Buyu: Bible for Genesis

Formatted for Translators

©2022 Wycliffe Associates
Released under a Creative Commons Attribution-ShareAlike 4.0 International License.
Bible Text: The English Unlocked Literal Bible (ULB)
©2017 Wycliffe Associates
Available at https://bibleineverylanguage.org/translations
The English Unlocked Literal Bible is based on the unfoldingWord® Literal Text, CC BY-SA 4.0. The original work of the unfoldingWord® Literal Text is available at https://unfoldingword.bible/ult/.
The ULB is licensed under the Creative Commons Attribution-ShareAlike 4.0 International License.
Notes: English ULB Translation Notes
©2017 Wycliffe Associates
Available at https://bibleineverylanguage.org/translations
The English ULB Translation Notes is based on the unfoldingWord translationNotes, under CC BY-SA 4.0. The original unfoldingWord work is available at https://unfoldingword.bible/utn.
The ULB Notes is licensed under the Creative Commons Attribution-ShareAlike 4.0 International License.
To view a copy of the CC BY-SA 4.0 license visit http://creativecommons.org/licenses/by-sa/4.0/
Below is a human-readable summary of (and not a substitute for) the license.
You are free to:
The licensor cannot revoke these freedoms as long as you follow the license terms.
Under the following conditions:
Notices:
You do not have to comply with the license for elements of the material in the public domain or where your use is permitted by an applicable exception or limitation.
No warranties are given. The license may not give you all of the permissions necessary for your intended use. For example, other rights such as publicity, privacy, or moral rights may limit how you use the material.

Genesis

Chapter 1

1 Haya ha butulilo Abetcha abumbile gulu na sii. 2 Nagyo sii gibele mauwa, na hululu, na mdoo gubele hegulu ha mabenga ma madi; Mtima gwa Abetcha gushamine hegulu ha uganjwa wa madi. 3 Abetcha aganine, Lube lwenge; lwenge nuuba,. 4 Abetcha amonine lwenge, uba mlusoga; Abetcha abagulile lwenge na mdoo. 5 Abetcha agitile lwenge Mengo ma Chuba, na mdoo gugugitile busugu. Yonuba igolo lonuba lwelo lusugu lumwechi. 6 Abetcha aganine, Na habe hululu hawingi ha madi, gubaguile madi na madi. 7 Abetcha aitile hululu gubaguile madi mali hegulu ha hululu na maya madi mali hasi ha hululu; Byonuba bibyo. 8 Abetcha agitile giya hululu Gulu . Ibele igolo habele halwelo, lusugu lwa mabili. 9 Abetcha aganine,Madi mali hasi ha gulu malisumbiche ihana imwechi, bululi hamoneye mgala gwa gugumu; byonuba bibyo. 10 Abetcha agitile guya mgala Sii; Na ulisumbicha ose wa madi guugitila Bahali; Abetcha amonine uba ii bosoga. 11 Abetcha aganine, Sii na gimene byanyi, byunaganywa byuha biguma, na mti gwa biguma guuha biguma nahi byaguli, goo biguma byage bili mnda mwage, hegulu ha sii; byonuba bibyo. 12 Sii gimenine byanyi, ihama ili huhaa biguma ulamana na byaili, na mti gulihuha biguma, gwinw guli na bigumamnda mwago, nahi byaguli,Abetcha aminine uba iibisoga. 13 Ibele igolo lubele lwelo, lusugu lwa matatu. 14 Abetcha aganine, Na habe lwenge ha hululu ha gulu bululi habagule hawingi ha mchuba na busugu; nabyo noo byabe humanya mengo na masugu na myaa; 15 iyaka lwabe noo lwenge mnda hululu lya gululwabiye lwenge mnda sii; byonuba bibyo. 16 Abetcha aitile lwenge lubili lwata, luya lwata lube mchuba, na luya luucho luba m'busugu; guitile na tumbala-mbala nato. 17 Abetcha abibiile ha hululu ha gulu, bululi ibiye lwenge hegulu ha sii 18 na utabala mchuba na busugu na ubagula lwenge na mdoo; Abetcha amonine uba ii bisoga. 19 Ibele igolo na lubele lwelo, lusugu lwa mana 20 Abetcha aganine, Madi na magilule meengi na uba na bili na mwego bilihugyata, na tunonyi tuguluwe hegulu ha sii hawingi ha hululu ha gulu. 21 Abetcha abumbile nyangumi gyata, na bibumbwa bili na mwegi bilihugyata, byine bigilulwe na madi mengi nahi byabili; Na tuninyi tose tuuguluwa nahi byatuliAbetcha aminine ugana ii bisoga. 22 Abetcha abihalile mihaa, gunanine, Butanywe, na ubula, mwagiluche madi na bahali,tunonyi na tubula mnda sii. 23 Ibele igolo lubele lwelo lusugu lwa matano. 24 Abetcha aganine, Sii na gibute ibumbwa yina mwego nahi byaili, nyama cha usugwa, nabyo bya ulibula, na nyama cha mmisowa nahi byachili bibele bibyo. 25 Abetcha aitile nyama cha m'bisowa nahi byachili, na nyama cha usugwa nahi byachili, na byose bili hulibula hegulu ha sii nahi byabili; Abetcha amonine ugana iibisoga. 26 Abetcha aganine, na Na tummite mtu wa mlingilisho gwetu, wa yenyi yetu; batabale swiicha m bahali, na tunonyi twa ha hululiu, na nyama, na sii gyose nagyo, na yoyose yine ili hugandala hugandala hegulu ha sii. 27 Abetcha abumbile mtu wa mlingilisho gwage, wa mlingilisho gwa Abetcha gum'bumbile, mlumyana na mmachana gubabumbile. 28 Abetcha abahalile mihaa, Abetcha abasambile, Buswe, mubule, mwagiluche sii, na udanja; mwatabale swii cha m bahali, na tunonyi twa ha hululu, na yoyose ibumbwa yine ili na mwego ilihugyata hegulu ha sii. 29 Abetcha aganine, Loolwe, namma bihama na binge byose bya m'bitete bili huhaa biguma, na bili hegulu na bitete byose, na miti gyose, gwina giguma bya matete; bibi noo biliwa byenyu; 30 na iliwa na nyama chose sii, na ya tunonyi tose ta ha hululu, na ya yoyose yine ilihugandala hegulu ha sii, yine ili na mwego; byanyi byose na bili mnda bitete, noo biliwa byenyu; bibele bibyo. 31 Abetcha amonine yoyose yeligilile, na loolwe, iyisoga abisa. Ibele igolo lubele lwelo lusugu lwa mtuba.
Chapter 2

1 Bibyo gulu na sii bihwile, na byose bili na mwego. 2 Na lusugu lwa njwii Abetcha ahwile mgilo gwage gose gweligilile; gulitudiche lusugu lwa njwii, guleile ugila mgilo gwage gose gweligilile. 3 Abetcha ahalile mihaa lusugu lwa njwii, guluhaheche wa yulu mnda lusugu lulo Abetcha gulitudiche; guleile ugila mgilo gwage gose gwelibumbile na gweligilile. 4 Bibyo noo bibushi bya gulu na sii habibumbilwe. Luya lusugu mlume Abetchahelibumbile gulu na sii 5 bishibele naba bihama mlubala, na ata byanyi bya mmabala byuliwa bishinabuda ata, bululi MLUME Abetcha gushi nanyesha mbula mgino sii, na hashi mtu gubilima bitete; 6 kunguku giselile mnda sii, gibiile madi heguluhose ha bitete. 7 MLUME Abetcha gummitile mtu wa ihwili ya bitete, gummulile mmihyembe luhuda lwa mwego; mtu genuba ichuli-chuli ya mwego. 8 MLUME Abetcha guunine lubala lubi lwa mlugulu mwa Edeni, gum'biile mnda lubala gugo mtu gweliitile. 9 MLUME Abetcha gumeninye mnda bitete miti gyose gyubenjiwa u meeso na gulinye uliwa; na mti gwa mwego m'bwingi mwa lubala, na mti gwa umana busoga na buube. 10 Luhumine ludi mnda Edeni lwa ubiila lubala madi, na uhumina haho luligabule miswee gina. 11 China lya lwa lutangi ii Pishoni; noo lulihuchunguluwa ibaloo yose ya Havila, oo noo uli nolo; 12 na nolo cha gigyo sii ii chibenju ; ubo uli bedola, na bitundu shihamu,. 13 Na china lya ludi lwa bubili ii Gihoni; noo lulihuchunguluwa sii gyose gya Kushi. 14 Na china lya ludi lwa butatu ii Hidekeli; noo luli huhita umbele wa Ashulu. Na ludi lwa buna ii Flati. 15 MLUME Abetcha gumguhile gugo mtu, gum'biile mnda lubala lwa Edeni, galulime na ululongya. 16 MLUME Abetcha gumlagile gugo mtu guganine, Biguma bya miti gyose gya mlubala wiiya, 17 bibyo biguma bya mti gwa umana bisoga na buube ushiye, bululi lusugu loliya biguma bya gugo mti wiwa winene. 18 MLUME Abetcha guganine, Bishi bisoga guno mtu gabe gee buchima, nimmitila m'bwatilicha gwa uhwanana nage. 19 MLUME Abetcha guitile uhuma mnda bitete nyama chose cha uhuma mgala, na tunonyi tose twa ha hululu, gummele Adamu yulu gamone na gwibigita wii; bibumwa byose bya bili na mwego china lyeli gitile Adamu lyo nuba noo china lyayo. 20 Adamu gubihele machina mabyo nyama chose cha usugwa, na tunonyi twa ha hululu, na nyama chose cha mgala; haho hashimoneye gwa ubwatilicha Adamu guhwanene nage. 21 MLUME Abetcha gumchwishiche adamu tulo tunyemu, nage gulalile; hanyuma guguhile lubachu lwage lumwechi, guwilile nyama byagibele, 22 na luya lubachu lweliguhile uli adamu MLUME Abetcha guluitile mmachana, gumleshile uli Adamu. 23 Adamu guganine, Bino guno ii uda mnda mauda manyi, na nyama mndanyama chanyi, mndi gwigiswa mmachana, bululi gwaguhwa mnda mlumyana. 24 Wa bibyo mlumyana gwishiga sage na mnage nage gwiumbatilana na mmachage, nabo babi m'bili gumwechi. 25 Nabo babeli buchi bose babili, Adamu na mmachage, na bashimonine abule.
Chapter 3

1 Bibyo ndowa gibele na butundu uhima nyama chose cha mgala cheliitile MLUME Abetcha.Gimsambile mmachana, Gogwe! Bino noo bidogomine Abetcha, Mushiye biguma bya miti gyose gya mlubala? 2 Mmachana gugisambile ndowa, Biguma bya miti gya mlubala tunaya; 3 hange biguma bya mti guli m'bwingi na lubala Abetcha aganine, Mushiye na mushiude, mushichwe uwa. 4 Ndowa gimsambile mmachana, Chigilwe mushiwa. 5 Bululi Abetcha agidi ugana lusugu lwamwiya biguma bya gugo mti, mwibululwa meeso, na benywe mubi nahi Abetcha, m'bemana bisoga na biibe. 6 Mmachana helimonine ugana guya mti gulingye wa uliwa, mgubenju u meeso, nago ii mti gwa itima ya meeso na malango, haho guguhile imwe iguma ya guya mti gee nuuya, gummele na mlumyage, nage nuuya. 7 Babululwe meeso bose babili balimanine uba bali buchi, bashonine byanyi bya mti, baliitile bichwalaganywa. 8 Hanyuma bahuliche lidi lya MLUME Abetcha, gulihugyata mnda mlubala mengo ma chuba usendama; Adamu na mmachage babisamine m'bwingi mwa miti gya mlubala, MLUME Abetcha gashibamone. 9 MLUME Abetcha gumgitile Adamu, gumganine , Uli uhi? 10 Adamu guganine, Nalihulicha lidi lyobe mlubala, namona booba bululi nene nilibuchi; nalibisa. 11 Abetcha aganine, Mnanyi gusambila ugana uli buchi? Wi wii! Gogwe wayaa biguma bya mti gwandiulagilke ushibiye? 12 Adamu guganine, Gugo mmachana golipele gabe hamwechi nanyi noo gupele buguma bya guya mti, nene nuuya. 13 MLUME Abetcha gumganine mmachana, Iyii ino yawagila? Mmachan guganine, Ndowa gyambicha, nene nuuya. 14 MLUME Abetcha gumganine ndowa, Yulu ya ibalo nai wagila bibyo, waalogwa gogwe uhima nyama chose, na uhima byose bili mnda mgala; wa lugili wigyata, na ihwili wiiya masugu mose ma mwego gobe; 15 na nene nibiya bumangu hawingi hobe na gugo mmachana, na hawingi ha ibushi yobe na ibushi yage; iyo yiunyuwa mswe, na gogwe wimnyuwa ashidagulu. 16 Gumsambile mmachana, Wineneniulibiila usuma obe, na ubuta obe; wa busungu wibuta baana; na itima yobe ibi uli mlumyobe, nage gwiutabala. 17 Gumsambile Adamu, Wa yulu wahulicha lidi lya mmachobe, ulile biguma bya mti gwandiulagile, niganine, Ushibiye; bitete byalogwa yulu yobe; wa usuma wiigilila mgilo liliwa yoliya masugu mobe mose ma mwego gobe. 18 byookole na miigwa byibuswa yulu yobe, na gogwe wiiya byanyi bya m'bihongelela; 19 Wa yuda ya yenyi yobe wiiya iliwa, ndaa na byoligiwila u bitete, wabili noo oliguhilwe; buluili gogwe uli ihwili, na gogwe wigiwila wigiwila. 20 Adamu gugitile mmachage china Hawa; bululi gee noo mnabo gwa babe bali na mwego. 21 MLUME Abetcha gubaitile Adamu na mmachage bichwalaganywa. 22 MLUME Abetcha guganine, Bino, guno mtu gusili nahi gumwe gwetu, wa umana bisoga na biibe; na bino gashichwe ugolola uboo wage na uguha biguma bya mti gwa mwego, gabeya, na ushama milumbu. 23 wa bibyo MLUME Abetcha gummuminye mnda lubala lwa Edeni, galime bitete byine byeguhilwe wa bili. 24 Haho gee numchinga mtu,gubiile Makelubi luubi lwa mlugulu lwa lubala lwa Edeni,na ahilu a ahyaa abele hugaluwa ubo na ubo, ugiusa nda gya mti gwa mwego.
Chapter 4

1 Adamu gummanine Hawa mmachage; nage guswalile gumo, gubutile Kaini, Hawa guganine, nahewa mwana gwa mlumyana na MLUME. 2 Gulaminye gunge mwana gwa mlumyana, Abeli. Abeli gubele mmushi gwa miyoo, na Kaini gubele mlimi gwa mabala. 3 Mndi haho Kaini guleshile biliwa bya mmabala, lutangi wa MLUME. 4 Abeli nage gulishile baana ba batangi ba nyama chage na bibaa bya binonyu bya nyama .MLUME gumgitabuwe abeli na lutangi lwage; 5 Mndi gushimgitabuwile Kaini, ata na lutangi lwage. Kaini guchigililwe abisa, yenyi yage ibungamine. 6 MLUME gumsambile Kaini, Yulu yai wachigililwa? Na yulu yai yenyi yobe yabungama? 7 Nambo wahugila bisoga, ushi gitabwiwa? Usahugila bisoga buube buluho, buumenena ha mchango, nabo bulihuunda gogwe, bibyo bilingye ubuhiime. 8 Kaini gumsambile Abeli mshiwabo, [ Tugye umabala ]. Haho hababele umabala, Kaini gumginwine Abeli mshiwabo na uumaga.v 9 MLUME gumganine Kaini, Gulu uhi Abeli mshiwenyu? Guganine, Nishigidi, nene nili mmushi gwa mshiwetu? 10 MLUME guganine, Wagila ii? Lidi lya mashi ma mshiwenyu malihundilila uhuma u bitete. 11 Bino hano, walogwa gogwe uhuma u bitete, byagaliya anywa age umina mashi ma mshiwenyu uhitila uboo obe. 12 holilima u bitete bishiuha biliwa byage, ubi gutolowa na mtu gushi na bushamo mmino ibaloo. 13 Kaini gumsambile MLUME, Uononywa wanyi wanjwila wiingi nishi osha uuswala. 14 Loola, wanyinga lino uhuma u yenyi ya sii, nibiswa koona yenyi yobe, nene nibi gutolowa namtu gushi na bushamo mmibaloo; na bibi gegese gwimona gwipaga. 15 MLUME gumsambile, Bululi bwa bibyo gegese gwimmaga Kaini gwigiwichiwa buube bwage nyendo njwii. MLUME gum'biile Kaini ibala, mtu gwimmona gashimmule. 16 Kaini gee nuhuma u meeso ma MLUME, gushamine m sii gya Nodi, umble wa Edeni. 17 Kaini gummanine mmachage; nage nuuswala gumo, gee nubuta Henoko; gugubaile mbuga nugigita Henoko, wa china lya mwanage . 18 Henoko gubutile Iladi, Iladi gubutile Mehuyaeli; Mehuyaeli gubutile Methushaeli; Methushaeli gubutile Lameki.
20 Ada gubutile Yadali; gugo noo sabo na bene bali hushama m'bitula na usuga nyama. 21 Na china lya mshiwabo gugitilwe Yubali; gugo noo sabo na bene balihugomba binubi na ma bihonde. 22 Sila nage gubutila Tubali-kaini, mtumbi gwa bwombo byose bya ugedela, bya mmubo bya bigela; na kachage Tubal-kaini gubele Naama. 23 Lameki gusambile baachi bage, Hulichiwe lidi lyanyi, Ada na Sila; Benywe baachi ba Lameki, hulichiwe udogoma wanyi; Bululi nihagile mtu wa umbiya malase; Mmwa lubaga wa uushubula; 24 Nahi Kaini gwagichiwa buube nyendo njwii, Winene Lameki gwigiwichiwa nyendo maumi njwii na njwii. 25 Adamu gummanine mmachage iyaka; gubutile mwaana gwa mlumyana, gumtile china lyage Seti; yulu guganine Abetcha gwambiile lunge lubuto ha ihana ya Abeli; bululi Kaini gummagile. 26 Seti nage gubutile mwaana; gumgitile china lyage Enoshi. Haho noo hene hatulile batu ulinyemya China lya MLUME.
Chapter 5

1 Ino noo itabo ya bibushi bya Adamu. Luya lusugu abetcha abumbile mtu, wa yenyi ya Abetcha gumishile; 2 mlumyana na mmachana gubabumbile, gubahalile mihaa gubagitile china lyabi Adamu, luya lusugu lweli babumbile. 3 Adamu gushamine myaa sambi na maumi matatu, gubutile mwaana nahiyenyi yage, wa mlingilisho gwage, gumgitile china lyage Seti. 4 Masugu ma Adamu hanyuma ha um'buta Seti gibele myaa sambi inana, gubutila baana ba mulumyana na ba baachana. 5 Masugu mose ma Adamu mebele na mwego ii myaa sambi yahabula na maumi matatu, nage nuuwa. 6 Seti gushsmine myaa sambi na gitano, gee noo ubuta Enoshi. 7 Seti gushamine hanyuma ha ubuta Enoshi myaa sambi inana na njwii, gubutile baana ba balumyana na ba baachana. 8 Masugu mose ma Seti ii myaa sambi yahabula na umi na gyopi, gee nuwa. 9 Enoshi gushamine myaa maumi yahabula, gee nubuta Kenani. 10 Enoshi gushamine hanyuma ha ubuta Kenani myaa sanbi china na umi na gitano, gubushile bawa lubaga na bawa misiha. 11 Masugo mose ma Enoshi ii myaa sambi yahabula na gitano, gee nuuwa. 12 Kenani gushamine myaa maumi njwii, genubuta Mahalaleli. 13 Kenani gushamine hanyuma ha ubuta Mahalaleli myaa sambi inana na maumi mana, gubushila bawa lubaga na bawa misiha. 14 Masugu mose ma Kenaniii myaa sambi yahabula na umi, genuuwa. 15 Mahalaleli gushamine myaa maumi mtuba na gitano, genuguta Yaledi . 16 Mahalaleli gushamine hanyuma ha ubuta Yaledi myaa sambi inana na maumi matatu, gubushile bawa lubaga na bawa misiha. 17 Masugu mose ma Mahalaleli ii myaa sambiinana na maumi yahabula na gitano, genuuwa. 18 Yaledi gushamine myaa sambi na maumi mtuba na gyopi, genuubuta Henoko. 19 Yaledi gushamine hanyuma ha ubuta Henoko myaa sambi inana, gubushile bawa lubaga na bawa misiha. 20 Masugu mose ma Yaledi ii myaa sambi yahabula na maumi mtuba na gibili, genuuwa. 21 Henoko gushamine myaa maumi mtuba na gitano, genuubuta Metusela. 22 Henoko gugile hamwechi na Abetcha hanyuma ha u'buta Metusela myaasambi chitatu, gubushile bawa lubaga na bawa misiha. 23 Masugu mose ma Henoko ii myaa sambi chitati na maumi mtuba na gitano. 24 Henoko gugile hamwechi na Abetcha, nage guchimine yulu Abetcha amguhile. 25 Metusela gushamine myaa sambi na maumi inana na njwii, genuubuta Lameki. 26 Metusela gushamine hanyuma ha ubuta Lameki myaa sambi njwii na maumi inana na gyopi, gubushile bawa lubaga na bawa misiha. 27 Masugu mose ma Metusela ii myaa sambi yahabula na maumi mtuba na yahabula, genuuwa. 28 Lameki gushamine myaa sambi na maumi inana na gibili, gubushile mwana. 29 Gumgitile china lyage Noa, godogomine Guno noo gwituhungya wa migilo gyetu na wa asusu a maboo metu mnda sii gyelilogilwe MLUME. 30 Lameki gushamine myaa hanyuma ha um'buta Noa myaa sambi na maumi yahabula na gitano, gubushila bawa lubaga na bawa misiha. 31 Masugu mose ma Lameki ii myaa sambi njwii na maumi njwii na njwii, genuuwa. 32
Chapter 6

1 Hene hatulile batu ubula hano ha sii na bawa misiha babushilwe wabali, 2 baana na Abetcha babamonine bawa misiha ba batu uba mmahungwe; baliguhile baachibobose bene babalisobwele. 3 MLUME guganine, Mtima gwanyi gushihimana na mtu milumbu, bululi gee nage ii nyama; mndi masugu mage mabi myaa sambi na maumi mopi. 4 Nabo Banefili babele hano ha siimaya masugu, hanyuma na bibyo, baana ba Abetcha habagingile u bawa misiha gya batu, babushile nabo baana; babo noo babele batu bauoma haya halaa, batu ba punda chingi. 5 MLUME gumonine buube bwa batu m'bwingi mmibaloo na ugana ibalo yose yelihulanga mnda mtima gwage mmabee masugu mose. 6 MLUME gulibediche yulu guitile mtu hano hamgala, guchigililwe mnda mtima. 7 MLUME guganine, Nichima abisa mtu gwandibumbile hegulu ha sii; mtu na nyama, na byulibula na tunonyi twa ha hululu; bululi nalibecha ugana nimitile mtu. 8 Haho Noa guhelwe keene u meeso ma Abetcha. 9 Bino noo bibushi bya Noa. Noa gubele mtu gwina kiine, m'bwilile mnda bibushi byage; Noa gugile hamwechi na Abetcha. 10 Noa gubushile bawa lubaga batatu, Shemu, na Hamu, na Yafeti. 11 Sii gidogile u meeso ma Abetcha, sii gigilule na umonenana. 12 Abetcha aimonine ibaloo, na loola, yadoga; bululi gegese mine gwina m'bili gwalidogecha ndila gyage hano ha sii. 13 Abetcha gumsambile Noa, Isula ya mine gwina m'bili yahuhiya u mbele gyanyi; bululi bagilucha ibaloo na msapwe yungwe, bino nibadogya hamwechi na ibaloo. 14 Ulilongeche bwato bwa mti gwa msese; walingye na byumba mnda bwato, wabumbe mnda na hambuga na butongu. 15 Bibyo noo byolibuita; maboo sambi chitatu ulaha wa bwato, na maboo maumi matano mmahinda mwage, na maboo maumi matatu ugimana ugya hegulu hage. 16 Waite bwato uba na lwenge, na waunine hegulu hage nahi na uboo umwechi; wabiya na mchango gwa bwato mlubachu mwage; babiye na butato butatu, bwa butangi, na bwa bubili, na bwa butatu. 17 Na loola, nihila imbi ludi ya madi hegulu ha ibaloo, nadigye byose byine bili na mibili na luhuda lwa mwego, ishiba iyaka hasi ha gulu; yose ili mmibaloo yiwaa. 18 Bino niita malagano manyi noobe, mabe maomu; na gogwe wigingila mnda bwato, gowe na baana bobe na mmachobe, na baachi ba baana bobe. 19 Na yoyose yine ili na mwego yina m'bili, bilili bya mioga gyose wibigingicha mnda bwato, wibiya bibe na mwego hamwechi nobe; bibe mlume na ota. 20 Na ata biya bilihuguluwa ulamana na mioga byabyo, na nyama chose ulamana na mioga gyacho, na byose bilihigandala hegulu ha ibaloo ulamana na mioga gyabyo, bibili bibili byichwa oli bululi ubibiye na mwego . 21 Waliguhile biliwa bya mioga gyose binaliwa, waongole , nayo ibi iliwa yenyu na yabo. 22 Noo byeliitile Noa, ulamana na biya bimsambile Abetcha, bibyo noo byeligilile.
Chapter 7

