Paulus ge Salam Gang ibangit gen Amara - mara ¹Paulus, Silwanus, mi Timatius mi uyackhi Tesalonika ming, ula pimam Latala mi Tuhan Yesus Kristus goming. Erekeke mi sanang unang at esasamung,²Ning Latala gbangit gang tiani indi inguunang, Etang ingguamba nila mi ni amurgoming. ³Iman ge kriang gula wang ommeyo, chkowi alus, mi muding sachkal gu ula Tuhan goming, Yesus Kristus, pimam Latala gapaning ming.⁴Ing egat wang iomeyo esugala ing wang trako, ing ne giri ne dang.⁵Egu injil asu ning adanret wang tutuk ba, wal si sur ckheu mosoing la gom ming, etang etatabit egu guali, emung ge ila wang urung gu uyackhi ning ga emung ing, emung eg ckhai wang ero.⁶Ingla uyackhi ge mi numurung emung Tuahan egula ing sur mosoing ula amara emung idir mi ge ckhowi ge sanang ula ckheu mosoing ming.⁷Ila uyackhi Makedonia mi Akhaya ge ckhowi ge mosoing mi gitaring.⁸Emung ala Tuhan gamang pin puang Makedonia mi Akhaya la ming bino, asi ula par ge baning egat, ega ning etang nadang wang tutuk bino si om gom la mi Latala wang meyang gu par ga egat wati sei.⁹Si, ging bala wang ni tutuk, tarang gi ging nuamba, etang ging la war teibackhi gaso* la ta ning gi ging ta Latala gumurung, emung Latala ge wat ge mosoing ge daning,¹⁰etang misit guackh la surga ming ge yaning gaaring, gang bading gbakung taso, egula Yesus, susa lala ma bedo gang wat pagui mi ping.

Paulus gang Uyackhi Tesalonika ming Giatutuk ¹Negiri namung, ing di ula lalo ning idan erening ega guru - guru bino. ²Indi ula wati ogoi wal gu uyackhi mola Filipi ming mo giom ni klikil ni maring, urang di Latala ge muding ula ning ming gen sanang ni ge injil gu wang tutuk walau uyackhi amara agai nimang wati.³Ni tutuk ega ge yasi ming bino, ing gen yasi biningo, etang ge palsu biningo.⁴Egula Latala di wang yawo ni ge injil wang tutuk, ge egu ning wang tutuk mi uyackhi gom - gom gen sanang biningo, egu ning wang tutuk met mi Latala gom - gom gen ckhoeo emung gala ning gen ckhowi gedaning.⁵Ning erening ega ning sur akal - akal wang tutk biningo, emung ila lalo, etang ing gen yasi biningo, Latala la ni saksi.⁶Nindi uyackhi gisei nimeli biningo, ing ge ega etang ui ge baning, egula ning ega Rasul - Rasul Kristus ning isei wati.⁷Urang di, ning ga moling - moling ula itang ming, emung ui guackh ckhakui ula uackh giriang ge daning. E gula, ni sayang amara - amara ning mi ing, ning mi ing egu Latala gamang etang niwat egat di munang egula ning wang sayang⁹e gula, ni giri ne deng namung, ni kriang tamadi ga, ning kriang ickhani- i lero e gang aki na tamadi ge daning emung Latala gamang wang iatutuk.¹⁰Ing egula Saksi - Saksi etang Latala, etab mosoing, molo, etang ge yasi ningo sei gi ni wat ga itang ming emung ni mosoing.¹¹Indi lalo, nila wom geno, iom er sanang, ing egat ing gaing, emung bom nuk uackh arat ge britang gedaning.¹²Urang ing wat Latala ge yawang gumurung,gang ipekit ge abang mosoing egu ler la ula ming.¹³Na ge ega nindi Latala gabangit gen amara-amara, ila nila nimang wati, ila med sei egu uyackhi manusia ge sur dar bino, ge molo-molo egu Latala ge sur ge dar ula wang kriang ging ge percaya gu ula gi tuag ming.¹⁴Negiri-nedang, ing egu emung uyackhi Latala gamang wati emung Yesus Kristus ula wang tutuk mola Yudea ming egu indi ge susa gu lalo emung i abang gemenak ula wang kriang ge daning molo ging lalit ging Yahudi gemenak wang kriang.¹⁵Ging lah Tuhan Yesus gabar etang Nabi-nabi, nindi nitero. ging Latala gumurung bino etang uyackhi amara wang sanang bino.¹⁶ging ning wang larang nisei aki uyackhi Yahudi gemenak biningang gu ga tutuk e ging .egula geyasi gula wang kriang giom guali, walsi susa lala lah ging guamba.¹⁷Negiri-nedang, ning ega uyackho nila te olo emung su nila tang gubuyo tang berakang gedaning, tet guackh la teolo. ¹⁸nila mau eret uamba, nala paulus nala mau eret mi idang nabo, asi iblis la ni yugut wang tering. ¹⁹yamila ing wang harap, gita niom ckho-ckhowo, makota niom gesamang gu Yesus gang eregi? egusi ing? ²⁰Ge ckhowi egula nindi sanang.

