To view a copy of the CC BY-SA 4.0 license visit
http://creativecommons.org/licenses/by-sa/4.0/
1 Pedro
1SPATJIBAL OT'ANIL1Pedro, wolwanej puk k'op yu'un te Jesucristo, ta stojol te mach'atik ayik ta yantik lumetik te puk'emikix ta bay lum sk'inal te Ponto, Galacia, Capadocia, Asia sok Bitinia, 2ta swenta te sbijil te Dios Tatil sok te ch'ultesel yu'un te Ch'ul Espíritue, te jich ya jch'uuntik te Jesucristo te ja smaloj te xch'ich'ele. Te yutsil yot'an te Kajwaltike sok te lamal k'inal yu'une ayuk me ta atojolik.KUXUL TE SMUK'UL JKOT'ANTIKE. 3Te Dios te Stat te Kajwaltik Jesucristoe ch'ultesbiluk me. Ta swenta xk'uxul yot'an, te ja la yak'botik te yach'il bejk'ajele, yu'un la yak'botik ta jtojoltik te smuk'ul jkot'antike te la xcha'kuses tel te Jesucristo ta ba ay te aelmeletike, 4melel ya me yak'botik te beluk la yalbotik te ya jkich'tike, sok ma me ya xlaj sk'oplal stukel. Melel k'ejbil ta bay ch'ulchan. 5Ta swenta te xch'uunjel awot'anike, te kanantebilex yu'un te yu'el te Diose, swenta yu'un jich me ya ataik te kolel te ya xchiknaj ta ilel ta slajibal k'aale.6Jich yu'un binuk nax me awot'anik yu'un in to, jauk me to puersa me ya xk'ax awokolik ta bayal yiljibal awot'anik. 7Te yiljibal awot'anike ja me ya yak' ta ilel te bit'il ay te xch'uunjel awot'anike, te xch'uunjel ot'anile ja k'ax t'ujbil xan te bit'il te oroe, melel te oroe ya xk'ax ta k'ajk' yu'un ya yich' ilel teme mayuk skape, jich uuk te xch'uujel ot'anile ya me xk'ax ta ilel swenta yu'un lek me sk'oplal ya xk'ot, sok ay yutsil, sok bayal me sk'oplal ya xk'ot te k'alal ya xchiknaj tel te Jesucristoe.8Te ja'exe ma ba awilojik te Jesuse, jauk me to k'ux ta awot'anik. Manchuk me ma ba awilojik ta ora to, jauk me to ja ach'uunojik sok binax awot'anik yu'un, ay yutsil awot'anik te ma xju' ta alel sk'oplale sok te ay nax yutsilale. 9Te ja'exe binax awot'anik yu'un te ya na'ikix te beluk ya awich'ik yu'un te xch'uunjel awot'anike, ja te ya xkol te ach'ulelike. 10Te alwanejetike la sleik sok la snopik ta lek te bit'il ya sjojk'iybey sbaik te sk'oplal te kuxinel sbajt'el k'inale, sok te yutsil ot'anil te ya jkich'tik ak'beyele.11La snopik te mach'a ya yich' tel te kolele sok te bin ora ya xk'ot ta pasel te beluk la yal te Espíritu yu'un te Cristo te joinbilik yu'une. Ja neel la yalbey sk'oplal te ya xk'ax swokol te Cristoe sok te yutsilal te yak ta taele. 