1 MLUME gumsambile Noa, Gingila gogwe na ibushi yobe yose mnda bwato; bululi nuumona gogwe uba mtu m'bwilile u meeso manyi mmino ibushi. 2 U nyama chose cha chibenju waguhe njwii njwii, mlume na ota; na nyama chishi chisoga uguhe chibili chibili, mlume na ota. 3 Iyaka tunonyi twa ha hululu njwii njwii, mlume na ota; yulu ya ushiga mbuto byina bili na mwego mgino sii. 4 Bululi hanyuma ha masugu njwii nihila mbula ginye hegulu ha ibaloo yose, masugu maumi mana chuba na busugu; Na yoyose yine yina mwego yandibumbile hegulu ha sii niichiminya abisa. 5 Noa guitile nahi biya bimsambile MLUME. 6 Nage Noa gusibele mtu gwa myaa sambi mtuba haho hene hachwile imbi ludi hegulu ha sii. 7 Noa gugingile mnda bwato, gee, na baana bage, na mmachage, na baachi ba baana bage hamwechi nage; yulu ya madi ma imbi ludi. 8 Na nyama cha chisoga, na nyama chishi cha chisoga, na tunonyi, na byose bilihugandala hegulu sii. 9 bigingile mnda bwayo muli Noa, bibili bibili, mlume na ota, nahi biya bimsambile Abetcha. 10 Haho hanyuma ha mamo masugu njwii, Madi ma imbi ludi magilule hegulu ha ibaloo. 11 Ha mwaa gwa sambi mtuba gwa mwego gwa Noa, mwechi gwa bulili, lusugu lwa umi na njwii lwa mwechi, luya lusugu misula gyose na mabenga mataa magilule wa uoma madilisha ma gulu mabuguwile. 12 Mbula ginyene hegulu ha sii, masugu maumi mana chuba na busugu. 13 Lusugu loka luya Noa gugingile mnda bwato, gee, na Shemu na Hamu na Yafeti, baana ba Noa, na mmachi gwa Noa, na baachi ba baana bage hamwechi nage; 14 boo na nyama chose cha mgala ulamana na mioga gyacho, na nyama chose cha usugwa ulamana na mioga gyacho, na byose byugandala hegulu ha sii ulamana na mioga gyacho, na byose byuguluwa ha hululu ha ibaloo na tunonyi tose ulamana na mioga gyato. 15 Bigingile mnda bwatu muli Noa, bibili bibili, byose byine byina mibili, yina luhuda lwa mwego mnda mwayo. 16 Na byine bigingile bigingile mlume na ota bya mioga gyose gyina mibili, nahi biya bimsambile Abetcha; MLUME gummambile mchango. 17 Iya imbi ludi ibele masugu maumi mana hegulu ha ibaloo; namo madi magililile, masediche bwato, buselile hagulu ha ibaloo, 18 Madi maselile abisa, mabulile abisa hegulu ha sii, na buya bwato buselile abisa hegulu ha madi. 19 Maji mapashila uoma abisa abisa hegulu ha sii; na koono chose cha chilahu chine chibele hasi ha gulu chiuninywe. 20 Madi mapashile uoma, na uunina koono alibu maboo umi na matano 21 Bawile bose bene bali na mibili balihugyata hegulu ha sii, na tunonyi, na nyama cha usugwa, na nyama chose cha mgala, na byose byugandala chine chili hugandala hegulu ha sii, na batu bose; 22 na byose byine byina luhuda lwa mtima lwa mwego mmihyembe mwagyo yonuuwa, yoyose yine ibele hegulu ha ibaloo. 23 Yoyose yine yina mwego hegulu ha sii ichiminyiwe koo utula mtu na myama cha usugwa, na byugandala, na tunonyi twa ha hululu; bichiminyiwe koo na ibaloo, gushigele Noa kaa, na baya bali hamwechi nage nda bwato. 24 Madi mashamine hegulu ha sii masugu sambi na maumi matano.
Chapter 8

1 Na Abetcha ammengelecha Noa, na yoyose yine ili na mwego, na nyama chose chine chibelehamwechi nage mnda bwato; Abetcha atuchiche mnaga hegulu ha sii, madi mahunguwile; 2 misula na mabenga mahambilwe, iyaka na madilisha ma hegulu, mbula gyuhuma hegulu gigimiwe. 3 madi magililile uama hegulu ha sii; na wisula ya masugu sambi na maumi matano madi mahungiwile. 4 Mwechi gwa njwii, lusugu lwa umi na njwii lwa mwechi, bwatu busalile hegulu ha loono lwa Ararati. 5 Madi mahungwile hungwile ndaa na mwechi gwa umi; mwechi gugo gwa umi lusugu lutangi lwa mwechi, pala cha koono chitulile umoneya. 6 Bibyo hanyuma ha masugu maumi mana, Noa gubugulile dilisha lya bwato, lyelilongiche,; 7 gutobolile imombo-mombo, nayo itobwele na ugya ubo na ubo, na ata bigumine madi hegulu ha sii. 8 Hanyuma gutobolile akundulu anome nambo madi mahuguma hegulu ha sii. 9 mndi ao akundulu ashimonine ihana ya usacha ata ugulu wage; amgiwilile Noa mnda bwato,bululi madi milibele hagulu ha sii gyose; nage gugolwele uboo na noo uaguha na uagingicha mnda bwato. 10 Guhembile iyaka masugu njwii; hanyuma gwatobole iyaka aya akundulu mnda bwato lwendo lwa bubili, 11 akundulu amgiwilile higolo, loola abele na yanyi ya ibisi ya mzeituni wilomo yage, yalihombile haho Noa gumanine ugana madi mahuhunguwa hegulu ha sii 12 Guhembile masugu njwii iyaka, gwatobole aya akundulu; nao ashimgiwilile iyaka. 13 Haguhyile mwaa gwa sambi mtuba na gumwechi, mwechi gwa gutangi, lusugu lutangi lwa mwechi, madi magumina hegulu ha sii. Noa guhuminye iunino ya bwato, nage gumonine, na ulola sii gyahuguma. 14 Na mwechi gwa bubili, lusugu lwa maumi mopi na njwii ma mwechi, sii gibele gigumu. 15 Abetcha asambile Noa, ugana, 16 Huma mnda bwato, gogwe, na mmachobe, na baana bobe, na baachi ba baana bobe hamwechi nobe. 17 Bitobowe byose byina mwego bilimo mnda bwato hamwechi nabe, yina m'bili, tunanyi, na nyama, na yose ili hugandala, ili hugandala hegulu ha sii; bigilule mnda sii, bibe na bibushi, byabule mnda sii. 18 Haho Noa gutobowile, gee, na baana bage, na mmachage, na baachi ba baana bage hamwechi nage; 19 nyama chose, na byose bya ugandala, na tononyi tose, na byose bilihugyata hegulu ha sii wa mioga gyacho, bbihumine mnda bwato. 20 Noa gumgubaile MLUME butambikilo; guguhile u chiya nyama chisoga, na utuya tunonyi twa tusoga, gubihanene ulutangi lwa uchigya hegulu ha butambikilo. 21 MLUME guhuliche bushio bwa busoga; MLUME guganine mnda mtima, Nishiloga iyaka sii yanyuma ha bibyo ibalo ya mtu, bululi malanga ma mtu mmasone utula u buwalubaga bwage; na nishidogya iyaka yoyose yine ili na mwego nahi byandiitile. 22 Mengo mose mishama sii, mengo ma uuna, na usola,mengo ma budogo na mengo ma kamo, mengo ma mnaga na mengo mamnaga gwa aungu chuba na busugu bishigimana.
Chapter 9

1 Abetcha ahalile Noa mihaa na baana bage, gumsambile, Butanywe, mwabule, mwagiluche ibaloo. 2 Nyama choose cha mmibaloo chyimsina benywe na umwa iduba, na tunonyi tose twa ha hululu; hamwechi na batu bose byababela bagiluchu bitete, na swii chose cha m'bahali; byabiwa mmaboo menyu. 3 Yoyose ilihugyata ili na mwego ibi iliwa yenyu, nahi byandibahele bi iliwe na byanyi, byoka biya namma bino byose. 4 Bibyo nyama hamwechi na mwego, nugana, mashi mage mushimaye. 5 Chigilwe mashi menyu ma mwego gwenyu nimasaba; ugana mnda uboo wa nyama niubucha; na mnda uboo wa mtu, mnda uboo wa mshiwabo nisaba mwego gwa mtu. 6 Nine gwigesa mashi ma mtu, mashi mage gugo migeswa na na mtu, bululi wqa mlingilisho gwagwage Abetcha tummitile mtu. 7 Benywe butanywe, mulibuche abisa; butanywe abisa mnda sii, mubule mnda mwayo. 8 Abetcha amsambile Noa, na baana bobe hamwechi nobe, guganine, 9 Nene loola, nigimiya malagano manyi nenyu; iyaka na ibushi yenyu hanyuma henyu; 10 iyaka na ibumbwa yose yina ili na mwego ili hamwechi nobe, tunonyi, na nyama cha usugwa, na nyama chose cha mgala mnda sii hamwechi nenyu; chose chilihuhuma mnda bwato, na yoyose yine ili na mwego mnda sii. 11 Na alago anyi niagimiya nenyu; na yoyose yine yina m'bili ishibangwa iyaka na madi ma imbi ludi, hanyuma ha bibyo, udogya sii. 12 Abetcha aganine, ino noo yumanya ya alago anduhuita hawingi nanyi na benywe,na bibumbwa bili na mwego byose bili hamwechi nenyu, wa bibushi byose ata na milumbu. 13 Nene nabiya mmita mbula gwanyi u matimba, nago bubi ii yumanya alago hawingi hanyi na sii. 14 Ata inangwa ninaganda matimba hegulu ha sii, mmita mbula gwimoneya umatimba, 15 Nene niaengelecha alago anyi, ene ali hawingi hanyi na benywe, na ibumbwa yose yina mwego hawingi ha byose bili na m'bili, na madi mashibi imbi ludi iyaka ubadogya bose bene bali na mibili. 16 Mndi gugo mmitambula gubi umatimba; nene nigulola bululi naengeleche alago a milumbuene aliho hawingi ha Abetcha naibumbwa yoyose ili na mwego hawingi ha bose bene balina m'bili ili hano ha mgala. 17 Abetcha gumsambile Noa, Ino noo yumanya alago andibiile hawingihanyi na bose bene bali na m'bili bali mnda sii. 18 Baana ba Noa bene bahumune mnda bwato, ii Shemu na Hamu na Yafeti; na Hamu noo sage na Kanaani. 19 Bano batatu babele baana ba Noa na ulamana na babo sii gyose gyawilila batu. 20 Noa gutulile uba mlimi, guunine mizabibu; 21 gee nuunywa divai, nuolwa; gee nuba buchi mnda itula yage. 22 Hamu, sage gwa Kanaani, gumonine buchi bwa sage, gubasambile bashiwabo babilibene babele hambuga. 23 Shemu na Yafeti baguhile ichwalaganywa, baigandile umaombe mabo bose babili, bagile inyuma nyuma, bawilile buchi bwa sabo; na byenyi byabo bibele hulola unyuma, bashimonine ata buchi bwa sabo. 24 Noa hammololowe boolwa bwage, gumanine bimgilile mwanaga gwa mmala. 25 Guganine, Na galogwe Kanaani; Gubi mcha abisa gwa bashiwabo; 26 Guganine, Na gahewe buswachi Abetcha a Shemu; Na Kanaani gabe mcha gwage. 27 Abetcha ammele Yafeti iba yata ya ibaloo. Na gashame mnda itula ya Shemu; Na kanaani gabe mcha gwage. 28 Na Noa gushamine iyaka hanyuma ha imbi ludi ginge myaa sambi chitatu na maumi matano. 29 Masugu mose ma Noa mabele myaa sambi yahabula na maumi matano. gee nuuwa.
Chapter 10

1 Bino noo bibushi bya baana ba Noa, Shemu, na Hamu, na Yafeti. Na wabali ubushilwe bawambaga hanyuma ha imbi ludi. 2 Baana ba Yafeti ii Gomeli, na Magogu, na Madai, na Yavani, na Tubali, na Mesheki, na Tilasi, 3 Na baana ba Gomeli ii Ashkenazi, na Lifathi, na Togama. 4 Na baana ba Yavani, ii Elisha, Talshishi, Kitimu, na Walodani. 5 Wa babo sii gwa wibega ya mioga giligabulile uba sii gyabo, gyogyose na lidi lyage, wa bubuswa bwabo, ulamana na mioga gyabo. 6 Na baana ba Hamu ii Kushi, na Misili, na Putu, na Kanaani. 7 Na baana ba Kushi ii Seba, na Havila, na Sabta, na Laama, na Sabteka. Na baana ba Laama ii Sheba, na Dedani. 8 Kushi gubushile Nimlodi, noo gutulile uba mtu gwa uoma wingi mnda sii. 9 Gubele mtu mmomu wa uhiba nyama umbele wa MLUME. Wa bibyo batu basugana, Nahi Nimulodi, mmomu wa uhiba nyama umbele wa MLUME. 10 Buolo bwage butulile Babeli na Eteku, na Akadi, na Kalne, mnda sii gya Shinali. 11 Guhumine mnda giya sii nuugya Ashulu, gugubae Ninawi, na Lehoboth-ili, na Kala; 12 na Lesini, hawingi ha Ninawi na Kala, nagyo ii mbuga gyata. 13 Misili gubushile Baludi, na Baanami, na Balehabi, na Banaftuhi, 14 na Bapathlusi, na Bakasluhi; ubo noo uhumine Bafilisti na Bakaftoli. 15 Bakanaani babushile Basidoni, mwanage gwa mtangi, na Hethi, 16 na Bayebusi, na Baamoli, na Bagilgashi,, 17 na Bahiti, na Bamwalki, na Bamsini, 18 na Balvadi, na Basemali, na Bahamathi. Hanyuma noo ibushi ya Bakanaani basambalele. 19 Na lugumba lwa Bakanaani ii utula uhuma Sidoni wa ndila gya Gelalindaa na Gaza; iyaka wa ndila gya Sodoma, na Gomola, na Adma, na Seboimu, ndaa na Lasha. 20 Babo noo baana ba Hamu, ulamana na ubuswa wabo, wa lidi lyabo, mnda bibalo byabo, ulamana na mioga gyabo. 21 Nage Shemu noo sabo gwa baana ba Ebeli, na mmulwage na Yafeti, gubushile baana. 22 Baana ba Shemu ii Elamu, na Ashulu, na Alfaksadi, na Ludi, na Alamu 23 Na baana ba Alamu ii Usi, na Huli, na Getheli, na Mashi. 24 Alfaksadi gubushile Sela, Sela gubushile Ebeli. 25 Ebeli gubushila baana bopi na balumyana; china lya gwa mtangi ii Pelegi, bulumbulwilo ii ugana ha masugu mage sii gigabwile; na china lya mshiwabo ii Yoktani. 26 Yoktani gubushile Almodadi, na Selefu, na Hasalmawethi, na Yela, 27 na Hadolamu, na Uzali, na Dikla, 28 na Obali, na Abimaeli, na Seba, 29 na Ofili, na Havila, na Yobabi. Babo bose noo baana ba Yoktani. 30 Bushamo bwabo bubele uhuma Mesha wa ndila gya Sefali, loono lwa mlugulu. 31 Babo noo baana ba Shemu, ulamana na ubuswa wabo, na lidi lyabo, mnda bibaloo byabo ulamana na mioga gyabo. 32 Babo noo baana ba Noa ulamana na ubuswa wabo, ulamana na bibushi byabo, mnda mioga gyabo; na wa gigyo mioga giligabulile mnda sii hanyuma ha imbi ludi.
Chapter 11

1 Sii gyose gibele na lidi limwechi na mdogomenyi gumwechi; 2 Mndi batu habagile luubi lwa mlugulu bamonine sii gya ibandabanda mnda sii gya Shinali; bashamine ubo. 3 Basambilene, Bino na tuhule biliki tubichele waahyaa. Babele na biliki pahali pa mawe, na bumba pahali pa luhemba. 4 Baganine, Bino, na tuligubaile mbuga, na tugubae itu ya ilahu ugya hegulu, songo gyage gihiye umatimba, na tuliginyiye china beswe bene; bululi tushimwagiye hegulu ha ibaloo yose. 5 MLUME gusalile gamone mbuga na itu ya ilahu yabali hugubaa batu. 6 MLUME guganine, Loola, bano batu ii ilongo imwechi, na lidi lyabo ii limwechi; na bino noo byabahutula ugila, na ata bino bashichibilwa na itu yabalihubenja ugila. 7 Bino mndi tusale ubo, tuba bulaganinye mdogomenyi gwabo yulu bashi hulichane binywa byabo boo wa boo. 8 Bibyo MLUME gubasambaleche uhuma ubo bagye m sii gyose; boo nuuleya ugubaa giya mbuga. 9 Yulu ya iyo ibalo china lyage gigisilwe Babeli; bululi haho noo hene MLUME heli bulaganye ludi lya sii gyose; na uhuma ubo MLUME guba sambaliche bagye mnda sii gyose. 10 Bino noo bibushi bya Shemu; Shemu gubele mtu gwa myaa sambi genubota Alfaksadi myaa gyopi hanyuma ha imbi ludi. 11 Shemu gushamine hanyuma ha ubuta Alfaksadi myaa sambi chitano, gubushile baana balume na baachi. 12 Alfaksadi gushamine myaa maumi matatu na gitano, genubuta Sela, 13 Alfaksadi gushamine hanyuma ha ubuta Sela myaa sambi china gitatu, gubushile baana, balume na baachi. 14 Sela gushamine myaa maumi matatu, genuubuta Ebeli. 15 Sela gushamine hanyuma ha ubuta Ebeli myaa sambi china na gitatu, gubushile baana balume na baachi. 16 Ebeli gushamine myaamaumi matatu na gina, genubuta Pelegi. 17 Ebeli gushamine hanyuma ha ubuta Pelegi myaa sambi china na maumi matatu, gusbushile baana balume na baachi. 18 Pelegi gushamine myaa maumi matatu, geenubuta Leu. 19 Pelegi gushamine hanyuma ha ubuta Leu myaa sambi chibili na yahabula, gubushile baana balume na baachi. 20 Leu gushamine myaa maumi matatu na gyopi, genubuta Selugi. 21 Leu gushamine hanyuma ha ubuta Selugi myaa sambi chopi na njwii, genubuta baana ba balumyana na ba baachana. 22 Selugi gushamine myaa maumi matatu, genubuta Naholi. 23 Selugi gushamine hanyuma ha ubuta Naholi myaa sambi chopi, genubuta baana ba balumyana na ba baachana. 24 Naholi gushamine myaa maumi mopi na yahabula, genubuta Tela. 25 Naholi gushaminne hanyuma ha ubuta Tela myaa sambi gimwechi na umi na yahabula, gubushile baana ba balume na ba baachi. 26 Tela gushamine myaa maumi njwii, gubushila Ablamu, na Naholi, na Halani. 27 Na ino noo ilongo ya Tela. Tela gubushila Ablamu, na Naholi, na Halani. Halani gubushile Luti. 28 Halani guwile hambele ha sage Tela mnda sii gyebushilwe, noo, mnda Ulu wa Bakaldayo. 29 Ablamu na Naholi galiguhile baachi. China lya mmachi gwa Ablamu gugitilwe Salai, na china lya mmachi gwa Naholi gugitilwe Milka, msiha gwa Halani, gee nogubele sabo gwa Milka na Iska. 30 Na Salai gubele igumba, gushibele na mwana. 31 Tela gumguhile Ablamu mwanage, na Luti mwana gwa Halani, midulwage, na Salai mmage buo, mmachi gwa Ablamu mwanage, bahumine bose Uli wa Bakaldayo, bagye sii gya Kanaani, bahiile ndaa na Halani bashamine ubo. 32 Masugu ma Tela mabele myaa sambi chibili na gitano; Tela guwile haya Halani.
Chapter 12

1 MLUME gumsambile Ablamu, Huma gogwe mnda sii gyobe, nailongo yobe, na ndu gya sobe, ugye ndaa m sii gyandiumonya; 2 nene niuita gogwe ube mmoga gwata, na uuhalila mihaa, na uliginuna china lyobe; na gogwe ube mihaa; 3 na nene nibahalila mihaa bene biuhalila mihaa, nage gwiuloga nene nimloga; na mnda mobe bilongo byose bya sii bihalilwa mihaa. 4 Bibyo Ablamu gugile, nahi bimsambile MLUME; Luti gugile hamwechi nage. Nage Ablamu gubele mtu gwa myaa maumi njwii na gitano helihumine Halani. 5 Ablamu gumguhile Salai mmachage, na Lutu mwana gwa mshiwabo, na bitundu byabo byose byabapashile uya Halani, Bachuwile yulu bagye sii gya Kanaani; nabo bagingile m sii gya Kanaani. 6 Ablamu guhitili m'bwingi na sii ndaa na ihana ya ihaha noo Shekemu; ndaa na ubutambikilo bwa Mole. Na ba Kanaani maya masugu bashamine mnda giyo sii. 7 MLUME gumtobwele Ablamu , guganine, ibushi yobe nibaha gino sii. Nage uya gumgimyile MLUME butangilo mine gumtobwele. 8 Hanyuma guhumine ubo gugile u loono luli lubi lwa mlugulu mwa Babeli, gugimiye hema lyage; gubele na Betheli luubi lwa igolo, na Ai luubi lwa mlugulu, gumgimyile MLUME butambikilo obo, gugishile Chila lya MLUME. 9 Nage Ablamu gugile, na ugilila ubi lwa uboo uachi. 10 Haho mndi habele ndala mnda giya sii; Ablamu gugile Misili, gashame uya mamwe mengo bululi ndala gibele gingi mnda sii. 11 Helibele alibu na ugingila Misili, gumsambila Salai mmachage, Loola, nigidi uli mmachana gwina buhungwe; 12 mndi habibi, Bamisili habiumona bigana, Gugu ii mmachobe; bibyo biipaga nene na gogwe biushiga na mwego. 13 Ibumbu ino ugane, gogwe ili kachanyi, byabe bisoga wandi yulu yobe, na ichuli-chuli yanyi ya mwego yabe poo yulu yobe. 14 Mndi haho hahiile Ablamu Misili, Bamisili bammonine gugo mmachana ugana gee ii hungwe abisa. 15 Baata ba Falao bammonine, nabo bamtonine uli Falao; bibyo gugo mmachana guhililwe mndu gya Falao. 16 Falao gumgilile Ablamu bosoga yulu ya Salai; Ablamu guhelwe miyoo na ng'ombe, na punda cha milume, na baacha na bagichi, na punda cha maota, na ngamiya. 17 Haho MLUME guhuli Falao na ndu gyage gyose wa bihulo byata, wa yulu ya Salai, mmachi gwa Ablamu. 18 Bibyo Falao gumtile Ablamu, guganine, Iyii ino yawapisha? Yulu yai usasambila ugana gugu ii mmachobe? 19 Yulu yai wagana, Gugu ii kachanyi, ata byandamguha uba mmachanyi? Bino hano, gugo mmachobe ubemguha, uligile lobe. 20 Falao gulagile batu yulu yage, bamshindiche undila, na mmachage, na byose byelibele nabyo.
Chapter 13

1 Ablamu guchuwile uhuma Misili, gee na mmachage, na byose byalibele nabyo, na Luti hamwechi nage, ndaa na lubi lwa uboo wa uachi. 2 Nage Ablamu gubele mona abisa gwa bisuganywa, wa bumona na nolo. 3 Gugililile ugya uhuma lubi lwa uboo wa uachi ndaa na Betheli, ihana iya yelitulile ugimiya hema lyage hawingi ha Betheli na Ai; 4 haho noo helitulile ugiliya butambikilo; Nage Ablamu gugitile china lya MLUME haho. 5 Na Luti gugile hamwechi na Ablamu, gee nage gubele na migoma gya ng'ombe na miyoo, na itula. 6 Na giya sii gibele gicho wabali, yulu bashame hamwechi; bululi bibya byabo bibele biingi, na bashioshe ushama hamwechi. 7 Habele byumano hawingi ha baushi ba nyama cha Ablamu na baushi ba nyama cha Luti; na maya masugu Bakanaani na Bapelizi babele bilihushama m gigyo sii. 8 Ablamu gunsambile Luti, Bino, hashibe byumano, nuutendelela, hawingi hanyi nobe, ata hawingi ha baushi banyi na baushi bobe; bululi beswe tuli babuswa. 9 Wi wii! Sii gino gyose ati gili u meeso mobe? Bino ulibagule nanyi, nuutendelela; ubegya lubi lwa uboo wa uachi nene nigya lubi lwa uboo wa ulume, ubegya uboo wa ulume nene nigya uboo wa uachi. 10 Luti guginunine meeso mage, Guimonine ibetabeta yose ya Yolodani, ugana yose yina madi, ii hambele ha MLUME gushinachigya Sodoma na Gomola, ibele nahi lubala lwa MLUME, nahi sii gya Misili ndila gyugya Soali. 11 Haho Luti gusobole ibetabeta yose ya Yolodani; guchuwile na ugya lubi lwa mlugulu; balibagulile boo wa boo. 12 Ablamu gushamine nda sii gya Kanaani, na Luti gushamine mnda mabuga ma iya Ibetabeta; gusheninye itula yage alibu na Sodoma. 13 Biya batu ba Sodoma babele babii, buugila bubii bwingi abisa MLUME. 6 Na baana ba Hamu ii Kushi, na Misili, na Putu, na Kanaani. 7 Na baana ba Kushi ii Seba, na Havila, na Sabta, na Laama, na Sabteka. Na baana ba Laama ii Sheba, na Dedani. 16 Na lubuto lobe niluita uba nahi ihwili ya ibaloo; ata mtu gabeosha ubala ihwili ya ibaloo, na ibushi yobe nayo yibalwa. 17 Gimana, wagyate mnda sii gino mmahinda mage, na ulaha wage, bululi niuha gogwe gino sii. 18 Bibyo Ablamu guseninye itula yage , guchwile na ushama mmiamba gya Mamle, nagyo noo miti gili Hebuloni, gumgimiile MLUME butambikilo uya.
Chapter 14