Tebritit ge ckhowo ¹Urang asi, nab-nab ge ckhowi gula wang gi brito. ²Masikwal ge bo-bom namunggu ging ging wang sapo gien wang griang giom gen ckhun ckhono etang giom ge ckhowi wang griang, ge ckhowi gu, egula ckhumit ckhai ckhayo.³ging, ckha-ckhalam ge tomokol gu ge amar tasinggu ckhowo gang aki am ge yas wang tutuk etang aki tockh geg a si ge ckhowi la wang te brito.⁴egula ging ge kunang umuckh etang ge masik namunggu ,wang tyani mi guackh namung geng.⁵Ge ba ding, mating, gang ge yas wangkriang bino, gang egu magom la mi kiriang, om gmayo ge masik geg wati, uranggi Latala ge gamanggu yasi bino.⁶Urangdi, kunag umuckh-masik wal gi brito ging egat gu mating.⁷Egat gegom, e ba ding gu ge ckhowi la mi tarin. Wom ge gom, mi pi amr tasinggu wang pa ling, ⁸Sur Ckhuno ge gasaing wang bino la pi lawang gu gang riyai la gang etang pi yas wang tutuk bino.⁹Ge-gaing wal egu toku metmi ui wad-wad geng nabla ging ero, ping ula we er gom-gom ckhewo etang aki gamang ta yayo.¹⁰Aki na tackhwo, egu pila mi taring e am pig gmurung seigi ge gom gu ge ckhowo Latala ping sok pibrito, gang ping egat piturui.¹¹Latala, gang wat mi ping etabit uyackhi egat.¹²Nindi ge yas gasaing gu mi ni olo ni tlogo etang tom klikil par moi geg egula pi watgu wang griang, ckhuno, etang mosoing ala wer ge ega,¹³Ega pila na ge ckhuni garing wang tomeyo, Latala etabit wado gang yat mi sogit guali, etang pi wat mosoing, Kristus Yesus.¹⁴Gang ge-Bading pagui mi ping egat gang mi piturui ping egat pi amar tasing gu yaso egu seigi ge-bading gang pagui gang wang ya mo, ge uyckhi gang wang trako ge ckhiwi la gang wang kriang.¹⁵Egat gang wang brito. Wom tnau etang wang tudumung gen gula mi oso. Aki uyackhi ge baning gi ping gmayo.

Wat gu er Gang Ckhowo ¹Ging gu ingat agar ging ipang gamayo met mi pimpinan geng ge ckhowi gula wang kriang, ²sur ge yasi gu wang am ge tutuk biningo, aki tabayung, ukuru - ukuru, etatabit ckhowi - ckhowi erit tapang gu gamayo met mi uyackhi egat geng.³Sebab, ping tur gu bodoh, ping gumurung gasaing ping taat biningo egula ping yas gasaing la wang kriang la urang.⁴Gang ping gen slamat, kringang ge yasi bino, asi ge ckhowi gula mi ping.⁵Gang ping wang giriang, egu bukan ping la ge ckhowi wang kriang ningo egu karna gang piom gom gu wang giriang e gang ckhowo gang ula tatang gom gula ming, ⁶Gang ming guali - guali gang e gula ping walo, gang egula ping wang wagi. ⁷Egula, gang ping wang giriang sei, ping egula pitang gasaing walo.⁸Sur ega molo - molo egula nang er su ing etatabit wang yawo etatabit gang egula pimam la ma e ping egat gumurung.⁹Egu si, yorang tudumung gu mi pi olo, ulul - ulul, ge tabayung yurang tudumung egu gang Bom do gamang wati biningo egu guna biningi sei. ¹⁰Egu uyackhi - uyackhi ge gelu uyackhi tang gen yaso, gang wang biritit mi nuko mi rackhi sei si ta ge olo. ¹¹Egula ing egat ui gula lalo gang egu yasi sei gang la e gang gang wang silaka.¹²Gang Artemas mi Titus unang gang gaying ere di Nikopolis gang ersu gala wang tutuk sei la miso. Wer ge ckhowi gu garing. ¹³Gang gu muding talalu, Senas gang wang mulag, gang egu ui hukum wado, etang Apolos gula yedi yugut tuag ming urang di ging aki kurang ganasing guangba.¹⁴Pi uyackhi - uyackhi namung gu ging gaing ge ckhowi gula wang kriang e gi wat gu gang ckhowo. Uyackhi egula niat wang ni birito, ne sur gala wang gi tutuk egula ama wati molo - molo egula Latala gamata ge ckhowi gula mi ping.¹⁵Uyackhi egat ge la nabung ming ega ging salam wang e tutuk. Ne salam gula mi wang gi tutuk. Anugerah gang piyat e sa samung.

