To view a copy of the CC BY-SA 4.0 license visit
http://creativecommons.org/licenses/by-sa/4.0/
Efesios
1SPATJIBAL OT'ANIL1Jo'on, Pabloon, te wolwanej puk k'opon yu'un te Jesucristo ta swenta sk'anjel yot'an te Diose. Ya jpatbeyex awot'anik te ja'ex te ch'ultesbilex sok te jun awot'anik ta stojol te Jesucristo te ayatik ta bay lum Éfeso. 2Ayuk yutsil sok lamal k'inal awaiyik yu'un te Jtatik Dios sok te Jkajwaltik Jesucristoe.CH'ULTESEL TA SWENTA TE ESPÍRITU YU'UN TE CRISTOE 3Ich'biluk ta muk' te Dios te ja stat te Jkajwaltik Jesucristoe, ja te mach'a la yak'botik jkich'tik te majt'aniletik te ay ta ch'ulchan ta swenta te Cristoe. 4Te Diose ja la stsaotik k'alal to ta xjajch'ibal te balumilale, swenta yu'un ch'ultesbilotik sok mayuk jmultik ya xk'ootik ta sit.5Ta swenta sk'anjel yot'an te Dios ta xjajch'ibal to, chapal yu'un a te ya yik' yal-snich'aninotik ta swenta te Jesucristoe. 6Ja yu'un te ya jk'ajinteybeytik te yutsil yot'ane, te mach'a la xk'uxtayotik ta swenta te Snich'an te bayal k'ux ta yot'ane.7Ta swenta te la smal xch'ich'el jku'untik te Jesucristoe, ayix koltayel ta jtojoltik sok ayix te perdón ta swenta te bayal yutsil yot'an jku'untike. 8Ja la yak'botik te yutsil yot'an ta jtojoltik sok spisil sbijil jkot'antik sok sbijil joltik.9Te Diose la yak'botik jna'tik stojol te sk'anjel yot'an te muken ay yu'un a, jich la spas te bit'il la sk'an yot'ane, te ja la yak' ilel ta stojol te Cristoe. 10Te beluk la spas te Cristoe, ja te ya sk'otes ta pasel te beluk albil yu'un te Diose, swenta yu'un ya x-ak'bot jilel swentein spisil te beluk ay ta ch'ulchan sok ta balumilal te Cristoe.11Ta swenta Cristo tsabilotik yu'un te ya jkich'tik te majt'anile.Te Diose la tsaotik ta namey k'inal yu'un te jich ya xk'ot ta pasel te bit'il sk'anjel yot'ane. 12Janix jich ja la stsaotik yu'un te la jkich'tik ta neelal te majt'anil yu'un te ay smuk'ul jkot'antik ta stojol te Cristoe, swenta yu'un ya jkich'tik ta muk' te yutsilale.13Ta swenta Cristo, la awaiyikix stojol te smelelil k'op sok te lek yach'il k'op yu'un te akolelike sok te k'alal la ach'uunike, la awich'ik te Ch'ul Espíritu te ja sello yu'un te beluk k'axel yaloj te Diose. 14Te Ch'ul Espíritue ja senyail te beluk ya jkich'tik ak'beyele, ja to teme k'axel la jkich'tik ak'beyel ta jpisiltik te majt'antik yu'un te Diose, jich me ya jkich'beytik ta muk' te yutsilale.TE ESPÍRITU YU'UN TE BIJIL-OT'ANILE SOK TE BELUK AK'BIL TA NA'EL YU'UN DIOS 15Ja yu'un te k'alal la jkaiy stojol te ay xch'uunjel awot'anik ta stojol te Jkajwaltik Jesuse sok te bit'il ay xk'uxul awot'anik yu'un te ch'ul lum yu'un te Diose, 16Ja yu'un te mayuk bi ora komenon ta yalel wokol ta stojol Dios awu'unik sok yakon ta sk'oponbelatik te Diose.17Ya jk'opon te Dios yu'un te Jkajwaltik Jesucristoe, te ja Tatil te ay yutsilale, yakuk yak'batik te Espíritu jich me ya awich'ik abijilik a sok jich me ya ana'beyik sba ta lek a te Diose. 18Ya jk'opon Dios ta awentaik yu'un te yakuk xjam te snopjibal awu'unike, jich me ya ana'beyik sba te mach'a smuk'ulinej awot'anik te ja ik'bilex yu'une sok te yutsil sk'ulejal te ya jkich'tik te ch'ul lumotik yu'un te Diose.19Te k'alal ya jk'opon te Diose, ya jk'anbey te yakuk ana'bey sbaik te k'ax muk' te yu'el te ma stak' ta bisel ta jtojoltik te mach'a ya jch'uuntike, te muk' yu'el te ya x-at'ej ta jtojoltike. 20Janix te yu'el te Dios te at'ej ta stojol te Cristoe, te k'alal cha'kux tel ta ailmeletike sok la snajk'an ta swa'el sk'ab ta bay ch'ulchan. 21Te Dios la yak' najk'ajuk te Cristo ta stojol te ajwaliletike sok te tuneletike sok spisil te mach'a ay yu'elike sok spisil te mach'a tulan sk'oplalike. Te Cristo ma jauk nax ya x-ajwalinaj ta ora to, janix jich ya x-ajwalinaj bael ta sbajt'el k'inal.22Te Diose la yak' te ya yich' ch'uunel te Cristo yu'un spisil te beluk aye sok ja jolol k'ot yu'un te ch'uunjeletike. 23Te ch'uunjeletike ja sbak'etal k'oem, te yutsilal te Cristoe ja ya snojes spisil te beluk aye.
