Bible

2 ሳሙኤል

1¹ክራ ሳኦልድዅ ደምቢ፡ ዳዊት ኣማሌቅሲ ቂልሲሶ ወንተሮ፡ ጺቅላግትል ለጛ ኳራ ጨበሩዅ። ²እን ሲዀር ኳሪልኻ፡ እናሓን፡ ላዅ ግርዋ መስከብ ሳኦልድዅልድ ኒሰረጝሲ ቐደዶ ኒኣዀርልኽር ቝሻ ነስነሶ እንቱዅ፣ ዳዊትል ገእዮሰናኻ፡ ብሪል ሉም ዮ ፍግም ይዅሉ።³ ዲዊትኻ፡ “ኣወትልድ እንትሩዅን፧” ዮ ወጝቀርዅሉ። ንኻ፡ “መስከብ እስራኤልዱዅልድ ሹልቝራኽር ግን” ዮ ወንተስዅሉ። ⁴ዳዊትኻ፡ “እን ጋር ኣውሰና ኣኽዅን፧ ኵዓይብ ድዊለ” ዮ ወጝቀርዅሉ። ንኻ፡ “እን እክ ሓርብልድ እግሩዅ፡ እን እክልድር ገሪው ለብኑዅር ክርኑዅር፡ ሳኦልዲ ዮናታን ኒእዅረድኽ ክርኑዅ” ይዅሉ። ⁵እንሲን ዳዊት እን ድወዅሉ ሻሎተስ፡“ሳኦልዲ ዮናታን ኒእዅረዲ ክርነት ኣዋህብርደ ኣለለይርዅን፡” ይዅሉ።⁶እን ድወዅሉ ሻሎታኻ፡ “ይገራሃትድ ጊራ ጊልባዖሩኽሊ እንትዅን፡ እናሕንኻ ሳኦል እኝሽኽሊ ተንከብሶ ደውዮ ዋኑ፡ ሰረገላትዲ ኣፍሩስዲ ለሸክንዅሉ፣ ⁷ኒገሽ ደምቢራ ግልጭ ዮሰና ቋልዅለ እማ ሽጝዅለ፡ ኣጝር፡ ‘ውራ እሲን’ ይዅንሉ።

⁸ “ንኻ፣ ‘እንቲ ኣውኒ ግን፧’ ዮ ወጝቀርዅለ፣ ኣጝኻ ‘ኣማሌቃዊራ ግን’ ዮ ወንተስዅንሉ።

⁹“ኒደምብኻ ‘ኣን ክሪል ሱኵሮ ህምበኵን፡ ይርሕኻ ፊግሪ ህምበቲ እማ፡ ኵዓይብ ይዳግ ደው ይሮ ክዊለ’ ይዅለ።

¹⁰“ኣንኻ፡ ለበሪት ደአነገት አርኦ፡ ኒዳግ ደውዮ ኵዅንሉ። ኒኣዀርሊ እርጋዅ አክሊልዲ ኒክርሽምሊ እኝሸውሶ እርጋዅዲት አድዅን፡ እናሓንኻ፡ ይአደሪል ናቕስዅንሉ።”

¹¹እንሲን ዳዊትዲ፡ እን ኒዲ እርገው ናውክ ከውዲ ናሰረጝሲ ቀደድኑዅ። ¹²ሳኦልዲ ኒእዅራ ዮናታንዲ፡ እክ ጃሩዲ ልጝ እስራኤልዱዲ፡ ሰፍድ ለብኖ እርግኑዅ እማ፡ ሓዘንዅሎምር ስሪኒዅሎምር፡ ኵንጝ ኣኽታሲክር ሹምኑዅ።

¹³ዳዊትኻ እን ድወዅሉ ሻሎተስ፡ “ኣወትልድ እንትሩዅ፧” ዮ ወጝቀሩዅሉ። ንኻ፡ “ኣን ላዅ ገፍራ ኣማሌቃዊራዅራ ግን” ይዅሉ።

¹⁴ዳዊትኻ፣ “እን ቀብእስታዅ ጃሩዅሲ ኵቶ ኵናንሲ ገምድሩ ኣዋህብርደ ጒኢትላ፧” ይዅሉ። ¹⁵እንሲን ዳዊት እን ኣባጥሕልድ ላዅሲ ሽጞ፡ “ሱክሪ እማ ጠዓምቢሉ” ይዅሉ። ንኽር ጠዓምቦ ኵውዅሉ። ¹⁶ዳዊትኻ፡ “እን ቀብእስታዅ ጃሩዅሲ፡ ኣን ኵዅኑሉ፡ ዮ ኵአብ ሰምዕዅልካ እማ፡ ኵብር ኵኣኾርሊ ግን” ይዅሉ።¹⁷ዳዊትኻ፡ ሳኦልዲ ዮናታን ኒእዅራ ሰበትድ እና ስረና ኒስ ስሪዅሎም። ¹⁸ይሁዳቝርስኻ ሕላይ እኝሽዂዅ መሀርድድኖሎም ኣደዱዅም። እናሓን ኒንኻ፡ እን ክታብ ሻትኵዅ(ጃሻር

¹⁹“ዎ እስራኤል፣ ኵክብር እን ክብያዅ ኵዅሊ ሰብስቶ ክሩዅ፣ እን ኵፋርሰን ኣዋኺነ ለብኑዅን! ²⁰እጝቓቕ ፍልስጢምሩ ፈርሕግኒን፡ እጝቓቕ እን ሰመተርስገው ባህ ይጊነን፡ ኒስ ጋትል ድወጋ፣ ደርፍፍ አስቀሎንሩልኽር ወሪስጋ።²¹“ዎ እንትን ጊልቦዖሩ ጊት፣ ቁጣዲ ስወዲ ገምጊንተት፡ እንተልኻ ጋዅ ሰደቕት ኪሽⶖዅ ኣርሲጊንተት፡ ውርድ፣ ኒል እን ሒለቱዅድ ጊብ ሮዀሱዅ፡ ሳኦልዱዅ ጊብ ኒድ ደምቢ ደድድ ሸመትሰላ።

²²እኝሽኽ ዮናታንዱዅ ብር እን ሰብስተውልድር፡ ሳዃ እን ፋርሳንዱልድር ደምቢራ ወንተርድላ፣ ሰፍ ሳኦልዱዅዃ ካያ ወንተርላ።

²³“ሳኦልዲ ዮናታንዲ ፊዅትድ ዋኑኑ፡ እኺርኺርሲ እጝከለውዲ ተሰማመዓውዲ እርግኑዅ፣ ክሩኑንሰነክኽር ሲርስጚኒ፡ ንስሪሪልድ ዋወው፡ ገመኒልዳ ሒለቲተው እርግኑዅአ።

²⁴ “ዎ እስራኤልዱቍር! ካብር ሓሪር ቀሚሽ ሰሱኩም እርጋዅድ፡ ደሀብዲ ዘቦርዲሲ ሽኻርዳኸድኩም፡ ሳኦልሲ ስራሉ!

²⁵ “ሓርብ ነበክል ፋርሰን ኣዋህቢነ ለብኑዅን፧ ዮናታን ጊት ዳግል ክውስተ ለቡዅ። ²⁶ “ዎ ይዳን ዮናታን! ኣን ኵሰበትድ ኣቕትራሲክ ሓዝንዅን፡ እንቲ ይድ ትክያዅ እጝከልሱራ እርግሩዅ። ኵእጝከሊ ይድ ፈከርዳዅ እርጉዅ፣ እናሓን እጝከሊ ኣጝቒሩዅልድ ታባዅ እርጒዅ። ²⁷ “ሒለቱ ኣዋኺነ ለብኑዅን፧ ሙዅር ሓርቡ ኣዋኸ ነፍዓገው ኣኺዅን!”

2¹ኒድ ደምቢ ዳዊት፣ “ይሁደር ዕርዲታተልድ ላሪት ፈርም፧ ዮ ጃርሲ ወጝቐሩዅ። ጃርኻ፣ “የዋ ፈሪ” ይዅሉ። ዳዊትኽር፣ “ኣዊትል ፈርን፧” ዩ ዋጝቐርዅሉ። ጃርኽር፣ “ኬብሮንትል” ዮ ወንተስዅሉ።

²እማ ዳዊት ለጛ ኒእኵንዲ ኬብሮትል ፈሪዅ፣ ³ኒሰናኽር ዳዊት እን ኒዲ እርገው ከውሲ ናኣዳምዲክ ናቕስኽሎም፡ ናውር ከብሮንዱ ዕርዲራታተል ከፍ ይኑዅ።⁴ከው ይሁደሩኽር ከብሮንትል እንትኑዅ፣ ኒልኻ ዳዊቲ ቀብእኖ ይሁደር ልጝል ሰየምንዅሉ። ሶኦልቲ ደበውሉ ከው ያቤሽ-ጊልዓድሩ ግናው ይኖ ዳዊትድ ድዊ ኒዅሉ። ⁵ዳዊትኻ ከው ያቤሽ-ጊልዓድሩሊ ንሽቕ እኝሻቖ ንሰና ይዅሎም፡ “እንታ አደራ ሳኦልቲ እንታ ደብነድ እና ብሕልታ እስዲኒነዲን፡ ጃር ባረኽንተት።⁶ኒሰናኽር ጃር እንተዲ ብሕልተዲ እምነትዲ እሲን። ኣንኻ እን እስዲናዅ ጋር ሰበትድ ትክያዅ እስየልኩም ግን። ⁷ደአም፡ እንታ አደራ ሳኦል ክሩዅ፡ ኣኽን ግራ ይት ልጝን ይሁደሩ ናሲም ኣኽያ ቀብእብንዅለ እማ፡ እንታ ናንትትሲ ተብዳ፡ ሒለትውር ኣኻ።⁸ኣብኔር ነርድዅራ ኣን ሓለቃ ዓስከር ሳኦልዱዅ፡ ኢሽ-ቦሽት ሳኦልድዅረስ አዶ፡ ማሓናዪምትል ካስዅሉ። ⁹ንኽር፡ ጊልዓዲ፡ ኣሹራውያንዲ፡ ይዝርኤልዲ፡ ኤፍሬምዲ፡ ብንያምዲ፡ ናውክ እስራኤልዱልኽር ሰየምዅሉ።¹⁰ኢሽ-ቦሽት ሳኦልዱዅራ፡ እስራኤል ዱቝርሊ ሰየምሱ እⶖጕሲክ፡ አርብያ አሚሩዅ፣ ለጛ አመራኻ ሲመርሊ እርጉዅ። ልጝን ይሁደሩዅ ካያ ዳዊቲ ተለዩዅ። ¹¹እን ዳዊት ከብሮንትል ሲም ኣኾ፡ እስራኤልቲ ኒመለካዅላ ለጘታ አመረዲ ወልታ አርበዲ እርጉዅ።¹²ኔር ኣብኔር ድእዅራ፡ ሳኦልዱዅረዲ ኣገልገልደንቲ ኢሽ-ቦሸትሩዲ ኣኾ ማሓናዪምትልድ ጕኖ ጊብዖንትል ፈርኑዅ። ¹³ዮኣብ ጽሩያዅረዲ ገኝሺን ዳዊትሩዲ ፍኖ እን ዓይግ ጊብዖዱዅሊ እኺርኺርሲ አርኑዅ፣ ነን እን ዓይግ ላገፉዅድ፡ እንደንኻ እን ዓይግ ላገፉዅድ ከፍ ይኑዅ።¹⁴እንሲን ኣብኔር ዮኣብቲ፡ ኵዓይብ እና ሻሎት ጕኒን እማ፡ ይና ጃብል ዋዕቢኒን፡ ይዅሉ። ዮኣብኻ ጕኒን፡ ዩዅ። ¹⁵እንሲንኻ ጕኖ ሺብ ቢንያምሩዅዲ ኢሽ-ቦሸት ሳኦልዱዅረዱዲ ሽካ ለጛ፣ ገኝሺን ዳዊትሩልድ ሽካ ለጛ ደኵኑዅ።¹⁶ናላዅ-ላዅክ ኣዀር ኒጨሪዅሲ ተብዶ ሸኾ፡ ሰፍሲ ክልኦት ኒጨሪዅሊ ሸከትዱዅ፣ እኺርኺር ሻኽኖኻ ላት ለብኑዅ። እማ፡ እን ኣካንኻ ሔልቃት-ሃጽሪም ይስትሮ ሽኝስትቲ፣ ንሪ ጊብዖንትል ህምበቲ። ¹⁷እን ግርጋ እንድሂቲኻ፡ እን ሓርብ ጊሪዅድክ ሒለቲቱዅ፣ ኣብኔርዲ እን ከው እስራኢልዱዲኻ ገኝሺን ዳዊትሩውድ ጃብል ለተቕስኑዅ።¹⁸ኒልኻ ሰዀርክ ጽሩያቝር ዮኣብዲ፡ ኣቢሻይዲ፡ ዓሳሄልዲ እርግኑዅ። ዓሳሄልኻ እን ከደንሊ መንደርትረሪ ኣንጣውለርሰና ኒልኵክ ስዳወው እርጉዅ። ¹⁹ዓሳሄልኻ ኣብኔርር ጒርጒርበት ተለዩዅ፡ ኒጒርጒርበት ተለይሮሉ ፈሩእⶖሲኻ፡ ላውዲ ሸጝገዲትል ግልጭ ይላ።²⁰እንሲን ኣብኔር ኒገሽ ደምቢራ ግልጭዮ፡ እንቲ ዓሳሄልማ ይዅሉ። ንኻ፡ የዋ ኣን ግን፡ ይዅሉ። ²¹ኣብኔርኻ፡ ላውር ወሪ ሸጝገብል ገለዲ እማ፡ ላሻሎተስ ሸኺ እማ እን ኒሙዅርሲ አዲ ይዅሉ።ደአም፡ ዓሳሄል ኒጒርጒርበት ተለይኒልድ ገለድሮ እጝከላ።²²ኣብኔርኻ ሓዲስድ ዓሳሄልቲ፡ “ይት ተለይኒልድ ገለዲ፡ ውሪዅ ግን ብረዲ ተከንዳዅንካ፧ ደምብርንኻ ኣዋህበ ገሽ ኵዳንዱዅሲ መርኪስያ ገረሳዅን፧” ይዅሉ። ²³ኒ፡ ደአም ገለድነስ ጉሹዅ። እንሲን ኣብኔር እን ቝምባ እኝሽኹዅድ ኒጐድጒል ሸከትድዅሉ እማ፣ እን እኝሽኽ ኒጒርበትድ ፊዅ። ኣኾኻ፡ እን ዓሳሄል ለቦ ክራ ኣካንሊ እንታዅክ ኒል ደው ዩ እርጉዅ።²⁴ዮኣብዲ ኣቢሻይዲኻ ኣብኔርቲ ተለይኑዅሉ። ኒጒርጒርበ ተለዩኑሉ ጊብዖንትል ኣውከደን ኣኽራሲክ ኣዳዅ ደርብል ጊያሕ ይስታዅድ ገቢል ህምባዅ ኣማ ጊሪ ገቢል ገይእነሪት ኳራ ለብቲ። ²⁵ብንያምድቝርኻ፡ ኣብኔር ጒርጒርበት እክብስኖ፡ ላዕቝብ ኣኽኖ፡ ላጊሪ ኣዀርሊ ኣኽኖ ደው ይኑዅ።²⁶እንሲን ዮኣብቲ ሽጞ፡ “ዲማማ ሓርብሊ መንደርትኖ፧ ኒደምበራ መረራዅ ኣከት አርእለማ፧ እና ከው ናሻንሲ ዳገኒልድ ወንተርድኖ ትእዳድ እዋግራዅ ኣውን ኣኽራሲክ ግን፧” ይዅሉ።

²⁷ዮኣብኻ፡ “ዋነዅ ጃር ግን፡ እንቲ ጋበግረን፡ እና እክ ኣመሪ ኣኽራሲክ ናሻንሲ ዳገኒልድ ወንተርግኒድ” ይዅሉ።²⁸እንሲን ዮኣብ መለከት ጠዓምቡዅ፣ እን እክ ናውክር ደውይኑዅ፡ ኒደምብኻ እስራኤልቲ ዳገነስ ባርኑዅ፡ ወንተስኖኽር ተሓረብኒ። ²⁹ኣብ ኔርዲ እን ኒዲ እርገው ከውዲ እን ቂሪ ሺረሪትክ ሕዳርድ ፈሩኑ ክኖ ዮርዳኖስቲ ካርኑዅ፡ ንርትክ ቢትሮንቲ ዶኵኖኻ መሓናይምትል ዐርኑዅ።³⁰ዮኣብኻ ኣብኔርቲ ዳገነስ ባሩዅ፣ እን እክ ናትክ እክበሰናኻ፡ ገኝሺን ዳዊትሩል ሽካ ሰሳ ግርወዲ ዓሳሄልዲ ነቐስኑዅ። ³¹እን ገኝሺን ዳዊትሩኻ፡ ብንያምዲ ኣብኔርዲር ከወልድ ሰዃ ሊኽዲ ወልትረጝዲ ኵኑዅ። ³²ዓሳሄልትኻ አድኖ እን ቤት-ልሄምትል ህምባዅ አርብ ኒኽርዱዅሊ ደቢኒዅሉ። ዮኣብዲ ኒከውድኻ ቒር ሺራዅስክ ፈሩኑ ክኖ፡ ኬብሮንትል ብራ ክስዅሎም።

3¹እን ሓርብኻ፡ ሳኦልዲ ዳዊትዲር ነበክል ገሪ ወክት ጨበሩዅ፣ ዳዊት ሒል ኣሱ ፈሩዅ፡ ልጝን ሳኦልዱዃ ሓወኑ ፈሩዅ።²ዳዊትስኻ ከብሮንትል ቝራቚር እዃርስንዅሉ። እን ኒባኽርኻ ኣሒኖዓም ይዝርኤልትሪትል እዃርሳዅ ኣምኖን ግን። ³እን ኒሊጘርኽር እቢጋይል፡ ናባል ቀርሜሎሱቝትልድ እዃርሳዅ ኪልኣብ ግን። እን ሲዀርር ኣቤሴሎም፡ ማዓካዅራ ታልማቝራ፡ ሲም ጌሹር፡ ግን።⁴እን ሰጀርኽር ኣዶንያ ሓጊቱዅራ ግን። እን ኣⶖኳርኽር ሸፋጥያ ኣቢጣልዱዅራ ግን። ⁵እን ወልተርኻ ዔግላ ዳዊቱቝትልድ እዃርሳዅ ዪትርዓም ግን። ነን ዳዊትሲ ኬብሮንትል እዃርስኑዅሉ።⁶ኣኾኽር፡ እን ሓርብ ልጝን ሳኦልዱዅዲ ዳዊቱዅዲር ነበክል ዋኑ፡ ኣብኔር ልጝን ሳኦልዱዅ ኣወይሲ ሒለቲቱ ፈሩዅ። ⁷ሳኦልኻ ርጽጳ ይስትረሪ ኣያቝራ፡ እዂና ሸሊትሪ እርግቲሉ። ኢሽ-ቦሸትኻ ኣብኔርቲ፡ “ውሪዅ ግን ይኽርድ እዂና ሸሊትሪትል ቱሩዅን፧” ይዅሉ።⁸እንሲን ኣብኔር ጋብ ኢሽ-ቦሸትዅድ ሓውዮ ንሰና ዩዅ፣ “ኣን ይሁደሩዅ ኣዀር ግድⶖዅማ ኣን፧ንኪ ልጝን ኲዅር ሳኦልድዅዲ ኒሻንዲ፡ ኒት እጝከለውዲሲ ብሕልታ እሳዅን እⶖኵዅን፡ ናን ዳዊትዅል ዶኵሶ እውሊካ፡ እንቲ ደአም ንኪ እና እዅና ሰበትድ ዓገብ ሺብሩዅለ።⁹ጃር ዳዊትድ ሸርነድ እዋዅሲሉ ሳደስ ኒደንጎቢል ገእይሮ እሲጋዅስኰት ክመን፡ ጃር ኣብኔር ዳግ በዳ እሲንሉ፡ ኒልድ ጂባዅር ናቕስኒት። ¹⁰እን ህክምሲ ልጝን ሳኦልዱዅልድ ፍዶ፡ ዳንትልድ ብኤር-ሸባዕ ህባዅሊ እስራኤልዲ ይሁደዲር ብሪል ዳዊትር ቒጦረስ ሰረትነድ እዋዅሉ ሳዳ ግን።” ¹¹እንሲን ኣብኔርቲ ጕኢትነዲንሉ፡ ላርኽር ጋቢሮሉ ገረስላ።¹²ኒደምብኻ፡ ኣብኔር ዳዊቲ፡ “እና ብራ ኣውትሪ ግን፧ ይዲ ተሰማምዒ፡ እናሓን እስራኤል ናውክ ኵል ወንተርድኖ ኣን ካብየካ ግን፣” ይኖ ዳዊትድ ድዊድኖሉ ንሽቕ እኝሻቝዅ።

¹³ዳዊትኻ፡ “ትክያዅ፡ ኣን ኵዲ ማእኰት ትውያ ግን፡ ኣኽን ግራ ኲልድ ላጋር ጀረባዅን፣ ይገሺ ቋልቶ እንትረን፡ ሰልፍ ሚካል ሳኦልዱቍረት ናቕሰግረን፡ ይገሺ ቋለለሉ፡” ዩዅ።¹⁴ኒድ ደምቢ ዳዊት፡ “ኢሽ-ቦሸት ሳኦልዱዅሪል ንሽቕ ፈሶ፡ እን ሊኽ ዕልቦ 11 ፍልስጢሙዅድ ሓጨየሪላ ይእዅና ሚካልቲ እዊለ” ይዅሉ። ¹⁵ኢሽ-ቦሸትኻ እኝሸቆ ንርግርዋ፡ ጳልጢኤል ላዪሽዅሪልድ አዲላ ይዅሉ። ¹⁶እን ንር ግርዋኻ፡ ንርዲ ፈሩዅ፡ ፈሩ እⶖጒሲካ ስሩ ባሑሪምትል ኣኽታሲክ ተለይዅላ። እንሲን ኣብኔር፡ “ፈሪ፡ ወንተሪ፡” ይዅሉ። ንኻ፡ ወንተሩዅ።¹⁷ኣብኔርኻ በህሊል እስራኤልዱሲ፡ “ዳዊት እንተል ሲም ኣኽሮ” ኣማነትልድ ጀረቢድነሉ እርግድኑዅ። ¹⁸ጃርኽር ዳዊትር ሰበትድ፣ ‘ይእክ እስራኤልቲ ናን ፍልስጢምሩዅዲ ናን ናውክ ናኣፋይዱዅዲትልድ፡ ናን ይኝሺና ዳዊቱዅድ ደአንድየሎም ግም’ ዮ እርጉዅ እማ፡ ናን እሰሉ፡ ዮ ጋቢዅሎም።¹⁹ኒሰናኽር ኣብኔር ብንያብሩሲ ኒላውድ ፈሮ ኒስ ድዊዅሎም፣ ኒደምብኻ እስራኤልዲ ንርውክ ልጝን ብንያብትሪዲ እሲድኖሉ ጀቢነዅ ኒትክ ዳዊትድ ድዊሮሉ ኬብሮንትል ፈሩዅ። ²⁰ኣብኔር ለጘርጝ ዓስከርዲ፡ እን ዳዊት ህምበሪላ ኬብሮንትል እንቱዅ፣ ዳዊትኽር ኣብኔርዲ እኒዲ ህምበው ከውዲሲ ዕዱመት እሲዅሎም።²¹ኒደምቢ ኣብኔር ዳዊቲ፡“ኵዲ ማእኰት ቱድኖ፡ ኲለበካ ተምነታዅሰና ኒትክ ሓከምቶር መታን እሽሾ ፈሮ፡ ይአደራ ሲምድ ኒርትክ እስራኤልቲ እክብን” ይዅሉ። እማ ዳዊት ኣብኔርቲ ስብድዅሉ፣ ሳላምድኻ ፈሩዅ።²²ከው ዳዊትሩዲ ዮኣብሩዲ እን ወክት እንድሂሲ ግሪዊ ምርኮ ሻኽኖ ሓርብልድ ወንተርኑዅ። ኣብኔር ደአም፡ ዳዊት ሳላምድ ስምዲሎ ፈርነዲን፣ ኬብሮንትል እርግላ። ²³ዮኣብዲ እን ኒዲ እርገው ዓስከርዲ ኒል ገእይነሰና፡ ኣብኔርድዅራ ኔር ሲምሊ እንቶ እርጉዅ፡ ንኻ ስብዶሉ ሰላምድ ፈሩዅ፡ ይኖ ዮኣብድ ድዊኒዅሉ።²⁴እንሲን ዮኣብ ሲምሊ ትዎ፡ “ውረኒ ግን እንቲ እስረዅ፧እናሓን ኣብኔር እንቶካ ሰላምድ ፈርዶ ስብድርዅንሉ፧ ²⁵ኔርድዅራ ኣብኔርቲ አርእሩዅመሉ፡ ኒ እንታዅ ምሊሮካ ግን፣ ኵፊነዲ ኵቱነዲት አርእሮኽር እንቲ እስራዅ ኒትክ ሰለይሮ መታን ግን።” ²⁶ዮኣብ ዲዊትልድ ፈሰና፡ ኣብኔር ጒርጉርበት ንሽቕ ፈሱዅ፡ እን እኝሻቕሰውኻ ዓቝ ሲራ ይስታዅል ወንተስንዅሉ፣ ዳዊት ደአም ኣርእላ።²⁷ኣብኔር ኬብሮትል ወንተረሰናኻ፡ ዮኣብ ኒቱትል ጋቢሮሉ ጀረበ ደንኣብል ስርግ ሲዅሉ፡ ኒልኻ ዓሳሄል ኒዳንዱዅድ ብር ሰበትድ ኒጐድጉል ሰቦ ኲዅሉ።²⁸ዳዊት ኒስ ግጆ ዋሳ ወክት ንሂሰና ዩዅ፡ “ኣን ኣኽን ይሕክም ኔርዱዅራ ኣብኔርዱ ብርልድ ጃር ጃብል ዲማ ዳይምድ ላጭሓን ግን፣ ²⁹ኒን፡ ዮኣብዲ ኒኽርድ ልጝን ንርትክሊ ለብን፡ ልጝን ዮኣብሩኽልኽር ጀጋል 11 ወሪ ሰውደቱዅ ወሪ ግብትል ተንከብሳዅ ወሪ ሰፍድ ለባዅ ወሪ ሳንሰዓ ሹጓዅሉ ካረምጊኒ፡ ዩዅ። ³⁰ኣብኔር ናዳን ዓሳሄልቲ ጊብዖንትል ሓርብሊ ኵውነዲንሉ፡ ዮኣብዲ ኣቢሳይ ኒዳንዲኻ ኣብኔርቲ ኵንዅሉ።³¹ኒደምብኻ ዳዊት ዮኣብዲ እን ኒዲ እርገው ናውክ ከውዲት፡“እንታ ሰረንሲ ቀደዳ፡ ሰረና ሓዘኑዅኻ ሰራ፡ ኣብነር ጃብጃብልኻ ስራ፡ ይዅሎ፣።” ሲም ዳዊትኻ እን ግናደት ጉርበት ፈሩ እርጉዅ። ³²ኣብኔርትኻ ኬብሮንትል ደቢኒዅሉ፡ ሲምኻ እን አርብ ኣብኔርዱዅሊ ኒ ደሀይሲ ክብሰ ስሪዅ፡ ናውክ እን እክኽር ስሪኒዅ።³³ሲም ኣብኔርሲ፡ ንሰና ዮ ስሪዅሉ፡ “ኣብኔርኽርማ ክራ ዓወዱዅሰና ክራኵን፧ ³⁴ኵናንትት እኝሸውስላ፡ ኵልኲክር ሸኻ እኝሸዊሰኒል ቱላ፡ ኣዳም እኲያን ኣዳም ጃብል ለባዅሰና እንትኽር ኒሰና ለብሩዅ።” እን እክ ናውክ ሓዲስድ ሲሪኒዅሉ።³⁵ኒደምብኻ፡ እን ከው ናውክ ናብራ ናው ቋና ወክት ገእየሰና፡ ዳዊትል እንትኖ ነብራ ቍሮ ተብድና ሺዊኒዅሊ። ዳዊትኻ፡ “ኳራ ለብግሪ ነብራ ነብራኽን ወሪ ኣሪዅ ታመን፡ ጃር ንሰና እሲን ይት፡ ኒሰናኽር ኰድን ይት” ዮ ሸሩዅ። ³⁶ናውክ እን ከው ኒስ አርእነሰና፡ ትክያዅ ኣኾ ቋልስትዅሎም። ናውክ እን ከውኽር እን ሲም እሰዅ ኒውክ ትክያዅ ኣኾ ቋልስትዅሎም።³⁷እን ክውስትና ኔር ኣብኔርዱዅራ ሲምልድ ኣኽገት፡ ናውክ እን ከውዲ እስራኤልዱዲ እን ግርጋ እንድሂቲ ኣለሌይኑዅ። ³⁸ሲም ኒገኝሺንሲ ንሰና ይዅሎም፡ “ንኪ እስራኤልትል ላዅ በሀር መልካይዲ ሳብስተዅዲ ኣዳም ላቦ ዋነት አርእድኒማ፧ ³⁹ኣንኻ፡ ወላ ሲም ኣኽያ ቀብእስተን፡ ሓያም ግን፡ እና ጽሩያቝር ሒል እሲኒዅለ፣ እን ሙቝላ እሳዅሲ ጃር ኒግብርሰና ፈደይኒት፣ ይዅሎም።”

