¹Aa omatatekelo oulumiwa wa Jesu Kreste, o Mwana Mulimu. ²Wenji omu kunan'oleliwa kwa Isaya omupolofita, "Omone, nahatuma o numana wange posho cho lupala loe, oyu tamba kulukisha enjila choe. ³E liywi lyo munu okuwaile munaheni, 'Mulukishe enjila cha Mulena; muolole amanjila ae."'⁴Joani yopo keya, yo kolobelize munaheni mi nakukutaza yo kolobezo cho kubakela eibi. ⁵Enaha choshe cha Judea mi naanu oshe a Jerusalema apaa panena okwae. Kumanaa lobeziwa o kwae mu nuka cha Jordani, aakuambelile eibi yoo. ⁶Joani kumanaa kumanga shiapalo sha mboya cha kamele mi nalukanda lwa litalo mumbunda chae, mi kumanaa lyanga limba na uki wa munaheni.⁷Kumanaa kutaza, yoambile, "Mumweya kumaa keya munyima change wo maata kunipita; oyu nikanine kufanena kunungulula amakatulo okumaulu ae. ⁸Nami kolobeza na meyu, kono oye kumaamikelobeza na moya ukenu."⁹Kumanakutendahala mwao mayuwa nji Jesu yopo keya kutunda ku Nazareta mu Galilea, mi kumanaa lobeziwa kwa Joani mu nuka cha Jordani. ¹⁰Jesu yo tunda mumeyu, yopo mona eliwilu eliyanjilukile mi na moya ukenu oushechumukelile okwae wenji likuchi. ¹¹E liywi lyo[o litunda kuwilu, "Yowe mwanange nishingile. Nakuyubishisha yonone."¹²Cwale honi o moya wopoumupindekecha kucha munaheni. ¹³Kumanaa kaikala munaheni mayuwa makumi mane, yolikilwe kwa Satani. Kumanaa ikala na iyama ya munaheni, mi amangeloi kumanaa mubelekela.¹⁴Cwale Joani yona kwatiwa, Jesu yopo keya mu Galilea yo ambile oulumiwa wa Mulimu. ¹⁵Yo ambile, "Enako china taleleziwa, mi na mubuso wa Mulimu wahaikala pepi. Mubake mi mulumele oulumiwa."¹⁶Yoendile kumbali no lichiya lwa Galilea, yopo mona Simoni na Andeleasi ominaa Simoni aayumbelile liochi mulichiya, kakuli neli mandui. ¹⁷Jesu yopo amba okoo, "Mukeye, munikon'e mi kumani mitenda ayambi aanu". ¹⁸Cwale honi wanguwangu apaa shiya amaochi mi apaa mukon'a.¹⁹Jesu yoendile pale kanyonyo, yopo mona Jakobo o mwana Zebede na Joani o minae; kumanaa ikala mushisepe aaonhile amaochi oo. ²⁰Yopo aisha mi apaa shiya ihoo Zebede mushisepe naa pika naamemiwa, mi apaa mukon'a.²¹Cwale honi apaa keya ku Kapernauma, mi peeli lyo Sabata, Jesu yopo ingena mu sinagoge mi yopo luta. ²²Kumanaa china kumilutelo chae, kakuli kumanaa luta wenji munu wakukwata maata amulao mi kaha wenji an'oli.²³Popo cwale honi o mulume mu sinagoge choo oyu nokwata moya ui yopo kuwelela, ²⁴yoambile, "Twahafanena kutenda ike okoe, Jesu wa Nazareta? Onakeele kuyatuipaa? Nakulimuka. Onokukena wa Mulimu!" ²⁵Jesu yopo kalimela o moya ui mi yopo amba, "O mwene mi otunde okwae!" ²⁶O moya ui wopoumuyumbela pashi oukuwile na liywi likulu.²⁷Aanu oshe kumanaa komoka, mi apaa kuipaula, "Ike ei? Mulutelo opya wa maata! Alaela shuwa emyooya chii mi chamuyubela!" ²⁸Amakande ae apaa cha moshe mushibaka sha Galilea.²⁹Munyima chokutunda mu sinagoge, apaa keya munjiyo cha Simoni na Andeleasi, aaeldile na Jakobo na Joani. ³⁰Cwale o mukwenyani wa Simoni wo mukachi kumanaa lala yokolile fibele, mi apaa ambela Jesu eyae. ³¹Mi yopo keya, yopo mushimba kulikaha, na kumuingula; e fibele chopochimushiya, mi yopo tateka kuabelekela.³²Ao mangolwangolwa e Lyuwa eli neeki, apaa leta okwae oshe aa naakola kamba aa naakwata myooya chii. ³³Omulenen'i woshe wopo ukuwana pa mweelo. ³⁴Yopo yoisha angi aa naakola matuku amifutafuta mi nakutundisha myooya chii chingi, kono keela aitanisha emyooya kuamba kakuli kumana chimulimuka.³⁵Yopo inguka amashikushiku shemwa, okushiilaulile; yopo funduka mi yopo cha munaheni mi yopo kalapela. ³⁶Simoni naa naaikala noo apaa mufaa. ³⁷Apaa muwana mi apaa muipula, "Aanu oshe akufaa."³⁸Yopo amba, "Tweendenyi kwako, mumatolopo achingulukile, ilikuli nikakutazeko nako. Eli lyoli baka nina keele kuno." ³⁹Yopo cha mu Galilea moshe, yo kutalize mumasinagoge oo mi nakutundisha myooya chii.⁴⁰Wo mbingwa yopo keaya okwae. Yomulombile; yopo kubama pashi mi yopo amba okwae, "Haiba nji washinga, watwesha kunikenisha." ⁴¹Yopo muyubela man'eke, Jesu yopo mukwata kulikaha, yoambile okwae, "Nashinga. Okene." ⁴²Wanguwangu e mbingwa chopo chimushiya, mi kumanaa kenishiwa.⁴³Jesu yopo mupa mamela mi yopo mulukulula. ⁴⁴Yopo amba okwae, "Okwate niti nji koambelile munu, kono oche, okakumonahalishe ku mupulisita, mi ope mpo echi naalaela Mushe, ilikutenda upaki okoo."⁴⁵Kono yopo cha mi yopo tateka kuamba yonalukuluha na kuhasanya e liywi, yonone kutenda nji Jesu yopo kwqanga kuingena tolopo yomonahalile kono yopoikala kuibaka yokule. Shuwangeyo aanu kumanaazwelapili kukeya okwae kutunda muibaka yoshe.

¹Jesu yo huka ku Kapernauma munyima cho mayuwaana, kumana kuyubala nji kumanaa ikala pamwanda. ²Mi aangi apaa kakuwana ko kutenda nji kopokuulwa nashibaka, kaha shuwa pamwelo, mi yopo amba eliywi okoo.³Cwale honi kopo kukeya alume okwae aaletile mulume wakukukutela lun'an'ali; alume ane kumanaamushimba. ⁴Aakwanga kukuma okunaa ikala kabakala eshichaba, apaa tundisha eshituwa eshi nashiikala peulu cha Jesu, mi aanamana kuyanjulula, apaa shechumuna omuseme apa naa shendama omulume wokukukutela olun'an'ali.⁵Yomona etumelo choo, Jesu yopo amba ku mulume wo kukukutela olun'an'ali, "Mwanange, eibi yoe inaswaleliwa." ⁶Cwale aakwao oan'oli omulaao kumanaa ikalapo, mi aakuipaulile mumichima choo, ⁷"Oyu mulume aha amba ngepi ngeya? Anyefula! Anyi yotweshile kuswalela ibi ene Mulimu yofochi?"⁸Wanguwangu Jesu kumanaa limuka mumoya wae einaakengeela mukachi koo. Yopo amba okoo, "Ike apa mukengeelelile yongeyo mu michima chenu? ⁹Shipi shoshioto, okuamba kumulume wo kukukutela olun'an'ali, 'Eibi yoe inaswaleliwa,' kamba kuamba nji, 'Oimane, oshimbe omuseme woe oende'?¹⁰Kono pakutenda nji mulimuke nji Mwana Munu akwata maata pakaye okuswalela ibi," yopo amba koyu wokukutela olun'an'ali, ¹¹"Nakuambela, oimane, oshimbe omuseme woe, mi oche ku njiyo choe." ¹²Yopo imana mi wanguwangu yopo shimba omuseme, mi yopo pana munjiyo posho cho munu yoshe, kuli oshe kumanaa komoka mi apa apa kanya kwa Mulimu, mi apa amba, "Keela twamona inu yangeya."¹³Yopo cha kame kumbali no lichiya, mi eshichaba shoshe shopo shikeya okwae, mi yopo aluta. ¹⁴Yopitile, yopo mona Levi o mwana Alufea yotongomanine ku tente cho mutelishi mi yopo amba okwae, "Onikon'e." Yopo imana mi yopo mukon'a.¹⁵Jesu kumanaa mukushuko munjiyo cha Levi mi aangi atelishi naa eza libi kumanaa ikala nae kutafule na alutiwa ae, kakuli kumanakuikala aangi mi kumanaamukon'a. ¹⁶Aan'oli, aanaa tenda mafalisi, aamona nji Jesu kumanaa lya naa eza libi na atelishi, apaa amba ku alutiwa ae, "Ike apa alyanga naa telishi naa eza libi?"¹⁷Jesu yoyuba ngeyo yopo amba okoo, "Aanu okukuketa mulutu katweshe kufaa mupangi; ene feela aa akolile aamufaile. Keela nakeyela kuya isha aa okuluka, kono aaezalibi."¹⁸Cwale aalutiwa a Joani na mafalisi neli akuyumena ilya. Kopo kukeya anu okwae mi apaa amba okwae, "Ike apa aalutiwa a Joani na mafalisi akuyumeninange yokulya, kono aalutiwa oe kaakuyumenine?" ¹⁹Jesu yopo amba okoo, "Kuamba nji aa aikile kumukiti wo maluwo atwesha kukuyumena ilya omuyeki yoshiikile noo? Pakutenda nji omuyeki oshiikile noo, kaatwesshe kukuyumena.²⁰Kono amayuwa kumaakeya o muyeki apaa shimbiwa okoo, mi mwaao mayuwa, kumaa kuyumena. ²¹Kakusha munu olukela lwambi lupya pashito shokale. Nji kaha ngeyo eshikamba shapayuka po, eshipya kutunda peshi shokale, mi kwaikala limbwatu likulu.²²Kakusha munu otulanga waine mupya mumatalo okale. Nji kaha ngeyo e waine kumachi payula amatalo mi muwiili wayo na waine na matalo kumai sinyeha. Kono, waine chipya chatuliwa mumatalo mapya."²³Pa lyuwa lyo Sabata Jesu yopo cha muyanda youloto, mi aalutiwa ae apaa tateka kuyanga emitwi choupeke aapitile. ²⁴Amafalisi apaa amba okwae, "Omone, ike apa atendeile yonambula mulao pa lyuwa lyo Sabata?"²⁵Yopo amba okoo, "Keela mwa bala einaa tenda Davida yo faile mi yoyubile njala- oye na alume naaikala noo- ²⁶omunaa chela munjiyo cha Mulimu Abiata yotendile mupulisita mukulu, mi kumanaa lya eishima naitulelwa Mulimu, mi neli kaha mulao ku munu yoshe kulya ene feela ama pulisita, mi yopo pa mane naa naa ikalaa nae?"²⁷Jesu yopo amba, "E Sabata kumana chitendeliwa munu, kaha munu kutendeliwa Sabata. ²⁸Mungeyo, Mwana Munu Mulena, shuwa lyo Sabata."

