Tzeltal de Oxchuc: Bible for Hebreos

Formatted for Translators

©2022 Wycliffe Associates
Released under a Creative Commons Attribution-ShareAlike 4.0 International License.
Bible Text: The English Unlocked Literal Bible (ULB)
©2017 Wycliffe Associates
Available at https://bibleineverylanguage.org/translations
The English Unlocked Literal Bible is based on the unfoldingWord® Literal Text, CC BY-SA 4.0. The original work of the unfoldingWord® Literal Text is available at https://unfoldingword.bible/ult/.
The ULB is licensed under the Creative Commons Attribution-ShareAlike 4.0 International License.
Notes: English ULB Translation Notes
©2017 Wycliffe Associates
Available at https://bibleineverylanguage.org/translations
The English ULB Translation Notes is based on the unfoldingWord translationNotes, under CC BY-SA 4.0. The original unfoldingWord work is available at https://unfoldingword.bible/utn.
The ULB Notes is licensed under the Creative Commons Attribution-ShareAlike 4.0 International License.
To view a copy of the CC BY-SA 4.0 license visit http://creativecommons.org/licenses/by-sa/4.0/
Below is a human-readable summary of (and not a substitute for) the license.
You are free to:
The licensor cannot revoke these freedoms as long as you follow the license terms.
Under the following conditions:
Notices:
You do not have to comply with the license for elements of the material in the public domain or where your use is permitted by an applicable exception or limitation.
No warranties are given. The license may not give you all of the permissions necessary for your intended use. For example, other rights such as publicity, privacy, or moral rights may limit how you use the material.

Hebreos

1DIOS K'OPOJIX TA SWENTA TE SNICH'ANE1Ta namey k'inal te Diose la sk'opon te chichmamiletike ta swenta te alwanejetike, ma junuk nax buelta te k'opnotike sok yanyantik nax te bit'il k'opoje. 2Yan ta ora to te slajibal k'aal ayotike, ja la sk'opnotikix ta swenta te tul Snich'ane, te ja la yak'bey ta swenta spisil te beluk aye. Ta swenta te Nich'anile te la spas te Dios te ch'ulchan sok te balumilale. 3Te Nich'anile ja ya yak' ilel te yutsil xojobil te Diose, sok janix jich ya yak' ta ilel te pajal stalelike. Ja ta swenta te yu'el sk'op te ipajem spisil te beluk aye. Te k'alal ju'ix yu'un a te la spokbotik te jmultike, la snajk'an sba ta swa'el sk'ab te muk' Dios te ay ta ch'ulchane.KAJAL AY YUTSILAL TE NICH'ANILE, JA' PEK'EL TE CH'UL ABATE. 4Te Nich'anile ja kajal xan k'ot te bit'il te ch'ul abatetike, melel te Diose la yak'bey sbiil te kajal yutsilale, te bit'il ay yutsil sbiil te ch'ul abatetike. 5Melel ¿ay ba tuluk ch'ul abat te la yich' albeyel yu'un te Diose: ''TE JA'ATE JNICH'ANAT, TA ORA TO JO'ON ATATON K'OONIX.'' "JO'ON TATIL ME YA XK'OON YU'UN SOK JA' ME JNICH'AN YA XK'OT?''6Te k'alal tal ta balumilal te tul Snich'an te Diose jich la yal: ''SPISIL TE CH'UL ABATETIK YU'UN TE DIOSE, AKA YICH'IK TA MUK'.'' 7Yan te ch'ul abatetik jich la yalbey sk'oplal: '' TE DIOSE JICH LA YAK' TE PAJAL K'OEMIK SOK IK' TE CH'UL ABATETIKE, SOK TE ABATETIK YU'UNE JICH K'OEMIK TE BIT'IL TE K'AJK' TE YAK TA TILELE.''8Jauk me to jich ya yal ta swenta te Snich'ane: "JA'AT TE DIOSATE, TE YA X-AJWALINAT TA SBAJT'EL K'INALE. SOK TOJ TE BIT'IL YA X-AJWALINATE. '' 9JA YA AMULAN TE BELUK TOJ TA PASELE SOK ILEBIL AWU'UN TE BELUK MA LEKUK TA PASELE. JICH YU'UN DIOS, TE DIOS AWU'UNE, LA YICH'AT TA MUK' SOK JA LA YAK'BAT BAYAL SBUJTS' AWOT'AN, K'AX JICH TE BIT'IL TE AJOTAKE.''10''TA XJAJCH'IBAL, KAJWAL, LA AWAK'BEY YIPTIJIB TE BALUMILALE. JA YAT'EL AK'AB TE CH'ULCHANE." 11SPISIL YA XLAJ STUKEL, YAN TE JA'ATE JA TALEL AYAT TA SBAJT'EL K'INAL. MELEL SPISIL YA XLAJ SK'OPLAL JICH TE BIT'IL YA XPOKOB TE K'U'UL-PAK'ALE. 12JA'AT YA ME ABALBEEL JICH TE BIT'IL JUN PAK'E, JICH ME YA YICH'IK YANTESEL TE BIT'IL JUN K'U'UL-PAK'ALE. JAUK ME TO TE JA'ATE JA TALEL AYAT, TE AWAWILALE MAYUK SLAJIBAL STUKEL."13Jauk me to, ¿ay ba tuluk ch'ul abat te jich la yich' albeyel yu'un te Diose: "NAKLAN TA SWA'EL JKAB, JA TO TEME JO'ON LA JKAK' TE YA APECH' TA TEK'EL TE AWAJ KONTROE?" 14¿Ma ba jauk te ch'ul abatetik te ya xch'uunik te Diose, sok te tikunbilik yu'un te ya skananteyik te mach'atik ya staik te xkuxlejalike?
2MUK'UL JKOLELTIK1Jich yu'un, ya me sk'an ya jkich'tik ta muk' te beluk jkaiyojtik stojole, jich me ma ya jkijk'teytik te beluk jnopojtike.2Melel te sk'op Dios te la yich' alel yu'un te ch'ul abatetik ta sneelal toe, smelelil stukel ja yu'un te mach'atik ya sle smulike sok te ya xk'axintesik mantale, ya me yich'ik kastigo yu'un. 3¿Bit'il me ya stak' ya jkoltaybatik lok'el teme ma jch'uuntik te ay jun kolel te mero muk' stukele? jai to janix te Kajwaltik te la xcholbey sk'oplal ta sneelal te jkoleltike sok te mach'atik la yaiyik stojol te sk'ope, ja'ik la yalbotik te smelelil te k'op te beluk la yale. 4Janix te Diose la yak' ta ilel te senyailetik, te chajp' at'eliletik te la yak' ta ilel ta swenta te yu'ele, sok te la yak' majt'aniletik ta swenta te Ch'ul Espíritu chikan bit'il la sk'an yot'an stukele.TE MACH'A LA YAK' TE KOLELE. 5Melel te Diose ma la yak'bey te ya spasik ta mantal te ch'ul abatetik ta stojol te yach'il balumilale, te ja yakotik ta xcholel sk'oplale. 6Jauk me to, ay mach'a la yal ta sjun te Diose: ''¿BI SWENTAILUK AWU'UN TE ANTS-WINIK, TE YA ANA'ULEYE? ¿SOK TE YAL-SNICH'AN TE WINIK, TE YA YA'AN AWOT'AN YU'UNE?7PEK'EL LA AWAK' TEBUK TE ANTS-WINIKETIK YU'UNA TE CH'UL ABATETIKE; LA AWAK'BEY SKORONAIN TE AWUTSILALE SOK LA AWAK' ICH'EL TA MUK'. SPISIL JA LA AWAK'BEY TA SK'AB." 8Melel ja ta swenta te Dios te la yak' te ya spas mantal spisil te beluk aye. Mayuk beluk ma yak'oj te ya spas ta mantale. Jauk me to ta ora to, ma jkiltik te ch'uunbil te smantale.9Jauk me to te jo'otike ya jna'tik te ay tul te pek'el ak'ot jun chebuk k'aal ta stojol te ch'ul abatetike, ja bi ja te Jesuse, jauk me to ta skaj te k'ax swokol sok te laj ta milele, la yich' te skoronae te ay yutsilal sok la yich' ich'el ta muk'. Jich yu'un, ta swenta te yutsil yot'an te Diose, te Jesuse la yak' sba ta lajel yu'un te ants-winiketike. 10Melel te Diose ja yu'un spisil te beluk aye, ja ta swenta te pastaje, swenta yu'un jich ya stak' yik' tel a te yal-snich'ane sok te ya yik' bael ta utsilale. Ja yu'un te la yak' tul wolwanej te k'ax bayal swokol ta swenta te la yak'botik jkoleltik sbajt'el k'inale, ja te Jesuse.11Melel pajal ta xcha'chajp'al, te mach'a ya xch'ulteswane sok te mach'atik la yich'ik ch'ultesele, junax me te Statike. Jich yu'un te Nich'anile ma xk'exaw ta yalel te ja jkermanobatik soke. 12Jich ya yal: ''YA ME JKAK'AT TA ICH'EL TA MUK' TA STOJOL TE JKERMANOTAKE; YA ME JK'AJINTAYAT TA BAY YOLIL TE MACH'ATIK STSOBOJ SBAIKE.''13Sok jich la yal xan: ''AY SMUK'UL JKOT'AN TA STOJOL DIOS.'' Sok jich la yal xan: ''ILAWILIK, LE' AYON TO SOK TE ALNICH'AN TE LA YAK'BON TE DIOSE.'' 14Jich yu'un te bit'il ch'ich'-bak'et ayik te alnich'anetik yu'un te Diose, janix jich uuk ch'ich'-bak'et k'ot te Jesuse, swenta yu'un jich ju' yu'un tsalaw a ta swenta te laje, jich la stsal te yip te lajele ja bi ja te pukuje. 15Jich la spas ta swenta yu'un te la yak' ta libre te mach'atik mosoinbilik yu'un te ya xi'ik te lajel te jayeb k'aal kuxulik ta k'inale.16Ma jauk ta swenta te ch'ul abatetik te ya smel-yot'ane, jauk me to, ja ya smel yot'an yu'un te sts'umbal Abrahame. 17Jich yu'un puersa me la sk'an te jich k'ot te bit'il te yermanotake, swenta yu'un jich xk'ot ta muk' sacerdote, te ay xk'uxul yot'ane sok te jun yot'an ta stojol te Diose, jich me ya staik ta stojol Jesús te perdón yu'un te smulik te ants-winiketike. 18Melel te Jesuse k'ax swokol sok la yich' ilbel yot'an, janax stukel te ya xju' yu'un skoltey te mach'atik ya yich'ik ilbel yot'anike.
