¹Esitavu sio olwivulo lwa Yeso Kristo, omwana wa Daudi, omwana wa Ibrahimu. ²Ibrahimu yevula Isaka; naye Isaka wevula Yakobo; naye Yakobo wevulaYuda nende avawandaye vave; ³Yuda naye wevula Pelesi nende Zera mu Tamara ; naye Pelesi wevula Esiromu; naye Esiromu wevula Aramu;⁴Naye Aramu wevula Aminadabu; Aminadabu naye wevula Nashoni; naye Nashoni wevula Salimoni ; ⁵Naye Salimoni wevula Boazi mu Rahabu; Boazi naye wevula Obedi mu Ruthi; naye Obedi wevula Yese; ⁶Naye Yese wevula omuruki Daudi ; naye omuruki Daudi wevula Solomoni mu ulia wali omukhasi wa Uria ;⁷Naye Solomoni wevula Rehoboamu ; naye Rehoboamu wevula Abiya ; naye Abiya wevula Asa ; ⁸Naye Asa wevula Yehoshafati ; naye Yehoshafati wevula Joramu ; naye Joramu wevula Uzia ;⁹Naye Uzia wevula Jothamu ; naye Jothamu wevula Ahazi; naye Ahazi wevula Hezekia. ¹⁰Naye Hezekia wevula Manase; naye Manase wevula Amoni; naye Amoni wevula Yosia; ¹¹Naye Yosia wevula Yekonia nende avawandaye vave, esikha sititi kho vayilwe muvuhambe Babuloni¹²Ne wavali nivakharerwa muvuhambwe Babuloni, Yekonia yevula Shealitieli; naye Shealitieli wevula Zerubabeli; ¹³Naye Zerubabeli wevula Abiuudi; naye Abiuudi wevula Eliakimu; naye Eliakimu wevula Azori; ¹⁴Naye Azori wevula Sadoko; naye Sadoko wevula Akimu; naye Akimu wevula Eliudi; ;¹⁵Naye Eliudi wevula Eleazi; naye Eleazi wevulaMatani; naye Matani wevula Yakobo ; ¹⁶Naye Yakobo wevula Yosefu omusacha wa Maria, wevula Yeso ulangwa Kristo. ¹⁷Kho chinjivulo okhurula khu Ibrahimu okhwola khu Daudi chivele chinjivulo elikhumi na chinne; ne okhurula khu Daudi okhwola anga vatilwa nivayilwa muvuhambe Babuloni ne chinjivulo elikhumi na chinne; okhurula anga vatilwa nivayilwa muvuhambe Babuloni okhutukha khu Kristo ne chinjivulo elikhumi na chinne.¹⁸Nono elivulwa lia Yeso Kristo liali lirinana: lwa mayi wuwe Maria yali naselelwe nende Yosefu, nivasili okhuvakho alala tawe, yanyolekha okhuva nende eyinda ya Roo Omuchenukhu. ¹⁹Ne Yosefu omusacha wuwe, sikila yali omulunji, siyenya okhumuchangalasia tawe, yakanakana okhumulekha muvwikisi .²⁰Ne anga yava nasiyililisia ario, lola, ingelosi yamulolekhanila mumarolo, niyisunga yiri, Yosefu, omwana wa Daudi okharia okhuvukula Maria okhuva omukhasi wuwo tawe: sikila silia siachekile nisia Roo Omuchenukhu. ²¹Alevula omwana omusolili, nawe olamukulikha elilra ori YESO: Sikila alawonia avandu vave okhurula muvwoni vwavo.²²Kano kosi kekholekha, khulwokhutusia kalia kasungwa nende Omwami okhuvirira omung'osi, nasunga ari, ²³Lola, Omuchima alanyola eyinda ne alevula omwana omusolili, naye kene mumukulikhe elira vari Immanueli, esifunane mukhukalukhasia sivele vari, Nyasaye alala ninafwe.²⁴Anga Yosefu yavukha okhurula mundolo yokhola anga eyingelosi yo Omwami yali niyimulakilisie, ne wavukula omukhasi wuwe: ²⁵Ne sivavakho alala tawe okhutukha anga yevula omwana wuwe omuvelee omusolili: naye wamukulikha elira ari YESO.

¹Ne olwa Yeso yevulwa Betselehemu ye Evuyuda muchindalo cho omuruki Herode, lola , avachesi okhurula evukwe vecha Yerusalemi, ²Nivasunga vari, wuveleena Omuruki wa Avayaudi wivulwe? sikila khulolile eying'iniesi yiye evukwe, neefwe khwichile okhumwinamila. ³Khulinga omuruki Herode yawulila amakhuwa kano, yanyakhana munganakani, nende Yerusalemi yosi.⁴Ne wayali niyakhavungelesia alala avasalisi avakhongo nende avaandiki va avandu vosi , yavanikilisia niyenya okhumanya okhurula khu nivo ni heena wa Kristo akhoyele okhwivulwa. ⁵Navo vamusungila vari , mu Betselehemu ye Evuyuda: sikila niko anga kaandikwa nende omung'osi vari, ⁶Ne ewe Betselehemu, musivala sie Evuyuda, ewe soli omutiti mu varuki Vevuyuda tawe: sikila okhurula mwiwe alarulamo Omuruki , walaruka avandu vanje Isiraeli.⁷Ne Herode niyakhalanga avachesi avo muvwikisi , yavarevelesia ne esinani eyisa ye eying'iniesi yalolekhela. ⁸Naye wavaruma vache Betselehemu, ne wavalakilisia ari , Chee ne khandi mukhavilisie nesinani omwana wivulwe; ne nimwakhamunyola , khandi munderire elikhuwa , kho siesi niiche emwinamile.⁹Anga vamala okhuulilisia ko omuruki, varekukha vacha; ne, kokhuuka, eying'iniesi, yavalola evukwe, yavemilila evweni wavo, okhutukha anga yecha ne yasinjila ikulu avundu wo omwana yali. ¹⁰Navo anga valola ing'iniesi, vasangala ne nivekhoyela okhuvira esikelo.¹¹Ne anga venjila munju, valola omwana omutoro nende mayi wuwe Maria, vasikama hasi ne vamwinamila: vakangulula amavikhilo kavo, varusia ofuaanwa fwavo khu omwana ; edhahabu, nende ovubani nende manemane. ¹²Ne okhuva Nyasaye yali wuvakanisie mumarolo ari vakhakalukha wa Herode tawe, varekukha vakalukha musivala siavo okhuvurira eyinjila yindi.¹³Ne anga vava nivachile, lola, eyingelosi yo Omwami yamulolekhanila Yosefu mumarolo, yamusungila yiri, Vukha, no ovukule omwana omutoro nende mayi wuwe,ne wilukhile Misiri, wikhale eweneyo okhutukha lwekhurerira elikhuwa: sikila Herode alakhava okhuvunia omwana omutoro. ¹⁴Anga yavukha , yavukula omwana omutoro nende mayi wuwe musilo,warekukha wacha Misiri. ¹⁵Ne yali eweneyo okhwola esikha sia Herode yafwa: kho katukhe okhwikholekhana kalia kalakaywa no Omwami okhuvirila omung'osi wuwe, nasunga ari , Nalanga omwana wanje okhurula misiri.¹⁶Naye Herode, anga yalola ari avachesi vamuveyile, yali neliruma likali, ne warumasia ari vachee ne vere avana vosi vali mu Betselehemu, nende ofurekelo fwosi fwali khuluchinga, khuchakila emiyika kivili okhukalukha hasi, okhulondana nende evise vya yali narevelesie avachesi nesinani.¹⁷Mani keecha kaava khulinga omung'osi Yeremia, yasunga ari, ¹⁸Mu Rama oluwungu luwulilikhane, okhukukula, nende okhulila, nendeokhwikhula ovululu, Recho alekhulanga avana vave, ne ulovile okhuwolelesivwa, sikila voosi sivaliwo tawe.¹⁹Lwa Herodi yafwa, lola, ingelosi yo Omwami yamulolekhanila Yosefu mumarolo nali Misiri, ²⁰Yamusungila yiri, Vukha, vukula omwana omutoro nende mayi wuwe , ne okalukhe mu sivala sia Isiraeli: sikila valia vakhavaanga ovulamu vwo omwana omutoro vaafwa. ²¹Naye wavukha , wavukula omwana omutoro nende mayi wuwe , vakalukha mu sivala sia Isiraeli.²²Nikakhali anga Yosefu yawulila ari Akelasi niyewamiye mu vwiyangu vwa Papa wuwe Herodi, yaria okhucha eweneyo: kakhava kario, Nyasaye yali wumukanisie mumarolo , wakomikha wacha mufurekelo fwa Galilaya: ²³Ne wecha wamenya mwitokho lia valanganga vari Nazareti: khokatukhe okhwikholekha kalia kalakaywa nende avang'osi vari,Alicha okhulangwa ari Omunazareti.

¹Muchindalo echo yecha Yohana Omubatisi, niyelwachanga musiangalamwe sie Evuyuda, ²ne nasunga ari, Enywe yikanile: sikila ovwami vwo mwikulu vulele ahambi. ³Niye wuno wo omung'osi Isaya, yasunga ari, omwoyo kwo omundu kwalangilisianga musiangalamwe, Lomba injila yo omwami, kololosia amaviro kake.⁴Ne Yohana mulala mwenoyo yali ne inguvo yo vwoya vwe yingamia, nende omusipi kwo olukhova kwayevoyanga musikhuulu; ne esiakhulia sisie sialingi echisike nende ovukhi vwa mwisino. ⁵Avandu vacha khuniye okhurula Yerusalemi, nende Evuyuda yosi, nende mulukongo lwosi lwali ahambi lwavotokhana Yoridani. ⁶Naye navabatisa mumuchela kwa Yoridani, niveyama ovwoni vwavo.⁷Nikakhali anga yalola Avafarisayo nende Avasudakayo avanyingi nivecha musibatiso sisie, yavasungila ari, enywe eselukho yechinjukha niwina umuchesiyisie okhwilukha okhurula khuliruma lialechanga? ⁸Khu kario mwame amatunde katukhane nende elikanila. ⁹Ne mukhapara mwinywe mwavene nomusunga muri, Khuvele nende Ibrahimu papa wefu: sikila namusungilanga endi, Nyasaye uno ovunyali vwo okhukalukhasia amachina kano kave avana va Ibrahimu.¹⁰Ne vulano eyaywa irerwe khale khu musi kwe emisala: khu kario, vuli omusala kukhama amatunde amalayi tawe kwalaremwa kukwe hasi, ne kusukunwe mumulilo. ¹¹Muvung'ali esie namubatisianga mumachi khulwo okhwikanila. Nikakhali ulia walecha inyuma wanje ni wovunyali okhumbira esie, wesie ekhatukhane okhusita ofuralo fufwe tawe: kene amubatisie mu Roo Omuchenukhu, nende omulilo: ¹²Unende olutelu lwo okhuselechilakho mumikhono kikie, ne aleya ovwelu vulave chwee, nende okhuvungelesia eyingano yiye nara musiachi; nikakhali alasamba omukhuchi mumulilo kukhanyala okusima tawe.¹³Mani Yeso warula Galilaya wecha mu Yoridani khu Yohana, amubatisie. ¹⁴Nikakhali Yohana wamukaya, wamusungila ari, Nisie ukhoyele embatisiwe nende ewe, nawe walanjichilanga esie? ¹⁵Ne Yeso okhumuchiva wamusungila ari, Yiyama kave kario khu lwa vulano: nikhukhola khurio khwalava khwalatusianga ovulunji vwosi. Mani wamwiyamila.¹⁶Ne anga Yeso, yali niyakhabatisiwa, avwene na avwene okhurula mumachi: ne, lola, elikulu liamwikukhila, ne walola Roo wa Nyasaye alekhanga anga eliuusi, ne wamuyelakho: ¹⁷Ne lola omwoyo okhurula mwikulu, kwasunga kuri, Owuno niye Omwana wanje omuyanje, wa nikhoyelanga muniye.

¹Mani Yeso yemililwa nende Roo okhucha musiangalamwe akelichwe no omusuku. ²Ne olwa yava niyeyimane okhulia echisuku amakhumi kane esilo ne esitere, olunyima injala yamuluma. ³Ne lwa omukhaki yecha waali, wamusungila ari, kava vari ewe uvele Omwana wa Nyasaye, laka ori amakina kano kekhole okhuva omukati. ⁴Nikakhali wamukalusia wamusungila ari, Kayandikwa , omundu salamenya sikila omukati kwong'ene tawe, nikakhali vuli likhuwa lirula mumunwa kwa Nyasaye.⁵Mani omusuku namuvukula okhucha mwitokho lichenukhu, ne namura khu sisuli sie litembeli, ⁶Ne wamusungila ari , Kava vari ewe uvele omwana wa Nyasaye , ruka okwe hasi: sikila kayandikwa kari, Alalakilisia echingelosi chiche khwiwe: nacho chalakhuvukula mumikhono kiavo, kho vari khusikha siosi okhatuwa esilenge sisio khwikina tawe⁷Yeso wamusungila ari, Khandi kayandikwa , okhakelicha Omwami Nyasaye wuwo tawe. ⁸Khandi, omusuku wamuvukula wamuyila khulukuluolurambi lwene, ne wamwekesia ovuruki vwosi vwo musialo, nende eyifuma yavwo; ⁹Wamusungila ari,evindu vino vioosi nakhuwelesia, kava vusa vari walanjinamila ne usikamile.¹⁰Mani Yeso wamusungila ari, Sietani : rulano ochee,: sikila kayandikwa, oleenamila Omwami Nyasaye wuwo yeng'ene ne niye yeng'ene wola rumikhila. ¹¹Mani omusuku wamulekha , ne, lolakho, echingelosi checha nende okhumurumikhila.¹²Ne lwa Yeso yawulila ari Yohana vamurere musivoye, yarekukha wacha Galilaya; ¹³Ne anga yarula Nazareti, yecha ne wamenya Kaperinaumu, yili khuluchinga lwe eyinyanja, yili khuchinjakho cha Zebuloni nende Nafutali:¹⁴Kho keche okhutukha kalia kalakaywa nende omung'osi Isaya, nasunga ari, ¹⁵Esivala sia Zabuloni, nende esivala sia Nafutali, khunjila yokhucha munyanja, injelekha wa Yoridani, Galilaya ya Vesivala; ¹⁶Avandu vekhala musilima valolile ovulafu ovukali; nende khuvalia vekhala mulukongo nende musininikha sie lifwa ovulafu vuvakhile.¹⁷Okhurula olwene olwo Yeso yachaka okhwilwacha, ne nasunga ari, Yikanilee: sikila ovwami vwo mwikulu vuvele ahambi.¹⁸Ne lwa Yeso, yali nalachendanga khundulo khwe eyinyanja ya Galilaya, yalola avawandaye vavili, Simoni walangwa vari Petero, nende Andreya omusiani wavo, nivalarechanga olurimba munyanja: sikila vali avalovi. ¹⁹Naye wavasungila ari, Noonde esie, ne nasie namulomba muve avalovi va avandu. ²⁰Ne avwene na avwene nivalekha chindimba chavo , ne vamulondakho.²¹Ne khuli yarula awenawo nalachichanga yalola avawandaye vandi vavili, Yakobo omwana wa Zebedayo, nende Yohana wandaye wuwe, vali muliaro nende Zebedayo papa wavo, nivalang'onanga chindimba chavo; ne wavalanga. ²²Ne awene na awene valekha eliaro nende papa wavo, ne vamulondakho.²³Khandi Yeso wachenda mu Galilaya yosi, nasomia muchisinagogi chavo, khandi niyelwacha eyinjili yo ovwami, khandi nawonia ovulwale vwosi vwa lukano na lukano nende ovutietiekhele vwa lukano na lukano vwali muvandu. ²⁴Khandi eyifuma yiye yachenda musivala sia Siria yosi: ne vamurerela avandu vosi vali avalwale vali no vutietiekhele vwa lukano na lukano nende veminyakhano, nende valia vosi vali nofusieno, nende vali avalalu, nende vafwokoya; naye wavawonia. ²⁵Olukhumulo olukali lwa avandu vamulonda okhurula Galilaya, nende okhurula Dekapoli, nende okhurula Yerusalemi, nende okhurula Evuyuda, nende okhurula injelekha wa Yoridani.

¹Lwa yalola olukhumulo, yanina musikulu: ne waayava niyakherechekha, aveki vave vecha wayali. ²Yachaka okhuvasomia, nasunga ari, ³Vaneyikhavi vali avamanani mumioyo: okhuva ovwami vwo mwikulu novwavo. ⁴Vaneyikhavi valia valilanga: okhuva valawolelesivwa.⁵Vaneyikhavi valia vetutuyanga: okhuva valanyola emiandu kie sivala. ⁶Vaneyikhavi valia vali neyinjala nende ovulesio vwo okhwenya okhukhola ovulunji: okhuva valejusiwa. ⁷Vaneyikhavi vali nechimbavasi: okhuva valanyola echimbavasi. ⁸Vaneyikhavi vali ne emioyo emiseleche: sikila valalola Nyasaye.⁹Vaneyikhavi valia vareranga omulembe, okhuva valalangwa avana va Nyasaye. ¹⁰Vaneyikhavi valia vanyakhasivwangwa khu kovulunji: okhuva ovwami vwo mwikulu novwavo.¹¹Enywe muvele neyikhavi wa avandu vamunyekanga, nivamunyakhasia ne nivamuchikhila amakhuwa kosi amavi kovuveyi okhuva esie. ¹²Mwikoye nomusangala, okhuva esianwa sienyu ne sikali mwikulu: Sikila niko kakila avandu vanyakhasia avang'osi vali evweni wenyu.¹³Enywe muvele omunyu kwe esialo: nikakhali omunyu nikwakhachinjiva, kunyala kwava kuriena khandi kwesiuya? sikutukhane musindu siosi tawe, nikakhali kusukunwe elwanyi, ne avandu vakusenakile hasi mufulenge. ¹⁴Enywe muvele ovulafu vwe esialo. Elitokho lia vombakha khulukulu selinyala okhwikisa tawe¹⁵Namwe avandu sivafianga etaa, ne vakifunikhila musikono tawe, nikakhali vakirechanga khusitete; ne nayo yaakha ovulafu khu vosi vali munju. ¹⁶Lekha ovulafu vwenyu vwaakhe evweni wa avandu, kho vatukhe okhulola evikholwa vyenyu evilayi, ne vechomie Papa wenyu uli mwikulu.¹⁷Mukhapara muri nayecha okhwinonia elilako nohomba avang'osi tawe: sinayeecha okhwinonia tawe, ni kakhali okhukatusia. ¹⁸Mukang'ali namusungilanga enywe, Kakhava vari elikulu nende elilova vialawawo, yivulawo ata enukuta ndala nohomba akhatonye khatiti khalarula khulilaka tawe, okhwola kosi katusiwe.¹⁹Kho ulia yesi wulariola lilala khu amalako matiti kano, nende okhwekesia avandu akenako, alalangwa vari waasi muno mu vwami vwo mwikulu: Nikakhali ulia walakakhola nende okhukekesia khu vandu, mulala mwenoyu niye walava omukhongo mu vwami vwo mwikulu. ²⁰Khu kario namusungilanga endi, ovulunji vwenyu novukhavira ovulunji vwa avandiki va amalako nende Avafarisayo, yivulawo eyinjila yindi yeenywe mulenjililamo muvwami vwo mwikulu tawe.²¹Mwawulila anga avakhale vasungilwa vari, Okhera tawe; ne ulia yesi walera alava muvutinyu vwo okhukhalakilwa: ²²Nikakhali namusungilanga enywe, Endi ulia yesi wulaviyanila wandaye wuwe vulali esifunane tawe alava muvutinyu vwe elikhalakilwa: ne ulia yesi wulasungila wandaye wuwe ari, ewe watamana, alava muvutinyu vwe esiyalo: nikakhali ulia yesi wulasunga ari, Ewe wawuvala, alava muvutinyu vwo omulilo kwo musiatisi.²³Khukario kaava vari olarusianga esianwa sisio khu vwali, ne wichulile ori wandaye wuwo wuvele novuvi ninawe; ²⁴Lekha esianwa sisio evweni wo vwali, ne orekukhe ochee; muwulilisiane nende wandaye wuwo, kho wiche orusie esianwa sisio.²⁵Wulilisiane vwangu nende womusolane, nimusili khunjila ninaye; nasili okhukhuyila khumuyali, ne omuyali naye okhure mumikhono kio musikari, ne naye akhure musivoye. ²⁶Kang'ali nakhusungilanga ewe, Solarulakho mukari mulia tawe, okhwola ove nomalile okhurunga elimotole lio okhumalilikha.²⁷Mwaulila anga kalakayilwa avakhale vari, okhaheya tawe. ²⁸Nikakhali navasungilanga enywe endi, Wulia yesi walalengela omukhasi ne amwikombe ava khale ukholile ninaye ovuheyi mumwoyo kukwe.²⁹Ne kava vari eyimoni yoomukhono kukwo omusacha yalakila wonone, yitomole okirusie, ne okisukune alee ninawe: sikila novulayi okhutifia esinama silala khumuvili kukwo, okhuvira omuvili kukwo kwosi kusukunwe musiatisi. ³⁰Ne omukhono kukwo omusacha kwakila wonone, kureme okurusiekho, ne okusukune okhurula khwiwe: sikila no vulayi okhutifia esinama silala khurula khu omuvili kukwo, okhuvira omuvili kukwo kwosi kusukunwe musiatisi.³¹Kasungwa kari, Ulia yesi yesi wulakhuma omukhasi wuwe, lekha akare muvwaandiki vwo okhulekhana: ³²Nikakhali esie namusungilanga enywe, endi wulia yesi yesi wulakhuma omukhasi wuwe, okhurusiakho khu amakhuwa kovutamba, alava alamurechanga muvweeyi: ne ulia yesi yesi wulayila omukhasi wavakhumile mulukhasi alava wakhakhola ovuheeyi.³³Khandi, mwawulila nikasungilwa avandu vakhale vari, Okhechuvakho muvuveyi tawe, nikakhali okholele omwami kalia kowechuva okhukhola. ³⁴Nikakhali navasungilanga enywe, Novulayi mulekhe okhwichuva; nelikulu; sikila nilio esifumbi sio ovuruki vwa Nyasaye: ³⁵Nohomba khwilova; sikila niwo wayalambisia ofulenge: namwe khu Yerusalemi tawe; sikila nilio elitokho lio omuruki omukhongo.³⁶Nohomba okhechuva khu murwe kukwo tawe, sikila ewe sonyala okhukalukhasia khalala khwiswi lilio khave akhawanga nohomba khave akhamali tawe. ³⁷Nikakhali lekha okhwiyama khukhwo khuve niwiyamile, wiyamile; niwikanile, wikanile: sikila elindi liosi livira awenawo niliomusuku.³⁸Mwawulila kasungwa kari, Eyimoni khu yimoni, ne eliino khu liino: ³⁹Nikakhali namusungilanga endi, mukhakhingilila omundu wa amavi tawe: nikakhali yesi yesi wulakhupa khuluseya lwo omukhono omusacha, kalukhana khandi omwelesie oluseya lwo omukhono omukhasi.⁴⁰Ne kava omundu yesi alacha okhukhuyala, ne avukule elikoti lilio, lekha avukule ne kanjo yosi. ⁴¹Ne yesi yesi wulakhukhayilisia oluchendo emayili ndala, chaa ninaye echimayili chivili. ⁴²Muwelesie wukhusava, ne khu ulia wulenya okhwikopa okhamukhuma tawe.⁴³Mwaulila nikasungwa vari, Yaanja omuchesa wuwo, ne osile omusuku wuwo. ⁴⁴Nikakhali navasungilanga enywe endi, Yaanje avasuku venyu, ne khandi muvasalile echikhavi valia vamulamanga vakholele amalayi vamuviyila, ne muvasalile valia vamurumikhilanga ovuvi nende okhuvanyakhasia; ⁴⁵Kho mutukhe okhuva avana va Papa wenyu uli mwikulu: sikila niye ukholanga eliuva lilie liakha khu avavi nende khu avalayi, ne khandi areranga eyifula khuvalunji nende khuvasiamu.⁴⁶Kava vari mulayanja valia vong'ene vamuyanja enywe, ava muvele nende murungo sina? avesivala vosi sivakholanga vario? ⁴⁷Kava vari mulakhesiania mwavene khu mwavene, sina sia muva nimuvirilekho avandi? ve sivala vosi sivakholanga vario? ⁴⁸Nono khukario kenyekha muve avechufu, anga Papa uli mwikulu ali omwichufu.

¹Mulengele ovulayi vwene mukhakhola evikholwa vienyu vio ovulunji evweni wa avandu , khovari mulolekhane tawe: navusa mulatakha esiyanwa sia Papa uli mwikulu. ²Khukario norusia ovuyeti vuvwo, okhelangilisia singa walekhupilanga esichiliva anga avandu vokhwikatirisia muchi sinagogi nende mumasanganjila, vari kho avandu vavafumie. Kang'ali namusungilanga enywe, vanyola khale omurungo kwavo .³Nikakhali norusia ovuyeti , omukhono kukwo omukhasi kukhamanya sio omukhono omusacha kwalakholanga tawe: ⁴Kho ovuyeti vuvwo vuve muvwikisi: ne Papa wuwo ulolanga muvwikisi omwene alakhurunga avufu .⁵Nenywe nomusala, mukhava anga avokhwikatirisia vavechanga tawe: sikila vayanja okhwisinjisia muchi sinagogi nivasala nende mumasanga njila kho vari vatukhe okhulolekhana na vandu. Kang'ali namusungilanga, Vanyola omurungo. ⁶Nikakhali ewe, nosala, yinjila avwikisi wuwo, na niwakhekala omuliango, sala khu Papa wuwo uli muvwikisi, ne Papa wuwo ulolanga muvwikisi alakhuwelesia avulafu. ⁷Nikakhali nomusala, mukhakalukhila amakhuwa amakangala tawe, anga avesivala vakholanga nivapara vari valaulilikhana khukhulakaya amakhuwa amanyingi.⁸Mukhava anga nivo tawe: sikila Papa wenyu wumanyile kalia kamulenyanga, evweni womusili okhusava. ⁹Khukario nomusala musalenge muri: Papa wefu uli mwikulu, elira lilio lichominywe. ¹⁰Ovwami vuvwo vwiche, elienya lilio likholekhane musialo anga likholekhananga mwikulu.¹¹Okhuwelesie omukati kwefu kwa vuli nyanga. ¹²Okhuvele ovwononi vwefu , anga fwesi khuvelanga vakhwononilanga. ¹³Olakhuyila mumakelicho tawe, nikakhali okhunanule okhurula khu omumayanu: sikila ovwami novuvwo, na amani, no ovukhumi, na mindali. Amina.¹⁴Okhuva nomuvela avandu ovwononi vwavo, Papa wenyu uli mwikulu yesi alamuvela: ¹⁵Nikakhali mwalekha okhuvela avandu ovwononi vwavo, ata Papa wenyu salamuvela ovwoni vwenyu tawe.¹⁶Khandi nomwiyimana okhulia sikila okhusala, mukhava anga avokhwikatirisia tawe, vo ovukondo vwo okhutunya : vakhunia muvweni mwavo, khovalolekhane na avandu vari veyimane okhulia sikila okhusala. Kang'ali namusungilanga enywe, Vanyola omurungo kwavo. ¹⁷Nikakhali enywe, nomwiyimane okhulia sikila okhusala, yivakhe amafura khumurwe, ne khandi osaave mumoni; ¹⁸Kho okhalolekhana khu vandu vari wiyimane okhulia sikila okhusala tawe, nikakhali Papa wuwo uli muvwikisi: ne Papa wuwo ulolanga muvwifusi, alakhurunga ewe avulafu.¹⁹Mukhevunjikhila mwavene amavikhilo musialo muno tawe, wa amasilili nende chindevelende chinonianga, nende wa avanuli vafunaka venjila veeva: ²⁰Nikakhali mwivunjikhile mwavene amavikhilo kenyu mwikulu wa amasilili nende chindevelende chikhenonia tawe, khandi wavanuli vakhariola venjila veeva tawe: ²¹sikila welivikhilo lilio lili, niwo wo omwoyo kukwo kuli.²²Ovulafu vwo omuvili ne eyimoni: kava vari eyimoni yiyo ni yindala, omuvili kukwo kwosi kwalechula ovulafu. ²³Nikakhali eyimoni yiyo yava eyimbi, omuvili kukwo kwosi kwalechulamo esilima. Kava vari ovulafu vuli mwiwe nesilima, esilima sienesi siva esimali situkha sirie! ²⁴Avulawo omundu unyala okhurumikhila avami vavili tawe: alaleka mulala , ne ayanje owundi; ne nikakhali kario tawe alatinya khu mulala, ne aleke owundi. Sonyala warumikhila Nyasaye ne echirubia tawe.²⁵Khu kario namusungilanga enywe, mukhanyakhana mu chinganakani chenyu sikila ovulamu vwenyu tawe, muri khwalalia sina, noomba khwalanywa sina; ne khumuvili, khwalafwala sina. Ovulamu sivuvurire esiakhulia, ne omuvili sikuvurire okhufwala? ²⁶Lola amanoni komwikulu: sikarakanga tawe, khandi sikafunanga tawe, nekhandi sikarechanga mufwachi tawe; nilali Papa womwikulu akalisianga. Nenywe somuli veyinganga okhukavira?²⁷Niwiina khwinywe khulwo okhwiyendekhelela unyala okhutasa enukta ndala khu ovulamu vuvwe? ²⁸Kho sikila sina wiyendekhelele khu siola fwala? Lengela amaua mumukunda, anga katukhanga; sikanyakhananga tawe, sikasonanga tawe. ²⁹Nikakhali navasungilanga endi, ata Solomoni mukhwamiya khukhwe khwosi siyafwalakho anga lilala khuniko tawe.³⁰Khukario, kava Nyasaye anyala okhufwala ovunyasi vwo mwisino ario, vuliwo vulano, ne muchuli vusukunwa mumulilo, sanyala okhumufwalakho enywe okhuvirawo, Enywe velisuvila lititi? ³¹Kho mukheyendekhelela, nomusunga muri Khwalalia sina? nohomba khwalanywa sina? nohomba muri khwalefwala sina?³²( Sikila evindu vino viosi nivyo via Vesivala vakhavanga:) sikila Papa wenyu uli mwikulu umanyile ari munende elienya lie evindu vino vwosi. ³³Nikakhali enywe khava ovwami vwa Nyasaye mpele , halala nende ovulunji vuvwe; ne akandi kosi kalataswa khwinywe. ³⁴Kho mukheyendekhelela khu kamuchuli tawe: sikila muchuli yalekhalavanila amakhuwa kayo. Amatinyu akeyindalo ndala kanyalile eyindalo yeneyo.

¹Mukhakhalaka tawe, khombu mwesi mukhakhalakilwa tawe. ²Elikhalakila lio khalakilanga avandu, nilio liolakhalakilwa: nekhandi esipimilo sio pimilangamo, nisio siolapimilwamo wesi.³Sikila sina olole sili mumoni yo wasio nokhaywe okhulola eyimbale yili mumoni yiyo wamwene? ⁴Nohomba onyala wasungila oriena owasio ori, Lekha ekhurusie esili mumoni mumwo; ne lola, eyimbale yivele mumoni yiyo wamwene? ⁵Ewe omwikatilisi, chakila okhurusia eyimbale yili mummoni yiyo wamwene; kholole ovulayi sili mumoni yowasio.⁶Mukhaelesia echimbwa esindu sili esichenukhu tawe, khandi mukhara chisimbi chenyu evweni wee chimbichi tawe, chikhecha chasenakilakho ofulenge fwacho, mani khandi chakhukalukhanakho chakhurandula.⁷Sava nawe olaelesivwa; khava, nawe olanyola; khononda, nawe olekulilwa: ⁸Vuli sia mulala usavanga anyolanga; ne ulia ukhavanga anyolanga; ne ulia ukhonondanga yekulilwangwa. ⁹Nohomba niwiina khwinywe , wo mwana wuwe amusavanga omukati, naye amuwelesia elikina? ¹⁰Nohomba namusava eying'eni, amwelesie yinjukha?¹¹Nikava vari enywe, muli avamayanu, mwamanya okhuwelesia avana venyu ofuaanwa ofulayi, ne sinakali okhuvirakho Papa uli mwikulu okhumuwelesia ofundu ofulayi khu valia vamusavanga? ¹²Khukario khu makhuwa kosikosi kamwakhenyile vamukholile enywe, mwesi vakholele akenako: sikila lino nilio elilaka nende avang'osi.¹³Yinjilile musilivwa sio omuliango omunyelele: sikila esilivwa nesivalayi, khandi eyinjila neyimbalayi, yichichanga mukhuvuna, ne navanyingi vachilangakho: ¹⁴Sikila esilivwa nesinyelele, ne khandi eyinjila neyinyelele, yichichanga muvulamu, ne vawo vatiti vakimanya.¹⁵Mwilinde okhurulana nende avang'osi vovuveyi, veechanga muvukondo vwa amachese, nilali mukari nofuvulukhu ofululu. ¹⁶Mulavamanya okhurulana nende evikholwa viavo. Avandu vamodangakho echinduli okhurula khu mawa, nohomba okhurula khumulemba? ¹⁷Khulwako omusala omulayi kwamanga amatunde amalayi, nilali omusala omuvi kwamanga amatunde amavi.¹⁸Omusala omulayi sikunyala okhwama amatunde amavi tawe, nohomba omusala omuvi sikunyala kwama amatunde amalayi tawe. ¹⁹Vuli omusala kukhama amatunde amalayi tawe kwalaremwa kukwe, lunyima kusukunwe mumulilo. ²⁰Kho khukario mwalavamanya khuvikholwa viavo.²¹Sali vuli siamulala walananga ari, Omwami,Omwami wulenjila muvwami vwo mwikulu tawe; nilali ulia ukholanga elienya lia Papa wanje uli mwikulu. ²²Avanyingi valisungila eyindalo yilia vari, Omwami, Omwami, sikhwarusia ovung'osi mulira lilio, ne khandi sikhwakhumanga ofusieno mulira lilio, ne khandi okhuvirila mulira lilio sikhwakhola ekasi eyingali yokhuwukisia? ²³Ne endivavasungila endi, sembamanyile tawe: rula evweni wanje, enywe avakholi vechimbi.²⁴Khu kario yesiyesi walawulila amakhuwa kanje kano, ne akakhole, namufwananisia nende omumbakhi omuchesi, wombakha eyinju yiye khulwanda: ²⁵Ne eyifula yakwa, emikhura kiekha, ne eyimboo yoluwuchi yawucha, yopa eyinju eyoo; ne eyinju eyoo siyakwa tawe: sikila yali yayombakhwa khulwanda.²⁶Ne vuli siamulala wuwulila amakhuwa kanje kano, nalekhe okhukakhola, alafwananisivwa nende omumbakhi omuyingwa, wombakha eyinju yiye khumuyekhe: ²⁷Ne eyifula yachaka, ne emikhura kiekha, ne eyimboo yooluwuchi yawucha, ne yakhupa eyinju eyoo; ne eyinju eyoo yakwa: ne olutiri lwayo lwali olukali muno.²⁸Kecha kava ombu, anga Yeso yamala okhulakaya amakhuwa kano, avandu vawuuka khu amekesio kake kano: ²⁹Sikila yavasomia khulinga ulia uli novunyali, ne siyali anga avandiki va amalako tawe.

¹Olwa Yeso yali niyakhekha okhurula khusikulu, olukhumulo olunyingi lwamulondakho. ²Ne, lola, omundu mulala wa amachele yecha wamwinamila, nasunga ari , Omwami noyanja, wumbonie. ³Ne Yeso wanyila omukhono kukwe, ne wamutilakho, nasunga ari, niyame, wona. Ne esikha sienesio na wona amachele.⁴Ne Yeso wamusungila ari, lola, okhasungilakho omundu yesi tawe, nikakhali ewe chaa wocha, wiyekesie khu omusalisi, ne orusie esiyanwa sia Musa yamulakilisia, anga ovuloli khunivo.⁵Ne olwa Yeso yali niyakhenjila Kapernaumu, omukhongo wa avalwani mulala yeecha wayali, namusaaya , ⁶Ne nasunga ari, Omwami, omurumikhi wanje wuwulikhe yingo ufwokoye, alanyakhananga ovululu. ⁷Naye Yeso wamusungila ari, necha emuwonie.⁸Omukhongo wa avalwani namukalusia ne namusungila ari, Omwami, Esie sendukhane okhukhurera ewe munju mwanje tawe: nikakhali ewe lakaya elikhuwa liong'ene, ne omurumikhi wanje alawona. ⁹Sikila esie nivele omundu uli hasi wovunyali, ninende avalwani vali hasi wanje: ne khandi enyala nasungila mulala endi Chaa, naye achaa; nesungila owundi endi Yicha, naye yecha; ne khumurumikhi wanje endi, Khola lino, ne naye alikhola. ¹⁰Anga Yeso yawulila akenako, yauka, ne navasungila valia vali nivamulondile ari, Kang'ali namusungilanga enywe, ekhalolakho elisuvila elikali anga lino tawe, mu Isiraeli tawe.¹¹Ne navasungilanga enywe, Avanyingi valecha okhurula evukwe nende mumbo, ne valekhala hasi nende Ibrahimu, nende Isaka nende Yakobo, muvwami vwo mwikulu. ¹²Nikakhali avana vo ovwami valasukunwa elwanyi musilima: eweneyo khwalavayo okhulila nende okhuluma ameno. ¹³Ne Yeso wasungila omukhongo wa avalwani ari, ewe chaa wocha; ne anga ewe osuvile kakhwikholekhanile kario. Ne khuyisa yeneyo ne yene omurumikhi wuwe wawona.¹⁴Ne anga Yeso yenjila munju mwa Petero, yalola mayi wo omukhasi wa Petero nakonile na alalwalanga omurengo. ¹⁵Ne Yeso wamutila khu mukhono, ne omurengo kwamulekhula: naye wavukha wachaka okhuvakhalavanila.¹⁶Lwa angolove yola, vamurerera avandu avanyingi vali nofusieno, yakhuma ofusieno okhurumikhila elikhuwa lilie, khandi wavawonia valia vosi vali avalwale: ¹⁷Kho katukhe okhukholekha anga omung'osi Isaya yasunga ari, Omwene yavukula ovutekhele vwefu, ne wasita amalwale kefu.¹⁸Lwa Yeso yalola olukhumulo olukali nolumuvotokhane, yarusia elilaka ari, vambukhe injelekha. ¹⁹Ne omwandiki mulala wa amalako yecha ne wamusungila ari, Omwami, nakhulonda vuli wosi wolacha. ²⁰Ne Yeso wamusungila ari, Ofuvwe funende ovwina, ne amanoni komwikulu kanende ofuchwi; nikakhali omwana wo mundu sali nende wara omurwe kukwe tawe.²¹Ne mulala khu veki vave namusungila ari, Omwami, njifwilekho enje mbele enjavile Papa wanje. ²²Nikakhali Yeso wamusungila ari, Ewee nonde; lekha avafu vayavile avafu vavo.²³Ne wayava nikhenjila mu liaro, aveki vave vamulondakho. ²⁴Ne, lola, eyimboo eyingali yo luwuucho yachaka okhuwuucha munyanja ovululu, esikelo sie eliaro okhufunikhwa nende amarunda: nikakhali Yeso yali mundolo. ²⁵Aveki vave vamwichila, ne vamuvusia, vamusungila vari, Omwami, khuwonie: khwavuna.²⁶Naye Yeso wavasungila ari, Sikila sina mwichule neechindenga enywe velisuvila lititi? Lunyima wavukha, wakondokhela eyimboo yo oluwuucho nende eyinyanja; ne kosi kanyira chii. ²⁷Nikakhali avasacha avo vawuuka, vasunga vari, Omundu wuno niwalukano sina, weimboo yoluwucho nende eyinyanja vimurile!²⁸Ne olwa Yeso yambukha injelekha eluveka wundi musivala sia Avakeresi, yakanana nende avandu vavili vofusieno fwamenyamo, nivalarulanga mufulindwa, ne vali avalulu pee, avulawo omundu wavirilanga eyinjila yeneyo. ²⁹Ne, lola, vawochelela vululu, nivasunga vari, Yeso, Omwana wa Nyasaye khukhukholele sina? wakhecha okhukhuwelesia esinyasio eyindalo yefu yokhukhalakilwa ni yisili?³⁰Ne esinawo sititi okhurula wavali esituli sie chimbichi echinyingi chali ni chilayanga. ³¹Ofusieno fwamusaya furi, Kava vari olakhurusia, lekha khuche khwinjile mwituli lie chimbichi. ³²Naye wafusungila ari, Chee. Nafwo anga fwarula, fwachaa mulituli lie chimbichi: ne, lola, elituli liosi lie chimbichi lielukha chimbilo khusikhomolokho chakwa munyanja, chavunila mumachi.³³Ne valia vali avaayi velukha, okhuchila khu chinjila chavo okhwola mwitokho, vasunga vuli esindu, nende kalia kosi kali nikekholekhe khu vali nofusieno. ³⁴Ne, lola, avamwitokho vosi varula vecha okhwakanana nende Yeso: ne anga vamulola, vamusaya achee, arule muchingongo chavo.

¹Naye wenjila muliaro, wambukhha injelekha, wecha mwitokho lilie. ²Ne, lola, vamurerera omundu walwala ovulwale vwo okhufwokoya, nivamwalisie khu sitanda : anga Yeso yalola elisuvila liavo, wasungila omulwale wafwokoya ari; mwana wanje, yikhoya, uvelelwe echimbi chicho.³Ne, lola, esituma sia avandiki va amalako, vachaka okhwimonya vari, Omundu wuno wusiamile. ⁴Ne Yeso wamanya echinganakani chavo wavasungila ari, sikila sina mwalabaririsianga amavi mumioyo kienyu? ⁵lilena lili eliangu, okhusunga ori, uvelelwe ovwoni vuvwo; nohomba okhusunga ori, Sinjila, ne, okende? ⁶Nikakhali khomutukhe okhumanya muri Omwana womundu unoovunyali vwo okhuvela ovwoni mwilova ( wasungila omulwale wafwokoya ari,) Sinjila, vukula esitanda sisio, ochee munju mumwo.⁷Ne wasinjila, warekukha wacha munju mumwe . ⁸Nikakhali anga olukhumulo lwalola akenako, vaukaa, ne velesia Nyasaye ovukhumi, wawelesia avandu ovunyali vuri. ⁹Ne anga Yeso yavira awenawo nacha, yalola omundu, elira lilie vari Matayo, niyekhale munju yokhurosiamo ovusuru: ne wamusungila ari, Nonde. Naye wasinjila wamulonda.¹⁰Kecha kava ombu Yeso wayali munju nalalichanga, lola, avokhurosia ovushuru avanyingi nende avoni vecha vekhala hasi alala nende aveki vave. ¹¹Ne anga Avafarisayo vavalola, vasungila aveki vave vari, Sikila sina Omukhongo wenyu alalichanga nende avokhurosia ovushuru nende avoni?¹²Nikakhali anga Yeso yavawulila, yavasungila ari , avandu vali avalamu sivakhavanga omusilikhi tawe, nikakhali valia vali avalwale. ¹³Nikakhali enywe chee mweke esifunane sia amakhuwa kano, nenya echimbavasi ne sinenya omusango tawe: Esie sinayecha okhulanga avalunji tawe, nikakhali avoni vekanile.¹⁴Olunyima aveki va Yohana vecha, nivasunga vari, sikila sina efwe nende Avafarisayo khwiyimananga okhulia muvunyingi, ne aveki vavo seveyimananga okhulia tawe? ¹⁵Naye Yeso wavasungila ari, valangilwe musiselelo vanyala vavelela nivali nende omusolili owesiselelo mwene? Nikakhali echindalo chalechanga, omusolili owesiselelo kene avukulwe, ne navo kene veyimane okhulia.¹⁶Avulawo omundu wupanga esilaka esiya khu eyinguvo eyikhale tawe, sikila esilia sili esiya sikhwesanga eyinguvo ne yirandukha ovuvi okhuvirakho mukhuranga.¹⁷Navusa avandu sivarechanga edivai eyimbia mufumuka ofukhale tawe, nikakhali kario tawe ofumuka fwatikhanga, khandi edivai yiyimbokha, khandi ofumuka fwononokha, nikakhali varechanga edivai eyimbia mufumuka ofuya, ne fwosi fuva ovulayi.¹⁸Anga yava nalavasungilanga amakhuwa kano, lola yecha omuruki mulala, ne wamwinamila, wamusungila ari, Omwana wanje wesikhana wakhafwa eyisa yino; nikakhali ewe yicha omurekho omukhono kukwo, naye alalamukha. ¹⁹Yeso wasinjila ne wamulonda alala nende aveki vave.²⁰Ne lola omukhasi mulala wali narachanga amavanga khulwe emiaka ekhumi na kivili, yarulila inyuma wuwe, ne watila khulikemo lie inguvo yiye. ²¹Nasunga mumwoyo kukwe ari, nenyala natilakho vusa khu yinguvo yiye, nava niwonile. ²²Nikakhali Yeso yesevukha, lwa yamulola, yamusungila ari, Mukhana wanje, tinya omwoyo; elisunila lilio likhuwonilie. Ne omukhasi oyo wawona avwene navwene.²³Anga Yeso yenjila munju yo omuruki oyo, ne walola valobanga emilele nende vechingukulo, ²⁴Wavasungila ari, mbee ovwiyangu: sikila omwana omukhana wuno siwufwile tawe nikakhali alakonanga. Navo vachekha esichekho sie esienyenye.²⁵Nikakhali anga avandu varusivwa elwanyi, Yeso yenjilamo, wamutila omukhono kukwe, ne omwana omukhana oyo walamukha. ²⁶Ne okhurula avwenawo eyifuma yiye yacha vuli avundu mulukongo lwenolu.²⁷Ne anga yarula avwenawo, avandu avavofu vavili vamulonda, nivamulangilisia, nivasunga vari, ewe omwana wa Daudi, khuveele echimbavasi. ²⁸Naye anga yenjila munju, avandu avavofu valia vamwichila: ne Yeso wavasungila ari, Mwalasuvilanga muri esie enyala okhukhola kano? Vamusungila vari, eeh Omwami.²⁹Avwene navwene wavatila khu chimoni chavo, nasunga ari, okhulondokhana nende elisuvila lienyu kave kario khwinywe . ³⁰Ne echimoni chavo chekukha; ne Yeso wavalakilisia nasunga ari, omundu yesi yesi akhamanyakho tawe. ³¹Nikakhali navo, anga varekukha, valandia eyifuma yiye muvuvalayi musivala sienesio siosi.³²Anga vali nivalarulanga elwanyi, ne khalole, vamurerera omundu omusilu we esisieno siava nisiamenyamo. ³³Ne anga yakhuma esisieno sienesio omusilu oyo walakaya: ne olukhumulo lwauka, vasunga vari, Kano kasili okhulolekhanakho Isiraeli. ³⁴Ne Avafarisayo vasunga vari, Akhumanga ofusieno okhuvirira omuruki wofusieno.³⁵Naye Yeso wakenda mumatokho nende mufurekero fwosi, nasomia muchi sinakoki chavo, ne niyelwacha amakhuwa amalayi ko ovwami, ne khandi nawonia ovulwale vwosi nende ovutietiekhele vwosi vwali muvandu. ³⁶Nikakhali anga yalola olukhumulo, yavakholela esisa sikila vanyiranga, ne vali vasalanile, anga amachese kavula omwayi³⁷Wasungila aveki vave ari, Kang'ali elichesa nelinyingi, nikakhali avakhalavani nivo vatiti; ³⁸Khukario sava Omwami welichesa, atukhe okhuruma avakhalavani mwichesa lilie.

