To view a copy of the CC BY-SA 4.0 license visit
http://creativecommons.org/licenses/by-sa/4.0/
Notices:
You do not have to comply with the license for elements of the material in
the public domain or where your use is permitted by an applicable
exception or limitation.
No warranties are given. The license may not give you all of the
permissions necessary for your intended use. For example, other rights
such as publicity, privacy, or moral rights may limit how you use the
material.
2 Timoteo
1SPATJIBAL OT'ANIL1Pablo, tul wolwanej puk k'op yu'un te Cristo Jesuse ta swenta te sk'anjel yot'an te Diose, ta swenta te beluk k'axel albil yu'un te janax ay kuxinel ta swenta te Cristo Jesuse. 2Ja la jts'ibubat jai jun to Timoteo, te ja jnich'anat te k'uxat ta jkot'ane: Te yutsil yot'an, sok te xk'uxul yot'an janix jich te lamal k'inal yu'un te Jtatik Dios sok te Cristo Jesús te ja Jkajwaltik jku'untik ayuk me ta atojol.YA YICH' ALEL SK'OPLAL TE CRISTOE 3Ya jkalbey wokol te Diose, te ja yakon ta abatinel yu'un, jich te bit'il la spas sok lekil at'elil te jchichmame, te k'alal ya jna'at ya jk'oponbat Dios ta spisil ora, k'aal ta ajk'ubal. 4Ya jk'an ya jkilat, jich me ya sbujts'naj jkot'an yu'un. Ya xtal ta jol te bit'il ok'ate. 5Sok ya xtal ta jol te smelelil te xch'uunjel awot'ane, te ja pajal sok te xch'uunjel yot'an te ja yame' Loidae sok te ja me' Eunice. Ya me xch'uun jkot'an te jich uuk te xch'uunjel awot'ane.6Jich yu'un ya me jkalbat te yakuk xjul ta ajol te majt'anil te la yak'bat te Dios te k'alal la jkajan jk'ab ta atojole. 7Melel te Diose ma jauk la yak'botik te espíritu yu'un te xiwele, ja la yak'botik te yu'ele, te xk'uxul ot'anile, sok te ya jna'tik te bit'il kuxulotike.8Jich yu'un ma me xk'exwat yu'un te ya awalbey sk'oplal te Jkajwaltike, sok te jo'on Pabloone, te chukulon ta swentae. Janix me jich uuk te ja'ate ya me ats'ik awokol uuk te ya apuk te lek yach'il k'op yu'un te Jkajwaltik ta swenta te yu'el te Diose. 9Ja Dios te la skoltayotike, sok la yik'otik yu'un te ch'ul lum ya xk'ootike. Jich la spas in to ma yu'unuk ay beluk lek la jpastik, ja la spas yu'un te beluk snopoje sok te xk'uxul yot'ane. Ja la yak'botik in to ta swenta te Cristo Jesús te k'alal ma to chiknajem a te balumilale. 10Jauk me to ta ora to te koltayel yu'un te Diose ja la yich'ix ak'el na'el stojol yu'un te chiknaj te koltaywanej jku'untike, te ja te Cristo Jesuse. Ja te Cristo te la slajinbey sk'oplal te lajele sok la yak'botik sujt'el te kuxinel te mayuk slajibale ta swenta te lek yach'il k'ope. 11Ja yu'un te la jkich' jkat'el yu'un te ya jchol te lek yach'il k'ope, sok te wolwanej puk k'opone sok te bijubteswanejone.12Ja yu'un te jich ayon ta woklajel uke. Jauk me to ma xk'exawon yu'un; melel ya jna'bey sba te mach'a jch'uuneje. Sok xch'uunej jkot'an te skananteyoj te beluk jkak'oj jilele, ja to te k'alal ya sta yorail te ya xcha'tale. 13Ma me xch'ay ta awot'an te lekil k'op te la jcholbat awaiye, sok te xch'uunjel awot'ane, janix jich te xk'uxul awot'an te ja ta swenta te Cristo Jesuse. 14Te beluk lek ak'bilat jilel ta mantal yu'un te Diose, k'ejame ta swenta te Ch'ul Espíritu te ja nainem ta jkot'antike.15Ja na'ojme, te mach'atik nainemik ta Asia la me yijk'teyonik. Janix me jich le'a te Figelo sok Hermógenes. 16Te Jkajwaltik ayuk me xk'uxul yot'an ta stojol te mach'atik ayik ta sna te Onesíforo, melel juju ajk'nax la smuk'tesbon jkot'an sok ma k'exaw yu'un te bit'il chukulone. 17Te k'alal tal ta Roma ja la sleon ja to te k'alal la staone. 18Aka me yich' k'uxtayel yu'un te Jkajwaltik te k'alal ya sta yoraile. Sok ja na'oj te bit'il bayal buelta la skoltayon te k'alal ayon ta Éfeso, ja na'oj me ta lek.