4¹ሳኦልዱዅራ ኣብኔር ኬብሮንትል ክረት ዋሰሰና፡ ኒናንትት ዓቝ ኣዂዅ፡ ናውክ እስራኤልዱቝርኻ በኻኽርኑዅ። ²ሳኦልዱዅረድኻ፡ ለጛ እሕሉቕ ዓስከሩ እርግኑዅሉ፣ እን ላዅድ ሱⶖኻ ባዓና፡ እን ሊጘሩዅድ ሱⶖኻ ሬካብ፡ ናውኻ ሪሞን ብኤሮታዊራቝር፡ ብንያም ዱቝርልድ ግን። ብኤሮትታዲ ብንያምዲ ግን ንሪ ሺብስትራዅ። ³እን ብኤሮትሩ ከው ጊታዪምትል እግርኖ ንኪ ኣኽታሲክ ኒል ስደተኛ ኣኽኖ ህበነኵ።⁴ዮናታን ሳኦልዱዅረድ ኒሉኵ ጐትሳዅ ቍራ እርጒዅሉ። ኒ፡ ሳኦልዲ ዮናታንዲር ክራ ይዝርኤልትል ድውስታካክ ኣኝኳ አመሪዅ እርጉዅ፣ እን ኒት ጒድረሪ አድሮሉ እግርቲ፣ አድሮሉ እግርዱ እⶖጕሲክኻ ለቡዅ እማ፡ ሓጝካስ ኣዂዅ። ኒሱⶖኻ መፊቢሸት ይስቱዅ።⁵እን ሪሞን ብኤርታዊቝር፡ ሬካብዲ ባዓናንዲ ፈርኑዅ፡ ሃሩር እሰሰና፡ ኣዳሓ ገኝጆ ዋኑ፡ ኒልጝል ቱኑዅ። ⁶ጀሩጒ አደው ተኪነ ልጝን ቱኖ ኒጐድጒል ሰብኑዅሉ። ኒደምብ፡ ሬካብዲ ባዓና ኒዳንዲ እግርኑዅ። ⁷ኒልጝሊ ቱነሰናኻ፡ ኒ ወደንሊ ኒዓራትሊ ገኝጆ ዋኑ፡ ሰብኖ ኵኑውዅሉ፣ ኒ፡ ኣዀርስኻ ቀርጭኑዅ። ኒ፡ ኣዀርሲ አድኖ ቂር ሺራዅስክ ደርብ ሕዳርድ ፈርኑዅ።⁸ኣዀር ኢሽ-ቦሸትሩዅስኻ ዳዊት እርጋ ኣካን ኬብሮንትል ናቕስንዅሉ፣ ሲምስኻ፡ ኣዀር ኢሽ-ቦሸት፡“እን ኵርሕሲ ጀረቡ እርጋዅ ሳኦልዱዅራ ኵኣባይ፣ እናሓን። ጃር ንኪ ይአደራ ሲም ሳኦልዲ ኒፈደዲትልድ ኒድመልሲ ፈደይዅሉ፡” ይዅሉ። ⁹እንሲን ዳዊት፡ ሬካብዲ ባዓና ኒዳንዲ፡ ሪሞን ብኤርታዊቝር፡ ንሰና ዮ ወንተስዅሎም፣ ‘ጃር ዋኔዅ ግን፡ እን ይርሕሲ ኣኻ ጅርበትልድክ ደአንዳዅላ። ¹⁰ብሽራ ናቕሳዅለ ተከሉ፣ ‘እናሓን፡ ሳኦል ክሩዅ’ ዮ ድወዅለ አዳምቲ ሻዀ ጺቅላግትል ኵዅንሉ።¹¹ኰዶ ጂባዅዃ፡ ከው ሙቝል፡ እን ሻትክ ግርወስ ኒልጝ ኒገኝጂሰኒል ኵናዅሉ፣ ኣውስኰት ናት ጂባዅ ቅጽዓት ኣስተሀለጋዅሎም፧ ኒ፡ ብርሲ እንታ ናንትተልድ ጀረቢያ፡ እንተትኻ ብሪልድ ድሂስየኩም ሻኽልማ፧” ¹²ዳዊትኻ ኒገኝሺንሲ ኣደዱዅ፡ ናውር ኵኑዅሎም፡ ናናትዲ ናሉኵክዲትኻ ቀረጭኑዅሎም፡ ዓይግ ኬብሮንዱዅ ገቢልኻ ሰቀልኑዅሎም። ኣዀት ኢሽ-ቦሸትሩዅስኻ አርብ ኣብኔርዱዅሊ ኬብሮትል ዲቢኒዅሉ።

5¹እንሲን እን ህምበውክ ነገድ እስራኤልዱ ኬብሮንትል ዳዊትል እንትኖ ንሰና ይኑዅሉ፡ “እናሓን ይን ኵናሽዲ፡ ኵስኻዲ ግን፣ ²እማና ሳኦል ይነል ሰየምሶ ዋኑ፡ እስራኤልቲ ሓርብሊ መርሕሩላ እርግራኽር እንቲ እርግሩዅ፣ ጃርኽር፡ ‘ኵት፡ ይእክ እስራኤልዱሲ ተከውቶ ግን፣ ናመርሓይር ኣኽቶ ግን’ ዮካ እርጉዅ።”³ናውክ በህሊል እስራኤልዱኻ ዳዊትል ኬብሮንትል እንትኑዅ፣ ሲም ዳዊትኻ ኬብሮንትል ናዲ ጃር ጃብል ሟእኰት ቱዉዅ። ዳዊትኽር እስራኤልትል ሲም ኣኽሮ ቀብእኑዅሉ። ⁴ዳዊት ሰየሱ እⶖጒሲ ሰዀርጝ ኣመሪዅ እርጉዅ፣ አርብያ ኣመራኻ ሰየምሱዅ። ⁵ኬብሮንትል ኣኾ ይሁደትል ለጛታ አመረዲ ወልታ አርበዲ ሰየምሱዅ፣ ኢየሩሳሌምትል ኣኾኻ፡ እራኤልዲ፡ ይሁዳዲትል ሳዀርጝንዲ ሰኻ ኣመራ ሰየምሱዅ።⁶ሲምዲ ኒእክዲ ኢዮርሳሌምትል፡ እን ንርትል መንደርተው ይቡሳውያንሲ ታሓረብድኖ ፈርኑዅ። ናውኻ ዳዊቲ፡ “ነትታ ቱቶ ኣኽላ፡ ዓራፍዲ ሓጝካሳንዲ ድኳ ዳገንድኖካ ግን፡” ይኑዅሉ። ዳዊት ነራ ቱወላ። ⁷ዳዊት ደአም ጊራ ጽዮንዱዅ ሻዅሉ፡ ንሪ ዕርዲራ ዳዊትሪ ይስትረሪ ግን።⁸ዳዊትኻ እንግርጋ እንድሂቲ፡ “የቡሳውያንሲ ቂልዶ ጀረባዅ፣ ዳዊትር ኣፋይቲ ኣኸውሊ፡ ‘ሓጝካሳንዲ ዓረፍዲት ኵሮ መታን፡ዓቝ ደኵሲሰነድ ዓረግን” ዩዅ። “እማ ንድ ግን፡ ሓጝካሳንዲ ዓረፍዲ ልጝን ሕኵመቱዅሊ ትወኒ ይስታዅ።” ⁹ዳዊትኻ እን ጊሪል ከፍ ዩዅ እማ፡ ዕርዲራ ዳዊትሪ ዮ ሽጝዅላ። ዳዊትኽር ሚሎትልድ ተርሰ ንርጅወዲ ንርበረዲት በነይዅሉ።

¹⁰ዳዊት ደአም፡ ጃር ኒዲ እርጉዅ እማ፡ ሒለቲቱ ፈሩዅ።¹¹ሒራም ሲም ጢሮስሩዅኻ ዳዊትሲ ንሽቕዲ ካን ጽሕዲሩ ሸረበውዲ፡ ክርጝ ሸረበውዲ እሰ ፈስዅሉ። ናውኻ፡ ዳዊትድ ልጝን ገበርኑዅሉ። ¹²ዳዊትኻ፡ ጃር እስራኤልትል ሲም እሰ ተብደትሉ፡ ኒሕክምስኻ ኒእክ እስራኤልድውድ ዮ ክብ ሰትላ ኣስተብሀልዱዅ።

¹³ዳዊት ኬብሮንትልድ ፈረሪት፡ ወንተሶ እኵን ሸሉዲ እዅንዲ እዮርሳለምትልድ አዱዅ። ዳዊትኻ፡ አሪው ቝራቝርዲ እጝቃቕዲ እዃሩዅ። ¹⁴እን ዮርሳሌምትል እዃረውሎምኻ ናስⶖጝ ነን ግን፣ ሻሙዓዲ ሾባብዲ፡ ናታንዲ ሰሎሞንዲ፡ ¹⁵ይብሓርዲ ኤሊሹዓዲ፡ ነፈግዲ ያፊዓዲ፡ ¹⁶ኤሊሻማዓዲ ኤልያዳዕዲ፡ ኤሊፈለጥዲ።¹⁷ፍልስጢምኻ ዳዊቲ እስራኤልትል ሰየምስሮ ቐብእነትሉ ዋስነሰና፡ ናውክ ፍልስጢም ዳዊቲ ጀረቢድኖሉ ተረገስኑዅ። ዳዊትኻ ኒስ ዋሰሰና፡ እኒኒልትብታዅ ኣካንሊ ገሙዅ። ¹⁸ፍልስጢምኻ እንትኖ ዓኝቀር ረፋይምሩዅሊ ፋሕ ይኑዅ።¹⁹ዳዊትኻ ጃርሲ፡ “ፍልስጢምሲ ፌ ተሓረብየሎም ይናንተል ዶኵስሮ ኡተመለ፧” ዩ ወጝቐሩዅ። ጃርኻ፣ “የዋ ፌሪ፡ ፍልስጢምሲ ኵናንተል ዶኵሶ እውየካ ግን” ይዅሉ። ²⁰ዳዊትኻ በዓል-ጰራጺምትል እንቱዅ፡ ኒልኻ ዲዊት ቒልዅሎም፣ ዓቝ ነደፍሰውሰና፡ ጃር ይኣፋይትስ ይጃብልድ ፋሕሲዅሎም፡ ዩዅ። እማ እን ሱⶖ ኣካንዱዅስኻ በዓል-ጰራጺም ሽጝዅላ። ²¹ናጣቆታትስኻ ኒል ባርኑዅሎም፡ ዳዊትዲ ኒኣዳምድኻ ጒድንዅሎም።²²ፍልስጢምኻ ሓዲስድ ተረገስኖ ዓጝቀር ረፋይምሩዅሊ ፋሕ ይኑዅ። ²³ዳዊት ጃርሲ መጝቀሮሰነክሉኻ፡ ጃርኻ ንሰና ይዅሉ፡ “ተረገስግሎም፡ ናጕርበትድ ጅልዊሎም፡ እን ካርጝ ባምፉዅ ትዊሎም፣²⁴ኣኽሮ ግን፡ እን ባምፍ ኣወይሲ ዳዳኒ ደሀይ ዋስረሰናኻ፡ እንሲን ጃር ዓስከር ፍልስጢሙሲ ታሓረብሮሎም ኵጃብል ፊዅ እማ፡ እንሲን ወለይድሮ ባⶖግሪ፡ ይዅሉ። ²⁵ዳዊትኻ፡ እን ጃር ኣደዳዅሰነሉ፡ ኒሰና እሲዅ፣ ፍልስጢምስኻ ጌብዕትልድ እን ጌዘርትል ቱስረሪትል ኣኽታሲክ ዳገንዅሎም።

6¹ዳዊትኻ ወንተሶ እስራኤልትልድ ፍሪርሰው ሰዀርጝ ስሕ ኣከው ግርው እክቡዅ። ²ዳዊዲ እን ኒዲ እርገው ከውዲ፡ እን ኪሩበል ታቦት ኣወይሊ ህምባዅድ ነበክል ሓደራዅ ጃር ጻቦኦቱዅ ስⶖድ ሽኝስታዅ ታቦትሲ፡ ናቕስድኖሉ ይሁዳ ብሪል፡ በዓለትል ፈርኑዅ።³ናውኻ፡ እን ታቦት ጃሩዅስዲ ሓዲስ ሰረጌሊል እሲነ፡ እን ጒርዕ ዳግ እርጋዅ ልጝን ኣቢናዳብሩዅልድ ጕድኑዅሉ፡ እን ሰረጌለስኻ ዑዛዲ ኣሕዮንዲ፡ ኣቢናዳብቝር፡ መርሕኑሉ እርግኑዅ። ⁴ ታቦት ጃሩዅ ሰረጌሊር ኣኾ፡ ኣሕይኻ ኒጃብ ጃብል ፈሩ እርጒዅ። ⁵ዳውትዲ እስራኤልዱዲ ንውክኻ፡ መዝሙርዲ፡ በገነዲ፡ ዕንድርዲ፡ ከለምቡረዲ፡ ጸናጽልዲ፡ ደውልዲሲ፡ ናሒልዲክ ጃር ጃብል በረጁኑ እርግኑዅ።⁶እን ወረና ናኮንድዅሊ ገይእነሰናኻ፡ እን ቢል ዓቀፍስንነዲን፡ ዑዛ ኒናንሲ መደዶ እን ታቦት ጃሩዅሲ ሻዅላ። ⁷ዑዛ ደፈሮ ኒስ እሲነዲን፡ ሓሪቆት ጃሩዅ ዑዛትል ሓውዩዅ፡ እማ ጃር ቀዘፍዅሉ፡ ንኻ ኒል እን ታቦት ጃሩዅ ገቢል ክሩዅ።⁸ዳዊትኻ፡ ጃር ዑዛት ከሪነዲንሉ፡ ጓሀይነድ ሓውዩዅ፣ እን ኣካንስኻ፡ ንኪ ኣኽታሲክ ሽጝስትራዅሰና፡ ጴረጽ-ዑዛ ዮ ሽጝዅላ። ⁹ዳውት እን ግርጋ እንድሂቲ ጃርሲ ጒኢትነዲን፡ “ታቦት ጃሩዅ ኣዋኸ ይል እንተራዅን፧” ዩዅ።¹⁰እማ ዳዊት ታቦት ጃሩዅሲ ልጝን ዖቤድ-ኤዶም፡ ጊታዊሪዅሊ ቱስዅላ ግን ግራ፡ ዕርዲራ-ዳዊትሪትል ኒል ካስሮላ እጝከላ። ¹¹እን ታቦት ጃሩዅዃ፡ ልጝን ዖቤድ-ኤዶም ጊታዊሪዅሊ ሰዃ አርባ ግጁዅ። ጃርኻ፡ ዖቤድ-ኤዶምዲ ኒውክ ኒልጝንዲት ገውሩዅሎም።¹²ጃር እን ታቦት ጃሩዅ መታን ዮ ልጝን ዖቤድ-ኤዶምዲ ኒውክ ኒድ ህምባዅሲሉ ገውርዅሉ፡ ይኖ ሲም ዳዊትድ ድዊኒዅሉ። እንሲን ዳዊት ፈሮ ታቦት ጃሩዅሲ ልጝን ዖቤድ-ኤድምሩዅልድ ፈርሓትድ ዕርዲራ-ዳዊትሪትል ተረገስድዅሉ። ¹³ኣኾኻ፡ እን ታቦት ጃሩዅሲ ሙዅረው ወልታ ስድር ፈርነሰና፡ ላዅ ቢረዲ ላዅ ሳዃ መደፍዲ ሰደቕኑዅ።¹⁴ድዊት ደአም፡ ኒውክ ኒሒልዲክ ጃር ጃብል በረጁ እርጒ፡ ዳዊት ኤፎድ ልሕጺ እንጣጢዕሩዅ ደበልቶኻ እርጉዅ። ¹⁵ዳዊትዲ ንርውክ እስራኤልዲ ታቦት ጃሩዅሲ እልልተዲ ቃና መለኸቱዅዲሲ ተረገስድኑዅሉ።¹⁶ኣኾኻ፡ እን ታቦት ጃሩዅ ዕርዲራ-ዳዊትሪትል ትዉ እⶖጒሲ፡ ሚካል ሳኦልድቝራኻ፡ ሽባክድ ሓወጭሮ ሲም ዳዊቲ ጃር ጃብል ባⶖጒራዅስኽር በረጁዅስኽር ቋልደሪ፡ ንርለበከድ ቃበብቲሉ። ¹⁷እን ታቦት ጃሩዅስኻ ናቕስኖ ኒኣካንሊ እን ዳዊት ካደማዅሉ ልጝን ነበክሊ ገምድንዅሉ። ዳዊትኻ ሓውያዅ ሰደቐትዲ ሰደቐት ሓምደሩዅዲ ጃር ጃብል ሱኵሱዅ።¹⁸ዳዊት እን ሓውያዅ ሰደቐትዲ ሰደቐት ሓምደሩዅዲት ሱኵሶ ድጞሰና፡ እን እክሲ ሱⶖ ጃር ጻበኦቱዅድ ገውርዅሎም። ¹⁹ናውክ እን ከውዲ ናውክ ዕግሎ እስራኤልዱዲት፡ ግርዊልድ እዂነትል ኣኽታሲክ ናላዅ ላዅስክ፡ ላቅጨረዲ ላቅራጫ ስኺዅዲ ላዅ ጐጎ ደቢቡዅዲ በኒዅሎም። ኒደምብኻ እን ከው ናውክ ላዅክ ኒልጝል ፈሩዅ።²⁰ዳዊትኻ ኒልጝኝሲ ገውርዶ ወንተሩዅ። ሚካል ሳኦልድቝራኻ ዳዊቲ ከለብርቶሉ ፊቲ እማ፣ “ንኪ ሲም እስራኤልዱዅ፡ ገኝሺን መኳንንቲሩ ጃብል ላዅ ነፍዓጋዅ ኣዳምርሰና ካያ ኣኾ ቋልስትና ክብር ኣኽነዲን መኒ!” ይቲ።²¹ዳዊትኻ ንሰን ይዅላ፡ “የዋ ኵዅርዲ እን ኒልጝል እርገው ናትከልድ ኪዳዅ እሰ እክ ጃሩ እስራኤልድ ኣወይሲ መልካይ እሰ ፍሪራዅለ ጃር ጃብል በረጅያ ግን፣ ናጝር በረጅያ ግን። ²²ልሳዕ፡ ኒልድ ኣወይሲ ስዳውየሉ ግን፣ ኵጃብል ትክሰ ስማርዳዅ ኣኽያ ግን፡ እን እንቲ ይረሪለን ገኝሺንልኻ ከበርያ ግን፡ ይዅላ። ²³ሚካል ሳኦልዱቝራኻ እን ክርዳ ግርጋ ኣኽታሲክ ውላድ እርግለላ።

7¹ኣኾኻ፡ እን ሲም ኒልጝንሊ ከፍ ዮሰና፡ ጃርኻ እን ኒላው ሸጝገብድ ህምበይ ኒኣፋይትልድ ፊዅደሪትሉ፣ ²እን ሲም ነቢራ ዮናታንቲ፡“ ቋሊ እማ፡ ኣን ልጝን ጽሕዲሲ ከደምሳዅሊ መንድርተኵን፣ ታቦት ጃሩዅኻ ዳስሊ መንደርተኵ” ይዅሉ።³ናታንኻ ሲምሲ፣ “ጃር ኵዲ ኣኸውድ፣ ፈሪ፡ ኵለበኪል ህምባዅ ኒትክሲ እሲ” ይዅሉ። ⁴እን ቂር እንድሂስኻ፡ ቆል ጃሩኽ ንሰና ዩ ናታንትል እንቱዅ፣ ⁵“ፈሪ እማ ይገኝሺና ዳዊቲ፣ ‘ጃር ንሰና ያኵ፡ ይድ መስከብ ከደምራኽር እንቲ ኣኽላ፣’⁶እስራኤልዱ ምስር ብሪልድ ፍነንትልድ ተርሰ ንኪ ኣኽታሲክ ዳሲ ይመስከብ እሰ ኣካንልድ ኣካንል ፈርዅን ግን ግራ፣ ልጝንሊ ከፍ ይሊ። ⁷እስራኤልድቝርዲ ወንተተሩ፡ ላዅ ነገድ እስራኤልድውልድ ይእክ እስራኤልዱሲ መቃቕሮ አደዳዅሲ፣ “ውራ መታን ልጝን ጽሕዲሪዅ ከደምድኒለ ዮማ ጋቢዅን፧”⁸“ናጝኻ ይገኝጂና ዳዊቲ ንሰና ይሉ፣ ‘ጃር ጻቦኦት ንሰና ያኵ፡ ይእክ እስራኤልዱዅ መልካይ ኣክቶ ሕዳርልድ ጒድዅንካ፣ በግ ተከውኒልድኻ አድዅንካ፣ ⁹ፈርድዅሊክ ኣን ኵዲ እርግዅን፣ ኵኣፋይትስኽር ኵጃብልድ ድሂስዅንላ፡ ናጝር ናሱⶖ ብሪል ገነነውሰና በህሊል ከው፡ ናላዅሰና ኵሱⶖሲ ገነንድየሉ ግን፣¹⁰ኒሹር መስከብ ዋንቲሮሉ፡ ናንድ ደምቢ ተናወጽጊን፣ ይእክ እስራኤልሲ ኣካን ኡውየሉ ግን፣ ተብድየሉ ግንኽር። ንጃብ ኣኻዅሰና ሙቝል እክ ጨነቕደለሎም፣ ¹¹ይእክ እስራኤልድውድ መርሓት ሰየማ ወክትልድ ተርሰ እሲነውሎም ኒውክ ናንድ ደምቢ እሰኒሎም፡ ኒሰናኽር ናውክ ናኣፍይትተልድ ተከውየሎም ግን። “ ‘ጃር ኒላውድ ልጝን ከደመትካ ድዊሮካ ግን፣¹²ኵግርጋት ተመመሰና፡ ኵእክልዲኻ ገጅረሰና፣ ኵደምብኻ እን ኵግርፍፍልድ ፈዅ ኵፈደንሲ ክብ ስየሉ ግን፡ እን ኒሕክምስኽር ተብድየላ ግን። ¹³ኒ ይሱⶖድ ልጝን ከደምሮ ግን፣ ኣጝኻ ቂጦራ ኒሕኵሙዅሲ ዲማ ዳይምድ ተብድየሉ ግን። ¹⁴ኣን እኽር ኣኽየሉ፡ ንኻ እዅራ ኣኽሮለ ግን። ዓገበንኻ፡ ኣዳም ኒድ ቀጽዓናዅ ግምብድ ቀጽዕየሉግን፣ ኣዳሚንድቍር ሓለንጊረድ ጠዓምብስተውሰና ጠዓምብየሉ ግን።¹⁵ደአም፡ ይብሕልተስ እን ኵጃብ ያዕያዅሉ ሳኦልትልድ ሲርዳዅሰና፡ ኒልድ ሲርደሊ። ¹⁶ኵልጝንዲ ኵሕክምድኻ ዲማ-ዳይምድ ይጃብል ተብሮ መንደርትቶ ግን፣ ኵቂጦራኽር ዲማ-ዳይምድ ተብሮ ግን። ¹⁷ናታንኽር፡ እና ቆልዲ ኒውክ ራእይዲት፡ ዳዊትድ ወድሕድዅሉ።¹⁸ኒደምብኻ ሲም ዳዊት ትዉዅ፡ እማ ጃር ጃብል ከፍ ዮ ንሰና ዩዅ፣ “ዎ ክብይራኽር ጃር! ንሂትል ኣኽታሲክ ገስራኽለ ኣን ኣውኒ ግን፧ ይልጝንኻ ውራኒ ግን፧ ¹⁹ዎ ክብይራኽር ጃር! ነን ኵጃብሊ ዕቝቱ ዋኑ እⶖጕሲ፡ እንቲ ደአም እን እንተራዅ ሰበትድ ኵገኝሺነር ልጝን ሰበትድ ጋብራኵ፣ ዎ ክብይራኽር ጃር፣ ኒን ፍትሕ አዳምሩዅ መኒ፧ ²⁰“ዳዊት ኒድ አወይሲ ውራ ይሮካ ገረሳኵን፧ ዎ ክብይራኽር ጃር ኵገጂነስ አርእርዅሉ!²¹ኵቆል ሰበትድር፡ ኵለበኪዅ ሓሳብሰናኽር፡ እና በሀር ጋርሲ እስሪዅ፣ ኵገጂና አርእሮሉ መታን ግን። ²²ዎ ክብይራኽር ጃር! እን ይና እⶖቀድ ዋስናዅ ኒትክሰና፡ ኵሰና እላ፣ ኵእጝገትር ጃር እላ፣ እማ፡ እንቲ በሀር ግን። ²³ኒእክ ኣኽሮ መትን ደአንድሮሎም፡ ኒሹሺ ሱⶖ እሲሮ መታን፣ እና በሀር ጋርሲ እስየልኩምር፡ እን ምስርትልልድር፡ እን ቆምያትዲ ናጣቆታትዲትልድ ደአንድረውሎም ኵእክ ጃብል፡ ኵብሪል ጒኢሳዅ ጋር እሲሮ ጃር ፈራዅሉ፡ ኵብሪል ኵእክ፡ እስራኤልድሰና ኣወያ አሪ እክ ህምበኵን።²⁴ኵእክ እስራኤልስኻ ዲመሲ ኵእክ ኣኽሮ ተብድርዅሉ። እንትኽር፡ ናጃር ኣኽሩዅ። ²⁵“ናንኻ፡ ዎ አደራ ጃር! እን ኵጀና ሰበትድር ኒልጝን ሰበትድር ጋብረዅ ቆልሲ ዲመሲ ተብዲሉ፣ እን እንቲ ጋብረዅሰናኽር እሲ፣ ²⁶እማ ኵሱⶖር ዲመሲ በሀር ኣኽሮ ግን፡ ‘ጃር ጻብኦት እስራኤልዱዅ ጃር ግን!’ ይድኖ ግን። ኵገጂና ዳዊትር ልጝን ኵጃብል ተብረሪ ኣኽቶ ግን።²⁷“ዎ እስራኤልዱዅ ጃር፡ ጃር ጻብኦት፡ ‘ኣን ኵድ ልጝን ከደምያ ግን’ ይሮ ኒስ ኵገጂነድ ወድሕድርዅሉ። እማ ኵገጂና እና ጠሎትሲ ኵል ሱክስሮ ድፍረት አሩዅ። ²⁸“ናንኻ፡ ዎ ጃር ጻብኦት፡ እንቲ ጃር ግን፡ ኵጋብር እምን ግናው፡ እና ትክያዅ ጋርስኻ ኵገጂነድ ሳዲስርዅሉ። ²⁹ኵጃብል ዲመሲ መንደርትሮ መታን ኵገጂነር ልጝንሲ ገውርቶ ኵምራድ ኣኽኒ፡ ዎ ጃር! ኒስ እንቲ ኵላውድ ጋብሪዅ እማ፡ ኵገውረድር ኵገጂነር ልጝን ዲመሲ ገውርስርን።

