Tzeltal de Oxchuc: Bible for Santiago

Formatted for Translators

©2022 Wycliffe Associates
Released under a Creative Commons Attribution-ShareAlike 4.0 International License.
Bible Text: The English Unlocked Literal Bible (ULB)
©2017 Wycliffe Associates
Available at https://bibleineverylanguage.org/translations
The English Unlocked Literal Bible is based on the unfoldingWord® Literal Text, CC BY-SA 4.0. The original work of the unfoldingWord® Literal Text is available at https://unfoldingword.bible/ult/.
The ULB is licensed under the Creative Commons Attribution-ShareAlike 4.0 International License.
Notes: English ULB Translation Notes
©2017 Wycliffe Associates
Available at https://bibleineverylanguage.org/translations
The English ULB Translation Notes is based on the unfoldingWord translationNotes, under CC BY-SA 4.0. The original unfoldingWord work is available at https://unfoldingword.bible/utn.
The ULB Notes is licensed under the Creative Commons Attribution-ShareAlike 4.0 International License.
To view a copy of the CC BY-SA 4.0 license visit http://creativecommons.org/licenses/by-sa/4.0/
Below is a human-readable summary of (and not a substitute for) the license.
You are free to:
The licensor cannot revoke these freedoms as long as you follow the license terms.
Under the following conditions:
Notices:
You do not have to comply with the license for elements of the material in the public domain or where your use is permitted by an applicable exception or limitation.
No warranties are given. The license may not give you all of the permissions necessary for your intended use. For example, other rights such as publicity, privacy, or moral rights may limit how you use the material.

Santiago

1SPATJIBAL OT'ANIL.1Jo'on Santiagoon, yabaton te Diose sok uuk te Kajwaltik Jesucristoe, ya jpatbeyex awot'anik ja'ex te lajchey tul te sts'umbalex Israel te pujk'emex bael ta spamal te balumilale. TE SBIJIL OT'ANIL TE YA XTAL TA STOJOL TE DIOSE. 2Jkermanotak ayuk me sbujts' awot'anik te k'alal ya xtal bayal awokolike, 3melel ja na'ojik te k'alal ya xtal ilbeyel te xch'uunjel awot'anike, ja me ya ataik xan yip te awot'anik a.4Jich yu'un aka me yich' yip te awot'anik ta sk'asesel te awokolike, jich me ya ats'aktesik te awat'elike, swenta yu'un ya xch'iex ta k'axem to xan ta stojol te Diose, ma me ayuk beluk ya spas falta awu'unik. 5Jauk me to teme ay mach'a mayuk sbijil yot'ane, aka me sk'anbey te Dios te ja ya yak' stukele, k'anbeyaik me, jich me ya yak'beyex, ma bisbiluk nax ya yak' stukel sok ma ba amen ya yaiy teme la yich' k'anbeyele.6Jauk me to, ayuk me xch'uunjel awot'anik te k'alal ya ak'anike, manchuk me xchebetuk awot'anik, melel te mach'a xchebet yot'ane jich me pajal k'oem te bit'il ya xtal-xbajt' nax yu'un te ik' te sbul te mare. 7Te mach'a jich ay te yot'ane, ma me akuyik te ay beluk ya x-ak'botik yu'un te Kajwaltike; 8Te ants-winik te mach'a xchebet yot'ane, janix me jich ma jun yot'an ta xkuxlejal.TE ME'BAETIKE SOK TE K'ULEJETIKE 9Te kermanotik te mayuk beluk ay yu'une binuk nax me yot'an, melel te Diose ya xtoyesbot sk'oplal yu'un, 10yan te mach'a k'uleje aka me pek'eluk ya yak' sba, melel jich ya xlaj bael te bit'il te'eltik nichime te ajk'nax ya xlaje. 