To view a copy of the CC BY-SA 4.0 license visit
http://creativecommons.org/licenses/by-sa/4.0/
Lukasi
11Vantu vavayingi kwaghupa shiruwana shaku tura pamwe ghumbangi wavininke ovyo vyatikiliromo mukatji ketu, 2yira momu tupu vavitapa naku vitjanga mumbapira ovo vakaliropo pavishorokwa vyaweno vavimone namantjo ghavo naku vitjanga mumbapira vatape ghumbangi waghushili waku vyukilira waku yulilira waku hamena kuMbudi yaRuhafo. 3Name mbyo nawana mpito yaku kuronga dino nkango naMbudi yaRuhafo oyo vatjanga varongi vankango, name mbyo naku kutjangera yino Mbudi yaRuhafo yira momu vayitjanga vambangi vaku hova, mposhi nove mukalikuto Teofilusi ghuyive Mbudi yaRuhafo yaghushili yaghumbangi waku tikiliramo, 4mpo ngoli ashi nove nga ghukare nandunge naghukonentu waku yiva Mbudi yaRuhafo yaghushili oyo vatapa oyo vana kuronga ntani nayo twa pura.5Pa ruvede rwalipangero lya Hompa Herodesi, Hompa wavaYuda pakalire mukurona wamu mbunga yava Pirisiteli walidina Sakariya waku tunda mulira lya Abiya; ghuye kwakalire namukamali wendi Elisabeti waku tunda mulira lya Aroni. 6Vavo navantje kwakalire vahungami kushipara shaKarunga, vavo kukwama naku limburuka naku tikitamo nkango navipango naveta daHompa nadintje. 7Ntani nka vavo kapi vayitire mwanuke mukondashi Elisabeti kwakalire ngandye kwato kuyita, ntani vavo nka navantje kwakalire vana kurupa paruvede runo.8Liyuva limwe paruvede rwaSakariya ghuye kuna ngene muntembeli kuna kupititira shiruwana shaghukareli Karunga, yira momu tupu aruwananga pa virugho navintje paruvede rwendi. 9Kutwara mumpo yaghupirisiteli namu ndyira yaghuhunga vakona kuruwana fungu-fungu vatoghorore mupirisiteli, waku ngena muntembeli aka ruwane ghukareli Karunga naku shora mundiro waku tutumukita muti walidumba lyaku nuka rupekwa. 10Pa ruvede runo mbunga yayinene yavantu kwapongire pandye yantembeli kuna kuraperera ntani ghuye munda kuna kushora mundiro naku tutumukita muti walidumba lyaku nuka rupekwa pashirugho ntjosho.11Makura muEngeli waHompa amu monekere ghuye kuna yimana kurulyo rwashidyambero shalidumba lyaku nuka rupekwa. 12Sakariya opo amonine muEngeli, akara naghoma waghunene, makura aku gandere kumeho yendi. 13Makura muEngeli aghamba kukwendi ashi, ''Sakariya, kapishi ghukare naghoma, mukondashi ndapero nalishungido lyoye vina katika kwaHompa. Mukamali ghoye Elisabeti ngayita mwanuke wamumati. Makura ngaghu muruke lidina lyendi Yohanesi.14Ove ngaghu kara naruhafo ghunene rwaku mushamberera, ntani navantu vavayingi navo ngava kara naruhafo rwaku shamberera lishampuruko lyendi. 15Ghuye nga kara mwanuke wamunene kushipara shaHompa. Ghuye nakadidishi kunwa vinyu ndi vikorwita vyaghururu, ntani ghuye nga kara kuna yura Mpepo yaKupongoka kumeho yaku tunda mulira lya vawina.16Ghuye nga shighura naku tjindja ghukaro waruvharo rwava Isirayeli ngava shayeke karuwana ghudona ngava vyuke kwaHompa Karunga wavo. 17Ghuye nga pita kumeho mwaHompa nga kara nampepo yankondo ntani nankondo dadinene daku fana yira damuporofete Eliya, ntani ghuye nga shighura naku tjindja dimutjima davasha ngava hore vana vavo ntani ghuye nga tjindja dimutjima naghukaro wavantu vaku pira kulimburuka ngava kare vaku limburuka vaghukonetu vakuhungama - ghuye nga ruwana vyaweno nga wapayike ndyira yavantu vavayingi ngava taterere Hompa kuna kuya.''18Makura Sakariya apura muEngeli ashi, ''Weni omo nganu yiva ashi vyaweno ngavi shoroka? Mukondashi name namuholikadi wande tuvakondi ntani tuna kurupa.'' 19MuEngeli amu limburura naku mutantera ashi, ''Ame Gaburiyeli, ame kwayimana ntani kwakara mwaHompa Karunga. Ame kuna ntumu nuyite Mbudi yaRuhafo kukoye, kuhamena kwavi ngavi shoroko kukoye. 20Terera! Ame kuna yita Mbudi yaRuhafo kukoye, odino nkango ngadi tikamo opo nga shitikamo shirugho. Ano ngoli ove kapi ghuna pura naku tambura yino mbudi, weno kuna kuku mwenikida ghupire kughamba, dogoro mpopo ngavi shoroka navintje ngadi tikemo dino nkango dande.21Ruvede runo Sakariya ghuye muntembeli kuna kughamba namu Engeli vavo vantu kuna kumu taterera pandye. Vantu kwatetukire mukondashi kwakalire shirugo shashire muntembeli. 22Opo arupukire muntembeli, kapi aghambire navantu. Mpopo vantu avadimburura ashi ghuye kuna mono limoneko opo ana kara munda yantembeli. Ghuye kapi avhulire kughamba naliywi makura aghamba muru puru-puru aghambe namaghoko. 23Opo amanine kuruwana viruwana vyaghupirisiteli naghukareli Karunga muntembeli, makura atundu palivhango ayende kumundi wendi.24Kutunda pamayuva ngogho, Elisabeti mukamali waSakariya akara namarutu maviri ntani ghuye akara mamwedi matano mumundi wendi kwato kurupuka kumbunga muku vandeka lira lyendi. Ghuye aghamba, 25''Ovino mbyo ana ruwana Hompa kukwande ntani Ghuye kuna mfere nkenda nukare namarutu maviri mbyo ana ghupu ntjoni kumeho yavantu ditunde papande.''26Elisabeti opo akalire mulira ghure wamakwedi matano nalimwe, Hompa atumu muEngeli Gaburiyeli ayende kushitata shamu Galileya osho vatwenyanga ashi Nasareti, 27ayende kwamu kadona ogho apiro kukara kumwe namukafu ogho avandekera murume walidina Yosefu, wakutunda mulira lya Dafiti, ntani ghuye kwavandikilire mukadona walidina Mariya. 28MuEngeli kwayenda kwaMariya aka ghamba ashi, ''Morokenu, Hompa Karunga kwakuhora ghunene! Ntani Hompa nove ana kara.'' 29Ano ngoli Mariya kapi akalire nambili mukonda yadino nkango damu Engeli ntani ghuye kapi ayivire naku kwata lighano ashi vinke dina kutanta nkango narumorolito rwaweno.30MuEngeli amu tantere ashi, ''Mariya, Washa tjira, ove wahungama ntani kuna wana ghushwi kwaKarunga ntani Karunga kwakuhora. 31Terera, ove ngaghu kara nalira ntani ngaghu shampuruka mwanuke wamumati, makura ngaghu muruke lidina 'Yesus.' 32Ghuye nga kara mwanuke wamunene ntani ngava mutwenya ashi Mona Hompa Karunga waku wiru-wiru. Hompa Karunga nga tapa kukwendi lipuna lya ghuHompa lyamu lira lya Hompa Dafiti. 33Ghuye nga pangera muhoko waYakopu dogoro naruntje naku naruntje, ntani lipangero lya ghuntungi wendi kapi ngali kara naghuhura.''34Makura Mariya apura muEngeli ashi, ''Weni omu ngavi shoroka vino vyaweno, nkene shi ame shimpe kapi nagwanekera rumwe namukafumu?'' 35MuEngeli amu limburura naku mutantera ashi, ''Mpepo yaKupongoka ngayi sheghumuka ngayi kara papoye, ntani nkondo daHompa Karunga waku liwiru ngadi kara papoye. Mwanuke wamumati ogho ngaghu shampuruka kwapongoka ntani Ghuye ngava mutwenya ashi Mona Karunga.36Terera, ghuno Elisabeti walikoro lyoye naye kuna kara namarutu maviri ghamwanuke wamumati, ghuye kuna kara nalira lyamu ghukurupe. Ghuye kuna kara nalira lya makwedi matano naghumwe, ghuye kwakara mukadi wangandye, ndi kwato kuyita. 37Mukondashi kwato shashidito shaku pira kuvhura kuruwana Hompa Karunga." 38Makura Mariya aghamba ashi, ''Terera, nawa tupu ame mukareli wamukamali waHompa. Viruwane vikare ngoli yira momu ghuna ghamba mposhi dino nkango ditikemo.'' Makura muEngeli atundupo aka yenda.39Mumayuva ngagho Mariya aku wapayikiri muku yenda ghugenda wankwangu kushirongo shaku ndundu, kushitata shaYudeya. 40Makura ayendi mumundi waSakariya aka morora Elisabeti mukamali wendi. 41Vino kwashoroka weno, Elisabeti tupu ayuvha liywi lya Mariya kuna kumorora, makura mukeke wamulira lyendi atukuka ntani avatuka, mpopo tupu Elisabeti ayura Mpepo yaKupongoka atameke kutanga Hompa.42Ghuye aghamba naliywi lyaku dameka ashi, ''Hompa kwakutungika mukatji ka vakamali navantje, ntani Ghuye kwapongora lira lyoye ntani kwatungika mbuto oyo yina karo mulira lyoye. 43Mukonda munke vina shorokere weno ashi vawina vaMuyogholi wande kunaya kukwande? 44Terera, opo nayuvhu liywi lyoye mulitwi lyande kuna kumorora, mukeke wamu lira lyande kuna tukuka mbyo ana vatuka, akare naruhafo rwarunene. 45Muntu walirago naghu waku pongoka ndyeghu wakupura naku huguvara nkango daHompa ashi daghushili ntani ovyo daghamba navintje ngavi shoroka ntani ngavi tikiliramo.''46Makura Mariya alimburura naku ghamba ashi, ''Monyo wande kuna kutanga naku shamberera Hompa wande, 47ntani mpepo yande kuna kara naruhafo muku tanga Karunga Muyowoli wande.48Ame mukareli waHompa wamukadona wamudidi waku pira likuto ano ngoli ghuye kapi amvhurama. Kenga, kutunda pano weno vantu vaku dimuhoko nadintje damu ghudyuni ngava ghamba ashi ame kwantungika ntani kwapongoka. 49Kwaghuno waku ruwana viruwana vyankondo vyavinene ovyo ana ruwana kukwande, lidina lyendi kwapongoka.50Ghuye kwakara naghufe-nkenda waku karererapo kutunda kuruvharo yenda ruvharo kwava vaku tjira naku fumadeka Hompa Karunga. 51Ghuye kwaneyeda nkondo daku tunda kulighoko lyendi; Ghuye kwahanaghurapo vantu vaku kunenepita vaku ghayara maghano ghamadona munda yadimutjima davo.52Ghuye kuvhukuma vana vavahompa vapalivhu vatunde kumapuna ghavo ghaghuhompa ntani ghuye kutapa mfumwa naku yerura vantu vaku kudidipita. 53Ghuye kutapa ndya dakulya dadiwa kuvantu vendi vakufa ndjara, ntani Ghuye kutjida vantu vavangagho vatunde mushirongo maghoko-ghoko.54Ghuye kwapopera naku vatera muhoko wava Isirayeli vaku mukarera naku limburuka kukwendi, ntani Ghuye kuneyada nkenda kuruvharo namuhoko wendi 55(Yira momu tupu atwenyedera vanyakulya vetu) kwaAburahamu kumwe naruvharo rwendi dogoro naruntje naku naruntje.''56Makura Mariya akara ghure wamakwedi matatu kumwe naElisabeti ntani avyukire kumundi wendi. 57Opo rwatikiremo ruvede rwaElisabeti rwaku shampuruka, ghuye kwashampuruka mukeke wamumati. 58Valikoro lyendi navantu vamaparambo vendi opo vayuvire yino mbudi ashi Hompa kuna fere nkenda Elisabeti, avakupakerere kumwe vahafe kumwe.59Kuruku rwamayuva matano-na-matatu makura vantu avapongo kumwe varuwane ghuno mwanuke wamumati vyavamba. Vantu kwashanine kumuta ghuno mwanuke lidina "Sakariya," lidina lya vashe. 60Makura vawina vamwanuke avalimburura naku ghamba ashi, "Hawe.'' Lidina lyendi Yohanesi.'' 61Vantu avamupura Elisabeti naku ghamba ashi, ''Mulira namu likoro lyenu kwato muntu walidina lino Yohanesi.''62Makura vantu avapura vashe vamwanuke muliraka lya rupuru-puru ashi lidina munke varuka ghuno mukeke. 63Vashe avashungida vantu vayiteko lipepa lyaku tjanga makura avatjanga po ashi, ''Lidina lyendi Yohanesi.'' Vantu navantje ovo vakaliropo avatetuka ghunene.64Mpopo tupu ayashuka kanwa kendi ntani ruraka rwendi naro arushutuka atameke kughamba. Mpopo tupu Sakariya atameke kutanga naku fumadeka Hompa Karunga. 65Vantu ovo vatungo kumwe navo avakara naghoma waghunene. Vavo avatwara yino mbudi yikuhanene kuvirongo vyaku ndundu navintje vyamu Yudeya. 66Vantu navantje ovo vayuviro yino mbudi avakupura munda yadimutjima davo kumwe naku ghamba ashi, "Viruwana munke nga ruwana ghuno mwanuke?'' Mukondashi nkondo daHompa Karunga mpodili papendi.67Vashe vamwanuke Sakariya mpopo kwayura Mpepo yaKupongoka atameka kupumba naku porofeta nkando dino, ashi, 68''Fumadekenu naku pandura Hompa Karunga, wava Isirayeli, Ghuye kunaya ashuture naku mangurura vantu vendi vawane liyoghoro kundyo davo.69Ghuye kuna tumu ruvinga rwankondo rwaku yita liyoghoro lya ndyo ntani Ghuye kwatunda mulira lya mukareli wendi Dafiti, 70(Yira momu tupu vaghamba vaporofete vendi vakupongoka virugho vina kapito ashi), 71Ghuye kwatuma muyogholi nga mangurure vantu vendi ngava tunde mumaghoko ghava nankore davo ntani ngava tunde mumango davantu vaku vanyenga.72Ghuye kuna ruwana vino muku yita naku neyeda nkenda kuva kurona vetu mposhi nga vhuruke liku kwatakano naligwanekero lyendi lya kupongoka, 73ntani namughano wendi ogho atwenyedera kwashetu Aburahamu. 74Hompa Karunga kwatu twenyedera ashi, Ghuye ngatu shutura ngatu manguruke ngatu tunde mumaghoko ghava nankore vetu, mposhi ngatu ruwane viruwana vyendi twa hana kukara naghoma, 75mposhi atwe ngatu kare vapongoki nava hungami kushipara shaHompa mumayuva ghaliparu lyetu naghantje.76Makura Sakariya atantere monendi wamumati ashi, monande, ove ngava kutwenya ashi ove muporofete waHompa Karunga wakuwiru-wiru, ntani ove nga ghupita kumeho yaHompa ngaghu kawapeke naku kenita ndyira yendi, ntani nga ghutantere vantu vaku wapayike mukondashi ghuye kuna kuya papepi ana kara, 77ntani ove ghuna hepa kuronga vantu vendi vayive ntani vakare nandunge daku hamena kuliyoghoko nalidongononopo lya ndyo davo ngava pire kuwana matengeko ghandyo davo.78Ovino ngavishoroka ntani ngavitikamo mukondashi Hompa Karunga kwakara nankenda kukwetu, mukonda yaweno ghuye mbyo atuma Muyogholi kukwetu, nga kare yira liyuva lyaku tapa shite naghukenu kukwetu, ntani ghuye nga tunda muliwiru ngaye kukwetu ngatu yoghore, 79ntani nka ghuye nga tapa shite naghukenu kuvantu ovo vashungiro navo vatungo mumundema ntani navo vakaro mumundunduma wamfa ntani navo vakaro naghoma wamfa. Ghuye nga ruwana vyaweno mposhi atwe ngatu yende mundyira yendi yampora.''80Makura ghuno mwanuke akuru parutu ntani akara nankondo pampepo, ntani ghuye kwatungire mumburundu dogoro mpopo lya tikiremo liyuva lyendi lyaku tameka kuyuvita Mbudi yaKarunga ntani ashorokire kumbunga yava Isirayeli.
21Pa shirugho ntjosho, Sisara Augustus kwatjangire nakutapa veta yapatjangwa yitunde kulipangero lyendi ashi vana hepa kuvarura naku tjanga shivaro shavantu navantje vamu ghudyuni. 2Shino kwakalire shirugho shaku hova shakutjanga nakuvarura vantu vamughudyuni, paruvede runo Kirinus ghuye kwakalire ghughuru wamukunda mushirongo shaSiriya. 3Kehe ghuno kwayendire avyuke kushitata shamvharera yendi aka kutjangite naku katapa lidina lyendi.4Makura Yosef naye ayendi avyuke kuGalileya, atunde kushitata shaNasareti, ayende kushirongo shaYudeya, kushitata shaHompa Dafiti, osho vatwenyanga ashi Betelehemu, mukondashi Dafiti kwatunda mulira lya ghuHompa mwaDafiti. 5Ghuye kwayendi aka kutjangite naku katapa shivaro kumwe namukamali wendi wakuvandekera walidina Mariya, ghuye kwakalire namarutu maviri.6Shirugho shino vavo kuna kara mushitata shaBetelehemu, makura makwedi naruvede rwaMariya rwakushampuruka mukeke wendi naro runatikimo. 7Ghuye ashampuruka mukeke waMumati, wambeli yendi, makura amu tura pamwaye naku mufikilira, amurangeke mushikumba shakulyera vimuna muhambo yavimuna, mukondashi ndyugho kwayulire vagenda ntani kapi mwahupire ndyugho dakurara.8Mushirongo kwakaliremo vashita vavo kuna kukunga vimuna mumafuva, muruvede rwamatiku. 9Makura muEngeli waHompa amoneke kukwavo, ntani ghuyerere waHompa aghuteme papavo naku vakundurukida, vavo avakara naghoma waghunene.10Makura muEngeli avatantere ashi, ''Kapishi mutjire ntani kapishi mukare naghoma, mukondashi ame kuna yita kukwenu Mbudi yaRuhafo yiwa oyo ngayi yito ruhafo rwarunene kuvantu navantje. 11Muliyuva lya namuntji mushitata shaDafiti kuna shampuruka mo Muyogholi! Ghuye ndye Kirisitusi Hompa! 12Oshino ntjo shiyivito nakutapa kukwenu omo ngamu mudimburura: Yendenu mushitata shaBetelemu ngamu kawana mukeke vanadingiri pamakeshe mbyo vana murangeke pashikumba shakulyera vimuna.13Mpopo tupu akalire ghuno muEngeli makura apa moneke mbunga yavaEngeli vavayingi vamuliwiru, vavo kuna kutanga nakupanda nakushamberera Karunga, vavo kuna kughamba ashi, 14''Mfumwa naghuyerere kwaKarunga wamuliwiru-wiru, ntani, mpora namatungiko nalirago vikare palivhu mughudyuni naghuntje kuvantu vakupura mwaHompa.''15Opo vatundirepo vaEngeli papavo vavyuke muliwiru, makura vashita vandywi avaghamba mukatji kavo ashi, ''Tushapukenu tuyende kuBetelehemu tukakenge vitetu ovino vina shoroko, kuhamena kwavino ana tuneyeda Hompa.'' 16Makura avakwangura kuyenda vakatike, avakawana Mariya, naYosefu, ntani namukeke, ghuye kuna murangeke mushikumba shakulyera vimuna.17Opo vamanine kukenga mukeke, makura avatapa nakutantera navantje ovo vakaliropo mbudi yakuhamena ghuno mwanuke. 18Vantu navantje ovo vayuviro yino mbudi oyo vaghambire vashita vavimuna, kwatetuka. 19Ano ngoli Mariya kwakupulire nakughayara ghunene kuhamena navintje ovyo ayuvire, akara namakupuliro ghunene munda yamutjima wendi. 20Makura vashita vavimuna avavyuka kuvimuna vyavo, vavo kuna kufumadeka nakutanga nakushamberera Karunga kuhamena kwanavintje ovyo vayuvire, navi vamonine ntani navi vyashorokiro, yira momu tupu vavi tapire nakuvighamba kukwavo.21Kuruku rwamayuva matano-na-matatu, mwanuke wamumati vana hepa kumuruwana vyavamba vamutete, ntani avamuruku lidina lyendi ashi Yesusi, lino lidina kwalitapire muEngeli ghuye mukeke shimpe kapi ana kara mulira lya vawina.22Opo atikiremo mayuva ghavo ghaku kara vana kushuruka, kutwara yira momu vatjanga muveta yaMoses, makura vakurona vendi avashapuka vatware mwanuke kuntembeli yaHompa kuYerusalemu vaka mutungike nakumutapa kushipara shaHompa. 23Veta yaHompa kwatanta ashi, ''Kehe ghuno mwanuke wamumati wambeli wakuhova kurupuka mulira lya vawina vana hepa kumutapa vamutungike nga kare waHompa.'' 24Ntani nka veta kwatanta ashi vakurona vamwanuke vana hepa kutapa naku dyamba ndjambo kutwara momu yatanta veta yaHompa ashi, ''Muna hepa kutapa mapato maviri ndi maputukuwa ghamadidi maviri.''25Momo, muYerusalemu kwakaliremo mukafumu walidina Simiyoni, mukafumu wamuhungami wakulimburuka nakufumadeka veta daHompa. Ghuye kwatatilire ghunene kwaKarunga nga tume muyogholi kumuhoko wava Isirayeli, ntani Mpepo yaKupongoka kwakalire papendi nakumupititira. 26Mpepo yaKupongoka kwamutantilire nakumuneyeda ashi ghuye kapi nga fa vamuvhumbike ghuye ahana kumona Kirisitus ogho nga karo Hompa naMuyogholi.27Mpepo yaKupongoka kwatantera, Simiyoni ayende kuntembeli. Opo vayatikire vakurona vaYesus, mukeke vamutungike nakuruwana navintje yira momu vyakarapo pampo yavo napaveta, 28makura Simiyoni aghupu mukeke amu kwata mumaghoko ghendi makura aghamba nkango dakupandura nakutanga Karunga, ashi, 29''Hompa Karunga weno pulitira ngoli mukareli ghoye ayende mundyira yambili, weno nkango doye dina tikilirimo kwanavintje ovyo waghamba.30Mantjo ghande ana mono Muyogholi, 31ogho watuma kukwetu nga yoghore vantu navantje: 32Ogho nga yito shite naghukenu naghuyerere nga shorore Mbudi yaRuhafo yaghushili kuvaPagani ntani Ghuye nga yita mfumwa naghuyerere kumuhoko ghoye wava Isirayeli.''33Vashe navawina vamwanuke kwatetukire kwadino nkango aghambire Simiyoni kuhamena kwamwanuke. 34Makura Simiyoni akambeke lighoko lyendi atungiki mwanuke, makura atantere Mariya vawina vamwanuke ashi, ''Terera nawa, ghuno mwanuke nga renkita vantu vavayingi vamu Isirayeli nga vatunde kwaKarunga ntani nka vantu vavayingi ngava kushighure vavyuke kwaKarunga, ntani ghuye kwaya nga tape marondoro kuvantu ntani nga kare shiyivito kwanavantje, ano ngoli vavayingi ngava mukanana - 35ntani nka rufuro rwaghutwe nga rutomona munda yamutjima ghoye namumaghayaro ghoye ove vawina - mposhi nga vimoneke nakushoroka navintje ovyo vyavando munda yamutjima ghoye ntani navi vyavando munda yadimutjima davantu vavayingi ngavi shoroke nakumoneka paghukenu.''36Muporofete wamukadi walidina Ana naye mpo akalire. Lidina lya vashe vaAna mbo Faniwele ntani vavo kwatunda mulira lya Asheri. Muporofete Ana kwaparukire liparu lya mughukurupe. Mugholikadi Ana kwaparukire tupu kumwe namukafumu wendi mwaka dakutika kuntano-na-mbiri makura adohoroka, 37makura ghuye kwakalire mukadi wakufita vyendi ntani kwakalire mughudike mwaka dimurongo ntano-na-ntatu-na-mwaka ne. Ghuye ka karanga muntembeli kehe pano ntani kuruwana muntembeli kehe liyuva ntani ghuye kuraperera kehe pano naku dililira matiku namwi. 38Paruvede ndoro Ana naye ayatiki muntembeli, makura atapa mpandu kwaKarunga kuhamena kwaghuno mwanuke, ntani atantere vantu navantje vakaliropo vyakuhamena ghuno mwanuke ogho vataterera nga yite liyoghoro muYerusalema.39Vakurona vamwanuke opo vamanine kuruwana navintje yira momu tupu vyawapera kutwara muveta yaHompa, makura avavyuka kuGalileya, kushitata shavo shaNasareti. 40Ghuno mwanuke akuru parutu ntani akara nankondo ana pama, ntani akara nandunge naghukonentu waghuyingi, mukondashi Nkenda YaKarunga kwakalire papendi.41Kehe mwaka vakondi vendi kuyenda kuYerusalemu kushilika shakuvhuruka mfa nalivhumbuko ndi Paska. 42Ghuno mwanuke opo akalire namwaka murongo-na-mwaka-mbiri, vakurona vendi avayendi nka kumwe naye kuYerusalemu paruvede rwakuvhuruka shilika shamfa nalivhumbuko. 43Opo shapwire shilika kuruku rwamayuva ghamasheshu tupu, vantu avatameke kuvyuka-vyuka kumandi ghavo. Ano ngoli mwanuke wamumati Yesus akara momo muYerusalemu ntani vakurona vendi kwato ovyo vayivireko. 44Vavo kwaghayalire ashi mwanuke kuna piti kumeho nambunga yavantu vakuhova ovo vapitiro kumeho, vavo kwayendire ghure waliyuva limwe lyaku yura. Vakurona vendi ntani vana kudimburura vashane mwanuke kumwe nakupura mumbunga yavantu valikoro navaholi.45Vakuro vendi kapi vamuwanine mwanuke, makura avavyuka nka kuYerusalemu vaka mushane momo. 46Kuruku rwamayuva matatu ghaku mushana avamuwana muntembeli, kuna shungiri mukatji ka varongi matjangwa, ghuye kuna shungiri kuna kuterera kumarongo ntani kuna kupura mapuro. 47Vantu navantje ovo vamuyuviro kuna kughamba kwatetukire kuhamena ndunge naghukonentu wendi waku ghamba nakulimburura mapuro kuhamena kumatjangwa.48Vakurona vendi opo vamumonine, kwatetuka. Makura vawina avaghamba kwendi ashi, ''Monande, mukonda munke ghuna kuruwanena vyaweno kukwetu? Terera, vasho ntani name ove tuna kushana-shana ntani tuna kara nashinka kukoye.'' 49Mwanuke alimburura kukwavo ashi, ''Mukonda munke muna kuntjana-ntjanena? Kapi mwayiva ashi ame kwaya kuviruwana ntani nahepa kuruwana viruwana vyava Vava? 50Ano ngoli vakurona vendi kapi vayivire nakukwata lighano dino nkango aghambire kukwavo.51Makura ayendi navakurona vendi vavyuke kukwavo kuNasareti ntani mwanuke alimburuka nakufumadeka vakurona vendi. Vawina vamwanuke kwakupura vininke vyaviyingi munda yamutjima wavo. 52Makura mwanuke Yesus akuru parutu napa mutika ntani nka akuru pandunge akara naghukonentu waghuyingi, ntani Karunga amu horo ntani amu tungiki ntani vantu navo avamuhoro ghunene.
31Mumwaka wamurongo-na-mwaka-ntano daTiberius Sisara walipangero lyava Roma waku pangera mughudyuni - paruvede rwaPontius Pilatus ghuye kwakalire Ngughuru wamu Yudeya, Herodes kwakalire mupangeli wamu Galireya, ntani mughunya Herodes walidina Felepu kwakalire mupangeli washirongo shaItureya ntani nashirongo shaTirakonitisi, ntani Lusaniyasi ghuye kwakalire mupangeli washirongo shaAbulene, 2paruvede runo Anasi naKayiyafasi kwakalire vapirisiteli vavanene muYerusalemu - Karunga kwatapire Nkango dendi kwaYohanesi mona Sakariya ghuye kuna kara mumburundu.3Yohanes kwayenda kumaruha ghavirongo navintje ovyo vyakundurukido Yorodani, kwaronga naku yuvita Mbudi yaku tjindja ghukaro vakushighure mposhi vawane liyoyero lyamu mema lyaku dongononapo ndyo davo.4Mwaka dina kapito mumbapira yamuporofete Yesaya kwatjangamo ashi, ''Liywi lya ghumwe kuna kuyiyira mumburundu ashi, 'Wapayikenu ndyira yaHompa, kenitenu naku vyukilita ndyira yendi yikare yina vyukiliri.5Dimuramba nadintje ngava difutira dishetakane, ntani ndundu namadamenena ngava difutira nga dishetakane, ntani vitaghura vyakupenga-penga navyo ngava viwapeka vikare kuna wapa kuna vyukiliri, ntani mavhango nalivhu lya kudama-dama ngava lishetakanita ngava dikiramo vitaghura vyaviwa, 6ntani navantje ngava kenga namantjo kuviruwana vyaKarunga omo nga yoghora vantu vendi vatunde mundyo.''7Makura Yohanesi aghamba atantere mbunga yavantu ovo vayiro kukwendi avakushe mumema ashi, ''Anwe vana vamayoka ghavambaroka! Are ana mutantero nakumurondora nakumutjilita muduke muyekuno mushenduke nakutjira lishandu lya Hompa nampanguro yendi yaghugara yakumeho?8Kutunda paweno, yimenu ngoli nyango yaghuhunga yayiwa muneyede ashi mwatjindja ghukaro wenu, ntani kapishi mutameke kughayara ashi, ''Atwe kwatunda mulira lya Aburahamu nyakulyetu, 'ntani ame kuna kumutantera nakumurondora ashi Karunga kuvhura kutura ghano mawe ghana raro pano vakare vana vaAburahamu.9Pa weno, likuva lyapwa kare kurora lya kuteta ndandani davitondo. Kehe shino shitondo shakupira kuyima nyango yayiwa yaghuhunga, kushitetapo shitundepo makura kushivhukumina mumundiro.''10Makura vantu vamwe ovo vakaliro mumbunga avamupura, ashi, ''Vinke ovyo tuvhura kuruwana?'' 11Ghuye avalimburura naku vatantera ashi, ''Nkeneshi ove kuna kara navikoverero viviri, damuna shikoverero shoye shimwe ghutape kwaghu ana karo rutu-rutu, ntani nkeneshi ove kuna kara nandya dadiyingi, damuna ghutapeko kwaghu wakupira ndya.''12Ntani vafutiti mutero vamwe navo avaya kukwendi avakushe muliyoyero lyamu mema, ntani navo avamupura ashi, ''Mushongi, vinke tuna hepa kuruwana?'' 13Ghuye avatantere ashi, ''Kapishi kutininika vantu vafute vimaliva vyaviyingi vyakupitakana pavi lyaturapo lipangero lya vaRoma.''14Ntani vakavita vamwe navo avaya kukwendi avamupura ashi, ''Atwe ne weni? Vinke tuna hepa kuruwana?'' Ghuye avatantere ashi, ''Shayekenu kushakana vimaliva vyavantu kunkondo, ntani shayekenu kurundira vantu ntani shayekenu kughamba vimpempa. Tamburenu shiringa yamfuto yenu oyo mwawananga ndyoyo yagwanapo.''15Vantu kwataterera nankondo ashi Kirisitusi Muyogholi kuna kuya, vantu vavayingi kwakupulire munda yadimutjima davo kuhamena Yohanesi mukushi, ashi walye ndye ngakaro Kirisitusi Muyogholi. 16Yohanesi mukushi avalimburura naku vatantera navantje ashi, ''Ame kuna kumukusha tupu mumema, ano ngoli mpwali ghumwe ogho ana kuyo kuruku rwande ghuye kwakara nankondo dadinene dakupitakana papande, ntani ame kapi nahungama kushutura rughodi rwaku nkaku dendi. Ghuye kuna kuya nga mukushe naMpepo yaKupongoka ntani namu Mundiro.17Ghuye kuna kwaterere shidyamito mulighoko lyendi ntani natjipa yakugaghununa mungu namahangu namantorwa ntani ghuye kupungura mahangu namantorwa mushishete. Ntani ghuye kuvhukumina mungu navirwenge vipwe mumundiro wakutwera ghunene wakupira kuveva.''18Ntani Yohanesi kwatapa makorangedo ghankondo kuvantu vakushighure vatjindye ghukaro wavo, ntani Yohanesi ayuvita Mbudi YaRufaho yayiwa kuvantu. 19Ntani Yohanesi kwatantilire Hompa Herodesi mupangeli washirongo vyakuhamena Herodesiya mukamali wana kufa mukurwendi Filipu ashi, nakuwapashi ghuye kukwara Herodisiya mukamali wana kufa mukurwendi Filipu, yino ndyo yayinene, ntani ghuye kwaruwanine viruwana vyaghurunde kushipara shaKarunga ghuye shimpe kuna kuparuka, 20ntani ghuye kwawederera ko kundyo dendi paku tantera vakavita vendi vakwate Yohanesi vamuture mudogorongo.21Paruvede runo, Yohanesi shimpe kapi vana mutura mudorongo, vantu navantje kwayendire kukwendi vavakushe liyoyero lyamu mema, ntani Yesusi naye kwayendire kukwendi vamukushe mumema, makura araperere, ghuye shimpe kuna kuraperera, liwiru alipaturuka likare kuna gharuka, 22makura Mpepo yaKupongoka ayi sheghumuka papendi mushishwi shaliputukuwa, makura liywi ali tundu muliwiru kuna kughamba ashi, ''Ove Monande ogho nahora ghunene. Ame kuna kara naruhafo kukoye.23Makura Yesus kwatamikire viruwana vyendi, Ghuye kuna kara namwaka dimurongo ntatu. Ghuye monarume waYosef, Yosef monarume waHeli, 24Heli monarume waMatati, Matati monarume waLevi, Levi monarume waMeleki, Meleki monarume waYanayi, Yanayi monarume waYosef.25Yosef monarume waMatatiyasi, Matatiyasi monarume waAmosi, Amosi monarume waNahumu, Nahumu monarume waEsili, Esili monarume waNagayi, Nagayi monarume waMayati, 26Mayati monarume waMatatiyasi, Matatiyasi monarume waSemeyini, Semeyini monarume waYoseki, Yoseki monarume waYoda.27Yoda monarume waYoyanana, monarume waReyesa, monarume waSerubabeli, monarume waSalatiyeli, monarume waNeri, 28monarume waMeleki, monarume waAdi, monarume waKosamu, monarume waElumadamu, monarume waEre, 29monarume waYoshwa, monarume waEliyaseri, monarume waYorimu, monarume waMatati, monarume waLevi.30Levi kwakalire monarume waSimeon, Monarume waYudah, monarume waYosef, monarume waYonam, monarume waEliakim, 31monarume waMelea, monarume waMena, monarume waMatata, monarume waDavid, 32monarume waYesi monarume waObed, monarume waBowasi, monarume waSalmon, monarume waNashshon.33Ntani Nashoni monarume waAmenadabu, monarume waAduminu, monarume waAruni, monarume waHeshironi, monarume waPeresi, monarume waYuda, 34monarume waYacobu, monarume waIsaki, monarume waAburahamu, monarume waTera, monarume waNahoru, 35monarume waSerugu, monarume waReghu, monarume waPelegu, monarume waEberu, monarume Shela.36Shela kwakalire monarume waKayinani, monarume waArufasadu, monarume waShemu, monarume waNowa, monarume waLameki, 37monarume waMetusela, monarume waEnoku, monarume waYaredu, monarume waMahalalele, monarume waKayinani, 38monarume waEnosi, monarume waSetu, monarume waAdamu, monarume waKarunga.
