¹Chighacha chevisiko cho ubhubhahi bwa abhahakimu abhakovo eghecha ighacha monse na omonto omwe wa Bethelehemu ya Yuda akaghi monse ya Moabu bhare hamwe na mghache na abhana bhache bhabhere bheghesubhe. ²Elina lyomonto oyo alekubherekeru Elimeleki, na elina le mghache alekubherekevu Naomi. Amarina ghaabhana bhache bhabhele bheghesubhe bhare kubherekevu Maloni na Kilioni, bhano bhale abha Efraimu bha ya Moabu no ghwikara hayo.³Neho Abimeleki, mosubhe ONaomi, akule, na Naomi aghatighuna abhana bhache bheghesubhe bhabhere. ⁴Abhana bhano bhaghatela abhaghaikoro abhaMoabu; elina leomwe alekubhelekeru Oripa, na Elina lyonde alekubherekeru Ruthu. Bakamenya eyo emeka ikomi. ⁵Okoruho bhansi Maloni na Kilioni bhaghaku, na komotigha Naomi atana Mosubhe wache na atana bhana bhache bhabhere.⁶Neho Naomi atanwele Moabu hamwe na abhaghaikoro bhabhana bhache na kughavoka Yuda ghokubha akoghu komkoa gho Moabu okubha Yahweh atori abhanto bhache ghokino bhakwighombu na abhahaire ebhyakori. ⁷Chasi aghatanora hareare na bhabhere, "Bhaghasekera nencheva kugharoka ghonse ya Yuda.⁸Naomi akabhova bhakamona bhache, mghende, mgharoka, kila omwe hare bhanyakuwanyu. na Mungu eleka obhuchomu hareinyu, kama inyu ghote mwelekili obhuchomu kubhano bhakule naeni. ⁹Mungu abhatori inyu abhamunyi, kila omwe wanyu konyumba yo Omosubhe onde." Akamora akabhaitabheri bhakaghamba bhukongu bhaghakula. ¹⁰Bhakambora, " Tigha! turagharoka hamwe naiye kubhanto bhacho!¹¹Ghasi Naomi akaghamba, "Mgharoke, bhanabhane! Ghoke mokoghi naeni? bhono nkele nina abhana monda yane hare inyu, bhache? bhabhe bhasubhe bhanyu? ¹²Mgharoke, Bhana bhane, mghende gho chinchera chanyu inyu bhene, ghokubha eni nenkunguhire bhukongu kubha nomosubhe. Kama ndaghambe, ndaghanya mbone abhana bheghesubhe, mware kughanya mpaka bhakine? ¹³Mlaghanya mwange ghutetu bhono? Hata, bhana bhane! Ndabhabhere bhukong'u ghukera ghote mokonyabhera inyu, ghokubha okubhoko ko Yahweh koghire mbaleka naeni."¹⁴Neho abhaghaiko bhabhana bhache bhakaghamba bhukong'u noghukula bwiki. Oripa ewe aghaitabheri ghutanora nokomwitabheri, ghasi Ruthu akaghendeli ghutama. ¹⁵Naomi akaghamba, "Teghera, mghandi wacho kubhanto bhache na Mungu bhache. gharoka hamwe nawe."¹⁶Ghasi Ruthu akaghamba, "Utachaghontigha koghi kule naye ghokubha hayokoghi, turahinani, Koghi kumenya, ndamenya, abhanto bhacho bharabha abhanto bhane na Mungu wacho alabha Mungu wane. ¹⁷Hano oghokwera hataeni neho ngokwera eho nkoriyeku. Yahweh antori, na hata bhukong'u okubha keho ghinsiginsi lutachakubha ho oraku ghitekunaghi ghotutanani. ¹⁸Naomi akarola Ruthu amare kumasa koghi nawe, aghatigha kunyankani nawe.¹⁹Ghansi bhansi bhabhere bhakaghi mpaka hayo bhahikile komoghi gho Betherehemu. Hano bhahilikile Betherehemu, omoghi ghunsi ghughachomevu, abhaghakoro bhakaghamba, "Ono Naomi." ²⁰Ghasi akabhabhora, mtacha kumbelekera Naomi. Mumbelekere omororo, ghokubha Mungu ankovile amang'ana amaroro bhukong'u. ²¹Ngatanora nale nichwire, ghasi Yahweh angarokivi ika ntagote bhansi bhano ghoke mumbelekere Naomi, nainyu mrarora Yahweh ahukumiru, kuba Mungu anyankivi?"²²Bhono Naomi na Ruthi Mmoabu, mkamra wache, mbaghavokire koru ense ya Moabu bhakagharoka Bethelehemu chinkagha cha amaghesa gheshairi.

