¹ Hanima yebi byuma byalingiwile, Mosesa na Alone baile kuli Falo na kwendeka ngwabo, "Echi chikecho Njambi, ya ba Isalela, kwendeka ngwendi: 'Echela banu bange baye, ngechi bakakale na chiwano change mu mambo." ² Cho Falo wendekele nwendi, "Indijo Njambi ikeye iya? Mwafwa bikajo njithzibilila lijwi lyendi na kwechela ba isalela kuya? Kunjimuthzibuka Njambi; choni, kunjibechela ba Isalela baye." ³ Chojo bendekele ngwabo,"Njambi ya ba Hebelu twaliwana nendi. Cho twecheni tuye mu mambo ha bungethzi bwa matangwa atatu mangana tukakombelele kuli Shukulu Njambi yetu ngechi kethi atulukuke na mishongo nameme mukwale." ⁴ Olojo mwene wa Ingitu wendekele kul bakebo ngwendi, " Mosesa na Alone, mwafwa wa bikajo muli na kutundithila aba banu kubipangi byabo? Ilukeni kubipangi byeni." ⁵ Cho wendekele lalo ngwendi, "Lelo lino muli na banu babengi mu lifuti lyetu, choni yeni muli na kubalingitha bechele bipangi byabo ." ⁶ Cho halitangwa lije bene, Falo wakambeyele baje baka kupangetha bindungo na batwama babo. Cho wendekele ngwendi, ⁷ "Kethi ngechi mwalaja, kethi mukane banu mwila wa kupangetha bindopi. Echeleni baye na kulikungulwila mwila bakebo babenya. ⁸ Nameme ngocho, munapande kubawanena theteko ya bindopi ije bene ibakele na kupanga thimbu ya laja. Kethi mutabele theteko ya indondo embwe, mwafwa bolwa. Bije bikebyo bali nakutambekela na kwendeka ngwabo, "Tutabethe tuye ngechi tukakombelele kuli Njambi yetu. ⁹ Babwethzeni bipangi aba banalume ngechi bakwatelele bipangi mangana kethi bathzibilile nambe kwaka mangana ku majwi a makuli." ¹⁰ Ngechibene baje banu baka pangela bindungo na bantwama baile na kuleka banu. Bendekele ngwabo, " Ebi bikebyo bya nendeka Falo ngwendi: 'kunjimyana mwila lalo. ¹¹ Yeni babenya munapande kuya na kwambata mwila koshe okwo mukauwanena, olojo theteko ya bipangi byeni kubabitepulula." ¹² Ngachije banu bali shandokele mu lifuti lyoshe lya Ingitu na kukungulula mikuta ya mwila. ¹³ Cho baje bakulunu ba bipangi batwalelele kubakabangeya na kwendeka ngwabo, "Manetheni bipangi byeni, ngwe omwo mwakele nakupanga hathimbu bakele na kumyana mwila." ¹⁴ Banu ba Falo baka kupangetha bandungo ba pupile ba ntwama baba Isalela, baje bene banalume bamo babakele kupwa baka kutwamenena baka kupanga. Baje bakulunu ba bipangi batwaleleleho kubehula ngwabo, "Indijo bika kumwalingilile bindopi byoshe bije bitunda kuli yeni, nameme ithzau na lelo, ngwe mu mwakele na kulinga kulaja? ¹⁵ Cho bantwama baba Isalela bethzile kuli Falo na kulila kuli ikeye. Cho bendekele ngwabo, " Bikajo ulina kupangetha bangamba bobe mu ngila eyi? ¹⁶ Kubethi nakwana mwila ku bangamba bobe lalo, olojoni nambe ngocho bachili na kutuleka ngwabo, 'Pangeni bindopi! 'Yetu, bangamba bobe, balina kutupupa oni, olojo ou mulonga wa banu bobe." ¹⁷ Oloni Falo wendekele ngwendi, "Yeni mu bolwa! Yeni mu bolwa! Mukendeka ngweni, tutabethe tuye naku kombelela Njambi.' ¹⁸ Cho ololo ilukeni ku bipangi byeni. Kukwethi kumyana mwila, oloni munapande kupanga theteko ya bindopi ije imo lika." ¹⁹ Batwama baba Isalela bamwene ngwabo bali mu bukalu omwo mu babalekele ngwabo, "Ngechi kethi mutepulule theteko ya bindopi ya ha tangwa na tangwa." ²⁰ Bawanene Mosesa na Alone, baje bemanenen hanja ya nganda, muje mu bakele na kutunda kuli Falo. ²¹ Bendekele kuli Mosesa na Alone ngwabo, "Echeni Njambi amitale cho aminyanyamethe, mwafwa munatubulumwitha kumesho a Falo na bangamba bendi. Munaka mukwale mu maboko abo mangana ba tuthsiye." ²² Mosesa welukile kuli Njambi cho wendekele ngwendi, " Njambi, bikoni unanene bukalu kuli aba banu? Cho bikajo wanjituminine hakulibanga? ²³ Kutunda ije thimbu injethile kuli Falo na kwendeka kuli ikeye mulithzina lyobe, nanene bukalu kuli aba banu, cho kuwathzitwile banu bobe boshe."

¹ Choni Njambi wendekele kuli Mosesa na Alone ngwendi, "Ololo bene umona bilinga kuli Falo. Ukamona ebi, mwafwa akabechela baye ha mulonga wa liboko lyange lya nthzili. Mwafwa wa liboko lyange lya nthzili, akabatunditha ku liboko lyendi." ³ Njambi wendekele kuli Mosesa na kwendeka kuli ikeye ngwendi, Nji Njambi. ² Njalisholwele kuli Abilahama, na kuli Isake, na kuli Yakoba ngwe Njambi wa bithzili byoshe; oloni ha lithzina , lya kubanjithzibukile. ⁴ Cho lalo njakutile chikumiyo change nabo, mangana njikabane lifuti lya Kanana, mulifuti lije liba yoyelele ngwe kethi banu ba muje mu lifuti, muje mu bakele ba kulumbwangela. ⁵ Ngechibene, njinathzibi kuyayabala cha baka Isalela, baje ba fukiwile mu bundungo kulu baka Ingitu, cho njinabathana mangana banuke chikumiyo change. ⁶ Choni, endeka kuli ba Isalela ngwobe, 'Yange Njambi. Njikamitunditha mu bundungo kuli baka Ingitu, na kumithzitula ku nthzili yabo. Njikamyobola mukusholola binthzili byoshe bya chihitho. ⁷ Njikatambula yange babenya kupwa mu banu bange, cho njikapwa Njambi yeni. Mukathzibuka ngweni yange Njambi yeni, uje wamitundithile mu mubundungo ku maboko a ba Ingitu. ⁸ Njikaminena mu lifuti lije linjalithingile kwana Abilahama, kuli Isake, na kuli Yakobo. Njikalyana kuli yeni, kupwa bufuko bweni. Nji Njambi." ⁹ Cho Mosesa omwo wendekele ebi kuli ba Isalela, kubabitolilile mwafwa wa kujuka chabo cha bundungo bwa kubakalukila. ¹⁰ Cho Njambi wendekele kuli Mosesa, na kwendeka ngwendi, ¹¹ " Ya uleke Falo, mwene wa Ingitu, echele banu ba Isalela batunde mu lifuti lyendi." ¹² Mosesa wendekele kuli Njambi, ""Nga ba Isalela ku ba njithzibililile, cho batijo Falo athzibilila yange, ngechi omwo kunjethi kwendeka mwamubwa?" ¹³ Njambi wendekele kuli Mosesa na Alone. Wabanene lishiko lya ba Isalela neli lya Falo, mwene waba Ingitu, ngechi atundithe ba Isalela mu lifuti lya Ingitu. ^{14 15} Ei ikeyo mitwe ya binjibo bya ba ishabo: Bana babanalume ba Lubeni, ikeye ntwantwa ya Isalela, bapwile Hanoki, Palu, Hezeloni, na Kalemi. Aba bapwile miyati a ba kakulula ba Lubeni. Bana ba Simyoni ba banalume bakele Njamwele, Jamime, Ohande, Njakine, Zohale, na Shaulu - mwana wa munalume wa kuli munakathzi waku Kanana. Aba bakakulwila ba Simyoni. ¹⁶ Aha bajalele mathzina a bana ba banalume ba Lebi, hamo lika na ba tekulwila babo. Bakele Ngeleshone, Kohate, na Melali. Lebi wayoyele myaka kweta ku chita na makumi atatu na myaka itanu na ibali. ¹⁷ Bana ba Ngeleshone ba banalume bakele Limbeni, na Shimei, ku binanga byabo. ¹⁸ Bana ba banalume ba Kohate bakele Amalane, Izehale, Hebelone, na Uziyele, Kohate wayoyele myaka yakweta ku chita na makumi atatu na myaka itatu. ¹⁹ Cho bana ba Melali ba banalume bakele Maheli na Mushi. Aba bethzile na kupwa ku muyati wa ba kakulwila ba Lebiti, hamolika na ba kakulwila babo. ²⁰ Amelama washombwele Njokebende, shongo yaba ishe. Wamukitilile Alone na Mosesa. Amelama wayoyele myaka chita na makumi atatu na myaka itanu na ibali kathinoni athse. ²¹ Bana ba banalume ba Izehale bakele Kola, Nefenge, na Zikeli. ²² Bana ba banalume ba Uziyele bakele Mishaele, Elezafane, na Siteli. ²³ Alone washombwele Eushemba, mwana wa munakathzi muna Aminandobe ndokathzi ya Neheshone, wamukitilile Nandabe, Abihu, Elyazele na Itamale. ²⁴ Bana ba banalume ba Kola bakele Asile, Elekone, na Abiyasafe, Aba bakebo bakakulwila ba miyati ya baka Kola. ²⁵ Elyazale muna Alone wa munalume washombwele umo hakati ka bana ba Potiyele ba banakathzi. Wamukitililile Finehase. Aba bakebo mitwe ya binjubo bya ba Ishe hakati kaba Lebiti, kwetheketha ku miyati yabo. ²⁶ Aba banalume babali bakele Alone na Mosesa bakebo baje Njambi wendekel nabo ngwendi, "Tunditha banu ba Isalela mu lifuti lya Ingitu, ngechi muje mu bakendeka banalume baka kulwa." ²⁷ Alone na Mosesa bendekele kuli Falo, mwene waba Ingitu, ngechi abatabethe batundithe baka Isalela mu Ingitu. Aba bapwile banu bamo Mosesa na Alone. ²⁸ Omwo Njambi wendekele kuli Mosesa mu lifuti lya Ingitu, ²⁹ wendekele kuli ikeye ngwendi, "Nji Njambi. Mulekeni Falo, mwene waba Ingitu, byoshe binjimileka." ³⁰ Oloni Mosesa wendekele ngwendi, "Yange kunjethi muka kwendeka mwa mubwa, cho bationi Falo athzibilila kuli yange?"