3TE JESUSE JA MUK' YU'UN TE MOISESE.1Jich yu'un, jkermanotak te ch'ultesbilexe, te ja'exe jun pajal ik'bilatik yu'un te Jkajwaltike. Ja me ya xbajt' ta awot'anik ta sna'uleyel te Jesuse, te ja muk' wolwanej puk k'op sok te ja muk' sacerdote yu'un te beluk jch'uunejtike. 2Melel ja jun yot'an ta stojol Dios te ja tsaot yu'une, jich te bit'il Moises te jun yot'an la yak' sba ta abatinel ta sna te Diose. 3Melel te Jesús la yich' ak'beyel bayal xan yutsilal a te bit'il te Moisese, melel te mach'a ya spas te wol nae k'ax jich ya yich' ak'beyel yutsilal a te bit'il te nae. 4Melel spisil te naetik te pasbile ay mach'a spasoj, jauk me to te mach'a spasoj spisile ja te Diose.5Jich te Moisese jun yot'an la yak' sba ta abatinel ta sna te Diose. Ja la yalbey sk'oplal te beluk ya yich' alel te pajel chaweje. 6Jauk me to te Cristo ja Nich'anil te ak'bil swentain te sna te Diose. Te jo'otike ja snaotik k'oem, teme jun jkot'antik ta xch'uunele sok te smuk'ul jkot'antik te stalel aye.MA ME TULANUK YA JKAK'TIK TE JKOT'ANTIKE. 7Ja swentail, te Ch'ul Espíritu te jich ya yale: ''YOTIK TO, TEME LA AWAYBEYIK TE SK'OPE, 8MA ME ATULANTESIK TE AWOT'ANIKE JICH BIT'IL LA SKONTROINONIK TE ACHICHMAMIKE, TE K'ALAL YORAIL TE YILJIBAL YOT'ANIK TA TAKIN JOCHOL K'INALE.9JA K'OT TA PASEL YU'UN TE ACHICHMAMTAK TE LA YILBONIK JKOT'ANE, SOK TE LA YILBONIK TE JKAT'EL CHA'WINIK (40)JA'WILE. 10JICH YU'UN, TE JO'ONE BOLOB JKOT'AN TA STOJOL TE ATS'UMBALIKE. JO'ON LA JKAL: ''SPISIL ORA JOWEJEM TE YOT'ANIKE. MA LA SNA'BONIK TE JBEE." 11JICH K'OT TA PASEL TE BELUK K'AXEL LA JKAL TE K'ALAL ILINONE: "MAYUK BI ORA YA X-OCHIK TA BAY ICH' LEWA JKU'UNE.''12Tsajteya me abaik, jkermanotak, mayuk me mach'a ay ta awolilik te mayuk xch'uunjel yot'anike, te ya sk'esbaik lok'el ta stojol te kuxul Diose. 13Jauk me to, jech muk'tesbey abaik awot'anik ta jujun k'aal, jich bit'il albil, ''YOTIK TO''; swenta yu'un ma me ayuk mach'a ya xtulnaj yot'an ta skaj te lo'layel yu'un te mulile.14Melel k'atbujotikix ta sjoy te Cristoe, teme k'axel jun jkot'antik ta stojol jich bit'il ta xjajch'ibale, jich nix ta slajibal. 15Ja ta swenta te jich albil jilele: ''YOTIK TO, TEME LA AWAYBEYIK STOJOL TE SK'OPE, MA ME TULANUK YA AWAK'IK TE AWOT'ANIKE JICH BIT'IL TE LA SKONTROINONIK TE ACHICHMAMIKE.''16¿Mach'a te la yaiybey stojol sk'op te Dios te patil la skontroinike? ¿Ma ba jaukik te mach'atik lok'ik tel ta Egipto ta swenta te Moisese? 17¿Mach'atik a te cha'winik ja'wil ilinem te Dios ta stojolike? ¿Ma ba jauk ta stojol te mach'atik la sta smulik te lajik jilel ta takin jochol k'inale? 18¿Mach'atik a te k'axel la yich'ik albeyel te ma x-ochik ta bay te ich' lewa yu'une, ma ba jaukik te mach'atik la sk'axintayik mantale? 19Le' ya jkiltik a te ma ju' yu'unik ochel ta bay te ich' lewa yu'un te Kajwaltike ta skaj te ma la sk'anik xch'uunike.
41Jich yu'un, ya me sk'an jtsajtaybatik jich me mayuk mach'a ya xch'ay jilel a te k'alal ya yich' tael te beluk yaloj te Diose, te ijk'teybil ta jwentatik te yakuk x-ochotik ta bay te ich' lewa yu'un te Diose. 2Melel la jkich'tikix albeyel te lek yach'il k'ope, jich nix te bit'il la yich' alel ta stojolike. Jauk me to mayuk sk'oplal bajt' yu'unik te mach'atik la yaiyik stojol te sk'ope, melel ma la xch'uunik jich bit'il te mach'atik la xch'uunik te mantale.3Melel te jo'otike, te mach'a jch'uunejtikix te mantalile ya me x-ochotik bael ta banti ya jkich'tik te lewae, jich bit'il yaloj: "TE K'ALAL ILINEMON A, LA JKAL TA JAMAL, MAYUK BIN ORA YA XJU' X-OCHIK TA BAY ICH' LEWA JKU'UN.'' Jauk me to, te Diose laj yot'an ta at'el te k'alal laj yot'an ta spasel te balumilale. 4Melel ay banti ts'ibubil ta sjun te Dios te jich ya yal ta swenta te sjukebal k'aale: ''TE DIOSE LA YICH' LEWA TA SPISIL YAT'EL TA SJUKEBAL K'AAL.'' 5Jich la yal ta yan buelta: ''MAYUK BIN ORA YA X-OCHIK TA BAY ICH' LEWA JKU'UN.''6Melel, ay to sk'an te ya x-ochik cha'ox tul ta ba ay te ich' lewae, jauk me to ay bayal te israelitaetike, te la yaiyik stojol te lek yach'il k'op ta sneelal toe, ma ba ochik stukelik ta skaj te la xk'axinteyik te mantale, 7Te Diose la slebey yan buelta sk'alelal te jich la yalbey sbiile: ''YOTIK TO.'' K'axemix bayal k'aal te k'opoj ta swenta te Davide, jich te bit'il albil ta sneelal toe: ''YOTIK TO TEME YA AWAYBEYIK STOJOL TE SK'OPE, MA ME TULANUK AWAK'IK TE AWOT'ANIKE.''8Te jauk la yak'beyex awich'ik lewa te Josueje, te Diose ma ba la slebey yan sk'alel te jichuke. 9Jauk me to ay to jun k'aal yu'un te ich' lewa te k'ejbil xan yu'un te slumal te Diose. 10Melel te mach'a ya x-och ta bay ich' lewa yu'un te Diose, janix jich ya yich' lewa yu'un te yat'elike, jich bit'il la yich' lewa te Diose. 11Jich yu'un, yakuk me jk'antik te ya x-ochotik ta bay te ich' lewae, swenta yu'un mayuk mach'a ya xyal te bit'il yalik te yantik yu'un te ma la xch'uunik te mantale.12Melel te sk'op te Diose kuxul sok bayal yip stukel, sok k'axem to xan ya xbojwan te bit'il espada te cha' mejch' yee. Ja in to ya x-och bael ja to k'alal ya set' k'axel te ch'ulelale sok te espíritue sok ta k'alal yutil te baketike. Ya xju' yu'un ya sna' te beluk ya snop ta sjol sok te beluk ya sk'an ya spas te ants-winiketike. 13Melel mayuk te beluk pasbil te mukbil ta stojol te Diose. Jauk me to, spisil jamal ya yil ta sit stukel te mach'a ya xk'o jkak'beytik kuenta te jkat'eltike.JESÚS TE MUK' SACERDOTE. 14Jich yu'un, ay muk' sacerdote jku'untik te mach'a baem ta ch'ulchane, ja te Jesús te snich'an te Diose, junuk me jkot'antik te bit'il yakotik ta xch'uunele. 15Melel te jo'otike mayuk muk' sacerdote jku'untik te ma sna'botik jkolilbatik yu'un te teb jtaeltike. Yan bi ay sacerdote jku'untik te la yich' ilbel yot'an jich bit'il te jo'otike, jauk me to ma la sta smul stukel. 16Jich yu'un noptsajukotik bael sok smuk'ul jkot'antik ta smuk'ul snaktijib te Dios te bayal yutsilal stukele, jich ya jkich'tik k'uxtayel yu'un, sok ya jtatik yutsil yot'an yu'un te k'alal ay jwokoltike.