¹Ne wayali niyakhalanga aveki vave ekhumi na vavili, yavawa ovunyali vuli vwo okhukhuma echiroo echinjafu, nende okhurusia ofusieno, nende okhuwonia ovulwale vwa vuli lukano.²Amera ka avarumwa ekhumi na vavili niko kano; Wokhuranga, Simoni, wavalanganga vari Petero, nende Andreya wandaye wuwe; Yakobo omwana wa Zebedayo, nende Yohana wandaye wuwe; ³Filipo, nende Bartimayo; Tomasi, nende Matayo omusololi wovushuru; Yakobo omwana wa Alfayo, nende Leviasi, wavalanganga elira lia yingo vari Tadayo; ⁴Simoni omukanani, nende Yuda Isikarioti, khandi niye wachama Yeso.⁵Ekhumi na vavili vano nivo va Yeso yaruma, ne navawa elilaka, navasungila ari, Mukhacha khu avesivala tawe, ne mukhenjilakho mwitokho liosi lia Avasamaria tawe: ⁶Nikakhali chee khu amachese kativa ke yinju ya Isiraeli. ⁷Ne anga mwalava nomuchaa, mwilache, nomusunga muri, Ovwami vwo mwikulu vuvele ahembi.⁸Muwonie avalwale, mutakase avamachele, musisimusie vafwile, mukhume ofusieno: munyolile esikhaya, nanywe mwane esikhaya. ⁹Mukhasitakho edhahabu, nohomba efetsa, nohomba echirubia mufuveti fwenyu tawe, ¹⁰Nohomba omuyinda kwo okhusumilamo, namwe amakoti kavili, namwe ofuralo, nohomba eyindavusi tawe: sikila omukholi we emilimo wukhoyele anyole esiakhulia.¹¹Ne mwitokho liosi nohomba elitala liosil lia mwalenjilamo, runilisie niwina muwenomu utukhane okhumwinjisia; ne mwikhalemo okhutukha anga mwalarulamo nomuchaa. ¹²Ne anga mwinjila munju mwenomu, muwanemo omulembe. ¹³Ne nikava vari eyinju yeneyo yitukhane, lekha omulembe kwenyu kuve khunju yeneyo: nikakhali yalekha okhuva neitukhane, lekha omulembe kwenyu kuvakalukhile mwavene¹⁴Ne ulia yesi ukhalavenjisia tawe, nohomba alekhe okhurekelesia amakhuwa kenyu, anga mwalarula munju yeneyo nohomba mwitikho lieneli, sisimulilawo olufu luli khufulenge fwenyu. ¹⁵Kang'ali namusungilanga enywe, indalo yelikhalakilwa valifwilakho esivala sia Sodoma nende Gomorra okhuvira elitokho lieneli.¹⁶Lola, Namurumanga anga amachese akarikari wo ofuvulukhu: khukario muve avachesi anga echinjukha, ne muve avawolu anga amawusi. ¹⁷Nikakhali muve meso na avandu: sikila valamutila vamuyile mufuyalo, ne valamukhupila mu sinagogi chavo; ¹⁸Ne valamurela evweni wa avami nende avaruki sikila esie, khuvuloli esinyuma khunivo nende avesivala.¹⁹Nikakhali wavalamurera evweni, mukhaparirisia nohomba okhwiyendekhela khu kamwalalakaya tawe: sikila mulawelesivwa avwene navwene kalia kamwalalakaya. ²⁰Simwalava enywe mwalalakaya tawe, nikakhali Roo wa Papa wenyu niye walalakaya mwinywe.²¹Ne wandaye alachama wandaye wuwe okhwola vamwire, ne papa naye alakhola ario khu omwana wuwe: na avana navo valakalukhana avevusi vavo, ne valava esifunane sie elifwa liavo. ²²Na avandu vosi valamulova sikila elira lianje: nikakhali ulia walekhalilikha okhutukha okhumalilikha alawonisivwa. ²³Nikakhali nivamunyakhasia mwitokho lino, yilukhe muchee mwitokho lindi: sikila kang'ali navasungilanga enywe, Semwalava nimuchile mumatokho kosi ka Isiraeli, Omwana wo mundu nasili okhukalukha tawe.²⁴Omweki sali ikulu wo omwekesia wuwe tawe, nohomba omukhalavani sali ikulu wo omwami wuwe tawe. ²⁵Katukhane omweki ave anga omwekesia wuwe, ne omurumikhi anga omwami wuwe. Nikava valangile omwami mwene eyinju vari Belizebuli, valavalanga variena vali veyinju yenyu?²⁶Khu kario mukhavaria tawe: sikila sivulawo sifunikhilwe, sialalekha okhumanyikha tawe; ne sivulawo sikisile, sialalekha okhumanyikana. ²⁷Siemusungila musiilima, enywe musilakaye avulafu: ne siamwalaulila musirwi, esienesio silwache khusisuli sie eyinju.²⁸Ne mukharia valia vo okhwira omuvili tawe, nikakhali sevanyala okhwira omwoyo tawe: nilali riaa ulia unyala okhuvunia omwoyo nende omuvili musiatisi. ²⁹Sivakusianga echiminyi chivili khu limotole lilala? ne khavulakhowo khalala khanyala khayela hasi vulali Papa wuwo okhumanya? ³⁰Yikhava esavu ye eliswi khu omurwe kukwo yosi yavasivwa. ³¹Khu kario mukharia tawe, sikila enywe mune inganga eyingali okhuvira echiminyi echinyingi.³²Khu kario omundu yesi walanjiyama evweni wa avandu, siesi namwiyama evweni wa Papa wanje uli mwikulu. ³³Nikakhali ulia yesi walanjikana esie evweni wa avandu , siesi namwikana evweni wa Papa wanje uli mwikulu.³⁴Mukhapara muri nayecha okhurera omulembe musivala tawe: sinayecha okhurera omulembe tawe, nikakhali olupanga. ³⁵Nayecha okhurera ovwawukhani akarikari wo omwana nende papa wuwe, ne omukhana nende mayi wuwe, ne omukhasi wo omusiani nende mayi nakhufiala wuwe. ³⁶Avasuku vo omundu valava avandu ve yinju yiye omwene.³⁷Ulia yesi wayanja papa wuwe nohomba mayi wuwe okhumbira esie satukhane esie tawe: ne ulia yesi wayanja omwana wuwe omusiani nohomba omwana wuwe omukhana okhumbira esie satukhane esie tawe. ³⁸Ne ulia ukhavukula omusalaba kukwe, ne wanondakho, satukhane esie tawe. ³⁹Ulia walenya okhuwonia ovulamu vuvwe alavutifia: ne ulia walatifia ovulamu vuvwe sikila esie alavunyola.⁴⁰Ulia walamwinjisia enywe alava unjinjisie esie, ne ulia walanjinjisia esie alava winjisie ulia wanduma esie. ⁴¹Ulia walenjisia omung'osi mulira lio omung'osi alanyola esiyanwa sio omung'osi; ne ulia walenjisia omundu omulunji mulira lia omundu omulunji mwenoyo alanyola esiyanwa sio omundu omulunji.⁴²Ne yesi walelesia mulala khu avatiti vano esikombe sia amachi amanyufu kong'ene mulira lio omweki, kang'ali namusungilanga enywe, avulakho munjila yosi anga alatifia esiyanwa sisie tawe.

²¹Ne kecha kava vari lwa Yeso yali niyakhamala okhurusia elilaka khu aveki vave ekhumi na vavili, yarekukha okhurula avwene yawo okhucha okhusomia niyelwacha mumatokho kavo.

¹Muchindalo echoYeso na aveki vave vavirira mumikunda kie ingano khu yindalo ye lisabato; ne aveki vave vali neinjala ne vachaka okhwamula eyingano nivalia. ²Nikakhali wa Avafarisayo valola elienelo, vasungila Yeso vari, Lolakho, aveki vavo valakholanga kakhenyakhane khu eyindalo ye lisabato.³Nikakhali Yeso wavasungila ari, Yani enywe sumwasomakho ka Daudi yakhola wayali neinjala, nende valia vali ninaye? ⁴Khuli yenjila munju mwa Nyasaye, ne walia omukati kwa vaana khu Nyasaye, kakhenyekha, okhulondana nende elilaka niye alie tawe, nohomba valia vaali ninaye, nikakhali avasalisi vong'ene?⁵Namwe enywe musili okhusomakho mwilako, anga muchindalo che lisabato avasalisi nivali mwitembeli vasakanianga elisabato, ne sivavatulanga tawe? ⁶Nikakhali namusungilanga enywe, Endi avundu wokhuli hano wuwo omukali uvirire elitembeli.⁷Nikakhali muva anga mumanyile esifune sia kano, Sinenyanga omusango tawe nenyanga echimbavasi, simwakhakhalakile vavula ovuvi tawe. ⁸Sikila Omwana wo mundu niye Omwami we lisabato.⁹Ne anga yarula avwenawo, yacha mu sinagogi yavo: ¹⁰Ne, lola, khwalimo nomundu wafwokoya omukhono. Navo vamureva , ni vamusungila vari, elilaka liyamanga okhuwonia echindalo che lisabato? kho vari vamusitake.¹¹Ne Yeso wavasungila ari, Ni wina khwinywe, unyala khuva nelichese lilala, ne likwe muvwina eyindalo ye lisabato, walalekha okhwikhamo alitile, ne alirusiemo? ¹²No omundu naye suuvirile alee elichese? Khukene yako nikelilako okhukhola amalayi echindalo che lisabato.¹³Mani naye wasungila omundu oyo ari, Nyila omukhono kukwo. Naye wakunyila evweni; nakwo kwawona kwakololokha, kwalekhana nokundi. ¹⁴Kho Avafarisayo varula elwanyi, ne vamwikhasiya esikhalo, anga vanyala okhumuvunia.¹⁵Nikakhali anga Yeso yakamanya, omwene yarula avwenawo: nolukhumulo olukali lwamulondakho, ne naye wavawonia vosi. ¹⁶Ne wavalakilisia ari vakhamuvula khu vandu tawe: ¹⁷Kho litukhe okhwikholekha lilia lio omung'osi Isaya yalakaya, nasunga ari,¹⁸Lola omurumikhi wanje, wa narovola; omuyanje wanje, owo mwoyo kwanje kwikhoyelanga: Naraa roo wanje khuniye, ne naye alekesia ve sivala ovung'ali vwanje.¹⁹Salayingania, namwe, ayokele tawe; nohomba omundu yesi salawulilakho omwoyo kukwe khu chinjila tawe. ²⁰Salatienula elikhindu liriokhile tawe, ne khandi salasimia etaa yeliosi yalamulamulanga tawe, okhutukha anga alalera ovung'ali muvukhayi. ²¹Ne avesivala valeyikina elira lilie.²²Mani vamurelila omundu wali ne sisieno, omuvofu, khandi omusilu: ne wamuwonia, khu sikelo siokhutukha okhulola nande okhulakaya. ²³Ne avandu vosi vawuuka ne vasunga vari, uno saali omwana wa Daudi?²⁴Nikakhali anga Avafarisayo vawulila elienelio, vasunga vari, Omundu wuno sarusianga ofusieno vusa tawe, nilali khumani ka Beelisebuli omukali wofusieno. ²⁵Ne Yeso yamanya echinganakani chavo, wavasungila ari, Vuli ovwami vukavukhanemo ovwene vuwechangawo; ne vuli elitokho nohomba eyinju yikavukhanemo eyene khu yene seyisinjilanga tawe:²⁶Ne kava vari Siestani anyala okhukhuma Sietani wasie, ava omwene ukavukhanemo ; ovwami vuvwe vuva vwalasinjila vuriena? ²⁷Ne kava vari ekhumanga ofusieno khuvunyali vwa Belizebuli, avana venyu navo vakhumanga okhuvirila muwina? khu kario avenavo nivo valava avakhalaki venyu.²⁸Nikakhali naava nekhumanga ofusieno okhuvirila mu Roo wa Nyasaye, nono ovwami mwa Nyasaye vuva vumwichile enywe. ²⁹Nohomba nikakhali kario tawe ukhowo omundu unyala okhwinjila munju yo omundu wamani, ne amuyaye emiandu kikie, nakhamutilile wamuvowa mbele? ne amuyaye emiandu kie eyinju yiye. ³⁰Ulia ukhali ninasie tawe uvele esinyuma ninasie; ne ulia ukhavungelesia ninasie tawe niwoo okhusasia.³¹Khu kario namusungilanga endi, avandu vakhavelwe ovwoni vwa lukano na lukano nende amanyeko kosi kakhwavelwe: nikakhali avandu sivalivelwa amanyeko khu Roo Omuchenukhu tawe. ³²ne ulia yesi ulakaya elikhuwa esinyuma nende Omwana wo Omundu, alicha okhuvelwa: nikakhali ulia yesi walalakaya ovuvi khu Roo Omuchenukhu, salavelwa tawe, akhava musivala muno, nohomba musivala silia sialecha.³³Mani omusala kwava omulayi, kwalama amatunde amalayi; nohomba omusala kwava omuvi amatunde kakwo kosi kalava amavi: sikila omusala kumanyikhananga okhulondana nende amatunde kakwo. ³⁴Enywe olwivulo lwe echinjukha, munyala okhuva muriena, avandu avavi, ne mulakaye amakhuwa amalayi? kechula mumwoyo niko komunwa kulakayanga. ³⁵Omundu omulayi okhurula mwivikhilo lio omwoyo kukwe arusianga amakhuwa amalayi naye omundu uli omuvi arusianga okhurula mwivikhilo lia amavi amakhuwa amavi.³⁶Nikakhakali namusungilanga endi, Vuli omundu alikhalakilwa okhulondana nende vuli elikhuwa liavusa lia yalalakaya eyindalo yokhukhalakilwa. ³⁷Okhuvirila khu amakhuwa kako olivalwa okhuva omulunji, ne khandi okhuvirila amakhuwa kako olikhalakilwa.³⁸Nono valala khu Vaandiki va amalako nende valala khu Avafarisayo vamuchiva, nivasunga vari, Omukhongo, khwalenyanga okhulola esilolesio okhurula khwiwe. ³⁹Nikhali wavachiva ne wavasungila ari, Eselukho eyimayanu khandi yovutamba yikhavilisianga esilolesio; ne sivulakhowo esilolesio sia valavelesia, nikakhali esilolelo sio omung'osi Yona: ⁴⁰Khuli Yona yali munda mwe ing'eni echindalo chitaru esilo ne esitere; niwo anga Omwana wo omundu alava musilindwa echindalo chitaru esilo ne esitere.⁴¹Avandu va Nineve vakhasinjile musiyalo nende eselukho yino, ne vakhakikhalakile: sikila nivo vekanila anga Yona yavelwachila, ne lola, ulikho omukhongo khu Yona wuvele hano.⁴²Omuruki we sikhasi we Emulambo alisinjila musiyalo nende eselukho yino, ne alicha okhuvakhalakila: sikila niye yecha okhurula khusiakamo sie esivala okhuwulila amekesio kelimanya lia Solomoni; ne, lola, uvirakho Solomoni uvele hano.⁴³Lwe esisieno sivechanga nisiakharula mu mundu, sikenda kendanga muchimbeka echinyumu, neesikhava we sielemunyila, ne sesinyola tawe. ⁴⁴Ne sisunga siiri, nakalukha munju wanje wanarula; ne nisiakhecha, sinyola neyikhaya, yeyilwe, khandi yilavile. ⁴⁵Niwo wasikalukhangayo, ne sivukula ofusieno fundi musafu fuli na amani khusivira, ne fwicha fwosi okhumwinjilamo ne fumumenyamo: ne elimalilikha lio omundu oyo liva elivi okhuvira mukhuchaka. Kho nimwo anga kalava khu eselukho eyimbi ya vulano yino⁴⁶Lwa yali nasilakayanga nende ofutuma fwa avandu, lola, mayi wuwe nende vawandaye vave vecha vasinjila elwanyi, nivalekombanga okhulakaya ninaye. ⁴⁷Omundu wamusungila ari, Lola mayi wuwo nende vawandayo vasinjile elwanyi, valekombanga okhulakaya ninawe.⁴⁸Nikakhali naye wamuchiva ne wamusungila ari, Mayi wanje niwina? ne avawandaye vanje ni wina? ⁴⁹Ne wanyila omukhono kukwe oluveka wa aveki vave vali, ne wasunga ari, Lola mayi wanje nende avawandaye vanje! ⁵⁰Khu wulia yesi walakhola elienya lia Papa wanje uli mwikulu, niye uli wandaye wanje omusolili, ne niye wandaye wanje omukhana, khandi niye mayi wanje.

¹Indalo yeneyo Yeso yarula munju wacha elwanyi, ne wekhala khuluchinga lwe eyinyanja. ²Ne ,olukhumulo olukali lwa avandu vevungelesia alala wayali, kakila wacha wenjila muliaro, ne wekhala; ne olukhumulo lwosi vasinjila khuluchinga.³Ne naye wavasungila amakhuwa amanyingi muchingano ari, Lola, omumichi mulala yacha okhumicha ; ⁴Ne anga yali nalamichanga, ovumicho vulala vwakwa khunjila, ne amanoni nako kecha kavuvocha vwosi: ⁵Ovundi vwakwa khumachina, welilova liakhali elinyingi tawe: navwo vwaromba vyangu, sikila elilova liali lititi: ⁶Ne anga omuvasu kwarula kwakha, vwafululukha; nesikila sivwali neemisi tawe, vwaniala vwosi.⁷Ne ovundi vwakwa mumawa; na amawa nako anga katukha vwangu, kakhola eying'ining'ini khuvumicho: ⁸Nikakhali ovundi vwakwa mwilova elilayi, ne vwama eviamo, ovundi eyimia khumia, ovundi amakhumi kasasava, ovundi amakhumi kataru. ⁹Wuli na amarwi kokhuwulila, awulile.¹⁰Nee aveki vecha, vamusungila vari, Sikila sina olakayaanga na avandu muchingano? ¹¹Wavachiva ne wavasungila ari, Sikila enywe mwayelesivwa ovuchesi vwo okhumanya kafiswa muvwami vwo mwikulu, nikakhali khunivo sivayelesiwa tawe. ¹²Okhuva wulia yesi wuli ninafwo, alataswa, naye alava ninafwo muvunyinji: nikakhali wulia yesi wukhaali ninafwo tawe, ata sititi siava nali ninasio sialavukulwa.¹³Khu kario niko kakilanga nembalakayila muchingano: sikila vamokanga ne sivalolanga tawe; ne valarekelesia ne sivalawulila tawe, ata sivamanyanga tawe. ¹⁴Ovung'osi vwo omung'osi Isaya vwatusiwa munivo, vwasunga vuri, Okhuwulila mulawulila, ne simulamanya tawe; ne okhulola mwalalola, navusa simulamanya tawe:¹⁵Okhuva emioyo kia avandu vano nemisiro, ne amarwi kavo namasiro okhuwulila, ne vafunyikhilala echimoni chavo; vari vakhechukhana valola nechimoni chavo khu sikha siosi ne vawulila na amarwi kavo, ne vecha vamanya ne mioyo kiavo, ne vakalukhane, ne Ne embawonie.¹⁶Nikakhali echimoni chenyu chine chikhavi, sikila chilolanga: nende amarwi kenyu, sikila kawulilanga. ¹⁷Kang'ali namusungilanga enywe, Endi avang'osi avanyingi nende avandu avalunji vayekomba okhulola amakhuwa kalia keenywe mulalolanga, ne sivakalola tawe; nende okhuwulila amakhuwa kalia kamulawulilanga, ne sivakawulila tawe.¹⁸Nakharekelesie vulano olukano lwo omumichi. ¹⁹Wo omundu yesi awulilanga elikhuwa lio ovwami vwo mwikulu, ne alekha okhumanya tawe, niwo anga omusuku yechanga, ne anula lilia lirakilwe mumwoyo kukwe. Wuno niye olumicho lwakwa khundulo khwe yinjila.²⁰Nikakhali olumicho lulia lwakwa mumachina, niwulia wuwulilanga elikhuwa, ne aliiyama mumwoyo kukwe novusangafu; ²¹Navusa siyayila emisi mukari mumwe tawe, nikakhali khu sikha sititi: kho anga eminyakhano nende okhutambichwa khwichanga okhulondokhana ne likhuwa lieneli, achaka okhwisikirala kalaa kalaa.²²Olumicho lwakwa mumawa niwulia yesi ulilanga elikhuwa; ne kakhali eliayaya lio musivala muno nende ovuveyi vwe emiandu, vwiranga elikhuwa muniye, nenaye alekha okhwama. ²³Nikakhali olumicho lwakwa khulilova lilayi niwulia wawulila elikhuwa, ne alimanya; ne khandi yama amatunde, akandi eyimia , akandi amakhumi kasasava, akandi amakhumi kataru.²⁴Olukano lundi yara evweni wavo,wavasungila ari, Ovwami vwo mwikulu vufwanananga nende omundu waraka ovumicho ovulayi mumukunda kukwe: ²⁵Nikakhali wa avandu vali nivakonile, omusuku wuwe yecha ne wamicha elivanje muyinganu, ne wechila khuyinjila yiye. ²⁶Nikakhali anga yachaka okhumela, ne yachaka okhwama, mani elivanje liosi lialolekhanamo.²⁷Kho avakhalavani va mwene mukunda vecha ne vamusungila vari, Omwami, ewe siwaraka ovumicho ovulayi mumukunda? vulano elivanje lirulile ena? ²⁸wavasungila ari, Omusuku niye wukholile akenako. Avakhalavani vamusungila vari, Nikali kario olenyanga khukhule ne khuvunjikhe alala?²⁹Nikakhali wavakania ari, Tawe; mukhecha mwava nimwalasiulanga elivanje, mwasiulilamo alala ne eyinganu. ³⁰Lekha viosi vitukhile halala okhwola mukhuchesa: ne musikha sio okhuchesa nasungila vava nivalachesanga endi, Chaka okhuvunjelesia elivanje alala mbele, mufuyayu fwo okhusamba: nikakhali muvungelesie eyinganu mukire musiachi sianje.³¹Khandi wavarusia olukano lundi nasungila ari, Ovwami vwo mwikulu vuvele anga olumicho olutiti, lwo omundu yavukula, ne wacha waraka mumukunda kukwe: ³²Luli lutiti muno okhuvira ovumicho vwosi: nilali nilwakhakhula, kuvechanga omusala omukali mumisala kiosi ne kuva omusala, ne amanoni komwikulu kecha ne kombakha ofuchwi muchisakia chakwo.³³Wela wavasungila olukano lundi ari, Ovwami vwo mwikulu vufwanane anga elimela lio omukhasi yavukula, ne wafusa mufukelo futaru fwo ovusie okhwola anga fwosi fwafura.³⁴Amakhuwa kano kosi Yeso yakalakayanga muchingano khu olukhumulo lwa avandu; ne avulawo avundu wa yalakaya vulali olukano tawe: ³⁵Kho katukhe okhwikholekha kalia kalakaywa nende omung'osi, nasunga ari, nalakaya no omunwa kwanje muchingano; nalakaya amakhuwa kaali ni kekisa okhurula mukhuchaka khwe esialo.³⁶Olunyuma Yeso wasevula volukhumulo vache, ne wacha wenjila munju: aveki vave vecha wayali, nivasunga vari, Khusungilekho akolukano lwe elivanje mumukunda. ³⁷Wavachiva wavasungila ari, Ulia waraka ovumicho ovulayi ni Omwana wo omundu; ³⁸omukunda nikwo esivala; ovumicho ovulayi na avana vo ovwami vwo mwikulu; nilali elivanje nivo avana vo omwononi; ³⁹Omusuku wavaraka niye sietani; elichesa nilio okhumalilikha khwe esivala; ne avokhuchesa ne echingelosi.⁴⁰Khu kario anga vavungelesianga elivanje ne valisamba mumulilo; niwo anga esieli siliva mukhumalilikha khwe esivala sino. ⁴¹Omwana wo omundu yakharume echingelosi chiche, ne nacho chilivunjelesia okhurula muvwami vwo mwikulu vuli sindu sisikirasianga, nende valia vosi vakholanga ovwoni; ⁴²Ne vavasukune mumulilo kwa amachenga: eweneyo khulivayo okhulila nende okhuluma ameno. ⁴³Olunyuma avalunji valiakha anga eliuva muvwami vwa Papa wavo. Uli naamarwi ko okhuwulila, lekha awulile.⁴⁴Khandi ovwami vwo mwikulu vuvele anga elivikhilo lia vafusa mumukunda; lio omundu yali niyakhalinyola, walifusa, ne muvusangafu warulawo waacha ne wakusia vuli esindu siayali ninasio, ne wecha wakula omukunda kwenoku. ⁴⁵Khandi ovwami vwo mwikulu vuvele anga omundu omukhala walakhavanga echisimbi echindayi : ⁴⁶Naye, wayali niyakhanyola eyisimbi ndala yoovukusi vwe ikulu, yacha ne wakusia vuli esindu sia yali ninasio, ne wakikula.⁴⁷Khandi, ovwami vwo mwikulu vuvele anga olurimba, lwa vasukunanga munyanja, ne nalwo lwatila esindu sia vuli lukano. ⁴⁸Nalwo, anga lwali ni lwakhechula, valukhwesa khulukuku, ne vekhala hasi, vachaka okhuvunjelesia eching'eni echindayi nivara mufukapu, nikakhali echimbi vachisukuna alee.⁴⁹Kho niwo anga kaliva musieli sie esivala: echingelosi chilicha, ne chiliawukhasia avononi okhurula khu valunji, ⁵⁰Ne valisukunwa mumulilo kwa amachenga: khulivawo nokhulila nende okhuluma ameno.⁵¹Yeso wavasungila ari, Muwulile amakhuwa kano kosi? Vamusungila vari, Khuwulile, Omwami. ⁵²Kho naye wavasungila ari, Khu kario vuli omwekesi wa amalako wekesianga amakhuwa okhulondokhana nende ovwami vwo mwikulu uvele anga mwene yinju, wurusianga mulivikhilo lilie ofundu ofuya nende ofukhale. ⁵³Ne kecha kava vari anga Yeso yali niyakhamala echingano chino, yarula awenawo.⁵⁴Ne wayali niyakhecha musivala sisie, yavekesia mu sinagogi yavo, vaasamilila vawuuka, ne vasunga vari, Omundu wuno yarusiena ovuchesi vuno, nende evikholwa ofukholwa ofukali funo? ⁵⁵Wuno sali omwana wo mufundi wechimbao? mayi wuwe sivamulanganga vari Maria? ne sali wandaye, Yakobo, nende Yosefu, nende Simoni, nende Yuda? ⁵⁶Ne sikhuli hano nende avakhana vavo? Omusacha wuno ava narusiena amakhuwa kano kosi?⁵⁷Ne vamwisikiralila. Nikakhali Yeso wavasungila ari, Omung'osi satakhanga oluyali tawe okhurusiakho musivala sisie nende munju mwavo. ⁵⁸Ne siyela wakholakho eweneyo ofukholwa fwo okhuuka ofukali tawe sikila okhulekha okhuva ne lisuvila khwavo.

¹Muchindalo echo omuruki Herodi yawulila eyifuma ya Yeso. ²Ne wasungila avarumikhi vave ari, Wuno ni Yohana Omubatisi; usisimukhe okhurula muvafu; ne khu kario ofukholwa ofukali fwene fulalolekhanga muniye.³Okhuva Herodi yali wutilile Yohana, ne wumuvoyile, nende okhumura musivoye khu amakhuwa sikila Herodiya, omukhasi wa Filipo, wandaye Herodi. ⁴Yohana yali usungilenge Herodi ari uriolile elilaka okhuvukula omukhasi wa wandaye wuwe. ⁵Ne anga yali nalenyanga okhumwira, yaria olukhumulo lwa avandu, sikila vamuvala anga omung'osi⁶Nikakhali anga vali mumulukha kwo okhwichulila indalo ya Herodi yo khwivulwa, omukhana wa Herodiya yakhina mumuse evweni wavo, ne wayanjisia Herodi. ⁷Yamulaka niyechuva okhumuwelesia esindu siosi sia alareva.⁸Ne naye, okhulonda anga mayi wuwe yava namwimisiye, wasunga ari, Mbelesie hano omurwe kwa Yohana Omubatisi khulutelu. ⁹Ne omuruki wavelela: kakhava kario sikila yali wichuvile, nende valia vali nevekhale okhulia ninaye , yarusia elilaka vamuwelesie.¹⁰Ne naye warumasia, na niwo anga vakhalaka omurwe kwa Yohana nali musivoye. ¹¹Ne varera omurwe kukwe khulutelu, velesia omukhana oyo: ne naye wakusita warelila mayi wuwe. ¹²Ne aveki vave vecha, vavukula omuvili, vakuyavila, ne vacha vasungila Yeso.¹³Anga Yeso yawulila akenako, yarekukha awenawo wenjila muliaro waacha aluveka musiangalamwe: ne anga avandu vawulila amakhuwa ako, varula muchingova chavo vamulondakho khufulenge. ¹⁴Ne Yeso wacha evweneyo, walola olukhumulo olukali, ne wavakholela echimbavasi, ne wawonia vali avalwale vavo.¹⁵Ne anga eyingolove yola, aveki vave vecha vamusungila vari, avundu hano nimusiangalamwe, ne echisa chakhavira; sevula olukhumulo luno, vatukhe okhucha mufurekelo vekulile ofwakhulia.¹⁶Nikakhali Yeso wavasungila ari, sivakhoyele vachee tawe; enywe velesie sia valia. ¹⁷Ne navo vamusungila vari, Hano khuvele vusa nende emikati kirano nende eching'eni chivili. ¹⁸Wavasungila ari, nderere fwosi hano.¹⁹Ne naye walakilisia avandu vekhale hasi khu vunyasi, wavukula emikati kirano nende eching'eni chivili, ne walengela mwikulu, wakalusia oluyali, wakitonya tonya, ne welesia aveki vave, na aveki vayilila olukhumulo. ²⁰Navo voosi valia vekura: aveki navo vavukula ofutonye fwali nofusikale ofukapu elikhumi na fuvili nifwichule. ²¹Ne valia voosi valia vali avasacha vatukha echelefu chirano, nokhavalilekho avakhasi nende avana.²²Ne okhurula awenawo, Yeso wayingilisia aveki vave venyowe okhwinjila muliaro, evweni wuwe vambukhe injelekha wundi, wayali nasisuvulanga olukhumulo okhucha. ²³Ne wayali niyakhasuvula olukhumulo lwa khacha, yanina mulukulu okhusala: ne lwa angolove yola, yali yeng'ene. ²⁴Nikakhali khu sikha sienesio eliaro liali akarikari weyinyanja, lilarengechanga sikila amarunda: okhurulana nende eyimboo yoluwuchi yarulanga evweni wavo.²⁵Ne wavwali novucha okhusia musilo Yeso yavechela, nalakendanga khu yinyanja. ²⁶Ne anga aveki vamulola nalakendanga khu yinyanja, vareenga, nivasunga vari, sino nesisieno; ne vakukula muvuri. ²⁷Nikakhali Yeso wavalakayila avwene na avwene, nasunga ari, va avasicha; Nisie ; mukharia tawe.²⁸Ne Petero wamuchiva wamusungila ari, Omwami, wava noli ewe, suvule enjende khu maachi niche woli weneyo. ²⁹Ne Yeso wamusungila ari ,Yiicha. Ne anga Petero yekha okhurula muliaro,yachenda khu maachi, okhucha wa Yeso yali. ³⁰Nikakhali anga yalola eyimboo yooluwucho, yaria; ne waanja okhwiyinikha, wakukula, nasungari, Omwami, mbonie.³¹Ne vwangu Yeso wanyila omukhono kukwe, ne wamutila, ne wamusungila ari, Ewe welisuvila lititi, sina sikilile ni wayaaya? ³²Ne wavali nivakhenjila muliaro, eyimboo yayenjela. ³³Ne valia vali muliaro vecha vamwinamila, nivasunga vari, Kang'ali ewe uvele Omwana wa Nyasaye.³⁴Ne anga vali nivakhambukha injelekha, vecha musivala sia Kenesareti. ³⁵Ne anga avandu va avundu wenawo vamanya vari niye, varumasia mufurekelo fwosi fwavotokhana esivala sienesio, ne vamurerira vosi vali avatekhele; ³⁶Ne vamusaya vari vatilekho vusa khu likemo lie eyinguvo yiye: ne anga avanyingi vanyala vatilakho vawona ovulayi vwene.

¹Ne Avandiki va amalako nende Avafarisayo vecha khu Yeso, vo okurula Yerusalemi, nivasunga vari, ²Sikila sina aveki vavo valenonanga omwima kwa avakhulundu? si valasavanga emikhono kiavo nivenya okhulia esiakhulia tawe. ³Nikakhali wavachiva wavasungila ari, Nenywe sikila sina mwinonanga elilako lia Nyasaye nende omwima kwenyu?⁴Okhuva Nyasaye yalakilisia, nasunga ari, Orie papa wuwo nende mayi wuwo: ne, Ulia walalaama papa wuwe nohomba mayi wuwe, lekha afwe elifwa. ⁵Nikakhali enywe musunga muri, Ulia yesi walasungila papa wuwe nende mayi wuwe ari, Esiyanwa siosi siamwakhanyolile khwisie nisia Nyasaye, ⁶Ne ukharia papa wuwe nende mayi wuwe, alava omulekhule. Niwo anga mwenona elilaka lia Nyasaye okhulekha okhuva naamani sikila omwima kwenyu.⁷Enywe avokhwikatia, kali ka avwene koomung'osi Isaya yarusia ovung'osi khwinywe, nasunga ari, ⁸Avandu vano vanjisundangakho vusa ne minwa kiavo, ne ni vamba oluyali lwa amunwa; nilali emioyo kiavo kivele ale ninasie. ⁹Nikakhali vanjinamilanga esie esikhaya, sikila vekesianga amekesio ka amalako kavandu.¹⁰Ne walanga olukhumulo, wavasungila ari, Wulila ne mumanye: ¹¹Sisili sichichanga mumunwa nisio sivakhanga omundu esifwavi tawe; nikakhali silia sirulanga mumunwa, nisio sivakhanga omundu esifwavi.¹²Ne aveki vave vecha ne vamusungila vari, Umanyile ori Avafarisayo vesikirale emioyo, anga vawulile kosungile? ¹³Yeso wavachiva wavasungila ari, Vuli esirakwa, sia Papa wanje uli mwikulu yakharaka tawe, silasiulwa. ¹⁴Lekhana ninavo: avenavo navemilisi avavofu va avavofu. Ne omuvofu niyemilila omuvofu, voosi valakwa mwitikho.¹⁵Ne Petero wachiva ne wamusungila ari, Khusungile kolukano luno. ¹⁶ne Yeso wasunga ari, Khane mwesi simuli nelimanya tawe? ¹⁷Musili okhumanya, muri, silia sinjililanga mumunwa sichichanga munda, ne sirula elwanyi nesicha muchoo?¹⁸Nikakhali ofundu fuvuriranga mumunwa furulanga mumwoyo; ne ni fwo fuvakhanga omundu esifwavi. ¹⁹Okhurula mumwoyo chirulangamo echinganakani echimbi, ovulimindi, ovuheeyi, ovukhovani, ovwifwi, ovuloli vwovuveyi, ovwononi: ²⁰Kano niko amakhuwa kavakhanga omundu esifwavi; nikakhali okhulia nokhasavile tawe sikhuvakhanga omundu esifwavi tawe.²¹Ne Yeso warula awenawo, ne wacha mulukongo lwa Tiro nende Sidon. ²²Ne, lola, omukhasi omukanaani wecha okhurula muluchinga lwe inyanja lula lulia, ne wamulilila, nasunga ari, Omwami, ewe omwana wa Daudi, Umbele echimbavasi; esisieno sinijile mumwana wanje omukhana sialamunyasianga. ²³Nikakhali Yeso siyamuchivakho elikhuwa liosi tawe. Ne aveki vave vecha ne vamusaya, nivasunga vari, Mukhume achee; sikila alakhuyokesianga.²⁴Nikakhali Yeso wamuchiva wamusungila ari, esie sinarumwa awundi tawe nikakali khu amachese kativa keyiinju ya Isiraeli. ²⁵Ne naye wecha wamwinamila, nasunga ari, Omwami, njeete. ²⁶Nikakhali wamuchiva wamusungila ari, Sikatukhane okhuvukula esiakhulia sia avana, ne osukunile echimbwa tawe.²⁷Ne naye wasunga ari, Ovung'ali, Omwami: kakhava kario ata echimbwa chilichanga fukwile okhurula khu mesa yo omwami wacho. ²⁸Ne Yeso wamuchiva ne wamusungila ari, Omukhasi wee, elisuvila lilio nelikali: lekha kave kario anga wenyile. Ne omukhana wuwe mwenoyo wawona avwene na avwene okhurula eyisa yeneyo.²⁹Ne Yeso warula avwenawo, ne wecha ahambi nende eyinyanja ya Galilaya; ne wanina mulukulu, ne wekhalasi evweneyo. ³⁰Ne olukhumulo olukali lwaavandu vecha wayali, nivasitanemo avalema, avavofu, avasilu, vafwokoya, nende avandi avanyingi, ne vavara hasi mufulenge fwa Yeso; ne naye wavawonia: ³¹musikelo sio olukhumulo okhuuka, anga valola avasilu vachaka okhulakaya, vafwokoya vawona, avalema vakenda, ne avavofu valola: ne vafumia Nyasaye wa Isiraeli.³²Ne Yeso walanga aveki vave veche wayali, ne wasunga ari, nakholelanga olukhumulo luno esisa, sikila vachililile okhuva ninasie vulano echindalo chitaru, ne sivulawo siavalile tawe: ne sinavalekhula vachee neyinjala tawe, vakhecha vanyirira khunjila. ³³Ne aveki vave vamusungila vari, Niheena wakhwalarusia esiakhulia musiangalamwe muno, sialaela olukhumulo olukali luno? ³⁴Naye Yeso wavasungila ari, Muvele nende emikati kiinga? Navo vasunga vari, musafu, nende eching'eni echintiti. ³⁵Yeso walakikilisia olukhumulo vekhale hasi..³⁶Ne naye wavukula emikakti musafu ekio nende eching'eni, ne wakhupa orio khu Nyasaye, wakitonyatonya, ne welesia aveki vave, ne aveki vayila mulukhumulo. ³⁷Ne navo valia vosi, vekura: aveki navo vavungelesia esiakhulia siali nesisikale ofukapu musafu fwichule. ³⁸Ne avandu valia esiakhulia esio vali avasacha echelefu chinne, vulali okhuvalilakho avakhasi nende avana. ³⁹Ne naye wasevula olukhumulo vachee, ne wenjila muliaro wecha mulukongo lwa Makadani.

¹Avafarisayo alala nende Avasadukayo vecha, vamukelicha vari avekesiekho esimanyikhilo sio okhurula mwikulu. ²Wavachipa wavasungila ari, niyakhola angolove, musunganga muri, esivala siselechile: sikila elilesi liveseme.³Ne mumavwivwi, muri yiyitile: sikila lilesi liveseme ne liakhenama. Enywe vokhwikholokhosia, mumanyanga amaleesi anga kafwana; nikakhali sina sikilanga mulekha okhumanya ofumanyikhilo fwe chinyanga? ⁴Olwivulo lwamayana khandi lwovutamba lukhavanga esimanyikhilo; sivulawo esimanyikhilo sia lulawelesivwa tawe, nikakhali esimanyikhilo sio omung'osi Yona. Ne wavalekha, wachaa.⁵Ne waveki vave wavali nivakhambukha oluveka lundi lulia, vali vevilile okhusita esiakhulia. ⁶Niwo wa Yeso yavasungila ari, mwikhale meso ne mwilinda okhurulana nende elimela lia Avafarisayo nende Avasadukayo. ⁷Ne vachaka okhurevana avene khu avene, nivasunga vari, awundi sikila sikhusitilekho omukati tawe? ⁸Khukario anga Yeso yamanya kavalikho, yavasungila ari, enywe velisuvila lititi, nisina sia mwalarevananga mwavene, sikila simusitilekho omukati tawe?⁹Enywe simwalamanyanga, nohomba okhwichulila emikati kirano khu avandu echelefu chirano, nende ofukapu fwinga fwasikala mwasita? ¹⁰Khandi emikati kiali saba khu vandu echelefu chinne, ne ofukapu fwinga fwasikala mwasita?¹¹Kavele kariena nimukhamanya muri sinavalakayilanga okhulondana nende omukati tawe?Mulengele ovulayi ne khandi mwilinde okhulondokhana nende elimela lia Avafarisayo nende Avasadukayo. ¹²Khu kario vava nelimanya vari savakanisienge okhwilinda nende elimela lio omukati tawe, nikakhali amekesio ka Avafarisayo nende Avasadukayo.¹³Anga Yeso yecha mu chingongo cha Kaisaria Filipi, yareva aveki vave, nasunga ari, Avandu vasunganga vari Esie Omwana wo mundu niwina? ¹⁴Vamusungila vari, avandu vandi vasunganga vari ewe uvele Yohana Omubatisi: avandi, Elijah; navo avandi vari, Yeremia, nohomba mulalakho khu avang'osi. ¹⁵Naye wavasungila ari, Nenywe mwalasunganga muri Esie niwina? ¹⁶Ne Simoni Petero wamuchiva wamusungila ari, Ewe niwe Kristo, Omwana wa Nasaye umenyanga.¹⁷Naye Yeso wamuchiva ne wamusungila ari, Ewe uneyikhavi, Simoni wa Yona: sikila omuvili nende amavanga sifuli nifwo fukhunulile ewe tawe, nakhali Papa wanje uli mwikulu. ¹⁸Ne nakhusungilanga ewe endi, ewe niwe Petero, ne khulwanda luno Nombakhakho elikanisa lianje; ne emiliango kie musiatisi sikialalikhaya tawe.¹⁹Ne Nasie nakhuwelesia echifunguwo cho ovwami vwo mwikulu: ne esindu siosi siolavowa musivala sialavoywa mwikulu: ne esindu siosi siolakangulula musivala sialakangululwa mwikulu. ²⁰Naye wavalakilisia aveki vave ari vakhasungilakho omundu yesi vari niye Yeso Kristo tawe.²¹Okhurula awenawo Yeso wachaka okhwekesia aveki vave, anga akhoyele achee Yerusalemi, nende anga alavirira musinyasio esinyingi mumikhono kia avasakhulu nende avasalisi avakhongo nende avandiki nende anga alerwa, ne asisimukhe khandi eyindalo ya khataru. ²²Petero naye wamuvukula aluveka, ne wachaka okhumuyivila, namusungila ari, Omwami, Akenako kavirire ale ninawe: kano sikalakhwichakho tawe. ²³Nikakhali naye wamwisevukha, ne wasungila Petero ari, , Kalukha inyuma wanje Shetani: ewe wakhava wokhwikhakasia khwisie: sikila ewe soparangakho amakhuwa ka Nyasaye tawe, nikakhali kalia kali ka avandu.²⁴Yeso wasungila aveki vave ari, Omundu yesi niyenya okhunonda, omwene yekaye, ne avukule omusalaba kukwe, ne yanonde. ²⁵Ulia walakhava okhuwonia ovulamu vuvwe alavutifia: ne ulia walatifia ovulamu vuvwe sikila esie alavunyola. ²⁶Ni vukhala sina vwo omundu alanyola, nanyala okhunyola esivala siosi, ne atifie omwoyo kukwe? nohomba nisina sio omundu anyala okhurusia okhupatirisia nende omwoyo kukwe?²⁷Sikila Omwana wo mundu alecha muvukhumi vwa Papa wuwe alala nende echingelosi chiche; ne naye alarunga vuli sia mulala okhulondana nende emilimo kikie. ²⁸Kang'ali namusungilanga, Vao valala vasinjile hano, vakhalakonyelelakho elifwa tawe, okhutukha wavalalola Omwana wo mundu nalechanga muvwami vuvwe.

¹Ne olunyima lwe echisuku chisasava okhuvira, Yeso yavukula Petero, Yakobo, nende Yohana wandaye wuwe, wavarera aluveka musikulu esirambi, ²Ne ovukondo vuvwe vwakalukhasiwa evweni wavo: ovweni vuvwe vwakha singa eliuva, ne echinguvo chiche chawangiya anga ovulafu.³Ne, lola, Musa nende Eliya valolekhana valalosianga ninaye. ⁴Khukenako Petero walakaya, wasungila Yeso ari, Omwami, novulayi khwifwe okhuva hano: nikava wakhayanjile lekha khulombe hano amatili kataru; lilala elilio, ne lilala lia Musa, ne elindi lia Eliya.⁵Wayali nasilakayanga, lola, elilesi lio ovulafu ovuwanga chwee liavafunikha: ne lola omwoyo kwaulilikha okhurula mwilesi chena, kwasunga kuri, Wuno niye Omwana wanje omuyanje, wanayanjisivwa ninaye, mumuwulile . ⁶Ne anga aveki vave vaulila akenako, vakwa mafumama, ne vava no ovuri ovukali. ⁷Naye Yeso wecha ne wavatilakho, wavasungila ari, Vukhe, ne mukharia tawe. ⁸Navo anga valikamila echimoni chavo ikulu, sivalolakho omundu yesi tawe, nakhali Yeso yeng'ene.⁹Ne anga vali nivakhakholomokha okhurula khulukulu, Yeso wavalakilisia, wavasungila ari, Mukhasungilakho omundu yesi amalolo kano tawe, okhwola olwa Omwana wo mundu alisisimukha okhura muvaafwa. ¹⁰Ne aveki vave vamureva ne vasunga vari, Ne sikila sina Avandiki va amalako vasunganga vari Eliya niye walava wokhuranga okhwicha?¹¹Naye Yeso wavachiva wavasungila ari, muvung'ali Eliya alenyowa yeche mbele, ne akalusie amakuwa kosi. ¹²Nikakhali namusungilanga enywe, Eliya wayecha khale, ne navo savamumanya tawe, nikakhali vamukholela kalia kosi kavenya vamukholele. Khu njila yeneyo nowo wakaliva omwana wo omundu alicha okhunyakhasivwa ninavo. ¹³Khukenako aveki vave vamanya vari alavasungilanga okhulondokhana nende Yohana omubatisi.¹⁴Anga vali nivakhecha wolukhumulo lwali, omusacha mulala yamwichila, wamusikamila ne wamusungila ari, ¹⁵Omwami, kholelakho omwana wanje echimbavasi: afwichanga esitelenyi, ne alasalilanga vululu: mumakhavi amanyinji akwichanga mumulilo, nende amakhavi amanyinji khandi akwa mumachi. ¹⁶Ne emurerire khu veki vavo, ne navo vakhaywa okhumuwonia.¹⁷Yeso wavachiva wavasungila ari, Enywe olwivulo luvula elisuvila khandi olumayanu, nava ninanywe okhwola lina? namwifwila okhwola lina? murere wendi hano. ¹⁸Ne Yeso wakondokhela esisieno, nasio siamurulamo: ne mwana oyoo wawona okhuchakila eyisa yeneyo.¹⁹Niwo anga aveki vave vecha khu Yeso aluveka, ne vamureva vari, sikila sina khukhayilwe okhukhuma esisieno sirule? ²⁰Ne Yeso wavasungila ari, Sikila okhulekha okhusuvila khwenyu: kang'ali navasungilanga enywe, Mwava nende elisuvila anga olumicho olutiti, onyala wasungila olukulu luno ori, siukha hano oche avundu handi yawo; lwalasiukha lurulewo; sivulawo siosi silavula okhunyalikha khwinywe. ²¹Kakhava kario funo sifurulanga fuche nokhasalile nende okhulekha okhulia.²²Ne wavali nivekhale Galilaya, Yeso yavasungila ari, Omwana wo omundu alachamwa mumikhono kia avandu: ²³Ne navo valamwira, ne eyindalo ya khataru alasisimusivwa. Navo vavelela okhuvira esikelo.²⁴Ne lwa vali nivakhecha kapernaumu, valia vokhurosia ovushuru vecha khu Petero, ne vamureva vari, Omwami wuwo sarungangaga ovushuru tawe? ²⁵Naye weyama ari, arunganga. Ne anga yali niyakhenjila munju, Yeso wamukhingilila, namureva ari, Ni sina siolaparanga, Simoni? ni vanga wina va avaruki ve sialo varosiangakho omurungo nohomba ovushuru? okhurula khu avana vavo nohomba okhurula khu avarende?²⁶Petero wamusungila ari, Okhurula khu avarende. Yeso wamusungila ari, khu kario avana navalekhule. ²⁷Kho, khulekhe okhuvesikirasia, ewe chaa munyanja, osukune olulovo, ne ovukule eying'eni yokhuranga okhwambwa; ne niwakhasamia omunwa kwayo, walanyolamo esitonye sie echisendi: chivukule, ne undungile ne wesi wirungile khu nivo.

