To view a copy of the CC BY-SA 4.0 license visit
http://creativecommons.org/licenses/by-sa/4.0/
Vahebeli
11Virugho vyakapito Karunga ka ghambitakanga vakurona vetu mumarupe ghakukushuva-shuva kupitira mutunwa twa vaporofete. 2Ano muvirigho vino vyakuhulilira ghuye kuna kughambera mwamonendi wamukafumu, ogho atoghorora ghuye aka mupingi wana vintje. Kupitira mu mwendi Karunga mbyo aturapo lishito. 3Ghuye ndje shite shaghuyerere waKarunga ghuye kwakukufana nawa-nawa na shishwi shendi. Ghuye kwashimba navintje na nkango yendi yankondo. Opo amanine kukushurura vantu kundjo davo akashungira kurulyo rwaKarunga muna nkondo nadintje.4Mona kwamutura akare munene kupitakana vaEngeli yira momo lya kara lidina amupa Karunga linene kupitakana ghavo. 5Karunga kapi atantera rumwe vaEngeli ashi, "Ove monande, namuntji nakara ame vasho"? ndi kuva Engeli munke aghamba Karunga ashi, "Ame ngani kara vashe ghuye nga kara monande"?6Waronka, opo ayitire mbeli yendi mu Udjuni, aghamba, ashi, "va Engeli vaKarunga navantje vamutongamene." 7Kuva engeli aghamba ashi, "Ghuye kuruwana vaEngeli vendi vakare mpepo, ntani vakareli vendi vkare maraka ghamundiro."8Ntani kwamonendi aghamba ashi, "Shipundi shoye shauhompa ngashi karerapo naruntje nanaruntjeya. 9Ove wahora uhungami ntani wanyenga udona. Karunga ghoye, mbyo akuwaveka na maghadi gharuhafo ghukare Hompa, upitakane vaUnyoye "navantje."10"Hompa, pakutanga, atura litateko lya udjuni. Liwiru nalyo viruwan vyamaghoko ghoye. 11Navintje ngavi kutundapo, ano ngoli ove ngaghuka twikira. Navintje ngavi kakurupa yira vidwata. 12Ngaghu vidingilira vikare yira mwaye, ntani ngavi kushintumuka yira momu vyakutjindjanga vidwata. Ano ngoli uye shimpe momu afana na kare, ntani mwaka doye kapi dakara na uhura."13Ndi mpwali mu engeli ogho atantera Karunga shirugho shimwe ashi, "Shungira kurolyo rwande dogoro mpopo ngani tura vanankore voye vakare ulyatero wampadi doye"? 14Nane vaengeli navantje kapi mpepo da ukarel, odo vatuma diporere ovo ngava kawano upingwa waliparu?
21Mpo ngoli ashi tuhamenu kwavi twa yuvha, ngatupire kupempuka.2Nkene ashi mbudi oyo yayiro kupitira muva engeli yakaro yaushili, kehe uno urunde na kupira kutikitamo veta ngava kawana matengeko, 3omo ngatu katunda mone weni nkene kapituna kutambura liparu lya linene! Liparu lya linene olyo ahovilire kuyivita mwene Hompa ntani vana kuyivita kukwetu ovo vayiyuviro. 4Waronka Karunga atapa ma ungambi nakuneyeda vivyivito, navitetu ntani naviruwana vyankondo vyakutunda kuma ushwi ghampepo yakupongoka, momu avishanine mwene.5Untungi unotuna kuyuvita ogho ghuna kuyo, Karunga kapi nga utapa ukare mulipangero lyava engeli. 6Ano ngoli muntu ghumwe kwangambipara ashi: "Muntu nani shininke munke, ovyo wamutulira nunaghano? Ndi mona Muntu, mukonda munke umu parekera mbili?7Wamudipita vamupitakane vaengeli shirugho shashifupi: mbyo wamupa nkata wamuyerepeka nalifumano. 8Mbyo wamutura akare mupangeli wanavantje." Kutanta ashi Karunga kwatura navintje vikare mulipangero lya muntu. Kwato oshi apira kutura mulipangero lyendi. Ano ngoli weno kapituna kumona waro ashi untungi mulipangero lyendi unakara.9Weno kuna kumona, Yesusa, ogho vadidipitire shirugho shashifupi vamupitakane vaengeliweno ntantani vana ghuyerere na lifumano konda ruhepo rwendi na mfa, mukonda yankenda yaKarunga ashi ngafere vantu navantje. 10Vyawapa kwaKarunga, mukonda ashi navintje mumwendi vyatunda ntani mushiti wanavintje, ngatwa vana vendi mughuyerere. Mposhi uye nyakare muyogholi walipuro lyavo mpo ngoli ashi ruhepo rwendi rutikiliremo.11Navantje kumwetupu mupomgoli na vapongoli shavo umwetupu. Ghuye kwato ntjoni mukavatwenya ashi vaghunivande. 12Ghuye kwaghamba ashi, "Ame nganitangauka lidina lyoye kuva ghunivande, Ame ngani kuyimbira mukatji ka Mbunga yoye."13Shimpe nka, "Ame nganiku huguvara." Shimpe nka, "Kengenu, ame uno novanuke ovo atapa kukwande Karunga." 14Mpo ngoli ashi, momu vakara vanuke pa rutu na honde, naye mbyo akufana navo pankedi ndjoyo, mposhingadjonaurepo mfa dogho akaro nalipangero lya mfa, uye ndje, Satana. 15Ghuye mukuruwana weno ghamangurura navantje ovo vakararo mughukaro waghoma na upika wakutjira mfa.16Vyaushili shinka shendi kapishi shakukwafa vaengeli, ngoli mukuvatera ruvharo rwaAbrahamu. 17Mpo akarera hepero ghuye akufane nava unyendi mumaruha naghantje, mpo ngoli ashi ngakare mupristeli wavo wamunene wankenda wakulimburukwa kwanavintje vyahameno kwaKarunga, nga gwanikite dimuhoko na kudongonapo ndjo davo. 18Mukonda Yesusa mwene kwakalire muruhepo na mumasheteko, mpo avhuliranga kukwafa ava vana karo mumasheteko.