12Ja la yich'ik ak'beyel sna' stojol te alwanejetik te ja yakik xch'uunel spisil in to, te ma jauk ta swentaik, ja ta awentaik, te beluk la awich'ik albeyel ta swenta te Espíritue te tikunbil tel koel ta ch'ulchan te ja la yak' na'el stojol ta stojolik te alwanejetike, janix jich te ch'ul abatetik ya sk'an sna'ik stojol uuk.CH'ULTESBILUK ME TE AKUXLEJALIKE. 13Jich yu'un chajp'aname abaik sok ayuk me sbijil awot'anik.Wik'iluk me asitik ta swenta te snopjibal awu'unik. Ayuk me smuk'ul awot'anik ta smaliyel te beluk ya awich'ik ak'beyel ta swenta te yutsil yot'an te k'alal ya xcha' tal te Jesucristoe. 14Jichukatik me te bit'il aletik te ya xch'uunik te mantale. Ma me ach'uunik xan spasel te beluk ma lekuk te amulanejik a, te k'alal ma to ayuk a te abijilike.15Jich yu'un te mach'a la yik'atike ch'ultesbil me stukel, janix me jichukex uuk ch'ultesbilukex me te jayeb k'aal kuxulatik ta balumilal. 16Melel jich ts'ibubil: ''CH'ULTESBILUKEX ME, JICH TE BIT'IL CH'ULTESBILONE''. 17Teme ya awalbeyik ''Jtat'' te Dios te mach'a toj ya slik mulil ta swenta te at'elil te ya apasik ta tulutule, ich'aik me ta muk' te jayeb k'aal kuxulatik le' ta balumilal to.18Te ja'exe ana'ojik te ma ta swenta oro ni plata, te k'axel nax aye, te la yak'botik te jkoleltike, ja la skoltayotik lok'el te Dios yu'un te beluk ma lekuk la yak'botik jnoptik spasel te me'el-tatiletike, 19jauk me to la stojbotik te jkoleltik ta swenta te xch'ul xch'ich'el te Cristoe, te jich bit'il te alal chij te mayuk beluk boloben yu'un sok te ma ba ch'alubene.20Te Cristoe ja tsabilix yu'un Dios ta sneelal to te ma to yich'oj pasel a te balumilale, jauk me to ta ora to te slajibalix k'aale, la yich'ix ak'el na'el ta atojolik. 21Te ja'exe ach'uunojik te Dios ta swenta te Cristoe, te ja Dios te la xcha'kuses tel ta bay aelmeletike sok la yak'bey yutsilal ta swenta te xch'uunjel awot'anike sok te ayuk smuk'ul awot'anik ta stojol te Diose.22Te ja'exe utstesbilix te ach'ulelik yu'un te la ach'uunikix te smelelil ta swenta te k'ux ya awaiy abaik sok te awermanotake, jich yu'un k'axel me k'ux ya awaiy abaik ta tulutul sok smelelil xk'uxul ot'anil te ay ta awot'anike. 23Te ja'exe cha' bejk'ajatikix, ma ba ta swenta te beluk ya xlaje, ja ta swenta te beluk ma ba ya xlaj stukele, ta swenta te kuxul sk'op Dios sok te ma ba ya xlaje.24MELEL SPISIL TE ANTS-WINIKETIKE, JICH K'OEMIK TE BIT'IL WAMAL SOK SPISIL TE YUTSILE, JICH K'OEM TE BIT'IL SNICH TE WAMALE. TE WAMALE YA XTAKEJ, JICH TE SNICHE YA XCH'AY KOEL. 25YAN TE SK'OP TE KAJWALTIKE MA XLAJ SBAJT'EL K'INAL STUKEL. Jai k'op to ja te lek yach'il k'op te la awich'ik cholbeyele.
