¹Liv dji jehasiõ dji Jezi Khi, pitxit dji Davi, pitxit, dji Abhaão. ²Abhaão fe Isaque; i Isaque fe Jacó; i Jacó fe Judá i so fue-ela. ³I Judá fe dji Tamar a Perez i a Será; Pérez fe Esron; i Esron fe Ahão.⁴I Ahão Aminadabe; i Aminadabe fe Naassom; i Naassom fe Salmom. ⁵I Salmom fe dji Haabe a Boaz; i Boaz fe dji Hute, Obede, i Obede fe Jessé. ⁶I Jessé fe vue Davi; i Davi fe Salomão ke sa ki ate fãm dji Uhias.⁷I Salomão fe Hoboão; i Hoboão fe Abias; i Abias fe Asa. ⁸I Asa fe Josafá; i Josafá fe Johão; i Johão fe Uzias.⁹I Uzias fe Jotão; i Jotão fe Acaz; i Acaz fe Ezequias. ¹⁰I Ezequias fe Manassés; i Manassés fe Amom; i Amom fe Josias. ¹¹I Josias fe Geconias, i so fue-iela la tã ki pov dji Izhael ale kumã phuiziõne pu Babilonia.¹²Aphue ki pov-la ale pu Babilonia Jeconias fe Salatiel; i Salatiel fe Zohobabel. ¹³I Zohobabel fe Abiúde; i Abiúde fé Eliaquim; i Eliaquim fe Azor. ¹⁴I Azor fe Zadoque; i Zadoque fe Aquim; i Aquim fe Eliúde.¹⁵Eliúde fe Eleazar; i Eleazar fe Matã; i Matã fe Jacó. ¹⁶I Jacó fe José, om dji Mahi dji sa ki fe Jezi sa ki aple Jezi Khi. ¹⁷Kõsa gãiẽ Katoz gehasiõ dji Abhaão juk Davi, i Katoz dji Davi juk ju ki pov dji Ishael ale kumã phuiziõne pu Babilonia. Djila juk ju ki Messias fet, osi gãiẽ Katoz gehasiõ.¹⁸I kã Jezi Khi fet ale kõsa, avã Mahi te maie ke José, avã ki ie te hete ãsam , li hete ãsen dji Sethesphui. ¹⁹Ẽbe José, so om, te jis, li pa te le fe Mahi pase hõte djivã mum, li majinẽ pu li lese'l ãseghe.²⁰I li te pi mio sa, un zãj dji Sẽie pahet la so hev, li dji: José, pitxit dji Davi pa pe husuve Mahi, u fam, pase sa ki li ke fe a dji Sethesphui. ²¹I li ke bai klehite un pitxit,i u aple so nõ Jezi, Pase li ke sove so pov dji ie pexe.²²I tut sa fet pu kõphui sa ki Sẽie dji pu phofeta-iela: ²³I ki un viej ke hete ãsen, i ke bai klehite un pitxit, so nõ Emanuel, ki signifike Bõdje ke no.²⁴I José leve dji so hev, li fe kumã zãj dji Sẽie te dji pu li, i husuve u fam. ²⁵I li pa te Konet Mahi, juk mumã ki li bai klehite un pitxit, i li mete so nõ Jezi.

¹I Aphue ki Jezi fet la Belém dji Judéia, lãdã se ju dji vue Hehodes, un dê magos vini dji Oriente la Jehusalém. ²Ie dji kote Vue dji judeu-iela ki sotxi fet? Pase no ue so zetuel la Ohiente, i no vini pu adohel. ³I vue Hehodes, kã li tãde sa, li hete thakase, i ke li tut Jehusalém.⁴Kã ie hasãble tut lidehãs dji judeu-iela i lidehãs dji laluá dji pov-la. Li dumãde ki kote Jezi Khi sotxi fet. ⁵Ie dji kõsa: la Belém dji Judéia, pase akõsa phofeta ekhi: ⁶I u Belém, late dji Judá dji pies mãiẽ u pa pitxi ãt lidehãs dji Judá, pase dji u ke sotxi un guviãnaj pu kõdji mo pov Ishael.⁷Ẽbe Herodes , voie aple ie ãseghe magos-iela, dumãde dji ie ki tã sa zetuel pahet. ⁸Li voie ie la Belém: zot ale sase ke pokosiõ suje sa tximum-la:Kã zot thuvel zot viatxi mo vini adohe'l.⁹I aphue ki ie kute vué-la, ie ale. I sa zetuel ki ie ue la Ohiente li te ka ale djivã dji ie, juk tã li hive, i li hete ãle kote tximun-la fika. ¹⁰Ie ue zetuel-la ie hete boku kõtã!¹¹Ie ãthe lãdã kaz-la, kõthe tximun-la ke so mãmã Mahi, i ie ãjunü i ie adohel. I ie luvui ie kof, ie ofui kado: lo, isẽs, i mirra. ¹²Mẽ kã ie tonẽ pu ie late, ie pa pase pa Jehusalém pu hakõte pu Hehodes, pase Bõdje viatxi lãdã un hev pu ie tonê pu un not ximẽ.¹³I kã ie ale, un zãj dji Sẽie pahet pu José lãdã so hev, li dji: leve phã sa tximun-la ke so mãmã, mahõ pu Egito, i hete laba juk tã mo dji, pase Hehodes Ka sase tximun-la pu txue. ¹⁴Ẽbe li leve, li phã tximun-la i so mãmã nãnuit, ie ale pu Egito; ¹⁵Ie hete laba juk tã Hehodes muhi, pu li puve kõphui sa ki Phofeta-iela dji: dji Egito mo aple mo pitxit.¹⁶Ẽbe Herodes, tã li ue ki magos-iela kuiẽnẽ'l, li hete boku kole, li voie txue tut tximun-iela la Belém i tut pahãtxie hegiõ, dji laj dji dê anẽ pu ãba, kumã ie te dumãde dji magos-iela.¹⁷Ẽbe li kõphui sa ki Phofeta Jehemias dji: ¹⁸un vue ki tãde la Hamá, khie, i ghã lapen; Haquel khie pu so pitxit-iela, i li pa te le kõsole, pase ie pa la ãko.¹⁹Mẽ aphue ki Hehodes muhi, un zãj dji Sẽie pahet la Egito pu José lãdã un hev. ²⁰Li dji: leve phã tximun- la i so mãmã, i ale pu late dji Ishael, pase ie deha muhi sa ki te le txue tximun-la ke so mãmã, ie tonẽ pu late dji Ishael. ²¹Ẽbe li leve, li phã tximun-la ke so mamã, ie tonê pu late dji Ishael.²²Kã li tãde ki vue Ahquelau Ka kumãde la Judéia la plas dji so papa Hehodes, li hete pé dji ale laba, mẽ Bõdje viatxi li lãdã un hev, pu li pa ale pu Judéia, li ale pu hegiõ dji Galiléia. ²³I vini hete la kote ki Ka numê Nazahé pu li ve kõphui sa ki Phofeta-iela dji: Ie ke aple li dji Nazaheno.

¹Lãdã sa ju-iela Jã Batxis vini li te ka pase pahol dji Bõdje la un kote ki pa gãiẽ ãiẽ (deserto), la Judéia. ²Li te ka dji: zot hepãtxi, zot pexe pase lasosiete dji lahosiel deha phox. ³Pase a li mem Phofet Isaías deha deklahe li dji: vue ki Ka klãme la kote ki pa gãiẽ ãiẽ (deserto): "zot phuepahe pu Sẽie i dhese so ximẽ pu li pase.⁴Jã so lẽj a te dji lapo dji xãmu, i so sẽtxie a te dji lapo i so mãje a te sothel i miel sovaj. ⁵Ẽbe te ka vini kotel mun, dji Jehusalém, dji tut Judéia i dji tut hegiõ ki phox dji Johdão. ⁶Jã te ka batxize ie la lahivie Johdão, ie te Ka kõfese ie pexe⁷Mẽ kã li ue boku fahiseu i saduseu te ka vini pu batem-la. Li dji pu ie ,has dji siapã ki move ,ki mun ke mõthe zot, ki zot ke mahõ dji pinitãski ka vini. ⁸zot fe bagaj ki bõ pu mõthe ki zot hepãtxi dji zot pexe. ⁹Pa majinẽ pu dji pu zot ko mem " no gãiẽ Abhaão kom no papa " pase no ka dji zot ki juk dji sa hox-iela Bõdje fe pitxit pu Abhaão.¹⁰I ato hax-la lasu hasin dji piebuá-iela, mẽ tut piebuá ki pa ka bai bõ fui, ie ka kupe, ie ka jite li la djife. ¹¹Mo ka batxize zot ke djilo pu mõthe ki zot hepãtxi, me sa ki ke vini aphue dji mo li pi gãiẽ povua pase mo ,no pa mehite xaie so savat, Li ke batxize zot ke Sêthesphui i ke djife. ¹²Li ke so pel la lãmẽ , li ke sepahe fahin fãs-la dji so pai, Li ke hamase fahin fãs-la li ke mete la so kaz. Mẽ li ke bule pai-la ke djife ki pa ka jẽ finï .¹³Ẽbe Jezi vini dji Galiléia pu Johdão kote Jã, pu Jã batxize Li . ¹⁴Mẽ Jã te le apexel, li dji : a mo ki buẽzẽ u batxize mo, i a u ka vini kote mo ? ¹⁵Jezi hepon: lese kõsa pu le mumã, pase akõsa no ka fe volõte dji Bõdje, ẽbe Jã dako.¹⁶Aphue ki Jezi batxize, li sotxi dji djilo-la, i siel-la luvui i li ue Lesphui dji Bõdje ka desan ã fom dji un hãmie. Li pose lasu Li. ¹⁷I un vue vini dji lahosiel , dji: sa a mo pitxit ki mo kõtã. Li ka bai mo boku kõtãtmã.

¹Aphue, Lesphui-la ale ke Jezi pu un kote ki pa gãiẽ ãiẽ (deserto)pu djiab-la tãte Jezi. ²Aphue ki Jezi pase kahãt ju i kahãt Nuit sã mãje li hete fẽ. ³Djiab-la vini kote Jezi li dji: "si u sa pitxit dji Bõdje, bai zod pu sa hox vihe djipẽ! " ⁴Mẽ Jezi hepon: pahol Sẽ-la dji kõsa. un mun pa ka viv selmã dji djipẽ , mẽ dji tut pahol ki Ka sotxi dji Bõdje so bux.⁵Aphue djiab-la pote Jezi la Jehusalém, pei ki Sẽ, li mete Jezi la un plas ki pi hot dji kaz dji Adohasiõ. ⁶Djiab-la dji. si u sa pitxit dji Bõdje, jite u ko dji esi, pase pahol ki Sẽ-la ka dji: Bõdje ke voie so zãj-iela pu ẽtxupe dji u, ie ke txẽbe la u lãmẽ, pu u pie pa blese lasu hox.⁷Jezi hepon: Mẽ pahol Sẽ-la osi ka dji: "pa mete lãdã situasiõ difisil , Sẽie u Bõdje". ⁸Aphue Djiab la pote Jezi la un mõtãi boku hot, li mõthe tut lasosiete dji tã-la i so hixez. ⁹Li dji mo ka bai tut sa pu u si u ãjunu i adohe mo.¹⁰Jezi dji: ale u ximẽ satã! pahol Sẽ-la ka dji: " adohe u Sẽie , Bõdje i suiv selmã li. ¹¹Aphue Djiab- la ale, i vini zãj ie ẽtxupe dji Jezi.¹²Kã Jezi save ki Jã ale phui,li ale pu hegiõ dji Galileia, ¹³Li pa hete la Nazahe, mẽ li ale hete la pei dji Kafahnaum, obo lag dji Galileia la hegiõ dji Zebulom i Naftali.¹⁴Sa fet pu kõphui sa ki Phofeta Isaías te dji: ¹⁵"late dji Zebulom i late dji Naftali, la djihesiõ dji ghã lãme , la uot bo dji lahivie Johdão, Galileia, kote ka hete vakabõ-iela! ¹⁶mun ki Ka viv lãdã suku ke ue un fo klehite! i sa klehite-la ke klehe lasu sa ki Ka viv la hegiõ dji lamo !¹⁷Dji la pu djivã, li kumase ãnüsie so pahol. Li te ka dji: hepãtxi dji zot pexe-iela, pase lasosiete dji lahosiel phox.¹⁸Jezi te ka maxe ovo Lag dji Galileia kã li ue dê fue ki a te pexo: Simõ, osi ie te ka aple dji Pie, i Andhe , ie te lãdã Lag te ka pexe ke ie thamaj ¹⁹Jezi dji pu ie: vini ke mo, no ke mõthe zot pexe mun. ²⁰Ẽbe ie lese ie thamaj ie ale ke Jezi.²¹Un tximoso pi djivã Jezi ue uot dê fue, Txiago i Jã , Zebedeu so pitxit-iela, ie te lãdã bato ãsan ke ie papa, te ka hãje ie thamaj . Jezi aple ie dê. ²²I la mem lokasiõ, ie lese ie papa i bato ie ale ke Jezi.²³Jezi maxe pu tut Galileia te ka mõthe la kaz dji Adohasiõ i ãnüsie Bõ nuvel, i te ka djiehi maladji ghav dji mum-iela. ²⁴Nuvel a hespek dji Jezi Kate pu tut hegiõ dji Síria. Pu sa pov-la te ka pote pu Jezi mum ki te ka sufui dji boku maladji, i tut kalite djimal, kumã mun ki pa te ka maxe i mun ki te ke Lesphui dji demuẽ, li te ka djiehi tut. ²⁵Ghã mutxidõ te ka suiv li , a te mun dji Galileia, i dji djix pei, dji Jehusalém, dji Judeia, dji hegiõ ki Ka hete bo Levã dji lahivie Johdão.

¹Kã Jezi ue sa ghã mutxidõ, li mõte la un mõtãi li asi. So djisip-iela hive obo li, ²I Li kumase mõthe ie. Jezi dji: ³Biẽ kõtã sa mun ki pov dji lesphui, pase Lasosiete dji Lahosiel a ie pa. ⁴Biẽ kõtã sa mun ki ka khie, pase Bõdje ke kõsole ie.⁵Biẽ kõtã sa mun ki pa gãiẽ ãiẽ, pase ie ke husuve late-la. ⁶Biẽ kõtã sa ki gãiẽ fẽ i suef dji fe volõte dji Bõdje,li ke ie kõpletmã kõtã. ⁷Biẽ kõtã sa mun ki gãiẽ lapen dji uot mun-iela, Bõdje ke gãiẽ lapen dji ie. ⁸Biẽ kõtã sa mun ki gãiẽ un bõ txo, ie ke ue Bõdje.⁹Biẽ kõtã sa mun ki ka thavai pu kõtãtmã, Bõdje ke ẽtxupe kumã so pitxit-iela. ¹⁰Biẽ kõtã sa mun ki ka sufui pehseguisiõ, pu fe Bõdje so volõte, Lasosiete dji Lahosiel a ie pa.¹¹Biẽ kõtã a zot, ka ie ka juhe zot, plede, i Kã ie ka dji tut kalite mãto kõt zot, pase zot sa mo siavitó-iela. ¹²Zot hete kõtã, pase un ghã hekõpãs sehe lahosiel pu zot. Pase akõsa men ie fe ke Phofeta ki vini ãvã zot.¹³Zot sa djisel dji late- la, mẽ se djisel piad so gu, pukisa li ke siavi? li posib pu li hete salê ãko? Ie ke jite'l deho mun ke djibut lasu'l, pase li pa ka siavi pu ãiẽ. ¹⁴Zot sa klehite pu tã-la, ïposib sehe un pei ki ie edjifike ãle un mõtãi.¹⁵Pies mun pa puve limẽ un lalãp i mete'l ãba un pãiẽ, okothe, ie ke mete'l un kote phop pu klehê tut sa ki lãdã kaz-la. ¹⁶Akõsa osi zot klehite djivet klehe pu uot mun-iela ue bagaj ki bõ ki zot ka fe, i pu ie osi lue i adohe zot Papa ki ka hete Lahosiel .¹⁷Zot pa majinẽ ki mo vini pu fini ke lalua dji Moisés o ke pahol dji uot Phofeta-iela. Nõ, mo pa vini pu fini ke ie, mo vini pu kõphui ie. ¹⁸Mo ka asihe zot ki sa a lavehite: Ẽkãt siel i late duhe, ãiẽ pa ke sotxi dji laluá-la nẽ pipitxi let-la i akõsa ke hete juk finisiõ de tut bagaj-iela.¹⁹Mun ki pa obei un dji sa lalua-la, i mõthe uot mun fe mem bagaj, ie ke kõsidehe li kumã pipitxi dji Lasosiete dji Lahosiel. I mun ki obei lalua-la i mõthe uot mun fe mem bagaj, ie ke kõsidehe li kumã ki pi gho la Lasosiete dji Lahosiel. ²⁰Mo ka asihe zot, ki u ke sel ãthe la Lasosiete dji Lahosiel si u hete fiam pu fe volõte dji Bodje,plis ki met dji lalua i fahiseu-iela²¹Zot tãde akisa ie dji pu zot ãtepase-iela :" pa txue, mun ki txue ke kõdãnẽ" ²²Mẽ mo ka dji mun ki hete kole ke so fue ke kõdãnẽ. Mun ki dji pu so fue u pa vu ãiẽ ke kõdãnẽ pu thibunal, mun ki aple so fue dji kuiõ, ke kõdãnẽ pu djife dji lãfe.²³Kã u ka ofui pu Bõdje u sakhifis la djivã leglis, i laba u xõje ki u fue gãiẽ un kek bagaj kõt u , ²⁴lese u sakhifis djivã leglis i ale phõmiẽ dumãde padõ dji u fue, i aphue vini phuesãte u sakhifis pu Bõdje.²⁵Ãthe vit lãdã hekosiliasiõ ke u fue i u elmi, ẽkãt u ke li lãdã ximẽ dji thibunal, pu li pa pote u pu xef-la, i xef-la pu soda-la, ie ke jite u lãdã phuisiõ. ²⁶Mo ka asihe u ki sa a lavehite, u pa ke sotxi dji laba ẽkãt u pa peie tut u kõt.²⁷Zot tãde sa ki ie dji: pa hete ke uot fam i uot om. ²⁸Mẽ mo ka dji pu zot: mun ki gade pu un fam ke mal ïtẽsiõ , i lide pu hete ke li, deha fe pexe lãdã u txo.²⁹Si u uei adhet ka fe u fe pexe, haxe'l i jite'l deho, pase pi bõ u piad un pedas dji u ko dji ki tut u ko ale pu lãfe. ³⁰Si u lãmẽ adhet ka fe u fe pexe, kupe'l i jite'l deho, pase pi bõ u piad un pedas dji u ko , dji ki tut u ko ãtxe ale pu lãfe.³¹Ie dji osi: "mun ki voie so fam ale li djivet bai pu li un papie dji sepahasiõ." ³²Mẽ mo ka dji pu zot: tut om ki voie so fam ale, sã li pa hete ke uot om, om-la ke hete ke fot dji fe fam-la fe pexe, i si fam-la maie ãko. I om ki maie li osi ka fe pexe.³³Zot tãde akisa ie dji pu zot ãtepase-iela: pa kase u phomes, mẽ kõphui, sa ki u phomet pu Bõdje ki u ke fe. ³⁴Mẽ mo ka dji pu zot, pa phomet dji pies mãiẽ . Pa phomet pu siel, pase a kote Bõdje ka hete, ³⁵pa phomet pu late, pase a kote Bõdje ka pose so pie, pa phomet pu Jehusalém, pase a pei dji no ghã Vue .³⁶I osi pa phomet pu u tet, pase zot pa puve fe ki un dji zot fil xive hete blã o nue . ³⁷A pu zot dji: "ui" "ui", o "nõ" "nõ "; sa ki pase dji sa ka vini dji elmi.³⁸Zot tãde akisa ie dji pu zot : "uei pu uei i dã pu dã". ³⁹Mẽ mo ka dji pu zot: pa hãde lasu sa ki Ka fe djimal pu zot. Si un kek mun fut la u vijaz vihe uot bo-la pu li fut osi.⁴⁰Si un kek mun plede ke u pu phã u *lẽj , lese li ale ke u *kap osi. ⁴¹Si un soda ẽthãje fose u xaie un xaj un kilomet, xaie'l dê kilomet . ⁴²Si un kek mun dumãde un kek bagaj, bai; i, si un kek mun dumãde pu phuete, phuete'l.⁴³Zot tãde akisa ie dji: "kõtã zot kamahad-iela i pa kõtã zot elmi-iela." ⁴⁴Mẽ mo ka dji pu zot: kõtã zot elmi-iela i phuie pu sa ki Ka kose mal dji zot. ⁴⁵Pu zot puve tonẽ pitxit dji zot Papa ki ka hete Lahosiel . Pase li ka fe solei klehe lasu mun ki bõ i lasu sa ki mixã-iela i li ka bai lapli pu sa ki Ka fe ddjibiẽ kumã osi pu sa ki ka fe djimal.⁴⁶Si zot kõtã selmã sa ki kõtã zot, pukisa zot ka ãtan ki Bõdje bai zot un kek hekõpãs? publikan-iela osi pa ka fe mem la? ⁴⁷Si zot pale selmã ke zot kamahad-iela,akisa zot ka fe dji ïpohtã ? publikan-iela osi pa ka fe mem la? ⁴⁸Zot hete jis kumã no Papa, ki Ka hete Lahosiel jis.

¹Zot hete ka veie pu zot pa fe zot bõ volõte dji thavai djivã mun-iela ãfẽ dji ue zot pahet djivã mun-iela; dji uot mãiẽ ki pa ke gãiẽ hekõpãs dji zot Papa dji Lahosiel .²kã zot bai un kek bagaj pu un mun ki nesesite, pa hakõte kisa u fe, kuma vakabõ-iela ka fe la "Kaz dji Adohasiõ" i la lahi, pu ie pahet djivã mum-iela; Ã lavehite mo ka dji pu zot ki ie deha husuve ie hekõpãs.³Me kã zot fe xahite, zot lãmẽ agox pa save akisa zot lãmẽ adhet ka fe.⁴Pu fe xahite ãseghe, i zot papa, ki ue ãseghe, ke hekõpãse zot.⁵I Kã zot ke phuie, pa fe kumã vakabõ-iela; pase ie kõtã phuie dji djibut la "kaz dji Adohasiõ", i la lahi pu ie pahet djivã mun-iela. A lavehite mo ka dji pu zot ki ie deha husuve ie hekõpãs .⁶Ẽbe u, kã u ke phuie, ãthe la u xã, fõmẽ lapot, i phuie pu u Papa, ki la ãseghe, li ke hekõpãse-u .⁷I Kã u ke phuie, pa numê mem pahol boku fue, kumã sa uot mun-iela ki pa batxize, ie ka majinẽ pi ie phuie lõg Bõdje ke kute ie.⁸Pa fe sãble ie, pase ãvã zot dumãde zot Papa deha save akisa zot buẽzẽ.⁹Ẽbe zot phuie kõsa: no papa ki lahosiel, u nõ a hespek tupatu.¹⁰Vini u Lasosiete . Pu fe u volõte, kõsa lasu late, i kõsa lahosiel.¹¹Bai no jodla no djipẽ dji xak ju .¹²I padõnẽ dji no pexe, kumã no osi padõnẽ sa ki te fe pexe kõt no.¹³I pa lese no tobe lãdã tẽtasiõ, me delivue no dji tut djimal.¹⁴Pase si zot padõnẽ mun-iela dji ie pexe, zot Papa ki Lahosiel osi ke padõnẽ zot.¹⁵Mẽ si zot pa padõnẽ mun-iela, osi zot Papa ki Lahosiel pa ke padõnẽ dji zot pexe.¹⁶I kã zot ka fe jẽnẽ, zot pa mõthe ki zot this, sãble vakabõ-iela; pase ie ka mõthe ie vijaz, pu ie pahet djivã uot mun-iela ki ie ka fe jẽnẽ . Ã lavehite mo ka dji pu zot ki ie deha husuve ie hekõpãs.¹⁷Me u, kã u ka fe Jẽnẽ, thãpe u tet i lave u vijaz ,¹⁸pu pa pahet djivã mun-iela ki u ka fe jẽnẽ, me ui pu u Papa, ki la ãseghe; i u Papa ki ue ãseghe ke hekõpãs u.¹⁹Pa hamase pu zot hixez lasu late, kote mit i lahuj ke huie li, i kote vole ka xakaia i ka volo.²⁰Mẽ hamase pu zot hixez dji lahosiel, kote mit i lahuj pa ka huie i kote volé pa ka xakaia i volo .²¹Pase kote gãiẽ u hixez, laba osi ka hete u txo.²²Klehite dji u ko a uei; Ẽbe, si u uei "phop", tut u ko ke hete plẽ ke lime.²³Me si u uei mal, tut u ko ke hete la suku. kõsa si Klehite ki lasu u vihe suku. A txi gho vilẽ suku.²⁴Pies mun pa puve siavi dê pathõ; li ke lese un, i li ke kõtã un; pu un li ke fe biẽ pu uot la li pa ke fe biẽ . u pa puve siavi Bõdje i hixez.²⁵Apusa mo ka dji pu zot: pa thakase ke u lavi, suje akisa u gãiẽ pu mãje, akisa u gãiẽ pu bue, nẽ pu u phop kó, a ki lẽj u gãiẽ pu ise.A pa lavi ki plis Bõ pase mãje, i u ko pase lẽj ?²⁶Gade txizozo-iela ki Ka vole lahosiel, ie pa ka sõmẽ ,ie pa ka hamase, nẽ hamase pu sehe, i ke tut sa zot Papa ki Lahosiel ka suen dji ie ke mãje. A pa zot ki pi boku ïpohtã pase ie ?²⁷Ki mun dji zot puve, fe so lavi pi lõg, ki Ka pi thakase ke sa ?²⁸I pukisa u ka maxe thakase ke lẽj? Gade butxie dji savã kumã ie ka puse, ie pa nẽ ka thavai nẽ nate.²⁹I mo ka dji pu zot ki nẽ Salomão, ke tut so fos. Li ise lẽj kumã un dji ie.³⁰Si Bõdje ka mete lẽj dji sa mãiẽ la sa plã dji savã, ki jodla li ka ise, i djimẽ li ka jite li la djife. Ẽbe, osi Bõdje ke mete lẽj lasu zot osi ki gãiẽ tximoso espua.³¹Pa maxe, ka majinẽ , ki u ka dji: akisa no ke mãje? " akisa no ke bue?" "ki lẽj no ke ise?³²Pukisa mun ki pa batxize ka sase tut sa bagaj-iela, i zot Papa ki Lahosiel save ki zot nesesite dji tut sa bagaj-iela.³³Me sase phõmiẽ Lasosiete i so hespek i tut sa bagaj-iela li ke bai pu zot .³⁴Pa maxe ka majinẽ , pu ju dji djimẽ, ju dji djimẽ ke ẽtxupe dji li phop. Li bõ xak ju ke so djimal.

¹Pa kõdãnẽ, pu u pa se kõdãnẽ,²Pase ke mem fom ki u ka kõdãnẽ, i ke mem mizu ki u ka mizuhe uot ie ke mizuhe u osi.³Pukisa u ue fuifui ki la uei dji u fue i u pa ue sa ki la u phop uei?⁴kumã u ke dji pu u fué "lese mo txihe fuifui ki la u uei" si li gãiẽ fuifui lãdã u phop uei!⁵Hipokhita? txihe phõmiẽ fuifui dji u uei! Ẽbe u ke ue kle pu txihe fuifui dji u fue so uei.⁶Pa bai sa ki sẽ pu xẽ-iela, pa jite bagaj dji valé pu koxõ-iela, pase koxõ- iela ke djibut ãle bagaj dji valé, i xẽ-iela ke vini kõt u ie ke atake u.⁷Dumãde zot ke husuve; sa ki ka sase ke thuve; bat i lapot-la ke luvui.⁸Pase sa ki ka dumãde ke husuve, mun ki ka sase ke thuve, sa ki bat lapot li ke luvui.⁹Ki mun ki ãt zot, ki se so pitxit dumãde djipẽ , li ke bai un hox?¹⁰Si dumãde puasõ, li ke bai un siapã?¹¹Si zot tuju mixã, sase bai bõ kado pu zot pitxit, Kã zot pPapa ki Lahosiel , bai bõ bagaj pu sa ki ka dumãde!¹²Pase tut sa ki u le ki uot fe, zot fe osi kõsa: pase sa a alpha dji Phofeta-iela.¹³Ãthe pu lapot ki exthuet, pase laj a lapot, ki ghã pase a ximẽ ki ka pote pu Kõdẽnasiõ, i boku mun ka ãthe.¹⁴Pase exthuet a lapot-la, i sehe a ximẽ ki ka pu lavi , i a kote tximoso ke ãthe.¹⁵Ãtãsiõ, ke phofeta ki ke vini ke lẽj dji mutõ, mẽ ãdjidã a xẽ ki mixã.¹⁶Zot konet pu so fui-iela: li posib hamase uva dji plã ki gãiẽ pikã o u ke hamase figo dji pie zutxi.¹⁷kõsa tut bõ pie-bua ka bai bõ fui, mẽ pie-bua ki pa bõ pa ka bai bõ fui.¹⁸Pie-bua ki bõ pa puve bai fui ki pa bõ, i osi pie-bua ki pa bõ pa puve bai bõ fui.¹⁹Tut pie-bua ki pa ka bai bõ fui ie ke kupe'l i jite lãdã djife.²⁰Zot ke konet, pu so fui-iela.²¹A pa nẽpot mun ke dji pu mo: "Sẽie, Sẽie" ke ãthe la lasosiete dji lahosiel, mẽ ui sa mun ki ka fe volõte dji no Papa ki Lahosiel.²²Kã sa ju-la ke hive, boku mun ke dji pu mo: "Sẽie, Sẽie " pu povua dji u nõ no pase mẽsaje dji Bõdje, no txihe demuẽ i no fe boku mihak!²³Mo ke hepon:" Mo pa konet zot! hete luẽ dji mo, zot ki ka fe djimal."²⁴Tut sa ki ka kute mo pahol, i viv kumã li ka dji mo ka kõpahe kumã un om ki ïtelijã ki leve so kaz lasu un hox.²⁵ke tõbe lapli, djilo-la ke vini gho, i vã-la ke sufle ke fos kõt kaz-la. Mẽ li pa tõbe, pase li te edjifike lasu hox-la.²⁶Mẽ tut ki ka kute mo pahol i pa ka viv kumã li ka dji mo ka kõpahe kumã un om ki fu ki fe so kaz lasu ban-sab.²⁷ke tõbe lapli djilo-la ke vini gho, i vã-la ke sufle ke fos kõt kaz-la. Kaz-la tõbe i hete dethi totalmã.²⁸Kã Jezi fini dji kose, mun-iela hete susphan ke so mãiẽ dji mõthe.²⁹Jezi te ka mõthe kumã un mun ki gãiẽ otohite, i nõ kumã met dji lalua-iela.

¹Kã Jezi desan dji mõtãi, boku mun suiv li.²Un on te gãiẽ bobo (lepra),vini ãjunü djivã Jezi, li dji: suple Sẽie, djiehi mo si u puve.³Jezi lõje so lãmẽ, li tuxe li dji: ui mo le djiehi'u. Lãdã men lokasiõ li hete phop dji so bobo.⁴Ẽbe Jezi dji: kute! pa hakõte sa pu pies mun, mẽ ale dumãde dji sasedotxi pu ẽsãmine zot. Aphue, ãfẽ pu tonẽ laphuev pu tut mun ki zot djiehi, zot ale ofui sakhifis ki Moisés dji.⁵Kã Jezi ãthe la pei dji Kafahnaum vini kote li un xef dji sã soda,⁶Li dji: Sẽie mo siavito la kaz malad i pahalize, li ka sufui boku ke dulo.⁷I Jezi dji: Mo ka ale djiehi'l.⁸I xef-la dji: Sẽie mo pa mehite pu u ãthe la mo kaz, mẽ sel dji un pahol mo siavito ke hete djiehi.⁹Mo osi ãba zod dji otohite dji soda-iela ki pi hot-iela i mo gãiẽ soda ki ka obei mo zod-iela. Kã mo ka dji pu un: ale li k'ale. Kã mo ka dji pu uot la vini li ka vini. I osi mo ka dji pu mo siavito: fe sa, li ka fe.¹⁰Kã tãde sa li hete kõtã boku li dji pu sa ki te ka suiv li: Ã lavehite mo ka dji esi la, la Ishael mo pa thuve un mun ke boku espua.¹¹Mẽ mo ka dji pu zot ki boku ke vini dji Levã i dji Kuxã ie ke asi obo tab ke Abhaão, Isaque i Jaco la lasosiete dji lahosiel.¹²Mẽ mun ki te djivet la lasosiete dji lahosiel ie ke jite ie deho lãdã, ghã suku. Laba ie ke khie i mode ie dã dji duló.¹³Ẽbe Jezi dji pu xef dji sã soda-iela: ale pu u kaz, akõsa men kumã u ka khe mo ke fe i lãdã mem lokasiõ siavito-la hete djiehi.¹⁴I Kã Jezi ale la kaz dji Pie, li ue so belmẽ kuxe lãdã so bukã ke lafiev.¹⁵Jezi tuxe la so lãmẽ i lafiev sotxi dji li.Ẽbe li leve djibut i kumase siavi Jezi.¹⁶Kã hive nãnuit, pov-la pote kote Jezi boku mun ki te gãiẽ move lesphui. I Jezi sel ke un pahol li tihe tut move lesphui i djiehi tut mun ki te malad-iela.¹⁷Jezi fe sa pu kõphui sa ki Phofet Isaías te dji: "li ale ke tut no maladji-iela i xaie tut no ïfehmite-iela.¹⁸Jezi ue ban mun-iela kõhõne'l li voie so djisip-iela ale uot bo dji lag-la.¹⁹Un met dji lalua hive phox dji li: Met, no ke suiv u kote u k'ale!²⁰Jezi hepon: hapoz-iela gãiẽ ie thu, i txisoso-iela gãiẽ ie nik. Mẽ, Pitxit dji Om pa gãiẽ kote pu li pose so tet.²¹I uot ki ate djisip dji Jezi dji: _Sẽie, phõmiẽ lese mo tone ale ãtehe mo papa.²²Jezi hepon: vini ke mo lese mun muhi ãtehe ie mun muhi-iela.²³Jezi ãthe lãdã bato-la i so djisip-iela ale ke li.²⁴Leve un vilẽ lapli ke gho vã, ki lag fe gho lãme dji un mãiẽ ki gho lame te ka khuvui bato-la. Jezi te ka dhõmi.²⁵Djisip-iela ale leve Jezi ie dji: Sẽie sove no! no ke muhi.²⁶Jezi hepon: pukisa zot pe, om dji pitxi espua? Ẽbe li leve le babie vã-la i lãme-la i tut hete this.²⁷Ẽbe ie tut hete susphan i ie dji: a ki om sa ki ka kumãde juk vã i lãme?²⁸Kã Jezi hive la hegiõ dji Gadaha, la bo Levã dji lag dji Galileia, ale kõthe ke li dẽ om ki te ke Lesphui dji demuẽ. Ie te ka vini dji semitxe, kote ie te ka hete. Ie te boku move ki pies mun pa te ka pase laba lãdã sa hegiõ-la.²⁹Ie kumase hele: Pitxit dji Bõdje akisa u le ke no? U vini esi pu bai pinitãs ãvã tã-la?³⁰Phox dji laba te gãiẽ boku koxõ te ka mãje.³¹I demuẽ-iela dji pu Jezi si u tihe no voie no ãthe lãdã sa ban koxõ-iela.³²Jezi dji: zot ale. Demuẽ-iela ale ie ãthe lãdã koxõ-iela ie kuhi djihet pu lag-la i ie neie.³³I om-iela ki te ka ẽtxupe dji koxõ-iela mahõ pu pei-la. Laba ie hakõte tut sa i osi sa ki fet ke dê om-iela ki te ke lesphui demuẽ.³⁴Ẽbe tut mun-iela dji pei-la sotxi pu kõthe ke Jezi, i, kã ie kõthe ke li ,ie dji pu li ale dji ie late .