41Makura Yesus, ghuye kuna yura Mpepo yaKupongoka, atundu kumukuro waYorodani aka yenda Mpepo ayi mupititiri yi mutware mumburundu, 2oko aka gwanekilire namunyengi Satana aka kara mumasheteko ghure wamayuva dimurongo ne. Mumayuva naghantje ghano ghuye kwato ovyo alire, makura kughuhura wamayuva dimurongo ne, ayi mukwata ndjara.3Munyengi Satana aghamba kukwendi ashi, ''Nkene shi ghushili ove Mona Karunga, tantera lino liwe likutjindye likare mboroto yakulya.'' 4Yesus amu limburura ashi, ''Matjangwa kwatanta ashi, 'Muntu nakuparukashi tupu kumboroto pentjayo.5Makura munyengi Satana apititiri atwara Yesus aka ronda kundundu yayire ghunene aka muneyeda maghuntungi namaghushwi ghamughudyuni naghuntje paruvede rwarufupi tupu. 6Munyengi Satana aghamba amu tantere ashi, ''Ame kunu tapa nkondo kukoye dakupangera ghudyuni nalimona nalintje, namfumwa naghukonentu ogho nakara nagho wakupangera navintje, ntani ame kwakara nankondo dakutapa lipangero kwakehe ghuno nashana. 7Nkene tupu, ove kughu tongamena pangoro doye ntani ghunyongamene mutwe ghoye ghuraperere naku shungida kukwande, lino limona nalintje ndi lyoye ngali karo.''8Waro nka Yesus amu limburura nka kumwe naku mutantera ashi, ''Matjangwa kwatanta ashi, 'Tongamena nakukarera Hompa Karunga ghoye, tupu pentjendi ahuru.9Shimpe nka munyengi Satana atwara Yesus ayende kuYerusalemu makura aka murondeka aka yimana pawiru-wiru yalitungo lya ntembeli, makura amu tantere ashi, ''Nkene shi ghushili ove Mona Karunga, vatuka ghutunde pano pawiru ghuyende palivhu. 10Mukondashi matjangwa kwatanta ashi, 'Ghuye nga tuma naku tantera vaEngeli vendi ngava kupopere naku kukunga,' 11ntani, Vavo ngava kukaghura ngava kukwate mumaghoko ghavo, mposhi nga ghupire kupunduka mpadi doye muliwe.''12Yesus amu limburura, naku mutantera ashi, ''Matjangwa kwatanta ashi, 'Nakadidi ntani kapishi kusheteka Hompa Karunga ghoye.''" 13Munyengi Satana opo amanine kusheteka Yesus, makura amu shuvu atundupo papendi aka yenda tanko aka taterera dogoro shirugho shakukwamako.14Kutunda pano makura Yesus avyuka kushirongo shaGalileya ghuye kuna yura nkondo dakutunda kuMpepo, mbudi yakuhamena kukwendi kwakuhanena yiyende virongo navintje ovyo vyava kundurukido. 15Ghuye makura atameke kuronga vantu muSinagoge davo ntani navantje vayuviro marongo ghendi kwatetukire nakutapa mpandu.16Makura Yesus ayendi kuNasareti, oku akulira, kutwara mumpo yavo, muliyuva lya Sabata naye ayendi aka ngena muSinagoge, makura ashapuka ayimana kumeho avarure matjangwa nakudameka. 17Makura muruwani ghumwe wamu Sinagoge atapa mbapira yamuporofete Yesaya kukwendi. Yesus aghupu mbapira makura afikura palipepa opo vatjanga dino nkango ashi:18''Mpepo yaHompa mpoyili mumwande, mukondashi ghuye kwangwaveka mbyo atungika nganu yuvite Mbudi yaRuhafo yayiwa kuvantu varuhepo. Ghuye kwantuma nganu yuvite Mbudi YaRufafo kuvantu vamudorongo mposhi ngava shutuke ngava manguruke ngava tunde mumango ntani naku verura vatwiku ngava pahuke vatameke kumona, ntani naku shutura vapika vatunde mughupika namumango namumahepeko, 19ntani nakutantera vantu vayive ashi ghuno mwaka ngo atoghorora Hompa ntani Ghuye nga fera nkenda naku yita mpora naku neyeda shihoro naghuwa kuvantu vendi.''20Makura afiki yino mbapira, ayi tapa yivyuke kwamuruwani wamu ntembeli, ghuye ayendi aka shungira. Mantjo ghavantu navantje vakaliro muSinagoge tupu vana kukenga nakunwika kukwendi. 21Makura ghuye aghamba nakuvatantera ashi, ''Odino nkango odo vatjanga muno mumatjangwa odino muna yuvhu namuntji weno dina tikilirimo ngoli.'' 22Kehe ghuno akaliromo muntembeli ogho ayuviro omo ana kughamba nakuronga kwatetukire kunkango namarongo ghaghukonentu ogho arupukiro mukanwa kendi, ano ngoli vantu vamwe ovo vakaliromo avapura ashi, ''Nane kapishi ndye mona Yosefu ghuno ndi?''23Ghuye avatantere ashi, ''Ame ghushili nakughamba kukwenu ashi anwe nga mughamba dino nkango davishewe kukwande dakutanta ashi, 'Ove ndokotora ndi nganga, kuverure naghumoye. Vitetu naviruwana vyavinene ovyo twa yuvha waruwana muKaperenumu, ghuna hepa kuviruwana nka muno mushitata shoye omo watunga.''' 24Ano ngoli ghuye aghamba nakuvatantera ashi, ''Ame kuna kumutantera ghushili ashi, kwato muporofete ogho vatambura vamufumadeka ntani kwato mbudi yendi oyo vatambura vantu vamushirongo shendi shamvharera.25Ntani nka ame kuna kumutantera ghushili ashi vakamali vakufita vavyavo vayingi vakaliromo mushirongo shaIsirayeli paruvede rwamuporofete Eliya, liwiru kwapatire likare ghure wamwaka ntatu namakwedi matano-ghumwe kwato kuroka mvhura ntani vantu kwakalire murukukutu namulirumbu lya linene mushirongo. 26Ntani nka muporofete Eliya kapi vamutumine ayende kwakehe ghuno mukatji kavo vatungo mushorongo shaIsirayeli, nane ngoli muporofete kwamutumine ayende kushitata shapeke shaSarefati mushirongo shaSidoni, ayende kwamufita vyendi ogho atungiro mo. 27Ntani paruvede rwamuporofete Elisha vantu vavavirema vayingi vatungiro mo mushirongo shaIsirayeli, ano ngoli kwato nampili ghumwe oghu vaverulire mo muno mushirongo, nkwandi Nayamani tupu pentjendi waku shirongo shaSiriya.''28Vantu navantje ovo vakaliro muSinagoge kwagarapire ghunene opo vayuvire dino nkango. 29Vavo kwashapuka, avamukwata vamurupwite pandye yashitata, vamutware kundundu vakaronde pawiru yandundu yayire ghunene, nashitambo vaka muvhukumine palivhu vaka mudipaye. 30Makura ghuye atundu mumaghoko ghavo apiti mukatji ka mbunga yavo ayende kulivhango lya peke.31Liyuva limwe ghuye kwayendire kuKaperenumu, kushitata shamuGalileya, makura muliyuva lya Sabata aka tameka kurongo muSinagoge yavo. 32Vantu kwatetukire kumarongo ghendi, mokonda shi ghuye kuronga mukumo ntani nankondo.33Pa ruvede runo muSinagoge kwakalire mo murume ghumwe ogho akaliro nampepo dadidona, makura ghuye kwaghamba naliywi lya kudameka ashi, 34"Oho! Vinke ghuna shana kuruwana kukwetu, ove Yesus waku Nasareti? Kunaya ghutu dyonaghure po ndi? Ame nakuyiva ashi overe - ove Mupongoki kwatunda kwaKarunga!''35Yesus aharuka amwenikida yino mpepo yakunyata, ayi tantere ashi, ''Mwenako kapi shi ghughambe! Rupuka tundamo mumwendi!'' Makura mpepo yayidona ayi muvhukuma aku gandere palivhu mukatji ka vantu, ntani yarupukamo mumwendi, kapi nka yamuhepikire yi muruwane mwamudona. 36Vantu navantje ovo vakaliropo kwatetukire ghunene, ntani navantje mbyo tupu vana kughambaghura. Vavo avakupura mukatji kavo kumwe nakughamba ashi, ''Nkango munke dino daweno? Ghuye kughamba nkango dankondo damukumo dakupangera mpepo dadidona ditunde muvantu.'' 37Makura mbudi yakuhamena kukwendi ayi kuhana yiyende kuvirongo navintje vyamaparambo ovyo vyava kundurukido.38Makura Yesus arupukamo muSinagoge ayendi aka ngena mumundi waSimoni. Vangumweyi vaSimoni vavo kuna rara kuna kuvera ghunene lishakima, makura vantu ovo vakaliromo mumundi avamu shungida Yesus averure muveli. 39Yesus ashapuka ayendi papepi namuveli makura atjidamo ghuvera walishakima ghutundemo mumwendi, makura lihamba ali rupukamo. Mpopo tupu muveli averuka ashapuka atameke kuva wapayikira ndya valye.40Liyuva shimpe kapi lina toko, vantu kwayita vaveli vavayingi vakuvera mahamba namaghuvera ghaku kushuva-shuva vaye kwaYesus. Ghuye akambeke maghoko pakehe ghuno wakuvera dogoro navantje kwaveruka. 41Ghuye kwapangera mpepo dadidona dirupuke ditundemo muvantu vavayingi, ntani pakurupuka muvantu dino mpepo dadidona kwatakuma nakughamba ashi, ''Ove Mona Karunga!'' Yesus kwaharukira nakutantera mpepo dadidona ashi kapishi dighambe ditantere vantu vyakuhamena kukwendi, mukondashi mpepo dadidona kwamuyivire ashi ghuye Kirisitus.42Liyuva lyaku kwamako kuruvede rwangura-ngura, Yesus kwashapuka ayende kulivhango lya mumburundu aka kare papentjendi. Mbunga yavantu kwayenda vashane Yesus dogoro avamuwana avakatika kulivhango oko akalire. Mbunga kapi yashanine kutunda kukwendi. 43Yesus avatantere ashi, ''Ame nahepa kuyenda nuyuvite Mbudi yaRuhafo yaghuntungi waKarunga kuvantu navantje ntani nakuvitata navintje, oshino ntjo shitambo osho vantumina nuye mughudyuni.'' 44Makura atwikiri kuronga nakuyuvita Mbudi yaRuhafo muSinagoge dadiyingi muvitata vyamu Yudeya.
51Liyuva limwe vantu vavayingi kwapongire nakukundurukida Yesus vaterere omo ana kuronga nkango daKarunga, ntani ghuye kwayimanine pepi nalidiva lya Genesareti. 2Ghuye amono mawato maviri kuna sheyama muliyenga kuntere yalidiva. Vashakangcongco ndi vakwati ndtjwi vavo vana tundumo muwato kuna kukusha makwe ghavo. 3Makura Yesus aperama muwato ghumwe, waSimoni, amu tantere ashi atindike wato ghutunde paliyenga ghuyende mumema pakatji ka lidiva. Makura Yesus ashungiri muwato pakatji ka lidiva atwikiri kuronga mbunga yavantu ghuye kuna perama muwato.4Opo amanine kuronga, Yesus atantere Simon ashi, ''Perama muwato duwa ghuyende palitondo ntani damuna makwe ghoye teya ghukwate ntjwi.'' 5Simoni amu limburura nakughamba ashi, ''Muhona, atwe kuna hugu ntjwi namakwe matiku naghantje, ano ngoli kwato ntjiwi oyo tuna kwatamo, nampili ngoli ame kuna kuruwana tupu yira momu ghuna kughamba nkango doye, ame kunu teya makwe mumema.'' 6Simoni naghunyendi avaruwna yira momu avatantilire Yesus vateye makwe mumema, makura avakwata ntjwi dadinene dadiyingi, dogoro makwe ghavo aghatameke kutweka nakutaghuka. 7Makura avayita vaghunyavo ovo vakaliro muwato wapeke, vaye kukwavo vava vatereko. Vavo avaya vakukwatite varondeke ntjwi mumawato maviri naghantje dogoro kwayura ghunene, mawato agha tameke kungena mema nakudama.8Ano ngoli Simoni Petrus, opo amonine vyaweno, atongamene pangoro dendi kumeho yaYesus, aghamba ashi, ''Tundapo kara ghure name, ame muntu wandyo, Hompa.'' 9Ghuye kwatetukire, mukonda yantjwi dadiyingi dadinene odo vakwatire mulikwe, ntani navantu navantje ovo vakaliro naye kwatetukire ghunene. 10Mukatji ka vantu kwakaliremo Yakopu naYohanes, vana rume vaSebediye, vavo kuruwana kumwe naSimoni. Makura Yesus atantere Simoni ashi, "Kapishi ghukare naghoma, kutunda pano ove nga ghukara mukwati wavantu.'' 11Opo vasheyekire mawato ghavo muliyenga, makura avashuvu navintje avakwama Yesus.12Liyuva limwe Yesus kwakalire mushitata shimwe, kwakaliremo murume wakuvera vingondwe murutu naruntje. Opo amonine Yesus, aya kukwendi atongamene pangoro dendi kumeho yendi, ashungida kukwendi ashi, ''Hompa, verura ghuvera wande, mukondashi ove kuvhura kuverura ghuno ghuvera nkene tupu ghuna shana.'' 13Makura Yesus ahonyonona lighoko lyendi amu kwata parutu, ghuye aghamba ashi, ''Ame kuna shana. Veruka.'' Mpopo tupu averuka ntani vingondwe kwatundamo murutu rwendi, akara kuna kushuka murutu naruntje.14Ghuye amu tantere ashi kwato kutantera ko kehe ghuno kuhamena kwavino, ano ngoli amu tantere ashi, ''Shapuka ghuyende, ghuka moneke kwamupirisiteli aka kumone omo ghuna fana, makura ghukatape ndjambo yaku neyeda ashi ghuna veruka ntani ghuna kushuka ghuna kene, katape ndjambo kutwara muveta daMosesi, ghuka kare ghumbangi ghoye kukwavo ashi ove kuna veruka.''15Ano ngoli mbudi yakuhamena kwaYesus omo averulire ghuno murume ayi kuhana yinde kwaghure, makura mbunga yayinene yavantu avaya kukwendi vaya yuvhe marongo nankango dendi ntani nakuverura maghuvera ghaku kushuva-shuva muvantu navantje. 16Ghuye kehe pano kayendanga kulivhango lya kughure mundurundu aka kare papentjendi aka raperere.17Liyuva limwe Yesus ghuye kuna kuronga, mbunga yavakafumu yava Farisayi navarongi vaveta kwayire avashungiri vaterere kumarongo ghendi, ntani vavo kwatundire kudimukunda daku kushuva-shuva damushirongo shaGalileya namuYudeya ntani nakushitata shaYerusalemu. Nkondo daHompa Karunga dakuverura maghuvera naghantje kwakalire papendi.18Yesus ghuye kuna kuronga, makura vakafumu vamwe kwayita muntu wakuvera shirema shamundambo, vavo kwamushimbira paghuro wendi, kwashanine vamutware kwaYesus munda yandyugho vaka murangeke kumeho yendi. 19Ano ngoli kapi vawanine mpito yaku ngena vayende munda vamutware kwaYesus mukondashi mbunga yayinene kwayuliremo, makura avarondo pawiru yandyugho avatomona waranda vamutupike ayende munda, vavo kwasheghumuna ghuro wendi, mukatji ka mbunga, mpopo akalire Yesus vamuture kumeho yendi.20Yesus opo amonine ashi vavo kuna kara nalipuro lya linene, Ghuye aghamba ashi, ''Mukafumu, ndyo doye vana dikughupiripo.'' 21Makura varongi vamatjangwa navaFarisayi avatameke kukupura mapuro ghaweno, makura avaghamba ashi, ''Are mwene ghuno waku ghamba nkango daku shwaghura Karunga? Atwe twa yiva nawa-nawa ashi kwato wakughupapo naku dongonona ndyo davantu, nkwandi Karunga pantjendi ti ahuru?''22Ano ngoli Yesus, ayivire ashi vinke vana kughayara mundunge davo, Ghuye avalimburura nakuvapura weno ashi, ''Mukonda munke muna kukupulira vyaweno mudimushima denu? 23Vinke vyaghurerupo kughamba, muku ghamba ashi, 'Ndyo doye vana dighupupo' ndi muku ghamba ashi, 'Shapuka yenda'? 24Mumone ghuno murume kuna veruka mpo ngoli shi anwe nga muyive ashi Mona Muntu kwakara nankondo pano palivhu daku ghupirapo vantu ndyo davo,''_ Makura ghuye atantere murume washirema ashi_ ''Ame kuna kukutantera weno, shapuka, damuna ghuro woye ntani ka yende kumundi wenu.''25Ghuno mukafumu mpopo averuka ntani ashapuka kumeho yavantu adamuna ghuro wendi opo aralire. Makura ayendi kumundi wendi, ghuye atapa mpandu nakutanga Karunga. 26Vantu navantje kwatetukire ntani navo avatapa mpandu nakutanga Karunga. Vavo kwakalire naghoma naghutjirwe waghunene, makura avaghamba ashi, ''Atwe tuna mono vitetu vyavinene namuntji.''27Kuruku rwavino vishorokwa, Yesus atundupo palivhango aka yenda makura amono mukafumu wakufutita mutero walidina Levi ghuye kuna shungiri mutende yakufutira mutero. Yesus amu tantere ashi, ''Shapuka nkwame ghukare murongwa wande.'' 28Makura Levi ashapuka amukwama Yesus, ghuye kwashuva navintje kunyima.29Makura Levi awapayiki shipito shashinene mumundi wendi shaYesus navarongwa vendi. Vafutiti mutero vavayingi kwapongire ntani navantu vamwe vavayingi kwashungilire kutafura yakuyura kuna kulya kumwe ndya. 30Makura mbunga yavaFarisayi naVarongi matjangwa avatameke kushivana vatantere varongwa vaYesus, naku ghamba ashi, ''Mukonda munke muna kulyera ndya nakunwa kumwe naVafutiti mutero ntani navantu vandyo?'' 31Makura Yesus avalimburura ashi, ''Vantu vandyewa-ndywa parutu kapi vahepa mupangi; vantu vakuvera mbo vaku shana kumona mupangi. 32Mo ngoli, Ame kapi naya mukuya shana vantu vavahungami, nane ngoli ame kwaya kuvantu vandyo mposhi vakushighure vatunde kundyo.''33Vampititi vava Yuda kwatantere Yesus ashi, ''Varongwa vaYohanesi vavo kuraperera nakudililira kehe pano, ntani Varongwa vaVafarisayi navo kuruwana ndapero daweno. Ano ngoli Varongwa voye ove Yesus vavo kuhokwa tupu kulya nakunwa.'' 34Yesus avalimburura nakuvatantere ashi, ''Are wakutantera vantu vaku ponga pashipito shalikwareko ashi kapi shi vadyobwane ndya dapa shilika shankwara nkene shi mukwali ghuye mpwali mukatji kavo? 35Ano ngoli ruvede nga rutikamo opo nga tundamo mukwali mukatji kavo, mumayuva ngogho navo ngava raperera nakudililira.''36Makura Yesus avatantere nkango davishewe navifanikito vyaweno ashi. ''Kwato muntu waku taghura shivando shalikeshe lya lipe ature naku hondyera awapeke lirwakani lya likuru-kuru likare kuna wapa. Nkene shi aruwana vyaweno, ghuye nga dyonaghura lirwakani lya lipe nga litavaghuke, mukondashi shivando shalikeshe lyaku kurupa kwato kugwaneka ntani kwato kuwapera muku shitura palirwakani lya lipe.37Kwato wakudunga marovhu ghamape apungure mushipapa shashikuru-kura. Nkene ngaghu ruwana vyaweno, marovhu ghamape nga ghatomona shipapa shashikuru-kuru, makura nga ghukombanita marovhu nga ghatekera palivhu ntani shipapa nasho nga shidyonaghuka. 38Ano ngoli nkene kuna kudunga marovhu ghamape ghuna hepa kugha tura mushipapa shashipe. 39Nkene shi ove muntu wakunwa nakumakera marovhu ghamakuru-kuru nwa tupu ngogho, kwato nka kushana kumakera kumarovhu ghamape makura nga ghughambe, ashi, 'Marovhu ghamakuru-kuru kutovara ghunene.'''
61Vino kwashorokire muliyuva lya Sabata Yesus ghuye kuna kuvindakana mulifuva, makura varongwa vendi avatjora mahangu ghantafu, avaghafenye vaghupeko mungu, valyeko mbuto. 2Vafalisayi vamwe vavo mbo tupu vana kukenga kwavyo vana kuruwana, makura avaghamba ashi, ''Mukonda munke muna kuruwanena viruwana ovyo vapira kupulitira muliyuva lya Sabata?''3Yesus avalimburura, kumwe nakuvatantera ashi, ''Kapi mwavarura mumatjangwa vyakuhamena kwaDafiti navaruwani vendi, kwavyo varuwanine opo vafire ndjara ndi? 4Dafiti kwayendire aka ngena muntembeli yaKarunga aka romba mboroto yakupongoka yandjambo oyo vatura kumeho yaHompa Karunga, makura aghupu alye paruvede runo ghuye shimpe kapishi muPirisiteli, ntani mboroto dimwe atapa kuvaruwani vendi navo valye ko, dino mboroto dandjambo kapi vapulitira kehe ghuno mukulyako nkwandi vaPirisiteli tupu.'' 5Yesus atantere vaFariseyi ashi, ''Mona Muntu ghuye ne Hompa nampili kuliyuva lya Sabata ntani kwakara nankondo daku tatntera vantu kuhamena kuviruwana vyaghuhunga vyaku ruwana muliyuva lya Sabata.''6Vino kwashorokire muliyuva limwe nka lya Sabata Yesus kwayendire aka ronge vantu muSinagoge. Munda kwakaliremo mukafumu ghumwe wakufa lighoko lyaku rulyo, lyalyo kwato kuruwana ntani kwato kuhonyonoka. 7Varongi vamatjangwa nava Farisayi vavo kuna kukengera tupu kwaYesus vamone ashi kwaverura ghuno muntu muliyuva lya Sabata ndi, mposhi vakare nakonda yaku murundira ashi kuna ruwana ndyo muliyuva lya Sabata. 8Ano ngoli Yesus kwayivire ovi vyakaliro mumaghayaro ghavo makura atantere mukafumu walighoko lya kufa ashi, ''Shapuka yenda ghuka yimane mukatji ka mbunga.'' Makura mukafumu walighoko lya kufa ashapuka aka yimana mukatji ka mbunga.9Makura Yesus aghamba ashi, ''Ame kuna kumupura weno ashi, vinke vapulitira kuruwana muliyuva lya Sabata, vyaku ruwana ghuwa naghuhunga ndi, vyaku popera monyo wamuntu, ndi vyaku dipaya naku dyonaura monyo wamuntu?'' 10Kapi vatapire lilimbururo, makure Yesus apiruka avakengurura navantje, makura atantere mukafumu walighoko lya kufa ashi, ''Honyonona lighoko lyoye.'' Ghuye aruwana ngoli, ahonyonona lighoko lyendi lya kuvera, mpopo tupu lighoko lyendi aliveruka likare lya ndyewa-ndyewa. 11Makura vavo kwayura ghugara mumwavo avatameke kuvhunguta vakuyonge ashi weni omo vamuruwana Yesus.12Kuruku rwashirugho, vino kwashorokire weno, liyuva limwe Yesus kwarupuka ayende kundundu aka raperere. Ghuye kwaraperera matiku naghantje ashungide kwaKarunga. 13Opo lya pumine liyuva lyaku kwamako, ghuye kwayita vantu vendi vaponge kumwe, mposhi atoghorore vantu ovo nga vakaro varongwa vendi ovo nga vatwenya ashi vaApositoli.14Madina ghava Apositoli ngo ghano Simon (ogho kava twenyanga ashi Peturusi) namughunyendi Andrias, naYakopu, naYohanesi, naFilipus, naBartolomeusi, 15naMateusa, naTomas, naYakopu mona Alufeusi, naSimon ogho kava twenyanga ashi waghupampi, 16naYudas mona Yacopu, ntani naYudas Isikalyoto ogho aka mutuliro muliyome.17Makura Yesus aghurumuka atunde kuwiru yandundu kumwe nambunga yavarongwa vendi avayimana kumwe palivhu navarongwa vendi ntani mbunga yavantu yayinene kwapongire palivhu, vavo kwatundire kuYudeya naku Yerusalemu ntani naku vitata vyaku lifuta kuTire ntani naku Sidoni. 18Vavo navantje kwayire kukwendi vayaterere nakuyuvha marongo ghendi ntani nakuya verura maghuvera ghavo naghantje. Ntani Vantu navantje ovo vahepiro kumpepo dadidona navantje kwava verura mpopo. 19Kehe ghuno akaliro palivhango kwashanine akwate parutu rwendi mukondashi nkondo dakuverura kwatundire mumwendi, ntani ghuye kwaverura navantje.20Yesus makura akenge kuvarongwa vendi, aghamba ashi, ''Lirago lya linene kukwenu anwe vantu varuhepo, mukondashi ghuntungi waKarunga kwenu wahamena. 21Lirago lya linene kukwenu anwe muna kufo ndjara paweno, mukondashi anwe ngamu ka kuta. Lirago ghunene kukwenu anwe muna kuliro mbyo muna kara muliguvo paweno, mukondashi anwe ngamu ka kara naruhafo.22Lirago ghunene kukwenu anwe nkene shi vantu kwamunyenga, naku mushwena, naku mutjida, naku mutuka ntani naku mushwaghura vaghambe ashi anwe vantu vavadona, vantu vandyo, mukonda yaku limburuka nakukwama Mona Muntu. 23Nkene vyaweno kuna shoroka kukwenu karenu naruhafo mudane liyuva nalintje, mukondashi anwe nga mukawana mfuto yayinene muliwiru, yivenu ashi nampili vanyakulya vavo mo ngoli kava ruwananga vaPorofete vaKarunga mwaka dina kapito.24Lihudi ghunene kukwenu anwe mwaweko limona lya liyingi paweno, mukondashi anwe muna wana kare ruviya rwenu. 25Lihudi ghunene kukwenu anwe muna karo mumakuta paweno, mukondashi anwe nga mukafa ndjara kughuhura. Lihudi ghunene kukwenu anwe muna karo muruhafo paweno, mukondashi anwe nga mukalira nakuguva kughuhura.26Lihudi ghunene kukwenu anwe nkene kuna kumupandayika naku mughamba vantu mwamuwa paweno, mukondashi vanyakulyenu mo ngoli kava pandayikanga nakutekura vaPorofete vavipempa.27''Ano ngoli kukwenu anwe muna kuterero kukwande paweno, ame kuna kumutantera ashi, horenu vana nkore venu ntani ruwanenenu ghuwa vantu vaku munyenga. 28Anwe shwerenu lirago vantu vaku mufinga ntani rapererenu naku shungidirako vantu vaku muhepeka nava vaku mutekura mwamudona.29Kehe ghuno waku kutoghona kulitama limwe, ove piruka ghutape litama lya ghuviri alitoghone. Nkene shi muntu kuna shakana mbayikisa yoye, ove tapa nashikoverero shoye shakuntji ashimbe. 30Kehe ghuno muntu waku romba shininke kukoye, ove tapa. Nkene shi muntu kwaya romba shininke kehe shino kukoye atwara makura kapi aka shivyuta, ove kwato kumutondora ntani kwato kuyenda ghuka shi shimbe.31Nkene shi kuna shana vantu ngava kuruwanene ghuwa, nkwandi nove varuwanene ghuwa. 32Nkene shi ove kwahora tupu vantu vaku kuhora, mfumwa namfuto munke ngaghuka wanenamo? Nampili vantu vandyo navo kwahora tupu vantu vaku vahora. 33Nkene shi ove kuruwanena tupu ghuwa kuvantu vaku kuruwanena ghuwa, mfumwa namfuto munke ngaghuka wanenamo? Nampili vantu ndyo navo kwaruwananga vyaweno. 34Ndi nkene shi ove kutapa makongo kuvantu ovo wayiva nava wahuguvara ashi vavo ngava vhura kufuta vavyute, mfumwa namfuto nampandu munke ngaghuka wanenamo? Nampili vantu vandyo navo kutapa kwavantu vakandyo, mukondashi navo kwakara nalihuguvaro ashi ngava wana mfuto yavo yakuyura.35Nane ngoli anwe horenu vana nkore venu ntani varuwanenenu ghuwa. Ntani anwe tapenu makongo kwakehe ghuno ana kushano makongo ntani kapi shi mutaterere ashi ngava fute vavhute, mposhi ngamu kawana mfuto yenu yayinene, anwe ntani nga mukara yira vana vaKarunga wamuliwiru, mukondashi Hompa Karunga kwakara nankenda nambili kuvantu vaghugu vakupira kupandura ntani naku vantu vavarunde. 36Karenu nankenda, yira momu akara Shenu nankenda yayinene kuvantu.37Kwato kupangura vantu mwamudona, mposhi ngava kapire kumupangura nanwe mwamudona. Kapi shi kutapa ghundyoni kuvantu, mposhi nanwe ngava kapire kumupa ghundyoni. Ghupirenupo vantu ndyo davo, mposhi nanwe ngava ka mughupirepo ndyo denu.38Tapenu ghuwa kuvantu, mposhi Karunga nga kamupe nanwe ghuwa. Tapenu lihemere lya kuyura mahangu - ntani nakudekako mposhi mahangu agwanekemo, ntani kuterako nka mahangu muyudeko kulihemere dogoro kuna kushukumuka mahangu awere palivhu - makura ghutape kuvantu. Lihemere olyo waruwanitire ghumete nakutapa mahangu, ndyo ngava ka ruwanita ngava kamete mahangu ngava katape kukoye ngava ka vyute.39Makura Yesus avatantere nka shifanikito shimwe ashi,'' Mutwiku kuvhura apititire mutwiku ghunyendi ndi? ntjeneshi mo ngoli, ameshi navantje kuvhura vawere mulikwina, ndi kapishi mo ngoli? 40Murongwa kapi apitakana murongi wendi, Ano ngoli ntjeneshi murongwa vana mumana kumuronga ntani ana kufana naye yira murongi wendi.41Anwe kukenga mananga ogho ana karo pamantjo ghavaghunyenu, ano ngoli anwe kwato kumona mananga ogho ana vindamo pamantjo ghenu? 42Ntani anwe kutantera vaghunyenu ashi, 'Muholi renka nukughupe mananga ogho ana vindamo pamantjo ghoye,' Nkene shi ove kapi ghuna kumona ashi nove pamantjo ghoye kuna vindamapo mananga? Anwe vavikupaki! Pa muhovo ghupenupo tanko mananga ogho ana vindamo pamantjo ghenu, mposhi mupahuke mukenge nawa ntani muvhura kukenga nawa mughupepo mananga ogho ana karo pamantjo ghavaghunyenu.43Anwe yivenu ashi kwato shitondo shashiwa shakuyima nyango dadidona dakughora, ntani kwato shitondo shashishidona shakughora shakuyima nyango dadiwa dakutovara. 44Kehe shino shitondo kushi dimburura mukonda yanyango dakuyimako. Ntani vantu kwato kunyanga nyango yaghukuyu kushitondo shamiya, ntani vantu kwato kunyanga mandyembere muvishwa vyamiya.45Muntu wamuwa kushorora limona lya munda yamutjima naghukaro wendi waghuwa, ano ngoli muntu wamudona waghurunde kushorora ghudona naghurunde wendi wamunda yamutjima wendi. Mbyovyo vyayuro munda yamutjima namu maghayaro ghamuntu mbyo vyaku rupukira mukanwa kendi.46Yesus atantere vantu ashi, "Mukonda munke mwantwenyenanga me ashi, 'Hompa, Hompa,' ano ngoli anwe kapi mwalimburukwa kukwande naku marongo ghande? 47Kehe ghuno wakuya kukwande aya yuvhe nkango dande namarongo ghande, Ame nganu muneyeda ashi weni omo nga fana. 48Ghuye kwafana yira mukafumu wakutima likwina lya lire liyende mulivhu mbyo aturamo mawe ghamanene ghankondo dogoro lya yura mbyo atatekerapo ntjima-ntjima yalitungo liyimane pamawe ghankondo. Opo nga ruya ruhandyo rwamema, nalikundungu lya nkondo lyaku yambura mema makura nga ghakutoghone mo mundyugho yayo nakadidi shi kukunyunganga kuna yimana tupu ndyikiti, mukondashi kwayitungira pamawe ghankondo.49Ano ngoli muntu wakuyuvha nkango dande namarongo ghande ntani ghuye kwato kulimburukwa naku ghatikitamo, ghuye kwafana yira mukafumu wakutungira ndyugho yendi pamusheke, yahana kuyimana palitateko lya lidyuni. Opo nga ghaya mema gharuhandyo nalikundungu lya mpepo tupu ngayi kutoghonamo mundyugho, makura ngayi yambuka naku mbandaghuka, dogoro nga yidyonaghukepo nayintje.''