¹Ghasi Elimeleki Mosubhe ONaomi, alebhawabho na ono alekubhelekelu Boazi, ono ale omwame na omonto ono amanyekaine. ²Ruthu, Mmoabhi, akabhora Naomi, "Tigha neghi nkomani amasaghu ghebyakoli komoghondo. Ntune unsi unsi ono nkubhona amabhera kumaisoghache." Igho Naomi akamubhora, "Noghi, monawane."³Ruthu, akaghi kughesa komoghondo akabharu nyuma abhaghesi. Ghasi ahase hale nomoghondo gwale gho Boazi mbawabho na Elimeleki. ⁴Urore Boazi aghacha koru Betherehemu no kubhabhora abhaghesi, "Yahweh abhena inyu." bhakamgharokeri, Yahweh akuheorembe."⁵Neho Boazi akamubhora omukori we meremo wache ono arekubhaimerera abhaghesi "Bwiyake mra omonke ono wawe?" ⁶Omukori we meremo omwimereri wa abhaghesi akagharokeri no kughamba, "Nomoke OMoabu ono agharokire na Naomi koruense ya Moabu. ⁷Akambora, 'tanyabhere onyitabheri ngese noghukomani amasaghu ghabheghesi, Igho aghacha akaghenderi kughesa koru etabhori mpaka nyingeno, ghasi amunyire hasuhu nyumba."⁸Okumara Boazi akabhora Rythu, nguteghera, oni monawane? utachakoghi kughesa komoghondo ghonde? utacha ghutanova komoghondo ghone. Ghasi bhono utame hano na abhanke bhane bhemeremo. ⁹Welekeri amaiso ghacho komoghondo ghuno abhasubhe bhakughesa ovu nyuma ya abhaghaikoro bhande. Ghasi bhono tinabhovire abhasubhe bhangeghokughota? Na urahomu oghi konyo amanche konyongo eno abhasubhe bhaichwiri."¹⁰Neho anighamire mbele ya Boazi, akaihinya ekehore ghikahika harense. Akamubhora, "Kana hake mbwine amabhera kumaiso ghacho, hata unsakeli eni omughesu?" ¹¹Boazi akagharokeri no komubora, "Mbamare kumbora ghansi ghano ukore ghokovru mosubhe wacho akure. Ubhatighire sawanyu na nyakuwanyu nense enowibhoriru ghutambona nyakobhiyera wanyu no ghucha kubhanto bano utamanyive. ¹²Yahweh akurehe kughano ukove Yahweh akurehe ko obhoru, Mungu wa Israeli, ono wanse ya amabhabha ghache obisinelin'osero."¹³Ruthu akaghamba, "Mbone amabhera kumaiso ghacho, mosubhe wane, ghokubha untori, na ughambile obhuchomu haleni, ghokubha eni tende omwe wa abhakori bhe meremo bhacho bhekighaikoro."¹⁴Chinkagha cho kulaghera Boazi akabhora Ruthu "Uche hano, oli emikate eghemwe, na uchabhi eghetene kosoda." aghaikara mbaleka ya abhaghesi, na Boazi akamba ebyakori bhino bhikarangiru. Ruthi akari akaighota aghakeru.¹⁵Hano abhokile koghi kughesa, Boazi akabhora bhamra bhache, "Motighe aghaese mpaka kobhighara na mtacha kombora ng'ara yinsi yinsi nsinenu. ¹⁶Momteghere ebhighara ebhemwe bhe kobhehuntu bheche, motighe abhighese. Mtacha kombeha."¹⁷Akaghesa mpaka mghorobha, akamara aghatanani ebhyakori na amanyanki ghano aghesile, nabyu ebyakori bhikabha kama efa emwe Ye shairi. ¹⁸Aghachighegha na koghi nachu komoghi. Neho nyakobhiyera wabho alochekele aghesire. Ruth akaretera nyakobhiyera wabho ebyakori bhino bhikarangiru. Bhino byasaghire kobyakori bheche.¹⁹Nyakobhiyera wabho akambora, moke ughesire hano ughesile lelo? moke waghire ghukora emeremo? Abhone omrembe omonto ono aghutori, neho Ruthu abhorire nyakobiyera wabho kohusu omonto omwene moghondo ghuno aleghukora emeremo. Akambora, "Elina lyomwene maghondo ghuno nale ghukora emeremo ngo Boazi." ²⁰Naomi akabhora Ruthu, "Aitabheribhu Yahweh, ono atarusiriho obhuhene bhoche kubhano bhani abhahoru na abhaku." Naomi akambora, omonto oyo mbaweto bhahaghuhe naitu, oyombaweito aghotukombora."²¹Ruth ommoabu akambora, "Nobhuhene, akambora, "Wikare haghuhe na abhana bhane bhekemra mpaka hano bhakumara lighesa lene linsi. ²²"Naomi akabhora Ruth mkamra wachewe ghesubhe, Mbwahene monawane mgendani na bhanke bhache bhemeremo, ili utacha kubhona enyanko yinsi yinsi komoghondo."²³Ghasi aghaikara haghuhe na abhakori bhemeremo bheghenke ili aghesi mpaka hano bhakumara amaghesa ghe shairi na engano. Na bhare gwikarana na nyakobhiyera wabho.