2KOLEMOTIK TA SWENTA YUTSIL YOT'AN1Jich te ja'exe, lajematik a ta skaj te amulike. 2Jich ayatik a, melel ja la apasik te beluk yu'un te balumilale. Te ja'exe la apasik te beluk ja yu'un te pukujetik te ayik ta sjamalul te k'inale. Jai to, ja te espíritu te yak ta at'el ta stojol te alnich'nabetik te ma ya xch'uunik te mantale. 3Ta jpisiltik jich ayotik a te bit'il te mach'atik k'axintey mantale. Ja yakotik ta spasel a te beluk ya smulan te jbak'etaltike sok te beluk ya jnoptike. Janax ayotik ta swenta yich'el tulan woklajel yu'un te Dios jich bit'il te yantike.4Jauk me to te Diose bayal k'ux la yaiyotik yu'un te ya sna'botik jkolilbatik ta skaj te bayal xk'uxul te yot'ane. 5Te k'alal lajemotik yu'un a te jmultike. La yik'otik tel ta yach'il kuxinel sok te Cristoe. Ta swenta nax yutsil yot'an te la jkich'tik koltayele. 6Te Diose la xcha'kusesotik sok la yak' xnajk'ajotik ta ch'ulchan sok te Jesucristoe. 7Jich la spas yu'un te ya yak' ilel ta patil bael te ay bayal yutsil yot'an ta jtojoltike. La yak'botik jkiltik in to ta swenta yutsil yot'an te Jesucristoe.8Melel ta swenta nax yutsil yot'an Dios te la awich'ikix koltayel ta skaj te xch'uunjel awot'anike, ma jauk te la akoltey abaik ta atukelik naxe, ja jun majt'anil yu'un te Diose. 9Ma ba ta skaj awat'elik, jich yu'un ma me ayuk mach'a ya stuy sba yu'un. 10Melel te jo'otike ja yat'elotik te Diose, la xchiknantesotik ta swenta te Jesucristoe, swenta yu'un ya jpastik te lekil at'elil te la xchajp'an ta namey k'inal te Diose, swenta yu'un ya me jpastik bael te beluk lek ta pasele.JUNAJ JKOT'ANTIK TA STOJOL DIOS TA SWENTA TE LAJ TA CRUZ TE CRISTOE 11Jich yu'un juluk me ta awot'anik te jich k'oematik a te bit'il yan lum ta swenta te abak'etalike. Te judioetike jich ya yalbeyex te "ma awich'ojik circuncision" melel ja yich'ojik te circuncisión ta sbak'etalik te pasbil ta sk'ab te ants-winiketike. 12Melel ta neelal to lok'ematik ta stojol a te Cristoe. Te ja'exe yan lumex yu'un a te lum Israele. Sok mayukatik ta bay te trato te yaloj te Diose. Te ja'exe mayuk smuk'ul awot'anik ja yu'un te beluk ya xk'ot ta pasel pajel chaweje. Te ja'exe mayuk Dios ta awot'anik ta balumilal.13Yan ta ora to ta swenta te Jesucristoe, manchuk teme k'ejel to ayex ta sneelal to ta stojol te Diose, la awich'ikix tel noptsanel ta stojol te Dios ta swenta te xch'ich'el te Cristoe. 14Melel te Cristoe la yak'botik lamal k'inal. La yak'otikix ta junax sok te judioetike.Ta swenta te laj ta cruz te la sjin te ts'ajk' te xatojotik a, te ja yak'oj te ya jkontroin batike. 15Janix jich, la slajinbey sk'oplal te mantaliletik sok te beluk chapal yu'une, swenta yu'un junax ya xk'ot te ants-winiketike. Ja la yak' lamal k'inal. 16Ja la spas yu'un te la yak' junajuk yot'an ta xcha'-xchajp'al te lume, jich junax k'ootik ta stojol te Dios ta swenta te laj ta cruz te Jesuse. Ta swenta te laj ta cruz te Jesuse, jich la yak' lajuk te ya jkontroin jbatike.17Te Jesuse tal xchol sk'oplal te lamal k'inal ta atojolik, te ja'ex te k'ejel to ayatike sok te mach'atik nopol ayike. 