To view a copy of the CC BY-SA 4.0 license visit
http://creativecommons.org/licenses/by-sa/4.0/
1 Juan
1TE K'OP TA SWENTA KUXINEL.1Te jo'otike ja la jts'ibubeytik sk'oplal ta atojolik te mach'a ay ta xjajch'ibale, te ja la jkaiybeytik stojol te sk'ope, sok te la jkiltik sok te jsitike, melel la jna'beytik sba te bi yilele, te ja la jpiktik sok te jk'abtike, te ja te k'op te ya yak' te kuxinele. 2Ak'ot ta ilel te kuxinele, sok jkilojtikix, sok testigootik yu'un. Te jo'otike yakotik ta yalbelex te sk'oplal te kuxinel sbajt'el k'inale, te ja ay ta stojol te Tatile, sok te ja la yak' sba ta ilel ta jtojoltike.3Ya me jkalbeyex te beluk la jkiltike sok te beluk la jkaiytik stojole, jich me junax ya xk'ootik ta jpisiltik. Ja me juybatik sok te Tatil sok te snich'an te ja te Jesucristoe. 4Janix jich la jts'ibubeyex spisil in to swenta yu'un junax me ya sbujts'naj jkot'anik yu'un.JA' SAKIL K'INAL TE DIOSE. 5Jai k'op to ja la yak'botik jnoptik te Kajwaltik Jesuse, ja yu'un te ya jkalbeyex awaiyike: Te Diose ja sakil k'inal stukel sok te banti ay te Diose mayuk ik'al k'inal le'a. 6Teme ya jkaltik te joybatik sok te Diose, jauk me to teme ayotik to ta ijk'al k'inale, yakotik ta lot abi, sok ma jauk ya jch'uuntik spasel te beluk smelelile. 7Jauk me to teme ayotik ta sakil k'inale, jich te bit'il ay ta sakil k'inal te Diose, jich me junax ya xk'ootik abi, sok te xch'ich'el te Snich'ane te ja te Jesuse ya me spokbotik lok'el spisil te jmultike.8Teme ya jkaltik te mayuk jmultike, jo'otik nix me yakotik ta jlo'laybel jbatik sok te smelelile ma me ayuk ta jtojoltik. 9Jauk me to teme ya jkaltik ta jamal te jmultike, te Dios te toj stukele ya me spasbotik perdón yu'un te jmultik sok ya me spokbotik lok'el spisil te beluk ma lekuk ta pasele. 10Teme ya jkaltik te mayuk jpasotik te mulile, yakotik me ta yalel te ya spas lot te Diose sok ma me k'oem ta jkot'antik te sk'ope.
2JA TEK'EL TA K'OP JKU'UNTIK TE CRISTOE.1Jkal-jnich'nab, ya jts'ibuybeyex in k'op to ta swenta te ma me awaiyikix mulweje. Jauk me to teme ay mach'a la yaiy mulweje, ay me mach'a ya skolteyotik ta k'op ta stojol te Tatile, ja' te Jesucristoe, te ja toj stukele. 2Ja la stojbotikix spisil te jmultike, sok ma jauk nax ta jwentatik te jo'otike, janix me jich ta swenta te spamal te balumilale. 3Ja ta swenta in to te ya jna'beytik sbae: Teme ya jk'ejtik te mantaliletik yu'une.4Te mach'a ya yale: ''Ya jna'bey sba te Diose'' jauk me to teme ma sk'ejoj te mantalile, yak ta spasel lot abi, ma yak ta yalel te beluk smelelile. 5Jauk me to te mach'a sk'ejobey te xch'ul sk'op Dios ta smelelile, ja tul ants-winik te k'axel ayix k'uxul yot'an abi. Jich me ya jna'tik te ayotik sok te Kajwaltike. 6Te mach'a ya yal te junax ayix sok te Diose, jich me ya sk'an xkuxin te bit'il Jesucristoe.TE YACH'IL MANTALILE. 7Kermanotak te k'uxex ta jkot'ane, ma me yakon ta sts'ibuybelex ach' mantalil ta atojolik, janix me te pokol mantalil te awich'ojikix ta sneelal toe. Te mantalil te namey ak'bilixe, janix me te la awaiyikix stojole. 8Jauk me to, yakon me ta sts'ibuybelex yach'il mantalil, ja te smelelil ta swenta te Cristoe sok ta atojolik uuk, melel te ijk'al k'inale yakix me ta k'axel stukel, sok te sakil k'inale yakix me ta tilel stukel.9Te mach'a ya yal te ayix ta sakil k'inale jauk me to ya skontroin te yermanoe, yu'un nanix ay to ta ijk'al k'inal abi. 10Te mach'a k'ux ta yot'an te yermanoe ay meix ta sakil k'inal, sok ma me ya xyalix ta mulil abi. 11Jauk me to te mach'a skontroinoj te yermanoe, ay me ta ijk'al k'inal sok yak ta beel ta ijk'al k'inal; ma ba ya sna' te ba ya xbeene melel makbil sit yu'un te ijk'al k'inale.12La jts'ibubeyex in to, jkal-jnich'nab te k'uxex ta jkot'ane, melel pasbilatikix perdón yu'un te amulik ta swentanax te sbiil te Jesucristoe. 