¹Kame Jesu yopo ingena mu Sinagoge, mi kumanakuikala mulume wo likaha lyokukukutela lun'an'ali. ²Anu amweya apaa mutanekela natokomelo kumona nji kumaa muyoisha pa lyuwa lyo Sabata ili kuli atweshe kumu shangecha.³Jesu yopo amba kooyo mulume wolikaha lyokukukutela olun'an'ali, "Oinguke mi oimane mukachi noanu oshe," ⁴Cwale honi yopo amba kuanu, "Kana mulao kutenda wino pa lyuwa lyo Sabata kamba kutenda ui; kuyoisha upilo kamba kuipaa?" Kono kumanaa mwena.⁵Yopo atanekela nauchini, mi yopo yuba man'eke kabakala okuongola emichima koo, mi yopo amba koyo mulume, "O olole elikaha lyoe." Yopo liolola, mi elikaha lyae kumalihukela. ⁶Amafalisi apaa panena panji mi wanguwangu apaa tateka kulela na ma Heroda omunga twesha kumipaela.⁷Cwale honi Jesu, na alutiwa ae, apaa cha kulichiya, mi eshichaba shikulu kutunda ku Galilea naku Judea shopo shikon'a ⁸naku Jerusalema naku Idumea mi mane nakupitelela Jordani mi nakuchinguluka Tire na Sidoni. Apa naayuba kuamana nainu naatenda, shichaba shikulu shopo shikeya okwae.⁹Yopo ambela aalutiwa ae nji kuikale shisepe shinyonyo shakumutatiela kabakala eshichaba, ilikuli akamushinenekecha. ¹⁰Kakuli kumanaa yoisha angi, ilikuli o munu yoshe oyunokwata utata kumanaa mukwekela ilikuli amukwate.¹¹Enako choshe e myoya chii echi mumona, kumanachingwela pashi posho chae echikuwelelile, mi echiambile, ¹²"Yowe Mwana ,Mulimu." Yopo alaela nji akamulimukisha kuanu.¹³Yopo kambamena kuli lundu, mi yopo isha aanaafaa, mi apaakeya okwae. ¹⁴Yopo keta olikumi (aanaaisha nji aapositola) ilikuli aikale nae mi afanena kuatuma nji aka ambe eliywi, ¹⁵mi nakukwata maata akutundisha myooya chii. ¹⁶Yopo keta olikumi: Simoni, oyu natula e lichina lya Pitolosi;¹⁷Jakobo omwana Zebede, na Joani omina Jakobo, oyu naatula elichina lya Boanegesi, kutalusa, ana omushika; ¹⁸na Andeleasi, Filipi, Batolomeu, Mateu, Tomasi, Jakobo omwana Alufea, Tadeusi, Simoni omukanana, ¹⁹na Judasi Isikaroita, oyuno mubeteka.²⁰Cwale honi yopo cha kumwanda, mi nashichaba yoposhokuwana pamweya kame, kutenda nji mane keela alya shuwa ishima. ²¹Olupashi lwae aayuba ngeyo, apaacha nji akamushimbe, kakuli kumanaa amba nji, "Aha lyangana." ²²Aan'oli noanu naakeya kutunda ku Jesrusalema apaa amba nji, "Aendishiwa kwa Bezebulu" mi kame "Namukulu wo myoya chii alonga e myooya chii."²³Jesu yopo aishela okwae mi yopo amba okoo mumanguli, "Satani atwesha kutundisha ngepi myoya chii? ²⁴Haiba nji o mubuso unakutapa wofochi, owo mubuso kautweshe kuimana. ²⁵Haiba nji e njiyo chinakutapa chofochi, e cho njiyo kachakutwesha kumana.²⁶Haiba nji Satani onakualukele yofochi mi onakutapa, katweshe kuimana, kono onakumu kumamaneneno. ²⁷Kono kakusha oyu twesha kuingena munjiyo cho mulume wokutiya mi akaiche eiluwo yae kwana mbula kumununga weli, mi honi aipishe munjiyo chae.²⁸Niti namiambela, eibi yoshe yoana noanu kumaiswaleliwa, shuwa amanyefulo oshe aa atendile, ²⁹kono yoshe oyu nyefula omoya ukenu kakuwana swalelo, kono onafoso shibi sha kuyakuile." ³⁰Jesu kumanaa amba ngeyo kakuli kumanakuambiwa nji, "Akwata moya ui."³¹Cwale honi inawae naaminae apaakeya mi nakuyaimana panji. Apaa mutumena munu, kukaamuisha. ³²Eshichaba kumana shitongomana eshimuchingulukile mi apaa amba okwae, "Inawoe na aminoe naamanjoe aikala panji, mi akufaa."³³Yopo aalaba, "Akaanyi oakainawange naa aminange ?" ³⁴Yopo tanekela ao naatongomana mushikwenda kumuchinguluka mi yopo amba, "Mumone, ngaa aainawange naa minange! ³⁵Kakuli yoshe oyu tendile etato cha Mulimu, oyo munu mwepange, mi manjange mi inawange."

¹Kame yopo tateka kuluta kumbali no ilchiya, mi eshichaba shukulu shopo shikuwana kumuchinguluka. Yopo lyata mushisepe nashiikala palichiya, mi yopo tongomana po. E shichaba shoshe kumanashiikala palikamba kumbali nolichiya. ²Yopo aluta inu ingi mumanguli, mi mumulutelo wae, ei yonaa amba okoo.³"Muteecheche! O mulimi kumanaacha kukakuna e mbuto chae. ⁴Yokunine, e mbuto chokwacho chopo chingwela ku mbali no njila, mi einyunyi yopoikeya na kuyachiipisha. ⁵E mbuto chokwacho chopo chingwela pa mubu wo mawe, apa nchi kana kuwana mubu ungi. Wanguwangu chopo chimena, kabakala kuulwa mubu uchon'i.⁶Kono e lyuwa elishila, echalo kumanaitumbekiwa, mi kabakala kuulwa minji, yopoikukuta. ⁷E mbuto chikwacho chopo chingwela paichalo yomingunguya. Eichalo yomingunguya mi yopo iikin'aana, mi keela yashema ilya.⁸Embuto chikwacho chopo chingwela mu mubu uwawa michopochishema ilya muikwata mi eiekezehile na kutula makumi mahatu, makumi mutanu nalikumi, mi mane shuwa miendo chakukwana muanda." ⁹Cwale honi yopo amba, "Yoshe oyu kwite matwi akuyuba, ayube."¹⁰Apa Jesu naaikala yofochi, aa naamuchinguluka naa olikumi apaa muipula kuamana yomanguli. ¹¹Yopo amba okoo, "Yenu munapiwa ekunutu cho mubuso wa Mulimu. Kono ao aikile panji einu yoshe yaikala mumanguli, ¹²ilikuli apaa taneka, ee ataneka, kono kamonine, ilikuli kame apaa yuba, ee ayuba, kono kayubishishile, kamba nji kaha ngeyo atweshe kualuka mi Mulimu atweshe kuaswalela."¹³Yopo amba okoo, "Kamuyubishishile echi nguli? Kumamuyubishisha ngepi amanguli oshe?" ¹⁴Omukuni akuna eliywi. ¹⁵Aa aikile kumbali no njila, oko eliywi likuninwe. Apaa yuba, Satani wanguwangu akeya mi ayatundisha eliywi linakuniwa okoo.¹⁶Mi aa chombuto nachikuniwa pa mubu wo mawe; ao, apaa yuba eliywi wanguwangu alitambula natabo. ¹⁷Kono okoo kaakwite minji, kono atundamena feela nako chinyonyo. Mi munyima okuinguka matomola na nyandiso kuamana na liywi, wanguwangu ahangwa.¹⁸Shuwa ngeyo amweya ngaa nakuniwa pamingunguya. Ngao ayubile eliywi, ¹⁹kono etokomelo cho kaye mi nakuhongauliwa koshifumu na matakazo oinu ikwayo aingena mi nakuyatundisha eliywi, mi kalishemine. ²⁰Echo nachikuniwa pamubu ouwawa ngao ayubile eliywi, aliitane mi lyatula muselo, makumi mahatu, makumi mutanu nalikumi, kamba shuwa miendo cha muanda kucha muungi.²¹Jesu yopo amba okoo, "Kana waleta e lampi munjiyo kuchitula mushi noshizuma kamba mushi nomumbeta? Wachiingenisha mi nakuchitula peulu. ²²Kakuli kakusha eshishinaholekiwa eshi shikana kulimukiwa, mi kakusha kunutu chikana kukeya pangandaleza. ²³Haiba nji kuli munu okwite matwi, ayube!"²⁴Yopo amba okoo, "Muteecheche kwei muyubile, eimukutusisile kuatula kumaikutusisiwa kumiatula, mi kumakuekeziwa ingi okwenu. ²⁵Kakuli yoshe oyu kwite, okwae kumakupiwa ingi, mi yoshe oyu kanine kukwata, shuwa ei akwite kumaishimbiwa."²⁶Yopo amba kame nji, "Omubuso wa Mulimu wafeka wenji mulume oyu kuna embuto chae pashi. ²⁷Alale oushiku mi ainguke oumushi, mi embuto chamena na kukula, yokanine kulimuka nji kwakeya ngepi. ²⁸Akaye katula upeke kofochi: Shopili moko, kutatama amatwi, cwale honi penji oupeke mumatwi. ²⁹Eimela eineebu, wanguwangu atumena mo e chekesi kakuli ekutulu chinakumu."³⁰Kame yopo amba, "Kushike okututwesha kubapanya omubuso wa Mulimu, kamba nguli mwike echi tukutusisa kuutalusa? ³¹Wafeka wenji mbuto cha mashitete, echo, apachikuniwa, chochinyonyo kumbuto choshe chopakaye. ³²Kono, echinakuniwa, chakula mi chatenda chikulu kupita eichalo yo yanda yoshe, mi chatenda mitai chikulu, ilikuli einyunyi yokuwilu itweshe kutenda iyaleto yayo mumuluti wacho."³³Namanguli mangi kumanaa amba ngeya eliywi okoo, kucha omunaatwesha kuyubishishela, ³⁴mi keela aamba okoo kwanambula nguli. Kono apa naaikala yofochi, yopo talusa yoshe kualutiwa ae.³⁵Peelyo lyuwa, amangolwangolwa aana kumu, yopo amba okoo, "Tuche tuhupukele mushambwaliya." ³⁶Mi apaa shiya eshichaba, kushimba Jesu noo, wenji feela omunaaikalela, mushisepe. Kumanakuikala isepe ikwayo naicha nae. ³⁷Popo cwale honi kopo kuinguka moya wamufilifili, mi amandinda kumanaaingena mushisepe kutenda nji eshisepe kumanashikwekela kukuumba.³⁸Kono Jesu oye kumanaikala mulitushi, yolalile yosamine pa musamo. Apaa muingula, aa ambile, "Muluti, kotokomelile nji twaha atumela kukufa?" ³⁹Yopo inguka , yopo kalimela e mepo, mi yopo amba kulichiya, "Kozo! Kumwene!" Cwale honi e mepo chopo chimwena, mi kumanakuikala kumwena kukulu.⁴⁰Cwale honi yopo amba okoo, "Ike apa mumbukile? Nangeno kamukwite tumelo?" ⁴¹Kumanaa kwata umowa ukulu mi apaa amba kumunu na munu, "Anyi honi oyu, kakuli shuwa emepo na lichiya yamuyubela?"

¹Apaa keya mushambwa elikwalyo no lichiya, kushilalanda sho ma Gerasini. ²Jesu yotunda mushisepe, omulume wo myoya chii kutunda pamapilo yopo keya okwae.³O mulume kumanaa pila mumapilo. Kakusha munu notwesha kumununga kame, kaha shuwa naliwenge. ⁴Kumanaa nungiwa miendo chingi na shekele na mawenge. Onambatula mawenge mi nama shekele ae ana shandauka. Kakusha oyu nokwata maata akumu eleza.⁵Ushiku na umushi mumapilo na mumalundu, yokuwelelile nakukuholofaza yofochi namawe akutwipa. ⁶Yomona Jesu kutunda pale, yopoitukela okwae mi yopo kakubama posho chae.⁷Yopo kuwelela naliywi lyokupahama, "Nitende ike noe, Jesu, Mwana Mulimu wokuwilu nakumana? Nakulomba na Mulimu oye shemwa, wakani nyandisha." ⁸Kakuli neli amuambelanga nji, "Otunde koyo mulume, owe moya ui."⁹Yopo muipula, "Owe anyi elichina?" Yopo mualaba, "Yome nompi, kakuli twaangi." ¹⁰Yopo mulomba kuhukahukela nji akaa longa kutunda mushilalanda.¹¹Cwale omutapi ukulu woikulube kumana ukala ko oufuile pan'ambamo, ¹²mi chopo chimulomba, kuamba nji, "Otutume muikulube; otuleshe tukaingene okwayo." ¹³Cwale yopo chilumeleza; e myooya chii chopo chipana mi chipo chikaingena muikulube, mi omutapi wopo unyangupa kushe chumuka kumbomba chon'ambamo kukaingena mu lichiya, mi ikulube yakuatumela kupalo chakukwana ikiti iili yopo iminena mu lichiya.¹⁴Cwale honi aalisani oikulube apaa hunduka mi apaakabiha ei nai tendahala mumulenen'i mi namunaha, mi cwale aanu apaa cha kukamona einaitendahala. ¹⁵Cwale honi apaa keya kwa Jesu mi apaa mona o mulume wo moya- ui, oyu nokwata myooya chingi, yotongomanine na Jesu, yonakumanga mi yonakukete; mi kumanaa mbuka.¹⁶Aanaa mona eshi nashitendahala ku mulume wo moya-ui apaai aambela muutungi, mi kame apaa aambela naiyo ikulube. ¹⁷Cwale honi apaa tateka kumulomba kutunda mushi lalanda shoo.¹⁸Yoingenine mu shisepe, omulume wo moya-ui yopo mulomba nji nga aikala nae. ¹⁹Kono Jesu keela amuitanena, kono yopo amba okwae, "Oche ku njiyo choe mi nakuanu oe mi okaa ambele ei ana kutendela Mulena, na muana kumonishele eshishemo." ²⁰Cwale yopo cha mi yopo tateka kukaamba mu minji cho likumi einu ikulu ana mutendele Jesu , mi aanu oshe kumanaa komoka.²¹Cwale Jesu yona hupukele kame mushambwa elikwalyo mu shisepe, eshichaba shikulu shopo shikuwana aamuchingulukile, yoikile kumbali nolichiya. ²²Cwale honi mumweya wo akulu o sinagoge wolichina lya Jairusi yopo keya, yomumona, yopo ngwela kumaulu ae. ²³Yopo lomba kuhukahukela, yoambile, "Olukeke wange ahaikala pepi nalifu. Nakulomba, okee oyatule amakaha oe apae ilikuli aikale wino mi ayoye." ²⁴Mi yopo cha nae, mi eshichaba shikulu shopo shimukon'a mi apaakushinanekecha pepi aamuchingulukile.²⁵Cwale kumanakuikala mukachi oyu nokwata utuku wo mweya muilimo yolikumi naiili. ²⁶Yona nyanda yonone kutunda kuanganga angi mi onaipisha yoshe einaakwata, kono kupita nji aikale mbubo mbubo yopo chaminena. ²⁷Yona yubu amapiho kuamana na Jesu, yopo keya munyima chae mushichaba mi yopo kwata kushiapalo shae.²⁸Kakuli kumanaa amba nji, "Haiba nji kumani kwata feela eito yae, kumani yoishiwa." ²⁹Yomukwata, omweya wae wopouimana, mi yopo yuba mulutu lwae nji onayoishiwa kuutuku wae.³⁰Wanguwangu Jesu yopo lemuha nji amaata anamutundu. Yopo aluka mukachi koshichaba mi yopo amba, "Anyi yonakwata eito yange?" ³¹Aalutiwa ae apaa amba okwae, "Onamono eshishichaba shikushinachekile kukuchinguluka, mi oambe nji anyi yonanikwata?"' ³²Kono Jesu yopo tanacheka kumona oyunatende ngeyo.³³Omukachi, mukulimuka einaitendahala okwae, yopo mbuka na kunjanja. Yopo keya miyopo yangwela posho chae mi yopo muambela eniti choshe. ³⁴Yopo amba okwae, "Mwanange, etumelo choe china kuyoisha. Oche mukozo mi oyoye kuutuku woe."³⁵Yoambile, kopo kukeya anu kutunda kumukulu wo sinagoge, aambile nji, "Mwanoe onafu. Ike apa oshishupile o muluti?"³⁶Kono Jesu yoyuba yonone elin'usa naliambiwa, yopo amba kumueteleli wo sinagoge, "Waka mbuka. Olumele feela." ³⁷Keela alumeleza munu kumushindekecha ene Pitolosi, Jakobo, na Joani, omina Jakobo. ³⁸Apaa keya kunjiyo cho mueteleli wo sinagoge mi yopo mona ko anu angi aa tendile lila lingi; aalilile na kushikoka yonone.³⁹Yoingena munjiyo, "Ike yomubilaelile mi ike apa mulilile? Olukeke kashifa kono onalala." ⁴⁰Apaa tateka kumunenauna. Kono yopo atula oshe kumbali mi yopo shimba ihwa lukeke na inawae naa naaikala nae, mi yopo ingena omunaaikala olukeke.⁴¹Yopo shimba e likaha lyolukeke mi yopo amba okwae, "Talitha, koum!" Kutalusa nji, "Lukeke no mukachi, Naamba okoe, oimane." ⁴²Wanguwangu olukeke yopoimana mi yopo enda (kakuli kumanaa kwata ilimo makumi naiili yokuelekiwa). Kumanaa filikana wanguwangu nakukomaka kwakupitelela. ⁴³Yopo alaela yonone nji kakusha munu oyu fanenine kuilimuka. Cwale honi yopoa ambela nji amupe shakulya.

