Bible

थेसलोनिकीहरूलाई पावलको दोस्रो पत्र

1¹पावल, सिलास र तिमोथीबाट परमेश्‍वर हाम्रा पिता र प्रभु येशू ख्रीष्‍टमा थेसलोनिकीहरूको मण्डलीलाई, ²परमेश्‍वर हाम्रा पिता र प्रभु येशू ख्रीष्‍टबाट तिमीहरुलाई अनुग्रह र शान्ति ।³भाइहरू हो, हामीले तिमीहरूका लागि परमेश्‍वरलाई सधैं धन्यवाद दिनुपर्छ । यो उचित छ किनभने तिमीहरूको विश्‍वास धेरै बढिरहेको र तिमीहरूमध्ये हरेकको प्रेम एक अर्काप्रति प्रगाढ भइरहेको छ। ⁴त्यसैले हामीहरू तिमीहरूको धैर्य र विश्‍वासको बारेमा परमेश्‍वरका मण्डलीहरूका बिचमा तिमीहरूले सहने सारा सतावटहरू र दुःख भोगाइहरूप्रति गर्व गर्दछौं । ⁵यो परमेश्‍वरको धार्मिक न्यायको प्रमाण हो, जसको कारणले तिमीहरू परमेश्‍वरको राज्यको योग्य ठहरिन्छौ, जुन राज्यको निम्ति तिमीहरू पिडा भोगिरहेका छौ ।⁶वास्तवमा, तिमीहरूलाई हानि गर्नेहरुलाई हानि गर्नु परमेश्‍वरको लागि धार्मिक छ, ⁷र प्रभु येशू स्वर्गबाट उहाँका शक्‍तिशाली स्वर्गदूतहरूका साथ प्रकट हुनुहुँदा, हामीसँग दुःख भोगेका तिमीहरूलाई छुटकारा मिल्नेछ । ⁸जसले परमेश्‍वरलाई चिन्दैनन् र तिनीहरू जसले हाम्रा प्रभु येशूको सुसमाचार पालन गर्दैनन्, उहाँले तिनीहरूलाई बलिरहेको आगोमा बदला लिनुहुनेछ ।⁹तिनीहरूले प्रभुको उपस्थितिबाट र उहाँको शक्‍तिको महिमादेखि टाढा रहेर अनन्त विनाशको दण्ड भोग्‍नेछन्। ¹⁰तिमीहरूले हाम्रो यो गवाही विश्‍वास गरेको कारण उहाँले यो त्यस दिन गर्नुहुनेछ, जब उहाँ आफ्ना पवित्र जातिहरूमा महिमित हुन र उहाँमाथि विश्‍वास गर्नेहरुलाई अचम्मित पार्न आउनुहुनेछ।¹¹यसको निम्ति हामी निरन्तर तिमीहरूका लागि प्रार्थना गर्छौं, कि हाम्रा परमेश्‍वरले तिमीहरूलाई तिमीहरूको बोलावटको योग्य ठानून्, र उहाँको शक्तिद्वारा हरेक असल योजना र हरेक विश्‍वासको काम पुरा गरून् । ¹²हामी यो प्रार्थना गर्छौं कि हाम्रा परमेश्‍वर र प्रभु येशू ख्रीष्‍टको अनुग्रहको कारणले येशूको नाउँ तिमीहरूबाट महिमित पारियोस् र तिमीहरू उहाँद्वारा महिमित होऔ ।

