To view a copy of the CC BY-SA 4.0 license visit
http://creativecommons.org/licenses/by-sa/4.0/
1 Corintios
1SPATJIBAL OT'ANIL1Pablo, te ik'bil yu'un te Cristo Jesús ta wolwanej puk k'op ta swenta te sk'anjel yot'an Dios sok nix te jkermanotik Sóstenes, 2ta bay ch'uunjeletik yu'un Dios ta Corinto, te mach'atik ch'ultesbilik ta swenta Cristo Jesús, te ik'bilik yu'un pajal ya yich'ik ch'ultesel. Sok te jo'otik yakotik ta sts'ibuyel ta stojolik te mach'atik ayik ta bayuk nax te ya yalbeyik wokol te Jkajwaltik Jesucristo te pajal jch'uunejtik Jkajwaltik soke. 3Te yutsil yot'an sok te lamal k'inal yu'un te Jkajwaltik Dios sok te Jkajwaltik Jesucristoe ayuk me ta atojolik.YALEL WOKOL DIOS YU'UN TE MAJT'ANILETIK YU'UN TE CH'UL ESPÍRITUE 4Spisil ora ya jkal wokol ta stojol te Dios ta awentaik, ta swenta te yutsil yot'an te Dios te ak'bilex ta swenta te Cristo Jesuse. 5Te Jkajwaltik ja yak'ojbatik ja k'ulejalik spisil te beluk aye, ta ak'opik sok ta abijilik, 6jich bit'il te sk'oplal te Cristo te melel k'oem ta atojolike.7Jich yu'un te ja'exe ma spas falta majt'anil awu'unik ta swenta te Espíritue, jich junax awot'anik yakalex ta smaliyel te ya awilik te Jkajwaltik Jesucristoe. 8Janix jich ya me yak'beyex yip awot'anik k'alal to ta slajibal k'aal, jich me mayuk amulik a te k'alal ya sta yorail te ya xtal te Jkajwaltik Jesucristoe. 9Te Diose jun yot'an stukel, melel ja la yik'atik tel yu'un te jun awot'anik ya xk'oex sok te Snich'ane, te ja Jkajwaltik Jesucristoe.¿YU'UN BA XATOJ SBA TE CRISTOE? 10Ta ora to ya jkalbeyex wokol, jkermanotak, ta swenta te Jkajwaltik Jesucristoe, te yakuk ja chajp'an abaik sok te mayuk xatomba ta atojolik. Ya jkalbatik wokol te junuk nax me ayex sok junuk nax te beluk ya anopik spasele. 11Melel la yalbonikix, jkermanotak, te ay xatomba ta awolilik melel jich ya yal te ants-winiketik yu'un te Cloé.12Ja ya jk'an jkalbeyex: Jich la awalik ta tulutul: ''Jo'on ayon sok te Pabloe,'' ''Te jo'one ayon sok te Apolose,'' ''Te jo'one ayon sok te Cefase,'' ''Te jo'one ayon sok te Cristoe.'' 13¿Yu'un ba xatoj sba te Cristoe? ¿ja bal te Pablo te la yich' jijp'anel ta cruz ta atojolike? ¿ja bal awich'ojik ja' ta sbiil te Pabloe?14Ya jkalbey wokol Dios yu'un te mayuk mach'a jkak'obey yich' ja', janax te Crispo soy te Gayo. 15Jich mayuk tuluk te ya yal te la yich' ja' ta jbiile. 16(Te jo'one la jkak'bey ich' ja' te jayeb ta tul te ayik ta sna te Estéfanoe. Jauk me to ma jna'ix teme ay la jkak'bey xan ich' ja' te yantike.)17Melel te Cristo ma jauk la stikunon tel yu'un ya jkak' ich' ja', ja la stikunon tel yu'un te ya jchol te lek yach'il k'ope. Ma jauk la stikunon tel yu'un te ya jchol ta swenta sbijil sk'op ants-winiketik, swenta yu'un ma tojoluk laj ta cruz te Cristoe.TE CRISTOE JA YU'EL, SBIJIL TE DIOSE 18Te mach'atik ch'ayel ya xbajt'ike jowil k'op nax ya yaiyik te beluk la yak' ta na'el ta cruz te Cristoe. Yan te mach'atik yakalik ta koltayele ja ta swenta yu'el te Diose. 19Melel jich ts'ibubil jilel: ''YA JINBEY SBIJIL TE MACH'ATIK BIJIKE; YA ME JKAL TE MAYUK SK'OPLAL YA XK'OT TE MACH'ATIK AY SBIJILIKE."20¿Banti ay te mach'atik bijike? ¿Banti ay te mach'a nopjunetike? ¿Banti ay te mach'a ya stsalwan ta k'op ta balumilale? ¿Ma ba la yak' jowilajuk te Dios te sbijil te balumilale? 21Melel te balumilale ma la sna'bey sba te Dios ta swenta sbijilik nax, ja lek la yaiy te Dios te yakuk xkolik te mach'atik ya xch'uunik ta swenta te sk'op te kuybil ta jowil k'ope.22Melel te judioetike ya sk'anik te yakuk x-ak'botik yilik senyailetik, sok te griegoetik ya sleik bijil jolil. 23Yan te jo'otike ja ya jkalbeytik sk'oplal te la yich' jijp'anel ta cruz te Cristoe, yan te judioetike jich k'oem yu'unik te bit'il ton te ya xk'ojch'in sbaik a, sok te griegoetike ja jowil k'op yu'unik.24Jauk me to te mach'atik ik'bilik yu'un te Diose, manchuk me judioetik sok griegoetik, te jo'otike ja ya jcholtik sk'oplal te Cristo te ja ay yu'el sok ja sbijil te Diose. 25Melel te banti teb nax sbijil Dios k'ax jich sbijil a te bit'il sbijil te ants-winiketike, sok te banti teb nax yip ya yak' ta ilel te Diose, k'ax jich yip te bit'il yu'un te ants-winiketike.26Jkermanotak, ilawilik te ik'el awich'ojike. Mayuk tsobolex te ay abijilik ta swenta te balumilale. Mayuk tsobolex te muk' k'oemexe. Mayuk tsobolex te mach'a bejk'ajemex te ich'bilex ta muk'e. 27Jauk me to ja la stsa te Dios te beluk mayuk sk'oplal ta balumilale, swenta yu'un ya xk'exlaltes te mach'atik ay sbijilike. Te Dios ja la stsa te beluk mayuk yip ta balumilal swenta yu'un ya xk'exlaltes te mach'atik ay yipike.28Te Diose ja la stsa te beluk mayuk stuul sok te beluk ilaybil ta balumilale. Sok ja la stsa te beluk mayuk sk'oplale, yu'un ya slajinbey sk'oplal te beluk k'ax k'anbile. 29Ja la spas yu'un te mayuk mach'a ya stoy sba ta stojole.30Janix ta swenta te beluk la spas te Diose, jich ta ora to te junax ayex sok te Cristo Jesuse, te mach'a la yak'botik jbijiltik yu'un te Diose. Ja tal yak'botik jkiltik te beluk toj ta pasele, sok ja ch'ultesbilotik yu'un sok te kolemotik yu'une. 31Ja swenta te jich ts'ibubile: ''TE MACH'A YA SK'AN YA YAK' SBA ICH'EL TA MUK'E, AKA YAK' SBA ICH'EL TA MUK' TA STOJOL TE JKAJWALTIKE."
2YALBEYEL SK'OPLAL TE LAJ TA CRUZ TE CRISTOE1Te k'alal talon ta atojolik, jkermanotak, ma ba talon sok t'ujbil jk'op sok sbijil jk'op, melel te jo'one la jkal ta jamal te smelelil te beluk mukul yu'un te Diose. 2Te jo'one la jnop ta jkot'an te mayuk beluk ya jk'an jna' stojol te k'alal ayon ta atojolike, janax te bit'il laj ta cruz te Jesucristoe.3Te k'alal ayon ta atojolik a, mayuk jkip a sok ayon ta xiwel a sok bayal yakon ta nijk'el a. 4Te jk'ope sok te beluk la jkalbeyexe ma ba ay sbijil stukel. Janax ta swenta te Ch'ul Espíritu te la yak' jkiltik sok te yipe. 5Swenta jich te xch'uunjel awot'anike ma ba ya x-ain ta sbijil sjol te ants-winiketike, janax ta yu'el te Diose.TE BELUK LA YAK'BOTIK JNA'TIK STOJOL TE ESPÍRITU YU'UN TE DIOSE 6Ja yu'un te jo'otike ya me xk'opojotik ta sbijil-ot'anil ta stojol te mach'atik yijubenikixe, ma jauk ta sbijil te balumilale, sok ma jauk ta stojolik te ajwaliletik ta balumilale, te ya xlaj bael sk'oplale. 7Te jo'otike ja ya jkalbeytik te sbijil te Dios te mukbile, te sbijil-ot'anil te mukbil yu'un te Diose, te la xchajp'an ta sneelal to, swenta jkutsilaltik ya xk'ot.8Ni tuluk te ajwaliletik te ayik ta balumilal ta ora to ma la sna'beyik sba jai bijilil to, melel te lajuk sna'ike, ma ba la yak'ik ta milel ta cruz te Jkajwaltik te ja ay yutsilal stukele. 9Jich te bit'il ts'ibubile: "MAYUK MACH'A YILOJ, MAYUK MACH'A YAIYOJ STOJOL, MAYUK MACH'A SNOPOJ, TE BELUK CHAJP'ANBIL YU'UN TE DIOS TA STOJOL TE MACH'ATIK K'UX TA YOT'AN TE DIOSE."10Te Dios la yak'botikix jna'tik stojol spisil ta swenta te Espíritue. Melel te Espíritue ya stsajtey spisil, sok spisil te beluk muken ay yu'un te Diose. 11Melel, ¿mach'a ya xju' ya sna'bey te beluk ya snop te tul ants-winike, janax te espíritu te yich'oje? janix jich, mayuk mach'a ya sna' te beluk muken ay yu'un te Diose, janax te Espíritu yu'un te Diose.12Jauk me to te jo'otike ma jauk jkich'ojbeytik te Espíritu yu'un te balumilale, ja jkich'ojtik te Espíritu te talem ta stojol te Diose, jich yu'un ya xju' jku'untik jna'tik stojol spisil te beluk yak'ojbotik ta majt'anil te Diose. 13Melel te jo'otike ma xk'opojotik ta sbijil sk'op te ants-winiketike melel ma xju' yu'un ya xnojp'teswan, janax te Espíritu ya snojp'tesotik stukel. Ja te k'opetik te ya yak' ta nopel te Espíritu te ja ya jkak'beytik snopik te mach'atik ayik ta swenta te Espíritue.14Te mach'a ma ba yich'oj te Espíritue ma xk'ot ta yot'an te beluk yu'un te Espíritu yu'un te Diose, melel skuyoj ta jowil k'op stukel. Ma xju' yu'un sna'bey sba melel janax ta swenta te Espíritue. 15Te mach'a yich'oj te Espíritue ya me sna' stsajteyel spisil, jauk me to te mach'a ma yich'oje ma xju' yu'un stsajteyel. 16"Jich yu'un, ¿MACH'A YA XJU' YU'UN SNA' TE BELUK SNOPOJ TE JKAJWALTIKE, SOK AY BA MACH'A YA XJU' XBIJTESOT YU'UN? jauk me to te jo'otike jkich'ojbeytik te snopjibal yu'un te Cristoe.
