Bible

Matthew

1¹Ty Boke ty raza i Jesosy Kristy ana i Davida ana i Abrahama. ²I Abrahama ro baba i Isaka, le i Isaka ro baba i Jakoba, le Jakoba ro baba i Joda naho iareo rahalahi'e. ³Joda ro baba i Fareza naho i Zara boake tamy ty Tamara, Freza ro baba i Herzona, le i Herzona ro baba i Rama.⁴Rama ro baba i Aminadaba, le i Aminadaba ro baba i Nasona, le i Nasona ro baba i Salomona. I Salomona ro baba i Boaza tamy ty ⁵Rahaba, Boaza ro baba i Obeda tamy ty Rota, i Obeda ro baba i Jese.⁶ Le i Jese ro baba i Davida mpanjaka, Davida ro baba i Salomona tamy ty valy i Oria.⁷Salomona ro baba i Rehoboama, Rehoboama ro baba i Abia, le i Abia ro baba i Asa. ⁸I Asa ro baba i Jaosafata, le i Jaosafata ro baba i Jorama, le i Jorama ro baba i Ozia.⁹Ozia ro baba i Jotama, Jotama ro baba i Ahaza, Ahaza ro baba i Hezekia. ¹⁰Hezekia ro baba i Manase, Manase ro baba i Amona, le i amona ro baba i Josia. ¹¹Josia ro raza i Jekonia naho iareo rahalahi'e tamy ty fotoa ty fanoiragne ho à Babylona agne.¹²Tafara ty fanoiragne ho à Babylona agney, le i Jekonia ro baba i Sealtiela, i Sealtiela ro raza i Zerobabela. ¹³I Zerobabela ro baba i Abihoda, Abihoda ro baba i Eliakima, le i Eliakima ro baba i Azora. ¹⁴I Azora ro baba i Zadoka, Zadoka ro baba i Akima, le i Akima ro baba i Elihoda.¹⁵I Elihoda ro baba i Eliazara, Eliazara ro baba i Matana, le i Matana ro baba i Jakoba.¹⁶ Jakoba ro baba i Josefa i valy Maria ay, i niterake i Jesosy'i, tinoka hoe Kristy zay. ¹⁷Folo efatse amby ze kila tarira aby manomboke am'i Abrahama le hatra am'i Davida, manomboke Davida le hatra amy ty fanoiragne ho à Babylona agne le tarira folo efatse amby, manomboke amy ty fanoiragne ho à Babylona agne le hatra am'i Kristy le tarira folo efatse amby .¹⁸Zao ty natao ty fiterahagne i Jesosy Kristy. Ty rene'e, i Maria, le fa navike hanambaly i Josefa, faie taloha ty nindreza iareo, le trea fa nitoe-jaza reke boake tamy ty Fagnahy Masigne. ¹⁹I Josefa, vali'e, lahilahy maregne, ro tsy te hagnala baraka aze amy ty ndaty maro. Le nana-pakevetse reke ty hamita fomba aze.²⁰Le naho reke mbe nivetsevetse mikasike o raha reo inge, le niavy tamy ty nofi'e ty Anjely i Tompo, manao te hoe: "Josefa, anadahy i Davida, ko misalasala ty hangalake i Maria ho vali'o, satria o ajaja mitoetse antro'e ao io boake amy ty Fagnahy Masigne. ²¹Hitera-dahy reke, le i rehe hitoka ty agnara'e hoe i Jesosy, fa i Reke ty hagnavotse ty Ndati'e hiala amy ty fahota'e abike iareo.²²Le nisy abike ze raha zao aby mba hahalefe ze nambara i Tompo tamy ty alala ty mpitoky manao te hoe: ²³"Ingo, ty virijiny hitoe-jaza le hiterake ajajalahy, le iareo hitoka ty agnara'e hoe Imanoela" le ty midika te hoe: "Amantika Andriagnanahare."²⁴Nifoha t'i Josefa le nano'e abike ze raha nandilia i Anjely i Tompo'i aze le nangalake aze ho vali'e. ²⁵Faie tsy nifagnosehose tama'e reke mandra-piterahagne i ajajalahy'i. Le nitokavegne hoe i Jesosy ty agnara'e.

2¹Tafara ty niterahagne i Jesosy à Betlehema ty Jodia tamy ty andro i Heroda mpanjaka, le niavy à Jerosalema ao iareo lahilahy vory hihitse boake antignanagne agne nirehake te hoe: ²"Aia reke naterake ho mpanjaka ty Jiosy? Nahatrea ty vanjiri'e boake antignanagne agne zahay le avy hiantsa aze."³ Naho fa naharey zay t'i Heroda, le nivoy vorombelo, le i Jerosalema abike mindre ama'e.⁴Nandese i Heroda nindra ty mpisorom-bey aby naho ty mpanora-dalàgne ty ndaty, le nagnontane iareo reke te hoe: "Aia ty niteraha i Kristy?"⁵ Nirehake ama'e iareo te hoe: "À Betlehema i Jodia ao, fe zao ty voasora ty mpitoky hoe: ⁶"Fa rehe, Betlehema, amy ty tane Joda, le tsy kede loatse amy mpitondra i Joda reo, fa boake ama'o ro hiavia ty mpandily hiambegne ty ndatiko Israely."⁷Le nitoka ankolake iareo lahilahy vory hihitse t'i Heroda mba hagnontane iareo mazava soa ty fotoagne niboaha i vanjiry'i.⁸ Nalefa'e ta Betlehema iareo, manao hoe: "Mandehana le fotopotoro'areo soa ty momba o ajaja zao. Naho fa hita areo reke, le ambarao areo ahike, mba handehanako agne hidera aze ka."⁹Tafara ty nitsandregna iareo ty mpanjaka, le nandeha tama ty lala'e iareo, le i vanjiry hita iareo tantignanagney ro nitaridalagne iareo mandram-pijanogna'e ambone i toeragne misy i ajaja'y. ¹⁰Naho fa nahatrea fanjiry iareo, le nirebeke tamy ty hafaleam-bey.¹¹Niditse amy tragnoy ao iareo le nahatrea i ajaja'y nindre taman-drene'e Maria. Niondreke naho nidera aze iareo. Nanokake ty fitoeran-karea'e iareo le nagnomey fagnomezagne volamena, dintin-kata'emagnitse, le miora ho aze.¹² Nampitandregne iareo tamy ty nofy ty Andriagnanahare tsy hiheregne am'i Heroda agne, le lalagne hafa ty nandehana iareo noly amy ty firenena niavia'e.¹³Naho fa nandeha iareo, le nisy anjely i Tompo niboake am'i Josefa tamy ty alala ty nofy nirehake te hoe: "Mitsangana, andeso o ajaja'o naho rene'e, le nilay Egypta agne. Mipetraha agne mandra-pitaliliako ama'o, fa i Heroda mipay o ajaja'o mba hamono aze."¹⁴ Amy halegne inge avao t'i Josefa le nifoha, le nitondra i ajaja'y naho rene'e nandeha Egypta agne. ¹⁵Zay le nahalefe ze nambara i Tompo tamy ty alala ty mpitoky hoe: "Nitokaveko handeha Egypta agne ty anako."¹⁶Avy eo t'i Heroda, naho fa nahafantatse fa voafita iareo lahilahy vory hihitse, le niboseke mafe. Nagnirake naho nampamono ze kila ajajalahy aby roe taogne mindigne ze ta Betlehema ao naho tamy ze kila faritse tey reke, arake ty fotoagne nifotore'e mazava tam'iareo lahilahy vory hihitse.¹⁷Avy eo le lefe ty rehake nambara tamy ty alala i Jeremia mpitoky te hoe:¹⁸ "Nisy feo nirey ta Rama tao, fitagniagne naho fisaonambey, mitagny naho ty amy ana'ey ty Rahely, le tsy nimete hampitsignegne reke, satria fa tsy tratse iareo."¹⁹Naho fa nimate t'i Heroda, ingo, nisy anjely i Tompo niboake am'i Josefa tamy ty nofy le nirehake te hoe: ²⁰"Mifohaza le andeso o ajajao naho rene'e mandehana amy ty tane Isiraely, fa fanimate iareo nikinia ty ay o ajajao." ²¹Nifoha ty Josefa le nandese'e i ajaja'y naho rene'e, le nandeha amy ty tane Isiraely agne.²²Fa naho fa nirei'e fa i Arkelaosy ro nanjaka à Jodia agne nandimbe i Heroda rae'e, le natahotse ty hombeo reke. Tafara ty nampitandreman' Andriagnanahare aze tamy ty nofy, le nandeha amy ty faritse Galilia reke, ²³le nipetrake amy ty tanagne atao hoe Nazareta tao. Zay le nahalefe ze rinehe ty mpitoky manao hoe: "Nazareana ty hitokavagne aze."

3¹Tamy ze andro zay le nandeha nitory agnefetse i Jodia agne agne t'i Jaona mpanao Batisa manao te hoe: ²"Mibebaha, fa marine ty fanjaka ty lagnitse.³ " Fa i reke rineha i Isaia mpitoky te hoe: "Misy feo raike mitoka agnefetse agne hoe: "Amboaro ty lala i Tompo, ahitsio ty lala'e."⁴Le i Jaona niakanjo volon-drameva naho nisekotry holitse amy ty vania'e. Valala naho tantele rembe ty natao'e fihanegne.⁵ Le Jerosalema, Jodia iabike, naho ze kila faritse magnodidigne ty vavarano i Jordana le nagnantogne aze.⁶ Natao'e Batisa amy ty vavarano Jordana iareo, naho fa nivalo amy ty hakeo'e.⁷Fa naho fa nahatrea iareo Fariseo naho Sadoseo namonje aze mba hatao Batisa reke, le hoe ty natao'e tam'iareo: "Ry tarira ty menaragne feno voreke, ia ro nampitao anareo hilay ty fahavigneragne ho avy? ⁸Mamoaza voa magneva ty fisolohoagne. ⁹Le ko mieretseretse am-po te hoe: "Managne i Abrahama ho rae'ay zahay." Fa ambarako anareo fa Andriagnanahare mahavita mampijangagne anake hoe i Abrahama ndra le avy amy ty vato retoa aza.¹⁰Le fa napoke am-poto-katae eo ty famaky. Le ze hatae tsy mamoa voa soa hotapahegne le hatorake agnate afo agne.¹¹ Manao batisa anareo amy ty rano ho amy ty fibebahagne raho. Fa misy mahery amboneko hoavy afarako ao, ndra ty hitondra ty kapa'e aza tsy magneva ahike. Hanao batisa anareo amy ty Fagnahy Masigne naho ty afo reke.¹² Fa am-pita'ey abike ty fikororoha'e hagnaliova'e ty famoloa'e naho hamoria'e ty vare'e an-tsopitse agne. Fa reke hagnoro o akofa reo amy ty afo tsy mete mate."¹³Niavy boake Galilia tagne t'i Jesosy le nandeha amy ty vavarano Joradana teo mba hatao i Jaona Batisa.¹⁴ Feie nisakana i Jaona reke, natao'e te hoe: "Iraho ro mila atao'o Batisa, ndra i rehe ka vao ro mamonje ahike?"¹⁵ Jesosy namale nirehake tama'e hoe: "Anovo fa zao ro mete amantika hahalefe ze kila fahamarenagne." Le nimete amzay t'i Jaona.¹⁶Naho fa nivita Batisa reke, le nitroatse ty andrano ey t'i Jesosy,le ingo, nisokake tama'e lagnitsey. Vazoho'e ty Fagnahin'Andriagnanahare nizotso ambone'eo manahake Voromahilalao. ¹⁷Le ingo nisy feo boake an-dagnitse agne nanao te hoe: "Itoy ro anako mamiko. Anako to vata'e."

4¹Naho fa niavy eo t'i Jesosy nindese Fagnahy'i ho agnefetse agne mba ho tsapae i Devoly fagnahy. ²Naho fa niavy nifaly hanegne efapolo andro naho efapolo alegne reke, le nimosare. ³Namonje ty mpitsoke fagnahy nirehake tama'e hoe: "Naho Anak'Andriagnanahare rehe, ampanjareo mofo ty vato toa."⁴ Nivalea i Jesosy reke te hoe: "Voasoratse te hoe: Tsy ty mofo avao ro hiveloma ty ndaty fa ze kila saontsy aboa ty falien'Andriagnanahare."⁵Avy eo nandese i Devoly amy ty tanagne masigne reke le napetra'e andindy ty anjomba abo agne(tempoly), ⁶le nirehake tama'e te hoe: "Naho Anak'Andriagnahare vata'e rehe, le mikopa ambane agne, fa voa soratse te hoe: Reke handily o anjely'e reo hanante azo naho hanandratse azo amy ty tagna'iareo, le tsy hikotrofotse amy ty vato ty tombo'o."⁷Jesosy nirehake tama'e hoe: "Le mbe voasoratse ndraike te hoe: Tsy toko'e hitsoke fagnahy I Tompo Andriagnahare'o rehe."⁸ Nandese i Devoly amy ty toeragne andidigne reke le naboa'e ama'e ze kila fanjakagne misy ambone tane eto naho ty hasoa'e.⁹ Le hoe ty natao'e tama'e hoe: "Omeiko azo abike o raha iaby reo, naho miondreke amako eto le midera ahike rehe."¹⁰Avy eo t'i Jesosy nirehake tama'e hoe: "Misitaha mberoa rehe kokolampon-draty! Fa voasoratse te hoe: "I rehe hidera i Tompo Andriagnanahare'o, le i reke rery avao ro hotompoe'o."¹¹ Avy eo nandeha niala aze ty devoly, ingo nisy anjely niavy nanompo Aze.¹²Naho fa nirey i Jesosy te voasambotse t'i Jaona le niheregne à Galilia agne reke.¹³ Niala i Nazareta reke le nandeha naho le niambesatse ta Kapernaomy tao, agnolon-dranomasy i Galilia eo zay, amy ty anjara-tane i Zebolona naho I Naftaly.¹⁴Le nisy aby zao mba hahalefe ze nambara i Isaia mpitoky hoe: ¹⁵"Ty tane i Zebolona naho ty tane i Naftaly, mba amy ranomasigney, an-dafe i Jordana agne, Galilia eo Jentilisa reo!¹⁶ O ndaty nipetrake tamy ty maiegne le nahatrea fahazavagne jabajaba, le iareo nipetrake tamy ty faritse naho ty alo ty fahafatesagne, le ama'iareo teo ro hijiriha ty fahazavagne."¹⁷Tamy zay fotoagne zay le namototse nitory zaka t'i Jesosy le nirehake te hoe: "Mibebaha fa famarine ty fanjaka ty lagnitse."¹⁸Naho fa nandeha agnolon-dranomasy i Galilia reke, le nahatrea mpirahalahy roe, Simona ie nitokavegne hoe Petera, Andrea rahalahi'e, nanorake ty harato'e andranomasigne ey, fa mpikara fiagne iareo.¹⁹ Le hoe t'i Jesosy tama'iareo: "Andao hindre amako fa hataoko mpagnarato ndaty nareo."²⁰ Leavy le tsy nisy alaharo iareo fa leavy le nenga iareo i haratoy le nagnorike aze.²¹Nionjogne avao t'i Jesosy le nahatrea mpirahalahy roe hafa ka, Jakoba ana i Zebedio, naho Jaona rahalahi'e. Namboatse i harato iareo'y an-tsambo iareo ao iareo aman-drae'iareo Zebedio. Nitoka iareo reke,²² leavy le tsy nisy alahaho ka iareo fa nenga iareo eo sambokele'y naho i baba'iareo le nagnorike aze.²³Nagnavelo nanitsike Galilia t'i Jesosy, nampianatse tamy ty synagoga tao iareo, nagnambara ty talily soa ty fanjakagne, le nagnasitragne ze kila aretegne naho ze kila maleme amy ty ndaty.²⁴ Niely nanitsike i Syria ty vaovao mahakasoike aze, le nandese ty ndaty ama eo abike ze kila marare, marare ty karazan'aretegne naho fangirifiriagne, kokolampogne reo, naho ze marare ty andro bey le marare ty paralysisa. Nisitragne i Jesosy aby rey. ²⁵Ndaty maro boake à Galilia agne, Dekapolisy, Jerosalema, Jodia le ze avy an-dafe i Jordana agne ro nagnorike aze.

5¹Naho fa nahonigne ndaty maro reo t'i Jesosy, le niakatse ambone vohitse ey. Naho fa tafa-fiambesatse ey reke, le nagnontane aze mpiana'e rey.² Nanokake falie'ey rekwe le nampianatse iareo, manao te hoe: ³"Votsotse ze sahiragne am-pagnahy, fa ho aze ty fanjaka ty lagnitse.⁴ Votsotse iareo misaona, fa hampitsignegne iareo.⁵Votsotse iareo maleme fagnahy, fa iareo io ro handova ty tane. ⁶Votsotse iareo ze kere naho mangetaheta ty fahamarenagne, fa hovontsignegne iareo io. ⁷Votsotse iareo mpamindra fo, fa hahazo famindra-po iareo io.⁸ Votsotse iareo madio am-po, fa hahatrea an'Andriagnanahare iareo io.⁹Votsotse iareo mpampilongo, fa iareo io ro hotokavegne hoe anak'Andriagnanahare.¹⁰ Votsotse iareo enjehegne amy ty fahamarenagne, fa ey iareo io ty fanjaka ty lagnitse.¹¹Votsotse nareo naho mametaveta anareo, magnenjeke anareo ty ndaty, le mamorogne vande handesegne manohetse anareo naho ty amako. ¹²Mirebeha naho mifalea, fa folo'ay ty ty valesoa'areo an-dagnitse agne. Fa manahake zay ty nagnenjeha ty ndaty iareo mpitoky nivelogne taloha'areo.¹³Nareo ro sira ty tane. Fa naho ty sira ka ro matsatso, amy ty akore ka ty hampafiry zay ndraike? Tsy ho soa zay ndra amy t'ino ndra amy t'ino fa hariagne naho ka holialia ty tombo ty ndaty. ¹⁴Nareo ro fahazava ze kila tane. Ty tanagne mioregne ambone ty haboagne le tsy voatakogne sasa.¹⁵Tsy misy ndaty handrehetse jiro ambane harogne, fa amy ty fipetrahan-jiro eo, le magnazava ty antragno'e ao abike zay.¹⁶ Ao soa hazava manahake zay ty fahazava'areo ama'ondaty mba hahatreava iareo ty asa soa atao'areo naho ka hankalaza'e ty Rae'areo an-dagnitse agne.¹⁷Ko mametsevetse te hoe avy handrava ty lily naho iareo mpitoky raho. Tsy avy handrava io raho, fa hanao ty hahalefe aze.¹⁸ Fa ambarako ama'areo ty maregne fa mandra-piveloma ty lagnitse naho ty tane, le tsy ho rava amy ty lily ndra le venten-tsoratse raike aza, mandra-pahateraha ze kila raha iaby.¹⁹Naho zay areke ndra ia ndra ia mandika ndra ty fara'e kede amy ze lily naho ze mampianatse ty hafa ka hanao zay le hotokavegne hoe fara'e kede amy ty fanjaka ty lagnitse ao. Fa ndra ia ndra ia magneke naho mampianatse le ho tokavegne hoe foloay amy ty fanjaka ty lagnitse. ²⁰Ambarako anareo fa naho tsy bey mihoatse ty mpanora-dalàgne naho ty fariseo ty fahamaregna'areo, le ko ndra mitama te hiditse amy ty fanjaka ty lagnitse nareo.²¹Fa nirei'areo nambara tam'iareo taloha tagne hoe: "Ko mamono ndaty," "Ndra ia ndra ia ndaty mamono ndaty le hohelofagne amy ty fitsaragne." ²²Fa ambarako ama'areo fa ze manan-keloke amy ty rahalahi'e le magneva helofagne amy ty fitsaragne agne; ndra ia ndra ia mirehake ty rahalahi'e hoe: "Irehe ndaty tsy misy asa'e!" le hohelofegne amy ty filan-kevetse; ndra ia ndra ia mirehake te hoe: "Gege rehe!" le magneva ty ho amy ty sihanake mirehetse afo.²³Naho zay areke, naho fa manese sesehaitse amy ty alitara eo rehe tiaro'o teo fa manan-keloke ama'o ty rahalahi'o, ²⁴le angao aloha alitara ao heke i sesehaitse'ey, mandehana oriho ty lala'o. Milongoa heke amy rahalahy'oi, zay vaho mihregne le manese sesehai'oy.²⁵Milongoa malaky amy ty mpandeteke azo amy rehe mindre ama'e amy fitsaragney agne, hendra ty mpandeteke avao ro hanolotse azo amy ty mpitsara, le hanolotse azo amy ty manam-bolonahetse ka ty mpitsara, le hatao antragno maieke ao rehe. ²⁶Ambarako anareo ty maregne, fa tsy hovotsotse ty ao rehe mandra-pandoava'o ty vola fara'e kede amy ty trosa'o.²⁷Fa rei'areo fa nambara te hoe: "Ko miviombiogne." ²⁸Ambarako anareo fa ze magnente ampela sady magniry aze le fa miviombiogne am-po'e ao reke zay.²⁹Naho mitohigne azo ty maso'o ankavana, le afaho ario lavitse azo. Fa ndra itrakitra'e ty ila ty vata'o ro simbagne te zay ty vata'o abike atorake agnate ty helo agne. ³⁰Naho mitohigne azo ty tagna'o havana, tapaho le ario hisitake lavitse azo. Fa ndra itrakitra'e ty ila'e amy ty vata'o ro montso te zay ty vata'o abike hariagne agnate ty helo agne.³¹Le fa nambara avaoka te hoe: "Ndra ia ndra ia misarake amy ty vali'e, ao soa reke hagnomey aze ty taratasy fisaram-panambaliagne."³² Mirehake ama'areo raho fa ze misarake amy ty fanambalia'e, akoatse amy ty fiviombiognagne, le mampiviombiogne aze. Ndra ia ndra ia manambaly aze afara fisaraha'ey le miviombiogne.³³Fa rei'areo avao ka fa nambara tamy ty ntaolo hoe: "Ko le voatsiriry miletse amy ty fiaignagne diso, fa andeso agnatreha i Tompo eo ty fiaigna'o." ³⁴Fa iraho magnambara amareo, ko miletse amy ze kila raha, ndra amy ty lagnitse aza, fa seza fiambesaran'Andriagnanahare zay; ³⁵ndra amy ty tane fa fipetraha ty tombo'e zay; ndra amy Jerosalema koa, fa tana ty mpanjaka bey zao.³⁶Ko miletse amy ty loha'o, fa tsy raha mahay magnafoty ndra magnamainte volo raike rehe. ³⁷Ao soa ty reha'o naho fa 'Eka le eka; naho 'Ehe'e le ehe'e.' Ze mbe mihoatse zay le boake amy ty raty.³⁸Rei'areo fa nambara te hoe: "Maso solo ty maso, le nife solo ty nife."³⁹ Fa raho magnambara ama'areo te hoe, ko mifandietse amy ty raty. Fa ndra ia ndra ia magnomey takapike fifi'o havanay le omeo aze ka i havia'ay.⁴⁰Le naho misy ndaty te hindre ama'o ho amy ty fitsaragne agne magnofike ty akanjo'o, le angao ho aze ty lamba'o. ⁴¹Ndra ia ndra ia manere azo handeha kilometatse raike, le mandehana mindre ama'e amy ty kilometatse roe. ⁴²Omeo ze mangatake ama'o, ao soa tsy handietse ndra ia ndra ia magniry te hindragne ama'o.⁴³Fa rei'areo fa nambara hoe: "Tsy maintsy teave'o ty raike tanagne ama'o, le rafeso ty fahavalo'o. ⁴⁴Fa ty ambarako anareo teavo ty fahavalo'areo le mivavaha hoe ze magnenjeke anareo, [Fagnamarenagne: Ty dikan-drehake soa taloha le magnafake ty hoe: "Isaoro'areo ze magnozogne anareo, manoa raha soa amy ze malaigne anareo."] ⁴⁵le ho ana ty Rae'areo an-dagnitse agne vata'e nareo. Fa reke mampibelagne ty masoandro'e amy ty soa naho ty raty, le mandatsake ty oragne amy ty maregne naho ty tsy maregne.⁴⁶Fa naho ze tea anareo avao ro tea'areo, le inogne ty valesoa ho azo'areo? Ndra o mpitake hagao vao tsy manahake zay avao ka? ⁴⁷Naho ty rahalahi'areo avao ro salamae'areo, le inogne ty atao'areo amy ty hafa? Ndra o jentilisao vao tsy manahake zay avao ka?⁴⁸ Naho zay areke tsy maintsy mitoetse nareo manahake ty fitoera ty Rae'areo an-dagnitse agne.