18Ta swenta te Jesuse, pajal ya stak' x-ochotik ta ba ay te Tatile, ta swenta junax Espíritu.19Jich yu'un, te ja'ex te yan lumexe, awich'ojikix me na'bel abaik sok ma ba yan lumatikix. Jauk me to te ja'exe pajal alumal abaikix sok te mach'a tsabilikix yu'un te Diose sok te ja yal-snich'anatikix me uuk te Diose. 20Te ja'exe awich'ojikix ts'ajk'uyel ta bay te yiptijib te noptesel yu'un te wolwanej puk k'opetike sok te alwanejetike. Janix te Jesucristo te ja smuk'ul yiptijib te xchikin nae. 21Ja ta swenta te Jesucristoe, te ya x-ipaj moel sts'ajk'ul spisil te nae sok te yak ta muk'ubel jich me ya xk'ot ta muk'ul ch'ul templo yu'un te Jkajwaltike. 22Ta swenta te Jkajwaltike, te ja'exe pajal yakalex ta ts'ajk'uyel moel swenta yu'un le' ya xnain ta atojolik te Dios ta swenta te Espíritue.
3YAT'EL TE PABLO TA STOJOL TE YAN LUMETIKE1Ja yu'un te jo'on, Pabloon, te ayon ta chukel yu'un te Jesucristoe ta skaj te ja'ex te yan lumexe. 2La niwan awaiyikix stojol te la yak'bon jkat'el te Dios te ya jcholbeyex te bit'il ay te yutsil yot'ane.3Te jo'one, yakon ta sts'ibuyel jich te bit'il la jkich' ak'beyel jna' stojole. Jai to, ja te beluk smelelil te ma ak'bil na'el stojole, te la jts'ibubeyex tebuk ta banti te yan june. 4Te k'alal ya ak'oponik jai jun to, jich me ya xju' xk'ot ta awot'anik te bit'il k'oemix ta jkot'an te beluk smelelil te mukul ta stojol te Cristoe. 5Te ma la yich'ik ak'beyel sna' stojol te yal-snich'nab te ants-winiketik ta namey k'inale. Yan ta ora to la yich'ix ak'beyel sna' stojol yu'un te Espíritu te wolwanej puk k'opetik sok te alwanejetik yu'une.6Te beluk smelil te ma ba ana'ojike: Ja te yan lumetik pajal me ya yich'ik smajt'anik sok sjoy me sba ya xk'ot sok te judioetike. Pajal me ya yich'ik te beluk ts'ibubil ta lek yach'il k'op te yaloj te Jesucristoe. 7Melel k'atbujon ta abat yu'un jai lek yach'il k'op to, te ja majt'anil yu'un te yutsil yot'an te Dios te la yak'bon ta skaj te yak ta at'el ta jtojol te yu'ele.8Te Diose ja la yak'bon jai majt'anil to, manchuk me ja pek'elon xan te bit'il te mach'atik tsabil yu'un te Diose. Jai majt'anil to te la jkich' ak'beyele, ja te ya jkalbey te yan lumetik te lek yach'il k'op yu'un te k'ax bayal te majt'anil yu'un te Cristoe. 9Ya sk'an te ya jkak' ta ilel ta stojol spisil te ants-winiketik te beluk muken chapal yu'un te Diose. Jai to ja te beluk chapal yu'un ta namey k'inal, te ja la spas spisil te beluk aye.10Jich yu'un, ta swenta te ch'uunjeletike, te ajwaliletik sok te mach'a tulan yich'ojik yat'elik ta ch'ulchan jich me ya sna'ik a te k'ax ay sbijil te Diose. 11Jich me k'ot ta pasel te bit'il xchapoj ta sneelal te Dios ta swenta sbajt'el k'inal, te ja la yak' k'otok ta pasel ta swenta te Jkajwaltik Jesucristoe.12Melel ta swenta Cristo te ma xiwotik sok te ya stak' x-ochotik sok smuk'ul jkot'antik ta banti ay te Dios ta skaj te xch'uunjel jkot'antik ta stojole. 