13La jts'ibubeyex ja'ex te me'el-tatilexe, melel ja ana'ojikix te mach'a ay ta xjajch'ibale. La jts'ibubeyex ja'ex te ch'iel ants-winikexe, melel la atsalikix te beluk ma lekuke. La jts'ibubatikix ja'ex te alalexe, melel ja ana'obey sbaikix te Tatile. 14La jts'ibubeyex ta atojolik, ja'ex te me'el-tatilexe, melel ana'ojbey sbaikix te mach'a ay ta xjajch'ibale. Ja la jts'ibubeyex ta atojolik, ja'ex te ch'iel ants-winikexe, melel ja'ex te tulanexe, sok te sk'op te Diose ay ta atojolik, melel ja atsalojikix te beluk ma lekuke.15Ma me k'uxuk ta awot'anik te balumilale sok te beluk ay ta balumilale. Teme ay mach'a k'ux ta yot'an te balumilale, te xk'uxul yot'an te Diose ma me ayuk ta stojol abi. 16Melel spisil te beluk ay ta balumilale, te beluk ya smulan te bak'ete, te beluk ya smulan yilel te jsitike sok te toyol ya jkak'batik ta kuxinele, ma jauk yu'un te Jtatike, ja yu'un te balumilale. 17Te balumilale sok te beluk ya smulan spasele, yakix me ta k'axel. Yan te mach'a ya spas te sk'anjel yot'an te Diose sbajt'el k'inal ay stukel.TE ANTICRISTOE. 18Jkal-jnich'nab, ayotikix me slajibal k'aal. Jich te bit'il la awaiyikix stojol te ya xtal te anticristoe, sok bayal anticristoetik talikix. Jich ya jna'tik stojol te slajibalix k'aal ayotike. 19Ja lok'ik bael ta jtojoltik, jauk me to yu'unanix ma junuk ayotik sok a. Melel te junuk ayotik soke, k'axel ayotik sok te jichuke. Jauk me to te k'alal lok'ik baele, le' la yak'ik ilel a te ma junuk ayotik soke.20Jauk me to te ja'exe awich'ojikix te Ch'ul Espíritue sok ja na'ojikix te beluk smelelile. 21La jts'ibubatik in to, ma yu'unik ma ana'ojik te smelelile, ja ana'ojikix, melel ana'ojik te mayuk lotil k'op te ya xtal ta stojol te Diose, te ja te smelelile.22¿Mach'a te yak ta lote ma ba jauk te mach'a ya yal te ma jauk te Cristo te Jesuse? ja bi ja te anticristoe melel ya smuk ta yot'an te Tatil sok te Nich'anile. 23Spisil te mach'a ya smuk ta yot'an te Nich'anile ma ba ay ta stojol te Tatile. Yan te mach'a xch'uunej te Nich'anile, ja me ay ta stojol te Tatile.24Te beluk awaiyojikix stojol ta sneelal toe, k'axel ainuk me ta awot'anik. Teme k'axel la awak' abaik ta stojol te beluk la awaiyikix stojol ta sneelale, jich me junax ayex sok te Nich'anile sok te Tatile. 25Jich k'axel yaloj ta jtojoltik te Jesuse: Te ay jkuxineltik ta sbajt'el k'inale. 26La jts'ibubeyex in to, ta swenta te ayuk abijilik yu'un te mayuk mach'a ya slo'layexe.27Jauk me to te bit'il awich'ojikix te Ch'ul Espíritue, te ay ta atojolike, ma me yejt'aluk te ay mach'a ya snojp'tesatike. Melel te Ch'ul Espíritue ja me ya yak'batik ana'ik stojol spisil, smelelil me, ma me lotiluk, jich bit'il la yak'batik anopike, k'axel junax me awak' abaik ta stojol. 28Jich yu'un ta ora to, jkermanotak te k'uxex ta jkot'ane, k'axel me awak' abaik ta stojol, jich me te k'alal ya xtale jun me jkot'antik yakotik ta smaliyel a sok jich me ma jtatik k'exlal a te k'alal ya xtale. 29Teme ana'ojik te toj stukel te Jesuse, ja ana'ojik me te mach'a ya spas te beluk toje ja me bejk'ajem ta stojol te Diose.
