ. Дыр вал дас час котыр.

⁴⁰Одӥгез кык пӧлысь, Иоаннлэсь Иисус сярысь кылылэмез, но Иисус сьӧры кошкисез, вал Андрей, Симон Пётрлэн выныз.

⁴¹Со нырысь ик шедьтэ аслэсьтыз вынзэ Симонэз но вера солы :"Ми шедьтӥмы Мессияез (Христосэз)"

⁴²Но ваиз сое Иисус доры. Иисус учкиз со шоры но шуиз:"Тон - Симон, Ионналэн пиез, тонэ нималозы Кифа, кудыз "из" ( Пётр ) луэ.

⁴³Мукет нуналэ Иисуслэн мынэмез потӥз Галилеяе. Но шедьтэ Филиппез но вера солы:"Лык Мон сьӧры"

⁴⁴Филипп нош вал Вифсаидысь, одӥг городысь Андреен но Пётырен.

⁴⁵Филип шедьтэ Нафанаилэз но вера солы:"Ми шедьтӥм Сое, Кин сярысь гожъяз Моисей но пророкъёс, Иисусэз, Иосифлэсь пизэ, кудыз Назаретысь".

⁴⁶Нош Нафанаил шуиз солы:"Марке ӟечез луыны быгатоз - а Назаретысь меда?"

⁴⁷Иисус, адӟиз Со доры лыктӥсь Нафанаилэз но вера со сярысь:"Тани зэмос Израильын улӥсь мурт, кудызлэн ӧвӧл кескич малпанэз".

⁴⁸ Нафанаил юа Солэсь:"Кытысь Тон монэ тодӥськод?" Иисус вераз солы:"Филипп тонэ ӧтемлэсь азьло ик, Мон тонэ адӟи смоковница улысь".

⁴⁹Нафанаил Солы пумитаз вазиз:"Равви! Тон - Инмарлэн Пиез, Тон - Израильлэн Царез".

⁵⁰Иисус солы вазиз:"Тон оскиськод, малыке шуоно Мон тыныд верай:"Мон адӟи тонэ смоковница улысь",- талэсь но бадымзэгес адӟёд!"

⁵¹Но вера солы:"Зэм ик, зэм ик верасько тӥлед: табере тӥ адӟёды усьтӥськем инэз но Инмарлэсь ангелъёссэ, кдъёсыз тубо но васько Адямилэн Пиез доры".

¹Куиньметӥ нуналаз Галилеяысь Кан городын сюан вал, Иисуслэн анаез но отын вылэм.

²Озьы ик сюанэ ӧтизы Иисусэз но Солесь дышетскисьёссэ.

³Но куке быриз виназы, Иисуслэн анаез вера Солы:"Милям винамы быриз".

⁴Иисус вера солы:"Мар Мыным но тыныд но, кышномурт? Мынам дыры ӧз на вуы",

⁵Солэн анаез шуыз ляльчиослы:"Мар Со тӥлед вералоз, сое ик лэсьтэ",

⁶Сыло вал отын куать излэсь лэсьтэм кувшинъёс, кудъёсыныз иудейёс чылкытатон сямзэс лэсьтыло вал. Котькудызлэн быдӟалаез вал сю литр пала.

⁷Иисус шуэ соослы:"Тырмытэ кувшинъёсты вуэн". Но тырмытӥзы соосты йылозяз.

⁸Но вераса соослы:"Табере омырты но шулдыръяськонлэн тӧроезлы нуэ". Но нуизы.

⁹Куке тӧро шӧмтӥз вуэз, кудыз вина пӧрмиз,- нош со уг тоды вал, кытысь со вина, ляльчиос гинэ тодо вал, кудъёсыз ву омыртӥзы, - соку тӧро эмеспиез ӧте

¹⁰но вера солы:"Котькуд адями нырысь ик ӟечсэ виназэ секта, нош шӧмаськемзы бере уродзэгес, нош тон ӟеч винадэ та дырозь возем".

¹¹Тазьы Галилеяысь Кан городын Иисус чудооссэ лэсьтыны ӧдъяз но Аслэсьтыз данзэ возьматӥз.Но Солэн дышетскисьёсыз оскизы Солы.

¹²Со бере Со, Солэн анаез, вынъёсыз но дышетскисьёсыз лыктӥзы Капернауме, кытын улӥзы кӧняке нунал.

¹³Матэктэ нӥ вал иудейёслэн Пасхазы. Иисус лыктӥз Иерусалиме

¹⁴но адӟиз, храмын вузало ошъёсты, ыжъёсты но дыдыкъёсты, но пуко коньдон вошъясьёс.

¹⁵Но, лэсьтыса гозыослэсь сюло, улляз храмысь ваньзэсты, озьы ик ыжъёсты но ошъёсты. Но пазяз коньдонзэс коньдон воштӥсьёслэсь, нош ӝӧкъёссэс бэрыкъяз.

¹⁶Но шуиз дыдык вузасьёслы:"Тае татысь басьтэ но Мынам Атаелэсь корказэ эн лэсьтэ вузкарон инты".

¹⁷Соку дышетскисьёсыз тодазы ваизы, гожтэмын шуыса:"Тынад коркоед сярысь сюлмаськон йыръе Монэ".

¹⁸Солы пумит иудуйёс юазы:"Кыӵе тодметэн возьматод Тон милем, властьед вань шуыса тазьы лэсьтыны?"

¹⁹Иисус вераз соослы пумитазы:"Куӵкатэ та храмез, но Мон сое куинь нуналскын пукто".

²⁰Талы пумит иудейёс веразы:"Та храм пуктэмын вал ньыльдон куть ар, нош Тон куинь нуналскын выльысь пуктод сое?"

²¹Нош Со вера вал Аслаз мугорызлэн храмез сярысь.

²²Куке Со улӟыса кулэмысь султӥз, соку дышетскисьёсыз тодазы ваизы Сое, Со вераз вал тае шуыса, но оскизы Писаниелы но Иисуслэн верам кылызлы.

²³Но куке Со вал Иерусалимын Пасхаез праздновать карыку, Солэсь чудоос лэсьтэмзэ адӟыса, тросэз оскизы Солэн нимызлы.

²⁴Нош Ачиз Иисус ӧз оскыты Ассэ соослы, малыке шуоно тодэ вал ваньзэсты

²⁵но кулэ ӧй вал Солы, кинке мед вералоз шуыса адями сярысь, малыке шуоно со Ачиз тодэ вал, мар адями пуӵкын.

¹Фарисейёс пӧлын вал Никодим нимо адями - одӥгез иудейёс пӧлысь кивалтӥсь.

²Со лыктӥз Иисус доры уйин но юаз Солэсь:"Равви! Ми тодӥськом Тон дышетӥсь шуыса, кудыз Инмар дорысь лыктэмын, малыке шуоно, сыӵе чудоосты, кудъёссэ Тон лэсьтӥськод, нокин но уз быгаты лэсьтыны, соин ӧз ке луы Инмар".

³Иисус шуиз солы:"Зэм ик, зэм ик верасько тыныд:кин ке ӧз ке вордӥськы вылӥысен, уз адӟы Инмарлэсь Царствозэ".

⁴Никодим вера Солы:"Кызьы пересь адями быгатоз вордӥськыны? Кызьы, бен, со кыкэтӥзэ пырыны быгатоз анаезлэн пушказ но выльысь вордӥськыны?"

⁵Иисус пумитаз вера:"Зэм ик, зэм ик верасько тыныд: кинке ӧз ке вордӥськы вулэсь но Духлэсь, уз быгаты пырыны Инмарлэн Царствоаз.

⁶Кин вордӥське мугорлэсь - со мугор, нош кин вордӥськоз Духлэсь - со дух.

⁷Эн паймелэ солы, мар Мон тӥлед верай:"Тӥ вордӥськыны кулэ вылӥысен".

⁸Дух шока, кытын мылыз потэ, куаразэ но солэсь кылӥськод, нош уд тодӥськы, кытысь лыктэ но кытчы кошке. Озьы луэ котькудыныз, кин вордӥськемын Духлэсь".

⁹Никодим юаз Солэсь:"Кызьы со озьы луыны быгатэ?"

¹⁰Иисус шуиз солы:"Тон - Израильысь дышетӥсь но сое но уд тодӥськы?

¹¹Зэм ик, зэм ик верасько тыныд: ми вераськом со сярысь, мае тодӥськом, ивортӥськом сое мае адӟиськом, нош тӥ кулэ уд кариське милесьтым ивортэммес.

¹²Мон верасько ке тӥлед музъемлэнэз сярысь, но тӥ уд оскиське, нош кызьы оскоды, верай ке тӥлед инмысезлэн сярысь?

¹³Нокин но ӧз на туба инме, инмысь васькись Адямилэн Пиез сяна, кудыз инмын улэ.

¹⁴Кызьы Моисей ӝутӥз кыйез пустыняын, озьы ик жутӥськыны куэ Адямилэн Пиез

¹⁵котькудыз Солы оскись медаз быр, нош мед луоз солэн ноку но быронтэм улонэз.

¹⁶Уго Инмар яратӥз дуннеез, но сётӥз аслэсьтыз Одӥг вордӥськем Пизэ, котькудыз Солы оскись медаз быр, нош мед луоз солэн ноку но быронтэм улонэз шуыса.

¹⁷Малыке шуоно Инмар ӧз келя пизэ быдтыны дуннез, нош лыктӥз, Со пыртӥ дунне утемын мед луоз шуыса.

¹⁸Солы оскись судэ сётэмын уз луы, нош кин Солы уг оскы, судить каремын ини, малыке шуоно ӧз оскы Одӥг гинэ Вордӥськем Инмарлэн пиезлы.

¹⁹Судлэн пуштросэз тазьы, югыт лыктӥз дуннее, нош калык тужгес яратӥзы пеймытэз югытлэсь золгес, малыке шуоно ужъёссы соослэн лекесь.

²⁰Уго котькудыз, кин лэсьтэ лек уж, адӟемпотостэм каре югытэз но уг лыкты югыт доры, медаз шараяське шуыса солэн лек ужъёсыз.

²¹Нош шонер лэсьтӥсь югыт доры мынэ, мед адӟиськоз шуыса солэн ужъёсыз, малыке шуоно соос лэсьтэмын Инмар пуӵкын".

²²Со бере Иисус лыктӥз Аслаз дышетскисьёсыз иудейской музъем вылэ, отын улӥз соосын но крестить карылӥз.

²³Озьы ик Иоанн крестить кариз Салим вӧзысь Енонын, малыке шуон отын тросс вуэз вал. Отчы лыктылӥзы но крестится кариськылӥзы,

²⁴соку Иоанн пытсамтэ но вал на тюрьмае.

²⁵Соку Иоаннлэн дышетскисьёсызлэн иудейёсын кылзы ӧз тупа чылкытатон сярысь.

²⁶Лыктӥзы Иоанн доры но юазы:"Равви! Со, Кин вал тонэныд Иордан дорын но Кудыз сярысь тон верад вал, тӥни, Со крестить кароз, но ваньмыз мыно Со доры".

²⁷Иоанн вераз:"Номыре но уз быгаты басьтыны адями вылаз, солы сетэмын ӧз ке луы инмысен.

²⁸Тӥ асьтэос отын вал, мар мон верай:"Мон ӧвӧл Христос, нош мон келямын Солэн азьпалаз"

²⁹Эмеспи со, кинлэн вань кенэз, эмеспилэн эшез сылэ но сак кылзӥське эмеспилэсь куаразэ но тырме шумпотонэн. Тани мынам шумпотонэ быдэсмиз.

³⁰Солы кулэ будыны нош мыным пичигес луыны.

³¹Вылӥысь лыктӥсь ваньмызлэсь бадӟымгес, нош музъелэнэз музъемлэн ик кылёз, вераське но музъемлэн кадь.Инмысь лыктӥсь ваньмызлэсь бадӟымгес,

³²но мае Со адӟиз но кылӥз, со сярысь ик вера, но нокин но уг басьты Солэсь верамзэ.

³³Кин басьтоз Солэсь верамзэ со юнматыса возьматэ Инмарлэзь зэмлыксэ

³⁴малыке шуоно Кинэ келяз Инмар, Со вера Инмарлэсь Кылъёссэ, малыке шуоно мертаса уг сёты Инмар Духсэ.

³⁵Атай яратэ Пизэ но ваньзэ сётӥз Солэн кияз.

³⁶Кин оске Пӥлы, солэн вань ноку но быронтэм улонэз , нош кин уг оскы Пилы, уз адӟы улонэз, нош Инмарлэн йыркурез кылёз со вылын".

¹Куке Иисус тодӥз фарисейёс доры вуиз ни шуыса вераськонъёс, Иисус пе дышетскисьёсэ люка но Со Иоаннлэсь троссгес крестить каре,-

²хотя Иисус ачиз крестить ӧз карылы, нош Солэн дышетскисьёсыз гинэ,-

³соку, Иудеяез кельтӥз но выльысь мынӥз Галилеяе.

⁴Нош Солы Самария пырти ортчёно вал.

⁵Соку лыктэ Со Самариысь Сихарь городэ, кудыз кыдёкын ой вал, Иаковлен аслаз пиезлы Иосифлы сётэм музъем удыслэсь.

⁶Отын вал Иаковлэ колодчаез. Иисус жадем сюрэс вылын но колодча вӧзы пуксем. Куать час котыр дыр вал.

⁷Самариысь кышномурт лыктэ ву понна. Иисус солы вера:"Вай Мыным юыны",-

⁸малыке шуоно Солэн дышетскисьёсыз кошкизы городэ сиён басьтыны.

⁹Самарянка шуиз солы:"Кызьы Тон иудей куриськод юыны самарянкалэсь? Уго иудейёс самарянъёсын уг верасько".

¹⁰Иисус шуиз солы пумитаз:"Тон тодысал ке Инмарлэсь кузьымзэ но Кин вера тыныд:"Вай Мыным юыны", соку тон ачид курысал Солэсь, но Со сётысал тыныд улэп ву".

¹¹Кышномурт шуэ Солы:"Господин! Тынад омыртонэд но ӧвӧл, нош колодча мур, кытысь бен Тынад улэп ву?

¹²Тон, бадӟымгес шат, милям атаймылэсь Иаковлэсь, кудыз сётиз милем та колодчаез но ачиз но, солэн нылпиосыз но, пудоез но отысь ик юылӥз?"

¹³Иисус вераз солы пумитаз:"Котькуд адямилэн, кин юоз та вуэз, выльысь сюэз куасьмоз,

¹⁴нош кин юоз вуэз кудзэ Мон сёто, солэн ноку но юэмез уз нӥ поты, нош ву кудзэ Мон сёто солы, пӧрмоз со пушкын ошмес, кудызлэн вуэз пумтэм- быронтэм улонэ бызе".

¹⁵Кышномурт шуэ Солы:"Господин! Вай мыным со вуэз, мынам сюэ но медаз нӥ куасьмы но татчы ву доры ветлонэз но медаз нӥ луы".

¹⁶Иисус вера солы:"Мын, ӧть карттэ но лыкты татчы".

¹⁷Кышномурт пумитаз вераз:"Мынам ӧвӧл картэ". Иисус солы шуэ:"Туж умой, тон верад, картэд ӧвӧл шуыса,

¹⁸уго тынад вал вить картъёсыд, но соиз,кудыныз тон улӥськод, тыныд карт ӧвӧл. Созэ тон шонер верад".

¹⁹Кышномурт шуэ Солы:"Господин! Адӟисько, тон пророк шуыса.

²⁰Милям атайёсмы йыбыртъяллязы та гурезьын, нош тӥ вераськоды, йыбыртъяны яра Иерусалимын гинэ.

²¹Иисус вера солы:"Оскы Мыным, вуоз сыӵе дыр, куке та гурезьын но Иерусалимын но уз нӥ йыбыртъялэ Атайлы.

²²Тӥ уд тодӥське, марлы йыбыртъяськоды, нош ми тодӥськом, марлы йыбыртъяськомы, спасение иудейёслэсь уго.

²³Нош вуоз дыр, но вуиз ини, куке зэмос йыбыртъяськисьёс Атайлы йыбыртъяськозы духын но зэмлыкен, малыке шуоно сыӵе йыбыртъяськисъёсты Атай утча Аслыз.

²⁴Инмар - со дух, но йыбыртъяськись Солы йыбыртъяськыны кулэ духын но зэмлыкен".

²⁵Кышномурт шуэ Солы:"Тодӥсько, лыктоз Мессия, кудзэ шуо Христос.Куке Со лыктоз, соку усьтоз милем ваньзэ".

²⁶Иисус вера солы:"Мон Со, Кудыз вераське тонэныд".

²⁷Со куспын лыктӥзы Солэн дышетскисьёсыз но паймизы, Со вераське шуыса кышномуртэн, озьы ке но, одӥгез но соос пӧлысь ӧз вералэ:"Мар Тыныд кулэ?" яке:"Мар сярысь вераськид соин?"

²⁸Соку кышномурт кельтӥз аслэсьтыз кувшинзэ но мынӥз городэ, но вераз калыклы:

²⁹"Мынэлэ, учкелэ Адямиез, Кудыз мыным вераз ваньзэ, мар мон лэсьтӥ: Со Христос ӧвӧл меда?"

³⁰Соос потӥзы городысь но Со доры мынӥзы.

³¹Сое дышетскисьёсыз куризы:"Равви! Сиськы".

³²Но Со сослы шуиз:" Мынам вань сионэ, кудыз сярысь тӥ уд тодӥське".

³³Соин ик дышетскисьёсыз куспазы верасько вал:" Кинке шат Солы ваиз сион?"

³⁴Иисус вера соослы:"Мынам сионэ луэ, Монэ Келясьлэсь куронзэ быдэстон но Солэсь ужзэ лэсьтон.

³⁵Тӥ уд шат вераське, ньыль толэзь ортчем бере вуоз аран дыр? Нош Мон верасько тӥлед: ӝутэ синъёстэс но учке ю бусыос шоры, соос тӧдьыектӥзы ини, дасесь нӥ араны.