31Vaunyande vakupongoka, anwe kwahamena mu untungi wamuliwiru. Karenu mughayare Yesusa, mu apostoli ntani mu pristeli wamunene walipuro olyo twatongononanga. 2Ghuye kwalimburukwa kushipara shaKarunga, ogho amutoghorora, yira momu akalire Moses mulimburukwi mundjugho yaKarunga nayintje. 3Yesusa kwamupa lifumano lya linene kupitakana lya Mosesa. mukonda ashi mutingi wandjugho akara na lifumano lya linene kupitakana ndjugho yene. 4Kehe yino ndjugho muntu ayitungo, ano ngoli mutungi wanavintje ndje Karunga.5Moses kwakalire mukareli wakulimburukwa mundjugho yaKarunga nayintje, atape ghungambi wavyo vaghambitre vyakalire kumeho. 6Ano ngoli Kristus ghuye kwalimburukwa yina mona wakupangera mundi waKarunga. atwe vantu atwe mundi wendi nange tukare nalididimiko na lihuguvaro lyovo twa taterera.7Yira momu tupu yaghamba mpepo yakupongoka ashi: " Namuntji, nkene kumuyuvha liywi lyendi 8kapishi mukare nadimutjima dakukukuta mukare ghurunde, yira momu mwakalire mumasheteko ghamu mburundu.9Navo ngoli mo varundire vakurona venu vantjeteke mushirugho shamwaka dimurongo ne, vamonine virughana vyande. 10Mbyo nagarapire unene na mbunga yavo. Ani ghamba ashi, 'kehe pano dimutjima davo kwapuka. Ano ngoli vavo nakukwatashi lighano ndjira dande. 11Makura mpo natulirepo mughano waugara wande ashi: 'kapi ngava kangena mo mulipwiyumikiro lyande.'''12Vaunyande, akrenu muna kotoka ashi mukatji kenu kapishi mukare nampili umwe ogho anakaro na mutjima waghudona wadira kupura, atunde kwakarunga wamonyo. 13Mpo ngoli ashi, kukorangedenu kumwe na unyendi kehe liyuvha mpopano shina kara ko shirugho vana kutwenya ashi "Namuntji," mpo ashi kapishi mukare ghumwe mukatji kenu vakukuta mutjima dimupukite ndjo.14Atwe tuna kara ngoli vaholi vaKristusa nkene kutu kwaterera lihuguvaro yira momu twatamikire dogoro na kughuhura. 15Kwavino matjangwa kwatanta ashi, "Namuntji nkene ghuyuvhe liywi lyendi, mwasha kukuta dimutjima denu yira mbovo vapiliro kulimburukwa."16Vantu munke ovo vayuvire liywi lya Karunga vapilire kulimburukwa? Nane kapishi muhoko ogho atunditire Moses vatunde mu shirongo shaEgipte? 17Vantu munke agarapilire Karunga ure wamwaka dimurongo ne? Nane kapishi mbovo vadjonino, makura ava fere momo mumburundu? 18Vantu munke aghanine ashi kapi ngava kangena mushirongo shendi shalipwiyumukiro, nane kapishi mbovo vapiliro kulimburuka kwendi? 19Weno tuna vimono ashi vyava limbire mukangena mushirongo shalipwiyumuko mukonda yakupira lipuro.
41Ano ngoli. litumbwidiro lya kukangena shimpe lina gharuka, tukarenu namukumo mposhi tupire ku kambanitapo vamwe. 2Mbudi yaruhafo vayitu yuvitira yira momo vayi vayuvitilire vavo. Ano ngoli mbudi kapi yava kwafire, mukonda ashi kapi vayitatambulire na lipuro.3Kukwetu atwe twapuro ngatu kangena mushirongo shalipwiyumukiro, yira momo agahmba ashi, "Ame kwaghana mulishandu lyande ashi, vavo kapi ngava kangena mushirongo shande shalipwiyumukiro." Ghuye kwaghambire vino nampili momu vyapwa viruwana vyendi pa lishito lya udjuni. 4Matjangwa kwaghamba pa vango ghamwe vyakuhamena kuliyuva lya Utano na uviri ashi: "Makura Karunga apwiyumuka kuliyuva lya Utano na uviri kuvi ruwana vyendi navintje." 5Ghuye ava vyukuruka kughamba nka waro ashi: "Vavo kapi ngava kangena mushirongo shande shalipwiyumukiro.''6Mpongoli, vamwe ngava kangenamo, ano ovo vahoviro kuyuvita mbudi yaruhafo kapi vayenda mo mukonda yakupira kulimburuka. 7Waro nka shimpe Karunga ayatura liyuva limwe ashi "Namuntji," Omo ghuye ayaghambilire muliywi lya Davit kumayuva ghakuhulilira pakughamba nkango dakuhoverera ashi: "Namuntji nkene muyuvha liywi lyendi, mwasha kukuta dimutjima denu."8Mbyovyo ashi ndi Yoshwa avhulire kukatikita muhoko mulipwiyumuko, Karunga ndi kapi avhulire kughamba aturepo liyuvha lya peke lya kuhulilira. 9Shimpe mpolili liyuvha lya Sabata liyuvha lya lipwiyumuko oly aturapo lya vantu vaKarunga. 10Kehe uno wakangena mulipwiyumiko ana hepa kupwiyumukira kuvirughana vyendi, yira momu apwiyumuka Karunga kuvirughana vyendi. 11Mpo ngoli tukondjenu ngatu kangene mulipwiyumukiro, mpo ashi mumbunga yetu kapishi mukare umwe wakupira kulimburukwa yira momu vakalire vakuhova.12Mukonda ashi nkango da Karunga kwakara na monyo na nkondo ntani da twepa unene kupitakana rufuro rwakuteta kuviri. Dado kungena murutu digaunune monyo na mpepo, ngongo na muhoko-hoko, ntani dado kuyiva maghadaro na liywi lya mumutjima. 13Kwato nampili shishitwa shimwe shakuvhura kuvanda kushipara shaKarunga. Ngoli navintje vyakara pa ukenu ghuye kuvi mona namantjo natuvantje ngatukatapa virughana vyetu kukwendi.14Muvirugho vino tuna kara namuPristeli wamunene ogho ayendo akangeno muliwiru, Yesusa ghuye ndje mona Karunga, mpo ngoli ashi tukwatererenu ngoli kulipuro olyo vaturonga. 15Atwe kapi twa kara namuPristeli wamunene ogho apiro kutu pakera mbili mu upira nkondo wetu. Nani ngoli, atwe kwakara namuntu ogho apito mumasheteko naghantje, ngoli kapi atura ndjo. 16Tuyendenu ngoli nadimutjima nadintje kulipuna lya Hompa wankenda, tuka wane nkenda yitu kwafe muvirugho vino tuna yihepa.
51Kehe pano mupristeli wamunene, kwamutoghorora mumbunga yavantu, kwamutoghorora aruwanene vantu mu viruwana vyaKarunga, ghuye atape vitapa na kudjamba ndjambo da kudongononapo ndjo. 2Ghuye kuruwanena navantje vakupira ukonentu navo vapuko, mukonda ashi ghuye naye akara nakupira nkondo kwamwene. 3Mukonda yino, naye anahepa kudjamba ndjambo yakudongononapo ndjo dendi, yira momu aruwanenanga mbunga ku ndjo davo.4Shiruwana shino kapishi shakehe uno, shandjegho atoghorora Karunga mwene, yira Aroni. 5Nampili Kristusa kapi akutulire mwene akare mu Pristeli wamunene. Ano ngoli, ndjegho aghambiro kukwendi ashi, "Ove monande; Namuntji na kara vasho."6Mumatjangwa ghamwe kawata waro ashi, "Ove mupristeli wanaruntje ngakwamo ghukaro waMelekesedeki."7Mumayuva ogho akalire narutu, Kristusa kwatapire ndapero na kukukwambera na kulirana kukuya na liywi lya linene na maruntjodi kwaKarunga, wakuvhura kumuyoghoramo mu mfa, ndapero yendi ayikatika mukonda yaupongoki wendi. 8Nampili momu akalire ashi ghuye monendi, ana hepa kumona ruhepo mposhi akuronge ashi vinke vina kutanta kulimburuka kwaKarunga.9Muruhepo rwendi ghuye atikitiliremo navintje, mposhi kehe uno wakulimburukwa kwendi, ayive ashi ndje ayito lighoko lyakutwara kuliparu lya naruntje. 10Mukonda yino Karunga amutoghorora akare mupristeli wamunene nga kwame mu ukaro waMelekesedeki. 11Kuvhura tughambe vyavingi vyakuhamena Yesusa, ano ngoli udito mukuvifwaturura konda munakupata kapi muviyuva.12Pashirugho shino mwawapera kukara varongi, ngoli shimpe mwahepa muntu wakumuronga shimpe madi ghamuhovo ghankango da Karunga. Kukwenu mashini mwahepa, kapishi ndya! 13Mukonda ashi kehe uno wakunwa mashini mwanuke, ghuye kwato ghukonentu wankango da ushili. 14Mpo ngoli ashi ndya dava kurona. Vakurona vandunge vayivo kuhangura ghuwawa utunde ku Udona.
