Bible

Yuhaana

1¹Mu li rhaanga ya li ho Likhuuva, khaandi Likhuuva ya li ho halala na Nyasaaye, khaandi Likuuva ya li Nyasaaye, ²Wa tsana ya li mu lirhaanga halala na Nyasaaye. ³Viindu vyoosi vya loombekha khu Uyu; khaandi vuchira Uyu shishiliho shaloombekha khali shilala khu vyoosi vya loombekha.⁴Muye lya li liiva mwooyo; na liiva mwooyo lya li vulavu vwa vaandu. ⁵Vulavu vu lava mu shisuundi; na shisuundi shi shya vwu kumirha mba.⁶Muundu yiitsa wa rhumwa khurhula khu Nyasaaye.Liirha lyeelye lya li Yuhaana. ⁷Uyu yiitsa khu li lolekhitsa, alolekhitse vulavu yuvu, voosi va tuukhe khusuuvira shichira naye. ⁸Shi yali vulavu yovo, navutswa yiitsa a loolekhitse vulavu.⁹Vwali ho vulvu vwa kiryikali vwiinjira mu lirova nu vu ha vaandu voosi vulavu.¹⁰Yali mu lirova, khaandi lirova lya loombekha khuye, khaandi lirova shi lya mu manya mba. ¹¹Yiitsa khuvyo vali veeve navo veeve va muvuchirira mba.¹²Navutswa voosi va mu vuchirhira, ya va ha tsingulu khukwa vaana va Nyasaaye,va tsana vasuuvira liirha lyeelye: ¹³Va masahi kavula khwiivula; anoho valaliri vwu mbiri, anoho vulariri vwu muundu, navutswa vulariri vwa Nyasaaye.¹⁴Likhuuva yakwa mbiri, na menya halala na khutse (khaandi khutse khwa loola vulavu vweevwe, vukhumi vwa wivulwa muderwa wa Taata), witsula tsimbavasi na kiryikali. ¹⁵Yuhaana aloolekhitsa khuye ,na yiirwaatsa, na voola Uyu naye wa ndiitsa mu voolere, "Uyu yiitsaanga inyuma waanje ukwire wi imberi waanje:shichira ya li imberi waanje."¹⁶Nu khu vwiitsuli vweevwe khutse voosi khu nyole, ni tsimbavasi khu tsimbavasi, ¹⁷Shichira Lirako lya lyalerhwa khu Muusa: tsimbavasi na kiryikali ka lerhwa khu Yeesu Kristo. ¹⁸Shya haliho nu muundu wa loola Nyasaaye inyiinga khali indala;navutswa Mwaana wivulwa muderwa u li mu shilirhu shya Taata, u mu vuuli.¹⁹Khaandi yil ni liloolekhitsa lya Yuhaana, inyiinga vayahudi va rhuma vasaalisi na valevi va varhula Yerhusalemi khu murheeva," Yiiwe uliwiina?" ²⁰Naye yiiyama, khaandi shi yambakhana; ni yiiyama, "Inse shi ndi Kristo". ²¹Ni va murheeva, Nii wiina khaandi? Iwe uli Iliicha? khaandi ya voola shindi Iliicha mba, "Iwe uli muporofeeti woyo? Khaandi ya rheevula, "Auwa."²²Nalwo lwa vamu rheeva," Iwe uli wiina? Khutuukha khukalukhitsire vakhurhuma marheevuli "Wiivoola ndi?" ²³Ya voola, "Inse nu mwooyo kwu muundu kuhaansuukha nu khwiirwaatsa mwiicheenda nyama:"Luunjikhitsa injira yu Mwaami, khuli Isaaya Muporofeeti ya voola."²⁴Vaandu valala vali ni varhumiirwe khurhula khu Vafarisayo, ²⁵khaandi vaandu yavo vamurheeva, "Shichira shina upatisaanga, na yiiwe nukhari Kristo, anoho Iriicha, anoho muporofeeti wooyo?"²⁶Yuhaana yavarheevulira, na voola, "Inse mpatisaanga mu maatsi; hakarhi heenyu khuliho nu mulala usiinjiire, wa mukhavula khumanya, ²⁷Unoondaanga inyuma waanje, wa khatuukhana khuvoholora migoye chyi shilaarho shyeeshye. ²⁸Viindu yivi vyaakholwa mu Petsaani khu lu cheerekha lwa Yorotaani, wa Yuhaana yapatisaanga.²⁹Mukaamba kwa loonda khu ya loola Yeesu niyiitsaanga khuye, na voola, "Heensi! yaho khuli ni shimeeme shyi likoondi lya Nyasaaye, urhulitsaaho vwooni vwa vaandu mushivala! ³⁰Uyu naye wa ndamuvoolerhaanga, inyuma waanje, yiitsaanga, muundu, wiitsa khuva imberi waanje: shichira yali imbeeri waanje. ³¹Khaandi yiinse shindali ndamumanya; navutswa khu aloolekhane na Israeli, yishi ni shichira ndiitsa khupatiisa mu maatsi.³²Yuhaana ya loolekhitsa, na voola, "Ndoli Rooho ni yiikhaanga khuli shituuti na rhula mwikulu; khaandi amanyi na yeera khuye. ³³Khaandi shindali ni mumanyi: navutswa Uyu waanduma khupatiisa mu maatsi, yamboolera wa nu loore Rooho ni yiikha nu khuyeera khuye, wooyo naye upatisaanga mu Rooho Mutsyeenukhu." ³⁴Na yiinse mmali khuloola khaandi mmali khuloolekhitsa naye Mwaana wa Nyasaaye."³⁵Mukaamba kwaloondakhu Yuhaana yaasiinjira na vaviri khu veechitswi veeve; ³⁶na heensa. Yeesu lwa ya cheenda, na valoola, "Heensa Mwaana wi likoondi wa Nyasaaye."³⁷Na veechitswi vaaviri veene yavo vamuhulira naavooolaanga, ni va mu loonda Yeesu. ³⁸Yeesu yiishevukha, na valoola ni va muloondaanga, na varheeva, "Mukhaava shina?" Navo vamurheevulira, "Rapii (kali khuvoola, mweechitsi), U menyaa heena? ³⁹Yeesu yavavoolera, "Haambi, mu la loola.Viitsa ni valoola wa yamenyaanga; ni vagona naye litukhu lyeeneyero:shichira yali niyeenya khutuukha isa ikholaanga likhomi ya hamukoloova.⁴⁰Amwaavo Simoni Petero walaangaangwa Andereya yali mulala khu veechitswi va viiri yavo vahulira Yuhaana na amuloonda. ⁴¹Ya rhaanga khunyoola amwaavo weewe mweene, Simoni, na muvoolera, "Khunyooli Masiiya (lili khuvoola Kristo). ⁴²Ya muhiirha khu Yeesu.Yeesu ya muheensa na voola, "Yiiwe Simoni mwaana wa Yuhaana: u la kuliikhwa Keefa anoho Petero (ni liili khuvoola Ulii lichina).⁴³Mukaamba kwa loondakhu, yarhula niyeenya khutsya Kalilaya, yamunyoola Filipu: khaandi Yeesu yamuvoolera," Unoonde." ⁴⁴Filipu ya wu khurhula havalaaanga Petsasaita, litaala lyaanga Andereya na Petero. ⁴⁵Filipu yanyoola Natsanieri, namu voolera, "Khunyooli Masiya wooyo wa Muusa yang'oota khuye mu Liiraka khaandi vaporofeeti; Yeesuj wa Natsareeti, mwaana wa Yosefu."⁴⁶Natsanieli ya muvoolera,"Shiindu shilahi shinyala khurhula mu litaala lya Natsareti.?' Na Filipu ya muvoolera, "Haamba , uloore." ⁴⁷Natsanieli ya muloora Natsanieli ni yiiytsaanga khuye, na mu voolera, "Heensa mwiisraeli wi lyiikali, ukhali nu vugaati!" ⁴⁸Natsanieli yamu voolera, "Umanyi ndiina inse ?"Yeesu ya rheevula nu khumuvoolera, "Filipu na shili khukhulaanga, lwa uveere haasi mu musaala kwa makhuyu, nda khuloola."⁴⁹Natsanieli ya murheevulira ,"Rapii, iwe naye Mwaana wa Nyasaaye; iwe nu Mwaami wa Israeli !" ⁵⁰Yeesu yamurheevulira, na muvoolera, "Shichira khuvoolere, ndakhuloola haasi mwu musaaala kwa makhuyu, u suuvira? U la loola viidu vinyiikhi vi virha yiivi." ⁵¹Khaandi ya muvoolera "Liikali liikali mmu voolela, "Mula loola likulu liikukhaanga, na tsingerosi tsya Nyasaaye vaniina nu khwiikha khu Mwaana wa Ataamu."

2¹Khu lituukhu likhoola khavaka, khwaliho ni shiserero mu Kaana mu litaala lya Kalilaya; khaandi maama wa Yeesu yali ho. ²Yeesu na veechitswi veeve vali vaalaangwa khutsya mu shiseerero shyeene yesho.³Lwa iwaini yacheehera, maama wa Yeesu ya mu voolera, "Va vula iwaaini" ⁴Na Yeesu ya mu voolera, "Mukhali yiiwe, shichira shina wiitsa khu yiinse? Inyiinga yaanje ishirhi khutuukha." ⁵Maama wa Yeesu ya voolera varhumikhi, "Ka amuvoolera, mukhole."⁶Khwaliho ni tsinyuungu tsya machina tsirhaanu na indala, tsya viikhwa khuli mwiima chwukhwochitsa chya vayahuuti, vuli indala ilekhaana ni tsisyoongo tsiviri anaho tsivaaka tsya maatsi. ⁷Yeesu ya va voolera, "Mwiitsulitse maatsi mu tsinyuungu kiitsule tu khutukha khu luliichi. ⁸Ma na voolera varhumikhi, Khulweene yulu tahikhu, muhilire mwiimiliri wi shiserero.Na vakhola ndyo ni vamuhirira.⁹Mwiimiriri wi shiserero ya tsansamakhu maatsi tsana kali kakholelwe iwaini, khaandi shiyamanya wa irhuli (navutswa varhumikhi vatahaa, navo vamanya), mwimiriri wi shiserero ya laanga usererelwe, ¹⁰na mu voolera, "Vaandu voosi va rhaanga khuleerha iwaini indahi; navutswa lwa va veetsa vakhang'wa inyiikhi khu uleerha intaamaanu: navutswa yiiwe urhaanji khuvisa iwaini indahi khutuukha lweene yulu."¹¹Liirhaanga lyu khukhola vilolekhitso vyeevye, Yeesu ya khoola mu Kaana ya Kalilaya,na manyinya vukhumi vweevwe; khaandi veechitswi veeve va mu suuvira.¹²Inyuma wa yaka Yeesu ya votokhana Kapenaumu, mweeme na maama weewe na va mwaavo na veechitswi veeve; ni vamenya matuukhu ka khali manyiikhi.¹³Khaandi Liipasaka lya Vayahuti lya li hiimbi, Yeesu yatiikulukha nu khutsya Yerusalemi. ¹⁴Na nyoola mu Liteembeeri, vakulanyinyi vyi tsing'oombe na makoondi ni vituuti, ni viikhale khushiraanyinya tsishiliinji.¹⁵¹⁶navavoolera vakuli vyii vituuti, "Rhulitsi viindu yiivi yumu; lekhi khukhola insu ya Taata waanje, khuva insu yi shiirhu shyu khukulanilamu."¹⁷Na veechitswi veeve vyiitsukhitsa ndi kang'ootwa, "Liititikhana lyiu muunsu yooyo lilaa ndya". ¹⁸Na vuvwaamihi vwa vayahuti varheevula ni va muvoolera, "U khu manyninye shilolekhitso, shichira nu khoola viindu yivi?" ¹⁹Yeesu yarheevula , "Yonoonyinyi liteembeeri yili, na inse nda li siinjiritsa khu lwa matukhu kavaka."²⁰Shichira yaka vu vwaamikhi vwa vayahuuti vavoola,"Liteembeeri yiri lyuumbakhwa khuu lwu mihiika makhomi kane na ni mihiika chyirhaanu nu mulala, na yiwe, ati u la li siinjiritsa khu matukhu kavaka?" ²¹Navutswa yalomoloma khu liteembeeri lyu muviri kweekwe. ²²Lwa yali yakhamala khusimikukha khurhula mu vakhutsu, veechitswi veeve viitsukhitsa yali yavoola yaka; ni va suuvira mang'oota ni likhuuva lya Yeesu ya voola.²³Lwa yali mu Yerusalemi mu Lipaasaka, inyiinga yii lilya vanyiikhi va suuvira khu liirha lyeelye, lwavaalola vilolekhitso vya yakhoola. ²⁴Navutswa Yeesu mweene shi ya va suuvira mba, shichira yamanya vaandu voosi, ²⁵khaandi shyali ni lyeenya lyu muundu khumulokhitsira makhuuva ku muundu; shichira mweene yamanya kali mu muundu.

3¹Yaliho muundu mulala khu vafarisayo liirha lyeelye lyaali Nikodemo, mwiimiliri wa vayahuuti. ²Yiitsa khu Yeesu vutukhu na murheeva," Rapii, khwamanya iwee uli mweechitsi wa rhula khu Nyasaaye; shichira shyaliho muundu unyala khukhola vilolekhitso yivi vya ukholaanga Nyasaaye na khali halala naye."³Yeesu yarheevula na muvoolera, "Likai, likali khu voolera, muundu na khiivulwe liivulwa lyu mwiikulu shyanyala khulola vwaami vwa Nyasaaye." ⁴Nikodemo yamurheeva, "Muundu anyala ndiina khwiivulwa lwakhaviri nali muundu muhiindirha? Anyala khwiinjira muunda mwa maama weewe lwa khaviri khu yiivulwe khaandi?"⁵Yeesu yamurheevulira, "Likali liikali khuvoolera, muundu na khiivulwe liivulwa lya maatsi na lyu mu Rooho shya anyala khwiinjira mu vwaami vwa Nyasaaye. ⁶Shyu muviri shiivula shyu muviri, khaandi sha Rooho yiivula ni rooho.⁷Ukhacheenya khu ka khuvoolere mba, khutuukha muundu yiivulwe liivulwa lya khaviri. ⁸Imbuutsa ihuutsaanga niitsya ha iyaansi, na iwe uhulira liihuuma lyayo, navutswa shyumanya wa irhuulaanga, shiinga wa itsitsaanga : niindyo khu vaandu voosi va Rooho yiivula."⁹Nikodemo yarheevula na muvoolera, viindu yivi vinyala ndi khuva?" ¹⁰Yeesu yarheevula nu khu muvoolera, "Iwe shyuli mweechitsi wa va Israeri na viindu yivi shyu hulira mba? ¹¹Liikali liikali khuvoolera khu voola ka khu khwamanya, khaandi khu loolekhitsa vya khu looli, naavutswa liilolekhitsa lyeerhu shyu mulivuchiirira mba.¹²Ni muvoolera viindu vova na munye shyu mu vi suuvira mba, mulasuuvira ndi ni muvoolera viindu vyu mwikulu? ¹³Khaandi shya hali nu muundu watsya mwikulu navutswa uyu wiikha khu rhuula mwikulu naye Mwaana wa Adamu, ali mwikulu.¹⁴Khaandi khuli Muusa ya chiinga insukha mwiicheendanyama, khaandi Mwaana wa Adamu ala jiingwa ndyo; ¹⁵khu vaandu voosi u musuuvira, akhatiiva mba, atuukhe khuva ni liivamwooyo likhahera- muye.¹⁶Nyasaaye ya yaansa va mushivala ndi, na vaha Mwaana weewe mudeerwa, khu voosi u mu suuvira a khativa mba navutswa a ve ni liiva mwooyo li khahera mba. ¹⁷Shichira Nyasaaye shi ya rhuma Mwaana weewe khwiitsa mu shivala khu khu khalachira va mushivala; navutswa khu honyinya va mushivala. ¹⁸U mu suuvira shi alakhalachirwa; uvula khu musuuvira umali khu khalachirwa, shichira avulaa khu suuvira mu liirha lyu Mwaana mudeerwa wa Nyasaaye.¹⁹Khaandi yishi nasho shivune shi likhalaka: Vulavu vwiinjira mushivala, na vaandu va yaansa shisuundi khuvirha vulavu; shichira miyiinsi chyaavo chyali mitaamaanu. ²⁰Shichira khu voosi ukholaanga vutaamaanu atuunyira vulavu,khaandi shi yiitsa khu vulavu ,inyiinga yoosi mihiinsi chyeechye chyiira laangaminywa havulavu. ²¹Navutswa u khoola kyirikali atsiitsa khu vulavu, khu miyiinsi chyeechye chyiituukhe khuloolekha chyikholelwa khu Nyasaaye.²²Inyuma wii viindu yivi Yeesu yiitsa na veechitswi veeve mu shivala shi Ivuyuta; ni yiikhala ho halala navo nu khupatiisa. ²³Khaandi Yuhaana yali na patiisaanga mu Ainoni hiimbi Saalimu, shichira kwaliho na maatsi manyiikhi:khaandi vaandu vanyiikhi viitsa ni vapatiiswa, ²⁴shichira Yuhaana yali nashiri khuvoohwa nu khusuuvwa muunsu yu vuhaaambe.²⁵Na khwaliho na mahaangali ka veechitswi va Yuhaana nu muundu muyahuuti khuloondekhana khu makhuuva kwu khwiilavitsa. ²⁶Ni vatsya khu Yuhaana , ni va muvoolera, "Rapii, wooyo yali halala na yiiwe kkhulujerekha lwu muchera kwa Yorotani, wooyo wa wakhulolekhitsira, heensa abatiisaanga , na vaandu voosi vatsitsa khu ye."²⁷Yuhaana yarheevula na vavoolera, "Muundu shyaanyala khu khuvukula shiindu na khaheelelwe shirhula mwikulu. ²⁸Munye veene mu ndookhitsira khuli ndavoola, "Inse shiindi Kristo, navutswa ndarhumwa imberi weewe."²⁹Uli nu mukhaana mwiiha naye usererwee: navutswa muliina wa usererwee, nu musiinjiriri nu wu khulira mwooyo kwa usererwe, ayaansa muno shichira mwooyo kwu usererwe , khu lwayako vuyaansi yovwo vwa ndi navwo vutuukhi. ³⁰Kamutuukhira khujiingulwa nu khukalihitswa na yiinse ka ndukhira khujeeha.³¹Uyu urhula mwikulu ali ikulu wa voosi: Urhula mushivala , uyu ni muundu wi shivala, khaandi avoola makhuuva kwu mu shivala:urhula mwikulu ali ikulu wa voosi. ³²Ahanaanga vushahidi khu ka yee mweene yalola nikakholekhaanga, khaandi na hulira.Navutswa muundu avulakhuho, uvuchilira makhuuva keeke. ³³Muundu uvuchilira vushahidi vweevwe, amanyinyaanga ni kyirikali ndi Nyasaaye nu wiilikari.³⁴Shichira wooyo wa Nyasaaye ya rhuma avoola makhuuva ka Nyasaaye: shichira Nyasaaye amuheetsaanga mu vunyiikhi tsingulu tsya Rooho . ³⁵Paapa ya yaansa Mwaana, khaandi umali khumuha vyoosi mu makhono keeke. ³⁶U suuviraanga Mwaana ali ni liivamwooyo li kha hera mba; navutswa uyu uvula khurhia Mwaana shyaliloola liivamwooyo, nikhali vurhima vwa Nyasaaye vumenya khu ye."