³⁶Арась басьтэ кузьым но люка емыш ноку быронтэм улонэ, озьыен кизись но арась но ӵошен шум потозы,

³⁷соку дыръя шонер верам:"одӥгез кизе нош мукетыз ара".

³⁸Мон келясько тӥледды араны, мае тӥ ӧд лэсьтэ:мукетъёсыз лэсьтӥзы, нош тӥ люкаськоды емышсэ соослэсь ужамзылэсь".

³⁹Со городысь тросэз самаръянёс оскизы Солы кышномуртлэн кылъёсызлэсь, кудыз ивортӥз, Со пе ваньзэ шонер вераз солэсь ужъёссэ.

⁴⁰Соин ик, куке Со доры лыктӥзы самарянъёс, куризы Сое доразы улыны, но отын Со вал кык нунал.

⁴¹Но эшшо но тросс калык оскизы на Солэн кылыныз..

⁴²Нош со кышномуртлы шуылӥзы:"Тынад кылыныд гинэ ум нӥ оскиське, малыке шуоно асьмеос кылӥм но тодӥм, Со- Христос дуннелэн зэмос утисез".

⁴³Кык нунал ортчем бере, Со потӥз отысь но мынӥз Галилеяе,

⁴⁴малыке шуоно Иисус Ачиз вераз, пророкез уг дунъяло шуыса аслаз вордӥськем палъёсаз.

⁴⁵Куке Со лыктӥз Галилеяе, отын улӥсьёс Сое принять каризы, малыке шуоно соос вал Иерусалимын проздник дыръя но ваньзэ адӟизы мар Со лэсьтӥз.

⁴⁶Иисус нош ик лыктӥз Галилеяеысь Кан городэ, кытын вуэз вина лэсьтӥз вал. Капернаумын вал царьлэн визь-кенеш сётӥсез, кудызлэн висе вал пиез.

⁴⁷Со кылэм Иисус лыктэм шуыса Иудеяысь Галилеяе, лыктӥз Со доры но куриз Сое мед катьялоз шуыса солэсь пизэ, кудыз кулон калын кылле.

⁴⁸Иисус шуиз солы:"Тӥ уд оскэ, ӧд ке адӟе тодмет но чудо".

⁴⁹Царьлэн визь-кенеш сётӥсез вера Солы:"Господин! Лыкты вал, мынам пиелэсь кулэмезлэсь азьло".

⁵⁰Иисус вера солы:"Мын, тынад пиед катьяськиз".Со оскиз Иисуслэн верамезлы но кошкиз.

⁵¹Сюрэс вылысен солэн ляльчиосыз сое пумитазы но веразы:"Тынад пие катьяськиз".

⁵²Со юаз соослэсь:"Кыӵе дырын солы йӧн луиз?" Солы шуизы:"Толон сизьыметӥ часын горячка кельтӥз сое".

⁵³Со бордысен атаез тодӥз, та со дыр вал шуыса,Куке Иисус солы вераз:"Тынад пиед катьяськиз".Соку оскиз ачиз но ваньмыз солэн коркасьтыз.

⁵⁴Иисуслэн Иудеяысь Галилеяе бертэмез бэре та кыкетӥез чудо вал, кудзэ Со лэсьтӥз.

¹Та бере вал иудейёслэн праздниксы, но лыктӥз Иисус Иерусалиме.

²Нош Иерусалимын, Ыж капка дорын, пыласькон инты вань, кудзэ еврейёс Вифезда шуо, кудызлэн вить липем пыронниез вал.

³Отын кыллё вал тросс висись, синтэм, чут, лябомем калык, кудъёсыз витё вал вулэсь бугыръяськемзэ,

⁴малыке шуоно ангел куд дыръя васькальляз пыласькон интые, но бугыръяськытылӥз вуэз, но кин нырысь ик отчы пырылӥз ву бугыръяськыны кутскем берэ , котькуд висёнъёслэсь катьяськылӥз.

⁵Вал отын одӥг адями, кудыз висе вал куамын тямыс ар.

⁶Иисус, адӟиз солэсь кыллемзэ но тодӥз со татын кемалась кылле ни шуыса, вера солы:"Катьяськемед потэ-а?"

⁷Висись вера солы:"Бен Господин, нош ӧвӧл адями, кудыз монэ лэзьысал пыласьконние, ву бугыръяськыны ӧдъяку. Нош куке мон лыктӥсько, мукетыз васькемын ини мынысьтым вазьгес"

⁸Иисус шуиз солы:"Басьты валескотырдэ но мын".

⁹Но со сокуспын ик катьяськиз, басьтӥз валескотырзэ но мынӥз. Ваньмыз та вал субботае,

¹⁰соин ик иудейёс катьяськемлы веразы:"Туннэ суббота. Уг яра валескотырдэ нуыны".

¹¹Со пумитазы вераз:"Кин монэ катьяз, Со шуиз мыным:"басьты валескотырдэ но мын"

¹²Солэсь юало:"Кин Со адями, кудыз шуиз тыныд:"басьты валескотырдэ но мын?"

¹³Катьяськем адями уг тоды вал, кин Со, нош Иисус ватскиз калык пӧлы, кудыз вал со интыын.

¹⁴Со бере Иисус пумитаз сое храмын но шуиз:"Тон катьяськид, отӥяз эн нӥ лэсьты сьӧлык, медаз луы уродгес вазьлоезлэсь".

¹⁵Со адями мынӥз но вераз иудейёслы, сое катьясь - Иисус

¹⁶Но ӧдъязы иудейёс улляны но преследовать карыны Иисусэз субботае лэсьтэ шуыса сыӵе ужъёс.

¹⁷Иисус нош соолы вераз:"Мынам Атае озьы лэсьтэ, мон но лэсьтӥсько"

¹⁸Иудейёслэн тужгес но виемзы потӥз Иисусэз, субботаез кулэтэм каремезлэсь гинэ ӧвол, но Инмарез Аслаз Атаез шуэмезлэсь, Асьсэ Инмарен одигкадь лэсьтэмез понна.

¹⁹Та пумысен Иисус шуиз:"Зэм ик, зэм ик верасько тӥлед, Пи номыре но уз быгаты лэсьтыны Аслэсьтыз Ачиз, ӧз ке адӟы Атаезлэсь лэсьтэмзэ: мае Со лэсьтэ, Пиез но сое ик лэсьтэ.

²⁰Уго Атаез яратэ Пизэ но возьматэ Солы ваньзэ. мае Ачиз лэсьтэ, но возьматоз Солы талэсь бадӟымгес ужъёс, ти паймоды аль.

²¹Уго кызь Атай кулэмъёсты улӟытъя но сётэ улон, озьы ик Пи сётэ улон, кинлы сётэмез потэ.

²²Уго Атай нокинэ но уг судья, нош вань судэз Пиезлы сётӥз,

²³ваньмыз мед лыдъяськозы шуыса Пиеныз, кызьы лыдъясько Атаеныз. Кин уг лыдъяськы Пиен, со уг лыдъяськы Атаен, кудыз келяз Сое.

²⁴Зэм ик, зэм ик верасько тӥлед:" кин кылӟиське Мынысьтым кылъёсме но оске Монэ Келясьлы, солэн пумтэм-быронтэм улонэз вань, судэ но со уг лыкты, нош вамыштӥз кулонысь улонэ.

²⁵Зэм ик, зэм ик верасько тӥлед:"матэктэ ини дыр, вуиз но ни, куке кулэмъёс кылозы Инмарлэн Пиезлэсь куаразэ но,кылыса, улӟыса султозы.

²⁶Кызьы Атайлэн вань улонэз Аслыз Ачиз, озьы ик Пиезлы но сётӥз улон Аслыз Ачиз.

²⁷Но сётӥз Солы власть судить карыны, малыке шуоно Со - Адямилэн Пиез.

²⁸Эн паймелэ солы, малыке шуоно вуэ дыр, куке ваньмыз, кин вань шӧйгуосын, кылозы куаразэ Инмарлэн Пиезлэсь,

²⁹но потозы ӟеч лэсьтӥсьёс, улон улӟёнэ, нош лек лэсьтӥсьёс - судлэн улӟёназ.

³⁰Мон номыре но уг быгатӥськы лэсьтыны Ачим Аслэсьтым. Кызьы кылӥсько, озьы ик судить карисько, но Мынам судэ шонер, уго Аслысьтым воляме уг утчаськы, нош Монэ келясь Атаелэсь волязэ.

³¹Мон верасько ке Асьме Ачим сярысь, соку Мынам вераме шонер ӧвӧл

³²Вань мукетыз Мон сярысь верась, но Мон тодӥсько, зэм шуыса со верам, кудыныз Со Мон сярысь вера.

³³Тӥ келяльяды Иоанн доры, но со валэктыса вераз зэмлык сярысь

³⁴Озьы ке но, Мон адямилэсь верамзэ уг басьтӥськы, нош верасько тае, тӥ мед мозмоды шуыса.

³⁵Со вал югыт карись, кудыз ӝуаз но югыт кариз, нош тӥляд ичи дыр куспын шулдыръяськемды потӥз солэн югытэзлы,

³⁶Нош Мынам тросгес веранэ Иоаннлэсь, уго ужъёс, кудзэ Атае сётӥз Мыным быдэстыны, та ужъёс, кудзэ Мон лэсьтӥсько, Мон сярысь верало, Атае Монэ келяз шуыса.

³⁷Но Монэ келясь Атае Ачиз вераз Мон сярысь.Нош тӥ Солэсь куаразэ но ноку но ӧд адӟылэ, тусбуйзэ но ӧд адӟылэ,

³⁸но ӧвӧл тӥляд Солэн кылыз, кудыз тӥ пучкын луыны кулэ, малыке шуоно тӥ уд оскиське Солы, Кинэ Со келяз.

³⁹Сэрттэ-пертче Писаниеосты, малыке шуоно тӥ малпаськоды соос пыртӥ басьтыны пумтэм-быронтэм улон, нош соос верало Мон сярысь

⁴⁰Нош тӥляд лыктэмды уг пон Мон доры, вечной улонлы

⁴¹Калыклэсь данзэс уг басьтӥськы,

⁴²нош тодӥсько тӥледлы:тӥ пушкын ӧвӧл Инмарез яратон.

⁴³Мон лыктӥ Мынам Атаелэн нимыз понна, но кулэ уд кариське Монэ, нош кинке лыктоз ке аслаз нимыз понна, соку сое кулэ кароды.

⁴⁴Кызьы тӥ быгатӥськоды оскыны, куке одӥг огдылэсь кулэ кариськоды данзэ, нош Одӥго Инмарлэсь данзэ, уд утчаське?

⁴⁵Эн малпалэ, Мон лыктӥ шуыса янгыше уськытыны тӥледлы Атае азьын: вань тӥляд янгыше уськытӥсьты, Моисей.

⁴⁶Тӥ оскысалды ке Моисейлы, соку оскысалды Мыным, малыке шуоно со гожтӥз Мон сярысь.

⁴⁷Солэн гожтэмъёсызлы ке уд оскиське, кызьы оскоды Мынам кылъёсылы?"

¹Со бере Иисус мынӥз Галилейской морелэн муке палаз Тивериада ёросэ.

²Со сьӧры тросс калык мынэм, малыке шуоно адӟиллям чудоос, кудъёссэ Со лэсьтылӥз висисьёс вылын.

³Иисус тубем гурезе но отчы пуксем Аслаз дышетскисьёсыныз.

⁴Матэктэ нӥ вал Пасха - иудейёслэн праздниксы.

⁵Иисус, синъёссэ ӝутыса, адӟиз трос калык лыктэ Со доры, но вера Филипплы:"Кытысь асьмеос басьтом нянь, вань калыкез сюдон понна?"

⁶Нош вераз озь, эскерон вылысь сое, малыке шуоно Солэн вал малпанэз кызьы лэсьтыны.

⁷Филипп вераз Солы:"Котькудызлы ӧжыт ке но нянь сётоно ке, кык сю динарий коньдон но уз тырмы нянь басьтыны".

⁸Одӥгез Солэн дышетскисез, Андрей, Симон Пётрлэн выныз, шуэ Солы:

⁹"Татын вань одӥг пияшлэн вить йыды нянез но кык чёрыгез, мар со тамында калыклы?"

¹⁰Иисус шуиз:"Косэлэ соосты пуксьыны". Со интыын вал тросс турын. Вить сюрс пала адямиос пуксизы турын вылэ.

¹¹Иисус, басьтыса нянь тау кариз Инмарлы, сётӥз дышетскисьёсызлы, дышетскисьёсыз - пукисьёслы, озьы ик чёрыгъёсты сётчаз соослы, кинлэн кӧня мылыз потӥз.

¹²Куке ваньмызлэн кӧтсы тыриз, шуиз Аслаз дышетскисьёсызлы:"Люкалэ кылемзэ нянь юдэсъёсты, номыре но медаз быры шуыса".

¹³Но люказы, но тырмытӥзы дас кык куды юдэсъёсын вить йыды няньлэсь, сиисьёслэсь кылемзэ.

¹⁴Соку калыкъёс, адӟизы Иисуслэсь лэсьтэм чудозэ но шуизы:"Та адями, зэм ик но пророк, кудыз лыктыны кулэ вал дунне вылэ".

¹⁵Нош Иисус, тодӥз дораз лыктыны медо но пуктыны малпало Сое Царен шуыса, выльысь кошкиз гурезе.

¹⁶Куке вуиз жыт, Солэн дышетскисьёсыз васькизы море дуре

¹⁷но пуксьыса лодкае, потӥзы морелэн мукет палаз, Капернауме. Пеймыт кариськиз, нош Иисус уг лыкты соос доры.

¹⁸Пельтӥз тӧл, но мореын ӝутскизы тулкымъёс.

¹⁹Уяса вить - куать иськем, соос адӟизы Иисусэз, кудыз матэктэ нӥ вал лодка доры море вылтӥ вамышъяса, но кышказы.

²⁰Нош Со шуиз соослы:"Мон Со. Эн кышкалэ".

²¹Соос малпало вал Сое лодкае пуктыны - но со куспын ик лодка яр доры вуиз, кудыз доры уяло вал.

²²Ӵуказеяз, мукет палаз морелэн сылӥсьёс, адӟизы, отын одӥг гинэ лодка сяна ӧй вал шуыса, но отчы пыризы Солэн дышетскисьёсыз гинэ огнязы, но уяса потӥзы соос Иисустэк.

²³Со куспын лыктӥзы Тивериадаысь мукет лодкаос матэ со интые, кытын соос сиизы нянь, кудзэ Кузё Инмар благославить кариз.

²⁴Куке калык адӟиз, татын ӧвӧл шуыса Иисус но Солэн дышетскисьёсыз но, пыризы лодкаосы но уяса потӥзы Капернауме, Иисусэз утчаны.

²⁵Но, шедьтыса Сое мукет палаз морелэн, шуизы Солы:"Равви! Ку Тон татчы лыктӥд?"

²⁶Иисус вераз соослы пумитазы:"Зэм ик, зэм ик верасько тӥлед: тӥ уд утчаське Монэ, чудосты адӟиды шуыса, нош утчаськоды нянь сииды но кӧтты тыриз шуыса.

²⁷Эн ужалэ сисьмыса бырись сиён понна, нош ужалэ сиён понна, кудыз кылёз пумтэм-быронтэм улонын, кудзэ сётоз тӥлед Адямилэн Пиез, Со вылэ уго пуктӥз Аслэсьтыз печатьсэ Атай Инмар",

²⁸Соку Солэсь юазы:"Мар милем лэсьтоно, быдэстыны понна Инмарлэсь ужъёссэ?"

²⁹Иисус вераз соослы пумитазы:"Тани Инмарлэн ужез: тӥ мед оскоды Солы, Кинэ Со келяз".

³⁰Солы шуизы:"Кыӵе Тон тодмет лэсьтод: мед ми оскомы шуыса Солы, Кинэ Со келяз".

³¹Атайёсмы сиылӥзы манна пустыняын, кызьы гожтэмын "нянь инмысь сётӥз соослы сиыны".

³²Иисус нош вераз соослы:"Зэм ик, зэм ик верасько тӥлед:Моисей ӧз сёты нянь инмысь, нош Мынам Атае сётэ тӥлед зэмос нянь инмысь.

³³Уго Инмарлэн Нянез вань Со, Кудыз ваське инмысь но сётэ дуннелы улон".

³⁴Талы шуизы Солы:"Господин! Сётч милем котьку сыӵе нянь".

³⁵Иисус нош шуиз соослы:"Мон - улонлэн нянез, Мон доры лыктӥсьлэн кӧтыз уз сюма, но Мыным оскисьлэн сюэз ноку но уз куасьмы.

³⁶Нош Мон шуи тӥлед, тӥ адӟылӥды Монэ, но уд оскиське.

³⁷Ваньзэ, мае сётэ Мыным Атае, Мон доры лыктоз, но Мон доры лыктӥсьсэ уг улля,

³⁸малыке шуоно Мон ӧй васькы инмысь, Аслэсьтым воляме быдэстыны, нош васьки, Монэ келясь Атаелэсь волязэ быдэстыны.

³⁹Монэ келясь Атаелэн воляез сыӵе, мае Со Мыным сётӥз, номыре но медам быры, нош ваньзэ сое улӟытыны берпуметӥ нуналэ.

⁴⁰Монэ келясь Атаелэн воляез сыӵе, котькудыз кин адӟе Пиез но оске Солы, басьтэ пумтэм-быронтэм улон но Мон улӟыто сое берпуметӥ нуналэ.

⁴¹Солэн верамысьтыз:"Мон - инмысь васькем нянь", иудейёс ӧдъязы роптать карыны Со вылэ.

⁴²Но вераллязы:"Ӧвӧл-а со Иисус, Иосифлэн пиез, атайзэ но анайзэ но кудызлэсь ми тодӥськом? Кызьы бен Со вера:"Мон васьки инмысь?"