6¹Miambena tsy hanao ty asa ty fahamaregna'areo amaso'ondaty eo mba ho trea iareo nareo, fa naho tsy zay le tsy hahazo valesoa avy amy ty Rae'areo an-dagnitse agne. ²Naho fa manao fagnampeagne nareo ao soa tsy hitioke vangabey manahake ty atao iareo soa miatreke à synagoga agne naho an-dalagne ey, am'zay mahazo roboke ama ondaty iareo. Ambarako anareo fa fanandrae ty valesoa'e iareo io.³Naho fa manao fagnampeagne nareo, ko atao fanta ty tagna'areo havia ze atao ty tagna'areo havana, ⁴le mba omeo am-pitolahagne ty fagnomeza'areo. Avy eo ty Rae'areo ie mahavazoho amy ty mangikey ro hamale soa anareo.⁵Naho fa mivavake nareo, ko manahake o soa miatrekeo, iareo tea mijangagne naho mivavake amy ty synagoga eo le agnolon-dalagney, le mete ho trea ty ndaty. Ambarako anareo ty maregne, fa iareo io le fa nandrae ty valesoa'e. ⁶Fa nareo naho fa mivavake midira an-tragno'areo ao. Hilio ty lalagne, le mivavaha aman-dRae'areo ie amy ty mangike ao. Avy eo ty rae'areo ie mahavazoho amy ty bangigne ro hamale soa anareo. ⁷Naho fa mivavake nareo, ko maro rehake fahatane manahake Jentilisao, amy ty fieretsereta'e te hoe horey amy ty rehake maro atao'e.⁸Ay zay areke, ko manahake iareo, fa ty Rae'areo fa maharofana ty raha paia'areo aloha ty angataha'areo Ama'e.⁹ Le mivavaha manahake zao: "Rae'ay andindimonegne agne, ho masigne ty tahina'o aba. ¹⁰Ho avy ty fanjaka'o. Hatao ze sitrake ty arofo'o an-tane etoy manahake ty an-dagnitse agne.¹¹Omeo anay anito ty hanegne tandrife ho anay. ¹²Hahao ty hakeo'ay, manahake ty hagnaha'ay ze manan-kakeo ama'ay. ¹³Ko andesegne amy ty fakam-pagnahy zahay, afaho am'ay ze kila raha raty. ["Fagnamarenagne: Ty dikan-drehake soa taloha le nagnafake ty hoe: "Fa azo ty fanjakagne naho ty hery le ty volonahetse hatrampara'e. Amen."]¹⁴Fa naho magnaha ty hadisoa ty ndaty nareo, le hagnaha anareo ka ty Rae'areo ie an-dagnitse agne. ¹⁵Fa naho tsy magnaha ty hadisoa'iareo nareo, le tsy hagnaha ty hakeo areo ka ty Rae'areo.¹⁶Ankoatse zay, naho fa mifaly hanegne nareo, ko mampiboake tarehe mahaferenaigne manahake ty atao ty soa miatreke, ampangoritagnegne ty tarehe iareo am'zay hita te tena mifaly hanegne. Ambarako anareo ty maregne, fa fanandrae ty valesoa'e iareo. ¹⁷Fa rehe, naho fa mifaly hanegne, hosoro menake ty loha'o le sasao ty tarehe'o,¹⁸ mba tsy hohay ty ndaty hafa te hoe mifaly hanegne, fa aman-dRae'o ie amy ty bangigne ao avao; le Rae'o ie mahonigne amy ty bangigne ao, ro hamale soa azo.¹⁹Ko mitahiry ty fanagna'areo ambone tane etoy, simbae ty bararaoke naho harefesegne, le hotavane ty mpangalatse angalare'e. ²⁰Faie, tahirio ty harea'areo an-dagnitse agne, tsy simba ty bararaoke naho le tsy mete harefesegne, le tsy ho voa tava ty o mpangalatseo ka. ²¹Fa ze misy ty harea'o ro itoboha ty fo'o ka.²²Ty maso ro jiro ty vatagne. Naho zay areke, naho soa ty maso'o, le hoatseke hazavagne ty vatagne abike. ²³Fa naho raty ty maso'o, le hoatseke ieke ty vata'o . Ay zay areke, naho maiegne ty fahazavagne amao ao henanezao, le manao akore ty habey o ieke zao!²⁴ Tsy misy afake hanompo tompo roe, fa hoheje'e ty raike le hotea'e ty raike, le hanolotse ty vata'e hoe ty raike fa handrafe ty raike hafa. Irehe tsy afake hanompo an'Andriagnanahare naho ty fanagnagne.²⁵Naho zay areke ambarako ama'areo, ko misalasala mikasike ty fiai'areo, ty hohane'areo, ndra ty mikasike ty vata'areo, ie horongona'areo. Tsy bey ambone o hanegneo vao ty fiaignagne, le o vatagneo vao bey ambone ty akanjo'o?²⁶ Henteo o vorogne agnala ey io. Iareo rey tsy raha mambole, fa ty rae'areo an-dagnitse agne ro mamahagne iareo. Tsy manan-kasigne mihoatse iareo vao nareo?²⁷Ia ama'areo ty mete hagnampe metatse raike amy ty andro hiveloma'e amy ty fitahiagne? ²⁸Nagninogne nareo ie misalasala amy ty ankanjo'areoo? Vetsevetseo ty mikasike ty lilia antondaey, manao akore ty tiry iareo. Tsy raha miasa iareo io, tsy raha manjaitse akanjo ka. ²⁹Ambarako ama'areo, fa ndra i Salomona aza amy ty volonahe'e le tsy niakanjo mitovy ty raike amy rey.³⁰Naho ampiakanjoen'Andriagnanahare mitovy amy ty ahetse atonda agne, ze misy androany naho maray le hatono am-patagneo, manahake ty ino ty hampiakanjoa'e anareo vata'e, nareo kede finoagne?³¹ Naho zay areke, ko misalasala te hoe: "Inogne ty hohane'ay?" "inogne ty honome'ay?" "inogne ty akanjo hakanjoe'ay?"³²Fa iareo Jentilisa mipay o raha reo, le ty Rae'areo an-dagnitse agne le mahafohigne ka fa mila io nareo. ³³Fa katroho heke ty fanjaka'e naho ty fahamarigna'e le hatolotse anareo o raha reo. ³⁴Naho zay areke, ko marikarike ty maray, fa mbe hisalasala ty aze ty maray. Ampe hoe ze kila andro ty raty ama'e ao.

7¹Ko mitsara mba tsy ho tsaraegne nareo. ²Fa amy ty fitsaragne natao'areo, ro hitsaragne anareo ka, le amy ty fandrefesagne andrefesagne'areo, ro handrefesagne anareo.³Nagnino rehe tondregne magnete ty akata kede agnate ty maso ty rahalahi'o, nefa ty amy ty azo tsy trea'o? ⁴Akore ty hirehafa'o ty rahalahi'o te hoe: "Apoho raho hangalake ty akata agnate maso'o ao, naho mbe agnate ty maso'o ao i azoy?⁵ Nareo soa miatreke! Afaho hek ty akata agnate ty maso'o, le avy eo rehe hahatrea soa naho fa magnafake ty amy ty maso ty rahalahi'o.⁶Ko ameagne amboa ty raha manan-kasigne, le ko ariagne amo kosogneo ey ty vatosoa'areo. Naho tsy zay le ho voa lialia ty tombo'iareo, le avy eo hifotetse naho hamilavila anareo amy ty fahapotehagne.⁷Mangataha, le ameagne anareo zay. Mipaia, le hahatrea nareo. Konkogno, fa hisokake ho anareo zay. ⁸Fa ze mangatake, le hahazo; iareo abike mipay, le mahatrea; le ze ndaty mampikonkogne ho sokafegne. ⁹Ia ama'areo ty angataha ty ana'e mofo, ro hanolotse vato ho aze?¹⁰ Na ka nangataha'e fiagne, le hagnomey bibilava aze?¹¹Naho zay areke, nareo raty aza mahay magnomey raha soa hoe ty ana'areo, tsy bey mihoatse zay vao ty raha soa amean-dRae'areo an-dagnitse agne hoe iareo ze mangatake ama'e? ¹²Naho zay areke, ndra ino ndra ino raha tea'areo hatao'ondaty amareo, le toko'e hanao manahake zay am'iareo ka nareo, fa zay ty lily naho iareo mpitoky.¹³Midira amy lalambey kititse. Fa bey naho malalake ty lalagne mitondra amy ty raty agne, le maro iareo ndaty mandeha am'zay. ¹⁴Fa kititse sady sarotse ty lalambey mitarike amy ty fiaignagne maregne, le tsy ampe iareo mahita zay.¹⁵Miambena amy ty mpitoky sandoke, ie mamonje anareo amy ty fiakanjon'agnondry nefa amboa ly mpitsitsa. ¹⁶Amy ty alala ty voa'e ro hahafantara'areo iareo. Mangalake voaloboke amy ty fatikey vao ty ndaty, ndra ka aviavy amy ty songosongo ey? ¹⁷Mitovy am'izay, ze hata soa aby le mamoa voa soa, fa ze hata raty mamoa voa raty.¹⁸Ty hata soa tsy mete hamoa voa raty, le ty hata raty tsy mete hamoa voa soa. ¹⁹Ze kila hata tsy mamoa voa soa le hotapahegne, le hatorake agnate afo agne. ²⁰Naho zay areke ho fanta'areo iareo amy ty alala ty voa'e.²¹Tsy ze kila mirehake amako hoe: "Ragnandria, Ragnandria" le hiditse ty fanjaka ty lagnitse, fa iareo manao ze zoto ty arofo ty Raiko an-dagnitse agne avao.²² Maro ndaty reo hirehake amako amy ze andro zay hoe: "Ragnandria, Ragnandria, tsy fa nitoky tamy ty agnara'o vao zahay, tsy fa nandroake kokolampogne tamy ty agnara'o, le nanao ka asa bey reo tamy ty agnara'o?"²³ Avy eo raho hagnambara am'iareo ampahabeso hoe: "Tsy mahafantatra anareo mihitsy Aho! Misitaha lavitse Ahy, ry mpanao raty!"²⁴Naho zay areke, iareo ndaty mitsandregne ty rehako manao aze to le hanahake ty ndaty hendre nagnoregne ty tragno'e ambone ty vatolampy. ²⁵Avy oragney, mitroa tamboho ranoy, le nifofofofo naho namele i tragnoy ty rivotse, fa tsy nihetseke, satria naoregne ambone ty vatolampy teo.²⁶Fa ze mitsandregne ty rehako fa tsy manao aze to rey le manahake ty ndaty gege magnoregne ty tragno'e ambone ty fasegne ey. ²⁷Avy oragney, mitroa tamboho ranoy, le nifofofofo namele tragnoy ty rivotse, le nihomake reke, sady nirava."²⁸Naho fa niavy nagnambara rehake reo t'i Jesosy, le nitea vahoake rey ty fampianara'e,²⁹ satria nampianatse iareo manahake ty ndaty managne fahefagne reke, fa tsy manahake iareo manoratse ty lili'iareo.

8¹Naho fa nizotso boake ambohitsey t'i Jesosy, le ndaty maro ty nagnorike aze.² Ingo, nisy boka nagnantogne aze le niondreke taloha'e eo nanao hoe: " Ragnandria, naho zoto'o, mahay magnalio ahike rehe." ³Nagnitsy fita'ey t'i Jesosy le nikasike aze, nanao hoe: "Zotoko. Madiova." Tsy nisy alaharo fa leavy le nadio tamy ty fahaboka'e reke.⁴Zao ty natao i Jesosy tama'e hoe: "Ao soa tsy hagnambara ndra am'ia ndra am'ia rehe. Mandehana amy ty lala'o, le atoro amy ty mpisorogne ty vata'o le atoloro i fagnatetse nandilia i Mosesy, mba ho fijoroagne vavolombelogne am'iareo."⁵Naho fa niditse tao Kapernaomy t'i Jesosy, le namonje aze ty kapiteny raike le nagnontane aze⁶ hoe: "Ragnandria, matindry antragno ao ty mpanompoko."⁷ Le hoe t'i Jesosy tama'e hoe: "HOavy raho le hagnasitragne aze."⁸Namale i Kapiteny le nanao te hoe: "Ragnandria, ndaty tsy to raho tsy magneva hidira'o ty antragnoko ao, misaontsia avao rehe le ho jangagne ty mpanompoko. ⁹Fa raho io lahilahy napetrake ho ambane fahefagne, le managne miaramila fehezeko raho. Mirehake amy ty raike raho te hoe: "Mandehana", le mandeha reke, le amy ty raike hafa ka hoe: "Avia", le magnantogne reke, le amy ty mpanompoko hoe: "Anovo zao", le atao'e zay."¹⁰ Naho fa nirey i Jesosy zay, le nilatsa reke sady nirehake am'iareo nagnorike aze hoe: "Ambarako ama'areo ty tena maregne, fa mbe tsy nahatrea ndaty manampinoagne manahake zao raho ta Israely teto.¹¹Ambarako anareo, fa maro ty boake antignanagne naho ty boake ahandrefagne ho avy, le hipetrake an-databatse eo mindra am'i Abrahama iareo, Isaka naho i Jakoba, amy ty fanjaka ty lagnitse agne.¹² Fa iareo ana ty fanjakagne le hatorake ivwela ty iegne lavitse agne, ie hisy fitagniagne naho fisokiragne nife. ¹³Le zao ty natao i Jesosy am'i Kapiteny hoe: "Mandehana! Magnorike ty ninoa'o, le ao zay hatao'o ho azo."¹⁴Naho fa niditse t'antragno i Petera ao t'i Jesosy, le nahavazoho ty rafoza i Petera ampela nandre marare voa ty tazogne reke.¹⁵ Nikasihe i Jesosy ty tagna'e, le nindre amizay tazogney. Le nitsangagne reke sady nanjotso hanegne ho aze.¹⁶Naho fa nihariva, le maro iareo nivoa ty kokolampogne nandese ty ndaty am'i Jesosy eo. Nandroake o kokolampon-draty reo tamy ty rehake reke le nagnasitragne iareo ze narary abike.¹⁷ Zay ty nahalefe ze nambara i Isaia mpitoky, nanao te hoe: "I reke vata'e nagnala ty faharareantika naho nitondra ty aretentika."¹⁸Naho fa nivazoho i Jesosy ndaty maro nagnarikobogne azey, le nagnomey torolalagne ty hitsahagne amy ranomasigne Galilia reke. ¹⁹Avy eo ty mpanoratse lily raike namonje aze le nanao te hoe: "O mpagnanatse, hagnorike azo raho ndre mbaia mbaia ty hagnaveloa'o."²⁰ Zao ty natao i Jesosy tama'e: "Ty amboahaolo manan-davake, le ty voro ty lagnitse managne tragno, fa ty ana'ondaty tsy managne ndra aia ndra aia ty degana ty loha'e."²¹Ty raike hafa amy mpiana'e reo nirehake tama'e hoe: "Ragnandria, votsoro raho handeha handevegne ty raeko."²² Le zao ty natao i Jesosy tama'e hoe: "Oriho raho, apoho ze mate handevegne ty mate ama'e ao avao."²³Naho fa niditse amy ty sambokede raike tao t'i Jesosy, le nagnorike aze t'agnate io ao ka mpiana'e rey. ²⁴Ingo, nisy rivotse mahery ty amy ranpomasigne ey, le nifeno rano i Samboy. ²⁵Namonje aze iareo mpiana'e le namoha aze nanao hoe: "Vonjeo tika, Ragnandria, ho mate tika!"²⁶Le hoe t'i Jesosy tama'iareo: "Nagnino nareo matahotseo, ry kede finoagne?" Le nitsangagne reke sady nirehafe'e mafe i rivotsey naho i ranomasigney. Le nijanogne.²⁷ Gaga iareo lahilahy le nirehake hoe: "Fa karazan-dahilahy inogne toy io, fa ndra rivotse naho ranomasigneo mieke aze?"²⁸Naho fa niavy nitsake le tamy ty tana i Gadarenesa t'i Jesosy, le nisy ajalahy roe zay nifeheze ty kokolampogne nifaname tama'e. Boake an-dolo ey iareo io, le tsy nisy mpandeha afake nandalo ty amy lalagney.²⁹ Ingo,nihiake mafe iareo le nanao te hoe: "Mpinogne vao zahay naho reheo, ry anak'Andriagnanahare? Avy eto vao rehe hamerevere anay aloha ty fotoagne tinondro?"³⁰Le nisy kosogne maro nihinagne teo, tsy lavitse iareo.³¹ Le mbe nitsoloke am'i Jesosy o kokolampogne reo nanao hoe: "Naho mandroake anay rehe, le alefaso agnate ty kosogne maro toa zahay." ³²Le zao ty natao i Jesosy tama'iareo: "Mandehana!" Le niala i kokolampon-draty reo sady niditse amy kosogne rey; le ingo, nihelalake an-dranomasigne ey le nimate agnate rano ao aby iareo.³³Iareo ze niarake kosogne rey le nilay antanagne agne, le nitalily ty raha nisy aby, naho ty raha niseho amy ajalahy nivoa ty kokolampogney. ³⁴Ingo, nivorake abike iareo t'antanagne ao mba hihaogne am'i Jesosy. Naho fa nitrea iareo reke, le nangatake aze mba hiala ty faritane iareo.

9¹Niditse an-tsambokede ao t'i Jesosy, nitsake, le niavy antana'e ao. ²Ingo, nisy ajalahy marare ty paralesisa milafike am-pandreagneo nandese iareo ama'e teo. Naho fa nahonigne ty finoa iareo, le hoe t'i Jesosy am'i lahilahy marare ty paralesisa: "Anake, mifalea amzay fa malio ty hakeo'o."³Ingo, ty sasa'e tama'iareo mpanora-dily manao rejiagne te hoe: "Mirehake raty ty lahilahy tia." ⁴Arofana i Jesosy ty eretsere iareo le nisaontsy reke hoe: "Nagnino nareo manao eretsere-draty am-po'o areo ao? ⁵Fa ia ty moramora ty mirehake aze hoe: voavela ty hakeo'o, sa ty mirehake hoe: mitsanga le mandehana? ⁶Fa mba ho fanta'areo fa ty ana'ondaty managne fahefagne hagnafake hakeo ambone tane eto..." hoe ty natao'e am'ie marare ty paralesisa: " Mitsangàna, jinio fandrea'o, le mandehana an-tragno'o agne."⁷Nitsangagne mararey le nandeha an-tragno'e agne. ⁸Naho fa nahatrea zay vahoakey, latsa iareo le niantsa an'Andriagnanahare, ie nagnomey fahefagne hoe ty ndaty. ⁹Naho fa niale eo t'i Jesosy, le nahatrea lahilahy tokavegne hoe Matio reke, nipetrake am-pamorian-ketra eo. Hoe ty natao'e tama'e: "Magnoriha ahy." Nitsangagne reke le nagnorike Aze."¹⁰Le naho nipetrake nikama tan-tragno ao t'i Jesosy, ingo, mpamory hetse naho ndaty be hakeo maro niavy nindre nihinagne am'i Jesosy le iareo mpiana'e. ¹¹Naho fa nahatrea zay iareo Fariseo, le nirehake amy mpiana'e reo nanao te hoe: "Nagnino mpampiana'areo io mindre mihinagne amy ty mpamory hetse naho ty ndaty be hakeo io?¹²Naho fa naharey zay t'i Jesosy, le hoe ty natao'e: "Ty ndaty matanjake tsy mipay mpitsabo, fa iareo marare avao. ¹³Toko'e mandeha mianatse ty dika ty hoe: Famindragne arofo ro irieko fa tsy sorogne. Fa avy raho, tsy hipay ze maren-tane hisoloho, fa ze be hakeo."¹⁴Avy nagnantogne iareo mpiana i Jaona le nirehake te hoe: "Nagnino zahay naho iareo fariseo mifaly hanegne mateteke, fa o mpiana'o reo tsy mba mifaly? ¹⁵Le hoe t'i Jesosy tam'iareo: "Ho meloke vao ty longo mpangalake io, naho mbe mindre am'iareo eo mpangalakey? Fa hoavy ty andro hangalagne ty mpangalake am'iareo eo, le amzay iareo vaho hifaly hanegne.¹⁶Tsy misy ndaty manampegne akanjo tonta amy ty tapa-damba vaovao, fa ty tampegne handrovitse ty lamba, le hisy triatse raty lavitse.¹⁷Tsy misy ndaty magniligne divay amy ty siny holitse tonta. Naho manao zay iareo, le ho triatse siny holitsey, ho longagne divay'i le ho poteke i siny holitsey. Fa magniligne divay vaovao amy ty siny vaovao iareo, le ho voa tahiry iareo.¹⁸Naho mbe nisaontsy raha reo tam'iareo t'i Jesosy, le ingo, nisy manampahefagne raike niavy le niondreke ama'e. Nirehake reke hoe: "Mate ty anako ampela, fa avia le apetraho ama'e ty fita'o, le ho velogne reke." ¹⁹Avy eo nagnavelo nindre ama'e t'i Jesosy naho iareo mpiana'e."²⁰Ingo, nisy ampela nadeha lio fa ho roe taogne, nandeha afara i Jesosy ao le nikasike sarimbo'ey. ²¹Fa zao ty natao'e: "Naho mahavoakasike ty lamba'e raho, le ho jangagne." ²²Nitolike t'i Jesosy le nahavazoho aze, le nirehake te hoe: "O anakampelako,mahereza, ty finoa'o ro nahajangagne azo." Le niafake nannomboke tam'io i lio lavay.²³Naho fa niavy amy ty tragno i manam-pahefagney t'i Jesosy, le nahavazoho iareo mpitioke antsiva naho naho ndaty maro mikorake reke. ²⁴Le hoe hoareke: "Mandehana, fa tsy mate i ajajampelay, miroro reke." Ndra nihehea iareo avao reke le natao tsikike.²⁵Naho fa naboake antane agne i ndaty maro rey, niditse antragno ao reke le nandrae aze amy ty tagna'e, le nitsangagne ajajampelay. ²⁶Le niely amy faritsey i vaovao soa zay.²⁷Naho fa niala teo t'i Jesosy, le nisy goa roelahy nagnorike aze. Tsy nijanogne nitoka iareo le nanao te hoe: "Amindrao fo zahay, ie ana i Davida!"²⁸ Naho fa niavy t'an-tragno ao t'i Jesosy, le namonje aze iareo lahilahy goa. Le hoe t'i Jesosy am'iareo: "Matoky vao nareo fa mahay manao zao raho?" Le zao ty natao iareo: "Eka, Ragnandria."²⁹Avy eo, nikasihe i Jesosy ty maso iareo, le nisaontsy reke te hoe: "Ho lefe ama'areo magnorike ty finoa'areo zay,"³⁰ le mahatrea ty maso'iareo. Avy eo t'i Jesosy nandily mafe iareo le nirehake te hoe: "Ao soa tsy hisy ndaty hahay ty momba zao." ³¹Faie le nandeha iareo roelahy nagnely i vaovao momba zay amy ze kila faritse tey.³²Le naho fa nandeha iareo roe lahy, ingo, nisy lahilahy moagne nippetraha ty kokolampon-draty tam'i Jesosy eo. ³³Naho fa niroahegne i kokolampondraty'i, le nirehake i lahilahy moagney. Gaga ndaty maroy le nivaky rehake te hoe: "Mbe tsy nimpitrea tam'Isiraely zao!"³⁴ Fa zao ty natao iareo fariseo: "Tamy ty fanapaha'iareo kokolampogne, ro nandroaha'e kokolambogne reo."³⁵Nandeha nagnavelo mbey tanam-bey naho ze kila vohitse t'i Jesosy. Nanohy nampianatse tam'iareo synagoga agne Reke, nagnambara ty talily soa ty fanjakagne, le nahajangagne karazan'aretegne maro isankaraza'e.³⁶ Naho fa nahavazoho iareo vahoake reke, le nanagne fiferenaignagne tama'iareo, nisalasala iareo. Manahake ty agnondry tsy misy mpiarake iareo.³⁷Le zao ty natao'e am'iareo mpiana'e: "Maro ty vokatse, fa iareo mpiasa ro tsy ampe. ³⁸Naho zay areke mivavaha malaky amy ty Tompom-bokatse, mba handefasa'e mpiasa amy ty voka'ey."