3ALNICH'ANETIK YU'UN TE DIOSE.1Ilawilik te chajp'nax xk'uxul yot'an ta jtojoltik te Jtatik Dios te bit'il la yak'botikix jbiiltik te yal-snich'anotikixe, smelelil me te yal-snich'anotike. Ja yu'un, te ma la sna'botikbatik te mach'atik ayik ta balumilale melel ma la sna'bey sbaik te Diose. 2Kermanotak te k'uxex ta jkot'ane, yal-snich'anotikix me te Diose, sok ma jna'tik te bit'il ya xk'ootik pajel-chaweje. Ya me jna'tik te k'alal ya xtal te Cristoe, jich me ya xk'ootik te bi yilel te Cristoe melel ya me jkiltik nix a te bi yilel te k'alal ya xtale. 3Spisil te mach'atik jun yot'anik yakalik ta smaliyel te bi yilel te Cristoe, ya me sk'an te mayuk smulik jich te bit'il te Cristoe.4Spisil te mach'a ya sle te smule yak ta xk'axintesel te smantal te Diose; melel te mulile ma xch'uun spasel te beluk toj te ya yal te mantale. 5Te ja'exe ana'ojik stojol te Cristo tal ta balumilal yu'un te tal yak' sba ta lajel yu'un te jmultike, sok ana'ojik te mayuk smul stukele. 6Mayuk tuluk te mach'a ayix ta stojole, ya spas xan te mulile. Mayuk tuluk te mach'a yak ta spasel te mulile, ma yiloj sok ma sna'bey sba te Cristoe.7Jkal-jnich'nab te k'uxex ta jkot'ane, ma me xa awak'ik te ay mach'a ya yak'ex ta ch'ayele. Te mach'a ya spas te beluk toje, ja me toj abi, jich te bit'il toj te Cristoe. 8Te mach'a ya spas te mulile ja me yu'un te pukuje, melel te pukuje stalel yat'elinoj spasel te mulil ta xjajch'ibale. Ja yu'un te la yich' ak'el na'el stojol te Snich'an te Diose, swenta yu'un ya slajinbey sk'oplal te yat'el te pukuje.9Te mach'a bejk'ajem ta stojol te Diose, ma me ya spasix te mulile, melel te Ch'ul Espíritu yu'un te Diose ayix ta stojol. Ma me stak' xan spas mulil melel bejk'ajemix ta stojol te Diose. 10Jich me ya jna'tik a te mach'a snich'an te Diose sok te mach'a snich'an te pukuje. Te mach'a ma spas te beluk toje sok te mach'a ma k'ux ta yot'an te yermanoe ma jauk yu'un te Diose.K'UXUK ME YA JKAIYBATIK TA TULUTUL. 11Melel jai k'op to ja te la awaiyik stojol ta sneelal toe: Ja te k'ux ya jkaiybatik ta jpisiltike, 12ma me jichukotik te bit'il te Cain te ja amene sok te ja la smil te yijts'ine.¿Bistuuk te la smile? melel ma ba lek te yat'ele yan stukel te yijts'ine lek te yat'ele.13Ma me chamuk nax awaiyik, jkermanotak, teme ya awich'ik ilayel yu'un te mach'atik ayik ta balumilale. 14Jna'ojtikix te lajemotik a jauk me to kuxulotikix melel k'ux ya jkaiybatik sok te kermanotaktike. Spisil te mach'a ma k'ux ya yaiy sbaike yu'un nanix ay to ta lajel abi. 15Spisil te mach'a ya yiley te yermanoe jich me k'oem te bit'il milwale. Ya me ana'ik te mayuk tuluk te mach'a ya xmilwane mayuk me xkuxinel sbajt'el k'inal.16Ta swenta in to jna'ojtik te xk'uxul ot'anile, melel te Cristoe la yak' te xkuxinel ta jtojoltike. Jich me ya sk'an ya jpastik uuk te ya jkak'tik te jkuxineltik ta stojol te jkermanotaktike. 