¹Jezi ãthe ãdjidã bato-la, li pase pu bo kuxã dji lag-la i li vini pu phop kote.²Ẽbe un dê om pote pu Jezi un mun pahalize kuxe ãle un lit. Kã Jezi ue ie espua, li dji pu pahalize-la: kohaj mo pitxit! u pexe-iela padõnẽ.³Ẽbe un dê met dji lalua kumase dji ãt ie men: sa on ka fe mal pale kõt Bõdje.⁴Mẽ Jezi te save ie lide: li dji pukisa zot ka majinẽ mal la zot txo?⁵Akisa ki pi fasil? pu dji: "u pexe-iela padõnẽ, o pu dji leve djibut i maxe"?⁶Mẽ pu zot save ki Pitxit dji On gãiẽ povua pu padõnẽ pexe, (li, ẽbe, dji pu pahalize-la): djibut, phã u lit i a li pu u kaz.⁷9 7 I sa pahalize-la djibut i li ale pu so kaz.⁸Kã mun-iela ue sa, ie pe i ie glohifike pu Bõdje, ki bai sa tel povua pu on-iela.⁹I Jezi sotxi dji laba, lamitã ximẽ li ue un on ki ka phã zahite dji mun-iela, asi kote ie ka peie xahite , so nõ ate Matxie; i Jezi dji pu li suiv mo. Ẽbe sa on-la leve i li suiv Jezi.¹⁰Sa fet ki, ẽkãt Jezi te ka mãje la kaz dji Matxie boku publikan i uot mun ki mixã hive ie asi obo tab ke Jezi i so djisip-iela.¹¹Kã fahiseu-iela ue sa, ie dumãde dji djisip-iela: pukisa zot Met ka mãje ãsan ke publikan-iela i ke mun ki ka fe pexe?¹²Kã Jezi tãde akisa ie dji: li hepon:" mun ki gãiẽ lasãte pa buẽsẽ dji un metsẽ, selmã mun ki malad-iela.¹³I li dji: "ato zot ale ãphan sa signifikasiõ: Mo le ki zot mõthe kõtãtmã i nõ ki zot ofui sakhifis", pase mo pa vini aple mun ki jis, mẽ ui mun ki gãiẽ pexe!¹⁴Ẽbe djisip-iela dji Jã Batxist ale kote Jezi ie dji: "pukisa u djisip-iela pa gãiẽ labitxuid dji fe jẽnẽ, kumã no i fahiseu-iela?¹⁵Jezi hepon: puve mun-iela ki lãdã lafet dji un lamaiaz hete this ẽkãt on ki maie-la ke ie? Mẽ ke vini ju-iela ki on ki maie-la ke sotxi dji lamitã, ẽbe mun-iela ke fe jẽnẽ.¹⁶Pies mun pa ka mete un pedas dji lẽj nov lãdã un lẽj vi e, pase lẽj-la ke fã de, i li ke hete un gho fã de.¹⁷Pies mun pa ka mete djivẽ nov, lãdã butei dji lapo ki vie, si u fe sa, lapo-la ke fãde, djivẽ ke gate, i butei-la ke xakaia. Djivẽ nov ka sehe lãdã butei dji lapo ki nov kõsa u pa ka piad butei-la i djivẽ-la.¹⁸Ẽkãt Jezi te ka dji sa bagaj-iela, um ofisial vini i ãjünü djivã Jezi, li dji:" Mo pitxit fam muhi ato mem, mẽ vini i mete u lãmẽ lasu li, i li ke viv ãko".¹⁹Ẽbe Jezi ale ke ofisial, i so djisip-iela osi ale.²⁰Lãdã sa mem lokasiõ-la , un fam ki te ka sufui, duz ãnẽ dji (hemohagia), vini deie dji Jezi li tuxe Jezi lãdã bo dji so lẽj;²¹fam-la majinẽ. "si mo selmã tuxe so lẽj, mo ke djiehi",²²Jezi tonẽ, Kã li ue fam-la li dji:"Pitxit hete kõtã! u espua djiehi u".djisa mumã-la fam-la hete djiehi.²³Kã Jezi ãthe lãdã kaz dji ofisial-la li ue ki mun-iela te ka fe gho thẽ,²⁴Li dji zot sotxi dji la, pase txifam-la pa muhi, mẽ li ka dhõmi, mẽ mun-iela ahi dji Jezi.²⁵Kã mun-iela sotxi dji laba, li ãthe lãdã xam-la, li phã txifam-la la so lãmẽ i li leve.²⁶Nuvel dji sa mihak kate pu tut hegiõ-la.²⁷Aphue Jezi sotxi dji laba, dê mun ki pa ka ue ale deie li, ie te Ka hele:"Pitxit dji Davi, gãiẽ lapen dji no!²⁸Kã Jezi ãthe lãdã kaz, mun ki pa ka ue-iela phoxe'l, i Jezi dji pu ie:"zot ka khe ki no puve fe zot ue?"ie hepon:"ui Sẽie".²⁹Ẽbe Jezi tuxe lãdã ie uei li dji: Mo ka fe kõfom zot espua.³⁰Ie uei-iela hete luvui ie hete ue, Jezi bai un zod pu ie siaie;" zot pa hakõte pu pies mun".³¹Mẽ ie dê ale ie hakõte, sa nuvel kate pu tut sa hegiõ-la.³²Ẽkãt sa dê on-iela te ka ale un on mud ki te ke demuẽ ie pote pu Jezi.³³Kã demuẽ ale, om mud-la kumase kose. Mun-iela hete susphan, " pase jãmẽ ie pa te ãko ue un bagaj kõsa la Ishael",³⁴mẽ fahiseu-iela dji: a pu xef dji demuẽ-iela ki li ka txihe demuẽ-iela.³⁵Jezi te ka maxe pu tut pei-iela i tut pov dji hegiõ li te ka mõthe lãdã Katz dji Adohasiõ i ãnusie bõ nuvel dji Bõdje i li te ka djiehi tut kalite maladji.³⁶Kã li ue mu-iela li hete ke lapen dji ie, pase ie ãbãdonẽ, kumã bam mutõ ki pa gãiẽ Pasteh.³⁷Li dji pu so djisip-iela: thavai-la boku, mẽ thavaio-iela pa boku .³⁸Dumãde pu Met dji thavai-la, pu li voie pi boku thavaio pu thavai-la.

¹Jezi aple so duz djisip-iela, li bai povua pu ie txihe lesphui demuẽ, i pu djiehi tut kalite maladji.²I nõ dji so duz djisip-iela: phõmiẽ, Simõ, ki ie aple Pie, i so fue Ãdhe; Txiago, Pitxit dji Zebedeu, i so fue Jã;³Filip i Bartolomeu; Tomé, i Matxie publikan-la; Txiago, pitxit dji Alfeu; i Tadeu;⁴Simõ kananeu-la, i Judas Iskahiote, ki kuiẽnẽ Jezi.⁵Jezi voie sa diz on-iela, li bai un zod pu ie: zot pa ale kote nõ-judeu-iela ka viv, pa ãthe lãdã pie dji "samahitan-iela".⁶Zot ale kote mutõ ki pedji-iela dji kaz dji Ishael.⁷Zot ale ãnüsie sa :" ki lasosiete dji lahosiel phox".⁸Zot djiehi mun ki malad, hesusite mun ki muhi djiehi mun ki gãiẽ bobo, i txihe demuẽ dji mun: pase zot husuve ghatxuit i so bai osi ghatxuit .⁹Zot pa ale ke lo, nï "prata " i "Cobre" sehe lãdã zot sẽtxie.¹⁰Lãdã sa voiaj pa ale ke sakol, nẽ ke uot pe lẽj, nẽ savat, nẽ batõ pu sutuni u ko; pase thavaio-la gãiẽ dhue dji husuve sa ki li buesẽ pu li viv.¹¹Lãdã nẽpot pei i vilaj ki zot ãthe zot gade un mun ki lê husuve zot, i zot hete la so kaz juk mumã ki zot ale dji sa pei-la.¹²Kã zot ãthe lãdã un kaz, zot dji "ki kõtãtmã hete lãdã sa kaz-la "!¹³Si sa mun-iela dji kaz-la husuve zot biẽ, ki saudasiõ dji kõtãtmã hete ke ie. Mẽ si ie pa husuve zot biẽ, zot tihe saudasiõ-la dji ie.¹⁴I si Lãdã un kek kaz o pei mun-iela pa le husuve, nẽ kute zot pahol, kã zot sotxi dji sa kaz o pei-la sukuie lapusie dji zot savat.¹⁵Ã lavehite mo dji pu zot: lãdã ju dji kõdẽnasiõ, Bõdje ke gãiẽ plis lapen dji Sodoma i Gomohha; pase dji sa pei-la.¹⁶Mo ka voie zot kumã mutõ-iela lamitã dji ban xẽ mixã; zot hete ãtãsiõ kumã siapã-iela i sẽp kumã hãmiẽ-iela.¹⁷Ãtãsiõ, pase zot ke ale phui, ie ke ale ke zot pu thibunal, ie ke fut zot lãdã ie sinagog-iela.¹⁸Pase zot sa mo siavito-iela, ie ke pote zot ou guvelmã-iela i vue-iela pu kõdãnẽ zot, i zot ke pale pu ie i pu nõ-judeu-iela dji no pahol.¹⁹Kã ie ke ale ke zot pu kõdãnẽ, pa hete thakase ke kisa pu zot kose o kumã pu zot kose, kã ke hive mumã, Bõdje ke bai pu zot sa ki zot ke kose.²⁰Pase pahol ki zot ke kose, a pa dji zot mem, mẽ ke vini dji Lesphui dji zot Papa, ki ka kose pu zot.²¹Fue ke pote so phop fue pu lamo, kõsa papa osi ke so phop pitxit; i pitxit-iela ke leve kõt papa-iela, i ie ke txue ie.²²Tut ke kõt zot pase zot ka suiv mo; mẽ mun ki hete fiam juk lãdã finisiõ ke sove.²³Kã ie ke maxe pu txue zot, lãdã un pei, mahõ pu uot. Mo ka asihe zot ki sa a lavehite: zot pa ke fini kuhi tut pei-iela dji Ishael, ãvã vini Pitxit dji Om.²⁴Djisip pa pi hot pase so Met, nẽ esklav-la pa hot pase so pathõ.²⁵Djisip-la djivet hete kõtã kumã li sãble so met, i esklav-la sãble so pathõ. Si ie aple un xef dji lafãmi dji gho xef demuẽ, kumã ie ke dji pu so lafãmi?²⁶Pa hete pe dji pies mun. Tut ki khuvui ke dekhuvui, i pa gãiẽ ki ke biẽ sehe sã pa dekhuvui.²⁷Sa ki no ka dji pu zot lãdã suku, zot ãnusie lãdã klehite dji jonẽ. I sa ki zot tãde ãseghe ãnüsie pu tut.²⁸Pa hete pe, dji mun ki ka txue ko, mẽ ie pa puve txue nam. Mẽ hete pe dji Bõdje, ki puve dethi la lãfe u nam i u ko. ²⁹Pa ka vãde dê txisoso pu un txi ãghẽnẽ? nẽ un dji ie dê ke tõbe ate sã konetmã dji so Papa. ³⁰Juk xive dji zot tet ie tut kõte. ³¹Zot pa hete pe, zot gãiẽ vale, pase un ban txisoso.³²mun ki hukonet mo lamitã boku mun esi lasu late, mo ke hukonet li djivã mo Papa ki lahosiel.³³Mẽ mun ki pa hukonet mo djivã mun-iela esi lasu late, mo osi pa ke hukonet li djivã mo Papa ki lahosiel.³⁴Pa majinẽ ki mo vini pote kõtãtmã esi lasu late! Mo pa vini pote kõtãtmã, mẽ ui espad.³⁵Mo vini pu mete pitxit on kõt so papa, Pitxit fam kõt so mãmã, i belfi kõt so belmẽ.³⁶I elmï dji on-la ke la so phop kaz.³⁷Mun ki kõtã so papa i so mãmã plis ki mo, pa mehite suiv mo. Mun ki kõtã so pitxit-iela plis ki mo, pa mehite suiv mo.³⁸Mun ki pa phã so lakhue, i vini deie mo li pa kõtã mo.³⁹Mun ki thuve ie lavi ie ke piad li, i mun ki piad ie lavi pu mo ie ke thuve li.⁴⁰Mun ki husuve zot, ka husuve mo, i mun ki husuve mo osi ka husuve sa ki voie mo.⁴¹Mun ki husuve un phofet, pase li hukonet li kumã li ke husuve un hekõpãs dji phofet; i mun ki husuve un mun ki jis pase li hukonet li kumã un mun jis, li ke husuve un hekõpãs dji un mun jis.⁴²Si un kek mun bai un goble djilo fue pu un dji no siavito-iela, ã lavehite mo ka dji: dji pies mãiẽ li ke piad so hekõpãs.

¹Kã Jezi fini dji bai sa zod-iela pu so djisip-iela, Li sotxi pu mõthe i ãnüsie so pahol lãdã pei-la.²I Jã Batxist, ki te la phuisiõ, li save dji tut sa bagaj, ki Jezi te ka fe. Pu sa li voie so djisip-iela pu dumãde dji Jezi:³U sa ki djivet vini, o no ke ãtan uot?⁴Jezi hepon:"zot tonẽ kote Jã i pale pu li sa ki zot tãde i zot ue.⁵Mun ki pa ka ue, ka ue, Mun ki ẽvalid ka maxe, Mun ki gãiẽ bobo ie hete phop, mun ki pa ka tãde ie ka tãde, i mun ki muhi ka hesusite ãko, i bõ nuvel ka ãnüsie pu mun-iela ki pov.⁶Biẽ kõtã sa mun ki pa lese dji khe lasu mo.⁷Ẽkãt djisip-iela dji Jã ale, Jezi kumase pale a hespek dji pu mun-iela:"ki kalite om zot ale gade la kote pa gãiẽ ãiẽ(deserto)? un txipiebua ki vã ka sukuie?⁸Akisa zot te ãtan ue? un om ki ka ise lẽj xe? nõ, mun ki ka sie lẽj xe ka hete lãdã kaz dji vue-iela.⁹Zot te ka sase un Phofet? ui, li sa plis ki un Phofet.¹⁰Jã a on ki pahol sẽ-la te dji: Mo voie un om pu pase mo mẽsaj, djivã dji u i li phuepahe u ximẽ¹¹Ã lavehite mo ka dji: dji tut om, ki fet dji fam, pa gãiẽ ki ïpohtã pase Jã. Pipitxi dji lasosiete dji lahosiel pi ïpohtã pase li.¹²I dji pi ju dji Jã Batxist, lasosiete dji lahosiel ie ka phã li pa fos, i sa ki ka ise dji fos ka phã li.¹³Pase, ãvã Jã vini, tut phofet-iela i lalua dji Moisés te ka pale a hespek dji Jã.¹⁴I, si zot le khe lãdã ie pahol, ki Jã a Elias, ki te ke vini.¹⁵Si zot gãiẽ zohe pu kute, ẽbe kute.¹⁶Mẽ ke kisa mo puve kõpahe sa jehasiõ? li sãble tximun-iela ki ka jue la plas, un ka hele pu uot:¹⁷"no jue lamisik dji lamaiaz, mẽ zot pa dãse! no xãte lamisik dji lamo, mẽ zot pa khie".¹⁸Kã, Jã pahet li pa te abitue mãje i bue lamitã mun, i zot dji: li ke demuẽ.¹⁹I Pitxit dji Om, ki ka mãje i bue ,zot dji: Li ghumã i li ka bue boku, li sa kamahad dji publikan-iela i mun ki gãiẽ pexe. Mẽ konetmã-la a laphuev dji thavai ki u ka fe.²⁰Ẽbe Jezi kumase denüsie pei-iela kote li fe boku mihak, pase mun-iela pa hepãtxi dji ie pexe. Jezi dji:²¹Dulo i aflisiõ, pu zot, pei dji Kohazim, i Betsaida! Pase sa mihak-iela ki mo fe pu zot, si mo te fe lãdã pei dji Tiho i dji Sidõ, ie mun-iela te deha hepãtxi dji ie pexe-iela kõtã. I pu mõthe ki ie te hepãtxi ie te ke fuhe lẽj dji sak i jite san lasu ie tet.²²Mo ka dji pu zot, ki lãdã ju dji kõdẽnasiõ, Bõdje ke gãiẽ boku lapen dji Tiho i Sidõ, pase dji zot, Kohazim i Betsaida.²³I u, pei dji Kafahnaum, u ka majinẽ ki u ke mõte pu lahosiel? Ie ke jite u lãdã pei dji mun ki muhi-iela. Pase si te fe mihak-iela lãdã Sodoma, kumã ie fe lãdã u, li te djibut juk jodla.²⁴Mo ka dji ki lãdã ju dji kõdẽnasiõ, Bõdje ke gãiẽ lapen dji Sodoma, pase dji u, Kafahnaum.²⁵Lãdã sa lokasiõ, Jezi phuie dji sa mãiẽ:"Papa, Sẽie dji siel i late, mo ka humiasi u, pase u sehe sa bagaj-iela dji mun ki ïtelijã i u mõthe pu sa mun ki pa gãiẽ boku ïtelijã.²⁶Ui, Papa a te u plesi fe sa.²⁷Mo Papa bai mo tut bagaj, pies mun pa save akimun pitxit-la, si nõ papa-la; pies mun pase akimun papa-la, si nõ pitxit-la i osi mun ki Pitxit-la le mõthe, akimun Papa sa.²⁸Vini kote mo, zot tut ki fatxige dji xaie zot xaj ki pesã, mo ke fe zot pose.²⁹Zot suiv mo i ãphan ke mo, pase mo bõ, i mo gãiẽ un txo ke ghã kõtãtmã, i zot ke thuve salvasiõ pu zot nam.³⁰Thavai ki mo ka dumãde dji zot fasil, i xaj ki mo ka mete lasu zot leje.

¹Lãdã sa ju-la Jezi pase pu un plãtasiõ ju dji samdji, so djisip-iela te fẽ ie kumase hamase fui pu ie mãje.²Kã fahiseu-iela, ue sa ie dji: u djisip-iela ka fe ki ïteãdji pu fe samdji.³Jezi dji: zot pa ãko li sa ki Davi fe kã li te fẽ ke so kamahad-iela.⁴Davi ãthe lãdã Kaz dji Bõdje,i li ke so kamahad-iela mãje djipẽ ki ofui pu Bõdje. Selmã sasedotxi-iela te gãiẽ dhue dji mãje djipẽ-iela.⁵Zot pa ka li lalua, ki samdji sasesotxi-iela la kaz dji Bõdje ie ka viole samdji mẽ ie ka hete sã fot.⁶Mo ka afihmẽ pu zot sa ki esi li pi ïpohtã pase Kaz-la⁷Si zot te save akisa signifike sa pahol-iela: Mo le kõtãtmã i nõ sakhifis, pa kõdãnẽ mun inosã.⁸Pase Pitxit dji Om-la a Sẽie dji samdji.⁹Li sotxi dji laba, Jezi ale pu sinagog.¹⁰Laba te gãiẽ un om ïvalid dji so lãmẽ. Ẽbe un dê mun te le voie to lasu Jezi ie dji: li bõ djiehi mun malad samdji?¹¹Li hepon: akimun dji zot, si gãiẽ un mutõ i li tõbe ofõ un thu samdji, u pa ke fe tut pu txihe li dji laba?¹²pi gãiẽ vale un om pase un mutõ! Apusa li bõ djiehi samdji.¹³Ẽbe li dji pu om-la: lõje u lãmẽ i li lõje so lãmẽ i li hete biẽ.¹⁴Ẽbe fahiseu-iela sotxi ie kumase kose kumã pu ie txue Jezi.¹⁵Kã Jezi save dji sa, li ale dji laba, i boku mun suiv li. I djiehi tut mun ki te malad.¹⁶Li dji pu ie pa hakõte akimun li sa.¹⁷Sa fet pu kõphui sa ki phofet Isaías te dji:¹⁸Bõdje dji: sa a mo Pitxit ki mo xuesi, ki mo kõtã ki ka bai mo boku kõtãtmã lãdã no txo. I Mo ke mete mo Lesphui lasu'l pu pase mo pahol pu nasiõ-iela.¹⁹Li pa ke bhuiga, i osi li pa ke hele. pies mun pa ke tãde so vue la lahi.²⁰Pa kase bhãx bua ki sek, i pa txue djife ki feb, li ke hete kõsa juk kã pahol-la kõphui.²¹Lasu u nõ nasiõ-iela ke ãtan.²²Ie pote pu Jezi un mun ki te gãiẽ mal lesphui li pa te ka ue i li te mud, mẽ Jezi dhiehi'l i mud-la kose i li ue.²³I tut mun-iela hete susphan ie dji: A pa sa ki a pitxit dji Davi?²⁴Mẽ, kã fahiseu-iela tãde, ie dji: li ka txihe demuẽ lasu nõ dji xef dji demuẽ-iela.²⁵Jezi konet ie majinasiõ li dji: Pei ki pataje ã ghup i ka bhuiga ãt ie mem, osi ke dethi. I lafãmi ki pataje ã ghup ki ka bhuiga ãt ie mem, osi ke dethi.²⁶Si satã thihe satã ie lãdã divisiõ, kumã i ke puve hete lãdã mem kote?²⁷Si mo txihe demuẽ pu xef dji demuẽ-iela i pu ki mun zot pitxit-iela ke txihe? A pu sa ie mem ke tone zot lidehãs.²⁸Lãdã lavehite a pu povua dji Bõdje ki mo ka txihe demuẽ, i sa a laphuev ki lasosiete dji Bõdje hive kote zot.²⁹Pies mun pa puve ãthe lãdã kaz dji un om ki fo i volo so bagaj-iela, sã phõmiẽ li mahe'l. Selmã kõsa sa mun-la ke puve ale ke bagaj ki gãiẽ lãdã kaz-la.³⁰Mun ki pa ke mo ie kõt mo, i mun ki pa ka thavai ke mo lãdã lavehite ie ka thavai kõt mo.³¹A pu sa no ka dji: tut pexe i kose mal, mo ka padõnẽ, mẽ kose mal kõt Lesphui-la pa gãiẽ padõ.³²Tut sa ki kose kõt Pitxit dji Om-la, gãiẽ padõ, mẽ sa ki kose kõt Lesphui Sẽ, pa gãiẽ padõ pu ie.³³Li dji ki tut bõ piebua, so fui-iela bõ, li dji osi tut piebua ki pa bõ so fui-iela pa bõ osi, pase pu kalite dji fui-iela u ka konet piebua-la.³⁴has dji siapã! kumã zot puve kose bagaj ki bõ si zot mixã? zot bux ka kose ke ki zot txo lẽ.³⁵Mun ki bõ ka txihe ki bõ i mun ki move ka txihe bagaj ki pa bõ.³⁶Mo ka dji pu zot, ki sa ju-la xak mum laba ke djivã Jezi pu ie kose.³⁷Pase u pahol-iela ke siavi pu kõdãnẽ u o pu libiate u.³⁸Un dê met dji lalua i un dê fahiseu dji pu Jezi: Met, no le ue u ka fe un mihak.³⁹Jezi hepon: kumã sa mun dji atxielmã ie mixã i ie pa gãiẽ espua! zot ka dumãde pu mo fe un mihak, mẽ mihak dji phofet Jonas a diãiẽ sin ki mo ke bai.⁴⁰Pase akõsa kumã Jonas hete thoa ju i thoa nuit ofõ van dji gho puasõ akõsa osi Pitxit dji Om-la ke hete thoa ju i thoa nuit ofõ late.⁴¹Lãdã sa Ju dji Kõdẽnasiõ pov dji Nínive ke leve kõt zot, mẽ ie ke hepãtxi dji ie pexe kã ie tãde Jonas ka pase pahol-la. I Mo ka dji sa ki esi plis ïpohtã pase Jonas.⁴²Lãdã sa Ju dji Kõdẽnasiõ ke leve un lahen dji (Saba) li ke kõt zot, pase li vini dji luẽ pu kute kumã Salomõ ka mõthe. I Mo ka dji sa ki esi plis ïpohtã pase Salomõ.⁴³Jezi kõtxinẽ: Kã un lesphui djimal sotxi dji ãle un mun, li ke maxe kote ki pa gãiẽ djilo, li ke sase kote pu li hete, mẽ li pa ke thuve.⁴⁴Ẽbe li ke dji: mo ke hutonẽ pu sa kaz dji kote mo vini, kã li ke hive, li ke ue kaz vid, phop i hãje.⁴⁵Aphue li ke sotxi, ale sase uot set lesphui-iela ki plis mixã i ie tut ke hete laba. kõsa situasiõ dji sa mun-la ke hete plis vilẽ pase ãvã. akõsa ke fet ke sa mun ki move dji atxelmã-iela.⁴⁶Kã Jezi te ka kose ke mun-iela so mãmã ke so fue-iela hive, ie hete deho ie dumãde pu ie kose ke li.⁴⁷Ẽbe li gãiẽ un mun ki dji pu Jezi: u mãmã i u fue-iela deho ie le kose ke u.⁴⁸Jezi dumãde: akimun ki sa mo mãmã i mo fue-iela?⁴⁹Ẽbe li mõthe pu so djisip-iela li dji: Gade esi mo mãmã i mo fue-iela.⁵⁰Pase mun ki ka fe volõte dji mo Papa, ki laba lahosiel, a mo fue, mo so, i mo mãmã.

¹Lãdã sa mem ju-la Jezi, sotxi dji so kaz li ale obo lag dji Galileia, li asi, laba li kumase mõthe.²mun-iela ki te asi obo li, te boku ki li ãthe lãdã un bato li asi; i mun-iela hete djibut.³Jezi hakõte boku Kopahasiõ, li mõthe boku bagaj. Li dji zot kute! un om sotxi sõmẽ.⁴Kã li te ka sõmẽ ghen-fui, un dê tõbe obo ximẽ, i txisoso mãje tut,⁵uot ghen-fui tõbe kote gãiẽ hox, i pitxi late, ghen-fui-iela puse vit, pase late-la pa te fõ.⁶Mẽ, kã solei-la pahet, li bule i txue plã-iela, ie hete sek, pase ie pa te gãiẽ hasin,⁷uot ghen-fui tõbe lamitã pikã, ie puse mẽ ie tufe.⁸Mẽ ghen-fui ki tõbe lãdã bõ late, li puse li bai fui, un ghen-fui bai uot sã,uot soasãt djix, i uot thãt.⁹Mun ki gãiẽ zohe, kute.¹⁰Ẽbe so djisip-iela hive obo li ie dji: pukisa u ka ise Kopahasiõ pu kose ke mun-iela?¹¹Jezi hepon: pu zot Bõdje ka mõthe seghe dji lasosiete dji lahosiel, mẽ pu ie, nõ.¹²Mun ki gãiẽ husuve plis, pu li gãiẽ boku. Mẽ mun ki pa gãiẽ, juk txisoso ki ie gãiẽ ie ke piad.¹³A pu sa mo ka ise Kopahasiõ pu kose ke sa mun-iela, pase ki ie ka gade mẽ ie pa ka ue; ie ka tãde mẽ ie pa ka kute i kõphan.¹⁴Akõsa ka hive ke sa mun-iela sa ki "phofet Isaías dji: zot ke tãde, mẽ zot pa ke kõphan, zot ke gade, mẽ zot pa ke ue ãiẽ.¹⁵Pase mẽmua dji sa mun-iela fõmẽ: ie buxe ie zohe i fõmẽ ie uei, si ie pa te fe sa, ie te puve ue, i ie te puve tãde ke zohe ie te ke kõphan ke ie mẽmua, ie te hutonẽ pu mo, mo te ke djiehi ie! Bõdje dji.¹⁶Jezi kõtxinẽ kose: Mẽ zot, kumã zot kõtã! Pase zot uei ka ue, i zot zohe ka tãde.¹⁷Ã lavehite mo ka dji pu zot: boku phofet i boku uot mun-iela dji pov dji Bõdje te ãvi ue sa ki zot ue, mẽ ie pa puve; ie te ãvi tãde sa ki zot tãde, mẽ ie pa tãde.¹⁸Ẽbe zot kute i ãphan sa Kopahasiõ dji "om ki sotxi pu sõmẽ " akisa li le dji .¹⁹Tut ki ka kute pahol dji Bõdje, i pa ka kõphan, ie kumã ghen-fui ki tõbe obo ximẽ, elmi-la ka vini li ka txihe tut sa ki sõmẽ lãdã so txo.²⁰Sa ghen-fui ki tõbe kote ki pa gãiẽ hox, a mun ki ka tãde pahol dji Bõdje ie ka asekte vit ke kõtãtmã,²¹mẽ li pa ka duhe boku, pase li pa gãiẽ hasin. I, kã palakos dji pahol dji Bõdje ka hive sufãs, thibulasiõ, ie ka ãbãdõnẽ ie espua.²²Uot mun-iela sãble sa ghen-fui ki tõbe lamitã pikã, ie ka kute pahol dji Bõdje, mẽ pheokupasiõ dji tã-la i ilusiõ dji hixez-iela ka tufe pahol-la, i sa mun-iela pa ka bai fui.²³I ghen-fui ki sõmẽ lãdã bõ late, a sa mun-iela ki ka kute i kõphan pahol dji Bõdje i ie ka bai fui, un ka bai sã, uot ka bai soasãt djix i uot thãt.²⁴Jezi hakõte uot Kopahasiõ, li dji pu mun-iela: lasosiete dji lahosiel akumã un om ki sõmẽ bõ ghen-fui lãdã so late.²⁵Mẽ, ẽkãt om-la te ka dhomi, vini un elmi, i sõmẽ lamitã dji fahin fãs u plã ki pa bõ(joio), i dji-la li ale.²⁶Kã plã-iela puse,i ie bai fui i plã ki pa bõ(joio)-la pahet osi.²⁷Kã thavaio-iela dji pathõ la hive ie dji: "Pathõ, u sõmẽ ghen-fui ki bõ lãdã u late. dji kote sa plã ki pa bõ-la (joio) vini"?²⁸li hepon."a un kek elmi ki fe sa". Ie dumãde dji pathõ-la: Pathõ u le ki no haxe plã ki pa bõ-la(joio)"?²⁹Li hepon: nõ, pase Kã zot ke haxe plã ki pa bõ-la (joio), veie zot haxe osi fahin fãs-la.³⁰Zot lese fahin fãs-la i plã ki pa bõ-la(joio), puse ãsam, lãdã sesõ pu haxe plã-iela. Ẽbe mo ke dji pu thavaio ki ke haxe plã-iela:"haxe phomet plã ki pa bõ-la(joio), i mahe ie ã patxe pu bule ie. Aphue pu haxe fahin-fãs la, pu mete la so depos".³¹Jezi hakõte uot Kopahasiõ. Li dji pu mun-iela: lasosiete dji lahosiel, akumã un ghen dji Mostarda, ki un om, sõmẽ lãdã so late.³²Li pipitxi dji tut ghen-fui-iela; Mẽ, kã li puse, li ka hete pi gho pase uot plã-iela. Li ka tonẽ un piebua, dji mãiẽ ki txisoso-iela ka vini, ie ka fe ie nik lasu so bhãx-iela.³³Jezi hakõte uot Kopahasiõ pu mun-iela: lasosiete dji lahosiel akumã un(fehmẽto), ki un fam phã pu fe djipẽ, li mete um tximoso(fehmeto), lãdã thoa kilo dji fahin-fãs, tut fahin-la hete ke (fehmẽto).³⁴Jezi te ka ise Kopahasiõ pu pale pu mun-iela. Li pa te pale ãiẽ pu ie sã a pa te ã Kopahasiõ.³⁵Sa hive pu kõphui ki phofet te dji: "mo ke ise Kopahasiõ kã mo ke pale ke sa mun-iela i mo ke esplike bagaj ki pa konet, dji kumasmã dji tã-la".³⁶Ẽbe Jezi lese mun-iela i li ale pu so kaz. Djisip-iela hive obo li ie dji: hakõte pu no akisa ki a Kopahasiõ dji plã ki pa bõ-la(joio).³⁷Jezi hepon: mun ki sõmẽ bõ ghen-fui a Pitxit dji Om.³⁸Savan-la a tã-la, ghen-fui ki bõ, a mun-iela dji lasosiete dji lahosiel; i plã ki pa bõ-la(joio), a mun-iela dji elmi-la.³⁹elmi ki ka sõmẽ plã ki pa bõ(joio), a phop djiab-la. I haxe, Hamase a finisiõ dji tã-la, sa ki ka haxe i hamase a zãj-iela.⁴⁰Kõsa kumã "plã ki pa bõ" ie ke hamase i jite lãdã djife, kõsa osi lãdã finisiõ dji tã-la. ⁴¹Pitxit dji Om ke voie so zãj-la, ie ke hasãble, i tihe dji lasosiete dji lahosiel tut sa ki ka fe uot-iela fe pexe, i osi tut ki kõtã fe djimal. ⁴²I aphue zãj-iela ke jite sa mun-iela lãdã ghã djife, kote ie ke khie i mode ie dã dji Dulo . ⁴³Ẽbe, pov dji Bõdje ke klehe kumã solei-la lãdã lasosiete dji so Papa, si zot gãiẽ zohe pu kute, ẽbe kute.⁴⁴lasosiete dji lahosiel akumã un hixez dji ghã vale ki sehe lãdã un ghã Savan, ki un om thuve i li sehe ãko. Li hete boku kõtã, li vãde tut kisa li te gãiẽ i axte savan-la. ⁴⁵lasosiete dji lahosiel osi kumã un om ki ka maxe deie hox dji ghã vale, ⁴⁶kã li thuve hox dji ghã vale, li ale vãde tut ki sa li gãiẽ i li axte hox dji vale-la.⁴⁷lasosiete dji lahosiel, akumã un thamaj ki ie jite lãdã un lag. Li txẽbe tut kalite puasõ. ⁴⁸I, kã li hete plẽ, pexo-iela, hale'l obo lag-la i asi pu ie sepahe puasõ-iela. Sa puasõ ki bõ ie mete lãdã ie pãiẽ, i sa puasõ ki pa bõ ie jite deho.⁴⁹ke kõsa osi lãdã finisiõ dji tã-la. Zãj-iela ke sotxi, ie ke sepahe mun ki mixã dji mun ki bõ, ⁵⁰ie ke jite mun ki mixã lãdã ghã djife. I laba ie ke khie i mode ie dã dji dulo.⁵¹Ẽbe Jezi dumãde dji so djisip-iela: zot kõphan sa bagaj-iela? Ie hepon ui. ⁵²Jezi tut met dji lalua ke tone djisip lãdã lasosiete dji lahosiel, sãble un met dji un kaz, ki tihe dji so depos bagaj ki nov i bagaj ki veie. ⁵³Kã Jezi fini dji hakõte sa Kopahasiõ-iela, li sotxi dji laba.⁵⁴Li hutonẽ pu pei dji Nazahe, kote li te ka hete. Li te ka mõthe lãdã sinagog-iela, i sa ki te ka kute ie hete susphan i ie dumãde. dji kote vini so konetmã i povua ki li gãiẽ pu fe mihak? ⁵⁵a pa pitxit dji José, sa ki ka thavai kaz? so mãmã a pa Mahi? li a pa fue dji Txiago, José, Simõ i Judas? ⁵⁶Tut so so-iela pa ka hete esi? dji kote li hesi gãiẽ tut sa?⁵⁷Ie hete boku kole, ke li: Mẽ Jezi dji: un Phofet ie ka hespete tut kote li ale, selmã la so late i so kaz ki ie pa ka hespete li. ⁵⁸Jezi pa fe boku mihak laba, pase ie pa te gãiẽ espua.

