Bible

ወንጌል የሐንስሩዅ

1¹ሰልፍ ቆል ሰጞኲ እን ቆልኻ ጃርሊ ሰጞኲ እንቆልኻ ጃር ሰጞኲ፡፡ ² ኒ በደሮ ሰልፍድ ጃርሊ ሰጞኲ፡፡ ³ኒውካ ኒድ አኹዂ እን አኸውልዳ ኒት እጞገት ላሪ ድኳ አኽላ፡፡⁴ ኒል ፊኹት እርጉዂ እን ፊኹታ ቲዃ አዳምሩዂ እርጉዂ፡፡⁵ቲዃኻ ጭልምሊ በርሁዂ ፡ ደኣም ጭልም ከለብርለሉ፡፡⁶ጃርድ እንሻቅሳዂ ላግርዋ ዮሓንስ ይስታዂ ሰጞኲ።⁷ኒ ናውክ ኒድ ኤምንድኖ ቲኼስ ሳምዕድሮ ሳምዕ ኣኾ እንቱዂ።⁸ኒ ቲኼስ ሳምዕድሮ እንቱዂ ግን ግራ-ኒ ኒ ላውድ ቲዃ እርግላ ።⁹ቆል እርድሊ እንተራኹድ ናትክ ከውሊ በርህዳኹ እምንዲ ቲዃ ሰጞኲ፡፡¹⁰ኒ እርድሊ ሰጞኲ እርድ ኒድ አኹዂ እርድ ደኣም ኣርእምቢኹሉ፡፡¹¹እን ኒውሊ እንቱዂ እን ኒውኻ ከለብርኒሉ፡፡¹²እን ከለብርኖ አምነውሲሉ ደኣም ጃር ቁር አኽድኖ መሰል እዉኹሎም፡፡¹³ነን ጃርልድ እዃርስኑዂ ግራ ብርልድ ወሪ ሥኺልድ ወሪ ይኸ አዳምር እንከሊትልድ እዃርስኒ፡፡¹⁴እን ቂልኻ አዳም አኹዂ ይነልኻ ዔሩዂ፡፡ ይንጝኻ ኒ ሳቡርሲ ሳቡር ላዂ ኒኸርድ ኒኡኹራ አኽነዲን ጸጋድ እምንድክ እንታኾሉ ቋልንኹንሉ፡፡¹⁵ዮሓንስ ኒድ እናሃበ ተብዶ ጋቢዂ እን ይደንቢ እንተራዂ ይጃብ እርግነዲን ይልድ ኒ ኩጞኲዮኩም እርጋዂ ኒን ግኒ ዮ ሳምዕዱኹሉ፡፡¹⁶ይጛ ናውክ ኒ እንተኽ ጸጊል ፡ ጸጋ ጸጋ አወይሲ ከለብርንኹን ፡፡¹⁷ውረድ ኦሪት ሙሴሲ እንቱኹና ጸጋዲ ሸተክነዲኻ ኢየሱስ እውስቱኹና¹⁸ላዂ ድኳ ጃርሲ ቛላኹ እላ፡፡ እን ላዂ ጃርኹራ ኒ-ኽርድ ንሐርሊ ህምባዂ ኒ-ካያ አርእሲሱኹና፡፡¹⁹ዮሓንስ ምስክራ ኒን አይሁድ ኢዮሩሳሌምትልድ አቅሸትዲ ሌዋውያንዲ እንቲ አውኒ ይኖ ወንቀርድኖሉ እንሻቕነሰነሉ፡²⁰አን ክርስቶስ አኽሊ ዮሎም እምን ዩዂ ግራ ላሪ በረይላ፡፡²¹ናዋ ኮድኖ እማ ኤውኒ እንቲ ኤልያስማ፤ ይኖ ወንቀርኑኹ፡ ኒኻ አኽሊ ይኹሎም፤ ናዋ ነቢማ እንቲ፤ ይኑኹሉ፡ ኒኻ አኽሊ ይኹሎም፡፡²²ናወኻ ኮዶ እን እንሸቐውድና ውራ ይንንሎም እንቲ አውኒ ግኒ ኩሱጝሲ ውራይቶና ገረስራኹን፤ ይኑኹሉ፡፡²³ኒኻ ክልብርሰ አን እን ኢሳይያስ ነቢራ ያኹድሰና ጉግ ጃሩዂ ጠፍሕዳ ዮ አው ከደንሊ ድሪሳ ጋባ ግን ይኹሎም ፡፡²⁴እን እንሸቅሶ እርገው ፈሪሳንልድ እርግንነዲን፡²⁵እማ እንቲ ወሪ ክርስቶስ ወሪ ኤልያስ ወሪ ይኽ ነቢ አኸግራኽር ውሪዂ ጠመቅድራኹን፤ ይኑኹሉ፡፡²⁶ዮሓንስ አን ዓቂድ ጠመቅደኩንኩም እንኩኹን፡ ደኣም እንትን አርእግድናዂ እንታ ነበክል ህምበኲ፡፡²⁷አን ኒ ሻንፍፋ አስርከትሲ እንክያ ወጀበጋኹሉ እንታ ነበክል አንጦጠሎ ህምበኲ ይጃብ ሰቐዂ ይደምቢ ኒ ግኒ ዮ ወንተስኹሎም ፡፡²⁸ኒን ኒውክ እንደራ ዮርዳኖስር ካርጝል እን ዮሓንስ ጠመቕዱ እርገሪ ቢታንያትል ኣኻዂ ግን፡፡²⁹ዮሓንስ አን ዓቂድ ጠመቅደኩንኩም እንኩኹን፡ ደኣም እንትን አርእግድናዂ እንታ ነበክል ህምበኲ፡፡³⁰አን ኒ ሻንፍፋ አስርከትሲ እንክያ ወጀበጋኹሉ እንታ ነበክል አንጦጠሎ ህምበኲ ይጃብ ሰቐዂ ይደምቢ ኒ ግኒ ዮ ወንተስኹሎም ፡፡³¹ኒን ኒውክ እንደራ ዮርዳኖስር ካርጝል እን ዮሓንስ ጠመቕዱ እርገሪ ቢታንያትል ኣኻዂ ግን፡፡³²ዮሓንስ ናሃበ መስከሩዂ መንፈስ ሻትክ ኳትራ ተኩንሲ፤፤ ዓስተልድ ገሙ ቋልኹን ኒ አወይስኻ ከፍ ዩዂ፡፡³³ኣን ይሹሺ ኤርኡሉ እርግሊ ሰኣም እን ዓቍድ ጠመቕድያ እንሸቁዂለ፡፡ እን መንፈስ ሻትክ ኒአወይሲ ገሙ ቛልዳዂ ኒ ግን እን መንፈስ ሻትክድ ጠመቕዳዂ ይኹለ፡፡³⁴ኣንኻ ቛልዂን ኒ ጃርዂራ አኸት ሸርዂን፡፡³⁵ኒኤመሪትል ዮሓንስ ለጛ ኒታለይቶትዲ ደውዮ ዋኑ፡፡³⁶ኢየሱስ ደኳዂሲ ቛሉዂ እማ እነሐኒ እን በጋ ጃሩዂ ዩዂ፡፡³⁷እን ለጛ ኒ ታለይሮቶትታ ኒስ ዋስነሰና ኢየሱስዲ ፈርኑዂ፡፡³⁸ኢየሱስ ግልጭዮሰና ኒ ጉርበት እንተረውሲ ቛሉኹሎም ውራ ጀረብደናኹንካ ይኹሎም፡፡ ናዋ ረቢ (መምህር ይና ግን) አዊል ግን ኲ መስካብ፤ ይንኹሉ፡፡³⁹ንኻ ላዃ ይኹሎም፡፡ ፈርኖኻ አዊል ኣኸት ቛልኑዂ እን ግርግስኻ ኒዲ እርግኑዂ፡፡ ወክትኻ ሰዓት ሰዃ ኣኾ እርጉዂ፡፡⁴⁰እን ዮሓንስር ጋብሲ ዋሶ ተለየውልድሉ ላዂ እንድርስዲ ኒዳን ስምኦን በጥሮስዲ ግን፡፡⁴¹ኒ በደሮ ስምኦን ኒ ዳንሲ አርዂ እማ (-- ክርስቶስቲ) አርንኹንሉ ይኹሉ፡፡⁴²ኢየሱስትልኻ ኤድኹሉ ኢየሱሳ ተጝሰ ማኻልቶሉ፡ እንቲ ስምኦን ዮናዂራ ኬፋ (-ሸሻ) ይስትሮ ሽሽትቶ ግን ኒንኻ ቤጥሮስ፡ ሸሻ ይና ግን፡፡⁴³ኤመሪትል ኢየሱስ ገሊላትል ፈሩ ፊሊጶስቲ አሩዂጉ ለሸኪለኻ ይኹሉ፡፡⁴⁴ፊሊጶስ ቤት ሳይዳሩዂ እንድርያስዲ ቤጥሮስዲሲ ናኮዂራ እርጉዂ፡፡⁴⁵ፊሊጶሳ ናትናኤልቲ ኤሩዂ እማ እን ሙሴዲ ነቢታትዲ ኒድ ከተብናዂ ኢየሱስ ዮሴፍዂራ ናዝሬትሩዂሲ አርንኹንሉ ይኹሉ፡፡⁴⁶ናትናኤላ ናዝሬትልድ ውሪ ትክያዂ አርስሮ ይሮ እንትኽር ይኹሉ፡ ፊሊጶሳ ላዂ ቛሊ ይኹሉ፡፡⁴⁷ኢየሱሳ ናትናኤልቲ ኒል ኣኽታሲክ እንተራዂሲ ቛለሰና እናሓኒ እምንድክ ምቍልናር ኤርእጋዂ እስራኤላዊራ ዩዂ ፡፡⁴⁸ናትናኤላ ኣዊል አርእሪለ ይኹሉ፡፡ ኢየሱሳ ፊሊጶስ ሽጝጊካ በለሰር ሱቄይሲ ዋንትሩ ቛልኹንካ ይኹሉ፡፡⁴⁹ናትናኤላ ረቢ (መምህር) እንቲ ጃሩዂራ ንጉሥ እስራኤልዱዂ ግን ይኹሉ፡፡⁵⁰ኢየሱሳ ክልብር ሰሉ በለሲ ስቄይሲ ቛልኹንካ ይነዲንካማ እምንድኹን፤ ኒልድ ኩኝዂ ቋልቶ ግን የኩንካ ይኹሉ፡፡⁵¹ንድደምቢ እምንድክ ይየኩም ዓስተር ብስቶ መላእኽቲ ጃሩ ኣዳሚንድዂሪ አወይሲ ዓረገውር ገመውር ቛልትኖ ግን የኩንኩምኻ ይኹሎም፡፡

2¹ሰዃ ኳራ ደምቢኻ ድገ ቃና ገሊላትል ክኻን እስቲዂ ኢየሱሲ ኒገናኽር ኒል እርግቲ፡፡ ²ኢየሱስር ኒ ታለየቱትዲ ኒል ሽጝስቶ እርጉዂ፡፡³ሚድ ዱጙስቶሰናኻ ኢየሱስቲ ኒገና፡ ሚድ ግን ሻኽኒኻ ይቲሉ፡፡⁴ኢየሱሳ እንቲ እዂና ኩዲኻ ውራ ዋነለ ፡ ይወክት ገእዮ እላ ይኹላ ፡፡⁵ኒ ገናኻ እን ምዳሰውሲ ኒያዂሲክኩም እሳ ይቲሎም፡፡⁶ና ዓደትሰና ለጭሀናው አይሁድ ወልታ ጀንትት ከልኣን ክርጚው ኒል እርጉዂ፡፡⁷ኢየሱሳ እን ሙነተውሲ ጀንትትሲ ዓቁድ እንሰኻ ኽሎም ይኹሎም፡፡ ኤብል አኽታሲካ እንሳዂኑኹሎም፡፡⁸ናን ቀደኽድኖ ዳስ አደሪል አድኖፈረሉ ይኹሎም፡፡ ናውኻ አድኖ እውኑኹሉ፡፡⁹እን ዳስ አደራኻ ዓቍሚድሊ በደልሰውሲ ታመሰና አዊልድ እንተት ላሪ አርእግኻ እን መርዓዊ ራስ፡¹⁰ሽጞኻ ከው ናውክ ሰክፍሚድ መለምልሲ ሱክሰኲ ደምቢረድ ሸከርኖሰነኻ እን ኪያዎውሲ ሱኩሰኲ እንቲኻ እን ሚድሽኻሩሲ ናን አኻሲክ እንኩርዱኽሎም ይኹሉ፡፡¹¹ኢየሱሳ እና ኒ ሰልፍ አምርሲ ድገ ቃና ገሊላሩኹር እሲዂ፡፡ ኒሳቡር ቛሊሱዂ ኒ ታለይቶታ ኒድ አምኑዂ፡፡¹²ኒደምቢ ኢየሱስ ኒገናዲ ኒታለይቶትዲዲ ቅፍርናሆምትል ገምዂ፡፡ ኒላ ግርጋት ግጁዂ፡፡¹³13.በዓል ፋጅኻ አይሁዱዂ ስኩሮ እርጉዂ ኢየሱሳ ኢዮሩሳሌምትል ፊዂ¹⁴14.ቤት መቅደስሊ ኻ ቢልዲ በግዲ ኳትርዲ ሰላዲዲ በደላውዲ ዲኒኹሉ፡፡¹⁵15.ገመርድ ሐለንጊራ እሰኻ ቤት መቅደስልድ ናበግዲ ናቢልዲ ናትክ ዳገኑኹሎም እን ሰላዲ በደለውዲ እንድባት ሲኽር ግፍትእዶ ፈተታሕሲኹሎም፡፡¹⁶16.እን ኳትር ክደውሲኽር ናሰና ናትክ ህየሎም ይኽርድ ልጝንሲ ዕዳጊ ልጝን እሰጋ ይኹሎም፡፡¹⁷17.እንሲን ኒታለይቶት ሕርሳ ኩልጝኑዂ ቍኹሉ ያዂ ክቱብሲ እልብድኑዂ፡፡¹⁸18.ንድኻ አይሁድ እንቲ ነስ እስራኽር ውሪ ሻሮት ቛሊስቶና ገረስራኹን ይኖ ወንቀርኑኹሉ፡፡¹⁹19.ኢየሱሳ እና ቤት መቅደስሲ ህገግደሉ አንኻ ሰኻ ኳረድ ጉድሪሉ ይኹሎም፡፡²⁰20.አይሁድ እና ቤት መቅደስ አርብያዲ ወልታ አመረድ ገበርሳዂሲ እንቲማ ሰዃ ኳረድ ገበርዳኹንሉ ይኑኹሉ፡፡²¹21.ኒ ደኣም ቤት መቅደስ ኒጎሮብኹድ ግኒ ኒ ጋበኹሎም፡፡²²22.ንድኻ ክሪልድ ጎሰና ኒታለይቶት ነስ ዮሎም እርገት ክቱባትድር እን ኢየሱስ ዮ እርጋ ጋብድ ኤምኑዂ፡፡²³23.ገሪዋ እን በዓልድ ኢዮሩሳሌምትል ዋኑ እሰውሲ ቛልነሰና ኒሱጙድ ኤምኑዂ፡፡²⁴24.ኢየሱስ ደኣም ናትክ ኤርኡሎም እርግነዲን ኤምንለሎም፡፡²⁵25.እን ከወል ህምባ ወራታትሲ ኒላውድ አርእነዲን ከው አሪው ድዊድኖሉ ጀረብዱሉ እርግላ፡፡

3¹1 ፈሪሳንልድ ኒቆዲሞስ ይስታዂ ግርዋ ላዂአይሁዳ ሲም እርጉዂ፡፡ ²ኒን ቂር ኢየሱስትል እንቶ፡ መምህር ጃር ኒዲ ህምባዂ አዳም ካያ እሰኲ ግን ግራ እና እንቲ እስራ አምራትሲ ኒላውድ እሳዂ ኒዀርሲክ እላ፡፡ መምህር አኽሮ ጃርልድ እንትረት አርእንኹን ይኹሉ፡፡³ኢየሱሳ ኣዳም ሐዲስድ እዃርሰገን ሲመር ጃሩዂሲ ቛለገት እምንድክ የኩንካ ይኹሉ፡፡⁴ኒቆዲሞሳ ውራ ኣዳም ገኖ ደምቢ ኣዋኸ እዃርሳኹን ሊጞር ኒገነር እርሕምሊ ወንተሮ እዃርስሮ ገረሳዂማ ይኹሉ፡፡⁵ኢየሱሳ እምንድክ ይየካ ኣዳም ዓቍዲ መንፈስዲሲ እዃርሰገን ሲመር ጃሩዂል ትወላ፡ የኩንካ፡፡⁶እን ስኺድ እዃርሳዂ ስኻ ግን እን መንፈስልድ እዃርሳዃ መንፈስ ግን፡፡⁷ሐዲስድ እዃርስትኖ ህምበኩኩም ይነዲንካ ፈከርስግ፡፡⁸ወልወል ኒ ጀረባዂሊክ ወልወልደኲ ደኣም ኒ ደሄይሲ ዋስረኲ ግን ግራ ኣዊልድ እንተረትር አአዊል ፈረትኽር ላሪ አርእለሉ እማ መንፈስልድ ኡዃርሳኹ ንሰና ግን፡፡⁹ ዩ ወንተስኹሉ፡፡ ኒቆዲሞሳ ክልብርሰ ኒን አዋኸ ግን ኒኣክና ይኹሉ፡፡¹⁰ኢየሱሳ ውራ እንቲ መምህር እስራኤልዱዂ ኣክሩማ ነስ አርእጝ ብራዂን ይኹሉ፡፡¹¹እምን እምንድክ ይየካ ይን አርእናዂሲ ጋብነኩን እንቛልናዂሲኽር መስከርነኩን እንትጛ ይና መስከርነስ ጉሽነኩሉ እንኩድኑዂ፡፡¹²ብሪ ወራትድ ድወንኩም እምንግድናኽር ዓስተሩውድ ወራትድ ድወንኩም ደኣም ኣዋ ሃብዲነ እምንትኖለ፡፡¹³እን ዓስተርልድ ገማዂ ላዂ ኣዳሚንድዂራ አኽገት ዓስተርሊ ዓረጋዂ ላዂ እላ፡፡¹⁴14.ኣዳሚንድዂሪል እምናዂክ ዲመሲ መናብረት አርዶ ግን፡፡¹⁵እን ሙሴ አው ከደንሊ ምራወስ ካኒል ከርከርዳዂድሰና ኣዳሚንዱኹራኽር ኒሰና ከርከርስሮ ህምበኩሉ፡፡¹⁶ኒድ አምናዂክ ዲመር መናብረት፡ ኤርዶ ግን ግራ ድድጊን ጃር እርድሲ እንከልነዲን ላዂ ኒዂረስ ኒእንከላዂሲ ሰደቀት ፈሱዂ፡፡¹⁷ውረድ ጃር ላዂ ኒ እዂረስ እርድሊ ኒ እንሻቃዂ እርድሲ ኒድ ደኤንድሮ ዮ ግን ግራ ፈረድሮ ዮ ኣኽላ፡፡¹⁸እን አምናዂ ድድሮ ኣኽላ እን ኣምንጋዂ ደኣም ላዂጃርዂሪ ሱጝድ ኣምናጋዂ ደኣም ድዳዂግን፡፡¹⁹እን ኒ ድዳኻ ነዋያዂ ግን ቲዃ እርድሊ ትልጭ ዩዂ ከዋ ናወራት መቍል ኣኽነዲን በርህልድ ጭልምሲ ፍሪርኑዂ፡፡²⁰ሙቍላ እሳኹክ ኒውክ በርህሲ እንጣሮኲ እንከለላ ኒ ወራት ሙቍልናሩዂ ቛልስጊንሉ ጭልምሲ እንከለኲ፡፡²¹እን ትክ ያዂ እሰንታ ደኣም ኒወራት ጃር ጃብል ኒ ወርክናር ቃልስትሮሉ ዮ በርህሊ እንተሮኲ ይኹም፡፡²²ኒ ደምቢ ኢየሱስ ኒ ታለይቱትዲ ይሁደር ብሪል ፈሩዂ፡፡ ኒላ አኾ ጠመቅዱ እርጉዂ፡፡²³ዮሓንስር ሄኖንትል ሳሌም ገቢል ዓቍ ገሪው እርግነዲን ጠመቕዱ እርጉዂ እን ከዋ ኒል እንተሪነክ ጠመቅሱኑ እርግኑዂ፡፡²⁴ውረድ ዮሓንስ እንሸውስጊ እርጉዂ፡፡²⁵እንሲን ዮሓብስር ታለይቶትዲ ላዂ ኣይሁዳዲ ላጭሕኒ ሰበትድ ካሐሐድስጚኒዂ፡፡²⁶ዮሓንስትል እንትኖኻ መምህር እንዮርዳኖስር ካርጝል ኩዲ እርጋዂ እንቲ መስከርዳኹሉጠመቅደኲ እንኲዂናውካ ኒል ፈረነዂ ይኑኹሉ²⁷ዮሓንስ ዓስተርልድ ኡውስተጋኹሉ አከገን ኣዳም ኒላውድ ላሪ አድሮ ገረሰላ፡፡²⁸ኣን ኒጃብ ጃብል እንሻቅሳኽር ግን ክርስቶስ አኽገት ዮኩም እርገት እንትጝር እንተላውድ ዋስድኑኹሉ፡፡²⁹ስርጉ ሻዂ ኒ ግን መርዓዊራ እን ኒት ዋሳዂ ማዳኻ መርዓዊሪ ጃጝስትነድ ነገሰኲ እማ ኒ ፈርሐት ከላእግን፡፡ ገድም ይፈርሐት አቅትኹለ፡፡³⁰ኒ ክብይሮ አጛ ለጥያ ዋጅብ ግን፡፡³¹እን ዓስተርልድ እንዂ ናድካ ኣወይሲ ግን እን ብሪልድ እንታዃ ብሪዂ ግን ብሪዂ ኣኸነዲንኻ ብሪዂ ግን ኒጋብር ብሪው ግን እማ ኒሰና ዓስተርልድ እንተራዂ ኒድካ ኣወይሲ ግን፡፡³²ኒ ቛለውድ ኒ ዋሰውዲት ሰምዕዶኲ ደአም ኒ ሳምዕ ድነስ ከለብራዂ ላዂ ድኳ እላ፡፡³³ ኒ ሳምዕድነስ ከለብራኹካ ጃር እምን አኸት እሙር ሃበኲ፡፡³⁴እን ጃር እንሻቃዂ ጋብ ጃርዲት ጋበኲ፡፡ ጃርኒ መንፈስሲ መከሮ እወላ፡፡³⁵እኽር ኒዂረስ እንከለኩሉ ኒትካ ኒ ናንተል ኡዎሉ ህምበኲ፡፡³⁶እን እዂረድ እምናዂ መናብረት ዲመሩዂሲ ለውሮ ግን እን ኡኹረድ ኣምነጋዂ መሃግ ጃሩዂ ኒዳግ ገምሮ ግን ግራ መናብረት ዲመሩዂሲ ቛልዶ አኽላ፡፡