¹Khu sikha sienesio aveki vecha khu Yeso, nivamureva vari, Niwina uli omukhongo mu vwami vwo mwikulu? ²Ne Yeso walanga omwana omutiti wecha wali, ne wamusinjisia akarikari wavo, ³Ne wasunga ari,Kang'ali navasungilanga, Nomukhakalukhana, ne mwava anga avana avatiti, simwalenjila muvwami vwo mwikulu tawe.⁴Khu kario wulia yesi waletutuya anga omwana omutiti wuno, niye omukhongo mu vwami vwo mwikulu. ⁵Ne yesi walenjisia omwana omutiti wuno mulira lianje alava unjinjiisiye. ⁶Nikhali ulia yesi walasikirasia mulala khu avatiti vano wasuvila mwisie, vwakhavele ovulayi khuniye avoywe oluchina mwikosi mumwe, ne ache asukunwe mulusuva lwe inyanja.⁷Kaliva amatinyu khusivala sikila amesikirasio! kavele vari amesikirasio kalecha; nikakhali kaliva amatinyu khu mundu ulia wakalechelakho! ⁸Kava vari omukhono kukwo nohomba esilenge sisio, silakhwisikirasia, fukhalake, ne ofusukune hale ninawe: novulayi khwiwe okhwinjila muvulamu vulali omukhono nohomba esilenge, okhuvira okhuva nende emikhono kivili nende ofulenge fuvili ne osukunwe mumulilo kwa mindali.⁹Ne eyimoni yiyo ne yikhwisikirasia, yikhule irule, ne oyisukune hale: sikila novulayi khwiwe okhwinjila mu vulamu nende eyimoni ndala, okhurasia okhuva nende echimoni chivili ne osukunwe mumulilo kwo musiatisi.¹⁰Wilinde okhalekelasiakho mulala khu vatiti vano tawe; sikila navasungilanga enywe endi, sikila vano echingelosi chavo mwikulu chilolanga ovweni vwa Papa wanje uli mwikulu vuli lwosi. ¹¹Sikila Omwana wo mundu yecha okhuwonia silia siativa.¹²Mwalaparanga murie? omundu wava nende amachese eyimia ndala, ne lilala liarula khu njila, salekhanga tisayine na tisa, ne acha muchingulu okhukhava lilia lirulile khunjila? ¹³Ne nikakhava vari wakhalinyola, kang'ali namusungilanga enywe, yekhoyelanga lukali sikila elichese lienelio, okhuvirakho kalia tisayine na tisa kakharulile khu njila tawe. ¹⁴Kakhava kario selili elienya lia Papa wenyu uli mwikulu, vari mulala khu avatiti vano avune tawe.¹⁵Yikulu wakenako wandaye wuwo wakhukosela, chaa omusungile ovuvi vuvwe akarikari wuwo ninaye mweng'ene: kava vari alakhuwulila ewe, olava umukalusie. ¹⁶Nikakhali walekha okhukhuwulilisia ewe, vukulakho omundu mulala nohomba vavili ninawe kho kave vari khu ovuloli vwo omunwa kwa avandu vavili nohomba vataru vuli elikhuwa livisiwe.¹⁷Ne naye naleka okhuvawulilisia, sungila elikanisa: naye waleka elikanisa, mulekhe ave khwinywe anga wesivala nende anga omusololi wovushuru.¹⁸Kang'ali namusungilanga enywe, Siosi siosi sia mwalavowa musialo sialavoywa mwikulu: ne siosi siosi sia mwalakangulula musialo sialakangululwa mwikulu. ¹⁹Khandi navasungilanga, Vavili khwinywe niveyamana okhulondokhana nende elikhuwa liosi lia valasava, valakholelwa nende Papa wanje wuli mwikulu. ²⁰Sikila wavali vavi nohomba vataru wavakanane mu lira lianje, avwenao Nivelewo akarikari wavo.²¹Petero wecha khu niye, ne wasunga ari, Omwami, wandaye yangosele amakhavi kenga, ninamuvelanga? okhwola amakhavi musaafu? ²²Yeso wamusungila ari, sinakhusungilanga ewe endi, okhwola amakhavi musafu tawe, nikakhali, Okhutukha amakhavi amakhumi musafu mara musafu.²³Khu kario ovwami vwo mwikulu vwafwanilisivwa nende omuruki navuleve, wenya okhukhola ovuvali nende avakhalavani vave. ²⁴Ne anga yachaka okhuvala, vamurerela omundu mulala, wayaloovanga echitalanta echelefu ekhumi. ²⁵Nikakhali anga yakhaywa okhurunga, omwami wuwe walakilisia ari akusiwe, nende omukhasi wuwe, nende avana, nende viosi viayali ninavio, ne omurungo kwikholekhane.²⁶Khu ako omukhalavani wakwa hasi, wamusikamila, nasunga ari, omwami, njifwilekho atiti, nasie nakhurunga chosi. ²⁷Ne omwami wo omukhalavani oyoo wamuvelelela, ne wamulekhula, nende okhumuvela elikofi eli.²⁸Nikakhali omukhalavani mulala vusa oyoo yacha elwanyi, ne wanyola mulala khu avakhalavani vasie, wali nelikofi lilie lia dinarii eyimia: ne wamukwakho, ne wamutila emumilo, nasunga ari, ndunge echanje chosi chekhuloovanga. ²⁹Ne omukhalavani wasie wamukwa mumakulu, ne wamusaya, nasunga ari, njifwilekho atiti, nasie nakhurunga chosi.³⁰Ne naye siyayenya tawe, nikakhali yacha ne wamura musivoye, okhutukha arunge elikofi. ³¹Khu kario anga avakhalavani vasie valola kali nikekholekhane, vakhola esisa, ne vecha vasungila omwami wavo kalia kosi kali nikekholekhane.³²Naye omwami wuwe, anga yava niyakhamulanga, yamusungila ari, Ewe omukhalavani omuvi, Ekhuvelele elikofi lilio liosi, sikila ewe wandilila: ³³Sikenyekhane wesi ovelelele omukhalavani wasio, anga siesi ekhuvelelele.?³⁴Ne eliruma liatila omwami wuwe, ne naye wamura khu vesinyasio, okhutukha anga yecha okhurunga chosi chilia chavamutayanga. ³⁵Na nimwo anga Papa wanje uli mwikulu alecha okhuvakholela enywe, kava vari enywe simwalavela okhurula mumwioyo kienyu vuli sia mulala wandaye wuwe khu khuviririra kavamukholela.

¹Nakecha okhwikholekhana, lwa Yeso yali niyakhamala kayalakayanga,yarekukha okhurula Galilaya, ne wecha muchingongo cha Avayudi injelekha wa Yoridani, ²Ne olukhumulo olukali lwamulondakho, ne naye wavawonia eweneyo.³Avafarisayo vosi vecha khuniye, nivamukhaka, ne nivamusungila vari, nikelilaka omusacha okhulekha omukhasi wuwe khu esifunane siosi? ⁴Ne naye wavachiva wavasungila ari, Enywe simwasomakho tawe, vari ulia wavalomba mukhuchaka yalomba omusacha nende omukhasi,⁵Ne wasunga ari, Khu sifune sino omusacha alalekha papa wuwe nende mayi wuwe, ne alambaana nende omukhasi wuwe: ne vavili vano valava omuvili mulula? ⁶Khu kario sivali vavili tawe, nikakhali omuvili mulala. Khu kenako sia Nyasaye yambasiye alala, omundu yesi akhakavukhasiakho tawe.⁷Navo vamusungila vari, Nono sikila sina Musa yalaka ari ore muvwandiki ebarua yokhulekhana, ne omulukhe achee? ⁸Naye wavasungila ari, Musa sikila ovutinyu vwe emioyo kienyu yamwiyamila mulekhane nende avakhasi venyu: nikakhali sikaali kario okhurula mukhuchaka tawe. ⁹Ne navasungilanga ,Yesi yesi walalekha omukhasi wuwe, okhurusiakho ave omutamba, ne ache ayile owundi, alava ukholile ovweyi. Ne wulia yesi wulayila omukhasi wulekhilwe alava wukholile ovweyi.¹⁰Aveki vave vamusungila vari, Kava vari kavele kario akari wo omusacha nende omukhasi wuwe, sovuli ovulayi okhuyila tawe. ¹¹Nikakhali yavasungila ari, Avandu vosi sivanyala okhwiyamana nende amakhuwa kano tawe, okhurusiakho valia vahelwa okhuva vario. ¹²Sikila khuwo nende vofuchili vandi, vevulwa vario okhurula muchinda cha mayi wavo: ne khuwo nende vofuchili vandi, vakholwa ofuchili nende avandu: khandi khuvele nende ofuchili, avene velomba ofuchili sikila ovwami vwo mwikulu. Ulia wunyala wakavukula, lekha akavukule.¹³Vamurerila avana avatiti, atukhe okhuvarakho emikhono, khandi avasalile: ne aveki vave vavakondokhela. ¹⁴Nikakhali Yeso wasunga ari, Lekhana na avana avatiti, khandi mukhavakaya, okhwicha khwisie tawe: sikila ovwami vwo mwikulu no vwa avandu anga nivo. ¹⁵Ne wavarakho emikhono kikie, ne warula awenawo wachaa.¹⁶Ne, Lola, oundu mulala wecha ne wamusungila ari, Omwami omulayi, nisina esilayi sienyala okhukhola, khendukhe okhunyola ovulamu vwa mindali? ¹⁷Naye wamusungila ari, ni sikila sina walananganga esie ori omulayi? avulakhowo uli omulayi tawe okhurusiakho mulala yeng'ene, nali Nyasaye: nikakhali niwakhenyile okhwinjila muvulamu vwa mindali, linda amalaka.¹⁸Naye wamureva ari, Kalena? Yeso wasunga ari, Okhera tawe, Okhaeya tawe, Okheva tawe, Okharusia ovuloli vwo ovuveyi tawe, ¹⁹Orie papa wuwo nende mayi wuwo: nee, Oyanje omuchesa wuwo anga wamwene weyanja.²⁰Omusolili oyoo wamusungila ari, Amakhuwa kano kosi esie nakatila okhurula ovuraka vwanje okhuchilila ikulu: ni sina siendemelwe ninasio? ²¹Yeso wamusungila ari, Ewe nolenyanga okhuva omulunji, chaa ne okusie fwosi fwoli ninafwo, ne welesie avatakha, ne nawe olava nelivikhilo mwikulu: ne wiche unonde. ²²Nikakhali omusolili oyoo anga yawulila akenako, yarekukha wacha navelele: sikila yali nende emiandu eminyingi.²³Naye Yeso wasungila aveki vave ari, Kang'ali namusungilanga enywe, Vwalava ovutinyu omundu omuyinda okhwinjila muvwami vwo mwikulu. ²⁴Ne khandi namusungilanga enywe, vwalava wvangu khu ingamia okhwinjilila mutundu ye esindani, okhuvira omuyinda okhwinjila muvwami vwo mwikulu.²⁵Anga aveki vave vawulila akenako, vawuuka vavira esikelo,vasunga vari, Khukario niwina unyala wawonisivwa? ²⁶Nikakhali Yeso wavalolelela, ne wavasungila ari, Khu vandu sikanyalikha tawe; nikakhali khu Nyasaye amakhuwa kosi kanyalikha. ²⁷Petero wamuchiva ne wamusungila ari, Lola, efwe khwalekha fwosi, ne khwakhulonda ewe; nafwe khwalanyolakho sina?²⁸Ne Yeso wavasungila ari, Kang'ali navasunilanga enywe, Valia vanonda esie, muselukho lwo Omwana wo mundu alikhala khu esifumbi sio ovukhumi vuvwe, enywe mwesi mulikhala khu ofufumbi elikhumi na fuli, nomukhalakila echikholo elikhumi na chivili cha Isiraeli²⁹Ne vuli siamulala walekha echinju, nohomba avawandaye vave avasiani, nohomba avakhana vavo, nohomba papa, nohomba mayi, nohomba omukhasi, nohomba avana, nohomba emikunda, sikila elira lianje, alinyola eyimia khu yimia, ne alinyola ovulamu vwa mindali. ³⁰Nikakhali avanyingi vokhuranga valava vokhumalilikha; ne vokhumalilikha valava vokhuranga.

¹Ovwami vwo mwikulu vuvele anga omundu mulala wali mwene eyinju, warula nivwakhasia mavwivwi okhucha okhukhava avakhalavani vokhukhola emilimo mumukunda kukwe kwa emisabibu. ²Ne wayali niyakheyamana nende avakhalavani omurungo kwe dinarii ndala khuyindalo yeneyo, yavayila mumumkunda kukwe kwa emisabibu .³Ne anga muchisa chitaru chirinana yela warula, ne walola avandi vayumbile khusoko, ⁴Ne wavasungila ari; enywe mweesi chee mumukunda kwa emisabibu, ne namurunga anga kenyekhane. Ne vacha vasamula.⁵Khandi wela warula musasita wachaa ne khandi musatisa, ne wela wakhola ario. ⁶Ne anga muyisa yeelikhumi na ndala weela warula wacha, ne wanyola avandi vasinjile marumba, ne wavasungila ari, Sikila siina nomusinjila hano eyindalo yoosi marumba? ⁷Navo vamusungila vari, avulawo omundu yesi okhulangilekho emilimo tawe. Wavasungila ari, mweesi khandi chee mumukunda kwa emisabibu; khandi siosi sili sia toto, nisio sia mwalanyola.⁸Anga eyingolove yoola, omwami mwene mukunda kwa emisabibu wasungila omusinjilili wuwe ari, Langa avakhalavani, ne ovelesie omurungo kwavo, okhuchaka nende vakhamalilikha okhwicha okhwola khu vokhuranga. ⁹Ne anga veecha valia vasamula muchisa cha ekhumi na ndala, vuli siamulala yanyola edinarii ndala. ¹⁰Nikakhali anga vali vokhuranga veecha, velola vari vatukhane vanyolekho akulu; ne vuli siamulala khunivo wanyola edinarii ndala.¹¹Ne anga vali nivakhanyola omurungo kwavo, vanyunyila mwene engo, ¹²Nivasunga vari, vakhecha inyuma vakhakhola emilimo eyisa ndala, neewe uvalekhaasiye ninafwe, khukholile emilimo emikali khandi khu muvasu kweesitere.¹³Nikakhali wachiva mulala khunivo, wamusungila ari, Musale wanje, sinikhukholele amavi tawe: ewe ninasie sokhwiyamane omurungo kwe dinarii ndala? ¹⁴Vukula sili esisio, nooche: nakharunga khu vakhecha inyuma, anga enywe vusa.¹⁵Yaani esie embula ovunyali vwo okhukholela valia vali avanje anga nenyile tawe? Walanengelanga eyimoni eyimbi, sikila khuvulayi vwanje? ¹⁶Khu kario vokhumalilikha valava vokhuranga, ne vokhuranga nivo valamalilikha: kho avanyingi valangwa, nikakhali nivatiti varovolwa.¹⁷Ne anga Yeso yali nalachichanga Yerusalemi yavukula aveki vave aluveka khunjila, ne wavasungila ari, ¹⁸Lola, khwalachichanga Yerusalemi: ne Omwana woomundu alachamwa khu avasalisi ovakhongo, nende khuvandiki vamalaka, ne navo valamukhalakila okhwirwa, ¹⁹Ne navo valamuyila khu Vesivala vamukholile esienyenye, alakhupwa ofuvoko, ne vamuvambe: ne eyindalo ya khataru alasisimukha khandi.²⁰Ne mayi wa avana va Zevetayo yecha nende avana vave avasiani khu Yeso, vamwinamila, ne vali nelikomba lie likhuwa navuleve khuniye. ²¹Ne wamureva ari, Walenyanga sina? Naye wamusungila ari, Olake ori avana avanje avasiani vavili vano vekhale, mulala omukhono kukwo omusacha, ne owundi omukhono kukwo omukhasi, muvwami vuvwo.²²Nikakhali Yeso wavachiva wavasungila ari, Enywe semumanyile lia mwalasavanga tawe. Mwalanyala okhunywela musikombe siesie nanywelamo, ne mubatisiwe nende ovubatiso vwesie nabatisiwamo? Vamusungila vari, khwalanyala. ²³Ne wavasungila ari, Okhunywela musikombe kavwene mwalanywelamo, ne okhubatiswa khwa nabatisiwa mwalabatisiwa: nikakhali okhwikhala omukhono kwanje omusacha, nende omukhono omukhasi, akenako sendisie wookhuwana tawe, nilali valelesiwa valia valombelwa khale nende Papa wanje. ²⁴Ne avandi elikhumi anga vawulila vario, vava neliruma khu vawandaye vavili valia.²⁵Nikakhali Yeso wavalanga, ne wasunga ari, Mumanyile muri avami veesivala sino varukanga vali hasi wavo, ne valia vali avakhongo khunivo navo vavarukaa. ²⁶Nikakhali sekalava kario mwinywe tawe: nilali ulia yesi walenya okhuva omukhongo mwinywe, lekha ave omurumikhi wenyu; ²⁷Ne wulia yesi walenya okhuva omukali mwinywe, lekha ave omukhalavani wenyu: ²⁸Khuli Omwana woomundu siyayecha okhurumikhilwa tawe, nikakhali okhurumikha, nende okhurusia ovulamu vuvwe omurungo kwa avanyingi²⁹Ne anga vali nivalarulanga Yeriko, olukhumulo olukali lwa avandu vamulondakho. ³⁰Ne, lola, avandu vavili avavofu vali vekhali khundulo khwe eyinjila, wavawulila vari Yeso alavirilanga awenawo, valangilisia ikulu, nivasunga vari, khukholile esisa, Omwami, ewe omwana wa Daudi. ³¹Ne vomulukhumulo vavakondokhela, sikila venyanga vawolele: nikakhali kho navo vatasa okhulangilisia, nivasunga vari, Khukholele esisa, Omwami, omwana wa Daudi.³²Ne Yeso wasinjila vureke, ne wavalanga, wasunga ari, Nisina sia mwalenyanga emukholele? ³³Vamusungila vari, Omwami, khwalenyanga echimoni chefu chikukhe chilole. ³⁴Kho Yeso wavakholela esisa, ne watila khu chimoni chavo: ne avwene na avwene echimoni chavo chachaka okhulola, ne navo vamulonda.

¹Anga vali nivakhembiya okhwola Yerusalemi, ne vava vakhola Bethfage, khusikulu sie Miseituni, niwo wa Yeso yaruma aveki vave vavili, ²Navasungila ari, chee musirekelo sili evweni wenyu, ne avwene yawo mwalanyola epunda yavavoyile, nende esimosi siayo: muchikangulule, ne munderele hano. ³Ne omundu yesi wuvanalamureva siosi, musunge muri, Omwani, wunende elienya ninacho; ne avwene na avwene alachilekhula chiche.⁴Kano kekholekha, kho keche okhutukha kalia kalakaywa no omung'osi, nasunga ari, ⁵Sungila omukhana wa Zayuni, Lola, Omuruki wuwo aleechanga womuli, nomuwolu, ne wikhale khu punda, nende esimosi, omwana we punda.⁶Ne aveki vacha, ne wakhola anga Yeso yali navalakilisie, ⁷Ne varera epunda, nende esimosi siayoo, ne vachirakho echikanjo chavo, ne vekhasiakho Yeso. ⁸Ne olukhumulo olukali lwavandu vaala echinguvo chavo khunjila; ne avandi varema echisakia cha amasafu okhurula khumisala, ne vaala khunjila.⁹Ne olukhumulo lwa avandu olukali vemila evweni wuwe, ne avandi valondakho inyuma, valangilisia, nivasunga vari, eyifuma khu mwana wa Daudi: Uvele neyikhavi ulia walecha mulira lio Omwami; Eyifuma eyingali khu ulia uli ikulu wene. ¹⁰Ne anga yenjila Yerusalemi, khwali nolutiri olukali mwitokho liosi, avandu vareva vari, Wuno ni wina? ¹¹Ne vali mulukhumulo vasunga vari, Wuno ni Yeso omung'osi wa Nazareti ya Galilaya.¹²Ne Yeso wachaa wenjila mutembeli lia Nyasaye, ne wavakhuma na varusia elwanyi valia vakusiyaanga nende okhukula mwitembeli, ne wafumalikha echimesa cha vandu vafunjilangakho echirubia, nende ofufumbi fwa vakusi va ofutute, ¹³Ne wavasungila ari, Kayaandikwa kari, Eyinju yanje yalangwa eyinju yaamasayo; nikakhali enywe mukikholile okhuva elivina lia vanuuli. ¹⁴Ne avavofu na valema vecha wayali mwitembeli; naye wavawonia.¹⁵Ne anga avasalisi avakhongo nende avandiki va amalaka valola amakhuwa amakali kokhuuka kakholile, ne avana valalangilisianga mwitembeli nivasunga vari, eyifuma khu mwana wa Daudi; valola ovuvi sana, ¹⁶Ne vamusungila vari, Ewe walawulilanga kavana vano valasunganga, Naye Yeso wavasungila ari, Eeh; enywe simwasomakho vari, Okhurula mumunwa kwa avana avatiti nende valanunanga ewe walanyola eyifuma yatoto? ¹⁷Ne naye wavalekha, warula mwitokho lieneli wacha Betsania; esilo weyalisia evweneyo.¹⁸Vulano mumavwivwi anga yali nalakalukhanga mwitokho, yaulila eyinjala. ¹⁹Ne anga yalola omukhuyu khundulo khweinjila, yacha wakwali, ne sikwalikho nende eviamo tawe nilali amasafu kong'ene, ne wakusungila ari, Amatunde kosi kakhamakho khwiwe okhurulila vulano okhuchililila mindali tawe. Ne avwene na avwene yawo omukhuyu okwo kwaniala.²⁰Anga aveki vave valola elieneli, vawuuka, vasunga vari, omukhuyu kuno kunialile vwangu kuriena! ²¹Yeso wavachiva ne wavasungila ari, kang'ali namusungilanga enywe, nomuli nelisuvila, ne mulekhe okhwayaya, simwalakhola vusa lino liong'ene liakhekholekha khu omukhuyu tawe, nikakhali khandi munyala mwasungila esikulu sino muri, Siukha orulewo, ochee wisukune munyanja; kava kalava kario. ²²Ne amakhuwa kosi kosi, kamwalasava mumasayo, nomusuvile, mwalanyola.²³Ne wayali niyakhecha mwitembeli, avasalisi avakhongo nende avasakhulu vavandu vecha khuniye wayali nalekesianga, ne vamureva vari, Khuvunyali vwa wina vwewe okholanga amakhuwa kano? ne niwina wakhuwa ovunyali vuno? ²⁴Ne Yeso wavachiva wavasungila ari, Siesi khemureve esindu silala, kava mwalasungila elieneli, Nimwo anga siesi namusungila khuvunyali sina vwekholelanga amakhuwa kano.²⁵Ovunyali vwa Yohana vwo okhubatisia, vwarula hena? okhurula mwikulu nohomba vwali vwa avandu? Ne vachaka okhurevana avene khu vene, nivasunga vari, kava khwalasunga khuri, Vwarula mwikulu, alakhureva ari, nono sikila sina nomukhamusuvila? ²⁶Nikakhali khwasunga khuri, Vwa avandu; khurire avandu; sikila vuli omundu yesi wamanya Yohana yali omung'osi. ²⁷Ne vamuchiva Yeso nivasunga vari, Sokhunyala khwachiva tawe. Ne naye wavasungila ari, Akhava Esie siesi sinamusungila khuvunyali sina vwekholelanga amakhuwa kano tawe.²⁸Nikakhali mwalaparanga sina? Omundu mulala yali naavana vavili; ne wecha khu wokhuranga wamusungila ari, Mwana wanje, chaa vulano vuri mumukunda kwanje kwe misabibu okholemo emilimo. ²⁹Wamuchiva wamusungila ari, Senacha tawe: nikakhali yevaasia olunyuma wekanila, ne wacha mumukunda. ³⁰Ne omundu oyoo wecha khu wakhavili, ne wamusungila kachena kalia. Ne omwana wuno wamuchiva wamusungila ari, nachaa, papa: ne siyacha tawe.³¹Niwina khu vavili vano wakhola elienya lia papa wuwe? Vamusungila vari, Wokhuranga. Yeso wavasungila ari, Kang'ali namusungilanga enywe, Endi avasololi voovushuru nende avatamba valenjila muvwami vwa Nyasaye evweni wenyu. ³²Okhuva Yohana yecha khwinywe okhumwekesia eyinjila yovulunji, nenywe simwamusuvila tawe: nikakhali avasololi voovushuru nende avatamba nivo vamusuvila: ne enywe anga mwalola murio, simwakelawo mwekanila mani mwatukha okhumusuvila tawe.³³Rekeresia olukano lundi: Yaliwo mwene eyinju mulala, waraka emisabibu, ne wasira kwosi wakuvotokhasia, wayavamo ovwina vwo okhutinyilamo emisabibu, ne wombakha omunara,, ne naye wakotisia avalimi vandi, ne warekukha wachaa musivala sindi siaale: ³⁴Ne esikha sie elichesa anga siola, yaruma avarumikhi vave khu avalimi valia, vatukhe okhunyolakho elichesa lieneli.³⁵Ne avalimi vatila avarumikhi vave, ne voopa mulala, ne vera mulala, ne vakhupa owundi amakina. ³⁶Khandi, wela waruma avarumikhi vavirakho vukhuranga: avalimi vavakhola anga vali vokhuranga. ³⁷Nikakhali okhumalilikha khwa kosi wavarumila omwana wuwe omusiani, nasunga ari, Okhwola valelesia omwana wanje oluyali.³⁸Nikakhali anga avalimi vemisabibu valola omwana omusiani, avene varevana vari, Wuno niye mwene miandu; khuchee, khutile khumwire, nefwe khunule emiandu kikie. ³⁹Ne vamukwakho, vamusukuna elwanyi womukunda kwe misabibu, ne vamwira.⁴⁰Kho khukario wo omwami mwene mukunda kwe emisabibu alecha, alakhola sina khu avalimi valia? ⁴¹Vamusungila vari, alaveera avandu avavi avo vululu, ne alakukodisia omukunda kwemisabibu khuvalimi vandi, valamuwelesia elichesa lilie khuvise viakwo.⁴²Yeso wavasungila ari, Enywe semwasomakho mumaandiko vari, Elikina lia avombakhi valova, nilio liachena liakhava liovwalilo ovukali mumbeka: okhuno nokhukhola khwo Omwami, ne nikokhuuka muchimoni cheefu?⁴³Khu kario namusungilanga enywe, Ovwami vwo mwikulu vwalarusivwa khwinywe, ne vwelesiwe esivala sialama amatunde. ⁴⁴Ne ulia yesi walakwa khulikina lino alariokhaka: nikakhali ulia walialakwakho, lialamusia anga ovusie.⁴⁵Ne anga avasalisi avakhongo nende Avafarisayo vawulila echingano chiche, vaamanya vari uvalikho. ⁴⁶Nikakhali anga vakhava lwavamutila, varia olukhumulo lwaandu, sikila avandu vamanya vari nomung'osi.

¹Yeso wavachiva, ne wela khandi wavalakayila muchingano, nasunga ari, ²Ovwami vwo mwikulu vuvele khuli omwami wundi, walombela omwana wuwe esiselelo, ³Ne waruma avakhalavani vave vache valange valia vosi vali nivalangilwe musiselelo: ne sevayecha tawe.⁴Khandi wela waruma avakhalavani vave, nasunga ari, chee muvasungile valia valangilwe, Lola, Nilombile esiakhulia sianje: nirire echiheyi chanje nende echiwunwa chakhomela, ne vuli esindu sivele avwene: yiche mu siselelo.⁵Nikakhali valivukulila vusa okhuva eliangu, ne vuli sia mulala wacha khu yinjila yiye, mulala wacha mumukunda kukwe, owundi wacha muvukhala muvwe: ⁶Ne vasikala vatila avarumikhi vave ne vavakholela esienyenye, ne vavera. ⁷Nikakhali anga omwami yawulila ario, eliruma liamutila: newaruma avamaye vave, ne vacha vavunia avalimindi valia, vasamba nende elitokho liavo.⁸Ne wasungila avakhalavani vave ari, esiselelo sirechekhe, nikakhali valia valangilwe sevatukhane tawe. ⁹Khu kario enywe chee khu miyila, ne avanyinji vomunyola valange veche musiselelo. ¹⁰Kho avakhalavani valia varula vacha khu miyila, ne vakhung'asia avanyinji vavanyola, avavi nende avalayi: ne eyinju ye esiselelo yechula avacheni.¹¹Ne wo omwami yecha wenjila okhulola avacheni, yalolamo omundu wakhali nafwalile eyinguvo ye esiselelo tawe: ¹²Ne wamusungila ari, Musale wanje, winjile muno oriena vulali okhufwala eyinguvo ye esiselelo? Ne naye wayumba.¹³Omwami wasungila avakhalani ari, Muvowe amakhono nende ofulenge, ne mumurusie elwanyi, ne mumusukune musilima sie elwanyi; niwo wokhulila nende okhuluma ameno khuliva. ¹⁴Okhuva avanyingi valangwa, nikakhali vatiti nivo varovolwa.¹⁵Niwo anga Avafarisayo varekukha vacha, ne vachaka okhukhava eyinjila yokhumutila okhuvrira mukhulakaya khukhwe. ¹⁶Ne vamurumila aveki vavo halala nende Vaherodi, nivasunga vari, Omwami, khwamanya khuri ewe wuvele wang'ali, ne wekesianga eyinjila ya Nyasaye muvung'ali, khandi solengelanga ovukhongo vwo omundu tawe: sikila ewe sorovolanga nokavukhasia avandu tawe. ¹⁷Khu kario khusungilekho, Olola oriena? nelilaka okhurusia ovushuru khu Kayisari, no tawe?¹⁸Nikakhali Yeso wamanya echinganakani chavo echimayanu, ne wasunga ari, Sikila sina mwalakhakanga enywe avokhwikatia? ¹⁹Njekesie echirubia chomurungilanga ovushuru. Ne vamurerela elimotole.²⁰Ne wavasungila ari, esifwanani sili khwi motole lino ni sia wina ne amandiko kalikho kano nikawina? ²¹Vamusungila vari, nika kayisari. Wavasungila ari, Khu kario elesia Kayisari ofundu fuli fwa Kayisari; ne mwelesie Nyasaye ofundu fuli fwa Nyasaye. ²²Anga vawulila amakhuwa kano, vachenya, ne vamulekha, varekukha vacha wa vechila²³Indalo yeneyo Avasadukayo vamwichakho, avandu vasunganga vari okhusisimukha khuvulawo, ne vamureva, ²⁴Nivasunga vari, Omwami, Musa yasunga ari, Omundu nafwa, nakhali na avana tawe, wandaye wuwe ava alakalusia omukhasi wuwe, ne asinjisie olwivulo lwa wandaye wuwe.²⁵Vulano, ewefu khwali nende avawandaye musafu: ne wokhuranga, wayava nayilile omukhasi, yafwa, ne sikila yali asili okhwivulakho, walekhela wandaye wuwe omukhasi: ²⁶Amakhuwa kava malala vusa kario khu wakhavili yesi, wakhataru, okhwola khu wa musafu. ²⁷Ne okhumalilikha omukhasi wulia yesi wafwa. ²⁸Khu kario mulisisimukha aliva omukhasi wa wina khu vasacha musafu vano? okhuva vosi vali ninaye.²⁹Yeso wavachiva ne wavasungila ari, Mutivanga, sikila semumanyile amandiko tawe, nohomba ovunyali vwa Nyasaye. ³⁰Sikila mulisisimukha sevayilanga, nohomba sevavakhanga tawe, nikakhali vosi vavechanga anga echingelosi cha mwikulu.³¹Nikakhali okhulondokhana nende okhusisimukha khwa avandu vafwa, enywe semwasoma kalia kamwasungilwa nende Nyasaye, wayasunga ari, ³²Nisie Nyasaye wa Ibrahimu, Nyasaye wa Isaka, nende Nyasaye wa Yakobo? Nyasaye sali Nyasaye avandu vafwa tawe, nikakhali wa valamu. ³³Ne olukhumulo lwa avandu wa vawulila akenako, vawuka khu amekesio kake.³⁴Nikhali wa Avafarisayo vali nivakhawulila vari wikale eminwa kia Avasadukayo, vasololana halala okhwimonya. ³⁵Mulala khu nivo, wali niyasomela elilaka, wamureva elireva, lio okhumukhaka, nasunga ari, ³⁶Omwekesi, ne lilaka sina lili elikali khu kosi?³⁷Yeso wamusungila ari, Oyanje Omwami Nyasaye no omwoyo kukwo kwosi, nende eliva mumwoyo, nende ovuchesi vuvwo vwosi. ³⁸Lino nilio elilaka lio okhuranga khandi lili elikali khu kosi.³⁹Ne lia khavili lifwanana ninalio, Oyanje omuchesa wuwo anga weyanja wamwene. ⁴⁰Amalaka kandi kosi nende avang'osi vayetikiya khu kavili kano.⁴¹Wa Avafarisayo vali nevasololane halala, Yeso yavareva, ⁴²Nasunga ari, Mulola murie khu makhuwa ka Kristo? no omwana wa wina? Vamusungila vari, No Omwana wa Daudi.⁴³Naye wavasungila ari, nikali kario sikila sina Daudi nali mu roo yamulanga ari Omwami, nasunga ari, ⁴⁴Omwami yasungila omwami wanje ari, Yikhala oluveka lwo omukhono kwanje omusacha, okhutukha anga enda avasuku vavo hasi mufulenge fufwo.⁴⁵Nikava Daudi yamulanga ari Omwami, no omwana wuwe ariena? ⁴⁶Ne avulawo omundu wamuchiva elikhuwa liosi, nohomba okhurula eyindalo yeneyi okhuchililila avulawo omundu yesi wela wamureva amareva kosi tawe.

¹Mani Yeso walakayila olukhumulo, nende aveki Vave, ²Nasunga ari, Avandiki va amalaka nende Avafarisayo vekhalanga khu sifumbi sia Musa: ³Kosi kavamusungilanga vari mulonde, akenako londe ne mukakhole; nikakhali mukhalonda eyinjila yavo tawe: sikila vasunganga ne sivakakholanga tawe.⁴Vavowanga emikuku kisitowile kia vakhanyala okhusita tawe, ne vatiukha avandu khu maveka; nikakhali avene sivenya ata okhutilakho esitere okhukisumula tawe. ⁵Nikakhali emilimo kiosi kiavakholanga venyanga avandu vavalole: vandikanga amandiko amavalayi ke elilaka elikhale khu fulemba fwe emirwe kiavo nende khu emisipi kia amaselo kia vevoyanga, ne vavavalayisia amakemo ke emikhono ke echinguvo chavo.⁶Ne khandi vayanja okhwikhala khu ofufumbi fwe evweni nivali mumilukha kio ovulilo, nende okhwikhala khu fufumbi ofukali fwe evweni nivali muchisinagogi, ⁷Nende okhukhesivwa emilembe nivali khu chisoko, khandi avandu nivavalanga vari, Rapi, Rapi.⁸Nikakhali enywe mukheyama okhulangwa vari Rapi tawe: sikila Omwami wenyu ni mulala, nali Kristo; nenywe mwesi muvele avawandaye. ⁹Ne mukhalangakho omundu yesi musivala muno muri papa tawe: sikila Papa wenyu ni Mulala, wuli mwikulu. ¹⁰Nohomba mukhalangwa vari avami tawe: okhuva wuwo mulala wuli Omwami wenyu, niye Kristo.¹¹Nikakhali wulia wuli omukali mwinywe niye walava omurumikhi wenyu. ¹²Ne wulia yesi waleninia omwene alekhisivwa; ne wulia omwene waletutuya alachingulwa.¹³Nikakhali nesilamo khwinywe, Avandiki nende Avafarisayo, vokhwikatia! okhuva mwikalilanga ovwami vwo mwikulu khu vandu: okhuva mwavene semwinjilanga mukari tawe, nohomba semwikulilanga valenyanga okhwinjila vache mukari tawe. ¹⁴Nesilamo khwinywe, avandiki nende Avafarisayo, vokhwikatia! okhuva mwalenjililanga echinju cha avanamulekhwa, ne mukhwikholokhosia, musala amasayo amarambi: khu kario mwalakhalakilwa vululu. ¹⁵Nesilamo kwinywe, avandiki nende Avafarisayo, vokhwikatia! okhuva muyiyananga khu nyanja ne khwilova nomukhava okhulomba omundu mulala ave omulondi wenyu, ne nimwakhamunyola, mumukhola okhuva omwana wo musiatisi mara khavili okhuvira anga mwavene muli.¹⁶Nesilamo khwinywe, enywe avemilisi avavofu, musunganga muri, omundu yesi walechuvila khu litembeli, avula ovuvi tawe, nikakhali wulia yesi walechuvila khu etsahabu ye elitembeli, alava nelikofi! ¹⁷Enywe avayingwa nende avavofu: nisina sili esikali, etsahabu noho elitembeli litakasanga etsahabu?¹⁸Ne, wulia yesi walechuvila avwali, elikhuwa liva livulawo; nikakhali wulia yesi walechuvila esiyanwa sili khu vwali, alava namakoso. ¹⁹Enywe avayingwa nende avavofu: ni sina sili esikali, esiyanwa, noho novwali vutakasanga esiyanwa?²⁰Wulia yesi khu kario walechuva khu vwali, alava wichuvile ovwali, nende ofundu fwosi fuva nofulikho. ²¹Ne wulia yesi walechuva khwi tembeli, alava wichuvilekho, nende khu Wulia wamenyamo. ²²Ne wulia walechuvila elikulu, alava wichuvile khu sifumbi sio ovwami vwa Nyasaye, nende khu Wulia wikhalangakho.²³Nesilamo khwinywe, avandiki nende Avafarisayo, vokhwikatia! okhuva murunganga esitonye sie elikhumi sie eminana nende sio omudalasini nende echira, ne mulekha kali novusiro ovukali, vwe elilaka, elikhalakilwa, echimbavasi, nende elisuvila: kamwenyekhana muve nimwakhola, nende vulali okhulekha okhukhola akandi tawe. ²⁴Enywe avemilisi avavofu, vachichunganga oluvukha, ne vamila eyingamia.²⁵Nesilamo khwinywe, avandiki nende Avafarisayo, vokhwikatia! okhuva musinganga esikombe nende ebakuli oluveka lwe elwanyi, nikakhali mukari mwayechulamo ovunuli nende ovulianga. ²⁶Enywe Avafarisayo avavofu, chaka okhusinga esikombe ne bakuli norusia fuli mukari, kho fulave fwosi elwanyi.²⁷Nesilamo khwinywe , avandiki nende Avafarisayo, vokhwikatia! okhuva muvele anga ofulindwa fwavavakha ovuwanga, elwanyi fulolekhana ofulayi, nikakhali mukari nofukumba fwa avandu vafwa, nende ovuchafu vwa lukano na lukano. ²⁸Niwo anga mwesi mulolekhananga okhuva avalunji nomuli elwanyi na avandu, nikakhali mukari mwayechulamo okhwikatirisia nende ovwononi vwe elilaka.²⁹Nesilamo khwinywe, avandiki nende Avafarisayo, vokhwikatia! sikila mwombakha ofulindwa fwa avang'osi, ne mwang'ona ofulindwa fwa avalunji. ³⁰Ne musunga muri, nikhwakhavere muchindalo chali cha avapapa vefu, sikhwakheyamane ninavo khukhuchukha amavanga ka avang'osi tawe. ³¹Awenawo mwalerusianga mwevene ovuloli, vari muvele avana va vandu vera avang'osi.³²Nakhechusie vulano esikelo sia avapapa venyu. ³³Enywe echinjukha, olwivulo lwe echikhalasima, mwalefuvarula muriena okhurula mulikhalakilwa lia musiatisi?³⁴Khu kario, lola, namurumila avang'osi nende avandu vovuchesi, nende avandiki: ne valalakho mwalavera no muvavamba; ne avandi khu nivo mwalavopela musinagogi chenyu, ne mwalavakhupia khusivi okhurula mwitokho lilala okhucha mwitokho lindi: ³⁵Kho keche khwinywe amavanga ka avalunji vosi ka mwachukha khusivala, okhuchakila amavanga ko omulunji Apili okhwola khumavanga ka Zakaria omwana wa Barakia, wamwerira akarikari we elitembeli nende ovwali. ³⁶Kang'ali namusungilanga, Amakhuwa kano kosi kalecha khu olwivulo luno.³⁷Ee Yerusalemi, Yerusalemi, ewe omwiri wa avang'osi, nokhupa na amakina valia varumwangwa khwiwe, na amakhavi kenga kanenya okhuvakura avana vavo alala, anga eyinyafusi yikuranga ofuminywi fwayo alala hasi we echimbaa chayo, ne nywe semwayenya tawe! ³⁸Lola, eyinju yenyu yamusikalila eyikhaya. ³⁹Sikila namusungilanga, Semwalandolakho khandi tawe okhurula vulano okhuchililila, okhutukha womulisunga muri, Wuvele novukasu wulia walecha mulira lio Omwami.

¹Ne Yeso warula elwanyi ,warekukha okhurula mu litempeli: ne aveki vave vecha okhumwekesia ovumbakhi vwe chinju che litempeli. ²Yeso naye wavasungila ari, Enywe semwalalolanga amakhuwa kano kosi tawe? kang'ali namusungilanga, Livulawo elichina ata lilala lilalekhwa khu lindi, likhalalekha okhukwisivwa hasi tawe.³Ne wayali niyekhale khu sikulu sie mizeituni, aveki vave vamwichila muvwikisi, nivasunga vari, Khusungilekho, amakhuwa kano kalava lina? ne sina sialava esimanyikhilo sio okhwicha khukhwo, nende sio okhumalilikha khwe esivala? ⁴Ne Yeso wavachiva wavasungila ari, Mwilinde omundu yesi akhamuveya tawe. ⁵Okhuva avanyingi valechela mu lira lianje, nivasunga vari, Nisie Kristo; mani valaveya avanyinji.⁶Ne enywe mulawulila amakhuwa akokhulwana nende okhurumbulwa khu ko ovulwani: mulole mukharengesivwa tawe: okhuva amakhuwa kano kosi kalecha okhuvira, nikakhali okhumalilikha khwako khwalava khusili. ⁷Sikila esivala silala sialacha siupane ne sivala sindi, ne ovwami vulala vwalacha vupane nende ovwami vundi: ne khwalavawo nende eyinjala, nende ovulwale vwo okhwafiana, esivala silarenga, muchimpeka lukano na lukano. ⁸Kano kosi kalava okhuchaka khwe esivela.⁹Niwo anga valamuveyela nivamuyila musinyasio, ne valamwira: ne ofuvala fwosi fwalamulova sikila elira lianje. ¹⁰Ne niwo wavanyingi valesikirala, ne valachamana mulala khu wundi, nende okhusilana. ¹¹Khandi avang'osi vovuveyi avanyinji valarulira, mani valaveya avanyinji.¹²Ne sikila ovwononi vulatasikha, ovuyanji vwa avandu avanyingi vulatitiya. ¹³Nikakhali wulia walefwila okhwola okhumalilikha, niye mulala chena alawonisivwa. ¹⁴Ne amakhuwa amalayi kano ko ovwami kalelwachwa mulilova liosi okhuva ovuloli khu fuvala fwosi; kho okhumalilikha khwiche.¹⁵Khu kario wamulilola esindu sio okhwonona nende okhusinya, kalakaywa nende omung'osi Danieli, nisisinjile avutakatifu, (wulia walasomanga, lekha awulile:) ¹⁶Lekha valia vali Yudeya velukhile mufukulu: ¹⁷Wulia wuli khunju ikulu akhekha wacha okhurusia esindu siosi munju yiye tawe: ¹⁸Nohomba wulia wuli mumukunda akhakalukha munju okhuvukula echinguvo chiche tawe.¹⁹Ne vuliva ovutinyu khu valia valiva neyindana, nende okhu valia valiva nivalanunianga echindalo chilia! ²⁰Nikakhali enywe sale muri, okhwilukha khwenyu khukhava muchindalo cho ovunyifu tawe, nohomba khu yindalo yelisabato tawe: ²¹Sikila echindalo chenecho chiliva chesinyasio esikali, chisili okhulolekhanakho okhurula mukhuranga khwe esivala okhwola vulano vuri, tawe, namwe sichilicha chela charulila. ²²Ne echindalo echo chalekha okhwimbiyiswa, sivulawo esindu siosi siomuvili siliwonisivwa tawe: nikakhali sikila avarovole echindalo chilia chilititiyisivwa.²³Kho omundu yesi namusungila ari, lengela, Kristo uvele hano, nohomba yawo; mukhasuvila akenako tawe. ²⁴Sikila valecha okhurulila Kristo avanyingi, nende avang'osi vovuveyi, ne valekesia ofulolesio ofukali nende kokhuchenya; khu sikelo vari, nikakhanyalikhe, vaveye hata avarovole. ²⁵Lola, ninyowile okhumusungila nikasili okhurulila.²⁶Khu kario nivamusungila vari, Lola, wuvele musiangalamwe; mukharula mwacha tawe: lola wikisile muyinju mukari; mukhakasuvila tawe. ²⁷Anga olweni lwenukhanga okhurula evukwe, ne lwakha nolucha mumbo; niwo anga okhwicha khwo Omwana wo omundu khuliva. ²⁸Sikila avundu wosi wesolo yifwile yili niwo wechingosia chivunjelesianga alala.²⁹A wene na wene wechindalo chesinyasio chilia chiliwa vusa chiri eliuva lilima, ne omwesi kulisima, ne eching'iniesi chilikwa okhurula mwikulu, ne ovunyali vwo mwikulu vulirengechisivwa.³⁰Ne niwo we esilolesio sio Omwana wo omundu silalolekha mwikulu: ne echikholo chosi cho musivala chililila, ne chililola Omwana wo omundu niyechela mumalesi ko mwikulu mu vunyali nende muvukhumi ovukali. ³¹Ne aliruma echingelosi chiche no omuwumo omukali kwe esichiliva, ne valivunjelesia alala avarovole vave okhurula muchimpeka chine che esivala, okhurula oluveka lulala lwe likulu okhwola oluveka lundi.³²Vulano mweke elieko lio olukano lwo omusala omukhuyu; Wokuchakanga okhwama echisakia echindoro, nende kuchaka okhwama amasafu, mumanyanga muri esimiyu sikana okhuchaka: ³³Khu kario enywe mwesi, lwamulalola kano kosi, mumanye muri kavele ahembi, amuliango.³⁴Kang'ali namusungilanga, Eselukho yino siyilavura tawe, okhutukha wa amakhuwa kano kosi kecha okhwikholekha. ³⁵Elikulu ne elilova vialecha okhuwawo, nikakhali amakhuwa kanje sekaliwawo tawe.³⁶Nikakhali eyindalo yilia ne yisa avulawo yesi wumanyile tawe, tawe, ata echingelosi cho mwikulu sechimanyile tawe, nakhali Papa wanje yeng'ene.³⁷Khuli echindalo chali cha Nuhu, niwo anga okhwicha khwo Omwana wo omundu khuliva. ³⁸Anga muchindalo cha amachi kali nikasili okhwichula musivala valichanga nende okhunywa, vayilanga nende nivavakha, okhwola eyindalo ya Nuhu yenjila musafina, ³⁹Ne sia vamanya tawe okhwola anga amachi kecha kechula, kavasita kavayila vosi; niwo anga okhwicha khwo Omwana wo omundu khuliva.⁴⁰Niwo anga avandu vavili valiva mumukunda; mulala alivukulwa, ne owundi alisikala. ⁴¹Avakhasi vavili valiva valasiechanga mulukina; mulala alivukulwa ne owundi alisikala. ⁴²Khu kario mwikhale meeso: sikila simumanyile eyisa yo Omwami wenyu alicha tawe.⁴³Nikakhali manye lino, muri mwene eyinju niyakhamanyile echisa cho omunuli alechela, yakhekhale meeso, ne siyakhalekhile vapomole munju mumwe tawe. ⁴⁴Khu kario mwesi mwikhale vureke: sikila khu chisa chomukhalaparanga tawe nicho cho Omwana wo omundu alecha.⁴⁵Khu kario nomurumikhi wulena omusuvilifu khandi uli omuchesi, wo omwami yarovola okhusinjirila eyinju yiye, yelesie avandu esiakhulia khu sikha sienyekhane? ⁴⁶Wune eyikhavi omurumikhi wulia, wo omwami wuwe alecha anyole nalakholanga ario. ⁴⁷Kang'ali namusungilanga, Endi ava alamukhola okhuva omwimilisi we emiandu kikie kiosi.⁴⁸Nikakhali kava vari omurumikhi omuvi mwenoyo alasunga mumwoyo kukwe ari, Omwami wanje wuchelewe okhwicha; ⁴⁹Ne achake okhukuluma avarumikhi vasie, khandi achake okhulia nanywa nende avamesi; ⁵⁰Omwami wo omurumikhi wulia alicha eyindalo yakhalaparanga ari alecha tawe, khandi khu yisa yakhamanyile tawe, ⁵¹Ne alimukhalakamo akarikari, ne amwelesie esitonye sisie halala nende avekatilisi: khuliva nokhulila nende okhuluma ameno.