61Turenu ngoli muviruwana vyaKristusa turuwane vyakutikiliramo shiruwana mposhi kapishi tukare pamarongo ghakutanga. Atwe weno nakuvhura nkashi kughamba ashi tushuve kuvirughana vyakutwara kumfa ngoli tukare nalipuro mwaKarunga, 2ndi kapishi turonge shimpe marongo ghaliyoyero, kukambeka vaveli maghoko, livhumbuko lyava fe ntani mpanguro yanaruntje. 3Tukurenu tuyende kumeho nkene atupulitire Karunga.4Vinke ngavi shoroko kwavo vakaliro mu ukenu, vamakera m ushwi ghamuliwiru, vatambulire mpepo yakupongoka, 5vamakera nkango da Karunga dadiwa dakaro nankondo mu Udjuni wakumeho, 6makura mbyo vashuva lipuro-ovo nakuvhurashi waro kukava vyuta kulipuro. Vavo kuna ku papamparera mona Karunga kushilivindakano rwauviri na kumushwaghura vamuture parukenu.7Livhu nkene lya nwa mema ghamhvura ntani lyalyo kurokera kehepano, ntani lyalyo kutapa muyangu kwava vakuni mbuto na kuvaruwana Karunga ku tungika livhu lya weno. 8Ano ngoli livhu lya kumena miya na lingangwe, kwato mulyo lya pwa kufinga ku uhura ngali kapya.9Vaunyande vakuhora atwe kuna kughamba vyaviwa kukwenu, mukonda anwe kuna kuruwan vorughana vyakutwara kuliparu. 10Karunga muhungami. Kapi nga vhurama virughana vyenu na shihoro shakufumadeka lidina lyendi, omo mwakwafa vapongoli ntani viruwana ovyo muna kuruwana weno kumbunga.11Atwe kuna horo ashi ndi kehe uno akare na upampi ngatikitiliremo lipuro dogoro ku uhura. 12Vino kuna kuvi ghamba mposhi kapishi mukare muna dwapa, muna hepa kuhonena na kukara na lididimiko olyo vakalire nalyo ovo vakapingo untungi waKarunga.13Karunga opo atapire matumbwidiro kwaAbrahamu, atapa mughano kulidina lya mwene, mukonda ashi kwato wamunene apitakano Karunga. 14Aghamba ashi, "Ame nganiku tungika unene ntani ngani vukita unene ruvaro roye." 15Mukonda yalididimikiro, Abrahamu akawanine matumbwidiro.16Mukonda ashi vantu kughna ogho avapitakano. Makura mughano nga uva korekere nakuku upapo dimutangu. 17Morwa Karunga kwatokolire aneghede ovo ngava kapingo matumbwidiro ashi ghuye kapi mpango dendi, atapa mughano kumatumbwidiro ghendi. 18Karunga nakughambashi vipempa -matumbwidiro ghendi na mughano wendi vino vininke viviri vyapirango kurunduruka atwe, tuyendenu tukawane uvando, renkenu ngoli matumbwidiro ghendi ghatupe mukumo tukare na lihuguvaro lyavyo vina karo kumeho yetu.19Lino lihuguvaro lya kora lya kara shiyimanito shawato shakukaora mpo twatura monyo detu, Lihuguvaro kwakara yira likeshe ly amunda yantembeli na mavango ghakupongerera, 20omo aka ngena Yesusa kumeho ngatu kangenemo atwe. ghuye ndje mupristeli wetu wamunenen wakukarerapo kupitira mu ukarao waMelekedeseki.
71Ghuno Melekesedeki, kwakalire Hompa waSaremu, kwakalire mupristeli waKarunga wakuliwiru-wiru, mundjira yakuka vyuka Abrahamu oko aka fundire vaHompa agwanekere naye makura amu kandayiki. 2Makura Abrahamu atapa navintje ovyo aka shimbire vikare ndjambo vyashina Murongo. Lidina Melekesedeki pakuhova, kutanta ashi, "Hompa waghuhungami"; ntani ghuye kwakalire nka "Hompa waSaremu," kutanta ashi, "Hompa wambili." 3Ghuye kundereko vashe, kundereko vawina, kundereko ntundiliro yavakurona vendi, kundereko liyuva olyo vamuyita ndi lya mfa dendi.4Monenu tupu omo anenepa oghuno mukafumu na Abrahamu mukurona wetu naye kwatapire vitapa vyashi namurongo kwavo aka kwatiro muvita. 5Veta kwatanta ashi valira lya Abrahamu vahepa kutapa shinamurongo kwavo vaweka vatape kulira lya Levi ovov vakaro mushirughana shaghupristeli, nampili momu vakara lira limwe tupu. 6Ghuye Melekesedeki, kapi atunda mulira lyava Levi, awane vitapa vyashina murongo kwaAbrahamu, makura amutungiki, ngawane matumbwidiro kwaKarunga.7Kwavino kapi kwakara mashinganyeko ashi mukurona ndje wakushwera mwanuke lirago. 8Vapristeli mbo vapongayikango vitapa vyashinamurongo, nampili ngoli vavo navantje ngavafa ku upako tupu Melekesedeki matjangwa kwatanta ashi ghuye ngakarererapo. 9Kutanta ashi na Levi wakupongayika vitapa vyashinamurongo, pakuhova naye atapire vitapa vishinamurongo kupitira mwaAbrahamu, 10mukonda Levi kwakalire shimpe murutu rwavakondi vendi mwaAbrahamu opo agwanikilire na Melekesedeki.11Veta kwatanta ashi vapristeli vana hepa kutundira mulira lya Levi, vano vapristeli na kuvhurashi kudongononapo ndjo da vantu, mbyo pakara hepero ashi pakare mu pristeli yira Melekesedeki, kapi ashi watunda mwaAroni? 