11Te k'alal ya xlok' tel te k'aale ya xtulanaj tel, ja yu'un te wamaletike ya xkajik ta takejel sok nix uuk te nichime ya xtakej koel, jich ya xlaj te yutsilale. Janix jich uuk te mach'atik k'ulejik, ja ya xmilotik bael yu'un spisil te yat'elike.AKA KUJCH'UK JKU'UNTIK TE YILJIBAL OT'ANILE. 12Binax me yutsil te winik te mach'a ya sts'ijk' yu'un spisil te wokolile, melel teme ju' yu'un sts'ikele ya me x-ak'botik te korona yu'un te kuxinel ta sbajt'el k'inal, ja te albilix te ya yich'ik te mach'atik sk'anojik te Diose. 13Te k'alal ya xtal te yiljibal awot'anik yu'un te mulile, ma me awalik: "Jai yiljibal jkot'an to, ja la yak'bon tel te Kajwaltike," melel te Diose ma xch'uun sujel ta mulil sok ma ba ya sujwan ta spasel te beluk amene.14Te beluk ya snopik ta yot'anik ta tulutul te ants-winiketike, janix me ya yich' ilbeyel yot'anik yu'un sok ya xnitot bael ta spasel te beluk amene, sok janix me ya x-ik'ot bael ta ch'ayel yu'un. 15Ja yu'un ta patil, te beluk ma lekuk ta pasele, neel me ya xtal ta yot'anik, ta patil ya me xchiknaj ta yat'elik, sok teme muk'ubix a, ja me ya yak'ex bael ta lajel sbajt'el k'inal. 16Ma me apas abaik ta lot, jkermanotak te k'uxex ta jkot'ane.17Spisil te beluk lek jkich'ojtike sok te majt'aniletik te jelawen yutsile koem tel ta ch'ulchan, ja yak'oj tel te Jtatik Dios te ja spasoj spisil te beluk ya xojobtes te balumilale. Te Diose ma ba ya xjelon stukel, stalel ay, sok ma ba ya xyanaj jich te bit'il snojk'teal te beluk pasbil yu'une. 18Te Diose ja la stsa te la yak'botik kuxinel ta swenta te smelelil k'ope, yu'un me jich ya xk'ootik te bit'il sbabial yal-snich'nabe.TE MACH'A YA XCH'UUNIK SPASEL TE SK'OP TE DIOSE 19Ja na'ojik me stojol spisil in to, jkermanotak te k'uxex ta jkot'ane. Spisil te ants-winiketike, yakuk me sna'ik xch'amel yaiyel stojol spisil te ayeje, yakuk me stsajtey sbaik te k'alal ya xk'opojike, sok manchuk me ya x-ilinik ta ora nax, 20melel te yilimba te ants-winike ma ba ya stak' x-at'ej ta ba ay te toj yat'el te Diose. 21Jich yu'un, ijk'teyaik me spisil mulil sok te beluk ma lekuk ta pasel te ayik ta sba te balumilale, sok pek'el me ya awak' abaik te k'alal ya awich'ik albeyel te sk'op te Diose, te janax ya xju' yu'un te ya yak' te ya xkol te ach'ulelike.22Ch'uunaik me ta spasel te sk'op te Diose, ma me jauk nax te ya awaiyik stojole, ma me apas abaik ta lot ta ja'ex naxe. 23Melel te mach'a janax ya yaiy stojol te sk'op te Diose, jauk me to, ma ba ya xch'uun spasel, jich k'oem te bit'il tul winik te ya yil sba ta bay espejo. 24Ya yil te sit yelawe, jauk me to te k'alal ya xlok' baele, ora nax ya xch'ay ta yot'an te bin yilele. 25Yan te ants-winik te mach'a ya snop ta lek te sk'op te Diose, te ja mantalil te ya yak' kolele, sok nix teme ma jauk nax te ya yaiy stojole; jai winik to ch'ultesbil me ya xk'ot ta spisil te beluk ya spase.26Te mach'a skuyoj sba ta ch'uunjele, jauk me to ma ba ya sna' skomel te sk'opjele, yak me ta spasbel sba ta lot stukel, sok jontol te ch'uunjele. 27Te bit'il ay ta xch'uunel ta lek te Diose sok te ma ba kapbil ta mulil te yiloj te Jtatik Diose, ja in to: Ja te ya jk'uxtaytik te mach'a me'ba aletike sok te mach'atik me'ba antsetik te k'alal ay swokolike, sok te ma yak' sbaik ta tsalel yu'un te beluk ma lekuk ta pasel le' ta sba te balumilale.