13Jich yu'un, ya jk'anbeyex te ma me xche'baj awot'anik yu'un te jwokol te yak ta k'axel ta awentaike. Ja me awutsilalik in to.TE XK'UXUL OT'ANIL TE JELAWEN XAN A TE BIT'IL YA XJU' TA NA'EL 14Ja yu'un te ya jkejanba ta stojol te Tatile, 15te ja la spas spisil te beluk ay ta ch'ulchan sok ta balumilal sok janix la yak'bey sbiil. 16Ya jk'opon Dios yu'un te yakuk yak'beyex te yutsil sk'ulejal sok te yakuk yich' yip awot'anik ta swenta yu'el te Espíritu yu'un te ay ta atojolike.17Ya jk'opon Dios yu'un te yakuk xnain ta awot'anik te Cristo ta swenta te xch'uunjel awot'anike. Ya jk'opon Dios ta atojolik te k'axeluk ya awak' abaik ta swenta te xk'uxul awot'anike. 18Jich me ya xk'ot ta awot'anik sok spisil te mach'atik ch'uunjeletik te bit'il ay te sjamalul, te snajt'il, te stoylejal sok te sk'ubulil xk'uxul yot'an te Cristoe. 19Ya jk'opon Dios ta atojolik te yakuk ana'ik stojol te smuk'ul xk'uxul yot'an te Cristoe, te k'axem to xan a te bit'il ya jna'tike. Swenta yu'un jich ya apasik, jich me ya awich'ik nojesel ta yutsilal te Diose.20Jich yu'un ta swenta nax Dios te ya xju' yu'un spasel spisil, kaxem to xan te bit'il ya jk'antike sok te beluk ya jnoptike, melel ja yak ta at'el ta jtojoltik te yu'ele, 21ich'biluk ta muk' te yutsilal te Dios sok ich'biluk ta muk' spisil ora te yutsil sbiil te Jesucristo yu'un te ch'uunjeletike sok te ts'umbaliletik ta sbajt'el k'inal. Jichuk.
4JUN AYOTIK TA SWENTA ESPÍRITU1Jich yu'un, te ayon ta chukel ta swenta te Jkajwaltike, ya me jkalbeyex bayal wokol te lek me ya xkuxinex ta k'inal jich te bit'il ik'bilexe. 2Pek'eluk me xa wak' abaik, ayuk me yutsil te awot'anike sok ayuk me smalib awu'unik. Jejch' k'ux me awaiy abaik. 3Pasaik te beluk leke, jich me jun ayatik sok te Espíritu te ayuk lamal k'inal awu'unike.4Junax te jbak'etaltik k'oem sok junax te Espíritue, janix jich junax la yik'otik te Dios yu'un te ya jmaliytik te ik'ele. 5Sok junax te Jkajwaltike, junax te xch'uunjel ot'anile, junax te ich' ja'e, 6junax te Dios sok junax te Jtatik ta jpisiltike. Te ja kajal yu'un spisil te beluk aye, sok ay ta swenta sok ja yu'un spisil.7Ta tulutul te jo'otike ak'bilotikix jun majt'anil jich te bit'il la sk'an yot'an yak'botik stukel te Cristoe. 8Jich te bit'il ya yal ta sjun te Diose : "TE K'ALAL MO BAEL TA CH'ULCHANE, LA YIK' MOEL TE MACH'A CHUKBILIKE SOK LA YAK'BEY SMAJT'AN TE LUME."9¿Beluuk ya sk'an yalbotik te "Mo baele," yu'un ba janix ko bael ta yet'al te balumilale? 10Te mach'a ko tele, janix te mach'a mo bael ta sba te ch'ulchanetike. Ja la spas yu'un te yakuk xnoj ta yu'el spisil te beluk aye.11Te Cristo ja me la yak' te majt'aniletik to: Wolwanej puk k'opetik, alwanejetik, te mach'atik ya xcholik te lek yach'il k'op, pastoretik sok te bijteswanejetike. 12Ja la yak' te majt'aniletik yu'un te ya xchajp'an ta lek te mach'atik ch'uunjeletik ta spasbeyel te yat'ele, ta swenta te yakuk xch'i te xch'uunjel yot'an te ch'uunjeletik te ja te sbak'etal te Cristoe. 