17Teme ay mach'a ay beluk ay yu'un ta balumilale, teme ya yil te yermano te ay swokole jauk me to teme ma ya xk'uxtaye, ¿Bit'il me ya yak' ilel te ay xk'uxul yot'an Dios ta stojole? 18Jkal-jnich'nab te k'uxex ta jkot'ane, manchuk me k'ux ya jkaiybatik ta jk'optik nax, yu'un uuk me ta smelelil ya jpastik.JA SMUK'UL JKOT'ANTIK TE DIOSE. 19Ja yu'un ya jna'tik te ayotik ta smelelile sok mayuk beluk ya ya'an jkot'antik ta stojol. 20Melel teme ya yalbotik ta jkot'antik te ay jmultike, te Diose ja k'ax muk' xan stukel te bit'il te jkot'antike, sok ja sna'oj spisil te beluk aye. 21Jkermanotak te k'uxex ta jkot'ane, teme ma ba ya yalbotik ta jkot'antik te mayuk jmultike, jun me jkot'antik ta stojol te Dios abi. 22Spisil te beluk ya jk'antike, ja me ya yak'botik stukel, melel ya jk'ejbeytik te mantalil yu'une sok ya jpastik te beluk ya smulan stukele.23Ja in to ja te mantalil yu'un te Diose: Te yakuk jch'uunbeytik sbiil te Snich'ane te ja te Jesucristoe sok te k'ux ya jkaiybatik ta jpisiltike, jich te bit'il la yak'botikix te mantalil yu'une. 24Te mach'a ya sk'ejbey te mantalil yu'un te Diose, stalel me ay ta stojol, sok nix te Diose ay me ta stojol uuk. Jich me ya jna'tik te ay ta jtojoltik ta swenta te Espíritu te la yak'botike.
4TE ESPÍRITU YU'UN TE DIOS SOK TE ESPÍRITU YU'UN TE ANTICRISTOE.1Jkermanotak te k'uxex ta jkot'ane, ma me xa ach'uunik spisil te mach'atik ya yalik te yich'ojik te Espíritue. Jauk me to, tsajteyame awilik neel uuk teme janix a te Espíritu yu'un te Dios te yich'ojike o teme ma jauke, melel bayal me lotil alwanejetik te lok'ikix tel ta balumilale. 2Jich yu'un te ja'exe le' me ya ana'ik a teme janix te Espíritu yu'un te Diose: Spisil te mach'a ya yal ta jamal te Jesucristo te ja' la yich' sbak'etal te k'alal tale, ja me yu'un te Diose, 3spisil te mach'a ya yal te ma la yich' sbak'etal te Jesuse, ma me jauk yu'un te Diose. Ja in to ja me Espíritu yu'un te anticristoe, te ja'atike awaiyojikix stojol te ya xtale, sok ta ora to le' ayix ta balumilal.4Jkal-jnich'nab te k'uxex ta jkot'ane te ja yu'unex te Diose, te ja'exe ja waiyojikix tsalaw, melel te mach'a ay ta atojolike ja mero muk' stukel yan te mach'a ay ta balumilale pek'el stukel. 5Te mach'a ayik ta swenta te balumilale ja ya yalik te beluk yu'un te balumilale. Jich ya x-aiybot stojol sk'opik yu'un te mach'a pajal ayik ta swenta te balumilale. 6Te jo'otike ja me snich'anotik te Diose. Spisil te mach'a ya sna'bey sba te Diose ya me x-aiybot stojol te sk'ope. Yan te mach'a ma yu'un uuk te Diose ma me ya x-aiybot stojol te sk'ope. Le' me ya jna'tik stojol a te mach'a yik'oj te Espíritu yu'un te smelelile sok te Espíritu yu'un te lo'laywaneje.JA XK'UXUL OT'ANIL TE DIOSE. 