¹Anii ku Bawulo lebkeeyiinteetaab Yeesu Kiriisto kuu woloo kitooltoo Yeyiin nyoo kaararookiinteenyoo kubununee Yeesu Kiriisto nyoo kiikeneekeey. ²Asiruung' inyiing' Temeteewo nyoo achamiing' anykaayetyeeching' icham Yeesu. Kooberuuriing. Baaba Yeyiin ak Mokoryoonteenyoo Yeesu Kiriisto, kuriireeniing' ankukooning' kaalyeet.³Kuu yoo kyaamwoowuung' amiite aweetii Maketoonnya, machaktoos ibuur Efeeso sukung,eet iboolchi biiko alak kusaanee keey kooneetee tukuuk chee mabo man. ⁴Kusaan koobootyine asiiswek kuraru tyoonkoochoy chee mabo laat ak kutetu kooynooy cheb Yuutayeek chebo keny, kuuyu yibu ng'aleechaa kwiilat ak wookuut, yoo yoo katekeeyechine Yeyiin yiisyeet am manta.⁵Kiyee bure siibolchi bichu ku kule kunyoor chamateet kubununee mooyeet nyee leel ankuyey kiyee inkete kule bo man ankookaaseekeey Yeyiin. ⁶Kiikuchuunnye alake kookaaseekeey Yeyiin ankuyeelchi ng'al buch chee mab man. ⁷Bere bichoo nto yek kaaneetikaab kiruutek nteenee meenkete kiyee ng'aloolee nto mbo kiyee ikiilchine keey kuraru. ⁸Kiinkete kule karoomech kiruutek yoo kayeyiisyee chiito am keelto nyee karaam.⁹Machakse chii koonkete kule meebere kikeeyeye kiruutek kubo biich chee churtootiin, nteenee kikeeyeye kubo biiko chee machurtootiin ak choo machame keebayta. Bo subak kiruutek biiko choo meeyweye Yeyiin, choo choolwookenootiin, choo matiliilech ak choo aweesech. Bo subak kiruutek biiko choo rume sikiikwaa ak choo bakakiisyoote, ¹⁰choo martooy, choo sikore keey, ak choo choore biiko. Bo choo iberbeeriisye ak choo mololchine biich ng'al ak kiy ake yukul nyoo marubtooy keey kaaneetuutekaab man. ¹¹Miite kaaneetuutechaa wolee bo lokooywek chee karoomech choo kikiitoorwoo kul a-amte. Yeyiin nyoo boonto lebkeeyyet ankootorooroot nyee kikoonoo lokooywechaa karoomech.¹²Abirchine Mokoryoonteenyoo Yeesu Kiriisto koonkoy nyoo kikoono kaamukeyweek, kuuyu kikasa kule kiikooseenoo keey kyaayeyoote ng'al chee kimaankete kumanaayenchine inee nteenee kuriireenaa. ¹³Ankoo kyaang'aloolee nyee inee miyaat ankaawusoote biikyii ankaakawootenoote, kutoola ayechi yiisyeenyii. ¹⁴Kinyoowoo mokoryoonteenyoo kaat am chamateet nyee kiboonteenoo ankoo kimaayemaat anii kiyeya acham inee ankaakoosee keey.¹⁵Ng'alyoonteet nyee machaktoos kiikooseekeey amakany chii kwaam met ku kule, kichooni kaarorookiinteet Yeesu ng'weny chokoororooche biiko choo kiikuchoolwooken, anku anii akeenke am bichooto nyee achoolwooketoot nyee makyoomu. ¹⁶Ankoo kiwuu nyooto kikeeriireenaa anii am biiko tukul sukooboorunee Kiriisto kule iruruunye mooyeenyii am wolee mii choo kiikuchoolwooken. Yoo imuchaktoos kiiraraachaa anii ankaanyooru soboontaab kibchuulyo, koomuuchaktoos kiiraraach nkicheek biiko alak. ¹⁷Kunyoo, kusilakoy ankukoonyitakoy Yeyiin nyoo makasakse ankubaytooyiisye kenyiis ak kenyiis, Kuwuuyiit nyooto.¹⁸Wenyoo Temeteewo, arwookuung' kurubtakeey ng'aleek choo kimwooye workooyik kubo inyiing'. Yoo keeruub ng'aleechaa, makuyeetyeeching' sii-am booryeet nyee karaam ¹⁹ankiitas taay ikooseekeey Yeyiin ankiyey kiyee inkete kule karaam. Kiikubootyo biiko alake chee kitay kuyey kuu nyooto. ²⁰Alak am bichooto kiikuyey kuu nyooto ku Umenaayo akoo Alekisaanta. Kwaatoorchi kibrokosyoonteet sukukaseekeey kule mamachaktoos kung'aloolee Yeyiin nyee miyaat.

