To view a copy of the CC BY-SA 4.0 license visit
http://creativecommons.org/licenses/by-sa/4.0/
Notices:
You do not have to comply with the license for elements of the material in
the public domain or where your use is permitted by an applicable
exception or limitation.
No warranties are given. The license may not give you all of the
permissions necessary for your intended use. For example, other rights
such as publicity, privacy, or moral rights may limit how you use the
material.
Filipenses
1SPATJIBAL OT'ANIL1Pablo sok Timoteo, te ja abatotik yu'un te Cristo Jesuse, te mach'atik tsabilik yu'un te Cristo Jesús ta Filipos, sok te ancianoetik sok te diáconoetike. 2Ayuk me yutsil awot'anik sok ayuk me lamal k'inal ta swenta te Jtatik Dios sok te Jkajwaltik Jesucristoe.LA SK'OPON DIOS TE PABLO TA STOJOL TE CH'UUNJELETIKE 3Te k'alal ya xjulex ta jkot'ane ya jkalbey wokol te Dios ta awentaik. 4Ta spisil ora ya jk'oponbeyex Dios soy spisil sbujts' jkot'an. 5Ya jkalbey wokol Dios yu'un te junax yakotik ta spukel te lek yach'il k'op ta xjajch'ibal ja to ta ora to. 6Xch'uunej jkot'an, te Dios ya sju'tes spasel te lekil at'elil te la sjajch'es spasel ta atojolike, ja to te bin ora ya xtal te Jesucristoe.7Ja me lek te jich ya jkaiy ta jkot'an ta atojolik yu'un k'uxex ta jkot'an. Melel joytak k'oemex ta apisilik swenta yu'un te yutsil yot'an te Diose, manchuk me chukulon a, melel la akoltayonik swenta yu'un te ya jchol ta jamal te lek yach'il k'ope. 8Melel ja testigo k'oem jku'un te Diose, te bayal k'uxex ta jkot'an ta apisilik jich te bit'il k'ax bayal k'uxotik ta yot'an te Cristo Jesuse.9Jich yakon ta sk'oponel te Dios in to: Te yakuk s-esmaj xan te sbijil te awot'anike sok te ayuk xan sbijil te ajolike. 10Ya jk'opon Dios ta swenta te yakuk ana'ik stsael te beluk leke, jich me mayuk amulik ya ataik te k'alal ya xk'opojexe sok jich me mayuk beluk kechel ta awentaik te k'alal ya xtal te Cristoe . 11Ya jk'opon Dios ta awentaik te yakuk xnojex uuk yu'un te sit te beluk toj ta pasel te ya xtal ta swenta te Jesucristoe, swenta yu'un ya yilbeyik yutsilal sok te ya yich'ik ta muk' te Diose.TEME KUXULOTIKE JA KUXULOTIK TA SWENTA TE CRISTOE 12Ta ora to jkermanotak ya jk'an te yakuk ana'ik stojol te beluk yakon ta k'axel a, ja la skoltayon yu'un te ya jpuk te lek yach'il k'ope. 13Te bit'il chukulon ta swenta te Cristoe, sna'ojik stojol spisil te kananetik yu'un te muk' ajwalile sok spisil te ants-winiketike. 