4¹Mwaami Yeesu lwa yamanya Vafarisayo vali vamali khuhulira Yeesu akhola vaandu vanyiikhi khuva veechitswi nu khuvapatisa khuvirha Yuhaana ²(navutswa Yeesu mweene shyiyapatiisa navutswa veechitswi veeve navo vapatiisaanga), ³ya lekha Ivuyuta natsya khaandi Kalilaya.⁴Kamutuukhira avirhire haakarhi ha Samaria. ⁵Khu lwayako yatuukha mu litaala lya Samaria lya laangwa Sikaru hiimbi hu mulimi kwaYakopo yaha Yosefu mwaana weewe.⁶Shisima shya Yakopo shyali haweene yaho.Yeesu yali na jooti khulucheendo lweelwe, ni yiikhala hambeka hi shisima, na inyiinga yeeneyo ni yakheenya khutuukha isaa ikhola tsirhaanu na indala . ⁷Mukhali mu Samaria yiitsa khutaha maatsi: Yeesu yamuvoolera, "Mpeekhu maatsi kwu khung'wa" ⁸Shichira veechitswi veeve vali vatsiire mu litaala khukula vyukhulya.⁹Na shichira yaka mukhali mu Samaria ya mu voolera, "Kali ndi yiwe Muyahuuti undeeva khuhe maatsi ku khung'wa, na yinse ndi mukhali mu Samaria? (Shichira Vayahuuti shivaliikhu ni lisaanga na vasamaria). ¹⁰Yeesu ya rheevula na mu voolera,"Iwe niiva ulamanya shihaanwa shya Nyasaaye, khaandi nu wiina wu khuvooleraanga, "Mbeekhu maatsi kwu khung'waa", khani wakhamurheevi naye akhuhe maatsi ki liiva mwooyo."¹¹Mukhali woyo yamu voolera, "Mwaami, nikhali shyuli ni indoho yukhutahira, na shisima yishi shiri haasi:Ulanyoola heena maatsi yaka ki liiva mwooyo? ¹²Yiwe uli mukali khuvirha Paapa weerhu Yakopo, ya khuha shisima yishi, na yangw'aamu mweene, na khaandi vaana veeve,ni mirhuuku chyeechye?'¹³Yeesu yamurheevulira, "Maatsi yaka khu voosi u kangw'eetsa khu, alaloola vuluhu khaandi: ¹⁴navutswa khu voosi ung'waa khu maatsi yaka ka ndimuha shyalaloola vuluhu khaandi; navutswa maatsi ka ndimuha kalava muye isyeeveye ya maatsi kasenukha liiva mwooyo li kha hera mba."¹⁵Mukhali woyo yamuvoolera, "Mwaami , u mpeekhu maatsi yaka mbule khuvakhu khaandi nu vuluhu, khaandi khuhonjera ni ndiitsa khutaha maatsi yaha". ¹⁶Yeesu ya mu voolera, "Tsyaa ulaanje musaatsa woowo , na mwiitsi naye haanu."¹⁷Mukhali woyo yarheevula na mu voolera, "Shindi nu musaatsa mba." Yeesu yamu voolera, "U vooli vulahi, "Shindi nu musaatsa mba." ¹⁸shichira wavakhu na vasaatsa varhaanu.Khaandi khali wa uli naye lweene yulu shali musaatsa woowo:yaka u vooli kyirikali."¹⁹Mukhali wuyu ya mu voolera,"Mwaami ndola uli muporofeeti. ²⁰Vaakuuka veerhu vasaalilaanga khu shikulu yishi, navutswa munye vayahuuti muvoolaanga ndi Yerusalemi nomwo mulahi mwa vaandu khutukhana khusaala khu Nyasaaye."²¹Yeesu ya mu voolera, "suuvire mukhali yiwe,isaa yiitsaanga ya mulivula khusaala khu Paapa mu shikulu yishi, khaandi khali mu Yerhusalemi. ²²Munye musaala khu shya mu kha manyi: navutswa khutse khusaala khu shya khwaamanya; shichirha vuhoonyi vurhula khu vayahuuti.²³Navutswa isaa yiitsaanga, nayo imali khutuukha, ya vaandu vwu khusala mu vwa kyirikali va la saala khu Paapa mu Rooho khaandi mu kyirikali:shichira Paapa yenyaanga vaatsana vave vu khusaala khu ye. ²⁴Nyasaaye ni Rooho, na vaandu va saala khu ye, ka vatuukhira khusaala mu rooho nu mu kyirikali."²⁵Mukhali wooyo ya mu voolera, "Manyi Masiha yiitsaanga (Wooyo wa valaanga Kristo). ²⁶Lwa alituukha aliitsa khu khuvoolere viindu vyoosi." Yeesu ya mu voolera, "Inse wa nomoloma niiwe wuyu, naye."²⁷Inyiinga yeene yeyo veechitswi veeve vakalukha.Na vacheenya khu ka yali na voolerhana nu muundu mukhali, navutswa avulakhu khu vo wa rheeva, "Weenya shiina?' anoho "Ni shiina shyu ulomoloma naye?"²⁸Khu, mukhali woyo yalekha isyoongo yeeye na kalukha mu litaala, nu khu voolera vaandu, ²⁹"Haambi, muloore muundu umbuliire viindu vyoosi vya ndakholakhu.Uyu a vule khuva naye Kristo, avuli khuva naye?' ³⁰Vaarhula mu litaala niviitsa khu ye.³¹Inyiinga tsana veechitswi veeve va mu voolera, "Rapii ulyi." ³²Navutswa ya vavoolera,"Ndi ni vyukhulya vyukhunyanya vya mukhamanya." ³³Shichira yaka veechitswi veeve va voolerana,"Muundu avulaho umulerheere vyukhulya viindi, aave aleerherwe noho?³⁴Yeesu yavavoolera, "Shyukhulya shyaanje nu khu khola lyeenya lya woyo waanduma; khaanda khu rhweekhitsa mihiinsi chyeechye. ³⁵Munye shyu mu ma muvooola, "Chirhikaale myeeri chyiine, khu liichesa lyi tuukhe? Heensa, muvoolera, chyiingulikhu tsyimoni tsyeenyu mu heense mu milimi chyiimali khulava chyituukhuna khu cheswa! ³⁶Muchesi uchesaanga amaa rhuungwa mirhuungu na avuunjeritsaanga vyaachesi shichira liiva mwooyo likhahera mba; voosi mu miitsi nu muchesi va tuukhe khu saangalira halala.³⁷Khu lwa yako , lyivoola lyavaoolaanga"Muundu mulala amiitsaanga na wuundi acheesa", ni lya kyiirikali. ³⁸Yiinse murhumaanga khutsya khuchesa mu milimi mwa mwakharhaaka mu. Ni vaandu vaandi vayiitsira mu nu khurhaaka, na munye mwiinjire mu mihiinsi chyaavo."³⁹Vasamaria vanyiikhi khurhula mu litaala lyeene yero, va suura mu Yeesu, shichira likhuuva lyu mu khali ya va voola "Amboolere vuli shiindu shyoosi sha ndakhola." ⁴⁰Khu, lwa vasamaria va tuukha khuye, va mu voorera amenye navo: na Yeesu yamenya khuyo matukhu kaviri.⁴¹Vaandu vaandi vanyiikhi va suuvira lyi khuuva lyeelye. ⁴²Ni va voolera mukhali woyo, "Shyu khu shisuuvira shichira makhuuva ku khuvoolere: navutswa shichira khutse veene khu mali khuhulira, khaandi khu manyi lyiikali uyu naye muhonyi wa vaandu mushivala."⁴³Matukhu kaviri ni ka khavirha, Yeesu ya rhula Samaria weene yeyo nu khutsya Kalilaya. ⁴⁴Shichira Yeesu mweene yali ya voola, "Muporofeeti shyanyala khu heerwa luyali na vaandu vwu mu shivala shyeeshye taawe". ⁴⁵Lwa ya tuukha mu Kalilaya, vakalilaya va muvuchiirira nu vuyaansi, shichira vaaloola viindu vyoosi vya ya khola mu Yerhusalemi inyiinga yi lyilya lya Pasaka: shichira khali vo veene vali vatsiire iweene yeyo mu lilya lyeeneyero.⁴⁶Yeesu ya kalukha mu liitaala lya Kaana lili mu lusomo lwa Kalilaya, mwa yali ni ya kalukhanyinyeekhu maatsi khu kwa iwaiini. Khwaliho nu mukhoongo mulala wu mwaana weewe muyayi yali na lwaalaanga, mu litaala lya Kapenamu. ⁴⁷Lwa yahulira Yeesu yiitsi Kalilaya khurhula Yudeya, ya tsya khuye na muvoolera atsyi mulitaala lya Kapenamu khu muhoonyinya mwaana weewe wali mulwaale nali hiimbi khukhutsa.⁴⁸Yeesu ya mu voolera, "Munye nu mukhalooli vilolekhitso ni vyukhucheenyinya shyu munyala khusuuvira taawe." ⁴⁹Muundu mweene woyo ya muvoolera, "Mwaami haamba khutsi niiwe mwaana waanje na shiri khu khutsa." ⁵⁰Yeesu yamuvoolera, "Yiwe tsya, mwaana woowo ali mwooyo."Muundu wooyo ya suuvira liikhuuva lya Yeesu ya mu voolera, na rhulaho.⁵¹Naye lwa yali nali khu injira na kholomokhaanga, ya vukana na varhumikhi veeve, ni va mu voolera muyayi woowo amanyi alahona. ⁵²Naye ya va rheeva inyiinga shina ya arhaangi khu soosa.Navo vamu voolera, "Mukoloova, isaa ikhola saa saba nalwo lwa lukhutsu lwu murheengo lumulekhi."⁵³Ise mwaana mweene woyo yamanya nayo isaa ya Yeesu ya mu voolera, "Mwaana woowo uhoni". Yee mweene na vaandu voosi vyi insu yeeye vasuuvira. ⁵⁴Yishi shyali shilolekhitso shya khaviri shya Yeesu yakhola inyiinga ya yali ni yakharhula mulusomo lwa Yudeya khutsya mu lusomo lwa Kalilaya.

5¹

²Mu Yerhusalemi khuliho ni litavalya lili hiimbi ni shirhivwa shya makoondi, shilaaangangwa mu lu heebrania, Petsesita, lili khu voola mikurhu chyiirhaanu. ³Vaandu vanyiikhi vali vakona khu mikurhu tsana, shituma shikali shya valwaale, vavekhu, valeema, na vafwookoya.[ Ni valiindiriraanga maatsi kanuuywe]. ⁴Shichira tsinyiinga tsinyiinga tsyaliho tsi ingerosi yiikhaanga khu litavalya khutuuvula maatsi, na woyo wiikhaanga khurhaanga, ya hona vulwaale vweevwe vwoosi.⁵Ya liho muundu mulala yali mu vutekharhanu vweevwe khu lwi mihiika makhomi kavaka na munaane . ⁶Yeesu ya mu loola ni yakona namanya yali ndyo matukhu manyiikhi, ya mu voolera, "Weenya ukholwe mulamu?"⁷Muundu mulwaale mweene woyo ya muvoolera, "Mwaami, mbulakhu muundu unyala khumbiikha mu litavalya inyiinga ya maatsi katuuvukhaanga.Muundu wuundi yiinjirhamu imberi waanje." ⁸Yeesu yamu voolera, "Siinjira uvukule shiseero shyooshyo nu khutysa."⁹Khaandi naho naho muundu yali ni yalwaala mweene woyo yahona, navukula shiseero shye nu khucheenda.Makhuuva yako kakholekha khu litukhu lyi Lisaapaato.¹⁰Khu lwayako vimiriri va vayahuuti vavoolera muundu yali na honyiinywee, "Liitukhu linu ni lyi lisaapato.Malako keerhu shikavuchiriraanga khuchiinga shiseero shyooshyo taawe." ¹¹Muundu umbonyinye amboolere, "Vuukula shiseero shyooshyo, ucheende."¹²Vamu rheeva, "Nu wina wakhuvoolera, "Vukula shiseero shyooshyo ucheende ?" ¹³Navutswa muundu wali na honyinywee, shiyali na manyi muundu wamuhonyinya shichira Yeesu yarhulaho mu vyivisu khurhula mu shituma shikali shyaliho.¹⁴Inyuma wa yaka Yeesu yamunyoola mu Liteembeeri na mu voolera, "Heensa, umali khuhonyinywa nuunundi! ukhakhola vwooni khaandi, khu shiindu shitaamaanu shiindi shivule khukhukwiirha." ¹⁵Muundu mweene woyo ya rhulaho natsya khuvoolera vimiriri va vayahuuti ndi Yeesu naye wali na mu honyinye.¹⁶Vimiriri va vayahuuti varhaanga khutaambitsa Yeesu, shichira yakhola shikholwa shyeeneyesho khu liitukhu li Lisaapaato. ¹⁷Yeesu yava voolera,"Paapa waanje yamenya vuli khase khoosi na yiinsilaanga khali khutuukha lweene yulu; khali na yiinse mbiitsilaanga khaandi." ¹⁸Shichira yaka vayahuuti vamuhiima ni lyeenya lyu khu mwiirha , shikali shichira yamunaka malako ki liitukhu lilisaapaato koonyene taawe, nikhali khaandi yalaanga Nyasaaye Paapa weewe, nu khwiikhola mweene alekhana na Nyasaaye.¹⁹Shichira yaka Yeesu yarhevula na va voolera, "Kyirikali , kyirikali muvoolera, Mwaana avulakhu vunyali vwu khukhola shiindu shyoosi khuvrhila khu tsingulu tsyeetsye mweene; navutswa anyala khukhola shiindu shyaalolaanga Paapa weewe na kholaanga shyoonyene; shichira vuli shiindu shyoosi shya Paapa akholaanga nashyo khaandi shyu Mwaana akholaanga. ²⁰Paapa yayaansa Mwaana, khaandi amu manyinyaanga khali viindu vikali vyeene vyu khukhola khuvira yivyi, khu voosi muliva ni liicheenya.²¹Khuli Paapa yisimukukhitsaanga vaandu vakhutsa khurhula mu liikutsa, nu khuvaha liiva mwooyo , khaandi ni ndyo Mwaana aheetsaanga vaandu va yaansitswaanga navo liiva mwooyo. ²²Paapa shya khalachiraanga muundu woosi mba; navutswa yaha Mwaana weewe vunyali vwoosi vu khukhalachira vaandu, ²³khu voosi vahe Mwaana luyali, mu injira indala yeene khuli vaheetsaanga Paapa luyali.Muundu wambakhanaanga khuha Mwaana luyali, shyaheetsaanga Paapa wa murhuma luyali taawe.²⁴"Muvooleraaanga kyirikali, ndi muundu uhuliraanga likhuuva lyaanje, khaandi asuuvira mu woyo wanduma, ali ni liiva mwooyo lyi mihika ni mihika.Muundu khuli mweene woyo, shyaliitsa khu khalachirwa taawe; navutswa ya rhula muliikhutsa nu khwiinjira mu liiva mwooyo.²⁵Kyirikali kyirikali muvoolera, inyiinga yiitsaanga, na nayo yiyi, lwa vaandu vakhutsa valiitsa khuhulira mwooyo kwu Mwaana wa Nyassaye, na yavo valihulira valiitsa khutsiiririra khuva mwooyo.²⁶Khuli Paapa ali ni liivamwooyo muye mweene khaandi ni ndyo yaloomba Mwaana weewe khuva ni liiva mwooyo muye mweene, ²⁷Paapa yaha Mwaana vunyali vwu khukhalachira vaandu, shichira naye Mwaana wu Muundu.²⁸Mukhacheenyi khu makhuuva yaka, shichira inyiinga iliitsa khutuukha lwa vaandu vakhutsa muviliindwa voosi, valiitsa khuhulira mwooyo kweekwe ²⁹nu khurhula mu viliindwa vyaavo:yavo valiiva vakhola malahi, valiitsa khwiisimukukha khurhula mu liikhutsa khaandi vatsiiririre khuva mwooyo. Navutswa yavo viitsa vave ni vakhola vwooni, valiitsa khwiisimukhukha khurhula mu likhutsa vakhalachirwe.³⁰"Mbulakhu shya nyala khukhola inse mweene khuvirhira khu vunyali vwaanje.Khalachiraanga vaandu khuloondekhana khuli Paapa amboleraanga,Khalachiraanga vaandu mu injira yu vuluunji, shichira shinjeritsaanga khukhola vularriri vwaanje; navutswa vulariri vwa Uyu wantuma yenyaanga. ³¹Niiva nyala khuhaana vushahidi khuloondekhaana khwiinse mweene, vushahidi vwaanje shyuvuli vwa kyirikali. ³²Navutswa khuliho nu wuundi umbaniraanga vushahidi; khaandi ndi ni liimanya ndi avoolaanga ka kyirikali khu loondekhana khu inse.³³Warhuma liikhuuva khu Yuhaana, naye na haana vushahidi khu loondekhana khu ka kyrikali. ³⁴navutswa inse shi mbuchiriraanga khunyola vushahidi khurhula khu vaandu; navutswa mboolaanga makhuuva yaka khu mu honyinywe. ³⁵Yuhaana yali khuli itaaha yakhaanga, ni kholitsaanga vulavu, khaandi mwa saangaalira mu vulavu vweevwe khu matukhu ma tiitiiti.³⁶Navutswa vushahidi vwa ndi navwo khu yinse mweene, nu vwu vunyali muno khuvirha vwa Yuhaana; shichira mihiinsi milahi mweere chya Paapa yaamba khu maliikhitsa, mihiinsi tsana chya kholaanga chyihaanaanga vushahidi ha vulavu ndi ni Paapa naye waanduma. ³⁷TPaapa yanduma naye uhaanaanga Mweene vushahidi khu yiinse.Mushiri khu hulirakhu mwooyo kweekwe anoho khulolakhu khuli a sasaanga khali ha tiitiiti heene; ³⁸khaandi likhuuva lyeelye shilimenya khu mu myooyo chyeenyu taawe; shichira mwayambakhana khu suuvira mu woyo wa yarhuma.³⁹Munye mukhaviritsa nu khu sooma vuli shiindu mu mahaandiiko matakatiifu, nu mukanakanaanga khunyoola mu liiva mwooyo li kha hera mba; na Mahaandiko Matakatiifu tsana nako kahaanaanga vushahidi khu yiinse, ⁴⁰navutswa khali ndyo, mwayambakhana khwiitsa khu yiinse mweene, khu munyole liiva mwooyo.⁴¹Shindeenya vaandu khumba vukhumi mba, ⁴²navutswa ndamanya khuli lwa muli.Khali ndamanya shyumwayaansa Nyasaaye mu myooyo chyeenyu taawe.⁴³Inse ndiitsa khuvirhira mu vunyali vwa Paapa waanje; navutswa mwa nyambakhana khunsinjiritsa.Niiva muundu wuundi anyala kwiitsa khuvirhira mu vunyali vweevwe mweeene; naye wa mu nyala khuvuchirira. ⁴⁴Munyala khu suuvira mu injira shina, niiva munyala khweenya vaandu va mwiitsoominye, navutswa shyu mucheelitsaanga khunyoola liitsoominywa khurhula khu Nyasaaye woonyenye taawe?⁴⁵Mukhava ni inganakani ndi niinse wa ni muyaale khu Paapa.Muusa naye wiitsa amuyaale shichira naye wa mwaviikhamu lisuuviritsa lyeenyu. ⁴⁶Niiva ni kyirikali mwali nu mwa suuvira Muusa, mwa khaasuuvire inse, shichira Muusa yahaandiika makhuuva khuloondekhana khu yiinse. ⁴⁷Navutswa niiva mwayambakhana khu suuvira, mu ka yahaandiika, munyala khusuuvira mu injira shina makhuuva kaanje?"