51Melel spisil te muk' sacerdoteetik te tsabilik ta yolil te ants-winiketike, ja la yich'ik yat'elik yu'un te ya skoltay ta k'op te ants-winiketik ta stojol te Diose, jich me ya xju' yak'bey smajt'an, janix jich te milbil majt'aniletik, swenta yu'un te smulike. 2Ya xju' yu'un stojtesel sok lamal k'inal te mach'atik ma sna'ik k'inale sok nix te mach'a ch'ayemike, te mayuk yip yot'anike. 3Jich yu'un ya me sk'an ya yak' milbil majt'aniletik yu'un te smule, jich nix te bit'il ya spas yu'un te smul te ants-winiketike.4Mayuk me mach'a jich nax ya yich' yat'el ta muk' sacerdoteil, janax me te mach'a ik'bilik yu'un te Diose, jich bit'il la yich' ik'el te Aarone. 5Janix jich uuk, te Cristoe ma ba la sle ich'el ta muk' te k'alal och ta muk' sacerdoteile. Jich albot yu'un te Diose: "TE JA'ATE JNICH'ANAT ME; TA ORA TO JO'ON ME ATATON."6Jich nix te bit'il ya yal yan buelta ta sjun te Diose: ''TE JA'ATE SACERDOTEAT SBAJT'EL K'INAL, JICH BIT'IL AT'EJ TE MELQUISEDEKE.''7Te jayeb k'aal la yich' te sbak'etal te Cristoe, ma la skom sba ta sk'oponel te Diose sok la sbik'tal k'optey ta aw sok ok'el ta stojol te Diose, te janax stukel ya xju' yu'un te ya skoltey lok'el tel ta lajele. Sok aiybot sk'op yu'un te la yich' na'bel yobolil sbae. 8Jayebuk Nich'anil a, le' la snop a te xch'uunel mantal ta swenta te bayal k'ax swokole.9Janax stukel te toj ak'ot yu'un te Diose sok ja ak' kolel k'ot yu'un spisil te mach'atik ya xch'uunbeyik te smantale, ta swenta te kuxlejal sbajt'el k'inale. 10Ja ak'bot yich' yat'el yu'un Dios ta muk' sacerdoteil jich bit'il te Melquisedeke.YA ME JTSAJTEYBATIK YU'UN TE MACH'ATIK YA XCH'AY XCH'UUNJEL YOT'ANIKE. 11Te jo'otike bayal beluk ya jkaltik ta swenta te Jesuse, jauk me to wokol ta cholel yu'un te ja'atik ma xtojobatik ta yaiyel stojole.12Melel te ja'exe ya me sk'an te yakukatikix bijubteswanej te jichuke, jauk me to te ja'atike ya to ak'anik te ya awich'ik xan bijtesel te bit'il ay ta xjajch'ibal te sk'op te Diose. ¡Te ja'exe ya to ak'anik chu'untesel jich bit'il te alale, ma to xju' awu'unik stuuntesel te tulan we'elile!. 13Melel spisil te mach'atik janax ya yuch'ik te chu'ule ma sna'beyik sk'oplal te beluk toj ta pasele, melel pajal k'oem sok te chu'ul alale. 14Jauk me to te mach'a muk'ixe ja me ya swe'ik te tulan we'elile. Jaik me te mach'atik yijubenikix te snopjibal yu'unike te ya sna'ik stsajtayel te beluk lek sok te beluk ma lekuke.
61Jich yu'un, ya sk'an ya jkijk'taytik te sneelal k'op ayej ta swenta te Cristoe sok aka yijubukotikix.Ma jauk nax ya jnopilaytik te ya jsut jkot'antik yu'un te beluk ya yak'otik ta lajele sok te ayuk xch'uunjel jkot'antik ta stojol te Diose, 2sok snopel sk'oplal te ich' ja'e, skajanel k'abil ta stojol te yane, te cha' kuxel yu'un te mach'a lajemikixe, sok te bit'il ya jkich'tik likbeyel jmultik ta swenta sbajt'el k'inal. 3Te jo'otike jich me ya jpastik teme jich ya sk'an yot'an te Diose.4Melel teme la yijk'teyik xch'uunel te Dios te mach'atik la yilikix jun buelta te sakil k'inale, sok te la yaiybeyikix sbujts' te majt'anil te la yak' te Diose, sok te la yich'ikix te Ch'ul Espíritue, 5sok te la smulanbeyikix te yutsilal sk'op te Diose sok te yu'el te ya xchiknaj tel pajel-chaweje, 6jauk me to teme yoloj ya yijk'teyik xch'uunel te Diose ma me stak'ix ta sujt'esel xan te yot'anike. Jich me k'oem te bit'il la cha' yak'ik ta jijp'anel ta cruz te Snich'an te Diose, sok ta komon sitil la yak'ik ta k'exlal.7Melel te lum k'inal te ya yuch' te ja'al te ya xch'ay tel koel ta stojole, jich ya xch'i tel te awal-ts'unubil te ya xtuun yu'unik te mach'atik at'ejik ta sk'inalike, jai k'inal to ya yich' bendición yu'un te Diose. 8Jauk me to teme ja ya xch'i tel te ch'ix sok te ch'ix-itaj mayuk stulal ya xk'ot, sok ma me lekuk sk'oplal ya xk'ot. Le' me nopolix a te ya yich' chik'ele.9Jauk me to te jo'otike xch'uunej jkot'antik te lek ayatike, ja'ex te k'uxex ta jkot'antike, melel jna'ojtik te awich'ojikix te kolele, manchuk me jich ya xk'opojotik to. 10Melel te Dios te toj yot'an stukele, ma xch'ay ta yot'an te awat'elik sok te xk'uxul awot'anik te awak'ojik ta ilel ta sbiil te Jkajwaltike, jich bit'il te at'ejatik ta stojol te ch'uunjeletike sok te yakatik to ta at'ele.11Jauk me to ya jk'antik ta atojolik ta tulutul te ya awak'beyik yipal ja to ta slajibal k'aale, swenta yu'un ya me ataik te beluk yakalex ta smaliyele. 12Jich me te ja'exe ma xch'ajubex a, pajbeyaik stalel te mach'a ay xch'uunjel yot'anik sok te ay smalib yu'unik te beluk ya yich'ik ak'beyel yu'un te Diose.13Melel te k'alal albot yu'un Dios te Abraham te ay beluk ya yak'beye, ja la yal ta jamal ta sbiil stukel, melel mayuk yan te mach'a kajal ay yu'une. 14Jich la yal: '' JO'ON YA ME JKAK'BAT BAYAL BENDICIÓN, SOK YA ME S-ESMAJ TE ATS'UMBALE.'' 15Jich te Abrahame la sta te beluk albil jilele, ja yu'un te jun yot'an la smaliye.16Jich te ants-winiketike ja ya yak' ta testigo te mach'a kajal ay yu'unike. Ta slajibal te sk'op yaiyejike, ya me yak'ik testigo jich me melel ya xk'ot te beluk la yalike. 17Te k'alal la yak' na'el stojol te Dios ta swenta te mach'atik ya yak'bey te beluk k'axel albile, la yal te mayuk bin ora ya syantes te beluk la yale, melel jamal la yal te ma syantese. 18Jich ay cha'ten te beluk ma stak' ta yantesele, melel ma xju' te ya spas lot stukel te Diose, te jo'otik te ay smuk'ul jkot'antik ta stojol, jich ya jtatik majt'antik teme k'axel ya jkak'batik ta stojole, junuk me jkot'antik ya jch'uuntik te beluk albilotike.19Te jo'otike jich me smuk'ul jkot'antik te bit'il nitil te barko sok te jun ancla-tak'in te ya xch'ojik koel ta ja'e sok te jich jun yot'an te jch'uleltike, jun jkot'antik yu'un te mach'a ochemix bael ta yutil te pak' te tsalbilixe. 20Te Jesuse la sjam ochel te jbetik ta stojol te Diose, jich k'atbuj ta muk' sacerdote ta sbajt'el k'inal, jich bit'il te Melquisedeke.