¹Yopo tunda mo mi yopo cha munaha chae, mi aalutiwa ae apaa mukon'a. ²Lyo Sabata elikuma, poluta musinagoge. Anu angi apaa muyuba mi kumanaa komoka. Apaa amba, "Kupi kwaatundishile echi milutelo?" "Utali mwike ou unapiwa okwae?" "Mamakazo mwike aa atendile namakaha ae?" ³"Oyu kaha yoe muyuwi, o mwana Maria mi omwepa Jakobo na Josesi na Jumasi na Simoni? Aamanjae kaikile netu pano?" Mi paa kwanga kuyubishisha Jesu.⁴Cwale honi Jesu yopo amba okoo, "Mupolofita akutekiwa, ene munaha chae mi kuapae mi naa omunjiyo chae." ⁵Keela atwesha kutenda musebezi ukulu, ene kutula amakaha ae paakuli anyonyo mi nakuayoisha. ⁶Kumanaa komoka kuulwa tumelo koo. Cwale honi yopo cha muminji yolutile.⁷Cwale honi yopo isha olikumi mi yopo tateka kuatuma aili aili, mi yopo apa maata pa myooya chii, ⁸mi yopo alaela nji aka shimba shinu pa muendo woo, ene feela mulamu-kwana bmula ishima, kwanambula mukotana, mi kwanambula mali mukanda oo- ⁹kono akumange makatulo, mi kaha kukumanga iapalo iili.¹⁰Yopo amba okoo, "Oko mukaingena munjiyo, muikale kupitela omufunduka kutunda mo. ¹¹Haiba nji mwapita mutolopo omu akana kumiamuhela kamba kumiteetecha, apa mushiya eshoshibaka, mututule amaluli kumaulu enu kutenda upaki okoo."¹²Apaa cha mi aambile nji anu afanena kubaka. ¹³Apaa longa myooya chingi, mi nakufuya akuli angi na oli mi nakuayoisha.¹⁴Mulena Heroda yopo iyuba, kakuli elichina lya Jesu kumanali limukiwa wino. Amweya kumanaa amba nji, "Joani mukolobezi onaingukishiwa kuafu, mi eli lyolibaka amaata o mamakazo atendile o musebezi okwae." ¹⁵Akwao kumanaa amba nji, "Elia." Shuwangeyo akwao kumanaa amba nji, "Mupolofita, wenji mumweya woa polofita mu nako chokale."¹⁶Kono Heroda yoyuba ngeyo yopo amba, "Joani, uyu nani mbatula omutwi, onaingukishiwa." ¹⁷Kakuli Heroda kumanaa tumena Joani nji akwatiwe mi kumanaa munungelela mutolongo mi kumanaa tenda ngeyo kabakala Herodiasi (Omukachi wa minae Filipi), kakuli kumanaa muyeka.¹⁸Kakuli Joani kumanaa ambela Herida nji, "Kaha mulao kushimba mukachi waminoe." ¹⁹Kono Herodiasi yopo pindamena ouchini wae kumulwisha mi yopo faa nji aipaiwe, kono keela atwesha kutenda ngeyo, ²⁰kakuli Heroda kumanaa mbuka Joani; kumanaa limuka nji mulume wakuluka mi wakukena, mi yopo mubuluka yokuketile. Kumanaa wapelanga kumuteechecha, shuwa kutende kumanaa katazeha nga yonone.²¹Cwale e kolo chopo chikeya Heroda yotabela omukiti wae wokuelekiwa mi kumanaa tenda mulalelo wamanduna ae mi naakulu o mpi naa eteleli a Galilea. ²²O mwana Herodiasi yopo ingena mi yopo akinena, mi yopo yubishisha Heroda naangena omulalelo wae. Mulena yopo amba kumusizana, "Onilombe yoshe ei ofaile mi kumani kupa."²³Yopo kuecha okwae yoambile, "Shoshe eshi onilomba, kumani kupa, shuwa eshiemba shomubuso wange." ²⁴Yopo cha mi yopo kaamba kwainawae, "Ike yoni mulomba?" Yopo amba, "O mutwi wa Joani Mukolobezi." ²⁵Wanguwangu yopo nyangupela kwa Mulena, mi yyopo lomba, "Nafaa nji onipe, popano, o mutwi wa Joani Mukolobezi pa katuwo koshitondo."²⁶Shuwa nji ei kumanai swabisa yonone Mulena, keela atwesha kukana e kupo chae kabakala okukuecha naatenda mi na kabakala aangenda ae. ²⁷Mi o Mulena yopo tuma musole kutunda kualibeleli ae mi yopo mulaela kumuletela o mutwi wa Joani. O mulibeleli yopo cha mi yopo kamumbatula mutolongo. ²⁸Yopo leta o mutwi wae pakatuwo miyopo pa o musizana, mi omusizana yopo pa inawae. ²⁹Aalutiwa ae ayuba ngeyo, apaa keya mi apaa shimba olutu lwae nakukalutula mulipilo.³⁰Aa apositola apaa keya pamweya na Jesu mi apaa muambela yoshe ei naa tenda nai naaluta. ³¹Cwale honi yopo amba okoo, "Mukee mofochi mushibaka sho lihalaupa mi mupumule kanyonyo." Kakuli oungi kumanaa keya na kucha, mi keela akwata shuwa nako cha kulya. ³²Mi apaa cha mushisepe kushibaka sholihalaupa ofochi.³³Kono apaa mona aafunduka mi oungi apaa limuka, mi apaa itukela ko pamweya pa maulukutunda mu matolopo oshe, mi apaa kakuma ko kale akuma. ³⁴Aakeya palikamba, yopo mona shichaba shikulu mi yopo ayubela man'eke kakuli kumanaa feka wenji mangu anambula mulisani. Mi yopo tateka kualuta inu ingi.³⁵E hola echinapu, aalutiwa ae apaa keya okwae mi apaa amba, "Eshishibaka shalihalaupa mi ehola chinapu yokale. ³⁶Oalukulule ilikuli ache munaha chiikile pepi na minji akakuulele yakulya."³⁷Kono yopo alaba mi yopo amba okoo, "Muape yakulya." Apaa amba okwae, "Tuche tuka ule ishima yateko cha ma dinari amianda chiili mi nakuapa elye?" ³⁸Yopo amba okoo, "Misulo chingachi chomukwite? Muche mukamone." Aaka batishisha, apaa amba, "Misulo mutanu na shi chiili."³⁹Yopo laela aanu oshe kutongomana mukwata pamuhonyi woutala. ⁴⁰Apaa tongomana muikwata yo mianda na makumi mutanu. ⁴¹Yopo shimba emisulo cho mutanu nashi chiili, mi yotaneka kuwilu yopo fuyaula mi yopo chola emisulo mi yopo pa aalutiwa nji atapele aanu. Yopo tapela kame eshi cho chiili pakachi koo oshe.⁴²Oshe kumanaa lya kupitela aaikuta. ⁴³Apaa tola umwamwa waishima, kuumbisha izuma likumi naiili, mi kame naumwamwa woshi. ⁴⁴Neli alime akukwana ikiti mutanu aa naalya emisulo.⁴⁵Wanguwangu yopo ingenisha aalutiwa ae mushisepe mi kuatangecha posho chae muwabu oukwao, ku Betisaida, yolukululile eshichaba. ⁴⁶Yona mana kuafundula, yopo kambamena kulilundu kuka lapela. ⁴⁷Amangolwangolwa apaa keya, mi eshisepe cwale seli kumanasiikala pakachi no lichiya, mi kumanaa ikala yofochi palikamba.⁴⁸Yopo mona nji kumanaa buwa kutanekela e mepo, kakuli e mepo kumanachialiba. Okuatumela amalungashiku aalibelile koune yopo keya okoo, yoendile palichiya, kumanaa faakuapitelela. ⁴⁹Kono aa mumona yoendile palichiya, apaa kengeela nji shilumbs mi apaa kuwa, ⁵⁰kakuli kumanaa mumona mi kumanaa katazeha. Wanguwangu yopo aambaulisha okoo mi yopo amba okoo, "Muongole! Yome! Mwaka mbuka!"⁵¹Yopo ingena noo mushisepe, mi emepo chopo chimwena kufuka. Kumanaa komoka yonone. ⁵²Kakuli keela ayubishisha nji emisulo chatalusa ike. Kono, emichima choo kumanachi ongola.⁵³Ana hupuka, apaa yafueka mu Genesareta mi apaa imeka eshisepe. ⁵⁴Aanatundu mushisepe, aanu apaa mulimuka wanguwangu, ⁵⁵mi apaa itukela mushilalanda shoshe mi apaatateka kuleta aakuli pamiseme koshe oku naayuba nji koniko aikile.⁵⁶Koshe oku naingenanga muminji, kamba milenen'i' kamba mu naha, kumanaa tulanga aakuli muibaka yomaaulishelo. Apaamu lomba nji aaleshe nji akwate kumungundo wo shito shae, mi oungi woshe aa naamukwata kumanaa yoishiwa.