¹Lãdã sa tã-la Herodes guvelmã-la tãde nuvel a hespek dji Jezi.²Ẽbe li dji pu so siavito-iela: sa om-la a Jã Batxist, ki hesusite dji lamo, Apusa li gãiẽ povua pu fe mihak.³Pase Herodes te phui Jã, li ãxẽnẽ'l, pu li voie'l la phuiziõ, li te fe palakos dji Herodias fam dji so fue Felip.⁴Pase Jã Batxist te dji boku fue pu Herodes" la no lua u pa te puve maie ke Herodias!⁵Herodes te le txue'l, mẽ li te hete pe dji pov-la, pase ie te ka kõsidehe'l kumã un Phofet.⁶Mẽ ju dji anivehse dji Herodes, pitxit dji Herodias dãse djivã mun-iela i Herodes hete kõtã boku.⁷Apusa li phomet bai tut sa ki txifam-la dumãde dji li.⁸Li suiv kõsei dji so mãmã, li dumãde: Mo le tet dji Jã Batxist ato mem lãdã un asiet.⁹Vue Hehodes hete boku this, mẽ palakos phomes ki li fe djivã mun-iela ki te la so phuezãs, ẽbe li bai zod pu ie fe sa ki txifam-la dumãde.¹⁰Ẽbe li voie hõie tet dji Jã Batxist la phuiziõ.¹¹Ẽbe ie pote so tet lãdã un asiet, ie bai pu txifam-la, i li ale pote'l pu so mãmã.¹²Ẽbe so djisip-iela vini sase so ko pu ie ãtehe'l. Aphue ie ale viatxi Jezi.¹³Aphue ki Jezi hete save dji ki te hive, li sotxi lãdã un bato, li ale un kote luẽ, ãfe dji hete li tu sel. Mẽ kã mun-iela hete save kote li te fika, ie sotxi dji ie pei-iela pu ie suiv li ka maxe.¹⁴Mẽ Kã sotxi dji bato-la, li ue mun-iela, li hete ke lapen dji ie, li djiehi boku ki te malad ki te laba osi.¹⁵Te asue deha djisip-iela hive phox dji Jezi ie dji:" li deha asue, sa kote la pa gãiẽ ãiẽ, voie sa mun-iela ale pu ie vil-iela, pu ie axte mãje pu ie mãje".¹⁶Mẽ Jezi hepon: ie pa buẽzẽ ale. A zot mem pu bai mãje pu ie.¹⁷Mẽ ie dji: nõ pa gãiẽ ãiẽ esi selmã sẽk djipẽ i dê puasõ.¹⁸Jezi dji: zot pote ie esi pu mo.¹⁹Ẽbe li voie mun-iela asi ale txihadje-iela. Ẽbe li phã sẽk djipẽ-iela i dê puasõ-iela, li gade pu lahosiel li humiasi Bõdje. Phue li pataje sẽk-iela ke dê puasõ-iela i li bai pu so djisip-iela, pataje pu mun-iela.²⁰I tut mun-iela mãje ke plezi i so djisip-iela hamase duz pãiẽ plẽ dji sa ki te hete.²¹I sa ki mãje-iela ale phox sẽk mil om, sã kõte fam i tximum-iela.²²Aphue dji sa, Jezi voie so djisip-iela ãthe lãdã bato-la, pu ie ale djivã, Pu uot bo lahivie-la, ẽkãt li ka voie mun-iela ale.²³Aphue ki li voie mun-iela ale, li mõte ãle un mõtãi pu li phuie. Kã hive nuit-la li te laba tuju selmã li tu sel.²⁴Ẽkãt sa, djisip-iela te luẽ dji late,ie te ka bhuiga kõt gho lãme, pase un gho vã te leve.²⁵Mẽ deha ãvã ju, ãt thoa ze i i six ze, Jezi ale laba kote ie, ka maxe lasu djilo.²⁶Kã djisip-iela ue Jezi ka maxe lasu djilo-la, ie hete boku pe, ie dji: a un bet! ie hele dji pe.²⁷Mẽ lãdã sa lokasiõ Jezi kose li dji pu ie: kohaj! a mo! zot pa buẽzẽ hete pe!²⁸Ẽbe Pie dji: "Sẽie, si a u mem, fe mo ale ka maxe lasu djilo juk kote u fika".²⁹Jezi hepon: "vini".Ẽbe Pie sotxi dji bato-la li kumase maxe lasu djilo-la li ale la djihesiõ dji Jezi.³⁰Mẽ, kã li ue fos dji vã-la, li hete pe, li kumase ale pu ofõ, li hele: Sẽie, sove mo!³¹la mem lokasiõ Jezi lõje so lãmẽ li txẽbe'l li dji: om u espua pitxi, pukisa u khe un moso?³²Kã ie dê ãthe ãdjidã bato-la vã-la kalmẽ.³³Ẽbe so djisip-iela ki te lãdã bato-la, ie hive phox dji li pu ie adohe'l, ie dji vuemã u sa Pitxit dji Bõdje.³⁴Kã ie pase pu uot bo lahivie-la, ie hive la hegiõ dji Genesahe .³⁵Kã mun-iela dji sa kote-la hukonet li ie kate so nuvel pu tut hegiõ-la ãtxe. Ẽbe ie pote tut sa mum ki te malad-iela pu li djiehi.³⁶Ie te ka dumãde pu li lese tut ki te malad-iela tuxe selmã obo so lẽj. I tut ki te ka tuxe ie te ka djiehi.

¹Ẽbe un dê fahiseu i met-iela dji lalua phoxe Jezi pu ie dumãde:²pukisa u djisip-iela pa ka obei mias dji ghã-mun lõtã-iela? Ie pa ka lave ie lãmẽ ãvã ie mãje.³Jezi hepon: i zot pukisa ka desobei zod dji Bõdje ke zot thadjisiõ?⁴Pase Bõdje dji: kõtã u papa ke u mãmã; mun ki madjixonẽ ie papa o ie mãmã ie mehite muhi!⁵Mẽ zot dji: "mo ke ofui pu Bõdje, sa ki mo te puve bai pu zot, sa pa buẽzẽ kõtã so papa i so mãmã.⁶Kõsa zot ka anule pahol dji Bõdje palakos dji zot thadjisiõ.⁷Hipokhita! phofet Isaías biẽ phofetxize suje zot, kã li dji:⁸Sa pov-la ka adohe mo selmã dji lapo bux; mẽ so txo luẽ dji mo.⁹Bõtxo zot ka adohe mo, zot ka mõthe konetmã dji zot phop lide, kumã si a zod dji Bõdje.¹⁰Jezi aple ban mun-iela obo'l li dji: zot kute i zot kõphan.¹¹A pa sa ki ka ãthe pu bux ki ka kõtãmine om-la; mẽ ui sa ki ka sotxi dji no bux, sa la ka kõtãmine om-la.¹²Ẽbe djisip-iela hive obo Jezi ie dji: u save ki pa bai ke fahiseu-iela ie gu kã ie tãdẽ sa pahol-iela?¹³Mẽ li hepon: tut plã ki mo Papa ki lahosiel pa plãte Li ke haxe'l pa so hasin.¹⁴Lese ie, a mun ki pa ka ue ka kõdji uot ki pa ka ue. Si sa ki pa ka ue-la ka kõdji un uot ki pa ka ue, ie dê ke tõbe lãdã mem thu.¹⁵Pie dji pu li: esplike no sa Kopahasiõ-la!¹⁶Jezi hepon: juk zot mem, pa ãko kõphan?¹⁷Zot pa save sa ki ka ãthe pa bux ka pase pu lestomak i aphue li ka sotxi dji no ko.¹⁸Mẽ bagaj ki ka sotxi dji bux li ka vini dji no txo. A sa-iela ka kõtãmine mun.¹⁹Pase a dji li ka vini mal majinasiõ, lamo, (adulterio), fohnikasiõ, volo, mãto, fo akuzasiõ.²⁰Sa bagaj-iela ka kõtãmine mun; mẽ mãje sã lave lãmẽ pa ka kõtãmine mun.²¹Jezi sotxi dji laba, li ale pu hegiõ ki ka hete phox dji pei dji Tiho i Sidõ.²²Un fam kananeia, ki vini dji sa hegiõ-iela, li te ka klãmẽ; Sẽie Pitxit dji Davi, gãiẽ lapen dji mo pitxit, un demuẽ ka thumãte'l boku.²³Mẽ Jezi pa hepon ãiẽ. Ẽbe djisip-iela phoxe Jezi ie dji: voie sa fam-la ale, pase li ka vini deie no ka fe boku thẽ.²⁴Jezi hepon: Mo vini selmã pu sa mutõ ki pedji dji kaz dji Ishael.²⁵Ẽbe li vini ãjunü djivã Jezi, li dji: Sẽie, ide mo!²⁶Mẽ Jezi hepon pa jis phã djipẽ dji pitxit-iela i voie pu txixẽ-iela.²⁷Fam-la dji: ui, Sẽie, mẽ juk txixẽ-iela ka mãje dji lahextã ki ka tõbẽ dji tab dji so met.²⁸Ẽbe Jezi hepon: fam, u espua thop gho. Li ke fet kumã u le. I lãdã sa mumã so pitxit-fam hete djiehi.²⁹Jezi sotxi dji laba li ale pu lag dji Galileia. I aphue li mõte un mõtãi i li asi laba.³⁰Ale kote Jezi boku mun.te ãsam mun ki pa ka maxe, mun ki alejad, mun ki pa ka ue, mun ki mud i boku uot osi, ie hãde ie lavi la pie dji Jezi. I Li djiehi ie tut.³¹Dji sa mãiẽ-la, mun-iela hete kõtã, kã ie ue mun ki mud ka kose, mun ki alejad djiehi, sa ki pa te puve maxe ka maxe, i sa ki pa te ka ue, vini ue.³²Jezi aple so djisip-iela li dji: Mo gãiẽ lapen dji mun-iela, pase deha ka fe thoa ju ki ie ke mo, i pa gãiẽ akisa pu mãje. Mo pa le ie ale sã mãje pu ie pa hete feb lamitã ximẽ.³³Djisip-iela hepon: kote no ke thuve boku djipẽ esi kote ki pa gãiẽ ãiẽ pu bai mãje pu sa mun-iela.³⁴Jezi dumãde: kõbie djipẽ zot gãiẽ? Ie hepon set, i un dê txipuasõ.³⁵Ẽbe Jezi voie mun-iela asi até.³⁶Li phã set djipẽ-iela i puasõ-iela, Li ghemesi Bõdje i li pataje ie. Aphue, li bai ie pu djisip-iela, i djisip-iela pu mun-iela.³⁷I tut mun mãje e van plẽ. Ie hamase dji sa pedas ki te hete set pãiẽ plẽ.³⁸Ie kõte sa mun ki mãje, kat mil om, sã kõte fam-iela i tximun-iela.³⁹Aphue li libehe mun-iela, Jezi ãthe lãdã bato i li ale pu hegiõ dji Magadã.

¹Un dê fahiseu i saduseu ale kose ke Jezi. Ie te le un kek laphuev kõt Jezi a pu sa ie dumãde pu li fe un mihak pu mõthe ki so povua ka vini mem dji Bõdje.²Mẽ Jezi hepon: Kã ke hive asue, zot ka dji:" Nõ ke gãiẽ bõ tã, pase ki siel-la huj.³I bõmãte, zot ka dji: "ke tõbe lapli pase ki siel-la huj-suku".zot biẽ konet fe djifehãs dji siel-la, mẽ sin dji tã-la zot pa konet.⁴Kumã pov dji jodla mixã i sã espua! zot ka dumãde dji mo un mihak, mẽ mihak ki mo ke mõthe a mihak dji Jonas . Ẽbe li sotxi i ale.⁵Kã djisip-iela pase pu bo Levã dji lag-la, ie blie pote djipẽ.⁶Jezi dji: zot hete veie i ãtãsiõ ke fehmẽto dji fahiseu-iela i dji saduseu-iela.⁷Djisip-iela kumase kose un pu uot: Li ka kose sa pase no pa pote djipẽ.⁸Jezi tãde sa ki ie te Ka kose li dumãde: Pukisa, zot ka kose kumã li pa gãiẽ djipẽ? kumã li pitxi espua ki zot gãiẽ!⁹Zot pãko kõphan? zot pa ka xõje dji sẽk djipẽ ki mo pataje pu sẽk mil om? Kõbie pãiẽ zot plẽ?¹⁰I sa set djipẽ-iela pu Kat mil om-iela? kõbie pãiẽ zot plẽ?¹¹Zot pa ka kõphan ki mo pa ka kose a hespek dji djipẽ. Ãtãsio ke fehmẽto dji fahiseu i saduseu-iela!¹²Ẽbe djisip-iela kõphan ki Li pa te ka kose pu ie te ãtãsiõ ke fehmẽto ki te ka ise lãdã djipẽ, mẽ ui ke sa ki ie te ka mõthe.¹³Jezi ale pu hegiõ ki ka hete phox dji Cesareia dji Felip. Laba li dumãde dji so djisip-iela: Akimun pov-la ka dji ki Pitxit dji Om sa?¹⁴Ie hepon: un dê ka dji Ki a Jã Batxist, uot ka dji ki a Elias, uot ka dji ki a Jehemias o un kek phofet.¹⁵Jezi dumade: I zot? akimun zot ka dji ki mo sa?¹⁶Simõ Pie hepon: Sẽie u sa Khi, Pitxit dji Bõdje vivã.¹⁷Jezi dji:Simõ, pitxit dji Jã,u kõtã pase ki sa lavehite-la a pa pies mun dji late ki mõthe pu u, mẽ vini djihekmã dji mo Papa ki lahosiel.¹⁸Ẽbe, no ka dji: u sa Pie, i lasu sa hox-la Mo ka edjifike mo leglis i nẽ lamo-la pa puve gãiẽ¹⁹Mo ke bai pu u lakle-iela dji lasosiete dji lahosiel; kisa u ïtẽãdji lasu late mo ke ïtẽãdji lahosiel, akisa u asekte lasu late mo ke asekte lahosiel.²⁰Ẽbe Jezi bai zod pu so djisip-iela pa hakõte pu pies mun ki li te sa Messias.²¹djila pu djivã, Jezi kumase dji pu so djisip-iela : Mo buẽzẽ ale pu Jehusalém, i laba lidehãs dji judeu-iela, xef dji sasedotxi-iela i met-iela dji lalua ke fue mo sufui boku. Mo ke muhi, i lãdã thoasen ju, mo ke hesusite.²²Ẽbe Pie ale ke Li un khã i li kumase babie'L, li dji: -Li Bõdje pa ke fe sa hive! sa pa jẽ ke hive ke u Sẽie!²³Jezi vihe li dji pu Pie: sotxi dji obo mo, Satã! u sãble un hox lãdã mo ximẽ pu fe mo tõb, u ka majinẽ kumã un om ka majinẽ i nõ kumã Bõdje ka majinẽ.²⁴I Jezi dji pu so djisip-iela: "si un kek dji zot, le tone mo siavito kuiẽnẽ u phop ko, phã u lakhue i suiv mo.²⁵Si nẽpot ki le sove so lavi li ke piad li, mẽ nẽpot ki pu mo piad so lavi, sa ke thuve so lavi.²⁶ki vale si un kek mun gãiẽ tã-la ãtxe, mẽ li piad vuemã lavi-la? Pa gãiẽ ãiẽ ki puve peie pu li gãiẽ lavi-la ãko.²⁷Pitxit dji Om ke vini lãdã (gloria) dji so Papa ke so zãj-iela i ẽbe li ke bai hekõpãs pu thavai ki xak un fe.²⁸Ã lavehite mo ka dji pu zot: Esi la gãiẽ un dê mun ki pa ke muhi ãvã dji ie ue Pitxit dji Om kumã un Vue.

¹Sis ju aphue Jezi ale pu un mõtãi hot, ale ke li selmã Pie, Txiago i so fue Jã.²Ẽbe laba li mudjifike djivã ie, so vijaz klehe kumã solei-la, so lẽj hete blã kumã un klehite.³Lãdã sa mem mumã-la pahet djivã ie Moises ke Elias ka kose ke Jezi.⁴Ẽbe Pie dji pu Jezi: Sẽie kumã li bõ ki no esi la. Si u le mo ka fe thoa bahak lãdã sa kote-la: un pu U, un pu Moises, I un pu Elias.⁵Ẽkãt Pie te ka kose tuju, un nuaj dji klehite khuvui ie sotxi un vue dji nuaj-la: Sa la a mo Pitxit ki ka pote pu mo boku kõtãtmã. Zot kute akisa li ka dji.⁶Kã so djisip-iela tãde, ie hete ãjunü ke ie vijaz lasu late-la, ie hete boku pe.⁷Jezi phoxe ie, li tuxe ie li dji: zot leve pa buẽzẽ hete pe!⁸Kã ie leve, ie gade, ie pa ue pies mum, a te selmã Jezi.⁹Ẽkãt ie te ka desan dji mõtãi-la Jezi dji sa zod-la pu ie: zot pa hakõte pu pies mum sa ki zot ue, juk tã "Pitxit dji Om-la ke hesusite dji lamo.¹⁰So djisip-iela dumade'l: Pukisa,ẽbe met dji lalua-iela ka dji Elias gãiẽ pu vini phõmiẽ?¹¹Jezi hepon ie: A lavehite Elias ke vini pu phuepahe tut bagaj.¹²Mo ka dji pu zot ki Elias deha vini, mẽ ie pa hukonet li. Mẽ ie malthete'l kumã ie te le. Kõsa osi ie ke malthete Pitxit dji Om-la.¹³Ẽbe so djisip-iela kõphan ki Jezi te ka pale a hespek dji Jã Batxist.¹⁴Kã ie hive phox dji ban mun-iela, un om phoxe jezi li ãjunü djivã'l I li dji:¹⁵Sẽie gãiẽ lapen dji mo pitxit, khis ka phã li boku fo, ki boku fue li ka tõbe lãdã djife, i lãdã djilo.¹⁶Mo pote'l pu u djisip-iela mẽ ie pa hesi djiehi'l.¹⁷Jezi hepon: gehasiõ ki mixã i sã espua juk ki tã mo ke hete ke zot? juk ki tã mo ke sipote zot? zot pote tximun-la esi la pu mo.¹⁸Ẽbe jezi bai zod pu demuẽ-la sotxi li sotxi, i lãdã mem lokasiõ tximun-la hete djiehi.¹⁹Aphue so djisip-la phoxe selmã Jezi i ie dumãde'l: Pukisa no pa hesi txihe demuẽ-la?²⁰Jezi hepon ie: pase zot espua pitxi, ã lavehite mo ka dji zot, si zot espua te gãiẽ ghoso dji un ghen dji mustahd, zot te puve dji pu sa mõtãi-la,"sotxi dji esi la, ale pu laba li te k'ale. I ãiẽ pa te ïposib.²¹(mẽ sa kalite demuẽ-la u ka sel txihe ke boku phuie I jẽnẽ).²²Ẽkãt ie te ka hasãble la Galileia, Jezi dji pu ie: ie ke hãde Pitxit dji Om-la la lãmẽ dji om-iela.²³I ie ke txue'l, mẽ lãdã thoazen ju-la li ke hesusite. I djisip-iela hete boku this.²⁴Kã Jezi ke so djisip-iela hive la pei dji Kafahnaum, mun ki ka hamase xahite-iela, ale kote Pie ie dumãde: zot Sẽie pa ka peie kõt dji kaz dji adohasiõ?²⁵Pie hepon: Li ka peie ui. Aphue Pie ãthe ãdjidã kaz-la, mẽ ãvã Pie kose un kek bagaj, Jezi dji: akisa u ka thuve Simõ ? akimum ka peie xahite i kõt pu vue-iela dji tã-la? a phop mun dji pei-la o ẽthãje-iela.²⁶Pie hepon: A ẽthãje-iela! Jezi dji pu li: Ẽbe ie phop mun-iela pa buẽzẽ peie.²⁷Mẽ no pa le demãtxi ie. Pusa ale obo lahivie voie u zẽ phõmiẽ puasõ ki u ke txẽbe, luvui so bux u ke thuve un ãghẽnẽ. Ẽbe ale i peie ke li mo kõt i u pa.

¹Lãdã sa mem lokasiõ-la djisip-iela phoxe Jezi ie dumãde: Ẽbe, akimun ki pi ïpohtã la lasosiete dji lahosiel?²Ẽbe Jezi aple un tximun, li mete'l lamitã dji ie,³Li dji: Ã lavehite mo ka dji,pu zot, si zot pa hepãtxi dji zot pexe-iela, i pu zot fe sãble un tximun zot pa ke puve ãthe lãdã lasosiete dji lahosiel.⁴Akõsa, xak un ki sẽp kumã sa tximun-la, li plis ïpohtã la lasosiete dji lahosiel.⁵I xak un ki husuve un tximun kumã sa lasu mo nõ, li ka husuve mo.⁶Mẽ si nẽpot un dji zot ki fe un dji sa pitxi-iela ki ka khe lasu mo thõpe, li pi bõ li mahe un hox la so goj i li jite so ko lãdã un lahivie.⁷Ki ghã sufãs pu tã-la palakos dji bagaj-iela ki ka fe mun-iela ãbãdõnẽ mo! Sa bagaj-iela gãiẽ dji hive, mẽ ki ghã sufãs pu sa mun ki ka fe sa djimal.⁸pase si un dji u lãmẽ o u pie fe u fe pexe kupe'l i jite'l deho! pi bõ u ãthe ke sel un bo la lasosiete dji Bõdje, dji ki u ke dê lãmẽ i dê pie u ale pu lãfe.⁹Si un dji u uei fe u fe pexe tihel i jite'l deho. Li pi bõ u ãthe ke sel un bo la lasosiete dji Bõdje, dji ki u ke dê uei i u ale pu lãfe.¹⁰Ãtãsiõ, zot pa nephuize pa un dji sa pitxi -iela! Mo ka afihmẽ pu zot ki ie zãj-iela tut tã la phuezãs dji mo Papa, ki laba lahosiel.¹¹(pase ki Pitxit dji Om-la vini sove sa ki pedji).¹²Akisa zot ka thuve? si un om gãiẽ sã mutõ, i un dji ie pedji, akisa li ke fe? li pa ka lese uot kathe vẽt djis nef pu li ale sase sa ki pedji-la.¹³I kã li thuvel, ã lavehite mo ka dji li ka hete plis kõtã pase dji sa uot kathe vẽt djis nef, ki pa pedji-iela.¹⁴Akõsa osi, zot Papa ki lahosiel, pa le piad pies un dji so pitxi-iela.¹⁵Si u fue fe pexe kõt u, ale mõthe'l kote li mãke. Mẽ fe sa selmã ãt zot dê. Si li kute u kõsei, ẽbe u gãiẽ u fue ãko.¹⁶Mẽ, si li pa kute u, ale ke un dê fue kote li, pu fe sa ji Pahol Sẽ ka dji : "nẽpot akusasiõ buẽzẽ kõfihmẽ pu pahol dji mem dê tẽmuẽ.¹⁷Mẽ, si li pa le kute, aple leglis-la, i si li pa le kute leglis-la, kosidehel Kumã un ẽthãje o un publikan.¹⁸Ã lavehite mo ka dji pu zot: sa ki zot ïteãdji lasu late li ïteãdji osi lahosiel, i sa ki zot peãmite lasu late li peãmite osi lahosiel.¹⁹I mo ka dji pu zot osi ã lavehite: tut fue ki dê dji zot ki lasu late dumãde mem bagaj lãdã phuie, mo Papa ki lahosiel ke fe pu zot.²⁰pase ki, kote dê o thoa hasãble asan lasu mo nõ, mo laba asan ke ie.²¹Ẽbe Pie vini kote Jezi li dumãde: Sẽie kõbie fue mo puve padõnẽ mo fue ki fe pexe kõt mo? set fue?²²Jezi hepon: u pa djivet padõnẽ set fue, mẽ soasãt djis set fue.²³Pase ki, Lasosiete dji Lahosiel a kumã un vue ki deside mete lãdã ju kõt ke so siavito-iela ki te ka siavi'l.²⁴Lãdã kumasmã ie pote un ki te ka deve vue-la miliõ dji ãghẽnẽ dji phata.²⁵Mẽ siavito-la pa te gãiẽ lajã pu peie. Ẽbe pu peie so kõt , so Pathõ, vue-la, bai zod ki li, i so fam, i so pitxit-iela I tut so djibiẽ-iela pu ie vãde pu peie so Pathõ.²⁶Mẽ siavito-la ãjunü djivã so Pathõ li dumãde: "gãiẽ pasiãs ke mo, mo ke peie tut pu u Pathõ".²⁷Pathõ-la hete ke lapen dji li, i pathõ-la padõnẽ so kõt.²⁸Mẽ, kã siavito-la sotxi dji phuezãs dji pathõ-la li ue un kamahad ki te mãke peie'l sã ãghẽnẽ dji phata. li txẽbe kamahad-la,la so goj li kumase sukuie'l li dji: peie sa ki u ka mäke peie mo!²⁹Ẽbe so kamahad ãjunü djivã li dumãde: "gãiẽ pasiãs ke mo, i mo ke peie tut sa ki mo ka mãke peie.³⁰Mẽ li pa kute'l. li voie phui hamahad-la juk kã li peie tut so kõt.³¹Kã, uot siavito-iela ue sa ki te hive ie hete kole I ale hakõte tut pu pathõ-la.³²Djila pathõ-la aple siavito-la li dji:"siavito maleve! u dumãde mo i mo padõnẽ u kõt ki u te ka mãke peie mo.³³Akõsa, u te djivet gãiẽ lapen dji u kamahad, kumã mo te gãiẽ lapen dji u".³⁴Pathõ-la hete boku kole li voie siavito-la pu phuisiõ, ãfẽ dji li sufui juk kã li peie tut kõt-la.³⁵Jezi dji: Akõsa mo Papa ki lahosiel ke fe ke zot, si xak un dji zot pa padõnẽ zot fue dji lavehite.

¹Aphue ki Jezi fini kose sa pahol-iela, li sotxi dji Galileia, li ale pu hegiõ dji Judeia ki ka hete bo Levã dji lahivie Johdão.²I ban mun-iela suiv Li, i laba li djiehi tut ki te malad-iela.³Ẽbe un dê fahiseu phoxel ie te le hesi un kek laphuev kõt Li, ie dumãde'l:li bõ djivohsie dji u fam palakos nẽpot bagaj?⁴Jezi hepon: zot pãko li sa ki Pahol Sẽ dji: "lãdã kumasmã Bõdje fe ie om i fam?"⁵I Bõdje dji: "pu sa om-la ke lese papa i mãmã pu hasãble ke so fam, i ie dê ke fõmẽ selmã un ko."⁶Kõsa ie pa ke sa dê ãko, mẽ un sel laxe; pase sa ki Bõdje hasãble, om-la pa ka sepahe.⁷Fahiseu-iela dumãde: Ẽbe pukisa Moises dji lãdã lalua-la ki om-la puve bai un papie dji djivohsie pu so fam i pu li voie'l ale.⁸Jezi hepon: Moises bai sa piami-la palakos dji zot txo du; mẽ lãdã kumasmã a pa te Kõsa.⁹Mẽ mo ka dji: si kek mun djivohsie dji so fam, si a pa palakos dji pexe dji hete ke uot om, i om-la maie ke uot fam li ka fe pexe osi.¹⁰Djisip-iela dji: Si akõsa situasiõ ãt om-la i so fam, ẽbe mio ie pa maie.¹¹Jezi hepon: Sa pahol-la a pa pu tut, mẽ selmã pu sa ki Bõdje ke bai.¹²pase li gãiẽ hezõ djifehã ki ka tonẽ un dê om ïkapab pu maie: un, pase ie fet kõsa; uot pase ie xathe; i uot osi pãko maie palakos dji Lasosiete dji Lahosiel. Mun ki puve, asekte sa pahol-la.¹³Aphue dji sa, un dê mun pote ie tximun-iela pu Jezi mete so lãmẽ lasu ie i phuie, mẽ djisip-iela babie sa mun-iela ki fe sa.¹⁴Jezi dji: lese ki tximun-iela vini kote mo i pa ïteãdji ki ie fe sa, pase Lasosiete dji Lahosiel a dji sa mun-iela ki sãble sa tximun-iela.¹⁵Ẽbe Jezi mete so lãmẽ lasu ie i aphue li ale.¹⁶Un om hive phox dji Jezi li dumãde: Bõ Met, akisa mo puve fe pu gãiẽ lavi ẽtehnel?¹⁷Jezi hepon: Pukisa u ka dumãde mo a hespek dji sa ki bõ? Bõ gãiẽ sel un; Bõdje. Si u le ãthe lãdã lavi ẽtehnel, sehe sa zod-iela.¹⁸li dumãde : ki zod? Jezi hepon: "pa txue, pa deie uot fam, pa volo, pa fe mãto kõt pies mun, ¹⁹hespete u papa i u mãmã kõtã uot-iela kumã u kõtã u phop ko".²⁰jon om-la hepon: mo ka obei tut sa zod-iela! akisa ka mãke mo fe?²¹Jezi hepon: u le hete jis, ale vãde tut sa ki u gãiẽ, bai lajã pu mum ki pov-iela, i kõsa u ke gãiẽ hixez laba lahosiel. Djila vini I suiv mo.²²Kã Jon om-la tãde sa, li ale this, pase li te boku hix.²³Ẽbe Jezi dji pu so djisip-iela: Ã lavehite mo ka dji pu zot. boku difisil un hix ãthe la Lasosiete dji Lahosiel.²⁴I mo ka dji ãko ki plis difisil un hix ãthe la Lasosiete dji Bõdje dji ki un xãmu pase lãdã thu dji un zedjui.²⁵Kã ie tãde sa, djisip-iela hete susphan ie dumãde: Ẽbe, kimun ki puve sove?²⁶Jezi gade kote ie li hepon: pu mun-iela sa pa posib; mẽ, pu Bõdje tut sa posib.²⁷Djila Pie dji: gade! No lese tut i no suiv u. Akisa no ke gãiẽ?²⁸Jezi hepon: Ã lavehite mo ka dji pu zot: Kã ke hive mumã ki Bõdje ke fe tut nov i Pitxit dji Om-la ke asi la so xez "glorioso", zot , mo djisip-iela ke asi osi lãdã duz xez pu kõdãnẽ duz "pei(tribo) dji Ishael".²⁹I tut mun ki lese palakos dji mo: kaz, fue-iela, so-iela, papa, mãmã, pitxit o late, ke husuve sã fue pi boku i osi lavi ẽtehnel.³⁰Boku ato ki sa phõmiẽ ie ke sa djiãiẽ, i boku ki sa djiãiẽ ie ke sa phõmiẽ.