71Yesus opo amanine kuronga vantu, makura ashapuka ayende kushitata shaKaperenamu.2Mushitata kwakaliremo mukurona wavakavita wavaka Roma, ghuye kwakalire namukareli wendi wamwanuke muviruwana ogho aholire ghunene, ghuye kwavelire ghunene, ghuvera waku mutwara kumfa. 3Mukurona wava kavita opo ayuvire mbudi yakuhamena kwaYesus, makura atumuko matimbi ghava Yuda, vayende kwaYesus vaka muyite kukwendi ngaya verure mukareli wendi. 4Opo vayatikire kwaYesus, avamushungida nakulilira kukwendi, ashi, ''Ghuno muntu kuna hepa ghunene mbatero yaku koye, 5mukondashi ghuye kwahora ghunene vantu vamuhoko wetu ntani nashirongo shetu mbyo atu tungira Sinagoge yetu.6Makura Yesus ayendi navo kumundi wamukurona wavakavita. Tupu vakatikire papepi namundi, mukurona wavakavita atumuko mukareli wendi aka tantere Yesus ashi, ''Hompa, kapi nashana ghukurorore, ame kapi nahungama kushipara shoye ntani ove kapi wawapera kungena mulipata lyande. 7Mukondashi ame kapi nahungama kushipara shoye, ghamba tupu nkango makura mukareli wande kwaveruka. 8Mukondashi ame muntu waku kwama naku ruwana naku limburuka ntani naku tikitamo veta, ntani ame kwakara navakurona vande vakuwiru, ntani name nka kwakara navakavita vande vamunda yalipangero lyande ovo napangeranga vakwame veta dande. Nkene shi anu tantere ghumwe ashi, 'Kayende' ghuye ana hepa kukayenda ntani,' nkene anu tantere ghumwe ashi, 'Ya kuno kukwande,' ghuye ana hepa kuya kukwande ntani, nkene anu tantera ghumwe ashi, 'ruwana vino, 'ghuye ana hepa kuviruwana vitikemo ntani.''9Yesus opo ayuvire vyaweno, ghuye kwatetuka ghunene, makura apiruka kumbunga oyo yamukwamino avatantere ashi, ''Ame kuna kumutantera weno ashi, ame kapi nawana mo muntu walipuro lya kuhura pano mushirongo shaIsirayeli nashintje waku fana yira ndyeghuno.'' 10Ovano vakavita ovo vatumine makura avavyuka, opo vakatikire kumundi, avakawana muveli ana veruka wandyewa-ndyewa.11Kutunda mpopo tupu mushirugho shashifupi, Yesus kwashapuka ayende kushitata shaNayini, navarongwa vendi ntani mbunga yayinene kwamukwama vayende naye. 12Tupu vakatika vangene mulivero lya shitata, vavo kwamona, vantu kuna shimbi shimpu vatware, ghuno muntu wakufa kwakalire mumati walimpowe (vawina kwakalire mufita vyendi), ntani mbunga yavantu vamushitata kwayendire namukadi wakufita. 13Makura Hompa opo amona ghuno mukadi, amu fere nkenda yayinene makura amu tantere ashi, ''Kapi shi ghulire.'' 14MakuraYesus akwa ngura kuyenda dogoro aka tika kwavo vashimbiro shimpu aka kwata pambete opo pakaliro shimpu, makura ovo vadamunino shimpu avayimana. Makura Yesus aghamba ashi, ''Mumati, ame kuna kukutantera ashi, rambuka.'' 15Makura nakufa mpopo arambuka ashungiri ntani atameke kughamba, makura Yesus amu ghupu amu tapa kuvawina.16Vantu navantje kwakalire naghutjirwe, makura avatanga nakupanda Karunga, avaghamba ashi, ''Muporofete wamunene mpwali mukatji ketu'' ntani avaghamba nka ashi, ''Karunga kuna vhuruka ntani kuna kudingura vantu vendi.'' 17Yino mbudi yakuhamena kwaYesus kwakuhanena mushirongo nashintje shaYudeya ntani naku dimukunda nadintje odo dakundurukido shirongo.18Varongwa vaYohanesi mukushi avaka tantera Yohanesi navintje ovyo vyashorokiro. 19Makura Yohanesi ayita vano varongwa vendi vaviri avatumu vayende kwaHompa, vaka mupure ashi, ''Atwe kuna shana kuyiva ashi ove vatuma ogho twa taterera ndi, ndi shimpe mpwali wapeke ogho ngayo kunyima?'' 20Varongwa vaYohanesi avaya papepi naYesus, avaghamba nka ashi, ''Atwe Yohanesi mukushi ana tutumo tuye kukoye, tuya kupure ashi, 'Ove twa taterera nga ghuye kukwetu ndi, ndi shimpe tu taterereko wapeke ogho ngayo kunyima?'''21Mpopo tupu Yesus kwaverura vantu vavayingi ku maghuvera ghaku kushuva-shuva navikunkira vyavantu naku tjida mpepo dadidona muvantu, ntani kwaverura vantu vavatwiku vapahuke mantjo vatameke kumona. 22Makura Yesus alimburura naku tantera varongwa vaYohanesi vano vaviri ashi, ''Opo mukatika, katanterenu Yohanesi vyakuhamena kwavino muna mono ntani navi muna yayuvhu ovyo vina shoroko. Vatwiku vana pahuka kuna kumona, vantu vavirema vana shapuka kuna kuyenda, vantu vavingondwe vana veruka, vantu vavipuru-puru kuna kughamba ntani kuna kuyuvha, vantu vakufa kuna kurambuka mumfa, ntani vantu vavahepwe kuna kuvayuvitira Mbudi yaRuhafo. 23Ntani ka tanterenu Yohanesi ashi Karunga nga tungika muntu wakuyuvha marongo ghendi nga pure ntani wakumona nakuyuvha viruwana vyendi nga pure naku limburuka, ghuye nga pire kutunda kukwendi.''24Opo vatundirepo vakayende varongwa vaYohanesi, makura Yesus atantere mbunga vyakuhamena kwaYohanesi ashi, ''Muntu wakufana weni mwayendilire mumburundu muka mumone? Rughu rwaku menga naku kankama naku kunyunganga kumpepo ndi? 25Muntu wakufana weni ogho mwayendilire muka mumone? Mukafumu wakudwata vyuma vyaghufughuli vyakuvembera ndi? Tererenu, vantu vakudwata nawa vyuma vyandiro vyaghufughuli vakutunga muruviya ne kwandi vahompa ovo vatungo mumbara. 26Anwe ne muntu munke ogho mwayendilire muka mumone? Anwe kwayendire muka mone muPorofete? Yi, ame kuna kumutantera ashi, Yohanesi kwapitakana vaPorofete navantje.27Ghuno Yohanesi ndye vatjanga mumatjangwa ashi, ''Kengenu, Ame kuna kutuma mukareli wande nga yende kumeho yenu, ghuye nga kawapeke ndyira yenu.' 28Ame kuna kumutantera ghushili ashi, kwanavantje ovo vashampuruka vakamali, kwato wamunene wakupitakana paYohanesi mukushi. Muntu wamudidi wakupira likuto mughuntungi waKarunga ghuye kwakara namfumwa yayinene yakupitakana paYohanesi.''29(Vantu navantje opo vayuvire vino, kumwe nava futiti mutero, vavo kwapura mpopo mwaKarunga ashi ghuye kwahungama, mukondashi vavo kwava kusha muliyoyero lya Yohanesi mukushi. 30Ano ngoli vaFariseya navarongi matjangwa vavo kapi vavakusha muliyoyero lya Yohanesi mukushi, mukondashi vavo kapi vatambura shihoro nashitambo shaKarunga.)31Yesus aghamba ashi, ''Ovano vantu, varuvede rwantantani weno, kuvafanekita weni? Weni omo vana fana weno? 32Vavo kuna fana yira vanuke vana pongo mumavhango ghakughulitira ngeshefa, mbyo vana shungiri kumwe tupu kuna kudanaghuka naku ghamba, weno ashi, 'Atwe kuna kumuyimbira ntjumo dakudana, ano ngoli anwe kapi muna kudana. Atwe mbyo tuna muyimbiri ntjumo damulitamu dakulira, ano ngoli anwe kapi muna kulira.'33Nanwe mo muna fana weno, Yohanesi mukushi opo ayire kukwenu ghuye kapi ka lyanga ndya ntani kapi ka nwanga marovhu, anwe mbyo mwamunyenga ntani mbyo mwaghamba ashi, 'Ghuye kwamupangeranga mpepo dadidona.' 34Ano ngoli Mona Muntu ghuye kwaya kukwenu ghuye kulya ndya nakunwa marovhu, makura anwe mbyo mwamushwena naku munyenga ntani mbyo mwaghamba ashi, 'Kengenu, ghuno mukafumu kwakara namakurulya ntani namakurunwa, ntani ghuye kwaku kwata ghukwavo navafutiti mutero ntani navantu vandyo!' 35Vino kuna shoroka weno, mposhi ghukonentu waKarunga ghu moneke ntani ghukare mushiruwana mposhi vana vendi vakuhungama valimburuke nakughutikitamo.36Liyuva limwe muntu ghumwe wavaFarisayi kwayita Yesus vakalye kumwe naye ndya. Makura Yesus ayendi aka ngena mulipata lyamu Fariseyi aka shungira kutafura valye kukumwe ndya. 37Momo, mushitata kwakalire mo mukadi ghumwe washikumbu ogho vayivire navantje ashi mukadi wandyo. Opo ayuvire mukadi ashi Yesus mpwali mumundi wamuFariseyi kuna kulya ndya, makura yendi nangwavero yendi yamaghadi Alabasta ghakunuka rupekwa. 38Yesus ghuye kuna shungiri kutafura kuna kulya ndya makura mukadi aya kukwendi ayimana kunyima yendi, makura atongamene kumpadi dendi, atameke kulira, aghupu maruntjodi ghendi akushu kumpadi daYesus, ntani akokota kumpadi dendi, nahuki daku mutwe wendi ntani ancumita nakanwa kumpadi dendi makura aghupu maghadi ghakunuka lidumba lya liwa, awaveke naku kwiti kumpadi dendi.39Ghuno muFariseyi ayitiro Yesus kumundi wendi opo amonine vyaweno, ghuye akupura munda yamutjima wendi, naku ghamba ashi, ''Nkene shi ghuno murume muporofete waghushili, ndi ana yiva ashi mukadi munke ghuno ana kukwato kumpadi dendi, mukondashi ghuno mukadi muna ndyo.'' 40Makura Yesus alimburura naku ghamba weno ashi, ''Simoni, ame kuna shana kukuronga ko nkango daghukonentu.'' Simoni aghamba ashi, ''Murongi, Ghamba tupu!''41Yesus amu tantere shifanikito ashi, ''Muntu ghumwe kwaruwananga ngeshefa yakutapa vimaliva kuvantu vakorote: Ghuye kwatapire vimaliva vyamakongo kuvantu vaviri. Ghumwe kwaghupire makongo ghaku tika kundjambi yaku ruwanena mayuva mafere matano ntani ghumwe kwaghupa makongo ghaku tika kundjambi yaku ruwanena mayuva dimurongo ntano. 42Ovano vantu vaviri navantje kapi vavhulire kufuta vavyute makongo ghavo, makura ghuno muntu wakutapa makongo ghavimaliva adongonona po makongo ghavano vantu vaviri naghantje. Pa katji kavano vantu vaviri, ghunindye po waku kara naruhafo rwarunene wakuhora ghunene ghuno muntu wakutapa makongo?'' 43Makura Simoni alimburura ashi, ''Ame mukutwara mumwande kwandi ndyegho wamakongo ghamayingi.'' Makura Yesus amu limburura ashi, ''Ove kuna limburura mughuhunga.''44Makura Yesusi apiruka akenge kwamukadi ntani atantere Simon ashi, ''Ove kuna kumona ovi ana kuruwana ghuno mukadi ndi. Ame kunaya mbyo nangene mulipata lyoye. Ove kapi ghuna tapa mema kukwande nuku kushe kumpadi dande, ano ngoli ghuno mukadi kuna ghoreke mpadi dande namaruntjodi ghendi, kenga ovi ana kuruwana, kuna kukusha mpadi dande namaruntjodi ghendi mbyo ana kukokota kumpadi nahuki dendi damu mutwe. 45Kutunda tupu opo nangene mulipata lyoye ove kapi ghuna morora naku ncumita, kenga ghuno mukadi kutunda tupu opo anaya tiki shimpe kapi ana shayeke kuncumita kumpadi dande.46Ove kapi ghuna kwiti naku waveka maghadi kumpadi dande, ano ngoli kenga ghuno mukadi kuna kukwita naku waveka maghadi ghandiro ghakunuka rupekwa kumpadi dande. 47Ame kuna kumutantera weno ashi, ndyo daghuno mukadi, dadiyingi, weno kuna didongonona po - ghuye mbyo ana kara nashihoro shashinene kukwande. Muntu wandyo dadisheshu odo vana dongonona po kukara nashihoro shashididi.''48Makura Yesus atantere ghuno mukadi ashi, ''Ndyo doye kuna didongonona po." 49Vantu ovo vakaliro kumwe naye kutafura avatameke kukupura ashi, ''Muntu munke mwene ghuno waku dongonona po nandyo davantu ndo dino.'' 50Ntani Yesus atantere nka ghuno mukadi ashi, ''Lipuro lyoye lya linene lina kuparura. Yenda mumbili yaHompa.''
81Kuruku rwashirugho, Yesus navarongwa vendi kwashapukire vayende kudimukunda naku vitata vyaku kushuva-shuva vatware nakuronga nakuyuvita Mbudi yaRuhafo yakuhamena kughuntungi waKarunga. Ghuye kwayendire navarongwa vendi muronga navaviri, 2ntani navakamali vamwe ovo averulire kumpepo dadidona namaghuvera ghaku kushuva-shuva vavo mbo vano: Mariya Magdalena, ogho varupwitire mpepo dadidona ntano-na-mbiri; 3naYohana, mukamali waKusa, lirenga lya likadi lya Herodesi; naSusana; ntani navakamali vamwe vavayingi, ovo, kava tapango mbatero yavimaliva namaghushwi ghaku kushuva-shuva kwaYesus navarongwa vendi.4Liyuva limwe mbunga yavantu kwayire vaponge palivhango limwe tupu, vavo kwatundire kuvitata vyaku kushuva-shuva vaye kwaYesus, makura ghuye kwava tantere nkango damuvishewe ashi: 5''Mukuni kwayendire aka kune mbuto. Nda ahokwera muku kuna mbuto mulivhu makura, mbuto yimwe ayi were kuntere yandyira makura vantu avayilyatanga nampadi davo, makura vidira avilipo yino mbuto avayimana po. 6Ntani mbuto yimwe ayi were palivhu lya nkarawe, makura ayi tameke kukura wangu-wangu, ntani ayi kukuta nka wangu-wangu, mukonda kwakalire palivhu lya lisheshu ntani kapi yawanine mema.7Ntani mbuto yimwe ayi were mumiya, makura ayi kuru kumwe namiya navishwa makonda yampato yino mbuto ayi fu. 8Ntani mbuto yimwe kwawera mulivhu lya liwa lya ndombe makura ayi kuru ayi kuvhara yitape muyangu waghuyingi wakupita kana palifere.'' Yesus opo amanine kughamba dino nkango, ayiyiri atantere vantu ashi, ''Kehe ghuno akaro namatwi ghakuyuvha, ayuvhe vino dina kutanta dino nkango.''9Makura varongwa vendi avamupura avatantere ashi vinke dina kutanta dino nkango damuvishewe. 10Yesus avatantere ashi, ''Ghukonentu nandunge dakuyiva naku kwata lighano nkango dakuhorama daghuntungi waKarunga kwavitapa tupu kukwenu, kuvantu vaku kukarera ame kughamba navo munkango damuvishewe, mposhi nampili ngava pahuke mantjo ngava mone, vavo kwato ovi ngava mona, ntani nampili ngava teye matwi ghavo ngava yuvhe dino nkango, ano ngoli kapi ngava yiva vakwate lighano ovyo datanta.'11Dino nkango davishewe kwatanta weno ashi: Yino mbuto kuna kara nkango daKarunga. 12Yino mbuto oyo yaweliliro kuntere yandyira kutanta ashi vano vantu ovo vayuviro nkango daKarunga, makura mudyonaghuli aya kukwavo avashakana dino nkango ditunde mo mudimutjima davo nga vapire kukara nalipuro mposhi ngava pire kuyoghoka kundyo davo. 13Yino mbuto yaweliliro pankarawe, kutanta ashi ovano vantu ovo vayuviro nkango daKarunga, makura avaditambura naruhafo. Ano ngoli vavo kapi vakalire nandandani daku ngena mulivhu; vavo kwakara tupu nalipuro mushirugho shashifupi tupu, makura shirugho shamasheteko nashirugho shamaghudito kapi vavhure kudidimika makura avashuvu nkango daKarunga ntani avatunda kulipuro.14Ntani mbuto oyo yaweliliro mumiya kutanta shi vantu ovo vayuviro nkango daKarunga, makura mundyira yaliparu lyavo, kwagwanekera navinka vyaliparu nalimona namaghuwa ghamuliparu ghamudyuni, makura kwadipaya nkango daKarunga kapi dawana livhango lya kuyima mbuto. 15Ntani mbuto oyo yaweliliro mulivhu lya liwa lya ndombe, ovano vantu ovo vayuviro nkango daKarunga, avadi tambura nawa vadipungure munda yadimutjima davo daku kushuka avalimburuka nakudikwama nakuditura mushiruwana, dogoro avayangura mo muyangu waghuwa waghuyingi nalididimiko lya linene.16"Kwato muntu wakutweda ramba ayi ture pashisha shakutura ramba makura ayi ture munda yambete. Nane ngoli, ramba kwawapera kuyitura pantishe yitape ghukenu mundyugho kwakehe ghuno waku ngena mo. 17Mukondashi kwato shakuvanda nga shipire kushoroka vashiyive vantu, ntani kwato shakuvanda nakuhorama nga shipire kushoroka paghukenu. 18Tererenu nawa mukwate lighano dino nkango, kehe ghuno akaro naghushwi wangandi, ngava muwedererako kughushwi wendi, ntani kehe ghuno wakupira ghushwi kehe ghuno, nakehe ghuno ghushwi waghudidi ogho akara nagho ngava ghumu shakana naghuntje.19Liyuva limwe vawina navaghuni vendi Yesus kwayire kukwendi vamumone, ano ngoli mukonda yambunga yayinene yavantu ovo vamu kundurukidiro mukatji kapi vawanine mpito yakungena vayende kukwendi. 20Makura vantu avamu tantere ashi, ''Vanyoko navaghuni voye mpovali pandye, ove vana kushana vakumone.'' 21Makura Yesus avalimburura naku vatantera ashi, ''Ame vanane navaghuni vande mbo vano vaku yuvha nkango daKarunga vadi limburuke nakuditura mushiruwana.22Liyuva limwe Yesus kwaperama muwato navarongwa vendi, makura avatantere ashi, ''Tuyendenu tu vindakane lidiva tuyende musheli munya yalikuru diva. Makura avaperama muwato vavindakane lidiva. 23Mundyira yakuduwa wato vavindakane mulidiva makura Yesus kwaporokera muturo arara. Makura likundungu lya mpepo yankondo kwayambuka mulidiva, mankumpi ghamanene kwayambura wato dogoro mema kwakuyura muwato, vantu ovo varondiro muwato kwakalire mushiponga shashinene.24Makura varongwa vaYesus avayendi kukwendi vaka murambwite, kumwe naku ghamba ashi, ''Murongi! Murongi! Atwe kuna kukufera!'' Ghuye kwarambuka mpopo makura aharuka akave likundungu namankumpi, namema makura mpopo tupu lifuta nalintje kwakutura, kwamwena teyete. 25Makura ghuye avapura ashi, ''Lipuro lyenu ne kuni nko oku lina kara?'' Makura vavo avakara naghoma ntani aghu vatundu, kwakutetuka ghunene, avakupura vavene-na-vavene ashi, ''Muntu munke mwene ghuno, waku kava naku pangera mpepo namema, ntani navintje kulimburukwa kukwendi?''26Makura Yesus navarongwa vendi avatwikiri kuyenda dogoro avakatika avakasheyeka kushirongo shaGadara, osho shakuvyuko nalifuta lya Galileya. 27Yesus tupu atunda muwato alyate palivhu paghurundu, ghuye kwakugwanekera namurume ghumwe ogho atundiro mushitata, ghuye kwakara nampepo dadidona. Ghuno murume kwakara shirugho shashire kwato kudwata vyuma, ntani kwato kurara mumundi ntani ghuye kararanga tupu mumayendo.28Murume wampepo dodidona opo amonine Yesus, aliri nakudameka ntani aku gandere kumeho yendi aghamba naliywi lya linene ashi, ''Vinka ghuna shana kuruwana kukwande, ove Yesus, Mona Karunga wakuwiru-wiru? Ame Kuna kuku shungida naku kukanderera ashi, kapi shi ghundyuvite kukora.'' 29Mukondashi Yesus kwatantilire kare dino mpepo dadidona dirupukemo mwaghuno murume. Virugho navintje yino mpepo kungena mumwendi yi hepeke, ghuno murume kehe pano kava mupandekanga, kumaghuru naku maghoko, vamu kunge naku munomena, ano ngoli ghuye kundembura maghuketanga atunde mumango makura mpepo dadidona kumutwara ayende mumburundu.30Makura Yesus apura ghuno murume ashi, ''Are lidina lyoye? Ghuye alimbura ashi, ''Ame mbunga yampepo dadidona,'' Mukondashi mpepo dadidona diyingi dangeno mo mumwendi. 31Yino mbunga yampepo dadidona kwashungida kwaYesusi ashi kapishi adi tininike naku dituma diyende muvirongo vyamulikwina lyalinene lyalikurundema lyakuntji yavirongo vyava fe vyarunyando namahepeko.32Mpopo palivhango kwakalirepo ghutanga wavinguru vyavyo kuna kulyera kuntere yandundu. Yino mbunga yampepo dadidona kwashungida kwaYesus ayi tume yingene mughutanga wavinguru, makura Yesu ayi pulitiri yi kangene mughutanga wavinguru. 33Makura yino mbunga yampepo dadidona kwarupukamo mwamurume ayi kangena mughutanga wavinguru, kwakuharukako tupu ghutanga wavinguru navintje kuna kudukira viyende mumema mulikurudiva makura navintje avi fu kumema.34Vakungi vinguru opo vamonine ovino vyashorokiro, kwaduka vayende vatware yino mbudi mushitata ntani yiku hanene mushirongo nashintje. 35Makura mbunga yavantu kwayenda vatunde mushitata vaka kenge ovyo vyashorokiro, makura avakatika avakawana Yesus ntani namurume ogho yarupukire mpepo yadidona. Murume kuna shungiri teyete kumpadi daYesus, kuna dwata nawa vyuma vyendi ntani kuna kara naghukaro waghuwa ntani kuna veruka wandyewa-ndyewa; vino kwatetukita vantu vamushirongo ntani kwava yitira ghoma naghutjirwe.36Varume ovo vakaliropo ovo vamonino vino omu vyashorokire mbo vatapiro yino mbudi kumbunga yavantu ashi weni omo ana veruka ghuno murume wampepo dadidona. 37Makura vantu navantje vamu shirongo shaGadara nadimukunda damaparambo kwashungida Yesus atundemo mushirongo shavo ayende kwapeke, mukondashi vino kwayitire ghoma naghutjirwe kukwavo. Makura Yesus navarongwa vendi kwaperama muwato vavindakane lidiva vayende vavyuke.38Ghuno murume ogho averukiro kumpepo dadidona kwashungida Yesus ashi ayende kumwe naye vamushimbe, ano ngoli Yesus amu tumu ayende kumundi ntani amu tantera nka ashi, 39''Kayende kumundi wenu ntani katante nakutapa ghumbangi kwanavintje ovyo ana kuruwanene Karunga.'' Makura ghuno murume kwayenda mundyira yendi nayintje, kwatantera vantu naku yuvita Mbudi yaRuhafo mushitata nashintje kuhamena kwavyo vyashorokiro ntani namu amu verulire Yesus.40Yesus navarongwa vendi avavyuka avakayenda dogoro avakatika, mbunga yavantu kwava taterera nankondo vavatambure naruhafo, mukondashi vantu vavayingi kwashanine kuva mona. 41Kwakuharukako tupu murume ghumwe walidina lya Yayirus, ghumwe wavakurona vaSinagoge, kwaya tupu kwawera kumpadi daYesus, amu shungida vayende kumwe kumundi wendi 42mukondashi monendi wamukadona ahuru, wamwaka murongo namwaka mbiri, kwavelire ntani kwakalire pepi namfa. Mbunga yayinene kwakundurukida Yesus, ntani kwamukwama vayende kumwe naye.43Ntani mumbunga yavantu kwakalire mo mukadi wakuvera wakupita honde ghure wamwaka murongo namwaka mbiri, ghuye kwamana limona lyendi nalintje kughuvera wendi, ano ngoli kwato kuveruka. 44Ghuno mukadi kwashupura Yesus kuruku rwendi dogoro aka tika aka kwata kulirwakani lyendi, mpopo tupu ghuvera wendi wakupita honde kwashaya ntani kwaveruka.45Makura Yesus apura ashi, ''Are ana kwato parutu rwande?'' Vantu navantje kwakanana, makura Peturusi aghamba ashi, ''Murongi, kenga yino mbunga yavantu vavo kuna kukurombera kehe ghuno kuna shana kukwata parutu roye ntani vavo kuna kukundurukida vana kutura mukatji vakwate parutu roye.'' 46Ano ngoli Yesus aghamba ashi, ''Mpwali ogho ana kwato parutu rwande, mukondashi ame kuna yuvhu nkondo kuna kurupuka ditunde murutu rwande.''47Ghuno mukadi kwadimburura ashi kapi nka ana kuvhura kuvanda mumbunga, makura aduka ayende kwaYesus aka kugandera kumeho yendi ghuye kuna kukankama. Ghuye kwatantera mbunga yayo kuna kuterera ashi, ghuye kwavera mbyo ana kwatere kulirwakani lya Yesus, makura mbyo ana veruka mpopo. 48Makura Yesus amu tantere ashi, ''Monande wamukadi, lipuro lyoye lina kuverura. Weno kayende nambili yaHompa.''49Yesus ghuye shimpe kuna kughamba namukadi, murume ghumwe kwatunda kumundi waYayirus kuSinagoge atape mbudi ashi, ''Monoye wamukadona ana dohoroko kumundi. Kwato nka ovyo ghu hepekera ghuno Murongi. 50Yesus opo ayuvire yino mbudi, atantere Yayirus ashi, ''Kapi shi ghukare naghoma, kara nalipuro, monoye nga paruka nga kara namonyo.''51Yesus opo aya tikire pandye yamundi, kwatantera vantu navantje varupuke mo mumundi vakare pandye yamundi, vahupare mo tupu vaPeturusi naYohanesi naYokopu, ntani navashe navawina vamukadona. 52Vantu vavayingi kwakalire naliguvo ntani kuna kulira ghunene mukonda yamfa damukadona, makura Yesus aghamba ashi, ''Kapi shi mulire, mukadona kapi ana fu kuna rara tupu.'' 53Vavo kwamushepa Yesus, mukondashi vayivire ashi mukadona kuna dohoroka.54Makura Yesus akwata kulighoko lya mukadona, aghamba naliywi lyaku dameka ashi, ''Mukodona, rambuka!'' 55Makura mpepo namonyo wendi aghu vyukirimo, murutu rwendi makura arambuka. Yesus atantere vakurona vendi vamupeko ndya alye. 56Vakurona vamwanuke kwatetuka ghunene, makura Yesus avatantere ashi kapi shi vavitante kuvantu ovino vyashorokiro.