¹Naomi nyakobhiyera wabho, akamubhora, "Mona wake, tenkwihameri ghotuna ahase hano iye okomunya, ili amang'ana ghacho ghaghi bwahene? ²Nawe Boazi, omonto ono ubhaire hamwe na abhanke bhache bhemeremo, bha ghuno alabha alakong'onta eshairi ghosakafu yokuhora.³Bhono wisabhe wihake amaghuta, oswale chingebho chacho chinchomu, na ung'arare koghi ghosakafu yokuhora- ghasi atachaghokumanya omonto oyo mpaka hano akumala kulaghera no konyo. ⁴Na uhenchi hano, akomisi harense, ohite ahase hano amisiri hanonokumara ensaende oghi harewe, usene amaghoro ghache, na omisi hayo. Okumarara ghache, na omisi hayo. Okumarara kubhora kyoghukora." ⁵Ruthu ahabhora Naomi, "Ndakora kila ghento kino ughambile."⁶Akang'arara koghi ghosakafu yokuhora aghakora amang'ana ghansi ghano ahabhiru na nyakobhiyera wabho. ⁷Boazi amare kuraghera nokonyo na omoyo ghoche ghughachomeru, akaghi komisi harense mbaleka ahase hare bhakubhe cheri ebhiakori, akamara Ruthu akaghi ihora, aghasena amaghoro gha Boazi, nokomisi hayo harense.⁸Chinkagha cho obhotiko bhokuhengera Boazi aghaitaki aghaishori, na hayo amghaikoro aleamisiri kumaghoro ghache! ⁹Akambora, iye niye uye?" Akagharokeri, Neni Ruthu, omonto wacho wekighaikoro. Tambisi esuka yacho eni omonto wacho we kighaikoro, ghokubha iye mbaweto bhahaghuhe."¹⁰Boazi akambora, "Monawane, Yahweh agwitabheri. Welekili obhuchomu bhono koliko mbele, ghokubha utaghire kubhasubhe abhamra, abhe omwame au omutobhu. ¹¹Na bhono, monawane, utachakobhoha! ndaghukora ghansi ghano okughamba ghokubha omoghi ghone ghunsi abhanto bhane mbakumanyire iye nomghaikoro gaikoro oni ono wisire.¹²Mahene okubha eni nomonto wacho wa haghuhe; hata igho, neho ani omonto wonde wahaghuhe bhukong'u ghukera eni, ¹³Tamahano obhotiko bhuno, na tabhori hano alakore amang'ana ghache ghobhukoo newe wa haghuhe mbwa hene, tigha akore ghekendemwe ghasi ubhone atakore amang'ana ghekendemwe. Hare iye bhono hayo eni ndakora, kama Yahweh amenyire. Misi mpaka tabhori."¹⁴Neho Ruthu amisiri kumaghoro gha Boazi mpaka tabhori. Ghasi akabhaoka tabhori chiri monto unsi atachakomanya wabwine amare kombora, "Itacha kumanyekana omghaikoro aghacha ghasakafu yo kuhora! ¹⁵Bwiki Boazi akamboraleta omtandio ghocho na oghughutere! Hano akore igho, aghapima ebhepimo ebhekoro bhisansabha bheshairi komtandio na komotweka Ruthu. Akamara Boazi akaghi komoghi.¹⁶Ruthu akagharoka hare nyakobhiyera wabho akaghamba mbwe wakore. Monawane?" Neho Ruthu ambhorire amang'ana ghansi ghano akoriru no omonto oyo. ¹⁷Akamubhora, ebhepimo bino bhinsabha bhe shairi mbele ahaire ewe, ghokubha ahaghamba, utachakoghi mabhoko machwe hare nyakobhiyera wanyu." ¹⁸Akamara Naomi akaghamba, tama hano monawane, mpaka hano okumanya mnoghakubha, ghokubha Boazi takomunya mpaka hano akumara eng'ana eno lelo."