¹Amafalisi na an'oli akwao naa tunda ku Jeslusalema apaa kuwana aamuchingulukile.²Apaa mona nji amweya oa lutiwa ae kumanaalya ishima namakaha omachilo, ili, anambula kuhupiwa. ³(Kakuli amafalisi na ma Judakali ene aakuhupa kumakaha oo natokomelo, kakuli aongochishela eshizo shoakulu. ⁴Amafalisi aatunda kushibaka shomaulishelo, kaali ene aakuhupa, mi aongochishela kuinu ingi anatambula, yokufeka wenji kuhupa makomoki, mipika, yo kopa, nai yokulyela).⁵Amafalisi naan'oli apaa ipula Jesu, "Ike apa aalutiwa oe akanine kuenda kucha mushizo shoakulu, kono alya eishima yoo namakaha omachilo?"⁶Kono yopo amba okoo, "Isaya kumanaa polofita wino eyenu mwaa ipi. Wenji omu kuna n'oleliwa, 'Aa anu anikuteka na milomo choo, kono emichima choo chaikala kule nange. ⁷Ani lapela mumbango, kakuli aluta emilao choanu wenji chocha Mulimu.'⁸Mwashiya omulao wa Mulimu nakupindamena eizo yoanu." ⁹Yopo amba okoo kame, "Mwakana wino ngepi o mulao wa Mulimu ili kubuluka eshizo shenu! ¹⁰Kakuli Mushe kumanaa amba nji, 'Okuteke ihoe na inawoe,' mi, 'Oyu ambile ui kawihwae kamba inawae shemwa kumaa ipaiwa.'¹¹Kono mwaa mba nji, 'Haiba nji munu aamba kwaihwae kamba inawae, "Chotuso choshe onatambula kwange Korbani"' (ili kutalusa, 'mpo'), ¹²cwale honi kamushimulumelelize kutendelela shinu ihwae kamba inwae. ¹³Mwaululwisha eliywi lya Mulimu amaata baken'isa eshizo shenu munaleshelele pashi. Nainu ingi yokukufeka mutendile."¹⁴Yopo isha eshichaba kame mi yopo amba okoo, "Muniteecheche, moshe, mi muyubishishe. ¹⁵Kakusha eshishitundile panji no munu eshishimu silafalize eshimuingena. Eshishi panine panji chae shoshi musilafalize. ¹⁶Oyu kwitw matwi ayube."¹⁷Cwale Jesu yona shii eshichaba mi yonaingene munjiyo, aalutiwa ae apaa muipula kuamana yo nguli. ¹⁸Jesu yopo amba, "Nayenu kamushikwaite kutwisiso nangeno? Mwalimuka nji eshi shiingenine o munu kutunda panji kashitweshe kumusilafaza, ¹⁹kakuli kashitweshe kucha mumuchima wae, kono shacha muihoye yae mi yaka panena mushimbuzi?" Jesu noamba ngeyo kutalusa nji eilya yoshe yakukena.²⁰Yopo amba, "Eshishitundile ku munu shoshi musilafalize. ²¹Kakuli kutunda mukachi ko munu, kutunda kumuchima, oui wazwela pili, uhule, umbui, uipai, ²²ubuki, nakulakaza inu yaanu, kutendisha nalu, uhata, kuyoela pa uhule, muna, ku hopa, muikuhumuso, utanya. ²³Ei ii yoshe yoshe yatunda mukachi, mi yoisilafalize o munu."²⁴Yopo imanamo mi yopo cha kunaha cha Tire na Sidoni. Teni yopo kaingena munjiyo, mi keela afaa munu kulimuka oku naaikala, kono keela atwesha kuholekiwa. ²⁵Kono wanguwangu o mukachi no kwata mwana wamusizana wo moya ui yopo yuba eyae mi yopo keaya na kuyangwela kumaulu ae. ²⁶Cwale o mukachi neli mu Gerike, wamushobo wa Masyrofenisia. Yopo mulomba kulonga omoya ui kwa mwanae.²⁷Yopo amba okwae, "Oleshe weli aanuke apiwe yokulya. Kakuli kaha swanelo kushimba eishima yoanike nakuiyumbela aambwa." ²⁸Kono o mukachi yopo alaba mi yopo amba okwae, "Eni, Mulena, shuwa aambwa mushi no tafule alyanga ou mwamwa woanuke."²⁹Yopo amba okwae, "Kabakala ei onaamba, onalukuha kucha. O moya ui unatundu kwa mwanoe." ³⁰Yopo huka kunjiyo chae mi yopo kawana o mwanuke yolalile pa mumbeta, mi o moya ui ounachi.³¹Cwale honi yopo tunda kame mushibaka sha Tire, mi yopo cha kupita mu Sidoni ku lichiya lya Galilea kukakuma munaha cho minji cholikumi. ³²Apaa leta okwae munu washushu mi kumanaa kwata ukalu kukuamba, mi apaa mulomba kumutula makaha ae.³³Cwale honi kumutwala kumbali kumukunda kutunda kushichaba, yopo tula eminwe chae mumatwi ae, mi honi yopo shipula mate mi nakukwata olulimi lwae. ³⁴Cwale honi yopo taneka kuwilu, yopo tula omoyo wae, mi yopo amba okwae, "Effata," ilikutalusa nji, "Oyanjulule!" ³⁵Munako chimweya amatwi ae apaa yanjululiwa, olulimi lwae lopo lulukuluha, mi yopo tateka kuamba wino.³⁶Jesu yopo alaela nji aka ambela munu. Kono omunaa laelela, na mwanaa zwela pili kuambela. ³⁷Kumanaa komoka yonone, aa ambile, "Onatende einu yoshe wino. Atenda shuwa aashushu okuyuba nai mumu okuamba."

¹Mwaao mayuwa, nakuikala kame shichaba shikulu, mi keela akwata yakulya. Jesu yopo isha aalutiwa ae mi yopo amba okoo, ²"Nashiyubela man'eke eshishichaba kakuli anazwele pili kuikala nange mumayuwa mahatu honi mi kakwite yakulya. ³Haiba nji naalukulula kwanambula kulya, atwesha kupwelela munjila. Amweya okoo atunda kule." ⁴Aalutiwa ae apaa mualaba, "Kupi kotutwesha kuwana ishima ingi mushibaka sho lihalaupa ngeya yokuikutisha anu akumine apa?"⁵Yopo aipula, "Mwakwata ishima ingachi?" Apaa amba, "Mutanu naiili." ⁶yopo laela eshichaba kutongomana pashi. Yopo shimaba eishima yo mutanu naiili, yopo kutumela, mi yopo ichola. Yopo ipa kualutiwa ae kutapela anu, mi apaa tapela eshichaba.⁷Kame kumanaa kwata shi chinyonyo, mi yomana kukutumela, yopo laela aalutiwa kutapela anu nayo. ⁸Apaa lya mi apaa ikuta, mi apaa tola oumwamwa, yakukwana izuma ikulu mutanu naiili. ⁹Kumana kuikala anu akuatumela kuikiti ine. Cwale honi yopo alukulula. ¹⁰Wanguwangu yopo ingena mushisepe naalutiwa ae, mi apaa cha munaha aha Dalmanuta.¹¹Cwale honi amafalisi apaa keya mi apaa tateka kukanana nae. Apaa faa shisupo kutunda kuwilu, kumuekecha. ¹²Yopo tula o moyo wae mi yopo amba, "Ike apa olulusika lufaile eshisupo? Niti namiambela, kakusha shisupo shipiwa kolulusika." ¹³Cwale honi yopo ashiya, yopo ingena mushisepe kame, mi yopo cha muwabu oukwao.¹⁴Cwale aalutiwa kumanaa bulama kushimba ishima. Keela akwata ingi kupitelela musulo umweya waishima mushisepe. ¹⁵Yopo alaela, kuamba nji, "Mumamele mi mutokomele o mumela wo mafalisi na mumela wa Heroda."¹⁶Aa lutiwa kumanaa kukananisha yokuulwa ishima. ¹⁷Yoyubishisha eyo, yopo aipula, "Ike apa mukukananishile yokuulwa ishima? Napelo kamumonine kamba kuyubishisha? Mwakwata mi chima chikalu?¹⁸Mukwite men'o, kamumonine? Mukwite matwi, kamuyubile? Kamuhupulile? ¹⁹Eni chola eishima yomutanu pakachi koanu oikiti mutanu, izuma ingachi youmwamwa namutola?" Apaa amba o kwae²⁰"Eni cholaula eishima yomutanu naiili pakachi koanu oikiti ine, izuma ingachi youmwamwa woishima yona mutola?" Apaa amba o kwae, "Mutanu naiili." ²¹Yopo amba, "Kamwashiyubishisha kale?"²²Apaa keya ku Betisaida. Teni aanu apaa muletela mulume wa shibofu mi apaa lomba Jesu kumukwata. ²³Jesu yopo kwatelela oyo mulume wo shibofu mi yopo mutundisha mumunji. Yomana kushipwela meate pamen'o ae mi nakumutula amakaha ae, yopo muipula, "Kuli eshiomonine?"²⁴Yopo taneka muwilu, mi yopo amba, "Namona alume akumonahala wenji itondo yakuenda." ²⁵Cwale honi kame yopo tula amakaha ae pa men'o ae, mi oyo mulume yopo kwalulula amen'o ae, okumona kwae kopo kuhukela, mi yopo mona einu yoshe wino. ²⁶Jesu yopo mulukulula mi yopo amba, "Waka ingena mumunji."²⁷Jesu yopo cha na alutiwa ae mu minji cha Kaezaria Filipi. Munjila yopo ipula aalutiwa ae, "Aanu aamba nji yome noanyi?" ²⁸Apaa mualaba mi paa amba, "Joani mukolobezi. Amweya aamba nji, 'Elia,' mi amweya, 'mumweya wo mapolofita."'²⁹Yopo aipula, "Kono yenu mwa amba nji yome noanyi?" Pitolosi yopo amba o kwae, "Yowe Kreste." ³⁰Jesu yopo apa mamela nji akaambela munu eyae.³¹Yopo tateka kualuta nji o Mwana Munu afanena kunyanda inu ingi, mi kumaa latuliwa kuakulu nomulao na akulu o mapulisita mi naan'oli, miaipaiwe, mi munyima chomayuwa mahatu ainguke. ³²Kumanaa amba elyo lin'usa pakachikoanu. Cwale honi Pitolosi yopo mushimbela kumbali mi yopo tateka kumukalimela.³³Kono Jesu yopo aluka mi yopo taneka aalutiwa ae mi cwale honi yopo kalimela Pitolosi mi yopo amba, "Huka kunyima change, Satani! Kotwalile engana choe kuinu ya Mulimu, kono kuinu yoanu." ³⁴Cwale honi yopo isha eshichaba naa lutiwa ae pamweya, mi yopo amba okoo, "Haiba nji munu ashinga kuni kon'a, afanena kukutatula yofochi, ashimbe eshifapahano shae, mi anikon'e.³⁵Kakuli yoshe oyu shingile kuyoisha oupilo wae kumaa usinyehelwa, mi yoshe oyu sinyehelilwe oupilo wae kabakala ome mi na kabakala oulumkiwa kumaa uyoisha. ³⁶Awanapo shike omunu mukukuungekela akaye koshe mi asinyeheliwe oupilo wae? ³⁷Shike eshi munu atwesha kupa kuchinja naupilo wae?³⁸Yoshe oyu nienenine mi namaywi ange molu lusika lo kuumba ubuki na lusika lokuumba ibi, o Mwana Munu ku maa muswabela apaa keaya mu kanya cha Ihwae na mangeloi o kukena."