91Yesus kwayita varongwa vendi vanya murongo navaviri vaponge makura avapa nkondo nalipangero lya kutjida mpepo dadidona nadintje muvantu ntani nakuverura maghuvera naghantje ghaku kushuva-shuva muvantu. 2Makura ghuye avatumu vayende mughudyuni vaka yuvite Mbudi yaRuhafo yaghuntungi waKarunga ntani naku kaverura vaveli.3Ghuye kwatantera varongwa vendi ashi, ''Kwato kushimba kehe shino muruyendo yikare - mpango, nandjato yavimaliva, nandya, ntani kwato kushimba vikoverero viviri. 4Nkene shi kuna ngene omo mumundi mbyo vana mutambura, muna hepa kukaramomo dogoro mpopo ngamu tundamo mushirongo nga muyende kulivhango lya peke.5Ano ngoli nkene shi kuna ngene omo mumundi makura kapi vana mutambura, muna hepa kutundamo omo mushitata, ntani muna hepa kuku kuku muna mbundu kumpadi denu yi tundeko mposhi ngayi ka kare ghumbangi wenu kukwavo ashi vavo kapi vamutambulire.'' 6Makura varongwa vendi kwayenda vakuhanene kudimukunda nadintje damushirongo, vaka yuvite Mbundi yaRuhafo naku verura vaveli kumavhango naghantje.7Herodesi mupangeli wamu Galileya opo ayuvire navintje vino vyashorokiro, akara naghoma, mukondashi vantu vamwe kwamutantilire ashi Yohanesi ana ka vhumbuka mumfa, 8ntani vamwe kwaghamba ashi muPorofete Eliya ana kavyuka, ntani vantu vamwe navo kwaghamba ashi ghumwe wava Porofete vakare ana moneke mukatji kavo. 9Makura Herode aghamba ashi, ''Ame kwatetire Yohanes mutwe wendi mbyo namu dipayire. Are nka ghuno naku yuvha ana kuruwano vyaweno? Makura akambadara kuyenda aka mumone Yesus.10VaApositoli opo vaka vhukire muruyendo rwavo, kwatantera Yesus navintje ovyo vaka ruwanine. Makura Yesus atantere varongwa vendi vashapuke vayende kumwe, kushitata shaBeteseyida vaka kare kulivhango lya pentjavo. 11Makura mbunga yavantu opo vayuvire yino mbudi, navo avava kwama nkoku vayendire. Makura Yesus kwatambura yino mbunga yavantu navantje ntani avatantere naku varonga vyakuhamena ghuntungi waKarunga ntani kwaverura vaveli navantje ovo vakaliro namaghuvera ghaku kushuva-shuva.12Ruvede runo liyuva kuna katoka, varongwa vaYesus kwayendire kukwendi vamu tantere ashi, ''Tantera vano vantu vayende vaka shane ndya namararo kudimukunda odo dakundurukido lino livhango, mukondashi lino livhango tuna kara livhango lya maghoko-ghoko. Yesus atantere varongwa vendi ashi, ''Vapenuko ndya valye.'' 13Vavo kwamu limburura ashi, ''Atwe kuna kara tupu namboroto ntano nantjwi mbiri - atwe kapi tuvhura kughura ndya dambunga yavantu vakutika pano vagwaneke.'' 14(Vavo kwaghambire vino mukondashi pano palivhango kwapongire po varume vakutika kumayovi matano.) Makura Yesus atantere varongwa vendi ashi, ''Tanterenu vano vantu vaponge vakare mutu-mbunga namutu-mbunga twa tusheshu, ntani mwakehe yino mbunga vakare mo vantu vakutika kudimurongo ntano.''15Varongwa vendi avaruwana yira momu vava tantelire, ntani avatantere vantu navantje vashungire. 16Yesus aghupu dino dimuntje ntano damboroto nantjwi mbiri, akankuka akenge kuliwiru, akanderere naku tungika dino ndya ntani atapa mpandu kwaVashe, makura abomona dino mboroto dikare dadididi, adi tapa kuvarongwa vendi, vavo vaka ditapere vantu, ovo vashungilire mutu-mbunga. 17Vantu navantje kwalya ndya dogoro kwakuta ntani ndya dimwe kwahuparako, makura varongwa vendi kwapongeka ndya odo dahupiroko vavo kwayuda vikumba murongo naviviri vyamboroto.18Liyuva limwe Yesus kwayendire aka kare kulivhango lya pentjendi kuna kuraperera, makura varongwa vendi avaya kukwendi. Makura Yesus apura varongwa vendi ashi, ''Vano vantu weni omo vana kughamba ashi ame re lidina lyande?'' 19Varongwa vendi kwalimburura ashi, ''Vamwe kuna kughamba ashi ove Yohanesi mukushi. Ntani vamwe ashi ove muPorofete Eliya, ntani vamwe ashi ove ghumwe wava Porofete vakare ogho ana ka vhumbuko kumfa.''20Makura ghuye apura varongwa vendi ashi, ''Anwe varongwa vande weni omo muna kughamba ame re lidina lyande?'' Peturusi amu limburura ashi, ''Ove Mesiya waKarunga.'' 21Mpopo Yesus kwatapa marondoro kuvarongwa vendi ashi nakadidi shi kuvitantera kehe ghuno, 22makura avatantere nka ashi, ''Mona Muntu nga kara murunyando ngava muhepeka ntani ngava mushwaghura naku mushwena Matimbi nava Pirisiteli vavanene navarongi vamatjangwa, ntani ngava mudipaya nga fe mfa dapa shilivindakano ngava muvhumbike makura muliyuva lya ghutatu ngaka vhumbuka kumfa.''23Makura Yesus atantere vantu navantje ashi, ''Kehe ghuno ana kushano kunkwama nga kare murongwa wande, nkwandi ana hepa kunyenga liparu lyendi ntani ghuye nga damune shilivindakano shendi kehe liyuva nga kwame mumwande. 24Mukondashi kehe ghuno wakuhora nakupopera liparu lyendi ngaka likombanita, ntani kehe ghuno waku kombanita liparu lyendi nga kare murongwa wande nga kwame mumwande nga popera liparu lyendi ntani nga kawana liparu lya naruntje. 25Vinke ngavi vhura kukwafa muntu nga weke nakuwana maghuwa naghantje ghamuno mughudyuni, ano ngoli kughuhura waruvede ngaka kombanite liparu lyendi namonyo wendi nga kayende mulidyonaghuko?26Kehe ghuno waku yuvha nkango dande makura ngafe ntjoni mukupura mumwande ntani namu nkango dande, name Mona Muntu nganu kafa ntjoni kukwendi opo nganu katika mughuntungi wande ntani namughutungi waVavava ntani namu ghuntungi wava Engeli vakupongoka. 27Vyaghushili naku mutantera ashi, mpovali vamwe ovo vana karo pano paweno vavo kapi ngava fa vahana kumona ghuntungi waKarunga.''28Opo amanine kutantera varongwa vendi dino nkango, makura kuruku rwamayuva matano-na-matatu Yesus, kwatantera Peturusi, naYohanesi naYakopu vayende vakaronde kundundu yayire vaka raperere. 29Yesus ghuye kuna kuraperera kundundu, mpopo tupu makura kushipara shendi kwakutjindja, ntani vyuma vyendi navyo kwakutjindja, kuna kutema yira shite shaliyuva lya kuvembera nakupayima ghunene.30Kwakuharukako tupu, varume vaviri vaPorofete vakare kuna yimana kumwe naye ntani kuna kughamba naye, Mosesi ntani naEliya, 31vavo kwayimanine ntani kwakalire mughukenu wamughuyerere wendi, kuna kughamba naYesus vyaku hamena kuruyendo rwendi, rwakuyenda kuYerusalemu nashitambo shaku katikitiliramo nkango naviruwana vyaKarunga.32Peturusi ntani navarongwa vaghunyendi navo mpo vakalire vavo kuna rara muturo twa tunene, opo varambukire muturo, vavo kwamonako tupu navo kuna kara mughuyerere wendi ntani varume vaviri kuna yimana kumwe naYesus. 33Tupu vatundirepo vano varume vaviri vakayende, makura Peturus atantere Yesus ashi, ''Hompa, nawa ghunene nkene tupu atwe ngatu kare mpo pano. Makura atwe ngatu tunge po ndyugho ntatu, ndyugho yimwe yoye, yimwe yaMoses, ntani yimwe yaEliya.'' (Ano ngoli Peturusi kapi ayivire ashi vinke ana kughamba.)34Ghuye shimpe kuna kughamba vino, makura liremo lya lishovagani kwaya papavo ntani kwava fikilira vakare mumundema, vavo kwakara naghoma waghunene opo vakaramo munda yamundunduma waliremo. 35Makura liywi kwatunda munda yaliremo, kuna kughamba ashi, ''Ghuno ndye Monande, ogho nahora ghunene ogho natoghorora; tererenu kukwendi.'' 36Tupu lya manine kughamba lino liywi, kwakuharukako tupu Yesus kuna yimana po pentjendi. Varongwa vendi kwamwena teyete ghure wamayuva ghangandi kwato ogho vatanterako vyakuhamena kwavyo vakamonine kundundu.37Liyuva lyaku kwamako, vavo kwatundire kundundu vaghurumuke, makura mbunga yavantu kwayenda vagwanekere naYesus. 38Kwakuharukako tupu, murume kwatunda mumbunga kuna kughamba naliywi lyaku dameka ashi, ''Murongi, ame kuna kushungida kukoye, fera nkenda ntani popera monande, ghuye kwamuyita tupu pentjendi ahuru. 39Mukenge tupu, mpepo dadidona kwangena murutu rwendi makura kehe pano kumu manga murutu rwendi naruntje dogoro kutakuma nakulira; ntani kumu mbirumuna aku dinge rutu rwendi naruntje makura kutameka kuruka ntutu yi tunde mukanwa kendi. Yino mpepo kapi yarupukanga yi tundemo murutu rwendi, ano ngoli nkene shi kuna kushana yi rupuke mo murutu rwendi yina hepa kumupuma yi mutoghone naku mugandera palivhu dogoro kuremana ghunene. 40Ame mbyo namuyita monande kuvarongwa voye ndi vatjidemo yino mpepo yi tundemo murutu rwendi, ano ngoli kapi vana kuvhura.41Yesus kwaghamba atantere varongwa vendi ashi, ''Anwe vantu varuvharo rwakupira lipuro ntani anwe kwakara naghukaro waghudona, dogoro shirugho shaku tika kuni nko ngamu kara name ntani nga mupura? Muyitenu ogho mwanuke kuno kukwande.'' 42Mundyira yaku muyita mwanuke kwaYesus, yino mpepo yayidona kwamu manga naku munyunga-nyunga yimu mbirumune dogoro kwamugandera palivhu. Mpopo Yesus kwaharukira mpepo yayidona yi tundemo mumwendi makura averura mwanuke, ntani amu tapa kwavashe.43Vantu navantje kwatetuka pakumona nkondo daKarunga dadinene. Vantu vavo shimpe kuna kukupura vyaku hamena kuvitetu ovyo aruwanine Yesus, makura ghuye kwatantera varongwa vendi ashi, 44''Turerenu nawa muyuvhe dino nkango mposhi mukwate lighano kwadino nkango naku ghamba kukwenu ashi: Mona Muntu ntantani ngava ka mutape mumaghoko ghavantu ngava ka mutware muliyome.'' 45Ano ngoli varongwa vendi kwayuvhire dino nkango aghambire, ano ngoli kapi vakwatire lighano ovi dina kutanta odino nkango. Karunga kwahoreka dino nkango dikare mulihoramo mposhi vantu ngava pire kuyiva ovyo datanta dino nkango, vavo ngava pire kuyiva naku kwata lighano ovi dina kutanta, makura varongwa vendi kwakalire naghoma muku mupura Yesus avatantere ovi dina kutanta dino nkango.46Kuruku rwashirugho, varongwa vendi avatameke kughamba vaku kanane mukatji ka mbunga yavo ashi are nga karopo mukondi wamunene wakupitakana vaghunyandi navantje. 47Yesus, kwayivire ovyo vyakaliro munda yadimutjima davo namu maghayaro ghavo, makura ghuye ayita mwanuke amu yimiki mulivhango lyendi kumeho yendi, 48ghuye avatantere ashi, ''Kehe ghuno waku tambura ghuno mwanuke wamudidi mukonda yalidina lyande, ghuye ame tupu ana kutambura; ntani kehe ghuno waku ntambura me, ghuye kuna tambura nka nandyegho antumo ame. Yivenu ashi Kehe ghuno wamudidi ghunene wakupira likuto mukatji kenu, ghuye ndye walikutopo lya linene lya kupita kana navantje kushipara shaHompa Karunga.''49Yohanesi atantere Yesus ashi, ''Hompa, atwe tuna kuwana murume kuna kutjida mpepo dadidona mulidina lyoye atwe mbyo tuna mutantere ashayeke, mukondashi ghuye kapi shi ghumwe wamu mbunga yetu.'' 50Makura Yesus kwatantera varongwa vendi ashi, ''Kapi shi kushayekita muntu waku ruwana vyaweno,'' ''Mukondashi kehe ghuno waku ruwana viruwana vyaghuhunga vyakupira kukurwanita naviruwna vyenu, naye kukwenu ahamena.''51Mayuva ghendi kuna kukwangura ntani kuna kutika papepi makura Karunga ngamu ghupemo nga tunde mo muno mughudyuni, Yesus kwatokora ntani kwashapuka ayende kuYerusalemu. 52Ghuye kwatuma vakareli vendi vapite kumeho yendi, vayende vakangene mumukunda waSamariya vaka wapayike navintje. 53Ano ngoli vantu vamu Samariya kwashwenine kumutambura Yesus mushirongo shavo mukondashi vavo kwayivire nawa-nawa ashi ghuye kuna kupita mo tupu mushirongo shavo, kuna kuyenda kuYerusalemu.54Vano varongwa vendi vaYakopu naYohanesi opo vayuvire vyaweno, vavo kwaghamba ashi, ''Hompa, ove kuna shana atwe tu shungide kwaKarunga atume mundiro ghutunde muliwiru ghuva shore naku vadyonaghurapo vano vantu ndi?'' 55Yesus kwapiruka aharukire vano varogwa vendi, 56vavo avakatwikira vakayende kumukunda waku kwamako.57Yesus navarongwa vendi vavo kuna kuyenda muruyendo rwavo, murume ghumwe, kwatantera Yesus ashi, ''Kehe kuno nga ghuyenda, name nko nganu yenda ntani ove nganu kwama.'' 58Yesus amu limburura ashi, ''Vikashama vyava mbwawa kwakara namakwina oko vararanga, ntani vidira vyakutuka muwiru navyo kwakara navitunguru omo vyararanga, ano ngoli Mona Muntu kapi akara nalivhango ntani nandyugho yakurara apwiyumuke.''59Makura Yesus ayendi ntani aneye muntu wapeke amu tantera ashi, ''Ove yakuno kukwande ghu nkwame.'' Ghuno muntu kwalimburura naku tantera Yesus ashi, ''Hompa, mpulitire tanko nu vyuke, nuyende nganu ka vhumbike vavava vana dohoroka.'' 60Yesus amu tantere ashi, ''Shuva vantu vakufa ngava vhumbike vafe vavo. Ano ngoli ove, kuna kukutuma ghuyende ghuka yuvite Mbudi yaRuhafo yaghuntungi waKarunga kumavhango ghapapepi nakughure.61Ntani muntu ghumwe kwaghamba atantere Yesus ashi, ''Hompa, ame kuna shana kuyenda nove nuku kwame, makura mpulitire tanko nuvyuke nuka tantere naku rekera vantu vamu mundi wande.'' 62Yesus amu tantere ashi, ''Kwato muntu wakutwa shipururo mulivhu atameke kupurura mulifuva lyendi, makura nga shayeke tanko nga piruke akenge fora dakuruku rwashipururo ashi weni omo dina fana, muntu wakufana weno kapi awapera ntani kapi ahungama muku ruwanena ghuntungi waKarunga naghuntungi wamu liwiru.
101Kuruku rwashirugho, Hompa wetu Yesus kwatoghorora vantu vamwe vakutika kudimurongo ntano-na-mbiri, makura avatantere ashi vantu vakare vaviri-vaviri muruyendo, makura vapite kumeho vayende kuvirongo naku dimukunda ntani naku mavhango naghantje oko ashanine kuyenda Yesus. 2Makura Yesus kwava tantera ashi, ''Muyangu ghuna vhuka ghunene, ano ngoli varuwani vasheshu.'' Mpo ngoli ashi raperernu mushungide kwaHompa mwenya muyangu nga wederere shivaro shava ruwani ngava kare vavayingi ngava tume mulifuva vayende vaka wapeke naku yangura muyangu wamu lifuva lyendi.3Shapukenu ntani kayendenu. Kengenu, ame kuna kumutuma yira ndywighona dina kuyendo mukatji ka mambungu. 4Anwe kwato kushimba ndjato yavimaliva, ntani anwe kwato kushimba ndjato yamuruyendo, ntani anwe kwato kushimba rupando rwankaku ntani anwe kwato kumorora muntu mundyira namuruyendo rwenu.5Ntani kehe muno mumundi ngamu ka ngena, pakuhova muna hepa kughamba weno ashi, 'Mbili yaHompa yikare muno mumundi!' 6Nkene shi vantu vamu mundi vana mutambura, vavo ngava wana yino mbili yaHompa yakutunda kukwenu ntani nka yino mbili nga yikara mumundi naghuntje, ano ngoli nkene shi vantu vamo mumundi kapi vana kumutambura, yino mbili yenu nga yivyuka kukwenu naghumwenu. 7Anwe muna hepa kukara momo mumundi nkene shi vantu vana mutambura, dogoro mpopo ngamu shapuka mutundemo omo mumushirongo, ntani anwe muna hepa kulya kehe dino ndya vana muyumbura ntani nakunwa kehe vino vana mupa vamu mundi, ntani kehe ghuno muruwani kwahepa kulya ndjambi yakutunda muliyuywa lyendi. Ntani anwe kwato kuyendaghura kumandi ghapeke tunda mundi, yenda mundi.8Nkene shi kuna ngene mushitata, makura vantu vana mutambura, muna hepa kulya kehe dino ndya vana tapa kukwenu 9ntani muna hepa kuverura vaveli navantje ovo muna kawana mo mumundi. Ntani muna hepa kutantera vantu ashi, 'Ghuntungi waKarunga papepi nanwe ghuna kara.'10Ano ngoli nkene shi anwe kuna ngene mushitata makura vantu vamo kapi vana kumutambura, muna hepa kuyenda mupitakane nandyira yenu ntani muna hepa kughamba weno ashi, 11'Atwe kuna kuku kumuna mbundu yaku mpadi detu yitunde ko ntani yikare momuno mushitata shenu, yayo nga yikare marondoro kukwenu! Anwe yivenu vino ashi: Ghuntungi waKarunga papepi ghuna kara nanwe.' 12Ame kuna kumutantera weno ashi muliyuva lyaku hulilira lya mpanguro yenu vantu vamu shitata shenu ngava kawana mpangura yayinene yayidito naghupyakadi nametengeko ghamanene, ghaku pitakana mpanguro yavantu vavarunde vamu shitata shaSodomu.13Lihudi lya linene kukwenu, anwe vantu mwatungo mushitata shaKorasini namu Betesayida! Mukondashi anwe kwashwena kuku shighura mutjindye ghukaro wenu mushayeke kuruwana ghurunde, vino viruwana vyavinene navitetu ovyo vyashorokiro mushirongo shenu, ashi ndi kwaviruwana vishorokere mushirongo shavantu vavarunde muTirusi namu Sidoni, vavo ndi vaku shighura kare vashayeke kuruwana ghurunde, vadwate ntjako daku tavaghuka vashungire mumutwitwi varaperere naku shungida kwaHompa adongononepo ndyo davo. 14Mpanguro namatengeko ghenu ngagha ka kara ghaghudito ghunene kupitakana mpanguro yavantu vavarunde vamu shirongo shaTirusi naSidoni. 15Ntani anwe, vantu vamu shirongo shaKaperenimu, kwakunene pita ntani anwe kukughayara ashi ngamu ka ngena mughuntungi wamu liwiru? Ani hawe, anwe tupu kuyenda kushirongo shavafe shakuntji munda yalivhu.16Yesus kwatantera varongwa vendi ashi, Kehe ghuno waku terera naku tambura nkango denu, ghuye kuna kuterera naku tambura nkango dande, ntani waku pira kuterera naku tambura nkango denu, ghuye kuna shwena kuterera naku tambura nkango dande, ntani waku pira kuterera naku tambura nkango dande, ghuye kuna shwena kuterera naku tambura nkango daKarunga ogho antumo ame.''17Ovano vantu dimurongo ntano-na-mbiri ovo atoghorolire Yesus kwaka vyuka naruhafo rwarunene, vavo kwaghamba weno ashi, ''Hompa, nampepo dadidona nadintje kuna ka limburuka kukwetu ditunde muvantu pakuraperera munkondo damu lidina lyoye ntani namu lipangero lyoye.'' 18Makura Yesus avatantere weno ashi, ''Opo muna ruwana vyaweno, ame kuna mono Satana kuna kukarumuka kuliwiru awere palivhu yira maruvadi. 19Kengenu, ame kuna tapa nkondo kukwenu dakulyata mayoka navange vaghushungu padimutwe davo, ntani nka ame kuna tapa kukwenu nkondo dadinene dakupitakana muna nkore wenu Satana, ntani kwato shimwe kehe shino shakuvhura kumufunda naku muremeka. 20Anwe karenu naruhafo mukonda shi, mpepo dadidona kuna ka limburuka kulipangero lyenu, ntani nka karenu naruhafo rwarunene rwakupitakana pano mukondashi madina ghenu kuna ghatjanga mumbapira yamonyo yamu liwiru.''21Pa ruvede runo Yesus kwakalire naruhafo rwarunene rwakutunda kuMpepo yaKupongoka, makura aghamba weno ashi, ''Vava Hompa wande, Ame kuna kutapa mpandu kukwenu, Ove Hompa walishito nalintje, liwiru nalivhu, ntani ove kwahoreka vino navintje kuvantu vaghukonentu vanandunge vaku kuronga vapire kuyiva naku kwata lighano vyaweno, ano ngoli ove mbyo wavishorora naku vineyeda vantu vakupira makurongo, ovo vapuro naku tambura ghushili ghoye mbyo vakara yira vanuke vavadidi. Mundyira, Vava, vino mo ngoli mwavishanena mukondashi vyaweno kuyita ruhafo kumutjima ghoye.22Yesus kwatantera varongwa vendi ashi, "Vavava kwatapa navintje vikare mulipangero lyande ntani kwato ghumwe wakuyiva Mona nkwandi Vavava tupu ti, ntani kwato wakuyiva Vavava nkwandi Mona tupu ti, ntani kuvantu ovo atoghorora Mona kwava neyeda naku vashorwera navintje kukwavo mposhi ngava muyive.''23Yesus kwakalire kumwe navarongwa vendi kulivhango lya pentjavo makura apiruka kukwavo avatantere weno ashi, ''Anwe vantu valirago navantu ovo vatoghorora ntani navantu ovo vatungika mbyo muna kumona vino vyaweno vishoroke mukatjikenu muruvede rwenu yira momu vina kushoroka paweno kumeho yenu. 24Ame kuna kumutantera nkango daghushili ashi, vaPorofete nava Hompa vakare vavayingi navo kwashanine kumona ovino viruwana ovi muna kumona anwe paweno ovi vina kushoroko kukumeho yenu paweno, ano ngoli vavo kapi vavhulire kuvimona ntani kapi vyashorokire muruvede rwavo, ntani navo kwashanine ghunene kuyuvha odino nkango odo muna kuyuvha anwe paweno, ano ngoli vavo kapi vavhulire kuyuvha dino nkango daweno.''25Mpopo tupu, ghumwe wavarongi matjangwa kwashapuka ayimana kwashanine kusheteke Yesus, ghuye kwapura mapuro ghaghudito ghaweno, ashi, ''Murongi, vinke ovyo nahepa kuruwana mposhi name nganu kawane monyo wanaruntje?'' 26Yesus amu pura weno ashi, ''Ove wavarura matjangwa ntani wayiva veta nadimuragho daMoses? Vinke dina kutanta veta nadimuragho daHompa?'' 27Ghuye kwalimburura weno ashi, ''Hora Hompa Karunga ghoye namutjima ghoye naghuntje, namonyo ghoye naghuntje, nankondo doye nadintje, nandunge doye nadintje, ntani hora ghunyoye yira momu waku hora naghumoye.'' 28Yesus amu tantera weno ashi, ''Ove kuna limburura mughuhunga. Viruwane vyaweno nga vitikemo ove ngaghu kawana monyo wanaruntje.''29Ano ngoli, ghuno murume kwashanine awane mpito, yaku pura Yesus weno ashi, ''Oghuno ghunyande are lidina lyendi ntani kuni nko ana kara?'' 30Yesus kwamu limburura naku mutantera weno ashi, ''Murume ghumwe kwayendire muruyendo atunde kuYerusalemu ayende kuYeriko. Mundyira yendi kwagwanekera namatjotji navantu vaghukorokotji vawidi wamashaka, vavo kwamu shakana limona lyendi nalintje, ntani kwamu toghona, dogoro kushana kumudipaya, ntani kwamu shuva kuna rara kuna kufa.31MuPirisiteli ghumwe wamu Yuda naye kwapitire ayende momo mushitaghura, opo amonine murume kuna rara, ghuye kwavindakana apitire musheli munya yashitaghura, kwamu shuva mpopo. 32Mushikavo nka, muPirisiteli wamu Levi waku ruwana muntembeli yaHompa naye, kwapitire momo mushitaghura, opo atikire papepi amono murume kuna rara kuna kufa, naye kwavindakana apitire musheli munya yashitaghura, kwamushuva mpopo.33Ntani murume waku Samariya, naye kwayenda apite momo mushitaghura, makura awana murume kuna rara kushana kufa. Opo amu monine ghuye kuna rara kushana kufa, kwamu fera nkenda ghunene. 34Ghuye kwayenda kukwendi makura amu rambwita naku muku kumuna mbundu, amupa mutondo anwe, amu kwiti maghadi parutu rwendi ntani adingi makeshe pavironda vyendi vi veruke wangu. Makura amu rondeke pashidongi shendi amu twara kumundi wendi lyendi, aka muvede naku mupanga. 35Liyuva lyaku kwamako ghuye kwaghupa vimaliva vyandjambi yaku ruwanena mayuva maviri atapa kwamu ruwani wamu mundi, ntani amu tantere weno ashi, 'Panga ghuno muveli ntani mupakera mbili dogoro nga veruke, nkene shi mfuto ngayi pitakana payino shiringa natapa, ame nganuya futa mfuto yaku hupako nayintje, opo nganu ka vyuka.'36Yesus kwaghamba ashi, kutwara mumoye pakatji ka vano vantu vatatu ghunindye po waku hora ghunyendi kutwara muviruwana vyaviwa kwaghuno muntu ashanino kufa?'' 37Murongi wamatjangwa kwalimburura weno ashi, ''Ndyegho amu popiliro naku mufera nkenda amu pange averuke.'' Yesus kwamutantera weno ashi, ''Yenda nove ghuka ruwane vyaweno.''38Yesus navarongwa vendi kwayenda muruyendo, opo vaka ngenine mumukunda ghumwe wapepi naYerusalemu, mukadi walidina Marita kwava tambura mulipata lyendi. 39Ghuye kwakalire namu ghunyendi wamwanuke wamukadona walidina Mariya, ogho ashungiliro mulivhango lya Yesus papepi nampadi dendi, ghuye aterere kunkango dendi namarongo ghendi.40Marita ghuye kwakalire nashinka shaku viyaghuka kulidiko aterekere naku wapayika ndya davagenda. Marita kwayenda kwaYesus amu tantere weno ashi, ''Hompa, ove kapi ghuna kumfera ko nkenda ashi munyande wamukadona kuna ntjuvu pentjande nu ruwane viruwana vyamu lipata ndi? Mutantere aye kuno kukwande tuya ruwane kumwe viruwna vyamu lipata.'' 41Ano ngoli Hompa kwamu limburura naku mutantera weno ashi, ''Marita, Marita, ove kuna kara navinka vyaviyingi mbyo ghuna kara namaghudito ghamayingi, 42ano ngoli shininke shimwe tupu shakaro nahepero, shaku terera kunkango dande naku marongo ghande. Mariya kuna toghorora po ruha rwamulyo ghunene, rwakuwana matungiko ghakutunda kunkango dakupongoka mukondashi kwato waku vhura kumu shakana matungiko ghaweno.''
111Vino kwashorokire liyuva limwe Yesus kwayendire kulivhango lya pentjendi aka raperere. Opo amanine kuraperera, ghumwe wavarongwa vendi kwayire kukwendi amu tantere weno ashi, ''Hompa, turonge ko natwe ngatu yive kuraperera yira momu aronga Yohanesi varongwa vendi.''2Yesus kwava tantera weno ashi, ''Nkene kuna kuraperera muna hepa kughamba weno ashi, Shetu wamu liwiru lidina lyenu lifumane. Ghuntungi wenu ghutuyere. Kupanga kwenu kutikemo pano palivhu yira muliwiru.3Tupenu ko ndya detu dakehe liyuva. 4Tughupirenupo pandyo detu, yira momu twa ghupira ngapo natwe vandyo detu. Kapi shi mutu kengerere tu nenukire kundyo, nane mutu yoghore kughudona.''5Yesus kwatantera varongwa vendi weno ashi, ''Nkene ghumwe wamu mbunga yenu, ayendi kumundi waghunyendi pakatji ka matiku, aka ghambe weno ashi, 6'Muholi ame kuna kara navagenda mumundi wande ovo vana tundo kughure, mpeko dimuntje ntatu damboroto, ame kapi nakara nandya mulipata lyande? 7Makura ghunyoye nga ghambe munda yandyugho yendi weno ashi, 'Ame narara kapishi ghuyoterere mumundi wande. Ame napata mavero ghaku ndyugho yande, ntani vana vande vana rara mumbete weno ntani name narara mumbete nakara weno. Ame naku vhura shi kurambuka ruvede runo nu tape ndya kukoye.' 8Ame kuna kumu tantera weno ashi, muntu waweno nkene kapi ana shana kurambuka atape ndya kukwenu, mukondashi anwe vaholi vendi, anwe kwato kushayeka muna hepa kutwikira ngoli naku shungida naku romba naku tininika kukwendi, anwe kwato kufa ntjoni daku ngongora naku romba ndya, dogoro nga rambuke nga tape mboroto dadiyingi dakupita kana pado muna rombo.9Ame kuna kumutantera weno ashi, romba naku shungida, ngava kupa; yenda ghuka shane, ngaghu kawana; ngongora, ngava gharura livero. 10Muntu waku romba ngava mupa nga wana, muntu waku yenda aka shane ngaka wana; ntani muntu waku ngongora kulivero, ngava gharura livero nga ngene.11Anwe vasha, mwakaro navana venu vavamati, nkene shi monoye kuna kuromba ntjwi yaku lya, ove kuvhura kudamuna liyoka lya ghushungu ghutape kukwendi alye ndi, mulivango lyaku tapa ntjwi kukwendi? 12Ntani, nkene mwanuke kuna kuromba lighuta kukoye, ove kuvhura kudamuna Nge waghushungu ghutape kukwendi ndi? 13Vino kuna kutanta ashi, muntu nampili weni akara naghurunde waghunene kwayiva kutapa maghushwi ghamawa kuvana vendi, Shetu waMuliwiru naye ngoli ghuye kwayiva kutapa ma ghushwi ghamawa ghaku tunda kuMpepo yaKupongoka kwakehe ghuno waku romba naku shungida kukwendi?"14Liyuva limwe Yesus kwatjida mpepo yaghupuru-puru yi tunde mumuntu waku pira kughamba. Opo yarupuka mo mpepo yayidona mumwendi, ghuno murume washipuru-puru mpopo kwatameka kughamba, makura mbunga yavantu kwatetuka ghunene. 15Ano ngoli vantu vamwe kwaghamba weno ashi, "Ghuye kutjida mo mpepo dadidona muvantu nankondo daBelisebulu, mukurona wampepo dadidona.''16Vantu vamwe kwashanine kumu sheteka ashi nkwandi aruwane vitetu avaneyede shiyivito ashi ghuye vyaghushili kwatunda muliwiru. 17Ano ngoli Yesus kwayivire ovi vyakaliro mumaghano ghavo, makura avatantere weno ashi, ''Kehe ghuno ghuntungi washirongo shaku kutavaghana kudyonaghukapo, ntani ghukare mundi nkene vantu vamulipata avakupiruka vaku rwanite-rwanite lino lipata kapi nga likarapo nga lihanaghuka po.18Nkene shi ghuntungi waSatana kwakutavaghana ntani kukurwanita wene nawene, weni omo ngaghu vhura kukarapo ghuno ghuntungi wendi? Anwe kuna kughamba weno ashi ame kutjida mpepo dadidona muvantu nankondo daBelisebulu. 19Nkene shi ame kutjida mpepo dadidona muvantu nankondo daBelisebulu, ovano varongwa venu ne nkondo munke varuwanitanga vatjide mpepo dadidona muvantu? Mukonda yaweno, vavo mbo ngava ka mupanguro ngava kamupe ghundyoni. 20Ano ngoli nkene shi ame kutjida mpepo dadidona muvantu nanyara yaKarunga, anwe yivenu ashi ghuntungi waKarunga ghunaya tiki kukwenu.21Yesus kwaghamba nka weno ashi, "Nkene shi murume wankondo wavirwita vyankondo nga kunge mumundi wendi, kwato waku danena mo ntani kwato waku vaka limona lyendi, 22ano ngoli nkene shi ghuno murume kuna mufundu, lino lipenda lya nkondo kupinga virwita vyendi vyankondo navintje ovyo ahuguvara vikare ghupingwa nalimona lyendi. 23Kehe ghuno wakupira kutambura viruwana vyande nga kare kuruha rwande, muntu waweno kwakulimba name ntani muna nkore wande, ntani kehe ghuno wakupira kuyita mbunga kukwande muntu waweno ghuye kukahanaghura vantu vatunde kukwande.24Nkene shi mpepo yayidona kuna rupuka mumuntu, yayo kuyenda mumburundu yika renda-rende yika shana-shane ghuturo. Nkene shi kapi yina kawana ghuturo, makura yayo kughamba weno ashi, ''Ame kuna kuvyuka kumundi wande oko natunda.' 25Nkene shi mpepo yayidona yina ka vyuka pakuya tika, kuya wana ndyugho yayo kuna kara muporongwa yina kene ntani yina wapa nawa. 26Makura yino mpepo yayidona yayo kuka shimbako mpepo dapeke ntano-na-mbiri dadidona ghunene dakupitakana papado makura dado kungena kumwe mundyugho nga ditunge mo kumwe tupu. Makura ghukaro wendi wakuhulilira waghudona waghuno muntu, kukuwederera ghukare ghukaro waghudona ngudu kupitakana ghukaro wakuhova.''27Vino kwashorokire weno mpopo, Yesus ghuye kuna kughamba dino nkango daweno, makura mukadi ghumwe wamu mbunga kwaghamba weno naliywi lyaku dameka ghunene amu tantere ashi, "Mukadi oghu aku yamwekiro mashini ghaku lishwe lyendi kwakara nalirago lya linene.'' 28Ano ngoli Yesus kwalimburura weno ashi, ''Mughuhunga, ano ngoli vantu valirago lya linene mbovo vaku yuvha nkango daKarunga vadi limburuke naku ditikitamo.''29Vantu vavayingi kwaya kukwendi vaku pakerere nambunga yavantu ovo vakaliro palivahngo makura shivaro kwaku wederera ntani kwavhuka ghunene, makura Yesus kwatantera weno yino mbunga yavantu ashi, ''Anwe vantu muna karo mughudyuni paweno, anwe muna kuparuko muruvede runo, anwe ruvharo rwavantu vavarunde. Anwe kuna shana ashi nkwandi numu neyede shiyivito shaku tunda muliwiru ntani mupura ashi ame kwatunda muliwiru, ano ngoli ame kwato shiyivito nganu tapa kukwenu, nkwandi shiyivito shaku fana yira shiyito shaYona. 30Yona kwamu tumine kushirongo shaNinive ngaka tape mbudi kuvantu vamushirongo ntani nga kare shiyivito kuvantu vamushirongo shaNinive, nanwe mo ngoli Mona Muntu kwamutuma kuvantu vamu ghudyuni nga kare shiyivito kukwenu anwe vantu muna kuparuko paruvede runo rwantantani.31Hompa wamukadi kwatundire Kumbindakano yavirongo ayende mundyira yaku ghure aka mone, naku yuvha ntani naku terera kughukonentu waSolomoni waku ghamba naku ruwana ntani naku pangura mpanguro, ano ngoli paweno anwe vantu muna karo pano weno anwe kuna kuyuvha naku terera naku kenga muntu wamunene waku pitakana paSolomoni ghuye mpwali kuna kara weno mukatjikenu, ano ngoli anwe kapi muna kuterera kunkango dendi odi ana kughamba, shirugho kuna kuya ntani papepi shina kara makura Hompa Karunga ngaka pangura vantu navantje vamu ghudyuni, ghuno hompa wamukadi ngaka yimana kumeho yenu anwe vantu muna karo pano weno anwe muna kuparuko pantunda yalivhu weno ghuye ngaka tapa ghumbangi waku hamena viruwana vyenu vyavi kukutu dimutjima mposhi ngava kamupe mpanguro yayidito yaku mutwara kundyo.32Ntani vantu vamu shirongo shaNinive kwashayeka kuruwna ghurunde mbyo vaku shighura vatjindye ghukaro wavo opo ayendire mo Yona aka tape marondoro mushirongo shavo ntani aka yuvita Mbudi yaRuhafo, ano ngoli paweno muntu wamunene waku pitakana Yona mpwali mukatji kenu ntani ghuye kuna kumuyuvitira Mbudi yaRuhafo ano ngoli anwe kapi muna kuyitambura ntani kapi muna kukushighura ghukaro mushayeke kuruwana ghurunde, tererenu, shirugho kuna kuya ntani papepi shina kara, Hompa Karunga ngaka pangura vantu navantje vamu ghudyuni, ntani vantu vamu shirongo shaNinine ngava kayimana kumeho yenu, ngava katape ghumbangi wakuhamena kuviruwana vyenu vyavikukutu dimutjima mposhi ngamu kawane mpanguro yayidito yaku mutwara mundyo.33Kwato muntu, waku hamweka ramba, makura kuyihoreka munda yambete ndipo ayi fikilire munda yashikumba, nane ngoli ghuna hepa kuyitura pawiru yashitafura, mposhi yitape ghukenu mundyugho nayintje, kwakehe ghuno wakungena mo. 34Mantjo ghoye kwakara ngo ramba yaku rutu roye. Nkene shi mantjo ghoye kwawapa ntani kumona nawa, kutanta ashi rutu roye naruntje kukara kuna yura ramba mposhi rukare kuna kutema ramba rutape ghukenu. Ano ngoli nkene shi mantjo ghoye kwavipa ntani kwato kukenga nawa, kutanta ashi rutu roye naruntje kwato ramba ntani kukara mumundema. 35Mpo ngoli shi, kara ghuna kotoka mposhi yino ramba yina karo murutu roye kapi shi ngayi dime makura rutu roye nga rukare mumundema. 36Ano ngoli nkene shi rutu roye naruntje kuna kara naramba kumaruha naghantje, nampili rutu roye naruntje ngaru kara mughukenu, ntani kwato ruha rwakukara mumundema, kutanta shi rutu roye naruntje kukara mughukenu yira ramba yina kutemeno parutu roye rumoneke nawa naruntje.37Tupu amana kughamba Yesus dino nkango, muFarisayi ghumwe kwatantera Yesus vayende kumwe kumundi wendi vakalye ndya mulipata lyendi, Yesus makura ashapuka avayendi kumwe vakalye ndya. 38Ghuno muFarisayi kwatetuka pakumona Yesus kuna kulya ndya ghuye ahana kuhova kuku kusha kumaghoko.39Hompa Yesus kwatantera ghuno murume weno ashi, ''Anwe vaFarisayi kukusha tupu nkinda navisha vyaku lyera ndya pantunda tupu, ano ngoli munda yadimutjima denu kwayura nyata yamakurulya ntani naghurunde. 40Anwe vantu vavagova! Karunga ogho aruwano pantunda yavisha ndye nka shimpe aruwano namunda yavisha? 41Tapenu kuvahepwe ovyo muna tura vikare munda yavisha, mposhi anwe ngamu kare muna kushuka munda ntani napa ntunda.42Lihudi lya linene kukwenu anwe vaFarisayi, anwe kutapa vitapa-murongo vyalimona lyenu kwaHompa Karunga lyaku tunda kumuyangu wanyango nalividi lyamu vipata namu mafuva ghenu, ano ngoli anwe kapi mwakara nashihoro naKarunga ntani kapi mwafera nga nkenda vantu vaghunyenu. Muna hepa kuruwana vino: kuhora Karunga ntani naku ruwana ghuhunga, ntani naku ruwana mulimburuke nakutikitamo navintje, ovyo aturapo Hompa Karunga.43Lihundi lya linene kukwenu anwe vaFarisayi, mukondashi anwe kwahora kushungira kumeho yavantu pavipuna vyavantu vakamakuto muSinogoge denu mposhi shi vantu vamu kenge ntani vamu morore naku mukunda naku mufumadeka kumavhango ghangeshefa. 44Lihudi lya linene kukwenu, mukondashi anwe kuna fana yira mayendo ogho vapira kutura liwe lyapa mbira narugumbo vikare viyivito kuvantu, vapire kuvindakanapo ntani naku lyatapo po pamayendo makura vakare kuna nyata pampepo."45Ghumwe wavarongi vamatjangwa kwapura Yesus weno ashi, "Murongi, odo nkango ghuna kughamba kukwetu daweno, atwe ghuna kutuka." 46Yesus kwava tantera weno ashi, ''Lihudi lya linene kukwenu, anwe varongwa vamatjangwa! Mukondashi anwe kutapa mudigho waghudito kuvantu vadamune pamapepe ghavo, ano ngoli anwe vavene kwato kukwata ko mudamune, nampili kadidi nanyara yimwe.47Lihudi lya linene kukwenu, mukondashi anwe kutunga mawe ghakare pantoko davaporofete, ovo vadipayire vakurona venu. 48Anwe kuruwana vyaweno mposhi mukare vambangi vaku hamena kuviruwana vyavakurona venu ashi, vavo vyaghushili kwadipaya vano vaporofete vakare, anwe mbyo mwatunga mawe pantoko davo mutape ghumbangi ashi anwe mwavadipayo.49Mukonda yaweno, Hompa Karunga kwakara naghukonentu, mbyo atanta weno ashi, ''Ame nganu tuma vaPorofeto nava Apositoli kukwavo ngava ka varonge nkango dande, ano ngoli vavo ngava ka vahepeka ntani vamwe ngava ka vadipaya.' 50Runo ruvharo rwavantu vana karo weno mughudyuni, ngava kafuta honde yava Porofete vaKarunga navantje ovo vadipaya, kuhonde yavo nayintje oyo yangeno mulivhu, kutunda kulishito lya ghundyuni, ghundyoni wava kurona vavo ngava ka ghutapa kukwavo, 51kutamekera kuhonde yaAbeli dogoro naku honde yaSakariya, ogho vadipayilire munda yaNtembeli kushidyambero shakupongoka. Yivenu vino, Ame kuna kumutantera weno ashi, runo ruvharo rwavantu ngamu kawana matengekero ntani nga mukafuta honde yava Porofete vaHompa navantje.52Lihudi lya linene kukwenu anwe varongi vamatjangwa, mukondashi anwe kwashakana vantu tjapi yaghukonentu; ntani nanwe shi kapi ngamu kangena mughuntungi waKarunga, ntani nka anwe mbyo muna kuditopita ndyira yavantu ovo vana kushano kukangena mughuntungi waKarunga.''53Opo atundire po Yesus, varongi vamatjangwa ntani nava Farisayi kwakalire nanyanya kukwendi avaghamba vaku kanane kuhamena vininke vyaviyingi vyaku kushuva-shuva, 54vavo kwashanine vamu wane ghuntjoni mposhi vamurundire mapuko ghamayingi ghaku kutunda kumarongo ghendi mwene.
