Bible

Mark

1¹Mar ka in Yesus Krais God atatin awagamun dimunta usaqta. ²Teq wagam ka alulinin kwaziqmo God ago nantut Aisaya gamuk mar tonta nazaqmo tugwahtimta. Gamuk na bilam, Ahol waqiy ham. Ya teq mat araq emid in yaqgo gamuk ad danmeb lehdaq ham. Leheq in ninmen dan tuwastitaydaq ham. ³Mat na aqez saw amatawun haiqtab lileyim bilaqaq, Ne iyahta ayon dan balaw toniy haqaq ham. Ad ne in ayon dante na wastitayid titnonan haqaq ham.⁴An abeb Asisaya mat anan bilamta na amatin gwahtiqim saw amatawun haiqtab osad in on mataw tuhuz negyaq. In anan Jon haqayta. Ain kazaq mataw gibilenyaq. Ne ginad buliyeq ne gigo daq teq ginad meqinta bunmo gileh ugiy haqyaq. Gileh ugad ne bolsa ya huz negiq haqyaq.Ne nazaq emsa teq God in ne gigo daq teq ginad meqinta na tigiwalem bugdaq haqyaq. ⁵Haqsa mataw saw Judiya-ibta teq uliq Jerusalem-ubta kabemo in Jon ago gamuk huritnan agerab tubol yaqay. Bolad in gigo daq teq ginad meqinta ulum hassa Jon giqad le yuw Jodan-ib tigihuz negyaq. ⁶Jon ago tubusan karuw anan kamel haqayta na asan ulim emiyta. Teq in karuw asan asor am gan nog am wazeq luwyaqta. Luwad in kasum teq garanab kubiq akokin neqad luwyaqta.⁷Ad in mataw kazaq gibilenyaq, Mat araq teq ya ibeb boldaqta na abin in ya ibin uriyamta haqyaq. Ya in ahaqenibta haqyaq. In yaqgo iyahta haqyaq. Ya in ago kabibiy mat samanta haqyaq. ⁸Ya ne yuwibmo huz negaiqta haqyaq. Ari mat ayahta na boleq teq in God ago bugaw dimunta amalib ne tuhuz negdaq haqyaq.⁹Kam nab Yesus in uliq Nasaret saw Galiliy-ibta hulosim bolan Jon yuw Jodan-ib in tuhuz ug. ¹⁰Huz ugan Yesus hidmo yuw hulosim dubub gwaladmo ame ulilib gwalehim kait misireq nog iyim aqez hasim ussa in ahol wam. Ahol waqsa God ago bugaw dimunta ah husta nog iyim in amalib tigehitim. ¹¹Gehitiqan Heven-ib God aqez bilam, Ni ya itatin ham. Ya ni ninan inad bilaqsa ya igem dimun iyaqta ham.¹²Ari God ago bugaw dimunta in Yesus eman saw araq amatawun haiqtab tilah. ¹³Lehim saw nab in kam 40 nazaqmo didaq haiqmo os. Ossa Satan gwatiqim Yesus daq araq meqinta emdaq haqad tuqulum waqyaq. Saw nab Yesus amomo karuw kwasikta nenaq osyaq. Ossamo angelo bolim in tuqulumsih yaqay.¹⁴Ari mataw in Jon wazim bit giqirquran osaytab eman ossa teq abeb Yesus saw Galiliy-ib gwahtiqim God ago gamuk dimunta on mataw tigibilenyaq. ¹⁵In bilaqyaq ,''God kwaziqmo kam anan bilam teq gwahtiqdaq hamta na muran tugwahtim haqyaq. Gwahtiqan God ago maror bolim sinsin tiqiy haqyaq. Ne ginad buliyad gigo daq meqinta gileh ugiy haqyaq. Ad ne God ago gamuk dimunta ka anan helmo haqiy haqyaq.''¹⁶Ari Yesus yuw kurorqan Galiliy aqurumnib lehad luwim in Saimon amikqan Andru inaq dob hunegim nabiq waqad luwsa tigibiy. In giger kabiy naqmo em yaqayta amatawun. ¹⁷Yesus mataw giger na giyad ''gibilan, Ne ya imuzeq boliy ham. Bolsa ya giqisihunid ne nabiq waqayta nazaqmo nemataw tigiwaq daqay ham.'' ¹⁸Haqan hidmo giger na dob hulosan ussa in Yesus muzim inaq tilehiy.¹⁹Yesus in giger na nenaq asitmo ta leh nog iyimmo in Sebediy atatniz giger Jems ama Jon inaq tigibiy . In nazaqmo muyib osad dob wastitayad osiy. ²⁰Ossa Yesus giger na gililewunan in gimam Sebediy ago kabibiy mataw nenaq gihulosan muyib ossa in Yesus muzim inaq tilehiymo.²¹Ari Yesus mataw na nenaq le uliq Kapaneam-ub tugwahtiqiy. Gwahtiqim Juda gigo lotu akamnib Yesus le Juda gigo bit humab wolaytab gwahtiqim mataw suleq negad tuqosyaq. ²²Suleq negsa mataw huritad gihol turuh nemyaqay. Na ezaqgo Yesus ago gamuk in mataw Moses ago gunun huit kemiyta na gigo gamuk nog a hi iyyaq. In ago gamuk bilaqne God inmo abin ugan in suleq bilaqaqta nazaq nog iyyaq.²³Samo mat araq ago bugaw meqinta inaqta bolim bit na aduganib gwahtiqim in lileyim bilam, ²⁴Yesus Nasaret-ibta ham, ni i ezaq gitonan bol? ham. Ni i gimeqin tonnan daqag ni bolya ham. Ya ningo tuhurit ham. Ni God ago mat tawon diqta naqmo ham. ²⁵Haqsa Yesus wadim bulon, Ni niqez hiqiy ham. Bugaw meqinta ni mat na hulosad gwahtiqeq leh ham. ²⁶Haqan bugaw meqinta na in mat na eman woqim abensen hunegsa bugaw na ek tonim gwahtiqimmo tituk.²⁷Tukanmo mataw bunmo daq na ahol waqad ginadnad emad teq in an bulon yaqay, I kwaziqmo nagah araq kazaqta ahol a hi wawta haq yaqay. Ka naga daqin diq? haq yaqay. Ka suleq muturta ago azawayin inaqta haq yaqay. Mat ko bugaw meqinta gamukmo gibilensa in aqez huritayta haq yaqay. ²⁸Nazaq iyan mataw kabemmo in Yesus daq amta na abin eman saw Galiliy-ib uliq bunmo tuhuritiy.²⁹Ari Yesus bit na hulosim in Jems ama Jon inaq giwaqim nenaq Saimon ama Andru inaq gigo bitab tilehiy. ³⁰Lehanmo mataw bit nabta Yesus buloniy, Saimon alen moq ayahta waqim asan afanfan iyad nawa banab usaq haqiy. ³¹Haqan Yesus aw na agerab lehim abenab wazim wazan tiqeram. Eraqim in asan afan iyim usta na tuhulos ug. Hulos uganmo in era lehim Yesus ago mataw na nenaq gimen didaq anaran usta na waqim a bolim tinag.³²- Ari teq zeq wolehsa imisor diq tiqiyan on mataw uliq nabta na bunmo Yesus ago hib bolad teq in giyogniz asor gigo moq inaqta na teq asor giholib bugaw meqinta usaqta na in giwaqim nenaq boliy. ³³Bolim in Yesus bit osaqta na aqezab humab wolim turiy. ³⁴Tursa Yesus nazaq gibiyad in mataw giholib moq amo amo usta na giwastitayad in gigo bugaw meqinta na gimuzan titukiy. Bugaw meqinta na in Yesus ahol alulin in God atatin na ago tuhuritiyta. Nazaq iyan Yesus ginadad gimuzad gibilenyaq, Ne giqezmo hiqiyeq lehiy haqyaq.³⁵Ari Yesus usim tarom asor ussamo in bit na hulosim saw araq amatawun haiqtab tilah. Lehim in amomo God inaq gamuk emad tuqos. ³⁶Ossa teq saimon ayogniz nenaq Yesus nagunim tilehiy. ³⁷Lehim ahol waqad teq in buloniy, Mataw kabemmo ninagunad luway haqiy.³⁸Haqan Yesus bilam, Nab iysa i uliq sinsin sinsin usayta kogabmo lehuq ham. Leheq ya God ago gamuk in tigibilendaiqmo ham. God ya iqeman ya kabiy naqmo emnan bolta ham. ³⁹Haqad in saw Galiliy ago uliq bunmo tilehyaq. Lehad in mataw gigo bit humab wolaytab gwahtiqeq gamuk dimunta gibilenad teq in mataw gigo bugaw meqinta tigimuzyaq.⁴⁰Ari Yesus daq nazaq emad luwsa mat araq aholib moq lepra inaqta in agerab tubol. Bolim in Yesus anognib abakbakan ulum laquwim turad kuh tonim in anad meqniysa bulon, Yesus ham ni ninad bilaqsa teq ni ya iwastitayid ya God ameb isan anumlan ka tihiqiydaq ham. ⁴¹Haqan Yesus anad meqniysa in aben itiwunim mat wazad bulon, Ya inad bilaqaq ham. Ni nisanib ninumlan usaqta na hiqiyan ham. ⁴²Haqan muran diq nawaqmo mat na ago moq lepra tihiqiy.⁴³Hiqiyan Yesus mat na eman lehsa in adek wazim bulon, ⁴⁴Ni hurit ham. Daq muran kawa ya niholib emta ka ni mat araq hikidik bulon ham. Ni leheq mat tamaz emaqta naqmo nihol isihun ham. Ad Moses bilamta nazaqmo ni nihol dimniyta na anawun em ham. Emid teq mataw in ningo moq tihiqiyta na ago tuhurit daqay ham.⁴⁵Teq haiq. Mat na lehim nagah bunmo in aholib gwahtimta na in mataw haresmo tigibilan. Nazaq iyan Yesus uliq-uliqgo lehad mataw gimeb a ta hi gwahtiqyaq, luweq ya in gimeb luwsa in bo ya iqisih net daqay haqad. Nazaq haqad in le saw amatawun haiqta nagab luw osyaqta. Ossa on mataw uliq saw bunmo in saw nabmo leheq Yesus ahol waq yaqayta.

2¹Ari kam asor le tihiqiyan Yesus uliq Kapaneam-ub a ta lah. Lehim ossa mataw Yesus bolim bitab osaqta na ago tuhuritiy. ² Huritim mataw kabemmo bolim bit nab humab wolan ban tihiqiy bug. Bit aqezab nazaqmo ban haiq tiqitmo. Na matawmo osan lah. Sa Yesus gamuk dimunta tigibilenyaq.³Gibilenad ossa mmataw aweweqmo in mat araq moqaqta banab emim sorim a boliy. Mat na abensen aditin moqan in asit a hi luwyaqta. ⁴Ari in mat na a bolan bit nab mataw ban tuwaq bugan in ad Yesus agerab loqgo dan haiq. Nazaq iyan in bit ahuqunib gwalehim Yesus osaq diqta nab in asor tihikneriy. Hiknerim in mat moqaqta na abanan inaqmo am emim Yesus osaqta nabmo eman tuwolah.⁵Wolehan Yesus mataw na ginad helta ahol waqadmo in mat moqaqta na tubulon, Yaqgo amun ham ya ningo daq meqinta tigiwalem bug ham. ⁶Haqan mataw Moses ago gunun hurit kemiyta na asor Yesus agerab osad in ginadibmo susumunim bilaqiy, ⁷Nagaqgo mat ka God ago ban waq nog iyim kazaq God bilawunaq? haqiy. Og kab mat araq mataw gigo daq meqinta walemdaqta haiqgam haqiy. God amulikmoqmo ago kabiyta haqiy.⁸Mataw na nazaq ginadib susumunsa Yesus giloyin kemim gibilan, Doq tonan ne ginad haresmo nazaq emay? ham. ⁹Ya naga gamukin bilaqid teq ne nan a hi yag daqay? ham. "Ya ningo daq meqinta tigiwalem" haqdaiq o "Ni eraqeq ningo ban waqeq a leh" haqdaiq? ham.¹⁰Teq mat Atatin in og daq meqinta walemgo azawayin aholib usaqta na ago ne hurit daqay haqad ya kazaq diq bilaqdaiq ham. Haqad in mat abensen moqan banab usaqta na tubulon, ¹¹Ya nibilenaiq ham. Ni eraqeq ningo us ban waqeq ad ningo bitab a leh ham.¹²Haqanmo mat na eraqim mataw na gimeb ago ban sorim ad ago bitab tilah. A lehsa mataw bunmo gihol ritensa in God abin iluwad bilaq yaqay, I nagah kazaqta kwaziqmo ahol a hi wawta haq yaqay.¹³Ari Yesus yuw-kurorqan Galiliy aqurumnib a ta lehan mataw kabemmo in agerab tuboliy. Bolan Yesus in God ago suleq tigibilenyaq. ¹⁴Gibilenad osim teq in era lehad luwim in Alfiyus atatin Liway ahol tuwam. Mat na takis abitnib ago kabiy takis waqad ossa Yesus ahol waqad tubulon, Ni ya imuzeq bol ham. Haqanmo Liway eraqim Yesus muzim inaq tilah.¹⁵Ari abeb Yesus in Liway ago bitab didaq neqad tuqos. Ossa mataw gibin meqinta takis waqayta teq mat daq meqinta emayta nenaq kabemmo bolim Yesus ago disaipel nenaq bit nab didaq neqad yuqosiymo.Mataw naqanta kabemmo Yesus muzinad inaq luw yaqayta.¹⁶In bunmo nazaq Yesus inaq didaq neqad ossa Farisi asor gibiyad osim in Yesus ago disaipel tigibileniy, Nagaqgo Yesus in mataw daq meqin emayta ko teq mataw takis waqayta ko nenaq didaq neqaq? haqay.¹⁷Haqsa Yesus huritim gibilan, Mataw gigo moq haiqta na in le dokta ahol a hi waqayta ham. Mataw gigo moq inaqta naqmo dokta ago hib lehayta ham. Ya on mataw titnonta gililewunnan a hi bol ham. Ya on mataw daq meqinta emad osayta naqmo gililewunnan bolta ham.¹⁸Ari Jon Mataw huz negyaqta na ago disaipel teq Farisi nenaq in tuteqmo didaq udin yaqayta. Nazaq iyan mataw asor bolim Yesus buloniy, Ezaqgo Jon ago disaipel na teq Farisi gigo disaipel na in udinsa ta ningo disaipel a hi udinayta? haqiy. ¹⁹Haqan Yesus gamuk awowun araq kazaq gibilan, Mat araq aw waqnan tonsa ni ayogniz boleq osad in ginad meqniysa didaq udin daqay ye? ham. Haiqgam ham. Mataw na giyow inaq osad iyan in didaq a hi udin daqay ham.²⁰Ari abeb mataw asor boleq mat aw waqaqta na myogniz gibenab tuwaq daqay ham. Kam na teq boldaqta ham. Bolid kam nab mat na ayogniz didaq tuqudin daqayta ham. ²¹Haqad in bilam, mataw tubusan muturta waqim amalib tubusan kwaziqta misiramta na inaq a hi initayta ham. In nazaq toneq abeb in tubusan kwaziqta na suholsa tubusan muturta na irnik toneq le amik iyadmo in tubusan kwaziqta na bulsireqid ayahmo diq a ta tartaydaq ham.²²Teq mataw wain ayun muturta memeq asan kwaziqtab a hi tenayta ham. In nazaq tonid wain aqurin gwalad huhuw nemsa memeq asan kwaziqta na tartayid wain ayun mutbaleq ogib woqsa memeq asan na timeqniydaqmo ham. Nazaq iyan mataw memeq asan muturtamo waqim wain ayun muturta tenayta ham.²³Ari teq Juda gigo lotu akaman araqab Yesus ago disaipel nenaq kabiy araq wit leyiyta aduganib gwahtiqim tileh yaqay. Lehad in ago disaipel gigem moqsa wit anagin asor tuguraq yaqay. ²⁴Guraqsa Farisi asor gibiyad in Yesus buloniy, Ni ko gibiy haqiy. Nagaqgo in lotu akaman ago gunun itiyonim kabiyab wit anagin tuguraqay? haqiy.²⁵Haqan Yesus gibilan, Nabag ne Devit ago dauh nenaq in nagah osgo siqim iyim gigemnan moqad teq Devit daq amta na awagamun ne ahol a hi waqiy -ya ham. ²⁶Tamaz mat danmebta Abiyatar akamnib Devit le God ago bit aduganib gwahtiqim God ameb bret eman usta na waqim tinam ham. Bret na gunun emiyta ham. Mataw tamaz emayta naqmo gimomo bret na neqayta ham. Teq haiq ham. Devit agem moq titaysa neqad in bret tawonta na asor in ayogniz negan tineqiymo ham. Ta teq in daq meqinta a hi emiy ham.²⁷Haqad in gibilan, God mataw gimeqin tonnan lotu akaman eman a hi gwahtim ham. Haiq ham. In mataw gidimun tonnan haqad lotu akaman eman gwahtimta ham. ²⁸Nazaq iyan Mat Atatin in lotu akaman anamrenmo diq iyim inmo mataw kam nab ezaq luw os daqayta na ago tigibilendaqta ham.

