Bible

Matayi

1¹Ukalata uwa luho ulwa Yesu Chilisiti, umwana uwa Davidi, umwana uwa Abulahamu. ²U Abulahamu ali wu Baba wa Isikaka, nu Isikaka wu Baba wa Yakovo, nu Yakovo wu Baba wa Yuda, pe navamwavo. ³U Yuda ali wu Baba wa Pelezi, u Pelezi nu Zela mwa Tama, u Pelezi wu Baba wa Heziloni, nu Heziloni wu Baba wa Ramu.⁴U Ramu ali wu Baba wa Aminadabu, u Aminadabu wu Baba wa Nashoni, u Nashoni wu Baba wa Salimoni. ⁵U Salimoni ali wu Baba wa Bohazi mwa Rahabu, u Bohazi wu Baba wa Obeti mwa Ruti, u Obeti wu Baba wa Yese. ⁶U Yese ali wu Baba wa Davidi u mwene, u Davidi wu Baba wa Solomoni mwa mushi uwa Yuliya.⁷U Solomoni ali wu Baba wa Rehobowamu, u Rehobowamu wu Baba wa Abija, u Abija wu Baba wa Asa. ⁸U Asa ali wu Baba wa Yehoshafati, u Yehoshafati wu Baba wa Yolamu, pe u Yolamu munyenya wa Uziya.⁹U Uziya ali wu Baba wa Yotamu, u Yotamu wu Baba wa Ahazi, u Ahazi wu Baba wa Hezekiya. ¹⁰U Hezekiya ali Baba wa Manase, u Manase wu Baba wa Amoni, u Amoni wu Baba wa Josiya. ¹¹U Josiya ali munyenya wa Yekoniya na vamwavo pahavalilo he vahavagalusyaga ku Babeloni.¹²Lwe vavagalusizye ku Babeloni, u Yekoniya ali wu Baba wa Shelitiyeli, u Shelitiyeli ali munyenya wa Zelubabeli. ¹³U Zelubabeli ali wu Baba wa Abihudi, u Abihudi wu Baba wa Eliyakimu, nu Eliyakimu wu Baba wa Azoli. ¹⁴U Azoli ali wu Baba wa Sadoki, nu Sadoki wu Baba wa Akimu, nu Akimu wu Baba wa Elihudi.¹⁵U Elihudi ali wu Baba wa Eliyaza, u Eliyaza wu Baba wa Matani, nu Matani wu Baba wa Yakovo. ¹⁶U Yakovo ali wu Baba wa Yosefu umulume uwa Maliya, mwa wula we u Yesu apafilwe, we ahitwa u Chilisiti. ¹⁷Induho zyonti ukufuma pa Abulahamu ukufiha pa Davidi zyamile induho 14, ukufuma pa davidi ukufiha pe vahagalushilaga ku Babeloni induho zyamile 14, ukufuma pe vahagalushilaga ku Babeloni ukufiha pa Chilisiti induho zyamile 14.¹⁸Ukupapwa ukwa Yesu kuhavombwa ukulandatana ni dala ili. U Mama wakwe, u Maliya, azinjililwe ukusendwa kwa Yosefu, nkandi lwe vashili ukuva poka, uwene ahajikwa ukuti ali nu lwanda munzila iya mupepo umufinjile. ¹⁹Loli u Yosefu, umulume wakwe, ali muntu umugolosu, pe atahanza ukumupezya insoni pa vuzelu, pe ahasivilila ukumuleha ishimyamya.²⁰Lwe asiviliye ukuyana ni vintu ivi, uhavizya uwa mwene ahamuvoneshela mu shilota, ahati, ''Yosefu umwana uwa Davidi, utahanyilaje ukumusenda u Maliya ukuva mushi waho, shifukwa uno we ali mu mu mwakwe afumile kwa Mupepo u Mufinjile. ²¹Uwene alipapa umwana umwanavuli, pe ulimwita izina lyakwe Yesu, pakuti alivapoha avantu vakwe ukufuma ku mbivi zyavo.''²²Ivi vyonti vyavomvilwe ukukwanilisya zye zyayanzilwe nu mwene ukujendela mwa mukuvwi, ahati, ²³''Yenya,umwali aliva nu lwanda havili alipapa umwana umwanavuli, pe valimwita izina lyakwe Imaniweli'_ lye pakulyilula likuti, ''U Mulungu ave niswe.''²⁴U Yosefu ahanyamuha mutulo twakwe nu kuvomba vye uhavizya wa mwene ahamuhomeshezya wenewo, pe ahamusenda wenewo ukuva mushi wakwe. ²⁵Nkandi uwene atamumanyile ukufishila pe apapa umwana umwanvuli.Pe ahamwita izina lyakwe Yesu.

2¹Ilelo lwe u Yesu apafilwe mu Betelehemu iya mu Yudeya mu masiku aga mwene u Helodi, avantu avanjele ukufuma kuvutukulo vahafiha mu Yelusalemu vahati, ²Ali kwi uno we apafilwe uMwene uwa va Yuda? Iswe tuluvonyi uluzota lwakwe kuvutukulo pe twinza ukumusugamilila wuyo.'' ³Lwe u Helodi ayivuye zinizi, ahayimba nkani, na vonti ava mu Yelusalemu poka nawo.⁴U Helodi ahavaleta poka vonti avaputi avapiti nava simbi ava vantu, pe ahavavuzilizya venevo, ''Kwe kwinyi kwe vatili u Chilisiti alipapwa?'' ⁵Avene vahati kuli kwakwe, ''Mu Betelehemu iya mu Yudeya, she izi zye zyasimvilwe nu mukuvwi, ⁶Loli iwe, Betelehemu, munsi iya mu Yudeya, te we munsi pakasi pa valongozi ava mu Yudeya, ukufuma muliwe aliyinza woka we alilajila, we alidima avantu vane ava Isilayeli.'''⁷U Helodi ahavita ku kwilu avanjele ukuvavuzilizya venevo ahavalilo ahenesho he uluzota lwavonesheye. ⁸Ahavatuma venevo ku Betelehemu, ahati, ''Jendaga nu kumulondolezya nkani umwana. Lwe imwe mumwazile uwene, mundetele ine ipangwi ukuti nine havili ininze nu kumusugamilila wuyo.''⁹Ilelo avene lwe vamwivuye umwene, pe vahajenda, nu luzota lwe valuvonyi kuvutukulo luhavalongolela avene ukufiha pe lwinzile nu kwimilila pepala pamwanya pe umwana ali. ¹⁰Lwe avene vluvonyi uluzota, pe vahaseshela uluseshelo ulupiti nkani.¹¹Pe vahinjila mu nyumba nu kumwenya umwana nu mama wakwe u Maliya. Avene vahakupama pansi nukumuputa uwene. Avene vahigula vye vamupayiye nu kumupa wuyo ivya vwila ivya golide, ni vya kununchila, nu mila. ¹²U Mulungu ahavasoha avene mushilota vatahagalushile kwa Helodi, pe vahajenda mu nsi yavo kwidala ilinji.¹³Ilelo avene lwe vajenzite, uhavizya uwa mwene ahamuloleshela u Yosefu mushilota pe ahati, ''Nyamuha umusende umwana nu mama wakwe, pe ushimbilile mu Ijiputi. Uhihale kwekula ukufishila pe Ine ndikuvuzya. She u Helodi alimwanza umwana ukuti amunanganye wenewo. ¹⁴Uvusiku vwevula u Yosefu ahanyamuha nukujenda pe ahamunyamula umwana nu mama wakwe nukuvala mu Ijiputi. ¹⁵Ahihala kwekula ukufishila uvufwe vwa Helodi.Izi zye zahafishila zila zye uMwene ayanzile ukujendela mwa mukuvwi, ''Ukufuma mu Ijiputi Ine nkamwita umwana wane.''¹⁶Ilelo u Helodi, lwe ayenya ukuti vamusesile avantu avanjele, ahalaye nkani. ahatuma nu kuvola avana vonti avanavuli ve vali mu Betelehemu na monti mu shigava shila ve vali namaha gavili ukwiha, ukuyanana na havalilo he avavuzizye ahenesho ukufuma ku vantu avanjele.¹⁷Pe zihafishila zizyo zye ayanzile u Yelemiya umukuvwi, ¹⁸Inkuta yihivwiha mu lama, ukulosya nu kulila ukupiti, u Laheli akulila umwana wakwe, pe uwene ahanile nukumupumilizya, pamulandu avene vatalipo.¹⁹Lwe u Helodi afuye, yenya, uhavizya uwa Mwene ahamuvoneshela u Yosefu mushilota mu Ijiputi pe ahati, ²⁰''Nyamuha umusende umwana nu mama wakwe, pe uvale munsi iya Isilayeli, she vala ve vavuvwimaga uvulanzi uvwa mwana vafuye.'' ²¹U Yosefu ahanyamuha, ahamusenda umwana nu mama wakwe, nukwinza munsi iya mu Isilayeli.²²Ilelo lwe ayivuye ukuti u Alikilavusi ukulajila mu Yudeya muvuzilo uvwa baba wakwe u Helodi, ali nilyoga ukuvala kula. Lwe u Mulungu amusoha mushilota, pe ahavala mu shigava isha mu Galileya. ²³Pe ahajenda nu kwihala mu nkaya ye yikwitwa Nazaleit. Izi zihafishila zye aziyanzile ukujendela mwa mukuvwi, ukuti aliyitwa mu Nazaleni.

3¹Mu masiku gala u Yohani we ahozyaga ahinza ukulumbilila mu lugwa ulwa mu Yudeya akuti, ²''Pindushi, pakuti uvumwene uvwa kumwanya ³vupalamiye.''She ishi she wula we ayanzilwe nu mukuvwi, ahati, ''Izwi ilya wumo likuholela mu lugwa, 'Yananya nzila idala ilya mwene, gomba utunzila twakwe tugoloshe.'''⁴Ilelo u Yohani ahazwalaga amasepe aga ngamila nu lamba uwi kwela mu mutenzi wakwe. Ishakulya shakwe ali wu makanta nu vushi uvwa muntundu. ⁵Pe u Yelusalemu, i Yudeya yonti, ni vigava vyonti vye vyazyunguliye ijenje ilya Yolodani vahafuma nukuvala ku kwakwe. ⁶Vahozelwa na wuyo mwijenje ilya Yordani, lwe vakuyilata imbivi zyavo.⁷Nkandi uwene lwe ayenizye avafalisayi na vasadukayi vahinza ku kwakwe ukuti pakozelwa, pe ahati ku vavo, ''Mwe vana ava njoha, wunanu we ahavasoha imwe ukushimbila ukufuma kuvuhalazu vwe vukwinza? ⁸Muhomaje insanga zye zihondeye ku lupinduho. ⁹Mutahasive ishakuyanga pakasi palimwe mweka, 'Iswe tuli nu Abulahamu uwa va tata vitu.' She Ine nkuyanga kulimwe ukuti u Mulungu we ahondeye ukumuzyusizya avana u Abulalahamu nakwe kufuma ku mavwe ganaga.¹⁰Intemo yivisilwe hali kumagululuzi aga makwi.Pe ikwei lyonti lila lye litakuhoma ivihomwa ivyinza likudumulwa pansi nu nkutajilwa mu moto. ¹¹Ine nkuvozya imwe na minzi aga lupinduho. Nkandi wula we akwinza mwisinda mu mwane mupiti ukulusya Ine, Pe ine ntahondeye nakwe kunyatula ivilyato vyakwe. ¹²We alivozya imwe nu mupepo umufinjile nu moto. We ulupe lwakwe luli mu nyove zyakwe pakuzelufya nzila uluvungano lwakwe nu kuvunganiha ingano mu nyumba iya kusengulila mumo. Nkandi alipemba ilyelelo nu moto we atalizima nalumo.¹³Pe u Yesu ahinza ukufuma ku Galileya ukuvala kwi jenje ilya Yolodani pakozelwa nu Yohani. ¹⁴Nkandi u Yohani ahajendelela ukumulesya uwene, ahayanga, ''nkwanza ukozelwa niwe, pe niwe ukwinza ku kwane?'' ¹⁵U Yesu ahamula nu kuyanga ku wuyo, ''yitishizya ishi, she ishene shinza pakukwanilisya uvugolosu vonti.'' Pe u Yohani ahamwitishizya uwene.¹⁶Lwe uwene ayozelilwe, u Yesu ahatumpuha luviloluvilo ukufuma mu minzi, pe yenya, imwanya zihamwigushila wuyo. Uwene ahenya u mupepo uwa Mulungu akwinza pansi ngati nkunda nu kwihala pali wuyo. ¹⁷Yenya, izwi lihafuma kumwanya lihati, ''Uno we mwana wane unkundwa .Ine nkuseshela nkani nawo.''

4¹Pe u Yesu agalongolwa nu mupepo ukuvala mu lugwa ukulingwa nu satana. ²Lwe uwene afunzile amasiku 40 umusanya na masiku 40 uvusiku, uwene inzala yihamuvava. ³Uwa kumulinga ahinza nukuti ku wuyo, ''Inga we mwana uwa Mulungu, lajila amavwe aga gave mukate.'' ⁴Ilelo u Yesu ahamula nukuti ku kwakwe, ''Ilyene lisimvilwe, 'Umuntu ataliyihala nu vulanzi nu mukate weka, nkandi amazwi gonti gala ge gakufuma mwilomo ilya Mulungu.''⁵Pe u satana ahamunyamulila mu nkaya imfinjile nukumuviha pamwanya nkani pi tempeli, ⁶pe ahati kuli wuyo, ''Inga we mwana uwa Mulungu, uyitaje wewe weka pansi, she ilyene lisimvilwe, Uwene alilajila avahavizya vakwe akukusajilila iwe,' havili, 'Avene valikutona iwe ni nyove zyavo, kwe kuti iwe utahinze uyihomezye ishinama shaho pivwe.'''⁷U Yesu ahati ku kwakwe, ''Havili ilyene lisimvilwe,' Iwe utahondeye ukumulinga u Mulungu waho.''' ⁸Havili, u satana ahamunyamulila pamwanya pigamba itali nukumuvonesya uwene ivinamwene vyonti ivya munsi ukulingana nu vushindamu vwakwe. ⁹Uwene ahati kuli wuyo, ''Ivintu vyonti vinivi Ine ndikupa iwe, inga wankupamila pansi nu kumputa ine.''¹⁰Pe u Yesu ahati ku kwakwe, Yepa penepo apa, satana! She ilyene lisimvilwe, Iwe ulimusugamilila uMwene u Mulungu waho, pe ulimuvombela wuyo weka.''' ¹¹Pe u satana ahamuleha uwene, pe yenya, avahavizya vahinza nu kumuvombela.¹²Ishi lwe u Yesu ayivuye ukuti u Yohani vamulwmile, pe ahepa mu Galileya. ¹³Uwene ahepa mu Nazaleti nukuvala nukutendama mu kapelinamu, ye yapalamine nu sumbi uwa Galileya mutwaya utwa Zebuloni nu Nafutali.¹⁴Izi zyavomvilwe ukukwanilisya zye aziyanzile u Yesaya u mukuvwi, ¹⁵''Munsi iya Zebuloni na munsi iya Nafutali, ukulungamana nu sumbi, kwisyila ilya Yolodani, u Galileya uwa va kunzi! ¹⁶Avantu ve vihaye mushisi valuvonyi uluhozyo ulupiti, na ku vanji ve vihaye mushigavo na mushizyungani isha vufwe, pali vavo uluhozyo luvalamiye.''¹⁷Ukufuma ahavalilo hehala u Yesu ahanda ukulumbilila nu kuti, ''Pindushi, she ishinamwene isha Mulungu shinzile papipi.''¹⁸Inza she uwene ahajendaga ukupalamana nu sumbi uwa Galileya, uwene ahavenya avanamuntu vavili, u Simoni we akwitwa u Peteli, nu Andileya uwamwavo, vakusumbila ishilepa mwa sumbi, she avene vali valova nswi. ¹⁹U Yesu ahati ku kwavo, ''Nzaga, mundandate ine, pe Ine ndivapela imwe ukuva vakulova ava vantu.'' ²⁰Umwaluvilo avene vahavileha ivilepa vyavo nu kumulandata wuyo.²¹Inza she u Yesu ahajendaga ukufuma kula ahavenya vavili avanamuntu avanji,u Yakovo umwana uwa zebediya, nu Yohani uwamwavo. Avene vali mmwi voti nu zebediya u baba wavo vahagambihaga ivilepa vyavo. Uwene ahavitizya venevo, ²²pe avene umwaluvilo vahalileha ivoti nu baba wavo nu kumulandata uwene.²³U Yesu ajenzite ukuzyungulila wonti u Galileya, ukumanyisya mu masinagogi gavo, ukulumbilila ipangwi ilyinza ilya shimamwene pe nukupozya ahavele honti aha mbina zyonti nu vuyeyevazu pakasi pa vantu. ²⁴Amapangwi aga wuyo gahafumukwa monti mu sliliya, pe na vantu vahavaleta kuli wuyo vonti vala ve vahayimbaga ukufuma ku mbina izya kulehana lehana na mavuvavu, na vala ve vali ni mpepo inkandamanu, pe nava vizilisi, nu vuvinu uvwa kumila.U Yesu ahavapozya venevo. ²⁵Impuga inyinji zyamulandite uwene ukufuma mu Galileya, mu Dekapoli, mu Yelusalemu, namu Yudeya, nu kufuma kwisyila ilya Yolodani.

5¹Lwe u Yesu ayenyizye impuga, uwene ahavala kwi gamba. Lwe uwene atendime pansi, avasundikwa vakwe vahinza ku kwakwe. ²Pe uwene ahigula ilomo lyakwe nu kuvasambilizya vavo, ukuti, ³''Valositwe ve vapina mu mupepo, she ishinamwene isha kumwanya shavo. ⁴Valositwe vala ve vakulila, she avene valivapumilizya.⁵Valositwe avatehamu, she avene valipyana insi. ⁶Valositwe vala ava nzala ni nyota iya vugolosu, she avene valiyikuta. ⁷Valositwe ava vwila, she avene valikava uvwila. ⁸Valositwe avazelu mu moyo, she aven valimwenya u Mulungu.⁹Valositwe ve vakupela umutende, she avene valiyitwa vana ava Mulungu. ¹⁰Valositwe ava ve vakuvwimwa pamulandu uwa vugolosu, she ishinamwene isha kumwanya shavo.¹¹Mulositwe imwe lwe avantu vakuvaliga imwe nu kuvavwima imwe nu kuvayanjila imwe ahavele honti aha vintu ivivivi ivyilenga pamulandu wine. ¹²Dovelaji havili seshelaji, she ishipambwi shinyu shipiti nkani kumwanya. She mwidala linili avantu vavavwimile avakuvwi ve valipo lwe imwe mutalipo.¹³Imwe mwe liveya ilya nsi. Nkandi inga iveya lyasovezya uvunonu vwakwe, pe ilyene lingapelwa vuli ukuva liveya havili? Pe ilyene telyinza havili ku shimo nkandi kwe kulitaga kunzi nukuhanyanjilwa pansi nivinama ivya vantu. ¹⁴Imwe mwe luhozyo ulwa nsi. Inkaya ye yili pamwanya pi gamba yatangavwama.¹⁵She avantu vatakuhozyaga inyale nu kuyikupishila mu shitundu, nkandi pasha kutendamishila inyale, pe iyene yikuvalamila vonti ve vali mu nyumba. ¹⁶Mwitishizye uluhozyo lwinyu lulame pilongolela ilya vantu mwidala ili ukuti avene venye imbombo zyinyu inyinza nu kumushindiha u Tata winyu we ali kumwanya.¹⁷Mutahasivaje ukuti Ine ninzile ukunanganya ululajilo pamo avakuvwi. Ine ntinzile ukuvanangania avene nkandi ukuzikwanilisya zyenezyo. ¹⁸Nalyoli Ine nkuyanga kulimwe ukuti ukufishila kumwanya ninsi vyepe, nahamo ahadona hoka pamo ahatwe hoka mwidala lyonti hataliyepa ukufuma mu lulajilo, ukufishila pe ivintu vyonti vyakwanilisiwa.¹⁹Ilelo uno we inga ishizania hoka ahansi munkomelezyo nu kuvasambilizya avanji ukuvomba vunuvu we aliyitwa munsi mushinamwene isha Mulungu. Nkandi uno we akuzisunjilila izyene nukuvasambilizya avene we aliyitwa mupiti mushinamwene isha Mulungu. ²⁰She Ine nkuyanga kulimwe peka peka uvugolosu vwinyu vuvupitilile uvugolosu uvwa va simbi na vafalisayi, imwe mwidala lyonti mutaliyinjila mu shinamwene isha Mulungu.²¹Imwe mwivuye ukuti ilyene lyayanzilwe ku vavo muhavalilo aha hali, 'Utahagogaje,' pe, 'uno we akugoga we aliva pavuvivi nu vulonzi.' ²²Nkandi Ine nkuyanga kulimwe ukuti uno wonti we akumuhalalila uwamwavo aliva pavuvivi nu vulonzi; pe nuno we akuyanga ku wamwavo, 'We muntu we ate ni mbombo! we aliva pavuvivi na vahombe; nuno we akuti, 'Iwe mupunganu!' we aliva pavuvivi nu moto uwi palazya.²³Ilelo we inga ukufumya ishavwila shaho pashifinjilo pe pala wakumbuha ukuti uwamwinyu ali nazimo niwe, ²⁴Leha ishavwila shaho pe pala pilongolela ilya shifinjilo, pe jendaga.Wandile utetelane nu wamwinyu, pe lelo winze nukuviha ishavwila shaho.²⁵Wivwane nu mulwani waho luvilo pe iwe ushili uli nawo mwidala ukuvala kwi lonjelwi, pamo umulwani waho ungakuviha iwe mu nyove iya mulonzi, wope umulonzi angakuviha iwe mu nyove izya mupiti, pe iwe ungasumbilwa mu jela. ²⁶Nalyoli Ine nkuyanga kulimwe, utalitela ufumile kunzi ukufuma mula, ukufishila pe iwe walipila ahakopala ahavumalilo he wahofile.²⁷''Imwe mwivuye ukuti ilyene liyanzilwe, 'Utahavembuhaje.' ²⁸Nkandi Ine nkuyanga kulimwe ukuti uno wonti we akumwenyelezya umwantanda nu kumunyonywa uwene we avembusile nawo nzila mu moyo wakwe.²⁹Inga ilyinso lyaho ilya ku ndilo likukupunuzya iwe, ulifolonkole lyenelyo nukulisumba.She ishi shinza kuliwe ukuti shoka muvya mu muvili waho shilove ukushila ukuti umuvili waho wonti asumbilwe mwi palazya. ³⁰Inga inyove yaho iya ndilo yikukupunuzya iwe, uyidumule nukuyisumba yeneyo. She ishi shinza kuliwe ukuti shoka mu vya mu muvili waho shilove ukushila ukuti umuvili waho wonti ajende mwi palazya.³¹Ilyene layanzilwe havili ukuti, 'Uno we akumusimbizya umushi wakwe, leha uwene amupanje ishakalata isha kusochela.' ³²Nkandi Ine nkuyanga kulimwe ukuti uno wonti we akumusosya umushi wakwe, peka pazya luvembu, akumupela uwene ukuvembuha. Nuno we akumusenda uwene lwe asosile akuvembuha.³³''Havili, imwe muhivwa ukuti lyayanzilwe ku vala mutuvalilo utwa hali, 'Mutahalapaje ilenga ku mfingo, nkandi iwe uzisendele imfingo zyaho kwa mwene.' ³⁴Nkandi Ine nkuyanga kulimwe, mutahalapaje, nakwe kumwanya, she ukwene kwe kuli ishitengo isha vumwene isha Mulungu; ³⁵nape pansi, she apene pe ahanyile ivinama vyakwe; nakwe ku Yelusalemu, she iyene ye nkaya iya Mwene umupiti nkani.³⁶Nakwe kulapila itwe lyaho, she iwe utangalupela ulusisi loka ukuva luzelu pamo lwilu. ³⁷Nkandi imwe injango yinyu yivanje wu 'Iyii, iyii,' pamo 'awe, awe,' Shonti shila she shishizile palishi shifumile kwa muvivi wula.³⁸Imwe mwivuye ukuti ilyene liyanzilwe, 'Ilyinso kwi lyinso, ni lyino kwi lyino.' ³⁹Nkandi Ine nkuyanga kulimwe mutahamujimbililaje uno we mutalamandu. Muvuzilo vwakwe, uno we akuhoma iwe ku lusaya ulwa ku ndilo, umupe nu lwamwavo havili.⁴⁰Inga wumo akwanza ukuksitaka iwe pe akufyula ni laya lyaho, mwitishizye umuntu uyo asende ni nkanzu vulo. ⁴¹Uno we akupatishizya iwe ukujenda nawo imayili yoka, jenda nawo zivili. ⁴²Mupanje uno wonti we akulava kulimwe, havili mutahamwimaje uno we akwazimya ukufuma kulimwe.⁴³Imwe mwivuye ukuti ilyene lyayanzilwe, 'Iwe uhondeye umukundaje umupalamani waho pe umuvengaje umulugu waho.' ⁴⁴Nkandi Ine nkuyanga kulimwe, muvakundaje avalugu vinyu nu kuvaputila vala ve vakuvavwima imwe, Muvalotaje ve vakuvatipa imwe, nukuvavombela inyinza vala ve vavapasite imwe. ⁴⁵Kwe kuti muvanje mwe vana ava Tata winyu uwa kumwanya. She uwene akulipelaga izuva lyakwe ukuvafumila avatalamalandu na vinza, nu kutuma imvula pa vagolosu nave tevagolosu.⁴⁶She inga imwe mukuvakunda vala ve vavakunzite imwe, shipambwi vuli she imwe mukusenda? Avene avasonchezya musonko vatakuvomba ishintu ngati shinisho? ⁴⁷Inga mukuvalamuha veka ve vamwinyu, pe mukuvomba shoni nkani ukuvalusya avanji? Vuli avene avakunzi vatakuvomba ishintu shinisho? ⁴⁸Ilelo imwe muhondeye muvanje mwe valungamanu, inza she u Tata winyu uwa kumwanya mulungamanu.

