Bible

Apocalipsis

1TE BELUK LA YAK' TA NA'EL STOJOL TE JESUCRISTOE.¹Ja in to, ja te beluk la yak' ta na'el stojol te Dios ta swenta te Jesucristoe, jich me la yak'bey sna' stojol te abatetik yu'une, te beluk nopol ya xk'ot ta pasele. Ja la yak'bey sna' stojol ta swenta te ch'ul abat te la stikun tel ta stojol te Juan te ja yabate. ²Te Juane la yalbey sk'oplal spisil te beluk la yil ta swenta te sk'op te Diose sok te testigo k'ot yu'un te sk'op sok te beluk la spas te Jesucristoe. ³Binax me yutsil te mach'a ya sk'opon jai jun to ta stojol te yantike, sok te mach'a ya yaiy stojol te sk'op te alwanej in to sok te mach'a ya xch'uunik spasel te beluk ts'ibubil le'a, melel nopol ayix te sk'alelale.SPATJIBAL YOT'AN TE JUK CHAJP' CH'UUNJELETIKE. ⁴Jo'on Juan, te ya jpatbey yot'an te juk chajp' ch'uunjeletik ta Asia: Te ja'exe, ich'aik me te yutsil ot'anile sok te lamal k'inal yu'un te mach'a stalel aye, sok te mach'a ay ta sneelale, sok te mach'a nopol ya xtale, sok te jukeb Espíritu te ay ta stojol te muk'ul naktijibale, ⁵sok te Jesucristoe, te ja testigo te jun yot'ane, te ja neel cha'kux tel yu'un te mach'atik lajemike, sok te ja ajwalil yu'un te muk' ajwaliletik ta balumilale. Ja te mach'a k'uxotik ta yot'ane sok te la skoltayotik lok'el yu'un te jmultik ta swenta te xch'ul xch'ich'ele, ⁶ja la xchajp'anbotik jun awilal, sacerdoteotik ta stojol te Jtatik Diose, ayuk me yutsilal sok ayuk me yu'el ta ora to sok ta sbajt'el k'inal. Jichuk.⁷Ilawilik, ja me ya xtal ta bay te tokale; spisil ants-winiketik ya me yilik, sok nix uuk te mach'atik la slowike. Spisil ta chajp' ts'umbalil ta balumilal ya me yok'tey sbaik yu'un. Aka k'otok ta pasel, jichuk. ⁸"Jo'on te Alfa sok te Omega," jich la yal te Kajwaltik Diose, "te mach'a ay ta xjajch'ibale sok te mach'a ay ta slajibale sok te mach'a kechel ya xtale, te mach'a spisil ya xju' yu'une."TE JUAN AK'BOT YIL TE BI YILEL YUTSILAL TE NICH'ANILE. ⁹Jo'on Juan te awermanoone sok te pajal ay ta jwentatik te woklajele sok te pajal joinoj jbatik ta bay ajwalinel yu'un te Cristoe sok te jun jkot'antik yakotik ta smaliyel ta swenta te Jesuse. Ayon ta bay ch'in lum te ay ta yolil te muk'ul ja'e, te Patmos sbiile, ta skaj te sk'op Diose sok te jamal la jkal te bit'il ay sk'oplal te Jesuse. ¹⁰Ta sk'alelal te Kajwaltike, te jo'one unteybilon yu'un a te Ch'ul Espíritue. La jkaiy stojol te ay mach'a tulan k'opoj ta jpat jich bit'il jun ok'es. ¹¹La yal: "Ts'ibuya ta bay jun te beluk ya awile, sok tikunbeya bael te juk chajp' ch'uunjeletik, ta Éfeso, ta Esmirna, ta Pérgamo, ta Tiatira, ta Sardis, ta Filadelfia, sok ta Laodicea."¹²La jsutbabel jkil te mach'a yak ta sk'oponbelone, sok te k'alal la jsutbabele la jkil te jukeb xtuchtijibal k'ajk' te pasbil ta oroe. ¹³Ta yolil te xtuchtijibal k'ajk'e, ay la jkil te jich yilel te bit'il Snich'an te winike, k'alal to ta yakan k'oem te palal pak' slapoje, sok jun xchujk'il xch'ujt' te pasbil ta oro te bech'bil k'axel ta k'alal yot'an.¹⁴Te sjole sok te stsotsil sjole sak nax jich bit'il te tunim chije, mero sak nax jich bit'il te ya xko tel te tuiwe, sok te site jich bit'il te k'ajk'e. ¹⁵Te yakane jich bit'il te bronce te xlem naxe, jich bit'il te lekubtesbilix ta k'ajk'e, sok te sk'ope jich bit'il te yip te bayal ja'etike. ¹⁶Ja yich'oj ta swa'el sk'ab jukeb ek'etik, sok yak ta lok'el tel ta ye jun espada te juxbil ta xcha' mejch'ele. Te sit yelawe xlemet nax xojobil jich te bit'il k'aal te bayal yip ya xleme.¹⁷Te k'alal la jkile, t'uxajon koel ta yakan, jich bit'il jun winik te lajeme. La skajan te swa'el sk'ab ta jtojol sok la yal: "Ma me xiwat. Jo'on te ayon ta xjajch'ibale sok jo'on nix te slajibale, ¹⁸sok jo'on te kuxulone. Te jo'one lajemon a, jauk me to ilawil, ¡Jo'on te kuxulon ta sbajt'el k'inale! sok jo'on jkich'oj te sjamjibal te lajele sok te yawil te aelmeletike.¹⁹Jich yu'un, ts'ibuya te beluk la awile, ja te beluk ay ta ora to, sok te beluk ya xk'ot ta pasel ta patile. ²⁰Jich yu'un, te beluk muken ay sk'oplal yu'un te jukeb ek'etik te la awil te ay ta swa'el jk'abe, sok te jukeb xtuchtijib k'ajk' te pasbil ta oroe ja: Te jukeb ek'etike ja me te ch'ul abatetik yu'un te juk chajp' ch'uunjeletike, sok te jukeb xtuchtijib k'ajk' ja me te juk chajp' ch'uunjeletike."

2TS'IBUBIL JUN TA STOJOL TE CH'UUNJELETIK TE AYIK TA LUM ÉFESO.¹Ts'ibubeya te ch'ul abat yu'un te ch'uunjeletik ta lum Éfeso: ''Jai k'op to ja sk'op te mach'a stsakoj ta swa'el sk'ab te jukeb ek'etik sok te mach'a yak ta beel ta yolilal te juk ch'ix xtuchtijib k'ajk' te pasbil ta oroe, jich ya yal: ²''Te jo'one ya jna'bat spisil te awat'ele, te tulan ya x-at'ejate, te ay smalib awu'une, te awak'ojbey yipale, sok ma sts'ijk' awu'un te mach'atik amenike, sok te apasojix ta prueba te mach'atik skuyoj sbaik ta wolwanej puk k'opetike, jauk me to ma nix jaukik a, sok la ana'ik stojol te lo'laywanejetike.³Te jo'one ya jna' te ya xkujch' awu'un sok te ay smalib awu'une, sok bayal beluk k'axematix a ta swenta te jbiile sok ma ba lujbenat. ⁴Jauk me to ay beluk amen jkilojbat, ja te la wijk'tay te sbabial xk'uxul awot'ane. ⁵Jauk me to na'ame te banti ch'ayemate. Sutame te awot'ane sok pasame te beluk la apas ta xjajch'ibale. Teme ma la sut te awot'ane, ya me xtalon ta atojol sok ya me jk'ej lok'el ta yawil te xtuchtijib k'ajk'e.⁶Jauk me to ay beluk lek apasoj: Ja te amen awiloj te beluk ya spas te Nicolaítase, jich te bit'il amen jkiloj uke. ⁷Te mach'a ay xchikine, aka me yaiy stojol te beluk ya yal te Espíritu ta stojol te ch'uunjeletike. Te mach'a ya xju' yu'un tsalawe ya me jkak'bey slo' te sit te te' te ya yak' te kuxinel ta sbajt'el k'inale, te ay ta bay te yawal sts'unub(Paraíso) te Diose.''TS'IBUBIL JUN TA STOJOL TE CH'UUNJELETIK TE AYIK TA LUM ESMIRNA. ⁸Ts'ibubeya te ch'ul abat yu'un te ch'uunjeletik te ayik ta lum Esmirna: Jai to ja sk'op te mach'a ay ta xjajch'ibal sok te ay ta slajibale, te laje sok te cha' kuxtele: ⁹"Te jo'one jkilojbat te awokole sok te me'baate, jauk me to k'ulejat. Jna'oj te ya sleatik ta k'op te mach'atik skuyoj sbaik ta judioetike jauk me to ma nix jaukik a, melel ja nainemik ta yot'anik te pukuje.¹⁰Ma me xiwat yu'un te wokolil te nopol ya xtal ta atojole. ¡Ilawilik! Te pukuje nopol ya yak'ex bael cha'ox tul ta chukel yu'un ya yilbeyex awot'anik a, ya me xwoklajatik lajuneb k'aal. Junuk me awot'an ja to te k'alal ya xlajate, jich me ya jkak'bat akorona ta swenta kuxlejal sbajt'el k'inal. ¹¹Te mach'a ay xchikine, aka me yaiy stojol te beluk ya yal te Espíritu ta stojol te ch'uunjeletike.Te mach'a ya xju' yu'un tsalawe ma ba ya xk'ax swokol yu'un te xchebal buelta lajele.TS'IBUBIL JUN TA STOJOL TE CH'UUNJELETIK TE AYIK TA LUM PÉRGAMO. ¹²''Ts'ibubeya te ch'ul abat yu'un te ch'uunjeletik ta Pérgamo: Jai to ja sk'op te mach'a yich'oj te espada te juxbil xcha' mejch'el te yee: ¹³''Te jo'one ya jna' te banti nainemate, ja te banti ay te smuk'ul snaktijib te pukuje. Jauk me to jun awot'an awich'ojbon ta muk' te jbiile. Ya jna' te ma ba amukoj ta awot'an te xch'uunjel awot'an ta jtojole, ni jauk a te k'alal laj te Antipase te ja testigo jku'une, sok te jun yot'an ta jtojole, te la xch'uun milel, te banti nainem te pukuje.¹⁴Jauk me to ay cha'ox chajp' te beluk amen jkilojbate: Te ay ajuinejik te mach'atik xch'uunejik to te snopjibal yu'un te Balaame, te ja la yak'bey snop te Balac te bit'il la yak' xyalik ta mulil te snich'nab te israeletike, te la sti'ik te milbil majt'anil te la yak'beyik te lok'ombaetike sok te ochik ta mulweje. ¹⁵Janix jich, ay cha'ox tulex te ach'uunejik to te snopjibal yu'un te Nicolaítase.¹⁶¡Jich yu'un sujt'esa me awot'an! teme ma la apase, ya me xtalon ta atojol ta oranax, sok ya me jkontroinat sok te espada te ya xlok' tel ta jkee. ¹⁷Te mach'a ay xchikine, aka me yaiy stojol te beluk ya yal te Espíritu ta stojol te ch'uunjeletike. Te mach'a ya xju' yu'un tsalawe ya me jkak'bey te maná te nak'bile, sok ya me jkak'bey wol sakil ton te le' ts'ibubil a te yach'il sbiil, jun biilil te mayuk mach'a ya sna'e, janax te mach'a ya yich'e."TS'IBUBIL JUN TA STOJOL TE CH'UUNJELETIK TE AYIK TA LUM TIATIRA. ¹⁸''Ts'ibubeya te ch'ul abat yu'un te ch'uunjeletik ta Tiatira: Ja in to ja sk'op te Snich'an te Diose, te jich sit te bit'il k'ajk'e sok te jich yakan te bit'il bronce te xlemet naxe: ¹⁹''Te jo'one ya jna' te beluk apasoje: Te xk'uxul awot'ane, te xch'uunjel awot'ane, sok te awat'ele, sok te bit'il ts'ijk'em awu'un te awokole. Ya jna' te bit'il yakat ta at'el ta ora to, te ja k'ax jich te bit'il xjajch'ibale.²⁰Jauk me to ay beluk amen jkilojbat: Te mayuk beluk ya awalbey te ants te Jezabel sbiile, te skuyoj sba ta alwaneje. Te ya yak'bey snop te abatetik jku'un te yakuk spasik te mulweje sok te ya slajinik te milbil majt'anil ta stojol te lok'ombaetike. ²¹Bayal k'aal la jmaliyix te yakuk sujt'es te yot'ane, jauk me to ma sk'an yijk'tey ta spasel te mulile.²²¡Ilawilik! ya me jkak' xchawajuk ta wa'ebal yu'un te xchamele, sok te mach'atik la spasik mulil sok te Jezabele ya me xk'ax bayal swokolik, teme ma' la sujt'es yot'anik yu'un te beluk ya spas te antse. ²³Te jo'one ya jkejch'entes ta lajel te yaaltake, jich me spisil te ch'uunjeletike ya me sna'ik stojol te jo'on jna'oj spisil te beluk ya snopike sok te beluk ya sk'anike. Jich me ya jkak'bey stoj ta tulu tul chikan te bi yilel spasojik te yat'elike.²⁴Yan te jayeb xan ayex ta Tiatira, te ma ba ach'uunejik te beluk ya yak' ta nopel te Jezabele, sok te ma la anopbeyik te beluk bijubtesel te ja yu'un te pukuje, te ja'exe ya jkalbeyex: 'Ma ba ya jkak'beyex xan yan awijk'atsik. ²⁵Jauk me to, ak'beyaik me yipal ja to teme talone.²⁶Te mach'a ya xju' yu'un tsalawe sok te mach'a ya spas spisil te beluk jpasoj ja to ta k'alal slajibal k'aale, ja me ya jkak'bey yich' yat'el ta stojol te muk'ul lumetike. ²⁷Ja me ya spas mantal sok te sbastón te pasbil ta tulan tak'ine, ya me sjin koel spisil te skontroe jich te bit'il ya xtob koel te oxometik te pasbilik ta ajch'ale. ²⁸Jich te bit'il la yak'bon jkat'el te Jtate, jich me ya jkak'bey te ek' te ya xlok' tel ta sakubelan k'inale. ²⁹Te mach'a ay xchikine, aka me yaiy stojol te beluk ya yal te Espíritu ta stojol te ch'uunjeletike.