3¹Ari kam araqab Yesus in Juda gigo bit humab wolaytab tilah. Lehan mat araq aben akogan anedan mayim aditinmo usaqta in nab os. ²Ossa Yesus ago bab in Yesus wamuzim nab osiymo, Yesus i gigo lotu akaman kab mat ka wastitayid dimniyid i amalib nan emam haqad.³Haqsa Yesus mat aben meqinta na tubulon, Ni boleq mataw ka gimeb tur ham. ⁴Haqad in mataw na tisusumun nag, I Juda gigo maror ezaq usaqta? ham. Lotu akamnib i mataw gidimun tonamta o i gimeqin tonamta? ham. Kam na i mat moqaqta ulumsihamta akaman o i mat na aholib hiqiyid in moqdaqta akaman? ham. Haqan mataw na giqezmo hiqiyim osiy.⁵Ossa Yesus in mataw na bunmo ginad ahol waqim le bolsa in ginad soqotim us. Ussa Yesus ahol afaqan diq iyad in mataw na ginan agem timeqniy. Agem meqniysa in mat na bulon, Ni niben itiwun ham. Haqan mat na aben itiwunan aben akogan na tidimniy. ⁶Dimniyan Farisi na hidmo lehim in Herot ago dauh nenaq humab wolim osad in ezaq toneq Yesus wol emid moqdaqta na agamukan tibilaq yaqay.⁷Ari Yesus ago disaipel nenaq yuw-kurorqan Galiliy-ib tilehiy. Lehsa mataw kabemmo Yesus muzim inaq tilehiymo. ⁸Sa mataw saw Galiliy-ibta teq saw Judiya-ibta teq uliq Jerusalem-ubta teq saw Idumea-ibta teq mataw kabemmo yuw Jodan aqurumnibta teq uliq giger Tair teq Saidon-ibta nagan kabemmo diq in kabiy daq bunmo Yesus emyaqta na abin huritim in agerab tuboliymo.⁹Bolan Yesus in ago disaipel gibilan, Ne yaqmen muy araq ahol waqid teq usan ham. Luweq mataw ka ya iqisih daqay ham. ¹⁰Na ezaqgo Yesus in mataw kabemmo gigo moq tuwastitayan iyan biyahta na gigo asor gigo moq inaq na bunmo in agerabmo diq loq yaqay, i Yesus wazeq teq gihol ti¹¹Sa mataw gigo bugaw meqinta inaq na in Yesus ahol waqadmo in anognib woqeq usad lileyeq bilaq yaqay, Ni God atatin haq yaqay. ¹²Haqsa in bugaw meqinta na atoran diqmo gibileneq bilaqyaq, Ne ya ihol abin na ulalab hi bilaqiy haqyaq.¹³Ari kam araqab Yesus garah araqab tugwalah. Gwalehim in mataw asor in ginan anad bilaqaqta naqmo gibilenan agarab tuboliy. ^14-¹⁵Bolan in mataw 12 nazaq gitowun emim ginan Aposel haqad tibiy. In anad mataw na in inaq ossa teq in giqemid in uliq -uliqgo lehad inmo ahol abinib ago gamuk dimunta na gibilenad teq in bugaw meqinta gimuz daqay haqad in anad am. ¹⁶Ari in mataw 12 giwamta na ginan kazaq. Saimon, Yesus anan araq Pita haqad biyim ugta.¹⁷Teq Sebediy atatniz Jems ama Jon inaq. Yesus in maqbab giger na ginan araq Bowanergers haqad biyta. ¹⁸Nan Bowanerges na alulin mat ago daq atoranta kait ahulan iyaq nazaq nogta haqayta. -¹⁹Teq Andru teq Filip teq Bartolomyu teq Matyu teq Tomas teq Alfiyus atatin Jems teq Tadiyus teq Saimon, mat Rom nenaq bab emyaqta amatin na teq Judas uliq Kariyot- ibta na. Mat naqmo Yesus waqim bab gibenab amta.²⁰Ari Yesus bitab tilah. Lehan mataw in ahol waqnan haqad lehim bit nab humab a ta woliy. Humab wolim ossa Yesus ago disaipel nenaq in gikabiyan kabemmo emad didaq neqgo akaman haiq iy yaqay. ²¹Sa Yesus asenlul huritim in Yesus waqnan haqad tuboliy, i gigo amun ahol agadan tiqiy daqag haqad. ²²Sa mataw Moses ago gunun hurit kemiyta na asor Jerusalem-ub osim gewoqim osad teq in bilaqiy, Bugaw meqinta gigo amebta Belsebul in Yesus aholib usaq haqiy. Ussa Yesus in belsebul ago zaway amalib bugaw meqinta gimuzaqta haqiy.²³Haqan Yesus in mataw aseseqta na gibilenan agerab bolan in gamuk awowun araq kazaq gibilan, Ezaq teq Satan inmo ago dauhta tigimuzdaq? ham. ²⁴Kantri araq ago on mataw gihol husereq an gihar ugad an wolad osad in zaway iyeq a hi tur daqay ham. ²⁵Teq bit araqab on mataw gihol husereq an gihar ugad an wolad osad in zaway iyeq a hi tur daqaymo ham.²⁶Ad nazaqmo Satan ago dauh nenaq gihol huserad an geg ugad Satan zaway iyeq a hi turdaq ham. In tihiqiydaq ham. ²⁷Haqad in bilam, Mat araq in mat awaz meqinta ago bit aduganib samanmo gwahtiqeq ago nagah a hi ginuwdaq ham. Haiq ham.In mat awaz meqinta na abensen irqureq teq in mat na ago bit aduganib gwahtiqeq ago nagah tiginuwdaq ham.²⁸Ya helmo ne gibilenaiq ham. God in on mataw gigo daq meqinta teq in bilawunayta na bunmo tigiwalem bugdaq ham. ²⁹Ari on mataw God ago Bugaw Dimunta bilawunid God in gigo daq meqinta na a hi walemdaq ham. Haiq ham. Daq meqinta na in giholib tuqus tutdaq ham. ³⁰Na ezaqgo mataw aseseqta na Yesus anan bilaqiy, In aholib bugaw meqinta usaq haqiyta na ago Yesus nazaq gibilan.³¹Ari kam nab Yesus anen teq in amagniz bolim asanib turad in Yesus ayon nan eman tileh, in gigerab boldaq haqad. ³²Teq mataw kabemmo Yesus lilut ugim osiy. Osad in Yesus buloniy, Ni ko gibiy haqiy. Ni ninen teq ni nimagniz bolim asanib kowa turad in ni ninan saw waqay haqiy.³³Haqan Yesus amenin emim gibilan, Ya inen teq ya imagniz gingan diq? ham. ³⁴Haqad in on mataw lilut ugim osiyta na gibyim le bolim bilam, Ne ahol waqiy ham. Ya inen teq ya imagniz kawa osay ham. ³⁵Mat aw nog in God anad muzad ago kabiy emayta naqmo in ya ima teq in ya ihiy teq in ya inen ham.

4¹ Ari kam araqab Yesus yuw-kurorqan Galiliy aqurumnib mataw suleq a ta gibilenyaq. Gibilensa mataw kabemo bolim Yesus agerabmo diq loqsa iyan in giban emim muy araqab gwalim yuwmeb tuqos. Ossa mataw bunmo yuw aqurumnib osiy. ²Ossa Yesus suleq kabemo negad gamuk amo amo tigibilenyaq. Gibilenad in kazaq bilam,³Ne huritiy ham. Mat araq ago kabiyab wit anagin hunegnan tilah ham. ⁴In lehim wit anagin hunegad luwsa asor dan adekib woqan ah bolim tineqiy ham. ⁵Teq wit anagin asor saw agigin inaqtab og asitmo usaqta nab wom ham. Woqim og ayah diq haiqgam iyan wit hidmo tugwal ham.⁶An zeq gwalim oysa wit na aninin haiqgam iyan in mayim tuwom ham. ⁷Teq wit anagin asor am asasuqin inaqta aduganib wom ham. Woqan am asasuqin inaqta na gwalad isihan wit na anon a hi am ham.⁸Teq wit anagin asor og dimuntab woqim ahokan gwalim anon tiqam ham. Wit anagin na asor anon 30 nazaq giqam ham. Sa asor anon 60 nazaq giqam ham. Teq asor anon kabemo diq 100 nazaq giqam ham. ⁹Haqan Yesus gibilan, Mat aw nog in gidek nan huritgo usaqta na in gamuk ka hurit kemiy ham.¹⁰Abeb mataw biyahta na haresmo tilehsa Yesus ago disaipel 12 na teq mataw asor nenaq in Yesus lilut ugim osad gamuk awowun in bilaqyaqta nagan ago tisusumun ugiy. ¹¹Susumun ugan in gibilan, Negmo God ago maror aduganib osayta ham. Nazaq iyan ya God ago maror abe alulin ulilemim usaqta na bilaqsa ne huritiyta ham. Teq mataw God ago maror asan ban osayta na ya gamuk awowun mo amalib gibilenaiqta ham. Ya nazaq gitonsa, ¹²Mataw ne gime saw waqad teq in nagah araq ahol a hi waqayta ham. In gamuk huritad teq in ginad a hi em hasayta ham. Luweq in ginad em hasad ginad buliyid God in gigo daq meqinta na tigiwalem nag ham.¹³Haqad Yesus gibilan, Ne gamuk awowun ka ago ginad a hi em hasay ye? ham. Ne gamuk awowun ka alulin ginad em haseq teq ne yaqgo gamuk awowun bunmo gigo ginad tiqem has daqaymo ham. ¹⁴Ari ne huritiy ham. Wit anagin na in God ago gamukmo ham. ¹⁵Sa mataw asor in wit anagin dan adekib woqaqta na nog ham. In God ago gamuk huritim in ginad bilaqsa hidmo waqayta ham.¹⁶Teq mataw asor in wit anagin og agigin inaqtab woqaqta na nog ham. In God ago gamuk huritim in ginad bilaqsa hidmo waqayta ham. ¹⁷Teq mataw na in bilaqne wit aninin haiqta nog ham. In God ago gamuk na gigemabmo diq a hi wazad in muzinad sisaqmo a hi luwayta ham. Na ezaqgo in God muzayta na ago mataw in gimeqin tonad afaqan amo amo negsa in God hulosayta ham.¹⁸Teq mataw asor in wit anagin am asasuqin inaqta amuganib woqaqta na nog ham. Mataw na God ago gamuk huritayta ham. ¹⁹Teq in og ka ago nagah kabemmo anadin emsa mani-mo kat negad ginad hureqsa in nagah kabemmo diq utetayta ham. Ginad meqinta na ginadib bolad in God ago gamuk isihaqta ham. Isihsa iyan gamuk na in gigemab anon a hi emaqta ham. ²⁰Teq mataw asor in wit anagin og dimuntab woqaqta na nog ham. In God ago gamuk huritim in waqim wazayta ham. An gamuk na in gigemab anon emaqta ham. Mataw na asor gigemab God ago gamuk anon 30 nazaq giqemaqta ham. Sa mataw asor gigemab God ago gamuk anon 60 nazaq giqemaqta ham. Teq mataw na asor gigemab God ago gamuk anon kabemmo diq 100 nazaq giqemaqta ham.²¹Ari teq Yesus bilam, Mataw lam miderim kuramab a hi sihenayta ham. Ad in ban ahaqenib a hi emaytamo ham. In lam miderim ulilib othenan oyad usaqta ham. ²²Nazaq iyan nagah bunmo ulilemim usaqta na in teq ulal tiqiydaq ham. Teq nagah bunmo giqisihan usaqta na in teq saw anuwanib tugwahtiqdaq ham. ²³Mat aw nog in gidek inaq iyeq teq in gamuk ka huriteq ginad emiy ham.²⁴Haqad Yesus gibilan, Gamuk ne huritayta ka ago ne ginad em hasiy ham. Mat God ago gamuk huritad anad a hi em hasaqta na, God in mat naqanta anad emid a hi hastitaydaq ham. Ari mat God ago gamuk huritim anad em hasaqta na, God in mat naqanta anad emid ayahmo diq tihastitaydaq ham. ²⁵Na ezaqgo God in on mataw gigo nagah inaqta na bunmo nagah asor a ta negdaq ham. Ad in mataw ginaghan haiqta na gibenab nagah asitmo wazayta na tigiwalem bugdaq ham.²⁶Haqad Yesus gamuk awowun araq kazaq ta bilam, God ago maror in bilaqne mat araq didaq anagin ogib hunegaq nazaq nog ham. ²⁷Mat na taromab usad zeqab in luwsa ago didaq gwalim ezaq ayah iyaqta na ago in a hi huritaqta ham. ²⁸Og inmo didaq eman kabiyab gwalaqta ham. Danmeb diq ahokan gwalaqta ham. Ahokan sisaq iyim in azizorin emaqta ham. Ari abeb in anon emaqta ham. ²⁹Anon na gihemeq ussa teq mat na biqir waqeq a le tigiqurotdaq ham. Na ezaqgo in didaq waqgo akaman tugwahtim ham.³⁰Haqad Yesus bilam, Ya naga diq atowun emeq bilaqid teq ne God ago maror anan ginad em daqay? ham. Teq ya naga gamukin amalib awowun hulsa ne hurit kem daqay? ham. ³¹Ari God ago maror na in bilaqne ay mastet anagin amulikmo nog ham. Mataw ay anagin na kabiyab leyan in didaq anagin bunmo giquriyamim amik didiq iyim usaqta ham. ³²Teq abeb in gwalim ayah iyim in kwasin - kwasan kabiyabta na bunmo giquriyamim turaqta ham. In gwalim aben aseseqmo iyan ah bolim abenab giririn emim amurnib osayta ham.³³Ari Yesus in on mataw God ago gamuk gibilenad in gamuk awowun kabemmo amalib nazaqmo gibilenyata. Gibilenad mataw naga gamukin hurit daqayta na in anad emadmo in gamuk awowun nazaqmo gibilenyata. ³⁴Teq in gamuk araq diq alulin a hi gibilenyaq. Haiqgam. In gamuk awowunmo gibilenya. Ari in ago disaipel-mo nenaq giholbinmo osad teq in gamuk alulin tigibilen kemyaqta.³⁵Ari kam nabmo imisor Yesus in ago disaipel gibilan, I yuw urumun kozaq ban lehuq ham. ³⁶Haqan disaipel in mataw biyahta na gihulosadmo in Yesus muy amalib osta nab le gwalim Yesus inaq tilehiy. Lehsa mataw asor gimuyin inaqta na Yesus muzim inaq tilehiymo. ³⁷Lehsa tim ayahta eraqad yuw eman sortukim muy amuganib woqad ate tugwalnan tonyaq.³⁸Ari na teko Yesus muy abe ban hartiy qwayim tuqus. Ussamo tim eraqsa ago disaipel bo bulonan in kayeq tiqiy. Kayeq iyan in buloniy, Tisa haqiy, i tumoqnan tonauq haqiy. Ni i ginan ninad a hi meqniyaq e? haqiy. ³⁹Haqan Yesus eraqim tim wadad teq in yuw atoranmo bulon, Muleqeq woq ham. Haqanmo tim hiqiysa yuw midemim ahol a ta hi wol.⁴⁰An Yesus in ago disaipel gibilan, Ne nagaqgo kazaq rabay? ham. Ne ezaq tonim God anadin a hi emay? ham. ⁴¹Haqan disaipel rabad in an tubulon yaqay, Mat ka nog diq? haq yaqay. Tim yuw inaq in aqez huritayta haq yaqay.

5¹Ari Yesus ago disaipel nenaq le yuw urumun kozaq ban tugwahtiqiy, uliq Gerasa gigo og saw ban. ²Gwahtiqim Yesus muy hulosim itiqsamo mat araq ago bugaw meqinta inaq luwaqta na hodhod hulosim in agerab tubol.³Mat na hodhodabmo luw osyaqta. Ossa mataw in wazan yo hiqiy yaqayta. In mat na aben amub wazan haiq. Ad in sen-ib am wazan haiqmo. ⁴Kam kabemmo in abensen sen-ib am waz yaqayta teq in sen na gibultayad hankap asenab usta na wolzilayyaqtamo. In mat awaz meqin diqta.⁵Sirisrimo zeqab teq taromab in hodhodab teq garahab osad in ek tonad inmo ahol asan gigib gwatayyaqta . ⁶Ari mat na yesus pesanmo bolsa ahol waqad in sibim bolim yesus anognib abakbakan ulum laquwim tur.⁷Turad in dedibmo lileyim bilam , Yesus ham ni God ulilibta atatin ham. Ni ya ezaq itonnan bol? ham. Ya God ameb nibilenaiq ham. Ni santitiy hi yag ham.⁸Na ezaqgo yesus tekomo tubulon, Bugaw meqin ham ni mat ka hulosad gwahtiq ham.⁹Haqad teq in susumun ug, Ni ninan ezaq? ham. Haqan in bilam, Ya inan kuluwmo ham. Na ezaqgo i mataw kabemmo diq ham. ¹⁰Teq mat na anad awaz meqin diq amalib ame kabemmo Yesus bulonyaq, Ni saw kab bugaw hi muz haqyaq.¹¹Haqsa bul gihumaban araq ayahta didaq neqad garah amanmanib sinsinmo turiy. ¹²Tursa bugaw meqinta nagan ginad meqniysa Yesus buloniy, Ni i giqemid i bul ko gimuganib le woquq haqiy. ¹³Haqan Yesus bilam, Lehiy ham. Haqanmo mat aholib bugaw meqinta giqusiyta na gwahtiqim le bul na gimuganib tuwoqiy. Woqanmo bul bunmo sibim wole garah asibsibranib bayhilek tonim yuwmeb woqan yuw gineqanmo tumoq bugiy. Bul na bunmo gigo ginulinqan 2,000 nazaq.¹⁴Ari mataw bul giwamuzim osiyta na in daq na ahol waqad titukiy. Tukim lehad uliqab teq saw haresmo in nagah ahol waqiyta na awagamun tibilaqiy. Bilaqsa on mataw huritim in nagah na ahol waqnan tilehiy. ¹⁵Lehim in Yesus ago hib bolim mat kwaziqmo bugaw meqinta kabemmo amuganib usiyta na in ahol tuwaqiy. Mat na anad dimunta waqim tubusan welim ossa in ahol waqad tirabiy.¹⁶Rabsa mataw gimeb daq ahol waqiyta na in mat kwaziqmo bugaw meqinta aholib usiyta na awagamun gibilenad teq in bul ago bilaq toniy. ¹⁷Bilaqan mataw na Yesus abe yahad buloniy, Ni saw ka huloseq leh heqiy.¹⁸Haqan Yesus le muyib tugwalsa mat bugaw meqinta aholib usan in gimuzta na in inaqmo lehnan anad bilaqsa in anad awaz meqin amalib Yesus bulonyaq, Ya ninaq lehdaiq haqyaq. ¹⁹Haqsa Yesus hulos. Hulosad in mat na bulon, Ni ningo uliqab nisenlul gigerabmo leh ham. Leheq teq Iyahta daq ayah diqmo em nigta na teq in ni ninan anad meqniyta na ni gibilen ham. ²⁰Haqan mat na saw anan Dekapolis haqayta nab lehim uliq bunmo luwad in nagah Yesus inmen amta na tibilaq bugyaq. Sa mataw bunmo huritim gihol turuh nemyaq.Yesus aw araq ned hunegaqta wastitayim teq in maror araq amiy tumomta wazan eram ²¹Ari teq Yesus ago disaipel nenaq yuw-kurorqan Galiliy urotim aqurumun kozaq ban ta lehiy. Lehan mataw kabemmo bolim Yesus agerab humab tuwoliy. yuw na aqurumnib. ²²Humab wolim Yesus inaq nab ossa Juda gigo bit humab wolayta ago danmebta araq anan Jairus haqay na bolim Yesus asen agerab ahol hulosan wom. ²³Ahol hulosim usad in anad meqniysa ame kabemmo bulonyaq, Yaqgo amun aw amikta tumoqnan diq tonaq haqyaq. Ni boleq niben aholib emeq wazid in ahol dimniyeq hi moqan haqyaq. ²⁴Haqan Yesus in inaq ago bitab tilah. Lehsa on mataw kabemmo Yesus muzim inaq lehad teq in aholib soqotim diq inaq leh yaqay.²⁵Lehsa aw araq moqad sirisimo ned hunegyaqta na in Yesus muzim mataw na nenaq tilehyaqmo. Ulig 12 nazaq moq na aholib usta.²⁶Ussa mataw gime inaqta santitiyayahmo ug yaqayta. in ahol dimniydaq haqad. Teq haiq. Aw na ago mani kabemmo mataw na gigo hib hulos bugta teq in ago moq naasit a hi hiqiyyaq. Haiqgam. In aholib moq ayahmo diq iyyaq. ²⁷Ari aw na Yesus ahol awagamun huritim in anad tiqam,²⁸Ya iben Yesus ago tubusanmo wazeq teq ya ihol tidimniydaq ham. Haqad in bolim mataw biyahta na gilikmanib gwahtiqim nenaq lehad in Yesus abun ban loqimmo aben le in ago tubusan tuwaz. ²⁹Wazimmo in ago ned muran diq nawaqmo tumay. Mayan aholib moq tihiqiyan in ahol tiloyin.³⁰Loyinsa Yesus ago zaway asor tuhulos ugim lahta na ago in ahol tiloyinmo. Nazaq iyan in ahol buliyim bilam, Nog aben yaqgo tubusan waz? ham.³¹Haqan ago disaipel buloniy , Ni mataw kabemmo soqot nigim ninaq lehayta ka a hi gibiyaq e? haqiy. Ni nagaqgo susumunim bilam, Nog yaqgo tubusan waz ham? haqiy. ³²Haqan teq haiq. Yesus saw waqim le bol, Nog diq daq na amta na ago haqad.³³Sa aw na in nagah aholib gwahtimta na ago anad emad in tirabyaq. Rabad in bolim Yesus anognib abakbakan ulum laquwim turad nagah aholib gwahtimta na in tibilaq bug. ³⁴Bilaq bugan Yesus bulon, Ya imiy ham ni ya inan helmo hamta naqmo niqeman ni nihol tidimniy ham. Ningo moq tihiqiyan ni le nigem dimniysa os ham.³⁵Ari Yesus gamuk bilaqad nab tursamo Jairus ago bitab mataw asor osim bolim in gigo mat ayahta na danib ahol waqad buloniy, Ningo amun aw tumom haqiy. Nagaqgo i Tisa atuw a ta bulam? haqiy.³⁶Haqan Yesus gamuk na ago adek a hi emad in Jairus bulon, Ni hi rab ham. Ni God amomo anan helmo haq ham. ³⁷Haqad teq in on mataw bunmo giwasihan nab tursa in pita teq Jems ama Jon inaq naqmo giwaqim nenaq tilehiy. ³⁸Lehim in Jairus ago bitab tugwahtiqiy. Gwahtiqim in mataw ek tonad gaq wazad ossa tigibiy.³⁹Gibiyad in lehim gibilan, Ne nagaqgo gaqad saw zunad osay? ham. In usaq ham. ⁴⁰Haqan on mataw na bunmo in aqez tiyuquwuniy. Yuquwunsa Yesus gimuzan asanib gwahtiqsa in amun anen amam teq inmo ago disaipel ezeqman na giwaqim nenaq bit adugan amun usaqta nab le tugwahtiqiy.⁴¹Gwahtiqim in amun na aben wazim in Juda gigo nanib bulonim kazaq bilam, Talita kumi ham. Na in kazaq bilam, Amun aw amik, ni eraq ham. ⁴²Haqan hidmo in eraqim tiloq gelyaq. [Amun aw na ayah tiqiy bugim in ago uliq 12 nazaq tiqiyta.] An amun anen amam in nagah na gimeb ahol waqim in gihol turuh nem naqmo diq hiqiy. ⁴³Sa Yesus atoranmo gibilan, Nagah ka ago ne mat araq hikidik buloniy ham. Haqan in amun didaq ugid neqgo gibilan.