13Ja to teme junax ya jtatik te xch'uunjel jkot'antike sok teme la jna'beytik sba te Snich'an te Diose. Jich me yak spasel in to swenta yu'un te yakuk xch'iotik jich bit'il te mach'atik sna'ojbey sbaik ta lek te Cristoe.14Swenta yu'un ma me jichukotik xan te bit'il alaletike. Swenta yu'un ma me xtal-xbootik nax. Jich ma me jkich'tik lo'layel yu'un a te yantik nojp'tesel yu'un te ants-winiketik te ya slo'leyotik ta ora nax yu'un te sbijil sjolike. 15Jauk me to, te jo'otike ya me sk'an ya jkaltik te smelelil k'op ta swenta te xk'uxul ot'anil jich me ya xch'iotik ta stojol te mach'a jolol jku'untike, ja bi ja te Cristoe. 16Te Cristoe, junax ya yak' spisil te ch'uunjeletike. Te ja ya yak' te junax ya x-at'ejotike, swenta yu'un jich me ya xch'iotik a, sok jich me ya xch'iotik ta swenta te xk'uxul ot'anile.TE YACH'IL KUXLEJAL TA SWENTA TE CRISTOE 17Jich yu'un, jich ya jkalbeyex ta mantal ta swenta te Jkajwaltike: Ma me jichuk xan ya xbeenex te bit'il yantik lumetik te janax ya spas te beluk snopojik te mayuk stulale. 18Te snopjibal yu'unike ijk'ubenikix. Melel ma sna'bey sbaik te Diose, ja yu'un te ma sna'ik k'inal ta skaj te tulan te yot'anike. 19Ma ba ya xk'exawik. Ja la yak' sbaikix ta stojol te beluk smulanej te sbak'etalike, ja ya spasik spisil te beluk amen ta pasele.20Jauk me to te ja'exe ma jichuk ja nopojik ta swenta te Cristoe. 21Melel jnopoj te la awaiyikix stojol sk'oplal sok te la awich'ikix nojp'tesel ta swenta, te ja smelelil te Jesuse. 22Ijk'tayameik te spokol akuxlejalik te bit'il ayatik ta sneelal toe. Melel bolobenix te spokol kuxlejalil ta swenta te sk'anjel ot'anil te ma lekuke.23Ijk'teyameik te spokol akuxlejalike, aka me ach'ubuk te atalelike sok te snopjibal awu'unike. 24Pasaik me jich in to swenta yu'un ya me stak' alapik te yach'il akuxlejalike, te jich ya sk'an te Diose. Te ja la yich' pasel ta stojil sok ja ch'ultesbil stukel.25Jich yu'un, ma me apasik lot. "K'OPOJANIK ME TA SMELELIL, TA TULUTUL SOK TE APAT AXUJK'E," melel junax ayotik ta jpisiltik. 26"TEME YA X-ILINEXE, MA ME LE'UK YA ATAIK AMULIK A." Ma me smaleluk k'aal te ya x-ilinexe. 27Ma me awak'ik x-och te pukuje.28Te mach'a ya x-elk'aje, ya me sk'an te ma x-elk'ajixe. Ya me sk'an te yakuk x-at'eje. Aka at'ejuk sok sk'ab, yu'un me jich ya stak' yak'bey xujt'uk a te mach'a mayuk beluk ay yu'une. 29Ma me xlok' bol-k'op ta aweik. Jauk me to, ja me aka lok'uk ta aweik te lekil k'op swenta yak'beyel yip yot'an te yantike, swenta jich ay yutsil ya yaiybeyex te ak'opike. 30Ma me awak'beyik smel-yot'an te Ch'ul Espíritu yu'un te Diose. Ja me sello awu'unik te la awich'ik ak'beyel jich me ya ataik te beluk yaloj jilel te Diose.31Ijk'teyaik te beluk xmich'et k'inal awaiyik yu'une, ijk'teyaik te la'-ot'anile, te ilimbae, te utawe, te bol-k'ope, sok spisil te beluk amen ta pasele. 32Jech k'ux me awaiy abaik. Ayuk me slekil te awot'anike. Pasbeya me abaik perdón, jich te bit'il Dios la spasbeyex perdón ta swenta te Cristoe.
