¹Tempono Ahasyweros, yahoo Ahasyweros da momparenta hai asa etu rua pulu opitu wonua mebinta hai India dungku hai Etiopia. ²Kokeena, tempono mokole Ahasyweros totoro hai kamokole'ano hai raha Susan.³Ta'u ko'otolu pomparentaano, kai pendo'uahakondo ko'ira ka'owose ronga pombantudo. Pera tontara da mebinta hai persia ronga hai media, pera mokole ronga pamarentano wonua leu hai ra'ino. ⁴Kai poko'ontoakondo'o inawa mewota kamokole'ano da te'angga hai kamoicoano da tekale opi-opia oleo, dungku asa etu halu pulu oleo.⁵Sakoanomo koie oleono, kai poweweu koie mokole yo ndo'ua pera luwu miano da mpo'ia hai raha Susan mau miano owose ronga da me'okidi hai umano raha mokole opitu oleo. ⁶Umano koie raha niparewaako perere kae lenan kowarnaa mopila-mo'uso, kinoo'ako bana lenan halusu waranaa olondoro da nikaitako ronga kale-kale tambaga hai tisa marmer. Hai wawo horo marmer kowaranaa motaha mo'uso, mopila ronga molori, nidio yo tambi mebinta hai wulaa ronga pera.⁷Kando luarako nindo'u hai tonde wulaa, koa-koa'o tonde sueree tee-tee'asa. Angguru taperano me'alu da tepasadia na ntaperano moico pelaroano koie mokole. ⁸Mondo'u kai te'atoro, ronga nahina pakisaa, kanamo da pomparentano mokole ko'ira ka'owoseno rahano kando poweehira mondo'u kana da po'eheno koa-koa miano.⁹Mokole ntina Wasti moweweuho na'ana ndo'ua untu pera tina da hai raha Ahasyweros. ¹⁰Oleo ko'opitu koie ndo'ua, tempono mokole dompa mohende pelaroano ndodaa mondo'u angguru, kai parentaa i Mehuman, Bista, Harbona, Bigta, Abagta, Setar ronga Karkas, ¹¹nta wawaa mokole ntina Wasti mera'iako hai mokole pake'o topi kamokoe'a nta mompoko'ontoakono'o mokokolarono hai miano me'alu hina mokokolaro ontoahano. MOKOLE MOWEWEU NDO'UA¹²Sawali koie mokole ntina nai ehe nta monunu parentano mokole ntama da pinoko dungkuno pogawe hai raha nangkuao kai mosa'o larono ronga masusa sai tekira-kira.¹³Yahopo koie mokole kai petukanaihira miano mandara da me'o'olu'o iso niweweuno na kanamo koie niweeuno mokole hai ira da mandara da to'orio atora ronga po'adilino, ¹⁴ronga miano da okuda hai mokole: Karsena, Setar, Admata, Tarsis, Meres, Marsena, ronga Memukan, ko'opitu ka'owose mebinta Persia ronga Media da nta tepo'awaakono mokole ronga da kototoro'a monto'e hai kamokole'a, ¹⁵"Nangkua atora, hapa danta awaa mokolentina i Wasti na sai weweuho parentano mokole ntama da ari pinokodungkuno pogawe kamokole'a hai iaa?"¹⁶Hai ra'ino mokole ronga pogawe, i Memukan kanahi, "Mokolentina Wasti nai te'iaa tesala hai mokole ntama, sawali ronga pera luwu ka'owose ronga ra'iati da meda'a hai luwu wonuano mokole Ahasyweros. ¹⁷Hiwa-hiwano mokole ntina dahoo nta to'orio luwuo tina kasando angga'o samotu'ando ronga kanahi 'mokole Ahasyweros mo'ita mokole ntina Wasti leu tepo'awa sawali na sai leu.' ¹⁸Die oleo, ko'ira tina samporano ka'owose Persia ronga Media da ari modeaho sipano mokole ntina dahirasi nta kanahi hai ira luwu ka'owoseno kamokole'a ronga dahoo nta me'alu po'anu-anu ronga pesosoori.¹⁹Ki daa nta tule'i kahioomo koie mokole kai poluarako te'asa parenta ronga burio hai bolo boku atorano Persia ronga Media kai osie koie tekikihi, koie i Wasti nai tewali mera'iako hai mokole kahioomo mokole kai weehako totoro'ano mokole ntina hai tina suere da moi-moico ka'iaa iaa. ²⁰Tempono koie mokole nta moweweu parenta nta nileleako upuo kamokole'ano da owose, luwuo tina dahoo nta pa'angga'o sampora, mau koie samporano ka'owose rongapo miano biasa."²¹Koie petena da po'eheno mokole ronga ka'owoseno nangkuamo koie mokole weweuho hapa da nikanahino Memukan. ²²Yahopo koie mokole pompokatu sura hai luwu powawai wonua kai kana da teburi hai pera suku, kai kana gau pantado, kai luwu tama kai tewali powawai hai laica pantado. MOKOLENTINA WASTI NI SEHEAKO

¹Sa'arino koie kadadia, hi terurumo sa'olarono Mokole Ahasyweros, kai poko'pehawa'o Wasti hapa da'ari niweweuno ronga inotuhi mekona hai iaa. ²Yahopo ko'ira da ladenio kanahi: "Po'u'ungkeakono koie mokole yo waipode da dadi-dadi.³Kahioomo mokole kai pontisu pogaweno kando poruruki waipode da dadi-dadi kando kompuluo hai raha Susan. Dahira nta pinoweehi mina-mina kando meniwawa hai me'asa laica. Danta dagai'ira yahoo Hegai. ⁴Yahopo koie tina da ineheno mokole koiemo danta popo'euho mokolentina Wasti."⁵Hai raha Susan dahoo me'asa miano Yahudi da meneehako Morekhai, anano Yair, anano Simei, anano Kish, miano Benyamin, ⁶da niwawa mebinta hai Yerusalem merongaa miano hinawiako da terako merongaa Yoyakhin, mokole Yehuda da niwawano Nebukadnesar, mokole Babel.⁷Iaa moko'owose Hadasa, yahoo Ester, anano ntinano ma'eno. Nasai hinamo tamano ronga tinano. Koie waipode dadi-dadio ronga mokokolaro. Tempono tinano ronga tamano mate, Mordekhai alaa tewali anano.⁸Sateleleakonomo parenta ronga da nipatantuno mokole, me'aluo waipode da mekompulu hai raha Susan. Yahopo kai niwawa Ester hai bolo rahano mokole kai dagai'o Hegai. ⁹Koie waipode moicoo larono ronga mobuna mpelaroa. Hegai karongano moweeho mina-mina ronga kinaa da moi-moico naamo opitu waipode polilimboino mokole da teruruki kando mpo'ia dahano moi-moico yahoo po'iahano tina olowano mokole.¹⁰Ester nai da'a mo'awaakondo mekona hai sukuno ronga dadaano rapino hina ntabe'o Mordekhai. ¹¹Tapio oleo Mordekhai tade-tade kai to'oriosi kana'umpe dadaano i Ester ronga hapa da dadi hai wotoluno.¹²Kuu-kuu'o waipode megilira mewiso awaa Mokole Ahasyweros, hidaa nidodongani lembahino hopulu orua wotiti, kana'umpe luwuo wotu nipake mominaki: Onoo wotiti mina mur, onoo wotiti mina kasai, naamo meha-mehano mina-mina. ¹³Yahopo me'asa waipode leu mera'iako hai mokole ronga pera luwu da po'eheno dahoo nta pinoweehi nta niwawano mebinta hai dahando yo tina lako hai rahano mokole.¹⁴Owawa oleo, pewiso'omo ronga dumondo pohule'omo hai laicano dahando ko'ira tina da dagai'ira yahoo Saasgas, pogaweno mokole. Koie waipode nai da'amo nta leu mera'iako hai mokole, te'iaasi ki po'eheno mokole kai daa nta niboboi neeno.¹⁵Tempono Ester, anano Abihail, ma'eno mebinta Mordekhai, da alaa Ester dadi anano, tempono leu mera'iako hai mokole, nai da'a mo'ita hapa-hapa saliwano hapa ari kanahino i Hegas. Luwu miano da ontoo Ester ndo mehawatako. ¹⁶Wotiti kohopulu, yahoo wotiti Tebet ko'opitu wotiti pomparentaano mokole, Ester niwawa mera'iako hai mokole.¹⁷Koie Ester kola-kolaloo telou hai mokole ka'iaa ko'ira tina meha, ronga koie mokole po'awaamo pololaro ronga pelaroa da owawa mebinta hai Ester, kai engkatako tewali mokolentina popo'euno Wasti. ¹⁸Yahopo, mokole kai pendo'ua ronga luwu ka'owose naamo pogaweno tendenomo Ester. Iaa na'ana mo'awaakondo oleo owose hai luwuo wonua, ronga moweehira lawe-lawendo nunu'o po'eheno. ESTER TEWALI MOKOLENTINA¹⁹Tempondo ko'ira waipode nikompulu da kompendua, Mordekhai totoro hai wamba rahano mokole. ²⁰Ester nai da'a montulura hapa pebintaano, nangkua petenano Mordekhai. ²¹Me'asa oleo Mordekhai konainoo totoro hai pinewambano mokole, Bigtan ronga Teresh, naamo orua miano da modaga wamba, mosa'o larondo kando nggauho nta pepatee Mokole Ahasyweros.²²Sawali Mordekhai hina nto'orio, kai tuluraakono'o mokole ntina Ester, kai po'awaakono mokole. ²³Tempono niparesa koie kara-kara menonaa, orua'o koie miano nibaehako hai tisa mpobaeha , kadadia koie dahoo terburi hai boku tulura mperiou pomokole'a hai ra'ino mokole. MORDEKHAI TO'ORIO PATUDU MOSA'ONDO

