¹Kantigas ki Salumon kanta. ²Beja-m ku beju di bu boka, pamodi bu amor é midjor di ki vinhu. ³Txeru di bus purfumu é sabi; bu nomi é sima purfumu ki ta pudu, purisu ki virjens ta ama-u. ⁴Leba-m ku bo, y nu kori; rei traze-m pa bus kuartu. Mosas noba: Na bo nu ta alegra y nu ta intxi di alegria; nu ta agrada mas di bu amor di ki ku vinhu. Es faze dretu ama-u.⁵Ami é murena, ma bunita, o fidjas di Jiruzalen: murena sima tenda di Kedar, bunita sima kurtina di Salumon. ⁶Ka nhos fika ta odja-m pa modi ami é murena, pamodi N sta kemadu di sol; fidjus di nha mai xatia ku mi, y es pu-m pa N toma konta di vinha; ma, di nha propri, ki ta pertense-m, N ka toma konta di el.⁷Fla-m, bo ki nha alma ta ama: Undi ki bu ta apasenta bus limaria? Undi ki bu ta guarda-s na meiu dia? Pomodi ki N ten ki fika sima ki kubertu ku un veu na meiu di limaria di bus kolega?⁸Si bo ki é mas bunita na meiu di mudjeris, bu ka sabe, sai pa pizada di ovelha, y apasenta bus kabras djuntu tenda di pastoris.⁹N ta konpara-u, kirida, ku éguas di karuajen di Faro. ¹⁰Ladu di bu rostu na meiu di bus infeitu y bu piskos na meiu di bus kolar, aes é bunitu dimas. ¹¹Infeiti di oru nu ta faze pa bo, ku ditalhi di prata.¹²Timenti rei sta xintadu na se meza, nha purfumu ta ba da se fragansia. ¹³Nha amadu é pa mi sima un saku di mira ki ta pasa noti riba nhas máma; ¹⁴Nha amadu é pa mi sima un ramaleti di flor na vinha di Engedi.¹⁵Moki bu é bunita, nha kretxeu! Moki bu é bunita! Bus odjus é sima ponba.¹⁶Moki bu é bunitu, nha amadu! Moki bu é amavel! Y nos leitu ta intxi di fodja berdi. ¹⁷Pilar di nos kaza é sima sedru, y nos varanda é di madera di sipresti.

¹Ami é roza di Saron, líriu di rubera. ²Sima un líriu na meiu di spinhu, asi é nha kirida na meiu di mosas noba.³Sima masiera na meiu di árvi di kanpu, asi é nha amdu na meiu di rapazis; dibaxu di se sonbra N ta dizeja txeu di sta, y doxi é bu frutu na nha paladar. ⁴E ta leba-m pa kaza di banketi, y se bandera riba mi é amor.⁵Susti-m ku fruta pasa, fortalese-m ku masan; pamodi N sta fraku di amor. ⁶Pui bu mon skerda baxu nha kabesa, y ku bu mon ndreta brasa-m.⁷N ta da nhos ordi, fidjas di Jiruzalen: Nhos jura pa kabritu di rotxa y pa korsa di kanpu, ki nhos ka ta korda, nen disperta amor, ti ki el é kre.⁸Kel-li ki é vos di nha amadu: Nhos odja-l ta ben, ta salta riba munti, ta bua riba ladera. ⁹Nha amadu é moda korso, o fidju di viadu. E sta tras di nos paredi, ta odja pa janela, ta ozerba pa gradi.¹⁰Nha amadu rusponde-m, y e fla-m: Labanta, kirida amiga, nha belezura, y ben. ¹¹Pamodi invernu dja pasa; txuba dja kaba, y e dja e bai se kaminhu.¹²Flor dja sa ta parse na tera, tenpu di kanturia dja txiga. Y sa ta obidu vos di rolinha na nos tera. ¹³Figera sa ta pruduzi ses figu berdi y bara po di videra berdi sa ta da txeru; labanta, nha kretxeu, nha belezura, y ben.¹⁴Nha ponba, ki ta anda na ratxadura di rotxa, na ladera sukundidu, mostra-m bu rostu, faze-m obi bu vos; pamodi bu vos é doxi, y bu rostu é atraenti.¹⁵Toma-nu rapoza, kes rapozinha ki ta straga vinha, pamodi nos vinha dja sta ta florese.¹⁶Nha amadu é di meu, y ami é di nha amadu. E ta apasenta na meiu di líriu. ¹⁷Anti dia manxe y di sonbra fuji, volta nha amadu, faze sima korso, fidju di korsa, riba munti di Beter.