⁴³Иисус шуиз соослы пумитазы:"Одӥг огеныды роптать эн каре.

⁴⁴Нокин но уз быгаты лыктыны Мон доры, ӧз ке сое ӧтьы Атай, кудыз келяз Монэ, но Мон улӟыто сое берпуметӥ нуналэ.

⁴⁵Пророкъёслэн гожтэмын"ваньмыз дышетэмын луозы Инмарен".Котькудыз кин кылӥз но дышетскоз Атайлэсь, лыктоз Мон доры.

⁴⁶Со ӧвӧл озьы, кинке адӟиз нӥ шуыса Атаез, Кин Инмарлэсь - Со гинэ адӟылӥз Атаез.

⁴⁷Зэм ик, зэм ик верасько тӥлед: кин оскоз мыным, солэн луоз пумтэм-быронтэм улонэз.

⁴⁸Мон-улонлэн нянез.

⁴⁹Атайёсты сиизы манна пустыняын но кулӥзы.

⁵⁰Нош нянь, инмысь васькемез, сыӵе: кин сое сиёз уз кулы.

⁵¹Мон инмысь васькем луло нянь.Кин сие со нянез, улоз пумтэм-быронтэм улонын.Нош нянь кудзэ Мон сёто Мынам мугоры, кудзэ Мон сёто дуннелэн улонэз понна".

⁵²Соку иудейёс ӧдъязы вожвы лъяськыны куспазы, вераса:"Кызьы Со сётыны быгатоз милем сиыны Аслысьтыз Мугорзэ?"

⁵³Иисус нош вераз соослы:"Зэм ик, зэм ик верасько тӥлед: ӧд ке сие Адямилэн Пиезлэсь Мугорзэ но ӧд ке юэ Солэсь Вирзэ, соку уз луы тӥляд пушкады улонды.

⁵⁴Со, кин сие Мынысьтым Мугорме, но кин юэ Мынысьтым Вирме, солэн вань пумтэм-быронтэм улонэз, но Мон сое берпуметӥ нуналэ кулэмысь улыто.

⁵⁵малыке шуоно Мынам мугоры - зэмлык сиён, но Мынам Виры - зэмлык юон.

⁵⁶Со, кин сие Мынысьтым Мугорме но юэ Мынысьтым Вирме, Мон пушкын улэ, но Мон со пушкын.

⁵⁷Кызьы келяз Монэ улэп Атай, но Мон Атаеным улӥсько, озьы ик со, кин сие Монэ, улоз Монэным.

⁵⁸Со ик вань нянь, кудыз васькиз инмысь.Со ӧвӧл манна кадь, кудзэ сиизы тӥляд атайёсты но кулӥзы: кин сиёз та нянез, улоз пумтэм - быронтэм улонын".

⁵⁹Сое вераз Со синагогаын, дышетыса Капернаумын.

⁶⁰Тросэз Солэн дышетскисьёсыз, кылӟыса тае шуылӥзы:"Кыӵе визьтэмесь кылъёс! Кинлэн кылскемез потэ тае?"

⁶¹Нош Иисус, пушказ тодыса, Солэн дышетскисьёсыз роптать каро шуыса, шуиз соослы:" Тӥледыз та ӵемтаськытэ?

⁶²Нош мар луоз, куке тӥ адӟёды Адямилэсь Пизэ, куке Со тубоз отчы, кытын вал азьло?

⁶³Дух сётэ улон, нош мугор пайда уг сёты. Кылъёсты, кудъёссэ Мон верасько тӥлед, - дух но улон.

⁶⁴Нош вань тӥ пӧлын куд огез оскисьтэмъёсыз" Уго Иисус ӧдъяназ ик тодэ вал, кин уг оскы но кин вузалоз Сое.

⁶⁵Но шуиз:"Соин ик вералляй Мон тӥлед, нокин но уг быгаты лыктыны Мон доры, со сётэмын ӧз ке луы солы Мынам Атаелэсь".

⁶⁶Со дырысен тросэз Солэн дышетскисьёсыз кошкизы Со дорысь но ӧз ни ветлэ Соин.

⁶⁷Соку Иисус шуиз Даскыкъёслы:"Тӥляд но кошкемды уг а поты?"

⁶⁸Симон Пётр вераз Солы:"Господи!Кин доры ми мыныны кулэ? Тынад вань пумтэм-быронтэм улонлэн кылъёсыз",

⁶⁹но ми оскимы но тодӥмы, Тон Христос - улэп Инмарлэн Пиез".

⁷⁰Иисус шуиз соослы:"Дас кык ӧй а быръйы Мон тӥледыз?Нош одӥгез тӥ пӧлысь-дьявал"

⁷¹Сое вераз Со Симонлэн пиезлэн Иуда Искариот сярысь, кудыз вал Дас кыкъёс пӧлысь но солэн Сое вузамез потэ вал.

¹Со бере Иисус ветлӥз Галилеятӥ, малыке шуон Иудеятӥ ветлэмез ӧз поты, иудейёслэн Сое виемзы потэм муген.

²Матэктэ ни вал иудейёслэн Суккот праздниксы.

³Соку Солэн вынъёсыз шуизы Солы:"Кош татысь но мын Иудеяе,Тынад дышетскисьёсыд но мед адӟёзы Тынысьтыд ужъёстэ.

⁴Малыке шуоно, кинлэнке тодмо луэмез потэ ке, уг лэсьты лушкем.Тон лэсьтӥськод ке сыӵе ужъёсты, возьмат Астэ дуннелы".

⁵Малыке шуоно Солэн вынъёсыз но уг оско вал Солы.

⁶Та верамзылы Иисус шуиз:"Мынам дыры ӧз на ву, нош тӥ понна котьку вань.

⁷Тӥледды дунне адӟемпотостэм карыны уг быгат, нош Монэ адӟемез уг пот, малыке шуоно Мон верасько со сярысь, солэн ужъёсыз лекесь шуыса.

⁸Тӥ мынэ празднике, нош Мон уг-на мын, малыке шуоно Мынам дыры ӧз-на вуы".

⁹Сое вераса соослы, кылиз Галилеяе.

¹⁰Нош, ку Солэн вынъёсыз лыктӥзы, Соку Со но лыктӥз празднике лушкем.

¹¹Иудейёс утчазы Сое праздникын но юаллязы:"Кытын Со?".

¹²Но вал трос вожвылъяськонъёс калыкын Со сярысь: одӥгъёсыз вераллязы Со ӟеч шуыса, мукетъёсыз вераллязы:"ӧвӧл, Со калыкез пӧяськоние вуттэ".

¹³Озьы ке но, нокин но Со сярысь шара ӧз вералля иудейёслэсь кышкаменызы.

¹⁴Нош праздниклэн шор вадесказ Иисус пыриз храме но дышетӥз.

¹⁵Но паймылӥзы иудейёс но шуылӥзы:"Кызьы Со сыӵе ӟеч тодэ Писаниез, дышетскытэк?"

¹⁶Солы пумитазы Иисус шуиз:"Мынам дышетэме - Мынам ӧвӧл, нош Монэ Келясьлэн,

¹⁷кинлэн быдэстэмез потэ Солэсь волязэ, со валалоз: та дышетон Инмарлэсь яке Мон Ачим верасько Аслысьтым.

¹⁸Кин вера аслысьтыз ачиз утча аслыз дан, нош Кин утча дан Сое Келясьлы, Со зэмлыко, Со пушкын шонертэмез ӧвӧл.

¹⁹Моисей ӧз-шат сёты тӥледлы закон? Нош нокин но тӥ пӧлысь законъя уг улы. Ма понна виемды потэ Монэ?"

²⁰Калык пумитаз вераз:"Тон пушкын демон ӧвӧл-а? Кинлэн виемез потэ Тонэ?"

²¹Соослы пумитазы Иисус шуиз:"Мон одӥг уж лэсьтӥ, но тӥ ваньды паймиськоды.

²²Моисей сётӥз тӥледлы обрезание(со Моисейлэсь ӧй вал ке но, нош атайёслэсь), но субботае тӥ обрезание лэсьтӥськоды адямиослы.

²³Субботае адями лэсьтэ ке обрезание, Моисейлэсь законзэ тӥяно медаз лу шуыса,- нош малы Мон вылэ ӧйркуръяськиськоды, Мон адямиез быдэсак катьяй шуыса субботае?

²⁴Эн судить каре тусызъя, нош шонерлыко судэн судить каре".

²⁵Со дыре куд огез Иерусалимысь улӥсьёс вераллязы:" Ӧвӧл-а бен Та Адями, Кудзэ виыны утчало?

²⁶Со шара вераське, но номыр но уг верало Солы: оло кивалтӥсьёс зэм ик но валазы, Со Христос шуыса?

²⁷Ми тодӥськом Сое, кытысь Со; Христос нош ку лыктоз, нокин но уз тоды, кытысь Со".

²⁸Соку Иисус, храмын дышетыкуз, кеськыса вераз:"Тодӥськоды Монэ но тодӥськоды кытысь Мон.Мон ӧй лыкты Аслысьтым Ачим, нош вань Монэ Зэмос-Келясь, кудзэ тӥ уд тодӥське.

²⁹Мон тодӥсько Сое, малыке шуоно Мон Солэсь, но Со келяз Монэ".

³⁰Но кутэмзы потэ вал Сое, нош нокин ӧз куты Сое, малыке шуоно Солэн дырыз ӧз на вуы.

³¹Калык пӧлысь нош тросэз оскизы Солы но вераллязы:"Куке лыктоз Христос, лэсьтоз шат тросгез тодметъёс, Та Адямилэн лэсьтэмезлэсь?"

³²Фарисейёс кылӥзы сыӵе вераськонъёсты Со сярысь, но соку фарисейёс но первосвященникъёс келязы ляльчиоссэс кутыны Сое.

³³Иисус нош шуиз соослы:"Трос ӧз нӥ кыльы Мыным тӥленыд луыны, но мон мыно Монэ Келясь доры.

³⁴Утчалоды Монэ, но уд шедьтэ,

³⁵Сое кылыса, иудейёс вераллязы одӥг огзылы:"Кытчы Со малпа мыныны, кытысь ми Сое ум шэдьтэ? Уг-а меда Со малпа мыныны грек городъёсы, кытын уло асьмелэн калыкмы но дышетыны грекъёсты?

³⁶Мар сярясь со кылъёс, кудъёссэ Со вераз:"утчалоды Монэ, но уд шэдьтэ, кытын Мон луо, отчы тӥ уд быгатэ лыктыны?"

³⁷Быдӟым праздниклэн берпуметӥ нуналаз Иисус кеськыса вераз:"Кинлэн сюэз куасьме, лыкты Мон доры но ю.

³⁸Кин оске Мыным, кызьы верамын Писаниын, солэн пушкысьтыз бызёзы луло вуэн шуръёс"

³⁹Тае Со вераз Дух сярысь, кудзэ басьтозы Солы оскисьёс: уго соос вылын ӧй вал но Святой Дух, малыке шуоно Иисус данъямтэ но вал.

⁴⁰Тросэз калык кылыса та кылъёсты шуылӥзы:"Зэм но Со пророк".

⁴¹Мукетъёсыз вераллязы:"Со - Христос". Нош муктъёсыз вераллязы:"Христос лыктоз шат Галилеяысь?

⁴²Ӧвӧл шат верамын Писаниын, Христос луоз шуыса Давидлэн выжыысьтыз Вифлеем городысь?"

⁴³Озьы калыкъёс люкиськиз Со сярысь пӧртэм малпанъёсын.

⁴⁴Куд огез соос пӧлысь тышо вал Сое кутыны, нош нокин но Сое ӧз иса.

⁴⁵Соин ик ляльчиос бэртӥзы фарисейёс но первосвященникъёс доры но соослэсь юазы:"Малы тӥ ӧд вае Сое?"

⁴⁶Ляльчиос шуизы:"Ноку но адями ӧз на вераськы, кызьы Со вераське".

⁴⁷Фарисейёс шуизы соослы:" Тӥледыз но шат пӧязы?

⁴⁸Кинъёс - ке кивалтӥсьёс яке фарисейёс пӧлысь оскизы шат Солы?

⁴⁹Та калык уг тоды законэз соин ик со проклять каремы".

⁵⁰Одӥгез соос пӧлысь, Никодим, уйин Иисус доры лыктылись, вера соослы:

⁵¹" Асьмелэн Законмы адямиез янгыше уськытэ-а, адямиез кылзиськытчёзь но тодытозь мар лэсьтэмзэ?"

⁵²Солы веразы:"Галилеяысь ӧвӧл-а тон? Сэртты-пертчы но тод, Галилеяысь пророк уг лыкты шуыса".

⁵³Но ваньмыз кошкизы гуртъёсазы.

¹Иисус Елеон гурезе мынӥз.

²Нош ӵукна выльысь лыктӥз храме, но вань калык лыктӥз Мо доры. Со пуксиз но ӧдъяз дышетыны.

³Татын фарисейёс но книжникъёс ваизы калгись кузпалъяськем кышномуртэз, кудыз кутэмын вал сьӧлык лэсьтыкуз, но, пуктыса сое шор вадескы,

⁴шуиз Солы:"Дышетӥсь! Та кузпалъяськем кышномурт кутэмын вал калгон сьӧлык лэсьтыкуз.

⁵Моисей законын косӥз асьмеды сыӵеосты, изэн зиръяса виыны, нош Тон ма вералод?

⁶Вераллязы озьы, эскерыса Сое, мед луоз шуыса муг янгыше уськытыны. Нош Иисус, улие мыкырскыса, чиньыеныз гожъяз музъем вылэ, кылэм-адӟеи но соосты карытэк.

⁷Куке азьланьтӥзы юалляськын Сое, Со, йырзэ жутыса, шуиз соослы:"Кудызлэн тӥ пӧлысь ӧвӧл сьӧлыкез, нырысь ик зӥрты солы изэн".

⁸Но нош ик, улӥе мыкырскыса, гожъяз музъем вылэ.

⁹Соос нош, тае кылыса но возьытсы соосты янгыше уськытыса, бадӟымысен ӧдъяса, оген оген кошкылӥзы,

¹⁰Нош Иисус, йырзэ ӝутӥз но, нокин но ӧвӧл, кышномурт сяна, но шуиз солы:"Кышномурт! Кытын тынад янгыше уськытӥсьёсыд? Нокин но тонэ судить оз кары-а?"

¹¹Со вераз:"Нокин но, Господи". Иисус шуиз солы:"Мон но тонэ судить уг кариськы. Мын но отӥяз сьӧлык зн лэсьты ни".

¹²Нош ик Иисус вералляз калыклы но шуиз соослы:"Мон - дуннелы югдытӥсь. Кин мыноз Мон сьӧры, со уз ветлы пеймытын, нош солэн луоз улонлэн югытэз".

¹³Соку фарисейёс шуизы Солы:"Тон вераськод Ачид Ачид сярысь, соин ик Тынад верамед шонер ӧвӧл".

¹⁴Иисус пумитазы вераз:"Мон верасько ке Ачим Ачим сярысь, мынам вераме шонер, малыке шуоно Мон тодӥсько, кытысь лыктӥ но кытчы мынӥсько, нош тӥ уд тодӥське, кытысь Мон но кытчы мынӥсько

¹⁵Тӥ судить кариськоды мугоръя, нош Мон нокинэ но судить уг кариськы.

¹⁶Мон судить карисько ке но, Мынам судэ шонер, малыке шуоно Мон ӧвӧл огням, нош Мон но Атае, кудыз келяз Монэ".

¹⁷Тӥляд законады но гожтэмын уг, кык муртлэн шара верамез шонер шуыса.

¹⁸Мон ачим верасько Ачим сярысь, но вера Мон сярысь Атае, кудыз келяз Монэ".

¹⁹Солы пумитаз веразы:"Кытын Тыад Атаед?" Иисус вера:"Тӥ уд тодӥське Монэ но Мынысьтым Атайме но. Тӥ тодысалды ке Монэ, соку тодысалды Мынысьтым Атайме но".

²⁰Та кылъёсты Иисус храмын дышетыкуз вераз ваньбур возённи дорын, но нокин но ӧз куты Сое, малыке шуоно ӧз на ву Солэн дырыз.

²¹Нош ик Иисус шуиз соослы:"Мон кошкисько, но утчалоды Монэ, но кулоды асьтэлэн сьолыкъёсады. Кытчы Мон мынӥсько, отчы тӥ уд быгатӥське лыктыны".

²²Отын иудейёс шуизы:"Оло Со Асьсэ Ачиз виыны чакла, куке вера"кытчы Мон мынӥсько, тӥ уд быгатӥське лыктыны?"

²³Со вераз соослы:"Тӥ улӥослэн, Мон вылӥослэн. Тӥ та дуннелэн, Мон ӧвӧл та дуннелэн.

²⁴Соин ик Мон верай соослы, тӥ кулоды шуыса сьолыкъёсады. Бен уд ке оске, Мон со шуыса, соку кулоды асьтэлэн сьолыкъёсады".

²⁵Соку шуизы Солы:"Кин бен Тон? Иисус шуиз соослы:"Со кин, кутсконысен ик вералляз Асьсэ.

²⁶Тросс вань, мар вераны но судьяны тӥ сярысь, нош Монэ Келясь зэмлыко, но мар Мон кылӥ Солэсь, сое ик верасько дуннелы".

²⁷Ӧз валалэ, Со вера шуыса Атаез сярысь.

²⁸Озьыен, Иисус шуиз соослы:"Куке ӝутоды Адямилэсь Пизэ, соку тододы, Мон со шуыса но номыре но уг лэсьтӥськы шуыса Аслэсьтым, нош кызьы дышетӥз Монэ Мынам Атае, озьы ик верасько.

²⁹Монэ келясь Монэным, Атае ӧз кельты Монэ огняме, малыке шуон Мон котьку лэсьтӥсько сое, мар Солы кельше".

³⁰Куке Со вералляз тае, тросэз оскизы Солы.

