Bible

Yilwilu

1¹Eyi Tiyofwilu, mumukanja wakusambila nasonekeli nakulumbulula yuma yezhima yatachikiliyi Yesu kukong’a nikutang’isha, ²kushika nikwifuku jamutambwiluwu mwiwulu, heliliyi muji Spilitu Wazhila nasambili jehi kulezha apostolu atonjeliyi. ³Wajimwekesheli kuji wena wamumi nayinzhikizhilu yayivulu, helili nakabi jehi. Wamwekeni kuji wena mafuku makumi awana (40), nakulumbulula yuma yawanta waNzambi⁴Chanapompuwu ninji hamu, hakuyilezha ninji, Bayi mufuma kuYelusalemaku, ching’a muching’ilila kukana kwakaniniyi Tata, kumwatiyili kujami. ⁵Chalala kwaamu, Yowanu wazhimikilang’a mumenzhi, hakwila enu akayizhimika muji Spilitu Wazhila hakaji kuhita mafuku amavulu.⁶Cheliluwu anapompi jehi hamu, hiyakwihula nawu, Eyi Mwanta, keng’a wufuntishi chiyuulu kuji Isalela mafuku anu, tahinji? ⁷Yena hakuyila ninji, Nsang’u zhakwiluka mpinzhi, hela yilaaka, hizhenwenuku, zhambala zhayomweni Tata zhanatong’oliyi mwatwala muchima winji. ⁸Ilang’a chakenzayi Spilitu Wazhila hajenu, mwakatambula ng’ovu, mwakekala ayinsahu zhami nimuYelusalema, nimwahita Yujeya mwezhima, nimuSamaliya, nikwakumina maseki.⁹Chanahoshiyi mwenimu, iku aji nakutala, hiyakumutwala mwiwulu, ivu jimutambula nizhimu, kumumona nawa cheng’i nehi. ¹⁰Iku achiji kutala mwiwulu mwanayiyi swi-i, nawu akasumuki, hiyakumona amayala ayeji anemani chimu nawena, avwala mahina atooka. ¹¹Hiyakwila nawu, Enu amayala akuNG’aliliya, munemeniji nakutala mwiwulu? Iwu Yesu anatwaluwu mwiwulu, wakenza neyi chochenichi chimunamumoni nakuya mwiwulu.¹²Hiyakufunta kuYelusalema. Kufuma kumpiji yaOliveta nakushika kuYelusalema mwekala chintampu chakweseka mukwenja kwamuSabata (1 km). ¹³Chanashikuwu, hiyakwing’ila nakukanjama munoju itala jahewulu mwajing’i nakushakamawu; aPetulu naYowanu, niYakoba naAnjeli, niFwilipu naTomasi, niBatolomewu naMatewu, niYakoba mwana kaAlafwewu naShimona kaZeloti, niYuja manakwaYakoba. ¹⁴Wenawa ezhima namuchima wawu wumu, hiyakukakela mbe nakulombela, chimu nanowu ambanja, niMaliya mama yaYesu, nianakwinji.¹⁵Hawena mafuku owu Petulu hakwimana mukachi kawanakwinji mwapompela jehi izaza jawantu hamu, kafwampi neyi nkulakazhi namakumi ayeji (120), ¹⁶hakwila ninji, Enu anakwetu, mazu amuMukanja Wazhila, ahosheli Spilitu Wazhila kukanwa kaJaviji akutena Yujasi, owu walombweli antu amukwatili Yesu, ching’a alumbuluki chikupu.¹⁷Mulong’a amuchinjilili hamu nanetu; watambwili mujimu winji wowumu nanetu. ¹⁸Yena walanjili kampata namali atambwiliyi kukuluwa kwinji, hakuholokelamu chamutu heseki, hakubusika niivumu ntwe-e, ninyizhing’wa yinji yezhima sèku. ¹⁹Achiluka nikuchiluka kuji akwaYelusalema ezhima, chakwila mwijimi jawu kampatoku hiyakujitena nawu, Akelejama, jaya mukwila nawu, Kampata kamashi.²⁰Mulong’a anasoneki mumukanja waMasamu nawu, Mwashakamayi mubalumuki mwikali ihembi, Bayi mushakama mwoku muntuku; cheng’i nawa nawu, Mujimu winji awutambuli kuji wacheng’i.²¹Jichi haji awa amayala twenjelang’a nawu mafuku ezhima hajing’i nakuhitang’anayi Mwanta Yesu mukachi ketu, ²²kufumisha hachizhimikilu chaYowanu nakushika kwifuku jatutambwiluwu Yesu; haji wenawa hafumi wumu ekali chinsahu chimu nanetu chakusang’uka kwasang’ukiliyi muji afu. ²³Hiyakutena ayeji, iwu Yosefu izhina jinji Balasaba, átumbiluwu izhina jikwawu nawu Sakulong’a, niMatiyasi.²⁴Hiyakulombela nawu, Eyi Mwanta, weluka nyichima yawantu ezhima; atulezhi awa antu ayeji wunatonjuhu wumwojihi? ²⁵Ahing’i mumujimu iwu nimuwupostolu mwasenukiliyi Yujasi kulonja ayi kwiinji kwatela kwikalayi. ²⁶Hiyakuyisakula nachinzhikizhilu chakusakula nachu; chinzhikizhilu hichikuya kuji Matiyasi; hiyakumuchinjila hamu nawapostolu ikumi nawumu (11).

2¹Chelili ifuku jaPentekosta jinashiki jehi chikupu, wezhima wawu ajing’i hamu mwomumu. ²Kukasumuka mwiwulu himukufuma lushinju luji neyi lwampepela yikukunka nang’ovu yaswezha nankashi, hilukwinzesha itala jezhima mwajing’i nakushakamawu. ³Hikukuyimwekena nyizuzu yakesi yiji neyi majimi; yambukili nakushakama haji wena wezhima wawu, hamuntu hamuntu. ⁴Wezhima wawu hiyakwinzala naSpilitu Wazhila, hiyakutachika kuhosha majimi acheng’i, mwomwayinkeleluwu kuji Spilitu kuhosha⁵Henohu kuYelusalema kunashakami aYujeya, amayala akweti kalemesha kakulemesha Nzambi, anafumafumi kwahita nyunza yamunu mwishina yezhima. ⁶Chinatiyakani olu lushinju, izaza jawantu hijikupompa, hiyakukumina jakuhayama nikutiya woma, nanichi chajing’i nakuyitiyawu nakuhosha wezhima wawu, iwu mwijimi jinji, iwu mwijimi jinji. ⁷Wezhima wawu hiyakukasumuka nikuhayama chikupu nawu, Talenu, awa akuhosha, wezhima wawu hiyaNG’aliliyaku?⁸Inji tuji nakutiya ng’ahi, wezhima wetu hamuntu hamuntu, iwu mwijimi jinji jachisemwa, iwu mwijimi jinji jachisemwa? ⁹APalatiya nawaMejiya, niaElamiti nawantu ashakama muMesopotamiya, nimuYujeya, nimuKapajosiya, nimuPontu, nimuAsiya, ¹⁰nimuFwilizhiya, nimuPamfwiliya, nimuEzhipitu, nikumutamba waLibiya kwakwihi naKileni; nawantu anafumi kuLoma, aYujeya nawánabalumuki kwikala aYujeya; ¹¹niaKeleta niaAlabiya; hitukuyitiya nakuhosha mumajimi etwetu aweni nakutena nyijimu yaNzambi yang’ovu.¹²Hiyakukasumuka wezhima wawu nikuzhinoka chikupu; hiyakujihula muntu namukwawu nawu, Ichi chaya mujihi? ¹³Ilang’a amakwawu hiyakuseha nawu, Anasheti jehi vinyu yayiha.¹⁴Petulu hakwimana chimu nekumi nawumu (11), hakubijika nakuyilezha ninji, Enu akwetu aYujeya, ninenu ezhima mwashakama muYelusalema, leka niyilezhi chachiwahi mwiluki; ntiyililenu munukuyilezha. ¹⁵Nami wenawa hiyanasheti neyi chimuji nakutong’ozhokaku; kutong’a ifuku jichiji mpinzhi yamuchisatu (09:00 hls) hohu.¹⁶Chuma chimunamoni, chochuma chateneni kaplofwetu Yoweli, ¹⁷ninji, Nzambi ninji, Chakela hamafuku akukuminina, Nakechila yaSpilitu wami haji antu ezhima; Nianyanenu amayala nawambanja akaplofweta, Anyikwenzi enu akamona yimwenu, Mapalenu amayala akalota yilota¹⁸Mwamweni, nihaji anjung’u zhami amayala nawambanja nakechila Spilitu wami Hamafuku akalonjelamu, akaplofweta. ¹⁹Nakamwekesha yuma yakuhayamisha mwiwulu haluzwizu, Niyinzhikizhilu hamaseki mwishina; Mashi nikesi nikufwinja wishi.²⁰Itang’wa jakabalumuka mwijima, Nikakwezhi kakabalumuka neyi mashi, Hamba kakeng’a kwinza ifuku jaMWANTA jatiyakana jeneni. ²¹Chakela, muntu wakatambika izhina jaMWANTA wakamwinewa.²²Enu akwetu amayala aIsalela, tiyenu niyilezhi, nami Yesu wakuNazaleta, iyala alemesheluwu kuji Nzambi nanyijimu yang’ovu, niyihayamisha, niyinzhikizhilu yeliliyi Nzambi nayena mukachi kenu, neyi chimuneluki jehi enu aweni; ²³Nzambi wayinkeliyi mwaya mpúng’a yinji, chakwilukang’ahu jehi, ilang’a enu mwamupopeleli hakulusu namakasa awantu atama, nakumuzhaha. ²⁴Nzambi chanamusubuliyi mumakabi akufwa, hakumusang’ula; mulong’a kufwa hikwajing’i nang’ovu zhakumukakelaku.²⁵Mulong’a anamuteni jehi kuji Javiji ninji, Namweni MWANTA kumesu ami mafuku ezhima; Wuji kuchikasa chami chachijiilu, kulonja zhibuli kunkuma. ²⁶Jichi muchima wami hiwukutiya kuwaha, Niijimi jami hijikutena nsang’u yakulung’a, Eng’a, muzhimba wami hiwukushakama nakuching’ezha.²⁷Mulong’a hiwakanshiya mukalung’aku, Hela kumwitezha weyi wazhila kumona kutokaku. ²⁸Wakanlezha nzhila zhawumi; Hakushakama kumesu eyi wukunzang’alesha chacheni²⁹Enu anakwami, leka niyilezhi nsang’u yankakulula Javiji, nami wafwili jehi, amuzhiikili jehi, izhamu jinji twekala naju nilelu. ³⁰Jichi chajing’iyi kaplofwetu, nichelukiliyi ninji Nzambi nasanyiki jehi nakukana, ninji kuji anyana akavwalayi wakashakamisha wumu hetanja jinji jawanta; ³¹chumichi yena wachimwenang’ahu jehi, hakutena nsang’u yakusang’uka kwaKlistu kwamuji afu, ninji hiyamushiyili mukalung’aku, hela muzhimba winji hiwamweni kutokaku.³²Yeniwu Yesu Nzambi wamusang’wili mukufwa, wezhima wetu tunachimoni namesu. ³³Jichi chanamutúmbakeshuwu jehi nakumusha kuchikasa chaNzambi chachijiilu, chanatambuliyi jehi kuji Tata Spilitu Wazhila akaniniyi, yena nechili yumiyi yimunamoni nikutiya.³⁴Mulong’a Javiji hakanjamini mumawuluku; ilang’a yomweni nahoshi ninji, MWANTA wamwilili Mwanta wami, ³⁵ninji, Shakamaku kuchikasa chami chachijiilu Nichinakayilisha akwankunyi neyi itanja jakunyenju yeyi. ³⁶jichi enu akwamutang’a waIsalela ezhima, ilukenu kwenu chalala, iwu Yesu mwápopeleli hakulusu, Nzambi namubalumuni jehi kwikala niMwanta jiyi, niKlistu jiyi.³⁷Chanatiyuwu mwenimu, atapika nimunyichima yawu. Hiyakuyila aPetulu nawapostolu amakwawu nawu, Enu anakwetu, tukwila ng’ahi? ³⁸Kuchinka Petulu ninji, Balumukenu munyichima yenu, ayizhimiki wezhima wenu mwizhina jaYesu Klistu, kulonja kuyanakena nshiji zhenu; mutambuli chamukunkulu chaSpilitu Wazhila. ³⁹Mulong’a jiyi ayikanawu jehi ninenu nianyanenu, niantu ezhima ekala kwakulehi, ezhima akatambikawu kuji MWANTA Nzambi yetu enzi kuji yena.⁴⁰Hakuyishimwina nakuyishinzhila chikupu namazu amakwawu amavulu ninji, Pulukenu kuji antu achisakichi chaheng’a. ⁴¹Jichi wena átambwili mazu inji namuzang’alu, hiyakuyizhimika; ifuku jenoju hiyakubombelaku antu kafwampi neyi makombakazhi asatu (3,000). ⁴²Hiyakukakela mbe muntang’ishilu yawapostolu, nimukukunjang’ana nimukuhumuna jinkenji, nimukulombela.⁴⁴Antu ezhima atiya niwoma. Apostolu hiyakwila yihayamisha yayivulu niyinzhikizhilu. ⁴³Owu ezhima akuhweleli, hiyakujibomba hamu; niyuma yawu yiikala niyebomba. ⁴⁵Hiyakulanjisha mahetawu niyuma yawu, hiyakwanzhang’ena akwawu ezhima mwabulililuwu.⁴⁶Hiyakukakela kupompa muTembeli hefuku hefuku, namuchima wawu wumu, nakuhumuna jinkenji mumatalawu, nakutiya kuwaha, nakujyang’ana. ⁴⁷Hiyakuhameka Nzambi namuchima wawuwahi. Hiyakuyimona kuwaha kuji antu ezhima. Mwanta hakubombelaku hefuku hefuku awa ajing’i nakwamwinewa.

3¹Petulu naYowanu hiyakukanjuka nawu eng’ili muTembeli hampinzhi yakulombela, yoyamuchitanu nachiwana (15:00 hls). ²Kwajing’i iyala wachifwayi chanyenju, wufwayi wakuvwalika nawu; ajing’i nakumutenteka hefuku hefuku kuchisu chaTembeli chatenang’awu nawu Lubanzhi, kulonja alombang’a tuyamukunkulu kuji antu ajing’i nakwing’ila muTembeli. ³Yenowu chanamoniyi aPetulu naYowanu hiyakukeng’a kwing’ila muTembeli, hakuyilomba kachamukunkulu.⁴Petulu hakumushinshika swi-i, niYowanu hamu, ninji, Tutali. ⁵Hakuyitala, ninji keng’a atambuli kachuma kuji wena. ⁶Ilang’a Petulu ninji, Ami kwami hinikweti hela siliva hela wuluku; chuma chiniji nachu jichi nukukwinka. Nakwili mwizhina jaYesu Klistu wakuNazaleta, nami enjaku.⁷Hakumukwata kuchikasa chachijiilu, hakumunyamuna; hohenohu ninyenju yinji nimafwahinji akutupokosu akwata ning’ovu. ⁸Hakunyamuka, hakwimana, hakutachika kwenja; hakwing’ila nawu muTembeli nakwenja nakukiluka nakuhameka Nzambi⁹Antu ezhima chanamumonuwu nakwenja nakuhameka Nzambi, ¹⁰hiyakumwiluka nawu, jiyi wajing’i nakushakamina tuyamukunkulu kuchisu chaTembeli chaLubanzhi, hiyakukumina jakujihayamina nikuzhinoka nankashi hachuma chanamonuwu hajiwu muntu.¹¹Chaneliyi wuchiji wakwata aPetulu naYowanu, antu ezhima hiyakupompa kuji wena lufuchi mwikeki jatenang’awu nawu jaSolomoni, nakuhayama nankashi. ¹²Petulu chanachimoniyi, hakwakula antu ninji, Enu akwetu amayala aIsalela, chuma chanamwililuwu iwu iyala munachihayaminiji? Mukutushinshikilaji, munatong’ozhoki nenu yetu tunamwenjeshi nang’ovu zhetwetu, inji nakuzhila kwetu, tahinji?¹³Nzambi yaAbalahama naIsaka naYakoba, Nzambi yawankakulula zhetu, nalemeshi kambung’inji Yesu mwálubwilenu nakumuleka chemeniyi kumesu aPilatu, chakeng’eliyi kumuumbaku. ¹⁴Ilang’a enu mwalekeli Wazhila, Walong’a; mwalombeli kuyinka mbanzhi.¹⁵Himukuzhaha Mwiniwumi ilang’a Nzambi wamusang’wili mujafu; chumochu twachimweni namesu. ¹⁶Nakukuhwelela izhina jinji, jimu munakoleli iwu iyala munamoni, mweluka jehi. Eng’a, kukuhwelela kwakukuhwelela Yesu, jiku kunamwinki kukola kwalala kumunamoni namesu enu wezhima wenu.¹⁷Nochu jinu, enu anakwetu, neluki nami enu mwachilili chakuyamba, jichi chelili nianyuuli zhenu nawa. ¹⁸Yuma yashimwinang’ahu jehi Nzambi kutunwa twawatuplofwetu ezhima, yakwila ninji Klistu winji akakabi, yinalumbulukili jehi mwenimu.¹⁹Jichi jinu, balumukenu munyichima yenu, mufunti, kulonja akazhimang’eshi nshiji zhenu, kulonja kwinzi yilaaka yakuhizumwisha yakuleta ng’ovu zhakufuma kwekala MWANTA. ²⁰Kulonja akatemeshi Klistu ayifuukwililuwu, jiyi Yesu.²¹Yenona ching’a ekala mwiwulu nichamba kafuntishawu yuma yezhima muyajing’i, yoyatenenang’ahu jehi Nzambi kutunwa twawatuplofwetu twinji azhila akufumisha kushankulu. ²²Mosi wahosheli chalala ninji, MWANTA Nzambi wakayimwekeshela Kaplofwetu wamuji anakwenu wakekala neyi ami; Mwakamutiyililang’a mwezhima mwakayilezhang’ayi. ²³Muntu wakabula kutiyilila mazu aKaplofwetu owu, Akamunong’esha chikupu mumunzowu.²⁴Eng’a, atuplofwetu ezhima, kufumisha haji Samweli ninawa alonjelelumu, ahoshelumu wezhima wawu, nakushimuna yuma yawena mafuku anu. ²⁵Enu yenu anyana kawatuplofwetu, niachitiyang’enu chatiyang’eniyi Nzambi nawankakulula zhenu, chamwililuwu Abalahama kuji Nzambi ninji, Muji mbutu yeyi mwakakoolekela yisaka yahamaseki yezhima. ²⁶Nzambi chasang’wiliyi Kambung’inji Yesu muji afu, wasambilili kumutemesha kujenu, akayikiswili nkisu, nakuyibalumuna munyichima yenu wezhima wenu, mufumi mukuluwa kwenu.

4¹Heliluwu achiji kuhosha nawantu, atuplistu nimukulumpi wamashijika amuTembeli, niaSajusi, hiyakuyishintakesha; ²anatiyi jehi kutama chaji nakutang’ishawu antu nawu muji Yesu afu amba kasang’uka. ³Hiyakuyikwata, hiyakuyisha mwakuyihembela, kulonja aching’ilili kucha, mulong’a henohu kuneli jehi melela. ⁴Ilang’a amavulu anatiyi jehi mazu hiyakukuhwelela, kuchinja amayala ashikili kafwampi neyi makombakazhi atanu (5,000).⁵Chikunachi, anyuuli zhawu niakulumpi niansoneki hiyakupompa muYelusalema, ⁶nikaplistu muneni Anasi, niKayafwasi, niYowanu, niAlesanjeli, nichisaka chakaplistu muneni chezhima. ⁷Hiyakuyimika aPetulu naYowanu mukachi, hiyakuyihula nawu, Ichi chuma chimuneli munachili nang’ovwinyi? nezhina janyi?⁸Petulu, nenzali jehi naSpilitu Wazhila, hakuyila ninji, Enu mwayuulang’a antu, ninenu akulumpi, ⁹chimuji nakutwihula lelu iwu mujimu wawuwahi wutunakoleshi nachu muntu wajing’i chifwayi; ¹⁰tiyenu chachiwahi mwiluki, wezhima wenu mwahita aIsalela ezhima nenu, izhina jaYesu Klistu wakuNazaleta, mwápopelenu hakulusu, ásang’ulawu jehi kuji Nzambi muji afu, muji yena jimu munakoleli iwu muntu nemani kunu kumesu enu.¹¹Yesu jiyi Ilola jimwajiwili enu akwakutung’a, jojinekali jaswezha kwoloka nankashi jakwiwombu. ¹²Himwekala wamwinu muji wacheng’uku, mulong’a munu mwishina mukachi kawantu hiyanenkumu izhina jacheng’i jakuhanja nachuku.¹³Chamwenuwu kuumika kwawaPetulu naYowanu, kuyitala komana hiyantu akaji kwiluka nyikanja, hela kwing’ila mumashikola amaana, hiyakuhayama. Chanayishinshikuwu ayiluka nikuyiluka, nawu wowu ajing’ilang’a naYesu. ¹⁴Chanamonuwu iyala akolesheluwu nemani nawu, hiyamweni mwakutajikilaku.¹⁵Ilang’a chanayilezhuwu kufuma muchota ayi kumbaji, akwachota hiyakushakama hampúng’a. ¹⁶Nawu, Awa amayalawa tukuyila ng’ahi? Mulong’a chinzhikizhilu chanakong’uwu hichakuyambaku, chinamwekani kuji antu ezhima ashakama muYelusalema, hitukutwesha kutajikaku. ¹⁷Tukuminenu jakuyikonkomwena chakuyizuwila, kulonja kufumisha hanu aleki kuhosha nawantu mwizhina jaYesu, kulonja nsang’u iyi yibuli kutiyakana kwacheng’i mukachi kawantu. ¹⁸Hiyakuyitambika, hiyakuyilezha nang’ovu nawu, Bayi muhosha cheng’i hela kutang’isha mwizhina jaYesu, hela hantuku.¹⁹Ilang’a aPetulu naYowanu hiyakuyakula nawu, Chachiwahi kumesu aNzambi kutiyilila enu, tahinji chachiwahi kutiyilila Nzambi? Sompenu ntahi enu aweni. ²⁰Mulong’a kuleka kutena yuma yitwelili nikumona nikutiya, etu kwetu kutwesha nehi.²¹Chanayikonkomwenuwu cheng’i chakuzuwa, hiyakuyumbaku, anakang’anyi jehi kumona chuma chakuyibabeshela; anatiyi jehi woma wawantu, mulong’a antu ezhima hiyakulemesha Nzambi hachuma chaneluwu. ²²Ona muntu elililuwu chinzhikizhilu chakumukolesha wajing’i wanyaka yakubajika makumi awana (40).²³Chanayumbuwu, hiyakuya kuji akwawu, hiyakushimuna mwezhima mwanayihoshuwu kuji akulumpi zhawatuplistu nikuji akulumpi. ²⁴Chanatiyuwu mwenomu, hiyakubijika kuji Nzambi namuchima wawu wumu hohu nawu, Eyi Mwanta, yeyi waleng’eli niiwulu niiseki nikalung’alwizhi, niyuma yezhima yijumu; ²⁵mwomuwahosheleli muji Spilitu Wazhila kukanwa kankakulula yetu kambung’eyi Javiji neyi, AZHentili anazuwiliji? Antu atong’ozhokeliji chuma chamukunkulwayi?²⁶Anyanta ahamaseki anatanjami, Anyuuli zhawu hiyakushakama hampúng’a Alwi naMWANTA nawinji awayishayi jehi manzhi.²⁷Chalala kwaamu, nikambung’eyi wazhila Yesu, iwawayishili manzhi, amushakaminini hampúng’a kuji aHeloji naPontusi Pilatu, hamu nawaZHentili, ninyunza yawaIsalela, mung’anja yinu; ²⁸eli mwakeng’eli kwila chikasa cheyi, muwatong’welang’ahu jehi hampúng’a yeyi²⁹Ichi jinu Mwanta, talaku chanatukonkomwenuwu chakuzuwa, atwitezhi etu anjung’u zheyi tushimuni izu jeyi chakaji woma, ³⁰iku wuji nakwolola chikasa cheyi nakukolesha antu, nakwila yinzhikizhilu niyihayamisha yakwila nezhina jaKambung’eyi wazhila Yesu. ³¹Chanalombeluwu, omu mwapompeleluwu himukukanka; wezhima wawu hiyakwinzala naSpilitu Wazhila, hiyakuhosha izu jaNzambi chakaji woma³²Izaza jawantu ákuhweleli, hiyakwikala namuchima wawu wumu, nakufwila kwawu kwokumu, hikwajing’i niwumu welili ninji yuma yahetayi yinji kankawinjuku; ilang’a yuma yawu yezhima hiyikwikala yebomba. ³³Apostolu hiyakushimuna nang’ovu yayeni wunsahu wawu wakusang’uka kwasang’ukiliyi Mwanta Yesu muji afu. Luwi lwalweni hilukuwanina wezhima wawu; lwakwila kwosi muntu niwumu wabulili chumaku³⁴mulong’a antu ajing’i namaha, hela matala, hiyakuyilanjisha, hiyakuleta mali ayuma yanalanjishuwu, ³⁵hiyakutulila kunyenju yawapostolu, hiyakwanzhang’ana hamuntu hamuntu mwanabuliluwu.³⁶Yosefu, átumbiluwu kuji apostolu izhina jikwawu jaBalanaba, jaya mukwila nawu Sakukunjezha, kaLevi wavwalikili kuKipilosi; ³⁷wajing’i neha, hakujilanjisha, hakuleta owu mali, hakuyitulila kunyenju yawapostolu.