6¹Matukhu ma tiitiiti ni ka khavirha, Yeesu ya rhula natsya injerekha wi inyaansa ya Kalilaya, nayo khaandi ilaangwa inyaansa ya Tiperia. ²Shituma shikali shya vaandu shya muloonda, shichira vali ni valooli vilolekhitso vyeeveye, khuli yali na honyinye vaandu valwaale. ³Yeesu ya tiikulukha khu shikulu, ni yikhala haasi na veechitswi veeve.⁴( Litukhu lyi Lipaasaka, lilya lya vayahuuti lyaali lili hiimbi khutuukha.) ⁵Lwa Yeesu ya heensa naloola shituuma shya vaandu vanyiikhi , niviitsaanga ha yali nali , yamu rheeva Filipu, "Khukuula ndiina mikati chya vaandu yava voosi vanyala khulya?" ⁶(Navutswa Yeesu yacheeritsa Filipu; shichira ye mweene yali na manyi shiindu shyayali na tsitsaanga khukhola.)⁷Filipu ya rheevula, "Tsirupya tsi tsidinari tsimia tsiviri, shi tsinyala khukuula mikati chya vaandu yava khusuchira voosi taawe!" ⁸Mulala khu veechitswi veeve walaangangwa Andereya, nali amwaavo Simoni Peetero, yavoolera Yeesu , ⁹"Mwaana wi shiyayi ali hanu ni mikati chirhaanu ni tsisuutsi tsiviri, navutswa vaandu yava ni vanyiikhi shivanyala khusuchira taawe."¹⁰Yeesu yavavoolera, veechitswi veeve, "Vooleri vaandu viikhae haasi." Havuundu heene yaho hali ni shikuurhi shinyiikhi.Khu lwayako, vaandu vasaatsa veenyene vikhalaho, voosi tsiheelefu tsirhaanu. ¹¹Yeesu ya vukula mukati, na saanditsa Nyasaaye, khaandi na kavulirha vaandu vali ni vikhaaleho; khaandi ya khola ndyo malala meere khu tsiisuutsi; ma vaandu ni vakavulilwa mu vunyiikhi khuli venyaanga. ¹²Lwa viikura, ni vakhalya, Yeesu ya voolera veechitswi veeve, "Vunjeeritsi matonye kyi shyukhulya shirhikale, khu khuvule khukoritsakhu shiindu shyoosi."¹³Veechitswi veeve va vunjeeritsa matonye kyi mikati chyali ni chyirhikale ni chitsula mu mihiinda likhomi na chyiviri, vaandu ni vakhamala khulya. ¹⁴Lwa vaandu valoora shilolekhitso shya Yeesu yali na kholi vavoola, "Ni kyirikali, uyu naye muporofeti wenyekhaanga ave ni yiitsa mu shivala." ¹⁵Lwa yeesu yamanya vaandu veene yavo venyaanga khwiitsa khu muvukula khu tsingulu khumwaamihitsa, yiilukha natsya mu vikulu, wanyala khuvayo woonyene.¹⁶Lwa halukoloova hatuukha , veechitswi va Yeesu vakholomokha ni vatuukha khu inyaansa. ¹⁷Viinjira mu lyaarho, kwaambukha inyaansa khukalukha mu litaala lya Kapenamu.Vutukhu vwatuukha, navutswa Yeeus yali naashiri khukalukha khuvo. ¹⁸Imbuutsa inditoho yahuutsaanga , maatsi nikarhaanga khuhirhikana mu inyaansa.¹⁹Lwa veechitswi va Yeesu val vakhisuundakhu tsikilomita tsirhaanu anoho sita, valoola Yeesu.Yeesu yali na cheendaanga khu maatsi kyi inyaansa nali hiimbi khutuukha khu lyaarho.Veechitswi vali nu vurhii. ²⁰Navutswa Yeesu yavavoolera, "Niinse, mukharhii mba." ²¹Shichira yaka veenya khu mu vukula yiinjire mu lyaarho, nah naho lyaarho lyatuukha khulujiinga lwi shivala shyavatsitsaayo.²²Mukaamba kwa loondakhu, vaandu vali ni varhikaare khulujereka lwa vurhulayo, varhikala ni vasiinjire haluveka lwi inyaansa, vamanya ni lyaarho lilala lya veechitswi vatsiirhamu na Yeesu yarhikala vuchira khuniinamu, khu veechitswi vali ni varhuliho voonyene. ²³Malala khu maarho kali ni karhuli Tiberia kiitsa, ni kasiinjira hiimbi hi stituma shya vaandu vali nivalyilyireenje mikati chyu Mwaami Yeesu yalina saanditseenge.²⁴Lwa shituma shyaloola ndi yeesu anoho veechitswi veeve vavulaho, viinjira mu maarho keene yako; ni vatsya khukhaava Yeesu mu litaala lya Kapenamu. ²⁵Lwa vaandu va mu nyoola Yeesu nali khu luveka luundi lwi inyaansa, va mu rheeva, "Mweechitsi, ni saa shina ya utuukhi hanu?'²⁶Yeesu yavarheevulira, "Muvoolera kyirikali ,kyirikali, shikali mukhaava shichira mwaloola vilolekhitso taawe, navutswa shichira mwalya mikati nu mwiikurha. ²⁷Mukhakholi mihiinsi khu lu khunyoola shyukhulya shyoonekhaanga taawe, navutswa mukhole mihiinsi khu lu khunyoola shyuukhulya shihanaanga vulamu vwi mihika ni mihika.Yiishi nashyo shyuukhulya shyu Mwaana wu Muundu amuha munye , shichira Nyasaaye, uli Paapa, yatuuya khuye muhuuri kweekwe khumanyinya ndi yamuyaansa."²⁸Nalwo lwa vaandu veene yavo, varheeva Yeesu, "Shina shya khunyala khukhola,khu khutsyanyinye khukhola mihiinsi chya Nyasaaye? ²⁹Yeesu yavarheevulira, "Mihiinsi chya Nyasaaye yenya mukhole, nu khu mu suuvira mu woyo wa yarhuma."³⁰Vamurheeva, "Ni shilolehitso shina shyu unyala khukhola , shya khulolakhu khutuukhe khu suuvira mu yiiwe. Ni muhiinsi shina kwu ukhola? ³¹Vaakuuka veerhu valya shyukhulya shyilangwangwa maana, lwa vamenyaanga mu shyangalangwe, khuli Mahaandiiko Matakatiifu kavoolaanga,"Yavaha mukati kwa valya khurhula mwikulu."³²Yeesu yavavoolera, Muvoolera kyirikali, kyirikali, shyali ni Muusa yamuha mikati khurhula mwiikulu taawe; navutswa Paapa waanje naye umuheensaanga mukati kwa tooto khurhul mwikulu. ³³Mukati kwa Nysaaye ahanaanga ni woyo warhula mwikulu khaandi ahaanaaanga vulamu khu vaandu mu shivala." ³⁴Vaavoolera Yeesu, "Mwaami, umenye nu khuheensaanga shya khase khoosi mukati kweene yoko."³⁵Yeesu yavavoolera," Niinse mukati, kuhaanaanga vulamu. Muundu yiitsa khwiinse, shyanyala khuhulira insala taawe.Muundu yiitsa khu suuvira mu yiinse, shya nyala khuhulira vuluhu taawe. ³⁶Navutswa ndamuvoolera ndi, mumali khundoola yinse, ni khali shyu munyala khu suuvira taawe. ³⁷Vuli muundu woosi wa Paapa waanje amba, aliitsa khu yiinse , shinyala khu mu khuunga taawe;³⁸Shichira shindarhula mwikulu khwiitsa khu shivala khukhola vulariri vwaanje, navutswa khukhola vulariri vwa Uyu wanduma. ³⁹Vulariri vwa Nyasaaye wa nduma vuli ndi mbule khukorhitsakhu khali mmulala khu yaavo voosi vayaamba; navutswa ni ndakhisimukukhitsa voosi khurhula mu likhutsa khu litukhu lyi shiheri. ⁴⁰Yuvwu novwo vulaaliri vwa Paapa waanje, ndi khu voosi ulolaanga Mwaana khaandi nu khusuuvira mu ye, anyoole liiva mwooyo li khahera mba, khu ndiri musimukukhitsa khurhula mu likhutsa khu litukhu lyi shiheri."⁴¹Nalwo lwa Vayahuuti varhaangakhung'uung'uuna, shichira Yeesu yali na vooli "Niinse mukati kwarhula mwikulu." ⁴²Khu lwa yako, varheevana veene khu veene, "Shikali katooto ndi uyu ni Yeesu, mwaana wa Yosefu, muundu wa khwaamanya isee weewe na maama weewe? Anyala ndina khu khuvoolera,"Ndiitsa haasi khurhula mwikulu?"⁴³Yeesu yavarheevulira, "Leekhi khu nug'uung'uuna munye veene. ⁴⁴Muundu avulakhuho unyala khwitsa khu inse, Paapa wanduma na kha muleerhi khwi inse; khaandi niinse wiitsa khu mwisimukukhitsa khurhula mu likhutsa khu litukhu lyu khumalirikha. ⁴⁵Vaporofeeti vahaandiika, "Vaandu voosi valiitsa khweechitswa na Nyasaaye.Vuli muundu woosi uhuliraanga likhuuva lya Paapa khaandi yeeka khurhula khuye, naye wiitsaanga khu inse.⁴⁶Avulakhuho muundu woosi waloola Paapa, navutswa woyo warhula khu Nyasaaye; naye woonyene waloola Paapa. ⁴⁷Kyirikali, kyirikali muvooleraanga,:Muundu usuuviraanga naye uli ni liiva mwooyo lyi mihika ni mihika.⁴⁸Niinse mukati kuhaanaanga liiva mwooyo lyi kha hera mba. ⁴⁹Vaakuuka veenyu valya shyukhulya shya maana, lwa vamenyaanga mu shyangalaangwe, navutswa khali ndyo vakhutsa.⁵⁰Navutswa yuku nokwo mukati kwa rhula mwikulu, khu muundu ukulyaakhu avule khu khutsa. ⁵¹Niinse mukati kuli mwooyo kwarhula mwikulu.Niiva muundu aliitsa khukulyaakhu mukati yuku, aliitsa khumenya ni liiva mwooyo mihika ni mihika.Mukati kwa mbaanaanga shichira liiva mwooyo lya vaandu mu shivaala, nu muviri kwaanje."⁵²Khu lwayako Vayahuuti varhaanga khu haangalitsana veene khu veene ni vavoola, "Muundu uyu anyala khukhuha munjira shina inyama yu muviri kweekwe khukulyi?" ⁵³Yeesu yavavoolera, "Kyirikali, kyirikali, nu mukhaliire inyama yu muviri kwu Mwaana wu Muundu nu khung'waakhu masahi keeke, shyu mulava ni liiva mwooyo mu munye.⁵⁴Muundu woosi ulyaakhu inyama yu muviri kwaanje nu khung'waakhu masahi kaanje ali ni liiva mwooyo lyi mihika ni mihika, khaandi ndiitsa khu musimukukhitsa khurhula mu likhutsa khu litukhu lyu khumalilikha. ⁵⁵Muviri kwaanje ni shyukhulya shya kyirikali khaandi masahi kaanje ni shyukhung'waa shya kyirikali. ⁵⁶Muundu uliitsaanga muviri kwaanje nu khung'waa masahi kaanje, alatsyanyinya khu menya mu inse na inse ndamenya muye.⁵⁷Khuli Paapa ali mwooyo yanduma, khaandi ndi mwooyo shichira Paapa, khu muundu ulyaakhu inse, alatysaanyinya khuva mwooyo shichira inse. ⁵⁸Yukwu nokwo mukati kwarhula mwikulu khwiitsa haasi hanu,Shyukuli khuli mukati kwa vaakuuka veenyu valya ma ni vakhutsa taawe; navutswa muundu uliitsa khulyaakhu mukati yuku, alatysaanyinya khuva mwooyo mihika ni mihika." ⁵⁹Yeesu yavoola likhuuva lyeene yero, ni yeechitsaanga mu lisinakoochi lili mu litaala lya Kapenamu.⁶⁰Lwa valala khu veechitswi va Yeesu vahulira na voolaanga yaka, vavoola, "Yili ni lyeechitso liitinyu muno, Nu wiina unyala khulihulira?' ⁶¹Navutswa lwa Yeesu yamanya mu mwooyo kweekwe ndi veechitswi veeve vimonyaanga khu liivoola yiri, yavarheeva, "Kaa mbooli kanyala khuva kamunyakhitsaanga mu myooyo?⁶²Khu lwa yako, kaliitsa khuva karina lwa muliloola Mwaana wu Muundu na kalukhaanga mwikulu mwa ya menyaanga? ⁶³Rooho naye uhaanaanga liiva mwooyo; tsingulu tsyu muviri tsivula vukhoonyi vwoosi.Makhuuva ka muvoolere, ni Rooho khaandi kali liiva mwooyo.⁶⁴Navutswa khali ndyo, vaandu valala vali mu munye va kha suuviraanga taawe.'Yeesu yali ya manya khurhula mu lirhaanga muundu uliitsa khu mutsaama. ⁶⁵Yeesu ya tsitsachirira khu va voolera, "Yishi nashyo shivune shichiraanga ni mu voolera ndi muundu avulakhuho unyala khwiitsa khwiinse, ni yakharhumwa na Paapa."⁶⁶Khurhula inyiinga yeene yeyo, valala khu veechitswi va Yeesu va kalukha inyuma ni vambakhana khucheenda naye. ⁶⁷Yeesu yarheeva veechitswi veeve vali likhomi na vaviri, "Na munye shyumweenya khu ndekha ta, nu mweenye?" ⁶⁸Simoni Petero yamurheevulira, "Mwaami, nu wina wuundi wa khutsyaakhu? Yiiwe uli na makhuuva kyi liiva mwooyo likha hera mba, ⁶⁹na khwamala khukhusuuvira nu khumanya ndi uli Kristo Mutakatiifu wa Nyasaaye."⁷⁰Yeesu yavavolera,"Shindamurhovola munye voosi lihomi na va viri, navutswa khali ndyo, mulala mu munye wakwa Shetaani?" ⁷¹Yeesu ya lomolomaanga makhuuva khu loondekhana khu Yuuda mwaana wa Simoni Isikarioti, shichira naye wali na tsitsaanga khu mu tsaama Yeesu, naye nali mulala khu yavo likhomi na va viri.

7¹Inyuma wa makhuva yaka, Yeesu yacheenda cheenda mu lusomo lwa Kalilaya, shiyenya khutsya mu lusomo lwa Yudeya; shichira vimiriri va vayahuuti vali vakhava khuli khumwiira. ²Litukhu lyi lyilya lyu khuumbakha matiiri lya vayahuuti lyaali liri hiimbi.³Vamwaavo veeve vamuvoolera, rhula hanu utsi Ivuyuta, khu veechitswi voovo vatukhe khuloola mihiinsi chya ukholaanga. ⁴Shichira avula khuho muundu ukhoola shiindu shyoosi mbwiivisu, na mweene yeenya khumanyikhana havulavu. Niiva ukhoola viindu yivi, wiloolekhitse khu shivala .⁵Shichira khali vamwaavo veeve shivasuuvira khu muye taawe. ⁶Yeesu yamanya na vavoolera, inyiinga yaanje ishiri khutuukha : navutswa inyiinga yenyu iliho vuli khase khoosi. ⁷Munye vaandu vwu mushivala vaandu shivanyala khumuhiima, navutswa inse vambiimaanga shichira inse ndolekhitsa mihiinsi chya vakholaanga ni vwooni.⁸Munye tsii mu mulukha kweene yuku, inse shindatikhuulukha khutsyaamu taawe, shichira inyiinga yaanje ishiri khutuukha. ⁹Lwa Yeesu yali ni yakhavavoolera makhuuva yaka, yarikala mulusomo lwa Kalilaya.¹⁰Navutswa lwa vamwaavo veeve vali ni vamali khutsya khu mulukha kwa matiiri , naye khaandi yavaloonda .Shiyiloolekhitsa, navutswa khuli mwiivisu, ¹¹Vimiriri va vayahuuti vamukhava Yeesu muvucheni vweene yovo, nivarheeva, "Ali heena?"¹²Khaandi khwali ni ling'uung'uuna hakarhi mu vaandu shichira yee; shichira vaandi vavoola nu muundu mulahi, na vaandi vavoola awa; Navutswa akaata vaandu. ¹³Khali ndyo shiyaliho nu muundu yalomoloma havulavu khulooondekhana naye shichira varhya vimiriri va Vayahuuti.¹⁴¹⁵Na vimiriri va vayahuuti nivacheenya , ni vavoola" Muundu wuyu yamanya ndi manyiikhi ni tsindukurha na shiyatsisoomera taawe?" ¹⁶Yeesu yavarheevulira na voola, "Meechitso kaanje , shikali kaanje, navutswa ni keeke woyo waanduma.¹⁷Niiva muundu woosi yenyaanga khukhola vulaliri vwa Nyasaaye , alamanya khuloondekhana na meechitso yaka ni ka Nyasaaye anoho nomolomaanga kaanje mweene. ¹⁸Woyo ulomolomaanga shichira ye mweene yiyenyeraanga vukhumi vweevwe mweene; navutswa woyo akhaava vukhumi vwa woyo wamurhuma, mweene woyo nu wa ka tooto, khaandi shyalikhu nu vwoonekhu muye taawe.¹⁹Muusa shiyamuha malako? na avula khu ho khali mulala khumunye aliindaanga malako! Khulwayako shichira shina mukhavaa khunsirha? ²⁰Shituma shya vaandu vamurheevulira ni vavoola, "Yiwe uli ni litiimoni: ni wina ukhavaanga khukhwirha?²¹Yeesu yarheevula na vavoolera, yinse kholi muhiinsi mulala, na munye voosi kumucheenyinye. ²²Khulwayko Muusa yavaha shyishyevo (shikali shichira ni shya Muusa, navutswa ni shya vaakuuka) Na munye khu litukhu lyi Lisaabaato mushevelamu muundu.²³Niiva mwaana anyala khushevwa khulitukhu li lisaapaato, khuloomba lilako lya Muusa livule khutong'olwa, shichira shina muli nuvurhima khuyinse lwa mbonyinye muundu mu litukhu lyi lisaapaato? ²⁴Mukhakhalaki khuli lwa mulolaanga, navutswa mukhalake likhalaka lyuvulunji."²⁵Valala khu vaandu varhula Yerusalemi varheeva,"Shyali wuyu naye wavakhava viirhe? ²⁶Loolikhu, alomooloma vutswa ni shiviko, na shiva muvoolerakhu shiindu; vimiriri va manyi likali wuyu ni Kristo mweene? ²⁷Navutswa khumanyi wuyu warhulaanga; Lwa Kristo na yiitse, avula khu ho muundu aliitsa khumanya warhulaanga."²⁸Yeesu yamanya nahaansukha nu khweechitsa muliteembeeri, navoola " voosi mwamanya yinse, khaandi mwamanya wa ndulaanga; na shindiitsa shichira yinse mweene , navutswa woyo yanduma ni watooto, wa mu khamanyi. ²⁹Navutswa inse ndamumanya shichira ndarhula khuye, naye yanduma."³⁰Venya khumuchimira, navutswa avulakhu ho muundu yaviikha mukhono kweekwe khuye, shichira inyiinga yeeye yali ni shiri khutuukha. ³¹Khaandi vaandu vanyiikhi vali mushituma va mu suuvira, ni vavoola "Lwa Kristo aliitsa khwiitsa , yiitsa akhole vilolekhitso vinyiikhi khuvira vyu muundu wuyu akholi? ³²Vafarisayo vahulira vaandu ni vang'uung'uuna vindu yivi shichira ye; khaandi vafarisayo na vasalisi vakali varhuma vasikali vwu mwiiteembeeri va mukumirhe.³³Yeesu yamanya na vavoolera, khu inyiinga intiitiiti ndi na munye , khaandi manya ngalukhe khu woyo yanduma. ³⁴Muliitsa khu khaava, na shimulakhanyole taawe .Khaandi shimunyala khwiitsa yiweene yeyo taawe."³⁵Vayahuuti vamanya ni vavoola veene khu veene, amanya atsi heena hakhuvula khumunyola? Alatsya mu vaandu va salaana mu mataala kyivukuriki, khaandi khuveechitsa vakuriki? ³⁶Yiri ni livoola lya lukanu shina lya avooli, ndi muliitsa khumukhaava, na shyu muli munyoola taawe; khaandi heene yaho shimunyala khwiitsaho taawe?"³⁷Mulitukhu lyukhumalilikha khaandi likali lyeene lyu vucheni, Yeesu yasiinjira, na hantsukha,naavoola, muundu woosi, uli nu vuluhu, lekhi yiitse khuyinse, khaandi ang'wi. ³⁸"Woyo usuuvira mu inse, khuloondekhana khuli Maandiko Matakatiifu kavoolaanga, muunda mweemwe mulasenukhamu michera chya maatsi kyi liiva mwooyo".³⁹Navutswa yavoola yaka khu Rooho Mutakatiifu, wa yavo vasuuvira muye valinyoola; shichira Rooho Mutakatiifu yali nashiri khuhanwa, shichira Yeesu yali nashiri khukhuminywa.⁴⁰Khu lwayako vaandu vanyiikhi, lwavahulira livoola yili, "Kyirikali wuyu naye Muporofeeti". ⁴¹Vaandi vavoola, uyu naye Kristo, navutswa valala vavoola," Kristo shaliitsa khurhula mu litaala lya Kalilaya taawe? ⁴²Mahaandiiko Matakatiifu shikavoolaanga, Kristo aliitsa khurhula mu luvamba lwa Daudi, khaandi mu litaala lya Betselehemu, mwa Daudi yamenyaamu?"⁴³Khu lwayako khwali ni lyaavukhana mu vaandu shichira Yeesu. ⁴⁴Valala muvo venya khumuchimira, navutswa avula khuho muundu yatiira mukhono kweekwe khuye.⁴⁵Lwa vasikali vu khuliinda liteembeeri vakalukha, khu vasaalisi vakali na vafarisayo; nivavarheeva, shichira shina muvuli khu muleera ? ⁴⁶Vasikali vavarheevulirha ,"shyukhuli nu muundu unyala khulomoloma khuli muundu wuyu. "⁴⁷Vafarisayo vavarheevulira," munye khaandi mukaatiirwe? ⁴⁸Haliho nu mwimiriri anoho mufarisayo asuuvire muye? ⁴⁹Navutswa shituma shya vaandu yava vakha manyi malako ni valaamwa."⁵⁰Mulala khu vafarisayo, yali naliho wavalaanga Nikodemo, yavavolera , ⁵¹Lilako likhalachirakhu muundu woosi vuchira khumuhulikhitsa, khaandi khumanya ka kholaanga? ⁵²Vamurheevulira , nivavoola, yiwe khaandi nu mu kalilaya? Khaviritsa mu Mahaandiiko Matakatiifu uloole vulahi vweene, ulanyoola muporofeeti shyaanyala khurhula mu kalilaya taawe.⁵³Na vuli muundu yarhulaho na loonda injira yeeye, khutsya ingo weewe.