¹Duranti noti N djobe na nha kama kel ki nha alma ta ama; N buska-l ma N ka atxa-l. ²Purisu, N labanta, y N kori pa tudu sidadi, na rua ku na pasa, N buska kenha ki nha alma ta ama, ma N ka atxa-l.³Guardas ki staba ta rodia na sidadi atxa-m. N purgunta-s: Nhos odja kel ki nha alma ta ama? ⁴Poku dipos ki N afasta di es, N bira si, N atxa kel ki nha alma ama. N bota-l mon, y N ka dexa-l bai se kaminhu, ti ki N traze-l pa kaza di nha mai, ka kuartu di kel ki jera-m.⁵N ta da nhos ordi, fidjas di Jiruzalen: Nhos jura pa korsa y pa kabritu di kanpu ki nhos ka ta korda y nen labanta nha amor, ti ki ora ki el kre.⁶Kel-li é kenha, ki sa ta ben di dizertu sima posti di fumasa, purfumada ku mira, insensu y ku tudu tipu di pó aromátiku ki ta bendedu na merkadu? ⁷Kama anbulanti di Salamon sta li! Sasenta gereru sta ta rodia-l, na meiu di gererus di Israel.⁸Tudu es ku ses spada, bon na gera. Kada un ku se spada na sintura, pa kazu di kuntise algun ataki di supreza di noti. ⁹Rei Salomon faze pa el un kadera di madera di Líbanu karegadu pa ómis.¹⁰Ses kuluna é faze di prata, se suadju é faze di oru, se kau di xinta di púrpura, pa dentu kubertu ku obra di amor di fidjas di Jiruzalen. ¹¹Nhos sai, fidjas di Sion, y nhos odja rei Salumon, ku koroa sima se mai koroa-l, na dia di se kazamentu, na dia di alegria di se kurason.

¹Moki bo é bunita, nha kretxeu! Moki ki bu é bunita! Bus odjus baxu di veu é sima ponba; bu kabelu é sima ribanhu di kabra, ki ta dixi di munti Gileadi.²Bus denti é sima ovelha rapadu, ki ta subi di lavatóriu. Es tudu es ten jémiu, y ninhu di es é ka stéril.³Bus beju é sima un fita di skarlata, y bu boka é bunitu. Bus ladu di kabesa é sima padas di roman, baxu veu.⁴Bu piskos é sima tori di Davidi, kunstruidu moda un fortaleza; mil skudu sta prindadu na el, tudu kes skudu di gererus. ⁵Bus dos mama é sima dois fidju di jémiu di korsa, ki ta kume na meiu di líriu.⁶Antis ki dia manxe, y di sonbra fuji, N ta bai pa munti di mira y rotxa di insensu. ⁷Abo bu é bunita, nha kretxeu! Ka ten ninhun difetu na bo.⁸Ben ku mi pa Líbanu, o nha spoza, ben ku mi pa Líbanu; dixi di riba di Amana, di riba di Senir y di Ermon, di muntanha di lioas, di munti di leopardus.⁹Dja bu kunsumi-m kurason, nha irma, nha spoza; bu toma nha kurason so ku un di bus odjus y ku un kolar di bu piskos.¹⁰Moki bu amor é doxi, nha irma, nha spoza! É mas sabi ki midjor vinhu; y txeru di bus purfumu é midjor ki tudu tipu di spesiaria. ¹¹Favu di mel ta dixi di bus beju, o nha spoza. Mel ku leti sta baxu di bu língua; y txeru di bus bistidu é sima txeru di Líbanu.¹²Abo é jardin fitxadu, nha irma, nha spoza; un nasenti di águ fitxadu, un fonti seladu. ¹³Bus planta é sima un orta di roman, ku bon frutu: Ena ku nardu. ¹⁴Nardu, asafron, kálamu y kanela, ku tudu tipu di árvi di insensu: mira, óliu di baboza, ku tudu kes midjor spesiaria.¹⁵Abo é un fonti di jardins, un posu di águ bibu ki ta kori di Líbanu. ¹⁶Labanta, bentu norti! Y ben, bentu sul! Sopra na nha jardin, pa es pode spadja ses aroma! Ki nha amadu ben pa se jardin, y kume ses bon frutu.