10¹Nikanjie i Jesosy hindre ama'e i mpiana'e roambifolo lahy'i le namea'e fahefagne handrese ty fagnahy maloto, mba hanfdroahagne iareo, hahajanganagne karazan'aretegne maro naho ze kila rare.²Le intoagne abike ty agnara iareo aposto9ly roambifolo. Ty voaloha'e, i Simona(tokavegne Petera ka), le i Andreo rahalahy'e; i Jakoba anadahy i Zebede naho i Jaona rahalahi'e, ³I Filipo, naho i Barteleomy; i Tomasy, naho Matio i mpamory hetsey; Jakoba anadahy i Alfeosy, le i Tadeosy;⁴ i Simona ie Zelota, le i Jodasy Iskariota, i namotetse azey.⁵Nirahe i Jesosy iareo roambifolo lahy. Nagnanatse iareo reke le nisaontsy te hoe: "Ko mandeha amy ty toeragne hipetraha ty jentilisa nareo, le ko miditse ka amy ty rova o Samaritanao. ⁶Mandehana am'iareo agnondry motso amy tarira Israely io agne; ⁷le naho fa mandeha nareo, mitoria zaka le magnambarà hoe: "Fa marine ty fiavia ty fanjaka ty lagnitse."⁸Jangano ty marare, atsangano ty mate, liovo iareo boka, le roaho o kokolampogne reo. Manahake ty nahazoa'areo maimaimpoagne le mizarà maimaimpoagne avao ka.⁹ Ko minday volamena, volafotsy, ndra varahigne amy ty kitapom-bola'areo. ¹⁰Ao soa tsy hinday vatiagne amy ze andehana'areo, ndra akanjo hafa, ndra kiraro, ndra tehegne, fa ty mpiasa fa magnave andombofagne hanegne.¹¹Ndra ino ndra ino rova bey naho tanagtne kede hidira'areo, paiavo ze magneva ao, le mitoboha ao mandram-pandehana'areo.¹² Naho vaho miditse antragno ao nareo, le manalamà ze ao. Naho malio hakeo tragnoy, le hizotso ao ty fiadana'areo. ¹³Fa naho tsy zay le hiheregne ama'areo fiadana'areoy.¹⁴Hoe iareo ze tsy mandray anareo naho ka tsy mitsandregne ty reha'areo, le ahintsagno ty deboke amy ty tombo'areo, naho fa miala amy tragno naho rova bey zay nareo.¹⁵ Ambarako ama'areo ty tena maregne, fa ndra ho moramora ty amy ty tana iareo Sodoma naho Gomora agne amy ty andro fitsragne toy zay amy rova bey zao.¹⁶Ingo, handefa anareo manahake o agnondrio ho agnate ty amboa ly io eo raho, mihendrea manahake ty menaragne, le tsy manan-tahy hoe voromahilala. ¹⁷Miambena amy ty ndaty! Hanolotse anareo amy ty zaka bey eo iareo, le hijera anareo amy ty synagoga'iareo ao iareo.¹⁸ Avy eo le handesegne amy ty goverinora naho ty mpanjaka nareo noho ty amako, mba ho vavolombelogne ho aze naho ka hoe iareo jentilisa.¹⁹Naho fa manolotse anareo iareo, le ko matahotse te hoe ino ty raha hovolagne'areo, fa hameigne anareo am'io fotoagne io ty raha horehafe'areo. ²⁰Tsy nareo ro hirehake, fa ty Fagnahy i Rae'areoy ro hisaontsy ama'areo ao.²¹Ty rahalahy hanolotse ty rahalahy ho amy ty fahafatesagne, ty ra le ty ana'e. Ty anake le hatsangagne hamale ty fanagnan-dRae'e naho ty fanagnan-dRene'e mba hahavia i fatey am'iareo.²² Hoheje ze kila ndaty nareo noho ty amy ty agnarako. Fa ndra ia ndra ia mahaligne hatra am-para'e le hoavotagne ze i ndaty zay. ²³Naho fa magniagne anareo am'io rova bey io iareo, le milaisa amy ty hafa ka, ambarako anareo ty tena maregne, fa tsy hahatety o tana Isiraely io nareo mandra-pahavia ty ana'ondaty.²⁴Ty mpianatse tsy mbia ho bey ambone ty mpitoky, ndra ty mpanompo tsy ho ambone ty tompo'e. ²⁵Ampe hoe ty mpianatse naho avy manahake ty mpitoky reke, le ty mpanompo manahake ty tompo'e. Naho nitokave iareo hoe Belzeboba tompo-tragnoy, le ho raty lavitse zay vao ty hitokava'iareo ty isam-bavea'e.²⁶Naho zay areke ko matahotse aze nareo, fa tsy misy takogne tsy hiboake, raha mietake tsy ho fantatse. ²⁷Ze rehafeko ama'areo agnate ty maieke, le rehafo amy ty andro mazava, le ze bisibisike rei'areo an-tsofi'areo, le koho ambone tragno agne.²⁸Ko matahotse iareo mamono ty vatagne faie tsy afake mamono ty fagnahy. Fa matahora ze afake mamoteke ty fagnahy naho ty vatagne amy ty hakeo. ²⁹Tsy ho vola torotoro avao vao ty hamarotagne foly roe? Fa mbe tsy misy ndra raike lavo an-tane am'iareo io naho tsy misy ty fahalalan-dRae'areo.³⁰ Ndra ty volon-doha'areo aza ho voa isake abike. ³¹Ao soa tsy hatahotse. Manan-kasigne ambone o foly io nareo.³²Naho zay areke, ze kila magneke ahy amaso'ondaty, le ho ekeko ka agnatreha ty Raeko an-dagnitse agne.³³Fa ze mandietse ahike agnatreha ty ndaty eo, le handa aze ka raho agnatreha ty Raeko andagnitse agne.³⁴Ko mieretseretse laleke fa raho avy hinday fiadanagne amy ty tane toy. Tsy avy hinday fiadanagne raho fa antsy. ³⁵Fa avy raho hampisarake ty ana-dahy amy ty ra'e, naho ty anakampela amy ty rene'e, le ty vinanto ampela amy ty rafoza'e ampela.³⁶ Iareo ze antragno'e ao avao ro ho lasa fahavalo ty ondaty.³⁷Ze tea ty ra'e ndra ty rene'e mihoatse le tsy magneva ahike, le ze tea ty ana-dahi'e ndra ty anak'ampela'e mihoatse ahy le tsy magneva ahy. ³⁸Ze tsy mandrae ty hazofijalea'e tsy magnorike ahy le tsy magneva ahy. ³⁹Ze mamonje ty fiai'e le hahamotso zay. Ze mamoe ty fiai'e noho ty amako le hahatrea zay.⁴⁰Ze mandrae anareo mandrae ahy, le ze mandrae ahy mandrae ie nagnirake ahy.⁴¹ Ze mandrae ty mpitoky satria mpitoky reke le hahazo ty valesoa ty mpitoky, le ze mandrae ty ndaty to satria to vata'e reke le hahazo ty vale soa ty ndaty to.⁴²Ndra ia ndra ia magnomey ty raike amy iareo kede rey, ndra tie rano zinga raike ho nome'e aza, satria reke mpianatse, le ambarako ama'areo ty mnaregne fa, tsy ho motso ty valesoa'e.

11¹Naho fa niavy nampianatse i mpiana'e roambifolo lahy'i t'i Jesosy, le niala teo reke handeha hampianatse amy tana'iareoy agne.² Naho fa nirey i Jaona am-pigadragne ao ty momba ty asa i Kristy, le nagnafatse i mpiana'e rey reke,³ le rehake te hoe: "I rehe vao o raike hoavy zao, sa mbe handigne hafa zahay?⁴Jesosy namale te hoe: "Akia rehafo am'i Jaona ze trea'areo naho ze nirei'areo."⁵ Hahatrea ze goa, handeha ze kepeke, halio ze boka, haharey ze karegnegne, hijangan-kovelogne ty ndaty mate, le agnambarao talily soa ty tsy managne.⁶ Votsotse ze tsy voa tsikapy amy agnamako."⁷Mbe andalagney avao o lahilahy reo, le nagnambara ty mikasike i Jaona amy vahoake rey t'i Jesosy hoe: "Hagnete ino ty niala'areo ty agnefetse-volotara tiofe ty tioke agne? ⁸Faie hagnete ino ka ty niakara o lahilahy miakanjo akanjo lafo reo? Ingo, iareo miakanjo akanjo lafo le mitoboke antragno iareo mpanjaka ao.⁹Hagnete ino ty niakara'areo mpitoky? Eka, mirehake ama'areo raho, le mihoatse lavitse ambone ty mpitoky.¹⁰ Ie voasoratse zay te hoe: "Henteo, magnirake ty irako hiaolo ty tarehehe'areo raho, ie hamboatse ty làla'areo mioaolo anareo."¹¹Ambarako ama'areo ty tena maregne, fa am'iareo natera ty ampela tsy misy ambone i Jaona mpanao Batisa. Faie ty ndaty tsy manan-danja amy ty fanjaka ty lagnitse le bey ambone'e. ¹²Nanomboke tamy ty andro i Jaona mpanao Batisa hatra am'izao, le leveleve ty aly sarotse ty fanjaka ty lagnitse, le alae iareo mahery tsy atolo-tagnagne.¹³Fa iareo ze kila mpitoky naho ty lily le fa nitoky hatra am'i Jaona;¹⁴ le naho zoto areo ty hagneke zay, le i reke ro i Elia ho avy zao. ¹⁵Ze manan-tsofigne le mitsandregne aze.¹⁶Inogne ty hampitovizeko amy ty tarira toy? Zay le manahake ty ajaja mihisa antserna ey,mitoboke le mifampitoka ¹⁷mirehake te hoe: "Nitioke antsiva ho anareo zahay, fa tsy nitsinjake nareo. Nanao antsa fisaoragne zaha, fa tsy nitagny nareo."¹⁸Fa i Jaona tsy raha niavy hihinagne mofo ndra hinogne divay, le hoe ty natao iareo: "Misy kokolampogne reke."¹⁹ Ty ana ondaty niavy hihinagne naho hinogne le hoe ty atao iareo: "Henteo, lahilahy maiavetse naho mamolava reke, ragne iareo mpitake hetse naho iareo behakeo!" Fa ty fahendrea'e mbe tsarae ty asa'e."²⁰Avy eo t'i Jesosy nanomboke nisaontsy mafe iareo tanagne ze nanoa'e ty asa'e maro mahagaga, satria tsy nisoloho iareo.²¹ "Loza ho anareo, ry Korazina! Loza ho anareo, ry Betsaida! Natao à Tyra naho à Sidona agne o asa mahagaga atao ama'areo eto zao, le fa ela ty nisolohoa'iareo amy ty lamba fisaonagne naho lavenoke. ²²Faie tsy ho sarotse ty à Tyra naho à Sidona agne amy ty andro fitsaragna te zay ty anareo.²³areo, ry Kapernaomy, miehevetse vao nareo fa hasandratse andagnitse agne? Tsie zay fa handesegne agnate ty afo mirehetse agne nareo. Satria naho t'à Sodoma agne ty nanoagne o asa mahagaga atao ama'areo eto, le mbe tsy ho lefe zay mandrak'anito.²⁴ Faie magnambara ama'areo raho fa ho ty ey Sodoma amy ty andro fitsaragne te zay ty anareo."²⁵Tam'zay fotoagne zay t'i Jesosy nisaontsy te hoe: "Miantsa azo raho, Raeko, Tompo ty lagnitse naho ty tane, satria i rehe ro nagnetake raha io amy ty hendre naho ty mahilala, manahake o ajaja kedeo.²⁶ Eka, Raeko, satria zay le nampalio fo t'ampihaino'o eo. ²⁷Ze kila raha ampanoegne ahike le avy am'ie Raeko; tsy misy mahay ty anake naho tsy ty rae'e avao le tsy misy ka mahafantatse an-dRae'e naho tsy ty ana'e, naho ka ze nifilie ty anake hagnambara aze.²⁸Mandehana amako atoy, nareo ze miasa naho mitondra entagne mavesatse iabike, fa homeako fitofagne nareo. ²⁹Andeso ty jiogako le mianara amako, fa maleme arofo raho, le hahatrea faliovagne hakeo ty fagnahy areo. ³⁰Fa mora ty jogako, maivagne ty entako."

12¹Tam'izay fotoagne zay t'i Jesosy nagnavelo an-tanembarey amy ty andro sabata. Kere i mpiana'e rey le nihinagne voam-bare iareo.² Faie naho fa nitrea iareo Fariseo zay, le hoe ty natao iareo am'i Jesosy: "Henteo, manao raha tsy toko'e hatao amy ty andro sabata."³Le nisaontsy iareo t'i Jesosy te hoe: "Mbe tsy nivakie'areo vao ty raha natao i Davida, naho fa nimosare reke, naho iareo lahilahy nindre ama'e? ⁴Nizilike agnan-jomban'Andriagnanahare ao reke le nihinagne ze mofo tao, ndra tie raha tsy manandrife iareo ty toko'e hihinagne aze fa hoe ty mpisorogne avao.⁵Mbe tsy nivakie'areo vao ty lily ao, fa amy ty sabata o mpisorogne agnan-jomba ao reo ota amy ty sabata fa tsy manan-tahigne? ⁶Faie ambarako ama'areo fa eto i raike ambone naho ty anjombay.⁷Naho fanta'areo ty heve ty hoe: "Famindragne arofo ty irieko fa tsy sorogne, le tsy naito amy ty tsy manan-tahigne nareo.⁸ Fa ty ana'ondaty ro Tompo ty sabata."⁹Niala eo t'i Jesosy le nandeha amy ty synagoga iareo ao. ¹⁰Ingo, nisy lahilahy maleme tagnagne teo. Nagnontane i Jesosy o Fariseo reo, nanao te hoe: "Magnorike lily vao ty mitsabo amy ty sabata? mba hitsepaha iareo aze amy ty ota.¹¹Zao ty natao i Jesosy am'iareo hoe: "Ndaty ia ama'areo eo, ia, naho agnondry raike avao ty anagna'e, le naho latsake agnate lavake ao i agnondry amy ty andro sabata, le tsy hampiakatse aze boake ao? ¹²Tsy mana-kasigne mihoatse ty agnondry vao ty ndaty! A naho zay magnorike lily ty manao raha soa amy ty andrto sabata.¹³Avy eo le nikanjie i Jesosy i lahilahy hoe: "Ahitsio tagnaoy." Le nahitsi'e am'izay, le niafake ty faleme'e. ¹⁴Niakatse am'zay iareo Fariseo hivognogne ty hamono aze. Nipay hevetse ty hamonoagne aze iareo.¹⁵Naho fa niarofana i Jesosy raha zay, le niala ty eo reke. Ndaty maro ty nagnorike aze, le nitsangane'e iareo abike.¹⁶ Le nililia'e iareo tsy hampibeobeoke amy ty ndaty hafa,¹⁷ mba hahalefe, ze fa nambara tamy ty alala i Isaiah mpitoky, manao te hoe:¹⁸"Henteo, ty mpanompoko nifilieko, iareo mamiko, naliova ty arofoko. Hatoboko amy ty fagnahiko ao, le hitalily ty fitsaragne amy ty Jentilisa reke.¹⁹Tsy hifandietse, tsy hikorake reke, le tsy hisy ndaty hitsandregne ty feo'e ty an-dalagne ey.²⁰ Tsy hanapake ty volotara torotoro reke; tsy hamono ze lelan-jiro manetroke, mandra-panaova'e ty rare'e ho fandreseagne,²¹ le amy ty agnara'e ro hanagna'iareo Jentilisa fitàmagne."²²Avy eo nisy ndaty goa naho moagne, nipetraha ty kokolampogne, nandesegne am'i Jesosy eo. Nijangane'e reke, le nijangagne nahita naho nahay nirehake.²³ Latsa iareo vahoake vaky rehake hoe: "Hendra o lahilahy io ana i Davida zao?"²⁴Faie naho fa naharey fahagagagne zay iareo Fariseo, le zao ty natao iareo hoe: "O lahilahy io tsy mandroake kokolampogne naho tsy amy ty alala ie Belzeboba, bey ty kokolampogne.²⁵ Faie niarofana i Jesosy ty vetsevetse iareo le nisaontsy reke te hoe: "Ze kila fanjakagne mialy an-tragno le tsy ho ela rava, le ty tanagne ndra tragno mialy an-tragno le ho rava.²⁶Naho nandroake kokolampogne ty kokolampogne, le mialy an-tragno reke. Le akore am'izay ty hitsangana ty fanjaka'e?²⁷ Le naho mandroake kokolampo amy ty alala ty Belzeboba raho, le amy ty alala'ia zane ty handroaha ty ana'areo aze? A naho zay anto'e zay areke le ho mpitsara'areo iareo.²⁸Faie naho mandroake kokolampogne amy ty alala ty Fagnahin'Andriagnanahare raho, le fa avy ama'areo ty Fanjakan'Andriagnanahare.²⁹ Amy ty fomba manao akore ty hahafaha ty ndaty miditse an-tragno ty lahilahy mahery naho tsy rohizagne heke i lahilahy mahery'i? Avy eo le hangalake o fanagna'e reo an-tragno ao reke. ³⁰Ze tsy miomba ahike le manohetse ahike, ze tsy mitraoke mindre amako le mivibike.³¹A naho zay ambarako anareo fa, hovotsoran-kakeo ze kila ndaty amy ty hakeo'e naho ty firehafa'e raty, fa ty firehafagne raty amy ty Fagnahy Masigne le tsy hahazoagne fagnaliovagne hakeo.³² Ndra ia ndra ia mirehake manohetse ty ana'ondaty, le halio reke. Fa ndra ia ndra ia mirehake manohetse ty Fagnahy Masigne, le tsy halio hakeo reke, ndra am'izao fiaignagne zao, ndra amy ty ho avy ka.³³Anovo soa ty hatae le hamoa zay, anovo raty ka ty hatae le hamoa raty zay, fa fantatse amy ty voa'e ty hatae.³⁴ Nareo tarira ty menaragne, satria raty fagnahy nareo, le akore ty hahafaha'areo mirehake raha soa? Fa avy amy ty habey ty am-po'e ao ro irehafa ty vava'e.³⁵ Ty ndaty soa amy ty fanagnagne boake am-po'e ao le mamokatse ze soa, le ze ndaty raty amy ty fanagnagne raty boake am-po'e ao le mamokatse raty zay.³⁶Ambarako anareo fa amy ty andro fitsaragne le ho adignegne amy ty rehake tsy voa heve'e rineha'e abike ty ndaty.³⁷ Fa ty reha'o ro hagnamarenagne azo, le ty reha'o ka ro hiheloke anareo."³⁸Avy eo nisy mpanoratse lily naho Fariseo sasantsasa'e namale i Jesosy nanao te hoe: "O mpagnanatse te hahatrea famantaragne boake ama'o zahay."³⁹ Fa namale t'i Jesosy le nisaontsy te hoe: "Misy keleiagne raty fagnahy mipay famantaragne. Faie tsy misy famantaragne afake omegne aze naho tsy ty famantara i Jaona mpitoky.⁴⁰ Fa manahake i Jonah ie telo andro naho telo alegne tan-tro ty fiam-bey ao, le manahake zay ka ty hipetraha ty ana'ondaty telo andro naho telo alegne agnate ty tane ao.⁴¹Iareo ndaty i Ninive le hatsangagne amy ty fitsaragne eo mindre amy ty keleiagne tia le hiheloke zay. fa nisoloho iareo tamy ty talily natao i Jaona, le ingo, misy ndaty bey ambone i Jaona ty eto.⁴²Ty mpanjaka vave ty atimo le hindre hitsangagne am'iareo lahilahy ty keleiagne toy amy ty andro fitsaragne le hiheloke zay. Boake amy ty fara ty tane reke mba hijanjigne ty fahendrea i Salomona, le ingo, misy bey ambone i Salomona eto.⁴³Naho fa nisy fagnahy raty niala tamy ty lahilahy raike, le mandriogne tane traintraigne reke mipay fitsaragne, faie tsy mahatrea zay.⁴⁴ Izay le magnambara te hoe: "Hiheregne an-tragnoko agne raho." Naho fa niavy ao le nahatrea te fa nisy namafa i tragnoy malio naho milamigne.⁴⁵ Avy eo nandeha zay, nitondra fagnahy raty fito nindre tama'e raty mihoatse aze, le nindre nipetrake tao iareo. Avy eo niharaty mihoatse i fagnahy raty i lahilahy. Le hanahake zay ka ty amy ty keleiagne raty fagnahy tia."⁴⁶Am'i Jesosy mbe misaontsy amy vahoake rey, le indroagne, ty rene'e naho iareo rahalahi'e nijangagne, te hirehake ama'e.⁴⁷ Nisy ndaty raike nirehake ama'e hioe : "Vazoho, ty rene'o naho iareo rahalahi'o fa mijangagne an-tane ao mipay azo."⁴⁸Nivalea i Jesosy reke te hoe, "Ia ty reneko, le ia ty rahalahiko"?⁴⁹ Avy eo nahitsi'e am'o mpiana'e reo ty fita'e le nisaontsy te hoe: "Henteo, fa iareo toa ty reneko naho rahalahiko!⁵⁰ Fa ze manao ty zoto ty arofo ty Raeko an-dagnitse agne, le zay ndaty zay ro rahalahiko, naho rahavaveko, le reneko."