3TS'IBUBIL JUN TA STOJOL TE CH'UUNJELETIK TE AYIK TA LUM SARDIS.¹Ts'ibubeya te ch'ul abat yu'un te ch'uunjeletik ta Sardis: "Jich me ya yalbat te mach'a yich'oj te jukeb Espírituetik yu'un te Diose sok te yich'oj te jukeb ek'etike. "Ya jna' te beluk apasoje. Kuxul xi' ak'oplal, jauk me to lajemat. ²Jajch'an me sok ak'beya yich' yip te beluk xan kuxul awu'une, melel le' nopol ya xlajix a, yu'un jkiloj te ma ts'akal pasbil te awat'el ta stojol te Diose.³Jich yu'un na'ame, te beluk awich'oj sok te beluk awaiyoj stojole. Ch'uuname sok sujt'esame awot'an yu'un. Teme ma ba la awik' asite, ya me xtalon jich te bit'il te elek'e, jich me ma ana' te bi ora ya xtalon ta atojole. ⁴Jauk me to ay nax cha'ox tulik ta Sardis te ma la spasik te mulile te ma la xch'altesik te sk'u'-spak'ike. Jaik me te ya sjoinonik ta beele, te slapojik te sakil sk'u'-spak'ike, melel lek te bit'il kuxulike.⁵Te mach'a ya xju' yu'un tsalawe ya me yich' lapbeyel te sakil sk'u'-spak'e, ma me ya jtubey sbiil ta sjunal te kuxinel sbajt'el k'inale, sok ya me jkalbey ta jamal te sbiil ta stojol te Jtat sok ta stojol te ch'ul abatetike. ⁶Te mach'a ay xchikine, aka me yaiy stojol te beluk ya yal te Espíritu ta stojol te ch'uunjeletike."TS'IBUBIL JUN TA STOJOL TE CH'UUNJELETIK TE AYIK TA LUM FILADELFIA. ⁷Ts'ibubeya te ch'ul abat yu'un te ch'uunjeletik ta Filadelfia: "Ja me sk'op te mach'a toj stukele sok te ja smelelil k'op te yich'oje, te ja stsakoj te llave yu'un te Davide, te ja' ya sjam sok mayuk mach'a ya stak' smak, te ja' ya smak sok mayuk mach'a ya stak' sjam. ⁸Ya jna' te beluk apasoje. Ilawil, la jambat jun ti'nail ta atojol te mayuk mach'a ya stak' ya smake. Ya jna' te mayuk lek awipe, jauk me to ach'uunojbon te jmantale sok ma amukoj ta awot'an te jbiile.⁹¡Ilawilik! Te mach'atik xch'uunejik te satanase, te ja ya yal sbaik te ja judioetike jauk me to ma jaukik, melel yakalik ta lot. Ya me jkak' xtalik skejan sbaik ta awakanik, sok ya me sna'ik stojol te k'uxex ta jkot'ane. ¹⁰Ta skaj te ja k'ejojbon te mantaliletik jku'une te ats'ikoj awokol yu'une, janix jichon uuk ya me jk'ejex te k'alal ya sta yorail te ya xtal te wokolil ta spamal te balumilale, swenta yu'un jich me ya jkilbey yot'an te mach'atik kuxulik ta balumilale. ¹¹Nopol me ya xtalon. Ma me xa wijk'teyik te xch'uunjel awot'anike, jich me ma ba ya awich'ik pojbeyel te akoronaike.¹²Te mach'a ya yaiy tsalawe, ya me jkak' te yuyal ya xk'ot yu'un te templo yu'un te Dios jku'une, ma me xlok' tel ta sbajt'el k'inal. Sok jo'on me ya jts'ibubey sbiil te Dios jku'un ta stojol, sok te sbiil te muk'ul lum yu'un te Dios jku'une ( ja te yach'il Jerusalén, te ya xko tel ta ch'ulchan ta stojol te Dios jku'une), sok ya me jts'ibubey jbiil ta stojol. ¹³Te mach'a ay xchikine, aka me yaiy stojol te beluk ya yal te Espíritu ta stojol te ch'uunjeletike."TS'IBUBIL JUN TA STOJOL TE CH'UUNJELETIK TE AYIK TA LUM LAODICEA. ¹⁴Ts'ibubeya te ch'ul abat yu'un te ch'uunjeletik te ayik ta Laodicea: "Jai k'op to te jichuk xi'e(Amén), ja te mach'a ya stak' jkak'tik smuk'ul jkot'antik ta stojole sok te ja smelelil testigoe, ja te ajwalil yu'un spisil te beluk la spas te Diose. ¹⁵Ya jna' te beluk apasoje, te ma ba sikukate sok te ma ba k'ixinukate. ¡Jkot'anuk te sikukate o te k'ixinukate! ¹⁶Jauk me to, samalat, ma sikukat sok ma k'ixinat, ya me jxeteyat lok'el ta jke.¹⁷Melel jich ya awal:"Jo'on k'ulejon, bayal beluk ay jku'un, sok mayuk beluk ya spas falta jku'un. "Jauk me to ma ana'oj te mayuk beluk ay awu'une, te k'exlaltik ayate, me'baat, ma'sitat, sok t'analat. ¹⁸Aiybon stojol te beluk ya jkalbate: Manbon te oro te lekubtesbil ta k'ajk', jich ya xk'atbujat ta k'ulej, sok manbon uuk te sakil k'u'ul-pak'al te ya alape yu'un me jich ma t'analat a, jich me ma awak' ta ilel te ak'exlale, sok manbon xpoxil te asit jich me ya apoxtey a, jich me ya stak' awil k'inal a.¹⁹Spisil te mach'a k'ux jkaiyoje ya jkak'bey snop sok ya jkak'bey yil te bit'il ya sk'an xkuxinike. Jich yu'un junajuk me awot'anik sok sujt'esa me awot'anik ta jtojol. ²⁰Ilawilik, tek'elon me ta ti'nail sok yakon me ta stijel. Teme ay mach'a ya yaiybon stojol te jk'ope sok teme ya sjam te ti'naile, ya me x-ochon bael ta sna, ya me join ba ta we'el sok, janix jich uuk ya me sjoinon ta we'el.²¹Te mach'atik ya yaiyik tsalawe, ya me jkak' sjoinon ta naklej ta banti muk'ul jnaktijibale, jich te bit'il la jkaiy tsalawe, jich me la join naklej ta smuk'ul snaktijib te Jtate. ²²Teme ay mach'a ay xchikine, aka me yaiy stojol te beluk ya yal te Ch'ul Espíritu ta stojol te ch'uunjeletike."

4TE YICH'EL TA MUK' DIOS TA CH'ULCHAN.¹Ta patil ay beluk la jkil xan, ja te ay jun ti'nail te jamal ta banti ch'ulchan. Te sbabial k'op te la sk'opnone jich te bit'il jun ok'es, te jich la yalbone: "Moan tel le' to, jich me ya jkak'bat awil te beluk ya xk'ot ta pasel ta patilale. ²Ta ora nax la yu'unteyon te yu'el te Espíritue, la jkil te jun muk'ul naktijibal te ay ta ch'ulchane, te ay mach'a nakal le'a. ³Te mach'a nakal le'a jich yilel te bit'il lekil tonetik te jaspe sbiile sok te cornalina sbiile. Te muk'ul naktijibale juybil ta sejk'arakub. Te sejk'arakube jich yilel te bit'il te esmeralda tone.⁴Ta sjuyubal te muk'ul naktijibale ay chaneb-xcha'winik (24) muk'ul naktijibaletik, te banti te muk'ul naktijibaletike nakatik chaneb-xcha'winik(24) ta tul ancianoetik le'a, te slapojik sakikal sk'u'-spak'ik, te yich'ojik skoronaik ta sjol te pasbil ta oroe. ⁵Te banti ay te muk'ul naktijibale ya xlok' tel tsan-tsewaletik, sok bayal beluk yak ta bul sok bayal chawuk le'a. Jukeb xtuchtijibal k'ajk' yakik ta tilel ta bay te muk'ul naktijibale, te jukeb k'ajk'etike ja' te Espíritu yu'un te Diose.⁶Sok nix te banti te muk'ul naktijibale ay pamal muk'ul ja te xlememetnaxe, jich te bit'il te jun espejoe (cristale). Ta banti sjuyubal sok ta yolilal te muk'ul naktijibale ay chaneb te mach'a kuxatik le'a, ay sitik ta skojt'ol ta sit yelawik sok ta spatik.⁷Te sbabial te beluk kuxule jich yilel te bit'il león-choje, te xchebalan te beluk kuxule jich yilel te bit'il alal wakaxe, te yoxebal te beluk kuxule jich yich'ojbey sit yelaw te bit'il te winike, te xchanebal te beluk kuxule jich yilel te bit'il águila te yak ta wilele. ⁸Ta xchanebal te beluk kuxatike, ay wakeb xik'ik ta juju kojt', nojel ta sitiletik ta spat sok ta yutil te xik'ike. K'aal ta ajk'ubal ma xlaj yot'anik ta yalel in to: ''CH'ULTESBIL, CH'ULTESBIL, CH'ULTESBIL, JA'AT TE KAJWALTIK DIOSATE, TE SPISIL YA XJU' AWU'UNE, ja te ay ta sneelale, ay ta ora to sok te mach'a ya xtale.''⁹Te chan kojt' te beluk kuxatike, te k'alal ya yalbeyik yutsilale sok te k'alal ya yich'ik ta muk' sok te k'alal ya yalbeyik wokol te mach'a nakal ta muk'ul naktijibale te ja stalel kuxul ta sbajt'el k'inale, ¹⁰te chaneb xcha'winik (24) ancianoetik ya me spajk'an sbaik ta stojol te mach'a nakal ta muk'ul naktijibale. Ya me stinan sbaik ta stojol te mach'a stalel kuxul ta sbajt'el k'inale, sok ya me skojt'esik te skoronaik ta stojol te muk'ul naktijibale, jich ya yalik:'' ¹¹''Ja awu'un te ich'el ta muk' Kajwal sok ja'at te Diosat jku'une, ya sk'an alel te awutsilale, ya awich' ich'el ta muk' sok te awu'ele. Melel ja apasoj spisil te beluk aye, ta swenta sk'anjel awot'an te chiknajem spisil te beluk aye sok te ja'at la apase."

5TE BALBIL JUN SOK TE ALALCHIJ.¹Jich yu'un la jkil ta swa'el sk'ab te mach'a nakal ta bay te muk'ul naktijibale, ay jun balbil jun te ay beluk ts'ibubil ta bay xcha'-mejch'el te june. Te la yich' ak'beyel jukeb selloetik. ²La jkil tul ch'ul abat te bayal yipe te yak ta yalel ta tulan aw: "¿Mach'a ya xju' yu'un sjamel te balbil june sok te ya sjam te selloetike?"³Mayuk tuluk ta bay ch'ulchan, ta bay balumilal, ta yet'al te balumilale te ju' yu'un sjamel te balbil june sok te ya sk'opone. ⁴Bayal ok'on yu'un melel mayuk mach'a la staik te ju' yu'un sjamel te balbil june sok te ya sk'opone. ⁵Jauk me to ay tul te anciano te la yalbone: "Ma x-ok'atix. ¡Ilawil! te muk'ul León-choj yu'un te sts'umbal Judá, te ja sts'umbal te Davide, la yaiyix tsalaw, ja ya xju' yu'un sjamel te balbil june sok te jukeb sello yich'oje.⁶La jkil kojt' Alalchij te kotol ta bay te muk'ul naktijibale sok te banti ay te chaneb te beluk kuxatike sok te ay ta yolilal te ancianoetike. Jich yilel te bit'il lowbilixe. Ay jukeb xulub sok jukeb sit; ja in to ja te jukeb Espírituetik yu'un te Diose, te tikumbilik tel koel ta spamal te balumilale. ⁷Jich bajt' sok la stsak lok'el te balbil jun te ay ta swa'el sk'ab te mach'a nakal ta bay te muk'ul naktijibale.⁸Te k'alal la stsak te balbil june, te chaneb te beluk kuxatike sok te chaneb xcha' winik (24) ancianoetike la skejan sbaik koel ta bay lum ta stojol te Alalchije. Ta tulutul yich'ojik yarpaik sok jun yawil te pasbil ta oro te nojel ta pom, te ja te beluk ya yalik ta sk'oponel Dios te ch'uunjeletike.⁹La sk'ajintayik yach'il k'ayoj: "Te ja'ate ja ya xju' awu'un stsakel te balbil june sok te ya ajam te selloetik yu'une. Melel ja'at la awich' milel, sok ta swenta ach'ich'el la amanbey skolel spisil te ants-winiketik, te ja yu'un Dios ya xk'otik ta spisil ta chajp' ts'umbaliletik, te yanyantik sk'opik, sok te yanyantik muk'ul lumetik. ¹⁰Ja la awak' te ya xk'otik ta ajwalinel sok ta sacerdoteil ta stojol Dios, jich me ya x-ajwalinajik ta balumilal."¹¹Jich yu'un la jkil sok la jkaiy stojol sk'op bayal ch'ul abatetik ta bay sjuyubal te muk'ul naktijibale, sok te beluk kuxatike, sok te ancianoetike. Te bayal ta millonetik te yajtalule. ¹²La yalik ta tulan aw: "Ja ay ta swenta te Alalchij te la yich' milele, te ya yich' yu'ele, sk'ulejal, sbijil, yip, ich'el ta muk', albeyel yutsilal sok te ya yich' k'ajintayele."¹³La jkaiy stojol spisil te beluk chiknajem ta ch'ulchan, sok ta balumilal, sok ta yet'al te balumilale, sok ta bay te muk'ul ja'etike te yakalik ta yalele: "Te mach'a nakal ta bay te muk'ul naktijibale, sok te Alalchije, aka yich' k'ajintayel, aka yich' ich'el ta muk', aka yich' albeyel yutsilal, sok te ja ay yu'el te ya x-ajwalinaj ta sbajt'el k'inale." ¹⁴Te chaneb te beluk kuxatike la yalik, "¡Jichuk!" jich yu'un te chaneb xcha'winik (24) ancianoetike la skejan sbaik koel ta lum sok la yich'ik ta muk'.