¹Lasosiete dji Lahosiel, a kumã un om met dji un ghã plãtasiõ dji (uva) ki sotxi bõmãtẽ bono pu sase thavaio pu thavai la so plãtasiõ.²Li kõbinẽ ke thavaio-iela un ãghẽnẽ dji (prata) pa jone, i li voie ie pu so plãtasiõ.³Kã li sotxi, phox neve dji bõmãtẽ, li ue un dê om ki pa te ka fe ãiẽ lãdã plas dji magazẽ.⁴Li dji pu ie "zot ale thavai lãdã mo plãtasiõ mo ke bai pu zot sa ki zot mehite ie ale"⁵Li sotxi ãko phox midji i thoaze, li fe mem bagaj ke uot thavaio-iela.⁶Kã li hu sotxi phox sẽke, li thuve uot om laba, li dumãde dji ie: Pukisa zot la sã fe ãiẽ?⁷ie hepon: pase pies mun pa bai no thavai. Ẽbe li dji: "zot ale osi thavai la mo plãtasiõ".⁸Lãdã finisiõ dji jonẽ-la met dji plãtasiõ-la li aple so adjiministhate li dji: aple thavaio-iela pu peie ie kumase dji djiãiẽ-iela pu phõmiẽ-iela.⁹om-iela ki kumase thavai sẽke dji asue ie husuve un ãghẽnẽ dji (prata) xak un.¹⁰Kã sa phõmiẽ-iela hive ie majinẽ ki ie te husuve plis. Mẽ ie osi husuve un ãghẽnẽ dji (prata) xak un.¹¹Kã ie husuve ie kumase heklãmẽ kõt Pathõ-la,¹²ie dji: Sa thavaio-iela ie thavai selmã un le dji tã, mẽ no sipote jonẽ-la ãtxe ãba sa solei ki xo-la. Mẽ, ie husuve mem-la ke no!¹³Mẽ xef-la dji pu un dji ie: kamahad mo pa ka fe ãiẽ ki pa his ke u. U pa te dako pu thavai jonẽ-la ãtxe pu un ãghẽnẽ selmã?¹⁴Phã sa ki a u pa i ale. Mo ke bai pu sa ki thavai djiãiẽ-la mem kãtxite ki mo bai pu u.¹⁵U khe mo pa gãiẽ dhue fe ke mo lajã sa ki mo le. O u thuve mal selmã kumã mo fe bõ ke li?¹⁶Jezi fini dji: Akõsa sa ki a phõmiẽ-iela ie ke sa djiãiẽ, i sa ki a djiãiẽ-iela ie ke sa phõmiẽ.¹⁷Kã Jezi te ka mõte pu Jehusalem, li aple so djisip-iela pu un bo, lamitã ximẽ li dji pu ie:¹⁸Zot kute! No k'ale pu Jehusalem, kote Pitxit dji Om-la, ie ke hãde'l pu "xef dji sasedotxi-iela" i pu "met dji lalua-iela", ie ke kõdãnẽ'l pu lamo.¹⁹Ie ke hãde'l la lãmẽ dji nõ-judeu-iela. Ie ke solãte'l, ie ke fut li, i ie ke klue'l; mẽ lãdã thoazem ju li ke hu leve dji lamo.²⁰Ẽbe phoxe dji Jezi zebedeu so pitxit-iela ke ie mãmã. Mãmã-la adohel pu li dumãde dji li un suple.²¹Jezi dumãde: akisa u le?. Li hepon: phomet ki, kã u te tonẽ Vue, sa no dê pitxit-iela ie ke asi un la u adhet i un la u agox.²²Jezi dji pu dê pitxit dji mãmã-la. Zot pa save akisa zot ka dumãde. Zot puve bue mem djivẽ ki mo ke bue? Ie hepon: ui no puve.²³Ẽbe Jezi dji: vuemã, zot ke bue mem djivẽ ke mo. Mẽ mo pa gãiẽ dhue xuezi akimun ke asi la mo adhet i la mo agox. Pase a mo Papa ki phuepahe sa plas-iela i li ke bai pu mun ki li le.²⁴Kã uot djis djisip-iela tãde sa, ie hete kole ke dê fue-iela.²⁵Jezi aple ie tut li dji: zot save ki guvelmã-iela dji sa tã-la gãiẽ otohite lasu pov-la, i ofisial-iela gãiẽ otohite lasu mun-iela.²⁶Mẽ zot pa puve fe Kõsa ãt zot. Mun ki le hete ïpohtã, pu li siavi uot-iela,²⁷i mun ki le sa phõmiẽ, ki ie tonẽ zot esklav.²⁸Pase ki, juk Pitxit dji Om-la pa vini pu ie siavi'l, mẽ pu li siavi i bai so lavi pu sove boku mun.²⁹Kã Jezi i so djisip-iela sotxi dji Jehiko, un ghã kãtxite mun te ka siuv Jezi.³⁰Dê mun ki pa te ka ue, ie te asi obo ximẽ, ie tãde ki Jezi te ka pase ie kumase hele: Sẽie, Pitxit dji Davi, gãiẽ lapen dji no!³¹Mẽ ban mun-iela te ka babie pu ie pa te hele, mẽ ie kõtxinẽ hele plis fo: _Sẽie, Pitxit dji Davi, gãiẽ lapen dji no!³²Ẽbe Jezi hete li aple ie, i li dumãde: akisa zot le ki mo fe ?³³Ie hepon: Sẽie ki no uei-iela hete luvui.³⁴Jezi hete ke lapen dji dê mun ki pa ka ue-iela, Jezi tuxe lãdã ie ue-iela. Lãdã mem lokasiõ ie hete ue i ẽbe ie suiv Jezi.

¹Kã ie phoxe Jehusalem, Jezi i so sjisip-iela hive la (Betfage), la mõtãi dji (Oliveira). Jezi voie djivã dê djisip.²Jezi dji pu ie:"zot ale lãdã vilaj ki djivã dji zot i zot ke thuve un fimel xuval mahe i un txixuval ke li; demahe ie i pote animal-iela pu mo".³Si un kek mun dumãde dji zot akisa zot ka fe; hepon kõsa no met buẽzẽ dji ie, kõsa ie ke lese zot pote animal-iela.⁴Sa hive pu kõphui sa ki phofet-la te dji:⁵"Pale pu pov dji Jehusalem: zot, gade ato zot Vue ka vini. Li onet i sẽp, li ka vini ãle un xuval i un txixuval, pitxit dji fimel xuval".⁶Dê djisip-iela fe kumã Jezi dji pu ie.⁷Ie pote fimel xuval-la i txixuval-la, ie mete ie kap-iela lasu do xuval-iela i Jezi mõte ãle xuval-la.⁸I ban mun-iela luvui ie lej-iela lãdã ximẽ-la djivã Jezi, i uot mun kupe fei dji bhãx-bua ie jite lãdã ximẽ-la.⁹I sa mun-iela ki te k'ale djivã i ki te ka vini deie Jezi, ie te ka hele: "hosana, pu Pitxit dji Davi! ki Bõdje bẽni sa ki ka vini la nõ dji Sẽie! Hosana pu Bõdje lãdã plis hot dji siel-la".¹⁰Kã Jezi ãthe la Jehusalem, i tut mun-iela dji pei-la hete thakase i susphan, mun-iela dji: "akimun li sa?"¹¹ban mun-iela hepon: "A Jezi, Phofet dji Nazahe, dji Galileia".¹²Ẽbe Jezi ãthe lãdã Kaz dji Adohasiõ, li kumase babie tut ki te laba ka axte i vãde animal-iela pu sakhifis. Li xavihe tut tab-iela dji mun ki te ka xãje lajã, i xavihe bã-iela dji mun ki te ka vãde hãmiẽ.¹³Jezi dji pu ie: Lãdã "Pahol Sẽ" la ekhi ki Bõdje dji kõsa: " Mo kaz ie ke aple Kaz dji Phuie, mẽ zot thãsfõmẽ li lãdã kaz dji vole".¹⁴I mun ki pa ka ue, i mun ïvalid vini kote Jezi lãdã Kaz dji Adohasiõ-la, i li djiehi ie.¹⁵Kã sasedotxi, i met dji lalua-iela ue sa mihak-iela i ie tãde tximun-iela ka hele"Hosana,Pitxit dji Davi, ie hete ãhaj. ¹⁶Ie dji pu Jezi: U ka tãde sa ki tximun-iela ka dji?Jezi hepon: zot pa jẽ li Pahol Sẽ-la? li dji: mõthe tximun-iela ofui bõ adohasiõ? ¹⁷Ẽbe Jezi lese ie, i sotxi dji pei-la li ale pu pov dji Betãnia. Li pase nuit laba.¹⁸Bõmãtẽ, ẽkãt li te ka hutonẽ pu Jehusalem, Jezi hete fẽ.¹⁹Li ue un pie-figo obo ximẽ-la, li ale gade si li te gãiẽ fui, mẽ li thuve selmã fei. Ẽbe, Jezi dji pu pie-figo:"u pa jẽ ke bai fui", i lãdã mem lokasiõ pie-figo-la hete sek.²⁰Kã djisip-iela ue sa, ie hete susphan ie dumãde:"kumã pie-figo-la hete sek thop vit?²¹Jezi hepon: Ã lavehite mo ka dji pu zot: si zot gãiẽ espua, i pa lese dji khe, zot puve fe mem bagaj kumã mo fe ke txipie-figo-la. I pa selmã sa, mẽ zot puve dji pu sa motai: "leve i ale pu ghã- lãme", i sa ka hive.²²"Si zot khe, zot ke husuve nẽpot bagaj ki zot dumãde lãdã phuie".²³Kã Jezi hutonẽ pu Kaz dji Adohasiõ li kumase mõthe i esplike, un dê sasedotxi i lidehãs dji judeu-iela ie phoxe Jezi i dumãde: ke ki povua u ka fe sa bagaj-iela? ki mun ki bai u sa povua-la?²⁴Jezi hepon: mo osi ke dumãde dji zot. si zot bai mo lahepõs la jis, mo ke dji pu zot ke ki povua mo ka fe sa bagaj-iela.²⁵Zot hepon mo: akimun ki bai povua pu Jã batxize? a Bõdje o mun-iela? Ie kumase kose un ke uot: si no dji ki a Bõdje, li ke dji. " Ẽbe, pukisa zot pa khe lasu Jã"?²⁶Mẽ, si nõ dji ki a mun-iela, no pe dji pov-la, pase ki tut pov-la ka kõsidehe Jã kumã un Phofet.²⁷Pu sa ie hepon: no pa save. Jezi dji: Mo osi pa ka pale ke ki povua mo ka fe sa bagaj-iela.²⁸Jezi kõtxinẽ dji: akisa zot ka thuve dji sa? un om te gãiẽ dê pitxit on. Li ale kose ke pitxit ki plis vie-la li dji:" pitxit jodla u k'ale thavai la no plãtasiõ dji (uva)."²⁹Pitxit-la hepon: Mo pa k'ale. mẽ aphue li xãje dji lide li ale.³⁰papa-la ale kote uot pitxit-la li bai mem zod. I pitxit-la hepon "ui". Mẽ aphue pitxit-la pa ale.³¹Jezi dumãde: dji ie dê, a ki pitxit ki fe volõte dji papa-la? Ie hepon: A pitxit ki plis vie-la. Ẽbe, Jezi dji pu ie: Mo ka dji pu zot ki sa a lavehite: publikan-iela i fam-iela dji lahi, ka ãthe la lasosiete dji lahosiel ãvã zot.³²Jã Batxist vini pu mõthe zot ximẽ ki jis, i zot pa khe lasu'l; mẽ publikan-iela i fam-iela dji lahi khe. I mem Aphue dji ue tut sa, zot pa hepãtxi i zot pa khe lasu'l.³³Jezi dji kute uot Kopahasiõ: un om fe un plãtasiõ dji (uva) i edjifike un bahaj pu kõhõnẽ plãtasiõ-la, un tãk pu phuese uva-iela, li edjifike un kaz hot pu so soda suveie; i aphue li lese so plãtasiõ la lãmẽ dji un dê aghikuto, i li voiaje.³⁴Kã hive sesõ pu hamase fui-iela, met-la voie un dê thavaio, pu husuve so pa kãtxite dji fui-iela.³⁵Aghikuto-iela txẽbe thavaio-iela, ie fut un, ie txue uot-la i ie jite hox lasu thoazem-la.³⁶Ẽbe met-la voie un patxizã ki plis boku dji thavaio, pu husuve so pa kãtxite dji fui-iela, mẽ aghikuto-iela fe ke patxizã-la mem bagaj.³⁷Aphue dji tut sa, met-la voie so pitxit, li majinẽ: djivet ie ke hespete mo pitxit.³⁸Mẽ, Kã aghikuto-iela ue pitxit-la, ie kose un ke uot: "Sa a pitxit dji met-la; li ke phã tut so plãtasiõ, ãnu txue'l, pu no hete ke plãtasiõ-la.³⁹Ẽbe, ie txẽbe pitxit-la, ie jite'l deho dji plãtasiõ- la i ie txue'l.⁴⁰Jezi dumãde: I ato, Kã met dji plãtasiõ-la hutonẽ, akisa li ke fe ke aghikuto-iela? ⁴¹Ie hepon: asihe li ke txue sa aghikuto mixã-iela, li ke bai plãtasiõ-la pu uot mun. Ie ke bai met-la so pa kãtxite dji fui, lãdã lokasiõ jis.⁴²Jezi ẽbe dumãde, zot pa jẽ li Pahol Sẽ-iela: " hox, ki mun ki edjifike, jite vini tonẽ plis ïpohtã dji tut hox-iela. Bõdje fe sa a un bagaj thop joli".⁴³Mo ka dji pu zot, ki Lasosiete dji Bõdje, ke sotxi dji zot, i mo ke bai pu sa mun-iela ki ka bai fui ki bõ. ⁴⁴Mun ki tõbe ale sa hox-la, ka hete ã pedas, i si hox-la tõbe ãle kek mun, sa mun-la ka vihe san.⁴⁵Xef dji sasedotxi-iela i fahiseu-iela ie tãde sa Kopahasiõ ki Jezi hakõte i ie te save ki li te ka pale a hespek dji ie. ⁴⁶Apusa ie te le phui Jezi, mẽ ie te pe dji mun-iela, pase ki pov-la te ka khe ki Jezi ate Phofet.

¹Ẽbe Jezi hutonẽ ise Kopahasiõ pu pale ke mun-iela, Li dji:²Lasosiete dji Lahosiel a kumã un vue ki phuepahe un lafet dji lamaiaz pu so pitxit.³Aphue li voie so siavito-iela aple mun ki li te ẽvite, mẽ ie pa te le vini.⁴Ẽbe li voie uot siavito, pu ie dji kõsa:"dji pu mun-iela ki mo ẽvite ki tut deha phuepahe pu lafet-la. Mo deha txue bef ki plis gha-iela, i tut phuepahe, ki ie vini lãdã lafet-la!"⁵Mẽ mun-iela ki li ẽvite pa bai atẽsiõ, ie ale pu ie fazen, uot ale pu ie magazẽ.⁶Uot-iela txẽbe siavito-iela ie fut ie i ie txue ie.⁷Vue-la hete ãhaj boku, ki li voie txue sa mun-la i bule ie pei kote ie ka hete.⁸Aphue li aple so siavito-iela li dji: "mo lafet dji lamaiaz, phuepahe, mẽ mun ki mo ẽvite pa mehite vini,⁹ato zot ale lãdã lahi-iela i ẽvite tut mun ki zot ue".¹⁰Ẽbe, siavito-iela sotxi lãdã lahi-iela ie hasãble tut sa ki ie thuve, kumã mun ki bõ, kõsa ki mixã. I lasal dji lafet-la hete plẽ ke mun.¹¹Kã vue-la ãthe pu gade mun ki so siavito-iela ẽvite, li ue un om ki pa te ka ise lẽj espesial pu lafet-la.¹²Vue la dji: kamahad, kumã u ãthe esi sã lẽj espesial dji lafet-la? mẽ om-la pa hepon ãiẽ.¹³Ẽbe, vue-la dji pu so siavito-iela: mahe pie i lãmẽ dji sa om-la i jite'l deho, lãdã suku. Laba li ke khie i mode so dã dji dulo.¹⁴I Jezi dji: boku mun ie ke ẽvite, mẽ tximoso ie ke xuesi.¹⁵Fahiseu-iela hasãble pu fe thap, pu Jezi puve pale un kek bagaj kõt ie, pu ie puve phui'l.¹⁶Ẽbe ie voie un dê dji so djisip-iela, i un dê mun dji Herodes, pu dji pu Jezi: _met, no save ki u onet, u ka mõthe lavehite, pu viv dji mãiẽ ki Bõdje le, u pa ka bai ïpohtã pu opiniõ dji uot-iela, u pa ka kõdãnẽ pu vijaz.¹⁷Ato dji pu no akisa u ka majinẽ dji sa: li jis peie xahite pu cezar: ui o nõ.¹⁸Mẽ Jezi te save dji ie ïtẽsiõ, li hepon: Hipokhita! pukisa zot ka sase un laphuev kõt mo?¹⁹Zot pote ãghẽnẽ ki zot ka peie xahite ie pote ãghẽnẽ-la.²⁰I li dumãde: A dji ki mun nõ i vijaz ki lãdã sa ãghẽnẽ-la?²¹Ie hepon: A dji Cezar: Ẽbe Jezi dji, zot bai pu Cezar sa ki a dji Cezar, i bai pu Bõdje sa ki a dji Bõdje.²²Ie hete susphan kã ie tãdẽ sa. Ẽbe ie lese Jezi i ie ale .²³Lãdã sa mem ju-la hive obo Jezi un dê "saduseus", ie afihmẽ ki pies mun pa ka hesusite.²⁴Ie dji pu Jezi: Met, Moisés mõthe kõsa, si un om muhi, i li lese so fam sã pitxit, so fue djivet maie ke fam-la, pu ie gãiẽ pitxit, ki ke kõsidehe pitxit-iela dji om ki muhi la.²⁵Te gãiẽ ãt no set fue, plis vie-la maie i aphue li muhi sã gãiẽ pitxit. Kõsa, li lese fam-la pu dezem fue-la.²⁶Mem bagaj hive ke dezem-la i osi ke thoazem-la, i finalmã ke tut set fue-iela.²⁷Aphue dji ie fam-la osi muhi.²⁸Lãdã ju dji hesuheisiõ, dji ki fue li ke tonẽ fam? Pase ie tut te maie ke li!²⁹Jezi hepon: kumã zot sot, zot pa konet Pahol Sẽ-la, nẽ povua dji Bõdje!³⁰Pase, kã mun muhi-iela ke hesusite, ie ke sãble zãj-iela dji Lahosiel, pies mun pa ke maie.³¹I suje hesuheisiõ dji mun ki muhi-iela, zot pa li sa ki Bõdje dji pu zot, Li dji:³²" Mo sa Bõdje dji Abhaão, Bõdje dji Isaque, i Bõdje dji Jacó". I Bõdje pa sa Bõdje dji mun muhi, mẽ ui dji mun vivã.³³Kã mun-iela tãde sa, ie hete susphan ke so mãiẽ dji mõthe.³⁴Fahiseu-iela hasãble, kã ie tãdẽ ki Jezi fe saduseu-iela fõmẽ ie bux.³⁵Un dji ie, ki ate met dji lalua, te le thuve un kek laphuev kõt Jezi, li dji:³⁶Met, akiles ki plis ïpohtã dji tut zod dji lalua-iela.³⁷Jezi hepon:"kõtã Sẽie, u Bõdje, ke tut u txo, ke tut u nam i ke tut u mẽmua".³⁸Sa a ki plis gho zod-la i ki plis ïpohtã.³⁹I desem ki plis ïpohtã sãble phõmiẽ-la:"kõtã uot-iela kumã u kõtã u phop ko. ⁴⁰Tut sa lalua dji Moises, i tut sa ki phofet mõthe, ie ka fini lãdã sa dê zod-iela.⁴¹Kã fahiseu-iela te hasãble, Jezi dumãde dji ie: ⁴²Akisa zot ka majinẽ dji Messias? dji ki mun li sa pitxit? Ie hepon: dji Davi.⁴³Jezi dumãde ie ãko: Ẽbe pukisa, Davi pu lesphui Sẽ, li aple Messias dji Sẽie: ⁴⁴"Sẽie Bõdje dji pu mo Sẽie: asi la mo bo adhet, juk kã mo mete u elmi-iela ãba u pie-iela".⁴⁵Si Davi ka aple "Messias" dji Sẽie, ẽbe kumã li puve sa so pitxit. ⁴⁶Pies mun pa te puve hepon ãiẽ, i dji sa ju-la pu djivã ie pa te gãiẽ kohaje pu dumãde ãiẽ dji Jezi.

¹Ẽbe Jezi dji pu ban-mun-iela i pu so djisip-iela,²Met dji lalua-iela ke fahiseu-iela, ka asi lãdã xez dji Moises.³Mẽ, zot fe i zot sehe, tut sa ki ie pale pu zot. Mẽ zot pa fe mem thavai ke ie, pase ie ka koze i ie pa ka kõphui.⁴Ie ka phã xaj pesã, ie ka mete la zepol dji uot-iela; mẽ ie mem ie pa le ide, nẽ ie duet ie pa le humẽ.⁵Tut thavai ki ie ka fe a pu mun-iela ue. Gade kumã gho sa lin dji Pahol Sẽ-la ki ie ka ekhi, ie ka mahe la ie tet i la ie bha!⁶Ie kõtã asi lãdã plas ki bõ dji, ghã lafet, ie kõtã asi lãdã phõmiẽ plas dji Sinagog-iela,⁷Ie kõtã husuve kõphimẽtasiõ dji mun-iela lãdã lahi kote ie k'ale, i osi ie kõtã mun-iela aple ie dji "met".⁸Zot pa lese ki pies mun aple zot dji "met", pase zot gãiẽ selmã un "Met", i zot tut sa fue.⁹I esi lãdã late pa aple pies mun dji papa, pase ki zot gãiẽ selmã un Papa, ki laba lahosiel.¹⁰Pa lese pies mun aple zot dji "met", pase ki, zot gãiẽ selmã un "Met", o Messias.¹¹Li plis ïpohtã ãt zot djivet sa un siavito dji uot-iela.¹²Mun ki le fe ki ie plis ïpohtã, ie ke hete lãdã umiliasiõ, mẽ mun ki tuju umilie ie ko ke hete plis ïpohtã.¹³Ki ghã aflisiõ ka ãtan zot, met dji lalua-iela i fahiseu-iela! hipokhit! zot ka fõmẽ lapot dji Lasosiete dji Lahosiel lãdã vijaz dji mun-iela, mẽ zot mem pa ka ãthe, nẽ zot pa ka lese ãthe mun ki le ãthe.¹⁴Ki ghã aflisiõ ka ãtan zot, met dji lalua-iela i fahiseu-iela! hipokhit! zot ka phã hixez dji fam ki ie om muhi, dji un mãiẽ ki pa onet, i aphue dji sa zot ka mõthe ki zot gãiẽ lapen dji ie, zot ka phuie lõg pu mun-iela ue. Palakos dji sa ghã aflisiõ ke vini lasu zot.¹⁵Ki ghã aflisiõ ka ãtan zot, met dji lalua-iela i fahiseu-iela! hipokhit! zot ka jãbe late i ghã lãme, ka gade mun pu asekte zot heligiõ, zot ka fe sa mun la tonẽ dê fue plis pitxit dji lãfe dji ki zot.¹⁶Ki ghã aflisiõ ka ãtan zot, mun-iela ki ka suiv ki pa ka ue! zot ka dji pa gãiẽ ïpohtã si un kek mun phomet pu kaz dji Adohasiõ dji Bõdje, mẽ si li phomet pu lo dji kaz dji Adohasiõ, li oblije kõphui sa ki li phomet.¹⁷Mun ki fu i ki pa ka ue! akiles ki plis ïpohtã : lo-la o Kaz dji Adohasiõ-la, ki ka sãtxifike lo-la?¹⁸Zot ka dji osi; pa ïpohtã si un kek mun phomet pu "altar", mẽ si li phomet pu ofãd ki lasu "altar-la ",oblije kõphui sa ki li phomet.¹⁹Mun ki pa ka ue-iela! akiles ki plis ïpohtã: ofãd ki lasu "altar-la" o "altar- la", ki ka sãtxifike ofãd-la?²⁰Kã u phomet pu "altar", u phomet pu li i pu tut sa ki lasu'l.²¹Kã u phomet pu "Kaz dji Adohasiõ" ; u phomet pu kaz-la i pu Bõdje, ki ka habite lãdã kaz-la.²²Kã u phomet pu "Sie-la", u phomet pu obiho dji Bõdje i pu Bõdje ki asi lãdã obiho-la.²³Ki ghã aflisiõ ka ãtan zot met dji lalua-iela i fahiseu-iela! hipokhit! zot ka ofui pu Bõdje zot djix zem pedas dji, hortelã, plã-dus i dji kominho,mẽ zot pa ka obei zod ki plis ïpohtã dji lalua-iela, ki a hete jis ke uot-la, i hete bõ i hete onet. Mẽ jistemã sa bagaj-iela pu zot fe, mẽ sã lese uot-iela.²⁴Mun-iela ki ka suiv ki pa ka ue! zot ka pase djilo-la pu zot pa vale mustik, mẽ zot ka vale un xãmu!²⁵Ki ghã aflisiõ ka ãtan zot, met dji lalua-iela i fahiseu-iela! hipokhit! Pase zot ka phopte goble i asiet palasu, mẽ ãdjidã plẽ ke bagaj ki zot hesi pu violãs i pu volo.²⁶Fahiseu ki pa ka ue! phopte phõmiẽ goble-la ãdjidã i aphue palasu osi ke hete phop.²⁷Ki ghã aflisiõ ka ãtan zot, met dji lalua-iela i fahiseu-iela! hipokhit! zot sãble un tom pẽtxihe dji blã: joli palasu, mẽ plẽ ke zo i tut kalite koxõdhi ãdjidã.²⁸Palasu zot ka pahet bõ mun, mẽ ãdjidã zot plẽ ke mãto i pexe.²⁹Ki ghã aflisiõ ka ãtan zot, met dji lalua-la i fahiseu-iela! hipokhit! zot ka fe tom pu phofet-iela, i zot fe hete joli monumã-iela dji mun-iela ki viv dji mãiẽ jis.³⁰Zot dji: si no te viv lãdã tã dji no ãtepase-iela, no papa te ke fe sa ki ie fe, no pa te ke txue phofet-iela.³¹kõsa zot ka kõfihmẽ ki zot sa pitxit dji sa ki txue phofet-iela.³²Zot ale i fini sa ki zot ãtepase-iela kumase.³³Siapã ki gãiẽ velẽ, nik dji siapã-iela! kumã zot ke fe xape dji Kõdẽnasiõ dji lãfe?³⁴Mo ke voie pu zot: phofet, om ïtelijã i met dji lalua.zot ke txue un dê, zot ke klue uot, zot ke fut uot lãdã sinagog i zot ke maxe deie ie dji pei ã pei.³⁵Pusa Bõdje ke pinï zot pu lamo dji tut sa mun inosã-iela ki zot ãtepase-iela txue, djipi dji lamo dji inosã Abel, juk dji Zacarias, pitxit dji Baraquias, ki zot txue ãt kaz dji Adohasiõ i "altar-la".³⁶Ã lavehite mo ka dji pu zot: pinitãs pu tut sa ke vini lasu pov dji jodla.³⁷Jezi finï ka dji kõsa: Jehusalem, Jehusalem, ki ka txue phofet-iela i ka jite hox lasu mun ki ka pase bõ nuvel dji Bõdje ka voie! Kõbie fue mo te le ãbhase tut u pov, sãble un mãmã pul ki ka sehe so pitxit-iela ãba so sel, mẽ zot pa te le!³⁸Ato zot kaz ke hete kõpletmã ãbãdonẽ.³⁹Mo ka afihmẽ ki zot pa ke ue mo ãko,juk hive sa ju kã ie ke dji: " Bõdje bẽni sa ki ka vini lasu nõ dji Sẽie".

¹Jezi sotxi dji kaz dji so Papa, i kã li te k'ale, so djisip-iela hive phox dji li pu ie mõthe fom dji Kaz-la.²Ẽbe Jezi dji pu ie: zot ka ue tut sa? Ã lavehite mo ka dji pu zot: Ki esi pa ke hete hox palasu dji hox, sã li pa tõbe.³I aphue ki li asi ãle mõtãi dji Oliveira. So djisip-iela phoxe li selmã ie mem, i ie dumãde dji Jezi: Dji pu no, ki tã sa bagaj-iela ke fet, ki sin ke gãiẽ kã u ke vini, lãdã finisiõ dji tã-la?⁴Jezi hepon: zot ãtãsiõ, pu pies mun pa kuiẽnẽ zot.⁵Pase boku ke vini lasu mo nõ, ie ke dji "mo sa Messias", ie ke kuiẽnẽ boku.⁶Zot ke tãde ladje i nuvel dji ladje. Mẽ zot pa hete pe, pase sa buẽzẽ fet, mẽ a pãko finisiõ-la.⁷Ke leve nasiõ kõt nasiõ, pei kõt pei, ke gãiẽ fẽ, i thãble te, boku kote.⁸Mẽ sa bagaj-iela a kumasmã dji dulo.⁹I aphue zot ke ale phui i ie ke hãde zot pu malthete zot i ie ke txue zot; tut nasiõ-iela ke hai zot, palakos dji mo nõ.¹⁰Lãdã sa mumã-la boku ke ãbãdonẽ ie espua ie ke kuiẽnẽ i hai un i uot.¹¹Ke leve boku phofet pu fe mãto, ie ke kuiẽnẽ boku.¹²pexe-la ke mutxiplike boku, ki kõtãtmã dji boku ke hete fue.¹³Mẽ sa ki sipote juk la finisiõ, ke sove.¹⁴Kã sa bõ nuvel ke ãnüsie lãdã tut tã-la, kumã tẽmuẽ pu tut nasiõ-iela, ẽbe finisiõ-la ke hive.¹⁵Jezi kõtxinẽ dji: zot ke ue lãdã "Kote Sẽ-la" ghã abominasiõ dji desolasiõ ki phofet Daniel te dji. ( ki mun ki ka li-la kõphan sa ki li le dji).¹⁶Ẽbe sa ki la Judéia mahõ pu mõtãi-iela,¹⁷Sa ki la ie fetaj kaz pa desan pu txihe bagaj dji so kaz.¹⁸Mun ki la savan, pa tonẽ pu so kaz pu phã so lẽj-iela.¹⁹Ki ghã aflisiõ pu fam ki ãsen-iela i pu mãmã ke tximun pitxi ka tete lãdã sa ju-iela.²⁰Zot phuie, pu zot pa mahõ sezõ lapli o samdji.²¹Pase ke gãiẽ ghã sufãs, kumã li pa te jẽ gãiẽ djipi kumasmã dji tã-la juk ato, kumã pa jẽ ke gãiẽ ãko.²²Pase Bõdje fe sa tã dji sufãs hete kut. Si a pa te kõsa pies mun pa te ke sove.²³Ẽbe si kek mun dji pu zot: "gade Messias-la esi" o "gade li laba", zot pa khe,²⁴Ke leve boku Messias i phofet pu fe mãto; ie ke fe ghã mihak, i ghã bagaj ki Joli. ki ke puve kuiẽnẽ, juk sa ki Bõdje deha xuesi.²⁵Ãtãsiõ, mo deha dji pu zot ãvã, sa bagaj-iela hive.²⁶Mẽ si ie dji li laba "la kote ki pa gãiẽ ãiẽ", zot pa ale gade . o ãko ie ke dji: "zot gade! li laba ãdjidã kaz-la, zot pa khe.²⁷Pase, kumã un zekle ka pase lãdã sie-la dji Levã pu juk kuxã, kõsa osi kã Pitxit Om-la ke vini.²⁸kute ko dji un bagaj muhi fika, a laba khobo--iela ka hasãble.²⁹Jezi dji: Aphue dji sa ju-iela dji sufãs , solei-la ke hete suku, i lalin-la pa ke bai so klehite ãko. Zetue-iela ke tõbe ki siel-la, i fos dji siel-la ke thãble.³⁰Ẽbe ke pahet sin dji Pitxit dji Om-la lasu siel-la. Tut pov ki lasu late-la ke khie i ie ke ue Pitxit dji Om-la ka vini lasu nuaj dji siel-la, ke ghã povua i "gloria".³¹Li ke voie so zãj-iela ke ghã thẽ dji thõbeta, i ie ke hamase sa mun ki Bõdje xuezi, dji un bo dji tã-la juk uot bo-la.³²Zot ãphan Kopahasiõ dji pie-figo-la: Kã so bhãx-iela ka hete viat, i li ka kumase gãiẽ fei, zot save ki botã-la phox.³³Kõsa osi, kã zot ke ue tut sa bagaj-iela, save ki li deha phox, dji lapot-iela.³⁴Ã lavehite mo ka dji pu zot ki sa jehasiõ-la pa ka pase, juk ki tut sa bagaj-iela fet.³⁵Siel i late-la ke pase, mẽ mo pahol pa jẽ ke pase.³⁶Jezi kõtxinẽ dji: Mẽ pies mun pa save nẽ ju-la i nẽ lo-la kã tut sa ke fet, nẽ zãj-iela, nẽ Pitxit-la, mẽ selmã Papa-la.³⁷Kõsa sãble ju dji Noé, akõsa osi kã Pitxit dji Om-la ke vini.³⁸Pase, kumã lãdã sa ju-iela ãvã tã-la te finï ke gho djilo. Mun-iela te ka mãje, bue, i ie te ka maie, juk ju ki Noé ãthe lãdã bato-la.³⁹Ie pa te save dji ãiẽ, juk ju ki vini gho djilo-la li ale ke tut. Akõsa osi kã Pitxit dji Om-la ke vini.⁴⁰Lãdã sa ju-la dê ke thavai lãdã fazen: un ke ale, uot-la ke hete. ⁴¹Dê fam ke lãdã ie mulẽ ka khaze fahin-fãs: un ke ale , uot-la ke hete. ⁴²Zot veie, pase zot pa save ki ju no Sẽie ke vini.⁴³Mẽ hete save dji sa: Si met dji kaz-la te save ki lo dji nuit vole-la te ke vini, li te ke veie, li pa te ke lese li ãthe lãdã so kaz. ⁴⁴Pu sa osi zot hete phuepahe, pase Pitxit dji Om-la ke vini Lãdã lo ki zot pa ka ãtan.⁴⁵Jezi dji ãko: Akimun sa thavaio dji kõfiãs i ïtelijã, ki so sẽie ka mete lasu uot thavaio-iela, pu li bai ie maxãdjis lãdã lo jis. ⁴⁶Biẽ kõtã a sa thavaio-la, kã so sẽie ke vini pu li thuve'l ka fe kõsa. ⁴⁷Ã lavehite mo ka dji pu zot: so sẽie ke mete'l pu ẽtxupe dji tut so djibiẽ-iela.⁴⁸Mẽ se thavaio-la kose mal lãdã so txo. "mo sẽie ka tade boku". ⁴⁹I li kumase fut so kõpãiẽ-iela, i mãje, i bue ãsam ke sa mun ki kõtã bue-iela, ⁵⁰thavaio-la so sẽie ke hive lãdã ju ki li pa ka ãtan, i lãdã lo ki li pa save. ⁵¹Sẽie-la ke voie ie kupe thavaio-la ã pedas ie ke voie'l kote mun ki pa bõ-iela. Laba li ke khie i mode so dã dji dulo.