7TE SACERDOTE MELQUISEDEC.1Ja te Melquisedec, ajwalil yu'un Salem, sacerdote yu'un te muk' Dios, te ja la sta sba sok te Abraham te k'alal yak ta sujt'el tel ta kerajel te ba smil jilel te muk' ajwaliletike sok ja la xch'uultes te Abrahame. 2Jich te Abrahame la yak'bey te Melquisedec spisil te jun ta slajunebale. Te biilil ''Melquisedec'' ya sk'an yal ''toj ajwalil.'' te yan sbiil te ak'bote ja', ''muk' ajwalil yu'un lum Salem'' te ja ya sk'an yal ''muk' ajwalil yu'un lamal k'inal.'' 3Mayuk sme'-stat, mayuk xchichmantak, janix jich mayuk xjajch'ibal sok mayuk slajibal te xkuxlejale. Jich yilel te bit'il te snich'an te Diose, melel janax tul sacerdote te ay ta sbajt'el k'inale.4Ilawilik te bit'il muk' stukel jai winik to. Te jchichmamtik Abraham la yak' te jun ta slajunebal te beluk la yich' tel te k'alal la yaiy te kerajele. 5Jauk me to, te snich'nab te Leví te la yich'ik ak'el ta sacerdoteil yich'ojik mantal ta sk'anel te jun ta slajunebal yu'un te ants-winiketike, te ja' junax yermano sbaike, sok te janix sts'umbalik te Abrahame. 6Yan te Melquisedec, manchuk me ma sna'beyik te mach'a sts'umbale, jauk me to la stsakbey te jun ta slajunebal te la yak' te Abrahame sok la xch'ultes ta swenta te beluk albil yu'un te Kajwaltike.7Melel nix a, te mach'a ya xch'ulteswane ja tulan sk'oplal yu'un te mach'a ya yich' ch'ultesele. 8Jich te mach'atik ya stsakik te jun ta slajunebale, ch'ich'-bak'etik stukelik, jauk me to te Melquisedeke albil sk'oplal te kuxul ta ora to. 9Jich yu'un ya stak' jkaltik, te Leví, te ja la yich' ak'beyel te jun ta slajunebale janix jich uuk la stoj te jun ta slajunebal ta swenta te Abrahame, 10Melel te Leví ja xchichmam te Abrahame ja yu'un te k'alal taot yu'un te Melquisedec ta bee ja la yak'bey uuk te jun ta slajunebale.11Jich yu'un, te jauk k'axel ya xlekubik yu'un te mantalil te la yich'ik ak'beyel jilel te sacerdoteetik yu'un Leví te ja sts'umbal te Aarone (melel ja ak'bot jilel te mantalil te lum yu'un te ya xlekubike) jauk me to ¿Bistuuk talix a te yan sacerdote te jich yilel te bit'il te Melquisedeke, sok te ma jichuk te bit'il te Aarone? 12Melel teme la yich' yantesel te sacerdotee, janix jich uuk ya yich' yantesel te mantalile.13Melel te mach'a yakotik ta yalbeyel sk'oplale, yan sts'umbal a, te mayuk ni tuluk yich'oj yat'el ta sacerdoteil. 14Melel te Kajwaltike ja sts'umbal te Judá, jauk me to te Moisese ma la yal te ya xlok' tel sacerdoteetik le'a.15Jich ya jna'tik te chiknaj tel yan sacerdote te jich bit'il te Melquisedeke. 16Te bit'il och ta sacerdote te Kajwaltike, ma ta swenta uuk te mantalil yu'un te chichmamiletike, ja ta swenta te ay yu'el te stalel kuxul te ma xlaj stukele. 17Melel jich ts'ibubil sk'oplal:'' TE JA'ATE SACERDOTEAT TA SBAJT'EL K'INAL JICH BIT'IL STALEL TE MELQUISEDEKE.''18Jich yu'un la yich' lajimbeyel sk'oplal te sneelal mantalile, ta skaj te mayuk yip sok te mayuk stulale. 19Melel te namey mantalile ma ju' yu'un te ya slekteswane. Jauk me to, ay banti ya stak' x-ochotik te pajel-chaweje, ta swenta te smuk'ul jkot'antik ta stojol te Diose.20Jich k'ot ta pasel, melel te Diose jamal la yal stukel. Jauk me to te yantik sacerdoteetike ma jichuk la yich'ik albeyel stukelik. 21Jauk me to, te Jesuse, och ta sacerdote ta swenta te jamal la yal te Diose, melel jich ts'ibubil jilel: ''TE KAJWALTIK K'AXEL LA YAL SOK MA XYANUB TE SNOPJIBAL YU'UNE: ''JA'AT SACERDOTEAT SBAJT'EL K'INAL.''22Jich yu'un te Jesuse la yak' k'otok ta pasel te lek trato te la yal te Diose. 23Jauk me to, bayal mach'a ya x-ochik ta sacerdoteil ta skaj te ya xlajik baele, jich ma stak' te k'axel ya xjilik ta at'ele. 24Yan te Jesuse sbajt'el k'inal kuxul stukel, ja yu'un sbajt'el k'inal ay ta sacerdoteil.25Jich yu'un, te Jesuse ya xju' yu'un te ya skoltey te mach'atik ya xtal ta stojol te Diose ta swenta te Kajwaltike, melel ja kuxul yu'un te ya skolteyotik ta k'op ta stojol te Diose. 26Melel ja muk' sacerdote te ya xtuun jku'untike. Mayuk smul stukel, toj, ay yutsilal, ma pajal ay sok te mulawiletike, ja muk' k'oem ta ch'ulchan.27Te Jesuse ma pajaluk sok te yantik sacerdoteetik, te ya yak'ik milbil majt'anil ta stojol Dios ta jujun k'aal ta swenta smulik sok ta swenta smul te lume. Yan stukel junax buelta la yak' te milbil majt'anile, melel ja la yak' sba ta milbil majt'anil stukel. 28Melel te mantalile ja ya yak' te ya x-ochik ta muk' sacerdoteil te ch'ich'-bak'ete sok te teb staelike. Jauk me to te k'alal la yak'botik tel te mantalile, tal te beluk k'axel albile, ja bi ja la snajk'an te Dios te Nich'anile te ja toj ta sbajt'el k'inale.
8TE JESÚS JA' TEJK'ANBIL TA K'OP YU'UN TE YACH'IL TRATOE.1Jich yu'un, yakotik ta yalel sk'oplal ja in to, te ayix te muk' sacerdote jku'untik te nakalix ta swa'el smuk'ul snaktijib te mach'a k'ax bayal yutsilal ta ch'ulchane. 2Ayix ta at'el ta bay ch'ul awilal, ja te smelelil nail pak' te pasbil yu'un te Kajwaltike, te ma jauk pasbil yu'un te ants-winiketike.3Melel spisil te muk' sacerdoteetik tsabilik yu'un te ya yak'beyik xcha'-chajp'al majt'aniletik sok milbil majt'aniletik. Ja swentail te ya me sk'an te ay beluk ya yak' uuk te Cristoe. 4Jauk me to te ayuk ta balumilal te Cristoe, ma jauk sacerdote te jichuke, melel ay te mach'atik ya yak'ik majt'aniletik jich te bit'il ya yal te mantalile. 5Ja yakalik ta at'el ta bay snail pak', te ja lok'taybil tel sok te ja snojk'teal te beluk ay ta ch'ulchane. Jich te bit'il ak'bot sna' te Moisés yu'un te Dios te k'alal jajch' spas te nail pak'e: La yal te Diose, "JICH ME YA APAS SPISIL TE BELUK LA JKAK'BAT AWIL TA BAY WITS.''6Jich ta ora to te Cristo ja yich'ojix te mero lekil yat'ele. Jich tejk'ambil ta k'op ta sk'asesel te yach'il tratoe, te ja ak'bil ta swenta te beluk mero lek yaloj te Diose. 7Te manchuk ay ch'ayem te sbabial tratoe, ma yejt'aluk ay xan te xchebale.8Te k'alal la sta te Dios te banti ch'ayemik te lume jich la yal: ''ILAWILIK, YA ME STA YORAIL, JICH YA YAL TE KAJWALTIKE, YA ME JPAS YACH'IL TRATO SOK TE SNA TE ISRAELETIKE SOK TE SNA TE JUDIOETIKE. 9JA IN TO, MA JICHUK TE BIT'IL TRATO TE LA JPAS SOK TE MACH'ATIK JA CHICHMAMIK TE K'ALAL LA JTSAKBEY TE SK'ABIK YU'UN TE LA JNIT LOK'EL TEL TA SLUM TE EGIPTOE. MELEL MA JAUK LA ST'UUNIK TE TRATO JKU'UNE, JICH YU'UN TE LA JKIJK'TEY JILEL, JICH LA YAL TE KAJWALTIKE.10JICH AY TE TRATO TE YA JPAS SOK TE SNA TE ISRAELETIKE TE K'ALAL YA STA YORAIL, JICH YA YAL TE KAJWALTIKE: "JO'ON YA JKAK'BEYEX JA NA'IK TE MANTALILE SOK YA JTS'IBUBEYEX TA AWOT'ANIK. TE JO'ONE DIOS YA XK'OON AWU'UNIK SOK JA LUM JKU'UN YA XK'OATIK.11MA YEJT'ALUK YA SNOJP'TESIK TA TULUTUL TE SPATXUJK'E SOK TE YERMANO SBAIKE, TE JICH YA YALIKE: ''NA'BEYA ME SBAIK TE JKAJWALTIKE." MELEL SPISILIK YA ME SNA'BONIK JBA TE MUK' BIK'ITE. 12MELEL TE JO'ONE YA JNA'BEY YOBOLIL SBAIK YU'UN TE BELUK AMEN SPASOJIKE, SOK MA BA YA JNA'BEY XAN TE SMULIKE."13Te k'alal ya yal ''YACH'ILE'', yu'un pokobenix k'oem yu'un te sbabial tratoe sok te beluk ma ba ya xtuunixe sok te yakix ta pokobele le' nopol ya xtubix bael a.