1 Bibyo masugu ma Amlafeli oolo lya Shinali, na Alioko oolo lya Elasali, na Kedollaoma oolo lya Elamu, na Tidali oolo lya Goimu, 2 balwile bita na Bela oolo lya Sodoma na Bilsha oolo lya Gomola, na Shinabu oolo lya Adma, na Shemebeli oolo lya Seboimu, na oolo lya Bela, noo Soali. 3 Bano bose basambene ha ibetabeta ya Sidimu, [iyaka halihugiswa Bahali lya miinyu]. 4 Myaa umi na gyopi bamgilile Kedollaoma, haguhiile mwaa gwa umi na butatu bam'bengile. 5 Na mwaa gwa umi na buna guchwile Kedollaoma na maoolo mabele hamwechi nage, balwile na Balefai mnda mwa Ashteloth-kalnaimu, na Bazuzi ha Hamu, na Baimu ha Shawe-kilyathaimu, 6 na Baholiu loono lwa Seili, ndaa na Elpalani gili hoka na mlwanaganywa. 7 Hanyuma bagiwile nuuhiya Enmisfati, noo Kadeshi, balwile sii gyose gya Baamaleki, na Baamoli babele bashameHasason-tamali. 8 Oolo lya Sodoma, na oolo lya Adma, na oolo lya Seboimu, na oolo lya Bela, noo Soali, bachuwile na ubiya itunga ya bita ha ibetabeta ya Sidimu; 9 balwe naKedollaoma oolo lya Elamu, na Tibali oolo lya Goimu, na Amlafeli oolo lya Shinali, na Alioko oolo lya Elasali, maoolo mana ugalwila maoolo matano. 10 Na ibetabeta ya Sidimu ibele igiluchu bina bya buumba. Nabo bamaoolo ba Sodoma na Gomola basinine, bagwile ubo nabo bene bashigele basinine u koono. 11 Bawatile kole gya bitundu byose bya Sodomana Gomola na biliwa byabo byose, bagile nabyo. 12 Bamguhile Luti, mwaana gwa mshiwabo na Ablamu, gubele hushama uya Sodoma, na bibya byage byose, bagile nabyo. 13 Mtu gumwechi guhogonowile gugile, na uuma Ablamu Mmeblulania mwano; nage gushamine ha miamba gya Mamle, guya Mmamoli, mshiwabo gwa Eshkoli, na mshiwabo gwa Aneli, na babo babele bbahulichane na Ablamu. 14 Ablamu helihuliche ugana mshiwabo gwawaswa kole, gee nuubaha byulwa nabyo bawambaga bage, bene babushilwe mndu gyage , batu sambi chitatu na umi na inana babalamine ndaa na Dani. 15 Gubiile itunga galwe nabo m'busugu, gee na baacha bage, gubahagile , gubachingile ndaa na Hoba, gili lubi lwa uboo wa uachi wa Damesiki. 16 Nage gugiwiche bibya byose, gumgiche Luti mshiwabona bitundu byage , na baachana, na batu. 17 Ablamu heligiwile ulwa na Kedollama na maya maoolo mabele hamwechi nage, oolo lya Sodoma lichuwile ugya usambana nage mmibetabeta ya Shawe, nayo ii ibetabeta ya Oolo. 18 Na Melkisedeki oolo lya Salemu gummele mkati na divai, nage gubele ibuli ya Abetcha Guli hegulu abisa. 19 Gummalile mihaa, guganine, Ablamu na gahalilwe mihaa na Abetcha Ali hegulu abisa, M'bumbi gwa gulu na sii. 20 Gaginunywe Abetcha ali hegulu abisa, ababiile ba tumangu tobe mmaboo mobe. Ablamu gummele ibaa ya umi ya bitu byose. 21 Oolo lya Sodoma liganine Ablamu, Upe nene babo batu, na bibyo bitundu gogwe uguhe. 22 Ablamu gumsambile oolo lya Sodoma, Niginune uboo wanyi wa MLUME, Abetcha Alihegulu abisa, M'bumbi gwa gulu na sii, 23 bululi nishiguha bunyishi na ata mgochi gwa mkalabanda na ata yoyose yine ili yobe, ushichwe ugana nimmele Ablamu uba mona. 24 nambo tu biya byabalile bawalubaga, na ibaa ya batu bagile hamwechi nanyi; noo, Aneli, na Eshkoli, na Mmle, nabo baguhe iba yabo .
Chapter 15

1 Hanyuma ha bibyo bihisho inywa ya MLUME ichwilile Ablamu u malo ma mtima, iganine, Nangu uwa booba, Ablamu, Nene nilingabo gyobe na alambwe oba aata abisa. 2 Ablamu gunanine, Ee Mlume ABETCHA, Wiipa ii, na nene nishi na mwaana, na gwihana ndu gyanyi ii gugu Eliezeli Mdameski? 3 Ablamu guganine, Loola ushipele lubuto, na mtu gubuswa mnda nduu gyanyi noo byana gyanyi. 4 Nayo inywa ya MLUME ichwilile na ugana, Gugu gushi uhyana, haho mine gwihuma mnda muunda chobe noo mine gwiuhyana. 5 Gumtobole hambuga, guganine, Loola bino hegulu, baala tumbala-mbala, nambo wiosha utubala. Gumsambile, Noo bibi ibushi yobe. 6 MLUME gumsambile, nage gum'balile iyo ihisho uba ii kiine. 7 Hanyuma gumsambile,Nene nili MLUME, niuhuminye sii gya Uli wa Bakaladayonuuhe gino sii uguhyane. 8 Guganine, Ee Mlume ABETCHA, niosha umana ugana niihyana ino ibaloo? 9 Gumsambile, upe mwana ng'ombe gwa myaa gitatu, na diba, na mwaana gwa akundulu. 10 Ablamu gummele bibyo byose, gubigadule bibaa bibili, gubiile kila ibaa ulola inge nage, gushigadule tu tunonyi. 11 Na mengo masalile maubi hegulu ha bitumba Ablamu gumachingile. 12 Na chuba halitulile usendama tulo twa bushito tumlemine Ablamu, booba bwa mdo gwa masolo gumgwilile. 13 MLUME gumsambile Ablamu, Umane chigilwe ugana ibushi yobe ibi igenyi mnda sii gishi gyage, bibagilila baya batu, nabo bisusulwa myaa sambi china. 14 Ata na guya mmoga, gwabigilila, bibaonona, hanyuma bihuma na bitundu biingi. 15 Gogwe noo wigya u bamasobe wa talala, wichiwa mnda buoto busoga. 16 Na ilongo ya buna noo yigiwila hano; bululi ushinawilila usona wa Baamoli. 17 Habele, chuba halichindile mdo guchwile, loola, lulindi lwa mii na mwenge gulihulama guhitile hawingi ha biya bihindi bya nyama. 18 Luya lusugu MLUME gubiile alago na Ablamu, guganine, ibushi yobe naiha gino sii, uhuma ludi lwa Misili ndaa na lulo ludi lwa lwata, ludu Flati. 19 Mkeni, na Mkenizi na Mkadmoni, 20 na Mhiti, na Mpelezi, na Mlefai, 21 na Mwamoli, na Mkanaani, na Mgilgashi, na Myebushi.
Chapter 16

1 Bibyo Salai mmachi gwa Ablamu gushim'butile mwaana, nage gubele na mtu gwa mgilo, Mmisili, china lyage Hajili. 2 Salai gumsambile Ablamu, Bino hano, MLUME gupambile gumo nashibute; mndi ugingile uli mgichi gwanyi hange mnapata ibushi weli. Ablamu guhuliche lidi lya Salai. 3 Salai mmachi gwa Ablamu nuguha Hajili Mmisili mgichi gwage, hanyuma ha Ablamu ushama mnda sii gya Bakanaani myaa umi, gummele Ablamu mlumyage, gabe mmachage. 4 Haho Ablamu gumngilile Hajili, nage guswalile gumo. nage helimonine gwaswala gumo, mnwge gwa mgilo, gubele gwa hasi u meeso mage. 5 Salai gumsambile Ablamu, Bubii bwapata buli yulu yobe; niuhele mgichi gwanyi myaali mobe; nage helimonine gwaswala gumo, nene nisili gwa hasi u meeso mage. MLUME gaonone hawingi hanyi na gogwe. 6 Nage Ablamu gumsambile Salai, Loola, mgichi gobe guli mmuboo obe, umgilile yoyose ili isoga u meeso mobe. Salai gumsusule, Hajili gusinine uhuma u meeso mage. 7 Malaika ma MLUME mammonine Hajili ha msula gwa madi mlwanaganywa, msula guli mndila gya ugya Shuni. 8 Gumsambile Hajili, gogwe mgichi gwa Salai, ulihuhuma uhi, na gogwe ulihugya uhi?guganine, Nene nasina uhuma uli mago gwa mgilo Salai. 9 Malaika ma MLUME mamganine, Giwila uli mmobe gwa mgilo, ulisache hasi ha maboo mage. 10 Malaika ma MLUME mamganine, Chigilwe niibucha ibushi yobe, ishibalwa wa yulu babi beengi. 11 Malaika ma MLUME mamsambile, Looma! Gogwe uli na gumo, wibuta mwaana gwa mlumyana, gogwe wimgita china lyage Ishimaeli,bululi MLUME gwahulicha lilo lya asusus obe. 12 Nage gubi nahi bende hawingi ha batu, uboo wage ubi hegulu ha batu bose na uboo wa batu bose ubi hegulu hage, nage gwishama umbele wa bashiwabo bose. 13 Gugishile china lya MLUME mine gudogomine nage, Gogwe uli Abetcha asumona, yulu aganine, Ata hano nimmonine gee gumbonine? 14 Wa bubyo ishima iya igitilwe Beel-lahai-loi. Loola, ili hawingi ha Kadeshi na Beledi. 15 Hajili gum'butule Ablamu mwaana gwa mlumyana; Ablamu gumgitile china lyage Ishimaeli, guya mwanage, gubushilwe na Hajili. 16 Nage Ablamu gubele mtu gwa myaa maumi inana na mtuba, haho Hajili helim'butule Ablamu mwaana.
Chapter 17

1 Ablamu halihyile mtu gwa myaa maumi yahabuna na yahabula, MLUME gumchilile Ablamu, gumsambile, Nene noo Abetcha Dambe, ugyate umbelewanyi, ube gwam'bwilile. 2 Na nene nibiya malagano manyi hawingi hanyi na gogwe, na nene niubicha abisa abisa 3 Ablamu gumginamine ndaa na hasi. Abetcha ammsambile, aganine, 4 Nene, malagano manyi mandabiye nobe, na gogwe ubi babo gwa mioga giingi, 5 ata china lyobe ushigiswa iyaka Ablamu, mndi china lyobe lisibi Iblahimu, yulu nuubiya uba babo gwa mioga giingi. 6 Niuita ube na milongo giingi abisa, na nene niuita ube mioga, na maoolo mihuma oli. 7 Malagano manyi nimaita uba masugu mose hawingi hanyi na gogwe, na ilongo yobe hanyuma hobe, na bibushi byobe, una malagano ma milumbu, ugana nibi Abetcha oli ba wa ibushi yobe hanyuma hobe. 8 Na Nene niuha gogwe na ibushi yobe hanyuma haobe gino sii gyolimshame gya bugenyi, sii gyose gya Kanaani, uba buhyana bwa milumbu; na nene nibi Abetcha obe. 9 Abetcha amsambile Iblahimu, Gogwe uwashe malagano manyi, gogwe na ilongoyobe wa bibushi byabo hanyuma hobe. 10 Mano noo malagano manyi moli washa, hawingi nahi nobe, na ibushi yobe hanyuma hobe, Mlumyana gegese gwenyu gwigya kumbi. 11 Mwigya kumbi, ugechwa afili a nyama chenyu, na iyo ibi isagaya malagano hawingi hanyi nenyu. 12 Mwaana gwenyu gwa masugu njwii gwigechwa kumbi, mlumyana gegese mnda bibushi byenyu, m'buswa gwa mndu, gwamgulwe na bumona bobe, mgenyi gegese gushi gwa ibushi yobe. 13 m'buswa gwa mndu mobe, na gugulilwe wa bumona bobe, utaga na ushutaga gagye kumbi; na malagano manyi mabi hamibili gyenyu, uba malagano ma milumbu. 14 Na mlumyana gegese gushimgibe kumbi afili a nyama gyage, gugo mtu gwibagulwa na batu bage; gwabele malagano manyi. 15 Abetcha amsambile Iblahimu, Salai mmachobe, gushigiswa china lyage Salai iyaka, wa bibyo china lyage gwigiswa Sala. 16 Nene nimmala mihaa, na iyaka niuha mwaana weli, ehe, nimmala mihaa, nage gubi mmabaana ba mioga, na maoolo ma milongo gya batu bihuma weli. 17 Haho Iblahimu gumginamine ndaa ha hasi gee nuuseya, gudogomine mnda mtima, Wi wii! Mtu gwa myaa sambi, wage unabuswa mwaana? Nage Sala gwina myaa maumi yahabula? 18 Iblahimu gumsambile Abetcha, Nambo ii Ishimaeli gwisuba na mwego umbele obe. 19 abetcha aganine, Bishi bibyo, chigilwe ii Sala mmachobe noo gwiubutila mwaana gwa mlumyana, na gogwe wimgita china lyage Isaka. Na nene nibiya malagano manyi masugu mose weli uba malagano ma milumbu wa yulu ya ibushi yage hanyuma hage. 20 Na wa mwano gwa Ishimaeli niuhuliche, nimmalile mihaa, nim'bucha, na nene nimlibiya abisa abisa,Gwibuta baana ba maoolo umi na babili, na nene nimita gabe mmoga gwata. 21 Bibyo malagano manyi nimabiya magimanyu masugu mose uli Isaka, guya mine Sala gwiubutila mengo nahi mano mwaa gwichwa. 22 Abetcha aleile udogoma nage, Abetcha agile uhuma uli Iblahimu. 23 Iblahimu gumguhile Ishimaeli mwanage, na bose beene babushilwe mndu mwage, na bose bene bagulilwe wa bumona bwage, balumyana bose ba mndu gya Iblahimu, gubagishiche kumbi gya tufili twa nyama chabo loka luya lusugu, nahi bimsambile Abetcha. 24 Nage Iblahimu gubele na myaa maumi yahabula na yahabula heligile kumbi cha afili age. 25 Na Ishimaeli mwanage gubele mtu gwa myaa umi na gitatu, heligile kumbi gya afili a nyama chage. 26 Loka luya lusugu Iblahimu gugile kumbi hamwechi na mwanage Ishimaeli. 27 Na batu bose ba mndu gyage, babushilwe mndu gyage, na beligulile na bumona u mmuboo ma mginyi, bagile kumbi hamwechi nage.
Chapter 18

1 MLUME gumchwilile Iblahimu alibu na miamba gya Mamle, helibele mashame ha mchango gwa itula yage mchuba mango ma yuda iingi. 2 Guginuine meeso mage gumonine, na loola, batu batatu bagimanyu umbele wage. Nage helibamonine guhingile abilo ugya ubagaa uhuma ha mchango gwa itula, guginamine ndaa na hasi, 3 guganine, MLUME gwanyi, nambo ninamona yano u meeso mobe nilihusaba ushipita abilo nene mcha gobe. 4 Na mahilwe madi macho muligoge umagulu, mulihoche nahi ha guno mti. 5 Nene namme iliwa icho, mulitoleleche mitima, hanyuma mwabegya, nambo mwamchwila mcha gwenyu. Baganine, Ai lugu, gilaga nahi byawadogoma. 6 Bibyo Iblahimu gudambuile na ugya witula uli Sala, guganine, dambuwa na ulingilile tubada tutatu twa busu bwa lebelebe, usupaganye, uchele mikati. 7 Iblahimu guhingile abilo ugya u mgoma, guleshile mwana ng'ombe gwa mmochu, na msoga, gummele mgichi, nage guhiile abilo. 8 Guguhile buleba na mabele, na mwana ng'ombe gwelihiile, gubabiile umbele wa meeso mabo, gulimene alibu nabo hasi ha mti, nabo balile. 9 Bamsambile, Guli uhi Sala mmachobe? Gugaile, guli nda itula. 10 Gumsambile, chigilwe niugiwilila moka mano mengo mwaa gwichwa, na loola, Salammachobe gwipata mwaana gwa mlumyana. Sala guhuliche haya ha mchango gwa itula yine ibele hanyuma hage. 11 Haho Iblahimu na Sala basibele miungu, na myaa gyabo giingi, na Sala gusibele gwahuhwa umona bya baachana. 12 Wa bibyo Sala guseile mnda mtima gwage, guganine, nisile mmungu, nimona saso, na mlumyanyi mmote? 13 MLUME gumsambile Iblahimu, Yulu yai Sala gwaseya na gwagana, Winene Nene nibuta mwaana, na nene nahuota? 14 Hali inywa nai ya igumu umima MLUME? Wa mengo mage nimchwila, moka mano mengi ma mwaa, Sala gubi na mwaana gwa mlumyana. 15 Sala guhaninye, ugana Nisaseya, bululi gumonine booba. Nage guganine, MLUME guganine iyaka waseya. 16 Hanyuma babo batu bachuwile na haya na uhugulula byenyi byabo lubi lwa Sodoma. Iblahimu gugile hamwechi nabo gabashindiche. 17 MLUME guganine, Wi wii! Nam'bise Iblahimu ihisho yandihugila, 18 Iblahimu gabeba ilongo yata, yinauoma, na ihitila gee mioga gyose gya ibaloo bilihalila mihaa? 19 Bululi nigidi gwibasambila baana bage, na ndu gyage hanyuma hage bawashi ndila gya MLUME, bagile kiine na uonona, yulu MLUME nage gam'bwilidiche Iblahimu malagano mage. 20 MLUME guganine, Bululu lilo lya Sodoma na Gomola yachili, na bubii bwabo bwabula abisa, 21 mndi, nisala na namone byabalihugila bili nahi lilo linjwilile; na nambo bishibyo niimana. 22 Bibyo baya batu bahumine uya bagile luubi lwa Sodoma; hahoIblahimu gwilibele mgimanyu umbele wa MLUME. 23 Iblahimu gummyile , gumganine, Wi wii! wihyagila bene bina kiine hamwechi na basone? 24 Nambo habeba bene bina kiine maumi matano mnda mbuga wibahyagila, na ushinashiga mbuga yulu ya baya maumi matano bina kiine balimo? 25 Nangu ushigile bibyo, ummaga mine gwina kiine hamwechi na msone, gwa kiine gabe nahi mtu msone. Nangu! Mmononyi gwa ibaloo yose gashigile kiine? 26 MLUME guganine, Nabemona mnda Sodoma beene bina kiine maumi matano mmbuga, nigileya bihana byose wa yulu yabo. 27 Iblahimu guganine, Bino naosha udogoma na MLUME, na nene nili ihwili na mto kaa. 28 Hange banahunguwa batano u baya maumi matano beene bali na kiine, wii! wihaga mbuga gyose wa uhungula batu batano? Gunanine, nishihaga inangwa balimo batu maumi nana na batano. 29 Iblahimu gugililile udogoma nage, guganine, Hange banamoneya mmo batu maumi mana? Guganine, nishigila yulu ya babo maumu mana. 30 Guganine, MLUME gashibe na sungu, nene nadogome, Hange banamoneya batu maumi matatu? Guganine nishigila nambo nabemona mmo batu maumi matatu.
32 Guganine, MLUME gashibe na sungu, nene nidogoma luno lwendo lumwechi kaa, Hange unamoneya uya batu umi? Gumganine, Nishihaga wa yulu ya batu babo umi. 33 Haho MLUME halihwile udogoma na Iblahimu guligile lwage; Iblahimu nage gugiwile wesushama
Chapter 19

1 Bibyo, baya bamalaika babili bagile Sodoma mengo na igolo; na Luti gubele mshame ha mchango gwa Sodoma, Luti gubamonine guchuwile na ugya ubagaa, guginamine ndaa na hasi. 2 Guganine, BALUME banyi, alibu namtongelela gingilwe mnda nduu gya mcha gwenyu, na lwelo pee mwachuwe mwabeligila lwenyu. Baganine bishi bibyo, mndi twishama mmibanja na uyesha busugu bose. 3 Gubabongele ibumbu abisa, nabo bachwile naq ugingila mnda nduu gyage. Gubahiile biliwa na ubaha mikati gishi gibiye mshimi boo nuya. 4 Mndi hambele bashi na lala, batu ba mmbuga, bashami ba Sodoma, bachunguluwile ndu, bawalubaga na baulu, batu bose bachwile uhuma ngubi chose. 5 Bamgitile Luti, bamsambile, Bali uhi baya batu bene bachwa oli buno busugu? Utuhe boo, yulu tubamane, 6 Luti guhumine ha mchango, na uhamba mchango inyumanyuma. 7 Guganine, Bino, nilihumtendelela, bashiwetu, mushigile bubo bubii. 8 Loolwe, ninabo bawamisiha bopi bashinamana balumyana, ibumbu ino nimma boo mubagilile bili bisoga u meeso menyu, yulu bano batu mushibagile atu, bululi bali bashame hasi ha butato bwanyi. 9 Bamganine, Huma hano! hanyuma baganine, Mtu guno gumwechi guchwile ushama uno wetu u bugenyi; nage mndi gulihubenja uonona! Bino twiugilila gogwe bibee uhima babo. Bamtagiye abisa gugo mtu, gugo Luti, bashenine bagubele mchango. 10 Mndi babo batu bagulole maboo mabo , bamgingiche Luti babali mndu, bahambile mchango. 11 Hanyuma babatele babo batu bali ha mchango buhobu, bawalubaga wa miungu, na baimine na uenga mchango. 12 Bibyo babo batu bamsambile Luti, Wi wii! wina gunge mtu hano iyaka? Sobe buo, baanaq bobe, na bawamisuha gyobe, na ata gegese guli nage mgino mbuge, ubahimye ha ino ihana; 13 bululi beswqe twachwa udogya iona ihana yose, yulu lilo lyage lili lingi u meeso na MLUME; nage MLUME gwatulihila tuhadigye. 14 Luti gutobowile na usambila basage buo; beligondiche misiha gyage, guganine humwe muhume ino ihana bululi MLUME gwidigya gino mbuga.Bibyo gubele nahi guli huina u meeso ma masage buo. 15 Haluhiile lwelo noo malaika nuutundumuna Luti, baganine, Chuwa, uguhe mmachobe na bawamisiha bobe babili bali hano, ushichimine mnda usona wa gino mbuga. 16 Gisingile singile; nabo babo batu bambwatile uboo, na uboo wa mmachage na uboo wa bawamisiha gyage,babili, nahi biya bimmonene MLUME keene, batobwele na ubiya hambuga ha mbuga. 17 Haho habamtobolile hambuga, gomwe guganine, Ulihonye ichili-chuli yobe ya mwego ushilochi unyuma, na ushigimane mmiiyo ibetabeta hohose; usinine uloono, ushichwe uchimina. 18 Luti gubasambile, bishi bibyo balume banyi! 19 Loola, mcha gobe gwahewa misa u meeso mobe, na Gogwe wagililila umonya uleelela obe byawangilila wa uhonya ichuli-chuli yanyi ya mwego, na nene nishiosha usinina uloono bululi nashibangwe na uya usona, niiwa. 20 Bino gino mbuga gili hoka, nagisinine, ati gili gicho gino?Na ichili-chuli yanyi ya mwego ibi poo. 21 Gumsambile, Loola, nuugitabicha ata wa ino inywa, ugana nishidogya gino mbuga gyolihugana. 22 Abilo, ubesinina ubo,yulu nishigila inywa yoyose ndaa na byoligingila moo. Wa biyo china lya giya mbuga gigisilwe Soali. 23 Chuba libele lya hutobowa hegulu ha sii Luti haligingile Soali. 24 Haho noo MLUME helinyeshiche hegulu ha Sodoma na Gomola abigo na ahyaauhuma hegulu ha MLUME. 25 Gugwishiche mamo mabuga na Ibetabeta yose, na bose bene bashamine mmamo mabuga, na byose bimenine mnda giya sii. 26 Haho mmachi gwa Luti gulingamine unyuma wage, gugaliwile uba ihanda ya miinyu. 27 Iblahimu guchuwile halwelo ugya ugimana haya halibele mgimanyu na MLUME, 28 nage gulingamine ubii lwa Sodoma na Gomola na sii gyose gya iya Ibetabeta, gumonine, na loola ,mii gwa ibaloo gwasela, nahi mii gwa lwenge. 29 Bibyo Abetcha halidogiche mamo mabuga ma Ibetabeta, Abetcha aengeleche Iblahimu, gummuminye Luti mnda usona byelidogiche maya mabuga melishamine Luti. 30 Luti guchuwile uhuma Soali gushamina uloono, na bawamisiha bage bopi hamwechi nage, yulu gusinine ushama Soali. Gushamine mnda miao, gee na bawamisiha bage. 31 Guya mmosobu gumsambile mnunage, Setu gusili mmungu, na hashi ata mlumyana mnda gino sii gatugingilile nahimishaminyi gya ibaloo yose. 32 Biyo, na tumnywishe setu malwa, tulale nage.yulu tumusile setu ibushi yage. 33 Banywishiche sabo malwa buya busugu, guchiwile guya mmosobu nulala nage, na Luti gushibele na mwano helilalile na heligile. 34 Haho lusugu lwa mabili mmusobu gumsambile mnunage,Loola, nalala mnakeshi na tata, tumnywishe iyaka malwa buno busugu, wagingile na walale nage. 35 Banywishiche iyaka sabo malwa buya busugu, guchuwile mnuna batu gulalile nage,na Luti gushi na mwano helilalile na helihumine. 36 Haho babo bawamisuiha ba Luti baswalile magumo ma sabo. 37 Guya mmosobu gubushile mwaana, gumgishile china lyage Moabu, ata na lino. 38 Na guya mnuna batu nage gubushile mwaana gumgishile china lyage Benami; gugo noo sabo na Baamoni ata na lino.
Chapter 20