¹Lasosiete dji Lahosiel a kumã djis jonfi viej ki phã, ie lalãp i ie sotxi pu ie kõthe ke om ki ke maie-la.²sẽk dji ie de sã hezõ, i sẽk te gãiẽ hezõ.³Jonfi sã hezõ-iela phã ie lalãp-iela, mẽ ie phã xis pu ie.⁴Sa ki gãiẽ hezõ-iela phã xis lãdã ue buet-iela pu ie lalãp.⁵Kumã om ki ke maie-la tade, djis jonfi-iela kumase sigale i ie dhõmi.⁶Mẽ minuit, ie tãde un hele: "om ki ke maie-la ka hive! vini kõthe ke li".⁷Ẽbe tut sa Jonfi viej-iela leve pu phuepahe ie lalãp.⁸I sa ki sã hezõ-iela dji pu sa ki gãiẽ hezõ-iela: "bai pu no un moso dji zot xis, pase no lalãp-iela ka muhi".⁹Mẽ sa ki te gãiẽ hezõ-iela hepon: "nõ, veie li mãke pu no i pu zot osi. si zot le xis, zot ale axte"!¹⁰Ẽkãt ie sotxi pu ie axte, om ki ke maie-la hive. Sa sẽk Jonfi ki te ke ie lalãp-iela phuepahe ie ãthe ke li pu lafet dji lamaiaz-la, i li tatxe lapot-la.¹¹Aphue uot sã hezõ-iela hive ie kumase hete."Sẽie, sẽie, lese no ãthe"!¹²Mẽ li hepon: "Ã lavehite mo ka dji mo pa konet zot"!¹³Jezi dji: zot hete ka veie, pase zot pa save ju-la i lo-la.¹⁴Jezi kõtxinẽ dji: Lasosiete dji Lahosiel a kumã un om ki te ke voiaje. Li aple so siavito-iela li mete ie pu ẽtxupe dji so djibiẽ-iela¹⁵Li bai lajã pu ie, jis kumã kapasite dji xak un: pu phõmiẽ-la li bai sẽksã ãghẽnẽ dji lo; pu dezem-la li bai dêsã ãghẽnẽ, i pu thoazem li bai sã. Aphue li ale voiaje.¹⁶Lãdã mem lokasiõ,sa ki husuve sẽksã-la li ale negosie lajã-la, li gãiẽ plis uot sẽksã.¹⁷Dji mem mãiẽ sa ki husuve desã-la ãghẽnẽ, li gãiẽ plis uot desã.¹⁸Mẽ sa ki husuve sã ãghẽnẽ-la li sotxi, li fe un thu lãdã late-la i li sehe lajã dji pathõ-la.¹⁹Aphue dji boku tã, pathõ-la tonẽ, pu hãde kõt ke ie.²⁰Siavito-la ki te husuve sẽksã ãghẽnẽ hive li bai plis sẽksã, li dji: "pathõ u bai mo sẽksã ãghẽnẽ. Gade! esi plis sẽksã ki mo hesi gãiẽ".²¹Mẽ so pathõ dji pu li: "boku biẽ, bõ siavito fiam! lasu tximoso u hete fiam, lasu boku no ke mete u; vini i pahtxisipe dji kõtãtmã dji u pathõ.²²Ẽbe siavito-la ki te husuve desã ãghẽnẽ-la hive li dji: "pathõ u bai mo desã ãghẽnẽ.Gade! esi plis desã ki mo hesi gãiẽ".²³So pathõ dji pu li: boku biẽ, siavito bõ i fiam! lasu tximoso u hete fiam, lasu boku mo ke mete u.²⁴Mẽ sa siavito ki te husuve sã ãghẽnẽ-la hive li dji: " mo te save pathõ ki u te sa un om du, ki te ka hamase kote u pa plãte, i u ka hasãble kote u pa sõmẽ.²⁵Mo hete pe a pu sa mo sehe u lajã lãdã late-la. Gade! esi u lajã."²⁶Ẽbe so pathõ hepon: Siavito maleve i fẽiã u save ki mo ka hamase kote mo pa plãte, i mo ka hasãble kote mo pa sõmẽ.²⁷Pu sa u te djivet deposite mo lajã lãdã bãk, i, kã mo te tonẽ, mo te husuve li plis boku.²⁸Aphue pathõ-la gade kote uot siavito-iela li dji: zot tihe dji li lajã-la i bai pu sa ki gãiẽ mil ãghẽnẽ.²⁹Pase sa ki gãiẽ boku ie ke husuve plis i kõsa ie ke gãiẽ plis boku ãko. Mẽ sa ki pa gãiẽ, juk tximoso ki ie gãiẽ ie ke txihe dji ie.³⁰"zot jite siavito-la, deho lãdã suku .Laba li ke khie i li ke mode so dã dji dulo.³¹Jezi dji ãko: Kã Pitxit dji Om-la ke vini kumã Vue, ke tut so zãj-iela, i li ke asi lãdã so obiho lãdã Glória dji lahosiel.³²Tut nasiõ-iela ke hasãble djivã li, i li ke sepahe mutõ-iela dji kabhuit-iela.³³Li ke mete ki bõ-iela la so adhet i uot-iela la so agox.³⁴Ẽbe Vue-la ke dji pu sa ki la so adhet-iela: "vini, zot ki mo Papa bẽni! Vini i zot husuve Lasosiete ki mo Papa phuepahe pu zot djipi kumasmã dji tã-la.³⁵Pase mo te fẽ, i zot bai mo mãje; mo te suef zot bai djilo. Mo te sa un ẽthaje, i zot husuve mo la zot Kaz.³⁶Mo te sã lẽj, i zot bai mo lẽj; mo te malad ,i zot ẽtxupe dji mo. Mo te la phuiziõ i zot ale vizite mo.³⁷Ẽbe sa mun ki bõ-iela ke dumãde: " Sẽie, ki tã no ue u fẽ i no bai u mãje i suef i no bai u djilo.? ³⁸Ki tã no ue u kumã un ẽthãje i no husuve u la no kaz, i sã lẽj i no bai pu u? ³⁹Ki tã ki no ue u malad, o u phui i no ale vizite u?" ⁴⁰Vue-la ke hepon: Ã lavehite mo ka dji pu zot: tut sa ki zot fe pu xak un dji mo fue-iela, a pu mo zot fe.⁴¹Aphue li ke dji pu sa ki la so agox: "zot sotxi dji obo mo, zot ki ãba maldjisiõ dji Bõdje! zot ale pu djife ẽtehnel, ki phuepahe pu djab-la i so zãj-iela! ⁴²Pase mo te fẽ, i zot pa bai mo mãje, mo te suef, zot pa bai mo djilo. ⁴³Mo te sa un ẽthãje, i zot pa husuve mo la zot Kaz,; mo te sã lẽj, o malad, o phui zot pa ide mo"?⁴⁴Ẽbe ie ke dumãde: Sẽie, ki tã no ue u fẽ, o suef i kumã un ẽthãje, i sã lẽj, o malad o la phuisiõ i no pa ide u? ⁴⁵Vue-la ke hepon: "Ã lavehite mo ka dji pu zot: tut sa ki zot lese dji fe pu xak un dji mo fue-iela; A pu mo zot lese dji fe. ⁴⁶I tut sa-iela ke ale pu sufãs ẽtehnel, mẽ sa ki bõ-iela ke ale pu lavi ẽtehnel.

¹Kã Jezi finï dji koze tut sa bagaj-iela, li dji pu so djisip-iela.²Zot save ki dji esi ke un dê ju a lafet Pak, ie ke hãde Pitxit dji Om-la pu ie klue'l lasu lakhue.³Xef dji sasedotxi-iela i lidehãs dji judeu-iela ie hasãble, la kaz dji Caifás, ghã sasedotxi-la,⁴Ie kose ãfẽ dji ize, un mãto pu ie phui Jezi, i pu ie txue'l.⁵Ie te ka dji: No pa ke fe sa dehãtxi lafet-la, pase veie pov-la hete kole.⁶Jezi te la pov dji Betânia, asi obo un tab la kaz dji Simõ, om ki gãiẽ bobo-la. ⁷Ẽbe un fam hive phox dji Jezi ke un buet plẽ ke un losiõ ki boku xe, li devide losiõ-la la tet dji Jezi.⁸Kã djisip-iela ue sa ie hete kole i ie dji: pukisa u ka gaspie!⁹Pase sa losiõ-la u te puve vãde boku xe, i lajã-la u te puve bai pu mun ki pov-iela.¹⁰Mẽ kã Jezi save dji sa, li dji pu djisip-iela: pukisa zot hete kole ke sa fam-la? Li fe pu mo un bagaj boku bõ.¹¹Pase mun pov-iela tuju ke hete ke zot, mẽ mo nõ.¹²Mẽ li mem, kã li devide losiõ-la lasu mo ko, li fe sa pu phuepahe mo ko pu ie ãtehe mo.¹³Ã lavehite mo ka dji pu zot: lada nẽpot kote dji tã-la kote Pahol-la ke ãnüsie, ie ke hakõte sa ki li fe, i ie ke xõje dji fam-la.¹⁴Ẽbe, um dji duz-iela ki ie te k'aple Judas Iscariotes, ale kose ke xef-iela dji sasedotxi-iela.¹⁵Li dji: kõbie zot ke peie mo, pu mo pote Jezi pu zot? I ie peie thãt ãghẽnẽ dji prata.¹⁶I djila pu djivã Judas te ka sase un opohtunite pu te hãde Jezi pu ie.¹⁷Lãdã phõmiẽ ju dji Lafet dji djipẽ sã Fehmẽto, djisip-iela hive phox dji Jezi i ie dumãde: Kõte u le no phuepahe mãje dji Lafet Pak-la pu u?¹⁸Li hepon: Zot ale juk la pei-la, sase un tel om i zot dji kõsa: "Met voie dji kõsa: Mo lo deha hive. Mo djisip-iela i mo ke ale fêtê lafet dji Pak-la la u kaz".¹⁹Djisip-iela fe kumã Jezi te dji pu ie fe i ie phuepahe mãje dji Lafet Pak-la.²⁰Kã, hive nãnuit, Jezi i so djisip-iela asi obo tab-la pu mãje.²¹Ẽkãt ie te ka mãje Jezi dji: à lavehite mo ka dji pu zot: un dji zot ke kuiẽnẽ mo.²²Ie hete boku this i, un pa un kumase dumãde: U ka majinẽ ki a mo Sẽie?²³Jezi hepon: Mun ki ke kuiẽnẽ mo, a sa ki ka mãje lãdã mem asiet ke mo.²⁴Pase Pitxit dji Om-la ke muhi dji mãiẽ kumã ka dji Pahol Sẽ-la; mẽ ki ghã aflisiõ pu sa ki ka kuiẽnẽ Pitxit dji Om-la! te plis bõ pu li pa te jẽ fet!²⁵Ẽbe Judas, sa ki kuiẽnẽ li, dumãde: Met, u khe ki a mo? Jezi hepon: A u ka dji sa.²⁶Ẽkãt ie te ka mãje, Jezi phã djipẽ-la li humiasi Bõdje. Aphue li pataje djipẽ-la li bai pu so djisip-iela, li dji: phã i zot mãje; sa la a mo ko.²⁷Aphue, li phã djivẽ-la li humiasi Bõdje. Aphue li bai djivẽ-la pu so djisip-iela, li dji: bue zot tut²⁸pase sa a mo djisã, a djisã dji kõtha, ki ka devide pu boku, pu padõnẽ tut pexe.²⁹Mo ka dji pu zot ki zot pa jẽ ke bue ãko dji sa djivẽ-la, juk ju kã mo ke bue ke zot un nov djivẽ, laba la Lasosiete dji Lahosiel.³⁰Ẽbe ie xãte,un xãte dji adohasiõ, aphue ie ale pu mõtãi dji Oliveiras.³¹I Jezi dji pu so djisip-iela :Sa nuit-la zot tut ke mahõ i zot ke ãbãdonẽ mo, pase Pahol Sẽ-la ka dji: "ie ke txue Pasteh-la, i mutõ-iela ke hete kate".³²Mẽ, aphue ki mo hesusite, mo ke ale djivã dji zot pu Galileia.³³Ẽbe Pie dji pu Jezi: Mo pa jẽ ke ãbãdonẽ u Sẽie, mem ki ie tut ãbãdonẽ u.³⁴Mẽ Jezi dji: à lavehite mo ka dji pu u: Lãdã sa mem nuit-la, ãvã kok xãte, u ke kuiẽnẽ thoa fue.³⁵Pie hepon: Mo pa jẽ ke kuiẽnẽ u, mem mo gãiẽ pu muhi ke u, mo pa jẽ ke kuiẽnẽ u. I tut uot djisip-iela dji mem bagaj.³⁶Jezi ale ke so djisip-iela pu un kote ki ie ka aple Getsêmani i li dji pu ie: Zot asi esi, ẽkãt mo ka ale laba phuie.³⁷Ẽbe Jezi ale, ale ke li Pie, i dê pitxit dji zebedeu-iela. I djila li kumase hete this i sãtxi u ghã aflisiõ³⁸Li dji pu ie: Aflisiõ ki mo ka sãtxi thop ghã, ki li kapab dji txue mo. zot hete esi, veie ke mo.³⁹Li ale un tximoso plis djivã, li ãjunü, li koxte so vijaz ate i li phuie: Mo Papa, si posib tihe sa sufãs dji mo, nõ pu fe sa ki mo le, mẽ ui pu fe kumã u le. ⁴⁰Aphue li tonẽ li ue thoa djisip-iela ka dhõmi. Ẽbe li dji pu Pie: Ẽbe, zot pa puve hete un le dji tã pu veie ke mo? ⁴¹Zot veie i phuie,pu zot pa tõbe lãdã tẽtasiõ. vuemã, lesphui-la phuepahe, mẽ laxe-la feb.⁴²Pu dezem fue Jezi ale phui, li dji: Mo Papa, sa djivẽ dji sufãs-la pa puve sotxi dji mo, sã ki mo bue'l, ẽbe fe u volõte. ⁴³Li tonẽ ãko li ue so djisip-iela ka dhõmi, ie pa te ka hesi hete ke ie uei luvui, pase ie te thop le dhõmi. ⁴⁴Jezi lese ie, li ale phuie thoazem fue, li dji mem pahol-iela.⁴⁵Ẽbe li tonẽ kote so djisip-iela te fika li dumãde: zot ka dhõmi i zot ka pose tuju? zot Gade! hive lo-la i Pitxit dji Om-la ie ka hãde la lãmẽ dji mun mixã-iela. ⁴⁶Zot leve, i ãnu ale. zot Gade! sa ki ka kuiẽnẽ mo-la deha hive.⁴⁷Jezi te ka kose tuju, kã Judas hive, un dji duz djisip-iela. Te ka vini ke li um ban mun ãmẽ ke zam, ke batõ, ki xef-iela dji sasedotxi-iela i lidehãs dji judeu-iela voie. ⁴⁸Judas te ķõbinẽ ke ie un sin. Li te dji:"zot phui sa ki mo ke bô-la, pase a li".⁴⁹Judas ale phox dji Jezi, i li dji: Met, ki kõtãtmã hete ke u Sẽie! i li bô Jezi. ⁵⁰Jezi hepon: kamahad, sa ki u ke fe, fe ato mem. Ẽbe ie hive, ie phui Jezi ie mahe'l.⁵¹Mẽ, un dji sa ki te laba ke Jezi tihe so espad, li atake un siavito dji Ghã Sasedotxi-la li kupe un zohe dji li. ⁵²Ẽbe Jezi dji: sehe u espad, pase mun ki ka ise espad ke muhi pu un espad. ⁵³u pa save, si mo te dumãde pu mo Papa ide mo, li te ke voie ato mem, duz legiõ dji zãj? ⁵⁴Mẽ dji sa mãiẽ, kumã te puve kõphui sa ki Pahol Sẽ-la te dji sa ki te buẽzẽ fet?⁵⁵Aphue Jezi dji pu sa mun-iela: zot ka vini ke espad i batõ pu phui mo kumã un vole? tu le ju mo te ka asi, no te ka mõthe la kaz dji mo Papa, i zot pa phui mo. ⁵⁶Mẽ tut sa ka hive pu kõphui sa ki phofet-iela ekhi lãdã Pahol Sẽ-la. Ẽbe tut djisip-iela ãbãdonẽ Jezi, i ie mahõ.⁵⁷Om-iela ki phui Jezi, ie pote'l juk la kaz dji Ghã Sasedotxi Caifás, kote te hasãble un dê met dji lalua-iela i um dê lidehãs dji judeu-iela. ⁵⁸Pie suiv Li dji luẽ, juk obo kaz dji Ghã Sasedotxi, li ãthe li asi ãsam ke soda-iela pu gade kumã li te ke fini.⁵⁹Xef-iela dji sasedotxi-iela i tut Kosei ki gho,te ka sase un akusasiõ ãfẽ dji kõdãnẽ'l pu lamo. ⁶⁰Mẽ ie pa thuve ãiẽ kõt li, mem Kõsa boku mun leve pu dji mãto a hespek dji li. Dê om leve, ⁶¹ie dji: Sa om-la afihmẽ: "Mo puve dethi gho Kaz dji Bõdje i level ãko lãdã thoa ju".⁶²Ghã Sasedotxi-la leve li dumãde dji Jezi: U pa ke defie u ko dji sa akuzasiõ-la? ⁶³Mẽ Jezi pa hepon ãiẽ: Ẽbe Ghã Sasedotxi-la dumãde'l ãko: Lasu nõ dji Bõdje vivã, no ka bai zod pu u dji pu no: U sa Messias, Pitxit ki Bõdje? ⁶⁴Jezi hepon: akimun ki ka dji sa a u. Mẽ, mo ka afihmẽ djila pu djivã zot ke ue Pitxit dji Om-la asi bo adhet dji Bõdje ki gãiẽ povua i ka vini lasu nuaj-iela.⁶⁵Ẽbe, Ghã Sasedotxi-la fãde so phop lẽj-iela i li dji: Li kose mal! no pa buẽzẽ ãko dji tẽmuẽ! zot tãde ato mem ki li kose mal kõt Bõdje. ⁶⁶akisa zot ka thuve? Ie hepon: Li gãiẽ ghã to, li djivet muhi!⁶⁷Djila ie khaxe la vijaz dji Jezi, ie fut li ke pohad. I sa-iela ki te ka fut li ⁶⁸te ka dji: Messias pale pu no akimun ki fut u!⁶⁹Pie te asi laba deho Kaz-la, kã un fam siavito, phoxe'l, li dji: U osi te ke Jezi dji Galileia. ⁷⁰Mẽ li kuiẽnẽ djivã tut mun, li dji: "Mo pa save a dji kisa u ka koze".⁷¹Aphue li ale lãdã djihesiõ dji kote ie ka ãthe dji kaz-la. uot fam siavito ue Pie li dji pu mun ki te laba: Li osi te ke Jezi dji Nazahe. ⁷²Pie kuiẽnẽ ãko, li hepon: Jãmẽ ki mo pa konet sa om-la!⁷³Aphue dji sa um tximoso, sa ki te laba-iela hive phox dji Pie ie dji: U, mãiẽ dji kose, ka mõthe vuemã, ki u sa un dji ie. ⁷⁴Ẽbe Pie dji: Jãmẽ, mo pa konet sa om-la! ki Bõdje madjixõnẽ mo si mo pa ka kose lavehite! Lãdã mem lokasiõ kok-la xãte. ⁷⁵I Pie xõje ki Jezi te dji: "Ãvã ki kok xãte, u ke kuiẽnẽ mo thoa fue u ke dji ki u pa konet mo. Ẽbe, Pie, sotxi dji laba li khie boku.

¹Kõsa, kã ju bõmãtẽ, tut xef dji sasedotxi-iela i lidehãs dji judeu-iela, ie hasãble ãsam pu hesi un kek laphuev ou kõdãnẽ Jezi pu lamo.²Ie mahe Jezi, ie ale ke li pu pote pu Guvelmã Pilatos.³Kã, Judas, sa ki kuiẽnẽ Jezi la, ue ki ie kõdãnẽ Jezi, li hepãtxi li tonẽ hãde thãt ãghẽnẽ dji (prata) ,pu xef dji sasedotxi-iela i pu lidehãs dji judeu-iela.⁴Judas dji: Mo fe pexe, mo pote pu lamo un om inosã. Ie hepon: akisa no gãiẽ ke sa? phoblem a u pa.⁵Ẽbe, Judas jite lajã-la ãdjidã kaz dji Adohasiõ-la i aphue li sotxi. Aphue li ale i li txue so ko : (ke kod la so goj).⁶Xef dji sasedotxi-iela phã lajã-la ie dji: Sa a lajã sal ke djisã, i a kõt no lalua, mete sa lajã-la lãdã txes dji ofãd dji Kaz dji Adohasiõ.⁷Ẽbe ie deside axte un tehẽ dji un Phofisionel ki ka fabhuike aglo, ie thãsfomẽ'l lãdã semitxe pu nõ-judeu-iela.⁸Pu sa juk jodla ie k'aple " tehẽ dji djisã".⁹Kõsa hive kumã phofet Jeremias te dji: "ie phã thãt ãghẽnẽ dji (prata), phui ki pov dji Ishael te dako pu peie pu li,¹⁰ie ise pu axte tehẽ dji Phofisionel ki ka fabhuike aglo, kumã Sẽie te dji pu mo fe".¹¹Jezi te djibut djivã Guvelmã, i li dumãde Jezi: U sa Vue dji judeu-iela? Jezi hepon: Akimun ka dji sa a u.¹²Mẽ, kã xef dji sasedotxi-iela i lidehãs dji judeu-iela akuse'l li pa dji ãiẽ.¹³Ẽbe Pilatos dji: U pa ka tãde akuzasiõ-iela ki ie ka fe kõt u?¹⁴Jezi pa hepon ãiẽ, i Guvelmã-la hete susphan ke sa.¹⁵Lãdã tut lafet-iela dji Pak a te labitxuid dji Guvelmã-la libiate un mun phui, nẽpot ki pov-la te xuezi,¹⁶ lãdã sa lokasiõ-la, te la phuiziõ un om ki pov-la te konet boku, so nõ Barrabas,¹⁷Ẽbe, kã pov-la hasãble, Pilatos dumãde: Akimun zot le mo libiate dji phuiziõ : Barrabas, o sa Jezi, ki ie ka aple Khi.¹⁸Pilatos te save ki lidehãs dji judeu-iela, te phui Jezi, pase ie te jaluzi'l.¹⁹Ẽkãt Pilatos te asi lãdã thibunal, so fam pale pu li lese sa om inosã-la thãkil: Lãdã sa nuit ki pase-la, no heve mo sufui boku palakos dji li.²⁰Xef dji sasedotxi-iela, i lidehãs dji judeu-iela, ie dji pu ban mun-iela dumãde dji Pilatos pu libiate Barrabas dji phuiziõ i pu kõdãnẽ Jezi pu lamo.²¹Ẽbe, Guvelmã-la dumãde. akiles dji ie dê, zot le mo libiate dji phuiziõ? Ie hepon: Barrabas!²²Pilatos dumãde: akisa ẽbe mo ke fe ke Jezi, ki ie ka aple Messias? Ie hepon: klue'l lãdã lakhue!²³Li dumãde: Ki khim li fe? mẽ ban mun-iela kumase hele fo: klue'l lãdã lakhue!²⁴Ẽbe Pilatos ue ki li pa te ke hesi ãiẽ, i ban mun-iela te ka kumase hete kole. Kõsa, li voie phã un besin ke djilo, li lave so lãmẽ djivã ban mun-iela li dji: "Mo inosã dji djisã sa om-la. hespõsabilite-la a zot pa".²⁵I tut ban mun-iela hepon: Ki pinitãs pu sa lamo-la tõbe lasu no, i lasu no pitxit-iela!²⁶Ẽbe Pilatos libiate Barrabas dji phuiziõ, kumã ban mun-iela te dumãde: Aphue li voie fut Jezi, i voie'l pu klue la lakhue.²⁷Aphue soda-iela dji Pilatos ale ke Jezi pu Kaz dji Guvelmã-la i hasãble tut soda-iela obo Jezi.²⁸Ie tihe lẽj dji Jezi i ie mete un kap huj lasu'l.²⁹Ie fe un kuhun dji pikã, ie fuhe lãdã so tet, i ie mete un batõ la so lãmẽ adhet. Aphue ie kumase ãjunü djivã Jezi i futan. Ie dji: Viv Vue dji judeu-iela!³⁰Ie khaxe lasu'l ie phã batõ-la ie fut la so tet.³¹Aphue ki ie futan dji Jezi, ie tihe kap huj-la i ie fuhe so phop lẽj lasu'l. I aphue ie ale ke Jezi pu ie klue'l.³²Lamitã ximẽ-la ie kõthe un om ki ie ka aple Simõ, dji Sirene, soda-iela oblije li xaie lakhue dji Jezi.³³Ie hive un kote, ie k'aple (Golgota) signifike, "kote dji ban zo".³⁴Laba ie bai djivẽ mele ke fiel pu Jezi bue. Mẽ aphue ki li gute, li pa bue.³⁵I aphue ki ie klue Jezi Lãdã lakhue, soda-iela pataje so lẽj-iela ãt ie, i tihe xãs lasu so lej-iela (pu kõphui sa ki Phofet-la te dji: ie pataje mo lẽj-iela ãt ie, i lasu mo gho hob ie tihe xãs).³⁶I aphue sa, ie asi laba ie hete suveie Jezi.³⁷Ie mete ãle dji so tet un plãx ki ekhi kumã akuzasiõ kõt li: "Sa a Jezi, Vue dji judeu-iela".³⁸ke Jezi, ie klue osi la lakhue dê vole: un la bo adhet, i uot-la bo agox. ³⁹mun-iela ki te ka pase laba te ka futan dji Jezi, ie te la sukuie ie tet, i ie te ka solãte'l. ⁴⁰Ie te ka dji kõsa: U dji ki u te ka dethi Kaz dji Adohasiõ-la i lãdã thoa ju u te ka edjifike'l ãko. Si u sa vuemã Pitxit dji Bõdje, desan dji lakhue-la i sove u phop ko.⁴¹Xef dji sasedotxi-iela, met dji lalua-iela i lidehãs dji judeu-iela, osi te ka solãte Jezi. ⁴²Ie dji: Li sove uot-iela, mẽ li pa puve sove so phop ko! li sa Vue dji Ishael, a pa sa? Si li desan ato mem dji lakhue-la, no ke khe lasu'l.⁴³Li mete so kõfiãs lasu Bõdje. Li dji ki li sa Pitxit Bõdje. Ãnu ue si Bõdje le sove'l ato! ⁴⁴I juk vole-iela ki klue obo Jezi la lakhue ie solãte'l osi.⁴⁵Midji kumase hete suku, i tut late-la hete thoa le dji tã, lãdã ghã suku. ⁴⁶Thoaze dji asue, Jezi hele ke ghã vue: "Eli, Eli, Lemá Sabaktani?" Sa pahol-iela signifike, " Mo Bõdje, mo Bõdje, pukisa u dezãpahe mo? ⁴⁷Un dê mun ki te laba tãde sa, i e dji: Li ka aple Elias.⁴⁸Un dji sa mun-iela kuhi i thãpe un pedas lẽj lãdã vineg, li mete lãdã put dji un batõ li bai pu Jezi bue. ⁴⁹Mẽ uot-iela dji: ãtan, ãnu ue si Elias ke vini sove'l! ⁵⁰Jezi hele fo aphue li muhi.⁵¹Lãdã sa mumã-la, gho dha dji Kaz dji Adohasiõ-la, fãde ã dê pedas, dji ãle juk ãba. Late-la thãble, i hox-iela fãde. ⁵²Tom-iela luvui, i boku mun muhi dji pov dji Bõdje ki te muhi ie hesusite ãko, ⁵³ie sotxi dji tom-iela. I aphue dji hesuheisiõ dji Jezi, ie ãthe la Jehusalem, Pei Sẽ-la, kote boku mun ue sa mun-iela.⁵⁴Ofisial dji soda-iela i so soda-iela, ki te ka suveie Jezi, ie ue late-la thãble i tut sa ki fet. Ẽbe ie hete pe boku ie dji: vuemã, sa om-la a te Pitxit dji Bõdje! ⁵⁵Un dê fam te laba, ka gade dji luẽ. A te fam ki te suiv Jezi djipi dji Galileia i ie te ide'l osi. ⁵⁶Ãt ie te laba: Mahi Madalen; Mahi mãmã dji Txiago i dji Jose; i mãmã dji pitxit-iela dji Zebedeu.⁵⁷te phox suku kã hive dji pei dji Arimateia, un om ki ie k'aple Jose. Li osi te ka suiv Jezi. ⁵⁸Jose ale dumãde dji Pilatos ko dji Jezi. I Pilatos bai zod pu ie bai ko-la pu li.⁵⁹Ẽbe Jose phã ko-la, li hule'l lãdã un dha nov i phop, ⁶⁰li mete'l lãdã so phop tom, ki li te fuie lãdã hox. Ẽbe aphue li hule un gho hox pu buxe thu dji tom-la i aphue li ale. ⁶¹Mahi Madalen i uot mahi-iela te laba, asi djivã tom-la.⁶²Uot ju-la, samdji, xef dji sasedotxi-iela i fahiseu-iela hasãble ke Pilatos. ⁶³Ie dji: Guvelmã, no ka xõje, kã sa met mãto-la te vivã, li te dji: "Aphue dji thoa ju mo ke hesusite". ⁶⁴Pu sa no ka dumãde fe ie suveie biẽ tom-la juk la thoazem ju-la, pu so djisip-iela pa puve volo so ko i aphue pu ie dji pu pov-la ki Jezi hesusite. Pase sa diãiẽ mãto-la ke pi gho pase phõmiẽ-la.⁶⁵Ẽbe Pilatos dji: Zot ale ke sa soda-iela pu veie tom-la kumã ie puve. ⁶⁶Ie ale, ie tatxe tom-la ie lese soda-iela pu veie.

¹Aphue dji samdji, djimãx biẽ bono, Mahi Madalen, i uot Mahi-la ale visite tom-la. ²Djinku, late-la thãble fo. Un zãj dji Sẽie desan dji siel-la, li tihe hox-la i li asi lasu'l.³Li te sãble un zekle, i so lẽj-iela te blã kumã nej.⁴Soda-iela hete boku pe dji zãj-la ie hete kumã mun muhi.⁵Ẽbe zãj-la dji pu fam-iela: Zot pa hete pe! mo save ki zot ka sase Jezi, sa ki ie klue la lakhue,⁶mẽ li pa esi; li deha hesusite, kumã li te dji. Zot, vini gade so plas kote ie te mete'l.⁷Ato zot, ale vit i dji pu so djisip-iela kõsa: "Li deha hesusite, li k'ale djivã dji zot pu Galileia. Laba zot ke ue li". A te sa mo te gãiẽ pu dji pu zot.⁸Ie ale vit dji tom-la, pase ie te hete pe, mẽ osi boku kõtã. Ie kuhi pu hakõte tut pu djisip-iela.⁹Djinku, Jezi kõthe ke ie li dji: ki kõtãtmã hete ke zot! Ie hive phox dji Li, ie txẽbe so pie-iela i ie adohe'l.¹⁰Ẽbe Jezi dji: Zot pa hete pe! zot ale dji pu mo fue-iela pu ie ale pu Galileia, i laba ie ke ue mo.¹¹Ẽkãt fam-iela te ka ale, un dê dji soda-iela ki te ka veie tom-la tonẽ pu pei-la ie hakõte pu xef dji sasedotxi-iela tut sa ki fet.¹²Xef-iela hasãble ke lidehãs dji judeu-iela ie fe ie desiziõ. Ẽbe ie bai un ghã kãtxite dji lajã pu soda-iela¹³Ie dji pu soda-iela kõsa: Zot pale ki so djisip-iela vini nãnuit, kã zot te ka dhõmi, i ie volo so ko.¹⁴Si Guvelmã save dji sa, no ke fe li khe ki a sa mem ki fet, i zot pa ke gãiẽ pies phoblem.¹⁵Soda-iela phã lajã-la i ie fe kumã xef dji sasedotxi-iela dji pu ie fe. I sa kose-la kate ãt judeu-iela juk jodla.¹⁶Õz djisip-iela ale pu Galileia ie hive la mõtãi ki Jezi te ïdjike ie.¹⁷I kã, ie ue Jezi, ie adohe'l, mẽ un dê pa khe.¹⁸Ẽbe Jezi phoxe ie li dji: Bõdje bai mo tut povua lãdã Lahosiel i lasu late.¹⁹Zot ale, kote tut nasiõ dji tã-la fe djisip, i zot batxize ie lãdã nõ dji Papa, dji Pitxit i dji Sethesphui.²⁰i mõthe ie obei tut bagaj ki mo dji pu zot. I zot xõje dji sa: mo ke zot tut ju-iela, juk la finisiõ dji tã-la.