21Jich yu'un ijk'teyaik me spasel spisil te beluk ma lek ta pasele, lotil k'op, cha'lam ot'anil sok te le mulile. 2Jichukex me te bit'il aletik te bejk'ajelik to naxe, te ya sk'anik te lekil chu'ul yu'un te Espíritue, jich me yu'un ya xmuk'ubex ta swenta te kolele, 3teme apasojik prueba te Kajwaltik te lek yot'an stukele.JA KUXUL TON TE CRISTOE. 4Talanik me ta stojol te ja kuxul ton stukele, te ma ba k'ambil yu'un te ants-winiketike jauk me to tsabil yu'un te Diose sok tulan sk'oplal yu'un. 5Te ja'exe, jiches uuk te bit'il te kuxul tonetike te yakalex ta pasel yu'un te jich ya xk'oex te bit'il sna te Espíritue, ta swenta te ch'ul sacerdote ya xk'oex te tsabil yu'un Dios ta yak'el te milbil majt'aniletik te lek yot'an yu'un te Dios ta swenta te Cristo Jesuse.6Jich ya yal te beluk ts'ibubile, ''ILAWILIK, YA JKAK' TA SIÓN TE TON TE JA YIPTIJIB TE CHIKIN NAE, TE JA SBABIAL SOK TSABIL SOK TE AY YUTSILE. TE MACH'A YA XCH'UUNE, MAYUK YA STA K'EXLAL''.7Jich yu'un te mach'a ya xch'uune lek me sk'oplal yu'un. Jauk me to, ''TE TON TE MA BA K'AMBIL YU'UN TE MACH'A YA SNAIK SPASEL TE NAE, JA K'ATBUJ TA JOLOL YU'UN TE CHIKIN NAE", 8Sok ''JA TE TON TE YA SK'OJCH'IN SBAIK A SOK TE CH'EN TE YA SYALESWANE.'' Ja ya sk'ojch'in sbaik a, yu'un te ma ba la xch'uunik te sk'ope, janix yu'un te jich albil jilel sk'oplale.TE LUM YU'UN TE DIOSE. 9Jauk me to te ja'exe tsabil lumex, sacerdoteex yu'un te muk'ul ajwalile, ch'ul muk'ul lum yu'unex, ja lum yu'unex te Diose, yu'un me ya apukik ta alel te yutsilal te beluk spasoj te mach'a la yik'ex lok'el tel ta ijk'al k'inal sok la yak'ex ta sakil k'inal te bayal yutsilale. 10Te ja'exe ma ba lumex yu'un te Dios ta sneelal to, yan ta ora to te ja'exe lumex yu'un te Diose. Te ja'exe ma ba la awich'ik k'uxtayel, jauk me to ta ora to la awich'ikix k'uxtayel.JICHUKEX ME TE BIT'IL ABATETIK YU'UN TE DIOSE. 11Jkermanotak te k'ambilex jku'une, ya jkik'atik tel jich te bit'il te mach'a k'ejel lum ayike sok te k'axel nax ayike, swenta yu'un jich me ya akom abaik yu'un spasel te beluk mulambil yu'un te abak'etalike te ja ya skontroin te ach'ulelike. 12Te ja'exe ya me sk'an te lek ya apasik te awat'elik ta stojol te mach'atik ma ba ch'uunjeletike, jich me yu'un, te k'alal ya yalik te ma lekuk te awat'elike, le' me ya yilik ta awat'elik sok jich me ya yich'ik ta muk' Dios yu'un a, ja to te k'alal ya xcha' tal xane.ICH'AIK TA MUK' TE AJWALILETIKE. 13Ch'uunaik me spisil te tuneletik ta balumilal ta swenta te Kajwaltike, jich bit'il te muk' ajwalil te muk' yat'ele, 14jich nix uuk te wolwanej ajwaliletike te tikunbilik tel yu'un ya yak'beyik kastigo te mach'a ma lek yat'elike sok te lek sk'oplal yu'un te mach'a ya spasik te beluk leke. 15Melel ja sk'anjel yot'an Dios, te ya apas te beluk lek ta pasel ta swenta te ya amakbeyik sti' te mach'atik ma sna'ik k'inale. 