To view a copy of the CC BY-SA 4.0 license visit
http://creativecommons.org/licenses/by-sa/4.0/
Below is a human-readable summary of (and not a substitute for) the
license.
You are free to:
-
Share — copy and redistribute the material in any medium or
format.
-
Adapt — remix, transform, and build upon the material for any
purpose, even commercially.
The licensor cannot revoke these freedoms as long as you follow the
license terms.
Under the following conditions:
-
Attribution — You must attribute the work as follows: "Original
work available at https://BibleInEveryLanguage.org." Attribution
statements in derivative works should not in any way suggest that we
endorse you or your use of this work.
-
ShareAlike — If you remix, transform, or build upon the
material, you must distribute your contributions under the same
license as the original.
-
No additional restrictions — You may not apply legal terms or
technological measures that legally restrict others from doing
anything the license permits.
Notices:
You do not have to comply with the license for elements of the material in
the public domain or where your use is permitted by an applicable
exception or limitation.
No warranties are given. The license may not give you all of the
permissions necessary for your intended use. For example, other rights
such as publicity, privacy, or moral rights may limit how you use the
material.
Luke
Chapter 1
1ዎሳ ባክሮ ዬራ ሃምማዳናም ኤዲኖ ጱፅኖ ይቻላዳናግያ ዋርቃትሮ ኡክዲና፤ 2ዼላቅና ክናም ካርስሮኻ ቻንቴ ኤና ሃፓዳናቤ ኤና ዼላቅና ክናም ታማርስቴን ዳናቤ ዎናንቴ ኬሳስካዳናና። 3ጎሻዻዳ ቴዎፍሎስ፤ እንታኻሞ እባራንካ ዼላቅና ክናሳ ጫጪም ፃሊ ሼዳንቴ፣ ዼላቅናሳ ካርስሮኻ ቻንቴ ቱንስንዛራ ኬም ሊክ ሊክ ሃያንቴ ሃናንቴ እኡኬኻናንቴ እናንቴ ፃሊ ማታንቴና ኬያፕንዻዶ። 4ዬራ ክናምካሞ ይንናንቴ እያያይኖ ዬራ ሃታማራዳ ጎንዼ ክዶን ሃዼሴኻናንቴና።5ይሁዳ ፔንሳ ብታ ሄሮዶስ ዋዳንካ ኤያ ኣብያ ኦላሮ ኤና ኣይሁድሳ ዳምብን ኣሽካያ ኤያ ዘካርያስ ሃንዻያ ዳይዲና፤ ሜኖ ክሳ ኤልሳቤጥ ኤያ ኣሮን ሃንዻያ ቢዛና። 6ኬ ላማ ውል ባርያሳ ቃቦንቤ ዳምብንቤም ፓይላ ሃያይና ዬርን ዛርቦንባራ ዪም ፔግንሳንቴ ዳና ባርያሳ ዎትሮ ኬ ኤዲ ጋዛና፤ 7ይያማንካሞ ኤልሳቤጥ ሴኮ ኮዶንታኻ ኬሳ ናሶ ቆልማሞ፤ ኬ ውል ካልሎን ጌችዲና።8ሮሮ ካላ ዘካርያስ ኦላን ይኖንሳ ዋድማን ሳኣታኻ ባርያሳ ዎትሮ ኣይሁድናሳ ዳምብን ኣሽክቴ ክዶን ዋዳንካ፤ 9ኣይሁድናሳ ኤና ዳምብን ኣሽካይና ጎይንካ ባርዮን ኦኖንዛራ ኣርዳንቴ ቁኛን ክጉዴኻናንቴ ቡኪ ዻባንቴ ኪም ካንዽዲና። 10ቁኛን ባርያናንቴ ጉዳዻን ዋዳንካ ዛርስኖ ፓይላ ጳልሎ ዳንቴ ምስክቴና ኮዶ። 11ባርያሳ ኤርጎን ኤያ ቁኛን ጉዳዻን ሙልዻንሳ ምዛቅባራ ዎያንቴ ክናንቴ ሃፕንዽዲና። 12ዘካርያስካሞ ኤርጎን ኤያም ሃፓንቴ ዎይላም ታክዲና፤ ካልሎን ጌጲካሞ ኩርትንዽዲና። 13ኮዶን ኤርጎን ኤያ ክግያ ይንታና ክያማዶ፦ “ዘካርያስ፣ ሃኩርትንዽናኖ፤ ምስኮን ሃሳም ኤሳርዽዲና፣ ሜኖ ሃሳ ኤልሳቤጥ ኣንጌ ናሶ ሃናንቴ ኣዻና ኮኣዻይ፤ ናብን ክሳምካሞ ዮሃንስ ሃማንቴ ዎድማ።14ክንካ ዼርቃዻንቴ ዋዛና ሃዳይ፤ ኪም ኣዻዻዳኻ ሃማንቴ ኤዲኖ ጱፅኖ ዋዝንዻና ኮዋዝንዻይ፤ 15ኦጎኖኻሞ ኖ ጌጳሳ ዎትሮ ኤዲ ጌጲ ክዳይንታኻና። ዎይንን ዚኣንቤ ውጮና ዋኒ ኤናም ባርያሳይናቤም ውጭማሞ፤ እንዳንሳ ኢሮ ዳንቴ ባርያሳ ኡሲን ጫራጚን ቻና ክቻይ።16እስራኤል ኤና ግዶርካ ኤዲን ጱፅኒም ጌጳ ኬሳ ባርያዛራ ኖ ማሳና ክማሳይ፤ 17እምባናሳ ዎይላምን ኬሳ ናናዛራ ማሳናንቴ ኤና ኤሳርምናም ኤና ጋዛናሳ ሃማሞዛራ ማሳናንቴ፤ ጌጳ ናንቴ ዛርስን ሼክምን ዶን ባኣናንቴ ኤልያስ ኡስንካቤ ካንታንቤኻ ጌጳሳ ዎትሮ ያኣና ክያኣይ። 18ዘካርያስካሞ ኤርጎን ኤያግያ፦ “ዬርን ኦጎም ሃርካ እዼሴ? እንታ ኤዲ ጌቾና፤ ሜኖ እሳኻሞ ካልሎን ጌችዲና” ና ክያማዶ። 19ኤርጎን ኤያ ማሳንቴ ክግያ ይንታና ክያማዶ፦ “እንታ ባርያሳ ዎትሮ ዎያያ ገብርኤሊና፤ ዬራ ካም ሃናንቴ ጌያናንቴቤ ዼላቃ ፃላ ካም ሃናንቴ ባኣቴ እኔኤኻናንቴ ኢም ኒእሳዽዲና። 20ታ ያ ቤሬ ይሳ ሮራኻ ዼላቃ እሳ ሃምማያም ጎንዼና ሃማንቴ ሃቻድሞንታኻ፣ ዬራ ካሳ ጎንዼ ማታዛራ ያ ኣፖ ካያና ሃዳይ፤ ዼላቃናንቴኻሞ ያ ቻልማሞ።”21ዋዳ ኣጋኻ ዛርስኖ ዘካርያስ ባርዮን ኦኖንባራ ውትማ ሃርናንቴ ክካፓዶን ኬናንቴ ዬር ዋና ኮማታዃ ካሊቴና ኬዶ። 22ኖ ባርዮን ኣኖንባራ ይውታና ኬም ዼላቅሳናንቴ ቻልድማሞ፤ ኬላማ ይሳ ኣኒካ ዼላቃሳ ኦባራ ኣፖንካ ዼላቃናንቴ ክቻልድሞንታኻ፤ ባርዮን ኦኖሮ ባርያ ክናንቴ ዬር ካላ ክዻዋዶንም ኤና ዼስዲና። 23ዘካርያስካሞ ባርያናንቴ ክዋድማን ዋዳኖ ኮማቃና ይሳ ኦኖንዛራ ያእዲና።24ናንሲ ኣጋሳ ራስባራ ሜኖ ክሳ ኤልሳቤጥ ኢ ካምዲና፤ ኣርፒ ዶጝናንቴኻሞ ዪም ኣችዲና፤ ናኻሞ ይጌይና፦ 25“ዬራ ኢም ቦውሳያም ኤናሳ ባክሮ እካላንካ ዻሳናንቴ ጌጳ ይሳ ጋዛሞንካ ኢም ሼዳንቴ ሮሮን ኮኻ ዬርን ኮም እናንቴ ሃይዲና” ና ኳማዶ።26ኤልሳቤጥ ስርማዻንቴ ኣርፒ ላኽ ኮሳ ኮማታዃ፣ ባርያ ይሳ ኤርጎን ኤያ ገብርኤሊም ገሊላ ፔንሳ ናዝሬት ሃንዻን ካታማንዛራ ይእስዲና። 27ይንዛራ ይእሳዻዶኖ ዳዊት ቢዛስ ዮሴፕ ሃንዻያሳ ሃራኖ ዱዲኖ ኣንጌን ዼስሞንናንቴና፤ ናን ዱድንሳኻሞ ናብኖ ማርያሚና። 28ኤርጎን ኤያ ኮዶንዛራ ቃልቴ ኮግያ፦ “ያ ናሻዻዶኖ፣ ፃሊኖ ሃናንቴ ኮዴ፤ ጌጳ ሃላማና ክዶ፤ ያ ሜ ይንናንቴ ፓፂን እዻዳና” ና ክያማዶ። 29ማርያምካሞ ዼላቅን ክሳኻ ካልሎን ቃꬅማንቴ፣ “ኮኖ ጌሶ ሃስ ሃማቴ?” ሃማንቴ ዼላቃም ቃባን ካርስዲና፤30ኤርጎን ኤያኻሞ ኮግያ ይንታና ክያማዶ፦ “ማርያም፣ ሃኩርትንዽናኖ፤ ባርያሳ ዎትሮ ያ ካንዽዲና። 31ታ ያ ኢ ካማና ሃካማይ፤ ኣንጌ ናሶኻሞ ኣዻና ሃኣዻይ፤ ናብን ክሳምካሞ ኢየሱስ ሃማንቴና ሃዎዳይ። 32ኖኻሞ ኤዲ ጌጲና ክማታይ፤ ባርያ ጌጳሳኻሞ ናሳና ሃንዻይ፤ ባርያ ጌጳ እምባ ዳዊትሳ ብታሞን ቦርኮቶን ክናንቴ እማና ክእማይ፤ 33ኖ ያእቆብ ሞሮሮ ላይ ብቲና ክዳይ፤ ክሳ ማንግስትንሳ ቱንሲ ቆልማሞ።”34ማርያምካሞ ኤርጎን ኤያግያ፤ “እንታ ኣንጌ እዼስሞንታኻ፣ ዬራ ኣጋ ሃስ ኦጎንታ ክዴ?” ና ኮያማዶ። 35ኤርጎን ኤያ ማሳንቴ ኮግያ ይንታ ሃምዲና፦ “ኡስኖ ጫራጚኖ ሃዛራ ናኣና ኮናኣይ፤ ጌጳሳ ካንታኖ ሃም ክጫና ኮክጫይ፣ ኣጋታኻ ናሳ ጋዛስ ኣዻዻያ ባርያ ናሳና ሃንዻይ።36ታ ሃሳ ኤዳኖ ኤልሳቤጥኻሞ ይሳ ጌችንታን ዋዳንካ ኣንጌ ናሶ ስርማዽዲና፤ ታ ኤስኖ ሴኮኖ ሃንዻዶኖ ስርማዻንቴ ኣርፓ ላይሳም ዬስክዲና፤ 37ባርያም ዬር ባሻያ ቆልማሞ።” 38ማርያምካሞ ክግያ “እንታ ጌጳሳ ካይሲና፤ ኣፓ ሃጌያዳግያ እናንቴ ኮዴ” ና ኳማዶ። ሃያንቴ ኤርጎን ኤያ ኮኻላንካ ያእዲና።39ማርያምካሞ ዋዳስ ኣጋኻ ዪሪካ ዻጳንቴ ይሁዳ ፔንሳ ጌማርሮ ዳ ካታማ ካላዛራ ያእዲና፤ 40ዘካርያስ ኦኖንካሞ ኣርዳንቴ ኤልሳቤጥም ጌስዲና። 41ኤልሳቤጥካሞ ማርያምሳ ጌሶንም ኮኤሳራና፣ ናሳ ኮሳ ኢሮ ዻጵዲና፤ ኤልሳቤጥካሞ ኡስን ጫራጚንካ ፆፅዲና፤42ናቅሲ ይሳም ዼግ ሃያንቴ ይንታና ኮያማዶ፦ “ያ ሜና ግዶር ሜ ይንናንቴ ፓፅን እንዻዶኖና፤ ናሳ ሃሳ ኢሮኻ ውታያ ይናንቴ ፓፂን እንዻዳና። 43ኤሳንካ እሳ ጌጳ እንዳኖ እዛራ ኮኔኤኻናንቴ እንታ ሃውቴ? 44ታ ሃሳ ጌሶን እኤሳራና ናሶኖ እሳ ኢሮ ዶኖ ዋዛኻ ዻጵዲና። 45ኮናንቴ ዬራ ሃምማና ክያማይ ሃማንቴ ጌጳ ክጌያዳ ኣፓም ኤኤ ሃማንቴ ኤስኖ ቻዶኖ ኦጎኖ ኤዲ ይንናንቴ ፓፅ እንዻዳና!”46ማርያምካሞ ይንታና ኮያማዶ፦ “ሳዳኖ እሳ ጌጳም ዼግ ዼግና ኮያያይ፤
47ኡስኖ እሳኻሞ እሳ ዼሻስ ባርያኻ ዋዝንዻና ኮዋዝንዻይ፤
48ኦጎኖኻሞ ኖ እ ካይስቶን ይሳሳ ቦውንታም ሃፕዲና።
ሃይታላኻ ካርሳንቴ ኤዲኖ ፓይላ
እግያ ና ኤዲ ይንናንቴ ፓፂ እንዻዶኖና ኬያማይ፤
49ኦጎኖኻሞ ካንታስ ኖ እናንቴ ዬር ጌጲ ሃይዲና፤ ናብኖ ክሳኻሞ ጫራጚና፤
50ፃላሞኖ ክሳኻሞ ኤና ኪም ኩርትንዻይናናንቴ ቢዛ ኣብ ኣብዛራ ላይና ኮዳይ።
51ኖ ኣኒን ይሳኻ ዋድማ ዋቺ ኣሽክዲና፤ ኖ ኤና ይሳ ዎይላምን ቃቦንካ ፖራዻይናም ላልዲና፤
52ኤና ብቲናም ኬሳ ብታሞን ቦርኮቶሮኻ ሃንችሽዲና፤ ኤና ዪም ይርክ ሃያዳናም ዼግ ዼግ ሃይዲና፤
53ኤና ዳቃዻዳናም ዬር ፃልካ ምሽሽዲና፤ ኤና ዎድሞናም ኣን ጉሮ ኦይትዲና፤
54ይሳ ፃላሞንናንቴ ሃማንቴ ይሳ ካይስታ እስራኤልም ኬልሽዲና፤
55ኣጋኻሞ ኣና ዎምባናናንቴ ይጌያዳግያ፣ ኣብርሃምቤ ክሳ ብዛንናንቴቤ ዬራ ይጌያዳም ላይ ጎንዼ ሃያናንቴና።”
56ማርያም ኣርፒ ማካምግያ ኤልሳቤጥ ካላ ዳርቃንቴ ይሳ ፔንዛራ ማታቴ ያእዲና። 57ኤልሳቤጥካሞ ኣዽማን ሮራ ኮሳ ክዬስካና፤ ኣንጌ ናሶ ኣዽዲና። 58ኮሳ ጉልን ኤናቤ ኤዳናቤ ጌጳ ኮናንቴ ፃላሞን ጌጲ ክያያዶንም ኤሳርዲና፤ ኮላማኻሞ ኬ ዋዝንዽዲና።59ሮራ ሎንካይሳ ጋላ ኬ ናሳም ቃማን ታስኮታ ናእዲና፤ ኬ ናብን ክሳም እምባ ዘካርያስ ናብንካ ግስማናንቴ ዛግዲና። 60ኮዶን እንዳኖ ኤናግያ “ይንታ ዳማሞ፤ ዮሃንስ ሃንዼ” ና ኮያማዶ። 61ኬኻሞ ኮግያ፣ “ሃሳ ኤና ግዶር ኤዲ ናባ ካኻ ግስንዻዳ ቆልማሞ” ና ኬያማዶ።62እምባኻሞ ክናንቴ ናብ ሃር ዎዳናንቴ ክዛጋዶንም ኬ ክካላ ኣኒካ ኦይስዲና። 63ኖኻሞ ዬር ይንዛራ ዋርቃት ኡካዻያ ኦይሳንቴ “ናብኖ ክሳ ዮዋንሲና” ሃማንቴ ኡክዲና፤ ኣጋኻሞ ኤዲኖ ፓይላ ዬርሽዲና።64ኣጋዛራ ዘካርያስሳ ኣፖኖ ቡልምዲና፤ ኣታጵኖ ክሳኻሞ ፕክዲና፤ ባርያም ጎሽቴ ዼላቃን ካርስዲና። 65ክሳ ጉልን ኤና ፓይላ ኩርትንዽዲና፤ ዬሮ ኦጎኖ ፓይላ ይሁዳሳ ፔየስ ጌማርሮ ዳሮ ሃሳውምዲና። 66ዬራ ኣጋም ኤና ኤሳርዳና ፓይላ “ናሳ ካ ቤሬ ብራዛራ ሃስ ሃማናንቴ ክዴ?” ሃማንቴ ዬራ ኣጋም ይሳ ዎይላምካ ዬድዲና፤ ኦጎኖኻሞ ጌጳሳ ኣኒኖ ጎንዼ ክማላና ኮዶ።67ናሳ እምባ ዘካርያስ ኡስን ጫራጚንካ ፆፃንቴ ይንታ ሃማንቴና ክዼላቃዶ፦ 68ጎሽኖ እስራኤል ባርያ ጌጳናንቴ ኮዴ፤ ኖ ናዴ ዛርስን ይሳም ዻኣሽዲና፤
69ይሳ ካይስታ ዳዊት ሞሮሮ፣ ዻኣሾ ኤድ ዎናንቴ ዻስዲና፤
70ኣጋኻሞ ኣና ኤና ባርያሳ ኣፖን ጌያይና ጫራጝናኻ ክጌያዳግያ፤
71ክሳ ዻኣሾኖኻሞ፣ ኤና ዎሳ ጋላቤ፣ ኤና ዎም ቶዛዻይናቤሳ ኣንሮኻና፤
72ዬራ ኣጋም ይንታ ክያያዶኖ ዎምባናናንቴ ፃላሞን ይሳም ዻዋናንቴቤ፣ ኣፓ ጋዛስ ይጌያዳም ጶቅሳናንቴቤና፤
73ኣፓ ጋዛስ ኣጋም ዎምባ ኣብርሃምናንቴ ኣሽንሻንቴ ሃያና እያያይ ሃማንቴ ይጌያዳም ጶቅሳናንቴ፤
74ዎሳ ጋላሳ ኣንሮኻ ዎም ቡላንቴ፤ ኩርታሞ ቆልማ ክናንቴ ዎዋድሜኻናንቴቤ፤
75ዎሳ ዴንታሮኻ ፓይላ ጫራጝማሞኻቤ ጋዛሞኻቤ ይሳ ዎትሮ ዎም ዎይሳናንቴና።
76ፕርካሞ ያ ናሳ፣ ባርያ ጌጳሳ ኣፖን ጌያያና ሃግያ ሃንዻይ፤ ጌጳሳ ጎይን ኣሽካናንቴ ኪም ብራንቴና ሃያኣይ፤
77ኬ ይሳ ሴሶንባራ ኬሻይማዶንታኻ፤ ዛርስንናንቴ ዼኣሾን ዼላቅን ሃጌኻናንቴ፣
78ባርያሳ ሃይንቶን ፃላሞንካ ሃማንቴ ቡሪ ሃዮ ፖላንባራ ዎናንቴ ውትዲና፤
79ኣጋኻ ሃማንቴ ኤና ፂፓሮ ዳናናንቴቤ ኤና ዴምጲን ኣፖሮ ዳናናንቴ ሮሮ ክማቴኻቤ
ዎምካሞ ጎይ ፃልዛራ ክኣንሴኻና።”
80ናሳኻሞ ጌጲዲና፤ ኡስን ጋዛንካኻሞ ዋቻዽዲና፤ እስራኤል ዛርስንናንቴ ይሳ ሃፕንዻዛራ ዳራሮና ክዶ።
Chapter 2
1ዋዳን ኦጎኻ ኤዲን ፔሮ ዶን ፓይላ ፓይዳዼኻቤ ዋርቃት ግዶር ኡካዼኻናንቴ ቄሳር ኣውግስጦስ ኬራፕዲና። 2ፓይዳ ኣጋ ቄሬኔዎስ ሶርያ ፔንሳ ብቲ ክዶን ዋዳንካ ዛርስንም ፓይዳዻዳ ፓይዳ ካርሳና። 3ኣጋታኻ ኤዲኖ ፓይላ ዋርቃትሮ ኡካዼኻናንቴ ይሳ ካታማናዛራ ያእዲና። 4ዮሴፍካሞ ዳዊት ሞሮ ኤድቤ ቢዛቤ ይዶንታኻ፣ ገሊላ ፔን ግዶር ዳ ካታማስ ናዝሬትባራ ዻጳንቴ ይሁዳ ግዶር ዳ ዳዊት ካታማስ ቤቴልሔም ሃንዻንዛራ ውትዲና። 5ኦጎዛራ ናብን ኡካዾታ ክያኣዶኖ፣ ስርማን ባሻዽን ኣዻናንቴ ዶን ሃራን ይሳ ማርያም ማላ ክንካና።6ኦጎታር ኬዳኻ ኮሳ ኣዽማን ሮሮኖ ሳንዲና፤ 7ናሳ ይሳ ቶይዳ ኣንጌን ናሳም ኣዽዲና፤ ኣፓላንካ ኪም ኡላስዲና፤ ቾችናሳ ዎድማዻን ራቅሮ ራቅ ኮቆልማታኻ፤ ናሳም ዋጛሳ ቆሬሮ ና ዎኦስዲና።8ፔን ኦጎሮ ሶትንካ እያና ይሳም ግሽቴ ጳሎ ዎዻይና ግሽሞን ኤና ዳይዲና። 9ኬኬንሽማ ባርያሳ ኤርጎን ኤያ ኬኻላ ናዴ ዎይዲና፤ ጌጳሳ ጎሺኖኻሞ ኬኻላ ኖግያ ሮጲዲና፤ ኩርታሞ ጌጲካሞ ኬም ዬድዲና።10ኮዶን ኤርጎን ኤያ ኬግያ ይንታና ክያማዶ፦ “ዬኩርትንዽናኖ፤ ኤዲ ውል ፓይላናንቴ ዳያ ጌጲ ዋዝንሳያ ሜርሜር ፃል እንታ ዬናንቴ ባኣቴ ናእዲና። 11ሃይታላ ዳዊት ካታማሮ ዬናንቴ ኤናም ዻኣሻያ ኤዲ ኣዻዽዲና፤ ኣጋኻሞ ኖ ጌጳ ክርስቶሲና። 12ይንካ ዬዼሳያ ዬራ ካ ክዴ፦ ናሶ ኣፓላኻ ኡላሳዻዃ ዋጛሳ ቆሬሮ ዎዻንቴ ክዳዃ ሃፓና ዬያፓይ።” 13ኣጋዛራ ዎታደርና ፖላን ጋይና ኤርጎን ኤያ ማላ ሃፕንዽዲና፤ ባርያምካሞ ጎሺቴ ይንታና ኬያማዶ፦ 14“ጎሽኖ ባርያናንቴ ጳ ፖላንሳ ፖላና ግዶር ኮዴ፤ ፃላሞኖኻሞ ፔሮ ኤና ክናሻይናናንቴ ኮዴ!”
15ኤርጎን ኤና ኬኻላንካ ዞን ፖላንዛራ ኬያኣዃ ራስባራ ግሽሞን ኤና ክግያ፦ “ጌጳሳ ዎናንቴ ዻውዻዳ ዬራ ሃምማዳም ሼዳናንቴ ቤተልሔምዛራ ዎኤ” ና ኬያማዶ። 16ኬኻሞ ዪሪካ ያእዲና፤ ማርያምቤ ዮሴፕቤ፣ ናሳምካሞ ዋጛሳ ቆሬሮ ዎዻንቴ ክዳዃ ሃፕዲና።17ኦጎም ሃፓንቴኻሞ፣ ናሳሳ ዬርን ጌይዻዶንም ማይ ሃያንቴ ኬናንቴ ጌይዲና። 18ዬርን ኦጎም ኤና ኤሳርዳና ፓይላ ግሽሞን ኤና ኬጌያዳና ዬራም ጎሽዲና፤ 19ኮዶን ማርያም ዬራ ኣጋም ይሳ ዎይላምካ ዬዳንቴ ቃብቴና ኮዶ። 20ግሽሞን ኤናኻሞ ዬራ ፓይላ ኬናንቴ ጌይዻዳግያ ኮዶን ይያፓና፦ ዬራ ይያፓዳናቤ ይኤሳርዳቤናንቴ ፓይላ ባርያም ጎሻዳቴቤ ኪም ዼግ ዼግ ሃያዳቴ ማታቴ ያእዲና።21ሮራ ሎንካይሳ ይንካ ቃማን ክታኻዻያ ክዬስካና፣ ኣኻራ እንዳኖ ኪም ኮስርማዽማ ባርያሳ ኤርጎን ኤያሳ ናባ ክናንቴ ክዎዳዳኻ ኢየሱስ ሃንዽዲና። 22ሙሴ ዳምብን ጎይንካ ዮሴፕቤ ማርያምቤ ዪም ጫራጝሻንቴ ይቱንሳና፣ ናሳም ባርያናንቴ እሞታ ዬሩሳሌምዛራ ባኣቴ ውትዲና፣ 23ኣጋኻሞ ጌጳሳ ዳምብን ጎይንካ “ኣንጌን ናና ቶይዲናም ጌጳናንቴ ጫራጝሻዻዳና ኬዳይ” ሃማንቴ ኣና ኡካዻዳግያ ዳምባ ኣጋም ሃያናንቴቤ፤ 24ፕርካሞ ጌጳሳ ዳምብንካ “ኣቲ ዎሌ ላማቤ ዎይካሞ ዳራ ዎሌ ላማ” ሃማንቴ ጌይዻዳግያ ዬራ እግናም ባርያናንቴ ባኣንቴ ሙልዻሮ እማናንቴና። 25ዋዳን ኦጎኻ ኤያ ጋዛስ ዋቻ ስምኦን ሃንዻያ ዬሩሳሌም ግዶር ዳይዲና፤ ኖኻሞ እስራኤልናሳ ዋዛን ካሊቴን ዳቤ ኡስን ጫራጚን ይንዛራ ይዳ ኤዲና። 26ሃያንቴኻሞ ኤያ ባርያ ይካማዳም ሃፕማ ክጅሞንም ኡስኖ ጫራጚኖ ይንናንቴ ይጌያዳ ኤዲና፤27ኖ ዋዳ ኣጋኻ ኡስኖ ጫራጚኖ ክናንቴ ኮጌያዃ ባርዮን ኦኖንዛራ ኣርድዲና፤ ናሳሳ እንዳንቤ እምባቤ ዳምብን ጎይንካ ዬራ ሃይዻይናም ክናንቴ ሃያናንቴ ናሳ ኢየሱስም ባኣንቴ ኬኣርዳዶን ዋዳንካ፤ 28ስምኦን ናሳም ቻንቴ ሹብዲና፤ ባርያናንቴ ጎሽን እምቴ ይንታና ክያማዶ፦ 29“ጌጳ፦ ኣና ኣፓ እናንቴ ሃጌያዳ ጎያኻ፤ ታ ናንሲ ካይስታ ሃሳም ፃሊንካ ይእስማ፤
30ኣፕኖ እሳ ኤና ውልሳ ዎትሮ ሃኣሽካዶንም፣
31ሃሳ ዻኣሾን ሃፕዲና።
32ካኻሞ ቶርስን ኤዲንናንቴ ባርያሳ ቃቦን ዻዋያ ሮሮና፤ ዛርስን ሃሳ እስራኤልናንቴኻሞ ጎሺና።”
33ናሳሳ ዬራ ጌይዻዳናም እምባቤ እንዳንቤ ዬርሽዲና። 34ስምኦን ኬናንቴ ፓፂ እማንቴ እንዳን ማርያምግያ ይንታና ክያማዶ፦ “ናሳ ካ እስራኤል ፔሮ ኤዲ ጱፅሳ ዲናቤ ዻጲንቶንቤናንቴ ክዴኻናንቴና፤ ሃያንቴኻሞ ኖ ኤዲ ቶዛዻዻዳ ክዴኻናንቴ ባርያ ጌይዲና፤ 35ኤዲን ጱፅንሳ ዎይላምን ቃቦኖ ክንካ ሃማንቴ ማይ ማታና ኮማታይ፤ ሃሳ ዎይላምካሞ ቤሬ እልል ጌጲ ጃኖ ኮጃይ።” 36ፕርካሞ ኣሴር ቢዛኖ ፋኑኤል ናኖ ሃና ሃንዻይኖ ባርያሳ ኣፖን ጌያይኖ ኦጎታር ዳይዲና፤ ናኻሞ ኤዲ ካልሎን ጌቻዳና፤ ኣኻራ ዱዲ ዳኣንቴ ኣንጋ ይሳ ይኬማዻዳ ላማ ቦን ꬆጳና ኮዳርቃዶ። 37ኮሳ ቦንኖ ሎንካይታም ኦይዲ ኮሳ ማታዛራ፣ ሮሮንቤ ሶትንቤ ባርዮን ኦኖንባራ ፔግንዽማ፣ ዳልሶ ማታንቴ ባርያም ቶሮንዽቴ ምስክቴቤ ቶሮንዽማ ምስክቴቤ ዋድምቴን ዶኖና። 38ግዳ ኣጋኻ ና ናዴ ባርያም ጎሺዲና፤ ዬሩሳሌምሳ ዻኣሾንም ኤና ካላዳና ፓይላናንቴ ናሳሳ ዬርም ጌይዲና። 39ዮሴፕቤ ማርያምቤ ጌጳሳ ዳምብን ጌይዻዶንም ፓይላ ኣሽካቴ ይቱንሳና ገሊላ ግዶር ዳ ይሳ ካታማስ ናዝሬትዛራ ማታቴ ያእዲና። 40ናሳኻሞ ጌጳዳቴቤ ካንታ ኡካዳቴቤ ያእዲና፤ ሃሚካሞ ማትዲና፤ ባርያሳ ፃላሞኖ ክዛራና ኮዶ።41እንዳንቤ እምባቤኻሞ ቦንናኻ ፋሲካን ባኣልንናንቴ ዬሩሳሌምዛራ ይቴና ኬዶ። 42ናሳ ቦን ታጲ ላማ ክማታዃ ኣና ይያያግያ ባኣሊንዛራ ኬ ውትዲና። 43ባኣልን ኬ ቱንሳንቴ ይሳ ኦኖናዛራ ኬማታዃ፣ ናሳ ኢየሱስ ዬሩሳሌም ግዶር ሽዽዲና፤ ኮዶን እንዳንቤ እምባቤኻሞ ኖ ክሽዻዶን ዼስማሞ፤ 44ኖ ኬኻላ ኬላማ ክንካ ክዳ ማይሻንይቴ፣ ሮሮ ካላ ጎይ ያእዲና፤ ኮዶን ራስባራ ኬ ይሳ ኤዳናቤ ኤና ይሳ ናሽዽናኻላ ኪም ዛጋን ካርስዲና፤45ኪም ይያፓድሞንታኻ፣ ዛጋዳቴ ዬሩሳሌምዛራ ማትዲና። 46ሮሮ ማካንሳሳ ራስባራ ኤና ታማርሳይናሳ ባክሮ ዳርቃንቴ ኬም ኤሳርቴቤ ኬም ማሳቴ ኦይሶ ኦይስቴቤ ክዳዃ ባርዮን ኦኖሮጎ ኪም ሃፕዲና፤ 47ኤና ኪም ኤሳርዳና ፓይላ ክሳ ዼስንቶንካቤ ዬራ ክማሳይናቤም ዬርሽቴና ኬዶ።48እንዳንቤ እምባቤኻሞ ኪም ይያፓና፣ የራ አጋም ዬርሽዲና፤ እንዳኖኻሞ ክግያ፦ “እሳ ናሳ፣ ሃርናንቴ ኢም ኮንታ ሃያዴ? ሃምባቤ እቤ ዎቲ ቃብማንቴ ሃም ዛግቴና ዎዶ” ና ኮያማዶ። 49ኖኻሞ ኬግያ፦ “ሃርናንቴ ኢም ዬዛጌ? ኣባ ኦኖሮ እዳን ኮዛግሳይንም ዬቲ ዼሳዬው?” ና ክያማዶ። 50ኮዶን ኬናንቴ ዬራ ክጌያዳ ኣርዳድማሞ። 51ሃያንቴ ኖ ኬ ላማ ክንካ ናዝሬትዛራ ሃንችዲና፤ ኬናንቴኻሞ ኤሳርቴና ክዶ። እንዳኖኻሞ ዬርን ኦጎም ፓይላ ይሳ ዎይላምካ ዬድቴና ኮዶ። 52ኢየሱስካሞ ፃላሞኻቤ ሃማሞቤኻቤ ጉድጳሞቤኻ ባርያቤ ኤናቤሳ ዎትሮ ጌጲዲና።
Chapter 3
1ጢባርዮስ ሃንዻያ ቄሳር ክብትማዃ ቦን ታጲ ዶጝ ኮማታዃ፣ ኣጋኻሞ ጳንጥዮስ ጲላጦስ ይሁዳ ፔንሳ ብቲ ክዶንካ፤ ሄሮዶስ ኣንቲጳስ ገሊላ ፔንሳ ብቲ ክዶንካ፤ ክሳ እንዳን ናሳ ፊልጶስ ኢጡርያስቤ ጥራኮኒዶስቤ ፔንሳ ብቲ ክዶንካ፤ ሊሳኒዮስካሞ ሳቢላኒስ ፔንሳ ብቲ ክዶንካ፤ 2ሃናቤ ቀያፋቤ ኤና ኣይሁድናሳ ዳምብን አሽካይናሳ ጋርና ኬዶን ዋዳንካ፣ ዘካርያስ ናሳ ዮሃንስ ዳራሮ ክዳዃ ባርያሳ ኣፖኖ ክዛራ ናእዲና።3ኖኻሞ ኤናሳ ሴሶን ኬናንቴ ጋርዼኻናንቴ ሴሶን ባራኻ ማታዻይን ሻዮንም ታማርሳዳቴ ዮርዳኖስ ሌኤንሳ ራቅና ዴሞሮን ዳና ውልዛራ ናእዲና።4ኣጋኻሞ ኤያ ባርያሳ ኣፖን ጌያያ ኢስያስሳ ዋርቃትሮ ይንታ ሃማንቴ ኣፓ ክኡካዳ ጎያኻና፦ “ዳራሮ ኤዲ ይንታ ሃማንቴ እላያታያሳ ናቅሲ፤
‘ጌጳሳ ጎይን ቡልማቴ
ጎይን ክሳምካሞ ፕሽክሽማቴ፤
5ባይናኻሞ ፓይላ ኬፆፄ፣ ጌማራቤ ጉርባናቤ ፓይላ ይርክ ኬያሜ፤
ጎይኖ ቆሮኖ ጋዝ ኮያሜ፤
ጎይኖ ሃርቾኖኻሞ ጫንቃል ኮዴ፤
6ኤዲ ናሶ ሃንዻያ ፓይላ ባርያሳ ዻኣሾን ሃፓና ኮያፓይ።’” 7ዮሃንስካሞ ኤና ክካላ ሻይዾታ ናኣይናም ይንታኻሞ ሃምቴና ክዶ፦ “ዬቲ ክና ጉንቶን ኦፖን ናና! ካዮን ናኣናንቴን ዶንባራ ዬዻቄኻናንቴ ዬናንቴ ጌያዳ ሃውቴ?8ታ ናንሲ ሴሶንባራ ዬማታዶን ዬር ዻዋያ ኣሽክማቴ፤ ሃያንቴኻሞ ዬሳ ዎይላምንካ ‘ዎምባ ኣብርሃም ዳይድና’ ሃማንቴ ጌያን ዬካርስናኖ፤ ባርያ ሱኒና ክና ግዶርካ ኣብርሃምናንቴ ናሶ ዻሳናንቴ ክቻላይንም ዬናንቴ ጌያና እጌያይ።9ታኻሞ ሹኮኖ ሃቃናሳ ጫጭሮ ዎዳዽዲና፤ ሃቃና ኣፕን ካምናም ፓይላ ጫራቴ ኖንዛራ ዻባና ዻባዻይ።” 10ዛስርኖ “ታ ዎቲ ሃር ዋዬ?” ሃማንቴና ክካላ ኬኦይሳዶ። 11ዮሃንስካሞ ኬናንቴ “ኤያ ይንሳ ኣፓላ ላማን ይዳ ኤያ ይንሳ ቆልማናንቴ ክእሜ፤ ኤያ ዳኣኖን ካዳኻሞ ኤያ ይንሳ ቆልማናንቴ ክካሼ” ሃማንቴና ክማሳዶ። 12ኤና ግብርን ፑኡሻይናኻሞ ክካላ ሻይዾታ ናዴ ክግያ፦ “ኣስታማራዮ፦ ኤ ዎቲ ሃር ዋዬ?” ና ኬያማዶ። 13ኖ ኬግያ “ዬናንቴ ጌይዻዳናሳ ጳባራ ሻባንቴ ኤና ኻላ ግብርን ዬችናኖ” ና ክያማዶ። 14ሃያንቴ ዎታዳርናኻሞ፣ “ኤ ዎቲ ሃር ዋዬ?” ሃማንቴ ክካላ ኦይስዲና። ኖኻሞ ኬግያ፦ “ኤዲ ካላሳኻሞ ብሬን ካንታኻ ዬሳርናኖ፤ ኤናምካሞ ፓጋሞኻ ዬቤርንስናኖ፤ ዬናንቴ ብሬና ካሻዻይና ዬካና ኬዬካይ” ና ክያማዶ።