6¹''Muvanje aminso ukuti imwe mutahavombaje imbombo zyinyu izya vugolosu pilongolela ilya vantu ukuti avene vavenye, pamo vwevulo imwe mutaliva nishipambwi ukufuma kwa Tata winyu we ali kumwanya. ²Pe lwe iwe ukupa ivya shikunzi, utahayilizizyaje weka isaji ngati she avalumilenga vakuvomba mu masinagogi na mutudala, kwe kuti avene vavanje ni ntimo izya vantu. Nalyoli Ine nkuyanga kulimwe, avene vaposheleye ishipambwi shavo.³Lwe ukufumya ivya vwila, utahaleshe inyove yaho iya mongo yimanye she inyove yaho iya ndilo yikuvomba ⁴kwe kuti ivya vwila ivyaho vipelwaje ku kwilu. Pe u Tata winyu we akwenyaga ivya ku kwilu alikulipila iwe.⁵Lwe imwe mukuputa, mutahavanje ngati valumilenga, she avene vaganile ukwimilila nu kuputa mu masinagogi na mwidala igombanu ukuti avene vangavoneshela ku vantu. Nalyoli Ine nkuti kulimwe, avene vaposheleye ishipambwi [amalipilo] gavo. ⁶Nkandi iwe, lwe ukuputa, winjilaje ku kasi yaho. Wigalile umulyango pe uyipute kwa Tata winyu, we ali ku kwilu. ⁷Pe uTata winyu we akwenya ku kwilu alikulipila iwe. Lwe imwe mukuputa, mutahapyanizyaje mwalwe ngati she avakunzi vakuvomba, she avene vakusiva ukuti valiyivwiha pamulandu uwa mazwi gavo aminji.⁸Pe lelo, mutahavanje ngati ve vavo, she u Tata winyu amanyile vintu vuli vye imwe mukwanza lwe mushili mutamulavile uwene. ⁹Pe lelo muputaje ngati uvu: 'Tata witu uwa kumwanya, izina lyaho lishindamaje ukuva lifinjile. ¹⁰Ishinamwene shaho shinze. Ukwanza kwaho kuvombwaje pansi inza she kwe kumwanya.¹¹Utupanje iswe ilelo ishakulya ishi siku ¹²lyonti.Ututetele amalandu gitu, inza she niswe tukuvatetela ve vakutunanjila iswe. ¹³Utahatuvishe iswe mundingo, nkandi utuposhe iswe ukufuma ku muvivi wula.' She ishinamwene shaho na maha nu vushindamu shima shima. Amen.¹⁴She inga imwe mukuvatetela avantu amalandu gavo, u Tata winyu uwa kumwanya wope alivatetela imwe. ¹⁵Nkandi inga imwe mutakuvatetela amalandu gavo, nawe Tata winyu atalivatetela amalandu ginyu.¹⁶Lwe imwe mukufunga, mutahavanje mwe vakuswimililwa pa minso ngati she avalumilenga vakuvomba, she avene vakuyigalula pa minso ukuti vavonehaje ku vantu vatinji vafunzile. Nalyoli nkuvavuzya imwe, avene aposheleye ishipambwi [amalipilo] ¹⁷shavo.Loli imwe, lwe imwe mukufunga, muyipahazye amafuta kwitwe pe mugezye ni sheni shinyu ¹⁸kwe kuti shitahavoneshelaje ku vanji ukuti imwe mufunzile, loli kweka kwa Tata we ali ku kwilu; pe uTata winyu we akwenya ku kwilu alivalipila imwe.¹⁹''Mutahayisunjilaje mwemwe mweka ishuma pansi, kwe inyenze nu vusimu vikunangania, havili kwe aviva vakubongola nu kwiva. ²⁰Muvuzilo vwakwe,muyisunjile mwemwe mweka ishuma ku mwanya, kwe na viva vatakubongola nu kwiva. ²¹She kwe kuli ishuma shinyu, kwe nu moyo winyu aliva.²²Ilyinso lwe luhozyo ulwa muvili. Pe lelo, inga ilyinso lyaho lyinza, umuvili wonti akwizula nu luhozyo. ²³Nkandi inga ilyinso lyaho livivi, umuvili waho wonti akwizula ni shisi. Pe lelo,inga uluhozyo lwe luli mu mwaho shisi ishenesho, vupiti vuli uvwa shisi isho! ²⁴Nawumo we angavavombela ava mwene vavili, she lumo uwene alimupata alimuvenga woka nu kumukunda uwamwavo, pamo lumo uwene alimukakatila woka nu kumususya uwunji.Iwe utangamuvombela u Mulungu ni shuma.²⁵Pe lelo ine nkuyanga kulimwe, mutahapasyaje nizya vulanzi vwinyu, shoni she imwe mulilya pamo shoni she imwe muling'wela; pamo nizya muvili, shoni she imwe mulizwala. Vuzye uvulanzi vutalusizye ishakulya, havili nu muvili atashizile ivyakuzwala? ²⁶Yenyelezya pa viyuni ivya mu mwanya. Ivyene vitakupesaga pamo ukwinula pamo ukuvunganiha muvyanga, loli u Tata winyu uwa kumwanya akuvilisyaga ivyene. Vuzye imwe temwe vapamwanya ukulusya vyenevyo.²⁷Wuwenu mulimwe nukuyilizanya kwakwe angonjezya ahapimo hoka ahavutali uvwa vulanzi vwakwe? ²⁸Shoni she mukuyilizania nizya vyakuzwala? Sivilila nizya vwezya uvwa muntundu, mwe uvwene vukukulila. Uvwene vutakuvombaga, havili uvwene vutakutavaga ²⁹umwenda.Pope vulo ine nkuyanga kulimwe, nawe Solomoni mu vushindamu vwakwe vonti atazwaye lumo ngati shimo mulivi.³⁰Inga u Mulungu akuzwiha isole ilya mu mugunda, lye likuvapo ilelo ni ndavi likutagwa mu muvuni, vwinji vuli vwe alivazwiha imwe, mwe valwitiho ulunsi? ³¹Pe lelo mutahapasyaje nu kuti, 'Iswe tulilya ishoni?' pamo 'Iswe tuling'wela ishoni?' pamo vizwalo vuli vye iswe tulizwala?'³²She avakunzi vakulondola ivintu vinivi, havili u Tata winyu uwa kumwanya avimanyile ukuti imwe mukuvyanza vyenevyo. ³³Nkandi mutalishe mulondole ishinamwene shakwe nu vugolosu vwakwe, pe vyonti vinivi ivintu vilipelwa kulimwe. ³⁴Pe lelo mutahapasyaje nizya ndavi , she ilya ndavi liliyipasizya lilyo lyeka. Isiku lyonti lili nu vuvivi vwakwe uvwa kulikwana.

7¹''Utahalongaje, pe niwe utalilongwa. ²She muvulonzi vwe ukulonga, niwe ulilongwa, pe nishipimo she iwe ukupima, ishene shilipimilwa kuliwe.³Shoni she ukwenya ahantu ahansi he hali mwi lyinso ilya wamwinyu, loli iwe utakumanya ishizinka she shili mwi lyinso lyaho? ⁴Ungayanga vulivuli kwa wamwinyu, 'Leha ine inkwefye ahantu he hali mwi lyinso lyaho,' pe ishizinka shili mwi lyinso lyaho? ⁵We muluma ilenga! Utalishe wefye ishizinka mwi lyinso lyaho, pe lelo iwe uliyenya ahinza nu kwefya ahantu ahansi he hali mwi lyinso ilya wamwinyu.⁶Mutahapanje vye vifinjile ku imbwa, havili mutahatagaje uvwambo vwinyu pilongolela ilya nguluve. Lumo izyene zingavuhanyanjila vwenevo ni vinama, havili zingagaluha nu kuvanyonkolania imwe muvigava.⁷''Lava, pe shilipelwa kuliwe. Londola, pe iwe ulivyaga. Uhonyonsyaje, pe ishene shiliyigulwa kuliwe. ⁸She wonti we akulava, akuposhela; naku muntu we akuhonyonsya, ukwene kulimwigushila. ⁹Pamo inga woka mulimwe, inga umwana wakwe akulava umukate, alimupa uwene ivwe? ¹⁰pamo inga uwene akulava inswi, alimupa uwene injoha?¹¹Pe lelo , inga imwe mwe vavivi mu manyile ukupa ivya vwila ivyinza ku vana vinyu, pe viliva vuli uvwinji nu Tata winyu uwa kumwanya ukuvapa ivintu ivyinza vala ve vakumulava uwene? ¹²Pe lelo, vyonti ivintu vye mukwanza avantu vavavombele imwe, nimwe vwelele muvombe ku kwavo, she ulu lwe lulajilo pe navakuvwi.¹³''Mwinjilaje pashilyango ishifinyu. She ishilyango shibaba havili ni dala libabazu lye likulongozya ku lunanjiho, havili kuli avantu avinji ve vakujenda mumo. ¹⁴Nkandi ishilyango shifinyu havili ni dala ligomu likulongozya ku vulanzi, pe vansi ve vakulyaga lyenelyo.¹⁵''Musheve na vakuvwi avilenga, ve vakwinza kulimwe vazwaye ikwela ilya ng'onzi uvwa nalyoli mpumpi inkali. Mwe munsanga zyavo mwe mulivamanyila avene. ¹⁶Ishi avantu vakuvunganihaga amampensya ukufuma ku mimvwa aga muntundu pamo amakunyu ukufuma munsonya? ¹⁷Mwidala linili, ikwi lyonti ilyinza likuhomaga ivihomwa ivyinza, nkandi ikwi ivivi lukuhomaga insanga imbivi.¹⁸Ikwi ilyinza litakuhomaga insanga imbivi, lyope nikwi ivivi litakuhomaga insanga imbivi. ¹⁹Ikwi lyonti lye litakuhoma insanga inyinza vakulidumula nukulisumbila pa moto. ²⁰Pe ishi,imwe mulivamanyila avene munsanga zyavo.²¹Te wonti we akuyanga kuline, 'Mwene, Mwene,' aliyinjila kushinamwene isha kumwanya, nkandi veka ve vakuvomba ukwanza ukwa Tata we ali kumwanya. ²²Avantu avinji valiyanga ku kwane pisiku lila, 'Mwene, Mwene, iswe tutahakuvwaga mwizina lyaho, mwe mwizina lyaho tuhafumyaga impepo inkandamanu, havili mwe mwizina lyaho tuvomvile imbombo impiti?' ²³Pe Ine ndivavuzya apazelu avene, Ine ntahavamanya imwe nalumo! Yepa kuline, mwe vavomba mbivi!'²⁴Pe lelo, wonti we akwivwa amazwi gane nukugashindiha genego aliholana nu muntu we azenzile inyumba yakwe pamwanya piyalavwe. ²⁵Imvula yihiha pansi, amahava gahinza, ninkungu yihaputa nukuhoma pa nyumba, nkandi iyene yitahagwa pansi, she iyene yazenzilwe pi yalavwe.²⁶Nkandi wonti we akwivwa amazwi gane havili atakugalandata genego aliholana nu muntu umupunganu we azenzile inyumba yakwe pa lusenga. ²⁷Pe imvula yihiha pansi, ni nkungu yihaputa nu kuyibunchila inyumba yila, pe iyene yihagwa, pe nukunanjiha kwakwe kwali kusila.''²⁸Pe kuhinza kwava ukuti lwe u Yesu amazile ukuyanga amazwi ganaga, impuga zyasukumiye ahamanyisizye hakwe, ²⁹she ahavamanyisya avene ukuva ngati woka we ali nuvulamulili, te ngati vasimbi vavo.

8¹Lwe u Yesu ayiha pansi ukufuma pi gamba, impuga impiti zyamulandite uwene. ²Yenya, uwa mambombo ahinza ku kwakwe nu kusugamila pilongolela lyakwe,nukuti, ''Mwene, inga iwe ukasime, unganzelufya ine,'' ³U Yesu ahafisya iyove yakwe nukumulema uwene, ahati, ''Ine nkasime.Zelupaga.'' Umwaluvilo uwene azelufile ku mambombo gakwe.⁴U Yesu ahati ku kwakwe, ''uyenye ukuti utahayanje mashim ku muntu wonti. Jendaga mwidala lyaho, uyilanjizye wewe weka ku muputi, havili ufumye ishavwila she umose ahavalajila, she lusimishizyo ku vavo.⁵Lwe akwinza ku kapelinamu, usongo uwa vasikali ahinza ku kwakwe, ukumulava uwene. ⁶pe ahati, ''Mwene, umuzya wane agonile kuhaya ayumiliye havili ali muvuvavu uvwakogofya.'' Pe u ⁷Yesu ahati ku wuyo,'' Ine kwe ninze nukumupozya uwene.''⁸Usongo uwa vasikali ahamula havili ahati, ''Mwene, ine ntahondeye ukuti iwe winze winjile muntende mu musonje wane. Yanga lyeka izwi pe umuzya wane kwe apole. ⁹She nine vulo ne muntu we vamuvisile pansi pa vulamulili, havili ndinavasikali pansi paline. Nkuyanga ku woka, 'Jendaga,' pe akujenda, nakuwamwavo woka, 'Nzaga,' pe akwinza, naku muzya wane, 'vomba ishi,' pe akushivomba. ¹⁰Lwe u Yesu alyivwa ili, ahasukumila havili ahati ku vala ve vahamulandataga uwene, ''Nalyoli nkuyanga kulimwe, ntamwazile nawumo uwa lwitiho ngati ulu mu Isilayeli.¹¹Ine nkuvavuzya imwe, avinji valiyinza ukufuma ku vutukulo na ku vuswelo, pe valitendama pa meza poka nu Abulahamu, nu Yisaki, nu Yakovo, mushinamwene isha kumwanya. ¹²Nkandi avana ava ku shinamwene valisumbilwa ku shisi isha kunzi, kwe valikutaga nukusya amino. U ¹³Yesu ahati kwa songo uwa vasikali, ''Jendaga! Inza she usuviye, she izyene zivombwe kuliwe.'' Pe umuzya ahapola mu havalilo he hala.¹⁴Lwe u Yesu ayinzile mu nyumba iya Peteli, ahamwenya unyinavyala uwa Peteli akasite avinile inzegema. ¹⁵U Yesu ahamulema inyove yakwe, pe ahanyamuha havili ahanda pa kumuvombela uwene.¹⁶Lwe ahamazuva hinzile, avantu vahavaleta kwa Yesu avinji ve vali ni mpepo inkandamanu. Ahazishimbizya impepo nalye lizwi pe vahapola vonti ve vali ¹⁷vavinu.Mwidala linili zyafishiye zye aziyanzile umukuvwi u Yesaya, ahati, ''Wuyo umwenesho ahasenda amavuvinu gitu havili ahayivegazya inzegema zyitu.¹⁸Ilelo u Yesu lwe ayenya impuga yimuliviliye, ahavalingania avene ukwepa ukuvala isyila ilinji ilya sumbi uwa mu Galileya. ¹⁹Pe umu simbi ahinza ku wuyo nu kuti, ''manyisi, kwe ine inkulandate iwe konti kwe ukuvala.'' ²⁰U Yesu ahati ku kwawe, ''Avahavila vali niviliva, havili niviyuni ivya mu mwanya vili nivisalanzo, nkandi umwana uwa muntu atali mapamo apa kugoneha itwe lyakwe.²¹Uwamwavo umusundikwa ahati ku wuyo, ''Mwene, utalishe unitishizye imbale insyile ubaba wane.'' ²²Pe lelo u Yesu ahati ku kwakwe, ''ndandata Ine, pe uvaleshe avafwe vasyile avafwe vavo.''²³Lwe u Yesu ayinjiye mwi voti, avasundikwa vakwe vahamulandata uwene mwemula. ²⁴Yenya, yanyamuha inkungu impiti pa sumbi, pe ni voti lyakupishilwe namavilingwa. Nkandi u Yesu uwene asyupiliye. ²⁵Pe avasundikwa vahinza ku kwakwe nukumunyamusya uwene, vahati, ''Tuposhe iswe Mwene; iswe tuli papipi ukufwa!''²⁶Pe u Yesu ahati ku vavo, ''shoni she mukunyila, mwe valwitiho ulunsi?'' Pe ahanyamuha nu kuyipilila inkungu nu sumbi. Pe kwali uvutehamu uvupiti nkani. ²⁷Avantu vahasukumila havili vahati, ''muntu wa havele vuli wununo, ukuti ni nkungu vulo nu sumbi vikumwivwila uwene?''²⁸Lwe u Yesu ayinzile kwisyila ilinji na kunsi iya Gadalena, avantu vavili ve vamile ni mpepo inkandamanu vahahomana nawo. Vahafumaga ku mbipa havili vamile vahali nkani, pe ukwene kutali nu wakujenda we ahadumunsanyaga kwidala lila. ²⁹Yenya, vahaholela havili vahati, ''Pe iswe tuvombe shoni niwe, Mwana uwa Mulungu? Iwe winzile uku ukutuyimvya iswe pe ahavalilo he havisilwe hashili?''³⁰Ilyene idimilo ilya nguluve inyinji lyali kwekula lihalyanga, patali uvutali nkani ukufuma pe vali. ³¹Impepo inkandamanu zihajendelela ukulambilizya kwa Yesu pe zihati, ''Inga ukutufumya ise kunzi, ututume iswe kwi dimilo ilya nguluve.'' U ³²Yesu ahati ku zizyo, ''Jendaji'' Impepo inkandamanu zihafuma nu kuvala mu nguluve; pe yenya, idimilo lyonti lihashimbila ukwiha igamba ukuvala mwa sumbi pe izyene zihafwila mu minzi.³³Vala ve vahadimaga inguluve vahashimbila pe vahavala mu nkaya nu kuyanga zyonti, nkaninkani zye zyavomvilwe ku vantu ve vali ni mpepo inkandamanu. ³⁴Yenya, inkaya yonti yihinza pa kuhomana nu Yesu. Lwe vamwenya uwene, vahamulava ukuti ayepe mu shigavo shavo.

9¹U Yesu ahinjila mwi voti, ahalamba, pe ahinza ku nkaya yakwe. ²Yenya, vahamuleta ku kwakwe umuntu we uyumiliye akasite pa shitanda. Kuvenya ulwitiho lwavo, u Yesu ahati ku muntu we ayumiliye, ''Mulumendo, yigomyaje. Imbivi zyaho zyatetelwa.''³Yenya, vamo ava simbi vahati vavo veka, ''Umuntu uno akusamula.'' ⁴U Yesu amanyile insvo zyavo pe ahati, ''Shoni she imwe mukusivilila imbivi mu moyo ginyu? ⁵Pe shoni she shipepusu, ukuti, 'Imbivi zyaho zyatetelwa,' pamo ukuti, Nyamuha pe ujendaje?' ⁶Nkandi imwe mu manyaje ukuti umwana uwa muntu ali nu vulamulili munsi ukutetela imbivi, ...''uwene ahati ku we ayumiliye, ''Nyamuha, nyamula ishitanda shaho, pe ujendaje ku nyumba yaho.''⁷Pe umuntu ahanyamuha nukuvala ku nyumba yakwe. ⁸Lwe impuga yenya ishi, yihanyila nu kumushindiha u Mulungu, we avapiye avantu uvulamulili vunuvo. ⁹Lwe u Yesu adumunsanya ukufuma pala, ahamwaga umuntu izina u Matayi atendime pi hema ilya kusonchezya umusonko. Ahati ku wuyo, ''Ndandata Ine.'' Uwene ahanyamuha nu kumulandata wuyo.¹⁰Lye u Yesu ayihala pansi ukulya munyumba yenya, avasonchezya musonko avinji na vatala malandu vahinza havili vahalya ishakulya ishahamazuva poka nu Yesu na vasundikwa vakwe. ¹¹Lwe avafalisayi venya ishi, vahati, ku vasundikwa vakwe, ''Shoni she umu manyisi winyu akulya poka na vasonchezya musonko na vatala malandu?''¹²Lwe u Yesu ayivwa ili, ahati, avantu ve vali na maha mu muvili vatakwanzaga umuganga, veka vala ve vavanu. ¹³Mavale mu manyile she ishi shikusula: 'Nkunyonywa uvwila nkandi imputile pole.' She ine ntahinza ukuvita avagolosu ku lupinduho nkandi avatala malandu.¹⁴Pe avasundikwa ava Yohani vahinza ku kwakwe,nu kuti, ''Shoni she iswe na vafalisayi tukufunga havili havili, loli avasundikwa vaho vatakufunga?'' ¹⁵U Yesu ahati ku vavo, ''Ishi ve vinzile ku vwinga vangaswimililwa lwe usivwinga ashili ali navo? Nkandi insiku zikwinza lwe usivwinga aliyepa ku kwavo, pe avene valifunga.¹⁶Nawumo umuntu we akugambihaga umwenda umupya ku shakuzwala ishikali, she ishigamba shilizepuha ukufuma ku shizwalo, pe ukuzepuha ukuvivi nkani kulivombwa.¹⁷Pope ishi avantu vakuvihaga ipele ipya ilya mampensya mu vya kuvishila ivya makwela ivikali. Inga avene vangavomba, amakwela galipunta, ni pele ilya mampensya liliyitiha, pe ni vya kuvishila ivya makwela vilinanjiha. muvuzilo vwakwe, avene vakuviha ipele ipya ilya mampensya mu vya kuvishila ivya makwela ivipya, pe vyonti vilisengulwa.''¹⁸Lwe u Yesu ashili akuyanga ivintu vinivi ku vavo, yenya, umupiti wumo ahinza pe ahasugamila pansi pa pakwe. Uwene ahati, ''U mwana wane umulindu afwa shinishi, pe nzaga nu kuviha inyove yaho pa pakwe, pe uwene aliva mulanzi.'' ¹⁹Pe u Yesu ahanyamuha nukumulandata uwene, pe vahavomba vunuvo avasundikwa vakwe.²⁰Yenya, umwantanda we ahayimba ukutonya ivanda amaha 12 ahinza kunsizi ukwa Yesu nu kulema uvupinde uvwa shizwalo shakwe. ²¹She uwene atili ku wuyo weka, ''Inga ningale vulo amenda gakwe, ndiva ahinza.'' ²²Loli u Yesu ahagalunkana nu kumwenya uwene, pe ahati, ''mulindu, jimbaga; ulwitiho lwaho lwakupela iwe ukuva ahinza.'' Pe umwantanda ahapola ukufuma ahavalilo he hala.²³Lwe u Yesu ayinzile mu nyumba iya mupiti, ahavenya avalizya malonji nimpuga vakuzuma nkani ishongo. ²⁴Uwene ahati, ''Yepa penepo, she umulindu afuye, nkandi uwene asyupiliye.'' Loli avene vahamuseha mulovezyo.²⁵Lwe impuga yikufuma kunzi, uwene ahinjila ku shipinda pe ahamunyamula uwene ni nyove, pe umlindu ahanyamuha. ²⁶Ipangwi ukulingana nishi lyasasite monti mushigava shila.²⁷Lye u Yesu adumunsanya ukufuma kula, avantu vavili ava ntonko vahamulandata uwene. Avene valindiye ukuholela pe vahatinji, ''vanga nu vwila niswe , Mwana uwa ²⁸Davidi!'' Lwe u Yesu ayinjiye mu nyumba, avantu ava ntonko vahinza ku kwakwe. U Yesu ahati ku kwavo, '' Vuzye imwe mukwitiha ukuti ine ningavomba ishi?'' Avene vahati ku wuyo, ''Iyii, Mwene.''²⁹Pe u Yesu ahalema aminso gavo pe ahati, ''Leha zivombwe kulimwe ukuyana un lwitiho lwinyu, '' ³⁰pe na minso gavo gahiguha.Pe u Yesu ahavahomelezya nkani avene pe ahati, ''Mwenye ukuti nawumo we azimanye izyi shi.'' ³¹Loli avantu vavaili vahafuma kunzi nukusasya ipangwi ukuyana nishi mushigava shonti.³²Lwe avantu vavili vala vakwepa, yenya, umuntu ushinunu we ali ni mpepo inkandamanu vahamuleta kwa Yesu. ³³Lwe impepo inkandamanu zyafuma kunzi, umuntu ushinunu ahayanga. Impuga yahasukumila pe yahati, ''Ishi shitahavoneha nalumo mu Isilayel!'' ³⁴Loli avafalisayi vahatinji, ''ukujendela muvulamulili uvwa mpepo inkandamanu, uwene akuzifumizya impepo inkandamanu.''³⁵U Yesu ahavala monti mu nkaya na mutwaya. Ahajendelela ukumanyisya mu masinagogi gavo, ukulumbilila ipangwi ilyinza ilya shinamwene nu kupozya ahavele honti aha vuyeyevazu na havele honti aha mbina. ³⁶Lwe ayenya impuga, uwene ahavafwila uvwila, pa mulandu vali mu mayimba havili vasungime. Avene vali ngati ng'onzi zye zitali nu mudimi.³⁷Uwene ahati ku vasundikwa vakwe, ''Imvuno ye nyinji, loli ava mbombo vashefile. ³⁸Pe lelo panapa putaga kwa Mwene uwa mvuno, kwe kuti uwene atume avavomvi mu mvuno yakwe.''