16Jich te bit'il te ants-winik te koleme, ma me jauk kolem yu'un ta spasel te beluk ma lekuk ta pasele, jichukex me te bit'il abatatik yu'un te Diose. 17Ich'aik me ta muk' spisil te ants-winiketike. K'anaik me te awermanotake. Xi'aik me te Diose. Ich'aik me ta muk' te muk'ul ajwalile.TE BELUK YA SK'AN SPASIK TE ABATETIKE. 18Abatetik, ch'uunbeyaik me smantal te ajwaliletik awu'unike sok ich'aik me ta muk', ma me jauk nax te mach'atik lekil ajwaliletike, janix me jich te mach'a ma lek yat'elike. 19Ja me lek sk'oplal te mach'atik ya xk'ax swokolik teme mayuk smule, yu'un sna'ojbey sba te Diose. 20¿Ay ba bayal sk'oplal teme ya awaiy mulwej sok ta patil ya awich' te kastigoe? Yan teme lek te awat'ele sok ta patil ya awich' kastigoe, ja me lek sk'oplal yu'un te Diose.21Ja la awich'ik ik'el tel yu'un, melel te Cristoe ja k'ax swokol ta awentaik, jich la yak'bat anopik yu'un jich ya at'uunbeyik a te stalele. 22Mayuk la sta smul stukel; sok mayuk lo'laywan ta k'op. 23Te k'alal la yich' bol-k'opteyele, ma ba la sut ta bol-k'op. K'alal k'ax swokol ma ba la yal te ya sutbey spakole, ja la yak' sba ta sk'ab te mach'a toj ya xchajp'anwane.24Ja la xkuchbotik te jmultik ta sbak'etal ta bay cruz te', yu'un me mayukotikix ta mulil a sok jich me ya xkuxinotikix ta stojol. Ja ta swenta te la yich' ejch'nantesel te lekubotikixe. 25Jich ayex te bit'il chijetik te jowejemike, jauk me to sujt'atikix tel ta stojol te kanantaywanej awu'unike te ja skanantayoj te ach'ulelike.
3BELUK ME YA SK'AN SPAS TE MACH'ATIK NUJP'INEMIKE.1Janix jichex uuk antsetik ya me sk'an ya ach'uunbeyik smantal te amamlalike, swenta yu'un teme ma xch'uunejik te sk'op te Diose, jich me ya xch'uunik a teme la yilik te lek te beluk ya apasike, 2melel ya yilbatik te lek te awat'elik sok te awich'ojik ta muk'e.3Ma me jauk ya xbajt' ta awot'anik te yantik nax xch'aljibal ajolike, te ualiletik te pasbilik ta oroe, sok te jeltomba nax te ak'u' apak'ike. 4Jauk me to ja lek teme mayuk mulil ta awot'anike, te ay yutsilale, te ay lamal k'inal yu'une, ja ay yutsilal ta sit te Diose.5Jich te bit'il te antsetik ta namey k'inale, te ja la xch'al sbaik ta swenta ta yutsil yot'anike. Ja la smuk'ulin yot'anik te Diose sok la xch'uunbeyik smantal te smamlalike. 6Jich nix te Sarae la xch'uunbey smantal te Abrahame sok la yalbey kajwal. Ta ora to, ja me yantsil alex te Sarae teme la apasik te beluk leke sok teme ma la axi'ik te wokolil te ya xtale.7Janix jichex uuk, winiketik ya me sk'an te lek ya xkuxinex sok te awinamike, melel te antse teb nax me stael stukel, na'beya sbaik jich te bit'il ja joy abaik ta kuxinele. Pasaik me jich to jich me mayuk bi ya smakex a te k'alal ya ak'oponik te Kajwaltike.TE BELUK YA SK'AN SPAS TE CH'UUNJELETIKE. 