2MA ME ATSAIK TE MACH'A LEK YA AWILIKE.1Jkermanotak, ma me tsabiluk nax awu'unik te mach'a lek ya awilike, melel te ja'exe ay me xch'uunjel awot'anik ta swenta te Jkajwaltik Jesucristoe, te ja ay yutsilal stukele. 2Teme ay mach'a ya x-och bael te banti tsobolexe, te slapoj k'oel lekil sk'u'-spak' sok teme slapoj ch'ojk'owil te pasbil ta oroe, janix jich teme och bael tul winik te me'bae sok teme slapoj k'oel sk'u'-spak' te mayuk stulale, 3teme janax bajt' ta awot'anik yilel te mach'a lek slapoj te sk'u'-spak'e, sok teme jich ya awalbeye: "Wokoluk, najk'anaba le' in to, ta bay lekil naktibal," jauk me to teme jich ya awalbey te me'ba winike: "Te ja'ate, baan tejk'anaba lum to o naklan ta lum," 4¿ma ba yakatikix ta slikel mulil abi, sok ma ba yakukatikix k'atbujel ta chajp'anwanej ta swenta te ma lekil snopjibal awu'unike?5Aya awaiyik stojol, jkermanotak te k'uxex ta jkot'ane, ¿ma ba jauk tsabilik yu'un Dios te me'baetik te leik ta balumilal to te ja k'ulej ya xk'otik yu'un te xch'uunjel yot'anike sok te ja ya yich'ik pajel chawej te beluk k'axel albil yu'un te Dios te mach'a sk'anojike? 6¡Jauk me to te ja'exe la awileyikix te me'baetike! ¿Ma ba jauk te k'ulejetik te ya yak'beyik swokolik sok ma ba jaukik te ya yik'ik bael ta bay te chajp'anwanejetike? 7¿Ma ba jauk te k'ulejetik te ya sbol k'opteyik te yutsil sbiil te Jkajwaltik te mach'a ik'otikix yu'une?8Jauk me to teme ya ach'uun spasel te lekil mantalil te ts'ibubil ta sjun te Diose: "K'UX ME YA AWAIY TE APAT AXUJK' JICH TE BIT'IL K'UX YA AWAIY ABAE," lek te jich ya apase. 9Jauk me to teme tsabil nax awu'un te mach'a lek ya awile, yakat me ta spasel mulil abi, ja yakatik stael amulik te la ak'axintesbeyik te smantal te Diose.10¡Te mach'a ya xch'uun spisil te mantalil yu'un te Diose, jauk me to teme la xk'axintey junuk te mantalile, la me xk'axintey spisil abi ! 11Janix stukel te Dios te jich la yale: "MA ME AWAIY MULWEJ," sok jich la yal xan: "MA ME AWAIY MILAW." Teme ma ba la awaiy mulweje, jauk me to teme la awaiy milawe, la me ak'axinteyix spisil te mantalil yu'un te Dios abi.12Jich yu'un, k'opojan me ta lek sok ch'uuna me spasel te beluk leke, jich te bit'il te mach'atik nopol ya x-ich'otik ta k'op yu'un te mantalil yu'un te kolele. 13Melel te mach'a mayuk yutsil yot'an ta stojol te yermanoe jich me mayuk yutsil ot'anil ya stauk te k'alal ya yich' ich'el ta k'ope. ¡Yan te mach'a ay yutsil yot'an ta stojol te yermanoe ya me yaiy tsalaw te k'alal ya yich' ich'el ta k'ope!LAJEM TE XCH'UUNJEL OT'ANIL TEME MAYUK YAT'ELULE. 