10¹U Yesu ahavita avasundikwa vakwe 12 poka nu kuvapa avene uvulamulili pa mpepo inyazu, ukuzishimbizya, nukupozya ahavele honti aha mbina na havele honti ahavuyeyevazu.²Ishi amazina aga vapositili 12 gali gegano. Uwakutaliha, u Simoni [uno we havili ahitwaga u Peteli], nu Andileya uwamwavo; nu Yakovo umwana uwa Zebediya, nu Yohani uwamwavo. ³nu Filipu, nu Batolomeyo; nu Tomasi, nu Matayi umusonchezya musonko; nu Yakovo umwana uwa Alufeyo; nu Tadeyo; ⁴nu Simoni umu Ziloti, nu Yudasi Isikaliyoti, we alimwanila uwene.⁵Ava 12 u Yesu ahavatuma. Ahavalingania avene nukuti, ''Mutahavalaje ku vuzilo navumo vwe ava kunzi vakutendama, havili mutahinjilaje mu nkaya nayimo iya va Samaliya. ⁶Muvuzilo vwakwe valaji ku ng'onzi zye zisoveleye izya mu nyumbaiya Isilayeli; ⁷na lwe mukujenda mulumbililaje pe mutinji, 'Ishinamwene isha kumwanya shinzile papipi.'⁸Pozya avavinu, zyusya avafwe, zelufya ava mambombo havili shimbizya impepo inkandamanu. Pavwelele imwe muposheleye, pavwelele mupe. ⁹Mutahanyamulaje u golide nawumo, nu siliva pamo ukopa mu mbogolo zyinyu. ¹⁰Mutahasendaje amafuko agakujendela pa vulendo vwinyu, pamo ilaya ilya konjelezya, pamo insapato, pamo indisa, she uhavomba ishakulya shakwe.¹¹Inkaya yonti pamo utwaya twe iwe ukwinjila, ulondole we ahondeye munumo, pe uve munumo ukufiha pe uliyepaga. ¹²Lwe iwe ukwinjila mu nyumba, uyilamushe yeneyo. ¹³Inga inyumba yihondeleye, mwitishizye umutende winyu ayinze pa yiyo. Nkandi inga iyene yitahondeleye, mwitishizye umutende winyu agalushile kulimwe.¹⁴Inza she vala ve vatakuvaposhela imwe pamo ukwivwa ku mazwi ginyu, lwe imwe mukwepa ukufuma mu nyumba yila pamo mu nkaya, mukung'unte ulusuto ukufuma ku vinama vyinyu. ¹⁵Nalyoli ine nkuyanga kulimwe, kuliva ukwitishilwa nkani ku nsi iya Sodomu nu Gomola pisiku ilya vulonzi ukulusya inkaya yila.¹⁶''Yenya, Ine nkuvatuma imwe ngati ng'onzi pakasi pa mpumpi, ilelo muve mwe vakusheva ngati njoha havili mwe vatonsu ngati nkunda. ¹⁷Mushevaje na vantu! avene valivatwala imwe ku vahombe, havili avene valivasyempa imwe mu masinagogi gavo. ¹⁸Pe imwe valivatwala pilongolela ilya valongozi na ku va mwene pa zyane, ukuva lusimishizyo ku vavo na kuvakunzi.¹⁹Lwe avene vakuvatwala imwe, mutahapasyaje ukti zyandi zive vuli pamo shoni she imwe muliyanga, she ishakuyanga shilipelwa ku kwinyu ahavalilo he hala. ²⁰She ishi temwemwe mwe muliyanga, nkandi mupepo uwa Tata winyu we aliyanga mu mwinyu.²¹Uwamwavo alimutwala uwamwavo ku vufwe, nu yise umwana wakwe. Avana valinyamuha ukuvavushila avapafi vavo nu kuvavombela avene ukuti vavavishe ku vufwe. ²²Imwe mulivengwa na vonti pa mulandu uwizina lyane. Nkandi uno we akujimbilila ukufiha pa vumalilo, umuntu wewula alipona. ²³Lwe avene vakukuvwima iwe mu nkaya ino, ushimbilile ku yamwavo, she nalyoli ine nkuvavuzya imwe, mutalijenda ukudumunsanya inkaya izya Isilayeli lwe umwana uwa muntu ashili ukwinza.²⁴''Ú musundikwa te mupiti nkani ukulusya umu manyisi wakwe, na we muvomvi te wapamwanya ku mupiti wakwe. ²⁵Ishi shikwanine kwa musundikwa ukuti uwene avanje ngati wu manyisi wakwe. Inga avene vamwisite u mupiti mu nyumba iya Belizebuli, vwinji vuli uvwa kuvipa ukwa mazina vakuvita vavulilani ava mu nyumba yakwe!²⁶Ilelo utahavanyilaje venevo, she zitalipo nazimo zye zikupishilwe zye zitalivumbuha, havili nazimo zye zivwamile ye zitalimanyiha. ²⁷She ine navavuzya ku shisi, mushiyanje pamusanya, nazye iwe wazyivwa mu vutonsu mwi kutwi lyaho, uzilumbilile pamwanya pa musonje uwa nyumba.²⁸Utahanyilaje vala ve vakugoga umuvili pe vakupotwa ukugoga umoyo. Muvuzilo vwakwe, mu munyilaje uwene ahondeye ukunangania vyonti umoyo nu muvili mwi palazya. ²⁹Vuli utudundulu tuvili tutakukalwa vulona hakopala ahansi? Pe lelo hoka mututo hatakugwanga pansi shisita u Tata witu ukuzimanya. ³⁰Nkandi ni nsisi vwelele izya kwitwe lyinyu zihavazilwa, ³¹Mutahanilaje.Imwe mwe vapamwanya nkani ukulusya utudundulu utwinji.³²Pe lelo uno we akunitiha Ine pilongolela ilya vantu, nine vulo ndimwitiha pilongolela ilya Tata we ali kumwanya. ³³Nkandi uno we ukunkana Ine pilongolela ilya vantu, nine vulo ndimuhana pilongolela ilya Tata wane we ali kumwanya.³⁴Mutahasivaje ukuti Ine nkinza ukuleta umutende munsi. Ine ntahinza ukuleta umutende, loli upanga. ³⁵She Ine nkinza ukuvagava umuntu ukumuvushila u baba wakwe, nu mwana umulindu ukumuvushila umama wakwe, nu muha mwana umwanavuli ukumuvushila unyinavyala uwakwe. ³⁶Avalugu ava muntu valiva vamunyumba iyakwe nu lwakwe.³⁷Uno we amuganile uyise pamo unyina nkani ukulusya Ine we atankondeleye Ine; nuno we amuganile umwana umulumendo pamo umulindu ukulusya Ine we atankondeleye Ine. ³⁸Uno we atakunyamula ishihovenkanyo ishakwe nu kulandata pisinda paline we atankondeleye Ine. ³⁹Uno we akwanza uvulanzi vwakwe we alivusovezya uvwene. Nkandi uno we akuvusovezya uvulanzi vwakwe pazyane we alivwaga uvwene.⁴⁰''Uno we akuvaposhela imwe akumposhela Ine, nuno we akumposhela Ine we akumuposhela nuno we ahantuma Ine. ⁴¹Uno we akumuposhela umukuvwi mwizina ilya mukuvwi aliposhela ishipambwi [ishavwila] isha mukuvwi, havili nuno we akumuposhela umuntu umugolosu mwizina ilya muntu umugolosu aliposhela ishipambwi [ishavwila] isha muntu umigolosu.⁴²Uno wonti we akupa ku woka mu vansi vanava nu lupindi [ishikombe] ulwa minzi amahatazu agakung'wela mwizina ilya musundikwa, nalyoli Ine nkuyanga kulimwe, uwene mwidala lyonti atalisovezya ishipambwi shakwe.

11²Kuhinza kwava ukuti lwe u Yesu amazile ukuvalingania avasundikwa vakwe 12, ahepa ukufuma pala ahavala ukumanyisya nukulumbilila mu nkaya ¹zyavo.Ishi lwe u Yohani ayivuye mu Jela nizya mbombo izya Chilisiti, ahatuma amazwi na vasundikwa vakwe ³pe ahati ku wuyo, ''We wewe uno we akwinza, pamo iswe twenyelezyaje uwamwavo?''⁴U Yesu ahamula nukuti ku kwavo, ''Jendaji muvale muyanje kwa Yohani zye mukwenya nu kwivwa. ⁵Ava ntonko vakuposhela ukwenya, avalemazu vakujenda, ava mambombo vakuzelipa, avakutwi vakwivwa havili, avafwe vakuzyuha havili kuvulanzi, havili ni pangwi ilyinza likulumbililwa ku va pina. ⁶Alositwe wula we atakupunula muline.''⁷Lye avantu vanava vajenda, u Yesu ahanda ukuyanga ku mpuga nizya Yohani, ''Mwavazile mulugwa ukwenya shoni - itete lye lihayinganaga ni nkungu? ⁸Loli mwavazile kunzi ukwenya shoni - umuntu we azwaye amenda amatonsu? Mwemumo, vala ve vakuzwala amenda amatonsu vakutendama mu nyumba izya va mwene.⁹Nkandi imwe mwavazile kunzi ukwenya shoni - umukuvwi? Iyii, Ine nkuyanga kulimwe, havili ukushila nu mukuvwi. ¹⁰Uno we wewula we zyasimvilwe, 'Yenya, Ine nkutuma intumi yane pilongolela pa sheni shinyu, we alisengania idala lyinyu pilongolela lyinyu.'¹¹Ine nkuyanga kulimwe uvwanalyoli, pakasi pa ve vapafilwe mu mwantanda nawumo umupiti ngati wu Yohani we ahozyaga. Nashe uno we munsi nkani wapamwanya mushinamwene isha kumwanya we mupiti ukulusya uwene. ¹²Ukufuma munsiku izya Yonani we ahozyaga ukufiha ishi, ishinamwene isha kumwanya shikuyimvilwa umuvwalanga, pe na vantu ava muvwalanga vakushisenda pa maha.¹³She vonti avakuvwi nu lulajilo vyakuvwaga ukufishila pa Yohani; ¹⁴pe inga imwe mukasime ukushitishizya ishi, uwene we wu Eliya we aliwakwinza. ¹⁵Uno we ali namakutwi agakwivwa, leha uwene ayivwe.¹⁶Kwe ku shoni kwe Ine injiholanie inkulo ino? Ishi shili ngati vana vakwizya pa vuzilo uvwa kukazizya, ve vakwihala nu kwitana uno nu wamwavo ¹⁷pe vakuti, 'Iswe twalizizye ilonji kulimwe, pe mutahimba. Iswe twalosizye pe imwe mutahakuta.¹⁸She u Yohani ayinzile atahalyanga umukate pamo ukung'wela ipele ilya mampensya , vahati, ali ni mpepo inkandamanu. ¹⁹Umwana uwa muntu ahinza ukulya nu kung'wela pe vahati, 'Yenya, umuntu umupafu uno havili wu shing'wela, mu manyani wa vasonchezya musonko na vatalamandu! Nkandi injele zikumashila mu mbombo zyakwe.²⁰Pe u Yesu ahanda ukuzipilila inkaya mwe imbombo zyakwe inyinji impiti zyavomvilwe, pa mulandu avene vatapindusile. ²¹''Ye mayi we, kolazini, Ye mayi we, Betisayida! Inga imbombo impiti zihavombwaga mu Tilo namu Sidoni zye zyavomvilwe kulimwe, avene nge vapindusile hali mu vizwalo vya magunila ni toyi. ²²Nkandi ishi shiliva shakwitishilwa nkani kwa Tilo nu Sidoni pisiku ilya vulonzi ukushila imwe.²³Iwe, Capelinamu, vuzye iwe ukusiva ukuti ulitumpulwa ku mwanya? Awe, iwe valikwisya pansi kuvuzimu. She inga mu sodomu mula muhavombwaga ivisukumizyo vye vyavomvilwe kulimwe, nge ivyene visyalishiye ukufiha ilelo. ²⁴Nkandi Ine nkuyanga kulimwe ukuti shiliva shipepusu kunsi iya Sodomu mwisiku ilya vulonzi ukushila imwe,''²⁵Muhavalilo he hala U Yesu ahati, ''nkukutima Iwe, Tata, Mwene uwa kumwanya na pansi, shifukwa ivizyisile ivintu vinivi ku vantu ava njele na vakuzimanyinsania, nukuvumbula zyenezyo ku vana avansi. ²⁶Iyii, Tata, she ishi shihakuseshelezya mu minso gaho. ²⁷Ivintu vyonti visuvalilwe mu mwane ukufuma kwa Tata wane; havili nawumo we amumanyile umwana nkandi we Tata, havili nawumo we amumanyile u Tata nkandi we mwana na wonti we umwana amusevile ukumuvumbulila uwene.²⁸Nzaji ku kwane mwenti imwe mwe mulisite havili munyamuye amazigo amang'wamu, pe Ine ndivapa imwe ukutuzya. ²⁹Sendaji ijoko lyane palimwe havili mu manyile ukufuma ku kwane, she ine ne mutonsu havili njisizye mu moyo, pe mulivwaga uvutuzyo uvwa moyo ginyu. ³⁰She ijoko lyane lipepe havili umuzigo wane mupepusu.''

12¹Pa havalilo he hala u Yesu ahajenda nu kudumunsania pa mugunda uwa ngano pisiku ilya sabata. Avasundikwa vakwe vali ninzala pe vanzite ukudumula amatwe aga ngano nu kugalya genego. ²Nkandi lwe avafalisayi vashivonyi isho, vahati kwa Yesu, ''Yenya, avasundikwa vaho vakuvomba she telulajilo ukushivomba pisiku ilya sabata.''³⁴Nkandi u Yesu ahati ku kwavo, ''Mutehatela imwe muvazye she u Davidi ahavomba lwe ali ni nzala,na vantu ve uwene ali navo? Ahavala mu nyumba iya Mulungu nu kulya umukate we ahaloleshelaga she lutali lulajilo ku kwakwe ukulya havili lutali lulajilo na kuvala ve ali navo, nkandi lwali lulajilo kweka ku vaputi.⁵Imwe mutavazizye mundajizyo ukuti pa sabata avaputi mwi tempeli vakunangania ilya sabata nkandi vatananzile nashimo? ⁶Loli Ine nkuti kulimwe umupiti nkani ukulusya ni tempeli ali panapa.⁷Inga imwe mwashimanyaga ishi she shikusula, 'Ine nkwanza uvwila loli imputile pole,' imwe pe nge mutavayanzile havivi ve vtananzile nasimo. ⁸She umwana uwa muntu we wu Mwene uwa sabata.''⁹Pe u Yesu ahepa ukufuma pala nu kuvala mwi sinagogi lyavo. ¹⁰Yenya, pala pali umuntu wumo we ayumiliye inyove.Avafalisayi vahamuvuzilizya u Yesu, vahati, ''Ishi lulajilo ukupozya pa sabata?'' kwe kuti vamususye uwene nizya kutala amalandu.¹¹U Yesu ahati ku kwavo, ''muntu vuli pakasi palimwe, we, inga ali ni ng'onzi yoka vwelele, havili inga ing'onzi yinino yingagwila mushiliva pa sabata, atangayilema nu kuyifumya kunzi? ¹²Pe vwinza vuli vwe vulusizye, lelo, umuntu ulusizye ing'onzi! Pe lelo ulwene lulujilo ukuvomba inyinza pa sabata.¹³Pe u Yesu ahati ku muntu, ''Golosya inyove yaho.'' uwene ahayigolosya, pe iyene yihagalushila ku vwinza, inza she nyove iyamwavo. ¹⁴Loli avafalisayi vahafuma kunzi nu kupangana izya kumuvushila uwene. Avene vahalondolezyaga mwe vangamugojela uwene.¹⁵Lwe u Yesu ashimanya ishi, uwene ahepa ukufuma pala. Avantu avinji vahamulandata uwene,pe ahavapozya vonti vala. ¹⁶Uwene ahavahomeshezya avene ukuti vatahavamanyisye avamwavo izya wuyo, ¹⁷ukuti izyene zifishile, zye zyayanzilwe ukujendela mwa mukuvvwi u Yesaya, ukuti,¹⁸''Yenya, umuvomvi wane we Ine musevile; unkundwa wane, we mu mwakwe umoyo wane akuseshela ahinza. Ine ndiviha uMupepo wane papakwe, pe uwene alikumusya uvwanalyoli ku vakunzi.¹⁹Uwene atalidalinkana pamo ukuholomoha; havili nawumo we aliyivwa izwi lyakwe mu madala. ²⁰Uwene atalibontola nalimo itete lye likuzusile; uwene atalivuzimya uvutambi vwe vukusuha, ukufiha pe uvulongozya uvwanalyoli ku vupoti, ²¹havili mwe mwizina lyakwe avakunzi valiva nulusuvilo.''²²Pe wumo untonko havili ushinunu, ali ni mpepo izya satana, vamulesite kwa Yesu. Ahamupozya uwene, uvumalilo vwakwe vwakuti umuntu ushinunu ahayanga nu kwenya. ²³Impuga yonti yasukumiye nukuti, ''umuntu uno angavanga mwana uwa Davidi?''²⁴Nkandi lwe avafalisayi vivuye izyi mfindango ili, vahati, ''Umuntu uno atakuzishimbizya impepo izya satana mweka mwe mwa Belizebuli, umupiti uwa mpepo izya satana.'' Nkandi u Yesu avamanyile insivo zyavo nu kuyanga ku vavo, ²⁵''Ishinamwene shonti she shigavane nukuvushilana sheka shitangajendelela, ni nkaya pamo nyumba ye yagavinkana yeka yitangimilila.²⁶Inga u satana ukumushimbizya u satana, pe agavinkine nu kuyivushila wuyo weka, pe ishinamwene shakwe shingimilila vuli vuli? ²⁷Inga Ine nkuzishimbizya impepo izya satana nu Belizebuli, pe mwe mwa wenu mwe avana vinyu vakuzishimbizizya izyene? Pa shifukwa ishi avene valiva valonzi vinyu.²⁸Nkandi inga Ine nkuzishimbizya impepo zya satana nu Mupepo uwa Mulungu, pe ishinamwene shinzile palimwe. ²⁹Wumo anginjila vuli mu nyumba iya muntu uwa maha nu kumwivila ivwakwe shisita kutaliha ukumupinya umuntu uwa maha? pe uwene alimwivila ivwakwe ukufuma mu nyumba yakwe. ³⁰Uno we atali poka nine we akumbushila Ine, havili nuno we atakuvunganiha nine akusasania.³¹Ilelo Ine nkuti kulimwe, uvutalamalandu vonti nu musamu vilitetelwa ku muntu, nkandi umusamu ukumuvushila u Mupepo vitalitetelwa. ³²Wonti we akuyanga izwi lyonti ukumuvushila umwana uwa muntu uwene alitetelwa. Nkandi uno wonti we akuyanga ukumuvushila u Mupepo u Mufijile, kulizyo uwene atalitetelwa, nakwe kunsi ino, pamo ku yila ye yikwinza.³³Mulipele ikwi live lyinza pe nivihomwa vyakwe vive vyinza, pamo mulipele ikwi ukuva livivi ni nsanga zyakwe zikuva mbivi, she ikwi likumanyikwa munsanga zyakwe. ³⁴Imwe mwe luho ulwa njoha, imwe mwe vavivi, mungayanga vuli vuli izya vintu ivyinza? She ukufuma muvwinji uvwa vye vili mu moyo ilomo lyakwe likuyanga. ³⁵Umuntu umwinza ukufuma kuzye asunzile inyinza mu moyo wakwe akufumyaga zye nyinza, pe umuntu umuvivi ukufuma kuzye asunzile imbivi mu moyo wakwe akufumyaga zye nyinza.³⁶Ine nkuyanga kulimwe ukuti pisiku ilya vulonzi avantu vakwinza ukuvazilwa izwi lyonti ivivi lye avene valiyanzile. ³⁷She ukujendela mwe mu mazwi ginyu muliva mwe vagolosu, havili ukujendela mwe mu mazwi ginyu mwe valivalonjela.³⁸Pe vamo ava Simbi na vafalisayi vahamwamula u Yesu vahati, ''Mu Manyisi, twanzaga twenye ishimanyilo ukufuma ku kwaho.'' ³⁹nkandi u Yesu ahamula nu kuti ku kwavo, ''Inkulo iya mbivi niya luvembu yikwanzaga ishimanyilo. nkandi nashimo ishimanyilo she shilipelwa ku yiyo. Sheka ishimanyilo isha mukuvwi u Yona. ⁴⁰Inza she u Yona ali mulwanda ulwa nswi impiti amasiku gatatu nu vusiku vutatu, she ziliva uvunye nu mwana uwa muntu aliva mu moyo uwa nsi amasiku gatatu nu vusiku vutatu.⁴¹Avantu ava mu Ninive valiyimilila pa vulonzi na vankulo inonye iya vantu nu kulususya uwene.She avene vapindusile pa vulumbilili uvwa Yona, pe yenya, wumo we mupiti nkani uklusya u Yona ali panapa.⁴²U Mwene umwantanda uwa ku vuswelo alinyamuha pa vulonzi na vantu ava nkulo inonye nu kuvasusya avene. Uwene ayinzile ukufuma muvumalilo uvwa nsi ukutetelezya izya njele izya Solomoni, pe yenya, wumo umupiti nkani ukulusya u Solomoni ali panapa.⁴³Lwe impepo inyazu yefile ukufuma mu muntu, iyene yihadumunsania muvuzilo vwe vutali na minzi nukwenya pe yingatuzya, nkandi apene patahajikwa. ⁴⁴Pe iyene yikuti, 'Ine ndigalushila mu nyumba yane ye ine nafumile.' lwe yagalushila, iyene yikwaga inyumba yila vayipyeleye havili yiyanine. ⁴⁵Pe iyene yihajenda nukuvala ukusenda impepo inkandamanu izyamwavo 7 imbivi nkani ukulusya iyenesho, pe izyene zikwinza zyonti nukutendama mumo. Pe nahavoneshele ahavumalilo aha muntu wula hakuva havivi ukulusya ahavwandilo, ishi she ziliva ngati uvunye ni nkulo imbivi.''⁴⁶Lwe u Yesu ashili akuyanga ku mpuga, yenya, umama wakwe na vamwavo vimiliye panzi, vahanzaga ukuyanga ku kwakwe.'' ⁴⁷Wumo ahati ku kwakwe, ''Yenya, umama waho na vamwinyu vimiliye panzi, vakwanza ukuyanga ku kwaho.''⁴⁸Nkandi u Yesu ahamula nukuti ku wula we amuvuzizye, ''Wu wenu we wu mama wane havili ve vawenu avamwitu?'' ⁴⁹Pe uwene ahagolosya inyove yakw ku vasundikwa vakwe nukuti, ''Yenya, apa pali umama wane na vamwitu! ⁵⁰She uno we akuvomba ukwanza ukwa Tata we ali kumwanya, umuntu we wula we wamwitu, nu muyemba nu mama.''