1 Iblahimu guhumine ubo nugya sii gya uboo uachi, gushamine hawingi ha Kadeshi na Shuli, nage gugyatile m Gelali. 2 Iblahimu guganine Sala mmachage, Gugu ii kachanyi. Haho Abimeleki oolo lya Gelali guhilile batu gumguhile Sala . 3 Bibyo Abetcha amchwilile Abimeleki u malo ma busugu , gumsambile, usili mmu gogwe yulu ya gugu mmachana gwawaguha, yulu ii mmachi gwa mtu. 4 Haho Abimeleki gubele gushinamyila, guganine, Ee MLUME, Wi wii! Wihaga ata na mmoga gwina kiine? 5 Wi wii! Gusasambila gee mine ugana gugu ii kachanyi? Na mmachana nage gugana, Gugu ii nyumyanyi. Wa yulu ya iwilila wa mtima gwanyi, Na wa yulu ya maboo manyi mahaha, nagila bino. 6 Abetcha amsambile u malo, Na nene namana ugana wa uwilila wa mtima gobe wagila bibyo, noo yulu nene nuuchibila ushingila buube, wa bibyo nisuuleya umude. 7 Bino, hano, umgiwiche gugu mmachana wa guno mtu, yulu gee iyi ibuli, nage gwiusabila, ube na mwego. Nambo ushimgiwicha, umane ugana wa chigilwe wiiwa gogwe na batu bose boli nabo. 8 Abimeleki gubyuwile halwelo pee, gubagitile bacha bage bose, gubasambile binywa bibyo byose mmatu mabo, na babo batu bamonine booba abisa. 9 Hanyuma Abimeleki gumgitile Ablahamu, gumsambile, Watuita ii? Nulubila ii, na ulusha yulu yanyi na yulu ya buoolo bwanyi buube bwata? Wangilila bigilanywa bishinagiliya. 10 Abimeleki gumsambile Ablahamu,Wamona ii ata uhishe ino ihisho? 11 Iblahimu guganine, bululi nimonine, ugana ha ino ihana ,nabo bipaga yulu ya mmachanyi. hashi booba bwa Abetcha. 12 Nage chigilwe ii kachanyi, msiha gwa seto, ila gushi mwaana gwa mago, haho gee nuba mmachanyi. 13 Mndi haya helipilile Abetcha uhuma mndu gya tata, nimsambile, ino noo yano, yolingitila. Ihana yose yatwigingila, ugane,Gugu ii mmachanyi. 14 Bibyo abimelekiguguhile mmoo, na ng'ombe, na baacha na bagichi, nuuma Ablahamu, gumgiwidiche sala mmachage. 15 Abimeleki guganine, Loola, Sii gyanyi gili umbele wa meeso mobe, shama oli hubenja. 16 Abimeleki gumsambile Sala, Loola! Namma mshiwenyu bumona uki, bube bwa uwila meeso oli umbele wa bose bali hamwechi nobe, na gogwe ubi na kiine umbele wa batu bose. 17 Iblahimu gumsabile Abetcha, Abetcha noo ummonya Abimeleki, na mmachage, na bagichi bage, nabo nuubuta baana. 18 Bululi MLUME gubele mmambe magumo ma batu ba mndu mwa Abimeleki, bashibute, wa yulu ya Sala mmachi gwa Iblahimu.
Chapter 21

1 MLUME gumchwilile sala nahi byeliganine, na MLUME bumgilile nahi byeliganine. 2 Sala guswalile gumo gumbutile Iblahimu mwaana gwa mlumyana u buungu bwage, u mwngo melisambilwe na Abetcha 3 Iblahimu gumgitile china lyage Isaka, guya mwaana gubushilwe, mine Sala gwelim'butile. 4 Iblahimu gumgishiche Isaka mwanage kumbi, helisibele ma masugu inana, nahi bimsambile AbetchA. 5 Nage Iblahimu gubele mtu gwamyaa sambi, halibitile mwanage Isaka. 6 Sala guganine, Abetcha angita nene useya; gegese gwihulicha gwiseya hamwechi nanyi. 7 Guganine, Mnanyi gwabasambila Iblahimu, Sala gwikokya mwaana? Bululi nam'butila mwaana u buungu bwage. 8 Mwaana guulile, guleichiwe ukoka; Iblahimu guhyiche biliwa bya saso luya lusugu luleichwe Isaka ukoka. 9 Sala gommonine guya mwaana gwa Hajili Mmisili, gwelibutile Iblahimu, gulihuita msebululo. 10 Wa bibyo gumsambile Iblahimu, Mchinge mgichi hamwechi na gugu mwanage, bululi mwana gwa mgichi gushihyana hamwechi na mwananyi, Isaka. 11 Na iyo inywa ibele isone abisa u meeso ma Iblahimu, wa yulu ya mwanage. 12 Abetcha amsambile Iblahimu, ino inywa isibe isone u meeso mobe, wa yulu ya gugo mwaana, na gugo mgichi gobe. Yoyose yine yiusambila Sala, hulicha lidi lyage, Bululi uhitila Isaka ibushi yobe yigiswa. 13 Nage mwaana gwa mgichi nimita uba mmoga, yulu gugu nage ii ibushi yobe. 14 Iblahimu gubyuwile lwelo pee guguhile mkati ma ibila ya madi, gummele Hajili na umswiya uombe lyage, na mmwalubaga, gumsambile; nage guchuwile, guchinine mnda mlele lya Beel-sheba. 15 Maya madi mahwile mmibila, gumlachiche mwaana hasi ha imwe ihuhu. 16 Hajili gugile ushama mbalamwa, koo na mwanage nahi ulaha wa utele mgwii; bululi guganine, Nashimone wiwila mmwalubaga; nahe gushamine gulihulingamina, wa lidi lyage lyata, gulilile. 17 Abetcha ahuliche lidi lya mmwalubaga. Malaika ma MLUME mamgitile Hajili uhumina hegulu, mamsambile, Wina ii, Hajili? Nangu uwa booba, bululi Abetcha ahulicha lidi lya mmwalubaga uya weli. 18 Gimana, uginune mmwalubaga, na um'bwate mmaboo mobe,yulu nimmita uba ilongo yata. 19 Abetcha am'bulule meeso,nage nuumona ishima ya madi; gugile na uigilucha ibila na madi, na uunywisha mmwalubaga. 20 Abetcha oo nuuba hamwechi na gugo mmwalubaga, nage nuula, gushamine mlele, nuuba mshi gwa buta. 21 Gushamine mnda lele lya Palani; mnage gumguhile mmachi mnda sii gya Bamisili. 22 Habele maya mengo Abimeleki, na Fikoli mmata gwa bilume pambwa byage, bamsambile Iblahimu, baganine, Abetcha ali nobe mnda byose byolihugila. 23 Bino hano undahile uli Abetcha, ugana ushigilila bya buyanja, ata na mwananyi, ata na midulwanyi, mndi ulamana na yano yandiugilile wangilile na nene, na gino sii gyine gyawagyata mwaili. 24 Iblahimu guganine, nilaha. 25 Hanyuma Iblahimu gummambile Abimeleki wa yulu ya ishima ya madi yine isapilwe na macha ba Abimeleki. 26 Abimeleki gudogomine, Nene nishigidi mnanyi mine gwagila iyo ihisho, na usbisambile ata, na nishihuliche gugo mwano, uhulicha mlino kaa. 27 Iblahimu guguhile mmoo na ng'ombe nuuma Abimeleki na babo babili babiile malagano. 28 Iblahimu gubiile baana ba miyoo njwii ba maota gee buchima. 29 Abimeleki gumsambile Iblahimu, Bano baana ba miyoo njwii, bawabiya boo buchima noo ugana wii? 30 Guganine, Bano baana ba miyoo njwii ba maota wibaguha mmaboo manyi, babe ubangisiya wa umonya ugana mnene nidabile ino ishima. 31 Wa bibyo guigitile iya ihana Beel-sheba, bululi balahile uya bose babili. 32 Haho baitile malagano uya Beel-sheba. Abimeleki, na Fikoli mmata gwa bilime pambwa byage, bachuwile bagiwile mnda sii gya Baflisti. 33 Iblahimu guunine mti gusuha biguma bilahu uya Beel-sheba, Guligishile china lya MLUME Abetcha a milumbu. 34 Iblahimu gushamine nahi mgenyi mnda sii gya Bafilisti masugu meengi.
Chapter 22

1 Habele hanyuma ha bibyo bihisho Abetcha amtondile Iblahimu, gumsambile, Ee Iblahimu! nage gugaile, Nene nili hano. 2 Abetcha guganine,Umguhe mwanobe, ihene yobe, gosuunda, Isaka, wagye lobe mnda sii gya Moliya, wamtambikile lutangi lwa uchigyauya hegulu ha lumwe loono lwandusambila. 3 Iblahimu guchuwile umayaya, guganjile punda gyage, guguhile bawalubaga babili hamwechi nage na Isaka mwanage, gunogile kunyi cha yulu ya lulo lutangi lwa uchigya, guchuwile, gugile ndaa na ihana yine yelisambilwe na abetcha. 4 Lusugu lwa matatu Iblahimu guginune meesi mage, guimonine iya ihana wa koo . 5 Iblahimu gusambile baya bawalubaga bage, Shamwe benywe hano hamwechi na punda, na nene na mmwalubaga twigya uya, twatangile, na twabegiwila wamli. 6 bibyo Iblahimu guchiguhile kunyi na lulo lutangi, gumswiiche Isaka mwanage; guguhile ahyaa na aele mmuboo mwage, bagile bose babili hamwechi. 7 Isaka gudogomine na Iblahimu sage,guganine, Tata! Nage gugaile Nene guno, mwananyi. Guganine, Loola! Ahyaa noo haali, na kunyi chili hoo, guli uhi mwana mmoo gwa lutangi lwa uchigya? 8 Iblahimu gugaile, Abetcha iliha oo ene mwana mmoo gwa lulo lutangi, mwananyi. Haho bagililile bose babili hamwechi. 9 Bahiile iya ihana yelisambilwe na Abetcha, Iblahimu gulongiche butambikilo uya, gubiile kunyi tayali, hanyuma gummambile Isaka mwanage,gum'biile hegulu ha butambikilo, hegulu ha chiya kunyi. 10 Iblahimu gugolele uboo wage, gughile aele yulu gamshinje mwanage. 11 Haho malaika ma MLUME gumgitile uhuma hegulu, guganine, Iblahimu! Iblahimu! Nage gugitabuwile, Nene guno. 12 Malaika guganine, Ushimgolwele mmwalubaga uboo obe, na ushimgilile atu; bululi bino nahumana ugana ulihumnyemya Abetcha, byosangima mwanobe, ihene yobe. 13 Iblahimu guginune meeso mage , gulolile, na umuna, mlume gwa mmoo guli hanyuma hage, gwahambwa meega mage u tabi lya mti. Haho Iblahimu gugile uguha gugo mmoo, gugutangile guba lutangi lwa uchigya na ugalula yulu ya mwanage.
15 Malaika ma MLUME mamgitile Iblahimu lwendo lwa bubili uhuma hegulu 16 guganine, Nahala wa ichuli-chuli yanyi ya mwego gwagana MLUME, bululu wagina ino igisho, na usangima mwanobe, ihene yobe, 17 wa yulu ya uhalila mihaa niuhalila mihaa, na wa yulu ya uubucha niibucha ilongo yobe nahi tumbalambala twa hegulu, na nahi isee ili wibwga; na ibushi yobe yitabala mchango gwa tumangu twabo; 18 Na uhitila ibushi yobe mioga gyose gya ibaloo gyilihalila mihaa; na yulu wawasha lidi lyanyi. 19 Haho noo Iblahimu gubagiwilile baya bawalubaga bage, bachuwile , bagile bose hamwechi ndaa na Beel-sheba; Iblahimu gushamine uya Beel-sheba. 20 Hanyuma ha bibyo bihisho, Iblahimu gusambilwe ugana, Loola, Milka nage gwam'butula Naholi mshiwenyu mwaana; 21 Usi, bubele mbuswa gwage mtangi, na Buzi mshiwabo, na Kemueli, sage gwa Alamu,; 22 na Kesedi, na Hazo, na Pildashi, na Yidlafu, na Bethueli. 23 Bethueli gubutile Lebeka; babo inana Milka belibutile Naholi mshiwabo na Iblahimu. 24 Na msei nage Leuma nage gubushile Teba na Gahamu na Tahashi na Maaka.
Chapter 23

1 Bibyo myaa gya Sala gibele myaa sambi na maumi mopi na njwii noo myaa gya Sala. 2 Sala guwile uya Kilith-alba, noo Hebuloni, mnda sii gya Kanaani. Iblahimuguchwile umlilila Sala na ubiya malilo. 3 Ibahimu guginwine uhuma witumba ya mmachage, gudogomine na baana ba Hethi, guganine, 4 Nene nilimgenyi, na nilihuena wenyu; pewe ihana ya uchyila, ibe yanyi, namchiye mmachanyi gahume umbele wanyi. 5 Baana ba Hethi bamgaile Iblahimu, bamsambile,, 6 Utuhuliche, Ee, mlume, gogwe noo mtu mmata abisa uli mwana gwa Abetcha watuli, uchiye itumba yobe mliya sinda lyolisobola mnda chicho sinda chetu. Hashi mtu watuli gwiuhanyinya sinda lyage, ushichiya itumba yobe. 7 Iblahimu guchuwile na uginama umbele wa batu ba gigyo sii, umbele wa baana ba Hethi. 8 Nage gugombole nabo, guganine, Uba malanga menyu naichiye itumba yanyi ihume umbele wa meeso manyi, mupuliche, mugyuysabila wa Efloni msiha gwa Sohali, 9 bululi gape mgumbo gwa Makpela, guli ulugumba lwa lubala lwage, na gape wa ugula uli wa usoga, hawingi henyu yulu ibe ihana yanyi ya uchiila. 10 Haho Efloni gubele hushama hwingi ha baana ba Hethi. Efloni Mhiti gumgaile Iblahimu, na baana ba Hethi balihuhulicha, ata na abtu bose bene balihugingila mnda mchango gwa mbuga gyage, guganine, 11 Bishi bibyo, mlumyanyi upuliche. Luya lubala nuuha loo, na mgumbo guli hoo nuuha, uchiye itumba yobe. 12 Iblahimu guginamine u meeso ma batu ba giya sii. 13 Gusambile Efloni, na batu ba giya sii balihuhulicha, guganine, Ibumbu ino upuliche nihana buguchi bwa lubala, na gogwe ubuguhe wandi, na nene niichiya moo itumba yanyi. 14 Efloni gumgaile Iblahimu, gumsambile,
16 Iblahimu gugitabuwe binywa bya Efloni. Iblahimu gummele Efloni buya bumona bweliganine u matu ma baana ba Hethi, shekeli cha bumona sambi china nahi byachilihugia na batu ba udagulanya. 17 Bibyo lubala lwa Efloni lubele uya Makpela ugya luubi lwa Mamle, lubala, na mgumbo gwine gubele mo, na miti gyose gibele mo mlubala, gibele u ng'umba chage ngubi chose, byose bigulilwe 18 uba bitundu byage Iblahimu, u meeso ma baana ba Hethi, na umbele wa batu bose bene balihugingila mnda mchango gwa mbuga gyage. 19 Haho hanyuma ha bibyo Iblahimu guchiile mmachage Sala mnda mgumbo gwa lubala haya Makpela lubi lwa ugya Mamle, noo Habuloni, mnda sii gya Bakanaani. 20 Na luya lubala, na mgumbo gwine gulimo, bimanyiye uba bitundu bya Iblahimu na baana ba Hethi, uba ihana ya uchyila.
Chapter 24

1 Haho Iblahimu gubele na myaa giingi, na MLUME gubele gwahuummalila Iblahimu mihaa u bitu byose. 2 Iblahimu gusambile mgichi gwage, mmungu gwandu gyage, gubele hulola bibya byage byose, Ibumbu ino, uubiye uboo obe hasi ha ilimbago yanyi, 3 na nene niulahila wa MLUME, Abetcha a gulu, na Abetcha a sii, ugana ushimguhila mwananyi mmachi hawingi ha misiha gya Bakanaani bano bandimshame hawingi habo. 4 mndi ugye mnda sii gyanyi, na u mmoga gwanyi, wamguhile mwananyi Isaka mmachi. 5 Guya mgichi gumsambile, Hange guya mmachana gushioleya uchwa nanyi ndaa na gino sii, wi wii! Namgiwiche mwanobe mpaga sii gyolihumine? 6 Iblahimu gumganine, Ube lwenge lululme, ushimgiwiche mwananyi ubo. 7 MLUME, Abetcha a gulu, apuminye mnda ndu gya tata, na udogoma nanyi mnda sii gyandibushilwe, gundahile nuugana, Nibaha ba ibushi yobe gino sii; gee gwimmila malaika mage hambele hobe, na gogwe wimguhila mwananyi mmachi uhuma uya. 8 na guya mmachana gusahuuswa uchwa nobe, bibyo, wisulwa mnda ilaha wanyi uno; mndi ushimgiwiche mwananyi uya. 9 Guya mgichi genuubiya uboo wage hasi ha ilimbago ya Iblahimu mlumyage, gumlahile wa iyo inywa. 10 hanyuma gugo mgichi guguhile ngamiya cha mlumyage gee nuugya, bululi bibya byose bya mlumyage bibele mmaboo mage, genuugya ndaa na Mesopotamiya, ndaa na mbuga gya Naholi. 11 Guchibungiche ngamiya machwii hambuga ha mbuga alibu na ishima ya madi mengo ma igolo, mengo masugya baachana utaha madi. 12 Nage guganine, Ee MLUME, Abetcha a mlumyanyi Iblahimu, nihusaba bino bihisho byanyi ubihe luhanga lusoga lino, umme yano yobe mlumyanyi Iblahimu. 13 Loola! Nagimana alibu na ishima ya madi, na bawamisiha gya batu na mbuga bahuhuma utaha madi, 14 mndi na bebi bino; guya msiha gwandisambila, Sula mtondo gobe, nusaba, nanywe madi, gabegana, ubenywa, na nene ninywisha na ngamiya chobe nacho,; bibyo noo guya golisobolelemgichi gobe Isaka; mndi wa bibyo noo handimana ugana wamonya yano yobe uli mlumyanyi. 15 Haho, gushinahwa udogoma, loola, Lebeka gwahuchwa, msiha gwa Bethueli mwaaana gwa Milka, mmachi gwa Naholi, mshiwabo gwa Iblahimu, nage gwina mtondoha ombe lyage. 16 Nago guya msiha gubele hungwe abisa u yenyi yage, inyundu, na ata balumyana bashinammana; gusalile mmishima, gugiluche mtondo gwage, gee nuusele. 17 Haho guya mgichi guhingile abilo ugya umgaa, guganine, Ibumbu ino upe madi macho mnda mtondo gobe nanywe. 18 Nage guganine, unywe, mlumyanyi, guitile abila, gusulile mtondo gwage mmaboo mage, gee nuunywisha. 19 Na ata helihwile uunywisha guganine, Na ngamiya chobe nichitahila, na ata byachihwa unywa. 20 Guitile abilo, gugesile madi na mtondo gwage mnda isengo, gugile abilo mmisima utaha,guchitahile ngamiya chage chose. 21 Haho gugo mtu gumlolile na meeso ma chunguchungu, gushamine pii, bululi gamane nambo MLUME gwawasha lwendo lwage nambo nangu, 22 Haya ngamiya hachihwile unywa, guya mtu guguhile lupete lwa nolo, bushito bwage bubele ibaa ya shekeli, na suu chibili u maboo mage, bushito bwage bubele shekeli umi cha nolo, 23 guganine, Uli msuha gwa nanyi gogwe? Ibumbu ino usambile. Wi wii! Uli ihana u ndu gya sobe tuoshe ushama imwe ihindi? 24 Guganine, Nene nili msiha gwa Bethueli mwaana gwa Milka, gwelibutile Naholi. 25 Gumsambile iyaka, Wetu uli byanyi biingi bya ulisha, na ihana ya ushamya bagenyi. 26 Guya mtu guginamine na umginuna MLUME, 27 Guganine, Na gaginunywe MLUME, Abetcha a mlume a mlumyanyi Iblahimu, guya mine gusaleya keene chagena kiine gyage wa mlumyanyi. MLUME gwangolwela nene na nene umona ndila gya uhiya undu gya mashiwabo na mlumyanyi. 28 Haho gugo msiha gugile abilo, gubasambile batu ba ndu gya mmage bibyo bihisho. 29 Na Lebeka gubele na nyumyage, china lyage Labani guchuwile abilo umgile guya mtu wishima. 30 Bibyo , helimonine luya lupete, na lusuu u maboo ma kachage, guhuliche binywa bya kachage Lebeka, gulihugana, Bibyo noo byasambila gugo mtu, haho gumgilile guya mtu, na loola, gulimgimanyu alibu na ngamiya haya hishima. 31 Guganine, Alibu, gugwe ulimmalwe mihaa na MLUME, yulu yai wagimana hambuga? Bululi nahuubiya ndu yulu yobe, na ihana ya ngamiya. 32 Na guya mtu gugingile mnda ndu, guchihambile ngamiya, nage guchihele byanyi na byuya bya ngamiya, na madi na usuwa magulu mage, na magulu ma baya batu beligila nabo. 33 Bahiile biliwa, haho guganione, Nishiya nambo nishi nalisamba binywa byanyi. Bibyo Labani guganine, ehe, Ubedogoma. 34 Guganine, Nene nili mcha gwa Iblahimu,
36 Na Sala, mmachi gwa mlumyanyi, gum'butuli mlumyanyi mwaana gwa mlumyana, u buungu bwage; nage gummele byose byeli nabyo. 37 Hanyuma mlumyanyi gwadahicha guganine, ushimguhile mwananyi u misiha gya Bakanaani, bene bandimshame mmibaloo yabo. 38 Bino, ugye ndaa na undu gya tata, na wibushi yanyi, wamguhile mwananyi mmachi. 39 Nimsambile, mlumyanyi, Hange gugo mmachana gushibenja uchwa nanyi. 40 Gusambile, MLUME, mine gwandihugyata u meeso mage, gwihila malaika mage ugyata hamwechi nobe, gwigolola ndila gyobe; na gowe wamguhile mwamanyi mmachi mnda ibushi yanyi, na gwa ndu gya tata. 41 Haho wisulwa ulaha wanyi holihyila ibushi yanyi, nabo basahuha gugo msiha, wisulwa ulaha wanyi. 42 Na nene nahiya lino wishima, nagana, Ee MLUME, Abetcha a mlumyanyi Iblahimu, wahingolwela ndila gyandi hugya. 43 loola, Nagimana alibu na ishima ya madi; mndi na bibe bino, msiha gyine gwichwa utaha madi, nabamsambila, Upe, nuusaba, madi machoo mnda mtondo gobe nanywe, 44 nage gusambile, gogwe ubenywa, na ngamiya chobe nichitahila, gugo noo gabe mmachi mine MLUME gwelibiile mwaana gwa mlumyanyi, 45 Haho habele nishinahwa udogoma mnda mtima gwanyi, loola! Lebeka guchwile, na mtondo haombe. Gusalile mmishima gutahile,. Nene nimsambile, Ibumbu ino upe madi nanywe. 46 Guitile abilo gusulile mtondo gwage hasi, guganine, Unywe, na ngamiya chobe nichinywisha nacho. 47 Hanyuma nim'budiche, nigsnine, Uli msiha gwa nanyi gogwe? Nage gugaile, Nene nili msiha gwa Bethueli, mwaana gwa Naholi, Milka gwelim'butile. Na nene nim'biile lupete lwa umyembe gwage na lusuu u maboo mage. 48 Niginamine, nimsalile MLUME hasi, nimtonine MLUME, Abetcha a mlumyanyi Iblahimu, angolwele mndila, namguhile mwaana gwa mlumyanyi msiha gwa mshiwabo. 49 Bino, nambo mulihubenja umgilile keene na chigilwe mlumyanyi, sambilwe nanbo bishi byo, sambilwe yulu nagaluwe luubilwa uboo wa ulume ao lwa uboo wa uachi. 50 Haho Labani na Bethueli mamgaile baganine, Ino inywa yahumawa MLUME, na ata beswe tushinaosha uusambila inywa isoga na ata isone. 51 Loola gugo Lebeka gulu umbele ubo, ubemguha, ugye nage gabe mmachi gwa mwaana gwa mlumyobe, nahi biganine MLUME. 52 Haho mgichi gwa Iblahimu helihuliche binywa byabo, guginamine ndaa nahasi umbele wa MLUME. 53 Hanyuma gugo mgichi gubahele byombo bya bumona na bya nolo na bichwalaganywa gummele Lebeka; na biyu bya bumona bwingi guhele nyumyage na mmage byoka biya. 54 Balile na banywine, gee na batu babele hamwechi nage, nabo bashamine m'busugu. bachuwile halwelo, nage guganine m'bendeya nagye wa mlumyanyi. 55 Myumyage na mmage baganine, msiha gushame watuli mashihunguwe masugu umi, hanyuma gabegya. 56 Nage gubasambile, mushisingye, ubenda ii biya MLUME gwanglila bisoga mndila gyanyi; ndewe nagye wa mlumyanyi. 57 Baganine, lewe tumgite gugo msiha, tum'buche gee mine. 58 Bamgitile Lebeka bam'budiche, Wi wii! Wigya na guno mtu? Gugaile, Niigya. 59 Haho bammilile Lebeka kachabo, na mgichi gwage, na mgichi gwa Iblahimu na batu bage, 60 Bammalile Lebeka mihaa, bamsambile, Kachetu, ube gogwe mmabo gwa uki umi, nyendo uki chingi, na ibushi yobe bahyaane mchango gwa babo bali hubaonywa. 61 Lebeka Guchuwile hamwechi na bagichi bage, nabo bachinine hegulu ha ngamiya, balamene na guya mtu, Na guya mgichi gumguhile Lebeka na uligila lwage. 62 Haya Isaka gubele hugya mndila gya Beel-lahai-loi, yulu gushamine m sii gya uboo uachi. 63 Isaka gugile yulu ya uengelecha wibetabeta mengo ma igolo; guginunine meeso mage, gumonine,uli ngamiya chili huchwa. 64 Lebeka guginunine meeso, nage helimonine Isaka, gusalile hegulu ha ngamiya, 65 Gum'budiche mgichi, Mnanyi gugu mtu gulihuchwa mmibetabeta utugaa? Mgichi gugaile, Gugo noo mlumyanyi. Haho guguhile lushungi lwage na ulihupa. 66 Guya mgichi gumsambile Isaka bigilanywa byose byeligilile. 67 Isaka gumgingiche Lebaka mnda itula ya mnage. Sala, gumguhile Lebeka , gee nuba mmachage, gummundile; Isaka guhungiwe wa yulu ya lubu lwa mnage.
Chapter 25