4¹እን ግርጋትሊ ፈሪሳን ኢየሱስ ዮሓንስሩልድ በጀኸው ታለይቶት እሰኩር ጠመቅደኩር ዮ ወሪሰውሲ ዋሱዂ፡፡ ²ኢየሱስ ኒላውድ ጠመቅድጊ ኒታለይቶት ጠመቅዱኑ እርገው አከነጝር ³ይሁዳር ብረስ ባሮ ገሊላትል ወንተሩዂ፡፡⁴ሰማርያድ ደኩሮኻ ጀረቢዂ፡፡⁵እን ያዕቆብ ኒኹራ ዮሴፍሲ እዋ ብሪ ገቢል አረርስረሪ ሲካር ይስትረሪ ድገ ሰማርያትልኻ እንቱዂ፡፡⁶ኒልኻ ያዕቆብ ግኽደሪ ኤባ እርግቲ ኢየሱስ ቂልሶ እርግነዲንኻ ፊኹ እን አበር ገቢል ከፍ ዩዂ፡፡ ወክታ ግርገፍ እርጉዂ፡፡⁷ላ እዂና ሳምራትሪኻ ዓቍ ወረድቶ ኒል እንትቲ ኢየሱሳ ዓቍ ጅእሲንለ ይኹሉ፡፡⁸ኒታለይቶታ ቍስታዂ ጅቢድኖ ድገትል ፈርኖ እርግኑዂ፡፡⁹እን እዂና ሳምራትሪኻ እንቲ አይሁደዊራ አክሩንሲክ አዋህብረ ግን እንቲ ይት ሳምራዊራት ዓቍ ጅእሲለ ይራኹን ይቲሉ ኒንኻ አይሁዲ ሳምራውያንዲ እኺኺርሊ ሱኩሩኑ ሰጞኒ፡፡¹⁰ኢየሱሳ እውን ጃሩዂዲ እን ዓቍ ጅእሲለ ያዂዲኪ አውኒ ኣኸት አርእረን እንቲ ወንተርዶ ሺዊትድሉ ኒኻ ዓቍ ፊኹቱ ኡርድኪ ዩ ወንተሰኹላ፡፡¹¹እን እዂናኻ ዎ ይኣደራ አባኻ ሺረሪ ግን ቀዳኺ ሰናኻ እጝግራኽር ዓቍ ፊዂቱሲ አዊልድ ናቕስቶግረስራኹን፡፡¹²እንትማ ይናኽር ያዕቆብ እና አበት ኡዋኹ ኒድ ኒቁርዲ ኒማልዲ ንርትልድ ጅኡኑ ሰጞናዂልድማ ኪድሮ ይቲሉ፡፡¹³ኢየሱሳ እና ዓቍነልድ ጀኣዂ ኮዶ ሱቛንቶዂ፡፡¹⁴እን ኣን ኡዋ ዓቍልድ ጀኣዃ ዲመሲ ሱቛተላ እን ኣን ኡዋ ዓቍ ኒርሕሊ ዲመሲ ጅብርዳሪ ዕሊ ዐቄሪ አኽሮሉ ግን ይኹላ፡፡¹⁵እን እዂናኻ እማ ያዳራ ደምበር ኳራ ወረድጊን ነትር እንትጊን ውራ እን ዓቍልድ ናከለለ ይቲሉ፡፡¹⁶ኢየሱሳ ፈሪ ኩራጝሲ ሽሽ ነት ላዂ ይኹላ፡፡¹⁷እን እዂነኻ ግርዋ ሻኽሊኒ ይቲሉ ኢየሱሳ ፍርዋ ሸኽሊ ኲ ይነድ እምን ጋብሪዂ¹⁸ውረድ አጝኳ ግርው እርግኑኹኪ እና ኩዲ ህምባዂር ኲ ግርዋ ኣኽላ ኲ እምን ግን ሻኽሊ ይቶ ይኹላ፡፡¹⁹እን እኹነኻ ዎ ያደራ እንቲ ነቢራ አኽረት ቛለኩን፡፡²⁰ይናእክል እና ጊራ ኒል ጀወሁኑ ሰጞነኲ እንትን ደኣም ጀውህስታ አካን ኢዮሩሳሌም ግን ይደነኲ ይቲሉ፡፡²¹ኢየሱሳ እንቲ እዂና ይት አምኒለ ነት አከጝር ኢዪሩሳሌምትል ቸከጝር እኽርሲ ጀውሀግና ግርጋት አንትሮ ግን፡፡²²እንትን አርእግድናዂሲ ጀውህደነኲ ይን ደኣም አርእናዂሲ ጀውህነኩን፡፡ ውረድ ደኤንና አይሁድልድ ግን፡፡²³ደኣም እን እኽርሲ ጀውሀው እምንዱ መንፈስድኽር እምንዲሲኽር ጀውሀነሉ ወክት እንትሮ ግን እን ወክታ ናን ግን፡፡ እኹራ ነስ ተከው ጀውሀው ግን ኒ-ጀረበው፡፡²⁴ጃር መንፈስ ግን እን ኒ ጀረበዋ ኒዋየው ጀውሀው ግን፡ እን ጀውሀዋ እምንዲ መንፈስዲሲ ጀውህድኖሉ ቀጀበኩሎም፡፡›²⁵እን እዂናኻ እን ክርስቶስ ይስታዂ መሲሕ እንተረቴ አርእኑኹን ኒ እንተራከክ ድዊሮና ግን ይቲሉ፡፡²⁶ኢየሱሳ እና ኩዲ ጋባኽር አን ኒ ግን ይኹላ፡፡²⁷እንሲን ኒታለይቶት እንትኑዂ፡ እዂናዲ ጋባዂሲ ቛልሰናኻ ፈከርስኑዂ ድኣም ላዂ ናልድ ውራ ጀረብራኹን ወሪ ውሪዂ ንርዲ ጋብራኹን፤ ይለሉ፡፡²⁸እን እዂናኻ ንርጀንሲ ባርዶ ድገትል ዔርቲ እማ እን ኮቄርሲ፡²⁹ላዃ ኒትክ አን እሴዂሲክ ድወዂሲለ ግርወስ ቛልትኖ ኤዊ አርእኹን ኒ ክርስቶስ አኽጊን ይቲሎም፡፡³⁰ድገትልድ ፍኖኻ ኒል እንትኑዂ፡፡³¹ኒ ታለይቶታ መምህር ውራ ቛላ፤ ይኖ ሺዊኒኹሉ፡፡³²ኒኻ እንትን አርእግድናዂ ቍስታ ሳንስዓ ህምበኩሉ ይኹሎም፡፡³³ኒታለይቶታ ናሹር ናሹ ውራ ከውማ ገለ ቍስታዂ ናቕስኖሉ ይስትጝኒዂ፡፡³⁴ኢየሱሳ ይቀለብ እን እንሸቃኹድለ ምራድሲ እስናዲ ኒወራትሲ ዱጙናዲ ግን፡፡³⁵እንትን መሽው አኽሮ ሰጃ አርባ ከብተ ህምበዂ ይደኒማ፤ እማ እናሓን እንታ ዕልልሲ በርስዲነ መኽልታ መሽው አኹዂ ኪሽጝ፡ ኒዂ የኩንኩም፡፡³⁶እን ፈዳኹዲ እሽራዂዲ ላት ፈርሕድኖ እን እሽራዂ ኒ ስድቅ ከለብረዂ፡፡ ዲመዳይድ ኒፊኹትድ እካ ምህርኻ እክበኲ፡፡³⁷ውረድ እን ላዃ ፍደኲ እን ላዃ ዔሰኲ ያዂ ድግም እምን ግን፡፡³⁸እን ቂልስግድናኹሊሉ ኤሽሪትኖ ፈሰኹንኩም፡ ኤሪው ስድቅርኑኹሉ እንትጛ እን ናው ስድቅርናኹሊ ቱውድኑዂ፡፡³⁹እን እዂና ኒትክ አን ሃቤኹሲክ ድዊኹለ ይረሰነሎም እን ድገሩ ሳምራውያን ኒድ ኤምኑዂ፡፡⁴⁰እን ሳምራውያን ኢየሱስትል እንትኖ ናዲ አኽሮ ሺዊኒኹሉ፡ ለጛ ኳረስ ናዲ ኒል ግጁዂ፡፡⁴¹ገሪው ናልድኻ ኒድ ኤምኑዂ፡፡⁴²እን እዂነት እና ግርዋ ኒን እምንድክ መድኃኔ ዓለም ክርስቶስ አኸት ይነላውድ ዋስኖኽር አርእኖኽር ኤምኑኹን ግን ግራ ኲጋብድ አኽላ ይን ኤምናዂ ይቡኹላ፡፡⁴³ላጛ ኳሪ ደምቢኻ ኒልድ-ፈ ገሊላትል ፈሩዂ፡፡⁴⁴ውረድ ኢየሱስ ኒላውድ ዮ እርገሰና፡ ነቢራ ኒኮል ሳብስተላ፡፡⁴⁵ገሊላትል እንተሰና እን ኢዮሩሳሌምትል በዓሊ እንቶ እርገው ገሊላሩ እን ኒል ኒ-እሰውሲ ቛልኖ እርግንነዲን ፈርሐትድ ከለብርኑኹ፡፡⁴⁶ኢየሱሳ እን ዓቁሲ ሚድሊ በደለሪ ድገ ቃና ገሊላትሪትል እንቱዂ፡፡ ቅፍርናሆምትላ ኒ እኹራ ሽኹሽታኹሉ ሹም እርጉዂ፡፡⁴⁷ኢየሱስ ይሁዳትልድ ገሊላትል ኒእንተርነስ ዋሶሰናኻ ኒል እንቶ፡ ኒኹራ ሐወኖ ዋነት ድዊኹሉ፡፡ እንቶ እቢስሮሉ ኽር ሺዊኹሉ፡፡⁴⁸ኢየሱሳ ኤምራትዲ አስደመምዳ ወራታትዲ ቛለግደነን ኤምንደኒ ይኹሎም፡፡⁴⁹እን ሹምኻ ዎ ይአደራ ይኹራ ክርጊ ወኑ አሸሺ ገሚ ይኹሉ፡፡⁵⁰ኢየሱሳ ፈሪ ኩኹራ እቢሩዂ ይኹሉ፡፡ ኒኻ ኢየሱስር ጋበት ኤምኖ ፈሩዂ፡፡⁵¹ገሙኻ ኒ ገንሺን ከለብርኖሉ ኒኹራ እቢረት ድዊኒኹሉ፡፡⁵²ኒኻ ኒኹራ እቢራ ወክትሲ ወንቀሩኹሎም፡ ናዋ እንጀጚ ሰዓት ላዂ ሐድ ባሩኹሉ ይኑኹሉ፡፡⁵³ኒኻ እን ኢየሱስ ኩኹራ እቢሩዂ ያሪሉ ወክት አኸት እልብዱዂ፡፡ ኒ ዕያልድ ካ ኤምኑዂ፡፡⁵⁴ኒን ኢየሱስ ይሁዳትልድ ገሊላትል ወንተረሰና እሰዂሊጞር አምር ግን፡፡

5¹ኒደምቢ ኢየሱስ በዓል አይሁዱዂ አኽነዲን ኢዮሩሳ ሌምትል ተረገሱዂ፡፡ ²ኢዮሩሳሌምትላ በጋ ኬለብ ይስታኹድ ገቢል አይሁድድ ቤተሳይዳ አንኳ ኩርዓርድ ኬለብሳ ዓይግ እርጉዂ፡፡ ³እን ዓቛ ውልቅነስ ጨበረዋ ከላእ ዓረፍዲ ደልጓሳንዲ ምግዱራንዲ ኒል ገንጁኑ እርግኑዂ፡፡ ⁴ውረድ ላዶንቲክ መልአክ ጃሩዂ እንቶ እን ዓቁሲ ሓምረጎሰና (ውልእደሰና) በደሮ ትዋኹኲ ኣኻ ሹዂዲልድክ እቢሩ ሰጞኲ⁵ኒላ ሰዀረግንዲ ሰዀታ እመራ እሰዂ ግርዋ ምግዱር ሰጞኲ፡፡⁶ኢየሱስ ገንጆ ህምባዂ ቛሎሰነሉ ኮዶ ይኸ ኒል ገሪ ወክታት እሰ ዋነት ዋስነዲን እቢርቶ ጀረብራኹማ፤ ዮ ወንቀሩኹሉ፡፡⁷እን ምግዱር ዎ ይአደራ ዓቁ ውልቆሰና ዓይግል ትውሳዂ እለለ፡፡ ኣን ትውጊኻ ኤሪው በደርኖለ ገመነኲ ይኹሉ፡፡⁸እንሲን ኢየሱስ ጒ ኲ ዐራት ምኹርዶ ፈሪ ይኹሉ፡፡⁹ንርድ-ንርድ እቢሮኻ ኒዓራት ሙኹሮ ፈሩዂ፡፡ እንግርጋኻ ሰንበር እርጉዂ፡፡¹⁰ንድኻ እን ግርዋ እቢራዂሲ አይሁድ ንኪ ብራ ሰንበር ግን ዓራት ምኹርቶ አከለካ ይኑኹሉ፡፡¹¹ኒኻ እን ግርዋ እቢሳኹለ ኒ ግን ኲ ዓራት ምኹዶ ፈሪ ያኹለ ዮ ወንተሱኹሎም፡፡¹²ኲ ዓራት ሙኹርዶ ፈሪ ያኹካ ግርዋ አወ ያዂ ግን ኒ፤ ይኑኹሉ፡፡¹³እን እቢራዃ ኢየሱስ ኒልድ ፈርነዲን ይኽ ኒላ ከው ገሪው እርግንነዲን ኤዊ አኸት ኣርእም ብስቲኹሉ፡፡¹⁴ንድ ደምቢ ኢየሱስ ቤተ መቅደስሊ አሩኹሉ እማ እናሐን ናን እቢርዱዂ ኒልድ ጂባዂ ኣርጊንካ ንድ ሰንቢክ ዓገብ እሰግ ይኹሉ፡፡¹⁵እን ግርዋኻ ፈሮ ኢየሱስ አኸት ኒት እቢሳኹሉ አይሁድድ ድዊኹሎም፡፡¹⁶ንድኻ ሰንበርድ ነስ እሲነዲን አይሁድ ወነንድኖሉ ተርሲኒዂ፡፡¹⁷ደኣም ኢየሱስ ይኽር ናን አኽራሲክ ኒወራት እሰኲ እንኩዂ አንኽር ይወራት እንሰኩን እንኩኹን ይኹሎም፡፡¹⁸ንድኻ ሰንበርሲ ደይዕና ዓቅትጊሉ ኒሹት ጃርዲ እርውድኲ፡፡ ጃርሲ ይኽር ኒ ይነድ አይሁድ ኩድኖሉ ጀረቡኑ እርግኑዂ፡፡¹⁹እንሲን ኢየሱሳ እምንድክ የኩንኩም እኹራ እን እኽር እሰዂሲ ቛሎ አከገን ላሪ ድኳ እሲሮ ገረሰላ፡፡²⁰ውረድ እን እኽር እሰዂሲ እኹራኽር ኒሰና እሲሮ ወጀበኲ፡፡ እኽር እኹረስ እንከለኩሉ እን ኒእሳዂሲኻ ኒትክ ቛሊሰኩሉ እንትን ፈከርስትኖ ኒልድ ኩጞው ወራታትር ቛሊስሮሉ ግን፡፡²¹እን እኽር ክረውሲ ጉዳኹሎም ፊኹትር እዋኹድሰነሎም እኹራኽር ኒሰና ኒጀረባውሲ ፊኹት እውሮሎም ግን፡፡²²እኽር ላዂሲ ፈረደላ ውረድ እን እኽር ናትክ ሳበነትሉ እኹረስር ኒሰና ሳቢድኖ ፍርድሲ ኒናንተል እዎሉ ህምበኲ፡፡²³እኹረስ ሳበጋዂ እን እንሻቓዂሲሉኽር ሳበላ፡፡²⁴24.እምን፡ እምንድክ ይየኩም እን ይጋበት ዋሳዂ እን እንሸቓዂሲለኽር አምናዂ ዲመር መናብረት አርዶ ግን ኒን ክሪልድ መናብረትል ካረኲ ግራ ድደላ፡፡²⁵እምንድክ ድውየኩም ክሪው ጃርኹራ ጋበት ዋሰና ግርጋ እንትሮ ግን ኒኻ ናን ግን እን ዋሰውኻ ዲመር መናብረት አርዶ ግን፡፡²⁶እን እኽር ኒላውድ ፊኹት ዋነትሉ ኒሰና እዂራድ ኽር ኒላውድ ኒ-ፊኹት እዎሉ እምበኲ፡፡²⁷ኣዳሚንዱኹራ ኣኽነዲጛ ፈረድሮ ሒል እዎሉ ህምበኲ፡፡²⁸ናውክ ኤርፍፈል ህምበው ኒደሃይሲ ዋሰና ግርጋ እንትሮ ግን እማ ኒድ ፈከርስድኖ ግን፡፡²⁹እን ትክያዂ እሰው ዲመር መምብሮትል ጉድኖ ግን፡ እን ሙቁላ እሰዋ ዲመር ክሪል ጉድኖ ግን፡፡³⁰ኣን ይላውድ ላሪ እሲያ ገረሰሊ እን ዋሳዂድሰና ግን ይፈረድና ይምራድሰና እሰጊ እን እንሻቃኹድለ ምራድሰና እሳኽር ኣኽነዲን ይፍርድ ወርካ ግን፡፡³¹አን ይሹሺ ሳምዕደን ይሳምዕ እምን አኽላ፡፡³²ኤሪዂ ሳምዕዳኹለ ህምበኲ፡ እን ኒ ይድ ሳምዕዳኹለኻ እምን አኽት አርእኹ፡፡³³እንትን ዮሓንስትል እንሻቕድኑዂ፡ ኒኻ እምን ሳምዕዱዂ፡፡³⁴ነስ አን ያኹከም እንትን ደኤንትኖ ዮ ግን ግራ ኣኻ ሳምዕ ከለብራኽር አኽሊ፡፡³⁵ዮሓንስ ሐውያኹር ትልጭያኹር ቲዃ ሰጞኲ፡፡ እንተጛ ከለላ ግርጋት ካያ ኒበርህድ ፈርሕትኖ ጀረብዲኒዂ፡፡³⁶አን ደኣም እን ዮሓንስሩዂልድ ኩጛዂ ሳምዕዳኹ ህምበኩለ፡፡ ኒንኻ፡ እን ይኽር እስያዮ እዋኹለ ወራት ግን፡፡ ኒኻ እናወራት ይኽር እንሸቀትለ ሳምዕድኩለ እንኩዂ፡፡³⁷እን እንሸቃኹለ ይኽር ኒላውድ ሳምዕዲለ ህምበኲ፡፡እንትን ኒዀርሲክ ኒጋበት ዋስድኖ ኣርእድኒ ኒገሽኽር ቛልድኒ፡፡³⁸እን ኒ እንሽቓኹድ እንታ እምና ብነድ ኒጋባ እንተል ኤተይላ፡፡³⁹ፊኹት ዲመሩዂ አረርደነኲ ተከኩም እንክቱባንሲ ላዂ ላኹድ ደኩስደነኲ፡፡ ደኣም ናውር ይድ ሳምዕደው ግን፡፡⁴⁰ደኣም ፊኹት አርትኖ ይል እንትትኖ ጀረብደኒ፡፡⁴¹አን ከዋ ጀንጀና ከለብረሊ፡፡⁴²እንትን ደኣም ጃር ተውፋቅ ዋኒ ገትኩም አርእኹ፡፡⁴³እን ይኽርድ ሱጙድ እንቶ ህምባኽርሲ ከለብርድኒለ አሪዂ ኒሹር ሱጙድ እንተረንኩማ ከለብርትንድሉ፡፡⁴⁴እንትን እኺረኺርሊ ሳቡር ጀረብደናኽር እን ጃርልድ እንተራ ሳቡርሲ ጀረበግደናኽር አኽድኖ ደምቢ አዋሃብዲነ እምንትኖ ገረስደናኹን፤⁴⁵አን ይኽርድ ጃብል ሸከይየኩም ተከጊንኩም፡፡ ሸከያኹኩም ኤሪዂ ግን እን እንትን ኒል ሳዳናዂ ሙሴ ግን፡፡⁴⁶ሙሴት ኤምንድናኽርሉ አክደነን ይትር ኤምንትንድለ ሻኽድናሕር ግን፡ ውራድ ኒ ይድ ከተቦ ህምበኲ፡፡⁴⁷ንድኻ እን ክቱባንሲ ኤምንግድናኽር አኽድኖ ደምቢ አዋ ሃብዲነ ግን ይጋብሲ ኤምንትኖ፤ ዩንሲክ ጋቢኹሎም፡፡