¹Yopo amba okoo, "Niti namiambela, kwaa ikile apenu pano muimanine aa akana kulimuka lifu kale amona o mubuso wa Mulimu oukeile na maata." ²Munyima chomayuwa mutanu na limweya, Jesu yopo shimba Pitolosi na Jakobo na Joani kucha noo kulilundu elile, oko naakaikala ofochi. Cwale nohi eshifateho shae shopo shichinja aatanekelile. ³Eito yae yopo iesha, yopo ikena, kukena yonone kupita kukena kutwesha kutendiwa kumunu yoshe pa kaye.⁴Cwale honi Eliya na Mushe apaa Kumonahalisha okoo, mi kumanaa ambaula na Jesu. ⁵Pitolosi yopo alaba mi yopo amba kwa Jesu, "Muluti, kwaikala wino nji tuikale kuno, mi tutende ibuma ihatu, shimweya shoe, shimweya sha Mushe, mi shimweya sha Eliya." ⁶(Kakuli keela alimuka yakuamba, kakuli kumanaambuka.)⁷E libui lyopo likeya kuyaafuka. Cwale honi e liywi lyopo likeya kutunda mulibui, "Oyu yo Mwanange nishingile. Mumu yube." ⁸Popo, aatanacheka, keela amona munu yoikile noo, kono ene Jesu feela.⁹Aashechumukile elilundu, yopo alaela nji akaambela munu ei anamono kupitela Mwana Munu yoingukishiwa kuafu. ¹⁰Mi apaa buluka eyo inu okoo, kono apaa kuambaucha pakachi okoo o "kuinguka kuafu" nji kwatalusa ike.¹¹Apaa muipula, "Ike apa aan'oli aambile nji Eliya afanena kukeya weli?" ¹²Yopo amba okoo, "Eliya akeya weli kuyahuchela einu yoshe. Ike honi apa kunan'oliwa nji Mwana Munu afanena kunyanda inu ingi mi nakushwauliwa? ¹³Kono namiambela nji Eliya onakee, mi anatende einu yoshe anafaa kutenda o kwae, wenji o muinan'oleliwa eyae."¹⁴Aakeya kualutiwa, apaa mona shichaba shikulu eshiachingulukile, mi aan'oli kumanaa kanana noo. ¹⁵Aa mona Jesu, eshichaba shoshe kumana shikomoka mi aaitukela o kwae apaa muimucha. ¹⁶Yopo ipula aalutiwa ae, "Ike yomukukananishile noo?"¹⁷Mumweya mushichaba yopo mualaba, "Muluti, Ninalete mwanange okoe. Akwata moya wakumukwangisha kuamba. ¹⁸Wamukwatanga mi nakumungwishela pashi, mi nakutenda lufuchi kumulomo, kukwecha ameno ae, mi akukutela. Nina lombo aalutiwa oe kuulonga o kwae, kono anakwanga." ¹⁹Yopo aalaba, "Lusika lwanambula tumelo, kumaniikala nako chakukuma kupi nenu? Kumani kutwesha kamwaka nenu? Mumulete o kwange."²⁰Apaa muletela o mutangana. O moya oumona Jesu, wanguwangu wopo ushangumuka. O mutangana yopo ngwela pashi mi yopo tenda lufuchi kumulomo. ²¹Jesu yopo ipula ihwae, "Tungachi twanaikala ngeya?" Ihwae yopo amba, "Kutunda kuwanuke. ²²Unamungwishelange mu mulilo na mumeyu mi nakulika kumuipisha. Haiba nji watwesha kutenda shinu, otuyubele man'eke mi otutuse."²³Jesu yopo amba o kwae, "'Haiba nji watwesha'? Einu yoshe ioto kumunu lumelile." ²⁴Wanguwangu o ihwa mwanuke yopo kuwa mi yopo amba, "Nalumela! Onituse o kuulwa tumelo kwange!" ²⁵Jesu yomona eshichaba eshiitukile okoo, yopo kalimela omoya ui mi yopo amba, "Owe moya noshi mumu na moya woushushu, Nakulaela, otunde o kwae, mi waka muingena po kame."²⁶Omooya wopo ukuwa mi wopo umungwisha o mutangana mi cwale honi wopo utunda. O mutangana kumanaa monahala wenji munu wakufa, mi aangi apaa amba nji, "Onafu." ²⁷Kono Jesu yopo mushimba kulikaha mi yopo munona, mi o mutangana yopo imana.²⁸Jesu yo ingena munjiyo, aalutiwa ae apaa muipula kumukunda, "Ike yetu apa tuna kwangele kulonga omooya ui?" ²⁹Yopo amba okoo, "Ou mufuta kautweshe kulongiwa ene na tapelo."³⁰Apaa cha kutunda omo mushibaka mi apaa pita mu Galilea. Keela afaa nji munu alimuke oku naaikala, ³¹kakuli kumanaa luta aalutiwa ae. Yopo amba okoo, "O Mwana Munu kumaa piwa mukaha o anu, mi kumaa muipaa. Yona ipaiwa, munyima chomayuwa mahatu kumaa inguka kame." ³²Kono keela ayubishisha e cho taba, mi kumanaa mbuka kumuipula.³³Cwale honi apaa keya ku Kapernauma. Munyima yonaingene munjiyo yopo aipula, "Ike yo munaambaula munjila?" ³⁴Kono apaa mwena. Kakuli kumanaa kukananisha munjila kuamana nji opi yomukulu nakumana. ³⁵Yotongomana pashi, yopoisha olikumi pamweya mi yopo amba okoo, "Omunu nji afaa kutenda wopili, afanena kutenda wamamaneneno kuoshe mi atende mupika woo oshe."³⁶Yopo shimba mwanuke mutomo mi yopo mutula mukachi koo. Yopo mushimba mukaha ae mi yopo amba okoo, ³⁷"Yoshe oyu tambula mwanuke wangeya mulichina lyange ontambula ome; yoshe oyu tambula ome kashitambula ome kono oyu nanitumu."³⁸Joani yopo amba okwae, "Muluti, tunamono munu yotundishile myooya chii mulichina lyoe mi topo tumuindeka, kakuli katunon'ine." ³⁹Kono Jesu yopo amba, "Mwaka muitendeka, kakuli kakusha munu otenda misebezi mulichina lyange mi munyima katweshe kuniamba inu ii.⁴⁰Yoshe oyu kanine kutulwasha wetu. ⁴¹Yoshe oyu mipa komoki chameyu nji munwe mulichina lyange kakuli mwaikala kwa Kreste, niti namiambela, kakusinyehelwa o mupuzo wae.⁴²Yoshe oyu fosisa aa anyonyo alumelile o kwange, kumakuikala wino o kwae kunungeleliwa liwe likulu mushingo chae mi nakuyumbeliwa milichiya. ⁴³Haiba nji elikaha lyoe lyakufosisa, olimbatule. Kwaikala wino okoe kuingena muupilo naikaha limweya kupita kukwata makaha meeli mi nakuyumbeliwa mulihele, mulilo washachimiwa. ⁴⁴Omo mipila noteni kachifile na mulilo washachimi.⁴⁵Haiba nji eliulu lyoe lyakufosisa, olimbatule. Kwaikala wi okoe kuingena muupilo nauhole kupita kukwata maulu meeli mi nakuyumbeliwa mulihele. ⁴⁶omo mipila noteni kachifile mi namulilo washachimi.⁴⁷Haiba nji elyen'o lyoe lyakufosisa, olitundishe. Kwaikala wino okoe kuingena mumubuso wa Mulimu na lyen'o limweya kupita kukwata men'o meeli mi nakuyumbeliwa mulihele, ⁴⁸omo mipila noteni kachifile mi namulilo washachimi.⁴⁹Kakuli munu na munu kumaa tendewa mungwa na mulilo. ⁵⁰Mungwa uwawa, kon haiba nji mungwa kaumamatile, mwatwesha kuutenda ngepi nji uikale mungwa? Mukwate mungwa pakachi kenu, mi mukwate kozo ku munu na munu."

¹Jesu yopo tunda omo mushibayopo cha mushilalanda sha Judea, na mushibaka shiikile kupitelela e nuka cha Jordani, mi na shichaba shopo shikeya o kwae kame. Kumanaa luta kame,wenji o munaa twaelela kutenda. ²Cwale honi ama falisi apaa keya o kwae kumuekecha mi apaa muipula, "Kana mulao mulume kulonga mukachi wae?" ³Yopo alaba, "Ike yona milaela Mushe?" ⁴Apaa amba, "Mushe kumanaa lumeleza mulume kun'ola lin'olo lyoteleko mi cwale honi amuleshe ache."⁵"Neli baken'isa okuongola kwenu e michima yonaa min'olela ou mulao," Jesu yopo amba okoo. ⁶"Kono kutunda kumatatekelo o pupo, 'Mulimu kumanaa tenda mulume na mukachi.'⁷Kabakala elilibaka o mulume kumaa shiya ihwae na inawae mi akwane na mukachi wae, ⁸mi muuili woo kumaa tenda nyama chimweya.' ⁹Mungeyo eshi anawaneke Mulimu pamweya, munu aka shitapa pakachi."¹⁰Aaikile munjiyo, aalutiwa apaa muipula kame yongeyo. ¹¹Yopo amba okoo, "Yoshe oyu lukulula mukachi wae mi ayeke mukachi wao amufoseza mukubuka. ¹²Mi munjila chimweya o mukachi yotunda ku mulume wae kutekiwa kuwao abuka."¹³Cwale honi apaa leta aanoo o kwae ilikuli aakwate, kono aalutiwa apaa kalimela. ¹⁴Kono Jesu yolemuha ngeyo, kumanaa china mi yopo amba okoo,"Mulumeleze aanuke atomo kukeya o kwange, mi mwakaaindeka, kakuli o mubuso wa Mulimu waao fekile wenji ao.¹⁵Niti namiambela, yoshe oyu kana kutambula o mubuso wa Mulium wenji mwanuke mutomo kakuuingena." ¹⁶Cwale honi yopo shimba aanuke mumakaha ae mi yopo afuyaula yoatulile amakaha ae.¹⁷Yotateka o muendo wae, o mulume yopo muitukela mi yopo kakubama posho chae mi yopoipula, "Muluti Muwawa, shike shoni fanenine kutenda nji niwane moyo washapu?" ¹⁸Jesu yopo apa, "Ike apa oni ishanine muwawa? Kakusha muwawa ene Mulimu yofochi. ¹⁹Walimuka e milao: 'Wakaipaa, waka buka, wakaicha, wapa upaki wauhata, wakashimba yamukoe mukuhonga, ukuteke ihoe na inawoe."'²⁰O mulume yopo amba nji, "Muluti, ei inu yoshe ninaimamele kutunda kuuchaha." ²¹Jesu yopo mutanekela mi yopo mushinga, "Shinu shimweya shoulwile. Wafanena kuulisha yoshe ei okwite mi ope kuashepwi, mi kumookwata shifumu kuwilu. Cwale honi okee, onikon'e." ²²Kono kabakala echo taba yopo monahala kuswaba mi yopo cha yokushondile, kakuli kumanaa kwata iluwo ingi.²³Jesu yopo tanacheka mi yopo aamba kualutiwa ae, "Kukalu yonone nji ao anafumu akaingene mumubuso wa Mulimu!" ²⁴Aalutiwa ae kumanaa komoka yonone a maywi ae. Kono Jesu yopo amba okoo kame, "Anange, kukalu kukaingena mumubuso wa Mulimu! ²⁵Kuoto nji o kamele aingene mulyen'o lyo shonga kupita munu wo fumi kuingena mumubuso wa Mulimu."²⁶Kumanaa china yonone mi apaa amba kumunu na munu, "Cwale honi akaanyi aaka yoishiwa?" ²⁷Jesu yopo ataneka mi yopo amba, "Naanu kaha kuoto, kono kaha na Mulimu." ²⁸Pitolosi yopo tateka kuamba o kwae, "Omone, tunashii einu yoshe mi tuna kukon'o."²⁹Jesu yopo amba, "Niti namiambela, kakusha oyu nashii njiyo kamba mwepae kamba manjae kamba inawae kamba ihwae kamba ana kamba kamba ilwa kabakala o me na ulumiwa ³⁰oyukana kutambula miendo chakukwana muanda muungi cwale mou mwaka: Manjiyo naapae naamanjae naa inawae naana na ilwa, mu nyandiso, mi namukaye kakeile, upilo washapu. ³¹Kono oungi aa pili kumaa tenda amamaneneno, mi o mamaneneno atende opili."³²Kumanaa ikala munjila kucha ku Jelusalema, mi Jesu kumanaa enda posho choo. Aalutiwa kumanaa komoka, mi aa naakon'a munyima kumanaa mbuka. Cwale honi Jesu yopo ishela olikumi naa ili kumbali mi yopo tateka kua ambela ei itamba kumutendahalela. ³³"Mumone twakambamena ku Jelusalema, mi o Mwana Munu kumaa piwa kuakulu o mapulisita naan'oli. Kumaa muatulela lifu mi amupe kwaa o lichaba. ³⁴Kumaa munenauna, amushipwele mate, amumwashaule, mi nakumuipaa. Kono munyima cho mayuwa mahatu kumaa inguka."³⁵Jakobo na Joani, aana a Zebede, apaa keya o kwae mi apaa amba, "Muluti, twafaa nji otu tendele yoshe ei tukulomba." ³⁶Yopo amba okoo, "Mwafaa nji nimitendele ike?" ³⁷Apaa amba, "Otulumeleze kutongomana noe mukanya, mumweya kulikaha lyoe lyo sholyo mi mumweya ku nzohoto choe."³⁸Kono Jesu yopo aa alaba, "Kamulimukile ei muipulile. Mwatwesha kunwa e komoki nitamba kunwa kamba ku kolobeziwa e kolobezo nkitamba ku kolobeziwa?" ³⁹Apaa amba o kwae, "Twatwesha." Jesu yopo amba okoo, "E komoki nitamba kunwa, kumamunwa, mi nakolobezo nitamba kukolobeziwa, kumamukolobeziwa. ⁴⁰Kono oyu fanenine kutongomana kulikaha lyange lyo shilyo kamaba kulikaha lyange lyo nzohato kaha yome nipile, kono kwao ana lukiseziwa."⁴¹Aalutiwa aakwao o likumi aayuba ngeyo, apaa tateka kuchinena Jakobo na Joani. ⁴²Jesu yopo aishela okwae mi yopom amba,"Mwalimuka ao ashimbilwe nji aeteleli aa olichaba aa lyatelela, mi aakulu oo akwata maata apoo.⁴³Kono kakuikile ngeyo pakachi kenu. Yoshe oyu shingile kutenda mukulu pakachi kenu afanena kutenda mupika wenu, ⁴⁴mi yoshe oyu shingile kutenda wopili afanena kutenda mupika wamunu yoshe. ⁴⁵Kakuli o Mwana Munu keela akeyela kuyabelekeliwa, kono kuya beleka, mi nakupa o moyo wae ili kutenda tifo chaangi."⁴⁶Apaa keya ku Jeroko. Yoshiya Jeriko na alutiwa ae na shichaba shikulu, o mwana Timea, Bartimea, oshibofu wokulombelela, kumanaa ikala kumbali no njila. ⁴⁷Yo yuba nji neli Jesu wa Nazareta, yopo tateka kukuwa mi yoambile nji, "Jesu, Mwana Davida, o niyubele man'eke!" ⁴⁸Oungi apaa mukalimela oyo shibofu, aa muambelile nji amwene. Kono yopo kuwelela yonone, "Mwana Favida, o niyubele man'eke!"⁴⁹Jesi yopo imana mi yopo laela nji aishiwe. Apaa isha o mulume woshibofu, aa ambile, "Ondumepe! Oimane! Akuisha." ⁵⁰Yopo yumbela eshiapalo shae kumbali, yopoimana, mi yopo keya kwa Jesu.⁵¹Jesu yopo mualaba mi yopo amba, "Wafaa nji nikutendele ike?" O mulume woshibofu yopo amba, "Raboni, ni faa kutambula kumona." ⁵²Cwale honi Jesu yopo amba okwae, "O che. Etumelo choe china kuyoisha." Wanguwangu yopo mona kame, mi yopo mukon'a pa njila.