14Teb ma spisiluk te jkermanotaktik te ay smuk'ul yot'anik ta stojol te Jkajwaltik yu'un te bit'il chukulone sok ma ya xiwik yu'un te ya xcholik te sk'op te Diose.15Melel ay cha'ox tul te ya spukbeyik sk'oplal te Cristo ta swenta sbik'tal ot'anil sok ta swenta tsaltomba k'op, sok janix jich ay cha'ox tul te ya spuk sok sk'anjel yot'an. 16Te mach'atik patil ya spasik ta swenta te xk'uxul yot'anike, yu'un ya sna'ik te ja chukulon ta swenta te ya xk'opojon yu'un te lek yach'il k'ope. 17Yan te yantike ja ya yalbeyik sk'oplal te Cristo yu'un te janax ya sk'anik te toyoluk sk'oplal stukelik, ma jauk ya spasik sok yot'anik. Ja ya skuyik te ya xju' yu'unik yak'bonik jwokol yu'un te chukulone.18¿Bi jwenta a? chikan teme ma lek yot'an ya spase o teme sok yot'an ya spase, janax teme ya yalbeyik sk'oplal te Cristoe, ja swenta te bayal sbujts' jkot'an yu'un. Jich ya sbujts'naj jkot'an yu'un, 19melel ya jna' te ya xkolon lok'el swenta yu'un te yakatik ta ak'oponbelonik Dios sok ta swenta te ya skoltayon te Espíritu yu'un te Jesucristoe.20Ja ya sk'an jkot'an sok ja smuk'ul jkot'an te mayuk beluk ya jta k'exlal yu'une, ja yu'un teme kuxulon o teme lajon baele, yakuk jpas ta spisil ora te beluk lek ta pasele, ta swenta te beluk ya jpas ta jbak'etale ya me yich'ik ta muk' a te Cristoe. 21Melel te bit'il kuxulone ja ta swenta te Cristoe sok teme lajon baele, la me jkayix tsalaw abi.22Jauk me to teme ya xkuxinon xan ta k'inal sok te jbak'etale, jich me ya xch'i xan ta lek te jkat'ele. Jich yu'un, ¿beluuk ya jtsa? ma jna'. 23Melel ma xju' jku'un stsael ta xchebal. Te beluk sk'anjel jkot'ane, ja te yakuk xlajonix baele sok te yakuk xk'oon ta stojol te Cristoe, te ja mero lek stukele. 24Jauk me to, ja ay bayal xan sk'oplal te ya xkuxinon xan ta jbak'etale swenta yu'un ja lekilalik.25Jich yu'un xch'uunej jkot'an, sok jich jna'oj te joinejex sok jich ya jpas xan bael ta k'inal, swenta jich me ya xch'iex xan sok te yakuk s-esmaj xan te sbujts' te xch'uunjel awot'anike. 26Jich me k'axem to xan bayal sk'oplal ya xk'ot awu'unik ta jwenta te Cristo Jesuse te k'alal ya xcha' sujt'on tel ta atojolike. 27Janax toj me ya xkuxinatik jich te bit'il ya yalbotik te lek yach'il k'op yu'un te Cristoe, swenta yu'un te k'alal ya xba jkilexe o teme k'ejel ayon a, ya me jk'an jkaiy stojol ak'oplalik, te junax ayatike sok te junax awot'anik ta swenta te Espíritue, jun snopjibal awu'unik sok te pajal yakex ta yak'beyel yipal yu'un ta xch'uunel te lek yach'il k'ope.28Ma me xiwatik yu'un te mach'atik skontroinojexe. Ja me senyail ya yilik te ch'ayel ya xbajt'ike, jauk me to, te ja'exe ya xkolex, melel ja talem ta stojol te Dios te kolele. 29Melel te Diose ja la yak'beyex te ja'exe, te ya xch'uun awot'anik ta swenta xk'uxul yot'an te Cristoe, ma jauk nax te ya ach'uunike, janix jich ak'bilex te ya xk'ax awokolik yu'un te k'ux ta awot'anik te Cristoe, 30janix jich me pajal ya jkich'tik jwokoltik yu'un, ja yu'un te yakatik ta yaiyel stojol te bit'il ayon to ta woklajele.