8¹ኒደምብኻ፡ ዳዊት ፍልስጢምሲ ቂሎሎም ኒምልክ ዓጝቀይ እሲዅሎም፣ “ሜተግ አመህትኻ” ናናንትተልድኻ አድዅላ።

²ኒሰናኽር ዳዊት ሞኣብሩሲ ቂልዅልም፡ ብሪል በጥሰኻ ገመርድ መተርዅሎም፣ ለጛ ገመድ ክረድ፡ ላገመድኻ ፊዅትድ መከሩዅ። ሞኣብሩኻ ዳዊትሲ ኒገኝሺን ኣኽኖ ርድቕ ናቕስንዅሉ።³ኒደምብኻ ዳዊት፡ እን ወረባ ኤፍራጥስሩዅሊ ገቢል እርግረሪ ኒምልክትሪት ወንተስሮላ ፈረሪት፡ ሃዳድ-ዔዘር፡ ሬሖብዱዅራ፡ ሲም ጸባሩዅሲ ቂልዅሉ። ⁴ዳዊትኻ ኒልድ ስሕዲ ለጘታ ሊኽዲ ፈርድት፡ ለጘረጝ ስሕኻ ልኵኩድ ፈረው ከው አዱዅ። ዳዊት እን ሊኽ ፈርድት ሰረገሊውሲ ከብሰ፡ እን ከብተው ፈርድት ሰረገሊው ናትክሲ ናሉኵክሲ ቀረጭዅሎም።⁵እን ዳማስቆትል እርገው ሶርያሩኻ ሃዳድ-ዔዝር ሲም ጸባሩዅሲ እልልድኖ እንትነሰና፡ ዳዊት ናልድ ለጘረጝንዲ ለጛ ስሕ ግርው ኵውዅ። ⁶ዳዊትኻ ሶርያ ዳማስቆትሪትል ተከወው ገምዱዅ፣ ሶርያሩኻ ዳዊትሲ ኒገኝሺን ኣኽኖ ርድቕ ናቕስንዅሉ። ጃርኻ ዲዊትሲ ንፈራ ኣካንሊ ዓውተ እውዅሉ።⁷ዳዊትኻ እን መርሓይ ሃዳድ-ዔዘርዱዅሊ እርጋዅ መሐገይ ደሀቡዅሲ አድዅሉ እማ፡ ኢዮርሳለምሊ ናቕስዅሉ። ⁸ሲም ዳዊትኻ ቤጣሕዲ ቤሮታይዲ ዕርዲታት ሃዳድ-ዔዘርዱልድ፡ ገሪው ናሕስ ናቅሱዅ።⁹ቶዒ ሲም ሓማትሩኻ፡ ዳዊት ናትክ ዓስከር(ደሽ) ሃዳድ-ዔዘርዱሲ ቂለትሎም ዋሰሰና፣ ¹⁰ሃዳድ-ዔዘር ቶዒዲ ታሓረቦ እርጉዅ እማ፦ ዳዊቲ ኒዓፍየት ሰበትድ ወጝቀርዶሉኽር፡ ሃዳድ-ዔዘርቲ ተሓረቦ ቂልነዲንሉኻ ገውርዶሉ፡ ኒእዅራ ዮሩምቲ እኝሻቕዅሉ።¹¹ሲም ዳዊት፡ ጃቢሶ ሐክመት እወውሉ ሰላዲዲ ደሃብዲት እሰሰና፡ እና እራኵስኽር፡ ጃርድ ሸተክድዅሎም። ¹²እን እወውሉ ሐክመትኻ፡ ኤዶምዲ ሞኣብዲ፡ ዓሞናውያንዲ ፍልስጢምዲ፡ ኣማሌቅሩዲ እርግኑዅ። ኒሰናኽር ሲም ጾባሩዅልድ ሃዳድ-ዔዘር ሬሖብዱዅሪልድ ኣደውሎም መርኮት ጃርድ ሸተክዱዅ።¹³ዳዊትኻ ሶርያሩሲ ቂሎ ወንተረሪት፣ ሽዋ ዓኝቀሩዅ ይስታዅሊ ሽካ ሰዀታ ስሕ ክወሪት፡ ኒሱⶖ ክብዩዅ። ¹⁴ኤዶምትልኻ ተከወው ገምዱዅ፡ ንርውክ ኤዶምትኻ ተከወንቲ እሲዅ። ናውክ ኤዶምሩኻ ዳዊትር ገኝሺን ኣኽኑዅ። ጃርኻ ዳትሲ ኒፈራ ኣካንልክ ዓውተ እዉሉ እርጉዅ።¹⁵ዳዊትኻ ናውክ ኒእክድ፡ ፍርዲ ጭድቅዲ እሱ ንርትክ እስራኤልትል ሰየምሱዅ። ¹⁶ዮኣብ ጽሩይድዅራኻ ሓለቓ ዓስከሩዅ እርጉዅ፣ ይሆሻፋጥ ኣሒሉድዅራኻ ከትባይ ህድጒዅ እርጉዅ፣ ¹⁷ጻዶቅ ኣሒጡብዅረዲ ኣሒሜለክ ኣብያታርድዅረዲኻ ከዳታት እርግኑዅ፡ ሰራያኻ ከትባይ እርጉዅ፡ ¹⁸በናያ ይሆያዳዅራኻ ሓለቓ ክረታውያንዱዅዲ ጵለታውያንዱዅዲ እርጉዅ። ዲዊትቍርኻ ከዳታት እርግኑዅ።

9²ጺባ ይስታዅ ግርዋኻ ኣገልጋሊራ ልጝን ሳኦልዱዅሊ እርጉዅ፡ ኒት ዳዊትል ሽኝንዅሉ። ሲምኻ፡ “እንቲ መኒ ጺባ፧” ይዅሉ፡ ንኻ “የዋ፡ ኵገኝሺና ኣን ግን” ይዅሉ። ¹ዳዊትኻ “ልጝን ሳኦልዱልድ ዮናታን መታን ዮ ብሕልታ እስየሉ ገለ ከብተዅማ እላ፧” ዩዅ።³ሲምኻ፡ “ብሕልታ ጃሩዅ እስየሉ፡ ልጝን ሳኦልዱዅልድ ገለ ከብተዅ ኣዳማ እላ፧” ይዅሉ። ጺባኻ፡ “ኒልኵኲክ ሃሽከብሳዅ ላዅ ዮናታድዅራ ህምባዅ” ይዅሉ። ⁴ሲምኻ፡ “አወት ህምበዅን ኒ፧” ይዅል። ጺባኻ፡ “እናሓን ኒ ልጝን ማኪር ዓማኤልዱኻራ፡ ሎ-ዳቦርትል” ህምበኵ ይዅሉ።⁵እንሲን ዳዊት እኝሻቆ፡ ልጝን ማኪር ዓሚኤልድዅሪዅልድ፡ ሎ-ድባርትልድ ናቅስዅሉ። ⁶መፊቦሸት ዮናታንድዅራ፡ ሳኦልድዅራ፡ ዳዊትል እንቱዅ፡ ኒብሶትድ ሉምዮኻ ፍግም ዩዅ፡ ዳዊትኻ፡ “መፊቦሸት” ይዅሉ። ንኻ፡ “እናሓን ኵገኝሺና” ይዅሉ።⁷ዳዊትኻ፡ “ጒኢትግ፡ ኵእኽር ዮናታን መታን እምንድክ ብሕል የካ ግን፡ ኪሽጝ ኵእኽር ሳኦልዱስኽር ወንተስየልካ ግን። እንትኻ ዲመሲ ይመኣዲሪል ሳንሰዓ ቍቶ ግን፡” ይዅሉ። ⁸መፊቦሰትኻ ክብሮ፡ “ክራዅ ግድጝሰና ሺብስታኽርሲ ይት፡ ኒስኰት እስራኽርለ ኵገኝሺና፡ አን ኣውኒ ግን፧” ዩዅ።⁹ኒደምብኻ ሲም ሳኦልዱዅ ገኝሺነስ ሽጞ ንሰና ይዅሉ፡ “ሳኦልዱዅዲ ኒከውዲሩዅሲ ኒትክ ኵአደራዅረድ እዅረድ እዎሉ ህምበኵን። ¹⁰ኵዲ፡ ኵቊርዲ ኵገሺንዲኻ፡ ኵአደረድዅረድ ቍስታዅ ሳንስዓ ኣኽሮሉ መታን፡ እን ብረስ ጐዲነ፡ ዐሰሉ። መፊቦሸት ኵአደረድዅራኻ ዲመሲ ይማኣዲሪል ቍሮ ግን፡ ይዅሉ።” እን ወክት እንድሂሲ ጺባ ሽካ ኣⶖኳ ቝራቚርዲ ለጘርጝን ገሺኝዲ እርግንዅሉ።¹¹ጺባኻ ሲምቲ፡ “የደራ ሲም፡ ኒገኝሺና ኒትክ አደዳዅሲ፡ ኵገኝሺና እሲሮሉ ግን” ይዅሉ። እማ፡ መፊቦሸት ላዅ እን ሲሙቍርሰና ኣኾ ዳዊትር መኣዲሪልድ ቝኡ እርጉዅ። ¹²መፊቦሸትኻ፡ ሚካ ይስቶ ሽጝስታዅ ግናይ ቝራ እርግዅሉ። ልጝን ጺባሩዅሊ እርገው ናውክኻ ገኝሺን መፊቦሸትሩ ኣኽኑዅ። ¹³መፊቦሸትኻ፡ ዲማ መኣዲራ ሲሙዅሉ ቍኡ እርጉዅ እማ፡ ኢሩሳሌምትል መንደርቱ እርጉዅ፡ ንኻ ለጘክ ኒልኲክ ሙጕዱራን እርጒኑዅ።

10¹ኒደምብኻ ሲም ዓሞንዱዅ ክሩዅ፡ ኒኣካንልኻ ኒእዅራ ሓኑን ሰየምሱዅ። ²ዳዊትኻ፡ “ሓኑን ናሕሽዅረስ፡ እን ኒእኽር ብሕልየሰነለ ኣጝር ብሕል የሉ ግን” ዩዅ። ዳዊትኻ ኒእኽር ሰበትድ ኒገኝሺንድ ደፍእድሮሉ ንሽቕ ፈስዅሉ። እን ገኝሺን ዳዊትሩኻ በለድ ዓሞንድቝርሊ ቱኑዅ። ³እን ዓሞንዱርሲ መርሓው ሲምሲ ንሰና ይንዅሉ፦ “ዳዊት ኵእርሲ ከበርዶ ደፍእደው ፈሰዅካማ ተካዅንካ እⶖኵዅን፧ ዳዊት እና ዕርዲረት መርመርዶላኽር፡ ሰለይሮላኽር፡ ድሂስሮላኽር ኣኽለማ፣ ኒ፡ኒገኝሺንሲ ፈሶልካ ህምባዅ፧” ይንዅሉ።⁴እንሲን ሓኑን ገኝሺን ዳዊትሩሲ አዶ፡ ገፍ-ገፍ ናሸከምስኻ ሊሾ፡ ገፍ-ገፍ ናሰረጝስኻ ናሞኲል ኣኽታሲክ ቀረጮ ፈስዅሎም። ⁵ኒስ ዳዊትድ ዲዊነሪትል፡ እን እኝሻቕሶ እርገው ገሪዅድክ ስማርኖ እርግንነዲን ከለብርድኖሎም ንኝሽቕ ፈስዅሎም፡ እን ሲምኻ፡ “እንታ ሸከም ቦኰልዳሲክ ያሪኮትል ግጃ እማ፡ ኒደምቢ ወንተራ” ይዅሎም።

⁶ዓሞንድቍርኻ፡ ዳዊት እንጠረትሎም አርእና ወክት፣ ልጝን ሬሖብሩዅዲ ጾባ ዲትልድ ልጘረጝ ስሕ ሶርዪው ዕስከር፣ ሲም መዓካትልድኽር ስሕ፡ ከው ጦቡልድኽር ሽካ ለጛ ስሕ ግርው ተኻረይኑዅ። ⁷ዳዊት ኒስ ዋሰሰና፡ ዮኣብቲ እን ፋርሰን ናትክሲ እዎ ፈስዅሉ። ⁸ዓሞንዱቍርኻ ፍኖ እን ዕርዲረል ቱሲሰኒል ሓርብድ ተሪትኑዅ፣ እን ሶርዪው ጾባሩዲ ሬሖብሩዲ፡ ከው ጦብሩዲ መዓካንሩዲኻ ናቱ ሕዳርሊ ተሪትኑዅ።⁹እንሲን ዮኣብ ኒጃብረዲ ኒደምቢረዲሲ ክልውሰት ቋለሪት፡ ናፈዳበት እስራኤልትል እርእስተው ፋርሰን ፍሪሮ፡ ሶርዪው ጃብል ተሪስዅሎም። ¹⁰እን ከብተው እክስኻ ኒዳን ኣቢሳይ ናንተል እሲዅሎም፡ ዓሞንዱቍርሲ ተሓረብሮኻ ተሪስዅሉ።¹¹ዮኣብኻ ንሰና ይዅሉ፡ ሶርዪው ይልድ ሒለቲተነን፡ እንቲ እልሊለ፡ ዓሞንድቍር ኵልድ ሕለቲተነንኻ፡ ኣን እንቶ እልልየካ ግን። ¹²ተቢ፡ ይና እክ መታንጝር ይና ዕርዳታት ጃሩውድ መታጝር ይኖ ተብንን፣ ጃርኻ እን ትክያዅ ኣኾ ቋልስታዅሲሉ እሲን።¹³ዮኣብዲ እን ኒዲ እርገው ከውዲኻ ሶርዪውሲ ተሓረብድኖሎም ስኵርኑዅ፡ ናውኻ ኒጃብልድ እግርኑዅ። ¹⁴እን ዓሞንድቍር ሶርዪው እግርነት ቋልነሰና፡ ናውኽር ኣቢሳይ ጃብልድ እግርኖ፡ እን ዕርዲረትል ቱኑዅ። እንሲን ዮኣብ ወንተሮ ኢየሩሳሌምትል ትዉዅ።¹⁵ሶርዪው እስራኤልዱ ጃብል ለተቕስነት ቋልነሰና፡ ሓዲስድ ላት እክብስኑዅ። ¹⁶ሃዳድ-ዔዘርኻ እን ካርጝ ወረቡዅሊ እርገው ሶርዪውሲ ፍድዅሎም እማ፣ ሾባኽ እን ሃዳድ-ዔዘርዱዅ ሓለቃ ደሹዅ መርሖሎም ሔላምትል እንትኑዅ።¹⁷ኒስ ዳዊትሲ ድዊነሰነሉ፡ ንርውክ እስራኤልቲ እክቡዅ እማ፡ ዮርዳኖስቲ ካርኖኻ ሔላምትል እንትኑዅ፣ ሶርዪውኻ ዳዊቲ ታሓረብድኖሉ ጕኑዅ፡ ኒድኽር ታሓረብኑዅ። ¹⁸ሳርዪውኻ እስራኤል ጃብልድ እግርኑዅ። ዳዊትኻ ሶርዪውልድ ለጘታ ሊኽ ከው ሰረገሊውዲ አርብያ ስሕ ፈርድቱዲ ክዉዅ፡ ሾባኽ ሓላቃ ናደሹዅሲ ኩውዅሉ እማ፡ ኒል ክሩዅ። ¹⁹እን ሃዳድ-ዔዘርቲ መለክሱኑሉ እርገው ናውክ እስራኤል ጃብሊ ቂልስነት ቋልነሰና፡ እስራኤልዲ ኣረክሲነ ናት መለክስንዅሎም። እን ሶርዪውኻ ኒድ ደምቢ ዓሞንድቍርሲ እልልነስ ጒኢትኑዅ።

11¹ኣኾኻ፡ ኒአመሪል፡ እን ስየም ሓርብሊ ፋናዅ ወክትድ፡ ዳዊት ዮኣብዲ ኒድኻ ኒገኝሺንዲ ናውክ እስራኤልዲት ፈስዅሎም። ዓሞንድቍርሲ ድሂስኖኻ ራባት ክልውኑዅላ። ዳዊት ደአም፡ ኢዮርሳለምሊ ከብተ እርጉዅ።²ላኰረት ኵንጝ፡ ዳዊት ኒዓራትልድ ጐ ልጝን ሕኲመቱዅ አወይሲ ነራ-እንደራ ዩ እርጒዅ፣ ላእዅናኻ ንርጎሮብሲ እጝቓርዱ ቋሉዅ፣ እን እዅናኻ ኣቕትራሲክ ሽኻርዲ እርግቲ። ³ዳዊትኻ እኝሸቆ እን እዅነር ሰበትድ ወጝቀርሩዅ፡ እን ከውኻ“ኒኒ፡ ኤሊዓምድቍራ፡ ኡርያ ሔታዊረድ እዅና ባትሴባማ እኽላ፧” ይንዅሉ።⁴ኒደምቢ፡ ዳዊት ንሽቓ ፈሶ አድዅላ፣ ኒልኻ ቱቲ፡ ጨረይሮ እርግቲ እማ፡ ኒዲ ገኝጅቲ፡ ንር ልጝንሊልኻ ወንተርቲ። ⁵እን እዅናኻ ሓነንቲ እማ፡ “ኣን ጐድጒሪ ግን” ይሮ፡ ዳውትል ንሽቓ ፈስቲሉ።⁶እንሲን ዳዊት ዮኣብቲ፡ ኡርያ ሔታዊረስ ፈሲለ፡ ዮ እኝሻቕዅሉ። ዮኣብኻ ኡርያስ ዳዊትል እኝሻቕዅሉ። ⁷ኡርያ ኒል እንተሰና፡ ዳዊት ኣዋዪን ዮኣብዱዅዲ እክዅዲ ዓስከሩውዲት ወጝቐርዅ። ⁸ዳዊትኻ ኡርያስ፡ “ኵልጝል ፈሪ፡ ኵልኲክስኽር እጝቃሪ፡” ይዅሉ። ኡርያኻ ልጝን ሲሙዅልድ ፊዅ፡ ሲምኻ ኒነብሪልድ ተለይድዅሉ።⁹ኡርያ ደአም፡ እን ገኝሺን ኒአደሪውዲ ልጝን ሕኲመቱዅ ጃብል ገጁዅ ግራ፡ ኒልጝንሊ ፈርላ። ¹⁰እንሲን ዳዊት ኡርያ ኒልጝንሊ ፈርገት ዲዊነሪትሉ፡ ዳዊት ኡርያት፡ “እንቲ ደርብልድ ናንማ እንትላ፧ ውራ መታን ኵልጝል ፈርድላ፧” ይዅሉ። ¹¹ኡርያኻ ዳዊቲ፡ “ታቦት እስራኤልዱዅዲ ይሁዳዲ ዳስሊ ኣኽኖ፡ ይአደራ ዮኣብዲ ኒከውዲኻ ከደን ከራይሊ ዋኑኑ፡ ቍያኽር ጅእያ፡ ኒሰናኽር ይእዅነዲ ገኝጅያ ኣዋህበ ይልጝንሊ ፈራዅን፧ ንሰና ያዅ ጋርሲ እሰገትሉ ይርሕድ ሸራዅን” ይዅሉ።¹²ዳዊትኻ ኡርያት፡ “ንክኽር ነት ግጂ፡ አመሪ ፈስየካ ግን” ይዅሉ። ኡርያኻ እና ግርጋ ኒትኽር ንር አመሪትሪትኽር ኢዮሩሳሌምሊ ግጁዅ። ¹³ዕዱመት ዳዊትሩዅሊኻ፡ ኒዲ ቝዅር ጅእዅር፡ ዳዊትኻ ሸከርድዅሉ፣ ኵንጝትኻ ኡርያ እን ገኝሺን ኒአደሪውድ ነበክሊ ገጅሮ ፈሩዅ ግራ፡ ኒልጝሊ ፈርላ።¹⁴ብራ ክሰሪት ዳዊት ዮኣብሲ ዳብዳበራ ከተቦ፡ ኡርያዲ ፈስዅሉ። ¹⁵እን ዳብዳበራትልኻ፡ “ኡርያት እን ተባዅ ሓርብ ህምባዅሊ ቱሲሉ፡ ሰብስቶ ክርዶ መታንኻ ኒጉርበትልድ ወንተራ” ዮ ከተቡዅ።¹⁶ኣኾኻ፡ ዮኣብ እን ዕርዲረት ክልወሰነላ፡ ኡርየት እን ፋርሰን ከው ዋንቲነትላ አርአሪላ ኣካንሊ እሲዅሉ። ¹⁷እን ከው ዕርዲረሩኻ ዮኣብቲ ፍኖ ተሓረብኑዅሉ። እን እክልድር፡ ገኝሺን ዳዊቱልድር ገለ ልብኑዅ፡ ኡርያ ሔታዊራኽር ክሩዅ።¹⁸እንሲን ዮኣብ እኝሻቆ እን ሓራብ ሰበትድ ኒትክ ዳዊትሲ ድዊዅሉ። ¹⁹እን ንሽቀስኽ ነዋ ዮ ኣደድዅሉ፡ “እን ጋር ሓሩቡዅሲ ኒትክ ሲምድ ድውረ ዱⶖረሪት፣ ²⁰ሲምኻ ቀጠብሶ ንሰና የንካ፡ ‘ተሓረብትኖ ውራማታን እን ዕርዲረትል ሱኵርድኑዅን፧ እን መንደቕ ኣወይልድ መለነትማ አርእድኒ፧²¹እና እን ቴቢጽትል ክራዅ ኣቢሜለክ የሩሼትዅረስ ኣውኒ ኵዅንሉ፧ እዂነማ ኣኽላ መንደቅ ኣወይልድ መዲድ መልደሪሉ፧ እንሲን እንቲ፡ ‘ኵኣገልገልደንታ ኡርያ ሔታዊራ ክሩዅ’ ይሉ።”²²እን ንሽቃኻ ጐ ፈሩዅ፡ ኒል እንቶኻ፡ እን ዮኣብ ድወውሲሉ ናትክ ዳዊትድ ድዊዅሉ። ²³እን ንሽቃኻ ዳዊትሲ፡ “ይና ኣፋይቲ ቂልኑዅና እማ ይነል ሕድርሊ እንትኑዅ፡ ይጝኻ መራ ዕርዲረሩዅሉ ኣኽታሲክ ደረክንዅኑሎም።²⁴እን ወርወረውኻ ኵገኝሺንሊ መንደቅ ኣወይልድ ወርወርንዅ፡ ኵገኝሺንልድኻ ክርኑዅ፡ ኡርያ እን ሔታዊራኽር ክሩዅ” ይዅሉ። ²⁵ዳዊትኻ እን ንሽቀስ፡ “ንሰና ይሮ ዮኣብሲ ድዊሉ፡ ‘ኣብሽርካ ተቢ፡ ሰፍ ላዶን ኒስ፣ አሪ ወክትኻ አሪዅሲ ጀለፋዅ እማ፣ እናኒን በዳን ኣኾ ቃልስትጊንካ፡ እን ዕርዲረት ተብድሮ ተሓረቢላ ፈተታኻ እሲላ፡ ይሉ” ’ ይዅሉ።²⁶ኡረየር እዂና ንርግርዋ፡ ኡርያ ክረት ዋስረሰና፡ ንር ግርወድ ስሪቲሉ። ²⁷ንር ሓዘን ደኴሪትኻ፡ ዳዊት እኝሸቆ ኒልጝንሊ አድዅላ። ኒእዂናኽር ኣኽቲ፡ ቍራኻ እዃርቲሉ። እና ዳዊት እሰዅ ጋር ጃር ጃብል በዳን ኣኾ ቋልስቱዅ።