¹Lãdã phõmiẽ liv ki mo ekhi, u, Teofilo, tut sa ki Jezi fe i mõthe djipi kumasmã dji so thavai²juk ju ki li ale pu lahosiel. Ãvã li ale pu lahosiel, li bai zod, pu povua dji Sẽtesphui, pu om-iela ki li te xuezi kumã *apostolo-iela.³Aphue dji so lamo, Jezi pahet pu ie dji boku mãiẽ, dehãtxi kahãt ju, li mõthe boku laphuev biẽ kle ki li te viv.Apostolo-iela ue Jezi, i li te ka koze ke ie a hespek dji *lasosiete dji Bõdje.⁴Un ju, kã li te ke so djisip-iela, Jezi bai pu ie sa zod-la: _hete la Jehuzalem i ãtan juk kã papa-la bai pu zot sa ki li phomet, kõfom mo dji pu zot.⁵Jã batxize ke djilo, mẽ aphue djila ke un de ju zot ke batxize ke Sẽtesphui.⁶Ẽbe, apostolo-iela ki te ke Jezi ie dumãde'l: _ato ki u ke hãde lasosiete-la pu pov dji Ishael?⁷Jezi hepon: pa buẽzẽ zot save lokasiõ o ju ki papa-la make ke so phop otohite,⁸kã Sẽtesphui ke desan lasu zot, zot ke husuve povua i zot ke sa mo tẽmuẽ, lãdã tut Judeia, i Samaria, i juk lãdã kote plis luẽ dji late-la.⁹Aphue ki li pale sa, Jezi ale pu lahosiel djivã ie. Ẽbe, un nuaj khuvui'l, i ie pa ue'l ãko.¹⁰Ie te ka gade tuju pu lahosiel, ẽkãt Jezi te ka mõte, kã de om dji lẽj blã pahet phox dji ie ¹¹zãj-iela dji:_om-iela dji Galileia, Pukisa zot ka gade pu lahosiel ?Sa Jezi ki te ke zot i ki ale pu lahosiel ke hutonẽ dji mem mãiẽ zot ue li mõte.¹²Ẽbe apostolo-iela desan dji mõtãi dji Oliveira i ie tonẽ pu Jehuzalem (mõtãi-la te ka hete un djistãs dji un kilomet dji pei-la).¹³Kã, ie hive lãdã pei-la, ie ale juk lãdã lasal, dji Dezem etaj dji kaz kote ie te ka hete.Apostolo-iela a te: Pie, Jã, Txiag, Ãdhe, Filip, Tome, Bahtolomeu, Matxie, Txiag, pitxit dji Alfeu, Simõ, publican-la i Judas, pitxit dji Txiag.¹⁴Ie tut te ka hasãble pu phuie ãsam ke fam-iela, mãmã dji Jezi, i so fue-iela.¹⁵Lãdã un dji sa ju-iela ki ie te hasãble, te gãiẽ phox dji sã vẽ mun ki te ka suiv Jezi. Lãdã sa heuniõ-la Pie djibut i li dji:¹⁶"Mo fue-iela, te gãiẽ pu hive, sa ki Sẽtesphui te dji pu Davi, lãdã *Pahol Sẽ-la a hespek dji Judas ki a te siavito dji sa mun-iela ki phui Jezi.¹⁷Judas a te dji no patxizã i li te ka thavai ãsam ke no.¹⁸(ke lajã ki te husuve palakos dji so khim, Judas axte un tehẽ. Lãdã sa tehẽ-la li tõbe ke so tet, so ko pataje lamitã, i so thip sotxi pu deho.¹⁹Tut mun ki te ka hete la Jehuzalem, hete save djisa. Pu sa ie bai pu tehẽ-la un nõ ki a "Aceldama", ki lãdã ie lãg, a " tehẽ dji djisã")²⁰I Pie kõtxinẽ: Sa a ki ekhi lãdã liv dji Salmo: ("ki so kaz hete ãbãdõnẽ, i pies mun pa ke hete lãdã'l" )I osi li dji: "ki uot mun fe thavai ki li te ka fe!"²¹"Ato no djivet xuezi uot om, dji lamitã om-iela ki te ãsam ke no dehãtxi tut sa tã ki Sẽie Jezi maxe ãt no,²²djipi mumã ki Jã batxize, juk ju ki li ale pu lahosiel. Sa mun ki ie xuezi ke hete ãsam ke no, kumã un tẽmuẽ dji hesuheisiõ"²³ie phuezãte de om: Joze, ki ie k'aple Bahsabas, ie te ka aple'l osi Jis, i Matxias .²⁴Aphue ie phuie, ie dji: Sẽie, u konet txo dji tut. Mõthe ato dji ie de akiles u xuezi²⁵pu thavai ke no kumã un apostolo, pase Judas ãbãdõnẽ sa thavai-la i li ale pu un kote ki li te mehite.²⁶Ẽbe, ie txihe xãs, i xãs-la tõbe lasu Matxias; djisa mãiẽ-la li hete ãsam ke patxizã dji õz apostolo-iela.

¹Thoa ju aphue ki Festo hive la Cesareia pu tonẽ guvelmã-la, li sotxi i ale juk Jehuzalem. ²Xef dji sasedotxi-iela i lidehãs dji judeu-iela phuezãte laba ie akuzasiõ-iela kõt Pol i ie dumãde dji Festo ³suple pu li pote Pol pu Jehuzalem. Ki ie te Kõbinẽ txue Pol lamitã ximẽ.⁴Mẽ Festo hepon: _ Pol phui la Cesareia, i mo ke tonẽ pu laba. ⁵ki zot lidehãs-iela akõpãiẽ mo juk laba i pu ie fe akuzasiõ, si li fe un kek djimal.⁶Festo pase iut (8) o djis (10) ju ãt ie I aphue li tonẽ pu Cesareia. lãdã uot ju-la li asi lãdã thibunal i voie ki ie pote Pol.⁷Kã Pol hive, judeu-iela ki te vinï dji Jehuzalem ãtuhe'l i ie kumase fe boku akuzasiõ ghav, mẽ ie pa hesi mõthe laphuev kõt ãiẽ. ⁸Ẽbe Pol defie so ko, li dji: _ Mo pa fe ãiẽ kõt Lalua dji judeu-iela, nẽ kõt Kaz dji Adohasiõ-la, nẽ kõt Cezar.⁹Festo, te le fe judeu-iela kõtã, li dumãde dji Pol: __ u pa le ale pu Jehuzalem pu mo deside u phoblem laba a hespek djisa bagaj-iela? ¹⁰Pol hepon: Mo esi djivã thibunal dji Cezar, a esi ki ie djivet kõdãnẽ mo. Mo pa fe pies djimal pu judeu-iela, kumã u biẽ save.¹¹Si mo pa hespete lalua-la o si mo fe un kek bagaj ki mehite ie txue mo, mo phuepahe pu muhi. Mẽ, si sa ki ie ka dji kõt mo a pa lavehite, pies mun pa puve hãde mo pu ie. Mo ke suplike pu Cezar.¹²Ẽbe Festo, aphue ki li bladje ke so Kõseie-iela, li dji: _ Kumã u suplike pu Cezar, ẽbe u ke ale pu Cezar.¹³Un de ju aphue, vue Agripa hive ke so só Berenice la Cesareia pu vizite Festo.¹⁴Kã deha te ka fe un de ju ki ie te laba, Festo hakõte pu vue-la phoblem dji Pol. Li dji: _ Mo gãiẽ esi un om ki Felix lese kumã phuiziõne pu mo.¹⁵Kã mo ale pu Jehuzalem, xef dji sasedotxi i lidehãs dji judeu-iela fe boku akuzasiõ kõt li, i ie dumãde pu mo kõdãnẽ'l. ¹⁶Mẽ mo dji pu ie ki romano-iela pa gãiẽ labitxuid dji kõdãnẽ pies mun sã phõmiẽ mete sa mun-iela ki ka fe akuzasiõ-iela djivã sa ki ie ka akuze-la, Ki li puve defie so ko dji akuzasiõ-iela.¹⁷Pu sa kã ie vinï juk esi, mo pa piad tã, i lãdã uot ju-la mo asi lãdã thibunal, i mo voie ie pote om-la.¹⁸So elmï-iela hive, mẽ ie pa akuze'l dji pies khim ghav kumã mo majinẽ ki ie te ke fe.¹⁹Sel akuzasiõ ki ie te gãiẽ kõt li a te a hespek dji ie phop helijiõ, i osi suje un om ki deha muhi, Ki ie te k'aple Jezi. Pol ka afihmẽ ki sa om-la vivã.²⁰Mo pa te save kumã pu hesi ifohmasiõ suje sa bagaj-iela. Pu sa mo dumãde dji Pol si li le ale pu Jehuzalem pu kõdãnẽ'l laba a hespek djisa akuzasiõ-iela.²¹Mẽ Pol suplike pu Cezar li dumãde pu hete phui juk Kã Cezar deside so phoblem. Ẽbe mo voie soda-iela ẽtxupe dji li juk tã mo voie'l pu Cezar.²²Djila Agripa dji pu Festo: _ Mo osi le kute sa om-la. Festo hepon: djimẽ u ke kute'l!²³Uot ju-la Agripa i Berenice hive ke ghã lafet, i ie ãthe lãdã lasal ke xef dji milite-iela i om-iela ki pi ïpohtã dji vil-la Festo voie ie pote Pol.²⁴li dji: _ Vue Agripa i tut zot ki esi zot gade sa om-la! a kõt li ki tut judeu dji esi i dji Jehuzalem, Ka fe akuzasiõ djivã mo. Ie ka dji ki sa om-la djivet muhi,²⁵mẽ mo ka thuve ki li pa fe ãiẽ pu kõdãnẽ pu lamo. Kumã li mem dumãde pu Cezar deside so phoblem, mo deside kute'l.²⁶Juk ato mo pa save akisa pu mo ekhi a hespek dji li pu Cezar. Ẽbe mo pote'l esi djivã zot _ espesialmã djivã u vue Agripa _ pu u dumãde'l kek bagaj. Kõsa mo ke gãiẽ un kek bagaj pu ekhi.²⁷Pase mo ka thuve un bagaj ki pa jis voie un phuiziõne sa esplike akuzasiõ-iela ki gãiẽ kõt li.

¹Finalmã, fue-iela phuie pu no pu ki pahol dji Sẽie kõtxinẽ kate hapidmã i pu ie husuvel biẽ, kumã hive ãt zot. ²Phuie osi pu ki Bõdje delivue no dji mun mixã-iela i move-iela, pase nẽ tut khe lãdã mẽsaj-la. ³Mẽ Sẽie Jezi fiam. Li ke bai ie fos i delivue ie dji mal.⁴I Sẽie ka fe ki no gãiẽ kõfiãs lasu zot; no asihe dji ki zot ka fe i zot ke kõtxinẽ fe sa ki no Ka hekumãde. ⁵Ki Sẽie fe zot kõphan pi biẽ kõtãtmã dji Bõdje pu zot i fos ki Li, Jezi, ka bai!⁶Fue-iela, lasu nõ dji Sẽie Jezi Khi, no Ka bai zod pu zot ki zot hete luẽ dji tut fue-iela ki ka viv sã thavai i ki pa ka suiv sa pahol-iela ki no mõthe pu ie. ⁷Zot save biẽ ki zot djivet suiv no legzam, pase no pa viv ãt zot sã thavai. ⁸No pa husuve aiẽ dji pies mun, sã peie; lãdã lavehite no thavai i no hete fatxige.No thavai sã poze, nuiti jonẽ, ãfẽ dji pu no pa sa pezãto pu pies un dji zot. ⁹No te gẽ dhue dji husuve un kek bagaj pu sutuni no; mẽ no pa dumãde ãiẽ ãfẽ dji ki zot suiv no legzam.¹⁰Pase, kã no te laba, no bai sa zod-la. "Mun ki pa le thavai pa ke mãje". ¹¹No ka afihmẽ sa pase ki no tãde kõsa ki gãiẽ ãt un de mun ki ka viv sãble mun ki fẽiã-iela: ie pa ka fe ãiẽ i ka gade pu lavi dji uot-iela. ¹²Lasu nõ dji Sẽie Jezi khi, no Ka bai sa zod-la pu sa mun-iela pu ie viv dji um mãiẽki jis i pu ie thavai pu ie sutuni ie ko.¹³Mẽ, zot fue-iela pa hete dji fe biẽ. ¹⁴Si un kek mun pa le obei sa ki no ka hukumãde lãdã sa let-la, zot gade akimun ka fe sa i zot sotxi dji obo li pu li hete hõte. ¹⁵Ẽbe zot pa thetel Kumã elmï, mẽ zot kõseiel kumã zot ka kõseie um fue.¹⁶Ki Sẽie dji thãkilite (paz) bai pu zot thãkilite-la sẽp i dji tut mãiẽ-iela! I ki Sẽie hete ke zot tut ! ¹⁷Ke mo phop lãmẽ mo ekhi sa: "saudasiõ dji Pol" .A kõsa mo ka ekhi lãdã tut mo let-iela pu mõthe ki a mo memki ekhi ie. ¹⁸Ki a *graça dji no Sẽie Jezi Khi hete ke zot tut.

¹Hevelasiõ dji Jezi Khi, ki Bõdje bai pu Li pu mõthe pu so siavito-iela sa ki pa ke tade pu fet. Jezi voie un zãj pu , palakos dji li, so siavito Jã save djisa bagaj-iela. ²Jã hakõte tut sa ki li ue, i esi fika sa ki li hakõte a hespek dji mẽsaj i dji lavehite ki Jezi mõthe. ³Biẽ kõtã mun ki li sa liv-la, i biẽ kõtã sa mun-iela ki ka kute pahol dji sa mẽsaj-la i ki ka obei sa ki ekhi lãdã sa liv-la! Pase ki tã-la phox ki tut sa bagaj-iela ke fet.⁴Mo, Jã, ekhi pu set legliz-iela ki laba la Ásia.*Graça i thãkilite pu zot ki vinï dji Bõdje, ki a sa , ki a te sa, i ki ke vinï, dji set lesphui-iela ki laba djivã dji so obiho ⁵i dji Jezi Khi, tẽmuẽ ki fiam la! Li sa phõmiẽ Pitxit, ki leve dji lamo i ki ka kumãde vue-iela dji tã-la ãtxe. Li kõtã no, i pu so lamo lãdã lakhue li delivue no dji no pexe-iela, ⁶i Li fe dji no vue i sasedotxi ãfẽ dji no siavi so Bõdje i Papa. Pu Jezi Khi ke bai *Glória i povua pu lavi ẽtehnel! *Amém!⁷Zot gade! Li ke vinï sãble nuaj-iela! tut mun ke ue'l, juk mem sa mun-iela ki jãbe'l ke lãs-la. Tut pov-iela dji tã-la ke khie palakos dji Li. Ui .Amém! ⁸Sẽie Bõdje dji: mo sa phõmiẽ i diãiẽ ki a sa, ki a te sa i ki ke vinï, ki gãiẽ ghã povua.¹⁹Mo sa Jã, zot fue i kõpãiẽ lãdã sufãs i lãdã lasosiete i pasiãs ãsam ke Jezi. Mo te la zile dji Patmos, pu kote ie te pote mo pase mo te ka ãnüsie mẽsaj dji Bõdje i lavehite ki Jezi mõthe. ¹⁰Lãdã ju dji Sẽie, Lesphui dji Bõdje dominẽ mo i mo tãde deie dji mo un vue fo sãble un thẽ dji thõbet , ¹¹ki te ka dji pu mo:_ ekhi lãdã un liv sa ki u ke ue i voie sa liv-la pu leglis-iela ki lãdã sa set pei-iela: Éfeso, Esmirna, Pérgamo, Tiatira, Sardes, Filadélfia i Laodiceia.¹²Mo vihe pu mo gade akimun ki te ka kose ke mo, i mo ue set *gho lalãp (candelabros) dji lo. ¹³Lãdã lamitã dji ie te laba un bagaj te sãble un mun, te lãdã un lẽj ki te ka hive juk la so pie-iela i ke un sẽtxie dji lo ka kõhõnẽ so pothin.¹⁴So xive-iela te blã kumã plim mutõ(lã) i kumã nej, i so uei-iela te ka klehe kumã djife. ¹⁵So pie-iela te ka klehe kumã (bronze) ki pase lãdã ghã djife i aphue ie poli'l, so vue te sãble thẽ dji un ghã so. ¹⁶Lãdã so lãmẽ adhet li te ka txẽbe set zetuel, i dji so bux te ka sotxi un espad ki biẽ fite dji dê bo-iela. So vijaz te ka klehe kumã solei dji midji¹⁷Kã mo ue'l, mo tõbe obo so pie-iela, kumã un mun muhi. Mẽ aphue li poze so lãmẽ adhet lasu mo li dji: - Pa hete pe. Mo sa phõmiẽ i diãiẽ. ¹⁸Mo sa ki ka viv-la. Mo te muhi, mẽ ato mo vivã pu ẽtehnite. Mo gãiẽ povua lasu lamo-la i lasu *tã dji mun muhi-iela.¹⁹Pu sa ekhi sa bagaj-iela ki u ke ue, sa ki ke fet ato kumã sa ki ke fet aphue-iela. ²⁰Signifikasiõ dji sa seghe dji set zetuel-iela ki u ue la mo lãmẽ adhet i dji set gho lalãp(candelabros) dji lo a sa: set zetuel-iela a zãj-iela dji set leglis-iela, i set gho lalãp(candelabros)-iela a set legliz-iela.

¹Pu zãj dji legliz dji Éfeso ekhi kõsa :" Sa a mẽsaj djisa ki ka txẽbe set zetuel-iela lãdã so lãmẽ adhet i ki ka maxe lamitã dji set *gho lalãp-iela (candelabros) dji lo. ²Mo save akisa zot te fe. Mo save ki zot thavai boku i zot sipote sufãs ke pasiãs. Mo save ki zot pa te puve sipote mun ki mixã-iela i mo save ki zot mete lãdã laphuev sa mun ki ka dji ki ie sa *apóstolo, mẽ ie pa sa , i kõsa zot dekhuvui ki ie sa met mãto.³Zot sipote sufãs-la ke pasiãs i zot sufui palakos dji mo, sã hete this. ⁴Mẽ mo gãiẽ un bagaj kõt zot: a ki ato zot pa kõtã mo kumã zot te kõtã mo ãvã. ⁵Xõje dji kote zot tõbe! Hepãtxi dji zot pexe-iela i fe sa ki zot te ka fe ãvã. Si zot pa hepãtxi, mo ke vinï i mo ke tihe zot gho lalãp(candelabro) dji so plas si zot pa hepãtxi.⁶Mẽ zot gãiẽ sa: Zot hai sa thavai ki nicolaita-iela ka fe, kumã mo osi hai. ⁷"Mẽ si zot gãiẽ zohe pu kute, ẽbe kute sa ki Lesphui dji Bõdje ka dji pu legliz-iela."Sa ki hesi sipote tut sa mo bai li dhue dji mãje dji fui dji pie-bua dji lavi-la, ki ka puse lamitã dji pahadji dji Bõdje.⁸Pu zãj dji legliz dji Esmirna ekhi kõsa:"Sa a mẽsaj djisa ki a phõmiẽ i diãiẽ, ki muhi i hutonẽ viv. ⁹Mo save ki zot ka sufui. Mo save ki zot pov, mẽ, vuemã zot hix. Mo save kumã sa mun ki ka dji ki ie sa judeu, mẽ ie pa sa, ie ka kose mal dji zot. Ie sa patxizã dji Djab-la.¹⁰Zot pa hete pe dji sa ki zot gãiẽ pu sufui. Kute! Djiab-la ke jite un dê dji zot lãdã phuiziõ pu tãte zot; i zot ke sufui dehãtxi djis ju. Hete fiam, mem zot gãiẽ dji muhi; i, kumã hekõpãs mo ke bai kuhun dji lavi-la. ¹¹" Pu sa, si zot gãiẽ zohe pu kute, ẽbe kute sa ki Lesphui dji Bõdje ka dji pu legliz-iela." Sa ki hesi sipote tut sa pa ke sufui pinitãs dji dezem lamo-la".¹²Pu zãj dji leglis dji Pergamo ekhi kõsa:" Sa a mẽsaj djisa ki gãiẽ espad fite dji de (2) bo-iela. ¹³Mo save ki zot ka hete laba kote fika obiho dji Satã-la. Zot fiam i zot pa ãbãdonẽ espua ki zot gãiẽ lasu mo, juk mem kã Antipas, mo tẽmuẽ ki fiam, ie txue laba la Pergamo, kote Djab ka hete.¹⁴Mẽ mo gãiẽ un kek bagaj kõt zot: gãiẽ ãt zot un de ki ka suiv ximẽ dji Balaão, ki mõthe pu Balaque kumã pu fe pu pov dji Ishael fe pexe, li dji ki mun dji Ishael te djivet mãje, mãje ki ofui pu bõdje-iela i phatxike bagaj seksual. ¹⁵Kõsa osi gãiẽ ãt zot un dê ki ka suiv ximẽ dji nicolaita-iela.¹⁶Zot hepãtxi! si nõ, mo ke vinï vit juk laba i, ke espad ki ka sotxi dji mo bux, mo ke bataie kõt sa mun-iela. ¹⁷Pu sa, si zot gãiẽ zohe pu kute, ẽbe kute sa ki Lesphui dji Bõdje ka dji pu legliz-iela."Sa ki hesi sipote tut sa mo ke bai dji *mãje dji lahosiel(maná) ki sehe. I pu xakẽ un dji ie mo ke bai un hox blã, i lãdã hox un nov nõ ki ekhi ki pies mun pa save, selmã sa ki ka husuvel-la."¹⁸Pu zãj dji legliz dji Tiatira ekhi kõsa:"Sa a mẽsaj dji Pitxit dji Bõdje, ki gãiẽ uei ki ka klehe kumã djife i pie ki ka klehe kumã (bronze) ki poli. ¹⁹Mo save akisa zot ka fe. Mo save ki zot gãiẽ kõtãtmã, i zot fiam, zot ka thavai i zot ka sipote sufãs-la ke pasiãs. Mo save ki zot ka fe plis ato dji ki ãvã.²⁰Mẽ mo gãiẽ kõt zot un bagaj: a ki zot sipote Jezabel, sa fam ki ka dji ki li sa *Phofeta. Li ka pote mo siavito-iela pu mal ximẽ, li ka mõthe ie phatxike bagaj seksual i mãje, mãje ke ie ka ofui pu bõdje-iela. ²¹Mo bai tã pu li lese so pexe-iela, mẽ li pa le lese so pexe-iela.²²Pu sa, mo ke jite'l lãdã un bukã, kote li i sa ki ke li ka phatxike bagaj seksual ie ke sufui ghã sufãs, si ie pa hepãtxi dji ie thavai-iela. ²³Mo ke txue sa mun-iela ki ka suiv li, i ẽbe tut leglis-iela ke save ki mo sa, sa ki konet majinasiõ i volõte dji tut. Mo ke peie xak un dji zot sosulã thavai ki zot fe.²⁴Mẽ laba la Tiatira lahextã dji zot pa suiv sa mal ximẽ-la. Zot pa ãphan sa ki un de ka aple dji 'seghe-iela ki pi ofõ dji Djab-la '. Mo ka afihmẽ mo pa ke mete xaj lasu zot. ²⁵Mẽ, juk kã mo ke vinï, sehe biẽ sa ki zot gãiẽ.²⁶Sa ki hesi sipote tut sa i kõtxinẽ fe juk lãdã finisiõ mo volõte mo ke bai mem otohite ki mo husuve dji mo Papa: otohite lasu nasiõ-iela ²⁷pu kumãde ie ke un batõ dji fe i li ke kase ie kumã un pot dji labu. ²⁸Mo ke bai pu ie zetuel dji bõmãtẽ. ²⁹Pu sa, si zot gãiẽ zohe pu kute, ẽbe kute sa ki Lesphui dji Bõdje ka dji pu legliz-iela

¹Pu zãj dji legliz dji Sardes ekhi kõsa:"Sa a mẽsaj djisa ki gãiẽ set Lesphui-iela dji Bõdje i set zetuel-iela. Mo save akisa zot ka fe. Zot ka dji ki zot vivã, mẽ, vuemã zot muhi. ²Leve i bai fos pu sa ki zot gãiẽ tuju ki vivã, ãvã muhi kõpletmã; pase mo save ki sa ki zot te fe pa te ãko susolã ke sa ki mo Bõdje ka dumãde.³Pu sa, xõje dji ki zot ãphan i tãde. Zot obei i hepãtxi. Si zot pa leve mo ke atake zot sã zot piasuve, kumã un vole, i zot pa ke hete save dji le ki mo ke vinï. ⁴Mẽ un de dji zot dji Sardes te kõsiavi zot lẽj-iela phop. Zot ke maxe ke mo lãdã lẽj blã, pase zot mehite i zot jis.⁵Sa ki hesi sipote tut sa, ke ize lẽj blã, i mo pa ke tihe nõ dji sa mun-iela dji Liv dji Lavi-la. Mo ke deklahe la phuezãs dji mo Papa i dji so zãj-iela ki sa mun-iela a mo pa. ⁶"Pu sa, si zot gãiẽ zohe pu kute, ẽbe kute sa ki Lesphui dji Bõdje ka dji pu legliz-iela.⁷Pu zãj dji legliz dji Filadélfia ekhi kõsa:"Sa a mẽsaj djisa ki a Sẽ i Lavehite. Li gãiẽ lakle ki a te dji vue Davi; sa ki Li ka luvui pies mun pa ka fõmẽ, i sa ki li ka fõmẽ pies mun pa ka luvui. ⁸Mo save akisa zot ka fe. Mo save ki zot pa gãiẽ boku fos , mem kõsa zot obei mo pahol i zot hete fiam. Mo luvui djivã zot un lapot ki pies mun pa puve fõmẽ.⁹Zot kute! Ẽkãt sa mun-iela ki a dji Djab-la, sa met mãto-iela ki ka afihmẽ ki ie sa judeu, mẽ ie pa sa, mo ke fe ki ie vinï i tõbe dji junü djivã zot. I ie tut ke save ki mo kõtã zot. ¹⁰Zot obei mo zod pu sipote sufãs-la ke pasiãs, i pu sa mo ke delivue zot lãdã ju dji aflisiõ ki ke vinï lasu tã-la ãtxe pu mete lãdã laphuev pov-iela dji Late-la. ¹¹Mo pa ke tade. Sehe sa ki u gãiẽ, pu pies mun pa volo u kuhun.¹²Mun ki hesi sipote tut sa, mo ke fe li *plis ïpohtã (coluna) lãdã Kaz dji mo Bõdje, i sa mun-la pa jãmẽ ke sotxi dji laba. I lasu'l mo ke ekhi nõ dji mo Bõdje i nõ dji pei dji mo Bõdje, nov Jehuzalem, ki ke vinï dji siel-la, i dji mo Bõdje. I osi mo ke ekhi lasu'l mo nov nõ. ¹³"Pu sa, si zot gãiẽ zohe pu kute, ẽbe kute sa ki Lesphui dji Bõdje ka dji pu legliz-iela".¹⁴Pu zãj dji legliz dji Laodiceia ekhi kõsa:"Sa a mẽsaj dji *Amém, dji tẽmuẽ ki fiam i lavehite, djisa ki palakos dji mun Bõdje fe tut bagaj-iela . ¹⁵Mo save akisa zot te fe. Mo save ki zot pa fue nẽ xo. kumã mo te le ki zot te fue o xo. ¹⁶Mẽ, pukisa zot sãble un djilo ki txed pa fue nẽ xo, mo ke vomï zot dji mo bux.¹⁷Zot ka dji: No hix, no biẽ dji lavi i no gãiẽ tut sa ki no buẽzẽ. Mẽ zot pa save ki zot maleve, pa gãiẽ kõtãtmã, zot pov, sã lẽj i pa ka ue. ¹⁸Pu sa , mo ka kõseie ki zot axte dji mo lo *fin(puro) pu ki zot hete, vuemã, hix.I axte lẽj blã pu so ize i khuvui zot hõte. Axte osi hemed pu zot uei-iela pu zot puve ue.¹⁹Mo ka babie i bai pinitãs pu tut sa ki mo kõtã-iela. ²⁰Zot kute! Mo obo lapot i mo ka bat. Si un kek mun tãde mo vue i luvui lapot-la, mo ke ãthe lãdã so kaz, mo ke mãje ke li i li ke mo.²¹Sa ki hesi sipote tut sa mo ke bai dhue dji asi obo mo obiho, kõsa kumã mo hesi sipote i ato mo asi obo obiho dji mo Papa. ²²"Pu sa, si zot gãiẽ zohe pu kute, ẽbe kute sa ki Lesphui dji Bõdje ka dji pu legliz-iela.

¹Aphue djisa mo te gãiẽ uot viziõ i mo ue un lapot luvui lahosiel. I vue-la ki te sãble thẽ dji un *suflet (trombeta) i ki ãvã te deha pale ke mo li dji:_ Mõte esi, i mo ke mõthe pu u sa ki buẽzẽ fet aphue djisa. ²Lãdã mem lokasiõ Lesphui dji Bõdje ãthe lasu mo. I laba lahosiel te gãiẽ un obiho ke un mun asi lasu'l. ³So vijaz te ka klehe kumã ka klehe hox-iela dji *jaspe i sárdio, i ka kõhõnẽ obiho-la un lakãsiel ki te ka klehe kumã un *esmeralda⁴I obo obiho-la te gãiẽ uot vẽt kat obiho ki te asi lasu ie vẽt kat ãsiẽ, lãdã hob blã i ke kuhun dji lo lasu ie tet-iela. ⁵Dji obiho-la te ka sotxi zekle, thẽ i lohaj. Djivã dji li te gãiẽ set *lime (tocha) te ka limẽ. ki a set lesphui-iela dji Bõdje.⁶I djivã dji obiho-la te gãiẽ un bagaj sãble kumã un *ghã lãme dji via, kle kumã *cristal.Obo obiho-la, i lãdã xakẽ un bo dji li, te gãiẽ kat bagaj vivã plẽ ke uei, djivã i deie.⁷Phõmiẽ-la djisa bagaj vivã-iela te sãble un liõ. Desem-la te sãble un bef. Thoazem-la te gãiẽ vijaz sãble dji un mun. I katzem-la te sãble un gho pagãnï te ka vole. ⁸Xakẽ un djisa kat bagaj vivã-iela te gãiẽ sis zel, ki te plẽ ke uei tu le dê bo-iela. I nuit i jonẽ ie pa te ka hete dji xãte kõsa:"Sẽ, sẽ, sẽ a Sẽie Bõdje, ki gãiẽ Ghã Povua, ki a te sa, ki a sa i ki ke vinï."⁹Xak fue ki kat bagaj vivã-iela te ka xãte i bai *Glória, honra i humiasi sa ki asi lãdã obiho-la i ki ka viv pu lavi ẽtehnel, ¹⁰vẽt kat ãsiẽ-iela te ka tõbe dji junü djivã'l i ie te ka adohe'l. Ie te ka jite ie kuhun-iela djivã obiho-la i ie te ka dji: ¹¹"no Sẽie i no Bõdje!U jis dji husuve *glória, honra i povua, pase u fe tut bagaj-iela;pu u volõte ie fet i pahet."

¹Lãdã lãmẽ adhet djisa ki te asi Lãdã obiho-la mo ue un liv, ki te ekhi dji dê bo-iela i tatxe ke set *lakle (selos). ²Mo ue osi un zãj ki gãiẽ povua ki te ka dumãde biẽ fo:_ Kimun ki jis dji kase *lakle-iela (selos) i luvui liv-la?³Mẽ pa te gãiẽ pies mun, nẽ lahosiel, nẽ lasu late, nẽ pahãba late-la ki te puve luvui liv-la i gade akisa ki te akhi laba. ⁴Mo te ka khie boku pase ki pa te puve thuve pies mun ki te jis dji luvui liv-la o gade akisa ki te ekhi laba. ⁵Ẽbe un dji vẽt kat ãsiẽ-iela dji pu mo:Pa khie. Gade! Liõ dji *thib dji Judá, Hasin dji Davi, hesi sipote i gãiẽ i li puve kase set *lakle-iela (selos) i luvui liv-la.⁶Ẽbe mo ue un *Pitxit mutõ(cordeiro) djibut lamitã dji obiho-la, kõhõnẽ pu kat bagaj vivã-iela i pu vẽt kat ãsiẽ-iela. Te ka pahet ki *Pitxitmutõ-la (cordeiro) te ofui kumã *sakhifis. Li te gãiẽ set kon i set uei, ki a set lesphui-iela dji Bõdje ki li voie pu tã-la ãtxe. ⁷Pitxit mutõ-la (cordeiro) ale i li phã liv dji lãmẽ adhet dji sa ki te asi lãdã obiho-la.⁸Kã li fe sa, kat bagaj vivã-iela i vẽt kat ãsiẽ-iela tõbe dji junü djivã dji'l. Cal un dji ie te gãiẽ la lãmẽ un *harpa i un dê pot dji lo plẽ dji ïsãs, ki a phuie-iela dji pov dji Bõdje.⁹Ie te ka xãte sa nov xãsiõ:"U jis dji phã liv-la i dji kase lakle-iela (selos).Pase u muhi lãdã lakhue i, palakos dji u lamo, u axte pu Bõdje mun dji tut thib-iela , lãg-iela , nasiõ-iela i has-iela. ¹⁰U fe dji sa mun-iela vue i sasedotxi pu siavi no Bõdje i ie ke kumãde tã-la ãtxe. "¹¹Ẽbe mo gade ãko i mo tãde boku zãj, miliõ i miliõ dji ie te obo obiho-la, i osi dji bagaj vivã-iela i dji ãsiẽ-iela ¹²ie te ka xãte ke vue biẽ fo :"Pitxit mutõ-la (cordeiro) ki muhi jis dji husuve povua, hixez, konetmã i fos, (honra),*(gloria) i adohasiõ ".¹³Ẽbe aphue mo tãde tut bagaj ki vivã ki gãiẽ lahosiel, lasu late, pahãba late i lãdã ghã lãme, te ka xãte:"Pu sa ki asi lãdã obiho-la i pu *Pitxit mutõ-la (cordeiro),pu ie adohasiõ, (honra) i glória i povua pu lavi ẽtehnel"! ¹⁴Kat bagaj vivã-iela te ka hepon: *Amém! " I ãsiẽ-iela te ka tõbe ãjunü i ie te ka adohe'l.