2PEK'EL LA YAK' SBA TE CRISTO JICH LA YICH' ICH'EL TA MUK'1Teme ay mach'a ay yip yot'an ta swenta Cristo, teme ay smuk'ul awot'anik, teme sjoinejex te Ch'ul Espíritue, teme ay yutsil xk'uxul awot'anike, 2jich yu'un ts'aktesbonik te sbujts' jkot'an te pajaluk ya anopik te bit'il jo'one, te pajal k'ux ya awaiy abaike, junuk nax me ayex ta swenta te Espíritu sok junuk nax te beluk ya anopike.3Ma me ayuk bi ya apasik ta swenta te beluk ya sk'an awot'anike, sok ta swenta toybajel te mayuk bi ya xlok' awu'unik a. Ja me lek te pek'el ya awak' abaik jich me ya akuyik te yantik te ja tuyem sk'oplalik te bit'il te ja'exe. 4Ma me atukeluk nax ya aleik te alekilalike, jauk nix me jich ya alebeyik slekilal te yantike.5Jich me ya anopik te bit'il la snop te Cristo Jesuse. 6Te ja pajal k'oem jich te bit'il te Diose, jauk me to ma la skuy sba te ja pajal sok te Diose. 7La xch'oj sba ta yot'an. Ja la yak' sba ta abat. Pajal yilel sok te ants-winiketike. Jich k'ot yilel te bit'il tul winike. 8Pek'el la yak' sba sok la xch'uun mantal k'axem to xan te la yak' sba ta lajel, ¡ta lajel ta cruz!9Jich yu'un, te Dios la smuk'tesbey sk'oplal ta k'axem to xan. Ja la yak'bey sbiil te toyol yu'un spisil te biililetike. 10Swenta yu'un ta sbiil Jesús ya skejan sbaik, spisil te mach'atik ayik ta ch'ulchan sok te mach'atik ayik ta balumilale sok te mach'atik ayik ta yet'al te balumilale. 11Ja la spas yu'un te yakuk yalik ta jamal spisil ants-winiketik te ja ajwalil te Jesucristoe, yu'un ya yich'ik ta muk' te Dios te ja Tatile.SAKIL K'INAL K'OEMEX YU'UN TE BALUMILALE 12Jich yu'un, ja'ex te k'uxex ta jkot'an, te yakatiknanix xch'uunel a te mantale, ma jauk nax te k'alal le' ayon a, janix me jich ya apasik te ma ba le' ayonix a, pasaik me te at'elile ta swenta yu'un te akolelike, ayuk me sk'oplal ta awot'anik. 13Melel janix te Dios te yak ta at'el ta atojolik yu'un jich ya sk'an x-at'ejatik ta swenta sk'anjel yot'an.14Spisil te beluk ya apasik, pasaik me, ma me xa muken k'optay abaik sok ma me ajachik k'op a. 15Jich me ya apasik swenta me jich me toj ya xk'oatik sok mayuk ya yich' tael amulik a, melel ja alnich'anatik yu'un te Dios te ma ch'alubenatike. Pasaik me, jich me ya xlemex te bit'il ek'etik ta balumilal, yu'un jich me ya xlemex ta stojol te mach'atik amen yat'elike. 16Tsakame abaik ta lek ta stojol te smelelil k'op jich me binax jkot'an awu'unik a te k'alal ya xtal te Cristoe. Jich me ya jna' te ma jontol la jkaiy at'ele.17Jauk me to teme ya jkich' milel jich te bit'il te milbil majt'anil ta atojolik yu'un te ayuk xch'uunjel awot'anike, binax me jkot'an yu'un sok pajal me ya xbinub jkot'antik yu'un. 18Jichukex me uuk, binuk nax me awot'anik sok binuk nax me jkot'anbatik ta jpisiltik.TIMOTEO SOK EPAFRODITO 19Teme jich ya sk'an te Jkajwaltik Jesús ya me jtikunbatik bael ta ora te Timoteoe, yu'un me jich ya xmuk'ub k'inal ya jkaiy te k'alal ya jkaiy stojol teme lek ayexe. 20Melel mayuk mach'a jich te bit'il stalele, te ja sk'an te lek ayatike. 