121Mpopo tupu, palivhango kwaponga po mbunga mayovi namayovi ghavantu vavo kuna kukurondanga vavene nava vene, makura Yesus kwatantera varongwa vendi navantje weno ashi, "Karenu muna kotoka kuhingo yava Farisayi, vavo vavikupaki.2Kwato shaku kuhorama osho ngashi piro kushoroka paghukenu, ntani kwato kehe shino shaku vanda kuvantu ngava pire kushiva. 3Ntani kehe vino ngamu ghambera mumundema mbyo tupu kuyuvika paghukenu, ntani kehe vino ngamu ghamba ngamu ghoghotera mumatwi ghavantu munda yandyugho ngavi katika kumbunga ntani vantu navantje vapandye yandyugho navo ngava viyuvha.4Vakwetu, ame kuna kumutantera weno ashi, kwato kutjira vantu vakudipaya rutu tupu, nkene kuna mana kudipaya rutu kwato nka vyaku vhura kuruwana ko kwaruno rutu. 5Ame kuna kumu rondora weno ashi muntu waku fana weni ogho ngamu vhura kutjira. Anwe muna hepa kutjira muntu waku ruwana vyaweno, waku dipaya rutu rwamuntu, ntani ghuye kwakara nankondo daku vhukumina rutu rwakufa mumundiro wanaruntje. Vakwetu, ame, kuna kumu tantera weno ashi, tjirenu muntu wakufana weno.6Ghayarenu weno ashi mandyunge matano kuvhura kugha ghura tupu kundando yasenda mbiri tupu? Ano ngoli kushipara shaKarunga kwato kuvhurama po lindyunge limwe pamandyunge maviri. 7Karunga kwayiva nampili shivaro shahuki doye nadintje damu mutwe ghoye dapwa kuvarura. Anwe kapi shi mukare naghoma. Anwe kwakara namulyo waghunene waku pitakana mandyunge ghamayingi.8Ame kuna kumutantera nka weno ashi, kehe ghuno waku ghamba nga tantere vantu ashi ghuye murongwa wande, Mona Muntu naye ngaka ghamba naku tapa ghumbangi kumeho yava Engeli vaKarunga ashi ghuye mukareli wande, 9ano ngoli kehe ghuno waku kanana lidina lyande kumeho yavantu name nganu kamu kanana naku mushwena kumeho yava Engeli vaKarunga ashi ghuye kapi shi mukareli wande. 10Kehe ghuno waku shwaghura Mona Muntu, kuvhura kudongonona po ndyo dendi, ano ngoli waku shwaghura Mpepo yaKupongoka, kwato nka mpito yaku dongononapo ndyo dendi.11Nkene shi ngava mukwata vamutware muSinagoge, kumpanguro, kumeho yaveta namatimbi ntani navapanguli, anwe kwato ovyo ngamu kudivikira vyaku hamena ashi weni omo ngamu ka ghamba kumeho yampanguro ngamu kupopere naghumwenu, ndipo ashi nkango munke odo muka twenya, 12Mpepo yaKupongoka ngayi tapa nkango kukwenu odo ngamu vhura kughamba paruvede ndoro.''13Makura muntu ghumwe wamu mbunga apura Yesus weno ashi, ''Murongi, tantera mukurwande wamurume tuku tapere ghupingwa wavakurona vetu nuwane ko wande.'' 14Yesus amu limburura weno ashi, ''Ove murume, ame kapi nakarerapo ashi waku mupangura ntani naku mutapera ghupingwa walimona lyenu?'' 15Makura Yesus kwatantera mbunga yavantu ashi, ''Karenu muna kotoka ntani karenu ghure namadovo ghalimona naghushwi wamu ghudyuni, mukondashi monyo wamuntu kapi wakarerapo tupu muku pongeka limona lya liyingi lyamu ghudyuni."16Yesus kwava tantilire shifanikito shaweno, ashi, ''Mulifuva lya murume ghumwe wamungagho kwamenamo mbuto yamuyangu waghuyingi ghunene, 17makura ghuye aku pura munda yamutjima wendi, weno ashi, 'Weni omo nganu vhura kuruwana, ame kapi nakara nashishete shashinene shakutura muyangu wambuto yande?' 18Makura ghuye aghamba weno ashi, 'Ame nganu ruwana weno. Ame nganu yungurura vishete vyande navintje makura nganu virambakane kumwe tupu nganu tunge po shishete shashinene shimwe tupu, nganu turemo muyangu wambuto yayande nayintje ntani nalimona lyande nalintje. 19Makura nganu tantere monyo wande weno ashi, ''Monyo wande, ove kuna kara namuyangu waghuyingi ghunene ogho ghuna pungura nga ghukare mwaka namwaka dadiyingi. Weno pwiyumuka ngoli, nakulya, nakunwa ntani ove kara ngoli muruhafo namuruviya rwarunene.'''20Ano ngoli Karunga amu tantere weno ashi, 'Ove murume wamugova, weno kumatiku ghana muntji monyo ghoye kuna kughughupamo murutu roye, olino limona wapungura weno, are nga lipingo?' 21Ovino mbyo nga vishoroko kuvantu vakupongeka nakupungura limona lyapa livhu, limona lya weno kwato mulyo kwaKarunga.''22Makura Yesus atantere varongwa vendi weno ashi, ''Ame kuna kumutantera weno ashi, anwe kapishi ngamu kupakere shinka shaku hamena kumonyo denu, ashi vinke nga mulya ngamu paruke; ndi ntani nka ashi vinke nga mudwateka, pamarutu ghenu. 23Mukondashi monyo ghoye kwakara namulyo waku pitaka ndya, ntani rutu naro kwakara namulyo waku pitakana vidwata!24Kengenu shi kwavino vidira vyamakorova, vyavyo kwato kukuna mbuto ntani kwato kuyangura muyangu. Ntani vyavyo kwato ndyugho yakupungura ndya ntani kwato vishete, ano ngoli Karunga mwene ndye waku virera. Anwe kwakara namulyo waghunene waku pitakan vidira! 25Are ghumwe mukatji kenu waku kara navinka ntani namakupuro ghamayingi ghamunda yamutjima wendi, waku vhura kuwederera ko kumayuva ghaliparu lyendi? 26Nkene shi anwe kwato kuruwana vino vyavireru, mukonda munke mukarera nashinka shashinene kwavi vyaku hupako?27Kengenu ntani ghayarenu dino dimucuko - omo dakuranga. Dado kwato kuruwana ntani kwato kuhondja vyuma ano ngoli dado kuwapa naku fughura ghunene. Ame kuna kumu tantera weno ashi, nampili Hompa Salomoni ogho kadwatango marwakani ghaghufughuli kapi ashetakana kumwe naghufughuli wadimucuko daku mushoni. 28Nkene shi Karunga kuwapeka weno dimucuko daku mushoni wamu mafuva, ghukare kuna wapa ghukare po tupu shirugho shashifupi namuntji nayona tupu, makura ngava ghu vhukumine mumundiro, anwe kwakara namulyo waghunene kushipara shaKarunga ntani ghuye nga mudwateka ngamu wape nawa nga mupitakane dimucuko daku mushoni, anwe vantu kwakara nalipuro lya lisheshu?29Kapi shi ngamu kare nashinka shaku kupura ashi vinke nga mulya ntani ovi nga munwa, anwe kapi shi kukupakera shinka kuvininke vyaweno. 30Mukondashi vantu vamughudyuni mbo vaku shana naku kupakera shinka kuvininke vyaweno, ano ngoli anwe Shenu wamu liwiru kwayiva kare ashi anwe muna vihepa vyaweno.31Pamuhovo anwe shanenu ghuntungi waKarunga, ntani nga muwana navintje ovyo muna hepa. 32Kapi shi mukare naghoma anwe mbungaghona yaHompa, mukondashi Shenu kuna shana kutapa ghuntungi wendi nalipangero lyendi kukwenu.33Weno ghupa limona lyoye nga ghutape kuvahepwe. Makura ove ngaghu ruwanene limona lyaku pira kudyonaghuka - limona lyamu liwiru lyaku pira kupwa, ntani muwidi naku vhura shi kutjora avake mo, ntani lino limona kwato kulikana kuvampuku. 34Kehe kuno wapungura naku wahoreka limona lyoye, nkoko nko wakara mutjima ghoye.35''Dwatenu marwakani ghenu ntani mangenu nkama denu mumbunda dikore ntani tikitenu mo viruwna vyenu ntani hamwekenu ramba denu dikare kuna kutwera, 36karenu yira vantu ovo vana kutaterero muhona wavo ogho ana kutundo kushipito shalikwareko, tupu ngaya tika nga ngongore kulivero, makura anwe ngamu gharure livero mpopo ghuye nga ngene mo.37Lirago lya linene kwavantu ovo ngaya wana muhona nkene shi vavo kuna kuruwana viruwana vyendi. Ame kuna kumutantera vyaghushili ashi, muhona ngaka dwata lirwakani nankama yendi yamu mbunda, ghuye nga tantera vakareli vendi vashungire kutafura makura ngava wapayikire ndya ngava dyobwane kumwe naye. 38Nkene shi muhona ngaya tika pakatji kamatiku paviri yamurongo naghuviri, ndi kumakya tiku paviri yaghutatu kungura-ngura yayinene, makura ngaya wane vakareli vendi kuna kuruwana viruwana vyendi ntani vana kuwapayikiri kuna kumu taterera, vano vakareli vendi vaweno kwakara nalirango ntani muhona nga kara naruhafo rwarunene kukwavo.39Anwe yivenu vino ashi, nturaghumbo wamundi kapi ayiva shirugho osho ngaya muwidi nga tjore mumundi wendi, ghuye ndi nga kunga mundi wendi nga pire kungenamo nga vakemo. 40Nanwe mushikwavo, karenu muna kuwapayiki, mukondashi kapi muna yiva shirugho naviri osho ngaya Mona Muntu.''41Makura Peturusi amu pura weno ashi, ''Hompa, ove kuna kughamba shino shanikito kukwetu tupu, ndi kwavantu navantje?'' 42Hompa amu limburura weno ashi, ''Ame kuna kughamba kwalirenga lyaku limburukwa lya ghukonentu olyo nga katura muhona ngali ka kare mpititi mulipangero lyendi, lyaku tapera ndya mushirongo kuvantu vendi opo nga shitika mo shirugho? 43Muntu walirago ndyegho ngaya wana muhona wendi ghuye kuna kuruwana, ghuye ngaka wana mfuto yendi. 44Vyaghushili, ame kuna kumutantera weno ashi ghuye ndye ngava katura mulipangero lyaku kunga limona lyamu shirongo shendi.45Ano ngoli nkene shi oghuno mukareli kuna kughayara weno munda yamutjima wendi ashi, 'Muhona wande kapi ngaka vyuka wangu,' makura ghuye nga tameke kutoghona varuwani vaghunyendi vavarume navakamali ntani nga hokwe tupu kulya naku nwa marovhu nga kare nkorwi, 46makura Muhona wendi ngaya tike ndyo lyo liyuva paruvede naviri oyo nga pira kumu taterera ghuye kwato ovyo ana yivako makura muhona wendi ngamu wane kuna kuruwana vyaweno, ghuye nga mupangura naku tengeka ghuno mukareli wendi ntani ngamu tjida nga tunde mo mulipundi ghuye nga turemo muntu wamurunde.47Mukareli waweno, kwayiva shiruwana shendi nashitumbukira shendi osho atapa muhona wendi kukwendi, makura ghuye kapi ashi ruwana shitikemo, ghuye ngava kamu shepura ngoreka dadiyingi ghunene! 48Ano ngoli mukareli waku pira kuyiva shitumbukira shendi makura nga ruwane lipuko naye ngava kamu shepura ngoreka dadisheshu tupu. Kwakehe ghuno vatapa maghushwi ghamayingi, ana hepa kuruwana ghunene nga wederere ghushwi wendi ghuvhuke, ntani kwakehe ghuno atapa limona lya liyingi, naye ngava kamu pura ngaka tape limona lya liyingi.49''Ame kwayita kaparwa kaku shora mundiro mughudyuni, ntani ame kwashana ashi ndi kumeho nganu yatike muno mughudyuni mundiro ndi watameka kare kutwera. 50Ame ntantani ngava nkushe muliyoyero lya runyando, ntani ame ngoli nganu twikira kukara murunyando namu ghupyakadi dogoro nganu tikitiliremo shiruwana shande!51Anwe kuna kughayara ashi ame kwayita mpora mughudyuni? Hawe, ame kapi nayita mpora mughudyuni, nane ngoli ame kwayita makunyengo muvantu ngava kugaghunuke. 52Kutunda pano vantu vatano vaku tunga mumundi ghumwe tupu ngava kugaghunuka - vano vatatu ngava kara kumwe tupu ntani vano vaviri navo ngava kara kumwe tupu, ntani ovano vantu vatatu ngava kunyenga navano vantu vaviri, ntani vano vantu vaviri ngava kunyenga navano vantu vatatu. 53Vantu ngava kunyenga-nyenga, vasha ngava nyenga vana vavo vavarume, ntani vana vavarume navo nga nyenga vashavo, ntani nyokwa muntu ngaku nyenga navana vendi vavakadi, ntani vanuke vavakadi navo ngava nyenga nyokwavo, ntani vangumweyi vamuntu ngava kunyenga navakadi vavana vavo vavarume.54Yesus kwatantera nka waro mbunga yavantu ashi, ''Anwe nkene shi kumona maremo kuna kutunda kuruha rwaku ghutokero, anwe kughamba weno ashi, 'Mvhura papepi yina kara kusha yiroke; makura vina hepa kushoroka ngoli. 55Nkene shi kuna kumona mpepo kuna kuyunga yitunde kughurundu yivinda kane, anwe kughamba weno ashi, 'Yona ngaku kara mwi waku shora; makura vina hepa kushoroka vikare ngoli. 56Anwe vantu kwavi kupaka, mwayiva viyivito navintje vyamu ghudyuni vyampepo namaremo ghaku liwiru ntani anwe kupumba nawa-nawa mughive ovi ngavi shoroko liyuva lyaku kwamako, makura ne weni-weni omo mupira kuyiva vino virugho naruvede oru muna kuparukapa weno ntani mupire kuyiva ashi vinke ana kuruwana Karunga paweno?57Mukonda munke muna kupira kutokora muruwane ghuhunga paruvede runo muna wana paweno? 58Sheteka kushungida kwaghunyoye ogho mwaku dyona naye muvhure kukughupirapo anwe shimpe kapi muna kamoneka kumeho yampanguro kumbara, nkene ngava kutwara kumpanguro ngava ka kuwane ghundyoni, ngava ka kutapa kuvapolisa vaveta, vapolisa vaveta ngava ka kupaterera mudorongo. 59Ame kuna kukutantera weno ashi, ove kapi ngaghu ka tundamo dogoro ngaghu kafute ndyo doye nadintje.''
131Pa shirugho shino, vantu ovo vakaliro po palivhango kwatantilire Yesus mbudi yakuhamena kuvaGalileya ovo adipayire Pilatusi vavo muntembeli kuna kuraperera naku dyamba ndjambo makura avaghupu honde yavo avayirunga-runga kumwe nandjambo. 2Yesus avapura weno ashi, ''Ovano vantu vyashorokilire vino vyaweno ne vavo vandyoni ghunene kupitakana vantu vamu Galileya navantje mbyo vafire kumfa daweno ndi? 3Hawe, kapi shi mo ngoli, ame kuna kumutantera weno ashi. Nkene shi kapi muku shighura mushayeke kuruwana ghurunde, nanwe shi mo ngoli ngamu fana, ngamu fa.4Ntani ovanya vantu murongo-na-vatano-na-vatatu ovo vafiro opo lya mbandukire litungo lya lire lya Shiroyamu avafere momo, anwe kuna kughayara ashi vavo ne vandyoni ghunene kupitakana vantu navantje vamu Yerusalemu mbyo vafire kumfa daweno ndi? 5Hawe, kapi shi mo ngoli, ame kuna kumutantera weno ashi. Nkene shi kapi muna kushayeka kuruwana ghurunde, nanwe mo ngoli ngamu fana, ngamu fa.''6Makura Yesus avatantere shino shifanikito ashi, ''Muntu ghumwe kwatapekire shitondo shaghukuyu mushikunino shendi shamandyembere makura aka vyuka ndi aya shimbeko nyango yaghukuyu ano ngoli kapi aya wanineko nyango. 7Makura mwenya shikunino atantere muruwani wamu shikunino weno ashi, 'Kenga, ame kwayenda mbyo naka kara ghure wamwaka ntatu, weno kunaya ndi nuya shimbeko nyango kuno kushitondo shaghukuyu, ano ngoli kapi nawanako nyango. Weno tetapo shino shitondo shitundepo. Vinke tupu shihepekera livhu nalivhango?'8''Makura muruwani wamu shikunino amu limburura weno naku ghamba ashi, 'Muhona, shuva tanko shino shitondo nga shikare po ghure wamwaka ghumwe tupu, ame nganu kayita rutoko nganu yatureko. 9Ano ngoli nkene shi ngaku yima nyango mwaka waku kwamako, ndi, nawa tupu; ano ngoli nkene shi shimpe kwato nyango, ndi ntani ngatu shitetapo nga shitundepo!''''10Liyuva limwe lya Sabata Yesus kwayendire aka ronge muSinagoge. 11Pano, palivhango kwakalirepo mukadi ghumwe wakuvera ogho akaliro nampepo yayidona murutu ghure wamwaka murongo na-ntano-na-ntantu. Ghuye kuyenda kuna kurumana kehe pano, kwato kuvhura kuyimana avyu kilire.12Yesus opo akengire ghuno mukadi, makura amu yita ntani amu tantere weno ashi, ''Mukadi, manguruka, weno ghuna veruka ntani ghuvera ghuna tundu mo murutu roye.'' 13Yesus makura akambeke maghoko papendi, mpopo tupu mukadi avyu kiliri kuyimana, makura atapa mpandu naku fumadeka Hompa Karunga. 14Ano ngoli mukurona waSinagoge kwagarapa ghunene mukondashi Yesus kwaverulire mukadi muliyuva lya Sabata. Ghuno mpititi aghamba naku tantera mbunga weno ashi, ''Mu shivike kwakara mo mayuva matano-na-limwe ogho vapulitira vantu kuruwana. Muna hepa kuya kuSinagoge muya verure vantu mumayuva ghano, kapi shi muliyuva lya Sabata.'''15Makura Hompa amu limburura weno ashi, ''Anwe vantu vaku vikupaka! Opo muna kara weno, anwe naku vhura shi, kushutura hove yenu ndi shidongi shenu mushi tware kumukuro shikanwe ko mema muliyuva lya Sabata ndi? 16Oghuno mukadi nane kapi shi naye mona Abrahamu, ogho amanga weno Satana ghure wamwaka murongo na-ntano-na-ntatu, ghuye ne naku vhura shi kumu mangurura naku mushutura muliyuva lino lya Sabata ndi?''17Yesus opo amanine kughamba nkango daweno, vana nkore vendi navantje kwakufa ntjoni ghunene, ntani mbunga yavantu avakara naruhafo rwarunene kuviruwana navitetu vyendi vyavinene ovyo aruwanine.18Makura Yesus aghamba weno ashi, ''Ghuntungi wamu liwiru waHompa Karunga ne weni omo wafana ntani kughu fanikita nanke, Ame kuna kumutantera weno ashi wagho kwafana weno? 19Ghuntungi waKarunga kwafana yira ntanga yambuto yayididi oyo vakunanga mulivhu mulifuva, makura ngayi kure dogoro nga yikare shitondo shashinene, shashire, shama mpava ghamanene, nadimutavi dadiyingi daku yungira ghunene ntani namahako ghamanene ghamayingi, makura vidira vyakuwiru nga vitunge mo vitunguru vyakughutira maghuta nandyugho dakurara muma mpava namu dimutavi dashitondo.20Yesus aghamba nka shimpe weno ashi, ''Ghuntungi wamu liwiru waKarunga ne kughu fanikita nanke? 21Ghuntungi wamu liwiru kwafana yira hingo ndi vifulito vyavisheshu tupu vyaku tura mughutura wakuduva vikuki mposhi ghukare vifulito vyaku yingipita viduva dogoro kuyuda lihemere lya linene."22Makura Yesus kwatwikira naruyendo rwendi rwakuyenda kuYerusalemu ntani ghuye kwapita mudi mukunda namudoropa daku kushuva-shuva aronge vantu. 23Makura muntu ghumwe amu pura weno ashi, ''Hompa, weno kuna kumoneka ashi vantu vavasheshu tupu ngava vhuro kupura ovo ngava paruko mo ndi?'' Yesus kwamu limburura weno ashi, 24''Vya ghushili naku kutantera ashi, kondja ntani kambadara mposhi nga ghungene ghupitire mulivero lya lididi dogoro ngaghu gwaneke mo ghungene munda, mukonda shi, vantu vavayingi ngava kutininika ashi ndi navo ngava pitiremo mulivero lya lididi, ano ngoli kapi ngava gwaneka mo ntani kapi ngava ngena mo munda.25Opo ngaya tika nturaghumbo wamu mundi nga shapuka ngaka pateko kulivero, makura anwe ngamu kara pandye yalivero ngamu ngongore kulivero naku yiyira ntani nakughamba weno ashi, 'Hompa, Hompa, tupaturure tungene munda.' ''Ghuye ngamu limburura kumwe naku mutantera weno ashi, 'Ame kapi naku mupaturura mukondashi ame kapi namuyiva ntani kapi nayiva ko oku mwatunda.' 26"Makura anwe ngamu ghamba weno ashi, 'Atwe kumwe tupu katu lyanga ndya ntani naku nwa kumwe nove kumeho yoye opo kaghu yuvitanga naku ronga Mbudi yaRuhafo mudoropa detu.' 27''Ano ngoli ghuye ngamu limburura weno ashi, 'Ame kuna kumutantera weno ashi, 'Ame kapi namuyiva ntani kapi nayiva ko oku muna kutunda. Tundenupo pano palivhango, anwe vantu vavarunde!'28Anwe nga mukalira naku kukwetja mayegho opo ngamu kamona Aburahamu, naIsaki, naYakopu, ntani navaporofete navantje vavo kuna kara mughuntungi waKarunga, ano ngoli anwe kuna muvhukumine mukare pandye. 29Vantu vavayingi ngava tunda kumaruha naghantje kughupumeyuva, naku ghutokero, naku ghumboyera, ntani naku ghucuma, vavo ngava ka shungira kutafura ngava ka dyobwane mughuntungi waKarunga. 30Anwe yivenu vino vyaweno ashi, vantu vaku pira mfumwa namakuto mbo ngava ka karo na mfumwa kumapundi ghamanene, ntani vantu ovo vana karo namfumwa kumapundi ghamanene paweno, vavo mbo ngava ka karo vakuhulilira mughuntungi waKarunga.31Kunyima yashirugho shashifupi tupu, vaFarisayi vamwe avaya kwaYesus avamutantere weno ashi, ''Yenda ghutundepo pano palivhango mukondashi Herodesi ove ana kushana - shana aku dipaye.'' 32Yesus alimburura weno ashi, ''Yendenu muka mutantere ogho mbwawa weno ashi, 'Kenga, ame kuna kuruwana viruwana vyande liyuva lya namuntji nayona ntani ame nganu verura vantu naku tjida mpepo dadidona muvantu navantje naku ruwana vitetu vyavinene, dogoro muliyuva lya ghutatu ame ntani nganu mana naku tikitamo viruwana vyande navintje.' 33Ovino vina hepa kutikamo ntani, ame kuna kutwikira naruyendo rwande namuntji nayona napinduko, mukondashi kapi vapulitira kudipayera muPorofete waKarunga pandye yashitata shaYerusalemu.34Yerusalemu, Yerusalemu, ove kwadipaya vaPorofete vaKarunga vakare ntani ove kwadipaya namawe vantu ovo vatuma vayuvite mbudi kukoye. Rukando rungapi naya kukoye ashi ndi nganu popere vantu vamu shitata shoye yira momu yapoperanga nkuku vitjiyo-tjiyo vivande mavava, ano ngoli ove kapi walimburukwa. 35Kenga, weno Karunga kapi nka nga popera ndyugho yoye. Ame kuna kukutantera weno ashi, kutunda pano weno ove kapi nka ngaghu nkenga wangu dogoro mpopo nga shitikamo shirugho opo nganu ka vyuka rukando rwaghuviri ntani ngaghu ghamba weno ashi, 'Muntu walirago ndyeghu waku yenda mulidina lya Hompa ntani namu nkondo daHompa Karunga.'''
141Vino kwashorokire muliyuva limwe lya Sabata, Yesus kwayendire mumundi wamukurona wava Farisayi akalye mboroto, ano ngli vantu navantje ndye tupu vana kunomena. 2Kwaku harukako tupu, murume wakudunda maghuru namaghoko ghendi mukonda yaghuvera, kwayimanine kumeho yaYesus. 3Makura Yesus apura varongi vamatjangwa nava Farisayi weno ashi, ''Vya pulitira vyakuverura muntu muliyuva lya Sabata ndi, ndi Hawe?''4Vavo kwamwena teyete. Makura Yesus akambeke maghoko ghendi papendi, mpopo tupu averura, ntani amu tantere aka yende. 5Ghuye avapura weno ashi, ''Opo muna pongo weno are wakupira kupopera monendi, ndi hove yendi nkene shi yayo kuna were mulitope mbyo yina patamene mo muliyuva lya Sabata, waku pira kuyi ghupamo yitunde mo wangu - wangu?'' 6Shimpe nka kwato ogho avhuliro kumu limburura.7Yesus opo adimburura weno ashi vantu ovo vayitire kushipito vavo kuna toghorora ntani kuna shungira pavipuna vyava kamakuto vyakumeho, ghuye avatantere shifanikito shaweno, ashi, 8''Nkene shi kuna kuyita ghuyende kushipito shankwara, kapi shi kuka shungire kuvipuna vyakumeho vyava kamakuto, mukondashi vaka makuto kuhulilira kuyatika pashilika dogoro vantu navantje vana yatika - tika kare kuna shungiri. 9Opo ngaya tika nturaghumbo washilika ogho ayito vano vantu navantje vaye kushilika, ghuye ngaku tantera weno ashi, 'Ove tundapo ghutape livhango lyoye kwaghunyoye,' makura ove ngaghu kuyuvha ntjoni ghunene ntani ove ngava kutwara kuruku rwavantu navantje.10Ano ngoli nkene shi kuna kuyita, ghuyende kushilika shankwara ghuna hepa kuka shungira kuvipuna vyaku nyima yavantu, mposhi opo ngaya tika nturaghumbo washilika, ngaku tantera weno ashi, 'Muholi, shapuka yenda ghuka shungire kuvipuna vyakumeho.' Ove ngaghu kawana livhango lya mfumwa kumeho yavantu navantje ove ngaghu ka shungira kumwe navo kutafura. 11Mukondashi kehe ghuno waku kunene pita mwene ngava ka mudidipita, ntani waku kudidipita mwene ngava ka munenepita naku muyerura.12Yesus kwatantera nka weno ghuno nturaghumbo ogho amu yitiro kushipito ashi, ''Nkene shi kuna kutura shilika nashipito shaku dyobwana ndya, kapi shi kuyita ko tupu vaholi, navantu vamulipata lyoye, nalikoro lyoye, navantu vamaparambo ghoye ntani navantu vavangagho, vaku vhura kutapa kukoye ngava vyute limona lyoye ngaghu wanenemo mfuto yoye.13Ano ngoli nkene shi kuna kutura po shilika nashipito, ghuna hepa kuyita ko vahepwe, navirema, navantu vavankundi ntani navantu vavatwiku, 14makura ove nga ghuwana matungiko ntani nalirago lya linene, mukondashi vantu vaweno kwato vyaku vhura kutapa kukoye ntani kwato ovyo nga ghuwana kukwavo. Ove ngaghu kawana mfuto yoye kwaHompa Karunga, palivhumbuko lya vahungami.''15Muntu ghumwe ogho ashungiliro kutafura kumwe naYesus opo ayuvire vino vyaweno, ghuye aghamba weno ashi, ''Muntu walirago ndyegho nga kalyo mboroto yamu ghuntungi waKarunga!'' 16Ano ngoli Yesus kwamu limburura weno ashi, ''Murume ghumwe kwatulire naku wapayika shipito shashinene makura ayita vantu vavayingi vaye kushipito. 17Opo vamana kutapa naku wapayika naku tura ndya pavitafura, ghuye atumu mukareli wendi aka yite vantu naku vatantera weno ashi, 'Weno tuyendenu ngoli kushipito, mukondashi ndya dinapu kuwapayika, weno pavitafura kare dina kara ntani dinapu kare kutapa.'18''Vantu navantje kwashwena kuyenda kushipito kehe ghuno kwatapa konda yendi navinka vyendi. Muntu wakuhova kwaghamba weno ashi, 'Ame kwaghura lifuva, weno nahepa kuyenda nganu kalimone. Ame kapi nuvhura kumoneka.' 19Ghumwe naye aghamba weno ashi, 'Ame kwaghura dyoko ntano navipururo vitano, weno kuna kuyenda nuka deghure hove dande. Kapi nuvhura kumoneka.' 20''Ntani murume ghumwe naye kwaghamba weno ashi, 'Ame ntantani tupu kanu wana lipata namugholikadi nankwara, ame kapi nuvhura kumoneka.'21''Makura muruwani aka vyuka aya tantere muhona wendi navintje ovyo vaka ghambire. Makura muhona agarapa ghunene ntani atantere muruwani wendi weno ashi, 'Kwangura weno kayende mundyira namu vitaghura vyamu shitata kayite vantu navantje vahepwe, navirema, navatwiku ntani navantu vavankundi.' 22''Muruwani atantere muhona wendi weno ashi, 'Muhona, ovino ghuna kughamba tuna viruwana kare, ano ngoli shimpe mavhango mayingi ana huparoko.'23''Muhona atantere nka mukareli wendi weno ashi, 'Kayende kudimukunda daku ghure dadi didi namu ndyira daku ghure dadi didi naku makwina ghaku ghure ghamadidi ntani naku mavhango ghaku ghure naghantje kayite vantu navantje, vaya ghupe ghano mavhango nandyugho ntani nankonda dino damuporongwa. 24Ame kuna kumutantera weno ashi, ovano vantu vahovire kuyita kushipito navantje, kwato ogho nga makeroko kuno kundja dashipito shande.''25Shirugho shino mbunga yayinene kuna kuyenda yi kwame Yesus, makura ghuye apiruka atantere mbunga weno ashi, 26''Kwato muntu wakuya kukwande ghuye nga pire kunyenga vashe, navawina, namukamali wendi, navana vendi, namughunyendi ndi mukurwendi, ntani nka ghuye kuna hepa kukara nashihoro shashinene shaku kwande ntani ana hepa kunyenga liparu lya mwene, ntani nga vhura kukara murongwa wande. 27Kehe ghuno wakupira kudamuna shikuruse shendi mwene, muntu waweno kapi alimburuka kunkango dande ntani ghuye naku vhura shi kukara murongwa wande.28Muntu nkene shi kuna kushana kutunga litungo lyalire lya linene, shakuhova ghuna hepa tanko kushungira ghukona - kone vihepwa navintje ovyo ghuna hepa kugwanitapo dogoro navintje vikarepo ntani vina tikiliremo, ove ghuna yiva nawa-nawa ashi viruwanita navintje vina tikilirimo ntani ghuna yina nka ashi lino litungo nga lipwa kudika. 29Nkene shi, kapi ghuna kuruwana vyaweno, tupu nga ghutameka kutunga kuntji litateko ashi ndi litungo liyimane litameke kukura mpopo tupu viruwanita vyoye navintje kare kavipupo ove wahana kumana kudika litungo lyoye nalintje, makura vantu navantje opo ngava mona vyaweno vavo ngava kushepa, 30naku kughamba mwamudona weno ashi, 'Kengenu oghuno murume ghuye kwatateka tupu kutunga litungo lyendi ano ngoli vina muvhuru muku tunga nga mane litungo lyendi.'31Ntani nka Hompa, nkene shi kuna kuyenda kuvita aka rwe na Hompa ghunyendi, pakuhova ana hepa kukuwapayika: kushungira namatimbi navakurona vavakavita ntani navatapi maghano vendi vakona - kone naku wapayika navintje ntani vayive ashi shino shivaro shava kavita vendi vano mayovi murongo ne vavo kuvhura kurwanita ngava funde shivaro shavakavita vakutika kumayovi dimurongo mbiri kumwe naHompa wavo ndi? 32Ano ngoli nkene shi Hompa kuna yiva ashi kapi nga vhura kufunda vita vyaweno, ghuye kuna hepa kuruwana vino, tupu nga mona ashi vana nkore vendi shimpe kughure vana kara ana hepa kutumako vantu vendi vayende kukwavo vakaghambe naku turapo mbili. 33Nanwe mo ngoli, kehe ghuno wakupira kushuva limona lyendi, ghuye naku vhura shi kukara murongwa wande.34Mungwa ghuwa ntani wawapa kare, ano ngoli nkene shi mungwa kuna hamupara, kughu ruwana weni mposhi ngaghu kare shimpe nankondo yira momu wahovire kukara pakuhova? 35Mungwa waweno kwato nka mulyo ntani kwato nka hepero yaku ghutura mulivhu namu lifuva ashi ghukare yira rutoko. Hasha tupu kughu vhukuma. Kehe ghuno akaro namatwi ghakuyuvha, ayuvhe naku kwata lighano.''