12¹ጃር ናታንሲ ዳዊትልድ እኝሻቕዅሉ፣ ንኻ ዳዊትል እንቶ “ላዕርዲረትል መንደርተው ለጛ ግርው እርግኑዅ፡ እን ላዅ ርዱቕ፡ እን ላዅኻ ድቡር እርጉዅ። ²እን ርዱቕኻ፡ ገሪው በጝዲ ወስዲ እርግኑዅሉ፣ ³እን ሓግልኻ ጅበሪላ ግናዪ በጋ ንኻ፡ ላርኽር እርግለሉ።ንኻ ለገድዅላ፡ ኒዲ ኒቍርዲዲ ለገቲ፡ ኒመኣድሪልድ ቝሩ፡ ኒኵባየትልድኻ ጅእሩ እርግቲ፣ ኒሕቝፍልኻ ገኝጀቲ፡ ኒድ ኒቝረሰና እርግቲ።⁴እን ርዱቕ ግርዋኻ፡ ደርቡዅ(ጋሻይ) እንተሪትሉኻ፡ እን እንታዅሉ ደርቡዅድ ኒበገልድር ኒወሰልድር አዶ ደልምድሮሉ ጀረቢላ እማ፡ እን ድቡሩዅ በገት አዶ እን ደርቡዅድ ደለምድዅላ። ⁵እንሲን ቀጥብ ዳዊቱዅ እን ግርዊል ትክሰ ሓውዩዅ፣ ናታንቲ፡ “ህምባዅ ጃር ግን፡ ኒስ እሰዅ አዳምቲ ክራ አስተሀላዅሉ! ⁶እና ጋር ኒስ እሲነዲጝር፡ ራሓምግነዲጝር፡ እን በጋ ኣካንሊ ሰጃ እሰ ፈደይሮ ሻዅ ይዅሉ።”⁷እንሲን ናታን ዳውትሲ “እና ግርዋ ኒን እንቲ ግን! ጃር እስራኤልዱዅ ንሰና ያኵ፦‘እስራኤልድ ኣወይሲ ሲም ኣኽቶ ኣን ቐብእዅንካ፡ ናን ሳኦልዱዅልድር ደአንድዅንካ። ⁸ልጝን ኵአደሪዅስኽር ኡዅንካ፡ እኵን ኵአደሪውስኻ ኵሕቝፍሊ ኡዅንካ፡ ልጝን እስራኤልዱዅዲ ይሁደሩዅዲትኽር ኡዅንካ። ኒን ሹጓንካኻ፡ ኒሰና አሪዅ ኰድሪድካ ሻኽር ግን።⁹ውራ መታን ግን፡ እን ጃርሊ በዳን ኣኾ ቋልስታዅሲ እሲቶ፡ ኒቆልሲ ቃበብሩዅን፣ ኡርያ ሔታዊረስ ሰፍድ ኵሮ፡ ኒእዅነት ኵእዅና ኣኽቶ አድርዅሉ። ኒትኻ ሰፍ ዓሞድቍርዅድ ኵሩዅሉ። ¹⁰ይት ቃበብርነዲንለ፡ እዅና ኡርያ ሔታዊሪቝት ኵእዅና ኣኽቶ አድርዅላ፣ እማ፡ ሰፍ ዲማ ዳይምድ ኵልጝንልድ ሲረላ።¹¹“ጃር ንሰና ያኵ፡ ‘እናሓን ኵልጝንልድ በዳ ጋር ጒድየልካ ግን፡ ኵእኲንሲ ኵጃብል አዶ ኵጨረድ እውየሉ ግን፣ ንኻ ኵእኲንዲ፡ እና በርህ ኳራዅ ጃብል ገኝጅሮ ግን። ¹²እንቲ ትብታንድ እስሪዅሉ፣ ኣጝኻ፡ እና ጋርኒስ ናውክ እስራኤልዱ ጃብል በርህድ እስየሉ ግን።’ ” ¹³እንሲን ዳዊት ናትንሲ፡ “ጃርሲ ዓገብዅን” ይዅሉ። ናታንኻ ንሰና ይዅሉ፡ “ጃር ኵሓራምሲ ሺሽድዅልካ፡ እንቲ ክረላኒክ፣¹⁴ኒስ ኵእስነድ፡ ኣፋይቲ ጃሩ፡ ጃርሲ ስዳውድኖ እስሪነዲን፣ እን እዃርሳዅ ቍራ ክርዶ ግን” ይዅሉ። ¹⁵ናታን ኒልጝንሊ ፈረሪት፡ እን እዅና ኡርየትሪ ዳዊትሲ እዃርዳዅሉ ቍረስ፡ ጃር ተቓዅ(ተባዅ) ሹዅዲል ማልዅሉ።¹⁶እንሲን ዳዊት እን ዓለታ ሰበትድ ጃርሊ ጠለዩዅ፣ ዳዊትኻ ሹም ሹሙዅ፡ ትዎኻ ብሪል በጥዮ ኪዅ። ¹⁷እን በህሊል ኒልጝኑኻ ብሪልድ ጒድኖሉ ኒገቢል ደውይኑዅ፣ ኒ ደአም ጒሹዅ፡ ሳንሰዓኽር ናዲ ቍላ። ¹⁸ኣኾኻ፡ ለጘተር ኳረድ እን ዓለታ ክሩዅ፣ ዳዊትር ኒገኝሺንድኻ፡ “እናሓን፡ ርሕድ ዋኑ ድውነዅሲሉ ዳዊት ዋስለና እማ ናን እን ዓለተሩዅ ክረስ ኣዋህብነ ድዊኖሉ ገረስነኵ፧ ኒ ፊዅትሊ በዳን እሲጊን” ይኖ ጋቢድኖሉ ጒኢትኑዅ።¹⁹ዳዊት እን ኒገኝሺን ናሹር-ናሹ ትሕም-ትሕም ይኑ ቋለሰና፡ እን ዓለታ ከረት ፈሀሙዅ። ዳዊትኻ ኒገኝሺንሲ፡ “እን ዓለታ ክሮማ፧” ዮ ወጝቀርዅሎም። ናውኻ፡ “የዋ ክሩዅ” ይኑዅሉ። ²⁰እንሲን ዳዊት ብሪልድ ጐ፡ እጝቃሩዅር ሸምትሱዅር፡ ኒሰረጝስኽር ለወቱዅ፡ ልጝን ጃሩዅሊ ትዎኻ ፍግም ዩዅ። ኒልጝንሊ እንቶኻ ቍስታዅ ሱኲስድኖሉ ጀረቢዅ፡ ሳንሰዓ ሱኵስኑዅሉ እማ ቍዅ።²¹እንሲን እን ኒገኝሺን፡ “እና እንቲ እስራዅ ጋር ውረኒ ግን፧ እን ዓለታ ርሕድ ዋኑ ኒመታን ሹምሩዅር ስርዲዅር፡ እን ዓለታ ክረሪትኻ፡ ጕሮ ነብራ ቍሩዅ” ይኖ ወጝቀርኑዅሉ።

²²ንኻ፡ “እምንድክ፡ እን ዓለታ ርሕድ ዋኑ‘ጃር ብሕል ዮለ እን ዓለታ ርሕድ መንደርትራ’ ዮ ሹምዅጝር፡ ስሪዅጝር። ²³ናን ደአም፡ እን ዓለታ ክሩዅ፣ ውራ መታን ሹማዅን፧ ወንትሶማ ናቕስየሉ ገረሳኵን፧ ኣን ኒል ፈራዅን ግራ፣ ኒ፡ ይል ወንተረላ!” ዩዅ።²⁴ዳዊትኻ ኒእዅና ባትሴባት ደፍእድዅላ፡ ንርትል ትዎኻ ንርዲ ገኝጁዅ እማ፡ ቍራኻ እዃርቲ፡ ኒሱⶖስኻ ሰሎሞን ዮ ሽጝዅሉ፡ ጃርኽር እጝከልዅል። ²⁵ጃር እን ዓለተስ እጝከልነዲንሉ የዲድያ ይስቶ ሽጝስትሮ መታን ነቢራ ናታንድ ቆል እኝሻቝዅ።²⁶እን ወክት እንድሂሲ ዮኣብ ራባ ይስትሮ ሽጝስትረሪ ዕርዲራ ዓሞንትሪት ሻኽሮ ተሓረቡዅ፡ እን ዕርዲራ ሲምትሪትኻ አድዅላ። ²⁷ኒደምብኻ፡ ዮኣብ ንሰና ዮ ዳዊትል ንኝሽቃ ፈሱዅ፦“ራባቲ ታሓረብዅንላ እማ፡ እን ዕርዲራ ዓቝትሪት ሻዅንላ፣ ²⁸እማ ናን፡ ኣን እን ዕርዲረት ሻኽጊንላ እማ፣ ይሱⶖድ ሽጝስትግሪን፡እን ከብተው ዓስከርሲ እክብሮ፡ እን ዕርዲረት ክልዊላ እማ ሸኺላ” ይዅሉ።²⁹ዳዊትኻ፡ ናውክ ኒዓስከርሲ እክቦ ራባትል ፈሩዅ እማ፡ ተሓረቦ ሻዅላ። ³⁰ኣክሊል ሲሙዅሲኻ ኒኣኾርልድ አድዅሉ፡ ኒሚዛንኻ ሰዀርጝንዲ ኣⶖኳ መዘንሳዅ እርጉዅ፡ ካብራን ዑንቍታትኽር እርግዅሉ፡ ኣዀር ዳዊቱዅሊኻ እሲኒዅሉ።እን ዕርዲረትልድኻ ገሪው ሰልብስተው ፍዱዅ።³¹እን ንርትል እርገው ከውስኻ ፍዶ መሻርድ ቀረጨውዲ፡ ሰረገላታት ሸኺው እሰውዲ፡ ሻኽ ሸኪደውዲ እሲዅሎም፣ ጦብ ፍሩሙልኽር ደኵስዅሎም። ናትክ ዕርዲታት ዓሞንዱስኽር ኒሰንስ እሲዅለን። ኒደምቢ፡ ዳዊትዲ፡ እን ኒዲ እርገው ናውክ ከውዲ፡ ኢዮርሳሌምሊ ወንተርኑዅ።

13¹ዳዊቱዅራ ኣቤሴሎምሲ ታማር ይስትረሪ ሽኻርዲ ሻኒ እርግቲሉ፣ ንርቲ ዳዊቱቍርልድ ላዅ ኣምኖን ይስታዅ እጝከልዅላ። ²ኣምኖን ኒሻኒ ታማርቲ ኒእጝከልኒልድ ጐዅ ሽዅዲል ገእይራሲክ ጨነቕሱዅ፣ ድንጝሊ ኣኽረውድ ንርቲ አርና ገረስተጋዅ ኣኾ አርዅሉ።³ኣምኖንኻ ዮናዳብ ይስታዅ ሺምዓ ዳዊትሲ ኒዳንድዅራ፡ እጝከላዅ እርጉዅሉ። ዮናዳብኻ ትክሰ ኣምር ግርዋ እርጉዅ። ⁴ኣምኖንቲ፡ “ዎ ሲምዅራ፡ ግርጊልድ ግርጋ ኵፊዅት ናእኸ ዓበርትራኽር፡ ውራ ኣኽርደ ግን፡ ድዋለመለ፧” ዩ ወጝቐርዅሉ። ኣምኖንኻ፡ “ታማር ይዳን ኣቤሴሎምሲ ኒሺኒ እጝከሎ ግን” ይዅሉ።⁵ዮናዳብኻ፣ “ደአም ኒን ኣከን፡ ‘ሹዅሽቱዅን’ ይሮ ኵዓራትሊ ገኝጂ፣ ኵእኽር ወጝቀርዶካ እንተረን፡ ‘ይሻኒ ታማር እንትሮ ቋዅሉ ኡረንለ ባህ የኲለ፡ እን ቍስታዅስኽር ናራ ይገቢል ኣኽሮ ቋሉንሲክ ደለምድሮ ንር ናንድ ኰለስድቶለ፡ ኵዓይብ ኣጃ ይለ ይሮ ድዊሉ’” ይዅሉ። ⁶እማ፡ ኣምኖን ሹዅሽታዅ ተኰ፡ ኒዓራትሊ ገኝጁዅ። ሲም ዳዊት ኣምኖንቲ ቋልዶሉ እንተሪት፡ “ኵዓይብ፡ ይሻኒ ታማር ናራ ይገቢል ቋሉንስክላ ለጛ ቅጨራ ሰንከትሮ ንር ናንድ ኰለስድቶለ እንትርን” ይዅሉ።⁷ዳዊትኻ፡ “ታማርቲ ልጝን ኣምኖን ኵዳንዱዅሊ ፈርዶ ነብራ ደለምዲሉ” ዮ ንሽቃ ፈስዅላ። ⁸እማ ታማር ንርዳን ኣምኖንዱዅ ልጝንሊ ፈርቲ፡ ዕቝቱገ ሞኰታ አድሮ ቦኵዕድሮ ቋሉንሰነክላ ደለምድሮ ቅጨራ ሰንከቲሉ፣ ⁹እን ሞቝሎረስ አድሮኻ ኒጃብል ገለበቲሉ። ኒ፡ ደአም ቍነስ ጒሹዅ፣ ኣምናንኻ፡ “ናውክ ከውሲ ነትድ ፍደሎም” ዩዅ፣ እን እርገው ከው ናውክኻ ባርኖሉ ፍኑዅ።¹⁰ኒደምቢ ኣምኖን ታማርቲ፣ “ኵናንድ ኰለስድቶለ ማታን እን ቝስታዅሲ ወደንሊ ቱሲሉ፡” ይዅላ። ታማርኻ እን ደለምድራዅ ነብረስ ሻኽሮ ወደንሊ፡ ንርዳን ኣምኖንትል ቱቲ። ¹¹ቝሮ ሱክስረሰነሉ ተብዶ ሻዅላ እማ፣ “ይሻኒ ላዅ ይዲ ገኝጂ” ይዅሉ። ¹²ንራኻ፡ “ኵዓይብ ይዳን ባሪ ኣከላ! ቀሰብግለ! ነዋእ ያዅ ጋር በታተን እስራኤልትል እስተ አርእላ፡ እና ስማሳዅ ክድመትሲ እሲግ፣¹³እና ስማሳዅሲ ሙዅሮ ኣንኻ ኣወት ፈሪያ ግን፧ እንትኽር ኣክረን፡ እን ዓወስ እስራኤልትል ህምበውሰና ኣኽቶማ ኣኽላ፧ እማ፡ኵዓይብ ሲምሲ ወጝቀሪሉ፡ ይት ገበበለካ፡ ኒት ድዊሉ” ይቲሉ። ¹⁴ኒ፡ ደአም ንርቲ ዋስሮላ ጀረቢላ፣ ንርትልድ ሒለቲታዅ እርግነዲ፡ ሒልድ ዓመጭዅላ፡ ንርድኻ ገኝጁዅ።¹⁵ኒደምብኻ ኣምኖን ገሪዅድክ እንጠርዅላ፡ እን እማና እጝከላዅልድ ኣወይሲ እንጠርዅላ።እማ፡ ኣምኖን “ጕእ ፊለ!” ይዅላ። ¹⁶ንርኻ፡ “ኒን ኣከላ! ይት ንሰና እስረ ዳገንደነለ ናን እስረዅ ዓገበልድ ጂባዅ ሓራም እሲቶ ግን!” ይቲሉ። ኣምኖን ደአም ዋስሮላ ጀረቢላ፣ ¹⁷ኒሹር ኣገልገልደንተስ ሽጞ፡ “እና አይኢት ነትድ ይጃብልድ ፍዲላ እማ፡ ባብሲ አበዲሉ” ይዅሉ።¹⁸ኒኣገልገልደንታኻ፡ ንርቲ ፍዶላ መረስ አበዱዅሉ፣ እን ወክት እንድሂሲ ደናግል ኣኸው ሲምቍር ሰረውሉ ተካዅ ሺራዅ ቀሚሽ ሰርዶ እርግቲ። ¹⁹ታማርኻ ንር ኣኾርሊ ቍሻ ነስነስቲ፡ እን ሺራዅ ንር ቐሚሺ ደቐይቲ፡ ኒደምቢ ንርናንሲ ንር ኣዀርሊ እስረ ስርዱ ፈርቲ።²⁰ንርዳን ኣቢሴሎምኻ፡ “ኵዳን ኣምኖን ኵድማ እርጉዅን፧ ዎ ይሻኒ፡ ናን ትምዪ፡ ኵዳን ኣኸውድ ላዅድ ድኳ ድዊግ” ይዅሉ። እማ ታማር ንርዳን ኣቤሴሎምዱዅ ልጝል ንርቱ ኣኽሮ መንደርትቲ። ²¹ሲም ዳዊት ኒስ ኒትክ ዋሰሰና ገሪዅድክ ቀጠብሱዅ፣ ²²ኣቤሴሎም ኣምኖንቲ ትክያዅ ኣኽን በዳን ላቆልድኳ ጋቢለሉ፣ ውረድ ኣምኖን ኒሻኒ ታማርቲ ዓመጭነዲንላ እንጠሮሉ እርጉዅ።²³ኣኾኻ፡ ኣቤሴሎም ለጛ አመራ ደምቢ ኤፍሬም ገቢል ህምብረሪ በዓል-ሓጾርትል በግ መቐሰው እርግንዅሉ። ኣቤሴሎምኻ ናውክ ሲምቍርሲ ዓደምዅሎም። ²⁴ኣቤሴሎም ሲምሊ እንቶ፡ “እናሓን፡ ኵኣገልገልደንታ በግ መቐሰው ህምበነኵለ እማ፣ ኵዓይብ፡ ሲምዲ ኒገኝሺንዲ ኵኣገልገልደንተዲ ፈሪኒን” ይዅሉ።²⁵ሲምኻ፡ “ዎ ይዅራ! ኣካል፡ ተቕግኒንካ ናውክ ፈርነሊኒክ፡” ይዅሉ። ንኻ ቀስብዅሉ፡ ኒ፡ ደአም ፈርዶ ጀረቢጋዅ ኣኽነዲን፡ ገውሮ ስብድዅሉ።

²⁶እንሲን ኣቤሴሎም፡ “እማ ይዳን ኣምኖን ይነዲ ፈርን” ይዅሉ። ሲምኻ፡ “እንተዲ ውራ መታን ፈራዅን፧” ዮ ወጝቐርዅሉ።²⁷ኣቤሴሎምኻ ኵዓይብ ዮ ሺዊዅሉ፣ እንሲን፡ ኣምኖንዲ አሪው ሲምቍርዲ፡ ኒዲ ፈርድኖ ባርዅሎም።

²⁸ኣቤሴሎምኻ ኒገኝሺንሲ ቋሎ፡“ቋላ፡ ለበካ ኣምኖንዱዅ ሚድድ ፈርሐሪት፡ እንሲን ለበካ ገምዳ፣ ኣን ኣምኖንቲ ‘ጠዓምበሉ የሪትኩምኻ ጒኢትጋ፡ ኵወሉ፡ ጓቝትጋ፡ ኣማ ኣኽሊ ኣደዳዅኩም፧ ተባ፡ ዳይዓንኻ ኣኻ” ይዅሎም። ²⁹ገኝሺን ኣቤሴሎምሩኻ፡ እን ኣቤሴሎም ያዅሰነሎም እሲኒዅሉ። እንሲን እን ሲምቍር፡ ላዅክ ኒበኽሊል ጨዓንሶ እግርኑዅ።³⁰ናው ደርብል ዋኑኑ፡ “ኣቤሴሎም ናትክ ሲም ቍርሲ ኵውዅሎም፡ ላዅ ከብተዅ እላ” ያዅ ህድግ ሲም ዳዊትል ገእይዅሉ። ³¹እንሲን ሲም ጐ፡ ኒሰረጝሲ ደቐዩዅ፡ ብሪልኽር ለቡዅ፣ ናውክ ኒገኝሺጝር ናሰረጝሲ ደቐይኖ ኒዲ ደውይኑዅ።³²ዳዊትሲ ኒዳን ሺምዓዅራ ዮናዳብኻ ንሰና ዮ ጋቢዅ፦ “ሲምቍርሲ ናትክ ጀለፈትሎም እሰ ይአደራ ሓሰብጊን፡ ኒሻኒ ታማርቲ ቀስብድ ዓመጨንትልድላ ተርሰ፡ ኣቤሴሎምሩዅ አብድ ኰድጝስተ እርጋዅ ግን እማ፣ ኣምኖን ካያ ግን እን ክራዅ” ይዅሉ። ³³እማ ናን ዎ ይአደራ ሲም፡ እን ክራዅ ኣምኖን ካያ ግን ግራ፡ ‘ናውክ ሲምቍር ኵውስትኑዅ’ ያዅ ህድግሲ እምንዶ ሻኽላ ይዅሉ።”³⁴እን ወክት እንድሂቲ ኣቤሴሎም እግሮ እርጉዅ። እን ተከዋዅ ግርዋኻ ቋለሰና፣ እናሓን፡ ኒጒርበትድ እን ጊራ ገፍድ ህምብረሪ ደርብድ ዮ ገሪው ከው እንተረው ቋሉዅ፣ ሲምሊ ሱኵሮኻ እን ኒ ቋለው ናትክ ድዊዅሉ። ³⁵ዮናዳብ ዳዊቲ፡ “እናሓን፡ ሲምቍር እንትኑዅ፣ ኵገኝሺና ያዅሰና ኣኺዅ” ይዅሉ። ³⁶ኒ፡ ኒሰ ጋበ ድጟሰና፡ ዳዊቱቍር ቱኖ ስረና ተርሲኒዅ፣ ዳዊትዲ ናውክ ኒገኝሺንዲኽር መረራዅ ስረና ስሪኒዅ።³⁷ኣቤሴሎምኻ እግሮ ታልማይ ዓሚሑር ሲም ጌሹርዱዅሪል ፈሩዅ። ዳዊት ደአም ኒዅረድ ዲማ ስሩሉ እርጉዅ። ³⁸ኣቤሴሎምኻ እግሮ ጌሹርትል ፈሩዅ፣ ኒልኻ ሰዃ ኣመራ እሲዅ። ³⁹ሲም ዳዊት ክራ ኣምኖንዱዅድ ደፍአሪት፡ ኒእዅራ ኣቤሴሎምቲ ሰፍለልትሮሉ ተርሲዅ።

14¹ዮኣብ ጽሩያዅራ፡ ለባካ ሲሙዅ ኣቤሴሎምቲ ሰፍለልተት ኣለለዩዅ። ²ዮኣብኻ ተቆዓትል እኝሻቆ ንርትልድ ላእዂና ኣምሪ ናቕሱዅ፣ ንሰናኽር ይዅላ፡ “እዅና ሓዘንትሪ ተክረ፡ ታኵን ሓዘኑ ሰሪ፣ ደድ ሸመትስግ፡ ክራዅ አዳምድ ገሪ ወክት ሓዘንደሪ እዂናሰና ኣኽሮ ቋልስቲ። ³ኒደምብኻ፡ ሲምሊ ፈርዶ ንሰና ይሉ።” ኒደምብኽር ዮኣብ እን ንሪ ጋብረው ቆላትሲ ድዊዅላ።⁴እን ተቆዓዊራ እዂናኻ ሲምሊ ቱሮ ጋቢቲሉ፣ ንርብሶትድ ብሪል ፍግ ይቲ እማ፡ “ዎ ሲም! እልሊለ” ይቲሉ።

⁵ሲምኻ፡ “ኵጨገም ውረኒ ግን፧” ዮ ወጝቀርዅላ። ንርኻ ንሰና ይቲሉ፣ “ኣን እምንድክ ንርግርዋ ከረሪላ መብልዳና ግን፣ ⁶ኣን ኵገኝሺና ለጛ ቍራቍር እርግኑዅለ፡ ላኳራ ባሪሳዅ እጝግጋ ኣካንሊ ለጘክ ይቍር ናሹር-ናሹ ዋኺትኑዅ፣ እን ላዅ ኒዳንሲ ጠዓምቦ ኵውዅሉ።⁷እናሓን ኒአዳም ናውክ ኵገኝሺናትል ጕኑዅ፡ ‘ኒዳንሲ ኵዋዅ ኣኸውድ ኵኖሉ ግን፡ እን መረሰንተስ ዶኵስሮ እዊኣና ኵኖሉ፣’ የናኵ እንኲኑዅ። እማ፡ እን ከብተዅ ላዅ ይቲኾስ ድሂስኖ፡ ይግርወስ ብሪል ሱⶖ እጝግትር ፈደን እጝገትር ከብሲድኖል ግን።”⁸እንሲን ሲም፡ እን እዂነት፣ “እንቲ ኵልጝል ፈሪ፡ ኣጝኻ ኵጋር ሰበትድ ጀረብዳዅ ትእዳድሲ እውያ ግን” ይዅላ። ⁹እን ተቆዓዊራ እዂናኻ፣ “ዎ ያአደራ ሲም፡ እን ዓገብ ይኣወይስኽር፡ይኽርድ ልጝን ኣወይስኽር ኣኽኒ፣ ሲምዲ ኒቂጦራዲኻ ዓገብልድ ለጭሓው ኣኽናው” ይቲሉ።¹⁰ሲምኻ፡ “ኣኻዅ ኣዳም ላጋባ ጋበንኪ ይል ናቕሲሉ፣ ድሞኽር ጨገምድሮኪ ኣኽላ” ይዅላ። ¹¹ንርኻ፡ “ዎ ሲም! ክራ ይዅሩዅሲ ፈደየው፡ ይዅረስ ኲነድ ጂባዅ ዓገብ ገእሲግኒን፣ ሲም ኒአደራ ጃርሲ ሺዊን” ይቲ። ሲምኻ፡ “ዋነዅ ጃር ግን! ኣኰር ኵዅሪዅልድ ላሽብካ ድኳ ተመድሰላ” ይዅላ።¹²ኒደምብኻ እን እዂና፡ “ኣን ኵኣጋልገልደንታ ይአደራ ሲምሲ ላቆሊ ጋብያሉ ኣጃይንለ” ይቲሉ። ንኻ “ኣጃ፡ ጋቢ” ይዅላ።