5TE BIT'IL YA SK'AN XKUXINIK TE MACH'ATIK YAL-SNICH'AN TE DIOSE1Jich yu'un, nopbeyaik me stalel te Diose, te ja'ex snich'nabex te bayal k'uxex ta yot'ane. 2Sok k'uxuk me ya awaiy abaik ta spisil ora, jich nix te bit'il bayal k'ux la yaiyotik te Cristoe te bit'il ja la yak' sba ta lajel ta jtojoltike. Te Cristoe jich k'ot te bit'il milbil majt'anil te xjuk'et nax yik' ta stojol te Diose.3Te ja'ex te ch'uunjelexe ma snujp'in te ya awa'anik spisil ta chajp' chijil ot'anil, te beluk ma lekuk ta pasele sok te sbik'tal ot'anil ma ba ya snujp'in te jich ya apasike. 4Ma me stak' ya awalik bol k'op, sok te jowil k'op sok te beluk ma ich'biluk swentail ta alele, ma ba ya snujp'in te jich ya apasike. Ja ya sk'an te yakukex yalel wokol ta stojol te Dios ta spisil ora.5Na'aik ta lek, te mach'a ya spas spisil ta chajp' mulil, te chijil-ot'anil sok sbik'tal-ot'anil yu'un tak'in te jich k'oem te bit'il te mach'a ya xch'uun te lok'om baetike, ma me ya xju' xnain ta ba ay ta ajwalinel te Cristoe sok te Diose. 6Ma me awak' abaik ta lolayel ta lotil k'opetik. Ta swenta spisil te mulil in to, te yilimba te Diose yak ta k'oel ta stojol te mach'atik yal-snich'nab te k'axintey mantaliletike. 7Jich yu'un ma me jichukex uuk.8Te ja'ex ta neelal to ayatik ta ijk'al k'inal a, yan xan ta ora to ayex ta sakil k'inal ta swenta te Kajwaltike. Jich yu'un kuxinanik bael jich te bit'il ya sk'an te Kajwaltike. 9Te sit te sakil k'inale ja te lekil at'elile, te beluk toj ta pasele sok te beluk smelelile. 10Tsajtayaik me te beluk lek ta pasel ta stojol te Kajwaltike. 11Ma me xa joinik ta spasel te beluk ma lekuk ta pasel jich te bit'il ya spasik te mach'atik ayik ta ijk' k'inale. Jauk me to ak'beyaik me sna' stojol te beluk ma lek yakik ta spasele. 12Melel te beluk muken ya spasike, k'ax k'exlaltik nax sba.13Spisil te beluk ya jpastike, teme la yich' ak'el ilel ta sakil k'inale, ya me yich' ilel te beluk amen spasojike. 14Melel spisil ya me yich' ak'el ta na'el stojol teme lok' ta sakil k'inale. Ja swentail te jich ay ta alel: "Jajch'an, ja'at te wayalate, sok jajch'an tel ta bay ay te aelmeletike jich te Cristoe ya me yak' sakil k'inal ta atojol."15Ja yu'un, bijanik me te bit'il ayexe, ma me jichukex te bit'il ants-winik te ma sna'ik k'inale, jaukex me te ayuk abijilike. 16Na'aik me te bit'il kuxulex ta jujun k'aale, melel ay amen ya xk'ax awu'unik te jujun k'aale. 17Ma me bolukex. Jaukex me te ya xk'ot ta awot'anik te beluk sk'anjel yot'an te Diose.18Sok ma me awuch'ik trago, melel ya me yak'ex ta me'bal. Jauk me to, jauk me ya ak'anik te yakuk awich'ik nojesel yu'un te Ch'ul Espíritue. 19Albeyame abaik salmoetik, k'ayojetik sok spisil ta chajp' k'ayoj te ya yalbey yutsilal te Kajwaltike. K'ajinanik sok ich'aik ta muk' sok spisil awot'anik te Kajwaltike. 20Spisil uuk me ora yakukex me yalel wokol yu'un spisil in to, ta swenta sbiil te Kajwaltik Jesucristoe sok te Jtatik Diose. JECH ICH'ABAIK TA MUK' 21Jech ich'abaik ta muk' jich te bit'il awich'ojik ta muk' ta smelelil te Cristoe.22Antsetik ich'aik me ta muk' te amamlalike, jich te bit'il ya awich'ik ta muk' te Kajwaltike. 