¹Niwo wo ovwami vwo mwikulu vulifwanilisivwa khu avakhana avachima elikhumi, vavukula echitaa chavo, ne vachaa okhwakanila omusacha wesiselelo. ²Ne varano khu nivo vali avachesi, ne varano vandi vava avayingwa. ³Valia vali avayingwa vavukula echitaa chavo, vulali okhuvukula nende amafura tawe: ⁴Nikakhali vali avachesi vavukula amafura muchichupa halala nende echitaa chavo.⁵Lwa omusacha we esiselelo yachelewa okhwicha, vosi vawungula ne vakona. ⁶Ne musilo akarikari, khwava nomulango, Lola, omusacha wesiselelo alechanga; rula elwanyi muche mumwakanile.⁷Avakhana avachima valia vosi vavukha, ne vafia echitaa chavo. ⁸Ne valia vali avayingwa vasungila vali avachesi vari, Khuwekho amafura kenyu matiti; okhuva echitaa chefu chisimile. ⁹Nikakhali vali avachesi vavachiva, nivasunga vari, Sikalava kario tawe; sekalakhwola efwe ninanywe tawe: vwalava ovulayi muche khu vakusianga, ne mwavene mwikulile.¹⁰Ne lwavali nivachile okhukula, omusacha wesiselelo yecha; ne valia vali niverechekhe vacha venjila ninaye musiselelo: ne omuliango kwekalwa. ¹¹Olunyuma avakhana vandi avachima valia vecha, vasunga vari, Omwami, Omwami, khwikulile. ¹²Nikakhali naye wavachiva wavasungila ari, Kang'ali Namusungilanga endi, Semumanyile tawe. ¹³Khu kario yikhala vureke, sikila simumanyile eyindalo nohomba eyisa yo Omwana wo omundu alechela tawe.¹⁴Ovwami vwo mwikulu vuvele anga omundu walachichanga khuluchendo lwe esivala siahale, walanga avakhalavani vave, ne wavahelesia emiandu kikie. ¹⁵Yelesia mulala echitalanta chirano, welesia owundi chivili ne welesia owundi ndala; yelesianga vuli sia mulala okhulondokhana nende amani kake; ne warekukha wacha khuluchendo. ¹⁶Wulia wali niyelesivwe echitalanta chirano yachikholela ovukhala, ne charera ovukhala vwe echitalanta chindi chirano.¹⁷Wulia yesi welesivwa chivili, yachikholela ovukhala, charera ovukhala vwe echindi chivili. ¹⁸Nikakhali wulia wavelesia ndala yacha ne wayava hasi mwilova, ne wakisamo echirubia cho omwami wuwe.¹⁹Wesikha esirambi siavira omwami wa avakhalavani valia yakalukha, ne wachaka okhukhola esavu ninavo. ²⁰Ne wulia wayelesia echitalanta chirano wecha ne watasakho echindi chirano, nasunga ari, Omwami, wandekhela echitalanta chirano: lola, nanyolelekho ovukhala vwa echitalanta chindi chirano khwikulu. ²¹Omwami wuwe wamusungila ari, Orio muno, ewe omukhalavani omulayi khandi omusuvilifu: ewe wavele omusuvilifu khu fundu futiti, vulano nakhura ove omwimilisi wo ofundu ofunyingi: yinjila muvusangafu vwo omwami wuwo.²²Wulia yesi wavalekhela echitalanta chivili yecha ne wasunga ari, Omwami, wandekhela echitalanta chivili: ne lola, natasa ovukhala vwe echitalanta chindi chivili khu chilia chawandekhela. ²³Omwami wuwe wamusungila ari, Orio muno, omukhalavani omulayi khandi omusuvilifu; wavele omusuvilifu khu fundu futiti, nakhura ove omwimilisi wofundu ofunyingi: yinjila muvusangafu vwo omwami wuwo²⁴Wulia wavelesia etalanta ndala yecha ne wasunga ari, Omwami, Nakhumanya endi ewe wuvele omundu omutinyu, ofunanga wokharakile tawe, ne wanulanga wokhavakale tawe: ²⁵Ne nali novuri, nacha ne nakisa etalanta yiyo mwilova: lola, niyo njeyo yoli ninayo yeneyo.u²⁶Omwami wuwe wamuchiva wamusungila ari, Ewe omukhalavani omumayanu khandi omutofu, ewe wamanya ori Esie efunanga wekharakile tawe, ne nanulanga wekhavakale tawe. ²⁷Khu kario wakhavukule echirubia chanje welesie vekopianga echirubia, ne anga nakhakalukhe nakhanyolile echirubia chanje novukhala khwikulu.²⁸Khu kario vukule etalanta ndala yali ninayo yeneyo, ne mwelesie wulia wuli ninacho elikhumi. ²⁹Sikila khu wulia wuli ninafwo alataswa, ne alava ninafwo muvunyingi: nikakhali khu wulia wuvula ata alanulwa sititi siava nali ninasio. ³⁰Ne musukune omukhalavani wuvula ovukhala wulia elwanyi musilima: niyo wokhulivayo okhulila nende okhuluma ameno.³¹Lwa Omwana wo omundu alicha muvukhumi vuvwe, nende echingelosi echinjenukhu chosi halala ninaye, niwo anga alikhala khu sifumpi sio ovuruki vwo ovukhumi vuvwe. ³²Ne evweni wuwe ofuvala fwosi fuliva fusololane: ne naye aliawukhasia mulala okhurula khu wundi, anga omwayi yawukhasianga amachese kake okhurula mumavusi: ³³Ne alira amachese omukhono kukwe omulunji, nikakali amavusi alikara omukhono omukhasi.³⁴Niwo wo Omwami Omuruki alisungila vali omukhono kukwe omulunji ari, Yiche, enywe mwakasichwa nende Papa wanje, munyole omwandu kwo ovwami vwa mwalombelwa okhura mukhuranga khwe esivala: ³⁵Sikila nali neyinjala, ne nanywe mwamba esiakhulia: Nali novulesio, ne nanywe mwamba nanywa: Nali omucheni, nanywe mwanjinjisia: ³⁶Nali esiekenye, nanywe mwafwala: Nali omulwale, nanywe mwecha mwangonya, nali musivowe, nenywe mwecha mwandola.³⁷Niwo wavalunji valimuchiva, ni vasunga vari, Omwami, ni lina wakhwakhulola noli ne eyinjala, ne khwakhulisia? nohomba ni lina wawali novulesio, ne nafwe khwakhuwelesia sionywa? ³⁸Ni lina wakhwakhulola noli omucheni ne nafwe khwakhwinjisia? nohomba wali esiekenye lina ne efwe khwakhufwala? ³⁹Nohomba ni lina wakhwakhulola noli omulwale, nohomba noli musivowe, nefwe khwecha okhukhukonya? ⁴⁰Ne niwo wo Omwami Omuruki alichiva ne avasungile ari, Kang'ali namusungilanga, Kalia kosi kamwakholela mulala khu vawandaye vanje avatiti vano, mwakholelanga esie.⁴¹Niwo khandi walisungila vali omukhono kukwe omukhasi ari, Rula evweni wanje, enywe mwalamwa, muche mumuliro kwa mindali, kwalombelwa shetani nende echingelosi chiche: ⁴²Sikila nali neyinjala, ne semwayamba esiakhulia tawe: Nali novulesio, ne semwayamba sienywa tawe: ⁴³Wanali omucheni, semwayanjinjisia tawe: wanali esiekenye ne semwayafwala tawe: wanali omulwale, ne nava musivowe, semwayecha okhungonyakho tawe.⁴⁴Navo vosi valimuchiva, nivasunga vari, Omwami, ni lina wakhwakhulola noli eyinjala, nohomba noli novulesio, nohomba noli omucheni, nohomba noli omulwale, nohomba noli musivowe, wakhwalekha okhukhurumikhila? ⁴⁵Niwo walivachiva, nasunga ari, Kang'ali namusungilanga, anga mwakhakholela mulala khu avatiti vano, semwayakholela tawe. ⁴⁶Ne vano vosi valicha musinyasio sia mindali: nikakhali khu valunji valicha muvulamu vwa mindali.

¹Ne kecha kava vari, lwa Yeso yali niyakhamala okhusunga amakuwa ako kosi, yasungila aveki vave ari, ²Mumanyile muri khu lwe echindalo chivili kwalava omulukha kwe epasaka, ne Omwana wo omundu alachamwa okhwola avambwe.³Niwo wavasalisi avakhongo vevusia halala, nende avandiki va amalaka, nende avasakhulu avemilisi va avandu vecha halala mulichipi lio omusalisi omwimilisi omukhongo wavalanganga vari Kayafa. ⁴Ne valomba etolondo anga vanyala khutila Yeso munjila yo vuvacha, ne vamwire. ⁵Nikakhali vasunga vari, Yikhava khu yindalo yo omulukha tawe, khukhecha khwava nolutiri muvandu tawe.⁶Wa Yeso yali nali Bethani, munju ya Simoni wa amachele, ⁷Omukhasi wava nasitile esivowo sia amafura kawunyanga ovulayi ko ovukusi vwe yikulu yecha wa Yeso yali, ne wamuchukha khu murue, khuli yava niyekhale nalalichanga. ⁸Nikakhali anga aveki vave valola vario, vasinyikha, vasunga vari, Esifunane sia asara yino yosi ni sina? ⁹Amafura kano vakhakusie echirubia echinyinji vayete avatakha.¹⁰Khuli Yeso yamanya, yavasungila ari, Mulanyakhasianga sina omukhasi wuno? okhuva wukholile emilimo emilayi khwisie. ¹¹Sikila muvechanga navatakha vuli lwosi; nikakhali semwalava ninasie vuli lwosi tawe.¹²Esifunane sia niye okhuchukha amafura khu muvili kwanje, sivele okhurechekha okhuyavilwa khwanje. ¹³Kang'ali navasungilanga, Avundu wosi wa amakhuwa amalayi kalelwachivwa musivala siosi, esikholwa sino siosi, sio omukhasi wuno akholile, siakhasungwe khumwichulila.¹⁴Mulala khu aveki vave elikhumi na vavili, wa valanganga vari Yuda Isikarioti, yacha khu avasalisi avakhongo, ¹⁵Ne wavasungila ari, Mwalamba sina, ne nasie namura mumikhono kienyu? Ne vakhola eyindakano ninaye yo ofupande amakhumi kataru fwe efetha. ¹⁶Ne okhuchakila esikha sienesio wachaka okhukhava ovwiyangu vwo okhumuchama.¹⁷Vulano we eyindalo yo omulukha kwe emikati kia vakhareremo elimela aveki vecha khu Yeso, nivamusungila vari, Ni hena wolenyanga khuche khurechekhe wolalila elipasaka? ¹⁸Ne naye wavasungila ari, Chee mwitokho khu omundu navuleve, ne mumusungile muri, Omwami alasunganga ari, Esikha sianje simpiye; Nakholela munju yiyo elipasaka na aveki vanje. ¹⁹Ne aveki vakhola khuli Yeso yali navalakile; ne valomba elipasaka.²⁰Vulano we ingolove yola, yekhala hasi na aveki vave elikhumi na vavili. ²¹Ne wavali nevalalichanga, yavasungila ari, Kang'ali namusungilanga, mulala khwinywe alanjama. ²²Ne vava ne esivela esikali, vachaka okhumureva vuli sia mulala vari, Omwami, nisie?²³Naye wavachiva ne wavasungila ari, Wulia walatonganga ninasie mu bakuli, niye walanjama. ²⁴Omwana wa Adamu alacha anga yandikilwa: nikakhali vwalava ovutinyu khu mundu wulia walachama Omwana wo omundu! vwakhavele ovulayi khu mundu mwenoyo niyakhevulwe tawe. ²⁵Ne Yuda, wulia wamuchama, wamuchiva ne wamusungila ari, Omwami, nisie? Naye wamusungila ari, Wamwene wakhasunga.²⁶Ne anga vali nevalalichanga, Yeso yavukula omukati, ne wakukasicha, wakutonya, welesia aveki vave, ne wasunga ari, Vukule, mulie, kuno nomuvili kwanje.²⁷Ne wavukula esikombe, ne wakhupa orio, ne wavawelesia, nasunga ari, Nywelemo enywe mwesi; ²⁸Okhuva kano niko amavanga kanje ke eyindakano eyimpia, kayombokha sikila avanyingi vatukhe okhuvelwa ovwoni. ²⁹Nikakhali namusungilanga, sinanywakho khandi amatunde ko omusapipu kuno tawe, okhwola eyindalo yilia wendinywa ovuya wendiva ninanywe mu vwami vwa Papa wanje.³⁰Ne wavali nivakhemba olwimbo lwo okhusala, varula vacha musikulu sie Miseyituni. ³¹Niwo wa Yeso yavasungila ari, Enywe mwesi mwalesikirala sikila esie esilo sia vulano: sikila kayandikwa, Nakhupa omwayi, ne amachese ke elituli kalasalanila vuli avundu. ³²Nikakhali wanava ninakhasisimukha khandi, Nemila enjee evweni wenyu Kalilaya.³³Ne Petero wamuchiva wamusungila ari, Ata kava vari avandu vosi valesikirala sikila ewe, esie senyala okhwisikirala tawe. ³⁴Yeso wamusungila ari, Kang'ali nakhusungilanga, Endi esilo sia vulano vuri, etwaya nesili okhukholiokha, ewe olanjikana okhula khataru. ³⁵Petero wamusungila ari, Khukhava okhufwa nafwa ninawe, nikakhali senyala okhukhwikana ewe tawe. Aveki vosi valakaya vario.³⁶Yeso wela wecha ninavo avundu wa valanganga vari Gethesemani, ne wasungila aveki vave ari, Enywe yikhale hano, Esie nisendekho avweni enje esale. ³⁷Ne wavukula Petero nende avana avasiani vavili va Zevetayo, wachaka okhuvelela nende okhuva novusiro mumwoyo. ³⁸Niwo wayavasungila ari, Omwoyo kwanje kuvelele okhuvira esikelo, khu sikha sio okhufwa: enywe sikala hano, ne muve meeso mulilinda ninasie.³⁹Ne naye wesenda avweni khu nivo, ne wasikama mafumama, ne wasala, nasukanga ari, Aa Papa wanje, nikakhanyalikhe, lekha esikombe sino sirule evweni wanje: nikali kario kakhava anga nenyanga tawe, nikakhali khuli anga elienya lilio lili. ⁴⁰Ne wecha wa aveki vave vali, ne wavanyola valakonanga, ne wasungila Petero ari, Ni sina, yani sonyala okhuva mulilinda ninasie khu lwe eyisa ndala tawe? ⁴¹Mulinde ni musala, kho mulekhe okhwinjila mumakelicho : kang'ali omwoyo kulenyanga, nikakhali omuvili kutorire.⁴²Wela wacha lukhola khavili, ne wasala, nasunga ari, Aa Papa wanje, nikava vari esikombe sino sisilarula evweni wanje tawe, okhwola esinywelemo, elienya lilio likholekhane. ⁴³Wela wecha ne wavanyola nivakonile khandi: sikila echimoni chavo chali ne chindolo. ⁴⁴Ne wavalekha, wela wacha khandi, ne wasala lukhola khataru, nasunga amakhuwa malala kalia.⁴⁵Wayecha wa aveki vali, ne wavasungila ari, vulano kone ne mwimunye: lola, eyisa yakhembiya, ne Omwana wo omundu wuchamilwe mu mikhono kia avononi. ⁴⁶Vukhe, khuchake okhucha: lola wuvele ahembi wulia wulanjama.⁴⁷Ne wayava nasilakayanga, ngwoyo, Yuda, mulala khu valia elikhumi na vavili, wecha, ne halala ninaye lwali olukhumulo olukali vali nechimpanga nende ofukong'o, okhurula khu vasalisi avakhongo nende avasakhulu avemilisi va avandu. ⁴⁸Vulano wulia wamuchama yavehelesia esimanyikhilo, nasunga ari, omundu wulia wanachunjuna oluseya, alava niye: mutile wangu⁴⁹Ne wecha wechoma khu Yeso, ne wasunga ari, Woluyali, omwami; ne wamuchunjuna khu luseya. ⁵⁰Naye Yeso wamusungila ari, Omusale, khola lia wichile okhukhola. Valia vecha, vatila Yeso, ne vamuvukula.⁵¹Ne, lola, mulala khu valia wali nende Yeso wanyila omukhono kukwe, ne wachomola olupanga lulwe, ne warema elirwi lio omukhalavani wo omusalisi omukhongo liakwa. ⁵²Niwo wa Yeso yamusungila ari, Kalusia olupanga lulwo musivavi sia lwo: sikila valia vosi vasitanga olupanga valivunila khulupanga. ⁵³Olalolanga kama senyala nasala Papa wanje eyisa yino, ne anyala wambelesia ofukosi fuvira elikhumi na fuvili fwe echingelosi che eliye? ⁵⁴Nikakhali amaandiko kalatusivwa kariena, ne kano niko kakhoyele kekholekhe?⁵⁵Khu yisa yene yilia Yeso yasungila olukhumulo ari, Enywe mwichile khuli vachile okhutila omwifwi, ne echimpanga nende ofukong'o, okhundila esie? Senayekhalenge ninanywe vuli eyindalo nemusomia mwitembeli, ne semwayandila tawe. ⁵⁶Nikakhali kano kosi kekholekhe, kho amaandiko ka avang'osi katukhe okhwikholekha. Niwo wa aveki vave vosi vamulekha, ne velukha.⁵⁷Ne valia vali nivatilile Yeso vamuyila khu Kayafa omusalisi omwimilisi, wa avandiki va amalaka nende avasakhulu vali ni vasololane. ⁵⁸Nikakhali Petero yakendelanga hale inyuma wene okhutukha anga vola mwichipi lio omusalisi omwimilisi, wenjila mukari, ne wekhala navarumikhi, alole okhumalilikha khwako.⁵⁹Vulano avasalisi avakhongo, nende avasakhulu, nende avayali, vakhava vokhurusia ovuloli vwo ovuveyi esinyuma nende Yeso, kho vatukhe okhumwira; ⁶⁰Ne sevanyola ovuloli vwosi tawe: kakhava vari, vokhurusia ovuloli vwo ovuveyi avanyingi vecha, sevanyola wuli novusiro tawe. Okhumalilikha vechawo okhurusia ovuloli vwo ovuveyi vavili, ⁶¹Ne vasunga vari, Omundu wuno yasunga ari, Esie enyala okhukwisia elitembeli lia Nyasaye, ne eliumbakhe khu chindalo chitaru.⁶²Ne omusalisi omwimilisi wasinjila, ne wamusungila ari, Solachivanga esindu tawe? ni sindu sina sia avaloli vano valasunganga khwiwe? ⁶³Nikakhali Yeso yawolela vusa. Ne omusalisi omwimilisi wachiva wamusungila ari, Nakhulamilisianga khu Nyasaye wumenyanga, endi ewe okhusungile noli Kristo, Omwana wa Nyasaye. ⁶⁴Yeso wamusungila ari, Niwe wakhasunga: kakhava kario namusungilanga endi, Okhuchakila hano mulalola Omwana wo omundu niyekhale omukhono omulunji kwo ovunyali, ne nalechanga mumalesi ko mwikulu.⁶⁵Niwo wo omusalisi omwimilisi yarandula echinguvo chiche, nasunga ari, wakhalakaya kesifwavi; ni vuloli sina ovundi vwa khwalenya? lola, vulano fwesi khwakhawulila kesifwavi sisie. ⁶⁶Mulola murie? Vachiva vasunga vari, wunyolekhe na amakoso ko okhwirwa.⁶⁷Niwo anga vamufucha mumoni, ne vamukhupa echingumi; ne avandi navo vamukhupa echikhofi, ⁶⁸Nivasunga vari, Khurusilie ovung'osi, ewe Kristo, okhusungile niwina wakhakhupa?⁶⁹Vulano Petero yali wikhale elwanyi we elichipi: ne omwana omukhana wecha wa yali, nasunga ari, Ewe wesi wavele nende Yeso wa Galilaya. ⁷⁰Nikakhali wekana evweni wavo vosi, nasunga ari, Esie semanyile kolasunganga tawe.⁷¹Ne wayali niyakharula elwanyi musilivwa, omukhasi wundi wamulola, ne wasungila avandu valiwo ari, Omundu wuno yesi yavele halala nende Yeso wa Nazareti. ⁷²Ne khandi wela wekana mulichuva ari, semanyile omundu wuno tawe.⁷³Ne khu sikha sititi vali nivasinjile ahembi ninaye vecha wayali, ne vasungila Petero vari, Kang'ali kene ewe wesi wuvele mulala khu nivo; sikila ata okhulakaya khwene khulekesianga. ⁷⁴Niwo wayachaka okhwilamilisia niyechuva, nasunga ari, semanyile omundu wuno tawe. Ne awene na awene etwaya yakholiokha. ⁷⁵Ne Petero wechulila elikhuwa lia Yeso, lia yamusungila ari, Etwaya nesili okhukholiokha, wakhanjikana khataru. Ne warula elwanyi, ne walila neliruma.

¹Wa mavwivwi yali niyakhola, avasalisi avakhongo nende avasakhulu avemilisi va avandu vachaka okhupanga esinyuma nende Yeso khuli valamwira: ²Ne wavali nivakhamuvowa, vamuvukula vacha ninaye, ne vamuyila khu Pontiasi Pilato wali kavana.³Ne Yuda , wali namuchamile, wayalola ari Yeso wamukhalakile, yekalukhila omwene, ne wela wakalusia khandi ofupande amakhumi kataru fwe efetsa khu avasalisi avakhongo nende avasakhulu, ⁴Nasunga ari, nikholile ovwoni okhuchama amavanga kavula ovuvi vwosi. Navo vasunga vari, Akenako ni sina khwifwe? kaakhwiwe wamwene. ⁵Ne wasukuna ofupande fwe echifetsa hasi mwitembali, ne warula, wacha ne weemika.⁶Ne avasalisi avakhongo vavukula ofupande fwe echifetsa chenecho, ne vasunga vari, okhulondana ne elilaka sekenyekhana khure mwivikhilo tawe, sikila ni fwe sivanga. ⁷Ne vasungana vawulilisiana, vavukula echirubia chenecho vakula esipande sio omukunda okhurula khu mulongi wechinyungu, vayavilengemo avacheni. ⁸Kakila esipande sio omukunda kwenokwo sialangwa vari, Omukunda kwe esivanga, okhwola vulano vuri.⁹Niwo we elikhuwa lio omung'osi Yeremia liatusivwa, lisunganga liri, Ne vavukula ofupande amakhumi kataru ke echifetsa, ovukusi vwa vali nivamukusiye, vwa valala khu vana va Isiraeli valola wutukhane; ¹⁰Ne varusia okhurunga esipande sio omukunda kwo omulongi we echinyungu, khuli anga Omwami yali niyandakilisie.¹¹Ne Yeso wasinjila evweni wa kavana: kavana wamureva, nasunga ari, Ewe wuvele Omwami wa avayawudi? Ne Yeso wamusungila ari, Niwe wakhasunga. ¹²Ne wavasali avakhongo nende avasakhulu vamusitaka, siyavachiva esindu tawe. ¹³Niwo wa Pilato yamusungila ari, Ewe solawulilanga na makhuwa kenga kavalarusianga khuli ovuloli vuli esinyuma ninawe? ¹⁴Ne seyamuchiva ata elikhuwa lilala liong'ene tawe; kawukisia kavana vululu.¹⁵Vulano mumulukha kwe esikuku siene silia kavana yalekhulilanga avandu omuvoywa mulala wa avandu venyanga. ¹⁶Ne echindalo chilia vali nende omuvoywa mulala wali niyamanyikhana, wavalanganga vari Baraba¹⁷Khu kario wavali nivasololane halala, Pilato wavasungila ari, Ni wina wamwalenyanga emulekhulile? Baraba, nohomba Yeso wavalanganga vari Kristo? ¹⁸Sikila yamanya ari elikhendekha nilio liakila vamurera, ¹⁹Wayava niyakhekhala khu sifumbi sie elikhalaka, omukhasi wuwe warumasia elikhuwa khu niye, nasunga ari, Ewe okheyinjisiakho mumakhuwa ko omundu omulunji wulia tawe: sikila ninyakhanile muno musilo sia vulano mumarolo okhulondokhana ninaye.²⁰Nikakhali avasalisi avakhongo nende avasakhulu vaompelesia olukhumulo vari musunge valekhule Baraba, ne vavunie Yeso. ²¹Ne kavana wachiva ne wavasungila ari, Ni wina khu vavili vano wa mulenyanga emulekhulile? Vasunga vari, Baraba. ²²Pilato wavasungila ari, Mulenyanga ekhole sina nende Yeso wavalanganga vari Kristo? Vosi vamusungila vari, Lekha avambwe.²³Ne kavana wasunga ari, Sikila sina, ni vuvi sina vwa akholile? Nikakhali navo vatasa okhulangilisia nivayokela, nivasunga vari, Lekha avambwe. ²⁴Lwa Pilato yalola ari salanyalanga tawe, nikakhali olutiri lwakhavawo, yavukula amachi, ne wasava emikhono kikie evweni wo olukhumulo, nasunga ari, esie sendi nelikhuwa liosi nende amavanga ko omundu omulunji wuno tawe: lole khukenako mwavene.²⁵Ne avandu vosi vachiva, ne vasunga vari, Amavanga kake kave khwifwe, nende khu vana vefu. ²⁶Ne naye wavalekhulila Baraba: ne wayali niyakhamala okhuchapa Yeso ofuvoko, yamulekhula ache avambwe.²⁷Ne avasikari va kavana vamuvukula vamuyila munju yokhukholelamo emikhung'ano, ne vamuwelakho esikosi esilamba. ²⁸Ne vamufwalula echinguvo, vamufwala ekanjo eyimbesemu. ²⁹Ne wavali nivakhalomba ekofia ye eyingara ya amawa, vamufwala khu murwe kukwe, ne eyindavusi yelikhindu vara mu mukhono kukwe omulunji: ne vamusikamila khwi sikamo evweni wuwe, ne vamumayasia, nivasunga vari, wichomivwe, Omwami wa Avayahudi!³⁰Ne vamufuchakho amare, vavukula eyindavusi ye elikhindu, ne vamukhupa khu murwe. ³¹Ne wavali nivakhamumayasia vario, vamufwalula ekanjo, ne vela vamufwala echinguvo chiche, vamurusia vache vamuvambe..³²Ne khuli vali nivalarulanga elwanyi, vanyola omundu okhurula Sireni, wavalanganga elira vari Simoni: vamuyingilisia amusitile omusalaba. ³³Ne wavali nivakhatukha avundu wavalanganga vari Golgotha, nikhwo okhusunga vari, avundu we esiang'ang'a. ³⁴Vamuwelesia edivai yavasasiliemo eyindulwe: ne anga yakonyelakho,walova okhunywa.³⁵Ne vamuvamba, vakavana echinguvo chiche, khu khupa ekura: kho katukhe okhutusivwa kalia kalakaywa nende omung'osi vari, avene vekavilamo echinguvo chanje, ne khuyinguvo yanje vopelakho ekura. ³⁶Ne vekhala hasi awenawo okhumulinda; ³⁷Ne akulu khu murwe kukwe vahandika kavali nivamuyalilekho, vari WUNO NIYE YESO OMWAMI WA AVAYAHUDI.³⁸Khwaliwo awenawo nende avefwi vavili vali nivavambilwe ninaye, mulala khu mukhono omulunji , ne owundi omukhono omukhasi. ³⁹Ne avandu vavirangawo khunjila vamukholelakho esienyenye nivasisikha emirwe kiavo, ⁴⁰Ne nivasunga vari, Ewe wasunga okhupomola elitembeli, ne oliumbakhe khu chindalo chitaru, sewiwonia wamwene. Noli Omwana wa Nyasaye, yikha orule khu musalaba.⁴¹Avasalisi avakhongo vosi vamumayasia , halala nende avandiki va amalaka nende avasakhulu, nivasunga vari, ⁴²Yawonia avandi; ne omwene sanyala okhwiwonia tawe. Wava nali Omwami wa Isiraeli, lekha yekhe nono okhurula khu musalaba, ne efwe fwesi khuva khwalamusuvila.⁴³Yeyikina mu Nyasaye; lekha nono amunanule, nikava alamwenyanga: sikila yasunga ari, Nivele Omwana wa Nyasaye. ⁴⁴Avefwi vosi vayali navambilwe ninavo, vamukhanyukhila khu meno.⁴⁵Vulano okhurula echisa sita esilima siafunikha esivala siosi okhwola echisa tisa. ⁴⁶Ne wechisa tisa chola Yeso yalila no omwoyo kweyikulu, nasunga ari, Eloi, Eloi, lama sabakithani? nikhwo okhusunga vari, Nyasaye wanje, Nyasaye wanje, sikila sina wundekhile? ⁴⁷Valala khu valia vali nivasinjilewo, anga vawulila vario, vasunga vari, Omundu wuno alalanganga Elija.⁴⁸Ne awenawo mulala khu nivo warulawo watumaka, ne wavukula esiangu, wenikha mu divayi yilulile, wara khu lukhindiu wamuwelesia anywe. ⁴⁹Ne avandi vasunga vari, Lekha avee, khulole nikava Elija alecha okhumuwonia. ⁵⁰Yeso, wayalila khandi nomwoyo kweyikulu, yakwisia omwoyo⁵¹Ne, lola, epasia yo mwitembeli yarandukhamo khavili okhurula ikulu okhwola hasi; ne esivala siarenga, echinyanda chatikhamo; ⁵²Khandi ofulindwa fwekukha; ne emivili kia avayanje vali nivakona kiasisimukha, ⁵³Khandi varula mufulindwa lwayali niyakhasisimukha, vacha mwitokho elichenukhu, ne valolekhanila khu vanyinji.⁵⁴Vulano khuli omusikari omukhongo, halala nende valia vali ninaye, nivalindile Yeso, valola esivala nisirenga, nende ofundu fwekholekhana, varia muno, nivasunga vari, Kang'ali wuno yavele Omwana wa Nyasaye. ⁵⁵Ne avakhasi avanyinji vali nivaliwo valengelelanga hale, vali nivamulondile Yeso okhurula Galilaya, vamurumikhilanga. ⁵⁶Mulala munivo yali Maria magadalena, nende Maria mayi wa Yakobo nende Yosefu, nende mayi wa avana va Zevetayo.⁵⁷Lwe eyingolove yola, yechawo omundu omuyinda okhurula Arimatseya, wavalanganga vari Yosefu, omwene nali mulala khuveki va Yeso: ⁵⁸Yacha khu Pilato, ne wasava vamuwelesie omuvili kwa Yeso. Niwo wa Pilato yarusia elilaka ari vamuwelesie omuvili.⁵⁹Ne wa Yosefu yali niyakhavukula omuvili, yakuvoyela mulusiuka oluwanga olulafu, ⁶⁰Ne wakwalisia musilindwa sisie esiya, siayali nayavile mulwanda: ne wapuringisia okuchina okukali wekala emuliango wesilindwa, ne wacha. ⁶¹Ne khwaliwo nende Maria Magadalena, nende Maria wundi wulia, vali nivekhale oluveka lundi lwe esilindwa⁶²Vulano eyindalo yarakho, yali neyilonda eyindalo yokhwirechekha, avasalisi avakhongo nende Avafarisayo vecha halala khu Pilato, ⁶³Nivasunga vari, Mukhongo, khwichulila omuvacha wulia yasunga ari, wayali nasili omulamu, Khu lwe echindalo chitaru emba nasisimukha. ⁶⁴Khu kario rusia elilaka valinde esilindwa khu lwe echindalo chitaru, kho aveki vave vakhecha musilo, vamwiva, ne vasungila avandu vari, Wusisimukhe okhurula muvafwa: kho ovuvacha vwo okhumalilikha vukhava na amani okhuvira vwo okhuranga tawe.⁶⁵Pilato wavasungila ari, Ovulindi vuvelewo: enywe che, muvasungile khuli mulenyanga. ⁶⁶Varula vacha, ne vara khusilindwa ovulindi ovukali, vakhomekha elikina lie muliango ovulayi vwene, ne warawo avasikari vokhulinda.

¹Mukhumalilikha khwe sabato, anga vwachaka okhwanulukha eyindalo yokhuchaka yelichuma, yecha Maria Magadalena nende Maria wundi oyo okhulola esilindwa. ²Ne lola, esivala siarenga vululu: sikila eyingelosi yo Omwami yekha okhurula mwikulu, ne yecha yapuringisia elikina inyuma okhurula khu muliango, ne yalikhalakho.³Okhufwanana khukhwe khwali singa olweni, ne echinguvo chiche chali echiwanga chwee: ⁴Ne sikila amarisio kake, avalindi varenga, valolekhana anga avandu vafwile⁵Ne eyingelosi yavachiva yavasungila avakhasi avo yiri, Mularia tawe: sikila nimanyile endi mwalakhavanga Yeso, wavavambile. ⁶Sali hano tawe, sikila usisimukhe anga yasunga. Yichee, mulole avundu wo Omwami yavele nakonile. ⁷Ne khomuche vwangu, musungile aveki vave muri usisimukhe okhurula muvaafwa; ne, lola, wumwinyowile enywe okhucha mu Galilaya; mwalamulola evweneyo: ne lola, nakhavasungila.⁸Ne varekukha vwangu okhurula musilindwa nivarile nende ovusangafu ovukali; ne vatumaka chimbilo okhurelila aveki vave elikhuwa. ⁹Ne anga vali nivalachichanga okhusungila aveki vave, lola Yeso wakanana ninavo, wavasungila ari, Muve nomulembe. Ne vecha khandi vamutila khufulenge fufwe, vamwinamila. ¹⁰Yeso wavasungila ari , Mularia tawe: Chee musungile avayanje muri vachee mu Galilaya, ne evweneyo valandolayo.¹¹Wavali nivalachichanga, nakhalole, valala khuvali nivalindile esilindwa vecha mwitokho, ne vasungila avasalisi avakhongo amakhuwa kosi kali nikekholekhane. ¹²Ne navo anga vakhola esikhalo nende avasakhulu, ne valia omuma, velesia avasikari avo echirubia echinyingi, ¹³Vavasungila vari, Sunge muri, Aveki vave vechile musilo, ne vamwiva anga khuvele nekhwalakonanga.¹⁴Ne amakhuwa kano nikecha mumarwi ka gavana, efwe khwalamuombelesia, ne khumusekule enywe. ¹⁵Khukario vavukula echirubia ne vakhola anga vali nivasomisivwe: ne olukano luno lwalanda muvunyingi mu Avayahudi okhutukha eyindalo ya vulano.¹⁶Aveki elikhumi na mulala varula vacha mu Galilaya, musikulu sia Yeso yali navalakilisie vakananemo. ¹⁷Ne anga vamulola vamwinamila: nikakhali valalakho vakalikania.¹⁸Ne Yeso wecha wavalakayila, nasunga ari, Ovunyali vwosi nelesivwe mwikulu nende mwilova. ¹⁹Khukario khomuchee, ne musomie ofuvala fwosi nimuvabatisia mulira lia Papa, nende Omwana nende Roo Omuchenukhu.²⁰Nomuvasomia okhutila amakhuwa kosi kanamulakilisia enywe: ne, lola, nivele halala ninanywe vuli lwosi, okhutukha okhuwa khwe sivala. Kave kario.

¹Okhuchaka khwe likhuwa elilayi lia Yeso Kristo, Omwana wa Nyasaye. ²Anga kahandikwa mu vang'osi, Lola, Narumanga omurumwa wanje evweni wuwo, walakhulombela eyinjila evweni wuwo. ³Omwoyo kwo omundu kwalalangilisianga musiangalamwe kuri, Lomba eyinjila yo Omwami, kololosia walavirila.⁴Yohana yabatisianga musiangalamwe, ne niyelwacha ovubatiso vwo okhwikanila nende okhuvelwa ovwoni. ⁵Ne vecha avandu vosi khu niye okhurula musialo sie Evuyuda, nende va Yerusalemi, ne naye wavabatisa vosi mumuchela kwa Yoridani, nivekanila ovwoni vwavo. ⁶Ne Yohana yali wayefwala echinguvo cho ovwoya vwe eyingamia, nende omusipi kwo olukhova musisindi sisie; ne yalichanga echisike nende ovukhi vwo mwisino.⁷Ne yelwacha, nasunga ari, Alecha mulala olunyuma lwanje wuli namani okhumbira esie, hata weesie ekhatukhane okhwinama hasi engangulule omukoye kwo furalo fufwe tawe. ⁸Esie musikholwa nimubatisiye mumachi: nikakhali niye alamubatisia enywe mu Roo Omuchenukhu.⁹Ne muchindalo chenecho kecha kekholekha, Yeso yecha okhurula Nazareti ya Galilaya, ne wabatisiwa nende Yohana mumuchela kwa Yoridani. ¹⁰Ne anga yarula mumachi vusa arinana, yalola elikulu nelikukha, ne Roo muvukondo vwe eliwusi wekha khuniye: ¹¹Ne omwoyo kwecha okhurula mwikulu, nokusunga kuri, Niwe uli omwana wanje omuyanje, wenikhoyelanga.¹²Ne avwene na avwene Roo wamuyila musiangalamwe. ¹³Ne wava musiangalamwe sienesi khu chindalo amakhumi kane, omusuku namukelichanga; ne khwalimo nende echinyama chomwisino; ne echingelosi chamukhalavanila.¹⁴Vulano wa Yohana yali niyakharerwa musivoye, Yeso yecha mu Galilaya, nalelwachanga elikhuwa elilayi lio ovwami vwa Nyasaye, ¹⁵Ne nasunga ari, Evise vyakhatusiwa, ne ovwami vwa Nyasaye vuvele ahembi: yikanile enywe, ne musuvile elikhuwa elilayi!¹⁶Vulano anga yali nalakendanga khulikingi lwe eyinyanja ya Galilaya, yalola Simoni nende Andreya wandaye wuwe nivasukunanga olurimba munyanja: okhuva vali avalovi. ¹⁷Ne Yeso wavasungila ari, Yicha munonde, ne nasie namulomba muve avalovi va avandu. ¹⁸Ne avwene na avwene valekha echindimba chavo, ne vamulonda.¹⁹Ne wayali niyakhesenda okhurula awenawo oluwono atiti, yalola Yakobo omwana wa Zebedayo, nende Yohana wandaye wuwe, wavali vosi muliaro valarikandanga echindimba chavo. ²⁰Ne avwene na avwene wavalanga: navo valekha papa wavo Zebedayo muliaro nali navakhalavani vo omurungo kwe eyindalo ne vaacha vamulonda.²¹Ne navo vacha Kapernaumu; ne eyindalo yelisabato yachaa nalunjikhe mu Sinagogi, ne wasomia. ²²Ne navo vawuka khumekesio kake: okhuva yasomia anga ulia uli novunyali, esunyuma anga avandiki vamalaka.²³Ne mu sinagogi yavo eyoo khwalimo no omundu wali nende eroo eyimayanu; naye yakukula, ²⁴Nasunga ari, Lekhana ninafwe; khunende sina ninawe, ewe Yeso wa Nazareti? ewe wakhecha okhukhuvunia? Nimanyile ewe niwawina, Omuchenukhu wa Nyasaye. ²⁵Ne Yeso wamukondokhela, namusungila ari, Wolela chii, ne orule muniye. ²⁶Ne we eroo eyimayanu yava niyakhamukwisia hasi, ne yakukula nomwoyo kweyikulu, yamurulamo.²⁷Ne voosi vauka, khusikelo sio okhurevana avene khu vene, nivasunga vari, nisindu sina sino? mekesio sina amacheni kano? okhuva khu vunyali vuvwe alalakilisianga echiroo echimbi, nacho chimuwulila nechimuria. ²⁸Ne avwene na avwene eyifuma yiye yalanda mufurekelo fwosi fuvotokhane Galilaya.²⁹Ne anga vecha vusa vari elwanyi okhurula mu sinagogi, vacha venjila munju ya Simoni nende Andreya, nali nende Yakobo nende Yohana. ³⁰Nikakhali mayi wo omukhasi wa Simoni yali wukonile hasi alalwalanga omurengo, ne avwene na avwene vasungila Yeso lwa yali. ³¹Naye wecha ne wamutila omukhono, wamuvusia; ne khusikha vusa sienesio omurengo kwamulekhula, ne naye wavarumikhila.³²Ne nivwakhelavula, anga eliuva liali niliakhayela, vamurelila avandu vosi vali avatietiekhele, nende vali nivatilwa nofusieno. ³³Ne elitokho liosi vasololana amuliango. ³⁴Ne naye wawonia avanyingi vali novulwale vwa lukano na lukano, nende okhukhuma ofusieno ofunyingi; khandi yakania ofusieno okhulakaya, sikila fwamumanya.³⁵Ne mu mavwivwi, yavukha novukhanulukha tawe, warula elwanyi, ne waacha avundu wuli wong'ene, ne wasalila avwenao. ³⁶Ne Simoni nende avasie vayali ninavo vamulondakho. ³⁷Ne wavali nivakhamunyola, vamusungila vari, avandu voosi valakhukhavanga ewe.³⁸Ne naye wavasungila ari, Lekha khuche muchingova chindi, nilwache eweneyo wosi: sikila niko kakila nenicha. ³⁹Ne naye welwacha muchi sinagogi chavo chosi mu Galilaya, nakhuma ofusieno.⁴⁰Ne omundu walwala amachele yecha wayali, namusaaya, namusikamile, ne namusungila ari, Nikava oyaanja, nombe embe omulamu. ⁴¹Ne Yeso wamukholila esisa, ne wanyila omukhono kukwe, ne wamutilakho, namusungila ari, Niyamile; vaa omulamu. ⁴²Ne anga yamala okhumusungila ario, avwene na avwene amachele kamurulakho, na naye wawona.⁴³Ne Yeso wamulakilisia vwangu, ne wamusevula arule avwenawo achee; ⁴⁴Ne wamusungila ari, Lengela okhasungilakho omundu yesi esindu tawe: nikakhali chaa vusa, wiyekesie khumusalisi, ne orusie ofundu fwenyekhane fwa Musa yamulakilisia, okhuva ovuloli khumakhuwa kenako.⁴⁵Nikakhali yarula elwanyi, ne wachaka okhukalandia vuli avundu, ne namuvuyila khu lukongo muvunyingi, kakila Yeso walekha okhucha mwitokho nalolekhana avulafu, nikakhali yali musiangalamwe avwikisi yeng'ene: ne avandu khovecha okhurula echimbeka chosi.