14¿Ja ba lekilal to, jkermanotak, teme ay mach'a ya yal te ay xch'uunjel yot'ane, jauk me to teme mayuk yat'elule? ¿ya ba xju' ya xkol yu'un te xch'uunjel yot'ane? 15Teme ay tul jkermanotik winik o jkermanatik ants te ay swokol yu'un te mayuk sk'u'- spak' sok mayuk swe'el ta jujun k'aale, 16teme ay mach'a jich ya yalbeye: "Lamal me k'inal ya xbaat, lapame a k'u', k'ixneame aba sok we'-uch'ajan me," jauk me to teme ma la awak'bey te beluk ya xtuun yu'un te sbak'etale, ¿ay ba stuul ya xk'ot abi ? 17Janix jich te xch'uunjel ot'anile, teme mayuk te yat'elule, lajem abi.18Jich yu'un teme ay mach'a jich ya yale: "Te ja'ate ay xch'uunjel awot'an yan te jo'one ay jkat'el. "Ak'bon jkil te xch'uunjel awot'an te mayuk yat'elule, te jo'one ya jkak'bat awil te xch'uunjel jkot'an ta swenta te jkat'ele. 19Te ja'exe ja ach'uunejik te junax te Diose; lek ay te bit'il ach'uunejike. Jauk me to janix jich xch'uunejik uuk te pukujetike sok ya xnijk' yot'anik yu'un. 20¿Yu'un ba ya ak'an ana' stojol, winik te mayuk snopjibal awu'une, te ma xtuun te xch'uunjel ot'anil teme mayuk yat'elule?21¿Ma ba jauk toj ilot yu'un Dios ta swenta yat'el te jtatik Abraham, te k'alal la yak' ta skajtijib majt'anil te Isaac te ja tul snich'ane? 22La awil te bit'il te xch'uunjel yot'an te Abrahame, te la yak' ta ilel ta yat'el sok ta swenta xch'uunjel yot'an la sta te beluk sk'anoj ta yot'ane. 23Te beluk ts'ibubil ta sjun te Diose k'ot ta pasel te k'alal jich ya yal: "TE ABRAHAM LA XCH'UUNBEY SK'OP TE DIOSE, JICH LA YICH' ALBEYEL SK'OPLAL TE TOJ STUKELE." Te Abrahame ja la yich' albeyel te ja' sjoy sba sok te Diose. 24La awilikix te ja'exe, ta skaj te yat'el te tul winik te toj la yich' ilel yu'un te Diose, ma jauk nax yu'un te xch'uunjel yot'ane.25Janix jich, ¿ma ba jauk te mulawil ants te Rahab sbiile, te toj la yich' ilel yu'un te Diose, ta swenta te yat'ele, te k'alal la yik' ochel te tsajtaywanejetik sok te la stikun bael ta yan bee? 26Melel jich te bit'il te bak'et te mayuk s-espíritue, lajem k'oem abi, janix jich uuk te xch'uunjel ot'anile teme mayuk yat'elule, lajem k'oem abi.
3BIT'IL AY SK'OPLAL TE JK'OP JKAYEJTIKE.1Kermanotak ma me apisilik ya akuy abaik te ya stak' ya xbijup'teswanexe, ya me ana'ik te ja me tulan xan ya yich'ik ich'el ta k'op te mach'atik ya xbijup'teswane. 2Melel jpisiltik bayal buelta ya xch'ayotik. Teme ay tuluk te ma xch'ay sok te sk'ope. Ja in to ja tul winik te mero toje, te ya xju' stsajtebel sba sok te sbak'etale.3Jich yu'un teme ya jkak'beytik xchujk'il yej te kaballoetike ya me xch'uunbotik te jmantaltike, sok ya me stak' jtojtestik skojt'ol te sbak'etale. 