13¹Tam'izay andro zay t'i Jesosy niakatse ty an-tragno ao le niambesatse agnolon-dranomasigne ey. ²Nisy ndaty maro nivory nanao arikobogne aze, le niditse agnate sambo kede ao reke le niambesatse, fa i ndaty maro rey ro nijanogne agnolon-dranomasigne ey avao.³Avy t'i Jesosy nisaontsy raha am'iareo tamy ty alala ty fagnoharagne. Zao ty natao'e : "Ingo, nisy mpambole raike nandeha nitongy tahiry. ⁴Am'i reke nitongy igne, nisy nihintsagne an-dalagne ey tahiry'i, le tsinimotsimo ty vorogne.⁵ Ty ila'e nipoke amy ty tane feno vato, le tsy nahazo nofon-tane soa. Faie le avy le nitiry, satria tsy laleke taney. ⁶Fa naho fa nipiake i tarignandrokey le avy le nimate naho nalazo ka satria tsy nisy vaha'e.⁷Nipoke am-patikey ty ila i tahiry'i. Nitiry soa i fatikey satria nanjare zezeke i tahiry nipoke teoy. ⁸Ze tahiry nipoke an-tane soa ey nitiry le namoa voa soa sady nivokatse. ⁹Ze manan-tsofigne le mitsandregna soa."¹⁰Iareo mpianatse le nirehake i Jesosy hoe: "Nagnino rehe atao'o fagnoharagne ty saontsi'o amy vahoake reoo?" ¹¹Namale t'i Jesosy le nisaontsie'e iareo te hoe: "Nareo ro nameagne ty tena maregne amy ty fanjaka ty lagnitse, fa iareo tsy nameagne zay.¹² Satria ndra ia ndra ia managne, le ho bey ambone zay ty homegne. Fa ndra ia ndra ia ka tsy managne, ndra ze kele anagna'e aza hofongoragne ama'e.¹³Zay ty anto'e iarehafako ama'iareo amy ty fagnoharagne: Ndra tie magnente aza iareo, le tsy mahita, le ndra tie mitsandregne iareo tsy maharey, tsy misy raha rendre'e. ¹⁴Am'iareo ty toky i Isaia ro holefe, ie mirehake te hoe: "Naho fa mitsandregne le haharey nareo fa tsy haharendreke; naho fa magnente le hahatrea fa tsy hahafantatse.¹⁵Fa fempegna ty raha ty fo o vahoake reo, mafe sofigne iareo, akipe iareo ty maso'e am'izay tsy mahatrea ty mso'e, am'izay tsy maharey ty sofi'e, hihilia ty fo'e, le hisoloho ndraike ka iareo, le hagnasitragne iareo raho.¹⁶Fa sambatse ty maso'areo, satria mahatrea; ty sofi'areo satria maharey.¹⁷ Ambarako ama'areo fa maro iareo mpitoky naho ndaty maregne te hahatrea o raha trea'areo io fa tsy nahatrea. Nagniry ty haharey ka fa tsy naharey.¹⁸Ka mitsandregna soa eo amy ty fagnoharagne ty amy ty mpambole raike nitongy tahiry. ¹⁹Naho fa misy mitsandregne ty saontsy ty fanjakagne faie tsy maharendreke zay, le avy i raty'i hagnombotse ze fa tinongy agnate ty fo'e ao. Io i tahiry nipoke an-dalagney'i.²⁰I nipoke amy ty tane feno vatoy le iareo ndaty mitsandregne ty rehako fa le avy mandrae aze am-pifaleagne. ²¹Faie tsy mba avy am-piai'e fa mora rava. Naho fa Avy ty fijaleagne amy ty fagnenjehagne noho ty amy ty saontsy, le mitsikifotse malaky reke.²²I nipokw amy ty fatikey, io le iareo ndaty mitsandregne ty saontsy, faie ty taho ze kila tane naho ty fitake ty fanagnagne ro magnondevo aze, le manjare tsy mamoa reke. ²³Ze tinongy amy ty tane soa eo, io ro ndaty maharey i saontsy naho mandrae zay. Mamoa voan-katae reke le mahavy voa raike, hagnomey zato mihoatse ty nitongisegne, ty ila'e enem-polo, ty ila'e telo-polo mihoatse.²⁴Nanao fagnoharagne hafa ka tam'iareo t'i Jesosy. Zao ty natao'e: "Ty fanjaka ty lagnitse le manahake ty lahilahy raike nitongy tahiry amy ty tonda'e ao. ²⁵Fa naho fa niroro ty ndaty le niavy ty fahavalo'e nitongy voan-tsifarefare ka amy vare ey ey le nandeha. ²⁶Naho fa nitiry i varey le nivokatse, le nitiry nindre ama'e avao ka i voan-tsifarefarey²⁷Niavy iareo mpiasa ty tompon-tane le nirehake ama'e te hoe: "Ragnandria, tsy nitongy vare antane'o ao vao reheo? Nagninogne reke am'zao misy voan-tsimparefare?"²⁸ Le hoe ty natao'e: "Nisy fahavalo nanao zay." Le zao ty natao iareo mpiasa hoe: "Zoto vao ty hiava'ay iareo io? "²⁹I tompon-taney nirehake hoe: "Aha'e. Satria naho ava'areo o tsimparefareo, le miombotse ka ty vaha o vare mitiry mindre ama'e eo. ³⁰Angao avao hindre hitiry iareo mandram-pijinjagne. Amy ty andro fijinjagne le hirehake amy ty mpijinja raho te hoe: "Afaho heke ze ahetse raty le avorio raike horoagne, fa o vareo ro ataovo an-drihako ao."³¹Avy eo t'i Jesosy nanao fagnoharagne hafa am'iareo. Zao ty natao'e: "Ty fanjaka ty lagnitse manahake ty voatsinampy nalae ty lahilahy le tinongi'e an-tonda'e ao. ³²O voa io ty voa fara'e kede amy ze kila voa. Fan naho fa mitiry le manjare hata bey midoroboke. Manjare hata bey, hipetraha ty vorogne le amboara'e tragno ty rantsa'e."³³Avy eo t'i Jesosy nisaontsy fagnoharagne hafa. Ty fanjaka ty lagnitse manahake ty lalevay nalae ty ampela raike nafangaro'e agnate ty lafarina intelo ty fagnaranagne ao."³⁴Fagnoharagne ro nagnambarà i Jesosy ze kila raha amy ty vahoake, le tsy nisaontsy ndra ino ndra ino am'iareo akoatse ty fagnoharagne reke. ³⁵Zay ty mba hahalefe ty nambara tamy ty alala ty mpitoky, naho fa nirehake reke hoe: " I raho hirehake amy ty alala ty fagnoharagne. Hagnambara ze kila raha naetake tamy ty fiforogna ze kila tane raho."³⁶Avy eo t'i Jesosy niala ty amy vahoake rey eo nizilike an-tragno. Nandeha ama'e eo mpiana'e rey, le nirehake te hoe: "Hazavao ama'ay ty mikasike i voa tsimparefare ty tonday."³⁷ Namale t'i Jesosy le nisaontsy te hoe: "Ze mitongy tahiry soa le i ana'ondaty'i.³⁸ Ty tonda le ze kila tane, ty tahiry soa, iareo ro ana ty fanjakagne. Ty tsimparefare le iareo ana ty raty,³⁹ ty fahavalo nitongy iareo le i kokolampo. Ty fijinjagne le amy ty fara ze kila tane, le ty mpijinja iarei anjely.⁴⁰A naho zay areke, manahake ty famoriagne o tsimparefare horoagne amy ty afo, ro atao amy ty fiafara ty tane toy.⁴¹ Hagnirake o anjeli'e reo ty ana'ondaty, le havory hiala amy ty fanjaka'e ze kila raha minday hakeo, naho ze manao raty ka. ⁴²Hatora iareo agnate ty afo mirehetse ao iareo, le hisy ty fitagniagne naho ty fangitsy ty nife.⁴³ Avy eo hamiratse manahake ty masoandro agnate ty fanjaka ty Rae'e iareo ndaty maregne. Ze manan-tsofigne mitsandregna.⁴⁴Ty fanjaka ty lagnitse manahake ty fanagnagne natao an-driha. Nisy lahilahy nahatrea zay le nambine'e. Nandeha amy ty hafaleagne reke, navaro ze kila raha nanagna'e, nivily o riha io. ⁴⁵Ty fanjaka ty lagnitse ka le manahake ty lahilahy mpivarotse mipay voangy lafo vily.⁴⁶ Naho fa nahatrea voangy raike lafo vily reke, le nandeha novarotse ty fanagna'e hivilianagne zay.⁴⁷Ty fanjaka ty lagnitse le manahake ka ty harato nalefa agnate ranomasigne agne, le mampikadake ze kila raha managne aigne ao. ⁴⁸Naho fa feno zay le nitarihe iareo mpagnarato agnolo i ranomasigney ey. Avy eo iareo nipetrake, le namike ze nilaegne, ze tsy nilaegne naria iareo.⁴⁹Hanahake zay ty amy ty fiafara ty tane toy. Hoavy iareo anjely le hamike ty raty fagnahy amy ty ndaty maregne.⁵⁰ Hatora iareo agnate ty afo mirehetse misy fitagniagne naho fangitsigna ty nife ao iareo io.⁵¹Azo'areo vao raha iabike zao? Zao ty natao mpiana'e rey tama'e hoe: "Eka."⁵² Avy eo t'i Jesosy nirehake am'iareo hoe: "A naho zay areke, ze mpanoratse lily iabike nanjare mpianatse amy ty fanjaka ty lagnitse le hanahake ty lahilahy raike tompon-dragno, magnakatse ze raha fa ela naho ty raha mbe vao amy ty fanagna'e ao." ⁵³Avy eo naho fa nahavita io fagnoharagne io t'i Jesosy, le nagnavelo am'izay reke.⁵⁴Avy eo t'i Jesosy niditse amy ty tane'e ao le nampianatse iareo vahoake amy ty synagoga'iareo ao. Voka izay le nivarenehake iareo le nirehake te hoe: "Boake aia ty nahazoa ty lahilahy toy ty fahendrea'e naho o fahagagagne reo? ⁵⁵Tsy o lahilahy io vao ana i mpandrafitsey? Tsy i Maria vao ty agnara ty rene'e? Tsy i Jakoba, i Josefa, i Simona, le i Jodasy vao ty rahalahy'e? ⁵⁶Tsy mindre amantika vao ty rahavave'e? Le boake aia ro nahazoa'e o raha zao abike?"⁵⁷Heje iareo vintagne reke. Le hoe ty natao i Jesosy tam'iareo: "Tsy misy mpitoky tsy misy haja'e naho tsy amy ty firenena'e naho ty longo'e marine aze avao."⁵⁸ Tsy nanao fahagagagne tao reke satria atao iareo tsy maregne.

14¹Tam'izay fotoagne zay, i Heroda mpanjaka naharey ty vaovao momba i Jesosy. ²Le zao ty natao'e amy ndevo'e rey: "I Jaona mpanao batisa zay, nivanon-kovelogne reke. A naho zay areke le miasa ama'e o hery reo."³Nampitsepahe i Heroda t'i Jaona, le nalefa'e am-pigadragne agne noho i Herodiasy, valy i Filipo rahalahi'e.⁴ Fa zao ty natao i Jaona tama'e hoe: "Tsy magnorike ty lily ho azo ty managne azo ho vali'o."⁵ Nagniry te hamono aze t'i Heroda, faie nataho o vahoake reo satria niraese iareo manahake ty mpitoky reke.⁶Fa naho fa niavy ty andro tsingerengeregne niteraha i Heroda le nitsinjake agnivo ty ambahiny maro niavy eo ty anak'ampela i Herodiasy, nalio fo avao am'izay t'i Heroda. ⁷Ho vale izay, le nampitamà tamy ty fiaiagna'e reke fa ze angatahe'e amy ty fiaigna'ele homei'e ndra ino ndra ino.⁸Naho fa niavy nitoroan-dRene'e hevetse, le zao ty natao'e: "Omeo ahike eto, ambone ty finga, ty loha i Jaona mpanao Batisa."⁹ Nikoretse ty fiay i mpanjaka noho i fangataha'ey, faie noho ty raha fa nampitama'e le nimegnatse i ambahiny maro nihinagne ama'e, le nagnomey baiko reke fa toko'e ho vita zay.¹⁰Nagnirake ty hanapake ty loha i Jaona am-pigadragne agne reke. ¹¹Avy eo natao am-pinga nameagne i ajaja ampelay le nandese'e aman-drene'ey am'zay. ¹²Avy eo niavy mpiana'e rey, nangalake fatey, le nandevegne. Le avy eo nandeha nitalily i Jesosy iareo.¹³Le naho fa naharey zay t'i Jesosy le niale ty amy samboo kede eo nagnavelo amy ty tane bangigne. Naho fa naharey zay iareo vahoake, le nandeha tomboke nagnorike aze boake amy ty rova bey agne. ¹⁴Avy eo t'i Jesosy nandeha aloha iareo eo le nahonigne ndaty maro. Niferegn'arofo iareo reke le nijangane'e ze marare.¹⁵Naho fa nihalegne, le namonje aze iareo mpiana'e le nirehake te hoe: "Tane bangigne ty etoy, fa tsofotse ka i androy. Ampolio ndaty reo mba hivily ty hane iareo."¹⁶Fa i Jesosy nisaontsy iareo te hoe: "Tsy mila mandeha lavitse iareo. Ameo'areo raha hohanegne iareo." ¹⁷Le zao ty natao iareo tama'e: "Mofo dime naho fiagne roe avao ty anagna'e ay eto." ¹⁸Zao ty natao i Jesosy hoe: "Andeso amako etoy zay."¹⁹Avy t'i Jesosy nikanjy i vahoake rey mba hipetrake ambone boka ey. Nalae'e i mofo dimey naho i mofo roey. Nivazoho mban-dagnitse agne, nisaotse reke naho le nanapake i mofoy nimei'e i mpiana'e rey, le mpiana'e rey ka t'i mizara amy ndaty maroy.²⁰ Nihinagne iareo le nivontsigne. Avy eo navory iareo ze tsy nilany le mbe nahafeno roambifolo harogne.²¹ Dime arivo lahy eo iareo te nihinagne tsy amy ty ajaja naho ty ampela.²²Avy eo le avy le nampijogne'e an-tsambo kede ey mpiana'e rey mba hitsake hiaolo lalagne aze, amy ty reke mbe nandefa i vahoake rey. ²³Tafara nandefasa'e o vahoake reo, le nandeha ambohitsey reke hivavake. Naho nihalegne i androy le i reke rery ty tey. ²⁴I samboy nahelakela i ranomasigne lavitse satria nisy tioke nandietse iareo.²⁵Tamy ty halegne faha efatse amy ty fiambenagne le namonje iareo t'i Jesosy, nagnavelo ambone ranomasigne ey. ²⁶Naho fa nahatrea aze nagnavelo ambone ranomasigney mpiana'e rey, natahotse le nivaky rehakle te hoe: "Kotokigne io," le nikorakorake iareo amy ty tahotse. ²⁷Fa i Jesosy nisaontsy iareo te hoe: "Ko matahotse fa raho avao toy."²⁸Namale aze t'i Petera le nanao te hoe: "Ragnandria, naho te i rehe vata'e io, ampamonjeo azo ey raho." ²⁹Hoe t'i Jesosy: "Avia magnantogna." Le niala i sambo kedey t'i Petera namonje aze nandeha ambone i ranomasigney. ³⁰Fa naho fa nahatrea i tiokey t'i Petera le natahotse. Naho fa nanomboke nilipotse ka le nihiake mafe reke te hoe: "Ragnandria, avoto raho!"³¹Nahitsy i Jesosy i fita'ey, nitagne i Petera, le nisaontsy reke te hoe: "Ihe osa finoagne fa magninogne rehe matahotse?" ³²Avy eo t'i Jesosy naho i Petera nandeha namonje i Sambo kedey, le nanomboke nijanogne ka i tiokey. ³³Avy eo iareo mpiana'e niantsa i Jesosy le nirehake te hoe: "I rehe vata'e ro anak'Androagnahare."³⁴Naho fa nitsake iareo le niavy an- tamboho à Genesareta. ³⁵Naho fa nahafantatse i Jesosy iareo lahilahy i tanagney, le nitalily amy ze faritse, le nandese iareo ama'e eo ze ndaty narare. ³⁶Nangatake ama'e iareo mba hahafaha'iareo mikasike ty rambon-tsarimbo'e avao, maro ty nikasike zay le nijangagne.

15¹Avy eo nisy Fariseo naho mpanoratse lily sasatsasa'e boake Jerosalema agne namonje i Jesosy. Hoe ty natao iareo:² "Nagnino o mpiana'o reo i mandika ty fomban-draza iareo ndaty bey io? Fa tsy manasa tagnagne iareo vaho mihinagne."³ Namale reke le nisaontsy am'iareo hoe: "Nagnigno ka eo nareo mandika ty lilin'Andriagnanahare noho ty fomban-draza'areo io?"⁴Fa Andiagnanahare nisaontsy hoe: "Iasio ty rae'o naho ty rene'o, le ze mirehake raty ty ra'e ndra ty rene'e, le ho mate vata'e." ⁵Fa nareo mirehake te hoe: "Ndra ia ndra ia mirehake amy ty rene'e hoe: "Ndra ino ndra ino fagnampeagne azo areo boake amako le ho sesehaitse hoan'Andriagnanahare am'izao," ⁶ze ndaty zay tsy mila magnaja ty ra'e. Am'izay fomba zay nilika'areo ty lilin'Andriagnanahare amy ty tombotsoa'areo amy ty fomban-draza'areo.⁷Ry soa miatreke! Maregne ty faminania i Isaia mikasike anareo, naho nirehake reke hoe: ⁸"Ty vahoake toa magnaja ahy am-bava'e fa ty fo iareo lavitse ahike. ⁹Tsy misy dika'e ty fiantsa iareo ahy, satria iareo mampianatse ty lily ondaty velogne manahake ty fampianara iareo."¹⁰Avy eo nikanjy vahoake ho ama'e eo reke le nisaontsy tam'iareo hoe: "Mitsandregna le maharendreha. ¹¹Tsy ze miditse am-bava ty ndaty ro mandoto ty ndaty. Fa ze miboake boake ao ro mandoto ty ndaty."¹²Avy eo nagnantogne iareo mpianatse le nirehake tam'i Jesosy hoe: "Arofana'o vao fa tohigne iareo Fariseo naho fa maharey saontsi'o zao?" ¹³Namale t'i Jesosy le nisaontsy te hoe: "Ze raha mitiry tsy nambolen-dRaeko an-dagnitse agne le ho fongoragne abike.¹⁴ Angao avao iareo ho eo, iareo mpitarike goa. Naho misy goa raike mitarike goa ka, le sambe hivarigne an-davake ao iareo roe."¹⁵Namale ka t'i Petera le nirehake am'i Jesosy hoe: "Tsakoreo ama'ay fagnoharagne zay." ¹⁶Hoe ty natao i Jesosy hoe: "Tsy mahihitse ka vao nareoo?" ¹⁷Tsy hai'o vao fa ze atao am-bava mizilike an-troke le ariagne amontogne?¹⁸Fa ze raha miboake amy ty vava le boake amy ty fo. O raha reo ro mandoto ty ndaty raike. ¹⁹Fa avy amy ty fo ro iboaha ty sain-draty, ty vono ndaty, ty fanaovagne raha raty, ty fanaovagne ndaty aivo tsy maregne, le ty firehafagne raty. ²⁰O raha reo ro mandoto ty ndaty raike. Fa ty mihinagne amy ty tagnagne tsy misasa tsy mandoto ty ndaty raike.²¹Avy eo t'i Jesosy niheregne nagnavelo amy ty tane i Tyro naho i Sidona agne.²² Ingo, nisy ampela Kananita raike am'izay faritse zay. Nitoka mafe reke hoe: "Mamindra arofo amako, Ragnandria, ana i Davida! Hisae ty kokolampon-draty ty anako ampela." ²³Fa tsy namale i reha'ey t'i Jesosy. Namonje aze iareo mpiana'e le nirehake te hoe: "Roaho reke, fa mikorakorake amantika."²⁴Namale t'i Jesosy le nisaontsy hoe: "Tsy nirahegne ho an'ia raho fa nirahegne hoe ze agnondry motso amy ty tarira i Israely." ²⁵Avy nangatake ama'e eo reke le niantognogne nanao hoe: "Ragnandria vonjeo raho." ²⁶Namale reke le nanao te hoe: "Tsy rara'e naho alaegne ty mofon'ajaja le atorake hoe ty amboa."²⁷Zao ty natao'e: "Eka, Ragnandria, fa ndra o amboa zao le mbe mihinagne ty potepoten-kanegne tsy ry ty tompo'e." ²⁸Le namale t'i Jesosy nisaontsy te hoe: "O rakembao, bey loatse ty finoa'o, le ho lefe ama'o abike ze irie ty fo'o." Le nijangagne i anak'ampela'ey.²⁹Niala eo t'i Jesosy le nagnavelo agnila i Ranomasy ty Galilia. Avy eo niakatse amy ty vohitse raike reke le niambesatse teo. ³⁰Ndaty maro ty namonje aze. Nandese iareo mindre am'iareo ty kepeke, ty moagne, ty goa, ty kitsa, le ze kila marare hafa ka. Napetra iareo am-pandia i Jesosy eo iareo; le nijangane'e. ³¹Le nigaga iareo vahoake naho fa nahatrea moagne rey nirehake, ty kepeke nitsoritike, ze nigoa nahatrea. Niantsa ty Andriagnanahare Israely iareo.³²Nikanjy iareo mpiana'e mba hamonje aze t'i Jesosy le nisaontsy te hoe: "Maferegne arofo o vahoake reo raho, satria fa ho telo andro zay ty nindreza iareo hipetrake amantike eto fa tsy managne raha ho hanegne. Tsy te hampandeha iareo tsy mihinagne raho tsy ho toragne an-dalagne ey." ³³Zao ty natao iareo mpiana'e: "Aia ty hahitava'ay mofo hahampe iareo amontogne atoy?" ³⁴Zao ty natao i Jesosy am'iareo: "Fire ty mofo ama'areo agne?" Le zao ty natao iareo: "Fito, le fiagne kede maromaro." ³⁵Avy eo t'i Jesosy nikanjy iareo vahoake mba hipetrake.³⁶Nandrae i mofoy naho i fiagney reke, naho fa nisaotse, vinaki'e i mofoy le natolo'e mpiana'e rey. Iareo mpianatse nizara hoe iareo vahoake. ³⁷Nihinagne le nianjagne i vahoake rey. Avy eo iareo nangalake harogne fito nasiagne ze tsy lany. ³⁸Iareo nihinagne tam'izay efatsarivo lahy eo, tsy amy ty ajaja naho ty ampela. ³⁹Avy eo nampolie i Jesosy vahoake rey le naondragne amy ty sambo kede le nandeha amy ty faritse à Magadana agne.

