To view a copy of the CC BY-SA 4.0 license visit
http://creativecommons.org/licenses/by-sa/4.0/
Matthew
Chapter 1
1
Kitab titis Yesus Kristus, anak Daud, anak Abraham.
2
Abraham anilah sama' Ishak,
Ishak anilah sama' Yakub.
Yakub anilah sama' Yehuda ge' age-age'a. Yakub anilah sama' Yehuda ge' age-age'a.
3
Yehuda anilah sama' Peres ge' Zerah, sino' ayoa' anilah Tamar.
Peres anilah sama' Hezron.
Hezron anilah sama' Ram.
4
Ram anilah sama' Aminadab.
Aminadab anilah sama' Nahason.
Nahason anilah sama' Salmon.
5
Salmon anilah sama' Boas, sino'a anilah Rahab.
Boas anilah sama' Obed, sino'a anilah Rut,
Obe anilah sama' Isai.
6
Isai anilah sa' Raja Daud,
Daud anilah sama' Salomo,
sino'a anilah tawatn sautn Uria.
7
Salomo anilah sama' Rehabeam.
Rehabeam anilah sama' Abia'
Abia anilah sama' Asa.
8
Asa anilah sama' Yosafat.
Yosafat anilah sama' Yoram.
Yoram anilah sama' Uzia.
9
Uzia anilah sama' Yotam.
Yotam anilah sama' Ahas.
Ahas anilah sama' Hizkia.
10
Hizkia anilah sama' Manasye.
Manasye anilah sama' Amon.
Amon anilah sama' Yosia.
11
Yosia anilah sama' Yekhonya ge' age-age'a,
jangkah pambuangan ka Babel.
12
Ngalaka pambuangan ka Babel,
Yekhonya anilah sama' Sealtiel.
Sealtiel anilah sama' Zerubabel.
13
Zerubabel anilah sama' Abihud.
Abihud anilah sama' Elyakim.
Elyakim anilah sama' Azor.
14
Azor anilah sama Zadok.
Zadok anilah sama' Akhim.
Akhim anilah sama' Eliud.
15
Eliud anilah sama' Eleazar.
Eleazar anilah sama' Matan.
Matan anilah sama' Yakub.
16
Yakub anilah sama' Yusuf, banun Maria.
Umpatn Maria gatn baranak Yesus, da gatn muji' Kristus.
17
Jadi, saman katurunan umpatn Abraham sampe Daud ani ampat balas katurunan, ge' umpatn Daud sampe pambuangan ka Babel ani ampat balas katurunan, ge' umpatn pambuangan ka Babel sampe Kristus ani ampat balas katurunan.
Yesus Kristus Gatn beranak
18
Mati', Yesus Kristus gatnberanak anilah samu' diah. Jangkah Maria, sino'-A laka batunang nige' Yusuf, katinga ayoa' idup bariuh, nyata ini' batahi' umpatn Roh Kudus.
19
Namun, karna Yusuf banun'a, anilah sok da taman ge' kati' ituh manyangun Maria ka tura umum, Yusuf bamaksud ya' ngabebas Maria ge' cara tunguh-tunguh.
20
Ao'a, jangkah Yusuf agi' nimbang hal diah, mile' ta, malaikat Tuhan tile' ka ini' sadatn samangat ge' nyansana "Yusuf, anak Daud, iya' buut nangkap Maria sabage sautnmu' karna Anak da gatn ni nahi' anilah umpatn Roh Kudus.
21
Ini' ao' baranak nyungan anak are ge' imu' ao' muji gaatn Na Yesus karna Ini' ao' nyalamat umat-A umpatn duse-duse ayoa'."
22
Samaan hal diah tajadi ya' ngagenap da gatn Tuhan Firman nabo nabi-nabia'.
23
"Mile' mih, nyungan parawan ao' batahi ge' ao' baranak nyungan anak are. Ayoa' ao' muji' gaatn-A Imanuel, " da gatn tarjamah ratia: "Jabata bariuh ge' ite'."
24
Jangkah Yusuf umpat umpatn buus'a, ini' umas samu da malaikat Tuhan muji' ka ini', ge' ini' ao' nangkap sautn'a, Maria,
25
tapi kati' baranun nige' ini' sampe ini' baranak anak are'a. Ge', Yusuf muji gaat-A, Yesus.
Chapter 2
1
Mati', ngalaka Yesus gat'n baranak wak Betlehem, wak Yudea, pas zaman Raja Herodes, ilelah, ayo-sok Majus umpat'n timur utukng ka Yerusalem.
2
Ayo'a mansikat'n, "Ka dume ta Ini', da gat'n baranak, Raja sok Yahudi dakoh? Barang, kai' laka mile bintakng-A wak timur ge' kai' utukng yak nyambah-A."
3
Jangkah Raja Herodes dangah hal diah, galisahlah ini' ge' samaan Yerusalem samahu'a.
4
Lalu, ini ngumpul samaan imam kapala ge' ahli-ahli Taurat bangsa dakoh. Ini' ngurek katarangan umpat'n ayo'a, tampat Yesus gat'n baranak.
5
Ayo'a nyansana ka ini', "Wak Betlehem, rapo Yudea, barang ladiahlah da gat'n nulis uleh nabi:
6
Ge', akup'm Betlehem, wak tana Yehuda, samu sakali inyalah da paling inek wak antara ayo panguasa Yehuda, barang umpat'nmu' muncol sook pamimpin, da aok mangambala umat-Ko', Israel."'
7
Laka dakoh, Herodes tunguh-tunguh maba ayo-sok Majus dakoh, mahi kapastian umpat'n ayo'a tentang waktu basinar'a bintakng dakoh.
8
Lalu, ini' ngadu ayo'a ka Betlehem ge' nyansana, "Anu ge' nyalidiknih nige taliti tentang Kangot dakoh. Ge', kalo imu' laka amput'-A, ngalapor ka iko' supaya iko' uga nyambah-A."
10
Jangkah mile bintakng dakoh, ayo'a basukacita da aru aihyo.
11
Ngalaka maruh ka sadat'n ramin, ayo'a amput Kangot dakoh samahu Maria, sino-A. Lalu, ayo'a tasungkap'm ge' nyambah-A. Laka dakoh, ayo'a muka tampat-tampat harta'a ge' mampersambah hadiah-hadiah ka-Ini', diu'ta barawat'n, kamanyan, ge' mur.
12
Barang gat'n mamparingat ka sadat'n samangat supaya iya' malik ka Herodes, ayo'a malik ka negeri'a nabo pagala lait'n. Parintah yak talama ka Mesir
13
Ngalaka ayo-sok Majus dakoh anu, ilelah, malaikat Tuhan nampak ka Yusuf ka sadat'n samangat ge' nyansana, "Umpatlah, minsakng Kangot dakoh samahu sino-A ge' talamalah ka Mesir. Madilah wak teet'n sampe Iko' nyansana ka imu' barang Herodes ngate najo Kangot dakoh yak mambinasa-A."
14
Laka dakoh, Yusuf umpat ge' minsakng Kangot dakoh nige sino-A pas waktu ngarum yak anu jauh ka Mesir,
15
ge' madi wak teet'n sampe Herodes kabis supaya gat'n nganganap da gat'n forman Tuhan nabo nabi: "Umpat'n Mesir Ko'maba Anak-Ko'." Pangamis Samaan Kangot Ayo-are wak Betlehem
16
Laka dakoh, jangkah Herodes mile kalo ini' laka gat'n mampardaya uleh ayo-sok Majus, ini' aru murka ge' marintah yak ngamis samaan kangot are-are wak Betlehem ge' samaan rapo wak sakitar'a, da baumur dua taun ka saroh, sasuei nige waktu da laka ini' pastikan umpat'n ayo-sok Majus.
17
Maka, ganaplah da gat'n nyampe uleh Nabi Yeremia:
18
"suatu sarat gat'n dangah di Rama, munse ge' ngaratap da aru sedih. Rahel ngawang anak-anak'a, ge' kati ituh gat'n ngahibur barang ayo'a laka ti'ani." Parintah yak kambali ka Israel
19
Tapi, jangkah Herodes kabis, ilelah, malaikat Tuhan nyua adup'a ka sadat'n samangat ka Yusuf wak Mesir,
20
ge' nyansana, "Umpat'lah, minsakng Kangot dakoh nige sino'-A ka tana Israel barang ayo-sok da barusaha ngamis singat Kangot dakoh laka kabis."
21
Lalu, ini' umpat ge' minsakng Kangot dakoh nige sino'-A kambali ka tana Israel.
22
Tapi aok'a, jangkah ini' dangah kalo Arkhelaus marintah wak Yudea nganti Herodes, sama'a, Yusuf buut anu ka teet'n. ngalaka gat'n mamparingat ka sadat'n samangat, ini' anu ka rapo Galilea.
23
Yusuf utukng ge' madi wak nyabuah kota da bagaat'n Nazaret supaya ganaplah da gat'n nyampe ayo nabi, "Ini' aok gat'n nyabut 'Sok Nazaret'."
Chapter 3
1
Ka ano-ano dakoh, muncol ta Yohanes Pembaptis, bakotbah ka taya udu Yudea.
2
Ini' muji', "Batobat mih karna Karajaan surga agi jiket."
3
Sabab, ini; ta da nabi Yesaya muji' waktu ni' nyansana,
" Saratn nyungan sok da ngampak-ngampak ka taya udu,
' Da nyiap ta gala ya' Tuhan, umas ta gala'-A tamut."
4
Ge', adup Yohanes ngiak pangiak umpatn burut unta ge' pantingo apakng umpan kurit gatn ngakilik apakng'a. Pangkuman'a anita buntak ge' madu tuatn.
5
Laka dakoh, ayo sok Yerusalem utukng wa ini' ge' samaan Yudea, ge' samaan rapo ka bagian Yordan.
6
Lalu , ayoa gatn ngabaptis ya' Yohanes ka Yordan, gae ngako duse-duse ayoa.
7
Malah, waktu Yohanes mile' karah ayo sok farisi ge' Saduki utukng wa' baptisan'a, ini' nyansana ka ayoa', "Imu' katuunan nipa babisa, asi da mamparingatmu' ya' boho umpatn pabaji' da ao' utukng?
8
Karna dakoh, ngasil ta buah da nyabanding nige' partobatan,
9
ge' iya' bapikir ge' muji' ka adupmu' sadik , kai nga ani Abraham, sama' leluhur kai, karna iko' muji' ka imu', bahwa umpatn batu-batu diah Jabata abak mangkidup anak-anak ya' Abraham!
10
Bahkan, mati' diah, kapak gatn ngamana' ka uhat pu'utn-pu'utn, ge' satiap pu'utn kayu' da kati' ngasil buah da bait gatn nabut ge' gatn nyangkahatn ka sadatn api.
11
Sasungguh'a iko' mambaptis imu' nige' paitn ya' batobat, tapi Ini' da ao' utukng ngalaka iko' anilah da labih bakuasa daripada iko', da sandal'a pun iko' kati' patut minsakng'a. Ini' ao' mambaptis imu' nige' Roh Kudus ge' nige' api.
12
Alat panayap ani ka barekng'a, ge' Ini' ao' marasih tampat pangihik-A, ge' ao' ngubu gandum'a ka sadatn langko. Tapi, Ini' ao' nyahung kalipe'a nige' api da kati' kaat gatn ngamis. Yesus Gatn Baptis ya' Yohanes Pembabtis
13
Laka dakoh, Yesus utukng umpatn Galilea ka Yordan wa' Yohanes ya' Yohanes baptis'a.
14
Tapi, Yohanes barusaha mancegah-A ge' nyansana, "Iko' ta da parlu gatn Mu' baptis , tapi justru da utukng wa' iko'.
15
Lalu Yesus naham ge' nyansana wa ' ini', "Mati', biar ta karna ladiah ta da saharus'a tajadi ka ite' ya' manggenap samaan kabenaran," Ge', Yohanes pun mambiar-A.
16
Ngalaka gatn baptis, Yesus lansong mungkas umpatn paitn, ge' mile' mih, surga tabuka ge' Ini' mile' Roh Jabata disah samu ge' manuk acang utukng ka samo-A.
17
Ge', dangah ta saratn umpatn surga da nyansana," Diah ta Anak-Ko da Ko nyayang, ka Ini'ta Iko bakenan.
Chapter 4
1
Laka dakoh, Yesus gat'n mimpin uleh Roh ka padakng balantara yak gat'n nyoba uleh Iblis.
2
Ge', Ini' bapuasa ampat puluh ano ge' ampat puluh ngarum, ngalaka dakoh Ini' jadi saburuk.
3
Lalu, utuknglah ini', da nyoba dakoh, ge' nyansana ka Yesus, "Sa' Akup'm diu'ta Anak Jabata, marintahlah supaya batu-batu diah jadi roti."
4
Tapi, Ini' naham ge' nyansana, "Ani gat'n nulis, 'inya uleh roti saja talino idup, tapi uleh satiap firman da mungkas nabo baba Jabata.'"
5
Laka koh, Iblis nabat-A' wak kota suci ge mana-A' ka puncak Bait Jabata,
6
ge nyansana ka-A', "Jika Akump Anak Jabata, matat a' lah adup-mu' ka saroh karna ani ta tulis:
'Tentang Akump, Jabata ao' marintah a' malaikat-malaikat-A' ge ngantat Akump ka samo barekng ayo' a' supaya kaja-Mu' kati ta singkak ka batu."
7
Yesus nyansana ka ini', " Sakali agi, ani gat'n nulis, 'Imu' iya' nyoba Tuhan Jabatamu."'
8
Sakali agi, Iblis minsakng Yesus ka samo gunung da aru nyamo ge' nyua'a ka-Ini' samaan karajaan dunia nige kamegahan'a,
9
ge' nyansana ka-Ini', "Samaan'a ini' aok Ko'mangkat'n ka-Imu', sa' Akup'm tasungkap'm ge' nyambahko."
10
Laka dakoh, Yesus nyansana ka ini', "Enyahlah Iblis! Ani tatulis, 'Imu' arus nyambah Tuhan Jabatamu' ge' ka-Ini' saja imu' sambayang."'
11
Ngalaka dakoh, Iblis ngagat'n Ini', ge' milelah, malaikat-malaikat utukng yak malayani Ini'. Yesus Mule Palayanan-A wak Galilea
12
Alu, waktu Yesus dangah bahwa Yohanes laka gatn nangkap, Ni' nyingkir ka Galilea.
13
Ni' ngagatn Nazaret ge utukng gae madi ka Kapernaum, ka tabikng danau, ka perbatasan Zebulon ge Naftali,
14
Supaya gatn genapi jai da gatn ngata lewat nabi Yesaya:
15
"Tana Zebulon ge tana Naftali,
gala danau, ka pajah Yordan, Galilea, wilayah ayo' sok inya Yahudi,
16
bangsa da madi' sadatn kagalapan
mile Tarakng da
ahyo,
ge bagi ayo' a' da madi ka nagari ge sadatn bayang-bayang pangkabih a', Tarakng dakoh laka tusak.
17
Singga waktu dakoh, Yesus mule ba khotbah ge nyansana, "Ba tobatlah karna Kerajaan Surga nga jeket!" Yesus maba' Apat murid-Ni' ta da Pamule
18
Jangkah Yesus bajalatn ka tabik danau Galilea, Ni' mile dua ba baradi, kohta Simon da gatn muji Petrus, ge Andreas, age a', sadang nga jale ka danau sabab ayo' a' anilah panjale ikatn.
19
Ge, Ni' nyansana wak ayo' a', "Kaehlah nganang Iko' ge Iko ao' ngadumu' npanjale talino."
20
Ayo' a' langsung nga gatn a' ta jale-jale a' ge ngadukng Ini'.
21
Ge, waktu ngakab umpatn teetn, Ni' mile dua baradi da laitn, Yakobus anak Zebedeus ge Yohanes, age a'. Ayo' a' ani ka sadatn parahu samahu Zebedeus, sama ayo' a' sadang ngangkalamus jale-jale a'. Ge, Ni' maba' ayo' a'.
22
Ge, ayo' a' langsung nga gatn parahu ge sama' ayo' a', alu nganang Yesus. Yesus Nagajar ge ngobat karah sok.
23
Laka koh, Yesus nga liling ka samaan daerah Galilea, ngajar ka sinagoge-sinagoge ge ngobat sagale macam panyakit, ge sagale macam pangkanap ka antara karah sok.
24
Ge, agah tentang-Ni' ta ta sebar sampe Siria. Ge, ayo' a' minsakng wak-Ini' ta samaan sok anap da mandarita sagale macam panyakit ge rase anap, ge da kerasukan setan, da anap lelap, ge da lumpuh, ge Ni' mangkhawhat a' ayo' a'.
25
Kerumunan ahyo sok Galilea, Dekapolis, Yerusalem, Yudea, ge umpatn pajah Yordqan nganang Ini'.
Chapter 5
1
Jangkah mile' sok karah dakoh, Yesus makka ka tumukng talidi. Ge', ngalaka Ini' unyung, ayo murid utukng wa'-Ini'.
2
Ge', Ini' muka' baba'-A ge' ngajar ayoa', waat-Na,
3
'Gatnberkatita sok papa sadatn roh sabab ayoa' da umpu' Karajaan Surga.
4
Gatnberkatita ayoa' da badukacita sabab ayoa' ao' gatnhibur.
5
Gatnberkatita sok da ba ate lembut sabab ayoa' ao' mawarisi bumi.
6
Gatnberkatita ayoa' da saburuk ge' da aus wa' kabenaran sabab ayoa ao' gatn ngangkabasoh.
7
Gatnberkatita ayoa' da mangkatn pamase' sabab ayoa' ao' kaatn pamase'.
8
Gatnberkatita ayoa' da barasih ate sadatn a' sabab ayoa' ao' mile' Jabata.
9
Gatnberkatita ayoa' da minsakng damai sabab ayoa' ao' gatnmuji' anak-anak Jabata.
10
Gatnberkatita ayoa' da gatnnyaya demi kabenaran sabab ayoa' ao' umpu' Karajaan Surga.
11
Gatnberkatita imu' sa' sok ngarandahmu ge' nganyayamu, ge' muji' bamacam saratn da jahe' wa'imu' nige' fitnah karna Iko'.
12
Basukacita ge' bargembiramih karna ahyo upahmu ka surga karna ladakohta ayoa' nganyaya ayo nabi uru umpatn imu'."
Sia' ge' Tarakng Dunia
13
"Imu' anilah sia' dunia, tapi sa; sia' dakoh ngajadi hambar, ge' jai ini' ao' gatnngansia? Ini' ti' bagune sama sekali salaitn ya' gatnmatatn ge' gatntalino nginyak-inyak."
14
"Imu' anilah tarakng dunia. Kota da madi' ka tumukng talidi ti' aba' gatnnyukatn.
15
Ayo sok uga' ti' ngangkidup pelita ge' mana' a' ka saroh gantang, malahan wa' tumukng tiang pelita, ge' ini' ao' nugo smaan da ani ka sadatn ramin.
16
Tea'lah tarakngmu uga babalo lah dakoh uga supaya ayoa' kaatn mile' parbuatan-parbuatanmu' da bait ge' ngarania' Sama'mu da ka surga." Pangganapan Hukum ge' Taurat ge' Kitab Ayo Nabi
17
"Iya' bapikir bahwa Iko' utukng ya' ngangkilang Hukum Taurat ato kitab ayo nabi. Iko' utukng inya ya' ngangkilang a' malahan ya' malaksana a'.
18
Iko' muji' da sabatola wa'imu', sampe rangit ge' tana'paitn lanyap, ti ani nya iota ato nya coret pun da ao' hilang umpatn Hukum Taurat sampe samaan gatnmalaksana.
19
Karna dakoh, asi da ngangkhilakng salah satu umpatn perintah-perintah da paling inek diah ge' ngajar sok laitn ya' umas hal da samu dakoh, ini' ao' gatnmuji' da paling inek sadatn Karajaan Surga. Namun, asi da malaksana perintah-perintah dakoh ge' ngajara' ao' gatnmuji' ahyo sadatn Karajaan Surga.
20
Sabab, Iko' muji' wa'imu' bahwa sak kabenaranmu' ti' labih bait daripada kabenaran ayo ahli Taurat ge' ayo sok Farisi, imu' sama sekali ti' ao' maruh ka sadatn Karajaan Surga.
Manganai Sok da Baji' wa Agea'
21
Imu' ngalaka dangah da ngagatnmuji' wa nenek moyang te', 'Iya' ngamis,' ge' 'Asi da ngamis pantas gatnminsakng wa' pangadilan.'
22
Tapi, Iko' muji' wa'imu' bahwa asi pun da baji' wa' agea' pantas madi ka sadatn hukuman, ge' asi pun da muji' wa agea', 'Imu' gila,' pantas madi' ka hadapan Mahkamah Agama, ge' asi pun da nyansana, 'Imu' baga', pantas madi ka api naraka.
23
Karna dakoh. sak imu' mamparsambah parsambahanmu' ka tumukng altar, ge' ka teetn mu' sanuut bahwa agemu ani jai-jai tarhadapmu,
24
Ngagatnmih parsambahanmu dakoh ka tura altar ge' anumih ya' uru' badamai nige' agemu. ngalaka dakoh urelah agi ge' mangkatlah parsambahanmu.
25
Sacapat mungkin, badamaimih nige' sok da nuduhmu selagi imu' samahua sadatn pajalatnmu supaya iya' sampe sok da nuduhmu dakoh nyarah imu' wa' pagawaia', ge' imu' gatn nyese' wa' panjara.
26
Iko' muji' da sabanara wa' imu', imu' ti' ao' bisa mungkas umpatn teetn sampe imu' nga mayar sampe sen da pangkabas. Sok Da Babayu
27
"Imu' ngalaka dangah bahwa ngagatnmuji, 'Iya' Babayu.'
28
Tapi, Iko' muji' wa'imu' bahwa satiap sok da nyantunung nyungan mahu ge' ngattea', ini' nga babayu nige' mahu dakoh ka sadatn atea.
29
Sa' matu' sentao'mu' umasmu baduse, nyungkelta matumu' dakoh ge' matatnmih. Sabab, labih bait imu' kahilangan salah satu aggota unganmu' daripada smaan-mana unganmu gatn matatn ka sadatn neraka.
30
Ge', sa' barekngmu umasmu' baduse, nyantak ge' matatnmih barekngmu dakoh karna labih bait imu' kahilangan salah satu anggota unganmu' daripada smaan-mana unganmu gatnmatatn ka sadatn naraka. Aturan manganai Parcarean
31
Nga gatnmuji': Asi da nyarai sautna' arus mangkatn surat care wa' sautna' dakoh.
32
Tapi, Iko' muji' wa imu' bahwa asi da nyarai sautna', kacuali karna babayu, ini' umas sautna' babayu. Ge', asi da bainyha' nige' mahu da nga gatnnyare dakoh, ini' uga babayu. Manganai Sumpah
33
Nyakali agi', imu' nga dangah da gatnmuji' wa' nenek moyang ite', 'Iya' basumpah palsu, tatapi malaksanamih sumpahmu dakoh ka hadapan Tuhan.'
34
Namun, Iko' nyansana wa'imu': Iya' nyakali-kali imu' basumpah, antah demi surga karna surga anilah takhta Jabata,
35
atopun demi tana'paitn karna tana'paitn anilah tumpuan kaja'-A, atopun demi Yerusalem karna dakoh anilah kota Sang Raja Ahyo.
36
Iya' uga imu' basumpah demi abakmu' karna imu' ti' kaatn umas nyatangke abok pun, ranakng ato sungut,
37
Namun, saharusa saratmu', ae' sa' ae', kati' sa' kati', karna diluar dakoh utukng umpatn si jahat. Manganai Pambalasan
38
Imu' ngalaka dangah jai da nga gatnmuji', 'Matu' ganti matu' ge' japu' ganti japu'.
39
Namun, iko' muji' wa'imu' iya' malawan da jahe', malah asi da namparmu' wa' kuko' sentao', nyarah uga wa'ini' kuko'mu da laitn uga'.
40
Ge', sa' sook ngana' nuntutmu' ge' naap pangiakmu', mangkatn uga jubahmu' wa'ini'.
41
Ge', asi da maksemu' bajalatn 1 mil, bajalatnmih samahua 2 mil jauha'.
42
Mangkatta wa' sok da mahi wa'imu' ge' iya' nolak sok da ngatte nginyam umpatnimu'." Kasihimih Munsuhmu
43
"Imu' ngalaka dangah firman da muji', 'Kasihimih sesamamu', ge' 'Bencimih munsuhmu'.
44
Namun, Iko' muji kimu', kasihimih ayo munsuhmu ge' badoamih bagi ayo sok da nganyaya imu',
45
nige ladakoh imu' kaatn jadi anak-anak Sama'mu' da ka surga karna Ini' mangkatn matuano-A ya' sok da jahe' ge' da bait, ge' nyusor ujatn ya' da benar ge' da kati' benar.