6TE SELLOETIKE¹La jkil te Alalchij te k'alal la sjam te jun ta sjukebal te selloe, sok la jkaiy stojol k'opoj kojt' te beluk kuxatike jich k'opoj te bit'il chawuke: ¡La' ilawil! ²"Jich la jkil kojt' sakil kaballo. Te mach'a kajal ta sba te kaballoe stsakoj t'im te' ta sk'ab sok ak'bot skorona ta sjol. Te k'alal lok'tel yaiyojix tsalaw a swenta yu'un ya xba yaiy tsalaw.³Te k'alal la sjam te xchebal sello te Alalchije, la jkaiybey stojol sk'op te xcha' kojt'ol te beluk kuxatike te jich la yale: "¡La' ilawil!" ⁴Jich yu'un lok' tel yan kaballo te tsajnax jich bit'ik te k'ajk'e. Te mach'a kajal ta sbae ak'bot yat'el te ya sk'ejbel te lamal k'inal ta balumilale, swenta yu'un jich ya xjajch' smil sbaik a te ants-winiketike. Sok te mach'a kajal ta sba te kaballoe ak'bot muk'ul espada.⁵Te k'alal la sjam te yoxebal sello te Alalchije, la jkaiybey stojol sk'op te yox kojt'ol te beluk kuxatike te jich la yale: "¡La' ilawil!" Jich la jkil kojt' ijk'al kaballo, te mach'a kajal ta sbae slikoj ta sk'ab te slikjibal yalal te biluketike (balanza). ⁶La jkaiy stojol te ay mach'a k'opoj ta yolilal te chan kojt' te beluk kuxatike te jich la yale: "Junax kilo trigo ya yich' tojel ta jun k'aal at'el, sok oxeb kilo cebada ya me yich' tojel ta jun k'aal at'el. Yan te aceite sok te vinoe ma me xa wak' xch'ayuk stukel."⁷Te k'alal la sjam te xchanebal sello te Alalchije, la jkaiybey stojol sk'op te xchanebal te beluk kuxatike: "¡La' ilawil!" ⁸Jich la jkil kojt' kaballo te sak pojch'anaxe. Te mach'a kajal ta sbae Lajel xi' te sbiile, sok nutsbil yu'un te stsobjibal aelmeletike (Hades). La yich' ak'beyel jun ta xchan xejt'el te balumilal te ya smil ta kerajel, ta winal, ta chamel, sok ya yich'ik ti'el ta ti'awal chambalametik te ants-winiketike.⁹Te k'alal la sjam te yo'ebal sello te Alalchije, la jkil ta bay yanil te xchik'jibal te milbil smajt'an Dios te xch'ulelik te jayeb te mach'atik yich'ojik milel ta skaj te la xcholik te sk'op te Diose sok te la yalik ta jamal te beluk xch'uunojike. ¹⁰Kajik ta tulan aw: "¿Jayeb xan k'aal ya sk'an Ajwalil yu'un spisil te beluk aye, ja'at te tojat sok smelelilat, te ya alikbey smul te mach'atik kuxatik ta balumilal sok te ya awak'bey stoj te la smalbotik te jch'ich'eltike?" ¹¹Jich yu'un ta tulutul la yich'ik ak'beyel lijk'il-lijk' sakil k'u'ul pak'al, la yich'ik albeyel te yakuk smaliyik xan tebuk, ja to teme ts'akaj te yajtalul te yermanotak te ayik ta abatinel te ya yich'ik milel jich te bit'il lajikuke.¹²Te k'alal la sjam te swakebal sello te Alalchije, la jkil tal tulan nijk'el ta balumilal. Te k'aale ijk'nax bajt' jich te bit'il ijk'al pak'e, sok te ue tsajub jich te bit'il stsajal te ch'ich'e. ¹³Te ek'etik te ayik ta ch'ulchane, ch'ayik tel koel ta balumilal, jich te bit'il ya xch'ay koel tel te sit te higo te' te k'alal ya xtal bayal te ik'e. ¹⁴Te ch'ulchane ch'ay bael jich te bit'il te ya yich' balel ta ora nax te june. Spisil te witsetike sok te sejp'elsejb te ch'in lum te juybil ta mare spisil kaj stij sbaik lok'el tel te banti ayike.¹⁵Jich yu'un te muk' ajwaliletik te ayik ta balumilale sok te mach'a tulan sk'oplalike, te wolwanej soldadoetike, te k'ulejetike, te mach'a tulan yat'elike, sok spisil te mach'atik esclavoinbilike, te mach'a libre ayike, la snak' sbaik ta xaabetik sok yutil ch'enetik te ayik ta witstikale. ¹⁶Sok jich la yalbeyik te witstikale sok te ch'enetike: "¡Ch'ayanik tel koel ta jtojoltik! Nak'awotik ta sit yelaw te mach'a nakal ta muk'ul naktijibale sok te yilimba te Alalchije. ¹⁷Melel k'otix yorail te yilimbae, ¿Mach'a ya xju' yu'un stejk'an sba ta stojol?"

7TE WAXUKLAJUNWINIK TA BAJK' (144,000) TE YICH'OJ SELLOILIKE.¹Ta patil la jkil chan tul ch'ul abatetik te tek'atik ta xchanebal xchikin te balumilale, te ja skomojik te chanchajp' ik' te ya xbeenik ta balumilale, swenta yu'un ma xbeenik ta lum k'inal, ta mar, sok jich ma stij sbaik pejt'uk te te'etike. ²La jkil yan tul ch'ul abat te mo tel ta bay slok'ib k'aale, te ja yich'oj ta sk'ab te sello yu'un te kuxul Diose. Tulan la yawtey te chan tul ch'ul abatetik te ja ak'bilik sjinel te lum k'inale sok te mare. ³''Ma to xa jinik te lum k'inale, te mare, sok te te'etike, ja to teme la jkak'beytik te sello ta sti'baik te abatetik yu'un te Dios jku'untike.''⁴La jkaiy stojol te jayeb ta tul ta spisilik te mach'atik la yich'ik te selloe: Ay waxuklajunwinik ta bajk' (144,000 mil), ta tul te mach'atik la yich'ik te sello ta chajp'al chajp' te ts'umbal te israeletike: ⁵Ay lajuneb xcha'winik ta bajk' (12,000 mil) ta tul te sts'umbal te Judá te la yich'ik te selloe, ay lajuneb xcha'winik ta bajk' (12,000 mil) ta tul te sts'umbal te Rubén, ay lajuneb xcha'winik ta bajk' (12,000 mil) ta tul te sts'umbal Gad. ⁶Ay lajuneb xcha'winik ta bajk' (12,000 mil) ta tul te sts'umbal Aser, ay lajuneb xcha'winik ta bajk' (12,000 mil) ta tul te sts'umbal Neftalí, ay lajuneb xcha'winik ta bajk' (12,000 mil) ta tul te sts'umbal Manasés.⁷Ay lajuneb xcha'winik ta bajk' (12,000 mil) ta tul te sts'umbal Simeón, ay lajuneb xcha'winik ta bajk' (12,000 mil) ta tul te sts'umbal Leví, ay lajuneb xcha'winik ta bajk' (12,000 mil) ta tul te sts'umbal Isacar, ⁸Ay lajuneb xcha'winik ta bajk' (12,000 mil) ta tul te sts'umbal Zabulón, ay lajuneb xcha'winik ta bajk' (12,000 mil) ta tul te sts'umbal José, sok ay lajuneb xcha'winik ta bajk' (12,000 mil) ta tul te sts'umbal Benjamín te la yich'ik te selloe.TSOBOL ANTS-WINIKETIK TE SLAPOJIK SAKIL SK'U' SPAK'IKE. ⁹Ta patil ay beluk yan la jkil, ja la jkil te ay bayal tsobol ants-winiketik te mayuk mach'a ya stak' yajteye, te talemik ta yanyantik lumetik, ts'umbaliletik, ta ch'in lumetik, te yanyantik sk'opike, te le' tek'atik ta bay stojol te muk' naktijibale sok ta stojol te Alalchije. Te slapojikix sakil sk'u'-spak'ike sok stuchojik ch'ib ta sk'abik, ¹⁰jich tulan yakalik ta k'op: ''¡Ay kolel ta swenta te Dios jku'untik te le' nakal ta smuk'ul snaktijib, sok ta swenta te Alalchije!''¹¹Spisil te ch'ul abatetik tek'atik ta sjuyubal te muk'ul naktijibale sok ta sjuyubal te chaneb xcha'winik (24) ta tul te ancianoetike sok te chaneb te beluk kuxatike jich la spajk'an sbaik ta lum ta stojol te muk'ul naktijibale. La slajin sbaik ta stojol te Diose, ¹²jich la yalik: ''¡Jichuk! ¡Te k'ayojetike, te utsilale, te bijil ot'anile, te yalel wokole, te ich'el ta muk'e, te yu'ele, sok te yipe ja ay ta swenta te Dios jku'untik ta sbajt'el k'inal! ¡Jichuk!''¹³Jich yu'un ay tul te ancianoetik te la sjojk'ibone: ''¿Mach'atik a in to, te slapojik sakil sk'u' spak'ike, sok banti talemik? ¹⁴La jkalbey te ancianoe: ''Tatik, ja'at nax ya ana' '' jich la yalbon: ''Jaik te mach'atik k'axemix yu'unik te tulan woklajele. Ja sak'ojikix te sk'u' spak'ike sok la saktesikix ta swenta te xch'ich'el te Alalchije.¹⁵Ja swenta te tek'atik ta stojol te muk'ul naktijibal yu'un te Diose, jich yu'un k'aal ta ajk'ubal yakalik ta yich'el ta muk' ta bay te templo yu'une. Te mach'a nakal ta bay te muk'ul naktijibale ya me yich'ik kananteyel yu'un. ¹⁶Ma ba ya xk'axix swokolik ta winal sok ma ba ya yaiyikix takinti'il. Sok ma ba ya yaiyikix sk'uxul te k'aale, sok ma ba ya xwoklajikix yu'un te xk'ixnale. ¹⁷Melel te Alalchije te ay ta bay yolilal te muk'ul naktijibale ya me xkanantayotik yu'un, jich ya me x-ik'otik bael ta bay te slok'ib ja' swenta yu'un te kuxlejale, sok ya me skusbotik te yalel sitik yu'un te Diose.''

8TE SJUKEBAL SELLO.¹Te k'alal la sjam te sjukebal sello te Alalchije, jich xch'abetnax k'inal abajt' ta ch'ulchan, jalaj niwan oliluk ora. ²Jich la jkil juk tul te ch'ul abatetik te tek'atik ta stojol te Diose, sok ak'botik jukeb ok'esetik ta stojolik.³Tal yan ch'ul abat, te yich'oj tel jun xchik'pom te pasbil ta oroe, tek'el ta bay skajtijib te majt'anile. Ak'bot bayal pom, swenta yu'un te ya stsaktes a te ya sk'oponik te Dios spisil te ch'uunjeletike, la yak' ta skajtijib te majt'anil te pasbil ta oro ta stojol te muk'ul naktijibal yu'un te Diose. ⁴Te xch'alel te pome, sok te k'alal la sk'oponik Dios te ch'uunjeletike, pajal mo bael ta stojol te Diose ta sk'ab te ch'ul abate. ⁵Te ch'ul abate la stsak te chik'pom te pasbil ta oroe sok la snojes ta yak'lel k'ajk' ta bay yawil te majt'anile. Jich la xch'oj tel koel k'alal ta lum, chiknaj bayal chawuk te yak nax ta bule, sok tsantsewaletik sok tulan nijk'el.TE OK'ESETIKE. ⁶Te jukeb ch'ul abatetik te yich'ojik te jukeb ok'esetike la xchajp'an sbaik yu'un ya yok'sinik. ⁷Te sbabial ch'ul abate la stij te yok'ese, jich tal bat sok k'ajk' kapal tel ta ch'ich'. Jich ch'ojotik koel tel k'alal ta lum swenta yu'un ya xk'ajk' te jun ta yox xejt'el te balumilale, sok te la yich' chik'el te jun ta yox xejt'el te te'etike sok te la yich' chik'el spisil uuk te yaxal aketike.⁸Te xchebal te ch'ul abate la yok'sin te yok'ese, jich chiknaj la jkil te jun muk'ul wits te yak ta tilel ta k'ajk', la yich' ch'ojel koel ta mar. Te jun ta yox xejt'el te mare k'atbuj ta ch'ich', ⁹te jun ta yox stsobol te beluk kuxatik ta bay te mare lajik, sok ta jun ta yox stsobol te barkoetike la yich'ik jinel uuk.¹⁰Te yoxebal te ch'ul abate la yok'sin te yok'ese, ay muk'ul ek' te ch'ay tel koel k'alal to ta ch'ulchan, yak ta tilel jich te bit'il te k'ajk'e, ch'ay koel ta bay te jun ta yox xejt'el te muk' ja'etike sok te slok'ib ja'etike. ¹¹Te sbiil te ek'e ja ch'aalwamal(Ajenjo). Te jun ta yox xejt'el te ja'etik k'atbuj ta ch'aal ja'(Ajenjo), jich bayal laj te ants-winiketik yu'un te la yuch'ik te ch'aal ja'e.¹²Te xchanebal te ch'ul abate la yok'sin te yok'ese, jich jun ta yox xejt'el te k'aale bolob, janix jich jun ta yox xejt'el te ue, sok janix jich jun ta yox xejt'el te ek'etike. Jich ta jun ta yox xejt'el te k'inale ijk'ub, sok te jun ta yox xejt'el te k'aleltike sok ta jun ta yox xejt'el te ajk'ubale ijk'ubik.¹³Jo'on la jkil, sok la jkaiy stojol te ay jun águila te yak ta wilel ta olil ch'ulchane sok tulan yak ta k'op: "Ay, ay, ay, k'ax ay swokolik te mach'atik kuxatik ta balumilale, ta skaj te k'alal ya yok'sinik te ok'esetik te oxeb xan ta tul te ch'ul abatetike."