7Jkermanotak te k'uxex ta jkot'ane, jich me ya jkalbeyex te k'uxuk me ya jkaiybatik ta jpisiltik, melel te xk'uxul ot'anile ya xtal ta stojol te Diose, spisil te mach'a ay xk'uxul te yot'ane ja me bejk'ajem ta stojol te Diose sok ya sna'bey sba te Diose. 8Te ants-winik te ma k'ux ta yot'an te yermanoe ma sna'ojbey sba te Diose, melel te Diose ja xk'uxul ot'anil stukel.9Ja yu'un la yak' ilel te xk'uxul yot'an te Dios ta jtojoltik, te la stikun tel koel te tul Snich'an ta balumilal swenta yu'un ya xkuxinotik ta stojol te Jesuse. 10Le' ya jna'tik stojol a te bit'il ay te xk'uxul ot'anile, te ma jo'okotik neel k'ux la jkaiytik te Diose, ja neel k'ux la yaiyotik stukel, ja yu'un te la stikun tel te tul Snich'ane, la sjelolinotik ta stojel te jmultike.11Jkermanotak te k'uxex ta jkot'ane, te Diose k'ax k'ux la yaiyotik ta yot'an, janix me jich ya me sk'an te k'uxuk ya jkaiybatik ta jpisiltike. 12Mayuk tuluk mach'a yiloj te Diose. Jauk me to teme k'ux ya jkaiybatik ta jpisiltike, te Diose ay me ta jtojoltik, sok te xk'uxul yot'ane ya me stojtesotik bael. 13Jich me ya jna'tik stojol te ayotik ta stojol te Diose, sok te ay ta jtojoltik uuke, melel ja yak'ojbotik te Espíritu yu'une. 14Janix jich, jkilotik sok jkak'ojbatik ta testigo yu'un te Tatil te ja la stikun tel te tul Snich'an swenta yu'un ja koltaywanej yu'un spisil te balumilale.15Spisil te mach'a ya yal te ja' Jesús te snich'an te Diose, janix me jich te Diose ya me x-ain ta stojol uuk sok janix me jich uuk ya x-ain ta stojol te Diose. 16Janix jich jna'ojtik stojol, sok jch'uunejtik te k'uxotik ta yot'an te Diose. Te Diose ja xk'uxul ot'anil, sok te mach'a ya x-ain ta xk'uxul yot'ane, ay me ta stojol te Dios abi, sok janix me jich te Diose ya me x-ain ta stojolik uuk.17Jich yu'un, te xk'uxul ot'anile ja me la stojtesotik ta jpisiltik, jich ay me smuk'ul jkot'antik te k'alal ya xk'ootik ta ich'el ta k'ope, melel teme jich ya xkuxinotik te bit'il te Jesuse, jich me lek ya xkuxinotik ta balumilal. 18Mayuk me xiwel ta stojol te k'uxul ot'anile. Te banti ay te xk'uxul ot'anile ya me xch'oj lok'el spisil te xiwele, melel te xiwele ja yu'un te kastigoe. Jauk me to te mach'a ya xiwe ma me yich'oj tojtesel yu'un te xk'uxul ot'anile.19Te jo'otike k'ux me ya jkaiybatik ta jkot'antik melel ja neel k'ux la yaiyotik stukel te Diose. 20Teme ay mach'a jich ya yale: "K'ux ta jkot'an te Diose,'' jauk me to teme ya yiley te yermanoe, yu'unanix pas lot abi. Melel te mach'a ma k'ux ta yot'an te yermanoe, te mach'a yiloje, ma me stak' ya yal te k'ux ta yot'an te Dios te ma ba yiloj stukele. 21Janix me jich, te mantalil jkich'ojtik yu'un te Diose: Te mach'a k'ux ya yaiy ta yot'an te Diose, janix me jich ya sk'an k'ux ya yaiy te yermano.