91Jich yu'un, te sbabial trato te la yak'botik jilele, le' la yak'botik jilel jkiltik te bit'il ya sk'an ya jkich'tik ta muk' te Diose, sok te bit'il ya yich' ich'el ta muk' te sna te Dios te ay ta balumilale. 2La yich' chajp'anel jun nail pak'. Te sbabial xjajch'ibal nae, le' ay a te xtuchtijib k'ajk'e, te we'bal te'e sok te kaxlan waj te ay ta stojol te Diose, la yak'beyik sbiilin Ch'ul awilal.3Ta spat te xcha' tsalal spajk'ul te nail pak'e, ja la yich' ak'beyel sbiil te mero muk' Ch'ul awilal stukele. 4Ay skajtijib xchik'jibal pom te pasbil ta spisil oro. Janix jich yich'oj te smuk'ul xkaxail te trato te pasbil ta spisil oro.Ta yutil te kaxae le' ay jun bojch' te pasbil ta oro te nojel yu'un te manaje, sok te sbastón yu'un te Aarón te puline, sok te cha' lejch' ton te ts'ibubil le'a te mantalil te k'axel ak'bil jilele. 5Ta sba te muk'ul kaxae, ay kerubinetik te yanxanix yutsilal a, te ya smukik sok te xik'ik te smajk'il te ch'ayel mulile, te yaxintesojik sok te xik'ike, jich yu'un ma stak' ya jcholbey xan sk'oplal spisil ta ora to.6Jich te bit'il chajbanbilix spisil a te sbilukil te nail pak'e, te sacerdoteetike jujun k'aal ya x-ochik bael ta bay te sbabial nail pak' te sbiilinoj ch'ul awilal swenta yu'un le' ya yich'ik ta muk' a te Dios yu'un le' ya x-at'ejik a. 7Jauk me to janax stukel te muk' sacerdote te ya x-och bael ta xcha' mejch'el te nae, junax buelta ta jun ja'wil, sok ya yich' ochel xch'ich'el chambalametik swenta yu'un te smule sok te smul te lum te ma sna'ik te bay ya xch'ayike.8Jich ya yak'botik jna'tik stojol te Ch'ul Espíritu te ma to ak'bil ilel te ch'ul awilal swenta yu'un te ay to ta tuntesel a te sbabial nail pak'e. 9Spisil in to ja la yak'botik jkiltik ta ora to te beluk tulan sk'oplale. Melel ta xcha' chajp'al, te smajt'an Dios sok te chik'bil majt'aniletik te ya yich' ak'el ta bay templo, ma xju' te k'axel libre ya xk'ot yu'unik te smulik te mach'atik ya yich'ik ta muk' te Diose. 10Janax ya yalbey sk'oplal te swe'elike sok te beluk ya yuch'ike, sok te bayal ta chajp' te bit'il ya sk'an spoksbaike. Ja in to janax yu'un te sbak'etalike, ja to te k'alal ya yich' yantesel yu'un te Diose.11Te Cristoe talix jich bit'il te muk' sacerdote te ja swentainej te beluk lek ya xtal te pajel-chaweje. Ja ay ta sacerdoteil ta ba ay te nail pak' te ma pasbiluk ta sk'ab te ants-winiketike, te k'axem to xan leke sok te k'axem to xan ay yutsilale, te ma le'uk ta balumilal to. 12Ma jauk la yich' ochel te xch'ich'el te stat tentsun sok te alal wakax, te k'o yak' ilel ta stojol te Diose, ja k'ot yak' ilel stukel te xch'ich'ele, te ja k'axel ochemix bael ta bay te mero ch'ul awilale, junax buelta och bael jich la yak'botik jkoleltik ta sbajt'el k'inal.13Te xch'ich'el te tentsunetike sok te stat te wakaxetike sok te ya yich' tijt'anel stanul te chik'bil te alal me' wakax ta stojol te mach'atik ay smulike, ya yich'ik ustesel yu'un te sbak'etalike sok k'ejbil ya xk'ot ta stojol te Diose, 14Jich yu'un k'ax to xan jich a te xch'ich'el te Cristo te ya xju' yu'un te ya skolteyotik, te ja ta swenta te Espíritu te ay ta sbajt'el k'inal te la yak' sba ta milel ta stojol te Diose, ja ya spokbotik lok'el te beluk amen jpasotike jich me ya stak' abatotik ya xk'ootik yu'un te kuxul Diose. 15Jich yu'un, ja ta swenta te tejk'anbil ta k'op yu'un te yach'il tratoe. Melel te Cristoe laj ta swenta te mach'atik ay smulik te ayik ta swenta te sbabial tratoe, jich me ya stak' yich'ik kolel yu'un te smulike, swenta yu'un ya yich'ik te beluk albotik yu'un te Dios te ya x-ak'botik yu'uninik sbajt'el k'inal te mach'atik ik'bilik yu'une.16Melel teme ay mach'a la spas jun te banti ya yal te bit'il ya sk'an ya yak' jilel spisil te sbiluke(testamento), ja to ay sk'oplal ya xk'ot a teme laj bael te mach'a la spas te june. 17Melel ja to ay sk'oplal a te jun(testamento) teme laj te mach'a la spase, melel teme kuxul to te mach'a la spase, mayuk stulal te june.18Jich yu'un te sneelal tratoe la sk'an te ch'ich'e. 19Jich te Moisés te k'alal la yak' te mantalil te ak'bot yu'un te Dios ta stojol te lume, la stsak tel te xch'ich'el te alal wakax sok te stat tentsun, sok la skap ta ja', sok te tsajal stsotsil te chije, sok te wamal te hisopo sbiile, te ja la stsijts'an a te banti ay te sjunal te mantalile sok te lum te stsoboj sbaike. 20Jich yu'un la yal: ''JA IN TO, JA TE CH'ICH' TE JA YU'UN TE TRATO TE LA YAK'BEYEX TA ATOJOLIK TE DIOSE."21Janix jich la spas te Moisese, la stsijts'an ta ch'ich' uuk te nail pak' sok te biluketik te ya yich' tuuntesel te k'alal ya yich' ich'el ta muk' te Diose. 22Jich te bit'il ay ta mantalile, teb ma spisiluk kusbil sok te ch'ich'e. Melel teme ma ya yich' malel te ch'ich'e mayuk perdón.TE CRISTO LA YAK' SBA TA MILBIL MAJT'ANIL TA SWENTA TE LA XCH'AYBOTIK TE JMULTIKE. 23Jich yu'un, puersa la sk'an te la yich' kusel a te beluk lok'tebil ta ch'ulchan sok te xch'ich'el te chambalametike. Yan te biluketik te ay ta ch'ulchan stukele ja ya sk'an kusel ta mero lek sok te lekil ch'ich'e. 24Melel te Cristoe ma ba och bael ta bay ch'ul awilal te pasbil ta sk'ab te ants-winiketike, melel ja lok'teybil tel ta bay smelelil stukele. Jauk me to ja och bael stukel ta bay ch'ulchan, jich ya yak' sba ilel ta ora to ta stojol te Dios ta jwentatik.25Te Jesuse ma bayaluk buelta la yak' te majt'anile, jich bit'il ya spas te muk' sacerdote te ya x-och bael ta jujun ja'wil sok te ch'ich' te ma jauk xch'ich'ele. 26Te jichuk xan la spas te Jesuse, bayal buelta k'ax swokol te jichuke ja to te k'alal xjajch'ibal te balumilale. Jauk me to, junax buelta k'ax swokol ta lajel melel le' nopolix a te slajibal te k'aale, te la yich'ix ak'el ta ilel swenta yu'un te ya yich' ch'ayel te mulil ta swenta te laj stukele.27Ta tulutul te ants-winiketik albilix sk'oplalik te junax buelta ya xlajike jich ya yich'ik ich'el ta k'op. 28Janix jich uuk te Cristoe, junax buelta la yak' sba ta lajel yu'un te yakuk yich'ik perdón yu'un smulik te ants-winiketike, jich me ya sujt' tel ta xchebal buelta, ma jauk yu'un te ya xtal xan ta xch'ayel te mulile, ja yu'un te ya skoltey te mach'atik junax yot'an yakik ta smaliyel te Jesuse.
101Melel te mantalile jich te bit'il snojk'teal nax te beluk lek yak ta taele, sok te ma jauk smelelil te beluk aye. Te mach'a ya x-oxtaj tel ta stojol te Diose, ma xju' te ya xlekub ta swenta te milbil majt'aniletik te ya yich'ik bael te sacerdoteetik ta jujun ja'wile. 2Te yakuk xju' yu'un te ya xkolteywan te milbil majt'aniletik te la yak'ike, ma me ayukix mulil te jichuke, sok ya me yijk'teyik yak'el te milbil majt'anil te jichuke, melel la yich'ikix sapel yu'un spisil te smulike, te mach'atik ya yich'ik ta muk' te Diose, sna'ojikix te mayuk smulik te jichuke. 3Jauk me to ma ba xch'ay te mulil yu'un te milbil majt'aniletik te ya yak'ik ta jujun ja'wile. 4Melel ma xju' yu'un xch'aybelotik jmultik te xch'ich'el te stat wakaxetik sok te stat tentsunetike.5Te k'alal tal ta balumilal te Cristoe, jich la yal: ''MA JAUK TE MILBIL MAJT'ANILETIK SOK MA JAUK TE MAJT'ANILETIK TE YA AK'ANE, JA LA ACHAJP'ANBON TE JBAK'ETALE. 6MA JAUK YA AK'AN SPISIL TE CHIK'BIL MAJT'ANILETIK SOK TE MAJT'ANILETIK YU'UN TE MULILE. 7Jich la jkal: "ILAWIL, LE' AYON TO TA SPASEL TE SK'ANJEL AWOT'ANE, JICH TE BIT'IL TS'IBUBIL JK'OPLAL TA BALBIL JUNE.''8Neel la yal te Cristoe: ''MA JAUK TE MILBIL MAJT'ANIL NI JAUK TE CHIK'BIL MAJT'ANILETIK, SOK MA JAUK TE CHIK'BIL MAJT'ANIL YU'UN TE MULIL TE YA SK'AN AWOT'ANE.'' Ja in to ja te milbil majt'aniletik te ya yich'ik ak'el ta swenta te mantalile. 