¹Ng'alyoonteet nyebo koomanuut miisin ku kule isooye Yeyiin ankiibirchine koonkoy kubo biiko ake tukul. ²Machaktoos keesoochine baytooyik ak kaantooyik sikeeminy am kaalyeet ak taloosyeet ankiinemchine keey Yeyiin ankiibuur nyee keekoonyiteech. ³Yoo kakeeyey kuu nyooto, ku karaam ankoong'ereeche Yeyiin nyoo kaarorookiinteenyoo. ⁴Mache Yeyiin kule kiiraraach biiko tukul koonket ng'alyoonteetaab manta.⁵Yeyiin ku akeenke nkit, anku akeenke chiito nyee ichoomnyeech ak Yeyiin. Nto nyooto ku Yeesu Kiriisto. ⁶Kiikooyto Yeesu soboonnyi sukuwalang'unee biiko tukul. Kiyityiin ng'alyoontooni am asiiswek chee yemootiin. ⁷Kunyi, kikeekweya anii a-amte ng'aleechaa kuu lebkeeyiinteet, man kiyee amwooye. Aneete biiko chee ma Yuutayeek akooseekeey Yeyiin ankaamwooye ng'al cheebo manta.⁸Makyiintoos murenik am yee kakiiruukyi keey kootoroore awunnyek chee tiliilech kusooye Yeyiin amanyeeru nto kuyey wookuut. ⁹Makyiintoos kooruuk koolooche keey nyee karaam. Koolooche sirook chebo koonyit ankuboonto atebuutek chee karoomech. Mamachaktoos kooleete buuteek kul sikeechorokyine, koolooche chobosaak, tukukaab kaat ak sirooy chee ale beesaan chee chaang'. ¹⁰Neenee, machaktoos kuboonto atebuutek chee karoomech chee misyine kooruuk choo kiikooonemchi Yeyiin.¹¹Machaktoos kooneete keey koorko ake tukul ng'aleek am keelto nyee intusoot ankooyweyiisye. ¹²Maachamchine koorko kuyek kaaneetikaab ng'alyoonteetaab Yeyiin nto mbo kule kubayta saanteenyii. Kusiisyine keey.¹³Aatam nyee kisumkuyey Yeyiin kurook, nto mii yoo, chokuyey Aaawa. ¹⁴Meebere ki Aatam nyee kikeekenta kut kuyey ng'ookisto, nteenee ki koorkeet. ¹⁵Machaktoos koorko ake tukul kuriibe koonyii ak lokokchii am keelto nyee karaam. Yoo kamuyta, kokaasee keey Yeyiin, kutinye chamateet, kutiliil ankuriibe keey, makutebto soboontaab kibchuulyo akookoy.