16¹Niavy iareo Fariseo naho Sadoseo le nitsoke hevetse aze le nangatake ama'e mba hanao famantaragne boake an-dagnitse agne. ²Fa reke namale le nisaontsy iareo hoe: "Naho fa ho hariva, le hoe nareo: 'Ho soa ty andro fa mena i lagnitsey.'³Naho fa maraindraigne le hoe nareo: "Ho raty ty andro, fa mena naho milopoke ty lagnitse.' Hay areo ty mamantatse ty tarehe i lagnitsey, fa nareo tsy afake maharendreke ty famantara i fotoagney. ⁴Ty tarira ze be hakeo mipay famantaragne, faie tsy hisy famanataragne homeigne aze akoatse ty famantara i Jaona." Avy eo t'i Jesosy nagnavelo.⁵Naho fa avy nitsake iareo mpianatse, le nihaligno iareo ty nitondra mofo. ⁶Zao ty natao i Jesosy am'iareo hoe: "Miambena amy ty besirasira iareo Fariseo naho Sadoseo." ⁷Nialy hevetse iareo mpianatse le vaky rehake te hoe: "Va'e tika tsy ninday mofoy zay." ⁸Arofana i Jesosy zay le nisaontsy reke: "Nareo kede finoagne, nagnino nareo ro mialy hevetse ama'areo le mirehake te va'e nareo tsy nitondra mofo zay?⁹e tsy rendre'areo avao vao i mofo dime nihane ty dimearivo lahy'i, le fire harogne ka ty tsy nilany? ¹⁰I mofo fito nihane ty efatsarivo, le fire harogne ty sisa tsy nilany?¹¹Inogne tsy ahafantara'areo te tsy mikasike mofo ty raha rehafeko ama'areo? Miambena amy ty besirasira iareo Fariseo naho Sadoseo." ¹²Zay vaho nihay iareo te tsy amy ty besirasira mofo ty rehafegne am'iareo, fa hiambegne soa amy ty fampianara iareo Fariseo naho Sadoseo.¹³Le naho fa niavy amy ty faritse agnila i Kaisaria-filipo t'i Jesosy, le nagnontane iareo mpiana'e reke te hoe: "Atao ndatio ho ia moa ty ana'ondaty? ¹⁴Hoe ty natao iareo: "T'ila'e manao te i Jaona mpanao batisa, i Elia ka hoe t'ila'e, i Jeremia hoe ty hafa ka, ty raike amy mpitoky reo abike hoe t'ila'e." ¹⁵Hoe ty natao'e am'iareo: "Zao areke, ia ka raho hoe nareo?" ¹⁶Namale t'i Simona Petera te hoe: "I rehe Kristy, ana ie Andriagnanahare velogne."¹⁷Namale aze t'i Jesosy hoe: "Votsotse rehe Simona Bar-Jaona, fa tsy nofotse ty nanoro zay azo fa ie Raeko an-dagnitse agne. ¹⁸Ambarako azo avao ka fa i rehe ro Petera, ho vatolampy hagnoregnako ty fiangonako. Ty lalam-bein-dolole tsy haharesezay.¹⁹Homeiko anareo ty fagnahy ty fanjaka ty lagnitse. Ndra ino ndra ino fehe'o an-tane etoy le hofehegne an-dagnitse agne, le ndra ino ndra ino vaha'o an-tane etoy le hovahagne an-dagnitse agne ka." ²⁰Avy eo t'i Jesosy nandily iareo mpiana'e tsy hampibeobeoke te ie o Kristy zao.²¹Tam'izay fotoagne zay t'i Jesosy nanomboke nisaontsy iareo mpiana'e fa tsy maintsy ho à Jerosalema agne reke, hiaretse fijaleagne an-tagna iareo mpisorogne naho iareo mpanoratse lily, ho vonoegne, le hatsangagne amy ty andro faha telo. ²²Avy eo t'i Petera nangalake aze, le nirehake mafe ama'e hoe: "Lonike ho lavitse azo zay Ragnandria." ²³Nitolike t'i Jesosy le nisaontsy te hoe: "Magnalavira ahy ry kokolampo! I rehe le hanikambatse ahike, amy ty tsy fidarea'o o rahan'Andriagnanahare eo, fa ty raha ty ndaty avao."²⁴Avy eo t'i Jesosy Nisaontsy tam'iareo mpiana'e hoe: "Naho misy te hagnorike ahy, le tsy maintsy mandietse ty vata'e reke hitondra i hazonajaley, le magnorike ahy. ²⁵Fa ndra ia ndra ia te hamonje ty fiai'e le hahamotso aze, fa ndra ia ndra ia hamoe ty fia'e noho ty amako, le hahazo zay. ²⁶Fa inogne heke ty ho soa hoe ty ndaty mahazo ze kila tane faie namoe ty fiai'e? Inogne ty homey ty ndaty hatakalo ty fiai'e?²⁷Ty ana'ondaty le ho avy amy ty volonahen-dRae'e mindre am'iareo anjeli'e. Avy eo iareo hamale soa ty ndaty amy ty raha natao'e. ²⁸Ambarako am'areo ty tena maregne, fa misy am'areo mitsangagne eto tsy hitsapa ty fahafatesagne mandra-pahita'iareo ty ana'ondaty toly amy ty fanjaka'e."

17¹Enegn'andro tafara atoy le nangalake i Petera, i Jakoba, naho i Jaona rahalahi'e nindre tama'e, le nandese'e ambohitse ey iareo. ²Niova tarehe aloha'iareo teo reke. Namiratse manahake i androy ty tarehe'e, le namiratse nanahake ty fipela o mazavao ty sarimbo'e.³Ingo, ingo niboake am'iareo t'i Mosesy naho i Elia nirehake tama'e. ⁴Namale t'i Petera le nirehake am'i Jesosy hoe: "Ragnandria, soa ho antika ty eto, hamboatse tragno telo eto raho naho zoto ty arofo, ho azo ty raike, hoe i Mosesy ty raike, le hoe i Elia ty raike."⁵Am'i reke nbe nirehakey, ingo, nisy rahogne mazava nandrongogne iareo, le ingo, nisy nirehake agnate rahogne ao, nanao te hoe: "Intoy ty anake teako,mamiko, atokisako vata'e. Janjigno reke." ⁶Naho fa nirey i mpianatsey zay, le nitota iareo nifoy vorombelogne. ⁷Avy eo nihezegne i Jesosy nikasihe'e le nisaontsie'e te hoe: "Ko matahotse fa mitsangana." ⁸Avy eo niandra miagnambone iareo le tsy nahita akoatse i Jesosy.⁹Naho fa nizotso boake ambohitsey iareo, le nandily iareo t'i Jesosy nanao hoe: "Ko mampibeobeoke ze raha nihita'areo ndra am'ia ndra am'ia mandram-pitsangana ty ana'ondaty amy ty mate."¹⁰ Nagnontane aze iareo mpiana'e te hoe: "Nagnino o mpanoratse lily io ie mirehake fa tsy maintsy i Eliah heke ty ho avy io?"¹¹Namale t'i Jesosy le nisaontsy te hoe: "Ho avy vata'e t'i Elia le haregne ze kila raha amy ty hisoa'e. ¹²Faie ambarako anareo, fa avy t'i Elia, fa iareo ro tsy mahafantatse aze. Mifanipake am'izay, nanao ty ze kila raha tea'iareo hatao ama'e iareo. Le manahake zay avao ka, ty ana'ondaty le hijale an-tagna'iareo eo. ¹³Avy eo le nifanta iareo mpianatse fa misaontsy ty momba i Jaona mpanao Batisa reke.¹⁴Naho fa niavy am'i vahoake rey eo iareo, le nisy lahilahy raike namonje aze, nandohaleke aloha'e eo, nirehake hoe,¹⁵ "Ragnandria, amindrao arofo ty anadahiko fa voa ty andro raty le mijale mafe. Mitota agnate afo naho rano avao reke. ¹⁶Nandeseko am'iareo mpiana'o fa tsy nijanga'iareo."¹⁷Namale t'i Jesosy le nisaontsy hoe: "Ry tarira tsy mpino naho sdimba fagnahy, mandrak'ombia ro toko'e hijanognako ama'areo eto? Mandrak'ombia ty tsy maintsy hioreako mindre ama'areo? Andeso amako etoy rele." ¹⁸Nikanjy mafe i kokolampogney t'i Jesosy le nisoike reke, jangagne i ajajalahy'i.¹⁹Natola'iareo mpiana'e t'i Jesosy le nirehafa iareo te hoe: "Nagnino zahay tsy naharoake ingeo?" ²⁰I Jesosy nisaontsy iareo hoe: "Ty hakele ty finoa'areo. Fa ambarako anareo ty tena maregne, naho managne finoagne ndre te ie hoe ty voa kidikidike aza nareo, le afake mirehake ty vohitse toy nareo te hoe: "Mifindrà eroy le mifindra reke, le tsy hisy raha tsy hohai'areo hanoegne.²¹ [Fagnamarenagne: Ty dikan-drehake soa taloha le tsy ahitagne te hoe. 21." Fa ty kokolampogne toy le tsy mete ho roahegne naho tsy mindre amy ty vavake naho fifaliagne hanegne."]²²Naho fa nipetrake à Galilia agne iareo, le hoe t'i Jesosy tam'iareo mpiana'e: "Ty ana'ondaty le hatolotse an-tagna ty ndaty,²³ hovonoe iareo, faie hatsangagne amy ty andro fahatelo reke." Ndra nahaferenaigne iareo mpiana'e.²⁴Naho fa niavy à Kaperinaomy agne iareo, le nandeha agnila i Petera eo i lahilahy namory haga an-tsasa ty sekely le nirehake te hoe: "Tsy mandoa ty haga antsasa ty sekely vao ty mpampiana'areo io?"²⁵ Hoe ty nata'e: "Eka." Fa naho fa niditse an-tragno ao t'i Petera, le i Jesosy heke ty nisaontsy ama'e hoe: "Ino ty vetsevetse'o, ry Simona? Iareo mpanjaka an-tane etoy, boake am'ia ty andraesa'iareo haga ndra haga'ondaty? Avy am'iareo vahoa'e vao sa avy am'iareo ambahini'e?"²⁶Naho fa nirehake t'i Petera hoe: "Avy am'iareo ambahiny," Hoe t'i Jesosy tama'e: "Le votsotse amy ty fandoavagne zay vao iareo vahoake. ²⁷Fa mba tsy hahabehakeo ty mpitake haga, le mandehana an-dranomasigne agne manoraha vitagne agne, le alao ze fiagne miboake voaloha'e. Naho fa voa soka'o ty vava'e, le hahita sekely rehe. Alao zay le omeo iareo mpamory haga ho ahy naho ho azo."

18¹Tam'izay fotoagne zay avao le niavy am'i Jesosy eo mpiana'e rey le nirehake te hoe: "Ia ty bey amy ty fanjakagne an-dagnitse agne?" ²I jesosy nikanjy anak'ajaja ho ama'e eo, nametrake aze am'iareo eo, ³le nisaontsy hoe: "Ambarako anareo ty tena maregne, fa naho tsy miova manahake o ajajao nareo, le tsy hisy hevetse ty hidira'areo amy ty fanjaka ty lagnitse agne.⁴A naho zay areke, ndra ia ndra ia miambane manahake ty ajaja toy le bey vata'e amy ty fanjaka ty lagnitse agne le ho bey amy ty fanjaka ty lagnitse agne.⁵ Ndra ia ndra ia mandrae ajaja kede hoe tone amy ty agnarako le mandray ahike. ⁶Fa ndra ia ndra ia mahavy ty raike am'o ajaja reo mino ahike hanota, le magneva aze ty ho rorofagne o falilio amy ty vozo'e.⁷Loza hoe ty tane toy noho ty fotoagne fanaintsaignagne! Fa soa ty ahavia zay fotoagne zay, faie ho loza amy ty ndaty iavia i fotoagne zay! ⁸Naho mahavy hakeo ama'o ty tagna'o ndra ty tombo'o, le tapaho afaho ama'o. Fa ndra aleo kepeke naho don-tagnagne amy ty fiaignagne tsy misy fahatampera'e toy zay ho motso amy ty afo mirehetse tsy mete mate amy ty fanagne tagnagne roe naho tomboke roe.⁹Naho miterake hakeo ho azo ty maso'o raike, le afaho. Aleo toka-maso miditse amy ty fiaignagne tsy misy fara'e toy zay managne maso roe fa miditse amy afo mirehetse tsy mete mate.¹⁰Ao soa tsy hatao areo ambanen-draha ty ajaja kedekedeke. Fa magnambara ama'areo raho fa an-dagnitse agne iareo anjeli'e le magnente avao ty tarehe ty Raeko ie an-dagnitse agne. ¹¹[Fagnamarenagne: Ty dikan-drehake soa taloha le tsy ahitagne ty rehake hoe: "Fa ty ana'ondaty le avy mba hagnavotse ty motso."]¹²Inogne ro vetsevetse'areo? Naho misy managne agnondry zato, mandeha amy ty lalagne diso ty raike am'iareo, le tsy hienga ty sive amby sivampolo an-tamboho ey vao reke le handeha hipay i raike nandeha amy ty lalagne disoy?¹³ Naho hita zay, le ambarako anareo ty tena maregne, fa mirebeke mihoatse noho iareo sive ambi-sivampolo tsy nandeha amy ty lalan-diso reke. ¹⁴Manahake zay avao ka, tsy zoto ty arofon'Andriagnanahare ty hahamotso ty raike am'areo kede reo.¹⁵Naho diso ama'o ty rahalahi'o, mandehana ambarao aze ty haota'e, nareo ndroroe avao. Naho mitsandregne azo reke, le hiheregne ndraike ty filongoa'areo.¹⁶ Faie naho tsy mitsandregne azo reke, le angalao mpizaka raike ndra roe hafa mindre ama'o, am'izay mba amy ty vava'iareo ndaty aivo roe ndra telo ty hahafantaragne ty maregne amy ze kila rehake.¹⁷Naho mbe mandietse ty hitsandregne iareo reke, le ambarao amy ty fiangonagne ty raha misy. Naho mbe tsy mete hitsandregne ty fiangonagne reke, le apoho reke hanahake o jentilisao naho mpitake hagao.¹⁸Ambarako am'areo ty tena maregne, ndra ino ndra ino fehe'areo an-tane etoy le ho fehegne ka an-dagnitse agne; le ndra ino ndra ino votsora'areo an-tane etoy le havotsotse ka an-dagnitse agne. ¹⁹Le mbe ambarako anareo avao hoe: "Naho misy roe ama'areo mete amy ze raha angatahe'iareo, le homeigne iareo zay amy ty alala ty agnaran-dRaeko an-dagnitse agne.²⁰ Fa ndre aia misy roe telo mivory amy ty agnarako, le ho agnivo iareo eo raho."²¹Avy eo namonje i Jesosy t'i Petera le nirehake te hoe: "Ragnandria, impire diso amako ty rahalahiko te ho votsorako ty helo'e? Hatra im-pito vao?"²² I Jesosy nisaontsy aze te hoe: "Tsy mirehake ama'o raho te im-pito, fa hatra amy ty fitom-polo im-pito.²³Naho zay areke ty fanjaka ty lagnitse le mitovy amy ty mpanjaka raike te hifandamigne ara-bola am'iareo ndevo'e. ²⁴Naho fa manomboke ty fandaharagne reke, le nisy ndevo raike nandesegne ama'e eo ie anagna'e songo ray alegne.²⁵ Faie tsy nanagne raha hanoloa'e aze reke, le nandily ty haamarotagne aze naho ty keleia'e mindre amy ze kila fanagna'e, le ho vita ty fandoavagne i trosay.²⁶Noho zay le niondreke i ndevoy, le niantognogne aloha'e eo, le nirehake te hoe: "Ragnandria, managnà faharetagne amako, le haloako abike raha'oy." ²⁷Nahaferenaigne i tompo'ey reke le nafaha'e tsy nampandoave'e i trosay.²⁸Niakatse am'izay reke le nahatrea ty ndevo manahake aze ka, nanagna'e trosa ka. Nitsepahe'e reke, niraese'e am-bozo'e eo, le rineha'e: "Aloavo i trosakoy." ²⁹Nibotreke i ndevo mitovy ama'e ey le nangatake ama'e hoe: "Lignaso heke le aloako iabike."³⁰Faie nandietse i ndevo voaloha'ey. Mifamotetse am'izay , nandeha reke le nigadra'e i ndevo raikey mandram-pandoava'e i trosa'ey. ³¹Naho fa nitrea o ndatio ty raha natao'e, le nikoretse ty fiay iareo. Nambara'iareo amy ty tompo'e ze kila raha natao'e nitrea iareo.³²Avy eo tinoka ty tompo o ndevo io reke, le nirehafe'e te hoe: "I rehe ndevo raty fagnahy, nangako trosako tama'oy satria rehe nangatake amako. ³³Tsy toko'e havale'o ty ndevo manahake azo ka vao zay, nanahake ty namindrako fo tama'o?"³⁴Vignitse i tompo'ey le nandefa aze hampijalegne mandram-pandoa'e ze kila trosa tama'e. ³⁵Manahake zay avao ka ty hataon-dRaeko an-dagnitse agne ama'areo."

19¹Naho nahavita o saontsy reo t'i Jesosy, le nagnavelo à Jodia ie tane andafe ty rano i Jordana niala ty à Galilia agne reke. ²Vahoake maro ty nagnorike aze, le nitsabo iareo tagne reke.³Namonje aze iareo Fariseo, nitsapa aze, nirehake ama'e hoe: "Mete amy ty lahilahy vao ty misarake amy ty vali'e noho amy ze kila anto'e? " ⁴Namale t'i Jesosy le nisaontsy te hoe: "Tsy vinaki'areo vao fa i reke namboatse aze am-boaloha'e le natao'e lahy naho vave?⁵I reke namboatse iareo le nisaontsy ka hoe: 'Fa noho zay anto'e zay le hienga ty rene'e ty naho ty ra'e ty ajalahy hitambatse amy ty vali'e, le hanjare ho nofotse raike iareo?' ⁶Le tsy ho roe sasa iareo, fa ho nofotse raike. Ze natamban'Andriagnanahare, ao soa tsy hisy hampisarake.⁷Zao ty natao iareo tama'e: "Nagninogne zane t'i Mosesy ie mandily anay hagnomey taratasy fagnamarenam-pisarahagneo, le avy eo mampoly aze?"⁸ Zao ty natao'e am'iareo: "Ty tsy hamete'areo volagnegne ro namotsora i Mosesy anareo hisarake amy ty vali'areo, fa ty taloha tsy zay ty fomba. ⁹Ambarako anareo, ndra ia ndra ia misarake amy ty vali'e, akoatse ty fanova'e raty mampirafe, le hanambaly hafa, le manitsakitsa-baly; le ze lahilahy manambaly ampela fa avy nisarake amy ty vali'e le manan-tahy."¹⁰Iareo mpianatse nirehake tam'i Jesosy hoe: "Naho zay ty fomba ty lahilahy amy ty vali'e, le tsy soa ty manambaly." ¹¹Le nisaontsy am'iareo t'i Jesosy hoe: "Tsy ze kila ndaty ro handrae fampianaragne zao fagnanaragne zao, fa iareo ze natao handrae avao.¹² Misy iareo fa naterake hahazo, misy iareo hahazo ze natao'ondaty, misy iareo manao ty vata'e hahazo noho ty fanjaka ty lagnitse. I reke ze afake mandrae zao fagnanaragne zao, le mandraesa aze."¹³Avy eo nisy anak'ajaja nandesegne ama'e eo hotsofe'e rano, le nirehake mafe iareo iareo mpianatse. ¹⁴Le zao ty natao i Jesosy: "Apoho'areo o ajajao, ko raragne naho fa mamonje ahy, satria ty fanjaka ty lagnitse natao hoe ty manahake iareo."¹⁵ Nitsofe'e rano i ajajarey le nagnavelo reke.¹⁶Ingo, nisy lahilahy namonje i Jesosy le nirehake te hoe: "O mpagnanatse inogne ty raha toko'e hataoko mba hahazoako ty fiaignagne tsy misy fahatampera'e?"¹⁷ Nisaontsy ama'e t'i Jesosy: "Nagninogne reheo ie magnontane ty mikasike ze raha soa amako? Raike avao ty soa, fa naho te hiditse amy ty fiaignagne tsy misy fara'e rehe miambena soa amy ty lily."¹⁸Zao ty natao i lahilahy'i hoe: "Lily inogne?" Hoe t'i Jesosy: "Ko mamono ndaty, ko manao sata raty, ko mangalatse, ko mete ho ndaty aivo amy ty tsy maregne,¹⁹ hajao ty ra'o naho ty rene'o, le teavo ty longo'o manahake ty vata'o."²⁰Le niorehake ama'e i ajalahy'i te hoe: "Fa nataoko abike zao Ragnandria. Inogne ty mbe tsy ampe amako?"²¹ Nisaontsy ama'e t'i Jesosy hoe: "Naho magniry ty ho to vata'e rehe, le mandehana, avaroto ze anagna'o, omeo ze tsy managne, le hanagne hareagne an-dagnitse agne rehe; avia mbetoa, oriho raho." ²²Fa naho fa naharey ty saonty i Jesosy i ajalahy'i, le niala amy ty habosehagne satria mpagnarivo reke.²³Zao ty natao i Jesosy amy mpiana'e rey: "Ambarako anareo ty tena maregene, sarotse amy ty mpagnarivo ty hiditse amy ty fanjaka ty lagnitse.²⁴ Le mbe ambarako anareo avao ka, ndra mbe mora ty hidira i rameva amy ty voly ty fanjaitse te zay ty hidira ty mpagnarivo amy ty fanjakan'Andriagnanahare."²⁵Naho fa naharey zay iareo mpianatse, nivarenehake le nirehake hoe: "Ia zane ty afake ho avotse amy ty fagnavotagne?"²⁶ Nivazoho iareo t'i Jesosy le nisaonty hoe: "Ama'ondaty le tsy fantatse ty hanoagne zay, fa am'Andriagnanahare ze kila raha mete atao aby."²⁷ Namale t'i Petera le nirehake te hoe: "Hehake, nanga'ay ze kila raha le nagnorike azo zahay. Inogne areke ty ho azo'ay?"²⁸Nisaontsy iareo t'i Jesosy hoe: "Ambarako ama'areo ty tena maeregne, amy ze fotoagne vaovao naho fa mitoboke amy ty seza'e ty ana'ondaty, le hitoboke amy ty seza'e ka ty roambifolo nagnorike ahy, hitsara iareo foko roambinifolo i Israely.²⁹Ze kila ndaty nienga tragno, rahalahy, rahavave, rae, rene, anake, ndra tane noho ty amy ty agnarako, handrae zato mihoatse le handova ty fiaignagne tsy misy fahatam-pera'e. ³⁰Fa maro iareo te ho voaloha'e le manjare ho fara'e, ty fara'e manjara voaloha'e.