6¹Ari Yesus uliq na hulosim inmo ago uliq diq Nasaret-ib lehsa in ago disaipel muzim inaq tilehiy. ²Lehim juda gigo lotu akamnib Yesus bit humab wolaytab gwahtiqim in mataw God ago gamuk tigibilenyaq. Gibilensa mataw kabemmo Yesus ago gamuk huritad in gihol turuh nemsa bilaq yaqay, Mat ko gamuk bilaqaqta na in edob diq wam? haq yaqay. In anad usaq ko ezaq diq wam? haq yaqay. In ezaq diq tonim anad emsamo nagah gwahtiqaq? haq yaqay. ³Mat ko in igmo gisenlul araq haq yaqay. In bitmo emaq ta amatin araqta haq yaqay. In anen Mariya teq in amagniz Jems teq Josep teq Judas teq Saimon kawa osay haq yaqay. Teq ahiyan kawa i nenaq osauqmo haq yaqay. In nazaq haqad Yesus anan gigem timeqniy yaqay.⁴Gigem meqniysa Yesus gibilan, Mat God ago nantut bilqaqta na abin uliq bunmo usaqta. Ari inmo ago uliqab teq in asenlulib teq in ago bitabmo diq in ahol abin haiqta ham. ⁵Nazaq iyan in daq azawayin inaqta araq diq uliq nab a hi emyaq. In matw gigo moq inaqta naqmo amulik-mulikmo giholib aben emim giwazsa in dimniy yaqay. ⁶Teq mataw uliq nabta na in anan helmo a hi haqsa iyan in anadnad emyaq. Ari Yesus saw nab uliq-uliqgo luywad in God ago gamuk on mataw tigibilenyaq.Yesus in ag disaipel ago zaway giqisihunsa ago a hi hurit kem yaqay Yesus disaipel 12 na kabiy nag Ari Yesus saw nab uliq-uliqgo luwad in God ago gamuk on mataw tigibilenyaq. ⁷In nazaqmo emad luwim kam nab in ago disaipel 12 na gibilenan boliy. Bolin inmo ahol abinib bugaw meqinta gimuzgo azawayin in negim teq in giqeman giger giger tilehiy. ⁸Lehsa in gibilan, Ne lehad es araq waqeq ad hi lehiy ham. Ne katekmo wazeq ulum ugeq a lehiy ham. Teq ne ziy araq es sihengo hi waqiy ham. Ad didaq araq neqgota ad hi lehiymo ham. Teq mani araq ne giholib hi usanmo ham. ⁹Ne gigo gisendugan gisenab tiqem daqay ham. Teq ne tubusan gigermo gihol siheneq hi lehiy ham.¹⁰Haqad in gibilan, Ne uliq araqab le tugwatiqeq bitbitmo leheq hi osiy ham. Bit amulikmo ne os daqayta nabmo ne osiy ham.Oseq teq ne era uliq araqab lehiy ham. ¹¹Ari ne le uliq araqab gwahtiqid mataw uliq nabta na in ne gibaymuzad gigo gamuk a hi huritsa teq ne uliq na huloseq uliq ta araqab lehiy ham. Lehad ne gisen aqogin uliq nab wolhamid woqan ham. Woqid teq mataw na in gigo daq na anadin tiqem daqay ham.¹²Haqan disaipel lehim on mataw gibileneq bilaq yaqay, Ne ginad buliyeq gigo daq meqinta gileh ugiy haq yaqay.¹³Haqad in bugaw meqinta kabemmo gimuzad teq in mataw gigo moq inaqta na giholib masil emad giwastitay yaqay.¹⁴Ari mataw saw nabta gigo king Herot in Yesus abin tuhurit. Na ezaqgo Yesus abin saw bunmo lehim ayah tiqiy bug. An mataw asor in anan bilaq yaqay, Jon mataw huz negyaqta na moqan God hodhodab wazan ta eram haq yaqay. Nazaq iyan in aholib zaway ayahmo usaqta haq yaqay. ¹⁵Sa mataw asor bilaq yaqay, Ko Elaija haq yaqay. God mat emid bo Iyahta ayon dan wastitaydaqta na amatin inmo haq yaqay. Teq mataw asor bilaq yaqay, Ko God ago nantut araq haq yaqay. Mataw kwaziqmo God ago nantut bilaq yaqayta naqanta araq haq yaqay.¹⁶Haqsa Herot gamuk na huritim bilam, Kwaziqmo ya bilaqan Jon mataw huz negyaqta na anat urot tayiyta ham. Ta teq God in hodhodab wazan ta eram daqagya ham. ¹⁷Na ezaqgo kwaziqmo Herot in ama awe Herodiyas hureqim aholyon wam.¹⁸In daq nazaq eman Jon tutimmo bulonyaq, Ni God ago gunun ayahta itiyonim niu nima awe wamta haqyaq. Haqsateq Herot in ago mataw asor giqeman lehim in Jon wazim tiqirquriy. ¹⁹Irquran ossa Herot awe Herodiyas agem meqin diq Jon ugad in anad emyaq, In moq nagta haqyaq. Haqad teq in wol emgo dan nagun yo hiqiyyaq. ²⁰Na ezaqgo aduw Herot in Jon rabunad alowan tonyaqta na ago. Herot anad emyaq, Jon in mat dimun diqta daq araq meqinta a hi amta haqyaq. Haqad in Jon gamuk bilaqsa huritad anad kabemmo emyaqta teq in huritnan anad bilaqyaqmo.²¹Ari abeb Herodiyas aduw Herot anen iqamta na akaman tugwahtim. Gwahtiqan kam nab Herot humab araq ayahta tiqam. Emim in mataw aseseqta in nenaq gavman ago kabiy muzayta na teq mataw bab emayta gigo aseseqta na teq saw Galiliy-ib mataw marorta nagan in gibilenan bolan nenaq humab wolim didaq neqad tuqosiy. Ossa Herodiyas gibiyad anad tiqam, Ari muran ya Jon wol emdaiqta adateqin inaq tiqiy ham. ²²Haqad Herodiyas in amiy eman lehim bit na aduganib gwahtiqim dorsa Herot ago mataw nenaq in amun aw na ahol waqad gime tisiriryaq. An abeb Herot aw barasta na bulonim bilam, Ni naga diq waqnan ninad bilaqaq? ham. Na ni ya ibilenid ya tinigdaiq ham.²³God ya ibiysa ya bilaqay ham. Ni naga diq anan susumun yagid ya tinigdaiq ham. Ari ni ninad yaqgo og ya wamuzaiqta na liqabmo uroteq asor nigdaiq haqid na dimunmo ya tinigdaiq ham. ²⁴Haqan amun aw na asanib gwahtiqim lehim in anen tisusumun ug, Ya le naga diq anan bilaqdaiq? ham. Haqan anen bilam, Ni Jon mataw huz negyaqta naqmo afaqin waqgo bilaq ham. ²⁵Haqan amun aw na hidmo lehim in Herot atoranmo bulon, Muranmo ni Jon mataw huz negyaqta na anat uroteq afaqin degib emeq a bo yag ham.²⁶In nazaq bilaqan Herot afaqan tiqiy.Na ezaqgo in ago mataw na gimeb helmo ulilib hamta na anadin emad in amun aw na aqez othasnan in atuw tihiqiy. ²⁷Ad hidmo in ago mat araq bab emaqta eman in Jon afaqin waqeq a bolnan tilah.Lehim in bit giqirquran osaytab gwahtiqim Jon anat urot tayim afaqin tuwam. ²⁸Waqim in degib emim a bolim aw barasta na uganin waqim a le anen tuqug. ²⁹An abeb Jon ago disaipel in Jon wol emiyta na ago huritim in bolim asan waqim a le hodhodab tiyay toniy³⁰Ari Yesus ago mataw in giqeman uliq-uliqgo lehiyta na muleqim ta bolim Yesus agerab humab tuwoliy. Humab wolim in lehim kabiy emiyta na teq gamuk bunmo in mataw gibileniyta na awagamun in Yesus tubuloniy. ³¹Bulonsa kam nabmo mataw kabemmo leh bolsa Yesus ago disaipel nenaq gikabiyan emad in didaq neq daqayta akaman haiq iy yaqay. Nazaq iyanYesus in ago disaipel gibilan, Bolsa i gimomo saw araq amatawun haiqtab leheq asitmo ginamur emuq ham. ³²Haqad in muyib gwalim saw araq amatawun haitab in gimo tilehiy.³³Lehsa mataw kabemmo gibiyad ginad emiy, Ko in saw nabmo tilehay haqay. Haqsa mataw uliq kabemmo era lehim gisenab yuw adek muzim ameb lehim saw nab tugwahtiqiy. Gwahtiqim tuqossa teq Yesus ago disaipel nenaq muyib abeb le gwahtiqiy, ³⁴Gwahtiqim Yesus muy hulosad le dubub gwalimmo ame le on mataw kabemmo gibiyad in ginan anad timeqniy. Mataw na bilaqne sipsip ginamren haiqta os nog iy yaqay. Nazaq iyan Yesus suleq dimdimunta kabemmo tigibilenyaq.³⁵Gibilenad ossa zeq tuwolenan tonsa Yesus ago disaipel bolim tubuloniy, Zeq tuwolehaq haqiy. Teq saw ka amatawun haiqta haqiy. ³⁶Ni on mataw ka giqemid leheq kabiy uliq sinsin usayta kogab giholmen didaq zayaq neqiy haqiy.³⁷Haqan Yesus amenin emim gibilan,Negmo didaq negid neqiy ham. Haqan in bilaqiy, Sey haqiy, i gigo 200 kina i a leheq bret kabemmo zayeq mataw biyahta ka negid neq daqayta na edowa? haqiy. ³⁸Haqan Yesus tisusumun nag, Ta ne gigo bret ganim usaq? ham. Leheq ahol waqiy ham. Haqan in lehim ahol waqim bolim Yesus buloniy, I gigo bret abaynagin teq nabiq giger nazaqmo usaq haqiy.³⁹Haqan Yesus gibilan, Ne mataw gibilenidn in humab ame ame emeq sisihun dimunta kogab osiy ham. ⁴⁰Haqan in mataw gibilenan tuqosiy.Mataw humab asor 100 teq mataw humab asor 50 nazaq in osiy. ⁴¹Ossa Yesus bret abaynagin na teq nabiq giger na waqim ame ulilib gwalsa in god esey ugim teq in bret na orqayim ago disaipel tinag. Negan in a le mataw negan tineqiy. teq nabiq giger na Yesus nazaqmo orqayim mataw bunmo tineqiymo.⁴²Negan tigiyuninan. ⁴³Teq bret na nabiq inaq abeyan ayahmo ussa disaipel kuram 12 nazaqmo giwaqim gisihenan ate tugwal bug. ⁴⁴Ari mataw didaq neqiyta na ginulinqan kabemmo diq 5,000 nazaq.⁴⁵Ari Yesus in ago disaipel giqeman muyib gwalim in ameb yuw-kurorqan Galiliy urotim aqurumun kozaq uliq Betsaida-ib tilehiy. Lehsa inmo osim mataw dauh biyahta na giqeman giquliqab tilehiy. ⁴⁶Lehsa Yesus gihulosim garahab God inaq gamuk emnan tugwalah. ⁴⁷Gwalehim ossa imisor diq tiqiysa ago disaipel gimuyin inaq yuwmeb liqabmo tiqiyiy. Iysa Yesus wole yuw aqurumnib titur.⁴⁸Tursa ago disaipel na tim ginobun ban bolsa in giholtuw bulad luwsa in tigibiy. Gibiyad saw tihastitaynan tonsa tarom asor usa in disaipel gigerab yuw bayim tilah. ⁴⁹ Lehim in disaipel gimeb gwahtiqeq bo lehdaiq haqsamo disaipel in Yesus yuw bayim lehsa ahol waqad in rabim ek tonim bilaqiy, Ko witag bo lehaq haqiy. ⁵⁰Haqsamo Yesus hidmo gibilan, Ne giwaz meqniyiy ham. Ne hi rabiy ham.⁵¹Haqad in muyib gwalanmo tim timidam. Mideman disaipel gihol riten lamsa ginadnad tiqem yaqay. ⁵²Na ezaqgo in ginad gigem soqotim ussa in Yesus mataw didaq nagta na abe alulin anan ginad a hi em hasiy.Yesus uliq Genesaret-ib mataw moqayta na kabemmo giwastitayan dimniyiy⁵³Ari Yesus ago disaipel nenaq yuw-kurorqan Galiliy urotim lehim urum kozaq ban uliq genesaret ago lan ezab tugwaliy. Gwalim saw nab in muy am wazan us. ⁵⁴Ussa Yesus muy hulosim hitiqsa mataw hidmo ahol tuwaq hasiy. ⁵⁵Ahol waq hasad in saw nab uliq haresmo sibim lehaq gibilensa mataw bunmo Yesus edob osaqta na huritad in giyogniz gigo moq inaq na banab giqemim gisorim giqad tubol yaqay.⁵⁶Sa Yesus saw bunmo uliq aseseqtab teq uliqben amikmiktab in lehsa mataw in giyogniz gigo moq inaqta na giwaqeq maket-ib giqad leheq giqemid us yaqay. Osad in Yesus atoran diqmo bulon yaqay,Nion mataw gigo moq inaqta ka gihulosid in giben ningo tubusan adekmo wait haq yaqay. Haqsa on mataw Yesus ago tubusan adek waz yaqayta na bunmo gihol tidimniy yaqay.

7¹Ari Farisi asor teq mataw Moses ago gunun hurit kemiyta na asor in Jerusalem hulosim bolim Yesus ago hib humab tuwoliy.²Humab wolim osad in Yesus ago disaipel gisesan Juda gigo gunun a hi muzinim giben a hi soholimmo didaq neqsa in tigibiyiy. ³Na Farisi teq Juda bunmo in gisesan gigo gunun muzinad in giben a hi soholim didaq a hi neqayta,luweq God ameb in gihol anumlan inaq iydaq haqad. ⁴Teq mataw na maket-ib lehim muleqim a hi huzimmo in didaq a hi neqaytamo. Ad in gisesan gigo gunun naqanta kabemmo muzinayta. Muzinad in gigo reb, deg, gog teq ban gisuholaytamo.⁵Ossa kam nab God in og ka ago asit diq araq Abraham aholyon waqgo a hi ug ham .Teq in hel diqmo haqad Abraham kazaq bulon, Abeb teq ya og ka nigid ni teq ni nitatniz nenaq giholyon tuwaq daqay haqad in bilam ham. Abraham amun haiqmo ossa God in nazaq bulonta ham.⁶Haqan Yesus gibilan, Ne mataw gimileq meqinta ham. Kwaziqmo God ago nantut Aisaya in ne gilum kemim gamuk araq Kazaq mar ton ham. On mataw ka giqezabmo God abin iluwayta haqad in bilam ham. Teq in ginad gigem pesanmo God ago hib usaqta haqad in bilam ham. ⁷Mataw na God abin samanta iluwayta haqad in bilam ham. In mataw og kabtaqmo gigo gunun anan bilaqiy, God ago maror dimunta haqayta, haqad in bilam ham. Ad in anad gunun naqmo mataw giqisihunayta haqad in bilam ham.⁸Ari Aisaya bilamta nazaq diqmo ne emad ne God ago gunun tuhulosim ne gisesan gigo gunun naqmo waz naqmo hiqiyayta ham. ⁹Haqad Yesus bilam, Ne God ago gunun dimunta walemad ne gisesan gigo daq naqmo wazgo ne tuhurit kemiy ham. ¹⁰Moses bilam, Ni ninen nimam giwazinad gilumsih haqad in bilam ham. Teq in bilam ham. Teq in bilam, Mat araq anen amam a hi giqudinad gamuk meqinta amalib gibilawunid ne wol emid moqan haqad in bilam ham.¹¹Ta teq negmo kazaq bilaqayta ham. Mat araq in anen amam gilumsihgo ago nagah giqusdaqta teq in gibileneq bilaqdaq, Yaqgo nagah ka in Korban iyim usaqta haqdaq haqayta ham. (Hibru nan Korban haqayta na alulin in kazaq. Nagah God abinib eman usaqta haqayta.) ¹²Mat na gamuk awaz meqinta nazaq gibileneq teq abeb in anad buliyeq ago nagah na amalib anen amam gilumsihgo haqsa ne wasihayta ham. ¹³Nazaq iyan ne gisesan gigo gunun waqiyta naqmo ne muzinad ne God ago gamuk bayan woqim samanta usaq ham. Ad ne daq naqanta kabemmo emayta ham.Yesus daq meqmeqinta mataw giqeman God ameb gihol anumlan inaq iyaqta na ginan bilam ¹⁴Haqad Yesus on mataw nab turiyta na a ta gibilenan bolan in gibilan, Ne bunmo w yaqgo gamuk ka huriteq teq ne ginad em hasiy ham. ¹⁵Nagah asanib usaqta na mat aduganib lehim in mat na ahol eman God ameb anmulan a hi iyaqta ham. Haiq ham. Nagah mat aduganib usaqta naqmo bo asanib gwahtiqim in mat na ahol eman God ameb anumlan inaq iyaqta ham.¹⁷Haqad Yesus ago disaipel nenaq mataw gihulosim bitab tilehiy. Lehimmo disaipel in Yesus gamuk awowun bilamta na ago tisusumun ugiy. ¹⁸Susumun ugan Yesus gibilan, Ne mataw aseseqta ginad a hi em hasayta ko nog ne ham.Ne ginad a hi emay daqag ham. Nagah bunmo asanib usaqta na mat aduganib lehim in mat na ahol eman anumlan inaq a hi iyaqta ham. ¹⁹Na ezaqgo nagah nazaqta na in mat agemab lehim aholib a hi usaqta ham. Haiq ham. Na mat abekoqib lehim le yayib wolehaqta ham. (Yesus nazaq haqad, in didaq bunmo anan dimunmo ham.)²⁰Haqad in bilam, Nagah mat aduganib usaqta naqmo bo asanib gwahtiqim in mat na ahol eman God ameb anumlan inaq iyaqta ham. ²¹Ari mataw giduganib daq meqinta gigemab gwahtiqad giqeman gihol anumlan inaq iyayta na kagzaq ham. Ni ninad meqmeqinta nigemab usaqta ham. Teq ni a hi waqadmo an haresmo hureqim inaq usaqta ham. Teq ni rin tonaqta ham. Teq ni mat wol emaqta ham. ²²Teq ni an alulib hureqaqta ham. Teq ni mataw gigo nagah utetaqta ham. Teq ni daq meqinta amo amo emaqta ham. Teq ni nan katiyta bilaqaqta ham. Teq ni yaqmo ag haqad daq daq emaqta ham. Teq ni mataw ginan nigem meqniyaqta ham. Teq ni mataw gibilawunaqta ham. Teq ni nihol abin wazan eraqaqta ham. Teq ni ninad a hi em hasadmo daq emaqta ham. ²³Daq meqinta nawa nagan bunmo in mat aduganib usim bo asanib gwahtiqim in mat na eman God ameb ahol anumlan inaqAw araq Fonisiya-ibta Yesus anan helmo ham²⁴Ari Yesus uliq na hulosim in uliq araq anan Tair haqaytab tilah. Lehim in bit araq aduganib gwahtiqim ulilemim os, mataw ya edob osaiqta na a hi hurit daqay haqad. ²⁵Teq haiq. Amun aw araq aholib bugaw meqinta usaqta na anen in Yesus edob osaqta na tuhurit. Huritim in hidmo lehim Yesus anognib abakbakan ulum laquwim turad afaqin mulbunim ogib wom. Aw na in Juda aw a haiqta. In Grik nan bilaqayta teq in ago uliq diq Fonisiya saw Siriya-ibta.²⁶ In lehim Yesus anognib abakbakan ulum laquwim turad tubulonyaq, Ni ya imiy aholib bugaw meqinta usaqta na muzid lehan haqyaq.²⁷Haqsa teq Yesus bulon, Ni hulossa yaqgo onmin didaq negid giyunin bugid teq ham. Luweq ya onmin gimen didaqta na waqeq gaun negid neqsa yaqgo onmin gigemnan moq daqay ham. Daq nawa na in dimun ahaiq ham. ²⁸Haqan aw na amein emim bulon, Mat Iyah ham ni helmo bilaqaq ham. Ta teq ningo onmin didaq neqsa aneglan ban ahaqenib woqsa gaun neqaytamo ham.²⁹Haqan Yesus bulon, Ni nazaq haqaq na ni muleqeq leh ham. Bugaw meqinta na ni nimiy tuhulos ug ham. ³⁰Haqan aw na muleqim aquliqab ta lehim bugaw meqinta na amiy tuhulos ugan amiy banab dimunmo ussa in ahol tuwam.Yesus mat araq adek haiqta gamuk a hi emaqta wastitayan dimniy ³¹Ari Yesus uliq Tair hulosim in uliq Saidom-ib tilah. Lehim uliq na hulosadmo in saw araq anan Dekapolis haqaytab gwahtiqim yuw-kurorqan Galiliy aqurumnib tilah. ³²Lehim in mataw in mat araq adek haiqta gamuk a hi emaqta waqim ad Yesus agerab tuboliy, in bulonid aben mat na aholib emeq wastitaydaq haqad.³³An Yesus mat na waqim mataw na gihulosad lehim in giholbinmo tituriy. Turad Yesus aben balaw-waz gigermo mat na adeksanib tiqam. Emim teq aben ta waqim abenab kusluwin in mat na amileqib tiqammo. ³⁴Emadmo in ame ulilib gwalsa ahol aqurin ayahmo gwahtiqsa inmo ago nanib bilam, Efata ham. Na in kazaq bilam, Ni nidek hastitayan ham. ³⁵Haqanmo mat na adeksan hastitaysa amileq abunbunan iyim usta na hulos uganmo in ga³⁶Sa Yesus mataw na gibilan, Ne nagah kawa ya emta ka ago ne mat araq hikidik buloniy ham. Teq haiq. mataw na bilaqnan zaway diq iy yaqay. ³⁷Sa mataw bunmo huritim bilaqiy, Helmo haqiy. Mat na nagah bunmo dimunmo emaqta haqiy. In mataw gidek haiqta na giwastitaysa in gamuk tuhuritayta haqiy. Ad in mataw giqez haiqta na giwastitaysa in gamuk tibilaqaytamo haqiy.