5¹Ilang’a kwajing’i iyala wumu, izhina jinji Ananiya, nang’ojinji Safwila, hiyakulanjisha iheta jawu. ²Hakunonahu chibalu chawuseya, ing’ojinji nawa niyena nachiluki, hakuleta chibalu chimu, hakuchitulila kunyenju yawapostolu.³Petulu hakwila ninji, Eyi Ananiya, Satana nenzeliji mumuchima weyi, mwaka wutwambi kuji Spilitu Wazhila, wusweki chibalu chawuseya weheta jeyi? ⁴Hajing’i iheta kanja wujilanjishi, hijajing’i jeyuku? Hela mali wunajilanjishi jehi, hiyajing’i eyeyi aweni akwila nachu mwezhima muwunakeng’uku? Muchima weyi wunatong’ozhokeliji mwenimu? Hiwunatwambi kuji antuku, wunatwambi kuji Nzambi. ⁵Ananiya hakutiya mazu awa, ajimbuka niheseki, yofwa nikufwa. Woma waweni wukwata niantu ezhima anachitiyi. ⁶Anyikwenzi hiyakunyamuka, hiyakumuzhing’azhing’a, hiyakumutwala hanzi, hiyakumutembeka nakumuzhiika.⁷Chikuneli munahiti jehi kwizhi mpinzhi zhisatu, ing’ojinji niyena hakwing’ilamu, chakaji kwiluka chuma chinasong’i. ⁸Petulu hakumwihula ninji, Nlezhi, wuseya wumwalanjisha iheta wowenowu, tahinji? Yena ninji, Eng’a, wowenowu.⁹Petulu hakumwila ninji, Munatiyang’eniji kumweseka Spilitu waMWANTA? Tiya nshinju zhanyenju yawantu anazhiiki mfumweyi ozhu zhikwinza kuchisu ozhu, nineyi nawa akukutwala hanzi. ¹⁰Hohenohu hakujimbukila kunyenju yinji, hakufwa. Anyikwenzi hiyakwing’ilamu, kumuwana wafwa jehi, hiyakumutwala hanzi nakumuzhiikila hamu namfumwinji. ¹¹Chipompelu chezhima chitiya niwoma waweni, niantu ezhima atiyili yumiyi.¹²Apostolu hiyakukong’a namakasawu niyinzhikizhilu niyihayamisha mukachi kawantu. Hiyakupompang’a wezhima wawu namuchima wumu hohu mwikeki jaSolomoni. ¹³Anashali hiyakutiya woma wakujibomba nawu; ilang’a hiyakuyilemesha kuji antu.¹⁴Akwakukuhwelela aswezha nikuswezha kuvula, ajibombeli kuji Mwanta, mazaza aweni amayala nawambanja. ¹⁵Hiyakweleka ákata hanzi nakuyisha munyikwakwa, nakuyikamika hela hatujiji hela hayikang’a, kulonja chakuhitayi Petulu, hela kwamwevulu winji hohu wuyilewukili. ¹⁶Hikukupompa izaza jafumini munyikala yajing’i kwakwihi naYelusalema niniku niniku kwi-njo; hiyakuleta antu awu akata, niezhima ajing’i nawaspilitu azonja, hiyakukola wezhima wawu.¹⁷Henohu kaplistu muneni niezhima ajing’iyi nawu, wowu achaaku chawaSajusi, hiyakusang’umoka, anatiyi jehi ichima mbe. ¹⁸Hiyakukwata apostolu, hiyakuyisha mukaleya mwashilang’awu antu ezhima.¹⁹Ilang’a kang’elu kaMWANTA wumu hakwinza nawufuku nakwenzulula yenzelu yakaleya, hakuyiijisha hanzi, ²⁰ninji, Yenu mwimani muTembeli, mulezhi antu mazu ezhima awumi wunu. ²¹Chanachitiyuwu, hiyakwing’ila muTembeli hankunku yakucha, hiyakutang’isha. Ilang’a kaplistu muneni hakuya, ninawa ekalayi nawu; hakupompesha chota, nichota chawaIsalela chikwawu chalema chezhima; hiyakutemesha anhembi kukaleya ayileti.²²Ilang’a chayiluwu anhembi, hiyakuwana mukaleya mwosi, hiyakufunta nakushimuna, ²³nawu, Kaleya chalala twawana kakupata chakola, nianhembi sang’a emenawu kuyenzelu; ilang’a chitwela netu twenzululuku, kuwana mukachi nimuntu mwosi.²⁴Mukulumpi wamashijika akuTembeli, niakulumpi zhawatuplistu, chatiyiluwu mazu awa, hiyakuzhinoka nankashi mukuya yumiyi. ²⁵Hikukwinza muntu nakuyilezha ninji, Tiyenu, awa amayala mwasha mukaleya anemani muTembeli nakutang’isha antu.²⁶Mukulumpi wamashijika nawanhembi hiyakuya nakuyileta chakaji njombu. Mulong’a hiyakutiya woma wawantu, nawu akenja katwasa malola. ²⁷Chanayiletuwu, hiyakuyimika muchota. ²⁸Kaplistu muneni hakuyila ninji, Twayilezheli chakola, netu bayi mutang’isha mwizhinijuku. Tiyenu ntahi, muYelusalema mwezhima mwawanina jehi kutang’isha kwenu hohu; munatong’ozhoki nenu mutwinki mulong’a wamashi aniwu muntu.²⁹Ilang’a aPetulu nawapostolu hiyakwakula nawu, Ching’a twovwahila Nzambi, bayi antuku. ³⁰Nzambi yawankakulula zhetu wamusang’wili Yesu muji afu, mwázhahilenu nakumukujika hamutonju. ³¹Yenowu anamutúmbakeshi jehi kuji Nzambi nachikasa chinji chachijiilu, ekali Mwanta niChamwinu, kulonja aleti kuji Isalela zhakubalumuka munyichima, nikuyanakena nshiji. ³²Etu yetu ayinsahu yayumiyi; niSpilitu Wazhila nawa anenkiyi Nzambi akwakumwovwahila.³³Wena chanachitiyuwu, chiyifutwisha nikunyichima, hiyakutong’ozhoka nawu ayizhahi. ³⁴Muchota himukwimana kaFwalisewu wumu, izhina jinji Gamaleli, nkulung’ang’a wanshimbi, amuhameka kuji antu ezhima; hakuyilezha ninji ayiijishi awa apostolu kampinzhi kanti.³⁵Hakuyila ninji, Enu amayala aIsalela, babalenu chimukukeng’a kuyila awa amayala. ³⁶Mulong’a mafuku ajing’uku, Teyujasa wanyamukili nakujisama ninji nalema; yena hakujibomba nawamayala amakwawu, kwizhi nkulakazhi zhiwana (400). Amuzhahili, niantu ezhima amwovwahilili ayipalang’esheli; akang’anya nipukwa. ³⁷Kulonjela haji yeniwu, hasonekesheluwu antu, Yujasi wakuNG’aliliya niyena nawa, hakwambula antu amakwawu, ninji ajikumi nayena. Yena nawa wanong’a jehi, niamakwawu ezhima amwovwahilili ayipalang’esha jehi nju-nju³⁸Ichi jinu nukuyilezha nami yambulukenu amayalawa, yilekenu kwawu. Mulong’a neyi mpúng’iyi hela mujimu iwu wawantu, wukwikala wamukunkulwayi. ³⁹Ilang’a neyi himujimu waNzambi, himwakatwesha kuyifwomona awa antuku, mwakenja kela muji nakulwisha naNzambi yomweni.⁴⁰Hiyakwitezha mwanahoshiyi. Chanatambikuwu apostolu, hiyakuyivupola, hiyakuyilezha nang’ovu nawu, Bayi muhosha mwizhina jaYesuku. Ayumbaku nikuyumbaku. ⁴¹Jichi hiyakufuma muchota nakuzang’alala, nanochu chanayifuukwiluwu kutela kusawuka nakukoola Izhina. ⁴²Hiyalekeli kutang’isha hefuku hefuku muTembeli nikumatalawuku, nakushimuna Yesu nawu jiyi Klistu.

6¹Hamafuku owu, chelili atumbanzhi hiyakuya nakuvula, hiyakutachika kujitopeka; aYujeya ahoshelang’a Gliki hiyakutopeka aYujeya ahoshelang’a Hebelu, mulong’a abonjeli amfwila zhawu hanzhang’enang’awu yakujya hefuku hefuku.²Ikumi nayeji (12) hiyakutambika izaza jawatumbanzhi, hiyakwila nawu, Hichachiwahi etu kushiya izu jaNzambi nakukalakela kuzhimesaku. ³Jichi enu anakwetu, talatalenu mukachi kenu amayala atanu nayeji akweti mpuhu yayiwahi, enzala jehi naSpilitu nimaana, tuyikunzhiki kumujimu iwu. ⁴Ilang’a etu kwetu tukukakela kukulombela, nimujimu wezu jaNzambi⁵Omu mwahosheluwu mutiyisha niizaza jezhima kuwaha. Hiyakutonja Stefwanu, iyala waswezha kukuhwelela, wenzala naSpilitu Wazhila; niFwilipu, niPolokolusi, niNikanoli, niTimoni, niPamenasi, niNikola wakuAntiyoki, wabalumukili kwikala kaYujeya. ⁶Wenawa hiyakuyisha kumesu awapostolu. Chanalombeluwu hiyakuyinang’ika makasawu.⁷Izu jaNzambi hijikutanja; niatumbanzhi hiyakuya nakuvula nankashi muYelusalema; mukanka wawatuplistu waweni hiyakwovwahila chikuhwelelu.⁸Stefwanu, wenzala nawuselewa waNzambi ning’ovu, hakwila yuma yakuhayamisha, niyinzhikizhilu yamaneni mukachi kawantu. ⁹Ilang’a hikukusang’umuka antu amakwawu akushikola yawantu anasubuluwu muwujung’u niakwaKileni, niakwaAlesanjeliya, niakwaSilisiya, niakwaAsiya, hiyakutajika ntaji naStefwanu.¹⁰Hiyakumukang’anya hansang’u yamaaninji, naSpilitu wahosheliyi nachu. ¹¹Hiyakwinka antu maseleka kulonja ahoshi nawu, Tunamutiyi nakuhosha mazu akutuka Mosi niNzambi.¹²Hiyakusang’umona antu niakulumpi niansoneki; chanamuwanuwu hiyakumukwata nang’ovu nakumutwala muchota. ¹³Hiyakwimika ayinsahu akutwamba elili nawu, Iwu iyala halekang’a kutena munu mwazhila ninshimbi chatamaku. ¹⁴Mulong’a tunamutiyi nakuhosha ninji, Iwu Yesu wakuNazaleta wakakisang’ana Tembeli iyi nakubalumuna yaaku yatulezheliyi Mosi. ¹⁵Antu ezhima ashakamini muchota hiyakumushinshika namesu awu swi-i; hiyakumona kumesu inji kuji neyi kumesu akang’elu.

7¹Kaplistu muneni hakwila ninji, Yumiyi yalala, tahinji? ²Yena ninji, Enu anakwami, ninenu atata, tiyililenu. Nzambi walubanzhi lwakulema wamwekeni kuji nkakulula yetu Abalahama, hajing’iyi muMesopotamiya, wuchiji kanja ashakami muHalana. ³Hakumwila ninji, Fumaku mwitung’a jenu, nikuji antang’a zheyi, Winzi mwitung’a jinakakulezha.⁴Hakufuma mwitung’a jawaKalajeya, hakushakama muHalana. Kwenoku, chafwiliyi tata yinji, Nzambi hakumufumishaku nakumuleta mwitung’a jinu jimwashakama lelu. ⁵Hamwinkeli mwoku wuswana, chalala hela hakujatila mwenju winjuku. Wakanini kumwinka itung’a jinji nawanyaninji amba kalonjelamu, hachijing’iyi kanja avwali mwana⁶Nzambi wahosheli mwakwila ninji, Anyaneyi akashakama mwitung’a jawenyi. Ninji akayiheta muwujung’u, nakuyikong’a chatama nyaka nkulakazhi zhiwana (400). ⁷Nzambi ninji, Owu munza wakayiheta nakawusompesha; Nkumininaku amba kafumamu, amba kankalakela mwenamunu. ⁸Hakumwinka chitiyang’enu chakwalama. Abalahama wavweli Isaka, hakumwalamisha ifuku jamuchitanu nachisatu, Isaka wavweli Yakoba, Yakoba wavweli ankakulula ikumi nayeji (12).⁹Owu ankakulula amutiyilili Yosefu ichima, hiyakumulanjisha kuji antu, amutweli muEzhipitu. Ilang’a Nzambi wajing’i ninji, ¹⁰hakumupulwisha kumakabi inji ezhima. Hemeniyi kumesu amwanta waEzhipitu Fwalo, Nzambi hakumutiyisha Fwalo kuwaha nayena namaaninji; yena hakumubalumuna kwikala nyuuli yaEzhipitu, nimukwakuhemba itala jinji jezhima.¹¹Henohu mumpata yaEzhipitu yezhima nimuKenani, himukuholoka nzala; hiyakumona yihung’u yayeni; ankakulula zhetu hiyamweni yakujyaku. ¹²Yakoba, chanatiyiyi nawu kuEzhipitu kuji tijiku, hakutemeshaku ankakulula zhetu ipampa jakusambila. ¹³Chayiluwu kamuchiyeji Yosefu hakujimwekesha kuji anakwinji; nimunza winji awiluka nikuji Fwalo¹⁴Yosefu hakutemesha nakutambika tata yinji Yakoba, niantang’a zhinji ezhima, antu makumi atanu nayeji natanu (75). ¹⁵Yakoba hakukunkumukila muEzhipitu. Hakufwa niyena niankakulula zhetu. ¹⁶Hiyakuyitwala kuShekemi nakuyikamika mwizhamu jalanjiliyi Abalahama nawuseya wasiliva kuji anyana kaHamoli muShekemi.¹⁷Chelili mwaka wamukaninuwu Abalahama kuji Nzambi hiwukuya nakushika, antu hiyakuswezha kuvula nankashi muEzhipitu. ¹⁸MuEzhipitu muswana nimwanta wacheng’i wabulili kwiluka Yosefu. ¹⁹Mwantowu hakukwatila munza wetu maana, hakukong’a ankakulula zhetu chatama, hiyakuyikanzhikizha kunata anyikeki zhawu, kulonja abuli kuhanja²⁰Wena mwakowu jiwu wavwalikiliyi Mosi, Nzambi hakumumona himwana walubanzhi; hiyakumulelela mwitala jatata yinji tukwezhi tusatu. ²¹Chamushiluwu mukalong’a, mwana kaFwalo wamumbanja hakumunona, hakumulela neyi mwaninji wakujivwela²²Chamushiluwu mukalong’a, mwana kaFwalo wamumbanja hakumunona, hakumulela neyi mwaninji wakujivwela22 Hiyakumutang’isha Mosi mwaya maana amuEzhipitu ezhima; hakuswezha ng’ovu nikumazu inji nikunyijimu yinji. ²³Chashikiliyi Mosi munyaka makumi awana (40), mumuchima winji himukwinza zhakuya nakuhempula anakwinji aIsalela. ²⁴Chanamoniyi mwinawu wumu hiyakumukong’a chatama, hakumwamwina, hakumutenja owu akabishiluwu, hakuzhaha owu kaEzhipitu. ²⁵Watong’ozhokeli ninji anakwinji akwiluka chakuyamwinawu kuji Nzambi nachikasa chinji yena, ilang’a wena kuchiluka nehi.²⁶Chikunachi, hakuyiwana aji nakulwisha mulwawu, yena hakukeng’a kuyihumang’esha cheng’i ninji, Enu akwetu, ivumu jenu jimu, mulong’anyi muji nakujikong’ela chatama chochichi? ²⁷Owu wamukong’eli mukwawu chatama hakumushinzhika Mosi ninji, Nakwilishi mulopu wetu ninsompeshi yetu hinyi? ²⁸Keng’a wunzhahi neyi chiwazhaha ona kaEzhipitu haloshi, tahinji?²⁹Mosi chanatiyiyi izu oju hakutemuka, hakushakama mwitung’a jakuMijiyani, hakuvwelaku anyana amayala ayeji. ³⁰Chinamani nyaka makumi awana (40), kang’elu hakumwekana kuji yena muchinkalampata chakumpiji yaSinayi, mumuzuzu wakesi muchiputa³¹Mosi chanachimoniyi, hakuhayama; hakwinza nakuswila kwakwihi, ninji atali. ³²Hikukutiyakana izu jaMWANTA ninji, Ami Yami Nzambi yawankakulula zheyi, Nzambi yaAbalahama, niyaIsaka, niyaYakoba. Mosi hakuzaala woma, nikutwesha kutalaku nehi³³MWANTA hakumwila ninji, Subulaku nkwabilu zhiji kunyenju yeyi, mulong’a hiwunemani hiiseki jazhila. ³⁴Chalala namoni chaji nakukabishawu antu ami aji muEzhipitu, natiyi chakwabawu; nasuluki jehi niyipulwishi. Jichi nakeng’i kukutemesha muEzhipitu.³⁵Yowu Mosi alekeluwu nawu, Nakwinki mujimu wakutuyuula hela kutusompesha hinyi? jiyi atemesheluwu kuji Nzambi ekali nyuuli ninkuuli, nachikasa chayenowu kang’elu wamwekeni kuji yena muchiputa. ³⁶Jiyi muntu wayifumishili muEzhipitu chanakong’iyi yihayamisha nayinzhikizhilu, nimuEzhipitu, nimuKalung’alwizhi Kachinana, nimuchinkalampata, nyaka makumi awana (40). ³⁷Yeniwu jiyi Mosi wayilili anyana kaIsalela ninji, Nzambi wakayimwekeshela Kaplofwetu wahaji anakwenu neyi ami.³⁸Jiyi wajing’i muchipompelu chamuchinkalampata, hamu nanowu kang’elu wahosheli nayena kumpiji yaSinayi, ninawankakulula zhetu; jiyi watambwili mazu amomi atutang’ishi etu. ³⁹Yowu alekeluwu ankakulula zhetu nawu etu kumwovwahila kwonti kwetu; hiyakumushinzhika nawu tufumi; nyichima yawu hiyikufunta cheng’i kuEzhipitu. ⁴⁰Hiyakumwila Aloni nawu, Wutwilili anzambi kulonja atwaminini kutukuyetu; Yeniwu Mosi, watufumishili mwitung’a jaEzhipitu, Hituneluki kwanayiyuku.⁴¹Wena mafuku owu hiyakwila mwana kang’ombi, hiyakuketwila yenowu nkishi chimuna, hiyakuzang’alala nanyijimu yakumakasawu. ⁴²Nzambi hakubalumuka, hakuyileka kwinji, ninji apeshang’a yileng’aleng’a yamwiwulu; neyi chasonekeluwu mumukanja wawatuplofwetu nawu, Enu akwamutang’a waIsalela, yami komana mwaketwililang’a yimuna, Mwaletelelang’a nyilambu nyaka makumi awana (40) muna muchinkalampata tahinji?⁴³Mwanyamwini tabanaka yaMoleki, nikukatumbwa kamukishi Lefwana, Jiyi yuma mwalumbishili kulonja kujifukula kuji wena, Ami nakayitwala kwakubajika Babiloni.⁴⁴Ankakulula zhetu ajing’i naTabanaka yawunsahu omu muchinkalampata, yamukunzhikiluwu Mosi kuji owu wahoshelang’a ninji, hakumulezha ninji akatung’i mwaya chifwikizha chanamoniyi. ⁴⁵Tabanaka yaleteluwu kuji ankakulula zhetu nawa, heng’ililuwu hamu naYoshuwa nakutambula itung’a jawaZHentili atemwiniyi Nzambi kúkuya ankakulula zhetu, njo-o nikumafuku aDavidi, ámwenuwu kuwaha kuji Nzambi. ⁴⁶Yowu walombeli kumutung’ila Nzambi yaYakoba hakushakama.⁴⁷Ilang’a Solomoni jiyi wamutung’ilili itala. ⁴⁸Hela chochu, Mukwakubajika hashakamang’a mwakutung’a namakasa awantuku; ⁴⁹mwomwaneliyi kaplofwetu ninji, Iwulu hiitanja jami jawanta, Iseki hiitanja jakunyenju yami. MWANTA ninji, Inji itala mukuntung’ilami kulonja nimoni mwakunookela, jishika hajihi? ⁵⁰Yuma yezhimiyi hiyayitung’ili kujami nachikasa chamuku?⁵¹Enu mwachinchika! Enu ayijima munyichima namatu! Yenu mwajikang’ang’a naSpilitu Wazhila mafuku ezhima. Chelilang’a ankakulula zhenu, jichi chimwelang’a ninenu. ⁵²Kaplofwetu wumwojihi abulili kukabishawu kuji ankakulula zhenu? Azhahili wena ayilezhelang’ahu jehi chakenzayi Mukwakulong’a; yenowu, yenu mwabalumukili kwikala akwakumufukezha, niambanzhi akumuzhaha. ⁵³Enu mwatambwili nshimbi yayileteleluwu kuji ang’elu, enu kuyihemba nehi.⁵⁴Wena chanatiyuwu mazu owu, chiyifutwisha nikunyichima, hiyakumusumang’ena kumazhi. ⁵⁵Ilang’a yena, wenzala jehi naSpilitu Wazhila, hakutala mwiwulu swi-i, hakumona lubanzhi lwakulema kwaNzambi, niYesu nemani kuchikasa chaNzambi chachijiilu. ⁵⁶Ninji, Talenu, namoni mumawulu munenzuluki, niMwana kaMuntu nemani kuchikasa chaNzambi chachijiilu.⁵⁷Ilang’a wena hiyakubijika nang’ovu, hiyakusha nyinu mumatu awu, hiyakumulotokela namuchima wawu wumu hohu. ⁵⁸Amukokela nihanzi yang’anja, amwasa nimalola. Ayinsahu hiyakutenteka mahinawu kunyenju yamukwenzi weyala, izhina jinji Sawulu.⁵⁹Hiyakumwasola Stefwanu malola, iku wuji nakutambika ninji, Mwanta Yesu, atambuli spilitu yami. ⁶⁰Hakufukama, hakubijika chakola ninji, Eyi Mwanta ayanakeni mulong’iwu. Chanahoshiyi mwenimu akama nitulu. Sawulu wajing’i nakwitezha chanamuzhahuwu.