¹Ne khandi anga yenjila mu Kapernaumu chindalo nechivirilekho; ne amakhuwa kamanyikha vari uvele munju. ²Ne avwene na avwene avandu avanyingi vevungelesia alala, khu sikelo sio okhwichula mukari khwatakhamo ovwiyangu, hata okhwola amuliango vwali ovutinyu: ne naye wavelwachila elikhuwa.³Ne vecha avandu vane, nivasitile omundu omulwale wafwokoya. ⁴Ne wavakhaywa okhwola ahembi ninaye sikila okhufindikana khwa avandu, vafumbula eyinju khwikulu wa Yeso yali: ne wavali nivakhakhalakawo, vekhisiliawo esitanda sio omulwale wa fwokoya yali nakonilekho.⁵Anga Yeso yalola elisuvila liavo, yasungila omulwale wafwokoya ari, Mwana wanje, wuvelilwe ovwoni vuvwo. ⁶Nikakhali khwaliwo nende valalakho khu avandiki vamalako vali nivekhalewo, ne niverevelesia mumwioyo kiavo, ⁷Sikila sina omundu wuno alasiamanga mukhulakaya? Ni wina owundi wunyala okhuveela ovwoni nakhali Nyasaye yeng'ene?⁸Ne khuchisa chene chilia Yeso wamanya mumwoyo kukwe kavalabaranga mumioyo kiavo, wavasungila ari, Sikila sina mwalabaranga amakhuwa kano mumioyo kienyu? ⁹Lilena lili eliangu okhusungila omulwale wafwokoya wuno ori, ovwoni vuvo vuvelelwe; nohomba okhusunga ori, Vukha, ne ovukule esitanda sisio, ne okende?¹⁰Nikakhali kho mumanye muri Omwana wo omundu wuno ovunyali musialo okhuveela ovwoni, (wasungila omulwale wafwokoya ari,) ¹¹Nakhusungilanga ewee, Vukha, vukula esitanda sisio, ne ochee khunjila yokhucha munju mumwo. ¹²Ne avwene na avwene wavukha, wavukula esitanda sisie, ne warula wachaa evweni wavo voosi; khusikelo sio okhuukisia voosi, ne vechomia Nyasaye, nivasunga vari, Sikhwalolakho akene kano tawe.¹³Ne khandi wela warula wacha oluveka lundi lwo lukingi lwe inyanja; ne olukhumulo lwa avandu voosi vacha wayali, ne naye wavasomia. ¹⁴Ne wayali nalaviranga, yalola Lawi omwana wa Alfayo niyekhale wavasololelanga ovushuru, ne wamusungila ari, Noonde. Ne naye wavukha ne wamulonda.¹⁵Ne kecha kava, vari, Yeso yali niyekhale munju mwa Lawi nalalichanga, avasololi avanyingi vovushuru nende avooni voosi vali vekhale alala nende Yeso na aveki vave: okhuva valiwo avanyingi, ne vamulonda. ¹⁶Ne anga avandiki vamalako nende Avafarisayo vamulola nalalichanga nende avasololi vo ovushuru nende avooni, vasungila aveki vave vari, Kavele kariena alalichanga nanywa nende avasololi vo ovushuru nende avooni?¹⁷Anga Yeso yakawulila, yavasungila ari, Valia vali avalamu sevakhavanga omusilikhi tawe, nikakhali valia vali avalwale: Sinayecha okhulanga avalunji tawe, nikakhali avooni vekanile.¹⁸Ne aveki va Yohana nende va Avafarisayo vava vanala okhwiyimana okhulia: ne vecha vasungila Yeso vari, Sikila sina aveki va Yohana nende va Avafarisayo veyimananga okhulia, na avavo siveyimananga okhulia tawe? ¹⁹Ne Yeso wavasungila ari, Avana va mwene esiselelo vanyala veyimana okhulia variena, mwene esiselelo nalisili halala ninavo? wo mwene esiselelo ava nasili ninavo, sevanyala okhwiyimana okhulia tawe.²⁰Nikakhali echindalo chalecha, wa mwene esiselelo alavukulwa okhurula khu nivo, ne niwo wavaliyimana okhulia muchindalo chenecho. ²¹Khandi avulawo omundu wunavanga esilaka esiya khu eyinguvo eyikhale tawe: sikila esilaka esiya sinyala okhukwesa eyinguvo eyikhale, ne yarandukha okhuvira anga yivele.²²Ne khandi avulawo omundu wurechanga edivai eyimbia muchichupa echikhale tawe: sikila edivai eyimbia yikhecha yaatisia echichupa echikhale tawe, ne edivai yayombokha, ne echichupa chacha eminyali: nikakhali edivai eyimbia yenyekha irelwe mu chichupa echimbia.²³Ne kecha kava vari, wayali nalaviranga mumukunda kwe eyinganu eyindalo ye elisabato; ne aveki vave vachaka, anga vava nivasichilililanga khuluchendo, okhwamula eyinganu. ²⁴Ne Avafarisayo vamusungila vari, Lola, sikila sina valakholanga kakhali kelilaka eyindalo ye elisabato?²⁵Ne naye wavasungila ari, Enywe semwasomakho ka Daudi yakhola, wayekomba, wayali neyinjala, niye nende valia vali ninaye? ²⁶Anga yacha munju ya Nyasaye muchindalo cha Abiasari omusalisi omukhongo, ne wavukula omukati kwali kwokhulolesia khu mesa evweni wa Nyasaye walia, esinyuma nelilaka okhuva kwali kwa avasalisi, ne khandi welesiakho valia vayali ninavo?²⁷Ne wavasungila ari, Elisabato lialombelwa omundu, ne omundu siyalombelwa esisabato tawe: ²⁸Khu kario Omwana wo omundu khandi no Omwami welisabato.

¹Ne khandi wela wenjila mu sinagogi; ne khwalimo nende omundu mukari mwenomu wali no omukhono kwakhunya. ²Navo vamureka, okhulola nikava alamuwonia eyindalo ye elisabato; kho vanyole sia valamusitakilakho.³Ne Yeso wasungila omundu wo omukhono kwakhunya ari, Sinjila evweni. ⁴Ne naye wavasungila ari, Nelilaka lia avwene okhukhola amalayi echindalo che elisabato, nohomba okhukhola amavi? okhuwonia ovulamu nohomba okhwira. Nikakhali valinya vusa.⁵Ne anga yavalolelela voosi muliruma, navelela khuvumu vwe emwioyo kiavo, wasungila omundu ulia ari, Nyila omukhono kukwo. Ne omundu ulia wakunyila: na omukhono kukwe kwekhuna kwakololokha kwalekhana nokundi. ⁶Ne Avafarisayo varula vachaa, ne wolomele vachakisia esikhalo nende Avaherodi esinyuma ninaye, anga vanyala okhumumalawo.⁷Nikakhali Yeso werusiawo nende aveki vave vacha khunyanja: ne olukhumulo olukali okhurula Galilaya vamulondakho, nende okhurula Evuyuda, ⁸nende okhurula Yerusalemi, nende okhurula Idumeya, nende okhurula evweni wa Yoridani; nende valia vali ahembi Tiro nende Sidoni, olukhumulo olukali, anga vava nevawulile amakhuwa amakali kayava nakholile, veecha wayali.⁹Ne wasungila aveki vave, ari varerewo eliaro elititi yelwachilemo sikila olukhumulo, vakhecha vafindikana wali tawe. ¹⁰Okhuva yali wuwoniye avanyingi; khu sikelo sio okhusukumana nivenya okhumutilakho, khuli avanyinji vali novulwale.¹¹Ne anga ofusieno fwamulolanga, fwakwichanga hasi evweni wuwe, nofukukula, nofusunga furi, Ewe uvele Omwana wa Nyasaye. ¹²Ne naye wafukania vululu ari fukhamuvula wamanyikha tawe.¹³Ne naye wacha ikulu mulukulu, ne walanga valia vayenyanga: ne navo vecha wayali. ¹⁴Ne wavarovola likhumi na vavili, kho vatukhe okhuva alala ninaye, ne khandi avarume vachee velwache, ¹⁵Ne vave novunyali vwo okhuwonia amalwale, nende okhukhuma ofusieno: ¹⁶Ne Simoni wamukulikha ari Petero;¹⁷Ne Yakobo omwana wa Zebedayo, nende Yohana wandaye wa Yakobo; ne wavarakho elira ari [ Boanerges ] esifunane yalio nesili, Avana vo olweni: ¹⁸Nende Andreya, nende Filipo, nende Baturumayo, nende Matayo, nende Tomasi, nende Yakobo omwana wa Alfayo, nende Tatayo, nende Simoni Omukanaani, ¹⁹Nende Yuda Isikarioti, niye khandi wamuchama: ne vacha venjila munju.²⁰Ne olukhumulo lwecha lwevungelesia khandi, hata vakhaywa okhulia esiakhulia. ²¹Ne anga avasale vave vawulila vario, varula vacha okhumutila, sikila vasunga vari urukile omurwe. ²²Ne avandiki va amalako vava nivechile okhurula Yerusalemi vasunga vari, Wuvele nende Beelisebuli, ne khumaani komukhongo wofusieno niko kalarumikhilanga okhukhuma ofusieno.²³Naye wavalanga vecha wayali, ne wavasungila muchingano ari, Kanyala okhuva kariena Shetani akhume Shetani? ²⁴Ne kava ovwami vunyala vwakavukhanamo ovwene khu vwene, ovwami vwenovwo sovunyala okhusinjila tawe: ²⁵Ne nikava eyinju yakavukhanamo eyene khu eyene, eyinju yeneyi seyinyala okhusinjila tawe.²⁶Ne kava Shetani anyala wasinjila wekalukhana omwene, ne akavukhanemo, sanyala okhusinjila tawe, nikakhali alava nesiakamo. ²⁷Avulawo omundu wunyala okhwinjila munju yo omundu wamaani, ne ayaaye emiandu kikie, nakhamuvoyile mbeele omundu wa amaani; ne kho ayaaya fwo munju yeneyi.²⁸Kang'ali namusungilanga, Ovwooni vwosi vulavelwa avana va avandu, nende eyimbelekewu yilia yoosi khu ulia ulakikhola. ²⁹Nikakhali ulia walakholela Roo Omuchenukhu eyimbelekewu ulia saaliva nende okhuvelwa tawe, nikakhali uvele muvutinyu vwo okhukhalakilwa mindali. ³⁰Sikila vasunga vari wuvele nesisieno.³¹Vecha awenao wandaye vave nende mayi wuwe, ne, wavali nevasinjile elwanyi, varumasia, vamulange. ³²Ne olulukhumulo lwali lwikhale lumuvotokhane, ne vamusungila vari, Lola, mayi wuwo nende wandaye vavo vavele elwanyi valakhukhavanga.³³Ne naye wavachiva, nasunga ari, Mayi wanje niwiina, nohomba avawandaye vanje? ³⁴Ne naye wavesevukha walola valia vali nivamuvotokhane, ne wasunga ari, Lola mayi wanje nende avawandaye vanje! ³⁵Khu wulia yesi yesi walakhola elienya lia Nyasaye, niye ulava wandaye wanje omusiani, nende wanaye wanje omukhana, nende mayi.

¹Ne naye wachaka khandi okhusomia nali oluveka lwo olukingi lwe eyinyanja: ne avwene yawo olukhumulo olukali lwevungelesia wayali, kakila wenjila muliaro, ne wekhalamo nelili khunyanja; ne olukhumulo nalwo vali khundulo khwe eyinyanja. ²Ne naye wavasomia amakhuwa amanyingi muchingano, ne wavasungila ari mumekesio kake,³Wulilisie; Lola, yaliwo omundu wachaa okhumicha ovumicho: ⁴Ne kecha kavira vari, anga yali nalamichanga ovumicho,vulala vwaakwa khundulo khwe eyinjila, ne amanoni koo mwikulu kecha ne kavuvocha. ⁵No ovundi vwakwa khu khulwanda, welilova liakhali elinyingi tawe; ne anga vwaromba, sikila sivwali nelilova elinyingi tawe:⁶Nikakhali anga eliuva liarula, omuvasu kwavusambaa; sikila sevwali ne emisi tawe, vwaniala vwafululukha. ⁷Ne ovundi vwakwa mumawa, ne amawa nako kakhula, ne kavuchoma choma, ne sevwayama ofwamo tawe.⁸Ne ovundi vwakwa khulilova elilayi, ne vwamela ofwamo fwaatukha ne fwevulana; ne fulala fwarusia, amakhavi amakhumi kataru, ne ofundi amakhumi kasasava, ne ofundi amakhavi eyimia. ⁹Kho wavasungila ari, Ulia wuli na amarwi kokhuulila, lekha awulile.¹⁰Ne wayali yeng'ene, valia vali ahembi ninaye halala na aveki vave elikhumi na vavili vamureva esifunane sio olukano olwo. ¹¹Ne naye wavasungila ari, Khwinywe mwawelesiwa okhumanya amakhuwa kekisa ko ovwami vwa Nyasaye: nikakhali khu vali elwanyi, amakhuwa kano kosi kekholekha vusa muchingano: ¹²Kho vari okhulola valole, ne vakhava nelimanya tawe; khandi okhuwulila vawulile, ne vakhatilakho liosi tawe; vakhecha khu sikha siosi vakalukhana, ne vavelwa ovwoni vwavo.¹³Ne wavasungila ari, Enywe somumanyile olukano luno tawe? ne vulano mwalamanya muriena echingano chosi? ¹⁴Omuraki arakanga elikhuwa. ¹⁵Ne vano nivo vwakwa khundulo khwe eyinjila, weelikhuwa liarakwa; nikakhali wavawulila elikhuwa, Shetani yechaa vwangu, ne wavukula elikhuwa liali nelirakilwe mumwioyo kiavo.¹⁶Ne valondakho vano nivo ovumicho vwarakwa khu lwanda lwali nakhalova khatiti; wavavechanga nevakhawulila elikhuwa, valivukulanga vwangu muvusangafu; ¹⁷Ne nikakhali avene sevali ne emisi tawe, kho vefwilanga vusa khu sikha sititi: okhurula awenawo, anga ovutinyu nohomba amakelicho karulila sikila elikhuwa lieneli, nivesicharala emwioyo vwangu.¹⁸Ne vano nivo ovumicho vwarakwa mumawa; nivo valia vawulilanga elikhuwa, ¹⁹Ne sikila okhwiyendekhelela khu makhuwa ke esialo sino, nende okhwikatirisia no ovuyinda, nende elikomba lia makhuwa kandi linjilamo, ne vikhingilila elikhuwa, ne lilekha okhwama eviamo. ²⁰Ne vano navo nivo ovumicho vulia vwarakwa mwilova elilayi; valia vawulila nga elikhuwa, ne valivukula, ne vama eviamo, akandi amakhumi kataru, akandi amakhumi kasasava, ne akandi eyimia.²¹Ne naye wavasungila ari, vafianga etaa vela vafunikha nesikono, nohomba vara mulwalo lwe esitanda? ne valekha okhura khusitete? ²²Kho sivulawo esindu sialekisa, sialalekha okhumanyikha; khandi sivulawo esindu siavavikhwa muvwikisi, nikakhali sialarelwa avulafu. ²³Omundu yesi uli namarwi kokhuwulila, lekha awulile²⁴Ne naye wavasungila ari, Mwireke vureke khu kalia kamwalawulila: khu sikelo silia siopimilanga, nisio esikelo sia wesi valakhupimilakho: ne khwinywe mwalawulilanga mwalalelesiwa amanyingi. ²⁵Khu wulia wuli ninafwo, niye walatasiwa: ne ulia ukhali ninafwo tawe, alarusiwakho sikhava silia siali ninasio.²⁶Ne wasunga ari, Nimwo anga ovwami vwa Nyasaye vuli, anga omundu arakanga ovumicho mumukunda; ²⁷Ne achaa akona, ne akhavukha esilo ne esitere, anga ovumicho vurombanga novurula ne vutuukha , samanyanga tawe. ²⁸Okhuva elilova liene nilio liamanga eviamo; okhuchakila khu sisina sio omurombo siama amasafu, ne viola okhwavalila, neviama vikhoomela. ²⁹Nikakhali niviakhalava, omundu avukulanga eyingeso yiye vwangu, sikila elichesa livechanga liakhola.³⁰Ne wasunga ari, sina siekhunyala khwafwanilisiakho ninasio ovwami vwa Nyasaye? nohomba khunyala khwakelasia nende sindu sina? ³¹Vuvele anga olumicho lwo omukhuyu, woluvechanga, nivakhaluraka mwilova, noolutiti okhuvira ovumicho vwoosi vuli mwilova: ³²nikakhali nivakharaka, lutukhanga lucha ikulu, ne kuva omusala omukali okhuvira ekindi, khandi kwama emisakia emikali kukhupasia; kho amanoni ko mwikulu kecha kameenya musininikha siakwo.³³Ne alala nende echingano chindi echinyingi yavelwachila elikhuwa, anga vanyala okhuliwulila. ³⁴Nikakhali livulakho lia yavalakayila vulali okhurumikhila olukano tawe: ne wavaali vong'ene, yavenosianga aveki vave amakhuwa kosi.³⁵Ne eyindalo ndala yeneyo, lwe ingolove yola, yavasungila ari, Lekha khwambukhe khuche oluveka lundi. ³⁶Ne wavali nivakhasevula nolukhumulo, venjila vamuvukulila muliaro lia yalimo. Ne avwene yawo khwaliwo nende amaro kandi amatiti. ³⁷Ne yarulila eyimboo eyingali yoluwuchi, ne amarunda ka amachi kachukha muliaro, kechulamo.³⁸Ne naye yali inyuma we eliaro wukonile witikiye epilo: ne navo vamuvusia, nivamusungila vari, Omwami, ewe solalolanga khwalavunga tawe? ³⁹Ne wavukha, ne wakondokhela eyimboo yo oluwuchi, ne wasungila eyinyanja ari, wolela, khuve nomulembe. Ne eyimboo yo oluwuchi yasinjila, ne yalinya chii.⁴⁰Ne naye wavasungila ari, muvenguwe muriena? mwakhava muriena vulali elisuvila? ⁴¹Kho navo vavenguwila elala, ne varevana avene khu vene vari, Omundu wuno ni walukano sina, we eyimboo yo oluwuchi ne eyinyanja vyalamuwulilanga?

¹Ne vecha oluveka lundi lwe eyinyanja, musivala sia Avakerasi. ²Ne wayali niyakharula muliaro, avwene na avwene wakananawo nende omundu wali nesisieno wali nalarulanga mufulindwa,³Ne yamenyanga mufulindwa; ne avulawo omundu wakhanyalile okhumuvowa tawe, tawe, akhava nali neminyololo: ⁴Sikila vamuvowanga nende echipingo ne eminyololo, ne yakitulakanga eminyololo kienekio akari, ne echipingo nacho yakitulakanga chiva ofutonye: khandi avulawo omundu yesi wakhamunyalile tawe.⁵Ne vuli lwosi, esilo ne esitere, yali mufukulu, nende mufulindwa nalila , ne khandi niyekhalaka nende amachina. ⁶Nikakhali anga yalola Yeso nasili hale, yatumaka chimbilo ne wamusikamila,⁷Ne wakukula vululu, ne wasunga ari, ninende sina ninawe Yeso, ewe Omwana wa Nyasaye wuli ikulu? Nakhusayanga evweni wa Nyasaye, endi okhamba esinyasio tawe. ⁸Okhuva yamusungila ari, Ewe esisieno, rula mumundu wuno.⁹Ne wamureva ari, Elira lilio niwina? Ne naye wamuchiva, nasunga ari, Elira lianje livele vari Lechoni: sikila khuvele avanyingi. ¹⁰Ne naye wamusaya akhanyingi ari akhafukhuma furule musivala sienesio tawe.¹¹Vulano ahembi wenawo mufukulu khwaliwo nende elituli elikali lie echimbichi chali nichilayanga. ¹²Ne ofusieno fwosi fwamusaya , nefusunga furi, Khurume khuche muchimbichi, khuchinjilemo. ¹³Ne avwene na avwene Yeso wafwiyamila fuchee. Ne ofusieno fwenofu fwarula fwacha, ne fwenjila muchimbichi: ne elituli lieneli lielukha chimbilo nelikhomolokha liakwa munyanja, ( chali chola ahembi echelefu chivili;) ne chosi chavunila munyanja.¹⁴Ne valia vayaanga echimbichi anga valola vario, velukha vacha okhukasunga mwitokho, nende mufurekelo. Ne varula vacha okhulola kalia kali nikekholekhane. ¹⁵Ne vecha khu Yeso, ne valola wulia wesisieno siali nisiamenyamo, ne wali nende Lechoni, niyekhale, ne niyefwalile, khandi nali avwene munganakani: navo vaaria.¹⁶Ne valia vali nivakalolile vasungila valia vali nivechilewo kali nikekholekhane khu wulia we esisieno siali nisiamenyamo, nende kalia kali nikekholekhe khu chimbichi. ¹⁷Ne navo vachaka okhumusaya arekukhe arule mulukongo lwavo.¹⁸Ne wayali niyakhecha wakhenjila muliaro, wulia wesisieno siali nisiamenyamo yamusaya amulonde. ¹⁹Kakhava kario Yeso siyamwiyamila tawe, nikakhali yamusungila ari, Chaa yingo khu avandu vavo, ne ovasungile amakhuwa amakali ko Omwami akhukholele, ne anga okhukholele esisa. ²⁰Ne naye warekukha wachaa, ne wachakila Dekapoli okhuvasungila amakhuwa amakali ka Yeso yali namukholile: ne avandu vosi vawuuka.²¹Ne Yeso wayava niyakhambukha khandi eyinyanja nali muliaro oluveka lwe injelekha, avandu avanyingi vasololana wayali: ne yali ahembi neyinyanja. ²²Ne, lola, mulala khu avakhongo ve sinagogi, ulangwa elira vari Yairo; ne anga yamulola, yamukwa mumakulu mumwe, ²³Ne wamusaya nakalukhila, nasunga ari, Omwana wanje omukhana omutiti wuwulikhe wusikasie amwoyo: Nakhusalanga, yicha omutilekho emikhono kikio, atukhe okhusosa; ne atukhe okhumenya. ²⁴Ne Yeso wacha ninaye; ne avandu avanyingi vamulondakho, nivamufindikanekho.²⁵Ne omukhasi navuleve, watachanga amavanga khu miyika elikhumi na kivili, ²⁶Ne yava wanyakhanila mumikhono kia avasilikhi avanyingi, ne yava warumikhila vuli esindu siosi sia yali ninasio, ne siyalolanga ovwawukhani vwosi tawe, nikakhali yachililila okhusalila, ²⁷Wayava nawulile eyifuma ya Yeso, yefindikisia muvandu okhurulila inyuma, ne watila khulikemo lie yinguvo yiye.²⁸Sikila yasunga ari, Kava vusa natilakho khu yinguvo yiye, nawona. ²⁹Ne avwene na avwene esevele yokhutacha amavanga yakhama; ne naye wewulila mumuvili kukwe ari wuwonile okhurula musinyasio.³⁰Ne Yeso, wamanya vwangu ari echingulu chakhamurulamo, wesevukha khu vandu vali nivalafindikananga, ne wasunga ari, Ni wina wakhatila khu chinguvo chanje? ³¹Ne aveki vave vamusungila vari, olalolanga olukhumulo luno lwosi lwala findikananga khwiwe, ne nawe olasunganga ori, Wina wundililekho? ³²Ne naye walola eyi nende eyi okhwenya okhumanya wulia wukholile esikholwa sienesio.³³Nikakhali omukhasi wulia narile nalarenganga, namanyile siali nesikholekhane khuniye, yecha wakwa evweni wuwe, ne wamusungila ovung'ali vwosi. ³⁴Ne naye wamusungila ari, Mwana mukhana ewe, elisuvila lilio likhuwonisie; chaa nomulembe, nowoone okhurula musinyasio.³⁵Wayava nasilakayanga ario, omundu mulala okhurula munju ya mulala wavemilisi ve sinagogi wasunga ari, Omwana wuwo omukhana wufwile: Sikila sina ochililile okhunyasia Omwami?³⁶Anga Yeso yawulila elikhuwa liavamusungila lieneli, wasungila omusinjilili we sinagogi mwenoyo ari, Okhaenda tawe, suvila vusa. ³⁷Ne wakaya omundu yesi akhamulondakho tawe, okhurusiakho Petero, Yakobo, nende Yohana wandaye Yakobo. ³⁸Ne wecha munju yo omusinjilili we sinagogi, ne walola valayokelanga , nende valia valilanga nende okhukukula vululu.³⁹Ne wayali niyakhenjila mukari, yavasungila ari, sina sia mulayokelanga, ne mulalilanga sina? omukhana wuno siwufwile tawe, nikakhali alakonanga. ⁴⁰Ne navo vamuchekha nivamukholelakho esienyenye. Nikakhali anga yava niyakhavarusia voosi elwanyi, yavukula papa nende mayi voomwana omukhana ulia, nende valia vayali ninavo, ne wenjila wavali nivalisie omwana omukhana wulia.⁴¹Ne naye watila omwana omukhana wulia omukhono, ne wamusungila ari, [ Talitha cumi ]; nikhwo okhusunga mukhukalukhasia vari, Mwana mukhana ewe, nakhusungilanga endi, vuukha. ⁴²Ne avwene na avwene Omwana omukhana wulia wavuukha, ne wakenda; sikila yali we emiyika elikhumi na kivili. Ne vesundukha nelisundukha elikali. ⁴³Ne naye wavakania navatindinya ari omundu yesi akhamanyakho tawe; ne wavalakilisia ari velesie omwana wulia sialia.

¹Ne warula awenawo wacha, ne wecha mulukova lwavo omwene; ne aveki vave vamulonda. ²Ne eyindalo ye elisabato anga yola, yachaka okhusomia mu sinagogi: ne avandu avanyingi vamuwulila vauka, nivasunga vari, Omundu wuno naye arusiye hena amakhuwa kano? ne ovuchesi ovunyingi vuno ni wina wumuwelesie, okutukha okhukhola ekasi eyingali anga yino neemikhono kikie? ³Uno sali niye omufundi wechimbao, omwana wa Maria, wandaye Yakobo nende Yosia, ne wanga Yuda nende Simoni? ne sekhuli hano nende avakhana vavo? Ne navo vesikirala sikila niye.⁴Nikakhali Yeso wavasungila, Omung'osi satakhananga oluyali tawe, okhurusiakho mulukova lwavo, nende mulwivulo lwavo omwene, nende vomunju mwumwe avene. ⁵Ne siyakholakho eweneyo esikholwa esikali tawe, okhurusiakho vatiti vali avalwale vayatilakho omukhono wavawonia. ⁶Ne naye wavaukila sikila okhulekha okhusuvila khwavo. Ne wacha mufurekelo fwali awenawo navasomia.⁷Ne walanga elikhumi na vavili, wachaka okhuvaruma vachee vavili vavili; ne wavawelesia ovunyali khu ofusieno; ⁸Ne wavakania ari, vakhasitakho siosi siokhulukendo tawe, okhurusiakho eyindavusi yong'ene; omusipi tawe, esiakhulia tawe, echirubia mufuveti tawe: ⁹Nikakhali vafwale ofuralo; ne vakhafwala echinguvo chivili tawe.¹⁰Ne wavasungila ari, avundu wosi wosi wamwalenjila munju, mwikhalemo okhwola anga mwalarulamo nomucha. ¹¹Ne wulia yesi wukhalavenjisia tawe, nohomba okhamurekelesia tawe, anga muva nimurulawo, musisimule olufu luva khufulenge fwenyu luve ovuloli esinyuma ninavo. Kang'ali namusungilanga enywe, kalivakho amangu khu Sodoma nende Komora eyindalo yelikhalakilwa,okhuvira elitokho lieneli.¹²Ne navo varula vacha, nivelwacha vari avandu vakhoyele vekanile. ¹³Ne navo vakhuma ofusieno ofunyingi, ne nivavakha amafura valia vali avalwale, ne nivavawonia.¹⁴Ne omwami Herodi wawulila okhulondokhana ninaye; (okhuva elira lilie liava lifumikhane vuli avundu: )ne naye wasunga ari, Vari Yohana Omubatisi wusisimukhe okhurula muvafu, ne niko kalakilanga emilimo emikali nekilolekhana muniye. ¹⁵Avandi vasunga vari, Omwenoyu ni Elicha. Ne avandi vasunga, Vari nomung'osi, nohomba anga mulala khu avang'osi .¹⁶Nikakhali anga Herodi yawulila akenako, yasunga ari, Ni Yohana, Wanakhalaka omurwe: wuvukhile okhurula mu vafwa. ¹⁷Okhuva Herodi mwene niye warumasia ne vacha vatila Yohana, ne vamuvowa musivoye sikila Herodia, omukhasi wa Philipo wandaye wuwe: esifunane Herodi yava umuyilile.¹⁸Sikila Yohana yava wusungile Herodi ari, Silili elilaka khwiwe okhuvukula omukhasi wa wandaye wuwo tawe. ¹⁹Khukario Herodia wakhayana ninaye, ne wakhava eyinjila yokhumwira ; nikakhali siyanyala tawe: ²⁰Okhuva Herodi yaria Yohana, yamanya ari no omundu wavwene ne khandi omuseleche, ne yamurekelesianga; ne anga yamuwulilanga, yakhola amakhuwa amanyingi, khandi yamuwulilanga novusangafu.²¹Weyindalo yayekombanga yoola, wa Herodi yali nalekhoyelanga eyindalo yokhwivulwa khukhwe yalombela esiakhulia avakhongo vave, avasinjilili va amaye, nende avemilisi vomulukongo lwosi lwa Galilaya; ²²Ne wo omukhana wa Heriodia chena yeecha mukari ne wakhina, wayanjisia Herodi nende voosi vali nivekhale halala ninaye, omwami wasungila omukhana wuno ari, Ndeve siosi siolenyanga, ne nakhuwelesia.²³Ne naye wamwichuvila ari, Silia siosi siolandeva esie, Nakhuwelesia ewe, vukhava enusu yo ovwami vwanje. ²⁴Ne naye warula wacha, ne wasungila mayi wuwe ari, Endeve sina? Ne naye wamusungila ari, Omurwe kwa Yohana Omubatisi. ²⁵Ne naye wecha vwangu wenjila mukari niyechomile Omwami, wamureva, nasunga ari, nenyanga avwene na avwene hano umbelesie khulutelu omurwe kwa Yohana Omubatisi.²⁶Ne omwami wavelela okhuvira esikelo; okhuva yali wumwichuvile, ne khandi sikila valia vali nivekhale ninaye, siyakhalovile tawe. ²⁷Ne avwene vusa yawo omwami warumasia omusikari, ne walaka varere omurwe kwa Yohana: naye wacha wakhalaka omurwe kukwe nali musivowe, ²⁸Ne warela omurwe kukwe khulutelu, ne welesia omwana omukhana: ne omwana omukhana naye welesia mayi wuwe. ²⁹Ne anga aveki vave vawulila vario, vecha vavukula omuvili kukwe, ne vakwalisia musilindwa.³⁰Ne avarumwa vesolola halala wa Yeso yali, ne vamusungila amakhuwa koosi, khu kalia kavali nivakholile, nende kalia kavali nivasomiye. ³¹Ne naye wavasungila ari, Mwavene yicha mwisendekho aluveka musiangalamwe, ne mwimunye atiti: okhuva avandu avanyingi veechanga ne nivaacha, ne sevalikho noovwiyangu vwo okhwimunya nohomba okhulia tawe. ³²Ne varula vachiila muliaro avundu avwikisi musiangalamwe.³³Ne avandu vavalola anga valachichanga, ne avanyingi vamumanya, ne vatumaka echimbilo okhurula mumatokho kosi, ne vavenyowela, ne vosi veechela khulala wayali. ³⁴Ne Yeso, anga yarula muliaro, yalola avandu avanyingi, ne wava nesisa ninavo, sikila vali anga amachese kalali noomwayi tawe: ne naye wachaka okhuvasomia amakhuwa amanyingi.³⁵Ne wavwachaka okhwilavula, aveki vave veecha wayali, ne vasunga vari, Muno nimusiangalamwe, ni vulano echisa chakhavira: ³⁶Vasevule vachee, musivala sili ahembi hano, nende mufurekelo, ne vekulile siavalia: okhuva sivula sia valia.³⁷Nikakhali wavachiva ne wavasungila ari, Enywe velesie sia valia. Ne navo vamusungila vari, walenyanga khuche khukule emikati kie echirubia echimia chivili, ne khuvelesie valie? ³⁸Ne wavasungila ari, Muvele ne emikati kinga? chee mulole. Ne anga vamanya esavu yakio, vamusungila vari, ni kirano nende eching'eni chivili.³⁹Ne warusia elilaka ari vekhasie avandu voosi hasi khuvunyasi mufutuma. ⁴⁰Ne vekhala hasi mufutuma, fwe eyimia eyimia nende fwa amakhumi karano karano. ⁴¹Ne wayali niyakhavukula emikati kirano nende eching'eni chivili, yalikamila mwikulu, ne wakikasicha, ne wakitonya tonya, ne welesia aveki vave vayile evweni wavo; ne eching'eni chivili wavakavilamo voosi.⁴²Ne voosi valiaa, ne vekura. ⁴³Ne aveki vavukula ofukapu elikhumi na fuvili fwichule ofupande fwe emikati, nende fwe eching'eni. ⁴⁴Ne avandu valiaa esiakhulia esio vali ahembi avasacha echelefu chirano.⁴⁵Ne vwangu avwene yawo nasungila aveki vave venjile muliaro, ne vachee vambukhe oluveka lundi inyuma nivakhatukha Betsisaida, nasisevula avandu. ⁴⁶Ne wayali niyakhavasevula, yacha musikulu okhusala. ⁴⁷Ne wesilima siachaka, eliaro liali akarikari weyinyanja, ne naye wava wusikale yeng'ene khundulo.⁴⁸Ne wayavalola valanyakhananga okhufuka eliaro; okhuva eyimboo yawuchanga esinyuma ninavo: ne anga echisa ekhumi novucha okhusia Yeso yacha wavali, nalakendanga khu yinyanja, ne wekosia anga walavavirangakho. ⁴⁹Nikakhali anga vamulola nalakendanga khu yinyanja, vafwanilisia vari nesisieno, ne vakukula: ⁵⁰Okhuva voosi vamulola, vavenguwa. Ne vwangu wavalakayila, navasungila ari, vee novusicha: Nisie; mukharia tawe.⁵¹Ne naye wacha wavali muliaro; ne eyimboo yawuchanga yasinjila: ne navo avene vawuuka okhuvira esikelo, ne vayumba. ⁵²Okhuva sivayililisiakho akamakana kemikati tawe, okhuva emioyo kiavo kiali emiumu.⁵³Ne wavali nivakhambukha injelekha, vecha musivala sia Genesareti, voola khuluchinga. ⁵⁴Ne anga varula muliaro vusa varinana, avwene na avwene vamumanya. ⁵⁵Ne vatumaka chimbilo mufurekelo fwo mulukova lwenolu lwosi, ne vachaka okhusita khu futanda valia voosi vali avalwale, okhuyila wavawulilanga wali.⁵⁶Ne avundu wosiwosi wayenjilanga, mufurekelo, nohomba mumatokho, nohomba musivala, vaalisianga avalwale khu chinjila, ne nivamusaya vari vamutilekho likhava khwikemo lie eyinguvo yiye: ne anga avanyingi vamutilangakho vawonanga.

¹Avafarisayo nende avandiki va amalaka valala vechela halala khu niye, okhurula Yerusalemi.²Ne anga valola vari valala khu veki va Yeso valalichanga esiakhulia esichafu, nikhwo okhusunga vari, ne mikhono, kiavakhasavile tawe, vanyolelawo ovutamanu. ³Khu Avafarisayo, nende khu Avayahudi vosi, nivakhasavile emikhono kiavo vuli khase, sevanyala okhulia tawe, vatila omwima kwa avasakhulu. ⁴Ne wavavechanga nivakharula khusoko, nevakhasavile emikhono, sevanyala valia tawe. Nende ofundu fundi ofunyingi fuva nofuliwo, fuva nevanyolile vatilakho, khuli okhusinga ofukombe, echinyungu, ofundi fwo okhurumikhila fwalombwa nende eshaba, nende fwo khu mesa.⁵Niwo wa Avafarisayo nende avandiki va malaka vamureva vari, Sikila sina nokhukesia aveki vavo okhulonda omwima kwa avasakhulu, nikakhali valalichanga esiakhulia nivakhasavile emikhono tawe?⁶Wavachiva wavasungila ari, Isaya seyarusia ovung'osi khwinywe aveka avokhwikatia, khuli, kahandikwa kari, Avandu vano vambechanga oluyali lwe eminwa kiavo, nikakhali omwoyo kwavo kuvele hale ninasie. ⁷Khwako vasikamilanga esikhaya, nevasomia amekesio ka amalaka kavandu.⁸Okhuva murechanga aluveka elilaka lia Nyasaye, mutila amekesio ka avandu, khuli okhusinga echinyungu nende ofukombe: nende akandi amanyingi kafwanana kario komukholanga. ⁹Ne wavasungila ari, Novulayi mulovanga elilaka lia Nyasaye, kho mulonde amekesio kenyu. ¹⁰Okhuva Musa yasunga ari, Orie papa wuwo nende mayi wuwo; ne, Wulia walalama papa nohomba mayi, lekha afwe elifwa:¹¹Nikakhali enywe musunga muri, Kava omundu alasungila papa wuwe nohomba mayi ari ni Korupani, nikhwo okhusunga vari, nesihanwa, esindu siosi sia mwalanyolelakho eyinganga okhurula khwisie; alava novulekhule. ¹²Ne semumulekha wakholela papa wuwe nohomba mayi wuwe khuli kenyekha tawe; ¹³Muchangalasia elikhuwa lia Nyasaye lilekha okhuva novusiro okhuvirira mumekesio komwekesianga, nende amakhuwa kandi amanyingi kafwana kario komukholanga¹⁴Ne wayali niyakhalanga avandu vosi wayali, yavasungila ari, Mbulilisie sia vuli mulala khwinywe, ne mumanye: ¹⁵Sivulawo esindu sili elwanyi wo omundu, siva nesialenjilanga muniye sinyala siamuvakha esifwavi: nikakhali amakhuwa amakhuwa karulanga muniye, akenako niko kamuvakhanga esifwavi. ¹⁶Nikava omundu yesi wuvele nende amarwi kokhuwulira, lekha awulire.¹⁷Ne wayali niyakhenjila munju okhurula muvandu, aveki vave vamureva okhulondokhana nendeolukano. ¹⁸Ne naye wavasungila ari, Alinywe mwesi muvula elimanya? Semwalamanyanga tawe, muri esindu siosi sio okhurula elwanyi, wesinjilanga mumundu sesinyala okhumuvakha esifwavi tawe; ¹⁹Sikila sesinjilanga mumwoyo tawe, nikakhali munda, ne sirula elwanyi nesicha muchoo? khwako yatakasa ofwakhulia fwosi okhuva ofulayi.²⁰Ne wasunga ari, Silia sirulanga elwanyi okhurula mu mundu, nisio sivakhanga omundu esifwavi. ²¹Okhurula mukari, mumioyo kia avandu, chirulangamo echinganakani echimpi, ovuheyi, ovwiri, ²²Ovwifwi, okhwikomba, ovuveyi, ovulianga, eyimoni eyimpi, amanyeko, esileka, ovuyingwa: ²³Ofundu ofuvi funo fwosi furulanga mukari, ne nifwofuvakhanga omundu esifwavi.²⁴Ne warekukha okhurula avwene yawo, ne wacha wavirira mulwakho lwaTiro nende Sidoni, newenjila munju, ne siyayenya omundu yesi amanye tawe: nikakhali siyanyala okhwikisa tawe. ²⁵Sikila omukhasi navuleve, womwana wuwe omukhana omuraka yali nende eroo ye esisieno, yamuwulila, wecha ne wasikama mufulenge fufwe: ²⁶Omukhasi mwene oyo yali Omuyunani, weyikholo ya Musirofoinike; ne wamusaya ari okhume esisieno sirule mu mwana wuwe.²⁷Nikakhali Yeso yamusungila ari, Lekha mbele avana vekure: sikila sekenyekhana ovukule esiakhulia sia avana, ne osukunile echimbwa tawe. ²⁸Naye wachiva ne wamusungila ari, Nikario, Omwami: kakhava kario echimbwa chikhalanga hasi we mesa chilichanga fwa avana valakwisianga.²⁹Ne naye wamusungila ari, Khu liawakhalakaya elio chila khu lieneli; esisieno sirurile mu mwana wuwo omukhana. ³⁰Ne khuli yola munju yiye, yanyola esisieno nesirulile, ne omukhana wuwe niyayalisie khu sitanda.³¹Ne khandi , welawarula khu lwakho lwa Tiro nende Sidoni, wecha wola khu yinyanja ya Galilaya, okhuvirila akari wa amachinga ka Dekapoli. ³²Ne vamurerila mulala wali niyekala amarwi, neyali novusiro vwo okhulakaya; ne vamusaya amurekho omukhono kukwe.³³Ne naye wamuvukula aluveka okhurula mulukhumulo, ne wara ofutere fufwe mu marwi kake, ne wafucha amare, ne wamutila khu lulimi lulwe; ³⁴Ne anga yalikamila mwikulu,yarula emiuya, ne wamusungila ari, Efufatha, nikhwo okhusunga vari, Kho wikukhe. ³⁵Ne avwene navwene amarwi kake kekukha, ne ovusiro vwo lulimi lulwe lwanguwa, ne walakayaovulayi vwene³⁶Ne wavakaya ari vakhasungila omundu yesi tawe: nikakhali khuli yatasa okhuvakaya, niwo anga navo vatasa okhukalandia; ³⁷Ne navo vawuka okhuvira esikelo, nivasunga vari, Wukholile ofundu fwosi ovulayi: alalombanga vosi avasilu okhuwulila, nende pupu okhulakaya.

¹Muchindalo chilia wo olukhumulo lwali olukali lwene, ne vava vavula sie valia, Yeso yalanga aveki vave wayali, ne wavasungila ari, ²Nakholelanga olukhumulo lwa avandu vano esisa,sikila vakhava ninasie khu lwe echindalo chitaru, ne sivulawo siosi sia valile; ³Ne nemba sungila endi vache muchingo chavo niveyimane okhulia, valanyirira khu njila: sikila avanyingi vayecha okhurula hale. ⁴Ne aveki vave vamuchiva vari, Omundu anyala warusia hena esiakhulia sio okhulisia avandu vano vosi musiangalamwe muno?⁵Ne wavareva ari, Ne emikati kinga kio muli ninakio, Ne vasunga vari, Musafu. ⁶Ne warusia elilaka avandu vekhale hasi khuvunyasi: ne wavukula emikati musafu, ne wopa orio muno, ne wakitonya tonya, welesia aveki vave vare evweni wa avandu.⁷Ne valiho nende orung'eni orutiti - rutiti avwene yawo: ne naye wavibarikiya, ne warusia elilaka viosivavire evweni wavo. ⁸Niwo anga valia, ne vekura: ne vasolola esiakhulia siali nesisikale ofukapu musafu. ⁹Ne valia esiakhulia esio vali avandu echelefu chinne: ne naye wavasevula. ¹⁰Ne avwene yawo wenjila muliaro nende aveki vave, ne vecha muchimpeka cha Dalimanutha.¹³¹¹Ne Avafarisayo varurila, ne vachaka okhurevana ninaye, nivenya avekesie esimanyikhilo sio okhurula mwikulu, nivamukhaka. ¹²Ne naye warula emiuya emikali mumwoyo kukwe, ne wasunga ari, Sikila sina eselukho yino yalakhavilisianga esilolelo? kang'ali namusungilanga, Sivulawo esilolelo siosi sie eselukho yino yalelesivwa tawe. Ne wavalekha, ne wayava niyakhenjila muliaro khandi varekukha vacha oluveka lundi.¹⁴Vulano aveki vali vevirile okhusita omukati, muliaro mwa vali sevalikho nende ikulu wo omukati mulala tawe. ¹⁵Ne naye wavemisia, nasunga ari, Mwikhale meso, mwilinde okhulondokhana nende elimela lia Avafarisayo, nende elimela lia Herodi.¹⁶Ne avene vachaka okhurevana, nivasunga vari, yaani sikila sekhuli no omukati tawe. ¹⁷Ne wa Yeso yamanya, Sina sie mwalarevananga, sikila muvula omukati? musili okhuva nelienelesia, nohomba elimanya? musilingi ne emioyo kienyu emisiro?¹⁸Muvele ne echimoni, ne sechalalolanga tawe? ne muvele na amarwi, ne semwalawulilanga tawe?nenywe semwalechulilanga tawe? ¹⁹Wanatonya emikati kiranokhu vandu echelefu chirano, nofukapu fwinga fwichule fwe esiakhulia siasikala fwa mwasolola? Vamusungila vari, elikhumi na fuvili.²¹²⁰Ne wakiali musafu khu vandu echelefu chinne, nofukapu fwinga fwichule fwo ofupande fwasikala fwa mwasolola? Ne vamusungila vari, Musafu. Ne wavasungila ari, Nesikila sina mwakhalamanyanga?²²Ne wecha Betsisaida; ne varera omundu omuvofu wayali, ne vamusaya vari amutilekho. ²³Ne watila omukhono kwo omuvofu wulia, ne warula ninaye elwanyi we elitokho; ne wayali niyakhafucha khuchimoni chiche, nende okhumurakho emikhono kikie, yamureva nikava alalolanga khuli kenyekhana.²⁴Ne naye walolelela yikulu, ne wasunga ari, nalolanga avandu khuli emisala, kialakendanga. ²⁵Khu lwako wela khandi wara emikhono kikie khu chimoni chiche, ne wamulikamia yikulu: ne naye wawona, wachaka okhulola vuli omundu ovulayi vwene. ²⁶Ne wamusevula ache munju yiye, namusungila ari, Okhachilakho mwitokho tawe, nohomba okhasungilakho omundu yesi mwitokho tawe.²⁷Ne Yeso warekukha wacha, nende aveki vave, mumatokho ka Kayisaria Filipi: ne khunjila wareva aveki vave, navasungila ari, Avandu vasunganga vari esie niwina? ²⁸Ne navo vachiva vari, Yohana Omubatisi: nikakhali avandi vasunga vari, Eliya; ne avandi vari, mulala khu avang'osi.²⁹Ne naye wavasungila ari, Nikakhali enywe nanywe mwalasunganga muri esie niwina? Ne Petero wachiva wamusungila ari, Ewe niwe Kristo. ³⁰Ne naye wavakania ari vakhamula khu mundu yesi tawe.³¹Ne wachaka okhuvasomia, ari Omwana wo mundu alavirira mu sinyasio sio ofundu ofunyingi, ne lalolwa nende avasakhulu, nende avasalisi avakhongo, nende avandiki va amalaka, ne alerwa, ne khu lwe echindalo chitaru alasisimukha khandi. ³²Ne yalakaya lieneli avulafu. Ne Petero wamuvukula aluveka wachaka okhumukondokhela.³³Nikakhali khulwa yesevukha ne walolelela aveki vave, yakondokhela Petero, nasunga ari, Kalukha inyuma wanje, Shetani: okhuva ewe somanyile amakhuwa ka Nyasaye tawe, nikakhali amakhuwa kali ka avandu. ³⁴Ne wayali niyakhalanga avandu wayali halala nende aveki vave, yavasungila ari, Wulia yesi walenya okhunonda, yeyikane omwene, na avukule omusalaba kukwe, ne yanonde.³⁵Okhuva wulia yesiwalawonia ovulamu vuvwe alavutifia,;nikakhali wulia yesi walatifia ovulamu vuvwe sikila esie nende sikila amakhuwa amalayi, niye mulala wulia walavuwonia. ³⁶Vwalava ni vukhala sina khu mundu, nikava anyala okhunyola esivala siosi, ne atifie ovulamu vwe eliva lio mumwoyo kukwe. ³⁷Nohomba nisina sio omundu anyala warusia muvwiyangu vwe eliva lia mumwoyo kukwe?³⁸Wulia yesi khukario walakholela echisoni nende amakhuwa kanje mulwivulo luno lwo ovutamba nende ovwononi; ava yesi Omwana wo omundu alamukholela echisoni, lwalicha muvukhumivwa Papa wuwe nende echingelosi echinjenukhu.