³¹Соку Иисус шуиз иудейёслы, кудъёсыз Солы оскизы:"Мынам кылам улоды ке, соку тӥ зэмос Мынам дышетскисьёсы,

³²но тододы зэмлыкез, но зэмлык лэсьтоз тӥледды эрико".

³³Солы пумитаз веразы:"Ми Авраамлэн выжыысьтыз, ноку но нокинлы но ми раб луыса ӧм улэ, кызьы Тон вераськод "луоды эрико?"

³⁴Иисус шуиз соослы:"Зэм ик, зэм ик, верасько тӥлед:котькудыз, кин лэсьтэ сьӧлык, со сьӧлыклэн рабез.

³⁵Раб уг кыльы коркан пыраклы. Нош Пи пыраклы кыле.

³⁶Соин ик, Пи мозмытӥз ке тӥледды, зэм ик эрико луоды.

³⁷Тодӥсько тӥ Авраамлэн выжыез шуыса, озьы ке но утчаськоды Монэ виыны, малыке шуоно Мынам кылы пырыны уг быгаты тӥ пушкы.

³⁸Мон верасько сое, мае адӟи Асмлам Атаелэсь, нош тӥ вераськоды, мае адӟиды астэлэн атайдылэсь.

³⁹Солэн пумитаз веразы:"Милям атаймы - Авраам". Иисус шуиз соослы:" Тӥ луысалды ке Авраамлэн нылпиосыз, соку лэсьтысалды Авраамлэсь ужъёссэ.

⁴⁰Та бере виемды потэ Монэ. Адямиез, кудыз вераз тӥледлы зэмлыкез, кудзэ кылӥз Инмарлэсь: Авраам озьы ӧз лэсьтылы.

⁴¹Тӥ лэсьтӥськоды ужъёссэ асьтэлэсь атайдылэсь". Та пумысен Солы веразы:"Ми калгон сьӧлыклэсь вордскем нылпиос ӧвӧл. Одӥг милям Атаймы, Инмар".

⁴²Иисус шуиз соослы:"Тӥляд Атайды луысал ке Инмар, соку тӥ яратысалды Монэ, малыке шуоно Мон Инмарлэсь потӥ но лыктӥ, Мон ӧй лыкты Ачим Аслысьтым, нош Со келяз Монэ.

⁴³Малы тӥ уд валасьее Мынысьтым верм кылме? Малыке шуоно уд быгатӥське кылыны Мынысьтым веранме.

⁴⁴Тӥляд атайды дьявол, но тӥляд лэсьтэмды потэ мылкыд потэмзэ асьтэлэсь атайдылэсь. Со кутсконысен ик адями виись вал, зэмлыкын сылыны ӧз быгаты, малыке шуоно со пушкын зэмлык ӧвӧл. Пӧяса веракуз, со вера аслэсьтыз, малыке шуоно со пӧялляськись но пӧялляськонлэн атаез.

⁴⁵Нош ку Мон верасько тӥлед шонерзэ, уд оскиське Мыным.

⁴⁶Кин тӥ пӧлысь вералоз он пӧялляськисько шуыса? Мон верасько ке шонер, малы тӥ уд оскиське Мыным?

⁴⁷Кин Инмарлэсь, со кылзӥське Инмарлэсь кылъёссэ. Тӥ Инмарлэн ӧвӧл, соин ик уд кылскиське".

⁴⁸Иудейёс та пумысен веразы Солы:"Ми шонер вераллям, Тон - самарянин но Тон пушкын демон?"

⁴⁹Иисус верам:"Мон пушкын ӧвӧл демон, но Мон гажасько Мынысьтым Атайме, нош тӥ урод кариськоды Монэ.

⁵⁰Озьы ке но, Мон уг утчаськы Аслысьтым данме: вань Утчась но Судить карись.

⁵¹Зэм ик, зэм ик верасько тӥлед: кин Мынысьтым кылме быдэсъялоз, со ноку но кулонэз уз адӟы".

⁵²Иудейёс шуизы Солы:"Табере ми тодӥмы, Тон пушкын демон, Авраам но пророкъёс кулӥзы, нош Тон вераськод" кин быдэстоз Мынысьтым верамме, ноку но кулонэз уз адӟы шуыса".

⁵³Тон бадӟымгес шат, Авраамлэсь - милям атаймылэсь, кудыз кулӥз? Пророкъёслэсь но кулӥзы: кинэн лыдъяськод Тон Астэ?"

⁵⁴Иисус вералляз:" Мон Асме Ачим ке данъясько, соку данэ Мынам - номырлы уг яра. Монэ данъялоз Мынам Атае, Кудыз сярысь тӥ вераськоды, Со тӥляд Инмарды шуыса.

⁵⁵Тӥ ӧд тодэ Сое нош Мон тодӥсько Сое, верай ке уг тодӥськы шуыса, соку луо пӧялляськись, тӥ кадь ик.Нош Мон тодӥсько Сое, но быдэстӥсько Солэсь куронзэ.

⁵⁶Авраам - тӥляд Атайды, шум потыса ик адӟемез потэ вал Мынысьтым нуналме, но адӟиз, но шум потӥз".

⁵⁷Иудейёс шуизы:"Тыныд ӧвӧл на витьтон арес но,- но Тон адӟиз ни Авраамез"

⁵⁸Иисус шуиз соослы:"Зэм ик, зэм ик верасько тӥлед :Авраамлэсь азьло Мон вал ини".

⁵⁹Соку басьтӥзы изъёс, Со вылэ зӥртынон вылысь, нош Иисус вадскиз но потӥз храмысь, соос пыртӥ но кошкиз мукет интые.

¹Но мыныкуз, адӟиз адямиез, кудызлэн синмыз уг адӟы вал вордӥськем дырысеныз.

²Солэн дышетскисьёсыз юазы Солэсь:"Равви! Аслаз-а, солэн анай-атайёсызлэн-а, сьӧлык лэсьтэменызы, со синтэм вордӥськиз?"

³Иисус вераз:"Со но, солен анай-атайёсыз но, сьӧлык ӧз лэсьтэ. Нош ваньмыз озьы луиз, Инмарлэн ужъёсыз мед быдэсмозы шуыса со вылын.

⁴Нуназе бырытозь, Мон ужъёссэ лэсьто Монэ Келясьлэсь. Уй вуэм бере нокин-но уг нӥ ужа.

⁵ Дуннеын улытозям, Мон дуннелы югыт карись".

⁶Тае вераса, сялӟиз музъем вылэ, лэсьтӥз дэри сялысьтыз но зыраз синъёссэ синтэмлэсь,

⁷но шуиз солы:"Мын пыласькы Силоам пыласьконниын, кудызэ "келямын" шуыны луэ. Со мынӥз но пыласькиз, но лыктӥз адӟись луыса.

⁸Соку бускельёсыз но кин тодэ со синтэм вал шуыса вераллязы:"Ӧвӧл-а со синтэм, кудыз кураське вал?"

⁹Одигъёсыз шуылӥзы:"Со", нош мукетъёсыз:"Солэн тусыз вань". Нош со шуылиз:"Мон со".

¹⁰Соку юаллязы солэсь:"Кызьы учкизы тынад синъёсыд?"

¹¹Соослы со озьы шуиз:"Иисус нимо адями лэсьтӥз дэри, но зыраса мынысьтым синъёсме шуиз "Силоам пыласьконние мын но пыласькы". Мон мынӥ, пыласьки но синмы адӟыны кутскиз".

¹²Соку юазы солэсь:"Кытын Со?" Со соослы:"Уг тодӥськы".

¹³Нуизы азьло синтэм адямиез фарисейес доры.

¹⁴Вал суббота, Иисус куке лэсьтӥз дэри но усьтӥз солэсь синъёссэ.

¹⁵Озьы ик фарисейёс но юазы солэсь кызьы со адӟыны кутскиз. Со шуиз соослы:"Со понӥз дэри мынам синъёсы вылэ, мон пыласьки но адӟыны кутски".

¹⁶Соку куд-ог фарисейёс шуизы:"Инмарлэсь ӧвӧл та адями, малыке шуоно субботаез уг утьы". Мукетъёсыз шуылӥзы:"Кызьы сьӧлыко адями быгатоз лэсьтыны сыӵе чудоос?" Но соос куспын вожвылъяськонъёс кылдӥзы.

¹⁷Нош ик юало азьло синтэмлэсь:"Со усьтӥз тынэсьтыд синъёстэ: мар тон вералод Со сярысь?" Со шуиз:"Со пророк".

¹⁸Соку иудейёс ӧз оске солэн синъёсыз уг адзё вал но адӟыны кутскизы шуыса, азьло синтэмлэсь анай-атайессэ отьытчёзь

¹⁹но юазы соослэсь:"Со-а тӥляд нылпиды, кудыз сярысь тӥ вералляды со синтэм вордӥськиз шуыса? Кызьы нош али со адӟе?"

²⁰Солэн анай-атаёсыз веразы соослы:"Ми тодӥськомы со милям нылпимы но вордӥськиз синтэм шуыса,

²¹нош кызьы со адӟыны кутскиз, ум тодӥське, яке кин солэсь синъёссэ усьтӥз, ми ум тодӥське. Со ачиз бадӟым ини, юалэ солэсь, мед ачиз ачиз сярысь вералоз".

²²Иудейёслэсь кышкаменызы, озьы веразы солэн анай-атайёсыз, иудейёс уго кенешизы ини синагогалэсь палэнэ карыны ваньзэсты, кин лыдъялоз Иисусэз Христос шуыса.

²³Соин ик солэн анай-атайёсыз шуизы:"Со бадӟым ни, аслысьтыз юалэ",

²⁴Кыкэтӥзэ ӧтизы со адямиез, кудызлэн синмыз уг адӟы вал, но шуизы солы:"Инмарез данъя. Ми тодӥськом, Со адями сьӧлыко шуыса".

²⁵Со вераз соослы:"Сьӧлыко-а Со, мон уг тодӥськы, одӥгзэ тодӥсько:мынам синмы уг адӟы вал нош али адӟе ни"

²⁶Нош ик юазы солэсь:"Мар тонэныд Со лэсьтӥз? Кызьы синъёстэ усьтӥз?'

²⁷Со шуиз солы:"Мон тӥледлы верай ни, нош тӥ ӧд кылзӥське, мае кылэмды потэ на? Яке тӥляд но-а луэмды потэ Солэн дышетскисьёсыз?"

²⁸Соос сое куаретыса веразы:" тон Солэн дышетскисез, нош ми Моисейлэн дышетскисьёсыз!

²⁹Ми тодӥськом, Моисеен Инмар вал, нош Тайзэ ум тодӥське, кытысь Со.

³⁰Синмыз учкем адями шуиз:"Со ик паймымон, тӥ уд тодӥське Со кытысь, нош Со усьтӥз мынысьтым синъёсме.

³¹Нош ми тодӥськом Инмар уг кылзӥськы сьӧлык лэсьтӥсьёсты, нош кин Инмарез гажа но быдэстэ Солэсь волязэ - сое кылзэ.

³²Даурлэн кутсконысеныз нокин но ӧз кылылы на, кинке мед усьтоз синъёссэ синтэм вордӥськемлэсь шуыса.

³³Со ӧй ке луысал Инмарлэсь, соку номыр но лэсьтыны ӧй быгатысал".

³⁴Соос солэн пумитаз веразы:"Сьӧлыкъёсын тон вордӥськид, тынад-а милемыз дышетоно?" Но уллязы сое педло.

³⁵Иисус, кылыса, сое педло уллямзэс, шедьтӥз сое но шуиз:"Оскиськод - а тон Инмарлэн Пиезлы?"

³⁶Со юаз:"Господин, нош кин Со, мон мед оско шуыса Солы?"

³⁷Иисус шуиз солы:"Тон адӟылӥд Сое, но Со вераськиз тонэныд".

³⁸Нош со вераз:"Оскисько, Господи!" Но йыбырттӥз Солы.

³⁹Но шуиз Иисус :"Суд лэсьтыны Мон лыктӥ та дуннее, кин уг адӟы вал - мед адӟёз, нош кин адӟе вал - медаз адӟы".

⁴⁰Тае кылыса, куд огез фарисейёс, кудъёсыз Соин вал, юазы солэсь:"Ми но шат синтэмесь?"

⁴¹Иисус шуиз соослы:"Тӥ луысалды ке синтэмесь, соку ой луысал тӥляд сьолыкъёсты, нош тӥ шуиськоды, "адӟиськом", соку сьӧлык кыле тӥ вылэ".

¹"Зэм ик, зэм ик верасько тӥлед:кин уг пыры ыж азбаре ӧсэтӥ, нош кенер вамен тэкчыса пыре, со лушкаськись но разбойник,

²нош ӧсэтӥ пырись - ыж возьмась.

³Солы ӧс дорын сылӥсь усья, но ыжъёс кылзо солэсь куаразэ, со ӧте ыжъёссэ нимзыя но нуллэ соосты.

⁴Но куке нуллэ аслэсьтыз ыжъёссэ, мынэ соослэн асьпалазы, нош ыжъёсыз со сьӧры, малыке шуоно соос тодмало солэсь куаразэ.

⁵Мурт сьӧры уг мыно, пегӟё, малыке шуоно уг тодмало мукет куараез".

⁶Та притчаез вераз Иисус соослы, нош соос ӧз валалэ, мае Солэн верамез потэ вал.

⁷Нош ик Иисус вераз соослы:"Зэм ик, зэм ик верасько тӥлед, Мон - ыжъёслы ӧс шуыса.

⁸Ваньмыз кинъёс лыктылӥзы Мынам азьпалам лушкаськисьёс но разбойникъёс, но ыжъёс ӧз кылзӥське соослэсь.

⁹Мон - ӧс: кин пыроз Мон пыртӥ со спастись кариськоз, пыроз но потоз но ыж сион инты но шэдьтоз.

¹⁰Вор лыктэ лушкан, виён но быдтон вылысь. Мон лыктӥ, мед луоз шуыса улон но пачыл улон.

¹¹Мон - ӟеч ыж возьмась: ӟеч ыж возьмась улонзэ сётэ аслаз ыжъёсыз понна.

¹²Нош медъяськыса ужась, ыж возьмась ӧвӧл, ыжъёсыз солэн аслаз ӧвӧл, кион лыктэ ке, кельтэ ыжъёсты но пегӟе, соку кион лушка но пазя ыжъёсты.

¹³Медъяськыса ужась пегӟе, малыке шуоно со медъяськемын, но ыжъёс понна уг чакласькы.

¹⁴Мон - ӟеч ыжвозьмась, Мон тодмасько аслэсьтымъёссэ, асламъёсыз но Монэ тодмало.

¹⁵Кызьы Атае тодэ Монэ, озьы ик Мон тодӥсько Атайме но улонме сётӥсько Аслам ыжъёсы понна.

¹⁶Вань Мынам мукетъёсыз но ыжъёсы, кудъёсыз та азбарысь ӧвӧл, соосты Мон вайыны кулэ: соос но кылозы Мынысьтым куараме, но луоз одӥг уллё но одӥг Ыжвозьмась.

¹⁷Соин ик яратэ Монэ Атае, Мон сётӥсько шуыса улонме, выльысь басьтон вылысь.

¹⁸Нокин но уг тала сое Мынысьтым, нош Мон ачим сётӥсько сое но власте вань выльысь басьтыны сое. Та заповедез Мон басьтӥ Аслам Атаелэсь.

¹⁹Та кылъёслэсь нош ик иудейёс пӧлын кылдӥзы вожвылъяськонъёс.

²⁰Тросэз соос пӧлысь вераллязы:" Сое демон вормемын но Со визьтэмъяське, мазэ кылзӥськоды Сое?"

²¹Мукетъёсыз вераллязы:"Та верам кылъёс ӧвӧл демонэн вормем муртлэсь. Быгатоз шат демон синтэмъёсты адӟись карыны.

²²Вуиз Иерусалимын выльдӥськон праздник, соку вал тол.

²³ Но ветлэ вал Иисус храметӥ, Соломонлэн притвортӥз.

²⁴Отын иудейёс котыртӥзы Сое но веразы Солы:"Кема-а Тон милемды возёд на тодытэк? Христос ке Тон вера милем меӵак".

²⁵Иисус соослы вераз:"Мон верай тӥлед нош тӥ ӧд оске.Ужъёс, кудъёссэ Мон лэсьтӥсько Мынам Атаелэн нимыз понна - соос Мынам свидетельствоосы.

²⁶Нош тӥ уд оскиське, малы ке шуоно тӥ ӧвӧл Мынам ыжъёсы пӧлысь, кызьы Мон верай тӥледлы.

²⁷Мынам ыжъёсы кылзӥсько Мынам куараелэсь, Мон тодӥсько соосты, но соос мыно Мон сьӧры.

²⁸Но Мон сётӥсько соослы пумтэм-быронтэм улон, ноку но уз кулэ, но нокин но уз лушка соосты Мынам Атаелэн киысьтыз.

²⁹Атае Мынам, Кудыз сетӥз Соосты Мыным, ваньмызлэсь бадӟым, но нокин но уз быгаты лушканы соосты Мынам Атаелэсь киысьтыз.

³⁰Мон но Атае одӥг".

³¹Иудейёс нош ик кутӥзы изъёс, Со вылэ зӥрян вылысь.

³²Иисус соослы вераз:"Трос ӟеч ужъёс возьматӥ Мон тӥлед Мынам Атаелесь, кудыз уже понна Монэ зӥръямды потэ изъёсын?"

³³Иудейёс шуизы Солы:"Ӟеч ужъёсыд понна зиръяммы изъёсын уг поты, нош богохульничать каремедлы, но Тон адями ке но, возьматӥськод Астэ, Инмар шуыса".

³⁴Иисус соослы вераз:"Ӧвӧл-а гожтэмын тӥляд законады:"Мон верай - тӥ инмаръёс"?

³⁵Со нимаз ке инмарен соосты, кинъёслы вал Инмарлэн кылыз, но воштэмын уг луы Писаниез,-

³⁶Солы-а, Кудзэ Атай освятить карӥз но келяз дуннее вылэ, тӥ вераськоды "богохульник", Мон верай шуыса:"Мон Инмарлэн Пиез"?