4Ilawilik uuk te barkoetike, manchuk me mero muk'ik sok manchuk me tembil yu'un tulan ik', ja tojtesbil yu'un te tsael nax te stijibale (timón), chikan te banti ya sk'an ya stij bael te mach'a yak ta stijele.5Janix jich uuk, te jkak'tike ch'in xut'il ta bay te jbak'etaltike, jauk me to ya stuy sba ta k'op. ¡Ilawilik te te bit'il ya xk'ajk' te te'eltike ja me ya xk'ajk' yu'un te ch'in snich k'ajk'e! 6Janix jich te jkak'tike jich k'oem te bit'il k'ajk'e, te nojel ta mulil te ak'bil ta jbak'etaltike, te ya sk'exlaltes spisil te jbak'etaltik sok te ya xjajch' sboltes spisil te jkuxineltike, sok nix te k'ajk' te tilem tel ta bay te k'atinbake.7Spisil ta chajp' ja'mal chambalametik, te'eltik mutetik, chambalametik te ya stas sbaik ta lum sok te xchambalamul te muk'ul ja'etik te pasbilikix ta mantale sok te spasojix ta mantal te ants-winiketike, 8Jauk me to mayuk tuluk winik te ya xju' ya spas ta mantal te yak'e; te ma xju' ta pasel ta mantale, te bayal sbolile sok te ya xmilwan baele.9Ta jkak'tik ya jkalbeytik yutsil sk'oplal te Jkajwaltike sok te Jtatik Diose, sok janix ya jbol k'optaytik a te ants-winiketike, te mach'a jich yilelik te bit'il te Diose. 10Ta junax jketik ya xlok' tel te lekil k'ope sok te bolk'ope. Jkermanotak ma me jichuk ya sk'an ya jpastik.11¿Ya ba xju' ya xlok' lekil ja' sok ch'aal ja' ta bay slok'ib te ja'e? 12Jkermanotak, ¿ya ba xju' te ya yak' aceituna te higo te'e, sok ya ba xju' ya yak' higo te ts'usubil te'e? janix jich uuk ma stak' te slok'ib ja' te yich'oj atsame te ya slok'es tel te lekil ja'e.TE BIJIL OT'ANIL TE TALEM TA CH'ULCHANE. 13¿Mach'a te ay sbijil yot'an ta awolilik sok te ya xk'ot ta yot'ane? aka yak' ta ilel te lekil kuxinel te bit'il ay sbijil yot'an ta stojol te ants-winiketike. 14Jauk me to teme ay mach'a janax baem ta yot'an te paechale sok teme ay mach'a ay sbik'tal yot'ane, ma me awich' abaik ta muk' yu'un sok ma me awaiyik lot ta skontroinel te beluk smelelile.15Ja in to ma jauk te bijil ot'anil te talem ta ch'ulchane, ja yu'un te balumilale, ma jauk yu'un te Ch'ul Espíritue, ja yu'un te pukuje. 16Te banti ay te paechale, sok te sbik'tal ot'anile, ay me jinel le'a sok ja me ya spasik spisil te beluk amene. 17Jauk me to te sbijil ot'anil te talem ta chulchane, ma kapbil ta mulil stukel, lamal me k'inal yu'un, lek me yot'an, ay yutsil yot'an, ya sna' yolil jbatik, sok lek te yat'ele, ma tsabiluk nax yu'un te ants-winike, sok smelelil ya xk'opoj. 18Te mach'a ay lamal k'inal ta stojole, jaik me te mach'atik ya spas te beluk toj ta pasele, ja te beluk albilik yu'un te Diose.