6¹ንድ ደምቢ ኢየሱስ እን ጥብርያዶስ ይስታ ቅብሊ ገሊላር ዓይግሊ ፈሩዂ፡፡ ²እን ሽኹሽተውድ አወይሲ እሱ እርገው አምራትሲ ቛለዋ ከው ከላእ ኒጉርበት ለሄክኑኹሉ፡፡ ³ኢየሱሳ ላጊሪል ተርገሶ ኒታለይቶትዲ ጀርሕ ዩዂ፡፡⁴ፋጅኻ ይስታዂ በዓል አይሁዱኻ ሱኩሮ እርጉዂ፡፡⁵እንሲን ኢየሱስ ኒዕልልኢ በርሰ ማኻተሰነኻ ከው ገሪው ኒል እንተረውሲ ቛሎሰና ፊሊጶስቲ፡ ነስካ ከውድ አካዂ ሳንስዓ አወትድ ጅቢኖ ግን፡ ይኹሉ፡፡⁶ኒንኻ ወጠንዶሉ ዮ ግን ግራ ኒ እሰውሲታ ኒላውድ አርኦ እርጉዂ፡፡⁷ፊሊጶሳ ሳንስዓ ለጛ ሊኽ አረኻ ላሽራፋኽር ገእይጊድሎም ዮኻ ወንተሱኹሉ፡፡⁸ኒታለይቶትልድ ላዃ እንድርያስ ቤጥሮሲ ኒዳን እንኳ ሳንሲዕ ስክሙዲ ለጛ ዓሰዲ ሻዂ ቍራ ነት ህምበኲ⁹ደኣም ነስከው በጃኽውድ ውራ አቅትሮሎም፤ ይኹሉ፡¹⁰ኢየሱሳ ከውሲ ጀጋሕ ሰሎም ኒልኻ ሻንካ ከላእ እርጉዂ፡፡ አንኳ ስሕ ግርዋ አከዋ ጀጋሕ ይኑዂ፡፡¹¹እንሲን ሳንስዓስ ጉዶ ሐመዱዂ ኒታለይቶትዳ እዉኹሎም፡፡ ናውኻ እን ጀጋሕ ዮ ህምበውድ በኒኒኹሎም ዓሲልድ ናው ጀረበነሰነክ፡፡¹²ብትኖሰናኻ ኒ ታለይቶትሲ እን ከብተ ሽርፍራፍ ልድ ላሪ ድኳ ማልስግሪን ለከማሎም ይኹሎም፡፡¹³ናዋ እን አንኳ ሳንስዓ ስኩሙልድ እን ቄውልድ ከብተውኻ ሽካ ለጛ ስግርፍኦታት ሽርፍራፍልድ እን ሰዂኑዂ፡፡¹⁴እን ከው ኒስ ተካ አምርሲ ቛልነሰና ኒን እምንድክ እን እርድሊ እንትሮ ህምባዂ ነቢራ ግን ይኑዂ፡፡¹⁵ንድኻ ኢየሱስቲ ሻኽኖ ሒልድ ሰየምድድኖሉ እን ተረውሲ ቛለሰና ኒቱ ኮዶ ጊሪል ዕጭጭ ዩዂ፡፡¹⁶ኩንጝ አኽሰና ኒታለይቶት ዓይግሊ ገምኑዂ፡፡¹⁷ታንኳትል አኽኖኻ እንደራ ዐይግ ካርጝል ቅፍርናሆ ምትል አኽራሲክ ፈርኑዂ፡፡ ጨልመቶኻ እርጉዂ፡ ኢየሱሳ እንቶሎም እርግላ፡፡¹⁸እን ዐይጋ ወልወል ሒለቱዂ ጉነዲን ለለክሱዂ፡፡¹⁹ለጞረጝንዲ አንኳ ወሪ ሰዀረጝን ፊዃ ፈርነሰነኻ ኢየሱስ ዓይግል ዓቁድ ዓቍ ፈሩ ታንኳትሊ ሱኩራዂሲ ቛልነሰነኻሉ ጓቍትኑዂ፡፡²⁰ኒኻ ኣን ግን ቸረጋ ይኹሎም፡፡²¹እንሲን ታንኳትሊ አድኖሉ ጀረቢኒዂ ደኣም እን ታንኳቲ ንርድ-ንርድ ናው ፈሩኑ እርግና ብሪል ገእይቲ፡፡²²ኤመሪትል እን ዓይግ ካርጝል ከብተ እርገው ከዋ ላታ ንኰቲ አኽገት ኒ ታለይቶታ ናቱ ፈሩኑ ኢየሱሳ ናዲ ታንኰትል ዓረግገት ቛልኖ እርግኑዂ፡፡²³ጥብርያዶስትልድ ጉኖኻ ታንኳት ኤሪው እን ኢየሱስ ሐመዶ ሳንሳዓ ቍሳኹሎም አካንሊ እንትቲ፡፡²⁴እን ከዋ ኡየሱስትኽር ኒታለይቶትሲኽር ኒል ብነሰነሎም ታንኳትሊ አኽኖ ኢየሱስቲ ጀረቢድኖ ቅፍርናሆምትል ፈርኑዂ፡፡²⁵ዓይግ እንደረሲ አርነሰናኸሉ መምህር አውን ነት እንትሮ ይንኹሉ፡፡²⁶ ኢየሱሳ እምንድክ ይየኩም እን ሳንስዓልድ ቍድኖ ብትድንነዲን ጀረብደነኩለ እንኲድኑዂ ግን ግራ አምር ቛልድናኹድ አኽድኒ፡፡²⁷ሳንስዓ ዶኳዂሲ ጀረበግዲኒ እን ሳንስዓ ዲመሩዂሲ ጀረባ ኒኻ እን ኣሚንድኹራ ኡሮኩም ህምባዂ ግን ውረድ እኽር ጃር ኒ ሻሮትድ ዱመት እሰ ህምባዂ ግን ይኹሎም፡፡²⁸ጃር ወራት ሀቢኖ ውራ እሲኖ ጀረብዳኹንና ይንኹሉ፡፡²⁹ኢየሱሳ ጃር ወራት ኒን ግን እን ኒ እንሻቃኹድ አምና ይኹም፡፡³⁰ናዋ እንቲ ውሪ ሻሮት እስራኹን፤ ኒት ቛልኖ አምኖ ውራኒ ግን እንቲ እስራ ወራት፤³¹ይና እክል ኣው ከደንሊ እን ክቱብ ያኹድሰና ዓስተርልድ ገማዂ ሳንሳዓ ማና ቍኑዂ ይኑኹሉ፡፡³²ኢየሱስ እምን እምንድክ ይየኩም ሙሴ አኽላ ዓስተርልድ ሳንሳዓስ ኡዋኹሎም ይኽር ግን ሳንሳዓ እምንዱዂሲ ኡዋኹሎም፡፡³³ ውረድ ጃር ሳንሳዓስ እን ዓስተርልድ ገማዂ ግን ኒኻ እርድድ ፊዂት ኡወኲ ይኹሎም፡፡³⁴ናዋ ዎ ይናአደራ እና ሳንሳዐ ኒልድ ዲማ ናኽና ይንኹ፡፡³⁵ኢየሱሳ እን ሳንሳዓ ፊዂቱዂ አን ግን ይኹሎም እን ይል እንተራዂ ዲመስ ከኣርተላ እን ይል አምናዃ ዲመሲ ሱቛንተላ፡፡³⁶ኣን ድዊኹንኩም እንትንኻ ቛልድንኹለ ደኣም አምንድኒለ፡፡³⁷ይኽር ኡዋዂክለ ይል እንትሮ ግን እን ይል እንተራዂስኻ ኒኾርስክ ከደን ዳገነሊሉ፡፡³⁸ውረድ አን ዓስተርልድ ገሞ ህምባኽር ይኽርድ ምራድሲ እስየ ግን ግራ ይምራድሲ ኣኽላ፡፡³⁹እን እንሻቃኹድለ ምራዳ ንድሰና ግን እን ኒ ኡዎ ውልድለ ላዂ ድሂስጊ ደምቢሪ ግርገድ ጉድየሉ ግን፡፡⁴⁰ኒንኻ ኡዂረስ ቛሎ አምናዂክ ዲመር ፊዂት ለውሮ ይኽርድ ምራድ ግን ኣንኻ እን ደንጎቢ ግርገድ ጉድየሉ ግን ዮ ወንተስኹሎም፡፡⁴¹ኣይሁድኻ ዓስተርልድ ገማኽር ሳንሳዓ አን ግን ይነዲንሎም ኒአወይሲ ጉድዕድዕ ይኑዂ፡፡⁴²ውራ ኒን ይን አርእናዂ ኒኽርዲ ኒገነዲት ኢየሱስ ዮሴፍዂራ አኽለማ እማ አዋ ሃበ ግን ዓስተርልድ ገማኽር ግን የኹን ይኑዂ፡፡⁴³ኢየሱሳ እንተሹር እንተሹ ጉድዕድዕ ይጋ፡፡⁴⁴እን ይኽር ወተርጋዂሉ ኣኽጋዂ ላዂ ድኳ ይል እንተራዂ እላ ኣንኻ ደንጎቢ ግርገድ ጉዲየሉ ግን፡፡⁴⁵ናውክ ጃርድ ክንተው አኽድኖ ግን ያዂ ነቢታትሊ ከተብሶ ህምበኲ እን እኽርሲ ዋሶ ኒ ምህሮት ከላብራኽክ ኒውክ ይል እንትሮ ግን፡፡⁴⁶እን ጃርልድ ፈዂ አኽገት ላዂ እኽርሲ ቛላዂ እላ እን ጃርሲ ቛላዃ ኒ ግን፡፡⁴⁷እምንድክ ይየኩም ይድ አምናዂክ ዲመር ፊዂት አርዶ ግን፡፡⁴⁸ሳንሳዓ ፊዂቱዂ ኣን ግን፡፡⁴⁹እንታ እክል አው ከደንሊ ማና ቍኑዂ ደኣም ክርኑዂ፡፡⁵⁰እን ኒልድ ቄዂክ ክርጊን ዓስተርልድ ገማኽር ሳንሳዓ ፊዂቱዂ ኣን ግን፡፡⁵¹እን ዐስተርልድ ገማኽር ፊዂት ሻዂ ሳንሳዓ ኣን ግን እና ሳንሳዓ ኒልድ ቄዂካ ዲመሲ መንደርትሮ ግን እና ኣን ዲመር መናብረትዲ ኡዋዂ ሳንሳዓኻ ይ ስኻ ግን ዮ ወንተሰኩሎም፡፡⁵²ንድኻ ኣይሁድ ኒን ኣዋሃበ ግን ኒ ስኸስ ቍኖ ኡዋዂንና ዩኑ ከሐድስጚኒዂ፡፡⁵³ኢየሱሳ እምን እምንድክ ይየኩም ኣዳሚንድዂሪ ሥኻሳ ቋግደነን ኒ ብርስኻ ጀአግደነን ፊዂት ሻኽድኒ፡፡⁵⁴ይስኸስ ቋዂዲ ይብርሲ ጀአዂዲ ዲመር ፊዂት ህምበኩሉ አንኻ ደንጎቢ ግርገድ ጉድየሉ ግን፡፡⁵⁵ውራድ ይስኻ እምንድ ነብራ ግን ይብርኻ እምንዲ ጅእ ግን፡፡⁵⁶ይ ስኸስ ቋዂዲ ይብርሲ ጀኣዂዲ ይል መንደርተኲ ኣንኽር ኒል መንደርተኩን፡፡⁵⁷ፊዂት ሻዂ ይኽር እንሻቃዂለ ኣንኽር ይኽር ፊዂት ክመት ኒሰና ይት ቋዂ ይድ ፊዂት ክሚሮ ግን፡፡⁵⁸እን ዓስተርልድ ገማዂ ሳንሳዓ ኒን ግን እን እንታ እክል ቍናዂ እማ ክረው ኒሰና ኣኽላ እና ሳንሳዓ ኒስ ቄዂክ ዲመስ መንደርትሮ ግን ይኹሎም፡፡⁵⁹እና ጋብ ነን ቅፍርናሆምትል ቤት መቅደስሊ ክንሱንሲክ የው ግን፡፡⁶⁰ገሪው ኒ ታለይቶትልድ ነስ ዋስነሰና እና ጋብ ነን ሒለቱ ግን ኤዊ ዋስሮሎም ገረሳዂን ይኑዂ፡፡⁶¹ኢየሱሳ ኒ ለበከድ አርእስቶሉ ኒ ታለይቶት ጉድዕድዕ ይነት ንድማ አንቄሪትደናዂን፡፡⁶²ኣዳሚንድዂረስ ኒ እማኒ ኣካንሊ አረጉ ቋልደነጛ ውራ ይትንድ፡፡⁶³ፊዂት ኡዋዂ መንፈስ ግን ስኻ ላሪ ሻኽላ እና ይጋብኻ መንፈስ ግን ፊዂትኻ ኡዎኲ፡፡⁶⁴ደኣም እንተዲ ኣምነገው ህምበነኲ ኒንኻ ኢየሱስ ሰልፍልድ ተርሰ ኤምነገው አወን አኽነት አውኒኻ ከየንዶሉ አከት አርኡ አርኡ እርጉዂ፡፡⁶⁵ንድ ግን እን ይኽርድ እውስትጋዂሉ አኽገት ላዂ ይል እንትሮ ገረሰላ ይኹሎም፡፡⁶⁶ንድ ደምቢ ገሪው ኒ ታለይቶትልድ ኒዲ ፈርነስ ባርኑዂ፡፡⁶⁷ኢየሱሳ እን ሽካ ለጞት እንትጝር ፈርትኖማ ጀረብደናኹን፤ ይኹሎም፡፡⁶⁸ስምኦን ቤጥሮሳ ዎ ይናአደራ አውትል ፈርኖ ይሮና እንቲ ካያ ጋብ ዲመር መናብረቱ ፊኹ ሻኽሩዂ⁶⁹እንቲ ሻትክ ጃርኹራ ኣኽረት ኤምኖኽር ኤርእኖኽር ህምብነኩን ይኹሉ፡፡⁷⁰⁷¹70.ኢየሱሳ ኣን አኽሊማ ሽካ ለጞርትክ ፍሪራኽርኩም፤ ደኣም እንተልድ ላዂ ዲያብሎስ ግን ይኹሎም፡፡71.ኒንኻ እን ከየንዶሉ ህምባኹድ ይሁዳ አስቆሮታዊራ ስምኦንዱኹራድ እንሽካ ለጛትልድ ላዂ ግን፡፡

7¹ንድ ደምቢ ኢየሱሳ አይሁድ ኩድኖሉ ጀረቡኑ እርግነዲን ገሊላትል ወንተሩ እርጉዂ ግራ አይ ሁድ ብሪል ፈርላ፡፡ ²እን ግርጋትሊኻ በዓል አይሁድሩዂ ስኩሮ እርጉዂ፡፡³ኒሻጛ ኲ ታለይቶት እንቲ እስረውሲ ቋልድኖ ጉ ነትድ አይሁድ ብሪል ፈሪ ይኑኹሉ፡፡⁴ውረድ ላዂ ቋልስትሮ ጀረባዂ ትብታንድ እሳዂ እላ እንቲ ነስ እስራኽር አኽሮ ደምቢ እርድድ ቃልዕስቲ፡፡⁵ኒንኻ ኒ ሻጝር ኒድ ኤምኑኑ ሰጞኒ፡፡⁶እንሲን ኢየሱስ ይወክት አቅቶ እላ እንታ ወክታ ዲማ ደለማዂ ግን፡፡⁷እርድ እንተት ወነነላ እርድ አን ወራት ንርሙቁልናሩዂሲ መስከራኽር አኽነዲን ይት እንጠረት፡፡⁸እንትን በዓሊ ፈራ አን ይወክት ገእይጋዂ ኣኽነዲን እና በዓል ኒል ተረገሰሊ ይኹሎም፡፡⁹ ነስ ዮ ደምቢኻ ገሊላትል ከብቲዂ፡፡¹⁰እን ኒሻን በዓሊ ተረገስኖሰነኻ ንኽር ትብታንድ እን በዓሊ ተረገሱዂ፡፡¹¹አይሁዳ እን በዓሊ ጀረቡኑሉ እርግኑዂ፡ አዊል ህንባኹን ኒ ይኖኽር ወንቀሩኑ እርግኑዂ፡፡¹²ከዋ ነበክላ ኒሰበትድ ገሪዂ ጉድዕድዕ ጉዂ ላው በኪት ግን ዩኑ ላዋ ኒን ከውሲ ከቲሰኲ ዩኑ እርግኑዂ፡፡¹³ደኣም አይሁድ ሰየምሲ ጓቍትንነዲን ላዂ ገሽድ ጋባዂ እርግላ፡፡¹⁴እንሲን ኢየሱስ በዓል ገፍሊ ቤተ መቅደስሊ ዓረጎ መሄርድሮ ተርሲዂ፡፡¹⁵ንድኻ አይሁድ ኒን መሄርስጊ አውሃበ ክቱባንሲ አርኡኹን፤ ይኖ ፈከርሱኑ እርግኑዂ፡፡¹⁶ኢየሱሳ አን ይክኒ እን እንሸቃዂዱኹለ ግን ግራ ዩዂ ኣኽላ፡፡¹⁷ኒ ምራድሲ እሲሮ ጀረባዂ ዋነን ደኣም እና አን ክንሳዂ ጃርልድ ወሪ ይልድ አከን አርእኖ ገረሰዂ፡፡¹⁸እን ኒሹትልድ ጋባዂ ኒሹር ጀንጀንስና ጀረባዂ ግን፡ እን እንሸቓኹድሉ ሳቡር ጀረባዃ እምንዱዂ ግን፡፡ ኒልኻ ላሪ ሃሽከብና እላ፡፡¹⁹ውራ ሙሴ አኽለማ ትእዳዳትሲ እዋኹኩም፤ ደኣም እንተልድ ላዂ ትእዳዳትሲ ተከዋኹሎም እላ፤ ኣከገጛውሪዂ ኩትኖለ ጀረብደናዂን ዮ ወንተስዂሎም፡፡²⁰እን ከዋ ክልብርሲነ አበዲ እንቲ ጅን ሻኽሩዂ ኤውኒ ግን ኩሮካ ጀረባዂ ይንዂሉ፡፡²¹ኢየሱሳ ላወራት እሲነዲን ናውክ ፈከርስድኑዂ፡፡²²ሙሴ ፍትሕ ስምትሪዂ እውኹም ኒንኻ እንታ እክል ግን ኒት ኡዎውኩም ግራ ሙሴ ሳኽላ፡፡ እንትጛ ሰንበርድ ሰመተርደነኲ፡፡²³እማ ሰንበርድ ሰመተርደነን ፍትሕ ሙሴሩዂ ዳድ ሰጋዂ ኣኾ ደምቢ ውሪዂ ኣን ሰምበርድ ግርዋ እቢስነዲን ይ አወይሲ ቀጠብደናዂን፡፡²⁴እማ እንከልስትኖ ይድኖ ፈረድግድኒ ትክያ ፍርድ ፈረዳ ዮ ወንተስዂሎም፡፡²⁵ላው ኢዮሩሳሌምሩኻ እን ኩድኖ ጀረቡኒ እርግናዂ፡፡²⁶ውራ ናሃበ አግሀዶ ጋቡ ላሪ የገውሉ እን አስያምኽርማ ኒል አምኖ እምንድክ ኒ ክርስቶስ አኽት፡፡²⁷ይን ደኣም ኒን ኤዊልድ እንተረት አርእንኹን ክርስቶስ ኤወትድ እንተረት ላዂ ድኳ አርእላ ይኑዂ፡፡²⁸ንዳ ኢየሱስ ቤተ መቅደስሊ አኾ ድርሲ ክብሰ እንትን አርእድኑዂለ ይኹ አወትድ እንተትኽር አርእድኑዂለ እን እንሻቃዂ እንትን አርእግድናዂ እምንግን፡፡²⁹አን ደኣም ኒልድ አኽነዲን እንሻቃዂለኽር ኒ ኣኽነዲን አርእዂለ ዩዂ፡፡³⁰ንድኻ ሻኽኖሉ ጀረቢኒዂ ደኣም ኒወክት አኽጋዂ አኽነዲን ላዂ ናን ገምድሮሉ ገረስላ፡፡³¹ከላእ ከውልዳ ኒድ አምኑዂ ውራ ክርስቶስ እን ተራካክ እና ኒ እሰው አምራትልድ በጃኸውማ እሲሮ ኣኾ፤ ዩኑ እርግኑዂ፡፡³²ፈሪሳን ከው ኒድ ና ሃቢነ ጋበውሲ ዋሰነሰና አቅሰታ በህሊንዲ ፈሪሳንዲ ሻኽድኖሉ ይኖ ናንሽቕሲ ፈስኑኹሉ፡፡³³ኢየሱሳ ከለላ ግርጋትሲ እንተዲ ህምበኩን፤ እን እንሻቃኹሊለ ወንተርድየ ግን ይኹሎም፡፡³⁴ጀረቢትኖለ ግን ደኣም ኣረርደኒለ እን አን ህምባኹሉ እንትትኖ ገረስደኒ ይኹሎም፡፡³⁵ኣይሁዳ ናሹር ናሹ ኒን ኤዊል ፈርዶ ግን ይን አረረግናኹ፤ እንጫ ግሪኽ ኮል ፈተታሕ ዮ ህምበውሊ መሄርድሮ ፈርዶ ቶክ አኾ፡፡³⁶ጀረቢትኖለ ግን ደኣም አረርደኒለ እን አን ህምባ ኹል እንትትኖኽር አከለኩም ይና ጋብ አበዲ ውሪ ማዕነት ግን ዩኑ ከሐድስጚኒዂ፡፡³⁷እን በዓል ድጙስትኒ ግርጊል ኢየሱስ ደውዩዂ እማ ስቛንታዂ ዋነን ይል እንቶ ጅእን ዮ ጨርሑዂ፡፡³⁸ይል ኤምናኹኲ እን ክቱባት የሰና ኒ-ጎዱጉልድ ኩራ ዲመዳዩዂ ኩሪትሮ ግን ዩዂ፡፡³⁹ኒጛ እን ኒል ኤምነው መንፈስ ሻትክ ከለብርዶ ህምበውድ ግን ኒ ያዂ፡፡ ውረድ ኢየሱስ ኒሳቡርሊ ገእይጋዂ አኽነዲን መንፈስ ሻትክ ገሞ እርግላ፡፡⁴⁰ነስ ተካ ጋብሲ ወስነሰና ላው እን ከውልድ ኒን እሙር እን ነቢራ ግን ይኑዂ፡፡⁴¹አሪዋ ኒን ክርስቶስ ግን ይኑዂ፡፡ ላዋ ውራ ድኣም ክርስቶስ ገሊላትልድማ እንትሮ ኣኾ፤ ይኑዂ፡፡⁴²ክርስቶስ ዳዊትር ፈደንልድኽር እንድገ ዳዊት መንደርቱ ሰጞሪ ቤተልሔምትልድ አኸት ውራ ክቱብ ደወኲ እለማ፤ ይኑዂ፡፡⁴³ኒሰበትድ ከዋ ነበክል ድርግርግ ትዉዂ፡፡⁴⁴ናልድ ላዋ ሻኽድኖሉ ጀረቢኒዂ፤ ደኣም ላዂ ናን ገምድለሉ፡፡⁴⁵እን እንሸቕሰዋ አቅሸታ በህሊንዲ ፈሪሳንዲትል ወንተርኑዂ፡ ናዋ ውራ ናቕስግድኒሉ፤ ይኑኹሎም፡፡⁴⁶እን ንሽቃ እና ግርዋ ንድሰና ሃበ ጋባዂ ኒዀርሲክ ላዂ እላ ይኑኹሎም፡፡⁴⁷ንድኻ ፈሪሳን ውራ እንትጝርማ ከትዲነ ይኑኹም፡፡⁴⁸ውራ አስያምልድ ወሪ ፈሪሳንልድ ላው ኒል ኤምነውማ ዋኒነ፤⁴⁹ከው ነን ፍትሕ አርእገው እሽው ግን ይኖኻ ወንተስኑኹሎም፡፡⁵⁰ናልድ ላዂ ኒቆዲሞስ ይስታዂ⁵¹ላዶን ኒል ቂር እንታዂ ክልብርሰ ውራ ይና ፍትሕ ላግርወስ በደሮ ሰልፍ ዋስጉሉኽር እን ወራትሲ ቛልጊሉኽር ፈረዳዂመሉ አኾ፤ ይኹሎም፡፡⁵²ናዋ እንቲኽርማ ገሊላሩዂ አኽሮ፤ ትክስረ ፈጠኒ ገሊላትልድ ነቢራ ጓገት ቛልቶ ግን ይኑኹሉ፡፡⁵³ናውካ ላኹኲ ኒልጝል ወንተርኑዂ፡፡