15ዛርስኖኻሞ ፓይላ ኪም ዼሳናንቴ ካሊቴ፣ “ኖ ይንዳ ሙሽ ክርስቶሱ?” ሃማንቴ ይሳ ኢካ ዮሃንስሳ ዬር ቃብቴና ኬዶ። 16ዮሃንስ ኤና ፓይላግያ ይንታና ክያማዶ፦ “እንታ ዬም ኑንቆካና እሻያይ፤ ኮዶን ኤያ እሳ ሳጋ ናኣና ክናኣይ፤ እንታ ክሳ ዱጙርን ካቲን ቡላን ቻልማሞ፤ ኖ ዬም ኡስን ጫራጝንካቤ ኖንካቤ ሻያና ክሻያይ፤17ቆይድኒም ሳንቴ ጫንቃል ሃያናንቴቤ፣ እስናም ኮናሮ ካናንቴ ሻርቃኖ እስንን ቡቡንሳይኖ ክሳ ኣኒሮና ኮዶ፤ ኮዶን ቱፖናም ኖን ካይሞንካ ኮቃና ክኮቃይ።”18ዮሃንስ ቃቦ ኣብ ጱፅካኻሞ ዛርስንም ኪሊቴ ባርያሳ ሜርሜርን ፃሊን ኬናንቴ ጌይዲና። 19ኮዶንካሞ ገሊላ ፔንሳ ብታ ሄሮዶስ እንዳን ናሳ ሜን ሄሮድያዳም ክኬማዳ ጎያኻቤ ክሳ ዋድማና ዋኒካ ዮሃንስ ክዛራ ክዋጭማዶንታኻ፤ 20ሄሮዶስ ዬራ ክናም ዼላቅ ኣብዛራ ሻባንቴ ዮሃንስም ዻክን ኦኖን ኣርስዲና።21ዛርስኖ ፓይላ ኑንቆንካ ኮሻይዻዃ ራስባራ ኢየሱስካሞ ኑንቆንካ ሻይዽዲና፤ ኖ ባርያም ምስክቴ ክዳዃ ፖላኖ ቡልሚዲና፤ 22ኡስኖ ጫራጚኖኻሞ፦ “ዎሌግያ ማታንቴ ክዛራ ሃንችዲና፤ ፖላንባራኻሞ “ናሳ እሳ እናሻያ ያና፤ ሃንካ ዋዝንዻና እዋዝንዻይ” ሃማያ ዼላቅ ኤሳርምዲና። 23ኢየሱስካሞ ዋድማን ክካርሳንካ ቦንኖ ክሳ ማካንታምግያና ኮዶ፤ ኤና ይቃባዳግያ ኖ ዮሴፕ ናሳና፣ ዮሴፕ ኤሊ ናሳና፣ 24ኤሊ ማቲ ናሳና፣ ማቲ ሌዊ ናሳና፣ ሌዊ ሚልኪ ናሳና፣ ሚልኪ ዮና ናሳና፣ ዮና ዮሴፕ ናሳና፣25ዮሴፍ ማታትዩ ናሳና፣ ማትታዩ ኣሞፅ ናሳና፣ ኣሞፅ ናሆም ናሳና፣ ናሆም ኤሲሊም ናሳና፣ ኤሲሊም ናጌ ናሳና፣ 26ናጌ ማኣት ናሳና፣ ማኣት ማታትዩ ናሳና፣ ማትታዩ ሴሜይ ናሳና፣ ሴሜይ ዮሴክ ናሳና፣ ዮሴክ ዮዳ ናሳና፣27ዮዳ ዮና ናሳና፣ ዮና ሬስ ናሳና፣ ሬስ ዘሩባቤል ናሳና፣ ዘሩባቤል ሰላትያል ናሳና፣ ሰላትያል ኔሪ ናሳና፣ 28ኔሪ ሚልኪ ናሳና፣ ሚልኪ ሃዲ ናሳና፣ ሃዲ ዮሳስ ናሳና፣ ዮሳስ ቆሳም ናሳና፣ ቆሳም ኤልሞዳም ናሳና፣ ኤልሞዳም ኤር ናሳና፣ 29ኤር ኢያሱ ናሳና፣ ኢያሱ ኤልኣዛር ናሳና፣ ኣልኣዛር ዮሪም ናሳና፣ ዮሪም ማጣት ናሳና፣ ማጣት ሌዊ ናሳና፣30ሌዊ ስምኦን ናሳና፣ ስምኦን ይሁዳ ናሳና፣ ይሁዳ ዮሴፕ ናሳና፣ ዮሴፕ ዮናም ናሳና፣ ዮናም ኤልያቄም ናሳና፣ 31ኤልያቄም ሜልያ ናሳና፣ ሜልያ ማይናን ናሳና፣ ማይናን ማታታ ናሳና፣ ማታታ ናታን ናሳና፣ ናታን ዳዊት ናሳና፣ 32ዳዊት እሴይ ናሳና፣ እሴይ ኢዮቤድ ናሳና፣ ኢዮቤድ ቦኤዝ ናሳና፣ ቦኤዝ ሳላ ናሳና፣ ሳላ ነኣሶን ናሳና፣33ነኣሶን ኣሚናዳብ ናሳና፣ ኣሚናዳብ ኣራም ናሳና፣ ኣራም ኣሮኒ ናሳና፣ ኣሮኒ ኤስሮም ናሳና፣ ኤስሮም ፓሬስ ናሳና፣ ፓሬስ ይሁዳ ናሳና፣ 34ይሁዳ ያእቆብ ናሳና፣ ያእቆብ ይስሃቅ ናሳና፣ ይስሃቅ ኣብርሃም ናሳና፣ ኣብርሃም ታራ ናሳና፣ ታራ ናኮር ናሳና፣ 35ናኮር ሴሮህ ናሳና፣ ሴሮህ ራጋው ናሳና፣ራጋው ፓሌቅ ናሳና፣ ፓሌቅ ኣቤር ናሳና ፣ ኣቤር ሳላ ናሳና፣36ሳላ ቃይንም ናሳና፣ ቃይንም ኣርፓክስድ ናሳና፣ ኣርፓክስድ ሴም ናሳና፣ ሴም ኖኅ ናሳና፣ ኖኅ ላሜህ ናሳና፣ 37ላሜህ ማቱሳላ ናሳና፣ ማቱሳላ ሄኖክ ናሳና፣ ሄኖክ ያሬድ ናሳና፣ ያሬድ መላልኤል ናሳና፣ መላልኤል ቃይናን ናሳና፣ 38ቃይናን ሄኖስ ናሳና፣ ሄኖስ ሴት ናሳና፣ ሴት ኣዳም ናሳና፣ ኣዳምምካሞ ባርያባራኻና ዎዳዻዶ።
Chapter 4
1ኢየሱስ ኡስን ጫራጚንካ ፆፃንቴ ዮርዳኖስ ሌኤንባራ ክሳ ማታ፣ ኡስኖ ጫራጚኖ ኪም ዳራንዛራ ኣንስዲና፤ 2ኦጎታርካሞ ሮሮ ኦይዲታም ኪም ጎይ ጶርጋዳ ይእሳናንቴ ዳቡሎስ ክካላ ኦይሶ ጋሮ ኦይስዲና፤ ሮሮና እግና ግዶርካሞ ዳኣኖ ካላኻሞ እꬅማ ዎዻንቴ ቱንስሮ ዳቃዽዲና።3ዳብሎስካሞ ክግያ “ይንዳ ያ ባርያ ናሳ ሃዳና፣ ሱና ካም ዳኣኖ ክማቴኻ ጌይማ” ና ክያማዶ። 4ኢየሱስካሞ ክግያ “‘ኤዲ ናሶ ዳኣኖኻ ሶጎ ዳማሞ’ ሃማንቴ ዋርቃትሮ ኡካዽዲና” ሃማንቴ ክናንቴ ማስዲና።5ሃያንቴ ዳብሎስ ራቅ ዼግ ሃማ ካላዛራ ኪም ቡላንቴ ማንግስትና ፔሮን ዳናም ፓይላ ክናንቴ ይሪካ ዻዋንቴ፤ 6ክግያ “ማንግስትና ክናሳ ጌጳሞንቤ ጎሺንቤም ፓይላ እናንቴ እንዽዲና፤ እንታኻሞ ኤያ እናሻያናንቴ እእማንታኻ ሃናንቴ እማና እእማይ፤ 7ኣጋታኻ እናንቴ ሃኮምፓርሳያዳና ኮኖ ፓይላ ውል ሃንቲና ኮዳይ።”8ኢየሱስካሞ ክግያ ይማሳና፣ “‘ባርያ ሃሳ ጌጳናንቴ ኮምፓርስማ፤ ክናንቴ ሶጎ ዋድምማ’ ሃማንቴ ዋርቃትሮ ኡካዽዲና” ና ክያማዶ።9ሃያንቴኻሞ ኪም ዬሩሳሌምዛራ ኣንሳቴ ቃልቴ ባርዮን ኦኖንሳ ዱሪሮ ዎይሳንቴ ክግያ፣ “ይንዳ ያ ባርያ ናሳ ሃዳና ኮታርካ ምጫ ዲኒማ፤ 10ኦጎኖኻሞ ኣና ዋርቃትሮ ይንታ ሃማንቴ ኡካዽዲና፦ “‘ሃም ኬካፔኻናንቴ ባርያ ይሳ ኤርጎን ኤናም ሃናንቴ ሃማንቴ ንእሳና ክንእሳይ፤ 11ራና ሃሳ ሱኒ ላማ ዻይማን ኬጋሬኻናንቴ ኬ ሃም ይሳ ኣንናኻ ካፓና ኬካፓይ።’”12ኢየሱስካሞ “ ‘ባርያ ጌጳ ሃሳ ኻላ ጋሮ ኦይሶ ሃኦይስናኖ’ ሃንዽዲና’’’ ሃማንቴ ክናንቴ ማስዲና። 13ዳቡሎስካሞ ይሳ ጋሮን ኦይሶናም ፓይላ ይቱንሳና ዋዳ ባሺ ኣብ ይሳ ሃፓዛራ ኪም ጋራንቴ ያእዲና።14ኢየሱስካሞ ኡስን ጫራጚንሳ ካንታንካ ዳንቴ ገሊላዛራ ማትዲና፤ ኜሙትኖ ክሳኻሞ ፔን ኦጎሳ ዴሞሮ ዳና ራቅና ውልዛራ ሻሚዲና። 15ኖኻሞ ኣይሁድናሳ ባርያም ምስካዻን ኦኖሮ ታማርስቴና ክዶ፤ ኤና ፓይላ ኪም ዬርሺቴና ኬዶ።16ሃያንቴኻሞ ኖ ይንግዶር ይጌጳዳ ናዝሬት ካታማስዛራ ናእዲና፤ ሌሌ ይያያግያ ኡኩንስን ሮራ ጋላ ባርያም ምስካዻን ኦኖንዛራ ኣርድዲና፤ ባርያሳ ዋርቃትን ናባባናንቴኻሞ ዻጳንቴ ዎይዲና። 17ኤያ ባርያሳ ኣፖን ጌያያ ኢስያስሳ ዋርቃትን ቱፕምን ክናንቴ እንዽዲና፤ ኖ ዋርቃትን ቱፕምን ክቡላና ይንታ ሃማንቴ ኡካዻዳ ራቃም ሃፕዲና፦18“ጌጳሳ ኡስኖ እዛራና ኮዶ፤ ኦጎኖኻሞ ኤና ኩፕናናንቴ ሜርማርን ፃሊንም እጌዬኻናንቴ ኖ ኢም ካምዲና፤
ኤና ዻኻዻዳናናንቴ ቡልንቶን፣
ኤና ኣፕን ካያናናንቴኻሞ ሃፕንቶን፣
ኤና ጋሎሮን ዳናናንቴኻሞ ቡሊንቶን፣
19ቦና ጌጳ ጋንታ ናሻዻዳምካሞ እጌዬኻናንቴ ኢም ንእስዲና።”20ሃያንቴኻሞ ዋርቃትንም ቱፓንቴ ዋድማን ኤያናንቴ ማሳቴ እማንቴ ዳርቅዲና፤ ሃያንቴ ኤና ምስኮን ኦኖንሳ ኢሮ ዳና ፓይላ ኪም ላይ ሼዲቴና ኬዶ። 21ኖ ኬግያ “ካ ቃሞ ዬሳኻ ዬኤሳራዳ ዋርቃትንሳ ኣፓ ጌይዻዳ ሃያኻ ጎንዼ ማትዲና” ሃማን ካርስዲና። 22ኤዲኖ ፓይላ ክሳ ዬር ፃል ጌይቴና ኮዶ፤ ሃያንቴኻሞ ክሳ ኣፖሮኻ ዼላቅን ፃሊን ውታይንም ጎሺቴ፤ “ካ ኤ ዮሴፕ ናሳሞ?” ሃምቴና ኬዶ።23ኖኻሞ ኬግያ “‘ያ ኤያ ዼሻን ካዳ፣ ዼሻን ሃኖንካ ሃም ፓሺሽማ፤ ቅፕርናሆም ግዶር ዬራ ሃያዳና ዎኤሳርዳናም ኮታር ካታማን ሃኖሮኻሞ ሃይማ’ ሃማያ ዻይንሳም እዛራ ዬጌያይንም እንታ ካላኻሞ ቃጋዽማሞ’’ ና ክያማዶ። 24ሃያንቴኻሞ ኖ ኬግያ “እንታ ዬናንቴ ጎንዼና እጌያይ፤ ኤዲ ባርያሳ ኣፖን ጌያያም ፔን ክኖሮ ኪም ጎባዽማሞ።25ኮዶን እንታ ዬናንቴ ጎንዼና እጌያይ፤ ፖላንም ቦን ማካምቤ ኣርፒ ላቤናንቴ ዲፃዻዃ ፔ ውል ግዶር ዳቆ ጌጲ ይንካ ይማታዶን ኤልያስ ዋዳንካ፤ ሜ ዳልሶ ጱፅ እስራኤል ግዶር ዳይዲና፤ 26ኤልያስም ሜና ዳልሶና እግናሳ ካላዛራኻሞ ይእሳዻዲማሞ፤ ኮዶን ሲዶና ፔሮ ሳራፕታ ግዶር ዶን ዳልሶንዛራና ይእሳዻዶ። 27ኤያ ባርያሳ ኣፖን ጌያያ ኤልሳዕ ዋዳንካኻሞ እስራኤል ግዶር ሙልካንባን ኤና ጱፅና ዳይዲና፤ ኮዶን ሶርያ ኤያ ንእማንሳ ኦባራ ኬ ግዶር ኤዲ ካላኻሞ ፓሻዳ ቆልማሞ” ና ክያማዶ።28ኤና ምስኮን ኦኖንሳ ኢሮ ዳና ፓይላ ክናም ይኤሳራና ክዛራ ካልሎን ዋጭምዲና፤ 29ኬ ይዳርቃዶሮኻ ዻጳንቴ ካታማንባራኻ ኪም ቡልዲና፤ ኪም ምጫኻሞ ውንኩርሳናንቴ ካታማን ኬሳም ይንግዶር ኣሽካዻዳ ጌማርታሳ ዴሎን ኣꬅንዛራ ኪም ባኣቴ ናእዲና፤ 30ኮዶን ኖ ኬሳ ባክንካ ሳጋንቴ ያእዲና።31ሃያንቴኻሞ ኖ ገሊላ ፔንሳ ኢሮ ዶን ካታማን ቅፕርናሆም ዛራ ሃንችዲና፤ ኦጎታርካሞ ኡኩንሳን ሮራ ጋላ ዛርስንም ታማርሳን ካርስዲና፤ 32ክሳ ዼላቅኖ ኤዲ ብቲ ዼላቅግያ ኮዶንታኻ ኤና ክሳ ታማርን ዬርሺዲና።33ምስኮን ኦኖንሳኻሞ ኢሮጎ ኤዲ ይንዛራ ቤሮን ይዳ ዳይዲና፤ ኖኻሞ ናቅሲ ይሳም ዼግ ሃያንቴ እላታንቴ ክግያ፤ 34“ናዝሬት ጋንታ ኢየሱስ፣ ዎላማ ሃሳ ሃርቴ ዶኖ? ዎም ካይሳናንቴው ሃናኣዶ? ያ ሃው ሃዶን እንታ ዼስዲና፤ ያ ኤያ ባርያሳ ጫራጛና!” ና ክያማዶ።35ኢየሱስካሞ “ጫክ ሃምማ! ኤያ ካ ግዶርካ ውትማ!” ሃማንቴ ኪም ጎሪዲና። ቤራኻሞ ኤያም ዛርስን ፓይላሳ ዎትሮ ዻባንቴ ክዛራ ዬር ዛርቦ ዬስክስማ ክባራ ውትዲና። 36ዬራ አጋም ኤና ፓይላ ዬርሽዲና፤ ኬ ክግያ “ኤሳንካ ኮኖ ታማር ሃርቴ? ብታሞኻቤ ካንታሞኻቤ ኖ ኡስና ዛርቦናም ጌይቴ ኦይታና ክኦይታይ፤ ኬኻሞ ውታና ኬውታይ” ና ኬያማዶ። 37ክሳ ኜሙትኖኻሞ ራቅና ኦጎታር ዳና ፓይላ ውልዛራ ሻሚዲና።38ኣጋሳ ራስባራ ኢየሱስ ኣይሁድናሳ ምስኮን ኦኖንባራኻ ውታንቴ ስምኦን ኦኖንዛራ ኣርድዲና። ስምኦንሳ ባይስኖ ግባዝ ጌጵካ ጋሊቴና ኮዶ፤ ኬ ኮናንቴ ሃማንቴ ኢየሱስም ምስክዲና። 39ኖኻሞ ኮዛራ ኩፕ ሃማንቴ ግባዝን ኮባራንካ ጎሪዲና፤ ግባዝኖኻሞ ኣጋዛራ ኮም ጋርዲና፤ ናኻሞ ዻጳንቴ ኬም ቾችንሽዲና። 40ሃያሳ ዋዛራ፣ ኤና ይሳ ሃጅሞ ኣብ ኣብንካ ዳናም ፓይላ ኤና ክዛራ ባኣቴ ናእዲና፤ ኖኻሞ ኤና ፓይላ ውልዛራ ኣን ይሳም ዎዳንቴ ኬም ፓሽሽዲና። 41ቤሮናኻሞ “ያ ባርያ ናሳና!” ሃማንቴ እላታንቴ ኤዲ ጱፅ ባራኻ ውትዲና። ኮዶን ኖ ኬም ጎሪዲና፤ ኖ ክርስቶስ ክዶንም ኬዼሳዶንታኻ፣ ዬር ካላኻሞ ኬጌዬኻናንቴ ኖ ዛጋዲማሞ።42ፔኖ ኮሶፃና ኢየሱስ ኤዲ ይቆልማ ራቅ ካላዛራ ያእዲና፤ ዛርስኖኻሞ ኪም ዛግቴና ኮዶ፤ ኖ ክዶን ራቅንዛራ ኬ ናእዲና፤ ኬም ጋራንቴ ያኣን ክጋሬኻናንቴ ኪም ማራናንቴ ሃይዲና። 43ኮዶን ኖ ኬግያ፦ “ካታማና ዋኒዛራ ቃልቴ ባርያ ማንግስትንሳ ሜርሜርን ፃሊን እታማርሴኻናንቴ እናንቴ ዛግሳና ኮዛግሳይ፤ ይንናንቴ ኢም ንእሳዻዶኖ ቃባ ካናንቴና” ና ክያማዶ። 44ይሁዳ ፔንሳ ባርያም ምስካዻን ኦኖና ግዶር ኖ ታማርሳን ዎይሳድማሞ።
Chapter 5
1ዛርስኖ ኪም ታኻንቴ ጭጅቴ ባርያሳ ኣፖን ክታማርሳይንም ኤሳርቴ ኮዶን ዋዳንካ፣ ኢየሱስ ጌንሳሬጥ ኛፓስንካላ ዎያንቴና ክዶ፤ 2ዋዳስ ኣጋኻ ጋጊ ላማ ኛፓስንሳ ኣፖሮ ኡኩማንቴ ኬዳዃ ኖ ሃፕዲና፤ ኮዶን ኤና ካራን ኤምማይና ጋግናባራኻ ሃንቻንቴ ኜፑቴይና ይሳም ሻይቴና ኬዶ። 3ጋግና ዳና ግዶር ስምኦን ጋጋዛራ ሃንቻንቴ ፔንባራኻ ሾሊ ክፔሬኻናንቴ ኪም ኦይስዲና፤ ሃያንቴኻሞ ጋግንዛራ ዳርቃንቴ ዛርስንም ታማርሳን ካርስዲና።4ዼላቃም ጌያቴ ይቱንሳና ስምኦንግያ፦ “ጋግን ሃሳም ሌኤን ግዶንዛራ ጩርሻንቴ ካራን ዬዳናንቴ ኜፑቴይና ዬሳም ዻብማቴ” ና ክያማዶ። 5ስምኦንካሞ ክግያ ይማሳና፦ “ኣስታማራዮ፦ ሶትን ሜሌል ኤምቴ ዎቲ ቃጃንቴ ካራ ካላኻሞ ዬዳድማሞ፤ ታ ያ ሃጌያዳና ኜፑቴይናም ኑንቆሮ ዻባና እጳባይ” ና ክያማዶ። 6ኬ ኣጋንታ ኬሃያዶን ዋዳንካ ካልሎን ካራ ጱፅ ዬድዲና፤ ኬሳ ኜፑቴይናኻሞ ታኻን ካርስዲና። 7ጋጋ ዋ ግዶር ዳና ኬሳ ሃርያና ናዴ ኬም ኬኬልሼኻናንቴ ኬ ኣኒካ ግስምዲና፤ ኬኻሞ ናዴ ጋግና ላማ ውል ግዶር ካራን ፆኦስዲና፤ ጋግና ኬሳኻሞ ፁዋን ካርስዲና።8ስምኦን ሃንዻያ ጴጥሮስካሞ ዬርን ኦጎም ሃፓንቴ ኢየሱስሳ ቡቆሮ ጳርፃንቴ ይጌይና “ጌጳ፦ እንታ ሴሶ ኤዲና፤ እካላንካ ዪማ” ና ክያማዶ። 9ኖ ይንናንቴ ይንታ ክጌያዶኖ ክቤ ኤና ክማላን ዳና ካራን ጱፅን ይዬዳዶን ዬርሻንቴና፤ 10ሃያንቴኻሞ ስምኦንሳ ሃርያና ዘብድዮስ ናና፣ ያእቆብቤ ዮሃንስቤ ዬራ ኣጋም ዬርሽዲና። ኢየሱስካሞ ስምኦንግያ፦ “ሃርኩትንዽናኖ፦ ናንሲ ካኻ ካርሳንቴ ኤዲ ኤማያና ሃዳይ” ና ክያማዶ። 11ኬኻሞ ጋግናም ፔንዛራ ይክድንሳና ራስባራ ፓይላ ውልም ጋራንቴ ኪም ጫግዲና።12ኢየሱስ ካታማናሳ ካታማ ዋሮጎ ክዶን ዋዳንካ ኤዲ ሙልካምባንካ ዳ ካላ ካታማስ ኣጋሮ ዳይዲና፤ ኤያ ኣጋ ኢየሱስም ይያፓና ዎትሮ ክሳ ጳርፃንቴ፦ “ጌጳ፦ ሃናሻያዳና ኢም ፓሽሻዻን ቻላና ሃቻላይ” ሃማንቴ ኪም ምስክዲና። 13ኢየሱስካሞ ኣን ይሳኻ ኪም ላኣሳንቴ፦ “እንታ ናሽዲና፣ ፓሺማ!” ና ክያማዶ። ኣጋዛራ ኤያሳ ሙልካምባኖ ካይዲና።14ኢየሱስካሞ ክግያ “ዬራ ካም ኤዲ ካላናንቴኻሞ ሃጌይናኖ፤ ይያማን ቃልቴ ሃም ኣይሁድ ኤናሳ ዳምብ አሽካያናንቴ ዻውማ፤ ሃፓሻዶኖ ኬናንቴ ማኚ ኮዴኻናንቴ ቃልቴ ሙሴ ይጌያዳ ዳምባም ሙልዻሮ ኣሽክማ” ና ክያማዶ።15ይንታ ኮዶንካሞ ዼላቅኖ ክሳ ጌይዻይኖ ካልሎን ሻሚዲና፤ ኤዲኖ ካልሎን ጱፅኖኻሞ ኖ ዼላቅን ክጌያይንም ኤሳራናንቴቤ ሃጅሞና ይሳ ግዶር ፓሻናንቴ ፑጭቴና ኮዶ። 16ኮዶን ኢየሱስ ሮሮ ውል ራቅ ፃክርሚዛራ ውታንቴ ምስክቴና ክዶ።17ሮሮ ካላ ኢየሱስ ታማርስቴና ክዶ፤ ኦጎታርካሞ ገሊላ ፔንባራቤ ይሁዳ ፔንሳ ሞሮናባራቤ ዬሩሳሌምባራ ናኣዳና ፈረስ ኤናቤ ኤና ሙሴ ዳምብን ታማራሳይናቤ ዳርቃንቴና ኬዶ፤ ኖ ክፓሽሼኻናንቴ ባርያሳ ካንታኖ ክላማና ኮዶ።18ዋዳስ ኣጋኻ ኤና ኤዲ ራንሳ ማልግማዳ ካላም ሻላንካ ሾፓቴ ናእዲና፤ ኢየሱስሳኻሞ ዎትሮ ዎዳናንቴ ኦኖንዛራ ኣርዳናንቴኻሞ ኬ ሃይዲና። 19ዛርስንሳ ጱፃሞንካ ሃማንቴ ኦኖንዛራ ኣርስዻይኖ ኬም ኮባሻዶንታኻ ጳ ኦኖንሳ ዱርንዛራ ውታንቴ ዱሪን ጯቃታንቴ ኤያ ራንሳ ማልግማዳም ክሳ ሻላንካ ዛርንሳ ባክንካ ኢየሱስሳ ዎትሮ ሃ ንችሽዲና። 20ኢየሱስካሞ እምነታ ኬሳም ሼዳንቴ ኤያግያ፣ “ያ ኤያ ካ፣ ሴሶን ሃሳም ሃናንቴ ጋርዽዲና” ና ክያማዶ። 21ኤና ሙሴ ዳምብን ታማርሳይናቤ ፈረስ ኤናቤ፣ “ካ ባርያም ቦዋንቴ ይንታ ዼላቃያ ሃውቴ? ባርያ ካላንብሻሳ ኦባራ ሴሶን ሽእሻናንቴ ቻላያ ሃውቴ?” ሃማንቴ ቃባን ካርስዲና። 22ኢየሱስካሞ ቃቦ ኬሳም ዼሳንቴ ኬግያ፣ “ዎይላም ዬሳኻ ይንታ ሃማንቴ ሃርናንቴ ዬቃቤ? 23‘ሴሶን ሃሳም ሃናንቴ ጋርዽዲና’ ሃንዻያቤ ‘ዻጳንቴ ይማ’ ሃንዻያቤሳ ባዳ ሃማቴ? 24ኮዶንካሞ ይንናንቴ ይንታ እያማዶኖ ኤዲ ናሶ ፔሮጎ ሴሶን ሽእሻናንቴ ጌጳሞ ክሳ ኮዶንም ዬዼሴኻናንቴና” ና ክያማዶ። ሃያንቴኻሞ ኤያ ራንስ ማልግማዳግያ “ዻጳንቴ ሻላን ሃሳም ባኣንቴ ሃሳ ኦኖንዛራ ይማና እያማይ” ና ክያማዶ።25ኖ ኣጋዛራ ዻጳንቴ ኬሳ ዎትሮ ዎይዲና፤ ይንዛራ ዎዻንቴ ይዶን ሻላን ባኣንቴ ባርያናንቴ ጎሺን እማዳቴ ይሳ ኦኖንዛራ ያእዲና። 26ዋዳ ኣጋኻ ኬ ፓይላ ውልናንቴ ዬራ ኣጋ ዬር ዋና ማትዲና፤ ባርያናንቴኻሞ ጎሺ እማንቴ “ሃይታላ ዎቲህ ዬር ዋና ሃፕዲና” ሃማንቴ ካልሎን ኩርትንዽዲና።27ኣጋሳ ራስባራ ኢየሱስ ኦጎታርካ ውታንቴ ያእዲና፤ ኤያ ሌዊ ሃንዻያ ግብርን ፑኡሻያ ግብርን ፑሻዻን ራቅሮ ዳርቃንቴ ክዳኻ ሃፓንቴ ክግያ “ኢም ጫግማ” ና ክያማዶ። 28ኖኻሞ ዬራ ፓይላ ውልም ጋራንቴ ኪም ጫግዲና።29ሌዊካሞ ኢየሱስናንቴ ይሳ ኦኖሮ ዲግስ ጌጲ ሃይዲና፤ ኤና ግብርን ፑኡሻይና ጱፅናቤ ኤና ዋኒቤ ኬላማ ክንካ እꬅምንቴና ኬዶ። 30ፋራሳዊይናቤ ኤና ኬሳ ዳምብን ታማርይሳናቤ “ኤና ግብርን ፑኡሻይናቤ ሴሶን ኤናቤ ማላ ክንካ ይንናንቴ ዬቲ ዬእꬃይኖቤ ዬውጫይኖቤ ሃርቴ?” ሃማንቴ ክሳ ታማርናዛራ ጉንድምዲና። 31ኢየሱስካሞ “ኤና ኣኪምን ይንናንቴ ይዛግሳይና ሃጅሞናና፣ ኤና ጫንቃል ሃምናናንቴ ትማሞ፤ 32እንታ ሴሶን ኤናም ሴሶንባራኻ ባርያዛራ ማሳናንቴና እናኣዶ፤ ኤና ጋዛናም ግስማናንቴ እንታ ናኣድማሞ” ሃማንቴ ኬናንቴ ማስዲና።33ኬ ክግያ “ዮሃንስ ታማርና ሮሮ ጱፅና ቶሮንዻንቴ ባርያም ኬምስካይ፤ ፈረስ ኤና ታማርናኻሞ ኦጎንታና ኬያያይ፤ ኮዶን ታማርና ሃና ሮሮ ውል እꬃ ውጫና ኬያያይ” ና ኬያማዶ። 34ኢየሱስካሞ ኬግያ “ኤና ግስንዻዳና ኡታስ ኬላማ ክዳዃ ኬቶሮንዼኻናንቴ ሃይዻን ቻላው ቻላዻይ? 35ኮዶን ኡታስም ኬኻላ ይንካ ቻዻያ ሮራ ናኣና ክናኣይ፤ ናንሲ ዋዳ ኣጋኻ ኬ ቶሮንዻና ኬቶሮንዻይ” ና ክያማዶ። 36ሃያንቴኻሞ ኬናንቴ ኖ ይንታ ሃማንቴና ዻይንሶ ክጌያዶ፦ “ኣፓላ ሃሊባራ ጫርቄ ሃኣሳንቴ ኣፓላ ጌቾዛራ ኤዲ ጋራያ ቆልማሞ፤ ኖ ኦጎንታ ይያይና ኣፓላ ሃላም ሃኣሳና ክያኣሳይ፤ ጫርቃ ሃላኻሞ ኣፓላን ጌቾንናንቴ ኣግማሞ።37ዎይንን ዚኣን ሃሊን ቁንጫ ሶርብ ጌቾ ግዶር ካንቴ ኤዲ ዎዳያ ቆልማሞ፤ ኖ ኦጎንታ ክያይና ዎይንን ዚኣኖ ሃሊኖ ቁንጫን ሶርባ ጌቻ ጋይኖ ጳቃና ኮጳቃይ፤ ዎይንን ዚኣኖኻሞ ይንቅማና ኮይንቅማይ፤ ናንሲ ቁንጫን ሶርባስሳ ዋጋ ቆልማሞ። 38ኣጋታኻ ዎይንን ዚኣን ሃሊን ቁንጫ ሶርብ ሃሊ ግዶር ካይንቶና ኮዛግሳይ፤ 39ታ ናንሲ ዎይንን ዚኣን ጌቾን ውጫንቴ ዚኣን ሃሊን ኤዲ ዛጋያ ቆልማሞ፤ ኣጋ ሃርቴ ኖ ‘ዚኣኖ ጌቾኖ ዚኣን ሃሊን ካላ ሳጊና ኮዶ’ ክያማንታኻና።”
Chapter 6
1ኡኩንሳ ሮሮ ካላ ኢየሱስ ሃምንሳ ኢንካ ይቴና ክዶ፤ ታማርና ክሳኻሞ ትሻን ቁንፃንቴ ሻክምቴ ጋእቴና ኬዶ። 2ፈረስ ኤና ግዶርካሞ ኤና ዋኒ ኬግያ “ኡኩንሳን ሮራ ጋላ ዬርን ሃይዽሞንም ሃርናንቴ ዬያዬ” ና ኬያማዶ። 3ኢየሱስካሞ ይንታ ሃማንቴና ኬናንቴ ክማሳዶ፦ “ዳዊት ይዳቃዻዶን ዋዳንካ ኤና ክላማ ክንካ ዳና ላማ ዬራ ክያያዳም ዬቲ ናባባዳዬው? 4ኖ ባርዮን ኦኖን ኣርዳንቴ ኣይሁድናሳ ዳምብን ኣሽካይና ሶጎ ይእꬃን ሙናን ቻንቴ ጋይዲና፤ ኤና ክላማን ዳናናንቴኻሞ እምዲና።” 5ሃያንቴኻሞ ኢየሱስ ኬግያ፣ “ኤዲ ናሶ ኡኩንሳን ሮራሳ ጌጳና” ና ክያማዶ። 6ኡኩንሳ ሮሮ ኣብካኻሞ ኖ ኣይሁድናሳ ባርያም ምስካዻን ኦኖንዛራ ኣርዳንቴ ታማርስቴና ክዶ፤ ኦጎታር ኤዲ ኣን ምዛቂ ይንሳ ይማልግማዳ ካላ ዳይዲና። 7ኤና ሙሴ ዳምብን ታማርሳይናቤ ፋራሳዊይናቤ ኪም ጎይ ይንካ ይቤርንሳያ ዛጋንቴ ኤያም ኡኩንሳን ሮራ ጋላ ክፓሽሻይንም ሼዳናንቴ ካላንቴና ኬዶ። 8ኢየሱስካሞ ቃቦ ኬሳም ዼሳንቴ ኤያ ኣንንሳ ማልግማዳግያ “ዻጳንቴ ኤናሳ ዎትሮ ዎይማ!” ሃምዲና፤ ኤያኻሞ ዻጳንቴ ዎይዲና። 9ኢየሱስካሞ ኬግያ “ይንዳ ዬኻላ ዬር ካላ እኦይሴ፤ ኡኩንሳ ሮራ ጋላ ሃይዼኻናንቴ ጌይዻዶኖ ዬር ፃል ሃይንቶሞ ሞ ዬር ዛርቦ? ሳዳ ዻኣሻሞ ሞ ሳዳ ካይሳ?” ና ክያማዶ። 10ሃያንቴ ኢየሱስ ኤና ክሳ ዴሞሮ ዳርቃዳናም ፓይላ ሼዳንቴ፤ ኤያ ኣንንሳ ማልግማግያ፦ “ኣኒ ሃሳም ፒክ ሃይማ” ና ክያማዶ። ኤያኻሞ ጌይዻዳግያ ሃይዲና፤ ክሳ ኣናኻሞ ጫንቃል ፓሽዲና። 11ኮዶን ኤና ጌጲ ዻጋስዲና፤ ኢየሱስዛራ ሃር ዋዬ ሃማንቴ ኬ ክንካ ዼላቅዲና።12ሮራና እግናሳ ሮሮ ካላኻ ኢየሱስ ባርያም ምስካናንቴ ጉርባስዛራ ውትዲና፤ ሶታ ኣጋም ሜሌል ባርያም ምስክቴ ዎዽዲና። 13ፔኖ ኮሶፃና ታማርና ይሳም ግስማንቴ ታጲ ላማናም ኬግዶር ካምዲና፤ ኬናንቴ ኤና ይእሳዻዳና ሃማንቴ ናቢ ዎድዲና።14ኬኻሞ ጴጥሮስ ሃማንቴ ክግስማዳ ስሞኦንቤ፣ እንዳን ናሳ እንድርያስቤ፣ ያእቆብቤ፣ ዮሃንስቤ፣ ፊልጶስቤ፣ በርቴሎሞስቤ፣ 15ማትዮስቤ፣ ቶማስቤ፣ እልፕዮስ ናሳ ያእቆብቤ፣ ፔን ይሳናንቴ ዎያዳ ስምኦንቤ፣ 16ያእቆብ ናሳ ይሁዳቤ ራስባራ ኢየሱስም ሳስካንቴ እማዳ ኣስቆሮንቱ ፔን ጋንታ ይሁዳቤና።17ኢየሱስ ጉርባስባራኻ ኬላማ ክንካ ሃንቻንቴ ራቅን ጳልሮ ዎይዲና፤ ኦጎታር ክሳ ታማርናሳ ዋኒ ዳይዲና፤ ይሁዳ ፔና ፓይላ ግዶርካቤ፣ ዬሩሳሌም ግዶርካቤ፣ ጢሮስቤ ሲዶና ኛፓስንሳ ማራሮኻ ናኣዶኖ ዛርስኖ ጱፅኖ ኦጎታር ዳይዲና። 18ኤና እግናኻሞ ይንናንቴ ኬናኣዶኖ ክካላ ታማራናንቴቤ ይሳ ሃጅሞና ግዶርካ ፓሻናንቴቤና። ኤና ቤሮንካ ጋሊቴን ዳናኻሞ ፓሽዲና፤ 19ካንታኖ ክግዶርካ ውታንቴ ኤና ፓይላም ፓሽሽቴ ኮዶንታኻ፣ ኤና ፓይላ ኪም ላኣሳናንቴ ዛግቴና ኬዶ።20ኖ ታማርና ይሳዛራ ሼዳንቴ ኬግያ ይንታና ክያማዶ፦ “ዬቲ ኤና ኩፕና ባርያሳ ማንግስትኖ ዬንቲ ኮዳንታኻ፣
ዬቲ ኤዲ ፑጋዻዳና፤
21ዬቲ ኤና ታ ዳቃዻዳና ቤሬ ዬምሻንታኻ ዬቲ ኤዲ ፑጋዻዳና፤
ዬቲ ኤና ታ ኤፕቴን ዳና
ቤሬ ዬያንጫንታኻ ዬቲ ኤዲ ፑጋዻዳና፤
22ኤና ኤዲ ናሶኻ ሃማንቴ ዬም ኬቶዛዽና፤ ይሳ ባክሮኻ ዬም ዋና ቡላንቴ፤ ዬዛራ ዬር ዛርቦ ኬጌይናቤ ናቢ ዬሳም ኬሴስና ዬቲ ኤዲ ፑጋዻዳና፤ 23እምባና ኬሳ ኣና ኤና ባርያሳ ኣፖን ጌያይናዛራ ክናም ኬያያዶንታኻ፣ ጳ ፖላሮ ካሺኖ ዬሳ ጌጲና ኮዳይ፤ ኣጋታኻ ሮራ ኣጋኻ ዋዝንዽማቴ፤ ዋርሳኻሞ ክርብማቴ።24ኮዶን ዬቲ ኤና ዎድሞና ታ ዬዋዝንዻዶንታኻ፣ ሃዪ! 25ዬቲ ኤና ታ ምሻዳና ቤሬ ዬዳቃዻንታኻ ሃዪ!
ዬቲ ኤና ታ ሃንጭቴን ዳና
ቤሬ እልል ጃንቴ ዬኤፓንታኻ ሃዪ!