13¹Pisiku lye lila u Yesu ahafuma mu nyumba pe ayihaye muluvazu mwa sumbi. ²Impuga impiti yavungine ukumuzyungulila uwene, pe ayinjiye mwi voti nu kutendama mumo, she impuga yonti yimiliye pa muluvazu.³Pe u Yesu ahayanga ivintu ivyinji ku kwavo muviholanyo, Ahati, ''Yenya, umulimi ahavala ukupesa imbeyu. ⁴Lwe apesile, zimo imbeyu zihagwila muluvazu mwidala, pe iviyuni vihinza nu kumilula zyenezyo. ⁵Imbeyu izyamwavo zihagwila pansi iyi yalavwe, mwe mutamile itope ilyinji. Umwaluvilo luvilo izyene zihamela shifukwa itope lyashefile. ⁶Nkandi lwe izuva lifumile, izyene zihafoha shifukwa zitamile nigululuzi, pe zihumila.⁷Izyamwavo imbeyu zihagwila pakasi pa mimvwa. Amimvwa gahakula pe gahayibuda yeneyo. ⁸Izyamwavo imbeyu zihagwila pitope ilyinza pe zihahoma insanga, yimo ukushila 100 uvwinji, yimo 60, ni yamwavo 30. ⁹Uno we ali na makutwi, leha uwene ayivwe.''¹⁰Avasundikwa vahinza pe vahati kwa Yesu, ''Shoni she ukuyanga ku mpuga muviholanyo?'' U ¹¹Yesu ahamula pe ahati ku vavo, ''Imwe mupelilwe injele izya kumanyinsanya ivya ku kwilu ivya shinamwene isha kumwanya, loli avene vatapelilwe. ¹²She uno wonti we ali navyo we alipelwa ivyinji, havili we aliva navyo ivyinji. Nkandi uno we atalinavyo, nashe amile nasho shilifyulwa ukufuma ku kwakwe.¹³Ishi she shifukwa nkuyanga navo muviholanyo: nashe avene vakwenyelezya, avene vatakwenya; pe nashe avene vangisya, avene vatakwivwa, pamo ukumanyinsanya. ¹⁴Ku vavo vuvafishiye uvukuvwi uvwa Yesaya, lila lye likuti, lwe mukwivwilizya imwe muliyivwa, loli imwe mu madala gonti mutalizimanyinsanya; lwe mukwenyelezya imwe muliyenya, loli mu madala gonti mutaliyenya.¹⁵She amoyo aga vantu ava gava magomu, havili avene vagomu ukwivwa, pe avene vasinziliye aminso gavo, kwekuti vatahenye na minso gavo, pamo ukwivwa namakutwi gavo, pamo ukuzimanyinsanya na moyo gavo, kwekuti avene vangapinduha havili,pe nine ningavapozya nenevo.'¹⁶Nkandi galositwe aminso ginyu, she agene gakwenya; namakutwi ginyu, she agene gakwivwa. ¹⁷Nalyoli nkuyanga kulimwe ukuti avakuvwi avinji na vantu avagolosu vahanyonywaga ukwenya ivintu vye imwe mukwenya loli ivyene vatahavyenya. Avene vahanyonywaga ukwivwa ivintu vye imwe mukwivwa loli ivyene vatahavyivwa.¹⁸Tejelezya lelo kushiholanyo isha mulimi we ahapes imbeyu yakwe. ¹⁹Lwe wumo akwivwa izwi ilya ku shinamwene loli atakulimanyinsania ilyene, umuvivi wula akwinza nukusompola she shivyalilwe mu moyo wakwe. Ino ye mbeyu ye vahayipesa muluvazu mwidala.²⁰Ye vapesile pavuzilo uvwi vwe muntu wula we akwivwa izwi naluvilo ukuliposhela ilyene nu luseshelo, ²¹lye uwene atali ni gululuzi muli wuyo weka pe akujimbilila muhavalilo hansi. Lwe amayimba pamo ukuvwimilwa kwanyamuha pamulandu uwi zwi, uwene umwaluvilo ukugwa.²²Zye vapesile pakasi pa mimvwa, uno we muntu wula we akwivwaga izwi, loli akusajila ivya munsi nukuyihopeha ni vyuma vikubuda izwi, pe atakuhoma insanga. ²³Imbeyu ye vapesile mwi tope ilyinza, uno we muntu wula we akwivwaga izwi nukulimanyinsanya ilyene. Uwene akwezyaga ivihomwa nukupa insanga, ukuvuna mu shoka 100, mu shamwavi 60, havili mu shinji 30 uvwinji ukulingana na mwe avyaliye.''²⁴U Yesu ahaleta ishiholanyo ishamwavo ku kwavo. Uwene ahati, ''Ishinamwene isha kumwanya shiholine nu muntu we ahapesa imbeyu inyinza mu mugunda wakwe. ²⁵Nkandi lwe avantu vasyupiliye, umulugu wakwe ahinza pe wope ahapesa indezye pakasi pa ngano nu kwepa. ²⁶Lwe umulemvwi akula havili afumya insanga zyakwe, pe nindezye yope yihavoneha.²⁷Avavomvi ava mwenesho mugunda vahinza pe vahati ku kwakwe, 'mwene, utahapesa imbeyu unyinza mu mugunda waho? Zyava vulivuli ishi mwava indezye?' ²⁸Uwene ahati ku vavo, 'Umulugu we avomvile zinizi.' ''Avamuvomvi vahati ku wuyo, 'Pe imwe mukwanza iswe tuvale nu kuzinyunkula zyenezyo?'²⁹''Umwenesho mugunda ahati, 'Awe, Shifukwa pe iwe ukunyunkula indezye unganyunkulila poka ni ngano. ³⁰Leha vyonti vikulile poka ukufishila pa mvuno. Mmuhavalilo aha kuvuna ndiyanga ku vakuvuna, ''Mwandile munyunkule indezye havili muyipinye yeneyo mu nkose nu kuyipemba, loli muvunganishe ingano mushanga shane.'''''³¹Pe Yesu ahaleta ishiholanyo ishamwavo ku kwavo. Ahati ''Ishinamwene isha kumwanya shili ngati nsanga izya muzimwa zye umuntu ahasenda nu kupesa mu mugunda wakwe. ³²Imbeyu ino nalyoli mbeyu inyinsi nkani pa zyonti. Nkandi lwe iyene yikuzile, mpiti ukushila inyanyi yonti. Likuva likwi, pe ni viyuni ivya mumwanya vikwinza nukutenjela munsamba zyakwe.³³Pe u Yesu ahavavuzya ishiholanyo ishamwavo.'' Ishinamwene isha kumwanya shiholine ni viluzizyo vye umwantanda ukusenda nukusanganya nivipimo vitatu ivya vusu ukufishila pe umunya wonti atutumuha.''³⁴Vyonti ivintu vinivi u Yesu ahayanga ku mpuga mu viholanyo; havili atahayanga nashimo ku kwavo shisita shiholanyo. ³⁵Ishi shali muluvatiho ukuti zye ayanzile ukujendela mwa mukuvwi zifishile, lwe atili, ''Ndiyigala ilomo lyane muviholanyo. Ine ndiyanga ivintu vye vya vwamile ukufma ku lwalo ulwa nsi.''³⁶Pe u Yesu ahayileha impuga pe ahavala mu nyumba. Avasundikwa vakwe vahinza ku kwakwe pe vahati, ''Tulinganye iswe ishiholanyo isha ndezye iya mu mugunda.'' ³⁷U Yesu ahamula nukuti, ''Uno we akupesa imbeyu inyinza we mwana uwa muntu. ³⁸Umugunda ye nsi; pe ni mbeyu inyinza, iva ve vana ava shinamwene. Indezye ve vana ava muvivi wula, ³⁹pe umulugu we avapesile avene we wu munkwalanzi. Imvuno vwe vumalilo uvwa nkulo, havili avakuvuna ve vahavizya.⁴⁰Pe lelo, lye indezye yivingine nu kupembwa nu moto, she izyene ziliva nu vumalilo uvwa nkulo. ⁴¹Umwana uwa muntu alivatuma avahavizya vakwe, pe avene valivunganiha ishinamwene shakwe ni vintu vyonti vye vihapelaga uvutalamalandu na vala ve vahavombaga imbivi. ⁴²Avene valivasumbila mwilinga ilya moto, kwe kuliva ukulila nukusya amino. ⁴³Pe avantu avagolosu valilama ngati lizuva mu shinamwene isha Tata wavo. Uno we ali namakutwi, leha uwene ayivwe.⁴⁴''Ishinamwene ishakumwanya shiholine ni nishuma she shivwamile mu mugunda . Umuntu akushaga havili akushizyiha. Muluseshelo lwakwe akujenda, akukazya vyonti vye asenguye, pe akukala umugunda wula. ⁴⁶Havili, ishinamwene ishakumwanya shiholine nu muntu we wuhakazya akulondola uvwambo uvwinza. ⁴⁵Lwe avwaga voka uvwambo uvwinza nkani, ahavala nu kukazya vyonti ivintu vye ali navyo nukuvukala vwenevo.⁴⁷Havili, ishinamwene isha kumwanya shiholine ni shilepa she vasumbiye mwa sumbi, havili shila shikuvunganiha ahavele honti aha nswi. ⁴⁸Lwe shizuye, avalova nswi vahashifumizya ku shipuma. Pe vahihala pansi nukuvunganiha inyinza mu vya kunyamulila, nkandi imivi zye vahazisumba.⁴⁹Ziliva vunuvu kvumalilo uvwa nkulo. Avahavizya valiyinza nukupagula avavivi ukufuma pakasi pa vagolosu. ⁵⁰Avene valivasumbila mwi linga ilya moto, kwe kuliva ukulila nu kusya amino.⁵¹''Mwavyivwisya ivintu vyonti vinivi? Avasundikwa vakwe vahati ku kwakwe, ''iiii.'' ⁵²Pe u Yesu ahati ku vavo, pe lelo umu simbi wonti we ava musundikwa uwa ku shinamwene ishakumwanya aholine nu muntu we mwenesho uwa nyumba, we akufumya ivintu ivikali ni vipya ukufuma ku shuma shakwe. ⁵³Pe kuhinza kwava ukuti lwe u Yesu amazile iviholanyo vinivi, ahepa pa vuzilo vula.⁵⁴Pe u Yesu ahinjila mushigavo shakwe nu kuvamanyisya avantu mu masinagogi gavo. Zye zihafumila zyakuti vasukumiye nkani havili vahati, ''Umuntu wununo akuzyaga kwiyi injele zyakwe na maha aga visukumizyo? ⁵⁵Umuntu uno te mwana uwa mupala matabwa? Te we unyina vakumwita u Maliya? Te we avamwavo ve va Yakovo, Yosefu, uSimoni, nu Yuda? ⁵⁶Te we vonti avayemba vakwe vamile niswe? Avyazile kwiyi ivintu vyonti vinivi?⁵⁷Vahapunula muliwuyo, Nkandi u Yesu ahati ku vavo, ''umukuvwi atakupelwa umushinzi loli kwe ku nkaya yakwe na mu nyumba yakwe.'' ⁵⁸Atahavomba ivisukumizyo ivyinji kula shifukwa sha kusita kusuvila kwavo.

14¹Ukuyana nahavalilo hala, Mwene u Helodi ayivuye ipangwi ilya Yesu. ²Uwene ahati ku vavomvi vakwe, ''Uno wu Yohani we ahozyaga; uwene azyusile ukufuma ku vafwe. Pe lelo amaha ganaga gali pa mbombo mu mwakwe.³She u Helodi amulemile u Yohani, nukumukunga uwene, nukumuviha uwene mu jela pa mulandu uwa Helodiya, umushi wa wamwavo u Filipu. ⁴She u Yohani ayanzile ku kwakwe, ''Ulu telulajilo ku kwaho ukuva nawo ngati mushi waho.'' ⁵U Helodi nge amugozile uwene, nkandi uwene anyizile avantu, mulandu avene vamuvisile ukuva ngati mukuvwi.⁶Nkandi lwe isiku ilya mpapwa iya Helodi lyinza, umwana umulindu uwa Helodi ahatyonga pakasi nukumuhovosya u Helodi. ⁷Muvwamuzi, uwene ahamulajizya nukufinga ukumupa uwene shonti she angamulava.⁸Lwe umama wakwe amulinginye, uwene ahati, ''Umpe ine apa, musiniya, itwe ilya Yohani we ahozyaga. ⁹Umwene avulungine nkani nu kumulava kwakwe, nkandi pamulandu uwa kufinga kwakwe na pamulandu uwa vala vonti ve ali navope pashakulya isha shamazuva, uwene ahamulava ukuti isho shivombwe.¹⁰Ahavatuma nu kumudumula itwe u Yohani mu jela. ¹¹Pe itwe lyakwe valivisile musiniya nukumupa umulindu pe ahasenda lyenelyo nukulitwala kwa nyina. ¹²Pe avasundikwa vakwe vahinza, vahanyamula umuvimba nu kumusyila.ukufuma pishi, avene vahajenda nukumuvuzya u Yesu.¹³Ilelo lwe u Yesu ayivuye ishi, ahepa ukufuma pala mwi voti nukuvala ku vuzilo vwe ali weka. Lwe impuga yivwa izyisho, yihamulandata uwene ulwa pansi ukufuma mu twaya. ¹⁴Pe u Yesu ahinza pilongolela lyavo nkuyenya impuga impiti. Ahavafwila uvwila avene nukuvapozya ava vinu vavo.¹⁵Lwe ishamazuva shinzile, avasundikwa vahinza ku kwakwe nukuti, ''Uvu vwe vuzilo vwe vuli ku vweka, nahe havalilo hajinzite hali, zivwezye impuga, kwe kuti zivwele mu twaya twavo nukuyikalila ishakulya shavo.''¹⁶Nkandi u Yesu ahati ku kwavo, ''Avene vatahondeye ukuti vepe.Imwe muvape venevo vimo ukuti valye.'' ¹⁷Vahati ku kwakwe, ''Iswe tulinago apa amakate amamensule 5 vwelele ni nswi zivili.'' ¹⁸U Yesu ahati, ''Leta vyenevyo kuline.''¹⁹Pe u Yesu ahayilajila impuga ukuti yitendame pansi mu masole.Uwene ahasenda amakate 5 ni nswi zivili. Ahenyelezya kumwanya, ahagalota nu kumensula amakate nukuvapa genego avasundikwa, pe avasundikwa vahagatwala genego ku mpuga. ²⁰Avene vonti valiye havili vikusi. Pe avene vahaseva vye vyasyaye ivimensule - ukwizula iviseji ²¹12.Vala ve valiye vali ukufiha avanavuli 5,000, ukwefya avantanda na vana.²²Umwaluvilo uwene ahavapela avasundikwa ukuti vinjile mwi voti nukujenda ukumulongolela wuyo nukuvala kuluvazu ulunji, lwe akuyivwezya impuga. ²³Lwe uwene ayivwezizye impuga, uwene ahajenda ukukwela igamba wuyo umwenesho ukuputa. Lwe ishamazuva shinzile, ali kwe kula ²⁴weka.Nkandi ivoti lyali pavutali na kunzi, lwe likututwa na mavilingwa, she avene inkungu yihavatutaga.²⁵Pa havalilo aha 4 aha vusiku u Yesu ahavaga avene, ahajendaga pa sumbi. ²⁶Lwe avasundikwa vamuvonyi uwene ukujenda pa sumbi, avene zihavatamya nukuti, ''Ishi Shizyuha,'' pe avene vahakuta mwilyoga. ²⁷Nkandi u Yesu ahayanga navo pepala nukuti, ''Mujimbe! Nene! mutahanyilaje.''²⁸U Peteli ahamwamula ahati, ''Mwene, inga ungava wewe, undajile ine ininze ku kwaho pa minzi.'' ²⁹U Yesu ahati, ''Nzaga.'' Pe u Peteli ahepa ukufuma mwi voti nu kujenda paminzi ukuvala kwa Yesu. ³⁰Nkandi lwe u Peteli ayivonyi inkungu iya maha, ahinza ava nilyoga. Ilelo uwene ayanzite ukudwiva, ahaholela nukuti, ''Mwene, mpoha ine!''³¹Umwaluvilo u Yesu ahagolosya inyove yakwe, ahamulema u Peteli, nukuti ku kwakwe, ''Iwe we walwitiho ulunsi, shoni she iwe uli namaganigani?'' ³²Lwe u Yesu nu Peteli vinjiye mwi voti, inkungu yihaleha ukupupa [ukuvugula]. ³³Pe avasundikwa mwi voti vahamusugamilila u Yesu nukuti, ''Nalyoli iwe we mwana uwa Mulungu.''³⁴Lwe avene valovosile, vahinza kunsi Genesaleti. ³⁵Lwe avantu ava muvuzilo vula vamumanya u Yesu, avene vatumile amapangwi monti ukuzyungulila utwaya, havili vamuleteye uwene wonti we ali muvinu. ³⁶Pe avene vahamulava ukuti vapalamansye vulo insongo iya mwenda wakwe, pe avinji ve vapalamansizye yeneyo vapozile.

15¹Pe vamo avafalisayi na vasimbi vahinza kwa Yesu ukufuma mu Yelusalemu. Avene vahati, ²''Shoni she avasundikwa vaho vakushizania indajizyo izya vasongo? Shoni avene vatakugeza mu nyove zyavo lwe vakulya umukate.'' Uwene ahamula pe ahati ku kwavo, ³''Pe shoni she mukushizania inkomelezyo izya Mulungu pa shifukwa isha ndajilo zyinyu?⁴She u Mulungu akuti, 'Umushindishe u baba waho nu mama waho,' pe 'wula we akuyanga imbivi izya yise pamo u nyina we nalyolinye alifwa.' ⁵Nkandi imwe mukuti, ''We akuyanga kwa yise pamo kwa mama wakwe, Shonti she shikukwavwa iwe nge ushiposheleye ukufuma ku kwane ishi she shavwila shipelilwe kwa Mulungu.'' ⁶umuntu wewula shitakwanzikwa umushindihaje u baba wakwe.' Mwidala linili imwe mulilesile izwi ilya Mulungu shifukwa isha ndajizyo zyinyu.⁷Mwe valumilenga imwe! U Yesaya ahakuvwa ahinza nkani ni zyinyu lwe uwene atili, ⁸'Avantu ava vakunchindiha ine na malomo gavo, loli amoyo gavo gali kuvutali nine. ⁹Avene vakumputa ine havivi shifukwa vakumanyisya imbatiho zyavo ukuva nkomelezyo izya vantu.'''¹⁰Pe uwene ahayitizya impuga ku wuyo weka pe ahati ku vavo, ''Tejelezyi havili muzimanyinsanye - ¹¹Nashimo she shikwinjila mwilomo shikumunangaga umuntu. Muvuzilo vwakwe, she shikufuma mwilomo, ishi she shikumunanganyaga umuntu.''¹²Pe avasundikwa vahinza nu kuti kwa Yesu, ''Uzimanyile ukuti avafalisayi vapunuye lwe vivuye ipangwi linili?'' ¹³U Yesu ahamula pe ahati, ''Shonti ishivyalwa she u Tata wane uwa kumwanya atavyaye shilinyunkulwa. ¹⁴Valeshe avene veka, vakulongolwa ni ntonko. Inga umuntu untonko akumulongozya umuntu untonko uwamwavo, vonti valigwila mushiliva.''¹⁵U Peteli ahamula pe ahati kwa Yesu, ''ulinganye ishiholanyo ishi kuliswe.'' ¹⁶U Yesu ahati, ''Nimwe vwelele mushili mutakuzyaganya? ¹⁷Mutakuzyaganya ukuti shonyi she shikuvala mwilomo shikwinjila mu mulwanda havili pe shikuvala kwi zyeje?¹⁸Nkandi ivintu vye vikufuma mwilomo vikwinza ukufuma mu moyo. Vye vintu vye vikumunananga ¹⁹umuntu.She ukufuma mu moyo zikujendIelela insivo imbivi, ukugoga, uluvembu, nu vwamalaya, uvwiva, uvwa home uvwi lenga, ni ndigo. ²⁰Ivi vye vintu vye vikumunanga umuntu. Loli ukulya ni nyove zye utagezile kutakumunanganya umuntu.''²¹Pe u Yesu ahepa ukufuma pala pe ahinjilaga ku shigava isha nkaya izya Tili nu Sidoni. ²²Yenya, umwantanda uwa ku kanani ahinza ukufuma kushigava shila. Uwene ahpunda pe ahati, ''vanga nu vwila paline, Mwene, We mwana uwa Davidi! Umwana wane umulindu alemilwe nkani ni mpepo inkandamanu.'' ²³Nkandi u Yesu atahamwamula uwene izwi. Avasundikwa vakwe vahinza nu kumulava uwene, vahati, Muvwezye wenewo, she uwene akutuzuma munsizi zyitu.''²⁴Nkandi u Yesu ahamula pe ahati, ''Ine ntahatumwa ku wumo loli ku ng'onzi zye zisoveleye izya mu nyumba iya Isilayeli.'' ²⁵Nkandi uwene ahinza nu kusugamila pilongolela paliwuyo, ahati, Mwene navwa ine.'' ²⁶Uwene ahamula pe ahati, ''Ishi te shinza ukusenda umukate uwa vana nu kumusumbila ku tuvwa utunsi.''²⁷Pe ahati, ''Mwemumo, Mwene, loli tope utuvwa utunsi tukulyanga tumo utuvuluvuswa twe tukugwa ukufuma pameza izya va mwene vavo. '' ²⁸Pe u Yesu ahamula ahati ku kwakwe, ''Mwantanda, lupiti ulwitiho lwaho; leha zivombwe kuliwe inza she ukwanza.'' Umwana wakwe umulindu ahapola muhavalilo he hala.²⁹U Yesu ahavuleha uvuzilo vula pe ahavala kupipi nu sumbi uwa ku galileya.Pe ahakwela mwigamba nu kwihala kwekula. ³⁰Impuga impiti yihinza ku kwakwe. Avene vahavaleta avalemazu, nava ntonko, nava shinunu, na vantu ve vakwavula, na vanji avinji ve vavinile. Vahavatwala avene ku vinama vya Yesu, pe ahavapozya venevo. ³¹Pe impuga yihasukumila lwe vakwenya avuntu avashinunu vakuyanga,avakwavula vakupola, avalemazuvakujenda, havili nava ntonko vakwenya. vahamushindiha u Mulungu uwa isilayili.³²U Yesu ahavita avasundikwa vakwe ku kwakwe pe ahati, ''Ine nkuyenyezya uvwila impuga shifukwa yihala nine kumasiku gatatu havili vatali nashimo ishakulya. Ine ntakwanza ukuvavwezya avene she vataliye nashimo, pamo lumo vangaziliha mwidala.'' ³³Avasundikwa vahati ku wuyo, ''Tungagaga kwiyi amakate aga kukwila pa vuzilo uvu vwe vuli vweka aga kwikusya impuga impiti ino?'' ³⁴U Yesu ahati kuvavo ,'' Muli namakate galinga?'' Avene vahati, '' 7, pe niswi nyinsi. ³⁵''Pe u Yesu ahayilajila impuga ukuti yihale pansi.³⁶Ahasenda makate 7 ni nswi, pe lwe asalifya ahamensulanya amakate nu kugatwala genego kuvasundikwa. Avasundikwa vahapa genego ku mpuga. ³⁷Avantu vonti vahalya havili vahikuta. Pe vahavunganiha iviseje 7 vye vyizuye ni vimensusu vye vyasyaye. ³⁸Vala ve valiye vali avanavuli 4,000, ukwefya avantanda na vana. ³⁹Pe u Yesu ahayivwezya impuga pe ahinjila mwi voti nu kuvala ku shigava isha ku Magadani.