8¹ኢየሱሳ ደብረ ዘይቲትል ፈሩዂ፡፡ ²ኤመሪትልኻ ኮዶ ቤተ መቅደስሊ ጉራቦ ወንተሩዂ፡፡ ከው ከላእ ኒል እንትነሰነኻ ከፍ ዮ ክንሲሮሎም ተርሲዂ፡፡ ³ከታበንዲ ፈሪሳንዲኻ ላ እዂና ዳነይኒል አርስረሪት ናቕስኑኹሉ እማ ነበክል አንጦጠልድኖላኻ ፡⁴መምህር እና እዂናት ናን ደነይኒል አርኑኹንላ፡⁵ነስ ተከው እውሰውሲኻ ሙሴ ኦሪትል ክርጝ ሕንጭልጭሊትድ ኩውስትድኖ ህምበኩለን ዮ መኾኾና ህምበኲ፡ እንቲኻ ንርድ ውራ ይራኽር፤ ይኑኹሉ፡፡⁶ኒስ ናይናኻ የኣይ ኒድ ሸከየናኹሉ አርድኖሉ ይኖ ግን፡፡ ኢየሱሳ ሉም ዮ ብሪል ጭብዕድ ከተቡዂ፡፡⁷ወንተተሪነክ ወንቀርነሰናኻ ሉ ናዕ ዩዂ እማ አዊ እንተልድ ዓገብእግጛ ማልንላ፤ ይኹሎም፡፡⁸ኮዶኻ ሎምዮ ብሪል ከተቡዂ፡፡⁹ናዋ ኒስ ዋስነሰና በሀሊንልድ ተርሲነ ላዂ ላዂድ ሕርጥ ሕርጥ ይኖ ፈርኑዂ እን እዂና ነበክል አን ጦጠልዶ ንርቱ ከብቲቲ፡፡¹⁰ኢየሱሳ አኾርሲ ክብሰ እን እዂናት አኽጋዂ ላሪ ቛላ እማ እንቲ እዂና እንኩት ሸከየው ኤዊል ህምበናኹን፤ ላዂማ ዓውቲትለኪ፤ ይኹላ፡፡¹¹ንሪኻ ላኹር እላ ያደራ ይቲሉ፡፡ ኢየሱሳ አንኽር ላሪ የሊኪ ፈሪ ንድ ደምቢ ዓገብ እሰግ ይኹላ፡፡¹²ኮዶ ኢየሱሳ ኣን ቲዃ እርዱዂ ግን ይት ተለያዂ ዲመሲ ጭልምሊ ወንተተረላ፤ ዲመር ቲዃ አርዶግን ይኹሎም፡፡¹³ፈሪሳንኻ እንቲ ኩሹሺ ሳምዕድራኽር ኲ ሳምዕድናኻ ሐላል ኣኽላ ይንኹሉ፡፡¹⁴ኢየሱሳ ይሹሺ ሳምእደን እምን ግን፡፡¹⁵ውረድ ኤዊልድ እንታኽር አኽትር ኤዊል ፈረትር አርእዂን እንትን ደኣም ኤዊልድ እንተራኽር አኸትር ኤዊል ፈራኽር አኽትር ላሪ አርእድኒ፤ እንትን ስኺዂድ ፈርደኖኲ አንኻ ላዂሲ ድኳ ፈረደሊ፡፡¹⁶ይኽ ፈረደንኽር ይፍርድ ሐላል ግን፡ ውረድ እን እንሻቃኹለ ይኽርድ ግን ግራ ይቱ አኽሊ ኣን ፈረዳኽር፡፡¹⁷እንታ ፍትሕል ለጛ ግርዊ ፍርድ ሐላል ግን ያዂ ክቱብ ህምበኲ፡፡¹⁸ኣን ይሹሺ ሳምዕደን ይኽር እን እንሻቃዂለኽር ይድ ሳምዕደኲ እንኩዂ ይኹሎም፡፡¹⁹ናዋ ኲ እኽር ኤዊል ህምባኹን፤ ይንኹሊ፡፡ ኢየሱሳ እንትን ይጥኽር አርእድኒ ይኽርስኽር አርእድኒ ይት አርእድናኽር አክደነን ይኽርስኽር አርእትንድ ሻኽድናኽር ግን ይኹሎም፡፡²⁰ኢየሱሳ ቤት መቅደስሊ እን እንድባ ሰደቀት ገምደናዂድ ገቢል ኣኾ ክንሱ ግን እና ጋብነስ ኒ ጋበዂ፡፡ ኒግርጋ አኽጋዂ ኣኽነዲን ላዂ ሻኽሮሉ ገረስላ፡፡²¹ኮዶ ኢየሱስ ኣን ፈረኩን እንኩኹን እንትጛ ጀረቢትኖለ ግን ደኣም እንታ ዓገብሊ ክርትና ግን ግራ እን አንፈራዂሊ እንትትኖ አከለኩም ይኹሎም፡፡²²ኣይሁድ ኣን ፈራዂሊ እንትትኖ ገረስደኒ ያኹና ውራ ኒ ሹትማ ኩሮ ኣኾ ይኑዂ፡፡²³እንትን ብሪልድ ግን አንኻ ዓስተርልድ ግን እንትን እና እርድልድ ግን ኣንኻ አኽሊ፡፡²⁴ኣን ኤዊ አኸት አርአግደነን እንታ ዓገብሊ ክርትኖ ግን የኩንኩም፡፡²⁵ናዋ እንቲ ኤውኒ ግን፤ ይኑኹሉ፡፡ ኢየሱሳ አን እን ሰልፍልድ ተርሰ ድወኹርኩም ግን፡፡²⁶እንተድ ጋበውድ ሸከየውዲ ገሪ ወራታት ህምበኩለ፡፡ አን እንሸቃኹለኻ እምንዱዂ ግን፤ አንኻ እን ኒልድ ዋሰውሲ ግን አን አርድድ ድዋዂ ይኹሎም፡፡²⁷ናዋ እን ኒ-የው ኒ-ኽርድ አኽት ላሪ ፈሀምኒ፡፡²⁸እንሲን ኢየሱስ አዳሚንድኹራስ ጉድነሰለለነሉ አን አኸት እኳ ይኽር ክንሰኹድለ ጋቡኩም ሰጞት ይላውድር ላሪ እሰገት ኤርእትኖ ግን፡፡²⁹እን እንሸቃኹለ ይዲ ግን፤ አንኻ ኒት ፈርሕዳ ወራት ዲማ እሳኽር አኽነዲን ይኽር ይቱ ባረለለ ይኹሎም፡፡³⁰ነስ ጋበሰና ገሪው ኒድ ኤምኑዂ፡፡³¹ኢየሱሳ እን አይሁድ ኒድ ኤምነውሲ እንትን ይጋበል ተብደነን እምንድክ ዪ ታለይቶት ግን፡፡³²እምንቲ አርእትኖ ግን፤ እን እምንኻ ሓሻ ፍድቶኩም ግን ይኹሎም፡፡³³ናዋ ይን ቸብርሃምር አሰል ግን ግራ ላኹድ ድኳ ገንጂን አኽኖ ኤርኒ፡፡ ኣዋሃብረ ግን ሓሻ አኽትኖ ግን፡ ይራኹንና፤ይኑኹሉ፡፡³⁴ኢየሱሳ ዓገብ እሳዂ እምን እምንድክ ይየኩም ዓገብ ገንጂና ግን፡፡³⁵ገንጂና ዲመሲ ልጝንሊ መንደርላ ኡኹራ ደኣም ዲመሲ ልጝሊ መንደርተኲ፡፡³⁶ኡኹራ ሐርነት ፍደንኩም እምንድክ እምንድክ ሓሻ ፍድኑዂ፡፡³⁷አብረሃምቁር አኽድነት አርእኹን፡፡ ደኣም ይጋብ እንተል ከለብርስላ እማ ኩትኖለ ጀረብደነኲ፡፡³⁸ አን ይኽርልድ ቛለዂሲ ድወኩንኩም እንኩኹን፡ እንትንኻ እንታ እኽርልድ ቛልድናዂሲ እስደነኲ እንኩድኑዂ ይኹሎም፡፡³⁹እማ እንትን ደኣም እንታናዋ ይና እኽር አብርሃም ግን ይኑኹሉ፡፡ ኢየሱሳ አብርሃም ቁር አክደነን አብርሃምር ወራት እሲትንድ ሻኽድናኽር ግን፡፡⁴⁰ናንኻ እን ጃርልድ ዋሳ እምንሲ ጋቢነዲንኩም ኩትኖለ ጀረብደነኲ፡ አብረሃም እንዳሃቢላ፡፡⁴¹ኽርድ ወራት እስደነኲ እንኩድኑዂ፡፡ ናዋ ይን ደነይናድ እዃርስኒ ይናኽር ላዂ ጃር ግን ይንኹሉ፡፡⁴²ኢየሱሳ ኣን ጃርልድ እንታኽር ግን፡ ኒ ግን ይት እንሸቓኲለ ግን ግራ ይላውድ እንትሊ፡ ንድኻ ጃር እንታኽር አከን ይት እንከልትንድለ ሻኽድናኽር፤ ግን፡፡⁴³ውረድ ግን ይጋብሲ አስተብሀልደግደናኽር፤ ኒንኻ ይጋብሲ ዋስትኖ ጀረበግደናኽር አኽድንነዲን ግን፡፡⁴⁴እንትን እንታኽር ሰጣን ግን፡ እንታኽር ሸንሀትሲኻ እሲትኖ ጀረብደነኲ፡ ኒ እማነንሱኲ ፊኹት ኩወንታ ግን፡፡ ኒል እምን ዋንትናብነድ እምንሊ ተበላ፡፡ ጋበን ኒሹትልድ አኽነዲን ብን ግን ኒጋብ፡፡ ውረድ ኒ ቡኝ ግን ብንድ ንርእኽርግን፡፡⁴⁵ይታ እምን ጋባኽር አኽነዲን ኤምንድኒለ፡፡⁴⁶ኤዊ ግን እንተልድ ሓጢአትድ ሸከይሮለ ገረሳዂ፤ እምን ጋባኽር አኾ ደምቢኻ ውረድ ግን ኤምንደኒለ፤⁴⁷እን ጃርልድ አኻዂ ጋባ ጃርዲት ሸኑሮኲ፡፡ እንትን ዋስድኑዂማ ጃርልድ አኽግድናኽር አኽድንነዲን ግን ጃር ጋብሲ እንትን ዋሰግደናዂ ይኹሎም፡፡⁴⁸አይሁድ ውራ ይና እምን አኽኒማ ሳምራዊራ ሰጣን ሻኲ ይኖካ፤ ይኑኹሉ፡፡⁴⁹ኢየሱሳ አን ይኽርሲ ሳበኩን ግራ ሰጣን እለለ፡ እንትን ግን ዕላጅ እስደናኽርለ፡፡⁵⁰አን ይሹር ሳቡር ጀረበሊ እን ሳቡር ጀረባዂዲ ፈረዳዂዲ ኤሪዂ ህምበኲ፡፡⁵¹እን ይጋበት ተከዋዂ ዲመዳይድ ክራ ቛለገት ኒዀርሲክ እምን እምንድክ የኩንኩም፡፡⁵²አይሁዳ ናን ኤለለይኑኹንካ ጅን ክምረት አብርሃምዲ ነቢታትዲኻ ክርኑዂ፡ እንቲኻ ይጋበት እንኩራዂ ዲመሲ ክረላ ይራኹን እንኩሩኹን ይኑኹሉ፡፡⁵³እንቲማ ይናኽር አብርሃም ክራኹልድ ኩጙሮ፤ ነቢታትር ክርኑኹለ፡ እንቲ ኩሹት አዊ እስራኹን እንኩሩኹ፤ ይኑኹሉ፡፡⁵⁴ኢየሱሳ አን ይሹት ሳበን ይሳቡር ጉምሽ ግን፡ ይትሳባኹለታ እን እንትን ይነጃር ይደናዂ ይኽር ግን፡፡⁵⁵እንትን አርእድኒሉ ደኣም አን ኤርእኹንሉ፡፡ አርእሊሉ የዶክ እንተሰና ቡኝ አኽሪድ፡ አን አርእኹንሉ ኒ ጋበትር ተከወኩን፡፡⁵⁶አብርሃም እንታኽር ይግርጋትሲ ቛልዶ ሸንሁ ሰጞኲ ቛሎኻ ነገሱዂ፡፡ የሰነሎም፡⁵⁷አይሁድ እንቲ አንኩረጝን አመሪኹ አከግራኽርማ አብርሃምቲ ቛልዱኹን፤ ይኑኹሉ፡፡⁵⁸ኢየሱሳ እምን እምን ይየኩም አብርሃም ኡዃርስጊ አን ሰጞኩን ይኹሎም፡፡⁵⁹ንድኻ ሕንጭልጭሊት ይድኖሉ ክርጝ ጉድኑዂ፡ ደኣም ኢየሱስ ትብቱዂ፡፡ ቤተመቅደስልድ ናነበክድ ደኮ ፊዂ፡፡

9¹ኢየሱስ ጉግድ ደግድ ደኩኻ ግርዋ ኒ ዓረብድ እዃርሳዂ ግርዋ ቛሉዂ፡፡ ²ኒታለይቶትኻ መምህር ኒን ዓረብ እዃርሱዂ ኤውር ዓገብ ግን፤ ኒዂማኒ እማ ኒት እዃረው ዱዂ፡ ይነረኹሉ፡፡³ኢየሱሳ ኒን ኒኹር ኒት እዃረውድ ከተድር አኽላ፡ ኒን ጃር ውራት ኒል ቛልስትሮ አኻዂግን፡፡⁴ላዂ ድኳ ኒወራት እሲሮላ ገረሰገሪ ቂር እንተረቲ እንኩቲ፡ እማ ገርክ ዋኑ እን እንሸቃኹድለ ወራትሲ እስያ ወጀበኩለ፡፡⁵አን እርድሊ ዋኑ ቲዃ እርዱዂ አን ግን ዮ ወንተስኹሎም፡፡⁶ነዋዮ ጋበ ደምቢኻ ብሪል ኒ-ብጭቅድ መርጓ እሲዂ፡፡ እን መርጓድገኻ እን ዕልል ዓረቡሲ ሸመትኹሎም፡⁷እማ ፈሪ ዓይግ ሰሊሆምርኹል ፈርዶ እንቃሪ ይኹሉ፡፡ ኒኻ ፈሮ ጀለጥሱዂ ቛሉኻ ወንተሩዂ፡፡⁸ኒአግዋርዲ እን እማና ሺዉ ቛሉሉ ሰጞውዲኻ ኒን እን ጉግ ሸሊ አኾ ሺዉ ሰኝዂ አኽለማ፤ ይስትጚኒዂ፡፡⁹ላዋ ኒ ግን ይኑዂ፡፡ ኤሪዋ አኽላ ኒን ተከኲ ግን ግራ ኤሪዂ ግን ይኑዂ፡ ኒኻ ኣን ግን ይኹሎም፡፡¹⁰ናዋ እንቲ ኲዕልል አዋኸ ንስቶካ ፤ ይኑኹሉ፡፡¹¹ኒኻ ግርዋ ኢየሱስ ይስታዂ መርጎድ ይዕልልሲ ሸመቱኹ፡ እማ ፈሪ ዓይግ ሰሊሆምሩኹ እንቃሪ ይኹሉ፡፡ ፈሮ እንቃሮሰነኻ ቛልኹን ይኹሎም፡፡¹²ናውኻ አዊል ህምባኹን ኒ፤ ይኑኹሉ፡፡ ኒኻ ከንዶ አርእሊ ይኹሎም፡፡¹³ፈሪሳንሊኻ አድኑኹሉ፡፡¹⁴እን ግርጋ ኢየሱስ መርጓድ እሰ ኒዕልልሲ ብዳኹሉ ሰንበር እርጉዂ፡፡¹⁵ንድኻ እን ፈሪሳን አዋሃበ ቛልዶ ገረሰት ኮዶ ደገስኖ ወንቀርኑኹሉ፡፡ ኒኻ መርጓ ዕልሊ እሲኹለ አጛ እንቃርኹን ቛልኹንኻ ይኹሎም፡፡¹⁶ላው ፈሪሳንልድ እና ግርዋ ኒን ሰንበርሰ ዳዳዂ ጃርልድ አኽላ ይኑኹ፡፡ ላው ደኣም ግርዋ ዓገቡዂ አዋ ሃቦ ግን ነስ አምራት እሲሮ ገረሳኹን፤ ይኑኹ፡፡ ናነበክላ ድርግርግ ጉዂ፡፡¹⁷ናው ኮዶ ወንተስኖ እን ዓረብሲ እንቲ ዕልልሲ ብድነዲንካ ኒድ ውራ ይቶ ገረስራኹን፤ ውራ ተካኹንካ፤ ይንኹሉ፡፡ ኒኻ ነቢራ ግን ይኹሎም፡፡¹⁸አይሁድ ኒገነዲ ኒኽርዲት ሽሽ ወንቀርድናሲክ እምንድክ ዓረብ ኡዃርሰት ናጛ ቛለት ኤምና ብኑዂ፡፡¹⁹ናዋ ኒን እን እንታዂራ ኒዓረብድ እዃርሳዂ ይዱኑ ሰጝደናዂ ማኒ፤ እማ ናን አዋሃበ ቛላኹን እንኩኹን፤ ይኖ ወንቀርኑኹሎም፡፡²⁰ናዋ ኒን ይናእኹራ አኸትር ዓረብ እዃርሰትር አርእንኹን፡፡²¹ደኣም ናን አዋሃበ ቛለትር አውኒ ብደትሉኽር ኒዕልልሲ ይን ላሪ አርእኒ፡፡ ኒ አሜታት ሻኲ ኒላውድ አርኡዂ ኒት ወንቀራ ይኑኹሎም፡፡²²ናዋ ና ነስ ይና አይሁድልድ ጓቍትንነዲን ግን፡፡ ውረድ ኢየሱስቲ መሲሕሰና ኤምናዂሲክ ቤተ መቅደስልድ ዳገንድኖ ኰድጚነ እርግኑዂ፡፡²³ንድኻ ኒ-ኣ,አሜታት ሻኲ ኒት ወንቀራ የውሎምኻ ጓቍትንነኒዲን ግን፡፡²⁴እን ዓረብ እርጋ ግርወስ ኢጞር ሽጝኖ እምን ጋብረት ላዂ ጃር ሱጙድ ሸሪ፡፡ ውረድ እና ግርዋ ኒን ዓገቡዂ ኣኸት ይን አርእንኹን ይኑኹሉ፡፡²⁵እንሲን ኒኻ ዓገቡዂ አኸት አርኣኹሉ ሻኽሊ፡ ላወራት ግን አን አርአሪ ዓረቦ ሰጞኩን ናንኻ ቛለኩን ዮ ወንተሱኹሎም፡፡²⁶26.ናዋ ኮድኖ ውራ ተካኹንካ፤ ኩድ አዋሃበ ግን ኒ ዕልልሲ ብዳኹካ፤ ይኑኹሉ፡፡²⁷27.ኒኻ ውራ እማ ድዊልመኩም እንትጛ ዋስድኒለ ውረድ ግን፡ ደገስድኖ ዋስትኖለ ጀረብደናኹ፤ ውራ እንትጝርማ ኒታለይቶት አኽትኖ ጀረብድኖ፤ ዮ ወንተሱኹሎም፡፡²⁸28.እንሲን ናዋ ያድቦ እንቲ አኺ ኒታለይቶራ ይን ሙሴሩ ግን ዩኑ ጃኺኒኹሉ፡፡²⁹29.ይን ሙሴት ጃር ጋበትሉ አርእንኹሉ ኒንኻ አወትድ አኸት አርእኒ ይኑኹሉ፡፡²⁸እንሲን ናዋ ያድቦ እንቲ አኺ ኒታለይቶራ ይን ሙሴሩ ግን ዩኑ ጃኺኒኹሉ፡፡²⁹ይን ሙሴት ጃር ጋበትሉ አርእንኹሉ ኒንኻ አወትድ አኸት አርእኒ ይኑኹሉ፡፡³⁰እን ግርዋኻ ይት ፈከርደኩለ እንትን አወትድ አኸት አርእድኒ ኒ ደኣም ይ ዕልልሲ ብድኹ፡፡³¹ጃር ኒት ጓቍተውዲ ኒምራድሲ እሰውዲት ናት ዋሰኲ ግን ግራ ሐጠአንሲ ዋሰገት አርእንኹን፡፡³²እርድ መሀድሰንትልድ ተርሰ ኣዳም ዓረብ ኡዃርሳዂሲ ዕልልሲ ብድኹሉ ይስታዂ ኒ ዀርሲክ፡ ዋስስቶ እላ፡፡³³እና ግርዋ ኒን ጃርልድ አኽጋዂ አከን ላሪ ድኳ እሲሮ ገረስጊስ ዮኻ ወንተስኹሎም፡፡³⁴አበዲ እንቲ ኒውክ ክሪሕ ዐገብሊ ጠበቅ ይሮ እዃርስራኽር ይነትማ ክንሲቶ፤ ይኖኻ ናቤት ጸሎትልድ ከደንሲ ዳገንኹሉ፡፡³⁵ኢየሱሳ ከደንሊ ዳገነትሉ ዋሰሰና፤ አረሰነሉ ኣዳሚንዱኹረድ ኤምንዳኹማ፡ እንቲ፤ ይኹሉ፡፡³⁶ኒኻ ዎ ያደራ ኒድ ኤምንያ አውኒ ግን ኒ፤ ይኹሉ፡፡³⁷ኢየሱሳ ቛልዶሉ ህምብረኲ እና ኩዲ ጋባዂ ኒ ግን ይኹሉ፡፡³⁸ኒኻ ኤምነኩን ያደራ ዮኻ ኒጃብል ሐረበጡዂ፡፡³⁹ኢየሱሳ አን እርድሊ ይእንተርና እን ቛለገዋ ቛልድኖ እን ቛለዋ ዓረብድኖ ፈረድያ ግን ዩዂ፡፡⁴⁰ላው ፈሪሳንልድ ኒል ደውየዋ ኒዲ ነስ ዋስነሰና ይጝርማ ዓረፍ፤ ይኑኹሉ፡፡⁴¹ኢየሱሳ ዓረፍ አክደነን ወርካ አኽርድ ዓገብ ሺብስትጊድኩም፡፡ ናጛ ቛልነኩን ይዱኑ ዓገብሊ ተብደኑኲ ይኹሎም፡፡

10¹እምን እምንድክ ይየኩም እን እጝጊ በጋኹል መራብድ ትውጊ አሪኹድ ባንጉሮ ትዋዂ ስዋነዲ ኩወንታዲ ግን፡፡ ²እን መራብድ ትዋዂ ደኣም ምቃቓ በጉዂ ግን፡፡³ኒድ እንተከዋዂ ማሕሰቢት እንጊሩኹ ብደኩሉ፤ እን በጋ ኒደሄይሲ ዋሰቲ ኒኻ እን በግሲ ላዂ ላኹድ ናሱጙድ ሽጞ ፍደኩለን፡፡⁴በግሲ ፍዶኸለን ናጃብል ፈረኲ፤ እን በግኻ አለለይርነዲንሊ ኒጉርበት ፈረቲ፡፡⁵ኤሪዂ አከን ደኣም አርእግረሪሉ አኽርነዲን ኒልድ ገለበቲ ግራ ኒጉርበት ፈረላ ይኹሎም፡፡⁶ኢየሱሳ እና ድግም ኒስ ጃጝስቲኹሎም ናዋ አስተብሃልድኒ፡፡⁷ንድ ኮዶ ኢየሱስ ሐዲስድ ደገሶ እምን እምንድክ ይየኩም መራብ በጉዂ አን ግን ይኹሎም፡፡⁸እን ይጃብ እንተው ናውክ ስኳንዲ ኩወውዲ ግን፡፡ እን በጋ ዋስሩሎም ሰጞላ፡፡⁹አን ግን መራብ ይድ ደኳዂ ደኤንዶ ግን፡ ቱውራኽር ፍራኽር መሸፈልር አርዳ፡፡¹⁰ሱዋና ሱውሮኽር፡ ኩሮኽር፡ ድሂስሮኽር ግን ኒ እንተራዂ፤ አን ደኣም መናብረት አርቶ በጀኽድሮ አርቶ ግን አን እንቶ ህንባዂ¹¹አን ምቃቃ በኪት ግን፡ እን ምቃቃ በኪት ኒ በግፍዳ ኒሹት እወኲ፡፡¹²እን ምቃቃ አኽጋዂ እንበግ ኒ-ማል አኽግረሪ አኽረነዲን ክራይ ምቃቃ አኽነዲን ትኲላ ቛለን እንበግ ኒው አኽግረሪ አኽርነዲን ባሮለን እግረኲ፡፡ ሲን እን ትዂላ ነጀረኩለን ፋሕር ሰኩለን፡፡¹³ኒ ክራዩዂ አኽነዲን እግረኲ ግን ግራ በግ ሐሰርደለሉ፡፡¹⁴ምቃቃ በኪት አን ግን፡ በግዩሲ አርእኹንለን፡ እን በግ ዩኽር አርእቲለ፡፡¹⁵እን ይኽር አርኣኹድሰነለ አንኽር ይኽርሲ አርእኹንሉ፡ ይፊኹትስኻ ይበግድ ፍዳ ደኩሰኩንላ፡፡¹⁶እና እጝጊ ኒልድ አኽግረሪ በግ አሪውር ህምበቲለ፤ ናትር ላእጝዲ ላሞራዲ አኽቶ ይል ኤድየለን ግን፡ ይደሀይሲ ዋስቶ ግን፡፡¹⁷አን ይፊኹትሲ ፍዳ አኽቶ ደኲሶ እወኩን፡ ወንተሶ ኤዳኽርላ አኽነዲን ይኽር ንድ እንከለኩለ፡፡¹⁸አን ፍዳ ኡዋኹላ ይላውድ ግን ግራ ይልድ ኤድሮላ ገረሳዃ ላዂ እላ፡ አን ፍዳ እውያላ፡ ኮዶኻ ወንተሶ ኤድየላ ሒል ህምበኩለ፡ እና ትእዳድ ኒስ ይኽርትልድ ከለብራዂ ግን ይኹሎም፡፡¹⁹እና ጋብ ነድኻ አይሁድ እኺርኺርሊ ፈተታሕ ትዉኹሎም፡፡²⁰ገሪው ናልድ ጅን ሻዂ ግኒቶ ህንባዂ ግን ውሪዂ ሸኑርዳናኹንሉ ይኑዂ፡፡²¹ኤሪው ደኣም ነስተካ ጋብሲ ጅን ሻዂ ጋበለሎም ውራ ጅን ሻዂ ዕልል ዓረፋ ብድሮ ገረሳኹማ ይኑዂ፡፡²²ኢየሩሳሌምትላ በዓል ተሐድሶ ቤተ መክደስዂ፡ ወክት ሽቕ እርጉዂ፡፡²³ኢየሱሳ ልንጎጭ ቤተ መቅደስ ሰለሙንድኹል ጅልዉ እርጉዂ፡፡²⁴አይሁድ እንሲን ከረረፍኖሉ እንቲ አውኒ አኽታሲክ ሳህሮ እሲቶና፤ ክርስቶስ አክረን ድዊና ይኑኹሉ፡፡²⁵ኢየሱሳ ውራ ድዊኹንኩም ግራ እንትጛ አምንድ ኒል፡፡ እን ይኽርድ ወራታት አን እሰው ይድ መስከረኩለ እንኩዂ፡፡²⁶እን አን ያኹድሰነኩም እንትን ይበግልድ አኽግድናኽር አኽድንነዲን ኤምንድኒለ፡፡²⁷እን ይበግ ይደሄይሲ ዋስቲ፡ አንኻ አርእኹንለን፡ ናዋ ይጉርበት ተለየቲ፡፡²⁸አን መናብረት ዲመዳዩዂ እወኩንለን፡ ዲመሲኻ ድደላ፡ ይናንልድ ላዂ መንተላዂለን እላ፡፡²⁹እን ናት እዋኹለ ይኽር ኒትክልድ ኩጙኲ፡ ይኽርልድ መንተላኹለንኻ ላዂ እላ፡፡³⁰ይዲ ይኽርዲ ላዂ ግን ዮኻ ወንተሱኹሎም፡፡³¹አይሁድ ሕጭልጭሊትድ ኩድኖሉ ይኖ ደገስኖክርጝ አድኑዂ፡፡³²ኢየሱሳ ይኽርልድ ከላእ ትክየው ወራታት ቛሊስኹንኩም፡፡ እማ ናልድ አውሂሲ ኪትኖለ ጀረብደናኹን፤ ዮ ወንተሱኹም፡፡³³አይሁድ ኩጀኽናሲ አዳም አክሩንሲክ አን ጃር ግን ኩይነድ ግን ግራ ኩወራት ትክየውድ አኽላ ይንክርጝድ ኩኖካ ጀረብናዂ ይንኹሉ፡፡³⁴ኢየሱሳ ውራ እንታፍትሕል እንትን አማልኽቲ ንሽቅ፡ ጃሩ ግን ያዂ ክቱብ እለማ፤³⁵እን ጃር ጋባ ናል ዔርዶ ህምብረሪት አማልኽቲ ንሽሕ ዮሎም ደምቢ እን ክቱብ ድድሮ ገረሰላ፡፡³⁶እን እኽር ገውሮ እርድሊ ፈሳዂሲ አዋ እስዲነ ጀኽረኲ እንኩሩዂ ይደናኹንለ፤³⁷ይኽርድ ወራትሲ እሰገን ኤምንገለ፡፡³⁸እሳኽር አኾ ደንቢ ይል አምነግደነን እን አን እሳወራታትሊ አምና፡ ንድ አርእትናኽር ኤምንትናኽር እኽር ይል አኸት እንኻ እኽርሊ ይኹሎም፡፡³⁹ንድኻ ኮዶ ሐዲስድ ሻኽድኖሉ ጀረቢኒዂ ኒ-ደኣም ና-ናንትተልድ ሽልቁርዂሎም፡፡⁴⁰ኮዶኻ ደገሶ እማና ዮሓንስ የመቅዱ ሰጛ አካንሊ ዮርዳኖስር ካርጝል ፈሩዂ፡፡⁴¹ገሪው ኒል እንትኖኻ ዮሓንስ ላሪ አምር እሲለ፡ እን ዮሓንስ እና ግርዋ ንድ ዮ እርገው እምን አኹዂ ይስትጙኑ እርግኑዂ፡፡⁴²ንዳ ገሪው ኒል ኒድ ኤምኑዂ፡፡