12Mukonda shi nkene ghu pristeli ghuna runduruka, veta nayo yina hepa kukutjindja.13Muntu ogho ghuna tuna kughamba pano muyogholi wetu ogho atundo mulira lya peke lya piro kuruwana rumwe ku shidjambero. 14Kehe uno avi yiva nawa-nawa ashi ghuye kwatunda mulira lya vaYuda, ano ngoli Mosesa kapi aghamba ashi vapristeli kuvhura kutunda mulira lino.15Navintje vino vyapwa kare kughamba nkene ashi ngakushoroka mupristeli wapeke wakufana yira ukaro waMelekesedeki. 16Ghuye kapi awana ghu pristeli, kupitira muveta na nkondo da vantu, nani ngoli kwatunda kunkondo dakukarererapo. 17Matjangwa kwatanta kukwendi ashi: "Ove mupristeli wanaruntje kupitira mu ukaro waMelekesedeki.18Makura ukaro na veta da pakare mbyo ghaditulira kuntere, 19mukonda ashi veta kapi yatikilira kehe vino ano ngoli mbyo vatupa lihuguvaro lya kutikiliramo tuye pepi na karunga.20Karunga mwene ndje atuliropo mughano pa kutoghorora uno mupristeli, 21Ano ngoli kapi atulirepo mughano wakufana ghuno opo atulire likukwatoghona lya upristeli wakuhova, ghuye kwamutuliremo namughano waKarunga aghamba kukwendi ashi, "Hompa kuna ghana ashi kapi ngarundurura maghano ghendi: 'Ove ngaghukaro mupristeli naruntje nanaruntje.'''22Weno kutanta ashi Yesusa ana kara mutikitimo ntani ndje ligwanikitiro lya liwa kupitakana lya kuhova. 23Vapristeli vakuhova vangi vakaliro ntani kava fanga mbyo kapiranga ku twikira viruwana vyavo. 24Ano ngoli Yesusa ghuye ngakarererapo naruntje- nanaruntje ntani na upristeli wendi ngaghu karererapo naruntje na naruntje.25Ghuye kuyoghora vantu vakuya kukwendi avayite kwaKarunga vapitire mumwendi, ntani ghuye kuva shungidirapo kwaKarunga. 26Yesusa ndje mupristeli wamunene twa hepa, uye apongoka, kapi akara nalipuruko, kwato ndjo, kwamupongora kuva kandjo mbyo vamu yerura apitakane vyamu liwiru-wiru.27Ghuye apitakana vapristeli vavanene navantje, ghuye kapi ahepa kudjamba da kehe liyuvha kundjo dendi ntani nadnjo da vantu. ghuye kwadjamba ndjambo y anavantje rumwe tupu pa kukutapa mwene akare ndjambo. 28Mukonda ashi veta ndjo yakutura mu pristeli wamunene ogho apiro nkondo dakutikiliramo. Ano ngoli nkango da mughano, odo dayiro kururwa veta, kwaya turamo mona, akare mutikitimo wanavintje.
81Lidi lya nkango odo twa yuvitanga yino ashi: Atwe twakara na mupristeli wamunene waweno ogho aka shingiro kurulyo rwashipundi shaUhompa osho shafumano muliwiru. 2Ghuye muruwani wamundjugho yakupongokerera yaushili oyo adika Hompa, kapishi muntu.3Kehe uno mu pristeli wamunene kumutura mushiruwana aruwane navintje atambure vitapa naku djamba ndjambo. 4Ashi ndi Kristus shimpe mpwali pano pantunda yalivhu, ndi kapi ana kara mupristeli, mukonda ashi vapristeli vakudjamba kutwara muveta shimpe mpovalipo. 5Vavo kuruwana viruwana vyamuntembeli ovyo vafaneka vaupeko mundundumba wavyo vyakaro muliwiru. Karunga kwatapire marondoror kwaMosesa kumeho yakudika nkuru ndjugho: Karunga aghamba ashi, "Kenga nawa ghuruwane navintje vifane yira momu vana kavi kunegheda kundundu."6Weno Kristusa kwamu tura amane shirughana shaUpristeli shashinene shakupitakana vakuhova, ghuye kwayita nka waro ligwanikitiro lya liwa lya makukwatakano ghamatumbwidiro ghamawa. 7Ashi ndi likukwatakano lyahova kundereko lipuko lya karopo, ndi kundereko hepero pakare lino lya uviri.8Makura Karunga akenge maudjini ghavantu vendi, makura aghamba ashi, "Kengenu mayuva kuna kuya omo ana kutanta Hompa opo ngani turapo likukwatakano lyalipe na lira lya vaIsragheli ntani nalira lyava Yuda. 9Kapishi likukwatakano lya kufana yira lyava kurona vavo muliyuva olyo nava kwatire kulighoko nivaghupe mushirongo shaEgipte. Kapi valimburukire kukilkukwatakano lyande, makura mpo nava shuvire mo anan kughamba Hompa.10Olino ndyo likukwatakano lya lipe olyo naruwanita kupitira mundjugho yaIsragheli muruku rwangogho mayuva --mo anakughamba Hompa. Veta dande nganiditura mumaghano ghavo, ntani nka ngani ditjanga mudimutjima davo, ntani vavo ngava kara muhoko wande.11Kapi ngapa kara umwe ashi ndje waKuronga vaunyendi ntani wakutantera vaunyendi ashi, yiva Hompa'. Mukonda ashi navantje ngava ndjiva me, akare mwanuke, akare mukurona. 12Mukonda ashi ame nganikara na nkenda kundjugho davo, ndjo davo kapinka ngani divhuruka waro."13Nkene kuna kughamba likukwatakano "lyalipe," Karunga kuna kutanta ashi lya kuhova lya kurupa, kehe shino shakukurupa shapwa mulyo ntani ntantani ngavidongonokapo.