20¹Ty fanjaka ty lagnitse manahake ty tompon-tane nagnalegnalegne hikarama mpiasa hoe ty tonda'e. ²Naho fa niletake iareo le denaria raike isan'andro ty karama iareo, le nalefa'e à tonda'e agne mpiasa rey.³Nandeha magneno akoho ka reke le nahatrea mpiasa haja nitsangatsangagne an-tsena ey. ⁴Zao ty natao'e am'iareo: "Nareo ka, mandehana à tondako agne, le ze an-keve'e maregne le homeko anareo." Le nandeha niasa iareo.⁵Mbe niboake ndraike reke toko'e tamy ty lera faha enegne naho faha sive, le mbe nanahake zay avao ka. ⁶Tamy ty lera faha raike ambifolo mbe niakatse ndraike reke le mbe nahita mpiasa nitsangatsangagne. Zao ty natao'e am'iareo: "Nagnino nareo mitsangagne eto le lomogn'andro avao io?" ⁷Zao ty natao iareo ama'e: "Tsy misy ndaty mampikarama anay." Zao ty natao'e am'iareo: "Mandehana à tondako agne ka eo nareo."⁸Naho fa nihalegne ty andro, le nirehake amy ty fehe'e i tompo i tonday hoe: "Tokavo mpiasa rey, le aloavo ty karama'iareo, boake am-boaloha'e hatra ampara'e." ⁹Naho fa niavy i mpiasa nalaegne amy ty lera faha raike ambifoloy, le nahazo derania kiraikiraike iabike iareo. ¹⁰Naho fa niavy iareo mpiasa voaloha'e, le nieretseretse fa hahazo ambone mihoatse zay ty ey iareo, a tie ndra nitovy avao aby aia ty nomeigne iareo, derania kiraikiraike avao ka.¹¹Naho fa nahavoarae ty karama'e iareo, le nitoreo am'i tompon-taney iareo. ¹²Zao ty natao iareo: "Iareo mpiasa niavy afara niasa lera raike avao, faie le nampitovioze'o ama'ay avao iareo, zahay trà mae trà manintsy nipaike an-tarign'androkey."¹³Namale i tompon-taney le nirehake amy ty raike am'aireo hoe: "O ragnetse tsy manao raha raty ama'o raho. Tsy derania raike vao ty nifagnarahantika?¹⁴ Raiso ze azo le oriho ty lala'o. I raho ty nandahatse ty karama iareo mpiasa niavy afara hitovy amy ty anareo avao.¹⁵Tsy hanagne zo handahatse ty rahako vao raho? Sa tsy tea'areo fa matarike raho?¹⁶ Le ze fara'e ho voaloha'e, le ze voaloha'e ho fara'e." [Fagnamarenagne: Ty dikan-drehake soa taloha le magnafake te hoe: "Maro ty tokavegne fa tsy ampe ty voafily."]¹⁷Naho fa hagnavelo ho à Jerosalema agne t'i Jesosy, le nalae'e ho agnila'e eo iareo roambifolo lahy, le nisaontsy am'iareo an-dalagne ey reke hoe:¹⁸ "Handeha ho à Jerosalema agne tika, hatolotse am'iareo loha ty mpisorogne naho iareo mpanoratse lily ty ana'ondaty. Iareo ty hamono aze.¹⁹ Le hanolotse aze am'iareo jentilisa hatao tsikike, ho jeragne, le hipeke aze amy ty fantsike amy ty hazonajale. Fa amy ty andro faha telo le hitsangagne ndraike reke."²⁰Avy eo ty rene ty anadahy i Zebedio namonje i Jesosy nindre am'i anadahi'ey. Nandohaleke aloha'e ao iareo le nangatake raha boake ama'e. ²¹Zao ty natao i Jesosy tama'e: "Inogne ty irie'o?" Namale reke hoe: "Mandilia ty hipetraha ty anadahiko roe toa, ty raike amy ty fita'o ankavia, ty raike amy ty fita'o havana, amy ty fanjaka'o ao."²²Namale aze t'i Jesosy nisaontsy hoe: "Tsy fanta'areo ty raha angatahe'areo. Mahatante ty fampijaleagne hatao ahike vao nareo?" Namale iareo hoe: "Mahatante zahay." ²³Zao ty natao'e am'iareo hoe: "Hiaretse ty fijaleako vata'e eo nareo. Fa ty hitoboke an-tagnako havana naho havia tsy raho ty mandahatse aze, fa i Raeko." ²⁴Naho fa naharey zay iareo mpianatse folo lahy hafa, le niboseke tam'iareo mpirahalahy roe.²⁵Nikanjie i Jesosy ho ama'e eo iareo, le nisaontsie'e hoe: "Fanta'areo fa iareo mpandily iareo jentilisa le hanindry iareo, iareo ajalahy mahry iareo le hanao bokosoroke am'iareo.²⁶ Fa tsy toko'e hanahake zay ty am'areo. Mifanohetse am'izay, ndra ia ndra ia mitognom-batagne ho loha'areo le tsy maintsy ho mpanompo'areo,²⁷ le ndra ia ndra ia te ho voaloha'e le tsy maintsy ho mpanompo'areo,²⁸ manahake ty ana'ondaty tsy avy ho tompoegne, fa hanompo, le hagnomey ty fiai'e ho vily ty fagnavotagne ty maro."²⁹Naho fa niala ty à Jeriko agne iareo, le ndaty maro ty nagnorike aze. ³⁰Nisy ajalahy roe goa nitoboke agnolon-dalagne eo . Naho fa naharey te mandriogne t'i Jesosy le nikorake hoe: "Ragnandria ana i Davida, amindrao arofo zahay."³¹ Nasiaha i vahoake rey iareo, le rineha iareo mba hitsigne, faie tsy nimete iareo fa nagnonjogne ty toka avao hoe: "Ragnandria ana i Davida, amindrao arofo zahay,"³²Nijanogne t'i Jesosy kinanji'e iareo le nisaontsy reke hoe: "Inogne ty irie'areo hataoko ama'areo?"³³ Zao ty natao iareo ama'e: "Ragnandria, te hahatrea ty maso'ay." ³⁴Avy eo t'i Jesosy, niferegn'arofo, le tsinapa'e ty maso'iareo. Avy eo nahatrea ty maso iareo le nagnorike aze.

21¹Naho fa niavy à Jerosalema agne t'i Jesosy naho iareo mpiana'e le nagnavelo à Betifaga ao, ambohy i Oliva ey, le nagnirake mpianatse roe t'i Jesosy, ²nirehake am'iareo hoe: "Mandehana amy vohitse ao zay, naho fa avy ao nareo le hahatrea boriky mirohy naho ty ana'e mindre ama'e. Hahao iareo le andeso amako atoy.³ Naho misy masiake ama'areo ty am'zay, le rehafo te: "Misy ipaiava i Tompo aze, le avy le hindre ama'areo ka reke hanese aze."⁴Le nisy aby zao mba hahalefe ty nambara iareo mpitoky. Zao ty natao'e:⁵ "Agnombarao ty anakampela i Ziona te hoe: "Ingo ty mpanjaka'o mamonje azo, miambane le andesegne amy ty boriky-ana-boriky lahi'e."⁶Nandeha iareo nirahegne le nanao ze raha nagniraha i Jesosy iareo. ⁷Nandese iareo i ampondray naho i ana-boriky le nisafora iareo lamba iareoy, le niambesatse amboe'ey t'i Jesosy. ⁸Ty maroa i vahoakey le nandafike ty lamba'e an-tane abike, t'ila'e nanampake rantsan-katae le nafeno iareo i lalagney.⁹Iareo vahoake nagnorike i Jesosy le nihorentsegne te hoe: "Hosana hoe ty ana i Davida! Davida! Isaoragne ie avy boake amy ty agnara i Magnitse! Hosana hoe ie andindimonegne agne."¹⁰ Naho fa niditse à Jerosalema agne t'i Jesosy, le nihorentsegne iareo tanan-draike te hoe: "Ia ioo?"¹¹ Namale i lahy alegne nindre ama'ey hoe: "I Jesosy reke ie mpitoky boake à Nazareta agne à Galilia agne."¹²Avy eo nagnavelo agnanjomban'Andriagnanahare ao t'i Jesosy. Nabaratsia'e ze kila mpivarotse naho mpivily tagnate'e tao, navalitsikota'e abike ty lataba iareo mpanakalo vola naho ty fipetraha iareo mpivarotse voromahilala.¹³ Zao ty nato'e am'iareo: "Voasoratse fa: "Ty anjombako le natao ho anjomba fivavahagne,' faie ndra atao'areo vala firerererea ty kidabolahy."¹⁴ Avy eo le nisy goa naho kepeke namonje aze agnanjoban'Andriagnanahare ao le nijangane'e abike.¹⁵Naho fa nahatrea ty fahagagagne natao'e ty ndaty bey mpisorogne naho iareo mpanoratse lily, naho fa nirey iareo ty ajaja kedekede nikorake agnanjomban'Andriagnanahare ao hoe: "Hosana hoe ty ana i Davida," le niboseke iareo. ¹⁶Le zao ty natao iareo tama'e: "Rei'areo vao raha rehafe o ndaty zao?" Namale iareo t'i Jesosy hoe: "Eka! Mbe tsy nivakie'areo vao ty hoe: 'Boake amy ty vava ty ajaja naho ty mbe minono ty hanaova'areo ty fideragne?"¹⁷ Avy eo niala ty eo t'i Jesosy le nagnavelo amy ty tana i Betania le niambesatse tao amy ty andro halegne raike.¹⁸Naho fa naraindraigne niheregne antanagne agne reke, le nimosare. ¹⁹Nahonigne aviavy tandalagney reke fa le nirave'e avao fa tsy misy voa'e. Zao ty natao'e tama'e: "Ao soa tsy hisy voa'e rehe hatrampara'e," le avy le niforehetse i aviavy'i.²⁰Naho fa nahatrea zay iareo mpianatse, latsa iareo le nirehake te hoe: "Akore ty leavy le nahamaike i aviavy?"²¹ Namale t'i Jesosy le nisaontsi'e iareo te hoe: "Ambarako ama'areo ty tena maregne, naho managne finoagne, naho tsy misalasala nareo, le tsy ze nata'o am'i aviavy io avao ro hata'areo ama'e, fa ndra tie hirehake amy ty vohitse toy aza hoe: 'miavota le mihorodoboha an-dranomasigney,' le hatao zay.²² Ndra ino ndra ino angatahe'areo am-bavake, am-pinoagne, le hoazo'areo."²³Naho fa niditse an-tempoly ao t'i Jesosy, le namonje aze ty bey mpisorogneo naho ty zoke ondaty am'i reke mampianatse le nirehake aze te hoe: "Fahefagne boake aia moa ty anaova'o raha manahake rey, le ia ty magnome azo fahefagne zay?" ²⁴Namale t'i Jesosy le nisaontsy am'iareo te hoe: "Homeako fagnontaneagne raike ka nareo. Naho ambara'areo amako, le hambarako ama'areo ty fahefagne anoako raha manahke rey.²⁵Ty batisa i Jaona, boake aia ty niavia'e? Boake an-dagnitse agne sa boake ama'ondaty? Nialy hevetse iareo nanao te hoe: "Naho ataontika te hoe boake an-dagnitse agne, hirehake amantika reke te hoe: "Le nagnino nareo tsy mino azeo?"²⁶ Fa naho mirehake tika te hoe: "Boake ama'ondaty", matahotse o vahoakeo tika, satria iareo mandrae i Jaona ho mpitoky." Le namale i Jesosy iareo hoe: "Tsy fanta'ay."²⁷ Le zao ty natao'e am'iareo: "Tsy hirehake ama'areo ka raho te hoe boake aia fahefagne anoako raha manahake rey io."²⁸Akore ty heve'areo? Nisy lahilahy raike managne anadahy roe. Nandeha am'i raike zoke'ey agne reke le nanao te hoe: "O kahe, akia miasà atonda agne rehe ty anito." ²⁹Namale aze i anadahi'ey te hoe: 'Tsy ho agne raho," Avy eo niova hevetse reke le nandeha. ³⁰Avy eo nandeha am'i raike zai'ey agne reke le nagnirake aze ka. Namale reke le nirehake te hoe: 'Eka baba, hoagne rahpo,' faie tsy nandeha agne reke.³¹Ia am'i ana'e roe reo ty nanao ty zoto ty arofon-dra'e? Le namale iareo hoe: "I raike voaloha'ey." Nisaontsy am'iareo t'i Jesosy hoe: "Ambarako ama'areo fa iareo mpitake haga naho iareo mpijangajanga le hiditse amy ty fanjakan'Andriagnanahare aloha'areo.³² I Jaona namonje anareo tamy ty fahamaregnagne, fa tsy nino aze nareo. Fa iareo mpitake haga naho mpijangajanga nino aze. Fa nareo, ndra tie nahita zay aza, le tsy nibebake sady tsy nino aze.³³Tsandregno ty fagnoharagne raike hafa toy. Nisy lahilahy raike, managne tane. Nanao tonda reke, le nifahera'e, le nihalia'e lavake hagnoregna'e tilikambo, le nampagnofa'e iareo mpambole. Avy eo nandeha amy ty tanagne hafa reke. ³⁴Naho fa narine i fotoagne famokaragney, le nagnirake mpiasa'e rey ho an-tondagne hangalake voka'ey reke.³⁵Ndra tsinepa i mpambole rey i mpiasa'ey, tsinera'e ty raike, vinono'e ty raike, le mbe tinora'e vato ka ty raike. ³⁶Le mbe nandefa mpiasa hafa ka i tompo-taney, maro naho tamy voaloha'ey, fa le mbe nampanahafe iareo zay avao ka.³⁷ Tafara zay le nagnirake ty anadahy'e henka'e handeha ho agne, le nirehake te hoe: "Hagnaja an-janako iareo."³⁸Fa naho fa nahatrea i anadahi'ey iareo mpambole, le nifampirehake iareo te hoe: "intoy ro mpandova, andao hovonoentika reke le halaentika i lovay." ³⁹A naho zay areke, le tsinepa iareo reke, natorake agnate tonda ao, le vinono.⁴⁰Le naho fa niavy ty tompo-tane, inogne ty hatao'e am'iareo mpambole?⁴¹ Le zao ty natao'e am'iareo hoe: "Ho zamane'e iareo ndaty nahavany loza, avy eo hampagnofa'e mpambole hafa ka i tonda'ey, ndaty hagnomey aze ty anjara vole'e amy ty fahavokara'e."⁴²Jesosy nisaontsy am'iareo te hoe: "Mbe tsy namaky talily masigne vao nareoo te hoe: 'Ty vato naria ty mpagnoregne tragno ro nanjare vato fehizoro. Boakr am'i Tompo zay, le mahagaga amy ty masontika'?⁴³A naho zay, amabarako anareo, hafahagne ama'areo ty fanjakan'Andriagnanahare le hatolotse hoe iareo firenena ze mamokatse voa'e reo. ⁴⁴Ndra ia ndra ia ho alavo o vato io le ho potepoteke. Le ze hitota'e ho torotoro."⁴⁵Naho fa naharey o fagnoharagne reo ty bey mpisorogne rey naho iareo Fariseo, le fanta'iareo fa mirehake ty momba iareo.⁴⁶ Le nivetsevetse ty hitsepake aze, faie natahotse vahoake rey iareo, satria niraese'iareo maro ho mpitoky reke.

22¹Nagnohatse am'iareo ndraike t'i Jesosy, nanao te hoe: ²"Ty fanjaka ty lagnitse le manahake ty mpanjaka magnombara amy ty engavao ty anadahy'e . ³Nagnirake ty ndevo'e hiatreke i engavaoy reke, fa tsy niavy iareo.⁴Nandefa ty ndevo'e ila'e hafa ka ty mpanjaka nanao te hoe: "Agnombarao iareo te hoe: "Henteo, fa nikarakarako ty sakafoko. Fa vinono ty agnombe naho ty agnondry, le fa vita aby ze kila raha. MIavia amy fanoagne engavaoy ao,"⁵Faie tsy nahoa iareo le nadeha iareo, ty raike nandeha niarak'agnombe, ty hafa nandeha nivaroste. ⁶T'ila'e nitsepake i ndevo mpanjaka rey, nagnala baraka iareo, le namono iareo. ⁷Vignitse i mpanjakay le nagnirake miaramila'e rey, le namono iareo mpamono ndaty naho le nagnoro ty tana'e ka.⁸Avy eo nirehake am'iareo ndevo'e reke hoe: "Fa vogno'e i engavaoy, fa iareo nagnombaragne tsy niavy. ⁹A naho zay areke mandehana agnarabey ey le agnombara'areo ze kila ndaty trea'areo ey hiatreke ty engavao toy."¹⁰ Nandeha agnarabey ey am'zay iareo ndevo le nitoka ze ndaty nitrea iareo ey, ndra soa ndra raty. Le niampo ndaty i tragno bey fanoagne engavaoy.¹¹Fa naho fa niditse hagnente iareo ambahiny t'i mpanjaka le nahita ndaty raike tsy ninday akanjo findesegne amy ty engavao. ¹²Nirehake ama'e t'i mpanjaka hoe: "O ragnetse akore ty hidira'o ato i rehe tsy ninday akanjo findesegne amy ty engavao toy?" Fa tsy nahareheke i lahilahyi.¹³Avy eo nirehake am'iareo ndevo'e ty mpanjaka hoe: Asio taly an-tomboke naho an-tagnagne ty lahilahy toy, le atoraho an-tane agne reke, agne ty misy fitagniagne naho fisokira-nife." ¹⁴Fa ndaty maro ty nagnombaragne, faie tsy ampe ty ho voa fily.¹⁵Avy eo niomagne ty hamandrihagne i Jesosy amy ty raha nisaontsie'e iareo Fariseo. ¹⁶Avy eo nirahe iareo hombama'e mbeo iareo mpiana'iareo, le nidre tamy ty Herodiana. Nirehake am'i Jesosy iareo te hoe: "O mpagnanatse fanta'ay fa ndaty maregne rehe, le mampianatse ty lalan'Andrignanahare amy ty maregne. Tsy midare ty heve ty hafa rehe, faie tsy mandeha ila ka. ¹⁷Aie zao, ambarao anay ty heve'o? Magnorike lily vao ty fandoavagne haga am'i Kaisara agne sa tsy mete?"¹⁸Faie arofana i Jesosy ty faharatia iareo le nitsontsie'e hoe: " Inogne itsapa'areo ahy io ry soa miatreke? ¹⁹Atoro ahy ty farantsa amy ty haga." Avy eo ninday derania ama'eo iareo.²⁰Zao ty natao i Jesosy am'iareo: "An'ia ty sare naho agnaragne tia?" ²¹Nirehake ama'e iareo hoe: "E'i Kaisara." Avy eo nisaontsie i Jesosy iareo hoe: "Ameo i Kaisara ze aze, ameo an'Andriagnanahare ze an'Andriagnanahare." ²²Naho fa naharey zayy iareo le nilatsa naho le nandeha.²³Am'io andro io avao ty Sadoseo ila'e, iareo nirehake te tsy misy havagnonam-belogne ty fa mate, nimbama'e mbeo. Nagnontane aze iareo ²⁴nanao ty hoe: "O mpagnantse i Mosesy nirehake te hoe: 'Naho mate ty ndaty, tsy managn'anake, le toko'e hanambaly ty rahalahy ty vali'e le hiterake hoe ty rahalahi'e.²⁵Nisy mpirahalahy fito. Nanambaly ty voaloha'e fa nimate naho niavy eo. Mate tsy nanagne tiry, nanga'e hoe ty rahalahi'e ty vali'e. ²⁶Nanao raha manahake zay avao ka i faharoey, le mbe nanahake zay avao ka ty fahatelo, hatra amy ty fahafito le mbe nanahake zay avao ka. ²⁷Nimate i ampelay naho fa tafara atoy. ²⁸Amy ty fivagnonam-belo'e ia ty hanambaly aze am'iareo mpirahalahy fito? Fa fananambaly aze aby iareo."²⁹Namale iareo t'i Jesosy nisaontsy te hoe: "Diso nareo, satria tsy mahafantatse ty soratse masigne naho ty herin'Andrignanahare.³⁰ Fa amy ty fivagnonan-kovelogne tsy hifanambaly iareo, tsy homeagne engavao ka. Faie mitovy am'iareo anjely an-dagnitse agne.³¹Fa ty momba ty fahavagnonam-belogne, mbe tsy nivakie'areo vao ty nisaontsien'Andriagnanahare am'areo, manao te hoe: ³²"Iraho ty Andriagnanahare i Abrahama, Andriagnanahare i Isaka, Andriagnanahare i Jakoba"? Andriagnanahare tsy Andriagnanahare ty mate fa ey ty velogne." ³³Naho fa naharey zay ndaty maro rey le nivarenehake amy ty fampianara'e.³⁴Naho fa nirey iareo Fariseo ty nampitsigna i Jesosy iareo Sadoseo, le nindre nivory iareo.³⁵ Ty raike am'iareo, mpahay lily, nametrake fagnontanegna ama'e, nitsoke ty fagnahi'e hoe:³⁶ "O mpagnatse, ino ty lily ambone agnate ty lily ao?"³⁷Nisaontsy ama'e t'i Jesosy te hoe: "Teavo amy ty fo'areo vata'e, amy ty fagnahi'areo vata'e, amy ty sai'areo vata'e ty Tompo Andriagnanahare'areo."³⁸ Izay ty lily zoke'e ambone ze fa lily.³⁹Ty lily faharoe le mbe manahake zay avao: 'Teavo manahake ty vata'o ty longo'o naho ty ndaty tanan-draike ama'o.'⁴⁰ Am'io lily roe io ty iankina ze kila dina naho iareo mpitoky."⁴¹Amy Fariseo reo mbe mivoryi, le nagnontane iareo t'i Jesosy. ⁴²Zao ty nato'e: "Inogne ty vetsevetse'o momba i Kristy? Anadahy'ia reke?" Nirehake ama'e iareo te hoe: "Ana i Davida."⁴³Zao ty natao i Jesosy am'iareo: "A nanao akore i Davida miambesatse amy ty Fagnahy masigne ao ie mitoka aze hoe Tompo, manao te hoe: "Ty Tompo nisaontsy tamy ty Tompoko hoe: ⁴⁴"Miantoera an-tagnan-kavanako eo mandram-panoako ty fahavalo'o ho fipetraha ty tombo'o."⁴⁵A i Davida aza mitoka i Kristy hoe: 'Tompo,' le akore ty maha ana i Davida aze?"⁴⁶ Tsy nisy nahavale aze tamy ty saontsy, lelia'e tsy nisy ka ty nametrake fagnontaneagne hafahafa ama'e tam'izay andro zay.