3JOYBATIK TA AT'EL TA STOJOL DIOS1Jich te jo'one, jkermanotak, ma ju' jku'un te la jk'oponex te bit'il te mach'atik yich'ojik te Espíritue, jich la jk'oponex te bit'il ch'ich' bak'ete, melel jich k'oemex te bit'il unin-alaletik ta stojol te Cristoe. 2Jo'on la jkak'beyex te leche, ma jauk la jkak'beyex te tibale, melel ma to chapalatik ta sti'el te tibale. Janix jich ta ora to ma to chapalex.3Melel te ja'exe ch'ich'-bak'et to ayex. Melel ay to te paechal sok te kerajel ta atojolike, ¿Ma ba jauk yakatik ta xkuxintayel te beluk ya sk'an te abak'etalike sok ma ba yakatik ta xch'uunel te beluk yu'un te ants-winiketike? 4Melel jich ya yal te tule: "Jo'on ya jt'un te Pabloe sok ya yal te yane: "Jo'on ya jt'un te Apolose," ¿Ma ba yakatik ta kuxinel te bit'il ants-winiketike? 5Jich yu'un ¿Mach'a a te Apolose? ¿Sok mach'a a te Pabloe? Ja abatetik te la yich'ik ak'beyel yat'elik yu'un te Jkajwaltike sok te ja la snojp'tesatik ta xch'uunel te Jkajwaltike.6Jo'on la jts'un, te Apolose la yak'bey ya'lel, jauk me to te Diose ja la yak' te ya xch'ie. 7Jich yu'un, te mach'a ya sts'une, sok te mach'a ya yak'bey te ya'lele mayuk sk'oplal stukel. Melel ja Dios te ya yak' xch'iuk stukele.8Jich yu'un te mach'a ya sts'une sok te mach'a ya yak'bey te ya'lele jun k'oemik, jich ta tulu tul ya yich'ik te stojolik ja chikan te bi yilel te yat'elike. 9Melel te jo'otike joybatik ta at'el sok te Diose. Te ja'exe yawil xnichimex te Diose, sok ja pasbilatik yu'un te Diose.10Ta swenta yutsil yot'an te Diose te jich la yak'on te bit'il tul winik te ya sna' spasel te nae, jo'on la jpas te yuyale sok te yane ja ya sts'ajk'uy moel. Jauk me to tulu tul te ants-winiketike yakuk me stsajtey te bit'il ya sts'ajk'uy moele. 11Melel mayuk mach'a ya stak' ya yak' yan yuyal, janax te ak'bilixe, ja bi ja te Jesucristoe.12Jich yu'un, teme ay mach'a ya xkaj spas ta bay te yuyal te pasbilixe, sok oro, plata, t'ujbil tonetik, te' sok sijk' o ak, 13te yat'elike ya xchiknaj ta ilel, melel te sakil k'inale ya yak' ta ilel. Melel te k'ajk'e ya yak' xchiknajuk te at'elile. Te k'ajk'e ya stsaj te bi yilel te yat'elik te spasojik ta tulu tule.14Teme ay mach'a stalel ay te yat'ele, ya me yich' te smajt'ane. 15Jauk me to teme ay mach'a k'ajk' te yat'ele, ya me xch'ay te beluk spasoje; Jauk me to ya stak' skoltey sba stukel, jich bit'il ya xlok' ta anel ta yolil te k'ajk'e.16¿Ma ba ana'ojik stojol te ja temploex yu'un te Diose sok te ya xnain te Ch'ul Espíritu ta atojolike? 17Teme ay mach'a ya sjinbey te templo yu'un te Diose, ya me yich' jinel yu'un uuk te Diose. Melel te templo yu'un te Diose ch'ultesbil stukel sok janix jich uuk te ja'exe.18Ma me ayuk mach'a ya slo'liy sba stukel nax. Teme ay mach'a ta awolilik te ya skuy sba te ay sbijil ta ora to, aka yak' sba te jich bit'il te mach'a ma sna' k'inale, yu'un me jich ay sbijil ya xk'ot a. 19Melel te sbijil te mach'a ayik ta balumilale mayuk stuul yu'un te Diose. Melel ts'ibubil jilel: "TE DIOSE YA YAK' TE YA XCH'AY TA SWENTA SBIJILIK TE MACH'ATIK BIJIK TA SK'OPIKE." 20Janix jich ts'ibubil xan: "TE KAJWALTIK SNA'OJ TE MA XTU'UN TE BELUK YA SNOPIK TE MACH'ATIK SKUYOJ SBAIK TA BIJE."21Jich yu'un, ¡manchuk me ayukix toybajel ta stojol te ants-winiketike! melel ja awu'unik spisil, 22manchuk me ja te Pablo, o Apolos, o Cefas, o teme ja te balumilale, o teme ja te kuxlejale, o teme ja te lajele, o ja ba te beluk ay ta ora to, o ja ba te beluk ya xk'ot ta pasel ta patilale. Spisil te beluk aye ja awu'unik, 23te ja'exe ja yu'unex te Cristoe, sok te Cristoe ja ay ta swenta te Diose.
4TE YAT'EL TE WOLWANEJ PUK K'OPETIKE1Janix jich ya sk'an jkich'tik na'beyel jbatik te abatotik sok yaj at'elotik yu'un te Cristo ta swenta te muken smelelil k'op yu'un te Diose. 2Jich yu'un, te mach'atik yich'ojik yat'elike ja ya sk'an te lek sk'oplalike.3Jauk me to mayuk sk'oplal ya jkaiy teme ya alikbonik jmul te ja'exe sok teme ya yik'onik ta chajp'anel te ants-winiketik te ayik ta balumilale. Melel te jo'one ma jwentauk yalel te bi jkilel ayone. 4Melel ya jkaiy te jo'one mayuk beluk ma lekuk yakon ta spasel jauk me to ma jkal te mayuk jmule. Janax te Jkajwaltik te ya slikbon te jmule.5Jich yu'un te ja'exe ma stak' te ya alikik mulil ta oranaxe, melel ma to xtal te Jkajwaltike. Melel ja stukel ya yak' ta ilel te beluk mukbile sok ya yak' ta na'el te beluk ay ta yot'anik te ants-winiketike. Jich me ta tulutul ya yich' albeyel lek sk'oplal yu'un te Diose.6Ja yu'un jkermanotak, te jo'one jich jajch' jpas sok te Apolose ta swenta te alekilalike, jich ta jwentatik ya anopik te beluk albile: ''Ma me xjelawatik yu'un te beluk ts'ibubile." Jich me mayuk mach'a ya alektesbeyik sk'oplal a sok jich me ma abajik a te yane. 7Jich yu'un ¿Mach'a me ya xju' yu'un ya yil teme jun pajalexe? ¿Beluuk ay awu'unik te ma ba ta majt'anil ja awich'ojike? Melel te ja'exe ta swenta majt'anil ja awich'ojik spisil, ¿Bin yu'un te ya atoy abaik, jich yilel te bit'il ja la apasike?8¡Melel awich'ojikix spisil te beluk ya ak'anike! ¡Te ja'exe k'ulejatikix! ¡Ja akuyoj abaikix ta ajwalil sok mayukix te beluk ya xtu'un awu'unik ta jtojoltike! jich nix a, ya jk'an te x-ajwalinexe, jich me ya joinex ta ajwalinel uuk. 9Melel te jo'one ya jnop te bit'il ja Dios te la yak'otik ta wolwanej puk k'op ta slajibal sok te bit'il ak'bilotikix ta lajele. Te jo'otike yanax ya yilotik a te mach'atik ayik ta balumilale sok ta stojol te ch'ul abatetike sok nix te ants-winiketike.10Te jo'otike kuybilotik te ma jna'tik k'inal ta swenta Cristo, yan te ja'exe ay abijilik ta swenta te Cristoe. Te jo'otike mayuk jkiptik, yan te ja'exe ay awipik. Te ja'exe ich'bilatik ta muk' yan te jo'otike ma ich'bilotik ta muk'. 11Ta ora to ayotik ta wi'nal sok ta takin ti'il, mayuk stu'ulal te jk'u'-jpak'tike, ayotik ta majel sok mayuk jnatik.12Te jo'otike tulan ya x-at'ejotik, yakotik ta at'el sok te jk'abtike. Te k'alal ya jkich'tik bol-k'opteyele, te jo'otike lek sk'oplal ya jkalbeytik. 13Te k'alal ya jkich'tik nutsele, te jo'otike ya sts'ijk' jku'untik. Te k'alal ya jkich'tik bol k'opteyele, te jo'otike ya xk'opojotik sok yutsil jkot'antik. Te jo'otike jich k'oemotik sok jich ilbilotik te bit'il mayuk jtu'ultik yu'un te balumilale sok jich ilbilotik te bit'il k'abal te ma xtu'une.14Te bit'il jich la jts'ibubeyexe ma jauk yu'un te ya jk'exlaltesexe, ja yu'un te ya jtojtesexe jich te bit'il jkal-jnich'an te k'ux ta jkot'ane. 15Manchuk me ay awu'unik lajun mil (10,000) kanantaywanejetik ta stojol Cristo, jauk me to mayuk bayal ame'-atatik. Melel te jo'one k'atbujonix ta atatik ta swenta te Cristo Jesús ta swenta te lek yach'il k'ope. 16Jich yu'un ya jkalbeyex wokol te ya anopbonik te jtalele.17Ja swentail te la jtikunbeyex tel te Timoteo, te jich k'oem te bit'il jnich'an te k'ux ta jkot'ane sok te jun yot'an ta stojol te Jkajwaltike. Ja me ya xcha' yalbeyex te bit'il beenon ta swenta te Cristoe, janix jich te bit'il yakon ta nojp'teswanej ta bayuk nax sok ta jujun tsojb ch'uunjeletik. 18Jauk me to ay cha'ox tulex te atoyoj abaike, jich yakatik ta spasel yu'un akuyojik te bit'il ma xba jkilexe.19Jauk me to nopol ya xtal jkilex, teme jich ya sk'an te Jkajwaltike. Jich me ya jna' stojol ta lek te beluk yakik ta ya'anel te mach'atik stuyoj sbaik ta k'ope, ya me jkil teme smelelile. 20Melel te ajwalinel yu'un te Diose ma jauk ta swentanax jowil k'opetik ja ta swenta yu'el te Diose. 21¿Beluuk ya ak'anik te ja'exe? ¿Ja bal ya ak'anik te ya xtalon ta atojolik sok wajch' o ja bal ya ak'anik te sok xk'uxul jkot'an sok te espíritu yu'un te yutsil ot'anile?
5CHAJP'ANEL YU'UN TE MACH'A YA XYAL TA MULILE1Te jo'otike la jkaiytik stojol te ay mulil te kexlaltik sba te yakatik ta spasele, te ten mulil te ma ak'bilik spas te mach'atik ma ba xch'uunejik te Diose. Te k'op ayeje ja te bit'il ay tul ta awolilik te ja yinaminej te yinam te state. 2¡Sok te ja'exe mero atoyoj abaik! ¿ma ba ya sk'an ya amel-awot'anik yu'un? Te mach'a jich la spas to, ya me sk'an ya yich' tenel lok'el ta atojolik.3Manchuk me ma ayukon ta awolilik sok te jbak'etale jauk me to joinejex me ta swenta espíritu, te jo'one la jkich'ix ta k'op te mach'a jich la spas to, jich te bit'il stelemal ayon ta atojolike. 4Te k'alal ya atsob abaik ta sbiil te Jkajwaltik Jesuse, joinejex me ta swenta te espíritue, sok yu'el te Jkajwaltik Jesuse, jo'on la jkich'ix ta k'op te mach'a jich la spase. 5Te jo'one jich la jpas ta stojol jai winik to swenta yu'un ya yich' ak'el ta sk'ab te pukuje jich me ya xtal swokol ta sbak'etal, swenta yu'un jich me ya xkol te s-espíritue te k'alal ya xtal te Jkajwaltike.6Te atoybaelike ma lekuk. ¿Yu'un ba ma ana'ik te tebnax te levadura ya spajubtes spisil te kaxlan waje? 7Pokabaik lok'el yu'un te spokol levadurae jich me yach'il mats' ya xk'oex a, jich me ya xk'oex te bit'il kaxlan waj te mayuk yich'oj slevadurae. Melel te Cristoe, te alal chij k'oem yu'un te pascuae, la yich'ix milel. 8Jich yu'un, ak'aik te ya jpastik te k'ine, ma jauk sok te pokol levadurae, ja te levadura te ma lekuk ta pasele sok te mulile. Jauk me to, te jo'otike aka jpastik sok te kaxlan waj te mayuk yich'oj slevadurae, te beluk stojile sok te beluk smelelile.9Te jo'one la jts'ibubeyex ta atojolik ta yan jun, te banti la jkalbeyex te ma atsob abaik sok te mach'atik ya yaiyik mulweje. 10Ma me jauk la jk'an jkalbey sk'oplal te ma xju' ya ak'oponik te mulawiletik ta balumilale sok te mach'atik ay sbik'tal yot'anike, o te elek'etike, sok nix te mach'a ya xch'uunik te lok'ombaetike, te jichuke puersa me ya sk'an awijk'tayik te balumilale.11Jich yu'un yakon ta jts'ibubelex te ma ajoin abaik sok te mach'a ya skuy sba ta ch'uunjele, jauk me to kapal ta mulil te xkuxinele, te ay sbik'tal yot'ane, te xch'uunej lok'ombaetike, te jelaw nax ta k'ope, te ya xyakube, te yaiyik elek'e. Ma me xa join abaik ta we'el sok. 12Jich yu'un, ¿jo'on ba ya jlikbey smul te mach'atik ma ch'uunjeluke? Jich yu'un, ¿Ma ba jauk lek te ja'ex ya achajp'anik te mach'atik xch'uunejikix te Diose? 13Melel te Diose ja me ya slikbey smul ta spisilik te mach'atik ma ba ch'uunjeletike. ''LOK'ESAIK BAEL TE MACH'A MA LEKUK YAT'EL TA AWOLILIKE."