46
Sabab, kalo imu' duhutn mangasihi ayo sok da mangasihimu', upah jai da imu' kaatn? Inyata pangumpur sewa ug umas hal da samu'?
47
Ge', sa' imu' mangkatn salam duhutn wa ayo agemu, jai rabeha parbuatanmu? Inyata ayo sok da kati' kanal wa Jabata uga' umas ulah dakoh?
48
Karna dakoh, imu' arus jadi sempurna, ulah Sama'mu' da ka surga anilah sempurna."
Chapter 6
1
"Waspada ta sadatn umas kawajiban agamamu' ka tura' talino, iya' nige' maksud ya' ayoa' mile'. Sa' ladakoh, imu' kati' ao' kaatn upah umpatn Samamu' da ka surga.
2
Karna dakoh, waktu imu' mangkatn sadakah, iya' mihu tarumpet ka tura' mu' samu ge' ayo sok munafik umas ka sinagoge-sinagoge ge' gala'-gala' supaya ayoa gatn sok laitn ngarania. Iko muji' da sabanar'a ka imu' bahwa ayoa ngalaka kaatn upah'a.
3
Tapi ao'a, waktu imu' mangkatn sadakah, iya' ta mambiar barekng sengkirimu' panane ja da barekng sentao'mu' umas.
4
supaya sadakahmu' dakoh kati' tile' ge' Samamu' da mile' da kati' tile' dakoh ao' mangkatn upah ka imu'." Ajaran manganai Badoa
5
" Ge', waktu imu' badoa, iya' samu ge ayo sok munafik karna ayo'a suka agutn ge' badoa ka sinagoge-sinagoge ge' pitok-pitok gala' supaya sok laitn mile'. Iko muji da sasungguh'a ka imu', ayo'a ngalaka narima upah'a.
6
Tapi ao'a, waktumu' badoa, maruh mih kasadatn uhakngmu' ge' ngabut mih pintu'a , ge' badoa mih ka Samamu' da ani ka tampat da kati tile',maka Samamu' da mile' da kati' tile' dakoh ao' mangkatn upah ka imu'.
7
Ge', waktumu' badoa, iya' manggune saratn-saratn da kati' ani rati'a,samu ge' da ayo sok da kati' nganal Jabata, sabab ayo'a ngira nige' karah'a saratn-saratn, ayo'a ao' gatn da dangah.
8
Karna dakoh, iya' samu' ge' ayoa karna Samamu' panane jai da imu' palalu katinga imu' mahi'a ka Ini'.
9
Badoa ta samu diah,
"Sama' kai da ka surga,
Da ngudus ta gaatn-Mu'.
10
Utukng ta Karajan-Mu',
Jadi ta kahandak-Mu' ka tana paitn samu ge' da ka surga.
11
Mangkatn ta kai, ka ano diah,
pangkuman kai da sacukup'a.
12
Ge', ngampun ta sara'-sara' kai,
samu' kai uga ngampun ayo sok da basara ka kai.
13
Ge', iya' ta minsak kai ka sadatn pancobaan,
tapi ngarapas ta kai umpatn da jahat.
Karna Akupm ta Sang Umpu' Karajaan, ge' kuasa,
ge' kamuliaan sampe salama-lama'a. Amin.
14
Karna sak imu' ngampun sara'-sara' sok laitn, Sama' surgawimu' uga ao' ngampunmu'.
15
Tapi ao'a, sak imu' kati' ngampun sara'-sara' sok laitn, Samamu' uga kati' ao' ngampun sara'-sara'mu'." Sikap waktu Bapuasa
16
"Ge', waktu imu' bapuasa, iya' sirum-sirum samu ge' sok munafik karna ayoa ngubah bahas'a supaya sok laitn mile' ni' agi bapuasa. Iko' muji' da sabanar'a ka imu' bahwa ayo'a laka kaatn upah'a.
17
Tapi ao'a, imu', sak bapuasa, gatn mangkabinyak ta abakmu' ge' me'et ta bahasmu'
18
supaya puasamu' kati' sok mile', tapi yak Samamu' da ani ka tampat da kati' tile'. Ge', Samamu' da mile' parbuatanmu' da kati tile' dakoh ao' mambalas'a ka imu'." Ngubu' ta Harta ka Surga
19
" Iya' nimbun ya' da adupmu' sadi' harta ka tana paitn, tampat bubuk ge' gagat marusak, ge' tampat parangko mambungkar sarta nangko.
20
Tapi ao'a, ngubu' ta ya' dimu' sadi' harta ka surga, tampat bubuk ge' gagat kati' marusak ge' tampat parangko kati' mambungkar sarta nangko.
21
Karna ka dume hartamu madi', ka dakoh uga atemu' madi'.
22
" Matu anita palita ungan. Jadi, sak matumu' lamus, samaan unganmu' ao' jadi tarakng.
23
Tapi ao'a, sak matumu' jahe, samaan unganmu' ao' panhu kagalapan. Jadi, sak tarakng da saharus'a ani ka imu' anita kagalapan, batapa kuat ata kagalapan dakoh."
24
" Kati' ani sok da abak malayan dua tuan karna ini' ao' rusi' ka tuan da nyungan ge' sayang ka tuan da laitn, ato ini' ao' setia ka tuan da nyungan ge' ngaremeh da laitn'a. Imu' kati bisa malayan Jabata ge' mamon. "Iya' Imu' Kuater
25
" Sabab dakoh ta Iko muji'ka imu', Iya' kuater manganai idupmu', jai da ao' imu' uman ato jai da imu' nyucur. Ladakoh uga manganai unganmu', jai da ao' imu' ngiak. Inya ta idup labih penting daripada pangkuman, ge' ungan daripada pangiak?
26
Milek mih manuk-manuk da ka rangit da kati' mura, kati' manen, ge' kati' ngubu'a ka sadatn langko, tapi Sama surgawimu' mangkatn ayoa uman. Inya ta imu' labih bararga daripada ayoa?
27
Asilah ka antara imu' da karna kuater abak nambah nyahasta ka umur'a?
28
Ge', manganai pangiak, jailah imu' kuater? mampratilah bunga bakung ka taya udu, langkina ayoa makkat, ayoa kati' bakaraje ge' uga' kati' mamintal,
29
tapi Iko muji' ka imu' bahwa Salomo sadatn samaan kamuliaan'a pun kati' bapangiak samu ge' salah satu umpatn bunga-bunga dakoh.
30
Jadi, sak udu' ka taya udu', da ano diah ani ge' jakkap gatn nyangkahatn ka sadatn tungko api, Jabata ngadandan'a ladakoh tao', inyata imu' labih agi', hei imu' da kurang iman?
31
Karna dakoh, iya' imu' kuater nige' muji', 'Jai da ao' kai uman?', ato 'Jai da ao' kai nyucur?', ato 'Jai da ao' kai ngiak?'
33
Tapi ao'a, najota uru Karajaan ge' kabanaran-A, ge' samaan dakoh ao' gatn nambah'a ka imu'.
34
Jadi, iya' kuater manganai ano da ao'a karna ano da ao'a ao' umpu kuater adup'a. Nyukup ta nyano nige' kasusahana sadi'.
Chapter 7
1
"Iya' manghakimi biar imu' kati gat'n manghakim.
2
Barang nige panghakiman da imu' gune ya' manghakimi, imu' aok gat'n manghakim, ge' nige ukuran da imu' ngukur aok gat'n ngukur ka imu'.
3
Ge', jai imu' mile uras kayu wak matu agemu', tapi kati pane balok da ani wak matumu' sandiri?
4
Ato, langkina bisa imu' muji' ka agemu', 'Kate iko' ngaluar uras kayu dakoh umpatn matumu',' tapi ile, ani balok wak matumu' sandiri?
5
Hei, sok munafik, kaluar uru balok dakoh umpat'n matumu', ge' lakadakoh imu' aok mile nige jelas ya' ngaluar uras kayu umpat'n matu agemu'.
6
Iya' mangkatn barang da kudus wa' ayo kasu', iya' uga' nyangkahatn mutiaramu' ka tura' babi supaya ayoa' kati' nginyak-nginyak dakoh nige' kaja' a' ge' malik ngarantak-rantak imu'." Mahimih, najomih, ge' ngatokmih
7
"Mahilah, ge' hal dakoh aok gat'n mangkat'n ka imu'. Najolah, ge' imu' aok kaat'n. Ngatoklah, ge' hal dakoh aok gat'n muka bagimu'.
8
Barang, satiap sok mahi, ini' narima, ge' sok da najo aok kaat'n, ge' bagi ini' da ngatok aok gat'n muka'.
9
Ato, asi umpat'n antara imu', da ani anak'a mahi roti aok mangkat'n batu ka anak'a dakoh?
10
Ato, sa' anak'a mahi ikat'n, ini' kati aok mangkat'n nipa ka anak'a dakoh, inya?
11
Jadi, sa' imu' da jahe pane langkina mangkat'n anak-anakmu pamberian-pamberian da bait, talabih agi Samamu' da wak saruga, Ini' aok mangkat'n da bait ka ayo'a da mahi ka-Ini." Hukum da Tarutama
12
"Barang dakoh, sagala tarut'n imu' ngate sok bulah ka imu', lakoh uga imu' bulah ka ayo'a barang diahlah isi Hukum Taurat ge' kitab ayo nabi." Jalat'n Nuju Kahidupan
13
"Maruhlah nabo garbang da sampit barang lebarlah garbang ge' luaslah pagala da nuju ka kabinasaan, ge' ani karah da maruh nabo'a.
14
Sa', sampitlah gerbang ge' sesaklah pagala da nuju ka kahidupan, ge' iget da amput'a." Paringatan tentang Nabi-Nabi Palsu
15
"arus, waspadalah tradap nabi-nabi palsu da utukng ka imu' tapangiak domba, tapi sabanar'a ayo'a ani ta serigala da garang.
16
Umpat'n buah'a imu' aok nganal ayo'a kaat'n sok ngubu buah-buah anggur umpat'n rumpo unak ge' buah-buah ara umpat'n puut'n da ba unak?
17
Lakoh uga, satiap puut'n da bait ngasil buah da bait, tapi puut'n da kati bait ngasil buah da kati bait.
18
Puut'n da bait kati mungkin ngasil buah da kati bait, ge' puut'n da kati bait kati mungkin ngasil buah da bait.
19
Satiap puut'n da kati ngasil buah da bait aok gat'n nabakng ge' gat'n matat'n ka sadat'n api.
20
Jadi, umpat'n buah-buah'a imu' aok nganal ayo'a.
21
Kati samaan sok da nyansana ka-Ko', 'Tuhan, Tuhan,' aok maruh ka sadat'n krajaan saruga, malait'nkan ini' da bulah kahendak Sama'ko' da wak saruga.
22
Pas ano dakoh, karah sok aok nyansana ka-Iko', 'Tuhan, Tuhan, inya ta kai' banubuat ka sadat'n gaat'n-Mu', da nguser Roh-Roh jah ka sadat'n gaat'n-Mu'?
23
Lalu, iko' aok muji'a ka ayo'a iko' parnah nganal mu'! lalu umpat'n ko', imu' da ngaraje da sara'!'" Dangah nige da Bulah
24
"Sa', lakoh, samaan sok da dangah sarat'n-Ko' diah ge' bulah'a aok jadi ulah sok bijaksana da mambangun ramin'a wak samo batu.
25
Lalu, disahlah ujat'n ge' utuknglah banjir, ge' nyaru batiup narajakng ramin dakoh kati ruboh barang gat'n mantagut'n wak samo batu.
26
Ge', satiap sok da dangah sarat'n-Ko' diah ge' kati bulah'a aok jadi ulah sok baga da mantagut'n ramin'a wak samo pasir.
27
Lalu, disahlah ujat'n ge' utuknglah banjir, ge' nyaru batiup narajakng ramin dakoh, ge' ramin dakoh ruboh, ge' aru aihyo rusak'a."
28
Jangkah Yesus salesai muji' hal-hal diah, sok karah taheran-heran ka pangajaran-A,
29
Barang Ini' ngajar ayo'a sabage sok da bakuasa, ge' kati ulah ahli-ahli Taurat ayo'a.
Chapter 8
1
Jangkah Yesus disah umpat'n mungu dakoh, kumpur sok karah nganang-A.
2
Ge', mile, sook da anap'm kusta utukng ka-Ini' ge' sujud wak tura-A, ge' nyansana, "Tuan, kalo Akup'm ituh, Akup'm kaat'n baranakko'."
3
Ge', Yesus nyulo barekng-A gae nyangkam'a, wat'n-A, "Iko' ituh, awhat'nlah." angkah dakoh uga, gat'n ngangkawhant'nlah kusta sok dakoh.
4
Ge', Yesus nyansana ka ini, "mampratilah, iyak imu' nyarita jai-jai ka sook, tapi anulah, pratikanlah adupmu' ka imam, ge' parsambahkanlah parsembahan da gat'n marintah Musa sabage kasaksian yak ayo'a. "Sook Palayan Parwira Romawi Gat'n nyambuh
5
Jangkah Yesus maruh ka Kapernaum, sook parwira utukng ka-Ini', mahi ka-Ini',
6
ge' nyansana, "Tuan, hambako' sadakng gurikng lumpuh wak ramin, aru manderita."
7
Ge', Yesus nyansana ka ini', "Iko' aok utukng ge' nyambuh ini'."
8
Tapi aok'a, parwira dakoh naham ge' nyansana, "Tuan, iko' kati layak yak Akup'm maruh ka saroh aro ko', tapi muji'lah nyapatah sarat'n sadi ge' hambako' aok gat'n ngangkawhat'n.
9
Barang, iko' uga diu'ta sok da ani ka saroh kakuasaan, nige tantara-tantara wak sarohko'. Ge', iko' nyansana ka da nyungan, 'Anulah,' ini' pun anu, ge' ka da lait'n, 'Utukngnih,' ge' ini' pun utukng, ge' ka hambako', 'Umas diah,' ge' ini' pun umas'a."
10
Jangkah Yesus dangah hal diah, Ini' kagum ge' nyansana ka ayo-sok da nganang-A, "Iko' nyansana da sbanar'a ka imu', Iko' ti'nga amput imam da aihyo diah wak antara sok Israel.
11
Iko' nyansana ka imu' saroh karah da aok utukng umpat'n timur ge' barat, ge' unyung uman nige Abraham, Ishak, ge' Yakub ka sadat'n Krajaan Surga,
12
tapi anak-anak krajaan dakoh aok gat'n matat'n ka sadat'n patakng da paling patakng. Wak teet'n aok ani rahu-rahu ge' bagaret japu."
13
Ge', Yesus nyansana ka parwira dakoh, "Anulah, kate'alah tarjadi ka imu' ulah da imu' macaya." Ge', pas angkah dakoh uga, hamba'a gat'n ngangkawhat'n. Sino Martua Petrus ge' Sok Karah Gat'n ngangkawhat'n
14
Jangkah Yesus utukng ka ramin Petrus, Ini' mile sino martua Petrus sadakng gurikng ge' sanguh.
15
Lalu, Yeus nyangkam barekng sino dakoh ge' sanguh'a ilang. Laka dakoh, ini' umpat ge' malayani Yesus.
16
Jangkah ngarami ano, ayo'a minsakng ka-Ini' karah sok da karasukan roh jahe, ge' Ini' nguser roh-roh dakoh nige nyiteng sarat'n, ge' ngangkawhat'n samaan sok da anap'm,
17
supaya gat'n nganganap jai da gat'n nyansana uleh Nabi Yesaya: "Ini'lah da naap kalamahan-kalamahan ite ge' nanggong panyakit-panyakit ite." Manjadi Pangikut Yesus
18
Mati', jangkah Yesus mile sok karah ngangkalilikng-A, Ini' mangkat'n parintah yak batolak ka pajah.
19
Laka dakoh, sook ahli Taurat utukng ge' nyansana ka-Ini', "Guru, iko' aok nganang-Mu' ka ume pun Akup'm anu."
20
Ge', Yesus nyansana ka ini', "Ayo rubah umpu liang ge' manuk-manuk wak rangit umpu sare-sare. Tapi aok'a, Anak Talino kati umpu tampat yak mana' abak-A."
21
Nyungan umpat'n ayo murid nyansana ka-Ini', "Tuhan, izinkanlah iko' yak talabih uru anu ge' ngubur sama'ko'."
22
Tapi aok'a, Yesus nyansana ka ini', "Ngananglah Iko', ge' kate'alah sok kabis ngubur sok kabis ayo'a sadi." Yesus Maredakan Badei
25
23
Ge', jangkah Yesus maka' ka parahu, murid-murid-A nganang Ini'.
24
Ge', ilelah, tarjadi badei aihyo wak timu' sahingga parahu dakoh tatutup ombak. Tapi aok'a, Yesus ge' ngias-A, wat'n'a, "Tuhan, salamatkan kai'! Ite sadakng binasa!"
26
Ge', Ini' nyansana ka ayo'a, "Nyai imu' buut, hei imu' da kurang baiman?" Lalu, Ini' agut'n ge' nguser nyaru gae timu' dakoh, ge' manjadi tanang sakali.
27
Maka, ayo-sok dakoh taheran-heran ge' nyansana, "Sok samu jailah Ini' diah, bahkan nyaru ge' timu' pun nurut-A?" Dua Ungan Gadara Karasukan Roh Jahe
28
Jangkah Yesus utukng wak pajah timu', wak daerah sok Gadara, dua ungan da karasukan roh jahe amput-A. Ayo'a mungkas umpat'n kuburan nige aru garang sahingga kati ani sok da kaat'n nabo pagala dakoh.
29
Ge', ilehlah, ayo'a ngampak, wat'n'a, "Jai urusan antara Akup'm nige kai', hei Anak Jabata? Jai Akup'm utukng yak nyiksa kai' kati'nga waktu'a?"
30
Ge', agak jauh umpat'n ayo'a ani sakawanan aihyo uwe da sadakng najo pangkuman.
31
Sitan-sitan dakoh mahi ka-Ini' ge' nyansana, "Sa' Akup'm ngate nguser kai' pindah ka sadat'n kawanan uwe dakoh."
32
Ge', Yesus nyansana ka ayo'a, "Anulah!" Lalu, ayo'a mungkas ge' maruh ka sadat'n uwe-uwe dakoh. Laka dakoh, samaan kawanan uwe dakoh pun nyangukng umpat'n tabikng timu' ge' kabis wak sadat'n pait'n.
33
Ayo-sok da mangambala kawanan uwe dakoh boho adup'a, ge' maruh ka sadat'n kota, ge' nyarita samaan'a, tarmasuk jai da tarjadi nige ayo-sok da gat'n ngarasuk sitan dakoh.
34
Ge', ilelah, samaan kota mungkas yak badaput nige Yesus. Jangkah mile Yesus, ayo'a mahi-A yak ngagat'n wilayah ayo'a.
Chapter 9
1
Ngalaka maruh ka parahu, Yesus ngalangkah tahuu' ge' tiba wak kota-A sadi
2
ge' mile, ayo'a minsakng ka ini' sok lumpuh da gurikng ka tampat pabuus waktu mile iman ayo'a. Yesus nyansana ka sok lumpuh dakoh "teguhkanlah ate mu' anak-Ko', duse mu' gat'n ngampun."
3
Laka dakoh, mani ungan ahli Taurat nyansana ka sadat'n ate'a, "Sok diah manhujat!"
4
Tapi, Yesus pane pikiran ayo'a, wat'n-A, "Nyai ayo kup'm mikir da jahe ka sadat'n atemu'?
5
Dumelah da labih mudah, nyansana 'Duse-dusemu' gat'n ngampun,' ato nyansana, 'Umpatlah ge' bajalat'nlah'?
6
Tapi aok'a, supaya imu' kaat'n pane kalo wak bumi Anak Talino bakuasa ya' mangampuni duse. "Laka dakoh, Yesus nyansana ka sok lumpuh dakoh, "Umpatlah, ngantat'nlah tampat pabuusmu', ge' urelah!"
7
Maka, ini' umpat ge' ure.
8
Barang, pas sok karah mile hal diah, ayo'a jadi takjub ge' mamuliakan Jabata da mangkat'n kuasa ulah dakoh ka talino. Matius Pangumpul Pajak Nganang Yesus
9
Pas Yesus anu umpat'n situ, Ini' mile sok da gat'n maba Matius sadakng unyung wak tampat pangumpulan pajak. Lalu, Yesus nyansana ka ini', "Ngananglah Iko'." Ge', Matius agut'n ge' nganang Yesus.
10
Pas waktu Yesus unyung uman wak sadat'n ramin dakoh, mile, karah pangumpul pajak ge' ayo-sok baduse utukng, lalu unyung uman samahu Yesus ge' murid-murid-A.
11
Ge', pas ayo-sok Farisi mile hal diah, ayo'a nyansana ka murid-murid-A, "Nyai Gurumu' uman samahu para pangumpul pajak ge' ayo-sok baduse?"
12
Tapi aok'a pas Yesus dangah hal dakoh, Ini' nyansana, "Ayo'a da sehat kati mambutuhkan tabib, malait'nkan ayo'a da anap'm.
13
Tapi, anulah ge' palajari jai arti'a diah, 'Iko' manghendaki pamase'a,' inya parsembahan,' sa' Iko' utukng inya ya' maba da taman, malait'nkan ayo-sok baduse." Partanyaan tentang Bapuasa
14
Laka dakoh, murid-murid Yohanes utukng ka Yesus ge' mansikat'n, "Nyai kai' ge' ayo-sok Farisi bulah puasa, tapi murid-murid-Mu kati bapuasa?"
15
Ge', Yesus nyansana ka ayo'a, "Kaat'nkah para pangrikng pangantin badukacita salama pangantin are-are masih samahu-mahu nige ayo'a? Tapi aok'a, aok tiba waktu'a pas pangantin are-are dakoh gat'n naap umpat'n ayo'a, ge' laka dakoh ayo'a aok bapuasa."
16
Kati ani sook pun da namal saput da bahu ka pangiak da tuhi, barang namal dakoh rubek pangiak da tuhi ge' makin aihyolah rubek'a.
17
Uga, kati ani sok da nuntokng anggur bahu ka sadat'n kantong kurit da tuhi. Sa ladakoh, kantong kurit dakoh aok rubek, ge' anggur'a aok tuntokng, ge' kurit'a ancur. Tapi aok'a, ayo'a mana' anggur da bahu ka kantong kurit da bahu pula sahingga kadua'a tarpelihara." Yesus ngabangkit ge' ngangkawhat'n'a
18
Samantara Yesus muji' hal-hal diah ka ayo'a, mile, sook pamimpin ramin sambahyang utukng ge' manyembah-A, ge' nyansana, "Anak mahuko' baru ta kabis. Tapi aok'a, utukng ge' mana'lah barekng-Mu' ka samo'a, maka ini' aok idup."
19
Lalu, Yesus umpat ge' nganang sok dakoh, lakoh uga nige murid-murid-A.
20
Ge', milelah, sook mahu da laka manderita pandarahan salama dua balas taun ngariket Yesus umpat'n balakang ge' manjamah ujukng jubah-A,
21
sa' mahu dakoh nyansana ka adup'a sadi, "Sa' iko' marap jubah-A saja, iko' aok awhat'n
22
Tapi aok'a, Yesus malik ge' mamandang mahu dakoh, lalu nyansana, "Teguhkanlah atemu', hei anak-Ko', imanmu' laka ngangkawhat'nmu'. "Pas no' dakoh uga, awhat'n'ta mahu dakoh.
23
Pas Yesus tiba wak ramin kapala ramin sambayang dakoh ge' mile para paniup suling ge' karumunan sok da manyababkan kabisingan,
24
Ini' nyansana ka ayo-sok dakoh, "Anulah, barang anak mahu dakoh kati kabis, malait'nkan sadakng buus." Ge', ayo'a ngalukat'n Yesus.
25
Barang, pas sok karah dakoh laka gat'n ngusir mungkas, Yesus maruh lalu nyinte barekng kangot dakoh, ge kangot mahu dakoh pun umpat.
26
Barita diah tarsabar ka saluruh daerah dakoh. Yesus ngangkawhat'n dua ungan sok Buta
27
Pas Yesus anu umpat'n dakoh, dua ungan buta nganang Ini' sambil kaekng-kaekng, "Maselah ka kai', Anak Daud."
28
Ngalaka Ini' maruh ramin dakoh, kadua ungan buta dakoh ngariket'-A ge' mansikat'n ka ayo'a, "Diu'ta imu' pacaya kalo Iko' kaat'n bulah hal diah?" Ayo'a nyansana ka-Ini', "Ai, Tuhan!"
29
Laka dakoh, Yesus manjamah matu ayo'a, wat'n-A, "Jadilah ka imu' manurut imanmu'."
30
Ge', tabukalah matu ayo'a. Yesus nige tegas mamparingatkan ayo'a, "Pratikanlah, iya' ani sook pun pane hal diah."