26ኤና ፓይላ ዬሳ ዬርን ፃላሞን ኬጌይና ዬቲ ሃዪ! እምባና ኬሳ ኣና ፖጋሞንካ ባርያሳ ኣፖን ጌያይና ኤናናንቴ ኣጋንታና ኬሃያዶ።27“ኮዶን ዬቲ ኤና እናንቴ ኤሳራይናናንቴ እንታ ጌያና እጌያይ፤ ጋላ ዬሳም ናሽማቴ፤ ኤና ዬም ቶዛዻይናናንቴኻሞ ዬር ፃል ሃይማቴ፤ 28ኤና ዬም ኣሻይናናንቴ ዬቲ ዻክምማቴ፤ ኤና ዬዛርን ዛርቦን ኣሽካይናናንቴኻሞ ባርያም ምስክማቴ፤29ኤያ ሃሳ ካርጫም ጫኣያናንቴ ካርጫ ዋምካሞ እምማ፤ ኤያ ሃሳ ኮቴን ቻያናንቴ ካርቴና ሃሳም ኪም ሃማርናኖ። 30ኤና ሃኻላ ምስካይና ውልናንቴ እምማ፤ ኤያ ሃሳ ኮይሳም ቻዳ ሃናንቴ ክማሴኻናንቴ ሃኦይስናኖ።31ኤና ዬናንቴ ኬያዬኻናንቴ ዬራ ዬዛጋይናም፣ ዬትካሞ ኬናንቴ ኦጎንታ ሃይማቴ። 32ኤና ዬም ናሻይናም ዬናሻያዳና ሃርካ ሳጊ ዬዴ? ሴሶን ኤናኻሞ ኤና ኬም ናሻይናም ናሻና ኬናሻይ። 33ኤና ዬናንቴ ዬርን ፃልን ሃያዳናናንቴ ዬር ፃል ዬሃያያዳና ሃርካ ሳጊ ዬዴ? ሴሶን ኤናኻሞ ኦጎንታ ሃያና ኬሃያይ። 34ኤና ብድሪ ዎናንቴ ማሳና ኬማሳይ ሃማንቴ ዬቃባይናናንቴ ዬብድርሳያ ዳና ሃርካ ሳጊ ዬዴ? ሴሶን ኤናኻሞ ዬራ ይብድርሳዳናም ፓይላ ቻና ዎቻይ ሃማንቴ ሴሶን ኤናናንቴ ብድርሳና ኬብድርሳይ።35ኮዶን ጋላ ዬሳም ናሽማቴ፤ ዬር ፃልካሞ ኬናንቴ ሃይማቴ፤ ኤናኻላ ማሳቴ ቻናንቴ ቃሞ ቁንፅማ ብድርስማቴ፤ ዬቲ ኦጎንታ ዬያይና ዬሳ ካሽኖ ጌጲና ኮዳይ፤ ባርያ ጌጳሳኻሞ ናና ዬዳይ፤ ኖ ኤና ኪም ጎብምናናንቴቤ ኤና ዛርቦናናንቴቤ ፃሊና ክዶ። 36ዬምባ ኤናናንቴ ክቡርቃዻያግያ ዬቲህካሞ ኤናናንቴ ቡርቃዻይና ዳማቴ።37ኤናም ዬዻብንሽናኖ፣ ዬምካሞ ዻብንሻዽማሞ፤ ኤናም ዬቦውናኖ ዬምካሞ ቦውዽማሞ፤ ኤናሳ ሴሶን ጋርማቴ፣ ዬናንቴኻሞ የሳ ሴሶም ጋራ ጋርዻይ።38ኤናንቴ እምማቴ፣ ዬናንቴኻሞ እማና እንዻይ፤ ሻርቃስ ይንካ ኤናናንቴ ዬሳፓርዳኻ ማሳንቴ ይንካ ዬናንቴ ሳፓራናሳፓርዻይ። ካሳ ኦባራ ሻርቃስ እንቃንቴ ጁጋዻዳኻ ፆፃንቴ ይንቅማያ ፃላኻ ሳፓራንቴ ዬናንቴ ዬሳ ዴሞዛራ እማና እንዻይ። 39ሃያንቴ ኖ ዻይንሳ ካም ይንታ ሃማንቴና ኬናንቴ ክጌያዶ፦ “ኤያ ኣፕን ካያ፣ ኤያ ኣፕን ካያስም ኣንሳናንቴ ቻላው? ኬ ላማ ውል ኪም ዬዳቴ ኦሎሮ ኣርዳይዮው? 40ታማራ ይሳ ኣስታማራ ካላንካ ሳግማሞ፤ ይያማንካሞ ኤያ ፃሊ ሃያንቴ ታማራዳ ይሳ ኣስታማራግያና ክዳይ። 41ሃንና ናሳሳ ኣፕሮን ዳ ዬራ ሾላም ሃርናንቴ ሃሼዴ? ሃሳ ኣፕሮ ቱፓን ግያንዶን ዶን ያ ሼዳይዮው? 42ኣፕን ሃኖሮ ሃቃ ዶንም ሼድማ ሃንና ናሳግያ:- ‘እንና ናሳ፣ ሃሳ ኣፕሮን ዳ ዬራ ሾላም እቡሌ’ ሃስ ሃማናንቴ ሃቻሌ? ያ ካይስንሶን ኤያ ካ፣ ብራቴንካ ቱፓን ኣፕን ሃኖሮን ዶን ቡልማ፤ ሃያንቴ ናንሲ ዬራ ሾላ ሃንና ናሳሳ ኣፕሮን ዳም ቡላናንቴ ፃሊ ሃያንቴ ሼዳና ሃሼዳይ።"43ሃቃ ባሺ ዳንቴ ኣፒ ዛርቦ ካያ ሃቃ ቆልማሞ፤ ሃያንቴኻሞ ሃቃ ዛርቦ ዳንቴ ኣፒ ባሺ ካያ ሃቃ ቆልማሞ። 44ሃቃናም ፓይላ ኬሳ ኣፕናኻ ዼሳና ዼሳዻይ፤ ሃቃ ኡኩምካ ዳ ግዶርካ ሃቃ ባላስሳ ኣፕ ሾማዽማሞ፤ ካዻላ ግዶርካ ዎይን ኣፕ ጫራዽማሞ45ኤዲ ፃል ይሳ ዎይላምሮ ዬርን ፃሊን ፆፃዶሮኻ ዬራ ፃላ ኣጋም ጌያናክጌያይ፤ ኤያ ዛርባ ይሳ ዎይላምሮ ዬርን ዛርቦን ፆፃዶሮኻ ዬራ ዛርባ ኣጋምና ክቡላይ። ኤዲ ይሳ ዎይላምሮ ዬርን ፆፃዶሮኻ ኣጋም ቡላቴ ጌያናክጌያይ።46ዬራ እጌያይናም ዬቲ ኣሽክማሞ፤ ታ እግያ ‘ጌጳዮ፣ ጌጳዮ’ ሃርናንቴ ዬያሜ? 47ኤዲ እዛራ ናኣያ ፓይላ እሳ ዼላቅን ኤሳራንቴ ኣሽካያ ሃውም ክታኻይንም ዬናንቴ እዻዌ፤ 48ኤያ ኣጋ ኦኖን ዻኻንቴ ኦሎን ፄሪ ኮያንቴ ላይታንዛራ ኦኖን ይሳም ዻኻዳሚና ክታኻይ፤ ሚሮኖ ጉንዛንቴ ኦና ኣጋም ይቅዲና፤ ኦና ኣጋም ፃሊ ዻኻዻዶንታኻ ይቃናንቴ ቻላድማሞ።49ኮዶን ኤያ እሳ ዼላቅን ኤሳራንቴ ኣሽክማ ኣጋ ኦኖን ይሳም ኦሎን ፄሪ ኮያንቴ ላይታንዛራ ዬስክማ ፔሮ ኦኖን ዻኻዳምና ክታኻይ፤ ምሮኖ ካንታኻ ናዴ ኦና ኣጋም ኮይቃዶን ዋዳንካ ይሪካ ይፕዲና፤ ይፕንቶኖ ክሳኻሞ ካልሎን ጌጲና ኮዶ።
Chapter 7
1ኢየሱስ ዼላቅና ክናም ፓይላ ዛርስንሳ ዎትሮ ጌያቴ ይቱንሳና ቅፕርናሆምዛራ ያእዲና።2ኦጎታርካሞ ኤያ ፖሊስና ማቶናሳ ጋራ ዳይዲና፤ ካይስታ ክሳ ካልሎን ክናሻያ ሃጃዻንቴ ጃናንቴና ክዶ። 3ኖኻሞ ኢየሱስሳ ዬር ይኤሳራና ካይስታ ክሳም ክናንቴ ክፓሽሼኻናንቴ ኪም ክናንቴ ኬምስካኻናንቴ ኣይሁድናሳ ዞንዛና ዋኒም ክዛራ ይእስዲና። 4ኤና ኣፖን ባኣቴ ያኣዳናኻሞ ኢየሱስ ካላ ይናኣና፤ ኪም ካልሎን ምስካንቴ፤ “ዬራ ካም ክናንቴ ሃዬኻናንቴ ዛግሳና ኮዛግሳይ፤ 5ኣጋኻሞ ኤያ ካ ዛርስን ዎሳም ናሻና ክናሻይ፤ ዎሳ ምስኮን ኦኖንምካሞ ዎናንቴ ኣሽክሻዳ ኖና” ሃማንቴ ካልሎን ኪም ባንዝምዲና። 6ሃይዻዃ ኢየሱስ ኬላማ ክንካ ያእዲና። ኖኻሞ ክሳ ኦኖን ካላ ፄዲ ክናኣና፤ ኤያ ፖሎስና ማቶናሳ ጋራ ኤና ይሳ ሃርያናም ክዛራ ይእሳንቴ ክግያ ይንታና ክያማዶ፦ “ጌጳዮ፣ ያ እሳ ኦኖን ሃኣርዴኻ ዛግሳያ ኤዲ እትሞንታኻ ኦራ ንቴ ሃጋሊናኖ፤ 7ኣጋኻ ሃማንቴ እንታ ሃዛራ ያኣናንቴ እናንቴ ኮዛግሳያግያ እንታ ኢም ፓይድማሞ፤ ታ ያ ዼላቅ ካላ ሶጎ ጌይማ፣ ካይስታ እሳ ፓሻና ክፓሻይ፤ 8እንታ እባራንካ እሳ ጳባራ ኤዲ ኢም ኤርጋያ ዳይዲና፤ ፕር እሳ ቾባራኻሞ እኤርጋይና ፖሎስና ዳይዲና፤ ዋግያ ይማ እያምና፣ ኖ ያኣና ክያኣይ፤ ዋግያኻሞ ኒማ እያምና፣ ኖኻሞ ናኣና ክናኣይ፤ ካይስታ እሳግያኻሞ ‘ዬራ ካም ሃይማ’ እያምና፣ ዬራ ክናንቴ ጌይዻዳም ሃያና ክሃያይ።”9ኢየሱስካሞ ኣጋም ይኤሳራና ኤያም ዬርሺዲና፤ ኤና ኪም ጫጋይናዛራ ሽራንቴ ኬግያ “እንታ ዬናንቴ ጌያና እጌያይ፤ እምነት ኮንታ ሃማ ጌጲ እስራኤል ፔሮ ካውል እንታ ሃፓድማሞ” ና ክያማዶ። 10ኤና ይእሳዻዳናኻሞ ኦኖንዛራ ማታቴ ይናኣዶን ዋዳንካ፣ ክሳ ካይስታ ፓሻንቴ ክዳኻና ኬያፓዶ።11ኣጋሳ ራስባራ ኢየሱስ ጌጲ ካፕማ፣ ካታማስ ናይን ሃንዻያዛራ ያእዲና፤ ክሳ ታማርናቤ ዛርሲ ጱፅካሞ ክላማ ያእዲና። 12ኢየሱስ ሙልዻፖን ይንካ ካታማንዛራ ኣርዳዻይንም ክዬስካና፤ ኤና ኤዲ ጃዳ ካላም ባኣንቴ ካታማንባራኻ ውትቴና ኬዶ፤ ናሳ ጃዳኻሞ እንዳንሳ ካላና፤ እንዳኖኻሞ ዳልሶና፤ ካታማን ዛርስኖ ጱፅኖ ኮላማ ዳይዲና። 13ጌጳኻሞ ኮም ይያፓና ኮናንቴ ቡርቃዻንቴ ኮግያ፣ “ሃኤፕናኖ፤ ሌምማ” ና ክያማዶ። 14ኖ ፄዲ ናዴኻሞ ሻላን ይንካ ናሳ ጃዳም ባዻዶንም ላኣስዲና፤ ኤና ባኣዳናኻሞ ትፕ ዎይዲና፤ ኢየሱስካሞ ናሳ ጃዳግያ “ያ ባርሻስ፣ ሃግያ ዻጲማና እያማይ!” ሃምዲና። 15ኤያ ጃዳኻሞ ዻጳንቴ ዳርቅዲና፤ ሃያንቴ ዼላቃን ካርስዲና። ኢየሱስካሞ ኪም ቻንቴ እንዳንናንቴ እምዲና። 16ኤዲኖ ፓይላ ውል ጌጲ ኩርትንዻንቴ ባርያም ጎሽቴ፤ “ኤዲ ባርያሳ ኣፖን ጌያያ ጌጲ ዎግዶርካ ውትዲና፤ ባርያኻሞ ዛርስን ይሳም ቃብዲና” ና ኬያማዶ። 17ኢየሱስሳ ኜሙቲኖ ኦጎኖ ይሁዳ ፔሮቤ ፔና ኮሳ ዴሞሮን ዳና ፓይላ ውል ግዶር ሻምዲና።18ዮሃንስሳ ታማርናኻሞ ክናም ፓይላ ዮሃንስናንቴ ጌይዲና። ኖኻሞ ኬሳ ባክሮ ታማሪ ላማም ግስማንቴ፤ 19“ናኣና ክናኣይ ይንግያ ሃንዻዳ ያሞ? ሞ ኤድ ኣብ ዎካሌ? ሃማንቴ ጌጳ ኢየሱስካላ ቃልቴ ኦይስማቴ” ሃማንቴ ኬም ክዛራ ይእስዲና። 20ኤናኻሞ ኢየሱስ ካላ ናዴ ክግያ፣ “ይንግያን ናኣና ክናኣይ ሃንዻዳ ያሞ? ሞ ኤድ ኣብ ዎካሌ? ሃማንቴና ኑንቆንካ ሻያያ ዮሃንስ ሃዛራ ዎም ክንእሳዶ” ና ኬያማዶ። 21ዋዳ ኣጋኻ ኢየሱስ ኤዲ ጱፅም ሃጅሞሮኻቤ ቡርቅሮኻቤ ቤሮና ዛርቦና ባራ ቡልዲና፤ ኤና ኣፕን ካያና ጱፅናኻሞ ኬያፔኻ ሃይዲና፤ 22ዮሃንስሳ ኤና ይእሳዻዳናግያ ኖ ይንታና ክያማዶ፦ “ቃልቴ ዬራ ዬያፓዳናቤ ዬኤሳርዳናቤም ዮሃንስናንቴ ጌይማቴ፤ ኤና ኣፕን ካያና ሃፓና ኬያፓይ፤ ኤና ኤላና ቲፕ ቲፕ ያያና ኬያያይ፤ ሙልካምባን ኤናኻሞ ፓሽቴና ኬዶ፤ ቃሞን ካያናኻሞ ኤሳራና ኬኤሳራይ፤ ኤና ጃዳናኻሞ ዴምጲንባራ ዻጲቴና ኬዶ፤ ኤና ኩፕናናንቴኻሞ ሜርሜርን ፃሊን ጌያና ጌይዻይ። 23እዛራ ኤዲ ኢ ካዽማ ሃውካሞ ይንናንቴ ፓፅ እንዻዳናና።” 24ዮሃንስሳ ኤርጎን ኤና ማታቴ ኬዬኣዃ ራስባራ ኢየሱስ ዛርስንናንቴ ዮሃንስሳ ዬር ይንታ ሃማንቴ ጌይዲና፦ “ዳራንዛራ ይንናንቴ ዬናኣዶኖ ሃር ሼዳናንቴቴ? ግባሮን ይሾሻይና ባልጉዳናም ሼዶታው ዬናኣዶ? 25ታ ናንሲ ሃር ሼዶታ ዬናኣዴ? ኤያ ኣፓላን ባሺን ኣርሳዳም ሼዶታው ዬናኣዶ? ኤና ኣፓላን ባሺን ኣርሳንቴ ቃያይናቤ ጋሎን ቆልማ ዳይና ኦ ማንግስት ኦኖሮ ዬናንቴ ዳይዲና። 26ታ ናንሲ ሃር ሼዶታ ዬናኣዴ? ኤያ ባርያሳ ኣፖን ጌያያም ሼዶታው ዬናኣዶ? ዪኒ ልኪና፤ ዬናንቴ ጌያና እጌያይ ሼዶታ ዬናኣዳ ኤያ ባርያሳ ኣፖን ጌያያሳ ሳጋሚና።27“‘ሃም ብራንቴ ጎይን ሃሳም ሃናንቴ ኣሽካያ እሳ ኤርጎን ኤያም ሃሳ ብራሮ ይእሳና እይእሳይ’ ሃማንቴ ይንሳን ኡካዻዳ ኣጋ ኖና፤ 28እንታ ዬናንቴ ጌያና እጌያይ፤ ኤና ሜና ይኣዻዳና ግዶርካ ዮሃንስካላ ኤዲ ሳጋያ ቆልማሞ፤ ኮዶን ባርያ ማንግስትሮ ኤያ ውልካላንካ ሾላ ኣጋ ክካላንካ ሳጋና ክሳጋይ።” 29ኤና ዬራ ኣጋም ኤሳራዳና ፓይላቤ ግብርን ኤና ፑኡሻይና ካውል፣ ዮሃንስሳ ሻዮንካ ሻይዻንቴ ባርያ ጎንዼ ክዶንም ዻውዲና፤ 30ኮዶን ኤና ፈረስ ኤናቤ ኤና ሙሴ ዳምብን ዼሳዳናቤ ዮሃንስ ኣንሮጎ ሻይዻን ይጋራዶንታኻ ባርያ ኬናንቴ ቃባ ክቃባዳም ቦውዲና። 31ሃያንቴኻሞ ኢየሱስ ይንታና ክያማዶ፦ “ታ ናንሲ ኤዲን ታንጋን ኮም ሃርካ እዬክንሴ? ዎይካሞ ሃር ኬታኬ? 32ኤና ጳልሮጎ ዳርቃንቴ ኪም ግስማይናምና ኬታኻይ። ኬኻሞ “ዎቲ ዬናንቴ ቱሉንጎን ፑግዲና፣ ዬቲ ክርባድማሞ፤ ዎቲ ዬናንቴ ዙልሞ ዎቡላዃ፤ ዬቲ ኤፓድማሞ’ ክግያ ሃማይናምና ኬታኻይ።33ኦጎኖ ይንታ ኮማታዶኖ ኑንቆንካ ሻያያ ዮሃንስ እስን እꬅማቤ ዎይን ውጭማቤ ክንና ክዛራ ቤሮ ዳይዲና ና ዬያማዶ። 34ፕር እንታ ኤዲ ናሶ እꬃዳቴቤ ውጫዳቴቤ እንና፣ ክግያ እꬅሞ ኤዲቤ ውጮ ኤዲቤ ኤና ግብርን ፑኡሻይናቤ ሴሶን ኤናቤሳ ሃርያናና ዬያማዶ። 35ታ ናንሲ ሃማሞኖ ሊክ ኮዶንም ናና ኮሳ ፓይላ ውልካ ዼሳዽዲና።”36ኣጋሳ ራስባራ ፋራሳዊይናሳ ኤዲ ካላ ኢየሱስ ክላማ ክንካ ክእꬅሜኻናንቴ ኦኖን ይሳዛራ ቾችንሻናንቴ ግስምዲና፤ ኖኻሞ ፋራሳዊያ ኦኖን ኣርዳንቴ እꬅማናንቴ ዳርቅዲና። 37ካታማስ ኣጋሮ ዶኖ ሜ ሴሶ ኤድ ካላ፣ ኢየሱስ ኤያ ፋራሳዊያ ኦኖሮ እꬅምቴ ዳርቃንቴ ክዶን ይኤሳራና ና ኣልባስጥሮስ ቃርምሻኻ ሽቶ ባኣንቴ ናእዲና፤ 38ክሳ ዙሎባራ ራን ክሳኻላ ዎያንቴ ኤፕቴ ራን ክሳም ይሳ እርማን ኑንቆንካ ጫፕሽቴ ይሳ ስትንካኻሞ ዹቃን ካርስዲና፤ ራን ክሳም ሱንቅቴ ሽቶንካ ቃዽዲና።39ኪም ቾችንሻዳ ፋራሳዊያኻሞ ኦጎም ይያፓና፣ “እኒ ኤያ ካ ኤዲ ባርያሳ ኣፖን ጌያያ ይዳና፣ ኤስኖ ኪም ላኣሳዶኖ ሃው ኮዶንቤ፣ ሃያንቴኻሞ ሜ ሃሳማ ኮዶንም እኒ ዼሳዻን ቻላናክቻላይ፤ ና ሴሶ ኤዲና” ሃማንቴ ይሳ ዎላምንካ ቃብዲና። 40ኢየሱስካሞ ክግያ፣ “ስምኦን፣ ሃናንቴ ዬር እጌያያ ዳይዲና” ና ክያማዶ። ኖኻሞ “ኣስታማራዮ፣ እናንቴ ጌይማ” ና ክያማዶ።41ኢየሱስካሞ ክግያ ይንታና ክያማዶ፦ “ኤያ ብሬን ብድርሳያኻላ ብሬን ብድራዳና ኤዲ ላማ ዳይዲና፤ ኤያ ዋዛራ ዲናር ማቶ ዶንጝ፣ ኤያ ላንሳዛራኻሞ ዲናር ዶጝታም ዳይዲና። 42ዬር ኬካሻያ ኬሳ ኮቆልሞንታኻ ኤያ ኬላማ ውልናንቴ ባዛና ኬሳም ኬናንቴ ጋርዲና። ታ ናንሲ ኤና ላማ ውልግዶርካ ኤያ ኬናንቴ ብድርሳዳም ጌጲካ ናሻያ ሃማቴ?” 43ስምኦንካሞ፦ “እካላ ይንናንቴ ባዛን ጱፅን ኤያ ጋርዻዳምና ክታኻይ” ሃማንቴና ክማሳዶ። ኢየሱስካሞ ክግያ “ሊኪና ሃጌያዶ” ና ክያማዶ።44ኤስንዛራ ማታቴ ሼዳንቴ ስምኦንግያ ይንታና ክያማዶ፦ “ኤስን ኮም ሼድቴው ሃዶ? እንታ ሃሳ ኦኖንዛራ እኣርዳዃ ያ እሳ ራንናንቴ ኑንቆኻሞ እማድማሞ፤ ኮዶን ና ራና እሳም ይሳ እርማን ኑንቆንካ ጫፕሽቴ ይሳ ስቲንካ ዹቅዲና። 45ያ ኢም ካላኻሞ ሱንቃድማሞ፤ ኮዶን ና እኒ እኣርዳዳሮኻ ካርሳንቴ ራን እሳም ሱንቃን ዎይሳድማሞ።46ያ እሳ ሜቴን ዋኣትንካ ቃዻድማሞ፤ ኮዶን ና ራን እሳም ሽቶንካ ቃዽዲና። 47ኣጋታኻ ሃናንቴ ጌያና እጌያይ፤ ና ኢም ጌጲ ኮናሻዶንታኻ ሴሶ ጱፅ ኮሳ ኮናንቴ ጋርዽዲና፤ ኮዶን ኤያ ይንሳ ሴሶን ሾሊን ጋርዻያ ኣጋ ሾሊ ሶጎና ክናሻይ።48ኢየሱስካሞ ኤስንግያ “ሴሶን ሃሳም ሃናንቴ ጋርዽዲና” ና ክያማዶ። 49ቾችና ክላማ ክንካ እꬅምቴ ዳርቃዳናኻሞ “ካ ኤዲሳ ሴሶም ጋራያ ኖ ሃውቴ?” ሃማንቴ ኬ ክንካ ሃሳውዲና። 50ኢየሱስካሞ ኤስንግያ “እምነትኖ ሃሳ ሃም ዻኣሽዲና፤ ፃሊንካ ይማ” ና ክያማዶ።
Chapter 8
1ኣጋሳ ራስባራ ኢየሱስ ባርያ ማንግስትንሳ ሜርሜርን ፃሊንም ታማርሳዳቴ ካታማናቤ ሞሮናቤኻ ሳግዲና። ታጲ ላማና ይእስድና ክላማ ክንካ ዳይዲና፤ 2ሃያንቴኻሞ ቤሮንባራቤ ሃጅሞናባራቤ ፓሽሻዻዳና ሜና ዋኒካሞ ክላማ ክንካና ኬዶ፤ ኬኻሞ ቤሮን ꬆጳን ይንባራኻ ይውታዶኖ መግደላ ፔን ጋይኖ ማርያምቤ፣ 3ሄሮዶስ ኦኖን ዻቃናያሳ ኩዛ ሜኖ ዮሃናቤ፣ ሶስናቤ፣ ሃያንቴኻሞ ኤና ዋኒ ጱፅና ዳይዲና፤ እግናኻሞ ኮይና ይናኻ ኬናንቴ ዋድምቴን ዳናና። 4ኤዲኖ ጱፅካሞ ክዛራ ፑጫንቴ ኮዳዃቤ፤ ሃያንቴ ኤና ካታማ ኣብ ኣብባራኻ ክዛራ ንቴ ኬዶን ዋዳንካ፤ ኖ ዻይንሳ ካም ይንታ ሃማንቴና ኬናንቴ ክጌያዶ፦ 5“ኤዲ ሃሚ ፓኻያ ካላ ሃሚን ይሳዛራ ጴንታ ጲዮታና ክያኣዶ፤ ክጲያን ዋዳንካ ጴንታና ዋኒ ጎይንሳ ዴሞሮና ኬዲናዶ፤ ራንካኻሞ ኬም ትጋዽዲና፤ ካርያናኻሞ ኬም እꬅዲና። 6ጴንታና ዋኒካሞ ራቅን ሃርቾሮና ኬዲናዶ፤ ይባቃላናኻሞ ራቅኖ ጫፒ ኮትሞንታኻ ዋችዲና።7ሃያንቴ ጴንታና ዋኒ ኡኩምንሳ ባክሮና ኬዲናዶ፤ ኡኩምኖኻሞ ኬላማ ክንካ ጌጳንቴ ኬም ሹማቴ ሽእሽዲና። 8ጴንታና ዋኒካሞ ፔን ፃልሮና ኬዲናዶ፤ ይባቃላናኻሞ ማቶዛራ ማቶና ኬኡሻዶ።” ኖ እግናም ጌያቴ ይቱንሳና ናቅሲ ይሳም ዼግ ሃያንቴ “ኤያ ቃሞን ኤሳራን ካዳ ክኤሳሬ” ና ክያማዶ። 9ታማርና ክሳኻሞ ዻይንሳ ኣጋሳ ዎኻሊንም ክካላ ኦይስዲና። 10ኖኻሞ ይንታና ክያማዶ፦ “ባርያ ማንግስትንሳ ኢን ኑንቆንም ዬዼሴኻናንቴ ዬናንቴ እንዽዲና፤ ኮዶን ኤና ዋኒናንቴ “ ‘ ኬ ሃፓንቴ ይሳ ዎይላምሮ ዎዳን ኬጋሬ፤
ኤሳራንቴኻሞ ጶቅሳን ኬጋሬካኻናንቴ ኬናንቴ ዻይንሶኻና ጌይዻይ።’
11ታ ናንሲ ዻይንሳሳ ዎኻላ ካና፦ ይንግያን ጴንታኖ ሃንዻዶኖ ባርያሳ ዼላቅኖና። 12ጴንታና ጎይንሳ ዴሞሮ ዲናዳና እግና ኤና ባርያሳ ዼላቅን ኤሳራይናና፣ ኮዶን ኣምናንቴ ዻቃን ኬጋሬኻናንቴ ሜሻሳ ናዴ ባርያሳ ዼላቅንም ይንሳ ዎይላምሮኻ ክቻይና ኤናና። 13ጴንታና ሃርቾን ራቅሮ ዲናዳና እግና ኤና ባርያሳ ዼላቅንም ኤሳራንቴ ዋዛንካ ቻይናና፤ ኬ እግና ዋዳ ቶኻናንቴና ኬኣምናይ፤ ጫጪ ኬሳ ኮቆልሞንታኻ ጋሎኖ ኮናኣን ዋዳንካ ኬ ኤና እግና ይሪካ ጋራንቴ ያኣይናና።14ጴንታና ኡኩምንሳ ባክሮ ዲናዳና እግና ኤና ባርያሳ ዼላቅንም ኤሳራይናና። ኤና እግና ዋዳ ቶኻ ካፓንቴ ፔን ኮሳ ዴንታን ቃብቴቤ፣ ኮሳ ዎዲማሞንቤ፣ ኮሳ ዋዛንቤኻ እዛቃዻዃ ጎይ ልኪካ ኣፕን ካምናና። 15ጴንታና ፔን ፃልሮ ዲናዳናኻሞ እግና ኤና ባርያሳ ዼላቅንዛራ ቃቦ እማንቴቤ ዎይላም ካላቤኻ ኤሳራንቴ ይንካ ዳይናና፣ ዶንሻንቴቤ ይንካ ዋቻዻንቴቤ ኣፕን ካይናና።16“ኖንም ሮጲሳንቴ ዳሳ ኢር ዎይካሞ ኣልጋን ቾባራ ዎዳያ ኤዲ ካላኻሞ ቆልማሞ፤ ኤና ኦኖንዛራ ኣርዳይና ኖን ኬያፔኻናንቴ ዼግ ሃያንቴና ኬዎዳይ። 17ኦጎኖኻሞ ዬር ኣቺምር ዳ ሃፕንዽማ፣ ዬር ዼሳዽማ ኖንናንቴ ሃፕንዽማ፤ ዬር ኣምር ዳ ኮቆልሞንታኻና። 18ታ ናንሲ ሃሞንታ ሃያንቴ ዬኤሳራይንም ፃሊ ቃብማቴ፤ ኤያ ይንስ ዳናንቴ ሻባና ሻባዻይ፤ ኮዶን ኤያ ይንስ ቆልማኻላ እሳ ዳይዲና ይንግያን ሃማንቴ ክቃባያምካሞ ክካላ ቻና ቻዻይ።”19ኣጋሳ ራስባራ ኢየሱስ እንዳንቤ እንዳን ናናቤ ኖ ክዶን ራቅንዛራ ናእዲና፤ ኮዶን ዛርስንሳ ጱፃሞንካ ሃማንቴ ክካላ ዬስካናንቴ ኬ ቻላድማሞ። 20ዋዳስ ኣጋኻ “ሃንናቤ ሃንና ናናቤ ሃም ሼዳናንቴ ናዴ ጳሎ ዎያንቴና ኬዶ” ሃማንቴ ኤና ዋኒ ክናንቴ ጌይዲና። 21ኢየሱስካሞ ኬናንቴ ይማሳና “እንናቤ እንና ናናቤ ባርያሳ ዼላቅን ኤሳራንቴ ይንካ ኤና ዳይና” ና ክያማዶ።22ሮሮ ካላ ኢየሱስ ታማርና ይሳ ላማ ጋግንዛራ ሃንቻንቴ፤ ኬግያ “ኛፓስንሳ ሳባራ ዎሳጌ” ና ክያማዶ፤ ሃያንቴ ኬ ያኣን ካርስዲና። 23ይቴኻሞ ኬዳዃ ኢየሱስሳ ኣፒ ኮግንዻዃ ራትዲና፤ ዋዳን ኦጎኻ ኛፓስሮጎ ቱልማይኖ ዻጵዲና፤ ኑንቆኖኻሞ ጋግንሳ ኢን ኮካይማዶንታኻ ኬ ካዮን ኣፖሮና ኬዶ።24ታማርናኻሞ ክካላ ናዴ፤ “ጌጳዮ፣ ጌጳዮ፣ ካያናንቴና ዎዶ!” ሃማንቴ ኪም ቃንስዲና። ኖኻሞ ዻጳንቴ ግባሮንቤ ቱልማይንቤ ጎሪዲና፤ ዋዳን ኦጎኻ ቱልማይኖ ዎይዲና፣ ኛፓስኖኻሞ ጫክ ሃምዲና። 25ኖኻሞ ይሳ ታማርናግያ “ዬሳ እምናትኖ ቆላ?” ና ክያማዶ። ኬኻሞ ኩርትንዻንቴቤ ጎሻንቴቤ “ካ ግባሮንቤ ኑንቆንቤም ጎራያ፣ ኬኻሞ ይንናንቴን ይኤሳራያ ኖ ሃውቴ?” ና ክግያ ኬያማዶ።26ኣጋሳ ራስባራ ኬ ገሊላ ኛፓስንሳ ሳባራን ዶን ጌርጌሴኖን ፔንዛራ ጋግንካ ሳግዲና። 27ኢየሱስካሞ ጋግንባራ ፔንዛራ ክያንቻንዶን ዋዳንካ ቤሮን ይሽማዳ ካታማን ኦጎ ኤዲ ካላ ኪም ሃፕዲና፤ ኤያ ኣጋ ቦን ጱፅናንቴ ኣፓላ ኣርስማ ኦኖሮ ዳን ጋራንቴ ዱክን ራቅንም ይሳ ኦኖ ሃያዳና።28ኤያ ኣጋ ኢየሱስም ይያፓዶን ዋዳንካ እላታንቴ ክሳ ዎትሮ ጳርፃንቴ፣ ናቅሲ ይሳም ዼግ ሃያንቴ “ባርያ ጌጳ ናሳ ኢየሱስ፣ እላማ ሃሳ ዶኖ ሃርቴ? ኢም ጋልንሻን ሃጋሬኻናንቴ እንታ ሃም ምስክዲና” ና ክያማዶ። 29ኖ ይንናንቴ ይንታ ክያማዶኖ ኤያ ግዶርካ ክውቴኻናንቴ ኢየሱስ ውትማ ሃማንቴ ክጌያዶንታኻና። ቤራኻሞ ላይ ክዻጳንታኻ ኤያም ሳንሳላትንካቤ ዛውን ራን ዻኻንቤኻ ዻኻንቴ ኪም ማንካዽናኻሞ ሳንሳላትን ይንካ ዻኻዻይንምካሞ ታሽካንቴ ቤሮኖ ክዛራን ዶኖ ኪም ዳራንዛራና ኮኣንሳይ። 30ኢየሱስካሞ ክግያ “ናብኖ ሃስ ሃውቴ?” ሃማንቴ ኦይስዲና። ኖኻሞ ቤሮ ጱፅ ኪም ኮሽማዶንታኻ፣ እሳ ናብኖ “ሌጌዎን” ና ክያማዶ። 31ቤሮናኻሞ ኦሎን ፄሪንዛራ ኬም ይእሳን ክጋሬኻናንቴ ኪም ጌጲ ምስክዲና። 32ራቅን ኦጎሮ ጌማርታዛራ ጉቱሚ ኬል ጱፅ ግሽቴና ዳዻዶ፤ ቤሮናኻሞ ጉቱምናዛራ ኣርድማቴ ኬግያ ክያሜኻናንቴ ኪም ምስክዲና፤ ኖኻሞ ኬኣርዴኻናንቴ ጌይዲና። 33ቤሮናኻሞ ኤያባራንካ ውታንቴ ጉቱምናዛራ ኣርድዲና፤ ጉቱምናኻሞ ዴሎንሳ ኣፖንዛራ ምጫ ሙጉማንቴ ኛፓስንዛራ ካይማንቴ ፁውዲና። 34ግሽሞን ኤናኻሞ ዬራ ሃምማዳናም ይያፓዶን ዋዳንካ፤ ጎብቴ ቃልቴ ካታማናቤ ሞሮናቤ ግዶር ጌይዲና። 35ዛርስኖኻሞ ዬራ ሃይዻዳናም ሼዳናንቴ ይዶንባራኻ ውታንቴ ኢየሱስዛራ ናእዲና። ኤያ ቤሮን ይንባራ ይውታዳ ኣፓላ ኣርሳንቴ ሜቴ ክሳ ኮማቷዃ ኢየሱስሳ ራንሳ ዴሞሮ ዳርቃንቴ ክዳዃ ይያፓና ኬ ኩርትንዽዲና።36ኤያ ቤሮን ይሽማዳ ክፓሻዶንም ኤና ሃፓዳና፣ ሃስ ሃማንቴ ክፓሻዶንም ዛርስንናንቴ ጌይዲና። 37ጌርጌሴኖንሳ ዴሞሮ ኤና ዳና ፓይላ ጌጲ ኬኩርትንዻዶንታኻ ፣ ኦጎታርካ ክዬኤኻናንቴ ኬ ኢየሱስም ምስክዲና፤ ኖኻሞ ጋግንዛራ ሃንቻንቴ ማታቴ ያእዲና። 38ኤያ ይንባራኻ ቤሮን ይውታዳኻሞ ክላማ ክንካ ዳናንቴ ኢየሱስም ምስክዲና፤ ኮዶን ኢየሱስ ይንታ ሃማንቴና ኪም ክይእሳዶ፦ 39“ሃሳ ኦኖንዛራ ማታቴ ቃልቴ ዬርን ጌጶን ባርያሳ ሃናንቴ ሃይዻዶንም ጌይማ” ና ክያማዶ። ኤያኻሞ ኢየሱስሳ ዬርን ጌጶን ክናንቴ ሃይዻዶንም ካታማና ፓይላዛራ ጌያዳቴ ያእዲና።40ዛርስኖኻሞ ፓይላ ክሳ ናኣም ካሊቴ ይዶንታኻ፣ ኢየሱስ ክናኣና ኬ ዋዛኻ ኪም ቾችዲና። 41ዋዳ ኦጎኻ ኢያኢሮስ ሃንዻያ ኣይሁድናሳ ምስኮን ኦኖንሳ ጋራ ናዴ፣ ኢየሱስሳ ራሮ ዻርፃንቴ ክሳ ኦኖንዛራ ክዬኤኻናንቴ ኪም ምስክዲና፤ 42ይንናንቴኻሞ ኪም ክምስካዶኖ ናኖ ክሳ ቦንንሳ ታጲ ላማኖ ካላን ብሽኖ ኦጎኖ ሶጎ ኮዶንታኻና፤ ናኻሞ ሎቃስካና። ኦጎዛራኻሞ ይቴ ክዳዃ ዛርስኖ ኪም ይቅቴ ካልሎን ኪም ጭጅቴና ኮዶ።43ቦን ታጲ ላማናንቴ ማኣስን ይንቅስቴ ዶኖ ሜ ካላ ዳይዲና፤ ኮይና ይሳ ዳናም ፓይላ ኤና ዼሻን እምባናናንቴ እማቴ ቱንሳንቴ ኤዲ ካላኻሞ ኮም ፓሽሻናንቴ ቻላዳ ቆልማሞ። 44ናኻሞ ኢየሱስሳ ቡዶባራ ናዴ ክሳ ኣፓላንሳ ብራም ላኣስዲና፤ ማኣስኖ ኮሳ ይንቅምቴን ዶኖኻሞ ኣጋዛራ ዎይዲና። 45ኢየሱስካሞ፣ “ሃውቴ ኢም ላኣሳዳ?” ና ክያማዶ። ኤና ፓይላ ዎቲ ሃም ላኣሳድማሞ ኬያማዃ ጴጥሮስ ክግያ፣ “ጌጳዮ፤ ዛርስኖ ፓይላ ሃም ታኻንቴ ይቅቴቤ ጭጅቴቤ ኮዳዃ ሃውቴ ኢም ላኣሳ ሃስ ሃሜ?” 46ኮዶን ኢየሱስ፣ “ኤዲ ካላ ኢም ላኣስዲና፤ ካንታኻሞ እባራንካ ኮውታዶንም እንታ ዼስዲና” ና ክያማዶ። 47ኤስኖኻሞ ዬራ ኮሳ ማይ ክዼስማዶንታኻ፤ ግባዛዳቴ ናዴ ክሳ ዎትሮ ጳርፅዲና፤ ሃርናንቴ ይላኣሳዶንቤ ሃሞንታ ይሪካ ይፓሻዶንቤም ዛርስን ፓይላ ውልሳ ዎትሮ ጌይዲና። 48ኖኻሞ ኮግያ “ናኖ እሳ፣ እምነትኖ ሃሳ ሃም ፓሽሽዲና፤ ፃሊንካ ይማ” ና ክያማዶ። 49ኢየሱስ ኣኻራ ዼላቅቴ ክዳዃ ኤዲ ካላ ኣይሁድናሳ ምስኮን ኦኖንሳ ጋራ ኢያኢሮስ ኦኖንባራ ናዴ፣ ኢያኢሮስ ግያ “ናኖ ሃሳ ጃይዲና፤ ናንሢ ኣስታማራም ሃቃጅሽናኖ” ና ክያማዶ። 50ኮዶን ኢየሱስ ኣጋም ይኤሳራና ኢያኢሮስ ግያ፣ “ሃይ ሃኩርትንዽናኖ፤ ሃሳ እምነት ሶጎ ኮዴ፣ ናኖ ሃሳ ፓሻና ኮፓሻይ” ና ክያማዶ። 51ኢየሱስ ኢያኢሮስ ኦኖንዛራ ኣርዳናንቴ ይያያዶን፤ ጴጥሮስቤ፣ዮሃንስቤ፣ ያእቆብቤ ሃያንቴኻሞ ናንሳ እምባቤ እንዳንቤሳ ኦባራ ኤዲ ካላኻሞ ክላማ ኮኣርዴኻናንቴ ዛጋድማሞ። 52ዋዳን ኦጎኻ ኤዲኖ ፓይላ ሃይኤ፣ ሃይኤ ሃንቴ ኤፕቴና ኬዶ። ኮዶን ኢየሱስ ኬግያ “ዬኤፕናኖ፣ ናኖ ዎዻንቴና ኮዶ፣ ጃድማሞ” ና ክያማዶ። 53ኤናኻሞ ናኖ ኮጃዶንም ይዼሳዶንታኻ ክዛራ ሃንጭዲና።54ኮዶን ኢየሱስ ናንሳ ኣኒም ዬዳንቴ “ያ ናኖ ኮኖ፣ ዻጲማ” ና ክያማዶ። 55ናኖኻሞ ኢዞ ማስዲና፤ ኣጋዛራኻሞ ና ዻጳንቴ ዎይዲና፤ ኢየሱስካሞ ኤና እꬃሮ ኮናንቴ ኬእሜኻናንቴ ጌይዲና። 56ናንሲ እምባቤ እንዳንቤ ዬርሽዲና፤ ኮዶን ኖ ዬራ ሃምማዳናም ኤዲ ካላናንቴኻሞ ጌያን ኬጋሬኻናንቴ ኪሊዲና።