6YA XCHAJP'AN SBAIK TE MACH'ATIK XCH'UUNEJIK TE DIOSE1Te k'alal ay k'op awu'unik sok te yan awermanoe, ¿Ja ba lek xan te ya xba awak'ik ta chajp'anel ta stojol te chajp'anwanejetik te ma ba ch'uunjeletike, ma ba jauk lek te ja ya awak' xchajp'an te ch'uunjeletike? 2¿Yu'un ba ma ana'ojik te mach'atik ch'uunjeletik ja ya yich'ik ta k'op te mach'atik ayik ta balumilale? teme ja ya awich'ik ta k'op te ants-winiketike, ¿ma ba xju' awu'unik xchajp'anel te jontol k'opetike? 3¿Yu'un ba ma ana'ik te jo'otik ya jkaiytik chajp'anwanej ta stojol te ch'ul abatetike? ¿ma ba jauk k'axem to xan ya xju' awu'unik xchajp'anel te k'op ayejetik ta swenta nax te jkuxineltike?4Jich yu'un teme ya awaiyik chajp'anwanej yu'un te beluk swentanax te akuxlejalik ta jujun k'aale, ¿bistuuk te ya awak'ik te ya xchajp'anik te beluk yu'un te akuxlejalik te mach'atik ma ch'uunjeletike? 5Ja me ya jkal yu'un te yakuk xk'exawexe. ¿Yu'un ba mayuk tuluk te ay sbijil yot'an ta xchajp'anel te k'opetik awu'unik te junax awermano abaike? 6Jauk me to, ¡teme jajch' k'op awu'unik te pajal ch'uunjelexe, ja ya awak'ik xchajp'an tul chajp'anwanej te ma ba ch'uunjele!7Te bit'il ay k'op awu'unik te ja'ex ch'uunjelexe, ja me ch'ayel k'ot awu'unik abi. ¿Ma ba jauk lek te yakuk xkujch' awu'unike? ¿ma ba jauk lek te ya xkujch' awu'unik te lo'layele? 8Jauk me to te ja'exe awuts'inojik sok alo'liyojik te yantike, ¡jich ya apasbeyik te awermanotake!9¿Yu'un ba ma ana'ojik stojol te mach'atik ma toj yot'anik ma xju' ya x-ochik ta stojol te ajwalinel yu'un te Diose? Ma me ach'uunik te lo'layele. Te mach'atik ya yaiyik mulwej sok te sbak'etalike, te mach'atik xch'uunejik te lok'ombaetike, te mach'atik ya smujk'-sitewanike, te mach'atik ya xchon te sbak'etalik ta mulweje, te winiketik te ya skuy sbaik ta antse, 10te elek'etike, sok te bik'tal ot'aniletike, te yakubeletike, te mach'atik ya xlewanik ta k'ope sok nix te mach'atik lo'leywanej tak'inetike, ni tuluk ma x-och ta bay yak ta ajwalinel te Diose. 11Jich la apasik ta sne'elal to. Jauk me to la awich'ikix utstesel, sok la awich'ikix ch'ultesel, te ja'exe la awich'ikix tojtesel ta stojol te Dios ta sbiil te Kajwaltik Jesucristoe sok ta swenta te Espíritu yu'un te Diose.JKICH'TIK TA MUK' TE DIOS SOK TE JBAK'ETALTIKE 12"Spisil ya stak' ya jpas" jauk me to ma spisiluk lek ta pasel te beluk ya jk'ane," "Spisil ya stak' jpas" jauk me to ma jkak' te ya stsalon xujt'uke. 13"Te we'lile ja yu'un te jch'ujtike, te jch'ujtike ja yu'un te we'lile," jauk me to ta xcha' tenel te Diose ya slajinbey sk'oplal. Te jbak'etaltike ma la yich' pasel yu'un te ya yaiy mulweje. Jauk me to, te jbak'etaltike ja yu'un te Jkajwaltike, sok te Jkajwaltike ya slebey te beluk ya xtu'un yu'un te jbak'etaltike.14Te Diose la spas ta xchebal, la xcha'kuxes te Jkajwaltike janix jich te jo'otike ya me xcha'kuxesotik ta swenta yu'el. 15¿Ma ba ana'ik te abak'etalik ja yu'unix te Jkajwaltike? ¿Jich yu'un te beluk yu'un te Jkajwaltike ya ba xju' ya slak' sba sok te mulawil antse? ¡ma jichuk ya sk'an!16¿Yu'un ba ma ana'ik te mach'a ya sjoin sba ta wayel sok te mulawil antse, junax sbak'etalik ya xk'ot sok? Jich te bit'il ts'ibubile: "TA XCHEBALIK JUNAX SBAK'ETALIK YA XK'OT." 17Yan te mach'a junax ay sok te Jkajwaltike jich junax Espíritu k'oem sok.18¡Lok'anik me tel ta bay te mulweje! chikan beluk yan mulil te ya spas te ants-winike, ma jauk ya spasbey te sbak'etale yan teme yal ta mulile ja ya yak' ta k'exlal te sbak'etale.19¿Yu'un ba ma ana'ojik te abak'etalik ja templo yu'un te Ch'ul Espíritu te ja nainem ta atojolike, te ja la yak'beyex te Diose? ¿Yu'un ba ma ana'ojik te ma jauk awu'unikix te abak'etalike? 20Melel te ja'exe manbilatikix. Jich yu'un albeyaik yutsilal te Dios ta swenta te abak'etalike.
7TAK'UYEL YU'UN NUJP'INEL1Ta ora to ya me jkak'beyex sujt'ib te beluk la ats'ibuybonike: ''Ja lek te ma xnujp'in te tul winike." 2Jauk me to ta skaj te yiljibal awot'anike, sok te bayalix te beluk ma lekuk ta pasele, ta tulu tul ayuk me yinamik sok ayuk me smamlalik te antsetike.3Te winike ya sk'an te jun yot'an ya sjoin te yiname, janix jich ya sk'an ya spas te ants ta stojol te smamlale. 4Ma me jauk xan yu'uninej sbak'etal te antse ja me yu'uninejix te smamlale. Janix jich uuk te winike ma yu'uninejix te sbak'etale, ja me yu'uninejix te yiname.5Ma me akom abaik ta ak'oponbel abaik, janax teme la achap ak'opike sok te jayeb k'aal ma ak'opon abaike. Jich me ya apasik swenta yu'un ya x-ochex ta sk'oponel te Diose. Jich yu'un teme ts'akaj te jayeb k'aal achapojik te ma ba ak'opon abaike ya me acha'-ak'opon abaik, jich te pukuje ma me yilbeyex awot'anik ta swenta te abak'etalike, ta skaj te ma xju' awu'unik te ya akom abaike. 6Te bit'il jich ya jkalbeyexe, ma jauk yu'un te ya sujex a, sok te ya jpas ta mantale, janax ya jkak'beyex ana'ik stojol te bit'il stojil ya sk'an ta pasele. 7Ya jk'an te jichukex apisilik te bit'il te jo'one. Jauk me to ta tulu tul ay smat'an yu'un te Diose. Ay mach'a jich smajt'an te bit'il jo'one, sok ay mach'a yan te smajt'ane.8Te mach'atik ma ba nujp'inemike sok te me'ba- antsetike, ya jkalbeyex te ja lek te manchuk ya xnujp'inexe, jichuk ya xjilex te bit'il jo'one. 9Jauk me to teme ma xju' yu'unik skomel te sbak'etalike. Ja lek te ya xnujp'inike, ja ma lekuk te ya xwoklaj yu'un te sbak'etalike.10Ta ora to ya jkalbey mantal te mach'a nujp'inemike, ma jauk ta sk'anjel jkot'an, ja ta sk'anjel yot'an te Jkajwaltike: ''TE ANTS TE NUJP'INEMIXE MA ME STAK' TE YA YIJK'TAY TE SMAMLALE.'' 11Jauk me to te ants teme ya yijk'tay te smamlale, ya sk'an te ma ya xcha' xnujp'ine, ja lek te yakuk xjunaj yot'an sok te smamlale. Jich, ''TE WINIK TE NUJP'INEME MA ME SK'AN YIJK'TAY TE YINAME.''12Yan te yantike, ya jkalbey, jo'on ya jkal, ma jauk te Jkajwaltike, teme ay mach'a ch'uunjel te nujp'inem sok tul ants te ma ba ch'uunjele, jauk me to jun yot'an te kuxinem soke, ma stak' te ya yijk'teye. 13Teme ay tul ants te ma ch'uunjeluk te smamlale, jauk me to teme jun yot'an sbaike ma me stak' ya yijk'tey sba te antse. 14Melel te winik te ma ba ch'uunjele ja kanantaybil ta swenta te yinam te xch'uunej te Diose, sok te ants te ma ba ch'uunjele ja kanantaybil ta swenta te smamlal te xch'uunej te Diose. Te manchuk jichuke te yal-snich'ane ilaybil sba, jauk me to kanantaybilikix.15Jauk me to teme ya x-ijk'taywan te mach'a ma ba xch'uunej te Diose, aka bajt'uk. Teme jich k'ot ta pasel ta stojol te winik o te ants te ch'uunjele, jich me ma chukul k'oem yu'un te bit'il nujp'inem soke. Melel te Diose la yik'otik tel ta kuxinel ta lamal k'inal. 16Melel, ¿Bit'il ya ana' stojol, ants, teme ya xju' awu'un skoltayel te amamlale? sok ¿Bit'il ya ana' winik, teme ya xju' awu'un skoltayel te awiname?17Chikan bit'il ta tulu tul la yak'beyex amajt'anik te Diose jichuk me ya xkuxinex. Ja me jich mantalil ya jkalbey spisil te ch'uunjeletike. 18¿Ay ba mach'a yich'ojix tel circuncisión te k'alal la xch'uun te Diose? manchuk me ya smuk te yich'oj circuncisione. ¿Ay ba mach'a ma yich'oj tel circuncisión te k'alal la xch'uun te Diose? ma spas te ya yich' te circuncisione. 19Melel te circuncisione sok te incircuncisione, ma jauk ay sk'oplal. Te beluk ay sk'oplale ja te ya jch'uunbeytik spisil te smantal te Diose.20Ta tulu tul ya me sk'an te jun awot'anik jich bit'il k'alal la ach'uunik te Diose. 21¿Mosoat bal a te k'alal la awich' ik'el yu'un te Diose?, ma me xa mel awot'anik yu'un. Jauk me to teme ya xju' awu'un te ya akoltay aba yu'un te mosoinele, koltay aba. 22Melel teme ay mach'a la yich' ik'el yu'un te Jkajwaltik te mosoinbil a, la yich'ix koltayel lok'el yu'un te Jkajwaltike. Janix jich te mach'a la yich' ik'el yu'un te Jkajwaltik te ma ba mosoinbil a, moso k'otix ta stojol te Cristoe. 23Te ja'atike toyem atojolik te la awich'ik manele, jich yu'un ma me awak' abaik xan ta mosoinel yu'un te ants-winiketike. 24Kermanotak, jich yu'un te bit'il ayex ta sne'elal to te k'alal la jkich'tik ik'el ta xch'uunel te Jkajwaltike, jichuk me jun jkot'antik ta spisil ora.25Ta ora to ya jkalbey mantal te mach'atik ma nujp'inike, mayuk bay jkayoj stojol teme ay mantal la yal te Jkajwaltike, jauk me to te jo'on jich ya sk'an jkot'an te ya jkalbeyex ta swenta te xk'uxul yot'an te Jkajwaltik te ja smuk'ul jkot'antike. 26Jich yu'un, ya jnop te jo'one ta skaj te ay wokolile, ja lek te jichuk ya xjil te winik te bit'il aye.27¿Chukulat ba ta stojol te tul antse? ma me xa le te ya awijk'tay te awiname ¿mayuk ba awinam? Ma me xa le awinam. 28Jauk me to teme ya xnujp'inate, ma me ya ata amul yu'un. Jauk me to teme nujp'in te ch'iel ach'ixe, ma me ya sta smul yu'un. Jauk me to te mach'a ya xnujp'inike puersa me ay bayal ta chajp' wokolil ya xtal ta xkuxinel, ja yu'un ya jk'an te manchuk ya xk'oex a.29Jich yu'un jich ya jkalbeyex kermanotak: Mayukix bayal k'aal. Jich ta ora to, te mach'atik ay yinamike, jich me ya spas te bit'il mayuk yiman k'oeme. 30Te mach'atik ya x-ok'ike jichuk me k'oem te bit'il ma yakalik ta ok'ele; sok te mach'atik binax yot'anike jichuk me k'oemik te bit'il mayuk sbujts' yot'anike; sok te mach'atik la yaiyik mambajele, jichuk me k'oemik te bit'il mayuk bi ay yu'unike. 31Te mach'atik ya stuuntesik spisil te beluk ay ta balumilale, jichuk me k'oem te bit'il ma yakik ta stuuntesele, melel yak ta k'oel yorail te ya xlaj sk'oplal te balumilale.32Ja ya jk'an te manchuk ayuk beluk ya ya'an awot'anike. Te winik te ma nujp'ineme ja ya xbajt' ta yot'an te beluk yu'un te Jkajwaltike sok te beluk ya smulan yot'ane. 33Yan stukel te winik te nujp'ineme ja ya smel yot'an yu'un te beluk ay ta balumilale sok te beluk lek yot'an yu'un te yiname. 34Jich yu'un te cha' xajt' aye. Te ants te ma nujp'ineme sok te ma staoj sba sok winike ja ya xbajt' ta yot'an yu'un te beluk yu'un te Jkajwaltike, sok te bit'il skanantey te sbak'etale sok te espíritue. Yan te ants te nujp'ineme ja ya smel yot'an yu'un te beluk ay ta balumilale sok te beluk lek yot'an yu'un te smamlale.35Ja ya jkalbeyex yu'un te lekuk ya xk'oex a, ma yu'unuk ya jkomex. Ja ya jkalbatik yu'un te beluk toj ta pasele, yu'un k'axel ayatik ta stojol te Jkajwaltike sok te mayuk beluk ya xch'aybex awot'anike.36Jauk me to teme ay tul winik te ya snop te ma lekuk te ma ya yak' ta nujp'inel te yantsil-nich'ane ta skaj te yakix ta k'axel te yawilale jichuk me ya spas, ma muliluk, aka nujp'inuk. 37Yan te mach'a yak'oj ta yot'ane, sok te mayuk beluk makbil yu'une, sok te ya xju' yu'un te ya skanantay sbae, sok te ja yak'oj ta yot'an te ma xnujp'ine, jichuk me ya spas. 38Ja yu'un ta xcha' xchajp'al, teme ya yak' ta nujp'inel te yantsil-nich'ane, lek ya spas, yan teme ma xnujp'in yu'un te yantsil-nich'ane ja lek xan ya spas.39Te tul antse junax me ay sok te smamlal te k'alal kuxule. Yan te me laj te smamlale, ya stak' ya xnujp'in sok te mach'a ya sk'ane jauk me to ta stojol te Jkajwaltike. 40Jauk me to te beluk lek ya jkil jtukele ja te ants te jichuk ya xjil te bit'il aye. Sok jna'oj te jkich'oj uuk te Espíritu yu'un te Diose.