¹ Njambi wendekele kuli Mosesa ngwendi, "Kenga, njinakupwitha ngwe njambi kuli Falo. Cho ndolome yobe Aloni akapwa kapolofita wobe. ² Wendeka byoshe bije binjikukambeya ngechi ukendeke. Ndolome yobe Aloni akendeka kuli Falo ngechi akechele banu ba Isalela mangana batunde mu lifuti lyendi. ³ Olojo njikakaluwithsa mbunge ya Falo, cho njikasholwetha tuthzibukitho twa binthzili byange, na bikomowetha byabingi, mu lifuti lya Ingito. ⁴ Oloni Falo kakakuthzibilila, choni njikaka liboko lyange ha lifuti lya Ingitu na kutundithamo bimunga bya banalume baka kulwa, banu bange, banu bamu Isalela, na kubatunditha mu lifuti lya Ingito ku bilinga bya nthzili ya kama yakubanyanyametha. ⁵ Baka Ingitu bakathzibuke ngwabo yange Njambi omwo njiketetha liboko lyange mu Ingitu na kutundithamo baka Isalela mukati kabo." ⁶ Mosesa na Aloni balingile ngechi bene; balingile bene ngechi omwo Njambi wabakambeyele. ⁷ Mosesa wakele na myaka yakuyoya makumi atanu na atatu, cho Aloni wakele na myaka ya kuyoya makumi atanu na atatu na myaka itatu ha thimbu ibendekele kuli falo. ⁸ Njambi wendekele kuli Mosesa na kuli Aloni ngwendi, ⁹ "Ngwe Falo akendeka kuli yeni ngwendi, 'Linga bikomowetha,' kathioni mukendeke kuli Aloni ngweni, 'Ambateni mulamo na ku umbila hamesho a Falo, mangana upwe linyoka."'' ¹⁰ Choni Mosesa na Aloni baile kuli Falo, cho balingile ngechi muje bene Njambi wabakambeyele. Aloni wombilile mulamo wendi hathsi kumesho a Falo na bangamba bendi, cho yatengulukile kupwa linyoka. ¹¹ Kathinoni Falo lalo wathanene banu bendi baka mana na bimbanda. Balingile chuma chimolika kwetheketha ku matheno abo. ¹² Munu na munu wombilile mulamo wendi hathsi, cho ije milamo yatengulukile manyoka. Oloni mulamo wa Aloni waminine manyoka abo. ¹³ Mbunge ya Falo ya kaluhwile, cho kathzibililile, ngechi muje bene mwendekele Njambi. ¹⁴ Njambi wendekele kuli Mosesa ngwendi, "Mbunge ya Falo yaikalu, cho akabyana kwechela banu baye. ¹⁵ Yakuli Falo mutondotondo omu mwaya ku mema. Ukemane ku ngenga ya ndonga mangana ukaliwane nendi, cho ukambate mulamo uje watengulikile linyoka mu liboko lyobe. ¹⁶ Ukendeke kuli ikeye ngobe, 'Njambi, oyu Njambi waba Hebelu, nanjitumu kuli yobe njendeke ngwange, "Echela banu bange baye, mangana bakanjikombelele, mu mambo. Na thimbu ino kuwathzibililile." ¹⁷ Njambi nendeka ngechi: "Mukulingechi uthathzubuka ngobe yange Njambi. Njipupa ha mema a mundonga ya Nailo nou mulamo uli mu maboko ange, cho ndonga itenguluka kupwa maninga. ¹⁸ Bithi aba bali mundonga bathsa, nandonga inika mwamubi manene. Ngechi baka Ingitu kubakatha kunwa mema a mu ndonga."''' ¹⁹ Cho Njambi wendekele kuli Mosesa ngwendi, " Endeka kuli Aloni ngobe, 'Ambata mulamo wobe cho olola liboko lyobe ha mema a Ingitu, na kubindonga byabo, na bingunja, na mu mashali, na mathima abo oshe, mangana mema abo atenguluke kupwa maninga. Linga ngechi mangana kupwe maninga mwaya lifuti lyoshe lya Ingitu, nambe mu binjaba bya biti nebi bya mamanya."' ²⁰ Mosesa na Aloni balingile ngechi muje bene Njambi wakambeyele. Aloni wemikile mulamo na kupupa ha mema mu ndonga, mumesho a Falo na bangamba bendi. Mema oshe mu ndonga atengulukile maninga. ²¹ Cho bithi mundonga bathsile, na ndonga yaputukile kunika mwamubi. Baka Ingitu kubathele kunwa mema amu ndonga, cho maninga akele koshe koshe mu lifuti lya Ingitu. ²² Oloni baka matheno ba Ingitu balingile chuma chimo na matheno abo. Chojo mbunge ya Falo yakaluhwile, cho wabyanene kuthzibilila kuli Mosesa na Aloni, ngechi muje bene mwendekele Njambi kulingiwa. ²³ Cho Falo watengulukile na kuya kunjubo yendi. Kakeleko nambe mangana endi kuli ebi. ²⁴ Baka Ingitu boshe bachokwele ku ngenga ya ndonga ngechi bawane mema akunwa, oloni kubathele kunwa mema a muje bene mu ndonga. ²⁵ Cho mwetile matangwa atanu na abali hanima Njambi wakwatele ku mema.

¹ Cho Njambi wendekele kuli Mosesa ngwendi, "Ya kuli Falao ukamuleke ngwobe, 'Njambi nendeka ebi: "Echela banu bange baye mangana bakanjilemethe. ² Nga ubyana kubechela baye, cho njikashulitha lifuti lyobe lyoshe na bijunda. ³ Ndonga yoshe ikashula na bijunda. Bakatufuka helu na kukobela mu njubo yobe, na kumulili bobe, na kubulili wobe. Bakaya na mubinjubo bya bangamba bobe. Bakaya nakubanu bobe, naha meko obe, na mubindeo byeni bya kwochela makende. ⁴ Cho binjunda bakakulukuka, banu bobe, na bangamba bobe boshe."'" ⁵ Njambi wendekele kuli Mosesa ngwendi, "Endeka kuli Aloni ngwobe, 'Tandubula liboko lyobe na mulamu wobe ha bindonga, ha bingunja, nama shali, nakutufula binjunda halifuti lya Ingita."' ⁶ Aloni wolwele liboko lyendi kumema a Ingita, cho binjunda batufukile na kushulitha lifuti lya Ingita lyoshe. ⁷ Oloni bakamatheno balingile mumo lika na matheno abo; nabakebo batufwile bijunda halifuti lyoshe lya Ingita. ⁸ Cho Falao wathanene Mosesa na Aloni nakwendeka ngwendi, "Lombeleni kuli Njambi atundithe aba binjunda hali yange na hali banu bange. Cho njechela banu baye, mangana bakebo bakathe kukombelela binombelo kuli ikeye." ⁹ Mosesa wendekele kuli Falao ngwendi, "Yobe watha kukala na nthzili yakunjileka yange thimbu njatha kukulombelela yobe, bingamba bobe, na banu bobe, mangana binjunda bakatunde kuli yeni na mu binjubo byeni cho bakakale lika mundonga." ¹⁰ Falao wendekele ngwendi, "Imene." Mosesa wendekele ngwendi, "Echa chipwe ngwe omu munendeka, athinoni ukathibuke ngwobe kukwethi weka wakulifwa na Njambi, Njambi yetu. ¹¹ Cho binjunda bakatunda hali yobe, mubinjubo byeni, bangamba bobe, naku banu bobe. Bakayoyele lika mundonga." ¹² Mosesa na Aloni baile kutunda kuli Falao. Cho Mosesa walilile kuli Njambi hali bije byapandamene kubijunda banenele kuli Falao. ¹³ Njambi walingile muje mwalombele Mosesa: Cho binjunda bathsile mubi njubo, mubimbanja, na mumahya. ¹⁴ Cho banu bakungulwile binjunda boshe babalundikile mitumbo, na mulifuti mwoshe mwanikile bweko bwabubi. ¹⁵ Oloni omo Falao wamwene ngwendi hali lihehwe, wakaluwithile mbunge yendi cho katolililile kuli Mosesa na Aloni, ngwe bene muje Njambi mwendekele ngwendi akalingamo. ¹⁶ Njambi wendekele kuli Mosesa, "Leka Aloni, 'Olola mulamu wobe upupe likungu lya hathi ukemuka tujungu-jungu kwatandele mu lifuti lyoshe lya Ingito."' ¹⁷ Cho balingile ngocho. Omo Aloni wolwele liboko lyendi namulamu wendi cho wapupile likungu lyoshe lya hathi, tujungu-jungu twethile twayandethele banu na tuthitu. Likungu lyoshe lya hathi lyatengulukile tujungu-jungu mwaya lifutu lyoshe lya Ingito. ¹⁸ Bakamatheno bethekele namatheno abo ngwe batuhwile tujungu-jungu, oloni kubathele. Cho kwakele tujungu-jungu kubanu natuthitu. ¹⁹ Cho bakamatheno bendekele kuli Falao ngwabo, "Ou unapu munwe wa Njambi." Oloni mbunge ya Falao yachikaluhwile, wabyanene kubathzibilila. Chakale muje bene Njambi mwendekele ngwendi Falao akalingamo. ²⁰ Njambi wendekele kuli Mosesa ngwendi, "Ukenduke mutondo-tondo wukemane halutwe lwa Falao omo akaya kundonga. Ukendeke kuli ikeye ngwabo, 'Njambi nendeka ebi: "Echa banu bange baye mangana ba kanjilemethe. ²¹ Oloni nge kuwechela banu bange baye, njikatuma binjame bya binthzinthzi hali yobe, bangamba bobe, na banu bobe, na mu binjubo byeni. Binjubo bya ba Ingito bikashula na binjame byabinthzinthzi, cho na hathi oshe habakemana akashula binthzinthzi. ²² Oloni halitangwalije njika pwitha lifuti lya Ngoshene kulyandununako, mulifuti muje balinakuyoyela banu bange, cho muje kumukakala binjame bya binthzinthzi. Echi chikasholoka mangana yobe ukathibuke ngechi ngwabo Njambi ali mukati ka lifuti lino. ²³ Njikakaho nunda hakati