¹³ንርኻ ወንተስሮ ንሰና ይቲሉ፣ “እክ ጃሩውድ ኣወይሲ ኒስ ተካዅ ዓገብሲ እስረዅ ውራ መታን ግን፧ ኵእዅራ እን ኒእግሮ ፋራዅ ኣካንልድ ወንተሮ እንትሮ ፈቀድለሉ፣ እማ እና ናን ጋብረዅ ቆልድ ኲሹትል ፈረድሩዅ፣ ¹⁴ይጝ ናውክ ይና ክርና ከብተጋዅ ግን፡ ይጝ ብሪል ቡቍተው እማ ወንተሮ ሸከፍስሮ/ጒሮ ገረሰገው ዓቍሰና ግን፣ ጃር ደአም ስደትሊ አረርሳዅ ኣዳም ኒልድ ሺሮ ከብቲጊን፡ ኒድ ወንተራዅ ደርብ ደለምዳዅሉ ግራ ኒርሕ ግምሽድ ድቶ ፈቐደላ።¹⁵ናን ዎ ሲም፡ ኣን ኵል እንታዅ ከው እና ጋር ኒሲ ጓቝሰነትለ ድውየካ ግን፣ ‘እማ፡ እን ወጝቀራዅሲ ኒትክ ሲም እሲረለ’ ያዅ ሳደድ ኵጃብል ሱክሮ ህምበኵን፣ ¹⁶እና ድወዅሲካ ዋስሮ፡ ይዲ ይዅረዲት ኵነድ፡ እን ጃር እዋዅና መራስልድ ድሂስሮ ጀረባዅ አዳምልድ ደአንድተና ዮ ግን። ¹⁷ኒሰናኽር ዎ ሲም! ሲም ጃር ተኪንሰና ኣኸውድ፡ እን ትክያዅሲ በዳንልድ ፈለዮ አርኣዅ እማ፡ እን ኵቆል ሳዲዅ ሰላም መንደርትያ እልልደለ ዮ ግን፣ እማ ገድም፡ ኵአደራ ጃር ኵዲ ኣኽኒ!”¹⁸ሲምኻ፡ “ላውጝቕራ ወጝቐርየኪ ግን፣ እንትኻ እምንሲ ድዊለ” ይዅላ። ንርኻ “ዎ ሲም! እንቲ ጀረብረዅሲክ ወጝቐሪለ” ይቲሉ። ¹⁹ሲምኻ፡ “እና ኒስ እሲቶ ኣደዳዅኪ ዮኣብ መኒ፧” ዩ ወጝቐርዅላ። ንርኻ “ዎ ሲም! እንቲ ይራዅ ኒትክልድ በታተን ላው ሸጝገብ ይሮ ገረሳዅ ዋነገት ኵሱⶖድ ሸራኵን፣ እምን ግን፡ ውራ እስያ ውራኻ ይያ ዋነትለ ኣደዳዅለ፡ ኵዓስከሩዅ መርሓይ ዮኣብ ግን። ²⁰ኒ፡ ኒስ ኒእሰዅኻ፡ እን ህምባዅ ኣዋይንሲ ጠፍሕድሮ ዮ ግን፣ ዎ ሲም! እንቲ ደአም መልኣክ ጃሩዅሰና ልውሩዅ ግን፡ እን ኣካዅ ጋር ኒትክሲ አርእሩዅ።”²¹ሲምኻ፡ ዮኣብቲ “ትክያዅ ግን፡ ፈቀዶ ህምበኵን፡ ፈርዶ ሻሎታ ኣቤሴሎምቲ ጀረብርደ ናቕሲሉ” ይዅሉ። ²²ዮኣብኻ ኒገሽድ ብሪል ፍግም ዩዅ፡ ሲምሲኻ ገውርዅሉ፣ ዮኣብ ተለይዶ “ሲም ኒገኝጂነር ሺዋንሲ ከለብረውድ፡ ኵገኝጂና ኵጃብል ዓመል አረት ንኪ አርእሮ ገረሱዅ” ይዅሉ።²³ኒደምብኻ ዮኣብ ጌሹርትል ፈሩዅ እማ፡ ኣቤሴሎምቲ ወንተሶ ዮርሳሌምሊ ናቅስዅሉ። ²⁴ኣኽን ግራ፡ ሲም ዮናታንቲ “ኒሹር ልጝንሊ ፈርን፡ ይገሺ ቋለላኒክ” ዩዅ። ኣቤሴሎምኻ ኒልጝንሊ ፈሩዅ፡ ገሽ ሲሙዅስኻ ቋላ።²⁵ንርውክ እስራኤልትል ኣቤሴሎምሰና ኒወጅህ ሳብስተዅ ኣዳም እርግላ። ራሐት ኒልኵዅልድ ኒኣዀርሊ ኣኽታሲክ ሓኵር ይስታዅ እርግለሉ። ²⁶ ሽብክ ኒኣዀሩ ገሪው እርጙዅ፣ ሺረውዲ ተቀውዲ እርገው ኣኸውድ አመሪል ላዶን ቀረጩሎም እርጉዅ፣ ተቃ ኒሽብካዅኻ ሚዛን ልጝን ሕኩመቱዅ መዘንሰሪት ለጛ ኪሎትልድ ኣወይሲ እርጉዅ። ²⁷ኣቤሴሎም ሰኻ ቍራቍርዲ ላአእዪዲ እርግንዅሉ፣ እን አእዪ ኒቍራኻ ታማር ይስትሩ እርግቲ፡ ንሪ ኣቕትራሲክላ ሽኻርዲ እርግቲ።²⁸ኣቤሴሎም ገሽ ሲሙዅሲ ቋልጊ፡ ለጛ አመራ ዮርሳሌምሊ መንደርቱዅ። ²⁹ኒድ ደምቢ ኣቤሴሎም ሲምሊ ሱኵሮ ወጝቀርዶሉ ዮኣብቲ ሽጚስዅሉ፡ ዮኣብ ደአም እንትሮ ጀረቢላ፣ ሊጘር ወክትኽር ሽጝዅሉ፡ ዮኣብ ናጝር እንትሮ ጀረቢላ።³⁰እማ ኣቤሴሎም ኒገኝሺንሲ፡ “ዮኣብ ይኪድጝ ገቢል ኪድጝ ህምባዅሉ፡ ንርትልኻ ስክም ህምባዅሉ እማ፡ ፈርድኖ ላኸድ ሓውሰሉ” ይዅሎም። ናውኻ እን ኪድጚት ለኸድ ሓውሲኒዅላ። ³¹ኒደምቢ ዮኣብ ልጝን ኣቤሴሎምሩዅሊ እንቱዅ፡ “ኵኣገልገልደንቲ ውራ መታን ግን ይኪድጝሲ ሓውሰውሉ፧” ዮ ወጝቀርዅሉ።³²ኣቤሴሎምኻ ዮኣብቲ፡ “ውራ መታን ጌሹርትልድ ናራ እንትዅኑ፧ ይድ ናን ኣኽታሲክ ኒል እርጋኽር ኣከን ኪድርድለ ይሮ ድዊቶሉ ‘ሲምሊ እኝሻቕየካ ይል ላዅ’ ዮ ሽጚስዅንካ፣ ናጝር ኣከን ገሽ ሲሙዅሲ ቋልያ ጀረባዅን፣ ኣን ዓገቡዅ ኣኾ ኣረርሰን ኵውንለ” ይዅሉ።

³³እማ ዮኣብ ሲም ዳዊትል ትዎ ኣቤሴሎም የውሲሉ ናትክ ድዊዅሉ፣ ሲምኻ ኣቤሴሎምቲ ሽጚስዅሉ፡ ኣቤሴሎምኻ ፈሮ ሲም ጃብል ብሪል በጥ ዮ ኒብሶትድ ክብሩዅ፡ ሲምኻ ኣቤሴሎምቲ ሰለምዅሉ።

15¹ኒድ ደምቢ ኣቤሴሎም ሰረገላዲ ኣፍራስዲ፡ ኒሰናኽር ኒጃብ-ጃብል ጋጘው ኣⶖኵረጝ ግርው ኒሹሺ ደለምዱዅ። ²ብሪ ክሽጛ ሺባ ጐኵ እን ዕርዲረትል ቱሲሰና መራብሊ ደው ዩ እርጉዅ፣ ሲም ኒጋርሲ ቋልዶሉ ጀረባዅ፡ ዋኻ ወሪ ተካሓድና ህምባዅሉ አዳም ኒድ እንተረን፡ ኣቤሴሎም ሽጞ ኣወትልድ እንተት ዋጝቀራዅሉ፣ እን አዳም ኣዊልድ ኣከት ድሪትሉ፣³ኣቤሴሎም፡ “ቋሊ፡ ኵጋር ራትዕዲ ተገባኣዅዲ ግን፣ ኣኽን ግራ፡ ሲም ኣካንሊ ኣኾ እምንድክ ቋልዶልካ ገረሳዅ እላ” ያዅሉ። ⁴ተልይዶኽር፡ “ኣኻዅክ፡ ዋኻ ወሪ ፈርድሳዅ ጋር ህባዅሉ አዳም ይል እንትሮ እማ እምን ፈረድየሉ፡ እና ብሪል ኣዊ ፈርዳይ እሲረለ” ዩ እርጉዅ።⁵ኣኾኻ፡ ኒል ሰገድሮ ዮ ሱክራዅሲሉ፡ ኒናንሲ መደዶ፡ ሸኾሉ ሰለሙሉ እርጉዅ። ⁶ኣቤሴሎምኻ፡ ፍርድ ኣርድኖ ሲምሊ እንተረውሲ ናትክ ንሰና እሱ እርጋዅ ኣኽነዲን፡ ናለበከስ ሰልብሮ ገረሱዅ።⁷ሰጃ ኣመራ ደምቢ ሲም ዳዊቲ ነዋ ይዅሉ፦ “ዎ ሲም! ጃርድ ትዋዅ ቆልሲ እስያ ኬብሮንትል ፈርያ ፈቀዲለ! ⁸ኣን ኵኣገልገልደንታ ጌሹርት ዋኑ ‘ዮርሳሌምሊ ወንተስረነ ሰደቐት ሱክስየልካ ግን’ ዮ ጃርድ ቆል ትዎ እርጉዅን” ይዅሉ።⁹ሲምኻ፡ “ሰላምድ ፈሪ” ይዅሉ፡ ኣቤሴሎምኻ ኬብሮንትል ፈሩዅ። ¹⁰“ኣቤሴሎም ደአም ንርውክ፡ እስራኤልትል ንሽቕ ፈሶ፡ ደሀይ መለኸቱዅ ዋስድና ወክት እንታ ደሀይሲ ክብ ስዲነ ‘ኣቤሴሎም ሲም ኬብሮንድዅ ኣኺዅ!’ ይድኖ ጨርሓ” ይኖ ድዊድኖሎም ሃቢዅ።¹¹ኣቤሴሎምድኻ ለጛ ሊኽ ዓደምሰው ከው ዮርሳሌምልድ ፈርኑዅ፣ ናውኻ ገራሃትድ፡ እና ጋር ሰበትድ ላሪ አርእግኒ ፈርኑዅ። ¹²ኣቤሴሎም ሰደቀት ሱክሳ ወክት፡ ንሽቃ እኝሸቆ ኣሒቶፌል ጊሎናዊረስ፡ ዳዊትር ኰድጚሰነስ፡ ዕርዲራ ጊሎትሪትል ሽጝዅሉ። እን ሸርናኻ ሒለቲቱዅ፣ እን ኣቤሴሎምዲ ፈሩኑ እርገው እክኻ በጀዅኑ ፈርኑዅ።¹³ላዅ ውሪሳዅ እንቶኻ፡ “ለበካ እክ እስራኤልዱዅ ኣቤሴሎምዲ ኣኺዅ” ዮ ዳዊትሲ ድዊዅሉ።

¹⁴እንሲን ዳዊት እን ኒዲ እርገው ናትክ ኒኣገልገልደንቲት፡ “ጓ እግርንን፡ ኣቤሴሎምትልድ ፍዲሰና ሻኽኒ እማ፡ እሽሻዅድ እንቶ ጠዓምብጊና፡ በዳንኽር ናቕስጊና፡ እና ዕርዲረትኽር ሰፍድ ጠዓምብጊና፡ ኣሸሻ ነትድ ፈርንን!” ይዅሎም።

¹⁵እን ኒኣገልገልደንትኻ፡ “ይናአደራ ሲም ፍሪራዅሲ ኒትክ እሲኖ ይን ኵኣገልገልደንቲ ደለምኖ ህምብነኵ” ይንዅሉ።¹⁶ሲም ናውክ ኒአዳምዲ ፊዅ፡ እኽን ግራ፡ ሲም ሽካ እኲን ሸሉሲ ልጝንሲ ተከውድኖ ባርዅለን።

¹⁷እማ ሲም፡ ናትክ እክሲ ተለይዶ ፊዅ፡ ግናዪ ፈርኖ ድምቢኻ፡ ላኣካንሊ ደው ይኑዅ። ¹⁸ናውክ ከው፡ ክረታውያንዲ ጵለታውያንዲ፡ ጋትውያንዲ፡ እን ጋትልድ ተለየውሉ ወልታ ሊኽ ከውዲ ተሪትኖ ሲም ጃብድ ዶኵኑዅ።¹⁹ሲምኻ ኢታይ ጋታዊረስ ንሰና ይዅሉ፡ “ውራ መታን ይነዲ እንትርዅን፧ ወንተሪ እማ ሲም ኣቤሴሎምዲ ኣኺ፣ እንቲ ኵላውድ ኵብሪልድ አስትሮ እንትራኽር ጋሻይ ግን፣ ²⁰እንጀጚ እንትሮማ፡ ንኪ ይነዲ ኰለል ስየካ፡ ኣን ኣወት ፈረት ድኳ አርእሊ፡ እማ ወንተሪ፣ ኵሻንስኽር ወንተሲሎም፡ ብሕልተዲ እምንዲ ኵዲ ኣኺን” ይዅሉ።²¹ኢታይ ደአም ሲምሲ፡ “ዋነዅ ጃር ግን፡ ይአደራ ሲምኽር ዋነዅ ግን፣ ይአደራ ሲም ህምባ ኣካንሊ፡ ክረድ ወሪ ፊዅትድ፡ ኵኝጂና ኒል ዋኒሮ ግን” ይዅሉ።

²²ዳዊትኻ ኢታይቲ፡ “ፈሪ ጃቢትሮ ካሪ ” ይዅሉ። ኢታይ ጋታዊረዲ እን ኒዲድ እርገው ኒከው ናውክዲ ቆልዕዲኻ ካርኑዅ ²³ናውክ እክ ናደሀይሲ ክብሲነ ስሩኑ እርግኑዅ ናው ደኵኑ እⶖጕሲ፣ ሲምኻ ኒት ተለዩ እርገውዲ ወራባ ቄድሮንዱዅሲ ካርኑዅ፡ ናውክኽር ላት ኣኽኖ እው ከደንሊ ኣኽታሲክ መርሕኑዅ።²⁴ካዳ ጻዶቅዲ ኒድኻ ታቦት ሟእኰት ጃሩዅሲ ሙዅረው ሌዋውያንዲ ኒል እርግኑዅ፣ ታቢት ሟእኰቱዅሲኻ፡ ከው ናውክ ዕርዲረት ባሮ ፍራሲክ ኣብያታር ገቢል ገምድንዅላ። ²⁵ኒደምቢኻ ሲም ጻዶቅቲ፡ “እን ታቦት ጃሩዅሲ ዕርዲረትል አድሮ ወንተሪ፡ ጃር ጃብል ዓመል ኣረረን፡ ወንተስሮለ ግን፣ ኒዲ ኒመስከብዲትኻ ወንተሶ ቋሊስሮለ ግን፣ ²⁶እጝከለሊካ የንለኻ፡ እናሓን ኣን፡ ኒድ ትክዮ ኣኾ ቋልስታዅሲክሉ እሲሮለ” ይዅሉ።²⁷ኒሰናኽር ሲም ከዳ ጻዶቅስቲ ነሰና ይዅሉ፡ “እንቲ ነቢራማ እኽላ፧ ሰላምድ ዕርዲረትል ወንተሪ፡ ኵዅራ ኣሒማዓጽዲ ዮናታን ኣብያታርዅረዲ ለጘርክ እንታቊርኽር እንተዲ ፈሪኒን ²⁸ኣጝር፡ እን ንኝሽቃ ኣዶ እንተራዅ እንተልድ እንትራሲክለ፡ ኣን ሕዳር ኣውከደኑዅሊ ጨበሪያ ግን” ይዅሉ። ²⁹እንሲን ጻዶቅዲ ኣብያታርዲ፡ ታቦት ጃሩዅሲ ዮርሳሌምሊ ወንተስንዅሉ፡ ንርትልኻ ኣኽኑዅ።³⁰ዳዊት ጊራ ወኸሪዅሲ ዓረጉእⶖጕሲ ስሪዅ፣ ኒኣዀርሲ ኵቶኻ፡ ሻምፍፍ እጝገት ፈሩ እርጉዅ። እን ተለየውሉ ናውክኽር ዓረጉኑ፡ ናኣዀርሲ ኵትኖ ስሩኑ እርግኑዅ። ³¹ዳዊትኻ፡ ኣሒቶፌል እን ሸረውድ ነበክል ሕበርሰ ኣቤሴሎምዲ ህምባኵ፡ ይኑዅሉ። ዳዊትኻ፡ “ዎ ጃር! ኰድጛ ኣሒቶፌልዱዅሲ ዓወድናርሊ ለወቶሉ፡ ሺወኵንካ!” ዮ ጠለዩዅ።³²ኣኾኻ፡ ዳዊት እን ጃርሲ ኣምለክዳ ኣካንሊ ገእያ ወክት፡ ሑሳይ ኣርኪዅራ ኒሰርጝሲ ቀደዶ ቍሻኻ ኒኣዀርሊ ነስነሶ ከለብርዶሉ እንቱዅ። ³³ዳዊትኻ፡ “እንቲ ይት ተለይሮ ፈርደን፡ ደምቢራ ከብሲቶና ግን፣ ³⁴እንቲ ይትካቢቶለ ገርሰራዅ፡ እን ዕርዲረትል ወንተርዶ ኣቤሴሎምቲ፡ ኵእኽርቲ ኣገልገልደሰና ኵትር እምንሶ ኣገልገልድየካ ግን ይሮ ድውረንሉ ግን፣ ኒሰናኽር ኣሒቶፌል እዋዅሉ ኰድጘስ ናፍዓጋዅ እስረን ግን፣³⁵ከዳታት ጻዶቅዲ ኣብያታርድኽር ኒል ህምበናኵ፣ ልጝን ሕኩመቱዅሊ ወስረውሲ ናትክ ናድ ድዊሎም። ³⁶ናድኽር ናቍር ኣሕማዓጽዲ ዮናታንዲ አረርሰናኵ፣ እን ዋስደናዅ ህድግ ኒትክሲኻ ናድ ሀብዲነ እኝሻቕትኖለ ገረስደናዅ።” ³⁷ሑሳይ ዳዊትር እጝከለንታ ዕርዲረትል ትዉዅ፡ ኣቤሴሎምኽር ኒድ-ኒድ ዮርሳሌምሊ ገእዩዅ።

16¹ዳዊትኻ እን ጊራ ኣወይስልድ ግናዪ ዶኵ የሪት፣ እናሓን፡ ጺባ ገጂና መፊቢሸትሩዅ፡ ለጛ ሊኽ ሳንሰዓዲ፡ ሊኽ ንሽዋ ደቢቡዅዲ፡ ሊኽኻ ሕምባሸራ በልሱዅዲ፡ ላዅ ሃወት ሚድ-ዲ ጨዓንሰው ለጛ ድዃራ ሸኾ ከለብርዅሉ። ²ሲምኻ፡ “እና ነስ ናትክ ውራ መታን ናቕስርዅንሎም፧” ዮ ወጝቀርዅሉ።

ጺባኻ “ዎ ሲም! እን ድቋልሲ ኵአዳም ጨዓንስድኖለን፡ እን ሳንሰዓዲ በለስዲትኻ ሻሎት ቍድኖሎም፡ ሚድ ወይኒሩስኻ እን ኣው ከደንሊ ቂልሰው ጅእድኖሎም ዮ ግን” ይዅሉ።

³ሲምኻ፡ “ኵኣደራ ሶኦልሲ ኒዅረድ ዅራ መፊቦሼት ኣወት ህምበኵን፧” ዮ ወጝቐርዅሉ። ጺባኻ “ኒ፡ ንኪ ልጝን እስራኤልዱዅ ሕክም ይኽርዱዅሲ ወንተስድኖለ ግን፡ ዩዅ እማ፡ ዮርሳሌምሊ ከፍ ዮ ህምበኵ” ይዅሉ። ⁴ኒደምቢኻ፡ ሲም ጺበት “መፊቦሸትሩ ናውክ ኲድ ግናው” ይዅሉ። ጺባኻ “ዎ ይኣደራ ሲም፡ እናሓን ኣን ኵኣገልገልደንታ ግን፣ ዲማ ኵት ፈርሕዳዅ ክድመት ከደምያ መታን ተውህያ ግን!” ይዅሉ።⁵ሲም ዳዊት ባሑሪምትል እንተሪት፡ እናሓን፡ ሺምዓ ይስታዅ ግርዋ፡ ጌራዅራ፡ ኣሰል ሳኦልዱዅልድ፡ ንርትልድ ፊዅ። ኒ፡ እሹ ፊዅ። ⁶እን እክዲ ፋርሳንዲ፡ ሲምሲ ኒላውዲ ኒሸገብዲሳ ዋኑኑ፡ ኒ ዳዊትልኽር ናውክ ገኝሺን ሲም ዳዊትሩልኽር ክርጝድ ድሪን ዩ እርጉዅ።⁷ሺምዓ ንሰና ዮ ዳዊቲ እሹሉ እርጉዅ፡ “ፊ! ነትድ ፊ! እንቲ ብርዅ አዳም፡ እንቲ እኵይ አዳም፣ ⁸እንቲ ሳኦልዱዅ ሕክምሲ አድሮ ኒአዳም ናትክሲ ኵርዅሎም፣ እናሓን፡ ናን-ኻ ጃር ኵት ቀጽዓዅካ እⶖኵዅ፣ ጃር ኵሕክምሲ ኵዅእራ ኣቤሴሎምሲ ደኵሶ እውዅላ፡ እንቲ ርሕ ኵራኽር! እናሓን ኵድዳ ገእዩዅ።”⁹ኣቢሻይ ጽሩያዅራ-ኻ ሲምሲ፡ “እና ክራዅ ግድጝ ውራ መታን ግን ይአደራ ሲምሲ እሻዅንሉ፧ ኣን ፈሮ ኒኣዀርሲማ ቀረጭንሉ!” ይዅሉ።

¹⁰ሲም ደአም፡ “እንትን ጽሩያቍር እንተዲ ይዲት አረሪሳዅ ውራ ጋር ህምበኵን፧ ጃር ‘ዳዊቲ እሺሉ’ ዮሉ እሻዅለ ኣከን፣ ‘ኒስ ውራ መታን እስሪዅን ዮ’ ኣውኒ ወጝቀርዶሉ ገረሳዅን፧” ይዅሉ።¹¹ተለይዶኻ ዳዊት ኣብሻይዲ መርሓትዲት ነሰና ይዅሎም፣ “ይግርፍፈልድ ፈዅ ይዅራ ኲረለ ጀረባዅ እⶖኵዅ፡ እማ-ኻ እና ብንያማዊረድ ውራ መታን ፈከርስደናዅን፧ እማ በረሉ፡ ጃር ዮሉ ግን፡ እሺን፣ ¹²ኣዊ አርእዅን፡ ጃር እና ገሞለ ህምባዅ ዓመጭሲ ቋሎ፡ እና ንኪር እሸና ኣካንሊ ትክያዅ ገውራ ኡረለ።”¹³ዳዊትዲ ኒአዳምድኻ ደርብድ ፈሩኑ እርግኑዅ፡ ሽምዓኻ እና ቅብለትድ ህምባዅ ጊራ ሸልድ ፈሩ እሹዅር ክርጝዲ ብተዲ ማሉሎም እርጉዅ። ¹⁴ሲምዲ ኒት ተለዩ እርገውዲ ናውክ ወረባ ዮርድኖስሩዅሊ ገእይና ወክትሲ ቂልስኖ እርግንነዲን ኒል ፊዅኑዅ።¹⁵እን ወክት እንድሂሲ፡ ኣቤሴሎምዲ ከው እስራኤልዱ ናውክዲ ዮርሳሌምሊ እንትኑዅ፣ ኣሒቶፌልኻ፡ ኒዲ እርጉዅ። ¹⁶ኣኾኻ፡ ዳዊትር እጝከልሰና ሒሻይ ኣርኪሩዅ፡ ኣቤሴሎምትል እንቶ፣ “ዎ ሲም! ዲመድ ሰየምሲ፡ ዎ ሲም! ዲመድ ሰየምሲ” ይዅሉ።¹⁷ኣቤሴሎምኻ ሑሻይቲ፡ “እን ኵእጝከልሱረድ ህምባዅካ እምንስና ንትል ኣኽራሲክ መኒ፧ ውራ መታን ኵእጝከልሱረዲ ፈርድላ፧” ዮ ወጝቀርዅሉ። ¹⁸ሑሻይኻ ኣቤሴሎምቲ፡ “ኣዋህበ ኣን ኒስ እሳዅን፧ ኣን ኣኻ ወክትሊ እና እክዲ ናውክ እስራኤልዲሲ ኒሰናኽር ጃርድ ፍሪርሳዅ ኣዳምሲ ተለያኽር ግን፣ ናጝኻ ኵዲ ላት መንደርትያ ግን፣¹⁹እማ-ኻ፡ ኒዅረስ ኣገልገልደገን ኣውቲ ኣገልገልድያ ግን፧ ኵእኽርቲ ኣገልገልደሰና ኵትር ኣገልገልድያካ ግን።”²⁰ኣቤሴሎምኻ ኣሒቶፌልቲ፡ “እስከ ኵኰድጛስ እዊ፡ ውራ እስኒን፧” ይዅሉ። ²¹ኣሒቶፌልኻ ኣቤሴሎምቲ፡ “ልጝን ሕኲመቱዅሲ ተከውድኖ ባረውልን እኵን ኵዅርዱዲ ገኝጂ፣ ኒደምቢ እንቲ፡ ኵእኽርሲ ትክስረ እንጠርደት ንርውክ እስራኤል ዋስድኖ ግን እማ፡ እንሲን እን ኵዲ ላት ህምበውድ ናናንትት ተብሮ ግን” ይዅሉ።²²እማ፡ ኣቤሴሎምሲ ኒልጝን ዳግ ዳስ ከደምኑዅሉ፣ ኒልኻ ኣቤሴሎም ናውክ እስራኤልዱ ቋሉኑሉ፡ ኒኽርድ እኵንዲ ትዎ ገኝጁዅ። ²³እን ወክት እንድሂሲ፡ ኣሒቶፌል ኰድጚሱ እርገው ኰድጛ፡ ቆል ጃሩዅሰና ከለብርሱ እርጉዅ፣ ዳዊትኽር ኣኽን ኣቤሴልም ኰድጛ ኣሒቶፌልዱዅሲ ኣና ደርብድ ከለብሩኑሉ እርግኑዅ።