4MA ME PAJALUK JKOT'ANTIK SOK TE MACH'ATIK AYIK TA BALUMILALE.1¿Banti ya xtal awalik te k'op te ya atsak abaik yu'une? ¿Ma ba jauk ta sbik'tal awot'anik te ya atsak abaik sok spisil te abak'etalike? 2Te ja'exe ya ak'anik te beluk mayuk awu'unike. Te ja'exe ya xmilwanex sok ja ya at'unik te beluk ma xju' awu'unik staele. Ya atsak abaik sok ya awut abaik, ma ataik te beluk ya ak'anike melel ma jauk ya ak'anbeyik te Diose. 3Te ja'exe ya ak'anik jauk me to ma x-ak'botex, melel ma ana'ik sk'anel, ja ya ak'anik te beluk ya sk'an te abak'etalike.4¡Ja'ex te mulawilexe! ¿Ma ba ana'ik teme jun awot'anik sok te balumilale ja la akontroinik te Dios abi? jich yu'un, te mach'a la snop sjoin sba sok te balumilale ja me la skontroin te Dios abi. 5¿Yu'un ba akuyojik te mayuk swentail te beluk ts'ibubil te k'alal la yal te la yak'botik te Ch'ul Espíritu ta jtojoltik, te ja la sk'anotik ta k'axem to xane?6Jauk me to te Diose ya yak' xan bayal yutsil yot'an, ja yu'un te jich ts'ibubil jilele: "TE DIOSE MA SK'AN TE MACH'A YA STOY SBAE, YAN TE MACH'A PEK'EL YAK'OJ SBAE YA STA UTSILAL." 7Jich yu'un, k'axel xa awak' abaik ta stojol te Diose. Pasaik ta kontro te pukuje jich me ya xlok' bael ta anel ta atojolik.8Noptsajanik tel ta stojol te Diose, jich me ya x-oxtaj tel ta atojolik uuk. Sapaik te ak'abik, ja'ex te mulawilexe, lekuk me ay te awot'anik, ja'ex te chalam awot'anike. 9¡Mel-awot'anik, sut awot'anik sok ok'anik yu'un! Te atseejike aka k'atbujuk ta ok'el, te sbujts' awot'anike aka k'atbujuk ta mel-ot'an. 10Bik'tajanik ta stojol te Diose, jich me ya awich'ik toyesbel ak'oplalik yu'un.MA ME XA AWA'AN TE AWERMANOE. 11Kermanotak ma me alebey aba amulik. Te mach'a ya slebey smul te yermanoe sok teme la slikbey smule, ja la skontro-k'optayix a te mantalile, sok ja la slikix mulil ta stojol Dios abi. Teme ja'at kajal la awak' aba yu'un te mantalile, ma me yakat ta xch'uunel te mantalile, ja me yakat ta slikel mulik abi . 12Jauk me to janax ay tul te mach'a ya slik te mulile sok te yak'oj te mantalile, ja te Diose, ja ay yu'el yu'un te ya xkoltaywane sok te ya xjinwane. ¿Mach'a ya akuy aba te ja'at te ya alikbey smul te awermanoe?MA ME YA ATUY ABA YU'UN TE BELUK YA APAS TE PAJELE. 13Aya awaiyik stojol, te ja'ex te jich ya awalike: "Ta ora to sok te pajele ya me xbootik ta banti jun muk'ul pam lum, sok ya me xjalajotik junuk ja'wil le'a, ya me jkaiytik chombajel, sok ya me jtatik tak'in le'a. 14¿Mach'a ya sna te beluk ya xk'ot ta pasel te pajele, jalbal k'aal ya akuyik te ya xkuxinexe? Melel te ja'ate jich k'oemat te bit'il te sabul te balumilale te ajk'nax ya xtup' baele.15Jauk me to jich me ya sk'an ya awalik: "Teme jich sk'anjel yot'an te Kajwaltike, ya me xkuxinotik sok ya me jpastik in to." 16Jauk me to te ja'exe janax ya atoy abaik yu'un te beluk ya achapike. Spisil te toybajele malekuk. 17Jich yu'un te mach'a ya sna' spasel te beluk leke, jauk me to teme ma la spase; la staix smul abi.