23¹Nisaontsy tam'i vahoakey naho iareo mpiana'e rey t'i Jesosy. ²Zao ty natao'e: "Iareo mpanoratse lily naho iareo Fariseo le nipetrake amy ty fitoera i Mosesy.'³ A naho zay ndra ino ndra ino handilia iareo anareo hatao, anovo ze raha zay le mitaoa am'iareo. Ao soa tsy hangalatahake ty raha atao iareo, satria iareo mirehake raha faie tsy atao'e.⁴Eka, fehe'iareo ty enta-mavesatse sarotse andesegne, le apo iareo ambone ty soro ty ndaty. Tsy raha mba hagnetse ty tagna'iareo iareo hitondra aze fa le mitorogn'hasigne avao. ⁵Ty anoa iareo ty asa iareo le atao mba ho trea'ondaty. Atao iareo malalake ty filakitera'e, le itare iareo ty moro ty akanjo'e.⁶Tea iareo ty toera ty manan-kaja naho itoa ty raha ivoriagne naho ty fiambesara ty bey amy ty synagoga,⁷ naho ty fanalamagne miavake an-tsena ey, le mba ho tokave ty ndaty hoe: "Raby."⁸Nareo tsy tokavegne hoe: "Raby," raike avao ty mpagnanatse anareo, le mirahalahy nareo iabike. ⁹Ao soa tsy hitoka ty ndaty an-tane etoy ho rae'areo, fa raike avao ty Ra'areo, an-dagnitse agne reke. ¹⁰Ao soa nareo tsy ho mete hotokavegne hoe: "Mpagnanatse,' fa raike avao ty mpagnanatse anareo, le i Kristy.¹¹Fa ze mitognom-batagne ho bey loatse ama'areo ro ho ndevo'areo. ¹²Ndra ia ndra ia miteha-tratra ho ambone le ho ambane reke zay, ndra ia ndra ia miambane le hasandratse ho ambone.¹³Loza ho anareo ry mpanoratse lily naho nareo Fariseo, soa miatreke! Fa arindri'areo amy ty ndaty ty fanjaka ty lagnitse. Nareo fa tsy bmampiditse ty vata'areo le mbe tsy anga'areo ka ze te hiditse.¹⁴ [Fagnamarenagne: "Ty taratasy taolo tsy nahitagne ty hoe: 'Loza ho anareo ry mpanoratse lily naho nareo Fariseo, soamiatreke! Mandany ty tragno ty miveitegna, le mbe manao vavake lavarene ka nareo. Zay ty hahazoa'areo heloke bey hagnoro anareo.']¹⁵ Loza ho anareo ry mpanoratse lily naho nareo Fariseo, soa miatreke! Fa mandeha mitety ty ranomasigne naho ty tane toy nareo mba hagnoveove ndaty raike, naho fa miova reke, le atao'areo anan-kakeo ambone areo reke.¹⁶Loza ho anareo ry mpitarike goa, mirehake te hoe: "Ndra ia ndra ia mititike amy ty tempoly, le tsy misy vara'e zane. Fa ndra ia ndra ia mititike amy ty volamena ty tempoly, le ho fehe ty havelo'e reke." ¹⁷Nareo goa gege! Ia ty bey vata'e, ty volamena sa ty tempoly manao ty volamena ho masigne?¹⁸Le, ndra ia ndra ia mititike amy ty alitara, le tsy misy vara'e zay. Fa ndra ia ndra ia mititike amy ty fisaoragne ambone io, le ho fehe ty havelo'e reke. ¹⁹Nareo ndaty goa! Ia ty bey to vata'e, ty fisaoragne sa ty alitara manao ty fisaoragne ho masigne?²⁰A naho zay areke, ze mititike amy ty alitara, le mititike ama'e naho amy ty raha ambone'e eo ka. ²¹Ty raike mititike amy ty tempoly, le mititike ama'e naho amy ty mipetrake ama'e ao,²² le ty raike mititike amy ty lagnitse, le mititike amy ty seza fiambesaran'Andriagnanahare naho ama'e.²³Loza ho anareo ry mpanoratse lily naho nareo Fariseo, soa miatreke! Fa mandoa ty fahafolo ty solila naho ty aneta le ty komina nareo, faie tsy nanao to ty raha mavesatse vata'e nareo amy ty famindragne arofo naho ty finoagne. Io ty toko'e ho natao'areo le tsy toko'e hisy tsy ho vita ndra ty raike. ²⁴Nareo mpitarike goa, nareo manivagne laletse faie ndra mitelegne rameva!²⁵Loza ho anareo ry mpanoratse lily naho nareo Fariseo, soa miatreke! Fa fotsia'areo ty voho ty kapoake naho ty finga, faie ty agnate'e ao feno fitsiririagne naho filagne.²⁶ Nareo fariseo goa! Fotsio heke ty agnate ty kapoake naho ty finga, le mba hanjare madio ka ty voho'e.²⁷Loza ho anareo mpanoratse lily naho fariseo, soa miatreke! Fa nareo mahake o kibory nilaloragne naho nilokoagneo avao, malio ty voho'e fa ty agnate'e ao feno taolam-pate naho ze kila loto. ²⁸Manahake zay avao ka, ivela'e etoy nareo malio ama'ondaty, faie ty agnate'areo ao feno haratiagne naho heloke.²⁹Loza ho anareo ry mpanoratse lily naho nareo Fariseo, soa miatreke! Fa magnoregne ty kibory ty mpitoky nareo le mandoko ty kibory ty ndaty maregne.³⁰ Hoe ty atao'areo: "Naho niaigne tamy ty andro ty razam-beitika tika, le tsy toko'e ho nindre am'iareo hampite lio ty mpitoky tikagne."³¹ A naho ty am'zay le mijoro ho ndaty aivo amy ty vata'areo nareo fa ana'iareo namono ty mpitoky.³²Nareo avao ka le fa mahafeno ty hakeo ty razambei'areo.³³ Nareo ry meregne, nareo ry tarira ty menaragne, akore ty hiolira'areo amy ty fagnamelohagne amy ty heloke?³⁴A naho zay areke, ingo, magnirake mpitoky naho ndaty maregne, le mpanoratse lily ka ho anareo raho. Ty ila'iareo ho vonoe'areo le ho tombohe'areo, le ty ila'e ho jera'areo amy ty synagoga'areo ao le ho soire'areo hila ty an-tanagne ao. ³⁵Hifotetse anareo ty raha nata'areo, mibabe hakeo boake amy ty lio maregne nate'areo an-tane eto nareo, nanomboke tamy ty lio i Abel maregne, le hatra amy ty lio i Zakaria ana i Barakia, ie nivonoe'areo agnivo ty fiambesaragne masigne eo naho ty alitara. ³⁶Ambarako ama'areo ty tena maregne, fa ze kila raha le ho avy amy ty tarira toy.³⁷Ry Jerosalema, ry Jerosalema, i rehe mamono ty mpitoky naho ze irahegne ho ama'o ao! Fa impire avao raho te nagnoloholo ty ana'o mba tsy hivibike, manahake o rene akohoo mamory ty ana'e ambane ela'e ao, faie tsy mba nirehake nareo!³⁸ Ingo ty tragno'areo apoke ho leo'areo. ³⁹Fa ambarako anareo hatra am'izao, tsy hahatrea ahy vata'e nareo mandram-pirehafa'areo hoe: "Isaoragne abeike i reke boake amy ty tahina i Magnitse."

24¹Niakatse i tempolyi t'i Jesosy le nagnavelo. Namonje aze i mpiana'e rey mba hanoro aze ty filahara i tempoly. ²Faie nisaontsie'e iareo te hoe: "Tsy trea'areo vao raha io maro io? Ambarako anareo ty tena maregne, tsy hisy vato hapoke amy ty raike ze tsy ho ravagne."³Naho niambesatse ambihitse amy Oliva ay reke, le nitolake namonje aze i mpiana'e rey nirehake te hoe: "Saontsio ama'ay, ombiagne ty hisehoa ze kila raha saontsie'o? Inogne ty famanataragne amy ty fiavia'o naho ty andro fara'e?" ⁴Nisaontsie i Jesosy iareo te hoe: "Miambena tsy azo ty fitake nareo."⁵ Ho lako ty ho avy amy ty agnarako. Le hirehake iareo te hoe: 'I Kristy raho,' le ho maro ty ho voa fitake."⁶Haharey ady naho talily aly nareo. Ao soa tsy hatahotse nareo, fa tsy maintsy hiseho aby raha zao; faie mbe tsy ho avy ty fara'e.⁷ Fa hisy firenenagne hitsangagne hiale amy ty firenenagne hafa, le fanjakagne hialy amy ty fanjakagne ka. Hisy saliko naho horohoron-tane amy ty faritse maro sambe hafa.⁸ Faie mbe fitsongo aloha ty hoterake avao aby raha zao.⁹Hampijale iareo nareo le hovonoegne ka. Ho heje ze kila ndaty nareo amy ty agnarako.¹⁰ Le maro ka ty ho boseke, hifamotetse naho hifankalaigne ze kila ndaty. ¹¹Mpitoky sandoke maro ty hiotsangagne le hamitake ndaty maro.¹²Satria hitombo ty haratiagne, le hihamanintsigne ty fiteava ty maro. ¹³Fa ze raike ie milofo hatrampara'e ro voavotse.¹⁴ Ty talily soa ty fanjakagne toy le habeobeoke amy ze kila tany ho ndaty aivo amy ze kila firenenagne. Avy eo le hoavy am'izay ty fara'e.¹⁵A naho zay areke, naho mahatrea ty fahavetaveta ty fandravagne nareo, nambara i Daniela mpitoky zay, le hitsangagne amy ty toeragne masigne nareo" (ao soa ty mpamaky hahatakatse), ¹⁶"Iareo à Jodia agne hilay ambohitsey, ¹⁷ze fa ambone tragno ao tsy hizotso hangalake raha an-tragno ao, ¹⁸ty fa atonda agne ao soa tsy hiheregne hangalake ty lamba'e.¹⁹Loza ho anareo mivesatse naho mampinono amy zay andro zay! ²⁰Mivavaha mba tsy hidfanandrifa amy ty andro manintsigne naho sabata ro hisehoa ty filaisa'areo.²¹ Fa hisy hasahiragne bey, raha tsy tantane teo ndraike, le tsy hisy ka. ²²Naho tsy atao fohefohe o andro reo, le tsy hisy nofotse ho voa tsindroke. Faie misy ndaty voa fily le atao fohe avao o andro reo.²³Naho misy ndaty mirehake anareo te hope: "Ingo, intoy ty Kristy, indroy ty Kristy," le ko ndra mino. ²⁴Fa ty Kristy sandoke naho ty mpitoky sandoke le hoavy hanao famantaragne naho raha mahagaga, mba hamitake, naho azo anoegne, ndra nareo ndaty voa fily aza.²⁵ Ingo fa nambarako anareo amboaloha'e ty fotoagne.²⁶A naho zay areke, naho mirehake anareo iareo hoe: "Indro, amontogne agne reke," ao soa tsy handeha ho agne. Ndra tie hoe 'ingo ie antragno,' ao soa tsy hatoky zay. ²⁷Fa manahake ty varatse himelatse boake antignanagne le mazava hatra ahandrefagne agne, le manahake zay ty ho fiavy ty ana'ondaty. ²⁸Ndra aia ndra aia misy biby mate, le agne ty hivioria ty voltora.²⁹Naho fa afake ty haoreagne amy andro reo le haiegne ty andro, tsy hagnome hazavagne ty volagne, hopoke boake an-dagnitsey ty kintagne, le hiozognozogne ty hery ty lagnitse.³⁰Avy eo le hiboake an-dagnitsey ty famantara ty ana'ondaty, le hisaona aby ze kila foko ambone tane. Hahatrea ty ana'ondaty avy amy ty rahogne an-dagnitsey mindre amy ty hery naho ty volonahetse bey iareo. ³¹Handefa i anjeli'e rey reke mindre amy ty feo ty trompetra mafe, le hamory iareo ndaty voa fili'e amy ty zoron-tane efatse iareo, manomboke amy ty foto ty lagnitse hatra amy ty hafa.³²Mianara ty lesogne boake amy ty aviavy. Naho vaho matoe ty tora'e le mandravegne, le hai'areo fa marine ty lohataogne.³³ Manahake zay avao ka, naho mahatrea ze raha zao aby nareo, le toko'e ho fanta'areo fa marine reke, an-dalambeo.³⁴Ambarako anareo ty tena maregne, fa tsy holany ty tarira toy mandram-piboaha ze raha zao aby. ³⁵Tsy hisy sasa ty lagnitse naho ty tane, fa ty rehako tsy mba hilevegne hatrampara'e.³⁶Faie ty momba i andro naho lera zay le tsy misy mahay, ndra ty anjely ty lagnitse aza, ndra ty anake lahilahy, fa ty Rae avao.³⁷Manahake ty tamy ty andro i Noa, manahake zay avao ka ty fiavia ty ana'ondaty.³⁸ Fa manahake ty tamy ty andro taloha i fitroara ty rano antambohoy le nihinagne naho ninogne iareo, nanambaly naho nagnengavao mandram-pahavia ty andro nidira i Noa tagnate i sambo ao,³⁹ le tsy naharendreke ndra ino ndra ino iareo mandrampahavia ty fitroa i ranoy, le niely iabike iareo, le manahake zay ty fiavia ty ana'ondaty.⁴⁰Avy eo hisy lahilahy roe ty atonda ey, ty raike handesegne, ty raike hengagne. ⁴¹Ampela roe ty handisam-bare, ty raike handesegne, le ty raike hengagne. ⁴²A naho zay areke le miambena, fa tsy fanta'areo ty andrio hiavia ty Tompo'areo.⁴³Fa fantaro zao, naho nihay ty tompotragno te hoe amy fire halegne ty hiavia ty mpangalatse, ho niambegne reke le tsy nanga'e ho vaky i tragno'ey. ⁴⁴A naho zay areke, miambena mivognona avao ka nareo, fa ho avy ty ana'ondaty amy ty lera tsy ampoeze'areo.⁴⁵Ia areke i mpanompo atokisagne naho matoe nitendre ty tompo'e handily ty longo'e mba hagnomeagne iareo ty hane iareo amy ty fotoagne mete ama'e? ⁴⁶Sambatse i mpanompo zay naho hita ty Tompo'e manao zay naho fa avy reke. ⁴⁷Ambarako anareo ty tena maregne, fa ty Tompo'e ro handily aze ho ambone ty ze kila raha anagna'e.⁴⁸Fa naho misy mp[anompo raty mirehake antro'e ao hoe: "Ela ty fiavy ty Tompoko," ⁴⁹le mamototse mamono o manompo nama'e reo, mihinagne, minogne mindre am'iareo mamo lava; ⁵⁰le avy ty tompo i manompoy amy ty fotoagne tsy ampoeze'e naho amy ty lera tsy fanta'e. ⁵¹Le ho tapatapahe ty tompo'e reke, le hampanahafe'e o soa miatrekeo ty anjara'e, hisy fitagniagne zay naho fangotsokotsoha ty nife.

25¹Ty fanjaka ty lagnitse manahake ty virijiny folo nangalake ty jiro'e le nandeha tamy ty mpagnengavao.² Gege ty dime am'iareo fa ty dime hendre. ³Naho fa ninday o jiro reo iareo virijiny gege, le tsy ninday solike nindre tama'e. ⁴Iareo virijiny mahihitse ninday fisiagne solike nindre amy ty jiro'e.⁵aho nitara ty mpagnengavao, le nilafike ty roro iareo. ⁶Naho fa nisasake i alegney le nitoka mafe nanao te hoe: "Ingo, ty mpagnengavao! miboaha hohita'e."⁷Le nifoha aby am'izay iareo virijiny hagnomagne ty jiro'e.⁸ Zao ty natao i gege rey tam'iareo mahilala: "Mba ameo kedekde amy soli'areoy zahay fa fahomate ty jiro'ay. ⁹Namale iareo mahilala hoe: "Hendra tsy ho ampe ho anay sady ho anareo, mandehana amy ty mpivarotse le miviliana ho anareo."¹⁰Naho fa nandeha nivily iareo, le niavy amboho'iareo i mpagnengavaoy, le ze nivogno'e nindre ama'e nandeha ho amy tragno fanoagne engavao, le nihily lalambeyi.¹¹ Naho fa nivita zay le niavy ka iareo virijiny ila'e nirehake te hoe: "Tompoko, Tompoko, sokafo zahay." ¹²Le namale reke te hoe: "Ambarako anareo ty tena maregne, tsy mahay anareo raho." ¹³A naho zay areke miambena soa fa tsy fanta'areo ty andro naho ty lera.¹⁴Zay le manahake ty lahilahy raike handeha ho amy ty firenenagne hafa. Nitoka ty tompo'e reke le nampiambene'e aze i fanagna'e rey. ¹⁵Ty raike am'iareo nomea'e fahaian-draha dime, ty raike hafa nomea'e roe, ty raike hafa nomea'e raike. Sambe nandrae fahaian-draha arakarake ty fahaia'e iareo, le nandeha amy lia'ey i lahilahy'i. ¹⁶I raike nahazo fahaian-draha dimey leavy le tsy nangatake andro fa nampiasa'e le nahazo fahaian-draha dime hafa ka.¹⁷Manahake zay avao ka i raike naharae fahaian-draha roe nahazo roe hafa ka.¹⁸ Fa i arike naharay fahaian-draha raikey, nandeha nihaly lavake amy ty tane, le nandevegne ty vola ty tompo'e.¹⁹Ela ty ela niregne ty tompo'iareo ndevo le nandamigne raha am'iareo. ²⁰Niditse i ndevo raike naharae fahaian-draha dimey le ninday dime hafa ka. Zao ty natao'e: "Ragnandria, namea'o fahaian-dfraha dime raho. Ingo nampitombo fahaian-draha dime hafa ka raho." ²¹Zao ty natao i tompo'ey ama'e: "Soa zao, ihe ndevo mahilala sady atokisagne! natokisagne amy ty raha maromaro rehe. Hampanoeko raha lako rehe. Midira amy ty falioavam-po ty tompo'o."²²I ndevo raike naharae fahaian-draha roey namonje le nirehake hoe: "Ragnandria, namea'o fahaian-draha roe raho, ingo nampitombo fahaian-draha roe hafa raho."²³ Nirehake aze i tompo'ey hoe: "Soa zay, ry ndevo mahilala sady atokisagne! Natokisagne amy ty raha tsy ampe rehe. Hampanoeko raha maro rehe. Midira amy ty liofo ty tompo'o,"²⁴Avy eo i ndevo naharae fahaian-draha raikey namonje aze le nirehake te hoe: "Ragnandria, fantako fa lahilahy masiake rehe. Mihaly amy ty tsy nioira'o rehe, le mangorogne vokatse amy ty tsy nambolea'o.²⁵ Natahotse raho, naho le nandeha nagnetake i fahaian-draha'oy tagnate tane ao. Henteo, ingo i azoy."²⁶Namale aze ty tompo'e nanao te hoe: "I rehe ndevo raty sady malaigne, fanta'o fa raho mihaly amy ty tsy nioirako naho ka mangorogne vokatse amy ty tsy namboleako.²⁷ Le toko'e ho namea'o ty mpanao balike i volakoy, le naho fa niavy raho nandrae ty ahy naho ty nitomboa'e.²⁸A naho zay areke afaho ama'e ty fahaian-draha le ameo hoe i managne fahaian-draha foloy.²⁹ Fa ze managne homeagne mihoatse lavitse. Fa hoe iareo tsy managne ndra ino ndra indro , ndra ze kele anagna'e aza hafahagne ama'e. ³⁰Atoraho amy ty maiegne antane agne ty ndevo raty, agne ty misy fitagniagne naho ty fangotsokotsoho ty nife.³¹Naho fa avy amy ty volonahe'e ty ana'ondaty naho iareo anjely mindre ama'e, le hiambesatse ambome ty seza fiambesara'e eo reke.³² Le ze kila firenenagne le havory aloha'e eo, le hamike ndaty raike amy ty raike hafa reke, manahake ty mpiambegne agnondry mamike ty agnondry amy ty ose.³³ Hampitoboke ty agnondry ankavana'e eo reke, fa ty ose ho ankavia'e eo.³⁴Ty mpanjaka hirehake am'iareo antagnan-kavana'e eo hoe: "Mbetoa nareo nitaien-Roaeko, mandovà ty fanjakagne fa nivognonegne ho anareo hatra amboaloha'e tamy ty nagnoregnagne ty tane toy.³⁵ Fa ho nimate ty hamosare raho nimea'areo hanegne; naeake ty arandrano raho nimea'areo rano honomegne; niambahiny raho nampandrosoe'areo;³⁶ tsy nisy hosaforegne naho nitanjake raho nampiankanjoe'areo; narare raho nikarakarae'areo; tampigadragne agne raho nitilike ahy nareo.³⁷Iareo maregnendake le hamale hirehake te hoe: "Ragnandria, ombiagne zahay nahatrea azo ho nimate ty saliko le namahagne azo? Ndra te hikama rano nampikamae'ay?³⁸ Ombiagne rehe nitrea'ay niambahiny nambandrosoe'ay? Ndra nitanjake nampiakanjoe'ay?³⁹ Ombiagne zahay nahatrea azo narare naho nigadra le nitilike azo ama'o agne? ⁴⁰Namale ty mpanjaka le nisaontsy am'iareo hoe: "Ambarako anareo ty tena maregne, ze natao'areo am'iareo rahalahiko kede rey, le natao'areo tamako."⁴¹Hisaontsy am'iareo ze ankavia'e reke: "Midisoa ahy nareo voaozogne hoa amy ty afo mirehetse hatrampara'e, fa nivognonegne hoe ty devoly naho iareo anjeli'e,⁴² satria mosare raho, fa tsy namea'areo hanegne, narandrano raho tsy namea'areo rano, ⁴³niambahiny raho tsy nampandrosoe'areo, nitanjake raho tsy nirongona'areo; narare naho tampigadragne ao raho fa tsy nitilike ahy nareo.⁴⁴Le hamale ka iareo hirehake te hoe: "Ragnandria! Omiagne zahay te nahatrea azo mosare, narandrano, niambahiny, nitanjake, narare, tampigadragne agne, le tsy nanompo azo?⁴⁵ Le hamale iareo reke hisaontsy hoe: "Ambarako anareo ty tena maregne, fa ze tsy natao'areo tamy ty raike am'iareo madineke, le tsy natao'areo tamako."⁴⁶ Halefa amy ty fampijaleagne hatrampara'e iareo fa ty maregnendake ho amy ty fiaignagne tsy misy fahatampera'e."