8TE MILBIL MAJT'ANIL TA STOJOL TE LOK'OMBAETIKE1Jich yu'un ta ora to ya sutbeyex yu'un uuk te beluk la ajojk'ibonik yu'un te we'eliletik yu'un te milbil majt'aniletik ta stojol te lok'ombaetike "te jo'otike jna'ojtik te jkich'ojtik te sbijil ot'anile." Te sbijil ot'anile ya smuk'tesotik, yan stukel te xk'uxul ot'anile ya utsteswan stukel. 2Teme ay mach'a ya skuy te ay beluk ya sna'e, te ants-winik bi ma ba sna'ojbey sba te bin ut'il ya sk'an sna'e. 3Jauk me to teme ay mach'a k'ux ta yot'an te Diose, na'bil sba stukel yu'un te Diose.4Te bit'il ay sk'oplal te we'elil te ya yich' lajinel yu'un milbil majt'anil yu'un te lok'ombaetike: "Te jo'otike jna'ojtik stojol te lok'ombaetike mayuk stulalik le' ta balumilal to sok junax te Diose, mayuk yan. 5Ay mach'a yalojik diosetik te chiknajemik ta bay ch'ulchan sok ta balumilal, jich te bit'il bayal "diosetik" sok "ajwaliletik," 6Jauk me to, te jo'otike jna'ojtik "te janax ay tul te Dios Tatile, te ja la spas spisil te beluk aye, sok te bit'il kuxulotike sok tul nax te Jkajwaltike ja te Jesucristoe, te ja ta swenta spisil te beluk chiknajeme, sok janix jich chiknajemotik uuk."7Jauk me to, ma ba ta apisilik te k'oem ta awot'anike. Melel ay cha'ox tul te mach'atik la snopik yich'el ta muk' te lok'ombaetike sok la slajinik te we'elile jich te bit'il te milbil majt'anil k'oem stojol jun lok'ombae. Melel te snopjibal yu'une ma ba lek stukel sok mayuk yip stukel.8Jauk me to ma jauk te we'elil te ya yotsesotik ta stojol te Diose. Melel te jo'otike ma jauk ya xbolobotik yu'un teme ma xwe'otike sok ma jauk ya xlekutobik yu'un teme ya xwe'otike. 9Jauk me to tsajteya me abaik te bit'il kolematikixe, ma me jaukex te ya awak'ik ta ch'ayel koel te mach'atik pek'el xch'uunjel yot'anike. 10Melel teme ay mach'a la yilate, ja'at te ayix sbijil awot'ane te nakalat ta we'el ta bay snail te lok'ombaetike. ¿Ma ba jauk ya awak'ik ilel te ya xjajch' slajinik uuk te milbil majt'anil yu'un te lok'ombaetike te mach'a mayuk yip te yot'ane?11Ta skaj te snopjibal awu'un te bit'il ja na'ojbeyix sk'oplal te ma kuxulik te lok'ombaetike, te awermano te ma to sna'ojbey lek sk'oplal stukele, sok te pek'el to aye, te ja ta swenta te laj yu'un te Cristoe ya me yich'ik jinel stukel. 12Jich yu'un te k'alal ya awuts'inbeyik snopjibal yu'un te awermanoike jich me k'oem te bit'il la awaiyix mulwej ta stojol te Cristoe. 13Jich yu'un, teme ja ta swenta te we'elil te ya jkak' ta ch'ayel koel te jkermanoe, ja lek te ma me ya jti' te milbil majt'anile, jich ma jkak' ta ch'ayel koel te jkermanoe.
9TE BELUK YA X-AK'BOT TE WOLWANEJ PUK-K'OPE1¿Yu'un ba ma kolemonix? ¿Ma ba wolwanej puk-k'opon? ¿Yu'un ba ma jkiloj te Jkajwaltik Jesuse? ¿Ma ba jauk jkat'elex yu'un te Jkajwaltike? 2Teme ma wolwanej puk-k'opon yu'un te yantik ants-winiketike, ja me puk-k'opon ta awentaik. Melel te ja'exe ja ya awak'ik ilel te bit'il wolwanej puk-k'opon yu'un te Jkajwaltike.3Ja in to ja me ya jkolteyba yu'un te mach'atik ya stsajteyonike: 4¿yu'un ba ma stak' ya xwe'-uch'ajotik? 5¿Ma ba ya stak' xnujp'inotik sok tul ants te ch'uunjele, jich te bit'il ya spasik te yantik wolwanej puk-k'opetike sok te yijts'inab te Jkajwaltike, sok te Cefase? 6¿Jo'on nax ba sok Bernabé te ma stak' te ya x-at'ejotike?7¿Mach'a ya x-abtinaj ta soldado te janax ya stoj stukel te beluk ya xtu'un yu'une? ¿Ay ba mach'a ya sts'un ts'usub te ma slajinbey te site? ¿Ay ba mach'a ya skanantey te wakaxetik te ma ba ya yuch'bey te leche yu'une? 8¿Janax ba ya jkal ta swenta sk'op te mach'a wolwanej ants-winiketike? ¿Ma ba jichuk ya yal uuk te mantalile?9Melel jich ts'ibubil ta bay smantal te Moisese: ''MA ME XA LAPBEY TE SMAJK'IL SNI' TE WAKAX TE K'ALAL YAK TA STEK'EL TE SBAK' TE TRIGOE." ¿Ja ba ya skanantey te wakaxetik te Diose? 10¿Ma ba jauk jk'oplaltik? Ja in to ja jk'oplaltik te ts'ibubil jilele, teme ay mach'a ya swok'bey slumil te yawal ts'unube aka me swok'bey slumil sok smuk'ul yot'an, sok te mach'a ya x-ixmaje aka me smaliy te k'alal ya spukbey sbaik te sit te awal-ts'unubile. 11Teme ya jts'untik ta atojolik te beluk yu'un te Espíritue, ¿K'ax muk' bal ya awaiyik te ya awak'botik te beluk ya xtuun jku'untik ta balumilale?12Teme ja yakalik ta spukel te yantik te beluk ak'bilexe. ¿Jauk to bal a te jo'otike? Jauk me to, mayuk bay jtuuntesotik te beluk ay ta jwentatike. Melel spisil jts'ikotik ta swenta te manchuk ya jmakbeytik te lek yach'il k'op yu'un te Cristoe. 13¿Ma ba ana'ojik te mach'atik ya yaiyik abatinel ta bay te temploe ya yich'ik swe'elik leuk a? ¿Ma ba ana'ojik te mach'atik ya yaiy abatinel ta bay yawil te xchik'jibal majt'anile ya spukik te beluk la yich' ak'el le'a? 14Janix jich la yal mantal te Jkajwaltik te mach'atik ya xcholik te lek yach'il k'ope, janix me jich ya yich'ik te beluk ya xtuun yu'un ta swenta te ya xcholik te lek yach'il k'ope.15Jauk me to te jo'one mayuk beluk jk'anoj. Ma me jauk la jts'ibuy yu'un te ya jk'an te ay beluk ya awak'bonike. Ja lek ya jkaiy te yakuk xlajon teme ay mach'a ya xtal spojbon bael te yutsil jkot'ane. 16Melel teme ya jchol te lek yach'il k'ope, ma lek ya xk'oon teme ya jtoyba yu'une, melel ja smantal te Diose, melel puersa ya sk'an jchol ¡Obol me jba teme ma ya jchol te lek yach'il k'ope!17Teme sok jkot'an ya jpasbey te yat'el te Diose, ay majt'anil ya jta. Jauk me to teme ma la jpas sok yutsil jkot'ane, ja ay nanix ta jwenta spasel a te beluk ak'bilon spasele. 18¿Beluuk majt'anil ya jta yu'un? te k'alal ya jchol te sk'op te Diose ma me ya jk'an jtojol yu'un, jich me ma jk'an te beluk ak'bilone.19Melel libre ayon, jauk me to abat ayon ta awentaik, jich ya xju' jku'un te yakuk a sut awot'anik a. 20Te bit'il stalel te judioetike jich la jpas te bit'il judioetike, swenta yu'un ya sut yot'anik a. Te mach'atik xch'uunejik te mantaliletike jich me la jch'uun uuk, swenta yu'un ya sut yot'anik a. Te jo'one jich la jpas manchuk me ma jch'uunej te mantalile.21Janix jich te mach'atik ma xch'uunojik te mantalile, jich me la jpas uuk, ma yu'unuk te ma ayon ta swenta te smantal te Diose, ja ayon ta swenta te smantal te Cristoe. Jich la jpas ta swenta te yakuk xju' jku'un a te yakuk sut yot'anike. 22Te mach'atik mayuk yip yot'anike jich me mayuk yip jkot'an la jkak' ba uuk, swenta yu'un yakuk sut te yot'anike. Jich la jpas spisil in to ta swenta te yakuk sut yot'anik ta spisilik te ants-winiketike, swenta yu'un ya stak' xkolik cha'ox tul a. 23Spisil jich la jpas in to swenta te lek yach'il k'ope, swenta jich ya stak' jta a te bendicione.24¿Ma ba ana'ojik te mach'atik ya stsal sbaik ta aelmal, stejk'elik ya x-aelmajik, jauk me to tul nax te mach'a ya sta te majt'anile? Jich yu'un aelmajanik me ta swenta te yakuk ataik te majt'anile. 25Te mach'a ya yaiy tsaltombae ya me xchajp'an sba. Ja me ya spas yu'un te ya yich' te skorona te ya xlaje. Jauk me to te jo'otike ya me x-aelmajotik jich me ya jkich'tik te korona te ma xlaje. 26Jich yu'un, te jo'one ma ba ya x-aelmajon teme mayuk swentaile, sok ma jkaiy kerajel teme jtukele. 27Jauk me to te jo'one ya suj ta abatinel te jbak'etale, swenta yu'un te k'alal ya jchol te sk'op te Dios sok te yantik ants-winiketike, manchuk me ya jkich' lok'esel yu'un.
