To view a copy of the CC BY-SA 4.0 license visit
http://creativecommons.org/licenses/by-sa/4.0/
Notices:
You do not have to comply with the license for elements of the material in
the public domain or where your use is permitted by an applicable
exception or limitation.
No warranties are given. The license may not give you all of the
permissions necessary for your intended use. For example, other rights
such as publicity, privacy, or moral rights may limit how you use the
material.
Tito
1SPATJIBAL OT'ANIL1Te Pabloe ja abat yu'un te Diose sok ja wolwanej puk k'op yu'un te Jesucristoe, ta swenta xch'uunjel yot'an te lum te tsabil yu'un te Diose sok te la sna'beyik sba te beluk smelelile te ja stojil ya yich' ich'el ta muk' te Diose, 2te jauk smuk'ul jkot'antik te kuxinel sbajt'el k'inal te ya yak' te Diose, te ma spas lot stukele, te jich yaloj ta jamal ta xjajch'ibal to tele. 3Te k'alal la sta yorail, la yak' ta ilel te beluk yaloj jilel ta swenta te la jcholbey te sk'ope te yak'ojbon te ya jchole. Jich ya jpas in to, te jich mantal yu'un te Diose te ja koltaywanej jku'untike.4Tito, jich k'oemat te bit'il jnich'anat ta swenta te pajal ay xch'uunjel jkot'antike. Te yutsil ot'anile sok te lamal k'inal yu'un te Dios Tatil sok te Cristo Jesús te koltaywanej jku'untike ayuk ta atojol. TE BELUK YA SK'AN YA SPAS TE TITO TA BAY LUM CRETA. 5Te beluk swentail te bit'il la jkijk'tayat jilel ta sk'inal Creta, ja yu'un te yakuk achajp'an te beluk kechel jilel ta pasele sok yakuk awak'bey yich' yat'elik ta ancianoil ta jujun pam lum, jich te bit'il la jkalbat jilel mantale.6Te mach'a ya x-och ta ancianoil ja me ya sk'an te lek stalele, tul nax me ants ya xnujp'in sok, te yal snich'ane ya me sk'an te jun yot'anik ta xch'uunel te Kajwaltike, ma me pujk'emuk sk'oplalik te ma lekuk stalelike sok te ma xch'uunik mantale. 7Ya me sk'an te mach'a wolwanej yu'un te ch'uunjeletike, te ja ya yilbey sna te Diose, lekuk me stalel. Ma me joweltikuk nax te beluk ya spase. Ma me orauk nax ya x-ilin, sok ma me smulan te yakubele, ma me jach k'opok, sok ma me ayuk sbik'tal yot'an.8Jauk me to, ya me sk'an te ya yotses ta sna te mach'a ya xk'ot ilel yu'une, toyol me yot'an yu'un te beluk lek ta pasele. Ya me sk'an te lek yot'ane, toj me te beluk ya spase, ayuk me xk'uxul yot'an sok te yakuk sna' stsajtebel sbae. 9Ja me sk'an te ja ya xbajt' ta yot'an te beluk ak'bil snope, jich me ya xju' yu'un yak'bey yip yot'an te yantikuke ta snopel te beluk leke sok jich me ya xju' yu'un stojtesel te mach'atik ma sk'anike.10Melel ay me bayal ants-winiketik te ya stoy sbaike, jai to ja me te mach'atik tulan sk'oplal yu'unik te circunsicióne. Te sk'op-yaiyejike mayuk stulal. Yakik me ta lo'laywanej sok ya me yik'ik bael te ants-winiketik te banti ma lekuk te bee. 11Puersa me ya sk'an ya jkomtik. Ja me yakik ta yak'el ta nopel te beluk ma jichuk ya sk'an yich' pasele, janax ya slo'layik tak'in a sok ya xatik te mach'a jun snaike.12Ay tul bijil winik, te ja alwanej yu'un te cretaetike te jich la yale: "Te Cretenseetike pas-lotetik, bol chambalametik sok te xi'bantik sbaike, sok janax baem yot'anik ta we'el-uch'ajel sok ch'ajinaletik." 13Mero smelelil jai k'op to, jich yu'un tulan me xa tojtesik swenta yu'un jun me ay a te xch'uunjel yot'anike.14Ma me xa ch'uunik jontol ayejetik te jowil nopbil yu'un te judioetike sok te mantaliletik te ya yalik te ants-winiketik te ma ba smelelile.15Te mach'atik mayuk mulil ta yot'ane, spisil lek sk'oplal yu'unik. Yan te mach'atik ay smulike sok te mach'a mayuk xch'uunjel yot'anike, xujt' mayuk bi lek sk'oplal yu'unik. Melel te snopjibal yu'unike ma lekuk. 16Ya yalik te sna'ojbey sbaik te Diose, jauk me to chikan ta yat'elik te ma jichuke. Mero amenik sok k'axinte mantaletik. Xujt' mayuk swentail te yat'elike.