8¹Ari kam nab mataw kabemmo Yesus agerab humab ta woliy. Humab wolim osad in didaq a boliyta na tineq bugiy. An Yesus in ago disaipel gibilenim bilam, ²Ya on mataw ginan inad timeqniyaq ham. Ya nenaq kam ezeqmanmo osan in gigo didaq tihiqiy ham. ³Luweq in gigemnan moqad ossa ya giqemid lehad in gime sinsanid danib woq daqay ham. Mataw ka asor pesanmo boliyta ham. ⁴Haqan in ago disaipel bilaqiy, Saw ka amatawun haiqta haqiy. I edob didaq waqeq mataw ka negid neq daqay? haqiy.⁵Haqan Yesus tisusumun nag, Ta negigo bret ganim usaq? ham. Haqan in bilaqiy, Bret 7 nazaq diq usaq haqiy. ⁶Haqan Yesus on mataw biyahta na gibilenan ogib tuqosiy. Ossa in bret 7 na waqim God esey ugim in orqayim teq in ago disaipel ibergo tinag. Negan in mataw gigo hib iberim a tilah.⁷Ad in gigo nabiq amikmikta amulik-mulikmo usta na Yesus waqim God esey ugan in ago disaipel waqim tiqiberymo. ⁸An Mataw neqan tigiyunin bug. Giyunin bugan didaq abeyan asor osan disaipel kuram 7 giwaqim amalib tigisiheniy. ⁹Mataw na ginulinqan kebemmo diq 4,000 nazaq. An Yesus on Mataw na gibilenan giquliq-uliqgo tilehiy. ¹⁰Lehsa Yesus ago disaipel nenaq muy araqab gwalim saw anan Dalmanuta haqay nabmo tilehiy.Mataw Yesus daq araq azawayin inaqta emsa ahol waqnan bilaqiy ¹¹Lehan teq Farisi asor Yesus agerab tuboliy. Bolim in Yesus ulum waqad buloniy, Ni God bulonid in daq araq azawayin inaqta em gwahtiqsa i ahol waqad teq i ni ninan helmo tihaqam haqiy. ¹² Haqan Yesus in Farisi gimugan meqinta na tiloyinim in ahol afaqan tiqiy. Ahol afaqan iyad ahol aqurin ayahmo gwahtiqsa in bilam, Nagaqgo Mataw muran kam kabta ka in daq azawayin inaqta ahol waqnan? ham. Ya helmo bilaqaiq ham. God daq araq azawayin inaqta mataw muran kam kabta gimen a hi em negdaq ham. Haiqmo diq ham. Farisi giyow Herot inaq gigo gamuk awowun ¹³Haqad Yesus ago disaipel nenaq in mataw na gihulosad muyib ta gwalim in yuw urotim aqurumnib kozaq ban tilehiy.¹⁴Lehad disaipel gidek zizalan in bret kabemmo a hi waqiy. Bret amulikmo muyib osta naqmo in a lehiy. ¹⁵Lehad luwimmo Yesus era ago disaipel tigibilan, Ni Farisi teq Herot inaq gigo yis anan gihol waz naqmo hiqiyiy ham.¹⁶Haqan disaipel in gimo an bulonim bilaqiy, I bret haiqgam iyan daqag in bilaqaqya haqiy. ¹⁷Haqsa Yesus huritad teq in gibilan, Ne nagaqgo "i bret haiq" haqad osay? ham. Ne gime haiqta iyim ginad a hi em hasay ye? ham. Ne ginad gigem soqotim usaq e? ham.¹⁸ Ne gime inaqta teq ne nagah ahol a hi waqayta ham. Ne gidek inaqta teq ne gamuk huritim ginad a hi em hasayta ham. Ne gidek tizizal daqag ham. ¹⁹Ya bret abaynaginmo orqayim mataw 5,000 negta na abeyan na kuram ganim siheniy? ham. Haqan disaipel bilaqiy, Na I kuram 12 nazaqmo gisihen haqiy.²⁰Haqan Yesus bilam, Teq ya Bret 7 na orqayim mataw 4,000 negta abeyan ne kuram ganim siheniymo? ham. An in bilaqiy, Na i kuram 7 nazaqmo gisihen haqiy. ²¹Haqan Yesus gibilan, Kam gineh teq ne ginad em has daqay? ham.Yesus ago disaipel suleq nagYesus uliq Betsaida-ib mat araq ame haiqta wastitayan dimniy²²Ari Yesus ago disaipel nenaq lehim uliq Betsaida-ib tugwahtiqiy. Gawtiqan mataw in mat araq ame haiqta Yesus agerab a boliy, in Yesus bulonid in aben mat na aholib emeq wazid dimniydaq haqad. ²³An Yesus mat na abenab waqim ad uliq asan ban le tugwahtiqim. Gwahtiqim in mat na ameqnagnib kusluwim aben emimmo tisusumun ug, Ni nagah araq ahol tuwaq e? ham.²⁴An mat na saw ahol waqad teq in bilam, Ya mataw loq gelsa gibiyaiqta ham. Teq ya gibiysa in bilaqne ay nog iyim turay ham. ²⁵ Haqan Yesus aben mat na ameqnagnib a ta am. Eman mat na ameqnagni dimniyan in ame rireqim saw ahol tuwaq kemyaq. ²⁶Sa Yesus mat na eman ago bitab lehsa in bulon, Ni bitab lehad uliq aduganib gwahtiqeq hi leh ham.Pita Yesus ahol alulin bilaq siram ²⁷Ari Yesus ago disaipel nenaq eraqim saw Sisariya Filipay gigi uliq amikmiktab tilehqd luwiy. Lehad luwsa teq Yesus in ago disaipel tisusumun nag, On mataw ya inan nog diq haqsa ne huritay? ham. ²⁸Haqan disaipel bilaqiy, Mataw asor ni ninan Jon mataw huz negyaqta na amatin haqay haqiy. Sa asor ni ninan bilaqay, Ni Elaija haqay haqiy. Sa asor bilaqay,God ago nantut kwaziqta na gigo araq daqag ni haqay haqiy.²⁹Haqan Yesus a ta susumun nag, Ta negmo ya inan nog diq haqay? ham. Haqan Pita amenin emim gibilam, Ni karis ham. God mat emid bo i gilumsihdaqta amatin na ninmo ham. ³⁰Haqan Yesus gunun negim gibilan, Ari ne yago tuhurit kemiy ham. Teq ne ya ihol alulin na ulalab hi bilaqiy ham.Yesus bilam, Ya moqeq teq ta eraqdaiq ham³¹Haqad Yesus in ago disaipel suleq begin bilam, Mat Atatin teq sanctity ayahmo tisordaqta ham. Sa Juda gigo mataw marorta na teq mataw tamaz emayta gigo aseseqta na teq mataw Moses ago gunun hurit kemiyta na in gileh tuqug daqay ham. Ugad teq in wol emid tumoqdaq ham. Moqeq kam ezeqmanmo useq teq in kayeq iyeq ta eraqdaq ham. ³²Yesus inmo moqdaqta na ahol alulin nazaq bilaq keman Pita waqim ad dan adek ban loqimmo in tuwad.³³Wadan Yesus ahol buliyim ago disaipel bunmo gibiyad teq in Pita wadim bulon, Satan ni tukeq ya igilehun ban leh ham. Ni God anad a hi muzaq ham. Haiqgam ham. Ni mat og kabtaqmo anad muzaq ham. ³⁴Haqad in mataw biyahta na gibilenan agerab boliy, in ago disaipel na nenaq. Bolan in gibilan, Mat araq ya imuzeq bolnan haqad anad emeq in ahol wazid woqan ham. Ad ya afaqan soraiqta nazaqmo in sornan anad bilaqsa in ago kruse sorid abetarib gwalan ham. In nazaq toneq teq in ya imuzeq bolam ham.³⁵Na ezaqgo mat nog inmo ahol anadin emad asan alowan tonaqta na in ahol awitan tihik hulesdaq ham. Ari mat nog in yaqmo teq ya iwagamun dimunta na inaq ginadin emad ahol nog hulosaqta na in ahol awitan ulumsiheq kuluwa-kuluwmo tuqosdaq ham. ³⁶Nagaqgo mataw og kab osad in giholyon nagah kabemmo diq rom tonayta? ham. Abeb in moqid in gigo nagah giholyon rom toniyta na ezaq teq gilumsihdaq? ham. Na haiq ham. In gihol awitan tihik hules daqay ham. ³⁷Teq in nagah ogibta na amalib gihol awitan zayeq le os dimunta nab tugwahtiq daqay ye? ham. Na haiqmo ham.³⁸Mataw muran kam kabta in God gileh ugad daq meqinta em bugayta ham. Sa mat aw nog in mataw meqinta na gimeb ya teq yaqgo gamuk inaq ginan gimebay woqaqta na, abeb Mat Atatin in amam ago ahol anuwanib angelo tawonta kabemmo nenaq ta boleq in nazaqmo mataw na ginan amebay tuwoqdaqmo ham

9¹Haqad Yesus gibilan, Ya helmo ne gibilenaiq ham. On mataw muran kam kab osayta ka gigo asor a hi moqadmo in God ago maror azawayin inaq og kab gwahtiqsa ahol tuwaq daqay ham. Yesus ahol awaqan lul araq diq iy ²Ari abeb kam 6 nazaq tihiqiyan Yesus in Pita, Jems teq Jon giwaqim nenaq garah araq sisaqta abigmanib tugwalehiy. Gwalehimin gimomo nab giholbin tuqosiy. Ossa mataw na gimeb Yesus ahol buliyim awaqan lularaq diq iy. ³Sa in ago tubusan hus diq zeq anuwan nog iymo. Mat araq og kabta ago tubusan suhol naqmo hiqiyan in nazaq hus diq a hi iyaqta.⁴Ari disaipel in Yesus nazaq ahol waqad ossa Elaija ayow Moses inaq giwitan tugwahtiqiy. Gwahtiqim in disaipel gimeb Yesus inaq gamuk bilaqad turiy. ⁵Tursa Pita in Yesus bulon, Tisa ham i kab osauqta ka in dimun diq ham. I baybay ezeqmanmo emuq ham. Araq ninmen teq araq Moses amen teq araq Elaija amen ham. ⁶Disaipel ezeqman na rab naqmo diq hiqiyad Pita anad a hi em hasadmo gamuk nazaq bilamta.⁷In nazaq gamuk bilaqad tursamo onqas hitiqim tigiqisih nat. Giqisih netan God aqez onqzs na aduganib gehitiqim bilam, Ka ya itatin ham.Ya in anan inad bilaq naqmo hiqiyaqta ham. ⁸Haqanmo disaipel ezeqman na gihol bubuliyad saw waqim leh boladmo in Moses ayow Elaija inaq a ta hi gibiyiy. In Yesus amomo gigerab tursa ahol waqiy.⁹Ari in aweweqmo garah hulosim gewoqadmo Yesus disaipel ezeqman na gidek wazim gibilan, Ne nagah muran ahol waqiyta ka hikidik bilaqiy ham. Abeb ya hodhod huloseq eraqid teq ne nagah ka ago tibilaq daqay ham. ¹⁰An in Yesus ago gamuk huritim ginadnad emad in gimo an bulonim bilaqiy, Yesus bilam, Ya hodhodab eraqdaiq hamta ko in gamuk alulin ezaqta? haqiy.¹¹Haqad in Yesus tususumun ugiy, Ta ezaqta ago mataw Moses ago gunun hurit kemiyta na bilaqiy, Elaija danmeb bolid teq Krais abeb boldaqta? haqiy. ¹²Haqan Yesus gibilan, Helmo ham. Elaija nagah bunmo wastitaynan haqad danmeb boldaqta ham. Teq gamuk araq kazaq usaqmo ham. Mat Atatin boleq santitiy ayahmo sorsa mataw gileh tuqug daqay ham. ¹³Ya ne gibilenaiq ham. Elaija tubol ham. Bolan mataw ginadibmo in aholib daqdaq emim timeqin toniy ham. Kwaziqmo mar na anan gamuk mar toniyta nazaqmo in tiqemiy ham.Yesus amun araq aholib bugaw meqinta muz¹⁴Ari Yesus disaipel ezeqman na nenaq muleqim tigewoqiy. Gewoqim in disaipel ta asor na mataw kabemmo nenaq humab ayahta wolim ossa tigibiyiy. Sa mataw Moses ago gunun hurit kemiyta na asor in disaipel na nenaq an mugad osiy. ¹⁵Ossa mataw biyahta na in Yesus bolsa ahol waqad gihol turuh nemsa in sibim agerab lehim tubuloniy, Yesus ni tegewom e? haqiy. ¹⁶Haqsa Yesus disaipel susumun negim bilam, Ne nagaqgo mataw ka nenaq an mugay? ham.¹⁷Haqan mat araq biyahta na gilikmanib osim era Yesus tubulon, Mat Iyah ya igo amun matta ka a bol ham. In atenmosib bugaw ussa in gamuk a hi emaqta ham. ¹⁸Bugaw na amun aholib bolaqta nab in amun wazim ogib hunegan woqaqta ham. Woqim in ateb asabalbalin husta gwahtiqsa in ate guruwad ahol baytunim usaqta ham. Ya ningo disaipel gibilenan in bugaw na muznan biyab a hi iyiy ham. ¹⁹Haqan Yesus amenin emim gibilan, On mataw kam kabta ne God anan helmo a hi haqayta ham. Kam ganim teq ya nenaq a ta osdaiq? ham. Kam ganim teq Ya ne ginad siqim iyaqta na ago a hi bilaqad ya ne gigo afaqan sordaiq? ham.²⁰Haqan in amun na Yesus ago hib a boliy, A bolsamo bugaw meqinta na in Yesus ahol waqad in amun na othasan ogib woqim ahol bubuliyad usad asabalbalin husta atenmosib gwahtiqyaq. ²¹Sa Yesus amun amam tisusumun ug, Kam ganim amun aholib moq ka tuqusta? ham. Haqan amun amam bilam, In amun amik osadmo in kazaq emyaqta ham. ²²Tutimmo bugaw meqinta na amun wol emnan tonad in faqab teq yuwmeb hunegan woqaqta ham. Ari ninmo ningo zaway ussun teq ni i ginan ninad meqniysa gilumsih ham.²³Haqan Yesus bulon, Ni nagaqgo bilam, Ningo zaway ussun teq i gilumsih haqad ni bilam? ham. Nazaq ni hi bilaq ham. Mat nog in helmo Mat Atatin ago zaway inaqta haqid teq God in mat nazaqta na ayon nagah tiqem ugdaq ham. ²⁴Haqan hidmo amun amam dedibmo bilam, Ya helmo haqayta teq ya inad siqim iyaq ham. Ni ya ilumsih ham. ²⁵Yesus in mataw kabemmo agerab bolsa gibiyad in bugaw meqinta na atoranmo bulon, Bugaw ni gamuk a hi emaqta nan a hi huritaqta ya ni nibilenaiq ham. Ni amun ka huloseq gwahtiq ham. Gwahtiqeq le in amuganib ta hi woq ham.²⁶Haqan bugaw meqinta na ek tonim amun wol hasan woqim abensen hunegsamo in amun hulosim gwahtiqim tituk. Tukim lehsa amun na bilaqne mat tumomta nog iy. Iyan mataw kabemmo bilaqiy, Amun ka tumom haqiy. ²⁷Teq haiq. Yesus amun na abenab wazim wazan eraqim titur.²⁸Abeb Yesus bitab lehim in ago disaipel nenaq giholbinmo osad disaipel tisusumun ugiy, I ezaq iyim bugaw meqinta ko a hi muz? haqiy. ²⁹Haqan Yesus bilam, Ne nagah araq amalib bugaw naqanta a hi muz daqay ham. Haiq ham. Ne God amomo bulonid susumun ugeq teq ne bugaw naqanta tumuz daqay ham.Yesus ame gigerta bilam, Ya moqeq teq ta eraqdaiq ham³⁰Ari Yesus ago disaipel nenaq saw na hulosim le saw Galiliy-ib tugwahtiqiy. Gwahtiqim lehad in le edob osaqta na ago mat araq huritgo in hulos. ³¹Na ezaqgo in ago disaipel suleq negyaqta na ago iyan. Suleq negad in gibilenyaq, Mat araq teq Mat Atatin Atatin waqdaq mataw gibenab tiqemdaq haqyaq. Emid teq in wol emid tumoqdaq haqyaq. Moqeq kam ezeqmanmo useq teq in kayeq iyeq ta eraqdaq haqyaq. ³²In nazaq bilaqsa ago disaipel ginad a hi em has yaqay. Ad teq in Yesus susumun ugnan rab yaqay.God ago maror aduganib nog in mat ayah diqta?³³ Ari in lehim uliq Kapaneam-ub tugwahtiqiy. Gwahtiqim in bitab lehim tuqosad teq Yesus in ago disaipel tisusumun nag, Ne danib nagah gamuk an bulonim bulonim boliy? ham. ³⁴Haqan disaipel giqezmo hiqiyim osiy. Nazaqmo in danib bolad in gimo an bulomi bilaq yaqay, I gilikmanib nog diq in ayah diqta? haq yaqay. ³⁵An Yesus os woqim osad ago disaipel 12 na gibilenan agerab boliy. Bolan in gibilan, Mat aw nog in danmebta iynan haqad in ahol waqeq abeb diq emeq teq in mataw bunmo gigo kabibiy mat samanta iyan ham.³⁶Haqad amun amikta araq waqim eman nob negim tursa in ay netim teq disaipel gibilan. ³⁷Mat nog in amun kaqanta ya ibinib bolsa ahol waqad wazinaqta na in ya iwazinaqmo ham. Teq in ya imomo a hi iwazinaq ham. Haiq ham. In ya imam iqeman bolta na wazinaqmo ham.Mat araq Yesus ananib bugaw meqinta gimuzsa disaipel wasihiy³⁸Ari Jon in Yesus bulon, Tisa ham mat araq in nibinib bugaw meqinta gimuzsa i luwim ahol waw ham. Teq mat na i inaq araqib a hi luwad iyan i wasihad bulon, Ni nazaq ta hi em haw ham. ³⁹Haqan Yesus bilam, Ne hi wasihiy ham. Mat araq ya ibinin daq azawayin inaqta emeq in hidmo ya igilehnib nan meqinta a hi bilaqdaq ham.⁴⁰Na ezaqgo mat geg a hi igaqta na in i giyowta ham. ⁴¹Ad mat aw nog in ne gibiy kemad bilaqdaq, Ka Krais ago haqad teq in ne gimen yuw soqoreq negid uluw daqayta na, ya helmo ne gibilenaiq ham. Mat na naqmo God abenab naw dimunta tuwaqdaqmo ham.Yesus daq hihiq mataw ginad helta meqin tonaqta na ginan bilam ⁴²Haqad Yesus bilam, Mat nog in onmin amikmikta ya inan helmo haqayta na gigo araq baymuzsa in anad helta na hulosnan tonid mat daq nazaq emdaqta na in yaqgo faq meqin diq tuwaqdaq ham. Na in kwaziqmo gig ayahta anatgumnib am wazeq kamismeb huneg nagiyta ham. Hunegid mat na moqeq daq meqinta na a hi emeq in yaqgo faq meqin diqta na ahi waq nagta ham. ⁴³-⁴⁴Ari ni niben araq kat nigid ni ninad helta hulosnan tonad ni niben na uroteq hunegid lehan ham. Ni niben amulikmo inaq iyeq os dimuntab lehdaqta na in dimunmo ham. Ari ni niben giger inaq iyeq os meqintab lehdaqtab na in meqin diq ham. Saw nab faq oyad a hi miyaqta usaqta ham.⁴⁵-⁴⁶Teq ni nisen araq kat nigid ni ninad helta hulosnan tonad ni nisen na uroteq hunegid lehan ham. Ni nisen amulikmo inaq iyeq os dimuntab lehdaqta na in dimunmo ham. Ari ni nisen giger inaq iyeq os meqintab lehdaqta na in meqindiq ham.⁴⁷Teq ni nimeqnagin araq kat nigid ni ninad helta hulosnan tonad ni nimeqnagin na othaseq hunegid lehan ham. Ni nimeqnagin amulikmo inaq iyeq God ago maror aduganib gwahtiqdaqta na in dimunmo ham. Ari ni nimeqnagin giger inaq iyeq os meqintab lehdaqta na in meqin diq ham. ⁴⁸Saw nab kadum gisan neqayta na a hi hiqiyayta ham. Teq nab faq oyad a hi miyaqtamo ham.⁴⁹Ne nazaq giholib ginad meqinta gwahtiqsa bolad gihol loyinsa in bilaqne daq ginoy nog iydaqta ham. Teq God in faq nazaqta amalib ne bunmo ginoy nog iya teq ne bilaqne kamis dimunta nog tiqiy daqay ham. ⁵⁰Kamis in nagah araq dimunta ham. Teq kamis agon hiqiyid ni ezaq tonid teq in agon inaq a ta iydaq? ham. Nazaq iyan ne gimugan bilaqne kamis dimunta nog iysa ne an ulumsihad an hi bayiy ham.