151Pa ruvede runo vafutiti mutero ntani navantu vandyo vavayingi kwayire kwaYesus vaya terere kumarongo ghendi. 2Makura Farisayi navarongi vamatjangwa avatameke kughamba naku vhunguta weno, ashi, ''Oghuno murume kuna kutambura vantu vandyo ntani ghuye kuna kulya ndya kumwe navo.''3Makura Yesus kwatantera vantu shifanikito shaweno ashi, 4''Opo muna kara anwe omo mumbunga yenu, nkene shi ove kwaweka Ndywi lifere, makura Ndywi yimwe yika kombane muwiya, kapi ngaghu shuva dino Ndywi dimurongo muvyu namuvyu, ove ngaghu yende ghuka shane yino Ndywi yimwe tupu oyo yina ka kombano muwiya dogoro ngaghu ka yiwane ndi? 5Opo ngaghu kayi wana yino Ndywi yaku kombana, ove ngaghu ka yidamuna ngaghu yiku kambeke pamapepe ghoye ngaghu yitware kumundi ntani ove ngaghu kara naruhafo rwarunene.6Opo ngaya tika mumundi wendi, ghuye nga yenda ngaka yita vaholi vendi navantu vamaparambo vendi, ghuye ngava tantera weno ashi, 'Yenu kukwande tuya dyombwane kumwe, mukondashi Ndywi yande oyo yakombanino weno naka yiwana.' 7Ame kuna kumu tantera weno ashi, vantu vamu liwiru navantje navo ngava kara naruhafo rwarunene, muku hafera muntu ghumwe tupu wandyo, nkene tupu kuna kushighura atjindye ghukaro wendi nga shayeke kuruwana ghurunde, kupitakana vantu dimurongo muvyu namuvyu vavahungami vaku pira kuhepa kushana kutjindja ghukaro.8Ndi po nkene shi mukamali kuna kara navisiliveli murongo vyamu waya-waya, makura siliveli yimwe tupu ngayi kombane po? Vinke nga vhura kuruwana mukadi? Ghuye nga tweda ramba yitape ghukenu mundyugho, ntani nga tameka kukwera mundyugho nayintje, nga shana-shane siliveli yendi dogoro nga yiwane? 9Opo nga wana siliveli yendi, makura nga yita vaholi vendi navantu vamaparambo vendi, ngava tantere weno ashi, 'Yenu kukwande tuya dyombwane kumwe tupu, mukondashi siliveli yande oyo yakombanino, nayiwana.' 10Ame kuna kumutantera nka, weno ashi, 'Mukatji ka mbunga yava Engeli vaKarunga navo ngava kara naruhafo rwarunene, nkene shi muntu ghumwe tupu wandyo kuna kushighura atjindye ghukaro wendi ashayeke kuruwana ghurunde.''11Ntani Yesus avatantere nka, weno ashi, ''Pa kalire murume ghumwe ogho akaliro navana vendi vavamati vaviri, 12monendi wamwanuke ayendi kwavashe aka ghamba weno ashi, 'Vava, mpenu ruha rwalimona lya ghupingwa wande.' Makura shavo aghupu limona lyendi ali gaghununa mukatji atapa kuvana vendi vaviri kehe ghuno awana ruha rwendi.13Kuruku rwamayuva ghama sheshu tupu, monendi wamwanuke aghupu limona lyendi nalintje makura ashapuka ayende kuvirongo vyaku ghure, nko aka tungire, makura ghuye aka hepeka limona lyendi nalintje. 14Opo lya pwire limona lyendi nalintje makura mushirongo kwaya mo lirumbu lya linene, makura mumati akara muruhepo rwarunene.15Makura ayendi aka shane viruwana kwamuntu wamomo mushirongo, ghuye aka mutura akare muruwani waku tapa ndya kuvinguru vyendi. 16Mumati kwakalire muruhepo rwarunene makura naye ashana kulya mutjeke-tjeke nandya davinguru, ano ngoli kwato ogho adi munukitiro.17Kuruku rwashirugho makura mumati kwavhuruka naku ghamba, weno ashi, 'Vavava kwakara navaruwani vavayingi ghunene ntani nka vavo kehe liyuva kulya ndya vakute, ano ngoli ame ghuno nafano weno, kuna kufa kundjara! 18Ame kuna kushapuka weno nganu tundemo muno mushirongo nganu vyuke kuva vava, ame nganu kava tantera weno ashi, 'Vava, ame kwadyona kukwenu ntani naku kwaKarunga wamuliwiru. 19Ame kapi nka nahungama ashi nganu kare, monoye; weno renka tupu ngoli name nganu kare ghumwe wavaruwani voye.'''20Makura mwanuke wamumati kwashapuka mpopo atundemo mushirongo avyuke kuvashe. Mumati ghuye shimpe kughure ana kara, vashe avamu mono kuna kuya, vavo kwamu fera nkenda ghunene, ntani avaduka vayende kwamonendi avakamu kwata namaghoko maviri kumwe naku mucumita pashipara shendi vamu shamberere. 21Mumati atantere vashe weno ashi, 'Vava, ame kwadyona kukwenu ntani naku kwaKarunga wamuliwiru. Ame kapi nahungama nka ashi nganu kare monoye.'22"Ano ngoli vashe kwatantera varuwani vendi weno ashi, 'Kwangurenu mukayite lirwakani lya lipe, mumudwateke, ntani mudwatekenu linga kunyara yendi, ntani mudwatekenu nkanu kumpadi dendi. 23Ntani kayitenu ntana yaku kulyera yaku neta muya yidipaye. Mposhi ngatu dane shipito shendi shaku dyombwana! 24Mukondashi monande ogho afiro, weno ana moneke kuna kuparuka. Ntani monande kwakombanine, weno ana moneke.' Makura avatura shipito shendi vadyobwane.25''Ano ngoli monendi wamukondi ghuye kwayenda muwiya aka ruwane. Opo aya tikire papepi namundi, ghuye kwayuvha tupu vantu mumundi kuna kuyimba ntjumo vadane. 26Makura ghuye kwayita muruwani wavashe ghumwe amu pura weno ashi vinke vina kushoroko mo mumundi wetu. 27Muruwani alimburura weno ashi, 'Mu ghunyoye wamwanuke ogho akombanino weno ana kavyuka mpwali mumundi, makura vasho mbyo vana dipaya ntana yaku kulyera yakuneta vadane shipito mukondashi ghuye kuna ka vyuka kumundi wandyewa-ndyewa.'28''Monendi wamukondi kwagarapa ghunene opo ayuvha vyaweno ntani nka kapi ashanine kungenamo mumundi, makura vashe avarupuka avaya kukwendi vamu shengawide. 29Monendi wamukondi kwatantera weno vashe ashi, 'Terera, ame kwakuruwanena mwaka dadiyingi ghunene, ntani kapi navaka kehe shino mumundi ghoye ntani ame kwalimburukwa kuveta doye nadintje, ano ngoli ove kwato osho watapa kukwande, nampili shimpendye ashi ndi name nudyobwane shipito nava ghunyande, 30ano ngoli monoye ogho atjwayuko kare-kare mumundi ghuye mbyo aka hepeka naku dyonaghura limona lyendi kuvakadi varukeshe, weno mbyo ana ka vyuka kumundi, ove mbyo ghuna dipaya ntana yaku kulyera yakuneta ghudane shipito shendi.'31''Vashe kwalimburura monendi naku mutantere weno ashi, 'Monande, ove kwakara mumundi wande ntani ove kwakara name, ntani limona lyande nalintje olyo naweka ne lyoye tupu. 32Vyaweno vina hungama ntani vina wapa tupu mukuturapo shilika shamu ghunyoye wamumati mposhi tudyobwane nakupembura kumwe, mukondashi mughunyoye kwafire, ano ngoli weno ana kara namonyo kuna kuparuka; ntani ghuye kwakombanine, ano ngoli weno ana moneke.''
161Ntani Yesus atantere nka varongwa vendi weno ashi, ''Pa kalire murume ghumwe wamungagho ogho akaliro nalirenga lyendi, makura vantu avaka rapota lirenga kwamuhona wendi ashi lino lirenga lyoye kuna kuhepeka naku hanaghura limona lyoye. 2Makura muhona ayita lirenga lyendi kumbara naku lipura weno ashi, 'Vinke nka ovino naku yuvha vyaku hamena kukoye? Kutunda pano pongeka ntani varura limona lyande nalintje olyo natapa kukoye, mukondashi ove kapi nka ngaghu kara mukungi walimona lyande.'3''Lirenga kwakupura weno ashi, 'Weni omo nu ruwana, nkene shi muhona wande kuna kuntjida muviruwana vyande? Ame kwato nkondo daku lima mulifuva ntani ntjoni mukurombaghera ndya kuvantu. 4Weno ame nayiva ashi weni omo nganu ruwana, kumeho yaku renka ashi muhona wande ngaka ntjide mo muviruwana vyande, mposhi vantu kapi shi ngava ka ntjide mumandi ghavo.'5Makura lirenga kwayita vantu navantje ovo vakaro namakongo ghamuhona wendi, ghumwe-ghumwe, naku vapura weno ashi, 'Makongo ghaku hura kuni ogho walya kwamuhona wande?' 6Ghuye kwalimburura weno ashi, 'Makende ghamaghadi lifere.'' Lirenga mpopo kwamutantera weno ashi,' Ghupa wangu mbapira yoye yamakongo, dongononapo oyo ndando yina karomo ntani tjangamo makende dimurongo ntano.' 7Ntani lirenga kwayenda aka pura waku kwamako weno ashi,' Makongo ghaku tika kuni walya kwamuhona wande?' ''Ghuye kwalimburura weno ashi, 'Ntjako darukokotwa lifere.' Ghuye kwamutantere weno ashi,' Ghupa mbapira yoye yamakongo, tjanga mo ntjako dimurongo ntano nantatu.'8Makura muhona wendi opo ayuvire yino mbudi kwapandayika lirenga lyendi lya vimpempa namandungwa-ndungwa mukondashi lyalyo kwaruwanine nandunge. Ame kuna kumutantera weno ashi, vantu vamu ghudyuni kwakara nandunge daku ruwana navantu vamu ghudyuni, kupitakana vantu vavahungami ovo vakaro ramba yamuno mughudyuni. 9Ame kuna kumu tantera weno ashi, ruwanitenu limona lyenu lya kupire kuhunga lya muno mughudyuni mposhi ngamu wane vantu ngava kare navaholi venu vamuno mughudyuni, mpo ngoli ashi opo nga lipwa limona lyenu vaholi venu navo ngava ka mutambure mumandi ghavo ghamu liparu lya naruntje-na naruntje.10Kehe ghuno waku huguvara nalimona lya lisheshu, ghuye kuvhura tupu nka kumu huguvara nalimona lya liyingi, ntani muntu waku pira kuhuguvara nalimona lya lisheshu, ghuye kwato kumu huguvara nampili nga wane limona lya liyingi. 11Nkene shi ove kwato lihuguvaro lyaku ruwanita limona lya muno mughudyuni lyaku pira mutompo, are waku kuhuguvara ashi nga kupe nove nga ghukare nalimona lyoye lya kupongoka lyaku karererapo? 12Nkene shi ove kapi wayiva kupakera mbili limona lya vantu, kuni nga tunda muntu ogho ngaku huguvaro ashi nga kupe limona nove nga ghukare naghushwi?13Kwato muntu waku kara navahona vendi vaviri, mukondashi ghuye nga horapo ghumwe ntani nga nyenga po ghunyendi, ndi po ghuye nga pakera shinka nambili yayinene kwaghumwe ntani ghunyendi kapi ngamu pakera mbili nashinka. Nanwe nka shi naku vhura shi kushana naku karera Hompa Karunga ntani nalimona.''14Ano ngoli vaFarisayi, kwaholire ghunene vimaliva, opo vayuvire vyaweno, vavo kwamu shepa ghunene. 15Yesus avatantere weno ashi,'' Anwe kwahora kumoneka kuvantu ashi kwahungama, ano ngoli Karunga kwayiva ntani kukenga navintje vyamu munda yamu dimutjima denu. Anwe yivenu vino ashi kehe vino vapandayikanga navi vafumadeka ghunene vantu ashi kwakara namulyo, Hompa Karunga kwavinyenga ghunene.16Veta odo atapire Hompa Karunga kwaMoses nava Porofete kwadi yuvita shirugho nashintje dogoro kwaya shayera paYohanesi muyoyi. Kutunda papendi, makura Mbudi yaRuhafo yaghuntungi waKarunga ndyo vana kuyuvita dogoro weno, makura vantu navantje mbyo vana kukondja naku duka nankondo ashi navo vangene mo. 17Ano ngoli liwiru nalivhu ngavi ka tundapo naghureru, ano ngoli kuveta yaKarunga kwato nkango nashikomona osho ngashi ka tundoko dahana kutikiliramo nadintje.18Kehe ghuno waku shwena mukamali wendi nga yende ngaka kware mukamali wapeke ghuye kuna kushondera ntani kuna dyono, ntani kehe ghuno waku kwara mukamali ogho ashuva mukafumu wendi naye kuna kushondera ntani kuna dyono.19''Ntani pakalire murume ghumwe wamungagho ghuye ka dwatanga marwakani ghamakenu ghaku vembera ghandiro ntani ghuye ka karanga naruhafo kehe liyuva ntani ka parukanga nawa kehe liyuva ghuye mbyo aku tumba ghunene mukondashi ghuye kwaweka limona lya liyingi. 20Ntani pakalire murume ghumwe wamuhepwe lidina lyendi Lasarusi ghuye ka shungiranga naku rara kehe liyuva palivero lya ghuno muntu wamu ngagho, ntani ghuye kwakalire navimburu murutu rwendi naruntje, 21ghuye ka fanga ndjara ntani ka shananga kehe pano kulya ndya dakuwa kutafura yamungagho. Nampili mbwa nado kadi yanga diya peshe vimburu vyaparutu rwendi.22Opo shatikamo shirugho ghuno murume wamuhepwe afu makura vaEngeli avaya mushimbi avamutwara aka shungire mulivhango lya Aburahamu. Ntani murume wamu ngagho naye afu ghuye avamu vhumbiki, 23murume wamungagho weno kuna kara mushirongo shavafe, mushirongo sharunyando naghupyakadi, makura akankuka shipara, mantjo ghendi agha kenge Aburahamu kuna kara kughure ntani Lasarusi kuna shungiri mulivango lyendi.24Ghuye kwalira naku yiyira naku ghamba weno ashi, 'Vava Aburahamu, mfere ko nkenda, tumako Las arus, aye kuno adove nyara yendi mumema ature paruraka rwande, mukondashi ame kuna kara mumundiro, kuna kupya.'25''Ano ngoli Aburahamu amu tantere weno ashi, 'Monande, vhuruka ashi ove kwaparukira nawa opo wakalire namonyo, ntani Lasarusi kwaparukire liparu lya lidona. Ano ngoli paweno Lasarusi kuna kuya pwiyumuka okuno ana kara weno, makura ove mbyo ghuna kumona ghudito naghupyakadi. 26Ntani nka kughupako navintje vyaweno, Hompa Karunga kwaturapo limpompa lya linene pakatji ketu lyaku kara weno ashi, atwe vaku ruha runo nampili kuna shana ashi tuvindakane tuye kukwenu, kwato kupita ntani naku vhura shi ntani nanwe nka mushikwavo kwato kuvindakana muye kuno kukwetu.'27''Murume wamungagho aghamba weno ashi, 'Vava Aburahamu, ame kuna kushungida naku kanderera kukoye, tuma Lasarusi ayende kumundi wava vava - 28mukondashi ame kwakara navaghuni vande vatano vavarume - mposhi ngaka vatantere kumwe naku varondora, mposhi ngava pire kuya kuno kushirongo sharunyando naghupyakadi.'29''Ano ngoli Aburahamu amu limburura weno ashi, 'Vavo kwakara nankango daHompa ntani veta daKarunga odo atjanga Moses ntani nava Porofete vakare; vana hepa kudi yuvha vadi limburuke naku ditikitamo.' 30"Ano ngoli murume wamungagho kwalimburura weno ashi, 'Hawe kapi shi mo ngoli, Vava Aburahamu, nkwandi nga tunde ghumwe kuno kushirongo shavafe ngaka vatantere naku varondora, ndi ntani ngava yuvha mposhi ngava kushighure.'' 31Ano ngoli Aburahamu amu limburura weno ashi, 'Nkene shi kapi vana kuyuvha naku limburuka kunkango naveta odo atjanga Moses nava Porofete vakare, nampili muntu nga tunde kuno kushirongo shava fe kapi ngava kamu terera ntani kapi ngava tjindja ghukaro wavo.'''
171Yesus kwatantera weno varongwa vendi ashi, ''Vantu vavayingi ngava gwanekera namasheteko ghamayingi ghaku kushuva-shuva makura ngava punduka ngava ture ndyo, ano ngoli muntu ogho nga yito masheteko ghaweno kuvantu ngava punduke mo ngava ture ndyo, ghuye nga kara nalihudi lya linene kuviruwana vyendi vyaweno! 2Muntu waku fana weno hashako tupu nkene shi kumu manga namawe ghamanene muntingo yendi makura kukamu vhukumina mulifuta palitondo, nkene tupu arenkita muntu walipuro lya lididi nga punduke nga ture ndyo.3Wapekenu ma ghukaro ghenu. Nkene shi ghunyoye kuna tura ndyo, ghuna hepa ntani kumuharukira naku mushwenena kuruwana ghurunde, ano ngoli nkene shi ana tambura lipuko lyendi ghuye mbyo ana kushighura, ghuna hepa ntani kumu ghupirapo pandyo dendi. 4Nkene shi ghunyoye kuna dyono kukoye rukando rutano naruviri muliyuya, ntani ghuye mbyo anaya kukoye ashungide lighupiropo lya ndyo dendi rukando rutano naruviri muliyuva, nga ghambe weno ashi, 'Ame nadyono kukoye hewa, ngupirepo pandyo dande, kapi nka nganu ruwana vyaweno, ove ghuna hepa ntani kumu ghupirapo pandyo dendi!''5VaApositoli kwatantera Hompa weno ashi, ''Vhukita naku wederera lipuro lyetu. 6Ano ngoli Hompa kwava tantera weno ashi, ''Nkene tupu ngamu kara nalipuro lyaku tika pantanga yayididi, anwe ngamu tantera shino shitondo shaghunyandi weno ashi, 'Tapurukapo pano tundapo, yenda ghuka mene mulifuta, shino shitondo ngashi limburuka kunkango denu.7Opo muna kara omo mumbunga yenu, nkene shi muruwani ghoye ntantani tupu ana kuya tika mumundi aka tunde kumafuva kuna kapurura ndi po kuna yendi murufo aka kunge ndywi doye muwiya, nkene shi ghuye anaya tiki mumundi weni omo ngaghu ghamba kukwendi? Kapi ngaghu ghamba weno ashi, 'Kwangura ko ghuye kuno wangu, ghuya shungira ghulye ndya doye dinapu kare kuwapayika'? 8Nane ngoli, ove ghuna hepa kutantera muruwani ghoye weno ashi, 'Yenda ghuka dwateko vyuma vyavikenu ghutameke kuwapayika ndya dande damu rarero ame kuna shana kulya ndya dande naku nwa weno. Opo nu mana ntani nove ghughupa ndya doye ghutameka kulya nakunwa?9Kapi vyahungama vyaku tapa mpandu kwamukareli ghoye mukondashi ghuye kuruwana atikitamo shiruwana shendi, osho shamu tumbukiro? 10Nampili natwe shi varongwa vendi mo ngoli, kapi twa hepa kuwana mpandu yaku viruwana vyetu, nane ngoli atwe kuruwana vino muku tutikitamo shitumbukira shetu osho vatapa kukwetu, ntani atwe kughamba weno ashi, 'Atwe vakareli vaHompa ntani kapi twa hepa mpandu yavantu mukonda yaviruwana vyetu. Atwe kuruwana vyaweno tutikitemo shiruwana shaHompa.''11Yesus navarongwa vendi mundyira vana kara kuna kuyenda kuYerusalemu, vavo kwapitire mukatji ka virongo viviri muSamariya naGalileya. 12Opo vangenine mumukunda ghumwe, vavo kwagwanekera navarume murongo vavingondwe. Vavo kwayimanine kughure naYesus, 13makura avayiyiri naliywi lyaku dameka, vaghambe weno ashi, ''Hompa Yesus, tufere ko nkenda.''14Yesus kwapiruka mpopo kwakenga kukwavo, ghuye kwava tantera weno ashi, ''Kayendenu muka moneke kuva Pirisiteli vaka mukenge." Vavo shimpe kuna kuyenda mundyira yavo mpopo tupu kwaveruka vana kushuka parutu. 15Ano ngoli oghuno ghumwe po tupu amonine ashi ghuye kuna veruka ntani kuna kushuka parutu, mpopo tupu kwapiruka kwavyuka, ayende kwaYesus ghuye kuna kara naruhafo kwatameka kuyimba naku panda naku tanga ashamberere Hompa Karunga liywi lya linene. 16Ghuye kwayenda dogoro aka kugandera kumpadi daYesus, aka tapa mpandu kukwendi. Ghuno murume kwatunda kuSamariya.17Makura Yesus avapura weno ashi, ''Nane kapi shi vantu murongo ovo vana veruko? Ovano vantu muvyu ne kuni nko vana kara? 18Kuna kumoneka ashi ndye ghuno tupu muntunda virongo, ndye tupu ana ka vyuko aya tape mpandu naku fumadeka Hompa Karunga?'' 19Yesus amu tantere weno ashi, ''Shapuka ghuka yende. Lipuro lyoye lina kuverura."20Liyuva limwe vaFarisayi vamwe kwayendire kwaYesus vaka mupura weno ashi ruvede munke nga ghuya ghuntungi waKarunga, Yesus kwalimburura naku vatantera weno ashi, ''Ghuntungi waKarunga opo nga ghuya kapi ngaghu moneka kuvantu ashi weno ghunaya tiki. 21Vantu kapi ngava ghukenga ngava ghambe weno ashi, 'Kengenu kuno, mpo ghuli pano! ntani, 'Mpo ghuli kunya!' Tererenu nawa, ghuntungi waKarunga mpoghuli kare mumwenu.''22Yesus kwatantera varongwa vendi weno ashi, ''Mayuva kuna kuya ntani papepi ana kara opo ngamu shana ashi ndi mukare kumwe name ntani ndi ngamu kenge Mona Muntu, ano ngoli kapi nga vishoroka. 23Vantu ngava mutantera weno ashi, 'Tererenu kuno, Mona Muntu mpwali kunya!' Tererenu kuno, Mona Muntu mpwali kuno! Opo ngava ghamba vyaweno kapi shi ngamu vipure ntani kapi shi ngamu yendeko, 24mukondashi nkene shi ruvadi kuna tema kuliwiru kuruha rumwe tupu, maruha naghantje ghaku liwiru kutema kukara mughukenu dogoro nkoko lya katwa liwiru, ntani vantu navantje kukara mushite sharuvadi, mo ngoli nga vishoroka: opo nga moneka Mona Muntu rukando rwaghuviri muliyuva lyaku hulilira, kehe ghuno ngamu kenga namantjo ghendi.25Kumeho yaku shoroka vyaweno, ghuye nga gwanekera narunyando dogoro vantu vamu ghudyuni navantje ngava tunde kukwendi. 26Kumeho nga moneka Mona Muntu rukando rwaghuviri ngavi shoroka yira momu tupu vyakalire mumayuva ghaNowa. 27Vantu ngava hokwa kulya, nakunwa, nankwara ntani naku dana vipito vyankwara, dogoro mpopo lya tikamo liyuva lya Nowa nalikoro lyendi vakaronde muwato waghunene - kuruku ntani ngoli runa kuya ruhandyo rwamema ghamayingi makura kwadipaya vantu navantje.28Ntani nka, yira momu tupu vyashorokire muruvede rwaLote mushirongo shaSodomu - vantu vavo kuna kudyobwana, nakunwa, naku ghura, naku ghulita, naku tapeka ntani naku tunga ndyugho. 29Muliyuva lino Lote kwatundamo mushirongo shaSodomu, makura mundiro wakuroka namawe ntani namungwa kwatunda muliwiru ntani kwaroka dogoro kwadyonaghura shitata nashintje.30Mo ngoli nga vishoroka ntani mo nga vikara opo nga moneka Mona Muntu shikando shaghuviri vantu ngava kara kwato ovi vana yivako ntani ngava kuvhurama. 31Opo nga litikamo lino liyuva kehe ghuno nga karo pawiru napandye yandyugho kapi shi nga yende mo munda yandyugho ngaka shimbemo kehe shino, ntani navo ngava yendo vakalime kulifuva kapi shi ngava ka vyuke ko kumundi ashi ngavaya shimbeko kehe shino.32Vhurukenu ovi vyashorokiro kwamukamali waLote. 33Kehe ghuno waku popera monyo wendi ngaghu kombanita, ntani kehe ghuno waku tapa naku kombanita monyo wendi ngaghu pungura ntani ngaka paruka.34Ame kuna kumu tantera weno ashi, vantu vaviri ngava rara paghuro ghumwe tupu. Muntu ghumwe ngava mughupapo ngava mutwara, ntani ghumwe nga huparapo.'' 35Vakamali vaviri nga vatwa mahangu mushinu shimwe tupu. Ghumwe ngava mughupapo ngava mutwara, ntani ghumwe nga huparapo.'' 36Ntani vantu vaviri ngava kara mulifuva; ghumwe ngava mutwara ntani ghumwe nga kara."37Varongwa vendi avamupura weno ashi, ''Kuni nko oku ngavi shorokera vyaweno, Hompa?'' Yesus kwava limburura weno ashi, ''Kehe kuno ngaku karo lirambo lya shikorama shakufa, kutanta ashi vidira vyamakuvi nkoko nko ngavi ponga nga vilye nyama.''
181Makura Yesus kwatantera varongwa vendi shifanikito shaweno ashi vavo vana hepa kuraperera kehe pano muvirugho navintje ntani kwato kudomba dimutjima vakare kuna dwapa, 2ghuye kwava tantera weno ashi, ''Mu shitata shimwe kwakaliremo mupanguli ghumwe waku pira kutjira Hompa Karunga ntani ghuye kapi afumadeka vantu.3Ntani mushitata kwakalire mo mukadi wakufita vyendi, ogho ka yendango kehe pano kwamupanguli aka ghambe weno ashi, 'Pangura ghuno ghudito wakaro mukatji ketu navantu ovo naku dyona navo.' 4Kwapitapo shirugho shashire ghuno mupanguli kwashwena kuterera naku pangura ghuno ghudito, dogoro kunyima yamayuva ghangandi mupanguli kwakupura mwene weno ashi, 'Na mpili momu napira kutjira Hompa Karunga ntani kapi nafumadeka vantu, 5ghuno mukadi wakufita vyendi kuna kuntininika ntani kuna kundyuvita kukora kumutjima, weno kuna kupangura ghudito wendi ngaghu tundepo, mposhi kapi shi ngaye kukwande kehe liyuva nga rorore monyo wande.'''6Makura Hompa avatantere weno ashi,'' Tererenu kwaghuno mupanguli wamudona omo ana kughamba. 7Makura ne weni omo nga pira kupopera Karunga vantu vendi ovo atoghorora nkene shi vavo kuna kuraperera naku lira naku shungida kukwendi matiku namwi? Ghuye kwakara nalididimiko kuvantu vendi? 8Ame kuna kumu tantera weno ashi ghuye nga kwangura kuruwanena ghuhunga vantu vendi. Nkene mo ngoli, opo ngaya tika Mona Muntu shirugho shaghuviri, vyaghushili ngaya wanamo vantu valipuro omuno mughudyuni ndi?''9Makura Yesus kwatantera vantu shifanikito shaweno ovo vaku mono vavene ashi vavo kwahungama mbyo vadina naku shentja vaghunyavo, ghuye kwava tantera weno ashi, '' 10Vakafumu vaviri kwayendire vakanduke KuYerusalemu muNtembeli vaka raperere - ghumwe muFarisayi ntani ghumwe mufutiti mutero.11Murume wamu Farisayi kwashapuka ayimana makura araperere weno ashi, 'Hompa Karunga, ame kuna kukupandura ove mukondashi ame kapi nafana yira vano vantu vaweno - vawidi, varunde, varushonda - ntani kapi nafana yira ghuno mufutiti wamutero. 12Ntani ame kuraperera ndapero yaku dililira rukando ruviri mushivike. Ntani ame kutapa vitwa murongo vyaku tunda kulimona naku viwana mo vyande.'13Oghuno Mufutiti wamutero, ghuye kwayimanine kughure, ghuye kapi akankuka akenge kuliwiru, ano ngoli ghuye kwakukwata lighoko lyendi panturo yendi, aghamba weno ashi, 'Hompa Karunga, mfereko nkenda, dongononapo ndyo dande, ame muntu wamurunde.' 14Makura Yesus kwaghamba weno ashi, mufutiti wamutero kwadongononapo ndyo dendi mukondashi ghuye kwaruwanine ghuhunga kushipara shaKarunga, kapi shi murume wamufarisayi, mukondashi kehe ghuno waku kuyerura mwene ngava mudidipita, ntani waku kudidipita mwene ngava ka muyerura.''15Liyuva limwe vantu kwayita vanuke kwaYesus ashi ndi avakambeke maghoko naku vatungika, ano ngoli varongwa vendi opo vamonine vyaweno, avava shweneke naku vatjida. 16Ano ngoli Yesus kwayita vanuke vavadidi vaye kukwendi, ntani aghamba weno ashi, ''Shuvenu vanuke vavadidi vaye kukwande, ntani kapi shi muva shweneke. Ghuntungi waKarunga kwahamena kukwavo. 17Ame vyaghushili naku mutantera weno ashi, kehe ghuno waku pira kukudidi pita akare yira mwnanuke wamudidi, kapi ngaka ngena mo mughuntungi waKarunga.''18Mukurona ghumwe wava Yuda kwapura Yesus weno, ashi, ''Murongi wamuwa, vinke nganu ruwana mposhi name nganu kawane monyo wanaruntje? '' 19Yesus amu limburura weno ashi,'' Mukonda munke ghuna kughambera weno ashi ame murongi wamuwa? Kwato muntu wamuwa waku hungama, nkwandi Karunga ahuru. 20Yesus aghamba weno ashi, ove wayiva vipango vyaKarunga navintje vyaweno - kwato kushondera, kwato kudipaya muntu, kwato kuvaka, kwato kurundira muntu, fumadeka vasho navanyoko.'' 21Murume atantere Yesus weno ashi,'' Ame kwalimburuka naku tikitamo vino vipango navintje kutunda kuwanuke wande.''22Yesus opo ayuvire nkango dendi daweno, ghuye amu tantere weno ashi, ''Ove ghuna hepa kuruwana shininke shimwe osho wapira kuruwana. Yenda ghuka ghulite limona lyoye nalintje ovyo waweka makura ghuka tapera vimaliva kuvantu vavahepwe, mposhi ove ngaghu kawana limona lya kupongoka lyamu ghuntungi wamu liwiru - makura ove nga ghuye ngaghu nkwame ngaghu kare murongwa wande.'' 23Ano ngoli ghuno murume opo ayuvire nkango daweno, ghuye kwaguva ghunene, mukondashi ghuye kwaweka limona lya liyingi ghunene.24Yesus opo amonine ghuno murume kuna guvu ghunene makura aghamba weno ashi, "Vantu vakuweka limona lya liyingi ghudito ghunene kukangena mughuntungi waKarunga wamu liwiru! 25Ngamero ghureru kungena yipite mulintjo lya ntonga, kupita kana muku renka ashi muntu wamungagho ngaka ngene mughuntungi waKarunga wamu liwiru.''26Makura vantu ovo vayuviro dino nkango daYesus avamupura weno ashi, ''Nkene shi mo ngoli are ngaka wano lino liparu lya naruntje?'' 27Makura Yesus avalimburura weno ashi, ''Vininke vyaghudito kuvantu, kwaKarunga vininke vyavireru.''28Peturus amu tantere weno ashi, ''Vhuruka weno ashi, atwe kwashuva vininke vyetu navintje mposhi tuku kwame ove ntani tukare varongwa voye.'' 29Makura Yesus avatantere weno ashi, ''Vya ghushili, naku mutantera weno ashi kwato waku shuva lipata lyendi, namukamali wendi, navaghuni vendi navakuru vendi, navakurona vendi ntani navana vendi, mukonda yaku yuvita mbudi yaghuntungi waKarunga, 30vavo ngava kapire kuwana mo limona lya liyingi lyaku pitakana olyo vashuva mughudyuni, ntani vavo ngava kawana liparu lya naruntje lyamu ghudyuni wakumeho.''31Yesus makura atantere varongwa vendi murongo nava viri vayende kulivhango lya pentjavo, ghuye aka vatantere weno ashi, ''Tererenu, atwe kuna kukanduka weno tuyende kuYerusalemu, mposhi nkango nadintje odo vatjanga vaPorofete vakare daku hamena kwaMona Muntu ngadi katikiliremo. 32Vana nkore vendi ngava ka mutapa mumaghoko ghava pagani, vavo ngava ka muhepeke, naku mushwaghura, ntani naku mutipira manyenye. 33Opo ngava mana kumushepura nangora, makura ngava mudipaye, ano ngoli kuliyuva lya ghutatu ngaka vhumbuka mumfa.''34Ano ngoli varongwa vendi kapi vakwatire lighano kwadino nkango odo aghambire kukwavo, mukondashi odino nkango kwakalire damu vishewe ntani kwakalire dina horama kukwavo, vavo kapi vayuvire vakwate lighano kwavyo aghambire kukwavo.35Yesus opo aya tikire pepi naYeriko, murume ghumwe washitwiku kwashungilire kuntere yashitaghura arombe vimaliva, 36opo ayuvire mbunga yavantu kuna kupita mushitaghura, ghuye apura weno ashi, vinke vina kushoroko. 37Vantu avamutantere weno ashi, Yesus wamu Nasareti ana kupito.38Makura murume washitwiku ayiyiri nalitwi lyaku dameka weno, ashi, ''Yesus, Mona Dafiti, mfereko nkenda.'' 39Makura vantu ovo vapitiro kumeho avatantere ghuno murume washitwiku ashi, mweneko shayeka kughamba. Ano ngoli ghuye aghamba naliywi lyaku dameka ghunene ayiyira weno ashi, ''Mona Dafiti, mfereko nkenda.''40Makura Yesus ayimana ntani atantere vantu vamu yite murume washitwiku kukwendi. Opo aya tikire papepi ghuno murume washitwiku, makura Yesus amu pura weno ashi, 41"Vinke ghuna shana ovyo nu ruwanena kukoye?'' Ghuye alimburura weno ashi, ''Hompa, ame kuna shana kupahuka nakenge.''42Yesus amu tantere weno ashi, ''Pahuka kenga. Lipuro lyoye lina kuverura.'' 43Mpopo tupu marume washitwiku apahuka atameke kukenga, mpopo akwama naye Yesus, ntani atapa mpandu naku fumadeka Karunga. Makura vantu navantje, ovo vakaliropo palivhango, opo vamonine vyaweno, navo avapanda naku fumadeka Karunga.