1 Iblahimu gugondile gunge mmachi china lyage gugitilwe Ketula. 2 Gum'butile Zimlani, na Yokshani, na Medani, na Midiani, na Ishbaki, na Sua. 3 Yokshani gubushile Sheba, na Dedani; na baana ba Dedani babele Baashuli na Baletushi, na Baleumi. 4 Na baana ba Midiani babele , Efa, na Efeli, na Hanoki, na Abida, na Eldaa. Babo bose babele ii baana ba Ketula. 5 Iblahimu gummele Isaka byose byelibele nabyo. 6 Haho baana ba basei nage belibele nabo Iblahimu, Iblahimu gubahele tulambwe, nage gubahuminye ha iya ihana yine ibele ishamr Isaka mwanage, mengo melibele na mwego, bagye luubi lwa mmugulu, ndaa na sii gya Kedemu. 7 Mano noo masugu ma myaa gya mwego gwa Iblahimugyelishamine, myaa sambi, na maumi njwii na gitano. 8 Iblahimu nuuwagee nuuwa, nage nuuwa u buungu busoga, mmungu abisa, gwa masugu meengi, gusumbile u batu bage. 9 Isaka na Ishimaeli baana bage bamchiile mnda mgumbo gwa Makpela, mnda lubala lwa Efloni mwaana gwa Sohali Mhiti, luli luubi lwa Mamle, 10 Mnda luya lubala luguli Iblahimu u baana ba Hethi, uya noo uchiilwe Iblahimu na mmachage Sala. 11 Habele hanyuma ha uwa wa Iblahimu, Abetcha ahalile Isaka mihaa mwanage. Nage Isaka gushamine alibu na Beel-lahai-loi. 12 Ino noo ibushi ya Ishimaeli, mwaana gwa Iblahimu, guya Hajili, Mmisili mgichi gwa Sala gwelibutile Iblahimu. 13 Na mano noo machina ma baama ba Ishimaeli, wa machina mabo na bibushi byabo. Bubele bwa Ishimaeli, noo Nebayothi, na Kedali, na Abdeeli, na Mibsamu. 14 na Mishma, na Duma, na Masa, 15 na Hadadi, na Tema, na Yetuli, na Nafishi, na Kedema. 16 Babo noo baana ba Ishimaeli, na mamo noo machina mabo, na mnda bushamo bwabo, baana ba maoolo umi na bopi ulamana na milongo gyabo. 17 Na gino noo myaa gya mwego gwa Ishimaeli, myaa sambi na maumi matatu na njwii. Nuala mtimo, genuuwa, gusumbile u batu bage. 18 Bashamine uhuma Havila ndaa na Shuli, ugya luubi lwa Misili, u ndila gyugya Ashulu. Gushamine hawingi ha bashiwabo bose 19 Na bino noo bibushi bya Isaka mwaana gwa Iblahimu. Iblahimu gubushile Isaka. 20 Isaka gusibele na myaa maumi mana heliguhile Lebeka msiha gwa Bethueli, Mshami, gwa Padan-alamu, kachage gwa Labani, Mshami,uba mmachage. 21 Isaka gusabile MLUME wa yulu ya mmachage, bululi gubele igumba. Nage MLUME gumtabuwe, na Lebeka mmachage guswalile gumo. 22 Baana bahimene nda mwage. Lebeka guganine uba m'bino, yulu yai nabe na mwego? Gugile um'bucha MLUME. 23 MLUME gumsambile Lebeka, mioga gibili gili mnda mwobe, Na bilongo bibili byigumana utulila mnda mwobe, Ilongo imwechi ibi na uoma uhima ya bubili. Na mulwabatu gwigilila mnuna. 24 Masugu mage ma ubuta hamawilile, loola! Mahasa mabele mnda gumo lyage. 25 Gwa mtangi nuutobowa, nage gubele mgachichu m'bili gose nahi ichwlaganywa ya njuli. Bamgitile china lyage Esau. 26 Hanyuma mnunage nage nuutobowa, na uboo wage uli uwate Esau ashindagulu. Gugishilwe china lyage Yakobo. Isaka gubele na myaa maumi mtuba mmachage halibushile. 27 Baana baomine, Esau gubele mtu gugidi uhibanyama, mtu gwa mgala tu, na Yakobo gubele mtu mmochu gwa usahama mnda itula. 28 Bibyo Isaba gubele huunda Esau, bululi gulile buhibi bwage, na Lebeka guundilw Yakobo. 29 Yakobo guhiile iliwa ya kunde. Esau guchwile uhuma mgala, nage gubele mmimu abisa. 30 Esau gumsambile Yakobo, Ibumbu ino, upe iyo iliwa ya igachichu naye, Yulu nagwa baga nene. Yulu ya bibyo bamgitile china lyage Edomu. 31 Yakobo gumsambile, Lutangi unguche lino kiine gyobe gya bubele bobe. 32 Esau guganine, Loola, nene nisili alibi na uwa, bwingita ii kiine gya ubuswa? 33 Yakobo gumsambile, Undahile kwanja. Nage gumlahile, gumgudiche Yakobo kiine gyage gya bubele. 34 Yakobo gummele Esau mkati na iliwa ya kunde, nage nuuya, nuunywa, hanyuma guchuwile, na uligila lwage, Bibyo Esau gulengiche kiine gyage gya bubele.
Chapter 26

1 Habele ndala mgiya sii, uhima giya ndala gya gitangi gibele masugu ma Iblahimu. Isaka gumgilile Abimeleki , oolo lya Bafilisiti, uya Geleli. 2 MLUME gumtobwele, guganine, ushisale ugya Misili, ushame mnda sii gyandiusambila. 3 Washsme ubugenyi mnda gigyo sii, na nene nibi hamwechi nobe, na uuhalila mihaa, bululi niuha gogwe na ibushi yobe bibaloo binobyose. Nene nigimiya masugu mose ulaha wandilahile na sobe Iblahimu. 4 Nibusha ibushi yobe nahi tumbalambala twa hegulu, nene niiha ibushi yobe bino bibaloo byose , na uhitila ibushi yobe mioga gyose gya gino sii gyilihalila mihaa. 5 Yulu Iblahimu guhuliche lidi lyanyi, guwashiche malagano, na uonona wanyi, na m'bindo gwanyi, 6 Isakagushamine uya Gelali. 7 Batu na iyo ihana bam'budiche mwano gwa mmachage. Guganine, Mkachanyi gugu bululi gusinine ugana, Mmachanyi, batu ba giya sii bashichwe umaga wa yulu ya Lebeka; bululi gubele na yenyi ya buhungwe. 8 Hesibele mshame masugu meengi uya, Abimeleki, oolo lya Bafilisiti, gulingamine mdilisha, gummonine Isaka gulihumbatila-umbatila Lebeka mmachage 9 Abimeleki gumgitile Isaka, guganine, Winene gugu ii mmachobe, yulu yai uganine, Mkachanyi gugu? Isaka gumgaile, Niganine bululi Nashiwe yulu yage. 10 Abimeleki guganine, Ino iyihisho nai yawatugilila? Hange gumwe mtu gwabalala na mmachobe wa nangu ulanga, gogwe wabatubiya mnda abachi. 11 Haho Abimeleki gusambile batu bose, guganine, gegese gwimuda guno mtu ata na mmachage chigilwe gwihagwa. 12 Isaka guunine matete mnda giya sii, gusolile guya mwaa bitanga sambi wa kila imwechi, MLUME gummalile Isaka mihaa. 13 Na gugo mtu guchwile mona, na uba mtu mmata, gugililile utonywa, na umanyiya abisa, 14 Gee nuba na bumona bwa miyoo, na bacha beengi. Babo Bafilisiti bammonene buwa. 15 Na biya bishima byose byabadabile bacha ba sage, masugu ma Iblahimu sage, Bafilisiti babele babihulile, babigiluche bibunduguchu. 16 Abimeleki gumsambile Isaka, Uhume watuli, bululi gogwe uli na uoma utuhima beswe, 17 Bibyo Isaka guhumine uya nugubaa itula yage wibetabeta ya Gelali, gushamine haya. 18 Isaka gugiwile na gubidabile iyaka biya bishima bya madi byabadabile masugu ma sage Iblahimu; yulu baya Bafilisiti babihulile hanyuma ha uwa wa Iblahimu; nage gubigitile machina, ulamana nq machina mabigitile sage. 19 Bacha ba Isaka badabile mmiya ibetabeta, bapashile ishima yina madi ma usuluwa. 20 Baushi ba Gelali bagumene na baushi ba Isaka baganine, Mano madi mmetu. Haho gee nwigita china lya iya ishima Eseki, bululi bagumene nage. 21 Badabile inge ishima, bagumene na iyo iyaka, Guigitile china lyage Sitma. 22 Guhumine ubo gudabile inge ishima, iyo noo yabashigumanine, guigitile china lyage Lehobothi, guganine bino MLUME gwatuitila ihana, na bwswe twibula mnda gino sii. 23 Gugile uhuma haya ndaa na Beel-shebe. 24 MLUME gumchwilile boka buya busugu, guganine, Nene nili Abetcha a sobe Iblahimu, ushimone booba, bululi nene nili hamwecho nobe, na nene niuhalila mihaa, na ubucha ibushi yobe wa yulu ya Iblahimu mgichi gwanyi. 25 Gugimiye butambikilo uya, guligishile china lya MLUME. gugimiye itula yage uya, na bacha ba Isaki badabile ishima uya. 26 Mndi Abimeleki gumgilile uhma Gelali, hamwechi na Ahuzathi genda lyage, na Fikoli, ilume pambwa yage ya bita, 27 Isaka gubabudiche, Yulu yai mwanjwila, na benywe mwakonywa, ati munyingile wenyu? 28 Baganine, Winene tumonine ugana MLUME gubele hamwechi nobe, na beswe tuganine, tulahanye beswe nobe, na ubiya malagano nobe. 29 na ugana ushitugilile bisone, inangwa beswe tushiuudile gogwe, tushibaugilile bisone ila bisuga kaa, tuuleile ugye lobe wa talala; na gogwe bino uli mmalilwa mihaa na MLUME. 30 Haho gubaitile biliwa biingi nabo nuuya naunywa. 31 Bagimene lwelo pee, balahyene boo wa boo, hanyuma Isaka gubaganine, nabo baligilile wabo na talala. 32 Haho loka luya lusugu, bacha ba Isaka, bachwile umsambila mwano gwa iya ishima yababele badabe, bamsambile, Twaimona ili na madi. 33 Nage guigitile china lyayo Shiba; wa bibyo china lya giya mbuga ii Beel-sheba, ata liino. 34 Esau helibele na myaa maumi mana, gugondile msiha gwa Beeli Mhiti, na Basemathi, msiha gwa Eloni, Mhiti. 35 Mitima gyabo Isaka na Lebeka gigilule na mmonywa wa yulu yabo.
Chapter 27

1 Memgo masibele Isaka mmosu, na meeso mage gushihumona yulu ya buhobu, gumgitile Esau, mwanage gwa mmusobu, gumsambile Mwananyi. Nage gugitabwile, Nene nili hano, 2 Guganine, Loola, bino nene nisili mmote, na nishigidi lusugu lwanyi lwa uwa. 3 Bino, nilihuusaba, uguhe migwi gyobe, luuku lobe, na buta bobe, ugye mgala upibile buhibi; 4 Wanongeche ililwa ibenju nahi iya yandisubenja, na wape, yulu naiye; na mtima gwanyi guhalile mihaa, hambele ha uwa wanyi. 5 Na Lebeke guhuliche, Isakahelibele hudogoma na Esau mwanage. haho Esau gugile mgala gahibe buhibi, gachwe nabo. 6 Lebeka gumsambile Yakobo mwanage, guganine, loola, nammulicha sobe guluhudogoma na Esau, mshiwenyu,gulihugana. 7 Upe buhibi, ungitile iliwa ibenju yulu naiye, na uhalila mihaa umbele wa MLUME hambele ha uwa wanyi. 8 Bino, mwananyi, hulicha lidi lyanyi nahi byandiulaga. 9 Ugye abilo u mgoma unguhile baana ba mbuchi babili babanonyu, na nene nihiya iliwa ya ibenju ya sobe, iya yine yesubenja. 10 Hanyuma wagye umma sobe, gaye, yulu guhale mihaa hambele ha uwa wage. 11 Yakobo gumsambile Lebeka mnage, Esau mmulwanyi ii mtu gwa isada ingi ha m'bili, na nene nili mtu gwa m'bili gubongu. 12 Hange tata gwimbabata, na nene nimoneya u meeso mage gwa lulimi; nilichwishicha buloga na ushi uhalilwa mihaa. 13 Mnage gumsambile, Ulogwa obe na ube hegulu hanyi, mwananyi, uhuliche lidi lyanyi tu, ugye uchupa baana ba mbuchi. 14 Gugile, gubaguhile, na nuuma mnage. Mnage guhiile iliwa ibenju, nahi iya yine isubenja sage. 15 Hanyuma Lebeka guguhile bichwalaganywa bibenju bya Esau mwanage gwa mmosobu, byelibele nabyo mndu, nuuchwiya Yakobo mnunage. 16 Na ibambi ya mwana mbuchi nuuchwiya umaboo, na mioshi mwage. 17 Nage nuuma Yakobo mwanage mmaboo mage iya iliwa ibenju, na mkati gwelichelile. 18 Gugile uli sage, guganine, Tata. Sage gugaile, Nene nili hano. Gogwe uli nanyi, mwananyi? 19 Yakobo gumsambile sage, Nene nili Esau, bubele bobe, naita nahi byolinganine. Ibumbu ino, Ubyuwe, ushame dinga, uye buhibi bwanyi, yulu mtima gobe gupalile mihaa. 20 Isaka gum'budiche mwanage, Byaba wii wahaga abisa abilo lino, mwananyi? Gumgaile, Wa yulu ya MLUME, Abetcha obe, gwangabila. 21 Isaka gumsambile Yakobo, Buuchwa, ibumbu ino, yulu nubabate, mwananyi Esau, nambo nangu. 22 Bibyo Yakobo gumshenene Isaka, sage, nage num'babata, guganine, Lidi ii lidi lya Yakobo, na maboo ii maboo ma Esau. 23 Na gushimmanine, bululi maboo mage mabele nahi maboo ma Esau, mmulwage, mali na isada; haho gee noo umalila mihaa. 24 Gum'budiche, winene noo gogwe mwananyi Esau? Guagnine, Noo nene, 25 Guganile, Ubepyicha alibu naya buhibi bwa mwananyi, bululi mtima gwanyi guhalile mihaa. Gushenenye alibu, nage nuuya; hanyuma gee nuuma na byunywa, genuunywa. 26 Isaka, sabe, gumsambile, Sheena alibu abisa, ukumbatile, mwananyi. 27 Gumshenene gumumbatile. Nage guhuliche chumba lya bichwalaganywa byage, gummalile mihaa guganine,Loola chumba lya mwananyi lili nahi chumba lya lubala lwelihalile mihaa MLUME. 28 Abetcha na auhe bya imee ya gulu, na bya unaga wa sii, na bwingi bwa biliwa na byunywa. 29 Mioga na giugilile na bilongo biuginamine, Ube mlume gwa bashiwenyu, Nabaana ba mnobe buginamine. Gwiuloga galogwe, Na gwihalila mihaa gahalilwe mihaa. 30 Haho Isaka helihwile umalila Yakobo mihaa, na Yakobo helihwile uhuma umbele wa Isaka, sage, haho Esau mshiwabo guchwile uhuma u buhibi bwage. 31 Nage byoka biya gwahiya iliwa ibenju gummele sage, gumsambile, sage, Tata, na gabyuwe , gaye buhibi bwa mwanage, yulu mtima gobe gupalile mihaa. 32 Isaka sage, gum'budiche, Gogwe uli nanyi? Guganine, Nene noo mwanobe, Esau bubele bobe. 33 Isaka gudandile ludando lwata abisa, guganine, M nanyi guya gwaguha buhibi nuchupa? Nene nahuhwa uya hambele gogwe ushinachwa, nammalila mihaa ehe, nage gwihalwa mihaa. 34 Esau helihulicha binywa bya sage, gulilile lilo lyata lya usumya mtima, gusambile sage, Palile na nene mihaa, na nene, Ee tata. 35 Isaka guganine, mshiwenyu gwachwa wa buyanja, gwaguha mihaa gyobe. 36 Esau guganine, Wi wii! Gushigisilwe Yakobo wa chigilwe, bululi gwalibiya ha ihana yanyi nyendi chopi chino? Guguhile u bubele bwanyi, hano gwahuguha iyaka mihaa gyanyi. Gubudiche, Wi wii! Tata usambiila na nene gyanyi mihaa. 37 Isaka gugaile, gumsambile Esau, Loola, nam'biya gabe mlume gobe, na bashiwenyu bobe bose namma babe bagichi bage; wa bililwa na wa byunywa namma byo, na gogwe nuitile ii bino, mwananyi? 38 Esau gumsambile sage, wina mihaa gumwechi kaa, tata,? Upalile mihaa nene, na nene, Ee tata, Esau gusediche lidi, gee nuulila. 39 Isaka, sage, gumgaile, gumsambile, Lingamina, hene hali unaga wa sii noo habi ha bushamo bobe, Na hene hali imee ya gulu ilihuhuma hegulu. 40 Wa ahilu obe gogwe ubi poo, na gogwe wimgilila mshiwenyu; Na bibi holihogonowa, Winoga uhambwa obe uoshi lyobe. 41 Esau gummonywine Yakobo yulu ya giya mihaa gimmalile sage. Esau guganine, mnda mtima gwage, Masugu ma ulilile tata mahuhiya, haho noo handimmaga mnunanyi Yakobo. 42 Lebeka gusambilwe bibywa bya Esau, mwanage gwa mmela. Guhilikle mtu umgita Yakobo, mwanage gwiisula, Gumsambile, Loola, mwano gwa Esau, msiwenyu, gwalihungya mtima gwage, bululi gulihuulangala uuhaga. 43 Mndi bino, mwananyi, hulicha lidi lyanyi, uchuwe usinine wa Labani nyumyanyiuya Halani; 44 washame masugu macho ata bishigililwa bya mshiwenyu habyihunguwa. 45 ata byihwa bishigililwa bya mshiwenyu, heligibilila byolimgilile. Haho noo handihila batu uchwa uuguha uhuma uya. Yulu yai nawilwe na benywe bose babili lusugu lumwechi? 46 Lebeka gumsambile Isaki, Mnda mtima gwanyi nishi na laha yulu ya babo misiha gya Hethi, nahi bano misiha gya gono sii, mwego gwanyi gwipa alambwe nai?
Chapter 28

1 Bibyo Isaka gugishile Yakobo, gummalile mihaa, gumlagile, gumsambile, Ushiguhe mmachi gwa misiha gya Bakanaani. 2 Chuwa, ugye Padanalamu, ndaa na u ndu gya Bethueli sobulu, ugye uliguhila mmachi uya u misiha gya Labani, nyumya mnobe. 3 Na Abetcha Dambe, guhalile mihaa, gubuche, na uugilucha, bululi ube sumbilo lya mioga. 4 Guhe miha gya Iblahimu, gogwe na ibushi yobe hamwechi nobe, bululi wahyane sii gyolimgyate mwagili, Abetcha gyelihele Iblahimu. 5 Haho Isaka gusininye Yakobo, nage gugile Padan-alamu wa Labani, mwaana gwa Bethueli, Mshami, nyumyage na Lebeka, mmabo gwa Yakobo na Esau. 6 Esau gumonine ugana Isaka gwammalile mihaa Yakobo na ummila Padan-alamu, yulu galiguhile mmachi uya, na mnda mwa umalila mihaa gumlagile, guganine, Ushiguhe mmachi gwa misiha gya Bakanaani, 7 na wa yulu Yakobo gubele na iuko uli sage na mmnage, gugile Padan-alamu. 8 Esau gumonine ugana misiha gya Bakanaani sage Isaka gushigibandiche. 9 Bibyo Esau gugile wa Ishimaeli gumguhile Mahalathi, msiha gwa Ishimaeli mwaana gwa Iblahimu, kachage gwa Nebayothi, uba mmachage hamwechi na bange baachi belibele nabo. 10 Yakobo guhumine Beel-sheba, nuugya Halani. 11 Guhiile imwe ihana gushamine haya busugu bose, bululi chuba lisibele lyahuchinda; gughile liwe limwechi lya haya gulibiile hasi ha mswe gwage, gulalile tulo hoka haya. 12 Gulishile malo; na loola, m'bambago gwagimiwa hegulu ha sii, songo lyage lahiya ha gulu. Iyaka, loola, bamalaika ba Abetcha balihusele, na usala u gugo m'bambago. 13 na loola, MLUME gwagimana hegulu hago, guganine, Nene nili MLUME, Abetcha a Iblahimu sobe, na Abetcha a Isaka; gino sii gyawalala mwa gili niuha gogwe na ibishi yobe. 14 Na ibishi yobe ibinahi ihwili ya sii, na gogwe wiwilila ihana yose na igolo, na mlugulu na lubi lwa uboo ulume, na uboo wa uachi, na uhula oli na uhuma uli ibushi yobe, bilongo byose bya ibaloo byihalwa mihaa. 15 Na looa, nene nili hamwechi nobe, niuusaose uligya, na nene niugiwicha iyaka mgino sii, bululi nishiuleya, ndaa na byandiugilila bibyo byandiusambile. 16 Yakobo gubyuwile mtulo twage,guganine, chuigilwe MLUME guli hano, na nene nisaba mmane. 17 Nage gumwene booba guganine, ino ihana iyausinywa nahi ii! Hashi adugwa, hano ii ndu gya Abetcha, naho noo mchango gwa ha gulu. 18 Yakobo guchuwile lwelo umayaya, guliguhile liya liwe lyelibiile hasi ha mswe gwage, guligimiya nahi ihanda, na uhongolola mauta hegulu hage. 19 Gugitile china lya iya ihana Betheli; na china lya giya mbuga hambele gigishilwe Luzu, 20 Yakobo gulibindile guganine, Abetcha abeba hamwechi nanyi, gabekusa ndila gyandigya, na uupa iliwa naye, na bichwalaganywa nachale; 21 na nene nabegiwila wa talala mndu gya tata, haho MLUME gubi Abetcha anyi. 22 Na lino liwe lyandagimiya nahi ihanda libi ndu gya abetcha; na mnda yoyose yolipa winene niuha ibaa ya umi yayo.
Chapter 29