¹Sa'arino kadadia koie, Mokole Ahasyweros engka'o i Haman, anano Hamedata, miano Agag, mokosabe'o ronga moko da'aa hai wawono luwuo ka'owose da perongano. ²Luwuo poladeni mokole da da'a hai wamba ngkatondono rahano mokole kokolontuu ronga sombaa i Haman kana'umpe mokole ariomo metena kana koie. Sawali Mordekhai nai ehe kokontouu atawa mesomba.³Yahopo pera ana buano mokole da da'a hai wamba ngkatondono Rahano Mokole kanahi hai Mordekhai, "Mohapa co'o kasau nunu'o petenano mokole?" ⁴Sa'arindomo toguru'o Mordekhai mebinta koie oleo nai ehe modedeahira yahomo kando po'awaakono i Haman kai to'orio dahoo bara i Mordekhai nta tule'i metaha kana'umpe ariomo montuluraakondo hinangkua iaa miano Yahudi.⁵Tempono Haman ontoo Mordekhai nai da'a kokolontuu ronga mesombaiho, i Haman dompaa mosa'o larono. ⁶Sawali hina sai nta te'angga'ako kilako anuo Mordekhai hi ari pino'awaako hicua iaa miano Yahudi. I Haman mepatudu nta pepatee luwuo miano Yahudi, sukuno Mordekhai da da'a hai laro mpomokole'ano Ahasyweros.⁷Larono wotiti me'asa , yahoo wotiti Nisan ta'u kohopulu orua pomparentaano Mokole Ahasyweros, kando pohawiako pur, yahoo loterei hai raino i Haman, oleo dungku oleo wotiti dungku wotiti kohopulu orua, yahoo wotiti adar.⁸Yahopo, i Haman mogau hai mokole Ahasyweros, "Dahoo me'asa suku da tekamburako ronga da da'a hai tonga-tongano suku hai luwuo wonua mpomokole'au. Atorado teposengka'o ronga atorano suku meha, ronga nando da'a monunuti atora-atorano mokole. Nangkuamo koie nai pantasi mokole mompoturusi kando e'elengua moo'ia. ⁹Ki po'eheako mokole, powukahi te'asa petena kaku popatehira ronga i'aku dahaku nta soroo hopulu rewu doi talenta pera hai limano miano da da'a pohedoano kai wiso'o hai bolo mpodiohano mokole,"¹⁰Yahopo mokole kai pudu'o sisi mpomokole'a hai wua limano, kai weehakono'o i Haman, anano Hamedata miano Agag, balino miano Yahudi. ¹¹Mokole mogau hai Haman, "Pera ronga di'ira miano yahoo tarou weweuhomo hapa da ni angga'u moico lako hai ira."¹²Larono wotiti me'asa, oleo kohopulu otolu, mokole kebaiho tuka mpoburi kando mpoburi kana luwuo da kinanahiino Haman hai pera mokoleno wonua ronga mowawai da makuasa hai tee-tee'asa wonua ronga hai tee-tee'asa ka'owose kana da teburi hai bolono ronga da kana gaudo. Parenta koie niburi larono neeno Mokole Ahasyweros ronga pineto'oako sisi mpantano mokole. ¹³Sura-sura koie pinokatu hai pera miano ntinena lako upuo wonua mokole nta sosa'oo, mompepate ronga sosa'ohira luwuo miano Yahudi. Mebinta da mongura dungku da motu'a, tina ronga anadalo ronga nta alaa luwu hapa-hapando miano Yahudi, larono me'asa oleo. Hai oleo kohopulu otolu wotiti hopulu orua koie wotiti Adar.¹⁴Sura koie ihino nileleako tewali hai tee-tee'asa wonua ronga pinodungku hai luwuo miano kando mesadi-sadia die oleo. ¹⁵Pera tinena karongaa lako ronga tekara-karai kua petenano mokole, ronga petena koie pinokodungku hai raha Susan. PATUDUNO HAMAN NTA SOSA'OO MIANO YAHUDI

¹Sato'oriomo koie i Mordekhai luwuo da kadia, kai hihia'o pakeano, kai pompake kae perurumate ronga awu, kai lako tongano kota kai pekora mehohou ronga mepoe-poe laro. ²Kai lako asa wamba raha mentalano nasahinamo mau te'asa miano da tewali mewiso hai wamba'eano rahano mokole ronga mepakea perurumate. ³Parenta ronga atorano mokole dungku hai luwuo wonua, peiekeena dahoo da merurumate hai tonga-tongano miano Yahudi, mempoasa, mewowo, ronga merurumate, ronga me'aluhira da montompa kae mperurumate ronga awu.⁴Koie'ira pera dayangno i Ester ronga pogawe'eando leu montuluraakono, kai halia koie mbisi, kai pompokatu pakea nta pakeano Mordekhai ronga kai luuhio koie kae mperurumateno, sawali Mordekhai nasai pontarima. ⁵Koie i Ester kai boboihira Hatah yo pogawe da ladenio mokole ronga tena'o tepo'awakono Mordekhai kai to'orio hapa da kadadia ronga kai tibo kana koie.⁶Nahopo kai lako Hatah tepo'awaakono Mordekhai hai lapangano kota da da'a hai wamba'eano rahano mokole. ⁷Kai tuluraakono'o koie i Mordekhai yo hapa da pinenasano ronga yo doi dandino Haman da nta niwiso hai bondaharano mokole da tewali gadino kai ari mompepate opia-opia miano Yahudi. ⁸Ronga kai poweho niburi kompenduano surano mokole da niluarako mebinta hai wonua Susan yahoo sura danta popatehira kai poko ontoniakono'o ronga kai po'awakono Ester, ronga tena'o Ester kai leu mera'iako hai mokole kai po'ita pompehawano mokole lako raro mpetilano.⁹Kai lako Hatah mo'o'awaakono hapa da kanahino Mordekhai nta lako hai Ester. ¹⁰Sawali i Ester mogau hai Hatah, ronga weho parenta lako hai Mordekhai kanahi, ¹¹"Luwuo da ladenio mokole ronga pera miano die hai wonua pomparentano mokole to'orio me'asa anantama atawa anantina da lako hai uluano kai sai da'a niboboi dahoo nta nihukuma mate tabea koie mokole kai mengkae tasuako tuko wulaano dahosi nta tora, sawali mokole nai da'a boboihaku salama tolu pulu oleo." ¹²Kando tulurakono i Mordekhai hapa da kanahino i Ester.¹³Kai kanahi i Mordekhai lolawanio hapa da kinahino i Ester, "Osie kanasi dako moo'ia hai rahano mokole daako tepulosi mebinta luwuo miano Yahudi. ¹⁴Maupo kau da mengingio die kana kantulungi ronga telapasiano raro miano Yahudi daho nta sadia saba hai meha po'iaha, sawali i co'o ronga rarompetila'u dakomiu nta mate. Aipo co'o kau daa nta mo'awa totoro'a kau tewali mbisi die kana?"¹⁵Kai lawanio koie i Ester hapa da kanahino Mordekhai, ¹⁶"Lakomo kompuluomo luwuo miano Yahudi da da'a hai Susan ronga kami mempoasa'akuomo osie mongka ronga osie mondo'u otolu oleo mau malo meanta. I aku ronga pera tina da simbau'aku dakami nta mempoasa kanto'u comiu. I aku dahaku nta mera'iako hai mokole, mau kai sai da'a tekona ronga atora; mau kudaa nta mateako, ehe kaku mate." ¹⁷Kai lako Mordekhai ronga weweuho luwuo hapa dahano tena'o Ester nta lako hai iaa. MORDEKHAI LOU-LOU'O ESTER

¹Oleo ko'otolu, Ester modahatako pakea mpomokole'ano kai pentade hai ulua rahando mokole hai ra'i wamba rahando mokole. Mokole dahirasi totoro hai kadera mpomokole'ano, hai bolo raha hai ra'i wamba raha. ²Tempono mokole ontoo mokolentina Ester mentade hai ulua kai po'awa pololaro mebinta hai mokole, kai tasuakoakono'o koie mokole tuko wulaa da hai limano hai Ester. Kai raraane Ester hedoo otuno koie tuko wulaa.³Kai petukana koie mokole, "Hapa mokolentina Ester? Hapa da pino'itau? Deenapo asantilara wonua mpomokole'a die dako nta pinoweehiako." ⁴Kai polawani Ester, "Kilako mokole mo'eheako kahioomo mokole ronga i Haman da leu die hai ndo'ua da'ari pinasadiaku."⁵Kai polawani mokole, kebaiho merare Haman kai oru weweuho hapa da kinahino Ester, kando leu mokole ronga Haman hai ndo'ua da'ari pinasadiano Ester. ⁶Dahiramo mpondo'u angguru hai ndo'ua kai petukana koie mokole hai Ester, "Hapa nta pino'itau, hapa da pino'itau dahaku nta pasinonaa, dadi hapa pino'itau? Deenapo asantilara wonua mpomokole'angku dahaku nta wehako'o."⁷Polawaniomo Ester, "Pino'itangku ronga paraluuku yahoo, ⁸kelakosi mokole mepelaroa moico ronga pesinonaa pino'itangku kahiomo koie mokole ronga i Haman ndo leu hai ndo'uangku danta pinasadiaku. Ile dahaku nta weweuho hapa da kinahino mokole. ESTER MOGAU HAI APUA⁹Yahopo Haman kai pohule mohende mpelaro ronga sanaa, sawali tempono Haman ontoo Mordekhai da mentade saida'a temimiu mepatabe hai pinewamba rahano mokole, masusa to'uomo Haman hai Mordekhai. ¹⁰Sawali mau kicana koie dahosi Haman rurusako larono kai pohule laicano, kai boboihira simbauno ronga Seres samporano. ¹¹Yahopo kai tulurakond'o kamokole'ano ronga kawasano, me'aluno anatamano, pera hapa hi'ari moweeho mokole, ronga totoro'a da montoe mebinta hai pagaweno mokole dungku hai atano.¹²Kanahiomo Haman, "Ronga Ester nda'a nta mompoturusi te'asa miano tabeano i'aku ronga mokole danta leu hai ndo'ua danta pinasadiano, ile dahakupo penda niboboi merongaakono mokole. ¹³Sawali luwuo nai kotudu torangku hicu daapo ontoo Mordekhai koie miano Yahudi da totoro hai pinewambano rahano mokole."¹⁴Yahopo Seres samporano ronga pera simbauno kanahiako, "Pasadia'o tisa mpobaehakoa da montoeno lima pulu metere ronga ile po'itamo hai mokole kai nibae koie Mordekhai. Yahopo kai mohende kai lako hai ndo'ua merongaakono mokole koie da pino'itano da moko mohende'omo Haman kai te'aira miano moweweu tisa mpobaeha. SA'OLARONO HAMAN LAKO HAI MORDEKHAI

