¹Anii ku Bawulo ankaaboonte keey Siila akoo Temeteewo. Asiirwook akweek kaniseet amTeesaloonike choo obooye Baaba Yeyiin ak Mokoryoonteet Yeesu Kiriisto. Leyye, kooberuurook Yeyiin ankoonyooru kaalyeet.²Keebirchine Yeyiin koonkoy akookoy kubo akweek tukul yoo keesoowook. ³Kiisootook am yiisyeet nyoo oyeye okoosee keey inee ankoboonte chamateet. Keebirchine Baaba Yeyiin koonkoy subak, kuuyukyookiimchi keey okenee keey Mokoryoonteenyoo Yeesu Kiriisto.⁴Mbo ng'eetaabiya, kiinkete kule kiikukweyaak Yeyiin nyoo chamook, ⁵Kuuyu yoo kikyoomwook lokooywek chee karoomech meebere ki ng'al buch, nteenee kibo kaamukey kuboonto keey Tamirmiryeetaab Yeyiin soochamte akweek manta. Onkete akweek mbo wolee kikiibuurtooy acheek yoo kikeeboonte keey tukul.⁶Kyoocham oyechi Yeyiin yiisyeet kuu acheek. Kyootaach lokoywechoo am ng'erekweekaab Tamirmiryeetaab Yeyiin ankookuyeyaak keewusook. ⁷Am yooto nanyuun, oyeku kaaneeteywoo am wolee mii biiko tukul chebo yeemeetaab Maketooniya akoo Akaaya choo iyeenchine Kaarorookiinteet.⁸Meebere kiyit lokooyweekwook choo bo mokoryoonteet yeemeetaab Maketoniya akoo Akaaya baateey, nteenee kikas kooreet tukul kule okoosee keey Yeyiin. Kunyoo, mamii kiy nyee takumachaktoos keemwaay. ⁹Ng'aloole bichooto tukul wolee kyoochamte ng'aleekyoo ak wolee kyootayte aynatoos ankoorub Yeyiin nyoo bo manta. ¹⁰Nto yooto okanyoonu lakwaanyii koyewunee kibkonkooy. Nyooto ku Yeesu nyoo king'eete Yeyiin meet. Inee nyee makuyeeteech simakiing'wooncheech.

¹Mbo ng'eetaabiya, onketee akweek kule manaawo buch ruutooyto nyoo kikeekwoonii acheek wolooto. ²Onkete wolee kisimkeewusteech ankintosuurteech am kiriinketaab Filibi.ankoo kikeekwiileech misiin,kikooneech Yeyiin nkuruuk kyoomwook lokooychii chee koroomeech.³Okas kule kimakyoomtooy ng'al chebo ng'wiiynan nto kikiisoote ng'al chee makoroomech nto kikeebere kule keekonwook. ⁴Kichamteech Yeyiin ankootoorweech lokoywechu koroomech. Kunyi, meebere kyoomtooy lokooywechu kule sikiing'ereech biiko, nteenee kyoomtooy kule sikiing'ereech Yeyiin nyoo inkete kaasooteyweekyoo.⁵Onkete akweek kuchurta kule meebere kikeekwaante acheek ng'aleek chee kikeeleebleebeenook nto kikeekwaante ng'al chee iyeele mooyeetyoontiit nyee keeboonte. Roobeech mbo Yeyiin kurubta keey ak ng'aleechu. ⁶Manaakeesyeem kule nto okaasteech akweek nto kuu chii ake tukul,⁷ankoo kiyemaat keenyikisyook acheek keeyeku lebkeyiikaab Kiriisto. Nteenee yu kikeeboonte keey akweek, kikeeyibook nyee karaam kuu woloo yibtooy cheebyoosya nyee ruroot moo lokokyii kuriibe. ⁸Kikeemache miisin kiibuurte keey akweek nyee meebere kikeekoonook lokooywekaab Yeyiin baateey,nteenee kikiiboorwook ng'aleek chee rubtooy keey ak soboonwekyoo, kuuyu kikeechamaak miisin. ⁹Mbo ng'eetaabiya, maanii onkete wolee kikeeyiyte yiisyeet ak wolee kikyoomtooy booryeet. Yooto kikeeyieyiisyee beet ak kweemooy. Kikeeyeye kuu nyooto simakeenyikisyook yookikeemwoowook lokooywechoo bo Yeyiin.¹⁰Yoo kikeeboonte keey akweek, choo oyeenchine Kiriisto, kyookas ankiikukas nkinee Yeyiin kule keeyekuu acheek biich chee keechurtootiin, chee bo man, amakeeboonte leelis. ¹¹Onkete mbo kule kiikeeyibook acheek kuu woloo yibtooy boyoo lokokyii. ¹²Kikiititiirook ankiikiimchook kule oyeye ng'aleek chee ing'ereeche Yeyiin nyoo kuurook boobuur tukul oyemte baytooyiisyeenyii akoo wooyinnyii.