17¹ኣሒቶፌል ኣቤሴሎምቲ ንሰና ይዅሉ፡ “ሽካ ለጛ ስሕ ግርው ፍሪሮ፡ ንኪ ቂር ኵእኽርሲ ሳደድየሉ ኣጃ ይለ ኵዓይብ፣ ²ቂልሶ ሳዳ ቀበጮ ምልዮ ዋኑ እንቶ በኸኽድየሉ እማ፣ እን ኒዲ ህምበው ከው ባርኖሉ እግርድኖ፡ እንሲን ኣንኻ ሲምሲ ኒቱ ኣሮ ክውየሉ ግን፣ ³ሱርጕ ንርግርዊል ወንተርድረሪሰና ኒት ተለዩ እርገው ናውክ ኵል ወንተርኖ እንተረነሰና እስያ ግን፣ ደአም እንቲ ጀረብራዅ ላኣዳትምቲ ኵቶ ግን፡ እን ከብተው እክኻ ሰላም መንደርትድኖ ግን።” ⁴ኒኰድጛኻ ኣቤሴሎምዲ ናውክ መርሓት እስራኤልዱዲሲ ትክያዅ ኣኾ ቋልስትዅሎም።⁵ኣቤሴሎምኻ፡ “እስከ ናንኻ ሑሻይ ኣርኪሩዅሲ ሽጘሉ፣ ኒየውስ ዋስኖ” ይዅ። ⁶ሑሻይ እንተሰና ኣቤሴሎም፡ “ኣሒቶፌል እዋዅና ኰድጛ ኒን ግን እማ፡ ኒትማ ተለይኒን ወሪ ውራ እሲኖ ክምነት እንትኽር ድውራዅና ዋኒረካ፧” ዮ ወጝቀርዅሉ። ⁷ሑሻይኻ ኣቤሴሎምቲ፡ “እና ወክትኒሲ ኣሒቶፌልዱዅ ኰድጛ ትክያዅ ኣኽላ፣⁸ኵእኽር ዳዊት እን ኒዲ ህምበው ከውዲ ንርቍርሲ ባሪሰውላ ድቢሪሰና ናፊዅት መረረውሎም ኣኽነ እንቲ እንቲ አርእሩዅ። ኵእኽርኻ ሓርቡዅ ግርዋ ግን እማ፣ እን እክዲ ካላ፣ ⁹እናሓን ናን ድኳ ላጎቕሊ ወሪ ላኣካኒ ትብቶ ዋኒራ፣ ዳዊት ጃቢቶ ምልሰ ጠዓምበንኵም እማ ኵልድ ገለ ክረነን ኒስ ዋሰው ናውክ፣ ኒድ-ኒድ ኵዓስከር ለተቕስነ ሃቢነ ውሪስድኖ ግን፣ ¹⁰ኵእኽር አርእስታዅ ተሓረባዅ፣ እን ኒዲ ህምበውኻ ፈርሳን ኣከነት እስራኤል ንርውክ አርእረውድ፣ ኒለበካ ገመኒዅሰና ጒኢታጋዅ ግን ይስታዅ ዓስከራ ድኳ ጓቂሲ ታንትሮ ግን።¹¹ “እማ ኣን ኰድⶖሳዅካ ኒን ግን፡ ቊሻ ባሓራዅሰና በጀኽድኖ መታን፡ ናውክ እስራኤልዱ ዳንትልድ ብኤር-ሸባዕ ኣኽታሲክ ኵል እክብስድኖ፡ እንቲ ኵላውድር ሓርብሊ መርሕቶሎም ግን፣ ¹²ኒደምብኻ፡ ኒ፡ ትዋ ኣካን ኒትክሊ ቱኖ አርኖሉ ግን፣ በርድ ብሪል ገመሰና ግምኖሉ ግን፡ ኒኣኽን ኒት ተለየው ላኽ ድኳ ፊዅትድ ከብቲሮ ኣኽላ።¹³ላዕርዲረትል ትወንኻ፡ እንሲን እስራኤልዱቍር ገመትድ እን ዕርዲረት ላክርጛ ከብተጋሰና እስነ፡ እንር ዓጝቀይሊ ህምባዅ ዓጝቀርሊ ወተርኖ ቱስኖላ ግን።” ¹⁴እንሲን ኣቤሴሎምዲ ከው እስራኤልዱዲ ናውክ፡ “ኰድጛ ኣሒቶፌልዱዅልድ ሒሻይዱዅ ኰድጛ ኪዳዅ” ይኑዅ፣ ጃር ኣቤሴሎምሊ ድዳ ናቕስሮ መታን ትክያዅ ኰድጛ ኣሒቶፌልዱዅሲ ከለብርስጋሰና እሲዅ።¹⁵ኒደምብኻ ሑሻይ፡ እን ከዳታት ጻዶቅዲ ኣብያታርዲት ንሰና ይዅሎም፡ “ኣሒቶፌል ኣቤሴሎምዲ ከው እስራኤልዱዲት ንሰናዲ ንሰናዲ ዮ ኰድጚዅሎም፣ ኣንኻ ንዲ-ንዲ ዮ ኰድጚዅንሎም። ¹⁶እማ ናን፡ ሲምዲ እን ኒዲ ህምበው እክዲ ዋሓጥስግኒን፡ ሃብረዅስክ ሃብረ ካሪ ግራ እና ቂርድ እን ካሲሰጝ ከደⶖዅሊ ኪግ፡ ይኖ ድዊድኖሉ፡ እሽሽድኖ እኝሻቃሉ” ይዅሎም።¹⁷ዮንታንዲ ኣሒማዓጽዲኻ ዔን-ሮጌትል ደው ይኖ እርግኑዅ፣ ዕርዲረትል ቱኖ ቋልስትድኖ ገረስኒ እማ፡ ላዓጝቂ ገኝሺና ፈሮ ድዊቲሎም፡ ናውኻ ሲም ዳዊትል ፈርኖ ድዊኒዅሉ። ¹⁸ኣኾኻ ላሻሎታ ቋልዅሎም እማ ኣቤሴሎምድ ድዊዅሉ፣ ናው ደአም፡ ለጛረክ ኣሻሻዅድ ፈርኑዅ፣ ባሑሪምትልኻ ልጝን ላግርዊዅሊ ቱኑዅ፡ እን ግርዋ ኒልጝን ገቢል ኣባ እርግቲሉ፣ ንርትልኻ ቱኑዅ።¹⁹እን እዅናኻ፡ ኣዳም ቋልጊንሎም ኵሲሳና አድሮ እን ኣብር አብሲ ኒድ ኣበድቲሉ፡ ኒኣኾርልኻ ከትከትሰው ስክም አድሮ ወድቲ እማ፡ ላዅ ድኳ አርእስትኒ። ²⁰ከው ኣቤሴሎምሩኻ እን እዅነትል እንትኖ “ኣሒማዓጽዲ ዮናታንዲ ኣወት ህምበናኵን፧” ይኑዅላ። እን እዅናኻ፡ “ወረበስ ካርን ፈርኑዅ” ይቲሎም።²¹እን ጀረቡሎም እርገው ፈርነሰናኻ እን ኣበትልድ ፍኖ ፈርኑዅ፡ ሲም ዳዊትኻ “ኣሒቶፌል ኵል ንሰናዲ-ንሰናዲ ዮ ኰድጘ ህምባዅ እማ፡ እሽሻዅ ጒሮ ወረበስ ካሪ!” ይኑዅሉ። ²²እንሲን ዳዊትዲ እን ኒዲ እርገው እክዲ ናውክ ጒኖ ወራባ ዮርዳኖስሩዅሲ ካርኑዅ፣ ብራ ክሰሪት ካርጊ ከብተዅ ላአዳምር እርግላ።²³ኣሒቶፌል ኒ ኰድጘስ ተለይግነት ቋላ ወክት፣ ኒድዃረስ ጨዓኖ፡ ጐ ኒዕርዲረትል ኒልጝል ፈሩዅ። ኒልጝንሲ ጠፍሕደሪት ሸናቕሶ ክሩዅ፣ አርብ ኒኽርዱዅልኻ ደብስቲዅ።²⁴ኣቤሴሎምዲ ከው እስራኤልዱዲ ዮርዳኖስቲ ካርና ወክት፣ ዳዊት ማሓናይም ይስትሮ ሽጝስትረሪ ግናዪ ዕርዲረትል ገእዮ እርጉዅ፣ ²⁵ኣቤሴሎም ዮኣብሩዅ ኣካንሊ ዓማሳት ኒዓስከር ኣወይሲ ሰየምዅሉ፣ ዓማሳ ዪትራ ይስታዅ እስራኤላዊራዅራ ግርዋ እርጉዅ። ኒ፡ ኣቢጋል ናሓሽቍራ፡ ጽሩያሲ ኒሻኒ ዮአብር ገና፡ ቱሶላ እርጉዅ። ²⁶እስራኤልዲ ኣቤሶልምድኻ ጊልዓድ ብሪል ከፍ ይኑዅ።²⁷ኣኾኻ ዳዎት ማሓናይምትል ትዎሰና፣ ሾቢ ናሓሽዅራ ወራባ ዓሞንድቍሩዅልድ፡ ማኪር ዓሚኤልድዅራኻ ሎ-ድባርትልድ፡ ባርዚላይ ጊልዓዳዎራኻ ርግሎምትል፣ ²⁸ገኝጂሰን ወሸቕዲ፡ ጥሕሎታትዲ ጭቀድ ከደምሰው እራኵዲ ሸኽኖ እንትኑዅ፣ ኒሰናኽር ጀሩጒዲ ስክምዲ፡ ላቅዲ ሸዊት ተኰድሰውዲ፡ ባልደንጓዲ ብርስንዲ፣ ²⁹ሰኻረዲ ርግኦዲ፡ ልዊሩዅ ሰናዲ ቝድኖ፡ ዳዊዲ ኒእክዲሲ ናቕስንዅሎም፣ ኒስ ናእስናኻ፡ “እን እክ ኣው ከደንሊ ከኣርትኑዅ፡ ቂልስኑዅ፡ ስቛንትኑዅ” ይነድ

18¹ዳዊትኻ፡ እን ኒዲ እርገው እክሲ ሺብዅሎም እማ፡ ናአወይሲ ሓላቓ ስሑዲ ሓላቓ ሊዅዲ ሰየሙዅ። ²ዳዊትኻ እን እክሲ፡ ወልትረጝንሲ ናን ዮኣብሩዅሊ፡ እን ወልትረጝንስኻ ናን ኣቢሻይ ጽሩያዅራ ዮአብድ ዳንሊ፡ እን ወልትረጝንስኻ ናን ኢታይ ጊታዊረዲ ሃበ ፈስዅሎም። ሲም፡ “እጝር እምንድክ እንተዲ ላት ፍያ ግን” ይዅሎም።³እን ከውኻ፡ “እንቲ ይነዲ ፋግረን ኪዳዅ ውረድ፡ ይንጝ እግርኖ ቀሰብስነን፣ ናው ይና ሰበትድ ሓሰበኒ፡ ይና ገፍ ክረነጝር ሓሰበኒኒክ፡ እንቲ ደአም ይነልድ ሽካ ስሕድ ኪድራዅ እማ ዕርዲረትል ኣኽሮ እልልደና ኪዳዅ” ይኑዅሉ። ⁴ሲምኻ፡ “ትክያዅ ኣኾ ቋልስታዅሲኵኩም ኒትክ እስያ ግን” ይዅሎም። እማ፡ እን እክ ናውክ ሊኽዲ ስሕዲሲ ኣኺነክ ተሪትኖ ተረገሱኑ፡ ሲም ባብ ደንአቡዅሊ ደውዮ እርጉዅ።⁵ሲምኻ ዮአብዲ፡ ኣቢሻይዲ ኢታይዲት፡ “ይማታን ይድኖ ሻሎታ ኣቤሴሎምቲ ሃሽከብገሉ” ይዅሎም። ሲም ኒእዅራ ኣቤሴልምሲ ቋላዅድ ዓስከርሲ ኣደደውድ ትእዳድ እዉ ናውክ ዓስከር ዋስኑዅ።⁶እን እክኻ፡ እስራኤልቲ ታሓረብሮሉ ሕዳርሊ ፊዅ፡ እን ሓርብኻ ገርበት ኤፍሬምሩዅሊ ኣኺዅ። ⁷ኒልኻ እክ እስራኤልዱ ከው ዳዊትሩ ጃብሊ ለተቕስኑዅ፣ እን ግርጋ እንድሂስኻ ተባዅ ድዳ ኣኹዅ፡ ለጘረጝን ስሕ ኣከው ከውኻ ክርኑዅ። ⁸እን ሓርብኻ ንርውክ ብሪል ዳሕ ዩዅ፣ እን ግርጋ እንድሂሲ፡ እን ሰፍድ ድደውልድ እን ገርበት ዋሓጠውሎም በጀኻናዅ።⁹ኣቤሴሎም ከው ዳዊቱሲ ናጃብድ ጎፍ ይዅሎም፣ ኣቤሴሎምኻ በኽሊል ጨዓንሶ እርጉዅ፡ እን በኽላኻ ገርው ለጝክክ ሻዅ በሀር ድዋ ዓጝቀይ ቱቲ፣ ኒኣዀርኻ እን ድዋትል ሻኽስቱዅ እማ፡ ሰመዲ ብረዲር ነበክሊ ጠልጠልዩዅ፣ እን ኒሱቓይሲ እርግረሪ በኽላኻ ደኵቲ። ¹⁰ላግርዋ ቆሎሉ ዮአብቲ፣ “እናሓን፡ ኣቤሴሎም ላድዋትል ጠልጠልዮ ቋልዅንሉ፡” ዮ ድዊዅሉ። ¹¹ዮአብኻ እን ድወዅሲሉ፡ “ውራ ይራዅን! ቋልድዅሉ፧ እማ ውራመታን ጠዓምብሮ ብረዲ ተከንድለሉ፧ ሽካ ሲቃል ወርከትዲ ተሓረበው ደበልተናዅዲ እውሪድካ ሻዅ ግን” ይዅሉ።¹²እን ግርዋኻ ንሰና ይዅሉ፡ “ላስሕ ወርኰ ድኳ ይናንሊ እውረንለ፡ ይናንሲ ሲምዅራ ዳግሊ ገምደሊ፣ ሲም ኵዲ ኣቢሻይዲ፡ ኢታይዲት ‘ይድ ይዱኑ ሻሎታ ኣቤሴሎምሊ ክሪል ገእሳዅ እሲገሉ’ ዩ እዋዅኩም ትእዳድሲ ይን ናውክ ዋስንዅን፣ ¹³እማ ኣን ትእዳድ ሲሙዅሲ ደኰ ኣቤሴሎምቲ ኵዋዅሉ ኣከን፣ ሲም ኒትክ ዋሰዅሰና ኒስኽር ኒዋስና ከብተላ፡ እንትኽር ኣክረን ይት ደአንድቶ ገበበለለ።”¹⁴ዮአብኻ፡ “ደአም እና ነወያዅድ ኵዲ ይወክትሲ ድሂስያ ጀረበሊ” ይዅሉ እማ፡ ሰዃ እኝሽኽ ኒናንተል እርገውሲ ኣዶፈሮ ኣቤሴሎም ኒርሕድ ድዋትል ጠልጠልዮ ዋኑ፣ ለበካ ኣቤሴሎምሩዅሊ ቱስዅለን። ¹⁵ሽካ ሻሎት ዮአብሩ፡ ኣቤሴሎምቲ ክልውኑዅሉ እማ፣ ጠዓምኖ ኵኑዅሉ።¹⁶ዮአብኻ እን ሓርብ ደው ይሮ መታን መለኸት ጠዓምቡዅ፡ እንሲን እን ዓስከር እስራኤልቲ ሳደድኒልድ ወንተርኑዅ። ¹⁷ኣቤሴሎምትኻ፡ አድኖ እን ገርበትሊ ኣረርሳዅ ጎቝሊ ማልኑዅሉ፣ ኒዳግልኻ ገሪው ክርጝ ኰመርኑ። እና ወክት ኒስኻ፡ እስራኤል ላዅክ ኒልጝንሊ እግሩዅ።¹⁸ኣቤሴሎም ኒሱⶖሲ ሽጚሳዅ ቍራ እዅራ እርግለሉ፡ እማ ኒርሕድ ዋኑ “ዓጝቀር ሲሙዅ” ይስቶ ሽጝስታዅሊ ኒሹሺ ሓወልቲ ከደሞ እርጉዅ፣ ኒሹር ሱⶖድ ሽጞሉ እርግነዲን ንኪ ኣኽታሲክ “ኣቤሴሎምሩዅ ሓወልቲ” ይስቱ ሽጝስታዅ።¹⁹እን ወክት እንድሂሲ ጻዶቅዅራ ኣሒማዓጽ፡ “ጃር ኒኣፋይትል ደአንደትሉ፡ እና ብሽራትሲ ድወይሉ ሲምሊማ ጋጝይን” ይዅሉ።

“” ‘’

²⁰ዮአብኻ፡ “ኣከላ፡ ንኪ እንቲ ኣኽላ ኪሰሪር ብሽራትሲ አድሮ ፈርዳኽር፣ ሲምዅራ ክርነዲን፡ ንኪ ኣኽጊ፣ ኪሰሪር ብሽራሲ ደበር ኳራ ገእሲተሉ” ይዅሉ።²¹ኒድ ደምቢ ዮአብ ኩሻት፡ “ፈሪ እማ፡ እን ቋልዳዅሲ ሲምድ ድዊሉ” ይዅሉ፣ ኩሻኻ ዮአብድ ፍግ ዮ ጋⶖ ፈሩዅ።

²²ኣሒማዓጽ ጻዶቅዅራ ወንተሶ ዮአብቲ፡ “ኵዓይብ፡ ኣኻዅክ ኣኺን እን ኩሻዊራ ጉር-ጉርበት ጋጝያ” ይዅሉ። ዮአብኻ፡ “ዎ ይዅራ! ውራመታን ኒስ እሲቶ ጀረብዲዅንካ፧ ኒስ ኵእስነድ ላዅ ድኳ ብልጫ/ሽልማት ኡሮካ ኣኽላ” ይዅሉ።

²³ኣሒማዓጽኻ፡ “ኣንታዅክ እንትን፣ ፈርያ ጀረባዅን” ይዅሉ። ዮአብኻ፡ “ደአም ይሮ ደምቢ፡ ጋጚ!” ይዅሉ፣ ኒልድኻ ኣሒማዓጽ ደርብ ሕዳሩዅድ ጋጞ እን ኩሻዊረስ በደሮሉ/ጃቢቶሉ ፈሩዅ።²⁴ዳዊት ደአም፡ እን ለጛ መራብ ነብክሊ ከውፍ ዮ እርጉዅ፣ እን ተከዋዅኻ ለጝን ዳግሊ ኣኾ ከደን ኣኽታሲክ መርኪሱ ላአዳም ኒቱ ጋⶖዅሲ ቋሉዅ። ²⁵እን ተከዋዅኻ ሲምሲ ሽጞ፡ ኒቋላዅሲ ሲምድ ድዊዅሉ፣ ሲምኻ፡ “ኒቱ ኣኾ ደምቢ ኪሲሪር ብሽራት ሸኾ እንታዅ ኣኽሮ ሻዅ” ዩዅ፣ እን ጋⶖ እርጋዅኻ ናል ሱኵሩ እንቱዅ።²⁶ኒደምብኽር ተከወንታ አሪዅ ኣዳም ጋጛዅሲ ቋሎ፡ እን ዋርድየትሲ ሽጞ፣ “እናሓን ኣሪዅ ኣዳም ኒቱ ጋⶖ እንተራዅ እⶖኵዅ!” ይዅሉ። ሲምኻ “ኒጝር ኪሰሪር ብሽራት ሸኾ እንተራዅ ኣኽሮ ገረሳዅ” ዩዅ።

²⁷እን ተከዋዅኻ፣ “እን ሰልፉዅ ኣዳም ኒጋጝይና ኣሒማዓጽ ጻዶቅዅሪዅሰና ተካዅ” ዩዅ፣ ሲምኻ “ንኽር ትክያዅ ኣዳም ግን፣ ኪሰሪር ብሽራ ሻኽጊ እንተረላ” ዩዅ።²⁸ኣሒማዓጽኻ ኒደሀይሲ ክብሰ፡ “ኒውክ ጋር ተመሙዅ” ዩዅ፣ እማ ብሪል ኒብሶትድ ክብሮ ሲምድ ፍግም ዩዅ፣ “ይአደራ ሲምሊ ናናትሲ ጉደው ከውሲ ዶኵሶ እዋዅ አደራ ጃር ሓመድሳዅ ኣኺን!” ዩዅ። ²⁹ሲምኻ “ሻሎታ ኣቤሴሎም ዳሕነመኒ፧” ዮ ወጝቅርዅሉ፣ ኣሒማዓጽኻ “ኵኣገልገልደንታ ዮአብ ይት ኵገጂነስ እኝሻቕሮ ዩ፣ በሀር ሁከት ቋልዅን፣ ውራ ኣከት ደአም አርእሊ” ይዅሉ። ³⁰ሲምኻ፡ “ደኵ ይሮ ደውዪ”ይዅሉ። ንኽር ደኵ ዮ ደውዩዅ።³¹ኒደምኻ ኩሻዊራ እንቱዅ እማ፡ “ዎ ይአደራ ሲም! ኪሰሪር ብሽራት! ንኪ ጃር ኵል ጐው ኣፋይቲ ናተከልድ ደአንድዅካ” ይዅሉ። ³²ሲምኻ እን ኩሽዊረስ፡ “ሻሎታ ኣቤሴሎም ዳሕነመኒ፧” ዩ ወጝቀርዅሉ። ኩሻዊራኻ “ዎ ይአደራ! ኒል ገእያዅ ኵኣፋይትዲ ኵል ዕምጭድ ጐውዲትል ናትከል ገእይን” ይዅሉ።

³³ሲምኻ ኣቕትራሲክሉ ሓዘኑዅ/ጓሀዩዅ፣ እን ባብ ኣወሲ ህምብረሪ ልጝኒትል ተረገሶ ስሪዅ፣ ፈሩኻ፡ “ዎ ዩዅራ ኣቤሴሎም! ይእዅራ ኣቤሴሎም! ኵኣካንሊ ኣን ክራኽር ኣከን! ዎ ኣቤሴሎም፣ ዩእዅራ፣ ዎ ይእዅራ!” ዩ እርጉዅ።

19¹ዮብትኻ፡ “ሲምዳዊት ኒእዅራ ኣቤሴሎም ሰበትድ ስራዅር ጓሃያዅር እⶖኩዅ” ይኖ ድዊኒዅሉ። ²እን ሲም “ኒእዅራ ሰበትድ ሓዘነት፡” እን እክ እን ግርጋ እንድሂሲ ዋስኖ እርጉኑዅ እማ፣ እን ግርጋ እንድሂሩዅ ዓውተ ናውክ እን እክሊ ሓዘንሊ ለወትሱዅ።³እማ፡ እን ሓርብልድ ደምቢራ ወንተርኖ እግረውሰና፣ ናደሀይሲ ድሂስኖ ዕርዲረትል ቱኑዅ። ⁴ሲምኻ ኒገሺ ኵቶ፡ “ዎ ይእዅራ! ይእዅራ ኣቤሴሎም! ኣቤሴሎም ይእዅራ!” ዩ ኒደሀይሲ ክብሰ ስሩ እርጉዅ።⁵ኒድ ደምቢ ዮኣብ ልጝን ሲሙዅሊ ትዎ፣ “ኵዲ ኵቍራቝርዲ ኵእኝቃቕዲ፡ ኵእኲንዲ፡ ኵእኩን ሸሉዲር ርሕሲ ከብሰው ከውሲ ናትክሲ ንኪ ስማስርዅሎም። ⁶እን እንጠረውሲካ እጝከልዳዅ፣ እን እጝከለውሲከኻ እንጠርዳዅ፡ ኲዓስከርሲ ኣደዳውዲ ኒደሽዲ ኵድ ላሪ ኣኽግነት እናሓን ንኪ ዋድሕ እስሪዅሉ፣ ንኪ ኣቤሴሎም ፊዅትድ ዋነን ይንኻ ናውክ ድⶖስናኽር ኣክነን ገሪዅድክ ፈርሕረት ንኪ ቋሎ ህምበኲን፣⁷ናንኻ፡ ጕ እማ ፊ፣ ለፈክ ኵዓስከሩሲ ተብዲ፣ ኒስ እሰግረን ደአም፡ ኣመሪ ክሰራ ናልድ ላዅድኳ ክዲ ኣከገት ጃር ሱⶖድ ሸራኵን፣ ኒንኻ፡ ኵርሕሊ ገእያዅ ጅርበትልድ ገሪዅድክ ጂባዅ ኣኽሮካ ግን” ይዅሉ። ⁸እንሲን ሲም ጐ ደንአብሊ ከፍ ዩዅ፣ እናሓን ሲም ደንአብሊ ከፍ ዮ ህምባዅ ይኖ ናትክ እን እክሲ ድዊኒዅሎም። ናውክ እን እክኻ ሲም ጃብል እንትኑዅ፣ እስራኤል ደአም፡ ላዅክ ኒልጝንሊ እግሮ እርጉዅ።⁹ ናውክ ፈራዕ እስራኤልዱ፡ ከው ንሰና ዩኑ ናሹር-ናሹ ተካትዑኑ እርግኑዅ፡ “ሲም ይና ኣፋይቲ ናንትተልድ ፍድዅና፡ ፍልስጢሙ ናንትተልድኽር ደአንዳዅና ኒ ግን፣ ናን ደአም፡ ኣቤሴሎም ሰበትድ ብረስ ባሮ እግሮ ፈሩዅ፣ ¹⁰ይና ኣወይሲ ኣኾ መለክሮና ቀብእናዅ ኣቤሴሎምኽር ሓርብሊ ክሩዅ፣ ደአም፡ ሲሙዅ ወንተርና ሰበትድ ውሪዅ ትም ይደናዅን፧”¹¹ሲም ዳዊት ካዳታት፡ ጻዶቅዲ ኣብያታርዲትል ንሰና ዮ ንሽቃ እኝሻቁዅ፡ “በህሊል ይሁደሩሲ ንሰና ይድኖ ጋበሎም፡ ‘ጋብ ናውክ እስራኤልዱ ሲምሊ ልጝንሊ እንቶ ዋኑ፡ ውራ መታን ግን፡ እንትን ሲምሲ ኒልጝንሊ ወንተስትኖ ደጎቢው እኽድኑዅ፧ ¹²እንትን ይሻን ግን፡ ይናሽዲ ይስኻዲ፣ ውራመታን ሲምሲ ወንተስኒል ደንጎቢው ኣኽድኑዅን፧’¹³ዓምሳውትኽር ንሰና የሉ፡ ‘እንትኻ፡ ይናሽዲ ይስኻዲማ እኽላ፧ ንኪትልድ ተርስረ፡ እንቲ ዮኣብ ኣካንሊ ዲመሲ ይጃብል መርሓይ ዓስከሩዅ ኣከግረን፡ ጃር ንሰና እሲን ይት!’ ይድኖ ድወሉ ይዅሎም።” ¹⁴ንኽር ይሁደር ከውሲ ናለበከስ ላዅ አዳሙዅ ለበካሰና እሰ ኒል ወንተስዅሎም፣ ናውኻ “ኵዲ ኵአዳምቲ ወንተራ” ይኖ እኝሻቕንዅሉ።