2TE LEKIL BIJTESEL1Jauk me to te ja'ate, jich me ya xk'opojat te bit'il la awich' ak'beyel anop ta swenta te lekil k'ope. 2Te ancianoetike ya me sk'an ya sna' stsajtebel sbaik, ya me sk'an te lekuk yot'anike, ya me sk'an te ay yutsil yot'anike, jun me yot'anik ta xch'uunel te Diose, ayuk me xk'uxul yot'anik sok ya me sk'an yak'beyik yipal.3Te ancianaetike ya me sk'an te lek sk'oplalike, ma me sk'an ya xlewanik ta k'op. Ma me sk'an te mosoinbilik yu'un te yakubele. Ja me ya sk'an yak'ik ta ilel te beluk leke 4sok ya sk'an yak'beyik snop te ch'iel antsetik te bit'il ya sk'an k'ux ya yaiyik ta yot'anik te smamlalik sok te yaaltakike. 5Ya me sk'an ya anojp'tesik te lekuk me te yot'anike, te manchuk ya sta smulike, te yakuk sna'ik skanantayel te snaike, sok te yakuk yich'ik ta muk' te smamlalike. Te antsetike ya me sk'an ya spasik spisil in to swenta yu'un jich me ma yich' bol k'opteyel a te sk'op te Diose.6Janix me jich uuk, tak'uyame te ch'iel winiketik te lekuk me te yot'anike. 7Te ja'ate ak'ame ta ilel te lekil at'elile; sok te k'alal ya awaiy nojp'teswaneje, lek me xa achol sok tulanuk me sk'oplal awu'un. 8Cholame te beluk lek ta cholel te ma stak' ya yich' kontroinele, jich me te mach'a ya skontroinate ya me yich' k'exlantesel a, melel mayuk beluk amen ya stak' yalik ta jwentatik.9Te abatetike ya me sk'an ya xch'uunbeyik smantal te yajwalike. Ya me sk'an te lekuk yot'anik sok ma me yaiyik kera sok te ajwaliletik yu'unike. 10Ma me sk'an te ya yaiyik elek'e. Ja me ya sk'an te ya yak'ik ta ilel te junax yot'anike, jich me ya yak'ik ta ilel te lek te nojp'tesel yu'un te Diose te ja koltaywanej jku'untike.11Melel te yutsil yot'an te Diose chiknajemix ta spisil te ants-winiketike. 12Ja ya snojp'tesotik te bit'il ya sk'an ya jkijk'teytik te beluk amen ta pasele sok te beluk mulanbil sba yu'un te balumilale. Ya snojp'tesotik te lekuk yakuk xkuxinotike, te tojok te jkat'eltike, sok te lekuk jkot'antik ta spisil ora te jayeb k'aal ayotik ta balumilale. 13Jich me ya sk'an ya xkuxinotik ja to te k'alal ya xcha' tal sok yutsilal te Diose te ja koltaywanej jku'untik, ja te Jesucristoe.14Te Jesuse la yak' sba ta lajel ta jwentatik yu'un te la skolteyotik lok'el yu'un te mulile sok la spokotik yu'un te jmultike, swenta yu'un slumotik ya xk'ootik te bit'il toyol jkot'antik ta spasel te beluk leke.15Aya me tak'uywanej sok ak'a me nopel spisil in to. Aya me komaw te ja awich'oj tulan awat'ele. Ma me ayuk mach'a ya sbajat.