¹³Keebirchine Yeyiin koonkoy akookoy, kuuyu yoo kikeeyikwook lokooyweekyii okas ankoocham meebere kuu lokooy chebo chii buch, nteenee bo Yeyyin. Man, yeyiisye ng'alyoontoonooto am ariing'woong' akweek choo oyeenchine Kiriisto.¹⁴Kyoonyooru akweek, mbo ng'eetaabiya ng'aleek chee kerkeey akoo choo kinyooru biikaab Kiriisto choo mii Yuuteeya. Kiinyaliilaak biikwook kuu yoo kiinyaliile icheek Yuutayeek ¹⁵choo kibekeche Mokoryoonteet Yeesu akoo workoyikaab Yeyiin ankukweteech acheek. Meeng'ereeche bichoo Yeyiin ankukwiile chii ake tukul. ¹⁶Kisyeem mbo kule kukerekteech kyoomchi lokooywek biiko choo ma Yuutayeek, lokooy chee makuyey kiiraraach bichoo. Nteenee mii kutasyine Yuutayeechaa ng'ookiswookik alak am chooto boonto. Kunyoo, kookoong'woonchi icheek Yeyiin.¹⁷Mbo ng'eetaabiya, ankoo kookuyeyeech biiko keebakaakte keey kisich am boorwek, kiisootook akookoy am tamirmiryeet. Kaakwaameech yeemooteet miisin keekasaak subak. ¹⁸Kiyooto nyee kiyeyeech keemach kiiyeewu woloo omiite. Kyaasyeem anii Bawulo kunyil areet chee chaang' kule nto ayeewu woloo omiite nteenee kikerekteech kibrokosyoonteet. ¹⁹Mbo ng'oo chee kiikenee keey acheek anku ng'oo chee keeng'ereechee, nto ku ng'oo chee keeng'asee keey yoo makeetuweneech am taayeetaab Mokoryoonteenyoo Yeesu besyoonoo iyeewu? Ma akweek? ²⁰Kubooyiit ma, akweek chee keeng'asee keey ankeeng'erechee.

¹Yu kakeekas kule kimakiimuuche takeemuyte, kiisoot keeng'atuunee kiriinkeetaab Aten. ²Ankiiyooku ng'eetaabiya Temeteewo nyoo kiyechine tukul Yeyiin yiisyeet kyoomtooy lokooywekaab Kriisto. Kikiiyooku chakootitiirook ankookiimook okaasee keey Kiriisto. ³Sukung'eet meebere makeenyebet chii am akweek kubo wusiisyooni. Onket akweek kule machaktoos keebuntee wusiisyeet.⁴Kisim keemwoowook oob keboonte keey kule makeewuuseech? kunyii, kokuyaayakiis kunyooto, kuyoo onkeete. ⁵Kiiyooto nyee kiyaya ayoku Temeteewo. kimamuche tamichte subook. kunyoo, ayoku inee chakukaas yoo tokoseekeey Kiriisto.Kyaamuy akaas am keelto ake kule kityaamak keniinteet sukubooyit buch isyoonoo kikeyeye.⁶Kokoyeewuune Temeteewo woloo omiite,ankooyibkweech lokooyweek chee koroomech kurubtakeey kakaseemwoong' ak chomnyeet nyee oboonte.Kokumwooweech kule osootyeech akokooy nyee karaam ankoo omeeche kule nto okaseech kuyoo kemeche ankaacheek kule nto kekasaak. ⁷Leyye' mbo ng'eetaabiya, kokeetiitir yu kakyoomweech wolee wu kakasemwoong' am Kiriisto ankoo kikinyaliileech ankewuusech.⁸Yoo kookiilchi akweek Mokoryoonteet keeng'ereche acheek ⁹nyee mamiite wolee makeebirtoochi Yeyiinteenyoo koonkoy. Keeng'erekootiin miisin am taayeenyii kubo akweek. ¹⁰Keesooye inee akookoy beet ak kweemooy kule nto keekasaak sikiititiirook ankeekoonook kiyee mooboonte kurubta keey ng'alyoonteetaab Yeyiin.¹¹Keesooye Baaba Yeyiin ak Mokoryoonteenyoo Yeesu kule kuyootweech keelto keekwaa bokeekasaak subak. ¹²Leyye, kuyey Mokoryoonteet kuwooyit choomnyeet nyoo oboonte ak chamateet nyoo oboontee chii ake tukul, kuu yoo keeboonteenook acheek. ¹³Kootitiir Yeyiin kaasooteyweekwook soochurte ankootililiitu am taayeetaab Baaba Yeyiin kuboonto keey biikyii tukul, besyoonoo choonii Mokoryoonteenyoo Yeesu.