Chapter 9
1ኢየሱስ ኤና ይእሳዻዳና ታጲ ላማናም ኬም ክዛራ ግስማንቴ ቤሮና ፓይላም ኬቡሌኻናንቴቤ፣ ቡርቅንምካሞ ኬፓሽሼኻናንቴ ኬናንቴ ካንታንቤ ጌጳሞንቤም እምዲና፤ 2ሃያንቴኻሞ ባርያ ማንግስትንም ኬታማርሴኻናንቴቤ ኤና ሃጅሞናም ኬፓሽሼኻናንቴ ኬም ይእስዲና፤3ይንታኻሞና ኬግያ ክያማዶ፦ “ዬሳ ጎይንናንቴ ሴጋዳናኻሞ፣ ጋላ ባኣያ ኦኾሎ ዳናኻሞ፣ ዳኣኖዳናኻሞ፣ ብሬዳናኻሞ፣ ኣፓላ ኣብካሞ ዬቤኤኻናንቴ ዛግስማሞ። 4ካታማስ ኣጋሮኻ ዬሳ ውታዛራ ኦና ይንዛራን ብራንቴ ዬኣርዳያ ግዶር ካፕማቴ።5ካታማን ኤና ዬም ኬቾቻድምና ካታማንም ጋራንቴ ዬይና ኬናንቴ ማኚ ኮዴኻናንቴ ቡቡንና ዬሳ ራሮ ዳናም ዹርዹራንቴ ውትማቴ።” 6ኬኻሞ ጎያ ኣጋኻ ሃማንቴ ባርያሳ ዼላቅን ታማርሳዳቴ ራቅና ውል ግዶር ኤና ሃጂሞናም ፓሽሻዳቴ ሞሮናም ሳግዲና። 7ዋዳን ኦጎኻ ገሊላ ፔንሳ ብታ ሄሮዶስ ዬራ ሃምማዳናም ኤሳራንቴ ዬራ ሃማዳናኻ ዋጂዲና፤ ኦጎኖኻሞ ኤዲኖ ዋኒ ዬዋንስ ዴምጲንባራኻ ዻጲዲና ሃማንቴ ጌይቴ ኬዶንታኻና። 8ኤና ዋኒ ኤልያስ ፕር ሃፕንዽዲናና ኬያማይ፣ ሃያንቴ ኤና ዋኒካሞ ኣና ኤና ብራና ባርያሳ ኣፖን ጌያይና ግዶር ኤዲ ካላ ዴምጲንባራኻ ዻጵዲና ሃማንቴ ጌይቴና ኬዶ። 9ሄሮዶስካሞ “ኑንቆንካ ሻያያ ዮሃንስም እንታ ክሳ ዛጋራን እቱምሳዃ ጃይዲና፤ ታ ክሳ ይንታ ሃማንቴ ጌይዻን እኤሳራያ ኣጋ ኤዲ ሃውቴ?” ና ክያማዶ፤ ኪም ይሳ ኣፕካ ሃፓናንቴኻሞ ዛግቴና ክዶ።10ኤና ይእሳዻዳናኻሞ ማታቴ ናዴ ዬራ ይያያዳናም ፓይላ ኢየሱስናንቴ ጌይዲና፤ ኖ ኬም ዋና ኣንሳንቴ ቤቴ ሳይዳ ሃንዻያ ካታማስዛራ ኬላማ ክንካ ያእዲና። 11ኢየሱስ ሃማዛራ ክያኣይንም ዛርስኖ ይዼሳና ኪም ጫግዲና፤ ኖኻሞ ኬም ቻንቴ ባርያሳ ማንግስትን ታማርስዲና፤ ኤና ፓሻናንቴ ዛግሳይናምካሞ ፓሽሽዲና። 12ፔኖ እባናዳቴ ኮያኣና፣ ክሳ ታጲና ላማና ኤና ክካላ ናዴ ክግያ፣ “ይንግዶር ዎዶኖ ዳራ ኮዶንታኻ፣ ዛርስኖ ሞሮናቤ ሞሮና ቄታና ኮታር ዳናቤዛራ ቃልቴ ዎዽንታ ራቅቤ ዳኣኖቤ ኬዛጌኻናንቴ ኬም ይእስማ” ና ኬያማዶ። 13ኮዶን ኖ ኬግያ፣ “ዬር ኬእꬃያ ዬቲ ኬናንቴ እምማቴ” ና ክያማዶ። ኬኻሞ ክግያ “ዛርስን ኮ ውልናንቴ ዬካያ ቃልቴ ዳኣኖ ዎሻናድምና፣ ዎሳ ዳና ሙና ዶጝቤ ካራ ላማቤሳ ኦባራ ኣብ ቆልማሞ” ና ኬያማዶ፤ 14ይንታ ይንናንቴ ኬያማዶኖ ኦጎታር ዳና ኤና ኣንጌና ሺ ዶጚያምና ኬዶንታኻና። ኢየሱስካሞ ይሳ ታማርናግያ፣ “ዛርስንም ዶጝታም ዶጝታም ሃያንቴ ዳኣርስማቴ” ና ክያማዶ። 15ታማርናኻሞ ኖ ክጌያዳ ጎያኻ ኤና ኬዳርቄኻናንቴ ሃይዲና። 16ኖኻሞ ሙናና ዶጝናቤ ካራና ላማናቤም ዬዳንቴ ፖላንዛራ ሼዳንቴ ባርያም ጎሻንቴ፤ ቁንፃንቴኻሞ ዛርስንናንቴ ኬካሼኻናንቴ ይሳ ታማርናናንቴ እምዲና። 17ኤዲኖ ፓይላ እꬃንቴ ምሽዲና፤ ኬኻላንካ ማኣሽን ሽዻዶንም ታማርና ክሳ እስሞ ሻርቃ ታጲ ላማና ኬፑኡሻዶ።18ኣጋሳ ራስባራ ኢየሱስ ይዻር ባርያም ምስክቴና ክዶ፤ ታማርና ክሳኻሞ ክላማ ክንካ ዳይዲና። ኖ ኬኻላ “ዛርስኖ እግያ ሃው ኮያሜ?” ሃማንቴና ክኦይሳዶ። 19ኬኻሞ ክግያ፣ “ኤና ዋኒ ኑንቆንካ ሻያያ ዬዋንሲና ኬያማይ፣ ዋኒ ኤልያሲና ኬያማይ፣ ኤና ዋኒካሞ ኣና ኤና ባርያሳ ኣፖን ጌያይናሳ ካላ ዴምጲንባራኻ ዻጲዲናና ኬያማይ” ና ኬያማዶ። 20ኖ ኬግያ፣ “ኤ ዬቲ እግያ ሃው ዬያሜ?” ና ክያማዶ። ጴጥሮስካሞ፣ “ያ ባርያባራንካ ንእሳዻዳ ክርስቶሲና” ሃማንቴ ክናንቴ ማስዲና። 21ኢየሱስካሞ ዬራ ካም ኤዲ ካላናንቴኻሞ ጌያን ኬጋሬኻናንቴ ኬም ጌጲ ክሊዲና። 22ሃያንቴኻሞ ኖ ኬግያ፣ “ኤዲ ናሶ ጋሎ ክቼኻናንቴ ክናንቴ ዛግሳና ኮዛግሳይ፤ ሃያንቴኻሞ ፔን ዞንዛናኻቤ፣ ኤና አይሁድናሳ ዳምብን አሽካይናሳ ጋርናኻቤ፣ ኤና ሙሴ ዳምብን ታማርሳይናኻቤ ኪም ቦውዻምቤ ዴሳዻንቤም ሮራ ማክንሳኻኻሞ ዴምጲንባራኻ ክዻጴኻናንቴ ዛግሳና ክዛግሳይ” ና ክያማዶ።23ሃያንቴ ፓይላ ውልናንቴ ይንታና ክያማዶ፦ “ኤያ ኢም ጫጋናንቴ ዛጋያ ዪም ክጋሬ፤ መስቀልን ይሳምካሞ ሮሮ ውል ባኣንቴ ኢም ክጫጌ፤ 24ኦጎኖኻሞ ኤዲ ሃውካሞ ይሳ ሳዳን ዻኣሻናንቴ ዛጋያ ሳዳን ይሳም ካይሳና ክካይሳይ፤ ኮዶን ኤያ ሳዳን ይሳም እናንቴ ሃማንቴ ካይሳያ ሳዳን ይሳም ዻኣሻና ክዻኣሻይ። 25ኮዶን ኤዲ ፔን ኮም ፓይላ ይንቲ ሃያንቴ ሳዳን ይሳም ክካይስና ዎይካሞ ዋጋ ቆልማ ክያይና ክናንቴ ሃር ኮማቴ?26ኤዲ ካላኻሞ እቤ እሳ ዼላቅንቤኻ ክቦክንዽና፤ ኤዲ ናሶ ጎሺን ይኖንካቤ፣ ባርያ ዎምባቤ ኤርጎን ኤና ጋዛናቤሳ ጎሽንካ ይንና ክንካ ቦክንዻና ክቦክንዻይ። 27እንታ ዬናንቴ ጎንዼና እጌያይ፤ ኤና ኮታር ዎያዳናሳ ባክሮ ባርያሳ ማንግስትን ሃፕማ ዴምጲን ጅምና ኤና ዳይዲና።28ኢየሱስ ዬራ ክናም ጌያንቴ ሮሮ ሎንካይሳ ራስባራ ጴጥሮስቤ፣ ዬዋንስቤ፣ ያእቆብቤም ኣንሳንቴ ባርያም ምስካናንቴ ኩርባስዛራ ውትዲና። 29ምስክቴኻሞ ክዳዃ ዎትኖ ክሳ ሮጵዲና፤ ኣፓላኖ ክሳኻሞ ሮጳንቴ ካልሎን ጫውሊ ማትዲና።30ሃያንቴ ኤዲ ላማ ዋኒ እግናኻሞ ኤልያስቤ ሙሴቤ ክላማ ክንካ ዼላቅቴና ኬዶ፤ 31ኬ ጎሽንካኻሞ ሃፕንዻንቴ፣ ዬሩሳሌም ግዶር ዬርን ሃምማይን ኦጎኖኻሞ ኖ ፔን ኮባራኻ ሃሞንታ ክያኣይንም ጌይቴና ኬዶ።32ዋዳ ኣጋኻ ጴጥሮስቤ ኤና ዋኒ ክላማን ኬሳ ኣፒ ካልሎን ኮግንዻዃ ራትዲና፤ ኮዶን ኬ ራትንባራ ኬዻጲና ክሳ ጎሽንቤ ኤዲ ላማ ክላማ ክንካ ዎያንቴ ኬዳዃና ኬያፓዶ። 33ኤናኻሞ ኢየሱስም ጋራንቴ ኬያኣና፣ ጴጥሮስ ክግያ፣ “ጌጳዮ፣ ኮታር ዎዳና ዎናንቴ ፃሊና፤ ኣጋታኻ ጋፓ ማካም ዎኬ፤ ካላም ሃናንቴ፣ ዋም ሙሴናንቴ ዋ ኤልያስ ጋንቲና ክዳይ” ና ክያማዶ። ሃር ጌይቴ ይዶንካሞ ኖ ዼስማሞ። 34ኖ ኣጋም ኣኻራ ጌይቴ ክዳዃ ሉፕኖ ናዴ ኬም ክጭዲና፤ ሉፕንዛራ ይኣርዳናኻሞ ኬ ኩርትንዽዲና። 35ሉፕንሳኻሞ ኢሮ “ናሳ እሳ እካማዳ ካና፤ ኪም ኤሳርማቴ” ሃማያ ናቅሲ ናእዲና። 36ናቅሳ ይኤሳርማዶን ዋዳንካ ኢየሱስ ይዻር ክዳዃና ሃፓዻዶ፤ ታማርናኻሞ ዬራ ይያፓዳም ይሳ ዎይላምካ ዬድዲና፤ ዬራ ይያፓዳምካሞ ዋዳ ኣጋኻ ኤዲ ካላናንቴኻሞ ጌያድማሞ።37ዋጋላሞካሞ ጉርባስባራ ኬያንቻዃ፣ ዛርሲ ጱፅ ናዴ ኢየሱስማላ ኬሪዲና። 38ዋዳን ኦጎኻ ዛርስንሳ ባክሮ ኤዲ ካላ ናቅሲ ይሳም ዼግ ሃያንቴ ይንታና ክያማዶ፦ “ኣስታማራዮ፣ ናሳ እሳ ዳ ኖ ሶጎ ክዶንታኻ ናሳ እሳም ሃሼዴኻናንቴ እንታ ሃም ምስክዲና። 39ቤራ ኪም ክዬድና ሱን ቃባዽማና ክእላታይ፤ ኣፖንካ ክሳ ዱቦ ንእስቴ ግርጫና ክጃይ፤ ኪም ኦጎንታ ጋሊንሽቴ ዛራን ክሳም ሃጅንሻንቴና ክጋራይ፤ 40ታማርና ሃሳኻሞ ክባራ ኬቡሌኻናንቴ እንታ ኬም ምስክዲና፣ ኮዶን ኬ ቡላናንቴ ቻላድማሞ።” 41ኢየሱስካሞ “ዬቲ ኮኖ ሃርያኖ ታን ጋይኖ ቆሮኖ፣ እምነትን ቆልሞኖ፤ ላይ ሃማዛራ ዬላማ ክንካ እዴ? ላይ ሃማዛራ ዬናንቴ እዶንሼ? ሃማንቴ ናሳ ሃሳም ኦራ ባኣማ” ና ክያማዶ። 42ናሳኻሞ ንቴ ክዳዃ ቤራ ፔሮጎ ኪም ዻባንቴ ግርጫ ዴስስዲና፤ ኮዶን ኢየሱስ ቤራ ጎራንቴ ናሳባራኻ ቡላንቴ ናሳም እምባ ናንቴ እምዲና።43ኤናኻሞ ፓይላ ባርያሳ ጌጳሞን ዬርሽዲና። ኖ ዬራ ክያያዳናም ኤዲኖ ፓይላ ዬርሽቴ ኮዳዃ፣ ኢየሱስ ይሳ ታማርናግያ ይንታና ክያማዶ፦ 44“ዬራ ዬናንቴ እጌያያ ካም ካላኻሞ ዬዋልናኖ፤ እ ኤዲ ናሶም ሳስካንቴ ኤናናንቴ እማና እንዻይ” ና ክያማዶ። 45ኮዶን ኬናንቴ ቃባ ኣጋ ኣርዳድማሞ፤ ኬ ጶቅሳን ኬጋረኻናንቴ ዬራ ኣጋ ኬናንቴ ኣቺሚና ክዶ፤ ዬራ ኣጋም ክካላ ኦይሳናንቴኻሞ ኬ ኩርትንዽዲና።46ኬ ግዶር ሃው ሳጊ ክዳይንም ታማርናሳ ባክሮ ክትሞ ዻጲዲና። 47ኢየሱስካሞ ኬሳ ዎይላምንሳ ቃቦም ዼሳንቴ ናሶ ሾሊ ካላም ባኣንቴ ይሳ ዴሞሮ ዎይስዲና፤ 48ይንታኻሞና ኬግያ ክያማዶ፦ “ናሳ ካም እንካ ሃማንቴ ኤዲ ቻያ ሃውካሞ ይዳና ኢም ቻና ክቻይ፤ ኤያ ኢም ቻያኻሞ ኣባ ኢም ንእሳዳም ቻና ክቻይ፤ ኦጎኖኻሞ ኤያ ዬውልሳ ቾባራን ዳያ ኣጋ ኖ ውልካላ ሳጋና ክሳጋይ።”49ዮሃንስ ክግያ፣ “ጌጳዮ፣ ኤዲ ካላ ናብን ሃሳኻ ቤሮን ክቡልካ ዎቲ ሃፕዲና፤ ዎላማ ዳንቴ ሃም ክጫግሞንታኻ ዎቲ ኪም ማራናንቴ ሃይዲና” ና ክያማዶ። 50ኢየሱስካሞ ክግያ “ዬማርናኖ፤ ኤና ዬም ቶዛዽምና ፓይላ ዬላማ ክንካና” ና ክያማዶ።51ኢየሱስ ዋዳኖ ይንካ ዞን ፖላንዛራ ክያኣይኖ ኮዬስካዶንታኻ፤ ዬሩሳሌምዛራ ያኣናንቴ ሼካቴ ዻጲዲና። 52ኦጎዛራኻሞ ብርሳንቴ ኤርጎን ኤናም ይእስዲና። ኬኻሞ ክናንቴ ዬራ ዛግሳይናም ሃያናንቴ ሰማርያሳ ሞሮ ካላዛራ ኣርድዲና። 53ኮዶን ዛርስኖ ኖ ዬሩሳሌምዛራ ይቴ ክዶንም ይዼሳዶንታኻ ኪም ቾቻድማሞ።54ክሳ ታማርና ያእቆብቤ ዮሃንስቤ ኦጎም ይያፓና ክግያ፣ “ጌጳዮ፣ ኤልያስ ይያያዳግያ ጳ ፖላንባራኻ ኖኖ ሃንቻንቴ ኬም ኮካይሴኻ ዎጌኻናንቴ ናሻው ሃናሻይ?” ና ኬያማዶ። 55ኮዶን ኢየሱስ ኬዛራ ሽራንቴ ኬም ጎራንቴ፤ “ኡስን ሃሞሮ ዬዶንም ዬቲ ዼስማሞ፤ እንታ ኤዲ ናሶ ይንናንቴ እናኣዶኖ ኤዲሳ ሳዳም ዻኣሻናንቴና፤ ካይሳናንቴ ትማሞ” ና ኬግያ ክያማዶ። 56ኣጋሮኻኻሞ ዻጳንቴ ሞሮ ኣብዛራ ኬ ያእዲና።57ጎይን ይቴ ኬዳኻ ኤዲ ካላ ናዴ ኢየሱስግያ “ራቅና ሃያኣይና ውልዛራ ሃም ጫጋና እጫጋይ” ና ክያማዶ። 58ኢየሱስካሞ ክግያ “ኩዬናንቴ ኦሎ ዳይዲና፣ ካርያና ፖላን ጋይናናንቴኻሞ ኦኖ ኬሳ ዳይዲና፤ ኮዶን ኤዲ ናሶ ይሳ ሜቴም ካውል ይንግዶር ክኣቻያ ቆልማሞ” ና ክያማዶ። 59ሃያንቴ ኤያ ዋግያ፣ “ኢም ጫግማ” ና ክያማዶ። ኤያኻሞ ክግያ “ጌጳዮ፣ ብራቴንካ ቃልቴ ኣባም እዱኬ” ና ክያማዶ። 60ኢየሱስካሞ ክግያ “ኤና ዴምጲና ኤና ይሳ ጃዳናም ኬዱኬኻናንቴ ኬናንቴ ጋርማ፤ ያ ቃልቴ ባርያሳ ማንግስትንም ታማርስማ” ና ክያማዶ። 61ፕር ኤያ ዋ ክግያ “ጌጳዮ፣ ሃም ጫጋዻን ጫጋና እጫጋይ፤ ኮዶን ብራቴንካ ቃልቴ እሳ ሞሮን ኤናም እኤልቅሜኻናንቴ እናንቴ ናሽማ” ና ክያማዶ። 62ኮዶን ኢየሱስ ክግያ፣ “ኤያ ጋይታን ዬዳንቴ ራሳዛራ ማታንቴ ሼዳያ ባርያ ማንግስትንናንቴ ኤዲ ዛግሳያ ትማሞ” ና ክያማዶ።
Chapter 10
1ሃያንቴ ጌጳ ኤዲ ꬆጳታም ላማ ኣብ ካማንቴ ኬም ጌጵስዲና፤ ኖ ይንዛራ ክያኣይና ካታማናቤ ሞሮና ፓይላ ውልዛራ ኪም ብራንቴ ኬዬኤኻናንቴ ላማ ላማ ሃያንቴ ይእስዲና፤ 2ይንታኻሞና ኬግያ ክያማዶ፦ “እስኖ ፑኡሻዼኻ ዛግሳይኖ ጱፂና፤ ኮዶን ኤና ዋድማይና ቶኻና፤ ኣጋታኻ ኤያ እስናሳ እምባ ኤና ዋድማይናም ሃምንዛራ ክይእሴኻናንቴ ምስክማቴ።3ታ ናንሲ ይማቴ፤ እያና ጋንታግያ ዮዮናሳ ባክንካና ዬም እይእሳይ። 4ጎርጶ ዎይካሞ ኦኾሎ ዎይካሞ ዱጙር ዬባኣናኖ፤ ጎይሮ ኤዲ ካላኻሞ ዬጌስናኖ። 5“ኦኖ ካላዛራ ዬኣርድናኻሞ ብርሳንቴ ፃሊኖ ኦና ካናንቴ ኮዴ ሃምማቴ፤ 6ኤዲ ፃል ኦጎታር ይዳና፣ ፃላሞኖ ዬኖ ኬዛራ ሳጋና ኮሳጋይ፤ ኦጎታር ኤዲ ፃል ኮቆልምና ፃላሞኖ ዬሳ ዬዛራ ማታና ኮማታይ። 7ኤያ ዋድማያናንቴ ካሺ ኮዛግሳንታኻ፤ ዬራ ዬናንቴ ኬእማይናም እስቴቤ ውጭቴቤ ኦና ይንግዶር ዬኣርዳዳሮ ዳርቅማቴ፤ ኦና ዋሮኻ ኦና ዋዛራ ዬሳግናኖ። 8ካታማ ካላዛራ ዬኣርድና ኤና ዬም ኬቾቻዳና፣ ዬራ ዬናንቴ ኬእማይናም እꬅማቴ፤ 9ኤና ሃጅሞና ኦጎታር ዳናም ፓሽሽቴ ኬግያ ‘ባርያሳ ማንግስትኖ ዬዛራ ሳንስዲና’ ሃምማቴ።10ኮዶን ካታማ ካላዛራ ዬኣርዳዃ ዬም ኬቾቻድምና፣ ጳልንዛራ ውታንቴ ይንታ ሃምማቴ፦ 11‘ዎሳ ራንዛራ ዶን ዬሳ ካታማንሳ ቡቡንናም ካውል ዬናንቴ ዹርዹራና ዎዱርዹራይ፤ ኮዶን ባርያሳ ማንግስትኖ ዬኻላ ኮሳንሳዶን ኦጎም ዼስማቴ።’ 12እንታ ዬናንቴ ጌያና እጌያይ፤ ሮራ ኣጋኻ ካታማስ ኣጋ ካላንካ ሶዶምዛራ ዻባሞኖ ናአይኖ ባዶና ኮዳይ። 13ሃይ ኮራዚን! ሃይ ቤቴ ሳይዳ! ዬራ ሃምማን ግያንዳና ሃግዶር ሃይዻዳና ጢሮስቤ ሲዶናቤ ግዶር ሃይዻዳና እኒ ኣና ዋዳ ሲዮን ኣፓላን ኣርሳንቴ ዲብን ዋቃዻንቴ ሴሶንባራኻ ማታና ኬማታይ። 14ኮዶን ብቶን ሮራ ጋላ ዬካላንካ ጢሮስቤ ሲዶናቤናንቴ ዻባኖ ባዶና ኮዳይ። 15ቅፕርናሆም፣ ያኻሞ ዞን ፖላንዛራ ዼግ ዼግ ሃምዲው? ምጫ ኦሎን ፄሪንዛራ ሃንቻና ሃያንቻይ። 16“ኤያ ዬም ኤሳራያ ኢም ኤሳራና ክኤሳራይ፤ ኤያ ዬም ቺማ ኢም ቺማሞ፤ ኤያ ኢም ቺማስ ኣባ ኢም ንእሳዳም ችማሞ።”17ኤና ꬆጳታም ላማናኻሞ ዎዛኻ ማታቴ ናዴ ክግያ “ጌጳዮ፣ ቤሮና ኻውል ሃሳ ናብንካ ሃማንቴ ዎናንቴ ኤሳርዲና” ና ኬያማዶ። 18ኖኻሞ ኬግያ ይንታና ክያማዶ፦ “ሜሺ ጳልቃትግያ ፖላንባራኻ ክዲኒካ እንታ ሃፕዲና። 19ታ ናንሲ ጉኖንቤ ቆሎምፖንቤ ዬትጌኻናንቴ ጋልታሳ ካንታን ፓይላዛራ እንታ ዬናንቴ ጌጳሞን እምዲና፤ ዬር ካላኻሞ ዬም ጌናያ ቆልማሞ። 20ይያማንካሞ ቤሮና ዬናንቴ ኬኤሳራዶን ኦጎኻ ሃማንቴ ዬዋዝንዽናኖ፤ ኮዶን ናብን ዬሳም ፖላሮጎ ኡካዻዳኻ አጋኻ ዋዝንዽማቴ።” 21ዋዳን ኦጎኻ ኢየሱስ ኡስን ጫራጚንካ ጌጲ ዋዝንዻንቴ ይንታና ክያማዶ፦ “ፖላንቤ ፔንቤሳ ጌጳ ኣባ፣ ኮም ፓይላም ኤና ማልትናቤ ኤና ዬርን ዼሳዳናቤኻላ ኣቻንቴ ናና ሾሊናንቴ ሃዻዋዶንናንቴ ሃም ጎሻና እጎሻይ፤ ዪኒ ዎምባ፣ ኮኖ ቃቦኖ ሃሳ ፃሊኖና። 22ዬራ ፓይላ ውልም ኣባባራንካ እናንቴ እንዽዲና፤ ሃያንቴኻሞ ናሳ ሃው ክዶንም ባርያ ዎምባሳ ኦባራ ኤዲ ዼሳዳ ቆልማሞ፤ ባርያ ዎምባ ሃው ክዶንምካሞ ናሳሳ ኦባራ ኤዲ ዼሳዳ ቆልማሞ፤ ፕር ናሳኻሞ ኤያ ይንናንቴ ክዻዋያሳ ኦባራ ኤዲ ባርያ ዎምባም ዼሳያ ካላኻሞ ቆላማሞ። 23ይሳ ታማርናዛራኻሞ ሽራንቴ ኬግያ ሶጎ ይታና ክያማዶ፦ “ዬቲ ዬራ ዬያፓይናም ኣፕና ሃፓይና ፑጋዻዳና፤ 24እንታ ዬናንቴ ጌያና እጌያይ፤ ኤና ባርያሳ ኣፖን ጌያይና ጱፅናቤ ብቲና ጱፅናቤ ዬቲ ዬራ ሃፕቴ ዬዳናም ሃፓናንቴ ዛጋንቴ ኬ ሃፓድማሞ፤ ዬራ ኤሳርቴ ዬዳናም ኤሳራናንቴ ዛጋንቴ ኬ ኤሳርድማሞ።”25ሮሮ ካላ ኤዲ ሙሴ ዳምብን ዼሳዳ ካላ ኢየሱስ ካላ ጋሮ ዬር ሃፓናንቴ ክግያ፣ “ኣስታማራዮ፤ ሳዳን ላይን ዳይንም ሃፓናንቴ ሃር እያዬ?” ና ክያማዶ። 26ዬሱሱካሞ፣ “ዬራ ዳምብሮ ኡካዻዳ ሃርቴ? ሃሞንታ ሃናባቤ?” ሃማንቴ ክናንቴ ማስዲና። 27ኤያኻሞ ክናንቴ ማሳንቴ፣ “ባርያ ጌጳ ሃሳም ሃሳ ዎይላምሮኻ ቡላንቴቤ፣ ሃሳ ሳዳንካ ፓይላቤ፣ ሃሳ ካንታንካቤ ሃሳ ቃቦንካቤ ፓይላ ናሽማ፤ ሃያንቴ ሃሃያርያምካሞ ሃም ሃናሻያግያ ናሽማና ኮያማይ” ና ክያማዶ። 28ኢየሱስካሞ ክግያ፣ “ያ ሊኪና ሃጌያዶ፤ ያኻሞ ኦጎንታ ሃይማ፤ ሳዳንካ ዳና ሃዳይ” ና ክያማዶ። 29ኤያኻሞ ይም ጫራጝ ሃያናንቴ ዛጋንቴ ክግያ፤ “ኤሳንካ እሳ ሃርያስ ሃውቴ?” ና ክያማዶ። 30ኢየሱስካሞ ይንታ ሃማንቴና ክናንቴ ክማሳዶ፦ “ኤዲ ካላ ዬሩሳሌምባራኻ ኢያሪኮዛራ ሃንችቴ ቃውን ኤና ኤናም ዻይናዛራና ክውታዶ፤ ኬ ኣፓላን ክሳም ቡላንቴ ኪም ዻዻቴ፤ ሃያንቴ ሎቃስካ ጋራንቴና ኬያኣዶ።31አይሁድናሳ ዳምብን አሽካያ ኤዲ ካላኻሞ ጎይን ኦጎኻ ምጫ ይቴ ኪም ሃፓንቴ ኦኻንቴ ያእዲና። 32ፕር ኤዲ ሌዊ ቢዛ ካላ ራቃ ኣጋም ናዴ ኖኻሞ ኪም ሃፓንቴ ኦኻንቴ ያእዲና።33ኮዶን ሳማርያ ኤዲ ካላ ጎይን ኦጎም ይቴ ኤያ ይዶን ራቅንዛራ ዬስክዲና፤ ኤያም ሃፓንቴ ክናንቴ ቡርቃዽዲና፤ 34ክካላ ናዴኻሞ ሃጅምን ክሳዛራ ዋኣትንቤ ዎይንን ዚኣንቤ ካንቴ ዻኻንቴ፤ ይሳ ኡኩልንዛራኻሞ ዎዳንቴ ኤና ቾቺና ይንግዶር ይዎድማን ኦኖንዛራ ባኣቴ ቃልቴ ኦጎታር ኪም ቶሪዲና። 35ዋጋላሞንካሞ ዲናር ላማ ቡላንቴ ቾቺና ይንግዶር ይዎድማን ኦኖንሳ ኤያ እምባናንቴ እማንቴ ክግያ፣ ‘ባንዞ ኤያ ካም እናንቴ ቶርማ፤ ክናሳ ጳባራ ኮይና ሃቡላይናም እማትና ሃናንቴ ማሳናእማሳይ’ ና ክያማዶ። 36“ታ ናንሲ፣ ኤና ማካምና እግና ግዶርካ ኤያ ቃውን ኤና ይዻዳናንቴ ሃርያ ማታዳ ሃኻላ ሃማቴ?” 37ኤያ ዳምብን ዼሳዳኻሞ፣ “ኤያ ክናንቴ ቡርቃዻዳ” ና ክያማዶ። ኢየሱስካሞ ክግያ “ያኻሞ ቃልቴ ኣጋንታ ሃይማ” ና ክያማዶ።38ኢየሱስቤ ታማርና ክሳቤ ክንካ ጎይን ኬይካ፤ ኢየሱስ ሞሮ ካላዛራ ኣርድዲና፤ ሜ ካላ ማርታ ሃንዻይኖ ኪም ይሳ ኦኖንዛራ ቾቻቴ ኣርስዲና። 39ኮሳኻሞ ማርያም ሃንዻይኖ እንዳን ናኖ ዳይዲና፤ ማርያምካሞ ጌጳሳ ዼላቅን ኤሳርቴ ክሳ ራንካላ ዳርቃንቴና ኮዶ።40ኮዶን ማርታ ዋድማ ጱፅ ኣሽክቴ ጋሊቴ ይዶንታኻ ክካላ ናዴ ክግያ፦ “ጌጳዮ፤ እንና ናኖ ዋድማን እናንቴ ሶጎ ጋራንቴ ኮዳርቅና ሃርናንቴ ላይ ሃማንቴ ሃሼዴ? ኢም ኮኬልሼኻናንቴ ኮናንቴ ጌይማ” ና ኮያማዶ። 41ኮዶን ጌጳ ይንታ ሃማንቴና ኮናንቴ ክማሳዶ፦ “ማርታ፣ ማርታ፤ ያ ዬር ጱፅናንቴ ቃብቴና ሃዶ፤ ሃያንቴኻሞ ቴሪቴና ሃዶ፤ 42ኮዶን ዬራ ዛግሳያ ካላ ሶጎና፤ ማርያም ዬር ፃሊና ኮካሽማዶ፤ ኣጋምካሞ ኮኻላንካ ቻዽማሞ።”Chapter 11
1ሮሮ ካላ ኢየሱስ ራቅ ካላ ግዶር ባርያም ምስክቴና ክዶ፤ ምስኮን ይቱንሳና፣ ክሳ ታማርና ግዶር ካላ ክግያ፣ “ጌጳዮ፤ ዮሃንስ ታማርና ይሳም ባርያም ምስካዻን ክታማርሳዳግያ ያኻሞ ዎም ባርያም ምስካዻን ታማርስማ” ና ክያማዶ። 2ኖኻሞ ኬግያ ይንታና ክያማዶ፦ “ዬቲ ባርያም ዬምስክና ይንታ ሃምማቴ፦ “ዎምባዮ፣
ናብኖ ሃሳ ኮጫራጝሜ፤
ማንግስትኖ ሃሳ ኮኔኤ፤
3ሮራኻ ዎእꬃን ዳኣኖን ሮራኻ ሮኻ ዎናንቴ እምማ፤
4ኤና ዎዛራ ሴሶን ሃያዳናሳ ሴሶን ኬሳም ፓይላ ዎቲ ኬናንቴ ዎጋራግያ፣ ሴሶን ዎሳም ዎናንቴ ጋርማ።
ጋሎንዛራ ዎም ሃኣርስናኖ፤ ዬርን ዛርቦሮኻ ዎም ዻኣሽማ።”
5ሃያንቴኻሞ ኖ ኬግያ ይንታና ክያማዶ፦ “ዬግዶር ኤዲ ካላሳ ሃርያ ኮዳና፣ ሶትን ግዶጋልትንካ ኦኖን ክሳዛራ ቃልቴ፤ ‘እያርያ፤ ሙና ማካም እናንቴ ብድርስማ፤ 6እሳ ሃርያ ካላ ጎይባራ ክናኣዃ ዬር ክናንቴ እእማያ ካላኻሞ ቆልማሞ’ ሃማንቴ ምስክዲና ይንዳ ዎያሜ። 7“ኤያ ኦኖሮን ዳኻሞ ኢም ሃጋሊንሽናኖ፤ ሙልዻፖን ቁልፓዽዲና፤ ናና እሳኻሞ እላማ ክንካ ዎዻንቴና ኬዶ፤ ናንሲ እንታ ዻጳንቴ ሃናንቴ እማናንቴ ቻልማሞ” ሃማው ክያማይ? 8እንታ ዬናንቴ ጌያና እጌያይ፤ ክሳ ሃርያስ ክዶንናንቴ ዻጳንቴ ይእማድምናኻሞ ኪም ክጋልንሻንናንቴ ሶጎ ሃማንቴ ክዛጋይናም ፓይላ ክናንቴ እማና ክእማይ። 9“ኣጋታኻ እንታ ዬናንቴ ጌያና እጌያይ፤ ኦይስማቴ ዬናንቴ እማና እንዻይ፤ ዛግማቴ ሃፓና ዬያፓይ፤ ሙልዻፖን ካላ ናዴ ግስምማቴ ዬናንቴ ቡላና ቡልዻይ፤ 10ኦጎኖኻሞ ኤና ኦይሳይና ፓይላ ቻና ኬቻይ፤ ኤና ዛጋይናኻሞ ሃፓና ኬያፓይ፤ ኤና ሙልዻፖንካላ ናዴ ግስማይናናንቴኻሞ ቡላና ቡልዻይ። 11“ዬሳ ባክሮ ኤዲ ካላ ናሶ እምባ ዳንቴ፣ ናሳ ክካላ ካራ ክምስክና፣ ጉኖን እማያ እምባ ሃውቴ? 12ዎይካሞ ሙቃዮ ክምስክና ቆሎምፖን እማያ ሃውቴ? 13ዬቲ ኤዲ ዛርቦ ዳንቴ፣ ናና ዬሳናንቴ ዬር ፃል እማዻን ዬዼሳዳና፤ ታ ኦጎንታ ዳና ዬምባ ፖላሮን ዳ ኤና ክካላ ምስካይናናንቴ ኡስን ጫራጚን ሃርቴ ሻባንቴ ክእምሞኖ!”14ሮሮ ካላ ኢየሱስ ኤዲ ኣፖ ካያ ካላዛራ ቤሮ ቡልቴና ክዶ፤ ቤራኻሞ ክውታዃ ራስባራ ኤያ ኣፖን ካያስ ዼላቅዲና፤ ዛርስኖኻሞ ዬራ ኣጋም ዬርሺዲና። 15ኮዶን ኤዲኖ ዋኒ፣ “ቤሮናሳ ጌጳ ብኤል ዜቡልካና ቤሮናም ክቡላይ” ና ኬያማዶ። 16ሃያንቴ ኤና ዋኒካሞ ጋሮ ዬር ሃፓናንቴ ፖላሮኻ ኬናንቴ ዬር ሃሊ ክዻዌኻናንቴና ኬዛጋዶ። 17ኮዶን ኢየሱስ ቃቦ ኬሳም ዼሳንቴ ይንታና ኬግያ ክያማዶ፦ “ማንግስት ኪም ፓላያ ፓይላ ካያና ክካያይ፤ ኦና ኪም ፓላያኻሞ ይፓና ክይፓይ።18ዬቲ እግያ ያ ቤራም ሃቡላይኖ ብኤልዜቡል ቤሮናሳ ጌጳኻናና ዬያማይ፣ ኮዶን ሜሺ ኪም ይፓላያ ዳና ክሳ ማንግስትኖ ሃስ ሃማንቴ ዋቻዻንቴ ኮዎዬ? 19እንታ ቤሮን እቡላይኖ ብኤል ዜቡልካ ኮዳና፣ ታ ናንሲ ናና ዬሳ ሃውካ ኬቡሌ? ኣጋታኻ ኬ ዬዛራ ብቶን ታኻይናና ኬዳይ። 20ኮዶን እንታ ቤሮናም ባርያ ኣኒንካ እቡላያ ዳና፣ ባርያሳ ማንግስትኖ ዬዛራ ኮናኣዶንም ዼስማቴ። 21ኤዲ ዋቺ ካላ ኦኖን ይሳም ሼካንቴ ክማንክና፣ ኮይና ክሳ ፃሊንካ ዳና ኬዳይ። 22ኮዶን ኤዲ ካሎን ዋቺ ክዛራ ናዴ ክላማ ዳማንቴ ኪም ይባሽና፣ ዻክዾን ይንካ ክኤርማዶንም ቡልሳና ክቡልሳይ፤ ኮይና ክሳም ሮጋንቴኻሞ ኤና ዋኒናንቴ ካሻና ክካሻይ። 23“ኤያ እላማን ትማ ኢም ቶዛዻና ክቶዛዻይ፤ ኤያ እላማ ክንካ ፑእሽማኻሞ ላላና ክላላይ። 24“ቤሮ ኤዲ ባራንካ ይውትና ኡኩንሳናንቴ ኑንቆ ይቆልማ ራቅዛራ ቃልቴ ጋላና ክጋላይ፤ ራቅ ይንግዶር ይኡኩንሳያም ሃያፓድምና፣ ‘ኦና ይንባራ እናኣዳዛራ ማታና እማታይ’ ና ክያማይ። 25ማታቴ ክንና ኦኖን ሳዻዃቤ ኣግሳዿዃቤና ክያፓይ። 26ሃያንቴ ቃልቴ ይካላንካ ካልሎን ዛርቦ ዳና ቤሮ ꬆጳናም ኣንሳቴና ክናኣይ፤ ኣርዳንቴኻሞ ኦጎታር ዳና ኬዳይ፤ ኤያ ኣጋናንቴ ዴንታ ብራስ ካላንካ ካርናስ ካሎን ዛርቦና ክዳይ።” 27ኢየሱስ ኣጋም ጌይቴ ክዳዃ፣ ዛርስንሳ ባክሮኻ ሜ ካላ ናቅሲ ይሳም ዼግ ሃያንቴ “ናሶን ኦሎኖ ሃም ባኣዶኖቤ ኣምና ሃቆጫዳናቤ ፑጋዻዳና” ና ኮያማዶ። 28ኮዶን ኖ “ኤና ፑጋዻዳና ባርያሳ ዼላቅን ኤሳራንቴ ይንካ ዳይና” ና ክያማዶ።29ዛርሲ ጱፅካሞ ክዛራ ኮፑጫዶን ዋዳንካ ኢየሱስ ይንታና ክያማዶ ፦ “ኤዲኖ ታን ጋይኖ ኮኖ ኤዲ ዛርቦና፤ ዬር ሃሊ ሃፓናንቴና ኮዛጋይ፤ ኮዶን ዮናስዛራ ዬራ ሃላ ሃምማዳሳ ኦባራ ዬር ሃሊ ኣብ ኬናንቴ ሃይዽማሞ። 30ኦጎኖኻሞ ዮናስ ነነዌ ኤናናንቴ ዬር ሃሊ ክማታዳግያ፣ እንታ ኤዲ ናሶኻሞ ኤዲን ታን ጋይን ኮናንቴ ዬር ሃሊና እማታይ።31ኤስኖ ደቡብ ጋይኖ ብትኖ ብቶን ታኻዻን ዋዳንካ ኤዲን ታን ጋይን ኮላማ ክንካ ዻጳንቴ ኬም ዻብንሻና ኮዻብንሻይ፣ ኦግኖኻሞ ና ሳላሞንስ ሃማሞን ኤሳራናንቴ ፔን ፔጌንባራ ናእዲና፣ ታ ኤዲ ኮታር ሳላሞን ካላ ሳጊ ዳይዲና።32ነነዌ ኤና ዮናስሳ ታማርን ኤሳራንቴ ዻቆን ጎይንዛራ ኬኣርዳዶንታኻ ብቶን ታኻዻን ዋዳንካ ኤዲን ታን ጋይን ኮላማ ክንካ ዻጳንቴ ኬም ዻብንሻና ኬዻብንሻይ፤ ታ ኤዲ ኮታር ዮናስ ካላ ሳጊ ዳይዲና።33ኤዲ ኖን ሮጵሳንቴ ራቅ ኣቺምር ዎይካሞ ኣኻሾሳ ኢር ዎዳያ ቆልማሞ፤ ኦጎኖኻሞ ኦኖንዛራ ኣርዳይናናንቴ ፓክ ኮዴኻ ኖንም ዼግ ሃያንቴና ክዎዳይ። 34ሃሳ ብሽንናንቴ ሮሮን ማታይኖ ኣፕኖ ሃሳና፤ ኣፕኖ ሃሳ ጫንቃል ኮዳና ብሺኖ ሃሳ ፓይላ ፓኪና ኮዳይ፤ ኮዶን ኣፕኖ ሃሳ ሃጅሞ ኮዳና ብሺኖ ሃሳ ፓይላ ፂፓና ኮዳይ። 35ኣጋታኻ ሃሳ ኢሮ ኖኖ ሮጳይኖ ፂፓን ኮጋሬኻናንቴ ሃም ማንክማ። 36ታ ናንሲ ብሺኖ ሃሳ ፓይላ ፓክ ኮዳናቤ፣ ሃሳ ብሺንሳ ራቅ ፂፓዳ ኮቆልምና፣ ኖኖ ሃሳ ብሺሮን ዳና ጉራንሳዻዳግያና ኬሼሽካይ።37ኢየሱስ ዼላቃቴ ክሳ ቱንሳ፣ ፋራሳዊ ካላ ክላማ ክንካ ክእꬅሜኻናንቴ ይሳ ኦኖሮ ኪም ግስምዲና፤ ኖኻሞ ክላማ ክንካ ኣርዳንቴ እꬅማናንቴ ዳርቅዲና። 38ፋራሳዊያ ኢየሱስ ዳኣኖንሳ ብራሮ ኣኒን ይሳም ክሻያድሞንም ይያፓና ቃቦ ያእዲና።39ጌጳኻሞ ክግያ ይንታና ክያማዶ፦ “ታ ዬቲ ፈረስ ኤና ኑንቆን ሻርቃንቤ እꬅሞን ሻርቃንቤሳ ዙሎን ሶጎና ዬሻያይ፤ ኮዶን ዬሳ ኢኖ ማዝንቶምቤ ዛርባሞምቤኻና ኮፆፃዶ። 40ዬቲ ኤና ዴምጲና፣ ባርያ ጳልን ጋይንም ዎዳዳ ኢን ጋይን ዎዳዳይዬው? 41ኮዶን ዬራ ኢሮ ዳናም ኤና ኩፒናናንቴ እምማቴ፣ ሃያንቴ ናንሲ ዬር ፓይላ ውል ዬናንቴ ጫንቃሊና ኮዳይ። 42ኮዶን ዬት ፈረስ ኤና ሃይ! ኣዝሙድቤ ጤና ኣዳምቤ ዎና ዬጲያዳናሳ ታጲና ግዶርካ ካላም ባር ናንቴ እማና ዬእማይ፤ ኮዶን ብቶንም ጎይ ልኪካ ታክንቶባራቤ ባርያም ናሻዻንባራቤ ዬቲ ግባርስድማሞ፤ ኮዶን ዬቲ እኒ ኪና ኦም ጋርማ ክናምካሞ ዬኣሽኬኻናንቴ ዛግሳና ኮዛግሳይ። 43ዬት ፈረስ ኤና ሃይ! ኣይሁድናሳ ምስኮን ኦኖሮ ጎሺ ቦርኮቶ ዬናሻንታኻ ጋባንሳ ግዶሮ ኤና ዬም ጎሺ ጌሶኻ ኬጌሴኻናንቴ ዬዛጋንታኻ ሃይ! 44ኤና ዼስማ ትጋዳቴ ይያኣይና ሃፕንዽምና ዱክናም ዬታኻንታኻ ሃይ!” 45ኤና ሙሴ ዳምብን ዼሳዳና ግዶር ኤዲ ካላ ይማሳና “ኣስታማራዮ፣ ኦጎንታ ሃጌይና ዎም ካውል እሪቴና ሃዶ” ሃማንቴና ክጌያዶ። 46ኢየሱስካሞ ይንታና ክያማዶ፤ “ዬቲ ኤና ዳምብን ዼሳዳና ሃይ፤ ኤና ባስክሳናንቴ ይቻልሞን ባስኮን ዴፆንና ኤናም ዬባስክስሳይ፤ ኮዶን ዬቲ ዬናንቴ ዬሳ ኣንሳ ብራኻ ላኣሳናንቴኻሞ ዛግማሞ።47ዬምባና ይዴሳዳና ኤና ባርያሳ ኣፖን ጌያይናሳ ዱክንም ዬኣሽካንታኻ ሃይ! 48ታ ናንሲ ዬቲ ዬምባና ዋድማና ኬኣሽካዳናም ኣሽካይና ኬሳ ማኚናና፤ኬ ኤና ባርያሳ ኣፖን ጌያይናም ዴስዲና፣ ዬትካሞ ኬሳ ዱክናም ኣሽካናዬኣሽካይ።49ኣጋታኻ ባርያሳ ሃማሞኖ ይንታና ኮያማዶ፤ ‘ኤና ባርያሳ ኣፖን ጌያይናቤ ኤና ይእሳዻናቤም ኬናንቴ ኒእሳና እኒእሳይ፤ኬ ዋኒም ዴሳና ኬዴሳይ፤ ዋኒምካሞ ኦይታንቴና ኬያያይ።’ 50ኣጋታኻ ኤዲኖ ታን ጋይኖ ኮኖ ኣና ፔን ጋላፕን ኮም ዎዳዻዳሮኻ ካርሳንቴ ኤና ባርያሳ ኣፖን ጌያይናሳ ማኣስን ይንቅማዶንም፣ ፓይላ ኬኻላ ኦይሳናኦይሳዻይ፤ 51ኣቤል ማኣስሮኻ ካርሳንቴ ሙልዻንቤ ባርያ ኦኖንቤሳ ባክሮ ይንቅማዶን ዘካርያስ ማኣስንዛራ ዶንም ኬኻላ ኦይሳና ኦይሳዻይ፤ ዪኒ፣ ዬናንቴ ጌያና እጌያይ፤ ኤዲን ታን ጋይን ኮኻላ ዬራ ክናም ኦይሳና ኦይሳዻይ። 52“ዬቲ ኤና ዳምብን ዼሳዳና ሃይ! ዼስንቶን ሙልዻፖን ቡላይን ዬርን ዬቲ ቻይዲና፤ ኮዶን ዬትካሞ ዬናንቴ ኣርዳድማሞ፤ ኤና ኣርዳይናምካሞ ዬቲ ማርዲና።” 53ኢየሱስ ኦጎባራ ክውታዃ ኤና ሙሴ ዳምብን ታማርሳይናቤ ፈረስ ኤናቤ ኪም ርብንዻንቴ ኦይሶኻ ኪም ዬዲዲና፤ 54ዼላቅና ክሳ ኣፖሮኻ ውታይናኻ ኪም ሴሳናንቴ ዛግቴና ኬዶ።Chapter 12