8¹Jena ifuku oju ikabisha jakukabisha chipompelu chajing’i muYelusalema jivulumuka nikuvulumuka. Hiyakupalang’ena wezhima wawu mwahita matung’a aYujeya naSamaliya, kwasheli wowu apostolu hohu. ²Stefwanu hiyakumuzhiika kuji amayala akweti kalemesha kakulemesha Nzambi, hiyakumujila makumbu aweni. ³Ilang’a Sawulu hakukisang’ana chipompelu; hakwing’ila mumatala ezhima nakukokakoka niamayala niambanja, hakuyisha mukaleya.⁴Jichi wena apalang’eni hiyakukimbuka nakushimuna izu jaNzambi. ⁵Fwilipu hakukunkumukila kung’anja yaSamaliya, hakuyishimwina nsang’u yaKlistu⁶Mazaza awantu chanatiyuwu mwahosheliyi Fwilipu, nikumona yinzhikizhilu yeliliyi, hiyakumutiyilila namuchima wawu wumu hohu. ⁷Mulong’a aspilitu azonja, hiyakufuma muji antu amavulu nakukaloka nang’ovu. Antu amavulu ajing’i namusong’u wakalepa, niajing’i nakubalakata, hiyakukola. ⁸Mung’anjoyu mwajing’i muzang’alu waswezha⁹Ilang’a mung’anjoyu mwajing’i iyala wumu, izhina jinji Shimona, yenowu wahong’elang’a nakuhayamisha akwaSamaliya, nakujisama ninji nalema. ¹⁰Antu ezhima, kufumisha kuji akaji kulema kushika nikuji alema, hiyakumusha kumuchima nawu, Yeniwu jiyi ng’ovu oyu yaNzambi yatenang’awu nawu Muneni . ¹¹Amushili kumuchima, mulong’a wayihayamishilang’a nang’ombu yinji mafuku amavulu.¹²Ilang’a chanakuhweleluwu mwashimwiniyi Fwilipu nsang’u yayiwahi yakutena wanta waNzambi niizhina jaYesu Klistu, hiyakuyizhimika, niamayala niambanja. ¹³Shimona yomweni niyena nawa hakukuhwelela; chanamuzhimikuwu hakwenja hamu naFwilipu. Chanamoniyi yinzhikizhilu ninyijimu yang’ovu yakong’eliyi, hakuhayama.¹⁴Nochu jinu apostolu ajing’i kuYelusalema, chanatiyuwu nawu aSamaliya anatambuli izu jaNzambi, hiyakutemeshaku aPetulu naYowanu. ¹⁵Wena chanashikuwu, hiyakuyilombelela kulonja atambuli Spilitu Wazhila. ¹⁶Mulong’a henohu Spilitu wuchiji kanja aholokeli hela haji muntu niwumu wakwenokuku, anakumini jakuyizhimika mwizhina jaMwanta Yesu hohu. ¹⁷Hiyakuyinang’ika makasa, atambula niSpilitu Wazhila.¹⁸Shimona, chanamoniyi Spilitu Wazhila ayinkang’ayu hakunang’ika makasa awapostolu, hakwila ninji ayinki mali; ¹⁹ninji, Nyinkenu ninami wanta iwu, kulonja yowu nakanang’ika makasami akatambuli Spilitu Wazhila²⁰Ilang’a Petulu hakumwila ninji, Mali eyi akisikili kumu naneyi, mulong’a wunatong’ozhoki neyi wutambuli namali chamukunkulu chaNzambi. ²¹Hiwukweti mwakutukwashila hela mujimu kunsang’u iyuku; mulong’a muchima weyi hiwalong’a kumesu aNzambuku. ²²Jichi balumukaku mumuchima wuleki ichi chuma chatama, wumulombi Mwanta, wamba kela muwunatong’ozhoki mumuchima weyi akakwanakeni. ²³Mulong’a nakumoni wumuntu wunaluli jehi nanjulu mumuchima, anakukasi jehi nakuluwa kweyi.²⁴Shimona hakwakula ninji, Nlombelelenuku kuji Mwanta, kulonja yumoyu yimunateni yibuli kunwana²⁵Jichi wena, chanashimunuwu wunsahu wawu nakuhosha izu jaMwanta, hiyakufunta kuYelusalema nakushimuna nsang’u yayiwahi munyikala yawaSamaliya yayivulu²⁶Ilang’a kang’elu kaMWANTA hakumwila Fwilipu ninji, Nyamukaku, wuyi kukabeta kakuchijiilu, kunzhila yafuma kuYelusalema yakunkumukila kuGaza muchinkalampata. ²⁷Hakunyamuka, hakuya. Kutala iyala wakuEtiyopiya, nhembi yamwanta wamumbanja wawaEtiyopiya Kanjesi, walema nankashi, jiyi wahembelang’a yuma yaKanjesi yalema yezhima. Yenowu wenza jehi kuYelusalema kulonja kujifukula kuji Nzambi; ²⁸wajing’i munzhila yakufunta, washakama mwikálu jinji nakutang’a mukanja wakaplofwetu Isaya.²⁹Spilitu hakumwila Fwilipu ninji, Yaku kwakwihi, wukunjami kwikálu jina. ³⁰Fwilipu hakuyaku lufuchi, hakumutiya wuji nakutang’a mukanja wakaplofwetu Isaya. Ninji, Chiwuji nakutang’a chinakulumbulukili, tahinji? ³¹Kuchinka yena nhembi ninji, Chikunlumbulukila ng’ahi chakaji muntu kunlezha? Hakumwila Fwilipu ninji akanjami ashakami hamu.³²Komana wajing’i nakutang’a mwasonekawu nawu, Neyi mwana kamukoku akutwalawu nakuzhaha, Neyi chamwenang’ayi mukoku haji akwakumutewula nzo-o, Jichi niyena haasamini mukanwa kinjuku. ³³Chajizozeliyi, hiyakumutambula wuhaku wakeng’eli kumonayi. Iking’u jinji akajishimuna kujinyi? Mulong’a wumi winji ;Najiteni yomweni, tahinji nateni muntu wacheng’i?³⁴Owu nhembi hakumwihula Fwilipu ninji, Kaplofwetu nateninyi, mwani? Najiteni yomweni, tahinji nateni muntu wacheng’i? ³⁵Fwilipu hakuhosha mazu akutachikila kumukanjiwu, hakumushimwina nsang’u yaYesu.³⁶Chayilang’awu munzhila hiyakushika kumenzhi. Owu nhembi ninji, Tala menzhi awa; chumanyi chikunlekesha kunzhimika? ³⁷Fwilipu hakwakula ninji, neyi wunakuhweleli namuchima weyi wezhima wukutwesha. Yena hakwakula ninji, Nakuhweleli nami Yesu Klistu jiyi Mwana kaNzambi. ³⁸Hakulezha antu kwimika ikálu. Hiyakukunkumukila mumenzhi mwayeji wawu, niFwilipu ninhembi; hakumuzhimika.³⁹Chanakanjukuwu mumenzhi, Spilitu waMWANTA hakumuhukula Fwilipu; owu nhembi hamumweni nawa cheng’uku, hakuyang’a kwinji munzhila yinji nakuzang’alala. ⁴⁰Hakwinza Fwilipu hiyakumuwana kuAzotu; chahitiliyi, hakushimuna nsang’u yayiwahi munyikala yeneni yezhima, nichashikiliyi kuKesaleya

9¹Ilang’a Sawulu hakwonashanina nikufunyina atumbanzhi twaMwanta zhawubanzhi; hakuya kuji kaplistu muneni, ²hakulomba nyikanja yakuya nachu kumashikola akuJamakasa, kulonja neyi wakawana akwaNzhila amakwawu, hela amayala hela ambanja, akayileti kuYelusalema munyonzhi.³Chajing’i nakwenjayi hakuya nakushika kuJamakasa, kukasumuka hikukumutong’ekela chezhezhi chakufuma mwiwulu kwi-njo. ⁴Hakujimbuka heseki, hakutiya izu hijikumwila ninji, Eyi Sawulu, Sawulu, wankabishilang’aji?⁵Sawulu ninji, Yeyinyi Mwanta? Mwanta ninji, Yami Yesu wákabishang’a. ⁶Nyamukaku, wing’ili mung’anja, akakulezhi muwukwila. ⁷Amayala enjeliyi nawu hiyakwimana, zhinayikang’i jehi zhakuhosha, anatiyi kwezu hohu, kumona muntu nehi.⁸Sawulu hakunyamuka hamaseki; ninji atoni, kumona chuma nehi. Hiyakumukwata kuchikasa, hiyakumutwala muJamakasa. ⁹Hakwikala mafuku asatu chakaji kumona; kujya hela kunwa nehi.¹⁰MuJamakasa mwajing’i kambanzhi wumu, izhina jinji Ananiya. Mwanta hakumwila muchimwenu ninji, Eyi Ananiya. Yena ninji, Yamonu Mwanta. ¹¹Mwanta hakumwila ninji, Nyamukaku, wuyi kumukwakwa wukweti izhina jaWoloka, mwihuli muntu mwitala jaYuja, izhina jinji Sawulu wakuTalusa; mulong’a wuji nakulombela. ¹²Niyena namoni muchimwenu iyala, izhina jinji Ananiya, hakwing’ila mwajiyi yena, hakumunang’ika makasa kulonja amoni.¹³Ilang’a Ananiya hakwakula ninji, Eyi Mwanta, iwu iyala namutiyi kuji antu amavulu, mwanakong’iyi antu eyi azhila kuYelusalema chatama; ¹⁴nikunu yena wukweti wanta watambulayi kuji akulumpi zhawatuplistu, kulonja kukasa antu ezhima atambikang’a izhina jeyi. ¹⁵Ilang’a Mwanta hakumwila ninji, Yang’a kweyi; yena hinsaba yinatonji ami aweni, kulonja atwali izhina jami kuji aZHentili, nikuji anyanta ankanu, nikuji aIsalela. ¹⁶Mulong’a ami nukumulezha yuma yayivulu yakakabayi, yakukoola izhina jami¹⁷Ananiya hakuya, hakwing’ila mwitaloju. Hakumunang’ika makasa ninji, Eyi manakwami Sawulu, Mwanta Yesu, wámwekana kujeyi munzhila yiwenzang’a, nantemeshi kulonja wumoni, winzali naSpilitu Wazhila. ¹⁸Hohenohu kumesu inji kuholoka niyuma yiji neyi makàlu, amona nikumona. Hakunyamuka, hiyakumuzhimika. ¹⁹Hakutambula yakujya, akwata ning’ovu. Hakushakama mafuku nawatumbanzhi ajing’i kuJamakasa.²⁰Hohenohu hakutiyakesha nsang’u yaYesu mumashikola, ninji hiMwana kaNzambi. ²¹Ezhima amutiyili hiyakuhayama nawu, Hijiyi wakabishilang’a antu muYelusalema atambikang’a izhinijuku? Nsang’u yanenzhiliyi kunu yoyu yakuyitwala munyonzhi kuji akulumpi zhawatuplistu. ²²Ilang’a Sawulu hakuswezha ng’ovu, hakuyibayisha aYujeya ashakamini kuJamakasa, nakulumbulula chakashinshi ninji chalala iwu Yesu jiyi Klistu.²³Chimunahiti jehi mafuku amavulu, aYujeya hiyakumushakamina hampúng’a yakumuzhaha. ²⁴Mpúng’oyu hiyakuyiluka kuji Sawulu. Hiyakuhemba kuyisu yamukala nimwaana niwufuku kulonja amuzhahi. ²⁵Ilang’a atumbanzhi hiyakumutwala nawufuku, hiyakumuhanwisha mwipwata jamumpwembu nakumuzelumuna muchimpaya.²⁶Chanashikiyi kuYelusalema hakweseka kujibomba nawatumbanzhi. Wezhima wawu hiyakumutiya woma, hiyakutajika nawu hikambanzhuku. ²⁷Ilang’a Balanaba hakumutambula, hakumutwala kuji apostolu, hakuyilezha chanamumoniyi Mwanta munzhila, nichanahoshiyi Mwanta nayena, nichanashimuniyi izhina jaYesu kuJamakasa chakaji woma.²⁸Hakwikala nawu kuYelusalema; hakukimbukang’a nawu, hakwing’ilang’a nakwijikang’a hamu nawu. ²⁹Hakushimuna izhina jaMwanta chakaji woma; hakuhosha nakutajika nawaYujeya ahoshang’a Gliki, ilang’a wena hiyakukeng’a mwakumuzhahila. ³⁰Chanachilukuwu anakwinji hiyakumukunkumwisha kuKesaleya, hiyakumutemesha kuTalusa³¹Mwahita Yujeya mwezhima nimuNG’aliliya nimuSamaliya, chipompelu hichikumona kuwunja, hichikujitung’a, hichikwenja nawoma waMwanta, nimukuyikunjezha kwaSpilitu Wazhila, hichikutoha. ³²Chajing’i nakukimbukayi Petulu kwezhima, hakushika nikuji akwakuzhila ashakama kuLija.³³Kwenoku hakumona muntu wumu, izhina jinji Eneya, wakama jehi hakajiji kinji nyaka yitanu nayisatu; mulong’a wajing’i wakata kalepa. ³⁴Petulu hakumwila ninji, Eyi Eneya, Yesu Klistu hakukukolesha; hinjukaku, alaku kajiji keyi. Ahinjuka nihohenohu. ³⁵Ezhima ashakama kuLija nimuShaloni hiyakumumona, hiyakubalumukila kuji Mwanta.³⁶Woho, kuYopa kwajing’i kambanzhi wumu, izhina jinji Tabita, muGliki jiyi Jokasi; yenowu mumbanja waswezheli nyijimu yayiwahi, niyuma yaluwi yeliliyi. ³⁷Hamafuku owu hakukata hakufwa. Chanamuweleshuwu, hiyakumukamika mwitala jahewulu.³⁸KuLija kwajing’i kwakwihi naYopa; jichi atumbanzhi, chanatiyuwu nawu Petulu wuji kuLija, hiyakutemeshaku amayala ayeji nakumulembelela nawu, Bayi wulaba kwinzaku. ³⁹Petulu hakunyamuka hakuya nawu. Chanashikiyi, hiyakumutwala mwitaloju jahewulu. Ambanja amfwila ezhima hiyakwimana kwakwihi nayena nakujila, nakumulezhalezha yikowelu niyuma yakuvwala yachiminiyi Jokasi hachijing’iyi nawu.⁴⁰Petulu hakuyiijishamu wezhima wawu, hakufukama nakulombela. Hakubalumuka nakutala kuji mufu ninji, Eyi Tabita, hinjukaku. Atona nikutona. Chanamoniyi Petulu, Tabita hakuhinjuka nakushakama. ⁴¹Petulu hakumukwata kuchikasa chinji, hakumuhinjwisha. Hakutambika akwakuzhila nawambanja amfwila, hakuyinkayi wamumi. ⁴²Hichikutiyakana muYopa mwezhima; amavulu hiyakumukuhwelela Mwanta. ⁴³Petulu hakushakama muYopa mafuku amavulu kwamuntu izhina jinji Shimona, mukwakuloomba yitembi.

10¹MuKesaleya mwajing’i iyala wumu, izhina jinji Konelisu, mukulumpi wamashijika atenang’awu nawu aItaliya; ²muntu wukweti kalemesha kakulemesha Nzambi, waakamang’a Nzambi hamu nawakwetala jinji ezhima, wenkelang’a antu yamukunkulu yayivulu, walombelelang’a kuji Nzambi hefuku hefuku.³Hakumona muchimwenu chalumbuluka, kang’elu kaNzambi hakwinza kuji yena hampinzhi kwizhi yamuchitanu nachiwana yefuku (15:00 hls), hakumwila ninji, Eyi Konelisu. ⁴Niyena chanamushinshikiyi kang’elu swi-i, hakutiya woma ninji, Chumanyi Mwanta? Yena hakumwila ninji, Kulombela kweyi kwakuvulu niyamukunkulu yeyi yinashiki kuji Nzambi, anakwanuki nachu. ⁵Jichi jinu, temeshaku amayala kuYopa, akaleti Shimona atumbiluwu izhina jikwawu jaPetulu; ⁶washakama kwamuntu wumu izhina jinji Shimona, mukwakuloomba yitembi, wukweti itala jinji kwakwihi nakalung’alwizhi.⁷Chanayiyi kang’elu wajing’i nakuhosha ninji, Konelisu hakutambika ang’amba zhinji ayeji, niishijika wumu wukweti kalemesha kakulemesha Nzambi, wowu akwakumwimena hefuku hefuku. ⁸Hakuyihitila mwezhima mwanamulezhuwu kuji kang’elu, hakuyitemesha kuYopa.⁹Chikunachi, achiji kuya munzhila yawu, hiyakuya nakuswila kwakwihi namukalowu, Petulu hakukanjuka hewulu jetala alombeli, kwizhi neyi hampinzhi yamuchitanu nayimu (12:00 hls). ¹⁰Hakutachika kutiya nzala, hakukeng’a kujya. Hachiji kulong’eshawu kujya, Petulu hakukeng’a kuya mutulu, hakumona chimwenu. ¹¹Wamweni iwulu hiyakujizhikula, nichuma kwizhi chiji neyi ihina jeneni, hichikuzelumuka, hiyakuchizelumwina kumawombu achu awana, chishika niheseki. ¹²Mwenomu muji anyama anyichiji yezhima, niyuma yazalalang’a hamaseki, nituja twahaluzwizu¹³Kuji yena hikukwinza izu jakwila nawu, Eyi Petulu, nyamukaku, wuzhahi, wujyi. ¹⁴Ilang’a Petulu ninji, Anha-a, Mwanta! Kanja jehi nijyi chuma chatama hela chamazhiluku. ¹⁵Izu hijikwinza kuji yena ipampa jamuchiyeji nawu, Chuma chanatookeshiyi Nzambi, bayi wuchitena neyi chatamaku. ¹⁶Chenichi achilili kasatu; chumochu achitambula nikwiwulu hohenohu.¹⁷Hachijing’iyi Petulu kuzhinoka nankashi, ninji chimwenu ichi chinamoni chinayi mujihi? kukasumuka owu amayala atemesheluwu kuji Konelisu, anehuli jehi kwitala jaShimona, anemani jehi kuchisu chachipang’u. ¹⁸Hiyakutambika nakwihula nawu, Shimona atumbiluwu izhina jikwawu jaPetulu, washakama kunu?¹⁹Hachijing’iyi Petulu kutong’ozhoka nsang’u yachimwenu ochu, Spilitu hakumwila ninji, Tala, amayala asatu anakukeng’i. ²⁰Jichi nyamukaku wusuluki, wuyi nawu chakaji ntaji; yami inayitemeshi. ²¹Petulu hakusulukila kuji owu amayala ninji, Yami muntu muji nakukeng’a; munenzhiliji?²²Nawu, Mukulumpi wamashijika Konelisu, muntu walong’a waakamang’a Nzambi, amuhamekang’a kuji munza wezhima wawaYujeya, anamulezhi kuji kang’elu wazhila nawu akakutambiki wuyi kwitala jinji, kulonja atiyi mazu kujeyi. ²³Petulu hakuyitambika mwitala hakuyilezha kwakukama. Chikunachi hakunyamuka hakuya nawu, nianakwinji amakwawu akuYopa hiyakumutwalaku.²⁴Chikunachi ifuku jikwawu hiyakwing’ila muKesaleya, kuwana Konelisu wuji nakuyiching’ilila, wapompesha jehi antang’a zhinji niamabwambu zhinji ajikunjayi nawu.²⁵Chaneng’iliyi Petulu, Konelisu hakumubulakana, hakujinata kunyenju yinji nakujifukula kuji yena. ²⁶Ilang’a Petulu hakumuhinjwisha ninji, Imanaku; ninami nawa nimuntu kwami.²⁷Iku wuji nakuhosha ninji hakwing’ila, hakuwana antu amavulu anapompi jehi. ²⁸Hakuyila ninji, Enu aweni muneluki kaYujeya kushakama namuntu wakumunza wacheng’i hela kwinza kwakwihi ninji, chinzhila. Hela chochu, Nzambi nanlezhi ninji, kutena muntu neyi watama hela wamazhilu, chinzhila. ²⁹Jichi chimwantambika, hinukwinza chakaji ntaji. Jichi nehuli nami mwantambikilaji?³⁰Kuchinka Konelisu ninji, Munahiti mafuku awana nakushika hampinzhi yinu, najing’i nakulombela mwitala jami hampinzhi yamuchitanu nachiwana (15:00 hls); kukasumuka iyala nemani kuniji, navwali mahina atong’eka chezhezhi. ³¹Ninji, Eyi Konelisu, kulombela kweyi anakutiyi, niyamukunkulu yeyi anayanuki kuji Nzambi. ³²Jichi jinu, temeshaku antu kuYopa wakatambiki Shimona atumbiluwu izhina jikwawu jaPetulu, akenzi kujeyi; yena wekala kwaShimona mukwakuloomba yitembi kuchikumu chakalung’alwizhi. ³³Jichi hinukukutemeshela antu hohenohu. Chinawahi mwani chiwunenzi. Jichi jinu, yetu awa tuji kunu kumesu aNzambi wezhima wetu, kulonja tutiyi yezhima yanakulezhuwu kuji Mwanta.³⁴Putulu hakuhosha ninji, Mwalala, namoni komana Nzambi haakamang’a antu kumesuku, ³⁵hakwila munyunza yezhima, muntu wamwakamang’a yena, welang’a mwalong’a, amutiyang’a kuwaha kuji Nzambi.³⁶Enu aweni mweluka izu jatemesheliyi Nzambi kuji aIsalela, nakushimuna nsang’u yayiwahi yakuwunja muji Yesu Klistu. Yena jiyi Mwanta wawantu ezhima. ³⁷Nsang’u iyi enu aweni mwayiluka, yatiyakeni mwahita Yujeya mwezhima; yatachikilili kuNG’aliliya hakumishiluwu chizhimikilu chashimwiniyi Yowanu. ³⁸Mwatiya jehi nsang’u yakutena Yesu wakuNazaleta, chamuwayishiluwu kuji Nzambi naSpilitu Wazhila nang’ovu; yena wahitang’enang’a nakwila yayiwahi, nakukolesha antu ezhima akabishilang’awu kuji jiyabolu, mulong’a Nzambi wajing’i nayena.³⁹Yetu ayinsahu twamweni namesu mwezhima mweliliyi mwitung’a jawaYujeya nimuYelusalema; yena nawa amuzhahili, nakumukujika hamutonju. ⁴⁰Yena amusang’wili kuji Nzambi muji afu ifuku jamuchisatu; ⁴¹hakumumwekesha hatooka, bayi kuji antu ezhimaku, ilang’a kujetu ayinsahu akutonjang’ahu jehi kuji Nzambi, yetu twelili nikujya nikunwa ninji heliliyi nasang’uki jehi muji afu.⁴²Yena hakutulezha ninji tushimwini antu, tushimuni wunsahu wakutena netu yenowu jiyi anafuukuluwu kuji Nzambi kwikala mukwakusompesha niamomi niafu. ⁴³Amushimunang’a wunsahu kuji atuplofwetu ezhima, nawu mwizhina jinji antu ezhima ákumukuhwelela akamona kuyanakena nshiji.⁴⁴Iku Petulu wuchiji kuhosha mazu awa, Spilitu Wazhila hakuholokela haji antu ezhima ajing’i nakutiya. ⁴⁵Niakwakwalama enzhili naPetulu ajing’i akuhwelela, chanachimonuwu, hiyakuhayama wezhima wawu nawu, Komana haji aZHentili nihena nawa anechiluhu chamukunkulu chaSpilitu Wazhila.⁴⁶Mulong’a atiyili hiyakuhosha majimi acheng’i nakumutohesha Nzambi. ⁴⁷Petulu hakwila ninji, Muntwinyi natweshi kulekesha menzhi, abuli kuyizhimika awa anatambuli Spilitu Wazhila mwomutwatambwili ninetu? ⁴⁸Hakuyila ninji ayizhimiki mwizhina jaYesu Klistu. Hiyakumulembelela nawu ashakamuku mafuku amakwawu.