8Ta slajibal, ya jkalbatik ta apisilik, pajaluk me awot'anik, na'beya me yobolil abaik, toyoluk me awot'an abaik te bit'il awermano abaike, ayuk yutsil awot'anik, sok pek'el uuk me awak' abaik. 9Ma me apakoltey te beluk ma lekuk ya awich'ik pasbeyele sok teme ay mach'a ya yixta k'opteyexe ma me apakoltey ta ixta k'op uuk; jauk me to ch'ultesaik me, melel te ja'atike ik'bilex yu'un te Diose, jich me ya awich'ik te bendición te albilatik te ya awich'ike.10''TE MACH'A YA SMULAN TE KUXLEJALE SOK TE YA SK'AN LEK AY TA JUJUN K'AALE, YA ME SK'AN YA STSAJTEY TE SK'OPE SOK MA ME YA YAL LOTIL K'OP. 11YA ME SKAN YA YIJK'TEY TE BELUK MA LEKUK TA PASELE SOK JA ME YA SK'AN SPAS TE BELUK LEKE. JA ME YA SK'AN SLE TE LAMAL K'INALE SOK JA ME YA SK'AN ST'UN BAEL. 12TE SIT TE KAJWALTIKE JA ME YA YIL TE BELUK TOJE SOK TE XCHIKINE JA ME YA YAIY STOJOL TE MACH'A YA SBIK'TAL K'OPTEYE. JAUK ME TO TE KAJWALTIKE SKONTROINOJ TE MACH'ATIK YA SPASIK TE BELUK MA LEKUKE.''13¿Mach'a ya yuts'inat, teme ja ak'an te beluk leke? 14Jauk me to teme ya xwoklajat ta skaj te beluk toj ta pasele, te ja'ate ja wich'oj bendición. MA ME AXI'IK TE BELUK YA AWICH'IK PASBEYELE, MA ME XNIJK' AWOT'ANIK YU'UN.15Ja me ya sk'an te yakuk awich'ik ta muk' te Kajwaltik Cristoe. Spisiluk me ora chapalukex yu'un te ya anaik sujt'esel te beluk ya awich'ik jojk'ibel yu'un te bit'il ay te xch'uunjel awot'anik ta swenta te Diose. 16Pek'el me awot'anik ta spasel spisil in to sok ich'aik me ta muk'. Lekuk me snopjibal awu'unik jich me te ants-winiketik te ya sboltesbex ak'oplalik ta swenta te ach'uunejik te Cristoe ya me xju' ya yich'ik k'exlaltesel a melel ya yalik te ma lekuk te awat'elike. 17Ja lek teme jich ya sk'an yot'an te Diose, te ya xk'ax awokolik ta spasel te beluk leke, ma jauk yu'un te beluk ma lekuke.18Te Cristoe junax buelta k'ax swokol yu'un te jmultike. Te bit'il toj stukele ja k'ax swokol ta jwentatik, te bit'il ma tojotik jtukeltike, swenta yu'un jich me la yik'otik tel ta stojol te Diose. Ja la yich' milbeyel te sbak'etale, jauk me to la yich' xkuxinel ta swenta te Espíritue. 19Ja bajt' xcholbey te xch'ulelik te mach'atik chukbilike. 20Ja te mach'atik ma la xch'uunik te mantalile, te la yich'ik maliyel yu'un te Diose te k'alal kuxul toa te Noeje, te k'alal la yich' pasel te barkoe, te Diose la skoltey waxukeb nax ta tul te k'alal tal te pulemale.21Ja pajal k'oem sk'oplal ta ora to te ich' ja' te ya jkich'tik ta swenta te kolele, ma jauk yu'un te ya spokbotik lok'el te xch'alel te jbak'etaltike, ja yu'un te lekuk snopjibal jku'untik ta stojol te Diose, ta swenta te cha'kux tel te Jesucristoe. 22Ja ayix ta swa'el sk'ab te Diose. Melel bajt'ix ta ch'ulchan. Te ch'ul abatetike sok te mach'atik yich'ojik tulan yat'elike sok te mach'atik ay yipike, ya me xch'uunbeyik smantal.