¹Ne wavasungila ari, Kang'ali namusunilanga, Endi valivamo valala vasinjile hano, vakhalikonyelakho elifwa tawe, okhutukha wavalilola ovwami vwa Nyasaye novwichile na amani. ²Ne wechindalo chisasava chali nechivirile Yeso yavukula Petero, nende Yakobo, nende Yohana, wanina khu lukulu olurambi ninavo vong'ene muvwikisi: ne naye wakalukhasivwa evweni wavo. ³Ne echinguvo chiche chang'inang'ina, chawangiya chwee okhuvira namwifweli; chavira esikelo sio omundu yesi anyala wafuwa chawangiya chirio.⁴Ne avwene yawo valolekhanawo Elicha nende Musa: ne vali valalakayanga nende Yeso. ⁵Ne Petero wachiva ne wasungila Yeso ari, Omwami, novulayi efwe fwesi okhuva hano: ne lekha khulombe amatili kataru; lilala elilio, ne elindi lia Musa, ne elindi lia Elicha. ⁶Sikila seyamanya lio okhulakaya tawe; okhuva vali vatililwe nechindenga echingali⁷Ne khwaliwo nelilesi liavafunikha: ne omwoyo kwarula mwilesi, nokusunga kuri, Owuno niye Omwana wanje omusime: mumuwulile. ⁸Ne khusikha sienesio, wavali nivakhalengela aluveka wenawo, sevayela valolakho omundu wundi yesi avwene yawo tawe, okhurusiakho Yeso yeng'ene nende avene.⁹Ne khuli vali nivalekhanga okhurula khu lukulu, yavakaya ari vakhasungilakho omundu yesi amakhuwa kavali nivalolile tawe, okhutukha anga Omwana wo omundu alivukha okhurula muvafwa. ¹⁰Ne avene khu vene valinya khu makhuwa kenako, nevarevana mulala nowundi vari okhuvukha okhurula muvafwa khuva khuvele nesifune sina.¹¹Ne vamureva, nivasunga vari, Sikila sina avandiki va amalaka vasunganga vari Elicha alemila anyowe yeche? ¹²Ne wavachiva wavasungila ari, Kang'ali Elicha alemila yeche, ne akalusieofundu fwosi; nende khuli kahandikwa khu Omwana wo omundu, vari alanyakhanila mufundu ofunyingi, ne nivamuleka. ¹³Nikakhali namusungilanga, Endi Elicha wayecha khale, ne vamukholela kalia kavamurechekhela, khuli anga kakandikwa khu niye.¹⁴Ne khuli yecha wa aveki vave vali, yolola olukhumulo olukali noluvavotokhane, ne avandiki va amalaka nivalarevananga ninavo. ¹⁵Ne avwene na avwene avandu vosi, khuli vamulola, vauka vululu, vatumaka okhumwakanila, vamukhesia. ¹⁶Ne wareva avandiki va amalaka ari, Ni mareva sina ka mwalavarevanga?¹⁷Ne mulala mulukhumulo wamuchiva ne wamusungila ari, Omwami, Nikhurerile omwana wanje omusiani, wuli nende eroo yo ovusilu; ¹⁸Ne avundu wosi wosi wayimutililanga, yimukhupanga hasi: ne arusia elifilo, ne achaka okhukhwayula ameno kake, ne achaka okhwikhuna: ne esungile aveki vavo endi vamukhume arule; ne navo vakhayilwe. ¹⁹Ne naye wamuchiva, ne wamusungila ari, Enywe eselukho yikhali nelisuvila, nava ninanywe khu sikha sina? Emwifwile okhwola hena? murere wendi hano.²⁰Ne vamurera wayali: ne anga yamulola, avwene na avwene eroo yilia yamukhupa; ne wakwa hasi, ne wakalakala narusia elifilo. ²¹Ne naye wareva papa wuwe ari, Ni khu sikha sina sie eroo yino yakhamumenyamo? Ne naye wasunga ari, okhurula nali ovwana. ²²Ne muvunyingi yimusukunanga mumulilo, ne khandi mumachi, okhwenya okhumuvunia,khukholele esisa, ne okhuyete.²³Yeso wamusungila ari, Nonyala okhusuvila, amakhuwa kosi kanyalikha khuwulia wusuvile. ²⁴Ne avwene na avwene, papa wo omwanawulia walila vululu, ne wasunga emisika nikialarulanga ari, Omwami, Nisuvile; njete mukhulekha okhusuvila khwanje. ²⁵Khuli Yeso yalola avandu valechanga halala nivatumaka, yakondokhela eroo eyimpi yilia, nakisungila ari, Ewe eroo yesiyingwa nende ovusilu, Nakhulakilisianga, rula muniye, ne okhela wecha wenjila khandi wenjila muniye tawe.²⁶Ne eroo yilia yalila, ne yamukalakasia hasivululu ne yarula muniye: ne naye wafwana khuli wufwile; niwo anga vanyingi vasunga vari, Wufwile ²⁷Nikakhali Yeso yamutila omukhono, ne wamuchingula yikulu; ne naye wavukha.²⁸Ne khuli yali niyakhenjila munju, aveki vave vamureva muvwikisi vari, Sikila sina efwe khukhayilwe okhurusia? ²⁹Ne wavasungila ari, fufwana furi sefurulanga vusa tawe, nikakhali okhuvirila mumasayo nende okhwiyimana okhulia.³⁰Ne varekukha awene yawo, ne vavirila mu Galilaya akari; ne seyayenya omundu yesi amanye tawe. ³¹Sikila yali wayekesia aveki vave, ne yavasungilanga ari, Omwana wo omundu alarusiwa mumikhono kia avandu, ne navo valamwira; ne wavalava nevamwirile, alasisimukha eyindalo ya khataru. ³²Nikakhali sevatilangaesifunane sia amakhuwa kenako tawe, ne varia okhumureva.³³Ne yecha Kapernaumu: ne wavali munju yavareva ari, Sivele sina sio murevanenge akari wenyu khu njila? ³⁴Nikakhali vawolela: sikila wavali khu njila vali varevanenge akari wavo, niwina walava omukhongo khu vosi. ³⁵Ne wekhala hasi, ne walanga elikhumi ne vavili, wavasungila ari, Nikava omundu yesi alekomba okhuva wokhuranga, akhoyela ave wokhumalilikha khu vosi, ne ave omurumikhi wa vosi.³⁶Ne wavukula omwana, ne wamusinjisia akarikari wavo: ne wayali niyakhamuvukula mumikhono kikie, yavasungila ari, ³⁷Wulia yesi walenjisia mulala khu vana vatiti anga wuno mulira lianje, alava wunjinjisie esie: ne wulia yesi walanjinjisia esie, salava wunjinjisie esie tawe, nikakhali wulia wanduma esie.³⁸Ne Yohana wamuchiva, nasunga ari, Omwami, khulolire omundu mulala nalakhumanga ofusieno mu lira lilio, ne sakhulondanga efwe tawe: ne khumukayile, sikila sakhulondanga efwe tawe. ³⁹Nikakhali Yeso wasunga ari, Mukhamukaya tawe: sikila avulawo omundu wunyala okhukhola amalolesio mulira lianje, wunyala wandakayakho amavi tawe.⁴⁰Sikila wulia wukhali esinyuma ninafwe tawe ava wuvele oluveka lwefu. ⁴¹Sikila wulia yesi walamuwelesia amachi ko okhunywamulira lianje,sikila enywe muvele va Kristo,kang'ali namusungilanga enywe,salatifia esihanwa sisie tawe.⁴²Ne wulia yesi walasikerasia mulala khu avatiti vano vaasuvila, vwakhavele ovulayi khu niye niyakhavoyilwe olukina mwikosi mumwe, ne ache asukunwe munyanja. ⁴³Omukhono kukwo nokukhwononela, kureme okhusukune: sikila novulayi khwiwe winjile muvulamu noli omulema, okhuvira ove ne mikhono kivili ne ochee musiatisi, sio omuliro kukhalisimwa tawe. ⁴⁴Weyinyende yavo yikhalifwa tawe, nende wo omuliro kukhalisimwa tawe.⁴⁵Ne esilenge sisio nesikhusiamia, sireme osirusiekho: novulayi khwiwe winjile muvulamu nokwila, okhuvira okhuva nofulenge fuvili ne osukunwe musiatisi, wo omuliro kukhalisimwa tawe: ⁴⁶We eyinyende yavo yikhalifwa tawe, nende wo omuliro kukhalisimwa tawe.⁴⁷Ne eyimoni yiyo neyikhusiamia, yitomole oyirusie: novulayi khwiwe winjile mu vwami vwa Nyasaye neyimoni ndala, okhuvira ove nechimoni chivili ne osukunwe mumuliro kwe musiatisi: ⁴⁸We eyinyende yavo yikhafwichanga tawe, ne omuliro sekusimanga tawe.⁴⁹Okhuva vuli omundu alirerwamo omunyu no omuliro, ne vuli omusango kulirerwamo omunyu no omunyu. ⁵⁰Omunyu nomulayi: nikakhali omunyu nekwakhatakha echanju, walaramo sina kho kuve ne echanju? Muve no omunyu mwinywe mwavene, ne muve no omulembe khu vuli sia mulala wenyu.

¹Ne warula evweneyo, wecha khu chinjakho cha Yuda oluveka luli hale khu Yoridani: ne avandu vevungelesia wayali khandi; ne khuli yali niyanala, wela wavasomia khandi. ²Ne Avafarisayo vecha wayali, ne vamureva vari, Nilia avwene omundu okhukhuma omukhasi wuwe? nivamukhaka. ³Ne wavachiva wavasungila ari, Musa yarusia elilaka ari sina? ⁴Ne vasunga vari, Musa yakhwiyamila khwandike evarwa yokhulekhana, ne naye ache.⁵Ne Yeso wavachiva wavasungila ari, ovumu vwe emioyo kienyu nivwo vwakila wavandikila elilaka lino. ⁶Nikakhali okhurula mukhuranga khwo okhulonga Nyasaye yavalomba omusacha nende omukhasi.⁷Khu sifune sino omusacha alalekha papa nende mayi wuwe, ne yambasivwe khu mukhasi wuwe; ⁸Ne navo vavili valava omuvili mulala: kho khu kario sevalava vasili vavili tawe, nikakhali omuvili mulala. ⁹Khu kario sia Nyasaye yambasiye halala,omundu yesi akhakavukhasia tawe.¹⁰Ne wavali munju aveki vave vela vamureva khandi khu malala kenako. ¹¹Ne naye wavasungila ari, Wulia yesi walakhuma omukhasi wuwe, ne ayile owundi, alava wukholile ovuheyi khu wulia. ¹²Ne nikava omukhasi alalova omusacha wuwe, ne ache olukhasi khu musacha wundi, alava wukholire ovuheyi.¹³Ne vamurelera avana avatiti, vari avatilekho: ne aveki vave vakondokhela vali nivavarelire. ¹⁴Nikakhali Yeso yalola, ne naye wasinyikha vululu, ne wavasungila ari, Lekha avana avatiti veche khwisie, ne mukhavakaya tawe: sikila ovwami vwa Nyasaye vuvele vwa avandu ori vano.¹⁵Kang'ali namusungilanga enywe, Wulia yesi wukhalenjisia ovwami vwa Nyasaye khuli omwana omutiti, salinjilamo tawe. ¹⁶Ne wavukula avana mumikhono kikie, wavarakho emikhono kikie ne wavasavila echikhavi.¹⁷Ne wayali niyakhacha khunjila evweni, omundu mulala yecha nalatumakanga, ne wamusikamila, ne wamureva ari, Omwami Omulayi, ekhole sina khe enyole ovulamu vwa mindali? ¹⁸Ne Yeso wamusungila ari, Sikila sina walananganga esie ori omulayi? avulawo yesi wuli omulayi tawe nikakhali mulala, nali, Nyasaye. ¹⁹Ewe wamanya amalaka, Okhaheya tawe, Okhera tawe, Okheva tawe, Okharusia ovuloli vulali vwa avwene tawe, Okhaveya tawe, Orie papa wuwo nende mayi wuwo.²⁰Ne naye wachiva wamusungila ari, Omwami, kano kosi ekholanga okhurula muvuraka vwanje. ²¹Niwo wa Yeso yamulolerera wamuyanja, ne wamusungila ari, Esindu silala nisio siotakhile: ewe cha, okusie vuli esindu siosi sioli ninasio, ne welesie avatakha, ne nawe walava nelivikhilo mwikulu: ne wiche, ovukule omusalaba, ne wunonde. ²²Ne naye wavelera anga yamusungila elieneli, ne warulawo wacha natunyire: sikila yali emiandu eminyingi.²³Ne Yeso wesevukha walolerera vuli avundu, ne wasungila aveki vave ari, Khuli vwalava ovutinyu khu vali nemiandu okhwinjila mu vwami vwa Nyasaye! ²⁴Ne aveki vawuka khu makhuwa kake. Nikakhali Yeso wela wavachiva khandi, ne wavasungila ari, Vana enywe, vwala ovutinyu khu valia vara eliyikina liavo muvuyinda okhwinjila muvwami vwa Nyasaye. ²⁵Vwalava vwangu khu yingamia okhuvirira mutundu ye esindani, okhuvira omundu omuyinda okhwinjila muvwami vwa Nyasaye.²⁶Ne vawuka okhuvira esikelo, ne avene varevana vari, Vulano niwina wunyala okhuwonisivwa? ²⁷Ne Yeso anga yavalola wasunga ari, Khu vandu sekanyalikha tawe, nikakhali sekali kario khu Nyasaye tawe: sikila khu Nyasaye ofundu fwosi funyalikha. ²⁸Ne Petero wachaka okhumusungila ari, Lola, efwe khwalekha fwosi, ne khwakhulonda ewe.²⁹Ne Yeso wachiva wasunga ari, Kang'ali namusungilanga enywe, avulawo omundu yesi walekha eyinju, nohomba avawandaye avasiani, nohomba avakhana, nohomba papa, nohomba mayi, nohomba omukhasi, nohomba avana, nohomba emikunda, sikila esie, nende sikila amakhuwa amalayi, ³⁰Nikhali alanyola omurungo kwe eyimia khu yimia khu sikha sia vulano sino, echinju, nende avawandaye avasiani, nende avakhana, nende avamayi, nende avana, nende emikunda, halala ne eminyakhano; khandi nende musivala siva nisialecha sio ovulamu vwa mindali. ³¹Nikakhali avanyingi vali evweni valava vokhumalilikha; ne vokhumalilikha valava vokhuranga.³⁴³²Ne navo wavali khunjila nivalachichanga Yerusalemi; Yeso yemila evweni wavo: ne navo vachenya; ne khuli vamulondanga, vava novuri. Ne khandi wela wavukula elikhumi nende vavili, wachaka okhuvasungila ofundu fwalachanga okhwikholekha khuniye, ³³Nasunga ari, Lola, khwalachichanga Yerusalemi; ne Omwana wo omundu alarusivwa khu avasalisi avakhongo,nende khu vandiki va amalaka; ne navo valamukhalakila okhwirwa, ne valamurusia khu Vesivala:

¹Ne wavali nivakana okhwola Yerusalemi, ahembi nende Bethifage nende Betsania, wesikulu sia Oliveti siali, yaruma vavili khu veki vave, ²Navasungila ari, chee musirekelo simufutare evweni wenyu: ne anga mwalava nimwakhenjilamo vusa muri, mwalanyola esimosi sie esikhili nesivoyilwe, sio omundu yesi sili okhwikhalakho tawe; sikangulule, ne musirere. ³Nikava omundu yesi alamureva ari, Sikila sina mwalakholanga murio? musunge muri; Omwami wuvele nelienya ninasio; ne avwene na avwene alamulekhula mumurere hano.⁴Ne navo varekukha vacha, ne vanyola esimosi sie esikhili sivoyilwe elwanyi wo omuliango mumasanganjila ke echinjila chivili chakananilanga: ne vasikangulula. ⁵Ne avandu navuleve vali nivasinjile awenawo vavareva vari, mwalakholanga sina, nomukangulula esimosi sie esikhili ? ⁶Ne vavasungila khuli Yeso yali narusie elilaka: ne valekhana ninavo vacha.¹⁰⁷Ne varela esimosi sie esikhili khu Yeso, vasirakho echinguvo chavo, ne naye wekhalakho. ⁸Ne : ne avanyingi vala echinguvo chavo khunjila: ne avandi navo varema echisakia cha amasafu okhurula khu misala, ne vara khunjila. ⁹Ne valia vemila evweni, nende valia vali yinyuma, valangilisia, nivasunga vari, HOSANNA; WUVELE NOVUKASU WALECHELA MULIRA LIO OMWAMI:

¹Ne wachaka okhuvalakayila muchingano. Omundu navuleve yaraka omukunda kwo omusabibu, ne wasira olukaka wakuvotokhasia, ne wayavamo avundu wokhutinyila omusabibu, ne wombakha omunara kwo okhulindilamo, ne wakukotisia khu avalimi vandi, ne warekuka wacha musivala sia hale. ²Ne khu esikha sio okhufuna, yaruma khu valimi valia omukhalavani wuwe, vari vamuwelesiekho elichesa lio omukunda kwe emisabibu. ³Ne navo vamutila, ne vamupa, ne vamukhuma amakhono amakangala.⁴Ne wela khandi wavarumila omukhalavani wundi; ne naye vamuchura amakina kamupa, ne vamusalisia khu murwe, ne naye vamukhuma wacha nivakhamukhosia akechisoni. ⁵Ne khandi wela waruma owundi; ne naye vamwira, nende avandi avanyingi; nivopa avandi, ne nivera avandi.⁶Khu kario wayava nasikale nende omwana wuwe omusiani mulala, wayayanja novuyanji vwosi, wela wamuruma khu valia, nasunga ari, Valelesia omwana wanje oluyali. ⁷Nikakhali avalimi valia vamonyana vari, Wuno niye mwene emiandu; yicha, lekha khumwire, ne emiandu kialava ekiefu.⁸Ne navo vamutila, ne vamwira, vamusukuna okhurula mumukunda kwe misabibu. ⁹Khu kario omwami mwene mukunda alakhola sina? alecha ne avunie avalimi valia, ne yelesie avalimi vandi.¹¹¹²¹⁰Ne enywe semwasomakho eliandiko lino; ELICHINA LIA AVOMBAKHI VALOVA NILIO LIACHENA LIAKHAVA LIO OVWALILO OVUKALI MUKONA:

¹Ne anga vali nivalarulanga elwanyi we litembeli, mulala khu veki vave wamusungila ari, Omwami lolakho khuli amakina kalombwa nende khuli vombakha hano! ²Ne Yeso okhumuchiva wamusungila ari, Walalolanga emichu emikali kino? livulawo elikina hata lilala lilisikala khu lindi lililekhwa vulali okhukwisivwa hasi tawe.³Ne anga yekhalasi khu sikulu sia Oliveti siali oluveka lundi nesilengelane ne elitembeli, Petero nende Yakobo nende Yohana nende Andreya vamureva muvwikisi, ⁴Khusungilekho, amakhuwa kene kano kaliva lina? ne sina nisio siliva esilolelo sio ofundu funo fwosi wofulicha okhwikholekha?⁵Ne Yeso mukhuvachiva wachaka okhuvasungila ari, Mwikhale vureke omundu yesi akhecha wamuveya tawe: ⁶Sikila avanyingi valechela mulira lianje, nivasunga vari, Nisie Kristo; ne valaveya avanyingi.⁷Ne wamwalaulila amaaye nende nivarumbula aka amaaye, mukhanyakhana tawe: sikila akenako kalecha okhurulila; nikakhali okhumalilikha khwalava khusili okhwola. ⁸Esivala sialacha siupane nesindi, ne ovwami vwalopana novundi: ne khwalavawo nende esialo okhurenga muchimpeka lukano na lukano, ne khwalavawo neyinjala nende eminyakhano: okhuno nikhwo khwalava okhuchaka khwo okhulumwa.⁹Nikakhali mwavene mwikhale vureke: sikila valavatila nivavayila mufuyalo; ne valamupila muchisinakoki: ne valamurela evweni avaruki nende avami sikila esie, vuve ovuloli esinyuma ninavo. ¹⁰Ne elikhuwa elilayi lialemila evweni lilwachisivwe mufuvala fwosi.¹¹Nikakhali anga valamutila, ne vamuyile evweni, mukhaenda muchinganakani khuli mwalalakaya tawe, nohomba mukhachaka okhukayililisia tawe: nikakhali kalia kamwalelesiwa eyisa yene yilia, akenako niko komuva nimwalalakaya: sikila simwalava enywe mwalava nimwalalakayanga tawe, nikakhali Roo Omuchenukhu. ¹²Vulano wandaye alachama wandaye okhwola yerwe, ne papa naye no omwana omusiani; ne avana navo valakalukhana avevusi vavo, ne navo valakila verwe. ¹³Ne mwalaviyilwa nende avandu vosi sikila elira lianje: nikakhali wulia walefwila atukhe mukhumalilikha, niye wuva nalawonisivwa.¹⁴Nikakhali wamulilola ESISINYISIO SIO OKHWINONIA, sialakaywa nende omung'osi Danieli, nesisinjile avundu wasikhakhoyele tawe, ( lekha wulia walasomanga ave nelimanya, ) kho lekha valia vali Evuyuda velukhe nivacha mufukulu: ¹⁵Ne lekha wulia wuli khunju yikulu akhekha hasi munju tawe, nohomba akhacha wenjilamo, okhuvukula esindu siosi tawe. ¹⁶Ne wulia wuli mumukunda akhakalukha khandi yinyuma okhuvukula eyinguvo yiye tawe.¹⁷Nikakhali kaliva amatinyu khu valia valiva neyinda, nende khu valia valiva nivalanunianga muchindalo chilia! ¹⁸Ne musale muri ako kakharulila echindalo cho omunyiri tawe. ¹⁹Okhuva muchindalo chilia khuliva nesinyasio, sisili okhulolekhanakho okhurula esialo nesichaka sia Nyasaye yalomba okhwola esikha sino, nohomba sisilicha khandi okhuvawo tawe. ²⁰Ne nikakhavele vari Omwami siyakhayembiyisie echindalo echo tawe, avulawo yesi wuli mumuvili wakhawonile tawe: nikakhali sikila avarovolwe, valia vayarovola, alembiyisia echindalo.²¹Ne nikava omundu yesi anyala wamusungila ari, Lola, Kristo wuvele hano; nohomba ari, lola, wuvele yawo; mukhamusuvila tawe: ²²Sikila Kristo vovuveyi nende avang'osi vovuveyi valarulila, ne walakhola amalolesio nende kokhuwuka, ko okhuselela, nikanyalikha, khu valia varovolwa. ²³Nikakhali enywe muve meeso: Ninyowile okhuvasungila amakhuwa kosi nikakharulila tawe.²⁴Nikakhali muchindalo chilia, wesinyasio siliva nisiakhawa, eliuva lililima, ne omwesi sikulirusia ovulafu vwakwo tawe, ²⁵Ne eching'iniesi cho mwikulu chilikwa, ne ovunyali vuli mwikulu vulirenga. ²⁶Ne niwo wavalilola Omwana wo omundu nalechanga mumalesi na amani amanyingi nende ovukhumi. ²⁷Ne niwo waliruma echingelosi chiche, ne valisolola halala avarovole vave okhurula echimpeka chinne che eyimboo, okhurula echimpeka cha hale che esialo okhucha echimpeka cha hale cho mwikulu.²⁸Vulano yekakho olukano lwo omusala omukhuyu; Wechisakia chivechanga nechisili echindoro, ne nichakhachaka okhwama amasafu, mumanyanga muri esimiyu sikana okhwola: ²⁹Kho mwesi munjila yeneyo, wamwalalola ofundu funo nifwakhachaka okhwikholekha, mumunye muri kavele ahembi, amiliango.³⁰Kang'ali namusungilanga enywe, endi eselukho ya vulano yino siyalavira tawe, okhwola ofundu funo fwosi fuve fwikholekhane. ³¹Elikulu ne elilova vialavira viche: nikakhali amakhuwa kanje sikalavira vusa tawe. ³²Nikakhali eyindalo yilia nende eyisa yilia avulawo omundu yesi wamanya tawe, tawe, chikhava echingelosi chili mwikulu, nohomba Omwana, nikakhali Papa.³³Mwikhale vureke, muve meeso nemusala: sikila simumanyile eyisa yiliva lina tawe. ³⁴Sikila Omwana wo omundu wuvele khuli omundu wachichanga oluchendo lwa hale, walekha eyinju yiye, ne welesia avakhalavani vave ovunyali, ne khu vuli sia mulala wamuwelesia emilimo kiakhola, ne wasungila omulindi wesilivwa yekhale meeso.³⁵Kho enywe yikhale meeso: sikila simumanyile nilina wo omwami mwene eyinju alecha tawe, khu ngolove, nohomba musilo akari, nohomba etwaya yikholiokhelanga, nohomba mumavwivwi: ³⁶Akhecha matintivikha wavanyola nimwalakonanga. ³⁷Ne kanavasungilanga kano nasungilanga vosi, Muve meeso.

¹Chali chisikale echindalo chivili okhwola omulukha kwe elipasaka, nende omukati khukhalimo elimela tawe: ne avasalisi avakhongo nende avandiki va amalaka vakhava siosi sia vanyala vamutililakho, ne vamwire. ²Nikakhali vasunga vari, Yikhava khu eyindalo yo omulukha tawe, avandu vakhecha varera olutiri.³Ne wavali Betsania munju ya Simoni walwala amachele, wayava niyekhale nalalichanga, yechamo omukhasi wali nelipokisi lia amafura kawunyanga ovulayi ko ovukusi vwe yikulu, ne warandula elipokisi, warusia amafura kalia wamuchukha khu murwe. ⁴Ne khwalimo nende avandu valala vasinyikhila mukari mwavo, ne vasunga vari, Sikila sina yenonile amafura amalayi kano? ⁵Vakhakusiye ikulu wechidinari echimia chitaru, ne vakhelesie avatakha. Ne vamwiviyilisiya.⁶Ne Yeso wasunga ari, Lekhana ninaye; nisina sia mwalamunyasianga? wukholile omulimo omulayi khwisie. ⁷Sikila muvele na avatakha vuli lwosi, ne khusikha siosi sia muva nemwalenya munyala mwavakholela amalayi: nikakhali esie simwalava ninasie vuli lwosi tawe. ⁸Wukholile khu kanyala: wunyowile okhwicha evweni okhuvakha amafura omuvili kwanje nokukhayavilwa. ⁹Kang'ali namusungilanga, avundu wosi wavalilwacha elikhuwa elilayi lino musivala siosi, esikholwa siakholile sino siosi sililakaywa mukhumwichulila.¹⁰Ne Yuda Isikarioti, mulala khu valia elikhumi nende vavili, yacha khu avasalisi avakhongo, amuchame khunivo. ¹¹Ne anga vawulila vario,vali novusangafu, ne vamulaka okhumuwa echirubia¹²Ne eyindalo yo okhuranga yo omukati kukhalimo elimela, wavali nivakhera ye elipasaka, aveki vave vamusungila vari, Nihena wolenyanga ori khuche ne khukhole emirechekho wolalila elipasaka? ¹³Ne waruma vavili khu veki vave, ne wavasungila ari, Enywe chee mwitokho, ne eweneyo mwalakananayo no omundu wusitile eyinyungu ya amachi: mumulonde. ¹⁴Ne avundu walacha yenjile, musungile mwene eyinju yilia muri, Omwami alasunganga ari, Eyinju ya avacheni yivele hena, wanalila elipasaka nende aveki vanje?¹⁵Ne alamwekesia eyinju eyimbalayi yili yikulu yimo vuli esindu ne khandi vakilompile: muvwene mulia mukhulompelemo. ¹⁶Ne aveki vave varula vacha, vola mwitokho, ne vanyola anga yali navasungile: ne navo valompamo emirechekho kie elipasaka.¹⁷Ne angolove yechamo nende aveki vave elikhumi nende vavili. ¹⁸Ne khuli vekhala hasi ne vachaka okhulia,Yeso yasunga ari, Kang'ali namusungilanga enywe, Mulala khwinywe walalichanga ninasie alanjama. ¹⁹Ne navo vachaka okhuvelela, vachaka okhumusungila mulala sia mulala vari, Nisie? ne owundi wasunga ari, Nisie?²⁰Ne naye wavachiva wavasungila ari, Ni mulala khu elikhumi na vavili, walatonganga ninasie khu bakuli ndala. ²¹Omwana wo omundu khu kang'ali alacha, khuli yahandikilwa: nikakhali nesinyasio khu mundu wulia walachama Omwana wo omundu! vwakhavele ovulayi omundu wulia niyakhalekhile okhwivulwa.²²Ne anga vali nivalalichanga, Yeso yavukula omukati, wakutakasa, ne wakutonya tonya, wavawelesia, ne wasunga ari, Vukula, liaa: kuno nomuvili kwanje. ²³Ne wavukula esikombe, ne wayali niyakhopa orio muno, yavawelesia: ne vosi vanywelamo. ²⁴Ne wavasungila ari, Kano namavanga kanje keyindakano eyimpia, kalachuchukhila avanyingi. ²⁵Kang'ali namusungilanga enywe, Sinela okhunywa khandi elitunde lio omusapipu kuno tawe, okhwola eyindalo yilia wentinywa ovuya mu vwami vwa Nyasaye.²⁶Ne wavali nivakhemba olwimbo, varula elwanyi vacha khu sikulu sie Emiseituni. ²⁷Ne Yeso wavasungula ari, Enywe mwesi mwalesikirala sikila esie esilo sia vulano vuri: okhuva kayandikwa, Nakhupa omwayi, ne amachese kalava kasalanikhe.²⁸Nikakhali wanava nesisimukhe, nacha evweni wenyu mu Galilaya. ²⁹Ne Petero wamusungila ari, Kakhava vari vosi valesikirala, esie sinakhulekha tawe.³⁰Ne Yeso wamusungila ari, Kang'ali nakhusungilanga ewe, Endi vulano vuri, esilo sia vulano vuno, etwaya neyisili okhukholiokha khavili, ewe walava wunjikanile khali khataru. ³¹Nikakhali naye walakaya nakhatalale, Nokhuli okhufwa ninawe, Esie senyala okhukhwikana munjila yosi tawe. Avandi valia vosi vasunga vario.³²Ne vola avundu wavalanganga vari, Getsesimani: ne wasungila aveki vave ari, Enywe yikhale hano, wanava ninasalanga. ³³Newavukula Petero nende Yakobo nende Yohana, ne wachaka okhuwuka vululu, nende okhuva novusiro ovukali; ³⁴Ne wavasungila ari, Omwoyo kwanje kuvelele okhuvira esikelo khu sikha sio okhufwa: enywe sikala hano, ne muve meeso.³⁵Ne naye wesendakho avweni atiti, ne wakwa hasi, wasala ari, nikakhanyalikhe, eyisa yilia yakhavirile okhurula khu niye. ³⁶Ne wasunga ari, Abba, Papa, ofundu fwosi funyalikha khwiwe; ndusiyewo esikombe sino: kakhava khario kakhava khuli nenyanga tawe, nikakhali khuli ewe walenyanga.³⁷Ne wecha, wavanyola niveyalisie, ne wasungila Petero, Simoni, ewe wesi wiyalisie? ewe sowakhekhalekho ata eyisa ndala? ³⁸Ewe yikhala meeso nosala, okhecha wenjila mumakelicho tawe. Eroo muvung'ali yirechekhe, nikakhali omuvili kutietiekhile. ³⁹Ne khandi wela wacha, ne wasala, ne walakaya amakhuwa malala kalia.⁴⁰Ne anga yakalukha, wavanyola khandi niveyalisie, (sikila echimoni chavo chali chisitowe,) ata sivaali nende lia vamuchiva tawe. ⁴¹Ne wela wecha lukhola khataru, ne wavasungila ari, Nakheyalisie vulano, ne mwimunye: kanyalile, eyisa yakhola; lola, Omwana wo omundu wuchamilwe mumikhono kia avooni. ⁴²Sinjile, lekha khuche; lola, wulia walanjamanga wuvele ahembi.⁴³Ne avwene na avwene, wayava nasilakayanga, Yuda yecha, mulala khu valia elikhumi na vavili, ne halala ninaye lwali olukhumulo olukali nechimpanga nende ofukong'o, okhurula khu vasalisi avakhongo nende avandiki va amalaka nende avasakhulu. ⁴⁴Ne wulia wamuchama yaliwuvawelesie esimanyikhilo, nasunga ari, Omundu wulia wanacha emuchunjunekho, mulala mwene wulia alava niye; muvukule, ne muche ninaye nomumulindile. ⁴⁵Ne anga yola vusa ario, yacha namwichomilekho, ne wasunga ari, Omwami, omwami; ne wamuchunjuna. ⁴⁶Ne navo vamukwakho, vamuvukula.⁴⁷Ne mulala khu valia vali nivasinjile awene yawo yarusia olupanga, ne warema omukhalavani wo omusalisi omwimilisi, ne elirwi liakwa. ⁴⁸Ne Yeso wavachiva wavasungila ari, Murule khuli mwalachichanga okhusera omunuli, nechimpanga nende ofukong'o okhundila esie? ⁴⁹Sinavelenge ninanywe vuli lwosi mwitembeli nesomia, ne simwayandilakho tawe: nikakhali amandiko kakhoyele katusivwe. ⁵⁰Ne voosi vali ninaye vamulekha, ne velukha⁵¹Ne avwene yawo omuraka navuleve yamulondakho, yali niyefwimbile olusiuka lwo okhing'inang'ina khu muvili kukwe kwali esiekenye; ne avaraka vamukwakho: ⁵²Ne wefwalula mulusiuka lwo okhung'inang'ina, ne vavelukhamo esiekenye.⁵³Ne vayila Yeso khu musalisi omwimilisi: ne halala ninaye vali vasololane avasalisi avakhongo vosi nende avasakhulu nende avandiki va amalaka. ⁵⁴Ne Petero wamulondakho khu lwa hale wene, okhutukha anga venjila mwichipi lio omusalisi omwimilisi: ne naye wekhala na avakhalavani, ne wekhala khu siosio okhwora omulilo.⁵⁵Ne avasalisi avakhongo nende avayali vosi vakhava ovuloli esinyuma nende Yeso vwavanyala okhurumikhila okhumwira; ne sivanyolakho vwosi tawe. ⁵⁶Sikila avanyingi varusia ovuloli vwo ovuveyi esinyuma ninaye, nikakhali ovuloli vwavo sevwayeyamananga halala tawe.⁵⁷Ne omundu mulala wasinjila, ne warusia ovuloli vwo ovuveyi esinyuma ninaye, nasunga ari, ⁵⁸Khwamuwulila nasunga ari, Esie napomola elitembeli lino liombakhwa nende emikhono, ne khu lwe echindalo chitaru nava nompakhe elindi vulali okhurumikhila emikhono. ⁵⁹Nikakhali khwako kosi ovuloli vwavo sevwayeyamana halala tawe.⁶⁰Ne omusalisi omwimilisiwasinjila akarikari, ne wareva Yeso, nasunga ari, Ewe solachivangakho liosi tawe? nisina esiene sino sia avaloli vano valarusianga esinyuma ninawe? ⁶¹Nikakhaliniye yawolela, ne siyachivakho siosi tawe. Khandi omusalisi omwimilisi wela wamureva, ne wasunga ari, Niwe Kristo, Omwana wo Ovukasu? ⁶²Ne Yeso wasunga ari, Nisie: nemwalalola Omwanawo omundu niyekhale omukhono omulunji kwo ovunyali, ne nalechanga mumalesi.⁶³Ne omusalisi omwimilisi warandula echinguvo chiche, ne wasunga ari, Sina esindi sia khwalenyanga sivira ovuloli vuno? ⁶⁴Mwakawulila amanyeko: mulola murie? Ne vosi vamukhalakila vari wune eyimbelelewu wutukhane yerwe. ⁶⁵Ne avandi vachaka okhumufuchakho amare, ne nivamufwimba mumoni, nivamupa, ne nivamusungila vari, Rusia ovung'osi: avakhalavani vamukhupa nofukalava fwe emikhono kiavo.⁶⁶Ne anga Petero yali hasi mwichipi, yechawo mulala khu avakholi ve esikhana vo omusalisi omwimilisi: ⁶⁷Ne anga yalola Petero naloranga omulilo, wamulolela, ne wasunga ari, Ne ewe wesi wavele nende Yeso wa Nazareti. ⁶⁸Nikakhali wekana, nasunga ari, Esie semumanyile tawe, ata semanyile kolasunganga tawe. Ne warula elwanyi musilivwa; etwaya yakholiokha.⁶⁹Ne omukholi we esikhana wela wamulola khandi, ne wachaka okhusungila vali nivasinjile awenawo ari, Wuno ni mulala khunivo. ⁷⁰Ne wela wekana khandi. Ne khu sikha sititi okhurula avwene yawo, valia vali nivasinjile avwene yawo vela vasungila Petero vari, Khu kavwene ewe wuvele mulala khu nivo: sikila ewe wuvele Omugalilaya, ne okhulakaya khukhwo khwekesie.⁷¹Nikakhali naye wachaka okhwilamilisia niyechuva, nasunga ari, Esie semanyile omundu wa mwalasunganga wuno tawe. ⁷²Ne lukhola khavili etwaya yakholiokha. Ne Petero wechulila munganakani elikhuwa lia Yeso yamusungila ari, Etwaya nesili okhukholiokha khavili, ewe olinjikana khataru. Ne khuli yapara elienelio, yalila.

¹Ne avwene na avwene mumavwivwi avasalisi avakhongo vekhasia esikhalo nende avasakhulu nende avandiki va amalaka nende esiyalo siosi, ne vavowa Yeso, ne vamusita vacha ninaye, vamuyila wa Pilato. ²Ne Pilato wamureva, Ewe wuvele Omwami wa Avayahudi? Ne naye khuli yachiva wavasungila ari, Niwe wakhalisunga. ³Ne avasalisi avakhongo vamusitaka khu fundu ofunyingi: nikakhali siyavachivakho esindu siosi tawe.⁴Ne Pilato wela wamureva khandi, nasunga ari, Ewe solachivanga esindi siosi tawe? Lola nofundu fwinga fwa valarusianga ovuloli vuli esinyuma ninawe. ⁵Ne Yeso wawolela khandi vulali okhuva esindu siosi; kela kawukisia Pilato.⁸⁶Vulano mumulukha kwene kulia yavalekhulilanga omuvoywa mulala, wulia wavenyanga. ⁷Ne khwaliwo mulala wavalanganga vari Baraba, wali niyavoywa halala nende avandu vo olutiri lukhenyanga ovuruki tawe, wali omwiri mulutiri lwenolu. Ne volukhumulo vachaka okhuwochelela ikulu nivenya akhole khuli avakholelanga.⁹Nikakhali pilato yavachiva, nasunga ari, Mwalenyanga emulekhulile Omwami wa Avayahudi? ¹⁰Yali umanyile ari avasalisi avakhongo vava vamurelile sikila vane esikhonde. ¹¹Nikakhali avasalisi avakhongo vachuva nivasovia avandu, vari vasunge avalekhulile Baraba.¹²Ne Pilato wavachiva ne wela wavasungila ari, Sina sia mwalenyanga emukholele omundu wamwalalanganga muri Omwami wa Avayahudi? ¹³Ne vawochelala khandi nivasunga vari, Muvambe.¹⁴Ne Pilato wavasungila ari, Sikila sina, vuvi sina vwakholile? Ne navo kho vatasa okhuwochelela ikulu wene okhuvira esikelo vari, Muvambe. ¹⁵Kho khukario Pilato, sikila yenya vanyalikhe, wavalekhulila Baraba, ne wavawelesia Yeso, wayava niyakhamukhupa ofuvoko, ache avambwe.¹⁶Ne avasikari vamuvukula vamuyila munju yemikhung'ano, yavalanganga vari, Puritoriamu; ne valanga esikosi esilamba. ¹⁷Ne vamufwala echinguvo chovukondo vwe echisioma, ne vanava eyingara ya amawa, ne vamufwala khu murwe kukwe, ¹⁸Ne vachaka okhumukhesia vari, Woluyali, Omwami wa Avayahudi!¹⁹Ne vamukhupa khu murwe no olukhindu, vamufuchakho, ne vasikama amasikamo kavo vamwinamila. ²⁰Ne wavali nivakhamukholelakho esienyenye, vamufwalula eyinguvo yo ovukondo vwe chisioma vamufwala echinguvo chiche, ne vamurusia elwanyi okhucha okhumuvamba. ²¹Ne vayingilisia omundu mulala vari Simoni Omukerine, wali nalavirangao, nalarulanga murisafu, yali papa wa Alekisanda nende Rufasi, asite omusalaba kukwe.²²Ne vamurera avundu wavalanganga vari Golgotha, nelili, mukhukalukhasia vari, Avundu we esiang'ang'a. ²³Ne vamuwelesia edivai ya vasasiliemo manemane: nikakhali yakilova. ²⁴Ne wavali nivakhamuvamba, vakavanamo echinguvo chiche, nivachupilakho ekura, sia vuli mulala alavukula.²⁵Ne chali echisa chitaru, ne vamuvamba. ²⁶Ne amandiko ka vamusitakilakho kahandikwa ikulu vari, OMWAMI WA AVAYAHUDI. ²⁷Ne halala ninaye vavamba avefwi vavili; mulala omukhono omulunji, ne owundi omukhono omukhasi. ²⁸Ne eliandiko liatusivwa, lisunganga liri, Ne yavasiwa halala nende avononi.²⁹Ne vavira ahembi nawenawo vamunyeka ni vamutamasia, nivayunguya emirwe, nivasunga vari, Aakh, ewe wasunga okhukwisia elitembeli, ne oliumbakhe khu chindalo chitaru, ³⁰Khowiwonie wamweme, ne wikhe okhurula khu musalaba.³¹Khunjila ndala yeneyo avasalilsi avakhongo navo vosi vamukholelakho esienyenye nivarevana avene khu vene halala nende avandiki va amalaka vari, Yawonia avandu vandi; ne omwene sanyala okhwiwonia tawe. ³²Lekha Kristo Omwami wa Isiraeli yekhe vulano okhurula khu musalaba, khu tukhe okhulola ne khusuvile. Ne valia vavambwa ninaye vosi vamunyeka.³³Ne khuli echisa sita chola, khwaliwo nesilima musialo siosiokhwola echisa tisa. ³⁴Ne khu chisa tisa Yeso yalila nomwoyo omululu, nasunga ari, Eloi, Eloi, lama sabakitsani? nikhwo osunga vari, mukhukalukhasia, Nyasaye wanje, Nyasaye wamje, sikila sina wundekhile? ³⁵Ne valala khu vali nivasinjile avwene yawo, anga vawulila, vasunga vari, Lola, alalanganga Eliya.³⁶Ne mulala watumaka chimbilo ne wavukula esiango wenikha mu divai yilulile, ne wara khu lukhindu, ne wamuwelesia anywe, nasunga ari, Lekhana ninaye; lekha khulole nikava Eliya alecha okhumwisia hasi. ³⁷Ne Yeso walilila vululu, ne wakwisia omwoyo. ³⁸Ne epasia ya mwitembeli yarandukhamo khavili okhurula yikulu okhwola hasi.³⁹Ne anga omukhongo wa avasikari, wali nasinjile evweni wuwe, yalola khuli yalila vululu, ne wakwisia omwoyo, yasunga ari, Kang'ali omundu wuno avele Omwana wa Nyasaye. ⁴⁰Khwaliwo khandi na avakhasi vamulolelanga nivasinjile hale: mulala khuvo yali Maria Magadalena, nende Maria mayi wa Yakobo wali omutua, nende Yosefu, nende Solome; ⁴¹(Niye khandi, wayali Galilaya, yamulonda, ne wamukhalavanila;) nende avakhasi vandi avanyingi vali nivechile ninaye Yerusalemi.⁴²Ne vulano weyingolove yola, sikila yali yokhwirechekha, nokhusunga vari, eyindalo yili inyuma we elisabato, ⁴³Yosefu wa Arimatseya, omushauri woluyali, yesi nali mulala khu valinda okhwicha khwo ovwami vwa Nyasaye, yecha, ne wacha wenjila novusicha khu Pilato, ne wasava vamuwelesie omuvili kwa Yeso. ⁴⁴Ne Pilato wachenya nikava wufwile khale: ne wayava niyakhalanga omukhongo wa avasikari, yamureva nikava wufwile khale.⁴⁵Ne khuli yanyola ovung'ali okhurula khu mukhongo wa avasikari, yelesia Yosefu omuvili. ⁴⁶Ne wakula olusiuka olumiukhu lwo ovukusi, ne wamwisia hasi, ne wamuvowela mulusiuka olumiukhu, ne wamura musilindwa siali nisiayavwa mulwanda, ne wapiringisia elichina wara emuliango we esilindwa. ⁴⁷Ne Maria Magadalena nende Maria mayi wa Yosefu valola wavamwalisia.

¹Ne we elisabato liali niliakhavira, Maria Magadalena, nende Maria mayi wa Yakobo, nende Salome, vali vakulile amafura kokhuwunya ovulayi, vari veche ne vavakhe omuvili kukwe. ²Ne wavwali nevwakhachaka okhwanulukha mavwivwi eyindalo yokhuranga ye elichuma, vecha khu silindwa we eliuva liali neliakhachaka okhurula.³Ne avene varevana vari, Niwina walakhupuringisiya okuchina okhurula emuliango we esilindwa? ⁴Ne khuli valengela, valola okuchina vakuvingirisie hale: sikila kwali okukali.⁵Ne khuli venjila musilindwa, valola omundu omuraka niyekhale oluveka lwo omukhono omulunji, nafwalile ekanjo eyindambi eyiwanga; ne navo vesundukha. ⁶Ne naye wavasungila ari, Mukhesundukha tawe, Mwalakhavanga Yeso wa Nazareti, wavavambile: wusisimukhe; sali hano tawe: lola avundu wa vavele nivamwalisie. ⁷Nikakhali enywe khomuche, musungile aveki vave nende Petero muri wimile evweni wenyu wuchile mu Galilaya: evweneyo niwo wamwalamulola, anga yamusungila.⁸Ne varulamo vwangu, ne velukha okhurula musilindwa; sikila varenga ne vawuka: nohomba sivasungakho esindu siosi khu omundu yesi tawe; sikila vali varile.⁹Vulano wa Yeso yali nayakhasisimukha nivwalasiechanga mavwivwi eyindalo yo okhuranga ye elichuma, yanyowa walolekhanila Maria Magadalena, wayava nakhumilemo ofusieno musafu. ¹⁰Ne wacha wasungila valia vali nivavelenge ninaye, wavava nivalekhulanga nivalila. ¹¹Ne navo, khuli vawulila vari wuvele mumwoyo, ne naye yali wumulolekhanile, sivasuvila tawe.¹²Ne okhurula awenawo yalolekhana muvukondo vundi khu vavili khunivo, wavali nivalakendanga, nivacha murisafu. ¹³Ne vacha, vasungila vali nivasikale: kakhava kario sivavasuvila tawe.¹⁴Olunyuma walolekhanila elikhumi nende mulala wavali nivekhale nivalalichanga, ne wavayivila mukhulekha okhusuvila khwavo nende ovumu vwe emioyo kiavo, sikila sivasuvila valia vali nivamulolile wayali nasisimukhe tawe. ¹⁵Ne wavasungila ari, Chee musivala siosi, ne mwilwache elikhuwa elilayi khu vuli esilonge. ¹⁶Wulia walasuvila ne abatisivwe alawonisivwa; nikakhali wulia wukhalasuvila tawe alakhalakilwa.¹⁷Ne ofumanyisio funo fwalalonda valia vosi valasuvila; Mulira lianje valakhuma ofusieno furule; valalakaya nende echindimi echimpia; ¹⁸Valatila echinjukha; ne nivanywa esindu siosi sio ovufwisi vwo okhwira, sesiva sialavasalisia tawe; valara emikhono kiavo khu valwale, ne navo valawona.¹⁹Kho wo Omwami yali niyakhalakaya ninavo, yenjisivwa yikulu mwikulu, ne wekhala omukhono omulunji kwa Nyasaye. ²⁰Ne navo vacha, ne velwacha vuli avundu, Omwami nakhalavana ninavo, ne natinyilisia elikhuwa lilie namalolesio nikalolekhana. Kave kario.