2¹अब भाइहरू हो, हाम्रा प्रभु येशूको आगमन र हाम्रो उहाँसँग एकसाथ भेट गर्ने सम्बन्धमा हामी अनुरोध गर्दछौं, ²कि प्रभुको दिन आइसकेको छ भनी न आत्माद्वारा, न वचन न त हाम्रो पत्रद्वारा तिमीहरूको मन सजिलै विचलित या हतास होस्।³तिमीहरूलाई कसैले कुनै रीतिले छल्न नपाओस् । किनकि पतित, पापमय विनाशको छोरो, अधर्मी मानिस प्रकट नहोऊन्जेलसम्म यो हुन आउनेछैन ।¹ ⁴यो त्यो हो, जसले विरोध गर्छ र परमेश्‍वर कहलिएका वा पुज्यहरू सबैको विरूद्ध आफैलाई उचाल्छ । जसको कारण त्यो परमेश्‍वरको मन्दिरमा बस्छ र आफैलाई परमेश्‍वरको रूपमा प्रस्तुत गर्छ ।⁵मैले तिमीहरूसँग हुँदा भनेका यी कुराहरू के तिमीहरूले सम्झदैनौ? ⁶अब तिमीहरू जान्दछौ कि कुनै कुराले त्यसलाई रोक्छ, ताकि त्यो ठिक समयमा मात्र प्रकट हुनेछ । ⁷किनकि, अधर्मको रहस्यले पहिलेदेखि नै काम गरिरहेको छ, तर केवल एक जना हुनुहुन्छ जसले त्यसलाई त्यसका मार्गबाट नहटाउनुभएसम्म त्यसलाई थामिराख्‍नुहुन्छ ।⁸त्यसपछि अधर्मी मानिस प्रकट हुनेछ, जसलाई प्रभु येशूले उहाँको मुखको सासले मार्नुहुनेछ र उहाँका आगमनले त्यसको अन्त हुनेछ । ⁹शैतानका सबै शक्‍तिशाली काम, चिन्हहरू र झुटा आश्‍चर्यकर्महरूको कारण अधर्मी मानिसको आगमन हुनेछ । ¹⁰त्यो अधार्मिकताका सबै प्रकारका छलहरु साथ आउनेछ । यी कुराहरू नाश हुनेहरूका निम्ति हुनेछन् किनभने तिनीहरूले बचाइनको लागि परमेश्‍वरको प्रेमको सत्यतालाई ग्रहण गरेनन् ।¹¹यसकारण तिनीहरूले झुटो विश्‍वास गरून् भनी परमेश्‍वरले शक्तिशाली भ्रम पठाउँदै हुनुहुन्छ, ¹²ताकि अधार्मिकतामा रमाउने तर सत्यतालाई विश्‍वास नगर्ने सबै दोषी ठहरिऊन् ।¹³तर प्रभुका प्रिय भाइहरू हो, हामीले प्रभुलाई तिमीहरूका लागि सधैं धन्यवाद दिनुपर्छ किनभने परमेश्‍वरले आत्माको शुद्धतामा र सत्यताको विश्‍वासमा उद्धारको पहिलो फलझैं तिमीहरूलाई चुन्‍नुभयो, ² ¹⁴हाम्रा सुसमाचारद्वारा प्रभु येशू ख्रीष्‍टको महिमा प्राप्‍त गर्न सक भनी उहाँले तिमीहरूलाई यसतर्फ बोलाउनुभयो । ¹⁵यसैले अब भाइहरू हो, स्थिर रहो, वचन या हाम्रा पत्रद्वारा तिमीहरूलाई सिकाएका परम्पराहरूलाई पक्रिराख ।¹⁶अब हामीलाई प्रेम गर्नुहुने र अनुग्रहद्वारा अनन्तको सहाजता र उत्तम आशा दिनुहुने हाम्रा प्रभु येशू ख्रीष्‍ट आफैले तथा परमेश्‍वर हाम्रा पिताले, ¹⁷हरेक असल काम र वचनमा तिमीहरूका हृदयलाई सहज र बलियो गरुन् ।

¹केही महत्‍वपूर्ण र प्राचीन प्रतिलिपिमा र पापको मानिस ।

²केही महत्वपूर्ण र प्राचीन ग्रीक प्रतिलिपिहरूमा पाउँछौं, परमेश्‍वरले... पहिलेदेखि नै उद्धारको लागि तिमीहरूलाई चुन्‍नुभयो ।