11¹Apostolu nianakwawu amuYujeya, hiyakutiya nawu aZHentili niwena nawa anatambuli jehi izu jaNzambi. ²Chanenziyi Petulu kuYelusalema, akwakwalama hiyakutajika ninji, ³nawu, Eyi weng’ilili mwawayijima, hiwukujya nawu.⁴Petulu hakutachika kuyilumbulwila mwahitili nsang’u yezhima. ⁵Ninji, Chinajing’i kumukala waYopa nakulombela, hinukukeng’a kuya mutulu, muchimwenu hinukumona chuma kwizhi chiji neyi ihina jeneni, hichikuzelumuka, hiyakuchizelumuna kwiwulu kuchajing’i kumawombu achu awana, chishika nikujami. ⁶Kushinshikamu hinukumona muji anyama ahanu heseki, nianyama amumpata, niyuma yazalalang’a, nituja twahaluzwizu.⁷Hinukutiya izu nawu, Eyi Petulu, nyamukaku, wuzhahi, wujyi. ⁸Ami hinukwila nami, Anha-a, Mwanta, kanja jehi nijyi chuma chatama hela chamazhiluku. ⁹Izu hijikwakula kwiwulu kamuchiyeji nawu, Chuma chanawahishiyi Nzambi, bayi wuchitena neyi chatamaku. ¹⁰Chanachiluwu kasatu ayikokela niyezhima mwiwulu.¹¹Hohenohu kutala amayala asatu, ánatemeshuwu jehi kujami kufuma kuKesaleya, anemani jehi kwitala kutwajing’i. ¹²Spilitu hakunlezha kuya nawu, chakubula kwakama. Nayili hamu nanawa anakwetu atanu nawumu; twing’ila nimwitala jayenowu iyala. ¹³Hakutulezha chamweniyi kang’elu nemani mwitala jinji, nichamulezheluwu kuji owu kang’elu ninji, Temeshaku antu kuYopa, akaleti Shimona atumbiluwu izhina jikwawu jaPetulu; ¹⁴akakulezhi mazu akuyamwina nineyi niakwetala jeyi ezhima.¹⁵Chinajing’i nakutachika kuhosha, Spilitu Wazhila hakuholokela haji wena, mwomwaholokeleliyi hajetu hakusambila. ¹⁶Hinukwanuka mazu aMwanta eliliyi ninji, Chalala Yowanu wazhimikili mumenzhi, hakwila enu akayizhimika muji Spilitu Wazhila.¹⁷Jichi jinu, Nzambi ayinka nichamukunkulu chochimu chatwinkeliyi etu hitwakuhweleleli Mwanta Yesu Klistu, yaminyi mwaka nimoni kujikang’a naNzambi? ¹⁸Chanatiyuwu yumiyi, amwena ninzo-o; hiyakumulemesha Nzambi nawu, Komana Nzambi netezhi aZHentili kubalumuka munyichima amoni wumi.¹⁹Owu apalang’esheluwu nekabisha jasang’umukili hansang’u yaStefwanu hiyakwenja chakushika nikuFwenisiya, nikuKipilosi, nikuAntiyoki, nakushimununa izu jaNzambi kuji aYujeya hohu, bayi kuji acheng’uku. ²⁰KuKipilosi nakuKileni kwajing’i amayala amakwawu avwalikilili kwenoku; wenawa chanashikuwu kuAntiyoki, hiyakuhoshahosha nawaGliki nawa, nakushimuna nsang’u yaMwanta Yesu. ²¹Chikasa chaMwanta hichikwikala nawena, amavulu nankashi hiyakukuhwelela, hiyakubalumuka nakutala kuji Mwanta.²²Nsang’u yayumiyi yitiyakana nikuji akwachipompelu chajing’i muYelusalema, hiyakutemeshaku Balanaba akashiki nikuAntiyoki. ²³Yena chanashikiyi, chanamoniyi wuselewa waNzambi, hakutiya kuwaha; hakuyikonkomwena wezhima wawu ninji akakakeli Mwanta chakutaku muchima. ²⁴Mulong’a wajing’i iyala wamuwahi, wenzala naSpilitu Wazhila nikukuhwelela. Antu amavulu ajibombeli naMwanta.²⁵Balanaba hakuya nakukeng’a Sawulu kuTalusa. Chanamuwaniyi hakumuleta kuAntiyoki. ²⁶Hiyakupompang’a hamu nachipompelu mwaka wezhima, nakutang’isha antu amavulu nankashi. KuAntiyoki jiku kwasambilili kutenawu atumbanzhi izhina jawakwaKlistu.²⁷Hamafuku owu, kuYelusalema hikukufuma atuplofwetu hiyakwinza kuAntiyoki. ²⁸Hikukwimana muntu wumu, izhina jinji Agabusi, hakushimunang’ahu jehi naSpilitu ninji kwakenza nzala yeneni mwahita mpata yamunu mwishina yezhima. Nzaloyu yaholokeli hamafuku ajing’iyi Kalujusa mwanta.²⁹Nochu atumbanzhi ezhima hiyakwila nawu tukwashuku anakwetu aji muYujeya. Hiyakukwasha iwu mwanatwesheliyi, iwu mwanatwesheliyi. ³⁰Chaneluwu mwenimu, hiyakutemesha kuji akulumpi yuma yapompesheluwu, kumakasa aBalanaba naSawulu.

12¹Kafwampi wowena mafuku owu mwanta Heloji hakwolola makasinji akabishi antu amakwawu amuchipompelu. ²Hakuzhaha Yakoba manakwaYowanu nampoku yakabali.³Chamweniyi chinatiyishi aYujeya kuwaha, hakubombelaku chuma chikwawu chakukwata niPetulu nawa. Wenowu mafuku ajing’i akujya mankenji akaji ilung’i. ⁴Chanamukwatiyi, hakumusha mukaleya, hakumwinka kuji mashijika ikumi natanu nawumu (16), amuhembang’a awana awana, ninji Chipanjakenu chisambili kuhita nimwijishi kuji antu.⁵Jichi Petulu hiyakumuhembang’a mukaleya; ilang’a akwachipompelu hiyakumulombelelang’a nang’ovu kuji Nzambi. ⁶Wowena wufuku watong’ozhokelang’ayi Heloji ninji nakamwijisha kumajiki, Petulu wajing’i wakama swatáka mutulu, sang’a amukasilawu mukachi kamashijika ayeji namaleng’i ayeji, anhembi anemani kuchenzelu chakaleya.⁷Kukasumuka kang’elu kaMWANTA nemani jehi kwajing’iyi; chezhezhi chitong’eka nimukapeka kamukachi kakaleya. Hakumweta Petulu hakabavu, hakumuhinjwisha mutulu ninji, Nyamukaku swayi. Maleng’i inji aholoka nikumakasinji mbambala.

⁸Kang’elu hakumwila ninji, Vwalaku, wukasi ninkwabilu zheyi. Hakwila mwenomu. Hakumwila ninji, Jikumbakeshi chikowelu cheyi, wunlonji.⁹Ejika nikwijika, hakumulonjela. Chajing’i nakumwilawu kuji kang’elu, yena kwiluka nehi; hakutong’ozhoka ninji namoni chimwenu. ¹⁰Chanapanjakanuwu anhembi akusambila niamuchiyeji, hiyakushika kuchenzelu chachikung’u chakuma kung’anja; hichikujenzulukila chacheni. Hiyakwijika, hiyakuya mumukwakwa wumu; hohenohu kang’elu hakujiyila kwinji.¹¹Petulu chanabazumukiyi ninji, Komana yami! Hakuhosha ninji, Ichi jinu neluki chalala, komana Mwanta natemeshi kang’elu kinji, nampulwishi jehi kuchikasa chaHeloji, nimwezhima mwajing’i nakuching’ezhawu aYujeya. ¹²Chanatong’ozhokiyi, hakuya kwitala jaMaliya, mama yaYowanu atumbiluwu izhina jikwawu jaMaku, mwapompelawu jehi antu amavulu nakulombela.¹³Chanajonjomweniyi kuchenzelu chakuchipang’u, hikukwinza chang’ajima chamumbanja, izhina jinji Loja, kulonja atiyilili.

¹⁴Chanelukiyi izu jaPetulu, hamweni zhakumwenzulwilaku nakuzang’alala kwanatiyiyi. Hakufunta lufuchi nakulezha akwawu ninji, Petulu nemani kuchisu iwu. ¹⁵Wena hiyakumwila nawu, Eyi wunaanjali! Yena hakukolesha chikupu ninji, Jiyi Petulu. Wena nawu, Kwizhi hikang’elu kinji.¹⁶Ilang’a Petulu sang’a ajonjomwenayi. Chanenzululuwu, hiyakumumona hiyakuhayama. ¹⁷Ilang’a yena hakuyimwenesha nachikasa; hakuyilumbulwila mwanamwijishiluwu mukaleya kuji Mwanta. Hakuyila ninji, Mumulezhang’amu Yakoba nianakwetu. Hakufumaku, hakuya kwacheng’i.¹⁸Chikunachi, kuji mashijika hikukuvwakuka ipumba, nawu Petulu nayi kujihi? ¹⁹Heloji chanamwiliyi keng’e-e, kumumona nehi, hakuyihuzhola anhembi; hakuhosha ninji yizhahenu. Heloji hakufuma kuYujeya, hakukunkumuka kuKesaleya, ashakama nikwenoku.²⁰Heloji hakutiya kutama nankashi nawakwaTila naSijoni, wena hiyakuya kuji yena mukanka, asambila jehi kukwata wubwambu naBalasatu, yowu wahembang’a itala jawanta, hiyakulemba nawu ashakami chachiwahi chakaji kumona nzhita; mulong’a itung’a jawu jatambwilang’a kujya kwitung’a jamwanta. ²¹Hashikili ifuku jakutong’ola jehi, Heloji hakuvwalavwala yuma yinji yawanta, hakushakama hetanja jinji jawanta, hakuhosha hoshe-e.²²Antu hiyakubijika nang’ovu nawu, Hiizu jaNzambi, hijamuntuku. ²³Hohenohu amweta nikuji kang’elu kaMWANTA, nanochu chabuliliyi kulemesha Nzambi; hiyakumujya kuji mavunu, afwa nikufwa.²⁴Ilang’a izu jaNzambi hijikutiyakana nikutanja. ²⁵ABalanaba naSawulu chanamanishuwu mujimu wawu, hiyakufuma kuYelusalema kwayiluwu, hiyakumuhitula Yowanu atumbiluwu izhina jikwawu jaMaku.

13¹Muchipompelu chajing’i kuAntiyoki mwajing’i atuplofwetu niankulung’ang’a, iwu Balanaba, iwu Simeyona atumbiluwu izhina jikwawu jaNigeli, iwu Lusiyu wakuKileni, iwu Manena aleleleluwu hamu nanowu mwanta Heloji, niSawulu. ²Chajing’i nakujifukulawu kuji Mwanta, nakuzhing’a nakuleka kujya, Spilitu Wazhila hakwila ninji, Ng’ambwilenuku Balanaba naSawulu akeli mujimu wunayitambikilili. ³Chanazhing’uwu cheng’i nakuleka kujya, hiyakulombela, hiyakuyinang’ika makasawu, hiyakuyitemesha nawu ayi.⁴Wena cheliluwu anayitemeshi jehi kuji Spilitu Wazhila, hiyakuya kuSelusiya, kufuma kwenoku hiyakuya muwatu kuKipilosi. ⁵Chanashikuwu kuSalamisa, hiyakushimuna izu jaNzambi mumashikola awaYujeya. Ajing’i naYowanu Maku kulonja ekali nkwashi yawu.⁶Chanahituwu muchitutu chezhima nikuPafwosi, hiyakuwana katepa wumu hikaplofwetu wakutwamba, kaYujeya, izhina jinji Balayesu. ⁷Yenowu wajing’i hamu namwanta wamukala, izhina jinji Selizhi Pawulu, iyala wukweti kashinshi. Yena hakutambika aBalanaba naSawulu, hakukeng’a ninji atiyi izu jaNzambi. ⁸Ilang’a owu katepa Elimasi, jimu mwalumbulukila izhina jinji, hakujikang’a nawu, ninji aluwang’eshi owu mwanta wamukala abuli kukuhwelela.⁹Ilang’a Sawulu, atenang’awu nawu Pawulu, wenzala naSpilitu Wazhila, hakumushinshika swi-i, ¹⁰ninji, Eyi mwana kajiyabolu, eyi waswezha kujimbana nikutama, eyi mukwankunyi nakulong’a kwezhima, wamba kaleka kuheng’esha nzhila zhaMwanta zhalong’a mwaakanyi?¹¹Jichi jinu tiya, chikasa chaMwanta chikukukunka, wakekala mputamesu; múkuhita chilaaka hiwakamona mwaanaku. Hohenohu kúmuholokela nimbunju nimwijima bwi-i; hakukimbuka nakukeng’akeng’a muntu wakumukwata kuchikasa. ¹²Owu mwanta wamukala, chanamoniyi chaneluwu, hakukuhwelela, nahayami jehi ntang’ishilu yakutena Mwanta.¹³Pawulu nawakwawu hiyakufuma kuPafwosi muwatu, ashika nikuPelega muPamfwiliya; kwenoku Yowanu Maku hakuyishiya, hakufunta kuYelusalema. ¹⁴Ilang’a wena hiyakuhita muPelega, hiyakushika kuAntiyoki wamuPisijiya. Hiyakwing’ila mushikola haSabata, hiyakushakama. ¹⁵Cheliluwu enimbu anakumishi jehi kutang’a nyikanja yazhila yanshimbi niyawatuplofwetu, anyuuli zhashikola hiyakuyitemeshela izu nawu, Enu anakwetu, neyi mukwetuhu izu jakukunjezha hela jakukonkomwena, jihoshenu.¹⁶Pawulu hakwimana, hakwolola chikasa ninji, Enu akwetu aIsalela, ninenu mwaakamang’a Nzambi, tiyililenu. ¹⁷Nzambi yaniwu munza waIsalela watonjeli ankakulula zhetu, watuumbakesheli iwu munza hashakaminuwu mwitung’a jaEzhipitu, hakuyiijishamu nachikasa chang’ovu. ¹⁸Hakukaba nawu omu muchinkalampata nyaka makumi awana (40).¹⁹Chanazhilumuniyi nyunza yitanu nayiyeji mwitung’a jaKenani, hakuyinka itung’a jawu jiikali wuswana wawu, mwahitili nyaka kafwampi neyi nkulakazhi zhiwana nanyaka makumi atanu (450). ²⁰Mwezhimomu hakuyinkang’a ansompeshi nichashikiluwu haji kaplofwetu Samweli.²¹Nkumininaku hiyakulomba mwanta wankanu. Nzambi hakuyinka mwana kaKishi, Sawulu, iyala wakumunza waBenzhamini, himukuhita nyaka makumi awana (40). ²²Chanamufumishuwu yena, hakujiishamu Davidi ekali mwanta wawu; niyena nawa wamushimwini wunsahu ninji, Namoni jehi mwana kaZHesi, Davidi, Iyala jamwaya muchima wami, Jiyi wakela munakeng’a mwezhima.²³Kwokuji anyana kayeniwu, mwomwakaniniyi jehi Nzambi, naleteli jehi Isalela Chamwinu, Yesu. ²⁴Hajing’iyi Yesu kanja amwekani, Yowanu wasambililang’ahu jehi kushimwina munza waIsalela wezhima chizhimikilu chakubalumuka munyichima. ²⁵Helili Yowanu hakuya nakumanisha mafuku inji, hakuyila antu ninji, Enu munatong’ozhoki nenu yaminyi? Ami hiniKlistuku. Tiyenu, munyima yami imu muji nakwinza muntu, ami hinatelela hela tuhu kusubula nkwabilu zhakunyenju yinjuku.²⁶Enu anakwetu, enu anyana akumuchiji waAbalahama, ninenu mwaakamang’a Nzambi, tiyenu, anatutemesheli jehi izu jawamwinu weniwu. ²⁷Chamuyambiluwu Yesu kuji antu ekala muYelusalema, hamu nawanyuuli zhawu, chabuliluwu kwiluka nimazu awatuplofwetu atang’ang’awu haSabata zhezhima, mazu awa analumbuluki jehi nanochu chamuhishiluwu.²⁸Cheliluwu wena kumumona nachitela chakumuzhahila nehi, hiyakumulomba Pilatu nawu ching’a amuzhahi tuhu. ²⁹Chanamanishuwu yuma yamusonekeleluwu yezhima, hiyakumukulula hamutonju, nakumukamika mwizhamu.³⁰Ilang’a Nzambi hakumusang’ula muji afu. ³¹Hiyakumumona mafuku amavulu kuji antu afuminiyi nawu muNG’aliliya nakushika kuYelusalema. Ichi jinu, wena hiyayinsahu zhinji akushimuna kuji antu mwamwenuwu.³²Jiyi nsang’u yayiwahi yitunayileteli, yayikaninuwu ankakulula zhetu. ³³Chamusang’wiluwu jehi Yesu muji afu kuji Nzambi, chinalumbulukili jehi anyanetu, mwomwasonekeluwu muIsamu jamuchiyeji nawu, Yeyi Mwanami, nakuvwali lelu. ³⁴Nikweniku kusang’ula kwamusang’wiluwu kuji Nzambi muji afu, kwakubula kufunta cheng’i mukutoka, wahoshelumu jehi mwenimu ninji, Nakakukiswila nkisu yaDavidi, yazhila yalala.³⁵Nahoshi nawa muIsamu jikwawu ninji, Hiwaketezha weyi Wazhila kumona kutokaku. ³⁶Mulong’a Davidi, chamanishiliyi kukalakela akwawu ahanyaka yinji mwaya mpúng’a yaNzambi, wayili mutulu; hiyakumukamika kwakama ankakulula zhinji, yotoka nikutoka. ³⁷Hakwila iwu asang’ulawu jehi kuji Nzambi hamweni kutokaku.³⁸Jichi enu anakwetu, leka niyilezhi mwiluki chachiwahi, nami mwizhina jayeniwu muntu itukuyishimwina, jimu mwekala kuyanakena antu nshiji. ³⁹Antu ezhima akukuhwelela, akuyiying’isha nakuyitena along’a kuyuma yezhima mwakang’enyuwu kuyiying’isha nakuyitena along’a nanshimbi yaMosi.⁴⁰Jichi babalenu, mubuli kumona mwanahoshuwu munyikanja yawatuplofwetu, ⁴¹nawu, Tiyenu jinu, enu akwakajiwu, Muhayami, munong’i. Ami nukukong’a mujimu mumafuku enu, Mujimu owu hela akayilezhawu kuji muntu himwakawitiya nihantuku.⁴²Chanejikuwu, hiyakuyilembelela nawu akayilezhuhu cheng’i nsang’u iyi haSabata yikulonjelamu. ⁴³Chanamwang’aluwu mwenomu mushikola, aYujeya amavulu ninawa abalumukili kwikala aYujeya, akwakulemesha Nzambi, hiyakulonja aPawulu naBalanaba; wena hiyakuhosha nawu nakuyishinzhila kukakela muluwi lwaNzambi.⁴⁴Sabata yalonjelumu, kwasheli hanti nakupompa ng’anja yezhima kulonja atiyi izu jaNzambi. ⁴⁵Ilang’a aYujeya chamwenuwu antu amavulu, hiyakutiya ichima jaswezha; hiyakutajika yuma yajing’i nakuhoshayi Pawulu, hiyakuhosha mazu atama.⁴⁶APawulu naBalanaba hiyakuhosha chakaji woma nawu, Chinawahi chitunasambili kushimuna izu jaNzambi kujenu aYujeya; hakwinzichi chimunayishinzhikili jehi kwakulehi nanenu, munajifuukuli enu aweni nenu himunateli kwenu wumi wahayanyakaku. Talenu, etu kwetu hitukubalumukila kuji aZHentili. ⁴⁷Mulong’a jichi chanatulezhiyi Mwanta, ninji, Nakushili kwikala chezhezhi chawaZHentili, Kulonja wakeli wakwamwina antu kushika nikwakumina maseki.⁴⁸Chanachitiyuwu aZHentili, hiyakutiya kuwaha, hiyakulemesha izu jaNzambi. Wezhima wawu afuukwilawu jehi kumona wumi wahayanyaka hiyakukuhwelela. ⁴⁹Izu jaMwanta jitiyakana nimwahita mutambowu wezhima, ti-li-li.⁵⁰Ilang’a aYujeya hiyakusang’umuna ambanja alumbwa, akwakuhameka Nzambi, niakulumpi amayala amung’anjoyu, hiyakusang’umuna ikabisha jakukabisha aPawulu naBalanaba, hiyakuyihang’a mung’inza zhawu. ⁵¹Ilang’a wena hiyakutotomona lunkung’u lwakunyenju yawu, hiyakuya kuIkoniyumu. ⁵²Atumbanzhi aswezheli muzang’alu nikwinzala naSpilitu Wazhila.

14¹MuIkoniyumu hiyakwing’ila mwayeji wawu mushikola yawaYujeya, hiyakuhosha chakwila niizaza jawaYujeya nijawaGliki jajeni hiyakukuhwelela. ²Hakwila aYujeya, ábulili kwovwahilamu, hiyakusang’umuna aZHentili kulonja atiyi anakwetu kutama.³Jichi hiyakulabila kwenoku mafuku amavulu nakuhosha muji Mwanta chakaji woma; Mwanta hakukolesha wunsahu wamazu aluwi lwinji; hakwitezha kukong’a yinzhikizhilu niyihayamisha namakasawu. ⁴Izaza jamung’anjoyu hijikwambuka; awa nakukunjamena aYujeya, awa nakukunjamena apostolu.⁵Chanafukuluwu aZHentili nawaYujeya, hamu nawanyuuli zhawu, nawu ayikong’i apostolu chatama, ayasoli malola, ⁶hiyakuchiluka, hiyakutemukila kung’anja zhamuLikoniya, zhozhaListila naJelibi, nikwilung’a janyeng’umukaku; ⁷hiyakushimuna nsang’u yayiwahi kwenoku.⁸KuListila kwajing’i iyala wabula ng’ovu kunyenju, kanja enjang’ahu jehi kufumisha havwalikiliyi. ⁹Yenowu hakutiya mwajing’i nakuhoshayi Pawulu. Pawulu hakumushinshika swi-i, hakumumona ninji wukweti kukuhwelela kwakumukolesha; ¹⁰hakuhosha nezu jang’ovu ninji, Imanaku zululu. Yotakumuka nikutakumuka, enja nikwenja.¹¹Mazaza awantu, chanamonuwu chuma chaneliyi Pawulu, hiyakubijika mwijimi jaLikoniya nawu, Akishi anatusulukili nanyizhimba yafwana neyi antu. ¹²Hiyakutumba Balanaba nawu Zewusi; Pawulu nawu Helemi, mulong’a jiyi waswezhelang’a kuhosha. ¹³Chikombezhi chaZewusi wukweti Tembeli yinji kwakwihi nang’anjoyu, hakuleta ang’ombi niyibaaba yamafu kuchisu chang’anja, ninji niyena hamu namazaza ayiketwili yimuna.¹⁴Ilang’a apostolu, aBalanaba naPawulu, chanachitiyuwu, hiyakutabola mahinawu, hiyakulunjumukila mwizaza jawantu; ¹⁵hiyakubijika nawu, Enu akwetu, iyi yuma yimukwila yanka? Etu nawa tuyantu twatiyang’a mumwatiyang’enu; tunayileteli nsang’u yayiwahi, yakwila netu muleki yumiyi yamukunkulwayi, mubalumuki munyichima, mutali kuji Nzambi wamumi waleng’eli iwulu niiseki, nikalung’alwizhi niyezhima yekalamu. ¹⁶Nyaka yinahiti jehi munyima wetezheli nyunza yezhima ninji yenji tuhu munzhila zhawu awenawu.¹⁷Hela chochu, hayilekeli tuhu chakaji kuyishiyila wunsahu winji wakwila chachiwahuku. Wayinkelang’a nvula yakufuma kwiwulu, niyilaaka yakujya, nakuyitiyisha kuwaha nayakujya, nikulung’a mwaya nyichima yenu mwezhima. ¹⁸Chahoshelang’awu mazu awa, hasheli hanti nakukang’anya kulekesha mazaza awantu kuyiketwila yimuna.¹⁹Kwenoku hikukwinza aYujeya anafumi jehi kuAntiyoki wamuPisijiya nikuIkoniyumu, wena chanakanzhikizhuwu mazaza awantu, hiyakumwasola Pawulu malola. Chanatong’ozhokuwu nawu wafwa jehi, hiyakumukokela hanzi yang’anja. ²⁰Chajing’i nakwimanawu atumbanzhi kwakwihi nayena kwi-njo, hakunyamuka, hakwing’ila cheng’i mung’anjoyu. Chikunachi hakufumamu naBalanaba, hiyakuya kuJelibi.²¹Chanashimunuwu nsang’u yayiwahi mung’anjoyu nakwilisha atumbanzhi amavulu, hiyakufunta cheng’i kuListila, nakuIkoniyumu, nikuAntiyoki wamuPisijiya. ²²Hiyakukolesha nyichima yawatumbanzhi, nakuyikonkomwena nawu akakeli muchikuhwelelu, nawu kwing’ila muwanta waNzambi ching’a tusambila kumona lukaji lwaluvulu nankashi.²³Chanayitonjeluwu akulumpi mwahita yipompelu yezhima nakulombela nakuleka kujya, hiyakuyikunzhika kuji Mwanta anakuhweleluwu. ²⁴Hiyakupanjakana muPisijiya, ashika nikuPamfwiliya. ²⁵Chanashimunuwu izu jaNzambi muPelega, hiyakukunkumuka kuAtaliya. ²⁶Kufuma kwenoku hiyakuya muwatu kuAntiyoki, kwayikunzhikiluwu kuluwi lwaNzambi akayi nakwila mujimu waneluwu jehi.²⁷Chanashikuwu, hiyakupompesha chipompelu, hiyakushimuna yuma yezhima yaneliyi Nzambi nawena, ninichi chanayenzulwiluwu aZHentili chenzelu chakukuhwelela. ²⁸Hiyakushakama nawatumbanzhi mafuku amavulu.