2TE LEKIL SOLDADO YU'UN TE JESUCRISTOE1Jich yu'un, Timoteo ja'at te jkuyojat ta jnich'ane, ayuk me yip awot'an ta swenta te yutsil yot'an te Cristo Jesuse. 2Spisil te beluk la jkalbat awaiy stojol ta stojol te tsobol testigoetike, ja me ya awak'bey snop te mach'atik jun yot'anike, te ya xju' yu'unik yak'el nopel ta stojol uuk te yantike.3Ts'ikame awokol jich te bit'ilone, jich te bit'il tul soldado yu'un te Cristo Jesuse. 4Mayuk tuluk soldado te janax ya sbajt' ta yot'an snopel te bit'il ya xkuxine, jich me lek sk'oplal yu'un te wolwanej yu'une. 5Janix jich teme ay mach'a ya yaiy tajimale, ma me ya yich' te smajt'an teme ma la xch'uun te bit'il ya sk'an ya yaiy te tajimale.6Te mach'a ya sts'un te yawal sts'unub ta sk'inale neel me ya sk'an ya x-at'ej jich me ya yich' te beluk ya sk'aje. 7Nopame te beluk yakon ta yalele, swenta yu'un ya me yak'bat te Dios te ya ana'bey swentail spisil in to.8Naame te Cristo Jesús, te ja sts'umbal te Davide, te ja la yich' cha'kusesel ta bay te aelmeletike. Jich te bit'il ya yal te yach'il k'op te yakon ta xcholele, 9ja yu'un te ayon ta wokolile te chukulon ta kadenaetik jich te bit'il tul milwale. Jauk me to te sk'op te Diose ma ba chukul stukel. 10Jich yu'un, te ya jts'ik spisil in to ta swenta te mach'atik tsabilikixe, jich ya staik uuk te skolelik ta stojol te Cristo Jesús, te ay yutsil sbajt'el k'inale.11Ja smelelil in to: "Teme lajotik soke, pajal ya xkuxinotik sok. 12Teme ya sts'ijk' jku'untik te jwokoltike ya me joinbatik ta ajwalinel sok. Teme la jmuktik ta jkot'antik, janix me jich ya smukotik ta yot'an uuk. 13Teme ma junuk jkot'antik ta stojole, jun me yot'an stukel, melel ma xju' ya smuk te bi yilel stalel stukele."TUL ABAT TE LEK YA XK'OT TA LOK'ELE 14Alulebeyame spisil te yantike te beluk la jkalbate. Tulan me xa awalbey ta stojol Dios te ma jontoltikuk nax ya stsak sbaik ta jowil k'opetik. Melel teme jich la spasike mayuk beluk ya xlok' yu'unik a. Ja me yu'un te ya xtal te jinel ta stojol te mach'a ya yaiyik stojole. 