8¹Yeesu yaatsya mushikulu shya Mitseituni. ²khaandi mukamba kwa loondakhu mu mavweevwe yaatsya khaandi mu liteembeeri , vaandu voosi viitsa khuye ,niyiikhala haasi narhaanga khuveechitsa. ³Vang'ooti na vafarisayo vamulerera mukhali wa vaanyoola na heyaanga .khaandi vamuviikha hakarhi hii shituma .⁴Vamuvoolera, mweechitsi "Mukhali wuyu anyoolekhe muvuheeyi, mushikhoolwa sheene." ⁵Khuloondekhana mu malako keerhu ka Muusa yaakhuha, vaandu khuli yaava vatuukhana valaswee naa machina:navuutswa yiwe uvoola ndiina? ⁶Yaka vavoola shichira khumuchelitsa, vatuukhe khunyoola khuli vamuyala; naavutwsa Yeesu yiinama haasi, nang'oota mulukushi nishitere shyeeshye khuli shyahulilaanga ni vavoolanga.⁷Khu lwa vaatsiririra khu murheeva, yachiingula murwi , navavoolera, woyo avula vwooni khu muye , lekhi ave wuukhuraanga khulasa liichina khuye. ⁸Khaandi yiinama haasi, nang'oota mulukushi ni shitere shyeeshye.⁹Navutswa lwa vahulirha ndyo , vaandu voosi va rhulaho shya mulala, khurhaanjira khu valikhu vahiindira veene.Yeesu yarhikala ha weene yaho woonyene, nu mukhali mweene woyo na shisinjiire ho. ¹⁰Lwa Yeesu yachiingula murwi, navula khunyoola muundu woosi nakhali mukhali wooyo, yaamuvoolera, mukhali, valiheena vakhuyalaanga? Avulakhuho muundu akhukhalachiire? ¹¹Naye ya muvoolera muundu avulaho , Mwaami.Khaandi Yeesu ya muvoolera, khali yiinse shindakhukhalaachira: utsii, na ukhakhoola vwooni khaandi taawe.¹²Yeesu yaamanya na valomolomera, na nava voolera," Yiinse ndi vulaavu vwii shivala, woosi unoonda shyalacheenda mu shisuuundi taawe, navutswa alava nuuvulavu vwu vulamu". ¹³Vafarisayo va muvoolera, "Yiiwe wiiloorekhitsa mweene, vuloorekhitsi vwoovwo shyuvuli vwa tooto."¹⁴Yeesu yaavarhevulirha, nu khuvavoolera," Khali niiva ndilolekhitsaanga mweene, lilorekhitsa lyaanje ni lya kyirikali: shichira ndaamanya wa ndulaanga, khaandi wantsisaanga, navuutswa shyumunyaala khuvoola wandulaanga ni waantsitsaanga. ¹⁵Munye mukhalaka khuloondekhana nu muviri, yiinze shiikhalachira muundu woosi taawe. ¹⁶Khaandi ndyo niiva ndakhalaka, liikhalaka lyaanje nilya kyirikali, shichira shiindi weenyene taawe, navuutswa yiinse ndi na Paapa waanduma.¹⁷Kang'ootwa khaandi mu malako keenyu ndi lwa vashahidi vavili va vuchilitsanaanga, khu kavavoolanga ni kyirikali. ¹⁸Inse mweene mbanaanga vushahidi khwinse; khaandi Paapa wanduma, naye uhaanaanga vushahidi vwuundi khuloondekhana khuyinse."¹⁹Vamanya ni vamuvoolera, Paapa wowo ali heena?Yeesu yavarhevulila, munye shi mumanyi inse taawe, khali Paapa waanje; mulava nu mumanyi inse, muveere mu manye Paapa waanje khaandi. ²⁰Makhuva yaka Yeesu yalomoloma nali mulivikhiro lwayeechitsaanga muliteemberi, na shiyaliho nu mundu yamutiirakhu, shichira inyinga yeye yali niishiri khutuukha.²¹Yeesu khaandi yavavoolera "Inse ntsitsaanga na muliitsa khukhava, khaandi mulakhakhutsire mu vwooni vweenyu:khaandi wa ntsiitsaanga shimunyala khutukhaho taawe." ²²Vayahuuti vamanya nivavoola, nii yii yirhe mweene? Shichira avoolaanga, wa inse ntsiitsaanga shyu munyala khutuukhaho taawe?"²³Khaandi yavavoolera, "munye muli va haasi, inse ndarhula mwikulu, munye muli vishivala; inse shindi wishivala yishi taawe. ²⁴Khulwayako ndamuvolera, mulitsa khukhutsira mu vwooni vweenyu, shichira nu mukhasuuvira ndina INZE NAYE , mulakhutsira mu vwooni vweenyu."²⁵Khaandi varheeva Yeesu, Yiwe naye wiina? Na Yeesu yavavoolera, Ndi vutswa khuli ndamuvoolera khurhula mulirhaanga. ²⁶Ndi na makhuuva manyiikhi kwu khuvavoolera, nu khukhalaka khumunye:Navutswa woyo wanduma , ni wa tooto, khaandi mbooleraanga shivala viindu vya mbuliraanga khurhula khuye. ²⁷Khaandi shivaamanya ndi yavavolera makhuuva khuloondekhana khu Paapa.²⁸Yeesu yamanya na vavoolera, "Lwa mulichingula Mwaana wu Muundu ikulu, nalwo lwa muliitsa khumanya INSE NAYE, khaandi shivula khuho shiindu shyakholaanga inse mweene, navutswa khola khuli Paapa anseechitsaanga, khulomoloma viindu yivi. ²⁹Khaandi woyo yanduma ali niinse:Paapa shiyandekha weenyene taawe; shichira kholaanga viindu vimuyaansitsaanga vuli inyiinga yoosi. ³⁰Lwa Yeesu yalomoloma makhuuva yaka,vaandu vanyiikhi vasuuvira muye.³¹Yeesu yamanya navavoolera vayahuuti vali ni vasuuvire munye; ni mutsitsachirira mu likhuuva lyaanje; munye mulava veechitswi vaanje va kyirikali. ³²Khaandi mulamanya ka kyirlikali ,khaandi ka kyirikali kalavaloomba khuva vavoholole." ³³Vamurheevulirha, khutse khuli vwi lwiivulu lwa Aburahamu, khaandi shyi khwavaakhu mushivoho shyu muundu wuundi woosi: ka nyala khuva ndina uvolaanga, mu lava vavoholole?'³⁴Yeesu yavarheevulira, "Lyikali ,lyikali muvoolera woosi ukholaanga vwooni ni murhumwa wu vwooni. ³⁵Khaandi murhumwa shyamenyaanga mu insu matukhu koosi; navutswa mwaana wa haango amenyamu khatsotso. ³⁶Niiva mwaana alakhuloomba khuva muvoholore, ulava muvoholore wa kyirikali.³⁷Inse manyi vulahi muli lwiivulu lwa Aburahamu: navutswa mukhaavaanga khuunsirha, shichira likhuva lyaanje livula vwiiyangu mu munye. ³⁸Mboolaanga kandolaanga halala na Paapa waanje: khaandi munye mukholaanga ka mulolaanga khu paapa weenyu."³⁹Vamurheevulira niva muvoolera, Aburahamu ni paapa weerhu.Yeesu yavavoolera," mulava nu muli vaana va Aburahamu, muveere mukhole mihiinsi chya Aburahamu. ⁴⁰Navutswa mukhaavaanga khunsirha, yinse muundu uvavoolere ka tooto, ka mbuliire khurhula khu Nyasaaye:Yaka ni ka Aburahamu yakhakholakhu . ⁴¹Mukhola vikhoolwa vya paapa weenyu".Navo vamuhinjiitsa, nivavoola ",khutse shyukhwiivulwa mu vuheeyi mba:khuli na Paapa mulala woonyene, naye ni Nyasaaye."⁴²Yeesu yavavoolera, Niiva tooto Nyasaaye naye Paapa weenyu, shyumwakhayaansi, shichira inse ndarhula khu Nyasaaye khaandi ndi hanu nunundi.shindiitsa inse mweene , navutswa ya nduma. ⁴³Shichira shina muvula khumanya liilomoloma lyaanje?Ni shichira shimunyala khuhulira likhuuva lyaanje. ⁴⁴Muli va paapa weenyu Shetaani,khaandi lyikoomba lya paapa weenyu mulalirhwekhitsa .Yali mulumiindi khurhula mulirhaanga, khaandi shyamenya mu kakyirikali, Shichira katooto kavula muye.Lwa alomolomaanga vuvehi, yivolaanga mweene,shichira nu muvehi, khaandi ye naye paapa wu vuvehi.⁴⁵Khali lwa muvolera vwa tooto, shyu mu suuvira taawe. ⁴⁶Nu wiina khu munye unyala khuhaana vushahiti vwu vwooni vwoosi khuinse? Khaandi niiva mboolaanga vwa tooto, shichira shina muvula khuusuuvira? ⁴⁷Woyo uli wa Nyasaaye ahuliraanga makhuuva ka Nyasaaye: Khu lwa yako munye shyumunyala khukahulira taawe, shichira shyumuli va Nyasaaye.⁴⁸Vayahuuti vamanya va murheevulire, ni va muvoolera," shyukhuvoola vulahi ndi yiwe uli musamaria khaandi uli ni litiimoni?" ⁴⁹Yeesu ya varheevulira, "Inse mbula litiimoni, navutswa mbanaanga luyali khu Paapa waanje , navutswa munye shyu mu mbeetsa khu luyali taawe.⁵⁰Khaandi yinse shikhavaanga luyali lwaanje mweene:khuli nu mulala akhavaanga khaandi akhalakaanga. ⁵¹Lyikali, lyikali muvoolera, Niiva muundu alahulira makhuuva kaanje, shyalitsa khuloola likhutsa."⁵²Vayahuuti vamanya vamuvoolera,"Nunundi khumanyi uli ni litiimoni, Aburahamu yakhutsa, khaandi va porofeeti, na yiwe ukhuvooleraanga, muundu nachimira makhuuva kaanje, shyaliitsa khutsaatsama likhutsa. ⁵³Yiwe uli mukali khuvirha paapa weerhu Aburahamu, naye yakhutsa? Khaandi vaporofeeti vakhutsa:Yiwe wikhoola khuva wiina?"⁵⁴Yeesu yavarheevulira ",Inse ni ndiiha luyali mweene, luyali lwaanje lulava lwa vutswa; Ni Paapa waanje ambeetsaanga luyali, woyo wa munye muvoolaanga khuva Nyasaaye weenyu. ⁵⁵Navutswa shyu mu mumanyi; navutswa inse ndamumanya, khaandi niiva nyala khuvoola, shindamumanya manya mbe nindi muvehi khuli munye, navutswa ndamumanya, khaandi kholaanga likhuuva lyeelye. ⁵⁶Kuuka weenyu Aburahamu yasangaala khulola lyiitukhu lyaanje; khaandi yaliloola, nayaansa."⁵⁷Vayahuuti vamanya nivamuvoolera, yiwe ushiri khutuukha mihika amusini (makhomi karhanu), yiwe waloola Aburahamu? ⁵⁸Yeesu yavavoolera "Lyikali lyikali muvooleraanga, Aburahamu nashiri khuvaaho NIINSE ULIHO. ⁵⁹Vamanya nivavukula machina vamulase nako:navutswa Yeesu yivisa, na rhula ilwaanyi wi liteembeeri, naloondera hakarhi haavo, naavirha.

9¹Khaandi lwa Yeesu yali navirhaanga, yaloola muundu wali muvekhu khurhula mulyiivulwa lyeelye. ²Veechitswi veeve vamurheeva, "mweechitsi, nu wiina yakhola vwooni, nu muundu uyu, anoho ni viivuli veeve kachira yiivulwa muvekhu?"³Yeesu yavarheevulirha," uyu shiyakhola vwooni khali viivuli veeve, navutswa yiivulwa ndi khu mihiinsi chya Nyasaaye chyituukhe khulolekhitswa muye. ⁴Katuukhira khukhole mihiinsi cha Woyo yanduma, nukushiri mmbaasu: vutukhu vwiitsaanga , lwa muundu woosi akhanyala khukhola mihiinsi. ⁵Nishishiri mwirova, ndi vulavu vwiilirova."⁶Lwa Yeesu yali yakhamala khuvoola yaka, yasuutsa marhee haasi, naloomba litohi na marhee, khaandi namuvekha mutsimooni tsyu muvekhu matoyi yako. ⁷Namuvoolera, tsya wiisaave mu litavalia lya Siloamu, (lyiri khuvoola, khurhuma)Yatsya , naasava khaandi, yaakalukha nalolaanga.⁸Na varheende na vaandu valii ni valinivamulola nali muvekhu , vavoola, wuyu shyali naye yiikhalaanga nu khusava? ⁹Vaandi vavoola" wuyu naye" , vaandi vavoola afwanana naye, navutswa mweene yavoola", Inse naye"..¹⁰Khu lwayako vamurheeva, tsimooni tsyootsyo tsyikuukhe ndina? ¹¹Naye yavarheevulira muundu wa valaanga Yeesu aloombi vutohi, nukhumbekha mutsimooni tsyaanje; nu khumboolera, tsya mulitaavalia lya Siloamu, ma wiisaave mu :khaandi niitsya khwisaava, nukhunyoola liilola . ¹²Vamanya ni vamuvoolera, "Ali heena ukhuhonyinye?" Naye navarheevulira, "Manyi mba."¹³Vamanya nivamulera khu vafarisayo woyo waliinji muvekhu ma natsya imberi. ¹⁴Na lyaali mu liitukhu lyi lisaapaato lwa Yeesu yaloomba vutohi, nu khumwikula tsimoni. ¹⁵Heene yaho khaandi vafarisayo vaamurheeva khuli yanyoola khulola.Yavavoolera, avekhi vutohi khutsimoni tsyaanje ,na lwandisaavi, nu lweenuulu mali khulola".¹⁶Khulwayako khaandi vafarisayo valala vavoola, muundu wuyu shyali wa Nyasaaye, shichira shina akhaliindaanga lisaapaato taawe.Vaandi ni vavoola ka khavere ndina muundu mwooni akhole vilolekhitso khuli yivi? khaandi khwali ni lyaavukhana hakari havo. ¹⁷Khaandi vavoolera muundu wali muvekhu woyo, uvoola ndina khu muundu wuyu, yikule tsimoni tsyootsyo? Naye yaavoola, "Nu muporofeeti" ¹⁸Navutswa Vayahuuti shivaamusuuvira, ndina yali yavetsakhu muvekhu, khutuukha lwa valaanga vivuli veeve woyo yali naanyoli khulola.¹⁹Khaandi vavarheeva viivuli veeve," wuyu nu mwikhula weenyu wa muvoolaanga yiivulwa nali muvekhu? ka khavere ndina khalunu alolaanga?" ²⁰Viivuli veeve vavarheevulira, nivavoola," khumanyi wuyu nu mwaana weerhu, khaandi khwamwiivula nali muvekhu. ²¹Navutswa khuli anyoli khulola, khumanyi vaava, khali wumwiikule tsimoni tsyeetsye khumanyi taawe: ye nu muundu atuukhi; murheevi: alii lomolomera mweene."²²Makhuuva yaka viivuli veeve vavoola, shichira varhia Vayahuuti: Shichira Vayahuuti vali niva vuchiritsaane, ndina muundu woosi narheevula khu tsa, Yesu ni Kristo, aviikhwe ilwanyi wii Lisinakoochi. ²³Khulwayako viivuli veeve vavoola, "nu mu hiindira; murheevi."²⁴Khaandi vamanya valaange muundu yaliinji muvekhu, nivamuvoolera;" Haana litsoominya khu Nyasaye; khumanyi muundu wuyu ni mwooni." ²⁵Na muundu woyo yavarheevulira nu khuvavoolera; "Khali nava nu mwooni, anoho taawe, manyi mba,; shindu shilala shyamanyi, ndali muvekhu, na khaluunu ndolaanga ."²⁶khaandi vamanya ni vamuvoolera," a khukholere shina? Yiikule ndina tsimoni tsyootsyo?" ²⁷Yavarheevulira, Inse muvoolere khale, na shyu mweenyi khuhulira:Shichira shiina mwenyaanga khuhulira khaandi? munye mweenya khuvakhu veechitswi veeve khaandi?" ²⁸Vamanya ni vamukoondekhera, ni va muvoolera",Yiiwe uli mweechitswi weewe: Navutswa khutse khuli veechitswi va Muusa. ²⁹Khwamanya Nyasaaye yalomololma na Muusa: Navutswa muundu wuyu, shyukhumanyi warhulaanga ta."³⁰Muundu woyo yarheevula na vavoolera, Yaka ni ku khucheenyinya hanu, munye shyu mumanyi wa arhulaanga, navutswa yikule tsimoni tsyaanje. ³¹Khwamanya ndi Nyasaaye shya hulikhitsaanga vooni: Niiva muundu woosi alitsoominya Nyasaaye, khaandi akhola vulaliri vweevwe, amu hulikhitsaanga.³²Kurhula mu lirhanga lyi shivala shi ha huliilikhakhu muundu woosi yikula tsimoni tsyu muundu yiivulwa muvekhu. ³³Muundu wuyu alavula khuva nu wa Nyasaaye, shyavere akhole shiindu shyoosi taawe." ³⁴Vamurheevulira nivamuvoolera, "Yiiwe wiivulwa mu vwooni, ni shina shyuvoola ukweechitsaanga?" Na va mukhuunga atsii irwaanyi.³⁵Lwa Yeesu yahulira vamali khu mukhuunga khurhula mu lisinakoochi, khaandi lwa ya munyoola, ya muvoolera "yiwe usuuvira mu Mwaana wa Nyasaaye?" ³⁶Naye ya mu rhevulira navoola, Yee nu wiina , Mwaami, khu nduukhe khusuuvira muye?". ³⁷Yeesu ya muvoolera,, "yiiwe umali khumuloola, khaandi nayee ulomolomanga niiwe wuyu." ³⁸Muundu woyo yamuvoolera;""Mwaami, suuvire," naamusikamira.³⁹Na Yeesu yamanya navoola,"Shichira likhalaka ndiitsa mushivala, khuyavo vavulaa khuloola vatuukhe khuloola, na yavo valolaanga vatuukhe khuvekhulitswa" ⁴⁰Khaandi vafarisayo valala vali naye vahulira makhuuva yaka, ni vamuvoolera, "khali khutse khaandi khuli vavekhu ndyoono?" ⁴¹Yeesu yavavoolera, nu mwakhavere vavekhu, shyumuveere muve nu vwooni; navutswa nuundi muvoolaanga," khulolaanga" khulwayako vwooni vweenyu vurhikala na munye."

10¹Yeesu ya va voolera, "Kyirikali, kyirikali, muvoolera, ndi muundu uvula khwiinjira mu shiko shya makoondi khuvirhila mu mushirhivwa, navutswa yiinjirira haluveka, muundu woyo ni shihuuvi nu munuuli. ²Navutswa muundu wiinjiraanga mu shiko shya makoondi khuvirhila mu shiliivwa naye mwaayi wa makoondi.³Muliindi wi shiliivwa amwiikulilaanga shiliivwa ; na makoondi ka hulirha mwooyo kweekwe.Alaanga vuli likoondi khu liirha lyalyo, khaandi aka rhulitsa ilwaanyi. ⁴Lwa aveetsaanga na mali khu ka rhulitsa makoondi keeke koosi irwaanyi, akimiriraanga, nako kamanya ka muloonda, shichira kamanya mwooyo kweekwe.⁵Makoondi shyi kanyala khuloonda muundu wuundi wa kakhamanyi mba; kamanya ka mwiirhukha, shichira shi kamanyi mwooyo kwa vaandu vacheeni." ⁶Yeesu yalomoloma lukanu yulu khu vafarisaayo, navutswa vakorwa khumanya ka lwali nu lu voolaanga khuvo.⁷Khu lwa yako ,Yessu ya va voolera khaandi, "Muvooleraanga kyirikali, kyirikali, ndi niinse shiliivwa shya makoondi ka virhiiramu. ⁸Vaandu vaandi voosi viitsa imberi waanje, ni shiri kwiitsa, yavo vali vihuuvi khaandi vali vanuuli, navutswa makoondi shyi kavahuliikhitsa taawe.⁹Niinse uli shiliivwa, niiva muundu woosi aliitsa khwiinjira khuvirhila mu yiinse, alahonyinywa; Aliitsa khwiinjiramu nu khurhula ilwaanyi, nu khu nyoola vwaayiro. ¹⁰Shihuuvi shitsaanga vutswa khwiiva, khwiirha, nu khutivitsa.Inse ndamala kwiitsa, khu vanyoole liiva mwooyo, khaandi va lyinyoole mu vwunyiikhi.¹¹"Niinse mwaayi mulahi.Mwaayi mulahi akhutsiraanga makoondi keeke. ¹²Muhiinsiri wu khuhaandiiwa ha tiitiiti khwaayitsa makoondi khu mirhuungu, shyali mwaayi mweene makoondi taawe.Lwa aloolaanga shing'ang'a ni shyitsaanga, alekha inyuma makoondi, a yiirhukha.Nalwo lwi shing'ang'a shitsuumbaa makoondi ,nu khu ka salaanyinya. ¹³Yiirhukha shichira, aveetsa ya samulitswa khwaaya makoondi khu mirhuungu khaandi shya heenderaanga makoondi keene yako mwoonyo mba.¹⁴Niinse mwaayi mulahi, ndamanya makoondi kaanje, khaandi makoondi kaanje kamanya yinse. ¹⁵Khuli Paapa yamanya, niinse ndamanya Paapa, na mbaana liiva mwooyo lyaanje khu khutsira makoondi kaanje. ¹⁶Ndi khaaandi na makoondi kaandi, navutswa shyi kali ku mushiko shya makoondi yishi taawe.Khuutuukha ndileerha makoondi keene yako.Kaliitsa khuhuliikhitsa mwooyo kwaanje khu khuliva ni shyayo shilala nu mwaayi mulala.¹⁷Paapa yanyaansa shichira ndayirhulitsa khukhutsa khu ndi li kalukhitsirwa liiva mwooyo khaandi. ¹⁸Avulakhu ho muundu unyala khurhulitsa mwiinse vulamu vwaanje.Navutswa niinse mweene ndirhulitsa khu khutsa, shichira lyeenya lyaanje.Ndi nu vunyali vwu khu khutsa ; khaandi vunyali vwu khuva mwooyo.Yaka nako ka Paapa waanje ya mboolera khole."¹⁹Khwaliho khaandi ni lyaavukhana mu vayahuuti shichira makhuuva yaka. ²⁰Khaandi vanyiikhi khu vo vaavoola, "Ali ni litiimoni na khaandi ukwiire mulalu. " ²¹Na vaandi va voola, "Shichira shina munye mutsirhirira khu muhuliikhitsa?" "Yaka shyikali makhuuva kwu muundu uli ni litiimoni.Litiimoni lyi nyala khwiikula tsimoni tsya vaandu vavekhu?"²²Matukhu kwu vushiindu katuukha; khaandi kaava inyiinga yu mulukha kwu khu takaasa liteembeeri Yerusalemi, ²³na Yeesu yali na cheenda cheenda mu liteembeeri ha valaanganga khu mukurhu kwa Solomoni. ²⁴Vayahuuti viivunjeeritsa nu khumu votong'aana nu khu khumuvoolera, "Weenya khumenye nu khuhaya hayaanga khutukha lina? Niiva uli Kristo, khuvoolere ka tooto havulavu."²⁵Yeesu ya varheevulira, " Ndaa mu voolera, navutswa shyu mu suuvira taawe: Mihiinsi chya kholaanga mu liirha lya Paapa waanje, chyi haana vushahidi khwiinse khu manyinya ndi wiina. ²⁶Navutswa munye mwa yambakhana khu suuvira shichira shyu muli makoondi kaanje.²⁷Makoondi kaanje kahulira mwooyo kwaanje; khaandi inse nda kamanya, khaandi ka noondaanga. ²⁸Inse ka heensaanga liiva mwooyo lyi mihika ni mihika; shyi kaliitsa khu khutsa taawe, khaandi avulakhu ho muundu unyala khu nuula makoondi keene yako mu makhono kaanje.²⁹Paapa waanje wamba makoondi keene yako, nu wu vunyali khuvirha voosi; muundu avulakhuho unyala khu munuula Paapa waanje makoondi keene yako. ³⁰Inse na Paapa waanje khuli shilala." ³¹Vayahuuti vatoola machina khaandi vamu lase Yeesu.³²Yeesu yavarheevulira, "Ndamu manyinya vilolekhitso vinyiikhi vyu khucheenyinya khurhula khu Paapa waanje. Ni shilolekhitso shina khurhula mwu vilolekhitso vyeene yevo, shichiraanga nu mweenya khu ndasa na machina.?" ³³Vayahuuti va murheevulira, "Shyu khweenya khu khulasa na machina shichira muhiinsi mulahi, navutswa shichira khunyeekana, shichira yiwe uli muundu, mweene wiikhoola Nyasaaye."³⁴Yeesu ya varheevulira, "Kavula khu ha kahaandiikwa mu marako keenyu ndi Nyasaaye yavoola, "Munye muli vanyasaaye." ³⁵Khwamanya ndi ka Mahaandiiko Matakatiifu kavoolaanga ni ka tooto mihika ni mihika, khaandi kavoola Nyasaaye yalaanga vaandu veene yavo vanyasaaye, vaandu virwaatsilwa likhuuva lyeelye. ³⁶niiva yavalaanga ndyo, na inse wa Paapa yarhovola nu khu nduma mu shivala, munyala khuvoola ndi khuye, Unyeeka Nyasaaye, shichira ndavoola, Inse ndi Mwaana wa Nyasaaye.³⁷Niiva shyikhoola mihiinsi chya Paapa waanje, lekhi khu suuvira mu inse. ³⁸Navutswa niiva kholaanga viindu vyeene yevo, khali nu muvula khu suuvira, suuviri mu mihiinsi chyeene yecho khu mutuukhe khuhulira nu khu manya, Paapa ali mu inse na inse ndi mu Paapa." ³⁹Vacheritsa khu mukumira khaandi, navutswa yarhula mu makhono kaavo.⁴⁰Yaatsya khaandi khu lujerekha lwa Yorodani hu vuundu ha Yuhaana yaansa khupatiisira, nu khumenya haweene yaho. ⁴¹Vaandu vanyiikhi viitsa khuye nu khuvoola, "Yuhaana mweene shyi yakhoolakhu vilolekhitso taawe, navutswa koosi ka Yuhaana yavoola khuloondekhana khu muundu wuyu vyali vyi likali. ⁴²Khaandi vaanudu vanyiikhi va mu suuvira haweene yaho.