¹Mii yu naas ng'alyoo nyee mache kiiyyoong'unee. Yoo kamach chii koontoochi biikaab Kiriisto, kaakukwechi keey yiisyo nyebo koonyit. ²Machaktoos kaantooyintoonoo ku chii nyee matinye leelis, ku chii nyee teeree koorkeenyii nkit, kusewunoot ankuriibe keey, kukoonyitoot, kururoot moo ankoomuuche kooneetiis. ³Mamachaktoos ku kibookityoo ama chii nyebo woorooryeet. Nteenee machaktoos koontusoot anku tala, amaboonto muchastaab beesaan.⁴Machaktoos koonkete kuriib kanyii nyee karaam kukas kule iyweye lokokchi kutukul. ⁵Yoo meemuuche chii kuriib kanyii kumeemuuche kuriib kaniseet.⁶Mamachaktoos keekweye chii nyoo manaakich am ng'alyoonteetaab Yeyiin kule koontoochi chuut kuuyu imuuche koontumeer. Nto yooto, makiitiilchi ng'aleek kuu choo kikiitiilchine Kibrokosyoonteet. ⁷Machaktoos kaantooyintoonoo ku chii nyee tinye kaayna nyee karaam am wolee mii yeemeet simonyoor Kibrokosyoonteet barooyinto nyee katechee.⁹Machaktoos nkicheek tooretikaab biikaab Kiriisto kukoonyitootiin nyee mawechweeche ng'al, ama kibookitiis, nto kutoortooy moonik kumach beesaan. ⁸Machaktoos kukiilchi am mooyeet akeenke ng'alyoonteetaab manta nyoo kikeeng'oong'weech anku yeye kiyee inkete kule bo man. ¹⁰Machaktoos keetyemtooy bichoo kutoombo keekweye.Nto yoo matinye ng'alyoo keechamchi kuyek tooretik.¹¹Machaktoos nkicheek kooruuk chee tooretik ku cheebyoosooy chee koonyitootiin, chee mayeyoote seemseem. Machaktoos ku koor chee riibe keey ankiikoosee keey am kiy ake tukul. ¹²Machaktoos chii am tooretichoo kuteeree koorkeenyii nkit ankuriibe lokokchii ak kanyii am keelto nyee karaam. ¹³Chii ake tukul nyee kayeyiis nye karaam, kooloong'u keey am komostaab ng'alyoonteetaab Yeyiin ankikich am manta nyeb kaararookiinteet Yeesu¹⁴Ankoo sinee aboonte mooyeet kule maachoonii wolooto imiite, asiruung' ng'aleechu si ¹⁵yoo kaakaay keey, keenket wolee machaktoos koobuurtooy biikaab Kiriisto. Bichooto ku choo kikwey Yeyiin kuyek cheechii. Tolochta bichoo ak sisineet nyee iyyoong'unee manta.¹⁶Ng'alyoo nyebo man kule woo kiyee kikung'oong'weech Yeyiin: Kikeesich inee kuu chii ake tukul, kiiboor Tamirmiryeetaab Yeyiin kule churtaat.Kikas nkicheek malayikaanik, Kikyaamtaat inee am kooroosyek, kikiiyeenchi am kooreet, ankeeyib kuwo barak woloo mii lebkeeyyet.

¹Ibooru Tamirmiryeetaab Yeyiin kutook kule am besyoosyek choo kwoonii, makuchuunnyee biiko ng'alyoonteetaab manta ankurub ng'aleekaab biiko choo teweche tamirmirook chee miyootech. ²Iberbeeriisye bichoo ameekoonkete ng'alyoonteet nyebo man ak nyebo ng'wiiynan.³Yeetee biiko koomutiis ak kule kumaam amiik alak ankoo kiyeye Yeyiin amiichoo kule kutaach biikyii choo inkete manta ankwaam kubirchine koonkooy. ⁴Karaam kiy ake tukul nyoo kiyeye Yeyiin kunyoo, mamachaktoos keetaye kiy mbo akeenke yoo kakeetaach keebirchine Yeyiin koonkoy. ⁵Yeye ng'alyoonteetaab Yeyiin ak saayeet kutililiit kiy ake tukul nyee kiyeye Yeyiin.