9TE YO'EBAL OK'ESE.¹Jich yu'un, te yo'ebal ch'ul abate la yok'sin te yok'ese. La jkil jun ek' ta ch'ulchan te ch'ay tel koel ta sba te balumilale. Te ek'e la yich' ak'beyel ta sk'ab te sjamjibal (llave) te sti'il te muk'ul ijk'al k'inal te mayuk slajibale. ²Ja la sjambey sti'il te muk'ul ijk'al k'inal te mayuk slajibale sok te k'alal jame xtomet nax lok'el tel cha'el le'a jich te bit'il xch'aelul te muk'ul yawil k'ajk'e. Te k'aale sok te ik'e ijk'ubik yu'un te ch'ael te yak ta lok'el tel ta bay te muk'ul ijk'al k'inale.³Te banti ch'aele lok' tel k'ulubetik te talik ta sba te balumilale, ak'botik yu'elik jich te bit'il ti'awal tseketik te ayik ta sba te balumilale. ⁴Albotik tel mantal te ma yuts'inik te aketik te ay ta sba te balumilale sok te yantik xan beluk ya xch'i le'a sok te te'etike, janax me ya yich'ik uts'inel te mach'atik ma' yich'ojik te sello yu'un te Dios ta banti stibaike.⁵Ma ak'botik te ya smilik ta k'axel te ants-winiketike, janax te ya yak'beyik swokolik jo'eb u. Te swokolike jich bit'il te xk'uxul te sti'awal tseketik te k'alal ya sti' te ants-winiketike. ⁶Te bi ora jich ya xk'ot ta pasele, te ants-winiketike ya me sleik te yakuk xlajike, jauk me to ma ba ya staik. Ya sk'an xlajik, jauk me to ya xlok' bael ta anel te lajele.⁷Te k'ulubetike jich yilel te bit'il kaballoetik te chapalik yu'un te ya yaiyik kerajele. Te banti sjolike ay beluk le'a jich yilel te bit'il korona te pasbil ta oro sok te sit yelawike jich te bit'il sit yelaw te ants-winiketike. ⁸Jich me stsotsil sjolik te bit'il stsotsil sjolik te antsetike sok te yeike jich te bit'il ye te león-chojetike. ⁹Ay smajk'ilik jich te bit'il tulan tak'ine, te sk'op te xik'ike jich te bit'il sk'op te bayal karretaetik sok te kaballoetik te yipik nax ta aelmal te ya xbajt'ik ta kerajele.¹⁰Ay sneik jich bit'il te sne te tseketik te ya xti'wanike; ta sneik ak'bilik yu'elik yu'un ya xju' yu'unik te ya yuts'inik te ants-winiketik jo'eb u. ¹¹Te ajwalil yu'unik te k'ulubetike ja' te ch'ul abat yu'un te muk'ul ijk'al k'inal te mayuk slajibale. Te sbiil ta hebreo k'op ja' Abadón, ta griego k'op ja' sbiil Apolión. ¹²K'axix te sbabial woklajele. ¡Ilawilik! ya to me xtal xan cha'kum woklajel.TE SWAKEBAL OK'ESE. ¹³Te swakebal ch'ul abat la yok'sin te yok'ese sok la jkaiy stojol te ay mach'a k'opoj tel ta banti xchanebal xulub yu'un te banti ay te skajtijib te majt'anil te pasbil ta oro te ay ta stojol te Diose. ¹⁴Te mach'a k'opoje jich la yalbey te swakebal te ch'ul abat te yich'oj te ok'ese: "Kolteya lok'el tel te chaneb ch'ul abatetik te chukulik ta banti sti' te muk'ul ja' Eúfrates." ¹⁵Te chan tul ch'ul abatetik te ja yich'ojik chajp'anel yu'un te k'alal ya xk'ot yoraile, sok te k'alal ya sta sk'alelale, sok te yuile, sok te yawilale, te ya yich'ik koltayel tel lok'el yu'un te ya smilik jun ta yox xejt'el te ants-winiketike.¹⁶La jkaiy stojol te yajtalul te soldadoetik te kajatik tel ta kaballoe, ja lajunwinik millón (200,000,000) ta tul te soldadoetike. ¹⁷Jich la yak'bonik jkil ta stelemal yilel te kaballoetike sok te mach'atik skajtibinojike: Te smajk'ilike jich tsajik te bit'il k'ajk'e, yax nax (azul oscuro) sok k'anax jich te bit'il te azufree. Sok te sjol te kaballoetik pajal sok yilel te sjol te león-chojetike, yak ta lok'el tel k'ajk' ta yeik, sok ch'ael sok azufre.¹⁸Jun ta yox xejt'el te ants-winiketik te lajik yu'un te ox xchajp' woklajele: Te k'ajk'e, te ch'aele sok te azufre te yak ta lok'el tel ta yeike. ¹⁹Melel te yip te kaballoetike le' ay ta banti yeike sok ta banti sneike, melel te sneike jich te bit'il ti'awal chanetike, te sjolike ya xju' yu'un te ya yak'beyik yejch'enik te ants-winiketike.²⁰Te jayeb xan ta tul te jilik te ants-winiketike, te mach'atik ma lajik yu'un te wokoliletike, ma la sut yot'anik yu'un te smulike, sok ma la yijk'tayik ta yich'el ta muk' te pukujetike sok te lok'ombaetik te pasbilik ta oro, ta plata, ta bronce, ta ton sok ta te', te ma ya yilik k'inale, te ma yaiyik stojol k'ope sok te ma xbeenike. ²¹Ma la sut yot'anik yu'un te la yaiyik milawe, te la yaiyik ts'ilwaneje, te la yaiyik mulweje sok te la yaiyik elek'e.

10TE CH'UL ABAT TE YICH'OJ TE CH'IN BALBIL JUN.¹Sok la jkil yan ch'ul abat te bayal yip te yak tel koel ta ch'ulchane. Potsol tel ta tocal sok ay jun sejk'arakub ta sjol. Te yelawe jich yilel te bit'il te k'aale sok te yakane jich yilel te bit'il muk'ul uy te tsajnax jich te bit'il k'ajk'e. ²Stsakoj ta sk'ab jun ch'in balbil jun te jambilixe, jich la stek' ta swa'el yakan te mare sok te sk'exen yakane ja la stek' te lum k'inale.³Jich yu'un tulan awun jich bit'il te jun muk'ul león-choj te yak ta awe, te k'alal awune, k'opojik te sjukebal te chawuketike. ⁴Te k'alal k'opojik te sjukebal te chawuketike, k'an jts'ibuyix a, jauk me to ay mach'a k'opoj tel ta ch'ulchan te jich la yale: "Muka ta awot'an te beluk la yal te jukeb chawuketike. Ma' xa ts'ibuy."⁵Jich yu'un te ch'ul abat te tek'el la jkil ta mare sok ta lum k'inale, la sjach moel te swa'el sk'ab ta ch'ulchane, ⁶sok jamal la yal ta stojol te mach'a kuxul ta sbajt'el k'inale, te ja la spas te ch'ulchane sok spisil te beluk ay le'a, te balumilale sok spisil te beluk ay le'a, te mare sok spisil te beluk ay le'a: Ma ba jalix k'aal. ⁷Melel te k'alal ya xk'ot sk'alel te ya yok'sin te yok'es te sjukebal ch'ul abate, jich me ya xk'ot ta pasel te beluk muken ay yu'un te Diose, jich te bit'il la yalbey ta stojol te abatetik te ja' te alwanejetik yu'une."⁸Te mach'a la sk'opnon tel ta ch'ulchane, la sk'opnon ta yan buelta: "Baan, tsaka te balbil jun te jambilixe te ay ta sk'ab te ch'ul abat te tek'el ta sti' te mare sok ta lum k'inale. ⁹Jich boon ta stojol te ch'ul abate, la jkalbey te yakuk yak'bon te ch'in balbil june. Jich la yalbon: "Ich'a te balbil june, we'a koel. Ya me xch'aub ta ach'ujt', yan te k'alal ya awe'e ya me xchiub jich te bit'il chabe."¹⁰Jich la jtsak te ch'in balbil jun ta sk'ab te ch'ul abate, jich la jwe'. Te jkee k'ax chi' la yaiy jich te bit'il chabe, jauk me to te k'alal la jbik' koele, te jch'ujt'e ch'anax abajt'. ¹¹Jich yu'un ay mach'a la yalbon: "Ya me sk'an xan te ya awal ta yan buelta te beluk ya sk'an yal te Dios ta stojol te ants-winiketike, ta stojol te yanyantik lumetike, ta stojol te mach'atik yanyantik sk'opike, sok ta stojol te muk' ajwaliletike."

11TE CHEB TESTIGOETIKE¹La yak'bonik ch'ix jalal swenta yu'un sbisjibal. Sok jich la yalbon. "Jajch'an sok bisa te snaj te Diose, sok te skajtijib te majt'anile, sok ajteya te mach'atik ya yich'ik ta muk' le'a. ²Jauk me to ma me xa bis te yamak'ul te templo te ay ta slok'ib baele, melel ja' ak'botix ta swenta te yantik lumetike. Ya me xpech'ulanik ta tek'el te ch'ul lum ta che' yoxwinik (42) u.³Ya me jkak'bey tulan yat'elik te cheb testigoetik jku'un, te yakuk yalik te beluk ya xk'ot ta pasel ta oxbajk' sok oxwinik (1,260) k'aal, te slapojik ch'ixal pak' swenta yu'un mel-ot'an. ⁴Te cheb testigoetike, ja' me te cheb olivoetike sok te cha' ch'ix xtuchtijib k'ajk' te tek'atik ta stojol te Kajwaltik te ja' Dios yu'un te balumilale. ⁵Teme ay mach'a ya yuts'inik te cheb testigoetike, ya me xlok' k'ajk' ta yeik, jich me ora nax ya xlaj te ya jkontroe. Teme ay mach'a ya sk'an yuts'ine, puersa me ya xlaj.⁶Te cheb testigoetike tulan yat'elik yich'ojik, ya xju' yu'unik smakel te ch'ulchane, swenta yu'un ma me yak' xtal ja'al te jayeb ka'al ya xk'opojik te alwanejetike. Ay me yu'elik yu'un te ya sk'atbunik te ja' ta ch'ich' sok te ya yak'bey xk'ax bayal swokol te balumilale, chikan jayeb buelta ya sk'an yot'anik te ya yak'bey xk'ax swokolike. ⁷Jauk me to, te k'alal lajix yot'anik spasel a te yat'elik ta testigo k'ope, te muk'ul chambalam te xi'bantik sbae ya me xlok' tel ta bay te muk'ul ijk'al k'inal te mayuk slajibale, ya me spasik kerajel sok. Ya me stsalotik sok k'axel ya xmilotik yu'un.⁸Te sbak'etalike tixil me ya xjilik ta skayeul ta bay muk'ul pam lum (te muk'ul lum Sodoma sbiile sok Egipto sbiil ta alel sk'oplal) te banti la yich' jijp'anel ta cruz te Kajwaltike. ⁹Oxeb k'aal sok olil ta spisil te yanyantik lumetik, te yanyantik ts'umbaliletik, te yanyantik sk'opik, sok te yanyantik muk'ul lumetik, ya me yilbeyik te tixatik te sbak'etal te testigoetike. Ma me yak'ik te ya yotsesik ta mukenal ch'en.¹⁰Te mach'atik nainemik ta balumilal ya me sbujts'naj yot'anik yu'un te lajemik ya yilike sok ya spasik k'in yu'un. Janix jich ya me yak'bey sbaik smajt'anik yu'un; melel bayal k'ax swokolik spisilik te mach'atik kuxinemik ta balumilale, ta swenta te cheb alwanejetik yu'un te Diose. ¹¹Jauk me to te k'alal k'axix a te oxeb k'aal sok olile. Te Diose la xcha' kuses tel te testigoetike sok ya me stejk'an sbaik jajch'el. Jich te mach'atik la yilike ya me xtal tulan xiwel ta stojolik. ¹²Jich yu'un, te cheb testigoetike la yaiyik stojol te ay mach'a k'opoj tel tulan ta ch'ulchan te jich albotike: "Moanik tel le' to! " Jich yu'un moik bael ta ch'ulchan potsotik moel ta tokal, jich te yaj skontroike la yilik ta spisilik.¹³Ora nax tal tulan nijk'el, sok jich jin te xejt' ta slajun xejt'el te muk'ul lume. Juk mil (siete mil) te ants-winiketik te lajik yu'un te nijk'ele sok spisilik te mach'atik kuxulik jilele och xiwel ta yot'anik sok jich kaj yalbeyik yutsilal te Dios te ay ta ch'ulchane. ¹⁴K'axix te xchebal muk'ul woklajele. ¡Ilawilik! ja ya xtalix ta ora nax te yoxebal muk'ul woklajele.TE SJUKEBAL OK'ESE ¹⁵Jich yu'un te sjukebal ch'ul abat la yok'sin te yok'ese, ay mach'atik tulan k'opojik tel k'alal to ta ch'ulchan sok jich la yalik: "Te Kajwaltik sok te Cristoe ja muk' ajwalilix yu'un spisil te ajwaliletik yu'un te balumilale. Ja me ya x-ajwalinaj ta sbajt'el k'inal."¹⁶Jich yu'un, te chaneb xcha'winik (24) ta tul te ancianoetik te mach'atik nakalik ta smuk'ul snaktijibik ta stojol te Diose, la spajk'an sbaik koel ta lum, la stinan sbaik koel, sok la yich'ik ta muk' te Diose. ¹⁷Jich la yalik: "Ya jkaltik bayal wokol ta atojol Kajwal Dios te spisil ya xju' awu'une, ja talel ayat ta namey sok ta ora to, melel la awak'ix ta ilel te smuk'ul awu'ele sok jajch'atix ta ajwalinel atukel.¹⁸Te muk'ul lumetik bayal ilinik yu'un, jauk me to k'otix yorail te awilimbae. K'otix sk'alel yu'un te mach'atik lajemikixe te ya yich'ik likbeyel te beluk la spasike sok te ya awak'bey smajt'anik spisilik te alwanejetik awu'une, te mach'atik ch'uunjeletike sok te mach'atik la xi'ik te ach'ul biile; chikan teme mayuk sk'oplalike o teme muk' sk'oplalike. K'otix yorail, te ya awak' ta lajel te mach'atik ya sboltes te balumilale."¹⁹Jich yu'un, jam te templo yu'un te Dios te ay ta ch'ulchane sok la jkil te xkaxail te tratoe (pacto) te ay ta yutil te temploe. Sok chiknaj tsantsewaletik, sok ay beluk yak ta bul ta k'op, sok tulan chawuk, sok tulan nijk'el sok tal tulan bat.

12TE ANTSE SOK TE MUK'UL CHAN TE XI'BANTIK SBAE.¹Chiknaj jun muk'ul senyail ta ch'ulchan: Tul ants sk'uinoj te k'aale sok ay ta yanil yakan te ue; sok jun skorona te ja yich'oj lajcheyeb ek'etik ta sba te sjole. ²Ay yik'en sok yak ta aw, yu'un nopol ya xbejk'ajix te yale.³Jich yu'un chiknaj yan senyail ta ch'ulchan: ¡Ilawilik! ay jun muk'ul tsajal chan(Dragón rojo) te k'ax xi'bantik sbae te ay jukeb sjole sok lajuneb xulub janix jich jukeb skorona ta ju jun sjol. ⁴Ta sne la smes koel tel jun ta yox xejt'el te ek'etik te ay ta banti ch'ulchane, jich la xch'oj koel tel ta balumilal. Te muk'ul chane(Dragón) la stejk'an sba ta stojol te ants te le' nopol ya xkolix ta aljel a, swenta yu'un te k'alal ya xbejk'aj te alale ya stak' sbik' baela.⁵Bejk'aj skerem-al te antse, te ja ya spas mantal spisil te balumilale sok te ch'ix sbaston te pasbil ta tulan tak'ine (hierro). Te skereme ik'bot moel ta stojol Dios sok ta stojol te muk'ul snaktijibe. ⁶Te antse lok' bael ta anel ta takin jochol k'inal, te banti chajp'anbil yawil yu'un te Diose, swenta yu'un jich ya stak' yich' kananteyel oxbajk' sok oxwinik (1,260) k'aal.⁷Jich jajch' tsaktomba ta ch'ulchan. Te Miguele sok te ch'ul abatetik yu'une, la stsak sbaik sok te muk'ul chane (Dragón); te muk'ul chane (Dragón) sok te abatetik yu'une la sutik uuk. ⁸Jauk me to te muk'ul chane (Dragón) mayuk bayal yip yu'un te ya xju' yu'un tsalawe. Jich yu'un mayukix yawil ta ch'ulchan sok te abatetik yu'une. ⁹Te muk'ul chane (Dragón) ja te namey k'inal chan te pukuj sbiile sok satanás te ja ya sloliy te balumilale la yich' ch'ojel koel tel ta balumilal sok te abatetik yu'une.¹⁰Jich la jkaiy stojol te ay mach'a tulan k'opoj ta ch'ulchan: "Talix te koltayele, te yu'ele, sok te ajwalil yu'un te Diose sok janix jich te la yich'ix yat'el te Cristoe. Melel ch'ojbilix koel tel te mach'a la slebey smul te kermanotaktike, te mach'a ya slebey smulik k'aal ta ajk'ubal ta stojol te Diose.¹¹Te kermanotaktike la yaiyik tsalaw ta swenta te xch'ich'el te Alalchije sok ta swenta te sk'op Dios te la yak' sbaik ta testigo yu'une, melel la xch'oj sbaik ta yot'anik, jun yot'anik la yak' sbaik ta lajel yu'un. ¹²Jich yu'un, binuk nax me awot'anik, ja'ex ta ayex ta ch'ulchane. Jauk me to te mach'atik ayik ta balumilale sok te mach'atik ayik ta mare k'ax ay me awokolik melel te pukuje koix tel ta atojolik. K'ax ilinem tel koel, melel ya sna' te mayukix bayal k'aal ay yu'une.¹³K'alal la sna' stojol te muk'ul chan (Dragón) te la yich' tel ch'ojel koel ta balumilale, la snuts te ants te bejk'ajemix te tul skerem-ale. ¹⁴Jauk me to te antse la yich' ak'beyel cheb muk'ul xik' jich te bit'il águilae, swenta yu'un jich me ya stak' xwil bael a te banti chajbanbil yawil ta takin jochol k'inal. Ja te banti ya yich' kanantayel oxeb ja'wil sok olil, jich ma stak' yich' tael yu'un a te muk'ul chane.¹⁵Te muk'ul chan te xi'bantik sbae la smal lok'el ja' ta banti ye jich te bit'il muk'ul ja'e, swenta yu'un ya sk'an xnoj ta ja' te banti ay te antse, jich ya xkuchot bael a. ¹⁶Jauk me to te lum-k'inale la skoltay te antse. La sjam sba te lum k'inale jich la yuch' bael te ja' te la slok'es ta ye te muk'ul chan te xi'bantik sbae (Dragón). ¹⁷Jich yu'un te muk'ul chane (Dragón) ilin bayal ta stojol te antse, jich bajt' ta kerajel sok te yantik sts'umbal te antse, ja te mach'atik xch'uunojbeyik smantal te Diose, sok te jun yot'anik yich'ojik ta muk' te testigo-k'op yaloj te Jesuse. ¹⁸Jich yu'un te muk'ul chan te xi'bantik sbae (Dragón) la stejk'an sba ta sti' te mare.