¹Ẽbe mo ue Pitxit mutõ-la (Cordeiro) kase phõmiẽ dji set lakle-iela (selos) i mo tãde un dji kat bagaj vivã-iela dji ke gho vue kumã thẽ dji un lohaj:_ Vinï! ²Mo gade i mo ue un xuval blã. So xuvalie te gãiẽ un nak i lasu so tet ie pose un kuhun dji vue. Li sotxi ka bataie i pu hesi gãiẽ batai-iela.³Aphue Pitxit mutõ (cordeiro) kase dezem *lakle-la (selo). I Mo tãde dezem bagaj vivã-la dji:_Vinï! ⁴Ẽbe sotxi uot xuval, ki te huj. So xuvalie husuve povua dji pote ladje pu tã-la ãfẽ dji ki mun-iela txue un i uot. I li husuve un gho espad.⁵Ẽbe Pitxit mutõ-la(cordeiro) kase thoazem *lakle-la (selo). I mo tãde thoazem bagaj vivã-la dji:_Vinï!Mo gade i mo ue un xuval nue. So xuvalie te gãiẽ un balãs la so lãmẽ. ⁶Mo tãde sãble un vue, ki te ka vinï dji lamitã dji kat bagaj vivã-iela te ka dji:_ Djimï kilo dji fahin fãs ka kute sa zot ka gãiẽ lãdã un jonẽ ãtxe dji thavai; i un kilo edjimï dji *(cevada) ka kute mem bagaj. Pa piad djiluid i djivẽ.⁷Aphue Pitxit mutõ-la (cordeiro) kase katzem lakle-la (selo). I mo tãde katzem bagaj vivã-la dji:_Vinï! ⁸Mo gade i mo ue un xuval jon. So xuvalie te k'aple Lamo, i *lãfe-la te ka suiv li. Ie husuve povua lasu katzem pedas dji late-la, pu txue palakos dji ladje, fẽ, maladji i animal sovaj.⁹Ẽbe Pitxit mutõ-la (cordeiro) kase sẽkzem *lakle-la (selo). I mo ue pahãba dji *(altar)-la nam-iela dji sa mun ki ie txue-iela pase ki ie te ãnüsie mẽsaj dji Bõdje i ie te fiam lãdã so tẽmuẽ. ¹⁰Ie te ka hele biẽ fo:O Sẽie ki gãiẽ ghã povua, ki Sẽ i lavehite! ki tã u ke kõdãnẽ sa mun-iela ki txue no laba lasu late. ¹¹Xakẽ un dji ie husuve un lẽj blã. I ie husuve zod pu poze un moso, juk kã ke kõplete lemeho dji ie kõpãiẽ-iela lãdã thavai dji Jezi, ki a te ie fue-iela i ki gãiẽ pu muhi kumã ie muhi.¹²Aphue djila mo ue Pitxit mutõ-la (cordeiro) kase siszem lakle-la (selo). I late-la thãble fo. Solei-la hete suku kumã un lẽj nue, i lalin-la hete tut huj kumã djisã. ¹³Zetuel-iela tõbe dji siel-la lasu late-la, sãble (figo) ki viat kã li ka tõbe dji so pie kã vã-la ka sukuie'l. ¹⁴Siel-la djispahet sãble un papie ki hule, i tut zile-iela sotxi dji ie plas .¹⁵Ẽbe vue-iela dji tã-la ãtxe, guvelmã-iela, i xef dji milite-iela, mun ki hix ki gãiẽ povua-iela, i tut esklav, i mun ki lib ie sehe ie ko lãdã kavian i ãba hox dji mõtãi-iela. ¹⁶Ie te ka hele pu mõtãi-iela i pu hox-iela:_Tõbe lasu no i sehe no dji uei dji sa ki asi lãdã obiho-la i delivue no dji *ãhaj dji Pitxit mutõ-la (cordeiro) ¹⁷Pase deha hive ghã ju dji ie ãhaj, i kimun ki ke puve sipote'l.

¹Aphue djisa mo ue lãdã kat khã-iela dji late-la kat zãj djibut, ie te ka ãpexe kat vã-iela sufle lãdã late-la, lasu ghã lãme-la i lasu nẽpot pie-bua. ²Ẽbe mo ue uot zãj, ki te ka mõte dji bo levã i ki te gãiẽ la lãmẽ *mak (sinete) dji Bõdje vivã. Li hele ke vue biẽ fo pu kat zãj-iela ki te husuve povua pu dethi late-la i ghã lãme. ³Zãj-la dji:_Pa dethi late-la i ghã lãme, nẽ pies pie-bua, juk kã no make ke mak (sinete) la tet dji *siavito-iela dji no Bõdje.⁴I mo tãde lemeho dji sa ki make-iela ke mak dji Bõdje. A te sã kahãt kat mil (144 mil), dji tut pov dji Ishael: ⁵dji thib dji Judá make, duz mil,dji thib dji Rúben, duz mil,dji thib dji Gade, duz mil, ⁶dji thib dji Aser, duz mil,dji thib dji Naftali, duz mil,dji thib dji Manassés, duz mil,⁷dji thib dji Simeão, duz mil,dji thib dji Lévi, duz mil,dji thib dji Issacar,duz mil, ⁸dji thib dji Zebulom, duz mil,dji thib dji José, duz mil,dji thib dji Benjamim, make duz mil.⁹Aphue djisa mo gade i mo ue boku mun, ki pies mun pa te puve kõte. A te dji tut nasiõ-iela, *thib, has i lãg. Ie te djibut djivã dji obiho-la i dji Pitxit mutõ-la (cordeiro), ka ize lẽj blã, i ie te ke fei dji (palmeira) lãdã ie lãmẽ. ¹⁰I ie te ka hele biẽ fo:_Dji no Bõdje, ki asi lãdã obiho-la, i dji *Pitxit mutõ-la (cordeiro) ka vinï no salvasiõ.¹¹tut zãj-iela te djibut ka kõhõnẽ obiho-la, ãsiẽ-iela i kat bagaj vivã-iela. Ẽbe ie te ka koste ie vijaz lasu late i ie te ka adohe Bõdje, ¹²Ie te ka dji:_*Amém, pu no Bõdje adohasiõ, *gloria, konetmã,*(graça) , (honra), povua pu lavi ẽtehnel! Amém!¹³13 Un dji ãsiẽ-iela dumãde dji mo:_akimun sa-iela ki lãdã lẽj blã? dji kote ie vinï?¹⁴14 _ Mo hepon: mo pa save. Mẽ u save! Ẽbe li dji pu mo:_Sa-iela a ki vinï dji ghã thibulasiõ. Sa mun-iela lave ie lẽj-iela lãdã djisã dji Pitxit mutõ-la (cordeiro), i ie hete blã.¹⁵A pu sa ki sa mun-iela djibut djivã obiho dji Bõdje i ie ka siavi'l nuit i jonẽ lãdã so Kaz (templo). I sa ki asi lãdã so obiho-la ke khuvui ie ke so lom. ¹⁶Ie pa jẽ ke sãtxi fẽ i suef i xalo dji solei-la pa jẽ ke bule ie. ¹⁷Pase Pitxit mutõ-la (cordeiro), ki laba lamitã dji obiho-la ke sa Pasteh dji sa mun-iela i li ke suiv ie pu khik dji djilo dji lavi-la. I Bõdje ke sue dji ie uei-iela tut *dlo uei (lágrimas).

¹Kã Pitxit mutõ-la (cordeiro) kase setzem *lakle-la (selo) siel-la hete this phox thãt minut. ²Ẽbe mo ue set zãj-iela ki te djibut djivã Bõdje, i ie husuve set *suflet (trombeta).³Not zãj vinï ke un pot dji lo ki ie ka bule ïsãs i li hete djibut obo (altar)-la. Li husuve boku ïsãs pu hasãble ãsam ke phuie-iela dji tut pov dji Bõdje i ofui'l lãdã (altar) dji lo ki laba djivã dji obiho-la. ⁴I dji lãmẽ-iela dji zãj-la ki te laba djivã Bõdje mõte lafimẽ dji ïsãs ki li bule, ãsam ke phuie-iela juk la phuezãs dji Bõdje. ⁵Ẽbe zãj-la phã pot dji ïsãs-la, li plẽ'l ke djife dji (altar)-la i li jite'l lasu late-la. Fet gho lohaj, thẽ, zekle, i late-la thãble.⁶I aphue set zãj-la ki te gãiẽ set *suflet-iela (trombetas) ie te phuepahe pu *sufle (tocar) lãdã ie. ⁷Phõmiẽ zãj-la sufle lãdã so suflet (trombeta), i li voie lasu late un lapli dji hox i djife, mele ke djisã. I djife-la dethi thoazem pedas dji late-la, dji pie-bua-iela i dji tut plã viat.⁸Aphue dezem zãj-la sufle lãdã so suflet (trombeta), i un bagaj ki te sãble un ghã mõtãi ki ka phã djife ie voie'l lãdã ghã lãme. I thoazem pedas dji ghã lãme-la vihe djisã, ⁹muhi thoazem pedas dji animal-iela ki ka viv lãdã ghã lãme-la, i dethi thoazem pedas dji tut gho bato-iela i txibato-iela.¹⁰Ẽbe thoazem zãj-la sufle lãdã so suflet (trombeta), i un gho zetuel, ka bule kumã un *gho djife (tocha), tõbe dji siel-la lasu thoazem pedas dji lahivie-iela i lasu khik-iela. ¹¹Nõ djisa zetuel-la a Ãme (Amargura). I thoazem pedas dji djilo-iela hete ãme, i a pu sa boku mun muhi kã ie bue djisa djilo-iela.¹²Djila katzem zãj-la sufle lãdã so suflet (trombeta), i blese thoazem pedas dji solei-la, dji lalin-la i dji zetuel-iela, dji mãiẽ ki ie pedji thoazem pedas dji ie klehite.Pa te gãiẽ klehite dehãtxi thoazem pedas dji jonẽ-la i osi dji nuit-la.¹³Aphue mo gade i mo ue un gho pagãnï ki te ka vole biẽ hot lãdã siel-la. I mo tãde gho pagãnï-la dji ke un vue biẽ fo kõsa: _ Sufãs pu zot! sufãs pu zot, sufãs pu zot ki ka hete lasu late, kã ke tãdẽ thẽ dji suflet (trombeta) ki uot thoa zãj-iela ke sufle!

¹Aphue sẽkzem zãj-la sufle lãdã so suflet (trombeta), i mo ue un zetuel ki te tõbe dji siel-la lasu late, i li husuve lakle dji *lãfe (abismo). ²Zetuel-la luvui pi dji *lãfe-la (abismo), i dji li sotxi lafimẽ, kumã lafimẽ dji un *gho djife (fornalha). I solei i siel-la hete suku ke lafimẽ ki te ka sotxi dji *lãfe-la (abismo).³Dji ãdjidã lafimẽ-la sotxi boku suthel, ki desam lasu late-la i ie husuve mem povua ki iskhopiõ-iela gãiẽ. ⁴Suthel-iela husuve zod pu pa dethi plã viat-iela, pie-bua-iela i nẽpot plã ; selmã pu ie blese sa mun-iela ki pa gãiẽ *mak (sinete) dji Bõdje Lãdã ie tet.⁵Suthel-iela pa te gãiẽ dhue pu txue sa mun-iela, ie te puve thumãte mun-iela dehãtxi sẽk mua. I dulo ki ie pote lasu mun-iela a te sãble dulo Kã iskhopiõ ka pitxe. ⁶Lãdã sa sẽk mua-iela mun-iela ke sase lamo-la, mẽ ie pa ke thuve'l; mun-iela ke le muhi mẽ lamo-la ke mahõ dji ie.⁷Suthel-iela te sãble boku xuval phuepahe pu bataie. Lãdã ie tet te gãiẽ un bagaj sãble un kuhun dji lo, i ie vijaz a te sãble vijaz dji un mun. ⁸Ie xive-iela a te sãble xive dji fam, i ie dã-iela te sãble dã dji liõ. ⁹Ie photesiõ-iela (couraça) te sãble photesiõ dji fe, i thẽ dji ie zel-iela a te sãble thẽ dji boku loto ki boku xuval ka hale kã ie ka kuhi pu bataie.¹⁰Suthel-iela te gãiẽ latxo i pikã kumã iskhopiõ-iela, i a te ke ie latxo-iela te gãiẽ povua dji blese mun-iela dehãtxi sẽk mua. ¹¹Ie te gãiẽ un vue ka kumãde ie, ki a te zãj dji lãfe-la (abismo). So nõ ã *hebraico a Abadom i ã *grego Apoliom. ¹²Phõmiẽ "sufãs-la " deha pase, mẽ tuju ke vinï uot dê-iela.¹³Ẽbe siszem zãj-la sufle lãdã so suflet (trombeta), i mo tãde un vue ki te ka vinï dji kat khã-iela dji (altar) dji lo ki laba djivã Bõdje. ¹⁴I pu siszem zãj, ki te gãiẽ lãdã so lãmẽ suflet-la (trombeta), vue-la dji:_Libiate kat zãj-iela ki phui phox dji ghã lahivie Eufrates! ¹⁵Kat zaj-iela hete lib. Ie te phuepahe pu sa lo, ju, mua i ãnẽ ãfẽ dji txue thoazem pedas dji tã-la.¹⁶I mo tãde ki ie patxizã dji soda a te dji desã miliõ dji soda ke xuval. ¹⁷Lãdã mo Visio mo ue xuval-iela ke ie xuvalie-iela. Xuvalie-iela te gãiẽ lãdã ie pothin *photesiõ (couraça) huj sãble djife, ble sãble *safira, i jon sãble *ãxof (enxofre). Tet dji xuval-iela te sãble tet dji liõ, i dji ie bux te ka sotxi djife, lafimẽ i *ãxof (enxofre).¹⁸I thoazem pedas dji tã-la muhi palakos dji sa thoa bagaj-iela ki te ka sotxi dji bux dji xuval-iela: djife, lafimẽ i ãxof (enxofre). ¹⁹Pase povua dji xuval-iela lãdã ie bux i osi lãdã ie latxo. Latxo-la te sãble un siapã ke tet lãdã so but, i ke li xuval-iela te ka blese mun-iela.²⁰Lahextã dji sa mun ki pa muhi-iela pu sa *dulo-iela (praga) sa mun-iela pa hepãtxi dji ie pexe-iela: ie kõtxinẽ adohe demuẽ-iela i txibodjẽ dji lo, dji *prata, dji *bronze, dji hox i dji madhie, ki pa puve ue, tãde i maxe. ²¹Osi ie pa hepãtxi dji ie khim-iela dji lamo, dji ie maji nue, dji ie phostxituisiõ i dji ie volo-iela.

¹Ẽbe mo ue not zãj, ki te ka desam dji siel-la. So lẽj a te un nuaj, i li te gãiẽ un lakãsiel lasu so tet. So vijaz te sãble solei-la, i so jam-iela te sãble poto dji djife. ²Zãj-la te gãiẽ un txi-liv luvui lãdã so lãmẽ. Li poze so pie adhet lasu ghã lãme-la i pie agox, lasu late-la³i Li hele ke vue boku fo, ki te sãble ghõdhe dji boku liõ.Aphue ki li hele, set lohaj-iela hepon ke un gho thẽ ⁴Lãdã mumã ki ie kose, mo te ke ekh, mẽ mo tãde un vue dji lahosiel ki kose: _ sehe ãseghe sa ki set lohaj-iela pale. Pa ekhi ãiẽ.⁵Aphue zãj ki mo ue djibut lasu ghã lãme-la i late-la leve so lãmẽ adhet pu siel-la ⁶I li fe un phomes lasu nõ dji Bõdje, ki ka viv pu lavi ẽtehnel, i ki fe siel, late, ghã lãme i tut sa ki gãiẽ lãdã ie.Phomes-la a sa:_Pa ke tade ãko. ⁷Kã setzem zãj-la sufle lãdã so suflet (trombeta, Bõdje ke kõphui so ïtẽsiõ ki ãseghe-iela, kumã li te ãnüsie pu so *siavito-iela (profetas).⁸Ẽbe vue ki mo te tãde dji siel-la kose ãko ke mo, li dji:_ Ale juk kote zãj ki djibut lasu ghã lãme i lasu late-la i phã liv ki luvui-la ki li gãiẽ lãdã so lãmẽ. ⁹Mo ale i mo dumãde dji zãj-la txiliv-la, i li dji pu mo:_ phã liv-la i mãje'l. Lãdã u lextomak li ke hete ãme, mẽ lãdã u bux li ke hete dus kumã miel.¹⁰Djila mo phã txiliv-la dji lãmẽ dji zãj-la i mo mãje'l, I lãdã mo bux li te dus kumã miel. Mẽ, aphue ki mo vale'l, mo lextomak hete ãme. ¹¹Ẽbe li dji pu mo: _ U buẽzẽ ãnüsie ãko mẽsaj dji Bõdje a hespek dji boku nasiõ, has, lãg i vue.

¹Aphue djisa mo husuve un batõ dji mizuhe li dji pu mo:_Leve, tihe mizu dji *Kaz (Templo) dji Bõdje i dji (Altar)-la i kõte mun-iela ki ka adohe lãdã *Kaz-la. ²Mẽ pa mizuhe (pátio) dji deho dji *Kaz-la, pase sa (pátio) ie bai pu nasiõ-iela, ki ie ke djibut lasu *Pei Sẽ-la dehãtxi kahãt dê mua.³Mo ke voie mo dê tẽmuẽ-iela, ka ize lẽj dji sak i ie ke ãnüsie mẽsaj dji Bõdje dehãtxi *mil desã soasãt ju. ⁴Dê tẽmuẽ a dê (oliveira)-iela i dê *gho lalãp-iela (candelabros) ki djibut djivã Sẽie dji tã-la ãtxe. ⁵Si ie elmï-iela seie fe ie djimal, dji ie bux ke sotxi djife i ka finï ke ie elmï-iela. Kõsa, nẽpot ki le fe ie djimal buẽzẽ muhi.⁶Dê tẽmuẽ gãiẽ povua pu fõmẽ siel-la, ãfẽ dji ki pu lapli pa tõbe dehãtxi tã ki ie ke ãnüsie mẽsaj dji Bõdje. Ie gãiẽ povua osi lasu djilo-iela pu vihe ã djisã. Ie gãiẽ povua tuju pu blese late-la ke tut kalite maladji, kõbie fue ie le. ⁷Kã dê tẽmuẽ-iela ke finï dji ãnüsie so mẽsaj, bet-la ki ka vinï dji *lãfe (abismo) ke bataie kõt ie.Bet-la ke hesi txue ie,⁸i ie ko-iela ke hete lãdã lahi ki ïpohtã dji ghã pei-la ki ie k'aple ã lesphui *Sodoma i *Egito kote ie Sẽie ale klue lãdã lakhue. ⁹Dehãtxi thoa ju edjimï, pov dji tut nasiõ-iela, thib-iela , lãg-iela , i has-iela ke gade pu sa dê ko-iela i ie pa ke lese mun ãtehe ko-iela.¹⁰Pov-iela dji late-la ke hete boku kõtãtmã ke lamo dji sa dê tẽmuẽ-iela. Ie ke fe lafet i ke voie kado un pu uot pase ki sa dê *phofet-iela pote boku sufãs pu tã-la. ¹¹Mẽ aphue dji thoa ju edjimï un vã dji lavi vinï dji Bõdje i ãthe lasu ie, i ie leve djibut. I tut mun-iela ki ue ie hete pe boku. ¹²Djila *phofet-iela tãdẽ un gho vue, ki te ka vinï dji lahosiel i li dji pu ie:_Mõte esi!Ẽkãt ie elmï-iela te ka gade, de *phofet-iela mõte pu siel-la lãdã un nuaj.¹³Lãdã sa lokasiõ-la late-la thãble fo. Ki diszem pedas dji pei-la hete dethi, i muhi set mil mun. Uot mun-iela hete boku pe i ie adohe Bõdje dji siel-la. ¹⁴Dezem "sufãs-la" deha pase. Mẽ gade! thoazem "sufãs" pa ke tade.¹⁵Ẽbe setzem zãj-la sufle lãdã so *suflet (trombeta), i fo vue hele lahosiel, ki te ka dji kõsa:_Povua pu kumãde tã-la ato a dji Bõdje, ki a no Sẽie, i *Messias ki li xuezi. I Bõdje ke kumãde pu ẽtehnite.¹⁶Djila vẽt kat ãsiẽ-iela, ki te asi lasu ie obiho-iela djivã Bõdje, ie ãjunü, i koste ie vijaz-iela lasu late-la i ie adohe Bõdje, ¹⁷ie dji:_Sẽie Bõdje,ki gãiẽ ghã povua,ki a sa i ki a te sa !No ka humiasi u pase ki u te ize u ghã povua i u kumase kumãde.¹⁸Nasiõ-iela hete kole pase ki deha hive mumã dji mõthe u *ãhaj i lo dji mun muhi-iela kõdãnẽ. Hive mumã dji u hekõpãse u *siavito-iela, *phofet-iela i tut u pov i tut sa ki ka adohe u nõ, djipi ki pitxi-iela juk ki ghã-iela. Hive mumã pu dethi sa-iela ki ka txue mun lasu late!¹⁹Ẽbe hete luvui lahosiel *kaz (templo) dji Bõdje, i ie ue *arca dji *kõtha-la (aliança) laba ãdjidã. I fet zekle, thẽ, lohaj, thãble late, i un fo lapli dji hox.

¹Ẽbe pahet lahosiel un ghã sin. A te un fam. So hob a te solei, pahãba dji so pie-iela a te lalin-la, i li te ka ize lãdã so tet un kuhun ki te gãiẽ duz zetuel. ²Fam-la te ãsen i li te ka hele ke dulo dji *akusmä (parto).³I pahet lahosiel not sin: a te un gho dhagõ huj ke set tet i djis kon i ke un kuhun lãdã xakẽ tet. ⁴Ke so latxo li hale dji siel-la thoazem pedas dji zetuel-iela i li jite ie lasu late-la. Aphue dhagõ-la hete djivã fam ãsen-la ãfẽ dji mãje tximun-la kã li ke fet.⁵Ẽbe fam-la akuxe un tximun om , ki ke kumãde tut nasiõ-iela ke un batõ dji lo. Mẽ tximun-la ale pu phox dji Bõdje i dji so obiho. ⁶Fam-la mahõ pu *kote ki pa gãiẽ ãiẽ (deserto), kote Bõdje te phuepahe un plas pu li. Laba Bõdje ke ẽtxupe dji'l dehãtxi mil desã soasãt ju.⁷Aphue fet un ladje lahosiel. Miguel i so zãj-iela bataie kõt dhagõ-la i so zãj-iela. ⁸Mẽ dhagõ-la piad lãdã ladje-la, pu sa li i so zãj-la pa te puve hete lahosiel. ⁹I ie jite'l dji lahosiel. Li a sa vie siapã, ki ie k'aple Djab o Satã, ki ka pote mun-iela dji tã-la fe pexe.Ie jite'l lasu late-la, i so zãj-iela osi vinï ãsam ke'l.¹⁰Ẽbe mo tãde un vue fo, ki te ka dji: _Ato hive salvasiõ dji Bõdje! Ato Bõdje mõthe so povua kumã vue! Ato *Messias ki li xuezi mõthe so povua.!Pase elmï dji no fue, ki te djivã Bõdje pu solãte ie nuit i jonẽ, Bõdje jite'l dji lahosiel.¹¹No fue-iela hesi sipote'l palakos dji djisã dji *Pitxit mutõ-la (cordeiro) i dji mẽsaj ki ie ãnüsie. Ie te phuepahe pu bai ie lavi i muhi. ¹²Siel-la i zot tut ki ka hete lãdã'l, zot hete boku kõtã! Mẽ sufãs pu late-la i ghã lãme! Pase djab-la desan juk kote zot i li boku ãhaj pase li save ki li gãiẽ selmã un tximoso tã pu thavai.¹³Kã dhagõ-la ue ki Bõdje te jite'l lasu late-la, li kumase piasuve fam ki te akuxe tximun-la. ¹⁴Mẽ fam-la husuve dê zel sãble sel dji un gho pagãnï pu vole pu kote ki phuepahe pu li laba lãdã *kote ki pa gãiẽ ãiẽ (deserto) kote Bõdje ke sutuni'l dehãtxi thoa ãnẽ edjimï, lib dji uei dji dhagõ-la.¹⁵Ẽbe dhagõ-la jite djilo dji so bux, sãble un lahivie, deie fam-la, pu djilo-la te hale'l. ¹⁶Mẽ late-la ide fam-la, phop late-la luvui so bux i vale djilo-la ki te sotxi dji bux dji dhagõ-la. ¹⁷Dhago-la hete boku ãhaj ke fam-la i li ale bataie kõt lahextã dji so pitxit-iela, a sa mun-iela ki ka obei zod-iela dji Bõdje i fiam lãdã lavehite ki Jezi mõthe. ¹⁸Ẽbe dhagõ-la hete djibut lãdã ban-sab dji ghã lãme-la.

¹Aphue mo ue un bet ki te ka mõte dji ghã lãme. Li te gãiẽ *djis kon i set tet, un kuhun lãdã xakẽ un kon-iela. Lãdã xakẽ tet te ekhi nõ-iela dji *mal pale (blasfêmia). ²Bet ki mo ue-la te sãble un *txig (leopardo); so pie-iela te sãble dji un *us (urso), i so bux te sãble dji un liõ. I pu bet-la dhagõ-la bai so povua, so obiho i ghã otohite.³Mo ue lãdã ki un dji tet-iela dji bet-la te husuve un blesmã dji lamo, mẽ blesmã-la hete djiehi. Tã-la ãtxe hete susphan i li suiv bet-la. ⁴Tut adohe dhagõ pase ki li te bai so povua pu bet-la. Ie adohe osi bet-la, ie dji:_ki mun ki fo kumã bet-la? ki mun ki puve bhuiga kõt li ?⁵Bet-la husuve peãmi pu *pale mal (blasfêmias) i husuve povua pu thavai dehãtxi kahãt dê mua. ⁶Li kumase kose mal kõt Bõdje, kõt so nõ, kõt plas kote li ka hete i kõt tut ki ka viv lahosiel.⁷Bet-la husuve peãmi pu bataie kõt pov dji Bõdje i dethi ie. I osi li husuve otohite pu kumãde tut *thib, nasiõ, lãg i has. ⁸Tut mun ki ka viv lasu late adohe bet-la, selmã sa ki, djipi kumasmã dji tã-la, gãiẽ ie nõ ekhi lãdã Liv dji Lavi pa adohel sa ki a dji *Pitxit mutõ-la (cordeiro) ki muhi-la.⁹Pu sa si zot le tãde, kute biẽ sa: ¹⁰Mun ki gãiẽ pu ale lãdã phuiziõ ke ale phui; mun ki gãiẽ pu muhi pu espad ke muhi pu espad.Sa buẽzẽ ki pov dji Bõdje sipote sufãs-la ke pasiãs i hete fiam.¹¹Ẽbe mo ue not bet, ki te ka mõte dji late-la. Li te gãiẽ dê kon sãble dji un mutõ, mẽ li te ka kose sãble un dhagõ . ¹²Li te ka ize tut povua dji phõmiẽ bet, lãdã so phuezãs. Li te ka fose late-la i tut mun-iela adohe phõmiẽ bet-la, sa ki so blesmã dji lamo-la ki te djiehi.¹³Sa dezem bet-la fe ghã bagaj. Li fe ki djife tõbe dji siel lasu late-la, lãdã phuezãs dji tut mun-iela. ¹⁴I li kuiẽnẽ tut pov-iela dji late-la palakos dji bagaj-iela ki li fe lãdã phuezãs dji phõmiẽ bet-la. Dezem bet-la dji pu tut pov-iela dji tã-la ou ie fe un imaj pu adohe uot bet-la sa ki te blese i pa te muhi¹⁵Dezem bet-la husuve povua dji sufle lavi lãdã imaj dji phõmiẽ-la, pu li te puve kose i txue tut sa ki pa adohel. ¹⁶Li oblije tut mun-iela ki ghã i pitxi, hix i pov, esklav i lib pu gãiẽ un mak lãdã lãmẽ adhet o lãdã tet. ¹⁷Pies mun pa puve axte i vãde, selmã sa ki gãiẽ sa mak-la, sa a nõ dji bet-la o lemeho dji so nõ.¹⁸Sa ka dumãde konetmã. Mun ki ïtelijã puve dekhuvui sa ki lemeho dji bet-la signifike, pase lemeho-la ka hephuezãte nõ dji un mun. So lemeho a sixsã soasãt sis.

¹Aphue mo gade i mo ue *Pitxit mutõ-la (cordeiro) djibut lãdã mõtãi *Sião. Ke li te gãiẽ sã kahãt kat mil mun ki te gãiẽ so nõ i dji so Papa ekhi lasu ie tet. ²Ẽbe mo tãde un vue dji lahosiel, ki te sãble thẽ dji un ghã *so (cachoeira) o thẽ dji un fo lohaj. Vue ki mo tãde te sãble lamizik dji *Harpa ki boku mun ka jue.³Sa sã kahãt Kat mil te djivã dji obiho-la, i dji kat bagaj vivã-iela, i dji ãsiẽ-iela i ie te ka xãte un nov xãsiõ ki selmã ie te puve ãphan.Dji tut tã-la a te selmã ie ki Bõdje te axte. ⁴Ie te kõsiavi ie ko phop pase ie pa te gãiẽ helasiõ ke fam, i ie ka suiv Pitxit mutõ-la (cordeiro) kote li k'ale. Ãt tut mun-iela dji late-la ie ale axte kumã ofãd espesial pu Bõdje i pu Pitxit muto-la (cordeiro). ⁵Ie pa jẽ fe mãto, ie pa fe pies pexe.⁶Ẽbe mo ue not zãj ka vole boku hot, ke un mẽsaj ẽtehnel dji *bõ nuvel-la pu ãnüsie pu pov-iela dji late-la, pu tut has, thib, lãg i nasiõ. ⁷Li dji ke vue fo kõsa:_*hete dji Bõdje i adohe so *glória, pase deha hive mumã dji Bõdje kõdãnẽ tã-la. Adohe sa ki fe siel-la, late-la, ghã lãme-la i sus djilo-iela!⁸Dezem zãj suiv phõmiẽ, ka dji kõsa:_Babilônia tõbe! tõbe sa ghã pei-la ki fe tut nasiõ-iela bue dji so djivẽ, djivẽ dji ãhaj i phostxituisiõ!⁹Um thoazem zãj suiv dezem-la, ka dji kõsa:_ Sa mun ki adohe bet-la i so imaj i husuve mak-la lãdã tet o lãdã ie lãmẽ ¹⁰ke bue djivẽ dji Bõdje, djivẽ dji so ãhaj, ki li devide sã melãj lãdã koble dji so ãhaj.Ie ke thumãte lãdã djife i lãdã ãxof (enxofre) djivã zãj-iela i dji Pitxit mutõ-la (cordeiro).¹¹lafimẽ dji djife ki te ka thumãte ie a pu lavi ẽtehnel. Laba pa ke gãiẽ poze dji sufui nẽ nãnuit i lajonẽ, pu sa mun-iela ki adohe bet-la i so imaj, nẽ pu nẽpot ki gãiẽ mak dji so nõ. ¹²Sa buẽzẽ ki pov dei Bõdje sipote sufãs-la ke pasiãs. Sa pov-la a sa ki ka obei zod-iela dji Bõdje i ie fiam lasu Jezi.¹³Ẽbe mo tãde un vue dji siel-la ka dji :_Ekhi sa: biẽ kõtã mun-iela ki djipi ato ka muhi lãdã thavai dji Sẽie!_Lesphui dji Bõdje dji: ui sa a lavehite, ie ke poze dji ie thavai ki pezã pase ie pote ke ie lahepõs dji ie thavai-iela.¹⁴Aphue mo ue un nuaj blã, i asi lasu nuaj-la, un mun sãble Pitxit dji Om-la, Ke un kuhun dji lo lãdã so tet i un fus biẽ fite lãdã so lãmẽ. ¹⁵Not zãj sotxi dji Kaz-la (templo) i li hele biẽ fo pu sa ki te asi lasu nuaj-la:_ Ize fus-la i hamase pase deha hive lokasiõ dji hamase.Fui-iela deha bõ pu hamase! ¹⁶Aphue sa ki te asi lasu nuaj-la pase fus-la lasu late-la i tut late-la hete kupe¹⁷Djila not zãj sotxi dji Kaz (templo) ki laba lahosiel i li osi te gãiẽ un fus biẽ fite. ¹⁸Aphue not zãj, ki te hespõsab dji djife, sotxi dji phox dji (altar)-la. Ke un vue fo li hele pu zãj ki te gãiẽ fus biẽ fite-la:_ Ize u fus i kupe thãx uva dji pie-uva-la, pase uva-iela deha mï (madura)!¹⁹Ẽbe zãj-la pase fus lasu late-la, li hamase uva-iela i li jite ie lãdã ghã tãk (lagar) dji ãhaj dji Bõdje, kote ke djibut lasu uva-iela. ²⁰Djibut lasu uva-iela lãdã tãk-la ki te ka hete deho dji pei-la, i lahivie dji djisã ki sotxi djisa tãk-la te gãiẽ thoasã kilomet dji lõdjo pu un met edjimï dji fõdo.