¹Paulus ge salam, ui nuk ula bui ming egu Yesus Kristus, etang Timotius geg, egu pi giri pila pi iman nuko, mi Filemon geng, ne giri ne dang ula pelayanan ge gom ming ning ibangit gen amara - amara. ²Etang met mi Avia, egu piedik, etang Arkipus, ping egat kriang e samung etang met mi jemaat ge ula tom nuko ula i ma ming egu. ³Anugerah tom nuko tas nuko ula ping ming, egu pima Latala mi Tuhan Yesus Kristus egu gig.Abangit gen Amara - amara Egula Iman mi Filemon ge sayang ⁴Nala we ckhanap Latala gabangit gen amara - amara dang si nang ing wang nomeyo egu ula ne amur gom ming. ⁵Si nang wati si i iman, i sayang ula ing ming Tuhan Yesus ge gom ming met mi ging ge mososing gu egat. ⁶Nang amur egu gi ta i tom nuko i iman gu ckhayo i pengetahuan gu guali egu gi nab - nab ge ckhowo ula we ula ping ming egula Kristus. ⁷Nang etabit nom sanang nom gom di sanang, i sayang egu, ing ne dang namung ging ge gom - gom mosoing gu gobot etang wang gockhowa.Paulus Ge Permohonana Mengenai Onesimus ⁸Egu la, urang di ne keyakinan egu etabit wado ula Kristus ge gom ming met wang i tang gita wang kriang nab - nab la egu i kewajiban. ⁹Ge ckhowi la pagui egu etabit ckhowo egu nang wang ibango, nala Paulus nang bom sei etang weki ega emung uyackhi ula bui gom ming.¹⁰Nuackh Onesimus nang e brito nabla nala med asi nala bui ming. ¹¹Tur egu ang egu ge guna wang bino weki ega si ang etabit ge guna wang, ula ang ming ula nang ming. ¹²nala gang gaying, egu nom gom geg, nang gobot mi emeng. ¹³Ge molo - molo gu gang yedi iyabung egu gi gang mi iyanti melayani nala yedi bui ming karna egu Injil.¹⁴Asi ing tom nuko bino, nang di na nuk wang kriang bino, egu gi ing ge ckhowi la wang kriang egu paksa bino egu suka. ¹⁵Onesimus ila yedi tang brakang gu egu gita obot tuang ba ge glola wang biningo. ¹⁶Asi egu i gaying wali biningo, asi ge amara egu emung iki wado tang wang sayang egu nang bino, egu ing, met mi pi diri bading etang met mi Latala unang.¹⁷La ing su nang gadi i giri egusi Onesimus mu mi ing unang, emung nang mi ing unang ge daning. ¹⁸Gang mi ing unang gu, gala na dang mi gasayaing, gang i nadang med. Nala nosoi mi geyei. ¹⁹Nala, Paulus. Ega nala natang mi suro, nala ma mi geyei, asi nang na dang gen eri bino nabi la gala med. Egu i wat enuckhai. ²⁰Ya, ala ping iki wado. La pila Latala gatang gom ming ega ge ckhowi gula ping med. Iyom gom gu gockhowa ula Latala gatang gom ming.²¹Ne keyakinana egu ula ing ming, nang surat ega surit mi emeng. Nang di lalo ing wang kriyang amara ge nala bango. ²²Egu nang wang iyatutuk tolong ne kamar nuk wang gockhowa egu nang wang harap ula ne amur ming. Nang di yakin i amur gu obot ula ing ming.Salam ge Weko ²³Epafras, ning ui nuko ula bui ming, Yesus Kristus ge gom ming. ²⁴Urang di Markus, Aristarkhus, Demas, etang Lukas, tom nuk melayani. ²⁵Pi Latala Yesus Kristus, Anugerah ckheu mosoing ula pia sa samung.