191Yesus kuna kungena muYeriko avindakane mushitata. 2Mushitata, kwakaliremo murume ghumwe walidina Sakeusi. Ghuye kwakalire mukurona wavafutiti mutero ntani ghuye kwakalire ngagho yayinene.3Ghuye kwashanine naye amone Yesus omo afana, ano ngoli kapi avhulire kumu mona mukonda yambunga yavantu vavayingi, ntani ghuye kwakalire muntu wamufupi ghunene mumutika. 4Makura ghuye aduka apite kumeho yambunga akaronda kushitondo shaGhukuyu mposhi amu mone, mukondashi ghuye kwayivire ashi Yesus kwaya pita mo mo mundyira.5Yesus opo aya tikilirepo palivhango, makura akankura akenge kuwiru makura amu tantere weno ashi, ''Sakeusi, kwangura dumpuka kushitaondo, namuntji kuna kuyenda nuka rare mumundi ghoye.'' 6Sakeusi, adumpuka wangu-wangu amu tambura namaghoko maviri ntani naruhafo rwarunene. 7Vantu navantje opo vamonine Yesus kuna kuruwana vyaweno, avatameke kuvhunguta naku ghamba weno, ashi, ''Kengenu ghuye kuna kuyenda aka dingure mumundi wamurume wandyo.''8Makura Sakeusi ashapuka ayima atantere weno Hompa ashi, ''Hompa, Terera kuno, ame kuna kukutantera weno ashi ame kuna kutapa ghukahe walimona lyande kuvantu varuhepo, ntani kwakehe ghuno navaka navo nashakana limona lyavo, ame nganu tapa limona lyavo ntani nganu liwederera rukando rune.'' 9Yesus amu tantere weno ashi, ''Namuntji Hompa Karunga kuna yoghora mundi ghoye naghuntje, mukondashi oghuno murume kuna neyeda shiyivito ashi naye mona Aburahamu. 10Anwe yivenu weno ashi Ame Mona Muntu kwaya nganu shane nakuyoghora vantu vaKarunga ovo vakombano.''11Vantu vavo shimpe kuna kuterera kunkango odo aghambire Yesus, makura ghuye atwikiri kuva tantere shifanikito shaweno, mukondashi Yesus kwakalire papepi naku tika kuYerusalemu, vantu kwaghayalire weno ashi ghuntungi waKarunga papepi ghuna kara naku moneka ntani Ghuye nga kara Hompa namupangeli. 12Yesus kwava tantera weno ashi, ''Mona Hompa wamurume kwakalire nalikuto ghuye kwayendi kushirongo shaku ghure ngava kamu tungike nga kare Hompa waku pangera mushirongo.13Kumeho yaku shapuka ayende ghuye kwayita vakareli vendi murongo, atapa vimaliva vyangorodo murongo kwakehe ghuno avatantera weno ashi, 'Ruwanitenu vino vimaliva dogoro mpopo nganu ka vyuka.' 14''Vantu vavayingi vamu shirongo shendi kwamunyengire makura avatumuko vantu, vaka ghambe weno ashi, 'Atwe kapi tuna shana oghuno murume nga kare Hompa wetu namupangeli wetu.' 15Ghuye avaka mutungika akara Hompa namupangeli ntani aka vyuka kushirongo shendi, makura ayita vakareli vendi ovo apire vimaliva vaviruwanite vaye kukwendi, aya mone viyeramo ashi kehe ghuno vingapi aturapo naku wanenapo ntani naku wedererapo.16''Muntu wakuhova aya kukwendi aghamba weno, ashi, 'Hompa, vimaliva vyoye ovyo watapire kukwande ovino, ame kwayitirapo naku vivhukita rukando murongo.' 17''Hompa walikuto amu tantere weno ashi, 'Mpandu ove kwaruwana nawa, ntani ove mukareli waghuhunga.' Mokonda yaviruwana vyoye vyaghuhunga vyaku kunga nakupakera mbili limona lya lisheshu, ame nganu tapa nkondo kukoye dakupangera vitata vyaviyingi vyaku pitakana murongo.'18''Muntu waghuviri naye aya, aghamba weno ashi, 'Hompa, vimaliva vyoye ovyo watapire kukwande ovino, ame kwavi wederera naku vivhukita rukando rutano.' 19''Hompa walikuto amu tantere weno ashi, 'Mpandu ove kwaruwana nawa, ame nganu tapa kukoye nkondo dakupangera vitata vyaviyingi vyaku pitakana pavitano.'20''Muntu waghutatu naye akwa mako, aghamba weno ashi, 'Hompa, vimaliva vyoye navintje ovyo watapire kukwande ovino, ame kwavimanga palikeshe mbyo navihoreka naku vipungura nawa, 21mukondashi ame kwakara naghoma kukoye, ove muntu wamudito nkene tupu kuna kombanita shoye. Ove kwahora kushakana limona lya vantu olyo wapira kuruwanena, ntani naku vaka muyangu wavantu ogho wapira kushupira liyuywa.22Hompa walikuto amu tantere weno ashi, 'Kutwara munkango doye odo ghuna ghamba dakufana weno, ame kuna kukutantera kumwe naku kupa ghundyoni waweno ashi, ove mukareli waghurunde. Nkene shi ove kwayiva nawa-nawa ashi limona lyande kapi lya yendanga palivhu, ntani nkene shi ove wayiva nawa-nawa ashi ame kushakana limona kuvantu, ntani nkene shi ove wayiva nawa-nawa ashi ame kwawananga limona kuvantu olyo napira kushupira liyuywa. 23Mukonda munke wapira kutapa vimaliva vyande vaviture mumbanga, mpo shi opo nganu kavyuka ame nganuya wanenemo ntjontjo yaku vhukita kuvimaliva vyande?'24Makura Hompa walikuto atantere vantu ovo vayimanino palivhango ashi, 'Mushakanenu vimaliva vendi navintje, muvitape kwamukareli ogho ana karo navimaliva vyaviyingi ovyo vavhukita rukando murongo.' 25Vantu navantje avaghamba weno vatantere Hompa, ashi, 'Hompa, kengururapo nawa, ghuye kuna kara kare navimaliva vyaviyingi ovyo vavhukita rukando murongo.'26'''Hompa avatantere weno ashi, kehe ghuno akaro nalimona lya liyingi shimpe ngava ka wedererako kulimona lyendi, ntani kwakehe ghuno apiro kuweka limona, ghuye ngava kamu shakana nakehe shino akara nasho. 27Ntani kuhamena vana nkore vande, ovo vapiro kushana kukara munda yalipangero lyande naghu Hompa wande, vakwatenu muva yite kukwande ntani vadipayenu kumeho yande navantje ame kuna kuva kenga namantjo.''28Yesus opo amanine kughamba nkango daweno, makura atwikiri naruyendo rwendi, ntani apiti kumeho yavarongwa vendi akanduke kuYerusalemu.29Opo vaka tikire papepi nadino dimukunda odo vatwenyanga ashi Betifagi naBetani, papepi nandundu oyo vatwenyanga ashi Ndundu yaMaghuywe, Yesus atumu varongwa vendi vaviri, 30avatantere weno ashi, ''Yendenu kumukunda wakumeho waku kwamako. Tupu mukangenamo mumukunda, kumu kawana shidongighona osho vapira kuronda rumwe. Makura muka shishuture muka shiyite kuno kukwande. 31Kehe ghuno aka mupura weno ashi, 'Vinke muna kushishutulira shidongi ntani kuni muna kushitwara? kamu tanterenu weno ashi, 'Hompa kuna shihepa.'''32Varongwa vendi vaviri ovo atumine kwayenda ntani avakawana shidongighona yira momu tupu avatantilire Yesus. 33Opo vatameka kushutura shidongoghona, muweki washidongi naye ayatiki, avapura weno ashi, 'Vinke muna kushutulira shino shidongighona?'' 34Varongwa vendi vaviri avalimburura weno ashi, ''Hompa kuna shihepa.'' 35Vavo avatwara shidongighona kwaYesus, opo vakatikire avakatura ndjako pamughongo washidongighona mposhi Yesus ashungirepo. 36Yesus kuna rondo ntani kuna kuyendera pashidongighona, vantu kuna piti kumeho vayare naku tura vyuma mundyira apitiremo.37Opo vakatikire papepi nalivhango lya Ndundu daMaghuywe vaghurumuke, mbunga yayinene yavantu navarongwa vendi avatameke kushamberera nakufumadeka naku pandura Karunga namaywi ghankondo ghakudameka ghunene mukonda yavitetu vyavinene ovyo vakengire ovyo aruwanine, 38vavo avaghamba weno ashi, ''Karunga atungike Hompa wetu wakuya mulidina lya Hompa Karunga! Mpora yamuliwiru yaKarunga yikare papetu atwe vantu vendi, mposhi vantu navantje ngava tape mpandu nakufumadeka Karunga wamuliwiru-wiru!''39VaFarisayi vamwe ovo vakaliro mumbunga yavantu kwatantilire Yesus weno ashi, ''Murongi, tantera varongwa voye vashayeke kuyimba vamwene teyete.'' 40Yesus kwava limburura naku vatantera weno ashi, ''Ame kuna kumutantera weno, nkene tupu vashayeka kuyimba vano vantu vamweneko teyete, oghano mawe kughatameka kuyimba naku tapa mpandu naku fumadeka lidina lyande.''41Yesus opo aka tikire papepi naYerusalemu makura akenge shitata, atameke kulira, 42aghamba weno ashi, ''Ame kuna shana ashi anwe vantu, ngamu yive shirugho naruvede naliyuva lya weno, lyaku yita mpora yaKarunga kukwenu! Ano ngoli paweno mpora yaKarunga vana yihoreke kushipara shenu.43Shirugho kuna kuya ntani papepi shina kara vana nkore venu ngava tima likwina lya kudama ngava kundurukide shitata shenu nashintje vavo ngava kare likuma lya nkondo ngava mukundurukide nga mukare mukatji makura ngava muhomokere kumaruha naghantje ngava mudipaye naku mumyona. 44Vana nkore venu ngava mudipaya naku mumyona naku mulyatangera palivhu, namuvantje vakurona navana venu. Opo ngava mana kumudipaya naku mumyona vana nkore venu kwato liwe olyo ngava shuvapo likare pawiru yamawe, odino nkango dina hepa kutikamo ntani vyaweno vina hepa kushoroka, mukondashi anwe kapi mwayivire shirugho shashiwa osho ayire Hompa Karunga kukwenu ndi amuyoghore.''45Yesus kwangena muYerusalemu makura aka ngena muntembeli aka wanamo vantu vakughulita ngeshefa makura aka vatjida vatundemo, 46ghuye aghamba weno ashi, ''Matjangwa kwatanta ashi, 'Ndyugho yande, nga yikara ndyugho yandapero,' anwe mbyo mwayitura yikare ghuvando wavantu vawidi.''47Kehe liyuva Yesus ka ronganga vantu muntembeli. Makura vaPirisiteli vavanene navarongi vamatjangwa ntani namatimbi ghamuhoko wava Yuda, kwashashine vamudipaye Yesus, 48ano ngoli kapi vawanine mpito yaku ruwana vyaweno mukondashi vantu navantje kwayire kukwendi vaya terere marongo ghendi.
201Liyuva limwe Yesus ghuye kuna kuronga vantu muntembeli nakuyuvita Mbudi yaRuhafo, makura vaPirisiteli vavanene navarongi vamatjangwa kumwe namatimbi avaya kukwendi. 2Vavo avamupura weno, naku ghamba ashi, ''Kware wawana nkondo daku ruwana vyaweno, ntani are akupo lipulitiro lyaku ruwana vyaweno.''3Yesus naye avalimburura naku vapura weno ashi, ''Ame kuna kumupura weno, anwe mutape lilimbururo kukwande. 4Vyaku hamena likusho lya Yohanesi: Kuni nko oku lya tunda likusho lya Yohanes, muliwiru ndi kuvantu?"5Vavo avakuyongo naku kupura weno, ashi, ''Nkene kutu ghamba weno ashi, 'Kwa tunda muliwiru,' ghuye kwatupura nka weno ashi, 'Mukonda munke mwapira kupura mumwendi?' 6Ntani nkene tupu kutughamba weno ashi, 'Kwa tunda kuvantu,' oyino mbunga yavantu yina pongo pano ndi kuvatudipaya namawe, mukondashi vavo kwayiva ntani kwapura weno ashi Yohanesi muPorofete waKarunga.''7Makura vavo avamu limburura weno Yesus ashi kapi vayiva oku datunda nkondo dalipangero lya Yohanes mukushi. Yesus naye avalimburura weno ashi, 8''Nkene shi mo ngoli muna kughamba, name shi kapi naku mutantera ashi kuni nawana nkondo nalipangero lyaku ruwana vyaweno.''9Yesus kwatantera vantu shifanikito shaweno ashi, ''Pakalire murume ghumwe ogho akaliro nashikunino shendi shavinyu ntani ghuye kalimanga mandyembere, makura atapa shikunino shendi kuvantu valimemo naku shitakamita, ghuye ayendi kushirongo shakughure kughugenda ntani aka karako shirugho shashire ghunene. 10Opo shatikire shirugho shakuyangura mandyembere, mwenya shikunino atumuko mukareli wendi kuvantu vakulima mushikunino shendi, aka shimbeko muyanguwa wamandyembere mushikunino shendi. Ano ngoli vantu vakulima mushikunino shendi avakamu toghona ghuno murume, ntani avaka mutjida avyuke maghoko-ghoko.11Kuruku rwashirugho mwenya shikunino atumuko nka mukareli wendi wapeke aka shimbeko muyangu, naye nka avaka mutoghona, naku mushwaghura ntani naku mufita ntjoni, vavo avaka mutjida avyuke maghoko-ghoko. 12Kuruku rwashirugho mwenya shikunino atumuko nka mukareli wendi waghutatu aka shimbeko muyangu, naye nka avaka mutoghona naku muremeka, ntani avaka mutjida.13Muweki washikunino shavinyu aku pura mwene weno ashi, 'Weni omo nuvhura kuruwana? Weno ame kuna kutumako monande ogho nahora ghunene. Ame nahuguvara ashi vavo opo ngava ka mumona ngava ka mufumadeka.' 14''Muweki washikunino atumuko monendi, makura vantu vakulima mushikunino opo vamu monine monendi, vavo avakupura naku ghamba weno, ashi, 'Oghuno ndye monendi wamwene ntani ndye nka nga karo mupingi washikunino. Weno tokwenu tudipaye monendi, makura atwe ngatu pinge shikunino nga shikare shetu.'15Vantu vakulima mushikunino avamukwata monendi avamutwara pandye yashikunino avakamu dipaya. Yesus makura apura mbunga yavantu weno ashi, ghuno muweki washikunino opo nga yatika kuvantu vaweno, vinke vyaku vhura kuruwana kuvantu vakufana weno? 16Muweki shikunino nga ruwana vyaweno: Ghuye ngaya dipaya vano vantu navantje vakulima mushikunino, makura nga ghupe shikunino shendi nga shitape kuvantu vapeke.'' Mbunga yavantu opo vayuvire vyaweno, vavo avaghamba ashi, ''Vininke vyaku fana weno nakadidi shi kuvipulitira vishoroke!''17Makura Yesus anwiki akenga kukwavo, ntani aghamba weno ashi, ''Vinke datanta dino nkango vatjanga mumatjangwa weno ashi: 'Liwe olyo vashwena vatungi vandyugho ndyo liwe ngali ka karo lya mulyo ghunene kundyugho oyo vatunga? 18Kehe ghuno nga pundukomo muliwe nga werapo paliwe nga remana naku tjokaghuka, ntani kehe ghuno nga liwera lino liwe nga limudyama naku mumyona nga mbandaghuke.''19Varongi vamatjangwa nava Pirisiteli vavanene kwashanine vamutoghone mpopo pashirugho, mukondashi vavo vayivire ashi ghuye kwaghambire dino nkango damu vishewe kukwavo ashi vavo vantu vavarunde. Vavo kwashanine vamukwate makura vatjilire mbunga yavantu. 20Makura vavo avamukwama naku munomena vayive ashi kuni nko ana kara naku ana kuyenda, ntani avatumu vantu vamwe vayende kukwendi vaka kukitaghukire ashi vavo vantu vavahungami, ano ngoli vavo kwashanine vawane mpito yaku muwana ghundyoni wakuhamena kunkango dendi, mposhi vamukwate vamu tware kuveta kwangughuru ngava ka mupangure.21Vano vantu vaku kukitaghukira makura avamupura weno Yesus ashi, ''Murongi, atwe twa yiva ashi ove kughamba nakuronga nkango daghuhunga, ntani ove kwato kukenga kulipuna naku likuto lya muntu, nane ngoli ove kuronga tupu ndyira yaKarunga yaghuhunga naghushili. 22Tutantere ndyira yaghuhunga yakuhamena kwavino, vino vyaweno ghushili vyakara paveta ntani vavipulitira ashi atwe vantu vamushirongo tufutange mutero kwaHompa Sisa, Hompa walipangero lya Varoma ndi, ndi hawe?''23Ano ngoli Yesus kwayivire ovi vyakaliro mumaghano ghavo ashi vavo kwashanine vamuture mughudito nava Yuda ovo vapiro kushana kufuta mutero ntani nalipangero lya Varoma lya kufutita metero, makura Yesus avapura weno ashi, 24''Yitenu kukwande muneyede shiringa yashincencere oyo muna kara nayo. Ntanterenu ashi lifano lyare vafanekapo ntani nalidina lyare vatjanga po pano pashiringa?25Makura Yesus avatantere weno ashi, ''Tapenu kwaHompa Sisa, Hompa walipangero lya Varoma ovyo vyahameno kukwendi, ntani anwe tapenu kwaHompa Karunga ovyo vyahameno kukwendi.'' 26Ovano vantu vaku kukitaghukira kwatetukire ghunene kuli limbururo lya ghukonentu lya Yesus olyo atapire kukwavo, vavo kapi vavhulire kumuwana ghundyoni kehe ghuno kumeho yambunga, ntani vantu navantje kwatetuka ntani kwamwena teyete.27Kuruku rwashirugho vaSadukayi vamwe kwayire kwaYesus, vavo kwapura weno ashi, kwato livhumbuko lya vafe, 28vavo kwashanine kuyuvha kwaYesus makura avamupura weno, ashi, ''Murongi, muveta yaMoses kwatjanga mo weno ashi nkene tupu murume waku kwara kuna fu, ashuve mukamali wendi, kwato mwanuke, mughunyendi wamurume ana hepa kughupa mukamali wamukurwendi amu kware, nga yitire po vanuke ngava kare vana vamulira lya mukurwendi.29Makura murume ghumwe kwayitire vana vanuke vana vendi vavarume vatano navaviri vaku tunda mulira lyendi, monendi wambeli akwara mukamali, ntani adohoroka ahana kuyitirapo mwanuke pamukamali wendi, 30mughunyendi waghuviri wamurume akwara mukamali wamukurwendi ndi nga yitirepo mwanuke naye adohoroka kwato kuyitira po mwanuke. 31Waghutatu naye amu kwara ntani adohoroka kwato kuyitirapo mwanuke, dogoro navantje mulira lyavo vatano navaviri kwamu kwara mukamali ntani navantje kwapwa kudohoroka kwato wakuyitira po mwanuke. 32Kuruku rwashirugho mukamali naye adohoroka. 33Nkene shi vyaghushili vantu ngava ka vhumbuka kughufe, are po ogho ngaka kwaro ghuno mukamali? Nkene shi vano varume vatano navaviri navantje mulira lyavo kwakwalire ghuno mukamali ghumwe.''34Yesus avalimburura weno ashi, ''Vantu vamuno mughudyuni kukwara ntani kutapa vana vavo vavakamali vavakware. 35Ano ngoli vantu vamu ghudyuni wakumeho ovo ngava kawano livhumbuko lya kughufe vavo ngava kangena muliwiru ntani kwato nka kukwara ntani kwato kutapa vana vavo vavakamali kunkwara. 36Ntani vavo kwato nka kufa, mukondashi ngava kara yira vaEngeli ntani ngava kara vana vaKarunga, mukondashi vavo kwavhumbuka kughufe mbyo vawana liparu lya lipe.37Moses kwatjanga aneyede vantu, ashi weni Karunga omo kavhumburanga vantu kughufe, atwe twa mona ovyo vyashorokiro mushishwa shaku twera mundiro waku pira kuveva, Moses kwatu neyeda ashi vantu ovo atoghorora Karunga nampili vafa kare vavo shimpe kuna kukarera naku raperera kwaKarunga, kwaKarunga waAbrahamu naKarunga waIsaka ntani naKarunga waYakopu. 38Ghuye kapi shi Karunga wavantu vakufa, nane ngoli Karunga wavantu vamonyo ovo vana kuparuko weno, mposhi natwe ngatu ka paruke kumwe naye ngatu katape mfumwa kukwendi.39Varongwa vamwe vamatjangwa avamu limburura weno, ashi, ''Murongi, ove kuna limburura mughuhunga.'' 40Kutunda po kwato nka ogho amu puliro mapuro ghaku musheteka.41Yesus avatantere weno ashi, ''Weni omo mughamba ashi Kirisitusi Mesaya ne Mona Hompa Dafiti? 42Nkene shi Hompa Dafiti mwene kwaghamba weno mumbapira yaMapisarome ashi, 43'Hompa kwatantera Hompa wande weno ashi, 'Shungira kulipuna lyaku rulyo rwande, dogoro nganu mane kufunda vana nkore voye nganu vature kuntji yampadi doye ngava kare ghulyatero wampadi doye.' 44Nkene shi Hompa Dafiti naye kwatwenyine Kirisitusi Mesaya ashi, 'Hompa wendi,' weni nka omo vikara ashi ghuye mona David kwatunda mulira lya Dafiti, nane ngoli ghuye kwapita kana lira lya Dafiti?''45Mbunga yavantu vavo shimpe kuna kuterera kukwendi makura ghuye atantere varongwa vendi weno ashi, 46''Karenu muna kotoka, ntani kapi shi mukare yira varongi vamatjangwa, vakudwata marwakani ghamare mumbunga vamoneke ashi vavo vaka makuto ntani kwahora kumorora vantu kumavhango ghangeshefa vavayarere vipuna vashungire kumeho yavantu ntani nka vavo kwahora kushungira kumeho yavantu muSinagoge ntani kwahora kushungira kumeho yavantu pavipuna vyavakamakuto pavipito napavilika. 47Vavo kushakana kehe pano limona lya mumandi ghavakamali vakufita vavya vavo, ntani vavo kuraperera ndapero dadire ghunene nkene shi kuna kuraperera mumbunga. Varume vakufana weno ngava kawana mpanguro yavo yaghudito ghunene.''
211Yesus opo aka nkukire, amono vantu vakuweka limona lya liyingi, kuna kutura vitapa vyavo mushimbangu shavitapa. 2Ntani ghuye amono nka mukamali wakufita vyendi naye kuna kutura vitapa mushimbangu ghuye kwatulire mo tupu randa dendi mbiri mushimbangu. 3Yesus aghamba weno ashi, ''Vya ghushili naku mutantera, oghuno mukamali wakufita vyendi ntani ghuye muntu waruhepo kuna tapa vitapa vyaviyingi kupita kana vantu navantje. 4Vantu valimona lya liyingi vavo kuna tapa tupu ghushwi waghudidi waku limona lyavo olyo vaweka. Ano ngoli oghuno mukadi wakufita vyendi, ntani ghuye mukadi waruhepo, kuna tapa limona lyandi nalintje nga wane ovyo ana hepa.5Makura vantu vamwe kwaghambire weno ashi ntembeli yavo yawapa nawa, ntani kwayitunga namawe ghaghufughuli ghakutunda kuvantu, ano ngoli Yesus ghuye aghamba weno ashi, 6''Oyino ntembeli muna kumona weno, mumayuva ghamasheshu tupu makura ngayi yungurukepo ngayi were palivhu ntani kwato liwe olyo nga lihuparopo likare pawiru yamawe.''7Makura vavo avamu pura, weno ashi, ''Murongi, liyuva munke nga vishoroka vyaweno? Viyivito munke nga vikaroko vyakuneyeda ashi weno papepi ntani kuna kushana ngoli vishoroke? 8Yesus avalimburura weno ashi, ''Takamitenu ntani karenu muna kotoka mposhi kapi shi ngava mukonge naku mupukita. Mukondashi vantu vavayingi ngava yera mulidina lyande, vavo ngava ghamba weno ashi, ''Kehe ghuno nga ghamba mwene ashi Ame Kirisitusi,' ntani nka ngava ghamba weno ashi, 'Weno ruvede kuna kutikamo.' Anwe Kapishi ngamu rupuke ko ntani kapishi ngamu vakwame. 9Ntani nange shi ngamu yuvha vita nandyorongani yavantu, anwe kapishi ngamu kare naghoma, mukondashi ovino navintje vina hepa kushoroka ntani, kumeho yakushaya ghudyuni.''10Makura Yesus avatantere weno ashi, ''Dimuhoko nadimuhoko ngadi kuhomokera, ntani virongo navirongo ngavi kurwanita. 11Kumavhango ghamayingi ngaku kara likinko livhu, ntani muvirongo vyaku kushuva-shuva ngamu kara lirumbu ntani namahamba ghamukaghu. Ntani kuliwiru ngaku kara viyivito vyavinene vyaku tjilita vyaku neyeda ashi vitetu vyavinene ntantani nga vishoroke.12Ntani kumeho yakushoroka vino, anwe ngava mutoghona naku muhepeka, ntani ngava mutwara muSinagoge ngava kamu pangure naku mutura mudorongo, ntani ngava mutwara kumeho yava Hompa nava Ngughuru vamu virongo mukonda yalidina lyande. 13Ovino mo nga vishoroka weno mposhi anwe ngamu wane mpito yakughamba nkango nga mutape ghumbangi wenu waghushili waku hamena kulidina lyande.14Mposhi anwe kapi shi ngamu kare naghoma munda yamutjima naku kupura ashi nkango munke ngamu kaghamba ngamu kupopera ntani anwe kwato hepero yaku kuwapayikira nkango odo ngamu ka ghamba, 15ame ngamu tapa nkango kukwenu ntani naghukonentu waku ghamba mposhi vana nkore venu ngava pire kuwana ghundyoni mumwenu ntani kapi ngava mukanana ntani kapi ngamu kulimba navo.16Ntani vakurona venu nava ghunivenu nava kuruvenu ntani navantu valikoro lyenu mbo ngava mutwaro muliyome ntani ngava mutapa vamudipaye. 17Vantu navantje ngava munyenga mukonda yalidina lyande. 18Ano ngoli kwato nampili huki yimwe tupu yamu mutwe ghoye oyo nga yikombano mo. 19Nkene nga ghuyenda mumasheteko ghamadito ove nga ghukare nalididimiko nalihuguvaro nalipuro mwaHompa Karunga ove nga ghupopera monyo waliparu lyoye.20Nkene ngamu mona shitata shaYerusalemu kuna shikundurukida vana nkore vavakavita, yivenu ashi ngoli papepi shina kara nakudyonaghuka. 21Pa ruvede runo vantu ovo vatungo muYudeya ngava tjwayuke vadukire kundundu, ntani ovo ngava karo mushitata paruvede runo ngava rupukemo wangu ngava tundemo, ntani ovo ngava karo pandye yashitata kapi shi ngava ngenemo nka mushitata. 22Shirugho shino Hompa Karunga nga tengeka shino shitata, ovino vyaweno nga vishoroka mposhi nkango damu matjangwa nga ditikiliremo.23Lihudi lya linene kuvantu ovo ngava karo namarutu maviri ntani navo ngava karo navakeke mumayuva ghaweno! Mukondashi mushirongo ngamu kara shiponga namaghupyakadi, ntani Hompa Karunga nga garapa ntani nga neyeda lishandu lyendi kuvantu. 24Vantu vavayingi ngava vadipaya vana nkore nalighonga, ntani vantu vavayinga ngava vakwata ngava vatware mughupika kuvirongo vyaku kushuva-shuva mughudyuni, ntani shitata shaYerusalemu ngava shilyatangera vapagani nashintje dogoro ruvede rwavapagani nga rutikiliremo.25''Pa ruvede runo viyivito ngavi kara kuliyuva, naku ka kwedi, naku ntungwedi, ntani napa ntunda yalivhu. Ntani vantu vamu ghudyuni ngava kara vana piyagana, ntani ngava kara naghoma pakuyuvha mema namankumpi ghamu lifuta kuna kundunduma. 26Vantu vamu ghudyuni ngava pwilira kughoma opo ngava yuvha ovyo vina kuyo mughudyuni. Nantungwedi daku liwiru nado ngadi kunyunganga ngadi tunda pamavega ghado.27Makura vantu navantje ngava kenga Mona Muntu kuna kuya paliremo nankondo naghuyerere wendi. 28Opo ngamu mona virugho vyavidito kuna kutameka kushoroka, anwe ngamu shapuke ngamu yimane rwi ntani ngamu kankuke dimutwe denu ngamu kenge kuliwiru, mukondashi liyoghoko lyenu kuna kuya papepi lina kara.''29Makura Yesus avatantere shishewe shaweno ashi, ''Ghayarenu ntani kengenu kushitondo shaghukuyu, ntani naku vitondo navintje. 30Nkene tupu kuna kutameka kutemuna mahako ghamape ghamateke naku shoka dimutavi daditeke kuvitondo, anwe muna yiva kare ashi shirugho shakwenye papepi shina kara. 31Mo ngoli nga vishoroka, nkene tupu ngamu mona vininke vyaweno kuna kushoroka, yivenu ashi ghuntungi waKarunga papepi ghuna kara.32Vyaghushili ame kuna kumutantera weno ashi, anwe vantu varuvharo runo rwantantani anwe muna kuparuko weno kapi nga mukatika ko kughuhura waghudyuni makura vininke navintje vino vyaweno nga vishoroke nga vitikiliromo. 33Ntani nka liwiru nalivhu navintje ngavi kashaya naku tundapo, ano ngoli dino nkango dande naku ghamba weno kwato shikomona osho ngashi katundoko.34''Anwe takamitenu ntani karenu muna kotoka, mpo shi kapi shi ngamu hokwe kuruwana vipito naghunkorwe ntani navinka vyaliparu, makura opo nga litikamo lino liyuva anwe ngamu kare muna kuvhuruma makura nga mufa mo mushiraha. 35Ovino nga vishoroka kwakehe ghuno pantunda yalivhu, ntani anwe kwato ovyo ngamu yivako ntani kapi ngamu kuwapayikira, mukondashi kwato ogho ayivo shirugho.36Karenu muna kotoka virugho navintje, ntani muna hepa kuraperera virugho navintje mposhi ngamu kare nankondo ngamu funde nakuparuka nakupita muvirugho vyavidito vyaku fana weno, mposhi anwe ngamu ka yimane kumeho yaMona Muntu.''37Kehe liyuva Yesus karonganga vantu muntembeli, ntani kehe pano kuruvede rwamatiku ghuye kurupukamo mushitata ayende aka kare kuNdundu yaMaghuywe matiku naghantje. 38Kehe liyuva ruvede rwangura-ngura vantu navantje kumeneka vayende kuntembeli vaka terere kumarongo ghendi.