¹I mo ue not ghã i joli sin lahosiel. A te set zãj ke set maldjisiõ-iela (pragas) ki a diãiẽ-iela, pase a finisiõ dji *ãhaj dji Bõdje.²Mo ue un bagaj ki sãble un ghã lãme dji via melãje ke djife. No ue osi mun-iela ki hesi dethi bet-la so imaj, i lemeho dji so nõ. Mun-iela te djibut, phox dji ghã lãme dji via-la, i ie te ka jue lãdã *ixthimã dji lamizik (harpa) ki Bõdje te bai pu ie.³Ie te ka xãte xãsiõ dji Moisés, *siavito dji Bõdje, i xãsiõ dji Pitxit mutõ-la (cordeiro). Ie te ka xãte kõsa:_ "Sẽie Bõdje, ki gãiẽ ghã povua, kumã gho i joli u thavai-iela!Vue dji nasiõ-iela, kumã jis i lavehite u ïtẽsiõ-iela! ⁴ki mun ki pa ke hete pe dji u, Sẽie?ki mun ki pa ke le ãnüsie u *glória?Pase selmã u ki a Sẽ.Tut nasiõ-iela ke vinï i ie ke adohe u, pase u thavai-iela ki jis tut mun-iela ue."⁵Djila, mo ue luvui lahosiel *kaz-la, ki a *Bahak (Tenda) dji phuezãs dji Bõdje. ⁶Set zãj-iela ki te gãiẽ set maldjisiõ-iela sotxi dji *kote Sẽ-la. Ie te ka ize hob dji lin blã i ka klehe ie te gãiẽ sẽtxie dji lo ka kõhõnẽ ie pothin.⁷Ẽbe un dji animal vivã-iela bai pu set zãj-iela set goble dji lo plẽ dji *ãhaj dji Bõdje, sa ki ka viv pu ẽtehnite. ⁸Kaz-la (templo) hete plẽ dji lafimẽ dji *glória i dji povua dji Bõdje, i pies mun pa te puve ãthe lãdã'l juk kã hive lãdã finisiõ set maldjisiõ-iela ki set zãj ke pote.

¹Aphue mo tãde un vue ki fo ka kose dji ãdjidã *Kaz-la (templo), ka dji pu set zãj-iela :_ zot ale i devide lasu late-la set goble-iela dji *ãhaj dji Bõdje!²Phõmiẽ zãj-la i devide so goble lasu late-la i luvui vilẽ bobo i gho dulo pahet lasu sa mun-iela ki te gãiẽ mak dji bet-la i ki adohe so imaj.³Djila dezem zãj-la devide so goble lasu ghã lãme. Djilo-la hete sãble djisã dji un mun muhi, i muhi tut tut animal ki ka viv lãdã ghã lãme.⁴Ẽbe thoazem zãj-la devide so goble lasu lahivie-iela i lãdã sus djilo-iela, i ie vihe djisã. ⁵Mo tãde zãj ki te gãiẽ povua lasu djilo-iela dji kõsa:" U jis, Bõdje Sẽ, ki a sa, i ki a te sa,pase u voie sa kõdẽnasiõ-iela. ⁶Pase mun mixã-iela devide djisã dji u pov sẽ i dji u phofet-iela, a pu sa u bai djisã pu ie bue. Ie ka husuve sa ki ie mehite. ⁷Djila mo tãde un vue ki te ka vinï dji (altar)-la. vue-la te ka dji:_ Sẽie Bõdje, ki gãiẽ Ghã Povua!U kõdẽnasiõ-iela a, vuemã, lavehite i jis!⁸Djila katzem zãj-la devide so goble lasu solei-la, ki husuve povua pu bule mun-iela ke djife. ⁹Tut mun-iela bule ke gho xalo dji djife-iela i ie madjixõnẽ nõ dji Bõdje, ki gãiẽ povua lasu sa maldjisiõ-iela (pragas).Mẽ ie pa hepãtxi dji ie pexe-iela, ie pa bai *glória pu Bõdje.¹⁰sẽkzem zãj-la devide so goble lasu obiho dji bet-la, i so lasosiete hete lãdã ghã suku, i mun-iela te ka mode ie lãg dji dulo ¹¹i, palakos dji ie dulo-iela i bobo-iela, ie te ka madjixõnẽ Bõdje dji siel-la.Ie pa hepãtxi dji ie thavai ki pa bõ-iela.¹²Aphue djila siszem zãj-la devide so goble lãdã lahivie Eufrates. Lahivie-la hete sek ãfẽ dji luvui un ximẽ pu vue-iela ki ka vinï dji Oriente. ¹³Ẽbe mo ue thoa lesphui malẽ ki te sãble khapo-iela, ki sotxi dji bux dji dhagõ-la, dji bux dji bet-la i dji bux dji *met (profeta) mãto-la. ¹⁴Ie sa lesphui mixã ki ka fe mihak. Sa thoa lesphui-iela k'ale kote vue-iela dji tã-la ãtxe ãfẽ dji hasãble ie pu bataie kõt Sẽie, lãdã ghã ju dji Bõdje, ki gãiẽ Ghã Povua.¹⁵"Zot kute! mo ke vinï kumã un vole. Biẽ kõtã sa mun ki ka veie i ki ka ẽtxupe dji so lẽj, ãfẽ dji pa maxe tuni i pa hete hõte lamitã mun!" ¹⁶Aphue lesphui-iela hasãble vue-la lãdã un kote ki ã *hebraico ie k'aple dji "Armagedom".¹⁷Setzem zãj-la devide so goble lãdã vã-la. Un vue fo vinï dji obiho dji Kaz-la (templo) ka dji:_ tut finï! ¹⁸Ẽbe fet zekle, thẽ i lohaj, i late-la thãble fo kumã pa jẽ fet djipi kumasmã dji mun-iela lasu late. ¹⁹Ghã pei Babilônia kase ã thoa pedas i pei-iela dji boku nasiõ-iela dethi. Bõdje xõje dji tut pexe-iela dji ghã Babilônia i li bai djivẽ dji so goble__ djivẽ dji so *ãhaj.²⁰Tut zile-iela mahõ i tut mõtãi-iela djispahet. ²¹Lapli dji hox tõbe dji siel-la lasu mun-iela.A te gho hox, ki te ka peze plis ki thãt kilo.I mun-iela madjixõnẽ Bõdje palakos dji gho lapli dji hox pase li te thop vilẽ.

¹Ẽbe un dji set zãj-iela ki te gãiẽ set goble-iela vinï dji pu mo:_ Vinï mo ke mõthe u kumã ke kõdãnẽ sa ghã *fam ki ka fe phostxituisiõ (prostituta), sa pei ki ka kumãde lasu boku djilo. ²Vue-iela dji tã-la ãtxe fe phostxituisiõ ke li, i pov-iela dji tã-la hete su ke djivẽ dji so phostxituisiõ.³Ẽbe Lesphui dji Bõdje ãthe lasu mo, i zãj-la pote mo pu un *kote ki pa gãiẽ ãiẽ (deserto), kote mo ue un mõte lasu un bet huj. Te gãiẽ boku *pahol mal (blasfêmia) ekhi lasu'l, i li te gãiẽ set tet i djis kon. ⁴Fam-la te ka ize un hob kulo dji *purpura i huj te kõhõnẽ dji abimã dji lo, dji hox dji vale i *perolas. Lãdã so lãmẽ li te ka txẽbe un goble dji lo plẽ ke djivẽ, ki te ka hephuezãte so thavai ki pa bõ-iela i so phostxituisiõ-iela. ⁵Lãdã so tet te ekhi un nõ ki gãiẽ signifike ãseghe: Ghã Babilônia, mãmã dji tut *fam ki ka fe phostxituisiõ i dji tut mun maleve dji tã-la.⁶Mo ue ki fam-la te su ke djisã dji pov dji Bõdje i dji mun-iela ki te muhi pase ki ie te fiam lasu Jezi.Kã mo ue'l, mo hete pe boku. ⁷I zãj-la dumãde dji mo:_ Pukisa ki u kõsa, tho pe?Mo ke hakõte sa signifikasiõ ki a seghe dji fam-la i dji bet ki ka pote'l i ki set tet i set kon.⁸Sa bet ki u ue te vivã, mẽ ato li pa ka viv ãko. Li phox pu mõte dji lãfe-la I li ke ale pu djisthuisiõ. Mun-iela ki ka hete lasu late-la, sa ki ie nõ pa ekhi lãdã Liv dji Lavi-la djipi kumasmã dji tã-la ke hete pe kã ie ke gade pu bet-la. Li te vivã; ato li pa ka viv ãko, mẽ li ke hutonẽ pahet vivã.⁹Sa buẽzẽ majinẽ ke konetmã. set tet-iela a set mõtãi kote fam-la asi. Ie osi a set vue-iela: ¹⁰Sẽk deha muhi, un ka kumãde, i uot-la pãko pahet. I, kã li ke pahet, li buẽzẽ kumãde dehãtxi tximoso tã.¹¹Bet ki deha te vivã, mẽ ato li pa ka viv ãko, a uitzem vue-la. A un dji set-iela, li ka maxe pu djisthuisiõ.¹²Djis kon-iela ki u ue a djis vue-iela ki pãko kumase kumãde, mẽ ie ke husuve povua pu kumãde ke bet-la dehãtxi un mumã. ¹³Sa djis-iela tut dako ãt ie, i ie ke bai pu bet-la povua i otohite ki ie gãiẽ. ¹⁴Ie ke bataie kõt *Pitxit mutõ-la (cordeiro), i li ke hesi dethi ie pase li sa Sẽie dji sẽie-iela i Vue dji vue-iela. I ke laba asam ke li so siavito-iela, sa ki fiam-iela i ki li xuezi-iela.¹⁵Ẽbe zãj-la osi dji pu mo: _ Djilo-iela ki u ue, kote *fam ki ka fe phostxituisiõ-la te asi, a nasiõ-iela, pov-iela, has-iela i lãg-iela.¹⁶Djis kon-iela ki u ue I bet-la ke hete ãhaj ke fam ki ka fe phostxituisiõ-la. Ie ke txihe tut sa ki li gãiẽ ie ke lesel tunï. Ie mãje so laxe i ie ke bule lahextã lãdã djife. ¹⁷Djis-iela ke fe sa pase Bõdje mete lãdã ie txo-iela plezi dji fe sa ki ie le. Kõsa ie ke dako ãt ie pu bai pu bet-la povua ki ie gãiẽ pu kumãde. Sa ke fet juk kã kõphui pahol dji Bõdje.¹⁸Fam ki u ue-la a ghã pei ki ka dominẽ vue-iela dji tã-la ãtxe.

¹Aphue djisa mo ue not zãj ka desan dji sie-la. Li te gãiẽ un ghã povua, i so klehite te ka klehe tut late-la. ²I li te ka hele ke un vue biẽ fo:__ Babilônia tõbe! Ghã pei-la tõbe! Ato ki mun ki ka viv laba a selmã demuẽ-iela i tut lesphui maleve-iela.Tut kalite jibie i animal ki pa bõ i vilẽ ka viv lãdã'l. ³Pase tut nasiõ-iela bue dji so djivẽ, djivẽ ki fo dji so mixã volõte. Vue-iela dji tã-la ãtxe phatxike phostxituisiõ ke li, i om-iela dji sa tã hete hix palakos dji phostxituisiõ ki sal dji *fam-la.⁴Ẽbe mo tãde not vue dji siel-la, dji kõsa:__ Sotxi dji sa pei-la mo pov! Sotxi zot tut dji li pu zot pa pahtxisipe dji so pexe-iela i osi pu zot pa dethi ãsam ke li. ⁵Pase so pexe-iela hete boku juk lahosiel, Bõdje xõje dji so mixãxte-iela ⁶Bai pu li mem bagaj ki li bai pu zot; peie ã dub pu sa ki li fe.Plẽ so goble ke buesõ dê fue pi fo, pase sa buesõ ki li phuepahe pu zot.⁷Bai pu li boku sufãs i aflisiõ kumã hixez i *gloria ki li bai pu so phop ko mem.Pase li ka majinẽ kõsa"mo esi asi kumã un lahin! *mo om pa muhi* (mo pa sa veuve) i mo pa jẽ ke sufui!" ⁸Pu sa lãdã un mem ju ke tõbe lasu'l sa sufãs-iela (pragas): maladji, dulo, fẽ, i li ke bule lãdã djife.Pase Sẽie Bõdje, ki ka kõdãnẽ gãiẽ ghã povua.⁹Vue-iela dji tã-la ãtxe ki phatxike phostxituisiõ ke li i pofite dji so hixez ie ke hele i khie kã ie ke ue lafimẽ dji so bule. ¹⁰Ie hete dji luẽ pase ie pe dji phã pinitãs i sufui ãsam ke li i ie ka dji:__ sufãs pu u! sufãs pu u! Babilônia ghã pei ki gãiẽ povua! Lãdã un le dji tã hive u kõdẽnasiõ.¹¹Met magazẽ-iela dji tã ke hele i ke khie palakos dji'l pase pa hete pies mun pu axte ie maxãdjiz-iela. ¹²Pies mun pa ka axte ie lo-iela, (prata), hox dji vale-iela i *perolas; nẽ ie lin fin, ie *purpura, ie *seda i lẽj huj; nẽ nẽpot espes dji madhie fin o nẽpot kalite bagaj ki ie fe dji *marfim i dji madhie ki xe, dji *bonze, fe i *mármore; ¹³nẽ canel, *cardamomo, ïsãs, *mirra o losiõ. Pies mun pa ka axte ie djivẽ, *azeite, fahin-fin, fahin-fãs, nẽ ie bef i ie mutõ-iela, nẽ ie loto-iela ki xuval ka puse, nẽ esklav-iela o uot mun.¹⁴Met magazẽ-iela ka dji pu pei-la:__ Finï tut sa bagaj ki bõ-iela ki u te kõtã-iela, i u piad pu ẽtehnite tut hixez ki u te gãiẽ i u pa ke thuve ie ãko.¹⁵I Met magazẽ-iela ki te hix lãdã sa pei-la, ke hete luẽ, ke boku pe dji ale pu pinitãs ãsam ke li.Ie ke hele i khie kõsa: ¹⁶Sufãs pu ghã pei-la, ki ghã sufãs pu pei ki te lãdã lẽj dji lin fin, i lẽj dji purpura i i lãdã lẽj huj ki te gãiẽ abimã dji lo i hox dji vale i perolas! ¹⁷Lãdã selmã un mumã li piad tut so hixez!Tut kapiten dji gho bato-iela, i tut mun-iela ki lãdã'l, soda-iela dji bato-la i uot ki ka gãiẽ ie lavi la ghã lãme ke hete dji luẽ.¹⁸Kã ie ke ue ghã pei ka bule, ie ke hele:__ Pa jẽ te gãiẽ un pei sãble sa ghã pei-la! ¹⁹Ie ke khie, ie ke jite san lasu ie tet i ie ke klãmẽ:__ Ki sufãs, ki sufãs pu sa pei-la!Met dji gho bato-iela hete hix, ka pote pu ghã lãme so ghã hixez.Lãdã un le dji tã tut pedji! ²⁰Hete kõtã, siel-iela, palakos dji djisthuisiõ dji sa pei-la! Hete kõtã pov dji Bõdje, *apostolo-iela i *phofet-iela!Pase Bõdje kõdãnẽ'l pu sa ki li fe pu zot!²¹Ẽbe un zãj ki gãiẽ povua leve un hox ghoso un hox dji mulẽ i li jite'l la ghã lãme. I li dji:__ a kõsa ghã pei dji Babilônia ie ke jite'l ke violãs ie pa jẽ ke ue'l. ²²Lamizik dji sa mun ki k jue-iela lãdã ie *harpa, Suflet (flauta i trombeta) i vue dji mun ka xatẽ-iela pa jẽ ke tãde lãdã'l, i lãdã pei-la pa jẽ ke thuve pies thavaio dji nẽpot thavai, i pa jẽ ke tãde thẽ dji hox-iela dji mulẽ!²³I pa jẽ ke klehe pies klehite lasu u dji pies lalãp, i pa jẽ ke tãde vue dji mun ka maie-iela lãdã pei-la. So met magazẽ-iela a te mun ki te pi gãiẽ povua dji tã-la, i ke u maji nue-iela u kuiẽnẽ tut pov-iela dji tã-la. ²⁴Ghã Babilônia dethi pase lãdã te gãiẽ djisã dji photet-iela, djisã dji pov dji Bõdje, i dji tut ki ie txue lasu late.

¹Aphue djisa mo tãde lahosiel un vue fo sãble dji un ban mun, ki te ka dji kõsa:__ *Aleluia! Salvasiõ-la, *gloria i povua-la a dji no Bõdje! ²so kõdẽnasiõ-iela a lavehite i jis. Li kõdãnẽ sa fam ki te ka fe phostxituisiõ-la, ki te ka kohõpi late-la ke so phostxituisiõ. Bõdje bai li pinitãs pase li te txue tut so siavito-iela.³I ban mun-iela dji ãko:__ Aleluia! Lafimẽ dji ghã pei ka bule la ka mõte pu ẽtehnite. ⁴Ẽbe vẽt kat ãsiẽ-iela i kat bagaj vivã-iela hete ãjunü i ie adohe Bõdje, ki te asi lãdã obiho-la, ie dji:__ Amém! Aleluia!⁵Ẽbe vinï dji obiho-la un thẽ dji un vue, ki te ka dji kõsa:__ Adohe no Bõdje, tut so siavito-iela, tut ki ka khe lasu'l, kumã pitxi i ghã.⁶Djila mo tãde un thẽ sãble vue dji ban mun, kumã vue dji boku djilo, i kumã vue dji ghã lohaj ki te ka dji:__ Aleluia! Pase Sẽie no Bõdje, ki gãiẽ Ghã Povua , a Vue!⁷No hete boju kõtã! No bai *gloria pu Li! Pase deha hive lokasiõ dji lafet dji lamaiaz dji Pitxit mutõ-la (cordeiro), i so fam deha phuepahe pu husuve'l. ⁸Fam-la husuve u hob dji lin fin, lin ki ka klehe i blã pu ize.Pase lin fin-la ka hephuezãte thavai ki jis dji pov sẽ dji Bõdje.⁹Ẽbe zãj-la dji pu mo:__ Ekhi sa : " Biẽ kõtã sa mun ki ie ẽvite pu lafet dji lamaiaz dji Pitxit mutõ-la (cordeiro)."I zãj-la dji ãko:__ Sa-iela a lavehite pahol dji Bõdje. ¹⁰Djila mo ãjunü obo put pie dji zãj-la pu mo adohe'l, mẽ li dji pu mo:__ Pa fe sa! Pase mo sa siavito dji Bõdje, kõsa kumã u i u fue-iela ki kõtxinẽ fiam lãdã lavehite ki Jezi mõthe. Adohe selmã Bõdje!Pase lavehite ki Jezi mõthe a mẽsaj ki Lesphui-la hãde pu *phofet-iela.¹¹Aphue djila mo ue siel-la luvui, i pahet un xuval blã. So xuvalie ie k'aple Fiam i Lavehite. Li ka kõdãnẽ i bataie ke justxis (justiça) ¹²So uei-iela sãble labhues djife, i li te gãiẽ boku kuhun la so tet. Li te gãiẽ un nõ ekhi lasu'l ki pies mun pa konet, selmã li mem ki konet. ¹³Li te ka ize un *Kap thãpe dji djisã, so nõ a te Pahol dji Bõdje¹⁴Legiõ dji soda-iela dji siel-la te ka suiv li ,mõte lãdã ie xuval blã-iela i ie te ka ize hob dji lin fin i blã. ¹⁵Dji so bux te ka sotxi un espad biẽ fite pu blese nasiõ-iela. Li ke kumãde ie ke un batõ dji fe i ke djibut lasu uva-iela lãdã tãk dji ãhaj dji Bõdje ki gãiẽ Ghã Povua. ¹⁶Lãdã so Kap i lasu so jam te ekhi sa nõ-la : Vue dji vue-iela i Sẽie dji sẽie-iela.¹⁷Ẽbe mo ue un zãj ki te djibut lasu solei-la. Li hele ke un vue biẽ fo, li ki kõsa pu tut jibie-iela ki te ka vole biẽ hot lãdã siel-la:__ Vinï i hasãble pu ghã mãje ki Bõdje phuepahe! ¹⁸Vinï imãje laxe dji vue-iela, dji kõmãdã-iela i dji soda-iela, dji xuval-iela i dji xuvalie-iela i dji tut mun-iela ki a esklav o lib , pitxi i ghã.¹⁹Aphue mo ue bet-la i vue-iela dji tã-la ãtxe i so patxizã dji soda-iela hasãble pu bataie kõt sa ki te mõte lãdã so xuval-la i kõt so legiõ dji soda-iela. ²⁰Bet-la ale pu phuiziõ asam ke *met mãto-la ki te fe boku bagaj la so phuezãs. Me sa bagaj-iela li te kuiẽnẽ sa ki te gãiẽ mak dji bet-la i sa ki te adohe imaj dji bet-la.Bet-la i met mãto-la ale vivã pu lag dji djife-la ki ka bule ke ãxof.²¹So patxizã dji soda-iela muhi pu espad ki te ka sotxi dji bux dji sa ki te mõte lãdã xuval blã-la. I tut jibie-iela, mãje dji ie laxe juk kã ie pa te gãiẽ plezi ãko.

¹Ẽbe mo ue desan dji siel-la un zãj ki te gãiẽ lãdã so lãmẽ-iela lakle dji *lãfe-la i un xen pezã. ²Li txẽbe dhagõ-la, sa vie siapã ki a Djiab-la o Satã, i li mahe'l pu mil ãnẽ. ³Ẽbe zãj-la jite Djiab-la lãdã lãfe-la i tatxe'l pu li pa kuiẽnẽ ãko nasiõ-iela juk kã finï mil ãnẽ-ielaAphue dji sa mil ãnẽ-iela buẽzẽ ki li sotxi dji phuiziõ pu un tximoso tã.⁴Djila mo ue un dê obiho, i sa ki te asi lasu ie husuve povua dji kõdãnẽ. Mo ue osi nam dji mun-iela ki muhi pase ie te ãnüsie mẽsaj dji Bõdje i lavehite ki Jezi mõthe. Ie pa te adohe bet-la i so imaj, nẽ ie pa te husuve so mak lãdã ie tet o lãdã ie lãmẽ. Sa mun-iela hutonẽ viv i ie kumãde ke Jezi dehãtxi mil ãnẽ.⁵Uot mun-iela pa hutonẽ viv, juk kã mil ãnẽ-iela finï. Sa a phõmiẽ hesuheisiõ-la. ⁶Biẽ kõtã sa mun-iela ki gãiẽ pedas lãdã phõmiẽ hesuheisiõ-la, pase dezem lamo-la pa gãiẽ povua lasu ie!Ie ke sa sasedotxi dji Bõdje i dji Jezi i ie ke kumãde dehãtxi mil ãnẽ.⁷Aphue ki sa mil ãnẽ-iela finï, Djiab-la ke sotxi dji phuiziõ ⁸I li ke sotxi pu kuiẽnẽ pov dji tut nasiõ-iela dji tã-la, ki a *Gogue i Magogue. Djiab-la ke hasãble ie pu batai, i ie ke boku sãble ban-sab dji ghã lãme.⁹Ie ke kate pu tã-la i ie kõhõnẽ kote pov dji Bõdje ka hete i osi pei ki li kõtã, mẽ un djife desan dji lahosiel i dethi ie tut. ¹⁰Djila Djiab-la, ki te kuiẽnẽ mun-iela ale pu lag dji djife i ãxof, kote bet-la i met mãto-la te fika. I laba ie ke sufui nuit i jonẽ, pu ẽtehnite.¹¹Ẽbe mo un gho obiho blã i sa ki te asi lasu'l. Late-la i siel-la mahõ dji so phuezãs i ie pa pahet ãko. ¹²Mo ue osi mun muhi-iela, pitxi i ghã, ki te djibut djivã obiho-la. I luvui liv-iela, i osi luvui uot liv-la, Liv dji Lavi-la. Mun muhi-iela ale kõdãnẽ sosulõ ie thavai ki xakẽ un te fe, kõfom te ekhi lãdã liv-iela.¹³Djila ghã lãme-la hãde mun muhi-iela ki te lãdã'l. Lamo-la i *tã dji mun muhi-iela osi hãde sa ki li te ka kumãde-iela. I tut ale kõdãnẽ sosulõ thavai ki xakẽ un te fe. ¹⁴Ẽbe lamo-la i tã dji mun muhi-iela ale lãdã lag dji djife. Sa lag-la dji djife-la a dezem lamo-la. ¹⁵Mun ki pa te gãiẽ ie nõ ekhi lãdã Liv dji Lavi-la ale lãdã lag dji djife.

¹Ẽbe mo ue un nov siel i un nov late. Pase phõmiẽ siel-la i phõmiẽ late-la deha pase, i ghã lãme-la djispahet. ²I mo ue Pei Sẽ-la, nov Jehusalém, ki te ka desan dji lahosiel. Li te ka vinï dji Bõdje, biẽ ke abimã i phuepahe, lãdã hob kumã un fam ki k'ale kõthe ke so om.³Mo tãde un vue ki te ka vinï dji obiho, te ka dji:__ Ato Bõdje ke habite ãt mun-iela! Bõdje ke hete ke ie, i ie ke sa so pov. Phop Bõdje-la ke asam ke ie, i li ke sa ie Bõdje. ⁴Li ke sue dji ie uei-iela tut *dlo-uei (lagrimas). Pa ke gãiẽ ãko lamo, nẽ khie, nẽ sufãs i dulo. Pase ki vie bagaj-iela deha pase.⁵Sa ki te asi lãdã obiho-la dji:__ Ato mo ka fe nov tut bagaj-iela!I osi li dji pu mo:__Ekhi sa, pase ki sa pahol-iela a lavehite i mehite kõfiãs . ⁶I li kõtxinẽ :__ tut deha finï! Mo sa *Phõmiẽ i *diãiẽ-la, Kumasmã-la i Finisiõ-la.Mun ki gãiẽ suef mo ke bai djilo pu li bue, ghatxuit, dji sus dji djilo dji Lavi-la.⁷Sa ki hesi sipote tut sufãs, ke husuve dji mo sa kado-la: Mo ke sa ie Bõdje, i ie ke sa mo pitxit-iela. ⁸Mẽ pu sa mun ki ka maleve-iela, ki ka kuiẽnẽ, ki ka fe vilẽ pexe, ki ka txue mun, ki ka phostxituisiõ i ki ka phatxike maji nue i tut ki ka adohe txi bõdje-iela i tut ki kõtã fe mãto-iela, plas dji sa mun-iela a lãdã lag kote ka bule djife i ãxof-la, ki a dezem lamo-la.⁹Un dji set zãj-iela ki te gãiẽ set goble-iela plẽ dji diãiẽ set *sufãs-iela (pragas) vinï i li dji pu mo:__ Vinï, i mo ke mõthe u Fam dji *Pitxit mutõ-la (cordeiro). ¹⁰Ẽbe Lesphui dji bõdje ãthe lasu mo, i zãj-la ale ke mo pu un mõtãi gho i boku hot. Li mõthe mo Jehusalém, Pei Sẽ-la, ki te ka dji lahosiel i ki te ka vinï dji Bõdje,¹¹ka klehe ke *gloria dji Bõdje. Pei-la te ka klehe, kumã un hox dji vale, kumã un hox dji *jaspe biẽ kle kumã un *cristal. ¹²Li te bahe ke un gho bahaj boku hot i ghã, ke duz gho lapot, ke duz zãj ka veie. Lãdã gho lapot-iela te ekhi nõ-iela dji duz *thib dji Ishael. ¹³Te gãiẽ thoa gho lapot dji xak bo: thoa pu *norte, thoa pu *sul, thoa pu levã i thoa pu kumã.¹⁴Gho bahaj dji pei-la te lasu duz gho hox, ki te ekhi nõ-iela dji duz *apostolo-iela dji Pitxit mutõ-la (cordeiro). ¹⁵Zãj ki kose ke mo la, te ka pote ke li un batõ dji lo pu mizuhe pei-la, so gho lapot-iela i gho bahaj-la.¹⁶Pei-la te kahe, so lõdjo te mem la ke so lajo. Zãj-la mizuhe pei-la ke batõ dji lo-la i li ue ki so mizu a te dê mil i desã (2.200) kilomet. So lõdjo, lajo i hoto te mem la. ¹⁷Zãj-la mizuhe osi gho bahaj-la I dekhuvui ki te gãiẽ soasãt kat met dji lajo, kofom mizu ki zãj-la te ka ize.¹⁸Gho bahaj-la a te dji jaspe, i phop pei-la a te dji lo, kle kumã via. ¹⁹Duz hox-iela dji poto dji gho bahaj-la te ke abimã dji tut kalite hox dji vale. Phõmiẽ hox-la te ke abimã dji jaspe; dezem-la dji *safira; thoazem-la dji *agata; katzem-la dji esmeralda; ²⁰sẽkzem-la dji sardônica; siszem-la dji sárdio; setzem-la dji *crisólito; uitzem-la dji *berilo; nefzem-la dji *topazio; djiszem-la dji *crisópraso; õszem-la dji jacinto; i duszem-la dji *ametista.²¹Duz gho lapot-iela a duz (perola). I xakẽ un dji sa gho lapot-iela a dji selmã un (perola) Gho lahi-la a te dji lo, kle kumã via. ²²Mo pa ue pies Kaz (templo) lãdã pei-la, pase ki so kaz (templo) a Sẽie Bõdje, ki gãiẽ Ghã Povua i Pitxit mutõ-la (cordeiro).²³Pei-la pa buẽzẽ dji solei nẽ dji lalin pu klehe'l, pase gloria dji Bõdje ka klehe lasu'l, i Pitxit mutõ-la (cordeiro) a so *gho lalãp (candelabro). ²⁴Nasiõ-iela ke maxe lãdã so klehite, i vue-iela, lãdã tut so gloria, ke ãthe lãdã pei-la. ²⁵So gho lapot-iela pa jẽ ke fõmẽ, pase laba pa ke gãiẽ nuit.²⁶Nasiõ-iela ke so gloria i hixez-iela pu pei-la. ²⁷Pase lãdã'l pa ke ãthe ãiẽ ki *sal, nẽ pies mun ki ka fe bagaj ki pa bõ i ki ka fe mãto.Ke ãthe lãdã pei-la selmã sa mun-iela ki gãiẽ ie nõ ekhi lãdã Liv dji Lavi-la dji Pitxit mutõ-la (cordeiro).

¹Zãj osi mõthe mo lahivie dji djilo dji lavi-la, ki ka klehe kumã *cristal, ki te ka sotxi dji Bõdje i dji Pitxit mutõ-la (cordeiro), ²i ki ka pase lãdã lahi ki plis ïpohtã dji pei-la. Lãdã xak bo dji lahivie-la te laba pie-bua dji lavi-la, ki ka bai duz fui pa ãnẽ, ki a un fui pa mua. I so fei-iela ka siavi pu djiehi nasiõ-iela.³I Lãdã pei-la pa jẽ ke gãiẽ maldjisiõ kõt pies mun. Obiho dji Bõdje i dji Pitxit mutõ-la (cordeiro) ke lãdã pei-la, i so siavito-iela ke adohel. ⁴Ie ke vue so vijaz, i lãdã ie tet ke gãiẽ nõ dji Bõdje ekhi. ⁵Laba pa ke gãiẽ nuit, i pa ke buẽzẽ dji klehite dji lalãp nẽ dji klehite dji solei-la, pase Sẽie Bõdje ke klehe lasu ie. I ke kumãde pu ẽtehnite.⁶Ẽbe zãj-la dji pu mo:__ Sa Pahol-iela a lavehite i mehite kõfiãs. Sẽie Bõdje ki bai so Lesphui pu *phofet-iela, voie so zãj pu mõthe pu so siavito-iela bagaj-iela ki pa ke tade pu fet. ⁷__ Zot kute! Jezi dji. __ Mo pa ke tade! Biẽ kõtã sa mun-iela ki ka obei pahol-iela dji sa liv-la.⁸Mo, Jã, mo tãde i mo ue tut sa bagaj-iela. I, kã mo finï dji tãde i ue, mo tõbe ãjunü obo pie dji zãj-la ki mõthe mo sa bagaj-iela i mo te ke adohel. ⁹Mẽ li dji pu mo:__ Pa fe sa! Pase mo sa siavito dji Bõdje, kõsa kumã u i u fue-iela, phofet-iela, i tut mun-iela ki ka obei paho-iela dji sa liv-la. Adobe selmã Bõdje!¹⁰I zãj-la kõtxinẽ dji: Pa sehe pahol-iela dji sa liv-la, pase tã dji fet sa bagaj-iela phox. ¹¹Mun ki mixã pu kõtxinẽ fe mixãxte, i mun ki sal ki kõtxinẽ hete sal, i mun ki jis ki kõtxinẽ hete jis; mun ki sẽ ki kõtxinẽ sãtxifike ie ko tuju.¹²Jezi dji: Zot kute.__ mo pa ke tade! Mo ke pote ke mo, mo hekõpãs-iela, pu bai ie pu xak un, sosulõ thavai ki xak un fe. ¹³Mo sa *Alfa e Omega, Phõmiẽ i diãiẽ, kumasmã i Finisiõ.¹⁴Biẽ kõtã sa mun-iela ki lave ie lẽj-iela lãdã djisã dji Pitxit mutõ-la (cordeiro), pase kõsa ie ke gãiẽ dhue dji mãje dji fui dji pie-bua dji lavi-la i ãthe lãdã pei-la pa so gho lapot-iela! ¹⁵Mẽ ke hete deho xẽ-iela, mun-iela ki ka fe maji nue, ki ka phatxike phostxituisiõ, depote-iela i tut ki ka adohe txi bõdje-iela i tut ki kõtã fe mãto.¹⁶Mo, Jezi, voie mo zãj pu ãnüsie sa bagaj-iela pu zot lãdã legliz-iela. Mo sa Hasin i Gehasiõ dji Davi , sa Zetuel ka klehe bõmãtẽ.¹⁷Lesphui-la i fam-la ka dji:__ Vinï! Sa mun ki tãde sa dji osi: __ Vinï! Sa mun ki suef vinï. I mun ki le husuve ghatxuit dji djilo dji lavi-la.¹⁸Mo, Jã, ka dji pu sa ki ka kute pahol dji sa liv-la: Si un kek mun mete kek bagaj lãdã pahol-iela, Bõdje ke fe vinï lasu li sa maldjisiõ-iela (pragas) ki ekhi lãdã sa liv-la. ¹⁹I, si un kek mun txihe un kek pahol dji sa liv-la, Bõdje ke txihe dji li so pedas dji pie-bua dji lavi i dji Pei Sẽ-la, ki ekhi lãdã sa liv-la.²⁰Sa ki ka bai tẽmuẽ dji tut sa dji: vuemã mo pa ka tade!__Amém! vinï, Sẽie Jezi! ²¹I ki *graça(kõtãtmã) dji Sẽie Jezi hete ke tut.