¹Dja N txiga na nha jardin, nha irma, nha spoza; N kodje nha mira ku nha spesiaria. N kume nha mel, N bebe nha vinhu ku nha leti. Nhos kume amigu; nhos bebe, amadus, y nhos inbriaga.²N staba ta durmi, ma nha kurason staba ta vijiaba. Era vos di nha amadu, ta konku: Abri-m, nha irma, nha kirida, nha ponba, nha ben fetu. Pamodi nha kabesa sta ku txeu umidadi, nhas kabelu ku txeu gota di noti.³Dja N tra nha ropa; moki N ta torna bisti-l? Dja N laba nhas pe; moki N ta suja-l di nobu? ⁴Nha amadu mete se mon pa braku di porta, y dentu di mi treme pa el.⁵N ta labanta pa N abri porta pa nha amadu; nha mon staba ta pinga di mira, y nhas dedu baxa mira riba puxador di fitxadura.⁶N abri porta pa nha amadu, ma nha amadu dja baba se kaminhu; nha alma moki sai di el trokadu di se fala. N buska-l, ma N ka atxa-l, N txoma-l, ma e ka rusponde-m.⁷Guardas ki staba ta rodia pa sidadi, atxa-m. Es dadje na mi y es fri-m. Guardas di muralha tra-m nha veu.⁸N ta da nhos ordi, fidjas di Jiruzalen: Nhos jura ki, si nhos atxa nha amadu, nhos fla-l ki N sta duenti di amor.⁹Bo ki é mas bunita na meiu di mudjer, moki é bu amadu, ki bu ta ama mas di ki kalker otu? Moki é kel bu amadu li, ki é mas amadu di ki kalker otu, pa kenha ki bu sa ta da-nu ordi pa nu jura?¹⁰Nha amadu é radianti y rozadu; e ta distaka na meiu di des mil. ¹¹Se kabesa é sima oru mas purifikadu; ses kabelu é krespu, pretu sima korbu.¹²Ses odju é sima ponba djuntu korenti di águ, labadu na leti, kolokadu sima joia.¹³Lateral di se rostu é sima un kanteru di spesiaria, sima kaxoti di aroma. Ses beju é sima líriu, ki ta pinga purfumu di mira.¹⁴Ses mon é sima anel di oru ku pedra di krizolitu; se abidomi sima marfin ki ta lumia, kubertu di safira.¹⁵Ses perna é sima posti di mármure, fundadu riba bazi di oru puru; se aspetu é sima Líbanu, prisiozu sima sedru.¹⁶Se boka ten txeu dusura, y e ta dizejadu na tudu xintidu; asi é nha amadu; asi é nha kretxeu, o fidjas di Jiruzalen.

¹Pa undi ki bu amadu bai, bo ki é mas bunita di ki tudu otus mudjeris? Pa ki direson ki bu amadu dja kanba, pa nu pode djuda-u djobe-l?²Nha amadu dixi pa se jardin, pa kanteru di spesiaria, pa apasenta se ribanhu na jardin, y pa kodje líriu. ³Ami é di nha amadu y nha amadu é di meu; e sa ta apasenta na meiu di lírius.⁴Abo é bunita, nha kretxeu, sima Tirza, ku txeu beleza sima Jiruzalen; Bu sta formoza sima bandera di izérsitu.⁵Afasta bus odjus di mi, pamodi es ta dexa-m diskonsertadu. Bu kabelu é sima un ribanhu di kabra, ki ta dixi di Gileadi.⁶Bus dentis é sima ribanhu di ovelhas, ki ta subi di lavatóriu; es tudu pari jémius, y na ses meiu ka ten ninhun stéril. ⁷Sima un padas di roman, asi é ladu di bu rostu baxu di bu veu.⁸Sasenta é rainha, y oitenta é raparigas; y donzelas é un monti; ⁹ma, un é nha ponba, nha perfeita, únika di se mai, mas bunita di ki kenha ki pari-l. Mininas odja-l, y txoma-l di filis; rainhas ku raparigas ta ilojia-l.¹⁰Kel-la é kenha, ki ta parse moda ora ki sol ta nase, bunita sima lua, ta lumia sima sol, formosa sima bandera di izérsitu?¹¹Dixi pa jardin di nogera, pa bu odja frutu na rubera; pa bu odja si videra dja dá flor, y se romanzera dja kumesa ta brota. ¹²Sen N da konta, nha alma pu-m na karuajen di nha nobri povu.¹³Volta! Volta, Sulamita! Volta, y nu ta odja-u! Pamodi ki bu kre odja Sulamita, sima badju di dos filera di izérsitu.