¹Kunyoo ii, mbo ng'eetaabiya, aber kiikiineetaak wolee kiibuurtooy sikiing'ereech Yeyiin ankuwuu nyooto wolee obuurtooy. Nanyuun, kiikaloone keemwoowook am kaayneetaab Mokoryoonteenyoo Yeesu kule, otas taay miisin oyey kuu nyooto. ²Onkete ng'aleek choo kikiiboorwook acheek kubununee kaamukeyweekaab Mokoryoonteet Yeesu.³Makyook Yeyiin otililiitu amoomartoote. ⁴Kuyibe mureno ake tukul koorkeenyii am keelto nyee tiliil ankubo koonyit. ⁵Mookany kutwaaraak muchastaab boorwoonikwook kuu bichoo meenkete Yeyiin. ⁶Am ng'alyoo nyee wuu nyiitenyi, ma-alok chii ng'eetaabkaamet. Kisimkiisoowook kule makoong'woonchi Yeyiin biiko choo yeye rokosiitenyi.⁷Kimakuureech Yeyiin kule subokeemartoote, nteenee mache kule kiibuur kaabuurto nyee tiliil. ⁸Kunyoo, yoo otaye kaaneeteyweechu meebere kootay chii, nteenee kootay Yeyiin nyoo koonook Tamirmiryeenyii.⁹Nto nanyuun ng'alyoo kurubta keey ak chamateetaab mbo ng'eetaabiya, mamachaktoos keesirwook kiy, kuuyu kiikooneetaak Yeyiin ochoomtoosii. ¹⁰Kyoobuur nkakweek kuu nyooto ochame mbo ng'eetaabiya tukul choo mii Maketoniya. Kunyoo ii, mbo ng'eetaabiya, keesoomook kule ochoomtoosii miisin. ¹¹Okas kule obuure am kaalyeet ankooyeye yiisyeemwoong' nkit o-ame kiyee koobirtee nkuruukwook kuu yoo kisikeemwoowook. ¹²Yoo koobuur kuu nyiitenyi, makukoonyitook mbo biiko choo meebere iyeenchine Mokoryoonteenyoo amamii kiy nyee makubotwook¹³Mbo ng'eetaabiya, keemache onket manta kurubtakeey ak biiko choo kiikubek simoomeeyse kuu biiko choo maboonto kiyee ikenee keey. ¹⁴Keechamtooy kule kime Yeesu ankung'eetee meet. Kunyoo, keechamchiintoosii kule makoong'eetee Yeyiin meet biiko choo kiikubek kuu yoo kiing'eetee Yeesu. ¹⁵Kaaneeteyweekaab Mokoryoonteet chu chee keemwoowook. Makiintooyee acheek choo keesobchootiin choo kiikubek besyoonoo choonii Mokoryoonteet.¹⁶Makuwookyi malayikeet nyee woo barak ankeekuut aryembuutaab Yeyiin. Yooto nanyuun mokuchoonee Mokoryoonteet kaab Yeyiin. Makiing'eetee meet kurook biikaab Kiriisto choo kiikubek. ¹⁷Nto yityoo, kiiruruucheech acheek choo takeesobchootiin keetuuye ak bichooto keebeete keey woliin bo boolik bokeeyeme barak ak Mokoryoonteet. Kuchakee yooto nanyuun, makiibuurte keeyMokoryoonteet akookoy. ¹⁸Kunyoo ii, leyye, otitiiree keey ng'aleechu.