91Nampili ndi likukwatakano lya kuhova lya kalire na veta da ukareli ntani na ntembeli yapano palivhu. Ntembeli kwayi dika yikare weno. 2Munko yakuhova kwakaramo maghuyweko gharamba, tafura, na mboroto yandjambo, oyo kava twenyanga ashi nkonda yakupongoka.3Kunyima yantembeli kwakalire nkonda yauviri, oyo vatwenyanga ashi nkonda yakupongokerera. 4Mwamo mo shakalire shindjambero shangorondo dha ku shwakerera ndjambo da lidumba lyaliwa. Ntani momo nka mo lya kalire limbangu lya makukwatakano vavambayika na ngorondo. Munda kwakaliremo kavaya ka ngorondo mwakutura mana, mapngo yaAroni yakukara naviperendo ntani navitafura vyadimuragho da Karunga. 5Pawiru yalimbangu lyamakukwatakano kwakarapo vakerubi vauyerere waKarunga ovo vafikiliro shipundi dha nkenda pawiru. Weno kapi pana kara shirugho shakughamba mo vyavingi.6nkene vinapu kuwapayika vino, makura vapristeli kungeanamo munkonda yakuhova yamuntembeli vakarughane virughana vyaukareli Karunga, kehe pano. 7Ano ngoli munkonda yaUviri, mu pristeli wamunene ndje tupu wakungenamo rumwe tupu, nakungenamoshi ahana honde yakudjambelita ndjo dendi ntani na ndjo da mbunga odo vadjona vahana kuyivilita.8Mpepo yakupongoka kwaghamba nawa nawa ashi ndjira yakungena mu nkurundjugho munkonda yakupongokerera na kuvhurashi yi gharuke nkene ashi nkonda yamuhovo shimpe mpoyili. 9Ovino kwafanikitire tupu kovino vyantantani. Vino kwatanta ashi maushwi na ndjambo kava djambanga ano ngoli kapi lya upapo marondoro ghaliywi lya mumutjima lyogho kadjambango. 10Mbyovo ashi vino kwahamenine tupu kundjwa ntani navi vyakunwa ntani navi vyakuhamena vyankedi dakuku shuva-shuva da kuku kenita vakushuruke, odino ndjenditito tupu da kuntunda yamuntu vaturapo dikarepo dogoro shirugho osho ngaturapo mpangera dadipe.11Kristusa kwayire aya kare mupristeli wamunene wavininke vyaviwa ovino vina karopo weno. Nkuru ndjugho yaKarunga oyo aruwanenanga yiwa unene yapitakana yakuhova ntani yayo kapishi vantu vayitungo, ntani yayo kapi yahamena ku udjuni uno. 12Ghuye opo angenine mu nkuru ndjugho yaKarunga ayangene munkonda yakupongokerera pa rumwe tupu makura, ghuye kapi aghupire honde yavimpendje nayi yavitana akadjambe, honde yamwene aghupire adjambe rumwe tupu atikitiliremo liyoghoro lya naruntje.13Nkene ashi honde yavimpendje nayi yantwedu na mutwitwi wandema yakushwakerera pa kuva mwayera honde na mutwitwi ovyovanatura kumwe kukushurura marutu ghavo, 14honde yaKristusa ogho akudjambero mwene mu mpepo yanaruntje, ghuye wakupita ndjo, ghuye kwamana kudongonona pa liywi lya mudimutjima detu kuviruwana vyakututwara kumfa, tukarere Karunga wamonyo? 15Mukonda yino, ghuye kwayita ligwanekero na likukwatakano lya lipe. Vino kwakarerapo morwa mfa odo dayoghoro vantu kumaudona ogho kava ruwananga opo vakalire mulikwatakano lya kuhova, mposhi ovov atoghorora Karunga ngava wane upingwa wanaruntje ogho vavatwenyidira.16Kuturapo makuyuvho aweno kwafana yira ndjugho yapatjangwa, nkwandi mwene anahepa kudohoroka ntani yina kukara mushiruwana. 17Ndjagho yalitwenyidiro lya upingwa kapi lya kara na nkondo nkene ashi mwene shimpe kuna kuparuka ano ngoli kukara na nkondo nkene mwene ana fu.18Nampili likukwatakano lya muhovo kapi valitulirepo pahana honde. 19Pamuhovo Moses atantere vantu dimuragho nadintje yira momu dakara muveta, makura aghupu honde yavitana nayo yavimpendje, kumwe namema makura amwayere mabpira da veta na vantu navantje kushi djambero shahuki da ndjwi dadigeha. 20Aghamba ashi, "Honde yino yakukoreka likukwatakano lyenu na Karunga.21Nkuru ndjugho na viruwanita navintje ivyo kava ruwanitanga mu ukareli Karunga navyo kwavi mwayilire na honde. 22Kutwara muveta, kehe shino kushikushurura na honde. Nkene kapi pana kara honde nakuvurashi kukarapo lidongonono na lighupiropo lya ndjo.23Vino kwakalire tupu mafano ghavyo vyakaro muliwiru ntani vyavyo vyahepa kuvi kushurura nandjambo da vikorama. Ano ngoli, vyamuliwiru ko vyene vyene vahepa kuvi kushurura na ndjambo da vikorama. Ano ngoli, vyamuliwiru ko vyene vyene vahepa kuvi kushurura na ndjambo djuni yakupitakana yino. 24Mukonda ashi Kristusa kapi angena munkonda yakupongokerera oyo vadika na maghoko, oyo vafaneka yifane yira yaushili. Ghuye kwakangena yamuliwiru yene-yene, akamoneke kushipara shaKarunga mukonda yetu atu popere.25Ghuye kapi akudjamba rukando rwarungi, yira momu karuwananga mu pristeli wamunene kehe mwaka kungena munkuru djugho munkonda yakupongekerera na honde yavi muna. 26Ashi ndi mongoli, Kristusa ndi kwahepa rwarungi shirugho shashire unene kutunda ku lishito lya udjuni. Ngoli ghuye kwashoroka rumwetupu ku uhura wamayuva aya kare ndjambo yakughupapo ndjo.27Yira momu tupu vaturapo ashi kehe uno muntu kufa rumwe tupu, ntani dina kukwamako mpanguro, 28na Kristusa naye, kwafa rumwetupu aghupepo ndjo davantu vavangi, shimpe nka nga ka vyuka shikando shauviri, kapishi waro mukaya upapo ndjo, nani ngoli ngaya kutapa liyoghoro kwavo vana kumutaterero.
101Veta kwakara tupu yira mundunduma wavininke vyaviwa vyakaro kumeho, ano ngoli kapishi vinke vyene vyene. Kwavo vakuya kwaKarunga kupitira muveta naku vhurashi kumangurura vantu kundjo na ndjambo odo vadjamberanga kehe mwaka. 2Ashi ndi mo ngoli, kudjamba ndjambo da kehe pano ndi kapi da shaya? Vakareli Karunga vakushuka shikando shimwe tupu ndi kapi vakara na liywi lya undjoni lya mumutjima. 3Ano ngoli ndjambo da kehe pano da kuvhurukita tupu ndjo da vantu kehe mwaka. 4Mukonda ashi honde, yantwedu nayi yavimpendje nakuvhurashi kudongonenapo ndjo da vantu.5Opo ayire Kristusa muno mu udjuni, kwaghambire ashi, "Ndjambo na vitapa kapi wavipanda, ano ngoli ove kwangwapayikira rutu; 6ndjambo da kushwakerera nadi da ndjo kapi wadipanda. 