9Jich la yal: ''ILAWIL, LE' AYON TO TA SPASEL TE SK'ANJEL AWOT'ANE.'' Jich te Cristoe la xch'aybey sk'oplal te majt'aniletik te ay ta ak'el ta neelal toe sok ja tulan k'ot sk'oplal te majt'anil te la yak'e. 10Ja yu'un te la spasbey sk'anjel yot'an te Dios te la jkich'tik ch'ultesele, ta swenta te la yak' te sbak'etal te Jesucristoe, junax buelta la yak' sba ta lajel sbajt'el k'inal.11Jauk me to, spisil te sacerdoteetik ya xjajch'ik ta jujun k'aal ta spasel te yat'el te Diose. Ja yakalik ta yak'el ta spisil ora te milbil majt'aniletike, jauk me to te milbil majt'aniletike ma xch'ay te mulile. 12Yan stukel te Cristoe la yak' jun milbil majt'anil ta sbajt'el k'inal yu'un te mulile; jich la snajk'an sba ta swa'el sk'ab te Diose. 13Ja yak ta smaliyel ja to te ya yak' ta yanil yakan te ya jkontroe. 14Melel ta swenta te la yak' junax buelta te majt'anile, te k'axel ju' yu'un te ya slektes ta sbajt'el k'inal te mach'atik jayeb ya yich'ik ch'ultesel yu'une.15Te Ch'ul Espíritue jich la yalbey sk'oplal ta jtojoltik. Melel jich la yal ta neelal: 16''JA IN TO JA TE CHAPIL TRATO TE YA JPAS SOK TE ANTS-WINIKETIK TE K'ALAL YA STA YORAILE, XI' TE KAJWALTIKE. JO'ON YA JKAK'BEY TA YOT'ANIK TE MANTALILETIK JKU'UNE, SOK YA JTS'IBUBEYEX TA AWOT'ANIK.17MA BA YA XTALIX TA JKOT'AN TE AMULIK SOK TE JAYEB BUELTA TE LA AK'AXINTESBONIK TE JMANTALE." 18Jich yu'un ta ora to, teme k'axel la yich'ix ch'ayel te jmultike ma ba yejt'alix te ya jkak'beytik te Dios te milbil majt'anil yu'un te jmultike.YA SK'AN TE YA SNOPTSAJOTIK TA STOJOL TE DIOSE. 19Ja yu'un, kermanotak, te jo'otike jun jkot'antik ya x-ochotik bael ta ba ay te ch'ul awilal ta swenta te xch'ich'el te Jesuse. 20Ja me te yach'il be te ya yak'botik te jkuxineltike, te ja la sjambotik ochel te pak' te jok'ole, te ja ta swenta te sbak'etal stukele. 21Melel ay me jku'untik tul muk' sacerdote ta sna te Diose, 22ya me x-oxtajotik bael sok spisil jkot'antik sok smelelil xch'uunjel jkot'antik, ta swenta te xch'ich'ele, sapilix me te jkot'antik yu'un te beluk amen ya jnoptike sok te jbak'etaltik sapilix me ta lekil ja'.23Ma me jkijk'taytik ta yalel te yakotik ta xch'uunel sok jkot'antik te ya xk'ot ta pasel te beluk yalojbotikixe, manchuk me ya ya'an jkot'antik yu'un, melel te Diose, ja k'axel la yalbotik te sk'ope, sok ma me ya spas lot stukel. 24Aka me jkak'tik ta ilel te bit'il jech jkak'beybatik yip jkot'antik sok te xk'uxul jkot'antik sok yakuk jpastik te lekil at'elile. 25Ma me xkomotik ta jtsobelbatik, jich te bit'il mach'atik ya spasike. Yan te ja'exe jech-muk'tesbeyame k'inal awaiyik xan, k'axem to me xan a te bit'il ya awilik te yak ta nojptsajel tel te sk'alelal te ya xtal te Kajwaltike.AK'EL NA'EL STOJOL TE MACH'A YA SLE SMULIKE. 26Jauk me to, teme spasemal jkot'antik ya jleuleytik xan jmultik te bit'il jna'ojtikix te beluk lek ta pasele, mayuk me xan yan milbil majt'anil ta swenta te mulile. 27Ja xanix me kechelotik ta jun chajp'anel te k'ax xi'bantik sbae sok ta chik'el ta k'ajk' te ya smil spisil te mach'atik skontroinejik te Diose.28Te mach'a ma la xch'uun spasel te mantaliletik te yaloj te Moisese, ya me xlaj sok ma me xna'bot yobolil sba yu'un, teme ay che'oxeb testigo yu'un te beluk amen spasoje. 29¿Ma ba k'axemuk to xan ya yich'ik kastigo te mach'atik la spech'ik ta tek'el te Snich'an te Diose, sok te ma tulanuk sk'oplal la yaiyik te xch'ich'el te yach'il chapbil trato, te ja ta swenta te xch'ich'el te la yich' ch'ultesel yu'un te Diose sok te la yich' bol k'optayel te Espíritu te yak' yutsil ot'anile?30Melel jna'ojtik te mach'a la yale: "JO'ON ME AY TA JWENTA TE SPAKOLE; JO'ON YA JKAK'BEY STOJ." Sok la yal xan: "TE KAJWALTIKE JA ME YA SLIKBEY SMUL TE SLUMALE." 31¡K'ax xi'bantik sba teme la stsakotik ta sk'ab te kuxul Diose!32Jauk me to juluk me ta ajolik te bin k'aalil te la ana'ik stojol te smelelil k'ope, te la ats'ikik bayal te awokolik te k'alal ayatik ta woklajel a. 33Te ja'exe la awich'ik k'exlaltesel ta komon sitil te k'alal la sbol-k'opteyatike sok te la awich'ik nutsele, sok nix te la akoltayik uuk te mach'atik jich k'ax swokolik uke. 34Melel te ja'exe la ana'beyik yobolil sba te mach'atik ayik ta chukel a, sok te la ats'ikik sok sbujts' awot'anik te k'alal la awich'ik pojbel bael spisil te beluk ay awu'unike. Melel ja na'ojikix a te ay xan beluk lek majt'anil ya ataik ta patilal.35Jich yu'un manchuk me ya xch'ay te smuk'ul k'inal awaiyik ta stojol te Diose, melel ay muk'ul majt'anil yu'un. 36Melel te ja'exe ya me sk'an te ayuk smalib awu'unike, yu'un me jich ya stak' awich'ik te beluk k'axel yaloj te Diose, te k'alal spasojix a te sk'anjel yot'ane. 37"MELEL MA ME XJALAJ XAN, TE MACH'A YA XTALE, YA ME XTAL, MA ME XJALAJIX.38TE MACH'A TOJ YAT'ELE, YA ME XKUXIN TA XCH'UUNJEL YOT'AN. TEME SUJT' TA SPATE, MA BA BINAX JKOT'AN YU'UN." 39Jauk me to, te jo'otike, ma jo'okotik te mach'a ya sujt' ta spat te ya yich'ik jinele. Jauk me to, jo'otik me te mach'a ay xch'uunjel jkot'antik ta sk'ejel te jch'uleltike.
11TE XCH'UUNJEL OT'ANILE.1Jich yu'un, te xch'uunjel ot'anile, ja te ya jna'tik te ya jtatik te beluk yakotik ta smaliyele. Ja te jna'otik te smelelil te ya jtatik te beluk ma jkilojtike. 2Melel te jchichmamtike lek k'ot sk'oplalik yu'un te xch'uunjel yot'anike. 3Ta swenta te xch'uunjel ot'anile, ya xk'ot ta jkot'antik te ja smantal te Dios te pastaj spisil te beluk ay ta ch'ulchan sok te beluk ay ta balumilal, melel te beluk ya jtatik ta ilel pasbil yu'un te beluk ma chikanuk ta ilele.4Ta swenta xch'uunjel yot'an te Abele te k'ax jich la yak' milbil majt'anil te bit'il la yak' te Caine, jich albot sk'oplal te toj stukele. Te Diose lek la yalbey sk'oplal te Abel yu'un te majt'aniletik te la yak'e, sok te xch'uunjel yot'ane, te Abele lajemix stukel jauk me to yak to ta k'op manchuk me lajemix a.5Ta swenta xch'uunjel yot'an te Enoc te la yich' ik'el bael yu'un ma ba la yaiy te lajele. Ma la yich' tael te sbak'etale, melel te Diose ja la yik' bael. Melel te k'alal ma to yich' ik'el bael a, la yich' albeyel sk'oplal te ja la xch'uunbey smantal te Diose. 6Jich yu'un, teme mayuk xch'uunjel ot'anile ma xju' te binax yot'an yu'un te Diose. Melel te mach'a ya xtal ta stojol te Diose ya me sk'an te yakuk xch'uun te ay Dios sok te ya yich' smajt'anik teme la sleike.7Ta swenta te xch'uunjel yot'an te Noeje, te la yich' albeyel tel koel te beluk ma to yiloj a te ya xk'ot ta pasele, jich jun yot'an la xch'uun spasel te jun barko te banti kol te mach'atik junax ayik ta snae. Te k'alal jich la spase, la yak'bey ilel smulik te mach'atik ayik ta balumilale sok ak'bot smajt'an yu'un te beluk toj la spase ta swenta te xch'uunjel yot'ane.8Ta swenta xch'uunjel yot'an te Abraham, te k'alal ik'ot, la xch'uun mantal sok lok' bael ta slumal yu'un le' ba yich' smajt'an k'inal ta yan lum. Te k'alal lok' baele, ma ba sna'oj te banti yak ta baele. 9Ta swenta te xch'uunjel yot'ane, te kuxin ta bay yan lum te k'axel ak'bil yu'un te Dios te ya xnaine. La snainik nail pak' sok Isaac sok Jacob, melel janix ak'botik te beluk ak'bot te statike. 10Melel te Abrahame ja yak ta yilel te lum te ay ta sbajt'el k'inale, te ja lum te mero nopbil sok ja lek pasbil yu'un te Diose.11Ta swenta te xch'uunjel yot'anike, te Sara te ma stak' x-alaje, jauk me to la yich' ak'beyel yip sbak'etal yu'un yik'el te yale. Jich k'ot ta pasel te k'alal mamalix a te Abrahame, melel ja xch'uunoj te Dios te ja la yal te beluk ya xk'ot ta pasel ta stojolike. 