10KOMEL YU'UN XCH'UUNEL LOK'OMBAETIK1Kermonotak, ya jk'an te yakuk ana'ik stojol, te jme'-jtatik ta namey k'inal ainik me ta yaxinal te tokal sok k'axik me ta yolil te mare. 2Spisilik la yich'ik ja' yu'un te Moisés ta yaxinal te tokale sok te k'alal k'axik bael ta bay te mare, 3sok spisilik pajal la stuuntesik te we'elil yu'un te espíritue. 4Janix jich ta spisilik pajal la yuch'ik te ja' te ak'botik yu'un te espíritue. Melel la me yuch'ik te ja' te lok' tel ta ch'en ta swenta te espíritu te t'unbilik yu'une, te ch'ene ja te Cristoe.5Jauk me to te Diose ma lekuk yot'an yu'un te beluk amen la spasik te tsobol ants-winiketike, jich lajik jilel ta bay takin jochol k'inal. 6Jich yu'un spisil in to ja la yak'botik jkiltik uuk, swenta yu'un manchuk me ya xbik'taj jkot'antik yu'un te beluk ma lekuke, jich te bit'il la spasike.7Ma me ach'uunik te lok'ombaetike, jich te bit'il ay mach'a la xch'uunike. Jich te bit'il te ts'ibubile: ''TE ANTS-WINIKETIKE LA SNAJK'AN SBAIK TA WE'EL-UCH'BAJEL, SOK JAJCH'IK TA TAJIMAL''. 8Ma me xyalatik ta mulil, jich bit'il bayal mach'atik yalik ta mulil. Ta junax k'aal laj oxeb xcha'winik ta mil (23,000) ta swenta in to.9Ma me jkilbeytik yot'an te Cristoe, jich te bit'il la spasike, ta swenta in to lajik ta ti'el ta chan. 10Sok ma me awaiyik muken ayej, jich te bit'il bayal mach'atik la yaiyik te muken ayeje, jich lajik milel yu'un te ch'ul abat yu'un te lajele.11Jich yu'un, jich k'ot ta pasel ta stojolik swenta yu'un jich la yak'botik jkiltik te jo'otike. Ja la yich' jilel ts'ibuyel yu'un te ya yak'botik jnoptike, te komel te la jkich'tike ja yu'un te nopol ya staix te slajibal k'aale. 12Jich yu'un, spisil te mach'a ya snop te lek ya skuy sbae aka me stsajtey sba te manchuk ya xch'ay koele. 13Te yiljibal awot'anik te julem ta atojolike, pajal me sok te ay ta stojolik uuk te ants-winiketike. Jauk me to te Diose jun yot'an ta atojolik. Ma ya yak' te ya xjelaw te yiljibal awot'anike. Te k'alal ya xtal te yiljibal awot'anike, janix me jich ya slok'esatik a, swenta yu'un jich me ya sts'ijk' awu'unik a.14Jich yu'un, kermanotak te k'uxex ta jkot'ane, ijk'tayaik ta xch'uunel te lok'ombaetike. 15Jich ya jk'oponex te bit'il mach'a bijike, jich me ya anop awaiyik te beluk ya jkalbeyexe. 16Te kopa yu'un te utsilal te ya jch'ultestike, ¿ma ba jauk junax k'oemotik ta swenta te xch'ich'el te Critoe? Te kaxlan waj te ya jxet'ike, ¿ma ba jauk junax k'oemotik ta swenta sbak'etal te Cristoe? 17Jich te bit'il junax ya jlajintik te pejch' kaxlan waje, jich junax ayotik, manchuk me bayalotik, junax jbak'etaltik. Ta jpisiltik ya jtsaktik te pejch' kaxlan waje.18Ilawilik te ants-winiketik te ayik ta lum Israel: ¿Ma ba jauk te ya slajinik te milbil majt'anil ta bay yawile? 19¿Beluuk yakon ta yalel? ¿Kuxul bal te lok'ombaetike? ¿Ay ba sk'oplal te smajt'an ti'bal te lok'ombaetike?20Jauk me to te jo'one ya jkalbey sk'oplal te yantik lumetik te ya slajin sbaik ta stojol te lok'ombaetike, ja ya yak'beyik smajt'an te pukujetike, ma jauk yu'un te Diose. ¡Ma jk'an te jun ya xk'oex sok te pukujetike! 21Te ja'exe ma xju' te ya x-uch'bajex ta skopa te Jkajwaltike sok ta skopa te pukujetike. Ma xju' te junax ya x-ainex ta swe'balte' te Jkajwaltike teme ayat ta swe'balte' te pukujetike. 22¿Ma ba jauk ya jkak'tik xbolob yot'an yu'un te Jkajwaltike? ¿Yu'un bal ja k'ax bayal xan jkiptik a te bit'il te Diose?PASAIK SPISIL TA SWENTA YICH'EL TA MUK' DIOS 23Spisil ya stak' jpas, jauk me to ma spisiluk lek. Spisil ya stak' jpas, jauk me to ma spisiluk ya slekubtes te ants-winiketike. 24Ma me ayuk mach'a ya sle stukel nax te yutsilale. Ja me ya sk'an slebey yutsilal uuk te spatxujk'e.25Spisil te beluk ya yich' chonel ta ch'iwich ya me stak' ya alajinik, ma me ajojk'iyik. 26Melel ''TE LUM K'INALE JA YU'UN TE JKAJWALTIKE, SOK NIX TE YUTSILALE.'' 27Teme ya yik'ex ta we'el te mach'a ma ch'uunjele sok teme ya ak'anik ya xbaatike, we'aik me te beluk ya yak'batike, ma me ajojk'ilayik.28Jauk me to teme ay mach'a la yalbate: ''Jai we'lil to ja smajt'an te balumilale,'' ma me awe'ik. Ta swenta te mach'a la xcholbat awaiye sok ta swenta te bit'il ana'ojixe. 29Ma me jauk ya jkalbat yu'un te snopjibal awu'une, ja me te beluk ya xk'ax ta snop'jibal yu'un te yane. Jich yu'un ¿bistuuk te ya jkich' komel yu'un te snopjibal yu'un te yane? 30Teme ya jlajin te we'lil sok sbujts' jkot'ane, ¿bistuuk te ya jkich' bol k'optayel yu'un te beluk la jkal wokol yu'une?31Jich yu'un, teme ya xwe'-uch'ajexe, chikan beluk xan ya apasik abi, pasaik me spisil ta swenta yutsilal te Diose. 32Ma me xa awutik te Judioetike sok te Griegoetike, sok nix te ch'uunjeletik yu'un te Diose. 33Jich bit'il te jo'one, ja ya jpas te beluk lek yot'anik yu'une. Ma jauk ya jle te jkutsilale, ja ya jlebey te lekuk ayik te yantike. Jich ya jpas in to swenta yu'un jich ya xkolik a.
11TE BIT'IL YA SK'AN XCHAJP'AN SBAIK TE ANTSETIKE1Nopbonik te jtalele, jich te bit'il la jnopbey stalel te Cristoe. 2Ta ora to lek ak'oplalik jku'un yu'un te ya xjulon ta awot'anik ta spisil ora. Lek ak'oplalik jku'un yu'un te k'axel awak'oj abaik ta swenta te stalel kuxlejalil te bit'il la jnojp'esexe. 3Ta ora to ya jk'an te yakuk xk'ot ta awot'anik te Cristo ja jolol yu'un te winike, yan te winike ja jolol yu'un te antse, sok te Diose ja jolol yu'un te Cristoe. 4Spisil winiketik te ya smuk sjol te k'alal ya sk'opon Dios sok te k'alal ya yalik te sk'op te Diose ja ya yak' ta k'exlal te sjole.5Jauk me to spisil te antsetik te ma smuk sjolik te k'alal ya sk'oponik te Diose sok te ya yalik te sk'op te Diose, ya yak'ik ta k'exlal te sjole. Pajal k'oem sok te bit'il lok'esbil te stsotsil sjole. 6Melel teme ay tul ants te ma ba ya smuk te sjole, akame yich' joxel lok'el te stsosil sjole. Yan teme k'exlal ya yaiy te ants te ya slok'es te stsotsil sjole, akame smuk te sjole.7Melel te tul winike ma stak' te ya smuk te sjole, melel jich yilel sok ja yutsilal te Diose. Yan stukel te antse ja yutsilal te winike. 8Melel te winike ma pasbil ta swenta te antse. Melel te antse ja talem ta swenta te winike.9Melel ma jauk ta skaj ants te la yich' pasel te winike. Ja ta skaj winik te pastaj te antse. 10Ja yu'un ya me sk'an smuk sjol te antse, ta swenta te ch'ul abatetike.11Jauk me to ta stojol te Jkajwaltike, te antse ma xju' yu'un teme mayuk te winike, sok janix jich ta swenta te winike ma xju' yu'un teme mayuk te antse. 12Jich bit'il te antse talem ta winik janix jich te winike talem ta ants. Jauk me to spisil talem ta stojol te Diose.13Ja'ex nix me ya atsajteyik: ¿Ya bal snujp'in te ma smuk sjol te ants te k'alal ya sk'opon te Diose? 14¿Ma bal ana'ojik stojol te jtaleltik ta k'inale ya yak'botik jnoptik te k'exlaltik sba te tul winik te ya yak' xnajt'ub te sjole? 15¿Ma bal ana'ojik teme tul ants te najt' te stsotsil sjole, ja yutsilal abi? Melel ja ak'bil te stsotsil sjol yu'un te ya smuk sba a. 16Teme ay mach'a ya sk'an xjajch k'op yu'une, te jo'otike mayuk yan te beluk jnopojtike jich nix uuk te ch'uunjeletik yu'un te Diose.TE BELUK MA LEKUK TA PASEL TA XCH'UL SMESA TE JKAJWALTIKE 17Jauk me to te beluk ya jkalbeyexe, ma lekuk ak'oplalik yu'un. Melel te k'alal ya atsob abaike ma jauk yu'un te beluk leke, ja yu'un te beluk ma lekuke. 18Melel te beluk neel ya jkaiy stojole ja te k'alal ya atsob abaik ta sna te Diose, ay xatomba ta awolilik, jich yu'un ay nix me ya jch'uun. 19Puersa me ay xatomba ta awolilik swenta yu'un ya xchiknaj ta atojolik te mach'atik tsabilike.20Melel te k'alal ya atsob abaik, ma ba jauk ya awe'ik te we'elil yu'un te Jkajwaltike. 21Te k'alal ya xwe'ex ta tulu-tule, te yane ya xneelaj ta we'el. Te tule yak ta wi'nal sok te yane ya xyakub. 22¿Ma bal ayuk ja anaik yu'un te ya xwe'-uch'ajex le'a? ¿yu'un bal ya awileyik te mach'atik ch'uunjeletik sok te ya awak'ik ta k'exlal te mach'atik mayuk beluk ay yu'unike?¿Beluk ya jkalbeyex? ¿Lek bal ak'oplalik jku'un? ¡Ma bal lek ak'oplalik jku'un!TE BIT'IL YA SK'AN PASEL TE XCH'UL SMESA TE JKAJWALTIKE 23Melel te jo'one la jnojp'tesatik yu'un te beluk la yak'bon te Jkajwaltike, te k'alal ak'ot ta k'abal te Jkajwaltik Jesuse, jai ajk'ubal abi la stsak te kaxlan waje. 24Te k'alal laj yot'an ta yalel wokol yu'une, la xet' te waje jich la yal: ''Ja in to ja te jbak'etale, te ja ak'bil ta atojolike. Jich me ya apasik swenta yu'un ya me ana'onik a."25Janix jich te k'alal laj yot'an ta we'ele, la stsak te kopae, sok jich la yal: ''Jai kopa to ja te yach'il trato ta swenta jch'ich'el. Jich me ya apasuleyik te k'alal ya awuch'ik ta jujun buelta ta swenta jna'jibal.'' 26Melel ta jujun buelta te ya awe'ik te kaxlan waje sok te ya awuch'ik te kopae, ja ya awalik ta jamal a te bit'il laj te Jkajwaltike, ja to te k'alal ya xcha' tal xane.TE BIT'IL YA SK'AN XWE'OTIK TA BAY TE XCH'UL SMESA TE JKAJWALTIKE 27Jich yu'un te mach'a ya swe' te kaxlan waje sok te mach'a ya yuch' te yalel te kopae, teme mayuk sk'oplal ta yot'ane, ja smul ya xk'ot ta stojol te sbak'etal sok te xch'ich'el te Jkajwaltike. 28Ja yu'un akame stsajtay sbaik ta tulu tul, jich ya awak'beyik swe' te kaxlan waje sok te ya yuch' te yalel te kopae. 29Melel te mach'a ma stsajtay sba neeluk te k'alal ya xwe' sok te k'alal ya yuch' te sbak'etal te Jkajwaltike, janix jich ya yich' ich'el ta k'op yu'un te beluk la yuch' sok te beluk la swe'e. 30Ja yu'un ay bayal ayik ta chamel sok mayuk yip sbak'etalik sok te ay cha'ox tul te wayemikix sbak'etalike.31Jauk me to teme ya jtsajtaybatik ta tulu tule, ma me ya jkich'tik ich'el ta k'op. 32Jauk me to te k'alal ya jkich'tik ich'el ta k'op yu'un te Jkajwaltike, ya jkich'tik tojtesel, swenta yu'un ma ba pajal ya xbootik ta ch'ayel sok te mach'atik ayik ta balumilale.33Jich yu'un jkermanotak, teme ya atsob abaik ta we'ele, maliya me abaik ta tulu tul. 34Teme ay mach'a ay ta wi'nale, aka me we'uk ta sna, swenta yu'un te k'alal ya atsob abaike ma me awich'ik ich'el ta k'op. Sok te beluk la ats'ibuyik tele, ya me jkak'beyex ana'ik te beluk ya sk'an apasik te k'alal ya xba jkilexe.