³⁷Мон уг ке лэсьтӥськы Ужъёссэ Атаелэсь, эн оскелэ Мыным,

³⁸нош лэсьтӥсько ке, куке уд ке оскиське Мыным, оске Мынам ужъёсылы, тодон но оскон вылысь, Атае Мон пушкын но Мон Атае пушкын шуыса".

³⁹Соку нош ик кутэмзы потэ вал Сое, нош Со утӥськыны быгатӥз соослэсь,

⁴⁰ но нош ик выжиз Иордан сьӧры, со интые, кытын азьло Иоанн крестить кариз, но отчы ик кылиз.

⁴¹Тросэз лыктӥзы Со доры но вераллязы, Иоанн пе ӧз лэсьты нокыӵе но чудо, нош ваньмыз, мае вераз Иоанн Со сярысь, вал шонер.

⁴²Но тросэз отын оскизы Солы.

¹Вифания гуртын, кытын уло вылэм Мария но солэн сузэрез Марфа, вал Лазарь нимо висись адями.

²Висись Лазарь вал выныз Мариялэн, кудыз зыраз Кузё Инмарез мираен но ӵушылӥз Солэсь пыдъёссэ аслаз йырсиосыныз.

³Сузэръёсыз келязы Солы вераны:"Кузё Инмар! Тани, Тон кинэ яратӥськод висе".

⁴Иисус, кылыса сое, шуиз:"Та висён кулонлы ӧвӧл, нош Инмарлэн данэз понна, со пыртӥ мед данъяськоз шуыса Инмарлэн Пиез".

⁵Иисус яратылӥз Марфаез, солэсь сузэрзэ но Лазарез.

⁶Куке нош кылӥз, со висе шуыса, соку со интыын, кытын вал, кык нунал улӥз.

⁷Со бере дышетскисъёсызлы шуиз:"Ойдолэ бертом Иудеяе".

⁸Дышетскисьёсыз шуизы Солы:"Равви! Кемалась-а иудейёс Тонэ зӥръян медо вал изъёсын, нош Тон выльысь отчы мынӥськод?"

⁹Иисус пумитазы верам:"Дас кык час ӧвӧл-а нуналын? Кин ветлэ нуназе, со уг ӵемты, малыке шуоно, адӟе югытсэ та дуннелэсь,

¹⁰нош кин ветлэ уйин, ӵемтаське, малыке шуоно, соин ӧвӧл югыт".

¹¹Тае вераса, бӧрысьгес ватсаз:"Асьмелэн эшмы Лазарь умме усиз, нош Мон мынӥсько сое сайкатыны".

¹²Дышетскисьёсыз шуизы Солы:"Кузё Инмар! Умме усиз ке, катьяськоз".

¹³Иисус вера вал солэн кулэмез сярысь, нош соос малпало вал, Со вера шуыса огшоры изён сярысь.

¹⁴Соку Иисус вераз соослы меӵак:"Лазарь кулӥз.

¹⁵Мон шум потӥсько тӥ понна. Мон ӧй вал отын, тӥ мед оскоды шуыса, нош та бере мыноме со доры".

¹⁶Соку Фома, кудзэ верало вал Кыкто, шуиз дышетскисьёслы:"Мыноме но асьмеос но соин ӵош кулом".

¹⁷Куке Иисус Лыктӥз но тодӥз, со ньыль нунал шӧйгуын ни шуыса.

¹⁸Вифания вал куинь иськемын гинэ Иерусалим дорысен,

¹⁹но тросэз иудейёс вынзы понна куректӥсь Марфа но Марияез буйгатыны лыктэмын вал.

²⁰Марфа, Иисуслэсь лыктэмзэ кылыса, Солэн пумитаз мынӥз, нош Мария коркан кылиз.

²¹Соку Марфа шуиз Иисуслы:"Тон луысал ке татын, ӧй кулысал мынам выны.

²²Но али но тодӥсько, Тон Инмарлэсь мае курод, Со сётоз Тыныд".

²³Иисус вера солы:"Выныд тынад улӟыса султоз"

²⁴Марфа шуиз Солы:"Тодӥсько, улӟыса султоз улӟыса султон, берпум нуналэ".

²⁵Иисус шуиз солы:"Мон - улӟыса султон но улон. Кин оске Мыным, кулӥз но ке - улӟёз.

²⁶Но кутькудыз, улӥсез но оскисез Мыным, ноку но уз кул. Оскиськод а талы?"

²⁷Со вераз Иисуслы:"Бэн Кузё Инмаре! Мон оскисько, Тон Христос, Инмарлэн Пиез, Кудыз лыктыны кулэ дуннее".

²⁸Тае вераса лушкем мынӥз но ӧтиз Мария сузэрзэ:"Дышетӥсь татын,. Со ӧте тонэ".

²⁹Со кылӥз но со куспын ик султӥз но Со доры мынӥз.

³⁰Иисуз ӧз на пыр вал гуртэ, нош вал со интыын, кытын Сое пумитаз Марфа.

³¹Иудейёс, кудъёсыз вал соин коркан но буйгато вал сое, адӟизы Мариялэсь ӝог султэмзэ но потэмзэ, но бӧрсяз мынӥзы, малпаса, со мынэ шуыса бӧрдыны шӧйгу доры.

³²Мария нош, Иисус доры лыктӥз но Сое адӟыса усиз Солэн пыдазяз но шуиз:"Кузё Инмаре! Тон луысал ке татын, мынам выны ӧй кулысал".

³³Иисус, куке адӟиз солэсь но иудейёслэсь бӧрдэмзэс, Ачиз духеныз ӝожомиз но бугырскиз,

³⁴но шуиз:"Кытчы тӥ сое понӥды? Солы верало:"Кузё Инмар! Мын но учкы".

³⁵Иисус бӧрдӥз.

³⁶Соку иудейёс вераллязы:"Учкы, кыӵе Со сое яратэ".

³⁷Нош куд-огез соос пӧлысь вераллязы:"Ӧз-а быгаты Со, Кин усьтӥз синтэмлэсь синъёссэ, лэсьтыны, Лазарь медаз кул шуыса?"

³⁸Нош Иисус, куректыса Ачиз Аслыз, лыктэ шӧйгу доры, кудыз вал пещёраын, но со борды пыкемын вал из.

³⁹Иисус шуиз:"Утялтэ изэз". Кулэмлэн сузэрез Марфа, шуэ Солы:"Кузё Инмар! Со ньыль нунал шӧйгуын кылле но зын потэ ини".

⁴⁰Иисус солы пумитаз вераз:"Ӧй-а вера Мон тыныд, оскид ке, адӟёд Инмарлэсь данзэ шуыса?"

⁴¹Соку палэнтӥзы изэз пещёра дорысь, кытын кылле вал кулэм адями. Иисус ӝутӥз синъёссэ инме но шуиз:"Атай! Тау тыныд, Тынад Монэ кылэмед понна.

⁴²Мон тодӥсько, Тон котьку кылӥськод Монэ, нош верай калык понна, кудъёсыз татын сыло, соос мед оскозы, Тон келяд шуыса Монэ".

⁴³Тае вераса,Со зол кеськиз:"Лазарь! Пот!"

⁴⁴ Кулэм мурт, кудызлэн киосыз но пыдъёсыз но кулон басмаен, ымнырыз но кышетэн бинемын вал, пещёраысь потӥз. Иисус вера соослы:"Пертчылэ сое, мед со мыноз".

⁴⁵Соку тросэз иудейёс, кудъёсыз вал Мария дорын адӟизы, мае лэсьтӥз Иисус, но оскизы Солы.

⁴⁶Куд огез соос пӧлысь мынӥзы фарисейёс доры но веразы соослы, мае Иисус лэсьтӥз.

⁴⁷Соку фарисейёс но первосвященникъёс люказы синедрион но вераськылӥзы:"Мар милем лэсьтоно? Та адями лэсьтэ тросс чудоос.

⁴⁸Кельтӥмы-ке Сое озьы ик, соку ваньмыз оскозы Солы, но лыктозы римлянъёс но басьтозы асьмелэсь интымес но асьмелэсь калыкмес но".

⁴⁹Одӥгез соос пӧлысь, Каифа, кудыз со арын первосвященник вал, шуиз соослы:"Тӥ номырэ но уд тодӥське

⁵⁰ уд но валаське, мар асьмелы ӟеч-гес, одӥг адями мед кулоз вань калык понна, ваньмыз калыкъёс бырытчёзь".

⁵¹Тае со аслысьтыз ӧз вера, нош вал со арын со первосвященник, соин ик пророчествовать кариз, Иисус кулоз шуыса калык понна,

⁵²но калык понна гинэ ӧвӧл, нош со понна но, пазяськем Инмарлэсь нылпиоссэ люкан вылысь одӥг интые.

⁵³Но та нуналысен кенешизы Сое виыны.

⁵⁴Соин ик Иисус ӧз нӥ ветлы шара иудейёс пӧлтӥ, нош кошкиз отысь пустынялы матысь Ефраим городэ, но улӥз отын дышетскисьёсыныз.

⁵⁵Матэктэ ни вал иудейёслэн Пасхазы, но тросэз, кунлэн котькуд интыысьтыз, Пасха азьын лыктӥзы Иерусалиме чылкытаськыны.

⁵⁶Соос утчаллязы Иисусэз но, храмын сылыкузы, ог огзылы вераллязы:"Кызьы тӥ малпаськоды, уз-а меда Со лыкты празднике?"

⁵⁷Первасвященникъёс но фарисейёс косӥзы, кин-ке пе тодӥз ке, кытын Со, мед чагиськоз, Сое кутон вылысь.

¹Пасхалэсь куать нуналы азьло Иисус лыктӥз Вифание, кытысь вал кулэм Лазарь, кудзэ Со кулэмысь улӟытӥз.

²Отын дасязы Солы ӝыт сион но Марфа служить кариз, нош Лазарь Соин ӵош пукиз.

³Нош Мария, басьтӥз фунт дуно чылкыт нордовой мира, но зыраз Иисуслэсь пыдъёссэ но ӵушылӥз соосты аслаз йырсиосыныз, корка тырмиз миралэн ческыт зыныныз.

⁴Соку одӥгез Солэн дышетскисез, Иуда Искариот, Симонлэн пиез, кудызлэн вузамез потэ вал Сое, шуиз:

⁵"Уг-а луы вал та мироез вузаны куинь сю динарийлы но сетчаны начаръёслы?"

⁶Нош со озьы начаръёс сярысь сюлмаськеменыз ӧз шуы, нош соин, малыке шуоно со вал вор. Солэн бордаз вал коньдонэн куды, но со лушкем басьтылӥз отысь, мае отчы понылӥзы.

⁷Иисус шуиз:"Кельты сое. Монэ ватон нуналлы тае со возиз.

⁸Уго начаръёс котьку луозы тӥледын, нош Мон котьку уг луы".

⁹Тросэз иудейёс тодӥзы, Солэсь отынзэ, но Иисус доры гинэ ӧз лыктэ, нош лыктӥзы адӟыны Лазарез но, кудзэ Со кулэмысь улӟытӥз.

¹⁰Нош первосвященникъёс чаклазы виыны Лазарез но,

¹¹со пыртӥ тросэз иудейс лыктылӥзы но оскылӥзы Иисуслы шуыса.

¹²Мукет нуналэ, празднике лыктэм трос калык, кылӥзы Иисуслэсь Ирусалиме лыктэмзэ,

¹³басьтӥзы финиковой пальмаослэсь вайёссэ, потӥзы Солэн пумитаз но шумпотыса вераллязы:"Осанна! Данъяськы Кузё Инмарлэн нимыз понна лыктӥсь, Израильлэн Царез!"

¹⁴Нош Иисус, шедьтыса егит оселэз, пуксӥз со вылэ, кызьы гожтэмын

¹⁵"Сионлэн нылыз, эн кышка! Тынад царед со бертэ, егит осёл вылын пукыса".

¹⁶Солэн дышетскисьёсыз нырысь ӧз валалэ тае, нош, куке данъяськиз Иисус, соку тодазы вайизы, озьы Со сярысь гожтэмын, но гожтэмья ик лэсьтӥзы Солы.

¹⁷Калык, кудыз Соин вал азьло, вералляз, Со пе поттӥз Лазарез шӧйгуысь но кулэмысь улӟытӥз.

¹⁸Соин ик пумитаз Сое калык, чудо лэсьтэмзэ кылыса.

¹⁹Фарисейёс куспазы шуылӥзы:"Адӟиськоды-а, тӥляд номыре но уг пӧрмы? Вань дунне Со сьӧры мынэ".

²⁰Куд огез праздник дырья йыбырттыны лыктэмъёс пӧлын грекъёс вал.

²¹Соос Филипп доры лыктӥзы, кудыз вал Галилейской Вифсаидаысь, но куризы солэсь, вераса:"Господин! милям Иисусэз адӟеммы потэ".

²²Филипп мынэ но вера со сярысь Андрейлы, но бӧрысь Андрей но Филипп верало со сярысь Иисуслы.

²³Иисус соослы пумитазы вераз:"Вуиз дыр данъяськыны Адямилэн Пиезлы.

²⁴Зэм ик зэм ик верасько тӥлед:"чабей тысь, музъеме шедьыса, ӧз ке кул, одӥг кылез, нош кулӥз ке, сётоз тросс емыш.

²⁵Кин яратэ аслысьтыз лулзэ быттоз сое, кин адӟемпотостэм каре аслысьтыз лулзэ таяз дуннеын, утёз сое пумтэм-быронтэм улонлы.

²⁶Кин Мыным служить каре, мед Мон сьӧры лыктоз, кытын Мон, отын ик луоз Мынам ляльчие но. Но кин служить каре Мыным, сое гажалоз Мынам Атае.

²⁷Лулы Мынам табере ӝожомиз. Мар Мыным лэсьтыны?Атай! Монэ та часлэсь мозмыты! Нош Мон та час понна ик лыктӥ.

²⁸Атай! Данъя Аслысьтыд нимдэ".Соку кылӥськиз инмысь куара:"Данъяй но эшшо но данъяло".

²⁹Калык, кудыз сылэ вал но кылӥз тае, вералляз:"Гудыри со", нош мукетъёсыз вераллязы:"Ангел вералляз Солы".

³⁰Иисус талы шуиз:"Мон понна ӧй вал та куара, нош калык понна.

³¹Табере та дунне осудить каремын.Табере та дуннелэн кивалтӥсез уллямын луоз.

³²Но, ку Мон музъем бордысь ӝутэмын луо, ваньзэсты Ас бордам кыско".

³³Тае Со вераз, мед валалозы, кыӵе быронэн Со кулоз.

³⁴Калык вералляз Солы:"Ми кылылим законысь, Христос улэ шуыса пумтэм-быронтэм дауръёс.Кызьы нош Тон вераськод, Адямилэн Пиез ӝутӥськыны кулэ? Кин Со Адямилэн Пиез?"

³⁵Соку Иисус соослы шуиз:"Кема на тӥленыд югыт. Ветлэ, югыт вань на дыръя, тӥледыз медаз басьты пеймыт. Нош пеймытын ветлӥсь уг тоды, кытчы мынэ.

³⁶Югыт тӥленыд на дыръя, оске югытлы, но югытлэн нылпиосыз луоды".Тае вераса, Иисус палдурскиз но ватскиз соослэсь.

³⁷Кӧня чудоос лэсьтӥз Со соос азьын, но соос ӧз оске Солы.

³⁸Озьы быдэсмиз Исаия пророклэн верамез:"Кузё Инмар! Кин оскиз асьмелэсь кылэмзэ? Но кинлы учкиз Кузё Инмарлэн киыз?"

³⁹Соос соин ӧз быгатэ оскыны, кызьы эшшо вераз вал Исаия,

⁴⁰"та калык синтэм луиз но измиз сюлэмыныз, но уг адзё синъёсынызы, но уз валалэ сюлэмынызы, но уз берытске, Мон мед катьяло шуыса соосты".

⁴¹Тае Исаия шуиз, куке адӟиз Солэсь данзэ но вералляз Со сярысь.

⁴²Кивалтисьёс пӧлысь но тросэз оскизы Солы, нош фарисейёс сэрен ӧз усьтӥськылэ, синагогалэсь палэнэ медаз каремын луэ шуыса,

⁴³малыке шуоно яратӥзы тросгес адямилэсь данзэ, Инмарлэсь данзэ сярысь.

⁴⁴Иисус нош шумпотыса вераз:"Кин Мыным оске Мыным уг оскы, нош Монэ Келясьлы оске.

⁴⁵Но Монэ адӟись, адӟе Монэ Келясез.

⁴⁶Мон-югыт-лыктӥ дуннее, котькудыз Мыным оскись медаз кыль шуыса пеймытын.

⁴⁷Но, кин кылоз Мынысьтым кылъёсме но уз оскы, Мон судить уг кариськы сое, малыке шуоно Мон судить карыны ой лыкты, нош спасать карыны дуннеез.

⁴⁸Монэ палэнэ карисьлы но Мынысьтым кылъёсме кулэтэм карисьлы вань судья - кыл, кудзэ Мон вералляй, со сое судить карос берпуметӥ нуналэ.

⁴⁹Уго, Мон ӧй вералля аслысьтым, нош Монэ келясь Атай, Со сётӥз Мыным заповедь, мар вераны но мар ивортыны но.

⁵⁰Но Мон тодӥсько, Солэн заповедез - пумтэм-быронтэм улон.Озьен, мае Мон верасько, верасько, кызьы Мыным вераз Мынам Атае"

¹Пасха праздник азьын Иисус, тодыса, вуиз ни шуыса Солэн дырыз кошкыны таяз дуннеысь Атаез доры. Яратыса Аслысьтыз дуннеын улӥсьёссэ, возьматӥз пумозяз соосты яратэмзэ.