10¹Ari Yesus saw na hulosim le saw Judiya-ib gwahtiqim teq in le yuw Jodan urotim aqurumun kozaq ban le luw. Luwsa mataw dauh kabemmo boleq agerab humab tuwol yaqay. Humab wolsa Yesus in ago daq muzim God ago suleq tigibilenyaq. ²Gibilensa Farisi asor Yesus ulum waqnan haqad agerab tuboliy. Bolim in Yesus tususumun ugiy, I Juda gigo maror bilam, Mat in ago aw muznan tumuzdaq hamta na in daq dimun o daq meqin? haqiy. ³Haqan ta Yesus in susumun negim gibilan, Moses naga gununin ne nag? ham. ⁴Haqan in bilaqiy, Moses gunun emim bilam, Mat in aw muz agamukan mar toneq teq in ago aw tumuzdaq haqad in bilam haqiy.⁵Haqan Yesus gibilan, Ne gigem soqotim ussa ne God anad a hi muzinsa iyan Moses ne gimen gunun na marton nag ham. ⁶Teq mebmebmo diq, God nagah bunmo giqamta nab in on mataw matmatta teq onqonta inaqmo giqam ham.⁷Daq alulin naqmo ago mat in anen amam gihuloseq in awe aholib tisoqotdaq ham.⁸Soqoteq in giger gihol amulikmo iyeq tuqos dayaq ham. Nazaq iyan mat awe inaq in gihol giger a ta hi iyayta ham. Haiqgam ham. In giger gihol amulikmo tiqiyim osayta ham.⁹Nazaq iyan nagah God am tuwazan usaqta na mat araq in ta hi uratan ham.¹⁰Ari abeb yesus ago disaipel nenaq le bit aduganib gwahtiqim teq disaipel in gamuk na ago tisusumun ugiy. ¹¹Susumun ugan Yesus gibilan, Mat awe muzad aw ta araq muturta waqaqta na in awe amebta na meqin tonad in bilaqne mat ta araq ago aw inaq luw nog iyaqta ham. ¹²Ad daq nazaqmo aw aduw hulosim le mat ta araq muturta waqaqta na in aduw amebta na meqin tonad in bilaqne aw ta araq ago mat inaq luw nog iyaqtamo ham.Yesus onmin amikmikta gidumun tonad gibar ton ¹³Ari on mataw gigo onmin amikmikta Yesus agerab giqad tubol yaqay, Yesus giwazad gidimun tondaq haqad. Teq haiq. In onmin giqad bolsa disaipel ginadad tigimuz yaqay. ¹⁴Sa Yesus in disaipel nazaq tonsa gibiyad agem timeqniy. Agem meqiniysa in gibilan, Ne onmin gihulosid yaqgo hib boliy ham. On mataw naqantaqmo God ago maror aduganib gwahtiqayta ham.¹⁵Ya helmo ne gibilenaiq ham. Mat aw nog in onmin gibin haiqta ka nogmo iyad . God ago maror ahaqenib a hi oseq in God ago maror aduganib le a hi gwahtiq daqay ham. ¹⁶Haqadmo in onmin giqay netim aben giholib emim giwazad tigibar ton.Mat araq ago nagah kabemmo usaqta na Yesus inaq gamuk bilam ¹⁷Ari Yesus, eraqim danib lehad luwsa mat araq sibim bolim in anagonib abakbakan ulum laquwim turad tubulon, Tisa dimuta ham, ya ezaq tonid teq God in ago os dimunta kuluwa-kuluwmo osayta na tiyagdaq? ham. ¹⁸Haqan Yesus bulon, Ni ninad ezaq emad ya inan dimun haqaq? ham. God amomo in dimunta ham. ¹⁹Haqan in mat na bulon, Gunun bunmo Moses bilamta na ago ni tuhurit ham.Ni mat araq wol emid hi moqan ham.Ni an alulib hureqeq inaq hi us ham.Ni hi rin ton ham.Ni hazizirib mat araq hi kat ug ham.Ni mat araq kat ugeq ago nagah samanmo hi waq ham.Ni ninenmaman giqez hurit ham.²⁰Haqanmo mat na bulon, Tisa ham ya amunibmo osad gunun nagan bunmo muzim bolim muran ya mat ayah tiqiy ham. ²¹Haqan Yesus mat na ahol waqad in anan anad bilam. Anad bilaqsa in bulon, Ni daq amulikmo em nagta a hi emaq ham. Ni leheq ningo nagah bunmo gizayeq amenin waqeq teq ni mataw ginaghan haiqta neg ham. Ni nazaq toneq teq Heven-ib ningo nagah kabemmo diq inaq iydaq ham. Ad ni daq na emeq teq ni ya imuzeq bol ham. ²²Haqan mat na gamuk nazaq huritim in anobun iyim anad ayahmo meqniysa tilah. Na ezaqgo in ago nagah dimdimunta kabemmo usaqta na ago iyan.²³Ari mat na tilehsa teq Yesus ahol buliyim in ago disaipel gibiyad gibilan, Mataw gigo nagah kabemmo inaqta na in God ago maror aduganib gwahtiqgo afaqan diq ham. ²⁴Haqan disaipel gamuk na huritim gihol turuh nam. Samo Yesus a ta gibilan, Yaqgo onmin ham mataw God ago maror aduganib gwahtiqgo in afaqan diq ham. ²⁵Haqan in gamuk awowun araq gibilenim bilam, Karuw ayahta anan kamel haqayta na in nidel akwiyaknib le tugwahtiqdaq e? ham. Hikidik ham. Ad nazaqmo mat ago es kabemmo ginadin emaqta na in God ago maror aduganib le a hi gwahtiqdaqmo ham.²⁶Haqan disaipel gihol turuh nemsa in bulonim bilaqiy, Nazaq iyid teq mat araq diq God ago os dimunta nab le a hi gwahtiqdaqya haqiy. ²⁷Haqsa Yesus gibiyad gibilan, Mataw in gimo gigo zawayib le a hi gwahtiq daqayta ham. Ari God in mat nog a haiq ham. Inmo mataw gilumsihsa teq in le tugwahtiq daqay ham. Na ezaqgo in nagah araq ahi emdaqta a haiq ham. ²⁸Haqan Pita tubulon, Ni i gibiy ham. I nagah bunmo gihulosim i ninmo nimuzim ninaq tilehauq ham.²⁹-³⁰Haqan Yesus bilam, Ya helmo ne gibilenaiq ham. Mat aw nog in ya iwagamun huritim teq in ya imuzeq bolnan haqad in gigo bit teq gimaqbaban teq in gigo onmin teq in gigo og gihulosiyta, on mataw na bunmo og kab osad in gigo nagah gihulosiyta na amenin 100 nazaq tuwaq daqay ham. Ta teq in ya imuzeq bolsa mataw in afaqan tineg daqaymo ham. Ad abeb kam muturta nab teq mataw na in God ago os dimuntab gwahtiqeq kuluwa-kuluwmo tuqos daqay ham. ³¹Kam nabmo mataw gibin inaq iyim osayta na kabemmo in gibin hiqiyad bo abeb tiqiy daqay ham. Sa mataw kabemmo og kab gibin haiqta na in gibin inaq iyeq le danmeb tiqiy daqay ham.Yesus ame ezeqmanta bilam, Ya moqeq teq ta eraqdaiq ham³²Ari kam nab Yesus danib gwahtiqim uliq Jerusalem-ub lehad in danmeb lehsa ago disaipel in abeb muzim inaq lehad teq in ginad haresmo em yaqay. Samo mataw ta asor in Yesus ago disaipel gibeb gimuzim nenaq lehad in gihol rabsa leh yaqaymo. Lehsa Yesus in ago disaipel 12 na giwaqim giqad le giholbinmo turad teq in aholib daq gwahtiqdaqta na anan tigibilan. ³³In bilam, Ne huritiy ham. Muran i Jerusalem-ub tugwalehauq ham. Nab teq mat araq in Mat Atatin waqeq mataw tamaz emayta gigo aseseqta na giyogniz mataw Moses ago gunun hurit kemiyta na nenaq gibenab tiqemdaq ham. Emid in ayon tibilaq daqay, Wol emid moqan haq daqay ham. Haqad in mataw en ta araq Juda a haiqta na gibenab tiqem daqay ham. ³⁴Emid teq in Mat Atatin bilawunad kusluw ugad tuwoltitay daqay ham. Woltitayeq teq in wol emid tumoqdaq ham. Moqeq kam ezeqmanmo useq teq in kayeq iyeqta eraqdaq ham.Jems ama Jon inaq maror iyeq osnan bilaqiy ³⁵Haqan teq Sebediy atatniz giger Jems ama Jon inaq in Yesus buloniy, Mat Iyah haqiy i giger nagah araq ago tisusumun nignan haqiy. Nagah na i gimen tiqemdaqta haqiy. ³⁶Haqan Yesus gibilan, Ya ne giger gimen naga diq emdaiq? ham. ³⁷Haqan in bilaqiy, Abeb ni maror ayah diqta iyeq ni nibin saw bunmo lehsa teq ni i giger ban igid i ninaq tuqosam haqiy. I ni nigerab niqabun ban teq ninasaran ban ossa on mataw bunmo in gihaqenib os daqay haqiy.³⁸Haqan Yesus gibilan, ne nagah anan susumunayta ka ago ne a hi hurit kemiy ham.Gog ayuwun agon meqin diqta ya uluwdaiqta na asor ne giger tuquluw daqaymo ye? ham.Teq santitiy ya iqisih bugdaqta na in ne giqisihsa ne tisor daqay ye? ham. ³⁹Haqanmo giger na bilaqiy, I nazaq tiqemam haqiy. Haqan Yesus gibilan, Helmo ham. Ya gog ayuwun agon meqinta uluwdaiqta na nogmo ne tuquluw daqaymo ham. Teq ya santitiy sordaiqta nazaq ne tisor daqaymo ham. ⁴⁰Ari nog diq ya iben iqabun ban osdaqta na teq nog ya iben anasaran ban osdaqta na in yaqgo nagah a haiq ham. God in mataw gingan gimen ban tuwastitayan usaqta naqmo in ban na tuwaq daqay ham.⁴¹Ari disaipel 10 na gamuk na huritim in Jems ama Jon inaq gigem meqinta tineg yaqay. ⁴²Negsa Yesus gibilenan agerab bolan in gibilan, On mataw en ta asor Juda a haiqta nagan gigo maror aseseqta in gihol abin iluwad igmo ag haqad osayta ham. Ad in gigo walmataw giqemid in gimo ginad muzad gihaqenib iyeq osgo in giwaz meqniyayta ham. Naago ne tuhuritiyta ham.⁴³Teq ne in gigo daq na hikidik muziniy ham. Ne gilikmanib mat nog in mat ayahta iyeq osnan haqad in aho wazid woqsa in ne gilumsiheq gimen kabiy eman ham. ⁴⁴Ad mat nog in ne gigo mat amebta iyeq osnan haqad in ne gigo kabibiy mat samanta iyeq osan ham. ⁴⁵Na ezaqgo Mat Atatin in mataw giqemid inmen kabiy sorgo a hi bol ham. In mataw gigo kabibiy mat nog iyeq in gigo afaqan inmo ahol ugad teq in ahol amalib mataw kabemmo gizayeq bab gibenab ta giwaqgo haqad in bolta ham.Yesus mat ame haiqta wastitayan dimniy ⁴⁶Ari Yesus ago disaipel nenaq teq mataw asor dauh biyahta nenaq in uliq ayahta Jerusalem-ub lehad luwim le uliq Jeriko-ib tugwahtiqiy. Gwahtiqim in uliq na hulosim lehsa Timeus atatin anan Bartimeus haqayta na in ame haiqta iyim dan adekib osad nagah anan sunad osyaqta.⁴⁷Osad in Yesus mat Nasaret-ibta bolaq haqsa a in tuhurit. Huritim in dedibmo lileq bilaqyaq, Yesus haqyaq. Devit atatin haqyaq. Ni ya inan ninad meqniyan haqyaq. ⁴⁸Haqsa mataw kabemmo mat na wadad buloniy, Ni niqez hiqiy haqiy. Teq haiq. In dedibmo lileyeq a ta bilaqyaq, Yesus haqyaq. Devit atatin haqyaq. Ni ya inan ninad meqniyan haqyaq.⁴⁹Haqsa Yesus bolim turad in mat na aqez huritadmo bilam, Bulonid ya igerab bolan ham. Haqan mataw na in mat ame haiqta na bulonim bilaqiy, Kadoy haqiy ni ninad dimniyan haqiy. In tinibilenaq haqiy. Ni eraqeq agerab leh haqiy. ⁵⁰Haqan mat ame haiqta na ago tubusan ahol isihim usta na hasim hulosan woqsa in hidmo eraqim Yesus agerab tilah.⁵¹Lehan Yesus bulon, Ya ni ezaq nitondaiq? ham. Haqan mat ame haiqta na bilam, Mat Iyah ham ya saw ahol waqnan inad bilaqaq ham. ⁵²Haqan Yesus bulon, Ni leh ham. Ni ya inan helmo hamta naqmo niqeman ni nime tidimniy ham. Haqan muran diq nawaqmo mat na ame hastitayan in saw ahol tuwaqyaq. Saw ahol waqad in Yesus muzim inaq Jerusalem-ub tilah.