13CHEB MUK'UL XI'BANTIK SBA CHAMBALAM¹Jich la jkil lok' tel ta mar te muk'ul xi'bantik sba chambalam (Bestia). Ay lajunch'ix xulub sok jukeb sjol, ta ju ju ch'ix te xulube ay lajuneb skorona sok ta ju jun sjol ay ju jun sbiil te ya sbol k'optey te Diose. ²Te muk'ul chambalam (Bestia) te xi'bantik sba te la jkile, jich bit'il te leopardo-choje. Te yakane jich yilel te bit'il yakan te osoe, te yee jich yilel te bit'il ye te león-choje. Te muk'ul chan te xi'bantik sbae (Dragón) la yak'bey jilel te yu'ele sok la yak'bey te smuk'ul snaktibe, sok la yak'bey tulan yat'el swenta yu'un ya x-ajwalinaj.³Te muk'ul chambalam te xi'bantik sbae (Bestia) ay jun sjol te ay yejch'en te ya xlaj yu'un yilele. Jauk me to te yejch'en te lajelix yu'une la yich' poxtayel, jich spisil te ants-winiketike chajp'nax la yilik a sok la st'unik te muk'ul chambalam te xi'bantik sbae (Bestia). ⁴La yich'ik ta muk' uuk ta spisilik te muk'ul chan te xi'bantik sbae (Dragón), melel ja la yak'bey yich' yat'el te chambalam te xi'bantik sbae (Bestia). Janix jich la yich'ik ta muk' te chambalam te xi'bantik sbae, jich la yalik: "¿Ay ba mach'a pajal sok te chambalam te xi'bantik sbae?" sok "¿Mach'a ya xju' yu'un stsal sba sok?."⁵Te muk'ul chambalam te xi'bantik sbae (bestia) la yich' ak'beyel ye jich ya stak' yal tuybajel-k'op sok bol k'opetik. La yich' ak'beyel yat'el cheb yoxwinik (42) u. ⁶Ja yu'un, la sjam te yee jich jajch' ta sbol k'optayel te Diose, la sbol k'optey te sbiil te Diose, sok te sna te Diose sok te mach'atik nainemik ta ch'ulchane.⁷Te chambalam te xi'bantik sbae (bestia) la yich' ak'beyel permiso te ya yaiy kerajel ta stojol te ch'uunjeletike ja to teme la stsale. Janix jich ak'bot yat'el ta stojol te chajp'al chajp' te ts'umbaliletike, te ants-winiketike, te yanyantik k'opetike sok te yanyantik muk'ul lumetike. ⁸Spisil te mach'atik nainemik ta balumilale ya yich'ik ta muk', jaik te mach'atik ma ba najk'anbilik sbiilik ta xjajch'ibal te balumilal ta bay te sjunal te kuxinele, te ja' yu'un te Alalchij te la yich' milele.⁹Teme ay achikinike, aiya me awaiyik stojol. ¹⁰Teme ay mach'a la yich' ik'el bael ta chukele, ja me ya yich' chukel jilel. Teme ay mach'a ya yich milel ta espadae, ta espada nix ya yich' milel. Le' me ya jkalbeyex te ayuk smalib awu'unik sok te manchuk ya awijk'teyik te xch'uunjel awot'anik ja'ex te ch'ultesbilexe.¹¹Jich la jkil yan muk'ul chambalam te xi'bantik sbae (bestia), te yak ta lok'el tel ta lum k'inal. Ay cheb xulub jich te bit'il te Alalchije sok jich sk'op te bit'il jun muk'ul chan te xi'bantik sbae (dragón). ¹²Te muk'ul chambalam te xi'bantik sbae (bestia) ja ak'bil yu'el yu'un te sbabial chambalam te xi'bantik sbae (bestia) sok jich la yak'bey yich'ik ta muk' te mach'atik nainemik ta balumilal ta stojol te sbabial muk'ul chambalam te xi'bantik sba te kolemix te yejch'ene.¹³Te muk'ul chambalam te xi'bantik sbae (bestia) la yak' ta ilel bayal yu'el sok bayal ta chajp' senyailetik, ya xch'oj tel koel k'ajk' ta balumilal k'alal to ta ch'ulchan ta sit te ants-winiketike. ¹⁴Ta swenta te ak'bil permiso te ya stak' spas spisil ta chajp' senyailetik, la slo'libey yot'an te mach'atik kuxatik ta balumilal, la yalbey te yakuk spasbeyik slok'ombail te muk'ul chambalamte xi'bantik sbae (bestia) te ejch'entesbil ta espada, jauk me to kuxul to.¹⁵Ja la yich' ak'beyel permiso yu'un te ya yak'bey xkuxinel te slok'omba te muk'ul chambalam te xi'bantik sbae (bestia), swenta yu'un ya stak' xk'opoj a te lok'ombae, jich me ya stak' yich'ik milel a te mach'atik ma sk'an ya yich'ik ta muk' te muk'ul chambalam te xi'bantik sbae (bestia) . ¹⁶Janix jich jamal albotik ta spisilik, te mach'atik mayuk sk'oplalik, te mach'atik ay tulan yat'elik, te k'ulejetik, te me'baetik, te mach'atik libre ayik, te mach'atik esclavoinbilik, te ya yich'ik te marca ta swa'el sk'abik o ta stibaik. ¹⁷Mayuk mach'a ya stak' yaiyik manbajel o ya yaiyik chonbajel, janax te mach'a yich'ojik te marca yu'un te muk'ul chambalam te xi'bantik sbae (bestia), ja bi ja' te ajtalil, te ja ya yak' ilel te sbiile.¹⁸Ja me ya sk'an te ayuk sbijil ajole. Teme ay mach'a ay beluk ya yil ta stelemal yilele, akame yajtey te yajtalul te muk'ul chambalame. Melel ja yajtalul te ants-winike. Te yajtalule ja te olil xcha'bajk' sok wakeb xchanwinik (666).

14K'AYOJETIK YU'UN TE WAXUKLAJUNWINIK TA BAJK' (144 MIL)¹La jkil te Alalchij te tek'el ta bay wits Sión. Joinbil yu'un te waxuklajunwinik ta bajk' ta tul(144 mil) te mach'atik yich'ojbey sbiil te Alalchije sok te sbiil te State sok te ts'ibubil ta stibaike. ²La jkaiy stojol jun k'op ta ch'ulchan te jich sk'op te bit'il snojel ja'etik sok tulan chawuk. Te sk'op jich la jkaiy te bit'il ay tsobol te mach'atik yakalik ta stijel te yarpaike.³Yakalik ta sk'ajintayel yach'il k'ayojetik ta stojol te muk'ul naktijibale sok ta stojol te chan kojt' te beluk kuxatike sok ta stojol te ancianoetike. Mayuk mach'a ya xju' yu'un snopel te k'ayojetike janax te waxuklajunwinik ta bajk' ta tul(144 mil) ja te mach'atik tsabilik lok'el ta yolil te ants-winiketike. ⁴Ja'ik te mach'atik ma la sboltes sbaik sok antsetik, melel xk'uxteyoj sbaik te ma ba ya xyalik ta mulil. Ja'ik me te mach'atik ya sts'aklinik te Alalchije chikan te banti ya xbajt'e. Ja la yich'ik tsael lok'el ta stojol te ants-winiketike, jich bit'il te sba sit ya x-och ta stojol te Dios sok te Alalchije. ⁵Xujt' mayuk la yalik lotil k'op, melel xujt' mayuk smulik ta stojol ta bay smuk'ul snaktijib te Diose.TE BELUK LA YALIK TE OXTUL CH'UL ABATETIKE ⁶La jkil yan ch'ul abat te yak ta wilel ta bay te sjamalul te ch'ulchane, ja te mach'a yich'oj te lek yach'il k'op swenta sbajt'el k'inal yu'un ya xcholbey yaiy te mach'atik nainemik ta balumilal ta bay ju jun muk'ul lumetik, chajbalchajb ts'umbaliletik, yantik k'opetik sok ants-winiketik. ⁷Tulan k'opoj: "Xiaik me te Diose sok albeyaik me te yutsil sk'oplale. Melel la staix yorail te ya x-ich'wan ta k'op. Ich'aik me ta muk' stukel, te mach'a la spas te ch'ulchane, te balumilale, te mare, sok te slok'ib ja'etike."⁸Ay yan ch'ul abat, ja te xchebalan ch'ul abate, jajch' yal: Ch'ayix koel, ch'ayix koel te muk'ul Babilonia, ja te mach'a la yak'bey yuch' te vino spisil te muk'ul lumetik yu'un spasel te beluk ilaybil sbae.⁹Ay yan ch'ul abat ja te yoxebalan ch'ul abate, tulan la yal uuk: "Teme ay mach'a ya yich' ta muk' te muk'ul chambalam te xi'bantik sbae(bestia) sok te slok'ombae sok teme la yich' te marca ta bay te stibae o ta bay te sk'abe, ¹⁰janix jich ya me yuch'ik te vino ta swenta te yilimba te Diose, te vino yu'un Dios te xujt' mayuk beluk skapoj sba soke. Te ants-winiketik te mach'a ya yuch'ik jai vino to, k'axel ya xk'ax swokolik ta k'ajk'el sok azufre ta stojol sit yelaw te ch'ul abatetik yu'une sok ta stojol te Alalchije.¹¹Te ch'ael yu'un te swokolike ya xmo ta sbajt'el k'inal sok ta sbajt'el k'inal sok ma ba ya yich'ik lewa k'aal ta ajk'ubal, te mach'atik yich'ojik ta muk' te muk'ul chambalam te xi'bantik sbae(bestia) sok te slok'ombae, sok spisil te mach'atik ya yich'ik te marca yu'un te sbiile. ¹²Jich yu'un ay jun ik'el ta stojolik te ayuk smalib yu'unik spisil te mach'atik ch'ultesbilike, ja te mach'atik ya xch'uunbeyik smantal te Diose sok te xch'uunjel yot'anik ta stojol te Jesuse."¹³La jkaiy stojol jun k'op ta ch'ulchan te jich la yale: "Ts'ibuya in to: Binax me yutsil te mach'atik lajemik ta stojol te Kajwaltike." "Jichuk" xi' te Espíritue, "Ja swentail te ya yich'ik lewa yu'un te yat'elike, melel ya xt'unotik bael yu'un te yat'elike."LA STAIX YORAIL TE K'AJOJE ¹⁴La jkil te ay jun sakil tokal le'a. Ay mach'a nakal ta sba te tokale te pajal sok yilel te Snich'an te winike. Ay yich'oj jun skorona ta sjol te pasbil ta oro sok jun tak'in te juxbil yee te ya sbojik trigo a (Hoz)te stsakoj ta sk'abe. ¹⁵Jich yu'un ay yan ch'ul abat te lok' tel ta bay te temploe sok tulan la yawtey te mach'a nakal ta bay te tokale: "Tsaka te sbojibal te trigoe (Hoz) sok jajch'an ta k'ajoj. Melel la staix yorail te k'ajoje, melel yijix te sit awal-ts'unubil ta balumilale." ¹⁶Jich yu'un te mach'a nakal ta bay te tokale kaj ta k'ajoj sok te sbojibal te trigoe (Hoz) ta bay te balumilale, sok jich la yich' k'ajel te sit te balumilale.¹⁷Ay yan ch'ul abat lok' tel ta templo ta bay ch'ulchan; janix jich yich'oj jun sbojibal trigo te juxbil yee (Hoz). ¹⁸Jich yu'un ay yan ch'ul abat te lok' tel ta bay yawil majt'anil te bay ya xchik'ik te pome, ja' te mach'a yich'oj tulan yat'el ta swentainel te k'ajk'e. Tulan la yawtey te mach'a yich'oj ta sk'ab te sbojibaltrigo te juxbil yee (Hoz):"Tsaka te sbojibal te trigo te juxbil yee (Hoz) sok tsoba ta tsojbol-tsojb te ts'usub te ay ta bay te balumilale, melel yijix te ts'usubetike."¹⁹Te ch'ul abate kaj ta k'ajoj sok te sbojibal te trigo(Hoz) ta bay te balumilale sok la stsob te sit te ts'usub te la yich' k'okel ta bay balumilal sok la xch'oj ochel ta bay muk'ul yawil te vino yu'un te yilimba te Diose. ²⁰Te yawil te bay la yich' pits'el te ts'usube la yich' lok'esel bael ta bay sti'il te lume te k'alal la yich' pits'el te ts'usube, lok' tel ch'ich' le'a, te ch'ich'e pamaj jich te bit'il snajt'il kojt' kaballo sok te spamlejale ja jo'lajunwinik (300) kilómetros.