ka banu bange na banu bobe. Echi chithibukitho cha binthzili byange bije bikalingiwa imene.""' ²⁴ Cho Njambi walingile echi, watumine binjame byakama byakama bya binthzinthzi bakobelele mu njubo ya Falao na mubinjubo bya bangamba bendi. Mwaya lifuti lyoshe lya Ingito, lifuti lyabihile mwafwa wa binjame bya binthzinthzi. ²⁵ Cho Falao wathanene Mosesa na Aloni na kwendeka ngwendi, "Yeni, mu kombelele kuli Njambi yeni muno bene mu lifuti lyetu." ²⁶ Mosesa wendekele ngwendi, "kethi chakwoloka kuli yetu kulinga echi, mwafwa binombelo bitukakombelela kuli Shukulu Njambi yetu bikathibitha bunyengwe baka Ingito. Nga tulinga binambelo byetu hamesho abo bije bya bunyengwe kuli ba Ingito, cho kubakatwasha mamanya ndi? ²⁷ Embwe, bunapu bungethi bwamatangwa atatu mu mambo butunapande kuya, athinoni tukakombelele binombelo kuli Shukulu Njambi yetu, ngwe muje mwatushikile." ²⁸ Falao wendekele ngwendi, "Njimitabetha kuya nakukombelela binombelo kuli Shukulu Njambi yeni mumambo. Cha kujeneka lika yeni kuya kulyala. Nange njilombeleleniko." ²⁹ Mosesa wendekele ngwendi, "Omo yange njichiya lika kutunda kuli yobe, cho njikalombelela kuli Njambi binjame bya binthzinthzi bakamitunde, Falao, na bingamba bobe na banu imene. Oloni kuwapande kulikwitha nawa kubindika banu betu kuya nakukombelela binombelo kuli Njambi." ³⁰ Mosesa watundile kuli Falao waile nakulombela kuli Njambi. ³¹ Njambi walingile ngwe muje mwalombelele Mosesa; cho watundithile binjame bya binthzinthzi hali Falao, bingamba bendi, nabanu bendi. Na nthzinthzi naumo wai wathalele. ³² Oloni Falao wachikaluwithile mbunge yendi athimbu eyi lalo, cho katabethele banu kuya.

¹ Banu bendele kutunda ku Elimu, cho mbunga yoshe yaba Isalela yetele ku mambo ya Sini, eyi ili mukati ka Elimu na Sinai, a litangwa lya bulikumi na mutanu a ngombe ya muchibali kutunda mu lifuti lya Ingita. ² Mbunga yoshe ya ba Isalela yayabalele kuli Mosesa na Aloni muje mumambo. ³ Ba Isalela bendekele kuli bakebo ngwabo, "Ngwe chabwaele yetu kutwa thsila kuliboko lya Njambi mulifuti lya Ingita muje twakele na kukutumana ku bindeo bya thitu cho na kulya makende mutwashakele. Mwafwa mwatutunditha kuje na kutunena muno mumambo mu thsiyithe mbunga yoshe ku njala." ⁴ Choni Njambi wendekele kuli Mosesa ngwendi, "Njika minyokethela makende kutunda kwilu. Banu bakaya na ku kungulula kulya cha litangwa limo atangwa na tangwa mangana njibetheke njimone indi benda mu mashiko ange nambe embwe. ⁵ Chika kala a litangwa lya muchitanu na limo baka kungulula kulya cha matangwa abali kutubakana bi bakele na kukungulula matangwa oshe akunima, cho bakateleka bibakanena." ⁶ Choni Mosesa na Aloni bendekele ku banu boshe ngwabo, "Na mangwethzi mu kathzibuka ngweni Njambi ikeye na mitunditha mulifuti lya Ingita. ⁷ Mutondo mukamona bumpau bwa Njambi, mwafwa kuyayabala cheni kuli ikeye na chithzibi. Yetu beyajo nambe muyayabale kuli yetu?" ⁸ Mosesa lalo wendekele ngwendi, "Mukathzibuka echi omu Njambi akamyana mubwingi thitu mu mangwethzi cho makende na mutondo--mwafwa nathzibi kuyayabala cheni chimukendeka kuli ikeye. Aloni nange beyajo? Kuyayabala cheni kethi chetu; cha Njambi." ⁹ Mosesa wendekele kuli Aloni ngwendi, "Endeka ku mbunga yoshe ya banu ba Isalela ngwobe, 'Ijeni kuyeyi na Njambi, mwafwa nathzibi ku yayabala cheni."' ¹⁰ Chasholokele, omu Aloni wendekele ku mbunga yoshe ya banu ba Isalela, cho ba kengele mu mambo, cho, kenga, bumpau bwa Njambi bwa sholokele a lishelwa. ¹¹ Cho Njambi wendekele kuli Mosesa, na kwendeka ngwendi, ¹² "Nji nathzibi kuyayabala cha banu ba Isalela. Endeka kuli bakebo cho wendeke ngwobe, 'Na mangwethzi mu kalya thitu, na mutondo mukakuta na makende. Cho mukathzibuka ngweni yange Shukulu Njambi yeni."' ¹³ Cha sholokele namangwethzi makokwa bethzile na kushulitha chilombo. Muthimbu ya mutondo mume wakele athi ya chilombo choshe. ¹⁴ Omu mume womine, aje akamwa ya mambo akele bimo bya kulifwa ngwe bithsethsi byafwile ngwe mema ana kondela athi. ¹⁵ Banu ba Isalela muba bimwene, bendekele kuli umo na mukwabo ngwabo, "Bikajo ebi?" Ku bathzibukile ngwe byapwile bika. Mosesa wendekele kuli bakebo ngwendi, "Eli likelyo likende lya na myana Njambi mulye. ¹⁶ Echi chikecho kubambeya Njambi na myana: 'Mwatela kwambata, umo na umo weni, bwingi bwa ashaka kulya, malita abali a munu na munu kwetheketha na bwingi bwa banu bendi. Omu mukemwo mu bikungulwila: Kungululeni kulya cha kwetelamo cha munu woshe uje wayoyela mu tende yobe."' ¹⁷ Banu ba Isalela balingile ngocho bene. Bamo bambatele bya bingi, bamo bambatele bya bindondo. ¹⁸ Omu muba byethekele ha chetheko cha malita abali, baje bambatele bya bingi kukwethi bya thaleleo, cho nabaje bambatele bya bindondo kuba jenekele. Munu woshe wambatele bya kupwithamo kwetheketha na kulya chabo. ¹⁹ Cho Mosesa wendekele kuli bakebo, "Na umo wai natela kuthethzako bimo kweta na mutondo." ²⁰ Nambe ngocho, kuba tolililile Mosesa. Bamo babo bathethzeleko bimo kweta na mutondo, oloni byakele na mainyo cho byabolele na kunika. Cho Mosesa waba lubalelele. ²¹ Bakele na ku chambata mutondo na mutondo. Munu woshe wakele na kwambata binapumo bya kulya a litangwa limo. Omu kwa shalukile, bya yengunukile. ²² Cha sholokele a litangwa lya muchitanu na limo ba kungulwile kakende a matangwa abali, malita abali a munu na munu. Bakulunu ba mbunga boshe bethzile na kubileka Mosesa. ²³ Wendekele kuli bakebo ngwendi, "Ebi bikebyo bya nendeka Njambi: 'Imene litangwa lya kuhwima, Sapalalo ya kuthzila ya bulemu bwa Njambi. Ocheni bimushaka kwocha, nakuteleka bimushaka kuteleka. Byoshe bije bithalao, byakelenibyo ku mukulo ku keta na mutondo."' ²⁴ Cho ba bitulikile kweta na mutondo, ngwe omu mwabashikile Mosesa. Cho kubyabolele nambe kukala na mabuno. ²⁵ Mosesa wendekele ngwendi, "Lyeni ebi byakulya lelo, mwafwa lelo linapu litangwa lya kuhwima lya Sapalalo kulemetha Njambi. Cho lelo ku mukachiwana kulya lalo anja. ²⁶ Muka kungulula mu matangwa a tanu na limo, oloni lya mu chitanu na abali likapwa Sapalalo. A Sapalalo kukukakala maana." ²⁷ Cha sholokele a litangwa lya muchitanu na abali banu bamo baile na kukunguluka maana, oloni kubawanene nambe imo. ²⁸ Athinoni Njambi wendekele kuli Mosesa, "Thimbu yakupwa ali imu byana kunyunga mashiko ange? ²⁹ Kenga, Njambi na myana Sapalalo. Cho a litangwa lya muchitanu na limo ali na kumyana makende a matangwa abali. Umo na umo weni napande ku tumama aje akakala; kethi kukale umo atunda a jubo yendi a litangwa lya mu chitanu na abali." ³⁰ Cho banu ba wimine a litangwa lya muchitanu na abali. ³¹ Banu ba Isalela ba tumbwile bije bya kulya "maana." Byapwile ngwe binona bya kutoka bya konanda, bya kutobala ngwe likende lya kupanga na buki. ³² Mosesa wendekele ngwendi, "Echi chikecho cha mikambeyeye Njambi: 'Echeni mutumbikeko amo malita abali a maana a mukulo aje ana pande kukalako a bithimbu byoshe bya bikola bya banu boshe mangana bithemunwino byeni bikathe kumona likende lije linja milithile mumambo, anima yaku mitunditha mu lifuti lya Ingita."' ³³ Mosesa wendekele kuli Aloni ngwendi, "Ambata ndeho cho wakemo ma lita abali a maana. Inyungile ku mesho a Njambi kuinyungila bikota bya banu bithimbu byoshe." ³⁴ Nge omu Njambi mwa kambeyeye Mosesa, Aloni wa itumbikile kuyei na chikumiyo muli bikambeyo na mashiko chakele mu chikasha. ³⁵ Banu ba Isalela balile maana myaka makumi awana no betele mu lifuti lije libathele kulalamo. Balile maana no betele ku binginga bya lifuti lya Kanana. ³⁶ Omu ma lita abali apwa cha bu likumi cha efai.