7Ame makura ani ghamba ashi, ''Kengenu, ame ghunopano ove veKarunga wande ame kwaya niyatikitemo matjangwa yira momo ghatanta muveta."8Pamuhovo aghamba ashi, "Ove kapi wahora ndi wapanda ndjambo, ndi vitapa, ndi ndjambo da kushwakerera, ndi da ndjo. Odino ndjambo varuwananga kutwara muveta. Ove kapi wadipanda." 9Ghuye aghambanka waro ashi, "Kengenu, ame uno kwaya niyatikitiremo mpango doye." Ghuye kwaya aya shayekitepo likwatakano lya kuhova aya turepo lyalipe. 10Muviruwana vyaweno, mbyo vatukushurura natuvantje kundjo detu pa kutapa rutu rwaYesusa Kristusa rukare ndjambo yarumwe tupu.11Kehe liyuva kehe uno mupristeli, kuyimana aruwane virughana vyendi, vyakehe liyuva vyakundjamba ndjambo yakehe liyuva yakuvyukuruka ngoli kundereko kughupapo ndjo. 12Kristusa kwadjambire ndjo da vantu ndjambo yimwe tupu ndjambo djuni, makura mbyo akashingira kurulyo rwaKarunga. 13Ghuye kuna kutaterera dogoro nkoko ngaka tulira Karunga vanankore vendi vakare ulyatero wampadi dendi. 14Na ndjambo yimwe tupu ghuye kwatikitiliramo vapongoki navantje kunaruntje nanaruntje.15Mpepo yakupongoka nayo kwatupa umbangi wavino. Pa kuhova aghamba ashi, 16"Weno mongani kukwatakano navo kumayuva ghakumeho, mo ana ghamba Hompa. Nganitura veta dande mudimutjima davo, ame ngani ditjanga munda yavo."17Makura atwikireko nka waro ashi, "Ame kapi ngani vhuruka ndjo na ukaro wavo." 18Opo pakaro lidongonono lya ndjo, kapi pa hepa kukara ndjambo yaku upapo ndjo.19Mpo ngoli, vaunyande weno tuna kara nalihuguvaro lya kukangena mundjugho yakupongokerera kupitira mu honde yaYesusa. 20Mbyo atupa ndjira yayipe yaliparu yapito munkonda, kuna kutanta ashi mururtu rwamwene. 21Mukonda ashi tuna kara na mupristeli wamunene wandjugho yaKarunga, 22tuyendenu na dimuctjima dakukutapa na lipuro lya ushili na di mutjima vamwayera da kushuko na liywi lya mumutjima lya kupira udjoni na marutu ogho vakusha na mema ghakukena.23Tukorenu ngoli mulihuguvaro lyetu olyo twatongononanga, munkondashi Karunga kuvhura kumuhuguvara ashi ghuye kuvhura kutikitamo matwenyidiro ghendi. 24Tukorangedenu ngoli umwe na unyendi tukare na shihoro ntani nakuruwana viruwana vyauhunga. 25Twasha shaghekenu vigongi vyamu mbunga kriste yetu, yira momu varuwana vamwe. Mpo ngolishi, tukukorangedenu unene kumuntu na unyendi momutuna kumona ashi liyuva lya Hompa kuna kutika papepi.26Nkene ashi kudjonena wina atwe twawana ukonentu mbyo twatambura mbudi ua ushili, kapi pakaranka ndjambo kehe yino yakudongononapo ndjo detu. 27Weno, kutatererako tupu lipanguro lya kutjilita na mundiro wakungongoma ogho ngaghu veveko vanankore vaKarunga.28Kehe ghuno wakudjona veta yaMosesa pa kare vambangi vaviri ndi vatatu ghuye ndje kufa pahana nkenda. 29Weni muna kughayara ashi lipanguro lya kuhura kuni olyo ngawana wakushentja mona Karunga, wakudina honde yalikukwatakano oyo vamu kushita ntani na kushwaghura mpepo yankenda?30Mukonda ashi atwe twamuyiva ogho aghambo ashi; "Nkoko yande; ame nagani vyuta rughoko." Mo ana kughamba Hompa, ntani "Hompa ndje ngapanguro muhoko wendi." 31Lihudi lya linene lya kuwira mumaghoko ghaKarunga wamonyo!32Vurukenu kumayuva ogho akapito, opo shayire shite papenu, anwe kwakalire na lididimiko lya linene muruhepo rwenu. 33Pavirugho vinya kava mushwauranga na kumutuka na kumuhepeka muvi kenge mantjo ghavantu pavi rugho vimwe anwe kamukupakeranga navantu ovo kavaruwanango vyakufana ngoweyo. 34Anwe kamupakeranga mbili vaka dorongo, ntani kava mushakananga limona lyenu. Mukonda anwe mwayiva ashi mwakara na limona lya kukarererapo.35Kapishi mushuve lihuguvaro lyenu, lya kara na mfuto yayinene. 36Karenu na lididimiko muruwane ovyo vyayendo Karunga kumutjima, ngamukawane matwenyidiro ghenu. 37"Mushirugho shashifupi, makura ogho ana kuyo ngayatike pahana kukara maranga.38Vahungami vande ngava parukira mu lipuro. Ano ngoli nkene tupu ava vyuka kuruku, mutjima wande na kuvahora nkashi waro." 39Ano ngoli atwe kapishi vantu vakuvyukanka kuruku ovo ngava kadjonauko, atwe kwakara nalipuro ntani monyo detu ngadi kaparuke.
111Lipuro kutanta ashi lihuguvaro lyalinene lya vininke ovyo tuna kutaterera ntani kwakara umbangi wavininke ovyo twa piranga kumona. 2Kutantashi mulipuro movawananga vakurona vetu uhungami waKarunga. 3Mukonda yalipuro atwe twayiva ashi Karunga kwashita udjuni na nkango yendi, vininke vina kumoneko kwatunda kuvininke vyaku pira kumoneka.4Mukonda yalipuro Abeli kwadjambire ndjambo yakupitakana ndjambo yaKayini, ghuye mulipuro mo awanine umbangi ashi ghuye muhungami, mukonda Karunga kwatapire umbangi ashi ndjambo yendi yahungama, ntani lipuro lyendi shimpe kuna kughamba kuliyuva lya namuntji nampili momu ghafa kare.5Mukonda yalipuro Henoka kwamughupirepo apire kumakera mfa. "Kapi nka amonikire, mukondashi Karunga kwamu upirepo." Kumeho yakumughupapo, awana umbangi ashi ghuye kwayenda Karunga kumutjima. 6Pahana lipuro kwato wakuyenda Karunga kumutjima. Kehe uno wakuya kwaKarunga akare nalipuro ashi Karunga mpwali ntani ghuye ndje wakufuta vantu vana kumushano.7Lipuro kwarenkitire Nowa alimburukwe ku nkango da Karunga kuhamena vyakumeho ovyo vyapiliro kukarapo pa shirugho osho, ghuye kwalimburukire Karunga makura atungu wato waunene omo vavhulire kuparukira na lipata lyendi. muliparu lya weno, mo avhulire kupangura udjuni makura ghuye a wana uhungami waKarunga wakutundilira ku lipuro.8Lipuro kwarenkire Abrahamu, a limburuke opo amuyitire Karunga, ayende kushirongo osho ashanine kumupa shikare upingwa wendi. Ghuye kwayendire tupu, ahan kuyiva ashi kuni ana kuyenda. 9Lipuro kwamurenkitire akatunge mushirongo shamatwenyidiro akakare muna virongo mushirongo shapeke. 10Ghuye kwatatelire shitata shashinene osho ngaya faneka na kutateka ntani mudiki ndje Karunga.11Lipuro kwarenkitire Sara akare na marutu maviri ashampuruke nampili momu akurupalire unene, mukondashi ghuye kwakalire na lipuro ashi ngawana matwenyidiro. 