To view a copy of the CC BY-SA 4.0 license visit
http://creativecommons.org/licenses/by-sa/4.0/
Notices:
You do not have to comply with the license for elements of the material in
the public domain or where your use is permitted by an applicable
exception or limitation.
No warranties are given. The license may not give you all of the
permissions necessary for your intended use. For example, other rights
such as publicity, privacy, or moral rights may limit how you use the
material.
2 Tesalonicenses
1SPATJIBAL OT'ANIL1Pablo, Silvano sok Timoteo, te jayeb ch'uunjeletik ta Tesalonicenses te ayik ta stojol te Jtatik Dios sok te Jkajwaltik Jesucristoe. 2Te yutsil yot'an sok te lamal k'inal yu'un te Jtatik Dios sok te Jkajwaltik Jesucristoe ayuk ta atojolik.TE DIOSE YA YICH' TA K'OP TE MULAWILETIK K'ALAL YA XCHA' TAL TE CRISTOE 3Ya me sk'an ya jkalbeytik wokol te Dios ta jujun k'aal ta awentaik jkermanotak. Yu'un jich me ya sk'an ta pasel, melel bayal yak ta muk'ubel te xch'uunjel awot'anike sok te junax awak'oj abaik yu'un te jech k'ux awaiyoj abaike. 4Te jo'otike binax jkot'antik ta xcholel ak'oplalik ta stojolik te yantik ch'uunjeletik yu'un te Diose. Ja me yakotik ta xcholel te bit'il bayal smalib awu'unik sok te bayal xch'uunjel awot'anik te k'alal ya awich'ik nutsele. Janix me jich ya jcholbeytik yaiyik te bit'il ts'ijk'em awu'unik te uts'inele. 5Ja in to ja me ya yak' ta ilel te janax toj te chajp'anel yu'un te Diose. Te beluk ya awich'ik ta swenta spisil in to, ja te muk' ak'oplalik ya xk'oex ta ba ay ta ajwalinel te Diose, ja yu'un te yakatik ta woklajele.6Te Kajwaltik Dios toj ya yil stukel te yakuk yich' spakol spisil te mach'a ya yuts'inexe, 7sok te ya xch'abtesbey swokolik te mach'atik uts'inbilik jich te bit'ilotike. Jich me ya xk'ot ta pasel, te k'alal ya xchiknaj tel te Jkajwaltik Jesús ta bay ch'ulchan sok te ch'ul abatetik te ay yu'elike. 8Sok yak me ta tilel muk' k'ajk' ya xtal kastigo ta spisilik te mach'a ma la sna'bey sbaik te Diose sok spisil te mach'a ma la sk'an yaiybeyik te smantal te Jkajwaltik Jesuse.9Ya me xwoklajik yu'un te kastigo te mayuk bin ora ya xlaj sk'oplale, ya me yich'ik ch'ojel lok'el ta stojol te Diose sok te banti ayike ma me ayuk le'a te yutsil yu'ele. 10Jich me ya xk'ot ta pasel te k'alal ya sta yorail te ya xtale, jich' me ya yich' ich'el ta muk' yu'un te slumale, jich binax me yutsil ya yilik te mach'atik jayeb la xch'uunike. Skaj yu'un te la ach'uunik te lek jkat'eltik te la jpastik ta atojolike.11Ja ta swenta in to te yakotik ta sk'oponel Dios ta jujun k'aal ta atojolik. Ya jk'opontik Dios yu'un te yakuk awich'ik tsael te k'alal ya jkich'tik ik'el yu'un te Diose. Ya jk'opontik Dios yu'un te yakuk xk'ot ta pasel spisil te beluk lek ta awot'anik spasel sok te yakuk spastaj ta swenta yu'el spisil te beluk ya apasik sok te xch'uunjel awot'anike. 12Ya me jk'opontik Dios ta swenta spisil in to, jich me ya awich'ik ta muk' a te sbiil te Jkajwaltik Jesucristoe. Ya jk'opontik Dios yu'un muk' ak'oplalik ya xk'oex ta stojol, swenta yutsil yot'an te Jkajwaltik Dios sok te Jkajwaltik Jesucristoe.