31
Tapi aok'a, ayo'a mungkas ge' manyabarkan barita tentang Yesus ka saluruh daerah dakoh. Yesus Manyembuhkan Sok Bisu
32
Ngalaka kadua sok dakoh mungkas, ilelah, ayo-sok minsakng sook awa' dakoh gat'n ngarasuk roh da jahe ka Yesus.
33
Ngalaka roh da jahe dakoh gat'n nguser, sok awa' dakoh pun nyansana. Sok karah dakoh jadi heran ge' muji', "Hal ulah diah ti'nga parnah gat'n mile wak Israel."
34
Tapi aok'a, ayo-sok Farisi muji', "Ini' nguser roh-roh da jahe nige panguasa roh-roh da jahe." Karah Panenan Iget Pangaraje
35
Ge', Yesus anu kalilikng samaan kota ge' desa sambil ngajar wak sinagoge-sinagoge ayo'a, ge' nyarita Injil krajaan, gae ngangkawhat'n sagala panyakit ge' anap'm.
36
Pas Yesus mile sok karah dakoh, Ini' marasa mase ka ayo'a barang ayo'a lalah ge' talantar ulah domba-domba tanpa gambala.
37
Laka dakoh, Ini' nyansana ka murid-murid-A, "Sasungguh'a, panenan karah, tapi pangaraje-pangaraje'a iget."
38
Barang dakoh, mahilah ka Tuhan da umpu panenan, ya' ngirim pangaraje-pangaraje ka sadat'n panenan-A."
Chapter 10
1
Ge', Yesus maba kadua balas murid-A ge' mangkat'n ayo'a kuasa ka samo roh-roh najis ya' nguser roh-roh dakoh ge' ya' ngangkawhat'n sagala macam panyakit maupun sagala macam pangkanap.
2
Diahlah gaat'n-gaat'n kadua balas rasul dakoh: da partama, Simon da gat'n nyebut Petrus, ge' Andreas age'a, ge' Yakobus anak Zebedius, ge' Yohanes age'a,
3
Filipus, ge' Bartolomeus, Tomas, ge' Matius si pamungut pajak, ge' Yakobus anak Alfeus, ge' Tadeus,
4
Simon sok Zelot, ge' Yudas Iskariot da mangkhianati Yesus.
5
Yesus mangutus kadua balas rasul dakoh ge' marintah ayo'a, "Iya' anu ka pagala bangsa-bangsa lait'n ato maruh ka sadat'n kota sok Samaria,
6
malait'nkan anulah ka domba-domba da sasat umpat'n antara umat Israel.
7
ge', salama imu' anu, nyaritalah nige nyansana, 'karajaan Saruga agi riket.'
8
nyembuhkanlah da anap, ngiduplah da kabis, tahirkanlah da kusta, ge' nguserlah roh-roh da jahe. Imu' narima nige cuma-cuma, mangkat'nlah nige cuma-cuma.
9
Iya' imu' minsakng barawat'n, ato parak, ato tambaga ka sadat'n ikat pinggangmu',
10
ato tas ya' pajalat'n, ato dua halai baju, ato sandal, ato tongkat barang sok pangaraje pantas ya' pangkuman'a.
11
Ge', wak kota ato desa dume pun da imu maruh, da nyalidik asi da layak wak sadat'n'a ge' madilah wak teet'n sampe imu' barangkat.
12
Pas imu' maruh ramin dakoh, mangkat'nlah salam.
13
Ge', sa' ramin dakoh layak, kate'a dame sejahteramu' disah ka samo'a, tapi sa' kati, kate'alah dame sejahteramu' malik ka imu'.
14
Ge', asi saja da kati narima imu' ato kati ituh dangah parkataanmu', pas imu' mungkas umpat'n ramin ato kota dakoh, ngibaslah dabu kajamu'.
15
Iko' muji' da sabanar'a ka imu' kalo pas ano panghakiman, tana Sodom ge' Gomora aok labih bisa mananggong'a dari pada kota diah." Kasulitan-kasulitan da aok gat'n manghadap para Murid
16
"Ile, Iko' mangutus imu' ulah domba ka tuda-uda sarigala. Barang dakoh, jadilah cerdik ulah nipa ge' tulus ulah manuk marpati.
17
Tapi aok'a ati-atilah tradap ayo-sok barang ayo'a aok nyarahmu' ka Sanhedrin ge' aok nyambukmu' wak sinagoge-sinagoge ayo'a.
18
Ge', imu' aok minsakng ka tura para panguasa ge' para raja demi Iko', sabage kasaksian ya' ayo'a ge' ya' bangsa-bangsa lait'n.
19
Tapi, pas ayo'a nyarah imu', ikya' khawatir tentang langkina ato jai da imu' muji' barang saat dakoh uga aok mangkat'n ka imu' jai da harus imu' muji'.
20
Sa', inya imu' da nyansana, tapi dakoh diu'ta Roh Bapamu' da nyansana wak sadat'n imu'.
21
Ayo age aok nyarah age'a ka sok da kabis, ge' sama' tradap anak'a. Ge', anak-anak aok malawan ayo sok dama ge' ngamis ayo'a
22
Imu' aok gat'n ngajahe uleh samaan'a barang gaat'n-Ko, tapi sok da batahan sampe akhir aok gat'n nyalamat. v 23 Pas ayo'a nganiaya imu' ka sadat'n sok kota, talamalah ka kota da lait'n. Iko' muji' da sabanar'a ka imu' kalo imu' kati aok salesai melewati kota Israel sampe Anak talino utukng.
24
Murid kati malabihi guru'a, ladakoh uga hamba kati malabihi tuan'a.
25
Cukuplah sa' murid jadi ulah guru'a, ge' hamba jadi ulah tuan'a. Sa' ayo'a nyebut tuan'a ramin dakoh Beelzebul, labih buruk agi ka angota kaluarga'a." Buutlah ka Jabata Inya ka Talino
26
"Barang dakoh, iya' imu' buut tradap ayo'a sa' kati ani jai pun da tartutup da kati aok gat'n ngungkap, ato da basukat'n da kati aok gat'n pane.
27
Jai da Iko' muji' ka imu' ka sadat'n patakng, muji'lah dakoh ka sadat'n tarakng. Ge', jai da imu' dangah barukup'm wak rajakmu', nyarita ta lah wak samo aro ramin.
28
Iya' buut ka ayo'a da ngamis ungan, tapi kati kaat'n ngamis jiwa, malait'nkan tarlabih buutlah ka Ini' da kaat'n memusnahkan jiwa maupun ungan wak naraka.
29
Inya'ta dua ungan manuk pipit gat'n nyual ya' nyiteng uang ? Ge', kati ani nyungan pun umpat'n ayo'a aok jantu ka tana wak sato kahendak Bapamu.
30
Bahkan, abok ka abakmu' samaan'a taritong.
31
Barang dakoh, iya' buut, imu' labih banilai daripada karah manuk pipit." Ngako Yesus wak tura Sok Lait'n
32
"Jadi, satiap sok da ngako Iko' wak tura talino, Iko' uga aok ngako'a wak tura Bapa-Ko' da ani wak saruga.
33
Tapi aok'a, asi da nyangkal Iko' wak tura talino, Iko' uga aok manyangkal'a wak tura Bapa-Ko' da ani wak saruga." Tujuan Pajutukng Yesus
34
"Iya' bapikir kalo Iko' utukng ya' minsakng pardamean wak bumi. Iko' utukng inya ya' minsakng pardamean, malait'nkan padang.
35
Sa', Iko' utukng ya' misah are-are umpat'n sama'a, kangot mahu umpat'n sino'a, ibat'n mahu umpat'n sino datu'a,
36
ge' musuh sook diu'ta umpat'n angota kaluarga'a.
37
Asi da labih nganyayang sama' ato sino'a daripada Iko'. kati layak bagi-Ko'. Ge', asi da labih nganyayang kangot are-are ato anak'a da mahu daripada Iko', kati layak bagi-Ko'.
38
Ge', asi da kati maha salib'a ge' nganang Iko', kati layak bagi-Ko.
39
Asi da mampartahankan nyawa'a aok kahilangan nyawa'a, demi Iko' aok kaat'a." Upah umpat'n Jabata
40
"Asi da narima imu', narima Iko'. Ge', asi da narima Iko', narima Ini' da ngutus Iko'.
41
Asi da narima nabi ka sadat'n gaat'n nabi aok narima upah nabi. Ge', asi da narima sok taman ka sadat'n gaat'n sok taman aok narima upah sok taman.
42
Ge', asi da mangkat'n nyucur ka sara' nyungan umpat'n ayo-sok da inek diah maskipun hanya sacangkir pait'n panut ka sadat'n gaat'n sook murid, Iko' muji' da sabanar'a ka imu', ini' kati aok kahilangan upah'a."
Chapter 11
1
Pas Yesus ngalaka mangkatn parintah ka dua belas murid-A', Ni' ano umpatn teetn yak ngajar ge berkhotbah ka kota-kota ayo' a'.
Yesus Ge Yohanes Pembaptis
2
Mati', pas Yohanes, da ani ka panjara, dangah pangaraje-pangaraje Kristus, ni' ngirim pasan lewat murid-murid a'.
3
ge mansikatn ka-Ini', "Diuta imu' da ao' utukng dakoh, ato arusbak kai nunggu da lait a'?"
4
Yesus naham ge nyansana ka ayo', "Anolah ge muji a' ka Yohanes jai da imu' dangah ge da ni mile,
5
da buta mile, da lumpuh bajalant, da kusta gatn nahir a', da banggal danggah, da kabis gatn mangkidup, ge ka da papa' gatn ngabar Injil.
6
Ge, gatn berkatilah sok da kati tasingkak kat-Ko'."
7
Ge, ngalaka ayo ano, Yesus mule nyansana ka sok karah tentang Yohanes, "Jai da nagte imu' mile ka tarut tuat? nyabatakng buro' da gatn ngule nyaru?
8
Imu' ano yak mile jai? sook da bapangiak halus? Ayo' a' da ba pangiak halus dakoh ani ka istana-istana raja.
9
Yak mile ano bak imu'? nyungan nabi? Ae', Iko' muji ka imu, ni' bahkan lebih ahyo daripada nyungan nabi.
10
Sabab, ini'lah sok da tentang a' laka gatn nulis:'ile! Iko' ngirim utusan-Ko' ngalewat a' -Mu'."
11
Iko' muji a' da sebenar a' ka imu', ka antara ayo' a' da gatn nusak a' kat mahung, kati suah tampalak sok da labih ahyo daripada Yohanes Pembaptis. Ao' tapi, da paling inek sadatn kerajaan surga, labih ahyo daripada ini'.
12
Sejak zaman Yohanes Pembaptis sampe mati', Kerajaan Surga mandarita kakakarasan, ge ayo' sok da kejam dakoh umas a' nige' paksa.
13
Sabab, samaan nabi ge Hukum Taurat bernubuat sampe zaman Yohanes.
14
Ge, Jika imu' ituh narima a', ini'lah Elia da ao' utukng dakoh.
15
Asi da ani rajak yak dangah, haruslah ni' dangah a'!
16
Namun, nige' jai bah ao' ko' banding a' generasi diah? ayo' a' dakoh samu kangod-kangod inek da unyung ka tampat-tampat sok karah, da maba kawan-kawan a'.
17
ge nyansana, 'kai mihu suling yak mu, tapi kati joget, kai ngado lagu dukacita, tapi imu' kati berduka.
18
Karna Yohanes utukng tanpa uman, uga kati nyucur, ge ayo' a' nyansana, 'Ni' kerasukan roh jahe'.'
19
Ao' tapi, pas anak Talino utukng lalu uman ge nyucur, ge ayo' a' nyansana, 'mile, sook da rangka ge pemabuk, kawan ayo pangumpul pajak ge ayo' sok baduse.' Ao' tapi, hikmat gatn benar a' kat perbuatan a." peringatan yak sok da kati tuh Pacaya
20
Lakadakoh Yesus mule manyangun kota-kota tampat Ni' umas a' paling karah mukjizat karna ayo' a' kati batobat.
21
"Celakalah imu, Khorazim! celakalah imu, Brtsaida! Sabab, jika mukjizat-mukjizat da laka tajadi ka antara imu' uga tajadi ka Tirus ge Sidon, ayo' a' nga tuhi ba toobat nige ba pangiak kabung ge abu.
22
Ao tapi, Iko' muji a' ka imu' bahwa ka ano penghakiman a' daripada imu'.
23
Ge, imu, Kaparnaum, ao' kah imu' gatn ngagat a' sampe ka rangit? kati, imu ao' gatn nyosor a' ka dunia sok kabis, sabab jika mukjizat-mukjizat da laka tajadi ka antara imu' dakoh ta jadi ka Sodom, kota dakoh ao' tatap ani sampe ano diah.
24
Ao' tapi, Ako' muji a' ka imu' bahwa ka ano penghakiman, tana Sodom ao' labih bisa nanggung a' daripada imu'." kelegaan ka sok da Utukng ka Yesus
25
Pas waktu dakoh Yesus nyansana, "Iko memuliakan Akupm, Bapa, Tuhan samo' rangit ge tana paitn, bahwa Akupm nyukatn samaan diah umpatn ayo' sok dabijaksana ge pande, ge mengungkap a' ka kangod-kangod inek.
26
Ae, Bapa, karna samu' dakohlah da berkenan ka hadapan-Mu.
27
Segale hal laka gatn nyerah a' ka-ko' kat Bapa-Ko'. Ge, kati nyungan pun da ngenal Anak, selain Bapa; kati nyungan pun ngenal Bapa selain Anak ge setiap sok da gatn kehendaki Sang Anak yak mengungkap a'.
28
Utuknglah ka-Ko', samaan da latih lesu ge berbeban bahat, ge Iko' ao' mangkatnmu' kelegaan.
29
Umit ta kuk da ko masang, ge belajarta umpatn-Ko' karna Iko' lemah lembut ge rendah ate, ge imu' ao' kaatn ketenangan sadatn jiwamu'.
30
Sabab, kuk da Ko'masang dakoh mudah ge beban-Ko' nyahan.
Chapter 12
1
Jangkah dakoh, Yesus bajalatn nabo' uma' gandum wa' ano Sabat, ge' ayo murid-A saburuk, ge' ayoa' mulei ngutupm iteng-iteng gandum, umana.
2
Tapi, jangkah ayo sok Farisi mile' a', ayoa' muji' wa'-Ini', "Ile', ayo murid-Mu umas jai da ti boleh gatnumas wa' ano Sabat."
3
Namun, Yesus muji' wa' ayoa', "Tinga suaha' imu' maca jai da Daud umas jangkah ini' ge' ayo pangananga saburuk,
4
langkina ini' maruh ka sadatn ramin Jabata ge' uman roti parsambahan da ti' boleh bagi ini' umana', ladakoh uga' ge' ayo sok da samahua', kacuali duhutn ayo imam?
5
Ato, tinga suaha' imu' maca sadatn Hukum Taurat, bahwa wa' ano Sabat, ayo imam ka Bait Jabata malanggar Sabat ge' ayoa' kati' basara'?
6
Tapi, Iko' muji' kimu' bahwa da labih ahyo daripada Bait Jabata ani ka diah.
7
Namun, sa' imu' nga pane rati diah: 'Iko' ngatte pamase' ge' inya paarsambahan.' imu' ti' ao' suah ngukum da ti' basara.
8
Sabab, Anak Talino anilah Tuhan wa' ano Sabat." Yesus Ngangkauhatn wa' Ano Sabat
9
Ngalaka barangkat umpatn teetn, Yesus utukng ka sinagoge ayoa'.
10
Ile', ani nyungan are da lumpuh ka nyararap barekng a'. Ge', ayoa' mansikatn wa' Yesus, waatn ayoa', "Anita gatnngijin ngangkauhatn wa' ano Sabat?" supaya ayoa' kaatn mansara' Yesus.
11
Ge', Ini' nyansana wa' ayoa', "Asi oranga ka antara kupm da umpu' nyungan domba, ge' sa' domba dakoh jantu ka sadatn rubakng wa ano Sabat, kati' ah ini' ao' narik a' ge' ngarapasa'?
12
Betapa jauh labih bararga ta talino daripada domba! Karna dakoh, gatnijin umas da bait wa' ano Sabat."
13
Lakadakoh, Yesus nyansana wa' sok dakoh, "Nyulo' barekngmu'." Sok dakoh nyulo' barekng a' ge' gatnngangkauhatn sempurna ulah barekng a' da laitn.
14
Tapi, ayo sok Farisi boho umpatn dakoh ge' bapakat malawan Ini', langkina ayoa' kaatn ngamis-A. Yesus, Hamba Pilihan Jabata
15
Namun, Yesus, jangkah panane hal dakoh, boho umpatn dakoh. Karah da nganang-A ge' Ini' ngangkauhatn ayoa' smaan,
16
ge' mamparingatkan ayoa' supaya ayoa ti' muji' ka sok laitn asi Ini'.
17
Hal diah tarjadi ya' manggenapi jai da gatnnyampe nabo' Nabi Yesaya:
18
"Ile'mih, hamba-Ko' da nga Ko'milih, da Ko'ngasihi, da wa'-Ini' jiwa-Ko' berkenan.
Iko' ao' mana'roh-Ko' ka tumukng-A, ge' Ini' ao' manyatakan kaadilan wa' bangsa-bangsa laitn.
19
Ini' kati' ao' malawan, ato ngampak, ge' kati' ao' ani nyungan pun da dangah saratn-Na ka gala'-gala'.
20
Buro' da pata' ti ao' gatn-Na mutus, ge' sumbu da ngana' kabis ti ao' gatn-Na ngamis, sampe Ini' umas kaadilan manang,
21
ge' sadatn gaatn-Na, bangsa-bangsa laitn ao' barharap."
Kuasa Yesus Utukng Umpatn Roh Jabata
22
Lakadakoh nyungan da karasukan roh jahat, da buta, ge' awa', gatnminsakng wa' Yesus. Ge', Yesus ngangkauhatna singge sok da buta ge' da awa' dakoh nyansana ge' mile'.
23
Smaan sok jadi terheran-heran ge' mansikatn, "Mungkintalah Ini' diah Anak Daud?"
24
Tapi, jangkah ayo sok Farisi dangaha' ayoa' nyansana, "Sok diah ti' mungkin nguser roh-roh jahat sa' ti' nige' Beelzebul, pamimpin roh-roh jahat."
25
Yesus panane pikiran ayoa' ge' nyansana wa' ayoa', "Satiap karajaan da tarbagi-bagi malawan adup a', gatnngagatn. Ge', satiap kota ato ramin da tarbagi-bagi malawan adup a', ti' ao' bartahan.
26
Ge', kalo Balis nguser Balis, ini' tarbagi-bagi malawan adupa'. Sa' ladakoh, langkina karajaana' ao' bartahan?
27
Ge', sa' Iko, nguser roh-roh jahat nige' Beelzebul, nige' asilah anak-anakmu nguser ayoa? Karna dakoh ayoa' ao' jadi hakimmu'.
28
Tapi, sa' nige' Roh Jabata, Iko' nguser roh-roh jahat, Karajaan Jabata nga utukng ka imu'.
29
Ato, langkina sook kaatn maruh ka ramin sok da kuat ge' ngarampas barang-barang a' sa' ini' ti' uru' ningo' sok kuat dakoh? Lakadakoh, ini' baru kaatn marampok ramin dakoh.
30
Asi saja da kati' samahu Iko', malawan Iko'. Ge', asi saja da kati ngubu' samaahu Iko', mencerai-beraikan.
31
Karna dakoh, Iko' muji' kimu' bahwa tiap duse ge' hujatan talino ao' gatnngampun, tapi hujatan tarhadap Roh ti' ao gatnngampun.
32
Ge', asi saja da muji' tarutn da malawan Anak Talino ao' gatnngampun, tapi asi saja da nyansana malawan Roh Kudus kati' ao' gatnngampun, bait wa masa diah atopun wa' masa da ao' utukng." Puutn Gatnkanal umpatn Buaha'
33
"Sa' puutn dakoh lamus, buaha' uga' ao' lamus. Ato, sa' puutn dakoh kati' lamus, buaha' uga' kati' ao' lamus. Sabab, puutn gatnkanal umpatn buaha'.
34
He, katurunan nipa' bisa, langkina mungkin imu' da jahat muji' hal-hal da bait? Karna umpatn sadatn ate, baba nyansana,
35
Sok bait ngaruah hal-hal da bait, ge' sok da jahat ngaruah hal-hal da jahat umpatn kakayaana' da jahat.
36
Namun, Iko' muji' wa'imu' bahwa satiap saratn sia-sia, da gatn sok muji', ayoa' ao' mampartanggung-jawab a' wa' ano panghakiman.
37
Karna oleh saratnmu, imu' ao' gatnbenarkan, ge' oleh saratnmu', imu' ao' gatnngukum. Sok Farisi ge' Ahli Taurat Mahi Tande
38
Lakadakoh, nyamani ahli Taurat ge' sok Farisi nyansana wa' Yesus, "Guru, kai ngatte mile' tande umpatn-Imu'."
39
Namun, Yesus naham ge' nyansana wa' ayoa', "Generasi da jahat ge' babayu diah nuntut nyabuah tande. Ge', kati' ao' ani tande da gatnmangkatn wa' ayoa' kacuali tande Nabi Yunus.
40
Sabab, ulah Yunus da madi ka sadatn putukng ikatn ahyo salama taru ano ge' taru ngarum, ladakoh uga' Anak Talino ao' madi salama taru ano ge' taru ngarum sadatn putukng bumi.
41
Ayo sok Niniwe ao' agutn samahu-mahu nige' generasi diah wa' panghakiman ge' ao' ngukuma' sabab ayoa' bartobat ngalaka dangah khotbah Yunus. Ge', ile', da labih ahyo daripada Yunus ani ka diah.
42
Ratu umpatn selatan ao' bangkit samahu-mahu generasi diah wa' ano panghakiman ge' ao' ngukuma' karna ini' utukng umpatn ujung bumi ya' ngadangah hikmat Salomo. Ge', ile', da labih ahyo daripada Salomo ani ka diah. Bahaya umpatn kakusongan
43
'Jangkah roh jahat mungkas umpatn talino, ini' nabo' tampat-tampat da ti' bapaitn ya' najo tampat istirahat, tapi kati' amput a'.
44
Lalu , ini' nyansana, 'Iko' ao' ure' ka raminko', tampat iko' mungkas. Ge', jangkah utukng, ini' amput ramin dakoh kusong, nga gatnnyapu, ge' tarator.
45
Lakadakoh, roh jahat dakoh anu ge' minsakng ijo' roh laitn da labih jahat dari ini', ge' ayoa' maruh ge' madi' ka teetn. Akhira', kaadaan ao' jadi mangkin parah daripada katinga a'. Demikian uga' da ao' tarjadi nige' generasi da jahat diah, Kaluarga Yesus da Sabanara
46
Samantara Yesus maseh nyansana nige' sok karah, ile', sino' ge' ayo age-A agutn ka sato, barusaha ya' nyansana nige' Ini'.
47
Nyungan sok nyansana wa'-Ini', "Ile', sino' ge' ayo agemu' agutn ka sato, barusaha nyansana nige' Akupm."
48
Namun, Yesus naham sok da muji' Wa'-Ini' dakoh ge' nyansana, "Asilah sino'-Ko' ge' asilah ayo age-Ko'?"
49
Ge', gae muka barekng-A ka arah ayo murid-A, Yesus nyansana, 'Diahtalah sino'-Ko ge' ayo age-Ko!
50
Karna asi saja da umas kahandak sama'-Ko' da ani ka surga, ini'talah age'-Ko, age-Ko da mahu, ge' sino'-Ko'."
Chapter 13
1
Wa' ano dakoh, Yesus mungkas umpatn ramin ge' unyung ka pihikng timu'.
2
Ge', sok karah ngabakumpur wa'-Ini'. Karna dakoh, Ini' makka ka parahu ge' unyung, ge' smaan sok karah dakoh agut ka pihikng timu'.
3
Ge', Ini' muji' karah hal wa' ayoa' sadatn parumpamaan, waat-Na, "Ani nyungan pangambhur anu ya' ngambhur,
4
ge' waktu ini' ngambhur, nyabagi bane' jantu ka pihikng gala', ayo manuk utukng ge' umana' sampe abas.
5
Bane' da laitn jantu ka tampat da babatu, da ti' karah mangandung tana', ge' capat idup karna ti' nyamani darupm tana a'.
6
Tapi, ngalaka matuano tusak, pamura' dakoh jarah nganhakng. Ge', karna ti' ani uhat, pamura' dakoh ngajadi karikng.
7
Bane' da laitn jantu ka sawakng rumpo' unak, ge' rumpo' unak dakoh mangkin ahyo, ge' ngapit a'.