¹Neho Boazi aghire kogheseku ko Betherehemu noghwikara harense. Enkagha ensuhu tu aghacha omonto wabho wa haghuhe ono Boazi ale kughamba. Boazi akamubhora, "msani wane uche hano, wikare. akamara omonto oyo aghacha aghaikara. ²Neho Boazi akomaini abhakangati ikomi bho omoghi na kughamba, "Mwikare hano." Bhaghaikara.³Boazi akamubhora omonto ole wa haghuhe, Naomi ono arure komoghi gho Moabu, araghori ahase hano hare hamraweito Elimeleki. ⁴Ngaiteghera ghokohiti noghokubhora, uhaghore mbele ya bhano bhaikaire hano, na mbele ya abhakangati bhabhanto bhane. Hano ulasaighe kuhagharoki uhagharoki ghasi hano ulange kuhatuna kuhagharoki. Umbore, ili manye, ghokubha tareho wonde wokuhagharoki ghasi niye, naeni nomosuhu wacho neho omonto ono owonde akaghamba, Ndahagharoki."⁵Neho Boazi aghambile orosikorore okughora omoghondo koru ghokubhoko ko Naomi, Neho bwiki okughegha Ruthu Mmoabu, Omosino womona wa Elimeleki, ili kubhoki elina le omoku kama eghebho yache." ⁶Neho omonto wole wa haghuhe aghambire, Eni tenkunaghi kuhagharoki ahase hayo hawane koghabo gharanyanki hawnw. Ndakuha iye kama uranaghi kuhagharoki iye mwene."⁷Eno moghiro gwane kubhayahudi kugharoki na ghukerani amachomu. Kuhenehi amang'ana ghayo ghansi, na omonto oyo akarusi ekirato gheche na komha omumenyani wache, ghano na amang'ana ghano bhakore gho gwitabhabherani ghubhe omoghiro gwabhaIsraeli. ⁸Ghokubha omonto wa haghuhe akamubhora Boazi oighore omwene." akamara akarusi ekirato gheche.⁹Neho Boazi abhorire abhakangati na abhanto bhansi, inyu bhano mwaleho moroche ndaghora kere kyare ke Elimeleki na kele kyare ghe Kilioni na Maloni koru kumabhoko gha Naomi. ¹⁰Ghansi ghayo gha bwine Ruthu MMoabu mka Maloni nemhaire obhuhene abhe mkane, ili kughenderi kubherekuvu elina ne eghabho yaomoku, ghokubha elina leche litacha ghosira kubhaghabhani bhache na kogheseku kyabhanto bhache. Inyu moroche lelo."¹¹Abhanto bhansi na abhakangati bhano bhare kogheseku, bhakaghamba, "Itu ntoroche. Yahweh amkore omghaikoro ono achire komoghi ghocho kama Raheri na Lea, bhabhere bhano bhabhekire enyumba ya Israeli. Na witabheribhu Efrata na Okubha Omhangaru Betherehemu. ¹²Na enyumba yacho kama enyumba ya Peresi ono Tamari aibhorire Yuda, kuhetera obwibhori bhuno Yahweh alakuha hamwe na omonke ono."¹³Igho Boazi akaghegha Ruthu, na akabha mghache. Boazi akamisi nawe na Yahweh akamwitabheri kubhona enda, na akaibhora omona amosubhe. ¹⁴Abhaghaikoro bhare bhakabhora Naomi, "Yahweh aitabheribhu, ono ataghotighire utana bhawanyu bhahaghuhe, bhono omana ono. Elina leche na limanyekane Israeli. ¹⁵Na abhe hare iye aghuchoche akuhe obhuhoru na aghutori bhokungu bhocho, ghokubha omona wacho omkamona ono aghusaighire, ono oni omchomu hare iye ghukera abhana bheghesubhe mohungate, amwibwire¹⁶Bwiki Naomi akaghegha omona, akamlali moghekubha gheche, komhenchera. ¹⁷Na abhamenyani bho omghaikoro ole, bhakamha elina, bhakaghamba, "Omona aibwiru ONaomi." Akabherekeru Obedi. Ono achire kubha swabho na Daudi.¹⁸Rino nelikora lyare le Peresi akaibhora, ¹⁹Hezroni akaibhora Ramu, Ramu aibhora aminadabu, ²⁰Abinadabu akaibhora Nashoni, Nashoni akaibhora Solomoni. ²¹Solomoni akaibhora Boazi, Boazi akaibhora Obedi. ²²Obedi akaibhora Yese na Yese akaibhora Daudi.