11¹Muundu wuundi walaangwangwa Latsaro khurhula Petsania yali walwaala , mu litaala mwa Malya na amwaavo weewe Malita vamenyaanga . ²Malya nali mbootso Latsaro walwaalaanga naye wa vekha vileenje vyu Mwaami Yeesu makurha,; khaandi ni yeeya ni liiswi lyeelye vileenje vyeene yevo.³Khu lwa yako vaana vyi shikhaana vaanga Latsaaro veene yavo, varhuma likhuuva khu Yeesu, ni va voola "Mwaami, mulina woowo wa yiwe mweene wa yaansa alwaalaanga." ⁴Lwa Yeesu ya hulira ndyo, ya voola, "Vulwaale yuvwu , shyu vunyala khu mwiirha taawe, navutswa nu vulwaale vuliho, shichira vukhumi vwa Nyasaaye, khu Mwaana wa Nyasaaye aheelwe vukhumi khuvirhira mu vwo."⁵Yeesu yali yavayaansa malita na malya, halala na mbootso waavo Latsaro. ⁶Lwa Yeesu yahulira Latsaaro alwaalaanga, ya tsiiririra khumenya havuundu ha yali matukhu kaandi ka viri. ⁷Inyuma wa yaka, Yeesu yavoolera veechitswi veeve, "Haambi khutsii mu lusomo lwa Yudeya khaandi."⁸Navutswa veechitswi veeve vamuvoolera, "Mweechitsi, ni matukhu matiitiiti khavirhi, lwa Vayahuuti venyaanga khukhulasa na machina.Wenyaanga khukalukhayo khaandi ? ⁹Yeesu yavarheevulira, "Mbaasu shyukuli ni tsisa likhomi na tsiviri? Muundu ucheendaanga mmbaasu nu kwaakhaanga shyanyala khwiisikarhala taawe, shichira aloolaanga vulavu vwakhaanga mu shivala shinu.¹⁰Navutswa na cheenda vutukhu aliisikarhala, shichira vulavu shyuvuli mu ye." ¹¹Yeesu yavoola viindu yivi, na inyuma wa yivi yavavoolera, "Mulina weerhu Latsaaro umali khukona, navutswa inse ntsiitsaa khu muvukhitsa khurhula mu tsindoolo."¹²Veechitswi veeve va murheeva, "Mwaami, niiva Latsaaro umali khukona tsindoolo, ala soosa?" ¹³Yeesu yali ulomolome makhuuva khu loondekhana khu likhutsa lya Latsaaro; navutswa veechitswi veeve vali ni inganakani ndi Yeesu avoolaanga Latsaaro, umali khukona tsindoolo tsya ka tooto. ¹⁴Khu lwa yako Yessu yava voolera havulavu, "Latsaaro umali khukhutsa.¹⁵Khaandi sangalaanga, shichira munye, lwa mbuli khuvaaho, khu munye mutuukhe khu suuvira. Cheendi khutsi khu ye." ¹⁶Tomasi (wali ni liirha liindi Likhwaana), yavoola khu veechitswi veeshye, "Cheendi khutsi voosi nu mweechitsi, khu kanyalikha khukhutse na Yeesu!"¹⁷Lwa Yeesu ya tuukha ho, yanyoola Latsaaro na mali mu shiliindwa matukhu kaane. ¹⁸Litaala lya Petsania lyaali hiimbi tsikilomita tsivaka khurhula Yerusalemi. ¹⁹Vayahuuti vanyiikhi vali vayitsa khuleminya mwooyo malita na malya khuloondekhana khu likhutsa lya mbootso waavo. ²⁰Lwa Malita ya hulira Yeesu yali ni yiitsaanga, yatsya khu mwakanira, navutswa malya yarhikala ni yikhale muunsu.²¹Malita ya voolera Yeesu, "Mwaami ,niiva wakhaveere hanu, mbootso waanje shyiyavere wakhutsa taawe. ²²Navutswa manyi ndi shiindu shyoosi shyu utsitsaanga khurheeva khu Nyasaaye, Nyasaaye atsiitsa khu khuha." ²³Yeesu yamuvoolera, Mbootso woowo aliisimukukha khurhula mu likhutsa."²⁴Malita ya mu voolera, "Manyi ndi aliitsa khwiisimukukha khurhula mu likhutsa, khaandi khulitukhu lyu khumalilikha, lwa vaandu vakhutsa valiitsa khwisimukukhitswa khurhula mu likhutsa." ²⁵Yeesu ya muvoolera malita, "Ninse mwisimukukhitsi wa vaandu khurhula mu likhutsa nu vulamu;Muundu usuuviraanga mu inse, alatsilirira khuva mwooyo,khali niiva aliitsa khu khutsa, ²⁶khaandi muundu uli mwooyo khaandi asuuviraanga mu inse, shyaliitsa khu khutsa taawe.Unyala khuva usuuviraanga mu makhuuva yaka?"²⁷Malita yamurheevulira, "Ndyo, Mwaami ndi ni lisuuvira uli Masiya, Mwaana wa Nyasaaye, wiitsaanga mu shivala." ²⁸Lwa yali namali khuvoola yaka , yatsya khulaanga amvaavo weewe Malya mu vwivisu.Na mu voolera, "Mweechitsi ali hanu na akhulaanganga." ²⁹Lwa yahulira yaka , yasiinjira vwaangu na tsya khu ye.³⁰Yeesu yali na shiri khwiinjira mu mchitsi, navutswa yali nashiri ha yalomoloma na Malita. ³¹La vayahuuti vali ni vali muunsu valeminyaanga mwooyo Malya, valoola Malya na sinjiraanga vwaangu nu khurhula ilwaanyi, navo va siinjira nu khumoloonda, ni vali ni inganakani yali natsitsaanga khu shiliindwa khu lirirakhu. ³²Lwa Malya yatukha ha Yeesu yali nu khu mu loola, yakwa haasi hi vileenje vyeevye nu khu muvoolera, "Mwaami, niiva wakhaveere hanu, mbootso waanje, shyiyakha khutsi."³³Lwa Yeesu yamuloola na lilaanga, khaandi halala na vayahuuti viitsa naye ni vityukhi tsikhwiiri, yaverera mwu mwooyo kwekwe, nanyakhana; ³⁴Yavarheeva, "Ni heena ha mu rheele muviri kweekwe?" Navo vamu voolera, "Mwaami, haamba ukuloore." ³⁵Yeesu yalira.³⁶Nalwo lwa Vayahuuti va voola, "Loori khu khuli yali ni ya muyaansa Latsaaro!" ³⁷Navutswa valala khuvo va voola, "Nikava muundu uyu ya honyinya muundu wali muvekhu, shyi ya khikaliire Latsaaro khuvula khu khutsa?"³⁸Lwa Yeesu yali na veerere muno mu mwooyo kweekwe khaandi, yatuukha ha shiliindwa; shiliindwa shyeene yesyo shyali luhaangaywa, khaandi lichina lyali ni likhunikwee mwu vwiinjirhiro vwi shiliindwa tsana. ³⁹Yeesu yavavoola, "Rhulitsikhu lichina yiri". Malita, mbootso weewe Latsaaro, woyo yali na khutsi, yamu voolera Yeesu, "Mwaami khurhula nu khumurha na nuunundi yaansi khukuunda nu khuhunya , katuukhi matukhu kaane khurhula na khutsa." ⁴⁰Yeesu yamuvoolera, "Shimbere ni khu voolere ndi niiva unyala khu suuvira , ulaloola vukhumi vwa Nyasaaye?"⁴¹Vamanya va rhulitsa khu lichina mwu vwiinjirhiro.Yeesu ya toovana mwikulu na voola, "Paapa waanje . Khu saanditsaa shichira umali khumbulikhitsa. ⁴²Ndamanya ndi vuli khase khoosi umbulikhitsaanga, navutswa mbolaanga yaka khu khoonya vaandu vasinjiire haandi hanu, khu vatuukhe khu suuvira ndi niiwe wa nduma."⁴³Lwa Yeesu yali ni yakhavoola ndyo, yalaanga nu mwooyo mukali, "Latsaaro, rhula mu shiliindwa!" ⁴⁴Mukhutsu mweene woyo yarhula ilwaanyi. Vileenje vyeevye na makhono keeke ni vishyinatsirhwe ni tsinguvu tsyu mushiliindwa.Khaandi mu mooni mwee nu muvotokhanyilwe vitaambaya.Yeesu ya va voolera, "Mu vohololi acheende."⁴⁵Na vayahuuti vanyiikhi vali ni viitsi khu leminya Malya mwooyo valoola ka Yeesu yakhola, va musuuvira. ⁴⁶Navutswa valala khuvo va rhulaho nu khutsya khu vafarisayo khu vavoolera viindu vya Yeesu yali na kholi.⁴⁷Nalwo lwa vafarisaayo na vasaalisi vakali ,vaakana na vaandu vyi shyikalo, ni va voola" Khu nyala khu khola shina?'Muundu wuyu khu akhola vilolekhitso vinyiikhi muno. ⁴⁸Niiva khu la mulekha atsiririre khuli akholaanga ndi, vuli muundu woosi ala suuvira muye; khaandi Varoma vanyala khwiitsa khwononyinya liteembeeri lyeerhu ni shivala shyeerhu."⁴⁹Muundu malala khu vafarisaayo walaamgwangwa Kayafa wala nali musaalisi mukali wa vasaalisi voosi khu muhika kweene yoko, yavavoolera, "Munye mulikhu ni shiindu shyoosi shya mwamanya mba.! ⁵⁰Shyumuloola khu ndi nu vulahi khulekha muundu mulala khukhutsira vaandu voosi vukhala vwi shivala shyeerhu shyoosi khutivitswa.⁵¹Shyiyavoola yaka khuvirhila khu vunyali vweevwe mweene taawe.Navutswa, yee khuli mukali wa vasaalisi voosi khu muhika kweene yoko, yahaana vuporofeeti ndi Yeesu aliista khukhutsira luhya lwi shivala shya vayahuuti; ⁵²khaandi shyikali khu lwa vo voonyene taawe, navutswa aliitsa khu khutsira vaandu voosi, khu vaana va Nyasaaye vasalana ha woosi vutuukhe khuvunjeeritswa halala khuva muviri mulala. ⁵³Khulwayako khurhaanjira khu litukhu lyeene yero,vimiriri va vayahuuti varhaanga vyikhalo vyu vulookhitsi khuli Yeesu anyala khwiirhwa.⁵⁴Shichira yaka, Yeesu shyi ya cheenda khu mu lusomo lwa Vayahuuti khaandi havulavu taawe, navutswa ya hamirha mu shivala shiri hiimbi ni liicheendanyama lyiri ni litaala lya Ifurahimu.Yiweene yeyo yamenya yo na veechitswi veeve. ⁵⁵Lwi litukhu lyu mulukha kwi Lipaasaka lya vayahuuti lyali lituukhaanga, vaandu vanyiikhi varhula mu mataala kaavo vatsya Yerusalemi muliitakasa litukhu lyeene ni lyishiri khutuukha.⁵⁶Vatsyanyinya khu khaava Yeesu, ni vavoolerana veene khu veene, lwavali ni vasiinjire mu liteembeeri, "Muloola ndina?" Ni ka tooto amanya a vule khwiitsa mu mulukha yuku?" ⁵⁷Khu lwi inyiinga yiyi, vasaalisi vakali na vafarisayo vali va haana munwa ndi muundu woosi wali namanyi wa Yeesu anyolekha, ahaane makhuuva khuvo khu vatsii iweeneyo khu mukumira.

12¹Matukhu sita nishiri khutuukha lituukhu lyi Lipaasaaka, Yeesu yiitsa mulitaala lya Betsaani , mu muchitsi mwa Latsaaro yamenyanga, woyo yi simukukhitsa khurhula mwu likhutsa. ²Khu lwayako va mu tiitiikhanira vamuloombera shyukhulya shya halukoloova, na Malita yali wu khuvakavulira shyukhulya, na Latsaaro yali ni viikhare halala nu khwiitira khu shiivwa na Yeesu. ³Malya yavukula iliita indala ya makurha kwu mwaayu mulahi kwi khwiivekha kali kwu vukuli vululu, kali kaaloombwa khurhula khu shyirhaakwa shilahi shyalaangwangwa inaridi, naaka tiintimula koosi khu vileenje vya Yeesu nu khumweeya ni liiswi lyeelye.Insu yeene yeyo yoosi yiitsula mwaayu kwa makurha malahi keene yako.⁴Navutswa Yuuda Isikarioti, woyo yali mulala khu veechitswi va Yeesu, {wali na tsitsaanga khu mutsaama} yarheeva, ⁵"Shichira shina makurha kwu mwaayu mulahi kwi khwiivekha yaka kavuli khu kulitswa tsidinari tsimya tsivaka, ma tsishilinji tsyeene yetso tsilaheerwa vatakha? ⁶Shyikali yavoola ndyo, shichira khuheendera mwooyo vaandu vatakha taawe,; navutswa shichira yali shyihuuvi. Naye yali wu khuchiinga shyisiikolo shyi tsiseenti, khaandi yali yamenya ni yivaanga khurhula mu.⁷Na Yeesu yavavoolera, "Mu lekhe ave! Lekhi ambiikhire makurha yaka khutuukha litukhu lyukhuyavilwa khwaanje mu shiliindwa. ⁸Shichira niiva ni vatakha, veene yavo mulatsirira kuva navo vuli khase khoosi:Navutswa shyu numuvetseenge niinse inyiinga yoosi taawe."⁹Lwi shituma shya vaandu vanyiikhi va hulira Yeesu yiitsi mu litaala lya Petsania; vasimukha nu khwiitsayo.Shyiviitsa yo shichira khumuloola Yeesu weenyene, navutswa khaandi vatukhe khu muloola Latsaaro, woyo mweene nu mweene wa Yeesu yali ya mu simukukhitsa khurhula mu vakhutsu. ¹⁰Khu lwa yako khaandi vasaalisi vakali vikhalitsa shina shyu khulokhitsa khuli vanyala khu mwiirha Latsaaro; ¹¹shichira lisimukukhitswa lyeelye lyali lyiloombi vuyahuuti vanyiikhi khulekhano navo nu khusuuvira mu Yeesu.¹²Mukaamba kwaloondakhu, shituma shya vaandu vanyiikhi vali ni viitsa mu lyiilya . lwa vahulira ndi Yeesu yiitsa Yerusalemi, ¹³vavukula tsiisya tsya mashiindu, khaandi ni vatsya khu mwaakanira, nu khukhupa isaango yu khuvoola, "Hosaana, Akasitswee wuyu witsanga khuvirhila mu liirha lyu Mwaami.Akasitswee Mwaami wa Israeli!"¹⁴Yeesu ya nyoola shimooli shijirishi shyi isukhiri na niina khu shyo, khuli Maandiko Matakatiifu kavoolaanga, ¹⁵"Ukharhia, Litaala likali lya Sayuni, mukharhi mba, looli Mwaami weenyu yiitsaanga, khaandi ni yiikhaale khu shimooli shijirishi shyi isukhiri."¹⁶Munyiinga yeeneyo veechitswi va Yeesu shivali ni vamanyi viindu yivi na shya kavoolaanga; navutswa lwa Yeesu yamala khu khuminywa, nalwo lwa viitsukhitsa ka Maandiiko Matakatiifu kavoolaanga khuye, khaandi khuli vaandu vali ni va mukholeere.¹⁷Shituma shya vaandu vali ni va verheenje na Yeesu inyiinga ya yamulaanga Latsaaro khurhula mu shiliindwa nu khumusimikukhitsa khurhula mu likhutsa, vatsiririra khulaanditsa ndi valoola liloolekhitsa yiri moni na moni. ¹⁸Yishi nashyo shilala khu vivune , na shyachira vaandu vasimkhe khutsya khu mwakana na Yeesu; shichira vali vahulire ndi yali ukholi shilolekhitso yishi. ¹⁹Khu lwayako vafarisayo vavoolerana veene khu veene, "Heensi, khuli khuho shindu shya khutsitsaa khukholo mba, looli khu, vaavdu voosi vamuloondaanga."²⁰Mu vaandu vali vatsitsaanga khu saala lyi Lipasaka, valalamu vali vakurhiki. ²¹Veene yavo vatsya khu Filipu, warhulaanga mu litaala lya Betsesaida ya kalilaya, ni vamurheeva, 'mwaami, khweenyaanga khuloola Yeesu." ²²Filipu yamanya natsya khuvoolera Andereya, na vo voosi vaviri vatsya khmuvoolera Yeesu.²³Yeesu yavarheevulira nu khu vavoorera, "Isaa imali khutuukha yu Mwaana wu Muundu khu heerwa vukhumi. ²⁴Kyirikali, kyirikali, muvoolera, lukuutsa lwi inganu nu lu shiri khukwaa haasi mumarova nu khukhutsa, lu rhikala vutswa lwoonyene; navutswa nu lukhtsa, lumanya lwaaminya tsyiimu tsinyiikhi.²⁵muundu uyaansaanga liiva mwooyo lyeelye, aliitsa khu likorhitsa; navutswa muundu wakhayaansa khu liiva mwooyo lyeelye mu shivala shinu, aliitsakhu nyoola vulamu vyi liiva mwooyo lyi mikhika ni mihika. ²⁶Niiva muundu alenya khundumikhira, anoonde haamba niindi, na haweene yaho naho hu murhumikhi waanje ava.Niiva muundu woosi andumikhiraanga, Paapa waanje alamuha luyali.²⁷Khaandi Yeesu yavoola, "Khaluunu nyakhanaanga mu mwooyo kwaanje, nyala khuvoola shina? Paapa mbonyinya yikalira isaa yeene yeyo khuvula khwiitsa? Niikhali ndiitsa mwirova shichira isaa yiyi. ²⁸Paapa khuminya liirha lyoolyo!"Nalwo lwu mwooyo kwarhula mwiikulu nu kuvoola, "Mali khulikhuminya, khaandi ndiitsa khulikhuminya khaandi." ²⁹Khu lwayako shituma shya vaandu vali ni vasiinjire heene yaho vahulira mwooyo kweene yoko.Valala va voola vahulira nu kuhirhikanaanga khuli liikulu, na vaandi ni vavoola"Ingerosi ilomolome khu Yeesu."³⁰Yeesu yarheevula nu khu voola, "Mwooyo yuku shyu kwiitsi shichira yiinse, navutswa shichira munye. ³¹"Linu nalyo litukhu lyu khu khalachirwa lya vaandu vu mu shivala :Khaluunu mwaamihi wi shivala shinu aliitsa khusuuvwa ilwaanyi.³²Khaandi lwamba ni ndakhajiingulwa ikulu wi lyirova ,ndiitsa khukweesa vaandu voosi khwitsa khu yinse. ³³Yavoola yaka khwu lwu khuvuula ndi ni likhutsa lya lukanu shina lya aliitsa khukhutsa.³⁴Vaandu navo vamurheevulira, "Khutse khwahulira khurhula mu lirako ndi Kristo aliitsa khumenya vuchira khukhutsa. "Unyala khuvoola ndi Mwaana wu Muundu khutuukha alijiingulwa ikulu? Na nu wiina mweene wa ulaangaanga Mwaana wu Muundu? ³⁵Yeesu yavavoolera, "Vulavu vulava na munye khu lwi inyiinga intiitiiti.Khu lwa yako mucheende lwa kushiri mmbasu, khu shisuundi shyilivula khumukhunikha nu khumukuurha.Muundu ucheendaanga mu shisuundi shamanyaanga wa avetsaanga na tsitsaanga taawe. ³⁶Lwa mu shishiri nu vulavu musuuvire mu vulavu khu muloombekhe khuva vaana va Nyasaaye ," Yeesu ni yakhavoora viindu yivi, yasimukha nu khutsya khwiivisa khurhula khuvo.³⁷Khali niiva Yeesu yakhoola vilolekhitso vinyiiskhi imberi waavo, vo vaambakhana khu suuvira mu ye; ³⁸Khu makhuuva kwu muporofeeti Isaaya yali ni yavoola katuukhe khurhweekhitswa: "Mwaami Nyasaaye nu wiina wa suuvira likuuva lya khwavoola? Nu wiina wu Mwaami Nyasaaye ya manyinya tsingulu tsyetsye?"³⁹Shichira shivune yishi shi vali vanyala khu suuvira mba, shichira khaandi Isaaya yali yavoola, ⁴⁰"Yavavekhulitsa tsimoni tsyaavo khu va vule khuloola, khaandi ya tiinyinya myooyo chyaavo khusuuvira, ni ka khali ndyo vakhalooli ni tsimoni tsyaavo nu khumanya mu myooyo chyaavo, avakalukhane, na ndakha va honyiinyee."⁴¹Isaaya yavoola viindu yivi shichira yaloola vukhumi vwa Yeesu na lomoloma khuloondekhana khu ye. ⁴²Khali ndyo vanyiikhu mu vimiriri va vayahuuti vasuuvira mu Yeesu; navutswa shichira varhia vafsrisaayo, shivavoolakhu havulavu, khu vavule khukhuungwa khurhula mu lisinakoochi. ⁴³Vimiriri va vayahuuti vali vayaansa vaandu khu vitsoominyi khuvirha Nyasaaye khuvitsoominya.⁴⁴Yeesu yahantsuukha nu mwooyo mukali na vavoolera, "Muundu usuuviraanga mwi inse, shyali asuuviraanga mu yinse woonyene navutswa a suuviraanga khaandi mu woyo wa nduma, ⁴⁵Muundu ulolaanga yinse khaandi alolaanga woyo wanduma.⁴⁶Ndayitsa mu shivala khuli vulavu, khu woosi usuuvira mu yinse avule khumenya mu shisuundi. ⁴⁷Niiva muundu alhulira likhuuva lyaanje na uvule khuliloonda, shimukhalachiraanga taawe; shichira shindiitsa khukhalachira vu mushivala mba, navutswa ndiitsa khu va honyinya vu mushivala.⁴⁸Muundu unyambakhanaanga, khaandi shyavuchiriraanga makhuva kaanje, ali na woyo uliitsa khu mukhalachira.Makhuuva ka nomolomaanga kaliitsa khu mu khalachira khu lituukhu lyi shiheri. ⁴⁹Shichira shindalomoloma khuvirhila khu vunyali vwaanje meene taawe; navutswa Khuvunyali vwa Paapa wanduma, naye mweene umboolere ka mboola khaandi khuli mboola. ⁵⁰Manyi vulahi ndi lilako lyeelye lyavoolaanga, nalyo lyihanaanga vulamu vwi mihika ni mihika.Khu lwa yako, vuli shindu shoosi shya mboolaanga , mboola shya Paapa waanje ambooleraanga mboole."