5YA YICH'IK AK'BEL SNA'IK STOJOL TE K'ULEJETIKE.1Laik me ta ora, ja'ex te k'ulejexe, awunanik me ta ok'el yu'un te wokolil te kechel ya xtal ta atojolike. 2Te ja k'ulejalike k'aemix stukel sok lajemix ta joch' te ak'u'-apak'ike. 3Te oro sok te plata awu'unike mayukix stuul, sok te bit'il tsaek'ubenixe ja me ya yak'ex ta k'abal sok ya me slajimbeyex abak'etalik jich te bit'il k'ajk'e. Te ja'exe ja la atsobik te ak'ulejalik manchuk me slajibalix k'aal.4Ilawilik, te yakik ta ok'el te mach'atik at'ejik ta ak'inalik te la yaiyik k'ajoje, melel ma ba la atojik, tulan yakik ta ok'el. Te yok'elik te mach'a la sk'ajik te awlile k'otix ta xchikin te Kajwaltik te spisil ya xju' yu'une. 5Te ja'exe kuxulatik ta lek ta sba te balumilale sok te bit'il ja la apasik te beluk la sk'an awot'anike. Te ja'exe jich k'oemex te bit'il wakax te neel ya yich' jujbtesel, te nopol ya xbajt' ta milele. 6Te ja'exe la alebeyikix smulik sok ja la amilikix te mach'atik toj yat'elike, ja te mach'a ma la sk'an skoltay sbaik ta k'ope.AYUK ME SMALIB AWU'UNIK SOK K'OPONAIK ME TE DIOSE. 7Jauk me to ayuk me smalib awu'unik, jkermanotak, ja to te bin ora ya xcha' tal te Jkajwaltike, jichukex me te bit'il mach'a yat'elinoj sk'alteyel te sk'inale, jun me yot'an yak ta smaliyel te bin ora ya sk'ajbey te sit te awlil te la sts'une sok ay me bayal smalib yu'un, te bin ora ya xtal te ja'ale. 8Jichukex me uuk, ayuk me bayal smalib awu'unik; Chajp'anameik ta lek te awot'anike, melel nopol ya xcha' sujt' tel te Jkajwaltike.9Jkermanotak ma me xa aleuley abaik ta k'op, jich me ma xk'axex ta chajp'anel a. Ilawilik, tek'el meix ta ti'nail te mach'a ya slik te mulile. 10Jauk me ya anopik jkermanotak, te bit'il k'ax swokolik sok te bayal smalib yu'unik te alwanejetik te k'opojik ta sbiil te Jkajwaltik ta namey k'inale. 11Ilawilik, te jo'otike jich me ya jkalbeytik te mach'atik ma xlujp'ike, "ch'ultesbilik me." Te ja'exe ay la awaiyikix stojol sk'oplal te Job te bit'il la sts'ik spisil te swokole sok nix ya ana'ik te Jkajwaltik te ay beluk xchajp'anojbeyix a te Jobe, melel te Jkajwaltike nojel ta xk'uxul yot'an sok ya sna' yolil jbatik stukel.12Bayal me sk'oplal in to, jkermanotak, ma me xa wak'ik ta testigo te ch'ulchan-balumilale, sok ma me ayuk yan te beluk ya awak'ik ta testigoe. Te k'alal ya xk'opojexe, "Yak" xaex me teme jiche, teme majichuke "jooj", xiex me, jich me ma awich'ik kastigo abi.13¿Ay bal mach'a yak k'axel swokol? aka me sk'opon te Diose. ¿Ay bal mach'a binax yot'an? aka me sk'ajintey te Diose. 14¿Ay bal mach'a ay ta chamel? aka me yik' tel te ancianoetik yu'un te sna te Diose, sok yakuk me sk'oponbeyex Dios, sok te yakuk yak'beyex aceite ta swenta sbiil te Kajwaltike. 15Teme ay xch'uunjel yot'anik te k'alal ya sk'oponik te Diose, jich me ya xkol te mach'a ay ta chamele, sok ya me xjajch'esot yu'un te Jkajwaltike. Teme ay staoj smule, ya me spasbot perdón yu'un te Diose.16Jich yu'un, albey abaik teme ay amulike, sok jech k'oponbeya me abaik Dios, jich me ya awich'ik poxtayel a. Te k'alal ya sk'opon Dios te mach'a toj yot'ane bayal yip ya xk'ot. 17Te Elíase ch'ich'-bak'et uuk jich te bit'ilotike. La sk'opon Dios te manchuk ya yak' te ja'ale, jich ma la yak' ja'al oxeb ja'wil sok olil ta bay lum k'inal. 18Janix jich te Elíase la xcha' sk'opon te Diose jich cha' tal te ja'al ta balumilale sok te awal ts'unubile sitin yu'un.19Jkermanotak, teme ay mach'a la yijk'tay xch'uunel te Diose, jauk me to, teme ay mach'a la xcha' yik' tel sujt'ele, 20na'aik me stojol, teme la awik'ik lok'el tel tul mulawil ta ba ay te ch'ayele, la me akoltaybeyix te xch'ulel abi sok la me yich' pasbel perdón spisil te smule.