221Shirugho shakudana liyuva lya shipito shaMboroto yaKupira Vifulito ndi yakupire Vishashita kwakalire papepi, ntani nka kulitwenya weno ashi Pasika ndi liyuva lya Mavhumbukiro. 2VaPirisiteli vavakurona ntani navarongi vamatjangwa kwashinine mpito nandyira ashi weni omo vavhura kudipaya Yesus, mukondashi vavo kwatjilire mbunga yavantu.3Makura Satana Munyengi angene mwaYudasi, Isakalyoto, ghumwe wavarongwa vendi murongo navaviri. 4Yudasi kwayendire kuvakurona vava Pirisiteli ntani navakurona vavakavita aka ghambe navo ashi ndyira munke ngava yenda ngava kwate Yesus ntani weni omo nga vhura kuva kwafa.5Vavo kwakalire naruhafo nambili paku yuvha mbudi yaweno makura avatapa vimaliva kukwendi. 6Makura Yadusi atambura vimaliva, ntani ashana mpito ashi weni omo avhura kumughupa Yesus atunde kumbunga yavantu amu tware muliyome.7Opo lya likiremo liyuva lya kudana shilika shaMboroto yaKupira vishashita, shilika shaMavhumbukiro shaku dyamba ndywighona. 8Yesus kwatuma vaPeturusi naYohanesi, avatantere weno ashi, ''Yendenu muka wapayike ndya dapashilika shaMavhumbukiro, mposhi ngatu kadyobwane kumwe.'' 9Vavo avamupura weno ashi, ''Ku livhango munke oku ghuna shana kukawapayika lyaku ka lyera shipito?''10Ghuye avalimburura weno ashi, ''Tererenu nawa, ka yendenu opo muka ngena mushitata, kumu kagwanekera namurume ogho ana shimbo hupa yakuvheta mema. Anwe ka kwamenu ndye ghuno murume dogoro momo mumundi omo aka ngena. 11Makura anwe ngamu kapure nturaghumbo wamu mundi weno ashi, 'Murongi wetu kuna tutumu kukoye ntani kuna shana kuyiva weno ashi, ''Kuni nko oku yina kara ndyugho yavagenda oko ngaya lyera Shilika shaMavhumbukiro, kumwe navarongwa vendi?''12Ghuye ngaka muneyeda nkonda yayinene yapawiru yandyugho oyo vawapayika kare yakaro navipuna natafura dadiwa. Ka ngenenu momo ngamu kawapayike Shilika shaMavhumbukiro.'' 13Makura vavo avayendi, ntani avakawana navintje vina karapo kare ntani vinapu kuwapayika yira momu tupu aghambire Yesus. Makura vavo avakawapayika ndya dapa Shilika shaMavhumbukiro.14Opo lya tikiremo liyuva lya kudyobwana Shilika, Ghuye ashungiri kumwe nava Apositoli vendi. 15Makura avatantere weno ashi, ''Ame kwataterera ghunene shino Shilika shaMavhumbukiro mposhi nganu lye ndya kumwe nanwe kumeho nganu yende murunyando rwande. 16Ame kuna kumu tantera weno ashi, ame kapi nka nganu vhura kulya ndya dogoro mpopo nga ghutikiliramo ghuntungi waHompa Karunga.''17Makura Yesus aghupu nkinda yavinyu ayi kandayiki, ntani atapa mpandu kwaKarunga, aghamba weno ashi, ''Ghupenu yino nkinda, nwenumo namuvantje. 18Ame kuna kumu tantera weno ashi, ame kapi nka nganu nwa vinyu yamandyembere dogoro mpopo ngaghu kayera ghuntungi waKarunga.''19Ntani aghupu mboroto, ayi kandayiki ntani atapa mpandu kwaKarunga, makura abomona mboroto yikare namaruha ghamadidi, atapa valye, ntani aghamba weno ashi, ''Yino mboroto rutu rwande, oru nakutapa kukwenu. Ntani muna hepa kuruwana vyaweno kehe pano ngamu mvhuruke.'' 20Opo vamanine kulya ndya damurarero, Yesus aghupu nkinda yavinyu, aghamba weno ashi, ''Yino nkinda kuna kara ligwanekero lya lipe lyamu honde yande, oyo ngayi tekero papenu.21Tererenu nawa mukwate lighano. Muntu ogho ngaka nturo muliyome naye tuna shungiri kumwe pano patafura. 22Ovino vina hepa kushoroka ngoli kwaMona Muntu mposhi nkango damatjangwa ngadi tikiliremo yira momu tupu vadi tjanga kare. Ano ngoli lihudi lya linene kwamurume ogho nga nturo muliyome nganu yende mumaghoko ghava nankore vande!'' 23Vavo avatameke kukupura vavene navavene weno ashi are waku ruwana vyaweno mukatji kavo.24Kuruku rwashirugho mukatji ka varongwa vendi kwatameka dimutangu dakuhamena kumbunga yavo mukondashi vavo kwashanine kuyiva weno ashi, are mukurona wakupitakana navantje mumbunga yavo. 25Yesus avatantere weno ashi, ''Vahompa vamu virongo vyavapwagani vavo kwashana kuneyeda vantu ashi vavo kwakara nankondo dakupangera vantu mushirongo, ntani nka vavo kukupa vavene mapundi vakare vampititi vaku ruwanena vantu ghuwa.26Ano ngoli anwe kapi shi ngamu fane yira vano vampititi. Nane ngoli, muntu walipuna lya linene mukatji kenu akona kukudidipita nga kare yira mwanuke wamudidi, ntani muntu walipuna wakupititira vantu ana hepa kukara yira muntu tupu waku ruwanena vantu navantje. 27Kutwara mumwenu muntu munke walikuto po pavantu vano, wakushungira kutafura alye ndya, ndi muntu wakuwapayika ndya ayite kutafura? Anwe muna hepa kuyiva weno ashi muntu walikuto lya linene kapi shi waku shungira kutafura? Kengenu kuno kukwande ame mukurona wenu nampititi wenu, ntani nka ame naku mutapero dino ndya mulye kutafura.28Ntani anwe ngamu karo kumwe name muvirugho vyande vyavidito vyamasheteko. 29Ame nganu ka tapa nkondo kukwenu dakupangera mughuntungi washirongo shande, yira momu tupu vatapa Vavava nkondo kukwande dakupangera mughuntungi waliwiru, 30anwe ngamu kalya nakunwa name kutafura yande mughuntungi wande, ntani nanwe ngamu ka shungira kulipuna lya ghu Hompa ngamu kapangure dimuhoko murongo nambiri dava Isirayeli.31''Simoni, Simoni, terera, Satana kuna pura kwaKarunga ashi kuna shana aku sheteke, yira momu tupu vaturanga mahangu ghaku pira kushwaya parupare vaghapume nampumo vagaghunune mungu ghutundeko kumahangu. 32Ano ngoli ame namana kare kukuraperera weno ashi, lipuro lyoye kapi shi nga liwe palivhu. Kuruku rwamasheteko ghoye, ghuna hepa kuya kuvaghunyoye nga ghuva korangede nakupameka lipuro lyavo.''33Peturusi atantere Yesus weno ashi, ''Hompa, Ame naku wapayikira kare mukuyenda nove naku ntje mudorongo ntani namu mfa.'' 34Yesus amu limburura weno ashi, ''Peturusi, Ame kuna kukutantera weno ashi, liyuva lino lyana muntji kumeho yakuyiya shikondomboro, ove ghuna kanana kare rukando rutatu ashi ove kapi wandyiva ame.''35Yesus kwapulire varongwa vendi weno ashi, ''Opo namu tumine muyende kuvirongo, anwe kwayenda tupu kwato kushimba ndjato, navimaliva, navihepwa, ntani nankaku, mpovili ovyo mwaka shanine muka pire kuviwana ndi? Vavo avalimburura weno ashi, ''Kwato.'' 36Makura Yesus avatantere weno ashi, ''Kutunda pano weno, kehe ghuno akaro nandjato, ana hepa kushimba, ntani kehe ghuno ana hepa kushimba ndjato navihepwa vyendi. Ntani kehe ghuno wakupira rufuro ana hepa kughulita lirwakani lyendi mposhi ngaka ghure ko rwendi.37Ame kuna kumutantera weno ashi, navintje ovyo vatjanga mumatjangwa vyakuhamena kukwande vina hepa kushoroka nga vitikiliremo ntani.' Vantu kwaghamba weno ashi ame muntu ghumwe wavarunde.' Navintje ovyo vapumba navi vatjanga vyakuhamena kukwande kuna kushoroka ntani kuna kutikiliramo weno.'' 38Makura varongwa vendi avaghamba weno ashi, ''Hompa, kenga! Atwe tuna kara namarufuro maviri.'' Yesus avalimburura weno ashi, ''Shayekenu kughamba vyaweno.''39Makura Yesus ayendi arupuka mushitata, yira momo tupu aruwananga kehe pano, ayendi kuNdundu YaMaghuywe, varongwa vendi navo avamukwama. 40Opo vaka tikire kukwendi, Ghuye avatantere weno ashi, ''Rapererenu kwaKarunga mupire kungena mumasheteko.''41Makura Yesus atundu po pavarongwa vendi ayendi aku nape shinema navo, makura atongamene pangoro araperere, 42aghamba weno ashi, "Vava, nkene shi kuvhura, ghupa yino nkinda yi tundeko kukwande. Nampili ngoli vina wapa tupu, kapi shi vyashihoro shande, ove ruwana tupu ovyo ghuna shana shihoro shoye shitikiliremo.''43Makura muEngeli atundu muliwiru aya kukwendi, atapa mukumo naku munkondo peka. 44Ghuye kwayuvha kukora ghunene, ntani kwaraperera ngudu nankondo, dogoro kwashupa liyuywa dogoro liyuywa lyendi kwawera palivhu yira litembwe lya honde yayi yingi.45Opo amanine kuraperera, ashapuka ayendi kuvarongwa vendi makura aka vawana vana rara ntani vana roroka, mukondashi vavo kwakalire naliguvo, 46Ghuye aghamba weno ashi, ''Vinke mwarara weno? Rambukenu muraperere kwaKarunga, mposhi kapi shi mungene mumasheteko.''47Ghuye shimpe kuna kughamba, mpopo tupu, mbunga kwamoneka, mulipititiro, lya Yudasi, ghumwe wavarongwa vendi murongo navaviri. Makura ghuye aya papepi naYesus amu ncumita, 48ano ngoli Yesus amu pura weno ashi, ''Yudasi ame ghuna kuncumita, ame Mona Muntu, ghuntware muliyome?''49Varongwa vendi ovo vakaliro naYesus opo vakengire vyaweno kuna kushoroko, vavo avaghamba weno ashi, ''Hompa, tuva toghone namarufuro ghetu ndi?'' 50Mpopo tupu ghumwe wavarongwa vendi aghupu rufuro rwendi atoghona naku tetako litwi lyaku rulyo kumutwe wamurume ghumwe wamu mbunga yavo mukareli wamupirisiteli wamukurona. 51Yesus aghamba weno ashi, ''Shayeka kuruwana vyaweno!'' Makura akwata kulitwi lyendi, mpopo tupu amu verura.52Makura Yesus atantere vapirisiteli vavanene, navakungi vantembeli, ntani namatimbi ghava Yuda ovo vayiro kukwendi, ghuye aghamba weno ashi, ''Shino shitetu shashinene, anwe kunaya kukwande navikwata navitwa ntani namarufuro, yira kunaya kwamuwidi? 53Opo kanu karanga nanwe kehe liyuva muntembeli, kapi mwankwatire nukare mudorongo. Ano ngoli ame nayiva ashi oruno ruvede rwenu, ruwanitenu lipangero nankondo denu damu mundema.''54Makura avamukwata, avamutwara kumundi wamu Pirisiteli wamukurona. Makura Peturusi naye akwama ko, ntani kwakalire kughure navo. 55Makura vantu avavankeda mundiro munda yambara avashungiri vaku kangumune, Peturusi naye aya ashungiri kumwe navo.56Muruwani ghumwe wamukadi akenge Peturusi kuna shungiri kushite shamundiro, makura amu kengurura ghunene, ntani aghamba weno ashi, ''Oghuno murume naye ghumwe wavantu vendi.'' 57Ano ngoli Peturusi aka nana, aghamba weno ashi, ''Ove mukadi, Ame kapi namuyiva ogho murume.'' 58Kuruku rwashirugho shashifupi tupu muntu wapeke naye akenge kwaPeturusi, ntani aghamba weno ashi, ''Nove ghumwe wavantu vendi.'' Ano ngoli Peturusi alimburura weno ashi, ''Ove murume, ame kapi shi ghumwe wavantu vendi.''59Kuruku rwaghure wavili murume ghumwe amu dimburura ntani aghamba naliywi lya kudameka weno ashi, ''Ghushili oghuno murume naye ghumwe wavantu vendi ntani kumwe kava karanga, naye muGalileya.'' 60Peturusi aghamba weno ashi, ''Ove murume, ame kapi nayiva ashi vinke ghuna kughamba.'' Mpopo tupu ghuye shimpe kuna kughamba, makura shikondomboro kwayiya.61Makura Hompa Yesus apiruka, akenge kwaPeturusi, makura Peturusi avhuruka nkango daHompa, odo aghambire kwendi weno ashi, ''Ku matiku ghana muntji kumeho yaku yiya shikondomboro ove ghuna kanana rukando rutatu ashi kapi wandyiva ame.'' 62Makura Peturusi arupukamo mumbara ayende pandye aka lira ghunene.63Makura varume ovo vakungiro Yesus avamushwaghura naku mutoghona. 64Vavo avamufikiliri mulikeshe ntani avamupura weno, ashi, ''Pumba atwe kuna shana tuyive ashi ove muporofete! Tutantere ashi are pakatji ketu oghu ana kutoghono?'' 65Ntani nka vavo avaghamba nkango dadidona kwaYesus, naku mushwaghura.66Liyuva lyaku kwamako kungura-ngura yayinene, vampititi navakurona vavaYuda, kumwe navaPirisiteli vavakurona ntani navarongi vamatjangwa avapongo kumwe tupu. Makura yino mbunga yavo avatokora kutwara Yesus kumpanguro 67ntani vavo avaka ghamba weno ashi, ''Nkene shi ove Kirisitusi, ghamba tutantere.'' Ghuye avalimburura weno ashi, ''Nkene shi kunu mutantera ashi Ame, anwe kapi muvipura, 68ntani nka nkene shi kunu mupura lipuro, anwe kapi mutapa lilimbururo.69Ntani kutunda pano weno, Ame Mona Muntu nganu kashungira kurulyo rwaShipuna shaHompa Karunga mupangeli waghudyuni wankondo nadintje.'' 70Vavo navantje avamupura nka weno ashi, ''Kutwara munkango doye odo ghuna kughamba ovene Mona Karunga ndi?'' Yesus avalimburura weno ashi, ''Anwe muna kughambo ashi Ame Mona Karunga.'' 71Vavo avaghamba weno ashi, ''Weno kwato nka hepero yaku ka shana ghumbangi wapeke? Natuvantje tuna yuvhu nkango dendi daku tunda mukanwa kwendi mwene.''
231Makura mbunga yavo yavantu navantje kwashapuka vamutware Yesus kwaPilatus. 2Vavo avatameke kumurundira, naku ghamba weno ashi, ''Oghuno murume kuna kupukita vantu vamu muhoko wetu, ghuye kuna kushweneka vantu vapire kufuta vimaliva vyamutero kwahompa Sisara, ntani Ghuye kuna ghamba nka weno ashi Ghuye ndye Kirisitus, Hompa.3Makura Pilatus amu pura, naku ghamba weno ashi, ''Ove Hompa wava Yuda ndi? Yesus amu limburura naku ghamba weno ashi, ''Ove ghuna kughambo vyaweno.'' 4Makura Pilatus atantere vaPirisiteli vavakurona ntani nambunga yavantu weno ashi, ''Ame kapi nawana ghundyoni kehe ghuno kwaghuno murume.'' 5Ano ngoli vavo kwatwikira kughamba varundire Yesus, naku ghamba weno ashi, ''Ghuno murume kuna kuyita ndyorongani kuvantu, ntani marongo ghendi kuna kuhanene mushirongo shaYudeya nashintje, ntani ana tameke nka kuyuvita Mbudi yaRuhafo muGalileya dogoro weno mbudi yendi yina yatiki kulivhango lyetu.''6Pilatus opo ayuvire dino nkango, apura weno ashi oghuno murume ne muka Galileya ndi. 7Pilatus opo adimburura ashi Yesus kwatunda kuGalileye makura amu tapa ntani amu tumu Yesus kwahompa Herodesi, pashirugho shino hompa Herodesi naye kwakalire muYerusalema mumayuva ngogho.8Herodesi opo amu monine Yesus, kwahafire ghunene, mukondashi ghuye kwataterera shirugho shashire naye ngamu mone. Ghuye kwamuyuvha tupu namatwi ntani kwashana nga kenge naye nkondo navitetu ovyo aruwananga. 9Makura Herodesi apura Yesus mapuro ghamayingi, ano ngoli Ghuye kapi amu limburura. 10VaPirisiteli vavakurona ntani navarongi vamatjangwa mpopo tupu kwashapuka nanyanya avayimana papepi naye, avaghamba naku murundira maghundyoni ghamayingi.11Mpopo tupu Herodesi navakavita vendi avamutuku Yesus kumwe naku mushwaghura naku mushepa. Opo vamanine kumushepa makura avamudwateke marwakani ghandiro afane yira Hompa makura avamutumu avyuke kwaPilatusi. 12Kutunda tupu mpopo vaHerodesi ntani naPilatusi kwaku kwata ghukwavo vakare vantu namuholi wendi mwamunene, mukondashi ghure wamwaka dadiyingi vavo kwakara naghunkore waghunene pakatji kavo.13Makura Pilatusi ayita vaPirisiteli vavakurona navapangeli vavaYuda ntani nambunga yavantu vaponge palivhango limwe tupu 14ghuye avatantere weno ashi, ''Anwe kuna yita ghuno murume kukwande ashi ghuye mundyoni ntani kuna kuyita ndyorongani kuvantu, tereranu, ame, kuna mupura mwene mposhi nuyive ghundyoni wendi kumeho yenu, ano ngoli ame kapi nawana ghundyoni kehe ghuno mwaghuno murume wakuhamena kwanavintje ovyo muna kughamba kumwe naku murundira.15Hawe, nampili Herodesi, naye kapi ana ka muwana ghundyoni mbyo ana mutumu avyuke kukwetu, terernu, oghuno murume kwato ghundyoni ogho aruwana waku mutwara kumfa. 16Makura ame kuna kumutapa kuvakavita vamupe matengeko makura vamushuture atunde mumango.'' 17Pilatusi kwaghambire vyaweno mukondashi ghuye kwakara nankondo dakushutura muna dorongo ghumwe tupu pashipito shaMaghumbukiro.18Ano ngoli mbunga yavantu nayintje kwayiyira kumwe tupu, naku ghamba weno ashi, ''Dipaya ghuno murume, ntani shutura Barabasi atunde mumango aye kuno kukwetu!'' 19Barabasi kwakalire murume wamurunde ogho ayitiro ndyorongani mushirongo pakatji ka vantu nalipangero ntani ghuye kwakalire murudipayi vantu makura avamutura mudorongo.20Ntani Pilatusi aghamba nka atantere mbunga, mukondashi ghuye kwashanine kushutura Yesus atunde mumango. 21Ano ngoli mbunga yavantu kwatwikira kuyiyira naku ghamba weno ashi, ''Mupampare kushikurushe, mupampare kushukurushe.'' 22Pilatusi apura mbunga rukando rwaghutatu weno ashi, '' Mukonda munke, ntani ghundyoni munke aruwana ghuno murume? Ame kapi nawana ghundyoni kehe ghuno mumwendi waku vhura kumudipaya ghuno murume. Ame kuna kumutapa vamutengeke, makura vamu shuture atunde mumango.''23Ano ngoli mbunga kwatwikira naku tininika vayiyire namaywi ghaku dameka ghunene ashi, vamu pamparere pashikurushe. Vavo kwaghamba naku yiyira nankondo vatininike Pilatusi dogoro atjindyi maghano ghendi. 24Makura Pilatusi naye aruwana mbyo vyo vashanine vantu navantje. 25Ghuye kwashutura muntu wamurunde ogho vashanine vantu navantje ogho vatulire mudorongo mukondashi ghuye kwayitire ndyorongani ntani kwadipaya vantu. Makura Pilatusi atapa Yesus mumaghoko ghavo vamu ruwane momu vana shana.26Vakavita opo vatwalire Yesus arupuke, makura avakenge Simoni waku Kirene, kuna kutunda kushirongo shavo, avamukwata avamukambeke pamapepe ghendi shikurushe shaYesus ashimbe, makura Yesus amu kwama muruku rwendi.27Mbunga yayinene yavantu, ntani vakamali ovo valiliro ngudu ntani navo vakaliro naliguvo ghunene, navantje kwamu kwamine muruku rwendi. 28Makura Yesus apiruka kuruku akenge kukwavo, aghamba weno ashi, ''Vanuke vavakadona vamu Yerusalemu, kapi shi mulire mukonda yarunyando rwande, nane ngoli lirenu mukonda yarunyando rwenu navana venu.29Tererenu, mayuva kuna kuya vantu ngava ghamba weno ashi, 'Lirago lya linene kwavantu vangandye vaku pira kuyita vanuke, ntani vavo kapi vayamweka rumwe mukeke kumashwe ghavo.' 30Ntani vavo ngava tameka kughamba vatantere ndundu weno ashi, 'Ove ndundu wera papetu, ntani 'Ove ndundu tufikilire.' 31Nkene shi vininke vyaweno kuna kushoroka kwashitondo shasho shimpe shina kara shashiteke namonyo namahako weno, weni omo ngavi kara ntani namo ngavi shoroka opo nga shikukuta shitondo?''32Yesus kwamutwalire kumwe navarume vaviri, varume vavarunde naghukorotji, kwava twalire vaka vadipaye kumwe naYesus.33Opo vakatikire kulivango olyo vatwenyanga ashi'' Livhango lya vifupa-fupa,'' makura avakamu pamparera kumwe navantu vaviri vavakorokotji - Ghuye akara pakatji ghumwe kurulyo rwendi ntani ghumwe kurumontjo rwendi. 34Makura Yesus aghamba weno ashi, ''Vava, vaghupirepo, kapi vana yiva ashi vinke vana kuruwana.'' Makura vavo avaruwana, fungu-fungu vaku shakanene vyuma vyendi, makura avatavaghura lirwakani lyendi kehe ghuno aghupeko ruha rwendi.35Vantu kwayimanine papepi naye vamu kengere ntani vampititi vava Yuda kwamushepa naku mushwaghura, avaghamba weno ashi, ''Ghuye kwapopera monyo davaghunyendi. Weno murenkenu naye aku popere mwene, nkene shi vyaghushili ghuye ndye Kirisitusi, ogho atoghorora Hompa Karunga.''36Vakavita navo avamushwaghura, ntani avaya vayimane papepi naye, makura avamupa vinyu yaghulyungu-lyungu anwe, 37ntani avaghamba weno ashi, '' Nkene shi ove Hompa wava Yuda, popera monyo ghoye.'' 38Ntani vavo kwatura shiyivito na shineyedito shendi opo vatjanga weno ashi, ''OGHUNO NDYE HOMPA WA VA YUDA.''39Muntu ghumwe wavano vantu vavakorokotji ogho vapampalilire pashikurushe ashwaghura Yesus aghamba weno ashi, ''Nkene shi vyaghushili ove Kirisitus? Popera monyo ghoye ntani natwe ghupopere monyo detu.'' 40Ano ngoli muntu ghumwe wavano vakorokotji vaviri aharukiri ghunyendi, aghamba weno ashi, ''Nane ove kapi watjira naku fumadeka Hompa Karunga, kwavyo ana kumpangura vaku tware kumfa mukonda yaviruwana vyoye vyaghurunde ndi? 41Atwe tuvaviri kuna kuwana matengeko ghamfa detu, kutwara muviruwana vyetu vyaghurunde. Ano ngoli oghuno murume kwato ghundyoni naghudona ogho aruwana.''42Makura ghuno murume aghamba weno ashi, ''Yesus, ka mvhuruke ko opo ngaghu katika mughuntungi ghoye.'' 43Yesus amu tantere weno ashi, ''Ame vyaghushili naku kutantera weno ghuvi yive ashi, namuntji weno ove kughu ka kara name muParadisa.''44Ovino kwashorokire kushitenguko paviha vyaviri yaghutatu, makura mushirongo amu kara mundema waghunene dogoro ghure waghukahe waviri yaghutatu 45shite kapi shakalireko kuliyuva. Makura likeshe lya munda yantembeli kwataghuka mukatji.46Opo vyashorokire vyaweno Yesus kwalira naliywi lyaku dameka, aghamba weno ashi, "Vava, ame kuna kutapa mpepo yande mumaghoko ghoye. Tupu amana kughamba nkango daweno monyo wendi aghurupukamo. 47Mukurona wavakavita lifere opo amona vyaweno kuna kushoroka, ghuye atongamene atapa mpandu naku fumadeka Hompa karunga, ntani aghamba weno ashi, ''Vya ghushili oghuno murume wamuhungami.''48Mbunga yavantu ovo vayiro kumwe naye opo vakengire namantjo ovyo vyashorokiro, opo vavyukire kwayuvha kukora munturo ntani kwatameka kukutoghona munturo. 49Ntani vantu navantje ovo vamu yiviro, ntani navakamali ovo vamu kwamino vaku tunda kuGalileya, vavo kwayimana kughure kwamwena teyete, vakengere navintje ovyo vina kushoroko.50Mpopo tupu, palivhango kwakalire po murume walidina Yosefu, murume ghumwe wava yenditi vadoropa. Ghuye kwakalire murume wamuwa ntani wamuhungami. 51Ghuye kapi aku yendire naku tambura maturopo namatokoro naviruwana vyava ghunyendi vayenditi vadoropa. Yosefu kwatunda kudoropa yaAramatiya, ntani ghuye kwataterera naku shana ghuntungi waKarunga.52Ghuno murume ayendi, kwaPilatusi, aka pure lipulitiro aka ghupe rutu rwaYesus aka vhumbike. 53Makura aka ghupa rutu rwendi rutunde pashikurushe, makura adingiri shimpu pamakeshe, aka vhumbika shimpu muntoko yaku tjokora muliwe, muliyendo lya lipe omu vapira shimpe kuvhumbika muntu.54Oruno ruvede kwakalire Liyuva lyaku kuwapayikira, liyuva lya Sabata lyaku pwiyumuka. 55Vagholikadi ovo vakwamino Yesus vatunde kuGalileya navo avayendi vaka kenge kumayendo oku vaka vhumbikire rutu rwendi. 56Makura vagholikadi avayendi vaka shimbe naku wapayika maghadi ghalidumba lyaku nuka rupekwa vaka waveke rutu rwaYesus. Makura muliyuva lya Sabata kwato kuruwana vavo kwapwiyumuka kutwara muveta yampo yavo.
241Kuliyuva lyaku hova lyamu shivike kungura-ngura yayinene kwameneka vayende kumayendo, vatware maghadi ogho vawapayikire. 2Vavo kwaka wana liwe lina tunduko kumbira ntani mbira yina gharuka. 3Makura avangene mo munda, ano ngoli kapi vaka wanine mo rutu rwaMuyogholi Yesus.4Vavo kwatukukire ghunene, oghu vatundu ntani kapi vayivire ashi vinke vavhura kuruwana, mpopo tupu, vakafumu vaviri avamoneke kuna yimana mpopo palivhango kuna dwata vyuma vyaku payima naku vembera yira shite. 5Vano vagholikadi avakara naghoma waghunene makura avatongamene pangoro avavanyongama vipara vyavo palivhu, makura vano varume vaviri avaghamba vatantere weno vagholikadi ashi, ''Mukonda munke muna kushanena muntu wamuyumi ogho ana karo namonyo mumavhango ghaku vhumbika vantu vakufa?6Ghuye mwato muno, ana tundumo ana vhumbuka mumfa! Vhurukenu nkango dendi odo omu tantilire opo akalire namonyo mukatji kenu kuGalileya, 7Ghuye kwaghambire weno ashi, Mona Muntu ngava ka mutapa mumaghoko ghava vantu vavarunde ngava ka mupamparere pashikurushe ngava ka mudipaye, ntani muliyuva lya ghutatu ngaka vhumbuka mumfa.''8Makura vagholikadi avavhuruka nkango daYesus odo aghambire kukwavo 9makura avayendi vatunde kumayendo vaka wane varongwa vendi murongo naghume avaka timwitira navintje ovyo vyashorokiro. 10Vavo kwakalire Mariya Magadalena, naYohana, naMariya vawina vaYakopu, ntani vagholikadi vamwe ovo vakalire navo avakatanta yino mbudi kuva Apositoli.11Ano ngoli oyino mbudi vayuvire vaApositoli yaku tunda kuvakamali, vavo kapi vavipulire. 12Makura Peturusi ashapuka aduka ayende kumbira, dogoro aka tika aka yimana, palivero lya mbira akenge munda, ghuye kwakenga mo tupu makeshe ana karomo, rutu rwendi mwato. Peturusi kwatetuka kwavino vyashorokiro, makura avyuka ayende kumundi wendi.13Liyuva ndyolyo, varongwa vaYesus vaviri kwayendire kumukunda walidina Emanusi, wagho kwakara shinema shakilo meta murongo kutunda kuYerusalemu. 14Vavo kwatimutira mundyira yavo navintje ovyo vyashorokiro kwaYesus.15Ovino kwashorokire weno, vavo kuna kuyenda mundyira naku timutira navintje ovyo vyashorokiro kumwe naku kupura kwavi vyaweno, makura Yesus aya kukwavo ayendi navo. 16Ano ngoli Karunga kwapata mantjo ghavo vapire kukenga naku dimburura ashi Kirisitusi mpwali mukatji kavo.17Makura Yesus avapura weno ashi, ''Anwe vantu vaviri vinke muna kutimutira mundyira yamu ruyendo rwenu?'' Makura vavo avayimana ndyikiti ntani kuna kara naliguvo mushipara. 18Murume ghumwe, walidina Kiliyopasi, amu limburura weno ashi, ''Nkwandi ove tupu pentjoye muntu wamu Yerusalemu ogho apiro kuyuvha vishoroka vyavinene ovyo vyashoroko mushirongo shetu mumayuva ana kapito?19Yesus avapura weno ashi, ''Vishoroka munke? Vavo avamu limburura weno ashi, ''Vishoroka vyakuhamena kwaYesus waku Nasareti, wamuporofete, ogho ka ruwanango vitetu vyavinene naku ronga nkango daKarunga nankondo kuvantu navantje, 20makura vaPirisiteli vavakurona ntani navapangeli vetu vamu shirongo avamutapa kulipangero lyava Roma avamupangura naku mutwara kumfa vaka mupamparere pashikurushe.21Atwe kwakalire nalihuguvaro mumwendi ashi ghuye ndye nga yoghoro muhoko wetu waIsirayeli kuva nankore vetu. Weno, kapi shi mo vina kumoneka, namuntji kare liyuva lya ghutatu kutunda kumfa dendi.22Ntani nka, vagholikadi vamwe vamu mbunga yetu kuna yita vitetu kukwetu, namuntji ngura-ngura yayinene kuna meneke vayende kumbira yendi. 23Vavo kapi vana ka wana rutu rwendi mumbira, mbyo vana ka vyuka, ntani mbyo vana ghamba nka weno ashi, mundyira yavo yaku ka vyuka mbyo vana mono nka limoneko lya vaEngeli ovo vana ghambo kukwavo weno ashi, ghuye muyumi kuna kara namwonyo. 24Vakafumu vamwe vamu mbunga yetu navo mbyo vana yendiko kumbira yendi, mbyo vana kawana ko yira momu tupu vana tanta vagholikadi. Vavo kapi vana kamu kenga Yesus.''25Yesus avatantere weno ashi, ''Anwe varume vaviri kwakara nadimutjima dadikukutu ntani anwe kapi mwapura nkango nadintje odo vatjanga vaporofete vakare mumatjangwa daku hamena kwavino vina kushoroko weno! 26Ovino vina kushoroko weno vyapwa kare kutjanga ntani vina kara hepero kushoroka weno matjangwa ghatikiliremo yira momu vatjanga weno ashi, Kirisitusi ana hepa kukara murunyando rwaweno ntani ngava mudipaya, mposhi Ghuye ngaka wane naku ngena mughuntungi wendi ngaka wane ghuyerere wendi?'' 27Makura Yesus atameke kuvaronga nkango damu matjangwa nadintje kutamekera kwaMosesi dogoro naku vaporofete navantje, ashingonone naku vaneyeda navintje ovyo vatjanga mumatjangwa vyaku hamena kukwendi.28Opo vatikire papepi naku tika kumukunda wavo, Yesus avatantere weno ashi ghuye kuna kupitakana ghuye kuna kuyenda kwaghure. 29Ovano varume vaviri avamushungida, naku ghamba weno ashi, ''Liyuva lina toko kare, yakuno tuyende kumwe mumundi wetu, weno mundema ghuna tiki kare.'' Makura Yesus ayendi kumwe navo aka rara mumundi wavo.30Opo vashungilire, valye ndya kumwe tupu, Ghuye aghupu mboroto, ayi tungiki ntani atapa mpandu kwaHompa Karunga, ntani abomona mboroto yikare maruvambi ghamadidi, ayi tapa kukwavo. 31Makura mpopo avapahuka mantjo ghavo, ntani avamu dimburura ashi Ghuye Yesus, makura Ghuye atundupo papavo adongonoka. 32Makura vavo avaghamba vavene navene weno ashi, ''Opo tuna yendi mundyira kumwe naye ghuye kuna kuturonga nkango damu matjangwa atwe kuna kuyuvhu mbili mumutjima, ntani kuna kara naruhafo ano ngoli kapi tuna yiva ashi mukonda munke, kutunda mpopo vavo avaghamba weno ashi tuyendenu tuka tantereko vantu kwavino vina shoroko kukwetu?''33Mpopo tupu avapiruka vavyuke vayende kuYerusalemu. Vavo kwakawana varongwa vendi murongo naghumwe kuna pongo kumwe ntani navantu ovo vakaliro navo, 34makura mbunga kwatantera varume vaviri weno ashi, "Ghushili Hompa ana vhumbuka, ghuye kuna moneke kwaSimoni." 35Makura ovano varume vaviri navo avatimutiri navintje ovyo vyashorokiro mundyira yavo, ntani namu avaneyedire naku mukenga Yesus kuna kubomona mboroto.36Vavo shimpe kuna kughamba vyaweno, mpopo tupu Yesus ayimana mukatji kavo, Ghuye avatantere weno ashi, ''Mbili yaHompa yikare nanwe.'' 37Vavo kwatukuka ntani kwakara naghoma, vavo kwaghayara ashi mpepo tupu vana kukenga.38Yesus avapura weno ashi, ''Mukonda munke muna karere muliguvo? Mukonda munke muna kutamangera munda yadimutjima denu vyaku hamena kulivhumbuko lyande? 39Kengenu mumaghoko ghande namu mpadi dande, Ame ghuno. Kwatenu parutu rwande yuvhe omo runa fana. Mposhi anwe muyive ashi mpepo kwato rutu navifupa, rwaku fana yira runo rwande.'' 40Opo amanine kughamba navo, makura avaneyeda vito vyamu maghoko ghendi ntani namu mpadi dendi.41Vavo kwatetuka ntani kwakalire naruhafo rwarunene, vavo kapi vapulire ashi ghuye kuna vhumbuka mumfa. Makura Yesus avapura weno ashi, ''Muna kara ko nandja dakulya ndi?'' 42Vavo avamupa ko ruha rwantjwi yakuyota, 43Ghuye aghupu alye kumeho yavo.44Makura Ghuye avatantere weno ashi, ''Opo nakalire nanwe pakutanga, ame kwamu tantilire weno ashi nkango nadintje odo vatjanga mumatjangwa ghaMosesa nava Porofete ntani namu Mapisalome dina hepa kutikilira mo nadintje.''45Makura Yesus apaturura ndunge davo, mposhi vayuvhe naku yiva ntani naku kwata lighano nkango damu matjangwa. 46Ghuye avatantere weno ashi, ''Matjangwa kwatanta weno ashi, Kirisitusi nga kara murunyando ngava mudipaya ntani kuliyuva lya ghutatu ngaka vhumbuka kumfa. 47Makura anwe muna hepa kuyuvita yino Mbudi yaRuhafo yalikushighuro nalidongononopo lya ndyo kupitira mulidina lya Yesus Kirisitus ntani yino mbudi yina hepa kuyenda kudimuhoko nadintje, kutamekera kuYerusalemu.48Anwe muna hepa kutapa ghumbangi kuvantu wakuhamena kwanavintje ovyo mwakenga namantjo navi mwayuvha namatwi navi aruwana ntani navi vyashoroko navintje. 49Tererenu, Ame nganu tuma Mpepo yaKupongoka oyo vamu twenyedera Vavava. Kutunda pano anwe karenu mushitata dogoro Karunga nga tume Mpepo yaKupongoka ngamu wane nkondo murutu.''50Kuruku rwashirugho Yesus arupuka navarongwa vendi vatunde mushitata vayende pepi namukunda waBetaniya. Makura Yesus ayerura maghoko ghendi akambeke naku tungika varongwa vendi 51Ghuye shimpe kuna kukambeka naku tungika varonwa vendi, makura avamudamuna atunde papavo arondo muliwiru.52Opo vamana kutongamena naku raperera kukwendi makura avavyuka kuYerusalemu naruhafo rwarunene. 53Kehe liyuva vavo kava yendanga muntembeli vaka raperere, naku tanga Hompa Karunga.