¹Mbo ng'eetaabiya mamachaktoos keesirwook kurubta keey besyeet nyee choonee Mokoryoonteet, ²kuuyu onket akweek kule makumuung' kuu chooriin nyoo choonii kweemooy. ³Besyeet nyoo mwooye biiko kule kaalya kooro ankeeriibootiin, ku yooto yee makiiserweetee bichoo. Machilile chii. Makumuunkyi bichoo ng'aleechaa kuu ng'oonin nyoo nyooru koorko nyoo mache kootuusyo.⁴Nteenee moomiite mbo ng'eetaabiya meenan nyee imuuche konyoorwook besyoonoo ku moochobootiin. ⁵Obooye akweek tukul lebkeeyyeet ankoobooye beetuut. Makeebooye kweemowuut amakeebooye meenaneet. ⁶Kunyoo, mamachakse keeruuye kuu biiko alak, nteenee machakse keeyeku biich chee kasunootiin ankeeriibe keey. ⁷Bo rwoonik kweemooy anku kweemooy yee bookiitoos biiko.⁸Nteenee keebooye acheek beetuut, kunyi machakse keeriibe keey. Machaktoos kiiluumee keey kaakaaseet ak chamateet kuyek kariikaab booryeet choo kiilookyine teket, ankiilaach nkinee kaakeneet nyebo kaararaacheet kuu kuutweetaab booryeet nyoo kiilookyine met. ⁹Manaakweyeech Yeyiin sukoong'wooncheech, nteenee mache sukooraraacheech kubununee Mokoryoonteet Yeesu Kiriisto. ¹⁰Kime Kiriisto kubo acheek kule subokeeminy ak inee anku yoo takeesobchootiin ee, nto kukiikeebeku. ¹¹Kunyoo, machaktoos otitiirii keey ankoosooysooye keey kuu yoo omiite oyeye kuunyiitenyi.¹²Mbo ng'eetaabiya, keesoomook okoonyit bichoo kiikukwey Yeyiin choo ame booryeet koontoowook ankootitiirook am Mokoryoonteet. ¹³Okoonyite bichoo miisin ankoochame am yiisyeet nyee yeye. Nto akweek, obuurte kaalyeet. ¹⁴Kiikaloonwook akweek mbo ng'eetaabiya kule ochuule biiko choo tinye keweynateet, otitiir choo nyokoorech, oyechteechine choo kuskusech ankoomuytoochine chii ake tukul.¹⁵Okas kule momii chii nyee kaketyi ake miyootyeet, nteenee osyeeme akookoy oboorchine karaamateet biiko tukul. ¹⁶Ong'ereche akookoy, ¹⁷osooye asiiswek akookoy, ¹⁸obirchine Yeyiin koonkoy am yeet ake tukul. Ng'alyoo nyi nyee makyook Yeyiin oyeye am Kaarorookiinteet Yeesu.¹⁹Moomiis Tamirmiryeetaab Yeyiin. ²⁰Moochuur ng'aleekaab workooyik. ²¹Orootoote tukuuk tukul ankooname choo karoomech ²²ankootayee keey kiy ake tukul nyebo rokos²³Kuyeyaak Yeyiin nyoo koonu kaalyeet otililiitu am keel ake tukul. Kuriibakoy tamirmiryeetaab chii ake tukul, soboonnnyi ak boornyii nyee momii leelis akoy yoo iyeewu Mokoryoonteenyoo Yeesu Kiriisto. ²⁴Mawechweeche keey nyoo kikweyook anku makuyey kuu nyooto.²⁵Mbo ng'eetaabiya, osooweech acheek, ²⁶Osuboowoo mbo ng'eetaabiya alak tukul nyee ong'erekyine. ²⁷Amwoowok am kaamukeyweekaab Mokoryoonteet kule osumanchi mbo ng'eetaabiya tukul. ²⁸Kooberuurook Mokoryoonteet Yeesu Kiriisto.