²Но ӝыт сиськон дыръя, куке дьявол понӥз ни сюлэмаз Симонлэн пиезлы Иуда Искариотлы вузаны Сое,

³Иисус, тодыса, Атаез сётӥз ваньзэ Солэн кияз но Со Инмар дорысь лыктӥз но Инмар доры кошке шуыса,

⁴султӥз ӝӧк сьӧрысь но кылиз вылӥ дӥсьсэ, басьтӥз ӵушкон но кусказ керттӥз

⁵Со бере ву люказ пыд миськон посудае но кутскиз дышетскисьёсызлэсь пыдъёссэс миськыны но ӵушылыны ӵушконэн, кыдыз кусказ керттэмын вал.

⁶Симон Пётр доры лыктэ, но соиз вера Солы:"Кузё Инмаре! Тон-а миськыны кулэ мынысьтым пыдъёсме?"

⁷Иисус пумитаз солы шуизы:"Мар Мон лэсьтӥсько али тон уд вала, нош берло валалод".

⁸Пётр солы вера:"Ноку но уд миськы мынысьтым пыдъёсме!". Иисус пумитаз вераз:"Ӧй-ке миськы тонэ, уд луы Мынам одӥгез пӧлысь."

⁹Симон Пётр вера Солы:"Кузё Инмаре! Мынысьтым пыдъёсме гинэ ӧвӧл киосме но йырме номиськы".

¹⁰Иисус вера солы:"Миськем муртлы пыдъёссэ гинэ миськыны кулэ, малыке шуоно быдэсак дун. Тӥ но дунэсь, нош ваньды ӧвӧл".

¹¹Со тодэ вал Аслысьтыз вузасьсэ, соин ик шуиз:"Ваньды дунэсь ӧвӧл".

¹²Куке миськиз соослэсь пыдъёссэс но дисяз аслысьтыз дисьсэ, нош ик, пуксиз ӝок сьоры но шуиз:"Тӥ валаськоды-а, мар Мон лэсьтӥ тӥ понна?

¹³Тӥ нимаськоды Монэ Дышетӥсен но Кузёен, но вераськоды шонер, Мон - Со ик вань.

¹⁴Озьыен, Мон ке,- Кузё но Дышетӥсь, миськи тӥлесьтыд пыдъёстэс, соку тӥ но ог-огдылэсь пыдъёстэс миськыны кулэ.

¹⁵Уго Мон тӥледлы адӟытӥ, тӥ но мед лэсьтоды шуыса озьы ик, мае Мон тӥлед лэсьтӥ.

¹⁶Зэм ик, зэм ик верасько тӥлед: раб бадӟымгес ӧвӧл аслысьтыз кузёезлэсь, но келям мурт бадӟымгес ӧвӧл келясьлэсь.

¹⁷Тодӥськоды ке тае но быдэстӥськоды ке, тӥ соку шудоесь.

¹⁸Ваньмыз сярысь Мон уг вераськы. Мон тодӥсько, кинэ быръи. Нош, Писаниеын мар гожтэмын, быдэсмыны кулэ:"со, кин сие Монэным нянь, ӝутӥз Мон вылэ пыдтышсэ".

¹⁹Али верасько тӥлед азьласянь, куке та луоз, тӥ мед оскоды, Мон со шуыса.

²⁰Зэм ик,зэм ик верасько тӥлед: кин лэзёз дораз, кинэ Мон келяй - Монэ лэзёз дораз, нош кин Монэ дораз лэзёз - дораз лэзёз Монэ Келясез".

²¹Иисус тае вераса духеныз бугырскиз но валэктыса вераз:"Зэм ик, зэм ик верасько тӥледлы, одӥгез тӥ пӧлысь вузалоз Монэ".

²²Соку дышетскисьёзыз ог огзы шоры паймыса учкизы но малпазы:" кин сярысь Со вера".

²³Нош одӥгез Иисуслэн дышетскисез, кудзэ Со яратэ вал, кылле вал Солен гадь вылаз.

²⁴Симон Пётр солы пус возьматӥз, мед юалоз, кин сярысь Со вера шуыса.

²⁵Со мыкырскиз Иисуслэн гадь бордаз но юаз Солэсь:"Кузёе! Кин со?"

²⁶Иисус вераз:"Солы, кинлы Мон сёто коттыса, нянь юдэс". Но коттыса нянь юдэсэз, сётӥз Симонлэн пиезы Иуда Искариотлы,

²⁷Та нянь юдэсэз кутэмез бере пыриз со пушкы сатана, Иисус соку шуиз солы:" Мар лэсьтӥськод, лэсьты ӝоггес".

²⁸Но нокин но Соин пукисьёс ӧз валалэ, марлы Со озьы вераз солы.

²⁹Иудалэн вал бере коньдонэн кудыез, соин ик куд-огез малпазы, Иисус солы шуэ пе:"Басьты, ма кулэ асьмелы праздниклы" яке мар-ке мед сётоз начаръёслы.

³⁰Со, басьтӥз нянь юдэсэз но соку ик потӥз. Вал уй.

³¹Куке со потӥз, Иисус шуиз:"Али данъяськиз Адямилэн Пиез но Инмар данъяськиз Со пушкын.

³²Инмар данъяськиз ке Со пушкын, соку Инмар данъялоз Сое Аслаз пушказ, но ӝоген данъялоз Сое.

³³Пиналъёсы! Трос ӧз ни кыльы Мыным тӥленыд луыны. Утчалоды Монэ, но, кызьы Мон верай иудейёслы, али тӥлед но озьы ик верасько:" кытчы Мон мынӥсько, тӥ уд быгатэ лыктыны".

³⁴Сётӥсько тӥлед выль заповедь, тӥ мед ог-огдэс яратоды шуыса. Кызьы Мон яратӥ тӥледыз, озьы ик яратэ ог-огдэс.

³⁵Кусыпады луиз ке яратон, со-я ваньмыз валалозы, тӥ Мынам дышетскисьёсы шуыса".

³⁶Симон Пётр шуиз солы:"Кузёе! Кытчы Тон мынӥськод?" Иисус пумитаз вераз:"Кытчы Мон мынӥсько,тон Монэным али мыныны уд быгатӥськы, нош бӧрысь Мон сӧры мынод".

³⁷Пётр шуиз солы:"Кузёе! Малы мон уг быгатӥськы мыныны Тон сьӧры али? Мон улонме сёто Тон понна".

³⁸Иисус пумитаз вераз:"Улондэ Мон понна сётод?Зм ик, зэм ик верасько тыныд атас ӵёръяса уз ву, тон куинь пол куштӥськод Мынысьтым".

¹"Тӥляд сюлэмды медаз шугъяськы. Оске Инмарлы но Мыным но оскелэ.

²Мынам Атаелэн корказ тросс комнатаосыз. Нош озьы ӧй ке луысал, Мон соку верасал Тӥлед:"Мон мынӥсько дасяны инты тӥлед.

³Но куке мыно но дасяло тӥлед инты, нош ик лыкто но басьто тӥледды Дорам, тӥ но мед луоды отын - кытын Мон".

⁴Кытчы Мон мынӥсько, тӥ тодӥськоды, сюрес но отчы тодӥськоды".

⁵Фома шуиз Солы:"Кузёмы! Ум тодӥське, кытчы мынӥськод, но кызьы тодыны быгатомы сюрес?"

⁶Иисус шуиз солы:"Мон - сюрес но, зэмлык но, улон но. Нокин но уг быгаты лыкты Атай доры, Мон пыртӥ сяна.

⁷Тӥ тодысалды ке Монэ, соку Мынысьтым Атайме но тодысалды. Табере тодӥськоды Сое но, адӟиды но Сое".

⁸Филипп шуиз Солы:"Кузёмы! Возьматы милем Атайдэ но милемлы тырмоз".

⁹Иисус шуиз солы:"Кӧня дыр Мон тӥленыд, но тон уд тодӥськы Монэ, Филипп? Монэ адӟись Атайме но адӟиз, малы бен соку вераськод:"возьмат милем Атайдэ"?

¹⁰Тон уд оскиськы шат, Мон Атае пушкын но Атае Мон пушкын? Кылъёсты, кудъёссэ Мон тӥлед верасько, Аслысьтым уг вераськы. Атае, Мон пушкын улӥсез, - Со лэсьтэ ужъёсты.

¹¹Оске Мыным, Мон Атае пушкын но Атае Мон пушкын шуыса, но ӧвӧл ке, соку Оске Мыным Мынам ужъёсыя.

¹²Зэм ик, зэм ик верасько тӥлед:" Мыным оскись, ужъёсты кудъёссэ Мон лэсьтӥсько, со но лэсьтоз, но тросгес лэсьтоз, малыке шуоно Мон мынӥсько Мынам Атае доры.

¹³Мае уд куре Атаелэсь Мынам нимы понна, сое лэсьто, мед данъяськоз шуыса Атай Пи пушкын.

¹⁴Мае куроды Мынам нимы понна, Мон лэсьто сое.

¹⁵Монэ яратӥськоды ке, быдэстэ Мынысьтым заповедьёсме.

¹⁶Но Мон Атаелэсь куро, но сётоз тӥлед мукетсэ Буйгатӥсез, Кудыз пыраклы кылёз тӥленыд.

¹⁷Зэмлыклэсь Духсэ, Кудзэ дунне уг быгаты басьтыны, малыке шуоно уг адӟы Сое но уг тоды Сое. Нош тӥ тодӥськоды Сое, малыке шуоно Со тӥленыд улэ но тӥ пушкын луоз.

¹⁸Уг кельты тӥледды сирота. Лыкто тӥ доры.

¹⁹Тросс ӧз ни кыльы, дунне Монэ уз ни адӟы, нош тӥ адӟёды Монэ, уго Мон улӥсько, тӥ но улоды.

²⁰Со нуналэ тӥ тододы, Мон Мынам Атае пушкын, но тӥ Мон пушкын, но Мон тӥ пушкын шуыса.

²¹Кин тодэ Мынысьтым заповедьёсме но быдэстэ соосты, со яратэ Монэ, нош кин яратэ Монэ, сое яратэмын луоз Мынам Атаеным, Мон но ярато сое но усьтӥсько солы Ачим".

²²Иуда - кудыз ӧвӧл Искариот - вера Солы:"Кузёмы! Мар луиз,Тынад возьматэмед потэ Астэ милем, нош дуннелы уг пот?"

²³Иисус шуиз солы пумитаз:"Кин Монэ яратэ, со быдэстоз Мынысьтым кылме, соку Мынам Атае яратоз сое, но Ми лыктом но улом со дорын.

²⁴Со, кин Монэ уг яраты, уг быдэсты Мынысьтым верамме, Нош кыл, кудзэ тӥ кылӥськоды, Мынам ӧвӧл, нош Монэ келясь Атаелэн.

²⁵Тае верай Мон тӥлед, тӥледын ӵош дыръям.

²⁶Нош Буйгатӥсь - Святой Дух, Кудзэ келялоз Атае Мынам нимы понна, дышетоз тӥледды ваньмызлы но тодады вайытоз тӥледлы ваньзэ, мае Мон тӥлед вералляй.

²⁷Зибыт улон кельтӥсько тӥледлы, Аслысьтым зибыт улонме сётӥсько тӥледлы, сыӵе со ӧвӧл, кыӵезэ дунне сётэ. Тӥляд сюлэмды медаз но сюлмаськы, медаз но кӧшкема.

²⁸Тӥ кылӥды, мар Мон верай тӥлед:"Кошкисько тӥ дорысь но лыкто тӥ доры". Тӥ Монэ яратысалды ке, соку тырмысалды шумпотонэн, Мон шуи "мынӥсько Атае доры", малыке шуоно Атае Мынысьтым бадӟымгес.

²⁹Быдэсмемезлэсь вазьгес Мон верай тӥлед со сярысь, быдэсмемез бере тӥ мед оскоды шуыса.

³⁰Мыным тӥленын вераськыны кема ӧз ни кыльы, малыке шуоно лыктэ та дуннелэн кивалтӥсез но солэн Мон вылэ нокыӵе но властез ӧвӧл.

³¹Но дунне мед тодоз, Мон Атайме яратӥсько но кызьы заповедовать кариз Мыным Атае, озьы ик лэсьтӥсько:султэ, кошкоме татысь.

¹"Мон - зэмос виноградлэн лозаез, нош Мынам Атае - виноград будэтӥсь.

²Кокькудзэ Мынысьтым вайме, кудыз уг сёт емыш, Со ӵоге, нош котькудзэ, кудыз сётэ емыш, сюзя, тросгес емышсэ мед сётоз на шуыса.

³Тӥ чылкыт каремын ни кыл пыртӥ, кудзэ Мон тӥлед вералляй.

⁴Улэ Мон пушкын, Мон уло тӥ пушкын. Кызьы вай уг быгаты сётыны емышсэ аслыз ачиз, ӧз ке луы лоза вылын, озьы ик тӥ, но ӧд ке улэ Мон пушкын, уд сётэ емыш.

⁵Мон - Лоза, нош тӥ вайёс. Кин улэ Мон пушкын, но Мон со пушкын, со сётэз трос емыш, нош Монтэк тӥ номыр но лэсьтыны уд быгатӥське.

⁶Кин уз луы Мон пушкын, вай кадь ӵогемын луоз но куасьмоз, сыӵе вайёсты люкало но тылэ кушто, но соос ӝуало.

⁷Мон пушкын луиды-ке но Мынам кылъёсы тӥ пушкын луизы ке, соку мае гинэ мылкыд уд каре, курэлэ, но луоз тӥледлы.

⁸Тӥ ваиды ке трос емыш но луиды ке Мынам дышетскисьёы, соку данъяськоз Мынам Атае.

⁹Кызьы Атае яратӥз Монэ, озьы ик Мон яратӥ тӥледыз. Мынам яратонам луэлэ.

¹⁰Быдэсъяды ке Мынысьтым заповедьёсме, улоды Мынам яратонам, кызьы Мон быдэсъясько Мынам Атаелэсь заповедьёссэ но улӥсько Солэн яратоназ.

¹¹Сое Мон верай тӥлед, Мынам шумпотонэ мед улоз тӥ пушкын но тӥляд шумпотонды тырмыт мед луоз.

¹²Тани Мынам заповеде: яратэ ог огдэс, кызьы Мон яратӥ тӥледыз.

¹³ Кинке улонзэ сётӥз ке аслад эшъёсыз понна, со яратонлэсь, ӧвӧл бадӟымгес яратон.

¹⁴Тӥ - Мынам эшъёсы, быдэстӥды ке заповедьёсты, кудзэ Мон тӥлед сёти.

¹⁵Мон уг нӥ вераськы тӥледыз тӥ рабъёс шуыса, уго раб уг тоды, мар лэсьтэ солэн кузёез. Мон верай тӥледлы ваньзэ, мае кылӥ Мынам Атаелэсь, соин ик нимай тӥледыз эшъёсы шуыса.

¹⁶Тӥ Монэ ӧд быръё, нош Мон тӥледыз быръйи но пуктӥ тиледыз, тӥ мед мыноды но емыш ваёды но тӥляд емышты бырисьтэм мед луоз, но мае уд куре Атаелэсь Мынам нимы понна, Со мед сётоз тӥледлы шуыса.

¹⁷Заповедоведь сётӥсько тӥледлы: яратэлэ ог огдэс.

¹⁸Дунне адӟемпотостэм ке каре тӥледыз, тодэ, Монэ адӥемпотостэм кариз тӥлесьтыд азьлогес.

¹⁹Тӥ луысалды ке та дуннелэсь, соку дунне яратысал аслысьтыз. Нош тӥ дуннелэн ӧвӧл, малыке шуоно Мон быръйи тӥледыз дуннеысь, соку дунне адӟемпотостэм кариз тӥледыз.

²⁰Тодады возе кылме, кудзэ Мон верай тӥледлы:"раб бадӟымгес ӧвӧл аслаз кузёезлэсь. Монэ уллязы бере, тӥледыз но уллялозы. Мынысьтым верамме быдэстӥзы ке, соку быдэстозы тӥлесьтыд но верамдэс.

²¹Нош ваньзэ сое лэсьтозы тӥледлы Мынам нимы понна, малыке шуоно уг тодо Монэ Келясез.

²²Мон ой ке лыктысал но ӧй ке верасал соослы, соку ӧй луысал сьӧлыксы, нош табере уг быгато асьсэлэсь сьӧлыкъёссылэсь шонере потыны.

²³Кин Монэ адӟемезпотостэм каре, адӟемпотонтэм каре Мынысьтым Атайме но.

²⁴Мон ой ке лэсьтысал соос пӧлын ужъёс, кудъёссэ нокин но мукетыз ӧз лэсьтыл, соку соослэн ӧй луысал сьӧлыксы, но табере адӟылӥзы нош озьы ке но адӟемпотостэм каризы Монэ но Мынысьтым атайме но.

²⁵Мед быдэсмоз соослэн законазы гожтэмын кыл:"адӟем потостэм каризы Монэ юнме шорысь."

²⁶Куке нош лыктоз Буйгатӥсь, кудзэ Мон келяло Атаелэсь,- зэмлыклен духез, Кудыз Атае дорысь лыктэ, Со вералоз Мон сярысь.

²⁷Озьы ик тӥ но Мон сярысь вералоды, малыке шуоно тӥ Монэным кутсконысеныз ик".

¹"Тае Мон верай тӥлед, тӥ медаз сюлэмшугъяське шуыса.

²Уллялозы тӥледыз синагогагаосысь, Сыӵе дыр но вуоз, куке котькудыз кин виылоз тӥледыз, малпалоз со ӧзьы Инмарлэсь ужзэ лэсьтэ шуыса.

³Озьы соос лэсьтозы, мылыке шуоно, ӧз тодэ Атайме но Монэ но.

⁴Нош Мон тае тӥледлы верай, куке вуоз та дыр, тӥ мед тодады вайӧды, мар Мон вералляй со сярысь. Азьласянь ӧй вера тӥледлы, малыке шуоно тӥледын ӵош вал.