11¹ግርዋ ኣልኣዛር ይስታዂ ማርያምዲ ማርታዲር ድገሩዂ ሽኹሽቶ እርጉዂ፡፡ ² ማርያ እን ይና አደረስ ቅዲትድ ሸመትሮ ሽብክ ንርአዀሩውድ ኒልኩኲሲ ሐሰስረሪሉ ግን፡፡ አልኣዛር እን ሽኹሽታዃ ንርዳን ግን፡፡³ንዳ እን ኒሻን ዎ ይናአደራ እን እንከልዳዂ ሽኹሽቶ ህምበኲ ይኖ ኢየሱስትል እንሸቕኑዂ፡፡⁴ኢየሱስ ኒስ ዋሰሰና እና ሹዂዳ ኒን ጃር ሳቡርድ ግን ውረድ ኣዳሚንዱዂራ ኒድ ጀንጀንስሮ ግን ግራ፡ ክረድ አኽላ ኒ እንቶ ህምባዂ ፡ ዩዂ፡፡⁵ኢየሱስ ማርታዲ ንርሻንዲ አልኣዛርዲት እንከሉሎም ሰጞኲ፡፡⁶ዋሶ ዋኑኻ እን እንኒ እርጋ ኣካንሊ ለጛ ኳራ እርጉዂ፡፡⁷ንድ ደምቢኻ ኒታለይቶትሲ ጎና ይሁዳር ብሪል ወንተርንን ይኹሎም፡፡⁸ኒታለይቶታ መምህር ውራ ናን ናን አይሁድ ሕን ጭልጭሊትድ ኩድኖካ ጉኖ እርግኖ ኮዶ ናን ኒል ወንተርቶ፤ ይኑኹሉ፡፡⁹ኢየሱሳ ውራ ግርግ ሽካ ለጛ ሰዓት ኣኽላማ፡ ገርክ ፈራዂሲ እና እርድ ንድ ቲዃ በርህዳዂሉ አኽነዲን ዓንቀፍሰላ፡፡¹⁰ቂር ፈራዂ ደኣም ቲዃ እንግጋዂ አኽነዲን ጎለቆምሰኲ ዮ ወንተስኹሎም፡፡¹¹ነስ ዮ ደምቢኻ አልኣዛር ይነማዳ ገንጆ ህምበኲ እማ ጉድየሉ ፈርድያ ግን ይኹሎም፡፡¹²ኒታለይቶራ ይናአደራ ገንጆ ዋነን እቢርዳለ ይኑኹሉ፡፡¹³ኢየሱስ ኒ ክርድ ግን ኒ ጋበዂ፡ ናው ደኣም ፊዃ ገንጂኹድ ጋባዂ ተከሎም እርጉዂ፡፡¹⁴ሲን ኢየሱሳ አላኣዛር ክሩዂ፡፡¹⁵እንትን አምንትኖ ዋድ ኒል ዲገት ነገስኹ፡፡ ናንኻ ጉና ኒል ይኹሎም፡፡¹⁶እንሲን ቶማስ ድዲሞስ ይስታዂ እን ይታለይቶትሲ ጎና ይጝር ኒዲ ክርኖ ይኹሎም፡፡¹⁷ኢየሱስ ኒል እንቶሰነኻ አልኣዛር ክሮደብተ ሰጃ ኳራ እሰ ዲዊኹሉ፡፡¹⁸ቢታንያ ኢዮሩሳሌምትልድ ሰዃ ኪሎሜትር አከቲ፡፡¹⁹ገሪው ኣይሁዳ ናዳንድ ክረድ ደፍእድኖለን ይኖ ማርያምዲ ማርታዲዲ እርግኑዂ፡፡²⁰ማርታ ኢየሱስር እንተርነስ ዋስረስና ከለብርቶሉ ፊቲ፤ ማርያማ ልጝል ጀጋሕ ይሮ እርግቲ፡፡²¹እንሲን ማርታ ኢየሱስቲ ዎ ያደራ እንቲ ነት ዲውረኽር አክረን ይዳን ክርጊድ ሻዂ ግን፡፡²²ደኣም ናንኻር ጃርሲ ሺውረንሉ ጃረብራኹክ እወትካ ኤርኦ ህምበኩን ይቲሉ፡፡²³ኢየሱሳ ኩዳን ጉሮ ግን ይኹላ፡፡²⁴ማርታኻ ደንጎቢ ግርገድ ጉኒ ወክትሊ ጓት አርኦ ህምበኩን ይቲሉ፡፡²⁵ኢየሱሳ ክሪልድ ጉናዲ ፊኹትዲ አን ግን፡ እን ይድ አምናኹክ ክረጝር እቢሮ መንደርትሮ ግን፡፡²⁶እን ፊኹቱኹል አምናኹ ዲመሲ ክረላ ኒስ አምን ዳኹማ እንቲ፤ ይኹሉ፡፡²⁷ንርኻ የዋ ይአደራ፡ እንቲ እን እርድሊ እንተራዂ ክርስቶስ ጃርኹራ አኽረት አምነኩን ይቲሉ፡፡²⁸እንደዋ ይሮኻ ፈርዶ ንርሻኒ ማርያምቲ ደፋእ ይሮ መምህር እንቶ ህምበኲ ላዂ ሽጞኩኪ ይቲላ፡፡²⁹ንርኻ ኒስ ዋስረሰና ከርተፍ ይሮ ኒል ፈርቲ፡፡³⁰ውረድ ኢየሱስ እን ማርታ ከለብርዳኹሉ ኣካንሊ እርጉዂግራ ኮል አተይላ፡፡³¹እን ደፍእድኖላ እንቶ እርገው አይሁዳ ማርያም ጉሮ ልጝልድ ፍረሪት ቛልነሰና ኤርብል ፈርደሪ ተከሎም ለሄክንኹላ፡፡³²እንሲን ማርያም እን ኢየሱስ አንጦጠሎ እርጋኹል እንትሮ ቛልደሰነሉ ዎ ይአደራ እንቲ ነት ዲውረኽር አክረን ይዳን ክርጊድ ሻዂ ግን ይሩ ኒልኩከል ኣብረክቲ፡፡³³እንሲን ኢየሱስ ስርደሪት ቛለሰነ ላ፡ እን አይሁድር ንርድ ስረውሲ ቛሎሰና፡ ኒኽር ኒጉድጉድ ለለክሱዂ እማ³⁴አዊል ደብዲኒኹንሉ፤ ይኹሎም፡፡ ናዋ ላዂ ቛሊ ይናአደራ ይንኹሉ፡፡³⁵እንሲን ኢየሱስ ስሩዂ፡፡³⁶ኣይሁዳ ቛላ የሄው ውሪኮት እንከሉሉ ሰጛኹን፤ ይስትጚኒዂ፡፡³⁷ላው ናልድኻ ውራ ኒን ዓረብድ ዕልል ብዳዂ ኒስር ክሪልድ ጉድሮ ገረስጊድማ፤ ይኑዂ፡፡³⁸እንሲን ኢየሱስ ኒጉድጉድ ለለክሱ ኤርብል ገእዩዂ፡ እን አርብኻ ክርጛድ አበስታዂ እርጉዂ፡፡³⁹እንሲን ኢየሱስ እና ክርጛስ ያዕየሉ ይኹሎም፡፡ ማርታ ክራኹድ ሻኒኻ ዎ ያደራ ክሮ ሰጃ ኳራ እሰዂ ግን እምቃ እኻረ ህምባዂ ግን ይቲሉ፡፡⁴⁰ኢየሱስ ውራ ኤምንዳኽር አክረን ጃር ሳቡርሲ ቛልቶ ግን፡ ዮኪ እርግሊማ፤ ይኹላ፡፡⁴¹እንሲን ክርጛስ ያዕይኑዂሉ፡ ኢየሱሳ አወት ናዕዮ መኽልቱዂ እማ ኦ አቤ ዋሰርነዲንለ ሐመደኩንካ፡⁴²እና ከው ከለሎለ ህምበው እንቲ እንሻቅረትለ ኤምንድኖ ዮ ግን ግራ፡ እንቲ ዲማ ዋስረትለ፡፡ አርኦ ህምበኩን ዩዂ፡፡⁴³ነስ ዮ ደምቢኻ፡ ደሄይሲ ክብሰ አልኣዛር ላዂ ፊ ዩዂ፡፡⁴⁴እን ክሪዋኻ፡ ናንትትዲ ልኩኲዲት ታዊነድ እንሸውሶ፡ ገሽሲኻ ሽቱትድ ኩቶ ዋኑ ጎቕልድ ፊዂ፡፡ ኢየሱሳ እንከሉ እማ ፈርዶ ባረሉ ይኹሎም፡፡⁴⁵እንሲን ገሪው አይሁድ ማርያምትል እንቶ እርገዋ እን ኒ እሰዂሲ ቋልኖ ኒድ ኤምኑዂ፡፡⁴⁶ላው ናልድ ደኣም ፈሪሳንሊ ፈርኖ፡ እን ኢየሱስ እሳ ጋርሲ ሺኒኹም፡፡⁴⁷እንሲን አቕሸታ በሄሊንዲ ፈሪሳንዲ ዲቢትኖ እና ግርዋ ገሪ አምራት እሰኲ እንኩዂ እማ ውራ እሰ ኒን፤ ይስትጚኒዂ፡፡⁴⁸እንዳ ሀቢሮ ባርነንሉ ከው ናውክ ኒድ ኤምንድኖ ግን፡ እን ሮሚዋ እንትኖ ይናከውዲ ይናንብረትዲት ድሂስድኖ ግን ይስትጚኒዂ፡፡⁴⁹ላዂ ናልድ ቀያፋ ይስታዂ እንሰከር አመሪል አቅሸታ ሲም እርጋዂ እንትን ላሪ ድኳ አርእድኒ ዩዂ፡፡⁵⁰ከው ናውክ ድደውልድ ላ ግርዋ ከዋ ፍዳ ክረን ኪደት ኒዀርሲክ ፈሄምደኒማ፡ ይኹሎም፡፡⁵¹ኒንኻ እንሰከር አመትል ኣቅሸታ ሲም እርግነዲን፡ ኢየሱስ ከዋ ፍዳ ክረት ተምብሁዂ ግራ ኒላውድ አኽላ ኒጋበዂ፡፡⁵²ይኽ እንፋሕዮ ድዶ ህምበው ጃር ቁርስኽር ላድ እን ኩልኩልዶናድር ክረት ተምብሁዂ ግን ግራ ኒ ኮቁርድ ካያ አኽላ፡፡⁵³እንግርጋትልድ ተርሲነኻ ኩድኖሉ ኮድጚኒዂ፡፡⁵⁴ኢየሱሳ ኒታለይቶትዲ፡ ድገ ኤፍርያም ይስትረሪ አው ከደን ገቢል አረርስረሪትል ፈሩዂ፡፡ እንሰከር ደምቢ አይሁድ ጃብል ጋርህስቶ ቋልስቱ እርግላ፡፡⁵⁵ኢየሱስኻ ጀረቡኑሉ እርግኑዂ፡፡ ቤተመቅደስል አኽኖኻ ናሹር ናሹ ውራ ተካኹንኩም እና በዓሊ እንትራማ ይደናኹን፤ ይስትጚንዂ፡፡⁵⁶56. ኢየሱስኻ ጀረቡኑሉ እርግኑዅ፡፡ ቤተመቅደስል አኽኖኻ ናሹር ናሹ ውራ ተካኹንኩም እና በዓሊ እንትራማ ይደናኹን፤ ይስትጚንዅ፡፡ ⁵⁷57. አቅሸታ በሄሊንዲ ፈሪሳንዲኻ ሻኽድኖሉ ኒ ህምባ አካንሲ ቋላኹክ ድዊሮሎም ፈጠኒስኖ እርግነዅ፡፡

12¹ኢየሱስ ፋጅኻ ጃብ ወልታ ኳራ ከብተ ዋኑኻ እን ክሪልድ ጉዳዂ ህምባ አካንሊ ድገ ቢታንያትል ፈሩዂ፡፡ ²ኒላ ሙነት ደለምድኑኹሉ፡ ማርታኻ ስኲስሩ እርግቲ፡ እን ዓገሎ እርገውልዳ ላዂ አልኣዛር እርጉዂ፡፡ ³ማርያምኻ ቅዲት ሕበር እንግገው ገባተትል ናቅስሮ ኢየሱስቲ ኒ ሉኩኲሲ ሸመቲሉ እማ ንርሽክዳ ሐሰስቲሉ፤ እን ልጝንኻ ቂራ ትክያኹድ እንታኹዂኹ፡፡⁴ኒ ታሌቶትልዳ እን ደኩሶ እውሮሉ ህምባዂ ይሁዳ አስቆሮታዊራ⁵ውሪዂ አበዲ ነስተካ ቅዲት ሰዃ ሊኽ ዲናርድ ክስቶ ድቡራንድ እውስጊ ዩዂ፤፡፡⁶ነስ ኒይናኻ ሱዋና አኽነዲን ግን ግራ ድቡራንድ ሳኽንቶ አኽላ፡፡ እን እንድባ ኒናንሊ አኽነዲን እን እዉኑሎም እርግነውልድር ስዉ እርግነዲን ግን ኒ እነደ ዋ ይና፡፡⁷እንሲን ኢየሱስ ይደብትኒ ግርገድ ደለምድረው ግን ባሪ ይግላ፡፡⁸ውረድ ድቡራን ዲማ እንተዲ ግን ይታ ዲማ ኤረርደኒለ ይኹሎም፡፡⁹ገሪው ኣሁድልዳ ኒል ዋነት ኢየሱስቲ ቋልድኖ ካያ አኽጊ እን ኒ ክሪልድ ጉዳዂ ኣልኣዛርቲኽር ቋልድኖ እንትኑዂ፡፡¹⁰ንድኻ ገሪው ኣይሁድልድ ናውሲ ባርኖ ኢየሱስትል ኤምነዲን¹¹ኣቅሸታ ነህሊን ኣልኣዛርትኽር ኩድኖ ኮድጚኒዂ፡፡¹²ኒ ኤመሪታ ከው ባዓሊ እንቶ እርገው ኢየሱስ ኢዮሩሳሌምትል እንቶ ዋነት ዋስነሰና፡¹³ኣቕሹን አጙኩ አድኖ ከለብርድኖሉ ፍኑዂ፡፡ ሆሳዕና ጃር ስጙድ እንተራዂ ንጉሥ እስራኤዱዂ ገውርሳዂ ግን ዩኑ በረጁኑ¹⁴ከለብርንኹሉ፡፡ ኦ ጽዮንድቍራ ላሪ ጓቍትግ እነሐን ኲንጉስ ጌንብል ጨዓንሶ እንተረኲ እጝኩዂ ያዂ ክቱብ ዋኒነዲን¹⁵ኢየሱስ ገንብ ድዃሪዂ አርዂ እማ ኒል ጨዓንሱዂ፡፡¹⁶ኒታለይቶት ኒስ ፈሀምኖ እርግኒ እማ ኢየሱስ ጀንጀንሶሰና ደኣም ኒን ኒድ አኸት አልብድኑዂ፡፡¹⁷እን አልኣዛርቲ ኤርብልድ ሽጞ ጉዱሉ ቋለው ከውኻ ሳምዕዱኑሉ እርግኑዂ፡፡¹⁸እን ከዋ እና አምር ኒስ እሰት ዋስንነዲን ግን ከለብርድኖሉ ናው ፍናዂ፡፡¹⁹ፈሪሳጛ ናሹር ናሹ ናውክ ኒል ፈረነኲ ላሪ እስቲሮ ገረስተላ ይስትጚኒዂ፡፡²⁰እን በዓሊ ፈ እርገውልዳ ገሪው ግሪክ እርግኑዂ፡፡²¹ነን ፍሊጶስ ቤት ሳይዳሩኹል እንትኖ ዎይና አደራ ኢየሱስቲ ቋልኖ ጀረብነኩን ይኖ ሺዊኒኹሉ፡፡²²ፈሊጶሳ ፈሮ እንድርያሲ ድዊኹሉ እንድርያስዲ ፍሊጶስዲኻ ኢየሱሲ ድዊኒኹሉ፡፡²³ኢየሱሳ ኣዳሚድዂራ ሳብስተሉ ወክት ገእዩዂ፡፡²⁴እምን እምንድክ ይየኩም ጀርጉ ፈደና ብሪል ደፈንስሮ ክርግረን ንርቱ ከብተቲ ክርደጛ ገሪው ፍሪተቲ፡፡²⁵እን ኒ ፊዂትሲ እንከላዂ ድሂሰኩላ እን እና እርድ ኒል እንጠራኹላኻ ዲመሲ ፊዂት ህምበኩሉ፡፡ ²⁶ታላያኹለ ዋነን ለሄክንለ እን እንሻቕሳኹ እን ኣን ህምባ ኣካንሊ ኣኽሮ ግን፡ እን እንሻቕሳዂሲለኻ ኮዶ ይኽር ሳቢሮሉ ግን፡፡²⁷ናን ይሪሕ ሰህሮ ኣኽሮ ህምበቲ እማ ውራ ይን ዎኤበ እና ወክት ኒልድ ደኤንዲለ ዳኣም ንድ መታን ግን ኣን እና ወክት ኒል ኣን ገእያዂ፡፡²⁸እማ ኦ፡ ኤበ ኩሱጙሲ ሳቢ ዩዂ፡ እንሲን ዓስተርልድ ሳቢኹንሉ ኮዶ ሐዲስድ ሳብየሉ ግን ያዂ ደሄይ ዋስስቱዂ፡፡²⁹እን ኒል ዲወው ከዋ ኒስ ዋስነሰና ጓንጉ ግን ይኑዂ፡፡ ላዋ አኽላ መልአኽ ጋቢኹሉ ይኑዂ፡፡³⁰ኢየሱሳ እና ደሄይ ኒን እንተድ ግን ግራ ይድ አኽላ ኒ እንተርና፡፡³¹እና እርድ ንድ ፍርድ ናን ግን፡፡ ሲም እና እርዱኹ ከደንሲ ዳገንስሮ ግን፡፡³²ኣንኻ ብሪልድ ጉሰና ናትክ ይል ወተርየሎም ግን ይኹሎም፡፡³³ነስ ኒ ይናኻ አወያ ክራ ክርዶ አኸት ፈሄሚስሮሎም ዮ ግን፡፡³⁴ንድኻ እን ከው ይን ክርስቶስ ዲመሲ መንደርተት ኦሪትልድ ዋስንኹን ናንኻ እንቲ አዋ ህብረ ግን ኣዳሚንድኹ ብሪልድ ጉሮ ግን ይራኹን፤ እነ ኣዳሚንድዂራኻ ኤውኒ ግን ኒ ይንኹሉ፡፡ ³⁵ኢየሱሳ ቲዃ ከለላ ወክትሲ እንታ ነበክል ህምበኲ ጭልም ኤርጊንኩም በርሆ ዋኑ ጅልልዋ ውረድ እን ጭልምሊ ጅልልዋዂ ኒ-ዳደዂ ኤርእላ፡፡ ³⁶ቲዂ ቍር ኣኽትኖ በርሆኩም ዋኑ በርህሊ ኤምና ይኹሎም፡፡ ኢየሱስ ነስዮ ድምቢ ናልድ ፈሮ ትብቱዂ፡፡³⁷ናጃብል ነስካ አምራት እሶ ዋኑ ዳኣም እን ነቢ ኢሰያስ ዎ ያደራ ይና መስከረነስ ኤዊ ኤምንኹንሉ ጃርሒልኻ አውሲ ቃልዕስታዂ ያ ጋባ ተመምቶ ኒድ ኤምንኒ፡፡ ³⁸38-39.ንድኻ ኢሰያስ ደገሶ ናዕልዳ ቋልኖ ናለበከዳ ፈሄምኖ ወንተርግኒን ኣንኻ እቢስጊንሎም ናዕልልኻ ዓረቡዂ ናለፈካ ደንደዱዂ ዮ ጋበ እርግነዲን ኤምንድኖሉ ጀረቢኒ፡፡³⁹⁴⁰ ኒ ሳቡርሲ ቋልነዲን ግን ኢሳይያስ ኒ ነስ ዮ ጋበዂ፡፡⁴¹ገሪው አስያምልድኽር ኒድ ኤምኑዂ ደኣም ፈሪሳን ጸሎት ልጝልድ ዳገንግኒንሎም ጉኢትኖ ናእምነት ትብታንድ ኣኹዂ፡፡⁴² ኒጛ ሳቡር ጃሩዂልድ ከዋ ሳቡር ፍሪርንነዲን ግን፡፡⁴³ኢአሱሳ ደሄይሲ ክብሰ ይድ ኡምናዂ እን እንሻቃዂሲ ለ ግን ኒ ኤምና ይት ኣኽላ፡፡⁴⁴እን ይት ቋላዂ ኮዶ እን ይት እንሻቃዂሲ ለ ግን ኒ ቋላዂ፡፡⁴⁵ እን ይት ቋላዂ እን እንሻቃዂሲለኽር ቋልዶ ግን፡፡⁴⁶እን አምናኹክ ጭልምሊ ፈርጊን ኣን ቲዃ ኣኾ እርድሊ እንቶ ህምባኽር ግን፡፡⁴⁷ እን ይጋበት ዋሶ ተከውጋዂሲ ኣን ኣኽሊ ኒት ፈረዳኽር ውረድ ኣን እርድሲ ደኤንድያ እንቶ ህምባኽር ግን እርድሲ ፈረድያ እንትሊ፡፡⁴⁸እን ይት ጉሻሻ ይጋበትኽር ከለብረጋዂሲ ኒት ፈረዳዂ ግምበኩሉ፤ እና ኣን ጋበው ደንጎቢ ግርገድ ፈረድሮሉ ግን፡፡⁴⁹ኒንኻ እን እንሻቃዂለ እኽር ኒላውድ ወራ የትለኽር ይኽ ውራ ጋበትር አደደትለኽር ጋበኩን እንኩኹን ግን ግራ ይኣኾርድ ኣኽሊ፡፡⁵⁰እን ኒትእዳድ ዲመዳይድ ፊዂትድ ኣኽት ኤርእኹን፡ ኒስኻ እን ኣን ጋበው እን እኽር ድወሰነላ ግን፡፡