12Jich yu'un, ta swenta te tul winik te ja te Abrahame, te le' nopol ya xlajix a, bek'ajik tsobol alnich'anetik yu'un te JICH K'OT TE BIT'IL EK'ETIK TE AY TA CH'ULCHAN TE BAYAL NAX TA ILEL SOK TE BIT'IL SJI'AL TE STI'IL TE MARE, TE MA STAK' TA AJTEYELE.13Ta spisilik in to, te ay xch'uunjel yot'anike, te k'alal lajik baele ma la staik te beluk la yich'ik albeyel yu'un te Diose. Janax la yilik te k'ejel to aye, la yalik te ma ba le' ayuk te snaike sok te k'axel nax ayik ta balumilale. 14Melel te mach'atik jich la yalike, ja la yalik ta jamal te yakik ta sleel te mero slumalike.15Te jauk yakik ta snopel te ya xch'a sujt'ik bael te banti lok'iktele, la stak' sujt'ik bael te jichuke. 16Jauk me to, ja la sk'anik jun slumalik te k'axem to xan leke, te ay ta ch'ulchane. Ja swentail te Dios te ma xk'exaw te ja Dios yu'unike, melel ja xchajp'anojbey jun slumalik.17Ta swenta te xch'uunjel yot'an te Abrahame, te k'alal la yich' ilbel te xch'uunjel yot'an yu'un te Diose, ja la yak' te Isaac. Te ja te tul snich'an te la yak' ta majt'anile, te janix la yich' ak'beyel yu'un te Diose. 18Te jich la yich' albeyel te Abrahame: "JA TA SWENTA TE ISAAC TE YA XCHIKNAJ TE ATS'UMBALE." 19Te Abraham xch'uunej yot'an te Dios te ay yu'el te ya stak' xcha'kuses tel te Isaac ta yolil te aelmeletike, melel la yil te Abraham te k'alal la yak' te snich'an te jich k'ot te bit'il milbil majt'anile, jauk me to ma la yich' milel melel komot yu'un te Diose, jich k'ot te bit'il cha'kuxtele.20Ja ta swenta te xch'uunjel ot'anile, te Isaac la yak'bey bendición te Jacob sok te Esaú ta swenta te beluk ya x-ak'botik ta patilale. 21Ja ta swenta te xch'uunjel yot'an te Jacob, te k'alal ya xlajix a, la yak'bey bendición ta tulutul te snich'nab te José. Te Jacobe la snijan sba ta sjol snabte' jich la yich' ta muk' te Diose. 22Ta swenta xch'uunjel yot'an te José, te le' nopol ya xlajix a, la yal jilel te ya me xlok'ik tel te snich'nab Israeletik ta lum Egipto sok la yal jilel te banti ya xjil te sbakele.23Ja ta swenta te xch'uunjel ot'anile, te k'alal bejk'aj te Moisese la yich' nak'el oxeb u, melel la yil te sme'-stat te t'ubil nax te alale. Ma la xi'ik te beluk la yal mantal te muk' ajwalile. 24Ja ta swenta te xch'uunjel yot'an te Moisese, te k'alal winikix a, ma la sk'an te la yich' albeyel te ja snich'an te yach'ix te Faraone. 25Ja la sk'an te yakuk xk'ax swokol sok te lum yu'un te Diose, melel ma la sk'an te la yaiybey sbujts' te mulil jun-chebuk nax k'aale. 26Ja k'ot ta yot'an te ja bayal xan sk'oplal te ya xk'ax swokol ta swenta Cristo melel te majt'aniletik te ay ta Egipto ma ba ya spajbey smuk'ul te bit'il ay ta ch'ulchane. Melel ja bajt' ta yot'an yilel te majt'anil te ya x-ak'bot yu'un te Diose.27Ta swenta xch'uunjel yot'an te Moisés lok' bael ta Egipto. Ma ba la xi' te yilimba te muk' ajwalile, melel ja yak'oj sit ta stojol te Dios te machikanuk ta ilele. 28Ja ta swenta xch'uunjel yot'an te Moisés te la sk'ej te pascua sok te la stsijts'an ch'ich' ta ti'naeletik yu'un te israeletik ta swenta te ma ya xlajik ta milel a te ba-alaletik yu'un te mach'a tikunbilik tel te ya xmilwanike.29Ja ta swenta te xch'uunjel yot'anik te israeletik te k'axik bael ta bay takin yolik slumil te tsajal mare. Jich k'anuk spasik uk te egipcioetike jauk me to ma la stak' k'axik bael melel bik'otik bael yu'un te ja'e. 30Ja ta swenta xch'uunjel ot'anil te jin koel te sts'akul te muk'ul lum Jericó, ja to jin koel a te k'alal la yich' juyinteyel jukeb k'aale. 31Ja ta swenta te xch'uunjel yot'an te mulawil ants Rahab ma ba laj sok te mach'atik k'axin te mantaletike, melel ay yutsil yot'an te la yik' ochel ta sna te mach'atik tsajtaywanejetike.32¿Beluk xan ya stak' jkalbeyex abi? ma xlaj jkot'an ta xcholel te bit'il ay sk'oplal te Gedeón, Barac, Sansón, Jefté, David, Samuel, sok te alwanejetike. 33Ta swenta xch'uunjel ot'anil te ju' yu'unik stsalel bayal lumetik, sok la spasik te beluk toj ta pasele sok la yich'ik te beluk k'axel albilike. Ju' yu'unik smakbeyel yej te león-ti' awal chojetike, 34la stubik te yip te k'ajk'e, sok ma la yich'ik milel ta espada, la yich'ik ch'abtesel yu'un te xchamelike, ju' yu'unik ta kerajel sok la yaiyik tsalaw ta stojol te mach'atik yaj-kontroik te talemik ta yan lumetike.35Te antsetike la yich'ik cha'kusesbel te mach'a lajemix yu'unike. Sok ay yantik te mach'a k'ax swokolik te ma la sk'anik te ya yich'ik ak'el ta libre, melel ja ay ta yot'anik te ya xch'a kuxike. 36Sok ay yantik te la yich'ik labanel sok la yich'ik majel sok la yich'ik chukel ta kadenaetik. 37La yich'ik ch'ojel ta ton. La yich'ik set'el ta serrucho. La yich'ik milel ta espada. La slapik snuk'el chijetik sok tentsunetik. Mero me'ba ayik ta k'inal, mayuk beluk ayu'unik a, sok uts'inbilik a. 38Ma snujp'in te ayik ta balumilale, Beenik ta bay takin jochol k'inal, ta muk'ul witsetik, ainik ta bay xaabetik sok la spas snaik ta bay yutil lum.39Ta spisilik in to, lek k'otik yu'un te xch'uunjel yot'anike, jauk me to ma to la yilik te beluk k'axel albilik yu'un te Diose. 40Melel te Diose ay bi xchajp'anoj ta jtojoltik te ja mero lek xane, yu'un ja ya sk'an te ya jkich'tik lektesel jich te bit'il la yich'ik lektesel uke.
12JAUK ME YA JTOJLINTIK TA ILEL TE JESUSE.1Jich yu'un, te joytabilotik yu'un te bayal testigoetik te la yak'ikix ta ilel te ay xch'uunjel yot'anike, aka me jkijteytik jilel spisil te jkijk'atstike sok te mulil te ja ya smakotike. Aelmajukotik bael ja to teme k'ootik te banti albilotike. 2Aka me jtojlintik ilel te Jesuse, te ja la yak'botik jkiltik ta sneelal sok te ja la stojtesotik yu'un te xch'uunjel ot'anile. Ta skaj te sbujts' yot'ane te la sts'ik swokol te la yich' milel ta cruz, ma ba la ya'an yot'an yu'un te la yich' k'exlaltesele, jich la snajk'an sba ta swa'el sk'ab te Dios ta banti muk'ul snaktijibe. 3Jich yu'un na'aik me te Jesuse, te ja la sts'ik swokol yu'un te kontroinot yu'un te mulawiletike, jich me ma spejk'tsaj awot'anik sok ma me awich'ik tsalel a.4Te ja'atike ma ba amalojik a ch'ich'elik yu'un te kontro awilojik te mulile. 5Sok te ja'atike ch'ayix ta awot'anik te tak'uyel te la awich'ik te bit'il yal-snich'anatik te Diose: ''JNICH'AN, MA ME AKUY TE MAYUK SK'OPLAL TE TAK'UYEL YU'UN TE KAJWALTIKE SOK MA ME XLUJBAT TE K'ALAL YA AWICH' TOJTESEL YU'UNE. 6MELEL TE KAJWALTIKE YA STOJTES SPISILIK TE MACH'ATIK SK'ANOJE SOK YA ME YAK'BEY KASTIGO SPISIL TE MACH'ATIK YA YIK' YAL-SNICH'ANINE.7Ts'ikameik te awokolik jich te bit'il ya awich'ik tojtesele. Te Diose jich ya skuyatik te bit'il yal- snich'anexe. Jauk me to, ¿Ay ba tuluk nich'anil te ma yich' tojtesel yu'un te sme'-state? 8Jauk me to teme ma awich'ik tojtesele, jich k'oem te bit'il ma ba atatik te Diose sok jich k'oem te bit'il ma ba yal-snich'anex abi.9Jich yu'un te jo'otik te ay jtatik ta balumilal te ja ya stojtesotik sok te ya jkich'tik ta muk'e. ¿Jauk to ba ma ya jkich'tik ta muk' a te Jtatik te ay ta ch'ulchane, sok te ja ya yak'botik te jkuxlejaltike? 10Melel te me'-jtatik la stojtesotik jich te bit'il la sk'an yot'anik jun-chebuk nax k'aal te bit'il le' kuxulotik ta balumilal to. Jauk me to te Diose ja ya spas yu'un te jich ya xlekubotik a, sok te jich ya xk'ootik te bit'il ch'ultesbile. 