15TE JUKEB CH'UL ABATETIK¹Sok la jkil yan senyail ta ch'ulchan, te yanxanix a sok bayal yutsilal: Ay juk tul ch'ul abatetik te yich'ojik te juk chajp' wokolil, te jaix te slajibal woklajele yu'un jich ya xk'ot ta pasel te yilamba te Diose.²La jkil te jich yilel te bit'il muk'ul mar te xlememetnax jich te bit'il espejo te kapb'il sok te k'ajk'e. Ta sti' te muk'ul mare le' tek'atik a te mach'atik ju' yu'unik stsalel te muk'ul chambalam te xi'bantik sbae(bestia)sok te ma' la yich'ik ta muk' te slok'ombae sok te sbiile ja jun yajtalul. Stsakojik yarpaik te ja ak'bilik yu'un te Diose.³Sok yakalik ta sk'ajintayel te sk'ayoj te Moisese, te ja yabat te Diose, sok te sk'ayoj te Alalchije: "Mero muk' sok bayal yutsilal te awat'ele, Kajwaltik Dios te spisil ya xju' awu'une, te ja ajwalilat yu'un spisil te beluk aye. Te ja toj sok te ja smelelil te ja bee, muk'ul ajwalil yu'un te muk'ul lumetike. ⁴¿Kajwal, ay ba mach'a te ma xiate sok te ma yich'bat ta muk' te abiile? melel ja'at nax tojat atukel. Spisil te muk'ul lumetike ya xtalik ta atojol ya yich'atik ta muk' yu'un spisil te beluk toj la apase melel la yich'ix ak'el na'el stojol.''⁵Ta patilal la jkil te jam te awilal te k'axem to xan ch'ultesbile, te le ay a te nail pak' yu'un te testigoetik ta ch'ulchane. ⁶Lok'ik tel ta banti ch'ul awilal te juk tul ch'ul abatetik, yich'ojik tel te juk chajp' woklajele. Slapojik lino pak' te xujt' ma ba ch'aluben sok xlememet nax ta ilel sok ay xchujk'il te k'an xojanax (dorado) ta sjuyubal te stanike.⁷Ay kojt' ta xchan kojt'ol te beluk kuxatik la yak'bey te juk tul ch'ul abatetike te juk wax awil te pasbil ta oro te nojatik ta yilimba te Diose, te stalel kuxul ta sbajt'el k'inale. ⁸Te awilal te k'axem to xan ch'ultesbile noj ta ch'ael yu'un yutsilal te Diose sok te yu'ele. Mayuk mach'a ya stak' x-och bael le'a ja to te k'alal k'ax bael te juk chajp' te wokolil te yich'ojik tel te juk tul ch'ul abatetike.

16TE JUKEB KOPAETIK¹La jkaiy stojol te ay mach'a tulan k'opoj ta banti yawil te beluk k'ax ch'ultesbile sok la yalbey te juk tul ch'ul abatetike: "Baanik sok malaik te jukeb kopaetik yu'un te yilimba te Diose."²Te sbabial ch'ul abat bajt' sok la smal koel tel ta balumilal te kopa yu'un te yilimba te Diose; bayal stuil sok chajp'ix xk'uxul a te k'ael chamel te tal ta stojolik te ants-winiketike ja' te mach'atik yich'ojbeyik smarka te xi'bantik sba te chambalame(bestia), sok te mach'a la yich'ik ta muk' te slok'ombae.³Te xchebal ch'ul abat la smal koel te kopa yu'un te yilimba te Dios ta bay te mar. Jich k'atbuj te bit'il xch'ich'el te tul ants-winik te lajemixe, sok spisil te beluk kuxul ta mar lajik.⁴Te yoxebal ch'ul abat la smal koel te kopa yu'un te yilimba te Dios ta ja'etik sok te bay slok'ib ja'etik; jich k'atbuj ta ch'ich'. ⁵La jkaiy stojol te ch'ul abat yu'un te ja'etike te jich la yale: "Ja'at te tojat atukele sok te atalel ayat ta nameye, te ch'ultesbilat melel ja la awaiyix chajp'anwaneje. ⁶Melel ja la smalbeyik xch'ich'elik te ch'uunjeletik sok te alwanejetike, ja yu'un te la awak'bey yuch'ik ch'ich'; yu'unix jich ya sk'an yich'ik pasbel a. ⁷La kaiy stojol ta bay xchik'jibal milbil majt'anil yu'un te Kajwaltike: "Jich, Kajwal Dios te spisil ya xju' awu'une, te ya awaiy ajwalinel ta spisil te beluk aye, te bit'il ya awaiy chajp'anwaneje smelelil sok toj stukel."⁸Te xchanebal ch'ul abate la smal koel tel te kopa yu'un te yilimba te Dios ta banti k'aal, sok la yalbey mantal te ya xchik' spisil te ants-winiketike sok te sk'aale. ⁹Jich la yich'ik chik'el yu'un te k'ax tulan te k'aale, jich la sbolk'opteyik sbiil te Diose, te ay yu'el ta yak'el spisil te woklajele. Jauk me to ma la sut yot'anik sok ma la yalbeyik yutsilal.¹⁰Te sjo'ebal ch'ul abat la smal koel tel te kopa yu'un te yilimba te Dios ta bay smuk'ul snaktijib te muk'ul chambalam te xi'bantik sbae(bestia), ijk'ub te ba ay ta ajwalinele. La sti' te yak'ike yu'un te xk'uxul te swokolike. ¹¹La sbol k'opteyik te Dios yu'un te xk'uxul te k'ael chamele sok ma la sk'an sut yot'anik yu'un te beluk la spasike.¹²Te swakebal ch'ul abate la smal koel tel te kopa yu'un te yilimba te Dios ta bay muk'ul ja' Éufrates. Te ja'e takej swenta yu'un ya yich' chajp'anel a te sbe te muk' ajwaliletik te ya xtalik ta slok'ib k'aale. ¹³La jkil oxeb espírituetik te ilaybil sbae, jichik yilel te bit'il te pork'ok'etik te yakik lok'el tel ta bay ye te muk'ul chan te te xi'bantik sbae (dragon) sok ta ye te muk'ul chambalam te xi'bantik sbae(Bestia) sok ta ye te lotil alwaneje. ¹⁴Melel ja espírituetik yu'un te pukujetik te ya spasik senyailetik te chajpnax ta ilele. Yakalik ta bael ta banti ay te muk'ul ajwaliletik yu'un te balumilale jich me junax ya stsob tel ta spisil te k'alal ya sta sk'alelal te kerajel yu'un te Dios te spisil ya xju' yu'une.¹⁵("¡Ilawilik! ¡Jich me ya xtalon te bit'il elek'e! Binax me yutsil te mach'a wik'il sit, sok te slapoj sk'u' yu'un me ma t'analuk ya yich' ilel a, jich me ma ya yich'ik k'exlantesel a.") ¹⁶Junax me ya stsob sbaik ta bay jun lum te Armagedón sbiil ta hebreo k'ope.¹⁷Jich te sjukebal ch'ul abat la smal koel tel te kopa yu'un te yilimba te Dios ta bay ik'. Jich yu'un ay mach'a tulan k'opoj tel ta yutil te temploe sok ta muk'ul naktijibal, te jich la yale: "¡k'otix ta pasel!" ¹⁸Jajch' lemlajanel te tsantsewaletike, jajch' ta bul te sk'op te chawuke sok tal tulan nijk'el, te nijk'ele k'ax tulan yip te mayuk jich k'axem ta stojol te ants-winiketike te jayeb k'aal kuxulik ta balumilale. K'axem to yip te nijk'ele. ¹⁹Te muk'ul lume la yich' xatel ta oxchajp', sok te lumetik yu'un te muk'ul lumetike jinik koel. Ta patil te Diose tal ta yot'an te Babilonia te mero muk'e, sok te ja la yak'bey yuch' te kopa te nojel ta vino te pasbil ta tulan yilimbae.²⁰Spisil te ch'in lum te juybil ta mare tubik bael sok te witstikale ma chikanuk te bay bajt'e. ²¹Muk'ik nax te bate, jich yalal te bit'il jun ch'en te chaneb xcha'winik (34) kilos te yalale, ko tel ta stojolik te ants-winiketike. Jich la sbolk'opteyik te Dios yu'un te swokolik yu'un te bate, melel te woklajele mero k'ax xibantik sba.

17TE WOKLAJEL YA YICH' TE MULAWIL ANTSE¹Tal sk'opnon tul ta sjuktulul te ch'ul abatetik te stsakoj te jukeb kopa yu'un te yilimba te Diose sok jich la yalbon: "La' le to, ya jkak'bat awil te woklajel te ya yich' te mulawil ants te nakal ta bay te nojel muk'ul ja'etike, ²te muk'ul ajwaliletik te ayik ta balumilale la spasik te mulwej te ilaybil sba sok te mulawil antse. Spisil te ants-winiketik te ayik ta balumilale yakubik yu'un te svino yu'un te mulweje.³Jich yu'un ta swenta yu'el te Ch'ul Espíritu la yik'on bael te ch'ul abat ta jochol takin k'inal, la jkil tul ants te kajal ta spat kojt' tsajal muk'ul chambalam te xi'bantik sbae(bestia) te ts'ibubil biililetik swenta sbol-k'optayel ta stojol te Diose. Te muk'ul chambalam te xi'bantik sbae(bestia) ay jukeb sjol sok lajuneb xulub. ⁴Te sk'u' slapoj te antse tsaj sok tsaj-amantik sok ch'albil ta oroetik, t'ujbil lekil tonetik sok perlaetik. Te antse stsakoj ta sk'ab te kopa te pasbil ta oro te nojel le'a te beluk ileybil sba yu'un te Diose sok sbolil te mulweje. ⁵Ta stiba ts'ibubil jun biilil te muk'en ay sk'oplale: "MUK'UL LUM BABILONIA, SME' SPISIL TE MULAWIL ANTSETIKE SOK TE BELUK ILEYBIL SBA TA BALUMILALE."⁶La jkil te antse yakuben yu'un te xch'ich'el te mach'atik ch'uunjeletik yu'un te Diose sok te xch'ich'el te mach'atik la yich'ik milel yu'un te la xch'uunik te Jesuse. Te k'alal la jkil te antse, chajp'nax la jkil yu'un a. ⁷Jich yu'un te ch'ul abate la yalbon: "¿Bin yu'un te chajp'nax la awile? Jo'on ya jcholbat awaiy te muken sk'oplal te antse sok te muk'ul chambalam te xi'bantik sbae(bestia) te kuchbil yu'une, te chambalam te xi'bantik sbae(bestia) te ay jukeb sjol sok lajun ch'ix xulube.⁸Te muk'ul chambalam te xi'bantik sbae(bestia) te la awil kuxul a, ta ora to ma ba kuxulix, jauk me to nopol ya xlok' tel ta banti ay te ijk'al k'inal te mayuk slajibale. Ta patil ya me xbajt' ta lajel ta k'ajk'el. Spisil te mach'atik kuxulik ta balumilale, te mach'atik ma ts'ibubilik sbiilik ta sjunal te kuxinel sbajt'el k'inal te k'alal to la xjajch'ibal te balumilale, chamnax me ya yaiyik te k'alal ya yilik te ay te muk'ul chambalam te xi'bantik sba(bestia) te kuxul ta neelal toe, te ma ba kuxulix ta ora to, jauk me to le' me nopol ya xtalix a.⁹Ya me sk'an te ay sbijil a jol teme ya ak'an ana' stojol in to. Te jukeb sjole ja me senyail te jukeb witsetik te bay nakal te antse. ¹⁰Sok janix senyail te jukeb muk'ul ajwaliletik. Jukeb ajwaliletik te lajix sk'oplalike, jun te kuxultoe sok te yane ma to chiknajem tel; te k'alal ya xchiknaj tele, ma me xjalaj bayal k'aal.¹¹Te muk'ul chambalam te xi'bantik sba(bestia) te kuxul ta sneelal toe, jauk me to te ma ba kuxulixe, janix xwaxukebal muk'ul ajwalil; jauk me to janix tul ta sjukebal te muk' ajwaliletik te ya xbajt' ta ch'ayele.¹²Te lajun ch'ix xulubil te la awile ja senyail lajun tul te muk' ajwaliletik te ma to yich'oj yat'elik, jauk me to ya me yich'ik tulan yat'elik ta muk' ajwalil jun ora sok te muk'ul chambalam te xi'bantik sbae(bestia). ¹³Te lajun tul te muk' ajwaliletike junax me te snopjibal yu'unike sok ya me yak'beyik yich' yu'el sok tulan yat'el te muk'ul chambalam te xi'bantik sbae(bestia). ¹⁴Jaik me ya yaiyik kerajel sok te Alalchije. Jauk me to te Alalchije ya me stsalwan melel ja' Ajwalil yu'un te ajwaliletike sok ja' Muk' Ajwalil yu'un te muk'ul ajwaliletike, te mach'atik sjoinoj sba soke, ja te mach'atik tsabilike, sok te jun yot'anik ta stojole."¹⁵Te ch'ul abate la yalbon: "Te ja'etik te la awile, te banti nakal te mulawil antse, ja me senyail te bayal ta chajp' lumetike, bayal ta tul ants-winiketik, muk'ul lumetik, sok te bayal ta chajp' te yanyantik sk'opike.¹⁶Te lajun ch'ix xulubil sok te muk'ul chambalam te xi'bantik sba(bestia) te la awile, ya me sla'-ot'anteyik te mulawil antse. Me'ba' sok t'anal me ya yijk'teyik, ya me sti'beyik te sbak'etal te antse sok k'axel me ya xchik'ik ta k'ajk'. ¹⁷Melel te Diose la yak'bey ta yot'anik te ya spasbeyik te beluk snopojik ta yot'anike, swenta yu'un jich ya yak'beyik yu'el ta spasel mantal te muk'ul chambalam te xi'bantik sbae(bestia) ja to te ya xk'ot ta pasel te sk'op te Diose.¹⁸Te ants te la awile, ja senyail te muk'ul lum te spasoj mantal spisil te muk'ul ajwaliletik ta balumilale."