⁶Yoo keeboorchi mbo ng'eetaabiya ng'aleechu, keeyey am keelto nyee karaam yiisyeetab Kaarorookiinteet Yeesu. Nto yooto imiite ititiire ng'alyoonteetaab manta nyoo kikiineetiing nyoo irube. ⁷Itay tyoonkoochoy chebo beerbeery0 chee marubtooykeey ak Yeyiin. Ichobakse akookoy ineete keey ibuure kuu woloo maktooy Yeyiin. ⁸Yoo keeneet boorng'uung' makuyetyeechiing' am koorooni am koorooni, nto yoo keeneet keey ibuure kuu woloo maktooy Yeyiin, makuyetyeechiing' am soboontaab koorooni akoo nyebo kooreet nyoo makucho.⁹Kiikooseekeey Yeyiin, Inee Kaarorookiinteet nteenee chee irarooche, ku biiko choo iyeenchine inee. ¹⁰Machaktoos keetiyee met ng'aleechaa ankuyemaktoos keechame kutukul. Kiyooto nyee keemiite keeng'etiichine keey.¹¹Ng'aleechaa chee machaktoos ikiime yoo ineetiisye. ¹²Meekany kumoontiing' biiko kuuyu teemining'. Nteenee inyiing' nyee machaktoos kukaseeniing' biiko tukul choo kiikooyeenchi ng'alyoonteet, woloo ing'alooltooy ak wolee itebtooy, wolee ichamtooy biiko, wolee iyenchintooy Yeyiin ak tiliilinto nyee iboonte. ¹³Iyeyiisyee barooyinto nyoo mii kumanaayitu, isumanchi biiko ng'alyoonteet, i-amchinee ankiineete.¹⁴Meechwees kaamukeyweechoo kiroobuung' Yeyiin kubununee kiyee kimwooy workoyoonteet ake yoo kitiinyeeniing' awunnyek kaantooyikaab biikaab Kiriisto. ¹⁵Iyeye tukuuchoo kibtaman ankiinemchinekeey kutukul sukung'eet kukas chii ake tukul wolee imiite itastooy taay. ¹⁶Machaktoos irootoote soboonng'uung' ak ng'aleek chee ineete. Imuytoochi tukuuchookuuyu, yoo keeyey kuu nyooto, meeraraachakse inyiing' ak biiko choo ineete.

¹Meeryonkyine booyoo yoo imiite iyisuu, nteenee ing'aloolchine kuu koon. Iyibe nkicheek aybeeriik wuu nyee mbo ng'eetaabkoomet. ²Iyibee cheebyoosya ak tukul wuu nyee koomet. Nto tiibiik, inam choo wuu nyee mbo cheebkoomet am keelto nyebo tiliilinto.³Machaktoos keeyetyeechine musukuunek choo matinye chii nyee kariib. ⁴Nteenee yoo boonto cheebyoosya nyee musuk leekooy nto muchokoroon, kumachaktoos lokochoo kuriib sikiikwaa, kuukaanyii nto kookoonyii sukooboorunee yooto kule iyweye Yeyiin. Yoo kayey kuu nyooto kumii kuyooku kiyee kikeeyechine icheek, ng'alyoo nyee chame Yeyiin.⁵Koorko nto cheebyoosya nyee kiikung'et nkit ku musuk kumachaktoos kookeneekeey Yeyiin nkit ankuriirchine beet ak kwemooy kule kuyetyeechi. ⁶Nto koorko nyoo musuk ankicham tukun chebo leles, kukiikume nyoo kusobe.⁷Machaktoos imwoochi nkicheek biiko ng'aleechu, sukung'eet mariirtee chii. ⁸Chii ake tukul nyoo mayetyeechine tilyoonuutekyii anku miisin biikyii choo bo ko, kaakutachiin ak ng'alyoonteetaab Yeyiin. Miyaat chiichoo kusiir nyoo maneeyeenchi ng'alyoonteetaab Yeyiin.