¹Moki ki é bunitu bus pe dentu sandália, bo ki é fidja di prínsipi! Bu koxa rodondu é sima joia, sima obra di mon di un artezon.²Bu biku é sima tasa rodondu, ki ka ta falta bebida; bu abidomi é sima un munti di trigu, rodiadu di líriu.³Bus dos seiu é sima dos fidju jémiu di korsa. ⁴Bu piskos é sima un tori di marfin; bus odjus é sima tanki di pexi di Esbon, djuntu porta di Bati-Rabin. Bu naris é sima tori di Líbanu, ki sta frenti di Damasku.⁵Bu kabesa riba di bo, é sima munti Karmelu, y transa di kabelus di bu kabesa é sima púrpura; rei sta sima ki e maradu ku bus transa. ⁶Moki bo é bunita! Moki bo é formoza, bo ki é sabura di amor.⁷Bu altura é moda palmera, bus máma é sima katxu di uva. N fla: N ta subi palmera, ⁸N ta pega di bus ramu; nton bus máma ta ser sima katxu di videra, y txeru di bu naris é sima txeru di masan.⁹Bu boka é sima bon vinhu; Vinhu ki ta entra suavimenti na nha amadu, y ta faze boka di kenha ki sa ta durmi papia.¹⁰Ami é di nha amadu y el é ta dizeja-m. ¹¹Ben, nha amadu! Nu sai pa kanpu, y nu pasa noti na aldeia.¹²Nu sai di madrugada ti vinha, nu odja si videra dja da flor, y si ses flor dja abri, si romanzera dja sta ta brota; la N ta da-u nha amor.¹³Mandrágoras dja spadja se purfumu, y djuntu di nos porta izisti tudu tipu di bons frutu, nobu ku bedju; N guarda-s pa bo, nha amadu.

¹Moki ki N ta gostaba ki bu era sima nha irmon, ki mamaba máma di nha mai. Ora ki N atxaba bo na rua, N ta beja bo y bu ka ta disprezaba mi.²N ta lebaba bo y N ta trazeba bo pa kaza di nha mai, kel ki inxina-m, y N ta daba bo vinhu purfumadu pa bu bebe, di sumu di nhas roman. ³Pui bu mon skerda baxu di nha kabesa, y ku bu bon ndreta, inbrasa-m.⁴N ta da nhos ordi, fidjas di Jiruzalen: Nhos jura ki nhos ka ta korda, y nen nhos ka ta disperta amor, ti ki el kre.⁵Kel li é kenha, ki sa ta subi di tera ki ka ta mora ningen, detadu riba se amadu? Dibaxu di u masiera N disperta-u, la bu mai pari-u ku dor; la kel ki jera-u, faze-u nase.⁶Pu-m sima selu riba bu kurason, sima selu riba bu brasu; pamodi amor é forti sima morti; siúmis é largu sima simitériu; ses braza é braza di lumi, un lumi tamanhu ku txeu forsa.⁷Monti águ ka ta pode paga es amor, nen riu ka ta pode foga-l; inda ki algen da tudu rikeza di se kaza pa es amor, sime, amor ta dispreza-l.⁸Nu ten un irma pikinoti, ki inda máma ka nase; kuze ki nu nta faze ku kel irma li, na dia ki es papia di el?⁹Si e for un muru, nu ta kunstrui riba di el un palasiu di prata; y si e for un porta, nton nu ta serka-l ku tábua di sedru.¹⁰Ami é un muru, y nhas máma é un tori; nton ami era pa ses odju, sima kel ki ta atxa pas.¹¹Salumon tenba un vinha na Baal-Amom; e entrega kel vinha la pa uns guarda, y kada un ta trazeba el un parti di lukru di ses frutu di mil mueda di prata. ¹²Nha vinha, ki ta pertense-m, sta na nha dispozison; mil mueda di prata é pa bo, Salumon, y duzentu pa guardas di bu frutu.¹³Bo ki ta mora na jardin, bus kolegas ta presta atenson na bu vos: dexa-m obi-l tanbe.¹⁴Ben faxi, nha amadu! Y ben faxi sima korsu, sima fidju di korsa, na muntanha di erva purfumadu!