23Melel te amamlalike ja me jolol k'oem awu'unik, jich te bit'il Cristo ja jolol k'oem yu'un te ch'uunjeletike. Te Cristoe ja me koltaywanej yu'un te slume. 24Jich bit'il te ch'uunjeletike yak'oj sbaik ta wentainel yu'un te Cristoe, Jichukik me uuk te antsetik te nujp'inemike, ya me sk'an te jichukex sok te amamlalik ta spisil ora.25Jichatik uuk winiketik, k'ux me ya awaiyik te awinamike jich bit'il te Cristo k'ux ta yot'an te ch'uunjeletike sok te la yak' sba ta milel ta stojole. 26Jich la spas spisil in to swenta yu'un ya yich' ch'uultesel. Te Cristoe ja me la spokbey lok'el spisil xch'alel ta swenta te ich' ja' te jich yaloj ta sk'ope. 27Jich la spas spisil in to, swenta yu'un ayuk yutsilal te ch'uunjeletike, te manchuk ayuk xch'alele sok te manchuk bolobene, sok te mayuk beluk ch'altesbil yu'une, jauk nax me te ch'uultesbiluke sok te mayuk bay ch'ayeme.28Janix me jich ya sk'an apasik, winiketik, k'anaik me te awinamik jich te bit'il ak'anojik te abak'etalike.Te mach'a sk'anoj te yiname, sk'anoj me sba uuk abi. 29Melel mayuk mach'a ya sbaj te sbak'etale. Jauk me to, ya me skanantey sok k'ux me ta yot'an, jich te bit'il Cristo k'axel k'ux la yaiy ta yot'an te slume. 30Melel, jo'otik te yok-sk'abotik te sbak'etale.31Ja ta swenta in to, te winike ya me yijk'tey jilel te sme'-state jich me ya yik' sba sok te yiname sok junax me ya xk'ot te sbak'etalike. 32Ja in to k'ax muk' sk'oplal te ma ba ana'ojik stojol ta neelale, jauk me to ja yakon ta yalbeyel sk'oplal te Cristoe sok te lum yu'une. 33Jich yu'un, ta tulutul k'anaik me te awinamik jich te bit'il ja k'anojik te abak'etalike, jichex uuk antsetik ich'aik ta muk' te amamlalike.
6TAK'UYEL YU'UN ALNICH'ANETIK SOK ME'EL-TATILETIK1Alnich'anetik, ch'uunbeyaik me smantal te ame'-atatike ta swenta te Jkajwatik, ja me jich ya sk'an ta pasel. 2"ICH'AIK ME TA MUK' TE AME'-ATATIKE," (ja me sbabial mantalil te yich'oj majt'anil), 3"JICH ME LEK YA XK'OEX TA APISILIK A, JICH YA XNAJT'UB AKUXLEJALIK LE' TA BALUMILAL TO."4Te ja'ex te me'el-tatilexe, ma me xa wak' x-ilinuk yot'an te awal-anich'anike. Jauk me to, lek me xa ch'itesik sok lek me ya abijubtesik ta swenta te Jkajwaltike.5Abatetik, ch'uunbeyaik me smantal te awajwalik ta balumilale, ich'aik me ta muk' sok xiaik me, tojok me te awot'anike. Ch'uunbeyaik me te smatal jich te bit'il ya ach'uunik te Cristoe. 6Ch'uunej mantalukex me ma me jauk nax te k'alal ya yilex te awajwalik te lekuk ak'oplalik yu'une. Jauk me to, ch'uunej mantalukex me jich bit'il te yabatex te Cristoe. Pasaik me te sk'anjel yot'an te Dios sok awot'anik. 7Ch'uunaik me sok spisil awot'anik, jich te bit'il ya ach'uunbeyik smantal te Jkajwaltik te manchuk jichuk te bit'il te ants-winiketike. 