4AKA KUXINUKOTIK TE BIT'IL YA SK'AN TE DIOSE.1Jich yu'un, te bit'il k'ax swokol ta sbak'etal te Cristoe, ja ya sk'an te janix jich ya apasik uke. Te mach'a k'axix swokol ta sbak'etale, jich la slajimbeyix sk'oplal te mulile. 2Ja te ants-winik bi ma ba kuxulix ta swenta te beluk ya smulan spasel te sbak'etale, ja kuxulix ta spasel te beluk ya sk'an yot'an te Diose, te jayeb xan k'aal kuxule.3Melel k'axix bayal k'aal awu'unik ta spasel te beluk mulanbil yu'un te mach'atik ma sna'ojbey sbaik te Diose: ja bi ja te chijubele, bik'tal-ot'anil yu'un te mulile, te yakubele, te k'inwej yu'un te balumilale, te mulweje, te jowil k'inweje, te xch'uunel lotil diosetik te ilaybil sba yu'un te Diose. 4Ja yan ya yaiyik a te ma ba ya ajuinikix ta spasel te beluk ma lekuk ta pasele, jich yu'un ma lekuk ak'oplalik yu'unik. 5Ja me ya xk'o yak'ik kuenta ta stojol te mach'a chapalix te ya yich' ta k'op te mach'atik kuxatik sok te mach'atik lajemikixe. 6Ja swentail te la yich'ik cholbeyel te lek yach'il k'op te mach'atik lajemikixe, swenta yu'un te la yich'ik likbel smulik ta swenta te sbak'etalike, jich me ya stak' xkuxinik ta swenta te espíritu, te bit'il ya sk'an te Diose.7Nopol ya staix yorail te ya xlaj spisil te beluk aye. Jich yu'un, ya me sk'an te yakuk ana'ik k'inal ta lek sok wik'iluk me asitik ta spisil ora, jich me lek ya xk'ot te k'alal ya ak'oponik te Diose. 8Ja tulan sk'oplal stukel te ma ba bisbiluk nax te k'ux ya awaiy abaik ta awot'anike, melel te xk'uxul ot'anile, ya yak' perdón yu'un te mulile. 9Ak'aik me ta ilel te binax awot'anik te ya awik'ik ochel ta anaik te mach'atik ya xtal yilexe, ma me beluk ya awalik yu'un.10Melel ta tulutul la awich'ik ja majt'anik, tuuntesaik me yu'un te ya awaiyik abatinel a, jich te bit'il lekil kanan yu'un te majt'aniletik te yak'ojbeyex te Diose. 11Teme ay mach'a ya xk'opoje, jich aka k'opojuk te bit'il ay te sk'op te Diose, teme ay mach'a ya yak' sba ta abatinele, aka me spas ta swenta te yip te ya x-ak'bot yu'un te Diose, jich yu'un spisil te beluk ya spasike, jauk me ich'biluk ta muk' te Dios ta swenta te Jesucristo te ja ay yutsilale, sok ay yu'el ta ora to sok ta sbajt'el k'inal. Jichuk.TE JWOKOLTIK TE BIT'IL CH'UUNJELOTIKE. 12Kermanotak te k'uxex ta jkot'ane, ma me chamuk nax ya awaiyik yu'un teme yakex ta k'axel ilbeyel awot'anik jich te bit'il tulan k'ajk'e, te ma jna'tik te bi ora ya xtale, ma me chamuk nax ya awaiyik te beluk yak ta k'oel ta pasele. 13Binuk nax me awot'anik yu'un melel pajal yak ta k'axel awokolik sok te Cristoe, swenta yu'un jich me bayal yutsil awot'anik a te k'alal ya xchiknaj tel te yutsilale. 14Teme la awich'ik bol-k'optayel ta skaj te sbiil te Cristoe bayal me awutsilik yu'un, melel te Ch'ul Espíritu yu'un te utsilale sok te Espíritu yu'un te Diose ay ta atojolik.15Jauk me to, manchuk me jauk ya xk'ax awokolik ta swenta te ya awaiyik milawe, ya awaiyik elek'e, teme ma lekuk te awat'elike sok teme ya awotses abaik te banti ma ik'bilexe. 16Yan teme ay mach'a ya xk'ax swokol ta swenta te xch'uunjel yot'ane, ma me xk'exaw yu'un, aka me yalbey yutsil sk'oplal te Diose.17Melel ja yorailix te ya xjajch' ta ich'el ta k'op te mach'atik ch'uunjeletik yu'un te Diose. Teme ja neel ya xjajch' ta jtojoltike ¿bit'il ya xk'otik ta lok'el te mach'atik ma xch'uunejik te lek yach'il k'op yu'un te Diose? 18Teme wokol ya xkol te mach'a toj yot'ane, ¿beluuk me ya xtal ta stojol te mach'a ma xch'uunej te Dios sok te mulawile? 19Jich yu'un, te mach'atik ya xwoklajik ta swenta sk'anjel yot'an te Diose ja me awak'ik ta wentainel te ach'ulelik ta swenta te mach'a pasbilatik yu'une, sok pasaik me te beluk lek ta pasele.