¹Koie malo mokole nai tekoturi. Kai parentahira koie sangkinano mokole kando wawaa boku peburiano tulura mperi'ou pomokole'a kando basaakono'o hai ra'ino koie mokole. ²Ihino yahoo Mordekhai ario laporohira Bigtan ronga Teresh orua pogaweno mokole da mohedo tewali podaga wamba da mania nta pepatee mokole. ³Petukanamo koie mokole, "Ni angga ronga pa'owose kana'umpe hipinowehi koie Mordekhai?" kanahi'iramo ko'ira sangkinano mokole, "Nahina mpiha te'asa hipinowehi Mordekhai."⁴Kai petukana penda koie mokole, "Inaiho dada'a hai ulua?" Koie tempo Haman nahopo kai pewiso hai uluano rahando mokole luwu mo'ita hai mokole kai nibaehako Mordekhai hai tisa pobaeha da ari nipasadiado. ⁵Kanahiomo koie sangkinano mokole, "Mi'ontoopo, Haman mentade hai ulua," Polawaniomo koie mokole, "Tena'o kai pewiso." ⁶Sapewisono Haman, koie mokole ala metukanaiho, "Haman hapa danta niweweuno koie hai miano yo mokole da po'eheno nipa'angga? Haman mogau bolo mpelaroano, inaiho ico koie miano da taliwa nipa'anggano mokole tekulaloi aku?"⁷Polawaniomo koie Haman, "Koiemo miano da po'eheno mokole pantasi nipa'angga, ⁸kahio kai pinowawaako pakea ka'owose da ari pinakeno mokole, dara da'ari pedarano mokole, ronga topi mpomokole'a pasaakono'o hai rapano, ⁹kahio pakea ronga dara kai pinowehiako hai te'asa miano ka'owoseno pomokole'a, kahio kando pasaakono'o hai miano da mokole pantasi nipa'angga ronga mi'uleahomo hai dara tealo hai sala kota kando daa mpehohou hai ra'indo 'Kanadiemo hiniweweuhako hai miano da mokole pantasi nipa'angga."¹⁰Koharatia'omo mokole hai Haman, "Oru, alaa pakea ronga dara kana da kanahiu, weweuhakono'o luwu hai Mordekhai, to Yahudi da totoro hai pinewamba rahando mokole. Osie tekolumpe te'asa ino'awa luwu da'ari kanahiu." ¹¹Haman alaa pakea ronga dara kai pasaakono'o Mordekhai yahopo kai wawaa meronga tealo hai sala kota kandodaa mpehohou, "Kanadiemo niweweuhako hai miano da mokole pantasi nipa'angga."¹²Sa'arino koie Mordekhai mohule hai pinewamba rahando mokole. Sawali Haman merare mohule hai laicano mepoe-poe laro kai tutuwio rapano. ¹³Haman tuluraakono'o hai samporano i Seresh ronga luwu simbauno koie da niperasano. Ko'ira miano mandara ronga samporano Seresh mengkanahi'iramo, "Kincua Mordekhai hai ra'iu montampu'ukomo tuuna yaho to Yahudi nau da'a nta tule'i bali'o santo'uahano tuuna hai ra'ino." ¹⁴Dahirapo mpogau leuhiramo pera pogaweno mokole wawaa Haman ndona nta mpongkaa mperonga da ari nipasadiano Ester. MORDEKHAI NI PA'ANGGA

¹Mokole ronga Haman leu hai ndo'ua merongakono mokolentina Ester. ²Oleo ko'orua, tempondo mondo'u angguru hai ndo'ua mokole metukanahio Ester, "Hapa pino'itau, mokolentina Ester? pino'itau dahoo nta ninunu. Hapa da nipo'itau? maupo asa ntilara pomparentaangku ku wehaako'o."³Mokolentina Ester molawani, "Kiku po'awa kamoicoa mpelaroamiu mokole ronga kimi'ehe mokole kahiomo penaangku nipowehiako pino'itangku ronga wonuangku. ⁴Sababuno, icami, i aku ronga wonuangku ariomo nibalu nipokodalango, ronga pinopate, kisa'iaa cami nibalu pinokontewali ata ntama ronga tina, aku nta mepongiohakumo koie karasaimami nai da'a metuduakono karugiano mokole." ⁵Mokole Ahasyweros metukana mokolentina Ester, "Inaiho iaa ronga hapa kai moseka moweweuhako kana die?"⁶Ester molawani, "Pompakasea ronga pedalu yahoo Haman miano mosa'o!" Haman lalo'eaho momee hai ra'ino mokole ronga mokolentina. ⁷Mokole mewangu ronga mosa'o larono hai ndo'ua pondo'ua angguru kai lako hai ulua raha, sawali Haman dahosi moo'ia hai ra'ino mokolentina Ester kai mepetulumi kai petunda'akono penaano, na'ontoomo mokole ariomo patantuo nta nimateakono.⁸Sapohuleno mokole mebinta hai ulua raha lako hai ndo'ua angguru, Haman dahoo kokolontuu hai ra'i dipan dahano leleha Ester. Mokole mogau, "Dahoo bara iaa nta weweungkabaria'o mokolentina hai ra'incu hai bololaicangku?" Sa'arino mogau kana koie, lakodo tutuwio ra'ino Haman.⁹Harbona yahoo me'asa miano mpohedono mokole kanahi santo'u-to'uahano tisa mpebaeha da'ari nipasadiano Haman ta pebaehakoano Mordekhai, miano da'ari mokosalama'o mokole ronga montuluraakono dahomo totade hai laicano Haman lima pulu hasta montoeno." Yahopo mokole mogau, "Uhukako haman koide hai tisa!" ¹⁰Kando uhukako Haman hai tisa mpobaehakoa da'ari nipasadia'akono Mordekhai. Nahopo kai montundu larono mokole. HAMAN NTA NIBAEHAKO

¹Koie oleo, mokole Ahasyweros moweeho laica Haman, balino miano Yahudi lako hai mokolentina Ester ronga Mordekhai leu mera'iako hai mokole na'arimo Ester mo'awaakondo petila'ando Mordekhai. ²Kai luuhio mokole sisi mpineto'ono da'ari inalano hai Haman kai weehakono'o Mordekhai. Yahopo Ester kai dioho Mordekhai tewali powawai hai laicano Haman.³Yahopo kai'ari kai pogau Ester hai mokole, sudu hai ra'i ngkaruno, mewowo mo'ita pololaro kai niboli'i koie patudu mosa'ono Haman miano Agag, ronga patudu da'ari niweweuno nta mekona hai miano Yahudi. ⁴Mokole tasuako tuko wulaa hai Ester yahopo kai pe'engka mentade hai ra'ino mokole.⁵Kai kanahiako, "Kipo'ehenosi mokole ronga kicu po'awasi pololarono mokole ronga die sipole ketekonasi hai ra'ino mokole ronga hai ra'incu, kahioomo kai niburi hai sura parenta kai nirenta mbule luwu surano Haman anano Hamedata miano Agag, da niburino nta popatee miano Yahudi hai upuo wonua pomokole'a. ⁶Kana'upe naku tule'i mo'onto abalaa da tumpaiho wonuangku. Kana'umpe kaku daa nta tule'i ontoo masilakano rarompetilaku?"⁷Mokole Ahasyweros kanahi hai mokolentina Ester ronga Mordekhai miano Yahudi, "Santo'u-touahano ariakumo weehakono'o laicano Haman hai Ester ronga arihiramo potoro'o hai tisa mpobaeha, nantibo tasuako limano hai miano Yahudi. ⁸Diekana poburimo sura dadaano miano Yahudi kana da po'onto'ori moicou laro neeno mokole ronga peto'oakono'omo sisi mpineto'ono mokole; kana'umpe yohapa da niburi laro neeno mokole ronga pineto'oako sisi mpineto'ono mokole nai tulei niboli'i.⁹Koie tempo pera miano da mpoo'ia hai raha niboboi oleo koruapulu otolu, wotiti ko'otolu yahoo wotiti Siwan ronga kana luwu da pomparentano Mordekhai, poburihiramo sura lako hai miano Yahudi, pera wakilino pamarenta, bupati ronga pera ka'owoseno wonua mebinta hai India dungku hai Etiopia asa'etu ruapulu opitu wonua hai upuo wonua kana da teburi ronga upuo wonua kana pogauno ronga hai miano Yahudi kana mpoburindo ronga ino'awando.¹⁰Kai poburi laro neeno mokole Ahasyweros ronga peto'oakono sisi mpineto'ono mokole, yahopo kai pokatuo ko'ira sura mentete miano ntinena da mpedara, mpedara'ako darano mokole da memoroso, da nipangku hai pompangku'a darano mokole. ¹¹Bolo surano koie mokole moweehira tempo miano Yahudi da mpoo'ia hai tee'te'asa wonua kando mpekompulu ronga totonga'o penaando, sosa'oo, mompepae ronga pokondalango'ira luwu sorodadu, mengkena ana'ate rongapo tina, mebinta hai wonua da pokomarasaihira ronga da rampasio hapa-hapando. ¹²Me'asa tempo hai upuo wonuano mokole Ahasyweros oleo ngkohopulu otolu wotiti kohopulu orua yahoo wotiti adar.¹³Ndoweehakono'o koie sura kai tewali po'atoro hai apia wonua ronga pinokodungku hai pera miano, kai tule'i miano Yahudi sadi-sadia koie oleo kando tule'i mpowolohi hai pedalundo. ¹⁴Pera miano ntinena karongando mentekara-karai mpe'ulea hai darano mokole kua parentano mokole. Po'atoro da niluarako hai raha Susan.¹⁵Lako'omo Mordekhai hai ra'ino mokole mepakea mokole mebinta hai olondoro motu'a ronga kae ngkati ronga songko wulaa ronga kae ngkati ronga kae olondoro mongura wonua Susan na'ana mehawa ronga mohende. ¹⁶Miano Yahudi memohende'iramo ronga sanaa ronga tepa'angga. ¹⁷Hai pera wonua parentano mokole ronga po'atoro da'ari pinokodungku dahoo mohende'a ronga sanaa'a hai ira miano Yahudi, me'asa ndo'ua ronga kahendepa. Me'aluo miano da mangaku wotoluno kanahi iaa miano Yahudi hindona momee kindo pinopate hai miano Yahudi. PARENTANO MOKOLE NTA TULUMIO MIANO YAHUDI