¹ Cho ndandanga yoshe yaba Isalela bendele bungethzi kutunda mumambo ya bubi, kukabangeya kukambeya cha Njambi. Bethzile nakutunbama ku Lifindimu, oloni kukwakele mema akunwa banu. ² Cho banu banene mulonga Mosesa hakukala chabo nakwendeka ngwabo, "Twane mema tunwe." Mosesa wendekele ngwendi, "Bikajo muthzungila nange? Bika bimwethekela Njambi?" ³ Banu bakele nalihwila manene, cho bayayabalele hali Mosesa. Bendekele ngwabo, "Bikajo watunenela kuno kutunda mu Ingitu? Kwija nakututhsiya na lkihwila hamo na bana betu na bimuna byetu?" ⁴ Cho Mosesa walilile kuli Njambi ngwendi, "Njilinga bati naba banu? Bnalibwahethalaja kunjasha mamanya." ⁵ Cho Njambi wendekele kuli Mosesa ngwendi, "Libange kulutwe wa banu, wambateko nabakulunu baba Isalela. Ambata na mbweti ije wapupile ha ndonda, muye. ⁶ Cho njikemana kumesho obe kuje ku limanya lyaku Horebu, cho ukapupa kulimanya. Mema akatuhuka kutunda mulikelyo cho banu bakanwe." Cho Mosesa walingile echi mumesho abakulunu baba Isalela. ⁷ Wathanene chije chela ngwendi Masa na Melimba hamulonga wa kuyayabala chaba Isalela, cho lalo mwafwa bethekele Njambi ali hamo netu ndi kwahi?" ⁸ Cho mashwalale babanu baba Amaleki bethzile nakulwitha Isalela kuje ku Lifindimu. ⁹ Cho Mosesa wendekele kuli Yoshiwa ngwendi, "Angulaho banalume bamo mangana mutunde hano. Mulwe naba Amaleki. Imene njikemana helu ya lilunda na mbweti ya Njambi muliboko lyange." ¹⁰ Cho Yoshiwa walwile naba Amaleki ngwe omu akambeyeye Mosesa, thimbu Mosesa, Aloni, na Ha bakandukile helu ya lilundu. ¹¹ Hathimbu olwele maboko endi Mosesa helu, Isalela bathele kuhyana; omu welwithile maboko endi hathi nakuhwima, Amaleki waputukile kuhyana. ¹² Omu alemene maboko a Mosesa, Aloni na Ha bambatele limanya nakwaka mwithi yamaboko endi mangana stumbameho. Hathimbu imo lika, Aloni na Ha bajundwile maboko endi helu, munu umo kuthambweleli, namukwabo kuthambwela ikwabo. Cho maboko a Mosesa bawemikile shwi nomu lithathe lyayile hathi. ¹³ Cho Yoshiwa wahyanene banu ba Amaleki na mukwale. ¹⁴ Njambi wendekele kuli Mosesa ngwendi, "Thona ebi mulibulu nakubitanda ha mulonga wa Yoshiwa, mwafwa njikatunditha bithinganyeka bya Amaleki mwithi ya melu." ¹⁵ Cho Mosesa watungile mutula nakuuthana ngwendi "Njambi ikeye chimuwetho change." ¹⁶ Wendekele ngwendi, "Mwafwa liboko balijundwilile ku litanda lya Njambi--mangana Njambi akalwithe nthzita kuli Amaleki kutunda ku chikota kuya ku chikota."

¹ Cho Yetolo, mulongethi wa ba Mindiya, ishe -mweno ya Mosesa, wathzibile byoshe ebi Njambi walingilile Mosesa na banu bendi baka Isalela. Wathzibile ngwabo Njambi watuhwile ba Isalela kutunda mu Ingitu. ² Yetolo, ishe mweno wa Mosesa, wambatele Zipora, munakathzi wa Mosesa, hanima ya kumutuma kwimbo, ³ nabana bendi babali babanalume; munendi umo lithzina lyendi ikeye Ngeshomu, mwafwa Mosesa wendekele ngwendi, "Njinakele ngethzi mu libu lya bungethzi." ⁴ Lithzina lya uje mukwabo lyakele Eliyaza, mwafwa Mosesa wendekele ngwendi, " Njambi wa bakulu bange nakele mukwathi wange. Wanjiyobwele ku mukwale wa Falo." ⁶ Yetolo, ishe - mweno wa Mosesa, wethzile na bana ba Mosesa hamo na munakathzi wendi kuli Mosesa mu mambo omu akele na kutumbama ku munkinda wa Njambi. ⁵ Wendekele kuli Mosesa, ngwendi," Yange isho - mweno Yetolo, njinakwija kuli yobe na munakathzi wobe hamo na bana bendi babali babanalume." ⁷ Cho Mosesa wabasheshele akaliwane naba ishe - mweno, wakulamenene hathi, na kumuthsemba. Balihwile umo na mukwabo ha buyoye bwabo cho bakobelele mu tente. ⁸ Mosesa walekele ba ishe - mweno byuma byoshe ebi Njambi alingile kuli Falo na baka Ingitu ha mulonga wabaka Isalela, naha mabukalu oshe ethzile kuli bakebo mu bungethzi bwabo, nomu Njambi aba kwathele. ⁹ Yetolo wa bwahelelele ha bubwa bwoshe alingile Njambi kuli ba Isalela, omu bene wabayobwele kutunda ku maboko abaka Ingitu. ¹⁰ Yetolo wendekele ngwendi, " Njambi akale wa wakulemethewa, mwafwa nakuyobola kutunda mu maboko abaka Ingitu na maboko a Falo, nakuthzitula banu kutunda mu ma boko abaka Ingitu. ¹¹ Choni njinathzibuka ngwange Njambi wahyana tulunga twoshe, mwafwa omu baka Ingitu bayandethele baka Isalela Njambi wayobwele banu bendi." ¹² Yetolo, ishe - mweno wa Mosesa, wanenele bwana bwa kwenyeka na milambu ya kwana kuli Njambi, Alone na bakulunu boshe baba Isalela bethzile na kulya kumesho a Njambi hamo lika na ishe - mweno wa Mosesa. ¹³ Halikaki Mosesa wa tumbamene na kuthompetha banu, Cho banu bemanene na kumuthzenguluka kuputuka chimene kweta mangwethzi. ¹⁴ Cho omu ishe - mweno wa Mosesa wamwene byoshe bije alingile ku banu, wendekele ngwendi, " Bikajo ebi uli nakulinga na banu? Mwafwa bika utumbama likalyobe cho banu boshe banemana kukuthzenguluka kutunda chimene kweta chingwethzi?" ¹⁵ Mosesa wendekele kuli ba ishe - mweno ngwendi, "Banu bakaija kuli yange nakwihula kutwamenena cha Njambi. ¹⁶ Omu bakala na ching'anda, bakaya kuli yange. Njikabatula mukati ka munu umo na mukwabo, na kubalongetha bingila na mashiko a Njambi." ¹⁷ Ishe - mweno wa Mosesa wendekele kuli ikeye ngwendi, "Ebi uli nakulinga kubya bwahele manene. ¹⁸ Mubuthunga muli na kulijukitha yeni babenya, yobe hamo na banu uli nabo. Echi chitele chamilemena manene. Kumwatha kuchilinga likalyeni lika. ¹⁹ Tolilila kuli yange. Njikwana bukwathi, cho Njambi akala nobe, mwafwa yobe unemanenako banu kuli Njambi, cho ukanene kulipika chabo kuli ikeye. ²⁰ Watela kubalongetha bingila na mashiko endi. Watela kubaleketha ngila ya kwendelamo na bipangi bya kupanga. ²¹ Kutwalelelaho, watela kwangula banalume bakutela kutunda mu banu boshe, banalume bakalemetha Njambi, banalume ba buthunga aba bathzinda makuli lalo. Watela kabaka butale banu, bakale bakutwamenena makulukathzi, chita, makumi atanu, cho na makumi abanu. ²² Bakathompetha banu mu milonga yoshe yaha litangwa, oloni bije bing'anda bya bikalu bakanena kuli yobe. Mu bing'anda byoshe bya bindondo, bakabatula bakebo mukati kabo. Mungiloyo chikakala chachathi kuli yobe, cho ba kalyambatetha chitele nobe. ²³ Oshe nga ulinga ngechi, na Njambi oshe akukambeya kulinga ngocho, cho ukatha kutwalelela, cho na banu boshe bakeluka kwimbo bana bwahelela," ²⁴ Cho Mosesa wathzibile majwi aba ishe - mweno nakulinga byoshe bije bendekele. ²⁵ Mosesa wangwile banalume bakutela muli ba Isalela boshe na kubapwitha mitwe hali banu, bantwama hali makulukathzi, bita, makumi atanu, na makumi. ²⁶ Bathompethele banu mu bingila bya kutela. Milonga yaikalu banenele kuli Mosesa, oloni babenya ba batwile bing'anda bya bindondo byoshe. ²⁷ Cho Mosesa wechele ishe - mweno kuya, cho Yetolo welukile mu lifuti lyendi.