13¹በዓል ፋጅኺኺድ ጃብ ኢየሱሳ እና እርድ ኒልድ ኒኽርሊ ወንተራ ወክት ገእየት አርኦ እርግነዲን፤ እና እርድ ኒላ እን ኒውሲ ግንዲ እንገት እንከሉሎም እርጉዂ ደንጎቢል ኣኽራሲካ እንከሉኹሎም፡፡ ²ሙነቱኻ ይሁዳ ኣስቆሮታዊራ ስምኦንድዂራ ኒ መምህርሲ ደኲሶ ኡሮሉ ሰጣን ኒ ለበኪል ሀመት ቱሶሉ እርጉዂ፡፡³ኢየሱሳ ኒኽር ኒትክ ኒናንሊ እወትሉኽር ጃርልድ እንተት ጃርሊኻ ወንተረት አርኦ ⁴ሙነትልድ ጎ ኒሰረንሲ ገምዶ ታዊና አዶ ደበልቱዂ ⁵ግባርሊ ዓቍ ኤዱዂ እማ ኒታለይቶትሲ ሉኩኲሲ እንቃስሮኽር ደበልቶ እርጋ ታዊነድ ሐሰስሮሎም ተርሲዂ፡፡⁶ስምዖን ጴጥሮስትል እንተሰና ዎ ያደራ እንቲ ይልኩኲ እንቃስቶማ፤ ይኹሉ፡፡⁷ኢየሱሳ እንቲ እና ኣን እሳዂ ናን ኤርእስተለካ ደምብርጝ ኤርእስትሮካ ግን ይኹሉ፡፡⁸ቤጥሮሳ ኒኾርሲክ እንቲ ይልኩኲሲ እንቃሰለለ ዮ ጋዕዮ ገብኹሉ፡፡ ኢየሱሳ ኣን ኲ ልኩኲሲ እንቃሰገንካ እንቲ ይዲ በና ሻኽላ ዮ ዎኺትኹ፡፡⁹እንሲን ስመኦን ቤጥሮስ ዎ ያደራ ልኩኲሲ ካያ ኣኽጊ ውራ ኣኾርዲ ናንትትዲትኽር እንቃሲለ ይኹሉ፡፡¹⁰ኢየሱሳ እን ገሮብሲ እንቃራዂ ልኩኲሲ ኣኽጋዂ ጫርይ ግን እንቃርና ጀረብደለሉ እንትን ጫርያን ግን ድኣም¹¹ናውክ ጫርያን አኽድኒ ኒንኻ እን ደኲሶ ኡሮሉ ህምባዂሲ አርኡ እርግነዲን ግን፡፡¹²ልኩኲሲ እንቃሶሎምኻ ኒ-ታኲን ሰሮ ከፍ ዩዂ፤ እና እሰዂሲኩም ፈሄምደናኹማ፤ ይኹሎም፡፡¹³እንትን ይት መምህርኽር ይደነኲን ኒሰና ግን አጃይድኑዂ፡ እንታ እምን ግን፡፡¹⁴እማ አን መምህርዲ አደራዲ እናሃበ እንታ ልኩኲሲ እንቃሳኻርኩም ኣኾ ደንቢ ችንትጝር እኺርኺራ ልኩኲሲ እንቃስትኖ ወጀበኩኩም፤ እነሐን አን ቋሊስኹንኩም ይኹሎምለ፡፡¹⁵እናሐን እን አን እሰኹድሰና እሲትኖ ሕርሳ እዎኩም ህምበኩን፡፡¹⁶እምንድክ ይየኩም ኒአደሪልድ ኩኝዂ ገንሺና፡ ኒእንሸቐንቲልድ ኩጛዂንሽቃ እላ፡፡¹⁷ እነሐን እና ጋር ኒን ፈሄምሶኩም ህምበኲ፤ እስደነንሉ ሻትካን ግን፡፡¹⁸ እና አን የውኩም ናድክድ አኽሊ አን ጋባዂ፡፡ እን አን ፍሪረውሲ አርእኹንሎም፡፡ እን ይዲ ይሳንስዓስ ቋዂ እንጠሩኹለ ያዂ ክቱብ አኽሮ ዮ ግን ኒን ኒአክና፡፡¹⁹አን አውኒ አኽት አርእትኖ ናን አንበታዂ ድወኩንኩም እንኩኹን፡፡²⁰እን ይንሽቀስ ከለብራዂ ይት ከለብረኲ፡ እን ይት ከለብራዃ እን ይት እንሻቃዂሲ ከለብረት እምንድክ የኰንኩም እንኩኹን፡፡²¹ነስ ዮኻ ኢየሱስ ኒ ጉድጉድ ለለክሱዂለ፡ ስንቕንቕ፡ ዩዂ እምን እምንድክ ይየኩም እንተልድ ላዂ ደኲሶ እውሮለ ግን፡፡²²ንድኻ ኒታለይቶት ኤውሲ ጋበት አርእምብስተሎም እኺርኺርሲ ምኸልትጚኒዂ፡፡²³ላዂ ኒታለይቶትልድ እን ኢየሱስ እንከሉ ሰጛዂ ኢየሱስር ነሐርሊ ጨግዕስቶ እርጉዂ፡፡²⁴ቤጥሮስ ሕንጉጥሰሎ እንደ ኤውርሰበትድ ግን ኒ ጋባዂ፤ ወንቀሪንደሉ ይኹሉ፡፡²⁵ኒንኻ ኢየሱስር ነሐርሊ ጭግዕ ዮ ዋንቱ ዎ ያደራ ኤውኒ ግን፤ ይኹሉ፡፡²⁶ኢየሱሳ እና ናን አን ሳንስዓ ሻቑሶ እዋዂ ኒ ግን ይኹሉ፡፡ እንሲን ሳንስዒልድ ሽርፍሰኻ ሻቑሶ ይሁዳ ስምኦን አስቆሮታዊራዂረድ እዉኹሉ፡፡²⁷እንሲን እንልቁመቲዲኻ ሸጣን ትዉዂ፡፡ ኢየሱሳ ፈሪና እስራዂሲክ ናን ወለይድሮ እሲሉ ይኹሉ፡፡²⁸እን ኒል ዓገሎ እርገውዳ ውሪዂ እንደወየትሉ ፈሄምስለሎም፡፡²⁹ላው ደኣም ይሁዳ እንድባ ማላዂ ኒዲ አኽነዲን ወሪ በዓልድ አካዂ ጅቢሮ ወሪ ኮዶ ድቡራንድ እዊ ያኹሉ ተኪሲኒዂ፡፡³⁰ኒኻ እን ልቁመትሲ ሱጞሰና ንርድ ንርድ ፊዂ፡ ብራኻ ቂር እርጉዂ፡፡³¹ኢየሱሳ ይሁዳ ፈረሰና እናሓን ናን ኣዳሚንድዂራ ናን ሳብስቲዂ፡ ጃርኽር ኒድ ጀንጀንሱዂ፡፡³²ጃር ኒድ ሳብስተ ደምቢ ጃርኽር ኒላውድ ሳቢሮሉ ግን፡ ኤሸሻኹድር ሳቢሮሉ ግን፡፡³³እንትን ይቑር ከለላ ወክት እንተዲ ህምበኩን፡ ጀረቢትኖለ ግን፡ ደኣም እን አይሁድሲ ያኹድሰነሎም እን አን ፈራኹል እንትንኽር እንትትኖ ጀረቢትኖ ግን ደኣም አከለኩም ያኹድሰነሎም እንተትር ናን ያኩንኩም እንኩኹን፡፡³⁴ትእዳድ ሐዲስ እወኩንኩም እንኩኹን፡ እኺርኺርሲ፡ እንከላ፡ እን አን እንከላኹድሰነኩም እንትጝር እኺርኺርሲ እንከልትኖ ትእዳድ ሐዲስ እወኩንኩም እንኩኹን፡፡³⁵እኺርኺር ሻም ዋንተንኩም ናውክ ይታለይቶት አኽድነት አርእድነኩም ይኹሎም፡፡³⁶ስምኦን ጴጥሮስኻ ዎ ይአደራ ኤዊል ፈርቶ ግን፤ ይኹሉ፡፡ ኢየሱሳ እን አን ፈራዂሊ እንቲ ናን ተለይቶለ ገረሰላ፡ ደምብርጝ ግን ኩተለይነለ ይኹሉ፡፡³⁷ቤጥሮሳ ድዊ ያደራ ውረድ ናን ተለይየካ ገረሰሊ አን ኩመታን ይፊኹትሲ ፍዳ ደኩሶ እውሪ ይኹሉ፡፡³⁸ኢየሱሳ ኲፊኹትሲማ ይመታን ደኲስሮ እውቶ፡ እምንድክ ይየካ እንቲ ዲርዋ ኳየጊ ሲኹን በረይቶለ ግን ዮ ፈጠኒስኹሉ፡፡

14¹እንተ ለፈክድ ሰንፈላል አኽጋ ጃርድር ይድር ኤምና አረጋ፡፡ ²ይኽር ልጝሊ ገሪ ኣካናት ህምበኲ፡፡ ኒሰና አከገን ድዊሪድኩም ሻኽር ግን፡ አካን ደለምድየኩም ግን፡፡ ³ኣካን ደለምደሰነልኩም እንትጝር ዲመሲ እን አን ህምባኹል ይዲ አኽትኖ ወንተሮ ኤድየኩም ግን፡፡⁴ኣን አዊል ፈረት ይጉግሲ አርእድኑዂ ይኹሎም፡፡⁵ቶማስ ዎ ይአደራ! እንቲ ኤዊል ፈርደት አርእግኒ እን ጉግሲ አዋሀብነ ኤርእኖሉ፤ ይኹሉ፡፡⁶ኢየሱሳ እን ጉግዲ፡ እምንዲ፡ ፊኹትዲ ግን፡ ይድ አኽገት ኒዀርሲክ ይኽርሊ እንተራዂ እላ፡፡⁷ይት ኤርእድናኽር አክደነን፡ ይኽርኽር ኤርእትንድ ሻኽድናኽር ግን፡ ንድ ደምብክ ደኣም ኤርእድኖኽርሉ ቋልድኖኽር ህምብደነኲ ይኹሎም፡፡⁸ፍሊጶሳ ዎ ይአደራ! ኩኹርሲ ቋሊሲና ግን ግራ አቕትረና ይኹሉ፡፡⁹ኢየሱሳ ውራ ይራኹን ዎ ፍሊጶስ፤ ንስካ ወክት እንተዲ ዋንቱንሲክማ አርእግሪለ፤ እን ይት ቋላዂ ይኽርሲ ቋላዂ አዋሃብረ ደኣም እንቲ እኽርሲ ቋሊሲና ይራኹን እንኩሩኹን፡፡¹⁰አን እኽርሊ ዋነት እኽርኻ ይል ዋነት ኤምነላማ፤ እን አን ጋበው ጋብ ይሹትልድ አኽላ፡ እን ይኽር ይል ህምባዂ ግን ኒትክ ወራትሲ እሳዂ፡፡፤¹¹አን ይኽርሊ ዋነት ይኽርኻ ኮዶ ይል ዋነት ኤምና አከገጛ እና ወራታትድ ኤምነለ፡፡¹²እምን እምንድክ ይየኩም፡ እን ይኽርሊ ፈረኩን እንኩኹን እማ እን ይድ ኤምናኹክ ንኽር እን አን እሰሰና እሲሮ ግን፡ ኒስጝ ኩጞውር እሲሮ ግን፡፡¹³እኽር እኹሪ ሰበትድ ሳብስቲሮ ይሱጙድ ሺውዲነዂሲ ኒትክ እሲሮኩም ግን፡፡ ይሱጙድ ሺውዲነዂሲክ ሺውደነን እሲሮኩም ግን፡፡¹⁴እንከልደናኽርለ አክደነን ይትእዳድሲ ተከዋ፡፡¹⁵አን እኽርሲ ሺውየሉ ግን፡ ዲማ እንተዲ መንደርታዂ ደፍእዳኹኩም ኤሪዂ እውሮኩም ግን፡፡¹⁶ኒኻ እርድ ቋልጓኹሉኽር ከለብርዶሉኽር ገረሰጋዂ መንፈስ ሻትክ ግን፡፡¹⁷እንትን ደኣም እንተዲ መንድርታዂ አኽነዲጝር እንትል ዋኒነዲጝር አርእድኑኹሉ፡፡¹⁸የታይም ባረኩንኩም ወንተርድየኩም ግን፡፡¹⁹ከለላ ግርጋት ደምቢ እርድ ኒዀርስክ ቋለለ፡፡ ደኣም እንትን ቋልትኖለ ግን ውረድ እን አን ህምባኹል እንትጝር ዋኒትኖ ግን፡፡²⁰እን ግርጋትሊ አን ይኸርሊ እንትጛ ይል አንኻ ኮዶ እንተል ዋነት ኤርእትኖ ግን፡፡²¹እን ይትእዳድሲ ከለብሮ ተከዋዂ ኒ ግን እንከላዂለ፡ እን እንከላዂሶለኻ ይኽር እንከለኩሉ፡ አንኽር እንከለኩንሉ ይሹትር ቀልዕየሉ ግን ይኹሎም፡፡²²እን አስቆሮታዊራ አኽጋዂ ይሁዳ ድዊ ያደራ ውሪዂ እርድድኻ ቃልዕስተግራኽር ይንድኻ ቀልዕስትራኽር፤ ዮ ወንቀሩኹሉ፡፡²³ኢየሱስኻ እን እንከላኹለ ይጋበት ተከውኲ፡ ይኽርር እንከለኩሉ፡ ኒል እንትኖኻ መስከብ እሲኖ ግን፡፡²⁴እን እንከለጋኹለኻ ይጋበት ተከውላ፡ እና እንትን ዋስደና ጋብ ነን ይጋብ አኽላ እን ይት እንሸቃዂ ይኽርድ ጋብ ግን፡፡²⁵እን እንተዲ ዋኑንሲክ ነስ ድወኩም እርጉኽን፡፡²⁶እን ይኽር ይሱጙድ ፈስሮልኩም ህምባዂ ደፍእዳኹኩም መንፈስ ቅዱስ ኒትክ ክንሲሮኩም ግን፡ ኒ ናትክ እን አን ድወውሲኩም ኤልብዲስሮኩም ግን፡፡²⁷ይወርክናርሲ ባረኩንኩም እንኩኹን፡ ይደባንሲ እወኩንኩም እጝኩኹን፡ እና አን እዋኹም እን እርድ እዋኹድሰና አኽላ፡ እንታ ለፈክ ሰንፈላል አኽጊን ጓቍትጋ፡፡²⁸28.አን ፈርድያ ግን እንተልር ወንተርድያ ግን የትኩም ዋስድኖ ህምብደነኲ፡ እማ ይኽር ይልድ ኩጛዂ አኽነዲን እንከልደናኽርለ አክደነን ይኽርሊ ይፈር ፈርሕድርድኩምሻዂ ግን፡፡²⁹29.እን ወራት አኾሰና አምንትኖኻ ናን ኒአክኒ ጃብ ድወኩንኩም እንኩኹን፡፡³⁰30.ንድ ደምቢ እንተዲ ገሪዂ ጂጝስተሊ፡ ሲም እና እርዱዂ እንተረኲ እንኩዂ አከጝር ይአውይሲ ላሪ ገርስ ሻኽላ፡፡³¹31. ደኣም አን ይኽርሲ እንከለት እርድ አርእሮ እን ኒ ያኹድሰነለ እስያ ግን፡ ሃያ ጓ ነትድ ፈርንን ይኹሎም፡፡³⁰ንድ ደምቢ እንተዲ ገሪዂ ጂጝስተሊ፡ ሲም እና እርዱዂ እንተረኲ እንኩዂ አከጝር ይአውይሲ ላሪ ገርስ ሻኽላ፡፡³¹ደኣም አን ይኽርሲ እንከለት እርድ አርእሮ እን ኒ ያኹድሰነለ እስያ ግን፡ ሃያ ጓ ነትድ ፈርንን ይኹሎም፡፡

15¹ኣን እምንዲ ካና ጀቢብሪ ግን፡ እን ንርቲ ተከላዂ አረሳኻ ይኽር ግን፡፡ ²ይል ፍሪተጋ ለንክክሲ ቃረጨኩሎም፤ እን ፍሪታ ልንክክስኻ ትክሰ ፍሪትሮ ዮ ጨረይደኩሎም፡፡³እንትን ደኣም እን ጋባ ኣን ድወኹድኩም ናግያን ግን፡፡⁴እንትን ይል ተብድኖ መንደርታ ኣጝር እንተል ተቦ መንደርትያ ግን፡፡ ለጝካ ካና ጀቢብሪትል ተቦ ተከነገን ኒላውድ ላሪ ፍሪትሮ ገረሰገሰና እንትጝር ኒሰና ይል ተበግደናን ላሪ ፍሪትደኒ፡፡⁵ ኣን ካና ጀቢብሪ ግን፡ እንትጛ ለጝክክ ግን፡፡ እን ይል መንደርታዂ አጝኽር ኒል መንደርተኲን ኒግን ገሪው ፍሪታዂ፡፡ ውረድ ይጥ እንገት ላሪ እሲትኖ ገረስደኒ፡፡⁶ ኒዀርስክ ይል ተቦ መንደርተጋዂክ፡ ለጝካ ኢዳኹሰና ከደን ማልሰኲ እማ ቀሸምሰና ሐው ይሮ ሳኺል ማልሰኲ፡፡⁷ ይል ተብድኖ መንደርትደነን ይጋባኻ እንተል ቱረን ሺውዲነዂክ ኒውክ ኣኽሮልም ግን፡፡⁸ገሪው ፍሪትደነን ንድ ሰበትድ ይኽር ጀንጀንስሮ ግን፡ እንትጛ ይታሌቶት ኣኽትኖ ግን፡፡⁹እን ይኽር እንከላኹድሰነለ ኣጝር እንከለኩንኩም እንትጝር ይእንከሊትል ተባ፡፡¹⁰እን ኣን ይኽርድ ትእዳድሲ ተከዉ ኒ እንከሊትልር መንደርኹሰና እንትጝር ይትእዳዳትሲ ተከውደነን ይእንከሊትል ተብድኖ መንደርትትኖ ግን፡፡¹¹ይ ፈርሐት እንተል ኣኽሮ እንታ ፈርሐት ኮዶ በሄርኮት ኣኽሮ ኒስ ድዊኹንኩም፡፡¹²እን ኣን እንከላኹድሰነኩም እንትጝር እኺር ኺርሲ እንከልስጚትኖ ይጥእዳድ ኒን ግን፡፡¹³ግርዋ ኒማስድ ኒፊዂትሲ ደኲሶ እዋኹድ እንከሊ ትልድ ኩጓዂ እላ፡፡¹⁴እንትን እና ኣን ያኹድሰነኩም ኒትክ እስደነን ይማስ ግን፡፡¹⁵ንደምቢ ገንሺን የሊኩም፡ ውረድ ገንሺና እን ኒአደራ እሳዂሲ አርእላ፡ ኣን ደኣም እን ይኽርልድ ዋሰውሲ ናትክ ድዊነዲንኩም ይማስ ግን የኩንኩም፡፡¹⁶ኣን ግን እንተት ፍሪራኽር ግን ግራ እንትን ኣኽድኒ ይት ፍሪርድናኽር፡፡ እን ይሱጙድ ሺደናዂሲ ኒትክ ይኽር ኡሮኩም ፈርድኖኻ ፈሪው ፍሪትኖ እንታ ፍራኻ መንደርተንታ ኣኽሮ ዮ ፍሪርኹንኩም፡፡ ንድ ይኽ እን ይስጙድ ይኽርሲ ሺውዲነዂሲክ ኡሮኩም ግን፡፡¹⁷17.እኺርኺርሲ እንከልስጚትኖ ኒን ይትእዳድ ግን፡፡¹⁸እርድ እንጠረንኩም እንታጃብ ይት እንጠረት ፈሀማ፡፡¹⁹እርድ ኒው ኣክደነን እንከልድድኩም ውረድ እርድ እን ኒው ኣኽውሲክ እንከለኩሎም፡፡ ዳኣም ኣን እርድልድ ፍሪሮ ኒልድ ፍድነዲንኩም ኒው ኣኽግድናኽር ኣኽድንነዲን እንጠረኩኩም፡፡²⁰ገንሺን ኒአደሪልድ ኩጓዂ እላ የኩም እርገት ይጋበት አልብዳ፡፡ ይት ጀረብድኖ ደምቢ እንተትር ጀርብድድኖኩም ግን፡፡²¹ደኣም እን እንሻቃዂሲለ ኤርእጝብነድ ይሱጝ ሰብትድ ነስ ናትክ እሲድኖኩም ግን፡፡²²ኣን ይላውድ እንቶ ድዊጋኽርሎም ኣክገን ሐጢአት ሺብስትጊድሎም ሻዂ ግን፡፡ ናንኻ ናሐጢኣትድ ላሪ ምስምሳ ሻኽኒ፡፡²³እን ይት እንጠራዂ ይኽርስኽር እንጠረኲ፡፡²⁴ና ነበክል ኤሪ ኣዳም እሲሮ ገረሰገው ወራት እሲጋኽር ኣከገን ሐጢኣት ሺብስትጊድሎም ሻዂ ግን፡ ናንኻ ቋልኖ ዋንቱኑ ይዲ ይኽርዲት እንጣርኑኹና፡፡²⁵ሚምኻ እን ናትእዳዳትሊ ላሪ ምስምሳ እንገት እንጠርንኹለ ያዂ ክቱብ ተመምሮ ግን ኒ ኣኻዂ፡፡²⁶እን ይኽልድ ፈሲየኩም ህምባዂ መንፈስ እምንዱዂ ይኽርልድ ፈዂእንተሰና ኒ ይድ ሳምዕድሮለ ግን፡፡²⁷እንትንኽር ሰልፍድ ይዲ እርግድናኽር ኣኽድንነዲን ሳምዕድትኖለ ግን፡፡