16¹Avasundikwa na vafalisayi vahinza nu kumulinga uwene pakumuvuzilizya avalanjizye ishimanyilo ukufuma mu mwanya. ²Nkandi uwene ahamula nukuti ku kwavo, ''Lwe kwava ahisi, imwe mukuti, ukwene kulisha ahinza, she mu mwanya mushemime.'³Lwe yishili nzanchi, imwe mukuti, kwe yihatonye, she mu mwanya mushemime havili mukogofya.' Imwe mumanyile ahilulile aha havoneshele aha mu mwanya, nkandi imwe mutangilula ivimanyilo ivya tuvalilo. ⁴Inkulo imbivi ni yaluvembu yikulondola ishimanyilo, loli nashimo ishimanyilo she shilipelwa ku yiyo sheka ishimanyilo isha Yona.⁵Lwe avasundikwa vafisile uluvazu ulunji, avene valuvilwe ukunyamula umukate. ⁶U Yesu ahati ku vavo, ''Muvanje aminso havili mushevaje ni viluzizyo ivya vafalisayi na vasadukuyi.'' ⁷Avasundikwa vavuzilizinye pakasi pa vavo avenesho ukuti, ''Ishi mulandu iswe tutanyamuye umukate nawumo.'' ⁸U Yesu azimanyile nzila izyishi ahati, ''Imwe mwe valwitiho ulunsi, shoni she mukuvuzilizanya pakasi palimwe mweka ukuti ishi mulandu iswe tutanyamuye umukate nawumo?⁹Mushili imwe mutakuzimanya pamo ukukumbuha amakate amamensule 5 aga ma 5,000, havili viseje vilinga vye imwe mwavunganisile? ¹⁰Pamo amakate amamensule 7 aga ma 4,000, havili viseje vilinga vye imwe mwavunganisile?¹¹Izi zili vuli kulimwe mutakuzimanya ukuti ine ntahayangaga kulimwe nizya mukate? Muvanje aminso havili mushevaje ni viluzizyo ivya vafalisayi na vasadukayi.'' ¹²Pe avene vazimanyinsinye ukuti uwene atahavavuzyaga avene ukuti vashevaje ni viluzizyo ivya mukate, nkandi vashevaje nivimanyisyo ivya vafalisayi na vasadukayi.¹³Ishi lwe u Yesu ayinzile muvigava kupipi ni Kayisaleya Filipu, uwene ahavavuzilizya avasundikwa vakwe, ahati, ''Avantu vakuyanga ukuti umwana uwa muntu wuwenu? ¹⁴Avene vahati, ''Vamo vakuti we Yohani we ahozyaga; vamo, we Eliya; na vanji, we Yelemiya pamo woka uwa vakuvwi.'' ¹⁵Uwene ahati ku kwavo, ''Loli imwe mukuyanga ukuti ine ne wenu? ¹⁶Ukumwamula, u Simoni Peteli ahati, ''Iwe we Chilisiti, umwana uwa mulungu umulanzi.¹⁷U Yesu ahamula nukuti ku kwavo, Ulositwe iwe, Simoni mwana uwa Yona, she umuvili ni vanda tevye vyakuvumbuliye iwe izi, nkandi wu Tata wane we ali kumwanya. ¹⁸Nine vwelele nkuyanga havili kuliwe ukuti iwe we Peteli, na pivwe linili ine ndizenga ishivanza shane. Ivilyango ivya ku vuzimu vitalijendelela ukulipota ilyene.¹⁹Ine ndivapa imwe imfungulo izya ku shinamwene isha ku mwanya. Shonti she imwe mulipinya munsi iya pansi shilipinywa na kumwanya, havili shonti she mulisatula munsi iya pansi shilisatulwa na kumwanya.'' ²⁰Pe u Yesu ahavahomelezya avasundikwa ukuti avene vatahamuvuzye nawumo ukuti uwene ali wu Chilisiti.²¹Ukufuma ahavalilo he hala u Yesu ayanzite ukuvavuzya avasundikwa vakwe ukuti uwene ahondeye avale ku Yelusalemu, nukuyimba muvintu ivyinji mu nyove izya vasongo na vaputi avapiti na vasimbi, ukugogwa, nukuzyuha havili ku vulanzi pisiku ilya vutatu. ²²Pe u Peteli ahamusenda uwene paluvazu nu kumupilila , ahati, ''Ishi shamile shive pavutali ukufuma kuliwe, Mwene, ishi shitahinze shivombwe nalumo ku kwaho.'' ²³Loli u Yesu ahagalunkana nukuti kwa Peteli ''vanga ku nsizi yane,satana! Iwe we shipunulo kuline, she iwe utakusivilila nizya vintu ivya Mulungu, loli nizya vintu ivya vantu.²⁴Pe u Yesu ahati ku vasundikwa vakwe, ''Inga wumo akwanza ukundandata ine, ahondeye ayihane wuyo weka, anyamule ishihovenkanyo ishakwe, pe andandate ine. ²⁵She uno we akwanza ukuvupoha uvulanzi vwakwe alivusovezya uvwene, Pe wonti we akuvusovezya uvulanzi vwakwe pazyane we ali vwaga ²⁶uvwene.Ilelo isho shingamwavwa shoni umuntu inga uwene angakava insi yonti iya pansi loli avusovezye uvulanzi vwakwe? Shoni she umuntu angaviha ukutananya nu vulanzi vwakwe?²⁷She umwana uwa muntu aliyinza muvushindamu uvwa Tata wakwe nu vwa vahavizya vakwe. Pe uwene alimulipila umuntu wonti ukuyana ni mbombo zyakwe. ²⁸Nalyoli ine nkuti kulimwe, valipo vamo avimwe ve vimiliye apa ve vatalivonja imfwa ukufishila pe avene vamwenya umwana uwa muntu akwinza mushinamwene shakwe.''

17¹Lwe gajenda amasiku 6 u Yesu ahavasenda poka u Peteli, u Yakovo, nu Yohani u mukulu wakwe, pe ahavatwala pamwanya pigamba itali vavo veka. ²Uwene ahayandula pilongolela lyavo. Isheni shakwe shihalama ngati lizuva, havili amenda gakwe gahanying'inyilaga nga luhozyo.³Yenya, kwavonesile ku vavo u Mose nu Eliya vahayangaga poka nawo. ⁴U Peteli ahamula pe ahati kwa Yesu, ''Mwene, shili ahinza kuliswe ukuva panapa. Inga ukasime iwe, Ine nkagombe utuyumba panapa tutatu - hoka haho, na hamwavo ha Mose, na hamwavo hoka ha Eliya.⁵Lwe ashili ukuyanga, yenya, ivingo lye ilyakulama lihavakupishila venevo, havili yenya, kuhinza izwi ukufuma mwivingo, lihati, ''Uno we Mwana wane unkundwa, muliwuyo mwe nkuseshela ahinza. Mumutejelezye ⁶wuyo.''Lye avasundikwa vivuye ishi , vahagwisya ivyeni vyavo pansi havili vogofile nkani. ⁷Pe u Yesu ahinza nukuvapalamanysa avene pe ahati, ''Nyamushi havili mutahogopaje.'' ⁸Pe vahinuha loli vatahenya nawumo nkandi we wu Yesu weka.⁹Lwe vakwiha mwigamba, u Yesu ahavahomeshezya avene, ahati, ''Mutahayanje nakumo ishitushizya ishi ukufishila pe umwana uwa muntu azyuha ukufuma ku vafwe.'' ¹⁰Avasundikwa vakwe vahamuvuzilizya uwene vahati, Shoni lelo she ava simbi vakuti u Eliya we ayandile ukwinza?''¹¹U Yesu ahamula pe ahati, 'U Eliya we mwemumo aliyinza nukuyananya ivintu ¹²vyonti.Loli ine nkuvavuzya imwe , u Eliya we ahinza hali, loli avene vatamumanyile.Muvuzilo vwakwe, avene vahavomba shonti she vahanzaga ku kwakwe. Mwidala linili, umwana uwa muntu wope vwelele aliyimba mu nyove zyavo. ¹³Pe avasundikwa vahazyaganya ukuti uwene ahayangaga ku kwavo nizya Yohani we ahozyaga.¹⁴Lwe avene vinzile ku mpuga, umuntu ahinza ku kwakwe, ahasugamila pilongolela lyakwe, pe ahati, ¹⁵''Mwene, uve nu vwila pa mwana wane, she uwene ali nahazilisi havili akuyimba nkani. She uwene shima ukugwilaga pa moto pamo mu minzi. ¹⁶Ine nkamuleta uwene ku vasundikwa vaho, nkandi vatahamupozya uwene.¹⁷U Yesu ahamula pe ahati, ''Mwevasita lwitiho havili mwe nkulo iya vutalamalandu, Ine kwe imbanje nimwe ukufishila linyi? Ine kwe imbajimbilile imwe ukufishila linyi? Mulete uwene kuline.'' ¹⁸U Yesu ahapilila impepo inkandamanu, pe izyene zihepa Mu mwakwe, pe umulumendo ahapola muhavalilo he hala.¹⁹Pe avasundikwa vahinza kwa Yesu ku kwilu pe vahati, ''Shoni she iswe tutahayifumya iyene?'' ²⁰U Yesu ahati ku kwavo, Pa mulandu wa lwitiho lwinyu ulunsi. She Ine nalyoli nkuyanga kulimwe, inga mungava nu lwitiho nape lushepe ngati hasanga aha muzimwa, mungayanga kwi gamba ili, 'Jenda ukufuma ipa uvale pala,' pe ilyene lilijenda, havili nashimo she shiliva shigomu kulimwe. ²¹Nkadi ahavele iha aha mpepo imbivi zitangafuma peka pa kuputa nu kufunga.²²Lwe avene vadiliye mu Galileya, u Yesu ahati kuvasundikwa, ''umwana uwa valimutwala mu nyove izya vantu, ²³pe avene valimugoga uwene, pe pisiku ilya vutatu uwene alizyuha. ''Avasundikwa vahinza vavulungana nkani.²⁴Lwe avene vinzile ukufuma ku kapelinamu, avantu vavili ve vahasanguzyaga idilakima vahinza kwa Peteli pe vahati, ''Vuzye u manyisi winyu atakulipa umusonko [idilakima zivili]?'' ²⁵Uwene ahati, ''Mwemumo.'' Lwe u Peteli ayinzile mu nyumba, u Yesu ayandiye ayanga ku kwakwe pe ahati, ''Iwe ukusivs shoni,Simoni? Ukufuma kwawenu kwe ava mwene ava munsi vakusenda utuntu pamo ukusonchezya umusonko? Ukufuma ku vana vavo pamo ukufuma ku vanji?²⁶''Ukufuma ku vanji,''u Peteli ahamula. Pe avana vasatushe,'' u Yesu ayanzile. ²⁷Loli kwe kuti iswe tutahavavombaje avasonchezya musonko ukutala amalandu, jendaga kwa sumbi, usumbile insikulo, pe inswi ye wandila ukulema. Lwe iwe wayigula ilomo lyakwe, uliyaga [indalama ] ishekeli. Uyisende yeneyo nu kuvapa ava sonchezya musonko iyane ni yaho.''

18¹Mu havalilo he hala avasundikwa vahinza kwa Yesu pe vahati, 7 ?''Wuwenu we mupiti mu shinamwene isha kumwanya?7 ?'' ²U Yesu ahavita avana avansi ku kwakwe, ahavaviha pakasi pa pavo, ³pe ahati, 7 ?''nalyoli Ine nkuyanga kulimwe ,peka peka imwe mupindushe pe muve ngati vana avansi, imwe mwidala lyonti mutaliyenya ishinamwene isha kumwanya.⁴Pe lelo, uno we akuyisya wuyo weka ngati mwana umunsi we mupiti nkani mushinamwene isha kumwanya. ⁵Uno we akumuposhela umwana umunsi ngati uvu pamulandu uwizina lyane we akumposhela ine. ⁶Nkandi uno we akuleha woka muvansi iva ve vakusuvila mu mwane ukutalamalandu, shangava ahinza ku kwakwe ukuti vamupinye nu lwala ulupiti mu nsingo yakwe, nukumudwivya uwene pa vwivizu uvwa sumbi.⁷Ye mayi we nsi pamulandu uwa vya kupunuzya! She ishene shinza ukuti impunuzyo izyo zyinze, nkandi ye mayi we ku muntu we impunuzyo izyo zikwinzila mumo! ⁸Inga inyove yaho pamo ishinama shaho shikukupelela iwe ukupunula, ushidumule shenesho pe ushisumbe ukutali niwe. Ishene shili ahinza kuliwe ukwinjila mu vulanzi ulemaye ukulusya ukutagwa mu moto uwa shima pe uli ni nyove zivili pamo ivinama vivili.⁹Inga ilyinso lyaho likukupelela iwe ukupunula, ulifolovole lyenelyo pe ulisumbe ukutali niwe.Shingava ahinza kuliwe ukwinjila ku vulanzi ni lyinso lyoka ukushila ukuti vakutaje mu moto uwa shima na shima uli na minso gonti gavili.¹⁰Mwenyaje imwe ukuti mutakumusula nawumo muvansi iva. She Ine nkuyanga kulimwe ukuti kumwanya avahavizya vavo vakwenya shima pa sheni isha Tata wane we ali kumwanya. ¹¹She umwana uwa muntu ahinza ukupoha shila she shisoveleye¹²Mukusiva shoni? Inga wumo ali ni ng'onzi 100, pe yimo mu zizyo yasovela, atakuzileha 99 muluvazu mwigamba nukuvala ukulondola yoka yeyisoveleye? ¹³Inga uwene ayazile iyene, nalyoli Ine nkuvavuzya imwe, uwene ukuseshela ukushila zila 99 zye zitasoveleye. ¹⁴Mwidala linili, te kwanza ukwa Tata winyu uwa kumwanya ukuti wumo mu vansi iva alove.¹⁵7 ?'' Inga uwamwinyu akunanjila iwe, valaga umuvuzye uwene uvunanzi vwakwe, pakasi piwe na wuyo mweka. Inga uwene ayivwisya ku kwaho pe umukavile uwamwinyu uyo. ¹⁶Nkandi inga uwene atakukwivyisya iwe, umusende woka pamo avanji vavili poka niwe kwe kuti ukujendela mwilomo ilya vavili pamo avahome vatatu izwi lyonti livanje lya kusimishizya.¹⁷Pe inga uwene akuhana ukwivwisya ku kwavo, yiyanje intamyo iyo ku shivanza.Inga uwene ashili akuhana ukwivwisya ku shivanza, leha uwene ave kuliwe ngati wakunzi havili musonchezya musonko.¹⁸Nalyoli Ine nkuyanga kulimwe, shonti ishintu she imwe mwapinya pansi apa shilipinywa na kumwanya, havili shonti she mwasatula pansi apa shilisatulwa na kumwanya. ¹⁹Havili Ine nkuyanga kulimwe, inga vamo vavili vivwana pansi apa nizya shimo she vakulava, ishene shilivombwa ku vavo ukujendela mwa Tata wane we ali kumwanya. ²⁰She kwe vavili pamo vatatu vavungine poka mwizina lyane, pepala pe nine nkuva pakasi pa pavo.²¹Pe u Peteli ahinza pe ahati kwa Yesu, 7 ?''Mwene, halinga he uwamwitu alinanjila ine pe nine imutetele uwene? Ukufishila ha 7?7 ?'' ²²U Yesu ahati ku kwakwe, Ine ntakuvuzizye iwe ukuti ha 7, nkandi ukufishila 70 * 7 {tiyimuzi}.²³Pe lelo ishinamwene isha kumawnya shiholine nu mwene wumo we ahanzaga ukuvelenjela ishuma na vavomvi vakwe. ²⁴Lye uwene ayanzite ukuvelenjela, woka umuvomvi vamulesite ku kwakwe we ahofile ku kwakwe italanta 10,000. ²⁵Nkandi she uwene atali na madala agakulipila, umupiti wakwe ahalajila ukuti vamukazye, poka nu mushi wakwe na vana na vyonti ivintu vye alinavyo, pe ukulipila she kuvombwe.²⁶Pe umuvomvi ahagwa pansi, ahasugamila pilongolela ilya wuyo, pe ahati, Mwene, unolovele ine, pe ine ndikulipa ivintu vyonti. ²⁷Pe umwene uwa muvomvi wula, ahamusatulila uwene pe ahamutetela uwene inkongole.²⁸Loli umuvomvi wula ahafuma pe ahamwaga woka umuvomvi uwamwavo, we amuhopeye uwene idinali 100. Ahamutona uwene, ahamufinya uwene pa nsingo, pe ahati, 'Ndipa ine vye iwe wahofile.' ²⁹7 ?''Nkandi umuvomvi uwamwavo ahagwa pansi pe ahalambilizya ku kwakwe ahati, 'Unolovele ine, pe ine ndikulipa iwe.'³⁰Loli umuvomvi uwakwanda ahahana. Muvuzilo vwakwe, uwene ahajenda nukumusumbila uwene mu mujela ukufishila pe amulipila wula vye ahofile. ³¹Lwe avavomvi avamwavo vazyenya zye zyavomvilwe, vahaswimililwa nkani. Vahinza nu kumuvuzya umwene wavo vyonti ivintu vye vya vomvilwe.³²Pe umwene wa muvomvi wula ahamwita uwene pe ahati ku kwakwe, 'We muvomvi umuvivi iwe, Ine nkakutetela iwe inkongole zyonti mulandu iwe wandambilizizye ine. ³³Iwe utamile uvanje nu vwila pa muvomvi uwamwinyu, inza she nali nu vwila paliwe?'³⁴Umupiti wakwe ahalaye pe ahamulemeha uwene ku vahayimvya ukufishila uwene pe alipila vyonti vye ahofile. ³⁵Inza vunuvu she uTata wane uwa kumwanya alivomba kulimwe inga mutakuvatetela avamwinyu ukufuma mu moyo ginyu.7 ?''

19¹Hafisile ahavalilizyo hala lwe u Yesu amalizizye amazwi aga, uwene ahepa ukufuma mu Galileya nu kwinza ku shigavo isha Yudeya she shamile kwisyila ilyi jenje ilya Yolodani. ²Impuga impiti yihamulandata wuyo pe uwene ahavapozya venevo kwe kula.³Avafasayi vahinza ku kwakwe, pa kumulinga, vahati ku kwakwe, ''Ulwene lungava lulajilo ukuti umwanavuli amusosye umushi wakwe pa shonti she shingavombwa?'' ⁴U Yesu ahamula pe ahati, ''Kwe kuti imwe mutavazizye uno we ahavapela avene ukufuma kuvwandilo ahapela umwanavuli nu mwantanda?⁵Uno we ahavapela avene ahayanga havili, 'Pa mulandu wishi umwanavuli alimuleha ubaba wakwe nu mama wakwe nu kulemenkana nu mushi wakwe, pe ava vavili valiva muvili woka.' ⁶Pe avene vataliva vavili havili, nkandi muvili woka. Pe lelo she u Mulungu ashileminsinye poka, patahave nawumo uwakulesanya.''⁷Avene vahati ku kwakwe, ''Shoni she u Mose atuhomelezizye iswe ukumupa ukalata uwa kusochela pe nu kumuvwezya uwene? ⁸Uwene ahati ku vavo, ''She amoyo ginyu magomu, u Mose ahavitishizya imwe ukulehana na vashi vinyu, Loli ukufuma ku vwandilo ishene shitamile mwidala ilyo. ⁹Ine nkuyanga kulimwe, wonti we akumusosya umushi wakwe, sheka isha luvembu, nu kusenda uwunji, akuvembuha, pe nu mwanavuli we akumusenda umwantanda we asosile akuvembuha.''¹⁰Avasundikwa vahati kwa Yesu, ''Inga zingava inza vwevulo ku mwanavuli nu mushi wakwe, pe tehinza ukusenda.'' ¹¹Loli u Yesu ahati ku kwavo, ''te wonti wula angitishizya ishimanyisyo ishi, nkandi ku veka vala ve vitishizilwe ukushiposhela ishene. ¹²She valipo vamo avapase ukufuma munyanda izya vanyina, havili valipo vamo avapase ve avantu vahavapasa, havili valipo avapase ve vahayipasa vavao veka pamulandu uwa shinamwene isha kumwanya. Uno we ahondeye ukushiposhela ishimanyisyo ishi, leha uwene ashiposhele.''¹³Pe vamo avana avansi vavalesite kwa Yesu ukuti uwene avavishe avene inyove zyakwe nu kuvaputila, loli avasundikwa vahavahalipila venevo. ¹⁴Nkandi u Yesu ahati ku kwavo, ''vitishizye avana avansi, pe mutahavahanizyaje venevo ukwinza kuline, she uvumwene uvwa kumwanya vwavo inza vanava.'' ¹⁵Uwene ahaviha inyove zyakwe pa vana, pe uwene ahepa ukufuma pala.¹⁶Yenya umuntu ahinza kwa Yesu pe ahati, ''Manyisi, shintu vuli ishinza she ine nkondeye ukuvomba ukuti imbe nuvulanzi uvwa shima?'' ¹⁷U Yesu ahati ku kwakwe, ''Shoni she ukumbuzya ine nizya shintu ishinza? Woka vwelele we mwinza, nkandi inga iwe ukwanza ukwinjila muvulanzi, usunjilile inkomelezyo.''¹⁸Pe umuntu ahati ku kwakwe, ''Nkomelezyo vuli'' U Yesu ahati, ''Utahagogaje, utahavembuhaje, utahivaje, utahavishilaje uvwahome uvwilenga, ¹⁹umushindihaje u baba waho nu mama waho, havili umuganaje umupalamani waho ngati wewe weka.''²⁰Umulumendo ahati ku kwakwe, ''ivintu vyonti vinivi ine nkavyivwila. Shoni she ine nchili nkwanza?'' ²¹U Yesu ahati ku kwakwe, ''Inga iwe ukwanza uve we mugolosu, jendaga, ukazye shonti she uli nasho, pe uvape avapina, pe iwe uliva ni shuma kumwanya; pe winze, undandate ²²ine.''Nkandi lwe umulumendo ayivuye she u Yesu ayanzile, uwene ahajenda ni shitima, she uwene ali ni vyuma ivyinji.²³U Yesu ahavavuzya avasundikwa vakwe, ''Nalyoli ine nkuvavuzya imwe, ishene shigomu ku muntu uwa shuma ukwinjila mushinamwene isha kumwanya. ²⁴Havili ine nkuvavuzya imwe, ishene shipepusu ingamila ukupulunsanya pi lyinso ilya sindano ukulusya umuntu uwa shuma ukwinjila mushinamwene isha Mulungu.''²⁵Lwe avasundikwa vivuye zinizi, avene vasukumiye nkani pe vahati, ''Pe wunanu we angapona?'' ²⁶U Yesu ahavenyelezya pe ahati, ''Na vantu ishi shitangavombwa, nkandi nu Mulungu shonti shikuvombwa.'' ²⁷Pe u Peteli ahamula nu kuti ku kwakwe, ''Yenya, iswe tuvilesile vyonti pe tukulandite iwe. Shoni lelo she iswe tuliva nasho?''²⁸U Yesu ahati ku kwavo, ''Nalyoli ine nkuyanga kulimwe, mu nkulo impya lwe u mwana uwa muntu atendime pa shitengo ishavumwene ishavushindamu, nimwe vwelele mwe mundandate ine mulitendama pa vitengo ivya vumwene 12, ukulonga inkolo 12 izya Isilayeli.²⁹Wonti we ayilesile inyumba, avamwavo, avayemba, ubaba, umama, avana, pamo amugunda pamulandu uwizina lyane aliposhela 100 havili ukushizya havili alipyana uvulanzi uvwa shima. ³⁰Nkandi avinji ve vakwanda valiva vavumalilo, pe avavumalilo valiva vakwanda.