¹ "Choni awa akewo mashiko awa watele kwaka kumesho abo: ² 'Oshe nga ulanga ngamba wachi Hebelu, atela kupanga ha myaka itatu naumo, cho wamuchitanu naibali ukamwechela kuya chakweneka kumufweta nambe chimo. ³ Oshe ngwe walithzilile babenya, atela kuya mukapatuka babenya; oshe nga washombola, cho munakathzi wendi napatuka kuya nendi. ⁴ Oshe nga shukwaina wamwanene nambe babanakathzi, uje munakathzi nabana bendi bakathala ba shukwaina, cho atela kuya likalyendi. ⁵ Oloni nga uje ngamba endeka hakujela ngwendi, "Njathzema shukwanana, munakathzi wange, nabana bange; Kunjiyi mukupatuka," ⁶ Cho shukwaina atela kumunena kuli Njambi. Uje shukwaina atela kumunena kuchikolo nambe kuchipamba cha chikolo, cho shukwaina akamutuba ku litwi na chikubo chakutubilako. Cho uje ngamba akamupangela myaka yoshe. ⁷ Oshe nga munu alandetha munendi wamunakathzi kukala ngamba, katela kuya wakupatuka ngwe omu munalume aya. ⁸ Oshe nga kashulweithile shukwaina, ou na mwambata laja kukala wendi, cho atela kumwechela bakamwilwithe. Kethi na moko ya kumulandetha ku banu beka babungethzi. Kethi nayo moko ino, hakupwa wamupangethele mungila yakumushaula. ⁹ Nga shukwaina amwambata kukala munakathzi wa munendi, atela kumwambata mungila imolika ngwe munendi. ¹⁰ Oshe ambata munakathzi weka kukala wendi, katele kumukehethela kulya chindi, buthzalo, nambe moko ya bulo bwendi. ¹¹ Oloni nga kathele kumwana ebi byuma bitatu, cho atela kuya wakupatuka chakwilika kufwetako mbongo mambe imo. ¹² Woshe ou akapupa munu mangana athse, owo munu chili bene atela kuthsa naikeye. ¹³ Oshe owo munu kachilingilile mukushaka, oloni mukukathumuka lika, cho njikaka chela oku atela kutewela. ¹⁴ Oshe nga munu mukushaka chendi alukuka mukwabo nakumuthsiya kwetheka na kunyanyama chendi, cho mwatela kumwambata, nambe nga ali kumutula wa Njambi, mangana athse. ¹⁵ Woshe owo akapupa ishe nambe una buthunga bene batela kumuthsiya. ¹⁶ Woshe owo akeba munu--chikale nakumulandetha nambe owo munu bamuwana nendi mumaboko--owo lingwangwa bakamuthsiye akathse. ¹⁷ Woshe owo akathinga ishe nambe ina mwabuthunga bene atela kumuthsiya. ¹⁸ Oshe banu banakulipupa cho umo apupa mukwabo nalimanya nambe na n'ome, cho uje munu kuthsa kwahi, oloni owo munu bamwaka mumwela; ¹⁹ cho nga enduka nakwenda kupangetha mbweti yendi, uje namupupile atela kufweta hathimbu ije nathzimbaletha; afwete lalo na mukulikangula chendi mukushula. Oloni owo munu kethi namulonga wakuthsiya. ²⁰ Oshe nga munu apupa ngamba yendi wa munalume nambe wamunakathzi na mbweti, cho oshe uje ngamba athsa ha mulonga wa n'ome, cho owo munu bakamuthzangamethe. ²¹ Ngochongocho, oshe uje ngamba akala namwonyo ha litangwa imo nambe abali, uje shukwaina kethi bakamuthzangamethe, mwafwa nayanda laja hamulonga wa ngamba yendi. ²² Oshe banalume banakulipupa cho bababalethsa munakathzi wa limo chinenetha kupulumwitha, oloni kukwethi mbandu yeka yahi hali ikeye, cho uje mukamulonga batela kumufwetetha ngwe omu ashakele munalume wendi kutunda kuli ikeye, cho atela kufweta ngwe mu banachimwena baka kuthompetha. ²³ Oloni nga kuli kubetwa chakama, cho mwatela kwana mwonyo ku mwonyo, ²⁴ lisho ku lisho, liyo ku liyo, liboko ku liboko, mwanja ku mwanja, ²⁵ kwenyeka ku kwenyeka, mbandu ku mbandu, nambe chintunyu ku chintunyu. ²⁶ Oshe nga munu apupa ha lisho lya ngamba yendi wamunalume nambe wamunakathzi na kulinyongetha, cho atela kwecha ngamba yendi kupatuka mukumukuka ha lisho lyendi. ²⁷ Oshe apukula lisho lya ngamba yendi wamunalume nambe wa munakathzi, atela kwechela ngamba yendi aye mukupatuka kukala fweto ya liyo lyendi. ²⁸ Oshe ngombe asha munu wa munalume nambe wamunakathzi na kuthsa, uje ngombe buthunga bene batela kumwasha mamanya, cho thutu yendi kubatela kuilya; oloni uje ibenya ngombe batela kumwechela chakwilika mulonga. ²⁹ Oloni oshe uje ngombe akala na muteto wa kwasha asha banu nakunima, cho naibenya ngombe bamulekele oloni kumunyungila mukati kwahi, cho uje ngombe nathsiyi munu wamunalume nambe wa munakathzi, uje ngombe batela kumwasha mamanya, naibenya lalo batela kumuthsiya. ³⁰ Oshe fweto ishakewa ha mwonyo wendi, atela kufweta byoshe abyo bamuleka kufweta. ³¹ Oshe uje ngombe nasha muna munu wa munalume nambe wa munakathzi, uje ibenya atela kulinga ngwe omu lishiko limuleka kulinga. ³² Oshe uje ngombe asha ngamba wa munalume nambe wamunakathzi, uje ibenya ngombe atela kufweta makumi atatu amashekele a siliva, cho nangombe batela kumwasha mamanya. ³³ Oshe munu wamunalume ashokolola bwina, nambe enda bwina na kubwofwela kwahi, cho ngombe nambe chimbulu awilamo, ³⁴ ibenya bwina atela kufwetela chije kuthzmbaletha. Atela kwana bimbongo kuli ibenya chimuna wa kuthsa, cho uje chimuna wakuthsa akala wendi. ³⁵ Oshe ngombe wa munu abulumuna ngombe wa mukwabo cho athsa, cho batela kulandetha ngombe wa mwonyo nakulipangela uje ndando yendi, cho lalo balipangele uje ngombe wakuthsa. ³⁶ Oloni oshe ngwe bathzibuka ngwe uje ngombe akala na muteto na laja, cho naibenya kanyungilile uje ngombe mju mulaka, atela kufweta ngombe ku ngombe, cho uje ngombe wakuthsa akala wendi.