1ዋዳ ኣጋኻ ኤዲኖ ፓይዶንሳ ሺ ጱፅ ግያንዶኖ ኪም ይሳ ትጋዛራ ፑጫንቴ ኮዳዃ፣ ኢየሱስ ይሳ ታማርናናንቴ ይንታ ሃማንቴና ክጌያዶ፦ “ኤና ፈረስ ኤናሳ ኛኻዻን ኣፕንካላ ፔጌንዽማቴ፤ ኦጎኖኻሞ ካይስንሶና።2ዬር ክጫሚ ዳ ጳል ውትማ ካላኻሞ ቆልማሞ፣ ዬር ዼሳዽማ ኣቺምር ዳ ካላኻሞ ቆልማሞ። 3ኣጋታኻ ዬራ ፅፓሮጎ ዬዼላቃዳና ፓይላ ሜሌል ሃሞሮ ኤሳርማና ኬኤሳርማይ፤ ቆፓሮጎ ዳንቴ ዬራ ክሳ ቃሞሮ ዬሃሽክማዳና ጳሎ ማይ ጌያና ጌይዻይ። 4“እያርያናቶ፤ እንታ ዬናንቴ ጌያና እጌያይ፤ ኤና ዋን ዴሳይናም፣ ሃያንቴ እስ ዬር ኣብ ካላኻሞ ኣሽካናንቴ ቻልምናም ዬኩርትንዽናኖ። 5ኮዶን ይንናንቴ ዬኩርትንዼኻናንቴ ዛግሳያ ሃው ክዶንም ዬናንቴ ዻዋና እዻዋይ፤ዴሳንቴ ጋሃነምንዛራ ዻባናንቴ ጌጳሞ ይንሳ ይዳም ኪም ኩርትንዽማቴ፤ ዪኒ፣ ዬግያ ኪም ኩርትንዽማቴና እያማይ።6ሱታና ዶጝናም ሽልንጋ ታጳዛራ ሻንሽቴ ዳዻዳይዬው? ኮዶን ኬግዶር ካላኻሞ ባርያኻላ ዋልሚ ዳማሞ። 7ዬሳ ሜቴሮን ዳና ስቲና ካውል ፓይላ ፓይዳዿዃና ኬዶ፤ ታ ናንሲ ዬኩርትንዽናኖ፤ ሱታና ጱፅና ባዛንሳ ጳባራ ባዛኖ ዬኖ ጌጲና። 8እንታ ዬናንቴ ጌያና እጌያይ፤ ኤና ኤናሳ ዎትሮ እናንቴ ማኛሞን ዎያይና ውልናንቴ፣ እንታ ኤዲ ናሶኻሞ ባርያሳ ኤርጎን ኤናሳ ዎትሮ ኬሳ ማኚ ዳና እዳይ። 9ኤናሳ ዎትሮ እንታ ኪም ዼስማሞ ሃማንቴ ኤያ ዜርማያ፣ ባርያሳ ኤርጎን ኤናሳ ዎትሮ ኪም ዼስዽማሞ ሃማና ሃንዻይ። 10ኤና እ ኤዲ ናሶዛራ ቦውንታ ዼላቅ ጌያይና ውልናንቴ ኬሳ ሴሶን ኬናንቴ ጋራና ጋርዻይ፤ ኮዶን ኤያ ኡስን ጫራጚኒም ኢራያናንቴ ሴሶን ክሳም ክናንቴ ካላኻሞ ጋርዽማሞ። 11ኤና ዬም ዬዳንቴ ኣይሁድናሳ ምስኮን ኦኖንዛራ ዎይካሞ ኤና ብቲናቤ ኤና ጋርናቤዛራ ኣንሳቴ ኬይና ሃሞንታ ዬማሳይንም ዎይካሞ ኬናንቴ ሃር ዬማሳይንም ዬቃብምናኖ፤ 12ሳኣታ ኣጋኻ ኡስኖ ጫራጚኖ ዬራ ዬጌዬኻናንቴ ዛግሳይናም ዬናንቴ ጌያና ኮጌያይ።”13ዛርስንሳ ባክሮ ኤዲ ካላ ክግያ ይጌይና፤ “ኣስታማራዮ፣ እንና ናሳ ዻልማን ኮይሶንሳ እናንቴ ዬስካይናም ክካሼኻናንቴ ክናንቴ ጌይማ” ና ክያማዶ። 14ኢየሱስካሞ ክግያ፣ “ያ ኤያ ካ፣ ኢም ዬዛራ ኤዲ ብቶ ታኻያ ዎይካሞ ኤዲ ጌጲ ሃያዳ ሃውቴ?” ና ክያማዶ። 15ሃያንቴኻሞ ኬግያ “ኤዲሳ ሳዳኖ ዎድማሞዛራ ኮጌክንዻድሞንታኻ፣ ዬም ማንክማቴ፤ ዛላሞሮኻኻሞ ፓይላ ዬም ማንክማቴ” ና ክያማዶ። 16ኖ ጫግሻንቴኻሞ ይንታ ሃማንቴና ዻይንሶ ኬናንቴ ክጌያዶ፦ “ኤዲ ዎድሞ ካላ ሃምንሳ ካሎን ጌጲ ኡሻዳ ዳይዲና፤ 17ኤያ ኣጋ፣ እስንን እሳም ይንግዶር እካያ ኮና ጌጲ ኮቆልሞንታኻ ሃስ እያዬ? ሃማንቴ ይሳ ዎይላምካ ቃብዲና። 18ይንታኻሞና ክያማዶ፦ ‘ይንታና እያያይ፤ ኮናና እሳ ዳናም ኮሳንቴ ኮና ኣብ ጌጲ ጌጲና እዻይ፤ ሃያንቴ ኬግዶር እሳ እስናቤ ኮይናቤም ፓይላ ካና እካይ፤ 19ሳዳን እሳምካሞ፣ “እሳ ሳዳኖ፣ ዋዳ ጱፅናንቴ ሃናንቴ ዬካያ ኮይሶ እንታ ዶሪዲና፤ ታ ናንሲ ኡሲ ችማ፤ እስማ፤ ውጭማ፤ ዋዝንዽማኻሞ” ኮግያ ሃማና እያማይ። 20ኮዶን ባርያ ክግያ ‘ያ ኤያ ዴምጳ ካ፣ ሳዳን ሃሳም ሃኻላ ሶታ ካኻ ቻናንቴ ዛጋና ኬዛጋይ፤ ታ ናንሲ ሃናንቴ ሃማንቴ ሃኬራዶኖ ሃውናንቴ ኮዴ?’ ና ክያማዶ። 21ኣጋታኻ ኤያ ይናንቴ ሃማንቴ ኮይሶን ፑኡሻያ፣ ኮዶን ባርያሳ ዎትሮ ዎድሞን ትማ ቱንስኖ ክሳ ኣጋንታና።”22ሃያንቴኻሞ ኢየሱስ ይሳ ታማርናግያ ይንታና ክያማዶ፦ “ኣጋታኻ ዬናንቴ ጌያና እጌያይ፤ ዬሳ ሳዳንናንቴ ሃር ዬእꬃይንም ዎይካሞ ዬሳ ብሺንናንቴ ሃር ዬኣርሳይን ኦጎናንቴ ዬሞይካዽናኖ፤ 23ኦጎኖኻሞ ሳዳኖ ዳኣኖን ካላ፣ ብሺኖኻሞ ኣፓላን ካላንካ ሳጊና።24ይንዳ ካርያናም ሼድማቴ፤ ኬ እስን ጲማሞ፣ ፓትማሞ፣ ይንግዶር እስንን ኬካያ ኮና ኬሳ ቆልማሞ፤ ኮዶን ባርያ ኬም እꬅንሳና ክእꬅንሳይ። ታ ዬቲ ካርያና ካላንካ ካሎን ሳጋይዬው? 25ኤሳንካ፣ ዬግዶር ሞይካዻንቴ ይሳ ቦንናዛራ ክንዲ ካላ ሻባናንቴ ቻላያ ሃውቴ? 26ታ ናንሲ ዬራ ሾላም ሃያናንቴ ዬቻሊምና፣ ዬራ ዋኒናንቴ ሃርናንቴ ዬሞይካዼ? 27“ይንዳ ኡሺምና ሃሞንታ ኬጌጳይንም ሼድማቴ፤ ኬ ኣሽክቴ ጋልማሞ፤ ፑታ ዽማሞ፤ ኮዶን ዬናንቴ ጌያና እጌያይ፤ ሳላሞን ካውል ይሳ ጎሺን ኦጎ ውልካ ኡሽምና ክናሳ ካላግያ ኣፓላ ኣርሳድማሞ። 28ታ ናንሲ ሃይታላ ሃፕንዻንቴ ሳኻ ኖንዛራ ካዻይና ሾቆና ጳልን ጋይናም ባርያ ኦጎንታ ከኣርስሳያ ዳና፣ ዬቲ እምነትንሳ ቄታና ዬቤም ሃርቴ ኬኻላንካ ሳጊ ክኣርስስሞኖ?29ኣጋታኻ ሃር ዎእꬄ ዎይካሞ ሃር ዎውጬ ሃማንቴ ዛጋኻ ዬሞይካዽናኖ፤ 30ኦጎቤም ኤዲኖ ፔን ጋላፕሮ ዶኖ ፓይላ ዛጋና ኮዛጋይ፤ ዬሮ ኦጎኖ ፓይላ ዬናንቴ ኮዛግሳይንም ዬምባ ዼስዲና።31ክናሳ ኦባራ ሳጊ ዬቲ ባርያሳ ማንግስትን ዛግማቴ፤ ዬርን ኦጎም ፓይላ ዬናንቴ ሻባንቴ እማና እንዻይ። 32“ዬቲ ኤና ቄታና፣ ይሳ ማንግስትን ዬናንቴ እማናንቴ ዬምባሳ ቃቦኖ ፃሊኖ ኮዶንታኻ፣ ዬኩርትንዽናኖ፤33ኮይና ዬሳም ሻንሻንቴ ኤና ኩፕናናንቴ ብሬንናም ካሽማቴ፤ ዲብን ይድብሞን ራቅሮቤ፣ ኦሎሎን ይእꬅሞን ራቅሮቤ፣ ሶርብን ጌችሞሮ ኮይሶ ማቅማ ፖላሮ ዬናንቴ ፑኡሽማቴ፤ 34ዬሳ ዎይላምኖ ኮይና ዬሳሳ ራቃ ይንግዶር ዳዻዳሮና ኮዳይ።35ዻክዻንቴ ሼክሚ ዳማቴ፤ ዬሳ ኖናኻሞ ሮጳንቴ ኬዴ፤ 36ኬሳ ጌጳ ጋይዶንባራ ክሳ ማታዛራ ኤና ካላይና ጌጳ ኬሳ ናዴ ኦኖንሳ ሙልዻፖንካላ ናዴ ክግስምና ኤና ዪሪካ ቡላይናግያ ሼክሚ ዳማቴ።37ኬሳ ጌጳ ክናኣን ዋዳንካ ካይስና ቃይማንቴ ኬዳዃ ክያፓይና ፓፅን ይንናንቴ እንዻዳናና፤ ዬናንቴ ጎንዼና እጌያይ፣ ኬሳ ጌጳ ዻክዻንቴ ዎያንቴ፤ ኬም እꬅንስናንቴ ዳኣርሳና ክዳኣርሳይ፤ ናዴ ኬም እꬅንሳና ክእꬅንሳይ። 38ጌጳ ሶትንሳ ግዶጋልት ግዶር ዎይካሞ ሶፅማ ኣፖ ግዶርካ ናዴ ኣጋንቴ ቃይማንቴ ኬዳዃ ክያፓይና ካይስና እግና ፓፅን እንዻዳናና።39ኮዶን ካም ዼስማቴ፤ ዲባ ሳኣታ ሃማኻ ክናኣን እኒ ኦኖን እምባ ይዼሳዳና፣ ክሳ ኦኖንሳ ኩባን ቡጫንቴ ክሳ ዲባዛራ ኖ ላይ ሃማንቴ ሼድማሞ። 40እንታ ኤዲ ናሶ ሳኣታ ዬቃባድማኻ እናኣንታኻ፣ ዬትካሞ ሼካንቴ ካሊማቴ።” 41ጴጥሮስ ክግያ፣ “ጌጳዮ፣ ዻይንሳ ካም ሃጌያይኖ ዎናንቴ ሶጎሞ ሞ ኤና ዋኒናንቴ ካውል?” ና ክያማዶ። 42ጌጳኻሞ ይንታ ሃማንቴና ክማሳዶ፦ “ታ ናንሲ ኤያ ጌጳ ይሳ ሞሮን ኤናናንቴ ዋዳ ሊኪ ሃማኻ ዳኣኖን ክእሜኻናንቴ ኬዛራ ይጌጵሳዳ ዋድማን ኤያ ጋዛስቤ ፓኻላስቤ ሃውቴ? 43ጌጳ ክሳ ማታቴ ክንና ዋድማን ኤያ ኦጎንታ ዋድምቴ ዳ ኣጋ ፑጋዻዳና፤ 44ዬናንቴ ጎንዼና እጌያይ፤ ኖ ኪም ኮይና ይሳ ዳና ፓይላ ውልዛራ ጌጵሳና ክጌጵሳይ።45ኮዶን ዋድማን ኤያ ኣጋ፣ ‘ጌጳ እሳ ይሪ ንማሞ፣ ኖ ካፓና ክካፓይ’ ሃማንቴ ቃባንቴ ካይስና ኣንጌናቤ ሜናቤም ክዽናቤ፣ ይዛጋዳግያ እꬃማቤ፣ ውጫቤ፣ ክክባርያዳናቤ፤ 46ዋድማን ኤያ ኣጋሳ ጌጳ ኖ ሮራ ክቃባድማኻቤ ሳኣታ ክዬክንስድማኻ ናኣና ክናኣናይ፤ ሃያንቴኻሞ ኪም ኝክ ኝክ ቱማና ክቱማይ፤ ዴንታን ክሳምካሞ ኤና ኣምንድምና ላማና ክያያይ። 47ጌጳ ክሳ ዬራ ይዛጋይናም ዼሳንቴ ሼክማቤ ቃቦ ክሳም ኣሽክማስ ካይስታ ኣጋም ኪም ዛርቦ ዻና ዻዻይ፤ 48ኮዶን ይሳ ጌጳሳ ቃቦን ዼስማ፣ ዬር ኪም ዻይሳያግያ ሃማ ዋድማ ሶጎ ኣሽካዳ ካይስታም ዬካ ዬካና ዻዻይ። ኤና ይንናንቴ ጱፅ እንዻዳና ፓይላ ውልካላ ጱፅና ዛጋዻይ፤ ኤና ኤልቅሞን ጱፅን ቻዳናኻላኻሞ ዬር ጱፂና ካላዻይ።49እንታ ይንናንቴ እናኣዶኖ ፔሮ ኖን ኣስናንቴና፤ ታ ካዛራ ኮዬዳዳና ሃሞንታ እኒ እዋዝንዼ! 50ኮዶን ሻዮ እሻይዻያ ዳይዲና፤ ኦጎኖ ኮሳ ሃምማዛራ እንታ ጌጲ ሞይካዽዲና።51ዬኻላ ፔንዛራ ፃላሞን ባኣናንቴ እናኣዳው ኮታኻይ? ይንታ ትማሞ፤ ዬናንቴ ጌያና እጌያይ፣ እንታ ይንናንቴ እናኣዶኖ ፓሽንታን ባኣናንቴና። 52ካኻ ካርሳንቴ ሞሮን ካሎንሳ ኢሮ ክንካ ፓሽማዳና ኤዲ ዶጝ ዳና ኬዳይ፤ ኤና ላማና ኤና ማካምናዛራ ዻጳናኬዻይ፣ ኤና ማካምና ኤና ላማናዛራ ዻጳንቴ ኪም ላላና ኬላላይ፤ 53እምባ ይሳ ናሳዛራ ዻጳናክዻጳይ፣ ናሳኻሞ እምባዛራ ዻጳናክዻጳይ፤ እንዳኖ ይሳ ናንዛራ ዻጳናኮዻጳይ፣ ናኖኻሞ እንዳንዛራ ዻጳናኮዻጳይ፤ ኣኻኖ ናሳ ሜንዛራ ዻጳናኮዻጳይ፣ ናሳ ሜኖኻሞ ኣኻንዛራ ዻጳንቴ ኪም ላላና ኬላላይ።”54ሃያንቴኻሞ ኖ ዛርስንናንቴ ይንታና ክያማዶ፦ “ሉፕኖ ሃዮን ይዋንባራ ኮውታን ዬያፕና፣ ይሪካ ‘ዶቦኖ ናኣናንቴና ኮዶና’ ዬያማይ፤ ኦጎንታኻሞ ዳና ኮዳይ፤ 55ዳቡብ ግባሮኖ ዳቡብባራ ኮግባርስና፣ ‘ፔኖ ኦይዻና ኮኦይዻይና’ ዬያማይ፤ ኦጎንታኻሞ ዳና ኮዳይ። 56ዬቲ ክና ካይስንሶን ኤና፣ ፔንቤ ፖላንቤሳ ዴንታንም ዬክንስዻን ዬቲ ዼስዲና፤ ዋዳን ታን ጋይን ኮሳ ዴንታም ዬክንስዻይኖ ሃስ ዬም ኮባሻዴ? 57“ታ ዬናንቴ ጎይ ልኪ ሃማኻ ሃርቴ ዬታክሞኖ? 58ሃሳ ቁፓሞን ኤያ ላማ ክንካ ኣኻራ ኤያ ብቶን ታኻያሳ ዎትሮ ዎዮታ ሃይና፤ ኣኻራ ጎይሮጎ ዳንቴ ክላማ ክንካ ቃሽማናንቴ ዛግማ፤ ኦጎንታ ሃያድምና ኖ ሃም ጉቻቴ ኤያ ብቶን ታኻያዛራና ክያኣያ፤ ኤያ ብቶን ታኻያኻሞ ሃም ኤያ ዻኻያናንቴ ሳስካንቴና ክእማይ፤ ኤያ ዻኻያኻሞ ሃም ዻክን ኦኖንዛራ ኣርሳና ክኣርሳይ፤ 59ሃናንቴ ጌያና እጌያይ፤ ሽልንጋ ቱንስም ሃሳ ካሻቴ ቱንስዛራ ኦጎታርካ ያ ውትማሞ።Chapter 13
1ዋዳን ኦጎኻ፣ ኤና ዋኒ ኢየሱስ ካላ ናዴ ይጌይና፦ “ገሊላ ኤና ሙልዻሮጎ ባርያናንቴ ቁሊ ኡኩቴ ኬዶን ዋዳንካ፣ ጲላጦስ ኬም ክዴሳንቴ ኬሳ ማኣስናም ቁላ ኬኡካዳና ማላ ክንካ ዎርስዲና” ሃማንቴ ክናንቴ ጌይዲና። 2ኖኻሞ ኬናንቴ ይንታ ሃማንቴና ክማሳዶ፦ “ታ ገሊላ ኤና ክና ጋሎኖ ኦጎኖ ኬዛራ ኮዬስካዶኖ ገሊላ ኤና ዋኒ ፓይላ ካላንካ ዬኻላ ካልሎን ሴሶ ኤድ ኬዳው ኮታኻይ? 3ኦጎንታ ትማሞ፤ እንታ ዬናንቴ እጌያና እጌያይ ሴሶንባራኻ ዬማታድምና ዬትካሞ ፓይላ ኣጋንታ ካያና ዬካያይ።4ዎይካሞ ሰሊሆም ግዶር ካርሚኖ ሱኒን ጋይኖ ይንዛራ ኮይፖዃ ጃዳና ኤና ታጲ ሎንካይና ኤና ዬሩሳሌም ግዶር ዳና ፓይላ ግዶርካ ዬኻላ ሳጊ ሴሶ ኤድ ኬዳው ኮታኻይ? 5ኦጎንታ ትማሞ፤ እንታ ዬናንቴ እጌያና እጌያይ፤ ዬትካሞ ሴሶንባራኻ ዬማታድምና ፓይላ ኣጋንታ ካያና ዬካያይ። 6ሃያንቴኻሞ ኖ ይንታ ሃማንቴ ዻይንሳ ካም ኬናንቴ ጌይዲና፦ “ኤዲ ካላ ይሳ ዎይንን ሃምን ራቅሮጎ ክኮራዳ ባላስ ሃቃ ካላ ክሳ ዳይዲና፤ ኖኻሞ ኣፒ ክግዶር ዛጋናንቴ ናዴ ኣፒ ካላኻሞ ሃፓድማሞ። 7ኖ ዎይንን ሃምንሳ ዋድማን ኤያግያ ‘እንታ ክግዶር ኣፒ ሃፓና እያፓይ ሃማንቴ ቦን ማካም ባላሳ ካዛራ ናዴ፤ እንታ ኣፕ ካላኻሞ ሃፓድማሞ፤ ኣጋታኻ ኪም ጫራቴ ዻብማ፤ ኖ ፔኒም ሃርናንቴ ሱን ክውጬ?’ ና ክያማዶ። 8“ኮዶን ኖ ይንታ ሃማንቴና ክናንቴ ክማሳዶ፦ ‘ጌጳዮ፣ ዴሞን ክሳም እሳ ዎዳዛራቤ ዱባ እሳ ካዛራ ቦና ካናንቴ ሶጎ ጋርማ፤ 9ቦና ናኣያ ኣፒ ክካዳና ኦጎ ፃሊና፤ ክካድምና ኪም ጫራና ሃጫራይ።”10ኢየሱስ ኡኩንሳን ሮራ ጋላ ኣይሁድናሳ ምስኮ ኦኖ ካላ ግዶር ታማርስቴና ክዶ። 11ኦጎታርካሞ ቦን ታጲ ሎንካይግያ ኤስኖ ቤሮንሳ ዙሎን ቁንዱል ይያዶኖ ሜ ኻላ ዳይዲና፤ ናኻሞ ዙሎኖ ኮሳ ቁንዱል ኮያማዶንታኻ ካች ሃማናንቴ ካላኻሞ ቻላድማሞ።12ኢየሱስካሞ ኮም ይያፓዶን ዋዳንካ ኮም ግስማንቴ፣“ያ ኤስኖ ኮኖ፣ ሃጅማ ሃም ዬዳዳሮኻ ያ ጫንቃል ሃምዲና” ና ክያማዶ፤ 13ኣን ይሳምካሞ ኮዛራ ዎድዲና፤ናኻሞ ኣጋዛራ ካች ሃማንቴ ዎይዲና፤ ባርያናንቴኻሞ ጎሺን እምዲና። 14ኮዶን ኤያ ኣይሁድናሳ ምስኮን ኦኖንሳ ጋራ ኢየሱስ ኡኩንሳን ሮራ ጋላ ክፓሽሻዶታኻ፣ ዋጭማንቴ ዛርስንግያ፤ “ዋድማን ይንካ ኣሽካዻይና ሮሮና ላና ዳይዲና፤ ኣጋታኻ ሮሮና እግናኻ ናዴ ፓሽማቴ፤ ኡኩንሳን ሮራኻ ትማሞ” ና ክያማዶ። 15ጌጳኻሞ ክናንቴ ማሳንቴ ይንታና ክያማዶ፦ “ዬቲ ክና ካይስንሶን ኤና፣ ዬሳ ባክሮ ኤዲ ይሳ ዋኻም ዎይካሞ ኡኩልታም ክሳ ዻክድሮኻ ኡኩንሳን ሮራ ጋላ ቡላንቴ ኑንቆ ዉሾታ ያኣያ ቆላይዬው? 16ታ ኤስኖ ኮኖ ኣብርሃም ናሶ ኮዳዃ፣ ሜሺ ኮም ቦን ታጲ ሎንካይናንቴ ይዻዃዃ ዶኖ፤ ዻክን ኦጎሮኻ ኡኩንሳን ሮራ ጋላ ኮም ቡሊንቶ ዛግሳይዬው?” 17ኖ ኣጋም ክጌያዶን ዋዳንካ ኤና ክሳ ቁፓሞን ኤና ፓይላ ቦኪንዽዲና፤ ኮዶን ዛርስኖ ፓይላ ዬር ሃሊ ኖ ክያያዳኻ ዋዝንዽዲና።18ሃያንቴኻሞ ኢየሱስ ይንታና ክያማዶ፦ “ባርያ ማንግስትኖ ሃር ኮታኬ? ሃርላማ ኮም እዬክንሴ? 19ኪም ኤዲ ካላ ቻንቴ ይሳ ሃምሮ ይጵያዳ ሻፖ ኣፒና ክታኻይ፤ ኖ ጌጳንቴኻሞ ሃቃ ጌጲ ማትዲና፤ ካርያና ፖላን ጋይናኻሞ ክሳ ኣንትናዛራ ዱንክዲና።” 20ሃያንቴኻሞ ኖ ይንታና ክያማዶ፦ “ባርያ ማንግስትንም ሃር ላማ ክንካ እዬክንሴ? 21ሜ ካላ ቡኮኖ ኮዱቤኻናንቴ ዹሎ ጱፅ ላማ ኮዎርሳዳ ኛኻዻ ኣፓ ሾላምና ክታኻይ።22ኣጋሳ ራስባራ ኢየሱስ ዬሩሳሌምዛራ ይቴ ዳንቴ፣ ይንካ ይሳጋይና ካታማናቤ ሞሮናቤ ግዶር ታማርሳዳቴ ይቴና ክዶ። 23ኤዲ ካላ ክካላ ናዴ ክግያ፣ “ጌጳዮ፣ ኤና ዻቃይና ኤዲ ቄታ ሶጎው?” ና ክያማዶ። ኖኻሞ ኬግያ ይንታና ክያማዶ፦ 24“ሙልዻፓ ቆቃስካ ኣርዳናንቴ ማይሽምማቴ፤ እንታ ዬናንቴ ጌያና እጌያይ፤ኤዲኖ ጱፅኖ ኣርዳናንቴ ዛጋና ኮዛጋይ፤ ኮዶን ኬናንቴ ቻልምማሞ፤25ኤያ ኦኖንሳ እምባ ኦኖንም ክቁልፓዃ ዬቲ ጳልባራ ዎያንቴ፣ ‘ጌጳዮ፤ ዎናንቴ ቡልማ’ ሃማንቴ ሙልዻፖን ካላ ዎያንቴ ግስማናዬግስማይ። ኮዶን ኖ፣ ‘ሃው ዬዶንቤ ሃምባራኻ ዬናኣዶንቤም እንታ ዼስማሞ’ ሃማንቴና ዬናንቴ ክማሳይ። 26“ዬትካሞ፣ ‘ዎቲ ሃላማ ክንካ እꬅምዲና፣ ክንካኻሞ ዎቲ ውጭዲና፤ዎሳ ኛርን ጳሎኻሞ ያ ታማርስዲና’ ና ዬያማይ። 27ኖኻሞ ዬግያ፣ ‘እንታ ዬናንቴ እጌያና እጌያይ፤ ዬቲ ሃው ዬዶንቤ ሃምባራኻ ዬናኣዶንቤም እንታ ዼስማሞ፤ ዬቲ ክና ኤና ዛርቦና ፓይላ እካላንካ ፔጌ ዳማቴ’ ና ክያማይ። 28“ኣብርሃምቤ፣ ይሳሃቅቤ፣ ያእቆብቤ፣ ኤና ባርያሳ ኣፖን ጌያይናቤም ፓይላ ባርያ ማንግስትንሳ ኢሮ ዬያፕናቤ፤ ናንሲ ዬም ጳሎ ዻባዻዃ ዬሽዽና ዋዳን ኣጋኻ ኤፕቤ ግግሪ ማሳቤና ኮዳይ። 29ኤዲኖ ሃዮን ይውታንባራቤ፣ ሃዮን ይዋንባራቤ፣ ጳባራቤ፣ ቾባራቤ ናዴ ባርያሳ ማንግስትሮ እꬅሞን ራቅሮጎ ዳርቃና ኬዳርቃይ። 30ኤና ራስባራን ዳናሳ ባክሮ ኤና ብራሮን ዳይና ዳይዲና፣ ኤና ብራሮን ዳናሳ ባክሮ ኤና ራስባራ ዳይና ዳይዲና።”31ዋዳን ኦጎኻ ፈረስ ኤና ግዶር ኤና ዋኒ ክካላ ናዴ ክግያ፣ “ሄሮዶስ ሃም ዴሳናንቴ ክዛጋዶንታኻ ኮታርካ ዻጳንቴ ይማ” ና ኬያማዶ። 32ኖኻሞ ኬግያ ይንታና ክያማዶ፦ “ቃልቴ ኩዪታ ኣጋናንቴ ዬሳ ጌያኖ፤ ‘ሃይታላቤ ሳኻቤ ቤሮናም ቡላና እቡላይ፤ ኤና ሃጅሞናም ፓሽሻና እፓሽሻይ፤ ሮራ ማክንሳ ጋላኻሞ እቃባዳዛራ ዬስካና እዬስካይ ሃማንቴ ኖ ጌይዲና’ ሃምማቴ፤ 33ኮዶን ኤያ ባርያሳ ኣፖን ጌያያ ዬሩሳሌምሳ ኦባራ ራቅ ኣብ ግዶር ክጄኻናንቴ ክዛግስሞንታኻ፣ ሃይታላቤ ሳኻቤ፣ ኦሽጋላቤ ኦጎዛራ ያኣና እያኣይ፤ 34“ዬሩሳሌም፣ ዬሩሳሌምዮ፣ ያ ኤና ባርያሳ ኣፖን ጌያይናም ዴሳይኖ፣ ኤና ሃዛራ ንእሳዻዳናምካሞ ሱኒንካ ፓኻይኖ! ባቻ ይሳ ናናም ይሳ ኮልንሳ ኢሮ ኮፑኡሻያግያ ናና ሃሳም ፑኡሻናንቴ ሃማግያ እዛጋዴ፤ ኮዶን ያ ጋርዲና፤ 35ሼድማቴ፤ ታ ኦኖና ዬሳ ጎልቂ ማታንቴ ሽዽዲና። ዬናንቴ ጌያና እጌያይ፤ ኤያ ጌጳ ናብንካ ናኣያ ፑጋዻዳና ዬሳ ሃማዛራ ካኻ ካርሳንቴ ዬቲ ኢም ሃፕማሞ።”Chapter 14
1ኡኩንሳ ሮሮ ካላ ኢየሱስ እꬅማናንቴ ኤና ፋራሳዊይናሳ ጋርናሳ ካላ ኦኖንዛራ ክኣርዳዶን ዋዳንካ፤ ኤና ኪም ኣፒ ማራኻ ሼድቴና ኬዶ። 2ኦጎታርካሞ ኤዲ ብሺ ኤትማኻ ጋላያ ካላ ኢየሱስሳ ዎትሮ ዳርቃንቴ ዳይዲና። 3ኢየሱስካሞ ኤና ሙሴ ዳምብን ዼሳዳናቤ ፈረስ ኤናቤግያ፣ “ኡኩንሳ ሮራ ጋላ ኤና ሃጅሞናም ፓሽሻዻያ ልኪሞ ሞ ልኪታይ?” ሃማንቴ ኬኻላ ኦይስዲና።4ኮዶን ኬ ዬር ካላኻሞ ጌያድማሞ። ኖኻሞ ኤያም ዬዳንቴ ፓሽሻንቴ ይእስዲና። 5ሃያንቴኻሞ ኬግያ፣ “ዬሳ ኤዲ ካላሳ፣ ናሶ ዎይካሞ ዋኪ ኡኩንሳን ሮራ ጋላ ኦሎሮ ኮኣርዲና ይሪካ ቡልማ ሃውቴ?” ና ክያማዶ። 6ኬኻሞ ዬር ካላኻሞ ማሳናንቴ ቻላድማሞ።7ኢየሱስካሞ ኤና ግስንዻዳና ጎሺ ቦርኮቶ ኬዛጋይንም ሃፓንቴ ይንታ ሃማንቴ ዻይንሳ ካም ኬናንቴ ጌይዲና። 8“ኤዲ ካላ ጋይዶንዛራ ሃም ክግስምና፣ ጌጳሞ ራቅዛራ ሃዳርቅናኖ፤ ኤዲ ጌጳሞኻ ሃሳ ሳጊ ግስንዻዳና፤ 9ዬላማ ውልም ኤያ ግስማዳ ናዴ ሃግያ ‘ራቃ ካም ኤያ ካናንቴ ጋርማ’ ና ክያማይ፤ ያኻሞ ቦክንዻናንቴ ራቅ ይርክ ሃማዛራ ሃንቻንቴ ዳርቃና ሃዳርቃይ።10ኮዶን ሃም ግስንዻን ዋዳንካ ራቅ ይርካ ሃማ ሼዳንቴ ዳርቅማ፤ ኤያ ሃም ግስማዳ ይንና ሃግያ እያርያ ራቃ ሃናንቴ ዛግሳያ ካሮ ዳርቅማና" ና ክያማይ፤ ዋዳ ኣጋኻ ሃምካሞ ኤና ሃላማ እꬃማናንቴ ዳርቃዳና ውልሳ ዎትሮ ጎባና ጎባዻይ። 11ኦጎኖኻሞ ኤና ዪም ዼግ ዼግ ሃያይና ፓይላ ይርክ ማታና ኬማታይ፤ ኤና ዪም ይርክ ይርክ ሃያይናኻሞ ፓይላ ዼግ ዼግ ማታና ኬማታይ።” 12ፕር ኢየሱስ ኤያ ኪም ግስማዳግያ ይንታና ክያማዶ፦ “ትፓን ዳኣኖንናንቴቤ ዎይካሞ እባንን ዳኣኖንናንቴቤ ኤናም ሃግስምና፣ እናንቴ ኢ ባዛ ማሳናኬማሳይ ሃማንቴ ኤና ሃሳ ናሽዽናም ዎይካሞ ሃንና ናናም ዎይካሞ ኤዳና ሃሳም ዎይካሞ ሃሳ ጉልን ኤና ዎድሞናም ሃግስምናኖ።13ኮዶን ዳኣኖን ባኻንቴ ኤናም ሃግስማን ዋዳንካ ኤና ኩፕናቤ፣ ኤና ዛራንሳ ጆግናቤ፣ ኤላናቤ፣ ኤና ኣፕን ካያናቤም ግስምማ፤ ያኻሞ ፑጋዻዳና ሃዳይ። 14ኦጎኖኻሞ ኤና እግና ሃናንቴ ኢን ባዛን ማሳዻን ኬቻልሞንታኻ፣ ኤና ጋዛናሳ ዴምጲንባራ ኬዻጳን ዋዳንካ፣ ሃናንቴ ኢን ባዛናም ማሳና ማሳዻይ።”15ኤና ኢየሱስ ማላ ክንካ እꬅማናንቴ ዳርቃዳና ግዶርካ ኤዲ ካላ ኣጋም ይኤሳራና ክግያ “ኤያ ባርያ ማንግስትሮጎ እꬅማናንቴ ዳርቃያ ፑጋዻዳና”ና ክያማዶ። 16ኢየሱስካሞ ክናንቴ ይንታና ክያማዶ፦ “ኤዲ ካላ ግስሞ ጌጲ ኣሽካንቴ ኤዲ ጱፅ ግስምዲና፤ 17ግስሞን ሳኣትኖ ኮዬስኳዃ ቾቺና ግስንዻዳናናንቴ ‘ዬር ፓይላ ውልም ኣሽክሚና፤ ንማቴ’ ሃማንቴ ክግስሜኻ ካይስታ ይሳም ኬዛራ ይእስዲና። 18“ኮዶን ኬ ፓይላ ውል ሽዻናንቴ ዬር ይንቲ ጌያን ካርስዲና፤ ዋ ክግያ፣ ‘ታ ኣኻራ ሃሚ እሻናዶንታኻ ቃልቴ እሼዴ፤ እዛራ ሃዻጋስናኖ እንታ ዬስክማሞ’ ሃምዲና። 19“ዋኻሞ ክግያ፣ ‘ዋኪ ሃሚ ፓኻያ ታጲ እንታ ሻንዲና፤ ኬም እርርሶታ እያኣይንታኻ፤ እዛራ ሃዻጋስናኖ እንታ ዬስክማሞ’ ሃማንቴ ጌይዲና። 20“ዋኻሞ ክግያ ‘እንታ ኣኻራ ኡታ እዶንታኻ፣ ናኣናንቴ እንታ ቻልማሞ’ ና ክያማዶ። 21“ካይስታኻሞ ማታቴ ናዴ ኦጎም ይሳ ጌጳናንቴ ጌይዲና። ዋዳ ኣጋኻ ኦኖንሳ ጌጳ ዋጭማንቴ ካይስታግያ፣ ‘ይሪካ ካታማንሳ ጎይና ጌጲናቤ ሾሊናቤዛራ ዪማ፤ ኤና ኩፕናቤ፣ ኤና ዛራንሳ ኣርስናቤ፣ ኤና ኣፕን ካያናቤ፣ ኤላናቤም ኦራ ኣርስማ’ ና ክያማዶ። 22“ኤያ ካይስታኻሞ ክግያ፣ ‘እሳ ጌጳ፤ ዬራ ሃጌያዳና ፓይላ ሃምሚዲና፤ ፕርካሞ ራቅ ሽዻዳ ዳይዲና’ ሃማንቴ ጌይዲና። 23“ጌጳኻሞ ካይስታግያ ‘ጎይና ካታማን ጋይናዛራቤ ጎይና ካታማንሳ ቡዶሮ ዳናዛራ ውትማ፤ ኦኖኖ እሳ ኮፆፄኻናንቴ ኤና ሃያፓይናም ፓይላ ኣንስቴ ናዴ ኣርስማ፤ 24ዬናንቴ ጌያና እጌያይ፤ ኤና እግና ግስንዻዳና ግዶርካ ኤዲ ካላኻሞ ግስሞን እሳም እꬅማሞ’ ና ክያማዶ።25ዛርስኖ ጱፅኖ ክላማ ክንካ ይቴ ኮዳዃ፣ ኢየሱስ ኬዛራ ማታንቴ ኬግያ ይንታና ክያማዶ፦ 26“ኤና እዛራ ናኣይና ፓይላ እምባቤ እንዳንቤም፣ ሜን ይሳቤ ናና ይሳቤም፣ እንዳን ናና ኣንዛናቤ እንዳን ናና ኣንጌናቤም ሃያንቴ ይሳ ሳዳንምካሞ ካውል ይጋራድምና፣ ኖ እሳ ታማሪ ዳናንቴ ቻልማሞ፤ 27ኤያ ይሳ መስቀልን ባስክሳንቴ ኢም ጫጋድማ ኣጋ ኖ እሳ ታማሪ ዳናንቴ ቻልማሞ። 28“ዬግዶርካ ኤዲ ካላ ኦኖን ኣሽካናንቴ ይዛግና፣ ኣሽካቴ ይቱንሳያቤ ይቱስማቤም ብራቴንካ ዳርቃንቴ ኦኖን ኣሽካን ዋጋን ቃብማ ሃውቴ? 29ኦኖን ኣሽካን ካርሳንቴ ቱንሳን ይባሻዻዳና፣ ኤና ሃፓይና ፓይላ ኪም ኦልታና ኬኦልታይ፤ 30ኬ ‘ኤያ ካ ኦኖ ኣሽካ ካርስዲና፤ ኮዶን ቱንሳኖ ኪም ባሸዲና’ ና ኬያማይ። 31“ዎይካሞ ኤዲ ቢቲ ካላ ቢቲ ኣብም ማላ ኪም ኡካናንቴ ይዻጲና፣ ቢታ ዋ ባንቆን ኤና ሺህ ታጲን ይንሳ ይዳ፣ ብታ ዋ ባንቆን ኤና ሺህ ላማታም ኣንሳቴ ናኣያም፣ ይባሻንቤ ይባሽሞንቤም፣ ብራቴንካ ዳርቃንቴ ብታ ኦሽማ ሃውቴ? 32ዳማን ይባሻዻዳና ብታ ዋ ኣኻራ ፔጌ ክዳዃ፣ ኣፖን ኤናም ይእሳንቴ ቃሺና ክኦይሳይ፤ 33ኣጋንታ፣ ዬግዶርካ ሃውካሞ ዬራ ዳናም ፓይላ ጋርማ፣ እሳ ታማሪ ዳናንቴ ቻልማሞ። 34“ሶቆ ባሺና፤ ሶቆ ይሳ ዳፃሞን ኮካይስና፣ ሃስ ሶቆ ማታንቴ ዳፃዻን ክቻሌ? 35ፔንናንቴቤ ዬር ፔን ሽትሻያ ኣሽካናንቴ ኮኣግሞንታኻ፣ ቡዶንዛራ ዻባና ዻባዻይ። ናንሲ ‘ኤያ ቃሞን ኤሳራን ካዳ ክኤሳሬ።”Chapter 15