51Teme ay mach'a ya xch'uun te Jesús te ja' Cristoe, ja me bejk'ajem ta swenta te Diose, sok teme ay mach'a k'ux yaiyoj ta yot'an te Tatile jich me k'ux ta yot'an te mach'a bejk'ajem yu'une. 2Jich ya jna'tik te k'ux ya jkaiytik ta jkot'antik te yal-snich'nab te Diose: Teme k'ux ya jkaiytik ta jkot'antik te Diose sok teme ya jch'uunbeytik spasel te mantalil yu'une. 3Melel jai to ja xk'uxul ot'anil ta stojol te Diose: Te yakuk k'ejbeytik te smantale. Melel te smantal stukele ma ba wokol ta pasel.4Melel te mach'a bejk'ajem ta swenta te Diose ya me stsal te balumilale. Te beluk ya yaiy tsalaw ta stojol te balumilale: Ja te xch'uunjel jkot'antike. 5¿Mach'a te ya stsal te balumilale? Ja te mach'a ya xch'uun te ja Jesús te Snich'an te Diose.TESTIGO YU'UN TE JESUCRISTOE. 6Ja te mach'a tal ta swenta ja' sok ta swenta te ch'ich'e: Ja te Jesucristoe. Ma jauk nax tal yu'un te ich' ja'e, janix jich tal yu'un te la smal xch'ich'el te laj ta cruze. 7Melel ay oxeb testigoetik yu'un: 8Ja te Espíritue, ja te ja'e sok te ch'ich'e. Ta yoxchajp'al junax me ayik.9Teme ya jkich'tik ta muk' te testigo-k'op te ya yalik te ants-winiketike, jichuk me k'axem to xan ya jkich'beytik ta muk' te testigo-k’op te ya yal stukel te Diose. Melel te testigo-k'op yu'un te Diose ja in to: Te ja la yalbotik sk'oplal te Snich'ane. 10Te mach'a ya xch'uun te Snich'an te Diose ja me xch'uunoj te testigo-k'op te la yal te Diose. Yan te mach'a ma xch'uun te sk'op te Diose, ja me la yalix a te ya spas lot te Diose, melel ma ba xch'uunoj te testigo-k'op te la yal te Dios ta swenta te Snich'ane.11Ja in to ja te testigo-k'op te la yalbotikixe: Te ja Dios te la yak'botikix te jkuxlejaltik ta sbajt'el k'inale sok te kuxlejale ja ta swenta te Snich'ane. 12Te mach'a yik'oj ta yot'an te Snich'an te Diose ay me xkuxinel ta sbajt'el k'inal. Yan te mach'a ma xch'uunej te Snich'an te Diose mayuk xkuxlejal stukel.TE BIT'IL AY SK'OPLAL TE KUXINEL SBAJT'EL K'INALE. 13La jts'ibubeyex ta awentaik, swenta yu'un te ya ana'ik te ay akuxinelik ta sbajt'el k'inale, ja'ex te ya ach'uunik te sbiil te Snich'an te Diose. 14Jich ay smuk'ul jkot'antik ta stojol te Diose, teme ay beluk ya jk'anbeytik ta swenta te sk'anjel yot'ane, ya me yaiybotik stojol te jk'optike. 15Janix jich, ya me jna'tik te ya yaiybotik stojol te jk'optike, sok ya me yak'botik te beluk ya jk'anbeytike.16Teme ay mach'a ya yil te yermano te yak ta sleel te smule, teme ma jauk ta swenta te lajele, ya me sk'an sk'oponbey Dios, jich te Diose ya me yak' xkuxin uuk. Ja me ya jkal yu'un te ay mulil te ma x-ak'wan ta lajele. Ay me mulil te ya x-ak'wan ta lajele jauk me to ma me ya jkal te ya ak'oponbeyik Dios yu'une. 17Spisil mulil te beluk ma stojil ta pasele, Jauk me to ay me mulil te ma ta swenta uuk te lajele.18Jna'ojtik stojol te mach'a bejk'ajem ta swenta te Diose, ma ba ya sleulayix smul. Melel ja kananteybil yu'un te Snich'an te Diose, jich me ma stak' yich' uts'inel yu'un te pukuje. 19Jna'ojtikix stojol te yu'unotikix te Diose, sok jna'ojtikix te balumilale ay ta sk'ab te pukuje.20Jauk me to jna'ojtikix te talukix te Snich'an te Diose, sok ja la yak'botikix jna'tik k'inal, swenta yu'un jich me ya jna'beytik sba te mach'a smelelile. Jich jun ayotikix sok te smelelile, ja bi ja' te Jesucristoe. Te ja Snich'an te Diose. Ja mero kuxul Dios stukel sok ja kuxinel sbajt'el k'inal. 21Jkal-jnich'nab, ma me ach'uunik te lok'ombaetike.