¹Cwale aakeya ku Jelusalema, kumanaa ikala pepi na Betefage ku lilundu lya Olive, mi Jesu yopo tuma aili kua lutiwa ae ²mi yopo amba okoo, "Muche mumunji tukubapile nao. Mushikaingenamo feela, kuma muwana mbongoloana wanambula kupelesiwa po. Mumunungulule mi mukamulete o kwange. ³O munu apaa amba okwenu nji, 'Ike apa mutendile ngeyo?' mwafanena kuamba nji, 'Mulena yomufaile mi wanguwangu mumu huche kuno."'⁴Apaa cha mi apaa kawana mbongoloana yona nungeleliwa pa mweelo panji mu likululu, mi apaa munungulula. ⁵Kuli anu naaimana po mi apaa amba okoo, "Mwatenda ike, apa munungululile oyo mbongoloana?" ⁶Apaa amba okoo omu naa ambela Jesu, mi aanu apaa alesha akakuchelelile.⁷Apaa leta o mbongoloana kwa Jesu mi apaa tula amapai oo apako, mi yopo tongomana po. ⁸Oungi woa nu apaa hasanya eito yoo munjila, mi amweya apaa hasanya mitai echi naambatula muyanda. ⁹Aa naacha posho chae naa naamukon'a apaa kuwelela, "Hosanna! Wafuyauchi oyu keile mulichina lya Mulena. ¹⁰Wafuyauchi o mubuso wa ihwetu Davida! Hosanna muwilu nakumana!"¹¹Cwale honi Jesu yopo ingena mu Jelusalema mi yopo cha mu tempele mi yopo katanekela einu yoshe. Cwale pakutenda nji enako kumanachipwa, yopo cha ku Betania naa olikumi. ¹²E liyuwa nalitatama aatunda mu Betania, kumanaa yuba njala.¹³Muku monena pale eshitondo sho feiga eshi nashikwata maawa, yopo cha kukamona nji mwenja kuli atwesha kuwanako muselo, mi yokeya okwasho, keela awana shinu kono maawa, kakuli neli kaha nako cha lifeiga. ¹⁴Yopo amba okwasho, "Kakusha munu mboolya muselo okoe." Mi alalutiwa ae naayuba.¹⁵Apaa keya ku Jelusalema, mi yopo ingena mu tempele mi yopo tateka kulonga aa naa ulisha naa uli mu tempele. Yopo alaula amatafule oanu naaa chinja amali na ipula yao naa ulisha otunkwilimba. ¹⁶Keela aitanisha munu kushimba shinu shaku ulisha mu tempele.¹⁷Yopo aluta mi yopo amba, "Kakwashin'oliwa, 'E njiyo change kuma chiishiwa njiyo cha milapelo cho mishobo choshe'? ¹⁸A mapulisita aakulu naan'oli naayuba ei naa amba, mi apaa faa mukwa mwakumuipishela. Kumanaa mumbuka kakuli eshichaba shoshe kumana shikomoka kumilutelo chae. ¹⁹Amangolwangolwa aakuma, apaa tunda mumunji.²⁰Aa endile amashikushiku, apaa mona eshitondo sho feiga eshina kukuta kukakuma ku minji chasho. ²¹Pitolosi yopo hupula mi yopo amba, "Muluti, o mone! Eshitondo sho feiga noo kutu shina kukuta."²²Jesu yopo aalaba, "Mukwate tumelo mwa Mulimu. ²³Niti namiambela nji o munu apaa ambela eli lilundu, 'Ononoke mi okuyumbele ofochi mu lichiya,' mi haiba nji ka kakanyine mumuchima kono alumele nji ei ana amba kumaitendahala, eyo yatenda Mulimu.²⁴Mungeyo namiambela: Eshinu shoshe mulapela nakulomba, mulumele nji munashitambula, mi kumashitenda shoe. ²⁵Apa muimana nakulapela, mwafanena kuswalela ei muna foseze yo munu yoshe, mili kuli Ihwenu oyu ikile kuwilu nae aswalele eibi yenu. ²⁶Kono haiba nji kamuswalelile, na Ihwenu oyu ikile kuwilu kakumiswalela eibi yenu."²⁷Apaa keya ku Jeslusalema kame. Jesu yoendile mu tempele, aakuluo mafalisi, aan'oli noanu, na akulu no mulao apaa keya okwae. ²⁸Apaa amba okwae, "Maata mwike aa otendishile ei inu, mi anyi yona kupu a maata o kuitenda?"²⁹Jesu yopo amba okoo, "Kumanimi ipula, puzo chimweya. Muni ambele mi name kumani miambela amaata nikutusisize kutenda ei inu. ³⁰Ekolobezo cha Joani, kumana chitunda kuwilu nji kuanu? Muni alabe."³¹Apaa kuambaucha mukacho koo mi akukananile kuamba nji, "Apa tuamba nji, 'Kuwilu,' kumaa amba nji, 'Ike cwale honi apa namukana kumulumela?' ³²Kono apa tumba nji, 'Kuanu,' ... ." Kumanaa mbuka aanu, kakuli aanu oshe kumaanaa yubishisha nji Joani neli mupolofita. ³³Cwale honi apaa alaba Jesu mi apa amba, "Katulimukile." Cwale honi Jesu yopo amba okoo, "Name kana kumiambela a maata nikutusisize kutenda ei inu."

¹Cwale honi Jesu yopo tateka kualuta mumanguli. Yopo amba, "O mulume nookuna shanda sha veine, yopo tula lukwakwa kushichingulukisha, mi yopo hapa liteke lyakulubela waine. Yopo yakwa tawala chamulibeleli mi yopo tula eshanda mupabalelo choalimi o veine. Cwale honi yopo cha muendo. ²Panako chokuswanela, yopo tuma muika kualimi o veine ili kukatambula shiselo sho shanda sho veine. ³Kono apaa mushimba, apaa mufula, mi apaa muhucha makaha -kaha.⁴Kame yopo atumena mupika mukwae, mi apaa muholofaza mumutwi nakumutenda ui. ⁵Kono yopo tuma kame mukwae, mi oyo apaa kaipaa. Apaa tenda angi munjila chimweya, kufula amweya nakuipaa okwao.⁶Nokwata munu mumweya wokutuma, o mwanae ashingile. Neli yono mamaneneno kutumiwa okoo. Yopo amba, 'Kumaa kuteka mwanange.' ⁷"Kono aalimi apaa kuambela, 'Oyu yoshwana. Mukee, tumuipae, ilikuli tuyole eshanda.'⁸Apaa mukwata, apaa muipaa, mi apaa muyumba mushanda sho veine. ⁹Mungeyo, omute woshanda kumaa tenda ngepi? Kumaa keya nakuyaipisha aalimi mi ape eshnda kuanu ao.¹⁰¹¹¹²Kamwashibala eli lin'olo? 'Eliwe naakana aayakwi lina tendiwa liwe liongochile eshiluli. Ei neli yatunda kwa Mulena, mi iwawa mumen'o etu."' Munyima cheeyo aakulu o ma Juda apaa faa mukwa mwaku kwatela Jesu kakuli kumanaa limuka nji aamba nguli choo. Kono kumanaa mbuka eshichaba. Mi apaa mushiya apaacha.¹³Cwale honi apaa tuma akwao o mafalisi na maheroda okwae ilikukamukwata kucha mumaywi ae. ¹⁴Akeya, apaa amba okwae, "Muluti, ei anu akengeelile kokwite taba nayo kakuli kokwite ketululo ku munu. Niti waluta e njila cha Mulimu. Kana mulao kutela kwa Sizale kamba shiwanji? Twafanena kuika kamba shiwanji?" ¹⁵Kono Jesu kumanaa limuka ou ipi woo mi yopo amba okoo, "Ike apa muniekechile? muniletele dinari ilikuli nitanekepo."¹⁶Apaa letela Jesu makwao. Yopo amba okoo, "Eshi shiswaniso nai inan'oliwa apa yaanyi?" Apaa amba, "Ya Sizale." ¹⁷Jesu yopo amba, "Mupu Sizale einu ya Sizale, mi na Mulimu einu ya Mulimu." Apaa mukomoka.¹⁸Cwale honi a masaduki, aambile nji kakusha zuho, apaa keya okwae. Apaa muipula, aa ambile nji, ¹⁹"Muluti, Mushe kumanaatun'olela, 'Haiba nji mwepa munu afa mi ashiya mukachi munyima chae, kono kakwite ana, oyo mulume afanena kushimba mukachi wa mukulwae, mi aelekele mukulwae ana.'²⁰Kumanakuikala micha mutanu naaili; wopili yopo shimba mukachi mi yopo fa, konambula ana. ²¹Cwale honi wo uili yopo mushimba mi nae yopo fa, keela ashiya mwana, mi nayu wouhatu ngeyo bene. ²²Oshe omutanu namuweya keela ashiya ana. Kumamaneneno, omukachi nae yopo fa. ²³Muzuho, apa mbaainguka kame, kumambaatenda mukachi waanyi? Kakuli oshe o mutanu namumweya neli mukachi woo."²⁴Jesu yopo amba, "Eli kaha lyolibaka mufosize, kakuli kamulimukile aman'olo shuwa amaata a Mulimu? ²⁵Kakuli apaainguka kuafu, kakuyeka kamba kuyekishiwa, kono afeka wenji mangeloi muwilu.²⁶Kono kuamna naafu aa anaingukishiwa, kamwashibala mubuka cha Mushe, muiambo yoshi pukumuna, omu Naambela nae Mulimu nji, 'Yome no Mulimu wa Abulahama na Mulimu wa Isaka na Mulimu wa Jakobo'? ²⁷Kaha Muliomu waafu, kono waayumi. Munafoso yonone."²⁸Mumweya wo aluti no mulao yopo keya mi kumanaayuba engambaulo choo; yopo mona nji Jesu kumanaa alaba wino. Yopo muipula, "Upi womulao woutokwa yonone pamilao choshe?" ²⁹Jesu yopo alaba, "Woutokwa yonone ngou, 'Oyube, Isilaele, Mulena Mulimu wetu, Mulena mumweya. ³⁰Wafanena kushinga Mulena Mulimu woe namuchima woe woshe, na moyo woe woshe, na ngana choe choshe, mim namaata oe oshe.' ³¹Omulao wouili ngou, 'Wafanena kushinga mwepoe wenji omu okushingelile.' Kakusha kame mulao ukulu kupita echi."³²Omuluti no mulao yopo amba, "Kunawapa, Muluti! Onaamba niti nji Mulimu mumweya, mi kame kakusha mukwae kutunda okwae. ³³Kumushinga namuchima woshe nakutwisiso choshe mi na maata oshe, naku shinga mwepae omunu wenji omuakushingelile oye mute shinu shikulu kupita kutumbekela Mulimu eimunanu pakatala naitabelo." ³⁴Jesu yomona nji onapu kalabo chautali, yopo amba okwae, "Koikile kule namubuso wa Mulimu." Munyima cheyo, kakusha oyu noekecha kuipula Jesu puzo kame.³⁵Jesu yolutile mumalapa o tempele, yopo amba, "Kwakeya ngepi nji aan'oli noanu aambe nji Kreste mwana Davida? ³⁶Oye Davida, muoya ukenu, kumanaa amba nji, 'Mulena yopo amba kwa Mulena wange, "Otongomane kulikaha lyange lyo shilyo kupitela eni tula eila yoe kushi nomaulu oe."' ³⁷Oye Davida amuisha nji 'Mulena' cwale Kreste atenda ngepi mwana Davida?" Eshichaba shikulu kumana shiwapela kumuteechecha.³⁸Mumilutelo chae Jesu kumanaa amba nji, "Mumamele aan'oli, aa ashingile kuenfda aakumangile ito ile nakuimuchiwa muibaka yomaulishelo, ³⁹mi nakutongomana paipula yokukutekeha mu masinagoge na muibaka yolikute pamikiti. ⁴⁰Aputelela aambelwa amanjiyo oo, mimalapela matapelo male ilikuli amoniwe kuanu. Aa anu kumaa tambula katulo chikulu."⁴¹Cwale honi Jesu yopotongomana yotanengelile e pongisi choshibulukelo mushibaka shotempele; kumanaa tanekela aanu aangwishelile amali oo mupongisi. Oungi woanu afumu kumanaa tula mali makulu. ⁴²Cwale honi omukachi wo mbelwa yopo keya mi yopo tula tumali tunyonyo, twakuatumela kukwana ngwee.⁴³Yopo isha aalutiwa ae mi yopo amba okoo, "Niti namiambela, oyu mukachi wo mbelwa woshepwi ona tulu yonone kupita oshe aa anatulu empo choo mushibulukelo. ⁴⁴Kakuli oshe anatundisha apapaikile. Kono oyu mbelwa, kutunda paushepwi wae, onatulu oshe amali anafanene kukuyishela po."