21Melel spisil te yantike janax ya sleik te beluk ya sk'an yot'anike, ma jauk ya sleik te beluk ya sk'an te Jesucristoe.22Te ja'exe ana'ojbeyik te lek stalel, te jich bit'il te alale te ya xch'uunbey smantal te state jich nix la xch'uun mantal ta swenta te lek yach'il k'ope. 23Jich yu'un, ya jk'an tikunbeyex bael teme la jna' stojol te bit'il ya xk'oone. 24Te jo'one ya xch'uun jkot'an ta stojol te Jkajwaltike te le' nopol ya xba jkilex uke.25Jich yu'un ya jnop stikunel bael ta yan buelta ta atojolik te Epafroditoe. Te ja jkermano sok joy ta at'el sok joy ta soldadoinel, te ja chol k'op awu'unik sok ja ya skoltayon te k'alal ay jwokole. 26Melel bayal yak ta mel-ot'an ta awentaik sok ya sk'an xba yilatik, melel la awaiyik stojol te tsajk' ta chamele. 27Melel te k'alal tsajk' ta chamele k'anuk lajuk yu'un. Jauk me to te Dios la sna'bey yobolil sba, ma jauk nax na'bot yobolil sba janix jichon uuk la sna'bon jkobolil jba uuk, swenta yu'un ma ba la jmel-jkot'an ta kaxem toxan yu'un te k'anuk lajuk baele.28Ja swenta te binax jkot'an ya jtikunbatik bael, yu'un te k'alal ya awilik ta yan bueltae, binuk nax me awot'anik yu'un jich me ma bayaluk xan ya jmel-jkot'an yu'un. 29Sok binuk nax me awot'anik ya awik'ik ta atojolik te Epafroditoe ta swenta te Jkajwaltike. Ich'aik ta muk' te mach'atik pajal yot'an soke. 30Melel ja ta swenta te at'ej ta stojol te Cristo te k'an lajuk baele. Ja la yak' te xkuxinel yu'un te la yak' sba ta abat ta jtojol melel te ja'exe ma ju' awu'unik te la akoltayonike.
3YA JTOJLIN BAEL TE BANTI YA XK'OONE1Jich yu'un, jkermanotak, ayuk me sbujts' awot'anik ta stojol te Jkajwaltike. Ma me amenuk ya jkaiy te ya jcha' jts'ibubeyex bael te beluk la jts'ibubatikixe. Melel spisil in to, ya me xtuun awu'unik. 2Bijanik me yu'un te ts'ietike sok te at'eletik te amen yat'elike. Bijanik me yu'un te mach'atik ya xbojwanik te ya yalik te ja ya sk'an ya jkich'tik te circuncisióne. 3Melel jo'otik te circuncisióne. Jo'otik te ya jkich'tik ta muk' ta swenta te Espíritu yu'un te Diose. Jo'otik te bayal sbujts' jkot'antik ta stojol te Cristo Jesuse sok te ma jauk ya smuk'ulin jkot'antik te ch'ich'-bak'ete.4Janix jich te jo'one ya stak' te ja ya smuk'ulin jkot'an te bak'ete. Teme ay tuluk te ya snop te ay smuk'ul yot'an ta bak'ete, k'ax to xan jich a te jo'one. 5Te jo'one xwaxukebal to nax k'aal jbejk'ajel a te la jkich' te circuncisión yu'un te lum Israel te ja jts'umbal te Benjamin sok snich'anon hebreoetik, te mantalile ja tulan sk'oplal ya jkaiy a, melel fariseon a.6Ta skaj te tulan sk'oplal ta jkot'an a te beluk jnopoje, jo'on la jnuts te ch'uunjeletike; la jch'uun spasel spisil te mantaliletike. 7Jauk me to te beluk la jpase, la jkuy te ja bayal sk'oplale, jauk me to mayuk sk'oplal ya jkaiy ta ora to, ta swenta te ya jna'bey sbaix te Cristoe.8Te jo'one ya jkal te mayuk bi ay stuulale melel ja mero lek te la jna'bey sba te Cristo Jesús te ja Jkajwale. Ja ta swenta te Cristo te la jkijk'teyix spisil, jich ya jkuyix te bit'il k'abale, swenta yu'un ya stak' ya jna'bey sba ta lek a te Cristoe 9sok jun me ya xk'oon sok te Cristoe. Ma jauk nax yakon ta xch'uunel te mantalil yu'un te lek ya yilon a te Diose. Jauk me to, ja yakon ta spasel te beluk toj ta pasel ta swenta te xch'uunjel jkot'an ta stojol te Cristoe, te beluk lek ta pasel ta stojol te Diose, te ja te xch'uunjel ot'anile. 