1 Hanyuma Yakobo gugile mlwendo lwage na uhiya sii gya baanaba mligulu. 2 Nage gulingamine, na ulola, hali ishima mlubala, na bihichi bitatu bya miyoo bili bilachu alibu nayo, yulu ha iya ishima basunywisha migoma; na habele liwe lyata lya uunina ishima. 3 Migoma gyose gisusumbila haho, batu basubilingisha lilyo liwe ulihunya hegulu ha ishima na uuginywisha miyoo, hanyuma noo uligiwucha liwe hagulu ha ishima hene halishushama. 4 Yakobo gubabudiche, bashiwetu, muli batu ba uhi? Baganine beswe tuli batu ba Halani. 5 Gubabudiche, Wi wii! mumgidi Labani, mwaana gwa Naholi? Baganine tumgidi. 6 Gubabudiche, Wi wii! Guli poo?Baganine, Guli poo, lolaga, Laeli msiha gwage gulimhuchwa na miyoo. 7 Yakobo guganine loola gyili kumyiya meno, mashi naba mengo ma uongole nyama; m'benyisha miyoo, na mugye ugilisha. 8 Baganine, tushinaosha, ata ginaongolwa migoma gyose, nambo batu babebilingisha liya liwe hegulu ha ishima, haho noo hatunywisha miyoo madi. 9 Na ata helibele hudogoma nabo, Laeli guchwile na miyoo gya sage, yulu gubele hugiusa. 10 Haho Yakobo helimoniune Laeli msiha gwa Labani, nyumyage gwa mnage, na miyoo gya Labani nyumyage gwa mnage, Yakobo gushenine, na ulibilingisha liya liwe lihume hegulu ha ishima, guginywishiche miyoo gya Labani nyumyage gwa mnage. 11 Yakobo gummumbatile Laeli, guginune lidi lyage na ulila. 12 Yakobo gummele Laeli mwano gwa ugana gee ii mihwa gwa sage, na ugana gee ii mwaana gwa Lebeka, Haho gugile abilo uha sage mwano. 13 Bibyo Labani helihuluche mwano gwa Yakobo, mwaana gwa kachage, gugile abilo umgaa, na umumbatila, na yambi, na umyicha mndu gyage. 14 Labani gumsambile, chigilwe noo gogwe uda lyanyi na nyama chanyi. Haho Yakobo gushamine wage nahi mwechi gumwechi. 15 Labani gumsambile Yakobo gogwe uli mihwanyi, mndi, wingilila bunene? Usambile alambwe obe abi ii? 16 Labani gubele na bawa misiha babili,china lya mmosobu ii Leya, na chinalwa mnunabatu ii Laeli. 17 Nage Leya meeso mage mabele malema, Bibyo Laeli gubele m'benju na hungwe u yenyi. 18 Yakobo gumdile Laeli guganine,Niugilila myaa njwi yulu yape Laeli, msiha gobe gwa gucho-gucho. 19 Labani guganine, Bili bisoga nuuhe gogwe uli uha gunge mtu; ushame wanyi. 20 Yakobo gugilile myaa njwii yulu gahewe Laeli. U meeso mage mabele nahi masugu macho wa yulu ya biya byelim'bendiche. 21 Yakobo gumsambila Labani, Ubepe mmachanyi, bululi masugu manyi mahuwilila; nagingile weli. 22 Labani guongwele batu bose ba giya mbuga na uhyicha bililwa saso. 23 Haho mengo ma busugu gumguhile Leya, msiha gwage, nuuma Yakobo, Nage gugingile weli. 24 Labani gummele Leya mgichi gwage Zilpa, gabe mgichi gwage. 25 Haho haluhiile lwelo, mndi! M Leya. Gumsambila Labani ino iyii yawangila? 26 Nishiugulile yulu ya Laeli? Bululi bwai wambicha? Labani gubanine, Bishibagiliya bino wetu, ugonja mnuna batu hambele ha mmulwa batu; 27 wilicha masugu mage njwii, haho twiuha gono nage wa bugichi bolingilila, ginge myaa njwii. 28 Yakobo gugilile bibyo, guwiliche masugu mage njwii. Nage nuuma Laeli msiha gwage gabe mmachage. 29 Labani gummele Laeli mgichi gwage Bilha gabe mgichi gwage. 30 Gugingile wa Laeli nage, Gummunjile Laeli uhima Leya, gugilile wa yulu ya Laeli, gunge myaa njwii. 31 MLUME gumonine ugana Leya gushihuunjwa, gusulile gumo lyage; mndi Laeli gushibele hubuta. 32 Leya gusalile gumo genuubuta mwaana, gummele china lyage, Leubeni, yulu guganine, bululi MLUME gwamona asusu anyi; bino mlumyanyi gwikunda. 33 Guswalile iyaka gumo nuubuta mwaana, guganine, wa yulu MLUME gwahilicha ugana nene nishiunjilwe, gwapa na guno; gumgitile chinalyage Simeoni. 34 Guswalile iyaka gumo, gubutile mwaana, guganine, Hanobino mlumyanyi gwilungana nanyi, bululi nam'butila mwaana gwa butatu. Wa bibyo gumgitile china lyage Lawi. 35 Guswalile gumo iyaka, gubitile mwaana. Guganine, Luno lwendo nimtona MLUME; wa bibyo gumgitile china lyage Yuda; gee nuuhamba lubuto
Chapter 30

1 Nage Laeli helimonine ugana gushihum'butila Yakobo mwaana, Laeli gumonene mshiwabo buwa. Gumsambile Yakobo, Pee mwaana; nambo bishi bibyo niiwa nene. 2 Yakobo guchigililwe yulu ya Laeli, guganine, Wi wii! Nene nili ha ihana ya Abetcha, guushibilile lubuto lwa gumo? 3 Guganine, Mgichi gwanyi guno, Bilha, ugimbile weli bululi gabute yulu gabute hegulu ha machwi manyi, na nene napateibushi uhitila gee. 4 Haho gummele Bilha mgichi gwage gabe mmachage. Yakobo gugingile weli. 5 Nage Bilha guswalile gumo, gum'butile Yakobo mwaana. 6 Laeli guganine, Abetcha apa kiine gyanyi, nage gwahulicha lidi lyanyi, genupa mwaana, Wa bibyo gumgitile china lyage Dani. 7 Bilha , mgichi gwa Laeli, guswalile gumo iyaka, gum'bitile Yakobo mwaana gwa bubili. 8 Laeli guganine, wa mahindi mauulu nahimana na kachanyi, nammima. Gumgitile chinalyage Naftali. 9 Leya helimonine ugana gwahuhamba lubuto, gughile Zilpa , mgichi gwage, gummele Yakobo gabe mmachage. 10 Zilpa, mgichi gwa Leya, gum'butile Yakobo mwaana. 11 Leya guganine, mwamdo gusoga! Gumgitile china lyage Gadi. 12 Zilpa mgichi gwa Leya, gum'butile Yakobo mwaana gwa bubili. 13 Leya guganine, Luhanga lusoga wandi, bululi baachana bingita luhanga lusoga. Gumgitile chinalyage Asheli. 14 Leubeni gugile masugu ma uesa ngano gunonine mtundu luhwa mlubala, guguletile wa Leya mnage, Haho Laeli gumsambile Leya, Pee na nene chimwe pwaa cha mwanobe. 15 Nage gumsambile, Wi wii! Iyihisho icho uusapa mlumyanyi; ata bibyo ulihubenja uguha na pwaa cha mwananyi nacho? Laeli gumsambile, Wa yulu ya bibyo lino gwichwa ulala oli buno busugu yulu ya pwaa cha mwanobe. 16 Yakoboguchwile uhuma ulubala na igolo, Leya guchuwile ugyugaa, guganine, Wichwa wanyi tu, wa bululi nuugula yulu ya pwaa cha mwananyi; Yakobo gulalile wage buya busugu. 17 Abetcha ammuliche Leya, nage guswalile gumo, Gum;butile Yakobo mwaana gwa butsano. 18 Leya guganine, Abetcha apa alambwe anyi, bululi namma mlumyanyi mgichi gwanyi. Gumgitile chinalyage Isakali. 19 Leya guswalile gumo iyaka, gum'bitile Yakobo mwaana gwa mtuba. 20 Leya guganine, Abetcha apa mmaso gubenju, mndi bino mmulmyanyi gwishama nanyi, yulu nam'butila mwana gwa mtuba. Gumgitile china lyage Zabuloni. 21 Hanyuma gubutile msiha, gumgitile china lyage Dina. 22 Abetcha ammengeleche Laeli; Abetcha ammuliche, amsulile gumo. 23 Guswalile gumo, gubushile mwaana, guganine, Abetcha apuminya abule anyi. 24 Gumgitile china lyage Yusufu, guganine MLUME gapee gunge mwaana. 25 Haho Laeli halibishile Yusufu, Yakobo gumsambile Labani, Ubendeya nagye wetu, na wibaloo yanyi. 26 Upe baachi banyi na baana banyi, bandiugilile, naligile lwanyi, bululi ugidi ugila wanyi byandiugilile. 27 Labani gumsambile, Nambo namona yano u meeso mobe, shama, yulu namana ugana uhitila gogwe MLUME gwapalila mihaa. 28 Labani guganine, gana alambwe nai oli hubenja, na nene niuha. 29 Yakobo guganine ugidi gogwe byandiugilile,na bibele nyama chobe wandi. 30 Bululi bumona bobe bubele buchoo handishibele nachwa, nabo bwabula uba bwingi, MLUME guhalile mihaa ose wandigile. Bino hano, mengo nai nilingya bya ndu gyanyi nene mine? 31 Labani gum'budiche, nuuhe ii? Yakobo guganine, ushipe atu; ubepisha ino ihisho, nilisha nyama chobe iyaka na uchiusa. 32 Nihita hawingi ha nyama chobe chose lino, na uhunya chiya chose china na bibala-bibala na mihuli-mihuli, na nyama chose cha chihisu uli gigyo miyoo na gili na bibala-bibala na mihuli-mihuli u mamo mabuchi; nacho chibi noo alambwe anyi 33 Na kiuine gyanyi gyimangisiya masugu nene michwa, holichwa ulola yulu ya alambwe anyi ene ali oli. mabuchi momose mene mali na bibala-bibala na mihuli-mihuli, na miyoo gishi gya gihisu gibemoneya wandi, gyibalwa uba gyagibwa. 34 Labani guganine, loola na bibe bibyo byawagana. 35 Haho Labani guhuminye liya chuba mabuchi ma malunga mabi na bitongecho na bibala, na buchi ma maota mali na bibala na mihuli gyogyose gyina ibala ya ihaha, na miyoo gyosegyina gibele gihisu, gugibiile mmaboo ma mwanage. 36 Gulibagulile na Yakobo lwendo lwa masugu matatu; nage Yakobo guusile nyama cha Labani chine chishigele. 37 Yakobo guguhile maongo ma mlubna ma magisi, na mlozi, na mwalamoni, gubandule bibandu, mihuli gya gihaha gimoneye mnda mamo maongo. 38 Gugimiya mamo maongo meli bandulile na umabiya ubishima bya unywishicha madi, haya hachibele huchwa nyama chinywe; chiswalile magumo hachibele huchwa unywa. 39 Nyama chiswalile magumo u mbele wa mamo maongo, chibutile baana bali na bibambu, na bibala na mihuli. 40 Na Yakobo gubagulile baana ba miyoo, nugilosha byenyi bya migoma bilole chiya chibele na bibambu na gyogyose gibele gihisumnda nyama cha Labani, Guchibiile habamba nyama chage, na gishichisumbiche hamwechi na nyama cha Labani. 41 Bibele hachiswalile magumo nyama cha chiomu, Yakobo gubiile maya maongo u mbele wa meeso ma chicho nyama u bishima yulu chiswale magumo hawingi ha mamo maongo, 42 Haya hasuminywe gushibiile iyaka maya maongo. haho chiya chilema chibele cha Labani, na chiya chibele na uoma noo chibelecha Yakobo. 43 Bibyo gugo mtu gugililile abisa, gubele na nyama chiingi, na bagichi, na baacha, na ngamiya, na punda.
Chapter 31

1 Haho Yakobo guhuliche binywa bya baana ba Labani, baganine, Yakobo gwaguha bitundu byose bya setu; na yulu ya bitundu bya setu gwahewa umanyiya uno ose. 2 Yakobo gumonine yenyi ya Labani, ugana gushilingamine bisoga nahi mmnakeshi na m'bunge. 3 MLUMNE gumsambile Yakobo, Ugiwile ndaa na sii gya bamasobe na gya ilongo yobe, na nene nibi hamwechi nobe. 4 Yakobo gutumine batu, gubagitile Laeli na Leya bachwe mgala uli nyama chage. Gubasambile, 5 Namona yenyi ya senyu, gushi huningamina bisoga nahi mna keshi na m'bunge, Bino Abetcha a tata guli hamwechi nanyi. 6 Na benywe mugudi ugana wa uoma wiingi nimgilile senyu. 7 Na senyu gumbidiche gwagalula alambwe anyi nyendo umi; Na Abetcha ashimleile gakonone. 8 Heliganine, Chili na bibala noo chibe alambwe obe, nyama chose chibutile cha bibala. Heliganine, Chili na bibambu noo chibi alambwe obe, haho nyama chose chibutile cha bibambu . 9 Bibyo Abetcha amsapile senyu bitundu byage, na uupa nene. 10 Mndi, nyama hachiswalile magumo, niginune meeso manyi nimonine u malo, na loola malunga mene maundile mabele na mihuli, na bibala, na bibambu. 11 Na malaika ma Abetcha masambile u malo, Yakobo! Nigaile, Nene guno. 12 Guganine, Ginuna, hano, meeso mobe, wamone; malunga mose mene malihuunda mali na mihuli, na bibala, na bibambu; bululi namona byose byeliugilile Labani.
14 Laeli na Leya bagaile, bamsambile, Wi wii! Tuli na ibaa nai na tuli na buhyana nai mnda ndu gya setu? 15 Gusatibiya nahi bagenyi, bululi gutuguchiche, nage gulile bumona bwetu abisa. 16 Bululi bumona bose bwa setu bwine bwamsapa Abetcha, bubo bumona noo busili bwetu na baana betu, Mndi, yoyose yine iusambile Abetcha, uigile. 17 Haho Yakobo, guchiwile, guchininye baana bage na baachi bage hegulu ha ngamiya. 18 Guguhile nyama chage chose, na bitundu byage byose byelibele gwapata, na nyama chelipashile uya Padan-alamu, yulu gahiya wa sage Isaka mnda sii gya Kanaani. 19 Haho, Labani gubele mgibe ugeda miyoo gyage maso, na Laeli gugubile miishi gya sage. 20 Yakobo gum'bunjiche Labani, Mshami, bululi gushimsambile ugana gwasina. 21 Bibyo gusinine gee na byose byelibele nabyo; guchiwile na udabuwa luudi, gulolile yenyi yage ugya lubi lwa Gileadi. 22 Na lusugu lwa matatu Labani gusambilwe ugana Yakobo gwasina, 23 guguhile bashiwabo hamwechi nage, gumlamine lwendo lwa masugu njwii. Gum'bangile u loono lwa Gileadi. 24 Abetcha amchilile Labani Mshami, u malo ma busugu, gumsambile, ube lwenge lulume, ushimsambileYakobo inywa ya luhanga lusoga na ata ya buloga. 25 Lanabi gummyile Yakobo, na Yakobo gubele gwagiliya bitula byage u loono, na Labani gubele gwagimiya bitula byagw na bashiwabo u loono Gileadi. 26 Labani gumsambile Yakobo, Waita ii? Wapunja, wabaguha bawa misiha gyanyi nahi kole chawaswa u bita bya ahilu. 27 Bibyo wasina wa lubisagulu na wapunja, na ushisambile, bululi nalagane nobe uligile wa talala, na ng'imbo cha magoma, na binubi? 28 Na ushileile nabaumbatile baana banyi na misiha gyanyi; umane wagila bya buhugi. 29 Nina uosha oose mmuboo wanyi na uuitila bya usona; lino m'busugu Abetcha a sobe asambila, agana, ube lwenge lulume, ushimsambile Yakobo inywa ya luhanga lusoga na ata ya uloga. 30 Bino hano, wachuwa bululi ulihubenja abisa ndu gya sobe. Yulu yai wagiba miishi gyanyi? 31 Yakobo gumgaile, gumsambile Labani, Bululi namona booba, niganine ushichwe uusapa bawa misiha bobe wa uoma. 32 Gegese golimona gwagiba miishi gyobe, gee gashibe na mwego. U mbele wa meeso ma bashiwetu uimone yoyose yobe wandi, waiguhe. Bululi Yakobo gushimanine ugana Laeli gwagigiba. 33 Labani gugingile mnda itula ya Yakobo, na itula ya Leya, na bitula bya bagichi bopi, gushigimonine. Gutoboile mnda itula ya Leya, Gugingile mnda itula ya Laeli. 34 Bibyo Laeli gubele gwagigiba giya miishi, mgibiye ubugandilo bwa ngamiya, na ugishamina. Labani gubabatile itula yose gushigimonine. 35 Nage Laeli gumsambile sage, mlumyanyi ushiba na sungubululi nishinaosha uginyuwa u mbele gyobe, yulu nawaswa na bya baachana. Guengile, na gushigimonine giya miishi. 36 Yakobo gichigililwe, gugumene na Labani. Yakobo gugaile, gusambaile Labani, Iyii abachi anyi? Nabi iyii buube bwanyi, ata wandama biino? 37 Wababata-babata m'byombo byanyi byose; ii yitu nai yawamona ya mnda gyobe? Uibiye hano hambele ha bashiwetu, na bashiwenyu, baagede mlandu hawingi hetu. 38 Myaa gino maumi mopi nashama obe; miyoo gyobe na ata mabuchi mobe ma maota mashihuminye magumo na ata malunga na nyama chobe nishichilile. 39 Yoyose ihagilwe na misohe nishichwile nayo, nene nime iguhile asala ayo, gogwe uisabile mnda uboo wanyi,uba iguhilwe mchuba uba iguhilwe m'busugu. 40 Gugo bubele mshaminyi gwanyi; mchuba chuba lioule na m'busugu peho, tulo tupumine mmeeso manyi. 41 Myaa gino maumi mopi nishamine mndu gyobe; niugilile myaa umi na gina yulu ay bawamisiha bobe bopi, na myaa mtuba u nyama chobe, na gogwe ugalule alambwe anyi nyendo umi. 42 Nambo Abetcha a tata, Abetcha a Iblahimu na Booba bwa Isaka, gushisuba jhamwechi nanyi, chigilwe wisuba unyibga maboo hululu.Asusu anyi na migilo gwa maboo manyi Abetcha agimonine, guambila buno busugu. 43 Labani gugaile, gumganine, Yakobo, Babo bawa misiha ii misiha gyanyi, na baana ii baana banyi, na nyama ii nyama chanyi, na byose byolihumona ii byanyi, na nene ninaosha ubagilila ii lino misiha gyanyi na baana babo bababushile? 44 Bino! na tubiye malagano , nene na gogwe,mabe ubangisiya hawingi hanyi na gogwe. 45 Yakobo guguhile liwe na uligimiya nahi ihanda. 46 Yakobo gubasambile bashiwabo, Ungolwe mawe. Baguhile mawe, bamabiile mtala, nabo nuuya haya hoka na mtala. 47 Labani guhagitile Yegalsahadutha, bibyo Yakobo guhagitile Galedi. 48 Labani guganine, guno mtala ii ubangisiya hawingi hanyi na gogwe hano lino. Wa bibyo hagishilwe china lyage Galedi, 49 na Mispa, yulu guganine, Abetcha alole hawingi hanyi na gogwe, mengo matushimonana. 50 Ubebasusula bawamisiha banyi, na ubegonda baachi beengi uhima misiha gyanyi, na hashi gunge mtu hamwechi netu, loola, Abetcha noo mangisiyo hawingi hanyi na gogwe. 51 Labano gumsambile Yakobo, Loola, abandagulu guno na ulingamine na ihanda yandagimiya hawingi hanyi na gogwe. 52 Abandagulu ano na abe mangisiyo,na ino ihanda ibe mangisiyo, na ugana nene nishiitowa ano abandagulu uchwa oli,na ata gogwe ushiitowa onu abandgulu na ino ihanda uchwe wandi, wa buube. 53 Abetcha a Iblahimu, na Abetcha a Naholi, Abetcha a sabo, aonone hawingi hetu. 54 Yakobo gushinjiche lutangi u loono, gubagishile bashiwabo bachwe uya iliwa, nabo balile iliwa, bashamine busugu bose u loono. 55 Labani guchuwile lwelo umayaya, Gubaumbatile baana babe na misiha gyage, gubahalile mihaa; hanyuma Labani gugile, gigiwile wage.
Chapter 32

1 Yakobo nage gugile mndila gyagena, bamalaika ba Abetcha basambene nage. 2 Nage Yakobo helibamonine, guganine, Bino ii bilume pambwa bya Abetcha.Guhitile iya ihana Mahanaimu. 3 Haho, Yakobo guhilile batu na mwano hambele hage ugya wa Esau mmulwage ndaa na sii gya Seili mgala gwa Edomu. 4 Gubalagile, guganine, Mwamsambile bino mlumyanyi, Esau, Bino noo byagana mcha gobe Yakobo, Nishamine ubugenyi wa Labani na usinga uya ata bino, 5 nene nina ng'ombe, na punda, na miyoo, na baacha, na bagichi, nene nahila batu namsambile mlumyanyi mwano, nahewe keene u meeso mage. 6 Baya batu bahililwe na mwano bagiwile uli Yakobo baganine, Tuhiile uli mmulobe, Esau, nage gulihuchwa uugaa, na batu sambi china hamwechi nage. 7 Haho Yakobo gumunine booba abisa, na uuwa iduba abisa, gubagabulile batu babele hamwechi nage, na miyoo, na ng'ombe, na ngamiya, babe bihichi byopi. 8 Guganine, gabechwa Esau wihichi ya itangi,na ubalwa bita, ingi ihichi ya bubili yihona. 9 Yakobo guganine, Ee Abetcha a tata Iblahimu, na Abetcha a tata Isaka, MLUME, usambile giwila ugye ndaa na sii gyobe, na wa ilongo yobe, na nene niugilila bisoga.
11 Ibumbu ino upogonone na uboo wa mmulwanyi, uboo wa Esau, bululi nene nilihummona booba, gashichwe upula bita, na bamna baana ba baana. 12 Na Gogwe uganine, chigilwe niugilila bisoga, na nene niita ibushi yobe ibe nahi isee ya bahali, ishinabalwa yulu ili iingi. 13 Gushamine uya busugu bose. Hanyuma guguhile bimwe bibya byelibe nabyo, bibe mmaso gwa Esau, mmulwage; 14 mabuchi ma maota sambi chibili, na mabuchi ma malunga maumi mopi, miyoo gya maota sambi chibili, na miyoo gya milume maumi mopi; 15 ngamiya chukokya maumi matatu hamwechi na baana bacho, ng'ombe cha maota maumi mana, na cha chibenju umi; punda cha maota maumi mopi, na baana bacho umi 16 guchibiile mmabo ma bacha bage, kila ihicha hayo, Nage gubasambile baacha bage, Dabuwe hambele hanyi, mubiya ihana hawingi ha ihichi na ihichi. 17 Gumlagile guya gwa mtangi gugsnine, Esau mmulwanyi, gabeubanga, na uubucha, gabegana, Gogwe uli gwa nanyi? Uli hugya uhi? Iyaka m'bananyi bano bali hambele hobe? 18 Bino, wagane, Ii ba mcha goge Yakobo, ii mmaso gwagahilila mlumyanyi, Esau. Na loola, gee mine guli hanyuma hetu. 19 Gumlagilena guya gwa bubili, na gwa butatu, nabose bene balimine mogoma, guganine, Bino noo byamwimsambila Esau, gabem'banga. 20 Iyaka mwagane, Loola, mcha gobe, Yakobo, gulihanyuma hetu. Yulu guganine, nihuchana nage wa mmaso gwabangwa hambele hanyi, hanyuma nimmona yenyi yage; hange gwioleya yenyi yanyi. 21 Haho guya mmaso gudabwile hambele hage, nagemine gushamine buya busugu mkambi. 22 Guchiwile buya busgu guguhile baachi bage babili, na bagichi bagi babili, na baana bagu umi na gumwechi, gudabwile ha yabu ya Yakobi. 23 Gubaguhile, gubadabulile luudi, gudabulile na byose byelibele nabyo. 24 Yakobo gushigele gee buchima; na gumwe mtu guhimene nage mtimbili ndaa na umayaya ma lwelo. 25 Nage helimonine gushi hummima, gummudile mchungo lya ilimbago yage; chongo lwa ilimbago ya Yakobo lihyondiwile helibele gulihuhimana nage. 26 Guanine, Ndeeche, nagye, yulu bwahuya. Guganine, nishulecha, usahupalila mihaa. 27 Gum'budiche, China lyobe uli nanyi? guganine, Yakobo, 28 Gumsambile, China lyobe ushigiswa iyaka Yakobo, lisibi Islaekli, bululi wahimana na Abetcha, na batu, na gogwe wahima. 29 Yakobo gum'budiche, guganine, Usambile, ibumbu ino, China lyobe? Gumbaile, Yulu yai wambucha china lyanyi? Gummalile mihaa uya. 30 Yakobo ha iya ihana guhatile, Penueli, bululi guganine, Namonana na Abetcha yenyi wa yenyi, na ichuli-chuliyanyi ya mwego yahogononywa. 31 Na chuba limtobwela gulihudabuwa Penueli, guchuliye bululi bwa ilimbago ya ugulu wage. 32 Wa bibyo baana ba Isilaeli bashibaya mmi guli lundu lwa tango ndaa na lino; yulu gumudile Yakobohaya ha lundu lwa ilimbago mnda mmi gwa lubunda.
Chapter 33