13¹Yali inyiinga yi litukhu lyi lipasaka lyali ni lishiri khutuukha.Yeesu yalia na manyi isaa yeeye yu khurhula mu shivala shinu nu khu tsya khu Paapa yali ni tuukhi.Yali ya yaansa vaandu veeve vyu mu shivala, khaandi yali yavayaansa mbirhilira. ²Ibilisi yali umali khuvikha mu mwooyo kwa Yuda Isikarhioti mwaana wa Simoni, inganakani yu khumutsaama Yeesu.Khu lwa yako munyiinga vali valiitsyaanga shyulya shyu khulukoloova,³Yeesu -- nali nimanya ndi Paapa weewe yali yamuha vuli shindu shyoosi mu makhono keeke, na khaandi yali yarhula khu Nyasaaye na khaandi yali na kalukhaanga khu Nyasaaye -- ⁴ya siinjira lwa yamala khulya shyukhulya shyu khukonerera , na naavula inguvu ya yali ni yiifwaali yikhwiikulu.Na vukula itahulu nu khwivohera itahulu mu shisindi mweemwe. ⁵Niyakhakhola ndyo, yatsukha maatsi khu lukalahi narhaanga khuvasavitsa veechitswi veeve virheenje nu khuveeya ni itahulu yali mu shisiindi mweemwe.⁶Yeesu yisuunda hiimbi khu Simoni Petero , na Petero yamurheeva, "Mwaami , wenya usavitse virheenje vyaanje?" ⁷Yeesu yarheevula nu khu mu voolera, "Shyakholaanga lweene yulu shyunyala khumanya taawe, navutswa nu wiitse khushimanya khale." ⁸Petero yamu voolera,"Usavitsa vileenje vyaanje khali hti mba ." Yeesu yamurhevulira, "Niiva ndavula khu khusavitsa, umanya uve nu vula lisaanga lyoosi na yinse." ⁹Simoni Petero yamuvoolera, "Mwaami, ukhasavitsa vileenje vyaanje vyonyene mba, navutswa khaandi na makhono kaanje nu murwi kwaanje."¹⁰Yeesu yamuvoolera, "Muundu na mali khwisiinga asavaanga vileenje vyoonyene,shichira muviri kweekwe kwoosi kuvetsaanga nu kuli munihu.Munye muli vanihu, khali niiva shyumuli voosi vanihu taawe. ¹¹(Shichira Yeesu yali na manyi nu wiina wali natsitsaanga khu mutsaama, nasho shivune shachira navoola ,"Shyumuli voosi vanihu taawe.")¹²Lwa Yeesu yali ni yakhamala khu vasavitsa veechitswi veeve vileenje vyaavo, yiifwala tsinguvu tsyeetsye tsyu khwikulu , na kalukha ha yali ni yikhaleenje; lwa valitsaanga shyukhulya khu shiivwa.Khaandi yamanya avarheeve, "Munyala khumanya shivune shyi shikholwa shya kholi khu munye? ¹³"Munye shyu munaanganga mweechitsi khaandi Mwaami; na nuvulahi khu mukholaanga ndyo, shichira ni ndyo ndi. ¹⁴Niiva inse uli Mwaami weenyu khaandi Mweechitsi weenyu , mali khu musaavitsa vileenje vyeenyu, munye khaandi mutuukhana khu saavitsana vileenje vyeenyu. ¹⁵Mali khu mumanyinya, mwiima kwa munyala khuloonda khukhoola, khuli lwa inse mweene mu kholeere munye.¹⁶kyirikali , kyirikali, muvooleraanga , murhumikhi avulakhuho , uli ni tsingulu tsinyiikhi khuvirha murhuchi weewe; khaandi avulakhuho murhumwa uli nintsingulu tsinyiikhi khuvirha woyo wa murhuma. ¹⁷Lwa mwakhamanya nuunundi viindu yivi, muliitsa khu kaasitswa, niiva muliitsa khu vikhola. ¹⁸Shyi nomolomaanga makhuuva yaka khu munye voosi taawe; ndamanya vulahi yavo va ndamurhoovola,-- navutswa yaka kali ndyo khu Mahaandiko Matakatiifu ka tuukhe khu rhweekhitswa: "Ndi woyo wa khusaanga naye khulya khu mu kati kwaanje khaandi naye wangalukhana."¹⁹Muvooleraanga makhuuva yaka nuunundi ni kashiri khwiikholekha, khu lwa kalikholekha , mulituukha khusuuvira NIINSE ALIHO. ²⁰Muvooleraanga kyirikali ndi , muundu woosi wiinjilitsaanga wa inse ndumaanga. yiinjilitsa inse, khaandi woyo unyinjilitsaanga khaandi yiinjilitsaanga woyo wanduma."²¹Lwa Yeesu yali na mali khuvoola ndyo, yanyakhana mu mwooyo kweekwe.Ya haana lilolekhitsa lyu khu voola, "Kyirikali, kyirikali muvoolera, ndi mulaal khu munye atistsaanga khu ntsaama." ²²Veechitswi veeve vaheensana veene khu veene nu khucheenya yakhavere nu wiina wa yalomolomera khu.²³²⁴Simoni Petero yamusima nu khumu voolera, "Murhunikhitse khumanye nu wiina wa alomolomakhu." ²⁵Khu lwayako mweechitswi mweene woyo yisuunda hiimbi nu khusetema hambalu ha Yeesu nu khumurheeva, "Mwaami, wiina mweene wuyu?"²⁶"Nu wuyu wandoonjera shirhonje shyu mukati yuku nu khumuha lwa mba ni ndakhakwiina mu ibakuuri." Lwa yali amali khwiinikha shitonyeshyu mukati mu ibaakuli, yamuha Yuuda Mwiikhula wa Simioni Iskarioti. ²⁷Niyakhamala khumuha shitonye shyu mukati, Shetani yiinjira mu Yuuda , na Yeesu na muvoolera, "Khola ka wenyaanga khukhola yako vwaangu."²⁸Avulakhu khali mulala khu veechitswi vali ni vakooni ha shiivwa na Yeesu wamanyakhu shachira Yeesu na muvoolera ndyo. ²⁹Valal khu vo vakanakana, shichira Yuuda naye wachiingaanga shisikolo shyi tsirupya, khu Yeesu yamovoolera ndi "Tsyukule shyukhulya shyakhulya mu inyiinga yi lipaasaaka", anoho kali atsi khuhaana khu vukhoonyi khu vaandu vatakha. ³⁰Lwa Yuuda yali khunyoola mukati, yarhula irwaanyi vwaangu. Nu vutukhu nu vwiinjira.³¹Lwa Yuuda ya rhulaho, Yeesu yavavoolera veechitswi veeve, "Mwaana wu Muundu umali khuheerhwa vukhumi nuunundi, na khaandi Nyasaaye umali khukhuminywa khuvirhira muye. ³²Niiva Nyasaaye ukhuminywe khuvirhira munye, Nyasaaye naye na khuminye Mwaana wu Muundu muye mweene, na khaandi alamukhuminya vwaangu. ³³Munye vaana vatiitiiti, ndi na munye khu lwi inyiinga intiitiiti.Muliitsa khu khaava, na khuli lwa ndavavoolera vayahuuti, "Watsitsaanga shyumunyala khwiitsa yiweeneyo." Na khaandi malala meere nako kamuvoolera munye.³⁴Muheetsaanga lirako lyii hya nuunundi, mu yaansaane veene khu veene, khuli inse ndamuyaansa, khaandi ndyo mu yaansaane veene. ³⁵Niiva mulayaansaana veene mu injira yiyi, nalwo lwa vaandu voosi valiitsa khumanya muli veechitswi vaanje,"³⁶Simon Petero yamuvoolera, "Mwaami utsitsa heena?Yeesu yamurheevulira, "Watsitsaanga shyumunyala khu noonda yiweene yeyo khu lweene yulu taawe, navutswa mwiitsa munoondeyo khale." ³⁷Petero yamuvoolera, "Mwaami shichira shina mbule khukhuloonda iweene yeyo lweene yulu? Ndirhulitsa liiva mwooyo lyaanje khutse shichira yiwe." ³⁸Yeesu yamuvoolera, "Yiiwe ulirhulitsa khu haana liiva mwooyo lyoolyo ukhutse shichira inse.? Kyirikali, kyirikali, khuvoolera, itaaywa shyitsitsaa khulakula nushiri khu nyambakhana khali khavaka."

14¹Mukhaheendi myooyo cheenyu mba.Musuuvire mu Nyasaaye khaandi musuuvire mu yiinse. ²Insu ya Paapa waanje ili nu vwiyaangu vwu viko vinyiikhi. Nikakhaveere ndyo, ndakhamuvoolere, shichira tsitsaanga khu mu loombera vukono munye. ³Na lwatsitsaanga khu mu loombera vukoono ndiitsa ngalukhe khumuvukula yinse mweene, khu haamba niindi khaandi munye muve nu muveetsaanga ho.⁴Munye mwamanya injira yitsitsaanga wa tistsaanga." ⁵Tomaasi yamurheeva Yeesu, " Mwaami khutse khumanyi wa utsitsaanga taawe; khulamanya ndi injira yu khutsyaayo?" ⁶Yeesu ya murheevulira, "Inse naye injira, kyirikali , ni liiva mwooyo; avulakhuho muundu wiitsa khu Paapa na khavirhiire khu mu yiinse. ⁷Mulava nu mwamanya , khaand mwakhamumanyi Paapa waanje. Khurhula nuunundi mu mumanyi khaandi mu mali khu muloola."⁸Filipo yamuvolera Yeesu, "Mwaami, Kha khumanyinye Paapa, aluve lutuukhi khu khutse." ⁹Yeesu ya muvoolera, "Inse ndaava na munye khu lwu luhoono muno, na mushiri khu manya, Filipo? Muundu woosi wandoola yinse khaandi yaloola Paapa. Uvoola ndina khaandi khumanyinye Paapa?"¹⁰Shyumunyala khu suuvira khu inse ndi mu Paapa khaandi Paapa ali mu yiinse? Makhuuva ka nomolomaanga khu munye , shyi kalomolomaanga khu lwu vunyali vyaanje, navutswa ni paapa umenyaanga mu yinse ukholaanga miyiinsi chyeechye. ¹¹Musuuvire inse ndi mu Paapa, khaandi Paapa ali mu yinse, nikakhali ndyo khu suuviri khuloondekhana khu miyiinsi cha kholaanga.¹²Kyirikali, kyirikali, muvooleraanga, Muundu usuuvira mu yinse alakhola mihiinsi khu chakholaanga, khaandi alakhoola mihiinsi mikali khuvirha yiichi cha kholaanga shichira tsitsaanga khu Paapa. ¹³Shindu shyoosi shyu rheeva mu liirha lyaanje, Ndashi khoola khu Paapa atuukhe khukhuminywa khuvirhila mu Mwaana ¹⁴Niiva mu larheeva shindu shyoosi mu liirha lyaanje, nda mukholeera..¹⁵Niiva mwa nyaansa, mu laliinda malako kaanje. ¹⁶na ndasaala khu Paapa, na Paapa aliitsa khu muha mukhoonyi wuundi , wiitsa amenye na munye mihika ni mihika --- ¹⁷Rooho wu vwakyirikali.Vaandu vishyivala shyivanyala khu mwiinjiritsa shichira shivala shyishyi muloolaanga taawe, khaandi shyi shyimumanyi taawe.Navutswa munye mwamumanya shichira amenyaanga mu munye khaandi aliitsa khutsilirira khu menya mu munye.¹⁸Shindamulekha khuli vavisaandu taawe; ndiitsa khu kalukha khu munye. ¹⁹Khu lwi inyiinga ya matukhu matiitiiti kashiri khuvirha, vaandu vu mu shivala, shyivaliitsa khundoola khu, navutswa munye muliitsa khu ndoola.Shichira inse menyaaanga khaandi munye mulamenya. ²⁰Khu litukhu yero, muliitsa khumanya ndi menya mu Paapa na munye muli mu inse, na inse ndi mu munye.²¹Muundu ulii malako kaanje khaandi akaliindaanga, woyo naye wanyaansa, na wonyo wa nyaansa, alayaanswa na Paapa waanje, na khaandi yinse nda muyaansa, ndaloolekha khu ye." ²²Yuuda (Ukhali Yuuda Iskarioti navutswa wuundi) yamuvoolera Yeesu, "Mwaami, shichira shina uloolekhe khu khutse vonyene navutswa khuvula khuloolwa ni shivala?"²³Yeesu yamurheevulira nu khumu voolera, "Niiva muundu woosi yanyaansa, alaliinda makhuuva kaanje.Paapa waanje naye alamuyaansa,khuliitsa khuye nu khuloombe liimenya muye khuli haango heerhu. ²⁴Muundu unyambakhanaanga shyaliindaanga makhuuva kaanje muye taawe.Likhuuva lyu uhulirhaanga shyilirhulaanga mu yiinse navutswa lirhulaanga khu Paapa woyo wa nduma.²⁵Muvoolere makhuuva yaka , nishyiri na munye. ²⁶Navutswa, Mukhoonyi --- nali Rooho Mutaakatiifu, wa Paapa aliitsa khurhuma mu liirha lyaanje --- aliitsa khumweechitsa viindu vyoosi na khaandi aliitsa khu mwiitsukhitsa vyoosi vya ndamuvoolerakhu. ²⁷Mirheembe mulekherhaanga; muheensaanga mirheembe chaanje.Shyimuheensaanga mireembe khuli chya vaandu vwu mushivala vahaanaanga taawe.Mukhaheendi mwyooyo chyeenyu mba, khaandi mukhava nu vurhi mba.²⁸Mwahulira ni mu vooleraanga, "Ndulaaho nu khutsya, khaandi ndiitsa khukalukha khu munye. Niiva mwanyaansa, mulava nu vusaangari shichira tsitsaanga khu Paapa, shichira Paapa waanje nu wu vunyali vunyiikhi khumbirha. ²⁹Nuunu ndi mali khu muvoolera ni kashiri khwiikholekha khu, lwa kaliitsa khwiikholekha, muliitsa khu suuvira. ³⁰Shyitsitsaanga khu va nililomoloma liindi lyu luhoono na munye, shichira mwaami wi shivala yishi yitsaanga.Mwaamihi mweene wuyu shyali ni tsingulu khuvirha yinse, ³¹navutswa khu vaandu vyu mushivala vtuukhe khumanya ndi ndamuyaansa Paapa waanje, kholaanga vutswa vuli shindu shyoosi shya Paapa amboleraanga khole."Siinjiri nuunundi khurhule havuundu hanu."

15¹"Inse ndi khuli musaala kwu musapipu kwa kyirikali; na Paapa waanje naye museembereri. ²Arhemaanga vuli lusya lwoosi lulu khu yinse lukhamaanga matuunda,khaandi asosolaanga vuli lusya lwoosi lwamaanga matuunda khu lutuukhe khwaminya matuunda mu vunyiikhi.³Munye muli vanihu khale khurhulana khu meechitso ka ndamweechitsa. ⁴Mutyaanyinye khumenya mu yinse, na yinse tsyaanyinye khumenya mu munye.Khuvula khuho nu lusya lunyala khwaminya matuunda lweene taawe, nun lukhaveere khu musaapipu.Khaandi ni ndyo munye shyumunyala khwaaminya khu matuunda koosi nu mukhatsyanyinye khuva mu yinse.⁵Inse ndi musapipu, na munye muri tsisyaa tsyakwo.Woosi utsiririlaanga khuva mu yinse , na yinse khurhikala muye, yamaanga matuunda mu vunyiikhi, shichira vuchira yinse shivulakhuho shyumunyala khukhola. ⁶Muundu wambakhana khu menya mu yinse , ali khuli lusya lwarheemwa nu suuvwa ilwaanyi nu khuniala.Tsisya tsyarhemwa tsivunjeritswaanga nu khusuuvwa mu muliro, na tsimaanya tsisaambwa. ⁷Niiva ulamenya mu yinse, khaandi makhuuva kaanje ni kamnya mu yiwe, mularheeva shindu shyoosi shyamuva mwenyaanga, na mulakholelwa.⁸Khuvirhila mu lyaama matuunda khweenyu, Paapa waanje akhuminywaanga, khu lwayako mwaame matuunda manyiikhi khu kalolekhe khuva ni kyirikali muli veechitswi vaanje. ⁹Khuli Paapa yanyaansa khaandi ndyo na yinse ndamuyaansa.Mutsiririre khumenye mu vuyaansi vwaanje.¹⁰Niiva mula tsiririra khuloonda malako kaanje, mulatsirira khuva mu vuyaansi vwaaanje, khuli lwa inse noondaanga malako ka Paapa waanje khaandi ntsiririlaanga khumenya mu vuyaansi vweevwe. ¹¹"Muvoolere vindu yivi, khu vuyaansi vwanje vutsyaanyinye khuva mu munye, khaandi khu vuyaansi vweenyu vutuukhe khwiitsula.¹²Yiri nalyo lilako lyaanje, muyaansane khuli inse ndamuyaansa. ¹³Vuyaansi vukali vwu muundu anyala khuyaansa valina veeve nu khuhaana liiva mwooyo lyeelye khuvakhutsira valina veeve.¹⁴Munye muli valina vaanje, niiva mulakhoola koosi kamuvoolera khukhola. ¹⁵Khurhula nuunundi shi ndatsyaanyinya khumulaanga varhumikhi vaanje taawe, shichira varhumikhi vakorwa shyu murhuchi waavo akholaanga.Navutswa ndamulaanga valina vaanje, shichira mali khu muvuulira vuli shiindu shyoosi shya ndeeka khurhula khu Paapa waanje.¹⁶Shyumuli nu munye mwandovola taawe, nikhali ni inse wamurhovola nu khumuvikha mutsi khwaama matuunda , na khaandi matuunda keenyu katuukhe khumenya.Kali ndyo khu koosi ka murheeva khu Paapa khuvirhila mu liirha lyaanje, alamu ha. ¹⁷Muvooleraanga, "Muyaansane veene khu veene¹⁸Niiva vaandu vwu mu shivala vamuhiimaanga, khutuukha mu manye ndi, vali nu vuhiimwa khu yinse khurhula mulirhaanga. ¹⁹Niiva mwakhaveere vaandu vyi shivala, shivala shakhamuyaansi khuli vaandu vashyo.Navutswa shichira shyumuli vaandu va shyo na ndamurhoovola khurhula mushivala, nalwo lwi shivala shimwambakhanaanga.²⁰Mwiitsukhitse makhuuva ka ndamuvoolera: "Muhinsiri shyali nu vunyali khuvirha murhuchi weewe taawe.Nikava vandambitsaanga, valiitsa khu mutaambitsa munye khaandi.Niiva valoonda meechitso kaanje, khaandi ni ndyo valiitsa khuloonda meechitso keenyu. ²¹Navutswa vaandu valiitsa khu mukholera viindu yivi vyoosi shichira liirha lyaanje, na shichira shyi vamumanya wanduma. ²²Ndava ni ndavula khwitsa khulomoloma khuvo, vakhaveere vave ni vavula vwooni, navutswa nuunundi va vula shivune shavishingilakhu khu va voolere va vula vwooni .²³Muundu unyambakhanaanga , yambakhana khali na Paapa waanje. ²⁴Kalava shyindakholakhu mihiinsi muvo, chya muundu wuundi ashiri khukholakhu, shivakhaveere nu vwooni taawe; navutswa shichira vamala khuloola na nalwo lwa vanyambakhanaanga halala na Paapa waanje. ²⁵Navutswa kali ndyo khu lwu khurhweekhitsa likhuuva lyahaandiikwa mu Malako kaavo, "Vanduunyira vuchira shivune shyoosi."²⁶Lwa mukhonyi alituukha --- Woyo wa ndilimurhumira khu rhula khu Paapa, naye nali, rooho wa kyirikali, urhulaanga khu Paapa ---yiitsa ahaane vushahiti khu yinse. ²⁷Na munye khaandi muliitsa khweenyekha khu haana vushahiti vwaanje, shichira mwaava halala na yinse khurhula mu lirhaanga.