¹Paulo, Silifano, nende Timoteo, khu livukana lia Avatsesolonike lili mu Nyasaye Papa wefu nende Omwami Yeso Kristo: ²Ovukasu vuve khwinywe, nende omulembe, okhurula khu Nyasaye wuli Papa wefu nende Omwami Yeso Kristo.³Efwe khwatilikha mukhupila Nyasaye orio muno vuli lwosi sikila enywe, avayanje, khuli anga kenyekha, sikila okhukhula okhukali khwene khwe elisuvila lienyu, nende ovuyanji vwa vuli sia mulala wenyu mwesi ali ninavwo khu wasie anga vwatasikha; ⁴Kakila fwavene fwesi khumwikhoyelanga mumavukana ka Nyasaye mukhwifwililisia khwenyu nende elisuvila mukhutambichwa khwosi nende eminyakhano kio mwifwilangamo: ⁵Nesili nisio esimanyikhilo sie elikhalakila lio ovulunji vwa Nyasaye, kho muvalikhane okhuva vatukhane muvwami vwa Nyasaye, sikila nivwo vwa mwesi mwalasalililanga:⁶Okhuva nesindu sili sia avwene khu Nyasaye okhwelesia esinyasio valia vamunyasianga; ⁷Ne enywe munyakhananga muliwulukha ninafwe, wo Omwami Yeso alilolekhana okhurula mwikulu ne echingelosi cho ovunyali vuvwe, ⁸Mulumemu lwo omulilo wavalielesia omurungo khu valia vakhamanya Nyasaye tawe, ne khandi vakharia elikhuwa elilayi lio Omwami Yeso Kristo:⁹Valinyola esinyasio sio okhuvunisivwa mindali okhurula evweni wo Omwami, nende okhurusivwa muvunyali vwo ovukhumi vuvwe; ¹⁰Ne walicha mukhwikhoyela mu avayanje vave, ne nivamwikomba valia vosi vasuvila (sikila ovuloli vwefu mwinywe mwavusuvila) khu yindalo yilia.¹¹Khulondokhana na akenako efwe fwesi khumusalilanga vuli lwosi, khuri Nyasaye wefu amuvasie okhuva vatukhane omulango kuno, ne avakholile elienya elilayi lio ovulayi vuvwe, nende emilimo kie elisuvila no ovunyali: ¹²Kho elira lio Omwami wefu Yeso Kristo litukhe okhuvalaya mwinywe, nenywe nanywe muniye, okhulondokhana nende ovukasu vwa Nyasaye wefu nende Omwami Yeso Kristo.

¹Nono khwalamusayanga enywe, avayanje, mukhwicha khwo Omwami wefu Yeso Kristo, nende okhusololana halala khwefu khuniye, ²Vari mukharisiwa vwangu muchinganakani tawe, nohomba mukhanyakhana, nomuli muroo, nohomba khu likhuwa, nohomba khu barua yikhali yokhurula khwifwe tawe, yilolekha khuli eyindalo ya Kristo yayola khale.³Mukhalekha omundu yesi wamuveya khu liosi tawe: sikila eyindalo yeneyi siyalola, okhurusiakho khuve mbele nende okhukwa mwisuvila, ne okhumanyikhana khwo omundu omwononi, omwana wo musiatisi. ⁴Wuyinganianga nende okhwininia omwene yikulu wa vuli esindu sia valanganga vari Nyasaye, nohomba siavasalanga; kho vari omwene anga Nyasaye, yeyekesia ari niye Nyasaye.⁵Enywe somwichulila, muri, wanali nesili ninanywe, namusungila amakhuwa kano? ⁶Ne vulano mwakhamanya siatililila vari atukhe okhumanyikhana khu sikha sisie. ⁷Sikila ovwononi vwo muvwikisi vwachaka khale okhukhola emilimo kiayo: nikakhali vulano wuwo wulia wikalilanga, okhwolanga yecha okhurusiwa khunjila.⁸Ne niwo Womumayanu alimanyikhanila, wo Omwami alimumala nende omuya kwo omunwa kukwe, ne alivunia nende ovulafu vwo okhwicha khukhwe: ⁹Nende wulia, wokhwicha khukhwe khulirulana nende emilimo kia Sietani novunyali vwosi nende ofumanyikhilo nende ovuveyi vwo okhuwukisia, ¹⁰Nende muvwikatirisi vwosi vukhalimo ovulunjikhi mu valia valavuna; sikila sivayeyama ovuyanji vwo ovung'ali tawe kho vatukhe okhwikanila.¹¹Ne khwako Nyasaye alavarumila amani amakali kokhutiva, vari kho vatukhe okhusuvila ovuveyi: ¹²Kho vari vosi vatukhe okhukhalakilwa vakhasuvila ovung'ali tawe, nikhakhali vachachalikhila kalali amalunji.¹³Nikakhali efwe khukhoyele khuve vokhupa orio muno vuli khase khu Nyasaye sikila enywe, avaanje vayanjwa nende Omwami, sikila ninywe va Nyasaye yarovola muvuwonia okhurula mukhuranga okhuvirila mukhusingwa khwa Roo nende elisuvila lio ovung'ali: ¹⁴Nikali niko kayamulangilakho okhuvirila elikhuwa elilayi liefu, kho mutukhe okhunyola ovukhumi vwo Omwami wefu Yeso Kristo. ¹⁵Khu kario, avayanje, sinjila vureke, ne mutile amekesio kalia kamwasoma, mwikhuwa nohomba muparua yefu.¹⁶Vulano Omwami wefu Yeso Kristo omwene, nende Nyasaye, wuli Papa wefu, wakhuyanja efwe, ne wakhuwelesia eliwulukha lia mindali, nende eliyikina lili elilayi okhuvirila muvukasu, ¹⁷Awochelesie emioyo kienyu, ne avatinyilisie muvuli mulikhuwa lili elilayi nende emilimo kili emilayi.

¹Mukhumalilikha, avayanje, khusalilekho, kho elikhuwa lio Omwami lichililile okhulanda, ne nelinyola ovukhumi, khuli anga lili ninanywe. ²Ne kho vari fwesi khuve vananulwa okhurulana nende avandu avamayanu vakhaparanga tawe: sikila avandu vosi sivali nelisuvila tawe. ³Nikakhali Omwami nomusuvilifu, walavatinyilisia enywe, nende walavalinda okhurulana nende ovwononi.⁴Ne khuvele novusicha mu Mwami okhuvatilakho, khuri enywe mwesi mwalakhola ne mwalakhola kalia kosi kokhumulakilisie mukhole. ⁵Ne Omwami yemilile emioyo kienyu muvuyanji vwa Nyasaye, nende mukhwifwililisia nomulindilila Kristo.⁶Vulano khwalamwamurisianga enywe, avayanje, mulira lio Omwami wefu Yeso Kristo, khuri mulekhane nende vuli wandaye yesi yesi walakenda muvukoyani, nende wukhalakenda okhulondokhana na amekesio kayanyola khwifwe tawe. ⁷Sikila enywe mwavene mwamanya khuli kenyekhana mukhulonde: sikila efwe sikhwayekoyasiakho mwinywe tawe; ⁸Nohomba efwe sikhwaliakho esiakhulia sio omundu yesi sia vusa tawe; nikakhali khwakhalavana nokhukwa ofukwa esilo nesitere, kho khulekhe okhuva nesitikha khu mundu yesi khwinywe: ⁹Sikali vari sikhwali novunyali tawe, nikakhali khwenya khuve esilolelo esilayi khwinywe mwalakhulondanga efwe¹⁰Sikila anga khwali nokhusili ninanywe, elikhuwa lino khwamulakilisia, khuri nikava vari omundu yesi salakhola emilimo tawe, sakhoyele alie tawe. ¹¹Sikila khuwulile vari vawo valalamwinywe valakendanga nivakoyana, vakhalakholanga emilimo kiosi tawe, nikakhali nivofulosio. ¹²Vulano khu vandu khuli avenavo khwalavamurisianga nokhuvatinyilisia khu Omwami wefu Yeso Kristo, khuri vakhole emilimo kiavo nivalinyile, ne valie esiakhulia siavo avene.¹³Nikakhali enywe , avayanje, mukhatora okhukhola amalayi tawe. ¹⁴Ne kava vari mundu yesi salava novuri khulikhuwa lia khwandike mubarua yino tawe, lengela omundu mwenoyo, ne mukhambana ninaye tawe, kho akhole echisoni. ¹⁵Mukhamuvala khuli omusuku tawe, nikakhali mutinyilisie khuli wandayo.¹⁶Vulano Omwami mwene wo omulembe avawelesie omulembe munjila yosi. Omwami ave halala ninanywe mwesi. ¹⁷Nemilembe kia Paulo kia namukhesianga nomukhono kwanje samwene, sili esimanyikhilo sia vuli ebarua: yemba ninandike. ¹⁸Ovukasu vwo Omwami wefu Yeso Kristo vuve halala ninanywe mwesi. Kave kario.

¹Paulo omuvoe wa Yeso Kristo, nende Timotheo wandaye wefu, khu Filimona omuyanje wefu, omukholi wemilimo ninafwe. ²Nende omuyanje wefu Afia, nende Archipa omusikeri halala ninafwe, khu likanisa lili munju mumwe. ³Chimbavasi khwiwe nende omulembe kwa baba khandi omwami Yeso.⁴Nakalusianga Nyasaye oluyali khase nekhwichulila mumasyo kanje. ⁵Vasungile amakhuwa khulondakhana nelisuvila lilio mumwami, khandi khuli wayancha avandu vanyasaye vosi. ⁶Lisuvila lilio lilokhe khandi likhole omilimo khuvirira muvandu okhwinyama esindu siosi sirula mwingwe mukristo Yeso. ⁷Khuocheswa nokhuva novusangafu nende khunyola amandi mumioyo kiefu sikila ovuyanji vuvwo mwanawefu.⁸Khukario, nivele nende ovusicha okhukhusuufira kenyekha okhole. ⁹Sikila nakhunyanja, nendi omusakhulu olwene inno nivere omuvumu wa Kristo.¹⁰Nakhukhusanya endi, okhonye onesima, wasuvira mukristo nava omwana wanje mukristo iwa navoywa. ¹¹Mukhuvanga onesima siyali omundu wovukhonyi khwiwe tawe, vulano vuri nomundu wovukhonyi khwiwe khandi khwisie. ¹²Nayanja ohesima nomwoyo kwanje kwosi namurumanga khandi khwiwe. ¹³Nakhayanjile yekhale ninasie yakhonga mukhuvogwe khwanje sikila evanjeli.¹⁴Vulali inganakani yiyo sinakhakholile siosi tawe; senyala khukhunika khukuhonya tawe, navusa kave khukhuwinlila khukhwo. ¹⁵Kanyalakhuva onesima yeshida hale khwiwe , khovninaye mindali. ¹⁶Onesima wavuviwa khuva omuvumwa khwiwe , nomundu wasuvila khulifwe, wovukhangi khwisie khandi wovukhonyi khwiwe , mukosi mumuvili khandi mumwami.¹⁷Khu kario nava nendi omulina wuwo, vukula onesima khuli ombukulanga esie. ¹⁸Wava niyakhukholela esindu esivi , namwe wuvele melikofi lilio ovanje esie nakhuvunga. ¹⁹Esie samwene naandikanga nomukhono kwanje, nakhuvunga. ²⁰Ee wandaye lekha embe novusanju vuvwo mumwami. Tinyilisia omwoyo kwanje mumwami.²¹Nivele nelisuvila endi olakhola kanakhwandikila nemanya endi olakhola khuvurakho. ²²Khutesa khukenako wuvechekele yinju yokhumenyamo. Nivele nelisuvila endi Nyasaye alanila lisala liengu engalukhe khwinywe khani .²³Epafura wavoywa ninasie muchela fikila Yeso Kristo wamuwele emilembe kikie. ²⁴Vakholi vemilimo halala ninafwe, Mariko Aristarika, Dema nende Luka vamurumile emilembe kiavo. ²⁵Esisa siomwami wefu Yeso Kristo sive memioyo kienyu.Amina.

¹Yakobo, omurumikhi wa Nyasaye nende wo Omwami Yeso Kristo, khu chikholo elikhumi nende chivili chasalanikha musialo, mulembe. ²Avayanje vanje, sangale khu kosi womuva nemwalaviriranga mumakelicho ka lukano na lukano; ³Nomumanya lino muri, okhukelichwa khwe elisuvila lienyu lireranga okhwifwila.⁴Nikakhali lekha okhwifwila khwenyu khumale emilimo kiayo, kho mutukhe okhuva va avwene nende avechufu, vulali okhutamba siosi tawe. ⁵Wavawo mulala yesi ukhali novuchesi tawe, lekha asave Nyasaye, welesianga avandu vosi muvukosi, ne sayivanga tawe, naye ava alelesivwa.⁶Nikakhali lekha asave mwisuvila, vulali okhwayaya. Okhuva ulia wayayanga yengana anga amarunda ke eyinyanja ke eyimboo yalapurusiaanga ikulu nako kayela hasi. ⁷Omundu uli anga oyo akhapara ari alanyola esindu siosi khurula khu Mwami tawe. ⁸Omundu wo okhwayaya sali nelichoma khu liosi lia lakholanga tawe.⁹Lekha omundu wasuvila we esikelo sia hasi asangale niyelola ari uchingulilwe: ¹⁰Nikakhali ulia wuli omuyinda, yetutuye niyelola ari wikhisivwe hasi: sikila khuli eliwuwa lio ovunyasi alatakhana. ¹¹Anga eliuva lirulanga nomuvasu omululu, ne kusamba ovunyasi vuniala, ne eliwuwa liva nilamilekho livungulukha likwa, ne ovulayi vwa livele ninavwo vutiva: niwo anga omundu omuyinda yesi alamulukhila mu chinjila chiche.¹²Wune eyikhavi omundu wulia wusinjilanga ne akhaya wa amakelicho kechanga: sikila wavechanga niyakhakelichwa, alinyola ekutwa yo ovulamu, vwo Omwami yalaka valia vamuyanja. ¹³Omundu yesi akhasunga wava niyakhakelichwa, ari Nyasaye wungeliche tawe: sikila Nyasaye sanyala wakhukelicha omundu na amavi tawe, nohomba niye sakelichanga omundu yesi tawe:¹⁴Nikakhali vuli omundu yesi akelichwangwa, wa yekombanga kali amavi kamukhwesanga, ne naye atilikha. ¹⁵Wo okhwikomba amavi khusiralanga, khwivulanga ovwoni: ne ovwoni navwo, nivwakhasitowa, navwo vwivula elifwa. ¹⁶Avayanje mwayanjwa, mukhaveywa tawe.¹⁷Vuli esiyanwa esilayi nende vuli esiyanwa sili sia avwene sirulanga yikulu, ne furulanga khu Papa wo ovuwanga vwosi, wukhakalukhanga, nohomba anga esininikha sichenjanga tawe. ¹⁸Khu lienya lilie omwene yakhwivula khu likhuwa lia ng'ali, kho khuve ve evweni muvilonge vivie viosi.¹⁹Khu kario avawandaye vanje avayanje, lekha vuli omundu ave omwangu mu khuwulila, ave wakalaha mukhulakaya, akhava weliruma lia vwangu tawe: ²⁰Okhuva eliruma lio omundu selikholanga kali amalunji ka Nyasaye tawe. ²¹Khu kene yako lekhana ne esifwavi nende esileka sie eyimbelekewu, ne mukhwitutuya muvukule elikhuwa lia Nyasaye yaraka mumioyo kienyu, linyala okhuwonia emioyo kienyu.²²Mukheveya vusa mwavene, no muwulila elikhuwa tawe, nikakhali mukhole ke likhuwa lialasunganga. ²³Kava vari omundu yesi alava wokhuwulila elikhuwa, na alekhe okhukhola ka lia lenyanga, alavanga anga omundu walelengeranga ovweni vuvwe musikiyo: ²⁴okhuva alelola vusa ovulayi ne achee wa wacha, ne avwene na avwene yevirila ovukondo vwali. ²⁵Nikakhali wulia wulolelelanga mu lilako elichufu lio ovulekhule, ne achilila kulikhola, nakhava omuwulilisi wokhwivirira tawe, nikakhali alira mu vikholwa, omundu wuno alakasichwa khu milimo kikie.²⁶Wavawo omundu yesi mwinywe walevala ari niwe edini, ne sanyala okhutila olulimi lulwe tawe, nikakhali yeveyanga mu mwoyo kukwe, ne edini yava nalimo niyavusa. ²⁷Edini yili eyingwalafu ne yikhali ne esifwavi evweni wa Nyasaye wuli Papa wefu ni yino: okhuchendelera avafuvi nende vanamulekhwa mu khunyakhana khwavo, nende okhwilinda esivala sikakhutifia tawe.

¹Avayanje vanje, mukhava ne elisuvila lio Omwami wefu Yeso Kristo, Omwami wo vukhumi, mukhurombolana tawe. ²Okhuva omundu niyenjila mumikhung'ano kienyu uli nende epete ye edhahabu, nafwalile ovulayi, ne khandi omundu owundi yenjile wuli omutakha wufwalile echinguvo echisamukhu; ³Ne enywe muvukula wifwalile ovulayi,mumusungila muri, Yikhala avundu avulayi hano; ne musungila omutakha muri, Ewe chaa osinjile yawo, nohomba muri yikhala hasi hano mufulenge fwanje: ⁴Nomurombosia avandu murio semuva mwalareranga ovwawukhani akari wenyu, nende okhwikhola avakhalaki ve echinganakani echimbi?⁵Wandaye vanje avayanje, rekelesia, Nyasaye sewarovola avatakha ve esivala sino okhuva avayinda ve elisuvila, nende okhunyola ovwami vwa yalaka valia vamuyanja? ⁶Nikakhali enywe mwalekelesia avatakha. Ne sevali avandu avayinda venavo vamuminanga enywe, ne vamukhwesa nivamuyila evweni mufuyalo? ⁷Sevali nivo vanyekanga elira elilayi elio lia mwalangilwakho?⁸Kava mwalatusia elilaka lio ovwami okhulondana nende kandikwa vari, Oyanje omuchesa wuwo anga weyanja wamwene, mwalava mwalakholanga ovulayi: ⁹Nikakhali mwava vokhurombosiana, muva mwakhakhola ovwoni, ne muva mwakhakhalakilwa ne lilaka anga avononi.¹⁰Okhuva wulia yesi walalonda elilaka liosi ne atukhe avundu afunake lilala, ava wufunake amalako kosi. ¹¹Okhuva wulia wasunga ari, Okhakhola ovuheyi tawe, yela wasunga ari, Okhera tawe. Vulano nikava vari solakhola ovuheyi tawe, ne wire omundu, ova wakhava omwononi we elilako.¹²Kho lakaye, ne mukhola, anga avandu valakhalakilwa khu lilaka lio ovulekhule. ¹³Okhuva elilaka livula echimbavasi khu wulia wuvula echimbavasi tawe; ne echimbavasi chivechanga ikulu we elikhalakilwa.¹⁴Avayanje vanje, nevukhala sina vwo omundu alanyola, nikava omundu alasunga ari wuvele ne elisuvila, ne avula ofukholwa? elisuvila linyala okhumuwonia? ¹⁵Kava vari wandaye wesisolili nohomba we esikhana wava esiekenye, ne avula esiakhulia sialia tawe, ¹⁶Ne mulala khwinywe avasungile ari, Enywe chee nomulembe, mufwale munyole oluya khandi mulie mwikure; nolekhe okhuvawelesia ofundu fwo omuvili kwalenyanga; ava wuna vukhala sina khu nivo? ¹⁷Niwo anga kali ne elisuvila, nelikhali no ofukholwa tawe, liva liafwa mumwoyo kukwe¹⁸Omundu anyala wasunga ari, Ewe wuvele ne lisuvila, ne esie nivele nofukholwa: njekesie elisuvila lilio livula ofukholwa, ne nasie ekhwekesie elisuvila lianje lili nende ofukholwa. ¹⁹Ewe wasuvila ori Nyasaye wuvele mulala, wakhola ovulayi: ofusieno fwosi fwasuvila furio ne furenganga. ²⁰Nikakhali walenyanga okhumanya, ewe omundu omukhaya, ori elisuvila vulali ofukholwa livechanga liafwa?²¹Papa wefu Ibrahimu seyavalikhana okhuva ne elisuvila sikila evikholwa, wayarusia Isaka omwana wuwe khu vwali? ²²Walalolanga anga lisuvila liakhola ofukholwa, ne anga okhuvirira mufukholwa elisuvila lilie liatusivwa? ²³Amandiko kalia katusivwa kasunga kari, Ibrahimu yasuvila Nyasaye, ne wavasivwa okhuva omulunji: ne walangwa vari Omusale wa Nyasaye. ²⁴Mwalalolanga khuli omundu avalilwanga okhuva omulunji khu lwe evikholwa, ne selili elisuvila liong'ene tawe.²⁵Khu yinjila yeneyo Rahabu yesi wali omukhasi omutamba seyavalikhana okhuva omulunji okhuvirira mufukholwa, wayenjisia varumwa, ne wavelekesia nivacha okhuvirira eyinjila yindi? ²⁶Okhuva anga omuvili vulali eroo kuvechanga kwafwa, niwo anga elisuvila vulali ofukholwa livechanga liafwa.

¹Avayanje vanje, mukhava avalimu avanyingi tawe, nomumanya muri efwe avalimu khwalanyola okhukhalakilwa okhukali khuvirakho. ²Okhuva fwesi mumakhuwa amanyingi khwisecheralanga okhuvira vosi. Okhuva omundu yesi ukhesecheralanga mukhulakaya, avechanga omwichufu, ne khandi anyala welinda omuvili kukwe kwosi.³Lolakho, khuvowanga echifarasi eminwa, kho chikhuwulile; ne khunyala khwachikalukhasia omuvili kwosi. ⁴Lolakho khandi echimeli, chikhava nechili echingali chene, ne eyimboo eyingali yikhava neyiyilumanga vululu, nikakhali yiyilangwa nende eyingara eyintiti, avundu wosi wo mundereva ava nalenyanga yiche.⁵Kakhava kario olulimi nesindu sititi, ne lulakayanga amakhuwa amakali kene. Lolakho, anga olumuli lutiti lwasianga omulilo omuchuru kwosi. ⁶Ne olulimi nomulilo, esivala sio ovutamanu: niwo anga olulimi luli lwarelwa mumuvili, luvakhanga esifwavi omuvili kwosi, ne luruvulanga omulilo khwakha khu muvili ne nalwo lwasiwangwa omulilo kwo musiatisi.⁷Vuli echisolo cha lukano na lukano, nende amanoni ko ovukondo vwosi, nende echinjukha cha lukano na lukano, nende ofundu fwosi fuli munyanja, funyala okhurukwa, nafwo fwarukwa na avandu: ⁸Nikakhali avulawo omundu wunyala waruka olulimi tawe; no ovuvi vukhanyalikha tawe, lwayechula ovufwisi vwiranga.⁹Khulurumikhilanga okhukasicha Nyasaye, uli Papa; ne khu lwachena khulama avandu, valombwa khu vukondo vwa Nyasaye. ¹⁰Okhurula mumunwa mulala kwenoku khukasichanga khandi khulama. Avayanje vanje, amakhuwa kano sekakhoyele kave kario tawe.¹¹Esevele ye eliso lila inyala okhurusia khu sikha silala amachi amanulu nende amalulu? ¹²Avayanje vanje, omusala omukhuyu, kunyala kwama emisapipu? nohomba emisaspipu, na amakhuyu? niwo anga kali vari esevele ye eliso lilala seyinyala okhurusia amachi ko omunyu nende amanulu ketetekhile tawe.¹³Ne wina uli mwinywe omundu wovuchesi nende elimanya? lekha yekesie muvikholwa vio omwima omulayi niyetutuya muvuchesi. ¹⁴Nikakhali mwava ne esikhonde esilulu nende amayinganio mumioyo kienyu, mukhefumia tawe, khandi mukhasunga ovuveyi khu vung'ali tawe.¹⁵Ovuchesi vwenovu sevuli vwo okhurula ikulu tawe, nikakhali nivwe esivala, vwo omwima kwa avandu, vwo ofusieno. ¹⁶Sikila wokhuli nesikhonde nende amayinganio, khu vechangawo ne emikoyano nende vuli emilimo kili emivi. ¹⁷Nikakhali ovuchesi vurulanga ikulu lio okhuranga vuvechanga ovuseleche, khandi vuva no omulembe, vuvechanga ovuwolu, khandi vurekelesianga vwangu, vwayechula echimbavasi khandi vunende amatunde amalayi, vuvulamo okhulekelesia, khandi vuvulamo okhwikatirisia. ¹⁸Ne elitunde lio ovulunjikhi lirakwangwa mumulembe nende valombanga omulembe.

¹Amaye nende okhupana khurulanga hena akari wenyu? sekarulanga mwinywe, okhwikomba khupananga mumivili kienyu? ²Mwikombanga, ne semuli ninafwo tawe: mwira, ne mwenya okhuva ninafwo, ne semunyala okhunyola tawe: muupana nomukhola amaye, ne khandi semunyolanga tawe, sikila semusavanga tawe. ³Musavanga, ne semunyolanga tawe, sikila musavanga esikhaya, kho muvirumikhile mukhwikomba khwenyu.⁴Enywe avasacha na avakhasi avaheyi, semumanyile muri ovusale ne esivala no ovusuku nende Nyasaye? wulia yesi walakhola ovusale ne esivala no omusuku wa Nyasaye. ⁵Mumanyanga muri amandiko kahandikwa muvukhaya, Roo wulia wamenya mwifwe okhwikombanga khu sikelo sio okhukhendekha?⁶Nikakhali akhwelesianga ovukasu vuvirirekho. Niko kakilanga nasunga ari, Nyasaye alovanga avesileka, nikakhali yelesianga echimavasi khu vetutuyanga. ⁷Khu kario mwirusie mwavene khu Nyasaye. Mwikalile shetani, naye alamwilukha⁸Mwisende ahembi khu Nyasaye, naye alesenda ahembi ni nanywe. Mulafie emikhono kienyu, enywe muli avononi; ne mukwelasie emioyo kienyu, enywe muli nechinganakani cho okhwayaya. ⁹Muvelele, ne mulila, ne mwikhula: lekha okhuchekha khwenyu khukalukhane khuve okhulila, ne ovusangafu vwenyu vuve ovusiro vwe emioyo. ¹⁰Mwitutuye mwavene evweni wo Omwami, ne naye alamuchingula.¹¹Avayanje, mukhachikhanila amakhuwa tawe, Wulia wuchikhilanga wandaye wuwe, ne khandi akhalakila wandaye wuwe, avechanga alachikhilanga elilaka, nende okhukhalakila elilaka: nikakhali nokhalakila elilaka, ewe sova nolakholanga elilaka tawe, nikakhali ova wakhava omukhalaki. ¹²Wuwo mulala vusa wokhurusia elilaka,wunyala okhuwonia nende okhuvunia; ewe ni wina wukhalakila owasio?¹³Nakhache vulano, enywe musunganga muri, Vulano nohomba muchuli, khwalacha mwitokho navuleve, ne khwikhaleyo omuyika mulala,nende nokhukula khandi nokhukusia, nekhunyole ovukhala. ¹⁴Ne semumanyile komuchuli tawe.Ovulamu vwenyu nisina? Okhuva enywe muvele anga omuya, kulolekhananga khu sikha sititi, ne kuwao.¹⁵Okhuva, kenyekhana musunga muri, nikava Omwami alenya, khwalamenya, ne khukhole lino nohomba lilia. ¹⁶Nikakhali vulano mwaleninianga nomwifumia: okhwininia muyinjila yeneyi no ovuvi. ¹⁷Khu kario wulia wamanya okhukhola amalayi, ne alekha okhukakhola, no ovwoni khuniye.

¹Yiche enywe vulano, muli avayinda, lilee no mukukula okhuva eminyakhano kienyu kialechanga khwinywe. ²Ovuyinda vwenyu vwinonokhe, ne echinguvo chenyu amasilili kalile. ³Etsahabu ne efetsa yenyu chivosele ne echindevelende chikwilekho nicho chalava ovuloli esinyuma ninanywe, chalalia emivili kienyu anga omulilo. Mwayevunjikhila emiandu alala khulwe echindalo cho okhumalilikha.⁴Lolakho, omurungo kwa avakhalavani vamuchesele mumikunda kienyu, enywe mwayandakho muvuvacha, kwalalilanga: nende amalilo ka valia vamuchesela kenjile mumarwi ko Omwami wa amaye. ⁵Mwamenya musivala no mwisangasia, nomukhola ovulianga; ne mwakhomesia emioyo kienyu, anga eyindalo yo khucha okhusinjwa. ⁶Mwakhalakila nende okhwira wuli omulunji; ne sewayingania ninanywe tawe.⁷Khu kario avayanje, mwifwile, okhwola wo Omwami alicha. Lola, anga omulimi alindililanga ofwamo fwo ovukusi mumukunda, ne naye yefwila khu esikha esirambi, okhwola we eyifula yo okhuranga nende ye esuvwe. ⁸Mwesi mwifwile; nomutinya emioyo kienyu: sikila okhwicha khwo Omwami khwalembiyanga.⁹Avaanje, mukheviyilisiana mulala no owundi tawe, mukhecha mwakhalakilwa: lola, omukhalaki wusinjile evweni wo omuliango. ¹⁰Avayanje, vukula, avang'osi, valakayila mu lira lio Omwami, okhuva eliekesio lio okhusalila muminyakhano, nende mukhwifwila. ¹¹Lola, khuvavasianga okhuva vo ovusangafu valia vekhalilikhanga. Mwawulila okhwifwila kha Ayubu, vari Omwami niwe esisa nende echimbavasi echinyingi.¹²Nikakhali ikulu wa amakhuwa kosi, avayanje vanje, mukhelamilisia, likhava ne likulu, likhava ne sivala, nohomba okhechuva nesindu siosi tawe: nikakhali lekha nowiyamile ori eeh khuve eeh; niwikanile ori tawe, ive tawe; kho olekhe okhwinjila mukhukhalakilwa.¹³Wuwo mulala mwimywe uli neminyakhano? Lekha asale. Wuwo wusangalile? Lekha yembe esaburi. ¹⁴Wuwo mulala mwinywe uli omulwale? Lekha alange avasakhulu avemilisi ve elikanisa; lekha navo vamusalile, nivamuvakha amafura ko ovuvakho mulira lio Omwami: ¹⁵Ne elisala lie elisuvila liva lialawonia omulwale, ne Omwami ava alamuvusia; ne wava nakholile ovwoni, ava alavelwa.¹⁶Muvelanile ovwoni vwenyu vuli sia mulala, ne musalanile vuli sia mulala, mutukhe okhuwonisivwa. Elisala lio omundu omulunji likholanga amakali. ¹⁷Eliya yali omundu wo omwima vusa anga efwe, ne yasala nesinani, ari eyifula yilekhe okhukwa: ne seyakwa khu sikha sie emiyika kitaru ne emiesi kisasava tawe. ¹⁸Ne wayasala khandi, elikulu lialekhula eyifula, ne esivala siama amatunde kasio.¹⁹Avayanje, mulala khwinywe narula khu vung'ali wasiama, ne mulala wamukalusia; ²⁰Lekha amanye ari, wulia wukalusie omwoni wuvele nasiamilekhu njila yiye alava wuwoniye omwoyo okhurula mulifwa, ne alava wufunikhe ovwoni ovunyingi.

¹Petero, omurumwa wa Yeso Kristo, khu vacheni vasalanila mu Pontusi, Galatia, Kapatosia, Esha, nende Bisinia, ²Mwarovolwa okhulondokhana nende elienya lia Nyasaye Papa, okhuvirila mukhulombwa avachenukhu nende Roo, khu lwo okhuva novuri nende okhusamilila khwa amavanga ka Yeso Kristo: Ovukosia vuve halala ninanywe, no omulembe, kutasikhe muvunyingi.³Akasichwe Nyasaye khandi Papa wo Omwami wefu Yeso Kristo, wakhwivula efwe ovuya khandi okhulondokhana nende echimbavasi chiche echinyingi mu eliyikina lio ovulamu okhuvirila okhusisimukha khwa Yeso Kristo okhurula muvafwa, ⁴okhwicha okhuwelesiwa ovuyinda vukhenonokhanga, nende vukhali nesifwavi, ne khandi vukhawelelanga tawe, vwe ewe wavikhilwa mwikulu. ⁵Khu vavikhwa namani ka Nyasaye okhuvirila mwisuvila lia ovuwonia vuli ahembi okhurusiwa musikha sio okhumalilikha.⁶Khu kano musangale, mukhava khu lwe sikha sititi sino, nomuvelele, nimwalaviriranga mu makelicho amakali: ⁷Okhuva okhukelichwa khwe elisuvila lienyu, khuvele novukhala okhuvira etsahabu yononokhanga, ikhava neyivisiwanga mumulilo kheyive eyiseleche, enywe munyolekhe okhuva voluyali ne eyifuma no ovukhumi okhwola lwa Yeso Kristo alilolekhanila.⁸Mukhava nomusili khumulolakho, mwamuyanja; mukhava nomusili khu lwe echisa chino okhumulola, nilali mwamusuvila, musangale novusangafu vwa mukhasungakho tawe khandi vwichulemo ovukhumi: ⁹Nomunyola okhumalilikha khwe elisuvila lienyu, novuli ovuwonia vwe emioyo kienyu. ¹⁰Ovuwonia vwa avang'osi varevelesia ne nivakhavilisia nesinani, varusia ovung'osi vwe echimbavasi chitukhane okhwicha khwinywe:¹¹Nivarunilisia okhwenya okhumanya ni mundu sina nohomba nisikha sina sia Roo wa Kristo wali munivo yali nalekesianga, wayanyowa wayarusia ovuloli evweni okhulondana nende okhunyakhana khwa Kristo, nende ovukhumi vwali novulondakho. ¹²Khu valia vakalolekhanila, amakhuwa kano sekali akavo avene tawe, nikakhali vakakholanga sikila efwe, niko vulano kavalareranga khwiwe nende valia vakhwilwachila eyinjili nende Roo Omuchenukhu warumwa hasi hano okhurula mwikulu; amakhuwa ke echingelosi chekomba okhumanya.¹³Khu kario rechekha echinganakani chenyu, mwikhale vureke, nende okhuva neliyikina okhutukha okhumalilikha khwe echimbavasi chalava khwinywe olwa Yeso Kristo yecha okhulolekhana. ¹⁴Anga avana avarekelefu, mukhava vokhulonda elikomba lia mwali ninalio wamwali nomusili muvusilu vwenyu tawe:¹⁵Nikakhali anga ulia wavalanga ali omuchenukhu, kho kenyekhana mwesi muve avachenukhu muchinjila chosi chelilakaya lienyu; ¹⁶Sikila kayandikwa vari, Muve avachenukhu; okhuva Esie nivele omuchenukhu. ¹⁷Ne nikava vari mwalamulanga muri Papa, ulia ukhalakilanga vuli omundu okhulondokhana nende emilimo kikie, menya hano novuri echindalo chicho chosi anga omuviri.¹⁸Enywe mwamanya muri semwananulwa nende ofundu fwinonokhanga tawe, anga efedha nende edhahabu, mutukhe okhurula khu mwima kwenyu kukhatukhane tawe kwamwarusia khu vapapa venyu. ¹⁹Nikakhali khu amavanga kovukusi ka Kristo, anga ke simeme sie elichese sikhali novulema nohomba elipala liosi:²⁰Naye muvung'ali yali wayawulwa khale ovwalilo vwe esialo novukhavawo tawe, nikakhali wulolekhane khwinywe echindalo chino cho okhumalilikha. ²¹Okhuvirila khuniye vulano mwasuvila Nyasaye, wamusisimusia okhurula muvafwa, naye wamuwelesia ovukhumi; okhwola vari elisuvila lienyu nende eliyikina lienyu litukhe okhuva muniye.²²Okhuva muselechile emioyo kienyu muvuri vwo ovung'ali okhuvirira mu Roo okhucha khu avasime novuyanji vuli vwavwene, tinyilila okhuyanjana mulala sia mulala no omwoyo omuselechi kuli kwavwene. ²³Okhuva mwivulwe olwa khavili, semuli olumicho lukhenonokhanga tawe, nikakhali luli olulayi, khu lwe elikhuwa lia Nyasaye, limenyanga khandi livawo namindali²⁴Okhuva omuvili kwosi kuvele anga ovunyasi, ne oluyali lulwe lwosi anga eliwuwa lio ovunyasi. Ovunyasi vunialanga, ne eliwuwa liva nelilikho livungulukha likwa: ²⁵Nikakhali elikhuwa lio Omwami liyindilanga namindali. Ne lino nilio elikhuwa elilayi lieneli lia vamwilwachila enywe.

¹Khu kario lekhana nende ovuvi vwosi, nende okhwiveya, nende okhwikatirisia, nende elikhendekha, nende okhukhanyukha khwosi. ²Anga avana avatoro vevulwe, mwikombe amavele amayu ke elikhuwa, kho mutukhe okhurulila awenawo: ³Nikava mwakhakonyela mwakhalola muri Omwami niwo ovuheli.⁴Muchile ulia, uli anga elikina lili novulamu, lialovwa nende avandu, nikakhali liarovolwa nende Nyasaye, ne lioluyali, ⁵Enywe mwesi, anga amakina kali novulamu, mwayombakhwa muve eyinju ya Roo, olwivulo oluchenukhu lwo ovusalisi, muve murusia omusango kwa roo, kwiyamilwe nende Nyasaye okhuvirira mu Yeso Kristo⁶Okhuva khandi kavele mumandiko, Lola, Narechanga mu Sayoni elikina elikali lia mukona, lia rovolwa, lio oluyali: ne ulia walamusuvila salakhola echisoni tawe.⁷Khu kario khwinywe musuvile niwoluyali: nikakhali khu vali vakhasuvila, elikina lia avombakhi valova, liachena nilio kikwile lia muvwalilo vwo mukona, ⁸Khandi nelikina lio okhwiyikumulakho, khandi nolwanda lwokhwisicharala, ne nivo valia veyikumulanga khwi khuwa, okhuva sevasuvilanga tawe: khandi niko kakila varelwawo vatukhe okhunyola kenako.⁹Nikakhali enywe muvele olwivulo olwawule, avasalisi vo ovwami, vo oluyia lwo ovuchenukhu, avandu vo ovuruki vwa Nyasaye, kho mutukhe okhwekesia eyifuma ya wulia wavalanga okhurula musilima mwiche mwinjile muvulafu vuvwe vwokhuuka: ¹⁰Enywe khale wene mwakhali avandu tawe, ne vulano muvele avandu va Nyasaye: mwakhali nimwanyola echimbavasi tawe, ne vulano mwanyola echimbavasi.¹¹Enywe vayanjwa, Navasayanga anga avacheni khandi anga avaviri, mwilinde okhurulana nende elikomba lio omuvili, liupananga nende omwoyo; ¹²Muve ne emima emilayi mu vandu vesivala: kho anga, vamuchikhila khuli avakholi va amavi, valole ofukholwa fuenyu ofulayi, vechomie Nyasaye khu yindalo yalilolekhanila.¹³Mwitutuye mwavene khu vuli ovuruki vwa avandu sikila Omwami: akhava omuruki , nali omukhongo khu vosi; ¹⁴Nohomba vakhava avemilisi, valia varumilwe ninaye okhukhololosia vasiamile khandi okhwichomia valia vakholile amalayi. ¹⁵Okhuva lino nilio elienya lia Nyasaye, vari mukhukhola amalayi mwikale eminwa kio ovuyingwa kia avandu vamayana: ¹⁶Anga avandu vali avalekhule, vakhalarumikhilanga ovulekhule vwavo okhukisa amavi tawe, nikakhali anga avarumikhi va Nyasaye. ¹⁷Mwelesie oluyali avandu vosi. Muyanje avasime. Murie Nyasaye. Muwelesie omuruki oluyali.¹⁸Enywe avarumikhi, mwitutuye khu avami venyu novuri vwosi; kakhava khu valia vali avalayi nende va amakhuwa matiti vong'ene tawe, nikakhali khu valia vosi vali avalulu. ¹⁹Okhuva vuno nivwo ovulayi vwenyekhane, vwo omundu anyala okhuvelela niyechulila Nyasaye, wava nalasalililanga khu kakhali ka avwene tawe. ²⁰Okhuva noluyali sina, kava vari, walakhupwa khu amavi kokholile, nowikhalilikhe? nikakhali vari, wolakhola amalayi, owumiyilekho, ne wikhalilikhe, nivwo ovulayi evweni wa Nyasaye.²¹Okhuva kano niko kamwalangilwa: okhuva Kristo yesi yanyakhana sikila efwe, wakhwekesia eyinjila, khulonde olukelo lulwe: ²²Siyakhola ovwoni tawe, nohomba ovuveyi sivwalolekhana mumunwa kukwe tawe: ²³Okhuva, wavamunyeka, siyanyekana tawe; wavamunyakhasia, siyarisiakho omundu yesi tawe; nikakhali omwene khu wulia uli omukhalaki wavwene²⁴Okhuva omwene yasita ovwoni vwefu mumuvili kukwe omwene khu musala, vari efwe, khwava nekhwafwa mumakhuwa kovwoni, khutukhe okhumenya mumakhuwa kali kang'ali: ne okhuvirila mukhupwa khukhwe mwawonisiwa. ²⁵Okhuva mwali anga amachese katimile; nikakhali vulano mukalukhile Omwayi khandi Omulindi we emioyo kienyu.

¹Khunjila ndala yeneyo, enywe avakhasi, okhoya mwitutuye mwavene khu avasacha venyu; kho vari, vavawo vakhasuvila elikhuwa, vatukhe okhukalukhana okhuvirila mumwima kwa avakhasi vavo, vulali elikhuwa. ²Nivalolelela omwima kwenyu omulayi nende ovuri.³Okhwing'ona khwe elikondo lienyu khukhava vusa khwe elwanyi khwo okhulomba eliswi, okhufwala ofundu fwe edhahabu, nohomba okhufwala echinguvo; ⁴Nikakhali okhung'ona khwe elikondo lienyu lirule mumundu womukari ukhalolekhana, mukhufwala khu kakhenonokhanga, nokuli omwoyo kwo okhwitutuya nende okhwisimilisia, kuli kwo ovukhala evweni wa Nyasaye⁵Okhuva niwo anga avakhasi avachenukhu vakhale vosi valingi, vali niveyikina Nyasaye, vefwalanga ovulayi vario, nivetutuya khu vasacha vavo. ⁶Anga Sara yesi yali omurekelefu khu Ibrahimu, wamulanganga ari omwami: nanywe nomuli avakhana vave, anga muchililila okhukhola amalayi, ne semwariakho elikhuwa liosi tawe.⁷Khunjila yeneyi, enywe avasacha, mumenye na vakhasi venyu muvuchesi, nomuvawelesia oluyali, anga avandu vali namani komuvili matiti khwinywe, ne anga mwesi halala muli avasangi khu sianwa sio ovukasu vwo ovulamu; kho amasayo kenyu kalekhe okhwikalilwa.⁸Lio okhumalilikha nilio lino, muve mwesi neyinganakani ndala, novulelelana echimbavasi khu vuli sia mulala, yanjane anga avawandaye, muve nesisa, muve avawolu; ⁹Mukharunga amavi khu mavi tawe, nohomba amanyeko khu kandi tawe: nikakhali esinyuma mwane echikhavi; okhuva akenako niko kamwalangilwa kho mutukhe okhuva avechikhavi.¹⁰Okhuva ulia walayanja ovulamu, ne alole echindalo echindayi, akaye olulimi lulwe okhulakaya amavi, nende omunwa kukwe okhulakaya ovuveyi: ¹¹Alekhane na amavi, ne akhole amalayi; lekha akhave omulembe ne akulondelele. ¹²Okhuva echimoni cha Nyasaye chilolanga valia vali avalunji, ne amarwi kake karekanga okhuwulila amasayo kavo: nikakhali ovweni vwo Omwami vuvele esinyuma khu valia vakholanga kali amavi.¹³Ne niwina wulia walavasalisia enywe, nomuli avalondi vakalia kali amalayi? ¹⁴Nikakhali ne kava vari mwalasalilila khu kalia kali kovulunji, ava munovuyanji: ne mukharia khu marisio kavo tawe, nohomba mukheyendekhela;¹⁵Nikakhali sandicha omwami mumioyo kienyu: ne vuli lwosi mwirechekhe okhuchiva omundu yesi walamureva esifune sie eliyikina lili mwinywe mukhwitutuya nende muvuri: ¹⁶Nomuli nende elimanya lio okhwivasia khuli okhulayi; vakhava nivamuchikhila amavi, anga avakholi vechimbi avene vakhole echisoni khu kavalalakaya okhulondana nende omwima kwenyu omulayi mu Kristo. ¹⁷Okhuva novulayi, nikava elienya lia Nyasaye lialava lirio, vari munyakhane mukhukhola akali amalayi , okhuvira akali amavi.¹⁸Okhuva Kristo yesi yanyasiwa lulala khu lwo ovwoni, omulunji wecha khu valali avalunji, kho atukhe okhukhurera efwe khu Nyasaye, yerwa mumuvili, nikakhali wakholwa omulamu mu Roo. ¹⁹Khandi okhuvirila mu Roo yacha ne welwachila echi roo chali musivoye; ²⁰Anyuma yawo vano sevali novuri tawe, welifwililisia lia Nyasaye liali nelisilindanga muchindalo cha Nowa, wayali nasilombanga esafina, ne valimo vatiti, yaani avandu munane vawononokha khu machi.²¹Sino siali esimanyikhilo sio ovubatiso sikhuwonianga efwe muchindalo chino ( sokhuli okhwirusiakho ovuchafu khu muvili tawe, nikakhali namachivu kokhuva nende okhwivasia khuli okhulayi evweni wa Nyasaye,) mukhusisimukha khwa Yeso Kristo: ²²Wulia wacha mwikulu, ne uvele omukhono omusacha kwa Nyasaye; echingelosi nende ovwami nende ovunyali vwosi vuvele hasi wuwe.