11Yesus king nog iyim le uliq Jerusalem-ub gwahtim¹Ari ago disaipel nenaq le Jerusalem sinsin tuqugad in le uliq giger Betfage teq Betaaniy gigerab tugwahtiqiy, garah Oliv agerab. ²gwahtiqim Yesus in ago disaipel giger giqeman danmeb lehsa in gibilan Ne le uliq ginobun ban usaqta kob gwahtiqeqmo donki amidon araq amalib asit a hi luwiyta nawa am wazan tursa ne ahol tuwaq daqay ham. Ahol waqeq ne haseq a boliy ham. ³Sa mat araq gibileneq bilaqdaq, "Ne nagaqgo nazaq emay?" haqid ne kazaq buloniy ham. Iyahta ago kabiy inaq iyan haqiy ham. Kabiy na hiqiyid teq in hidmo emid ta boldaq haqad ne buloniy ham.⁴Haqan giger na lehim donki araq minminta bit araq aqezab am wazan tursa ahol tuwaqiy. Ahol waqad in donki na aqamun tihasiy. ⁵Hassa mataw nab turiy na tisusumun negiy, Ne giger nagaqgo donki minminta na aqamun hasay? haqiy. ⁶Haqan Yesus gibilanta nazaqmo in mataw na tigibileniy. Gibilenan mataw na 'dimunmo' haqanmo in donki amidon na tuwaqiy.⁷Waqim in Yesus agerab a lehi in gigo tubusan asor hasim donki amalib emanmo Yesus donki amalib tuqos. ⁸Osim lehsa mataw kabemmo in gigo tubusan hasim danib gihureniy. Gihurensa asor ay aben amikmikta giwaqim a bolim danib gihunegim giqad lehiy. ⁹Dan balaw tonim hulosad teq mataw asor ameb lehad maraw asor abeb bolad in lileyim bilaq yaqay, God abin soriy haq yaqay. Mat ka Iyahta abinib bolan i ginad bilaq gigayinaq haq yaqay. ¹⁰Teq kwaziqmo i gises Devit maror iyim osta na akaman diq a ta gwahtiqsa i ginad tidimniy hasaq haq yaqay. I God abin sorid ulilibmo diq gwalan haq yaqay.¹¹Ari Yesus le uliq Jerusalem-ub gwahtiqim Tempel-ib tilah. Lehim Tempel ago gel aduganib gwahtiqim luwad in nagah bunmo ahol waqad luwsa tarom tiqiynan tonsa in ago disaipel 12 na nenaq usnan haqad uliq Betaniy-ib muleqim ta lehiy. Yesus bilaqan ay fik araq may ¹²Lehim usim tarommoin eraqim Betaniy hulosim Jerusalem-ub ta lehad luwimmo Yesus agem tumoqyaq.¹³Agem moqsa in ay fik araq pesanmo tursa ahol waqad in anon waqnan agerab tilom. Loqim in anon araq ahol a hi wam. Haiqgam. Ananmo us. Na ezaqgo kam na in ay fik anon emgo akaman a haiq. ¹⁴An Yesus ay na bulonim bilam, Ni ninon a ta hi emsa mataw ninon araq waqeq a ta hi neq daqay ham. Haqsa ago disaipel tuhuritiy.Mataw Tempel-ib mani akabiyan emsa Yesus gimuzan asan ban gwahtiqiy¹⁵Ari Yesus ago disaipel nenaq le Jerusalem-ub tugwahtiqiy. Gwahtiqim Yesus le Tempel agelin aduganib gwahtiqim in mataw nagah gizayad osiyta na gimuzan in tukim asan ban gwahti tileh yaqay. Lehsa in mataw mani amo waqad amenin bit na ago mani negayta gigo ban otbuliyan tuwom. Teq in mataw ah hushusta God ayon tamaz emgo gizayayta na gigo ban nagan inaqmo giqot buliyan woqiymo. ¹⁶Sa mataw Tempel a hi wazinad in saw na agem siseyim nagah sorim le bolad luwsa Yesus gibiyad in gunun emim gibilan, Ne Tempel ago saw ka wazinad nagah haresmo sorad uliq gem siseyad hi luwiy ham.¹⁷Haqad in mataw suleq negim kazaq gibilan, God ago marib in gamuk araq kazaq bilam ham. Mataw yaqgo bit anan bilaq daqay, On mataw en bunmo God inaq gamuk emgo abitan haq daqay haqad in bilam ham.Ta teq ne bit ka eman in mataw rin tonayta gigo bit nog tiqiy ham. ¹⁸Ari mataw tamaz emayta gigo aseseqta na giyogniz mataw Moses ago gunun hurit kemiyta na nenaq in Yesus ago gamuk nazaq huritim in wol emid moqgo adanteqin tinagun yaqay. Teq in Yesus rabun yaqaymo. Na ezaqgo on mataw bunmo Yesus ago suleq huritad gihol turuh nemsa in wazin yaqayta na ago iyan. Mat helmo diq haqad God bulonsa in nagah ugaqta¹⁹Ari imisor tiqiysa Yesus ago disaipel nenaq Jerusalem hulosim tilehiy.²⁰Lehim usim eraqim tarommo in Jerusalem-ub ta lehad luwimmo in ay fik na ahol ta waqiy. Ay na aninin, abeqar teq anan inaqmo tumay bugim tur. ²¹Sa Pita in irimo Yesus gamuk bilamta na anadin emad in Yesus bulon, Iyahta ham ni ay ka ahol waq ham. Irimo ni ay fik anan bilam 'meqniydaq' hamta ka tumay bug ham.²²Haqan Yesus bilam, Ni ninad ayahmo God amomo ago hib usan ham. ²³Ya helmo ne gibilenaiq ham. Mat anad amulikmo ussa in helmo God nagah yaqmen tiqem yagdaq haqaqta, mat na garah ko bulonid in eraqeq sortukeq le kamismeb tuwoqdaq ham.²⁴Na alulin nazaq iyan ya ne gibilenaiq ham. Ni nagah araq anan God susumun ugad bilaqeq "Helmo God tiyagdaq" haqid God nagah na tinigdaq ham. ²⁵Ari ni God inaq gamuk tiqemnan haqad luweq ni mat araq nimeqin tonta na anadin emdaq ham. Nazaq iyid danmeb ni mat na ago daq meqinta na walemad anadin ta hi em ham. Ad teq ni Gimam Iyah Heven-ib osaqta na ningo gamuk bulon ham. Ni nazaq tonid teq God nazaqmo ningo daq meqinta giwalemad in ni niqez tuhuritdaq ham. [²⁶Ari ni mat na ago daq meqinta a hi walemid i Gimam Ulilib Osaqta na in ningo daq meqinta a hi giwalemdaqmo ham.]Mataw aseseqta in nog Yesus ahol abin ugta na anan susumun ugiy²⁷Ari Yesus ago disaipel nenaq Jerusalem-ub a ta lehiy. Lehim Yesus Tempel agelin aduganib log gelad luwsa mataw tamaz emayta na giyogniz mataw Moses ago gunun hurit kemiyta na teq Juda gigo mataw marorta naganin Yesus agerab tuboliy. ²⁸ Bolim in Yesus tisusumun ugiy, Ni nibin ezaqta iyim ni daq kagan eman? haqiy. Teq nog diq nibin na nigan ni kazaq emaq? haqiy.²⁹Haqan Yesus gibilan, Ta ya nazaqmo nagah araq ago susumun negid ne amenin emiy ham. Ne yaqgo susumun ka amenin emid teq nog ibin yagan ya daq kagan emaiqta na ago ya tigibilendaiqmo ham. ³⁰Ari Jon mataw huz negyaqta na ago kabiy Heven-ib bol ohaiq in matawmo gigo hib kabiy na wamta? ham. Ne yaqgo gamuk ka amenin bilaqid ya huritiq ham.³¹Haqan mataw aseseqta na in gimo an mugad bilaqiy, I bilaqam, Kabiy na God ago hib bolta haqid in tibilaqdaq, Ta nagaqgo ne Jon ago gamuk huritim anan helmo a hi haqiy? haqdaq haqiy. ³²Ari i bilaqam, Kabiy na matawmo gigo hib bolta haqid mataw biyahta ka eraqeq i ezaq giton daqayta na in a hi hurit haqiy. Na ezaqgo on mataw na bunmo Jon anan God ago nantut araqmo diq haqsa mataw marorta nagan in ginan tirab yaqay. ³³Nazaq iyan in Yesus ago susumun na amenin emim buloniy, I a hi hurit haqiy. Haqan Yesus gibilan, Ya nazaqmo ham. Nog ibin yagan ya daq kagan emaiqta na ago ya a hi gibilendaiqmo ham.

12¹Haqad Yesus in mataw aseseqtana gamuk awowun araq gibilenim bilam, Mat araq am wain anagin kabemmo leyim in tigel ton ham. Gel tonim in yay araq wain anon em woqid bay ninaleq ayun waqgota na titay ham. Na tihiqiyan in mat kabiy wamuzdaqta ayon bit araq asen sisaqta emim in kabiy na mataw asor gibinenab tiqam ham. In anad mataw na in gimo giholyon kabiy emad wain anagin asor waqad asor in ya yag daqay haqad ham. Kabiy anamren anad nazaq emad gibilenim hulosad in eraq uliq araq pesantab tilah ham. ²Lehim ossa wain anagin waqgo akaman tugwahtiqan in ago kabibiy mat araq eman mataw wain akabiyan emayta ta na agerab tilah ham. In leheq kabibiy mataw na gibinab wain anagin asor tuwaqdaq haqad ham. ³Teq haiq ham. Kabibiy mat na lehanmo mataw wain akabiyan emayta na in woltitayim muzan samanmo muleqim tilah ham.⁴Lehan kabiy anamren in kabibiy mat ta araq eman tilah ham. Lehan in mat afaqin wolturim meqin diq toniy ham. ⁵Anmo in kabibiy mat araq eman a lah ham. Lahan in mat na wol eman tumom ham. Moqan kabiy anamren in ago kabibiy mataw kabemmo giqeman leh yaqay ham. Lehsa mataw akabiyan emayta na in asor ginolad asor in ginol eman tumoqiy ham.⁶Ari kabiy anamren ago mat amulikmo tiqiy ham. Na in atatinmo in anan anad am, Ya itatin em lehid teq mataw na in aqez tuhurit daqay haqad in eman abebtanta tilah ham. ⁷Teq haiq ham. Mataw kabiy wamuzayta na in gimo an bulonim bilaqiy, Abeb mat ko amam moqid in amam ago ahuran nagah bunmo tuwaqdaqta haqiy ham. Bolsa i mat ko wol emid moqanmo haqiy ham. Moqsa amam ago kabiy ka igmo waquq haqiy ham⁸Haqadmo in mat na wazim wol eman moqan in asan waqim kabiy asan ban hunegan tilah ham. ⁹Nazaq iyan kabiy anamren na ezaq tondaq? ham. In boleq mataw wain akabiyan wamuzayta na ginol em bugad teq in ago kabiy na mataw ta asor bunta gibenab tiqemdaq ham.¹⁰Haqad Yesus bilam, Ne God ago mar ahol a hi waqayta ye? ham. Mar nab gamuk araq kazaq bilam ham. Titu mataw anan bilaqiy 'meqin' haqiyta naqmo in awaz meqin diq turad bit anon bunmo soraq haqad in bilam ham. ¹¹Iyahtaqmo nagah na eman gwahtiqan i ahol waqsa in dimun diq iyaq haqad in bilam ham. ¹²Yesus nazaq haqan mataw aseseqta na ginad tiqemiy. Yesus i gibin wazid woqgo haqad gamuk awowun na bilam haqiy. Haqad in Yesus waznan ginad bilaqsa teq in ta on mataw girabun yaqay. Nazaq iyan in Yesus hulosim tilehiy.Mataw sisa takis ugayta na ago in Yesus ulum waqiy. ¹³Ari mataw asor teq Herot ago matawta asor nenaq gibilenan tilehiy, in leheq Yesus kat ugid in gavman gigo gunun araq itiyonad gamuk araq hi bilaqnabta bilaqid i tuwazam haqad.^14-¹⁵In lehim Yesus buloniy, Tisa haqiy, i ningo tuhurit haqiy. Ni a hi katiyaqta haqiy. Ni mataw gibin inaqta a hi girabunad gigomo a hi lehaqta haqiy. Ad ni on mataw God ago dan titnonta giqisihunad ni hel diqmo gibilenaqta haqiy. Ni ninad ezaq emaq? haqiy. I gibabun Rom gigo King Sisa in i gituw bulsa i takis ugauqta na in daq dimun o daq meqin? haqiy. I Juda gigo maror ezaq bilamta? haqiy. I tuqugam o haiy? haqiy. Haqan Yesus in gigo gamuk katiyta na tuhurit. In ya imeqin tongo adanin tiqemay ham. Haqad in gibilan, Nagaqgo ne ya ilum waqay? ham. Ari mani araq waq a bolid ya ahol waqiq ham.¹⁶Haqan in araq a bolim tuqugiy. Ugan ahol waqad in tisusumun nag, Ka nog diq adulan teq ahol anan usaq? ham. Haqan in bilaqiy,Na Sisa-mo agota haqiy. ¹⁷Haqan Yesus gibilan, Sisa ago nagah na ne Sisa-mo ugiy ham. Ad God ago nagah na ne God-mo ugiy ham. Haqan mataw na ginadnad emad tuqosiy.Saduysi in mataw hodhodab eraq daqayta na ago Yesus ulum waqiy ¹⁸-¹⁹Sa saduysi asor Yesus ago hib toboliy. Mataw na ginad kazaq emayta. MataNa in bolim w tumoqiyta hodhodab a hi eraq daqaya haqayta.Na in bolim Yesus buloniy, Tisa haqiy Moses i gimen gamuk araq mar tonim in kazaq bilam haqiy. Mat araq aw waqeq amun a hi emsamo moqid ago aw amomo ossa teq in amikqan araq abab aqoburan na waqeq alulib abab ayon onmin tigiqemdaq ham haqiy.²⁰Ari gamuk araq kazaq lahta haqiy. Mat araq amikqaniz nenaq 7 nazaq diq iyim osiy haiq. Osim in gibab na aw araq tuwam haqiy. ²¹Moqan amata araq aw naqmo haqiy. Waqim in nazaqmo osim tumommo haqiy. Tain gima ezeqmanta na nazaqmo ton haqiy.²²Na moqan in amagniz bunmo nazaqmo titoniymo haqiy. Mataw maqbab 7 na in aw amulik naqmo waqim amun araq eman a hi gwahtiqsamo in tumoq bugiy haqiy. ²³Nazaq iyan abeb mataw bunmo hodhod huloseq eraq daqayta nab teq aw na in nog diq awe tiqiydaq? haqiy. Maqbab 7 na bunmo in aw amulik naqmo waqiyta haqiy²⁴In nazaq haqanmo Yesus gibilan, Ne God ago marib gamuk usaqta na ago ginad a hi em hasay ham. Te ne God ago zaway a hi hurit kemaymo ham. Naago iyan ne gamuk menmen bilaqay ham. ²⁵Ari on mataw hodhodab eraqeq in an a ta hi waq daqay ham.In bilaqne God ago hib angelo osayta nazaq nagmo in os daqay ham.²⁶Te God mataw tumoqiyta giwazid hodhodab eraq daqayta na agamukan Moses ago marib usaqta ham. Mar nab ne ay amikta faq oyad a hi oyworta awagamun na ne ahol a hi waqiyta daqagya ham. Wagam nab God in Moses bulonim bilam, Abraham ago God , teq Aisak ago God,teq Jekob ago God na yaqmo haqad in bilam. ²⁷Nazaq iyan God in mataw moqim kayeqmo osayta gigo God iyim in gibiy muzaqta ham. Ne gigo gamuk kawa na ne menmen diq bilaqiy ham.God ago gunun ameb diqta²⁸Ari mat araq Moses ago gunun hurit kamta na bolim Yesus Sadyus nenaq gamukib an bayard tursa in tuhurit. Huritsa Yesus in gigo gamuk amenin dimun diqmo bilaqan mat na era Yesus tususumun ug, God ago gunun doqag diqta in gunun bunmo giquriyamim in danmeb diqta? ham. ²⁹Haqan Yesus bilam, Gunun ameb diqta na kazaq bilam ham. Ne Isrel huritiy haqad in bilam ham. Gigo Iyahta God in amomo Iyah iyim osaqta haqad in bilam ham. ³⁰Sa ne gigem, giqutil, ginad, teq ne gigo zaway bunmo amalib ne gigo Iyahta God anan ginad bilaqan haqad in bilam ham. ³¹Teq gunun gigerta na in kazaq ham, Ni nihol anan ninad bilaqaqta nazaqmo ni niyow anan ninad bilaqan haqad in bilam ham.Gunun giger na in God ago daq dimdimunta bunmo giquriyamim in ameb diqta ham.³²Haqan mat Moses ago gunun hurit kamta na in Yesus bulon, Mat Iyah ham helmo ni dimunmo bilam ham. God amomo in Iyahta iyim osaqta ham. God araq haiq ham. ³³Ad in giqutilibmo teq i ginadibmo teq i gigo zawayibmo i God anan ginad bilaqdaq ham. Teq igmo gihol anan ginad bilaqaqta nazaqmo i on mataw bunmo ginan ginad bilaqdaq ham. Daq giger na in mataw God ayon tamaz emad naw ugayta na bunmo giquriyamim in ameb diqta ham. ³⁴In nazaq anad em hasim bilaqan Yesus huritim tubulon, Ni God ago maror sinsin diq ugim osaqta ham. Ari Yesus in mataw na gigo susumun bunmo amenin anononmo eman mataw bunmo rabad in Yesus ulum waqnan a ta hi susumun ug yaqay.Krais ahol alulin ezaqta na ago Yesus Farisi susumun nag ³⁵Ari Yesus Tempel agelin aduganib mataw suleq negad tuqos. Osad in bilam, Ezaq haqad mataw Moses ago gunun hurit kemiyta na bilaqay, Krais in Devit atatin haqayta? ham. ³⁶Kwaziqmo God ago Bugaw Dimunta in Devit anad ussa Devit in Krais anan bilam, Iyahta in yaqgo Iyahta kazaq bulonim bilam ham. Ni ya iben iqabun ban kab ya imen emad ossa ya ningo bab giqemid nisen ahaqenib tiqiy bug daqay haqad in bilam ham. ³⁷Ari Devit-mo in Krais anan bilam, 'Yaqgo Iyahta' haqad in bilam ham. Nazaq iyan ezaq toneq Krais in Devit ago Iyahta iyeq teq in Devit atatin a ta iydaq? ham. Haqan on mataw biyahta nab turiyta na in Yesus ago gamuk huritim in ginad tidimniyiy. Na ezaqgo Yesus in mataw aseseqta na gigo gamuk adanin qway bugta na ago iyan.Yesus in mataw Moses ago gunun hurit kemiyta na gigo daq anan bilam ³⁸Ari Yesus in mataw na suleq negad osim gibilan, Ne mataw Moses ago gunun hurit kemiyta na gigo ne gihol waz naqmo hiqiyiy ham. In tubusan dimun diqta giholib emim dan muzad luwayta ham. Luwsa mataw gibiyad ginan 'mat ayah' haqsa in ginad diq dimniyaqta ham. ³⁹Mataw na bit humab wolaytab ban ulilibta nabmo osnan ginad bilaqaqta ham. Ad in humab adidaqan inaqtab ogib garuruhab osnan hulosmo diq hulosayta ham. ⁴⁰Teq in on waburta kat negad gigo bit samanmo waqayta ham. Ad in mataw gimeb God inaq gamuk sisaqmo bilaqim a lehayta ham, mataw gibiyad ginan dimun diqta haq daqay ham. God hazizir ayahta emdaqta nab teq mataw na in on mataw giquriyameq faq ayah diqmo tuwaq daqayta ham.Aw anaghan haiqta araq in God naw ug ⁴¹Ari teq Yesus Tempel agelin aduganib osad mataw gigo naw hunegan mani emayta abanab woqsa in gibiyad os. Ossa mataw ginaghan inaqta na kabemmo boleq mani kabemmo giqem yaqay. ⁴²Sa teq aw waburta araq anaghan haiqta bolim mani amikmikta gigermo hunag.⁴³Hunegan Yesus ahol waqad in ago disaipel gibilenan agerab boliy. Bolan in gibilan, Ya helmo ne gibilenaiq ham. Aw waburta ahol anaghan haiqta ko in mani amik diqta emim in on mataw mani kabemmo emayta ko giquriyam bug ham. ⁴⁴Na ezaqgo mataw ko bunmo in gigo mani kabemmo usaqta na ago asitmo emiyta ham. Ari aw ko haiq ham. In aholib mani asitmo usaqta na bunmo em bugim in ago mani araq in didaq zayeq neqdaqta na haiq tiqiy ham.