12TE MAJT'ANILETIK YU'UN TE ESPÍRITUE1Jich yu'un jkermanotak, ma me sk'an te ma ana'beyik swentail te majt'aniletik yu'un te Espíritue. 2Te ja'exe ya me ana'ik te k'alal ma ba ach'uunejik a te Jkajwaltike, la me awich'ik jowtesel yu'un te lok'ombaetik te ma xk'opojike, janix jich la awich'ik lo'liyel yu'un. 3Jich yu'un, ya jk'an te yakuk ana'ik te mayuk mach'a ya xk'opoj ta swenta te Espíritu yu'un te Diose, te jich ya yale: ''Te Jesuse mayuk stuul stukel.'' Janix jich mayuk mach'a ya xju' yu'un ya yal: "Ja Ajwalil te Jesuse,'' janax ta swenta te Ch'ul Espíritue.4Ja yu'un ta ora to, ay bayal ta chajp' te majt'aniletike, jauk me to te Espíritue junax stukel 5Ay bayal ta chajp' te at'eliletike, jauk me to junax te Jkajwaltike. 6Sok Janix jich ay bayal ta chajp' te at'eliletike, jauk me to junax te Dios te spisil ya stak' spas ta jtojoltike.7Jich yu'un ta tulu tul la jkich'tik ak'beyel te majt'aniletik ta swenta te Espíritue, yu'un ya jejch jkoltaybatik a. 8Melel ay tul te mach'a ya x-ak'bot sbijil yot'an yu'un te Espíritue, sok ay yan mach'a ya x-ak'bot sbijil sk'op-yaiyej ta swenta nix te Espíritue.9Ay mach'a ya x-ak'bot xch'uunjel yot'an ta swentanix te Espíritue, sok ay mach'a ya x-ak'bot smajt'an yu'un te ya slamantes chamel te janix ta swenta te Espíritue. 10Ay mach'a ya x-ak'bot yu'el yu'un spasel yantik nax at'eliletik, sok ay mach'a ya x-ak'bot sna' te beluk ya xk'ot ta pasele. Janix jich ay mach'a te ya x-ak'bot sna' stsajteyel te chajp'alchajp' te espírituetike, ay mach'a te x-ak'bot xk'opoj ta yantik k'opetik, sok ay mach'a te ya x-ak'bot sna' te beluk ya sk'an yal te yantik k'opetike. 11Jauk me to janax stukel te Espíritu te ya x-at'ej ta spisil in to, ja ya stsaj stukel te bit'il ya yak' ta tulu tul te majt'anile.12Jich te bit'il te jbak'etaltik te junax ay stukele sok te bayal ta chajp' te beluk ay le'a jauk me to junax ay ta spisil te jbak'etaltike, janix jich junax ay te Cristoe. 13Melel ta swenta te Espíritu yu'un te Cristo te junax jbak'etaltik k'ootik ta swenta te ich' ja'e, manchuk me judioetik o griegoetik, chukbilik o kolemik, ta jpisiltik junax la jkich'tik te Espíritue.14Melel te beluk ay ta jbak'etaltike ma ba junax stukel, ay bayal ta chajp'. 15Teme jich ya yal te akanile: ''Ma jo'okon te k'abile, ma ba ayon ta bak'et abi, jauk me to ma jauk pek'el ya xk'ot sk'oplal te xejt' bak'ete. 16Sok teme jich ya yal te chikinile: ''Ma jo'okon te sitile, ma ba ayon ta bak'et abi,'' jauk me to ma jauk pek'el ya xk'ot sk'oplal te xejt' bak'ete. 17Te jauk sitil spisil te bak'ete ¿bit'il ya yaiyix stojol k'op a? te jauk chikinil spisil te bak'ete, ¿banti ya yich' ik' abi?18Jauk me to te Diose la xchajp'an te bak'et te bit'il la smulan yot'an stukele. 19Te chajp'uk nax ay spisil te beluk ay ta jbak'etaltike, ¿banti ayix a te bak'ete? 20Melel te beluk ay ta jbak'etaltike ma ba junax stukel, ay bayal ta chajp', jauk me to junax me te bak'ete.21Te sitile ma xju' ya yalbey te k'abile: ''Ma xtuunat jku'un.'' Janix jich te jolole ma stak' yalbey te akanile: ''Ma xtuunat jku'un." 22Jauk me to te beluk mayuk yip yilel te ay ta jbak'etaltike ja me ya xtuun xan jku'untik. 23Sok te beluk ay ta jbak'etaltik te pek'el sk'oplal jkuyojtike ja k'axem to xan muk' sk'oplal stukel sok te bay ma snujp'in te ya jkak'tik ta ilele ja k'axem to xan ya jmuktik ta lek. 24Ja yu'un ta ora to te beluk ay ta jbak'etaltike ma yejt'aluk te lek ya yich' ilele melel lek ilbilix. Jauk me to te Diose junax la yak' spisil te beluk ay ta jbak'etaltike, sok ja la yak'bey xan bayal sk'oplal te banti ma ich'biluk ta wentae.25Jich la spas in to swenta yu'un mayuk xatomba ta bak'et, jich yu'un te beluk yich'oj te bak'ete ya me sk'an skanantay sbaik ta chajp'al chajp' jich bit'il junax ayike. 26Sok te k'alal ay ta wokol te chajp' bak'ete junax me ya xwoklajik. Sok teme ay chajp' bak'et te ya yich' ich'el ta muk'e, junax me ya sbujts'naj yot'anik yu'un ta spisilik. 27Jich yu'un ta ora to ja'ex me te sbak'etal te Cristoe sok ta tulu tul ayex me ta stojol.28Sok te Diose la yak' ta stojol te ch'uunjeletik te ja me neel te wolwanej puk-k'opetike, ta xchebalan ja me te alwanejetike, ta yoxebalan ja te mach'atik ya yaiyik bijteswaneje, ta patilal ja te mach'atik ya spasik spisil ta chajp' at'eliletik te ya yak'ik ta ilel te yu'el te Diose, sok te mach'atik ay smajt'anik yu'un te ya xch'abtesik te chameletike, sok te mach'atik ya xkoltaywanike, janix jich uuk te mach'atik ya xwolwanik ta at'ele, sok te mach'atik ya xk'opojik ta yantik k'opetike. 29¿Spisilik ba wolwanej puk-k'opetik? ¿Spisilik ba alwanejetik? ¿Spisilik ba bijteswanejetik? ¿Spisilik ba ya spasik chajp' at'eliletik te ya yak'ik ilel yu'el te Diose?30¿Spisilik ba yich'ojik te majt'anil yu'un te ya slamantes te chameletike? ¿Spisilik ba ya xk'opojik ta yantik k'opetik? ¿Spisilik ba ya sna'ik sk'asesel te yantik k'opetike? 31Bik'tajuk me awot'anik ta sleel te toyol majt'aniletike. Sok te jo'one ja me ya jkak'beyex awilik te lekil bee.
13JA KAJAL SK'OPLAL TE XK'UXUL OT'ANILE1Teme ya xk'opojon ta sk'op te ants-winiketike sok ta sk'op te ch'ul abatetike. Jauk me to teme mayuk xk'uxul te jkot'ane jich k'oemon te bit'il tak'in te jontol tsintsone sok janix jich bit'il te tak'in te címbalo sbiil te jontol tsintson ta tijele. 2Teme ay jmajt'an yu'un sna'el te beluk ya xk'ot ta pasel ta pajel chaweje sok teme ya jna' stojol te beluk smelelil te muken aye sok teme ay sbijil jkot'ane, sok teme muk' te xch'uunjel jkot'an yu'un te ya xju' jku'un sk'ejel bael te witse. Jauk me to teme mayuk xk'uxul jkot'ane, jontol ayon ta k'inal abi. 3Teme ya k'ebanbey spisil jbiluk te me'baetike, sok teme ya jkak' ta k'ajk'el te jbak'etale. Jauk me to teme mayuk xk'uxul te jkot'ane, mayuk beluk ya xlok' jku'un abi.4Te xk'uxul ot'anile ay smalib yu'un sok ay yutsilal. Te xk'uxul ot'anile mayuk sbik'tal yot'an, sok ma ya yak' sba ta ich'el ta muk', sok ma stoy sba. 5Ma spas te beluk ma lekuke sok ma stukeluk nax ya sle te beluk ay yuts'il yot'an yu'une. Ma x-ilin ta ora nax, sok ma xkupetuk sla' yot'an. 6Ma binuk nax yot'an yu'un te beluk ma stojiluk ta pasale. Jauk me to ja binax yot'an yu'un te smelelile. 7Te xk'uxul ot'onile ya xkujch' yu'un spisil, spisil ya xch'uun yot'an, sok ay smuk'ul yot'an yu'un spisil sok spisil ya sts'ijk' yu'un.8Te xk'uxul ot'anile mayuk bin ora ya xlaj stukel. Yan te sk'op te alwanejetike, ya me xlaj sk'oplal stukel. Teme ay mach'a ya xk'opoj ta yantik k'opetike, mayuk me mach'a ya xk'opoj xan abi. Teme ay sbijil ot'anile janix me jich ya xlaj uuk. 9Melel ay beluk jna'ojtik tebuk sok ya jcholbeytik tebuk sk'oplal te beluk ya xk'ot ta pasele. 10Jauk me to teme tal te beluk ts'akal ya jna'tik stojole, te beluk ma ts'akal uuk ta neelale jich me ts'akal ya xk'ot.11Te k'alal alalon toa, jich me ya xk'opojon te bit'il alale, sok jich ya jnop te bit'il alale, sok jich jkot'an te bit'il alale. Yan te k'alal muk'ubone, jich la jkijk'tey te beluk swenta te alale. 12Melel ta ora to te jo'otike ma mero yakotik ta yilel ta espejo, jauk me to ta patil ya me jkiltik ta mero melel. Ta ora to teb nax te beluk ya jna'tik stojole, jauk me to ta patil ts'akal ya jna' stojol te bit'il ay te Diose, jich te bit'il ya sna'bon jbae. 13Jauk me to ta ora to ay ox xchajp' te beluk stalel aye: ja te xch'uunjel ot'anile, te smuk'ul ot'anile, sok te xk'uxul ot'anile. Jauk me to te beluk muk' sk'oplale ja te xk'uxul ot'anile.