12Mwauno mukafumu umwe tupu ogho vawanine ghuye akurupa movatunda vavangi yira ntungwedi dakuwiru da kuhura pa ndanda da musheke wakuntere yalifuta wakupira kuvhura kuvarura.13Navantje kwafelilire lipuro vahana kuwana matwenyidiro kwaKarunga. Vavo kwavimonena tupu ku ure mbyova pura na kutambura kumwe nakukutongonona ashi vavo vayeni kuntunda yalivhu. 14Vano vakughamba weno vakutoghorora ashi vavo kunakushana shirongo shavavene.15Ashi ndi vavo kuna kughamba shirongo aosho vahovire kutunga, vavo ndi vavyuka kukwavo. 16Ano ngoli, vavo kuna kushana shirongo djuni, shamuliwiru. Mposhi Karunga kwato kukuyivha ntjoni pa kumutwenya vavo ashi Karunga wavo, ghuye kwava wapayikira shitata shavo.17Lipuro kwarenkitire Abrahamu, aka djambe monendi Isaka, opo amushetekire Karunga. Monendi ahuru ti, ogho ngakawano matwenyidiro. 18Abrahamu kwamutantelire ashi, " MwaIsaka mo ngamu katundilira ruvharo roye." 19Abrahamu aghayara ashi Karunga akara nankondo ngavhura kukavhumbura monendi Isaka ku vafe, ndi tughambe tupu ashi, kwamu vhumbulire Isaka atnde kughufe.20Lipuro kwarenkitire Isaka atungike Yakopo na Esaghu ngava kawane matwenyidiro ghakumeho. 21Lipuro kwarenkire Yakopo atungike vana vaYosefu vaviri, ghuye pepi na mfa. Yakopo akurumana shipara shendi atu mutwe wendi, pa mpango atongamene Karunga. 22Lipuro kwarenkitire Yosefu, Opo akalire pepi namfa dendi, aghamba vyakuhamena mudiru wava Isragheli ntani ghuye ava tanter weni omo ngva ruwana vifupa vyendi.23Lipuro kwarenkitire vakurona vaMosesa, opo vamushampurukire, vamuhoreke makwedi matatu mukonda vamoneshi mwanuke wamuwa, vapire kutjira veta yaFaragho. 24Lipuro kwarenkitire Mosesa opo akulire, ashwena kumutwenya ashi wamona Faragho wamukadi. 25Ghuye atoghorapo mukumuhepeka kumwe na muhoko waKarunga kupitakana mukukara mu ruhafo rwandjo rwashirugho shashifupi. 26Ghuye kwamonekire ashi, lishwaghu mwaKristusa ghuye kwalimonine ashi limona lya linene unene lya pitakana ghungagho wamu Egipite. Mukonda ashi ghuye kwatambire mfuto yakumeho.27Lipuro kwarenkitire Mosesa atunde mu Egipite. Ghuye kapi atjilire ghugara waHompa, ntani akara na lididimiko yira ndjeghu amonino Karunga wakupira kumoneka. 28Lipuro kwarenkitire vatameka kudana shilika shaPaska kumwe na kumwayera honde, kumavero mposhi mudipayi wavanuke vambeli apire kuguma mbeli dadirume dava Isragheli.29Lipuro kwarenkitire vaIsragheli vavindakane mulifuta lya ligeha yira livhu lya likukutu. Ano ngoli vaEgipite opo vakambadalire kuvindakana ava fu kumema. 30Lipuro kwarenkitire makuma ghaJeriko ghabomaghuke, opa vayi kundurukire mayuva matano-namaviri. 31Lipuro kwarenkitire Rahaba waruntjo apire kufa kumwe na vantu vaurunde, mukonda ghuye kwatambulire na kuhoreka vakafumu vaviri.32Vinke vyavingi ovyo tuvura kughamba? shirugho kapi shitu pulitira nkene tughamba vyakuhamena kwaGidyoni, na Baraka, na Simisoni, na Jefuta, na Ndafita, na Samwel ntani vyakuhamena vaporofete. 33Lipuro kwarenkitire vafunde virongo, varuwanene ghuhungami, ntani vawane matwenyidiro. Vavo kwapatire tunwa twava nyime, 34ava dimita mundiro wankondo, avaparuka lighonga lyavanankore, ava veruka kumaghuvera ghakukushuva-shuva, ava wana nkondo da kurwa vita. ntani ava wana nkondo da kufunda vana nkore vavirongo peke.35Lipuro kwarenkitire vaka mali vamone vakafumu vavo vakavhumbuke mumfa. Vamwe kwava hepekire unene, ngoli ava shwena kukutapa ashi, nampili vafe ngava vhumbukira monyo waghuwa wakupitakana wapa livhu. Vamwe kwava hepekire unene, ngoli ava shwena kukutapa ashi, nampili avafu ngava vhumbukira monyo waghuwa wakupitakana wapa livhu. 36Vamwe kwava shentjire na nakuvashepura, na kuva manga namauketanga kumwe na kuvatura mudorongo. 37Vamwe kwava dipayire namawe. Vamwe kwava dipaghire nakuvataghura mukatji. Vamwe kwava dipayire namaghonga. Vamwe kavarenda-rendanga. vavo kudwata vipapa vyandjwi na vimpendje. Vamwe kwakalire muruhepo, kwava hepekire, nakuvaruwana mwamudona. Matjangwa ghamwe kwatanta ashi, kwava dipaghire namawe. Nakutaghura marutu ghavo mukatji. kwakalire mumasheteko ghamanene. Kwava dipayire namaghonga. 38Udjuni kapi wava wapilire. Vavo kava renda-renda nga mumburundu na kuma ndundu, kumarupako na kumakwina ghamulivhu.39Ovano navantje kwafumanine unene mukonda yalipuro lyavo, vavo kapi vawanine matwenyidiro ghavo. 40Karunga kwatu pungulira vininke vyaviwa, ghuye kapi ashanine ashi vavo vatikitemo shiruwana shavo shalipuro atwe twahana kukarapo.
121Weno, tuna kara nambunga yayinene yavambangi oyo yina tukundurukido, tushuvenu ngoli mudgho wandjo odi dina tungilikido. Makura tudukenu na lididimiko mumarumbatano oghano ana karo kumeho yetu. 2Tukengenu mantjo ghetu kwaYesusa, mukonda ashi lipuro ndje alitameko ntani mbyo alitikitiliramo. Ghuye kwakudidimikira mfa da pa shikurushe, kapi aku fire ntjoni, ghuye weno akashingira kurulyo rwalipuna lya Karunga. 3Ghayarenu ngoli, ogho akudidimikiliro unkore wakuhurapo omo vamuruwanine vakandjo, mposhi mudire kuroroka na kudompa mutjima.4Mukurwana kwenu nandjo shimpe kapi muna rwana dogoro mumfa dene-dene; 5Anwe kuna vhurama makorangedo ogho vatapa kwavana vaKarunga ashi: "Monande, kapishi udine lipuro lya Hompa, ntani washa dompa mutjima nkene kuna kukuvyukita mundjira yauhunga. 6Mukonda ashi Hompa kuvyukita kehe uno ahora, ntani kutengeka vana ovo vayo kukwendi."7Muna hepa kudidimika nkene kuna kumuvyukita. Karunga kuvyukita vana vendi. Ndi mpwali mona ogho vapiranga kuvyukita vashe? 8Nkeneshi anwe kundereko ukaro wauwa, ogho vakara nagho vana navantje, anwe vamushwa kapishi muvana vendi.9Mukuwederako, atwe twakara na vashetu vapalivhu vakutuvyukita ano ngoli shimpe twava fumadeka. Tuna hepa kulimburuka unene kwashetu wapa mpepo ngatu kakare namonyo! 10Vashetu vapano kutuvyukita tupu shirugho shashifupi kutwara mu ukonentu wavo. Ano ngoli Karunga kutu vyukita ngatu kawanenemo maghuwa ghetu, ntani natwe ngatujawaneko kughupongoki wendi. 