16¹ነስ ኣን ድወኹኩም እንታ እምነትድ ኣንቁሪት ግድኒን ዮ ግን፡፡ ²ና ጸሎት ልጝንተልድ ዳገንድኖኩም ግን ይኽ ላዂ ኩወነንኩም ኮዶ ጃርድ ሰደቀት ሱኲሳኹድሰና ተካ ወክት እንትሮ ግን፡፡³ይኽርዲ ይዲት አርእምብነድ ነስ ናትክ እሲድኖኩም ግን፡፡⁴ሚወክት ኣኽሰና እን ኣን የሰነኩም አልብድትኖ ዮ ግን ኣን ድወኹኩም፡፡⁵ኣን ናን እን እንሻቃዂሊለ ፈረኩን እጝኩኹን እን ተልድ ላዂ ኤዊል ፈርቶ ዮ ወንቀራኹ እላ፡፡⁶ናን ነስ ይነዲንኩም እንተለፈክ ሰህሮ እንታ ኸቱዂ፡፡⁷ደኣም እምንድክይየኩም አንፈረን ኪደኩኩም፡ ውረድ አን ፈረገን እን ደፍእዳዂ እንተረለኩም፡፡ ኣን ፈረን ደኣም ኒት ፈስየልኩም ግን፡፡⁸ኒ እንቶሰና ሐጢኣትድር ሸተክነድኽር እርድሲ ፍርድድ ዓውቲትሮ ግን፡፡⁹ሐጢኣትድ ይት ኤምናብነድ ግን፡፡¹⁰ሸተክነድ ይኽርሊ ፈራኽር አኽነዲን ንደምቢክ ቋልደኒለ፡፡¹¹ፍርድዳ እና እርድ ሕክም ሲም ፈረድሱዂ፡፡¹²ናጝር ይውኩም ገሪው እርጉኹለ ዳኣም ዋስስተለኩም ትቕሮኩም ግን፡፡¹³እን መንፈስ ሻትክ እንቶሰና ኒ ኒላውድ እምንሊ ታተይሮኩም ግን፡፡ ኒ ዋሳዂሲክ ካያ ጋበኲ ግን ግራ ኒ ኒላውድ ያኹኩም ሻኽላ፡፡ እን አኽሮ ህምባ ወራታትሲ ኤርእሲስሮኩም ግን፡፡¹⁴ኒ ይልድ ኤዶ ድዊሮኩም አኽነዲን ሳቢሮለ ግን፡፡¹⁵ኒውክ ይኽርዱዂ ዩዂ ግን፡ ኒድ ግን ይልድ ኤዶ ድዊሮኩም ግን አን ያኹኩም፡፡¹⁶ከለላ ግርጋትሲ ቋልደኒለ ከለላ ግርጋት ደምቢኻ ሐዲስድ ቋልትኖለ ግን፡፡¹⁷ላው ኒ ታለይቶትልዳ ናሹር ናሹ አበዲ ውሪ ሰበትድ ግን ከለላ ኳሪስ ቋልትኖለ ግን ኒያኹና፤ ውሪዂ ይኽርሊ ፈርያ ግን ያኹንና፤ ይስትጚኒዂ፡፡¹⁸ንድኻ ውረድ ግን ኒ ከለላ ግርጋት ያኹና፤ ኒዀርሲክ ፈሄምሶና እላ ይኑዂ፡፡¹⁹ኢሱሳ ወንቀርድኖሉ ጀርቢነት ኤርእስቶሉ ከለላ ግርጋትሲ ቋልደኒለ፡ ኮዶ ሐዲስድ ከለላ ግርጋት ደምቢ ቋልትኖለ ግን ይነዲንኩም ማ፤ እኺርኺርሲ ወንቀርደናኹን እንኩድኑኹን፡፡²⁰እምን እምንድክ ይየኩም እንትን ስሪትኖኽር ቁርቁርትኖኽር ግነ፡፡ እርድኻ ፈርሕሮ ግን፡፡ ቁርቁርትትኖግን ደኣም እንታ ቁርቁርትና ፈርሐትሊ በደልስሮ ግን፡፡²¹እዂና ንር እዃርና ወክት አኾሰና ምሕጮሲ ንርዓቕል ሽብወኩላ፡፡ እዃርደሰነኻ እርድሊ አዳም እዃርስነዲን እን ንርምሕጮ ተባዂሲ ኤልብደለሉ፡፡²²ኒሰና እንትጝኽር ናን ቁርቁርትደነኲ እንኩድኑዂ፡ ደኣም ሐዲስድ ቋልድየኩም አኽነዲን እንታ ለፈክ ፈርሕሮ ግን፡፡ እና ፈርሐት ኒስኻ ኒዀርሲክ ላዂ ኤዳኹልኩም እላ፡፡²³እን ግርጋትሊ ኒዀርሲክ ላሪ ድኳ ወንቀርደኒለ፡፡ እምንድክ ይየኩም ይኽርሲ ይሱጙድ ጀረብዲናዂሲክ ሺውደነን እውሮኩም ግን፡፡²⁴ናን እኽታሲክ ይሱጝድ ላሪ ድኳ ሺውዲኒ፡ እንታ ንግስ ኩጝሮ ሺዋ እውስትሮኩምር ግን፡፡²⁵እና ወራታትሲ ናትክ ድግምድ ጋቢኹንኩም፡፡ ንድደምቢክ ናንትልድ ተርሰ አግሀድዶ ጋባኹኩም ወክት እንትሮ ግን፡፡²⁶እን ግርጋት እንደል ይሱጙድ ሺዊትኖ ግን አንኻ ይኽርሊ ሺውየልኩም ግን፡፡²⁷ውረድ እንትን አን ጃርልድ እንተት እምንድንነዲ ንለኽር እንከልድንነዲንለኽር፡ ኒላዊሲ እኽር እንከለኩኩም፡፡²⁸እኽርልድ ፈ እርድሊ እንቱኹን፡ ሐዲስድ እርድሲ ባሮ ይኽርሊ ወንተረኩን እንኩኹን፡፡²⁹ሚታለይቶታ ናን በርህድሮ ጋብረኲ ድግማትድ ጋበላ፡፡³⁰ናን እንቲ ኒትክ ኤርእረት ኤርእንኹን ኮዶ ላዂ ወንቀርዶካ ጀረበግረት እንቲ ጃርልድ እንትረትር ኤምነኩንካ ይኑኹሉ፡፡³¹ኢየሱሳ ናንማ ኤምንድኑኹንለ፤³²እናሐን ናን ወክት ጋእ ዩዂ ናውክ ይቱ ባርድኖለ እንተት ነቱ ፋሕ ይትኖ ግን ደኣም ይኽር ይዲ አኽነዲን ይቱ አኽሊ፡፡³³ይል ሰላም ኤርትኖ ነስ ጋቢኹንኩም፡ እርድሊ ጅርበት ህምበኩኩም፡፡ ደኣም አረጋ ኣን እርድሲ ዓውቲትኹንሉ፡፡

17¹ኢየሱስ ነስ ዮ ጋበ ደምቢ ዕልልሲ ዓስተርሊ አኽታሲክ ብርሰ ዎ አበ! እናሐን እን ወክት ገእዮዂ፡፡ እኹራ ሳቢሮካር መታን ኩእኹረስ ሳቢሉ፡፡ ²እና እውረውሲሉ ናትክ ዲመዳይ መናብረት እውሮሎም መታን ኒት ከዋ አወይሲ ሰየምድሩኹሉ፡፡³ዲመዳይ መናብረትኻ ጃር ላዂ ካያ እንቲ እምን አኽረትር እን እንቲ እንሸቕራዂ ኢየሱስ ክርስቶስ ቲኽር ኤርእና ግን፡፡⁴እንቲ እውራ ጋርሲ ተመምዶ እና ብሪል ጀንጅንኹንካ፡፡⁵እንቲኻ ኦ አበ! ናን እን እርድ መሄድስጊ እንኩል ሰጛኺለ ሳቡርድ ሳቢለ፡፡⁶እን እና እርድልድ እውረውሲሉ ኩሱጝሲ አርእሲስኹንሎም፡፡ ኩ እርግኑዂ፡ ይድኻ እውሩኹለ ናዋ ኩጋበት ተከውኑዂ፡፡⁷እን እውራዂሲለ ኒትክ ኩልድ አኸት ናን ኤርእኖ ህምበኑኲ፡፡⁸ውረድ እን እንቲ እውራ ጋበት እውኹንሎም ናዋ ከለብርኑኹለ፡፡ ኩልድ እንታኽር አኸት እምንድክ ኤርእስትኹሎም እንቲ ፈስረትለኽር ኤምኖ ህምበነኲ፡፡⁹ናድ ግን አን ሺኹካ ግን ግራ እርድድ አኽሊ አን ሺዋኹካ፡፡ እና እንቲ እውረውለ ኩ አኽንነዲን ናመታን ሺወኩንካ እንኩኹን፡፡¹⁰ኒውክ ዩዂ ኩዂ ግን እንኩኹር ዩዂ ግን፡፡ አንኽር ናድ ሳብስተ ህምበኩን፡፡¹¹ንደምቢ አን እርድሊ እልሊ ኩል እንትያ ግነ፡ ናውኻ እርድሊ ህምበነኲ፤ ኦ ይኽር ሻትክ! እና እንቲ አውረውለ ይነሰና ላዂ አኽድኖ ኩሱጙድ ተከዊሎም፡፡¹²አን ናዲ እርድሊ ዋኑ እና ኩሱጙድ እውረውሲለ ተከውኹንሎም፤ እን ድዲዂራ ክቱብ ተመምሮር መታን ድዳዂሲ አኽገት፡ ናልድ ላዂ ድዳዂ እላ፡፡¹³ናን ኩል እንተረኩን እንኩኹን፡ እን ይፈርሐት ናል እንተኽሮ እርድል ዋኑ ነስ የኩንሎም እንኩኹን፡፡¹⁴ አን ኩጋበት ኡኹንሎም፡ እን አን እርዱዂ አኽገሰና ናውር እርዱ አኽኒ እማ እርድ እንጠረኩሎም፡፡¹⁵ምቑሊልድ ተከውቶሎም ሺወኩንካ እንኩኹን ግን ግራ እርድልድ ህይቶሎም ዮ አኽሊ፡፡¹⁶እን አን እርዱዂ አኽገሰና ናውር እርዱ አኽኒ፡፡¹⁷ኩጋብ እምንዲ ግን፡ እማ እምንድ ሸተክዲሎም፡፡¹⁸እን እንቲ ይት እርድሊ እንሸቕረሰነለ አንኽር ናት እርድሊ እንሸቐኩንሎም እንኩኹን፡፡¹⁹ናው እምንዲ ሻትካን አኽድ አንኽር ይሹቲ ናመታን ሸተክደኩን እንኩኹን፡፡²⁰ናድ ካያ አኽላ አን ሺዋኹካ እን ናጋባሲ ይል ኤምንዶ ህምበውድር ሺወኩንካ፡፡²¹ናውክ ላዂ አኽድኖ ሺወኩንካ እንኩኹን፡ እርድኻ እንቲ እንሻቕረትለ አርእሮ፡ ኦ አበ! እን እንቲ ይል ዋንትረት አንኻ ኩል ዋንተት ናውር ይነል ላዂ አኽድኖ ሺወኩንካ እንኩኹን፡፡²²ይዲ ኩዲ ላዂ አኽነሰና ናውኽር ላዂ አኽድኖ እን እንቲ እውራኹለ ሳቡርሲ እውኹንሎም፡፡²³ኣንኻ ናል እንትኻ ይል አኽድኖ እን እንቲ ይት እንከልደሰነለ ናትኽር አን እንከለትሎም እርድ እንቲ እንሸቕረትለ ኤርኡዂ፡፡²⁴ዎ አበ! እርድ መሄድስጊ እንከልዳኽርለ ግን፡ እማ እና እንቲ እውረውለ እን እንቲ እውራ ሳቡርሲ ቋልድኖ እን ኣን ህምባ ኣካንሊ ናውኽር ኒል አኽድኖ ይምራድ ግን፡፡²⁵ዎ ይኽር ሻትክ እርድ አርእለካ አጛ ኤርኦካ ህምበኩን ነጝር እንቲ እንሸቕረትለ ኤርእኖ ህምበነኲ፡፡²⁶እን ይት እንከልዳ እንከሊ ናል ዋንቲቶር መታን፡ አንኽር ናል መንደርትያ ኩሱጝሲ ኤርእሲሶሎም ህምበኩን፡ ኮዶኽር ኤርእሲስየሎም ግን፡፡

18¹ኢየሱስ ነስ ጋበ ደምቢ ነታለይቶትዲ ወረባ ቄድሮስቲ ካሮ እን ጀርዲን (ጭንድቕ) ህምባ አካንሊ እርጉዂ እማ ኒታለይቶትዲኻ ኒል ትዉዂ፡፡ ²ኢየሱስ ኒታለይቶትዲ ገሪ ወክት ኒል ፈሩ ሰጚነዲን እን ደኲሶ እዋኹሉ ይሁዳ እን አካንሲ አርኡሉ ሰጞኲ፡፡ ³ይሁዳ ይኽ ቲዃ ሻኽውዲ ስላሕ ደበልተውዲ ከላእ ዓስከርዲ አቕሸታ በህሊን ንሽቕዲ ፈሪሳንዲት መርሔሎም እንቱዂ፡፡⁴ኢየሱስ እን እንተራ ጅርበትሲ ኤርኡ እርግነዲን፡ ኤውቲ ጀረብደናኹን እንኩድኑኹን፡ ዮ ወንቀሩኹሎም፡፡⁵ናዋ ኢየሱስ ናዝራዊረስ ጀረብነኩን ይኑኹሉ፡፡ ኢየሱሳ አን ግን ይኹሎም፡፡ እን ደኩሶ እዋኹሉ ይሁዳኽር ናዲ እርጉዂ፡፡⁶ኢየሱስ አን ግን! ዮሰነሎምኻ ወንተርኖ ብሪል ሐጨፍስኑዂ፡፡⁷ሐዲስድ ኮዶ ኤውቲ ጀረብደናኹን፤ ይኹሎም፡፡ ናዋ ኢየሱስ ናዝራዊራስ ይኑኹሉ፡፡⁸ኢየሱሳ እንሲን ውራ አን አኽት ድዊልመኩም፤ ይት ጀረብደናኽር አክደነን ነስ ባረሎም ይኹሎም፡፡⁹ኒንኻ እን እውረውልድለ ላኲ ድኳ ድደላ ያዂ ተመምሮር መታን አኻዂ ግን፡፡¹⁰ስመዖን ጴጥሮሳ ሴፍ ዲውሲዂ እማ አቅሸታ በህሊና ገንሺነስ ሴፍሲ ፍዶ ጠዓምብኹሉ፡ እንቁዋ ላውሪትኻ ከልተምኹሉ፡፡ እን ገንሺ ሱጛ ማልኮስ ይስቱ እርጉዂ፡፡¹¹ኢየሱሳ ቤጥሮስቲ ህምቢ ኲ ሴፍሲ ኒ-ልጝሊ ወንተሲሉ፡፡ እን ይኽር እወለ ዋንጨስ ጀኤጋኽርሉማ ተኪኹንካ፤ ይኹሉ፡፡¹²እንሲን እን ዓስከርዲ ሲሕ አደረዲ አይሁዲ ኤቅሸትዲ ኢየሱስቲ ሻኹኖ እንሸውኑኹሉ፡፡¹³ሰልፍ እን እንሰካር አመሪል አቅሸታ በሄር እርጋዂ ቀያፋር አንሺን ሃናትላ አድኑኹሉ፡፡¹⁴ቀያፋኻ ከዋ መታን ላግርዋ ክረን ኪደኲ ዮ አይሁድሲ ኰድጚሰዂ ግን፡፡¹⁵ስመዖን ጴጥሮስዲ እን ኤሪ ታለይቶረድኻ ኢየሱስቲ ለሄክንኹ፡፡ እና ታለይቶራ ኒን ኣቅሸታ ብሄርድ አርእስታዂ ኣኽነዲን ኢየሱስዲ ኬለብል ቱዉዂ፡፡¹⁶ጴጥሮሳ መራብ ገቢል ከደን ከብቲዂ፡፡ እንታለይቶራ ኣቅሸታ በሄርድ ኤርእስታዂ ዓንቂ መራብሲ ተከውረሪት ጋቢኹላ እማ ጴጥሮስቲ ቱሱኹሉ፡፡¹⁷እን መራብሲ ተከውረሪኻ ጴጥሮስቲ ቋልደሰነሉ እንትኽር ታለይቶት እና ግርዊውልድ ኣኽግራኽርማ፤ ይቲሉ ኒኻ ኣኽሊ ዩኹላ፡፡¹⁸እንሲን ገሪዂ ብርድ እሰ እርግነዲን እን ንሽቅዲ ገንጂንዲ ላኻ ሻኽስኖ ካውሩኑ እርግኑዂ ጴጥሮስር ናዲ ካውሩ እርጉዂ፡፡¹⁹እን ኣቅሸታ ሲምኻ ኢየሱስቲ ኒታለይቶትዲ ኒምህሮዲር ሰበትድ ገሪዂ ወንቀሩዂሉ፡፡²⁰ኢየሱሳ ኣን እርድሊ ትብታንድ የው ሻኽሊ ዲማ ኣይሁድ እንኩልኩልስናዂ ቤተ መቅደስሊኽር ክንሲኹን ግራ ላሪ ድኳ ስቱርድ ጋቢሊ፡፡²¹ይት ውሪዂ ወንቀርዳኹንለ እን ኣን ጋቡሎም ሰጞውሲ ውራ ዩሎም ሰጞት ናት ወንቀሪሎም፡፡ ናው እን ኣን ጋቡሎም ሰጞውሲ አርእኑዂ ዮ ወንተስኹሉ፡፡²²ነስ ዋሰሰና እን ኒል እርገውልድ ላ ገንጂና እንቲ ኣቅሸታ ሲምድ ነስ ይሮ ወንተስራኹን ዮ ቃሺ በረግዕኹሉ፡፡²³ኢየሱሳ ምቁላ ጋበኽር ኣከን ይምቍልናርሲ ድዊለ፡ ትክያዂ ጋበኽር ኣከን ዳኣም ውሪዂ ጣዓምብራኹንለ ይኹሉ፡፡²⁴እንሲን ሃናንያ ኢየሱስቲ እንሸውሶ ዋኑ ኣቅሸታ በሄር ቀያፋትል ፈሱኹሉ፡፡²⁵ስምኦን ጴጥሮስ ደው ዮ ካውሩኻ እንቲ እን ኒታለይቶትልድ ኣኽግራኽርማ፤ ይንኹሉ፡፡ ኒኻ ኣኽሊ ዮ በረዩዂ፡፡²⁶እን ጴጥሮስ ኒ እጝቁወስ ቀረጫኹድ ኒ ወንዳ ኣካዂ ገንጂናኻ ውራ እንደራ እን ጭንድቅሊ ኒዲ ቋሊመካ ይኹሉ፡፡²⁷ጴጥሮስ ኮዶ ሲዀር ወክት በረዩዂ ንርድ ንርዳ ዲርዋ ኳዪዂ፡፡²⁸ኢየሱስቲኻ ቀያፈትልድ ፈረድስሮ ዲቢል አድንኹሉ ብርክስጛኻ እርጉዂ ናው በጋ ፋጅኺዂሲ ቍድኖ አኽነውድ ዓማቅርግኒን ዲቢ ልጝሊ ትውኒ፡፡²⁹እንሲን ጲላጦስ ናል ፊዂ እማ እናግርወስ ውረድ ግን እንትን ሸከይደናኹሉ፤ ይኹሎም፡፡³⁰ናዋ ምቑላ እሲጋዂ ኣከንማ ኩልደኲስንድሉ ሻኽናኽር አኽኖ ይኑኹሉ፡፡³¹ጲላጦሳ እንተላውድ ኤድኖ እንታ ፍትሕሰነክ ሃብዲነ ፈረደሉ ይኹሎም፡፡³²ኢየሱስ አወያ ክራ አርዶ አኸት ጋበ እርጋዂ ተመምሮር መታን፡ አይሁድ፡ ላዂሲ ድኳ ኩኖ አከለና ይንኹሉ፡፡³³ጲላጦስ ዲቢ ልጝል ወንተሮ ኢየሱስቲ ሽጞ አይሁድ ንጉሥማ እንቲ ይኹሉ፡፡³⁴ ኢየሱሳ እና እንቲ ይረው ኩላውድማ እማ ኤሪው ይሰበትድ ይነውካ ክምረ ዮ ወንተሱኹሉ፡፡³⁵ጲላጦሳ ውራ ኣን አይሁዳማ ኣኾ፡ ኩከውዲ አቅሸታ በሄሊንዲ ይል ሸከይኖካ ህምበው ውራ ሃብረግን፤ ይኹሉ፡፡³⁶ኢየሱሳ ይሕክም እና እርድ ንዱዂ አኽላ፡ ንዱዂ አከን አይሁድ ሻኽግኒንለ ይዓስከር ገደይስድንድለ ሻው ግን፡ ደኣም ይሕክም ንዱዂ አኽላ ይኹሉ፡፡³⁷ጲላጦሳ እማ እንቲ ንጉሥ ግን፣ ይኹሉ፡፡ ኢየሱስኻ አን ንጉሥ አኸት ውራ እንትኽር ኩላውድ ይረኲ እጝኩላማ፡፡ አን እምንሲ ሳምዕድያ ግን አን እዃርሳዂ፡ ኒመታጝር ግን እና ብሪል አን እንቶ ህንባዂ፤ እምንዱኹካ ይጋብሲ ዋሰኲ ይኹሉ፡፡³⁸ጲላጦሳ እምንኻ ውራ ኒ ግን፤ ይኹሉ፡፡ እንደዋዮኻ አይሁድሊ ፊዂ ኮዶ እማ ኣን እና ግርዋ ኒል ላሪ ከታ አረረኩን እልሊ፡፡³⁹እንትን ደኣም ፋጅኻድ ላዂ እንሸውሳዂ እንኪየልኩም እንታ ክኒ ግን እማ እና አይሁድ ንጉሥሲ እንክየልኩም ጀረብደናኹማ፤ ይኹሎም፡፡⁴⁰እንሲን ናውኻ ሐዲስድ ኒስ ጀረብነሊ ባርባንቲ እንኪልና ዩኑ ዓልበጥኑዂ፡፡ ባርባን ደኣም ላዂ ግርዋ አጎበንታ እርጋዂ ግን፡፡