11Mayuk tojtesel te binax jkot'antik yu'une, k'ux ya jkaiytik. Jauk me to, ta patilal ya me sitin ta swenta te beluk toj ta pasele sok lamal k'inal ya yaiy yu'un te mach'a ya xch'uun te tojtesele.TE MACH'ATIK YA SBAJIK TE YUTSIL YOT'AN TE DIOSE. 12Jich yu'un ak'beyaik xan yich' yip te ak'abik te saybujemixe sok te sjol awakanik te mayukix yipe. 13Leaik me te toj bee, jich me ya xtojob te koxoe sok jich me ya yich' poxtayel a.14Leaik me te lamal k'inal sok spisil te yantike, sok ch'ultesbilukex me, teme ma jichuke mayuk mach'a ya xk'o yilbey sit te Kajwaltike. 15Tsajteya me abaik te manchuk ayuk tuluk te ma ba yich'oj te yutsilal te Diose sok te manchuk ya xch'i ta awot'anik te beluk ma lekuke, swenta yu'un ma me ya yak'atik ta wokol sok jich me ma tsobol ya xbolob yot'anik yu'un. 16Tsajteya me abaik te mayuk ni tuluk ya xyal ta mulil sok te mayuk xch'uunjel awot'anike, jich te bit'il la spas te Esaú, te mayuk sk'oplal bajt' yu'un te bit'il ba alale melel ta pajch'nax we'lil te la xchon te bendición te albil te ya yich' te k'alal bejk'aje. 17Melel ya me ana'ik, te ma ba ak'bot xan te bendición te k'alal la sk'an xan ta patilale, ma la yich'ix k'anel, melel ma la stak'ix sut'es te yot'ane, manchuk me bayal xan la yok'tesba yu'un.18Melel ma jauk talatik ta wits jich te bit'il te israeletik te noptsajik bael le'a, te ya xju' ta pikele, te yak ta tilel ta k'ajk'e, te ijk'naxe, sok te ijk' maxan te k'inale, sok xlemlajanax chawuk sok bayal ik' le'a. 19Te ja'exe ma talatik yu'un te k'alal k'opoj te ok'ese, sok te k'alal k'opoj te Dios ta stojol te lume, te mach'a la yaiyik stojole la yalik wokol te manchuk ya xk'opoj xane. 20Melel ma ju' yu'unik te la yaiyik stojol te beluk albotik ta mantale: ''TEME AY KOJT' CHAMBALAM TE YA STEK' TE WITSE, YA ME YICH' CH'OJEL TA TON.'' 21Kaxem to xan la xi'ik te beluk ak'botik yilik te jich la yal te Moisese: ''YAKON TA XIWEL SOK YAKON TA NIJK'EL''.22Yan te ja'exe ja talatik te banti ay te wits Sión sok ta banti ay muk'ul lum yu'un te kuxul Diose, ja te Jerusalén te ay ta ch'ulchane sok te bay tsobol bayal ta mil te ch'ul abatetik te yakalik ta spasel k'in. 23Te ja'atike ja talatik te banti stsoboj sbaik te sbabial alnich'anetike, te la yich'ikix najk'anbel sbiilik ta ch'ulchan. Talik ta stojol Dios te ja chajbanwanej yu'un spisil te ants-winiketike, sok te banti ay te espírituetik te la yich'ikix utstesele. 24Te ja'atike talatik ta stojol te Jesuse, te ja la yich' tel te yach'il trato, sok te la yich' tsijts'anel te xch'ich'el te ja lek stukele, ma jichuk te bit'il xch'ich'el te Abele.25Ma me xa bajik te mach'a yak ta k'ope. Melel ma kolik te mach'atik la sbajik te tak'uyel te la yak' le' ta balumilale, jauk to bal a te jo'otik, teme la jkijk'teytik sok teme lok'otik ta anel yu'un te mach'a yak ta stak'uybelotik k'alal to ta ch'ulchan. 26Te k'alal k'opoje nijk' yu'un te balumilale. Jauk me to jich k'axel yaloj jilel sok te jich ya xk'ot ta pasele: ''JUN XAN BUELTA, YA XNIJK' JKU'UN TE BALUMILALE, SOK TE CH'ULCHANE.''27Jai k'opetik to: ''JUN XAN BUELTA'', ja ya sk'an yalbotik spisil te beluk pasbile, ya me stak' ta jinel, melel pasbil stukel, ja xanix ya xjil te beluk ma stak' ta jinele. 28Jich yu'un, te jo'otik te ya jkich'tik ak'el ta ba ay ta ajwalinel te Diose, te ma stak' ta jinel stukele, aka me jkaltik wokol yu'un sok aka me jkich'tik ta muk' sok xiwel sok te ya jlajinbatik ta stojol te Diose. 29Melel te Dios jku'untike jich te bit'il k'ajk' te ya xchik'otike.
13BIT'IL YA STAK' XKUXIN TUL CH'UUNJEL.1Ma me xa awijk'tayik te stalel xk'uxul awot'anik te bit'il awermano abaike. 2Ma me xch'ay awu'unik te ya awik'ik ochel ta anaik te mach'atik ma ana'bey sbaike. Melel ay me mach'atik la yik'ik ochel ta snaik ch'ul abatetik te ma la sna'bey sbaike.3Na'aik me te mach'atik chukatike, jichuk me k'oem ta awot'anik te bit'il chukulatik soke. Na'aik me te mach'atik ayik ta uts'inele, jich'uk me k'oem te bit'il pajal uts'inbilex soke. 4Ich'biluk ta muk' awu'unik te nujp'inele. Ma me xa kapik ta mulil te bit'il awik'oj abaike, melel te Diose ya me yak'bey kastigo te mach'a ya xyal ta mulil sok te ya yaiy mulweje.5Ma me jauk ay ta awot'anik te tak'ine. Binuk nax me k'inal awaiyik yu'un te beluk ay awu'unike, melel te Diose jich la yal: ''MA BA YA JKIJK'TAYAT, SOK MA BA YA JPIJT'ESAT.'' 6Binuk nax me jkot'antik te jich ya jkaltike: ''TE KAJWALTIKE, JA' KOLTAYWANEJ JKU'UN; MA BA YA XIWON. ¿BELUK YA STAK' SPASBON TE ANTS-WINIKETIKE?''7Ma me xch'ay ta awot'anik te wolwanej awu'unike, te ja la yalbeyex te sk'op te Dios ta atojolike, sok na'aik me te lekil at'elil la spasike. Nopbeyaik me te xch'uunjel yot'anike. 8Te Jesucristoe stalel ay, ma xyanaj stukel, te bit'il ay te wojeye, janix jich ta ora to, sok ta sbajt'el k'inal.9Ma me ach'uunik te yantik jnoptesel te ya yak'batike. Ja me lek te yakuk yich' smuk'ul awot'anik ta swenta te yutsil yot'an te Diose, ma ta swenta we'lil te lek ya xk'oex yu'une. Melel mayuk beluk ya staik te mach'atik ya xch'uunik spasele. 10Ay jku'untik milbil smajt'an Dios, te ma xju' yu'un slajinik te sacerdoteetik te swenteinojik te nail pak'e. 11Melel te xch'ich'el te chambalametik, te la yich' ak'el ta swenta te mulile, och ak'el ta bay te awilal te ch'ultesbile, yan te sbak'etale ya yich' chik'el ta sti'il te lume.12Janix jich k'ot ta pasel ta swenta te Jesuse, te k'ax swokol ta lajel te la yich' lok'esel bael ta sti'il te lume, ja ta swenta te la xch'ultes jilel te lume, ta swenta te xch'ich'ele. 13Aka lok'otik bael uuk ta spat te lume, aka me ts'ijk'uk jku'untik uuk teme ya jkich'tik labanele. 14Melel mayuk jlumaltik le' to te sbajt'el k'inal aye. Jauk me to, yakotik ta sleel te jun muk'ul lum te ya xtale.15Jich yu'un ya sk'an ya jkak'tik ta spisil ora te majt'aniletik ta yich'el ta muk' te Diose, sok te ya jk'ajinteybeytik te yutsilal sbiile. 16Sok ma me xch'ay ta jkot'antik ta spasel te beluk leke sok te jech ya jkoltaybatike, melel ja milbil majt'anil te ya smulan bayal te Diose. 17Ch'uunbeyaik me smantal sok ich'aik me ta muk' te wolwanejetik awu'unike, melel jaik ya skananteybeyex te ach'ulelike, sok te jaik nix ya xk'o yak'ik kuenta. Ch'uunbeyaik me smantal te wolwanejetik awu'unike, ma me xa wak'beyik smel-yot'an jich me binax yot'anik ya x-at'ejik ta atojolik, jich me ya stak' akolteyik uuk.18K'oponbotik me Dios, melel jna'otik te mayuk beluk ma lekuk ya jnoptik, sok te ya jk'antik te toj ya xkuxinotike. 19Ya jkalbeyex te yakuk apasik tulan ta spasel spisil in to, ta swenta te yakuk xju' sujt'on tel ta atojolik ta ora nax.BENDICIÓN SOK SPATJIBAL-OT'ANIL TA SLAJIBAL. 20Ta ora to te Dios yu'un te lamal k'inale, te ja la xcha' kusestel ta aelmeletik te muk'ul wolwanej kanan chij, ja bi ja te Kajwaltik Jesuse, ta swenta te xch'ich'ele te ay trato ta sbajt'el k'inale, 21sok te yakuk stojtesatik ta spasel te beluk lek ta pasele, jich me ya yich' pasel te sk'anjel yot'ane. Te yakuk spastaj te yat'el ta jtojoltik te bit'il ya sk'an ta swenta te Jesucristoe, te ja ay yutsilal ta sbajt'el k'inal. Jichuk.22Ta ora to, kermanotak ya me jkalbeyex te yakuk awak'beyik yipal, te lekuk ya awaiyik te tak'uyel te ja la jts'ibubeyexe. 23Na'aik me te jkermanotik Timoteo te lok'ix tel ta chukele, ja ya juintel teme sujt' tel ta orae ya me xtal jkilex.24Ak'beyame spatjibal yot'anik spisilik te wolwanejetik awu'unike sok spisilik te ch'ul lum yu'un te Jkajwaltike. Te mach'atik ayik ta Italia ya me spatbeyex awot'anik uuk. 25Te yutsil yot'an te Diose ayuk me ta atojolik.