8
Namun, bane' da laitn jantu' ka tana' da bait ge' ngasel buah, ani da saratus kali lipat, ani da inum puluh kali lipat, ge' ani da taru puluh kali lipat.
9
Asi da barajak, tea'lah ini' ngadangah."
Yesus Mangajar nige' Parumpamaan
10
Ge', ayo murid Yesus utukng ge' mansikatn wa'-Ini', "Jailah Akup nyansana waa' ayoa' sadatn parumpamaan?"
11
Yesus naham ayoa', "Wa'imu' ngalaka gatnngarunia pangatahuan rahasia Karajaan Surga, tapi wa' ayoa' ti' gatnngarunia.
12
Sabab, sok da ngaani, wa'ini' ao' gatnmangkatn ge' ini' ao' marabeh-abeh. Namun, asi da ti' ani, malah jai da ani dini' ao' gatnnaap umpatn ini'.
13
Karna dakohta, iko' nyansana wa' ayoa' sadatn parumpaman karna jangkah mile', ayoa' ti' mile', ge' jangkah ngadangah, ayoa' ti' mgadangah , ge' ti' ngarati.
14
Manganai ayoa', ganapta nubuatan Yesaya da muji',
"Nige' pangadangah, imu' ao' ngadangah,
tapi kati' ao' suah ngarati.
Ge', nige' mile', imu' ao' mile, tapi kati' ao' paham.'
15
Karna ate bangsa diah nga mangkin tabal,
rajak ayoa' malas ya' ngadangah,
ge' ayoa' nutup matu' ayoa'.
Sa' kati', pasti ayoa' kaatn mile' nige' matu',
dangah nige' rajak ayoa',
ge' ngarati nige' ate ayoa',
lalu malik wa'-Iko' ge' gatnngangkauhatn.'
16
Tapi, gatnberkatilah matu'mu' karna mile' ge' rajakmu' karna ngadangah.
17
Iko' muji' da sabanara wa'imu' bahwa karah nabi ge' ayo sok da benar da ngatte mile' jai da imu' ile', tapi kati' mile' a', ge' ngatte dangah jai da imu' dangah, tapi ti' dangaha'."
Panjelasan manganai Parumpamaan Pangambhur
18
"Oleh karna dakoh, dangahtalah rati parumpamaan manganai pangambhur.
19
Jangkah sok ngadangah firman Karajaan ge' ti' mamahamia', si jahat utukng ge' ngarampas jai da nga gatnngambhur sadatn ate sok dakoh. Dishta sok da bane' a' jantu' wa' pihikng gala'.
20
Anipun da tarhambhur ka tampat-tampat da babatu', diata sok da ngadangah firman ge' lansong nyamut a' nige' sukacita,
21
tatapi ini' ti' ani uhat sadatn adup a' ge' bartahan sabantar ja'. Ge', jangkah panindasan ge' panganyayaaan utukng karna firman dakoh, ini' lansong tajantu.
22
Bane' da jantu' ka rumpo'-rumpo' unak anilah sok da ngadangah firman dakoh, lakadakoh kakawateran dunia ge' tipu daya dunia ge' tipu daya kakayaan ngaraccet firman dakoh singge ti' babuah.
23
Namun, sok da bane' a' jantu ka tana' da bait, diahta sok da ngadangah firman dakoh ge' memahamia'. Ini'talah da batol-batol babuah ge' ani ngasel, ani da 100 kali lipat, ani da 60 kali lipat, ge' ani da 30 kali lipat."
Parumpamaan manganai Udu' Liar ge' Gandum
24
Yesus nyampe parumpamaan da laitn a' wa' ayoa', waatn-A, "Karajaan Surga dakoh kaatn gatnumpama ulah sok da ngambhur bane' da bait ka uma a'.
25
Tapi, samantara sok buus, munsuha' utukng ge' ngambhur bane' padakng ka sawang bane gandum, ge' anu.
26
Jangkah pamura' batunas ge' babuah, lakadakoh padakng dakoh tile' uga'.
27
Maka, hamba-hamba umpat umpu' uma dakoh utukng ge' mansikatn wa'ini', 'Tuan, inyata akupm ngambhur bane da bait ka uma'mu'? Lalu, umpatn dumelah utukng padakng dakoh?'
28
Ini' nyansana wa' ayoa', 'Nyungan munsuh da umasa'. Lalu, hamba-hamba dakoh nyansana wa'ini', 'Apakah akupm ittuh kai anu ge' ngubu'a'?'
29
Tapi, tuan dakoh nyansana, 'Iya'! Sabab, jangkah imu' ngubu' padakng-padakng dakoh, bisa-bisa imu' uga' ao' nubut gandum dakoh samahua'.
30
Tea'lah dua-dua a' idup samahu sampe' musim panen. Ge', pas panen, iko' ao' muji' wa' ayo pangambhur, "Pamule-mule, ngubu'talah padakng-padakng dakoh ge' ningo'talah sadatn kubu'-kubu' ya' nyahunga'. Namun, ngubu'talah gandum a' ka sadatn langkoko'."
Karajaan Jabata Ulah Igi' Sesawi ge' Ragi
31
Lakadakoh Yesus nyarita parumpamaan da laitn wa' ayoa', waatn-A, "Karajaan Surga dakoh ulah igi'sesawi da gatn sok naap ge' gatnngambhur ka uma a'.
32
Igi' dakoh anilah da paling innek umpatn smaan jenis bane', tapi jangkah idup, ini' ao' labih ahyo umpatn smaan jenis apu, malah jadi puutn singge ayo manuk ka rangit utukng ge' basare ka daatn-daatna'."
33
Lakadakoh Yesus nyarita nyabuah parumpamaan da laitn wa' ayoa', "Karajaan Surga dakoh ulah ragi, da kat nyungan mahu gatnnaap ge' gatnnyese' ka sadatn adonan tapukng terigu karaaha taru sukat sampe smaan adonan tacampur ragi.
34
Smaan hal diah Yesus muji' wa' sok karah sadatn parumpamaan-parumpamaan, ge' Ini' ti' nyansana wa' ayoa' tampa parumpamaan.
35
Nige' ladakoh, ganaptalah jai da gatnnyampe nabo' nabi,
"Iko' ao' muka' babako' sadatn parumpamaan-parumpamaan,
Iko' ao' muji' hal-hal da tasukatn pamule dunia gatnumas."
Parumpamaan manganai Udu Liar ka Uma'
36
Lakadakoh, Yesus ngagatn sok karah dakoh lalu maruh ka ramin. Ge', ayo murin-A utukng wa'-Ini' ge' nyansana, "Manjelas wa' kai parumpamaan manganai padakng-padakng ka uma'."
37
Ge', Ni' naham, "Sok da ngambhur bane' da bait anilah Anak Talino,
38
ge' uma' dakoh anilah dunia diah. Bane' da bait anilah anak-anak Karajaan, ge' padakng anilah anak-anak si jahat,
39
ge' munsuh da ngambhura' anilah Balis, ge' musim panen anilah pangkabas zaman, ge' ayo pamanen dakoh anilah ayo malaikat.
40
Jadi, samu' ulah padakng da gatnngubu' ge' gatnnyahung sadatn api, ladakohtalah da ao' tarjadi wa' pangkabas zaman.
41
Anak Talino ao' ngutus ayo malaikat-A, ge' ayoa' ao' ngubu' smaan batu' singkak ge' ayo sok da umas kajahatan umpatn karajaan-A,
42
ge' ao' nyangkahatna' ka sadatn tungko api. Ka tampat dakoh ao' ani kaung ge' garet japu'.
43
Lakadakoh, ayo sok da taman ao' babalo ulah matuano sadatn Karajaan Sama' ayoa'. Asi da barajak, tea'lah ini' ngadangah."
Karajaan Surga ulah Harta da Gatnpendam ge' Mutiara
44
"Karajaan Surga anilah ulah harta da gatnpendam ka uma', da gatn sok amput, lalu gatnnyukatn agi'. Ge', karna auhatn atea', ini' anu, nyual smaan da ni' umpu', ge' mari uma' dakoh.
45
Nyasidah agi', Karajaan Surga anilah ulah nyungan padagang da najo mutiara da lamus.
46
Jangkah ini' amput nyabuah mutiara da raga a' tinggi, ini' anu ge' nyual smaan da ni' umpu', lalu mari uma' dakoh."
Karajaan Surga ulah Jala da Panhu' Ikatn
47
"Ulah dakoh uga', Karajaan Surga anilah ulah jala da gatnngampar ka sdatan laut, ge' ngubu' bamacam jenis ikatn.
48
Jangkah jala dakoh panhu', ayoa' ngarihita' ka pantai ge' unyung, lalu ngubu' ikatn-ikatn da lamus ka sadatn garanjang-garanjang ahyo, tapi matatn da ti' lamus.
49
Jadi, dakohtalah da ao' tarjadi wa' pangkabas zaman. Ayo malaikat ao' mungkas ge' misah da jahat umpatn sok da benar,
50
ge' nyangkahatn ayo sok jahat dakoh ka sadatn tungko api. Ka tampat dakoh ao' ani kaung ge' garet japu'.
51
Laka a' imu' ngarati smaana diah?" Ayoa' muji' Kini', "Ai'."
52
Ge', Yesus nyansana wa' ayoa', "Karna dakoh, satiap ahli Taurat ngajadi murid Karajaan Surga, ini' ulah tuan ramin da ngaruah harta da bahu ge' da ama umpatn kakayaana'." Yesus Gatnnolak ka Kota Asal-A
53
Jangkah Yesus ngalaka nyelesai parumpamaan-parumpamaan dakoh, Ini' boho umpatn teetn.
54
Ge', Jangkah Ini' utukng ka kota asal-A, Ini' mangajar ka sinagoge-sinagoge ayoa' singge ayoa' heran ge' nyansana,
"Umpatn dume Sok diah kaatn kebijaksanaan ge' mukjizat-mukjizat diah?
55
Inyata Ini' diah anak nyungan tukang kayu'? Inyata ama-A gatnmuji' Maria, ge' ayo age-A anilah Yakobus, Yusuf, Simon, ge' Yudas?
56
Inyata ayo age-A da mahu ani ka antara ite'? Lalu, umpatn dume Sok diah kaatn smaan hal diah?"
57
Ge', ayoa' tarsinggung katn-A. Namun, Yesus nyansana wa' ayoa', "Nyungan nabi inya kati' gatnhormati, kacuali ka tampat asala' ge' ka ramin adup a'."
58
Ge', Ini' ti' umas karah mukjizat ka teetn karna ayoa' kati' pacaya.
Chapter 14
1
Waktu dakoh, Herodes, raja rappo ngadangah agah manganai Yesus.
2
Ge', ini' nyansana wa' hamba-hamba a', "Diahtalah Yohanes Pambaptis. Ini' nga umpat umpatn antara sok kabis ge' karna dakohtalah mukjizat-mukjizat diah bakaraje ka sadatn-A."
Peristiwa Pangkabis Yohanes Pambaptis
3
Sabab, Herodes nga nangkap Yohanes, ningo'a', ge' nyese'a' ka panjara karna Herodias, sautn Filipus, age Herodes.
4
Karna Yohanes suah nyansana wa'ini', "Kati' samanggah sa' imu' umpu' Herodias."
5
Ge', walopun Herodes ngatte ngamis Yohanes, ini' buut wa' sok karah karna ayoa' manganggap Yohanes sebage nabi.
6
Tapi, jangkah ano ulang tahun Herodes utukng, anak mahu Herodias batari ka tura' ayoa', ge' dakoh ngangkauhatn ate Herodes,
7
singge ini' basumpah ao' mangkatn jai saja da dara dakoh mahi'.
8
Maka, karna ama a' ngalabak a', "Mangkatnmih wa' iko' ka diah, abak Yohannes Pambaptis ka tumukng talam."
9
Waloupun raja sedih, tapi karna sumpaha' ge' karna ayo sok da uman samahua', ini' pun ngadu mangkatn a' tao'.
10
Ini' ngadu ya' nyantak abak Yohanes ka panjara.
11
Ge', abak Yohanes gatnminsakng wa' dara dakoh ge' ini' minsakng a' wa' ama a'.
12
Lakadakoh, ayo muid Yohanes utukng, naap bangke a', ge' nyibura'. Lalu, ayoa' anu ge' muji' wa' Yesus. Rima Roti ge' dua Ikatn ya' Rima Ribu Ungan
13
Jangkah Yesus ngadangah hal diah, Ini' nyingah adup-A umpatn teetn nige' parahu, ka tampat da sunyi adup-adup. Ge', jangkah ayo sok ngadangah diah, ayoa' nganang-A nige' bajalatn kaja' umpatn kota-kota,
14
Jangkah Yesus mungkas, Ini' mile' sok karah bakumpur, ge' mangkatn pamase' ka ayoa', ge' ngangkauhatn pangkanapm ayoa'.
15
Jangkan ano ngana' ngarum, ayo murid utukng wa' Yesus ge' nyansana, "Tampat diah sunyi' ge' ano' ngana ngarum. Ngadulah sok karah dakoh anu ka desa-desa ge' mari pangkuman ya' da adup a'."
16
Tapi, Yesus muji' wa' ayoa', "Ayoa' ti' palalu anu. Imu', mangkatnmih ayoa' pangkuman."
17
Ayoa' nyansana wa'-Ini', "Ka diah ti' ani jai-jai, kacuali 5 roti ge' 2 ikatn."
18
Ge', Ini' nyansana, "Minsakng dakoh kadiah, wa'-Iko'."
19
Lakadakoh, Ini' ngadu sok karah dakoh unyung ka udu', ge' Ini' naap 5 roti ge' 2 ikatn dakoh, lalu gae nyantunung ka rangit, ini' ngucap syukur ge' mata'-mata' roti dakoh. Ngalaka dakoh, Ini' mangkatn a' wa' ayo murid-murid-A, ge' ayo murid-A wa' sok karah.
20
Ge', ayoa' smaan uman ge' gatnngabasoh. Lalu, ayoa' naap kaba santak-santak a', ani dua balas garanjang panhu.
21
Ge', ayoa' da uman kira-kira ani 5.000 are, tinga tarmasok mahu ge' ayo kangot.
Yesus Bajalatn ka Tumukng Paitn
22
Yesus capat-capat ngalabak ayo murid-A maruh ka parahu lalu anu nyantulu-A ka seberang, samantara Ini' ngadu sok karah dakoh ure'.
23
Ge', ngalaka Yesus ngadu sok karah dakoh ure', Ini' makka ka samo gunung adup-adup a' ge' badoa'. Jangkah ngana ngarum, Ini' adup-adup ata ka teetn.
24
Tapi, parahu dakoh nga jauh umpatn daratan, gatn galombang ombang-ambing karna balawan ge' nyaru.
25
Ge', pas jam ampat ngarum dakoh, Ini' utukng wa' ayoa', bajalatn ka tumukng paitn.
26
Jangkah ayo murid mile'-A bajalatn ka tumukng paitn, ayoa' batol buut ge' ngampak, "Dakoh amot!" Lalu, ayoa', kaekng-kaekng karna buut.
27
Tapi, Yesus lansong nyansana wa' ayoa', waatn-A, "Nguattalah atemu! Diah Iko, iya' buut."
28
Ge', Petrus nyansana wa'-Ini', "Tuhan, sa' dakoh Akupm, ngadumih iko' utukng kimu' ka tumukng paitn."
29
Yesus nyansana, "Utukngtalah!"
Maka Petrus mungkas umpatn parahu, ge' bajalayn ka tumukng paitn, ge' utukng wa' Yesus.
30
Namun, jangkah mile' nyaru, ini' buut ge' mule tanggulupm, Ini' ngampak, "Tuhan, nyalamatmih iko'!"
31
Yesus lansong nyulo' barekng-A, minte Petrus, ge' nyansana, "Imu' da kurang baiman, kajai imu' ragu-ragu?"
32
Jangkah ayoa' maruh ka sadatn parahu, nyaru pun baranti.
33
Lakadakoh, ayoa' da ani ka parahu manyambah Yesus ge' nyansana, "Sasungguha', Akupm anilah Anak Jabata!"
Yesus Ngangkauhatn Ayo Sok Anapm
34
Ngalaka nyambarang, ayoa' sampe' ka tana' Genesaret.
35
Jangkah ayo sok ka tampat dakoh panane-A, ayoa' ngagaha' ka smaan daerah dakoh ge' minsakng sok da anapm wa' Yesus.
36
Ayoa' mahi' wa' Yesus supaya buleh minte jubah-A, ge' smaan sok da minte'a' ngajadi auhatn.
Chapter 15
1
Lakadakoh, nyamani sok Farisi ge' ayo ahli Taurat umpatn Yerusalem utukng wa' Yesus ge' nyansana,
2
"Jailah ayo murid-Mu malanggar tradisi nenek moyang? Sabab, ayoa' ti' meetn barekng jangkah uman roti!"
3
Ge', Yesus naham ge' nyansana wa' ayoa', "Ge', jailah imu' uga' malanggar parintah Jabata demi tradisimu'?
4
Karna Jabata bafirman, 'Hormatimih sama' ge' sino'mu', ge', 'Asi da ngutuk sama' ato sino'a', arus gatnngukum kabis.
5
Namun, imu' nyansana, "Asi saja da nyansana wa' sama' ato sino'a', 'Jai pun da palalu kimu' nga gatnparsambah wa' Jabata,"
6
ini' kati' palalu manghormati sama' ato sino'a'. Nige' ladakoh, imu mambatal firman Jabata demi tradisimu.
7
Imu', sok-sok da munafik, memang taman nubuatan Yesaya manganai imu:
8
'Bangsa diah manghormati Iko' nige' baba' ayoa',
tapi ate ayoa' jauh umpatn Iko.
9
Ge', sia-sia ayoa' manyambah-Ko nige' perintah-perintah talino."
10
Ge', Yesus maba' sok karah ge' nyansana, "Dangah ge' pahamilah!
11
Inya jai da maruh ka sadatn baba' da ngutor sok, tapi jai da mungkas umpatn baba'a', diata da ngutor sok"
12
Lakadakoh, ayo murid Yesus utukng ge' mansikatn wa'-Ini', "Panea Akupm bahwa ayo sok Farisi tersinggung jangkah ngadangah pansikatn diah?"
13
Namun, Yesus naham ge' nyansana, "Satiap pamura' da ti' gatnmura' kat Sama'-Ko' da ka surga ao' gatnnubut sampe' ka uhat-uhat a'.
14
Tea'lah ayoa'. Ayoa' anilah pangirikng-pangirikng buta umpatn ayo sok buta. Ge', sa' sok buta ngirikng sok buta, dua-dua a' ao' jantu' ka sadatn rubakng."
15
Petrus nyansana wa-Ini', "Manjelasmih parumpamaan dakoh wa' kai."
16
Yesus nyansana, "Anita kupm tinga paham uga'?
17
Anita kupm tinga ngarati bahwa jai tarutn da maruh ka sadatn baba' ao sosor ka putukng ge' gatnmatatn ka sadatn jammatn?
18
Tapi, jai da mungkas umpatn baba' timbul umpatn ate, ge' dakohlah da ngutor sok.
19
Karna umpatn ate timbul pikiran-pikiran da jahe', pangamis, babayu', duse-duse seksual, parangko, saksi palsu ge' fitnah.
20
Hal-hal diahta da ngutor sok, tapi uman tampa meetn barekng kati' ngutor sok."
Yesus Nulong Mahu Kanaan
21
Lakadakoh, Yesus anu umpatn teetn ge' nyingkir ka daerah Tirus ge' Sidon.
22
Ge', nyungan mahu Kanaan da barasal umpatn daerah dakoh utukng ge' ngampak, "Maseklah wa' iko', Tuhan, Anak Daud! Anak mahuko' kuat parah karasukan roh jahat ."
23
Tapi, Yesus kati' naham mahu dakoh, nyapatah sarat pun. Ge', ayo murid-A utukng ge' ngalabak-A, "Ngadulah ini' boho karna ini' ti' madi'-madi' ngampak ka buntot ite'."
24
Lalu, Ini' naham ge' nyansana, "Iko' duhutn gatnutus wa' domba-domba da ilakng umpatn umat Israel."
25
Lakadakoh, mahu dakoh utukng ge' sujud ka tura Yesus, waatna', "Tuhan, nulonglah iko'!"
26
Namun, Yesus naham ge' nyansana, "Ti' bait naap roti da ya' ayo kangot ge' nyangkahatna' wa' ayo kasu'."
27
Mahu dakoh naham, "Taman, Tuhan, tapi kasu-kasu dakoh uman bara'-bara' da jantu umpatn meja tuana'."
28
Lakadakoh, Yesus nyansana wa'ini', "He mahu, imanmu ahyo! Jadilah ka imu' ulah da imu ngatte." Wa' ano dakoh uga', anak mahu a' gatnngangkauhatn.
Yesus Ngangkauhatn Karah Sok
29
Yesus boho umpatn teetn, ngaduk pihikng timu' Galilea. Ge', ngalaka namaat ka samo talidi, Ini' unyung ka teetn.
30
Lakadakoh, karah sok utukng wa'-Ini', minsakng ayo sok da lumpuh, cacat, buta, awa', ge' sok karah laitn a'. Lalu, ayoa' magurikng ayo sok dakoh ka kaja' Yesus ge' Ini' ngangkauhatn ayoa',
31
singge sok karah dakoh terheran-heran jangkah ayoa' mile' da awa' nyansana, da cacat gatnngangkauhatn, da lumpuh bajalatn ge' da buta mile'. Ge', ayoa' muji Jabata Israel.
Yesus Mangkatn Pangkuman Wa' Labih Ampat Ribu Ungan
32
Lalu, Yesus maba' ayo murid-A ge' nyansana, "Iko' ani pamase' wa' ayo sok dakoh karna ayoa' nga samahu nige' Iko' salama taru ano ge' kati' ani umpu' pangkuman. Ge', Iko' kati' ittuh ngadu ayoa' ure' saburuk supaya ayoa' kati' pingsan sadatn pajalatna'."
33
Lakadakoh, ayo murid nyansana wa'-Ini', "Umpatn dume ite' ao' kaatn roti da karah ka tampat sunyi' diah ya' ngangkabasoh sok da karah samu' diah."
34
Yesus mansikatn wa' ayoa', "Nyamani karah roti da mu' umpu'?"
Ayoa' naham, "Ijo, ge' nyamani ikatn inek."
35
Lalu, Yesus merintah sok karah dakoh unyung ka tana'.
36
Lakadakoh, Ini' naap ijo roti ge' ikatn-ikatn dakoh. Ge', gae mangucap syukur Ini' mata'-mata'a', ge' mangkatn a' wa ayo murid-A, ge' mangkatn a' wa' sok karah dakoh.
37
Ayoa' smaana uman ge' gatnngabasoh. Lalu, ayoa' naap santak-santak da kaba, ani ijo' garanjang panhu.
38
Ayoa' da uman ani ampat ribu ungan are, kati tarmasok mahu ge' ayo kangot.
39
ngalaka ngadu sok karah dakoh ure', Yesus maruh ka parahu ge' anu ka daerah Magadan.
Chapter 16
1
Lakadakoh, ayo sok Farisi ge' Saduki utukng ya' mancobai Yesus. Ayoa' mahi sak Yesus nyuak ka ayoa' nyabuah tande umpatn surga.
2
Tapi ao'a, Yesus naham, "Waktu ngana ngarum, imu' muji', 'cuaca calikng karna rangit taransak.'
3
Ge', ka ngakkap ano, 'Ano diah ao' ani nyaru kuat karna rangit taransak ge' patakng.' Imuk pane mambeda rupa rangit tapi kati'mampu mambeda tande-tande zaman.
4
Nyiteng katurunan da jahe' ge' penzina diah nuntut nyabuah tande. tapi nyiteng tande pun kati' ao' gatn mangkatn kaini', kacuali tande Nabi Yunus. "Lalu, Ini' ngagatn ayoa' ge' anu. Panjelasan manganai Bunyu Sok Farisi ge' Saduki
5
Jangkah murid-murid utukng ka sambarang tamu', ayoa' karimut minsakng roti.
6
Ge' Yesus nyansana wa' ayoa', " Mamprati ta ge' waspada ta tarhadap bunyu ayo sok Farisi ge' ayo Saduki."
7
Ge' ayoa' mule nyarita hal diah ka antara ayoa' sadi' ge' nyansana, "diah karna ite' kati' minsakng roti."
8
Tapi ao'a, Yesus pane hal diah ge' nyansana, "He, sok da kurang iman, jailah imu' nyarita ka antaramu' sadi' manganai kati' ani roti?
9
Jailah imu' masih katinga ngarati ge' uga kati' ingat ao' rima rori ya' rima ribu sok, ge' nyamani karah kabaa damu' ngubu' ka karanjang?
10
Ato, ijo roti ya' ampat ribu sok, ge' nyamani karah kabaa damu' ngubu' ka karanjang?