15¹KuYujeya hikukufuma antu amakwawu hiyakutang’isha akwakukuhwelela nawu, Ching’a akayalamisha mwaya chizhila chaMosi kulonja mwakahanji. ²Chanatajikuwu nawaPawulu naBalanaba tajike-e, nikujihuzhola nawu, hiyakukunzhika aPawulu naBalanaba niakwawu, akayi nansang’u iyi kuYelusalema kuji apostolu nawakulumpi.³Jichi chipompelu hichikuyishinzhikizhaku munzhila yawu; hiyakuhita muFwenisiya nimuSamaliya nakushimuna chanabalumukuwu aZHentili; hiyakuyilung’isha nankashi anakwawu ezhima. ⁴Chanashikuwu kuYelusalema, hiyakuyitambula kuji chipompelu nikuji apostolu nawakulumpi, hiyakuyishimwina mwezhima mwaneliyi Nzambi nawena.⁵Hikukunyamuka akwachaaku chawaFwalisewu amakwawu akuhwelela jehi, hiyakwila nawu, Ching’a ayalamishi, ayitang’ishi nawa kuhemba nshimbi yaMosi. ⁶Apostolu nawakulumpi hiyakupompa nakutong’ozhoka nsang’u iyi hamu.⁷Chanajihuzholuwu ihuzhole-e, Petulu hakwimana nakuyila ninji, Enu anakwetu, enu aweni mweluka jehi chantonjeluwu kuji Nzambi mukachi kenu hamafuku akusambila, kulonja aZHentili atiyi mazu ansang’u yayiwahi kukanwa kami, amoni kukuhwelela. ⁸Jichi Nzambi, weluka nyichima yawantu, washimuna jehi wunsahu wakuyinka Spilitu Wazhila mwomwatwinkeleliyi etu. ⁹Kwambula mukachi kawena nanetu nehi, natookeshi jehi nyichima yawu nakukuhwelela.¹⁰Enu munakeng’eliji kumweseka Nzambi, chakwing’izha nshing’u zhawatumbanzhi mumpanja yakang’enyuwu kusenja hela ankakulula zhetu hela etu aweni? ¹¹Etu tunakuhweleli netu akatuhanjisha naluwi lwaMwanta Yesu, mwomwakayihanjishilawu niwena nawa.¹²Izaza jawantu jezhima jimwena ninzo-o. Hiyakutiyilila nsang’u zhajing’i nakushimunawu aBalanaba naPawulu, zhayinzhikizhilu nayihayamisha yanakong’iyi Nzambi nawena mukachi kawaZHentili.¹³Chanamwenuwu nzo-o, Yakoba hakwakula ninji, Enu anakwetu, ntiyililenu. ¹⁴Shimona nashimuni jehi chasambililiyi Nzambi kuhempula aZHentili, kulonja kutambwilamu antu ambala ezhina jinji;¹⁵mwomwaya mazu awatuplofwetu asonekeluwu jehi, ¹⁶nawu, Hakulonjela hayumiyi nakafunta, Nakatung’ulula cheng’i tabanaka yaDavidi yinashiwuki; Nakazhikazhika munahumoki, nakayimika cheng’i; ¹⁷kulonja antu anashali akakeng’akeng’i MWANTA, NiaZHentili ezhima anatumbuwu izhina jami. ¹⁸Jichi chanahoshiyi MWANTA welukishang’a yuma yezhimiyi kufumisha kushankulu.¹⁹Jichi ami naketuli jehi nsang’u, nami bayi tukabisha aZHentili akubalumukila kuji Nzambuku; ²⁰ilang’a tukuminenu jakuyisonekela netu aleki yuma yakupesha nachu akishi, niwuzhila, nianyama akushotomona, nimashi. ²¹Mulong’a kufumisha kushankulu Mosi wukweti akwakumushimuna munyikala yezhima, enja atang’a nyikanja yinji yazhila mumashikola Sabata zhezhima.²²Jichi apostolu nawakulumpi, hamu nachipompelu chezhima, hiyakutong’ozhoka nawu, chachiwahi kutonja mukachi ketu amayala, tuyitemeshi kuAntiyoki naPawulu naBalanaba. Hiyakutonja Yuja atumbiluwu izhina jikwawu jaBalasaba, niSilasi; ajing’i amayala alema mukachi kawanakwawu. ²³Hiyakuyinka mukanja wakwila nawu, Etu apostolu nawanakwenu akulumpi, Tunayimushi enu anakwetu amuji aZHentili muji nikuAntiyoki, nimuSiliya, nimuSilisiya.²⁴Tunatiyi nawu kunu kujetu kunafumi antu amakwawu, anenzi nakuyikabisha namazu akuluwang’esha nyichima yenu; etu kwetu hitwayilezheli mwoku. ²⁵Tunatiyang’ani namuchima wumu netu chachiwahi tutonji amayala, tuyitemeshi oku kujenu, hamu nawakwetu aBalanaba naPawulu twakeng’a, ²⁶amayala akeng’eli kufwa kukoola izhina jaMwanta wetu Yesu Klistu.²⁷Jichi tunatemeshi Yuja naSilasi, awenawu akayilezha mukanwa mwomumu. ²⁸Mulong’a Spilitu Wazhila ninetu tunatong’ozhoki netu bayi tuyitwika chisenja chakubajika yumiyi yalemaku. ²⁹Netu, ching’a muleki yuma yakupesha nachu akishi, nimashi, nianyama akushotomona, niwuzhila. Neyi mukujihemba kuyumiyi chikuwaha. Shalenu chachiwahi.³⁰Jichi wena chanayishinzhikizhuwu, hiyakukunkumukila kuAntiyoki; hiyakupompesha chipompelu, ayinka ninowu mukanja. ³¹Chanawutang’uwu, hiyakuzang’alala nakukunjezha kwanayikunjezhuwu. ³²Yuja naSilasi awenawu ajing’i atuplofwetu nawa, hiyakukunjezha anakwawu namazu amavulu, ayikolesha nikuyikolesha.³³Chanashakamuwu mpinzhi kwenoku, anakwawu hiyakuyishinzhikizha mukuwunja, ³⁴afunti kuji apostolu áyitemesheli. ³⁵APawulu naBalanaba hiyakulabila kuAntiyoki, nakutang’isha nikushimuna izu jaMwanta, hamu nawakwawu amavulu nawa.³⁶Chimunahiti mafuku, Pawulu hakumwila Balanaba ninji, Tufuntenu nakuhempula hempula anakwetu amunyikala yezhima mutwashimwini izu jaMwanta, twakatali chanashakamuwu. ³⁷Balanaba hakwila ninji ayi hamu naYowanu atenawu izhina jikwawu jaMaku. ³⁸Ilang’a Pawulu hakutong’ozhoka ninji chatama kuya nayenowu wayishiyili kuPamfwiliya, wabulili kuya nawu kumujimu.³⁹Kúvulumuka nintaji yayeni, hiyakwambuka; Balanaba hakusenja Maku hakuya kuKipilosi muwatu. ⁴⁰Hakwila Pawulu hakutonja Silasi; chanamukunzhikuwu kuluwi lwaMwanta kuji anakwinji, hakuya munzhila yinji. ⁴¹Hakuhita muSiliya nimuSilisiya, nakukolesha yipompelu.

16¹Hakushika kuJelibi nikuListila. Kutala kuji kambanzhi wumu kwenoku, izhina jinji Timotewu, mwana kamumbanja wakaYujeya mukwakukuhwelela; hakwila tata yinji wajing’i kaGliki. ²Himuntu ahamekawu kuji anakwinji ajing’i kuListila nakuIkoniyumu. ³Hiyakumukeng’a kuji Pawulu ninji ayang’a ninji. Chanamutambuliyi hakumwalamisha, mulong’a waakamini aYujeya ajing’i munyikala yakwenoku, mulong’a antu ezhima eluka jehi nawu tata yinji kaGliki.⁴Chayilang’awu nakuhitahita munyikala, hiyakuyilezhalezha yizhila yayilezheluwu kuji apostolu nawakulumpi kuYelusalema, nawu ayovwahili. ⁵Yipompelu hiyikujikolesha muchikuhwelelu, akwakukuhwelela hiyakuya nakuvula hefuku hefuku.⁶Hiyakupanjakana kuFwilizhiya nakuNG’alizha, mulong’a Spilitu Wazhila wayilekesha jehi kushimuna izu jaNzambi muAsiya. ⁷Chanashikuwu kung’inza yaMisiya, nawu eseki kuya kuBitiniya, Spilitu waYesu kuyitezha nehi. ⁸Hiyakupanjakana Misiya, akunkumukila nikuTilowasi.⁹Pawulu hakumona chimwenu nawufuku; hakumona iyala wakuMasijoniya, nemani nakumulembelela ninji, Zambukilaku kunu kuMasijoniya, wutukwashuku. ¹⁰Chanamoniyi chimwenu ochu, hohenohu tukeng’a nikuya kuMasijoniya, tuneluki jehi netu Nzambi natutambiki, kulonja twakashimuni nsang’u yayiwahi kuji antu akwenoku.¹¹Jichi hitukufuma kuTilowasi muwatu, twimakana nzwa-a nikuSamotilasi; chikunachi tushika nikuNeyapoli. ¹²Tufuma nikwenoku tuya nikuFwilipi, yoying’anja yamuMasijoniya yalema, mwatung’ishawu jehi aLoma mashijikawu. Hitukulabila mung’anjoyu mafuku amakwawu. ¹³Hitukwijika kuchisu chamung’anja haSabata, hitukuya kuchikumu chakalong’a, kutwatong’ozhokeli netu kwizhi jiku kwapompelang’awu nakulombela. Hitukushakama nakuhoshahosha nawambanja apompeli kwenoku.¹⁴Mumbanja wumu, izhina jinji Lijiya, wakumukala waTiyatila, mukwakulanjisha mahina awusombu, mukwakuhameka Nzambi, hakututiya. Mwanta hakwenzulula mumuchima winji, kulonja atambuli nsang’u yakuhoshayi Pawulu. ¹⁵Chanamuzhimikuwu niyena niakwetala jinji, hakutulembelela ninji, Neyi munanmoni nenu namukuhweleli Mwanta, ing’ilenu mwitala jami tushakami nenu. Hakutushinzhila chakutushinzhila.¹⁶Chelili hitukuya kwalombelelang’awu, hiyakutubulakana kuji chang’ajima chamumbanja, wajing’i naspilitu yakuhong’a, ng’ombu yinji jiyi yaheteshang’ayi nachu anyanta zhinji. ¹⁷Yenowu hakulonjang’a Pawulu nanetu nakubijika ninji, Awa amayala hiyang’amba zhaNzambi Mukwakubajika, hiyakuyishimwina nzhila yakuhanjila. ¹⁸Hakwilang’a mwenimu mwahita mafuku amavulu. Ilang’a Pawulu hakutiya kumuchima bwi-i; hakushetumuka nakumwila owu spilitu ninji, Nakulezhi mwizhina jaYesu Klistu, nami mufumi. Amufuma nihohenohu.¹⁹Anyanta zhinji, chanamonuwu mwakuhwelelang’awu kuheta munakumi jehi, hiyakukwata aPawulu naSilasi, hiyakuyikokela kuwulanjilu, kumesu awanyuuli. ²⁰Chanayitwaluwu kuji ansompeshi, hiyakwila nawu, AYujeya awa hiyatuvuba aji nakukabisha nankashi ng’anja yetu. ²¹Hiyakututang’isha yaaku, kuyitambula hela kuyovwahila kujetu aLoma chinzhila.²²Izaza hijikuyilunjumukila nanjombu, ansompeshi hiyakuyitabwila mahinawu, hiyakulezha mashijika nawu yetenu natubama. ²³Chanayetuwu tubama twatuvulu hiyakuyinatila mukaleya; hiyakulezha mukwakuhemba kaleya, nawu ayihembi chachiwahi. ²⁴Yena chanamulezhuwu ochu, hakuyishinzhikila mukatala kamukachi kakaleya, hakupata nyenju yawu mumpompa.²⁵Ilang’a mukachi kawufuku, aPawulu naSilasi ajing’i nakulombela nakwimbila Nzambi tumina, iku antu amukaleya enja ayitiya. ²⁶Kukasumuka himutentanshi waweni; chikuku chetala jakaleya hichikutenta nte-nte, yenzelu yezhima yenzuluka nihohenohu, maleng’i awantu ezhima amukaleya asubuka nikusubuka.²⁷Mukwakuhemba kaleya hakubazumuka mutulu, hakumona kuyenzelu yakaleya kwachashi; hakuhola mpoku yinji yakabali, ninji ajizhahi, mulong’a natong’ozhoki ninji antu amukaleya anatemuki jehi. ²⁸Ilang’a Pawulu hakubijika nezu jang’ovu ninji, Bayi wujikatishaku, yetu awa wezhima wetu.²⁹Mukwakuhemba kaleya hakutambika antu aleti yimunyi, hakukilukilamu, iku wuji nakuzaala woma, hakujinata heseki kunyenju yaPawulu naSilasi. ³⁰Hakuyiijishamu ninji, Enu anyanta, nukwila ng’ahi namwinewi? ³¹Wena nawu, Mukuhweleli Mwanta Yesu, wamwinewi, nineyi niakwetala jeyi.³²Hiyakushimwina yena, niantu ezhima amwitala jinji, izu jaMwanta. ³³Yena hakuyitwala yoyena mpinzhi yawufuku oyu, hakukosakosa nyinkakambu yawu; amuzhimika niyena niayinji ezhima hohenohu. ³⁴Hakuying’izha mwitala jinji, hakuyitentekela yakujya. Hakuzang’alala nankashi chanakuhweleliyi Nzambi niayinji ezhima.³⁵Chelili kunachi jehi, ansompeshi hiyakutemesha anhembi, nawu, Yilekenu amayala ayi tuhu. ³⁶Mukwakuhemba kaleya hakulezhamu Pawulu, ninji, Ansompeshi anatemeshi izu jakwila nawu, Yenu. Jichi jinu fumenumu muyi chachiwahi.³⁷Ilang’a Pawulu hakuyila ninji, Kutweta anatweteli hatooka chakaji kutuhisha, kutong’a etu tuyaLoma; hiyakutunatila mukaleya, atufumishumu kumbaji? Chinzhila! Enzang’a kwawu awenawu atufumishumu. ³⁸Anhembi hiyakulezha ansompeshi mazu awa. Chanatiyuwu nawu hiyaLoma, atiya niwoma. ³⁹Hiyakwinza nakuyilembelela. Chanayifumishuwu hiyakulomba nawu, Fumenu mwani kung’anja yetu.⁴⁰Hiyakufuma mukaleya hiyakuya kwaLijiya. Chanamonuwu anakwetu nakuyikunjezha, hiyakufuma kwenoku.

17¹Chanapanjakanuwu muAmfwipoli nimuApoloniya, ashika nikuTesalonika kwajing’i shikola yawaYujeya. ²Pawulu hakwing’ilamu neyi chelilang’ayi jikalu, hakujihuzhola nawu mwomwaya nyikanja yazhila, Sabata zhisatu.³Hakuyilumbulwila nakukolesha chikupu ninji, Chalala chateleleli Klistu kukaba nakusang’uka muji afu; ninji, Iwu Yesu iniji nakuyishimwina, jiyi Klistu. ⁴Amakwawu hiyakwitezha, hiyakujibomba nawaPawulu naSilasi, niaGliki akwakuhameka Nzambi izaza jajeni, niambanja alema amavulu.⁵Ilang’a aYujeya, anatiyi jehi ichima, hiyakufumba amayala atama ayiluwang’imbi, hiyakupompesha izaza jawantu, avwakula niipumba mwahita ng’anja yezhima. Hiyakulotokela kwitala jaYasoni, hiyakukeng’a nawu ayiijishi kuji antu. ⁶Chanakang’anyuwu kuyiwana, hiyakukokela Yasoni nianakwetu amakwawu kumesu awanyuuli zhang’anja, nakubijeka nang’ovu nawu, Wenawa hiyatuvuba anavunjuli mpata yamunu mwishina yezhima, anenzi nikunu nawa; ⁷anayitambuli kuji Yasoni. Wezhima wawu hiyovwahilang’a nshimbi zhaKesaluku, elang’a nawu kuji mwanta wankanu wacheng’i, yowu Yesu.⁸Izaza jawantu nianyuuli zhang’anja, chanatiyuwu yumiyi, kutiyakana niipumba janjombu. ⁹Chanatambuluwu kapopu kuji Yasoni nawakwawu, hiyakuyumbaku nawu ayi.¹⁰Hohenohu anakwetu hiyakutemesha aPawulu naSilasi kuBeleya nawufuku. Chanashikuwu, hiyakwing’ila mushikola yawaYujeya. ¹¹AYujeya akwenoku hiyakubajika amuTesalonika kalemesha, mulong’a wena anyakeli kutambula izu jaNzambi; hiyakutalatala munyikanja yazhila hefuku hefuku, amoni neyi yumiyi jimu yaya. ¹²Jichi amavulu hiyakukuhwelela; niambanja aGliki alumbwa amavulu, niamayala amavulu nawa.¹³Ilang’a aYujeya akuTesalonika, chanelukuwu nawu Pawulu nashimuni jehi izu jaNzambi muBeleya nawa, hiyakuya kwenoku nakuyibobwesha, kulonja afutwishi nyichima yezaza jawantu. ¹⁴Anakwetu atemesha niPawulu hohenohu, ayi akashikang’ahu jehi kukalung’alwizhi; aSilasi naTimotewu hiyakushala kwenoku. ¹⁵Antu amutweleluku Pawulu hiyakumushikizha kuAtenisi. Chanayilezhiyi ninji aSilasi naTimotewu akanyakali kwinza, hiyakufunta.¹⁶Pawulu chajing’i nakuyiching’ililayi kuAtenisi, spilitu yinji hiyikutiya chikela, chanamoniyi ng’anja yezhima yinenzali ankishi to-o. ¹⁷Jichi hakujihuzhola nikutajikang’a mushikola nawaYujeya nawakwakujifukula kuji Nzambi; nikuwulanjilwilu nawantu akujimonayi nawu, hefuku hefuku.¹⁸AEpikuleya nawaSitoki amakwawu ajing’i akwakukeng’akeng’a kwiluka maana, hiyakumubulakana. Amakwawu hiyakwila nawu, Iwu Sakubobola keng’a ahoshi ninjiji? Amakwawu nawu, Kwizhi hakushimuna akishi akwitung’a jacheng’i; nanochu chajing’i nakushimunayi Yesu, nikusang’uka muji afu.¹⁹Hiyakumukwata kuchikasa, hiyakuya ninji hampiji yaMalasa; hiyakumwila nawu, Iyi nsang’u yayiha yiwuji nakushimuna, etu nawa tukutwesha kuyiluka, tahinji? ²⁰Wunaleti nsang’u yacheng’i kumatu etu; jichi tunakeng’i twiluki nsang’u iyi. ²¹AkwaAtenisi ezhima, hela enyi, hiyelili chuma chacheng’uku, akuminini jakushimuna hela kutiya chuma chachiha hohu.²²Jichi Pawulu hakwimana hakachi kawu hampiji yaMalasa, hakwila ninji, Enu akwetu amayala akwaAtenisi, namoni mwaswezha kukeng’a kupeshapesha. ²³Mulong’a chinajing’i nakuhitahita hinukumona yuma yimwapeshang’a; hinukuwana nawa kameng’a kakusoneka nawu, KAMENG’A KANZAMBI WAKAJI KWILUKEWA. Jichi yeniwu mwapeshang’a chakuyamba, jiyi nukuyishimwina.²⁴Yowu Nzambi waleng’eli mpata yamunu mwishina niyuma yezhima yijumu, jiyi Mwanta wamwiwulu niweseki. Hashakamang’a kwinji mumatembeli akutung’a namakasa awantuku; ²⁵hela kumukalakela hiyamukalakelang’a namakasa awantu, mwaka eli ninji nakeng’i chumaku. Mulong’a yena jiyi wenkang’a antu wumi nimuuya niyuma yezhima.²⁶Wafumishili kuji muntu wumu nyunza yawantu ezhima, kulonja ashakami heseki jezhima. Hakuyitong’wela yilaaka yawu, ning’inza zhawu mwakushakaminawu. ²⁷Ninji akakeng’akeng’i Nzambi, hamwaha akamupapata, akamuwana; kutong’a yena hekala kwakulehi nanetu ezhimaku.²⁸Mulong’a muji yena jimu mutwahanjilang’a, jimu mutwenjelang’a, jimu mutwekalilang’a. Mwomwaneluwu akwakusoneka enwenu aweni amakwawu nawu, Twafuma kuji yena. ²⁹Ichi jinu chituneli twafuma kuji Nzambi, wuNzambi hitwaji kuwutong’ozhoka netu wuji neyi wulu inji kwizhi siliva, inji kwizhi ilola jabazang’awu nawukalawenu wamaana amuntuku.³⁰Nzambi wajiwili oyu nyaka yakuyamba; hakwinza katataka nalezhi antu ezhima kwezhima kwezhima, ninji abalumuki munyichima. ³¹Mulong’a nashumu jehi ifuku jamba kasompeshayi matung’a mwalong’a, neyala anafuukuliyi jehi. Mwenomu nakoleshumu jehi kuji antu ezhima, nanochu chanamusang’uliyi muji afu.³²Jichi wena chanatiyuwu nsang’u yakusang’uka mukufwa, amakwawu hiyakuseha; hakwila amakwawu nawu, Tunakeng’i kutiya cheng’i nsang’u iyi. ³³Jichi Pawulu hakufuma mukachi kawu. ³⁴Amayala amakwawu hiyakumukakela, hiyakukuhwelela; ajing’i iwu Jiyonisi mukwampiji yaMalasa, nimumbanja wumu izhina jinji Jamalisi, hamu nawamakwawu nawa.Kapetulu 18