War ge ewat met mi Bangsa ge Kudus ¹Egula, e tang wang sanang bino, e tang tipu, e tang akal, e tom te klikil, met mi e tang wang tutuk yasi gu e gat met gubuyo. ²Emung kunang ckhackhui ge gugi ere, egula ang susu rohani ge etatabit ckhowi egula wang tarako e ang e wat gom gula mi iling, ³etatabit ing tau Latala egu ckhowit talalu.⁴Ing Kristus gadan erening egula, uyackhi ging war ewat gu gubuyo, asi egula Latala gang tarako gang su egula etatabit ckhowo, ⁵ing di emung war ge wat ge daning, e i wat gom gu etabit mosoing emung Latala ge mosoing ge daning, e i wat gom gu mosoing emung pembriang ge ckhowo mi Yesus Kristus gatang gom ming gang mi Latala geng.⁶Egula Alkitab gang wang tutuk, " lali gi, nang war nuk met mi Sion mi meyo, war ge etatabit ckhowi egula wang tarako, yamickhai gang Bom do gamang gumurung si gang am gang gen riyay bino.⁷Egula ing ge la Bom do gamang gumurung egu war ge egu etatabit ckhowo, asi ing ge Bom do gamang gumurung bino, "war egu uyackhi kriang ckhowi namung gu ging gayo, war egu ging pake sei, " ⁸etang war ge am gemelang egu, met mi war magang egu er uyackhi bat sero." Ging gibat itapang egu ging Firman gumurung bino. Tor egula am mi gitaring sei.⁹Asi, ing egu Bangsa ge am wang taraki sei, Imamat etabit wado, Bangsa etatabit ckhowo, ing etabit Latala ge uyackhi egu ing ge ckhowi - ckhowi gula wang tutuk, ila ckhanigom ming gang i pekit ler mi ma.¹⁰Tur egu, ing egu Latala ge uyackhi bino, asi weki ega ing Latala ge uyackhi. Tur egu, ing am ing wang giriang bino, asi weki ega ing egat Latala gang ing wang giriang.Wat ge ckhowi gula wang Kriang mi Latala Gemelo ¹¹Ne giri ne dang ge nang ging wang sayang, ing ereneg wal gu nang mau iyatutuk yas gasaing par moy geg gu mi i olo egu gang iyormani gat yo. ¹²I amar tasing gu wang giriyang mi uyackhi Latala gumurung binang gu ge tuag gom ming e gung aki giom i diro esu ing uyackhi yas wang kriang, e ging kriang ckhowi gu lalo, Latala gemelit wang wer ge maning.Apang Gamai ui wad-wad Gamang wati¹³Demi Latala geni, lembaga pemerintah ping ging wang tarakang gu apang gamai mi ging, ge elesing egu ray.¹⁴Etang Gubernur ray gang gang gaying uyackhi ge yas gassaning wang kriang gu ging ukung etang ging ge ckhowo wang wang kriang gu gemelo.¹⁵Egula Latala gom gadano ge ckhowi wang kriang, ing er ging ge kmuki wang kurang binang gu wang paling.¹⁶Wat emung uyackhi sanang gom ming, asi aki i sanang gu amamgui ckhuang gu mi mey ge yas wang kriang, asi i wat gu emung Latala ge gaing wal ge daning.¹⁷Toku mi uyackhi egat geng. I giri i dang gu i tom nuko itang wang sayang, Latala gula wang reckho, toku mi ray geng.Pi Wat ga Ping etatabit Kristus Gala Susa Lala Guang baning Gumurung ¹⁸Gaing wal namung, toku mi e mnak wal gu geng. Aki ging ge ckhowo, sur danmaing la enuckhai, aki mi ging ge tapang wang lali di mi ging. ¹⁹Ig egu egat karunia nuko, egu ping pi wat ga wang urung Latala la wang tomeyo, ing dang am ge mi ing unang ing susa lala guang ba di aki ge biro. ²⁰Egudi, nab la am mi iming am ing kupi di ing wang gobo bino egu kriang ge yaso? ing ge ckhowi wang kriang gi ing susa lala guang ba di ing wang ukuru, i kruiang gu Latala gom gadano.²¹Egula am i peko, Kristus di susa lala guang ba egat i gu ing e ing egat ge yugut gula gumurung. ²²Gang yas gasaing wang kriang bino, mou leckhi gang wang tutuk bino. ²³Am ge yasi wang tutuk di gang ge yasi gobot mi ging bino, am gang er susa di gang gianumui bino, asi e wat mi Latala gatang ming, gala ui sur piling ge molo - molo²⁴Gang la pi yas gasaing wret pin salib wang oro e yas gasaing ping ming gu nimino. Ping ge ckhowo ge molo gula mi wat. Ge ibat ge wei esero, egula er pi ewat. ²⁵Tur gu, ing juma - juma rewang mi ta rewang. Asi weki ega ing egat ibat ret e mnak gabung gang la ibackhi iormani wang giriang.