11
Langkinatalah imu' kati' ngarati bahwa Iko' kati' sadang nyansana kaimu' manganai roti? Tapi ao'a, waspada ta tarhadap bunyu' ayo sok Farisi ge' sok Saduki."
12
Lakadakoh, ayoa' ngarati bahwa Ini' kati' muji' ya' waspada tarhadap bunyu' roti, tapi tarhadap ajaran ayo sok Farisi ge' ayo Saduki. Yesus anitalah Mesias
13
Jangkah Yesus sampe ka daerah Kaisarea Filipi, Ini' mansikatn ayo murin-A, "Manurut saratn sok, asilah Anak Talino?"
14
Ayoa' naham, "Mani ungan magaatn Yohanes Pambaptis, da laitn magaatn Elia, ge' da laitn agi' magaatn Yeremia, ato salah satu umpatn ayo sok nabi."
15
Lalu, Yesus mansikatn ka ayoa, "Tapi ao'a, manurutmu', asilah Iko' diah?"
16
Simon Petrus naham, "Imu' anitalah Mesias, Anak Jabata da idup!"
17
Yesus nyansana ka ini', " Gatn berkat ta mu' Simon anak Yunus. sabab inya dagin ge' daya' da muji' diah kaimu', tapi Samak-Ko da ka surga.
18
Ge', iko' uga muji' kaimu' bahwa imu' anilah Petrus. Ge' ka tummukng batu diah, Iko' ao' mantagutn jemaat-Ko' ge' gerbang-gerbang Hades kati' ao' nguasa'a.
19
Iko' ao' mangkatnmu' kunci-kunci Karajaan Surga. Ge', jai pun da mu' ningo' ka bumi ao' tatingo' ka surga. Ge, jaipun da mu' ngarapas ka bumi ao' tarapas ga ka surga."
20
Lalu, Yesus mamparingat murid-murid supaya kati' muji' ka asi-asi bahwa Ini' talah Mesias. Yesus mangkatn pane manganai Pangkabis-A
21
Mule dakoh ta, Yesus ngamule nujo' ka ayo murid-A bahwa Ini' harus anu ka Yerusalem ge' manderita karah hal umpatn ama-ama, imam-imam, atopun ahli -ahli Taurat, lalu gatn ngamis ge' gatn ngangkidup pas ano da kataru'a.
22
Lakadakoh, Petrus narik Yesus ka samping, nagor-A, ge' nyansana, "Tuhan kiraa Jabata ngajauh hal dakoh umpatn imu! Hal diah kati' ao' suah tajadi wa' Imu'."
23
Tapi ao'a, Yesus babalik ge' nyansana ka Petrus, "Bohomih umpatn hadapan-Ko, he Balis! Imutalah batu sandungan ka-Iko sabab imu' kati' nganatap pikiranmu' ka hal-hal da umpatn Jabata, tapi ka hal-hal da umpatn talino."
24
Lakadakoh Yesus nyansana ka ayo murid-A, "Sak ani da ituh nganang Iko', ini' harus ngayum adup'a, maha salib'a ge' nganang Iko'.
25
Karna asi da ngate nyalamat nyawa'a ao' kahilangan nyawa'a. t
Tatapi asi da kahilangan nyawa'a karna Iko, ini' ao' kaatna agi'.
26
Jailah untonga sak sook aba' kaatn nyamanman isi dunia diah, tapi ni' kahilangan nyawaa'? Ato, jailah da bisa sook mangkatn sabage ganti nyawaa?
27
Sabab, Anak Talino ao' utukng sadatn kamuliaan Sama-A samahu ge' ayo Malaikat-A ge' lakadakoh ao' mambalas satiap sok sasuei ge' parbuatan'a.
28
Iko' muji' da sabanara kaimu', ani mani ungan sok da agutn kadiah da kati' ao' misa pangkabis sampe ayoa mile' Anak Talino utukng sadatn Karajaan-A."
Chapter 17
1
Inum ano ngalaka dakoh, Yesus minsakng Petrus, Yakobus, uga Yohanes age Yakobus, ge' minsakng ayoa' makka ka gunung da nyamo nige' cara adup-A.
2
Lalu, Yesus barubah rupa ka tura ayoa'. Bahas-A babalo samu ge' matuano ge' pangiak-A jadi ranakng ulah balo.
3
Ge', ile', tile' ta ka ayoa' Musa ge' Elia, agi' basarita nige' Yesus.
4
Petrus nyansana ka Yesus, "Tuhan, bait ta ite' madi' kadiah, iko' ao' mantagut taru dio kadiah, nyiteng ya' di-Mu', nyiteng ya' da Musa, nyiteng ya' da Elia."
5
Jangkah Petrus masih nyansana, nyabuah rahu da tarakng nuno' ayoa', ge' mile', ani saratn da umpatn sadatn rahu dakoh da muji', "Diah ta Anak-Ko da gatn Konyayang, ka Ini'talah Iko berkenan, Da dangah ta ka-Ini'."
6
Jangkah ayo murid ngadangah diah, ayoa' maramuup nige' bahas'a sampe ka tana ge' aru buut.
7
Namun, Yesus utukng ge' nyintuh ayoa', waat-Na, " Umpat mih ge' iya' buut."
8
Jangkah ayoa' nika matu ayoa', ayoa' kati' milek asi pun, kacuali Yesus sadi'.
9
Jangkah ayoa' disah umpatn gunung, Yesus ngadu ayoa', waat-Na, "iya' nyarita pamile' dakoh ka asipun sampe Anak Talino gatn ngangkidup umpatn antara sok kabis."
10
Ge' ayo murid mansikatn ka- Ini', " Lalu, jailah ayo ahli-ahli Taurat nyansana bahwa Elia harus da uru utukng.
11
Yesus naham, "Elia memang da uru utukng ge' ngangkabait segala jaipun.
12
Namun, Iko muji' ka kaimu' bahwa Elia nga utukng, tapi ayoa' kati nganal'a ge' mamparlakua ulah da ayoa' ngate. Ladakoh uga Anak Talino ya' mandarita ka barekng ayoa'.
13
Laka dakoh, ayo murid ngarati bahwa Ini' nyansana ka ayoa' manganai Yohanes Pambaptis. Nyungan kangot gatn ngarapas umpatn Roh da jahe
14
Jangkah Yesus ge' ayo murid malik ka sok da karah, nyungan are utukng ka Yesus nige' basujut ka hadapan-A gae muji',
15
" Tuhan, mahi pamase' ya' anakko sabab ni' anapm gila babi ge' aru tao manderita. Ini' sering jantu ka sadatn api ge' sadatn paitn.
16
Iko ngalaka minsakng'a ka ayo murid-Mu', tapi ayoa' kati' aba' ngangkauhatn'a".
17
Yesus naham, "He, imu' katurunan da kati' pacaya ge' da sasat! Mani tuhi agi' Iko ao' madi' samahu imu? Mani tuhi agi Iko harus basabar tarhadap imu'? Minsakng mih kangot dakoh ka-Iko'."
18
Maka Yesus ngarato' roh da jahe' dakoh singga kaluar umpatn kangot are dakoh, ge' kangot dakoh auhatn waktu dakoh uga.
19
Lakadakoh ayo murid utukng ka Yesus, jangkah ayoa adup-adup ge' Ini' ge' mansikatn, "Jailah kai kati kaatn nguser roh da jahe' dakoh?"
20
Waat-Na ka ayoa', "Karna imanmu' inek. Iko muji' da sabanara kaimu', sak imu' ani umpu' iman ahyo ulah igi' sansabi sadi', maka imu' aba' muji' ka gunung diah, 'Pinda mih umpatn tampat diah ka teetn!' ge' gunung diah ao' pindah. Kati' ani da mustahil bagi imu'.
21
[Tapi ao'a, roh da jahe' jenis diah hanya kaat gatn nguser nige' doa ge' puasa."] Yesus Nyansana manganai Pangkabis-A
22
Jangkah Yesus ge' ayo murid-A agi bakumpur ka rapo Galilea, Ini' nyansana ka ayoa', "Anak Talino ao' gatn nyarah ka sadatn barekng talino,
23
ge' ayoa' ao' ngamis-A, ge' Ini' ao' ngangkidup-A pas ano ka taru'a." Ge', ayo murid-A aru sedih'a. Pangajaran manganai Mayar Pajak
24
Jangkah ayoa' utukng ka Kapernaum, ayo panageh pajak 2 dirhsm utukng ka Petrus ge' mansikatn, "Anita gurumu' kati' mayar pajak 2 dirham?"
25
Petrus naham, "ai". Jangkah ini' maruh ka sadatn ramin, Yesus nga uru nyansana kaini', "Langkina manurutmu' , Simon? Umpatn asilah raja-raja dunia diah nageh bea ge' pajak? Umpatn anak-anak'a ato sok laitn?"
26
Jangkah Petrus naham, "Umpatn sok laitn," Yesus nyansana kaini', "Kalo lakoh, anak-anak'a bebas.
27
Tapi ao'a, supaya ite' kati' nyinggung ayoa', anu mih ka tamu' ge' nyangkahatn kail. Naap ta ikatn da partama muncol ge' jangkah imu' nika baba'a, imu' ao' amput nyakaping uang da nilaia 4 dirham. Naap ta uang dakoh ge' mangkatn ka ayoa', ya' di-Ko ge' ya' dimu'."
Chapter 18
1
Pas waktu no dakoh, murid-murid utukng ka Yesus ge' mansikat'n, "Asi ta da paling aihyo ka sadat'n Karajaan Saruga?"
2
Lalu, Yesus maba sook kangot inek ka-Ini', ge' mana' kangot inek dakoh wak tauda-uda ayo'a,
3
ge' nyansana, "Iko' muji' da subanar'a ka imu', kacuali imu' batobat ge' jadi ulah ayo-kangot, imu' kati aok maruh ka sadat'n Karajaan Saruga.
4
Asi da ngarendah adup'a ulah kangot diah diu'ta da paling aihyo ka sadat'n Karajaan Saruga.
5
Ge', asi da narima kangot inek ulah da nyungan diah ka sadat'n gaat'n-Ko', ini' narima Iko'." Paringatan tentang Panyabab Duse
6
"Tapi aok'a, asi da manyasat salah satu umpat'n ayo-kangot inek da pacaya ka-Iko' diah, labih bait bagi'a sa nyabuah batu kilangan gat'n ngantukng ka jangok'a ge' gat'n nanggulup'm ka laut da paling sadat'n.
7
Calakalah dunia barang panyasat-panyasat da ani wak sadat'n'a! Sa', panyasatan memang arus tajadi, tapi calakalah sok da majaka'a.
8
Sa' barekng ato kajamu' umasmu' baduse, nyantak ge' matat'n ta dakoh. Labih bait bagimu' maruh ka sadat'n idup nige barekng da pugot ato pincang daripada umpu dua barekng ge' dua kaja, tapi gat'n matat'n ka sadat'n api kekal.
9
Sa' matu'mu' umasmu' baduse, nyungkil ge' matatnlah dakoh, labih bait imu' maruh ka sadatn idup nige' nyiteng matu', daripada umpu' dua matu' tapi gatnmatatn ka sadatn api naraka."
10
"Memperhatimih, iya' imu' ngaremeh nyungan umpatn ayo kangot diah. Sabab, Iko' muji' wa'imu' bahwa malaikat- malaikat ayoa' ka surga salalu nyantunung muka Sama'-Ko da ka surga.
11
[Sabab, Anak Talino nga utukng ya' nyalamat sok da ilakng.]
Parumpamaan manganai Domba da Ilakng
12
Langkina manurutmu'? Sa' sook ani 100 ungan domba, tapi da nyungan umpatn ayoa' layo, kati'a' sok dakoh ngagatn da 99 ungan ka gunung ge' anu ya' najo da nyungan da layo dakoh?
13
Ge', sa' ini' amput a', sasungguha' Iko muji' kimu', ini labih basukacita karna nyungan da layo dakoh daripada 99 da ti layo.
14
Ladakoh uga', inyatalah kahendak Sama'mu' da ka surga sa' nyungan umpatn ayo kangot diah binasa."
Manasihati Sok da Basara
15
"Sa' agemu baduse, anu ge' nyua' sara a', antara imu' ge' ini' sadi' ja'. Sa' ini ngadangahmu', imu' nga kaatn agemu.
16
Tapi, sa' ini' kati ngadangahmu, minsaknglah nyungan ato dua ungan agi' samahumu' supaya nige' saratn umpatn dua ato taru ungan saksi, satiap saratn gatnnatap.
17
Sa' ini' nulak ya' ngadangah ayoa', mujitalah hal dakoh wa' jemaat. Ge', sa' ini' malah nulak ya' ngadangah jemaat, biartalah ini' jadi ulah bangsa-bangsa laitn ge' pangubu' sewa.
18
Iko' muji' da sabanara wa'imu' bahwa jai da mu' ningo' ka bumi ao' tatingo' ka surga. Ge', jai da mu' ngarapas ka bumi ao' gatnngarapas ka surga."
19
Nyakali agi', Iko' muji' kimu' bahwa sa' dua ungan ka antaramu' sapakat ka bumi mahi tarutn, hal dakoh ao' tarjadi bagi ayoa' kat Sama'-Ko' da ani ka surga.
20
Sabab, ka tampat dua ato taru ungan samahu bakumpur sadatn Gaatn-Ko', Iko' ani ka tuda'-tuda' ayoa'.Parumpamaan manganai Pangampunan
21
Lakadakoh, Petrus utukng wa' Yesus ge' mansikatn, "Tuhan, nyamani sering saharus a' iko' ngampun ageko' da baduse tarhadapko'? Sampai 7 sidah?"
22
Yesus muji' wa'ini', "Iko ti' muji' wa'imu' 7 sidah tapi sampe 70 sidah kali 7 sidah.
23
Karna dakohlah, Karajaan Surga gatnumpama ulah nyungan raja da umas paritongan nige' ayo hamba a'.
24
Jangkah ni' mule baritong, sok da barutang 10.000 talenta gatnminsakng wa'ini'.
25
Karna ini' dakoh ti' mampu mayar, tuana' ngadu supaya ini' gatnnyual, samahu sautn a' ge' ayo anak a', uga' smaan da ini' umpu', ge' nige'dakohta ni' umas pambayaran.
26
Maka, hamba dakoh maramuup ge' nyambah tuana', waatna', 'Basabarlah wa'iko' ge' iko' ao' mayar smaana wa' imu'.'
27
Lakadakoh, tuan umpatn hamba dakoh ani rasa mase, ge' ngarapasa' ge' mangkatn a' ampun atas utanga' dakoh.
28
Tapi, jangkah hamba dakoh mungkas ge' badaput nige' hamba laitn da barutang 100 dinar wa'ini', ini' nangkap gae nyikel hamba dakoh, ge' nyansana, 'Mayar agi' uang da imu' nginyapm unpatnko!'
29
Maka, hamba da barutang dakohsujud ge' mamuhon wa'ini', waatna', 'Basabarlah wa'iko' ge' iko' ao' mayar smaana wa'imu'.'
30
Tapi, ini' nulak a' ge' nyese' kawana' dakoh ka panjara sampe ini dakohaba' malunasi smaan utanga'.
31
Jangkah hamba-hamba da laitn mile' kejadian dakoh, ayoa' jadi mangkin sedih lalu utukng ge' malapor wa' tuana' manganai smaan da nga terjadi.
32
Lakadakoh, tuana maba' hamba da pamule dakoh ge' nyansana wa'ini', 'Imu' hamba da jahat. Iko' nga mengampuni smaan utangmu' karna imu' mamuhon wa'iko'.
33
Inyata saharus a' imu' ani pamase' wa' samu ka adupmu' hamba, ulah iko' uga' nga nyua' pamase' wa'imu'?'
34
Ge', tuana, ngabato-batol baji', nyaraha' wa ayo panyiksa sampe ini' kaatn mayar agi' smaan da ngagatnnginyapm wa' ini'.
35
Sama'-Ko' ka surga uga' ao' umas hal da samu' wa'imu', sa' imu' ti' mangampuni agemu' umpatn sadatn atemu'."
Chapter 19
1
Jangkah Yesus nga ngangkabas saratn-saratn diah, Ini' barangkat umpatn Galilea ge' utukng ka rappo Yudea, ka sabarang sungi Yordan.
2
Ge', Kumpur ahyo sok karah nganang-A, ge' Ini' ngangkauhatn ayoa' ka teetn.
3
Nyamani sok Farisi utukng wa' Yesus ya' nguji Ini' ge' mansikatn, "Anita gatnngadu bagi are ya' mancare sautn a' nige' bamacam alasan?"
4
Lalu, Yesus naham ge' nyansana, "Kati'ah imu' maca bahwa Ini', da nyipta ayoa' umpatn mulea', umas ayoa' are ge' mahu,
5
ge' Ini' berfirman, "Karna dakoh, arus ngagatn sama'a' ge' sino'a' ge' nyatu nige' sautna', ge' kadua a' dakoh ao' jadi nyiteng ungan?
6
Jadi ayoa' inya agi' dua, tapi nyiteng ungan. Karna dakoh, jai da nga gatn Jabata nyatu, kati' buleh talino misah a'."
7
Ayoa' nyansana wa' Yesus, "Lalu, jailah Musa mangkatn perintah ya' mangkatn surat care ge' mancare sautn?"
8
Yesus nyansana wa' ayoa', "Karna kakarasan atemu', Musa mangkatn ijin kimu' mancare sautnmu'. Tapi, wa' pamulea ti'ta samu dakoh.
9
Ge', Iko' muji' kimu' bahwaasi da mancare sautn a', kacuali karna babayu, lalu bainyha' nige' mahu da laitn, ini' babayu."
10
Ayo murid muji' wa'-Ini', "Sa' ulah diah hal a' banun nige' sautn a', labih bait kati' bainyha'."
11
Namun, Yesus nyansana wa' ayoa', "Kati' smaan sok kaatn narima sarat diah, kacuali ayoa' gatn mangkatn karunia.
12
Sabab, ani sok da kati' bainyha' karna memang umpatn gatnbaranak ladakoh umpatn putukng sino'a', ge' ani sok da kati' bainyha' karna sok lain ngadu, ge' ani uga da umas adup a' ladakoh umpatn adup a' sendiri demi Karajaan Surga. Barang asi da kaatn narima hal diah, teaklah ini' manarimaa'."
Yesus ge' Ayo Kangot Innek
13
Lakadakoh, nyamani kangot innek gatnminsakng wa'-Ini' supaya Ini' kaatn mana' barekng-A ka tumukng ayo kangot dakoh ge' ngadoa ayoa'. Tapi, ayo murid mingat ayo sok dakoh.
14
Namun, Yesus nyansana, "Iya'mingat ayo kangot innek dakoh. Iya' manghalang-halangi ayoa' utukng wa'-Iko' sabab Karajaan Surga ao' gatn umpu' ayo kangot innek da ulah ayoa'.
15
Ngalaka Yesus mana' barekng-A ka tumukng ayo kangot dakoh, Ini' boho umpatn dakoh.
Langkina Kaatn Idup Kekal?
16
Lakadakoh, utukngtalah sook wa' Yesus ge' mansikatn, "Guru, hal bait jai da arus ko' umas supaya kaatn idup da kekal?"
17
Ge', Yesus nyansana wa' sok dakoh, "Jailah imu' mansikatn wa'-Iko' manganai jai da bait? Duhutn Nyiteng ta da bait. Namun, sa' imu' ittuh maruh ka sadatn idup, taati ja' parintah-parintah dakoh."
18
Sok dakoh mansikatn wa' Yesus, "Parintah da dume?"
Yesus nahama, "Iya' ngamis, iya' babayu, iya' nangko, iya' mangkatn kesaksian palsu,
19
manghormatlah sama' ge' sino'mu' ge' kasihilah samu adupmu' talino ulah adupmu' sendiri."
20
Sok bujakng dakoh nyansana wa'-Ini', "Smaan hal dakoh nga ko' taati, jai agi da masih kurang?"
21
Yesus nyansana wa'ini', "Sa' imu' ngatte sempurna, anu ge' nyualtalah smaan da mu' umpu'. Lalu, mangkatnlah wa' sok papa, ge' imu ao' umpu' harta ka surga, ge' kaeh ngananglah Iko."
22
Namun, Jangkah sok bujakng dakoh ngadangah saratn diah, ini' boho nige' sedih sabab ini batol kaya.
23
Lalu, Yesus nyansana wa ayo murid-A, "Iko' muji' da sabanara wa'imu, susah bagi sok da kaya ya' maruh ka sadatn Karajaan Surga.
24
Nyasidah agi', Iko' muji' wa'imu' bahwa labih mudah bagi nyungan unta ya' nabo rubakng atos daripada sok kaya maruh ka sadatn Karajaan Jabata."
25
Jangkah ayo murid ngadangah sarat dakoh, ayoa' jadi aru heran, ge' nyansana, "Kalo ladakoh, asilah da kaatn gatn nyalamat?"
26
Gae nyantunung ayoa, Yesus nyansana, "Samahu talino, hal diah mustahil, tapi samahu Jabata, smaan hal dakoh mungkin."
27
Lakadakoh, Petrus nyansana wa'-Ini', "Ilekmih, kai nga ngagatn smaana ge' nganang Akupm. Jadi jai da ao' kai narima?"
28
Ge', Yesus nyansana wa' ayoa', "Iko' muji da sabanara wa'imu' bahwa imu', da nganang Iko' sadatn dunia da bahu, jangkah Anak Talino unyung ka takhta kabesaran-A imu' uga' ao' unyung ka tumukng dua balas takhta ya' manghakimi kadua balas suku Israel.
29
Ge', satiap sok da laka ngagatn ramin, agea' da are, agea' da mahu, sama', sino', anak-anak, ato uma a' karna gaatn-Ko ao' narima saratus kali lipat ge' ao' mawarisi idup da kekal.
30
Tapi, karah sok da pamule ao' jadi da unyhi', ge' da unyhi' jadi da pamule."
Chapter 20
1
"Sabab , Karajaan Surga anilah ulah umpu' kabon da baru ngakkap ano anu ya' najo pakaraje-pakaraje ya' kabon anggur a'.
2
Jangkah ini' nga sapakat nige' ayo' pakaraje dakoh ya' nyadinar nyano, ini' ngadu ayoa' ka kabon anggur a'.
3
Ge', kira-kira kitar taru jam ini' anu ge' mile' da laitn a' agi' agutn nganggur ka tampat umum. Lalu, ini' nyansana wa' ayoa', 'Imu', anulah uga ka kabon anggur ge' jai da pantas ao' ko' mangkatn wa'imu'. Ge', ayoa pun anu.
5
Nyasidah agi', kitar jam kainum ge' jam ka pire ini' anu ge' umas hal da samu'.
6
Ge', kira-kira wa' jam kasabalas, ini' anu ge' amput da laitn a' agi' agutn ge' ini' nyansana wa' ayoa', 'Jailah imu' agutn ka diah manganggur nyano-ano?'
7
Ayoa' nyansana wa'ini', 'Karna tinga ani da ngadu kai karaje.' Umpu' kabon dakoh nyansana wa' ayoa', 'Imu', anulah uga' ka kabon anggurko'.
8
Jangkah ano nga mule ngarum, umpu' kabon dakoh nyansana wa mandor a', 'Maba'talah ayo pakaraje ge' mayartalah wa' ayoa' upaha', gatnmule umpatn da paling unyhi' sampe da pamule.'
9
Jangkah ayoa' da gatn ngadu karaje wa' jam ka sabalas, utukng, masing-masing sok kaatn 1 dinar.
10
Jangkah ayoa' da gatn ngadu pamule bakaraje utukng ayoa' ngira ao' narima labih karah. Namun, ayoa' masing-masing uga' kaatn 1 dinar.
11
Jangfkah narima a', ayoa' mamprotes wa' umpu' kabon.
12
Ayoa' nyansana, 'Ayo sok da maruh paling unyhi' duhutn bakaraje 1 jam tuhi a', ge' akupm umas ayoa' samu' nige' kai, da nga nanggong beban ge' paras kuat nyano-ano.'
13
Tapi, umpu' kabon dakoh naham ge' nyansana wa' nyungan umpatn ayoa', 'Age, iko' ti' basara' wa'imu'. Inyata imu' laka sapakat nige' iko' ya' nyadinar?
14
Naaplah bagianmu' ge' anulah, tapi iko' mangkatn wa' da unyhi' diah, samu' ulah wa'dimu.
15
Aniah iko ti' gatnngijin umas jai pun da ko'ngatte wa' hartako sendiri? Ato, anita matu'mu' jahat karna iko' bait?"
16
Jadi, da unyhi ao' jadi da pamule, ge' da pamule ao' jadi da unyhi."