1ሮሮ ካላ ኤና ግብርን ፑኡሻይናቤ፣ ሴሶን ኤናቤ ፓይላ ኢየሱስ ክጌያይን ኤሳራናንቴ ክካላ ፑጭዲና። 2ኤና ፈረስ ኤናቤ ኤና ሙሴ ዳምብን ታማርሳይናቤ፣ “ኤያ ካ ሴሶን ኤናም ናሻናክናሻይ ኬላማኻሞ ክንካ እꬅማና ክእꬅማይ” ሃማንቴ ጉንድምዲና። 3ኢየሱስካሞ ይንታ ሃማንቴና ኬናንቴ ዻይሳ ካም ክጌያዶ፦ 4“ዬሳ ባክሮ ኤዲ ካላሳ እያት መቶ ካላ ኮዳና፣ ኬግዶርካሞ ካላ ክካያዳና፣ ሳልታም ሳልናም ጳልሮጎ ጋራንቴ ካያዳም ዛጋቴ ይሳ ሃፓዛራ ይማ ሃውቴ? 5ይያፕና ካሎን ዋዝንዻንቴ ይሳ ካፓናሮ ዎዳንቴ፤6ይሳ ኦኖንዛራ ማታቴ ናኣና ክናኣይ፤ ይሳ ሃርያናቤ ጉሊን ኤናቤም ክዛራ ግስማንቴ ኬግያ፣ ‘እሳ እያታ ካያዳም እንታ ሃፕዲና፤ እላማ ክንካ ዋዝንዽማቴ’ ና ክያማይ። 7ዬናንቴ ጌያና እጌያይ፤ ኣጋግያ ኤና ጋዛና ሴሶንባራኻ ማታን ይዛግስምና ሳልታም ሳልናኻ ዋዝንዻዻንሳ ኦባራ ባርያዛራ ማታያ ሴሶን ኤያኻ ሃማንቴ ጳ ፖላሮ ዋዛ ጌጲና ኮዳይ።8“ዎይካሞ ሜ ካላ ሽልንጊ ታጲ ይንሳን ዶኖ፣ ታጲና ግዶርካ ካላ ክካይና፣ ይሳ ሃፓዛራ ኦኖሮ ኖንኒም ኣሳንቴ ኦኖን ሳንቴ ሃፓናንቴ ካሎን ዛግሞኖ ኤስኖ ና ሃውቴ? 9ይያፓን ዋዳንካኻሞ ይሳ ሃሪያናቤ ጉልን ኤናቤም ክዛራ ግስማንቴ ኬግያ፣ ‘እሳ ሽልንጋ ካያዳም እንታ ሃፕዲና እላማ ክንካ ዋዝንዽማቴ’ ና ኮያማይ። 10ዬናንቴ ጌያና እጌያይ፤ ኣጋግያ ሴሶ ኤድ ካላ ባርያዛራ ክማትና ባርያሳ ኤርጎን ኤናሳ ዎትሮጎ ዋዛና ክዳይ።11ሃያንቴኻሞ ኢየሱስ ኬግያ ይንታና ክያማዶ፦ “ኤዲ ካላሳ ናሶ ላማ ዳይዲና። 12ኬግዶርካሞ ናሳ ሾላ እምባግያ፣ ‘ኣባ፣ ኮይና ሃሳ ግዶርካ እናንቴ ዬስካይናም እናንቴ እማ’ ና ክያማዶ፤ እምባኻሞ ኬናንቴ ኮይና ይሳም ካሽዲና። 13“ሮሮ ጱፅ ካፕማ፣ ናሳ ሾላ ኮይና ይና ፓይላ ውልም ባኣንቴ ፔ ፔጌዛራ ያእዲና፤ ኦጎታርካሞ ኮይናኻ ኣልማቴ ቱንስዲና። 14ኮይናም ፓይላ ኣልማቴ ክቱንሳዃ፣ ፔን ኦጎሮ ዳቆ ጌጲ ኣርድዲና፤ ኖኻሞ ጋሊዲና።15ኣጋታኻ ኖ ፔን ኦጎ ኤዲ ካላዛራ ኣርድዲና፤ ኤያኻሞ ጉቱምና ክሳም ክግሼኻናንቴ ግሽሞንዛራ ኪም ይእስዲና። 16ጉቱምናሳ እꬃዻይንም ቱፖን እꬃናንቴ ኣጝርዽቴና ክዶ፤ ኮዶን ኦጎምካሞ ኤዲ ክናንቴ እማያ ቆልማሞ። 17“ኮዶን ዎይላም ይጶቃና ይንታና ክያማዶ፦ ‘ኣባሳ ዋድማን ኤናሳ ዳኣኖ ሃማግያ ኬዳ ኮሽዻዴ፤ ኮዶን እንታ ኮታር ዳቆንካ ጃናንቴና እዶ! 18ታ ዻጳንቴ ኣባዛራ ቃልቴ፣ ክግያ ይንታ እያማይ፦ “ኣባዮ፤ ፖላሮ ባርያሳ ዎትሮ ፔሮኻሞ ሃሳ ዎትሮጎ እንታ ሴሶ ኣሽክዲና፤ 19ካሃ ካርሳንቴ ሃሳ ናሶ ሃማንቴ ግስዼኻናንቴ እንታ ዛግስማሞ፤ ሃሳ ዋድማን ኤናሳ ካላግያ ኢም ሼድማ’ ና እያማይ።20ሃያንቴ ኖ ዻጳንቴ እምባዛራ ያእዲና። ኮዶን ኣኻራ ፔጌ ክዳዃ፣ እምባ ኪም ሃፓንቴ ክናንቴ ቡርቃዽዲና፤ ክዛራኻሞ ጎባኻ ናዴ ዬዳንቴ ሱንቅዲና። 21“ናሳኻሞ ክግያ፣ ‘ኣባዮ፤ፖላሮ ባርያሳ ዎትሮ ፔሮኻሞ ሃሳ ዎትሮጎ እንታ ሴሶ ኣሽክዲና፤ ናንሲ ካሃ ካርሳንቴ ሃሳ ናሶ ሃማንቴ ግስዼኻናንቴ እንታ ዛግስማሞ’ ና ክያማዶ። 22“ኮዶን እምባ ይሳ ዋድማን ኤናግያ ይንታና ክያማዶ፦ ‘ይሪካ ኣፓላና ግዶርካ ኣፓላ ባሺ ባኣቴ ናዴ ኪም ኣርስስማቴ፤ ክሳ ኣኒሮኻሞ ጋዉ ኮጝማቴ፤ ራሮ ክሳኻሞ ዱጙሪ ኣርስስማቴ 23ዋኻ ዱርፓምካሞ ጉቻቴ ናዴ ማችማቴ፤ እꬅቴ፤ ዎዋዝንዼ፤ 24እሳ ናሳ ካ ጃይዲና፣ ኮዶን ታ ሳዳን ካና ክዶ፤ ኖ ካይቴ ዻብዲና፣ ኮዶን ታ ሃፓዽዲና።” ሃያንቴኻሞ ኬ ዋዝንዻን ካርስዲና። 25“ዋዳ ኦጋኻ ናሳ ጌጳ ሃሚሮና ክዶ፤ ሃያንቴኻሞ ኦኖንዛራ ማታቴ ፄዲ ክናኣና፣ ሙራ ፑጋዽካቤ ዋርሳ ክርባዽካቤና ክኤሳራዶ፤ 26ኖኻሞ ዋድማን ኤናሳ ካላም ግስማንቴ ኮኖ ና ሃርቴ እኤሳራይኖ ሃማንቴ ክካላ ኦይስዲና። 27ዋድማን ኤያኻሞ፣ ‘ሃንና ናሳ ፃሊንካ ማታቴ ክናኣዶንታኻ ሃምባ ዋኪ ዱርፒ ክናንቴ ማችዲና’ ና ክያማዶ። 28“እንዳን ናሳ ጌጳኻሞ ዋጭምዲና፤ኦኖንዛራኻሞ ኣርዳናንቴ ዛጋድማሞ፤ እምባኻሞ ጳልንዛራ ውታንቴ ክኣርዴኻናንቴ ኪም ምስክዲና። 29ኮዶን ኖ ማሳንቴ እምባግያ ይንታና ክያማዶ፦ ‘እንታ ቦንና ክናሳ ኢር ሃናንቴ ካይስግያ ዋድምዲና፤ኢም ሃኤርጋዳና ኤርጎና ግዶርካ ካላምካሞ እንታ ጋራድማሞ፤ ኮዶን እሳ ሃያሪያና ማላ ክንካ እዋዝንዼኻናንቴ እናንቴ እንቃሶ ናሶ ዳናኻሞ እማድማሞ፤ 30ኮዶን ናሳ ሃሳ ካ ኮይና ሃሳኻ ኤና ቡሎና ላማ ኣልማቴ ቱንሳንቴ ክንና፣ ዋኻ ዱርፓምና ክናንቴ ሃማቻዶ’ና ክያማዶ። 31“እምባኻሞ ክግያ ይንታና ክያማዶ፦ ‘ናሳ እሳ፣ ያ ሮሮ ውል እላማ ክንካና ሃዶ፤ ኮይና እና ፓይላ ውል ሃንቲና፤ 32ኮዶን ሃንና ናሳ ካ ጃይዲና፣ ኮዶን ታ ሳዳኻ ማትዲና፤ ኖ ካይቴ ዻብዲና፣ ታ ሃፓዽዲና፤ ኣጋታኻ ዋዝንዽቴ ዎእꬄ፣ ዎውጬ።’”Chapter 16
1ኢየሱስ ይሳ ታማርናግያ ይንታና ክያማዶ፦ “ኤዲ ዎዲሞ ካላ ኮይና ክሳም ክማንኬኻናንቴ ኮይና ይሳዛራ ኤዲ ክጌጵሳዳ ካላ ዳይዲና፤ ኤያ ክጌጵሳዳ ኣጋኻሞ ኤያ ዎድንታሳ ኮይናኻ ክኣልማይንም ክናንቴ ኣፖ ዬስክዲና። 2ኣጋታኻ ኤያ ዎድንታ ኪም ግስንሳንቴ፣ ‘ኮኖ ሃሳ እኤሳራይኖ ሃርቴ? ካሃ ካርሳንቴ ያ ኮይና እሳም ማንካናንቴ ሃቻልሞንታኻ፣ ኮይና እሳም ፓይላ እናንቴ እምማ’ ና ክያማዶ። 3“ኤያ ኮይናም ማንካያ ይሳ ዎይላምካ ይንታና ክያማዶ፦ ‘ጌጳ እሳ ኢም ጌጳሞሮኻ ኦይታናንቴና ክዶ፤ ፓክማያ እሳ ካንታ ቆልማሞ፤ ሃያንቴኻሞ ምስክማናንቴ ቦክንዻና እቦክንዻይ፤ ኣጋታኻ ሃር እያዬ? 4ኢም እሳ ጌጳሞሮኻ ኦይታዻዳና ኤና ይሳ ኦኖናዛራ ኢም ኬኣርሴኻናንቴ ዬራ እየያያም እንታ ዼስዲና።’ 5ኣጋታኻ ኤያ ክሳ ጌጳሳ ኤና ይንዛራን ባዛን ይዳናም ፓይላ ግስምዲና፤ ኤያ ብራስግያኻሞ ‘ጌጳሳ ባዛና ሃዛራን ዳና ሜምቴ?’ ና ክያማዶ። 6ኖኻሞ ‘እዛራን ዳና ዛይቲ ዳጋንት መቶ ካላና’ ና ክያማዶ። ኤያ ኮይናም ማንካያኻሞ ክግያ ‘ዋርቃታ ይንካ ሃኣርዳዳም ችማ፤ይሪካ “ዳ ዶጝታም” ሃማንቴ ኡኩማ’ ና ክያማዶ። 7ሃያንቴኻሞ ዋግያ ‘ሃዛራ ሜሚቴ ዳና?’ ና ክያማዶ። ኖኻሞ ክግያ ‘እዛራ ናሙቹሌ ሶርብ ዶጝታምና ዳና’ ና ክያማዶ። ኤያ ኮይናም ማንካያኻሞ ክግያ፣ ‘ዋርቃታ ሃሳ ብድሪ ጋንታም ቻንቴ፤ “ ኦይዲታም” ሃማንቴ ኡኩማ’ ና ክያማዶ። 8ክሳ ጌጳኻሞ ኤያ ኮይናም ማንካያ ማልታ ኣጋሳ ማልታሞንም ዬርሽዲና፤ ኤና ፔን ኮ ናና ኤና ይም ታኻይና ማላ ክንካ ዴንታን ይሳ ዶንካ ናና ሮሮን ጋይና ካላንካ ማልቲና። 9ኣጋታኻ ዬናንቴ ጌያና እጌያይ፣ ኮይና ፔን ኮ ጋይና ኬማቃን ዋዳንካ ኦኖን ላይን ዳዻይንዛራ ዬም ቻዼኻናንቴ፣ ኮይና ክናኻ ዬናንቴ ዬሳ ሃርያናም ፑኡሽማቴ። 10“ኤያ ዬር ሾልካ ጋዛን ዳያ ዬር ጌጲካኻሞ ጋዛ ዳና ክዳይ፤ ኤያ ዬር ሾልካ ጋዛን ዳድማ ዬር ጌጲካኻሞ ጋዛ ዳማሞ። 11ታ ናንሲ ኮይሶን ፔን ኮ ጋንካ ጋዛ ዬዳድምና፣ ኮይሶን ጎንዼንም ሃውቴ ዬዛራ ኤልቅማያ? 12ኤና ኣብና ኮይሶንካ ጋዛ ዬዳድምና፣ ኮይና ዬናም ሃውቴ ዬናንቴ እማያ? 13ካላኻ ኤዲ ጌጲ ላማናንቴ ካይሲ ዳንቴ ዋድማ ኣሽካናንቴ ቻላያ ኤዲ ካላኻሞ ቆልማሞ፤ ካላም ይቶዛዽና ዋም ናሻና ክናሻይ ዎይካሞ ዋም ይጎብና ዋም ቦዋና ክቦዋይ። ባርያናንቴቤ ብሬናንቴቤ ካላኻ ካይሲ ዳናንቴ ዬቲ ቻልማሞ። 14ብሬን ናሻይና ፈረስ ኤና እግና ኦጎም ፓይላ ኤሳራንቴ ኢየሱስዛራ ሃንጭዲና። 15ኖኻሞ ኬግያ ይንታና ክያማዶ፦ “ዬቲ ኤናሳ ዎትሮጎ ዬም ጋዛን ሃያይናና፤ ኮዶን ባርያ ዬሳ ዎይላምን ዼስዲና፤ ዬራ ኤናሳ ዎትሮ ጎሻዻዳና ባርያሳ ዎትሮጎ ቦውሚና ኬዳይ። 16ዳምብንቤ ኤና ባርያሳ ኣፖን ጌያይናሳ ዼላቅንቤም ላይ ዮሃንስዛራ ጌይቴ ዳዽዲና፤ሃያንቴኻሞ ባርያ ማንግስትንሳ ሜርሜርን ፃሊን ጌይዽዲና፤ ኤናኻሞ ፓይላ ኦጎዛራ ኣርዳናንቴ ማይሽምቴና ኬዶ። 17ኮዶን ዳምብሮኻ ዬር ሾሊ ኡካዻዳ ካላ ኣሽካዽማ ክሽዻንናንቴ ፖላንቤ ፔንቤ ኮካያይኖ ባዶና። 18“ኤያ ሜን ይሳም ቡላንቴ ሜ ኣብ ኬማያ ኣጋ ኩጳሞና ክያኣይ፤ ኤያ ኤስን ኣንጋ ካላንካ ውታዶንም ኬማያ ኣጋኻሞ ኩጳሞና ክያኣይ።19ሃያንቴኻሞ ኢየሱስ ይንታና ክያማዶ፦ “ኣፓላን ዋችንቤ ኣፓላን ፃሊንቤም ኣርሳያ ዬር ውል ይንካላ ይፆፃዃ ዋዛንካ ዳ ኤዲ ዎድሞ ካላ ዳይዲና። 20ፕርካሞ ኤዲ ካላ ብሽንሳ ሃጅምን ጉራ ኩፓስ ኣልኣዛር ሃንዻያ ኤያ ዎድንታ ኣጋሳ ሻንሮ ዎዽቴና ክዶ፤ 21ኖኻሞ ኤያ ዎድንታ ዳኣኖን ክእꬅና ክሳ ኣንሮኻ ፓላሞና ድናይናም እꬃናንቴና ክኣጝርዻይ፤ ቃስክናኻሞ ናዴ ሃጅምን ክሳም ዻጵቴና ኬዶ። 22ኤያ ኩፓ ኣጋ ጃይዲና፤ ባርያሳ ኤርጎን ኤናኻሞ ናዴ ኪም ኣብርሃምሳ ዴሞዛራ ኣንሳቴ ያእዲና። ሃያንቴ ኤያ ዎድንታኻሞ ክጃዃ ዱካዽዲና። 23ኖ ሲኦሊሮ ጋሊቴ ዳንቴ ካች ሃማንቴ ኣብርሃምምቤ ክሳ ዴሞሮን ዳም ኣልኣዛርም ሃፕዲና።24ኖኻሞ፣ ‘ኣባ ኣብርሃም፣ ባንዞ እናንቴ ቡርቃዽማ፤ ኮታር ኖን ሮጳን ኮኻ ጋሊቴ እዶንታኻ፣ ኣልኣዛር ይሳ ኣንሳ ብራም ኑንቆሮ ኣርሳንቴ ናዴ እሳ ኣታጲም ክቃጅሼኻናንቴ እናንቴ ንእስማ’ ሃንቴ እላትዲና። 25ኮዶን ኣብርሃም ክግያ ይንታና ክያማዶ፦ ‘ናሳ እሳ፣ ያ ኣና ሳዳንካ ፔሮጎ ሃዶን ዬርን ፃልን ሃያፓዳ፣ ኣጋግያ ኣልኣዛርካሞ ዬር ዛርቦ ክያፓዶንም ጶቅስማ፤ ኮዶን ታ ኖ ኮታ ክዋዝንዽና፣ ያ ጋሊቴና ሃዶ። 26ኮ ውልሳ ጳባራ ኤና ኮታርካ ዬዛራ ሳጋን ኬጋሬኻናንቴቤ፤ ሳ ሃኻላን ዳናኻሞ ዎዛራ ሳጋን ኬጋሬኻናንቴ ዎቤ ዬቤሳ ባክሮጎ ዴሎ ጌጲ ዎዳዽዲና። 27“ኖኻሞ ይንታና ክያማዶ፦ ‘ኣባ፣ ኦጎንታ ዳና፤ኣልኣዛርም ኣባ ኦኖንዛራ ሃይእሴኻናንቴ እንታ ሃም ምስክዲና። 28እሳ እንዳን ናና ዶጝና ዳይዲና፤ ኬኻሞ ጋሎን ራቅን ኮዛራ ናኣን ኬጋሬኻናንቴ ኬናንቴ ክጌዬ። 29“ኮዶን ኣብርሃም ክግያ ይጌይና፣ ‘ሙሴቤ ኤና ባርያሳ ኣፖን ጌያይናቤ ኬሳ ዳይዲና፣ ኬም ኬኤሳሬ’ ና ክያማዶ። 30ኤያ ዎድንታኻሞ ክግያ፣ ‘ኣባ ኣብርሃም ኦጎንታ ትማሞ፤ ኤዲ ካላ ዴምጲንባራ ዻጳንቴ ኬናንቴ ክይና ባርያዛራ ማታና ኬማታይ’ ና ክያማዶ። 31ኣብርሃምካሞ ሙሴቤ ኤና ባርያሳ ኣፖን ጌያይናቤም ኬኤሳራድምና፣ ኤዲ ካላ ዴምጲንባራኻ ክዻጳዳናኻሞ ኬ ኣምንማሞ’ ና ክያማዶ።Chapter 17
1ኢየሱስ ይሳ ታማርናግያ ይንታና ክያማዶ፦ “ኤናም ዬር ጎይ ጋዳዛራ ይእሳያ ኮሳ ናኣኖ ሽዽማሞ፤ ኮዶን ኤናም ጎይን ጋዳንዛራ ይእሳን ዬርን ባኣያ ኤያ ኣጋናንቴ ሃይ። 2ኤያ ኣጋ ናና ካናና ክናሳ ካላም ጎይ ጋዳዛራ ክይእሳንናንቴ፣ ሱኒ ዴስማያ ክሳ ቆርጭሮ ዻኻንቴ ኛፓስሮጎ ዻባዽና ክናንቴ ባሺና።3ኣጋታኻ ዬም ማንክማቴ። “ሃምባ ናሳ ክሴሳዳና ኪም ጎሪማ፤ እንታ ዻቢና ክያማዳና ሴሶን ክሳም ክናንቴ ጋርማ። 4ሮራሳ ኢሮ ኢ ꬆጳግያ ሃም ክሴሳዳና፣ ‘እንታ ዻቢና’ ሃማንቴ ኢ ꬆጳ ሃዛራ ክማትና ሴሶን ክሳም ክናንቴ ጋርማ። 5ኤና ይእሳዻዳናኻሞ ጌጳግያ፣ “ዎናንቴ እምነትን ሻብማ” ና ኬያማዶ። 6ጌጳኻሞ፣ “ዬናንቴ ኮልፒ ኣፕግያ ዳናኻሞ እኒ እምነት ሾሊ ኮዳና፣ ሻፖን ሃቃስካግያ፣ ‘ካሮኻ ቡጭማንቴ ቃልቴ ኛፓስንሳ ግዶሮ ዎይማ’ ዬያምና ዬናንቴ ኤሳራና ክኤሳራይ” ና ክያማዶ። 7ሃያንቴኻሞ ኢየሱስ ይንታና ክያማዶ፦ “ዬሳ ባክሮጎ ኤዲ ካላሳ ሃሚ ፓኻያ ዋድማ ኤድ ዎይካሞ ግሽሞ ኤዲ ኮዳና፣ ኖ ዋድማንባራኻ ክሳ ናኣ ክግያ፣ ‘ይሪካ ዳኣኖንዛራ ንማ’ ሃማው ክያማይ? 8ኦጎንታ ይያማንናንቴ ክግያ፣ ‘ብራቴንካ እባንን ዳኣኖን እእꬄኻናንቴ እናንቴ ባክማ፤ እሳ እꬅማቴቤ እሳ ውጫቴቤ ቱንሳዛራ ያ ዋቻዻንቴ እናንቴ ዋድምማ፤ ሃያንቴ ያኻሞ እꬃናሃእꬃይ፤ ውጭናሃውጫይ’ ሃማይዬው?9ታ ናንሲ ኤያ ካ፣ ዋድማን ኤያ ክናንቴ ክኤሳራዶንታኻ ኪም ማሳቴ ጎሻው ክጎሻይ? 10ኣጋታኻ ዬትካሞ ዬራ ዬናንቴ ጌይዻዳናም ፓያላ ዬዋድምና፣ ‘ዎቲ ዋድማን ኤና ፓይዶን ቆልምናና፤ ዬራ ዎባራንካ ዎዋድሜኻናንቴ ዛግሳይናም ዎቲ ኣሽክዲና’ ሃምማቴ።”11ኣጋሳ ራስባራ ኢየሱስ ዬሩሳሌም ዛራ ይቴ፣ ሰማርያቤ ገሊላቤሳ ባክንካ ሳጋንቴ ያእዲና፤ 12ሞሮ ካላዛራኻሞ ይኣርዳና ኤና ሙልካምባን ዬድንዻዳና ታጲና ኪም ሃፕዲና፤ ኬኻሞ ፔጌ ዎያንቴ፣ 13ናቅሲ ይሳም ዼግ ሃያንቴ ክግያ፣ “ጌጳ ኢየሱስ፣ ዎናንቴ ቡርቃዽማ!” ና ኬያማዶ። 14ኖኻሞ ኬም ይያፓና፣ “ቃልቴ ዬም ኤና አይሁድናሳ ዳምብን አሽካይናናንቴ ዻውማቴ” ና ክያማዶ። ኬኻሞ ጎይሮጎ ይቴ ዳንቴ ፓሽዲና። 15ኬግዶርካሞ ዋ ይፓሻዶን ይያፓና ናቅሲ ይሳም ዼግ ሃያንቴ ባርያናንቴ ጎሺን እማዳቴ ኢየሱስዛራ ማትዲና፤ 16ኢየሱስሳ ዎትሮ ኮምፓርሳንቴ ክናንቴ ጎሽን እምዲና፤ ኤያ ኣጋኻሞ ሰማርያ ፔን ኤዲና። 17ኢየሱስካሞ ይንታ ሃማንቴና ክካላ ክኦይሳዶ፦ “ኤና ፓሻዳና ታጲ ጋኬ? ኤ ኤና ሳልና ሃሞንታ ኬያኣዴ? 18ቶርስን ኤያ ካሳ ኦባራ ኤዲ ማታቴ ናዴ ባርያናንቴ ጎሺ እማያ ቆላይዬው?” 19ኖ ኤያግያኻሞ “ዻጳንቴ ይማ፤ እምነትኖ ሃሳ ሃም ፓሽሽዲና” ና ክያማዶ።20ኤና ፈረስ ኤና ኢየሱስም ባርያ ማንግስትኖ ሃ ኮኔኤ? ሃማንቴ ክካላ ኦይስዲና። ኖኻሞ ኬናንቴ ይንታ ሃማንቴ ማስዲና፦“ባርያ ማንግስትኖ ዬር ሃፓዻያኻ ንማሞ፤ 21ኤናኻሞ ኮግያ፣ ‘ና ኮታሪና’ ዎይካሞ ‘ኦ ኦጎታሪና ኮዶ’ ሃማናንቴ ቻልማሞ፤ባርያሳ ማንግስትኖ ዬሳ ባክሮና ኮዶ።” 22ኖ ይሳ ታማርናግያኻሞ ይንታና ክያማዶ፦ “እ ኤዲ ናሶሳ ሮሮና ግዶር ካላም ሃፓናንቴ ዬኣጝርዻን ዋዳኖ ናኣና ኮናይ፤ ኮዶን ዬቲ ሃፕማሞ። 23ኤዲኖኻሞ ዬግያ፣ ‘ኦ ኦጎታሪና’ ዎይካሞ ‘ኮታሪና ክዶ’ ሃማና ኬያማይ፤ ኮዶን ኬም ጫጋቴ ዬይናኖ፤ 24ኦጎኖኻሞ ጳልቃትኖ ጳልቃታንቴ ፖላንም ፓይላ ፓክ ኳያያግያ፣ ሮራ እንታ ኤዲ ናሶ ይንካ እናኣያ ጋላ ኦጎንታና ክዳይ።25ኮዶን ኦጎኖ ኮሳ ሃምማሳ ብራር ኤዲ ናሶ ጋሎ ጱፅ ጋልንቶቤ ኤድን ታን ጋይን ኮኻላ ክቦውዼኻናንቴ ዛግሳና ክዛግሳይ። 26“ኣና ኖህ ዋዳንካ ይያማዳግያ፣ ኤዲ ናሶ ዋዳንካኻሞ ኦጎንታ ዳና ኮዳይ፤ 27ኖሆ ጋግንዛራ ክኣርዳዳ ሮራ ክሳ ዬስካዛራ ኤና እꬅቴቤ፣ ውጭቴቤ፣ ኬምቴቤ፣ ኬማዽቴቤና ኬዶ፤ ካይሶን ኑንቆኖኻሞ ናዴ ፓይላ ውልም ካይስዲና። 28“ሎጥ ዋዳንካኻሞ ኣና ኦጎንታና፤ ኤና እስቴቤ ውጭቴቤ፣ ሻንቴቤ ሻንሽቴቤ፣ ሃቃንካሞ ኮርቴቤ ኦኖን ዻክቴቤና ኬዶ፤ 29ኮዶን ሎጥ ሶዶምባራ ክውታዳ ሮራ ጋላ ኖቤ ዲን ሃንዻያ ኮቃያቤ ዶቦግያ ፖላንባራኻ ዻንቴ ፓይላ ውልም ካይስዲና። 30“እንታ ኤዲ ናሶ እናኣን ዋዳንካኻሞ ኦጎንታና ኮዳይ። 31ሮራ ኣጋኻ ኤያ ኦኖንስ ዱርሮን ዳ ኦኖንሳ ኢሮጎ ኮይና ዳናም ቻናንቴ ሃንቻን ክጋሬ፤ ሃያንቴኻሞ ኤያ ሃምሮን ዳኻሞ ይሳ ኦኖንዛራ ራስዛራ ማታን ክጋሬ።32ዬት ሎጥ ሜኒም ጶቅስማቴ። 33ኤና ሳዳን ይሳም ዳሳናንቴ ዛጋይና ፓይላ ሳዳን ይሳም ካይሳና ኬካይሳይ፤ ኮዶን ኤና ሳዳን ይሳም ሳስካንቴ እማይና እግና ሳዳን ይሳም ዳሳና ኬዳሳይ።34እንታ ዬናንቴ ጌያና እጌያይ፤ ሶታ ኣጋኻ ኤዲ ላማ ዼጴ ካላ ግዶሪና ኬዎዻይ፤ ኤያ ዋም ቻና ቻዻይ፤ ዋ ሽዻና ክሽዻይ። 35ሜ ላማ ክንካ ዴስማና ኬዴስማይ፤ ኤስን ዋም ቻና ቻዻይ፤ ዋ ሽዻና ኮሽዻይ። 36ኤዲ ላማ ሃምን ክንካና ኬፓክማይ፤ ኤያ ዋም ቻና ቻዻይ፤ ዋ ሽዻና ክሽዻይ።” 37ኬኻሞ ክግያ ማሳንቴ፣ “ጌጳዮ፤ ኬም ኮሳ ቻዻኖ ሃሞዛራቴ?” ና ኬያማዶ። ኖኻሞ፣ “ዬር ጃዳ ይዳ ራቅ ግዶር ኩፆና ፑጫና ኬፑጫይ” ና ክያማዶ።Chapter 18
1ታማርና ክሳ ቃጆ ቆልማ ሮሮ ውል ኬምስኬኻ ኮዛግሳይንም ዻዋናንቴ ኢየሱስ ዻይንሳ ካም ኬናንቴ ጌይዲና፦ ኬግያ ይንታኻሞና ክያማዶ፦ 2“ካታማ ካላ ግዶር ባርያም ኩርትንዽማቤ ኤዲም ጎብማ ብቶ ታኻያ ኤዲ ካላ ዳይዲና።3ካታማስ ኣጋሮኻሞ ሜ ዳልሶ ካላ ዳይዲና፤ ናኻሞ ‘ቁፓሞን ኤያ እሳ ላማ እሳ ሃሳዋስ ዳናንቴ እናንቴ ብቶ ታክማ’ ሃማንቴ ላይና ክዛራ ኮያኣይ። 4“ኤያ ብቶን ታኻያኻሞ ብራቴንካ ኮናንቴ ኤሳርድማሞ፤ ኮዶን ራስባራ ይሳ ዎይላምካ ይንታና ክያማዶ፦ ‘እንታ ባርያም እኩርትንዽምናኻሞ፣ ኤዲም እጎብምናኻሞ፤ 5ኤስኖ ዳልሶኖ ኮኖ ሮሮ ውል ናዴ ኢም ጋልንሻን ኮጋሬኻናንቴ ኮናንቴ ብቶን ታኻና እታኻይ፤ ኮናንቴ ብቶን እታኻድምና ሮሮ ውል ናዴ ኢም ቃጅሻናኮቃጅሻይ።” 6ጌጳኻሞ ይንታና ክያማዶ፦ “ኤያ ብቶን ልክን ታክማሳ ጌይዻዳም ኤሳርማቴ። 7ኤ ባርያ ሮሮንቤ ሶትንቤ ክዛራ እላታይና ኤና ይሳ ካምድናናንቴ ብቶን ታኻይዬው? ኤሳራንቴኻሞ ኤሳርድማግያ ላይ ጫክ ክዳይ? 8ዬናንቴ ጌያና እጌያይ፤ ብቶን ታኻናክታኻይ ኣጋንታ ይሪካ ኬናንቴ ብቶን ታኻና ክታኻይ፤ ኮዶን እንታ ኤዲ ናሶ እናኣን ዋዳንካ ፔሮጎ ኬዳ ኤዲ እምነትካ እንታ ሃፓው?9ኤና ይም ጋዛግያ ሃያንቴ ፓይዳንቴ ፖራዻይናቤ ኤና ዋኒም ቦዋይናቤናንቴ ዻይንሳ ካም ኢየሱስ ይንታ ሃማንቴ ጌይዲና፦ 10“ኤዲ ላማ ዋኒ ባርዮን ኦኖን ምስኮታ ናእዲና፤ ካላ ፈረስ ኤና፣ ኤያ ዋ ግብር ፑኡሻያና።11ኤያ ፋራሳዊኻሞ ፃክሪሚ ዎያንቴ ይናንቴ ይንታ ሃማንቴና ክምስካዶ፦ ‘ባርያዮ፤ እንታ ኤና ዋኒ ጋንታ ግያ ሰሪ ኤዲቤ፣ ጋኻ ኤዲቤ፣ ቡሎቤ፣ ሃያንቴኻሞ ኤያ ካ ግብርን ፑኡሻያግያኻሞ እትሞንታኻ ጎሽኖ ሃናንቴ ኮዴ፤ 12ሳምንታሳኻሞ ኢሮጎ ሮሮ ላማ ቶሮንዻንቴና እምስካይ፤ ዬራ እያፓይናሳ ታጲና ግዶርካኻሞ ካላም ሃናንቴ እማና እማይ።’ 13“ኮዶን ኤያ ግብርን ፑኡሻያ ፔጌ ዎያንቴ፣ ፖላንዛራ ሼዳን ጋራንቴ ዎቲ ይሳም ኣቻንቴ፤ ሃያንቴ ይሳ ሳዳም ጫእቴ ‘ባርያዮ፤ እ ሴሶን ኤያናንቴ ሴሶን እሳም እናንቴ ጋርማ’ ሃምቴና ክዶ። 14“ዬናንቴ ጌያና እጌያይ፤ ፋራሳዊያ ካላንካ ኤያ ኣጋ ባርያሳ ዎትሮ ኤዲ ጋዛግያ ፓይዳዻዃ ይሳ ኦኖንዛራ ማትዲና፤ ኤና ዪም ዼግ ዼግ ሃያይና ፓይላ ቦዋዻናኬቦዋዻይ፤ ኮዶን ኤና ይም ዪርክ ዪርክ ሃያይና ዼጊና ኬዳይ።”15ኢየሱስ ናናናንቴ ክዻክሜኻናንቴ ኤዲኖ ናናም ክዛራ ባኣቴ ንቴና ኮዶ፤ ክሳ ታማርናኻሞ ኦጎም ይያፓና ኬም ጎርዲና። 16ኮዶን ኢየሱስ ናናም ይዛራ ግስማንቴ ይንታና ክያማዶ፦ “ናናም እዛራ ኬኔኤኻናንቴ ጋርማቴ፣ ዬማርናኖ፤ ባርያሳ ማንግስትኖ ክናግያን ዳናናንቴና። 17ዬናንቴ ጎንዼና እጌያይ፤ ኤና ባርያሳ ማንግስትን ናሶግያ ናሻንቴ ቻድምና ኮዛራ ካላኻሞ ኣርድማሞ።18ኤና ኣይሁድናሳ ጋርና ግዶር ካላ ክግያ፣ “ኣስታማራ ፃላዮ፤ ሳዳንካ ላይ ዳናንቴ ሃር እያዬኻ ኮዛግሴ?” ሃማንቴ ኦይስዲና። 19ኢየሱስካሞ ይንታ ሃማንቴና ክናንቴ ክማሳዶ፦ “ሃርናንቴ እግያ ፃላስ ሃሜ? ባርያ ካላስሳ ኦባራ ኤዲ ካላኻሞ ፃሊ ቆልማሞ፤ 20‘ኩጳሞ ሃይናኖ፣ ኤዲ ሃዴስናኖ፣ ሃድብምናኖ፣ ፖጋሞኻ ማኛሞ ሃዎይናኖ፣ ሃምባቤ ሃንናቤም ጎብማ’ ሃማይና ዳምብናም ያ ዼስዲና።” 21ኤያኻሞ ክግያ፣ “እግናም እንታ እሳ ናሳሞሮኻ ካርሳንቴ ኣሽክቴና እዶ” ና ክያማዶ። 22ኢየሱስካሞ እግናም ይኤሳራና ክግያ፣ “ታ ናንሲ ሃኻላ ዬር ካላ ሽዽዲና፤ ኮይና ሃሳ ዳናም ፓይላ ሻንሻቴ ብሬና ኬሳም ኤና ኩፕናናንቴ እምማ፤ ፖላሮጎ ኮይሶ ሃፓና ሃያፓይ፤ ሃያንቴ ናዴ ኢም ጫግማ” ና ክያማዶ። 23ኮዶን ኤያ ኣጋ ዬራ እግናም ይኤሳራና፣ ኮይሶ ክሳ ጱፅ ኮዶንታኻ እልል ጃይዲና።24ኢየሱስካሞ ኤያም ሼዳንቴ ይንታና ክያማዶ፦ “ኤና ዎድሞናናንቴ ባርያ ማንግስትንዛራ ኣርድንቶኖ ካልሎን ዋቺና። 25ኤና ዎድሞና ባርያ ማንግስትን ኬኣርዳንናንቴ ጋማላ ማርፌሳ ፑላኻ ኮኣርዳይኖ ባዶና።” 26ኦጎም ኤና ኤሳርዳናኻሞ፣ “ታ ኦጎንታ ዳና፣ ሃውቴ ዻቃያ?” ና ኬያማዶ። 27ኢየሱስካሞ፣ “ኤዲ ናሶናንቴ ዬር ቻልምማ ባርያናንቴ ቻልማና ኮቻልማይ” ና ክያማዶ። 28ጴጥሮስካሞ ክግያ፣ “ዎቲ ዬራ ዎሳ ዳናም ፓይላ ጋራንቴ ሃም ጫግዲና” ና ክያማዶ። 29ኢየሱስካሞ ኬግያ ይንታና ክያማዶ፦ “ዬናንቴ ጎንዼና እጌያይ፤ ባርያ ማንግስትንናንቴ ሃማንቴ ኦኖን ይሳም ዎይካሞ ሜን ይሳም ዎይካሞ ይሳ እንዳን ናናም ዎይካሞ እምባቤ እንዳምቤም ዎይካሞ ናና ይሳም ጋራዳ፤ 30ዋዳን ኮኻ ዬር ጱፅ ሳጊቤ፣ ዋዳን ናኣይንካኻሞ ሳዳን ላይን ዳይንም ሃፓና ክያፓይ።”31ኢየሱስካሞ ይሳ ታማርና ታጲ ላማናም ዋና ቡላንቴ ኬግያ፦ “ታ ናንሲ ዬሩሳሌምዛራ ውታናንቴና ዎዶ፤ ኤና ባርያሳ ኣፖን ጌያይና እ ኤዲ ናሶሳ ዬራ ዋርቃትሮ ኬኡካዳና ፓይላ ሃምማና ኬያማይ። 32ኢም ኤና ቶርስናናንቴ ሳስካንቴ እማና እንዻይ፤ ኬኻሞ ኢም ቦዋና ኬቦዋይ፤ ጋልንሻና ኬጋልንሻይ፤ ፓፅንካሞ እዛራ ማማና ኬማማይ፤ ኢም ዻና ኬዻይ፤ ሃያንቴኻሞ ኢም ዴሳና ኬዴሳይ። 33እንታኻሞ ሮራ ማክንሳኻ ዴምጲንባራኻ ዻጳናእዻጳይ” ና ክያማዶ። 34ኮዶን ክሳ ታማርና ዬራ እግና ፓይላ ግዶር ዬር ኬናንቴ ኣርዳዳ ካላኻሞ ቆልማሞ፤ ዬራ ክጌያዳና ኬኻላ ሽርሚና ኬዶ፤ ኖ ዬር ሃር ኬናንቴ ክጌያዶንም ኬ ዼሳድማሞ።35ኢየሱስ ኢያሪኮዛራ ክሳንሳዶን ዋዳንካ፣ ኤዲ ኣፒ ካያ ካላ ጎይንሳ ዴሞሮ ዳርቃንቴ ምስክምቴና ክዶ። 36ኤያ ኣፕን ካያስካሞ ዛርስኖ ኦጎኻ ኮሳጋይንም ኤሳራንቴ ኬኻላ ዬር ሃር ኮዶንም ኦይስዲና። 37ኬኻሞ ክግያ፣ “ናዝሬት ጋንቴ ኢየሱስ ኮኻ ሳግቴና ክዶ” ሃማንቴ ጌይዲና። 38ኖኻሞ፣ “ዳዊት ናሳ ኢየሱስዮ፣ እናንቴ ቡርቃዽማ!” ሃማንቴ እላትዲና። 39ኤና ብራንቴ ይቴን ዳናኻሞ ጫክ ክያሜኻናንቴ ኪም ጎርዲና፤ ኮዶን ኖ፣ “ዳዊት ናሳዮ፤ እናንቴ ቡርቃዽማ!” ሃማንቴ ካልሎን እላትዲና። 40ኢየሱስካሞ ዎያንቴ ኤያም ክዛራ ኬኣንሴኻናንቴ ኤናናንቴ ጌይዲና፤ ክዛራኻሞ ክናኣዃ፤ 41ኖ ክግያ “ሃር ሃናንቴ እያዬኻናንቴ ሃዛጌ?” ሃማንቴ ኦይስዲና። ኤያ ኣፕን ካያስካሞ፣ “ጌጳዮ፤ ሃፓናንቴና እዛጋይ” ና ክያማዶ። 42ኢየሱስካሞ ክግያ፣ “ሼድማ፤ እምነትኖ ሃሳ ሃም ዻኣሽዲና” ና ክያማዶ። 43ኤያኻሞ ኣጋዛራ ሃፓን ቻልዲና፤ ባርያም ጎሻዳቴ ኢየሱስም ጫግዲና። ዛርስኖኻሞ ፓይላ ኦጎም ይያፓና ባርያናንቴ ጎሽን እምዲና።Chapter 19