14TE MACH'ATIK YA XK'OPOJIK TA YANTIK K'OPETIKE1Ayuk me xk'uxul awot'anik sok pasaik me tulan ta sleel te majt'aniletik yu'un te Espíritue, ja me xa ak'anik xan te yakuk xk'oatik ta alwaneje. 2Melel te mach'a ya xk'opoj ta yantik k'opetike, ma jauk ya sk'opon te ants-winiketike ja ya sk'opon te Diose. Melel mayuk mach'a ya xk'ot ta yot'an te beluk ya yale, melel ja ya yal te beluk muken ay yu'un te Espíritue. 3Yan te mach'a alwaneje ya sk'opon te ants-winiketike jich ya staik te lektesele, sok te yip yot'anike sok te smuk'ul k'inal ya yaiyike. 4Te mach'a ya xk'opoj ta yan k'ope ya me yutstesba stukel nax, yan te mach'a ya yal ta jamal te beluk ak'bil sna' stojole, ya me yutstes te ch'uunjeletike.5Ta ora to, jkot'anuk te yakuk xk'opojex ta yantik k'opetike. Jauk me to, ja mero toyol jkot'an yu'un te yakuk yak'batik ana'ik stojol te beluk ya sk'an te Jkajwaltike. Te mach'a ya yal ta jamal te beluk ak'bil sna' stojol yu'un te Diose ja toyem xan sk'oplal yu'un te mach'a ya xk'opoj ta yantik k'ope (jaxanix te ayuk mach'a ya xju' yu'un sk'asesel te chajp' k'ope jich ya stak' sta yip yot'anik a te ch'uunjeletike). 6Jauk me to ta ora to, jkermanotak, teme talon jk'oponex ta yantik k'opetike ¿Bit'il me ya jnojp'tesex abi? Te jo'one ma stak' te beluk ya jkalbeyex teme ma ak'bil jkile, sok teme mayuk sbijil te jole, sok nix teme ma ak'bil jna' stojol yu'un te Diose, janix jich teme ma jkich'oj nojp'tesele.7Teme spisil te instrumento yu'un te musicae teme majnax ya xk'ajinik jich bit'il te amay sok te arpae, sok teme majnax ya slok'esik te k'ayojiletike, ¿bit'il me ya sna' teme yak ta tijel te amay sok te arpae? 8Teme ma xchiknaj ta lek te sk'op te kornetae ¿bit'il me ya sna' te bin ora ya xchajp'an sba yu'un te kerajele? 9Janix jich te ja'exe. Teme ay beluk ya awalik te ma xk'ot ta ot'anile ¿bit'il me ya xk'ot ta yot'anik te mach'atik ya awalbeyike? yakatik ta k'op jauk me to mayuk mach'a ya xk'ot ta yot'an.10Ma lotiluk te ay bayal ta chajp' k'opetik ta balumilale, sok spisil chikan ta ayel. 11Jauk me to teme ma jna'bey swentail te yantik k'op ayejetike, jich me k'oemon te bit'il mach'a yan lum te yak ta k'ope, janix jich uuk te jo'one teme ma jkaiybey stojol te bit'il ya xk'opoje yan lum k'oem ta jtojol uuk abi.12Jichatik uuk. Melel te ja'exe ya ak'anik te yakuk yak'beyex te majt'aniletik yu'un te Espíritue, ja me xa ak'anik te beluk ya xmuk'ub yu'un te ch'uunjeletike. 13Jich yu'un te mach'a ya xk'opoj ta yan k'ope aka me sk'opon te Jkajwaltik te yakuk sna' sk'asesel te beluk ya yale. 14Teme ya jk'opon ta yan k'op te Jkajwaltike, ja yak ta k'op te j-espíritue, jauk me to mayuk beluk ya x-och jilel ta jol.15¿Beluuk me ya stak' jpas jiche? ya me jk'opon sok te j-espíritue, janix jich ya jk'opon sok te snopjibal jku'une. Ya jk'ajintay sok te j-espíritue, sok nix spisil te snopjibal jku'une. 16Yan teme, ya awich' ta muk' te Dios sok te espíritue, ¿bit'il ya xju' ya yal ''Jichuk,'' te mach'a ma to ay xch'uunjel yot'an teme ma sna' te beluk yakatik ta yalel wokol yu'une?17Lek te yakatik yalel wokole, jauk me to ma sta yip yot'an ta stojol te Jkajwaltik te yane. 18Ya jkalbey wokol Dios yu'un te ya xk'opojon xan ta yan k'opetik te bit'il te ja'exe. 19Jauk me to ta bay yolil te ch'uunjeletike, ja lek ya jkaiy te jo' baluk nax k'op ya jcholbey yaiyik te ya xk'ot ta yot'anike sok te ya xbijubik yu'une, jayebuk lajun mil yantik k'opetik ya jcholbey yaiyik teme ma xk'ot ta yot'anike.20Jkermanotak, ma me jichuk snopjibal awu'un te bit'il alale. Jauk me to jichukex me te bit'il alal yu'un te beluk amen ta pasele. Jauk me to yijubenuk me te bit'il anopike. 21Jich ts'ibubil ta bay mantalil: ''YA JK'OPON TE LUM TA SWENTA WINIKETIK TE YA XK'OPOJIK TA YANTIK K'OPETIKE. JAUK ME TO MA YAIYBONIK STOJOL," xi' te Jkajwaltike.22Jauk me to, te yantik k'opetike ja senyail ta stojolik te mach'atik ma ch'uunjeletike, ma jauk senyail ta stojol te ch'uunjeletike.Yan te alwaneje ja senyail ta stojol te mach'atik ch'uunjeletike, ma jauk yu'un ta stojol te mach'atik ma ch'uunjeletike. 23Te yakuk stsob sbaik spisil te mach'atik ch'uunjeletike sok te spisiluk ya xk'opojik ta yantik k'opetike, sok te yakuk x-ochik bael te mach'atik ma sna'ojbeyik sk'oplale sok te mach'atik ma ba ch'uunjeletike ¿ma ba ya yalik te jowejemexe?24Jauk me to teme yakatik ta yak'el na'el stojol te beluk yak'ojbatik ana'ik te Jkajwaltike sok teme och bael tul te ma ba sna'ojbey sk'oplale sok te ma ba ch'uunjele, ya me xch'uun te beluk ya yaiyik stojole. Jich me ya sna'ik stojol te bit'il mulawiletike. 25Te beluk smukoj ta yot'ane ya me x-ak'ot ta na'el stojol. Jich ya me skejan sba sok ya yich' ta muk' te Diose. Jich jamal ya yal te smelelil nix a te sjoinejex te Diose.TE TSOBLEJ YU'UN TE CH'UUNJELETIKE 26¿Beluuk xan ya xtal abi jkermanotak? te k'alal ya atsob abaike, ta tulu tul ayuk me mach'a ya xk'ajin ta salmoetik, sok ayuk me bijuptesel awu'unik, sok ayuk me mach'a ya yak' ta na'el stojol te beluk ya x-ak'bot sna' stojol yu'un te Diose, sok yakuk me xk'opojex ta yantik k'opetik, sok ayuk me mach'a ya sk'ases. Pasaik me spisil in to jich me ya xmuk'ub yot'an a te ch'uunjeletike. 27Teme ay mach'a ya xk'opoj ta yantik k'opetike, yakuk me xk'opoj cha'ox tul nax sok tulu tul me aka k'axukik, sok ayuk mach'a ya sk'ases te beluk yak ta alele. 28Jauk me to teme mayuk mach'a ya sk'ases te yan k'ope, ja lek te manchuk ya xk'opoj ta yantik k'opetike. Jich aka k'opojok stukel sok te Diose.29Janix jich teme ay cha'ox tul te alwanejetik aka me yalik te beluk albilik yu'un te Diose, jich te yantike aka yaiyik stojol teme lek te beluk ya yale. 30Jauk me to teme ay mach'a nakal le'a te ay beluk ak'bot sna' stojol yu'un te Diose, te mach'a yak ta k'ope aka me skom sba ta ayej.31Melel te ja'exe ta tulu tul ya me xju' awu'unik te ya awalik te beluk ya sk'an yal te Diose, jich me ta apisilik ya me anopik sok jich me ta apisilik ya awich'ik smuk'ul awot'anik a. 32Melel te Espíritu yu'un te alwanejetike, ay nix ta swenta te alwanejetike. 33Melel te Diose ma jauk ya sk'an te ya sjowtesate, ja ya sk'an te ayuk lamal k'inal ya awaiy ta awot'ane. Ja me mantal yu'un spisil te ch'uunjeletike.34Te antsetike aka me ch'abukik te k'alal ayik sok te ch'uunjeletike. Melel ma ak'bilik te ya xk'opojik stukelike. Jauk me to aka me yaiyik te mantale, jich te bit'il ya yal te mantalile. 35Teme ay beluk ya sk'an snopike, aka me jojk'ibeyik ta snaik te smamlalike. Melel ma lekuk ta ilel teme ay tul ants te ya xk'opoj ta ba ay te ch'uunjeletike. 36¿Tal bal ta atojolik te sk'op te Diose? ¿o janax bal awaiyojik stojol?37Teme ay mach'a stukel ya yal sba te ja alwaneje sok te ay ta swenta te Espíritue, ya me sk'an ya sna' te beluk ya jts'ibuy ta atojolike ja me mantalil yu'un te Jkajwaltike. 38Jauk me to teme ay mach'a ma yich' ta wenta jai k'op to, janix jich ma me yich' ich'el ta wenta.39Jich yu'un jkermanotak, k'anaik me sok spisil awot'anik te alwanejuk ya xk'oexe, sok ma me xa akomik te mach'a ya xk'opojik ta yantik k'opetike. 40Jauk me to spisil te beluk ya apasike, yich'ojok me swentail sok lekuk me chapaluk awu'unik.
15TE CHA'KUXEL YU'UN TE CRISTOE1Ta ora to jkermanotak ya jcha' jkalbeyex te lek yach'il k'ope, te ja la jkalbeyexe, te la awaiyik stojole sok te jun awot'anik yu'une. 2Ja ta swenta te lek yach'il k'op to te ay kolel awu'unike, teme ya ak'ejik te lek yach'il k'op te la jkalbeyexe, yu'un teme ma jichuke jontol te la ach'uunike.3Melel te jo'one ja la jkalbeyex ta atojolik te beluk tulan sk'oplal la jkaiy stojol te k'alal la jkich' albeyele: Te ja Cristo te laj yu'un te jmultik jich te bit'il ts'ibubil jilele, 4te bajt' ta mukele sok te cha'kux tel ta yoxebal k'aal jich te bit'il ts'ibubil jilele.5Sok te Cristo te la yak' sba ta ilel ta stojol te Cefase, sok nix uuk te lajchay tul nopojeletike. 6sok nix ba yak' sba ta ilel ta stojolik te k'axem ta jo'winik xcha'bajk' (500) jkermanotaktik te stsoboj sbaike. Ay bayalik to te kuxatike, jauk me to ay cha'ox tul te wayemikix sbak'etalike. 7Janix jich la yak' sba ta ilel ta stojol te Santiagoe, sok nix ta spisil te wolwanej puk k'opetike.8Ta slajibal, la yak' sba ta ilel ta jtojol, jich te bit'il tul alal te ma to yu'iluk a te bejk'ajeme. 9Melel te jo'one ja pek'el ayon yu'un te yantik wolwanej puk k'opetike. Yan te jo'one ya jkaiy te ma snujp'in te jbiilinoj wolwanej puk k'opone melel te jo'on ja la jnuts ta uts'inel te ch'uunjeletik yu'un te Diose.10Jauk me to ta skaj te yutsil yot'an te Diose, te jich k'ot ta jwentae, sok ma tojol uuk te yutsil yot'an ta jtojole. Jauk me to te jo'one ja tulan xan at'ejon a te bit'il at'ejike. Jauk me to ma jo'okon ta jwenta yu'un ja at'ej ta jtojol te yutsil yot'an te Dios te ay ta jtojole. 11Jich yu'un, manchuk me jo'on o ja te yantik te la jcholtik te lek yach'il k'ope, jich la ach'uunik uuk te ja'exe.12Jich yu'un teme Cristo yak ta albeyel sk'oplal te la yich'ix jajch'esel tel ta ba ay te aelmeletike, ¿bit'il ay a te ay cha'oxtulex te ya awalik te mayuk te cha'kuxel ta swenta te aelmeletike? 13Jauk me to teme mayuk te cha'kuxel ta swenta te aelmeletike, jich yu'un te Cristo ma cha'kuxem tel te jichuke. 14Teme ma cha'kuxem tel te Cristoe, jich yu'un te lek yach'il k'op te yakotik ta yalele jontol nax abi sok te xch'uunjel ot'anile mayuk stulal.15Sok teme ma ba cha'kuxem tel te Cristoe jich k'oemotik te bit'il lotil testigo ta swenta te Dios abi, melel te jo'otike la jkaltikix te la yich'ix cha'kuxesel tel yu'un te Diose. 