1 Yakobo guginunine meeso mage, gumonine, na loola Esau gulihuchwa na batu sambi china hamwechi nage. Gubagabulile Leya na Laeli na baya bagichi babili, baana babo. 2 Gugabiile na baya bagichi na baana babo umbele, na Leya na baana bage hanyuma habo, Laeli na Yusufu wisula. 3 Gee guhishile hambele habo, guginanine ndaa na hasi nyendo njwii, na ata bimmyile mmulwage. 4 Esau guchwile abilo umgaa, gumumbatile na umlalila mioshi, na umma yambi; nabo balilile. 5 Esau guginunine meeso mage,gubamonine baya baachana na baana, gubuchiche, m'bananyi bano bali hamwechi nobe? Guganine, Ii baana Abetcha belihele mcha gobe wa keene chage. 6 Noo baya bagichi, na na baana babo, bashenine na baginamine. 7 Leya nage, na baana bage, bashenine, baginamine, Hanyuma Yusufu na Laeki bashenine na baginamine. 8 Esau guganine, Guno mgoma gose gwandabanga guli yulu yai? Yakobo guganine, Yulu nagitabichiwe u meeso ma mlumyanyi. 9 Esau guganine, ninacho bee, mnunanyi, choli nacho na chibe chobe.
11 Guha, ibimbu ino, ii miha gyanyi, gwandipashile, bululi Abetcha apele keene chage, na yulu ninabyo bino byose, Gumminyinyiye, Esau gusili guhile. 12 Hanyuma Esau gumsambile, Beswe tubegya, tubangwe, nene niulombwela. 13 Yakobo gumgaile, Mlumyanyi nigidi ugana baana bili bacho-bacho, iyaka moyoo na ng'ombe chili hukokya. Chicho nyama uchigyasha lwendo lwingi chuba ligima chiwa chose. 14 Ibumbu ino mlumyanyi na gahita hambele ha mcha gwage; na nemne nichigyasha lemba-lemba nahi lwendo lwa nyama chino chili umbele wanyi, na nahi lwendo lwa baana, na niihiya wa mlumyanyi uya Seili. 15 Esau guganine, Nuushige na bamwe batu banyi bene bali hamwechi nanyi. Yakobo guganine hali ibalo nai? Namone ugitabichiwa ka u meeso ma mlumyanyi. 16 Bibyo Esau gugiwile loka luya lusugu nugya mndila gyage ndaa na Seili 17 Yakobo gugililile ndaa na Sukoti. Guligubaile ndu, guchiyengela nyana chage bitula-tula. Wa bibyo iha ihana igitilwe Sukoti. 18 Yakobo guchwile wa talala ndaa na mbuga gya Shekemu, gili hawingi ha sii gya Kanaani, helihumine uya Padan-alamu; guyengile itula yage umbele wa gigyo mbuga. 19 Gugulile ibaa ya sii, heligimiile itula yage, gugulile mmaboo ma mwaana gwaHamoli, sage na Shekemu, bihindi sambi bya bomona. 20 Gugimiile uya butambikilo, guhagishile, El-elohe Isilaeli.
Chapter 34

1 Haho Dina, msiha gwa Leya, guya gwelibutile Yakobo, gugile ulola misiha gya giya sii. 2 Shekemu mwaana gwa Hamoli, Mmiti, mmata gwa ibaloo,gummonine, gumguhile, gulalile nage, gumdogoche. 3 Mtima gwage gummundile Dina msiha gwa Yakobo, gumbenjiche abisa gugo msiha, gudogomine binywa bisoga. 4 Shekemu gusambile Hamoli sage, guganine upe guno msiha gabe mmachanyi. 5 haho Yakobo guhuliche ugana gwamdogya Dina msiha gwage. Na baana bage babele uya hamwechi na nyama chage u lubugu. 6 Hamoli guchwile, sage na Shekemu, umgile Yakobo, gadogome nage, 7 Baana ba Yakobo habahuliche bibyo, bachile uhuma uya ulubugu; nabo bashimwene bisoga, bachigililwe abisa, yulu gwagila bwa buhugi nda Isilaeli wa ulala na msiha gwa Yahobo, inywa ishinaoshiwa ugilwa. 8 Hamoli gudogomine nabo, guganine, Mtima gwa Shekemu, mwananyi, gulihumunda kachenyu, ibumbu ino pewe gee gamgonde. 9 Mwagondane netu, mutuhe beswe misiha gyenyu, na benywe mwaguhe misiha gyetu. 10 Na benywe mwisha netu, na gino sii gibi u meeso menyu; shamwe na ugila bya udagulanya moo, mwabe na bumone. 11 Shekemu gubasambile sage na guya msiha na banyume chage, na nagitabwiwe u meeso menyu, na byamwisaba nihana. 12 Inangwa mwiluluya bumona na mmaso, nigonda nahi bya mwisambila, bibyo mupe guno msiha gabe mmachanyi. 13 Baana ba Yakobo babagaile, Shekemu na Hamili sage, wa buyanja, bululi gwamdogya Dina, kachabo, 14 babasambile, Tushinaosha ugila ino inywa, tumme kacheyu mtu gushigile kumbi; byiba bya abule watuli, 15 Nambo yulu ya ino ikoko kaa, twihulichana nenyu; wabe nahi beswe, gabegya kumbi mlumyana gegese gwenyu, 16 mndi haho twimma benywe misiha gyetu, na beswe twiguha misiha gyenyu twishama hamwechi nenyu, na beswe tubi batu bamwechi. 17 Nambo mushi hutuhulicha na ugya kumbi, bino twimguha kachetu, na beswe twigya lyetu. 18 Binywa byabo bibele bisoga u meeso ma Hamilo, na umeesoma Shekemu, mwaana gwa Hamoli, 19 Na guya mmwalubaga gushisingile ugika iya ikoko, bululi gumbendiche guya msiha gwa Yakobo,nage gubele na anyemu uhima bose mnda gya sage. 20 Hamoli na Shekemu mwanage, bagile u mchango gwa mbuga gyabo, baganine, 21 Bano batu bali na talala netu, bino na bashame mmino ibaloo, na ugila bya ugalulanya mo; bululi ibnaloo ii yata, yabawilila, na twabaguhe bawamisiha gyabo uba baachio betu, na bawamisiha gyetu twabahe boo. 22 Bibyo wa iyo ihisho imwechi ka bihulichana netu bashame bose wetu, tube batu bamwechi, nambo twigya kumbi kila mlumyana, nahi bano byabagile kumbi. 23 Wi wii! miyoo gyabo, na bumona bwabo, na nyama chabo chose chishibi bumona bwetu? mndi tuhulichane nabo ka, nabo bishama wetu. 24 Bose babahuliche Hamuli na Shekemu mwanage, bose bene basutobowa uguya mchango gwa mbuga gyage. Bagile kumbi balumyana, bose bene bali hutobowa mnda mchango gwa mbuga gyage. 25 Haluhiile lusugu lwa matatu, habasibele husumwa abisa, baana babili ba Yakobo, Simeoni na Lawi, banyume chage na Dina, baguhile bose gwaumwa ahilu age, bagichwilile mbuga wa uoma, babahagile balumyana bose. 26 Babahagile Hamoni na Shekemu mwanage, wa bwigi bwa ahilu, bamguhile Dina mnda ndu gya Shehemu, boo nuligila. 27 Baana ba Yakobo babigilile biya bitumba byine bihagilwe, bagiwatile kole mbuga bululi badagiche kachabo, 28 Baguhile miyoo gyabo, na ng'ombe chabo, na punda chabo, na bitu byine bibelemnda mbuga, na byine bibele umabala. 29 Baguhile na bumona bwabo bose, na baachi babo, na byose byine bibele mmadu mabo babiguhile kole, 30 Yakobo gubasmbile Simeoni na Lawi, Mwasususla, ungita nanyuke bisone hawingi ha batu ba ino ibaloo, Bakanaani na Bapelezi; na nene, yulu baana babyi m'bacho, bikongolwela, na unjwa bita, nene nihagwa, nene na ndu gyanyi. 31 Nabo baganine, Wi wii! gamgilile kachetu na sengu?
Chapter 35

1 Abetcha amsambile Yakobo chuwa, seela ugya Batheli, ushame uya; wamgimyile Abetcha butambikilo uya; guya guutobwele holimsinine Esau, mmulobe. 2 Yakobo gusambile batu ba mndu gyage, na bose bene babele hamwechi nage, telwe miishi gyamuli nagyo, mulihahache, mwagalule binge bichwalaganywa. 3 Tuchuwe tusele tugye Betheli, na nene nimgimyila Abetcha butambikilo uya, gee mine gupuliche lusugu lwa asusu anyi,gubele hamwechi nanyi ndila gyose gyandihitile. 4 Nabo bammele Yakobo miishi gyose gigenyi bibele mmaboo mabo, na matimbi mabele u matu mabo, nage Yakobo gugibisile hasi ha mti mwaloni guli haya Shekemu. 5 Bachuwile, booba bwa Abetcha buwashile mabuga mabele mabachunguluwe, na bashioshiche ubalama baana ba Yakobo. 6 Haho Yakobo guhiile Luzu, gili mnda ibaloo ya Bakanaani, noo Betheli, gee na batu bose bene babelehamwechi nage. 7 Gugimiile uya butambikilo, guhagitile ha iya ihana, El-Betheli; bululi uya noo umtobwele Abetcha,mengo melisinine mmulwage. 8 Debola guwile yaya gwa Lebeka, guchiilwe hasi ha Betheli, hasi ha mti mwaloni; na china lya haya ligitilwe Alon-bakuthi. 9 Abetcha amtobwele Yakobo iyaka, heligiwile uhuma Padan-alamu Abetcha ammalile mihaa. 10 Abetcha amsambile china lyobe uli Yakobo; Ushigiswa iyaka Yakobo, bino Isilaeli noo lishibi china lyobe, Gumgitile china lyage, Isilaeli. 11 Abetcha amsambile, Nene, nili Abetcha Dambe, ubule na ugililila. Mmoga na ihichi ya miogabihuma oli, na maoolo bihuma mlubunda mobe. 12 Na gino sii gyandibahele Iblahimu na Isaka niuha gogwe, na ibushi yobe hanyuma hobe nibaha gigyo sii. 13 Abetcha guselile hegulu uhuma uli Yakobo ha iya ihana yelibele hudogoma nage. 14 Yakobo gugimiye ihanda ha iya ihana yelibele hudogoma nage, ihanda ya mawe, guhongolole hegulu hayo lutangi lwa byunywa, guhongolole mauta hegulo hayo. 15 Yakobo guhagitile haya, Abetcha helidogomine nage, Betheli. 16 Bachuwile uhuma Betheli, na hasibele hashigachu lwendo lushihu, uhiya Eflathi, Laeli guwashilwe na busungu bwa ubuta, na busungu bwage bubele bugumagachu. 17 Hesibele gwahusumwa abisa na busungu, mgumba gumsambile, nagu umona booba, bino hanohoka ulihubuta gunge mwaana gwa mlumyana. 18 Haho helibele hubuta alibu na uwa, gubushile na mmginyiya china lya Ben-oni, nage nuuwa, hoka haho sage gumgishile china lyageBenjamini. 19 Lweli guwile, guchiilwe mndila gya Eflethi, noo Bethelehemu. 20 Yakobo gugimiile uhanda hegulu ha sinda,noo ihanda ya sinda lya Laeli ndaa na lino. 21 Hanyuma Isilaeli gugile gugimiile itula yage lubi lwa bubili lwa mnala gwa Edeli, 22 Haho Isilaeli helibele hushama mnda giyo sii, Leubeni gugile ulala na Bilha, mgichi gwa sage. Isilaeli guhuli mwano. Haho babo baana ba Isilaeli babele umi na bopi. 23 Baana ba Leya noo Leubeni, bubele bwa Yakobo, na Simeoni, na Lawi, na Yuda, na Isakali, na Zabuloni, na. 24 Baana ba Laeli, noo Yusufu, na Benjamini. 25 Baana ba Bilha, mgichi gwa Laeli, noo Dani, na Naftali. 26 Baana ba Zipa, mgichi gwa Leya, noo Gadi, na Asheli, Bano noo baana ba Yakobo belibutile uya Padn-alamu. 27 Yakobo guhiili uli Isaka, sage, uya Mamle, mbuga gya Alba, noo Hebloni, wabashamine ubugenyi Iblahimu na Isaka. 28 Masugu ma Isaka mabele myaa sambi na maumi inana. 29 Nage Isaka gugedile mtima, gee nuuwa, gusumbile u batu bage, ii mmungu, mgyusu masugu. Esau na Yakobo baana bage, bamchiile.
Chapter 36

1 Bino noo bibushi bya Esau, noo Edomu. 2 Esau guguhile bawamisiha gya Bakanaani uba baachi bage; Ada, msiha gwa Eloni, Mmiti, na Oholibama, msiha gwa Ana, msiha gwaSibeoni,Mmiti; 3 na Basemathi, msiha gwa Ishmaeli, mshiwabo Nebayothi. 6 Esau gubaguhile baachi bage, na baana bage, na misiha gyage, na batu bose ba mndu gyage, na ng'ombe chage, na nyama chage chose, na bitundu byge byose byelipashile mnda sii gya Bakanaani; gugile ndaa na m gili koo na Yakobo mshiwabo. 7 Bululi bitundu byabo bibele biingi bashinaosha ushama hamwechi, na giya sii gishinaosha ubanabo bose hamwechi, yulu ya nyama chabo. 8 Esau gushamine u loono Seili, Esau noo iyaka edomu. 9 Bino noo bibushi bya Esau, sage gwa Edomu mnda loono lwa Seili. 10 Mano noo machina ma baana ba Esau, Elifazi mwaana gwa Ada mmachi gwa Esau. Reuli, mwaanagwaBasemathi, mmachi gwa Esau 11 Na baana ba Elifazi , noo Temani na Omali, na Sefo, na Gatamu, na Kenazi. 12 Na Timna gubele mgichi gwa elifazi, mwaana gwa Esau; nage gum'butile Elifazi Ameleki, babo noo baana ba Ada, mmachi gwa Esau. 13 Na bano noo baana ba Leueli, Nahathi, na Zela, na Shama na Miza. Bano babele baana ba Basemathi. mmachi gwa Esau. 14 Na bano noo baana ba Oholibama, msiha gwa Ana, msiha gwa Sibeoni, mmachi gwa Esau; gum'butile Esau, Yeushi, na Yalamu, na Kola. 15 Bibyo noo bibushi bya baana ba Esau; baana ba Elifazi, bubele bwa Esau; mmulu gwa mbuga Temani, mmulu gwa mbuga Omali, mmulu gwa mbuga Sefo, mmulu gwa mbuga Kenazi, 16 mmulu gwa mbuga Kola, mmulu gwa mbuga Gatamu, mmulu gwa mbuga Ameleki. babi noo baulu ba mabuga , bahumine wa Elifazimnda sii gya Edomu. Babi noo baana ba Ada. 17 Na bano noo baana ba Leueli, mwaana gwa Esau; mmulu gwa mbuga Nahathi,, mmulu gwa mbuga Zela, mmulu gwa bmuga Shama, mmulu gwa mbugaMiza, Babi noo baulu ba mabuga bahumine wa Leueli mnda sii gya Edomu. Babo noo baana ba Basemathi, mmachi gwa Esau. 18 Na bano noo baana ba Oholibana, mmachi gwa Esau; mmulu gwa mbuga Yeushi, mmulu gwa mbuga Yalamu, mmulu gwa mbuga Kola, Babo noo baulu ba mabuga, bene bahumine wa Oholibama, msiha gwa Ana, mmachi gwa Esau. 19 Babi noo baana ba Esau, na babo noo baulu ba mabuga mabo; nage Esau noo iyaka Edomu. 20 Bano noo baana ba Seili, Mmoli, mshami gwa giya sii; Lotani, na shobali, na Sibeoni, na Ana, 21 na Dishoni, na Eseli, na Dishoni. Babi noo baulu ba mabuga bene bahumine wa Baholi, baana ba Seili, mnda sii gya Edomu. 22 Na baana ba Lotani, noo Holi, na Hemamu, na kachage gwa Lotaninoo Tmna. 23 Na bano noo baana ba Shobali, Alvani, na Manahathi, na Ebali, na Shefo, na Onamu. 24 Nabano noo baana ba Sibeoni, Aya, na Ana; noo guya Ana mine gumonine msula gwa madi ma ahyaa mlubugu, helibele huusa punda cha sage Sibeoni. 25 Na bano noo baana ba Ana, Dishoni, na Oholibama, msiha gwa Ana. 26 Na bano noo baana ba Dishoni, Hemdali, na Eshbani, na Ithlani, na Kelani. 27 Na bano noo baana ba Eseli, Bilhani, na Zaawani, na Akani. 28 Na bano noo baana ba Dishoni, Usi, na Alani. 29 Nabo noo baulu ba mabuga bene bahuline wa Baholi; mmulu gwa mbuga Lotani, mmulu gwa mbuga Shobali, mmulu gwa mbuga Sibeoni, mmulu gwa mbuga Ana, 30 mmulu gwa mbuga Dishoni, mmulu gwa mbuga Eseli, mmulu gwa mbuga Dishani. Babo noo baulu ba mabuga bahumine wa Baholi, wa mwano gwa baulu ba mabuga mabo, mnda sii gya Seili. 31 Na bano noo maoolo bene bahyilile mnda sii gya Edomu, ii hambele ha baana ba Isilaeli uhyililwa na oolo lyolyose . 32 Bela gwa Beoli guhyilile sii gya Edomu, na china lya mbuga byage ii Dinhaba. 33 Bele guwile, Yobabu mwaana gwa Zela guhyilile, gwa Bosla, hanyuma hage. 34 Yobau heliwile, Hoshamu guhyilile, gwa sii gya Batemani, hanyuma hage. 35 Hushamu gee nuuwa, Hadadi gwa Bedadi gee nuuhyilila hanyuma hage, nage noo gulwile na Bamediani mnda sii gya Bamoabu, na china lya mbuga gyage noo Avithi. 36 Hadadi heliwile Hadadi, Samla gwa Masleka guhyilile hanyuma hage. 37 Heliwile Samla, Shauli gwa Lehobothi, gili hoka ma ludi, guhyilile hanyuma hage. 38 Heliwile Shauli,Baal-hanani mwana gwa Akboli guhyilile hanyuma hage. 39 Haliwile Baal-hanani mwama gwa Akboli, Hadadi guhyilile hanyuma hage; na china lya mbuga gyage ii Pau; na china lya mmachage iiMehetabeli, msiha gwa Matledi, msiha gwa Mezahabu. 40 Na mamo noo machina ma baulu ba mabuga bahumine wa Esau, ulamana na bibushi byabo, na bushamo bwabo, na wa machina mabo, mmulu gwa mbuga Timna, mmulu gwa mbuga Alva, mmulu gwa mbuga Yethethi, 41 mmulu gwa mbuga Oholibama. mmulu gwa mbuga Ela, mmulu gwa mbuga Pinoni. 42 mmulu gwa mbuga Kenazi, mmulu gwa mbuga Temani, mmulu gwa mbuga Mibsali, 43 mmulu gwa mbuga Magdieli, mmulu gwa mbugaIlamu, ulamana na bushamo bwabo, mnda sii gya uosha wabo, Nage gugo noo Esau, sage gwa Edomu.
Chapter 37

1 Yakobo gushamine mnda sii giya gyilienene sage sii gya Bakanaani. 2 Bino noo bibushi bya Yakobo. Yusufu hasilibele na myaa umi na njwii gya ubuswa, gubele huusa myoo hamwechi na bashiwabo; nage gubele mmwalubaga hamwechi na baana ba Bilha, na baana ba Zilpa, baachi ba sage. Yusufu gummyiche sage mwano gwabo gubii. 3 Haho Isilaeli gubenjiche Yusufu uhima baana bage bose, yulu ii mwaana gwa buulu bwage, gumshonene kanju lilahu.
5 Yusufu guloshile malo, gubalangulile mo, mndi boo nuusili ugililila uumonywa; 6 yusufu gubasambile, Ibumbu ino, hulichiwe mano malo mandalota. 7 Loolwe, beswe tuba huhamba mikanda ulubala, mndi! mkanda gwangi gwa chuwa na ugya ugimana mbalamwa, noo ulola, mikanda gyenyu gyachunguluwa nauginama umbele wa mkanda gwanyi. 8 Bashiwabo bamsambile, Wi wii! Chigilwe gogwe wituhyilila beswe? na gogwe ubi hegulu hetu beswe? Bagililile ummonywa yulu ya malo mage, na yulu ya binywa byage. 9 Gulishile iyaka mange malo, gubasambile bashiwabo, guganine, Lingaminywe, nalota iyaka mange malo; na loola, chuna na mwechi na tumbalambala umi na amwechi tunginamine. 10 Gumsambile sabe, na bashiwabo; sage gumambile na gumsambile, mmalo nai mano mawalota? Wi wii!Nene na mnobe na bashiwenyu twichwa uuginamina ndaa na hasi? 11 Basiwabo bammonene buwa; haho sage gubiile iya inywa mnda mtima gwage. 12 Bashiwabo bagile uusa miyoo gya sabouya Shekemu. 13 Isilaeli gumsambile Yusufu, Wi wii! ati bashiwenyu balihuusa miyoo uya Shekemu? Chuno, nutume wabali. Gumsambile, Nene guno. 14 Isilaeli gumsambile, Ugye, umone, nambo bashiwenyu bali poo, na ihichi yabo nambo ili bisoga, wachupa mwano, Haho gummilile uhuma haya ha ibetabeta ya Hebloni, gee nuhiya Shekemu. 15 Gumwe mtu gumlamine gubele huchunguluwa-chunguluwa mluya lubala; guya mtu gum'budiche, guganine, Ulihuenga ii? 16 Yusufu guganine, Nilihubaenga bashiwetu; ibumbu ino usambile wabali huusila. 17 Guya mtu guganine, Bahuma hano, bululi nabahulicha balihugana, Tugye Dothani. Hahao Yusufu gubalamine bashiwabo na ubabanga Dothani. 18 Bammonine wa koo, na gushibele nabahyila, bahungile mmungo yulu yage bammage. 19 Badogomyane boo wa boo, Loola, guya mlume gwa malo gulihuchwa. 20 Bino, tubegya, tummagena tumtele mmimwe ina ya mloba, na beswe twigana, nyama gya buhuchi noo gyamya; noo twamone byiwilila malo mage. 21 Leubeni guhuliche na umogonona mnda maboo mabo, guganine, Tushimmage. 22 Leubeni gubasambile Mushigeshi mashi; mtelwe mnda ina ya mloba yine ili mlubugu, na mushimmude; yulu gaoshe ummogonona mnda maboo mabo, gamgiwiche uli sage. 23 Haho Yusufu helihyile uli bashiwabo, bamchulile Ysufu kanjo lyage, kanjo liya lya lilahu lyelichwalile, 24 bamguhile na uutela mnda iya ina ya mloba, na iyo ina ya mloba ibele hululu, mushi madi. 25 Nabo bashamine hasi uya iliwa; baginunine meeso mabo bamonine mlongo gwa Baishimaeli balihuchwa uhuma Gileadi na ngamiya chabo, balibaswale buswenge na [zeri] butongo buhisu busuhocha nolo huhuma wahya, na malashi, balihugya nabyo ndaa na Misili 26 Yuda gubasambile bashiwabo, Yulu ya ibalo nai tummage mshiwetu na umabisa mashi mage? 27 Bino, tumguche uli bano Baishimaeli, na ata maboo metu mashimgilile biibe, bululi gee ii mshiwetu, na mashi metu. Bashiwabo na Yuda bagitabuwe. 28 Bamidiani budagulanya bahitile; haho boo nuumunya Yusufu mnda ina ya mloba nuusecha, boo nuumgucha Yusufu u Baishimaeli wa bihindi bya bomona maumi mopi; nabo bamguhile Yusufu ndaa na Misili. 29 Leubeni gugiwile wiiya ina ya mloba, mndi! yusufu gushimo mnda iya ina ya mloba, gugulile bichwalaganywa byage. 30 Gugiwile uli bashiwabo, guganine, Mwaana gushimo mmina, nene nagye uhi? 31 Baguhile kanjo lya Yusufu , bashinjiche mwaana gwa mbuchi, na uchunda kanjo mnda mashi ma mwana mbuchi, 32 Bagile nalyo liya kanjo lilahu, bammele lyo sabo, baganine, Twalimona lili; hano, usungula lino kanjo nambo ii lwa mwanobe, hange lishilyo. 33 Gulisungulile, guganine, Noo kanjo lya mwananyi, nyama gya buhuchi gyamya; hashi ata adugwa gwahagwa. 34 Yakobo gugulile bichwlaganywa byage, guchwalile maduda mlubunda, na umlilila mwanage masugu meengi. 35 Banabage bose na misiha gyage gyose bagile ummocha mtima, haho gee guhanyinye utolelechiwa, guganine, Nangu! Nimsalila mwananyi, niluhusumwa na mtima yulu yage, ndaa na usinda,Sage gumlilile. 36 Nabo Bamidiani bamgudiche uya Misili, wa Potifa, ilume pambwa wa Falao, mmusobu gwa bita.
Chapter 38