13¹Ari Yesus ago disaipel nenaq Tempel hulosim lehadmo disaipel araq in Yesus tubuon, Mat Iyah ham gig aseseqta amalib bit dimdimunta giqemiyta ko ni gibiy ham. ²Haqan Yesus bilam, Ni bit aseseqta ko gibiyaq e? ham. Gig ko bunmo teq wolzizilayeq gihunegid tuwoq bug daqay ham.Yesus bilam, Afaqan kabemmo teq gwahtiqdaq ham ³Haqad in tilehiy. Lehim Yesus garah anan Oliv haqayta nab osad teq in ame lehim tempel na ahol waqad osyaq. Ossa Pita, Jems, Jon teq Andru nazaqmo in agerab tuboliy. Bolim in tisusumun ugiy, ⁴Yesus haqiy ni i gibilen haqiy. Kam gineh teq nagah ni anan bilamta na tugwahtiqdaq? haqiy. Naga daqin diq gwahtiqsa i ahol waqad ginad emam nagah na tugwahtiqnan tonaq haqam? haqiy.⁵Haqan Yesus gibilenim bilam, Ne gihol waz naqmo hiqiyiy ham. Luweq mat araq ne kat negdaq ham. ⁶Mataw kabemmo teq boleq ya inan biyad bilaq daqay, Mat naqmo ya kawaqmo haq daqay ham. Haqad in mataw kabemmo kat negsa in ginan helmo haq daqay ham.⁷Ad mataw bab emsa ne gihulan huritad ta teq mataw pesanta bab emsa ne gibin hurit daqaymo ham. Huritad ne ginad haresmo emad hi rabiy ham. Daq nagan nazaq tugwahtiqdaqta ham. Ta teq kam Abebtanta na teqmo ham. Afaqan na bunmo gwahtiqeq le hiqiyid teq kam na tugwahtiqdaq ham. ⁸Na ezaqgo mataw en araq in eraqeq mataw saw araqabta nenaq an wol daqayta ham. Sa king araq ago dauh in king ta araq ago dauhta nenaq an wol daqaytamo ham. Saw haresmo og ahol woleq lehsa uliq saw asor zarow ayahta gwahtiqdaqta ham. Daq na bunmo bilaqne aw agemab amun tubaysa loyinaqta nazaq nog iydaq ham.⁹Ari negmo gihol waz naqmo hiqiyiy ham. Mataw teq ne giwazeq kaunsel gibenab giqem daqay ham. Ad in bit humab wolayta nagab ne ginol titay daqay ham. Ne ya inan helmo haqad imuzad luwayta na ago in ne giqemid ne king teq gavman aseseqta gimeb tur daqay ham. Turad teq ne nagah gimeb ahol waqiyta na na awagamun tigibilen daqay ham. ¹⁰On mataw ya iwagamun dimunta uliq saw bunmo a leheq gibilensa teq nagah ya anan bilaqayta na tugwahtiqdaq ham.¹¹Ari in ne giwazeq giqad gavman gimeb lehid teq in ne naga gamukin bilaq daqayta na ago ginad ad hi emiy ham. Gamuk bunmo ne bilaq daqayta na God tinegdaq ham. Kam nab in gamuk negdaqta nazaqmo ne bilaqiy ham. Nazaq iyan negmo diq gamuk na hi bilaq daqay ham. Haiq ham. God ago Bugaw Dimunta inmo gamuk na ne giqezab tibilaqdaq ham. ¹²Kam nab teq mataw in gimaqbaban giwaqeq bab gibenab giqemid in ginol emid tumoq daqay ham. Sa gimaman in nazaqmo gigo onmin giwazeq bab gibenab giqem daqaymo ham. Ad onmin in nazaqmo ginenmaman gihar negad bab gibenab giqemidmin ginol emid tumoq daqay ham. ¹³Ya ihol abin ne giholib usaqta na ago on mataw bunmo gigem meqinta neg daqay ham. Ari on mataw zaway diq iyeq ossa le in gigo kam abebtanta iydaqta nab teq God in gilumsiheq ta giwaq daq ham.Yesus bilam, Jerusalem teq meqniydaq ham ¹⁴Haqad Yesus bilam, Yeq nagah meqin diqta uliq saw meqin tonaqta na in ban a hi osnagta nab ossa ne ahol tuwaq daqay ham. (Mat gamuk ka ahol waqad bilaqaqta na in anad em hasad bilaq sireqan.) Kam nab on mataw saw Judiya-ib os daqayta na in tukeq garah ban gwalehiy ham. ¹⁵Sa mat bit ahuqunib ban osnantab osdaqta na in ogib hitiqeq tukeq lehanmo ham. In ago es nagah giwaqgo bit aduganib le hi gwahtiqan ham. ¹⁶Teq mat kabiyab luwdaqta na in ago aholsihen waqnan uliqab muleqeq ta hi bolanmo ham.¹⁷Kam nab on gigem iyayta na teq amun muturta sus ugayta na in timeqniy daqay ham. ¹⁸Nazaq iyan ne God susumun ugid in kam meqinta na emid urom akamnib hi gwahtiqan ham. ¹⁹Kam nab mataw afaqan ayah diqmo tisor daqay ham. God nagah bunmo giqeman gwahtiqiyta nab iyim bo muran kam kabmo afaqan araq nazaqta a hi gwahtimta ham. Teq abeb afaqan araq nazaqta a ta hi gwahtiqdaqmo ham. ²⁰Ari Iyahta kam meqinta na siqim diq hi emid on mataw bunmo tihiqiy bug nagiy ham. Teq inmo ago on mataw in gilumim ahoyon giwamta na ginadin emad in kam na emid siqim tiqiydaqta ham.²¹Kam nab mat araq ne gibileneq bilaqdaq, Ahol waqiy, Krais kawa osaq o Krais kowa osaq haqsa ne in aqez ne hikidik huritiy ham. ²²Na ezaqgo Krais katiyta teq nantut katiyta teq kabemmo giqemid in kabiy lul araq diqta amo amo giqem daqayta ham. In nazaq emad teq in God ago on mataw in gilumim aholyon giwamta gihureqnan diq ton daqayta ham. ²³Ne gihol waz naqmo hiqiyiy ham. Daq nagan bunmo a hi gwahtiqsa kawa ya ne tigibilen kemaiq ham.Mat Atatin teq ta boldaq ²⁴Haqad Yesus bilam, Kam nab afaqan ayahta na tihiqiyid teq Zeq ame romriq iysa kalam a ta hi oydaq ham. ²⁵Sa kaitab ulig milheseq ogib tuwoq daqay ham. Woqsa nagah aseseqta zawayta ulilib usayta nagan gihol tuwol daqaymo ham.²⁶Kam nabmo Mat Atatin onqas amalib oseq ago zaway ayahta teq ahol anuwan inaqmo bolsa on mataw ahol tuwaq daqay ham. ²⁷Sa in angelo asor giqemid in og saw bunmo lehad inmo ago on mataw in gilumim aholyon giwaqan osayta na giwaqeq giwaqeq a lehad teq in tigiwaq bug daqay ham.Ay fik kam ulum kemaqta ²⁸Haqad Yesus bilam, Ay fik ago hib teq ne ginad tiqem has daqay ham. Ay na aben hur tonad atitoqin muturta gwahtiqsa ne ahol waqad ginad emay, Zeq akaman tiqiynan tonaq haqayta ham. ²⁹Nazaqmo teq abeb nagah ya anan bilamta ka bunmo tugwahtiqsa ne ahol waqad ginad kazaq emiy ham. Nagah Yesus anan bilamta na bolim sinsin tiqiy haqiy ham, bilaqne mat dan ezab turad bit aduganib gwahtiqnan tonaq nazaq haqiy ham.³⁰Ya helmo ne gibilenaiq ham. On mataw muran kam kab osayta ka a hi moq bugsanagan bunmo tugwahtiqdaq ham. ³¹Kait of inaq teq tihiqiydaqta ham. Ari yaqgo gamuk ka a hi hiqiydaq ham. Mat araq diq Yesus ta boldaqta na akaman a hi hurit³²Ari eq Mat Atatin kam gineh diq ta boldaq na teq in zeq adulan ganimtab bo gwahtiqdaqta na mat araq a hi hurit ham. Angelo Heven-ib osayta na teq God Atatin inaqmo in kam na a hi huritiymo ham. God amomo kam na ago tuhuritta ham.³³Nazaq iyan ne saw waqad gihol waz naqmo hiqiyeq osiy ham. In boldaqta na akaman ne a hi huritiy ham. ³⁴Na in bilaqne mat ayahta ago uliq hulosim saw araq pesantab lehaqta nazaq nog iydaq ham. Mat na a hi lehadmo in kabiy iberim ago kabibiy mataw amulik-mulikmo negad gibilenan in ago nagah wamuzayta ham. Sa mat ayahta na in mat dan ez wamuzim turaqta na bulonaq, Ni dan ez wamuz naqmo hiqiyeq os haqaqta ham. Haqad in gihulosim tilehaqta ham.³⁵Haqad Yesus bilam, Nazaq iyan ne gihol waz naqmo hiqiyeq osiy ham. Kam gineh bit anamren taboldaqta na ne a hi huritayta ham. In taromab o tarom alihanib o saw hastitaysa o tarommo in boldaqta na ne a hi huritayta ham. ³⁶Luweq in hidmo boleq ne ussa in gibiydaq ham. ³⁷Gamuk kawa ya ne gibilenaiqta ka ya on mataw uliq saw bunmo gibilenaiqmo ham. Ne bunmo gihol asawan woltayad osiy ham.

14¹Ari abeb kam giger le tihiqiyid teq Juda ago lotu akaman ayahta anan Pasova haqayta na teq bret yis haiqmo negayta na akaman tugwahtiqdaq. Sa mataw tamaz emayta na teq mataw Moses ago gunun hurit kemiyta na in mataw gimeq titonad Yesus wazeq wol emid moqdaqta ago adan meqin tinagun yaqay. ²Na ezaqgo in bilaqiy, I Pasova akamnib Yesus ulalabmo a hi wazam haqiy. Luweq mataw biyahta na gigem meqniysa bab araq ayahta wazid eraqdaq haqiy.Aw araq Yesus afaqinib masil ahuran dimunta wazbalan wom ³Ari Yesus uliq Betany-ib mat araq kwaziqmo aholib moq lepra usim tihiqiyta anan Saimon haqayta ago bitab os. Osad in didaq neqsa aw araq tubol.Aw na gago araq amikta gig anan alabasta haqayta na sisoqim emiyta nab in masil ahuran dimunta anan nard haqayta anawun ayahta tonim teq in wazim abol. A bolim in aqez orqayim Yesus afaqinib wazbalan tuwom. ⁴Wazbalan woqsa mataw asor nab osiyta na gigem timeqniysa in ginadibmo bilaqiy, Nagaqgo aw ko masil dimunta ko abu ulumaq? haqiy. ⁵I masil ko mat araq inaq zayeq 300 kina nazaq waq nagta haqiy. Waqeq i mataw ginaghan haiqmo osaiqta na neg nagta haqiy. Haqad in aw na tuwad yaqay.6Wadsa Yesus bilam, Ne hulosiy ham. Nagaqgo ne aw na afaqan ugay? ham. In a ilowan tonad yaqmen daq dimun diqta tiqem yag ham. 7Tutimmo mataw ginaghan haiqta na ne nenaq osayta ham. ossa ne gilumsih daqayta akaman kabemmo ham. Ari ya nenaq tuteqmo a hi osdaiqta ham. 8 Aw ka ya inadin emim in yaqmen emdaqta na kawa tiqem yag ham. In masil ya giholib amta ka in ya isan wastitayeq hodhodab iqemgo in kawa tiqam ham. 9 ya helmo ne gibilenaiq ham. Mataw edobya leheq ya iwagamun dimunta bilaqad in aw ka daq amta ka awagamun tibilaq daqaymo ham. Bilaqsa mataw huritad teq in aw ka anadin tiqem daqay ham.Judas in Yesus waqeq Juda gigo mataw marorta gibenab emgo bilam 10 Ari kam nab disaipel 12 na gigo araq anan Judas uliq Kariyot-ib haqayta na in mataw tamaz emayta gigo aseseqta gigerabe lehim gibilan, Ya Yesus waqeq ne gibenab tiqemdaiq ham. 11 In nazaq bilaqan mataw aseseqta na huritim ginad tidimniyiy. Ginad dimniyan in Judas naw uggo tubuloniy . Bulonan Judas huritim teq in Yesus waqeq mataw na gibenab emdaqta adanteqin araq dimunta tinagunyaq.Yesus ago disaipel nenaq Pasova abebtanta neqiy¹² Ari bret yis haiqmo na akaman tugwahtim. Kam nab in Pasova ayon sipsip amidon wol emayta. Nazaq iyan disaipel in Yesus tisusumun ugiy, Ni ninad I bit edob leheq ni Pasova adidaqan neqdaqta abenab wastitayam? haqiy. ¹³Haqan Yesus in ago disaipel gigermo gibilan, Ne giger le uliq kop gwahtiqim teq mat araq reb ayuwun inaqta oseq a bo lehad in ne danib tihiqiydaq ham. mat naqmo ne imuzeq inaq lehiy ham. ¹⁴Leheq mat na bit edob gwahtiqdaqta nab ne moqeq bit na anamren kazaq susumun ugiy ham. Tisa bilam, Yaqgo disaipel nenaq Pasova adidaqan neqamtam ba ago bit adugan edowa? haqad ne buloniy ham.¹⁵Ne nazaq bulonid teq in bit adugan araq ayahta ulilib usaqta na tigiqishundaq ham. Bit adugan nab didaq neqayta anaghan bunmo usaqta ham.Nab ne leheq I bunmo Pasova adidaqan neqamta habana wastitayiy ham.Haqad Jesus in giqeman tilehiy. ¹⁶Lehim uliq nab gwahtiqim in Yesus nagah bunmo ginan gibilanta nazaqmo ahol tuwaqiy. Ahol waqad in nab Pasova adidaqan neq daqayta akaman tuwastitayiy.¹⁸Lehim in banab didaq neqad osad Yesus bilam. Ya helmo ne gibilenaiq ham. Ne gilikmanib teq mat araq ya giwaqeq bab gibenab iqemdaq ham. Mat ya inaq araqib didaq neqauqata naqmo ham.¹⁹Haqan disaipel gihol afaqan tiqiysamo in amulik-mulikmo Yesus tususumun ug yaqay, Yaqmo ye? haq yaqay.²⁰Haqsa Yesus Yesus gibilan,Ne disaipel 12 gilikmanib mat ya inaq dedib aben woqaqnaqmo ham.²¹Helmo diq ham. God ago mar mat Atatin anan bilamta nazaqmo diq in dan muzeq tilehqdaqta ham. Teq mat in Mat Atatin bab gibenab emdaqta na timeqniy hasdaq ham. Mat na anen a hi em nagta in am ham.²²Ari in didaq neqad osad Yesus bret asor waqim God esey ugim in orqayim ago disaipel tinag. Nagad in gibilan, Ne bret ka waqeq neqiy ham. Ka ya inon ham. ²³Haqad in wain agogin inaq waqim God esey ugim teq in negan in bunmo tuquluw. ²⁴Uluwan Yesus gibilan, ka ya inedan God ago maror muturta na zaway ugdaqta ham. Ya need ka on mataw kabemmo giwastitaynan haqad wazbaldaiqta ham. ²⁵Ya ne helmo gibilenaiq ham. Ya wain ayun ka a ta hi uluwaqdaiq ham. Abeb ya God ago maror muturta aduganib osad teq ya wain ayun ka ta uluwdaiq ham.²⁶Admo in lotu ago bar araq wazim hulasadmo in uliq hulosim garah Oliv-ub tilehiy .Yesus bilam, Pita teq tileh yagdaq ham.²⁷Lehad Yesus in ago disaipel gibilan, Ne bunmo ginad ya inan helmo haqayta na hulosad gileh biyab daqad ham. Na ezaqgo God ago marib gamuk araq kazaq bilam ham.Ya mat sipsip giwamuzaqta na wol emsa in ago sipsip haresmo tukeq tileh daqay haqad in bilam.²⁸Ari ya hodhodab eraqeq teq ya ameb saw Galiliy-ib tilehqdaq ham. ²⁹Haqan Pita bulon, Mataw ka bunmo in ginad helta na hulosad gileh negsa ya haiq ham.³⁰Haqan Yesus bulon, Ya helmo gibilenaiq ham. Tarom kab kuram ame gigerta a hi gayonsamo ni nime ezeqmanmo gileh tiyagdaq ham.³¹Haqan Pita atoranmo bilam, Nab iyan ham. Mataw ya ninaq ginol emnan bilaqsa ya gileh a hi nigdaiq ham. Haqan disaipel bunmo gamuk nazaqmo bilaqiy.Yesus og Getsemaniy-ib God inaq gamuk am ³²Ari Yesus ago disaipel nenaq le og araq waqnan dimunta anan Getsemaniy haqayta nab tugwahtiqiy. Gwahtiqim Yesus in ago disaipel gibilan, Ne kab osiy ham. Sa ya leheq God inaq gamuk emnan ham. ³³Haqad in Pita, Jems teq Jon giwaqim nenaq tilah. Lehad in ahol afaqan diq iysa ahol meqin diq tiloyinyaq. ³⁴Ad in gibilan, Ya ihol afaqan diq iysa ya tumoqnan tonaiq ham.³⁵Haqan in asitmo ta leh nog iyim in ogib woqim osad God tubulonyaq, God anad bilaqid in afaqan ka ya iholib walemdaq haqad. ³⁶In bilaqay, O kabay haqyaq ni ya imam haqyaq. Ni nagah araq a hi emdaqta a haiq haqyaq. Ya iholib afaqan ayahta ka ni walem haqyaq. Teq ni ya inad ka hi muz haqyaq. Ninmo ninad muz haqyaq.³⁷Haqan in muleqim ta lehim disaipel ezeqman na ussa in gibiy. Gibiyad in Pita bulon, Saimon ham ni nagaqgo usaq? ham. Ni asitmo saw waqad a hi osdaq e? ham. ³⁸Ne saw waqad God inaq gamuk emad osiy ham. Gamuk emad daq ne gilum waqaqta na bo giholib gwahtiqsa ne hi woqgo haqad buloniy ham. Helmo ne ya inad muznan ginad bilaqaqta ham. Teq ne gihol awaz meqin a haiq ham. ³⁹Haqad in lehim a God ta bulon. Take in God bulonta nazaqmo in a ta bulon ton.⁴⁰Bulonim in muleqim ta lehim disaipel gime tursa ussa in gibiy. Gibiysa in kayeq ta iyim in gamuk araq bilaq daqayta hiqiyan in giqezmo hiqiyim tuqosiy. ⁴¹Sa Yesus ame ezeqmanta lehim teq ta bol. Bolim in gibilan, Ne ginamur emad us tutay ye? ham. Ne dimunmo tuqosiy ham. Ahol waqiy ham. Muran in mat Atatin waqeq mataw meqinta gibenab em daqayta akaman tiqiy ham. ⁴²Ne eraqiysa i lehuq ham.Ahol waqiy ham.Mat ya giwaqeq bab gibenab emdaqta na bo tugwahtim ham.Judas Yesus waqim bab gibenab am ⁴³Yesus nazaq gamuk bilaqad tursa hid naqmo disaipel 12 na gigo araq anan Judas haqayta na tubol. In bolsa mataw dauh biyahta Baqir senor wazim ad inaq tuboliymo. Mataw tamaz emayta gigo aseseqta na teq Juda gigo mataw marorta na teq mataw Moses ago gunun hurit kemiyta na in mataw na giqeman boliyta. ⁴⁴Ari mat Yesus waqeq bab gibenab emdaqta na in naga daqin emid in Yesus ahol waqad waz daqayta na ago in Tokyo tigibilanta. In bilam, Ya leheq mat nog ya wazeq ilawundaiqta naqmo ne wazeq bab mataw na gibenab emid in mat na wamuzeq ad lehiy ham. ⁴⁵Nazaq iyan in hidmo Yesus agerab luwimmo gibilam, Tisa ham. Haqadmo in wazim tiqilawun. ⁴⁶Ilawunanmo mataw na eraqim Yesus tuwaziy.⁴⁷Wazs mat araq Yesus agerab turta na ago baqir hureq hasim wam. Waqim in tamaz mat danmebta ago kabibiy mat araq wolim adeksanmo qwatayan ogib tuwom. ⁴⁸An teq Yesus in bab mataw na gibilan, Ne baqir sebur giwaqim a boliyta ka ne mat rin tonaqta waznan boliy ye? ham. ⁴⁹Kam kabemmo ya ne suleq negad nenaq Tempel-ib ossa ne ya a hi iwaziy ham. Teq daq Kagan bunmo gwahtiqad in God ago mar tuwol net bugaq ham. ⁵⁰Haqanmo disaipel bunmo Yesus hulosim titukiy.Mat araq minminta tuk⁵¹Disaipel tukim lehsa mat araq minminta ago tubusan dimunta husta amta na in Yesus muzim inaq lehsa mataw na ahol waqad tuwaziy. ⁵²Wazan haiq in giben lelhasadmo ago tubusan gibenab hulosadmomin abe aholmo tukim tilah.Mataw aseseqta Yesus amalib nan kabemmo emiy ⁵³Ari mataw na Yesus wazim ad tamaz mat danmebta ago bitab tilehiy. Lehan mataw tamaz emayta gigo aseseqta na teq Juda gigo mataw marorta na teq Moses ago gunun hurit kemiyta na in bolim humab tuwoliy. ⁵⁴Sa Pita in Yesus muzim lehad teq in pesan nog lehyaq. Lehim in tamaz mat danmebta na ago bit agelin aduganib gwahtiqim in mataw Tempel-ib Hurley gan turayta na faq iterad tuqos.⁵⁵Ossa mataw tamaz emayta gigo aseseqta na teq Juda gigo kaunsel ayahta na amatawun bunmo in mat araq Yesus ago hib nan bilaqid teq in wol emid moqgo na tinagun yaqay. ⁵⁶Mataw kabemmo bolim Yesus amalib nan katiyta em yaqayta. Teq haiq in gigo gamuk katiyta na araqibmo a hi iyyaq.⁵⁷-⁵⁸Sa mataw asor turad in katiyim kazaq bilaq yaqay, Yesus kazaq bilaqsa i hurit haq yaqay. Yaqmo teq Tempel mataw gibenab emiyta ka wol inereq kam ezeqmanmo aduganib ya Tempel araq gibenab a hi em daqayta na wazid tiqeraqdaq haqad in bilamta haq yaqay. ⁵⁹Teq gamuk in bilaq yaqayta na araqib diq a hi iyyaqmo.⁶⁰Anmo tamaz mat danmebta na eraqim liqabmo turad in Yesus tisusumun ug, Mataw ka bolim ninan gamuk bilaqayta ka in ezaq diq? ham. Ni gamuk ka araq amenin a hi emdaq e? ham. ⁶¹Haqanmo Yesus aqez hiqiyim in mat na ago gamuk amenin araq a hi bilam. Sa tamaz mat danmebta na a ta susumun ug, Mat Iyah Ulilib Diqta na atatin mataw anan Krais haqayta na ninmo ye? ham. ⁶²Haqan Yesus bilam, Eqe ham. Na yaqmo kawa ham. Teq Mat Atatin in God Awaz Meqin Diqta aben aqabun ban ossa ne ahol tuwaq daqay ham. Ahol waqsa in kaitab onqas inaq bolsa ne ahol tuwaq daqaymo ham.⁶³Haqan tamaz mat danmebta na era inmo aholib tubusan bulsireqim bilam, Mat araq in ayon nan araq ta hi bilaqan ham. ⁶⁴Mat ka God bilawunsa ne tuhuritiy ham. Ne in ayon naga gamukin bilaq daqay? ham. Haqan mataw bunmo bilaqiy, Na in daq meqin diq haqiy. Mat daq nazaq amta na in moq nagta haqiy. ⁶⁵Haqad mataw na gigo asor in Yesus tukusluw ug yaqay. Ad in tubusanib ame isihim wolad teq in bulon yaqay, Ni nantut iysun nog ninolaqta ka anan biy haq yaqay. Haqsa mataw tamaz emayta na gigo hurmey na in Yesus waqim tuwoltitay yaqaymo.Pita Yesus gileh ug ⁶⁶Ari in Yesus nazaq tonsa Pita bit asisuranib ossamo tamaz mat danmebta na ago kabibiy aw araq tubol. ⁶⁷Bolim Pita faq iterad ossa in ahol waninunadmo bulon, Ni Yesus Nasaret-ibta inaq luwta ham. ⁶⁸Haqan Pita bilam, Haiq ham. Ya ni gamuk bilaqaqta na inad a hi emaiq ham. Ni nog diq anan bilaqaq? ham. Haqad in asanib bit aqez ban le tugwahtim.[Gwahtiqsamo kurek araq tigayon.]⁶⁹An kabibiy aw na in Pita nab tursa ahol waqad in mataw nab turiyta na tigibilan, Mat ka in Yesus ago mat araq kawa ham. ⁷⁰Haqan Pita a ta bilam, Na ya a haiq ham. Haqan mataw in agerab turiyta na asitmo ta tur nog iyim bilaqiy, Helmo diq haqiy ni mat Galiliy-ibta iyim iyan ni Yesus ago mat araq daqag haqiy.⁷¹Haqan Pita atoranmo bilam, God ulilibta ibiysa ya helmo bilaqay ham. Ya mat na ago a hi huritta ne anan bilaqay ham. ⁷²Haqan kurek ame gigerta tigayon. Gayonanmo Pita in Yesus gamuk bilamta na anadin tiqam. Yesus bilam, Kurek ame gigerta a hi gayonsamo ni nime ezeqmanmo gileh tiyag daq ham. Pita gamuk na anadin emad in anad meqniysa gaqad tuqos.