¹Oleo kohopulu, wotiti kohopulu orua yahoo wotiti Adar dadaano parentano mokole ronga atorano niweweu. Oleo koie balino miano Yahudi moharapu nangio miano Yahudi. Sawali miano Yahudi deenapo nangihira koie balido. ²Miano Yahudi mpekompulu hai kotado luwu kampo mokole Ahasyweros nta pepatehira da mania masilaka ira. Nahinampiha te'asa da tule'i meta'o hai ra'indo, deenapo ndona momee hai suku koie.³Luwu ka'owose wonua, wakilino pamarenta, bupati ronga luwu ka'owoseno pomokolea, itaiho miano Yahudi, kana'umpe momee'ira hai Mordekhai. ⁴Kana'umpe Mordekhai tetianio makuasa hai rahando mokole ronga lele dungku hai luwuo kampo, nangkuamo koie Mordekhai tetianio owose ronga makuasa. ⁵Kanamo koie miano Yahudi nangihira luwu pedaluno, wangkui'ira ronga padanga, mompepate ronga mompokolono; ira weweuho kana da po'eheno larondo koie hai balido.⁶Hai bolo raha Susan miano Yahudi mompepate ronga pokolono'ira lima etu miano, ⁷rongapo Parsandata, Dalfon, Aspata, ⁸Porata, Adalya, Aridata, ⁹Parmasta, Arisai, Aridai, dan Waizata, ¹⁰kohopulu anantamano Haman, anano Hamedata, balido miano Yahudi. Sawali nandoda'a rampasio inawando.¹¹Koiesi oleo me'alu miano da pinopate hai raha Susan ndo mpotuluraakono mokole. ¹²Mokole kanahi koie hai mokolentina Ester, "Miano Yahudi ario mompepate ronga pokolono'ira lima etu rongapo anano Haman hai raha Susan. Hapa da'ari niweweundo hai wonua mokole meha? Diekana Hapa da pino'itau? daako nta nipowehiako. Hapa da pino'itau diekana? daho nta pinowehi."¹³Ester molawani, "Kimi'ehe, ile mimpoturusio miano Yahudi hai Susan kana atorano die oleo, kahiomo kohopulu anano Haman kando nibae hai tisa mpebaeha." ¹⁴Kai parentahira kando weweuho kana koie. Atora koie niluarako hai Susan ronga ndobaeho hopulu anano Haman.¹⁵Miano Yahudi mpekompulu mbule hai Susan oleo kohopulu opaa wotiti Adar ronga mompepate tolu'etu miano hai Susan, sawali nandoda'a mpo'ala bara nirampasi. ¹⁶Miano Yahudi meha da meda'a hai kampo pomokole'a na'anda mekompulu montota'osi toraha ronga mo'awa kamontundua mebinta hai balido ronga mompepate pitupulu olima miano balido. Sawali nando da'a mengkae lima mo'ala bara nirampasindo.¹⁷Koie wotu kadadia oleo kohopulu otolu larono wotiti Adar, oleo kohopulu opaa, ndomentodo pokontewalio oleo koie tewali oleo mpongkaaha mperonga ronga mohende'a. POPONANGIANO MIANO YAHUDI ¹⁸Miano Yahudi da meda'a hai Susan mpekompulu oleo kohopulu otolu ronga kohopulu opaa wotiti koie. I'ira mentodo oleo ko hopulu olima owititi koie, mokontewalio oleo koie oleo pongkaaha mperonga-ronga mohende. ¹⁹Nangkuamo koie miano Yahudi da mpo'ia hai desa mokontewalio oleo kohopulu opaa wotiti Adar tewali oleo mohende'a ronga pongkaaha mperonga kando mempetuka kinaa.²⁰Mordekhai burio da kadadia kai pokatuo sura hai luwu miano Yahudi da mpo'ia hai kampo mokole Ahasyweros okuda rongapo da mentala, ²¹paralu'o kando pokomaroaho oleo kohopulu opaa ronga kohopulu olima wotiti Adar tapio ta'u, ²²koie oleo miano Yahudi mo'awa pontota'osi mebinta hai balino, koie wotiti mepoe-poe laro teboli'i tewali mohende, oleo perurumatea tewali oleo da dompa moico, kando poko maroaho tewali oleo pongkaaha mperonga ronga mohende kando powawakondo kinaa hai miano marasai.²³Miano Yahudi tarimaa da'arimo niweweundo ronga niburino Mordekhai hai ira. ²⁴Santo'uahano, Haman, anano Hamedata miano Agag balido luwuo miano Yahudi, da'ari mania nta pokolono'ira miano Yahudi ronga hawiako pur yahoo lotrei nta garoa'o ronga poko lono'ira. ²⁵Sawali sa'arino Ester leu mera'iako hai mokole, ia parentahira mentete sura yo patudu mosa'o da'ari niweweuno Haman nta dungku miano Yahudi kai pinokompohule hai wawo rapano yahomo Haman ronga anano kai nibaehako hai tisa mpebaeha.²⁶Koiemo kando neehakono'o Purim, mebinta kata pur. Nangkuamo koie luwu da teburi hai sura mau da inontondo maupo da nirasado, ²⁷miano Yahudi patantuo ronga tarimaa tewali patantuno wotoluno, leeno ronga luwu miano da medulu hai'ira nando da'a nta kolumpe pokomaroaho ko'arua oleo owose tapio ta'u, ²⁸ko'ira oleo kando sadia pokopehawa'o kai nipokomaroa, koa-koa'o turuna, rapi, kampo, wonua. Oleo owose Purim nai tewali kinolumpe tongano miano Yahudi nai tewali ni'unini tongano leedo.²⁹Yahopo mokole Ester, anano Abihail meronga Mordekhai, koie miano Yahudi, moburi sura ronga kuasano, mompokomorodo sura ko'orua dadaano oleo owose Purim.³⁰Mordekhai kompuluo luwu miano Yahudi hai asa etu rua pulu opitu kampo hai pomokole'ano Ahasyweros ronga ino'awa momapu larondo. ³¹Nta patantuo oleo owose Purim kana da nipo'eheno Mordekhai miano Yahudi ronga mokole Ester, kanasi na'ana hindo'ari patantuo nta dungku hai wotolundo, leedo dadaano poasa ronga wowondo. ³²Kanamo koie parentano Ester da patantuo Purim ronga ko'ira niburi hai bolo boku. OLEO OWOSE PURIM

¹Mokole Ahasyweros mompokatu sima nta untu wonua ronga hai wonua wiwi ntahi. ²Luwu niweweuno da owose ronga mosekano, rongapo nipasileleakono dadaano ka'owoseno Mordekhai da pompowehino mokole hai iaa, luwu koie terburi hai boku tulura mperi'ou mokoleno Media ronga Persia.³Kana'umpe Mordekhai, miano Yahudi yahoo miano ko'orua da makuasa hai pomparentaano Mokole Ahasyweros, iaa da makuasa tongano miano Yahudi ronga ndotarimaa moico luwu miano sangkampono, rongapo ia pasipolee kando mpo'awa toraaha moico untu miano hai wonuano ronga mogau tepokonaa hai luwu miano hai kampono. MORDEKHAI NI PA'ANGGA

¹Kanadiemo Haratiano Apu Alla nta tudu hai Edom: Aricamimo podeaho yo lele bintaho Apu me'asa miano tinenano da leu meroronga to manusia, ²"Pewangumo, leumo kato pe'engka lawa ira mamusu! "Santo'u-to'uahano, dahaku nta weweuko okidi hai tonga-tongano suku-suku, ronga dako nta dompa marasai. APU KOHARATIA NTA TUDU HAI EDOM³Mentabano pelaroau koiemo da kulepico'o da mo'ia hai olotano watu hai po'iaha da motoe kau kanahi laro mpelaroau "Inai da nta tihakoaku hai wita'ea. ⁴Maupo lumaa montoe konto'u sico maupo poniu'u nidio hai olotano olimpopo, mebinta kokeenamo kutihakoko. Haratiano Apu.⁵Kai leu malo miano mpononako atawa parampo leunico santo'uhano dako nta mawu na'iaa bara dahira nta mononako te'iaasi da pinaraluukino. Kai tibo tuka po'upui wua angguru leuico iaa bara dahira nta mobintani tora po'upuhando. ⁶Santo'u-to'uahano, Suku Esau ni paresa, nta inawano da tewuniako.⁷Dungku otungkampo ndo tilako, da tilako yahoo luwuo tokia'u, dako ni tipuno raro tokiau. I'ira da kaaho roti'u modio bengkaro hai ra'iU. Nahina pompaha hai iaa. ⁸"Na'iaa bara koie oleo," kana koiemo haratiano Apu, Dahaku nta pokomawuo pera miano mandara hai Edom ronga pompaha mebinta hai Tangkeno Esau? ⁹Pera tamalaki, o simbau, dahira nta bibi momee, kai luwu wiano hai tangkenono i Esau daho nta pura pinopate.¹⁰Sawali perukusi hai petila'u, i Yakub, koanu daho nta kalimbutuko ronga dako nta mawu salemba-lembahino. ¹¹Iso'u mentade mentala, pera miano leu o'alaa kawasano Yerusalem. Ronga miano leu mewiso hai mata wambano ndo loterei'o inawano rongapo ico'o pengkena-ngkenako ronga i'ira.¹²Osie pebuu-buu'o petila'u kaida konaa karasai. Osie mehawa'aku leeno Yehuda, hai oleo lono'ano. Osie owose gau'u hai oleo marasaiha. ¹³Osie mewiso hai pinewamba ea umatincu hai oleo marasaiha, rongapo osie ontoo mobunaa balaa da konaa hai oleo karasaiha. ¹⁴Osie mentade hai teposampaano sala nta poko'isaa pera miano da sa'iaa kona balaa, ronga osie soroakono'o pera miano da tebinta hai oleo karasaiha.¹⁵Santo'u-to'uahano, oleono Apu okudaamo hai pera wonua. Pengkenaa ronga da niweweu, niweweu dahoo nta mebulili dasi'o rapau panta'u. ¹⁶Santo'u-to'uahano kau ari mondo'u hai wawo tangkenongku da mewota, luwuo suku dahoo nta mondo'ungkaida'a, dahira nta mpondo'u tekara-karai, ronga dahira nta tewali kanato'u nando paisa da'a.¹⁷Sawali hai tangkeno Sion dahoo pera miano da tepulosi. Koie tangkeno dahoo nta tewali wonua mewota, ronga pera leeno i Yakub dahoo nta totokio wita po'iahando. ¹⁸Luwu leeno i Yakub dahoo nta tewali api ronga luwu leeno i Yusuf dahoo nta tewali api da kolanga-langa, ronga luwu leeno Esau dahoo nta tewali seami da nta tinunudo ronga kokaa. Mebinta leeno Esau nahinmpiha da nipoturusi kai tebintani, kanakoiemo haratiana Apu.¹⁹Pera miano hai wita Negeb dahoo nta ko'apuako tangkeno Esau, pera miano da hai kabumu dahoo nta totorokio witano miano Filistin, dahira nta totorokio wonua Efraim ronga wonua Samaria, ronga leeno Benyamin dahoo nta alaa wonua Gilead.²⁰Pera miano Israel dahoo nta niwawa hai wita tebasioakoando ronga alaa witano miano Kana'an dungku hai Sarfat, ronga miano Yerusalem niwewe hai tebasiakoando, da da'a hai Sefarad, dahira nta ko'apuako kota-kota hai wita Negeb. ²¹Pera pompokosalama dahoo nta sabe hai tangkeno Sion, mo'o'otuhi Tangkeno Esau, yo Apumo danta ungkario ronga makuasa hai pomokole'a.