1ኢየሱስ ኢያርኮዛራ ኣርዳንቴ ኦጎኻ ሳጋንቴ ይቴና ክዶ። 2ዘክዮስ ሃንዻያ ኤዲ ካላ ኦጎታር ዳይዲና፤ ኖ ኤና ግብርን ፑኡሻይናሳ ጋሪቤ ኤዲ ዎድሞቤና።3ኖኻሞ ኢየሱስ ሃንዻያ ሃማ ክዶንም ሃፓናንቴ ዛጋና ክዛጋይ፤ ኖ ኤዲ ፄዲ ይዶንታኻ ዛርስንስ ጱፃሞንካ ሃማንቴ ኪም ሃፓናንቴ ቻላድማሞ። 4ኢየሱስካሞ ጎይን ኦጎኻ ሳግቴ ክዶንታኻ፣ ኪም ሃፓናንቴ ብራዛራ ጎብቴ ቃልቴ ሻፖ ካላም ውትዲና። 5ኢየሱስካሞ ራቃ ኣጋም ይዬስካና፣ ዞን ኪም ሼዳንቴ፣ “ዘክዮስ ይሪካ ሃንችማ! ሃይታላ ኦኖን ሃኖሮጎ ሃቃናእያቃይ” ና ክያማዶ። 6ኖኻሞ ይሪካ ሃንቻንቴ ዋዛኻ ኪም ቾችዲና። 7ኤና ኦጎታር ዳናኻሞ ኦጎም ሃፓንቴ፣ “ሴሶን ኤያ ኦኖሮጎ ኣርዳንቴ ቾችንሻዻናንቴና ክዶ” ሃማንቴ ጉንድምዲና። 8ኮዶን ዘክዮስ ዎያንቴ ጌጳግያ “ጌጳዮ፣ ኮይሶን እሳ ዶሮኻ ባኻላም ኤና ኩፕናናንቴ እማና እእማይ፤ ኤዲም ፖጋሞኻ እሳርዳናኻሞ፣ ኤያ ኣጋናንቴ ኦይዲግያ ሻባንቴ ማሳና እማሳይ” ና ክያማዶ። 9ኢየሱስካሞ ክግያ ይንታና ክያማዶ፦ “ኤያ ካ ኣብርሃም ናሶ ክዶንታኻ፣ ሃይታላ ሳዳን ዻቆኖ ኦኖን ኮዛራ ናእዲና፤ 10ኦጎኖኻሞ እንታ ኤዲ ናሶ ይንናንቴ እናዻዶኖ ኤና ካያዳናም ዛጋናንቴቤ ዻኣሻናንቴቤና።11ዛርስኖኻሞ ኦጎም ኤሳርቴ ኬዳዃ፤ ኖ ዬሩሳሌምዛራ ክሳንስዶንታኻቤ ኤዲን ካላ ባርያሳ ማንግስትኖ ኮናኣዳግያ ኬማይሻዶንታኻ፣ ኖ ፕር ዻይንሶ ኣብ ኬናንቴ ጌይዲና፤ 12ይንታኻሞና ክያማዶ፦ “ኤዲ ጎሻዻዳ ካላ ብታሞን ቻንቴ ማታናንቴ ፔ ፔጌ ካላዛራ ያእዲና፤13ይሳ ዋድማን ኤና ግዶርካኻሞ ታጲናም ግስማንቴ ምናን ሃንዻይና ብሬ ታጲ ኬናንቴ እማንቴ ኬግያ፣ ‘እሳ ማታቴ ናኣዛራ ይንካ ንግድማቴ’ ና ክያማዶ። 14ክሳ ፔን ኤናኻሞ ኪም ይቶዛዻዶንታኻ፤ ‘ዎዛራ ክብትሜኻናንቴ ዎቲ ዛግማሞ’ ሃማንቴ ክሳ ራስባራ ኣፖ ክናንቴ ይእስዲና። 15“ይያማንካሞ ኤያ ጎሻዻዳ ኤጋ ብቲ ማታንቴ ይሳ ፔንዛራ ማታቴ ናእዲና፤ ክሳ ዋድማን ኤናኻሞ ምናን ሃንዻይና ክእማዳናኻ ንግዳቴ ሜም ኬፑኒሳዶንም ዼሳናንቴ ኬም ግስንስዲና። 16“ዋድማን ኤያ ብራስካሞ ናዴ ክግያ፣ ‘ጌጳዮ፣ ምናና እናንቴ ሃእማዳኻ ንግዳንቴ እንታ ምናን ታጲ ፑኒስዲና’ ና ክያማዶ። 17“ክሳ ጌጳኻሞ ክግያ፣ ‘ያ ዋድማን ኤያ ጋዛስ፣ ፃሊና ሃያዶ፤ ዬራ ሾላኻ ሃጋዛዻዶንታኻ፣ ካታማ ታጲዛራ ሃናንቴ ጌጳሞ እንዽዲና’ ና ክያማዶ። 18“ዋድማን ኤያ ላንሳኻሞ ናዴ ክግያ፣ ‘ጌጳዮ፤ ምናና እናንቴ ሃእማዳኻ ንግዳንቴ ምናን ዶጝ እንታ ፑኒስዲና’ ና ክያማዶ። 19“ክሳ ጌጳኻሞ ክግያ ‘ሃናንቴኻሞ ካታማ ዶጝዛራ ጌጳሞ እንዽዲና’ ና ክያማዶ። 20“ዋድማን ኤያ ዋኻሞ ናዴ ክግያ ይንታና ክያማዶ፦ ‘ጌጳዮ፣ ሃሳ ምናና ኣፓላንካ ቱፓቴ እዎዳዳ ካሼ፤ 21ያ ዬራ ሃዎዳድማም ቻያ፣ ሃጲያድሞንም ፓታያ ጋሮ ኤድ ሃዶንታኻ እንታ ሃም ኩርትንዽዲና።’ 22“ጌጳ ክሳኻሞ ክግያ ይንታና ክያማዶ፦ ‘ያ ዋድማን ኤያ ዛርባ! ኣፓ ሃጌያዳኻ ሃዛራ ብቶን ታኻና እታኻይ እንታ ዬራ እዎዳድማም ቻያ፣ እጲያድሞንምካሞ ፓታያ፣ ጋሮ ኤዲ እዶንም ሃዼሳዳና፤ 23እኒ ናዴ ምናና እሳም ኬፑናዳናኻ እቼኻናንቴ፣ ሃርናንቴ ኤና ይንካ ኣሽካይናናንቴ እማን ሃጋራዴ?’ 24“ክሳ ጌጳኻሞ ኤና ኦጎታር ዎያንቴን ዳናግያ፣ ‘ምናናም ክካላንካ ቻንቴ ኤያ ምናን ታጲ ይንሳ ይዳናንቴ እምማቴ’ ና ክያማዶ። 25“ኬኻሞ ጌጳግያ ‘ጌጳዮ፣ ክካላ ምናን ታጲ ዳይዲና’ ና ኬያማዶ። 26“ኖኻሞ ይንታና ክያማዶ፦ ‘ዬናንቴ ጌያና እጌያይ፤ ኤያ ይንሳ ዳናንቴ ሻባና ሻባዻይ፤ ኮዶን ኤያ ይንሳ ቆልማሳ ዳምካሞ ክካላ ቻና ቻዻይ። 27ኮዶን እንታ ኬዛራ እብትሜኻናንቴ ኤና ዛጋድምና እሳ ጋላ እግናም ኦራ ኣንሳቴ ናዴ እሳ ዎትሮጎ ኬም ዴስማቴ።’ ”28ኢየሱስ ኣጋም ጌያንቴ ናንሲ፣ ዬሩሳሌምዛራ ውታናንቴ ኬም ብራንቴ ይቴና ክዶ፤29ደብረዘይት ሃንዻያ ጉርባስ ካላን ዳና ካታማና ቤተ ፋጌቤ ቢታንያቤዛራ ይዬስካዶን ዋዳንካ ይሳ ታማርና ግዶርካ ላማ ኬሳም ይንታ ሃማንቴና ክይእሳዶ፤ 30“ሞራ ዬሳ ዎትሮን ዳዛራ ይማቴ፤ ኦጎታርካሞ ዬኣርዲና ኤዲ ይንዛራ ይዳርቃድማ ኡኩሊ ናሶ ዻክማንቴ ክዳዃ ሃፓና ዬያፓይ፤ ቡላንቴኻሞ ኦራ ዻቴ ንማቴ። 31ኤዲ ሃውካሞ ዬግያ፣ ‘ሃርናንቴ ዬቡሌ?’ ሃማንቴ ኮኦይስና፣ ‘ጌጳናንቴ ዛግሳና ኮዛግሳይ’ ሃማንቴ ጌይማቴ።” 32ኤና ይእሳዻዳናኻሞ ቃልቴ ኬናንቴ ክጌያዳግያ ኮዳዃ ሃፕዲና። 33ኤና እምባናኻሞ ኡኩልቶን ናሳም ኬቡልካ ሃፓንቴ፣ “ኡኩልቶን ናሳም ሃርናንቴ ዬቡሌ?” ሃማንቴ ኬኻላ ኦይስዲና። 34ኬኻሞ፣ “ጌጳናንቴ ዛግሳና ክዛግሳይ” ና ኬያማዶ። 35ሃያንቴኻሞ ኬ ኡኩልቶን ናሳም ኢየሱስዛራ ዻቴ ናዴ፣ ኣፓላና ይሳም ኡኩልቶን ናሳዛራ ኣፓንቴ ኢየሱስም ክዛራ ዼግ ዳኣርስዲና። 36ኤናኻሞ ኖ ጎይን ክያኣንዛራ ኣፓላና ይሳም ኣፕቴና ኬዶ። 37ደብረዘይት ጉርባስካ ጎይን ምጫ ሃንቻንዛራ ኬሳንሳዶን ዋዳንካ፣ ኤዲኖ ጱፅኖ ኪም ጫጋዶኖ ዬርን ሃምማንቴን ዼስሞን ይያፓዶንታኻ ዋዝንዻንቴ እላታንቴ ይንታ ሃማንቴ ባርያም ጎሻን ካርስዲና፦ 38“ብታ ጌጳሳ ናብንካ ናኣያ ፑጋዻዳና!” “ፖላሮ ፃላሞኖ፣ ፖላናሳ ፖላሮኻሞ ጎሽኖ ኮዴ!” 39ዛርስንሳኻሞ ባክሮጎ ፈረስ ኤና ዋኒካሞ ኢየሱስግያ፣ “ኣስታማራዮ፣ ታማርና ሃሳም ጎርማ” ና ኬያማዶ። 40ኖኻሞ ኬግያ፣ “ዬናንቴ ጌያና እጌያይ፤ ኬ ጫክ ኬያምናኻሞ፣ ሱኒና እላታና ኬእላታይ” ና ክያማዶ። 41ኢየሱስ ዬሩሳሌምዛራ ይሳንሳና ካታማስም ሼዳንቴ ኮናንቴ ኤፕዲና፤ 42ይታኻሞና ክያማዶ፦ “እኒ ሃናንቴ ፃላሞን ባኣያም ሃይታላ ሃዼሳዳና ሃርቴ ዶኖ! ኮዶን ታ ኖ ሃሳ ኣፕሮኻ ካይዲና፤43ጋላ ሃሳ ዴሞሮ ሃሳ ካርሚን ጫኣንቴ፣ ራቅ ውልባራኻ ታኻንቴ ሃም ይንካ ኬጋልንሻን ዋዳኖ ናኣና ኮናኣይ፤ 44ሃቤ ካርምንሳ ኢሮጎ ሃላማን ዳና ናና ሃሳቤም ፔን ላማ ክዛራ ዎርሳና ኬዎርሳይ፤ ሱኒናኻሞ ሱንንዛራ ኬዴኻናንቴ ኬ ጋርማሞ፤ ኦጎኖኻሞ ባርያ ይንካ ሃዛራ ክናኣዳ ዋዳስም ያ ዼሳድማሞ።”45ኣጋሳ ራስባራ ኢየሱስ ባርዮን ኦኖን ኣርዳንቴ፣ ኦጎታርካ ኤና ኮይሶን ሻንሻይናም ኦይትዲና፤ 46ሃያንቴኻሞ ኬግያ “ ‘ኦኖኖ እሳ ምስኮ ኦኖና ኮዳይ’ ሃማንቴ ዋርቃትሮጎ ኡካዽዲና፤ ኮዶን ዬቲ ‘ኤና ዲብናሳ ኣዽሚ ራቅ’ ሃይዲና” ና ክያማዶ። 47ሮሮ ውልካሞ ባርዮን ኦኖንሳ ኢሮጎ ኖ ታማርስቴና ክዶ፤ ኤና ዳምብን ኣሽካይናሳ ጋርናቤ፣ ኤና ሙሴ ዳምብን ታማርሳይናቤ፣ ኤና ዛርስንሳ ጋርናቤ ኪም ዴሳናንቴ ዛግቴና ኬዶ፤ 48ኮዶን ዛርስኖ ፓይላ ታማርን ክሳም ኮቻዶንታኻ፣ ዬራ ኬሃያያ ኬኻላ ካይዲና።
Chapter 20
1ሮሮ ካላ ኢየሱስ ዛርስንም ባርዮን ኦኖሮ ክታማርስካቤ ባርያሳ ሜርሜርን ፃሊን ክጌይካ ኤና ዳምብና ኣሽካይናሳ ጋርናቤ፣ ኤና ሙሴ ዳምብን ታማርሳይናቤ ዞንዛናቤ ፑጫንቴ ክዛራ ናእዲና፤ 2ኬኻሞ፣ “ዋድማና ክና ሃዋድማይና ሃር ብታሞኻ ኮዶን ዎናንቴ ጌይማ፤ ብታሞን ኮም ሃናንቴ እማዳ ኖ ሃውቴ?” ሃማንቴ ክካላ ኦይስዲና። 3ኖኻሞ ኬናንቴ ይንታ ሃማንቴ ማስዲና፦ “እንታኻሞ ኦይሶ ካላ ዬኻላ እኦይሴ፤ ዬቲ ይንዳ እናንቴ ማስማቴ፤ 4ዮሃንስሳ ኤናም ኑንቆንካ ሻይዻይኖ ዳምብኖ ባርያባራኻሞ ሞ ኤዲባራ ናኣዳ?” 5ኬኻሞ ክንካ ይንታ ሃሳውዲና፦ “‘ባርያባራኻና ዎያምና’፣ ዎግያ ‘ታ ሃርቴ ኪም ዬኣምናድሞኖ’ ና ክያማይ፤ 6‘ኤዲባራና ዎያምና’ ዛርስኖ ፓይላ ዮሃንስ ባርያሳ ኣፖን ጌያያ ክዶንም ኬኣምናንታኻ ዎም ሱንኒካ ፓኻና ኬፓኻይ።” 7ኣጋታኻ ኬ፣ “ሃምባራኻ ኮናኣዶንም ዎቲ ዼስማሞ” ሃማንቴ ክናንቴ ማስዲና። 8ኢየሱስካሞ ኬግያ፣ “ኣጎንታ ኮዳና፤ እንታኻሞ ዬራ ክናም ሃር ጌጳሞኻ እኣሽካይንም ዬናንቴ ጌይማሞ” ና ክያማዶ።9ኣጋሳ ራስባራ ኢየሱስ ይንታ ሃማንቴ ዻይንሳ ካም ዛርስንናንቴ ጌያን ካርስዲና፤ “ኤዲ ካላ ዎይን ሃቃ ኮራንቴ ኤና ሃሚን ፓኻይናናንቴ እማንቴ ዎይንን ኣፕኖ ኮኡሽና እናም እናንቴ እምማቴ ሃማንቴ ፔ ኣብዛራ ቃልቴ ሮሮ ጱፅ ዎዽዲና። 10ዋዳኖ ይንካ ዎይንን ኣፕን ፑሻዻይኖ ኮሳናዃ፤ ዎይንንሳ ኣፕን ክናንቴ ኬንእሴኻናንቴ ኖ ይሳ ዋድማን ኤያም ኬዛራ ይእስዲና፤ ኮዶን ክሳ ሃሚን ኤና ፓኻይና ክሳ ዋድማን ኤያም ዻንቴ ኣን ጉሮ ንእስዲና።11ፕር ኖ ይሳ ዋድማ ኤድ ኣብ ካላም ይእስዲና፤ ኤና ክሳ ሃሚን ፓኻና ኪምካሞ ፕር ዻይዲና፤ ክንካኻሞ ኣልማንቴ ኣን ጉሮ ይእስዲና። 12ፕርካሞ ኖ ይሳ ዋድማን ኤያ ማክንሳም ይእስዲና፤ ሃሚን ፓኻይና ኣጋምካሞ ፕር ማዳንቴ ኪም ዎንን ሃሚንሳ ቡዶሮ ዻብዲና። 13“ዎይንን ሃምንሳ እምባኻሞ ይጌይና፣ ‘ታ ናንሲ ሃር እያዬ? ይንዳ ፕርካሞ ናሳ እሳ እናሻያም ይእሳና እይእሳይ፤ ኬዳ ኪም ጎባና ኬጎባይ’ ና ክያማዶ። 14“ኤና ሃምን ፓኻይናኻሞ ክሳ ናሳም ይያፓና፣ ካ ኪም ዻላያና፣ ንማቴ ኪም ዎዴሴ፤ ኦጎንታ ዋይና ዻልማኖ ዎንቲና ኮዳይ” ሃማንቴ ክንካ ዼላቅዲና፤15ዎይንን ሃምንባራኻ ኪም ጳልንዛራ ቡላንቴ ኬ ዴስዲና። ታ ናንሲ ዎይንን ሃምንሳ እምባ ኬም ሃስ ክያዬ? 16ናዴ ኤና ሃምን ፓኻይና እግናም ዴሳናክዴሳይ፤ ዎይንን ሃምንካሞ ኤና ዋኒናንቴ እማና ክእማይ።” ዛርስኖኻሞ ኣጋም ይኤሳራዶን ዋዳንካ፣ “ዬር ኦጎንታ ሃማ ዳን ኮጋሬ” ና ኬያማዶ። 17ኢየሱስካሞ ኬም ሼዳንቴ ኬናንቴ ይንታና ክያማዶ፦ “ታ ‘ኤና ሱኒንካ ኦኖን ዻኻይናሳ ሱና ቦውዻዳ ኣጋ ሱኒ ዛጋዻያ ማትዲና’ ሃማንቴ ኡካዻዳ ኣፓሳ ዎኻልኖ ሃርቴ? 18ሱና ካዛራ ኤና ዲናይና ፓይላ ኣና ኬኣይ፤ ሱና ካሳ ይንዛራ ይዲናይና ኤና ፓይላ ዹሎ ማታና ኬማታይ።” 19ኤና ሙሴ ዳምብን ታማርሳይናቤ ኤና ዳምብን ኣሽካይናሳ ጋርናቤ ኖ ዻይንሳ ኣጋም ክጌያዶኖ ኬዛራ ኮዶንም ዼሳንቴ፣ ሳኣታ ኣጋኻ ኪም ዬዳናንቴ ዛግዲና፤ ኮዶን ኬ ዛርስንም ኩርትንዽዲና። 20ኬ ኢየሱስም ኤያ ካንታቤ ጌጳሞቤ ካዳ ፔንስ ብታናንቴ ሳስካቴ እማናንቴ፣ ክሳ ኣፖንባራኻ ዼላቅና ውታይናኻ ኪም ዬዳናንቴ ዛግቴና ኬዶ፤ ኣጋታኻ ጎንዼ ኤዲግያ ማታንቴ ክላማ ክንካ ሃሳዋይና ዶያን ኤናም ኬ ክዛራ ይእስዲና።21ዶያን ኤናኻሞ ይንታ ሃማንቴና ክካላ ኬኦይሳዶ፦ “ኣስታማራዮ፣ ያ ጎንዼን ሃጌያንቤ ሃታማርሳይንቤ ሃያንቴኻሞ ባርያሳ ጎይን ጋዛን ጎንዼምባ ሃታማርሳይንቤ ኤዲ ሃውዛራኻሞ ሃዎዽሞንም ዎቲህ ዼስዲና፤ 22ኤሳንካ ቄሳርናንቴ ግብርን ካሻዻይኖ ልኪሞ ሞ ልክታይ?” 23ኮዶን ኖ ኬሳ ጃኻማን ዼሳንቴ ኬግያ ይንታና ክያማዶ፦ 24“ይንዳ እናንቴ ዲናር ካላም ዻውማቴ፤ ክዛራ ዶኖ ሃው ዎት ክታኬ፣ ዛራን ኡካዻዳኻሞ ሃው ጋንትቴ?” 25ኬኻሞ፣ “ቄሳር ጋንቲና” ሃማንቴና ክናንቴ ኬማሳዶ። ኖኻሞ ኬግያ “ታ ናንሢ ቄሳር ጋይንም ቄሳርናንቴ እምማቴ፤ ባርያ ጋይናምካሞ ባርያናንቴ እምማቴ” ና ክያማዶ። 26ኣጋታኻ ዼላቅና ክጌያዳናኻ ሃማንቴ ዛርስንስ ዎትሮጎ ኪም ዻብንሻናንቴ ኬ ቻላድማሞ፤ ዬራ ኬናንቴ ክማሳዳናም ዬርሻንቴ ኬ ላይ ሃምዲና።27ኤና ዴምጲንባራኻ ዻጲማሞ ሃማይና ኤና ሰዱቃዊና ዋኒ ኢየሱስ ካላ ናዴ ኣይሶ ኦይስዲና፤ 28ክግያ ይንታኻሞና ኬያማዶ፦ “ኣስታማራዮ፤ ኤዲ ካላ ሜ ኬማንቴ ናሶ ኣዽማ ክጅና እንዳን ናሳ ሜን ክሳ ዳልሶንም ኬማንቴ ናናም ኣዽቴ እንዳናሳናንቴ ሜቴ ክዎይሴኻናንቴ ሙሴ ዎናንቴ ኡክዲና።29ታ ናንሲ ኣና ክሳ እንዳ ናሶ ꬆጳና ዳና፤ እንዳን ናሳ ብራስ ሜ ኬማንቴ ናሶ ኣዽማ ጃይዲና፤ 30ፕር እንዳን ናሳ ላንስኻሞ ኮም ባስካንቴ ኣጋንታ ናሶ ኣዽማ ጃይዲና፤ 31ማክንስኻሞ ኮም ባስክዲና፤ ናና ሶጳናኻሞ ኣጋንታ ፑጭ ኮም ባስካንቴ ናሶ ኣዽማና ኬጃዶ። 32ቱንስሮኻሞ ኤስኖ ጃይዲና። 33ኣጋታኻ ናና ꬆጳና ፓይላ ኮም ኬዬዳዶንታኻ፣ ዴምጲንባራ ዻጳዻይን ዋዳንካ ና ሃው ሜ ኮዴ?” 34ኢየሱስካሞ ኬናንቴ ይንታ ሃማንቴና ክማሳዶ፦ “ፔን ኮ ናና ኬማና ኬኬማይ፤ ኬማዻና ኬኬማዻይ፤ 35ኮዶን ዴምጵንባራኻ ዻጳንቴ ፔን ናኣንናንቴ ዶንም ኤና ሃፓይና ኬምማሞ ዎይካሞ ኬማዽማሞ፤ 36ኬ ባርያሳ ኤርጎ ኤናግያ ኬዶንታኻ ናንሲ ኬ ጅማሞ፤ ኬ ዴምጲንባራ ናና ዻጳዳና ኬዶንታኻ ኬ ባርያ ናናና።37ሙሴ ሃቃስ ሮጳያሳ ዬር ዋርቃትሮ ይኡካዶንካ ጌጳም፣ ‘ኣብርሃም ባርያ፣ ይሳሃቅ ባርያ፣ ያእቆብ ባርያ’ ክያማዳ ኤና ዴምጲንባራ ኬዻጳይንምና ክዻዋይ፤ 38ኬ ፓይላ ክናንቴ ሳዳንካ ኬዶንታኻ፣ ኖ ኤና ሳዳንካ ዳና ባርያና፣ ኤና ጃዳና ባርያ ትማሞ።” 39ኤና ሙሴ ዳምብን ታማርሳይና ዋኒካሞ ክግያ፣ “ኣስታማራዮ፤ ያ ፃሊና ሃጌያዶ” ና ኬያማዶ። 40ኣጋኻ ካርሳንቴ ኤዲ ክካላ ኦይሶ ኦይሳናንቴ ዛጋዳ ቆልማሞ።41ሃያንቴ ኢየሱስ ኬግያ ይንታና ክያማዶ፦ “ኤና ክርስቶስም ኖ ዳዊት ናሶና ሃስ ኬያሜ? 42ኦጎኖኻሞ ዳዊት ይባራንካ ዋርሳን ዋርቃትሮ ይንታ ሃምዲና፦ “ ‘ጌጳ እሳ ጌጳግያ፣
43ጋላ ሃሳም ራን ሃሳሳ ቾባራ እሳ ሃያዛራ እሳ ምዛቅባራ ዳርቅማ” ና ክያማዶ።
44ታ ናንሲ ዳዊት ኪም ‘ጌጳ’ ሃማንቴ ክግስማዳና ሃስ ክሳ ናሶ ክዴ?”45ዛርስኖ ፓይላ ኪም ኤሳርቴ ኮዳዃ ይሳ ታማርናግያ ይንታና ክያማዶ፦ 46ኣፓላን ውልፑስ ሃሞን ጉድጶን ኣርሳንቴ ያዮን ዛጋይና፣ ጳልሮጎ ጌሶን ዛጋይና፣ ኦይሁድናሳ ምስኮን ኦኖሮቤ ድግስን ራቅሮቤ ጎሺን ራቅን ዛጋይና ኤና ሙሴ ዳምብን ታማርሳይናኻላ ዬም ማንክማቴ፤ 47ኬ ባርያም ጉዱጲ ምስክቴ ሜና ዳልሶናም ታይስቴ ኬሳ ኦኖናምና ኬቡራይ፤ ኤና ኬም ኬሼዴኻናንቴኻሞና ኬምስካይ፤ ኬ እግናም ብቶ ዛርቦ ካላና ኮካላይ።”
Chapter 21
1ኢየሱስ ካች ሃማንቴ ክሼዲና ኤና ዎድሞና ባርዮ ኦኖንሳ ብሬን ፑኡሻዻን ሳጥንሮ ብሬን ኬዻብካ ሃፕዲና። 2ሃያንቴኻሞ ኤዲ ሜ ዳልሶ ኩፒ ካላ ሳንቲም ላማም ሳጥንን ኦጎሮ ኮዻብካ ሃፕዲና፤ 3ይንታኻሞና ክያማዶ፦ “ዬናንቴ ጎንዼና እጌያይ፤ ኤና ፓይላ ውል ካላ ኤስኖ ዳልሶኖ ኩፒኖ ኮኖ ሳጊ እምዲና፤ 4ኤና ክና ዋኒ ኬእማዶኖ ኮይና ይሳ ጱፅና ዳና ግዶሮካና፤ ኮዶን ና ኩፒ ዳንቴ ካላኻሞ ሽእሽማ ይሳ ዳናም ፓይላ እምዲና።”5ክሳ ታማርና ግዶር ዋኒ ባርዮን ኦኖኖንም ሱኒና ፃሊናኻቤ ኤና ባርያናንቴ ኮይና ኬእማዳናቤኻ ኣሽካዻዃ ኮጎባዶንም ክንካ ሃሳውቴ ኬዳዃ፣ ኢየሱስ ይንታና ክያማዶ፦ 6“ኮኖ ዬያፓይኖ ፓይላ ኮስምማ ሱኒ ሱኒዛራ ኮንታ ዶርማንቴ ኮሽዽሞን ዋዳኖ ናኣና ኮኣናይ።” 7ኬኻሞ ክግያ፣ “ኣስታማራዮ፣ ታ ናንሲ ዬሮ ኦጎኖ ፓይላ ሃ ኮያሜ? ሃያንቴኻሞ ዬሮ ኦጎኖ ኮያማንሳ ብራሮ ዬራ ብራንቴ ሃፕንዻያ ሃርቴ?” 8ኖኻሞ ኬናንቴ ይንታ ሃማንቴና ክማሳዶ፦ “ዬቲ ጎይ ጋዳ ያኣና ዬም ማንክማቴ፤ ኤዲኖ ጱፅኖ፣ ‘እንታ ክርስቶስና’፣ ሃያንቴኻሞ፣ ‘ዋዳኖ ሳንዲና’ ሃማንቴ እሳ ናብንካ ናኣና ኬናኣይ፤ ኮዶን ዬቲ ኬም ዬጫግናኖ። 9ባንቆንቤ ዛርስንሳ ጄካን ዬኤሳርና ዬቃꬅምናኖ፤ ዬራ ኣጋ ብራንቴ ክያሜኻናንቴ ዛግሳና ኮዛግሳይ፤ ኮዶን ቱንስኖ ይሪካ ሃምማሞ።” 10ሃያንቴኻሞ ኬናንቴ ይንታና ክያማዶ፦ “ዛርስኖ ዛርስን ዋኒዛራ ዻጳና ኮዻጳይ፣ ማንግስትካሞ ማንግስት ዋዛራ ዻጳና ክዻጳይ፤ 11ፔንሳ ዝጋ ጌጲ ማታና ኮማታይ፤ ዳቆምቤ ሃጅሞምቤ ራቅ ዋና ዋና ግዶር ዳና ኮዳይ፤ ዬር ኩርትንሳያቤ ፖላንባራኻ ዬር ሃምማንቴ ዼስማ ሃምማና ኮያምማይ። 12“ኮዶን ዬሮ ኦጎኖ ፓይላ ኮያምማ ኮሳ ብራሮ ኤና ዬም ዬዳና ኬዬዳይ፤ ዬም ኦይታንቴና ኬያያይ፤ ኣይሁድናሳ ምስኮን ኦኖንዛራቤ ዻክን ኦኖንዛራቤ ዬም ኣርሳና ኬኣርሳይ፤ ኤና ብትናቤ ኤና ጌጵናቤሳ ዎትሮ ዬም ባኣና ኬባኣይ፤ ኮኖ ፓይላ እንካ ሃማንቴ ዬዛራ ዬስካና ኮዬስካይ። 13ኦጎኖኻሞ ኤናናንቴ ማኚ ዬዴኻናንቴ ዬናንቴ ጎይ ፃሊና ኮዳይ።14ኣጋታኻ ሃር ዎማሴ ሃማንቴ ብራንቴ ዬቃብምናኖ። 15ዬሳ ቁፓሞን ኤና ፓይላ ዜርማናንቴቤ ማሳናንቴ ኬቻልሞን ኣፖንቤ ሃሞሞንቤም እንታ ዬናንቴ እማና እእማይ።16ዬምባናቤ ዬንዳናቤ፣ ዬንዳና ናናቤ፣ ዬሳ ኤዳናቤ፣ ዬያርና ካውል ዬም ሳስካንቴ እማና ኬእማይ፤ ዬግዶር ዬሳ ዋኒም ዴሳና ኬዴሳይ፤ 17እንካ ሃማንቴ ኤና ውልሳ ዎትሮጎ ቶዛዻዻዃና ዬዳይ። 18ኮዶን ዬሳ ስትና ግዶርካ ስቲ ካላኻሞ ካይማሞ፤ 19ዎቻዻንቴ ዎያንቴኻሞ ሳዳን ዬሳም ዻኣሻና ዬዻኣሻይ።20ዬሩሳሌምም ባንቆን ኤናኻ ታኻዻዃ ዬያፕና፣ ዋዳኖ ይንካ ኮካያይኖ ኮዬስካዶን ዼስማቴ። 21ዋዳ ኣጋኻ ኤና ይሁዳ ግዶር ዳና ጉርባናዛራ ኬጎቤ፤ ኤና ካታማሮጎ ዳናኻሞ ኦጎባራ ኬውቴ፤ ኤና ካታማንሳ ቡዶሮ ዳናኻሞ ካታማንዛራ ኣርዳን ኬጋሬ፤ 22ዬራ ዋርቃትሮ ኡካዻዳና ፓይላ ጎንዼ ኬማቴኻናንቴ ዋዳ ኣጋ ዻባሞን ይንካ ካዻያ ሮራና።23ፔን ኮሮ ጋሎ ጌጲ ማታና ኮማታይ፤ ዛርስን ኮዛራኻሞ ቦክ ናኣና ኮናኣይ፤ ኣጋታኻ ዋዳን ኦጎኻ ሜና ስርማናናንቴቤ ናናም ቆኦሻይናናንቴቤ ሃይ! 24ሃልፓካ ኬ ጃና ኬጃይ፤ ቶርስን ውልዛራ ኬም ሮጋና ሮጋዻይ፤ ዬሩሳሌምካሞ ኤና ቶርስና ዋዳኖ ኮሳ ማቃዛራ፤ ኤና ቶርስናኻ ኮም ትጋዻዃና ኮዳይ።25“ሃዮንዛራቤ፣ ኣርፕንዛራቤ ኤዝንንዛራቤ ዬር ሃፓንቴ ዼሳዻድማ ማታና ኮማታይ፤ ኛፓስን ቱልማይንሳ እርጎንካ ሃማንቴ፣ ኤድኖ ፔሮ ዶኖ ፓይላ ቃብማና ኮቃብማይ፤ ሃያንቴኻሞ ጄካና ኬጄካይ፤ 26ፖላናሳ ካንታና ኬጄካንታኻ፣ ኤድኖ ኩርታሞኻቤ ፔሮ ናኣናንቴ ዶኖ ሃርቴ ሃማንቴ ካሊቴ ቃጃና ኬቃጃይ።27ዋዳን ኦጎኻ እንታ ኤዲ ናሶ ካንታንካቤ ጎሺ ጌጵካቤ ሉፕንካ እኒካ ኢም ሃፓና ኬያፓይ። 28ዬትካሞ ዬራ እግና ሃምማን ኬካርስና፣ ዻቆኖ ዬሳ ኮሳናዶንታኻ፣ ዻጳንቴ ዎይማቴ፤ ዎትን ዬሳም ዞን ካች ሃይማቴ።” 29ጫግሻንቴኻሞ ኖ ዻይንሳ ካም ይንታ ሃማንቴ ኬናንቴ ጌይዲና፦ ባላስንቤ ሃቃና ዋኒቤም ፓይላ ሼድማቴ፤ 30ቃልጶና ኬሳ ኬኮዳዃ ዬያፕና፣ ዬቲ ዬባራንካ ዋዳን ኦጎኻ ቦናኖ ኮሳናዶንም ዼስዲና። 31ሃያንቴኻሞ ዬራ እግና ኬያማይንም ዬያፕና ባርያሳ ማንግስትኖ ኮዬስካዶንም ዼስማቴ። 32“ዬናንቴ ጎንዼና እጌያይ፤ ዬሮ ኦጎኖ ፓይላ ኮሳ ሃምማዛራ ኤዲኖ ታን ጋይኖ ካይማሞ። 33ፖላንቤ ፔንቤ ካያና ኬካያይ፤ ኮዶን እሳ ዼላቅኖ ካይማሞ።” 34ኣጋታኻ ዴንታ ሱን ሃማኻቤ፣ ውጮ ጵፅ ውጭቴቤ ዴንታን ዬዶንናንቴ ቃብምቴ ዎይላምኖ ዬሳ ካያንቴ፣ ሮራ ኣጋ ዛኒግያ ዬኬንሽማ ዬም ዬዳን ክጋሬኻናንቴ ፓኻልዽማቴ፤ 35ዬራ ኣጋ ኤዲን ፔን ጋላፕሮ ዶንዛራ ፓይላ ዬስካና ክዬስካይ።36ኣጋታኻ ዬርን ናኣንባራኻ ዬዻቄኻናንቴቤ እ ኤዲ ናሶሳ ዎትሮጎ ዎያን ዬቻሌኻናንቴ ሮሮ ውል ዋቻዻንቴ ምስክማቴ።” 37ኢየሱስ ሮሮን ባርዮን ኣኖሮጎ ታማርስቴ ዳንቴ፣ ኮዶን ሶትን ደብረዘይት ሃንዻያ ጉርባስዛራ ውታንቴ ዎዽቴና ክዶ። 38ዛርስኖኻሞ ፓይላ ኪም ኤሳራናንቴ ባርዮን ኦኖንዛራ ክዛራ ቡሪን ንቴና ኮዶ።
Chapter 22