⁹Yoo sikiityi cheebyoosya nyee musuk komostaab choo yame keetooret kumachaktoos ku kiikukeeytee kenyiisyek tamanwookik lo. Machaktoos ku cheebyoosya nyee manaachoonchooyenoot, ¹⁰ankitookunoot am yeyuutek chee karoomech kuu woloo kiriibtooy lokokchii, wolee kitooktooy tayek, wolee kiyetyeechintooy biikaab Kiriisto, wolee kitooretitooy biiko choo nyaliltoos ak mbo tukuk alak chee karoomech chee kiikuyey¹¹Mamachaktoos keesirtooy musukuun cho takuminkeeh kuuyu yoo kabiirta muchastaab boorwoonikwa wolee kiikoonemtoochiikeey Kiriisto, kumach kiimut. ¹²Yooto, koosakyi keey kiitiilchi ng'al, kuuyu kaakwiiri kiiiruutyeet ak Yeyiin. ¹³Ilumoote :kooru chee wuu choo koorin koobootoote asiiswekwaa. Ma wuu nyoot bo taay, nteenee yeyoote mbo subak seemseemnyeet koowuutiootee keey ng'al chee ma cheekwaa ankung'oloote mbo ng'al chee mayemakse.¹⁴Kunyoo, amwoochine musuukuunek choo takuminkeech kule kucheeng' saanik ankuriib lokokwaa ak kooriikwaa sumonyoo bunyoonteet barooyinto nyee kang'alaalee icheek nyee miyaat. ¹⁵Kookuweech keey keny :alake kuba wolee mii keniinteet/kibrokoosyoonteet ankookurub ng'aleekyii. ¹⁶Nte yoo mii chebyoosya nyee kiikuchamte Yeyiin ankuming'too keey musukuunek, kumachaktoos kuyechtechine musukuunechoo. Mamachaktoos kubokookyi nyikiisinoo kootaab saayeet. Yooto makuyechteechi kootaab saayeet musukuunechoo minye nkityo.¹⁷Machaktoos keekoonyite boyiikaab kootaab saayeet choo tinye kaantooyiisyeet nyee karaam, anku miisin choo amtooy ng'alyoonteet ankooneete. ¹⁸Mwooye siruutek kule, makeerete yeeyto kuutiit yoo yeyiisye. Nto subak yeme chii nyoo kaakubirto nkuruukyii kunyoor kiy.¹⁹Mamachaktoos simiyeenchine ng'alyo nyee kakeemwooy keeng'aloolee booyik nyee miyaat, nteenee akoy baateey yoo kaakumwooy noomiik chee yite ayeeng' nto somok kule wuu nyooto. ²⁰Yoo kaachoolwooken kaantooyik, iburyoong'tooy kukase biiko, sukung'eet kooyweye chuut alake.²¹Kunyoo ii, Temeteewo, amwoowuung' am taayeetaab Yeyiin ak nyebo Kaaroorookiinteet Yeesu ak mbo am taayeetaab Malayiikaanik choo kweyootiin kule, iruub ng'alechaa nyee meekweye chii. Mamachktoos ichame biiko alak kusiir alak. ²²Meesamsamane keey yoo itinyee chii awunnyek itoolchine yiisyeetaab Yeyiin ameekany kunaming' ng'ookistaab biiko alak. Ibuur itiliil.²³Meeyyee beeko baateey nteenee imoose tiifaayik tisch kubo boortaab moo nyoo iyiimseetiing' btaman. ²⁴Meemuuchaktoos kuwalokiis ng'okiswookikaab biiko alak, nteenee simkeekase bakeenke kumanabokiitiilchine ng'al. Nto chebo alak kooyeelootiin akoy besyoonoo bakiitiilchine nga'l. ²⁵Am keelto nyee wuu nyooto sumkutooku karoomnyeetaab yeyuutekaab biiko alak, amawunyektoos akookoy choo iyeelootiin.