¹Leuhomo haratiano Apu hai Yunus, anano i Amitai da kanahi, ²"Pe'engkamo, lakomo hai Niniwe, koie kota da owose ronga hohouhiramo na'umpe dungku'omo niweweu mosa'ondo hai ra'icu. ³Sawali koie i Yunus mepasadia molai hai Tarsis, nta lako mentalahio Apu. Kai lako hai Yafo hai awaa me'asa bangka danta lako hai Tarsis. Kai wada'o ongkosono koie bangka yahopo kai lako mebangka merongahira hai Tarsis, molaisio Apu. ALLA TA'ALA BOBOIHO I YUNUS SAWALI IA MOLAISIO⁴Apu mompokontii ngalu'ea hai tahi, yahopo kai dadi hembo ea ronga koie bangka te'enopo kai terowaki. ⁵Miano da sapirio koie bangka momee'toumo, ronga ko'ra miano hai bangka mpe'e'etaa ka'apu-apundo, ronga ndo hawiako hapa-hapando hai bolo ntahi kai mobata koie bangka. Sawali koie i Yunus nantii hai bolo suono bangka, leleha kai poturi endo.⁶Leuhomo koie da sapirio koie bangka ronga kanahi "kana'umpe kau tule'i moturi endo? Pe'engkamo pe'e'etamo Apu Allau, aipo dahoo nta modeakita kato osie molomo. SABABUNO NGALU EA. ⁷Mengkanahi'iramo, "Leuhiramo kato loterei'o, toto'orio inai sababuno kai dadi die silaka." Karongando mohawiako loterei ronga neeno i Yunus da tuuna.⁸Mengkanahi'iramo hai iaa: pontuluraakami diekana inaiho da moweweu kato nikona silaka. Hapa pohedoau, hai hapa pebintaau, hai hapa wonuau? ⁹Kai lawanihira: "i aku die miano Ibrani da momeetako Apu. Apu Alla da moweweu tahi ronga wita." ¹⁰Dompa momeeto'uhiramo ko'ira miano, yahopo kando kanahi, "Hapa da ari niweweuu? Ndona mento'oriomo hi'ari molaisio Apu, hina'arimo mo'awaakondo.¹¹Kando mpetukana, "Hapa danta niweweumami hai co'o kai to'ori montundu die hembo ronga kai osie mokomasilaka kami penda, kana'umpe hembo tetianiomo mokora." ¹²Kai lawanihira, "Angka'akumo ronga basiakoaku hai bolo ntahi, dahomo nta montundu hembo, kunanto'orio hicuamo i'aku kai daa die hembo'ea nta mokomasilakako." ¹³Yahopo ko'ira miano mekora mpebosei, patudundo nta wawaa koie bangka hai wiwintahi, sawali nando tule'i hina tetianianimo koie hembo rumpatihira.¹⁴Ndo mpehohou hai Apu, "O Apu kahio kako osie masilaka tendenomo penaano die miano, osie babaakoakomio reano miano da sai da'a tesala, kana'umpe comiu Apua aricomiumo weweuho hapa da po'ehemiu." ¹⁵Yahopo kando angka'o koie i Yunus, kando hawiako bolo ntahi ronga hembo te'o'ariomo pamuru. ¹⁶Dompa momeeto'uhiramo hai Apu, yahopo kanto mpontompa kurbaa sinumbele hai Apu ronga gau'o tebokando. HUKUMANO I YUNUS.¹⁷Apu patantuo me'asa ica'ea kai udooho i Yunus, ronga i Yunus moo'ia hai bolontiano ica tolu oleo tolu malo mengkauno.

¹Yahopo kai amala i Yunus hai Apu Alla Apuno tempono hai bolontiano ica. ²Kai kanahi : laro ntepakaseahangku Iaa lawaniaku. Mebinta hai wonuando miano mate ku pehohou, Comiu modeaho suarangku. AMALANO I YUNUS³Aricomiumo hawiakoaku hai tongano tahi da olaro, karusolo libuaku. Luwu hembo hai tahi ronga hembomiu olumiaku. ⁴Kaku kanahi : tehawiakoakumo hai ra'imiu sawali dahaku nta molihe mbule hai rahamiu da mewota.⁵E'e ntahi kopuaku, tangkunaa'o penaangku. Tahi molue libuaku. Lumu ntahi walunio ranpangku, ⁶hai pu'uno tangkeno. Kaku tii hai purino wita da niguali samengka-mengkauno. sawali Comiu wuatako penaangku mebinta hai bolongkoburu, o Apu Alla Apungku.⁷Tempono wotolungku mokokau, ku pokopehawa'o Apu, ronga amalangku dungku'o hai Comiu hai rahamiu da mewota. ⁸Ko'ira da mpe'ungkaa hai ka'apu-apu sai koguna ndobintanio Iaa da konianto'u pololarono.⁹Sawali, aku ronga montarima kasi dahaku nta montompa pesomba hai Comiu. Hapa da ari tebokangku dahaku nta wada'o. Kasala'a yahoo mebinta hai Apu!" ¹⁰Apu koharatia koie hai ica, yahopo kai lua'o i Yunus hai wawo wita.

¹Leuhomo haratiano Apu hai Yunus kompenduano da kanahi, ²"Pe'engkamo, lakomo hai Niniwe wonua da owose, puntulurakondo pehoungku kana haratiangku hai co'o." ³Pe'engka'omo i Yunus kai lako hai Niniwe kana haratiano Apu Alla." Niniwe koie yahoo wonua da mompokobangao owose, otolu oleo lakoiho na mentala. APU MEBOBOI RONGA I YUNUS NUNU'O.⁴Metampu'uomo Yunus mewiso hai wonua koie, asa oleo lolako, kai pehou kanahi, "Patopulu oleo penda Niniwe dahoo nta nipokomawu. ⁵Miano Niniwe parasaea hai Apu, I'ira pinontulurako kando pompake babu molori, mebinta miano motu'a rongapo ana'ate.⁶Dungku'omo lele koie hai mokole Niniwe, kai petihako bintaa kamokole'ano dioho babu owoseno, kai pekalimbutuako babu molori kai totoro hai wawo awu. ⁷Nangkua petenado mokole ronga ka'owoseno pera miano moleleako hai Niniwe. "To manusia ronga pinotuwu, sapi, wembe, nai tewali mongkaa hapa-hapa, nai tewali mongkaa ewo, nai tewali mondo'u e'e.⁸To manusia ronga pinotuwu mesolibumbuako kae molori, mokora mpehohou hai Apu ronga mebitani sala da sai tekona da niweweuno. ⁹Ehepo Apu Alla kai pebulili mesosori mebinta sa'olarondo da kolanga-langa kato osie pinokolono."¹⁰Sando ontoo da niweweundo yahoo manda mebinta hai sala da sai tekona, pesosoriomo Apu Alla nangkua silaka hi ari moweweuhakondo ronga irapo nando da'a moweweuhako.

¹Nangkuamo koie da dompa mokomopoe'o pelaroano i Yunus kai dompa masusa. ²Kai amala hai Apu Alla kai kanahi, " Apua, na'iaa bara da'ari nikanahiakongku daangkupo moo'ia hai wonuangku, koiemo sababuno koie tempo kaku polai koraa hai Tarsis, kuna to'orio, Comiu yahoo Apu Allangku da dompa mompe'o'oloi, dompa sabara ronga me'alu pompehawa, sosoria karasai danta niweweundo. ³Die kana Apua, alaamo die penangku, dadisi kaku mate ka'iaa nta tora." POMPEHAWANO APU ALLA DA MOKO MASUSA'O LARONO I YUNUS⁴Nangkuamo kai koharatia Apu Alla kanahi, "Pantasio bara kau masusa (kai mosa'o larono)?" ⁵Yunus yahopo kai bintanio koie kampo ronga montodo hai timbu. Kai pompotade me'asa olompu kokeena, yahopo kai totoro hai tonto inoluno kai ontoo hapa danta kadadia koie hai kampo. PU'U NTANGA-NTANGA RONGA ULE⁶Nangkua po'eheno Apu Alla, kai tora asa pu'u ntanga-ntanga liaho Yunus nta olumio rapano kai te'o'ari masusa pelaroano, Yunus taperano mohende hei tora koie pu'u ntanga-ntanga. ⁷Sawali me'asa oleono sosabano oleo kua po'eheno Apu Alla, asa wuku ule dakokto'o koie pu'u ntanga-ntanga kai moleu. PU'U NTANGA-NTANGA RONGA ULE.⁸Sasabano oleo, dungku kiniwia, po'eheno Apu Alla kai tewundu ngalu timbu da dompa mokula, niwincano oleo poetio rapano Yunus, kai teranggahako molu'o kanahino, "Labiraamo kai mate kai iaa nta tora." ⁹Kai koharatia Apu Alla hai Yunus, pantasio bara kai mosa'o larou hai koie pu'u ntanga-ntanga?" Kai polawani Yunus kanahi, "Pantasio kumasusa dungku mate."¹⁰Apu Alla koharatia, "Daako pe'o'oloiho koie pu'u ntanga-ntanga da sai ni mbulau ronga pinotorau, da tora asamalo, mate koiesi malo. ¹¹Naku da'a bara nta pe'o'oloiho Niniwe kampo da owose da okuda asa etu rua pulu rewu mianono da sai to'ori tindahako lima muana ronga lima suwa, da mompo'ule me'alu pinotuwu.