¹Jesu yoendile kutunda mutempele, mumweya woa lutiwa ae yopo amba okwae, "Muluti, omone amawe amawawa na miyaho echiwawa!" ²Jesu yopo amba okwae, "Onamono echi miyaho echikulu? Kakusha liwe litamba kushiiwa palikwalyo eli likana kupayauka."³Yotongomanine palilundu lya Olive kutanekela e tempele, Pitolosi, Jakobo, na Andeleasi apaa muipula kumukunda, ⁴"Otuambele, ei inu kumaitendahala kamwaka? Shisupo mwike eshi shimonisha nji ei inu itamba kutendahala?"⁵Jesu yopo tateka kuamba okoo, "Mutokomele nji kakusha munu o milyanganisha. ⁶Aangi kumaa keya mulichina lyange mi aambe nji, 'Yome,' mi kumaa lyanganisha angi.⁷Apamuyuba yo mandwa namakande omandwa, mwaka mbuka; ei inu yafanena kutendahala, kono amamaneneno kale kashikuma. ⁸Kakuli omushobo kumaualukela oukwao mushobo, mi namubuso kualukela mubuso ukwao. Kumakuikala mazikinyeho muibaka ingi, na lukupwe. Aa omatatekelo okukola kolueleko.⁹"Muikale omutatielile. Kumaa mitwala kumakuta, mi kumamufuliwa mu masinagoge. Kumamuimana posho choabusisi na malena kabakala ome, ilikupa upaki okoo. ¹⁰Kono oulumiwa weli wafanena ku ambiwa kumishobo choshe.¹¹Apaa minunga na kumitwala kukuta, mwaka bilaela eimutamba kuamba. Kakuli mwecho hola, ei mufanenine kuamba kumaipiwa okwenu; kaha yenu muamba, kono moya ukenu. ¹²Munu kumaa ipaa mwepae, na ihwa munu kuipaa mwanae. Aanuke kumaa alukela aashemi oo mi nakualetela nji aipaiwe. ¹³Kuma muchimbiwa kuanu oshe kabakala elichina lyange. Kono yoshe oyunpindamena kukakuma kumamaneneno, oyo munu kumaa yoishiwa.¹⁴"Kono apamumona oui ukulu ouikile apaukanine kufanena kuikala," (omubali ayubishishe) "aa aikile mu Judea aitukele kumalundu, ¹⁵oyu ikile peulu no njiyo akashechumuka munjiyo kamba kukashimba mo shinu, ¹⁶mi oyu ikile mushanda akahuka kukashimba eshiapalo shae.¹⁷Kono aumai ao alemupa mi nao ayamwisha otukeke mwao mayuwa! ¹⁸Mulapele nji yakatendahala enako chomupepo. ¹⁹Kakuli ao kumaa tenda mayuwa anyandiso chikulu, echo keela cha tendahala kutunda kumatatekelo o pupo, echi naa umba Mulimu, kupitela pelo, shiwanji, kamba kutendahala po kame. ²⁰Nji Mulena kakuaipipisha amayuwa, kakusha nyama chakuyoishiwa. Kono mulibaka lyoaketwa, ao anakuketa, kumaa mbatula amayuwa kuaipipisha.²¹Cwale honi o munu apaa amba okwenu, 'Mumone, Kreste ngoyu!' kamba 'Mumone, ngoya ikile paya!' mwaka lumela. ²²Kakuli ama Kreste ouhata na mapolofita ouhata kumaamonahala mi kumaapa isupo na mamakazo ili kuhonga, haiba nji kwakonahala, shuwa aaketwa. ²³Muikale omulibelelile! Nina miambele ee inu yoshe kale enako chakuma.²⁴"Kono munyima cho mayuwa omanyando, 'eliyuwa kumaliilaulishiwa, o mwechi kawa kupanisha elitwa lyao, ²⁵ama tungwechi kumaangwa kuwilu, mi na maata aikile kuwilu kumaa nyanganyishiwa.' ²⁶Cwale honi kumaa mona o Mwana Munu yokeile mumabui na maata makulu na kanya. ²⁷Cwale honi kumaa tuma amangeloi ae mi kumaawaneka pamweya aaketwa ae kutunda pa mepo chine, kutunda kumamaneneno o kaye kutwala kumamaneneno o liwilu.²⁸Mukututele pashitondo. Popo emitai echi tateka kushoshela mi cha tutula amawo acho, mwalimuka nji enako chobula chaikala pepi. ²⁹Mi kame, apa mumona ei inu eitendahala, mulemuhe nji aikala pepi, kukwekela kumyeelo.³⁰Niti namiambela, olu lusika kalwa kupwa kupitela ei inu eitendahala. ³¹E liwilu na kaye kumaya kupwa, kono amaywi ange kaakupita. ³²Kono kuamana nalyo liyuwa kamba echo hola, kakusha oyu limukile, kaha shuwa amangeloi muwilu, shuwa o Mwana, kono feela Tate.³³"Mukutukiseze! Mulibelele, kakuli kamulimukile enako. ³⁴Kwatenda wenji munu oyu chile mweendo- ashiye enjiyo chae mi atule aapika ae kuendisha e njiyo chae, munu na munu namusebezi wae, mi alaele oyu mamelile pamwelo nji aikale yonakutukiseze.³⁵Mungeyo muikale omunakutukiseze kakuli kamulimukile nji kamwaka apa mbahuka ominya njiyo; kwatwesha kutenda mangolwangolwa, pakachi koushiku, omukombwe ouiya, kamba amashikushiku. ³⁶Haiba nji akeya mushipundumukela, akayamiwana omulalile. ³⁷Ei niambile okwenu yoniambelile munu na munu: Mulibelele!"

¹Neli mayuwa mahatu e Paseka chakuma mi namukiti woishima yonambula mumela. Amapulisita aakulu naan'oli kumanaa faa mikwa mwakumukwatela nautali mi amuipae. ²Kakuli kumanaa amba nji, "Kaha enako cho mukiti, ilikuli kwakainguka mufilifili pakachi koanu."³Jesu yoikile mu Betania munjiyo cha Simoni wo mbingwa, yoikile kutafule, kopo kukeya mukachi yoshimbile shikala sha alabasita sho sende woteko chikulu, Neli cha nadi chakukena shemwa. Yopo chola eshikala mi yopo mwaela e nadi pamutwi wae. ⁴Kono kumana kuikala amweya aa naachina. Apaaku ambela pakachi koo mi aa ambile, "Taluso mwike chokuipishela echi sende? ⁵Echi sende kumachina fanene kuulishiwa pa ma dinari akupitelela mianda chihatu, mi nakupa aashepwi." Cwale honi apaa muchinena.⁶Kono Jesu yopo amba, "Mumushileshe. Ike apa mumushupile? Onatende shinu shiwawa okwange. ⁷Enako choshe mwaikala naa shepwi, mi poshe apamushingela mwatwesha kutenda iwawa okoo, kono kamwakuikala nange enako choshe. ⁸Onatende ei ana tweshe. Onafuyu olutu lwange ilikulukisa yo kubulukiwa. ⁹Niti namiambela, koshe oku ukataziwa oulumiwa mukaye, ei anatende oyu mukachi kumaiambiwa, ili kumuhupula."¹⁰Cwale honi Judasi Isikariota, mumweya wao olikumi, yopo cha kumapulisita akulu ilikuli amupe okoo. ¹¹Amapulisita aakulu aayuba ngeyo, kumanaa wapela mi apaa sepisa kumupa mali. Yopo tateka kufaa kolo mwakumupela okoo.¹²Pa liyuwa lyopili lyoishima yonambula mumela, aatenda eshitabelo shongu wo Paseka, aalutiwa ae apaa amba okwae, "Kupi koofaile nji tukalukise, ilikuli okalye omulalelo wo Paseka?" ¹³Yopo tuma aili oa lutiwa ae mi yopo amba okoo, "Muche mumunji, mi omulume oshimbile shibeto sho meyu kumaa miwana. Mumukon'e. ¹⁴Oku akaingena munjiyo, mumukon'e mo mi mukaambe kumute wecho njiyo, 'Muluti aamba nji, "Kupi kouikile omusiyo wange woangenda okunilyela omulalelo wo Paseka naa lutiwa ange?"'¹⁵Oye kumaamimonisha omusiyo wopeulu omumuikile einu yoshe. Mukatulukiseze mo omulalelo wetu." ¹⁶Aalutiwa apaa funduka mi apaa cha mumulenen'i. Apaa kawana einu yoshe kucha omunaa ambelela, mi apaa kalukisa omulalelo wo Paseka.¹⁷Okutenda mangolwangolwa, yopo keya naa olikumi naaili. ¹⁸Aatongomanine ku tafule mi aalile, Jesu yopo amba, "Niti namiambela, mu mweya okwenu oyu lile nange kumaanibeteka." ¹⁹Oshe kumanaa swaba yonone, mi mumweya na mumweya apaa amba okwae, "Shemwa kaha ome?"²⁰Jesu yopo alaba mi yopo amba okoo, "Mumweya waa olikumi, oyushimbile ishima nange mukatuwo. ²¹Kakuli o Mwana Munu kumaa cha wenji omu kunan'oleliwa eyae. Kono waumai oyu beteka Mwana Munu! Nakuikala wino okwae nga keela aelekiwa."²²Aalile, Jesu yopo shimba ishima, yopo ifuyaula, mi yopo ichola. Yopo ipa okoo mi yopo amba, "Mushimbe. Olu lolutu lwange." ²³Yopo shimba komoki, yopo kutumela, mi yopo chiapa, mi oshe apaa nwamo. ²⁴Yopo amba okoo, "Ou unyinga wange woshihonyi, ounyinga unamwaalele angi. ²⁵Niti namiambela, Kana kunwa kame koumuselo wo veine kupitela elyo liyuwa apani kaunwa sinca mumubuso wa Mulimu."²⁶Aanembi liimbo, apaa cha kuli lundu lya Olive. ²⁷Jesu yopo amba okoo, "Moshe kuma mungwa, kakuli kuna n'oliwa, 'Kumani fula omulisani mi amangu kumaa hasanyiwa.'²⁸Kono kunyima enimana kuingukishiwa, kumanicha posho chenu kucha ku Galilea." ²⁹Pitolosi yopo amba okwae, "Shuwa nji oshe angwe, ome shiwanji."³⁰Jesu yopo amba okwae, Niti nakuambela, pelo- ee, ouushiku shemwa- omukombwe kale waiya miendo chiili kumoo nilatula tuhatu." ³¹Kono Pitolosi yopo amba kuongocha nji, "Haiba nji nafanena kufa noe, Kana kukulatula." Oshe apaa tenda sepiso chimweya.³²Apaa keya kushibaka nashiishiwa Gesemani, mi Jesu yopo amba kualutiwa ae, "Muikale pano eni lapelile." ³³Yopo shimba Pitolosi, Jakobo, na Joani mi yopo tateka kuingenena umowa nakukukalelwa. ³⁴Yopo amba okoo, "Omoyo wange unatomoha, wenji nashinga kufa. Muikale pano mi mulibelele."³⁵Kucha kanyonyo feela, Jesu yopo ngwela pashi mi yopo lapela nji haiba nji kwakonahala ehola chimupitelele. ³⁶Yopo amba, "Abba, Tate, einu yoshe ioto okoe. Otundishe echikomoki okwange. Kono kaha tato change, kono choe."³⁷Yopo huka mi yopo awana aalalile, mi yopo amba kwa Pitolosi, "Simoni, onalala? kotweshe kulibelela pa hola? ³⁸Olibelele mi olapele nji wakaingena mumuliko. Omoya shemwa wafaa, kono enyama chafokola." ³⁹Kame yopocha mi yopokalapela, mi yopokakutushisha maywi mamweya.⁴⁰Yokahuka kame, yopo awana aalalile, kakuli amen'o oo kumanaa lema. Keela limuka yakuamba okwae. ⁴¹Yopo kouhatu mi yopo amba okoo, "Mushilalile mi mushipumulile? Kunapu! E hola chinakumu. Mutaneke! O Mwana Munu abetekiwa mumakaha oaezalibi. ⁴²Muimane; Twendenyi. Mumone, oyu nibetekile aikala pepi."⁴³Yoshiambile, Judasi, mumweya woalikumi, yopo kuma, mi eshi chaba shikulu kumanashiikala nae aashimbile mikwale na milmu, kutunda ku mapulisita aakulu, aan'oli, mi naakulu oanu. ⁴⁴Cwale omubeteki wae yona mana kuapa shisupo, kuamba nji, "Oyu nikachupyata yoye. Mumukwate mumutwale omumu mamelile." ⁴⁵Judasi yokuma, wanguwangu yopo keya kwa Jesu mi yoambile, "Muluti," mi yopo muchupyata. ⁴⁶Cwale honi apaa mutula amakaha oo mi apaa mukwata.⁴⁷Kono mumweya okoo oyu noimana yopo shimba omukwale wae mi yopo fula omupika wo mupulisita omukulu mi yopo mbatula o kutwi kwae. ⁴⁸Jesu yopo amba okoo, "Mwakeya wenji wakuya lwisha shisinyi, na mikwale na milamu, kuyanikwata? ⁴⁹Apa ninaikalanga nenu mi eni lutile mutempele, keela mwani kwata. Kono ei kumanaitendahala ilikutaleleza aman'olo." ⁵⁰Oshe aa naaikala na Jesu apaa cha mi apaaituka.⁵¹Omutanga, oyu nokumanga feela shito sho line naakuchingela, kumanaa kon'a Jesu. Aalume aamukwata, ⁵²yopo shiya eshito sho line mi yopo ituka sheshe.⁵³Apaa twa Jesu ku mupulisita omukulu. Oko kumanaa kakuwana nae oshe amapulisita aakulu, aakulu noanu, naan'oli noanu. ⁵⁴Cwale Pitolosi yopo mukon'a yoendelile pale, kukakuma kulilapa lyo mulisita omukulu. Yopo tongomana pakachi ko masile, yokuenyaanishile pepi namulilo.⁵⁵Cwale amapulisita aakulu nakuta choshe cho ma Juda kumanaa faa upaki wakushangecha Jesu ilikuli amuipae. Kono keela awana upaki. ⁵⁶Kakuli aangi kumanaa leta upaki wauhata okwae, kono shuwa oupaki woo keela walumelelana.⁵⁷Amweya apaa imana mi apaa tula ukapaki wauhata kulwisha Jesu, aa ambile nji, ⁵⁸"Natumuyuba yoambile nji, 'Kumaniumbulula echi tempele china tendiwa namakaha, mi mumayuwa mahatu kumaniyakwa chikwacho chanambula kuumbiwa namakaha."' ⁵⁹kono shuwa ngeyo oupaki woo keela walumelelana.⁶⁰Omupulisita omukulu yopo imana pakachi koo mi yopo ipula Jesu, "Kokwite kalabo? Shike eshi aa anu apakile kuamana noe?" ⁶¹Kono kumanaa mwena mi keela aalaba shinu. Kame omupulisita omukulu yopo muipula mi yopoamba, "Yowe Kreste? o Mwana woyu nafuyauliwa?" ⁶²Jesu yopo amba, "Yome; mi kumoomona o Mwana Munu apaa tongomana kulikaha lyo shilyo lyo maata mi yokeile namabui okuwilu."⁶³Omupulisita omukulu yopo payula eito yae mi yopo amba nji, "Kuamba nji tushi faile apaki? ⁶⁴Munayuba akashwau. O muhupulo wenu upi?" Oshe apaa munyaza wenji munu wakufanena lifu. ⁶⁵Amweya apaa tateka kumushipwela mate mi nakufuka kulupala lwae nakumufula man'indi mi nakuamba okwae nji, "O polofite!" Amasole apaa mushimba mi apaa mufula.⁶⁶Pitolosi yoikile pashi mulilapa lyo kuta, mumweya wo asizana oapika omupulisita omukulu yopo keya okwae. ⁶⁷Yopo mona Pitolosi yokuenyaanishile, mi yopo mutaneka wino nakuamba nji, "Nawe kumoonaikala na Jesu, o mu Nazareta." ⁶⁸Kono yopo latula, yoambile nji, "Ome kanilimukile kamba kuyubishisha ei oambile." Cwale honi yopo kapana mumwelo. Mi na mukombwe wopo uiya.⁶⁹Kono omupika wo musizana yopo mumona mi yopo tateka kuamba kwaa naimana ko, "Nayu mulume mumweya woo!" ⁷⁰Kono yopo latula kame. Munyima chonako chinyonyo aa naaimana ko apaa amba kwa Pitolosi, "Shemwa omumweya woo, kakuli nawe omu Galilea."⁷¹Kono yopo tateka kukutula yofochi muikuto mi nakuecha, "Kani mulimukile oyu mulume oambile eyae." ⁷²Wanguwangu omukombwe wopo uiya kouili. Cwale honi Pitolosi yopohupila amaywi namuambela Jesu: "Kale omukombwe waiya kouili kumoonilatula miendo chihatu," mi yopo ngwela pashi mi yopo lila.