18¹Kulonjela hayumiyi, Pawulu hakufuma kuAtenisi, hakushika kuKolinja. ²Kwenoku hakuwanaku kaYujeya wumu, izhina jinji Akwila, wavwalikili muPontu, yena mwomukufuma kuItaliya nang’ojinji Plisila; mulong’a Kalujusa nalezhi jehi aYujeya ezhima, ninji afumi muLoma. Jichi yena Pawulu hakuya kuji wena; ³hakushakama nawu mulong’a mujimu wawu wowumu nayena. Hiyakukalakela hamu, mulong’a mujimu wawu wowu wakuchima matenti.⁴Hakujihuzhola nikutajikang’a nawantu mushikola Sabata zhezhima; hakushinzhilang’a aYujeya nawaGliki. ⁵Cheliluwu aSilasi naTimotewu anafumi jehi kuMasijoniya, Pawulu hakutiya iyena muspilitu. Hakushimwina aYujeya ninji Yesu jiyi Klistu. ⁶Chanajikang’uwu nakuhosha chatama, hakutotomona mahininji, hakuyila ninji, Mashi enu ayikumini enu aweni, ami kwami hinikweti mulong’aku. Kufumisha kulelu nukuya kwami kuji aZHentili.⁷Hakufumaku, hakwing’ila mwitala jamuntu wumu, izhina jinji Titusa Yusitu, mukwakuhameka Nzambi, wukweti itala jinji jajikuma nashikola. ⁸Nyuuli yashikoloyu Kilisipu hakumukuhwelela Mwanta nawakwetala jinji ezhima. AKolinja amavulu niwena chanatiyuwu, akuhwelela nikukuhwelela, hiyakuyizhimika.⁹Mwanta hakumwila Pawulu muchimwenu nawufuku ninji, Bayi wutiyang’a womaku, hoshang’a kweyi, bayi wumwenang’aku; ¹⁰mulong’a ami niji naneyi, hikukwikala muntu wakukuzung’isha hela kukukatishaku; nikweti antu amavulu mung’anja yinu. ¹¹Hakushakama kwenoku mwaka wumu natukwezhi tutanu nakamu, nakutang’isha izu jaNzambi mukachi kawu ho-o.¹²Hajing’iyi Galiyo mwanta wamukala wamuAkaya, aYujeya hiyakumunyamukila Pawulu namuchima wawu wumu, hiyakumutwala kwitanja jakusompela. ¹³Nawu, Iwu iyala wuji nakushinzhila antu kujifukula kuji Nzambi mwacheng’i, mwabula kuya nshimbi.¹⁴Heliliyi Pawulu ninji akwati kuhosha, Galiyo hakuyila aYujeya ninji, Enu aYujeya, iyi nsang’u neyi yajing’i yakwila chatama, hela yakubazhama, naji kwitezha tuhu kunkabisha kujenu; ¹⁵kwinzichi chiyineli nsang’u yamazu namazhina nanshimbi zhenwenu aweni, yiketulenu enu aweni; ami naleki kusompesha nsang’u iyi.¹⁶Hakuyihang’a kwitanja jakusompela. ¹⁷Wena ezhima amukwata ninyuuli yashikola Soseteni, amwetela nikwenoku kwitanja jakusompela. Ilang’a Galiyo kubang’aku nehi.¹⁸Kufumisha henaha heliluwu yumiyi, Pawulu hakulabilaku mafuku amakwawu amavulu. Nkumininaku hakushalisha anakwinji, hakuya kuSiliya muwatu, wuji nawaPlisila naAkwila; watewula jehi mutu winji muKenikili, mulong’a wajing’i nansang’u yajikaniniyi. ¹⁹Chanashikuwu kuEfwesesa, hakushiya akwawu kwenoku, ilang’a yena yomweni hakwing’ila mushikola, hakujihuzhola nikutajika nawaYujeya.²⁰Chanamulombuwu nawu ashakamuku mafuku amakwawu, yena kwitezha nehi. ²¹Hakuyishalisha ninji, Neyi Nzambi netezhi, nakafunta kunu kujenu. Hakufuma kuEfwesesa muwatu.²²Chanashikiyi kuKesaleya, chanafumiyi muwatu owu, hakukanjuka kuYelusalema nakwimusha chipompelu; hakukunkumuka kuAntiyoki. ²³Chanashakamuku mafuku, hakufumaku, hakuhita mwitung’a jaNG’alizha nijaFwilizhiya, nakukolesha atumbanzhi ezhima hamukala hamukala.²⁴KuEfwesesa hikukwinza kaYujeya wumu, izhina jinji Apolosi, wavwalikili kuAlesanjeliya; muntu waswezha maana nankashi, waswezha ng’ovu zhakwiluka mwalumbulukila nyikanja yazhila. ²⁵Yena amutang’isha jehi mwaya nzhila yaMwanta; wekala neyena muspilitu yinji. Hakuhosha nakutang’isha nsang’u yaYesu chakashinshi, weluka kwachizhimikilu chaYowanu hohu. ²⁶Hakutachika kuhosha mushikola chakaji woma. Chanamutiyuwu aPlisila naAkwila, hiyakumutwala kwitala jawu, hiyakumulumbulwila mwaya nzhila yaNzambi, chakashinshi hanashali hanashali.²⁷Chakeng’eliyi kuya muAkaya, anakwinji hiyakumukwashaku nakumusonekela mukanja wakulezha atumbanzhi nawu mutambulenu. Chanashikiyi hakuyikwashaku nankashi antu anakuhweleli naluwi lwaNzambi. ²⁸Mulong’a waswezheli kuyibayisha aYujeya nang’ovu hatooka, nakuyilezha munyikanja yazhila ninji Yesu jiyi Klistu.

19¹19Helili Apolosi wuji kuKolinja, Pawulu hakuhita mwitung’a jakunjunjamu, hakushika kuEfwesesa, hakuwana atumbanzhi amu. ²Hakuyihula ninji, Enu chimwakuhweleleli mwatambwili Spilitu Wazhila? Hiyakumwila nawu, Nehi, hitunatiyi nawu kuji Spilitu Wazhilaku.³Yena ninji, Inji ayizhimikili nachizhimikilu chanyi? Nawu, Nachizhimikilu chaYowanu. ⁴Pawulu hakwila ninji, Yowanu wazhimikilang’a nachizhimikilu chakubalumuka mumuchima; walezhelang’a antu ninji akuhweleli owu wukumulonjela munyima, yowu Yesu.⁵Chanatiyuwu mwenimu, hiyakuyizhimika mwizhina jaMwanta Yesu. ⁶Pawulu chanayinang’ikiyi makasinji, Spilitu Wazhila hakwinza haji wena; hiyakuhosha majimi acheng’i nakuplofweta. ⁷Kuyichinja wezhima wawu, ajing’i amayala neyi ikumi nayeji (12).⁸Pawulu hakwing’ila mushikola, hakuhoshang’a chakaji woma mwahita tukwezhi tusatu, nakujihuzhola nikutajika nakuyishinzhila mwaya nsang’u yawanta waNzambi. ⁹Chanajikang’uwu amakwawu, kwonti kwawu kwovwahila, hiyakutena Nzhila chatama, iku izaza jawantu jitiyang’a, Pawulu hakufuma kuji wena, hakufumishaku atumbanzhi, hakutang’isha nakujihuzhola nawu mushikola yaTilanusa hefuku hefuku. ¹⁰Welilang’a mwenomu nyaka yiyeji, chakwila aYujeya nawaGliki ezhima ashakama muAsiya hiyakutiya izu jaMwanta.¹¹Nzambi wakong’elang’a nyijimu yang’ovu yacheng’i chikupu kumakasa aPawulu. ¹²Ákata ayitwelelang’a hela yitambala hela mahina akufuma kumuzhimba winji, nyisong’u yawu hiyikuyifuma, niaspilitu atama hiyakuyifuma.¹³Hakwila aYujeya amakwawu, akwakutambatamba, akwakufumisha anjemoni, hiyakukwata ng’ovu zhakutenena antu akweti aspilitu atama izhina jaMwanta Yesu, nawu, Tunayisanyikishi mwizhina jaYesu ashimunang’ayi Pawulu, netu fumaku. ¹⁴Mukulumpi wawatuplistu wumu izhina jinji Seva, kaYujeya, wajing’i nawanyaninji amayala atanu nayeji elilang’a mwenomu.¹⁵Spilitu watama hakuyakula ninji, Yesu namwiluki, Pawulu nawa namwiluki, ilang’a enu yenu anyi? ¹⁶Owu iyala wukweti spilitu watama hakuyimotokela, hakuzhama nawu; ayimika nimushinju wezhima wawu, hiyakutemoka mwitaloju nzekesi, ayikatisha jehi. ¹⁷Chumichi hichikutiyakana kuji aYujeya nawaGliki ashakama kuEfwesesa ezhima; wezhima wawu hiyakutiya woma, izhina jaMwanta Yesu jitoha nikutoha.¹⁸Chanakuhweleluwu antu amavulu, hiyakwitezha mwatamishiluwu, nikushimuna mweliluwu. ¹⁹Amakwawu amavulu élilang’a tufuta twacheng’i natwacheng’i, hiyakupompesha nyikanja yawu nakuyochela hatooka; kweseka wuseya wanyikanjoyu kumona wunashiki mumali asiliva makombakazhi makumi atanu (50,000). ²⁰Jichi izu jaMwanta hijikukula nikwimika mushinju.²¹Kulonjela hayumiyi, Pawulu hakutong’ozhoka muji Spilitu ninji, Neyi nahiti jehi muAkaya nimuMasijoniya, nakaya nikuYelusalema; chinakela nayi jehi kwenoku, ching’a nimona kuLoma nawa. ²²Chanatemeshiyi muMasijoniya ankwashi zhinji ayeji, iwu Timotewu, iwu Elasitusi, yomweni hakulabila muAsiya mafuku amakwawu.²³Hamafuku wowenowu hikukuvulumuka ipumba jajeni hansang’u yaNzhila. ²⁴Mulong’a iyala wumu, izhina jinji Jemetelusa, muchizhi wasiliva, wachililang’a ankishi zhaJiyana zhasiliva, hakuheteshang’a ankong’i maheta amavulu. ²⁵Hakupompesha ankong’i owu, hamu nawakwawu akong’elang’a mujimu wowumu, hakuyila ninji, Enu akwetu, mweluka nenu kumujimu iwu jiku kutwahetelang’a.²⁶Munamoni, munatiyi, hikuEfwesesa hohuku, ilang’a kunashali kwanti nakwila mwahita Asiya mwezhima, iwu Pawulu wakanzhikizha jehi antu amavulu, nakuyibalumuna munyichima yawu, ninji ankishi zhakutung’a namakasa hijiwu anzambuku. ²⁷Chuma chitukukeng’a kumona kukala, chakwila mujimu wetu iwu keng’a awujiwuli; himwenomu hohuku, tembeli yambala yamukishi wamumbanja walema Jiyana, keng’a yisawuki. Kuji chuma chikwawu nawa, wanta winji waweni walemeshang’awu muAsiya mwezhima, chalala hela mumpata yamunu mwishina yezhima keng’a wili chimwang’azhi.²⁸Chanatiyuwu mwenimu, nyichima yawu hiyikukuma mbe nakuzuwa; hiyakuvwakuka nawu, Jiyana wawaEfwesesa muneni! ²⁹NG’anja yezhima yiluwang’ana nikuluwang’ana; hiyakulotokela mwibulu jawu jeneni namuchima wawu wumu, anakwati jehi aGayusi naAlisitaka, amayala akuMasijoniya akwakwenja naPawulu.³⁰Cheliliyi Pawulu ninji eng’ili mwibulu mwanapompeluwu antu, atumbanzhi kumwitezha nehi. ³¹Atulamba amakwawu akuAsiya, ajing’i amabwambu zhinji, hiyakumutemeshela izu jakumulembelela nawu, Bayi weseka kwing’ila mwibuluku. ³²Amakwawu hiyakubijeka chuma chimu, amakwawu chuma chikwawu; mulong’a chipompelu chezhima chaluwang’ana jehi, amavulu nikwiluka nsang’u yanapompeluwu nehi.³³Hiyakufumisha Alesanjeli mwizaza jawantu, aYujeya hiyakumusha kumbiji. Alesanjeli hakweseka kuyimwenesha nachikasa chinji, ninji akwati kukulumbulwila antu nsang’u oyu. ³⁴Ilang’a chanelukuwu nawu hikaYujeya, hiyakuvwakuka wezhima wawu izu jawu jimu hohu, mwahita mpinzhi zhiyeji, vwakuke-e, nawu, Jiyana wawaEfwesesa muneni!³⁵Nsoneki wang’anjoyu chanamweneshiyi izaza hakwila ninji, Enu akwetu amayala aEfwesesa, haji muntu wayamba ng’anja yawaEfwesesa chiyahembang’a tembeli yaJiyana muneni, nimukishi waholokeli kwiwulu kuji Zewusi, tahinji? ³⁶Chineli yumiyi, kwosi muntu natweshi kutajika mwokuku, komana enu mwaji kumwena, himwaji kunyakala kwila chumaku. ³⁷Munaleti kunu awa amayala anabuli hela kwiya yuma yamumatembeli, hela kutena chatama mukishi wetu wamumbanja.³⁸Jichi Jemetelusa nawantu akong’elang’a mujimu wowumu, neyi akweti nsang’u yakujiholokela, yota yiji kwoku, ansompeshi aji kwoku, ajiholokeli kwawu. ³⁹Ilang’a neyi munakeng’i kuhosha nsang’u yacheng’i, akuyisompeshela muchota chawakulumpi awantu ezhima chalumbuluka. ⁴⁰Mulong’a keng’a tumoni mulong’a nansang’u yanjombu yalelu; neyi twakamona mwenomu, hitwakatwesha kulumbulula chachiwahi nsang’u yitunapompeluku. Chanahoshiyi mwenomu hakumwang’a chipompelu ochu.

20¹Ipumba chijinamweni, Pawulu hakutambika atumbanzhi; chaneliyi nayikunjezhi jehi, hakuyishalisha chachiwahi, hakufumaku ninji ayi muMasijoniya. ²Chanahitiyi mumpatoyu, chanayikwashiyi namazu amavulu, ashika nimumpata yawaGliki. ³Chanashakamiyi kwenoku tukwezhi tusatu, wajing’i namuchima wakukeng’a kuya kuSiliya muwatu; ilang’a chanatiyiyi nawu anamushakamini jehi hampúng’a kuji aYujeya, hakukinkang’ana nakuya cheng’i muMasijoniya.⁴Wenjelang’a hamu namwana kaPilihusi, Sopateli wakuBeleya; niAlisitaka naSekunju akuTesalonika; niGayusi wakuJelibi naTimotewu; niTikikusa naTlofwimusa antu akuAsiya. ⁵Hiyakuyang’ahu jehi kumbiji, hiyakutuching’ilila kuTilowasi. ⁶Chanamanuwu mafuku amankenji akaji ilung’i, hitukufuma muFwilipi muwatu, chimunahiti mafuku atanu hitukujiwana nawu kuTilowasi. Kwenoku hitukulabilaku mafuku atanu nayeji.⁷Hamulungu jojifuku jatachi, chitunapompi nakuhumuna jinkenji, Pawulu hakuyitang’isha, natong’ozhoki jehi ninji nukunyamuka hankunku yakucha, hakwila hoshe-e nimukachi kawufuku. ⁸Mwitala jahewulu mutwapompeleli mwajing’i manong’u amavulu.⁹Munjanina mwashakamini mukwenzi weyala, izhina jinji Yutikusa, hakuya mutulu twatweni; chaneliyi Pawulu hakushaku mazu amakwawu, yena hakukunjuka, hakuholoka kufuma hetala jahewulu jamuchisatu, hiyakumunona wafwa jehi. ¹⁰Pawulu hakusuluka, hakumubanjamina nakumukumbata, ninji, Bayi mwakamaku, himumi.¹¹Hakukanjama cheng’i hakuhumuna jinkenji, hakujya nawu. Chaneliyi hanzhike-e nichikunachi, hakufumaku. ¹²Owu mukwenzi hiyakumutwala wamuwenyi, hiyakutiya kuwaha nankashi.¹³Etu hitukuyang’ahu jehi kuwatu, hitukuya kuAsosa muwatu owu, netu jiku kutwakamwing’izhila Pawulu; mulong’a jimu mwatulezheliyi yomweni ninji, Ami nukuya heseki. ¹⁴Chanatuwaniyi kuAsosa, hitukumwing’izhamu, hitukushika nikuMitilene.¹⁵Hitukufuma kwenoku muwatu; chikunachi tushika nikwatalang’ana naChiyosi; chikunachi nawa tujata nikuSamosi; chikunachi nawa cheng’i tushika nikuMiletusa. ¹⁶Mulong’a Pawulu nakeng’i jehi kupanjakana Efwesesa muwatu, kulonja abuli kulabila muAsiya. Hakujihinja ninji wamba kela nakatwesha kushika kuYelusalema hefuku jaPentekosta.¹⁷Chajing’iyi kuMiletusa, hakutambika akulumpi achipompelu chakuEfwesesa. ¹⁸Chanenzuwu kuji yena hakuyila ninji, Enu aweni mweluka jehi munashakaminang’a nenu mafuku ezhima, kufumisha kwifuku jinasambilili kujata mwenju muAsiya; ¹⁹nakukalakela Mwanta nakujizoza mumuchima, namajilu niyuma yakala yinamweni hanshakamininuwu hampúng’a kuji aYujeya. ²⁰Chinabulili kuheng’uka nakuleka kushimuna yuma yakuyikwasha nachu yezhima; nayitang’ishili hatooka hetala hetala, ²¹nakushimwina niaYujeya niaGliki kubalumuka munyichima nakutala kuji Nzambi, nikumukuhwelela Mwanta Yesu Klistu.²²Ichi jinu tiyenu, yami nukuyiwu kuYelusalema, anankasi jehi muji Spilitu. Yuma yakanwana kwenoku hinayilukuku. ²³Nakumini jakwiluka mwanlezhang’awu munyikala yezhima kuji Spilitu Wazhila, ninji kumbiji kunanshakamini nyonzhi niyuma yakala. ²⁴Hela chochu, wumi wami hinawumoni kulemaku; chakala nakamanishi nzhila yami, nimujimu wanyinkeliyi Mwanta Yesu kukalakala, nikushimuna nsang’u yayiwahi yaluwi lwaNzambi.²⁵Ichi jinu tiyenu, neluki jehi nami enu akwetu ezhima, mwanmwenang’a nakukimbuka nakushimuna wanta waNzambi, himwamba kanmona nawa cheng’uku. ²⁶Jihu hanafumi kuyilezha lelu, nami nabuli mulong’a wamashi awantu ezhima. ²⁷Mulong’a hinaheng’ukili nileka kuyishimwina mwaya mpúng’a yaNzambi yezhimaku.²⁸Jihembenu enu aweni, hembenu ninyikoku yezhima yanayikunzhikuwu kuji Spilitu Wazhila kwikala anhembi, mwikali atubing’a nakujiisha chachiwahi chipompelu chaNzambi chalanjiliyi namashi inji yomweni. ²⁹Ami neluki nami chinakafumahu, atung’wiji azuwa akeng’ila mukachi kenu, hiyakaanakena nyikokuku. ³⁰Hela mukachi kenwenu aweni mwakanyamuka antu akuhosha yuma yaheng’a, akajikokela atumbanzhi awenawu.³¹Jichi jinu tonenu, mwanukang’a mwahita nyaka yisatu hinalekeli kuyikonkomwena wezhima wenu niwufuku nimwaana namajiluku. ³²Ichi jinu, hinukuyikunzhika kuji Nzambi, nikwizu jaluwi lwinji jinatweshi kuyitung’a nakuyinka wuswana nawantu azhila ezhima.³³Hinajing’i nalwisu lwasiliva yamuntu niwumu, hela lwawulu hela lwamahinaku. ³⁴Enu aweni muneluki makasami awa jiwu ajing’i nakukalakela yuma yinabulili, niyabulili akwetu najing’i nawu. ³⁵Yuma yezhimiyi nelili kulonja mutaliluhu, kulonja enu aweni mwakakalakali mukwashi akwenu abula ng’ovu; mwanukang’a mazu aMwanta Yesu chahosheliyi ninji, Chikweti kukooleka yowu kwinka akwenu, kutambula chakuminamu.³⁶Chanakumishiyi kuhosha mwenimu hakufukama, hakulombela nawu wezhima wawu. ³⁷Wezhima wawu hiyakujila nankashi, hiyakujinata hanshing’u yaPawulu nakumupwepuzhola. ³⁸Chuma chaswezheluwu kutiya wushona jojizu jahosheliyi ninji, Himwamba kanmona nawa cheng’uku. Hiyakumutwalaku munzhila yinji yakuya kuwatu.

21¹Chitunaambuki nawu, hitukutachika kwenja muwatu, hitukwimakana nikuKosi nzwa-a; chikunachi tushika nikuLoji, kufuma oku tuya nikuPatala. ²Hitukuwana watu wacheng’i wuji nakuzambukila kuFwenisiya, hitukwing’ilamu, tutachika nikwenja muwatu owu.³Chitunashiki kwela chitutu chaKipilosi hichikumwekana, hitukuchibakila kuchikasa chachimunswa, hitukuyang’a tuhu muwatu kuSiliya. Hitukushika kuTila, tufuma nimuwatu; mulong’a kwenoku jiku kwakeng’eli kulong’ololawu yuma yajing’i muwatu. ⁴Chitunawani atumbanzhi, hitukulabila kwenoku mafuku atanu nayeji. Wenawa hiyakumwila Pawulu muji Spilitu nawu bayi akajata mwenju muYelusalemaku.⁵Chinamani mafuku owu, hitukunyamuka nakuya munzhila yetu; akwetu ezhima, niang’ojizhawu nianyanawu, hiyakututwalaku munzhila yetu. Chitunafumi mung’anjoyu, hitukufukama kuchikumu chakalung’alwizhi nakulombela. ⁶Chitunajishaliki chachiwahi, hitukuya cheng’i muwatu owu, wena afunta nikumatalawu.⁷Chitunakumishi nzhila yetu yamuwatu yakufuma kuTila, tushika nikuTolemayi. Hitukuyimusha anakwetu, tuzhing’ilaku niifuku jimu. ⁸Chikunachi hitukunyamuka, tushika nikuKesaleya. Kwenoku hitukwing’ila mwitala jamukwakushimuna nsang’u yayiwahi, Fwilipu, jiyi wajing’i wanawa ankwashi atanu nayeji atonjeluwu; hitukushakama ninji. ⁹Yenowu iyala wajing’i nawanyaninji awambanja azhiki awana, aplofwetelang’a.¹⁰Chitunalabili kwenoku mafuku amavulu, kuYujeya hikukufuma kaplofwetu wumu, izhina jinji Agabusi. ¹¹Hakwinza kujetu, hakutambula muya waPawulu, hakujikasawu kunyenju nikumakasa; hakwila ninji, Spilitu Wazhila ninji, Jichi chakakasawu muntu wukweti muyiwu kuji aYujeya akuYelusalema; akamulubula kuji aZHentili.¹²Chitunatiyi mwenimu, etu nawakwetu akwenoku hitukumulembelela Pawulu, netu bayi akanjuka kuYelusalemaku. ¹³Pawulu hakwakula ninji, Aka! Muji nakujilaji? Mukumbalula muchima? Netezhi kwami hela kunkasa, hela kukumina jakufwa kuYelusalema, kukoola izhina jaMwanta Yesu. ¹⁴Chaneliyi kumulekesha kwonti kwinji, hitukumwena netu, Eli muchima waMwanta.¹⁵Mafuku alonjelumu, hitukulong’ezha yuma yetu, tukanjuka nikuYelusalema. ¹⁶Hitukuya nawakwetu atumbanzhi akuKesaleya, nimuntu wumu wakuKipilosi, izhina jinji Manasoni, kambanzhi wamukulu itukukeng’a kushakama ninji.

¹⁷Chitunashiki kuYelusalema, anakwetu hiyakutiya kuwaha kututambula. ¹⁸Chikunachi hitukuya naPawulu kwaYakoba; kwajing’uwu niakulumpi ezhima. ¹⁹Chanayimushiyi, hakuyishimwinamu mwezhima mwakong’eliyi Nzambi mukachi kawaZHentili kumujimu winji, hachuma hachuma.