2YA XCHIKNAJ TE MULAWIL WINIKE1Jich yu'un ya jk'anbeyex wokol jkermanotak te k'alal ya xcha' tal te Jkajwaltik Jesucristo sok te k'alal ya jkich'tik tsobel ta junax soke, 2ma me ajk'nax ya yaan awot'anik sok ma me amel-awot'anik yu'un teme ay mach'a tal yalbeyex te la staix yorail te ya xtal te Jkajwaltike sok teme ya yalik te albotik yu'un te Espíritu o teme ya yalik ta swenta nax sk'opik o teme ay ts'ibubil jun te pasbil jku'untik te jich ya yalik ta sk'opike.3Ma me ayuk mach'a ya awak' abaik ta lo'layel yu'un. Ma to me ya xtal te Jkajwaltike ja neel ya xk'ot ta pasel te ay bayal mach'a ya xch'ay te xch'uunjel yot'anike sok ya xchiknaj uuk te mach'a mulawil winike, te yu'un te ch'ayele. 4Ja me te mach'a yich'oj sba ta muk' stukele sok te ya sk'an slajinbey sk'oplal te Diose sok te beluk ch'uunbile. Ya me snajk'an sba ta yutil templo yu'un te Dios sok te jich ya skuy sba te bit'il Diose.5¿Yu'un ba ma xtal ta awot'anik te jich la jkalbeyex te k'alal joinejex ae? 6Ja na'ojik me te beluk kombil yu'un ta ora to, swenta yu'un ma to ya yak' sba ta ilel ja to teme la sta yoraile. 7Melel yakix ta at'el te beluk ma' lekuk ta pasele, tul xanix me te mach'a makbil yu'une, ja to me teme la sta sk'alelal te ya xk'ejot lok'ele.8Jich yu'un ya me yak' sba ta ilel te mach'a mero mulawil winike, ja te mach'a ya yich' milel ta sjab ye nax te Jkajwatik Jesuse. Te k'alal ya xtal te Jkajwaltike ya slajinbey sk'oplal. 9Te k'alal ya xtal te mach'a mero mulawil winike ja me ya xtal yu'un te yu'el te satanase, ya me yak' ta ilel senyailetik sok lotil chajp' at'eliletik, 10sok ya me xlo'lawan sok te beluk ma toj ta pasele. Spisil in to ja me ya xch'uunik te mach'atik ya xch'ayik baele, melel ma la sk'anik xch'uunik te smelelil xk'uxul ot'anil te ay kolel yu'une.11Ja yu'un te Dios ya me yak' tel te ya xjowejik swenta yu'un jich me ya yich'ik lo'layel a. 12Swenta yu'un jich me ya stak' yich'ik ich'el ta k'op te mach'atik ma la sk'an xch'uunik te smelelile, ja la spasik te beluk ma lekuk ta pasele.TSABILIK YU'UN DIOS TE MACH'ATIK YA XKOLIKE 13Jauk me to te jo'otike ya me jkaltik wokol ta stojol Dios ta awentaik jkermanotak te k'ux aybilex yu'un te Jkajwaltike. Melel te Diose ja la stsaatik yu'un te ja neel la ach'uunike sok te la awich'ik ch'ultesel yu'un te Ch'ul Espíritue, sok te la ach'uunik te smelelile. 14Ja yu'un te la awich'ik ik'el yu'un te Dios ta swenta te lek yach'il k'ope, swenta yu'un jich ya awich'beyik a te yutsilal te Jkajwaltik Jesucristoe. 15Jich yu'un jkermanotak ma me xlujbex. Ma me xch'ay ta awot'anik te beluk la jkak'tik anopike, chikan teme la jkaltik o teme la jts'ibuybatik bael ta june.16Ta ora to, janix te Jkajwaltik Jesucristoe sok te Jtatik Dios te k'ux la yaiyotik sok la yak'botik smuk'ul jkot'antik ta sbajt'el k'inal, ayuk smalib jku'untik yu'un te pajel-chawej swenta te yutsil yot'ane, 17aka me yak'batik smuk'ul awot'anik sok yip awot'anik jich me lek ya apasik spisil te beluk ya apasike sok te beluk ya awalike.