Yesus Nyansana Agi' manganai Pangkabis-A
17
Jangkah Yesus ao' anu ka Yerusalem, Ini' minsakng dua balas murid-A nige' cara tarpisah. Sadatn pajalatna', Ini' nyansana wa' ayoa',
18
"Ile'mih, ite' agi nuju Yerusalem ge' Anak Talino ao' gatnnyarah wa' imam-imam kapala ge' ahli-ahli Taurat. Ayoa' ao' manghukum-A nige' pangkabis.
19
Lalu, ayoa' ao' nyarah Ini' wa' pangijek, nyambuk ge' nyalib-A. Ge', ano da kataru Ini' ao' gatnngabangkit."
Pamahi Sino' umpatn Anak-Anak Zebedeus
20
Lakadakoh sino' umpatn anak-anak Zebedeus samahu ayo anak a' utukng wa' Yesus ge' basujud ya' mahi tarutn wa Yesus.
21
Ge', Yesus nyansana waini', "Jai da imu' ngatte?"
Sino' dakoh naham, "Ngadulah supaya kadua anakko' buleh unyung sadatn Karajaan-Mu, nyungan ka rarap sentao'-Mu ge' da nyungan ka rarap sengkiri'-Mu'."
22
Tapi, Yesus naham, "Imu' kati' ngarati jai da imu' mahi. Anita imu' sanggup nyucur cawan da arus Ko'nyucur?" Ayoa' nyansana wa' Yesus, "Ai', kai sanggup."
23
Yesus nyansana wa' ayoa', "Imu' memang ao' nyucur umpatn cawan-Ko, tapi ya' unyung ka sentao'-Ko ato sengkiri'-Ko, inyalah hak-Ko mangkatn a', tapi bagi ayoa' da nga Sama-Ko nyadia."
24
Jangkah sapuluh murid laitn ngadangah a', ayoa' baji' wa kadua agea' dakoh.
25
Namun, Yesus maba' ayoa' ge' nyansana, "Imu' pane bahwa ayo panguasa bangsa-bangsa laitn mamarintah atas ayoa', ge' sok ayoa' da kuat ao' manjalan wewenang atas ayoa'.
26
Saharus a' kati' ladakoh ka antara imu', tapi asi da ngatte jadi da paling ahyo ka antara imu', ini' arus jadi palayanmu.
27
Ge', asi saja da ngatte jadi da pamule ka antara imu', ini' arus jadi hambamu',
28
samu' ulah Anak Talino da utukng inya ya' gatnngalayan, tapi ya' malayani ge' mangkatn nyawa-A sebage tabusan bagi sok da karah. "
Dua Sok Buta Gatnngangkauhatn
29
Ge', jangkah ayoa' ngagatn Yerikho, kumpur sok karah nganang-A.
30
Ge', dua sok buta da agi' unyung ka pihik gala', jangkah ngadangah agah Yesus lewat, ayoa' ngampak, "Tuhan, Anak Daud, maseklah wa' kai!"
31
Sok karah nagor ayoa' supaya ayoa' madi'. Tapi malah, semangkin kuat ayoa' ngampak, "Tuhan, Anak Daud, maseklah wa' kai!"
32
Lalu Yesus baranti ge' maba' ayoa'. Ini' nyansana, "Jai da mu' ngatte Iko' umas ya' dimu?"
33
Ayoa' nyansana wa'-Ini', "Tuhan, kai ngatte matu' kai gatnmuka'."
34
Yesus targerak kat pamase' wa' ayoa', ge' minte matu' ayoa'. wa' jangkaha dakoh uga' ayoa' narima pamile a' agi', ge' nganang Yesus.
Chapter 21
1
Jangkah ayoa' laka riket ge' Yerusalem ge' laka utukng ka Betfage, ka bukit Zaitun, Yesus ngutus dua ungan murid-A.
2
Waat-A wa' ayoa', "Anuteetn ka desa da ani ka depanmu', ge' imu' ao' lansong amput nyungan keledai da gatnningo' ge' nyungan anak keledai samahu a'. Muhu mih pantingo' ayoa' ge' minsakng ta kadua a' wa'-Iko'.
3
Sak ani sok da muji' tarutn ka imu', imu' arus muji', Tuhan palalu a'', ge' Ini' ao' capat mangkure' a'."
4
Hal diah tajadi supaya ya' manggenapi jai da gatn nabi muji':
5
"Muji'lah wa' mahu Sion, mile'lah, Rajamu' utukng ka imu', rendah ate, ge' makka nyungan keledai nige' nyungan keledai angot, anak umpatn keledai beban.
6
Murid-murid anu ge' umas ulah da nga Yesus perintah wa' ayoa'.
7
Ayoa' minsakng keledai samahu ge' anak keledai dakoh, ge' mana' jubah-jubah ayoa' ka tumukng keledai-keledai dakoh. ge' Yesus unyung ka tumukng a'.
8
Nyabagi ahyo umpatn sok karah dakoh malampar jubah-jubah ayoa' ka gala', ge' da laitn a' nyantak daatn-daatn puutn, lalu nyarak a' ka gala'.
9
Karah sok bajalatn ka tura'-A ge' ayoa' da nganang a' ngampak,
"Hosana bagi Anak Daud!
'Gatnberkatlah Ini' da utukng sadatn gaatn Tuhan.'
Hosana ka tampat da paling nyamo!"
10
Jangkah Yesus maruh ka Yerusalem, smaan kota jadi bago. Ayoa' mansikatn, "Asilah Ini' diah?"
11
Ge', sok da karah naham, "Ini' anilah Nabi Yesus, umpatn Nazaret ka Galilea." Yesus Nyuci Bait Jabata
12
Lalu, Yesus maruh ka Bait Jabata ge' nguser ayo sok da agi' bajual ka Bait Jabata, lalu nyungkir balik meja-meja da ya' nukar uang ge' pangkeng-pangkeng ayoa' da nyual manuk-manuk acang.
13
Ini' nyansana wa' ayoa', "Ani tatulis, 'Ramin-Ko' ao' gatnmuji' ramin doa' tapi imu' umas jadi sarang ayo parampok."
14
Ge', sok da buta ge' uga da lumpuh utukng wa'-Ini' ka Bait Jabata, Lalu Ini' Ngangkauhatn ayoa'.
15
Tapi, jangkah ayo imam kapala ge' ahli-ahli Taurat mile' mujizat-mujizat da nga laka gatn Yesus umas ge' mile' anak-anak da ngampak sadatn Bait Jabata, "Hosana bagi Anak Daud," ayoa' jadi baji'.
16
Lalu, ayoa' mansikatn wa' Yesus, "Anita Akupm ani dangah da da gatn anak-anak muji'?"
ge', Yesus naham ayoa', "Ai'. Tinga suah a' imu' maca', 'Umpatn baba' kangot bayi ge' kagot-kangot da nyusu', Akupm nga nyiap pujian ya' adup-Mu sadi'?"
17
Lakadakoh, Yesus ngagatn ayoa' ge' mungkas umpatn kota dakoh ka Betania ge' bangarum ka teetn. Yesus Nyua' Kuasa Iman
18
Mati, wa' ano asat , jangkah Yesus malik ka kota, Ini' jadi siburuk.
19
Ge', jangkah mile' puutn ara ka pinggir gala', Ini' nutok a' ge' kati' ani amput jai-jai, kacuali dautn-dautn ja'. Ge', Ini' nyansana wa' puutn dakoh, "Kati' ao' suah agi' ani buah umpatn imu' sampe salama-lama a'!" Ano dakoh uga', puutn ara dakoh ngajadi karikng.
20
Jangkah murid-murid mile' hal diah, ayo murid terheran-heran ge' mansikatn, "Langkina puutn ara dakoh karikng tiba-tiba?"
21
Ge', Yesus naham ayoa', "Sasungguh a' iko' muji' wa'imu', sa' imu' umpu' iman ge' kati bimbang, imu' inya hanya ao' umas jai da gatnumas tarhadap puutn ara diah, bahkan sak imu' nyansana wa' gunung diah, 'Tarantatnlah ge' tacampaklah ka sadatn laut,' hal dakoh ao' tajadi.
22
Ge', tarutn jai pun da imu' mahi sadatn doa, pacayalah, imu' ao' kaatn a'. Pamimpin Yahudi Ragu wa' Kuasa Yesus.
23
Jangkah Yesus maruh ka Bait Jabata, ayo imam kapala ge' ayo ama-ama bangsa Yahudi utukng wa'-Ini' samantara Ini' agi' ngajar ge' mansikatn, "Nige' kuasa jailah Akupm umas hal-hal diah?
Ge', asilah da mangkatn-Mu' kuasa diah?"
24
Yesus naham ayoa', "Iko' uga' ao' mansikatn nyiteng hal wa'imu', da sak imu' bisa naham a', Iko' uga' ao' muji'kaimu' nige' kuasa jai Iko' umas smaan hal diah.
25
Umpatn umelah baptisan Yohanes? Umpatn surga ato umpatn talino?" Ge' ayoa' mule nyarita a' ka antara samu adup ayoa', waatn a', "Sak ite' muji', 'Umpatn Surga,' Ini' ao' muji' 'Kalo ladakoh, jai imu' kati' pacaya wa' Yohanes?'
26
Tapi ao'a, sak ite' naham, 'Baasal umpatn talino.' Ite' buut wa' sok karah karna ayoa' smaan muji' bahwa Yohanes anilah nabi."
27
Maka ayoa' naham Yesus, "Kai kati' pane."
Ge', kalo ladakoh, Iko' uga kati' ao' muji' ka imu' nige' kuasa jai Iko' umas hal-hal diah."
Parumpamaan manganai Dua Sok Anak
28
'Tapi, jai pandapatmu? ani sok da umpu' dua anak are, ge' ini' utukng wa' da ama ge' nayansana, 'Anakko, anu ge' bakarajelah ano diah ka kabon anggur.'
29
Ge', ini' naham, 'Ai', Sama', tapi ngalaka dakoh ini' kati' anu.
30
Lakadakoh sama' dakoh anu wa' da kadua ge' muji hal da samu'. Anak dakoh naham, 'Kati' tuh', tapi ni' nyasal ge' anu.
31
Asilah umpatn kadua anak dakoh da nurut wa' sama' a? Ayoa' muji', "Da tarakhir."
Yesus nyansana wa' ayoa', "Sasungguh a', iko' muji' wa'imu' bahwa ayo pangumpur pajak ge' lonte-lonte ao' maruh ka sadatn Karajaan Jabata nyantulu imu'.
32
Sabab, Yohanes utukng wa'imu' sadatn gala' da taman ge' imu' kati' tuh pacaya, tapi, ayo pangumpur pajak ge' lonte-lonte tuh pacaya. Ge', imu', jangkah mile' hal diah bahka kati' nyasal ngalaka a' singge imu' kaatn macaya a'.' Parumpamaan manganai Daumpu' ge' Danyewa Kabon Anggur
33
"Dangahlah Parumpamaan da laitn. Ani daumpu' kabon da mura' nyabuah kabon anggur, ge' masang paga ka kalilikng a', ge' ngari' tampat ngaccet anggur, ge' mantagutn menara. Lakadakoh, ini' nyewa kabon anggur a' wa' ani mani petani, ge' ini' barangkat ka luar negeri.
34
Jangkah musim buah hampir utukng, ini' ngutus panyangu-panyangu a' wa' petani-petani dakoh ya'nyamut buah a'.
35
Ge', ayo petani nangkap ayo palayan dakoh ge' mangkukng da nyungan, ge' ngamis da nyungan, ge' munu' da laitn a' nige' batu.
36
Nyakali agi', daumpu' kabon dakoh ngadu panyangu-panyangu da laitn, da labih karah daripada da katinga a'. Ge', ayo petani dakoh umas hal da samu' tarhadap ayoa'.
37
Pangkabas a', daumpu' kabon dakoh ngutus anak a' wa ayoa', waatn a', 'Ayoa' ao' manghormat anakko.'
38
Tapi, jangkah ayo petani dakoh mile' anak a', ayoa' nyansana ka antara ayo samu adup, 'Ini' anilah ahli waris, kaeh ite' ngamis ini' ge' ngarampas warisan a'.'
39
Lalu, ayoa' nangkap anak daumpu' kabon dakoh, nyangkahatn ka sato kabon anggur, ge' ngamis a'.
40
Karna dakoh, jangkah daumpu' kabon anggur dakoh utukng, jai da ao' ini' umas wa' petani-petani dakoh?"
41
Ayoa' nyansana wa'-Ini', "Ini' ao' mambinasa ayo sok jahe'. ge' ao' ngadu nyewa kabon anggur a' wa' petani-petani da laitn, da ao' nyarah wa'ini' buah-buah wa' musim a'."
42
Yesus nyansana wa' ayoa', "Anita imu' ti' suah maca sadatn Kitab Suci:
'Batu da gatnulak ya' tukang-tukang bangunan nga jadi batu penjuru.
Hal diah tajadi umpatn pihak Tuhan, ge' hal diah ajaib ka matu' ite'?
43
Karna dakoh, Iko nyansana wa' imu', Karajaan Jabata ao' naap umpatnimu' ge' ao' mangkatn wa' ayo sok da ngasel buah umpatn a'.
44
Ge', asi da jantu' ka tumukng batu diah ao' gatnmucuh bakaping-kaping; ge' asipun da gatn batu ngantuk ao' ancur."
45
Jangkah imam-imam kapala ge' ayo sok Farisi dangah parumpamaan-parumpamaan-A, ayoa' ngarati bahwa Yesus agi' nyansana manganai ayoa'.
46
Tapi, jangkah ayoa barusaha ya' nangkap Yesus, ayoa' buut wa' sok karah dakoh da nganggap Yesus anilah nabi.
Chapter 22
1
Yesus nyansana agi' ka ayoa' sadatn parumpamaan-parumpamaan, waat-Na,
2
"Karajaan Surga bisa gatn ngumpama ulah nyungan raja da umas pesta bainyha' ya' anak are'a.
3
Ge' ini' ngadu ayo panyagu'a ya' maba' ayo sok da laka gatn ngundang ka pesta dakoh, tapi ayoa' kati' ituh utukng.
4
Lalu, raja ngadu agi' ayo panyangu da laitn, waatna, 'Mujiatalah ka ayo sok da ngagatn ngundang. Ile', iko laka nyiap pangkumanko'. Lembu-lembu are ge' tarnak-tarnak da gatn ngamanu' samaana nga siap ta. Utuknglah ka paruman bainyha' diah.'
5
Tapi , ayoa' kati' padulia' ge' boho, da nyungan ka uma'a, da laitn ka usaha'a,
6
ge' da laitn'a nangkap ayo panyangu raja dakoh, nyiksa'a ge' ngamis'a.
7
Maka, sang raja baji', ge' ngutus tantara-tantara'a, mambinasa pangamis-pangamis dakoh, ge' nyahung kota ayoa'.
8
Lakadakoh, ini' nyansana ka ayo panyangua, 'Gawe bainyha' nga siap, tapi ayo sok da gatn ngundang dakoh kati' layak.
9
Ya' karna dakoh, anu mih ka gala'-gala' da ayho ge' ngundang mih nyamani karah sok da kaatn imu' amput ka gawe bainyhak diah.
10
Maka, panyangu-panyangu dakoh anu ka gala'-gala' ge' ngumpur samaan sok da ayo amput, da bait ge' da jahe'. Ge', tampat bainyha' dakoh panhu ge' ayo tamu.
11
Ao' ta, jangkah raja maruh ya' badaput nige' ayo tamui a', ini' mile' nyungan sok ka teetn, da kati' ngiak pangiak ya' gawe bainyha'.
12
Ini' nyansana wa' ini', 'Age,langkina imu' kaatn maruh ka diah tampa ngiak pangiak ya' gawe bainyha'? Ge',sok dakoh tatunguh.
13
Lakadakoh raja dakoh nyansana wa' panyangu-panyangu a', 'Ningo' barekng ge' kaja'a', ge' nyangkahatnta ini' ka sadatn tampat da galap da paling sato. Ka teetn, ao' ani unse' ge' karatok japu'.
14
Sabab, karah da gatnmaba', tapi iget da gatnmilih." Usaha Pamimpin Yahudi ya' Ngajerat Yesus
15
Lakadakoh, ayo Farisi anu ge' bapakat supaya ayoa' kaatn ngajerat Yesus nige' saratn-A.
16
Ge', ayoa' ngutus ayo murid ayoa' wa' Yesus samahu nige' ayo sok Herodian. Ayoa' nyansana, "Guru, kai pane bahwa Akupm jujur ge' ngajar gala' Jabata sadatn da taman. Akupm ti' buut wa' asi pun sabab Akupm kati' mile' muka'.
17
Kalo ladakoh,muji'ta pandapat-Mu wa' kai' Anita gatn ngataman ya' mayar pajak wa' kaisar ato kati'?
18
Ao'a ta, Yesus panane kajahatan ayoa' ge' nyansana, "Jailah imu' nyuba Iko', he munapik?
19
Nampilta wa' -Iko uang ya' pajak dakoh." Lalu, ayoa' nyarah nyakapikng dinar ka-Ini'.
20
Ge', Ini' nyansana wa'ayoa', "Gambar ge' tulisan asi diah?"
21
Ayoa' naham, "Kaisar."
Lakadakoh, Yesus nyansana wa' ayoa', "Oleh karna dakoh, mayarlah wa' kaisar hal-hal da kaisar umpu', ge' wa' Jabata hal-hal da anilah Jabata umpu'."
22
Jangkah dangah a', ayoa' aru herana', ge' ngagatn-A ge' anu. Usaha Sok Saduki ya' Ngajebak Yesus
23
Wa' ano da samu, ayo sok saduki, da nyansana bahwa kati' ani kabangkitan, utukng wa' Yesus ge' mansikatn wa'-Ini'.
24
Ayoa' muji', "Guru, Musa muji' bahwa sa' nyungan are kabis ge' kati umpu' anak, age da are harus kawin gek sautna ge' nyambung katurunan wa' age a' da kabis dakoh.
25
Mati', ani ijo' badadik ka antara kai. Da ama bainyha', ge' kabis tampa ani umpu' anak, ge' ngagatn sautn a' wa' agea.
26
Ladakoh uga nige' da kadua, da kataru, sampe da kaijo'.
27
Pangkabas umpatn samana', mahung dakoh kabis uga'.
28
Wa' ano kabangkitan, mahung dakoh jadi sautn asilah umpatn da ijo badadi' dakoh? Sabab, ayoa ' samaan laka kawin ge' ini'."
29
Ao'ata, Yesus naham ge' nyansana wa' ayoa', "Imu' ngasasat, kati' ngarati Kitab Suci atopun kuasa Jabata.
30
Sabab, wa' ano kabangkitan, ayoa' kati' kawin atopun gatnngawin, tapi ulah malaikat-malaikat ka surga.
31
Namun, manganai kabangkitan ayo sok kabis, tinga bah mu' maca jai da gatn muji' wa'imu' uleh Jabata,
32
'Iko'ta Jabata Abraham, Jabata Ishak, ge' Jabata Yakub'? Ini' inya Jabata sok kabis tapi Jabata sok da idup."
33
Jangkah ayo sok da karah dangah hal diah, ayoa' batol-batol heran wa' pangajaran-A. Hukum Dadumelah da Paling Penting?
34
Namun, jangkah ayo sok Farisi ngadangah bahwa Yesus laka umas ayo sok Saduki karatunguh, bakumpurta ayoa'.
35
Lakadakoh, nyiteng umpatn ayoa', nyungan ahli Hukum Taurat, mansikatn wa' Yesus ya' nguji-A,
36
"Guru, parintah dadume da paling penting sadatn Hukum Taurat?"
37
Ge', Yesus nyansana wa'ini', "Imu' harus nyayang Tuhan Jabatamu' nige' sapanhu atemu', ge' nige' sapanhu jiwamu', ge' nige'sapanhu pikiranmu'.
38
Diah anilah parintah da paling ayho ge' da uru.
39
Da kadua anilah ulah diah, 'Imu' harus nyayang samuadup kupm ulah adupmu.'
40
Sadatn kadua parintah diah, bagantong samaan Hukum Taurat ge' kitab ayo nabi." Mansikatn manganai Mesias
41
Mati', samantara ayo sok Farisi bakumpur samahu, Yesus mansikatn wa' ayoa',
42
"Langkina pandapatmu' manganai Kristus? Anak asilah Ini'?"
Ayoa' muji' wa'-Ini'. "Anak Daud."
43
Ini' muji' wa' ayoa', "Kalo ladakoh, langkinalah Daud, sadatn Roh, maba'-A 'Tuan', waatna,
44
Tuhan bafirman wa' Tuanko,
"Uyungta ka suutn sentao'-Ko',
sampe Iko' mana' ayo musuh-Mu ka saroh kaja'-Mu'.?
45
Sak Daud maba' Kristus jadi 'Tuan', langkina mungkin Ini' anilah anak Daud?"
46
Kati' nyunganpun da kaatn naham nyapatah kata pun wa'-Ini'. Ge', mule no dakoh, kati' ani sok da pagatn mansikatn partanyaan-partanyaan agi wa'-Ini'.
Chapter 23
1
Laka dakoh, Yesus nyansana ka ayo' sok dakarah ge murid-murid-A',
2
Ayo' ahli Taurat ge ayo' sok Farisimunyung ka samo' pankeng Musa.
3
Kat karna dakoh, sagale hal, dakarah da ayo' muji ka imu' umas ta lah ge memperhatilah. Ao' tapi, usah umsa a' parabuatan-parabuatan a' karna ayo' a' muji a', tapi kati umas a'.
4
Ayo' a' ninggo beban-beban da bahat ge' mana a' ka samo' kae' sok laitn. Ao' tapi, ayo' adup a' kati ituh nginsit a' nige taringgo' ayo' a'.
5
Ayo' a' umas a' samaan parabuatan ayo' a' sapaya gatn ayo' sok mile. Ayo' a' mampalabar tari-tari sembahyang a' ge mangkahyo rinde-rinde ujung jubah ayo' a'.
6
Ayo' a' suke tampat ta hormat sadatn perjamuan, tampat pantunjung ka tura ka sadatn sinagoge-sinagoge.
7
salam penghormatan ka tampat-tampat umum, ge gatn magaatn Rabi kat ayo' sok.
8
Ao tapi, usah gatn magaatn rabi karna hanya nyungan Gurumu', ge imu samaan nya age.
9
Iya gaatn magaatn asi saja sabage samma' mu' ka dunia diah karna nyungan sadi samma'mu', ai' dakoh Ini' da ka surga.
10
Iya uga imu' gatn magaatn pamimpin karna nyungan sadi Pamimpinmu', dakoh ta Kristus.
11
Namun, da paling ahyo ka antra imu' arus ta ini' jadi palayanmu'.
12
Asi da ngangkanyamo' adup a' ao' a' gatn randah a' adup a' ao' gatn ngannyamo a'.
13
Celakalah imu' ahli-ahli Taurat ge Ayo' sok Farisi, ayo' sok munafik! Imu' ngabut pintu Kerajaan Surga ka tura sok karna imu' sadi kati ngamaruh a' ge uga kati mengizinkan ayo' a' da sadang maruh yak ngamaruh a'.
14
Celakalah imu', he ahli-ahli Taurat ge ayo' sok Farisi, ayo' sok munafik! imu' melahap ramin ayo' janda ge yak pura-pura imu' umas doa-doa da angho'. Karna dakoh, imu' ao' narima hukuman da labih bahat.
15
Celakalah imu' he ahli-ahli Taurat ge ayo' sok Farisi, ayo' sok munafik! imu' menjelajahi lautan ka sadatn ge ka dayu yak minsakng ayo' sok maruh ka sadatn agamamu'. Ge, ketika ni' laka jadi salah satu a', imu' gatn jadi a' anak neraka, dua kali lipat daripada imu' sadi.
16
Calakalah imu', hei ayo' pamimpin buta, da nyansana, 'Asi da ba sumpah demi Bait Jabata, hal dakoh kati ani arti a'. Ao' tapi, asi da ba sumpah dakoh.'
17
Imu' da baga ge da buta! ume da paling ahyo, barawatn ato Bait Jabata da mengudus a' barawatn dakoh?
18
Ge, 'Asi da ba sumpah demi papante, sumpah dakoh kati ani arti a'. Ao' tapi, asi da ba sumpah demi parsambah ka sammo' papante dakoh, ini' ta tinggo kat sumpah a' dakoh.'
19
He imu' ayo' sok buta! ume da paling ahyo, parsambahan ato papante da ngudus a' parsambahan dakoh?
20
Karna dakoh, asi da ba sumpah demi papante, ba sumpah demi papante ge samaan da ani ka samo a'.
21
Ge, asi da ba sumpah demi Bait Jabata, ba sumpah demi bait Jabata ge demi Ini' da madi ka sadatn a'.
22
Ge, asi da ba sumpah demi surga, ba sumpah demi tahta Jabata, ge demi Ini' da munyung ka sammo' a'.