18YA XJIN TE MUK'UL LUM BABILONIA.¹Ta patil la jkil yan ch'ul abat te ko tel ta ch'ulchan. Tulan yich'oj yat'el sok te balumilale xojobaj ta yutsilal. ²Tulan yak ta aw, jich yak ta yalel: "¡Ch'ayix, ch'ayix koel te muk'ul lum Babilonia! Melel ja k'atbujix ta sna te pukujetike, anjibalix yu'un te espírituetik te ilaybil sbaike sok anjibal yu'un spisil ta chajp' mutetik te ilaybil sbae sok te k'ax bolobenixe. ³Melel spisil te muk'ul lumetike yakubikix yu'un te svino ja te beluk ilaybil sba te k'ax smulanejike. Te muk'ul ajwaliletik yu'un te balumilale la spasikix te beluk k'ax ilaybil sba soke. Te chombajeletik yu'un te balumilale k'atbujikix ta k'ulej yu'un te bit'il kuxul ta mulile."⁴Jich la jkaiy stojol yan k'op ta ch'ulchan te yak ta yalel: "Lok'antel le'a lum jku'un, jich ma ajoin ta spasel te muliletike sok ma awich'ik ni junuk te wokolil te ya xtal ta stojole. ⁵Te smulike tsobol k'otix k'alal ta ch'ulchan, jich te Diose julix ta sjol te beluk ma lekuk la spasike. ⁶Ak'beya spakol jich te bit'il la spasbey te yantike sok cheb xan me buelta ya awak'bey spakol te bit'il la spasuke; te beluk la skap ta kopae, cheb xan me buelta ya akapbey te bit'il la spase.⁷Jich te bit'il la yich' sba ta muk' stukel nax sok te sk'ulejal xkuxinel, ak'beya k'axuk swokol sok ta uts'inel. Melel jich ya yal ta yot'an: "Te jo'one nakalon jich te bit'il antsil-ajwalil; ma ba me'ba' antson, sok mayuk bin ora ya x-ok'on jtukel. ⁸Jich yu'un ya sta sk'alel te ya xtaot ta woklajel; lajel, mel-ot'an sok winal. Ya me yich' chik'el ta k'ajk', melel te Kajwaltik Diose ay yu'el stukel sok ja ya slik te mulile."⁹Te muk'ul ajwaliletik ta balumilal te la spasik mulil te ileybil sbae, sok te ma la snaik stsajtebel sbaik ya me x-ok'ik sok k'axem to me ya sna'ik te k'alal ya yilik te xch'ailel te ants te yak ta k'ajk'ele. ¹⁰K'ejel to me ya xba stejk'an sbaik yu'un xi'el te woklajele, jich ya yalik: "¡Ay, ay, ya jna'beytik yobolil sba te muk'ul lum Babilonia, ja te muk'ul lum te ay yipe! Melel ta junax ora jul te swokole."¹¹Te chombajeletik yu'un te balumilale ya me x-ok'ik sok k'axem to xan ya smel-yot'anik yu'un, melel mayuk mach'a ya xmanbotix yu'un te sbiluke, ¹²te biluketik te pasbil ta k'anal tak'in (oro), sakil tak'in (plata), t'ujbil tonetik, perlaetik, lino pak', tsaj aman pak'(púrpura), seda pak', tsajal pak' (escarlata) sok spisil te te'etik te xjuk'et nax yik'ike, te ju jun bojch' te pasbil ta marfil sok spisil bojch' te pasbil ta t'ujbil te', sok ta bronce tak'in, sok ta hierro tak'in, sok ta mármol tonetik, ¹³canela sbiil te xjuk'et nax sbujts'e, wamaletik te ay sbujts'e(especias), pom, mirra, pom te yich'oj perfume, vino, aceite, lekikal harina, trigo, wakaxetik sok tunim chijetik, kaballoetik sok karroetik, sok te mosoetik sok nix te ants-winiketike.¹⁴Te beluk k'axem to xan amulaneje, bajt'ix ta atojol. Spisil te ak'ulejale sok te beluk xtilik nax te ay awu'une, ch'ayix bael ta atojol sok mayuk bin ora ya yich' tael ta yan buelta.¹⁵Te chonbajeletik yu'un te biluketik to te k'ulinajik ta swentae, k'ejel to me ya stejk'an sbaik yu'un te ya xi'ik te swokole, yakik me ta ok'el sok k'axem to xan ya smel-yot'anik yu'un. ¹⁶Ya me yalik: "Ay, ay, ya me jna'beytik yobolil sba te muk'ul lum te la yich' lapbeyel sk'u' te pasbil ta lekil lino pak', tsaj aman pak', tsajal pak', sok te la yich' ch'alel ta oroe, te xch'aljibal te t'ujbilik naxe sok te t'ujbikal tonetik te perlaetik sbiile! ¹⁷Ta junax ora spisil te sk'ulejale ch'ay k'axel." Tulu tul te kapitán yu'un te barkoetike, tulu tul winik te yak ta at'el ta mar, te mach'atik swentenejik te bit'il ya xbeen te barkoetike sok spisilik te mach'atik ya staik swe'elik ta mar, k'ejel to la sk'ej sbaik.¹⁸Awunik te k'alal la yilik te xch'ailel te yak ta k'ajk'ele. Jich la yalik: "¿Ay bal yan muk'ul lum jich bit'il in to?" ¹⁹La sbusk'inik tan ta sjolik sok yakik ta aw, ta ok'el sok ta mel-ot'an: "Ay, ay, ya me jna'beytik yobolil sba te muk'ul lume te banti k'ulinajik te mach'atik ay sbarkoik ta mar. Jauk me to ta junax ora la yich'ix jinel." ²⁰"¡Bujts'najuk me awot'anik ta stojol, te ja'ex te ayatik ta ch'ulchan, ja'ex te ch'uunjelexe, ja'ex te wolwanejex chol k'opetik sok te ja'ex alwanejexe, melel te Diose la yich'ix tel te kastigo ta stojol ta mach'a la yuts'inexe!"²¹Tul ch'ul abat te ay yipe la stsak bij muk'ul ton, jich smuk'ul yilel te bit'il te xch'enul te molinoe sok ba xch'oj ta bay mar, jich la yal: "Jich me ya yich' pasbeyel te Babilonia, te muk'ul lum, ya me yich' ch'ojel koel ta tulan sok mayuk bin ora ya yich' xan ta ilel. ²²Te sk'op te tij arpaetike, te mach'atik ya xk'ajinike, te tij amayetike sok te tij ok'esetike ma xchiknajix ta atojol. Ni jauk te mach'atik ya sna'ik te jalabe ma xchiknajix ta atojol. Janix jich ma xchiknajix ta atojol te sk'op te molinoe.²³Te xojobil te k'ajk'e mayuk bin ora ya xchiknajix ta atojol. Te sk'opik te mach'a ya xnujp'ine mayuk bi ora ya xchiknaxan ta atojol, melel te chonbajeletik awu'une jaik te ich'bilik ta muk' ta balumilale sok te muk'ul lumetik la yich'ik lolayel yu'un te la apas te ts'ilwaneje. ²⁴Ta stojol la yich'ix tael te xch'ich'el te alwanejetike sok te ch'uunjeletike sok te xch'ich'elik te mach'atik la yich'ik milel ta balumilale.

19AY YUTSIL DIOS TA CH'ULCHAN.¹Ta patil la jkaiy stojol te ay tsobol ants-winiketik te ayik ta ch'ulchan te tulan yakalik ta k'op; te jich yakalik ta yalele: ''Aleluya. Ay kolel ta swenta te Dios jku'untike, ay yutsilal sok ja ay bayal yu'el stukel. ²Te bit'il ya xchajp'anwane ja toj stukel sok ja smelelil, melel ja la slikbeyix smul te mulawiletik te ayik ta Babilonia te jich k'oemik te bit'il mulawil-ants te la sboltes ta mulwej ta spamal te balumilale. Te Diose la yak'beyix stoj te la smalbey xch'ich'el te abatetik yu'une.''³Cha' k'opojik xan: ''¡Aleluya! jich me sbajt'el k'inal xtomet ya xmo te xchailel te muk'ul lume.'' ⁴Te chaneb xcha'winik (24) ta tul te ancianoetik sok te chan kojt' (4) te beluk kuxatik la skejan sbaik sok la yich'ik ta muk' te Dios te ja nakal ta bay te muk'ul naktijibale. Jich yakalik ta yalel: ''Jichuk. ¡Aleluya!''⁵Jich yu'un la jkaiy stojol jun k'op te lok' tel ta bay te muk'ul naktijibale, te jich la yale: ''Ich'aik me ta muk' te Dios jku'untike, spisil te abatetik yu'une, te ja'ex te ja xi'ojike, ja'ex te mayuk bi ay awu'unike sok te mach'atik tulan yat'elike.''⁶Jich yu'un la jkaiy stojol yan k'op te ja pajal sok te tsobol ants-winiketik te tulan yakalik ta k'ope, jich bit'il ya xk'opoj ta tulan te bayal te ja'etike sok jich sk'op te bit'il tulan chawuke, te jich yakik ta yalele: ''¡Aleluya! melel jajch'ix ta ajwalinel te Kajwaltike, te ja Dios te ja ajwalil yu'un spisil te beluk aye.K'IN SWENTA NUJP'INEL YU'UN TE ALALCHIJE. ⁷Aka me bujts'najuk jkot'antik sok binuk nax me jkot'antik yu'un sok aka me jkalbeytik yutsilal te Diose, melel la staix yorail te k'in swenta te nujp'inel yu'un te Alalchije melel la xchajp'an sbaix te mach'a ya xnujp'in soke.'' ⁸Melel ja ak'botix slap te lino-pak' te xlem naxe sok te sak nax ta ilele'' (Melel te lino-pak'e ja senyail te beluk toj spasojik ta k'inal te mach'atik ch'ul lum yu'une).⁹Te ch'ul abat la yalbon: ''Ts'ibuya ta jun in to: Binax me yutsilik te mach'atik ik'bilik ta we'el ta bay te nujp'inel yu'un te Alalchije.'' Sok jich la yalbon xan: ''Ja in to ja smelelil k'op yu'un te Diose.'' ¹⁰Te jo'one la jkejanba ta yakan ta yich'el ta muk' te ch'ul abate jauk me to la yalbon: ''¡Ma xa pas jich me to!'' melel pajal ayotik ta abatinel sok te awermanotak te mach'atik ya xch'uunike sok te ya yalik ta jamal te sk'oplal te Jesuse. Ja me xa wich' ta muk' te Diose, melel te sk'oplal te Jesuse jaix te ya x-at'ej ta yot'anik ta swenta te Ch'ul Espíritue.''TE MACH'A KAJAL TA SAKIL KABALLO. ¹¹Jich yu'un la jkil te jamal te ch'ulchane sok la jkil ay kojt' sakil kaballo le'a. Te mach'a kajal le'a ja stalel jun yot'an sok smelelil xk'opoj, xi' te sbiile. Yu'un toj ya yaiy chajp'anwanej sok toj ya yaiy tsalaw. ¹²Te site jich yak ta tilel te bit'il k'ajk' sok ay bayal koronaetik ta sjol. Sok ts'ibubil jun biilil te mayuk mach'a ya sna', janax ya sna' stukel. ¹³Slapoj jun najt'il k'u'ul te mulbil ta ch'ich'e, te sbiile ja sk'op Dios.¹⁴T'umbil yu'un tsobol soldadoetik te ayik ta ch'ulchane te kajatik ta sakil kaballoetik, te slapojik lekil lino-pak', te saknaxe sok te mayuk xch'alele. ¹⁵Yak ta lok'el tel ta ye jun espada te mero juxbil ye te ya yexnentes te lumetik sok te yaiy ajwalinel sok sbaston-tak'in. Ya me xpech' ta tek'el te yaj-kontro ta swenta te chajp'anel yu'un Dios te ja k'ax bayal yu'el stukel, jich te bit'il ya yich' pits'el ta tek'el te ts'usube. ¹⁶Ja ts'ibubil sbiil ta bay te snajt'il sk'u'e sok ta bay skub: ''Ja muk' Ajwalil yu'un spisil te muk' ajwaliletike sok ja Ajwalil yu'un spisil te ajwaliletike.''¹⁷La jkil tul ch'ul abat te tek'el ta bay xojobal te k'aale. Tulan yak ta yawteyel spisil te mutetik te yakalik ta wilel ta sjamalul te ch'ulchane: ''La'ik, tsob abaik tel ta il-k'in yu'un te Diose. ¹⁸La'ik ta we'el, la' ti'beyaik sbak'etal te muk' ajwaliletike, te sbak'etal te wolwanej yu'un te soldadoetike, te sbak'etal te tulan winike, te sbak'etal te kaballoetike sok te mach'atik kajatik le'a sok te sbak'etal spisil te ants-winiketike, te mach'atik kolemike sok te mach'atik esclavoinbilike sok te mach'a mayuk beluk ay yu'unike sok te mach'a tulan yat'elike.''¹⁹La jkil te muk'ul chambalam te xi'bantik sbae(bestia) sok te muk' ajwaliletik te ayik ta balumilale sok te tsobol soldadoetik yu'une. Yakalik ta stsobel sbaik swenta yu'un sjajch'esel kera sok te mach'a kajal ta bay te sakil kaballoe sok te tsobol soldadoetik yu'une. ²⁰Te muk'ul chambalam te xi'bantik sbae(bestia) la yich' tsakel sok te lotil chol k'ope, ja te la yak'tiley ta ilel senyailetik ta stojole. Ta swenta te senyailetik te la spase la slo'liy spisil te mach'atik la yich'ik te marca yu'un te muk'ul chambalam te xi'bantik sbae(bestia) sok te la yich'ik ta muk' te slok'ombae. Kuxul la yich'ik ch'ojel ochel ta xchebalik ta bay muk' pamal k'ajk' te yak ta tilel sok azufre.²¹Te jayeb xan jilik, la yich'ik milel ta espada te yak ta lok'el tel ta bay te ye te mach'a kajal ta kaballoe. Spisil te mutetike la slajinik te sbak'etalik te mach'atik lajemike.

20TE MIL JA'WIL.¹La jkil tul ch'ul abat te ko tel ta ch'ulchan te ja yich'oj ta sk'ab te sjamjibal (llave) te sjiawal xaab te mayuk slajibale sok stsakoj ta sk'ab jun muk'ul kadena. ²Te ch'ul abate la stsak te muk'ul chan te xi'bantik sba ta ilele (dragon), te ja namey k'inal chan, ja te pukuje, o Satanás xi' te yan sbiile, jich te ch'ul abate la xchuk mil ja'wil. ³Jich la xch'oj ochel ta bay te sjiawal xaab te mayuk slajibale, la smak sok la yak'bey jilel sello. Swenta yu'un ma ba ya slo'liy xan a te yantik muk'ul lumetik ja to teme sts'akaj te mil ja'wile. Te k'alal ya sts'akaj te mil ja'wile, ya me yich' koltayel lok'el jun-chebuk xan k'aal te pukuje.⁴Jich la jkil muk'ul naktijibaletik. Le' nakatik a te mach'atik ak'bilik yat'elik yu'un te Dios ta slikel muliletik. Sok la jkil te xch'ulelik te mach'atik la yich'ik ts'okbeyel te sjolik ta swenta te la xcholbeyik ta jamal te beluk la spas te Jesús sok te sk'op te Diose. Jaik te mach'atik ma la yich'ik ta muk' te chambalam te xi'bantik sbae (bestia) sok te slok'ombae sok te ma la sk'an yich'ik te marca ta bay stibaik sok ta bay sk'abike. La jkil te cha'kuxik tel sok la sjoinik te Cristo ta ajwalinel mil ja'wil.⁵Spisil te mach'atik lajemike ma ba cha' kuxik tel ja to te k'alal ts'akaj te mil ja'wile. Ja in to ja sbabial te cha' kuxele. ⁶¡Binax me yutsilik sok ch'ultesbil me te mach'a ya cha' kuxik tel ta sbabial cha'kuxele! melel mayukix yu'el te xchebal buelta lajele. Jich me ya xk'otik ta sacerdoteil yu'un Dios sok te Cristoe sok jich me ya sjoinik ta ajwalinel ta mil ja'wil.TSALBILIX TE PUKUJE. ⁷Te k'alal ya stsakaj te mil ja'wile. Ya me yich' koltayel tel lok'el te Satanás ta bay chukule. ⁸Jich me ya xbajt' slo'liy te lumetik ta xchanebal xchikin te balumilale te ja Gog sok Magog yu'un ya stsob tel ta kerajel. Jich me bayal ya xk'otik te bit'il sjial te mare.⁹Jich talik ta bay sjamalil te balumilale sok la sjoytayik te bay ayik te mach'atik ch'uunjeletike, ja te muk'ul lum te k'ux ay ta yot'an te Diose, ja te Jerusalén. Jauk me to te Dios la yak' koel tel k'ajk' ta ch'ulchan jich lajik ta k'ajk'el ta spisilik. ¹⁰Te pukuje, te ja lo'liyotik yu'une, la yich' ch'ojel ochel ta bay pamal k'ajk' te yak ta tilel sok azufre, te banti la yich'ik ch'ojelbel uk te chambalam te xi'bantik sbae(bestia) sok te lotil alwaneje. Jich me ya xk'ax swokolik k'aal ta ajk'ubal ta sbajt'el k'inal.ICH'EL TA K'OP TA MUK'UL SAKIL NAKTIJIBAL. ¹¹La jkil jun muk'ul sakil naktijibal sok la jkil te mach'a nakal le'a. Lok'ik ta anel te ch'ulchan sok te balumilal ta stojol, jauk me to ma ba wejt' te banti ya x-ainike. ¹²La jkil spisil te aelmeletik te mach'atik tulan yat'elike sok te mach'atik mayuk bi ay yu'unike, tek'atik ta stojol te muk'ul sakil naktijibale, jich la yich' jamel te libroetike. Jauk me to la yich' jamel yan libro, ja te libro yu'un te kuxinele. Spisil te mach'atik lajemike la yich'ik ich'el ta k'op swenta yu'un te beluk la spasik ta balumilale, te le' ts'ibubil ta bay te libroe.¹³Te mare la yak' lok'uk tel spisil te mach'atik lajemik le'a. Te lajele sok te stsobjibal aelmeletike la yak'ik lok'el tel uuk te mach'atik le' ayik a jich te aelmeletike la yich'ik ich'el ta k'op swenta yu'un te beluk la spasik ta balumilale. ¹⁴Te lajele sok te stsobjibal aelmeletike la yich'ik ch'ojel ochel ta bay muk'ul pamal k'ajk'. Ja te xchebalan buelta lajele. ¹⁵Te mach'a ma ba ts'ibubil te sbiil ta bay te libro yu'un te kuxinele, ya me yich' ch'ojel ochel ta bay muk'ul pamal k'ajk'.