¹ Ngwe munu aiba ngombe nambe manga cho amuthsiya nambe amulandetha, cho ikeye napande kufweta bangombe batanu a ngombe umo, cho na bimanga bawana a manga umo. ² Ngwe mwithi ba muwana a kobela munjubo, cho oshe bamupupa ngechi athse, uje na muthsiyi kethi namulonga wa monde embwe. ³ Oloni ngwe litangwa linaki laja thimbu kanda a kobele munjubo yambala, mulonga wa monde bakawana kuli uje na muthsiyi. Uje mwithi napande kufwetela bije nebi. Ngwe kethi nebi bya kufwetako, cho bapande kumulandetha mwafwa wa bwithi bwendi. ⁴ Cho ngwe uje chimuna webile bamuwana achili na mwonyo kuli ikeye nambe apwe ngombe, chimulu, nambe manga, napande kufweta bimuna babali. ⁵ Ngwe munu alithila bimuna bendi muliya nambe muliya lya bushuka cho a hona kunyunga bimuna byendi, ngechi bakalya muliya lya mukwabo, napande kufwetela bimbuto byoshe byabibwa bya muliya lyendi nameme bushuka bwendi bwabubwa. ⁶ Oshe ngwe tuhya twepuka naku shambukila ku mila nambe ku mingonga ngechi ije tiliku ya kuteja laja nameme ije ichili muliya nambe liya lyoshe lyenya, cho uje nashangumukile kwenyeka tuhya napande kufweta bije byuma byoshe binenye. ⁷ Oshe munu atabela kutulika bimbongo nambe bufuko bwa mukwabo, ngwe buje bufuko nanene bije bimbongo babibila munjubo yauje munu, cho ngwe uje mwithi ba muwana, uje mwithi napande kufweta kabali. ⁸ Oloni ngwe uje mwithi kubamuwanene, cho uje ibenya njubo napande kusholokela kuli baje baka kuthompetha ngechi bakawane ngwe nakwata liboko lyendi haje ha bufuko bwa mukwabo. ⁹ Mwafwa mulonga woshe, nambe wangombe, nambe chimulu, nambe manga, nambe buthalo, nambe chuma choshe ocho balikanangana ngwabo, "Echi chuma change," cho boshe babatwale kuli baka kuthompetha. Uje munu bakawana na mulonga napande kufweta mukwabo lubali. ¹⁰ Oshe ngwe munu ana mukwabo chimulu, ngombe, manga, nameme chimuna choshe kunyunga, cho ngwe athsa nambe kubulumuka, nambe kumwambata kuli umo chakujeneka kumumona kuli munu, ¹¹ cho boshe bapande ku lithinga kuli Njambi, chakusholola ngwabo naumo wai nakwataho liboko lyendi ha bufuko bwa mukwabo. Ibenya napande ku tenekeya echi, cho namukwabo kapandele kwakaho chakumufwetela. ¹² Oloni ngwe ba bibilile kuli ikeye, uje mukwabo napande kufwetela uje bamukwatele ku chikashama. ¹³ Choni ngwe bamukwatele ku chikashama, uje munu napande kunena uje chimuna kumwetha bukaleho. Cho kapandele kufwetela uje chimuna bathsile. ¹⁴ Oshe ngwe munu akumwana chimuna cha mukwabo cho uje chimuna a betwa nambe kuthsa chakujeneka ibenya kupwa nendi, buthunga bene uje mukwabo napande kumufweta. ¹⁵ Oloni ngwe uje ibenya chimuna wakele nendi, uje munu mukwabo kapandele kumufweta embwe; oloni ngwe uje chimuna bamukumwine, bapande kumufweta naije fweto yaku mukumuna. ¹⁶ Oshe ngwe munalume akokweya mumbanda uje kanda bendekeye, cho alimona nendi, napande kumushombola na kufweta matemo anapumo mu kumwambata. ¹⁷ Cho ngwe ishe abyana kumu shombwetha kuli ikeye, napande kufweta bimbongo binapwitha mu matemo a myali. ¹⁸ Kethi mukatabele mulothzi wa munakathzi kuyoya. ¹⁹ Munu woshe uje akalala na kathitu banapande kumuthsiya. ²⁰ Woshe owo akakombelela kukanjambi keka kutubakana yange Njambi yeni banapande ku muthsiya. ²¹ Kethi mupakethe nambe muka yandethe muka kwija embwe, mwafwa neni lalo mwapwile baka kwija muje mulifuti lya Engipito. ²² Kethi muyandethe fwile nambe muna thiwa. ²³ Ngwe yeni mukachilinga, cho ngwe bakachililila kumesho ange, cho buthinga bene njika thiba kuthana kwabo. ²⁴ Cho njikathiba manene matoto, naku minthsiya na mukwale; banakathzi beni bakapwa bafwile, cho lalo bana beni bakapwa bithiwa. ²⁵ Chongwe ukongwetha bimbongo kubanu bange bamo bakuutwa, kethi mulinge ngwe baje bakakukongwetha ba shakaho ka kwendetho. ²⁶ Ngwe wambata buthzalo bwa mukweni kupwa chishimbikiya, cho mwilwithilesho thimbu kanda litangwa litoke, ²⁷ mwafwa bukebo muthzalo bwendi bwakalifwiki; bunapu buthzalo bwa hamubila bwendi. Indi bika lalo alifwika? Omwo mwatambekela kuli yange, cho njikamuthiba, mwafwa yange njimuka mema kumbunge. ²⁸ Kethi mwendeke mwamubi hali yange, Njambi, cho lalo kethi muthinge ntwama wa banu beni. ²⁹ Kethi mwishwale kulambula byakulya byeni nambe binyu byeni. Mwapande kunjana batwatwa babana beni babanalume. ³⁰ Munapande kulinga chimolika naku bangombe naku bamanga beni. Cho amatangwa atanu na abali bakale nabainabo, olojo halitangwa lya muchitanu nawatatu munapande ku njanabo. ³¹ Yeni mukapwa mubanu bange ba kujela baku limanena. Cho kumwapandele kulya nthitu ije bana nthsile kuli bakwabo tuthitu muje mushwata. Ngechi, munapande kuyana kuli tutali.

¹ Linga mbalaka na mabamba likumi bya linyu ya ibwa bya kwosha na ulu ya bwithi-bwithi, na ya kubenguluka, na yakubenga bishobe na butongwe na bifwa bya bakelumbi ba mambaba. Ebi bikapwa bipangi bya baje bathzibuka manene bipangi. ² Bulaja bwa libamba na libamba bupwe ma kyubiti makumi abali na atanu na atatu, na ma kyubiti awana mu bwihi. Mabamba oshe a pwe mumo. ³ Cho mabamba atanu anungileni hamo, nawa akwabo mabamba atanu anungileni na akewo hamolika. ⁴ Chotonga bikongo bya nanga ya bwiti-bwithi ku mukundwilo wa anja ya libamba limo. Mungila imo lika, linga chuma chimo kumundwilo wa anja ya libamba lya muchibali. ⁵ Tonga bikongo makumi atanu a mukundwilo wa libamba lyakulibanga, cho na bikongo makumi atanu ku mukundwilo wa libamba lya muchibali. Lingeni ngocho bene linga bikongo bilitombole. ⁶ Cho fula bikwatetho makumi atanu bya ngolinde bya kunungilitha mabamba hamo ngechi ipwe mbalaka ya kulinunga. ⁷ Cho linga mabamba a kutonga na maka a bimembe a tente ya kufwika akamwa ya mbalaka. Linga mabamba likumi naimo. ⁸ Cho bulaja bwa libamba na libamba bupwe ma kyubiti makumi atatu, nama kyubili awana mu bwihi. Mabamba oshe likumi na imo anapande kupwa mumo. ⁹ Cho mabamba oshe atanu atongele amolika cho nawa lalo atanu naimo atongele amolika. Cho etekela mubali libamba lya muchitanu naimo a kamwa ku lutwe ya tente. ¹⁰ Cho tonga bikongo makumi atanu ku mutundwilo wa libamba limo, na bikongo makumi atanu ku mukundwilo wa libamba likwabo lya muchibali. ¹¹ Cho fula bikwatetho bya bunengu kakumi atanu bishilwithe mu bikongo. Cho kumbathana amo tente linga ipwe imo. ¹² Mbathzubwila yalije libamba lina thalaho, echi, lya kujengela linathala kulibamba lya tente, lijenjele kunima ya mbalaka. ¹³ Kukale kyubiti imo ya libamba kushongo imo, na kyubiti imo ya libamba kushongo ikwabo--akajenjele kubathambwela a tabanakele limo ku thambweli likwabo kuthambwa ikwabo, mukuyifwika. ¹⁴ Chotongela kumbalaka cha kufwika cha nkomba yamanga ya kulomba na mushumbelo wa kubenga, chikwabo nawa cha chilambu chachibwa cha kufwika akanwa. ¹⁵ Cho shonga bibuliko bya mbalaka bya ku shungama bya mabaya a mungongo. ¹⁶ Chibuliko chimo na chimo chipwe ma kyubiti bikumi mubulaja, cho mubwihi chipwe kyubiti imo na mbathzubwila. ¹⁷ Cho kuchibuliko na chibuliko kukale bi thinthzo bibali ngechi byathe kunungila bibuliko hamo. Byoshe bibuliko bya mbalaka munapande kubilionga mungila imo. ¹⁸ Cho omo ushonga bibuliko bya mbalaka, shonga bibuliko makumi a bali bya kumutambela wa mu shango. ¹⁹ Fula masanda a siliba makumi a wana akale mwithi ya bikuliko makumi abali. Kikale masanda abali kwithi ya chibuliko cha kulibanga bipwe bya kukwatetha bije bya kushongomoka bibali, na akwabo nawa masanda abali kwithi ya bibuliko bikwabo bipwe bya kukwatetha bije bya kushongomoka bibali. ²⁰ Kumutambela wamuchibali wa mbalaka, ku kunto yawo, shonga bibuliko makumi abali ²¹ namasanda a siliba makumi awana. Kukale masanda abali kwithi ya chibuliko cha kulibanga, masanda a bali nawa akale kwithi ya chibuliko chikwabo, nakutwalelelaho. ²² Cho anima ya mbalaka mukangombe ka yambi, shongelao bibuliko batanu na chimo. ²³ Cho shonga bibuliko bibali bikale munima ya bimbango bya mbalaka. ²⁴ Ebi bibuliko bilyandunune kwithi, oloje babi nungakane kwilu ku mukata umo. Na bibuliko bili kunima ya bimbango ba bilinge mungila ei bene. ²⁵ Ngechi bene kukale bibuliko bitanu na bitatu, na masanda abyo a siliba. Oshe akale masanda likumi na atanu na limo, masanda abali kwithi ya chibuliko cha kulibanga, masanda abali nwa akale kwithi ya chibuliko chikwabo, naku twalelelaho. ²⁶ Cho lalo shonga mabalo a mabaya a mungongo--atanu a bibuliko kumutambela umo wa mbalaka. ²⁷ Cho mabalo atanu a bibuliko kumutambela ukwabo wa mbalaka, cho atanu kubibuliko bya kunima ya mbalaka mu kangombe ka yambi. ²⁸ Cho libalo lya mukati ka bibuliko, ebi bene, kwimana mbathzubwilo, lika kingabale kutunda kushongo imo na kweta kushongo ikwabo. ²⁹ Cho fwika bibuliko na ngolinde. Na kubikuta na mukata wa ngolinde, linga a kolethe mabalo, cho akeo lalo mu fwike na ngolinde. ³⁰ Cho imika mbalaka ngwe kubutumbe bije baku mwethele a munkinda. ³¹ Cho tonga libamba lya nanga yaibwa ya linyu yakwosha na ulu, ya bwithi-bwithi, ya ku benguluka, na yakubenga, ya kushelathana na chifwa cha bakelumbi ba mambaba, bipangi bya baje ba thzibuka. ³² Cho lishukike a bimanda biwana bya mabaya amungongo bya ku fwika na ngolinde, ebi bi ngunthzi bimane a masanda awana a siliba. ³³ Cho shukika libamba mwithi ya bikwatetho kubimanda, cho nena bwato bwa chikumiiyo. Ngechi libamba likaangunune mwela wakujela kutunda kumwela wa kujela manene. ³⁴ Munapande kufwika chije chifwiko cha mema kumbunge ali chije chikatha cha buthunga, chije chakala muje mwa kuthzila manene. Cho aka mesa hanja ya libamba. ³⁵ Cho aka chitumbikilo cha bindeya kumutambela wa mushongo ya mbalaka. Mesa ikale ku kunto. ³⁶ Kuje kuchikolo cha tende tongelako libamba. Lipwe lya bwithi-bwithi, naku benguluka, na kubenga ya kushobeya na bwanda bwa kushelathana, bipangi bya muka kutunga. ³⁷ Kuje kwaku shukika, shonga bimanda bitanu bya mabaya a mungongo ubi fwike na ngolinde. Bikwatetho byabyo bipwe bya ngolinde, cho binapande kwimana a masanda atanu a bunengu.