23
Calakalah imu, he ahli-ahli Taurat ge ayo' sok Farisi, Ayo' sok munafik! imu' mangkatn' parsepuluhanmu' umpat selasih, adas manis, ge jinta, tapi ngalaka nyapile hal-hal da labih bahatn umpatn Hukum Taurat, kohlah ka adilan, pamase, ge iman. Hal-hal diahlah da saharus a' laka imu' umas tanpa nyapile hal-hal da laitn.
24
Imu' pamimpin-pamimpin buta, da ma nyaring pantujok ge nalatn nyungan unta!.
25
Calakalah imu', he ahli-ahli Taurat ge ayo' sok Farisi, ayo' sok munafik! Sabab, imu' marasih bagian satto' galas ge pingatn mu', tapi bagian sadatn a' panhu rampasan ge keserakahan.
26
Imu' ayo' sok Farisi da buta! Marasih a' uru bagian sadatn galas ge pingatn, maka bagian satto' a' uga bisa jadi bersih.
27
Calakalah imu' ahli-ahli Taurat ge ayo' sok Farisi, ayo' sok munafik! Sabab, imu' samu nige' sibur da gatn ngecat ranak, wa bagian satto' a' gatn mile ulah lamus, tapi bagian sadatn a' panhu nige' turakng-turakng sok kabis ge samaan nabis ta.
28
Lahdakoh uge nige' imu', wa bagian satto' imu' tile taman bagi talino. Ao' tapi, wa bagian sadatn' imu' panhu kemunafikan ge kajahatan.
29
Calakalah imu', ahli-ahli Taurat ge ayo' sok Farisi, ayo' sok munafik! Sabab, imu' umas sibur-sibur ayo' nabi ge ngangkalamus tande-tande ayo' sok saleh,
30
ge nyansana, 'Jika kai laka idup wa masa samma moyang kai, kai kati ao' nangkap bagian nige' ayo' a' sadatn dayya ayo' nabi.'
31
Nige' lahdakohlah, imu' ba saksi tahadap adupmu' sadi bahwa imu' anilah kangod-kangod ayo' a' da ngamis ayo' nabi.
32
Jadi, nyukup ta lah ukuran ayo' samma moyangmu'.
33
Imu' nipa-nipa, katurunan nipa-nipa beludak, langkina imu' ao' ngarapas a' adup umpatn neraka?
34
Karna dakoh, mile mih, Iko' ngutus nabi-nabi, ayo' sok bijak, ge ahli-ahli Taurat wa imu'. nyamani umpatn ayo' a' ao' imu' ngamis ge nyalib a', nyamani ao' mangkung a' ka sinagoge-sinagogemu', ge imu' aniaya umpatn' kota ka kota.
35
supaya samaan dayya ayo' sok benar da gatn nuntokng a' ka tana paitn ao' utukng ka imu', mule umpatn' dayya Habel, sok da benar dakoh, sampe ka dayya Zakharia, kangod Berekhya, da imu' ngamis ka antara Bait Jabata ge papante.
36
Sesungguh a', iko' muji a' ka imu' bahwa samaan hal-hal diah ao' utukng samo generasi diah." Hukuman bagi Yerusalem
37
"Oh Yerusalem, Yerusalem, da ngamis ayo' nabi ge mono nige' batu ayo' a' da gatn ngutus ka a'. Betapa saring a' Iko' ngate ngumpul a' kangod-kangodmu' samahu, samu nige indo' siap ngumpul a' anak-anak a' ka saroh arad a', tapi imu' kati tuh.
38
Mile mih, raminmu gatn ngagatn ta bagimu' ge jadi sunyi.
39
Sabab, Iko' muji a' ka imu' bahwa mule mati', imu' kati ao' mile Iko' agi sampe imu' nyansana, 'Gatn berkatilah Ni' da utukng sadatn gaatn Tuhan.'"
Chapter 24
Khotbah Yesus Tentang Abas Zaman
Bait Jabata Ao' gantn Ngaruruh
1
Yesus mungkas umpatn Bait Jabata lalu ano waktu ayo' murid-A' utukng nujo a' bangunan-bangunan Bait Jabata wak'-A'.
2
Ge, Ni' mansikatn wak' ayo' a', "Kati' bak imu' milesamaan hal diah? Iko' magaatn a' da sebenar a' wak'mu' bahwa kati ani nyitengpun batu ka diah ao' gatn ngabiar a' ani ka sammo' batu da laitn, da kati ao' gatn ngaruruh a'." Mule Penderitaan
3
Ge, waktu Yesus munyung ka sammo' apar Zaitun, murid-murid utukng wak'-A' secara adup-adup a' ge nyansana, "magaatn ta lah wak' kai, ngina hal-hal dakoh ao' tajadi ge ani bak da ao' jadi tande pangkutukng-Mu' ge pangkabis zaman diah?"
4
Yesus naham ayo' a', "Perhatikanlah supaya usah ani sok da menyesat a' imu'.
5
Sabab, karah da ao' utukng sadatn gaatn-Ko' ge nyansana, 'Iko' anilah Kristus,' ge ayo' a' ao' menyesat a' karah sok.
6
Imu' ao' dangah peperangan ge agah-agah tentang perang. Perhatikanlah supaya imu' kati buut karna ha-hal diah harus ta jadi, tapi diah tinga pangkabas a'.
7
Sabab, bangsa ao' umpatn melawan bangsa, ge kerajaan ao' melawan kerajaan, ge ka berbagai tampat ao' ani saburuk ge gempa tana paitn.
8
Samaan hal diah anilah awal umpatn panderitaan anap baranak.
9
Laka dakoh, ayo' a' ao' mangkatn a' imu' wak' panganiaanyaan, ge ao' ngamismu, ge imu' ao' gatn ngarusi kat seluruh bangsa karna gaatn-Ko'.
10
Ka waktu dakoh, karah da ao' ta singkak, ge ao' saling mangkatn a', ge rusi nyungan samu laitn.
11
Karah nabi palsu ao' mampuang ge' nyesat a' karah sok.
12
Sabab, pelanggaran semakin ba tambah, kasih sok da karah ao' jadi pannud.
13
Ao' tapi, sok da ba tahan sampe abas ao' gatn nyelamat.
14
Ge, Injil Kerajaan diah ao' gatn ngagah ka samaan dunia sebagai kesaksian bagi samaan bangsa, ge laka dakoh pangkabas ao' utukng. Pandaritaan Ahyo ge Kristus-Kristus Palsu
15
"Jadi, jangkah imu' mile pembinasa keji, samu da gatn nabi Daniel muji, agutn ka tampat suci, arus ta lah ayo' da maca mamahami a'.
16
maka ayo' a' da ani ka Yehuda arus buho ka pengunungan.
17
Asi da ani ka samo seng ramin, iya lah ni' tusor yak nangkap jai pun umpatn sadatn ramin a'.
18
Asi da ani ka uma, iya ure yak nangkap jubah a'.
19
Namun, calakalah ayo' a' da sadang batahi ge ayo' a' da jangkah nyusu kangod a' ka ano-ano dakoh.
20
Badoa nih supaya pabohomu' iya ka musim pannud ato ka ano sabat.
21
Karna laka dakoh ao' ta jadi masa panderitaan ahyo, samu da tinga pernah ta jadi sajak pamule dunia sampe mati', ge kati ao' pernah ta jadi agi.
22
Ge, jika ano-ano dakoh kati gant ngankunok, kati ani idup da ao' gatn nyalamat a'. Namun, demi ayo' a' da gatn milih, ano-ano dakoh gant ngangkunok.
23
Laka dakoh, Jika anisok nyansana wak' imu', 'mile, Kristus ani ka diah,' ato 'Ni' ani ka teetn,' iya lah pacaya wak' a'.
24
Sabab, kristus-kristus palsu ge nabi-nabi palsu ao' muncul ge ao' bulah tande-tande mukjizat-mukjizat sehingga menyesatkan, jika mungkin , bahkan ayo' a'da gatn milih.
25
Perhatikanlah, Iko' laka muji a' wak'imu' katinga dakoh a'.
26
Jadi, jika ayo' a' nyansana wak' imu, 'mile, Ni' ani ka padang balantara,' iya ano ka teetn, ato 'mile, Ni' ani ka sadatn kamar dakoh,'iya pacaya ka ini'.
27
Sabab, samu ulah kilat da mancar umpatn timur ge babalo sampe ka barat, pangkoh uge pangkutukng anak talino ao' ta jadi.
28
Ka tampatn da ani bangke, ka dakohlah manuk nasar ao' ba kumpul." Pangkutukng Anak Talino.
29
"segera, ngalaka masa panderitaan dakoh, 'Matu ano ao' gatn jadi galap, ge buratn kati ao' mangkatn balo a', Bintakng-bintakng ao' ruruh umpatn rangit, ge kuasa-kuasa ka rangit ao' gatn ngoncang a'.
30
Lalu, tande Anak Talino ao' muncul ka rangit ge suku-suku ka tana paitn ao' sabal ate. Ayo' a' ao' mile Anak Talino utukng sadatn rahu-rahu ka rangit, nige' kuasa ge kamuliaan da ahyo.
31
Ge, Ni' ao' ngutus malaikat-malaikat-A' nige' saratn trompet da karas, ge ayo' a' ao' ngumpul a' umat pilihan-A' umpatn ke ampat penjuru tana paitn, umpatn ujung rangit da nyeteng ke ujung a' da laitn.
32
Mati', pelajarilah perumpamaan umpatn pu'ut ara jangkah da' at a' jadi lembut ge daut-daut a' narok, imu' nga panane bahwa musim paras nga jeket.
33
Lahkoh uga jangkah imu' mile samaan hal diah, imu' nga panane bahwa Ni' nga jeket, ka talubo pintu.
34
Sasungguh a', Iko' muji a' wak' imu' bahwa generasi diah kati ao' mua sampe samaan hal diah ta jadi.
35
Rabgit ge tana paitn ao' a' lanyap, tapi Firman-firman-Ko' kati ao' lanyap." Masa Pa jutukng Anak Talino
36
Ao' tapi, tentang ano ge waktu a', kati ani nyunganpun da pane, malaikat-malaikat ka surga uga kati, Sang Anak pun kati, tapi sang Bapa sadi.
37
Samu ulah da ta jadi ka zaman Nuh, lah dakoh uga pajutukng Anak Manusia ao' ta jadi.
38
Sabab, ulah ka ano-ano tinga paitn bah, ayo' a' uman ge nyucur , basautn ge gatn basaut a', sampe ka ano Nuh maruh ka sadatn Bahtera.
39
Ge, ayo' a' kati paham a' sampe paitn bah utukng ge me lanyap a' ayo' a' samaan; lah dakoh ugalah pa jutukng Anak Talino ao' a' ta jadi.
40
Laka dakoh, ao' ani dua sok ka uma; da nyungan ao' gatn naaf ge da nyungan ao' gatn nanggalatn.
41
Dua mahung ao' giling ka batu kilangan, da nyungan ao' gatn naaf ge da nyungan ao' gatn nganggat a'.
42
Karna dakoh, ba jage-jagelah karna imu' kati pane ka ano jai Tuhanmu' ao' utukng.
43
Namun, ngapananelah diah bahwa jika tuan ramin laka panane ngina, ka waktu ngarum, si parangko ao' utukng, ni' ao' ba jage-jage ge kati ao' ngabiar a' ramin a' gatn bongkar.
44
Kat karna dakoh, imu' uga arus siap sedia karna Anak talino utukng ka waktu da imu' kati nga duga a'. Hamba da Setia ge Hamba da Jahe'
45
"Lalu, asi duk hamba da setia ge bijaksana, da tuan a' ngankat sammo' samaan ramin a' yak mangkatn ayo' a' pangkuman ka waktu da tapat?
46
Gatn berkatilah hamba dakoh, da jangkah tuan a' utukng, tuan a' dakoh amputn ini' jangkah karaje la dakoh rupa.
47
Sa sungguh a', Iko' nyansana wak' imu' bahwa tuan dakoh ao' ngangkat hamba a' dakoh sammo' samaan pangumpu a'.
48
Namun, jika hamba da jahe' dakoh nyansana sadatn ate a', Tuanko' nunda utukng,'
49
Lalu ni' mule mangkung a' hamba-hamba da laitn, lalu uman serta nyucur samahu nige' da abok;
50
tuan umpatn hamba dakoh ao' utukng ka ano jangkah ni' kati harapkan a' ge ka waktu da kati ni' panane,
51
ge ao' nyangkalatn a' ge mana a' ni' samahu-mahu ayo' sok munafik. Ka tampatn dakoh, ao' ani unse ge kertak japu.
Chapter 25
1
"Lakadakoh, Karajaan Surga gatnumpama ulah sapulu dara da minsakng pelita-pelita a' ge' anu ya' nyamut penganten are.
2
Rima ka antara a' anilah baga, ge' rima da laitn a' anilah bijaksana.
3
Jangkah da baga dakoh minsakng pelita-pelita a', ayoa' kati' minsakng binyak samahu a'.
4
Tapi, da bijaksana minsakng binyak sadatn butol inek samahu nige' pelita-pelita ayoa'.
5
Mati', jangkah penganten are dakoh nunda pajutukng a', ayoa' smaan ngantuk ge' buus.
6
Tapi, wa' tuda' ngarum ani kampak, 'Penganten are utukng! Mungkaslah ya' nyamut a'!
7
Lakadakoh, smaan dara dakoh umpat ge' ngamas pelit-pelita ayoa'.
8
Ge', da baga nyansana wa' da bijaksana, 'Mangkatnlah wa' kai iget-iget binyakmu' karna pelita-pelita kai ampir kabis.'
9
Tapi, da bijaksana naham, 'Kati', ti' ao' cukup jana ya' kai ge' imu'. Labih bait, anulah wa' sok da nyual binyak ge' marilah ya' da adupmu'.'
10
Samantara ayoa' anu ya' mari, penganten are dakoh utukng, ge' ayoa' da siap, maruh samahu-mahu nige' ini' ka paruman gawe inyha', ge' pintu gatnngabut.
11
Ngalaka dakoh, utukng uga' dara-dara da laitna' ge' nyansana, 'Tuan, tuan! Nukas pintu bagi kai.'
12
Tapi, ini' naham a', 'Sasungguh a', iko' muji' kimu', iko' kati' kanalmu'.'
13
Uleh karna dakoh, bajaga-jagalah karna imu' ti' pane ano ato waktu a'." Parumpamaan tentang Taru Palayan
14
"Sabab, Karajaan Surga samu' ulah sook da ao' anu ka luar nagari, da maba' panyangu-panyangu a' ge' nyarah harta a' wa' ayoa'.
15
Wa' da nyungan, ini' mangkatn 5 talenta. Wa' da laitn a', 2 talenta, ge' wa' da laitn a' agi', 1 talentaa. Masing-masing sasue kamampuan a'. Lakadakoh, ini' anu.
16
Sok da narima 5 talenta dakoh lansong anu, ge' manjalan talenta dakoh, ge' ngasel 5 talenta agi'.
17
Ladakoh uga' da narima 2 talenta, ini' ngasel 2 talenta agi'.
18
Tapi, sok da narima 1 talenta dakoh anu, ngari' rubakng ka tana, ge' nyukatn uang tuan a'.
19
Tuhi' ngalaka dakoh, tuan umpatn panyangu-panyangu dakoh utukng ge' umas paritungan nige' ayoa'.
20
Sok da nga narima 5 talenta dakoh ngadap ge' minsakng 5 talenta agi', waat na', 'Tuan, akupm nyarah 5 talenta wa'iko'. Mile'lah, iko' nga ngasel 5 talenta agi'.'
21
Tuan a' muji' wa' ini', 'Lamus tao', panyangu da bait ge' da setia. Imu' setia nige' hal-hal da inek, iko' ao' ngangkat imu' wa' karah hal, maruhlah ka sadatn sukacita tuanmu'.'
22
Ge', sok da narima 2 talenta uga' manghadap ge' nyansana, 'Tuan, akupm nyarah 2 talenta wa'iko'. Mile', iko' nga ngasel dua talenta agi'.'
23
Tuan a' naham, 'Lamus tao', panyangu da bait ge' setia. Imu' nga setia nige' hal-hal inek, iko' ao' ngangkat imu' wa' karah hal, maruhlah ka sadatn sukacita tuanmu'.'
24
Lakadakoh, sok da narima 1 talenta uga' manghadap ge' nyansana, 'Tuan, iko' pane akupm sok da kejam, manen ka tampat da akupm ti' mura', ge' ngumpur ka tampat da akupm ti' ngamhur bane.
25
Karna dakoh, iko' buut, ge' anu ge' nyukatn a' talentamu' ka sadatn tana. Mile', akupm umpu'lah jai da jadi hartamu'.
26
Tapi, tuan a' naham ge' nyansana wa'ini', 'Imu' panyangu da jahe' ge' lansi! Imu' pane bahwa iko' manen ka tampat da iko' kati' mura' ge' ngubu' ka tampat da iko' kati' ngamhur bane'.
27
Karna dakoh, saharua a' imu' mana' uangko' ka bank ge' jangkah iko' ure', iko' ao' narima hartako' agi' nige' bunga a'.
28
Naaplah 1 talenta dakoh umpatn ini' ge' mangkatnlah wa' ini', da umpu' 10 talenta dakoh.
29
Sabab, satiap sok da ani umpu' ao' gatnmangkatn agi', ge' ini' ao' bakalimpahan. Tapi, umpatn sok da kati' ani umpu', bahkan jai da ini' umpu' ao' gatnnaap.
30
Nyangkahatnlah panyangu dakoh ka sadatn kagalapan da paling galap. Ka tampat dakoh ao' ani unse' ge' garet japu'." Panghakiman kat nak Talino
31
"Jangkah Anak Talino utukng sadatn kamuliaan-A, ge' ayo malaikat samahu-A, lalu Ini' ao' unyung ka takhta kamuliaan-A.
32
Smaan bangsa ao' gatnngubu' ka hadapan-A, ge' Ini' ao' misah ayoa' nyungan umpatn laitn a', ulah gembala da misah domba umpatn kambing-kambing,
33
Ge', Ini' ao' mana' domba-domba ka sabalah sentao'-A, ge' kambing-kambing ka sabalah kiri.
34
Lakadakoh Raja ao' muji' wa' ayoa' da ka sabalah sentao'-A, ' Kaeh , imu' da gatn Sama-Ko' memberkat, warisilah Karajaan da gatnnyiap ya' dimu' umpatn pamule dunia.
35
Karna jangkah Iko' saburuk, imu' mangkatn Iko' uman. Iko' aus ge' imu' mangkatn Iko' nyucur. Iko' jadi sok asing, ge' imu' ngadu Iko' maruh.
36
Iko' ugakng ge' imu' nakat Iko' pangiak. Iko' anapm ge' imu' mile' Iko'. Iko' ka panjara ge' imu' utukng wa'Iko'.'
37
Lalu, ayo sok taman dakoh naham -A, 'Tuan, ngina kai mile' Akupm saburuk ge' mangkatn-Mu' uman, ato aus ge' mangkat-Mu' nyucur?
38
Ngina kai mile' Akupm sook asing gen ngadu Akupm maruh, ato ugakng ge' nakat pangiak wa' Akupm?
39
Ngina kai mile' Akupm anapm ato ka panjara ge' kai utukng wa'- Akupm?'
40
Raja dakoh naham, 'Iko' muji' da sabatol a' wa'imu', samu ulah da imu' umas wa' nyungan umpatn age-age-Ko' da paling inek diah, imu' umas a' ya'-Diko'.'
41
Lakadakoh, Ini' ao' muji' uga' wa' ayoa' da ka sengkiri-A, 'Boholah umpat hadapan-Ko', imu' da tarkutuk, ka sadatn api kekal da nga gatnnyiap ya' Balis ge' malaikat-malaikat a'.
42
Sabab, Iko saburuk ge' imu' kati' mangkatn-Ko' uman. Iko' aus ge' imu' ti' mangkatn-Ko' nyucur.
43
Iko' sok asing ge' imu' ti' ngundang-Ko' maruh; ugakng ge' imu' ti' nakat Iko' pangiak; anapm ge' ka panjara, ge' imu' ti' mile' Iko'.'
44
Lakadakoh, ayoa' naham, 'Tuan, ngina kai mile' Akupm saburuk ato aus, ato sok asing, ato anapm, ato ugakng, ato ka panjara, ge' kati' malayan-Mu'?'
45
Lakadakoh, Ini' ao' naham ayoa', "Iko' muji' wa'imu'. ulah kina imu' ti' umas tarhadap nyungan umpatn ayoa' da paling inek diah, imu' kati' umas a' wa'-Iko'.'
46
Ge', ayoa' diah ao' anu ka sadatn panghukuman kekal, tatapi ayo sok da taman ka sadatn kahidupan kekal."
Chapter 26
1
Jangkah Yesus laka muji' smaan saratn-saratn diah, Ini' nyansana wa' ayo murid-A,
2
"Imu' pane bahwa dua ano agi' Paskah utukng ge' Anak Talino ao' gatnnyarah ya' gatnnyalib.
3
Lakadakoh, ayo imam kapala ge' ama-ama bangsa dakoh ao' gatnngumpur samahu ka istana Imam Ahyo, da bagaatn Kayafas.
4
Ge', ayoa' bapakat ya' nangkap Yesus nige' tipu daya ge' ngamis-A.
5
Tapi ayoa' muji', "Iya' pas parayaan supaya kati' ani karusuhan ka antara sok karah." Yesus Gatnngangkabinyak ya' Nyungan Mahu
6
Mati', jangkah Yesus ani ka Betania, ka ramin Simon si Kusta,
7
nyungan mahu utukng wa'-Ini' nige' nyabutol guci pualam ine' dabiatn binyak wangi da batol mahal, ge' mahu dakoh nuntokng a' ka tumukng abak Yesus jangkah Ini' agi' unyung uman.
8
Jangkah murid-murid mile' a', ayoa' baji' ge' nyansana, "Jai pemborosan diah?
9
Sabab, binyak wangi dakoh bisa gatn nyual nige' raga da mahal ge' gatnmangkatn wa' da papa."
10
Tapi, Yesus, panane hal diah, nyansana wa' ayoa', "Jai imu' nyusah mahu diah? Sabab, ini' umas parbuatan bait wa'-Iko'.
11
Sabab, imu' salalu umpu' ayo sok papa samahumu', tapi imu' kati' ao' selalu umpu' Iko'.
12
Jangkah mahu diah mubuh binyak wangi ka ungan-Ko', ini' umas a' ya' nyiap ano-Ko' gatnnyibur.
13
Iko' muji' da sabatol a' wa'imu' bahwa ka dume saja Injil diah gatnngabar ka smaan dunia diah, jai da nga gatn mahu diah umas ao' gatn nyarita uga' sebage peringatan ao' ini'." Rencana ya' Menghianati Yesus
14
Lakadakoh, nyungan umpatn kadua balas murid, da bagaatn Yudas Iskariot, anu wa' imam-imam kapala,
15
ge' nyansana, "Imu' ao' mangkatnko jai sak iko' nyarah Ini' wa'imu'?" Ge', ayoa' natap 30 kapikng perak ya' dini'.
16
Ge', mule dakoh, ini' najo kasampatan bait ya' nyarah Yesus. Paruman Paskah
17
Mati', wa' ano partama Roti Kati' Baragi, ayo murid utukng ka Yesus ge' mansikatn, ka ume Akupm ngate kai nyiap uman Paskah bagi-Mu'?"
18
Yesus naham, "Maruhlah ka kota, ka sook, ge' muji' wa'ini', 'Guru muji' "Waktu-Ko' nga jiket. Iko' ao' meraya Paskah ka raminmu' samahu murid-murid-Ko'.
19
Ayo murid umas samu da Yesus laka bapesan ka ayoa' ge' nyiap Paskah dakoh.
20
Mati', jangkah mule ngarum, Yesus unyung uman samahu nige' kadua balas murid.
21
Ge', waktu ayoa' agi' uman, Ini' nyansana, "Iko muji' da sabatol a' wa'imu' bahwa salah satu umpatn imu' ao' manghianati Iko'."
22
Ayoa' batol susah ge' masing-masing sok mule nyansana wa'-Ini', "Da pasti a', inya iko' Tuhan?"
23
Ge', Ini' naham, "Ini', da nyihup barekng a' ka sadatn mangkok samahu-mahu Iko', ini'talah da ao' manghianati Iko'.
24
Anak Talino ao' anu ulah da tatulis manganai Ini'. Tapi, celakata sok dakoh, da karna a' Anak Talino gatnhianati! Ao' labih bait bagi sok dakoh sak ini' kati' suah gatnbaranak."
25
Lakadakoh Yudas, da ao' nyarah Yesus, nyansana wa'-Ini', "Pasti inya iko', Rabi?" Yesus nyansana wa'ini', "Imu' ngalaka muji' a'." Peringatan ao' Ungan ge' Daya' Kristus
26
Jangkah ayoa' agi' uman, Yesus naap roti. Ge', ngalaka memberkat a', Yesus matah-matah a' ge' mangkatn a' wa' ayo murid nige' nyansana, "Naaplah ge' umanlah, diah anilah ungan-Ko'."