¹⁵እንሲን ሲምወንተሮ ዮርዳኖስትል እንቱዅ፣ ከው ይሁደሩኻ ፈርኖ ሲምሲ ከለብርኖ ወረባ ዮርዳኖስሩዅሲ ካሲስድኖሉ፡ ጊልጋልትል እንትኑዅ።¹⁶ሺምዒ፡ ጌራ ብንያማዊራ ባሔሪምዱዅድ እዅራኻ፡ ከው ይሁደሩዲ ኣኾ ሲም ዳዊቲ ከለብርዶ ኣሸሻዅድ ገሙዅ። ¹⁷ብንያምሩልድኻ፡ ላስሕ ግርው ኒዲ እርግኑዅ፣ ጺባ ገጂና ሳኦልዱዅኻ፡ ሽካ ኣⶖኳ ኒቍርዲ ለጘረጝን ኒገኝሺንዲ ኒዲ እርግኑዅ እማ፡ ሲም ጃብል ዮርዳኖስቲ ካርኑዅ። ¹⁸ናውኻ፡ ሲምዲ እን ኒት ተለዮ እርገው ከውዲት ባኽረትድ ካርጝሊ ክልውኖሎም ካስድኖኽር፡ ሲም ጀረባዅ ኒትክ እሲድኖኽር ወረባ ዮርዳኖስሩዅሲ ካርኑዅ። ሲም ወረባ ዮርዳኖስሩዅሲ ካርዶ ዩ፡ ሺምዒ ጌራዅራ እንቶ ኒጃብል ለቦ ንሰና ዩዅ፣¹⁹“ዎ ሲም! ዮርሳሌምልድ ፈሮ ፈርዳ ግርገድ እሰዅ ዓገብሲ ኵዓይብ ብሕል ይለ፣ ኵሙዅልድር ፍዲሉ። ²⁰ኣን ኵኣገልገልደንታ ሓራም እሰት አርእዅን፡ ንኪ ደአም ይአደራ ሲምሲ ከለብርያ ልጝን ዮሴፍሩዅ ኒልክልድ ሰልፉዅ ኣኾ እንቶ ህምበኵን።”²¹ኣቢሻይ ጽሩይዅራኻ፡ “ሺምዒ ቕቡእ ጃሩዅሲ እሺዅ እማ፡ እና ንድ ክርዶማ ኣስተሀላለሉ፧” ዩዅ። ²²ዳዊትኻ፡ “እንትን ጽሩያቍር፡ እንተዲ ይዲት ውራ አረሪሳዅ ጋር ህምበዅንና፧ ንኪ ኣፋይቲ ኣኽድኒዅለ! ኣኻዅክ ኣኺን፡ ንኪማ እስራኤልትል አዳም ክራዅን፧ ኣን እስራኤልትል ሲም ኣከት አርኣ ግርጋማ ኣኽላ፧” ዩዅሎም። ²³ሲምኻ ሺምዒት “ክረላኒክ” ይዅሉ። ኒስኻ፡ ሲም ሸርነድ ተብድዅሉ።²⁴ሳኦልዱዅራ መፊቦሸትኽር ሲምሲ ከለብርዶ ገሙዅ፣ ሲም ዮርሳሌምልድ እግረንትልድ ወንተርዳሲክ ኒሉኵሲ ተጋባኣዅሰና ተንከባከብለላ፣ ኒሸከምስኽር ሊሽላ፡ ኒሰናኽር፣ ኒሰረጝሲ እጝቃስጊ እርጉዅ። ²⁵ሲምሲ ከለብርዶ ዮርሳሌምሊ እንቶሰና፡ ሲም፡ “እንቲ መፊቦሸት፣ ውራመታን ይዲ ፈርድላ፧” ዩዅሉ።²⁶መፊቦሸትኻ ንሰና ይዅሉ፡ “ዎ ሲም! እንቲ አርእራዅሰና፡ ኣን ሙጕዱር ግን፣ ኵዲ ፈርያ ጀረበ ይገጂነስ ‘ይበኽሊል ጨዓኒለ’ ይዅንሉ፣ ደአም ኒ፡ ከሓዶለ ፈሩዅ፣ ²⁷ይአደራ ሲም ጃብልኻ ሱⶖ ኵገጂኒዅሲ ጂብዱዅ፣ እማ፡ ይአደራ ሲም መልኣክ ጃሩዅሰና ኣኸውድ፡ ትክያዅ ኣኾ ቋልስታዅሲክካ ኒትክ እሲ። ²⁸ይእኽርድ ልጝን ናውክ ይአደራ ሲምልድ ክራ ግራ አሪዅ ወጀባዅሉ እርግላ፣ እንቲ ደአም፡ ኵገጂነስ መኣዲራ ኵዅሲ በንሰውዲ ከፍሲሪዅ፣ ኒድ ኣወይሲ እሲንለ ዮ ሲምሲ ወጝቀርየሉ ውራ መሰል ሻዅን፧”²⁹ሲምኻ፡ “ኒድ ኣወይሲ ገሪው ጋቢቶ ጀረብደለካ፣ ኲዲ ጺባዲ ሶኦልዱዅ ኪድጝሲ በንስጚትኖ ኰድጘ ህምበኵን” ይዅሉ።

³⁰መፊቦሸትኻ፡ “ይአደራ ሲም ዋዲክ ሰላምድ ወንተረትለ ግራ፣ ኒ፡ ኒትክስኽር አድንሉ” ይዅሉ።³¹ባርዚ፡እን ጊልዓዊራኻ ሮግሊምትልድ ገሞ፣ ዮርዳኖስር ካርጝሊ ኣኽታሲክ ስብድሮሉ ዮ፡ ሲምዲ ወረባ ዮርዳኖስሩዅሲ ካሩዅ። ³²እን ወክት እንድሂሲ፡ ባርዚል ሰዀትረጝን አመሪዅ ሽማግለራ እርጉዅ፣ ኒ፡ ገሪዅድክ ርዱቅ እርግነዲን፡ ሲምቲ መሓናይምትል ዋኑ ነብራ ስኵሱሉ እርጉዅ። ³³ሲምኻ ባርዚላይቲ፡ “እንቲ ይዲ ካሪ እማ፣ ዮርሳሌምሊ ይዲ ቍስየካ ግን” ይዅሉ።³⁴ባርዚላይኻ ሲምቲ ንሰና ይዅሉ፡ “ዎ ሲም! ናንዲ ደምቢ ገሪ ኣመታት መንደርተሊ እማ፣ ኵዲ ዮርሳሌምሊ ፈርድያ ውሪዅ ጀረብዲዅንለ፧ ³⁵ኣን ንኪ ሰዀትረጝን ኣመሪዅራ ግን፣ እማ-ኻ፡ ትክያዅዲ በዳንዲትማ ሲድያ ገረሳዅን፧ ናንዲ ደምቢ፣ ኵኣገልገልደንታ ቝስታኽዲ ጅእስታዅዲት፡ ውራ ታመትማ ሲድሮ ገረሳኽን፧ ሓለየው ቍራቍርዲ እጝቃቕዲትማ ንጝር ናድሀይሲ ዋስያ ገረሳዅን፧ እማ፡ ኵኣገልገልደንታ ይአደራ ሲምድ ውሪዅ ኰሳ መዅር ኣካዅን፧ ³⁶ኵኣገልገልደንታ ወረባ ዮርዳኖስሩዅሲ ካሮ ሲምዲ ከለላዅ ደርብ ፈርዶ ግን፣ ኣኽን ግራ፡ ሲም እና ነወያዅድ ውረታ ዋንሳዅለ ውሪዅ ግን፧³⁷ይሹር ዕርዲረትል፡ ይኽርዱዅዲ ይገነሩዅዲር ኣርፍፍ ገቢል ደምስትያ፣ ኵኣገልገልደንተስ ስምብዲሉ እማ ወንተርን፣ ኵኣገልገልደንታ ኪምሃምኻ እናሓን፡ ይአደራ ሲምዲ ካርን፣ እጝከልዳዅስኻ ኒድ እሲሉ።”³⁸ሲምኻ፡ “ኪምሃም ይዲ ካርዶ ግን፣ ኵት ፈርሕዳዅሲካ ኒትክስኽር እስየሉ ግን፣ ኵድኽር ይልድ ጀረብዳዅሲካ ኒትክ እስየልካ ግን” ይዅሉ። ³⁹ኒድ ደምብኻ፡ ሲምዲ ኒት ተለየውዲ ናውክ ወረባ ዮርዳኖስሩዅሲ ካርኑዅ፣ ዳዊትኻ፡ ባርዚላይቲ ሰለምዅሉ እማ፡ገውርዅሉ፣ ባርዚላይኻ ወንተሮ ኒልጝል ፈሩዅ።⁴⁰ሲም ጊልጋትል ካሩዅ፡ ኪምሃምኽር ኒዲ ካሩዅ፣ ናውክ እክ ይሁደሩዲ ገፍ እክ እስራኤልዱዲ ኣኽኖኻ ሲምቲ ካስንዅሉ። ⁴¹ኒደምብኻ፡ እክ እስራኤልዱ ሲምሊ ስኵርኖ “እና ይናሻን ይሁደሩ ሲምቲ ትብታንድ ናቱ ሻኽኖ ኒዲ ኒኣዳምዲ፡ ኒት ተለዩ እርገውዲት ውሪዅ ወረባ ዮርዳኖስሩዅሲ ካስንዅን፧” ይኑዅሉ።⁴²ከው ይሁደሩኻ እስራኤልቲ፡ “ኒስ ይን እስነዅ ሲም ይነት ሱኵራዅ ኣኽነዲን ግን፣ እማ-ኻ፡ ኒን እንተት ቀጠብዳዅማ-ኒ፧ ይን ሲምልድ ከለብርኖ ቍኖማ፧ ይናሹሽኻ ውራ አድናዅ ሻኽንዅን፧” ይኑዅሎም። ⁴³ከው እስራኤልዱኻ፡ “ይን ድኳ ሲምልድ ሽከር-ናን ገእያዅን ሻኽንዅን፣ ኒልድ ኪዳዅ-ዃ ዳዊትልድ እንተልድ ኣወይሲ መሰል ሻኽኑዅን፣ እማ፡ ይነት ቃበብድናዅ ውሪ መታን ግን፧ ይናሲም ወንተርዶ ሰልፍድ ወጝቀረው ይን-ማ ኣኽኒ፧” ይኑዅሎም። ደአም፡ ከው ይሁደሩ ኡናዅ ውንትሳ፣ እክ እስራኤልዱ ኡናዅ ውንትሲልድ ተባዅ

20¹ኒልኻ ላዅ ቢልያልዱዅ፡ ሸባዕ ይስታዅ ቢክሪርዱዅራ፣ ብንያማዊራ ግርዋ እርጉዅ። ንኻ፡ ይን ዳዊትል በና ሻኽኒ፣ እሴይዅሪልኻ መራስ ሻኽኒ እማ፣ ዎ እክ እስራኤልዱ፡ ላዅክ ኒልጝንሊ ወንተርን ዮ መለከት ጠዓምቡዅ። ²ናውክ እክ እስራኤልዱኻ ዳዊቲ ተለይኒልድ ወንተርኖ፡ ሸባዕ ቢክሪርዱዅረስ ተለይኑዅ፣ እን ከው ይሁደሩኻ ናሲምሊ ተከኖ ወረባ ዮርዳኖስሩዅልድ ዮርሳሌምትል ኣኽታሲክ ተለይኑዅሉ።³ዳዊትኻ፡ ዮርሳሌምሊ ኒልጝን ሕክሙዅሊ እንቱዅ፣ እንሲን ሲም እን ኒልጝን ሕክሙዅሲ ተከውድኖ ባሮለን እርገው ሽካ እኲን ኒሸሉሲ አድዅለን፣ ተከውስድኖኻ፡ ልጝንሊ እሰ፡ ቝሱለን እርጉዅ ግራ፣ ናል ቱላ። ናውኻ መፍልታን ኣኽኖ፡ ክርድናሲክ ኣበድስኖ እርግኑዅ።⁴ሲምኻ፡ ዓማሳት “ከው ይሁደሩ ናትክሲ እና ሰዃ ኳሪል፡ ይል እንትድኖ ሽጚሎም፣ እንቲኽር ናዲ እንቲ” ይዅሉ። ⁵እንሲን ዓማሳ ከው ይሁደሩሲ ሽጝሮ ፈሩዅ፣ ኣኽን ግራ ሲም ኣደዳዅሉ ግርጋት ኣወይሲ ግጁዅ።⁶እንሲን ዳዊት ኣቢሻይቲ “ናን ሸባዕ ቢክሪርዱዅራ ኣቤሴሎምትልድ ጂብሮና ግን፣ ትብቲሰን ዕርዲታት እርጊን እማ፡ ይና ዕልድ ሹልቝርጊን፡ እንቲ ዓስከር ኵአደሪውሲ ኣዲ እማ ሳደዲሉ” ይዅሉ። ⁷እንሲን ከው ዮአብሩዲ፡ ክረታውያንዲ ጵለታውያንዲ፡ ናውክ ፋርሳንዲ ኒጉርጒርበት ተለይኑዅ፡ ሸባዕ ቢክሪርዱዅረስ ሳደድኖኻ ዮርሳሌምልድ ፍኑዅ።⁸እን ጊብዖንትል ህምብዅ በሀር ክርጚል ገእይነሰናኻ፡ ዓማሳ አርዅሎም፣ ዮአብኻ፡ ዓስከሩዅ ኒሰረነስ ሰሮ ኒኣወይስኻ ሰፍ ኒመስከብዲ ኒየውሊ ደበልቶ እርግዅ፣ ኒገሽ ጃብራ ፈረሰንኻ፡ እን ሰፍ ኒምስከብልድ ፌ ለቡዅ።⁹ዮአብኻ ዓማሳት፡ “ዎ ይዳን፣ ውራ ህምብራዅን፧ ይዅሉ፣ ኒደምብኻ ዓማሳት ሰለማዅሉ ተከ ኒልው ናንድ ኒሸከምሲ ሻዅሉ። ¹⁰ዓማሳኻ ናን ዮአብሩዅሊ ሰፍ እርገት ለበካ ግምድላ እማ፡ ጠንቐቕስላ፣ እማ ዮአብ፡ እን ሰፍሲ ኒጐድጕል ሸከትዅል፣ ኒጅልልኻ ብሪል ቡቍቲዅ፡ ሊጘር ወክት ሰብግሉኻ ክሩዅ፣ ዮአብዲ ኣቢሻይ ኒዳንድኻ ሸባዕ ቢክሪርዱዅረስ ሳደድኑዅሉ።¹¹ግናደት ዓማሳሩዅ ገቢል ደውየው ላዅ ከው ዮአብሩልድ፡ “ዮአቲ እጝከላዅ፡ ዳዊትሩዅ ኣኻዅ ኒውክ ዮአብቲ የለይን!” ዩዅ። ¹²እን ወክት እንድድ ግናደት ዓማሳይሩዅ ብርድ መጝከልሶ ደርብ ነበክሊ ለቦ እርጉዅ፣ እን ኒድ ደከው ዓስከር ናውክ ናደው ይነስ እና ግርዋ ቋሉዅ፡ እን ግናደትሊ ገእያዅክ ዓስከራ ደውይነት ፋሃማ ወክት፣ ግናደት ዓማሳይሩዅሲ ደርብልድ ሸሊሶ ታዊንድ ኵስዅሉ። ¹³ግናደት ዓማሳሩዅ ደርብልድ ጌሰና፡ ናውክ እን ከው ዮአብቲ ተለይኖ ሸባዕ ቢክሪርዅረስ ሳደድድኖ ፈርኑዅ።¹⁴ንኻ፡ ናውክ ፈራዕ እስራኤልድዉዅድ እሰ ኣቤልዲ ለጝ-ማዓካንዱዅዲሲ፡ ናውክ በርያውያንዱውዅድ ደኵኑዅ፣ ናውኻ እክብስኖ ኒጉርጒርበት ፈርኑዅ። ¹⁵እንትኖኻ ኣቤል ልጝን-ማዓካሩዅሊ ክልውኑዅሉ፣ እን ዕርዲረትኻ እን ንር ሐጠትዲ ድውያዅ ካሲሰና ገበርኑዅ፡ እን ዮአብዲ እርገው ናውክ ከውኻ እን ሐጠትሲ ለብድድኖሉ ሃገግድኑሉ እርግኑዅ። ¹⁶እንሲን፣ ላሪ ኣስተብህልድረሪ እዅና፡ “ዋሳ! ዋሳ! እንታ ዓይብ ዮአብቲ ድዋዅሉ ጋር ዋነውድለ ናራ ሱክርዶ ድወል” ይቲሎም።¹⁷ዮአብኻ ንርትል ሱኵርዅ፣ ንርኻ፡ “ዮአብ ይስትርራኽር እንቲማ፧” ይሩ ወጝቀርቲሉ፣ ንኻ፡ “የዋ ኣንግን” ይዅላ፣ ንርኻ፡ “ይአደራ፡ እስከ ዋሲለ” ይቲሉ፣ ንኻ፡ “እናሓን ዋሳዅንኪ እⶖኵዅን” ይዅላ።

¹⁸ኒልድ ኰድሮ ንሰና ይቲሉ፡ “እን እማኒው ከው፡ ‘ኰድጘስ ኣቤልትልድ ወጝቀራ’ ዩኑ እርግኑዅ፣ እማ፡ ናው ይናዅሰናኻ ኣዅ እርጉዅ፣ ¹⁹ይን እስራኤልትል ሳላሙዲ እምንዱዲ ግን፣ እንቲ ደአም እስራኤልትል ገና ኣኽርደሪ ዕርዲረት ሃገግድቶ ጀረብራዅ እⶖኵረዅ፣ ውራመታን ግን እና ርስቲ ጃርትሪ ኣኽርደሪ ዕርዲረት ሃገግድቶላ ጀረብራዅን፧”²⁰ዮአብኻ ንሰና ይዅላ፡ “እን ድሂስነዲ ሃገግድነዲ ሺሽድኑ! ሺሽድኑ ይልድ!” ²¹እን ጋር ኒሰና ኣኽላ፡ ሸባዕ ይስታዅ ግርዋ፡ ቢክሪርዅራ ጊራ ኤፍሬምሩዅልድ፡ ሲም ዳዊትል ኒናንሲ ጉዱዅ እማ፣ ኒት ካያ እወለ ግራ፡ እና ዕርዲረትልድ ፈርድየልኩም ግን” ይዅላ። እን እዅናኻ፡ “እን ግርዊዅ ኣዀርሲ ሐጠትድ ማልኖልካ ግን” ይቲሉ። ²²እንሲን እዅና ኣምር እንታኽታዅ ንር ኰድጘስ አድሮ ናውክ እክሊ እንትቲ፣ ኣዀር ሸባዕ ቢክሪርዱዅረስ ነተፍኖኻ ዮአብድ ማልንዅሉ፣ ኒኻ መለክት ጠዓምቡዅ እማ፡ ላዅክ እን ዕርዲረትልድ ኒልጝንሊ ዳሕዩዅ/ፈሩዅ፣ ዮአብኻ ሲምሊ ዮርሳሌምትል ወንተሩዅ።²³ዮአብኻ ሓለቃ ናድካ ዓስከር እስራኤልድዉዅ እርጉዅ፣ በናያ የሆያዳዅራኻ ሓለቃ ክረታውያንዱዅዲ ጵለታውይንዱዅዲ እርጉዅ። ²⁴ኣዶራም ካየድ ከደመው ዳግሊ ሰይምሶ እርጉዅ፣ ዮሳፋጥኻ ህድግ ከተበንታ እርጉዅ። ²⁵ሸያ ልጝን ሕክሙዅዱዅ ከተበንታ ኣዅ፣ ጻዶቅዲ ኣብያታርዲኻ ከዳታት እርግኑዅ። ²⁶ኒሰናኽር ዒራ ያኢራዊራ፡ ዳዊትር ከዳታተልድ ላዅ እርጉዅ።

21¹ዳዊትር ወክትድ ሰዃ ኣመራ ጉርጉርበትድ ትግር ኣኺዅ፣ እማ ዳዊት ጃርሲ ወጝቀሩዅ፡ ጃርኻ “ኒን ሳኦልድ ሰበትድር፡ እን ብር ሻኽረሪ ኒልጝን ሰበትድር ግን፡ ጊብዖንዱሲ ኲውነዲንሎም ግን” ይዅሉ።²እንሲን ሲም ጊብዖንዱሲ ሽጘ ጋቢዅሎም፣ ጊብዖንዱ ኣሞራውያንልድ ከብተው ግራ፡ እስራኤልዱቍርልድ ኣኽኒ፣ ናው እስራኤልዱቍር ተከውድኖሎም ቆል ቱኖሎም እርግንነዲን ኣሞራውያንልድ በንሲነ ናቱ መንደርተው እርግኑዅ፣ ሳኦል ደአም እስራኤልዲ ይሁደዲሲ እርጋዅሉ ቅንዕብልድ ጐዅ ድሂስሮሎም ጀረቡ እርጉዅ፣ ³እማ፡ ዳዊት ከው ጊብዖንዱሲ ላት ሽጞ፣ “እክ ጃሩስ ገውርትኖ መታን፡ እን እማና ገማዅኩም ዓመጭ ኣካንሊ ላጋር እስየልኩም ጀረባዅን እⶖኵዅን፣ እማ ውራ እሲንልኩም፧” ይዅሎም።⁴ናውኻ፡ “ሳኦልዲ ኒኣዳምዲ ህምባዅና ዋኻ ሰላዲዲ ደሃብዲሲ ገበብሳዅ ኣኽላ፣ ኒድ ንኻ ይን እስራኤልዱ ገፍልድ ላዅ ድኳ ኵኖ ጀረብነሊ” ይንዅሉ። ዳዊትኻ፡ “እማ ውራ እስየልኩም ጀረብደናኵን” ይዅሎም።⁵ናውኻ፡ “ሳኦል ይነት ናትክሲ ድሂስሮና ይና ነበክልድኻ ላዅ-ድኳ እስራኤልዱዅ ብሪል ኣኻ ኣካንሊ ፊዅትድ መንደርትጊን ጀረቦ እርጉዅ፣ ⁶እማ፡ ፈደን ሳኦልዱልድ ይነድ ለጘታ ቍራቍር ደኲስሮ እዊና፡ ይጝኻ ናት ጃር ፍሪሮ ሰየማዅሉ ሲም ሳኦልዱዅ ዕርዲረትል ጊብዖንትል ጃር ጃብል ከርከርኖሎም ግን” ይንዅሉ። ሲም ዳዊትኻ፡ “ናት ደኵሶ እውየኩም ግን” ይዅሎም።⁷ደአም፡ ዳዊትዲ ዮናታንዲ ናሹር-ናሹ ቱናዅ ሻትክ ቆል ሟእኳቱዅ ሰበትድ፡ ዳዊት ሳኦልሲ ኒእዅረድ ዅረስ፡ ዮናታንዱዅረስ መፊቦሸቲ ደኵሶ ኡለሉ። ⁸ኣኽን ግራ ዳዊት ኣያቍራ ሪጽጳ ሳኦልድ እዃርዳዅሉ ኣርሞንዲ መፊቦሸትዲ፡ እን ኣⶖኳ ሚካል ሳኦልድቍረድ ቍር፡ ዓድርኤል ባርዚላይድዅራ መሖላታዊራ እዃርድራዅ ናት አድዅሎም፣ ⁹ዳዊት ነስ ናትክ ጊብዖንድውድ ደኵሶ እውዅ፣ ናውኻ ጃር ጃብል ጊሪል ከርከርንዅሎም፣ ለጘተርክኻ ላት ክርኑዅ፣ ናው ኲናዅሎምኻ፡ እን እሽርና ስክሙዅ ተርሰዅድ፡ መሽው ወክትድ እርጉዅ።¹⁰ሪጽጳ ኣያ ቍራኻ ንርሹሺ እን ግናደት ህምባዅ ኣካን ገቢል ማቕ አድሮ ሸሺል ወሸቕድቲ እማ ኒል ከፍ ይቲ፣ ንርኻ መሽው ተርይኒልድ ተርስረ፡ ሰሚልድ ስዋ እሲራሲክኻ፡ ገርክድ ጀከል ሰሚው ናዳግ ገምጊን፡ ቂርድኻ እንሱስ ከደኑ ቝጊንሎም ተከውሩሎም እርግቲ። ¹¹ሪጽጳ ኣያቍራ፡ እዅና ሸልትሪ ሳኦልትሪ፡ እስረዅሲ ዳዊትድ ድዊኒዅሉ።¹²ዳዊትኻ ፈሮ ናሽሽ ሳኦልዱዲ ዮናታን ኒዅሪውዲት ከው ያቤሽ-ጊልዓድሩልድ አዱዅ። ናው እን ሕዳር ልጝን-ሻንሩዅልድ ስዊኖሉ እርግኑዅ፣ ናው ኒል ፍልስጢምሩ፡ እን ሳኦልቲ ግልቦዓትል ኵና ግርገድ ኒል ከርከርኖሎም እርግኑዅ። ¹³ዳዊትኻ ናሽሽ ሳኦልዱዲ ዮናታንዱዲት አዱዅ፣ ኒሰናኽር ከርከርሶ እርገው ለጘታ ግናደትስኽር እኽቡዅ፣¹⁴ኒድ ደምቢ ሳልዱዅዲ ዮናታንድዅዲት አድኖ፡ ብንያም ብሪል ጼላዕ ይስቶ ሽጝስታዅ ኣካንሊ ሳኦልድ እክር አርብ ቂስሩዅሊ፡ ትእዳድ ሲሙዅድ ደቢኒዅሎም፣ ኒስ እሲናሰና፡ እን እክ ናብራ ሰበትድ ጠለይናዅ ጠሎትሲ ጃር ዋሱዅ።¹⁵ፍልስጢምኻ ሓዲስድ እስራኤልዲ ተሓረብኑዅ፣ ዳዊትዲ ኒዓስከር ኒዲ ገምኖ ፍልስጢምዲ ተሓረብኑዅ፣ ዳዊትኻ ቂልሱዅ። ¹⁶ይሽቢ-ብኖብኻ፡ ኒ ራፋ ገፍልድ ኣኻዅ፡ ሰዃ ኪሎዲ ገፍዲ ናሕስልድ ከደምሳዅ እኝሽኽዲ፡ ሰፍ ሓዲስ ደበልታዅ እርጉዅ፣ ኒ፡ ዳዊቲ ኵሮሉ ሓሰቡዅ። ¹⁷ኣቢሻይ ጽሩያዅራ ደአም እልልዅሉ፣ እን ፍልስጢማዊረስኻ ሸወጦ ክውዅሉ። እንሲን እን ዓስክር ዳዊትሩ “ቲዃ እስራኤልዱዅሲ ድሂስግሪን፣ ናንዲ ደምቢ ይነዲ ሓርብሊ ፊግ፡” ይኑዅሉ።¹⁸ኒድ ደምቢ ሓዲስድ፡ ጎብ ይስታዅ ኣካንሊ ፍልስጢምዲ ሓርብ ኣዂዅ፣ እንሲን ሲብካይ ሑሻታዊራኻ እን ራፋቍርልድ እርጋዅ ሳፍቲ ኵዅሉ። ¹⁹ኰዶኽር ሊጘር ወክት ጎብ ይስታዅ ኣካንሊ ፍልስጢምዲ ሓርብ ኣዂዅ፣ ኤልሓናን ያዓሬ-ዖርጊምዅራ ቤት-ልሄምዱዅኻ፡ እን ኒእኝሽኽ ሸኺሰና ከብድ ከደምሳዅሰና እርጋዅ ጐልያድ ጋቱዅሲ ኵውዅሉ።²⁰ናጝር ሓዲስድ ጋትል ሓርብ ኣዂዅ፣ ኒልኻ ኣጫብዕ ኒናትቱዲ ኒልኲኵዲ ወልወልታ፡ ሺብ ናድካዅኻ ለጘርጝንዲ ሰጃ፡ እርጋዅሉ ግርዋ ኒል እርጉዅ። ንኻ ራፍትልድ እዃርሳዅ ግን። ²¹ኒ፡ እስራኤልቲ ጀኸሰና፡ ሺምዓዅራ ዳዊትሲ ኒዳን፡ ኵዅሉ። ²²እና ሰጃ ነን ጋትልድ እዃርስኑዅ፣ ናው ዳዊትዲ ኒዓስከሩ ናንትዲሲ ለብኑዅ።