8Te ja'exe ya me sk'an te ya ana'ik te beluk lek at'elil ya spas te ants-winike, ya me yich' smajt'an yu'un te Jkajwaltike manchuk me ja te mach'a esclavoinbile o ja te mach'a libre aye.9Sok te ja'ex ajwalilexe, jich nix ya sk'an ya apasik ta stojol te amosoike. Ma me xa k'ajk'al k'opteyik. Ya me ana'ik te ja'ex pajal me ay awajwalik ta ch'ulchan sok. Te ja'exe ana'ojik me te mayuk mach'a tsabil nax yu'un te Jkajwaltike.TE JMAJK'ILTIK YU'UN TE DIOSE 10Jich me ya jkalbatik ta slajibal, ich'aik me yip te awot'anik ta stojol te Jkajwaltik ta swenta yip te yu'ele. 11K'uinaik me te amajk'ilik te yak'ojbeyex te Diose, jich me ya xju' awu'unik sts'ikel spisil te beluk chapal yu'un te pukuje.12Melel ma jauk ya jtsakbatik sok te mach'a pajal ch'ich' bak'etotik soke. Ja ya jtsakbatik sok te bol espírituetik, te ja ajwaliletik te ay yu'elik te ma chikanuk ta ilele sok te mach'a ajwaliletik te ya x-ajwalinik ta ijk'al k'inale, sok te bol espírituetik te ayik ta sjamalul te ch'ulchane. 13Jich yu'un lapaik me te amajk'ilik yu'un te Diose, jich me ya xju' awu'unik stsalel te bi k'aalil ay awokolike sok ya me xju' awu'unik stsalel te beluk amene. Teme jich la apasik spisil in to, ya me xju' awu'unik tsalaw.14Jich yu'un, ayuk me smuk'ul awot'anik, chukaik me ach'ujt'ik yu'un te beluk smelelile sok k'uinaik me te beluk lek ta pasele ja me smajk'il awot'anik k'oem. 15Lekuk me chapalatik yu'un te ya xba acholik te lek yach'il k'op yu'un te lamal k'inale, jich te bit'il lek alapik te axanabike. 16Ta spisil ora jauk me smajk'il awot'anik te xch'uunjel awot'anike, jich ya me xju' awu'unik stubel te k'ajk' te ya xtal ta atojolik yu'un te jkaj jkontrotik ja te pukuje.17Ich'aik me te smajk'il ajolik te ja te akolelike sok ich'aik me te espada yu'un te Ch'ul Espíritu, ja te sk'op te Diose. 18Ma me xch'ay ta awot'anik sk'oponel te Dios sok ta yalel wokol ta spisil ora ta swenta te Espíritue. Wik'iluk me asitik ta spisil ora, manchuk me xkomex ta sk'oponel te Diose, k'oponbeyaik me Dios spisil te ch'uunjeletike.19Sok k'oponbonik me Dios uuk, swenta yu'un te k'alal ya xk'opojone, ya me yalbon te Dios te beluk ya sk'an te ya jchole. K'oponbonik me Dios yu'un te ma xiw jkot'an te k'alal ya jchol te lek yach'il k'op te mukbil ta sneelal toe. 20Ja me tikunbilon tel yu'un te ya jchol te lek yach'il k'ope, ja swentail te chukulon ta kadenaetike, manchuk me chukulon ma me xiw jkot'an ta xcholel te beluk smelelile.SLAJIBAL SPATJIBAL OT'ANIL 21Janix jich ya jtikunbatik bael te kermanotik Tíquico te k'ux ta jkot'antik sok te jun yot'an te yak'oj sba ta abatinele, te ya xba yalbatik te bit'il ayone sok te ya xcholbatik spisil te beluk yakotik ta spasele. 22Jo'on la jtikunix tel ta atojolik swenta yu'un ya xcholbatik te bit'il ayotike, jich me ya ana'ik stojol te beluk yakotik ta spasele, jich me ya xmuk'ub k'inal awaiyik a.23Te Jtatik Dios sok te Kajwaltik Jesucristo aka yak'beyex lamal k'inal sok xk'uxul awot'anik ta swenta te xch'uunjel awot'anik jkermanotak. 24Te yutsil yot'an te Diose ayuk me ta atojolik te mach'a sk'anoj te Kajwaltik Jesucristoe sok te xk'uxul yot'an te ma xlaj stukele.