11Shirugho nashintje shakukuvyukita kapishi shakuyita ruhafo, mposhi ukore. Ano ngoli kuruku kukayita mbili yaukaro wauhungami kwavo vapito madeghuro ghaweno.12Weno yerurenu maghoko ghenu ghakupira nkondo ntani shaghekenu kukankama mungoro denu. 13Yendenu mundjira yakuvyukilira, mposhi vantu vavirema vaveruke uvera kapishi ukuwederere.14Kondjenu kukara nampora na kehe uno, ntani karenu mughupongoki, mbyovyo ashi nkene ghupirapo kapi ngamukamoumona Hompa. 15Takamitenu ashi kundereko umwe mukatji kenu wakutunda ku nkenda yaKarunga, ndi akare yira ndandani yaghureru vavangi ku ushungi wayo. 16Kehe uno warushonda ndi mundjoni wakufana yira Esaghu ogho aghulitiro umbeli wendi kundjwata muyusha umwetu. 17Mwayiva ashi kuruku yashirugho, ahanine ashi akare mupingi wamatungiko ava mushwena, mukondashi kapi pa kalire livango lya kupulitira. Lashi likarepo, ghu kwaghuholire unene dogoro alilirimo.18Anwe kapi mwaya yira momu vayire vaIsragheli kundundu yaSinayi yakuvhura kuguma muntu yakutwedera mundiro, ndi mundema, ndi dovera, ndi likundungu oli lya kaliroko. 19Kapi mwaya ku liywi lya marumbendo, na liywi lya kudameka unene opo valiyuvire ava kanderere ashi kapishi lighambe navo. 20Mukonda ashi vavo kapi vavhulire kukudidimikira mpangero odo vavapire ashi, "Kehe shino shikorama shina gumo kundundu, vashi dipaye na mawe." 21Limoneko lya udito unene lya kaliro makura Mosesa aghamba ashi, "Ame natukuka kuna kukankama."22Mpo ngolishi, anwe kwaya kundundu yaSiyoni kushitata shaKarunga wamonyo, ku Jerusalema yamuliwiru na mayovi ghava Engeli vana karo mushipito. 23Anwe kwaya ku lipongero lya mbunga Kriste yambeli, kwavo vatjanga muliwiru. Anwe kwaya kwaKarunga, mupanguli wanavantje ntani na mpepo da vahungami ovo vatikiliromo. 24Anwe kwaya kwaYesusa, ogho ayito likukwatakano lyalipe, ntani honde yendi kwatekera papetu yayo kughamba vyaviwa kupitakana yaAbeli.25Kengenu walye muna kupira kutambura liywi lyagho ana kughambo nanwe. Vavo kapi vavhulire kutundamo mukondashi kapi vavhulire kulimburuka kumarondoro ogho vawanine pano pa livhu, omo ngaghukavhura kutundamo ne weni nkene ghuna shwena kulimburukwa kwagho wamuliwiru ogho ana kughambo nove. 26Pamwe, liywi lyendi kwakankamitire livhu. Ano ngoli shirugho shino ghuye kwaghamba ashi, "Shimpe nka shikando shino kapishi livhu pentjako ngani kankamita, nani ngoli na liwiru nalyo.27Odino nkango, "Shmpe nka," kutanta ashi kushorora nawa-nawa vininke ovyo vashita, ngava vikankamite ngavitundepo makura vyakupira kukankama ngavi karerepo. 28Mpongolishi, mukukawana untungi wakupira kukankama, tupandurenu ntani tuwaperenu Karunga nakumuruwane na lifumadeko na utjirwe. 29Mukondashi Karunga wetu mundiro wakuveveka.
131Karenu na shihoro navaghunyenu vamwaKristusa. 2Kapishi ngamu vhurame kutambura vagenda mumandi ghenu. Mukondashi vamwe ovo kava ruwanenango weno, kuva tamburanga vaEngeli vavo vahana kuviyiva.3Kehepano vhurukenu vakadorango yira kumwe tupu navo muna kara. Vhurukenu ovov vana karo muruhepo yira kumwe tupu navo munakara. 4Nkwara vana hepa kudifumadeka navantje, ntani ghuro wankwara ghukare ghuna pongoka, Mukonda Karunga ngaka pangura vantu varushonda navo vakutjora nkwara.5Kapishi mukare nalidogho lyavi maliva. Ovyo muna kara navyo vina gwaneke, mukondashi Karunga mwene kwatanta ashi, "Ame kapi nganimushuva ndi nganitunde papenu." 6Vino tuna karo navyo vina gwaneke makura tukare nalihuguvaro ashi, "Hompa ndje mukwafi wande; Vinke ovyo natjira. Muntu atompore vinke kukwande?"7Vhurukenu vampititi venu, ovo vamuyuvitire nkango da Karunga ntani mughuyare ukaro wavo. Upenu shihonena shalipuro lyavo. 8Yesusa Kristusa ndje kakaropo yona, namuntji naruntje na naruntje.9Kapishi ghamupukite marongo nagho peke. Ghuwa unene nkene ashi dimutjima denu adiwana nkondo kunkenda yaKarunga, kapishi kundya dapa veta odo dapiro kukwafa ovov kava dilyango. 10Atwe kwakara nashidjambero osho vashweneka ashi nakuvhurashi kulyeramo vapristeli ovo varuwanango mo mu ntembeli. 11Honde yavikorama ovyo vana dipagha vadjanbere kundjo kuyita kwamupresteli wamunene ayi tware minkonda yakupongokerera yikare ndjmbo yandjo, ntani vilyo navintje kuvishwakerera pandje yakamba.12Yesusa naye kwamonine ruhepo pandje yalivero, opo afire apongore muhoko na honde yamwene. 13Weno turupukenumo ngoli mukamba, tuyende ku kwendi tuka shimbe ntjoni dendi. 14Mukonda ashi atwe kapi twakara na shitata shakukarerapo pano. Ano ngoli atwe kuna tamba shitata oshi shinakaro kumeho.15Atwe ndjambo yetune yakutungauka Karunga kehe pano kupitura mulidina lya Yesusa. 16Kapishi muvurame kuruwana uwa ntani kuvatera-vaterenu mukondashi ndjambo da weno da yenda Karunga kumutjima. 17Nkene mulimburukwa kuva mpititi venu vavo ngava muruwanenena naruhafo kapishi namutjima koka, ndi kapi ngava mukwafa.18Tuturenu mundapero, mukondashi atwe twayiva nawa-nawa ashi twa kara na liywi lya Karunga lya liwa lya mumutjima mukondashi atwe kwahora kutungika navintje. 19Ame kuna kumukorangeda mukanderere unene nganikavyuke kukwenu wangu.20Karunga wambili ogho avhumbuko kughufe Hompa wetu Yesusa ogho anakaro mushita wamunene wandjwi, mukondashi honde yendi kwayita likukwa takano lya naruntje 21amupeko vininke navintje vyaviwa ovyo muna hepa mutikitemo vipango vyendi, ghuye aruwane mumwetu ovyo vyamuyendo kumutjima mwaYesusa Kristusa, ghuye vamufamedeke naruntje na naruntje. Amen.22Vaunyande, ame kuna kumukorangeda, tamburenu na lididimiko nkango da makorangedo, ame kuna dimutjangere pa ufupi. 23Kuna kumupukurura ashi unyetu Timoteghusi vamughupamo mudorongo, nkene ngani kuvinduka kuya ndi kumwe naye ngatuya tuyamudingure.24Mororenupo vampititi venu navantje na vapongoki navantje. Vaghunyenu vaItaliya navo vana mukunditiripo. 25Nkenda yaKarunga yikare papenu namuvantje.