15Pasame te beluk lek ta pasele jich me te k'alal ya xk'o atejk'an aba ta stojol te Diose ma me ya awich' k'exlantesel a. Sok te toj ya awak' ta nopel te smelelil k'ope.16Ijk'teyame jilel spisil te jontol k'opetike, te ja yanyan ya yak'at ta ch'ayele. 17Te sk'opike jich me ya xpujk' bael te bit'il k'ael chamel te mayuk xpoxile. Jich te bit'il ay te Himeneo sok te Filetoe. 18Jai winiketik to la yijk'teyikix te beluk smelelile. Melel ya yalik te k'axix te cha'kuxele.Jich me ay cha'ox tul te ch'ayikix te xch'uunjel yot'anik yu'une.19Jauk me to, junax te yiptijib te yak'oj te Diose, te ma stij sba stukele, jai to ja sello te ak'bile: "Te Jkajwaltike ya sna'bey sba te mach'atik yu'une," "sok spisil te mach'a ya yalbey sbiil te Jkajwaltike ya sk'an ya sk'ej sba lok'el tel yu'un beluk ma lekuk ta pasele." 20Ta bay sna te tul k'uleje ma jauk nax ay swe'-sets' te pasbil ta oroe sok ta platae. Jauk me to ay nix swe'- sets' te pasbil ta te' sok ta ajch'ale. Ay ya xtuun yu'un te k'alal ya yich' pasel k'in sok ay ya xtuun yu'un ta jujun k'aal. 21Teme ay mach'a ya yijk'tey te beluk ma lekuke jich me ya xk'ot te bit'il lekil we'-sets'e. K'ejel me ya yich' ak'el, ya me xtuun yu'un te Jkajwaltike, sok jich chapal ta spasel spisil te beluk lekil at'elile.22Ma me xa k'ain spasel te beluk ya smulan yot'an te ch'ieletike. Nutsame te beluk toj ta pasele, te xch'uunjel ot'anile, te xk'uxul ot'anile sok te lamal k'inale, pajal me ya awich'ik ta muk' te Kajwaltik sok te mach'atik toj yot'anik ta xch'uunele. 23Jauk me to ma me awak' achikin a te beluk jontol k'op te ya awich' jojk'ibele.Ya me ana' te ya xjach kerae.24Te abat yu'un te Kajwaltike ma me sk'an ya yaiy kera. Ja me ya sk'an te ya yak' ilel te yutsil yot'ane sok te ya sna' nojp'teswaneje, janix jich te ayuk smalib yu'une. 25Pek'eluk me ya yak' sba te k'alal ya sbijtes te mach'a yan snopjibal yu'une. Te Diose ya me stak' ya yak' te ya sut yot'anik yu'un te smelelil te ya yich' cholbeyele. 26Jich ya me stak' xlok'ik tel ta spejts' te pukuje jich ya me xkux k'inal ya yaiyik a, melel chukulik sok yakik ta spasel te beluk sk'anjel yot'an te pukuje.