¹Machaktoos motwooriik koyweyee mokoreniik kwaa sikuung'eet make ng'oololee yeeyiin nyee miyaat ak mbo kaaneteeyweekyoo. ²mamachaktoos motworiik choo kikoyentyii mokoreniikwaa yeeyiin kukoochonkchine, kuyuu mbo ng'etaabiya am kiiriisto. Ntenee, machaktos kuyeyee isyeemwa kutook, kuyuu chee yetyeechine isyoonutochoo kuchoo kikoyeentyii ng'oolwonteetaab yeyiin. Ng'eeleek choto chee machaktos inyiing Temetewo ineete ankikiime biiko kurub.³Chiito nyoo kaubaatyeenyekeey wolee mii mokoryoonteet Yeesu kiriisto anko neet ng'aal chee moboo maan, ⁴Kukiikoolaambuch nyoo ng'aasetaab keey amenkeete kiy.Kicham chii choo kwilat ak wookuut.Ibuu ng'alechaa kotuyiityikeey biich moon.Kuwookut, kung'alalatekeey nyee miyaat, kosootyine alaak nyee miyaat, ⁵anku chunchuntos metowookaab biichoo kubo kasooteeyweek chee miyootech chee boonto.Biichuteechu chee kikeebutee ng'oolwonteetaab manta ankusoote kule tos yo kasyeem chii kurub keeltaab Yeyiin ku kelto nyoto nye yeyee chii kunyoor boytiit am korooni.⁶Ntenee, yo0 keenumchi keey chii isyeetaab yeyiin, ametuyiityine ake moo, kaa kunyoor baytit nyee woo miisin am kab yeyiin. ⁷mebere kikesiikteech kii, amekeebetoy kii koyyin kakeboku. ⁸Ntenee yoo kenyoru, kiyee kyome ak kiiyee kilochee, kuyemeech choto.⁹Nto biiko choo nte cheeng' tukuuk sikumokornoon, kutorchine ng'aaleechaa tyemisyeet ankutaach.Torchine ng'aaleechata kuyeye tukuuk chee chaang' cheboo berberyoo ak mbo cheebo muchastaab tukuuk chee iwong'toy biich.Tortooy ng'aleechaa biiko kubootyo ankworon. ¹⁰Towuuneekeey miyotyeet wolee woo muchastaab besaan.Biiko choo loosyoote kumechee besan kikuchuchunee ng'olwonteetaab yeyiin anku ibchikeey mwoonin nyee mokyoomu.¹¹Nto inyiing' nyoo iboye yeyiin, machaktos iseetekeey wolee mii ng'aaleechaa ankirub sobonto nyee churtaat, inemchikeey yeyiin ank kikasekeey inee, ichame biiko alaak,imitochine ng'al ankitalayiitu. ¹²I-am boriyeet nyee karam kubo ng'olwoonteetaab yeyiin. Inket kule kikuriing' yeyiin inyooru soboontaan kibchulyo. Kunyii, ikilchi sobonoo kiichamchintosii kukase biiko chee chang'.¹³Am tayeetaab yeyiin nyoo ikochine kii ake tukuul soboonto ak mbo am tayeetaab yeesu kiriisto, nyoo kichachin am tayeetaab Bontyo Bilato kule inee ku karorokinteet, amwowuung' kule ikilchii ng'olwoonteetaab Yeyiin. ¹⁴Meekany inyoru tisya nto mbo kule keng'aalaleniing' nyee miyaat.Iriib kunyooto akoy besyeet nyoo mokuchone mokoryotenyoo Yeesu kiriisto.¹⁵Mokukweryoon yeyiin am besyeet nyoo kikotorto inee. Itororoot Yeyiin ankwine nkityo boytoyinteet. Inee boyintoyinteetaab boytoyiik anku mokoryoonteetaab mokoreeniik. ¹⁶Yeyiin nkityo nyee mameye anku munyee am lakweyeet nyee makesekse.Mamii chii nyee kikukas Yeyiin nto mbo nyee imuche kukas.Kukonyitokoy Yeyiin ankuboytoyis akokoy.Kuwuuyiit nyooto.¹⁷Imwoochi choo boonto boychtiit am koronii kule mang'eesekeey ametiyee met tukuchoo. TUkuuk choo chee makiinkeete batay ak moo.Ntenee kiyee mache kuyeye kuku tiyee Yeyiin met nyoo koneech kii ake tukuul kuyaam anku yeyeech tukuchoo keeng'arach. ¹⁸Imwoochi buchoo kuyaay ng'aaleek chee chaang' chee koromeech, kuyeek biich chee lelaach mooniik ankuchame kuyeemtoy tukuuk ak biiko alaak. ¹⁹Yoo kayay kunyotoo, kakuyochtochi keey boychtiit nyee tiyekeey am koreet nyoo chooni,sukung'eet ku kilchi soboontaab manta.²⁰Temetewo, kamwoowuung' kule mekuste iyey ng'eeleechaa tukuul choo kikotorung' Yeyiin. Isetekeey kwilateet nto wookut nyebo berberyo nyoo yeye choo ng'eesekeey kirneteet nyee mobo man. ²¹Yeye keey kule ng'omeech,ntenee kikuchuniye ng'aloonteetaab Yeyiin. Kooberuurook Yeyiin.