3TE BELUK YA SK'AN YA SPASIK TE CH'UUNJELETIKE.1Alulebeyame te yakuk xch'uunbeyik smantal te muk' ajwaliletike sok te mach'atik tulan yat'el yich'ojike, aka me xch'uunbeyik smantal, swenta yu'un jich me lek chapatik ya spasik a te lekil at'elile. 2Alulebeyame te ma lekuk ya yaanik te yantike, swenta yu'un ma ya xjachik k'op a, ya me sk'an te binax awot'an sok te yantike ja me lek te pek'el ya awak'aba ta stojol te yantike.3Melel te jo'otike jichotik ta sneelal uuk, ma jna'tik k'inal a sok ma jch'uuntik mantal a. Jowejemotik a sok mosoinbilotik yu'un te beluk ya smulan te jbak'etaltike. Ja ya jpastik a te mulile sok ay sbik'tal jkot'antik a. La jkak'tik te ya yileyotik te yantike sok ya jkileybatik ta tulu tul.4Jauk me to te Dios te koltaywanej jku'untik la yak' ta ilel te bayal la sk'anotike sok te bayal xk'uxul yot'an ta swenta te ants-winiketike, 5ma ta swenta te toj jkat'eltik te la skoltayotike, ta swentanax xk'uxul yot'an te kolotik yu'une. La skoltayotik ta swenta te ach'ub te jkuxineltik yu'un te la spokotik sok te la jkich'tik yach'il jkuxlejaltik ta swenta te Ch'ul Espíritue.6Te Diose ma bisbiluk nax la yak'botik te Ch'ul Espíritue te ja ta swenta te Jesucristo te ja koltaywanej jku'untike. 7Jich la spas yu'un te toj ya xk'ootik ta swenta te yutsil yot'ane, jich la stak' jtatik a te kuxlejal sbajt'el k'inale.8Smelelil jai k'op to. Junuk me awot'an ta yalel sk'oplal spisil in to, jich me te mach'atik xch'uunejik te Diose ya me yat'elinik spasel te beluk lek ta pasel te albilik yu'un te Diose. Ja lek te jich ya spasike sok ja ya xtuun yu'un spisil te ants-winiketike.9Jauk me to ijk'taya jilel te jontol jach k'ope ma me lek teme ya awa'an te namey me'el-tatiletike; sok te jowil tsaltomba k'op ta swenta te mantalile. Te mayuk sk'oplale, sok te mayuk swentail ta spisile, 10Teme ay mach'a ya yaiy xatomba ta stojol te ch'uunjeletike koma me jun chebuk buelta, teme ma la xch'uunike, lok'esame bael, 11sok jich me ya ana'ik a te k'axel jowejem te yat'elike sok te yakik spasel te mulile sok janix me ya xtal ta stojolik te kastigoe .LA YICH' TAK'UYEL TE TITOE. 12Te k'alal ya jtikunbatel te Artemase o te Tíquicoe, teme k'ote, talan me ta ora ta jtojol ta bay lum Nicópolis, te banti jnopoj ya xk'ax jku'un te yorail sikil k'inale. 13Talan me ta ora sok kolteyame bael yu'un te sbeib te Zenas, te ja snopoj ta lek te leyetike sok uuk te Apolose, jich me mayuk swokolik a.14Te mach'a junax ayotik soke aka me snopik spasel te beluk leke.Ya me xk'uxtayik te mach'atik ay yo'bolil sbaike swenta yu'un ma tojoluk kuxulik ta k'inal a.SPATJIBAL OT'ANIL TA SLAJIBAL. 15Spisil te mach'atik sjoinojone ya stikunbat spatjibal awot'an. Sok ak'bon spatjibal yot'an te mach'atik k'uxotik ta yot'anik ta swenta te pajal ay xch'uunjel jkot'antike. Te yutsil yot'an te Diose ayuk me ta atojolik ta apisilik.