⁵Нош табере мынӥсько Монэ Келясь доры, но нокин но тӥ пӧлысь уг юа Монэ:"Кытчы мынӥськод?"

⁶Нош Мон тӥледлы тае верамысь, тӥляд сюлэмды куректонэн тырмӥз.

⁷Нош Мон тӥледлы зэмлык верасько: тӥледлы ӟечгес луоз, Мон мынӥ ке, нош Мон ӧй ке мын, Буйгатӥсь уз лыкты тӥ доры, нош мынӥ ке, соку кэляло Сое тӥ доры,

⁸но Со, лыктыса, дуннеез шарае поттоз сьӧлык, шонерлык но суд но сярысь:

⁹сьӧлык сярысь, Мыным уг оско шуыса;

¹⁰шонерлык сярысь, Мон мынӥсько Мынам Атае доры, но уд ни адӟе Монэ;

¹¹суд сярысь, та дуннелэн кивалтӥсез судить каремын ини.

¹²Вань на трос мае вераны луоз тӥлед, нош тӥ уд на быгатӥське валаны.

¹³Куке нош лыктоз Со, зэмлыклэн Духез, соку дышетоз тӥледыз котькыӵе зэмлыклы, малыке шуоно Аслысьтыз Со уз вера, нош вералоз, мае кылоз, но азьланьзэ тӥледлы ивортоз.

¹⁴Со данъялоз Монэ, малыке шуоно Мынысьтым басьтоз но ваньмызлы вералоз.

¹⁵Ваньмыз маиз вань Атаелэн, Мынам но вань, соин ик Мон верай, Мынысьтым басьтоз но тӥледлы вералоз.

¹⁶Ӝоген уд ни Монэ адӟеле но ӝоген выльысь адзёды Монэ уго Мон Атае доры мынӥсько"

¹⁷Татын куд огез дышетскисьёсыз шуизы ог огзылы:"Мар Со вера милемлы "Ӝоген уд ни Монэ адӟелэ но ӝоген выльысь адзёды Монэ" но " Мон Атае доры мынӥсько"?"

¹⁸Озьыен, соос вераллязы:"Мар сярысь Со вера "Ӝоген?" Ум тодӥське, мар вера".

¹⁹Иисус, валаса, Солэн юамзы потэ шуыса, вераз соослы:"Тӥ ог огдылэсь юаськоды, Мынам вераме мар сярысь:"Ӝоген уд нӥ адӟелэ Монэ но ӝоген нош ик адзёды Монэ"?

²⁰Зэм ик зэм ик верасько тӥледлы:" тӥ бӧрдоды но викышъялоды, нош дунне шумпотоз; тӥ ӝожэсь луоды, нош ӝожды тӥляд пӧрмоз шумпотонэ.

²¹Кышномурт курадӟыса пиннал вае, нош ку нуныез вордӥське, шумпотэменыз уг нӥ тоды курадӟемзэ, малыке шуоно дуннее адями вордӥське.

²²Озьы ик тӥ но али ӝожомемын, нош Мон выльысь адзё тӥледыз, но шумпотоз тӥляд сюлэмды, тӥлесьтыд шумпотэмдэс нокин но уз ни тала.

²³Со нуналэ тӥ уд юалэ Монэ номыре но сярысь. Зэм ик, зэм ик верасько тӥледлы:" мае уд курэ Атаелэсь Мынам нимы понна, сётоз тӥледлы.

²⁴Та дырозь тӥ номыр но ӧд курылэ Мынам нимы понна.Курелэ но сётозы, тӥляд шумпотонды мед быдэсмоз шуыса

²⁵Та дырозь Мон вералляй тӥледлы притчаосын, но вуэ ни дыр куке уг нӥ вераськы притчаосын, но меӵак верало тӥледлы Атае сярысь.

²⁶Со нуналэ куроды Мынам нимы понна, но уг вераськы тӥледлы, мон куро шуыса Атайме тӥ сярысь:

²⁷уго Ачиз Атае яратэ тӥледыз, малыке шуоно тӥ яратӥды Монэ но оскиды, Мон лыктӥ шуыса Инмар дорысь.

²⁸Мон потӥ Атаелэсь но лыктӥ дуннее, нош ик кельто дуннеез но мынӥсько Атае доры.

²⁹Солэн дышетскисьёсыз шуизы Солы:" Тани, табере Тон шонер вераськод но нокыӵе но притчаосын уд вераськиськы.

³⁰Та бере адӟиськом, Тон тодӥськод шуыса ваньзэ, кулэ ӧвӧл ни Тынысьтыд юаны. Соин ик оскиськом, Тон Инмарлэсь лыктӥд шуыса.

³¹Иисус пумитазы вералляз:"Табере оскиськоды?"

³²Тани, вуе ни дыр, вуиз но ни, куке тӥ кошкоды котькудды ас палады но кельтоды Монэ огням. Нош Мон огням ӧвӧл, малыке шуоно Атае Монэным.

³³Тае Мон верай тӥледлы, тӥляд мед луоз Мон пушкын канньллыкты шуыса. Дуннеын куректонъёс адзёды, но юнматске:"Мон ворми дуннеез".

¹Та кылъёссэ верамез бере Иисус ӝутӥз синъёссэ инме но вераз:"Атае вуиз дыр, данъя Аслысьтыд Пидэ, Тынад Пиед но мед данъялоз тонэ шуыса,

²Тон Солы сётӥд бере власть котькуд адями вылын, Со мед сётоз шуыса пумтэм-быронтэм улон ваньмызлы, кинэ Тон сётӥд Солы.

³Пумтэм-быронтэм улон луэ, Тонэ, - Одӥг Зэмос Инмарез но Тонэныд Келям Иисус Христосэз мед тодозы шуыса.

⁴Мон данъяй Тонэ музъем вылын, лэсьтӥ уж кудзэ Тон Мыным сётӥд быдэстыны.

⁵Но Тон, Атае, табере данъя Монэ Аслад дорад данэн, кудыз вал Мынам Тон дорын дуннелэн кылдэмезлэсь азьло.

⁶Мон усьтӥ Тынысьтыд нимдэ калыклы, кудъёссэ Тон сётӥд Мыным дуннысь. Соос Тынад вал, Тон сётӥд Мыным соосты, но соос утизы Тынысьтыд кылдэ.

⁷Табере соос тодӥзы, мае Тон сётӥд Мыным, - Тынысьтыд,

⁸малыке шуоно кылъёс, кудъёссэ Тон сётӥд Мыным, Мон соослы сётӥ, соос сое басьтӥзы но валазы зэмосэз, Мынысьтым Тон дорысь лыктэммэ, но оскизы, Тод келяд шуыса Монэ.

⁹Мон соос понна вӧсяськисько:вань дунне понна уг вӧсяськиськы, нош соос понна, кудъёссэ сётӥд Тон Мыным, малыке шуоно соос Тынад.

¹⁰Но ваньмыз Мынамез -Тынад, но Тынадэз - Мынам, но Мон данъяськи соос пушкын.

¹¹Мон ӧвӧл ни дуннеын, нош соос дуннеын на, нош Мон мынӥсько Тон доры, Данлыко Атае! Уть соосты Тынад нимыд понна, соосэ, кудъёссэ Тон сётӥд Мыным, соос мед луозы одӥго, Ми кадь ик.

¹²Куке мон соосын вал дуннеын, Мон утьылӥ соосты Тынад нимыд понна. Соосэ, кудъёссэ Тон сётӥд мыным, Мон утӥ, но нокудзы но соос пӧлысь ӧз быре, быронлэн пиез сяна, мед быдэсмоз шуыса Писание.

¹³Нош табере Мон Тон доры мынӥсько но верасько со сярысь дуннеын, Мынам шумпотонэ соос пушкын тырмыт мед луоз шуыса.

¹⁴Мон сётӥ соослы Тынысьтыд кылдэ, но дунне соосты адӟемпоностэм кариз, малыке шуоно соос дуннелэн ӧвӧл, кызь Мон но дуннелэн ӧвӧл.

¹⁵Уг куриськы, Тон мед басьтод соосты дуннеысь шуыса, но курисько,Тон мед утёд шуыса уродлэсь.

¹⁶Соос ӧвӧл дуннелэн, кызьы Мон но ӧвӧл дуннелэн.

¹⁷Освятить кар соосты Тынад зэмлыкеныд: тынад кылыд со змлык.

¹⁸Кызьы Тон келяд Монэ дуннее, озьы ик Мон келясько соосты дуннее.

¹⁹Но соос понна Мон Асме сӥзисько, соос но мед освятить каремын луозы шуыса зэмлыкен.

²⁰Соос понна гинэ уг вӧсяськиськы, нош соослэн верам кылзыя Мыным оскисьёс понна но,

²¹ваньмыз мед луозы одӥг, кызьы Тон, Атай ,Мон пушкын но Мон Тон пушкын, соос но мед луозы Ми пушкын одӥг, мед оскоз дунне, Тон келяд шуыса Монэ.

²²Дан, кудзэ Тон сётӥд Мыным, Мон сётӥ соослы:"мед луозы одӥго, кызьы Ми одӥго.

²³Мон соос пушкын, Тон но Мон пушкын. Мед луоз соослэн огазёяськонзы быдэсмемын, дунне мед адӟёз, Тон келяд шуыса Монэ но яратӥд соосты, кызьы Монэ яратӥд.

²⁴Атае! Отын, кытын Мон, мед луысалзы Монэным соосыз но кудъёссэ Тон Мыным сётӥд, мед адӟысалзы Мынысьтым данме, кудзэ Тон Мыным кузьмад, яратыса Монэ дунне кылдэмлэсь азьло ик.

²⁵Шонерлыко Атае! Дунне Тонэ ӧз но ке тоды, Мон Тодӥ Тонэ, кинэ Тон келяд, соос но тодӥзы Тонэ.

²⁶Но Мон усьтӥ соослы Тынысьтыд нимдэ но эшшо но усьто, яратонэд, кудыныз Тон яратӥд Монэ, соос пушкын мед луоз, Мон но соос пушкын".

¹Сое вераса, Иисус потӥз Аслаз дышетскисьёсыныз Кедрон ӧр сьӧры, кытын вал сад, кудаз Со пыриз Аслаз дышетскисьёсыныз.

²Тодэ вал со интыез Иуда но, Сое вузась, малыке шуоно Иисус ӵем люкаськылӥз отын Аслаз дышетскисьёсыныз.

³Озьыен, Иуда, басьтыса первосвященникъёслэсь но фарисейёслэсь солдатъёсын отрядзэс но ляльчиоссэс, лыктэ отчы факелъёсын, светильникъёсын но ожмаськон тӥрлыкен.

⁴Нош Иисус, ваньзэ тодыса, мар Соин луоз, потӥз но шуиз соослы:"Кинэ утчаськоды?"

⁵Солы вераллязы:"Нозорей Иисусэз". Иисус вера соослы:"Мон Со". Соин ӵош сылэ вал Сое вузазь Иуда но.

⁶Но ку шуиз соослы:"Мон Со",- соос берлань чигназы но музъем вылэ усьылӥзы.

⁷Нош ик юаз соослэсь:" Кинэ утчаськоды?" Соос шуизы:"Нозорей Иисусэз".

⁸Иисус вераз:"Мон верай тӥледлы, Мон Со шуыса. Озьыен, утчаськоды ке Монэ, кельтэ соосты, мед мынозы",-

⁹озьы быдэсмиз Солэн верам кылыз "Мон нокинэ но ӧй ышты соос пӧлысь, кудъёссэ Тон Мыным сётӥд".

¹⁰Нош Симон Пётр, кудызлэн вал мечез, басьтӥз сое но шуккиз первосвященниклэсь рабзэ, но ӵогиз солэсь бурзэ пельзэ, раблэн нимыз вал Малх.

¹¹Иисус шуиз Пётрлы:" Пон мечтэ интыяз. Ӧвӧл шат Мынам юоно чашаез, кудзэ сётӥз Мыным Атае?"

¹²Соку солдатъёс, сюрсъёсынкивалтӥсьёс но иудейёслэ храмысьтызы служительёс кутыса Иисусэз керттылӥзы,

¹³но нуизы нырысь Сое Анна доры, малыке шуоно со вал Каифа первосвященниклэн вармаез.

¹⁴Та со Каифа вылэм, кудыз валэктыса иудуйёслы вераз:"ӟечгес луоз одӥг муртлы вань калык понна кулына ".

¹⁵Симон Пётр но мукетыз дышетскисьез мынӥзы вал Иисус сьӧры; со дышетскись нош вал тодмо первосвященникен но пыриз Иисусэн ӵош первосвященниклэн азбараз,

¹⁶нош Пётр сылӥз петпалаз ӧс сьӧрын. Со бере мукетыз дышетскись, кудыз вал тодмо первосвященниклы, потӥз, вераз ӧс дорын возьмаськись ляльчи кышномуртлы но пыртӥз Пётырез.

¹⁷Со ӧс дорын возьмаськись ляльчи Пётрлы вера:" Тон ӧвӧл-а солэн дышетскисез?" Со шуиз:" Ӧвӧл".

¹⁸Вылэм кезьыт но храмын служить карисьёс, тылскиллям но шунытскыса сыло вылэм. Озьы ик соосын ӵош Пётр но шунытскыса сылэ вылэм.

¹⁹Нош первасвященник юам Исуслэсь Солэн дышетскисьёсыз но дышетэмез сярысь.

²⁰Иисус вераз солы:"Мон шара вералляй дуннелы. Мон котьку дышетылӥ синагогаын но храмын, кытын люкаськылӥзы ваньмыз иудейёс, но лушкем номырэ но ӧй вералля.

²¹Малы юаськод Монэ? Юа кылылэм муртъёслэсь, мар Мон вералляй соослы, соос тодо, мае Мон вералляй"

²²Куке Со вераз тае, одӥгез храмын служить карись, кудыз матын сылэ вал, Иисуслэн пэльдораз шуккиз но шуиз:" Кызьы Тон вераськиськод первосвященникен?"

²³Иисус вераз Солы:" Мон верай ке урод, вера, урод шуыса. Нош ӟеч ке малы Монэ жугиськод?"

²⁴Керттылэм Иисусэз, Анна келяз Каифа первасвященник доры.

²⁵Симон Пётр шунытскыса сылэ вал, но солы шуизы:" Тон ӧвӧл-а Солэн дышетскисёсыз пӧлысь?" Со куштӥськыса шуиз:" Ӧвӧл".

²⁶Одӥгез первосвященниклэн рабез, Пётр пельзэ ӵогем муртлэн чыжы-выжыез, вера:"Тонэ мон Соин ӵош садысен ӧй адӟыл - а?"

²⁷Пётр нош ик куштӥськиз, но со дыръя атас ӵёръяз.

²⁸Каифа дорысь Иисусэз приторияе нуизы. Вал ӵукна, но соос ӧз пыре приторияе, саптаськоно медам луы, но пасха сиёнэз сиыны мед луоз шуыса.

²⁹Пилат потӥз соос доры но шуиз:" Та адямиез маин тӥ янгыш кариськоды?"

³⁰Соос солы пумитаз шуизы:" Со злодей ӧй ке луысал, ми Сое тыныд ӧй сётысалмы".

³¹Пилат шуиз соослы:" Тӥ басьтэлэ Сое но судить каре асьтэлэн закондыя". Иудейёс шуизы солы:" Милем уг яра нокинэ но виыны", -

³²озьы быдэсмиз Иисуслэн кылыз, кудзэ Со валэктыса вералляз, кыӵе кулонэн Со кулоз.

³³Соку пилат нош ик пыриз приторияе, ӧтиз Иисусэз но шуиз Солы:" Тон Иудеялэн Царез?"

³⁴Иисус вераз солы:" Аслысьтыд-а тон вераськод тае, яке Мон сярысь тыныд мукетъёсыз-а веразы?"

³⁵Пилат вераз:" Мон иудей шат? Тынад калыкед но первосвященникъёс сётӥзы Тонэ, мар Тон лэсьтӥд?"

³⁶Иисус вераз:" Мынам Царствое та дуннеысь ӧвӧл. Мынам Царствое луысал ке та дуннеысь, соку Мынам служить карисьёсы ожмаськысалзы Мон понна, Мон иудейёслы медам сётэмын луы шуыса, нош али Мынам Царствое татысь ӧвӧл"

³⁷Пилат шуиз солы:" Озьыен Тон царь? Иисус верам пумитаз:" Тон вераськод Мон царь шуыса. Мон вордӥськи но лыктӥ но дуннее, свидетельствовать карон понна зэмлык сярысь. Котькудыз, кин зэмлыклэсь, кылске Мынысьтым куараме".

³⁸Пилат шуиз солы:" Мар вань зэмлык?" Но, тае вераса, нош ик потӥз иудейёс доры но шуиз соослы:" Нокыӵе но янгышсэ мон уг адӟиськы Та адямилэсь.

³⁹Тӥляд вань сямды, мон тӥледлы Пасха праздниклы одӥг муртэз мед мозмыто шуыса. Кулэ-ке, мозмыто тӥледлы Иудеялэсь Царзэ?"

⁴⁰Соку нош ик ваньмыз кесяськыны ӧдъязы:" Сое кулэ ӧвӧл, лэзь Варавваез". Нош Варавва вал разбойник.

¹Соку Пилат кутӥз Иисусэз но косӥз Сое сюлоен жугыны.

²Солдатъёс пунӥзы бышкиськись терновниклэсь венец, но дӥсязы Солы йыраз, но дӥсязы со вылэ горд басмалэсь мантия,

³но вераллязы:" Шум пот, Иудеялэн Царьез!" Но жугылӥзы Сое ымныраз.

⁴Пилат нош ик потӥз но шуиз соослы:" Тани, мон поттӥсько Сое тӥ доры, тӥ мед тододы, мон уг шэдьтӥськы шуыса Солэсь нокыӵе но янгышсэ".

⁵Соку Иисус потӥз терновой венецен но горд мантияен. Но шуиз Пилат соослы:" Тани Со адями!"