16¹Muvoolere makhuuva yaka koosi khu mulivula khu kalukha inyuma mu lisuuvira lyeenyu. ²Valiitsa khu mukhuunga nu khu musuuva ilwaayi wa masinakoochi. Navutswa inyiinga yiitsaanga ya woosi umwirhaanga alakanakana akholaanga mihinsi chya Nyasaaye.³Valiitsa khumu kholera viindu yivi shichira vakorhwa khumanya Paapa khaandi yinse. ⁴Mali khumuvoolera makhuuva yaka khu lwa isaa yeyo ituukha, muliitsa khwiitsukhitsa ndamu lomolomera khulondekhanakhu.Shi ndali ndamuvoolera khu yaka khurhula mulirhaanga, shichira ndali niindi halala na munye.⁵Navutswa nuunundi tsitsaanga khu woyo wanduma mushivala, na avulakhu woosi khu munye undeevanga, "Ni heena wa utsitsaanga?" ⁶Navutswa shichira mali khumuvoolera viindu yivi, vuveereri vwitsuure mu mwyooyo chyeenyu. ⁷Navutswa ka kyirikali mu voolera, nu vukhala khu munye inse ni ndulaho.Shichira ni kharhuliho nu khutsya, Mukhonyi shyaliitsa khu munye, navutswa nintsya, ndamurhuma khu munye.⁸Lwa Mukhoonyi aliitsa khwitsa, aliitsa khuvakala havulavu khu vumushivala, vutaamanu vwa vaandu vakhoolaanga shichira vwooni, khaandi khuli Nyasaaye aliitsa khukhalachira vaandu khu likhoola lyuvuluunji -- ⁹khuloondekhana khu vwooni, shichira vaandu vishivala shi vasuuviraanga mu inse; ¹⁰khuloondekhana khu vuluunji shichira, ntsiitsa khu Paapa na shyu nu mundoleekhu mba; ¹¹khuloondekhana khulikhalaka, shichira mwaamihi wu mushivala shinu amali khukhalachirwa.¹²Ndi na makhuuva manyiikhi ku khumu voolera, navutswa shyumuli ni liikhutsira khu lweene yulu. ¹³Navutswa lwu Mukhoonyi aliitsa, nali Rooho wa Kyirikali, aliitsa khu mwimirira mu ka kyirikali koosi,shichira shyi yiitsa alomolome keeke mweene taawe.Navutswa koosi ka alihulira, kaandi kaliva ni kiitsaanga. ¹⁴Aliitsa khu khuminya inse, shichira alavukula khu kali kaanje nu khumuvoolera.¹⁵Viindu vyoosi vya Paapa waanje ali navyo ni vyaanje.Khu lwa yako, nalwo lwa muvoolera ndi Rooho aliitsa khuhulira ka ndiitsa khumuvoolera khaandi amuvoolere. ¹⁶Ni matukhu matiitiiti ka rhikale ka mutsitsaanga khuvula khu ndoola,ma khaandi matukhu matiitiiti ka khavirha, muliitsa khu ndoola khaandi."¹⁷Valala khu veechitswi veeve vavoolerhana, "Yaka , anyala khuva na khuvoolera shina?" "Khu lwa matukhu matiitiiti shyumulandola khu mba, khaandi khu lwa matukhu matiitiiti nu mu ndoole khaandi." ma khaandi ,shichira ntsitsaanga khu Paapa?' ¹⁸Khu lwa yako vavoola, "Ni shina shya avoolaanga, "Khu lwa matukhu matiitiiti?' khutse shyu khumanyi shyoosi khuloondekhana khu kavoolaanga."¹⁹Yeesu yamanya vali na marheeva, na yamanya navavoolera, "Yaka nako kamurheevanaanga, shya kamuvoolere kavoolaanga; Mbooli karhikale matukhu matiitiiti na shyumuliitsa khundola inse taawe, khaandi matukhu matiitiiti ni kakhavirha, muliitsa khundola inse. ²⁰Kyirikali, kyirikali, muvoolera, muliitsa khulira nu mwikhuula, navutswa vaandu vwu mushivala, valiitsa khusaangala.Muliitsa khuveerera, navutswa khuveerera khweenyu khuliitsa khuchira musaangale. ²¹Lwa mukhali yaahelitsa avetsaanga hiimbi khwiivula mwaana, aveleraanga shichira isaa yeeye yu khu nyaakhana ivetsaanga ni ya khatuukha; navutswa lywu mwaana avetsaanga ni yakhivulwa, yivilirira lyiinyakhana lyeelye, shichira vuyaansi vyu mwaana umali kwiivulwa mushivala.²²Niindyo khaandi kali khu munye nuunundi muli nu vuveereri, navutswa ndikhakalukhe khu muloola, nalwo khaandi muliitsa khuva nu vusaangali, na avulakhuho unyala khuvanuula lisaangala lyeenyu. ²³Khu litukhu yero muliitsa khuvula khundeevakhu shindu shyoosi.kyirikaali, kyirikali, muvoolera,nu murheeva shindu shyoosi khu Paapa mu liirha lyaanje alamukha. ²⁴Khutuukha lweene yulu mushili khu ndeevakhu shindu mu liirha lyaanje.Murheeve na mu lanyoola, khu vuyaansi vyeenyu vutuukhe khurhweekhitswa.²⁵Muvoolere viindu yivi mu tsinganu, nvutswa inyiinga ituukhaanga ya ndakhitse khuvula khu muvoolera mu tsinganu, nikhali ndiliitsa khumuvulira mumanye havulavu makhuuva koosi khuloondekhana khu Paapa.²⁶Khu litukhu lyeene yero muliitsa khurheeva Paapa shiindu shyoosimu liirha lyaanje : shyikanyala khuva mboolaanga , inse nda murheevera khu Paapa taawe, ²⁷shichira Paapa yakhandi yamuyaansa mweene, khaandi shichira mwaanyaansa nu khu suuvira ndiitsa khurhula khu Nyasaaye. ²⁸Ndiitsa khuhula khu Paapa, na ndayiitsa mu shivala.Khaandi ndulaanga nuunundi mu shivala na ntsitsaanga khu Paapa waanje."²⁹Veechitswi veeve vamuvoolera, "Loola, yaha wakhakhu lomolomera havulavu vuchira khurhumikhira tsinganu. ³⁰Nuunundi khumanyi uli wamanya vindu vyoosi, na khaandi shyu weenya muundu woosi khukhurheeva marheeva taawe. Shichira yaka, kachiraanga nu khukhusuuvira ndi warhula khu Nyasaaye." ³¹Yeesu yavarheevulira, ""Mwakhasuuvira nuunundi?"³²Heensi, isaa yiitsaanga, nyee, na imali khutuukha, lwa mutsitsaanga khu salaanyinywa, vuli muundu muungo mweemwe, na mulaandekha woonyene. Navutswa shindi woonyene taawe, shichira Paapa ali niinse. ³³Muvoolera vindu yivi khu lwa muli muyinse muliva ni mireembe .Vaandu vwu mushivala shinu valiitsa khumutaambitsa ni shyivi, navutswa mwikhutsire, inse mali khu kuurha shivala."

17¹Yeesu lwa yali ni yakhamala khu voola makhuuva yaka, yatoovana tsimoni tsyeetsye na heensa mwikulu nu khuvoola, " Paapa, isa yaanje imali khutuukha, khakhuminye mwaana woowo, mwaana woowo, khu khaandi mwaana wowo atuukhe khu khu mhuminya--- ²khuli wamuha vanyali khu vaandu voosi khu atuukhe khuhaana liiva mwooyo khu vaandu voosi vu mali khu muha.³Vulamu vyi liiva mwooyo li kha hera mba nu yuvu: Ndi va tuukhe khu khumanya ,yiwe uli Nyasaaye wa kyirikali, na wooyo wa warhuma, Yeesu Kristo. ⁴Inse mali khu khuminya hanu khu liirhova.Mali khu rhweekhitsa mihiinsi cha waanduma nditse khu khola. ⁵Khu lwayako, Paapa, kha khu minye nuunundi halala niiwe vukhumi vulalal vweere vwa ndali navwo na yiwe liirhova ni lishiri khuloongwa.⁶Mali khu va vuulirha vaandu va waamba khurhula mushivala liirha lyoolyo .Vaandu vali voovo va yiwe waamba, khaandi vatsitsachiriraanga khuloonda likhuuva lyoolyo. ⁷Nuunundi vamali khumanya viindu vyoosi vya waamba virhulaanga khu yiwe, ⁸shichira mali khuvaha makhuuva koosi ka vaamba.Vakavuchirire nu khumanya kyirikali ndi ndiitsa khurhula khu yiwe,khaandi vasuuvire niwe waanduma.⁹Mbasaaliraanga veechitswi vaanje: shi va saaliraanga vaandu vi shivala taawe, navutswa yavo vwu waamba, shichira veeneyava ni voovo. ¹⁰Vuli shiindu shyoosi shyiri shyaanje ni shyooshyo , na shyoosi shyiri shyooshyo ni shyaanje, na yinse nyoola likhuminywa khuvirhila mu vyo. ¹¹Yinse shiindi mu shivala khaandi, navutswa vaandu yava navo vashiri mu shivala, na inse ndiitsaanga khu yiwe.Yiwe Paapa Mutakatiifu, valiinde mu liirha lyoolyo lyu waamba khu vatuukhe khuva shiindu shilala, khuli khaandi khutse khuli shiindu shilala.¹²Lwa nadali ni shiri halala navo, ndava liinda vulahimu lyiirha lyoolyo, liirha lya waamba.Ndavaliinda vulahi, na avulakhuho muundu woosi khali mulala khuvo wakorha, khu katuukhe khurhweekhitswa Maandaiiko Matakatiifu. ¹³Navutswa nuunundi ndiitsa khu yiwe,navutswa mbasaaliraanga viindu yivi yavo vashiri mu lirhova, khu vatuukhe khu nu vuyaansi vwaanje nu vurhweekhitswa mu vo. ¹⁴Mali khuvaha likhuuva lyoolyo, na vaandu vyu mushivala vavambakhaane, shichira shyivali vu mushivala, khuli khaandi yinse lwakhali wu mushivala.¹⁵Shyivasaalira yiwe khuvarhulitsa mu liirhova taawe, navutswa uvaliinde khurhula khu Mutaamanu woyo. ¹⁶Vo shivali vyishivala taawe, khuli yinse khaandi lwa khali wu mushivala. ¹⁷Uvatakaase khu virhila mu vywa kyirikali ,shichira likhuuva lyoolyo ni lya tooto.¹⁸Khuli wanduma khu vaandu vwu mushivala, khaandi ndyo inse va rhumaanga khutsya mushivala. ¹⁹Ndayivikha khuva mutakase shichira vo, khu khaandi vo veene vatuukhe khwitakasa khu virhila mu vwakyirikali.²⁰Shisaalilaanga veene yava vonyene taawe,navutswa khaandi yavo voosi valiitsa khusuuvira mu yintse khuvirhila mu likhuuva lyaavo ²¹khu voosi valiva halala, khuli yiwe Paapa, uli mu yinse, khaandi inse ndi mu yiwe.Saalaanga vave khaandi mu khutse khu vaandu vu mushivala vatuukhe khu suuvira ndi niwe wanduma.²²Vukhumi vwu waamba mali khu vaha, mabheere khu vatuukhe khuva shiindu shilala, khuli manya khutse khuli halala: ²³inse mbee mu vo, na yiwe uve mu yinse --khu vatuukhe khuleerhwa mu vulala humani, khaandi khu vaandu vwu mushivala valimanya ndi yiwe naye wanduma, na wavayaansa vwulala vweere khuli lwa wanyaansa.²⁴Paapa, ndenyaanga yavo voosi vwu wamba vave na yinse handi, khaandi valoole vukhumi vwaanje, vukhumi vwa waamba shichira wanyaansa khali misiinji chyi shivala ni chyishiri khuloongwa.²⁵Paapa wu liikhoola lyu vwuluunji, khali niiva vaandu vwu mushivala shyi vakhumanyi mba, navutswa yinse ndakhumanya; na yava vamanya niwe wanduma. ²⁶Na inse mali khu vamanyinya liirha lyoolyo,khaandi ndaliloomba khumanyikhana, khu vuyaansi vwanyaansa navwo vutuuke khuva khaandi muvo, na inse ndava mu vo."

18¹Yeesu lwa yamala khuvoola yaka, ya rhula halala na veechitswi veeve na tsya khu lucherekha lwu muchera kwa Kiduroni. Khwali ho nu mulimi kwa Yeesu na veechitswi veeve vinjiramu. ²Yuuda woyo yali natsitsaanga khu mutsaama Yeesu, yali ya manya havuundu heene yaho vulahi, shichira Yeesu na veechitswi veeve vali vamenya ni vakaanira haweene yaho. ³Khu lwa yako, Yuuda yiitsa ho, ni yimirire mukaanda kwa kwa vasikali va varoma, na valala khu valiindi vyi liiteembeeri vali ni varhumilwe na vasikali vakali na vafarisaayo.Viitsaho ni vachiinji tsitoochi, tsitaaha ni vyuuchi.⁴Na Yeesu, wali yamanya vuli shindu shyoosi, shyali ni shitsitsaanga khwiikholekha khuye. Yisuunda imberi na varheeva, "Nu wiina wa mukhavaanga?" ⁵Navo vamurheevulira, "Yeesu wa Natsareti." Yeesu yavavolera, "Naye inse."Yuuda , yali na mutsaami, yali na siinjire halal na vasikali.⁶Heene yaho, lwa yavavoolera "Naye inse", vakalukha inyuma ni khukwa haasi. ⁷Na khaandi yavarheeva, "Nu wiina wa mukhavaanga?" Navo khaandi vavoola, "Yeesu wa Natsareti."⁸Yeesu yavarheevulira,"Mu voolere naye inse".Khu lwa yako niiva ni inse wa mukhaavaanga , lekhi yava va tsii." ⁹Yaka kali khu lituukhe khurhweekhitswa likhuuva lya ya voola: "Yavo voosi va wamba avulakhuho khali mulala wa ndakoritsa."¹⁰Simoni Petero, yali nali ni shivaavi, ya shitsomola nu khurhema shirhoyi shyu khu mukhono musaatsa shyu muhinsiri wu mukali wa vasaalisi voosi.Muhiinsiri mweene woyo liirha lyeelye lyali Malukasi. ¹¹Yeesu ya muvoolera Petero, "Kalukhitsa shivavi yeshyo mu shyuula shya shyo! Shyu vuli nu vulahi inse khungw'a mu shikoombe shyi linyaakhana, shya Taata waanje ambeele?"¹²Mukaanda kwa vasikali va Varoma na halala nu mwiimiriri waavo na vasikali vyi liteembeeri lya vayahuuti, vamukuirha Yeesu nu khu mu vooha. ¹³Varhaanga khu muhirha khu Anasi, shichira yali nakhuvitsala wa Kayafa, wali nali mukali wa vasaalisi voosi khu muhika kweene yoko. ¹⁴Kayafa naye yali na vooleere vimiriri va Vayahhuti ndi nu vulahi muundu mulala khukhutsira vaandu voosi.¹⁵Simoni Petero yamuloonda Yeesu, nakhaandi mweechitswi wuundi yamuloonda.Mweechitswi mweene woyo yali yamanyikhana khu musaalisi mukali, khu lwayako yaloonda khu Yeesu ni yiinjira halala na Yeesu yinjira mu mujitsi mwu musaalisi mukali; ¹⁶navutswa Petero yasiinjira irwaanyi wi shirivwa.Khu lwa yako mweechitswi wuundi woyo, wali yamanyikha khu musaalisi mukali, yarhula ilwaanyi na lomoloma nu muliindi wi shilivwa, namwiyamira khumwinjiritsa Petero mukari.¹⁷Mwaana wi shikhaana wali nali wu khuliinda ha shirivwa yamurheeva Petero,"Yiwe shyuli mulala khu veechitswi vwu muundu wuyu?" Petero yamurheevulira, "Awa Shiindi mulala khu vo taawe?" ¹⁸Varhumikhi na valiindi vali ni vasiinjire ho vali ni vawaani muliiro shichira vushiindu vwaali nu vuvalechi.khu vawaana muliiro kwa maanda, shichira vushiindu vutsiriru vwalikhu, khu vali vasiinjireho ni voorhaa muliiro. Petero yali halala navo, na siinjire ho ni yoorhaa muliiro.¹⁹Mukali wa vasaalisi ya rheeva Yeesu khu loondekhana khu veechitswi veeve khaandi khu meechitso keeke. ²⁰Yeesu yamurheevulira, "Ndalomoloma khase khoosi havulavu khu vaandu vyu mushivala.Ndayechitsa havulavu vuli khase mu masinakoochi nu mu liteembeeri hakwali na vayahuuti voosi ni viitsi halala. Shyu khuli khu ho ni shiindu shya ndavoola ha vwu visu taawe. ²¹Shichira shina nu muvula khu ndeeva? Rheeva yavo vambulikhitsa ni lomlomaanga vakhuvoolere kandavoola."²²Lwa Yeesu yali ni yakhavoola yaka, mulala khu vakhoongo va vasikali yali na siinjiire ho, ya musaamula Yeesu lukhovi ni shikaalo shyu mukhono kweekwe nu khu mu voolera, "Ni ndyo unyala khu rheevulira mukali wa Vasaalisi ?" ²³Yeesu yamurheevulira, "Niiva nomolome vutaamaanu, voola khu vushahiti khu vutaamaanu mu kanomolome, navutswa niiva nu vuluunji, shichira shina nu saamula lukhovi? ²⁴Khu lwa yako , Anasi, yamuhirha Yeesu na shi voheerwe khu Kayafa , yali nali mukali wa vasaalisi voosi.²⁵Simoni Petero yali na siinjire ni yorhaa muliiro.Ni vamurheeva, "Yiwe uvule khuva uli mulala khu veechitswi vyu muundu woyo?"Naye yambakhana khu lwu khuvoola,"Awa, ndi mulala khuvo taawe?" ²⁶Murhumwa mulala wu musaalisi mukali, yali mwiikho wu musikali wa Petero yakhalaka shiroyi, yavoola, "Mbuli khukhulora khu mu mliminuli halala naye?" ²⁷Petero yambakhana khaandi; na heene yaho itaaywa yamanya ni ilakula.²⁸Mukaamba tsuri nu kushiri mu mavweevwe, Yeesu yarhulitswa wa Kayafa nu khu hirwa mu insu yu vwamihi nu hu vukhalachi .Na veene shiviinjira munsu yi likhalaka taawe, viliinda va vule khwiivekha vwooni, khu vatuukhe khusaanga mu lilya li lipaasaka. ²⁹Pilato yarhula irwaanyi niyiitsa khuvo nu khuvavoolera,"Ni mayaalo shina ka muli nako khu muundu wuyu?" ³⁰Vamurheevulira nu khu voola," Muundu wuyu alavula khuva mutaamaanu shyu khuveere khumuleere khu yiwe taawe."³¹Pilato yamanya ava voolere, "Shyu mu muvukula veene, mumu khalachire khuloondekhana na malako keenyu." Vayahuuti yavo vamu voolera, "Malako keerhu shi kakhwiiyamirakhu khutse khukhalachira muundu likhutsa mba." ³²Vavoola yaka , nakali ku khurhweekhitsa livoola lya Yeesu yali ni yavoola khumanyinyi likhutsa lya lukanu shyi yiitsa akhutsa.³³Pilato yiinjira muunsu yu vwaami khaandi nu khumulaanga Yeesu khu lu khumuvoolera, "Yiiwe uli Mwaami wa Vayahuuti?" ³⁴Yeesu yamurheeva, "Yero ni liirheeva lyu undevaanga lyolyo mweene ,anoho vaandu vaandi vakhuvoolere makhuuva khu inse? ³⁵Pilato ya murheevulira,"Yinse shiindi muyahuuti taawe, Uloola niindi khuli mu yahuut? Vaandu vi ihiiri yooyo na vasaalisi vakali vakhuleerhi imberi waanje. Ukholi shina?"³⁶Yeesu yamu rheevulira, "Vwaami vwaanje shyu vuli vwu khushivala shinu.Niiva vwaami vwaanje vwakhaveere vwu khu shivala shinu, varhumikhi vaanje vavere vala lwaana nuunundi nu khuloomba Vayahuuti vavule khu mbaana khu yiwe.Nuvutswa vwaami vwaanje shyuvuli vwarhula haasi hanu. ³⁷Pilato yamanya amuvoolere, "Yiwe uli Mwaami?" Yeesu ya murheevulira, "Yiwe uvoola ndi Mwaami.Ni shicira keene yaka nako kaachira ni ndiivulwa, khaandi shichira yaka ndiitsa mu shivala, nduukhe khuhaana vushahiti khu vwa kyirikali.Muundu woosi wa kyirikali ahuliikhitsa mwooyo kwaanje."³⁸Pilato yamurheeva, "Vwa kyirikali ni shina?" Na lwa yamala khu voola yaka, yakalukha khu Vayahuuti irwaanyi nu khu vavoolera, "Shindolakhu vwooni vwoosi khali vuti khu muundu wuyu vuchira mukhalachire. ³⁹Navutswa khu loondekhana khu mwiima kweenyu kwa muli nakwo, kaanduukhira mulakhulire muundu mulala mu inyiinga yu mu lipaasaka.Khu lwa yako , mweenya mulakhulire Mwaami wa Vayahuuti khu munye?" ⁴⁰"Valaanjirira nu khu voola, "Muundu wuyu taawe, lakhula Paraaba! Paraaba yali muhiingani wenya khukalukhanyinya vwaami.