3¹अब भाइहरू हो, हाम्रो निम्ति प्रार्थना गर, ताकि हाम्रा प्रभुको वचन द्रुत गतिमा फैलियोस् र महिमित होस्, जसरी तिमीहरूका माझमा पनि भएको छ । ²र हामी दुष्‍ट र ईश्‍वरहीन मानिसहरूबाट छुटकारा हुन सकौं, किनकि सबैसँग विश्‍वास छैन । ³तर प्रभु विश्‍वासयोग्य हुनुहुन्छ, जसले तिमीहरूलाई बलियो पार्नुहुन्छ र दुष्‍टताबाट सुरक्षा प्रदान गर्नुहुन्छ ।⁴हामी तिमीहरूप्रति प्रभुमा विश्‍वस्त छौं कि तिमीहरू दुवैले हामीले आज्ञा गरेका कामहरू गर्नेछौ र निरन्तरता दिइरहनेछौ । ⁵प्रभुले तिमीहरूका हृदयलाई परमेश्‍वरको प्रेम र ख्रीष्‍टको सहनशीलतातर्फ अगुवाइ गर्नुभएको होस् ।⁶अब हाम्रा प्रभु येशूको नाउँमा भाइहरूलाई आज्ञा गर्छौं कि, तिमीहरूले अल्छे भाइहरूलाई अलग गर जसले हामीले सिकाएको विधि अनुसार जिउँदैनन् जुन कुरा तिमीहरूले हामीबाट ग्रहण गरेका छौ । ⁷तिमीहरू आफैलाई थाहा छ, कि तिमीहरूले हाम्रो अनुकरण गर्नु असल कुरा हो किनभने हामीले तिमीहरूका बीचमा अल्छीपना देखाएनौं, ⁸न त हामीले सित्तैंमा कसैको रोटी नै खायौं, तर त्यसको सट्टामा हामी कसैको भार नबनौं भनेर हामीले कठोर परिश्रम र अप्‍ठेरोमा रातदिन काम गर्‍यौं । ⁹हामीसँग कुनै अधिकार नभएको कारणले हामीले यसो गरेको होइन तर हामी तिमीहरूको निम्ति उदाहरण बन्‍न यसो गर्‍यौं ताकि तिमीहरूले हाम्रो अनुकरण गर्न सक ।¹⁰हामी तिमीहरूसँग हुँदा आज्ञा गरेका थियौं, “यदि कसैले काम गर्न चाहँदैन भने, त्यसले खाना पनि नखाओस्” । ¹¹किनकि हामीले सुन्यौं कोही-कोही अल्छी भएर काम नगरीकन तिमीहरूको माझमा हिंड्छन्, तिनीहरू काम गर्दैनन् तर व्यर्थै अर्काको काममा हात लगाउनेहरू भएका छन् । ¹²यस्ताहरूलाई हामी ख्रीष्‍ट येशूमा आज्ञा र उत्साह दिन्छौं, कि तिनीहरू शान्तसँग काम गरून् र आफ्नै मेहेनतद्वारा जीविकोपार्जन गरून् ।¹³तर तिमी भाइहरू हो, जे असल छ त्यो गर्नबाट थकित नहोऔ, ¹⁴र यदि कसैले यो पत्रमा लेखिएको हाम्रो आज्ञालाई पालना गर्दैन भने त्यसको विषयमा ख्याल गर र त्यससँग कुनै सम्बन्ध नराख ताकि त्यो शर्ममा परोस् । ¹⁵तरपनि त्यसलाई शत्रुलाई झैँ व्यवहार नगर तर आफ्नो भाइ सम्झेर सुझाव देओ ।¹⁶शान्तिका प्रभु आफैंले तिमीहरूलाई सदासर्वदाका लागि हरेक मार्गमा शान्ति प्रदान गरून् । प्रभु तिमीहरू सबैसँग रहुन्। ¹⁷म, पावल, यो मेरो आफ्नै हातले लेखेको हुँ जुन मैले लेख्‍ने हरेक पत्रहरूमा भएको चिन्ह हो । ¹⁸हाम्रा प्रभु येशूको अनुग्रह तिमीहरू सबैमा रहोस् । आमेन ।

Nepali: Unlocked Literal Bible for थेसलोनिकीहरूलाई पावलको दोस्रो पत्र

Formatted for Translators

थेसलोनिकीहरूलाई पावलको दोस्रो पत्र