¹ Shonga mutula na mabaya a mungongo, una pande kupwa ma kyubiti atanu mubulaja nama kyubiti atanu mu bwihi. Mutula upwe sikweya na ma kyubiti atatu mubulaja. ² Cho shongoleniko ku bimbango biwana bya kupwa ngwe mambinga a ngombe. Mambinga apwe chuma chimo na mutula, cho mubithate na bunengu.. ³ Fula byuma byakupangetha mutula; bindeho bya kukundwila lito, na bifwosholo, na malonga, na binguto bya thitu, na mapanda akwambatela tuhya. Byoshe ebi bya kupangetha bipwe bya kufula na bunengu. ⁴ Fula mushele waha mutula, wa bunengu bwaku Shelahama. Fula kathzeya ka bunengu ha bimbango byoshe biwana bya mushele. ⁵ Cho aka mushele mwithi ya libalo lya mutula, ngechi uthikithile ha kati. ⁶ Cho shonga bithini bya ha mutula, bithini bya mabaya a mungongo, cho uithate na bunengu. ⁷ Kobeletha bithini ha mikata, bithini bina pande kupwa ku mitambela ibali ya mutula, omwo ba wa mbata. ⁸ Shonga mutula uka thethza mako mukati, wa kulinga na mabaya. Ulinge ngechi muje muba kumwethele ha munkinda. ⁹ Tunga chipango cha mbalaka. Chapande kupwa na mabamba ku mutambela wa mumbwela ya chipango, mabamba a linyu yaibwa yakushelathana mwa mubwa apwe ma kyubiti likulukathzi mu ulaja. ¹⁰ Mabamba apwe na bimanda makumi abali, na masanda makumi abali a bunengu, Akale na bikwatetho bya kunungila ku masanda, na mabalo a kufula na siliba. ¹¹ Mungila imo lika, kumutambela wa ku kunto, kuna mpande kupwa mabamba a kupwa ma kyubiti likulakathzi mu bulaja na bimanda makumi abali, masanda makumi abali a bunengu,bikwatelo bya kunungila ku masanda, na mabalo a kufula na siliba. ¹² Cho ku mutambela wa mu kangombe ka yambi ka chipango kukale mabamba ma kyubiti makumi atanu mu bulaja. Kukale bimanda likumi na masanda lalo likumi. ¹³ Chipango lalo chipwe ma kyubiti makumi atanu mu bulaja ku mutambela wa mu ngangela. ¹⁴ Cho ku mutambela umo wa chikolo kukale libamba lya ma kyubiti atanu mu bulaja. Bipwe na bimanda bitatu na masanda atatu. ¹⁵ Cho ku mutambela ukwabo kukale mambamba a kweta ma kyubiti likumi na atanu mu bulaja. Bipwe na bimanda bitatu na masanda atatu. ¹⁶ Ku chikolo cha chipango kukale libamba lya mamita a mu bulaja. Likamba lipwe lya bwithi - bwithi, na kubenguluka, na kubenga lyaku shobeya naku shelathana, bipangi bya mukakutonga na binanga bya bibwa bya linyu. Cho chikale na bimanda bi wana na masanda awana. ¹⁷ Bimanda byoshe bya chipango bi kakale na mabalo a siliba, bikwatetho byabo bipwe bya kufula na siliba, na masanda a bunengu. ¹⁸ Cho chipango chikapwe ma kyubiti likulakathzi mu bulaja, mu mwihi ma kyubiti makumi atanu na mukuloba ma kyubiti atanu cho mabamba apwe a kutonga na binanga bya bibwa bya linyu, na masanda a bunengu. ¹⁹ Byoshe bibala bya kupangetha mu mbalaka, na bipampalango byoshe bya mbalaka na bya chipango bipwe bya kufula na bunengu. ²⁰ Kambeya banu ba Isalela banene mathzi a olive, amabwa a kushoma mu ng'unju, amu bindeya ngechi byathe kushukuma thimbu yoshe. ²¹ Muje mu tente ya kuliwanena, hanja ya libamba lije lili ku lutwe lwa mbalaka muje mwakala chikatha cha chikumiiyo, Alone ba bana bendi bakebo baka shukumitha bindeya ku mesho a Njambi, kutunda mangwethzi na kweta ku mutondo. Cho ba Isalela na chikota chabo baka nyunga kushika oku.

¹ Cho Njambi wendekele kuli Mosesa ngwendi, ² "Kenga, njina thana lithzina lya Mbezalele muna Uli muna Hule, wa kumuyati wa Yunda. ³ Njina mushulitha na munthzinthzime wange Mbezalele, njina mwana mana, ku mizibithitha, na kunanguka, ha bipangi byoshe bya bulongwe, ⁴ ku linga butumbe bwa butongwe bwa kushoba na kushobathana na kubi pangetha na ngolinde, siliba, na bunengu; ⁵ na kulamothzola mamanya mabaya - na kulinga bipangi byoshe bya butongwe. ⁶ Kwakelako kuli ikeye, njinangula Oholyabe muna Ahisamake, wa kumuyati wa Ndani. Njinaka kunangula mubi mbunge bya boshe baka mana linga bakalinga byoshe bije bi njina mikambeya. Ebi bya kufwa ⁷ ngwe tende mwa kuli wanena, na bwato bwa chikumiiyo, na chifwiko cha ku tengulula cha ha bwato na bitala byoshe bya mu mbalaka - na ⁸ mesa na bibala byabo, na chilumikilo cha bindeya cha kujela na bibala byacho byoshe, na mutula wa kweyekela bya bweko, ⁹ na mutula wa milambu ya kwenyeka na bibala byabo byoshe, na mbashiya ya kama na lisanda lyalyo. ¹⁰ Kwakelaho lalo na buthzalo bwaubwa bwa kutonga bwino - bithzalo bwa kuthzila bwa bwa Alone muka kukombelela na bakwabo bana bendi, banji tulikilile linga ba pange bipangi bya kukombelela. ¹¹ Kwakelaho lalo na mathzi a kubwabetha na insense yaku mwela wa ku thzila. Aba baka kupanga bana pande kupanga byuma byoshe ebi ngwe omu munjina mishiki." ¹² Cho Njambi wendekele na Mosesa ngwendi, ¹³ "Leka baka Isalela; "Mukemo bene muna pande ku nyunga matangwa a Njambi a Sapalalo, mwafwa akapwa chimwetho hakati kendi neni kubi themwa bya banu beni byoshe ba kulutwe linga muthzubuke ngweni ikeye Njambi, ou wa myangula linga mupwe bendi. ¹⁴ Ngechibene munapande ku nyunga Sapalalo, muna pande kuya mbata ngweni litangwa lya kuthzila, lya kutumbikila ikeye. Cho woshe uje kalinyungu chili bene napande kutsa. Woshe uje a panga halitangwa lya Sapalalo, mwachili bene uje munu bana pande kumufumitha ku banu bendi. ¹⁵ Mukapanga bipangi byeni matangwa atanu na limo, oloni litangwa lya muchitanu na abali linapande kupwa Sapalalo ya kuhwima, ya kuthzila ya kundama kuli Njambi. Cho woshe uje akapanga ha litangwa lya Sapalalo chili bene baka muthsiya. ¹⁶ Ngechibene ba Isalela bana pande kunyunga Sapalalo. Bana pande kuinyunga kupwa chimwetho cha chikumiiyo kubithemwa byabo byoshe bya kulutwe. ¹⁷ Sapalalo ikapwa chimwesho hakati ka Njambi na ba ka Isalela, Njambi watengele lilu na hathi mu matangwa a tanu na limo, cho na litangwa lya mu chitanu na abali walikelele kupanga cho wa hwimine." ¹⁸ Omwo Njambi wa manethele kwendeka na Mosesa ha lilundu lya Sinai, wa mwanene bitale bibali bya bukaleo bwa mashiko, ba apangele ku limanya, wa a sonekele na liboko lyendi.