⁶Нош куке Сое адӟизы первосвященникъёс но служить карисьёс, кесяськыса веразы:" Кортӵога! кортӵога Сое". Пилат вера соослы:" Тӥ басьтэ но кортӵогалэ Сое, мон уго, уг шэдьтӥськы Солэсь янгышсэ".

⁷Иудейёс вераллязы солы:" Милям вань законмы, но милям законмыя Со кулыны кулэ, малыке шуоно Со Асьсэ Инмарлен Пиез шуыса вера".

⁸Пилат, та кылъёсты кылэм бераз, тужгес но зол кышказ на.

⁹Нош ик пыриз приторияе но Иисуслэсь юаз:" Кытысь Тон?" Нош Иисус солы номыр-но ӧз вера.

¹⁰Пилат вера Солы:" Мыным-а уд вераськы? Уд шат тодӥськы, мынам вань шуыса власте кортӵоганы Тонэ но вань власте лэзьыны но Тонэ?"

¹¹Иисус вералляз:" Тынад ӧй луысал нокыӵе но властед Мон вылын, сётэмын ӧй ке луысал тыныд вылӥысен, соин ик бадӟымгес сьолык со вылын, кин сётӥз Монэ тыныд".

¹²Со сэрен Пилат утчаз муг лэзьыны Сое. Нош иудейёс кесяськыса вераллязы:" Лэзьид ке Сое, тон кесарьлэн эшез ӧвӧл. Котькудыз кин асьсэ царь каре, - пумит лэсьтэ кесарьлы".

¹³Пилат кылӥз тае верамзэс, поттӥз Иисусэз отысь но пуксиз судьялэн интыяз, кудыз нимаське вал Лифостротон ( еврей кылын Гаввафа).

¹⁴Соку Пасха азьын пятница вал, куатетӥ час. Но вераз Пилат иудейёслы:" Тани тӥляд Царьды!"

¹⁵Нош соос кесяськыса веразы:" Басьты, басьты, кортӵога Сое!" Пилат вера соослы:" Царьдэс тӥлесьтыд кортӵогано?" Первосвященникъёс вераллязы:" Ӧвӧл милям царьмы, цезарь сяна".

¹⁶Соку сётӥз со Иисусэз соослы кортӵоганы. Басьтӥзы Сое но нуизы.

¹⁷Но, нуиз Со кироссэ со интые, кудыз нимаське вал Лобной ( еврей кылын Голгофа).

¹⁸Отын Сое кортӵогазы, Соин ӵош эшшо кык мукетъёссэ одӥгзэ огпалаз нош мукетсэ мукет палаз, нош шоразы - Иисусэз.

¹⁹Пилат лэсьтӥз гожтэт но шуккиз кирос вылэ. Гожтэмын вал:" Нозорей Иисус, Иудея Царь".

²⁰Та гожтэмез лыдзӥзы тросэз иудейёс, малыке шуон инты, кытын кортӵогамын вал Иисус, кыдёкын ой вал город дорысь, но гожтэмын вал еврей, грек но рим кылъёсын.

²¹Иудаысь первосвященникъёс Пилатлы шуизы:" Эн гожты "Иудея Царь", нош гошты,:" Со вералляз: Мон - Иудея Царь" шуыса".

²²Пилат шуэм:" Мар мон гожтӥ, сое гожтӥ".

²³Солдатъёс Иисусэз кортӵогам бере, басьтӥзы Солэсь дӥсьёссэ но люкизы ньыль шори, котькуд солдатлы одӥг люкет но хитон. Хитон вурэмын ой вал, но быдэсак куэмын вал.

²⁴Соос шуизы ог огзылы:" Ум кесялэ сое, нош пус куштом, кинлы сюроз", - мед быдэсмоз шуыса Писаниын верам:" люкизы Мынысьтым дисьёсме ог огенызы но Мынам шобретэлы куштӥзы пус". Озьы лэсьтӥзы солдатъёс.

²⁵Иисуслэн киросэз дорын сылӥзы Солэн анаез но сузэрез Солэн анаезлэн, Мария, Клеолалэн кышноез но Мария Магдалина.

²⁶Иисус, адӟыса анайзэ но дышетскисьсэ, артысь сылӥсьсэ, кудзэ яратэ вал, вераз аслаз анаезлы:" Кышномурт! Тани тынад пиед",

²⁷Со бере вера дышетскисезлы:" Тани тынад анаед!" Со дырысен со дышетскись басьтӥз сое дораз.

²⁸Со бере Иисус, тодыса, ваньмыз луиз ни шуыса, Писание быдэсмон понна вера:"Сюэ куастме!"

²⁹Отын сылэ вал чырс винаен тырмытэм посуда. Солдатъёс, коттыса чырс винаен губкаез, боды йылэ бышкалтыса, сётӥзы Солэн ымдураз.

³⁰Куке Иисус шӧмьяз чырс винаез, шуиз:" Быдэсмиз!" Но, йырзэ мыкыртыса, духез потӥз.

³¹Нош вал бере пятница, иудейёс медаз кыль шуыса мугорыз кирос вылын субботалы,- уго таиз суббота вал быдӟым праздник,- куризы Пилатлэсь, пильылыны соослэсь пыдъюмылъёссэс но басьтыны кирос бордысь.

³²Озьыен, лыктӥзы солдатъёс но нырысетӥеслэсь пильылӥзы пыдъюмылъёссэ, но мукетызлэсь но Соин ӵош кортӵогамлэсь.

³³Нош, Иисус доры лыктӥзы но адӟизы, Со кулэмен ни, соин ик ӧз ни пильылэ Солэсь пыдъюмылъёссэ,

³⁴нош одӥгез солдатъёс пӧлысь бышкалтӥз Солэн кӧтурдэсаз копъёен но соку ик бызьиз вир но ву.

³⁵Но адӟись вераз, но солэн верамез зэм. Со тодэ, зэм вера шуыса, тӥ мед оскоды шуыса.

³⁶Озьы луиз, мед быдэсмоз шуыса Писание:" Лыэз но Солэн уз куашка".

³⁷Озьы ик Писание мукет интыын но вера:" Учкозы Со шоры, Кудзэ бышкалтӥзы",

³⁸Со бере Аримафеяысь Иисус -иудуйёслэсь кышкаменыз Иисуслэн лушкем дышетскисез, - куриз Пилатлэсь, басьтыны Иисуслэсь мугорзэ кирос вылысь, но Пилат лэзиз. Со мынӥз но Иисуслэсь Мугорзэ киросысь басьтӥз.

³⁹Озьы ик лыктӥз Никодим но - кудыз лыктылӥз Иисус доры уйин - но ваиз ог сю литр пала смирналэсь но алойлэсь сурет ваиз.

⁴⁰Соос басьтӥзы Иисуслэсь мугорзэ но биняллязы кулон басмаен ческыт зын вӧйёсын зыраса, кызьы ватыло иудейёс.

⁴¹Кытын Сое кортӵогазы вал сад, но садын выль шӧйгу, кудаз нокин но понэмын ӧй на вал.

⁴²Отчы понӥзы Иисусэз иудейёслэн пятницазы сэрен, малыке шуоно, шӧйгу матын вылэм

¹Суббота бере мукет нуналаз Мария Магдолина лыктэ вазь ӵукна, куке пеймыт на вал, шӧйгу доры, но адӟе шӧйгу бордысь из палэнэ каремын.

²Со бызьыса лыктэ Симон Пётр но мукетыз дышетскись доры, кудзэ Иисус яратэ вал, но вера соослы:"Нуиллям Кузёмес шӧйгуысь, но ум тодӥське, кытчы Сое понӥзы".

³Пётр но мукетыз дышетскись соку ик потӥзы, но мынӥзы шӧйгу доры.

⁴Соос бызьыса ӵош мыно вал, нош мукетыз дышетскись бызе вал ӝоггез Пётрлэсь но шӧйгу доры вазьгес вуиз.

⁵Но, мыкырскыса, адӟиз басма кылле, нош шӧйгуэ ӧз пыры.

⁶Со сьӧры лыктэ Пётр,но пыре шӧйгуэ, но адӟе кыллись ватон басмаосты

⁷но кышетэз, кудыз вал Солэн йыр вылаз, басмаосын ӵош кышет ӧй вал, нош нимаз керттэмын вал мукет интыын.

⁸Соку пыриз мукетыз но дышетскись, вазьгес вуисез шӧйгу доры, адӟиз, но оскиз.

⁹Уго соос уг на тодо вал Писаниысь, Со кулэмысь улӟыса султыны кулэ шуыса.

¹⁰Но бертӥзы дышетскисьёс доразы.

¹¹Нош Мария шӧйгу дорын бӧрдыса сылэм. Но бӧрдыкез шӧйгуэ учкем,

¹²но адӟе кык ангелъёсты, кудъёсыз пуко вылэм тӧдьы дисьёсын:одӥгез йыр дораз, нош мукетыз кытын кылле вал Иисуслэн мугорыз.

¹³Но соос верало солы:"Кышномурт! Малы тон бӧрдӥськод?" Вера соослы:"Кузёме мынысьтым нуизы, но уг тодӥськы, кытчы Сое понӥзы".

¹⁴Сое вераса, берлань бэрытскиз но адӟиз пукись Иисусэз, но ӧз тодма, со Иисус шуыса.

¹⁵Иисус вера солы:" Кышномурт! Малы тон бӧрдӥськод? Кинэ утчаськод?" Мария малпам Со садовник шуыса, но вера Солы:" Кузёе! Тон ке нуид Сое, вера мыным, кытчы понӥд Сое, но мон басьто Сое".

¹⁶Иисус вера солы:"Мария!" Со,берытскиз но вераз:"Раввуни!" - " Учитель".

¹⁷Иисус вера солы:" Эн кутскылы Мон борды, уго Мон Атае доры ой на туба. Мын Мынам вынъёсы доры но вера соослы:" Тубисько Мынам Атае доры, тӥляд но Атайды доры, Мынам Инмаре доры, тӥляд но Инмарды доры".

¹⁸Мария Магдолина мынэ но ивортэ дышетскисьёслы, адӟылӥ шуыса Кузё Инмарез но Со пе вераз тае солы.

¹⁹Со нуналэ ик суббота бере, ӝытазе, куке корка ӧсъёс, кытын вал дышетскисьёс, ворсамын вал иудейёслэсь кышкаса, лыктӥз Иисус но султӥз соослэн шоразы, но шуиз соослы:"Мир тӥледлы!"

²⁰Вераса тае, Со возьматӥз соослы Аслысьтыз киоссэ но кӧтурдэссэ. Дышетскисьёсыз шум потӥзы, адӟыса Кузёзэс.

²¹Иисус нош ик соослы шуиз:"Мир тӥледлы! Кызьы келяз Монэ Атай, озьы ик Мон но келясько тӥледыз".

²²Тае вераса, шокчиз, но вера соослы:" Басьтэлэ Святой Духез.

²³Кинлы сӧлыкёссэ простить кароды, соизлы простится кариськоз, кин вылэ кельтоды, со вылын кылёз",

²⁴Нош Фома, одӥгез Даскыкъёс пӧлысь, кудзэ вераллязы Кыкто, соосын ой вал Иисус лыктыку.

²⁵Мукетъёсыз дышетскисьёс шуизы солы:"Ми Кузёмес адӟылӥм". Нош со шуэм соосды:"Ӧй ке адӟы кортчог бере ранаоссэ Солэн киысьтыз но ӧй ке пон чиньыме Солэн ранаяз, но киме ӧй ке пон Солэн кӧтурдэсаз, уг оскы".

²⁶Тямыс нунал ортчем бере Солэн дышетскисьёсыз нош ик вал коркан, Фома но соосын. Иисус лыктӥз, куке ӧсъёс ворсамын вал, султӥз соослэн шоразы но шуиз :" Мир тӥледлы"

²⁷Со бере Фомалы вера:" Вай татчы аслысьтыд чиньыдэ но учкы Мынам киосы шоры. Вай кидэ но пон Мынам кӧтурдэскам, но эн лу оскисьтэм, нош лу оскись".

²⁸Фома пумитаз вера Солы:" Кузёе мынам но Инмаре Мынам!"

²⁹Иисус вера солы:" Тон оскид, Монэ адӟид но. Шудоесь Монэ адӟытэк оскисьёс.

³⁰Трос мукетъёссэ но чудоос Иисус лэсьтылӥз аслаз дышетскисьёсыз азьын, кудъёсыз сярысь гожтэмын та книгаын.

³¹Та ик гоштэмын, тӥ мед оскоды шуыса, Иисус - со Христос, Инмарлэн Пиез, но, оскыса, Солэн нимыз понна улон мед басьтоды шуыса.

¹Со бере нош ик лыктэм Иисус Аслаз дышетскисьёсыз доры Тивириада море дурын. Лыктэм нош тазьы:

²ӵош вал Симон Пётр, но Фома, Кыкто шуон, но Нафанаил Галилейской Канаысь, но Заведейлэн пиосыз, но кык мукетъёсыз Солэн дышетскисьёсыз.

³Симон Пётр шуэ соослы:"Мыно чёрыг кутылыны". Солы шуо:"Ми но тонэныд мыном". Мынӥзы но со куспын ик пуксизы лодкае. Со уйэ чёрыг ӧз кутэ.

⁴ Иисус, ӵукна ик сылэ вылэм яр дурын, нош дышетсисьёсыз Сое ӧвӧл тодмаллям.

⁵Иисус шуиз соослы:" Пиналъёсы! вань-а тӥляд кыӵе ке сиёнды?" Соос веразы:"Ӧвӧл".

⁶Нош Со шуиз соослы:"Куштэлэ сетьтэс лодкалэн бур палаз но кутоды". Соос куштӥзы но ӧз ни ворме кыскыны сетьсэс, уго сокем трос чёрыг пырем.

⁷Соку дышетскись, кудзэ яратэ вал Иисус, шуэ Пётрлы:" Кузёмы Со!", Симон Пётр кылэм бераз Со Иисус шуыса, дӥсяськиз, малыке шуоно голик вал, но морее тэкчиз.

⁸Нош мукетъёсыз ученикъёс лодкаен уяса лыктӥзы:"

⁹Куке потӥзы яр дуре, адӟизы - тылскемын, но эгыр вылын пыже чёрыг но нянь.

¹⁰Иисус шуэ соослы:"Вае чёрыгдэс, кудзэ тӥ али гинэ кутӥды".

¹¹Симон Пётр мынӥз но поттӥз яр дуре сетьсэс, кудыз тырмемын вал сю витьтон куинь бадӟым чёрыгёсын, сокем тросс чёрыгез но ке вал сетьсы ӧвӧл кеськем.

¹²Иисус шуэ соослы:" Лыктэ но сиське". Дышетсисьёс пӧлысь нокин но ӧз дӥсьты юаны Солэсь:"Кин Тон?", тодыса, Со Кузёзы шуыса.

¹³Иисус басьтэ нянь но сётэ соослы, озьы ик чёрыг но.

¹⁴Кулэмысь улӟыса султэмез бере та вал куинетӥез Иисуслэн лыктэмез Аслаз дышетскисьёсыз доры.

¹⁵Куке соос обедало вал, Иисус вера Симон Пётрлы:" Симон, Иоаннлэн пиез! Яратӥськод-а Монэ соослэсь золгес? Пётр вера Солы:" Бен, Кузёе! Тон тодӥськод, мон Тонэ яратӥсько шуыса". Иисус вера солы:" Возьма Мынысьтым ыжпиосме".

¹⁶Но вера солы кыктэтӥзэ:" Симон, Иоаннлэн пиез! Яратӥськод-а Монэ?" Пётр вера Солы:" Бен, Кузёе! Тон тодӥськод, мон Тонэ яратӥсько шуыса". Иисус вера солы:" Возьма Мынысьтым ыжъёсме".

¹⁷Вера солы куинетӥзэ:"Симон, Иоаннлэн пиез! Яратӥськод-а Монэ?" Пётр ӝожомиз куиньметӥзэ юамезлэсь "яратӥськод-а Монэ", но вера Солы:" Кузёе! Тон ваньзэ тодӥськод. Тон тодӥськод, мон Тонэ яратӥсько шуыса". Иисус вера солы:" Возьма Мынысьтым ыжъёсме.

¹⁸Зэм ик, зэм ик верасько тыныд:" куке тон вал егит, ачид дисяськылӥд но кытчы мынэмед потӥз отчы ик вэтлылӥд, нош куке мӧйымид ке, киостэ ӝутод но муке мурт дӥсялоз тонэ но нуоз, кытчы мынэмед уг поты",

¹⁹ Тае, вераз возьматыны, кыӵе кулонэн Пётр данъялоз Инмарез. Тае вераса, шуиз солы:" Лык Мон сьӧры".

²⁰Пётр берытскиз но адӟиз со сьӧры лыктэ дышетскись, кудзэ Иисус яратэ вал но кудыз ӝыт сиськыку, мыкырскыса Солэн гадь вылаз, шуиз:"Кузёе! Кин вузалоз тонэ?"

²¹Пётр адӟыса сое Иисуслы вера:"Кузёе! Нош со мар?"

²²Иисус вера солы:" Мынам мылы потӥз ке, со, лыктытчёзям мед улоз шуыса, мар тыныд? Тон лык Мон сьоры".

²³Но вӧлмиз та верам вынъёс куспын, со дышетскись уз пе кул. Нош Иисус ӧз вера солы, уз кулы шуыса. Со вераз гинэ:" Мынам мылы потӥз ке, со, лыктытчёзям мед улоз шуыса, мар тыныд?

²⁴Та дышетскись ивортэ но гожтэм та учыръёс сярысь, но ми тодӥськом, солэн ивортэмез шонер шуыса.

²⁵Но трос мукетъёссэ лэсьтӥз Иисус, ваньмыз сярысь тупен тупен гожтоно луысал ке, малпасько, быдэс дуннее но ой тэрысал гожтэм книгаос. Аминь.

Northern Udmurt: Unlocked Literal Bible for John

Formatted for Translators

John