20¹'She uvumwene uvwa kumwanya vuli ngati mwenesho mugunda we ahalavila ni nzanchi ukuvalondola ava kumuvombela mu mugunda wakwe uwa mampensya. ²Lwe uwene ayivwana navo ava kuvomba imbombo iya kuvapa idinali yoka pisiku lyoka, uwene ahavatuma mu mugunda wakwe uwa mampensya.³Uwene ahavala havili pa havalilo aha vutatu pe ahavenya ava kuvomba imbombo avanji vimiliye vwelele pa vuzilo uvwa kukazizya. ⁴Ku kwavo uwene ahati, 'nimwe vwelele, jendaji mu mugunda uwa mumpensya, pe ine ndivapa imwe vye vihondeleye.' pe avene vahavala ukuvomba.⁵Havili uwene ahavala pa havalilo ahavu 6 pe havili ahavalilo ahavu 9 pe vahavomba shalishoka. ⁶Vahapyanizya pahavalilo ahavu 11 uwene ahepa pe ahavaga avanji vimiliye vwelele.Uwene ahati ku kwavo, 'Shoni she mwimiliye vwelele apa musanya wonti?' ⁷Avene vahati ku kwavo, 'shifukwa nawumo we atwisite iswe.' Uwene ahati ku kwavo, Nimwe vwelele valaji mu mugunda uwa mampensya.'⁸Lwe ahamazuva hafisile, umwenesho mugunda uwa mampensya ahati kuwakwenyelezya wakwe, 'vitizye avakuvomba imbombo nu kuvapa amalipilo gavo, wandile ukufuma ku vumalilo ukwinza kuvwandilo.' ⁹Lwe avakuvomba imbombo ve vinjiye pa havalilo aha 11 vinzile, wonti muli vavo ahaposhela idinali. ¹⁰Lwe avakuvomba imbombo ava vwandilo vinza, avene vahasiva ukuti kwe avene vaposhele inyinji, loli vope vwelele vahaposhela idinali lyoka.¹¹Lwe avene vaposhela amalipilo gavo, vanzite ukuyilizanya kwa mwenesho mugunda. ¹²Avene vahati, 'Avavomba mbombo avavumalilo ava vamala ahavalilo hoka vwelele pa mbombo, nkandi iwe wavapa ukulingana niswe, iswe swe twayimba ni mbombo ing'wamu iyi siku nu kupya nilungula.'¹³Loli umwenesho mugunda ahamula pe ahati ku wumo uwa vavo, 'Mu manyani, Ine ntakuvombeye iwe ishivivi nashimo. Vuli imwe tutahitinkana nine kwi dinali yoka? ¹⁴Senda she sha kuliwe pe ujendaje. Ine nsazile ukuvapa avavomvi inza she ndinginye nimwe¹⁵Vuzye Ine ntali nuvusatushe uvwa kuvomba inza she Ine nkwanza ku shila shonti she shane Ine? Pamo imwe muli nuvuzuva pamulandu wakuti ine ne mupi? ¹⁶Pe ava vumalilo valiva vakwanda, na vakwanda valiva vavumalilo.'' Avitwa vinji, nkandi avasalwa vansi.¹⁷Lwe u Yesu ahajendaga ukuzuva ku Yelusalemu, uwene ahavasenda 12 paluvazu, pe mwidala uwene ahati ku kwavo, ¹⁸''Yenya, iswe tukujenda ukuvala ku Yelusalemu, pe umwana uwa muntu valimuviha ku vaputi avapiti na ku vasimbi. Avene valimuha uwene ku vufwe havili valimuviha uwene ku vakunzi ukuti avene vamovezye, ukumusyempa, ¹⁹nu kumuhomela uwene. Nkandi pisiku ilya vutatu uwene alizyuha.''²⁰Pe umama uwa vana ava zebediya ayinzile kwa Yesu na vana vakwe. Uwene ahamsugamilila pansi pilongolela lyakwe nukulava shimo ukufuma ku kwakwe. ²¹U Yesu ahati ku kwakwe, ''Iwe ukwanza shoni?'' Uwene ahati ku kwakwe, ''Lajila ukuti avana vane vavili ava vahatendame, woka ku nyove yavo iyandilo havili woka ku nyove yaho iya mongo, kushinamwene shaho.''²²Nkandi u Yesu ahamula pe ahati, ''Iwe utashimanyile she iwe ukulava. Imwe mungakwanisya ukung'wela ishikombe she ine navala pakung'wela?'' Avene vahati ku kwakwe, ''Iswe tungakwanisya.'' ²³Uwene ahati ku kwavo, ''Ishikombe shane nalyoli muling'wela. Nkandi ukutendama ku nyove yakwe iyandilo na kunyove yakwe iya mongo tevyane ukupa, nkandi ivyene vya vala ve u Tata avasenganizizye.'' ²⁴Lwe avasundikwa avanji 10 vivwa ishi, avene vahalaye nkani nizya vamwavo vavili.²⁵Nkandi u Yesu ahavita avene ku kwakwe nu kuti, ''Imwe mumanyile ukuti avahalajila ava vakunzi vaku valamulila avene, pe na vantu vavo avapamwanya vakuyezya uvulamulili papavo. ²⁶Nkandi ishi shitahondeleye ukuva mwidala ili pakasi palimwe. Muvuzilo vwakwe, we akwanza ukuva mupiti pakasi palimwe we ahondeye ukuva muvomvi winyu, ²⁷na we akwanza ukuva wakwanda pakasi palimwe ahondeye ukuva muvomvi winyu, ²⁸inza she umwana uwa muntu atahinza ukuvombelwa, nkandi ukuvomba, nukupa uvulanzi vwakwe ukuva vuposhi kuvinji.''²⁹Lwe avene vefile ukufuma mu Yeliko, impuga impiti yavalandite avene. ³⁰Kula kwamile avantu ava ntonko vavili vatendime muluvazu mwidala. Lwe avene vivuye ukuti u Yesu akudumunsanya kupipi, avene vahaholela, ''Mwene, Mwana wa Davidi, uve nu vwila paliswe. ³¹''Impuga yihavapilila venevo, ukuvavuzya ukuti vapume, nkandi avene vahaholela na kwe kuzuma nkani, ''Mwene, Mwana wa Davidi, uve nu vwila paliswe.''³²Pe u Yesu ahimilila nu kuvita venevo pe ahati, ''Shoni she imwe mukwanza ine imbombe kulimwe?'' ³³Avene vahati ku kwakwe, ''Mwene, ukuti aminso gitu gigushe.'' ³⁴Pe u Yesu, uvwila vuhamulema, ahapalamansya aminso gavo. Umwaluvilo avene vahaposhela ukwenya kwavo pe vahamulandata wuyo.

21¹Lye u Yesu na vasundikwa vakwe vapalamiye mu Yelusalemu pe vahinza ku Betifage, kwi gamba ilya mavula, pe u Yesu ahavatuma avasundikwa vavili, ²ahati ku kwavo, ''Jendaji ku nkaya ye tupalamine nayo, pe umwaluvilo mukuyaga impunda vayikunzile pepala, ni nyana yakwe. Musatule zyenezyo muzilete ku kwane.'' ³Inga wumo akuyanga zimo ukuyana nisho, imwe muhatinji, 'UMwene akuzyanza zyenezyo, pe umuntu wula naluvilo alivatuma nazyo imwe.⁴⁵Ilelo ishi shihinza ukuyana na zila zye zyayanzilwe ukujendela mwa mukuvwi ukuti zifishilaje. Uwene ahati, ''Umuvuzye umulindu uwa mu ziyoni, 'Yenya, umwene waho akwinza kuliwe, Umutehamu havili akweleye pa mpunda - pa nyana, ye vatakweleye nalumo.'''⁶Pe avasundikwa vahajenda nu kuvomba inza she u Yesu avalinginye avene. ⁷Avene vahayileta impunda ni nyana yakwe nu kuviha amenda gavo papo, pe u Yesu ahihala pamwana pa menda. ⁸Impuga yonti yatenzile amenda gavo mwidala, pe avanji vahadumula insamba ukufuma mu makwi nu kutenga zyenevyo mwidala.⁹Pe impuga ye yamulongoleye u Yesu na vala ve vahamulandataga uwene vahapundaga, ''Hosana ku mwana uwa Davidi! Alositwe uno we akwinza mwizina ilya mwene!'' ¹⁰Lwe u Yesu ayinzile mu Yelusalemu, inkaya yonti yavulungine pe yihati, ''Uno we wunanu?'' ¹¹Impuga yahamula, ''Uno we wu Yesu umukuvwi ukufuma ku Nazaleti uwa mu Galileya.''¹²Pe u Yesu ahinjila mwi tempeli. Uwene ahavashimbizya vonti vala ve vahakalaga nu kukazya mwi tempeli, pe ahabenulanya imeza izya vahatanania ava mpiya nivya kutendamila ivya vala ve vahakazyaga inkunda. ¹³Uwene ahati ku kwavo, ''Ilyene lisimvilwe, 'Inyumba yane yiliyitwa nyumba iya mputo,' nkandi imwe mwayipela ukuva nyumba iya viva avapiti.'' ¹⁴Pe untonko nu mulemazu vahinza ku kwakwe mwi tempeli, pe uwene ahavapozya venevo.¹⁵Loli lwe avaputi avapiti na vasimbi venya ivintu ivya kusukumizya vye uwene avomvile, na lwe vivuye avana vakuholela mwi tempeli pe vahati, ''Hosana ku mwana uwa Davidi,'' avene vahalaye nkani. ¹⁶Avene vahati ku kwakwe, Vuzye iwe ukwivya she avene vakuyanga?'' U Yesu ahati ku kwavo, 'Iyiii! Loli imwe mutavazizye nalumo, 'Ukufuma mu malomo aga vana avansi na vabonda ve vakonka avene vansenganizizye intimo'?'' ¹⁷Pe u Yesu ahavaleha avene nu kuvala kwa sumbi uwa Betaniya pe ahalinda uvusiku vonti kwe kula.¹⁸Ilelo inzanchi lwe agalushila ku nkaya, uwene inzala yihamuvava. ¹⁹Ahalyenya ikwi ilyi kunyu muluvazu mwidala, uwene ahavala ku lilyo, pe atahashaga nashimo mumo geka ge matundu. ''kutahinze kuve ivihomwa muliwe havili, ''pe umwaluvilo ikwi ilyi kunyu lihumila.²⁰Lwe avasundikwa valyenya lyenelyo vahasukumila pe vahati, ''Ikwi ikunyu lyumila vulivuli naluvilo?'' ²¹U Yesu ahamula pe ahati ku vavo, ''Nalyoli nkuyanga kulimwe, inga muli nulwitiho havili mutali na maganigani, mutalivomba sheka she shavombwa kwi kunyu ili, loli muliyanga nakwe kwi gamba ili, 'Nyamulwa mumwanya nukusumbilwa mwa sumbi.' pe zilivombwa. ²²Shonti she mukulava mu mputo, mulusuvilo, imwe muliposhela.''²³Lwe u Yesu ayinjila mwi tempeli, avaputi avapiti nava songo ava vantu vahinza ku kwakwe pe ahamanyisyaga pe vahati, ''ukujendela mu vulamulili vuli vwe ukuvombela ivintu vinivi, havili wuwenu akupiye uvulamulili vunuvu?'' ²⁴U Yesu ahamula pe ahati ku kwavo, ''Nine nkuvavuzilizya imwe ivuzyo lyoka. Inga imwe mwambuzya ine, nine kwe imbavuzye ukujendela mu vulamulili vuli vwe ine nkuvombela ivintu vinivi.²⁵Ulozyo ulwa Yohani - lwafumiliye kwiyi? Lwafumiliye kumwanya pamo lwafumiliye ku vantu?'' Avene vahayanjizania vavo veka, vahati, ''Inga iswe tungati, 'Lwafumiliye kumwanya,' uwene aliti kuliswe, 'Shoni lelo she imwe mutamusuviye uwene?' ²⁶Loli inga iswe tungati, 'Lwafumiliye ku vantu,' tukunyila impuga, shifukwa vonti vahamwenyaga u Yohani ngati mukuvwi.'' ²⁷Pe vahamwamula u Yesu vahati, ''Iswe tutamanyile.'' wope vwelele ahati ku kwavo, ''Nine vwelele tembavuzye imwe ukujendela vulamulili vuli vwe ine nkuvombela ivintu vinivi.²⁸Loli imwe mukusiva shoni? Umuntu ali na vana avalumendo vavili. Ahavala kuwa vwandilo pe ahati, 'Mulumendo, uvale uvombe ilelo ku mugunda uwa mampenysa.' ²⁹''Umulumendo ahamula pe ahati, 'Ine ntakuvala,' nkandi lwe pahava hansi uwene ahanduha munsivo zyakwe pe ahavala. '' ³⁰Pe umuntu ahavala ku mulumendo uwa vuvili pe ayanzile ishintu shalishoka. Uwene ahamula nukuti, 'Ine nkuvala, tata, loli uwene atahavala.³¹Mu vana vavili wuwenu we ahavomba ukwanza ukwa yise?'' Avene vahati, ''Uwakwanda.'' U Yesu ahati ku kwavo, ''Nalyoli Ine nkuyanga kulimwe, avasonchezya musonko nava malaya valiyinjila mushinamwene isha Mulungu lwe imwe mushili. ³²She u Yohani ahinza kulimwe mwidala ilya vugolosu, loli mutahamusuvila uwene. Nkandi avasonchezya musonko nava malaya vahamusuvila uwene. Loli imwe, nalwe imwe mwashivonyi ishi, mutapindusile nakwe kumusuvila uwene.³³''Tejelezya kushiholanyo ishamwavo. Kwamile umuntu, umwenesho uwa mugunda. Uwene avyaye umugunda uwa mampensya, ahazenjelela uluvaga muluvazu, ahabana ishiliva isha kifinyila ipele ilya mampensya mumo, ahazenga ni ngazya [watchtower], pe ahavaleshela avalimi. Pe ahavala kunsi iyinji. ³⁴Lwe ahavalilo ahakuvuna hafisile, ahavatuma vamo avazya ku valimi ava mampensya ukusenda ivihomwa vyakwe.³⁵Loli avalimi vahavasenda avavomvi, vahamuhoma woka, vahamugoga uwamwavo, pe nuwamwavo vahamuhoma namavwe. ³⁶Havili, umwenesho ahavatuma avavomvi avanji, avinji ukushila avakwanda, loli avalimi vahavavomba ngati vakwanda. ³⁷Lwe zyajenda izyo, umwenesho ahamutuma umwana wakwe wuyo ku kwavo, ahati, 'Avene valimushindiha umwana wane.'³⁸Nkandi lwe avalimi ava mampensya vamwenya umwana wakwe wuyo ku kwavo, avene vahayanjizania vavo veka, 'Uno we wakupyana. Nzaji, leha iswe tumugoje wenewo pe tusende vwenevo uvupyano.' ³⁹Pe vahamusenda uwene, vahamusumba wenewo kunzi ku mugunda nu kumugoga.⁴⁰Ilelo lwe umwenesho mugunda uwa mampensya ayinzile, alivomba shoni kuvala avalimi ava mampensya? ⁴¹Vahati ku kwakwe, ''Alivanangania avantu avavivi ivo muvuvavu nkani, pe alivapa umugunda uwa mampensya avalimi avanji, avantu ve valimupa uwene vimo muvihomwa vyakwe muhavalilo ahanyinulo.''⁴²U Yesu ahati ku kwavo, ''Mutahatela muvazye mu masimbo, 'Ivwe lye ivazenzi vahalihana lipezilwe ukuva livwe ilya pa nguto [pashipembe]. Ili lyafumile kwa Mwene, havili ilyene lyakusukumizya pa minso gitu'?⁴³Pe lelo Ine nkuyanga kulimwe, ishinamwene isha Mulungu shilinyamulwa ukufuma klimwe pe shilipelwa kunsi ye yikuhoma insanga zyakwe. ⁴⁴Wonti we agwila pivwe linili we alibazunkana mutugava. Nkandi uno we inga ilyene lyamugwila lilimusyusyuta.''⁴⁵Lwe avaputi avapiti na vafalisayi vivwa iviholanyo vyakwe, vahazyagania ukuti ahayangaga ukuyana nizyavo. ⁴⁶Vahanzaga ukumulema uweme, vahanyila impuga, shifukwa avantu vahamwenyaga uwene ukuva mukuvwi.

227 ?

23¹Pe u Yesu ayanzile ku mpuga na ku vasundikwa vakwe. ²Uwene ahati, ''Avasimbi na vafalisayi vakutendama pa shitengo isha Mose. ³Ilelo shonti she avene vakuvahomelezya ukuvomba, muvombaje ivintu vinivi nu kuvyenyelezya vyenevyo. Nkandi imbombo zyavo mutahejelelaje, she avene vakuyanga ivintu loli avene vatakuvivomba vyenevyo.⁴Iyii, avene vakupinya amazigo amang'wamu ge gakuva matazu pakunyamula, pe avene vakugaviha pavipungo ivya vantu. Nkandi avene vavo avenesho vatakuyinzya ahasalala pakuganyamula genego. ⁵Avene vakuvomba zyonti imbombo zyavo ukuti vavoneshele ku vantu. She avene vakuvapela ava kalata vavo ukuva vababazu, havili vakukuzya ni nsongo izya menda gavo.⁶Avene vakukunda uvuzilo uvwa shimwene pa luseshelo ni vitengo ivya shimwene muma sinagogi, ⁷na halamushile aha mushinzi mu vuzilo uvwa kukazizya, nu kwitwa 'Labbi' na vantu.⁸Nkandi imwe mutahondeye ukwitwa 'Labbi,' she muli numu manyisi woka vwelele, havili nimwe mwenti mwe vamwavo. ⁹Pe mutahamwitaje umuntu nuwumo munsi iya pansi ukuva wu Tata winyu, she muli nu Tata woka vwelele, havili uwene ali kumwanya. ¹⁰Mutahondeye imwe nakwe kwitwa mumanyisi,' she muli nu mumanyisi woka vwelele, u Chilisiti.¹¹Nkandi uno we mupiti nkani pakasi palimwe we aliva muvomvi winyu. ¹²Uno we akuyikuzya weka we valimwisya, nuno we akuyisya weka we valimukwezya.¹³Nkandi ye mayi we kulimwe, vasimbi na vafalisayi, na valumilenga! Imwe mukwigalila ishinamwene isha kumwanya ukuvavushila avantu. She imwe mutakwinjila mwemwe mweka, havili mutakuvitishizya ve vakwanza ukwinjila. ¹⁴Ye mayi we kulimwe, vasimbi na vafalisayi, nava lumilenga! She imwe mukumilula inyumba izya va mama avafwilwe, lwe imwe mukujendelela ukugomba nukulanjizya imputo intali. Imwe lelo muliposhela ulunanjiho ulupiti ¹⁵nkani.Ye mayi we kulimwe, vasimbi na vafalisayi, na valumilenga! She imwe mukulovoha u sumbi ni nsi nukumupela woka ukuva winyu, na lwe uwene ayima winyu, imwe mukumupela uwene havili ukuva nkani mwana uwi palazya ngati mwemwe.¹⁶Ye mayi we kulimwe, mwe valongozi ava ntonko, imwe mwe mukuti, Uno we akulapila kwi tempeli, shitali nashimo. Nkandi uno we akulapila kwa golide uwa mwi tempeli, uwene we apinyilwe ku lufingwi lwakwe. ¹⁷Imwe mwe vantonko avakupukupu [avakaleza]! Shoni she shipiti nkani, u golide pamo itempeli lye likumupela u golide ukuva mufinjile?¹⁸Pe, 'Uno we akulapila kushifinjilo, shitali nashimo. Nkandi uno we akulapila pa shavwila she shili papo, we apinyilwe kulufingwi lwakwe.' ¹⁹Imwe mwe vantu avantonko! Shoni she shipiti nkani, Ishavwila pamo ishifinjilo she shikushipela ishavwila ukuva shifinile?²⁰Pe lelo, uno we akulapila ku shifinjilo akulapila pa shisho napa vyonti vye vili papo. ²¹Uno we akulapila kwi tempeli akulapila lilyo na wula we akutendama mumo. ²²Nuno we akulapila kumwanya akulapila ishitengo ishavumwene isha Mulungu na wula we akutendamila papo.²³Ye mayi we kulimwe, vasimbi na vafalisayi, mwe valumilenga! She imwe mukufumya isha 10 impilipili ni ntanga ni vinzale, ilelo imwe shisita kuvombwa nu hapima uwa ndajilo - uvwanalyoli nu vwila nu vusuvalilwa. Nkandi vinivi vye imwe muvivomvile pe mutavilesile ivyamwavo shisita kuvomba. ²⁴Imwe mwe valongozi avantonko, imwe mwe mukuzuvula ahasazi nkandi mukumilula ingamila!²⁵Ye mayi we kulimwe, vasimbi na vafalisayi, na valumilenga! She imwe mukozya ulupindi [ishikombe] kunzi ni mbale, nkandi mukasi izyene zyizuye uvupafu nu kuluguha. ²⁶Imwe mwe vafalisayi ava ntonko! mundie mozye imbale mukasi, kwe kuti na kunzi kope kukwinza ukuzelupa.²⁷Ye mayi we kulimwe, vasimbi na vafalisayi, na valumilenga! She imwe muli ngati mbipa zye vazipasile uvuzelu, zye kunzi zikuvoneha inyinza, nkandi mukasi zyizuye na mafupa aga vantu avafwe na vyonti ivinyazu. ²⁸Mwidala linili, nimwe vwelele kunzi mukuvoneha mwe vantu avagolosu, loli mukasi imwe mwizuye nu vulumilenga nu kusulania indajilo.²⁹Ye mayi we kulimwe, vasimbi na vafalisayi, na valumilenga! She imwe mukuzenga insaha [imbipa] izya vakuvwi nu kuziyemvya insaha izya vagolosu. ³⁰Imwe mukuti, 'Inga tuhavangako mu masiku aga va tata vitu, iswe nge tutayisanzizye pakwita amavanda aga vakuvwi.' ³¹Ilelo imwe mukusimishizya ukuyivushila mwemwe mweka ukuti imwe mwe vana ava vala ve vavagozile avakuvwi.³²Nimwe vwelele mukwizuzya ishipimo isha va tata vinyu. ³³Imwe mwe njoha, imwe mwe luho ulwa njoha, imwe muli vushimbila vuli vuli uvulonzi uvwi palazya?³⁴Pe lelo, yenya, Ine nkuvatumila imwe avakuvwi na vantu ava njele na vasimbi. Vamo muli vavo imwe mulivagoga nu kuvahomela, havili avanji imwe mulivasyempa mu masinagogi ginyu pe nukuvashimbizya avene ukufuma mu nkaya ukuvala mu nkaya. ³⁵Uvumalilo vwakuti palimwe paliyinza uvugolosu vonti uvwa mavanda ge gitisile munsi iya pansi, ukufuma ku mavanda aga Abeli umugolosu, ukufiha ku mavanda aga Zakaliya umwana uwa Belekiya, we mwamugozile pakasi pa nyumba imfinjile na pa shifinjilo. ³⁶Nalyoli ine nkuyanga kulimwe, ivintu vyonti vinivi viliyinza pa nkulo inonye.³⁷''Yelusalemu, Yelusalemu, iwe we ukugoga avakuvwi nukuvahoma na mavwe vala ve vatumilwe ku kwaho! Vuli uvwinji vwe ine nkusambaga ukuvavunganiha avana vaho poka, inza she inkuku yikuvunganiha utwana twakwe muntende mu vyapa vyakwe, loli imwe mutahanzaga! ³⁸Yenya, inyumba yaho yikukusyalila iwe ukuva shisami [litongo]. ³⁹She ine nkuyanga kulimwe, imwe mutalinenya ine ukufuma ahavalilo aha ukufishila pe imwe muliti, 'Alositwe uno we akwinzila mwizina ilya Mwene.'''