¹ Cho omwoni banu bamwene ngwabo Mosesa neshwala ku thikumuka ku munkinda, ba kungulukile na kuthzenguluka Aloni na kumuleka ngwabo, "Ija, tumungile kamponya ou ya tutwamenena. ² Ngwe ali ou Mosesa, ou munalume yatutundithile mulifuti lya Ingitu, kutwatanekeyeyoni bibinalinginka kuli ikeye." Ngechi Aloni wendekele kuli bakebo ngwendi, "Tunditheni bimbilingwa bya ngolinde bibili kumatwi a banakathzi beni, na kumatwi a bana beni babanalume nababanakathzi, na kubinena kuli yange." ³ Banu boshe ba shulwile bije bimbilingwa ba thzalele ku matwitwi abo na ku binena kuli Aloni. ⁴ Cho nendi wa tambwile ije ngolinde kutunda ku maboko abo na kuifwatula na mushubo na ku mungaho kaponya muchifwa cha munangombe. Ngechioni bendekele ngwabo, "Aboni bakebo ba njambi bobe, Isalela, baje bakunenele kutunda mulifuti lya Ingitu." ⁵ Omwoni Aloni wa mwene echi, cho watungile mutula kulutwe lwa uje muna ngombe na kutambekela; wendekele ngwendi, "Imene likala litangwa lya chilika cha kuthingimika Njambi." ⁶ Cho alikaki mutondo-tondo bane bendukile na kwana mabwana a ku lumba na kunna mabwana a kuliwana mu buthamba. Ngechi batumbamene athi na kulya na kunwa, cho na hanima ba likobelethele mu kubwahelela chije cha kujeneka kufwilamo. ⁷ Ngechi Njambi wendekele kuli Mosesa ngwendi, "Yaa bwathi bwathi, mwafwa banu bobe, bajabene baunanenele kufuma muje mulifuti lya Ingitu, banalibihitha bakebo babenya. ⁸ Bwathi bwathi banathebuka mungila ije njinabakambeyeye kwendamo. Bana mungu kamponya wa chifwa cha muna ngombe naku mulemetha na kwana mabwana kuli ikeye. Cho bandeka ngwabo, 'Aboni bakebo tulunga twobe, Isalela, baje bakunenele kufuma ku lifuti lya Ingitu."' ⁹ Chojo Njambi wendekele kuli Mosesa ngwendi, "Njinabamono aba banu. Kenga, kubethi kuthziba banu aba. ¹⁰ Cho namuchifwechioni, kethi wetheke kunji bindika embwe. Matoto ange abenyeka kushaluka akati kabo, mangana njiba bulumuna. Hanimoni njikalingitha kupwa lifuti lya kama manene." ¹¹ Olojo Mosesa wethekele ku lambelela na ku hwimitha mbunge ya Shukulu Njambi yendi. Cho wendekele kuli ikeye ngwendi, "Njambi, bikajo una lubalela manene ngachije na banu bobe, baje ba unatunditha mu lifuti lya Ingitu na binthzili bya kama na liboko lya thzili ya kama? ¹² Bikajo baka Ingita bakendekela ngwabo, 'Wabatundithile kuno na biyongola bya bibi, kuya na kukabathsihila ku munkinda na kuba nyongetha boshe mu lifuti?' Kumani echela kulubalela banu bobe manene ngachije cho lalo likele kwana aka kashitiko ka kufwa ngachije ali banu bobe. ¹³ Anuka bandungo bobe ba Abilahama na Isaka na Isalela, baje kuli bakebo wa lithingile lwangu yobebabenya na kwendeka kuli bakebo ngwobe, 'Njikapwitha chithemunwina cheni kutuma ngwe bingongonothi bya mumelu, cho lalo njikana ku chithemunwina cheni lino libu lyoshe linjinendekaho hamo. Cho baka liswana myaka yoshe."' ¹⁴ Ngechi Njambi walikelele kunena kuje kashitiko katumbwile ku nena hali banu bendi. ¹⁵ Chojo Mosesa watengulukile na kuthikumukoni kwithi ya munkinda, oku nambata aje mabaya abali a mashiko a litambathano muliboko lyendi. Aje mabaya bwathonene ku mitambela yoshe ibali, kwoshe naku mbando na kunima. ¹⁶ Bije bitale bya mamanya byapwile bipange bya Njambi babenya, na aje bene mathona akele bene mathona a Njambi babenya, bije ba thonekele ha bitale bya mamanya. ¹⁷ Omwoni Yoshuwa wathzibile ije miyoyo bakele na kulinga banu omu bakele nakutambeka, cho wendekele kuli Mosesa ngwendi, "Muli miyoyo ya nthzita mu chilombo." ¹⁸ Olojo Mosesa wendekele ngwendi, "Kethi ngwe chilumo cha uje muka kuhyana, cholalo kethi chilumo cha banu baje bana fungula, oloni chilumo cha kwimba chikecho njili na kuthziba." ¹⁹ Omwoni Mosesa wa shwenene kuje ku chilombo, cho wamwenoni uje muna ngombe na bani bali na kukina. Cho walubalele manene. Ngechi wombilile ajebene bije bitale byamamanya kutunda mu maboko endi na kuwapokothwela kwithi ya munkinda. ²⁰ Cho wambatele uje munangombe ba mungile banu, na kumwenyeka, naku muthsena kupwa bunga, na kubwambata na kubwitila mu mema. Cho walingithile banu ba mu Isalela ku anwa. ²¹ Kathioni Mosesa wendekele kuli Aloni ngwendi, "Kumani bikajo aba banu banalingi kuli yobe, manganoni unene bubi bwakama ali bakebo?" ²² Aloni wendekele kuli ikeye ngwendi, "Kethi ulubale manene, shukwayina wange. Uthzubuka banu aba, omwo mu bakolelela ha kulinga bya bibi. ²³ Banendekele kuli yange ngwabo, 'Tumungile kamponya owoni ya tutwamenena. Ngwe ngechi mwou Mosesa, ou munalume yana tunenele kutu tunditha ku lifuti lya Ingitu, yetu kutwazubukile bibina lingika kuli ikeye.' ²⁴ Cho nange njendekele kuli bakebo ngwange, 'Kumani woshowo hali na ngolinde, ai shulule.' Cho bana njanene ngolinde cho nange njayumbilile mutuhya, mukemwoni munatundilile ou muna ngombe." ²⁵ Cho Mosesa wamwene ngwendi banu balingiloni ngwe bana thzaluka (mwafwa Aloni wabatabethele kulilingila byoshe bibathzangele kulinga, chojo echoni cha nenethele bitothzi baba kubathsompa). ²⁶ Ngechi Mosesa wemanene kuje kuchikolo cha chilombo na kwendeka ngwendi, "Woshe uje yali ku mutambela wa Njambi, cho aije kuno kuli yange." Ba Lebi boshe bamuthzengulukile. ²⁷ Cho wendekele kuli bakebo ngwendi, "Njambi, Njambi wa Isalela, nendeka echi ngwendi: 'Echa munalume na munalume woshe akutihiye mukwale wendi ha mbunda yendi na kwitangana tunda chikolo ya chikolo mu chilombo choshe, na kuthsiya ndolome yendi, na mukabuthamba kendi, na mukwabo wa lyata nendi.'" ²⁸ Ngechi ba Lebi balingilebene chije chabashikile Mosesa. Chojo halitangwa bene lije banu ba kweta ku makulukathzi a tatu ba thsile. ²⁹ Choni Mosesa wendekele kuli baje ba Levi ngwendi, "Lelo lino yeni bana myakoni mukupangela Njambi, mwafwa umo na umo weni na tengulukila munendi na ndolome yendi, ngechi Njambi natha kumikwithula lelo.' ³⁰ Cho alikaki Mosesa wendekele ku banu ngwendi, "Munalingi bubi bwa kama manene. Ngechi hanobene njili na kukanduka kuli Njambi. Achimo njikami wanenako chikombeyo cha bubi bweni." ³¹ Chojo Mosesa welukile lalo kuli Njambi na kukendeka ngwendi, "Nana, aba banu banabulumuna mulonga wakama wa bubi wa kulimungila kamonya ka ngolinde. ³² Olojo lelo, njakandelelako nji kulomba ngwange bathambethe ku bubi bwabo; oloni ngwe ku uba thambetha, cho nange bene njifumithe na mulibulu olyo una thono." ³³ Njambi wendekele kuli Mosesa ngwendi, "Uje woshe anabulumuna kuli yange, munu wakufwa ngachije njikamuthzimangana mulibulu lyange. ³⁴ Chonini ya, twamenena banu kumwela uje njinendeka laja kuli yobe. Kenga, kangelo kange alibanga kulutwe lwobe. Olonini alitangwa lije linjika bana kashitiko, cho njikabana kashitiko ha bubi bwabo." ³⁵ Njambi wa tumine mushongo ha banu baje mwafwa bamungile uje muna ngombe, uje bene munangombe ya mungile Aloni.