21TE YACH'IL CH'ULCHAN SOK TE YACH'IL BALUMILAL.¹Ta patil la jkil jun yach'il ch'ulchan son jun yach'il balumilal, melel te sbabial ch'ulchane sok te sbabial balumilale jilikix, sok te mare lajix sk'oplal. ²La jkil te muk'ul ch'ul lum, ja te yach'il Jerusalén, yak ta koel tel ta ch'ulchan, ja te ch'ulchan yu'un te Diose, buen chapal jich bit'il tul ach'ix te ya xnujp'ine te buen ya xchajp'an sba yu'un te smamlale.³La jkaiy stojol jun tulan k'op te lok' tel ta bay te muk'ul naktijibale jich la yal: "¡Ilawilik! te sna te Diose ay ta yolil te ants-winiketike sok ya xkuxin sok. Ja me slum ya xk'ot sok ya me yich'ik joinel yu'un te Diose sok ja me Dios ya xk'ot yu'unik. ⁴Janix me ya yich'ik kusbeyel yu'un te yalel sitike sok mayukix lajel le'a, mayukix ok'el le'a, sok mayukix mel-ot'an, mayukix wokolil le'a. Melel spisil te spokol kuxinel lajix sk'oplal.⁵Te mach'a nakal ta muk'ul naktijibale jich la yal: "¡Ilawilik! La jpasix ta yach'il spisil te beluk aye." Sok jich la yalbon: "Ts'ibuya ta jun spisil in to melel smelelil k'op te ya xch'uun awot'ane." ⁶Sok jich la yalbon xan: "¡Juix jku'un! jo'on te Alfa sok te Omega, te mach'a ay ta sneelal toe sok te ay ta slajibale. Spisil te mach'a ay ta takin ti'ile, Jo'on ya me jkak'bey yuch'ik lekil ja' te mayuk stojole sok te ya yak' kuxinele.⁷Spisil te mach'a ya yaiy tsalawe ya me yich' ak'beyel yu'unin spisil in to sok Jo'on me Dios ya xk'oon yu'unik sok ja me jnich'an ya xk'ot. ⁸Yan te mach'atik xiwelike, te mach'atik mayuk xch'uunjel yot'anike, te mach'a ilaybil sba te beluk ya spasike, te milwaletike, te mulwejetike, te ak' chameletike, sok te mach'atik ya xch'uunik lok'ombaetike sok spisil te pas lotetike, ta spisilik in to, ya me xbajt'ik ch'ojel ta bay pamal k'ajk' te yich'oj azufree. Te ja te xchebalan buelta lajele.TE YACH'IL LUM JERUSALÉN. ⁹Ay tal ta jtojol tul ta sjuk tulul te ch'ul abatetike, ja te mach'a yich'oj te jukeb kopaetik te nojelik yu'un te juk chajb wokoliletik ta slajibal k'aale sok jich la yal: "Laik le' to. Ya jkak'beyex awilik te ach'ix te ya xnujp'ine, ja' te ya xnujp'in sok te Alalchije." ¹⁰Te Espíritue la yik'on bael ta bay jun muk'ul najt'il wits sok la yak'bon jkil te ch'ul lume, Jerusalén, te yak ta koel tel ta bay ch'ulchan yu'un te Diose.¹¹Te lum Jerusalén yich'ojbey te yutsilal te Diose sok te xojobil jich k'oem te bit'il jun ton te k'ax t'ujbilnaxe, jich bit'il te jun ton te jaspe sbiil te ya xk'ax jsitik ta yilel k'inal a jich te bit'il te cristale. ¹²Juytabil ta najt'il ts'ajk' sok te ay lajcheyeb ta kum muk'ul ti'nailetik, ta jujun muk'ul ti'nail ay tul ch'ul abat le'a. Ta bay jujun muk'ul ti'nail ts'ibubil te sbiilik te lajcheyeb ta chajp' ts'umbalil yu'un te Israeletike. ¹³Ay oxeb muk'ul ti'nailetik ta slok'ib k'aal, sok nix ay oxeb ta Norte, sok oxeb ta bay sur sok oxeb ta smalib k'aal.¹⁴Ta bay ts'ajk' yu'un te muk'ul lume ay lajcheyeb yuyal te pasbil ta muk'ul tonetik, te le' ts'ibubil a te sbiilik te lajchey tul puk k'opetik yu'un te Alalchije. ¹⁵Te mach'a la sk'oponone ay stsakoj jun jawubil te' te pasbil ta oro yu'un ya yich' bisel a te muk'ul lume, sok te muk'ul ti'nailetike, sok te ts'ajk'etike.¹⁶Te muk'ul lume la yich' najk'anel koel; te snajt'ile pajal sok te sjamalule. La sbis te muk'ul lume sok te jawubil te' te pasbil ta oroe, lok' jo' bajk' sok lajunwinik (2200) kilómetro ta bisel yu'un (te sjamalule sok te snajt'lejale pajal snajt'ilik). ¹⁷Janix jich la sbis spisil te sts'ajk' yu'un te lume, chaneb swakwinik xujk'ubil(144 codos). Te jich sbisjibal yu'un te ants-winik te pajal nix sok te sbisjibal yu'un te ch'ul abatetike).¹⁸Te ts'ajk' pasbil ta jaspe sok te muk'ul lum pasbil ta oro te mayuk skap, te pajal sok te cristale. ¹⁹Te yuyal te ts'ajk'etike ch'albil ta cha'oxchajp' tonetik te chajp'ix yutsilal a. Te sneelale ch'albil ta jaspe, te xchebale ja safiro, te yoxebale ja ágata, te xchanebale ja esmeralda, ²⁰te sjoebalan ja ónice, te swakebale ja sardio, te sjukebalan ja crisólito, te xwaxukebalane ja berilio, te sbalunebale ja topacio, te slajunebale ja crisopraso, te xbuluchebale ja jacinto, te slajcheyebale ja amatista.²¹Te lajcheyeb muk'ul ti'nailetik ja lajcheyeb perlaetik te chajp'ix st'ujbilal a, ta jujun ti'nail pajal te perlaetik te yich'ojik ta pasele. Te kalleetike pasbilik ta oro te mayuk skape, jich bit'il te ya xk'ax jsitik ta yilel k'inal a. ²²Te jo'one mayuk la jkil templo le' ta bay te muk'ul lume, melel te Jkajwaltik Diose te spisil ya xju' yu'une, sok te Alalchije ja'ix templo yu'unik.²³Te muk'ul lume ma xtuunix yu'un te xojobil k'aale sok te xojobil te ue, melel te yutsilal te Diose ja ya xojobtes sok te Alalchije ja' sk'ajk'ik. ²⁴Te muk'ul lumetike ya me x-ainik ta sakil k'inal yu'un. Te muk'ul ajwaliletik yu'un te balumilale ya me yich'ik tel yutsil sk'ulejalik ta stojol. ²⁵Te muk'ul ti'nailetik ma ba yich'ik makel ta k'aleltik sok mayukix ajk'ubal le'a.²⁶Sok spisil ta chajp' lumetik ya me yich'ik tel te yutsilalik sok te ya yak'ik ta ich'el ta muk' te muk'ul lume, ²⁷sok ma stak' ya x-och te beluk ma lekuk ta pasel sok ma stak' ya x-och te beluk ileybil sbae sok te mach'atik ya spasik lot ma' xju' ya x-och le'a. Janax te mach'a ts'ibubil sbiilik ta bay libro yu'un te kuxinel te yich'oj te Alalchije.

22¹Jich yu'un te ch'ul abate la yak'bon jkil jun muk'ul ja' yu'un te kuxinele te jich bit'il te cristal te xlememet naxe. Le' yak ta lok'el tel ta bay muk'ul naktijibal yu'un te Diose sok te Alalchije, ²yak ta ok ta yolil te kalle yu'un te muk'ul lume. Ta jujumejch' sti'il te ja'e le' ay a te te' yu'un te kuxinele, te ya yak' lajcheyeb buelta(12) sit ta jujun ja'wil, jujun buelta ta jun u. Te yabenal te te'e ja xpoxil te muk'ul lumetike.³Mayukix mach'a le'a te ya x-ak'ot bael ta ch'ayele. Te muk'ul naktijibal yu'un te Diose sok te Alalchije le' me ay ta bay muk'ul lum sok te abatetik yu'une ya me yich'ik ta muk'. ⁴Ya me yilbeyik te sit-yelawe sok ta stibaik ts'ibubil te sbiile. ⁵Ma me ayukix ajk'ubal; Ma me xtuunix te yawil k'ajk'etike sok te xojobal te k'aale melel ja sakubenix k'inal yu'un te xojobil te Jkajwaltik Diose. Sok ta sbajt'el k'inal ya x-ajwalinik.NOPOL YA XTALIX TE KAJWALTIKE. ⁶Te ch'ul abate la yalbon: "Jai k'op to ja me smelelil sok ma me spas lot. Te Kajwaltik te ja Dios yu'un te xch'ulelik te alwanejetike, la stikun tel te ch'ul abat yu'une ta swenta te ya yak' ta ilel ta stojolik te abatetik te beluk nopol ya xk'ot ta pasele." ⁷"¡Ilawil! ¡Le' me nopol ya xtalon! Binax me yutsil te mach'a ya xch'uun te beluk ts'ibubil jilel ta bay te libro to te ya xk'ot ta pasele."⁸Jo'on, Juan, te la jkaiy stojole sok la jkil spisil in to. Te k'alal la jkaiy stojole sok te k'alal la jkile, la jkejanba koel ta yich'el ta muk' te ch'ul abate, te ch'ul abat te mach'a la yak'bon jkil in to. ⁹La yalbon: "¡Ma xa pas jich! melel pajal yabatotik te Diose sok te awermanotak te alwanejetike, sok te mach'a ya xch'uun te beluk ts'ibubil ta libro to. ¡Ich'ame ta muk' te Diose!."¹⁰La yalbon: "Ma me xa mak te beluk ts'ibubil jilel ta bay te libro to, melel le' nopolix ya xk'ot ta pasel. ¹¹Te mach'a ma toj te yat'ele, aka me spas xan te beluk ma tojuk ta pasele. Te mach'a ch'aluben yu'un te beluk ilaybil sbae, aka me xch'altes sba xan. Te mach'a toj te yat'ele, aka me spa xan te beluk toje. Te mach'a ch'ultesbile, aka me yich' ch'uultesel xan."¹²¡Ilawil! Le' me nopolix ya xtalon. Jkich'oj tel te majt'aniletike, yu'un me jich ya jtojbey ta tulu tul te beluk la spasike. ¹³Jo'on me te Alfa sok te Omega, te ayon ta sjajch'ibal sok ta slajibal, te sneelal sok ta slajibal.¹⁴Binax me yutsil te mach'atik ya xch'uunik te mantaliletike, jich me ya stak' slo'beyik te sit te te' yu'un te kuxinele sok te ya stak' x-och bael ta ti'nail yu'un te muk'ul lume. ¹⁵Yan te ts'ietike, te mach'a ts'ilwanejetike, te mach'a ya spasik te muliletike, te mach'a ya xmilwanike, te mach'a ya yich'ik ta muk' te lok'ombaetike, sok spisil te mach'a ya smulanik sok ya spasik te lote ya me xjilik ta bay spat te ti'naele.¹⁶Jo'on, Jesús, la jtikun bael te ch'ul abat jku'une yu'un ya yak'bat ana' stojol spisil te k'op to, te ja ta swenta te ch'uunjeletike. Jo'on te yisim sok jts'umbal te muk' ajwalil David, jo'on te ek' te mero xlemetnax te ya xlok' tel ta sakubelan k'inale."¹⁷Te Espíritu sok te yinam te Alalchije, jich ya yalik:"¡La'!" spisil te mach'a ya yaiy stojol aka yal uuk: "¡La'!" te mach'a ya yaiy takin ti'ile, aka me taluk, sok te mach'a ya sk'an xtale, smajt'an ya x-ak'bot te ja yu'un te kuxinele.¹⁸Jo'on ya jkalbey ta jamal te mach'a ya yaiy stojol te beluk ts'ibubil jilel ta libro to: Teme ay mach'a ya yak'bey sjuy te beluk ts'ibubil jilele, te Diose ya me yak'bey te ya xtal ta stojol te jayeb chajp' wokolil te ts'ibubil jilel ta bay te libro to. ¹⁹Teme ay mach'a ya yak' xch'ay te beluk ts'ibubil jilel ta bay te libro to, janix jich ya xtubot sbiil yu'un te Dios ta bay te kuxinel sbajt'el k'inale sok ma ba ya x-och ta muk'ul ch'ul lum te ts'ibubil sk'oplal ta bay te libro to.²⁰Te mach'a ya yalbat spisil in to, jich ya yal: "¡Jich! nopol ya xtalon." ¡Jichuk! ¡ La' Kajwal Jesús! ²¹Te yutsil yot'an te Kajwaltik Jesús ayuk ta atojolik. Jichuk.

Tzeltal de Oxchuc: Bible for Apocalipsis

Formatted for Translators

Apocalipsis