²⁰Wena chanachitiyuwu, hiyakulemesha Nzambi. Hiyakumwila nawu, Eyi manakwetu, wunamoni chanakuhweleluwu aYujeya makombakazhi namakombakazhi; wezhima wawu aswezha ng’ovu yakujizhilika nanshimbi zhawu. ²¹Nsang’u yeyi yatiyakana jehi, anatiyi nawu watang’ishang’a aYujeya ezhima ekala mukachi kawaZHentili, neyi ambuki naMosi. Nawu wayitang’ishang’a neyi bayi aalamishang’a anyanawu, hela kwenja mwaya yizhila yaMosuku.²²Tukwila ng’ahi jinu? Chalala izaza keng’a jitiyi nawu wenza jehi. ²³Jichi ilaku mutukukulezha. Tukweti amayala awana anajishiilumu jehi; wutwalaku wenawa wujizhiliki nawu hamu, ²⁴yikwashuku kufweta kulonja atewuli nyitu yawu. Mwenomu antu ezhima eluki nawu nsang’u yeyi yanayilezhuwu yakutwamba; komana eyi aweni wenjang’a chachiwahi mwaya nshimbi.²⁵Hakwila hansang’u yawaZHentili akuhwelela jehi, twasonekeli jehi. Twaketwili jehi netu aleki yuma yakupesha nachu ankishi, nimashi, nianyama akushotomona, niwuzhila. ²⁶Pawulu hakutambula wenowu amayala; chikunachi hakujizhilika nawu hamu, hakwing’ila muTembeli kulonja alezhi mwakamanina mafuku akujizhilikila; hakayikwashayi namulambu wawu wezhima wawu.²⁷Chaneluwu mafuku atanu nayeji hiyakuya nakumana, aYujeya afumini kuAsiya, chanamonuwu Pawulu muTembeli, hiyakusang’umuna izaza jawantu jezhima, amukwata nikumukwata. ²⁸Hiyakubilela nawu, Enu akwetu amayala aIsalela, tukwashenuku! Yeniwu jiyi iyala watang’ishang’a antu ezhima kwezhima, nakutung’ula niaIsalela ninshimbi niTembeli iyi. Nabombeluku chuma chikwawu nawa, neng’izhi aGliki muTembeli; nazhiloli jehi munu mwazhila. ²⁹Mulong’a henohu amumona jehi mung’anja hamu nakaEfwesesa, Tlofwimusa; anatong’ozhoki nawu Pawulu namwing’izhi muTembeli.³⁰Ng’anja yezhima yivwakuka niipumba; antu hiyakupompa lufuchi, hiyakumukwata Pawulu, hiyakumukokela hanzi yaTembeli. Enzela niyenzelu hohenohu. ³¹Heliluwu hiyakukeng’a kumuzhaha, nsang’u oyu yishika nikuji mukulumpi wamashijika ikombakazhi (1,000), nawu Yelusalema yezhima yavwakuka jehi kwepumba hohu.³²chanamonuwu mukulumpi muneni wamashijika nimashijika, aleka nikumweta Pawulu. ³³Mukulumpi muneni wamashijika hakwinza kwakwihi, hakumukwata, hakuyila ninji mukasenu namaleng’i ayeji. Hakwihula ninji, Yeniwu hinyi? Neli ng’ahi?³⁴Ámwizaza amakwawu hiyakubijeka chuma chimu, amakwawu nawa chuma chikwawu. Chanabuliyi kwiluka chakashinshi nepumba jajing’uku, hakuyilezha ninji mutwalenu mwitala jamashijika. ³⁵Chanashikuwu kuwukanjaminu, hiyakumweleka Pawulu kuji mashijika, nanochu chaswezheluwu antu kuzuwa. ³⁶Mulong’a izaza jawantu hijikuyilonjela nakubijeka nawu, Waaji! Waaji!³⁷Hakeng’eluwu kumwing’izha mwitala jamashijika, Pawulu hakumwila owu mukulumpi muneni, ninji, Wukung’itezha chuma chimu? Yena ninji, Komana wahoshang’a ijimi jaGliki? ³⁸Ami nami kwizhi yeyi kaEzhipitu wafumbili nzhita mafuku awa ajing’uku, watweli atuponju makombakazhi awana (4,000) muchinkalampata.³⁹Pawulu hakwakula ninji, Ami yami kaYujeya wakuTalusa muSilisiya, nimwining’anja yalema. Nakulembeleli nami ang’itezhi mwani nihoshi nawantu. ⁴⁰Chanamwitezhiyi, Pawulu hakwimana hawukanjaminu, hakuyolwela antu chikasa kwiwulu; chanamwenuwu chacheni nzo-o, hakuhosha nawena mwijimi jaHebelu.

22¹Ninji, Enu anakwetu, ninenu atata, tiyenu munukujihakwila kujenu. ²Chanatiyuwu wuji nakuhosha nawu mwijimi jaHebelu, aswezha nikumwena.³Hakuhosha ninji, Ami nikaYujeya, navwalikilili kuTalusa muSilisiya, ilang’a najizilili mung’anja yinu kunyenju yaGamaleli; amfumbilang’a mwalong’ela nshimbi yawankakulula zhetu chikupu; najing’i nakumukalakela Nzambi nang’ovu neyena kumuchima, neyi chimuji nakwila wezhima wenu lelu. ⁴Nakabishilang’a akwaNzhila yinu hela kuyizhaha; najing’i nakukasakasa amayala nawambanja nakuyisha mutuleya. ⁵Hela kaplistu muneni hichinsahu wukushimuna tuhu, niakulumpi ezhima. Wowu anyinkeli nyikanja yakuji akwetu aYujeya, kulonja nakayi mulwenju lwakuJamakasa, nakayileti akwakukuhwelela munyonzhi kuYelusalema, kulonja akayibabeshi.

⁶Chinajing’i nakuya munzhila yami, hinukushika kwakwihi naJamakasa, itang’wa mwiwulu; kukasumuka chezhezhi cheneni chakufuma mwiwulu hichikuntong’ekelami kwi-njo. ⁷Hinukujimbuka hamaseki, nitiya niizu hijikung’ila ninji, Eyi Sawulu, Sawulu, wankabishilang’aji? ⁸Hinukwakula nami, Yeyinyi Mwanta? Yena hakung’ila ninji, Yami Yesu wakuNazaleta, yami wakabishang’a.⁹Akwetu twajing’i nawu, chalala chezhezhi achimweni, hakwila izu janowu wajing’i nakuhosha nanami hiyajitiyiluku. ¹⁰Hinukwila nami, Nukwila ng’ahi, Mwanta? Mwanta hakung’ila ninji, Nyamukaku, wuyi muJamakasa, jiku kwakakulezhelawu mujimu wezhima wanakukunzhikuwu. ¹¹Chinakang’enyi kumona hansang’u yakuswezha kwachezhezhi chalubanzhi lwakulema, akwetu najing’i nawu hiyakunkwata kuchikasa, hinukwing’ila muJamakasa.¹²Muntu wumu izhina jinji Ananiya, iyala wukweti kalemesha kakulemesha nshimbi, amuhamekelang’a kuji aYujeya ezhima ashakamini muJamakasa; ¹³hakwinza kujami, hakwimana kwakwihi, hakung’ila ninji, Eyi manakwami Sawulu, tonaku. Hohenohu hinukutona, hinukumumona.¹⁴Yena hakwila ninji, Nzambi yawankakulula zhetu nakukunzhiki kukwiluka muchima winji, wumoni Mukwakulong’a, wutiyi izu jakukanwa kinji. ¹⁵Mulong’a wakekala chinsahu chinji chakushimuna kuji antu ezhima yuma yiwunamoni nikutiya. ¹⁶Wukulabilaji jinu? Nyamukaku, akuzhimiki, wutooki kunshiji zheyi chiwukutambika izhina jinji.¹⁷Chineli nafunti jehi kuYelusalema, hinajing’i nakulombela muTembeli, hinukwila neyi nayi mutulu. ¹⁸Hinukumumona Yesu, hakung’ila ninji, Nyakalaku, wufumi swayi muYelusalema, mulong’a hiyakwitezha wunsahu weyi wakunshimunaku.¹⁹Hinukwila nami, Mwanta, awenawu aneluki chinashilang’a akwakukukuhwelela amumashikola ezhima mukaleya, nikuyeta chikupu. ²⁰Chamwang’iluwu mashi achinsahu cheyi Stefwanu, ami kwoku nemeni, hinukwitezhamu, hinukuhemba mahina anawa ajing’i nakumuzhaha. ²¹Hakung’ila ninji, Yaku tuhu, mulong’a ami nakakutemesha kuji aZHentili kwakulehi.²²Hiyakumutiya kushika nihezu oju; henohu hiyakuvwakuka nawu, Muntu wuji ichi haji kwikala hamasekuku. Hanateli kuhanjaku. ²³Iku aji nakubijeka nang’ovu, nakutabola mahinawu, nakunata lunkung’u kwiwulu, ²⁴mukulumpi muneni wamashijika hakuyila mashijika ninji mwing’izhenu mwitala jenu, ninji muvupulenu nachikoti kulonja niluki nsang’u yakumubijekawu.²⁵Chanamukasuwu nanyisulu, Pawulu hakumwila mukulumpi wamashijika wajing’i nakwimana kwakwihi, ninji, Kuvupula kaLoma chakaji kumuhisha, hichinzhilaku? ²⁶Chanachitiyiyi, owu mukulumpi hakuya kuji mukulumpi muneni wamashijika, hakumulezha ninji, Keng’a wili chumanyi? Yeniwu muntu hikaLoma.²⁷Mukulumpi muneni wamashijika hakwinza, hakumwila ninji, Nlezhi, eyi wukaLoma? Yena ninji, Eng’a. ²⁸Mukulumpi muneni wamashijika hakwakula ninji, WuLomiwu ami nawulanjili namali amavulu nankashi. Pawulu ninji, Hakwila ami kwami jimu munavwalikila. ²⁹Henohu wena akeng’eli kumuvupula amufuma nikumufuma. Mukulumpi muneni wamashijika niyena, chanelukiyi ninji Pawulu hikaLoma hakutiya woma, nanochu chanamukasiyi.³⁰Chikunachi, hakukeng’a kwiluka chakashinshi nsang’u zhanamumonuwu nazhu kuji aYujeya; hakumwijisha, hakulezha akulumpi zhawatuplistu nichota chezhima ninji akapompi hamu; hakumutwala nakumwimika Pawulu kumesu awu.

23¹Pawulu hakushinshika akwachota swi-i ninji, Enu anakwami, ami nenzi kumesu aNzambi nachinlezhi chamuchima chachiwahi hohu, kushika nikwifuku jalelu. ²Kapilistu muneni Ananiya hakuyila antu emeni kwajing'iyi, ninji amweti kukanwa. ³Pawulu hakumwila ninji, Nzambi wakakweteyi, yeyi mbang'u yakupembezha! Eyi wushakami nakunsompesha mwaya nshimbi, wulezhi antu neyi mwetenu, chakumotoka nshimbi?⁴Antu emenuku hiyakumwila nawu, Wutuki kapristu muneni wambala waNzambi? ⁵Pawulu nindi, Enu anakwetu, hinamwiluki nami jiyi kapilistu munenuku. Mulong'a anasoneki nawu, Kutena nyuuli yawantu enu chatama, chinzhila.⁶Pawulu chanelukiyi ninji komana aneli awa aSadusi, awa aFwarisewu, hakubijika mwenomu muchota ninji, Enu anakwetu, ami nikaFwarisewu, nimwana kawaFwarisewu! Nsang'u yaji nakunsompeshelawu yoyakuchiŋeja kusang'uka kwamba kasang'uka afu. ⁷Chanahoshiyi chochochu, aFwarisewu nawaSadusi hiyakuvwakuka ntaji, nichota chambuka nihakachi. ⁸Mulong'a aSadusi elaŋa nawu hikwekala kusang'ukaku; nawu hikwekala hela kang'elu, hela spilituku. Hakwinza aFwarisewu etiyang'a mwejima.⁹Henohu avwakuka niipumba fwi-i. Ansoneki zhawaFwarisewu hiyakwimana, hiyakuzuwa nawu, Iwu muntu hitunamumoni nachuma chatamaku. Kwiji kang'elu jiyi nahoshi nayena, inoji kwizhi spilitu. ¹⁰Chihanamwekani ndombu yasweja, mukulumpi muneni wamashidika hakwakama ninji keng'a amusansoli Pawulu. Hakulezha mashijika ninji, Kunkumukenu mumwamuki nang'ovu mukachi kawu, mumuleti mwitala jenu.¹¹Wufuku walondeluku, Mwanta Yesu hakwimana kwadiŋi Pawulu, hakumwila nindi, Tiyaku kuwaha; mulong'a chiwunanshimuni wunsahu muYerusalema, jichi wamba kashimuna nikuRoma nawa.¹²Chikunachi, aYudeya hiyakujipompesha, hiyakusanyika naŋovu nawu, Etu kudya hela kunwa ching'a tunajahi Pawulu. ¹³Wenawa ashakamini hampúng'oyu ading'i abadika makumi awana (40).¹⁴Hiyakuya kuji akulumpi zhawatupiliistu nikuji akulumpi, hiyakuyila nawu, Tunasanyiki jehi kusanyika kwakujishing'a netu, Etu kutompa kudya ching'a tunasambili jehi kuzhaha Pawulu. ¹⁵Jichi jinu enu niakwachota, mumulezhang'a mukulumpi muneni wamashidika nenu akenzi naPawulu kudenu kumajiki; chiji neyi munakeng'i kwihula nsang'u yindi chakashinshi. Etu twakela kanja tuhu aswili nikwakwihi, mwaka twamuzhaha jehi.¹⁶Komana mwiha kaPawulu chanatiyiyi chakukeng'a kumubelaminawu, hakwing'ila mwitala jamashijika nakumulezha Pawulu. ¹⁷Pawulu hakutambika mukulumpi wumu wamashijika ninji, Mutwali iwu mukwenzi kuji mukulumpi muneni wamashidika; wukweti kansang'u kakukeng'a kumulezhayi.¹⁸Jichi hakumutwala nakumushikizha kuji mukulumpi muneni wamashijika. Hakumwila ninji, Pawulu, muntu wamukaleya, nantambiki, nang'ili ninji nikuleteli iwu mukwenzi, wukweti kansang'u kakukeng'a kukulejayi. ¹⁹Mukulumpi muneni wamashijika hakumukwata kuchikasa, hakuya ninji hambaji. Hakumwihula kwakankawawu ninji, Wuji nansang'winyi yiwukukeŋa kunlezha?²⁰Hakumulezha ninji, AYudeya anatiyaŋani kukulomba nawu wakakunkumuki naPawulu kuchota kumajiki, chiji neyi anakeng'i kwihula nsang'u yinji chakashinshi. ²¹Hakwila eyi bayi wuyitezhaku, mulong'a kunamubelamini deji amayala akubajika makumi awana (40); anadishing'i nawu, kudya hela kunwa ching'a tunamuzhahi jehi. Chituji nakuhosha ichi anabatami jehi, aji nakutalila chimukukeng'a kujikana nawu.²²Mukulumpi muneni wamashidika hakufuntisha yenowu mukwenzi, hakumwila ninji, Yaŋa kweyi; ichi chiwunanleji, bayi wulejamu muntu niwumuku. ²³Hakutambika akulumpi ayeji amashijika ninji, Long'eshenu mashijika nkulakazhi zhiyeji (200), niakwatuwalu makumi atanu nayeji (70), niakwamayong'a nkulakazhi jiyeji (200), akayi kuKesareya; akanyamuki mpinji yawufuku yamuchisatu (21:00 hrs). ²⁴Ninji, Mukeng'a nianyama akwendela, mushuhu Pawulu, akamutwali chachiwahi kudi nyuuli Filiksi.²⁵Hakusoneka mukanda wakwila ninji, ²⁶Ami Kalujusa Lisiya, Nidi nakusoneka mukanda weyi eyi nyuuli Filekisi walema nankashi. Tunayimushi mwani. ²⁷Yeniwu iyala amukwatili kudi aYudeya, akeng'eli kumuzhaha; hinukuyikasumwisha namashijika, hinukumupulwisha, mulong'a natiya nawu hikaRoma.²⁸Chinakeŋeli kwiluka mulong'a wanamwinkuwu, hinukumukunkumwisha kuchota chawu. ²⁹Kutiya komana anamwinki mulong'a wansang'u janshimbi jawu, himuloŋa wakutela kufwa hela kumukasaku. ³⁰Chananlezhuwu nawu anamushakamini muntu iwu hampúng'a, hinukunyakala kumutemesha kudeyi, hinukuleja ánamuholokeli nami akenzi nakumuholokela kujeyi. Shalenu chachiwahi.³¹Jichi mashijika hiyakwila mwayilezheluwu, hiyakumutambula Pawulu nakumutwala kuAntipatila nawufuku. ³²Chikunachi, hiyakumushiya nawakwatuwalu; wena hiyakufunta kwitala jamashijika. ³³Chanashikuwu kuKesaleya, hiyakumwinka nyuuli mukanja, ashikizha niPawulu kuji yena.³⁴Chanawutang’iyi hakwihula ninji, Himuntu wakwilung’anyi? ³⁵Chanelukiyi ninji himuntu wakuSilisiya, hakwila ninji, Nakatiya nsang’u yeyi chachiwahi chakenzawu anakuholokeli. Hakulezha mashijika ninji muhembenu mwitala jaHeloji jawanta.

24¹Chimunahiti mafuku atanu, kaplistu muneni Ananiya hakushika nawakulumpi amu, niihaku jawu izhina jinji Telitulu. Hiyakumulezha nyuuli mulong’a waPawulu. ²Chanamutambikuwu Telitulu, yena hakutachika kushimuna mulong’a waPawulu. Ninji, Chiwunatushakamishi chachiwahi chamwena, niyuma yatama yayivulu yamwenang’a munza wetu wunayololi jehi namaaneyi, ³twachitambulang’a mafuku ezhima mwezhima, eyi Filiksi waswezha kulema nankashi, twasakililang’a nankoshi zhazhivulu.⁴Ilang’a hinakeng’i mwani kukulabishaku, nakenja kakuzeyesha. Nikumini jakukulembelela wututiyi tumazu twanti naluwi lwambala wekala nalu. ⁵Iyaliwu tunamumoni hikavuba, wasang’umunang’a mazhita mwahita aYujeya mumpata yamunu mwishina yezhima. Himukulumpi wawakwachaaku chawaNazaleta ⁶Yeniwu wajing’i nakweseka ninji azhiloli Tembeli; tumukwata nikumukwata netu tumusompeshi mwaya nshimbi yetu.⁷Ilang’a mukulumpi muneni wamashijika Lisiya hakwinza nanjombu yayeni, hakutwamukayi. ⁸Hakulezha etu tunamuholokeli, ninji twinzi kujeyi. Mwihuli tuhu eyi aweni, wiluki chachiwahi mwezhima mutunamwinkeli nyilong’a. ⁹AYujeya niwena hiyakukoleshamu nawu chalala kwaamu.¹⁰Nyuuli chanamulezhiyi nachikasa ninji ahoshi, Pawulu hakwakula ninji, Chineluki nami eyi wunasompeshi jehi munza wetu nyaka yayivulu, jichi natiyi kuwaha kujihakwila. ¹¹Eyi aweni wukushinshika tuhu chinayili kuYelusalema nakujifukula kuji Nzambi, kanja muhiti nimafuku ikumi nayeji (12). ¹²Hiyanweni muTembeli nakutajika namuntu niwumuku; hela kuvulumuna ipumba mumashikola aweni, hela tuhu mung’anja nehi. ¹³Hiyakutwesha kunhisha nayuma yananholokeluwuku.¹⁴Hela chochu, nukwitezha tuhu kujeyi nami nakalakelang’a Nzambi yawankakulula zhetu mwaya chaaku chatenang’awu nawu Nzhila; netiyang’a yuma yezhima mwaya nshimbi, niyanasonekuwu atuplofwetu. ¹⁵Namukuhwelelang’a Nzambi mwomwakuhwelelang’awu niwena nawa, nami kwamba kekala kusang’uka kwawalong’a nikwawabula kulong’a. ¹⁶Chinaching’ezhang’a mwenimu najikwatishang’a nankashi, kulonja nijimoni nawa, nami kuji Nzambi nikuji antu nabuli mulong’a mafuku ezhima.¹⁷Jichi jinu chiyahitili nyaka yayivulu, chinajing’i nakuletela akwetu akwamunza wami yamukunkulu, nikulambula Nzambi, ¹⁸aYujeya akuAsiya hiyakunwana najizhilika jehi muTembeli, chakaji izaza hela tuhu ipumba. ¹⁹Wenowu jiwu atezhi kwinza kunu nakunholokela kujeyi, neyi akweti nsang’u nanami.²⁰Hela wenowu ashimuni tuhu chuma chatama chamwenuwu chinemani muchota; ²¹kwizhi jojizu jinemeni nakubijika nang’ovu mukachi kawu nami, Muji nakunsompesha lelu nsang’u yakusang’uka kwawafu.²²Filekisi, nanochu chelukayi jehi nsang’u yaNzhila chakashinshi, hakuhachika nsang’u ninji, Chakenzayi mukulumpi muneni wamashijika Lisiya, nakasompa nsang’u yenu. ²³Hakumulezha mukulumpi wamashijika kumuhemba chachiwahi mukaleya chakaji kumukabisha; ninji bayi alekesha amabwambu zhinji kwinza nakumukalakelaku.²⁴Chimunahiti mafuku amakwawu, Filiksi hakwinza nang’ojinji Jlusila, yena nawa hikaYujeya, hakutambika Pawulu, hakumutiya chakushimunayi nsang’u yinji yakukuhwelela Klistu Yesu. ²⁵Chashimwiniyi zhakulong’a, nizhakujihemba, nizhakusompa kwamba kenza, Filiksi hakuzaala woma; hakwakula ninji, Lelu yang’a kweyi; neyi namoni hahawahi nakakutambika.²⁶Hakukuhwelela ninji akumwinka mali kuji Pawulu; jihu hafuminang’a kumutambika nakuhanzhika ninji hanti nahanti. ²⁷Chimunahiti nyaka yiyeji, Filiksi hiyakumuswana kuji Polokiwu Festusi. Chakeng’eliyi Filiksi kutiyisha aYujeya kuwaha, hakumulekela Pawulu mukaleya.

25¹Chanenziyi Festusi mwilung’a oju, chimunahiti mafuku asatu hakufuma kuKesaleya, hakuya kuYelusalema. ²Akulumpi zhawatuplistu niakulumpi zhawaYujeya alema, hiyakumuholokela Pawulu kuji yena. ³Hiyakumulembelela nawu, Atwanakeni mwani, atukwashuku; mumuleti Pawulu enzi kuYelusalema. Elili nawu amubelamini, akamuzhahili munzhila.⁴Ilang’a Festusi hakwakula ninji, Pawulu wuji mukaleya kuKesaleya, ami aweni keng’a niyi kwenoku. ⁵Jichi niyi nawakwenu alumbuluka; neyi haji chuma chatama chaneliyi akamuholokeli tuhu.⁶Chimunahiti jehi mafuku atanu nasatu inji kwizhi ikumi, hakuya kuKesaleya. Chikunachi, hakushakama hetanja jakusompela, hakulezha antu kumuleta Pawulu. ⁷Chanenziyi, owu aYujeya afumini naFestusi kuYelusalema hiyakwimana kuji Pawulu kwi-njo, nakumwinka nyilong’a yatama yayivulu. Hela chochu, hiyatwesheli kumuhishaku. ⁸Pawulu hakujihakwila ninji, Hela nshimbi yawaYujeya, hela Tembeli, hela Kesali, hinayitamishi nihantuku.⁹Ilang’a Festusi, wakeng’a jehi kuyitiyisha aYujeya kuwaha, hakumwihula Pawulu ninji, Wukwitezha kukanjuka kuYelusalema, akakusompesheluku yumiyi kumesu ami, tahinji? ¹⁰Pawulu hakwila ninji, Nemani kwami kwitanja jaKesali jakusompela, kwatela kunsompeshelawu. Hinakong’eli aYujeya chatamaku; hela eyi aweni wunelukumu chikupu,¹¹Neyi ami nakong’ang’a chatama, hela neyi nela jehi chuma chatela kufwa, hinakaani kufwaku. Ilang’a neyi yananholokeluwu yakutwamba, hikuji muntu wukutwesha kunlubula kuji wenaku. Niyi kwami kuji Kesali. ¹²Festusi, chanashakamiyi hampúng’a nachota chinji, hakwakula ninji, Chiwunalombi kuya kuji Kesali, wakaya kuji Kesali.¹³Chimunahiti mafuku antesha, Aglipa hakushika kuKesaleya naBelenisi, nawu amwimushi Festusi. ¹⁴Chaneluwu achiji kulabalaba mafuku amavulu, Festusi hakumwawila mwantowu nsang’u yaPawulu, ninji, Kunu kuji iyala alekelawu munyonzhi kuji Filiksi. ¹⁵Chinajing’i kuYelusalema, akulumpi zhawatuplistu niakulumpi zhawaYujeya hiyakumuholokela kujami, nawu nimuhishi. ¹⁶Hinukuyakula nami, kusha muntu mukaleya chakaji kujimona nawakwakumuholokela mesu namesu, amoni zhakujihakwila nansang’u yanamuholokeluwu, hichaaku chetwetu aLomaku.¹⁷Chapompeluwu kunu, hinalabiluku, ilang’a jojifuku jalonjelumu, hinukushakama hetanja jakusompela; hinukulezha antu kumuleta yenowu iyala. ¹⁸Chanemanuwu akwakumuholokela, hiyateneni nyilong’a yatama yiji neyi munatong’ozhokeluku; ¹⁹komana anamuholokeli tusang’u twayizhila yawu, nimuntu izhina jinji Yesu wafwili, atenang’ayi Pawulu ninji wamumi. ²⁰Chinelili nami nizhinoki mwakwihwila nsang’u iyi, hinukumwihula nami, Wukwitezha kuya kuYelusalema, akusompesheluku nsang’u iyi, tahinji?²¹Ilang’a chaneliyi Pawulu nalombi jehi ninji amuhembang’a nichamba kamuketwilawu mulong’a kuji Agusitusi, hinukulezha antu nami amuhembi tuhu mukaleya, nichinakamona zhakumutemesha kuji Kesali. ²²Aglipa hakumwila Festusi ninji, Ninami nakeng’i kumutiya yeniwu iyala. Festusi ninji, Kumajiki wakamutiya.²³Chikunachi Aglipa hakwinza naBelenisi, nawanta waweni; hakwing’ila mwitala jakuhoshela nyilong’a, hamu nawakulumpi anzhita, niantu amung’anja alema. Festusi hakulezha antu kuleta Pawulu. ²⁴Festusi hakuhosha ninji, Eyi mwanta Aglipa, ninenu amayala ezhima tuji nenu munu, iwu iyala munamoni iwu, anamuholokeli kujami kuji aYujeya ezhima. KuYelusalema, nikunu nawa, hiyakumbijika nawu hatela kuhanja nawa cheng’uku.²⁵Ami hinamumoni namulong’a wakutela kufwaku; jichi chaneliyi yomweni nalombi jehi ninji ayi kuji Agusitusi hohu, ami hinukwila nami nimutemeshi tuhu. ²⁶Hinamoni nsang’u yalumbuluka yinukusoneka kuji mwanta wamuku; jihu hanafumi kumuleta kumesu enu, nankashi kumesu eyeyi mwanta Aglipa, kulonja tumwihuzholi, tumoni mwakusonekela. ²⁷Mulong’a natong’ozhoki nami hichikweti maana kutemesha muntu wamukaleya chakaji mukanja wakushimuna nyilong’a yamuholokeleluwuku.