¹Ino'awano Apu hai po'ontono Nabi Habakuk. ²Dahopo pempia penda Apu kudaa nta mehou, sawali nami da'a nta modeaho, kupoukomiu kudaa "Tekarasai!" sawali namimpokosalma'aku? HABAKUK HOHORURU HAI APU ALLA³Hapa kau popo'ontoniaku karasai, kaku daa mo'oonto tepakaseaha, tekarasaiha ronga tepakaseaha dahoo hai ra'incu tepopontondo'a ronga teposala'a da kadadia. ⁴Nangkuamo koie po'atoro ke'isaa kamokoraano, ronga da mongkote nai sabamo. Kana'umpe miano da mosa'o atekano daho nta lilicu'o miano moico, nangkuamo koie da mongkote dahoo nta saba tebulili.⁵Ontoomo hai perano wonua ronga titicoo tekangkamo kana'umpe ariakumo weweuho luwu pohedoa tempou da sai mparasaeau, mau kindo daa tuluraako'o. ⁶Santo'u-to'uahano, akumo da moko mpewanguo miano Kasdim wonua da mosoko ronga da motica tadehio upuo wonua, kai totorokio me'asa wonua da sa'ia wonuando. ⁷Koie wonua mokoraa ronga pinometakoo, kamoicono ronga ka'owose'ano mebinta hai wotolu mpatano.⁸Darano meraree ka'iaa meo'ea, moso-mosokoo ka'iaa dahu lampu hi malo. Sorodaduno da mpedara leuhiramo meronga unino mebinta mentalaano, lumaa kanto'u sico'ea da mokohuloo. ⁹Luwuo wonua leu mompokontekarasai, Sorodadu hai ra'ino kanato'u ngalu ntimbu, ronga ndo kompuluo iano ntinaha kana me'aluno hahi.¹⁰Ndo pokola'u-la'uo mokole ronga mototaahio powawai ndo pototaahio dahando mpoo'ia, ndo tawaniakono'o wita kando alaa koie daaha. ¹¹Yahopo kando polai kanto'u ngalu hindona momparasaea kamokoraando pantado. PEDEALINO DA KOMPENDUA I HABAKUK¹²Na'iaakah comiu da da'a metampu'u ponoha Apu Alla da mewota? Nako da'a nta mate. Apu comiumo da'ari patantuhira danta mompadala hukuma, yo Tangkeno Watu, aricomiumo mompatantu danta mompakasea.¹³Poo'ontomiu lalo'eaho mentoda nta mo'onto da mosa'o ronga namintule'i nta mo'onto da sai ia-iaa hapa kau pompekokoo miano da mosa'o niweweuno kau suka mengio. Tempono miano mosa'o rampasio miano da tekona ka'iaa wotoluno. ¹⁴Kami weweuho miano kana ica hai tahi, kana pera kadadi da lumele da sai ko pamarenta.¹⁵Ndorentaakono'o kokabi, nirako pukano kando kompuluo nangkuamo koie kando memohende. ¹⁶Nangkuamo koie kai pesombaako pesombano hai pukano kai tunuo pesombano. Hina mentete hai pokosangkano ko'ira kai po'awa barakati me'alu ronga kinaa da kolalo. ¹⁷Koiemo bara da mokontebituo padangano ronga da mokontewalio miano mpopepate da sai hina pompeehawano.

¹Ku pentade ngkote hai wawo monara, pentadeangku mepopora, kaku daa totarimaa hapa haratiado hai aku ronga hapa da polawanindo mekona hai kara-karaku. APU ALLA LAWANIO I HABAKUK²Apu lawaniaku, "Buriomo koie niamata ronga taluluo hai wawo watu, kai pera miano mau da mekalulu tule'io basaa. ³Santo'uto'uahano, nia mata dahopo tinotarima tempono, sawali dahomo nta oru leu tempono rongan koie na'iaa kule. Kisai oru leu, totarimaa, kana'umpe koie santo'uto'uahano dahoo nta leu ronga nai da'amo nta nitado-tado.⁴Santo'uto'uahano, miano da mentaba nai mongkote pelaroano, sawali miano da tekonadahoo nta tora tendenomo imanino. ⁵Miano mentaba rongan miano mpekulepi ira da sai konianto'u sawali hira meda'a, kando buka'o ngangando molu-molue kana to'u wonuano miano mate, ronga nai paisa lowu'o kana to'u mateaha, yahomo kai kompuluo pera suku rongan wonua.⁶Na'iaa bara luwundo nta momparere mekona hai iaa, lagu pompoko la'u-la'u ronga mompoko anu-anu. Unino : "Masilaka'o miano mokongkawasaa wotoluno ronga bara da sa'ia anuno-dahopo bara lembahi? Ranga, da bebeatio wotoluno ronga bara da nipatoro!" ⁷Ronga asampiroha mata, na'ia bara ira da kekealico, yahomo kau tewali bara nirampasi hai ira? ⁸Kana'umpe aricomo morampasi me'alu suku, yahomo ko'ira wonua da da'apo dahira nta rampasico, tendenomo reano miano da tesolo ronga luwuo mianono koie wonua.⁹Masilaka'o miano da mo'ala untu da haramu mekona hai luwu ihi laicano. Koie miano dioho poniuno dahano montoe kai tebintani wotoluno mebinta hai bolongkinungkuno abalaa! ¹⁰Aricomo moranca da mosa'o hai luwu ihi laicau, kau lolotu'o ronga moko mawuo me'alu suku, kicana koie madosakomo hai wotolu mpanta'u. ¹¹Santo'uto'uahano watu-watu mebinta hai tembo dahira nta mpehohou, ronga balo ngkeu mebinta hai rangkano laica, dahoo nta molawani.¹²Masilaka'o miano da mowangu kotano hai wawo rea, ronga modio benteno hai wawo sa'o-sa'o. ¹³Santo'uto'uahano, na'iaa pinatantuno Apu, Apuno langi ronga wita'ea, kindo pokomokokauho wotolundo ko'ira wonua mekona da nta nikaano api, ronga pera suku memokokau mekona da sai nta koguna? ¹⁴Santo'uto'uahano, wita'ea dahoo nta pono'ako ponto'ori mekona mewota'ano Apu, kana e'e tutuwio tahi.¹⁵Masilaka'o miano da moweeho mondo'u simbauno ronga sa'o laro, denaapo pokomolanguo kai ontoo tinotolaino. ¹⁶Aricomo pinokomowohiako peparurua

popo'euno teangga'a. Pondo'umo na'au kau sisimparere. Pondo'ua hai lima muanano Apu dahoo nta dapo'o te'angga'au.

¹Amalano Nabii Habakuk. Mekona lagu rurumate. ²APUA, ariakumo modeaho lele mekona icomiu, Niweweumiu, O Apua, kumomeetako! Pokontoraamo ronga popo'ontoniomo koie tuntu ta'u, hai sa'o laro, peehawa'o pololaro!³Alla ta'ala leu mebinta hai wonua Teman. Ronga da Dompa Mewota leu mebinta hai Tangkeno Paran. Mewotano tutuwio upu-upuo langi, ronga wita'ea pono'ako poreree hai Iaa.⁴Dahoo niwinca kana-kana susumoo oleo, dahoo niwinca hai limano, kokeenamo tewuniako kamokoraano. ⁵Hai ra'ino rungku ngkalelei tealo, ronga reo nunu'o nilimpano.⁶Iaa mentade, wita'ea molelu, Iaa molilihei hai pampa ronga mokomohitu'o ihino wonua. Tangkeno da da'amo iponoha teruruhi, kabumbu da da'amo iponoha tutungko'omo.⁷Ku ontoo kemah-kemahno miano Kusyan da tedasi, mboru-mboruno miano Midian rerende. Hai laa e'e bara da nisusaimiu Apua? ⁸Hai laa e'e bara dungku'ano poelaromiu? Hai tahi bara, dungkku'ano kilowumiu, kami mpe'uleahio dara ronga bendi pomponangiMiu.⁹Wo'eno panamiu aricomiumo huda'o mebinta hai wonuano, ronga ihianiakono'o pana. Mibage'o wita'ea tewali laa e'e kana-kana dandiMiu. ¹⁰Tangkeno bibi'o, e'e waa ruru o'ontokomiu, tahi ea mompokompodeaho suarano, ronga angka'o limano.¹¹Oleo ronga wotiti todo hai wonuano, tendeno niwincano mata mpanaMiu da wiu'a, tendeno wincano pandoMiu da kongkila. ¹²Hai larono kilowu, milaahio wita'ea, hai larono poe laro, milesa-lesa'o miano ihino wita'ea.¹³Mimpelimpa hai ra'i nta pokosalama'o umatimiu, nta poko salma'o miano da nirurukiMiu. Misosa'oo rapino miano mosa'o ronga buka'o watu perambahino dungku hai watu kompura-puraano.¹⁴Comiu uhu'akono'o ana panano pantano hai sorodadu da mempamuru nta soroaku kana-kanato'u nta mo'udoo miano marasai da tedadasako. ¹⁵Ronga daramiu, comiu lesa'o tahi, me'aluomo burano e'e da owose.¹⁶Tempongku modeaho, bibi'ano larongku, rerendeemo wiwincu modeaho unino, wukungku kana-kana to'u da mewiso'io ule wenga ronga baku bibi mentade. Sawali ronga mengio kaku daa totarimaa oleo ntepakaseaha, danta leunio wonua danta ta'okami. SADIA MOHENDE HAI APU¹⁷Sahapano pu'u ngkeu ara nai da'a kobunga, pu'u angguru nai kowua, hasilino pu'u saitun poko mopoe'o laro, ronga uma nahina hasilino, wembe domba tebintaamo ronga nahina sapi hai bolo boso.¹⁸Sawali, aku mohende hai Apu, ronga reree'ira Apu Alla da mokosalama'aku. ¹⁹APU Alla yahoo kamokorangku. Iaa weweuho karuku kana karuno melaa, Iaa poturusiaku kaku lolako hai kabumbu.