¹Kristus ba mi idir guamba, egusi ing egu met mi ing ming ing iom egat esamung, egu uyackhi ge ula idir gunang baning gu, gimg igai ge yas wang kriang ²egu sei gi gi wat ckhackhung mi par ga ta amar, gang etang uyackhi geg gumurung bino, gang Latala geg la gumurung.³Egat sei ogoi e masa tur geg ging ge yas wang kriang emung uyackhi - uyackhi ging Latala wang kurang bino, mutuang ge ningang ckhayo, tockh na - tockh na, etang war teibackhi gemelo, etang ge yasit molo. ⁴Wedi ga, ging etabit wang ada etabit ge yas gasaing gu wang kriang bino. Egu sei gi, ging uyackhi gesei wang tutuk. ⁵Egu si tarang, ging la met mi wang Latala ge tutuk Latala la ma giwang takani uyackhi ge ewat etang ge niminang. ⁶egu sei gi, ler gu mi uyackhi ge tutuk weki ga etang ge niminang sei egu sei gi uyackhi am guang takani, ging i wat ula ckheu mosoing gom ming geng ula Latala ge ongat gom ming.E ckheu mosoing gu Met mi uyackhi ge baning di mi miging ⁷Nab - nab egat ge wer peng sei. Egu si tarang, wang urung wang paling urang gi i iom oso. ⁸Egat egu, ing egat i tang wang giriang etatabo e ckhowi gu gang mi e yas gasaing wang tering. ⁹E ckhowi gula mi e giri namung gi taring aki etang wang tutuk.¹⁰Egu gi ta uyackhi egat ckheu mosoing giom - giom ming, egu wang giriang met mi uyackhi ge baning di geng nuk met mi ge baning etang pelayanan ge ckhowo egat Latala ge ckhowo: ¹¹Yami la wang tutuk, wang kilang gang wang tutuk met mi uyackhi la Latala ge ckheu mosoing wang tutuk; etang yamila melayani, wang kilang gang melayani egat egu Latala ge muding sackhal gang mi ping egu gi ta ita ming ckhayi di, ging Yesus Kristus gemelo. Gang sei gi ge ler gu gang ge glola - glola wang biningo. Amin.I dir Guangba ¹²Ne gir - ne dang nang ing tianing, aki yas gasaing gu wang ida gang mat, pi tang geno emung na dang la er apang ging lali bedo. ¹³Egu sanang ging egat gumurung ckhas met i ge gom Kristus ging egat sanang wang eleckh egu am met meyo am souk. ¹⁴Ging sanang am gi yas wang tutuk egu Kristus geni, ckheu mosoing egu egu ta graung souk etang Latala ga graung ukuru piom ming.¹⁵Asi, aki ula ging gang i gang tabar, na tackhawo, ge yas gasaing uyackhi egu gang am ge nadang wati si gang di wang tutuk. ¹⁶Urang asi yami la gang i gang ersu gang uyackhi kristen, gang aki riyai, lebai ckhowi la Latala gemelo egu egat ge gamang.¹⁷Sei gama su gang la gu am ugugi tuang takani pin Latala ge uyackho. Etang, am piwang takani pi Latala gang etang piwang takani, eta tarang uyackhi - uyackhi ge ewat Latala ge ler ging gumurng bino? ¹⁸gang uyackhi gang ge ckhowo wang kriang ba mi gang surga abang mi gi biningo, etang uyackhi ge numui etang uyackhi ge ula yas gasaing wang kiriang? ¹⁹urang si, wang kilang ging egu Latala ge wayang tor mani gang Latala gumurung gemelo, etang ge ckhowila wang kiriang.