19¹

²Vasikali va liinga ingarha ya mahwa ki vikuunga.Nivachifwala khu murwi kwa Yeesu nu khu mu fwaala ikaansa yi itsambarau. ³Niva mu voolera, "Mireembe Mwaami wa Vayahuuti": Nukhu mu saamula tsikhoovi⁴Pilato yakalukha nu khutysa irwaanyi khuvo nu khu voola, Heensi mukalukhitsa khu munye, khu mumanye mbula vutaamaanu vwanyooli khu ye vuchira akhalachirwe." ⁵Haweene yaho Yeesu yiitsa irwaanyi, na fwaalilwe ingarha ya mahwa, ni ikaansa yi tsambarau.Pilato yavavoolera,,"Heensi muundu tsana naye wuyu!" ⁶Lwa vakali va vasaalisi na vasikali vamuloola Yeesu, vahaansukha nu khuvoola, "Avaambwe! Avaambwe!" Pilato yavavoolera, "Muvukuli mumu vaambe munye veene, inse shindooli khu likoso lye mba."⁷Vayahuuti vamurheevulira, "Khuli ni liirako,na khuloondekhana khu lirako tsana, kamutuukhira akhutse shichira wayikhola khuva Mwaana wa Nyasaaye." ⁸Lwa Pilato ya hulira ndyo, yatsyaanyinya khurhia muno, ⁹ni yiinjira munsu yu vwaamihi khaandi nu khuvoolera Yeesu, "NI heena wa urhulaanga?" Navutswa Yeesu ya shiring'ana vutswa.¹⁰Heene yaho pilato yamuvoolera, "Shyunyala khu nomolomera taawe? Shyu manyi khu ndi nu vunyali vwu khukhuvoholola , anoho vwunyali vwu khukhuvaamba?" ¹¹Yeesu yamurheevulira, "Ulikhu nu vunyali vwoosi khu inse mba, nikakhali ka uhererwe khu khurhula mwikulu.Khu lwa yako woyo umbaani khu yiwenaye ali nu vwooni vwukali muno."¹²Lwa Mwaami Pilato yahulira ndyo, yacheritsa khuli yali anyala khu muvoholola Yeesu.Navutswa Vayahuuti valaanjirira ni vavoola, Niiva ulamuvoholola muundu wuyu, shyu nyala khuva mulina wu Mwaami wa Rooma taawe! Muundu wiikholaanga khuva mwaami, ahiinganyinyaanga mwaami wa Rooma." ¹³Lwa Pilato yahulira ndyo, yahira Yesu irwaanyi, ni yikhala khu shirhuumbi shyumukhalachi mu lwaanyi halaangangwa "Injira ya Machina." (Muluhebrania kavoolaanga "Gabatsa,")¹⁴Lyaali ni lyiri litukhu lyu khwirhechekhera Lipaasaka; hiimbi mu saa sita.Pilato yavavoolera Vayahuuti, "Ansi , uyu nu Mwaami weenyu!" ¹⁵Navutswa va mu haantsukhira, "Mwiirhe, mwiirhe, avaambwe!" Na Pilato yavavoolera, "Mweenya inse mbaambe Mwaami weenyu?" Vasaalisi vakali vamurheevulira, "Khuvula Mwaami wuundi nakhali Kaisari woonyene." ¹⁶Haweene yaho Pilato yahaana Yeesu khuvo atsi khuvaambwa.Khu lwa yako, vasikali vavukula Yeesu.¹⁷Yessu yitiukha musalaba kweekwe, na rhulaho na chiingi musalaba kweekwe ni vamuhiira halaangwangwa "Havundu hi shihaanga"Liirha liindi lya hawatsana Muluhebrania, "Gologotsa". ¹⁸Vamuvambira Yeesu haweene yaho, na halala naye vavambilaho khaandi vaandu vasaatsa vaviri, vuli mulala, khu luveka lwa Yeesu, na Yeesu na khakari haavo.¹⁹Pilato yahaandiika mahaandiiko ki shyimanyinyiro na viikha khu musaalaba.Mahaandiiko keene yako kali, YEESU WA NATSARETI, MWAAMI WA VAYAHUUTI. ²⁰Vanyiikhi va Vayahuuti vasooma shyimanyinyiro yishi shichira ha Yeesu yavaambirwa hali hiimbi ni litaala.Shyimanyinyiro yesho shya haandiikwa mu lwu luhebrania, nu Muluyunani khaandi mu Lukuriki.²¹Vasaalisi vakali va vayahuuti vavoolera Pilato, "Ukhang'oota khu "Mwaami wa Vayahuuti taawe, navutswa ung'oote khu, "yavoola, ndi Mwaami wa Vayahuuti." ²²Pilato yavarheevulira, "Lya ng'ooti, mali khu lying'oota."²³Lwa vasikali vali ni vakhamala khu vaamba Yeesu, vavukula tsinguvu tsye, nu khu khalakanyinyamu vitonye vinne, vuli shitonye khu vuli musikali; khaandi niveenya khukavulana ikaansa yeye.Navutswa iikaansa shyiyali ni vuhambaanyiro mba, lyali lya navwa khulala khurhula ikulu khutuukha haasi. ²⁴Na vavoolerana, "Rhiiki khuvule khurhaandulanyinya yiyi, navutswa rhiiki khuchi khuvire ikuura khumanya nu wiina uchivukula." Yaka kaakholekhana khu katuukhe khu rhweekhitswa kavoolwa, "Vakavulanaanga tsinguvu tsyaanje veene khu veene, khaandi ikaansa yaanje vajikhuvira ikuura." Yaka nako ka vasikali veene yavo vakhola.²⁵Vaandu vali ni vasiinjire hiimbi hu musalapa kwa Yeesu vali, maama wa Yeesu, na seenje wa Yeesu nali mwaana wi shikhaana amwaavo Maryaa, Maryaa mukhali wa Kilyoopa walaangaangwa Maryaa, na Maryaa Magatalena. ²⁶Lwa Yeesu yavaloola maama weewe na mweechitswi waya ya yaansa ni vasiinjre hiimbi, yavoolera maama weewe, "Mukhali, heensa woyo nu mwiikhula woowo!" ²⁷Khaandi yavoolera mweechitswi mweene woyo, "Heensa, woyo ni nyina woowo!" Khurhula inyiinga yeene yeyo mweechitswi woyo yamuvukula Maryaa nu khumuhirha muungo mweemwe.²⁸Inyuma wa yaka Yeesu nali ni liimanya lyi viindu vyoosi vyali vimali khurhweekhitswa, na khu ka rhweekhitsa mang'oota, Yeesu yavoola, "Ndi nu vuluhu." ²⁹Ibaakuli yali ni yitsulitswekhu idivai indulu yali niliho; vinikha shitaambaya mu idivai yeeneyo, nivaviikha khu shisaala shyi shituundu, ni vashichiingula khukhoombitsa Yeesu. ³⁰Lwa Yeesu yali namali khu chikhoomba khu yavoola, "Luweere!" Na yinaminya murwi kweekwe haasi a na khutsa.³¹Khu lwayako vayahuuti, shichira lyaari mulitukhu lyu khwirechekhera Lipaasaka, khu miviri chyivure khurhikala khu musalapa mu litukhu lyi Lisaapato,(shichira Lisaapato lyaali litukhu lyu luyali lukali) Varheeva Pilato avavuchiirire khumunaka vileenje vya vaandu vali ni vavaambirwe nu khurhulitsa khu musalapa. ³²Khu lwa yako vasikali vasimukha ni vatsya khumunaka vileenje vyu muundu wu khurhaanga, khaandi vyu muundu wa khaviri vali ni vavaambwa na Yeesu. ³³Navutswa lwa vatuukha khu Yeesu, vanyoola na mali khu khutsa khale; shivamunaka vileenje vyeevye taawe.³⁴Navutswa mulala khu vasikali veene yavo yarhivirha lirhimo lyeelye mu tsiimbalu tsya Yeesu, na masaahi na maatsi nikavukhaane kasundukha. ³⁵Muundu yaalola yaka ni ka kholekhaanga ahanaanga lilolekhitsa khuloondekhana khu ko, na lilolekhitsa lyeelye khuko ni lya kyirikali.Khaandi ya manya ndi lilomoloma lye khu ko ni lya kyirikali khu vaandu mutuukhe khusuuvira.³⁶Yaka kiikholekha khu ka tuukhe khurhweekhitsa kaang"ootwa mu lirako likhulu, "Shyivulakhu khali shilala shyi vikuumba vyeevye shyiliitsa khu munakwa." ³⁷Khaandi hawuundi mu indakano kahaandiikwa, "Vaandu valiitsa khu heensa khu woyo wa rhivirhwa mu tsiimbalu."³⁸Viindu yivi nivyakhamala khwiikholekha, Yosefu ya rhulaanga mu litaala lya Arimatseya khaandi nali mulala khu veechitswi va Yeesu, navutswa mwuvwivisu shichira yali yarhia Vayahuuti, yatsyaa khurheeva Pilato amuvuchirire khuvukula muviri kwa Yeesu khurhula khumusalapa.Pilato yamuvuchirira Khu lwa yako Yosefu yiitsa khuvukula muviri kwa Yeesu nu khutsya khurha . ³⁹Nikodemo khaandi yitsa khumukhonya , woyo wali yiitsaakhu khulola Yeesu vutukhu.Nkodemo yali uchiinji hiimbi tsikilo 30 tsya manemane na maraashi ku mwaayu mulahi ni vitsukaanyilwe halala.⁴⁰Vavukula muviri kwa Yeesu, ni vakuliinjira mu vitambaya vyi tsimbaala tsindavu halala ni maraashi kwu mwaayu mulahi, khu loondekhana nu mwiima kwa Vayahuuti kwu liirha miviri. ⁴¹Khwali nu mulimi heene ha Yeesu yavaambirwa, na mu mulimi mweene yomo hakari, khwaliho ni shiliindwa shyiyaa shya yavwa mwiichina, shyali shyishiri khuyavirwakhu mu muundu. ⁴²Shichira lyaali litukhu lyu khwiirhechekhera Lipaasaaka lya Vayahuuti, na khaandi shichira shiliindwa yeshyo shyali hiimbi, vamuviikha Yeesu mu shiliindwa mweene yomo.

20¹

²Khu lwa yako yirhukhaka nu khutsya khu Simoni Petero khaandi khu mweechitswi wa Yeesu yali ya yaansa, nu khu va voolera, "Varhulitse Mwaami mu shiliindwa, na shyu khumanyi wa vatsiire khu mwaalikhitsa taawe."³Shichira yaka Petero nu mweechitswi wuundi woyo varhula ilwaanyi nukhutsay khu shiliindwa. ⁴Voosi vilukhaka khulala, navutswa mweechitswi wuundu woyo yamuvirha nu khwirhukhaka imberi wa Petero na rhaanga khutuukha hashiliindwa. ⁵Na lwa yiinama, na heensa mu, yalola vutswa tsinguvu tsyi tsimbaala tsindavu tsirhikaale mu, navutswa shyinyiinjila mu taawe.⁶Simoni Petero yitsa na muloonda, na lwa yatuukha ho, yiinjira mu shiliindwa.Na loola tsinguvu tsyu muviri kwalimu tsirinjiremu ⁷khaandi ni tsinguvu tsyavali vavohi khu murwi tsyali tsyirinjire haluveka khurhula khu tsyali khu muviri.⁸Mweechitswi wuundi wali na tuukhi khurhaanga khu shiliindwa , khaandi yiinjiramu, na loola nu khusuuvira. ⁹Shichira vali ni vashiri khumanya mang'oota, ndi kamutuukhira khwiisimukukha khurhula mu vakhutsu. ¹⁰Khu lwayako veechitswi vaviri yavo varhulaho nu khu kalukha khaandi mu tsingo tsyaavo.¹¹Malya yasiinjira irwaanyi wi shiliindwa na lilaanga.Lwa yali na shyililaanga, yiinama na heensa mu shiliindwa ¹²na yaloolamu tsingerosi tsiviri ni vali ni vifwaali tsinguvu tsindavu, ni vikaale, mulala hu murwi kwa Yeesu kwali na wuundi ha vileenje vya Yeesu vyali. ¹³Tsingerosi tsyeene yetso tsya mu rheeeva, "Mukhali yiwe shichira shina uliiraanga?" Naye yatsirheevulira, "Shichira vavukule Mwaami waanje, na shimanyi wa vamuvikhi taawe."¹⁴Lwa Malya yamala khuvoola yaka, yi shevukha nu khuloola Yeesu na siinjire inyuma weewe navutswa shyiyamanya yali nali Yeesu taawe. ¹⁵Na Yeesu yamuvoolera, "Mukhali yiwe , shichira shina uliiraanga?" Nu wiina wa ukhavaanga?" Ye yakanakana nu mweene mulimi yali na mulomolomeraanga, khu lwa yako yamuvoolera, "Mwaami, niiva niwe umurhulitse hanu , mboolera ha umuviikhi, na ndatsya khumuvukula."¹⁶Yeesu yamuvoolera, "Malya". lwamanya ni yishevukha khu hensa khu Yeesu, nu khumuvoolera mu lu hebrania, "Rapponi! (Ni kavoolaanga: "Mweechitsi' ). ¹⁷Na Yeesu yamuvoolera, "Ukhangumirha khu taawe, shichira shiri khukalukha khu Paapa, navutswa tsyaa khu vamwaavo vaanje uvavoolere, ntsitsaa khu Paapa waanje, khaandi nali Paapa weenyu, khaandi khu Nyasaaye waanje khaandi nali Nyasaaye weenyu>' ¹⁸Malya Makadalena yiitsa na voolera veechitswi, "Ndooli Mwaami sichi na moni." na khaandi na va voolera makhuuva kayali na vooli avavoolere.¹⁹Lwi shivala shyali ni shyimwamaanga khu litukhu lyu khu rhaanga khu lisiitsa,veechitswi veeve vali ni viyikaliire munsu, shichira vali varhiire Vayahuuti, Yeesu yiitsa nu khu siinjira hakari haavo nu khuvavoolera, "Mireembe khu munye" ²⁰Lwa yeesu yavavolera ndyo, yavamanyinya makhoono keeke khaandi mu mbalu mweemwe.Veechitswi veeve vali nu vuyaansi vwunyiikhi, lwa valoola Mwaami Yeesu.²¹Yeesu yava voolera khaandi, "Mireembe khu munye :Khuli lwa Paapa yaanduma, khaandi ni ndyo inse murhumaanga". ²²Lwa Yeesu yali na mali khuvoola yaka, yava vurhira muhikha , nu khu va voolera, "Nyooli Rooho Mutakatiifu." ²³Muundu woosi wa mu samiiha vwooni vweevwe, valava vasamiihirwe; na khu voosi wa muvohera vwooni vweevwe, valavohwa."²⁴Tomasi, nali mulala khu vali likhomi na vaviri, khaandi walaangwaangwa Titimasi, yali na vulaho lwa Yeesu yiitsa khuvo. ²⁵Lwa yakalukha Yeesu narhuli khale, veechitswi vaandi vamuvoolera, "Khutse khu mulooli Mwaami." Naye yavavoolera, "Inse ni khalooli tsiimbala tsyi misumali mu makhoono keeke, nu khutiirha mu tsiimbaala tsana, khaandi khutiirha mumbaala yu muumbalu mweemwe, shyi ndasuuvira."²⁶Matukhu munaane ni kaakhavirha, veechitswi veeve vali muunsu tsana khaandi, na Tomasi yali nali navo.Yeesu yiitsa muvo khaandi milyaango nichikale, nu khusiinjira hakari haavo, nu khuvavoolera,"Mireembe Khu munye ." ²⁷Na yamuvoolera Tomasi, "Haamba utiirhe vitere vyoovyo mu tsimbala tsyaanje nu khuheensa mu makhono kaanje.Leerha mukhono kwookwo utiirhe muumbalu mwaanje.Ulekhe khuhayahaya na usuuvire."²⁸Tomasi yarhevula nu khu muvoolera, "Mwaami waanje , khaandi Nyasaaye waanje." ²⁹Yeesu ya muvoolera ,"Tomasi shichira lwa wa khaandola wa kha usuuvira.Vali ni ikhavi yavo va suuviraanga, ni vashiri khulola³⁰Yeesu yakhola vilolekhitso vinyiikhi mu tsimoni mwa veechitswi veeve, vilolekhitso vyaa kha haandikwa mu shitabu yumu, ³¹navutswa yaka kahaaniikwa khu mutuukhe khu suuvira Yeesu naye Kristo, Mwaana wa Nyasaaye, khu khulwu khu suuvira khweenyu, mutuukhe khunyoola liiva mwooyo mu liirha lyeelye.

21¹

²Simoni Petero nali halala na Tomasi walaangwa khaandi Titimas, Natsanieli warhulaanga Kaana ya Kalilaya, na viikhula va Tsepetayo, nivali na veechitswi vaandi vaviri va Yeesu. ³Simoni Petero yava voolera,"Inse ntsitsaanga khuluva tsisutsi."Navo vamuvoolera,"Khali khutse khulatsya niiwe khuluva." Khu vatsya nu khwiinjira mu lyaarho khu nyaansa khuluva, navutswa shyi valuvakhu isutsi yoosi vutukhu weene yovo vwoosi.⁴Ni ishishiri mu mavweevwe khu litukhu lya loondakhu, Yeesus yasiinjira khuluchiinga lwi inyaansa; navutswa veechitswi veeve, shivamumanyiritsa khu ni Yeesu mba. ⁵Khu lwa yako Yeesu yavavoolera,"Valina vaanje , munyala khuva nu muluvikhui isutsi yoosi ndiikhu ?'Navo vamurheevulira, "Awa" ⁶Yeesu ya va voolerla,"Siuvi ineeti yeenyu khu luveka lwu mukhono musaatsa kwi lyaarho na mulanyoola khu".Khu lwa yako vasiuva ineeti yavo mu maatsi khaandi khu yavavooleraa, na shyi vanyalitsa khu khweesa ikalukhe khu lyaaro shichira vulitoho vwi tsisutsi tsinyiikhi tsyaali mu neeti.⁷Nalwo lwu mweechitswi wa Yeedsu yali ya yaansa yamuvoolera Petero, "Nu Mwaami". Lwa Simoni Petero ya hulira yali nali Mwaami, yivoha inguvu yeeye yikulu (shichira yali nanavule tsinguvu tsyeetsye khu khola muhiinsi) nu khu rhuuma mu maatsi. ⁸Veechitswi vaandi va viitsira mu lyaarho ( shichira shyivali ihaale khurhula khu luchiinga, vali vutswa hiimbi tsimita imyaa indala khutuukha khuluchiinga), na vali nivakhweesaanga ineeti yali niyitsuule tsisutsi. ⁹Lwa vasena khu luchiinga, va loola muliiro kwa maanda kwulikhu ni tsisuutsi nu vushuma.¹⁰Yeesu yava voolera, "Leerhi khu tsisutsi tsyaa mwakhaluva." ¹¹Simoni Petero ya tsya nu khukweesa ineeti khuluchiinga, na yali yitsule tsisutsi tsingali, tsingali, 153, ni tsiindi tsintiitiiti khaandi ,navutswa ineti shyi yali ni rhaandukhe taawe.¹²Yeesu ya va voolera, "Haambi mu lyii shyukhulya shya asuvuhi." Avulakhu khali mulala khuvo yamurheeva khu "Na yiwe uli wina?" Vamanya vutswa voosi yali nu Mwaami. ¹³Yeesu yavukula vushuma, nu khu vaha, khaandi na vakavulirha tsisutsi. ¹⁴Iyi yali inyiinga ya khavaka ya Yeesu yiloolekhitsa khu veechitswi veeve ni yamali khwisimukukha khurhula mu vakhutsu.¹⁵Lwa vali vakhamala khulya, Yeesu ya voolera Simoni Petero. "Simoni, khwa Yuhaana, wanyaansa khu virha yava voosi?' Petero yamuvoolera, "Nyee Mwaami, wamanya ndakhu yaansa." Yeesu yamu voolera, "Uliikhitse vyi meeme vyaanje." ¹⁶Yeesu yamurheeva khaandi lwa khaviri, "Simoni khwa Yuhaana, wanyaansa?" Petero yamuvoolera, "Nyee Mwaami, wwmanya ndaakhuyaansa."Yeesu ya mu voolera, "Wayitse makoondi kaanje."¹⁷Ya murheeva lwa khavaka, "Simoni mwaana wa Yuhaana, wanyaansa?" Petero yamanya na veerera shichira Yeesu ya murheeva lwa khavaka, "Wanyaansa.?" Yamurheevulira, "Mwaami , yiwe wamanya viindu vyoosi, wamanya ndakhuyaansa." Yeesu yamuvoolera, "Ulikhitse makoondi kaanje. ¹⁸Kakyirikali, kakyirikali, khuvoolera, lwa wali nushiri muvukha, wiliinda mweene nu khucheenda ha wenyaanga, navutswa lwa utuukhi musakhulu, wiitsa unyirhe makhono na muundu wundi yiitsa akhuvohe nu khukhujiinga akhuhire khali ha ukhenyaanga khutsya."¹⁹Yessu yavoola yaka khu lwu khwivaala khuli Petero yiitsa akhutse khu haana vukhumi khu Nyasaaye.Lwa yali yakhavoola yaka, yamu voolera Petero, "Unoonde inse."²⁰Petero yi shevukha nu khumuheensa mweechitswi wa Yeesu yali yayaansa muno na va loondaanga, wuyu witiirhaanga khu Yeesu muumbalu inyiinga lwa vali mwilya khulukoloova, khaandi yarheevaanga, "Mwaami , nu wiina wiitsa akhu tsaame?' ²¹Petero ya muloola ana rheeva Yeesu,"Mwaami na wuyu keeke kiitsa kave ndina?"²²Yeesu yamurhevulira, "Niiva ndakhenyi ye amenye khutuukha lwa ndiitsa mbe ni ngalukhaanga , keene yako kakhukhonya shina?"Yiwe noonda." ²³Khu lwa yako, liikhuuva yiri lyalaanda mu vamweerhu vasuuviri, ndi mweechitswi wuyu shyaliitsa khukhutsa.Navutswa shi kali Yeesu yavoolera Petero ndi mweechitswi yali wuundi woyo yitsa avule khukhutsa taawe, navutswa, "Niiva ndakhenyi atsilirire khuva mwooyo khutuukha lwa ngalukha, keene yako kali nu vukhoonyi shina khu yiwe?"²⁴Wuyu naye mweechitswi uhaanaanga vushahidi khuloondekhana ni viindu yivi, khaandi na kahaandiika.Na khwamanya ndi ka yavoola ni ka kyirikali. ²⁵Khuliho ni viindu viindi vinyiikhi vya Yesu yaakhola.Niiva vuli shiindu shyakhahaandichirwe, rhika mboole ndi khali liirhova lyoosi shyi lyakhaveere nu vwiyaangu vwu khuviikhamu vitabu vyakha haandichirwe taawe,

Tiriki: Bible for Yuhaana

Formatted for Translators

Yuhaana