10Ja yu'un te ya jk'an jna'bey sba ta lek te Cristoe sok te yakuk jkaiybey te yu'el te bit'il cha'kuxtele sok te jichuk ya xk'ax jwokol te bit'il k'ax swokole. Sok te jichuk jkot'an te bit'il la yak' sba ta lajele, 11swenta yu'un jich ya stak' xcha' kuxon uuk a ta bay te aelmeletike.12Ma ba ya jkal te juemix jku'un spasel spisil in to sok te k'axel tojobenonixe. Jauk me to yakon ta yak'beyel yipal, yu'un jich me ya jta te beluk ak'bilonix ta swenta te Cristo Jesuse. 13Jkermanotak, te jo'one ma stak' ya jkal te juemix jku'une. Jauk me to ay junax te beluk ya jpase: Ja te ya jch'ay ta jkot'an te beluk jilix ta jpate, ja me ya jkak'bey yipal ta sleel te beluk ay ta jtojole. 14Te jo'one ya jkak'bey yipal yu'un te ya xk'o jta te majt'anil, te ja te ya jkich' ik'el moel ta ch'ulchan yu'un te Dios te ja ta swenta te Cristo Jesuse.15Ta jpisiltik te mach'a muk'ubenotikix ta stojol te Diose, jichuk me pajaluk ya jnoptik in to; teme ma jichuk ya anopike, te Diose janix ya yak'batik ana'ik stojol. 16Jauk me to, te beluk lek la jpastikixe akame jkak'beytik yipal ta spasel.17Kermanotak, noponik te jtalele. Sok ilame awilik te mach'atik jich yakik ta spasele, jich me ya awak'ik ta ilel a te bit'il la jkak'beyex anopike. 18Ay bayal mach'a skontroinoj te bit'il laj ta cruz te Cristoe, ja yu'un te bayal buelta jkalojbatikixe, jauk me to yakon ta ok'el te ya jkalbatik xane. 19Te beluk ya xk'ot ta pasel ta stojolike ja te ya xlajik ta sbajt'el k'inale. Melel ja dios yu'unik te beluk ya smulan te sbak'etalike sok ja binax yot'anik yu'un te beluk k'exlaltik ya spasike. Janax baem ta yot'anik spasel te beluk ay ta balumilale.20Jauk me to te jlumaltike ay ta ch'ulchan, ja yakotik ta smaliyel te ya xtal te jkoleltik le'a, ja te Jkajwaltik Jesucristoe. 21Ya me xtal sk'atbunbotik te jbak'etaltik te mayuk stuulale jich ya xk'atbuj te bit'il ay yutsilale, jich me ya spastaj ta swenta yu'el te ja ya xju' yu'un spasel ta mantal spisil te beluk aye.
4SPISILUK ME ORA AYUK SBUJTS' JKOT'ANTIK TA SWENTA TE JKAJWALTIKE1Jich yu'un, jkermanotak te k'uxex ta jkot'an sok te ma ch'ayemex ta jkot'ane, te ja'exe awak'ojbonik sbujts' jkot'an swenta te la ach'uunikix te Jesuse sok ja sit jkat'el k'oemex ta stojol te Diose, junuk me awot'anik sok teJkajwaltik jkermanotak te k'uxex ta jkot'ane. 2Yakon ta yalbeyel wokol te Evodia sok te Síntique, te jun pajaluk yot'anik ta swenta te Jkajwaltike. 3Jich yu'un ya jkalbat wokol uuk, ja'at te joybatik ta at'ele; kolteya jai antsetik to. Melel ja la sjoinonik ta at'el swenta spukel te lek yach'il k'op sok te Clemente sok xan te yantik jotak ta at'ele, te ay sbiilik ta bay sjunal te kuxinele.4Ta spisil ora ayuk me sbujts' awot'anik ta swenta te Jkajwaltike. Ya xcha' jkalbeyex xan, ayuk me sbujts' awot'anik. 5Aka chiknajuk te slekil awot'anik ta stojol te ants-winiketike. Te Kajwaltike nopol ya xtalix. 