27
Lakadakoh, Ini' naap cawan, ngucap syukur, ge' mangkatn a' wa' ayoa', waat-A, "Imu' smaan, nyucurtalah umpatn diah.
28
Sabab, diah anilah daya'-Ko', daya' perjanjian, da gatn nuntokng ya' sok karah ya' ngampun duse-duse.
29
Iko' muji' wa' imu' bahwa Iko' kati' ao' nyucur asil puutn anggur diah, umpatn mati' sampe ano dakoh , jangkah Iko' nyucur anggur da bahu samahu imu' sadatn karajaan Sama'-Ko'."
30
Ngalaka ngado nyabuah lagu, ayoa' anu ka bukit Zaitun. Petrus Ao' Nyangkal Yesus
31
Lakadakoh Yesus nyansana wa' murid-murid-A, "Imu' smaan ao' tasingkak karna Iko' ngarum diah. Karna ani tatulis,
'Iko' ao' mangkukng gembala,
ge' domba-domba umpatn kalumpok dakoh ao' tacire -bare.'
32
Tapi ngalaka Iko' bangkit, Iko' ao' nyantulu' imu' ka Galilea."
33
Petrus nyansana, "Biarpun smaan tasingkak karna-Mu', iko' kati' ao' suah tasingkak."
34
Waat Yesus kaini', "Iko' muji' da sabanara kaimu' bahwa wa' ngarum diah, katinga siap ngangkuak, imu' ao' nyangkal Iko' taru kali."
35
Petrus nyansana wa'-Ini', "Sekalipun Iko' arus kabis samahu-Mu', Iko' kati' ao'nyangkal-Mu!" Smaan murid da laitn uga' muji' hal da samu'. Yesus Badoa ka Getsemani
36
Lakadakoh Yesus utukng samahu ayo murid-A ka tampat da bagaatn Getsemani ge' Ini' nyansana wa' ayo murid-A, "Unyunglah ka diah, samantara Iko' ka teetn ya' badoa."
37
Ge', Ini' minsakng Petrus ge' kadua anak Zebedeus samahu-A, ge' Ini' mule baduka ge' susah ate.
38
Lakadakoh, Ini' nyansana wa' ayoa', "Ate-Ko' aru tao sedih, bahkan ulah ngate kabis sa' a'. Madi'lah ka diah ge' tatapta bajaga-jaga samahu-Ko."
39
Ge', Ini' agak ngajauh, lalu sujud nige' muka-A sampe ka tana ge' badoa, waat-A,
"Sama'-Ko', sak mungkin, teak'lah cawan diah gatnngalewat umpatn-Ko'. Tapi, iyak ulah da gatn Iko' ngate, tapi da ulah Imu' ngate."
40
Lakadakoh, Ini' utukng wa' murid-murid-A ge' amput ayoa' agi' buus. Lalu, Ini' nyansana wa' Petrus, "Jadi, imu' kati' sanggup bajaga-jaga samahu Iko' salama 1 jam?
41
Bajaga-jaga ge' badoalah supaya imu' iya' jantu ka sadatn pancobaan. Roh memang panurut tapi dagin lamah."
42
Yesus anu agi' ya' kadua kalia' ge' badoa, waat-A, "Sama'-Ko', sak diah kati' kaatn gatnngalewat kacuali Iko' nyucura, kahandak-Mulah da ao' tajadi."
43
Nyasidah agi', Ini' utukng ge' amput ayoa' buus karna matu' ayoa' rasa bahat.
44
Maka, Ini' ngagatn ayoa', ge' Ini anu agi', lalu badoa ya' kataru sidah a', ngucap saratn-saratn da samu'.
45
Lakadakoh Yesus malik wa' murid-murid ge' nyansana, "Buusmih mati' ge' istirahat ta. Mile', waktua' mangkin jiket ge' Anak Talino ao' gatn nyarah ka barekng ayo sok baduse.
46
Umpatlah, kaeh ite' anu. Mile', sok da nyarah Iko' nga jiket." Yesus gatn Nangkap
47
Samantara Yesus maseh nyansana, Yudas, nyungan umpatn kadua balas murid dakoh utukng. Samahu-mahu nige' ini', kubu' ahyo sok karah nige' padang ge' pamukol, umpatn imam-imam kapala ge' ama-ama bangsa dakoh.
48
Mati', ini' da nyarah Yesus mangkatn ayoa' tande, waat a', "Asi da ko' nyium, kohtalah Ini', nangkaplah Ini'."
49
Yudas capat-capat ngariket Yesus ge' nyansana, "Salam, Rabi! Ge', Yudas nyium-A.
50
Yesus nyansana wa'ini', "Kawan, umaslah maksud pajutukngmu."
Lakadakoh sok karah dakoh ngariket, mana' barekng wa' Yesus, ge' nangkap-A.
51
Ge', mile', nyungan umpatn ayoa' da samahu Yesus nyulok barekng a', narik padang a', ge' nyarang hamba imam ahyo dakoh, ge' mutong rajak a'.
52
Lakadakoh, Yesus nyansana wa'ini', "Mangkure' padangmu' ka tampat a', karna smaan da manggune padang ao' binasa gatn padang.
53
Ato, imu' ngira iko' ti' aba' mahi wa' Sama'-Ko', ge' Ini', mati' uga', ao' mangkatn rabeh dua balas pasukan malaikat ya'-Iko'?
54
Tapi, langkina lakadakoh Kitab Suci ao' gatnganap da muji' bahwa arus tajadi ladakoh?
55
Waktu dakoh ta, Yesus nyansana wa' sok karah dakoh, "Anita ulah malawan parampok imu' mungkas nige' padang ge' pamukol ya' nangkap Iko'? Bilakng kano, Iko' unyung ngajar ka Bait Jabata ge' imu' kati' nangkap Iko'.
56
Tapi ao' a, smaan diah tajadi supaya kitab-kitab ayo nabi gatngenap."
Lakadakoh, smaan murid ngagatn-A ge' boho. Ayo Pamimpin Yahudi Manghakimi Yesus
57
Ayoa' da nangkap Yesus minsakng-A wa' Kayafas, sang Imam Ahyo, tampat ayo ahli-ahli Taurat ge' ayo ama-ama bakumpur samahu.
58
Lalu, Petrus nganang Yesus umpatn jauh sampe ka kalangan ramin imam ahyo. Ge', Petrus maruh, unyung samahu ayo pangawal ya' mile' pangkabas a'.
59
Mati', ayo imam kapala ge' smaan Sanhedrin najo kesaksian palsu tarhadap Yesus supaya kaatn ngukum kabis Ini'.
60
Tapi, ayoa' kati' kaatn amput a' biarpun karah saksi laceh da utukng. Lakadakoh, ani dua sok da muncol,
61
ge' nyansana, "Sok diah nyansana,'Iko' aba' ngaruboh Bait Jabata ge' mantagutn a' agi' sadatn taru ano."
62
Lakadakoh, Imam Ahyo agutn ge' nyansana wa' Yesus, "Kati a' Akupm ani jawaban? Jai da ayo sok diah nyaksi tarhadap-Mu'?"
63
Tapi, Yesus tatap tunguh. Ge', Imam Ahyo dakoh nyansana wa' Yesus, "Iko' nyumpah-Mu dmi Jabata da idup biar Akupm muji' ka kai, anita Akupm anilah Mesias, Anak Jabata?"
64
Yesus nyansana wa'ini', "Imu' sadi' nga muji' a'. Tapi, Iko' muji' wa'imu' bahwa mule umpatn mati' imu'ao' mile' Anak Talino unyung ka sabalah sentao' Da Mahakuasa, ge' utukng ka tumukng rahu'-rahu' ka rangit."
65
Lakadakoh, Imam Ahyo ngarantak pangiak a' ge' nyansana, "Ini' nga manghujat! jailah agi' palalu saksi? Mile', mati' imu' nga dangah hujatan-hujatan-A.
66
Langkina pamimpin Yahudi dakoh naham, "Ini' pantas gatnhukum kabis."
67
Lakadakoh, ayoa' ngaruja' muka-A ge' ninggu-A. Ge', da laitn nampar-A.
68
Ayoa' nyansana, "Banubuatmih tarhadap kai, he Mesias; asilah da mukol Akupm?" Petrus Kati' Ngako Yesus
69
Mati', Petrus unyung ka sato kalangan ge' nyungan palayan mahu utukng wa'ini' ge' nyansana, "Imu' uga samahu nige' Yesus, sok Galilea dakoh."
70
Tapi, Petrus nyangkal a' ka tura' ayoa' smaan, waat a', "Iko' kati' pane jai da imu' nyarita."
71
Jangkah Petrus mungkas ka pintu gerbang, palayan mahu da laitn a' mile' ini' ge' nyansana wa' ayo sok da ani ka teetn, "Sok diah samahu-mahu nige' Yesus umpatn Nazaret dakoh."
72
Ge', nyasidah agi' Petrus nyangkal a' nige' sumpah, 'Iko' ti' kanal Sok dakoh."
73
Kati' tuhi' lakadakoh, ayo sok da agutn ka dakoh ngariket Petrus ge' nyansana, "Pasti imu' uga' anilah salah satu umpatn ayoa' karna logatmu' jelas nandemu'.
74
Lakadakoh, Petrus mule ngutuk ge' basumpah, waat a', "Iko' kati' kanal Sok dakoh." Ge', tiba-tiba, siap abakng ngangkua'.
75
Ge' Petrus teringat ka saratn Yesus, "Katinga siap abakng ngangkua', imu' ao' nyangkal Iko' taru sidah." Lakadakoh, Petrus mungkas ge' munse' nige' aru sedih.
Chapter 27
1
Mati', jangkah asat utukng, smaan imam kapala ge' ayo ama-ama bangsa dakoh naap kaputusan samahu tentang Yesus ya' ngukum kabis Ini'.
2
Ge', ayoa' ningo' Yesus, lalu minsakng ge' nyarah-A wa' gubernur Pilatus. Yudas Ngamis Adup
3
Jangkah Yudas, da nyarah Yesus, mile' bahwa Yesus gatnangkatn hukuman, ini' rasa nyesal ge' mangkure' 30 kapikng pirak wa' imam-imam kapala ge' ayo ama-ama,
4
waatn a', "Iko' nga baduse karna nyarah daya' da ti' basara."
Tapi, ayoa muji', "Jai urusan a' nige' kai? Dakoh urusanmu'!"
5
Ge', Yudas nyangkahatn kapikng-kapikng pirak dakoh ka Bait Jabata ge' ngagatn a'. Lalu, ini' anu ge' gantong adup a'.
6
Tapi, imam-imam kapala naap kapikng-kapikng pirak dakoh ge' muji', "Kati' gatnmurokng ya' mana' a' ka sadatn kas karna diah anilah raga daya'."
7
Maka, ayoa' naap kaputusan samahu ge' nige' uang dakoh, ayoa' mari tana tukang pariok sebage tampat sibur ya' ayo sok asing.
8
Kohtalah sabab a', tana' dakoh gatnmuji' 'Tana Daya' sampe no diah,
9
Nige' ladakoh, ganaplah jai da gatn Nabi Yeremia muji':
10
Ayoa' manggune 30 kapikng pirak ya' mari tana tukang pariok, ulah da nga Tuhan parintah wa'iko'." Yesus ge; Gubernur Pilatus
11
Mati', Yesus agutn ka tura' Gubernur ge' Gubernur mansikatn wa'-Ini', "Diu'ta Akupm Raja sok Yahudi?"
Waat Yesus, "Ai', ulah da imu ngamuji."
12
Tapi, jangkah Ini' gatn imam-imam kapala ge' ayo ama-ama nuduh, Ini' ti' naham jai pun.
13
Lakadakoh, Pilatus nyansana wa'-Ini', "Anita Akupm ti' dangah batol karah ayoa' da nuduh Akupm?"
14
Tapi, Yesus ti' naham Pilatus, biar ya' nyiteng tuduhan pun singge gubernur dakoh aru heran. Pilatus Gagal Ngarapas Yesus
15
Mati', wa' satiap ari raya, Gubernur biasa ngarapas bagi sok karah, nyungan tahanan da gatn ayoa' ngatte.
16
Wa' ano dakoh, Ayoa' ani umpu' tahanan da terkenal, da gatnmuji' Barabas.
17
Jadi, jangkah sok karah bakumpur, Pilatus mansikatn wa' ayoa', "Asilah da mu' ngatte ya' gatnngarapas, Barabas ato Yesus, da gatnmuji' Kristus?"
18
Sabab, Pilatus pane bahwa karna iri, ayoa' nga nyarah Yesus wa'ini'.
19
jangkah Pilatus agi' unyung ka karusi pangadilan, sautn a' ngirim pusutn wa'ini', "Iya' umas jai pun tarhadap Sok tsmsn dskoh. Sabab, iko nga menderita karah macam ano diah sadatn mimpi karna Ini'."
20
Tapi, ayo imam kapala ge' ayo ama-ama nganjong sok karah ya' mahi Barabas ge' ngamis Yesus.
21
Gubernur mansikatn wa' ayoa', "Da dume umpatn kadua sok dakoh da imu' ngatte ya' iko' ngarapas bagimu? ge', ayoa' nyansana, "Barabas!"
22
Pilatus nyansana wa' ayoa', "Kalo daladakoh, jailah da arus ko'umas nige' Yesus da gatb muji' Kristus?" Ayoa' smaan muji', "Nyalib Kini'!"
23
Ge', Pilatus mansikatn, "Kajai? Ini' nga umas kajahatan jai?'
Tapi, ayoa' ngampak labih kuat agi', "Nyalib Kini!"
24
Jangkah Pilatus mile' bahwa ini' ti' aba' nyelesai jai pun, malah karusuhan mule tajadi, ini' naap paitn ge' nyuci barekng a' ka tura' sok karah dakoh ge' nyansana, "Iko' ti' basara tumukng daya' Sok diah. Dakoh urusan adupmu!"
25
Ge', smaan sok dakoh naham, "Daya'-A ani atas kai ge' anak-anak kai!"
26
Lakadakoh, Pilatus ngarapas Barabas bagi ayoa' ge' ngalaka nyambuk Yesus, Pilatus nyarah Ini' ya' gatnnyalib. Sardadu Pilatus Mangolo'-olo' Yesus
27
Lakadakoh, ayo sardadu gubernur minsakng Yesus ka markas pamadi' gubernur ge' ngumpur smaan pasukan Romawi ngangkalilikng Ini'.
28
Ayoa' muka' baju Yesus ge' nakkat jubah ungu wa-Ini'.
29
Ge', ngalaka manganyam nyabuah mahkota dabaunak samahu-mahu, ayoa' nakkat a' ka abak Yesus, nyasantak buro' wa' barekng sentao'-A, ge' basujud ka tura'-A, ge' mangijek Ini',waat ayoa', "Salam, Raja sok Yahudi!"
30
Ayoa' ngaruja'-A, naap buro' dakoh, lalu mantokng a' ka abak-A.
31
Ngalaka ayoa' mangejek Ini', ayoa' muka jubah ungu dakoh umpatn Yesus, ge' agi' nakkat pangiak -A sendiri, ge' minsakng-A anu ya' nyalib-A. Yesus Gatnnyalib
32
Jangkah ayo sardadu dakoh mungkas, ayoa' amput nyungan are umpatn Kirene da bagaatn Simon. Ayoa' makse Simon ya' mikul salib Yesus.
33
Ge', jangkah utukng ka nyabuah tampat da bagaatn Golgota, da bararti "Tampat Tengkorak",
34
ayoa' mangkatn-A anggur ya' gatnnyucur da gatnnyampur nige' ampadu, ge' ngalaka nyacap a', Ini' kati' ittuh nyucura'.
35
Jangkah ayoa' manyalib Yesus, ayoa' magi-magi pangiak-A ka antara ayoa' nige' matatn undi.
36
Lakadakoh, ayoa' unyung ge' mangawasi-A ka dakoh.
37
Ge', ka tumukng abak-A ayoa' masang tuduhan tarhadap-A, "DIAHTALAH YESUS, RAJA SOK YAHUDI.'
38
Jangkaha dakoh, ani dua panjahat da gatnnyalib samahu nige' Yesus. Nyungan ka suutn sentao' ge' da nyungan ka suutn sengkiri.
39
Ge', ayo sok da nabo', manghujat Ini gae gileng-gileng abak,
40
ge' nyansana, "Akupm da ao' ngaruboh Bait Jabata ge' mantagut a' agi' sadatn taru ano, nyalamatmih adup-Mu sendiri! Sa' Akupn Anak Jabata, susor umpatn salib dakoh!".
41
Ladakoh uga' imam-imam kapala, samahu ayo ahli Taurat, ge' ayo ama-ama ngijek Yesus, waat ayoa,
42
"Ini' nyalamat sok laitn, tapi Ini' ti' kaatn nyalamat Adup-A sendiri. Sa' Ini' anilah Raja Israel, tea'lah Ini' susor umpatn salib mati' diah ge' ite' ao' pacaya wa'-Ini.
43
Ini' pacaya wa' Jabata, maka tea'lah Jabata da nyalamat-A mati', sa' Jabata manghendaki-A. Karna Adup-A ta da muji', 'Iko anilah Anak Jabata."
44
Ayo panjahat gatn nyalib samahu' nige' Ini' uga' ngijek-A.
Pangkabis Yesus
45
Mati', umpatn jam kainum, kagalapan tumukng smaan tana' dakoh, sampe jam kapire.
46
Kira-kira, wa' jam kapire, Yesus ngampak nige' saratn da kuat, waatn-A, "Eli, Eli, lama sabakhtani?" da ratia, "Jabata-Kom Jabata-Ko, jailah Akupm ngagatn Iko'?"
47
Ge', nyamani umpatn ayoa' da agutn ka teetn, jangkah ayoa' ngadangah dakoh, ayoa' nyansana, "Sok diah agi' maba' Elia."
48
Tiba-tiba, nyungan umpatn ayoa' talama', ge' naap bunga karang, masa a' nige' paitn anggur masum, ge' ninggo'a' wa' nyabuah buro', ge' mangkatn a' wa' Yesus ya' gatnnyucur.
49
Tapi, da laitn a' nyansana, "Kaeh ite' ile', diu'ta Elia ao' utukng nyalamat-A."
50
Ge', Yesus ngampak nyasidah agi' nige' sarat da kuat ge' nyarah Roh-A.
51
Ge', ile', saput sadatn Bait Jabata rarak jadi dua bagian, umpatn samoo sampe ka saroh, ge' bumi baguncang, ge' batu'-batu' tabatah.
52
Sibur-sibur tabuka, ge' karah ungan ayo sok da suci da laka kabis gatnngabangkit.
53
Ge', ngalaka mungkas umpatn sibur-sibur a', ngalaka kabangkitan Yesus, ayoa' maruh ka kota suci ge' nyua' adup a' wa' sok karah.
54
Mati', kapala pasukan, ge' ayoa' da samahu nige'a' mangawasi Yesus, jangkah ayoa' mile' gempa bumi ge' smaan hal da tarjadi diah, ngajadi aru buut a' ge' nyansana, "Taman, Ini' anilah Anak Jabata!"
55
Ka teetn, ani karah mahu da mile' umpatn jauh, da nganang Yesus umpatn Galilea ya' malayan Ini'.
56
Ka antara ayoa' ani Maria Magdalena, Maria sino' Yakobus ge' Yusuf, uga' sino' umpatn anak-anak Zebedeus.
Yesus Gatnnyibur
57
Jangkah ano mule ngarum, utukngta nyungan da kaya umpatn Arimatea da bagaatn Yusuf, da uga' nga jadi murid Yesus.
58
Ini' anu wa' Pilatus ge' mahi ungan Yesus. Lalu, Pilatus mangkatn parintah ngadu mangkatn ungan Yesus wa' Yusuf.
59
Ge, Yusuf naap ungan Yesus, ge' mungkus-A nige' saput blacu da barasih,
60
ge' magurikng-A sadatn sibur da bahu, da adup a', da laka gatn ngari' wa' talidi batu'. Lalu, Yusuf mangguling nyabuah batu' ahyo ka pintu sibur dakoh ge' anu.
61
Ge', ka teetn, ani Maria Magdalena ge' Maria da lain agi' unyung ka tura' sibur dakoh.
Kubur Yesus Gatnjaga
62
Wa' jakkap anoa', kohta ano ngalaka parsiapan ya' Sabat, imam-imam kapala ge' ayo sok Farisi gatnngumpur ka hadapan Pilatus.
63
Ayoa' nyansana, "Tuan, kai sanuut bahwa jangkah si lacceh dakoh maseh idup, Ini' suah nyansana, "Ngalaka taru ano, Iko' ao' bangkit agi'.'
64
Karna dakoh, marintahmih supaya sibur dakoh gatnngajaga sampe ano da kataru, asi pane ayo murid-A mungkin utukng ge' nangko-A, ge' nyansana, "Ngalaka taru ano, Iko' ao' bangkit agi','
Ge', panipuan da unyhi' ao' labih jahe' daripada da pamule a'."
65
Pilatus nyansana wa' ayoa', "Imu' ani umpu' panjaga. Anu, jagamih ulah jai da imu' pane."
66
Lalu, ayoa' anu ge' ngaman sibur dakoh samahu nige' regu panjaga, ge' nyigel batu' panutup sibur.
Chapter 28
1
Mati', ngalaka Sabat jangkah ngana' asat, wa' ano pamule minggu dakoh, Maria Magdalena ge' Maria da laitn anu mile' sibur dakoh.
2
Ge, mile', tajadi gempa bumi da ahyo karna Malaikat Tuhan disah umpatn surga, utukng mambarikng batu dakoh, lakadakoh unyung ka tumukng a'.
3
Bahas a' ulah kilat ge' pangiak a' ranakng ulah salju.
4
Karna rasa buut wa' ini', ayoa' da ngajaga dakoh taguncang ge' ngajadi ulah sok da kabis.
5
Ge', malaikat dakoh nyansana wa' mahu-mahu dakoh, "Iya' buut karna iko' pane kalo imu' najo Yesus da nga gatnnyalib.
6
Ini' ti' ani ka diah karna Ini' nga bangkit ulah da gatn-Na' muji'. Kaeh, ile'lah tampat Ini' gurikng.
7
Capatlah anu ge' muji' ka ayo murid-A bahwa Ini' nga bangkit umpatn antara sok kabis, ge' ile', Ini' nyantulu' imu' ka Galilea. Ka teetn, imu' ao' mile' Ini'. Mamparhatita, iko' nga muji' a' wa'imu'."
8
Ge', ayoa' galabak- abak ngagatn sibur dakoh nige' rasa buut ge' sukacita ahyo; ge' talama' ya' mangkatn pane wa' ayo murid-A.
9
Ge', ile', Yesus amput ayoa' ge' nyansana, "Salam!" Lalu, ayoa' utukng wa' Yesus, minte kaja'-A, ge' nyambah-A.
10
Lakadakoh, Yesus nyansana wa' ayoa', "Iya' buut; anu ge' muji'lah wa' age-age-Ko' ya' anu ka Galilea, ge' ka teetn ayoa' ao' mile' Iko'." Ayo Panjaga Sibur Gatnmayar ya' ya' Ngalaceh
11
Samantara ayoa' anu, bamani panjaga dakoh anu ka kota ge' muji wa' imam-imam kapala tentang smaan hal da nga tajadi.
12
Ge', jangkah ayoa' gatnngumpul samahu ayo tua-tua. Ngalaka barunding, lalu ayoa' mangkatn uang karah wa' ayo panjaga dakoh,
13
ge' muji', "Muji' alah, 'Murid-murid Yesus utukng wa' ngarum ano ge' nangko-A waktu kai buus.'
14
Ge', sak hal diah tadangah ka gubernur, kai ao' ngayakin a' ge' ngadumu' kati camas."
15
Maka, ayoa' nyamut uang dakoh ge' umas ulah da gatnngadu wa' ayoa'; ge' saratn dakoh maseh tarsebar ka antara sok Yahudi sampe ano diah. Amanat Agung Yesus
16
Lakadakoh, kasabalas murid anu ka Galilea, ka bukit da nga gatn Yesus nujo' wa' ayoa'.
17
Jangkah ayoa' mile' a', ayoa' nyambah-A, bamani ani da ragu.
18
Lalu, Yesus utukng ge' muji' wa' ayoa', "Smaan kuasa nga gatnmangkatn wa'-Iko', ka surga atopun ka bumi.
19
Karna dakoh, anulah ge' umaslah smaan bangsa jadi murid, baptislah ayoa' sadatn gaatn Sama', Anak, ge' Roh Kudus,
20
jarlah ayoa' ya' nganang smaan da Iko' merintah wa' imu'; ge' mile'ta, Iko' salalu samahumu', bahkan sampe wa' pangkabas zaman."