3TE BI YILEL STALELIK TE ANTS-WINIKETIK TA SLAJIBAL K'AAL1Jauk me to ya me sk'an ya ana' stojol in to: Ta slajibal k'aal ya me xtal te beluk chujk'ultik sbae. 2Ta skaj te ay ants-winiketik te janax k'ux ya yaiy sbaik stukelik, ya smulanik te tak'ine, ya stoy sbaik, sok ya stoy sbaik ta k'op, bol k'optewanejetik, k'axinte mantaliletik ta stojol te sme'-statike, ma sna'ik yalel wokol, ma lekuk yat'elik. 3Mayuk xk'uxul yot'anik, ma xlekubik, jowil le muliletik, ma sna'ik skombel sbaik, uts'iwanejetik, ma smulanik te beluk smelelile. 4Ja me ya x-ak'wanik ta k'abal, ma snopik te beluk ya spasike, ya sk'anik te ya yich'ik ich'el ta muk', janax ya smulanik spasel te beluk ya smulan te sbak'etalike, ma jauk ya spasik te beluk ya sk'an yot'an te Diose.5Xch'uunejik yilel te Diose, jauk me to ta swenta te yat'elike ya xchiknaj te ma jichuke. K'ejamaba lok'el ta stojol te ants-winiketik te mach'a jich ya spasike. 6Melel ay winiketik te ya x-ochik ta naetik sok te ya slo'layik te antsetik te ma xtojobike. Jai antsetik to ja boltesbilikix yu'un te smulike sok te ya yak' sbaik ta tsalel yu'un te cha'ox chajp' te beluk ya smulanik te sbak'etalike. 7Jai antsetik to spisil ora yakik ta snopel, jauk me to ma xju' yu'unik te ya snabey sbaik te smelelil k'ope.8Jich nix te bit'il te Janese sok te Jambrese la skontroinik te Moisese. Janix jich uuk te lotil bijteswanejetike ya me xjajch' skontroinik te beluk smelelile. Jai winiketik to k'ax bolobenix te snopjibal yu'unike sok ya yak'ik ta ilel te mayuk nix a te xch'uunjel yot'anike. 9Ja'uk me to ma k'axeluk ya xju' yu'unik. Melel ya xchiknaj ta ilel ta komon sitil, te jowilajel yu'unike jich te bit'il cha'tul te winiketike.10Jauk me to te ja'ate ja at'unoj te beluk la jkak'bat anope, te jtalele, te beluk yakon ta sle'ele, te xch'uunjel jkot'ane, te beluk k'axem jwokol yu'une, te xk'uxul jkot'ane, te ay smalip' jku'une, 11ja wilobon te bit'il la jkich' nutsele, te jwokole, sok te beluk k'ax ta jtojol ta Antioquía, ta Iconio sok ta Listra. La jts'ik spisil te nutsele. Ja la skoltayonix lok'el te Kajwaltike. 12Spisil te mach'atik ya sk'an lek ya xkuxinik ta stojol te Cristo Jesuse ya me yich'ik nutsel. 13Te ants-winiketik te amen yat'elike sok te ya spasik lote ya me xbolobik xan. Ja me ya slo'layik bael cha'ox tul ta ch'ayel. Jauk me to ya me yich'ik lo'layel uuk.14Jauk me to te ja'ate, ja me xbajt' ta awot'an te beluk anopoje sok te jun awot'an yu'un te beluk ach'uuneje. Melel ana'ojbey sba te mach'a la yak'bat anope. 15Ja na'oj te k'alal awalalil to la ach'uun te beluk ts'ibubil ta Xch'ul Sjun te Diose. Ja me ya xju' yu'un te ya yak'bat sbijil awot'an swenta yu'un jich ya stak' xkolat a ta swenta te xch'uunjel awot'an te ja' ta stojol te Cristo Jesuse.16Spisil te beluk ts'ibubil ta sjun te Diose lok'em tel ta yot'an te Diose. Ya xtuun ta swenta bijup'tesel, te ya yak'botik jna'tik stojol te banti ch'ayemotike, te ya stojtesotike, sok te toj ya skomotike. 17Sok jich me te ch'uunjeletik yu'un te Diose, chapal me ya xk'otik, ta swenta te lekil at'elile.