19¹ንድ ደምቢ ጲላጦስ ኢየሱስቲ ቀለጢሲኹሉ፡፡ ²እን ዓስከርኻ እክክም ለከሚነ እኺርኺርሊ ለዋለይኖ ሻኺስኖ አኾርሊ ገምድኑኹሉ፤ ኮዶ ታዊና ሰራዂስኽር ሰስኑኹሉ፡፡ ³ኒል ሱኩርኖኻ ዎ አይሁድ ንጉሥ! ደባንማ ውራ ህምብራኹን ዪነክ ገሺ ብርግዕዱኑሉ እርግኑዂ፡፡⁴ጲላጦስ ሐዲስድ ዲቢልድ ከደን ፈ እና ግርዋ ኒል ላሪ ከታ ድኳ አርገትሉ አርእትኖ እናሐን ከደንሊ ፍደኩንልኩም እንኩኹን ይኹሎም፡፡⁵እንሲን ኢየሱስ ሻሽ እክክማዂዲ ታዊና ሰራዂዲት ሰሮ ከደንሲ ፊዂ፡፡ ጲላጦሳ እናሐን እን ግርዋ ይኹሎም፡፡⁶አቕሻታ በሄሊንዲ ናገንጂንዲ ቋልነሰነሉ ካኒል ከርከርዲሉ! ካል ከርከርዲሉ! ይኖ ዓልበጥኑዂ፡፡ ጲላጦስኻ እንተላውድ አድኖ ከርከርደሉ አን ወላ ላሪ ካታ ድኳ አርሊሉ ይኹሎም፡፡⁷አይሁድኻ ይን ፍትሕ ሸኽንኹን፡ እን ይናፍትሕሰናኻ ኒሹት ጃር ኹራ እሲነዲን ክርዶ ህምበኩሉ ይኑኹሉ፡፡⁸ጲላጦሳ ነስ ተካ ጋብሲ ዋሰሰና ገሪዂ ጓቍቱዂ፡፡⁹ሐዲስድ ዲቢል ወንተሮኻ ኢየሱስቲ እንቲ አዊልድ ግን፤ ዮ ወንቀሩኹሉ፡፡ ኢየሱሳ ላሪ ድኳ ወንተስለሉ፡፡¹⁰ጲላጦስ ውራ ይዲኽርማ ጋበላ፡ አን ከርከርድየካኽር እንኪየካኽር ሒል ክሜት ኤርእላማ እንቲ፡ ይኹሉ፡፡¹¹ኢየሱሳ አዋዂልድ እውስታኹካ አኾ ግራ እንቲ ይአወይሲ ላሪ ሕክም ዋንተጊትካ፡ ናንኻ እን ይትደኲሶ እዋኹካ ሐጢአት በሄር ኮት ህምበኩሉ ይኹሉ፡፡¹²ኒድ ደምቢ ጲላጦስ እንክሮሉ ጀረቡ እርጉዂ፡፡ ደኣም አይሁድ ኒስ እንክረዶክ እንቲ ቄሳርዲ ሻሙዂ አኽላ፡፡ ኒሹት ሰየምሮ ጀረባዂ ኒውክ ቄሳርዲ አባይ ግን ይኖ ጨርሕኑዂ፡፡¹³ጲላጦስ ነስ ተካ ጋራትሲ ዋሰሰና ኢየሱስቲ ከደን አዶ ፊኹሉ እማ ሊጠስትሮትል ዕብራይስጢሲኻ ገበታ ይስታ አካንሊ ኒቂጦራ ፍርዱኹል ከፍ ዩዂ፡፡¹⁴ እን ወክት እንዲን ፋጅኻ ደለምድና ግርገፍ እርጉዂ፡፡ እን ኤሁድስኻ እናሐን እንተ ንጉሥ ይኹሎም፡፡¹⁵ናውኻ እንደራ ይሉ! እንደራ ይሉ! ከርከርደሉ! ዩኑ ጨርሕኑዂ፡፡ ጲላጦስኻ እና እንታ ንጉሢ ከርከርድየሉማ፤ ይኹሎም፡፡ አቅሸታ በሄሊንኻ ይን ቄሳርቲ አኽገት ኤሪ ንጉሥ ሻኽኒ ይኖ ወንተስኑኹሉ፡፡¹⁶እንሲን ኢየሱስቲ ከርከርድድኖሉ ናናንተል ደኩሶ እዉኹሎም፡፡¹⁷ናውኻ ኢየሱስቲ ጲላጦስትልድ ከለብርኑኹሉ፡ ኒመስቀል ሙኹሮኻ ‹‹ቀራንዮ›› ዕብራይስጢሲኻ ‹‹ጎልጎልታ›› ይስታ አካንሊ አኽራሲክ አድኖ ፈርኑኹሉ፡፡¹⁸ኒልኻ ለጛ ስኳንሲ ላዂሲ ኒላው ገፍድ ላዂስኻ ኒ ሸንገብድ ኢየሱስትኻ ናነበክል ከርከርድኑኹሉ፡፡¹⁹ጲላጦስ ክቱብ ከተቦ ኒአወይሲ ጠልሲኹሉ፡፡ እን ክቱብኻ ፡ ኢየሱስ ናዝሬትሩዂ አይሁድ ንጉሥ ያዂ ግን፡፡²⁰እን ኢየሱስ ከርከርሳ አካን ድገር ገቢል አኽነዲን ገሪው አይሁድልድ እን ክቱብሲ አንበብድኑኹሊ፡፡ እን ክታበትኻ፡ ዕብራይስጢስኽር ላቲንድር ግሪኽድር እርጉዂ፡፡²¹ንድ እን አቅሸታ በሄሊን ጲላጦስቲ ውራ ኒላውድ ግራ አይሁዳ ንጉሥ ግን አን ኒ ዩ እርጋዂ አይሁዳ ንጉሥ ግን ይሮ ከተብግ ይኑኹሉ፡፡²²ጲላጦስ አን ከተባዂሲ ከተቦ ህምበኩን ይኹሎም፡፡²³እን ዐስከርኻ ኢየሱስቲ ከርከርድነሰነሉ ኒሰረንሲ አድኖ ሰጃትል በኒነሎም ላኹክ ኒበና አዱዂ፡፡ እን ቀሚሽኽር ኒሰና፡ ደኣም እን ቀሚሽ አዀርልድ ልኩል አኽራሲክ ንርውክ ሰፍጣ የናዂሲክ እርግለላ፡፡²⁴ ኰድጚነኻ ንሂታ ገእያራዂሊክ ገእይቶ ቅሻ ማልንንላ ይስትጚኑዂ፡፡ ኒንኻ እን ይሰረንሲ በንስጚኑኹሎም ይቀሚሽሊኻ ቅሻ ማልኑዂ ያዂ ክቱብ አኽሮር መታን ግን ዓስከር ነስ ናው ሃቢነዂ፡፡²⁵እን ኢየሱስ ከርከርሳኹሉ ኒ ገቢል ኒገነዲ ማርያም ኒሐልቲ ቀለዮጳ ቍዲ ማርያም መግደላዊትዲ ደው ይኖ እርግኑዂ፡፡²⁶ኢየሱሳ ኒገናዲ እን እንከሉ ሰቍዂ ታለይሮራዲት ኒል አንጦጠለውሲ ቋሎሰና፡ ኒገናት እንቲ እዂና እነሐኒ ኩዂራ ይኹላ፡፡²⁷እንታለይቶራስኽር እነሐን ኩገና ይኹሉ፡፡ ኒኻ እንሲንትልድ ተርሰ ኒልጝል አዱዂላ፡፡²⁸ንድ ደንም ኢየሱስ ኒውክ ድጙስተት ቋሎሰና እን ክቱብ ተመሮር መታን ስቋንቱኹን ዩዂ፡፡²⁹ኒልኻ ጉና ሚድ መንሸውድ እንተኻዂ እርጉዂ እንሲን እን ጉነስ ሽነክሪል እንሸውኖ ኤብል ስኩስኑኹሉ፡፡³⁰ኢየሱስኻ እንሚድ መንሸውሲ ታሞሰና ‹‹ ተመሙዂ ›› ዩዂ፡፡ አኾርሱኻ ሉም ሲዂ ኒፊኹትኻ ፊቲ፡፡³¹በዓሊ ደለምኒ ግርጋ እርግነዲን እን በድናት ኒልእርግጊን ውረድ እን ሰምበር በዓል በሄር እርግነዲን ልኩክሲ ክርጚነ ኒልድ ያዕይድኖሎም አይሁድ ጲላጦስቲ ሺዊኒኁሉ፡፡³²እንሲን ዓስከር ፈርኖ እን ኒዲ ሰቀልሶ እርገውሲ ለጞርትክ ልኩኲሲ ከሪኒኹሎም፡፡³³ኢየሱስትል እንትነሰና ክሮ ህምባዂሲ ቋልነሰና ልኩኩሲ ከሪኒሉ፡፡³⁴ደኣም ላዂ እን ዐስከርልድ እንሽኽድ ስምጥሲ ሰቡኹሉ ንርድ ንርድ ብርዲ ዓቍዲ ፊዂ፡፡³⁵እን ኒዕልድ ቋላዂ እንትን አምንትኖር መታን ሸረኲ እጝኩዂ፡፡ ኒሸርናኻ እምን ግን፡፡³⁶ኒጛ እን ኒ ናሽሽልድ ላሪድኳ ከረኒሉ የዂ ክቱብ ዱጙስትሮ ኣኻዂ ግን፡፡³⁷ኤሪ ቆል ክቱቡዂ ኮዶ እንሰብናዂሲሉ ማኻልትድኖ ግን ያዂ ህምባኲ፡፡³⁸ንድ ደምቢ ዮሴፍ አርማትያስሩዂ እን ኣይሁድሲ ጓቍቶ ትብታንድ ኢየሱስር ታለይቶራ እርጋዂ ጲላጦስቲ ኢየሱስር ግናደትሲ እውሮሉ ሺዊኹሉ ጲላጦሳ አጃ ይኹሉ እማ ፈሮ ኢየሱስር ግናደትሲ ኣዶኹሉ፡፡³⁹እን ላዶን ኢየሱስትል ቂር እንታዂ ኒቆዲሞስ ቅዲት ሰኾረጝንዲ ላዂ ኪሎራ ኣከው ከርበራዲ ጫብርዲ ሕበርሰ ህምበው አዶ እንቱዂ፡፡⁴⁰ኢየሱስር በድንሲ አድኖኻ እንአይሁድ ክኒርሰና ቅዲትድ ሸመትኖ ደበላን ሐዲስል ገነድንኹሉ፡፡⁴¹እን ከርከርሶሉ እርጋ ኣካንሊኻ ጭንድቅ እርጉዂ፡፡ ኒላ ላዂ ኣዳም ደብቲጋዂሉ ጎቕ ሓዲስ እርጉዂ፡፡⁴²በዓል ስኲሮ እርግነዲጛ እን አርብ ታኸት እርግነዲን ኢየሱስቲ ኒል ደቢኒኹሉ፡፡

20¹እን ግርጋ ኡናር ሰልፍሪትላ ማርያም መግደላዊት ጭልግልግል ጉራብሮ እን አርብል ፈርቲ፡፡ እን ክርጛ ጎቕ አብሲ አበዶ እርጋዃ ገለበስቶ ህምባዂሲ ቋልቲ፡፡ ² ጋጝሩ ወንተርዶኻ ስምኦን ጴጥሮስዲ እን ኢየሱስ እንከሉ ሰጛዂ ታለይቶራዲት እንትሮ ይ አደረስ ጎቕልድ አድንኹሉ አዊል እሲነትሉኻ ከንዶ ይቲሎም፡፡³ቤጥሮስዲ እን ታለይቶራድኻ ላት ተርይኑዂ እን ኤርብልኻ ፈርኑዂ፡፡⁴ለጞክ ላት ጋጚኒዂ እንታለይቶራ ቤጥሮስቲ በደሮሉ እን ኤርብል ገእዩዂ፡፡⁵ሉም ዮሰናኻ መግነድሲ ገሞ ቋሉዂ ደኣም ቱላ፡፡⁶ስምኦን ቤጥሮስ ኒ ጉርጉርበትሲ ለሀኩዂ ቱዎኻ እን መግነድሲ ቋሉዂ፡፡⁷እን ኣኾርሲ ኩስኖሉ እርግናዂ ሽልቱት ደኣም ላገፍድ ትብልሶ ገሞ እርጉዂ ግራ እን መግነዲ እርግላ፡፡⁸ኒድ ደምቢ እን ታለይቶራ በደሮ እንቶ እርጋዂ እንሲን ቱዎ ቋሉዂ እማ አምኑዂ፡፡⁹ውረድ እንሲን ኣኽራሲክ እን ክሪልድ ጉሮ ዋነት እንክቱብዮ እርጋዂሲ ፈሃምኖ እርግኒ፡፡¹⁰ንድ ደምቢ እን ታለይቶት ናኣካንሊ ወንተርኑዂ፡፡¹¹ማርያም እን ጎቕ ገቢል አኽሮ ስርዱ እርግቲ፡፡ ስርዱኻ እን ጎቕሊ ሉም ይቲ፡፡¹²እን ኢየሱስር በድን እርጋዂሊ ለጛ መላእኽቲ ሰረን ሜዕተው ሰረው ላዃ ኒ አዀር እርጋዂሊ ላዃ ኒልኩኲ እርጋዂሊ ቋልቲ፡፡¹³ናውክ እንቲ እዂና ውራኽረ ስርዳኹን፤ ይንኹላ፡፡ ንርኻ ይኤደረስ አድኑኹሉ ኣዊል እሲነትሉኻ ኤርእሊ ይቲሎም፡፡¹⁴ነስ ይሮኻ ደምቢራ ግልጭ ይቲ፡ ኢየሱስትኻ ደውዮ ህምባዂሲ ቋልቲ ኢየሱስ አኽታ ፈረግለሉ፡፡¹⁵ኢየሱሳ እንቲ እዂና ውራኽረ ስርዳኹን፤ ኣውቲ ጀረብራኹ፤ ይኹላ፡፡ ንርኻ እን ጭንድቕ አደራ ተከላ፡ ዎ ይአደራ እንቲ ጉድራኽርሉ አክረን አዊል እስረትሉ ድዊንደለ ኣን ኤድየሉ ይቲሉ፡፡¹⁶ኢየሱሳ ማርያም ይኹላ ንርኻ ግልጭ ይቲ እማ ዕብራይስጢሲ ረቡኒ ይቲሉ፡፡ ኒንኻ ይመምህር ይና ግን፡፡¹⁷ኢየሱሳ ናን አኽራሲክ ይኽርሊ ፈ እልሊ ተመድገለ፡ ደኣም ይሻንሊ ፈርዶ ይኽርሊኽር እንታ እኽርሊኽር ይአደሪልር እንታ ኤደሪልር ፋኩን እንኩኹን ይሮ ድዊሎም ይኹላ፡፡¹⁸ ማርያም መግደላዊታ ፈርዶ ኒታለይቶት ይአደረስ ቋልኹሉ ነስር ድዊኹለ ይሮ በሸርድቲሎም፡፡¹⁹እን ግርጋ ጃበራ ኡናርዲትላ ኣመቅረብ ኣኾሰና ኒታለይቶት ኣይሁድልድ ጓቍትኖ እድሲ አበድኖ ዋኑኑ እን ናው እክብስኖ ህምበናዂ ኣካንሊ ኢየሱስ እንቱዂ ናነበክልኻ ደውዩዂ እማ ሰላም እንተድ ኣኽኒ ይኹም፡፡²⁰ነስ ዮኻ ኒናንትትዲ ኒስምጥዲት ቋሊስኹሎም ኒታለይቶታ አደረስ ቋልነሰና ገሪዂ ፈርሕኑዂ፡፡²¹ኢየሱሳ ደገሶ ሰላም እንተዲ ኣኽኒ እን ይኽር ይት እንሻቃሰነለ ኣጝር ኒሰና እንተት እንሻቃኩንኩም እንኩኹን ዩኹሎም፡፡²²ኒስ ዮኻ ኡፍ ይኹሎም እማ መንፋስ ሻትክ ከለብርኑዂ፡፡²³ናሓጢኣትሲ ባርድነውሎም ባርስትሮሎም ግን እን ሻኽድነውሎማ ሻኽስትሮሎም ግን ይኹሎም፡፡²⁴ኢየሱስ እንተሶነሎም እን ዲዲሞስ ይስታዂ ቶማስ እን ሽካ ለጞትልድ ናዲ ዲዊላ፡፡²⁵እን ታለይቶታ ይና አደረስ ቋልንኹንሉ ይንኹሉ ኒኻ ኒናንትተል መሳሚራ ፋላኻሽስ ቋልጊ ይኣጫቢዕስኻ እን መሳሚርድ ሰብስቶ ኣካንሊ ቱስጊ ይናንስኽር ኒስምጥሊ ወንተስጊ አምነሊ ይኹሎም፡፡²⁶ኮዶኻ ሳዀታ ኳራ ደምቢ ኒ ታለይቶት ቶማስር ናዲ ልጝሊ አበስትኖ ዋንቱኑ ኢየሱስ ተለውዮ ናነበክል ደውዩዂ እማ ሰላም እንተድ ኣኽኒ ይኹሎም፡፡²⁷ቶማስቲ ሽጞኻ ላዂ ኩኣጫብዕሲ ነት ገምዲ ይናንትትሲኻ ህኒ ቋሊ ኩናንሲኽር ይስምጥሊ ቱሲ አምነንታ ኣኺ ግን ግራ አምነግራኽር ኣኽግ ይኹሉ፡፡²⁸ቶማስ ዎ ይአደራዲ ይጃርዲ ዮ ወንተስኹሉ፡፡²⁹ኢየሱሳ እንቲ ቋልድነዲን አምንዱዂ፤ ዳኣም እን ቋልጊ አምነው ሻትካን ግን ዩኹሉ፡፡³⁰ኢየሱስ ኒ ታለይቶት ጃብል እና ክቱብ ኒል ከተብስገው ገሪው አምራት እሲዂ፡፡³¹ደኣም ኒን እና ክቱብሰና እንትን አምንትኖ ኢየሱስ እን መሲሕ ጃርኹራ ኣኸት እምንድኖኻ ኒስጙድ ዲመር መምብሮ አርእትኖ ከተብሶ ህምበኲ፡፡

21¹ንድ ደምቢ ኮዶ ኢየሱስ ኒታለይቶትድ ዓይግ ጥብርያዶስሩኹ ገቢል ሐዲስድ ቋልስትኹሎም፡፡ ናኽኻ ቋልስትኹሎም፡፡ ²ስምዖን ጴጥሮስዲ መታ ይስታዂቶማስዲ ናትናኤል ቃና ገሊላሩዂዲ ለጛ አሪው ታለይቶትዲ ላት ዋኑኑ፡ ³ ስምዖን ጴጥሮስ ኣን ዓሳ ቃይያ ፈርያ ግን ይኹሎም፡፡ ናውኻ ይንኽር ኩዲ ፈርና ይኑኹሉ፡፡ ፈርኖኻ ታንኩትል ዓረግኑዂ፡ ደኣም ቂርሲክ ጀረቢነ ላሪ ድኳ ሻኽኒ፡፡⁴ብራ ክሰሰነኻ ኢየሱስ ዓይግ ሸሊ እንቱዂ፡፡ ኒታለይቶታ ኢየሱስ አኽት ፈረግኒሉ፡፡⁵ኢየሱሳ ይቑር ቍስታዂ ሻኽድኒማ፡ ይኹሎም፡፡ ናዋ ላሪ ሻኽኒ ይኑኹሉ፡፡⁶ኒኻ ሰቐሊትሲ ላው ገፍድ ገምዳ ኤርትኖ ግን ይኹሎም፡፡ እንሲን እንሰቐሊት ዓሰድ እንሰቐሊት ዓሰድ እንተኾ ወተርነስ ቂልስኑኹሉ፡፡⁷እን ኢየሱስ እንከሉ ሰጋዂ ታለይቶራኻ ቤጥሮስቲ ኒን ይና አደራ ግን ይኹሉ፡፡ እንሲን ቤጥሮስ ይናአደራ ኣከት ዋሶሰና መቅጠን ካያ እርጋዂ ታዊነስ ደበልቶ ዓይግል ባጙገሩዂ፡፡⁸እን ኤሪው ታለይቶታ ብሪልድ ሊኽ እመት ኣካዂሺርኖ እርግንነዲን እን ዓሰድ እንታኾ እረታኾ እርጋ ሳቀርሲ ገወዱኑ እንትኑዂ፡፡⁹ብሪል ፍነሰናኻ ዓሰዲ ሳንስዓዲ ገሞ ህምባዂ ገኣ ቋልኑዂ፡፡¹⁰ኢየሱሳ እንደ እና ዓሳ ናን ኤድነውልድ ናቕሰና ይኹሎም፡፡¹¹ስምኦን ቤጥሮሳ ታንኰትሊ ዓረጉዂ እማ እን ሳቀርሊኽዲ አንኩረጝንዲ ሰዃ ዓሳ ሻዂሲ ገወዶ ብሪል ናቕስዂሉ፡፡ ነስኮት በጃኸው ሻኾ ዋኑኻ እንሳቀርሔቕ ይላ፡፡¹²ኢየሱሳ ላዃ ቋ ይኹሎም እንታለይቶታ ይና ኣደራ ኣከት ፈረግኖሉ ላዂ ናልድ ኤውኒ እንቲ ዮ ወንቀራኹሉ እርግላ፡፡¹³ኢየሱስ ስኩርዮ እን ሳንሳዓስ ጉዶ እውኹሎም፡፡ ኒሰና እንዓሰስር፡፡¹⁴ኢየሱስ ክሪልድ ጎ ኒሲዀር ወክት ግን ኒታለይቶትድ ኒ ቋልስታኹሎም፡፡¹⁵ቄሰናኻ ኢየሱሳ ስምኦን ጴጥሮስቲ ስምኦን ዮናሱዂራ ነልድ አወይሲ እንከልዳኹመላ ይኹሉ፡፡ ኒኻ የዋ ያአደራ እንከለትካ እንትኽር አርእሩዂ ይኹሉ፡፡ ኒኻ ይዓያዊት ተከዊ ይኹሉ፡፡¹⁶ኮዶ ሊጞር ስምኦን ዮናሱዂራ እንከልዳኹመለ ይኹሉ፡ ሊኻ የዋ ያደራ ኣን እንከለትካ እንቲ አርእሩዂ ይኹሉ፡፡ ኒኻ እማ ይበግሲ ምቃቕሪ ይኹሉ፡፡¹⁷ሲኾር ኮዶ ስምኦን ዮናሱዂራ እንከልዳኹመለ ይኹሉ፡፡ ሲኾር ወክት እንከልዳዂመለ ይነዲንሉ ቤጥሮስ ቁርቁርቶ ዎ ያደራ እንቲ ኒትክ አርእሩዂ ኣን እንከለትካኽ አርእሩዂ ይኹሉ፡፡ ኢየሱሳ ይበግሲ ተከዊ ይኹሉ፡፡¹⁸እምን እምንድክ ድውየካ መንደላይ ኣክሩ ኩላውድ ደበልትሩ ሰጝረኲ ጀረብራዂሊካ ፈረዱ ሰጝረኲ ገንዶ ሰና ደኣም አሪዂ ደበልድሮካ ኩናንትትሲ ጠለቕቶ ግን ኒኻ እንቲ ጀረብግራዂሊኽር አድሮካ ግን ይኹሉ፡፡¹⁹ኒስ ኒድ ያዂሉኻ አወያ ክረድ ጃርሲ ጀንጀንዶ ክመት ፈሃሚስሮሉ ዮ ግን፡፡ ነዋ ዮሉ ደምቢኻ ተለዪለ ይኹሉ፡፡²⁰ቤጥሮስ ግልጭ ዮ እን ኢየሱስ እንከሉ ሰጛዂ ታለይቶረስ እንተራዂሲ ቋሉዂ ኒን ኢአሱስቲ እን ሙነቱኑ ኒ ናሓርሊ ጭግዕ ዮ ድዊ ያደራ እንደኲሶ ኡዋኹካ አውኒ ግን ያኹሉ ግን፡፡²¹ቤጥሮስ ኒት ቋለሰና ኢየሱስቲ ድዊ ያደራ ኒንኻ ውራ ኣኽሮ ግን ይኹሉ፡፡²²ኢየሱሳ ኣን እንትሪሲክ ዲወንኻ ኩት ውራ ፈሮካ ይኹሉ፡፡²³እንታለይቶራ ክረላ ይስቶኻ ሻና ነበክል ወሪስቱዂ፡፡ ኢየሱስ ደኣም ኣን እንትሪሲክ ዲወን ኩድ ውራ ፈሮካ ግን ኒ ያዂ ግራ ክረላ ኣኽላ ኒ ያኹሉ፡፡²⁴እን እና ወራታት ነስ ሳምዕዳዂዲ ከተባዂዲ ታለይቶራ ኒ ግን፡፡ ኒ ሳምዕኻ እምን ኣኸት ኤርእንኹ፡፡²⁵ኢየሱስ እሰው ኤሪውር ወራታት ገሪው ህምበኲ ናውክ ላዂ ላኹድ ከተብሰን እን ውራቅ እርዱውክ ኣቕትጊድሉ ተከኩለ፡፡

Bilen: Bible for ወንጌል የሐንስሩዅ

Formatted for Translators

ወንጌል የሐንስሩዅ