15¹Ari tarommo diq mataw tamaz emayta gigo aseseqta na teq Juda gigo mataw marorta na teq mataw Moses ago gunun hurit kemiyta na teq Juda gigo kaunsel ayahta na amatawun bunmo in humab wolim an amugan tuwaziy. An amugan wazim in Yesus irqurim wazim ad lehim Rom gigo maror saw Judiya wamuzim osaqta anan Pailat haqay na tuqugiy. ²Ugan Pailat Yesus tisusumun ug, Ni Juda on mataw gigo king e? ham. Haqan Yesus bilam, Nawaqmo ni tibilam ham. ³Haqanmo mataw tamaz emayta gigo aseseqta na in Yesus amalib nan kabemmo tiqem yaqay.⁴Emsa Pailat in Yesus ta susumun ug, Ni gamuk araq amenin a hi em daq e? ham. Ni hurit ham. Mataw ko nan kabemmo nimalib tiqemayham. ⁵Haqan Yesus gamuk amenin araq diq a ta hi bilam. Nazaq iyan Pailat anad kabemmo emayaq.Pailat bilam, Yesus ayib dom woliy ham. ⁶Ari ulig bunmo Juda gigo lotu akaman ayahta nab Pailat in mat araq irquran ossa hasid gwahtiqyaqta. Juda on mataw nog anan bilaqid Pailat naqmo hasid in gigo hib lehyaqta ⁷Teq kam nab mat araq anan Barabas haqayta na irquran os. Mat na in Rom gimuznan haqad ago dauh nenaq lehim Rom ginolad in mataw asor ginol amta amatin. Nazaq iyan Rom in mat na wazim a le mataw giqirquran osayta na nenaq eman osta. ⁸Ari Juda mataw kabemmo Pailat agerab lehim tisusumun ugiy, Pailat ago daq muzeq mat araq bit giqirquean osaytab hasid gwahtiq daq haqad.⁹Susumun ugan Pailat in gigo gamuk amenin emim bilam, Ne ginad ya Juda gigo king na hasid ne gigo hib lehdaq e? ham. ¹⁰ Na ezaqgo Pailat anad tiqam, Yesus mataw tamaz emayta gigo aseseqta ka gibayan woqiyta na ago in gigem meqniysa in amalib nan emay ham. ¹¹Teq haiq. Mataw tamaz emayta gigo aseseqta na in mataw biyahta na gigem wazan eraqsa in Pailat buloniy. Ni Barabas hasid i gigerab bolan haqiy.¹²Haqan Pailat gibilan, Nazaq na teq mat ne anan bilaqay, Juda gigo king ka ya ezaq tondaiq? ham. ¹³Haqan in lileyim bilaqiy, Ayib dom wolid moqan haqiy.¹⁴Haqan Pailat bilam, Nagaqgo? ham. Mat ka naga daqin meqinta am? ham. Haqsa teq haiq. Mataw na dedibmo lileyim a ta bilaq toniy, Ayib dom woliy haqiy. ¹⁵Haqan Pailat in Juda mataw ginad emid dimniynan haqad in Barabas hasan in gigo hib tilah. Lehsa in ago mataw gibilenan in warig waqim hiklaquwim amalib Yesus tuwoltitayiy. Woltitayim hulosan Pailat in Yesus ayib dom wolgo haqad ago mataw bab emayta na gibenab tiqam.Rom gigo mataw bab emayta a Yesus bilawuniy¹⁶Ari mataw bab emayta na in Yesus waqin ad Pailat ago bitab lehi in bit aduganib ad tugwahtiqiy. Gwahtiqim in giyogniz bunmo gibilenan bo humab tuwoliy. ¹⁷Humab wolim in tubusan araq sisaqta kakaqta amalib Yesus ahol isihim teq in am araq asasuqin inaqta tal tonim king ago balaw nogta afaqinib emiy. ¹⁸Emim teq in eraqim Yesus buloneq bilaq yaqay, ni Juda gigo king-mo diq haq yaqay.¹⁹Haqad in tuqir araq waqim afaqin wolad tukusluw ug yaqay. Kusluw ugad in gibakbakan ulum laquwim turad bilaq yaqay, Mator haq yaqay i ni nibin tisorauq haq yaqay. ²⁰Ari in Yesus bilawunim hulosadmo in tubusan kakaqta na hasim waqad inmo ago tubusan na aholib ta em ugiy. Em ugim teq in ayib dom wolnan haqad waqim ad tilehiy.Mataw Yesus ayib dom woliy²¹Ari in Yesus waqim ad lehsa Aleksanda ayow Rufus inaq gimam Saimon uliq Sairin-ibta na in uliqab bolad luwsa bab mataw in abe yahad bulonan in Yesus ulumsihim ayon ay tisor ug, Yesus ago zaway tihiqiy bugan iyan.²²Sa bab mataw na in Yesus waqin garah akululqan araq anan Golgota haqaytab tilehiy. Gamuk Golgota n alulin 'Gifaqin Agolgolan' haqayta. ²³A lehim in wain ayun teq masil anan mir haqayta na inaq buliyim Yesus ugiy. Ugan teq haiq. Yesus tuhulos. ²⁴Anmo in Yesus ayib dom tuwoliy. Dom wolim hulosad teq in nog Yesus ago tubusan waqdaqta na ahol waqnan haqad in gig amikmikta hunegad tubusan nagan iberim giholyon tuwaqiy.²⁵Ari tarommo 9 kilok nazaq in Yesus ayib dom tuwoliy. ²⁶Teq Yesus naga daqin eman in ayib dom woliyta na agamukan in mar tonim ulilib ay nabmo tuqotheniy. Gamuk na in kazaq mar toniy. JUDA GIGO KING²⁷Teq Yesus agerab in mataw rin tonayta gigermo ayib dom giwoliymo. Dom wolan araq Yesus aben aqabun ban tursa araq aben anasaran ban turyaq. [²⁸Nazaq iyan daq na in gamuk araq God ago marib usaqta na in tuwolnet bug. Gamuk na bilam, In mat na anan mat gunun othasaqta araq haqiy ham.]²⁹Sa on mataw bo lehad in Yesus ahol waqad bilawun yaqay. Bilawunad gifaqin lelad teq in bilaq yaqay, Oyeq! haq yaqay. Mat Tempel wol inereq kam ezeqmanmo aduganib a ta eraqdaqta na amatin ni haq yaqay. ³⁰Nazaq iyan ni niwaz meqniyeq ninmo nihol ulumsiheq ay na huloseq gehitiq haq yaqay.³¹Sa mataw tamaz emayta gigo aseseqta na teq mataw Moses ago gunun hurit kemiyta na in nazaqmo Yesus bilawunad in an bulonim kazaq bilaq yaqay, In mataw asor gilumsihan a hi moqiyta haq yaqay. ³²Ari in Isrel gigo king anan Krais haqayta na iyeq teq in ay na huloseq gehitiqan haq yaqay. Gehitiqid teq i anan helmo tihaqam haq yaqay. Sa mataw giger Yesus inaq ayib dom woliyta na in inaqmo Yesus bilawun yaqaymo.Yesus mom ³³Ari zeq gabolim liqabmo tiqiysa saw bunmo romriq iyad le 3 kilok imisor tiqiy. ³⁴Ad 3 kilok imisor nazaq tiqiyanmo Yesus dedibmo lileyim bilam, Eloy Eloy lama sabaktaniy ham. Gamuk na in kazaq bilam, Yaqgo God yaqgo God nagaqgo ni ya ihulosaq? ham. ³⁵Haqan mataw asor nab turiyta na in Yesus aqez huritim bilaqiy, Huritiy haqiy. Ko in Elaija lilewunaq haqiy.³⁶Anmo mat araq sibim lehim tubusandek waqim tuqir amotnib am wazim teq in wain ayun agon iyta na ulum tirim Yesus ateb tiqam, in sisow daq haqad. Emim teq in bilam, Sa i ahol waqad teq. Elaija boleq walemid tiqdaq o haiq ham. ³⁷Haqan Yesus dedibmo ek tonim tumom. ³⁸Moqanmo tubusan ayahta Tempel-ib othenan usta na ulilib liqabmo tartayim giger iyim bo ogib tuwom.³⁹Teq bab mataw gigo ayahta saw nab Yesus wamuzim turad in Yesus nazaq moqsa ahol waqad bilam, Helmo diq ham. Mat ko in God atatin ham. ⁴⁰Sa on asor pesanmo turad teq in nagah na ahol waqad turiy. In gilikmanib Mariya uliq Magdala-ibta na teq Jems ayow Josep inaq ginen anan Mariya haqayta na teq aw araq anan Salome haqayta na in nab turiy. ⁴¹Kwaziqmo Yesus saw Galiliy-ib ossa on na in muzad ulumsihad luw yaqayta. Teq on kabemmo Yesus inaq Jerusalem-ub boliyta na in nab turiymo.Yesus moqan asan hodhodab a lehiy ⁴²-⁴³Ari kam Yesus momta na in Juda gigo lotu ayon nagah wastitayayta ba akamnib in momta. Babeq na Juda gigo lotu akaman diq na tugwahtiqdaqta. Nazaq iyan Yesus momta kam nab imisor tiqiysa uliq Arimatea-ib mat araq anan Josep haqayta na bolim Pailat ago hib tilah. Mat na in Juda gigo mat marorta araq teq in abin inaqta. In inaqmo God ago maror og kab gwahtiqsa in ahol waqnan haqad amen emyaqta. In awaz meqniyim lehim Yesus asan waqeq a le yay tongo Pailat tisusumun ug. ⁴⁴An Pailat in Yesus momta na huritim anadnad am. Anadnad emim in ago mat bab emaqta araq bulonan bolan in tisusumun ug, Yesus tumom e? ham. Haqan mat na bilam, Yesus tumom ham.⁴⁵Pailat in mat na gamuk bilaqan huritad teq in Josep bulon, Ari ni Yesus asan tuwaqdaq ham. ⁴⁶Haqan Josep le tubusan araq husta tizay. Zayim a lehim in Yesus asan walemim ogib eman usaq teq in tubusan husta na amalib tiqil ton. Il tonim a leh mataw gig qwayan hodhod iyta na amuganib tiqam. Nab emim teq in gig araq otbuliyan bo hodhod aqez tiqitum. ⁴⁷Sa Mariya uliq Magdala-ibta na ayow Josep ta araq na anan Mariya inaq in giger nab turad mat na Yesus asan hodhodab emsa in ahol tuwaqiy.

16¹Ari Juda gigo lotu akaman tihiqiyan Mariya uliq Magdala-ibta na teq Jems anen Mariya teq aw anan Salome haqayta na in nagah asor ahuran dimun diqta tizayiy, in hodhodab a leheq Yesus asanib emnan haqad. ²Zayim Sande taromo in hodhodab tilehiy.³Lehad in an bulonim bilaqiy, Nog teq i gilumsiheq hodhod aqez gig otbuliydaq? haqiy. ⁴Haqadmo in gime lehim hodhodab gig ayahta na tuqotbuliyan hodhod adek ban lehim ussa in ahol waqiy.⁵Ahol waqad in lehim hodhod amuganib gwahtiqimmo mat araq minminta aholib tubusa husta emim ossa in ahol waqiy. Ahol waqad in tirabiy. ⁶Rabsa mat na gibilan, Ne hi rabiy ham. Ya tuhurit ham. Ne Yesus Nasaret-ibta mataw ayib dom wolan momta naqmo ahol waqnan boliy ham. Mat na tiqeram ham. In kab haiq ham. In asan eman usta asawan ka ne ahol waqiy ham. ⁷Ad me leheq disaipel bunmo gibilenad ne Pita inaqmo buloniy ham. Yesus ameb Galiliy-ib tilehaq haqiy ham. Kwaziqmo in ne gibilanta nazaq haqad ne gibileniy ham.⁸Haqan on na gihol ritenim harara nemsa in hodhod hulosim gwahtiqim tukim tilehiy. Lehad in rab titayad mat araq a hi buloniy.Mariya uliq Magdala-ibta na Yesus ahol wam⁹Ari kam nab Sande tarommo Yesus hodhod hulosim in danmeb Mariya uliq Magdala-ibta na ago hib tugwahtim. Kwaziqmo Yesus in aw na ago bugaw meqinta 7 gimuzta. ¹⁰An teq Mariya lehim mataw Yesus inaq luwiyta na gaqad ginadnad emad ossa in gibilan, ¹¹Yesus hodhodab eraqim ossa ya ahol tuway ham. Haqan mataw na Mariya ago gamuk huritim anan helmo a hi haqiy.Disaipel gigermo danib Yesus ahol waqiy ¹²Abeb disaipel giger Jerusalem hulosim lehsa Yesus ahol awaqan lul araq diq iyim in gigerab gwahtim. ¹³Gwahtiqan giger na muleqim ta lehim disaipel ta asor na gibilenan in helmo a hi haqiymo.Yesus in ago disaipel kabiy nag ¹⁴An abeb disaipel 11 na didaq neqad ossa Yesus in gimeb gwahtim. Gwahtiqim in ginadad gibilan, Ne nagaqgo on mataw ya ibiyiyta na in bo ne gibilensa ne ginad soqotim ussa ya inan helmo a hi haqiy? ham. ¹⁵Haqad in gibilan, Ne og saw bunmo leheq ya iwagamun dimunta na on mataw gibileniy ham. ¹⁶Mat ya ihol awagamun anan helmo haqad yuw huzdaqta na God in mat na waqid ingo tiqiydaq ham. Ari mat ya inan helmo a hi haqdaqta na God in mat na emid saw meqintab tilehdaq ham.¹⁷Sa God in mataw ya inan helmo haq daqayta na gibenab daq kazaq tiqemdaq ham. In ya inanib bugaw meqinta tigimuz daqay ham. ¹⁸In nagah ahuliqnaqta ahol a hi waqeqmo wazid gimugid a hi moq daqay ham. Ad in nagah uluwim moqayta na ahol a hi waqeqmo ulweq a hi moq daqaymo ham. Teq in mat moqaqta aholib giben emeq wazsa mat na ago moq tihiqiydaq ham.God Yesus waqim ad Heven-ib tugwalah¹⁹Ari Iyahta Yesus gamuk na gibilen bugan tihiqiyan teq God in waqim ad Heven-ib tugwalah. Gwalehim eman in God aben aqabun ban tuqos wom. ²⁰Os woqim ossa in ago disaipel og saw bunmo lehad in Yesus awagamun dimunta na on mataw gibileneq gibileneq tileh yaqay. In nazaq emad luwsa Iyahta in nenaq kabiy tiqemyaqmo. Sa disaipel Yesus awagamun bilaqsa God inmo daq azawayin inaqta emsa on mataw ahol waqad bilaq yaqay, Wagam na in hel diqtaqmo haq yaqay.

Wasabamal: Bible for Mark

Formatted for Translators

Mark