¹Egula, ping Penatua namung ping e gat la Kristus ge i gu lalo. Egu sei gi ping egu gumurung met mi sur mosoing goming wang Penatua ula abung ming gu ge tutuk. ²Latala ge guackh garat, ge ula abung ming gu wang giriang! ³aki e diri geleso. Esu ang la, ang kriang ge ckhowi gula mi e giri e dang namung gu gitaring. ⁴Egu gi wekit sang Gembala Agung gang re, ing makota ge ckhowi gang ckheli binang egula ig.⁵Urang di ing ge muda - muda namung. I diri gu gamayo met mi ge bo bom namung ang ing egat i diri gamayo nuk met mi nuk unang. Uyackhi ge sombong egu, Latala gang agayo. Gang Berkat anugerah gu met mi uyackhi e diri gamayang gu geng. ⁶Egula e diri gamayo met mi Latala ge Kuasa gu gom ming egusi am mata ang os geleso. ⁷Aki gang wang reckho, gang Latala la ping wang giriang.⁸Iblis gu la wat gi mat gi la wang urung wang paling. ⁹Iblis gu getero! e diri gu gamayo ckheu mosoing gu gang om gom gu ming¹⁰Ang. Yedi ula i dir gom ming la Latala gala ula ang ta urung ge wedo ge meyo, Kristus gang om gom ming. ¹¹Gang egula. Sur ge mosoing ge glola wang bino. AminSalam ge Wang Gabang ¹²Nang surat gom mi suro tuko met mi Silvanus geng. Gang ping egat tom gom nuko e sa samung. ¹³Ping ge ula Babilonia ming egu. Egat egu Latala ge uyackho. Gang Markus ge tutuk, Kristus gang salam met mi guackh geng. ¹⁴Ping egat tom nuko tas nuko. Kristus gatang gom ming. Amin

¹Gang penatua, gala umuckhwal wang tarackho etang kunang - kunang mi tang, ge nang gemelit ge molo, etang nenuckhai bino, ega uyackhi egat ula go molo gu lalo, ²ge molo ula ping ming gu gama ping ming ge glola wang bino. ³Anugerah, tom te yaso, etang te le leling egu pimam Latala etang Yesus Kristus geg, guackh gu, gala piat ge ckhowi gom ming.⁴Nom ckho ckhowit talalu nang lali si uackh namung ga wat etang ge ckhowi la wang kiriang, emung nila Bom do gamang wati ge daning. ⁵Ega, nom, nang abango, aki esu sei ugugi la nag surit mi meng, egu pi sur ogoi ming, urang e ping tang wang sanang. ⁶Etang, e gala ckhowo, e gu gi ping wat gala pi biritang gu gumurng. Ge birirtang gu arang, ila tur atang mi wati gu egula ing ge gom mi wat.⁷Eri si uyackhi Latala wang kurang binang gu ging par moi ga ta ere ging ersu Yesus egu Latala guackh biningo ge ckhowi egu ging ersu yaso egula uyackhi Latala gamang wati bino. ⁸Iom gen ckhun - ckhuno urang e na ge ckhowi pila wang kiriang gu gang aki gubuyo, egu sei gi wat ge ckhowi gu ing egat ig.⁹Uyackhi amara ge yasi wang kiriang etang Latala gamang wati bino ge wat egu Latala ge olo. Egula geg, yami la Latala gamang wati gang la Latala etang Yesus guackh. ¹⁰Wekit ui dang gang idan re gang sur ckhowi wang tutuk bino aki i ma mi ging trima etang aki ging wang tudumung. ¹¹Egu la, yami ckhai ging trima eri si gi kiriang yasi egula ging di gumurung.Salam ge Wang gbang ¹²Nab - nab amara nang surit mi iming, asing nang nagayo kertas mi tinta nang mi surti mi iming. Asi, nang su ping tuang bat e sa sa mung gi pita ta tutuk. ¹³E kau guackh namung gu am wang tarakit ging gaying salam wang e tutuk.