¹Khukario, Kristo yanyakhana mumuvili sikila efwe, nanywe mwesi mwifwale eyinganakani yeneyo: okhuva ulia wanyakhana mumuvili walekhana novwoni; ²Sakhoyele okhuchililila okhumenya ovulamu vuvwe vusikale mulikomba lio omuvili kwa avandu tawe, nikakhali khu lienya lia Nyasaye.³Okhuva ovwiyangu vwa khwali ninavwo vwo ovulamu vwefu nokhusikhola akesivala vwanyala, wakhwali avalianga, avokunyasi, avameesi, emilukha kie sifwavi, ofutuma fwa avanywi, nende okhusala ofufwanani fwo okhusinyisia: ⁴Amakhuwa kanivo valolanga vari nikokhuuka vari semutukakanga ninavo muvulianga vulali nesikelo, nivalakaya amavi khwinywe: ⁵Navo valirusia ovuloli evweni wa wulia wirechekhe okhuyala vali mumwoyo nende vafwa. ⁶Okhuva nisio esifunane sia vosi valia vafwa velwachilwa eyinjili, kho vosi vakhalakilwe anga avandu vali vomumuvili valakhalakilwa; nikakhali vamenye okhulondokha nende Nyasaye mu roo.⁷Nikakhali okhumalilikha khwa amakhuwa kosi khuvele ahembi: khu kario muve meeso, nemwilinde nomusala. ⁸Ne ikulu wa amakhuwa kosi muve nesinani sio ovuyanji mwavene khu vene. ⁹Mwikhoye avesienywe muchingo chenyu vulali okhwing'ulung'unya.¹⁰Anga vuli sia mulala anyolile omukavwa, kurumikhile okhwombakha owasio, khuli avasinjilili avalayi ve echimbavasi cha lukano na lukkano cha Nyasaye. ¹¹Nikava omundu yesi alelwacha, akhoya welwacha anga elikhuwa lia Nyasaye; ne omundu yesi walakholanga emilimo kia Nyasaye, lekha akikhole na amani kosi ka Nyasaye ava namuwele: kho Nyasaye wechomisiwe mumakhuwa kosi okhuvirila mu Yeso Kristo, utukhane okhunyola eyifuma no ovunyali mindali na mindali. Amina¹²Avayanje, mukhalole okhuva esindu esicheni wamwalecha okhuvirila mumakelicho amakali , anga esindu sio okhuuka khwinywe tawe. ¹³Nikakhali musangale, okhuva mwalava mwalamananga nende Kristo muminyakhano kikie; kho wovukhumi vuvwe vulilolekhana, mutukhe okhwikhoyela nesikhoyelo esikali. ¹⁴Muno ovuyanji, nikava valamumayasia khu lwelira lia Kristo; okhuva roo wovukhumi nende wa Nyasaye wuvele khwinywe¹⁵Nikakhali akhavawo mulala khwinywe walanyakhana khuli omwiri tawe, nohomba khuli omwifwi, nohomba khuli omukholi wa amavi, nohomba khuli wokhwikhupa mumakhuwa ka avandu tawe. ¹⁶Nikava omundu yesi alanyakhana anga omukristo, akhava ne echisoni tawe; nikakhali akalusiye Nyasaye ovukhumi khu lira lieneli.¹⁷Okhuva esikha siolile welikhalakilwa lialachakila munju ya Nyasaye: ne nikava lialachakila khwifwe, kalava kariena mukhumalilikha khu valia vakhali novuri khu yinjili ya Nyasaye? ¹⁸Ne kava vari vwalavakho ovutinyu khu vali avalunji okhwokoka, vakhamanya Nyasaye nende avoni valalolekhanila hena? ¹⁹Khu kario lekha valia valanyakhana okhulondokhana nende elienya lia Nyasaye vavikhe emioyo kiavo muniye mukhukhola amalayi, anga khu Omulongi uli omusuvilifu.

¹Nasayanga avasakhulu vali mwinywe, esie nendikho khu mulala khu nivo, nende wuli novuloli vwe eminyakhano kia Kristo, khandi wuli omusangi wovukhumi vwicha okhwikulilwa: ²Lisia elituli lia Nyasaye lili mwinywe, nemulisinjilila, vulali okhuvayikilisia, nikakhali mukhwirusia; vulali okhwiyenyela echirubia chesifwavi tawe, nikakhali mukhwirusia mumwoyo; ³Nohomba vulali okhwininia ikulu khu valia valiemiandu kia Nyasaye, nikakhali okhuva esilolelo esilayi khu lituli. ⁴Ne wo Omwayi omukhongo alilolekhana, olinyola ekutwa yo ovukhumi ikhali yokhuwechekhela tawe..⁵Khunjila ndala yeneyo, enywe avaraka, no ovuri khu vasakhulu. Nikario, vuli siamulala khwinywe ave novuri khu wasie, ne mwifwale okhwitutuya: okhuva Nyasaye walova vokhwininia, ne yelesianga ovukasu khu valia vetutuyanga. ⁶Khu kario yitutuye mwavene muve hasi wo omukhono kwamani kwa Nyasaye, kho naye atukhe okhukhuchingula musikha sienyekhane: ⁷Nomumulekhela okhwenda khwenyu khwosi; okhuva niye wumwendelanga.⁸Mwikhale meeso, no mwilinda; sikila omusitakilisi wenyu shetani, uli anga esimba yokhuwulukhuma, yikendanga neyiyima, alakhavanga omundu wokhwira. ⁹Sinjila vureke murekane ninaye mwisuvila, nomumanya muri avesienywe vosi vali musivala valavirilanga mu minyakhano kieneki.¹⁰Nikakhali Nyasaye wovukasu vwosi, wakhulanga muvukhumi vwa mindali mu Kristo Yeso, wamwalava nimwakhanyakhana atiti, alamulomba muve vatukhane, alavekhasia, avawe amani, avemunyisie. ¹¹Ovukhumi no ovunyali vuve khu mwene mindali na mindali. Amen.¹²Okhuvirila mumukhono kwa Silivanisi, wandaye wenyu uli omusuvilifu, khuli nalolanga, nivandikile muvwimbi, nemutinyilisia, khandi nemurusia ovuloli endi vwo musinjilekho vuno nivwo ovukasu vwa ng'ali vwa Nyasaye. ¹³Elivukana lili Babuloni, liarovolwa halala ninanywe, vamukhesia; nende Marko omwana wanje. ¹⁴Khesiane vuli sia mulala ne ekisi yovuyanji. Omulembe kuve halala ninanywe mwesi muli mu Kristo Yeso. Amina.

¹Simoni Petero, omurumikhi khandi omurumwawa Yeso Kristo, khu valia vanyola elisuvila elilayi ninafwe okhuvirila muvulunjikhi vwa Nyasaye nende ovwo Omunanuli wefu Yeso Kristo: ²Ovukasu no omulembe vutasikhe mwinywe okhuvirila muvuchesi vwo okhumanya Nyasaye, nende Yeso Omwami wefu³Okhulondana nende amani kovunyali ywa Kristo wakhuwelesia evindu viosi vitukhane okhuva novulamu nende okhuria Nyasaye, okhuvirila okhumanya wulia wakhulanga mu vukhumi nende muvulayi vuvwe. ⁴Khukenako wakhulaka ofundu fwo ovukusi ovukali khandi ofulayi fuvira esikelo: kho okhuvirila munifwo khuve vomulwivulo lwo omwima kukwe, nokhwivacha ovukoyani vuli musivala vwichilanga mukhwikomba.⁵Ne aluveka wakano, mutinyilile nevuva nesinani, mutasekho ovulayi khu lisuvila lienyu; ne khu vulayi mutasekho ovumanyilisi; ⁶Ne khu vumanyilisi mutasekho ovwiruki; ne khu vwiruki mutasekho okhwifwililisia; ne khu khwifwililisia, mutasekho ovutakatifu, ⁷Ne khu ovutakatifu mutasekho ovuyanji vwa avawanaye; ne khu ovuyanji vwa avawandaye mutasekho ovuyanji.⁸Okhuva amakhuwa kano kava mwinywe, ne kamwichulemo, kalavalomba mulekhe okhuva avakumba nohomba okhutakha okhuva na amatunde mukhumanya Yeso Kristo Omwami wefu. ⁹Nikakhali ulia wutakhile amakhuwa kano nomuvofu, ne sanyala walola hale tawe, ne wayevilila ari wasingwa ovwoni vuvwe vwa khale.¹⁰Khu kario, avayanje, khaka namani okhukhola omulango kwenyu nende ovurovolli vwenyu vuve vwa avwene: okhuva nomukhola amakhuwa kenako, semulakwa tawe: ¹¹Okhuva okhwinjila khwenyu khwalava okhukali mu vwami vwa mindali vwo Omwami wefu khandi omuwonia wefu Yeso Kristo.¹²Khu kario sinalekha okhumwichusia vuli lwosi amakhuwa kano tawe, mukhava nimwakamanya, ne mwatinya muvung'ali vwa mulimo vulano. ¹³Nalolanga endi katukhane, wemba nesili mumuvili kuno, emutinyilisie mukhwichulila. ¹⁴Ninamanyanga endi, esikha sititi nava nefwalulanga mumuvili kuno, anga Omwami wefu Yeso Kristo yanjekesie. ¹⁵Kakhava kario nakhakanga nesinani endi wenembe nefwile muve munyala vuli lwosi okhwichulila amakhuwa kano.¹⁶Okhuva sekhwalonda echingano chavatunga muvuchesi tawe, wakhwamwekesia ovunyali nende okhwicha khwo Omwami wefu Yeso Kristo, nikakhali fwavene khwalola ne echimoni chefu ovunyali vuvwe. ¹⁷Okhuva yanyola okhurula khu Nyasaye Papa oluyali novokhumi, womwoyo kwecha khuniye wakwarula muvukhumi ovukhongo kuri, Uno niye Omwana wanje omusime, wenikhoyelanga. ¹⁸Ne omwoyo kuno kwarula mwikulu khwakuwulila, wakhwali ninaye khu sikulu esichenukhu.¹⁹Khandi khuvele nende elikhuwa lili lia avwene lio ovung'osi; mwalakhola ovulayi nikava mwalalirekelesia, khuli anga ovulafu vukhosianga avundu wesilima sili, okhwola mavwivwi, ne eying'iniesi ye indalo yakha mumioyo kienyu: ²⁰Munyowe mumanye elikhuwa lino, muri vuvulawo ovung'osi vwosi mu kahandikwa vwo omundu yesi anyala okhukalukhasia anga ava nalalolanga tawe. ²¹Okhuva ovung'osi sevwayecha okhurula khale khu lienya lio omundu tawe: nikakhali avandu avachenukhu va Nyasaye valakaya anga Roo Omuchenukhu yavanyalila.

¹Nikakhali valikhomo avang'osi vo ovuveyi muvandu, anga valecha okhuvawo avalimu vo ovuveyi mwinywe, valenjisiamo echimbemba chokhusakulula, khusikelo sio okhwikana Omwami wavakula, ne nivevunia avene. ²Mani avanyingi valalonda emima kiavo kie esifwavi; ne okhuvirila khukenako eyinjila yovung'ali yalamayasiwa. ³Mani okhuvirila muvulianga valamukholelakho ovukhala nivamuveya: okhukhalakilwa khwavo khwarula khale ne sekhuli ale tawe, ne okhuvuna khwavo sekhuli okhuwungula tawe.⁴Nikava Nyasaye seyaveela echingelosi chakhola ovwoni tawe, nikakhali yachisukuna musiatisi, ne wachivowa ne minyololo musilima, chikhalemo okhulinda okhukhalakilwa; ⁵Ne khandi seyavela esivala esikhale sialiwo tawe, nikakhali yawonia Nuhu omwilwachi wo ovung'ali, nende avandu vandi musafu, wayarela amachi keyifula musivala khu vandu vakharia Nyasaye tawe; ⁶Ne anga yakhalakila amatokho ka Sodoma nende Gomora kaaya kakwa elikokhe, wakakhola okhuva elieko khu kalecha okhwikholekha khu valia vakharia Nyasaye tawe.⁷Ne wananula Lutu wali omulunji, wasinyikha nende emima kie esifwavi kia avandu vatamana: ⁸( Okhuva omundu omulunji mwenoyu anga yamenyanga munivo, kayalolanga khandi kayawulilanga, omwoyo kukwe omulunji kwasinyikhanga vuli eyindalo nende ofukholwa fwavo fwo okhuriola amalako; ) ⁹Omwami waamanya anga anyala okhunanula vali novuri vwa Nyasaye okhurula mumakelicho, nende okhuvikha vakhali avalunji okhwola eyindalo ya valikhalakilwa ne vanyole esinyasio.¹⁰Nikakhali sana khu valia vakendanga muvuchafu nivekomba mumuvili, ne nivaleka ovuruki. Nivo okhwiveya, okhwiyenyela, sevali novuri okhulakaya amavi khu voluyali tawe. ¹¹Chikhava echingelosi chili na amani nende ovunyali ovukali, sechilakayanga ovuvi vwavo evweni wo Omwami tawe.¹²Nikakhali vano, vali anga echisolo chilali no ovuchesi tawe, vevulwa anga echisola chavatilanga ne vera, valakayanga amakhuwa amavi kavakhamanyile tawe; ne valavunila mukhukoyana khwavo; ¹³Ne valanyola esinyasio, nokuli omurungo kwa valali avalunji, vava nivabaranga vari valakhola vuli esindu nivasangasia emivili kiavo nivakhola anga valekombanga musitere. Vakwile ve esifwavi ne echisoni, nivefunikha novuveyi vwavo nomuli ninavo mumilukha kio okhulia; ¹⁴Echimoni chavo chayechula ovuheyi, ne sevalekhanga okhukhola ovwoni tawe; nivombelesia ave emioyo emiangu: ve emioyo kiavo kianala okhwikomba; Avana valamwa:¹⁵Valekha eyinjila yili ya avwene, ne vasiama, valonda eyinjila ya Balamu omwana wa Beori, wali niyayanja omurungo kukhali kwa avwene; ¹⁶Nikakhali Nyasaye yamukondokhela khu vwononi vuvwe: we epunda yikhalakayanga yachaka okhulakaya nende omwoyo kwo omundu kania omung'osi alekhe ovulalu.¹⁷Avandu vano vafwana anga echisevele chakhama amachi, amaleesi ko oluwucho lusitanga; vavikhilwa esilima esimali tii. ¹⁸Okhuva wavalakayanga amakhuwa amakali amasiro mani amakangala ne esilekamo, vombelesianga okhuvirila mukhwikomba khwo omuvili, okhuvirila mukhukoyasia, valia vali avalafu vavelukhakho wavachaka okhukenda nivativa. ¹⁹Nivavalaka vari valava avalekhule, ne avene vavoywa muvwononi: okhuva omundu nakhaywa nowasie avechanga wakhava omuvoywa wuwe.²⁰Okhuva valia vewononokha okhurula musifwavi sio musivalaanga vecha vamanya Omwami khandi Omuwonia Yeso Kristo, nikava vanyala okhutilikha mukari mwenomu ne vakhaywe, okhumalilikha khwavo khuvechanga okhuvi okhuvira mukhuranga. ²¹Vwakhavele ovulayi khunivo nikakhavele vari sevamanya eyinjila yo ovulunji tawe, okhuvira, niwakhamanya eyinjila, okalukhanekhurula khu amalako amachenukhu kamwelesiwa. ²²Nikakhali kayekholekha anga vopa olukano lwa ng'ali vari, Eyimbwa yakalukha khandi khu masale kayo; ne khandi vari eyimbichi yavasinga yakalukha yekalakasia mumatoyi.

¹Avayanje, yino ne ebarua yanje ya khavili, yanamwandikilanga; muchibarua chino chosi nachuvanga echinganakani chenyu echiseleche mukhuvechusia: ²Mutukhe okhwichulila amakhuwa ka avang'osi avachenukhu va khale valakaya, nende elilako lio Omwami khandi omuwonia lie efwe avarumwa khwamurelila:³Mukhuchaka kenyekha mumanye muri, muchindalo cho okhumalilikha kene veche avandu veyimbelekewu valecha, nivakenda mulikomba liavo lie esifwavi, ⁴Ne vasunga vari, okhwicha khwa yalaka khuvele hena? okhurula okhufwa khwa ava papa vefu vuli esindu siachililila okhuva vusa anga sialingi mukhuchaka khwo ovulongi.⁵Okhuva valekelesianga muvusilu, vari khu likhuwa lia Nyasaye elikulu lialiwookhurula khale, ne esivala siavawo okhurula mumachi khandi simumachi: ⁶Khu kenako esivala silia sialiwo, siasombwa na amachi, siavuma. ⁷Nikakhali elikulu ne elilova, liliwo vulano, khulikhuwa lilia fwavikhwa, okhulindilila eyindalo yo okhukhalakilwa nende okhuvunusiwa khwa avandu mumulilo.⁸Nikakhali avayanje , mukhevilila elikhuwa lilala lino tawe, okhuva eyindalo ndala khu Nyasaye yivele anga emiyika elefu yindala, ne emiyika elefu yindala yivele anga eyindalo ndala. ⁹Omwami seyekhwesanga okhutusia eyindakano yiye tawe, anga avandu vandi vabaranga; nikakhali akhwifwilanga, sikila seyenyanga omundu yesi ative tawe, nikakhali vosi vekanile.¹⁰Nikakhali eyindalo yo Omwami yakheche anga omwifwi musilo; welikulu lilirulawo nolutiri olukali, ne fwalongamwo fwosi fuliya fwalala, ne esivala siosi, halala ne emilimo kiasio kiosi kiliya.¹¹Kava vari ofundu funo fwosi fwalavunisivwa munjila yino, nono kenyekhana muve avandu vo omwima kufwana kuriena nomumenya muvutakatifu nende muvuseleche, ¹²Nomwirechekhela okhwicha khwe eyindalo yo Omwami, welikulu lialava nelialayichanga neliketulukha nende evilonge vilimo viosi? ¹³Kakhava kario efwe, khuli aveyindakano yiye, khwalava khulindile okhulola elikulu eliya nende esivala esiya, sio ovulunji vulimo.¹⁴Khu kario, avasime, okhuva mwalalindililanga okhulola amakhuwa kenako, khaka nesinani amunyole nomuli no omulembe, vulali okhuva nelipala, nohomba ovutulani tawe. ¹⁵Nomuvasia muri okhwifwililisia khwo Omwami wefu novuwonia; anga wandaye wefu omuyanje Paulo, khu ovuchesi vwa yali niyelesivwa yamwandikila ari; ¹⁶Khandi khuli muchibarua chichechosi, wayalakayamo amakhuwa kano; malalamo namatinyu okhukamanyilisia, nakali khu valia vakhasoma nende khu valia vakhamanya elikhuwa, anga vayayanga khu mandiko kandi, nivemala avene.¹⁷Khu kario, enywe avayanje, okhuva mumanyile amakhuwa kano evweni,mwilinde ovulayi , mukhecha mwesi, mwatima muvusiamu vwa avamayanu tawe, mwakwa okhurula mulisuvila. ¹⁸Nikakhali tukhe muchimbavasi, ne khandi mulimanya lio Omwami uli Omunanuli wefu Yeso Kristo.

¹Lilia lialiwo okhurula mukhuranga, lia khwawulila, lia khwalola ne echimoni chefu, lilia lia khwalengelakho, ne emikhono kiefu kiatilakho, nelili Elikhuwa lio ovulamu; ²( Okhuva ovulamu vwenovu vwalolekhana, ne nafwe khwavulola, ne khwalananga ovuloli, khandi khwalamwekesianga ovulamu vwa mindali vwenovu, vwali halala nende Papa, ne vwalolekhana khifwe;)³Lilia lia khwalola ne khandi khwaliwulila nilio lia khwalelwachanga khwinywe, kho mwesi muve novulala ninafwe: ne muvung'ali ovulala vwefu vuvele nende Papa, halala nende Omwana wuwe Yeso Kristo. ⁴Ne amakhuwa kano khwalamwandikilanga enywe, kho ovusangafu vwenyu vwichule.⁵Ne ovurume vuno nivwo vwakhwawulila khuniye, ne nivwo vwokhumurerere, vari Nyasaye novulafu, ne esilima sesili muniye ata atiti tawe. ⁶Nokhusunga khuri khuno ovulala ninaye, ne khuchenda musilima, khuva khwalaveyanga, ne sikhuva khwalakholanga ovung'ali tawe: ⁷Nikakhali nokhukenda muvulafu, anga omwene ali muvulafu, ava fwavene khuvele novulala khu vuli siamulala, ne amavanga ka Yeso Kristo Omwana wuwe kalakhusinga efwe okhurula muvwoni vwefu vwosi.⁸Kava vari khwalasunga khuri khuvula ovwoni, khuva khwaleveyanga, ne ovung'ali sevuva mwifwe tawe. ⁹Nikakhali nokhwiyama ovwoni vwefu, niye nomusuvilifu ne khandi niwang'ali wokhukhuvela ovwoni vwefu, khandi okhukhusinga efwe okhurulana nende ovusiamu vwosi. ¹⁰Nokhusunga khuri sekhwakhola ovwoni tawe, khuva khwalamukholanga okhuva omuveyi, ne elikhuwa lilie liva livula mwifwe tawe.

¹Khu avana vanje avanyelele, namwandikilanga amakhuwa kano, kho mulekhe okhukhola ovwoni. Ne kava vari omundu yesi alakhola ovwoni, khuvele nende wo okhuteteya evweni wa Papa, Yeso Kristo uli omulunji. ²Ne niye wakholekha omusango kwo ovwoni vwefu: ne sevuli ovwoni vwefu fweng'ene tawe, nikakhali ovwoni vwe esivala siosi. ³Ne lino nilio likilanga khumanya khuri khwamumanya, nikava khwalatila amalako kake.⁴Ulia usunganga ari, namumanya, ne siwatila amalako kake tawe, nomuveyi, ne ovung'ali sivuli muniye tawe. ⁵Nikakhali wulia watila elikhuwa lilie, kang'ali ovuyanji vwa Nyasaye vuva vwayechula muniye: khu lino khumanyanga khuri khuvele muniye. ⁶Wulia usunganga ari wamenya muniye kenyekha omwene khandi akende ario, khuli omwene yachenda⁷Avayanje, sinandikanga elilako eliya khwinywe tawe, nikakhali elilako elikhale lia mwali ninalio okhurula mukhuranga. Elilako elikhale nelikhuwa lia mwawulila okhurula mukhuranga. ⁸Khandi, elilako eliya namwandikilanga enywe, esindu sia ng'ali muniye nende mwinywe: sikila esilima sivurire, ne vulano ovulafu vwa ng'ali nivwo vwalakhanga.⁹Wulia usunganga ari wuvele muvulafu, ne wasila wandaye wuwe, omwene oyo asili musilima okhwola esikha sino. ¹⁰Wulia wayanja wandaye wuwe yekhalanga muvulafu, ne sivulawo siosi sio okhumwisikirasia tawe. ¹¹Nikakhhali wulia wasila wandaye wuwe asili musilima, ne achendanga musilima, khandi samanyile walachichanga tawe, sikila esilima sienesi siamuvofusia echimoni.¹²Namwandikilanga enywe, avana avanyelele, sikila mwavelwa ovwoni vwenyu khulwe elira lilie. ¹³Namwandikilanga enywe, avapapa, sikila mwamumanya ulia waliwo okhurula mukhuranga. Namwandikilanga enywe, avaraka, sikila mwakhaya wulia uli omumayanu. Nandikilanga enywe, avana avanyelele sikila mwamanya Papa. ¹⁴Nimwandikile enywe, avapapa, sikila mwamanya wulia waliwo okhurula mukhuranga. Nimwandikile enywe avaraka, sikila muvele nende amani, sikila elikhuwa lia Nyasaye lia menya mwinywe, ne mwakhaya omumayanu.¹⁵Mukhayanja esivala tawe, nohomba ofundu fuli musivala tawe. Omundu yesi nayanja esivala, ovuyanji vwa Papa sivuli muniye tawe. ¹⁶Okhuva fwosi fuli musivala, elikomba lio omuvili, nende elikomba lie echimoni, nende okhwininia khwelimenya, sefurulanga khu Papa tawe, nikakhali nifwesivala. ¹⁷Ne esivala sialawawo, nende elikomba liasio: nikakhali wulia ukholanga elienya lia Nyasaye alayindila mindali.¹⁸Enywe avana avanyelele, chino nechindalo echimalilisi: ne anga mwawulila vari wokhwikana Kristo alecha, okhwola vulano vuri vekana Kristo avanyingi vayecha khale vavelewo; khu kario khwalamanyanga khuri khuvele muchindalo echimalilisi. ¹⁹Varula mwifwe vacha, okhuva sivali vomuwefu tawe; sikila nivakhavele vomuwefu, vakhachililile okhuva ninafwe: nikakhali varula vacha, kho vatukhe okhumanyikhana vari vosi sivali avefu tawe.²⁰Nikakhali enywe muvele novuvakho okhurula khu Omuchenukhu Mulala, ne mwamanya amakhuwa kosi. ²¹Sinavandikilanga sikila simumanyile ovung'ali tawe, nikakhali sikila mwamanya, ne khandi ovuveyi vuvulawo vuli vwa ng'ali.²²Wina uli omuveyi nakhali wulia wikananga ari Yeso niye Kristo? Ulia wikananga Kristo, niye wulovanga Papa nende Omwana. ²³Wulia yesi wikananga Omwana, niye wulia ukhali nende Papa tawe: (nikakhali) wulia wiyamanga omwana avechanga khandi wiyamile Papa.²⁴Lekha lilia khu kario likhale mwinywe, lia mwawulila okhurula mukhuranga. Nikava lilia lia mwawulila mukhuranga lialekha mwinywe, mwesi muva mwalachililila okhuva mu Mwana, nende mu Papa. ²⁵Ne khuno nikhwo okhulaka khwa ya yakhulaka, nevuli ovulamu vwa mindali. ²⁶Nivandikile amakhuwa kano okhulondokhana nende valia valenya okhumwombelesia vamutifie.²⁷Nikakhali ovuvakho vwa mwanyola muniye vwayekhala mwinywe, ne simwalenya omundu wundi yeche amusomie tawe: nikakhali anga ovuvakho vulala vwenovu vwalamunyalila okhumanya amakhuwa kosi ne no ovung'ali, vulali ovuveyi tawe, khandi anga alava namwekesie, niwo anga mwalamenya muniye. ²⁸Ne vulano, enywe avana avanyelele, mwikhale muniye; vari, walilolekhana, khuve novusicha, vulali okhukhola echisoni waliva nakalukha. ²⁹Nikava mwamanya muri nomulunji, mwamanya muri vuli wukholanga amalunji wayevulwa muniye.

¹Lolakho, novuyanji vutukha vuriena vwa Papa yakhuwelesia, vari khulangwe avana va Nyasaye: khu kario esivala sisikhumanyile tawe, sikila sisiamumanya tawe. ²Avayanje, vulano khuvele avana va Nyasaye, ne kasili okhulolekha khuli khulicha okhuva: nikakhali khwamanya khuri, lwa alilolekha , khwakhafwanane ninaye; sikila khwakhamulole anga ali. ³Ne vuli omundu ulinende eliyikina lino muniye yetakasanga omwene, anga ali omulafu.⁴Wulia yesi ukholanga ovwoni avechanga khandi alariolanga elilaka: okhuva ovwoni nokhuriola elilaka. ⁵Ne mumanyile muri niye walolekha khu lwo okhurusiawo ovwoni; khandi ovwoni sivuli muniye tawe. ⁶Wulia yesi wikhalanga muniye sakholanga ovwoni tawe: wulia yesi wukholanga ovwoni asili okhumulolakho, nohomba okhumumanya.⁷Enywe avana avanyelele, omundu yesi akhamuveya tawe: wulia ukholanga akali amalunji nomulunji khuli omwene ali omulunji. ⁸Wulia wukholanga ovwoni niwa sietani; okhuva sietani niye wukholanga ovwoni okhurula mukhuranga. Khu esifune sino Omwana wa Nyasaye yalolekha, kho atukhe okhwinona emilimo kia sietani.⁹Wulia wevulwa okhurula khu Nyasaye sakholanga ovwoni tawe; okhuva olumicho lulwe lwasikala muniye: khu kario sanyala okhukhola ovwoni tawe, okhuva wayevulwa mu Nyasaye. ¹⁰Khu kene kano avana va Nyasaye vamanyikha nende avana va sietani: Wulia yesi wukhakholanga kakhali amalunji sali wa Nyasaye tawe, nohomba wulia wakhayanja wandaye wuwe tawe¹¹Okhuva vuno nivwo ovurume vwa mwawulila okhurula mukhuranga, vari khuyanjane vuli siamulala. ¹²Mukhava anga Kaini, wali wo mumayanu, yera wandaye wuwe. Ne sina siakila namwira? Sikila ofukholwa fufwe fwali ofuvi ne fwa wandaye wuwe fwava ofulayi.¹³Mukhachenya tawe, avayanje, nikava esivala sialamusila. ¹⁴Khwamanya khuri khwavira mulifwa khwayenjila muvulamu, sikila khwayanja avawandaye vefu. Wakhayanja wandaye wuwe tawe wamenya mulifwa. ¹⁵Wulia yesi waleka wandaye wuwe no omulimindi: ne mwamanya muri ovulamu vwa mindali sivumenyanga mu mulimindi tawe.¹⁶Khu lino khwamanya ovuyanji vwa Nyasaye, okhuva yara hasi ovulamu vuvwe sikila efwe: ne fwesi kenyekhana khure hasi ovulamu vwefu sikila avayanje. ¹⁷Nikakhali wulia uli nende emiandu kie esivali sino, ne alole wandaye wuwe utakhile, ne naye alekhe okhumukholila esisa, ava ovuyanji vwa Nyasaye vuvele hena muniye? ¹⁸Avanyelele vanje, khukhayanja vusa khu kemunwa nende khu lulimi tawe; nikakhali mu vikholwa nende mu vung'ali.¹⁹Ne khu liene lino khwalamanya khuri khuvele muvung'ali, ne khulatinyilisia emioyo kiefu evweni wuwe. ²⁰Nikava omwoyo kwefu kwalakhuyala, okhuva Nyasaye nomukali okhuvira omwoyo, ne wamanya amakhuwa koosi. ²¹Avayanje, nikava omwoyo kwefu sikukhuyalanga tawe, ava khunende ovusicha evweni wa Nyasaye. ²²Ne siosi sia khwalamusava, khwalanyola, sikila khwaria amalaka kake, ne khukholanga kamuyanjisie muchimoni chiche.²³Ne lino nilio elilaka lilie, khusuvile khu lira lio Omwana wuwe Yeso Kristo, ne khuyanjane, anga yakhuwelesia elilaka. ²⁴Ne wurichanga amalaka kake amenyanga muniye ne naye amenya muniye. Ne khulino khumanya khuri wamenya mwifwe, okhuvirira mu Roo wayakhuwa.

¹Avayanje, mukhasuvila vuli eroo tawe, nikakhali mulengele echiroo nikava nicha Nyasaye: sikila avang'osi avanyingi vovuveyi vayecha musivala. ²Khulino mwamanya Roo wa Nyasaye: Vuli roo wiyamanga ari Yeso Kristo yecha mumuvili ava niwa Nyasaye: ³Ne vuli roo wukheyamanga ari Yeso Kristo siyecha mumuvili tawe sali wa Nyasaye tawe: ne yino niyo eroo yilia yo wulia wikananga Kristo, yamwawulila vari yalecha; ne vulano yayecha khale musivala.⁴Enywe muvele va Nyasaye, avana avanyelele, nenywe mwavakhaya: sikila ulia uli mwinywe nomukhongo okhuvira wulia uli musivala. ⁵Avenavo ni vesivala: khu kario valakayanga kesivala, ne esivala sivawulilanga. ⁶Efwe khuvele va Nyasaye: wulia wamanya Nyasaye akhuwulilanga efwe; ne wulia ukhali wa Nyasaye tawe sakhuwulilanga efwe tawe. Hano niwo wokhumanyilanga roo wang'ali nende wovusiamu.⁷Avayanje, lekha khuyanjane: okhuva ovuyanji nivwa Nyasaye; ne vuli sia mulala wuli novuyanji wayevulwa mu Nyasaye, naye wamanya Nyasaye. ⁸Wulia ukhali novuyanji tawe siwamanya Nyasaye tawe; okhuva Nyasaye novuyanji.⁹Ne mulino ovuyanji vwa Nyasaye vwenovu vwalolekhana khwifwe, sikila Nyasaye yaruma Omwana wuwe omutelwa musivala, vari khutukhe okhumenya okhuvirila muniye. ¹⁰Vuno nivwo ovuyanji, sikali vari nifwe khwayanja Nyasaye tawe, nikakhali niye wakhuyanja efwe, ne waruma Omwana wuwe ave omuasango kwo ovwoni vwefu.¹¹Avayanje, nikava Nyasaye yakhuyanja, fwesi khukhoyele khuyanjane. ¹²Avulawo omundu yesi walolakho Nyasaye khu sikha siosi tawe. Nokhuyanjana fwavene, Nyasaye amenyanga mwifwe ne ovuyanji vuvwe vwalechula mwifwe. ¹³Khu lino khwalamanya khuri khwamenya muniye, naye wamenya mwifwe, sikila wakhuwelesia roo wuwe. ¹⁴Ne khulolile ne khwalahananga ovuloli khuri Papa yaruma Omwana ave Omunanuli we esivala.¹⁵Wulia yesi waleyama ari Yeso no Omwana wa Nyasaye, Nyasaye amenyanga muniye, naye amenya mu Nyasaye. ¹⁶Ne efwe khwamanya ne khwasuvila ovuyanji vwa Nyasaye ali ninavwo khwifwe. Nyasaye novuyanji; ne wulia wamenya muvuyanji wamenya mu Nyasaye, ne Nyasaye naye wamenya muniye¹⁷Khu lino ovuyanji vuvwe vwa yechula mwifwe, kho khutukhe okhuva novusicha khu yindalo yelikhalakilwa: sikila anga ali, niwo anga fwesi khwalava musivala muno. ¹⁸Ovuri sivuliwo muvuyanji tawe; nikakhali ovuyanji vwa avwene vurusianga elwanyi ovuri: sikila ovuri vuvele neminyakhano. Wulia wurichanga asili okhuva no ovuyanji muvwichufu.¹⁹Khwamuyanja, sikila niye wakhuyanja mukhuranga. ²⁰Nikava omundu yesi alasunga ari, Nayanja Nyasaye, ne naye wasila wandaye wuwe, nomuveyi: niyakhayanja wandaye wuwe walolanga tawe, alayanja ariena Nyasaye wasili okhulolakho? ²¹Ne elilaka lino nilio lia khwanyola okhurula khu niye, Wulia wayanja Nyasaye akhoyela khandi ayanjanga wandaye wuwe.

¹Vuli omundu wasuvila ari Yeso niye Kristo avechanga wayevulwa mu Nyasaye: Ne vuli omundu wayanja omwivuli alayanja nende omwana wayevula. ²Khu lino khumanya khuri khwayanja avana va Nyasaye, nekhuva khwayanja Nyasaye, ne khuria amalaka kake. ³Sikila vuno nivwo ovuyanji vwa Nyasaye, vari khurie amalaka kake: ne amalaka kake sikali amasiro tawe.⁴Sikila wulia yesi wevulwa nende Nyasaye akhayanga esivala: ne vuno nivwo ovukhayi vwakhaya esivala, nelili elisuvila liefu. ⁵Ni wina niye wakhaya esivala, nakhali wulia wasuvila ari Yeso no Omwana wa Nyasaye.⁶Wuno niye wecha na amachi nende amavanga nali Yeso Kristo, ne sikhuli okhuvirira mumachi kong'ene tawe, nilali no okhuviriri mumachi nende amavanga. Ne ni Roo niye wureranga ovuloli, sikila Roo niye ovung'ali. ⁷Okhuva vawo vataru varurusianga ovuloli mwikulu, Papa, Elikhuwa, nende Roo Omuchenukhu: ne vataru vano vavele omundu mulala. ⁸Ne fuwo ofundu futaru furusianga ovuloli musivala, Roo, nende amachi, nende amavanga: ne futaru funo fwiyamanga mu mulala.⁹Nikava khwiyamanga ovuloli vwa avandu, ovuloli vwa Nyasaye navwo novukali okhurawo: okhuva vuno nivwo ovuloli vwa Nyasaye vwa yarusia khu Omwana wuwe. ¹⁰Wulia wasuvila Omwana wa Nyasaye wuvele novuloli mumwoyo kukwe: ne wulia wakhasuvila Nyasaye tawe amukholanga okhuva omuveyi; sikila siyasuvila ka Nyasaye yandika okhulondokhana nende Omwana wuwe tawe.¹¹Ne vuno nivwo ovuloli, vuli vari Nyasaye wakhuwelesia ovulamu vwa mindali, ne ovulamu vuno vuvele mu Mwana wuwe. ¹²Wulia uli no Omwana wuvele no ovulamu; ne ulia ukhali no Omwana wa Nyasaye tawe avula ovulamu.¹³Amakhuwa kano nimwandikile enywe mwasuvila khu lira lio Omwana wa Nyasaye; mutukhe okhumanya muri muvele novulamu vwa mindali, ne khandi mutukhe okhusuvila khu elira lio Omwana wa Nyasaye. ¹⁴Ne lino nilio eliyikina liokhuli ninalio muniye, vari, nokhumusava esindu siosi okhulondokhana nende elienya lilie, alakhuwulila: ¹⁵Ne nikhumanya khuri alakhuwulila, khu lilia liosi lia khwalasava, khwalamanya khuri alakhuwelesia kalia kosi kokhuva nokhwikomba khu niye.¹⁶Ne omundu yesi nalola wandaye wuwe alakholanga ovwoni vukhamuyila mulifwa tawe, alamusavila ne naye alamuwelesia ovulamu vwa valia vakholanga ovwoni vulali vwokhurela elifwa tawe. Okhuva vuwo ovwoni vwo okhurela elifwa: Sinasunganga endi amusavile khu ovwenovu tawe. ¹⁷Ovusiamu vwosi novwoni: ne vuwo ovwoni vukhareranga elifwa tawe.¹⁸Khwamanya khuri wulia yesi wevulwa mu Nyasaye sakholanga ovwoni tawe; nikakhali wulia wevulwa mu Nyasaye omwene yelindanga, ne omumayanu wulia samutilangakho tawe. ¹⁹Ne efwe khwamanya khuri khuvele va Nyasaye, ne esivala siosi siayekhala muvumayanu.²⁰Ne khwamanya khuri Omwana wa Nyasaye wayecha, ne wakhuwelesia elimanya, vari khutukhe okhumanya wulia wuli wang'ali, ne efwe khuvele mu wulia uli wang'ali, yaani mu Omwana wuwe Yeso Kristo. Wuno niye Nyasaye wang'ali, khandi wovulamu vwa mindali. ²¹Avana avanyelele, mwilinde mwavene okhurulana nende ofufwanani. Amina.

¹Omusakhulu khu mukhaye warovolwa nende avana vave, wanaanja muvungali; mani sieng'ene tawe, halali vosi vamanga ovungali- ²khulwa khuvela ovungali, vuli mwifwe, khandi valava mwifwe mindali. ³Chimbavasi chive ninyanywe, esisa, nende omulembe khuvurula khu Nyasaye Baba , nende khurula khu Yeso Kristo, omwana wa Baba, muvung'ali nende ovuyanji.⁴Esangalanga muno khulwa avana venyu khuchendanga muvung'ali, khuli khwanyola lilak khurula khu Baba . ⁵Khu kario omukhaye, nakhusavanga, sikali vari naandikanga lilaka liya tawe, halali lilila lia khwava ninalio khuvula kenyi, ombu khuyanjane. ⁶Khandi vuno novuyanji, vari khuchende mumalako kake. Lino nilio lilako , vari khuli wawulila khuvula kenyi, ochendengemo.⁷Okhuvela avaveyi avanyinyi venjile musialo, vasunganga vari Yeso Kristo asili khwicha mumuvili Wuno nomuveyi khandi wayambakhana Kristo. ⁸Yilengela mwavane, ombu mukhatifia emilimo kia mwakhola tawe, halali munyole esihanwa mubwichiusie.⁹Oyo yesi omwononi, khandi salondanga maandiko tawe, sali na Nyasaye tawe. Oyo wumenyanga mumaandiko ka Kristo , wuna vosi baba nende omwana . ¹⁰Khuwana nende yesi ulecha khwinywe, vulali amaandiko kano, mukhamwinjisia munju mwenyu tawe, khandi mukhamukhesia tawe. ¹¹Yesi wumukhesia walova vikholwa via Nyasaye, no mwoni.¹²Khumanyinji kanenyile evandikile, sinaandika khukarasasi nobwino tawe: halali navusilanga. ¹³Avana va yaya wenyu wavovulwa vavakhesilie Amina.

¹mwimilili wa nayanja kayo omuyanje wanje muvung'ali. ²Omuyanje, esala ochililile ovulai mumakhuwa kako kosi, ove omulamu mumwoyo kukwo. ³sikila nayanja sana nga avayanje vecha varusia ovuloli vwa lichenda lilio lia ovutoto ⁴. sendi nende ovuyanji ovunyinji okhuvura vuno tawe, okhuulila vari avana vanje valachendanga muvulunji.⁵Omuyanje, emilimo kia okholelanga avayanje nende avakeni ne emilayi sana. ⁶vakhwichomia ovuyanje vuvwo mukanisa. Nosima chililila okhuvayeta mwichenda liavo na nyasaye na olakasichwa. ⁷Khukario, vanja oluchendo lwa okhurumikhila vulali ovukhonyi vwa avononi tawe, vachila mulira lilie. ⁸Kenyekhana khulonde injila ya ovutoto nga eyo nende [Okhukaribisia] avandu khurio..⁹Nandikila ekanisa endio lakini Dioterefe wayanja okhwira evueni wa avandi siyakhwiyama tawe. ¹⁰Khukario lwa nendukhe khwicha, Nakhechulile evikholwa vivie evimayanu, amanyeko nende ovwimani vwa yakhukholela alala nende okhukaya vakaribisianga avandu khandi na avarusia mukanisa.¹¹Avayanje, mukhalonda amavi tawe nelali khola kali amalayi. Sikila ulia ukhola amalayi ni wanyasaye na ukhola amavi si walolakho nyasaye ta. ¹²Demeterio yechomivwa na avandu vosi khandi fwesi khusunga khurio.¹³Ninende Amanyinji ka okwandika nelali seli muvwino ne ekalamu tawe, nda suvilanga endi kana niche khulosie moni na moni. ¹⁴Avasime vamukhesia. Khukhesiliekho avasime veweneyo sia mulala khulira lilie. ¹⁵Omulembe kuve ninanywe

¹Yuda , omurumikhi wa Yeso Kristo wandaye Yakobo , khu valia vatakaswa nende Nyasaye Papa , avavikhwa khu Yeso Kristo mumulango. ²Chimbavasi khwiwe nende omulembe no vuyanji vutasikhe khwiwe .³Avayanje ,khuli nerusia okhwandika khulwa ovuhonia , kenyekha nandike khwinywe okhuvatinyilisia mulienyelesialie lisuvilaliemwawelesiwa nende avayanje . ⁴Okhuva khunende avandu vamwinjilamo muvwifusi . Vano nivo avandu vapangilwa okhukhalakilwa . Avenavo navandu vakhamanyile Nyasaye tawe vakalukhasia ovukasu vwa Nyasaye okhuva ovuvacha , vekananga Omukhongo uli Omwami , Yeso Kristo .⁵Khukario navechusianga endi kakhava nimwali nemwamanya khuli Omwami yaonia avandu khurula musivala sia Misiri ,olunyima niyenonia vakhasuvila tawe . ⁶Nende Chingelosi chakhalinda liva liavo liokhuranga nende wavenyakhana vave , wavavikhilalimenya lilie emiyika ne miyika musivoye sia musilima muvukhalaki vwe indalo ingali .⁷Khuli Sodoma nende Komora amatokho kali ahembi munjila ili ifwanana verusia okhuveya nende chinjila chimbi khumuvili , varwerao okhuva esilolelo nivanyakhana khu kavakhola mumulilo kwe miyika ne miyika. ⁸Kafwanana na kenako vamarolo amachafu vano vachafukisianga omuvili nivamochelesia ovuruki , nivalakaya amavi khuvesilivwa .⁹Kho nikava ingelosi Mikaili omukhongo wayali nalayinganilianga khumuvili kwa Musa nende Sietani siyamunyeka namwe khumukhalakila tawe nilali yamusungila ari Omwami akhukondokhile . ¹⁰Navusa vano vanyekanga amatamanu khukavakorirwe ; navusa kavamanyile khu vwavo khuli chisang'i cha mwisinochisilu khumakhuwa kenako veyinonanga avene . ¹¹Esilamo khuvene khulwa injila yavavukula ya Kaini nende nivelukha muvulianga mukhukorwa khwa Balamu khwokhwiyenyela .Vavunila muvwononi vwa Kora .¹²Avandu vano namarakondo muchikhoyela chefu cho vuyanji , nivalia ninawe vulali chisoni - avayi vokhwilisia avene . Vengana amalesi kalali keifula kapurusiwangwa neyimboo ; emisala kie siuvue, kivula amatunde - kwafwa kwakalukhila ,kwakhulwa nemizi ¹³Vavele anga okhwikovola khwa machi keinyanja nivarusia elifilo lie chisoni chavo ,nivayiyana singa eching'iniesi ,valia vavikhilwa esilima esikali esimali tii sie mindali .¹⁴Enoka , omundu ukhola musaafu khu Adamu , yavarusia ovung'osi, nasunga ari , Lola !, Omwami alechanga nende avakwelafu vave echelefu ne echelefu . ¹⁵Alechanga okhuyala na khalakila vuli siamulala. Alechanga okhukhalakila valia vosi vakharia Nyasaye ta halala ne milimo kiavo kiosi kiavakhola nende amakhuwa amalulu kosi kovwononi kavoni vamulakayakho . ¹⁶Avandu vano vavele avavululi ,avayingani ,valondanga elikomba elivi . Eminwa kiavo no khwifumia ikulu , nivaveya avandu okhwirerera eyifuma .¹⁷Navusa ewe, omuyanje , ichulila amakhuwa ka avarumwa vo Omwami wefu Yeso Kristo. ¹⁸Khulinga vamusungila vari , Chisuku chimalilisi Kene khuve nende vokhumayasia valalonda elienya liavo avene. ¹⁹Vano nivo vareranga okhukavukhana , ni vesivala khandi sivali nende Roo tawe .²⁰Nilali enywe , avasime , yumbakhane mwavene khu venemuvukwelafu vwe lisuvila . ²¹yivikha mwavene muvuyanji vwa Nyasaye ne mulinde chimbavasi cho Omwami Yeso Kristo chireranga ovulamu vwe emiyika ne miyika .²²Vavele valia vayayanga . ²³wonie avandi nimuvakhwesa okhurula mumulilo ; na avandi vakholele chimbavasi novuri ,nomulova echinguvo che sifwavi sio omuvili .²⁴Nono khu ulia unyala khukhulind aokhurulana nende okhwiyikumula nende unyala okhukhusinjisia evweni wo vukhumi vwaulia ulali nelipala ta nende ovusangafu ovukali . ²⁵khu Nyasayeuli Omunanuli wefu okhuvirila mu Yeso Kristo Omwami wefu anyole ovukhumi ,ovukhongo , ovuruki nende ovunyali, inyuma wa evikha viosi , vulano , ne emiyika kiosi . A mina .