5TAK'UYEL YU'UN TE MACH'A WOLWANEJ YU'UN TE CH'UUNJELETIKE.1Ta ora to ya jtak'uy te ancianoetik te ay ta atojolike, melel te jo'one, ancianoon uuk, jo'on la jkil ta sit te woklaj te Kajwaltik Cristoe, sok janix me jich pajal ya jkil utsilal sok te k'alal ya xchiknaj tel te utsilal te albilix sk'oplale. 2Jich yu'un ya jtak'uyex ancianoetik, kananteyaik me te chijetik yu'un te Dios te ay ta atojolike. Ma me sujbilukex ta spasel, sok me yutsil awot'anik ya apasik ta swenta te Diose, ma me ta skajuk nax tak'in te ya x-at'ejexe ja ya sk'an te binuk nax me awot'anik ta spasele. 3Ma me akuy abaik ta ajwalil ta stojol te mach'atik ja kanantayojike. Jauk me ya awak'ik ta ilel te lekil kanan chijexe. 4Te k'alal ya xchiknaj te wolwanej yu'un te chijetike, ya me awich'ik akoronaik te jelawen yutsilale sok te ma xlaj stukele.TAK'UYEL YU'UN TE CH'UUNJELETIKE. 5Janix jich te ch'ielexe, ch'uunbeyaik me smantal te ancianoetike. Pek'el me awak' abaik, ch'uunbeya me abaik amantalik melel te Diose ma sk'an te toybajele, yan te mach'a pek'el yak'oj sbae, lek me sk'oplal stukel. 6Jich yu'un pek'el me awak' abaik ta sk'ab te muk' Diose, jich ya yak'ex ta ich'el ta muk' te k'alal ya sta yorail te yaloje. 7Ak'beyaik ta stojol Dios te beluk ya ya'an awot'anike, melel ja ya skanantayex stukel.8Bijukex me sok kanantay abaik. Melel te akontroike ja te pukuje, jich te bit'il kojt' león choj te ya x-awune, sok te xjuyuyet ta sleel te mach'a ya sk'an sti'e. 9Jajch'anik me, tsakabaik sok, sok tulanukex me ta swenta te xch'uunjel awot'anike. Na'aik me te jkermanotaktik te mach'atik ayik ta spamal te balumilale janix jich ayik ta woklajel uuk.10Teme tsijk' awu'unik te woklajel te k'axel nax aye, te Dios te ay bayal yutsil yot'ane, te ja la yik'atik ta yutsilal sbajt'el k'inal ta swenta te Cristoe, janix me ya stojtesatik ta lek, ya me stulantesex, sok ya me yak'batik yip awot'anik. 11Ja ya xmantalaj, ta sbajt'el k'inal stukel. Jichuk.SLAJIBAL SPATJIBAL OT'ANIL. 12Te jo'one jna'oj te bit'il jun yot'an ta stojol Dios te jkermano Silvanoe, ja yu'un te la jk'ambey wokol te la sts'ibubeyex tebuk te beluk ya jk'an jkalbeyexe. Ya jtak'uyex sok testigoon yu'un te smelelil te beluk la jts'ibubeyexe, te ja yutsil yot'an te Diose, ich'aik me lewa ta stojol. 13Te mach'atik ayik ta Babilonia te pajal tsabilatik soke, ya yak'beyex spatjibal awot'anik. 14Jech patbey abaik awot'anik sok ujts'iyel te ya xlok' tel ta awot'anike. Te lamal k'inal ayuk ta atojolik ja'ex te ayex ta swenta te Cristoe.