¹Amashikushiku, aakulu omapulisita, naa kulu oanu naa n'oli mi na kuta choshe cho ma Juda apaa kuwana. Cwale honi apaa nunga Jesu na kumutwala. Apaa mutwala kwa Pilato. ²Pilato yopo muipula, "Yowe Mulena wo ma Juda?" Yopo mualaba, "Onaamba." ³Aakulu omapulisita kumanaa mushangecha inu ingi.⁴Pilato kame yopo muipula, "Koalabile? Omone einu akushangechile okubula!" ⁵Kono Jesu keela aalaba Pilato, mi esho kumanashimukomokisha.⁶Cwale kumamaneneno o mukiti, Pilato kumanaa lukululanga lipanditi mumweya, e lipanditi naalomba nga. ⁷Nakuikala mulume wa lichina lya Barabasi mutolongo naa ipanguli naatenda oukebenga enako cho mifilifili. ⁸Eshichaba shopo shikeya kwa Pilato mi apaa tateka kumulomba nji atende omu naa tendelanga kale.⁹Pilato yopo aa alaba mi yopo amba, "Mwafaa nji nimilukululele o Mulena wo ma Juda?" ¹⁰Kakuli kumanaa limuka nji neli libaka lyamuna elyo amapulisita aakulu naapela Jesu okwae. ¹¹Kono amapulisita aakulu apaa susueza eshichaba nji kulukululiwe Barabasi.¹²Pilato yopo aalaba kame mi yopo aipula, "Ike cwale honi ei nifanenine kutenda ku Mulena wo ma Juda?" ¹³Apaakuwelela kame, "Omukokotele!"¹⁴Pilato yopo amba okoo, "Ui mwike wanatende?" Kono apaa kuwelela yonone, "Omukokotele." ¹⁵Pilato kumanaa faa kutabisha eshichaba, mi yopo alukuluklela Barabasi. Yopo mwashaula Jesu mi yopo mupa okoo nji akamukokotele.¹⁶Amasole apaa mutwala mu lilapa lyo kuta (ili e pita cho mubuso), mi apaa isha e mpi choshe chomasole. ¹⁷Apaa tula Jesu shito shikihu, mi apaa ngungeka pamweya mushukwe wa mingunguya na kuchimutula. ¹⁸Apaa tateka kumuimucha mi aa ambile nji, "Yo shoo, Mulena wo ma Juda!"¹⁹Kumana fula kumutwi wae na lutaka na kumushipwela mate. Apaa kubama kumanwi oo mi apaa kubama posho chae. ²⁰Aa mana kumunenauna, apaa mutundisha eshito shikihu mi nakumumanga eito yae, mi apaa muetelela kuka mukokotela. ²¹Mulume mumweya , Simoni wo ku Serenje, kumanaa keya kutunda munaha (Neli ihwa Alekizanda na Rufusi), mi apaa mupindekecha kushimba e shifapahano.²²Amasole apaa leta Jesu kushibaka nashiishaniwa Gologota(kutalusa "Shibaka sha katendele"). ²³Apaa mupa waine chakuwaneka na mira, kono keela achinwa. ²⁴Apaa mukokotela mi apaa payaula eito yae aayumbaanine ingi kumona nji musole na musole kumaa shimba shiemba shipi.²⁵Neli hola chauhatu aamukokotela. ²⁶Pashisupo apaa n'ola omulandu naamushangecha, "Mulena wa ma Juda." ²⁷kumanaa mukokotela naa isinyi iili, mumweya kushilyo mi mumweya ku nzohoto chae. ²⁸"Elin'olo kumanali taleleziwa eli liambile nji, 'kumana baleliwa kwaa inambula mulao."'²⁹Aa naa pita munjila apaa mutuka chana, aanyungile emitwi choo mi aa ambile, "Aha! owe otweshile kuumbulula e tempele mi nakuchiyakwa mumayuwa mahatu, ³⁰okuyoishe ofochi mi oshuluke pashi fapahano!"³¹Munjila chimweya aakulu o mapulisita namunu na munu, pamweya naan'oli oanu, mi aa ambile, "Ona yoisha aakwae, kono katweshe kukuyoisha. ³²Muleshe Kreste, o Mulena wo ma Isilaele, ashuluke cwa pashifapahano, ilikuli tumone mi tulumele." Aa naakokoteliwa nae nao apaa mutukachana.³³Pahola cho mutanu naka mweya, kopo kukeya lififi kuya fuka enaha choshe kupitela e hola cho mutanu natune. ³⁴Pa hola cho mutanu natune Jesu yopo kuwa na liywi lyakupahama, "Eloi, Eloi, lama sabakitani?" ili kutalusa nji, "Mulimu wange, Mulimu wange, ike apa ona nileshelele?" ³⁵Aakwao aa naimana kumbali aayuba amaywi ae apaa amba nji, "Mumone, aha isha Elia."³⁶Mumweya yopo hunduka, kukatula waine wakulula kushiponji, yoposhi tula kulutaka, mi nakumupa nji anwe. Oyo mulume yopo amba nji, "Tumone nji Elia akeya kuyamushulukisha po." ³⁷Cwale honi Jesu yopo ukwelela na liywi lyokupahama mi yopo fa. ³⁸O lwambi lo mutempele lopo lupayuka muiemba iili kutunda kuwilu kucha pashi.³⁹O mukulu wo masole oyu noimana mi yotanekelile Jesu yomona nji onafu mwecho njila, yopo amba, "Niti oyu munu neli Mwana Mulimu." ⁴⁰Nakuikala kame akachi aa naatanekela aaikile pale. Pakachi koo kumanakuikala Maria Magadalena, Maria (inawa Jakobo omina Josesi), na Salome. ⁴¹Yoshiikile mu Galilea kumanaa mukon'elela mi nakumubelekela. Akachi angi kame kumanaa mukon'a kutunda ku Jelusalema.⁴²Amangolwangolwa aakuma, kakuli neli liyuwa lyauitukiso, ili, e liyuwa lyuokukwekela kweli lyo Sabata, ⁴³Josefa wo ku Arimatea yopo keya ko. Neli munu waku kutekeha mukuta oyu nolibelela omubuso wa Mulimu. Yopo ingena nauikokobezo kwa Pilato mi yopo kalomba olutu lwa Jesu. ⁴⁴Pilato kumanaa komoka nji Jesu onafu yokale; yopo isha omukulu wo masole kumuipula nji Jesu onafu.⁴⁵Pilato yoyuba kumukulu womasole nji Jesu onafu, yopo pa olutu kwa Josefa. ⁴⁶Josefa kumaa ula lwambi lwa line. Yopo mushulula kutunda pa shifapahano, yopo muchingela mu lwambi lo line, na kumushendeka mulipilo eli naatenda kutunda pa liwe. Cwale honi yopo pikuluseza liwe kumweelo wo lipilo. ⁴⁷Maria Magadalena na Maria inawa Josesi apaa mona eshibaka omu naa bulukiwa Jesu.

¹E liyuwa lyo Sabata elinapu, Maria Magadalena, Maria inawa Jakobo, na Salome apaa ula minuko ilikuli akafuye olutu lwa Jesu. ²Amashikushiku shemwa pa liyuwa lyopili lyo biki, apaa cha kulipilo eliyuwa elikambama.³Aakuambelile, "Anyi yokatutundishela eliwe kumweelo wo lipilo?" ⁴Aataneka, apaa mona nji eliwe lina tundishiwa, kakuli neli likulu yonone.⁵Apaa ingena milipilo mi apaa mona mutangana yokumangile mushito shikenu, yotongomanine kushilyo, mimkumanaa mbuka. ⁶Yopo amba okoo, "Mwaka mbuka. Mwa faa Jesu, omu Nazareta, oyu nokokoteliwa. Onainguka! Kaikele kokuno. Mutaneke pashibaka naamulangeke. ⁷Kono muche, mukaambele aalutiwa ae na Pitolosi, 'Aenda posho chenu kucha ku Galilea. Oko kumamukamumona, wenji omu naamiambelela."'⁸Apaa pana mi apaa ituka kutunda mulipilo; kumaa njanja nakukomoka. Kakusha eshi naakumbaulisha kakuli kumanaa mbuka yonone.⁹Amashikushiku pa liyuwa lyopili mubiki, kutunda yoinguka, yopo kumonahalisha weli kwa Maria Magadalena, okwae oyu naa tundisha e myoya chii cho mutanu na chiili. ¹⁰Yopo cha mi yopo kaambela aa naaikala nae, aalilile nakushilisha. ¹¹Apaa yuba nji muyumi mi onamumono, kono keela alumela.¹²Munyima cheyo inu yopo kumonahalisha kuaili oo aaendile kuingena munaha. ¹³Apaa huka kuka ambela aakwao oshe, kono keela aalumela.¹⁴Jesu munyima yopo kumonahalisha kwaa olikumi namumweya aatongomanine kutafule, mi yopoakalimela kabakala okuulwa koo etumelo na kuongola michima, kakuli keela alumela aa naamumona kutonda yoinguka kuafu. ¹⁵Yopo amba okoo, "Muche mukaye koshe, mi muka kutaze oulumiwa ku pupo choshe. ¹⁶Oyu lumela mi akolobeziwe kumaa yoishiwa, mi oyu kana kulumela kumaaipaiwa.¹⁷Ei isupo kumaicha naa alumelile: Mulichina lyange kumaa longa e myoya chii. Kumaa amba mumalimi mapya. ¹⁸Kumaa shimba amayoka namakaha oo, mi haiba nji anwa shakuipaa, kasha kuatenda ui. Kumaa tula makaha paakuli, mi kumaa yoya."¹⁹Mulena Jesu yona mana kuamba okoo, kumanaa shimbeliwa kuwilu mi nakutongomana kulikaha lyoshilyo lya Mulimu. ²⁰Aalutiwa apaa cha mi nakuka kutaza koshe, Mulena yobelekile noo mi apaa paka eliywi naisupo naicha noo.