¹Ta'u ko'oru pomparentaano mokole I Darius, wotiti ko onoo, koie oleo me'asa wotiti, luehomo haratiano Apu Alla da pinokodungkuno nabii Hagai lako hai Serubabel, anano sealtiel Bupati Yehuda, ronga Yosua anano Yosadak, pua'ima ea, dakanahi, ²"Kanadiemo haratiano Apu Alla, Apuno langi ronga wita'ea: kando kanahi dia suku. 'nai da'apo dungku tempono nta mompotade mbule laicano Apu!"'³Yahopo kai leu haratiano Apu Alla da niwawano nabii Hagai, unino dakanahi, ⁴"Diemo bara tempono nta poo'iahamiu hai bolo laicamiu da ari tinoriciakodopi moi-moico, sawali die Raha dada'iasi terowakino?" ⁵Nangkuamo koie, kanadie haratiano Apu Alla, Apuno langi ronga wita'ea, "mimpekokooho dadaamiu! ⁶Co'o mohawu me'alu, sawali mongkotu te'ete. Co'o mongkaa sawali perasa'o mowohi. Co'o mondo'u, sawali nai lowukico. Co'o mepakea nau perasa'o mokula. Miano da montarima gadi kana to'u da montarima hai bolongkadu da kobolo!"⁷Kanadiemo haratiano Apu Alla, Apuno langi ronga wita'ea, "Petoto'oo dadaamiu! ⁸Mimporakemo hai tangkeno, mimpowawa keu, mimpotadeemo koie laica, dahaku nta merorongaa ronga poko'owose'o," Haratiano Apu Alla. ⁹Dakomiu momperahi-rahi kai me'alu, sawali santo'u-to'uahano te'ete'o hasilino. Tempomiu wawaa hai laica, kaku puusako. Hapa kai kana koie? Haratiano Apu Alla, Apuno langi ronga wita'ea, "Kana'umpe, Rahang-Ku dada'iasi terowa, sawali comiu dakomiusi marepo'ako laica mpantamiu.¹⁰Nangkuamo koie, langi taha'o ngaluno, wita'ea taha'o hasilino. ¹¹Kaku boboiho wula oleo hai wawono die wonua, hai wawontangkeno, hai wawo gandum, hai wawo angguru, hai wawo mina, hai wawono pera luwu da nihasilino wita danta dungku hai manusia, hai wawono pinotuwu, ronga hai wawono pera luwu hasili niweweuno limamiu." PINOTADEANO RAHANO APU NITAMPU'U¹²Yahopo, Serubabel anano i Sealtiel, ronga i Yosua anano i Yosadak, pua'ima ea, ronga luwu torano suku kokeena da pangkuku hai suarano Allata'ala, Apundo, rongapo dakanahino nabii Hagai, kana pomparentano Allata'ala, Apundo. Yahopo kando memomee ko'ira suku hai Apu. ¹³Yahopo kai kanahi i Hagai, tinenano Apu kana da pe'oliwino Apu koie hai suku, kanadie haratiano Apu Alla, "Dahaku nta merorongako.¹⁴Apu tuba'o pelaroano Serubabel anano i Sealtiel, bupati Yehuda, ronga pelaroano yosua anano i Yosadak, pua'ima ea, rongapo pelaroano torano ko'ira suku. Kando meleu tampu'uo pohedoa mompotade laicano Apu, Apuno langi ronga wita'ea, Apundo. ¹⁵Hai oleo koruapulu opia wotiti ko onoo ta'u pomparentaano mokole Darius.

¹Larono wotiti ke opitu, tanggala rua pulu me'asa tiihomo haratiano Apu Alla mentete Nabii Hagai, kanahi: ²"Kanahi hai Serubabel, anano Sealtiel, bupati Yehuda, hai Yosua, anano Yosadak, pua ima'ea, ronga hai torano suku da da'a.³Inaiho dahai comiu da'ari ontoo die raha daano kawasa iponoha? Po'awamiu kana'umpe dadaano die kana? Na'iaa bara kana dasai ko'angga hai matamiu? ⁴Sawali die kana, pokotende'o pelarou o o Serubabel, Haratiano Apu. Pokotende'o larou o Yosua, anano Yosadak pua ima'ea. Pokontende'o laromiu luwumiu limbo die wonua kanamo die haratiano Apu, ronga mpohedomo, kana'umpe i Aku meronga komiu, Haratiano Apu upu-upuo wita'ea. ⁵Mekona dandicu da'ari pinatantu hai co'o tempo'u meluarako mebinta hai wonua Mesir. Penaa Mewotangku moo'ia hai olotamiu. Osie momee.⁶Santo'u-to'uahano kanamo die haratiano Apu Alla upu-upuo wita'ea, teponohapo penda, te'etenopo penda, Dahaku nta pokoleluo langi ronga wita'ea, tahi ronga wita. ⁷Dahaku nta pokoleluo pera suku dungku kawasando pera suku leu sosolo yahopo kaku poponotiakono'o kawasa die raha kai kolalo kana kawasano da meri'ou. Haratiano Apuno langi ronga wita'ea.⁸Yo pera yahoo anungku, ronga wulaa yahoo anungku; haratiano Apu Allano langi ronga wita'ea. ⁹Parewano die raha nahopo kaidaa na mompokulaloi da'ari mperi'ou. Haratiano Apu Allano langi ronga wita'ea. Dicenaamo dahanku nta olumiakomiu'o pelaroa morini, Haratiano Apu Allano langi ronga wita'ea." PETAMPU'UNO OLEO BARAKATI¹⁰Oleo korua pulu opaa wotiti osio, ta'u ko'orua pomparentaano Mokole Darius, leuhomo haratiano Apu hai Nabii Hagai. ¹¹Kanamo die Haratiano Apu Alla Apuno langi ronga wita'ea, petukanaako hai pua ima'ea dadaano atora. ¹²Kilako te'asa miano mowawa pe'inahu moico hai wiribabuno, kai henderio koier roti yo tinewawe, angguru, mina atawa kinaa hapamo, tewalio ninehako modali? koie da hinenderi? Pera pua ima molawani "Nai da'a!"¹³Nahopo Hagai kai petukana, "Kidaa te'asa miano da mowuse namohenderi mada kai henderihira luwuo ko'ira tewalio bara mowuse luwuo? Pera pua ima molawani, "Mowuse!" ¹⁴Pogau'omo Hagai kanahi: "Kanamo koie umati ronga suku die hai ra'incu, kanamo die haratiano Apu Alla. Kanapo na'au luwu niweweundo. Pera luwu da pesombando koraane mowuse."¹⁵Die kana pekokooho metampu'u die oleo ronga ra'i danta leu, saida'apo me'asa watu nidio hai wawo watu meha hai raha mpesombaa. ¹⁶Die kana kileu miano ontoo hinowuno pae gandu danta rua pulu ganta, te'iasi hopulu ganta, ronga tempono lako hai pompio'a angguru nta mosiru 'ute, lima pulu takara, te'iasi rua pulu da da'a. ¹⁷Ariakumo sosa'oo luwuo pohedoau kai kohama rungkuno pae gandu, ronga usa watu, sawali nau ehe monunu kinahincu, Haratiano Apu Allano langi ronga wita'ea.¹⁸Pekokooho, metampu'u die oleo dungku ra'i danta leu, metampu'u oleo korua pulu opaa wotiti osie. Iso'ano nidio totoro'ano raha mpesomba, pekokooho: ¹⁹Hidaapo pombulo hai bolo kampiri, rongapo pu'u angguru, pu'u ara, pu'u delima, ronga pu'u Saitun sai da'apo kowua? Metampu'u die oleo dahaku nta barakati'o.²⁰Haratiano Apu Alla tii kompenduano hai Hagai tanggala rua pulu opaa wotitino. ²¹Kanahimo hai Serubabel, bupati Yehuda, kanadiemo: "Dahaku nta poko leluo langi ronga wita'ea. ²²Dahaku nta pokopatu-patua'oo totoro'ando pera mokole, dahaku nta pupuraa kora-korando mokole pera suku-suku, nta pokobuli-buliliakondo. bendi ronga da me'uleahio, dara ronga da me'uleahio dahoo nta mate tetapasako, merongaako ta'owudo.²³Die oleo, kanamo die haratiano Apu Alla langi ronga wita'ea, dahaku alako, hai Serubabel anano Sealtiel, mianongku, Haratiano Apu Alla langi ronga wita'ea, ronga dahaku nta poko ntewalico kana sisi mpeto'o, kana'umpe kuna'arimo rurukico, Haratiano Apu Alla langi ronga wita'ea.

¹Diemo kanahino haratiano Apu hai Israil da mentete hai Maleakhi. Apu Alla lolaroo miano Israel ²"Kulolarokomiu," Haratiano Apu, Sawali minangkanahi, "Kana'umpe kau lolarokami? Na'iaa bara i Esau koie petilano i Yakub?" Haratiano Apu. "Koie i Yakub kulolaroo, ³sawali i Esau ku sosa'oki laroo. Kuweweuho tangkenono mongio to'u ronga daahano kupokontewalio bolo lueno."⁴Kitibo Edom kanahi, "Hancurukamimo, sawali nta wanguo mbule koie da terowaki," kana diemo haratiano Apu "Tewalio kindo wanguo sawali dahaku nta rowakio, dahira nta ninee "Wonua sai moico" ronga "nta mo'awa sa'o larono Apu Alla dungku samengka-mengkauno." ⁵Dakomiu nta ontoakono'o matamiu ronga dakomiu nta kanahi. "Apu dompaa owose dungku hai upu-upuo wonua saliwano Israil"⁶"Me'asa ana ate lolaroo tamano, ronga me'asa sangkinaa lou'o ponggawano. Kicua i Aku die i Ama, mainaa pololaromiu i'aku? kicua i'aku die ponggawa, mainaa ona momeemiu hai Aku? Haratiano Apu, comiu perano pua ima da moko'anu-anuo neengku. Sawali mina metukana "Kana'umpe kakodaa moko'anu-anuo neemiu?" ⁷Comiu mowawa roti sai moico hai wawo medaku yahopo kami ngkanahi "Kana'umpe kakodaa moko mosa'oo?" Ronga mepekiri, "Medano Apu tewalio pinoko'anu-anu!" MIANO DA SAI MOLOLARO APU ALLA⁸Kimi mempesombaako kadadi da mopusu tewali pesomba kurubaa, na'iaa bara koie dasai moico? Kimi mempesombaako kadadi motince ronga da morungku na'iaa bara koie da sai moico? ronga da morungku na'iaa bara koie da sai moico? ndokamo poko dungku'o hai bupatimiu dahoo bara nta po'eheno comiu atawa lawati moicokomiu? Haratiano Apu. ⁹Nangkuamo koie "ndoka poko mohende'o pelaroano Apu Alla kai lolarokita" nangkuamo limamiu luwuo die kai dadi hapa kai daa nta ehe molawa moico te'asa miano hai comiu? Haratiano Apu.¹⁰Kicanano dahoo hai comiu da ehe montampo wamba yahopo sai mompekaa api hai rahangku da sai kotudu, Haratiano Apu, Naku ehe montarima pesomba mebinta hai limamiu. ¹¹Santo'u-to'uno mebinta tepanano oleo ronga dungku sumoono oleo neengku owose'o hai olotano wonua. Hai koa-koa'o wonua nipesombaako dupa ronga nipesombaako kurbaa hai neengku rongamo kurbaa mpetoka da moico kana'umpe neengku owose'o hai tongano wonua, Haratiano Apu. ¹²Sawali comiu mina moko mowusee ronga mepekiri "Medano Apu santo'u-to'uno nai moico ronga kinaa da da'a kokeena tewalio nipoko'anu-anu!"¹³Kami ngkanahi, "Ontoo, taperano masusa ronga comiu mokomasusa'aku, Haratiano Apu. Comiu mowawa kadadi nirampasi, kadadi motince ronga kadadi morungku da tewali pesomba. Dahoo bara nta po'ehengku montarima mebinta hai laimamu? Haratiano Apu. ¹⁴Konantunda'o pontipu, miano kidaa te'asa kadadi ntamano hai simbau mpinowuwuno da'ari tinawui, sawali kai pesombaako kadadi dasai moico hai Apu Alla kana'umpe i'Aku die mokole ronga owose. Haratiano Apu, ronga neengku pinomeetako hai upu-upuo wonua.