16Melel teme ma ba ya xcha'kuxik tel te aelmeletike, janix jich te Cristo ma ba cha'kuxem tel abi. 17Jauk me to teme ma ba cha'kuxem tel te Cristoe, te xch'uunjel awot'anike jontol nax abi sok te ja'exe ayatik to ta mulil abi.18Janix jich te mach'atik wayemikix sbak'etalik ta swenta te Cristoe, k'axel lajemikix abi. 19Teme janax smuk'ulinoj jkot'antik te Cristo te bit'il kuxulotik le ta balumilal to, ja k'axem to obol jbatik yu'un te yantike.20Jauk me to ta ora to te Cristoe la yich'ix cha'kuxesel tel ta bay te aelmeletike, ja sbabial yu'un te mach'atik lajemikixe. 21Melel te lajele tal ta swenta tul winik, janix jich ta swenta tul winik te tal te cha'kuxel yu'un te aelmeletike.22Ta swenta te Adane spisilik ya xlajik, janix jich uuk ta swenta te Cristoe spisilik ya xkuxinik. 23Jauk me to ta tulu tul xmelet ya yich' cha'kuxesel: Te Cristo ja me sbabial; sok ta patil te mach'atik yu'uninej te Cristoe ya me yich'ik xkuxinelik te k'alal ya xcha'tale.24Jich me ya xtal te slajibal k'aale, te k'alal te Cristo ya slajinbey sk'oplal spisil ta chajp' mantaliletik sok spisil ajwaliletik te ay yu'elike jich ya me yak'bey ta sk'ab ta stojol te Dios Tatil spisil te ajwaliletike. 25Melel ja to ya x-ajwalinaj teme la yak' ta yaninal yakan te yajkontroe. 26Te slajibal kontroinwanej te ya yich' jinele ja te lajele.27Melel: "TE DIOS LA YAK' SPISIL TA YANINAL YAKAN.'' Jauk me to te k'alal la yale: ''LA YAK' SPISIL'' ma ich'ot ta wenta le'a te Dios te ja la yak' ta yakan spisile. 28Te k'alal ayix ta sk'ab spisil te beluk aye, te Nich'anile ya me yak' sba ta stojol uuk. Ja me ya xk'ot ta pasel spisil in to swenta jich te Dios Tatile ja me swentain spisil te beluk aye.29Teme mayuk te cha' kuxele ¿Beluuk me ya spasik te mach'atik ya yich'ik ja' ta swenta te mach'atik lajemikixe? Teme ma xcha' kuxik tel te mach'atik lajemixe, ¿Bistuuk te ya yak' sbaik ta ich' ja' yu'un jiche? 30¿Bistuuk te ju jun k'aal ya jkak'batik ta bay ay te wokolil teme mayuk te cha'kuxele?31Ju jun k'aal kechelon ta lajel. Jamal ya jkal jkermanotak, te binax jkot'an ta atojolik ta swenta te Jkajwaltik Cristo Jesuse. 32¿Beluuk me ya xlok' jku'un a te k'alal la jtsakba sok te mach'atik pajal sok te ti'awal chambalametik ta Éfeso, teme ma ya xcha' kuxik tel te aelmeletike? ''We'-uch'ajukotik, melel te pajele ya me xlajotik.''33Ma me xa awich'ik lo'layel: ''Te mach'a ma lekuk stalele ya me sboltes te lekil kuxlejale.'' 34¡Kuxuluk me k'inal awaiyik! ¡Toj me xkuxinatik! ma me xa leuleyik amulik. Melel ay cha'ox tulex te ma ana'bey sbaik te Diose. Ja me la jkalbeyex yu'un te ya xk'exawex a.35Jauk me to ay mach'a ya yal: "¿Bit'il me yilel te mach'atik lajemikix te k'alal ya xcha' kuxik tele? ¿Bit'il me yilel te sbak'etalik te k'alal ya xcha'kuxik tele ?" 36¡Te ja'exe ma ana'ik k'inal! Te beluk ya ats'unike ma xju' ya xch'i tel teme ma neeluk ya xlaje.37Te beluk ya yich' ts'unele ma jauk ya xch'i tel, janax te sbak' te awlile. Jich ya xk'ot ta lok'el ta trigo sok ta yantik awlil. 38Jauk me to te Diose ya yak'bey sbak'etal jich te bit'il ya sk'an stukele, ta ju jun chajp' awlil ya yak'bey ste'el sok yabenal. 39Ma spisiluk pajal te sbak'etalike. Yan sbak'etal te ants-winike, jich te chambalametike yan sbak'etalik uuk, sok yan sbak'etalik uuk te te'eltik mutetike. Janix jich uuk te chayetike.40Janix jich yan sbak'etalik te mach'atik ayik ta ch'ulchane, sok yan sbak'etalik te beluk ay ta balumilale. Jauk me to yan yutsilal te sbak'etalik te mach'atik ayik ta ch'ulchane, sok yan yutsilal te sbak'etalik te mach'atik ayik ta balumilale. 41Yan yutsilal a te k'aale, sok yan yutsilal uuk te ue, janix jich yan yutsilal uuk te ek'etike. Melel te jun ek'e yan yutsilal uuk te bit'il te yane.42Janix jich ya xk'ot ta pasel ta stojol te mach'atik ya xcha'kuxik tele. Te bak'ete ya me yich' mukel ta lum sok ya me xk'a', jauk me to teme cha'kux tele sbajt'el k'inal ya xkuxin. 43Ya me yich' mukel jich te bit'il mayuk stulale, jauk me to ay me yutsilal te k'alal ya yich' cha'kuxesel tele. Ya me yich' mukel te beluk tebnax staele; ya me yich' cha'kuxesel tel sok yu'el. 44Ya me yich' mukel te bak'ete, jauk me to ya me xcha'kux tel ta swenta espíritu. Teme ay sbak'etal te ch'ich' bak'ete janix jich ay sbak'etal uuk te espíritue.45Janix jich ts'ibubil: ''TE SBABIAL WINIK ADÁN AK'BOT XKUXLEJAL.'' Te slajibal Adán ja espíritu te ya yak' kuxlejale. 46Jauk me to te beluk swenta espíritue ma jauk neel tal, ja tal neel te ch'ich' bak'ete, patil tal te beluk swenta espíritue.47Te sbabial winik ta k'inal pasbil ta ts'ubil lum. Te xchebal winike talem ta ch'ulchan. 48Te mach'a pasbil ta ts'ubil lume, jich nix yilel te mach'atik ayik ta balumilale, te bin yilel te mach'a talem ta ch'ulchane janix jich yilel te mach'atik ayik ta ch'ulchane. 49Jich te bit'il jo'otik pajalotik sok te winik te pasot ta ts'ubil lume, janix jich me pajal jkileltik sok te winik te talem ta ch'ulchane.50Jich yu'un ta ora to, jkermanotak ya jkalbeyex, te ch'ich' bak'et ma xju' ya x-och ta bay ajwalinel yu'un te Diose. Janix jich te beluk ya xk'ae ma xju' ya xk'ot sjoin te beluk stalel ma xlaje. 51¡Ilawilik! ya jkalbeyex te smelelil k'op te mukbile: Ma me jpisiltik ya xlajotik, jauk me to ya me xk'atbujotik ta jpisiltik.52Ya me xk'atbujotik ta ora nax, ta muts'el jsitik, ta slajibal te ok'ese. Melel te k'alal ya x-ok'sinot te ok'ese, te aelmeletike ya me xcha'kuxik tel jich me mayukix lajel abi sok te jo'otik te kuxolotike ya me xk'atbujotik ta jpisiltik. 53Melel te jbak'etaltik te ya xk'ae ya me sk'uin te beluk ma xk'ae, sok te jbak'etaltik te ya xlaje ya me sk'uin te beluk ma xlaje.54Jauk me to te bak'et te ya xk'ae teme sk'uinejix a te beluk ma xk'ae sok teme sk'unejix a te beluk ma xlaje, jich me ya xk'ot ta pasel te beluk ts'ibubil jilele: '"TE LAJELE K'AXEL LA YICH'IX TSALEL.'' 55"¿LAJEL, BANTI AY TE YA XJU' AWU'UN TSALAWE? ¿LAJEL, BANTI AY TE SNI'IL TE AWAT'IBE?''56Te sni'il yat'ib te lajele, ja te mulile, sok te yip te mulile, ja te mantalile. 57¡Jauk me to, wokol la yal te Diose, yu'un te ya yak'botik jkaiytik tsalaw ta swenta te Jkajwaltik Jesucristoe!58Jich yu'un, jkermanotak te k'uxex ta jkot'ane, junuk me awot'anik sok ma me xchebaj awot'anik. Yan yanuk me ta muk'ubel awu'unik te yat'el te Jkajwaltike, melel ya me ana'ik te ma tojolok te ya awak' abaik ta abatinel yu'un te Jkajwaltike.
16YA STSOBIK MAJT'ANIL TA STOJOL TE CH'UUNJELETIKE1Jich yu'un ta ora to, te bit'il ay sk'oplal te majt'aniletik yu'un te mach'atik ch'uunjeletike, jich te bit'il la jkak' ta ilel ta stojol te ch'uunjeletik yu'un te Galacia jich nix me ya apasik uuk te ja'exe. 2Ta sbabial k'aal yu'un te semanae, ta tulu tul te ja'exe ya me sk'an te ay beluk ya ak'ejike, ja me chikan te jayeb ya ataike. Pasaik me jich, swenta yu'un te k'alal ya xk'oone ma me jauk to ya atsobik a te majt'anile.3Te k'alal ya xk'oone, ya me jtikun bael sok ts'ibubil junetik te mach'atik ya atsaike, swenta yu'un ya me yich'ik bael te majt'aniletik ta Jerusalén. 4Teme lek ya awaiyik te ya xboone, ya me sjoinonik bael.TE BELUK CHAPAL YU'UN TE PABLOE 5Jauk me to te jo'one ya me xtalon ta atojolik, te k'alal ya xk'axon ta Macedonia. Melel ya xk'axon le'a. 6Yaniwan xju' jku'un ya xjilon sok ja'ex sok niwan le' ya xk'ax jku'un a te yorail sike, swenta yu'un te ja'exe ya me akoltayonik a te k'alal ya xlok'on baele, chikan te bay k'alal ya xboone.7Melel te jo'one ma jk'an te ajk'nax ya xk'ax jkilexe. Ja ya jk'an te ya xjalajon te banti ayexe, teme jich ya sk'an te Jkajwaltike. 8Jauk me to ya me xjilon ta Efeso ja to ta yorail te sk'in Pentecostés, 9melel la yich' jamel muk'ul ti'naeletik ta jtojol, sok bayal te mach'atik kontro ya yilonike.10Te k'alal ya xtal te Timoteoe, ilame awilik te manchuk sok xiwel ya x-ain ta atojolike, melel ja me yak ta spasel te yat'el te Jkajwaltike, jich te bit'il jo'one. 11Ma me xa awak'ik te ay mach'a ya spejk'tsanbey sk'oplale. Koltayaik me jich me ay lamal k'inal ta sbe, jich me ya xju' yu'un ya xtal ta jtojol. Melel te jo'one yakon ta smaliyel te yakuk xtal sok te jkermanotake. 12Jich yu'un ta ora to, ya me jkalbeyex ta stojol te jkermanotik Apolose, la jkalbey bayal wokol te yakuk xbajt' yilex sok te yantik jkermanotaktike. Jauk me to ma ba la sk'an bajt' ta ora. Jich yu'un ya xbajt' te bin ora ya xju' yu'une.SLAJIBAL SPATJIBAL OT'ANIL 13Wik'a me asitik, ayuk me yip te xch'uunjel awot'anike, jich me apasik te bit'il tulan winike. 14Spisiluk me te beluk ya apasik te ja'exe, pasaik me sok xk'uxul awot'anik.15Te ja'exe ja na'ojik me te sjunal sna te Estéfanase, ja neel la sut yot'anik ta Acaya sok la yak' sbaik ta abatinel yu'un te ch'uunjeletike. Jich yu'un ta ora to, jkermanotak ya jk'anbeyex bayal wokol, 16te pek'el me xa awak' abaik ta stojolik sok ta spisil te mach'atik ya xkoltaywanik ta at'el sok te ya yak' sbaik ta abatinele.17Binax jkot'an yu'un te tal te Estéfanas, te Fortunato sok te Acaico. Melel ja la skoltayonik te bit'il ma leukex toe. 18Melel la me yak'bonikix lamal k'inal yu'un te j-espíritue sok nix uuk te ja'exe. Jich yu'un na'beyaik me sbaik uuk.19Te ch'uunjeletik ta bay Asia la me yak'beyex tel spatjibal awot'anik. Te Aquila sok Priscila la me yak'beyex tel spatjibal awot'anik ta stojol te Jkajwaltike, sok te ch'uunjeletik te ayik ta bay te snae. 20Spisil te jkermanotaktike ya yak'beyex spatjibal awot'anik. Patbeya me aba awot'anik ta tulu tul ta swenta ch'ul ujts'iyel.21Jo'on, Pablo te la jts'ibubeyex ta jk'ab te spatjibal awot'anike. 22Teme ay mach'a ma k'ux ya yaiy ta yot'an te Jkajwaltike, bolobok me sk'oplal abi. 23¡Aka me taluk te Jkajwaltike! Aka me sjoinex te yutsil yot'an te Jkajwaltik Jesuse. 24Te xk'uxul jkot'an ayuk me ta atojolik ta swenta te Cristo Jesuse.