24¹U Yesu ahepa ukufuma mwi tempeli pe ahajenda pa vulendo vwakwe. Avasundikwa vakwe vinzile ku kwakwe nu kumusontela uwene uvuzenzi uvwi tempeli. ²Nkandi uwene ahamula ahati ku vavo, ''Kwe kuti imwe mutakuvyenya ivintu vyonti vinivi? Nalyoli ine nkuyanga kulimwe, nalimo ivwe inga lyoka lye lilisyalishila pa lyamwavo lye litalimongolwa pansi.³Lwe uwene atendime pigamba ilya mavula, avasundikwa vinzile ku kwakwe ku kwilu pe vahati, ''Utuvuzye iswe, havalilo vuli he ivintu vyonti vinivi vilivombwa? Kuliva shimanyilo vuli isha kwinza kwaho nu vumalilo uvwa mwaha?'' ⁴U Yesu ahavamula pe ahati ku kwavo, ''Mushevaje ukuti kutahave nawumo we avasovezye imwe. ⁵She avinji valiyinza mwe mwizina lyane. Avene valiti, 'Ine ne Chilisiti,' havili valivasovezya avinji.⁶Imwe miliyivwa izya vulugu na mapangwi aga vulugu. Mwenyaje ukuti imwe zitahavatamyaje, she ivintu vinivi vihondeye ukuvombwa; nkandi uvumalilo vwe vushili. ⁷She insi yilinyamuha ukuvushila insi, ni shinamwene shilivushilana ni shinamwene. Kuliva inzala ni vizumanzi mu vuzilo uvwa kulehana lehana. ⁸Loli ivintu vinivi vwe vwandilo vwelele uvwa kupapwa ukwa vuvavu [mayimba].⁹Avene valivatwala imwe mu mayimba amapiti nu kuvagoga imwe. Imwe mulivengwa ninsi zyonti pa shifukwa ishane. ¹⁰Pe avinji valipunula, nukwanilana woka nu wamwavo nukuvengana woka nu wamwavo. ¹¹Avakuvwi avilenga avinji valinyamuha nu kuvasovezya avinji.¹²Shifukwa ukusulanya ukwa ndajilo kuliyonjela, ishikunzi isha vinji shilihatala nkani. ¹³Loli woka we ajimbilila ukufiha kuvumalilo alipona. ¹⁴Ipangwi ilyinza ili ilya kushinamwene lililumbililwa munsi yonti iya pansi ukuva lusimishizyo ukuvala kunsi zyonti. Pe uvumalilo vuliyinza.¹⁵''Pe lelo, lwe imwe mwashenya isha mwiho she vahashihana she ashiyanzile u mukuvwi u Daniyeli, shimiliye pa vuzilo uvufinjile'' [ muleshe we akuvazya azimanyinsanye ], ¹⁶''valeshe vala ve vali mu Yudeya vashimbilile mu magamba. ¹⁷Muleshe uno we ali pa musonje uwa nyumba atahishe pansi nu kusenda shimo ukufuma mu nyumba yakwe. ¹⁸havili muleshe uno we ali mu mugunda atahagalushile ukusenda amenda gakwe.¹⁹Loli ye mayi we ku vala ve vali nu lwanda na kuvala ve vakonsya utwa bonda mu masiku ge gala! ²⁰Muyiputaje ukuti ukushimbila kwinyu kutahinze kuvombwe mu shisiku pamo pa sabata. ²¹She kuliva amayimba amapiti nkani, ge gatahatela gaveko nalumo ukufuma kuvwandilo uvwa nsi ukufiha ishi, nakwe kwinza ukuvako havili. ²²Peka peka inga amasiku igo vangagafupizya, nawumo umuvili we alipona. Nkandi pa mulandu uwa vasavulwa amasiku igo galifupila.²³Pe inga wumo akuyanga kulimwe, 'Yenya, apa pe pali u Chilisiti!' pamo, 'kula kwe kuli u Chilisiti!' mutahazisuvilaje. ²⁴She ava Chilisiti avilenga na vakuvwi avilenga valiyinza nu kulanjizya ivimanyilo ivipiti nkani ni visukumizyo, ukuti vavasovezye, inga zikwitishilwa, navasavulwa vwelele. ²⁵Yenya, Ine navavuzizya nzila lwe nahavalilo hashili hatafisile.²⁶Pe lelo, inga avene vakuti kulimwe, 'Yenya, uwene ali mulugwa,' mutahafumaje ukuvala mu lugwa. Pamo, Yenya, uwene ali ku kasi,' mutahashisuvilaje isho. ²⁷She ahamesya hakulamaga ukufuma ku vutukulo nu kumesezya mwidala lyonti ukuvala ku vuswelo, she ziliva vwevulo ukwinza ukwa mwana uwa muntu. ²⁸Konti kwe kuli ishinyamana she shifuye, kwe kuula kwe amavimba galivungana.²⁹Nkandi umwaluvilo lwe amayimba amapiti gajenda aga masiku ge gala izuva liliyilupa, umwezi atalifumya uvuzelu vwakwe, inzota ziligwa ukufuma mu mwanya, pe na maha aga kumwanya galiyingana.³⁰Pe ishimanyilo isha mwana uwa muntu shilivoneha mu mwanya, ni nkolo zyonti izya munsi iya pansi zililila. Avene valimwenya umwana uwa muntu pa mavingo aga mu mwanya na maha nuvushindamu uvupiti nkani. ³¹Uwene alivatuma avahavizya vakwe nukulila ukupiti nkani ukwi saji, pe avene valivavunganiha poka avimishilwa vakwe ukufuma ku mpepo 4, ukufuma kuvumalilo voka uvwa mwanya ukuvala ku vwamwavo.³²Mu manyile ishimanyisyo ukufuma kwi kunyu. Pe insamba zyagoma vwelele nukulagazya amatundu gakwe, imwe mukumanya ukuti ishisanya shili papipi. ³³Nishi vwelele, lwe imwe mukwenya ivintu vyonti vinivi, imwe mumanye ukuti uwene ali papipi, pa shilyango she shila.³⁴Nalyoli ine nkuyanga kulimwe, inkulo ino yitalifwa ukufishila pe ivintu vyonti vinivi vivomvilwe. ³⁵Imwanya ni nsi iya pansi viliyepa, nkandi amazwi gane gataliyepa nalumo.³⁶Loli ukuyana nizyi siku lila nahavalilo nawumo we ahamanyile, nave vahavizya ava kumwanya, nawe mwana, nkandi weka u Tata.³⁷Inza she amasiku aga Nowa gamile, she ziliva vwevulo nu kwinza ukwa mwana uwa muntu. ³⁸She inza mwe zyaveleye mu masiku ge gala lwe amahava gashili avene vahalyanga nu kung'wela, vahasendaga nu kusendwa ukufishila isiku lye u Nowa ayinjiye mu mbogosi, ³⁹pe avene vatamanyile nashimo ukufishila pe amahava ginzile nu kuvasenda venevo konti kwe gahavalaga - she ziliva vwevulo nu kwinza ukwa mwana uwa muntu.⁴⁰Pe avantu vavili valiva mu mugunda - woka alinyamulwa, pe woka alisyala. ⁴¹Avantanda vavili valisyanga pa lwala - woka alinyamulwa, pe woka alisyala. ⁴²Ilelo pe muyimililile mwemwe mweka, she imwe mutamanyile lisiku vuli lye u Mwene winyu aliyinzila.⁴³Nkandi mumanye ishi, inga umwenesho uwa nyumba amanyaga havalilo vuli aha vusiku he umwiva aliyinzila, pe nge amile aminso atangitishizye ukuti inyumba yakwe yimongolwe. ⁴⁴Ilelo imwe muhondeye ukuyisenganya, she umwana uwa muntu aliyinza pa havalilo he imwe mutasuviye.⁴⁵Ishi wuwenu we musuvalilwa nu muvomvi uwa njele we umupiti wakwe amwimisile ukuva wamu nyumba yakwe, nukuvapa avene ishakulya mu havalilo ahenesho? ⁴⁶Alositwe umuvomvi wula we u mupiti wakwe alimwaga akuvomba zila lwe uwene akwinza. ⁴⁷Nalyoli Ine nkuyanga kulimwe ukuti umupiti alimwimiha ukuva wu songo pa vintu vyakwe vyonti.⁴⁸Loli inga umuvombi umuvivi akuyanga mumoyo wakwe, 'Umupiti wane ahava, ⁴⁹'nu kwanda ukuvahoma avavomvi avamwavo, nu kulya nu kung'wela na vashing'wela, ⁵⁰pe umupiti uwa muvomvi wula aliyinza pisiku lila lye umuvomvi atasuviye na pa havalilo hala he atahamanyile. ⁵¹Umupiti wakwe alimudumulanya uwene muvigava nukumusalila uvuzilo poka nava lumilenga, kwe kula kuliva inkuta nu kusya amino.

25¹Pe ishinamwene isha kumwanya shiliholana na vamwali 10 ve vanyamuye inyale zyavo pe vavazile ukuhomana nu sivwinga. ²Muli vavo 5 vatali ni njele [avakupukupu] havili 5 vamile ni njele. ³Lwe avamwali avasita njele [avakupukupu] vanyamuye inyale zyavo, avene vatanyamuye amafuta nagamo. ⁴Nkandi avamwali ava njele vasenzite ivya kunyamulila amafuta poka ni nyale zyavo.⁵Ilelo lwe usivwinga ahavile, avene vonti utulo tuhavalema pe vahagona. ⁶Loli pavusiku pakasi kwamile ukuholela, 'Yenyelezya, usivwinga! Fuma kunzi pe muhomane nawo.'⁷Pe avamwali vonti vala vahanyamuha pe vahahozya inyale zyavo. ⁸Avasita njele [avakupukupu], 'Mutupe iswe gamo amafuta ginyu shifukwa inyale zyitu zikuzima.' ⁹''Loli ava njele vahavamula pe vahati, 'She umo gatatuyanine iswe nimwe, muvuzilo vwakwe valaji ku vala ve vakukazya mukale gamo aginyu mweka.'¹⁰Lwe avene vepa vwelele ukuvala ukukala, usivwinga ahinza, pe vala ve vayisenginye vahinjila nawo ukulya pa luseshelo ulwi senda, pe nu mulyango ahigalilwa. ¹¹Lye zyajenda izyo avamwali avamwavo vope vinzile pe vahati, 'Mwene, mwene, twigulile iswe.' ¹²''Nkandi uwene ahamula pe ahati, 'Nalyoli Ine nkuyanga kulimwe, Ine ntavamanyile imwe.' ¹³Ilelo muve aminso, she imwe mutalimanyile isiku pamo ahavalilo.¹⁴She ishi shali ngati lwe umuntu akwanza ukuvala ku nsi iyinji. Uwene avisite avavomvi vakwe nu kuvapa venevo ishuma shakwe. ¹⁵Ku woka muli vavo uwene ahamupa italanta 5, ku wamwavo uwene ahamupa zivili, pe na ku wamwavo vwelele uwene ahamupa italanta yoka. Ali wonti ahaposhela ukushizya ukuyana na maha gakwe, pe umuntu wula ahajenda uvulendo vwakwe. ¹⁶Wula we aposheleye italanta 5 ahepa lyelila pe ahavala aziviha mu mbombo nu kukava italanta izyamwavo 5.¹⁷Inza vwevulo woka we aposheleye italanta zivili ahakava izyamwavo zivili. ¹⁸Nkandi umuvomvi we aposheleye italanta yoka ahepa, ahabana ishiliva pansi, pe ahazyiha impiya [indalama] iya mwene wakwe.¹⁹Ilelo lwe hajenda ahavalilo ahatali umwene uwa vavomvi vala ahinza pe ahavelenjela poka navo. ²⁰Umuvomvi we aposheleye italanta 5 ahinza pe ahaleta italanta izyamwavo 5. Uwene ahati, 'Mwene, iwe wampiye ine italanta 5. Yenya, ine nakava italanta izyamwavo 5.' ²¹Umwene wakwe ahati ku kwakwe, 'wavomba ahinza, we muvomvi umwinza havili we musuvalilwa! Iwe wamile we musuvalilwa pa vintu ivinsi. Ine kwe nkuvishe iwe ukuva we songo pa vintu ivyinji.²²Umuvomvi we aposheleye italanta zivili ahinza pe ahati, Mwene, iwe wampiye ine italanta zivili. Yenya, Ine nakava izyamwavo zivili.' ²³''Umwene wakwe ahati ku kwakwe, 'wavomba ahinza, we muvomvi umwinza havili we musuvalilwa! Iwe wamile we musuvalilwa pa vintu ivinsi. Ine kwe nkakuvishe iwe ukuva we songo pa vintu ivyinji. Yinjila muluseshelo lwa mwene waho.²⁴Pe umuvomvi we aposheleye italanta yoka ahinza pe ahati, 'Mwene, manyile ukuti iwe we muhali.Iwe ukuvunaga pala pe iwe atahapesa, havili iwe ukwinulaga na pala pe utahasasya. ²⁵Ine nali nilyoga, pe ine nkepa nukuzyiha italanta yaho pansi.Yenya, ulinayo ipa ye yaho iwe.'²⁶Loli u mwene wakwe ahamwamula pe ahati, 'We muvomvi umuvivi havili we muhata, wamanyile ukuti nkuvunganihaga nape ntavyaye havili nkwinulaga nape ntapesile. ²⁷Pe lelo nge uhavapanga impiya [indalama] yane avahasengula, pe ukwinza kwane nge ninza naposhela izyane poka niya pamwanya.²⁸Pe lelo senda italanta ku kwakwe pe umupe umuvomvi we ali ni talanta 10. ²⁹Ilelo ku wonti we ali navyo, ivyinji vilipelwa - ivyinji ukushizya. Nkandi ukufuma ku wula we atali nasho nashimo, nashila she uwene ali nasho shilifyulwa ku kwakwe. ³⁰Musumbe umuvomvi umusita mbombo kushisi isha kunzi, kwe kuliva ukulila nu kusya amino.³¹Lwe umwana uwa muntu ayinzile muvushindamu vwakwe poka na vahavizya, pe uwene alitendama pashitengo ishishindamu isha vumwene. ³²Pilongolela lyakwe palivungana insi zyonti, pe uwene alivapagula avantu woka ukufuma ku wamwavo, inza she umudimi akupagulaga ing'onzi ukufuma ku mbuzi. ³³Uwene aliziviha ing'onzi ku nyove yakwe indilo, loli imbuzi ku mongo yakwe.³⁴Pe u Mwene aliyanga ku vala ava ku nyove yakwe iya ndilo, 'Nzaji, imwe mwe mulositwe nu Tata wane, pyana ishinamwene she nkavasenganizizya imwe ukufuma kwe kulwalo ilwa nsi. ³⁵She ine namile ni nzala pe imwe muhampa Ine ishakulya; Ine nali ni nyota pe imwe muhampa ine ishakung'wela; Ine nali ne mujeni pe imwe muhansendela ine munyumba; ³⁶Ine nali ishitali pe imwe muhanzwiha ine; Ine nali ne muvinu pe imwe muhansajilila ine; Ine nali mujela pe imwe muhinza ku kwane.³⁷Pe avagolosu valiyamula pe valiti, 'Mwene, lye liyi lye iswe twakuvonyi iwe uli ni nzala pe tuhakulisya iwe? pamo inyota pe twakupiye iwe ishakung'wela? ³⁸Lye liyi lye iswe twakuvonyi iwe we mujeni nu kusendela iwe munyumba? pamo ishitali pe tuhakuzwiha iwe? ³⁹Lye liyi lye twakuvonyi iwe we muvinu pamo wali mujela pe tuhinza ku kwaho?' ⁴⁰''Pe u Mwene aliyamula pe aliti ku kwavo, 'Nalyoli Ine nkuyanga kulimwe, she imwe mwavomvile ku vamwitu avansi ava avane, imwe mwambombeye ine.⁴¹Pe uwene aliyanga ku vala ava ku nyove yakwe iya ndilo, 'Yepa kuline, imwe mwe mutifilwe, ukwinjila mu moto uwa shima we vamusenganizizye u satana na vahavizya vakwe, ⁴²Shifukwa Ine nali ni nzala, loli imwe mutampiye ine ishakulya; Ine nali ni nyota, loli imwe mutampiye ine ishakung'wela; ⁴³Ine nali ne mujeni, loli imwe mutahaninjizya ine munyumba; nali ishitali, loli imwe mutanzwisile in; navinile havili nali mujela, imwe mutansajiliye ine.'⁴⁴Pe avene havili valiyamula valiti, 'Mwene, lye liyi lye twakuvonyi iwe uli ni nzala, pamo ni nyota, pamo we mujeni, pamo uli shitali, pamo uvinile, pamo uli mujela, pe tutahinza twakuvombela iwe?' ⁴⁵Pe uwene aliyamula ku kwavo pe aliti, 'Nalyoli ine nkuyanga kulimwe, she imwe mutahashivomba ku woka mu vansi ava, imwe mutahambombela ine,' ⁴⁶Ava valivala kwi sunde ilya shima na shima, loli avagolosu ku vulanzi uvwa shima na shima.''