4CHOLAME TE LEK YACH'IL K'OPE1Ya jpasat ta mantal ta stojol te Diose sok ta stojol te Cristo Jesuse, te le' nopolix a te ya slikbey smul te mach'atik kuxatik sok te mach'atik lajemikixe, ta swenta te ya xcha' tal ta ajwalinele. 2Chola me te sk'op te Diose. Cholame teme yorail xcholel a o teme ma yorailuk a. Aya me tojteswanej, aya me komaw, lamaluk me awot'an ta tak'uywanej sok aya me bijteswanej.3Melel ya me sta yorail te ants-winiketik te ma sk'an yaiyik stojol te bijtesele. Ja me ya sjoin sbaik sok te mach'atik bijteswanejetik te ya yak'ik ta nopel te beluk ya smulan te sbak'etalike. Jich me yu'un yakik sleel te beluk lek ya yaiyik stojol stukelike. 4Ma me sk'an xch'am yaiyik stojol te beluk smelelile, sok ya me sujt'ik bael ta yaiyel stojol te jontol k'opetike. 5Jauk me to te ja'ate ayuk me abijil yu'un spisil in to. Ts'ikame te awokole, at'eliname xcholel te lek yach'il k'ope, ts'aktesame ta pasel te awat'el te jkak'ojbate.6Melel te jo'one chapalonix yu'un te ya xlajon ta swenta te Jkajwaltike. Ya staix yorail te ya xboone. 7La jkayix te lekil tsalawe, lajix jkot'an ta aelmal; ma ba ch'ay te xch'uunjel jkot'ane. 8Te Diose ja sk'ejobon te jkorona yu'un te toj k'axon ta k'inale, te ja ya yak'bon te Jkajwaltik te toj ya xchajp'anwan stukele, ya me yak'bon te jkorona te k'alal ya sta yoraile. Ma jo'okon nax, janix me jich te mach'atik yakik ta smaliyel te k'alal ya xcha' sujtele.TE BELUK ALBOT TE YA SK'AN SPAS TE TIMOTEOE 9Pasa me tulan te ya xtal awilon ta ora. 10Melel te Demase la me yijk'teyonix. Ja bik'taj yot'an yu'un te balumilale jich bajt' ta Tesalónica. Te Crescente bajt' ta Galacia, sok te Titoe bajt' ta Dalmacia.11Janax te Lucas sjoinejon jilel. Lea te Marcose sok ik'a tel yu'un ya x-at'ej jku'un ta swenta te yat'el te Jkajwaltike. 12Te Tíquicoe la jtikun bael ta Éfeso. 13Te jnajt'il jk'u'e te jkijteyoj ta lum Troas ta bay sna te Carpoe, ich'bon tel a teme talate, sok te libroetike janix jich te balbil junetik melel bayal sk'oplal jku'un.14Te Alejandro te ya x-at'ej ta ten tak'ine la yak'bon bayal jwokol. Te Kajwaltike aka sujt'esbey te beluk la spase. 15Janix jichat uuk ya me sk'an ya atsajtay aba ta stojol, melel k'axel skontroinoj te beluk ya jkaltike. 16Te sbabial buelta te la jtejk'an ba yu'un te la jkoltey ba ta k'ope, mayuk mach'a la skoltayon. la yijk'teyonik ta spisilik. Manchuk me ya yich' kuenta te Jkajwaltik te beluk la spasike.17Jauk me to te Jkajwaltike ma la yijk'teyon sok la yak'bon yip jkot'an, jich ju' jku'un ta xcholel spisil te lek yach'il k'ope, sok spisil te yan lumetike la yaiyik stojol. Jich la skolteyon lok'el tel ta ye te ti'awal choje. 18Te Kajwaltike ya me skoltayon lok'el yu'un spisil te beluk amene sok ya me skoltayon te ya x-ochon ta bay ajwalinel ta ch'ulchane. Aka yich' ich'el ta muk' ta ora to sok ta sbajt'el k'inal. Jichuk.SLAJIBAL CH'UULTESEL SOK SPATJIBAL OT'ANIL 19Patbeya me yot'an te Prisca, Aquila, sok te mach'a ay ta sna te Onesíforo. 20Te Erasto ay ta lum Corinto, jauk me to te Trófimo la jkijk'tey ta Mileto melel tsajk' ta chamel. 21Pasa tulan te ya xtalat te k'alal ma to xjul a te yorail te sike. Te Eubulo ya spatbat awot'an, sok te Pudente, Lino, Claudia sok spisil te jkermanotaktike. Te Jkajwaltike yakuk me yak'bat yip te a espíritue. 22Te yutsil yot'an te Jkajwaltike ayuk ta atojolik.