1ዋዳን ኦጎኻ ፋስካ ሃንዻያ ኣይሁድናሳ ባላሻን ይንካ እꬃዻያ ባኣላ ዬስክዲና። 2ኤና ዳምብን ኣሽካይናሳ ጋርናቤ ኤና ሙሴ ዳምብን ታማርሳይና ዛርስንም ይኩርትንዻዶንታኻ፣ ሃሞንታ ሃያንቴ ኢየሱስም ይንካ ይካይሳያ ጎይ ዛግቴና ኬዶ። 3ሜሻኻሞ ኤና ታጲ ላማናሳ ካላ ግዶር ኣስቆሮቱ ሃንዻያ ይሁዳዛራ ኣርድዲና፤ 4ይሁዳኻሞ ኤና ዳምብን ኣሽካይናሳ ጋርናቤ ኤና ባርዮን ኦኖን ዻቃናይናሳ ጋርናቤዛራ ቃልቴ ኢየሱስም ሃስ ሃያንቴ ኬናንቴ ይእማይንም ኬላማ ክንካ ሃሳውዲና።5ኬኻሞ ዼላቃ ኣጋኻ ዋዝንዻንቴ፣ ክናንቴ ብሬ እማናንቴ ክላማ ዼላቅዲና። 6ኖኻሞ ዼላቃም ናሽዲና፤ ኪም ሳስካቴ እማናንቴ ዛርስን ይንግዶር ይቆልማ ዋዳ ሊኪ ሃማ ካሊቴና ክዶ።7ኣጋሳ ራስባራ ፋስካን እያትን ይንካ ማቻዻያ ባላሻን ባኣላ ዬስክዲና። 8ኢየሱስካሞ፣ “ፋስካን ዳኣኖን ዎእꬄኻናንቴ ቃልቴ ዎናንቴ ባክማቴ” ሃማንቴ ጴጥሮስቤ ዮሃንስቤም ይእስዲና። 9ኬኻሞ ክግያ፣ “ሃናንቴ ሃንታ ዎባኬኻናንቴ ሃዛጋዴ?” ና ኬያማዶ።10ኖኻሞ ኬግያ ይንታና ክያማዶ፦ “ካታማንዛራ ዬኣርድና ኤዲ ዳኻ ኑንቆ ባኣዳ ዬም ሃፓና ክያፓይ፤ ኪም ጫጋቴ ኦኖን ክኣርዳይንዛራ ኣርድማቴ፤ 11ኦኖን እምባግያ፣ ‘ኣስታማራ ይጌይና፣ “እሳ ታማርና ላማ ክንካ ፋስካን ዳኣኖን እባንን ጋይን ይንግዶር እእꬃያ ቾችና ራቃ ሃንታሪቴ?” ና ሃግያ ክያማይ’ ሃምማቴ።12ኖኻሞ ፎቅን ኦኖንዛራ ራቅ ዎሪ ኣሽካዻዃ ዳም ዬናንቴ ዻዋና ክዻዋይ፣ ኦጎታር ዎናንቴ ባክማቴ።” 13ኬኻሞ ቃልቴ ኢየሱስ ኬናንቴ ክጌያዳግያ ኮዳዃ ሃፕዲና፤ ፋስካን ዳኣኖንካሞ ኬ ኦጎታር ባክዲና። 14ሳኣታኻሞ ክዬስካዃ ኢየሱስ ኤና ይሳ ይእሳዻዳናላማ እꬅማናንቴ ዳርቅዲና፤ 15ኬግያ ይንታና ክያማዶ፦ “ጋላ ካ ኣኻራ እዛራ ኮዬስክማ ፋስካን ዳኣንታ ካም ዬላማ ክንካ እꬃናንቴ ጌጲ ዛግቴና እዶ፤ 16ዬናንቴ ጌያና እጌያይ፤ ባርያ ማንግስትንካ ዬራ ካሳ ዎኻላ ጎንዼ ክሳ ሃምማዛራ ፋስካን ዳኣንታ ካም ላንሲ እንታ እꬅማሞ።” 17ሻርቃስም ዻሳንቴ ባርያም ምስካንቴ ኬግያ ይንታና ክያማዶ፦ “ችማቴ፣ ካሮኻ ፓይላ ውጭማቴ፤ 18ዬናንቴ ጌያና እጌያይ፤ ካኻ ካርሳንቴ ባርያሳ ማንግስትኖ ኮሳ ናኣዛራ፣ ዎይንን ኣፓ ካሮኻ እንታ ውጭማሞ።” 19ባላሻንም ዻሳንቴ ባርያም ምስክዲና፤ ፖጫንቴኻሞ ኬናንቴ እማንቴ፣ “ኮኖ ዬናንቴ እንዻይኖ እሳ ዋኖና፤ ኣጋም ይንታ ሃይቴ ኢም ጶቅስማቴ” ሃማንቴ ጌይዲና። 20ኣጋንታኻሞ ዳኣኖንሳ ራስባራ ሻርቃስም ዻሳንቴ ይንታና ክያማዶ፦ “ሻርቃሮ ዶኖ ዎይንኖ ኮኖ እሳ ማኣስን ዬናንንቴ ይንቅማይንካ ኣሽካዻዶኖ ኣሽንሾኖና።21ኮዶን ኤያ ኢም ሳስካቴ እማያ ሻርቃሮ እላማ ክንካ ኣን ኣርስቴና ክዶ። 22እንታ ኤዲ ናሶ ኣና ብራንቴ ዬራ እናንቴ ጌይዻዳ ጎያ ኣጋኻና እያኣይ፤ ኮዶን ኤያ ኢም ሳስካቴ እማያ ኣጋናንቴ ሃይ።” 23ኬኻሞ ኬግዶር ኦጎንታ ይንታ ሃያያ ሃው ክዶንም ክካላ ኦይስማን ካርስዲና። 24ፕርካሞ ኬሳ ባክሮጎ ሃውቴ ሳጊ ዳያ ሃማያ ዜርማ ዻጲዲና። 25ኢየሱስካሞ ኬግያ ይንታና ክያማዶ፦ “ቶርስን ኤናሳ ብትና ዛርስን ይሳም ካንታኻና ኬሻናይ፤ ዛርስን ይኖንዛራ ይሳ ጌጳሞን ዻዋይና ኤና ዬርን ፃልን ኣሽካይና ሃማንቴና ግስንዻይ።26ኮዶን ዬባራንካ ይንታ ዳን ኮጋሬ፤ ኦጎናንቴ ዬግዶርካ እሽማ ካናግያ ክዴ፤ጌጳኻሞ ካይሲግያ ክዴ። 27ኤሳንካ ኤያ ዳኣኖን እꬃናንቴ ዳርቃዳቤ ኤያ ዎያንቴ ክናንቴ ዋድማያቤሳ ሃማቴ ሳጋ? ኤያ እꬅማናንቴ ዳርቃዳሞ? ኮዶን እንታ ዬሳ ባክሮ ዳ ኤዲ ካይሲ ካላግያና እዶ።28ዬትካሞ እሳ ጋሎን ዋዳንካ እካላንካ ፔጌ ይማ እሳ ዴሞሮ ዎያዳናና፤ 29ኣባ ኢም ክጌጵሳዳግያ እንታኻሞ እሳ ማንግስትሮ ዬም ጌጵሳ እጌጵሳይ፤ 30ኦጎኖኻሞ እሳ ማንግስትሮ እእꬃይሮኻ ዬእꬅኻቤ ዬውጨኻቤ፣ ሃያንቴኻሞ ብታሞን ቦርኮቶሮ ዳርቃንቴ እስራኤልናሳ ብዛና ታጲ ላማናዛራ ብቶን ዬታኬኻናንቴና።”31ፕርካሞ ኢየሱስ ይንታና ክያማዶ፦ “ስምኦን ስምኦንዮ፤ ሜሺ ዬም ናሙችሌግያ ሃሳናንቴ ምስክዲና፤ 32ኮዶን ሃሳ እምነትኖ ካያን ኮጋሬኻናንቴ እንታ ሃናንቴ ባርያም ምስክዲና፤ ያኻሞ ሃማትና ሃምባ ናናም ሶቦርስማ።” 33ስምኦንካሞ ክግያ፣ “ጌጳዮ፤እንታ ሃላማ ክንካ ዻክን ኦኖን ኣርዳዻያ ኮዳናኻሞ፣ዴምጲናንቴኻሞ ሼክሚና እዶ” ና ክያማዶ። 34ኢየሱስካሞ ክግያ፣ “ጴጥሮስዮ፤ ሃይታላ ባቻ ኮኤሊማ እንታ ኪም ዼስማሞ ሃማንቴ ኢ ማካምግያ ዜርማና ሃዜርማይና እያማይ” ና ክያማዶ። 35ሃያንቴኻሞ ኢየሱስ ኬኻላ “ኣና ጎርጶ ቆልማቤ ሶርቢ ቆልማቤ ዱጝሪ ቆልማቤ ዬም እይእሳዃ ዬር ዬሳ ጆጋዳ ዳይዲው? ሃማንቴ ኦይስዲና። ኬኻሞ “ዎኻላ ዬር ካላኻሞ ጆጋዳ ቆልማሞ” ሃምዲና። 36ኖኻሞ ኬግያ ይንታና ክያማዶ፦ “ኮዶን ታ ኤያ ጎርጶን ካዳ ጎርጳ ይሳም ክዬዴ፣ ኤያ ሶርብን ካዳኻሞ ሶርባ ይሳም ክዬዴ፤ኤያ ሃልፓን ቆልማኻሞ ኣፓላን ይሳም ሻንሻንቴ ሃልፓ ክሻኔ።37ዬናንቴ ጌያና እጌያይ፤ ‘ሴሶን ኤና ላማ ኪም ፓይዳዽዲና’ ሃማንቴ ዋርቃትሮ ኡካዻዳ እዛራ ክያሜኻናንቴ ዛግሳና ኮዛግሳይ፤ ዬራ እሳ ዋርቃትሮጎ ኡካዻዳናሳ ቱንስኖ ጎንዼ ዬስክዲና።” 38ክሳ ታማርናኻሞ ክግያ፣ “ጌጳዮ፣ ሃልፓ ላማ ኮታር ዳይዲና” ና ኬያማዶ። ኖኻሞ ኬግያ፣ “እግና ዬክዲና” ና ክያማዶ።39ኢየሱስ ሌሌ ይያያግያ ውታንቴ ደብረዘይት ጉርባስዛራ ያእዲና፤ ታማርና ክሳኻሞ ኪም ጫግዲና። 40ኦጎታር ኬዬስካና ኖ ኬግያ፣ “የሳ እምነትን ጋርሳያ ጎይ ጶርጋዳዛራ ያኣን ዬጋሬኻናንቴ ምስክማቴ” ና ክያማዶ።41ኖኻሞ ኬኻላ ሾሊ ፔጌ ቃልቴ ኮምፓርሳንቴ ምስክዲና፤ 42ይንታኻሞና ክያማዶ፦ “ኣባዮ፣ ሃናሻዳ፣ ጋላ ካም እካላንካ ችማ፤ ኮዶን እንታ እናሻዳግያ ዳን ክጋሬ፣ ሃናሻዳግያ ኮዴ።”43ባርያሳ ኤርጎን ኤያ ፖላንባራኻ ክናንቴ ሃፕንዻንቴ ኪም ሶቦርስዲና። 44ኖ ካሎን ቃብማንቴ ጌጲ ምስክቴና ክዶ፤ ክሳ እርማኖኻሞ ማኣሲግያ ፔንዛራ ዽጵቴና ኮዶ። 45ይሳ ምስኮንባራኻ ዻጳንቴ ይሳ ታማርናኻላ ናእዲና፤ ኬኻሞ ሞይካዻንቴ ራትሮ ኬዳዃ ሃፓንቴ ኬግያ፣ 46“ሃርናንቴ ዬራቴ? የሳ እምነትን ጋርሳያ ጎይ ጶርጋዳዛራ ያኣን የጋሬኻናንቴ ዻጳንቴ ምስክማቴ” ና ክያማዶ።47ኖኻሞ ኣኻራ ዼላቅቴ ክዳዃ፣ ኤዲ ጱፅ ናእዲና፤ ክሳ ታማርና ታጲ ላማናሳ ካላ ይሁዳ ሃንዻያ ኬም ኣንሳቴ ንቴና ክዶ፤ ኪም ሱንቃናንቴ ክዛራ ክድሚዲና። 48ኮዶን ዬሱሰ ክግያ፣ “ይሁዳ፣ እ ኤ ኤዲ ናሶም ሱንቃኻው ሳስካቴ ሃእማይ?” ና ክያማዶ። 49ኤና ኢየሱስሳ ዴሞሮ ዳናኻሞ ዼላቃሳ ዴንታ ሼዳንቴ ክግያ “ጌጳዮ፣ ሃልፓንካ ኬም ዎኡካያው?” ና ክያማዶ። 50ኬሳ ባክሮኻሞ ኤዲ ካላ ኣይሁድና ኤናሳ ዳምብን ኣሽካይናሳ ጋራሳ ካይስታም ክሳ ቃማ ምዛቃም ታክዲና። 51ኮዶን ኢየሱስ፣ “ጋርማ!፣ ካኻ ካርሳንቴ የር ይንታ ሃማ የሃይናኖ!” ሃማንቴ ኤያሳ ቃሞንም ላኣሳንቴ ፓሽሽዲና። 52ሃያንቴ ኢየሱስ ኤና ኪም ዬዶታ ናኣዳና ኤና ኣይሁድናሳ ዳምብን ኣሽካይናሳ ጋርናቤ፣ ኤና ባርዮን ኦኖን ዻቃናይናሳ ጋርናቤ፣ ዞንዛናቤናንቴ ይንታና ክያማዶ፦ “ቃው ኤዲ ዬዳያግያ ሃልፓቤ ቁራቤ ዬዳንቴው ዬናአዶ? 53ሮሮ ውል ባርዮን ኣኖሮጎ ዬላማ እዶንካ ኣን ዬሳም ዬቲ እዛራ ዻሳድማሞ፤ ኮዶን ዋዳኖ ኮኖ ዬቤ ሜሻቤ ዬዛጋዳም ይንካ ዬአሽካን ዋዳኖ ሊክን ዶኖና።”54ኣጋሳ ራስባራ ኤና ኢየሱስም ዬዳንቴ ኣንሳቴ ኤና ኣይሁድናሳ ዳምብን ኣሽካይናሳ ጋራ ኦኖንዛራ ኣርስዲና፤ ጴጥሮስካሞ ኪም ፔጌኻ ጫግቴና ክዶ። 55ኤናኻሞ ኤያ ጋራ ኦኖንሳ ሻንሮ ኖን ኣሳንቴ ክንካ ፑጫንቴ ዳርቃንቴ ኬዳዃ ጴጥሮስካሞ ኬላማ ክንካ ዳርቃንቴና ክዶ።56ሜ ካይሲ ካላ ጴጥሮስ ኖንሳ ዴሞሮ ዳርቃንቴ ክዳዃ ኪም ፃሊ ሼዳንቴ፣ “ኤያ ካ ክማላ ክንካና ክዶ” ና ኮያማዶ። 57ኮዶን ኖ ኮግያ፣ “ያ ኤስኖ ኮኖ፣ እንታ ኪም ዼስማሞ” ሃማንቴ ዜርምዲና። 58ሾሊ ሶጎ ካፕ ሃማንቴ ኤዲ ኣብ ካላ ኪም ሃፓንቴ ክግያ፣ “ያኻሞ ፕር ኬግዶር ካላና” ና ክያማዶ። ኮዶን ጴጥሮስ ክግያ፣ “ያ ኤያ ካ፣ እንታ ኖ ትማሞ” ና ክያማዶ። 59ሳኣት ካላግያ ካፓንቴ፣ ፕር ኤዲ ካላ ጎንዼ ዼሳንቴ፣ “ኤያ ካ ገሊላ ኤድ ክዶንታኻ፣ ጎንዼኻ ክላማ ክንካ ዳይዲና” ና ክያማዶ። 60ኮዶን ጴጥሮስ ክግያ፣ “ያ ኤያ ካ፣ ሃጌያይን ኦጎም እንታ ዼስማሞ” ና ክያማዶ፤ ኣጋም ጌያቴ ክቱንስማ ባቻ ኤሊዲና።61ጌጳኻሞ ጴጥሮስም ማታቴ ሼድዲና፤ ጴጥሮስካሞ ጌጳሳ ክግያ፣ “ሃይታላ ባቻ ክኤሊማ እንታ ኪም ዼስማሞ ሃማንቴ ኢ ማካም ዜርማና ሃዜርማይ” ሃማንቴ ክናንቴ ክጌያዳ ክካላ ጶቅ ሃምዲና። 62ጴጥሮስካሞ ጳልንዛራ ውታንቴ ጌጲ ኤፕዲና።63ኤና ኢየሱስም ዻቃናይናኻሞ ኪም ቦውቶቤ ዻቤ ካርስዲና፤ 64ኣፕን ክሳምካሞ ክጫንቴ፣ “ይንዳ ጌይማ፤ ሃም ዻዳ ሃውቴ?” ሃማንቴ ክካላ ኦይስቴና ኬዶ። 65ፕርካሞ ኢሪሞ ዼላቅ ጱፅ ጌይቴ ኪም ቦውቴቤና ኬዶ።66ፔኖ ኮሶፆዃ፣ ዛርስንሳ ዞንዛናቤ፣ ኤና ኣይሁድናሳ ዳምብን አሽካይናሳ ጋርናቤ፣ ኤና ሙሴ ዳምብን ታማርሳይናቤ ፑጭዲና፤ ኢየሱስምካሞ ይሳ ዎትሮ ዎይስዲና። 67ኬኻሞ ክግያ፣ “ያ ክርስቶስው? ይንዳ ዎናንቴ ጌይማ” ሃምዲና። ኢየሱስካሞ ኬግያ ይንታና ክያማዶ፦ “ዬናንቴ እጌይና፣ ዬቲ ኢም ኣምንማሞ፤ 68ዬኻላ እዎይስናኻሞ ዬቲ እናንቴ ማስማሞ።69ኮዶን ካኻ ካርሳንቴ እንታ ኤዲ ናሶ ባርያ ካንታንሳ ምዛቃባራ ዳርቃና እዳርቃይ።” 70ዋዳ ኣጋኻ ኬ ፓይላ ክግያ፣ “ያ ታ ባርያሳ ናሶው?ና ኬያማዶ። ኖኻሞ ኬግያ፣ “ዪኒ እዶንም ዬቲ ጌይዲና” ና ክያማዶ። 71ኬኻሞ፣ “ታ ናንሲ ማኚ ኣብ ዎናንቴ ሃር ኮዛግሴ? ዎቲ ዎዻርካ ክሳ ኣፖሮኻ ኤሳርዲና” ና ኬያማዶ።
Chapter 23
1ኤና ኦጎታር ፑጫንቴ ዳና ፓይላ ዻጳንቴ ኢየሱስም ጲላጦስዛራ ኣንሳቴ ያእዲና፤ 2ይንታኻሞ ሃማንቴ ኪም ቤሪንሳን ካርስዲና፣ “ኤያ ካ ዛርስን ዎሳም ጎይ ጶርጋዳ ይእስቴቤ፣ ቄሳርናንቴኻሞ ግብርን ካሻን ጋርዼኻናንቴቤ ፕርካሞ ‘እንታ ክርስቶስ ብቲና’ ሃማንቴ ክጌይካ ዎቲ ኪም ሃፕዲና። 3ጲላጦስካሞ፣ “ያ ኣይሁድናሳ ብቲው?” ሃማንቴ ክካላ ኦይስዲና። ኢየሱስካሞ ክግያ “ዪኒ፣ ሃጌያዳ ልኪና” ና ክያማዶ። 4ጲላጦስካሞ፣ ኤና አይሁድናሳ ዳምብን አሽካይናሳ ጋርናናንቴቤ ዛርስንናንቴቤ ይጌይና፤ “እንታ ኤያ ካዛራ ሴሶ ካላኻሞ ሃፓድማሞ” ና ክያማዶ። 5ኮዶን ኬ ይጌይና፣ “ኤያ ካ ገሊላ ግዶር ካርሳንቴ ላይ ካዛራ ይሁዳ ፔና ፓይላ ግዶርካሞ ይሳ ትምርትን ታማርስቴ ዛርስን ዻስቴና ክዶ።” 6ጲላጦስካሞ ዬራ ኣጋም ኤሳራንቴ፣ ኖ ገሊላ ኤድ ክዶንም ዼሳናንቴ ኦይስዲና፤ 7ጲላጦስ ኢየሱስ ብታ ሄሮዶስ ፔንባራ ክናኣዶንም ይዼሳዶን ዋዳንካ፣ ሄሮዶስ ዋዳን ኦጎኻ ዬሩሳሌም ግዶር ክዶንታኻ ኪም ክዛራ ይእስዲና። 8ሄሮዶስካሞ ኢየሱስም ሌሌ ሃፓናንቴ ዛግቴ ይዶንታኻ፣ ኪም ሃፓንቴ ካሎን ዋዝንዽዲና፤ ኖ ክሳ ዬር ክኤሳራዶንታኻ፣ ዬር ሃሚማግያንዳ ክኣሽካዃ ሃፓናንቴ ዛግቴና ክዶ። 9ክካላ ኦይሶ ጱፅካሞ ኖ ኦይስዲና፤ ኮዶን ኖ ክናንቴ ኣፖ ካላኻሞ ማሳድማሞ። 10ኤና አይሁድናሳ ዳምብን አሽካይናሳ ጋርናቤ ኤና ሙሴ ዳምብን ታማርሳይናቤ ኦጎታር ዎያንቴ ኪም ጌጲ ቤሪንስቴና ኬዶ።11ሄሮዶስካሞ ይሳ ዎታደርና ማላ ክንካ ኪም ቦዋንቴ ኦልትዲና፤ ኪም ጎሺ ኣፓላ ኣርስሳንቴ ጲላጦስዛራ ማሳቴ ይእስዲና። 12ሄሮዶስቤ ጲላጦስቤ ኣና ክሳ ቁፓሞ ኤድ ዳንቴ ኮዶን ሮራ ኣጋኻ ክንካ ቃሽምዲና። 13ጲላጦስካሞ ኤና አይሁድናሳ ዳምብን አሽካይናሳ ጋርናቤ፤ኤና ብትናቤ፤ ዛርስንቤም ክዛራ ፑኡሻንቴ፤ 14ኬግያ ይንታና ክያማዶ፦ “ኤያ ካ ዛርስኒና ክዻሳይ ሃማንቴ ዬቲ እዛራ ባእዲና፤ እንታኻሞ ዬሳ ዎትሮ ክካላ ኦይሳንቴ፣ ኪም ይንካ ይቤሪንሳዳ ሴሶም ክዛራ ካላኻሞ እንታ ሃፓድማሞ።15ፕርካሞ ሄሮዶስ ኣጋንታ ዬር ካላኻሞ ክዛራ ይፓድሞንታኻ ኪም ዎዛራ ማስዲና፤ ዬያፓዳግያ ኤያ ካ ዬር ኪም ዴምጲዛራ ባኣያ ሴሶ ካላኻሞ ሴሳድማሞ፤ 16ኣጋታኻ እንታ ኪም ዻንቴ ቡላና እቡላይ። 17ኖ ይንታ ይንናንቴ ክጌያዶኖ ባኣልን ዋዳንካ ዻኪ ኤድ ካላ ኬናንቴ ቡልዼኻናንቴ ግዲ ኮዛግሳንታኻና። 18ዛርስኖኻሞ ፓይላ ክንካ ማታንቴ፣ “ኤያ ካም እስ ካይስማ! ባርባንም ዎናንቴ ቡልማ!” ሃማንቴ እላትዲና። 19ባርባንካሞ ካታማንሳ ኢሮጎ ዛርስንም ዬር ዛርቦናናንቴ ክዻስሳዃቤ ኤዲ ክዴሳዃቤ ዻኻዻዳ ኤዲና። 20ጲላጦስካሞ ኢየሱስም ቡላናንቴ ይዛጋዶንታኻ፣ ፕርካሞ ኬም ዼላቅስዲና፤ 21ኮዶን ኬ ክግያ፣ “ኪም ዚትማ! ኪም ዚትማ!” ሃማንቴ እላትቴና ኬዶ። 22ጲላጦስካሞ ማክንሳኻ ኬግያ፣ “ሃርናንቴ? ኤያ ካ ሴሳ ክኣሽካዳ ሃርቴ? ሴሶ ኪም ዴምጲዛራ ባኣያ እንታ ክዛራ ሃፓድማሞ፤ ኣጋታኻ እንታ ኪም ዻንቴ ቡላና እቡላይ” ና ክያማዶ። 23ኮዶን ኬ ናቅሲ ይሳም ዼግ ሃያንቴ ኪም ዚታዼኻናንቴ ብታም ምስክዲና፤ ኬሳ እላትኖኻሞ ካሎን ካንታዽዲና። 24ኣጋታኻ ጲላጦስ ዬራ ኬኦይሳዳም ሃይዼኻናንቴ ኪም ዻብንሽዲና። 25ኤያ ዛርስንም ዬር ዛርቦናንቴ ክዻስሳዃቤ ኤዲ ክዴሳዃቤ ዻኻዻዳም፣ ኬናንቴ ቡልዼኻናንቴ ኬኦይሳዳ ኤያ ኣጋም ኖ ኬናንቴ ቡልዲና፤ ኮዶን ኬ ኢየሱስም ኬቃባዳግያ ኬናንቴ ኖ ሳስካቴ እምዲና።26ኬ ኢየሱስም ዬዳንቴ ኣንስቴ ዳንቴ፣ ስምኦን ሃንዻያ ቀሬና ፔን ኤዲ ካላ ሞራ ካታማንሳ ቡዶሮ ዳ ባራ ክኒካ ሃፓንቴ ክሳ መስቀልን ባኣሳንቴ ኢየሱስም ጫጋንቴ ክዬኤኻናንቴ ኪም እሽክንሽዲና።27ኤዲ ጱፅቤ ሜና ይሳ ሳዳን ጫእቴ ክናንቴ ኤፓይናቤ ክሳ ራስባራ ኪም ጫግቴና ኬዶ። 28ኮዶን ኢየሱስ ኬዛራ ሽራንቴ ኬግያ ይንታና ክያማዶ፤ “ዬቲ ዬሩሳሌም ሜና ዬናንቴቤ ዬሳ ናናናንቴቤ ኤፕማቴ እናንቴ ዬኤፕናኖ፤29‘ሜና ሴኮናቤ ናሶን ኦሎኖ ናሶን ኣዻድሞንቤ፣ ኣምና ናሶን ቆኦሻድምና ፑጋዻዳናና’ ዬያማን ዋዳኖ ናኣና ኮናይ፤ 30ዋዳን ኦጎኻ ኤና “ጌማራግያ፣ “ዎዛራ ዲኒማቴ” ጉርባናግያኻሞ፣ “ዎም ኣችማቴ” ሃማና ኬያማይ።’ 31ታ ናንሲ ሃቃ ኣቅካ ኬ ይንታ ኬሃያዳና፣ ሃቃ ዋችካ ሃሞንታ ኬያዬ?” 32ክላማ ዴሳዼኻናንቴ ሴሶ ኤድ ላማ ዋኒም ኬ ቻይዲና።33ራቃ ቀራኒዮ ሃንዻያም ኬ ይዬስካና ኬ ኪም ዚትዲና፤ ሴሶን ኤናሳ ካላም ክሳ ምዛቅባራ፣ዋምካሞ ክሳ ዋርካታባራ ሃያንቴ ኬ ዚትዲና። 34ኢየሱስካሞ፣ “ኣባዮ፣ ዬራ ይያያይናም ኬዼስሞንታኻ ሴሶን ኬሳም ኬናንቴ ጋርማ” ሃምዲና። ኬኻሞ ክሳ ኣፓላን ቡኪ ዻባንቴ ካሽምዲና። 35ዛርስኖኻሞ ዎያንቴ ሼድቴና ኮዶ። ኤና ጌጵናኻሞ፣ “ኤና ዋኒም ኖ ዻኣሽዲና፤ ባርያ ይካማዳ ክርስቶስ ኖ ይዳና፣ ይንዳ ዪም ክዻኣሼ” ሃምቴ ኪም ቦውዲና። 36ዎታደርናኻሞ ናዴ ኪም ቦውቴና ኬዶ፤ ዎይን ዚኣ ጋኣዳ ክናንቴ ክውጬኻ እምቴ፣ 37ክግያ “ያ ኣይሁድናሳ ብቲ ሃዳና፣ ይንዳ ሃም ዻኣሽማ” ሃምቴና ኬዶ። 38ጳ ክሳ ሜቴባራ፣ “ካ ኣይሁድናሳ ብታና” ሃማንቴ ኡካዻዳ ዋርቃቲ ዳይዲና። 39ሴሶን ኤና ዝታዻዳናሳ ካላ ኪም ዛርቦ ኢሪቴ ክግያ፣ “ያ ክርስቶስ ሞ? ይንዳ ሃምካሞ ዎምካሞ ዻኣሽማ” ሃምቴና ክዶ። 40ኮዶን ሴሶን ኤያ ዋ ይንታ ሃማንቴ ኪም ጎሪዲና፦ “ያ ዻባሞ ክግያ ዳ ችቴ ዳንቴ፣ ያ ባርያም ሾልካሞ ኩርትንዻይዬው? 41ዎቲ ዬራ ዎኣሽካዳናኻ ሃማንቴ ዻባሞን ዎዛራ ካዻዶንታኻ፣ ዻባሞን ልኪ ችቴና ዎዶ፤ ኮዶን ኤያ ካ ዬር ዛርቦ ካላኻሞ ኣሽካድማሞ።” 42ፕርካሞ ኖ፣ “ኢየሱስዮ፣ ቤሬ ሃሳ ማንግስትንካ ሃኒና ኢም ቃብማ” ና ክያማዶ። 43ኢየሱስካሞ ክግያ፣ “ሃናንቴ ጎንዼና እጌያይ፤ ሃይታላ እላማ ክንካ ገነትሮ ዳና ሃዳይ” ና ክያማዶ።44ዋዳኖኻሞ ሳኣት ላግያና ኮዶ፤ ሳኣት ሳልዛራ ፔኖ ፓይላ ፅፓ ማትዲና። 45ኦጎኖኻሞ ሃዮኖ ኮካያዶንታኻና። ባርዮን ኣኖንሳኻሞ ኣፓላኖ ጋዳን ዻኻዻዶኖ ዻሪ ሃኣንቴ ላማ ማትዲና።46ኢየሱስካሞ ናቅሲ ይሳም ዼግ ሃያንቴ እላታንቴ፣ “ኣባዮ ሳዳን እሳም እንታ ሃናንቴ እምዲና!” ሃምዲና፤ ኣጋንታኻሞ ሃማንቴ ጃይዲና። 47ፖሎስና ማቶናሳ ጌጳ ዬራ ኣጋም ሃፓንቴ፣ “ኤያ ካ ጎንዼምባ ጋዛና ክዶ” ሃማንቴ ባርያም ጎሽዲና።48ኤና ዬርን ኦጎም ሼዳናንቴ ራቃም ፑጫዳና ፓይላ ዬራ ሃምማዳም ይያፓና ሳዳ ይሳም ጫኣዳቴ ማትዲና። 49ኮዶን ኤና ኢየሱስም ዼሳዳና ፓይላቤ ሃያንቴ ገሊላ ፔሮኻ ካርሳንቴ ሜና ኪም ጫጋዳና ዬራ እግናም ሼድቴ ፔጌ ዎያንቴና ኬዶ።50ኤና ኣይሁድናሳ ብቶን ታኻይና ግዶር ዳ ዮሴፕ ሃንዻያ ኤድ ፃሊ ጋዛ ካላ ዳይዲና። 51ኤያ አጋ ኬሳ ኦሽሮቤ ኬሳ ዋድማሮቤ ቆልማሞ፤ ኖኻሞ ኣርማትያስ ሃንዻያ ኣይሁድ ፔየስ ኤድ ዳንቴ፣ ባርያሳ ማንግሳትንሳ ናኣም ካሊቴና ክዶ።52ኤያ ኣጋ ጲላጦስ ካላ ቃልቴ ክካላ ኢየሱስሳ ብሽን ምስክዲና፤ 53ክናንቴ እንዻዃ ኪም ሃንችሻንቴ ኣፓላ ናይሎንካ ኪም ቱፕዲና፤ ዱኪ ላይታ ግዶር ኮይዻዳ ኤዲም ይንግዶር ዱካዻድማ ግዶር ኪም ዎድዲና።54ሮራ ኣጋኻሞ ይንካ ኤናሳ ባኣልንናንቴ ሼካዻያና፤ ኡኩንሳን ሮራኻሞ ዬስካናንቴና ክዶ። 55ሜና ገሊላባራኻ ካርሳንቴ ኢየሱስ ማላ ናኣዳና ዮሴፕም ጫጋቴ ቃልቴ ዱክን ሃፕዲና፤ ብሽን ክሳም ሃሞንታ ኬዎዳዶንም ኬ ሼድዲና። 56ሃያንቴ ኬ ማታንቴ ሽቶቤ ጋምሬቤ ኣሽክዲና ዳምብን ይጌያንካ ሃማንቴ ኡኩንሳን ሮራ ጋላ ኬ ኡኩንስዲና።
Chapter 24
1ሳምንታሳ ሮራ ካርሳ ጋላ ሜና ጋምሬን ይኣሽካዶንም ባኣንቴ ኣኻራ ፔኖ ቡሪ ሶቲ ኮዳዃ ዱክንዛራ ያእዲና። 2ሱኒኖኻሞ ዱክንሳ ኣፖሮኻ ውንኩርስማንቴ ኮዳዃ ኬ ሃፕዲና፤ 3ዱክን ኦሎንዛራ ኬኣርድና ጌጳ ዬሱሱሳ ብሽን ኬ ሃፓድማሞ።4ዬራ ሃምማዳኻ ኬ ቴርቴር ሃንቴ ኬዳዃ፤ኣፓላ ጫውሊ ፑ ሃማ ኣርሳዳና ኤዲ ላማ ዋኒ ኬኬንሽማ ኬኻላ ዎይዲና። 5ሜናኻሞ ይኩርትንዻዶንናንቴ ሃማንቴ ፔንዛራ ኩፕ ሃማንቴ ኬዳዃ፣ ኤናኻሞ ኬግያ ይንታ ሃምዲና፦ “ኤያ ሳዳንካ ዳም ኤና ጃዳናሳ ባክሮ ሃርናንቴ ዬዛጌ?6-7ኖ ዻጲዲና! ኮታር ቆልማሞ፤ ሃያንቴኻሞ ኣና ገሊላ ግዶር ዳንቴ ‘እ ኤዲ ናሶም ሴሶን ኤናሳ ኣንሮ ሳስካንቴ እማናኬእማይ ሃያንቴ ዚታናኬዚታይ ሮራ ማክንሳኻኻሞ ዴምጲንባራ ዻጳናእዻጳይ’ ሃማንቴ ዬራ ዬናንቴ ክግያዳም ጶቅስማቴ፦8ዋዳ ኣጋኻ ሜና ኣፓ ክጌያዳም ጶቅስዲና። 9ሜና ዱክን ራቅንባራኻ ማታንቴ ዬርን ኦጎም ፓይላ ታማርና ክሳ ታጲ ካላናናንቴቤ ኤና ዋኒናንቴ ፓይላ ጌይዲና። 10ዬራ ኣጋም ኤና ይእሳዻዳናናንቴ ሜና ጌያዳና፣ መግዳላ ፔን ጋይኖ ማርያምቤ፣ ዮሃናቤ፣ ያእቆብ እንዳኖ ማርያምቤ፣ ሜና ዋኒ ኬማላን ዳናቤና።11ኮዶን ሜናሳ ኬናንቴ ሜርሜራ ጌይዻዳ ኬኻላ ባርያሞ ኣፖ ኬዼላቃያግያ ማይሻንቴ ኬም ኣምናድማሞ። 12ኮዶን ጴጥሮስ ዻጳንቴ ዱክንዛራ ጎብዲና፤ ኦጎታርካሞ ዬስካንቴ ዱክን ኦሎንሳ ኢን ኩፕ ሃማንቴ ክሼድና፣ ኣፓላስ ናይሎና ዋና ክዳዃ ሃፕዲና፤ ዬራ ሃምማዳም የርሻዳቴ ይሳ ኦኖንዛራ ማትዲና።13ሮራ ኣጋኻ ኤና ኪም ጫጋይናሳ ላማ ዋኒ ዬሩሳሌም ካላ ኪሎ ሜትር ታጵ ካላግያ ፔግንዻዳ፣ ኤማውስ ሃንዻያ ካታማስዛራ ይቴና ኬዶ፤ 14ኬኻሞ ዬራ ሃምማዳናም ፓይላ ክንካ ሃሳውቴና ኬዶ።15ኬ ክንካ ሃሳውቴቤ ዼላቅቴቤ ኬዳዃ ኢየሱስ ኬኻላ ናዴ ኬማላ ያኣን ካርስዲና፤ 16ኮዶን ኬ ኪም ዼሳን ኬጋሬኻናንቴ ኬሳ ኣፕኖ ክጭሚና ኮዶ። 17ኖኻሞ ኬግያ፣ “ጎይሮ ይቴ ክንካ ይንታ ዬያሳዋይኖ ሃርቴ?” ሃምዲና። ኬኻሞ ሞይካዻንቴ ዎይዲና። 18ኬግዶር ካላ ቀለዮጳ ሃንዻያ፣ “ሮሮና ክና ግዶር ኮታ ዬሩሳሌም ግዶር ዬርን ሃምማዶንም ዼስማ ያ ሶጎ ፔንሳ ቾቺው?” ሃማንቴ ክናንቴ ማስዲና። 19ኖኻሞ ኬግያ፣ “ዬራ ሃምማዳ ዳቢ ሃርቴ?” ና ክያማዶ። ኬኻሞ ክግያ ይንታ ሃምዲና፦ “ባርያቤ ኤናቤሳ ዎትሮ ፓይላ ዋድማንካቤ ዼላቅንካቤ ዋቻስ ባርያሳ ኣፖን ጌያያ ናዝሬት ጋንታ ኢየሱስሳ ዼላቅና፤ 20ኪም ኤና አይሁድናሳ ዳምብን አሽካይናሳ ጋርናቤ ዎሳ ብትናቤ ዴምጲ ክጄኻናንቴ ዻባሞ ክዛራ ካዽዲና፤ ኬ ኪም ዚትዲና።21ኮዶን ዎቲ እስራኤልም ዻኣሻና ክዻሻይ ሃማንቴ ክዛራ ቃሞን ዎቁንፃዳ ኖና፤ ውልሳ ጳባራ ዬራ ካ ክያሟዃ ሃይታላ ሮራ ማካንሳና።22ፕርካሞ ዎግዶር ሜና ዋኒ ዎናንቴ ዬር ዋና ጌይዲና፤ ኬኻሞ ቡሪን ዻጳንቴ ዱክን ኦሎንዛራ ያእዲና፤ 23ብሽን ክሳም ይያፓድሞንታኻ ማታቴ ናዴ፣ ኖ ኣፕካ ክዶንም ኬናንቴ ጌያዳና ኤርጎን ኤናም ይያፓዶንም ዎናንቴ ጌይዲና። 24ዎግዶርካኻሞ ኤና ዋኒ ዱክን ኦሎንዛራ ቃልቴ ሜና ይጌያዳግያ ኣጋንታ ኮዶን ሃፕዲና ኮዶን ኬ ኢየሱስም ሃፓድማሞ።” 25ኖኻሞ ኬግያ ይንታና ክያማዶ፦ “ዬቲ ክና ዬርን ጶቅስምና፣ኤና ባርያሳ ኣፖን ጌያይናሳ ኣፖን ጌይዻዶንም ዎይላምንሳ ኣምናናንቴ ጵጭጭምና፤ 26ክርሰቶስ ጋላ ካም ክጋላንቤ ይሳ ጎሽንዛራ ክኣርዳይንም ዛግሳይዬው?” 27ሙሴ ዋርቃትሮኻ ካርሳንቴ ኤና ባርያሳ ኣፖን ጌያይናሳ ኣፖን ኬጌያዶን ፓይላዛራ ዋርቃትን ጋዛሮ ዬርን ክሳ ኡካዻዶንም ኬናንቴ ፃሊ ጌይዲና። 28ኬ ሞራ ይንዛራን ይያኣያም ይዬስካና፣ ኢየሱስ ሳጋንቴ ያኣያግያና ክዶ። 29ኮዶን ኬ “ሃዮኖ እባንቴ ኮዶንታኻ፣ ፔኖኻሞ ሶትቴ ኮዶንታኻ ዎላማ ክንካ ዎዽማ” ሃማንቴ ኬ ኪም ካሎን ምስክዲና፤ ኣጋታኻ ኖ ኬላማ ክንካ ዎዻናንቴ ኣርድዲና። 30ኖ ኬላማ ክንካ እꬅማናንቴ ይዳርቃዶን ዋዳንካ ባላሻን ቻንቴ ባርያም ጎሽዲና፤ ቁንፃንቴኻሞ ኬናንቴ እምዲና። 31ዋዳ ኣጋኻ ኬሳ ኣፕና ፖችምዲና፤ ኬኻሞ ኪም ዼስዲና፤ ኖኻሞ ኬኻላንካ ካይዲና። 32ኬኻሞ ክግያ፤ “ጎይሮ ንቴ ዎዳዃ፣ ዎም ዼላቅስቴ ዋርቃትን ጋዛን ዎናንቴ ጌይቴ ክዳዃ ዎይላምኖ ዎሳ ኣትቴሞ ኮዶኖ?” ና ኬያማዶ። 33ሳኣታ ኣጋኻ ኬ ዻጳንቴ ዬሩሳሌምዛራ ማትዲና፤ ኤና ታጲ ካላናቤ ኤና ኬላማን ዳናቤ ክንካ ፑጫንቴ ኣጎታር ኬዳዃ ኬ ሃፕዲና፤ 34ኬኻሞ ክግያ፣ “ጌጳ ዴምጲንባራ ጎንዼ ዻጲዲና፣ ስምኦንናንቴኻሞ ሃፕንዽዲና” ሃምቴና ኬዶ። 35ኤና ኪም ጫጋይና ላማናኻሞ ዬራ ጎይሮጎ ሃምማዳናቤ ኢየሱስ ባላሻን ኬናንቴ ክፓጫዶን ዋዳንካ ኬ ኪም ሃሞንታ ሃያንቴ ኬዼሳዶንም ኬናንቴ ጌይዲና።36ኬ ኣጋም ዼላቅቴ ኬዳዃ፣ ኢየሱስ ይዻር ኬሳ ባክሮጎ ዎያንቴ ኬግያ፣ “ፃሊኖ ዬናንቴ ኮዴ” ና ክያማዶ። 37ኮዶን ኬ ቃꬅማንቴ ጌጲ ኩርትንዽዲና፤ ቤሮ ይያፓዳኻሞና ኬማይሻዶ።38ኖኻሞ ኬግያ ይንታና ክያማዶ፦ “ሃርናንቴ ዎይላም ዬታኬ? ሃርናንቴ ዬሳ ዎይላም ኮቃጋዼ? 39ኣንና እሳቤ ራና እሳቤም ሼድማቴ፣ ኣጋ እንታና። ይንዳ ኢም ላኣሳንቴ ሼድማቴ፤ እዛራ ብሽቤ ላፖቤ ዬሻዳዳግያ ቤሮዛራ ብሽቤ ላፖቤ ቆልማሞ።” 40ኣጋም ኖ ይጌያና ኣንና ይሳቤ ራና ይሳቤም ኬናንቴ ዻውዲና።41ኬኻሞ ዋዝንዽቴቤ ዬርሽቴቤ ኣኻራ ኣምናድማሞ። የሱስ ኬግያ፣ “የኻላ ዬር እꬃዻያ ዳይዲው?” ና ክያማዶ። 42ኬኻሞ ካራ ኮቅዲ ሾሊ ካላ ክናንቴ እምዲና፤ 43ኖኻሞ ቻንቴ ኬሳ ዎትሮጎ እꬅዲና። 44ኖኻሞ ኬግያ፣ “ኣና ዬላማ ክንካ እዶን ዋዳንካ ‘ሙሴ ዋርቃትሮቤ ኤና ባርያሳ ኣፖን ጌያይናሳ ኣፖን ኬጌያዶሮቤ፣ ዋርሳና ዋርቃትሮ ኡካዻዳናቤ ግዶር ዬራ እሳ ጌይዻዳና ፓይላ ሃምማና ኬያምማይ’ ሃማንቴ ዬናንቴ እጌያዳ ኣፓ እሳ ካና” ና ክያማዶ። 45ዋዳ ኣጋኻ ዋርቃትን ጋዛንሳ ዼላቅኖ ኮአርዴኻናንቴ ሜቴን ኬሳም ኬናንቴ ዋጭ ሃይዲና፤ 46ኬግያ ይንታኻሞና ክያማዶ፦ “ይንታ ሃማንቴ ዋርቃትሮ ኡካዽዲና፤ ‘ክርስቶስ ጋሎን ጋላና ክላይ፤ ሮራ ማክንሳኻኻሞ ዴምጲንባራ ዻጳና ክዻጳይ፤ 47ባርያ ኤናሳ ሴሶን ክጋሬኻናንቴ ባርያዛራ ማትንቶ ዼላቅ ዬሩሳሌም ግዶርካ ካርሳንቴ ቶርስን ኤና ፓይላናንቴቤ ክሳ ናብንካ ጌያና ጌይዻይ’48ዬትካሞ ዬራ ክናሳ ማኚና ዬዳይ። 49እንታኻሞ ኣባሳ ዼላቃ ጌይዻዳም ዬናንቴ ንእሳና እንሳይ፤ ኮዶን ዬቲ ጳባራኻ ካንታ ዬሳ ሃፓዛራ ዬሩሳሌም ግዶር ካፕማቴ።”50ኣጋሳ ራስባራ ኖ ኬም ኣንሳቴ ቢታንያዛራ ውትዲና፤ ኣን ይሳም ዻሳንቴ ኬም ፑግዲና። 51ኬም ፑግቴ ክዳዃ፣ ኬኻላንካ ኪም ፖላንዛራ ቻዽዲና።52ሃያንቴ ኬ ክናንቴ ኮምፓርስዲና፤ ዋዛ ጌጵካኻሞ ዬሩሳሌምዛራ ኬ ማትዲና፤ 53ኬኻሞ ሮሮ ውል ባርያም ጎሽቴ ባርዮን ኦኖሮጎና ኬዶ።