26¹Aglipa hakumwila Pawulu ninji, Anakwitezhi kujihakwila eyi aweni. Pawulu hakwolola chikasa hakujihakwila; ²ninji, Eyi mwanta Aglipa, natiyi kuwaha mwani kujihakwila kumesu eyi ifuku jalelu, nihiti mwezhima mwananholokeluwu kuji aYujeya. ³Mulong’a eyi aweni weluka jehi nankashi yaaku yawaYujeya yezhima, nimwehuzholang’awu; jichi nalembi mwani, jung’umiki wuntiyilili chachiwahi.⁴AYujeya ezhima aneluki munekalilang’a mwezhima kufumisha kuwukwenzi wami, mukachi kamunza wetu nimuYelusalema. ⁵Awenawu aneluki kufumisha kutachi, chinajing’i kaFwalisewu, chochaaku chakwitiya kwetu kwaswezha kuzhila. Neyi etezha kushimunamu, aji kushimuna tuhu.⁶Nsang’u yinemeni nakunsompesha yoyakuching’ezha chuma chakaniniyi Nzambi ankakulula zhetu. ⁷Chochakalakelang’a nyichiji yetu ikumi nayiyeji (12) nang’ovu, niwufuku nimwaana, nawu amba kachimona. Kuching’ezhoku jiku kunanholokeluwu aYujeya, eyi mwanta. ⁸Mulong’anyi mwamonang’a kukala kukuhwelela chasang’ulang’ayi Nzambi afu?⁹Chalala ami aweni natong’ozhokelang’a nami chachiwahi kwila yuma yayivulu nakujikang’a nezhina jaYesu wakuNazaleta. ¹⁰Eng’ang’i, nelilang’a muYelusalema mwenimu nawa. Chinatambwili wanta kuji akulumpi zhawatuplistu, hinukukasakasa akwakuzhila amavulu, hinukuyisha mutuleya. Chajing’i nakuyizhahawu, ami najing’i nakwitezhamu. ¹¹Nayibabeshelang’a kakavulu mwahita mashikola ezhima; nesekelang’a kuyikanzhikizha kulonja atuki Nzambi. Chinaswezhelang’a kuzuwa nankashi, hinukuyikabishang’a hela kunyikala yakumatung’a acheng’i.¹²Eyi mwanta, chinajing’i munzhila yami yakuya kuJamakasa namukanja wawanta wakunyinka kuji akulumpi zhawatuplistu, ¹³iku niji munzhila, itang’wa jinashiki jehi mukachi kewulu, hinukumona chezhezhi chiji nakufuma mwiwulu, chakubajika kutong’eka kwamwaana wetang’wa, hichikutong’ekela hinajing’i ami nawakwetu nenjelang’a nawu kwi-njo. ¹⁴Chitunajimbuki wezhima wetu hamaseki hinukutiya izu jakung’ila mwijimi jaHebelu nawu, Eyi Sawulu, Sawulu, wankabishilang’aji? Ochu chiwuji nakusobola kunyumba, yiji nakukulemeka.¹⁵Nami, Yeyinyi Mwanta? Mwanta ninji, Yami Yesu wakabishang’a. ¹⁶Nyamukaku jinu wimani; chinamwekani kujeyi nalonji nikukunzhiki kumujimu wakwikala mukwakukalakala nichinsahu, nanochu chiwunanmonami, nichiwamba kanmona. ¹⁷Nakakupulwisha kuji aYujeya nikuji aZHentili kunukukutemesha, ¹⁸kulonja wutoneshi mesu awu, abalumuki afumi kumwijima eng’ili muchezhezhi; afumi kuwanta waSatana ayi kuji Nzambi; kulonja amoni kuyanakena nshiji, atambuli wuswana hamu nanawa aneli azhila nakunkuhwelelami.¹⁹Eyi mwanta Aglipa, chimwenu chamwiwulu chinamweni hinachijiwiluku. ²⁰Hinukutachika kushimuna kuJamakasa, nimuYelusalema, nimwahita itung’a jaYujeya jezhima, nikuji aZHentili nawa, nami abalumuki munyichima atali kuji Nzambi, akong’i nyijimu yatelela kubalumuka mumuchima. ²¹Jiyi nsang’u yankwatililuwu aYujeya muTembeli, hiyakweseka nikunzhaha.²²Chanankwashuwu kuji Nzambi, jichi chinamoni kukakela kushika nikwifuku jalelu, nakushimwina nianyanya niamaneni. Hinashimunang’a yacheng’uku, ching’a yoyashimwinuwu jehi atuplofwetu naMosi nawu yakenza; ²³yoyu nsang’u yakwila nawu Klistu ching’a akakabi, akekali wakusambila kusang’uka muji afu, kulonja kumwekesha nachu chezhezhi kuji aYujeya nikuji aZHentili.²⁴Chajing’i nakujihakwilayi Pawulu mwenomu, Festusi hakuhosha nezu jang’ovu ninji, Eyi Pawulu, waanjala! Maaneyi aswezha jiwu anakukozhezhi kwanjala. ²⁵Kuchinka Pawulu ninji, Eyi Festusi waswezha kulema, hinaanjaluku; ilang’a hinukuhosha mazu alala, amumesu mwawunja. ²⁶Mulong’a mwanta wambala niji nakuhosha ninji chakaji chibeng’u, yena nayiluki yumiyi, ninami nawa neluki chikupu nami yumiyi hiyakuyamba yenaku, mulong’a yumiyi hiyayilili kumbajuku.²⁷Eyi mwanta Aglipa, atuplofwetu wayikuhwelelang’a? Neluki nami wayikuhwelelang’a. ²⁸Aglipa hakumwila Pawulu ninji, Nakunshinzhila chenochu chantesha hohu, keng’a wumbalumuni niikali mukwaKlistu! ²⁹Pawulu ninji, Hela chantesha hohu, hela chaswezha kuvula, nalombi kuji Nzambi nami, akubalumuni nineyi, niantu ezhima aji nakuntiya lelu, mwikali neyi chinekalami; ilang’a chakubula kwanawa maleng’i hohu.³⁰Mwanta hakunyamuka, ninyuuli, niBelenisi, niakwawu ajing’i nakushakama nawu. ³¹Chanayuwu kumbaji, hiyakuhanzhika nsang’u oyu mukachi kawu. Hiyakutiyang’ana nawu, Iwu muntu haneli yuma yakutela kufwa hela yakumukasa munyonzhuku. ³²Aglipa hakumwila Festusi ninji, Iwu muntu, neyi wabula kwila ninji niyi kuji Kesali, mutenowu aji kumuumbaku tuhu kwinji.

27¹Chaneluwu nawu twakayi kuItaliya muwatu, hiyakuyinka Pawulu nawakwakaleya amakwawu kuji mukulumpi wumu wamashijika, izhina jinji Yuliyusi, wamuchenju chaAgusitusi. ²Hitukwing’ila muwatu wakufuma kuAjamitumi, wukukeng’a kunyamuka henohu nakuya munzhila yakukulisha Asiya, nakukunkakunka kunyikala yakwenoku. Hitukuya hakalung’alwizhi muwatu owu tuji naAlisitaka, kaMasijoniya wakuTesalonika.³Chikunachi tujata nikuSijoni. Yuliyusi wamwilili Pawulu chachiwahi, hakumwitezha kuya nakujya nawamabwambu zhinji. ⁴Hitukufuma kwenoku muwatu nakukulisha Kipilosi, mulong’a mpepela zhajing’i nakukeng’a kutufuntisha munyima ho-o. ⁵Hitukuketula muhong’i wamukalung’alwizhi, wela Silisiya iku, Pamfwiliya iku; tushika nikuMila wamuLisiya. ⁶Kwenoku mukulumpi wamashijika hakumona watu wakuAlesanjeliya wuji nakuya kuItaliya; hakutwing’izhamu.⁷Watu wetu hiwukwenja chovu chakukabakana hohu mafuku amavulu, tushika nikwatalang’ana naKinijusi. Chiyineli mpepela yichiji kukeng’a kutufuntisha munyima, hitukuya nakukulisha Keleta kwatalang’ana naSalimoni. ⁸Kwenoku twakulishili chakukabakana hohu, tushika nikwatenang’awu nawu kuMenzhi Awunja, kwakwihi namukala waLaseya.⁹Chimunahiti mafuku amavulu, nikwenja kwela jehi kwafwana, mulong’a mafuku akuleka kujya achijika Chakubuta Nshiji anahiti jehi, ¹⁰Pawulu hakuyikonkomwena ninji, Enu akwetu, natong’ozhoki nami lwenju lwetu lwakekala lwakala, lwakukisang’ana yuma nankashi, hiyikumba yiji muwatu hohuku, hela ninetu aweni kwizhi twakafwa tuhu. ¹¹Mukulumpi wamashijika wabang’ili chalala mukwakwenjesha watu nimwiniwatu, hakwila chahosheliyi Pawulu yena kubang’amu nehi.¹²Mulong’a mwenomu mwawong’akana mwabulili kuwaha kuchelukilamu tukwezhi twamashika, jichi amavulu hiyakwila nawu tufumi kwenakunu muwatu, tuyi tukabili kushika kuFwenisi, tuchelukili kwenoku. Fwenisi himukala wakuchikumu chakuKeleta, kwatala iku kukabeta, iku kumusela, iku nawa kukabeta kakwawu kwekala kwawong’akana. ¹³Chitunamoni mpepela yakukabeta kakuchijiilu hiyikukunka chovu chovu, atong’ozhoka nawu anamoni mwakeng’awu; hiyakufumisha mumenzhi chikung’u chakwimikisha nachu watu, hiyakukulisha Keleta kwakwihi nachikumu.¹⁴Ilang’a chakaji nikuleha, hikukwinza haji watu mpepela yaswezha ng’ovu yakufuma kumusela. ¹⁵Chiyinakwati hawatu wetu, hiwukukang’anya kutala kukwinza mpepela, hitukukumina jakuyovwahila, tuhung’umuka nikuhung’umuka tuhu. ¹⁶Chitunahiti mumukulishu wakachitutu kanyanya izhina jaku Kawuja, hitukukasa kawatu ketu kakwawu chakukabakana hohu;¹⁷chanakikokuwu kwiwulu hiyakuzhing’azhing’a watu weneni nanyonzhi yamaneni nankashi nawu awukoleshi. Chanatiyuwu woma nawu keng’a atunatili hawusekulula namalola kuSilitisi. Hiyakulemuna mahina akwenjesha nachu watu, hitukukumina jakuhung’umuka. ¹⁸Chikunachi, tuchiji kukabakana nankashi nanoyu mpepela yaswezha, hiyakutachika kunata yuma yamuwatu mumenzhi.¹⁹Hefuku jamuchisatu hiyakunata yuma yakwenjesha nachu watu namakasawu aweni. ²⁰Chineli nimutena nitutumbwa kututong’ekela mafuku amavulu nehi, oyu mpepela yeneni yichiji kukunka, kukuhwelela kwezhima kwakwila netu tukuhanja hikukutufuma.²¹Chanashakamuwu nanzala mafuku amavulu, Pawulu hakwimana mukachi kawu ninji, Enu akwetu, neyi mwantiyilili, mutenowu mwabulili kufuma kuKeleta, mubuli kumona kukabakana kwezhimiku, nikuzhimbesha yuma. ²²Ichi jinu nukuyikunjezha nami tiyenu kuwaha, hikukufwa mwinenu hela wumuku, ching’a yowu watu hohu.²³Mulong’a wufuku wowenawunu kang’elu kaNzambi yami, wánheta inakalakelang’a nawa, wemana kunijami. ²⁴Hakung’ila ninji, Eyi Pawulu, bayi wutiya womaku; ching’a wakemani kumesu aKesali hohu. Tiya, Nzambi nakwinki jehi akwenu ezhima wuji nakwenja nawu muwatu. ²⁵Jichi jinu enu akwetu, tiyenu kuwaha mulong’a namukuhweleli Nzambi, neluki chikupu nami mwanahoshiyi mwakamwekana mwezhima. ²⁶Hela chochu, akatunatila hachitutu chimu.²⁷Chiwunashiki wufuku wekumi nachiwana (14), hitukuhung’umuka niniku niniku mukalung’alwizhi kaAjiliya. Kwizhi kwela jehi mukachi kawufuku, akwakwenjesha watu hiyakutong’ozhoka nawu hiyakuya nakuswila kwakwihi nampata yimu. ²⁸Hiyakweseka namwonzhi mwakunamina menzhi, hiyakuwana kuji zhimita 37. Chihanahiti mpinzhi yanti hiyakweseka cheng’i, hiyakuwana kuji zhimita 27. ²⁹Hiyakutiya woma, nawu keng’a atunati hamalola akuchikumu; hiyakuzelumuna yikung’u yiwana yakwimikisha nachu watu kuntong’i yakunyima; hiyakulombela nawu kuchi.³⁰Akwakwenjesha watu hiyakukeng’a kutemuka, anazelumuni jehi kawatu kanyanya mumenzhi, kulonja ajimbani nawu tukukeng’a kuzelumwina yikung’u yakwimikisha nachu kuntong’i yakumbiji. ³¹Jichi Pawulu hakumwila mukulumpi wamashijika nimashijika ninji, Neyi wenawa akubula kushala muwatu himukutwesha kuhanjaku. ³²Mashijika aketula ninyonzhi yakawatu oku, hikakuholoka mumenzhi.³³Chikwakeng’eli kucha, Pawulu hakuyilembelela wezhima wawu, ninji jyenu. Ninji, Lelu ifuku jekumi nakawana (14) jimunashakami nanzala, kujyahu chuma nehi. ³⁴Jichi nalembi mwani, jyenu muhanji; hikwakazhimbala hela lusuki lwamuntu nilumuku. ³⁵Chanahoshiyi ochu, hakutambula jinkenji, hakumusakilila Nzambi, iku wezhima wawu amutiyang’a; hakujihumuna nakutachika kujya.³⁶Wezhima wawu hiyakutiya kuwaha, hiyakujya niwena nawa. ³⁷Kubomba etu antu ezhima twajing’i muwatu owu, twashika munkulakazhi zhiyeji namakumi atanu nayeji nawantu atanu nawumu (276). ³⁸Chanekutuwu, hiyakunata tijiku mumenzhi kulonja kupepelesha watu.³⁹Chikunachi, hiyelukili mpatoyuku. Nawu atali, hiyakushinshika kumu kwawong’akana, kuji wusekulula kuchikumu; hiyakutiyang’ana nawu tukung’ikiluku watu, neyi tunatweshi. ⁴⁰Chanaketuluwu nyonzhi yayikung’u yakwimikisha nachu watu, hiyakuyilekela mumenzhi; hiyakukasununa yilapu yajing’i yakwolola nachu watu, hiyakulema ihina jakumbiji kulonja jikwati mpepela, hiyakweseka kuya kuchikumu. ⁴¹Ilang’a chanashikuwu halunjuka wusekulula,watu hiwukukakela hawusekulula; ntong’i yakumbiji hiyikukakela mbe, ilang’a ntong’i yakunyima hiyikutachika kubaluka nang’ovu zhamankanja.⁴²Mashijika atiyang’ana jehi nawu akazhahi akwakaleya, nawu akenja kela amakwawu akasala, hiyakapuluka. ⁴³Ilang’a mukulumpi wamashijika wakeng’eli kumuhanjisha Pawulu, jichi hakuyilekesha kwila mwenomu. Hakuyilezha ninji, antu ezhima anatweshi kusala ajumbi mumenzhi akashikang’ahu jehi kumpata. ⁴⁴Anabuli kutwesha kusala akwati kumapulang’a, hela kuyuma yakuwatu, chaneluwu mwenomu hiyakupuluka chachiwahi, ashika nikuchikumu.

28¹Chituneli tunapuluki jehi, hitukwiluka izhina jachitutu ochu netu Melita. ²Enimbu hiyakututambula wezhima wetu naluwi nankashi, hiyakubutula kesi mulong’a kwajing’i nakunoka nvula, nichishika hamu.³Pawulu chanakung’uliyi chita chansonsu, nachishi jehi hakesi, kabanjayula chanatiyiyi iyena, hikakufuma hakesi hikakulamata kuchikasa chinji. ⁴Enimbu chanamonuwu kapela nalamati jehi kuchikasa chinji, hiyakujilezha muntu namukwawu, nawu, Chalala iyaliwu himbanzhi, hela wapuluka jehi mukalung’alwizhi, Mukwakulong’a hanamwitezhi kuhanjaku.⁵Ilang’a yena hakumujikumwina kapela mukesi, kutiya kukata nehi. ⁶Wena enimbu atong’ozhokeli nawu keng’a hanani, inji kwizhi tukukasumuka najimbuki nafwi jehi. Chaneluwu talile-e, kumumona yena hanatiyi chuma chatamaku, hiyakubalumuka munyichima yawu, nawu komana himukishi.⁷Kwenoku kwajing’i mpata yamwanta wachitutu ochu izhina jinji Pubilusi. Yena hakututambula hakutujiisha chachiwahi mafuku asatu. ⁸Chelili tata yaPubilusi nakami jehi nayikatu yamusong’u wamashika nikapokota, Pawulu hakwing’ila mwajing’iyi, hakulombela, chanamunang’ikiyi makasa, hakumukolesha. ⁹Chaneliyi mwenimu, antu amakwawu ahachitutu ochu ajing’i nanyisong’u, hiyakwinza, hiyakuyikolesha nawa. ¹⁰Hiyakutulemeshang’a nakutwinka yuma yayivulu; chitwakeng’eli kuya muwatu hiyakushamu yuma yayivulu yakujiila munzhila.¹¹Chimunahiti tukwezhi tusatu, hitukuya muwatu wakufuma kuAlesanjeliya, wukweti chinzhikizhilu chawakishi ampamba, Kasto niPoluki, wachelukilaku jehi nvula kuchitutu ochu; ¹²tujata nikuSilakusa, hitukuzhing’ilaku mafuku asatu.¹³Kufuma kwenoku hitukuya niniku niniku, tunyeng’umuka nakushika nikuLegumi. Chikunahiti ifuku jimu, mpepela yakukabeta kakuchijiilu hiyikutachika kukunka, tushika nikuPuteyoli mumafuku ayeji hohu. ¹⁴Kwenoku hitukuwana anakwetu, hiyakutulembelela tushakami nawu mulungu wumu. Nkumininaku tushika nikuLoma. ¹⁵Chanatutiyuwu kuLoma, anakwetu hiyakwinza nakutukinkilila kuwulanjilwilu waApiyusi, nikuYisolu Yisatu. Pawulu chanayimoniyi, hakusakilila Nzambi, akwata ning’ovu.¹⁶Chituneng’ili muLoma, hiyakumwitezha Pawulu kushakama kankawinji neshijika wamuhembelang’a. ¹⁷Chimunahiti mafuku asatu, Pawulu hakutambika akulumpi zhawaYujeya. Chanapompuwu hamu, hakuyilezha ninji, Enu akwetu amayala, ami hinakong’i chuma chakutamisha akwetu aYujeya, hela yaaku yawankakulula zhetuku. Hela chochu, ankwatili kuYelusalema nakunlubula kuji aLoma; wena hiyakung’usha mukaleya. ¹⁸Wena chanang’ihuzholuwu, hiyakukeng’a nawu ang’umbuku, mulong’a hiyanmweni nachitela chakufwaku.¹⁹Chanatiyuwu aYujeya kutama mwenomu, ami hinukumona nami kunashali zhakulomba kuya kuji Kesali hohu; ilang’a hinikweti mulong’a wakuholokela akwamunza wetuku. ²⁰Jihu hanafumi kuyitambika, nami niyimoni nihoshi nenu. Anankasili ileng’i iji nsang’u yakuching’ezha kwaching’ezhang’awu aIsalela.²¹Wena hiyakumwila nawu, Hitunatambuli nyikanja yakufuma kuYujeya yakukuteneyuku. Hela anakwetu enzhili kunu, kukushimuna hela kukutena chatama nehi. ²²Ilang’a tunakeng’i tukutiyi muwatong’ozhokang’a eyi aweni; hakwila chaaku ichi tweluka jehi netu achitenang’a chatama kwezhima kwezhima.²³Chiyanatiyang’anuwu ifuku, aYujeya amavulu nankashi hiyakwinza kwitala kwashakaminiyi. Yena hakuhita munsang’u oyu, hakushimuna wanta waNzambi, hakuyilumbulwila nsang’u yaYesu, chakufumisha munyikanja yanshimbi yaMosi, niyawatuplofwetu, kufumisha kubujiji njo-o nikumelela. ²⁴Amakwawu hiyakwitezha mwahosheliyi, amakwawu hiyakuleka.²⁵Chanabuluwu kutiyang’ana mulwawu, hiyakujifuminamu. Henohu Pawulu nahoshi jehi izu jimu ninji, Mwalala mwahosheli Spilitu Wazhila nawankakulula zhenu muji kaplofwetu Isaya, ²⁶cheliliyi ninji, Yaku wakalezhi antu awa neyi, Kutiya mukutiya, himwakashinshika nihantuku; Kumona mukumona, himwakeluka nihantuku.²⁷Mulong’a nyichima yawantu awa yinasupi jehi, matu awu anazhiki, Nimesu awu anazhimi; akenja kamona namesu awu, Akenja katiya namatu awu, akenja kashinshika munyichima yawu, Akenja kabalumuka hinukuyuuka.²⁸Jichi ilukenu nenu iwu wamwinu waNzambi anawutemeshi kuji aZHentili; komana wena akatiya. ²⁹Chanahoshiyi mazu awa, aYujeya hiyakufumaku hiyakutajika nankashi mukachi kawu.³⁰Pawulu washakamini nyaka yiyeji yamana chikupu mwitala jinji jakujifwetela, hakutambula antu ezhima ayilang’a mwajing’iyi. ³¹Hakushimunang’a wanta waNzambi, nakutena nsang’u yaMwanta Yesu Klistu chakaji woma; kwosi nawa wamulekesheluku.

Lunda Koosa: Bible for Yilwilu

Formatted for Translators

Yilwilu