6Manchuk ayuk beluk ya yaan awot'anik. Jauk me ya xbajt' ta awot'anik ta sk'oponel te Diose, k'anaik me te beluk ya xtuun awu'unik sok albeyaik wokol yu'un, yakuk me yaiybatik stojol te beluk ya ak'anbeyik te Diose, 7sok te lamal k'inal yu'un te Diose, te k'ax muk' te ma xju' jku'untik sna'el, ya me skananteybeyex te awot'anike sok te snopjibal awu'unik ta swenta te Cristo Jesuse.JAUK ME YA ANOPIK IN TO 8Ta slajibal ya jkalbeyex jkermanotak, spisil te beluk smelelile, spisil te beluk ich'bil ta muk'e, spisil te beluk toje, spisil te beluk ma kapal ta mulile, spisil te beluk ay yutsile, spisil te beluk lek sk'oplale, teme ay beluk lek ta pasele, teme ay beluk ya x-alot yutsil sk'oplale, jauk me taluk ta ajolik spisil in to. 9Te beluk la anopike sok te beluk la awich'ike, te beluk la awaiyik stojole sok te beluk la awilik ta jtojole, pasaik me spisil in to, jich te Dios yu'un te lamal k'inale ya me sjoinex.TE MAJT'ANIL YU'UN TE FILIPOETIKE 10Te jo'one bayal sbujts' jkot'an ta swenta te Jkajwaltike, melel ja yu'un te la acha' ana'onike. Ya jna' te la ana'onike, jauk me to ma ba wejt' awu'unik te bin ut'il la akoltayonike. 11Ma jauk ya jkal yu'un te mayuk beluk ay jku'une. Melel nojp'enix jku'un te binax jkot'an yu'un te beluk ay jku'une. 12Ya jna' xkuxinon ta me'bal sok ya jna' xkuxinon te k'alal bayal beluk ay jku'une. Ta spisil te beluk aye, nojp'enix jku'un, chikan te bi jkilel ayone, teme nojel te jch'ujt'e o teme ayon ta wi'nale sok teme ay bayal beluk ay jku'une o teme mayuk beluk ay jku'une. 13Spisil ya xju' jku'un spasel ta swenta Cristo te mach'a yak'ojbon yip jkot'ane.14Jauk me to, lek te la akoltayonik te k'alal ay jwokole. 15Ja'ex, filipenseetik, ya ana'ik te k'alal jajch' ta alel te lek yach'il k'ope, te k'alal la jkijk'tey te Macedonia, mayuk yan ch'uunjeletik la skoltayon yu'un te beluk tuun jku'une, ja'ex nax te la akoltayonike. 16Te k'alal ayon ta lum Tesalónica, te ja'exe ma junuk nax buelta la atikunbonik tel te beluk tuun jku'une. 17Ma jauk nax ay ta jkot'an te majt'anile. Ja bayal sk'oplal ta jkot'an te yakuk x-esmaj te majt'aniletik ta atojolike.18Te jo'one jkich'ojix spisil te beluk la atikunbonik tel sok bayalix beluk ay jku'un. Te jo'one lek ayonix. Jich la jkich'ix te beluk la atikunbonik tel sok te Epafroditoe.Te majt'anil te la atikunbonik tel, xuk'et nax sbujt' ta stojol te Diose, jich te bit'il milbil majt'anile. 19Te Dios jku'une, ya me yak'beyex spisil te beluk ya xtuun awu'unike swenta te yutsil sk'ulejal te Cristo Jesuse. 20Jich ta ora to ayuk me yutsilal ta sbajt'el k'inal te Jtatik Dios jku'untik. Jichuk.SLAJIBAL SPATJIBAL OT'ANIL 21Ak'beya me spatjibal yot'anik te ch'uunjeletik ta swenta te Cristo Jesuse. Ya stikunbeyex tel spatjibal awot'anik te jkermanotaktik te sjoinojonik le' in to. 22Sok la stikunbeyex tel spatjibal awot'anik spisil te mach'atik ch'uunjeletike, Ja k'axem to xan te mach'atik ayik ta abatinel ta sna te muk' ajwalil Césare. 23Aka sjoinex te yutsil yot'an te Jkajwaltik Jesucristo ta swenta te Espíritu yu'une.