22¹ጃር ዳዊቲ ሳኦልዲ፡ አሪው ኒኣፋይትዲትል ደአንደሉ ወክት፡ እና ሕላይሲ ጃር ክብርድ ሓለዩዅ፣ ²“ጃር ይሸሻዲ ይጊረዲ፡ ኒደአናዅ ሒልዲ፡ ተባዅ መሐገይዲ ግን።³ይጃር፡ ተንከብሳዅሉ ሸሻዲ፡ ይወልተዲ ይደአኒዅ ጊኽዲ ግን፣ ኒ፡ ተባዅ ይመሐገይ ግን፣ ተንከብሲነዲ ደአንዱረዲ ግን፣ አዳም ሒለቱርድ ደአንድራዅለ። ⁴ሓምደ ኣስተሀላዅሉ ጃርሲ ሽጛኵን፡ ንኽር ይኣፋይትልድ ደአንዳዅለ።⁵“ኣፍሉት ክሪው ክልውዅለ፣ ኵራ ድዲዅር ተራቝድዅለ። ⁶ገመት ኣርፍፉዅ ሎለይስዅለ፣ ሸረክ ክሪዅኻ እስቲዅለ፣⁷ጅርበት ገእየለ ወክትድ ጃርሲ ሽጝዅኑሉ፣ እልልዶለኽር ይጃርሲ ሺዊዅኑ፣ ኒልጝን ሻትክሊ ኣኾ ይደሀይሲ ዋሱዅ።⁸“ጃር ቀጠብስነዲን ብራ ተናወጥትኽር ውልቅትኽር፣ መሱን ሰሚውር ናሹር-ናሹ ደረረክስኑዅር ውልቅኑዅር። ⁹ኒቍምፍፍልድኻ ቀጥቡዅ ትዳ ፊዅ፣ ኒኣብልድር ቋዅ ለኻ ሓውዩዅ፣ ኒጅዊልድኽር ጋጋእያዅ ገኣ ፊዅ።¹⁰ዓስተርሲ በጢሶ ሱቖት ገሙዅ፣ ኒሉኲኵ ሱቖይስኻ ቡኳና አረባ እርጉዅ፣ ¹¹ኪሩቤል ዳግል ኣኾ ዋዉዅ፡ ካምፍፍ ውልዋሉሊኻ ቋልስቱዅ። ¹²ጭልም ኒላው ሸጝገብድ ክልውሮሉ፣ አረባ ኣኻዅ ሰሚዅ ስዋ ብኳናኻ ኵስሮሉ እሲዅ።¹³ኒገሽሊ ህምባዅ በርህልድኻ፣ ምርኲዅ ተልዋሕታ ፊዅ። ¹⁴ጃር ሰሚልድ ጓⶖጕዅ፡ ጃር ጻበኦት ኒደሀይሲ ዋሲሱዅ። ¹⁵ኒፍላጸስ ማሎ፡ ኒ ኣፋይትስ ፋሕሲዅሎም፣ ኒ፡ ምርክሲ እኝሸቆኻ ሳደድዅሎም።¹⁶ተግሳጥ ጃሩዅድር፡ ኒ ቍምቢልድ ፋዅ ትንፋስድር፡ ቆር በሓሩዅ ቋልስቱዅ፡ ሰረት ብሪዅር ገልህስቱዅ።¹⁷“ወይልድ ኒናንሲ መደዶ ሻዅለ፣ ዓቍ በህሊንልድር ፍድዅለ። ¹⁸ይልድ ሒለቲተው እርግኑዅ እማ፣ እን ሒለቱዅ ይኣባይልድር፡ እን እንጠርውለትልድር ደአንድዅሉ።¹⁹ይጅርበትድ ግርገድ ምልዮ ዋኑ እንትኑዅለ፣ ጃር ደአም ተከውዅለ። ²⁰ኣካን እዳናዅሊ ፍድዅለ፣ ይድ ፍርሕነዲንኻ ደአንድዅለ። ²¹“ጃር ይጭድቅሰና ወንተስዅለ፣ ይናን ላጭሕሰናኽር ፈደይዅለ፣²²ደርፍፍ ጃሩሲ ተከውዅን እማ፣ ይጃርልድ ዓገብድ ሲርሊ።

²³ኒውክ ኒፍትሕ ይጃብል ግን እማ፣ ኒየውልድ ደምቢራ ወንተርሊ።

²⁴ኒጃብል ሓኵር እገት እርጉዅን፣ ሓርምልድኽር ይኣኾርሲ ተከውዅን። ²⁵እማ፡ ጃር ይጨዳቀትሰና፣ ኒጃብል ህምባዅለ ለጫሓትሰናኽር ኒዕል ጃብል ወንተስዅለ።²⁶“እን እምንሰውድ እምንስራኽር ግን፡ እን እሙኑ ኣኸውድር እሙኑዅ ግን። ²⁷ላጭሓንድ ላጭሕ ግን፣ ሸጝከይሳዅድኻ ሸጝከይራዅ።²⁸ለተቅ የውሲ ደአንድራዅሎም፣ ዕቡያንስኻ ኣዋረድቶሎም መታን፡ ኵዕልል ናል ቋለናኵ። ²⁹ዎ ጃር! እንቲ ይቲዃ ግን፣ እንቲ ይጃር ይጭልምሲ በርህድራዅሉ።³⁰ኵድ ዓስከርሲ ጋጝ የሎም ግን እማ፣ ይጃርድ መንደቕሲ/ሐጠትሲ ባⶖጕራዅን። ³¹“ደርብ ጃሩዅ ራትዕ ግን፣ ቆል ጃሩዅኻ ጫሪ ግን፣ ኒ፡ እን ኒል ሳዳ እሰውሲ ናጨግዕ ግን፣³²ጃር ንኻ አደራ ኣውኒ ህምበኵን፧ ይና ጃርንኻኻ ሸሻ ኣውኒ ግን፧ ³³ሒል እዋዅለ፡ ይደርብስኻ ጠፍሕዳዅለ ጃር ግን።³⁴ይልኩኵሲ እንጣውለር ልኩኵሰና ሃበኵሎም፣ ክብያዅልኽር ተብዶ ደውሲሮለ ግን። ³⁵ይናንትትሲ ሓርብ፡ ይክርሽምስኻ እኝሽኽ ናሓስሩዅ ሰደድና ክንሲዅ።³⁶ኵጊብ ኵደአኒዅስ ኡሩዅለ፣ ኵካበናኻ በሀር እሲዅለ። ³⁷ይልኩኵድ ደርብ ፋይሕ እስሩዅለን እማ፣ ይልኩኵ ዓጝቀፍስላ።³⁸ “ይኣፋይትስኻ ዳገኖ ድሂስዅንሎም፣ ዱⶖሪሲክሎምኽር ወንተርሊ። ³⁹ጓገነሰና እሰ ጠዓምባዅንሎም፣ ይልኩኳ ዓቀይር ለበናኵ።⁴⁰ሓርብድ ሒል ደበልድሩዅለ፣ እን ተጣረረነውሲለ ይዓጝቀይ ሉም ስሪዅሎም። ⁴¹ይኣፋይትስ ናገሽሲ ደምቢራ ዋንስኖ እግረነት ሃብሪዅሎም፣ እን እንጠረውሲለኻ ድሂስርዅሎም።⁴²እልላዅሎም ጀረቢነ ዋዕ ይኑዅ፣ ደአም፡ ደአንዳዅ ላዅር እርግላ፣ ጃርስኽር ሽጛናዅሉ፡ ኒ ደአም ዋንስለሎም። ⁴³ቍሻ ብሪው እኽድናሲክ ደሀክዅንሎም፣ ደርብል ህምባ ጭቃሰናኻ ዳድዅንሎም።⁴⁴ “ዋኻ ይእኵዅልድ ደአንድሩዅለ፣ ኣዀር እኵዅ ኣኽያ ሰየምሩዅለ፣ አርእገውሎም ከውር ገዝእስትኑዅለ። ⁴⁵ገፍር አሪውር ገዝእስተናዅለ፡ ዋስነሪትለኽር ኒድ-ኒድ አደድሰናዅለ። ⁴⁶ጕኢሲ ጨነቅሰናዅ፣ ረጀፉኑ ናው ትብትናዅልድ ፍኖ ይል እንተረናኵ።⁴⁷ “ጃር ዋነዅ ግን! ጃር ይሸሻ ሓመድስኒ! ደአንዳዅለ ሒቱዅ ጃር ክብ ክብ ይኒ! ⁴⁸እን ይድ ገደያዅለ ጃር፡ ሕክም ብሪውሲ ይስቆይሲ ገዝእዳዅለ ኒ ግን። ⁴⁹ኒ፡ ይኣፋይትልድ በሪ ፍዳዅለ፣ እንቲ ይኣፋይቲ ኣወይሲ ክብ ክብስሪዅለ፣ ጨካናን ናንትተልድር ደአንድሩዅለ።⁵⁰እማ፡ ዎ ጃር! ሕኩማት ነበክል ሓመድየካ ግን፣ ኵሱⶖ ሓመድነድር ዘመርያ ግን። ⁵¹ሲምድ በሀር ኰት ዓውተ እዋዅሉ፣ ኒቀባዅሉ ዲዊትዲ ኒፈደንዲሲኻ፣ ዲማ ዳይምድ ለወትሰጋዅ ኒእጝከሊት ቋሊስሮሉ

23¹ጃር ክብ ክብሰዅሉ፡ ያእቆብር ጃርድ ቐብእስታዅ፡ እስራኤልድ እጝከልሱራ ዘማሪራ/ሓለየንታ ኣኻዅ፣ እሴይዅራ ዳዊትር ደⶖጐቢዅ ቆል ኒን ግን። ²“መንፈስ ጃሩዅ ይድ ሃበ ጋቢዅ፡ ኒቆልኻ ይላጝቂል እርጉዅ፣³ጃር እስራኤልዱዅ ጋቢዅ፣ ሸሻ እስራኤልዱዅ ንሰና ይዅሉ፣ ከውሲ ጭድቅድ ገዝኣዅ፡ ጕኢ ጃሩዅድ ኣማሕደርዳዅ ሲም፣ ⁴ኒ፡ እን ቡኳና እጝግጋዅ፡ ብራክስናድ ኳራ ፍራ ወክትድ ህምባዅ በርህሰና ግን፣ ኒሰናኽር፡ እን ስዋ ደምቢ ጭሮርሕድ ብሪልድ ሻጝካ በኰልዳዅሉ፡ በርህ ብርክስጚዅሰና ግን።”⁵“ይልጝን ጃርሊ ራትዒማ ኣኽላ፧ ኒትክሲ ደለምዶኽር ተከዎኽር፣ ይዲ ዲመሩዅ ሟእኰት እሰዅ ኣኽለማ፧ ይደአነስ ደንጐቢል ገእሳዅሉ፣ ኒትክ ኣን ጀረባዅሲክ እዋዅለ ንማ ኣኽላ፧⁶ደአም፡ እን ብልያል ድቍር ናውክ፣ ናንድ እክብሰገውሰና እክክምሰና ማልስድኖ ግን። ⁷እክክምሲ ተመዳዅ ኒውክ፡ ሸኻ ወሪ እኝሽኽ ሓርቡኽ ሻካዅ፣ እን ኒል ህምበና ኣካንልኻ ኣቕትራሲክ ለኸድ ሓውየናኵ።⁸ፋርሰን ዳዊትሩውድ ሱጙⶖ ነን ግን፡ ታሕክሞንዱዅ ዮሼብ-ባሸቤት ሰዃሩዅ ሓለቃ ኣኲ፣ ኒ፡ እኝሽኽድ ሓርብሊ ሰዀታ ሊኽ አዳም ክዋዅ ግን።⁹ኒልድ ተለዮኻ፡ ኣልኣዛር ዶዶ ኣሖሓዊሪዅራ፣ ኒ፡ እን ሰኻ ዳዊትዲ እርገው ፋርሳንልድ ግን፣ ናው እን ኒል ታሓረብድኖ እክብሰው ፍልስጢም ቃየርናሰንክሎም፣ እን ከው እስራኤልዱኻ ደምቢራ እግርናሰና፡ ¹⁰ኒ፡ ደአም እን ኒል ደውያ ኣክንልድ ላው ሸጝገብ ይላ፣ ኒናንሰፍሊ ተከንዳሲክ ፍልስጢምሲ ኲዅሎም። ጃርኻ እን ግርጋ እንድሂቲ/ሲ በሀር ደአና እሲዅ፣ እን እክኻ ገፈፍድኖ ካያ ኒጉርጒርበት ወንተርኑዅ።¹¹ኒልድ ተለዮኻ፡ ሻማ ኣጌ ሃራራዊሪዅራ እርጉዅ፣ ፍልስጢምሩኻ ሌሒ ይስትረሪ ኣካንሊ ብርስን እንታኽተሪላ ላኪድጚትል፣ ላት እክብስኖ ዋኑኑ፡ ዓስክር እስራኤልዱ ፍልስጢምሩ ገሸልድ እግርኑዅ፣ ¹²ሻማ ደአም፡ እን ኪድጚ ነበክል ደውዮ ደአንድዅላ፣ ፍልስጢሩስኽር ቂልዅሎም። ጃርኻ በሀር ደአና እሲዅ።¹³እን ሰኾረጝን ኣሕሉቕለድኻ ሰዃ ገምኖ፡ እሽርና ወክትድ ዳዊትል ጋኻ ኣዱላምሩዅሊ እንትኑዅ። ደሽ ፍልስጢምሩኻ ዓጝቀር ረፋይምሩዅሊ ፊዅኖ እርግኑዅ። ¹⁴እና ወክት ኒሲ ዳዊት መሐገይሊ እርግዅ፣ ደሽ ፍልስጢምሩኻ እንሲን ቤት-ልሄምትል እርግኑዅ።¹⁵ዳዊትኻ፡ “እና ቤት-ልሄምሩዅ ሔጠቱዅ መራብ ገቢል ህምብረሪ ኣቢልድ ኣውኒ ዓቝ ጅእስረለ!” ዮ ሸንሕስቱዅ። ¹⁶እንሲን እንሰኻ ፋርሳን፡ ደሽ ፍልስጢምሩውድ ነበክድ በጥስኖ ደኵነድ፣ መራ ቤት-ልሄሩዅድ ገቢል ህምብረሪ ኣቢልድ ዓቝ ገለልኖ ዳዊትድ ናቕስኑዅሉ። ዳዊት ደአም ጅእሮ ጀረቢላ እማ፡ ጃር ጃብል ሰደቀት እሰ ቡቝሲዅሎም፣ ¹⁷“ዎ ጃር! እና ዓቝሲ በታተን ጀአሊሎም! ኣን፡ ነስ ጅአን፣ ናፊዅትሲ ቀበጭኖ ፈርነው እና ፋርሳን ብርሲ ጀኣሰና ሺብስታዅ!” ዩዅ፣ እን ዓቝሲ ጅእሮኻ እምቢ ዩዅ። እማ፡ እን ሰዃ ፋርሳን ዓስክር እስነዅሉ ንሰና እርጉዅ።¹⁸ጽሩይዅራ ኣቢሻይ ዮኣብሲ ኒዳንኻ፣ ኒ፡ እን ሰዃ ፋርሳንድ ናሓላአቓ እርጉዅ፣ ንኻ እኝሽኽ አዶ ሰዃ ሊኽሲ ክዉዅሎም። እን ሰዃ ነበክልኻ ሸጝስታ/አርእስታዅ እርጉዅ። ¹⁹ኒ፡ እን ሰዃትልድ ኪዳዅማ እርግላ፧ ናልድ፡ ናላዅሰና እርግገጝር ናሓለቓ እርጉዅ።²⁰ቀብጽኤልዱዅ ኣኻዅ በናያ የሆያዳዅራ በሀር ጋር ከደማዅ፣ ኒ፡ እን ለጛ ኣሪኤልዱቍር ከው ሞኣብሩሲ ኵውዅሎም፣ ኒሰናኽር፡ በርድ ወክትድ ግብሊ ትዎ ገመና ክዉዅ። ²¹ኰዶኽር፡ ላዅ አርእስታዅ ምስሩዅሲ ክዉዅ። እን ምስሩዅ ናንልኽር እኝሽኽ እርጉዅ፣ ኒ፡ ደአም ግቢ አዶ ኒል ገሙዅ እማ፣ እን እኝሽኽሲ እን ምሱሩዅልድ መንተሎ ኒሹር እኝሽኽድ ኵውዅሉ።²²በናያ የሆያዳዅራ እና ጋርኒስ እሶ እርጉዅ እማ፣ እን ሰኻ ፋርሳን ነብክል ሽጝስታዅ/አርእስታዅ እርጉዅ። ²³እን ሰኹርጝንልድ ሳብስታዅ እርጉዅ፣ እን ሰኻ ሰልፉሊ ደአም ገእይላኒክ። ዳዊታኻ ኰድጝሳዅ እሲዅሉ።²⁴ዓሳሄል ዮኣብሲ ኒዳን እን ሰዃረጝንልድ ላዅ ግን፣ ቤት-ልሄምሩዅ ኤልሓንስን ዶዶዅራ፣ ²⁵ሓሮዳዊራ ሻማዲ፡ ሓሮዳዊራ ኤሊቃዲ፣ ²⁶ጳልጣዊራ ሔለጽዲ፡ ተቆዓዊራ ዒራ ዒቄሽዅረዲ፣ ²⁷ዓናቶታዊራ ኣቢዔዘርዲ፡ ሑሻታዊራ ሜቡናይዲ፣ ²⁸ኣሖሓዊራ ጻልሞንዲ፡ ነጦፋታዊራ መሓራይዲ፣²⁹ነጦፋታዊራ ሔለብ ባዓናዅራዲ፡ ብንያም ገፍልድ ጊብዓሩዅ ኢታይ ሪባዅራዲ፣ ³⁰ጲርዓቶናዊራ በናያሓደዲ፡ሂዳይ ወርፍ ጋዓሽሩዅዲ፣ ³¹ዓርባታዊራ ኣቢ-ዓልቦንዲ፡ ባርሑማዊራ ዓዝማወት ይስታዅዲ፣ ³²ሻዓልቦናዊራ ኤልያሕባዲ፡ ብኔያሸዲ ዮናታንዲ፣³³ሃራራዊራ ሻማዲ፡ ሃራራዊራ ኣሒያም ሻራርዅረዲ፣ ³⁴ላዅ ማዓካታዊራ ኤሊ ፈለጥ ኣሓስባይዅረዲ፡ ጊሎናዊራ ኤሊዓም ኣሒቶፌልዅረዲ፣ ³⁵ቀርሜሎሳዊራ ሔጽራይዲ፡ ኣርባዊራ ጳዓራይዲ፣ ³⁶ጾባሩዅ ዪጋል ናታንዅረዲ፡ ጋታዊራ ባኒዲ፣³⁷ዓሞናዊራ ጸለቅዲ፡ ጽሩይዅራ ዮኣብድ ኒእኝሽኽሲ ሙዅራዅ ብኤሮታዊራ ናሓራይዲ፣ ³⁸ዪትራዊራ ዒራዲ፡ ዪትራዊራ ጋሬብዲ፣ ³⁹ሔታዊራ ኡሪያዲ፡ ናውክ ላትኻ ሰዀረጝንዲ ለጛታ እርግኑዅ።

24¹ሓዲስድ ጃር እስራኤልት ገሪዅድክ ቀጥብሱዅ፣ እማ፡ ዳዊቲ “ፈሪ፡ እስራኤልዲ ይሁደዲት ሺቢ” ይዅሉ። ²ሲምኻ ዮኣብዲ ኒዲ ህምበው ዓስከርሲ ኣደደውዲት፡ “ዳንትልድ ብኤር-ሸባዕ ኣኽታሲክ ሀምበው ፈራዕ እስራኤልዱሊ ናትክሊ ፈራ፡ ናብጅኽ ውሪከው ኣከነት አርእያ መታን ተሓረበውሲ ሺባ” ይዅሎም።³ዮኣብ ደአም ሲምቲ፡ “ኵአደራ ጃር ኵዓስከርስኪ ሊኽ እሽባ እሲናት፣ ዕልል ይአደሪውኻ ኒስ ቋልኒል ገእይኒን፣ ይአደራ ሲም ኒስ እሲሮ ጀረበዅ ውሪ መታን ግን፧” ዮ ወጝቅርዅሉ። ⁴ደአም ሲም ዮኣብዲ ዓስከርሲ አደደውዲት ትእድድሲ እሲድኖ ቀሰብነዲንሎም፣ ኒጃብል ፍኖ ደሽ እስራኤልዱሲ ሺብድኖ ፈርኑዅ።⁵ዮርዳኖስቲ ካርነሰና፡ ዓጝቀርሊ ህምብረሪ ዕርዲረር ላው ሸጝገብድ ህምብርሪ ዓሮዔርትል ፊዅኑዅ፣ ኒልድኻ፡ ጋድድ ሃቢነ ያዕዜርትል ፈርኑዅ፣ ⁶ጊልዓድትል እንትኖኻ ብራ ታሕቲም-ሖድሺትል ቱኑዅ፣ ኒልድኻ፡ ዳን-ያዓንድ እሲነኻ ጅልውኖ ሲዶንትል ፈርኑዅ። ⁷ኒሰናኽር ትብቲሰና ጢሮስሩዅድ፡ ሃዋውያንዲ ከነኣናውያንዲትል እንትኑዅ፣ ግብልት ይሁደሩዅድ ብኤር-ሸባዕትል እንትኑዅ።⁸ንርውክ ብረስ ጅልውኖ ሰሳ አርበዲ ልጘረጝን ኳራዲር ደምቢ ዮርሳለምሊ ወንተርኑዅ። ⁹ዮኣብ እን ተሓረብውድ ሺብሲ ሲምድ አእሲሱዅ፣ እስራኤልትል ሰዃታ ሊኽ ስሕ፣ ይሁደትልኻ ኣⶖኳ ሊኽ ስሕ ሰፍ ሻኽድኖ ገረሰው ታምማን ዋኒነት ድዊዅሉ።¹⁰ዳዊት እን ተሓረበውሲ ሺበሰና ኒለበካ ወቀስነዲንሉ ጃርሲ፣ “ኣን ኒስ ይእስነድ በሀር በደል ከደምዅን፣ ዓወድናሩዅ ክድመት ከደምነዲን ኵዓይብ ብሕል ይለ!” ዩ ሺዊዅ።¹¹ዳዊት ክሰራ ጐሰና፡ ቆል ጃሩዅ ነቢራ ጋትል፡ እን ዳዊትሩዅ ቋላዅሊ እንቱዅ፣ ¹²ንሰናኻ ይዅሉ፡ “ፈሪ እማ ዳዊቲ፣ ‘ጃር ንሰና ያኵ፡ ሰዃ ጋራት ፍሪርቶ ሱክስየልካ ግን፣ ናልድ ላሪት ፍሪሪ እማ፡ ንርቲ እስየልካ ግን’ ያኵ እⶖኲዅ ይሮ ጋቢሉ”።¹³ጋድኻ ዳዊትል እንቶ፡ “ኵብሪል ሰኻ ኣመራ ከአር እንትሮከማ ጀረብራክውን፧ ወሪ ሰዃ አርባ ኵኣፋይታ ገሸልድ እግርቶ፧ ወሪ ይኼ ኵብሪል ሰዃ ኳረድ ዕድር እንትሮ ጀረብራዅን፧ እማ ናን እን እኝሻቃዅሰለ ውራ ወንተሰትሉ ሓሰብሮ ኰድጚ” ይዅሉ። ¹⁴ዳዊት ጋድቲ፣ “ገሪዅድክ ጨነቅሶ ህምበኵን፣ ደአም፡ ኒብሕልታ ገሪዅ ግን እማ፣ ናን ጃሩዅሊ ለብና ግራ፡ ናን አዳምሩዅሊታዲ ለበሊ” ይዅሉ።¹⁵እንሲን ጃር ብርክስኒልድ ተርሰ እን ኒ ኰድጘ እራጋዅ ወክት ኣኽታሲክ እስራኤልትል ዕድር ፈሱዅ፣ እን እከልድኻ ዳንትልድ ብኤር-ሸባዕ ኣኽታሲክ፡ ለጘትረጝን ስሕ ከው ክርኑዅ። ¹⁶መልኣክ ጃሩዅ ዮርሳሌምቲ ድሂስሮ ኒናንሲ መደዶሰናኻ፣ እን ገእያዅ እኪትድ ጃር ጥዒሱዅ፡ እን እክሲ ድሒሳዅ መልኣክስኻ “በቃ! ኵናንሲ ወንተሲ” ይዅሉ። እን ወክት እንድሂስኻ፡ እን መልኣክ ጃሩዅ ወረና ኣራውና እን ይቡሳዊሪዅ ገቢል እርጉዅ።¹⁷ዳዊትኻ ኣን እክሲ ድሂሱ እርጋዅ መልኣክሲ ቋለሰነክሉ፡ ጃርሲ “እናሓን፡ ሓራም ከደማኽርዲ ከተኽርዲ ኣን ግን፣ ነን ደአም በግ ግንናው፣ ውራ እሲኒዅን፧ ኵናን ይዲ ይኽርድ ልጝንዲትል ኣኽርን” ይዅ።¹⁸እን ግርጋ እንድሂስኻ ጋድ ዳዊትል እንቶ፡ “ወረና ኣራውና እን ይቡሳዊሪዅሊ፡ ጃርድ ሰደቒሰና ከደሚ” ይዅሉ። ¹⁹እማ፡ ዳዊት ጃር ጋድድ እሰ ያዅሰነሉ ፊዅ/ተረገሱዅ። ²⁰ኣራውናኻ ሱቖት መኸልተሪት፡ ሲምዲ ኒኝሺንዲ እንተሩኑ ቋሉዅ፣ ኒልድ ፈኻ ሲምድ ብሪል ፍግም ዮ ክብር ኡዅሉ።²¹ኣራውናኻ፡ “ይአደራ ሲም ኒገጂኒል/ኒኣገልገልደንቲል እንታዅ ውራ መታን ግን፧” ይዅሉ። ዳዊትኻ “እና መቕዘፍቲ እከልድ ገበብስሮ፡ ጃርድ ሰደቒሰና ከደምየሉ እና ኲወረነስ ጅብያ ግን” ይዅሉ።

²²ኣራናውኻ ዳዊቲ “ይአደራ ሲም ደስ ያዅሲክሉ አዶ ሰደቀት ሱክስን፣ ሓውያዅ ሰደቀትድኻ ብል ህምበናኵ፡ ሓውየው ካንኻ ሰረገላታትዲ ወኽደም ቢሉዲ ህምበኵ። ²³ዎ ሲም፡ ነስ ናትክ ኣራውና ሲምድ ኡዅሉ ዩዅ።” ኒሰናኽር ኣራውና “አደራ ጃር ከለብሩⶖኵት” ይዅሉ።²⁴ሲም ደአም ኣራውናት፣ “ኒሰና ኣከላ፡ ኒኣረኸስ ከፈልየካ ሻዅን፣ ይአደራ ጃርድ ኣራኻ ከፈልጊ ሰደቀት ሱክሰሊ” ይዅሉ። እማ ዳዊት፡ እን ወረነዲ ቢልዲት ኣⶖኵረጝን ሲቃል ወርከትድ ጅቢዅሉ። ²⁵ኒልኻ ዳዊት ጃርድ ሰደቐት ከደሙዅ፣ ሓውያዅ ሰደቀትዲ ሕብረቱዅዲ ሱኵሱዅ፣ ኒልድኻ ጃር፡ እን ብረሲ ሱኵሳዅ ጠሎትሲ ዋሱዅ፣ እስራኤልትል ናቅሳዅሉ መቕዘፍቲትኽር ደውሲዅሉ።

Bilen: Bible for 2 ሳሙኤል

Formatted for Translators

2 ሳሙኤል