3ICH'BILUK TA MUK' TE SK'OP TE DIOSE1Jich yu'un jkermanotak k'oponbotik me Dios, swenta yu'un te yakuk xpujk' bael ta ora nax te sk'op te Jkajwaltike sok te ya yich' ich'el ta muk'e, jich nix te bit'il k'ot ta pasel ta awolilik te ja'exe. 2K'oponaik me te Jkajwaltik yu'un te yakuk skoltayotik ta sk'ab te ants-winiketik te amen yot'anik sok te janax ya sleik te beluk ya yuts'inotik a, melel ma spisilik ay xch'uunjel yot'anik 3Jauk me to te Jkajwaltike jun yot'an stukel, ya me yak'batik yip awot'anik sok ya me skananteyex yu'un te beluk ma leke.4Te jo'otike jkak'ojtik smuk'ul jkot'antik ta stojol te Jkajwaltik ta atojolik, te yakukex me spasel ta spisil ora te beluk la jkaltik ta mantale. 5Jauk me ya yak'beyex ta awot'anik te Jkajwaltik te bit'il ay xk'uxul yot'an te Diose sok te yakuk jkak'beytik yipal ta stojol te Cristoe.AY TA JWENTATIK TE YA X-AT'EJOTIKE 6Ya me jkalbeyex mantal jkermanotak, ta swenta sbiil te Kajwaltik Jesucristoe, te ma me ajoinabaik sok te jkermanotaktik te mayuk bi ya sk'an spasike, te ma ya xkuxinik te bit'il la jkak'tik ta nopel ta atojolike. 7Ja'ex nix ana'ojik te bit'il ya sk'an ya anopik te jtaleltike. Melel te k'alal kuxinotik ta awolilik ma ba kuxinotik jich te bit'il mach'a mayuk beluk ya sk'an spase. 8Sok mayuk me jich nax we'otik la me jtojtik te jayeb pajch' we'elil te la jkich'tik ak'beyele. Ja me yu'un te ma komotik ta at'el k'aal ta ajk'ubal ta tulan at'eliletik sok jwokoltik, swenta yu'un ma me la jkak'tik awokolik. 9Jich la jpastik in to, ma ba yu'un mayuk jkich'ojtik tulan jkat'eltik, ja la jpastik yu'un te jichuk ya apasik uuke.10Te k'alal joinojex a, la me jkaltik mantal: "Te mach'a ma sk'an ya x-at'eje, ma me xwe'." 11Melel te jo'otike, la jkaiytik stojol te ay cha'ox tul te ma sk'anik at'ele. Ma x-at'ejik jauk me to chikan banti ya yotses sbaik ta ayej. 12Jich yu'un ya jkalbeytik mantal ta ora to te mach'atik jich ya spasike sok ya me jtak'uytik ta swenta te Jkajwaltik Jesucristoe, aka me at'ejukik, jich me ya staik swe'elik a.13Jauk me to, jkermanotak, ma me xlujbex ta spasel te beluk lek ta pasele. 14Teme ay mach'a ma xch'uun te beluk la jts'ibuytik bael ta june, na'beyaik me sba sok ma me xa ajoinik, jich me ya xk'exaw a. 15Ma me akontroinik jauk me to albeyaik me mantal jich te bit'il awermanoe.SLAJIBAL CH'UULTESEL 16Janix me te Dios yu'un te lamal k'inal yakuk me yak'beyex lamal k'inal ta spisil ora. Ayuk me ta atojolik te Kajwaltike. 17Jai to ja spatjibal awot'anik jku'un, te jo'on Pabloone, ja me te jfirma in to te la jkak' ta spisil te ts'ibubil june. Jich te bit'il la jts'ibuye. 18Te yutsil yot'an te Kajwaltik Jesucristoe ayuk me ta atojolik.