¹Diekana, die parenta danta tudu hai comiu pera imamu! ²Kimi ntibo sai mompodea ronga pekokooho pa'angga'o neengku, diemo haratiano Apuno wita ea dahaku nta mpokotihakomiu'o tundari, yo katundari kai kami sie po'awa barakati ronga dahaku nta tundari to'ukomiu sami da'a pekokoho ronga dioho haratiaku, hai pelaroamiu.³Santo'u-to'uno dahaku nta tilaa lee'u ronga tabesako hai ra'iu rengko kurbaa pesomba oleo kongko-kongkosau, ronga dako nta nibasiako merongakono rengko. ⁴Dako nta to'orio dahaku mompokatu die parenta nta dungku hai co'o kai pedandicu ronga i Lewi sadia da'a," Haratiano Apu Allano langi ronga wita.⁵Pedandiku ronga iaa nahoo pendandi kantoraaha ronga sanaa ronga kupoweho hai iaa kai momee hai Aku kai momeetako to'u neengku. ⁶Pompotisu da tekona daho i laro nganano pompotisu mosa'o nau da'a nta mowawa hai wiwino. Ia nunu'aku laro sala molino ronga konianto'u ronga me'aluo miano mebulili nunu'o mebinta hai sala da sai tekona. ⁷Ngkua wiwino me'asa imamu modio tino'ori moico ronga miano mo'u'ungke pompotisu da mebinta hai ihi mpelaroano, nangkuamo iaa da tinena Apuno langi ronga wita'ea.⁸Sawali co'o nau da'a monunu sala da tekona, sawali da moweweu miano kai tetanda'ako pompotisu'u, co'o da mokobinasaa pedandino i Lewi, Haratiano Apuno wita ronga langi. ⁹i Aku dahaku nta mokodadio marasai ronga sai te'angga hai luwuno die tomanusia, nasau da'a paliharaa pompotisuku.¹⁰Na'iaa bara i cita te'iasi me'asa tamanto?, na'iaa bara Apu da'ari pokodadikita? Hapa kato sadia teposala'ako ronga mokosisimiu pendandino mbue-mbueto? ¹¹Yehuda nai ponunu pedandi da niweweuno hai wonua Israil ronga Yerusalem, kana'umpe Yehuda pokomosisi'o Raha Mewota da ningkikitaino Apu daari tewali samporano anatina ka'apu-apu. ¹²Hiomo Apu kai poko mawuo luwuo leeno i Yakub da hai kemah-kemah da sai nunu'o pedandino maupo asahapamo kai mowawa pesumbele hai ra'indo Apuno wita ea.¹³Adiemo daho orua da nta niweweu miu, kana'umpe mintutuwio mesbahno Apu ronga e'e luu meruru mate ronga poe laro. Sawali Ia nai da'amo nta montarima pesombau ronga nai da'amo nta montarima pera da mebinta hai limau.¹⁴Kiu petukana, "hapa" sababuno Apu kai tewali saksiku, ronga samporau dahaupo mongura ronga sau da'asi konianto'u. ¹⁵Iaa bara Apu Alla kontu'uma da'ari pokodadihira me'asa? larono wotolu ronga penaa koiemo moicoano kando me'asa? Leeno ka'apu-apu, nangkuamo koie, dagano wotolu osie sai konianto'u hai samporau dahaupo mongura. ¹⁶"Dompa aku sai ehe teposincaa" Haratiano Apu Alla ta'allano Israil, ronga miano da sadia tutuwio wotoluno ronga pokae ronga niweweu mosa'o" Haratiano Apuno Wita'ea" Nangkuamo koie dagai'o wotolumiu osie sai konianto'u.¹⁷Aricomiumo pokomasusa'o Apu ronga gau'u. Sawali kau pebulili metukana, "Nde'e kako tibo pokomasusa'o? Kanamo koie pempatudu hai aku, pera miano da mosa'o niweweuno koiemo da moico hai matano Apu. Hai iramo dahano po'eheno Apu, atawa sa'iaa "Hai hapa dahano Alla ta'alla da mohukuma?

¹"Ontoo, Kupokatuo tinena-Ku da nta mompasadia'akuo sala! Tibo-tibono, Apu da inu'ungkemiu dahoo nta mewiso hai rahano! Mala'eka mpedandi da po'eheu dahoo nta leu, haratiano Apu, Apuno langi ronga wita'ea. ²Sawali inaiho daa nta metaha hai oleo leuhano? Inaiho da tule'i mentade kilako mepopo'ontoako wotoluno? kana'umpe, Iaa kana to'u api da mompokodali ronga kana to'u sabu mpontatapi. ³Dahoo nta totoro kana to'u da mompoko modali ronga mompoko mowua pera, kai pokomowuaho miano Lewi ronga pokomewota'ira kanato'u wulaa ronga pera kando mpowawa pesomba da moico hai Apu.⁴Nangkuamo koie, pesombano Yehuda rongaYerusalem dahoo nta pokosanaa'o larono Apu kana iso-iso ponoha, kana tau-tau da ari tealo. ⁵Dahaku nta okudahico mo'otuhi tesala. Ronga merare, dahaku nta mesaksii ta'ohira miano mponto'ori, miano da meduluakono dasa'iaa samporano, ta'o hira miano da mosaksiingkule, ronga ta'o hira miano da mo'alampakisaa tilano miano nigadi, iramo da mokomarasaiho ntina walu, ana elu, ronga miano suere, ronga nando da'a momeetakoaku, "haratiano Apu Alla. MONONAKO HAI APU ALLA⁶"Kana'umpe, Akumo die Apu, da sai teboli'i. Co'o leeno i Yakub, nai da'a nta pinoko mawu. ⁷Membinta mbue-mbue'u, dakomo mebia mebinta hai petena-Ku, ronga nau ungkari to'uo. Pohulemo mbule hai Aku, dahakumo nta mohule mbule hai co'o," haratiano Apu, Apuno langi ronga wita'ea. Sawali, dakopo metukana, "Kana'umpe kako daa nta mohule?"⁸"Tewaliosi bara manusia akala'o Apu Alla? Denapo, co'o mepatudu mosa'o hai Aku. Sawali , kau kanahi, "kana'umpe dadaano kako tule'i akalako?" Hai pesombaa tila hopu-hopulu ronga pesomba ntetindahako. ⁹Konaakomo katundari, sawali dakosi mepatudu mosa'o hai Aku. Comiu luwu miano!¹⁰"Wawaamo luwu koie pesomba tila hopu-hopulu hai bolo laica mpodioha kai tepasadia kinaa hai rahangku. Udi Aku," haratiano Apu, Apuno langi ronga wita'ea, "Naku da'a bara mobuka'akomiu langi ronga tuduriakomiu'o barakati dungku kai kolalo. ¹¹Dahaku nta tilaa komiu'o kotumba mpososa'o kai osie puraa tila mebinta hai umau ronga pu'u angguru'u nai da'a nta paisa meloo kowua," haratiano Apu, Apuno langi ronga wita'ea. ¹²"Luwuo suku dahira nta neeko konantuara kana'umpe daako nta tewali wonua pinehawatako," haratiano Apu, Apuno langi ronga wita'ea. OLEO PO'OTUHIA KARA-KARA¹³Ino'awau koko'anuihaku, haratiano Apu. Sawali, kau kanahi, "hapa da nigau mami mekona hai Co'o?" ¹⁴Kau kanahi, "mesomba hai Apu Alla nai koguna. Hapa nta pinelawento kito ungkari to'uo nta niweweunto hai Iaa ronga lolako mebabuako babumpoelaro hai ra'indo Apu, Apuno langi ronga wita'ea? ¹⁵Diekana, koneehakono'o ko'ira miano da mentaba konianto'u. Koira miano da mosa'o niweweundo moicoo toraando, ronga ko'ira miano da mosoba-soba Apu tepulosi'ira."¹⁶Yahopo ko'ira miano da pangkuku hai Apu kando kanahi, "Apu ontoo ronga podeaho, me'asa boku pompokompehawa teburi hai ra'ino hai ira miano da pangkuku hai Apu ronga da pa'angga'o neeno!"¹⁷"Dahira nta tewali mianongku," haratiano Apu, Apuno langi ronga wita'ea, hai wotu da ari pinasadia-Ku. Dahaku nta lolarohira kana me'asa tama da lolaroo anano ronga da pasipolee. ¹⁸Dako nta ontoo mbule miano moico ronga miano ngkodosa, hai ira da mesomba hai Apu Alla ronga miano da sai mesomba hai Iaa.

¹Santo'u-touahano koie oleo dahoo nta leu kolanga-langa kanato'u radaka. Luwuo miano mentaba ronga miano mpoweweu dosa dahoo nta tewali seami. Koie oleo dahira nta tinunu, Haratiano Apu, Apuno langi ronga wita ea. Nai podiohakondo haka ronga sampa. ²Sawali, comiu da momeetako neeng-Ku dahoo nta tepana kuasa da mompokosalama ronga entidoha hai panino. Daako nta meluaraka lulumoso kana ana sapi da tebinta hai boso. Hai oleo da pinasadiaku. ³Daako nta lelesaki hira miano ngkodosa kanato'u awu hai pelengkaru'u, Haratiano Apu, Apuno langi ronga wita 'ea.⁴Peehawa'o pompotisu hicu'ari moweeho i Musa, atang-Ku yahoo pinatantu ronga luwu parenta hai tangkeno Horeb danta pinokodungku hai luwuo miano Israel. ⁵Santo'u-touahano, hisaida'opo leuho wotuno Apu, yahoo oleo owose ronga mosa'oano larondo, dahaku nta tena'o nabi Elia leu hai comiu. ⁶Dahoo nta pokomoicoo miano motu'a ronga anano, ana'ate ronga miano motu'ano, kaku osie leu pokomawuo wita'ea.