26¹Naho fa nivita i Jesosy ty saontsi'e le nisaontsy amy mpiana'e rey reke te hoe: ²"Fanta'areo fa afake roe andro le hoavy i Paskay, le hatoloktse hofatsihegne amy ty hazonajale ty ana ondaty."³Avy eo ty bey ty mpisorogne naho ty loha ondaty nindre nivory tamy ty anjomba ty mpisorombey, ie nitokavegne te hoe i Kaiafa.⁴ Nitolake ty hitsepake naho ty hamonoagne i Jesosy iareo.⁵ Zao ty natao iareo hoe: "Tsy amy ty fete mba tsy hisia ty korontagne amy ty ndaty eo."⁶Naho fa ta Betania tan-tragno i simona boka t'i Jesosy, ⁷miambesatse mikama an-databatse eo, le nisy ampela raike nanagne tavoara alabastara feno menake lafo vily namonje aze, le nagniligne menakey amy ty agnambone'e.⁸ Naho fa nitrea iareo mpiana'e zay, niboseke le nirehake te hoe: "Inogne ty anto ty fandaniagne toa io?⁹ Afake navily lafo nomeagne ty tsy managne io."¹⁰Arofana i Jesosy zay, le nisaontsy reke te hoe: "Nagnino nareo ndra manosotse ty loha o ampelao? Fa raha soa ty nanoe'e tamako.¹¹ Ama'areo eo le lomogn'andro ty tsy managne, fa raho tsy raha ho ama'areo nanaike.¹²Fa naho fa nagniligne ty menake magnitsey tamy ty vatako reke, le anoe'e amy ty fandevegnagne ahy zay. ¹³Ambarako anareo ty tena maregne, ndra aia ndra aia hitoriagne ty talily soa amy ze kila tane, ty nanoe ty ampela toy le hatalily mbeombeo ka ho fahatiarovagne aze."¹⁴Naho fa niavy eo ty raike am'iareo roambifolo, ty agnara'e i Jodasy Iskariota, nadeha amy ty bey mpisorogney agne,¹⁵ le nanao te hoe: "Amea'areo hotrinogne raho hagnomeako aze anareo?" Nandanja volavotsy kede telopolo iareo hameagne aze.¹⁶ Avy eo le natao'e ty nanoloragne aze am'iareo.¹⁷Tamy ty andro voaloha'e ty mofo tsy misy lalivay le namonje i Jesosy i mpiana'e rey le nirehake te hoe: "Aia ty zoto'o hanoa'ay mahakama ho azo amy ty paska?" ¹⁸Namale reke hoe: "Miziliha amy ty tanagne ao misy lahilahy le ambarao reke te hoe: 'Hoe ty mpagnanatse: "Fa marine ty fotoako. Antragno'o ato raho ro hanao paska mindre am'iareo mpianako."""¹⁹ Le nanoe'iareio mpianatse ze nandilia i Jesosy iareo, le namboatse ty hanegne amy ty paska iareo.²⁰Naho fa nihalegne ty andro le nindre nikama tamy mpiana'e roambifolo reke. ²¹ Zao ty natao'e ampihinana'iareo hoe: "Ambarako nareo ty tena maregne, fa hisy raike am'areo hifotetse ahy." ²²Nikoretse ty fiai'iareo le nagnontane aze te hoe: "Tsy ho raho zao, Ragnandria?"²³Namale reke hoe: "Ze nindre tamako nampijogne ty tagna'e tagnate finga ao ie ty hifotetse ahy.²⁴ Handeha ty ana ondaty, magnorike ty fa voa soratse momba aze. Faie ho loza hoe ze mifotetse ty ana ondaty! Ty mahay i ndaty zay ty tsy hierake sasa." ²⁵I Jodasy ie hivalike ama'e nagnontane hoe: "I raho vao zaoo, Raby o?" Zao ty natao'e tama'e hoe: "I rehe."²⁶Mbe ampihinanagne eo iareo, le nangalake mofo t'i Jesosy, nisaotse, le nanampake. Namea'e i mpianatse rey zay le nisaontsy reke hoe: "Raiso, hano. Vatako toy."²⁷Nandrae i kapoakey reke le nisaotse, namea'e iareo le nisaontsie'e te hoe: "Nareo abike, nomo'areo toy. ²⁸Fa toy ty lio ty filongoagne hazotso hoe ty maro ho fagnaliovagne hakeo. ²⁹Ambarako anareo, fa tsy mba hinogne ty vokatse amy ty volaloboke sasa raho, mandram-pahavia ty finomagne vaovao hindrezako ama'areo amy ty fanjaka ty raeko."³⁰Naho fa nihira hira fiantsagne iareo, le nandeha ambohits'oliva ey.³¹ Zao ty natao i Jesosy am'iareo: "Nareo abike le hisitake ahy naho ty amako anito halegne, fa voasoratse te hoe: 'Hijera ty mpiambegne agnondry raho le hibaratsiake ty agnondry.'³² Afara ty havagnon-koveloko amy ty mate, le hiaolo lalagne anareo à Galelia agne."³³I Petera nirehake ama'e te hoe: "Ndra tie hilay naho ty am'izay aza iareo, i raho tsy mba hisitake azo."³⁴ Zao ty natao i Jesosy tama'e: "Ambarako azo ty tena maregne, anito halegne mbe tsy mikekeo ty akoho, le handà ahy intelo rehe." ³⁵I Petera nirehake hoe: "Ndra tie hifatezako mindre ama'o aza tsy handà azo raho." Manahake zay avao ka ty rineha ty mpianatse ila'e.³⁶Nagnavelo nindre am'iareo amy ty tane atao Getsemane t'i Jesosy, le nisaontsy tamy mpiana'e rey hoe: "Mipetraha etoa nareo fa hivavake eroy raho."³⁷ Nandese'e t'i Petera naho ty ana i Zebedio roe lahy le nanomboke nikoretse sady ore ty fo'iareo.³⁸ Zao ty natao'e am'iareo hoe: "Foy vorombelogne ty fagnahiko, manahake ty fa ho mate. Miantoera eto le miambena mindre amako."³⁹Nitolake reke, nivavake. Zao ty natao'e: "Babako, naho azo atao, afaho amako ty jera mangirifiry toy. Faie tsy ty ahy anio ty hanoegne fa ze zoto ty arofo'o."⁴⁰ Namonje i mpiana'e rey reke, aheo'e naho milafike ty roro abike iareo, zao ty natao'e amy petera hoe: "Inogne, tsy mahavita miambegne minde amako ndra tie lera raike vao nareo? ⁴¹Miambena ao soa tsy azo ty mpitsoke fagnahy nareo. Mete avao ty fagnahy, fa ty nofotse ro maleme."⁴²Nagnavelo fagnindroe'e reke le nivavake. Zao ty natao'e: "Babako, naho fa tsy azo hafahagne amako ty fampijaleagne toy, le hataoko ty zoto ty arofo'o." ⁴³Niheregne reke le mbe zoe'e nilafike ty roro iareo, fa navesatse ty maso'iareo.⁴⁴ Nenga'e ndraike iareo, le nivavake fagnintelo'e, nisaontsy o saontsy reo avao abike.⁴⁵Avy eo t'i Jesosy namonje iareo mpiana'e, zao ty natao'e am'iareo hoe: "Mbe miroro avao vao nareoo? Henteo, fa marine ty lera, le ty ana ondaty hatolotse antagna iareo be hakeo. ⁴⁶Mitsangàna, andao tika. Henteo, fa marine ie hifotetse ahy."⁴⁷Amy reke mbe misaontsyi, avy t'i Jodasy, ie nivalike am'iareo folo roe amby. Nisy ndaty maro nindre ama'e boake amy ty bey ty mpisorogne naho ty zoke ondaty. Niavy mindre amy ty ampingaratse naho langilangy iareo. ⁴⁸Le nagnomey famantaragne iareo i lahilahy nifotetse i Jesosy i, manao te hoe: "Ze orofoko, ro ie. Tsepaho reke."⁴⁹Tsy nisy alaharo fa namonje i Jesosy reke le nirehake te hoe: "Salama, Raby!" Le nagnoroke aze reke. ⁵⁰Zao ty natao i Jesosy tama'e hoe: "Anovo ze nilia'o eto korahe." Avy eo niavy iareo, nagnampatse ty tagna'iareo tam'i Jesosy, le nitsepake aze.⁵¹Ingo, ty raike am'iareo nindre am'i Jesosy, nagnakatse ty ampingara'e ka le namatsika ty ndevo i mpisorombey, le nihifike ty sofi'e. ⁵²Zao ty natao i Jesosy hoe: "Aheregno amy ty nisia'o aze ty antsi'o toy, fa ze mandrae antsigne le hovonoegne amy ty antsigne.⁵³ Mivetsevetse vao nareo te hoe tsy mahatoka an-draeko raho, le i reke afake mandefa miaramila anjely mihoatse ty roambifolo lahy? ⁵⁴Fa hatao akore fa zao ty hahato ty soratse masigne, ie magnambara fa tsy maintsy hisy?"⁵⁵Tam'izay andro zay t'i Jesosy nisaontsy tamy vahoake rey te hoe: "Avy amy ty ampingaratse naho langilangy hitsepake ahy manahake ty mpangalatse vao nareoo? Nampianatse an-tempoly ao le lomogn'andro avao raho fa tsy nitsepahe'areo. ⁵⁶Misy abike ze raha zao mba hahalefe ty voasora ty mpitoky." Nibaratsiake i mpiana'e rey nilay nisitake aze.⁵⁷Nandese'iareo nitsepake aze am'i Kaiafa mpisorombey agne t'i Jesosy, ao ty nivoria iareo mpanoratse lily naho loha ondaty. ⁵⁸Namalavala aze ey avao t'i Petera amy ty ie andalagne andesegne ho amy ty vala bey ty mpisorogne. Niditse agnate'e ao reke le nipetrake nindre am'iareo mpiambegne mba hahatrea ty hiafara'e.⁵⁹Iareo bey ty mpisorogne naho iareo Synedriona abike le nipay fandieragne tsy maregne handieragne i Jesosy, am'izay ameagne lalagne iareo hamono aze. ⁶⁰Tsy nahatrea ndra ino ndra ino iareo, ndra tie nisy ndaty aivo tsy maregne niavy eo. Naho fa niavy eo nisy roe niavy namonje eo⁶¹ le nirehake te hoe: "O lahilahy io, nirehake te hoe: 'Mahavita mandrava ty Tempolin'Andriagnanahare raho le managagne ka afake telo andro.'"⁶²Nitsangagne i mpisorogne bey le nanao te hoe: "Tsy managne havale vao reheo? Inogne raha hamono iareo azo zao?"⁶³ Nianjigne avao t'i Jesosy. Zao ty natao i mpisorogney tama'e: "Mandily azo amy ty tahin'Andriagnanahare raho, ambarao ama'ay, te i rehe o Kristy anak'Andriagnanahare zao." ⁶⁴Namale aze t'i Jesosy hoe: "I ho rinehakoy nambara'o zay. Fa ambarako ama'areo, anito avao le hotrea'areo ty ana'ondaty hipetrake an-tagnan-kavana ty hery, le ho avy amy ty raho ty lagnitse."⁶⁵Niriate i mpiorombey ty akanjo'e le rineha'e te hoe: "Nirehake ratyb reke! nagnino tika mbe mipay ndaty aivoo? Ingo, rei'areo ty reha'e raty teo. ⁶⁶Akore ty heve'areo? Zao ty navale iareo: "Magneva vonoegne agne reke."⁶⁷Nandrora'e ty tarehe'e le jera'e, le nipoaha'e raratehake ka, ⁶⁸zao ty natao'e: "Tokio ama'ay rehe Krisrty. Ia nijera azoy?"⁶⁹I Petera nietake agnolo i valay, le nisy mpanompo ampela namonje aze nanao te hoe: "Irehe ka nindra tam'i Jesosy ty Galilia."⁷⁰ Fa nandietse aloha iareo teo reke, zao ty natao'e: "Tsy fantako ty raha rehafe'areo."⁷¹Naho fa niakatse i lalambey reke le nisy mpanompo ampela hafa ka nirehake tam'iareo teo hoe: "Ty lahilahy toy ka le nindre tam'i Jesosy boake Nazareta." ⁷²Le mbe nandietse avao reke nanao te hoe: "Tsy fantako o lahilahy zao!"⁷³Naho fa niavy eo le nandfeha namonje i Petera iareo ze nitsangagne teo, nirehake ama'e hoe: "I rehe ka aza ty raike am'iareo fa tsy zao raha, ndra ty reha'o le ahafantaragne azo." ⁷⁴Avy eo reke nifanta naho le nititike nanao te hoe: "Le amoeako an'io o lahilahy rehafe'areo zao!" Leavy le nagneno am'izay ty akoho. ⁷⁵Tiaro i Petera ty saontsy i Jesosy hoe: "Mbe tsy mikekeo ty akoho le handà ahy intelo rehe." Niakatse reke le nitagny.

27¹Maraindraigne ty andro, le niomagne ty hipay ty raha hamonoagne i Jesosy iareo ndaty bey ty mpisorogne naho iareo loha'ondaty.² Nifehe iareo reke, le nandese iareo am'i Pilato goverinora agne.³Ie Joday nifotetse aze, naho fa nahatrea te voaheloke t'i Jesosy, le nisoloho reke, nahere'e tam'iareo bey ty mpisorogne naho iareo i volafotsy telopoloy, ⁴nirehake reke te hoe: "Behakeo raho namotetse ty lio tsy manan-tahy." Namale iareo te hoe: "Hahoa'ay ino? Azo zay!"⁵ Le natora'e an-tempoly ao i volafotsy rey, nandeha reke le namonje ty vata'e.⁶Iareo bey ty mpisorogne nandrabe i volafotsy rey le nirehake te hoe: "Mitipake ty lily ty hampijognagne toy amy ty fasiam-bola satria vilin-dio."⁷ Nindre nirehake ty tsy mete iareo le nivily tane amy ty mpamboatse valagne tane handevegnagne ze vola ambahiny.⁸ Le zay ty anto'e nanaovagne ty agnara i taney hoe: "Tanen-dio" hatram'izao.⁹Le nilefe ty nivoareha ty mpitoky Jeremia manao te hoe: "Nangalake ty volafotsy telopolo iareo, vily ty nanomgagna iareo vahoa i Israely aze,¹⁰ le namei'areo hoe ty mpamboatse valagne tane, zay ty nambara i Tompo ahy."¹¹Nijahigne aloha ie goverinora t'i Jesosy, le nagnontane aze t'i goverinora te hoe: "i rehe vao ty mpanjaka ty Jiosy?" Namale reke te hoe: "Ie niazo'o zay, ie raho." ¹²Fa naho fa niliere iareo bey ty mpisorogne na. ho iareo loha ondaty reke le nianjigne. ¹³Nirehake ama'e t'i Pilato te hoe: "Tsy rei'o vao fandieragne azo zao?"¹⁴ Le mbe nianjigne avao reke, gaga ty govrinora.¹⁵Naho fa amy ty faliovagne fo le fomba i goverinora ty mamotsotse gadra raike voafily iareo vahoake. ¹⁶Nanagne gadra raike malaza atao hoe i Barabasy iareo tam'izay fotoagne zay.¹⁷A naho fa nivory iareo, zao ty natao i Pilato am'iareo hoe: "Ia ty te'areo havotsoko ho anareo? Barabasy, sa i Jesosy ie tokavegne te hoe i Kristy? ¹⁸Fanta'e fa fialognagne ty nahavy iareo manolotse i Jesosy tama'e. ¹⁹Naho fa nipetrake amy ty seza fitsaragne eo reke, le nandefa rehake ama'e ty vali'e hoe: "Tsy hitako ty hatao amy ty lahilahy tsy manan-tahigne toy. Ore raho te anito amy ty nofiko momba aze."²⁰Iareo bey ty mpisorogne naho iareo loha'ondaty nandrisike iareo vahoake hangatake ty hamotsoragne i Barabasy, le hampamono i Jesosy. ²¹Nagnontane iareo ty goverinora hoe: "Ia am'iareo roe ty tea'areo havotsoko ho anareo?" Zao ty natao iareo: "I Barabasy."²² I Pilato nirehake am'iareo hoe: "Inogne ty toko'e hanoeko am'i Jesosy ie tokavegne ho i Kristy?" Namale iareo: "Fatsiho amy ty hazonajale reke."²³Zao ty natao'e: "Nagnino, inogne ty sata raty vita'e?" Nimanea iareo ty korake te hoe: "Fatsiho amy ty hazonajale reke."²⁴ Naho fa nihay i Pilato te tsy misy azo'e atao ndra ino ndra ino amy korakey, le nangalake rano reke, nanasa ty tagna'e aloha i vahoake rey eo, le nanao te hoe: "Tsy manan-tahy tsy manan-kakeo amy ty lio ty lahilahy tsy manan-tahy toy raho. Fa asa'areo zay."²⁵Nirehake iareo ndaty maro te hoe: "Lonike mba ho ama'ay naho ty ana'ay ty lio'e." ²⁶Navotso'e hoe iareo t'i Brabasy, natolo'e ho fatsihegne amy ty hazonajale t'i Jesosy le jinera amy ty karavantsy.²⁷Avy iareo miaramila nangalake i Jesosy handesegne an-dapa ao, le namory ze kila miaramila. ²⁸Nafaha iareo ty akanjo'e le nampanoe iareo akanjo jaky reke. ²⁹Namboatse sabaka fatike iareo le natao iareo agnambone'ey, le nasia iareo tehegne ty fita'e havana. Nandohaleke ama'e iareo nanao tsikike aze, te hoe: "Salama rehe mpanjaka ty Jiosy!"³⁰Nandrora iareo reke, nafaha iareo i tehegney, tsinera iareo amy ty agnambone'e.³¹ Naho fa nivita iareo ty nanao tsikike aze, nafaha iareo ty akanjo lava'e, le nampiankanjoe iareo ty akanjo'e handese'e amy reke hofantsihegne amy ty hazonajale, le nandesegne niboake am'izay.³²Naho fa niakatse iareo, le nahatrea lahilahy raike boake syrena agne atao hoe simona, nisere iareo hindre am'iareo hijiny ty hazonajale.³³ Nandeha amy ty tane atao hoe Golgota iareo iareo, ty dika'e: "Tane ty karankan-doha."³⁴ Namea'iareo divay miharo afero reke ho kamae'e. Fa naho fa nandrama'e le tsy nikama reke.³⁵Naho fa nifatsihe iareo amy ty hazonajale reke, le nifanoa iareo kize ty nifizaragne i akanjo'ey, ³⁶nipetrake iareo niambegne aze.³⁷ Ambone eo ty nasia'iareo soratse mirehake ty anto'e namonoagne aze, te hoe: "Intoy t'i Jesosy mpanjaka iareo Jiosy."³⁸Nisy dahalo roelahy ty nifatsihegne mindre ama'e, ty raike an-kavana'e eo ty raike an-kavia'e eo.³⁹ Iareo ze nandriogne le nanimbotimbo aze, nampigibigibigne ty loha iareo⁴⁰ le nanao te hoe: "I rehe handrava ty tempoly le handagne zay ka agnate ty telo andro avoto ty vata'o!" Naho i rehe ty anan'Andriagnanahare le mizotsoa boake amy ty hazo najaley!"⁴¹Manahake zay avao ka iareo bey ty mpisorogne nanao tsikike aze, nindre am'iareo mpanoratse lily naho iareo loha'ondaty, le nirehake te hoe: ⁴²"Nagnavotse ty ndaty hafa reke, faie tsy mahaavotse ty vata'e. I reke mpanjaka Israely. Angao reke hizotso boake ambone ty hazonajalke'ey, le ho meanto reke."⁴³Natoky an'Andriagnanahare reke, angao ty Andriagnanahare hagnavotse aze henaneo, naho toe zoton'Andriagnanahare ty hiafaha'e. Reha'e ty tihoeke: "Anak'Andriagnanahare raho.'" ⁴⁴Manahake zay avao ka ty ajalahy nifatsihegne nindre ama'e toy, nanivativa naho le nanao tsikike aze avao ka.⁴⁵Rinako ty iegne ze kila tane nanomboke tamy ty lera fahaenegene le niavy avao ty lera fahasive. ⁴⁶Amy ty lera fahasive eo nikanjy amy ty feo mafe t'i jesosy nanao te hoe: "Ely, Ely, lamà sabaktani?" Mitsakore ty tihoeke: "Andriagnanahareko, Andriagnanahareko, akore rehe ie mienga ahikeo?"⁴⁷ Naho fa naharey zay ze mbe nitsangagne teo, le nanao te hoe: "Mitoka i Elia reke."⁴⁸Tsy nisy alaharo fa nilay ty raike am'iareo le nangalake spaonjy, nivontoe'e amy ty vinegra, le natao'e amy ty bararata mitohitohy, le nimei'e aze ho kamae'e. ⁴⁹T'ila'e am'iareo nirehake te hoe: "Angao reke. Hotreantika eo ty hiavia i Elia hagnavotse aze." ⁵⁰Le mbe nikanjy amy ty feo mafe ndraike t'i Jesosy nanolotse ty fagnahi'e.⁵¹Tsinera ty raha roe mira boake ambone hatra ambane ty lamba i anjomban'Andriagnanaharey, nangodongodogne ty tane, nitserake roe mira ty vatolahy. ⁵²Nisokake ty kibory, le nivagnon-kovelogne ty fate ze kila ndtatin'Andriagnanahare fa nimate.⁵³ Le niakatse ty an-kibory ao iareo, nizilike an-tanagne masigne, le niboake amy ty maro.⁵⁴Iareo kapiteny naho iareo nahatrea i Jesosy naho fa naharey i horohoron-taney naho ze kila raha nisy teo, ndra natahotse le nivaky rehake te hoe: "Anak'Andriaganahare vata'e toy." ⁵⁵Nisy ampela maro nagnorike i Jesosy boake à Galilia agne mba hagnalankagne aze, namalavala nagnente agnolo'ey avao. ⁵⁶Tam'iareo t'i Maria Magdalena, Maria rene i Jakoba naho Josefa, le ty rene'iareo anadahy i Zebedio.⁵⁷Naho fa nihale ty andro, le nisy lahilahy raike mpagnarivo boake à Armatia agne, i Josefa ty aganara'e, mpiana i Jesosy avao ka reke. ⁵⁸Namonje i Pilato reke le nangatake ty vata i Jesosy. Le nomey i Pilato aze.⁵⁹Nangalake i fatey t'i Josefa, nisafora'e sarimbo rongony malio, ⁶⁰le naleve'e amy ty kibori'e vaovao namboare'e tamy ty vatolahy, namoy vato bey hatao rindry kiboryi reke le noly.⁶¹ I Maria Magdalena naho iareo Maria hafa le teo aby, nidoboke agnila i kiboryi eo.⁶²Niavy ty andro raike afara ty fagnomanagne, le nindre nivory am'i Pilato iareo bey ty mpisorogne naho iareo Fariseo.⁶³ Zao ty natao iareo: "Ragnandria, tiaro'ay fa tamy tie mbe nivelogne i mpamitake inge le nirehake te hoe: "Naho fa afake telo andro le hovagnon-kovelogne raho." ⁶⁴A naho zay areke mandilia ty hiambenagne i kibory mandram-pahavia ty telo andro, fa naho tsy zay le hoavy iareo mpiana'e hangalatse aze le hirehake amo'ondatio te hoe: "Nivanon-kovelogne reke!", ty fitake fara'e le ho raty mihoatse ty reke tamy voaloha'e."⁶⁵Zao ty natao i Pilato tam'iareo: "Mangalà mpiambegne. Akia ambeno soa ataovo'areo ze fiambena'areo aze. ⁶⁶Le nandeha'iareo niambegne kibory, nasia'iareo tombo-kase ty vato le nampijangana'iareo mpiambegne.

28¹Tamy ty hariva ty sabata, naho fa nanomboke mangararake atignanagne ty andro voaloha'e amy ty heregn'andro, le nandeha nagnente i kiboryi t'i Maria Magdalena naho i Maria raike hafay.² Ingo, nisy horohoron-tane bey, ty anjelin'Andriagnanahare nizotso boake an-dagnitse agne, niavy nampibaribarigne i vatoy, le nipetrake ambone'ey.³Manahake o helatseo ty tarehe'e, le ty akanjo'e foty manahake ty oram-panala.⁴ Natahotse iareo mpiambegne le nanahake ty lahilahy mate.⁵Nirehake tam'iareo ampela i Anjelyi le nanao te hoe: "Ao soa tsy hatahotse, fantako fa mipay i Jesosy nareo, I nifatsihegne tamy ty hazonajaley. ⁶Tsy ato reke, fa nitsangagne nagnorike ty fa sinaontsi'e ama'areo. Mbetoa henteo ty nirota i Magnitse. ⁷Akia malaky agnombarao iareo mpiana'e te hoe: "Nivagnon-kovelogne reke. Ingo, fa niaolo lalagne anareo à Galilia agne reke. Agne ty hahatreava'areo aze." Ingo, fa nambarako tama'areo."⁸Nifoy vorom-belogne i ampela rey le niala ty an-kibory ey, le nilay hirehake am'iareo mpiana'e. ⁹Ingo, namonje iareo t'i Jesosy le nisaontsy te hoe: "Salama!" Namonje aze i ampela rey, nitagne fandia'ey le nirebeke aze. ¹⁰Nisaontsy iareo t'i Jesosy nanao te hoe: "Ao soa tsy hatahotse. Akia agnombarao iareo rahalahiko, ampandehao à Galilia agne. Agne ty hahatreava iareo ahy."¹¹Mbe andalagney avao i ampela rey, ingo, t'ila i mpiambegne rey nandeha an-tanam-bey agne le nirehake am'iareo bey ty mpisorogne ze kila raha nisy. ¹²Naho fa namonje iareo zoke'ondaty i mpisorogney le nirehake mikasike ty olagne am'iareo, le nagnomey vola tsy fotofoto iareo miaramila iareo,¹³ le nirehake am'iareo te hoe: "Ambarao amy ty hafa te hoe: 'Niavy tamy ty andro halegne i mpiana i Jesosy rey le nagalatse ty vata'e amy ty zahay mbe miroro.'¹⁴Naho avy am'i goverinora agne o talily zao, hizaka aze tika, le hagnafake ty famarahia'e ama'areo." ¹⁵Rinambe miaramila rey volay le natao iareo ze nampanoegne iareo. Ze natalily iareo le niely amy ty tane iareo Jiosy le mbe mitohy hatra am'izao.¹⁶Nandeha à Galilea agne iareo mpianatse raike amby folo, le t'ambohitse fa natoro i Jesosy iareo ey. ¹⁷Naho fa nahatrea aze iareo, le nirebeke aze, fa t'ila'e mbe nisalasala natahotse.¹⁸Namonje iareo t'i Jesosy le nisaontsy te hoe: "Fa nameagne ahike ty fahefagne an-dagnitse agne naho ty an-tane etoy. ¹⁹Akia mandehana, ampanjareo mpianako ze kila tane aby. Ano batisa iareo amy ty agnara ty Rae, ty Anake, le ty Fagnahy Masigne.²⁰Ampianaro iareo hagnomey hato ze kila raha nandiliako anareo. Ingo, mindre ama'areo avao raho hatra amy ty fimodoa ty tane toy.

Malagasy, Tandroy: Bible for Matthew

Formatted for Translators

Matthew