26¹²? Ahene hinzile hafiha ukuti lwe u Yesu amalizizye amazwi gonti ganaga, uwene ahati ku vasundikwa vakwe, ²''Imwe mumanyile ukuti inga gajenda amasiku gavili u pasaka akwinza, pe nu mwana uwa muntu vakwinza ukumutwala pa kuhomelwa.''³Pe avaputi avapiti na vasongo ava vantu vavungine poka mu nyumba iya muputi umupiti, we izina ali wu kayafa. ⁴Avene vahayanjizanya poka ukumulema u Yesu umwakumwiva nukumugoga uwene. ⁵She avene vahatinji, ''Hatahave havalilizyo ahaluseshelo, kwe kuti ishongo isha muvwalanga shitahanyamushe pakasi pa vantu.''⁶Ilelo lwe u Yesu ali mu Betaniya munyumba iya Simoni uwa mambombo, ⁷lwe uwene atendime pa meza, umwantanda ahinza ku kwakwe amile ni nsupa iya mafuta aga mutengo nkani, pe uwene ahamupungulila pitwe lyakwe. ⁸Loli lwe avasundikwa vakwe venya ishi, avene vahinza vahalala pe vahati, ''Shifukwa shoni ishakunanganya uvu? ⁹Aga nge twakazya pa mutengo umupiti nkani nukuvapa avapina.''¹²?0 Nkandi u Yesu, ukushimanya ishi, ahati ku kwavo, '''Shoni she imwe mukumutamya u mama uno? She uwene avomvile ishintu ishinza ku kwane. ¹²?12 ? Imwe muli na vapina ahavalilo honti, loli ine mutaliva nine ahavalilo honti.¹²? Lwe uwene ampungulila ine amafuta aga mu muvili, uwene avomvile ishi isha kusyilwa kwane. ¹²?3 Nalyoli Ine nkuyanga kulimwe, konti kula kwe ipangwi ilyinza ili likulumbililwa munsi yonti iya pansi, she umwantanda uno avomvile shiliyangwa havili umwa kumukumbushila uwene.''¹²?4 Pe woka mu vala 12 ?, we izina ali wu Yudasi isikaliyoti, ahavala ku vaputi ¹²?5 pe ahati, ''Imwe mukwanza ukumpa ine zilinga ukumuleta uwene kulimwe?'' Avene vahamupimila uwene isiliva 30. ¹²?6 Ukufuma muhavalilo he hala uwene ahahaga ahavalilo ahakumulemeshela uwene ku kwavo.¹²?7 Ilelo pisiku ilya kwanda ilya mukate we atali ni viluzizyo avasundikwa vahinza kwa Yesu pe vahati, ''Kwe kwiyi kwe iwe ukwanza iswe tukuyananizye iwe ukwakulyela ishakulya isha pasaka?'' ¹²?8 Uwene ahati, ''Valaji mu nkaya ku muntu wumo pe umuvuzye uwene, 'Umumanyisi akuti, ''Ahavalilizyo hane hali papipi. Ine navala kusengula u pasaka pa nyumba yaho na vasundikwa vane.''''' ¹²?9 Avasundikwa vavomvile inza she u Yesu avalinginye avene, pe avene vahasenganya ishakulya isha pasaka.²⁰Lwe ahamazuva hafisile, uwene ahatendama pansi ukulya na vasundikwa vakwe 12 ?. ²¹²? Pe avene vahalyanga, uwene ahati, ''Nalyoli Ine nkuyanga kulimwe ukuti woka palimwe alinanila Ine.'' ²²Avene vaswimililwe nkani, pe woka na woka ayanzite ukumuvuzilizya uwene, ''Vwanalyoli ine tenene, Mwene?''²³Uwene ahamula, ''Woka we akudwivya inyove yakwe poka nine mu shililo wewe wula we alinanila ine. ²⁴Umwana uwa muntu alijenda, inza she zisimvilwe izya wuyo. Nkandi ye mayi we ku muntu we mumwakwe u mwana uwa muntu aliyanilwa! Ishi shamile ahinza ku muntu wula nge uwene atahapapwaga.'' ²⁵Yudasi, we alimwanila uwene ahati, ''Ningava nene, [Manyisi] Labbi?'' Uwene ahati ku kwakwe, ''Iwe wayiyanjila wewe weka.''²⁶Lwe avene valipakulya, uYesu ahasenda u mukate, ahamulota, pe ahamensula. Uwene ahavapa wenewo avasundikwa pe ahati, ''Senda, mulye. Uno we muvili wane.''²⁷Uwene ahasenda ishikombe pe ahasalifya, nukuvapa shenesho vavo pe ahati, ''Ng'wela, imwe mwenti. ²⁸She ili livanda lyane ilya lufingwi lye lihapungulwa ku vinji pakutetela imbivi. ²⁹Loli Ine nkuyanga kulimwe, Ine ntaling'wela havili ilya shihomwa isha mampensya ili, ukufishila pisiku lila pe Ine nding'wela ipya poka nimwe mushinamwene isha Tata.''³⁰Lwe avene vimvile ulwimbo, vahepa ukuvala kwi gamba ilya mavula. ³¹²? Pe u Yesu ahati ku kukwavo, ''Imwe mwenti kwe mupunule uvusiku uvwilelo pa shifukwa ishane, 'Ine ndimuhoma umudimi pe ni dimilo ilya ng'onzi lilisata. ³²Nkandi lwe ine nazyuha, ndavalongolela imwe mu Galieya.''³³Loli u Peteli ahayanga ku kwakwe, ''Pope inga vonti vangagwa pamulandu waho, Ine ntaligwa nalumo.'' ³⁴U Yesu ahati ku kwakwe, ''Nalyoli Ine nkuyanga kuliwe, uvusiku vunuvu, lye umukolwe atalizile, iwe ulinkana Ine hatatu.'' ³⁵U Peteli ahati ku wuyo, pope inga ine nkondeye ukufwa poka niwe, Ine ntalikuhana nalumo.'' Avanji vonti avasundikwa vayanzile ishintu shalishoka.³⁶Pe u Yesu ahepa navo ahavala ku vuzilo vwe vahatinji Getisemani pe ahati ku vasundikwa vakwe, ''Tendami apa lwe Ine nakuvala kula pa kuputa.'' ³⁷Uwene amusenzite u Peteli na vana vavili ava zebediya poka nawo pe ahinza aswimililwa nu kuyimvilwa. ³⁸Pe uwene ahati ku kwavo, ''U Moyo wane akuswimililwa nkani, na kwe ku vufwe. Musyale panapa pe mudamule poka nine.''³⁹Uwene ahajenda pilongolela hansi, ahakupama isheni shakwe, pe apusite.Uwene atili, ''Tata wane, Inga ishi shingava shipepusu, leha ishikombe ishi shimpitilile ukufuma kuline. Lelo kutahave ngati she Ine nkwanza, nkandi inza she iwe ukwanza.'' ⁴⁰Uwene ayinzile ku vasundikwa pe ayazile avene vasyupiliye, pe uwene ahati kwa Peteli, ''Shoni, she imwe mutadamulaga poka nine muhavalilo hoka? ⁴¹²? muve aminso [mudamule] havili muputaje ukuti imwe mutahinjile mundingo. U Mupepo mwemumo akwanza, loli umuvili muyeyevazu.''⁴²Uwene ahepa ilya vuvili pe apusite. Uwene atili, ''Tata wane, inga ishi shitangampitilila ukufishila pe Ine nang'wela shenesho, ukwanza kwaho kwe kuhavombwe.'' ⁴³Uwene ahinza havili pe ayazile avene vasyupiliye, she aminso gavo gang'wamile. ⁴⁴Pe ukuvaleha avene havili, uwene ahepa pe apusite ilya vutatu, ahayangaga amazwi galigoka.⁴⁵Pe u Yesu ayinzile ku vasundikwa nukuti ku kwavo, ''Imwe mushili musyupiliye mukutuzya? Yenyelezya, ahavalilo hali papipi, pe nu mwana uwa muntu avala pakwanilwa mu nyove izya vatalamalandu. ⁴⁶Nyamushi, leha iswe tujendaje. Yenyelezya, uno we akunanila Ine ali papipi.''⁴⁷Lwe uwene ashili akuyanga, uYudasi, woka uwa muvala 12 ?, ayinzile. Impuga impiti nkani yinzile poka nawo ukufuma ku vaputi avapiti nava songo ava vantu. Avene vinzile na vapanga nizya ndugu. ⁴⁸Ilelo umuntu we avala ukumwanila u Yesu ahavapa avene ishimanyilo, atili, ''Uno we ine namufyompa. Muhamulemaje uwene.''⁴⁹Umwaluvilo uwene ahinza kwa Yesu pe ahati, ''Mwakata, manyisi!'' [Labbi] pe ahamufyompa uwene. ⁵⁰U Yesu ahati ku kwakwe, ''Mumanyani, vomba she iwe winzile pakuvomba.'' Pe avene vinzile, vahaviha inyove zyavo pa Yesu, pe vahamulema uwene.⁵¹²? Yenya, woka mu vala ve vali nu Yesu ahagolosya inyove yakwe, ahakula upanga wakwe, pe ahamupupa umuvomvi uwa muputi umupiti, havili ahamudumula ikutwi lyakwe. ⁵²Pe u Yesu ahati ku kwakwe, ''Viha upanga waho muvuzilo vwakwe, she vonti ve vakunyamula upanga valilova ukujendela kwa panga. ⁵³Imwe mukusiva ukuti Ine mpositwe ukumwita u Tata wane, pe uwene nge atumile kuline ukupitilila impuga izya vahavizya 12 ?? ⁵⁴Nkandi lelo pe amasimbo gandi gafishile vuli, ukuti ishi shihondeye shivombwe?⁵⁵Pa havalilo he hala u Yesu ahayanga ku mpuga, ''mungavanga imwe mwinzile na vapanga ni ndugu ukundema Ine ngati ne mwiva umupiti? Isiku lyonti Ine nkatendamaga ukumanyisya [ukusambilizya] mwi tempeli, pe imwe mutandemile Ine. ⁵⁶Nkandi zyonti izi zyavomvilwe ukuti amasimbo aga vakuvwi gafishile.'' Pe avasundikwa vonti vahamuleha uwene pe vahashimbila.⁵⁷Vala ve vamulemile u Yesu vamulongoziye uwene kwa kayafa umuputi umupiti, kwe ava simbi nava songo vavungine poka. ⁵⁸Nkandi u Peteli amulandite uwene ukufuma pa hantambwi [atantime hansi] ukuvala pilonjelwi ilya muputi umupiti. Uwene ahinjila mukasi nu kutendama pansi nava lindilili ukwenya she kwe sheveko.⁵⁹Ilelo avaputi avapiti nava hombe vonti vahenyelezyaga ulusimishizyo ulwilenga ukumuvushila u Yesu ukuti avene vamuvishe uwene ku vufwe. ⁶⁰Avene vatahalwaga nalumo, nashe avahome avinji avilenga vinzile pantanzi. Nkandi pisinda palizyo vavili vinzile pantanzi ⁶¹²? pe vahati, ''Umuntu uno ahati, 'Ine ningalimongola itempeli ilya Mulungu nukulizenga ilyene ku nsiku zitatu.'''⁶²Umuputi umupiti ayimiliye nu kuyanga ku kwakwe, ''Ungavanga iwe utali nu vwamuzi? Shoni ishi she avene vakusimishizya ukuvushila iwe?'' ⁶³Loli u Yesu apumile. Umuputi umupiti ahayanga ku kwakwe, ''nkukulajila iwe ukujendela mwa Mulungu umulanzi, tuvuzye iswe inga iwe we Chilisiti, umwana uwa Mulungu.'' ⁶⁴U Yesu ahamula kuli wuyo, ''Iwe wayanga ishi wemwenesho. Nkandi ine nkukuvuzya iwe, ukufuma ishi ukuvala kuntanzi iwe ulimwenya umwana uwa muntu atendime ku nyove iya ndilo iya maha, havili akwinza mu mavingo aga kumwanya.''⁶⁵Pe umuputi umupiti ahazepula amenda gakwe pe ahati, ''Uwene ayanzile umusamu! Shoni she tushili tukwanza avahome? Yenyelezya, ishi imwe muyivwiliye umusamu. ⁶⁶Imwe mukusiva shoni?'' Avene vahamula nukuti, ''Úwene ahondeye imfwa.''⁶⁷Pe avene vahamuswilila ku minso pe vahamuhoma, nu kumuzapa uwene na makofi aga nyove zyavo, ⁶⁸havili vahati, ''Ukuvwe kuliswe, iwe Chilisiti. Wuwenu we akuzapa iwe?''⁶⁹Ilelo u Peteli atendime kunzi kwi lonjelwi, pe umuvomvi umulindu ahinza ku kwakwe pe ahati, ''Niwe vwelele wamile poka nu Yesu uwa mu Galileya.'' ⁷⁰Loli uwene ahalihana ilyo pantanzi pa vonti vala, atili, ''Ine ntashimanyile she iwe ukuyanga.''⁷¹²? Lwe uwene ahafumaga ku shilyango, umuvomvi uwamwavo umulindu ahamwenya uwene pe ahati ku vala ve vali pala, ''Umuntu uno wope amile nu Yesu uwa mu Nazaleti.'' ⁷²Uwene ahazihana izyo nishilapo, ''Ine ntamumanyile umuntu uno!''⁷³Lwe pajenda ahavalilo hansi vala ve vimiliye kupipi vahinza nukuyanga kwa Peteli, ''Vwanalyoli niwe vwelele we wumo uwa vala, she mwe iwe ukuyanjila shikupiye iwe idala.'' ⁷⁴Pe uwene ahanda ukutipa nu kulapa, ''Ine ntamumanyile umuntu uno,'' pe umwaluvilo umukolwe ahavilishila. ⁷⁵U Peteli ahakumbuha amazwi ge u Yesu ayanzile, ''Lwe umukolwe atavilishiye iwe ulinkana Ine hatatu.'' Pe uwene ahafuma kunzi pe ahakuta nuvuvavu.

27¹Ishi lwe inzanchi yinzile, avaputi avapiti vonti nava songo ava vantu vahayanjizanya ukumuvushila u Yesu ukumuviha uwene kuvufwe [ukumugoga]. ²Avene vamupinyile uwene, vahamufumya uwene, pe vahamutwala uwene kwa Pilati umusunga nsi.³Pe lwe u Yuda, we amwaniliye uwene, ahenya ukuti u Yesu vamulonzile, uwene ahapinduha nukugalusya ivipande ivya siliva vila 30 ku vaputi avapiti nava songo, ⁴pe ahati, ine natala amalandu pakulyanila ivanda lye litali nahalema.'' Loli avene vahati, Isho she shoni kuliswe? wenye shenesho wewe weka.'' ⁵Pe uwene ahasumba pansi ivipande ivya siliva mwi tempeli, nu kwepa, Pe ahafuma kunzi ahayinyonga weka.⁶Umuputi umupiti ahasenda ivipande ivya siliva pe ahati, ''Ulu telulajilo ukuviha izi mu shakusengulila mwe pe izyene zya mutengo uwa mavanda.'' ⁷Avene vahayanjizanya izya shintu isho poka, pe vakazile ni ndalama umugunda uwa mu matansonta we kwe vasyilaje avajeni. ⁸Pa mulandu wununo umugunda wula vahamwita, ''Umugunda uwa Mavanda'' ukufiha isiku ilyilelo.⁹Pe ishi zila zye zyayanzilwe nu mukuvwi u Yelemiya zihafishila, ukuti, ''Avene vahasenda ivipande 30 ivya siliva, we mutengo we vamwimishiye uwene avana ava Isilayeli, ¹⁰pe avene vahamupa zyenezyo ukuva zya mugunda uwa mu matansonta, ngati she u Mwene andongozizye ine.''¹¹Ishi u Yesu ayimiliye pilongolela ilya musunga nsi, pe u musunga nsi amuvuzilizizye uwene, ''Ungavanga iwe we Mwene uwa va Yuda?'' U Yesu ahamwamula uwene, ''Iwe she wayanga.'' ¹²Nkandi uwene lwe vamulonjeleye avaputi avapiti nava songo, uwene atahavamula nashimo. ¹³Pe u Pilati ahati ku kwakwe, ''Vuli iwe utakuzyivwa zyonti zye vakuvushiye ukukuyanjila iwe?'' ¹⁴Nkandi uwene atahamula izwi inga lyoka, pe umusunga nsi asukumiye nkani.¹⁵Ishi paluseshelo shamile sha mwiho kwa musunga nsi ukumusatula woka umukungwa we impuga yimusevile. ¹⁶Pa havalilo he hala avene vali nu mukungwa umuvivi izina u Balaba.¹⁷Pe lwe avene vavungine poka, u Pilati atili ku kwavo, ''Wuwenu we imwe mukwanza imbasatulile imwe? U Balaba, pamo u Yesu we akwitwa u Chilisiti?'' ¹⁸Uwene azimanyile ukuti avene vahamulemeha u Yesu ku kwakwe pa shifukwa isha sifumbo. ¹⁹Lwe uwene ashili atendime pa shitengo isha vulonzi, umushi wakwe ahatuma izwi ku kwakwe pe ahati, ''Utahavombe nashimo nu muntu we atananzile nashimo.She ine nayimba nkani ilelo pamulandu uwa shilota she namile nasho nazya wuyo.''²⁰Pe avaputi avapiti na vasongo vahayilambilizya impuga yimulave u Balaba, ukuti u Yesu vamugoje. ²¹Umusunga nsi ahavavuzilizya avene, ''wuwenu pa vavili we imwe mukwanza ine imbasatulile imwe?'' Avene vahati, u Balaba.'' ²²U Pilati ahati ku kwavo, ''Ine imbombe shoni nu Yesu we akwitwa u Chilisiti?Pe avene vonti vahamula, ''Uwene ahomelwaje.''²³Pe uwene ahati, ''Shoni, vuvivi vuli vwe uwene avomvile?'' Nkandi avene vahaholela nkani nakwe kuzuma [kupongomoha], ''Ahomelwaje uwene.'' ²⁴Ilelo lwe u Pilati ayenyizye ukuti uwene atakupata nashimo, nkandi muvuzilo vwakwe ishongo shatalisile, uwene asenzite aminzi, ahageza munyove zyakwe pilongolela ilya mpuga, pe ahati, ''Ine ntenashimo ni vanda ilya muntu uno. Imwe mwenye kulishi.''²⁵Avantu vonti vahati, ''Leha ivanda lyakwe live paliswe na vana vitu.'' ²⁶Pe uwene ahamusatulila u Balaba ku kwavo, loli uwene ahamusyempa u Yesu nukuvalemeha uwene pa kumuhomela.²⁷Pe avalwa vulugu ava musunga nsi vahamusenda u Yesu nu kumutwala uwene ku vupiti uvwa nsi yavo nukuvunganiha impuga yonti iya valwa vulugu. ²⁸Pe vahamuzula uwene nukumuviha inkanzu inchemamu. ²⁹Avene vamugombeye impumpu iya mimvwa pe vahamuviha yeneyo pitwe lyakwe, nukuviha indisa ku nyove yakwe iya ndilo. Avene vahasugamila pansi pilongolela lyakw nu kumovezya, vahati, ''Mwakata, Mwene uwa va Yuda?''³⁰Avene vahamuswilila amati, pe vahasenda indisa nu kumuhoma uwene pitwe havili havili. ³¹Lwe avene vamovezya, vahamwefya inkanzu nukumuzwiha amenda gakwe, pe vahamulongozya uwene kunzi pakumuhomela.³²Lwe avene vafumile panzi, vamwazile umuntu we afumile ku kileni izina lyakwe u Simoni, uwene we vamuvijilizizye ukujenda navo kwe kuti uwene anyamule ishihovenkanyo shakwe. ³³Avene vinzile pa vuzilo vwe vukwitwa goligota, vwe ishing'anamulo ''Vuzilo ivwi pango.'' ³⁴Avene vamupiye wuyo ipele ukuti ang'wele vasanginye nahanyongo.Nkandi uwene lwe alivonja, atahang'wela.³⁵Lwe avene vamuhomeleye wuyo, vahagavana amenda gakwe kwidala ilya kusumbilana ivyili, ³⁶pe avene vatendime nukumugulilila uwene. ³⁷Pa mwanya pitwe lyakwe avene vavisile inongwa iya kumuvushila wuyo, ye pakuvazya, ''Uno we wu Yesu, u Mwene uwa va Yuda.''³⁸Aviva avapiti vavili vavahomeleye poka nawope, woka ku ndilo yakwe pe uwamwavo ku mongo. ³⁹Vala ve vahajendaga papo vahamuliga uwene, vahapukusyaga amatwe gavo ⁴⁰pe vahati, ''Iwe we ahavalaga ukunanganya itempeli nukulizenga havili ilyene pa masiku gatatu, yiposhe wewe weka! Inga iwe we mwana uwa mulungu, nzaga pansi ukufuma pa shihovenkanyo!''⁴¹Mwidala linili avaputi avapiti vahamovezyaga uwene, vali poka nava simbi nava songo, nukuti, ⁴²uwene avaposile avanji, nkandi uwene atangayipoha weka. Uwene wu Mwene wava Isilayeli. Muleshe uwene ayinze pansi ukufuma pa shihovenkanyo, pe iswe tulisuvila mu mwakwe.⁴³Uwene asuviye mwa Mulungu, ishi leha u Mulungu amuposhe inga u Mulungu anganza ukumusatula uwene . She uwene havili atili, 'Ine ne mwana uwa Mulungu.''' ⁴⁴Mwe mwidala linili aviva avapiti ve vavahomeleye poka navo vope vahamuliga wuyo.⁴⁵Ishi ukufuma mu havalilo aha vu 6 ishisi shinzile munsi yonti ukufishila ahavalilo aha vu 9. ⁴⁶Ukupalamila ahavalilo aha vu 9, u Yesu ahalila kwizwi ipiti pe ahati, ''Eloyi, Eloyi, lama sabakitani?'' lye ishing'anamulo, ''Mulungu wane, Mulungu wame, shoni she iwe wandeha ine?'' ⁴⁷Lwe vamo mu vala ve vimiliye papo vivuye ishi, avene vahati, ''uwene akumwitizya u Eliya.''⁴⁸Umwaluvilo woka mu vavo ahashimbila nu kusenda ishakufipila, ahizuzya shenesho nipele lye liluzile, ahaliviha ku ndisa iyi tete, pe ahamupa uwene ukuti ang'wele. ⁴⁹vonti mu vala vahati, ''Muleshe weka. Leha iswe twenye inga u Eliya akwinza ukumupoha uwene.'' ⁵⁰Pe u Yesu ahaholela havili kwi zwi ipiti pe ahalemeha umuzimu wakwe.⁵¹Yenya, umwenda uwa mwi tempeli ahazepuha pavili ukufuma pamwanya ukufiha pe apeleleye, pe ni nsi yihayingana na mavwe gahagavinkana. ⁵²Imbipa zyigusile, na mavili aga vantu avafinjile ge gakasite utulo gazyusile. ⁵³Avene vafumile kunzi mu mbipa lwe uwene azyusile, hinjila mu nkaya imfinjile, pe avonesheye ku vinji.⁵⁴Lwe usongo wa valugu na vala ve vahamwenyelezyaga u Yesu vahenya ishizumanzi ni vintu vye vyavomvilwe, avene vahinza vanyila nkani pe vahati, ''Nalyoli uno amile mwana uwa Mulungu.'' ⁵⁵Avantanda avinji ve vamulandite u Yesu ukufuma ku Galileya ukumusajilila uwene vali pe pala vahenyaga ukufuma pa hantambwi. ⁵⁶Pakasi palivavo pali u Maliya u Magadalena, u Maliya umama uwa Yakovo nu Yosefu, pe nu mama uwa vana ava Zebediya.⁵⁷Lwe kwali ahavwelelema, pala pinzile umuntu udumbwe ukufuma ku Alimatiya, izina u Yosefu, we wope ali musndikwa uwa Yesu. ⁵⁸Uwene ahamupalamila u Pilati pe ahalava umuvili uwa Yesu. Pe u Pilati ahalajila ukuti vamupe wenewo.⁵⁹U Yosefu ahanyamula umuvili, ahamuzinga wenewo mu mwenda umwinza umuzelu, ⁶⁰pe ahamugoneha wenewo mu mbipa yakwe impya ye uwene adivile kwi vwe. Pe uwene ahagalagasizya ivwe pa mulyango uwa mbipa pe ahepa. ⁶¹U Maliya u Magadalena nu Maliya uwamwavo vali pe pala, vatendime ukulungamana ni mbipa.⁶²Isiku lye likulandata, lye lyali lisiku lwe ukuyisenganya kujenzite, avaputi avapiti na vafalisayi vavungine poka nu pilati. ⁶³Avene vahati, ''mushindikwa, iswe tukukmbuha ukuti lwe uwilenga wula ali mulanzi, uwene atili, 'Lwe gajenda amasiku gatatu Ine ndizyuha havili.' ⁶⁴Ilelo homeshezya ukuti imbipa yigulililwe ukufishila isiku ilya vutatu, lumo avasundikwa vakwe vanginza nu kumwiva pe nukuyanga ku vantu,' Uwene azyusile ukufuma ku vafwe,' pe ilenga ilya vumalilo liliva livivi nkani ukulusya ilya vwandilo.''⁶⁵U Pilati ahati ku kwavo, ''Senda umulindilili. Valaga uyilindililaje ukuyana namwe uzimanyiye izi.'' ⁶⁶Pe avene vahajenda nukuyindilila imbipa, vahamatila nivwe nukumuviha umulindilili.

28¹Ilelo lye lyasila ilya sabata, lye ilyene lyanzite ukusha isiku ilya kwanda ilya mwa sabata, u Maliya u Magadalena nu Maliya uwamwavo vahinza ukwenya imbipa. ²Yenya, kwamile ishizumanzi ishipiti nkani, she uhavizya uwa Mwene ahiha ukufuma kumwanya, ahinza havili nukulivungulusya ivwe, havili ahalitendamila lyenelyo.³Ahavoneshele hakwe hamile ngati hamesya, na menda gakwe gamile mazelu ngati mpepo iya majela. ⁴Ava henyelezya vahatetema nilyoga pe vahinza vava ngati vantu avafwe.⁵U havizya ahavalinganya avantanda pe ahati ku kwavo, ''Mutahanyilaje, she Ine munyile ukuti imwe mukumulondola u Yesu, we vamuhomeleye. ⁶Uwene atali apa, loli azyusile, inza she ayanzile. Nzaji mwenye uvuzilo vwe u Mwene agonile. ⁷Jendaji luvilo nu kuvavuzya avasundikwa vakwe, 'Uwene azyusile ukufuma kuvafwe. Yenya, avalongoleye imwe ukuvala mu Galileya. Kula kwe imwe mulimwenya.' Yenya, Ine mbavuzizye imwe.''⁸Úmwaluvilo avantanda vahepa ku mbipa ni lyoga havili nu luseshelo ulupiti nkani, pe vahashimbila ukuvavuzya avasundikwa vakwe. ⁹Yenya, u Yesu ahahomana navo pe ahati, ''Nkuvalamuha!'' Avantanda vahinza, vahamulema ivinama vyakwe pe vahamuputa. ¹⁰Pe u Yesu ahati ku kwavo, ''Mutahanyilaje. Jendaji muvavuzye avamwitu vavale mu Galileya. Kula kwe valinenya Ine.¹¹Ilelo lwe avantanda vakujenda, yenya, vamo ava henyelezya vahavala mu nkaya pe vahavavuzya avaputi avapiti ivintu vyonti vye vivomvilwe. ¹²Lwe avaputi vahomana poka nava songo pe vahapangana navo izyisho, avene vavapiye indalama inyinji avalwa vulugu ¹³pe vahavavuzya, ''Muyanje ku vanji, 'Avasundikwa va Yesu vinzile uvusiku nu kwiva umuvili wakwe lwe iswe tugonile.¹⁴Inga ipangwi ili lyamwaga umusunga nsi, iswe tulimulambilizya uwene pe tulimwefya insivo zyonti ukwepa kulimwe.'' ¹⁵Pe avalwa vulugu vahasenda indalama nu kuvomba inza she avene vavalinginye. Ipangwi ili lyasasite nkani pakasi pava Yuda pe likujendelela ni lelo ili.¹⁶Nkandi avasundakwa 11 vahavala ku Galileya, kwi gamba lye u Yesu avalongozizye. ¹⁷Lwe avene vamwenya, vahamuputa, loli vamo vali na maganigani.¹⁸U Yesu ahinza ku kwavo pe ayanzile ku vavo pe ahati, ''Uvulamulili vonti vupelilwe kuline kumwanya na pansi. ¹⁹Pe lelo valaji nu kuvapela avasundikwa ava nsi zyonti. Muvozye venevo mwizina ilya Tata, nu mwana, nu mupepo umufinjile.²⁰Muvamanyisye venevo ukushindiha ivintu vyonti vye Ine mbahomeshezizye imwe. Yenye, Ine ndinimwe shima, nakwe kuvumalilo uvwa nkulo.''

Nyiha, Malawi: Bible for Matayi

Formatted for Translators

Matayi