1 Habele maya mengo, Yuda gusalile uhuma u bashiwabo, guhiili na ushama wa gumwe mtu gwa Badulami, china lyage Hila. 2 Yuda gumonine uya msiha gwa mtu Mkanaani, china lyage Shuwa. Gumguhile na ugingila weli. 3 Guswalile gumo, gubutile mwaana gumgitile china lyage Eli. 4 guswalile gumo iyaka , gubushile mwaana, gumgitili china lyage Onani,. 5 Gugililile, gubushile iyaka gunge mwaana,gumgishile china lyageShela. Nage Yuda gubele uya Kezibu, helim'bushile. 6 Yuda gumgondele Eli mmachi, bubele bwage, na chinalya gugo mmachana ii Tamali. 7 Nage Eli, bubele bwa Yuda gubele mtu msone u meesoma MLUME; na MLUME nuummaga. 8 Yuda gumsambile Onani, Ugingile uli mmachi gwa mshiwenyu, umgonde, wamginunine mshiwenyu ibushi. 9 Onani gumanine ugana iyo ibushi ishibi yage, haho heligingile uli mmachi gwa mshiwabo, gugesile hasi gashimme mshiwabe ibushi. 10 Iyo ihisho yeligilile ibele isone u meeso ma MLUME, bibyo, gummagile gee nage. 11 Yuda gumsambile Tamali mnage buo, Ugye ushama m'bwile wenyu wa sobe ndaa na byioma Shela mwananyi helihiya uba mtu mmomu, yulu Yuda guganine gashiwe nahi bashiwabo. Haho Tamali gugile, gushamine wabo u nduu gya sage. 12 Masugu mengi mahitile, msiha gwa Shuwa guwile, mmachi gwa Yuda. Yuda guhungiwe, gugile uli batu bage balihugeda miyoo maaso uya Timna, gee na miinage Hila, gwa Badulami. 13 Gugo Tamali guhelwe mwano,ugana, Sobe buo gulihuhita ugya Timna, ugeda miyoo gyage maaso. 14 Haho, guchulile bichwalaganywa bya buwile bwage, gulichwiiche ilemba, guliwilile yenyi, gushamine ha mchango gwa Enaimu, hoka na ndila gyugya Timna. Bululi gumanine ugana Shela gwahwoma, na basamgonja gabe mmachage. 15 Yuda helimmonine gulangile ugana ii sengu, yulu gulimliunine yenyi. 16 Gumgalwile hibamba ha ndila, guganine, Kumbatile nagingile obe. Bululi gushimanine ugana noo mmage buo. Gum'budiche, Wipa ii nambo ubegingila wanyi? 17 Yuda guganine, niuhilila mwana mbuchi gwa ihichi. Tamali gum'budiche, Wi wii! Wishigila ii yumanya abangisio holichwa? 18 Yuda guganine, Nuhe abangisio nai? Guganine, lupete loba lwa yaala, na mchingo gwage, na lubango lobe lwine luli mmuboo obe. Bibyo gee numma, gugingile weli nage nuswala gumo. 19 Yuda guchiwile nuuligila lwage, guchulile iya ilemba yage, na uchwala bichwalaganywa byage bya buwile. 20 Yuda guhilile guya mwana gwa mbuchi mmaboo ma bugenda bwage gwa Badulami, yulu gahewe abangisio age uhuma mmaboo ma guya mmachana bino gushigiwishe guya mmachana. 21 Gubudiche batu ba iya ihana, guganine, Guli uhi guya sengu gubele haya Enaimu hibamba ha ndila? Bagaile, Hano hashibele sengo. 22 Guya gwa Badulami gugiwile uli Yuda guganine, Nisammona; ata batu ba iya ihana baganine, Hashibele sebgu haya. 23 Yuda gugaile, Gee gabebiguha, tushichwe ubiwa abule; loola nammilila mbuchi gugo, na nisam'banga. 24 Hanyuma ha myechi gitatu yusa guhelwe mwano gwa ugana, Mnage buo Tamali gwaita masei, nage gwina gumo lya bunyenye. Yuda guganine mlushiwe hano gachigiwe. 25 Helilushiwe, guhilile mtu uli sage buo, guganine, Nene naswala gumo lya mtu mine bino bitu. Guganine, Chelechiwe, bino bitu ii bya nanyi, luno lupete, mchingo guno, na luno lubango. 26 Yuda gubigitabuwe,guganine, Gee gwina kiine upima nene, bululinishimmele Shela, mwananyi, na gushimmanine, iyaka hanyuma ha haho. 27 Hasibele mengo mage ma ubuta mnda mwage mubele mahasa. 28 Helibele huubuta, gumwe mwaana gutobole uboo, mgumba guguhile lumondo lwa lugachichu guluhambile uboo wage, mgumba guganine guno noo mtangi utobowa. 29 Mengo meligiwiche uboo wage, loola, mshuwabo gee nutobowa. Mgumba guganine, Yulu yai watobowa wa uoma gogwe? Bigilanywa bya uoma na byulame gogwe. Wa bibyo china lyage gugishilwe Pelesi. 30 gotobowile mshiwabo hanyuma, gwina lumondo lwa lugachichu uboo wage, nage gugishilwe china lyage Zela.
Chapter 39

1 Haho Yusufu guhiichiwe ndaa na Misili nage Potifa, ilume pambwa ya Falao, mmusobu gwa basolokoto, mtu gwa Misili, gumgulile mmaboo ma babo Baishimaeli bene bamyiche uya. 2 MLUME gubele hamwechi na Yusufu, nage gushamine bisoga; nage gubele mndu gya mlumyage , guya Mmisili. 3 Mlumyage gumonine ugana MLUME guli hamwechi nage, na umone MLUME gwaginuna bitundubyose ihitila maboo ma Yusufu. 4 Yusufu gumonine misa u meeso ma Potifa, gumgilile, Nage gum'biile gabe mgimenyi gwa hegulu ha ndu gyage gyose, na byose byine bibele mnda du gubibiile mmaboo ma Yusufu. 5 Haho habele mengo melim'biile uba mgimenyi hegulu ha ndu gyage, na byose bilimo, MLUME guhalile mihaa ndu gya guya Mmisili wa yulu ya Yusufu. Mihaa gya MLUME gibele hegulu ha byose byelibele nabyo mnda ndu, na mnda lubala. 6 Guleile byose byelibele nabyo mmaboo ma Yusufu; na gushimanine mwano gwa itu yoyose yelibele nayo nambo iliwa ka. Nage Yusufugubele mtu m'benju, na buhungwe bwa yenyi. 7 Hanyuma ha biyo bihisho, mmachi gwa mlumyage gumbenjiche Yusufu, gumsambile, Lala nanyi. 8 Haho guhaninye,gumsambile mmachi gwa mlumyage, Loola, mlumyanyi gushigidi itu yoyose yine ibiilwe mnda ndu, na byose byine byeli nabyo gubibiile mmaboo manyi. 9 Hashi mmata mnda gino ndu upima nene, na gushipaninye itu yoyose nambo gogwe kaa, yulu gogwe uli mmachage,. Nagile wii buube buno bwata, namlubile Abetcha? 10 Gugulilile udogoma na Yusufu chuba wa chuba, bibyo gushigitabuwe ulala nage, na gashi gagombole nage. 11 Lubele lumwe lusugu, Yusufu gugingile mndu gagile mgilo gwage, na hashibele na mtu mnda ndu mwelibele; 12 gugo mmachana gum'bwashile Yusufu u bichwalaganywa byage, guganine, Ulale nanyi. Yusufu gushigile ichwalaganywa yage mmaboo mage, gusinine na utobowa hambuga. 13 Heliminine gwamshigila bichwalaganywa byage mmaboo mage,nage Yusufu gwasinina hambuga, 14 mmachana gugushile batu ba mndu gyage, gubasambile, guganine, Lingaminywe, gutuleyele mtu gwa Baeblaniya gatugilile byusewa. Gwagingila wandi, yulu galale nanyi, nilile wa lidi lyata. 15 Helihuliche nahugaba wa lidi lyata na ulila, gushigile bichwalaganywa byage wandi,na gusinine, na utobowa hambuga. 16 Bibyo gubibiile biya bichwalaganywa bya Yusufu na bichwile mlumyage mndu. 17 Nage gumsambile, byoka biya binywa mlumyage, guganine, Guya mcha Mmeblaniya gochwile nage watuli, gwagingila wangi yulu gasebulule. 18 Haho handigabile wa lidi lyata, nililile, gwashiga bichwalaganywa byage wandi, gee nuusina hambuga. 19 Haho mlumyage helihuliche binywa bya mmachage gumsambile, guganine, Mcha gobe gwangilila bihisho nahi bino, sungu chage chiselile. 20 Mlumyage gwa Yusufu gumguhile Yusufu, gum'biile m'bulogo, uya ubele bahambwe bahambwa ba oolo, nage gubele mo mya m'bulugo. 21 Haho MLUME gubele hamwechi na Yusufu, gummusule, gummele ugitabichiwa u meeso ma mmela gwa bulogo. 22 Mmela gwa bulugo gubiile bahambwa bose mmaboo ma Yusufu batu bose babele bahambwe, bali m'bulogo; na byose byine bigiliye mo gee noo gubigilile. 23 Na mmela gwa bulogo gushilolile bigilanywa byelihugila Yusufu; bululi MLUME gubele hamwechi na Yusufu. MLUME gubigitabiche byose byine byeligilile.
Chapter 40

1 Hanyuma ha bihisho bibyo, guya gusunywisha oolo lya Misili, na mmiyi gwage, bamlubile mlumyabo, oolo lya Misili. 2 Falao guchigililwe yulu ya baata bage babili, mmulu gwa buunywisha, na mmulu gwa buhiya. 3 Gubabiile mnda ihambo mdu mwa ilume ya basolokoto, mya mnda bulogo, haya hene hahambilwe Yusufu. 4 Ilume ya basolokoto, ibiile babo batu uli Yusufu, nage gubagilile, nabo bashamine mamwe masugu mnda bulogo. 5 Baloshile malo bose babili, busugu bumwechi gwaomwa na malo mage, na gegese bulumbulwilo bwa malo mage, gumnywisha na gummiila oolo lya Bamisili bene bahambilwe m'bulogo. 6 Yusufu gubachwilile halwelo, gubamonine bahulwe saso. 7 Gubabudiche baya baulu ba Falao, bene belibele nabo m'bulogo, mndu gya mlumyage, guganine, Yulu yai byenyi byenyu byabungamana lino? 8 Bamsambile, Twalota malo na hashi gunaosha umalangula. Yusufu gubasambile, ulangula gushi mgilo gwa Abetcha? Ibumbu ino sambilwe. 9 Mmulu gwa bunywisha gulisambile malo mage uli Yusufu, gumsambile, u malo manyi namona, umbele wanyi uli mzabibu. 10 Na guya mzabibu gulina matabi matatu, nago gwaba nahi guli hutota, gwahusola na bulula, buluba bwage bihele zabibu cha chigechu. 11 Na isengo ya Falao yaba mmaboo manyi, niguhile zabibu, nichihinine mnda isengo ya Falao, nimmele Falao isengo mmaboo mage. 12 Yusufu gumsambile, Ulangula wage noo uno. Matabi matatu ii masugu matatu. 13 Hanyuma ha masugu matatu Falao gwiginuna mswe gobe, gwiuguwicha iyaka u mgilo gobe; na gogwe wimma Falao isengo mmaboo mage, nahi byamubele gamble, byolibele humnywisha. 14 Bibyo wakengeleche na nene, holihewa bisoga, wangitile bya yano, nihuusaba, wandisambe uli Falao, na upunya mnda gino ndu. 15 Chigilwe ibalo nigibilwe uhuma mnda sii gya Baeblaniya, na ata bino nishimgile ihisho yoyose yulu bambiye mnda bulogo. 16 Mmulu gya bahii nage helimonine, ulangula uya ubele usoga, gumsambile Yusufu, Nene byoka biya naba mnda malo manyi, na loola, hali bitanga bitatu bya mikati gihaha hegulu ha mswe gwanyi. 17 Na mnda itanga ya hegulu, mubele na biliwa byose bya Falao, mgilo gwa mmii; tumonyi tubilile mnda itanga hegulu ha mswe gwanyi. 18 Yusufu gumgaile, guganine, ulangula wage noo uno; Bitanga bitatu noo masugu matatu. 19 Hanyuma ha masugu matatu Falao gwiuginuna na uguhunya mswe gobe na uusundiya hegulu ha mti, na tunonyi twiya nyama chobe. 20 Haluhiile lisugu lwa butatu, lusugu lwa ubuswa wage Falao, gugaitile lusugu lwa saso bacha bage bose; guguginune mswe gwa mmulu gwa baunywisha, na gwa mmulu gwa bahii mmiihichi ya bacha bage. 21 Gumgiwiche mmulu gwa baunywisha mnda mgilo gwage gwa unywisha, nage gummele Falao isengu mmaboo mage. 22 Bino gumsundiye mmulu gwa bahii, nahi biya bibalangulile Yusufu, 23 Mndi guya mmulu gwa bunywisha gushi mmengechiche Yusufu. gumgibilile.
Chapter 41

1 Habele hanyuma ha myaa gyose gibili,Falao guloshile malo; na loola, gulimgimanyu ham'bega gwa ludi. 2 Na loola, ng'omgo njwii chisoga chinonyu, chidabuwile uhuma mludi, bibele huya byanyi. 3 Na loola chinge ng'ombe njwii chilihudabuwa hanyuma mludi, cha chisone, chigonju, chigimene hoka na chiya ng'ombe u m'bega gwa ludi. 4 Hanyuma chiya ng'ombe chisone cha chigonju chilile chiya njwii cha chisoga, chinonyu. Haho Falao nuubyuwa. 5 Genulala, guloshile malo lwendo lwa bubili. Loola, mihunga njwii gimenine u belee limwechi, chata, na chisoga. 6 Na loola, mihunga njwii gigonju, gigumiwe na mnaga gwa mlugulu, gimenine hanyuma hagyo. 7 Hanyuma gigyo mihunga gya gigonju njwii gilile giya mihunga njwii gya gyata gyagigiluchu. Haho Falao gubyuwile mndi m malo ka. 8 Ata halwelo mtima gwage gushibele na saso; guhilile batu uongola bagabo bose ba Misili, Na batu bose bene bali na lwengo wine wabali. Falao gubalangulile malo mage, na hashibele guoshiche usambila Falao bibyo bihisho. 9 Haho mmulu gwa bumnywisha gumsambile Falao guganine, Naengelecha buube byanyi lino. 10 Falao guchililwe yulu ya bacha bage, gumbiile nahambwe mnda ndu gya mmulu gwa basolokoto, nene na mmulu gwa bahii. 11 Tuloshile malo busugu bumwechi nene na gee gumwechi gumwechi na ulangulilwa malo mage tumonine. 12 Na uya tubele na gumwe mmwalubaga; Mmeblaniya, mgichi gwa mmulu gwa basolokoto, tumsambile, nage gutulangulile malo; gumlangulile kila mtu ulamana na malo mage. 13 Biya, nahi byeli tulangulile noo byabigiliye; nene nigiwichiwe mnda mgilo gwanyi, nage gusundiwe. 14 Bibyo Falao guhilile batu umgita Yusufu, bamleshile abilo uhuma mnda bulogo. Gubegile njuli, gugalule bichwalaganywa byage, na ugingila wa Falao. 15 Falao gumsambile Yusufu, namona malo, na hashi gulihuosha uchilangula; na nene nahulicha mwano gobe, ugana, ubehulicha malo unaosha umalangula. 16 Yusufu gumgaile Falao, guganine, gushi nene; Abetcha gwimgaa Falao binywa bya talala. 17 Falao gumsambile Yusufu, Mnda malo manyi nibele mgimanyu u m'bega gwa ludi. 18 na loola, ng'ombe njwii chili hudabuwa mludi, chinonyu,chisoga,chilihuya byanyi. 19 Hanyuma, noo ulola, chinge ng'ombe chidabuwile hanyuma hacho, chilema, chisone abisa, chigunju; mnda sii gyose gya Misili nishinamona chinge cha chilema biya. 20 Na chiya ng'ombe cha chigonju, chisone,chilile chiya ng'mbe njwii cha chitangi, cha chinonyu. 21 Na hachihwile uchiya hashimanyiye ugana chachiya, mndi chimoneye chisone na haya hatangi, Haho nene nuubyuwa. 22 Hanyuma nimonine mnda mange malo manyi, na loola, mihunga njwii gimenine u belee limwechi, gusoga na gya gugiluchu. 23 Na loola, mihunga njwii gya gigonju, bihuhu, byabigumu na mnaga gwa mlugulu, gimenine hanyuma hagyo, 24 Na giya mihunga gya bihuhu giminine giya mihunga gya gisoga, Na nene nibasambile baya bagabo, na hashimoneye gunaosha unangulila mo. 25 Yusufu gumsambile Falao, Malo mose ma Falao ii mamwechi, Abetcha aammonya Falao byeligila hano hoka. 26 Chiya ng'ombe njwii cha chisoga ii myaa njwii, na chiya mihunga njwii gya gisoga ii myaa njwii, Malo ii mamwechi. 27 Na chiya ng'ombe njwii, cha chilema, chidabuwile hanyuma hacho ii myaa njwii; na giya mihunga, njwii gya bihuhu gina gigumiwe na mnaga gwa mlugulu, gibi myaa njwii gya mdala. 28 Bibyo noo byandisambile Falao, ugana Abetcha gwammonya Falao byeigila hano hoka. 29 Loola myaa njwii gya buswi gilihuchwa mnda sii gyose gya Misili. 30 Hanyuma hichwa myaa njwii gya ndala hanyuma hagyo; na buswi bubo bose bwigibililwa mnda sii gya Misili, na ndala gyidigya sii. 31 Na buya buswi bushimaniya mnda sii yulu ya ndala gyine gilihucha hanu hoka, bululi gibi bushito abisa. 32 Na malo ma Falao biya byamebele nyendo chopi, ii yulu Abetcha aimonya uba ya chigilwe, na Abetcha iihwicha hano hoka. 33 Bino, Falao mndi gaenge mtu guli na lwenyi na lwengu gam'biye hegulu ha sii gya Misili. 34 Falao na gagile bino, iyaka na gabiye batu ba ugimanina hegulu ha sii, babe huguha ibaa ya bitano mnda ibaloo yose ya Misili, mnda gino myaa gya buswi. 35 Na baongole biliwa byose bya gino myaa njwii gya gisoga gyichwa, baabiye poombo gya biliwa mmaboo ma Falao babibiye bibe biliwa mmabuga mose. 36 Na bibyo biliwa byabe pomboo yulu ya sii, wa yulu ya giya myaa njwii gya ndala, gyine gibi mnda sii gya Misili, ibaloo ishidoge yulu ya ndala. 37 Iyo inywa ibele isoga u meeso ma Falao, na umeeso ma bacha bage bose. 38 Falao gusambile bacha bage, twimona uhi mtu nahi guno, mine gwina mtima gwa Abetcha mnda mwage? 39 Falao gumsambile Yusufu, Bululi Abetcha uununina bibyo byose, hashi gunge gwina lwenyi na lwengu nahi gogwe. 40 Bino, gogwe ubi mlochi gwa ndu gyanyi, na wa yulu ya inywa yobe batu banyi bihyililwa. Haya ha iti yanyi ya bwata noo hambi mmela uhima gogwe. 41 Falao gumsambile Yusufu, Loola, nuubiya hegulu ha sii gyanyi gyose gya Misili. 42 Falao guchulile lupete lwage lwa yaala mmuboo wage, nuuchiya Yusufu mmuboo; gumchwiiche na bichwalaganywa alili abenju, na uuchwiya ihogo ya nolo mioshi mwage, 43 Gumchininye hegulu ha abilibili age a bubili elibele nao. Na batu batele bigelegele umbele wage. Bungwe machwi.Bibyo gubiilwe hegulu ha sii gyose gya Misili. 44 Falao gumsambile Yusufu, Nene noo Falao, na nambo hashi inywa yobe, mtu gegese gashiginune uboo ata ugulu mnda ibaloo yose ya Misili. 45 Falao gumgitile Yusufu, Sefenath-panea; nuugondela Asenathi msiha gwa Potifela, ibuli ya Oni, uba mmachage, Yusufu gugile ubo na uya mnda obaloo yose ya Misili. 46 Yusufu nage gubele na myaa maumi matatu, heligimene u meeso ma Falao, oolo lya Misili. Yusufu guhumine umbele wa meeso ma Falao, guhitile mnda ibaloo yose ya Misili. 47 Hagibele giya myaa gya buswi, ibaloo ibushile biliwa biingi. 48 Yusufu guongwela buliwa bya mioga gyose wa giya myaa njwi mnda ibaloo ya Misili, Gubiile biliwa mnda mabuga, biliwa gya mmabala byine bibele buchungulubu mabuga, gubiile mnda mwamo. 49 Yusufu guongwele biliwa nahi isee ya wibega, biingi abisa,, na guleile ubala bululi bwa bwiingi. 50 Hambele ha uchwa wa myaa gya ndala, Yusufu gubushile baana bopi, beene Asenathi, msiha gwa Potifala, ibuli ua Oni, belim'butile. 51 Yusufu gumgishile guya gubutilwe mtangi, Manase,bululi guganine, Abetcha angibilicha asusu anyi ose, na malanga mose ma ndu gya tata. 52 Na gwa bubili gumgitile china lyage Eflaimu, yulu guganine, Abetcha apa ibushi mnda sii gya asusu anyi. 53 Myaa giya gya buswi gyo nuuhwa mnda ibaloo ya Misili, 54 gitulile uchwa giya myaa njwi gya ndala, nahi biya buiganine Yusufu. Hoo nuuba na ndala mnda bibaloo byose, haho mnda ibaloo yose ya Misili habele na buliwa. 55 Na ibaloo yose ya Misili haimonine ndala, batu bamlilile Falaogabahe biliwa, Falao gubasambile Bamisili bose giwe ulu Yusufu; gilwe byeli basambila. 56 Ndala gyo nuba mnda sii gyose. Yusufu gusulile pomboo chage chose, nuubagudicha Bamisili,. Ndala nuba bushito mnda ibaloo ya Misili. 57 Batu ba sii gyose boo nuuchwa Misili uli Yusufu; yulu bagule biliwa; bululi ndala gisili ginyemu mnda sii gyose.
Chapter 42

1 Bino Yakobo gumonine ugana Misili uli biliwa, Yakobo gusambile baana bage, Yulu yai muli hulingamine? 2 Guganine, Loolwe, nahulicha ugana Misili uli biliwa; salwe, mugye utugulila biliwa, bululi tube na mwego na tushiwe.
4 Haho, Benjamini mmunage na Yuusufu, Yakobo gushimmilile hamwechi na bashiwabo, Nilihumona booba bisone binaba weli. 5 Baana ba Isilaeli bachwile ugula biliwa mmanga gwabo bachwile, buluili ubele ndalamnda sii gya Bakanaani. 6 Nage Yusufu gubele na isuba ya ulola sii, gee noo gubele hubagusha batu bose ba ibaloo. Nabo bashiwabo na Yusufu bachwile, baginamine umbele gyage ndaa na hasi, 7 Yusufu gubamonine bashiwabo, gubasungule, haho gulibiile nahi mgenyi wabali. Gudogomine nabo wa binywa bya buhuchi, gubasambile, Benywe mwahuma uhi? Baganine, Twahuma mnda sii gya Bakanaani, yulu tugule biliwa. 8 Yusufu gubasungule bashiwabo, bibyo boo bashimsungule gee. 9 Yusufu guengeleche malo melibalotele. Gubasambile, Benywe muli Badinji, mwachwa yulu ya umona bulema bwa ibaloo. 10 Bamsambile, Nangu, mlume, bacha bobe twachwa ugula biliwa. 11 Beswe bose tuli baana ba mtu gumwechi tuli batu ba kiine, beswe; bacha bobe tushi badinji. 12 Gubasambile, Bishi bibyo, mwachwa umona bulema bwa ibaloo. 14 Yusufu gubasambile, Bibyo noo yulu namsambila muli badinji. 15 Mwitonjwa wa gino ndila; bili Falao na mwego, mushihuma hano, gusahuchwa guya mnunenyu. 17 Gubabiile bose m'bulogo masugu matatu. 18 Yusufu gubasambile lusugu lwa matatu, Iswe bino, m'be na mwego,bululi nene nilihumsina Abetcha . 19 Nambo muli na chigilwe mshiwenyu gumwechi gahambwe m'bulogo, na benywe mugye uguha biliwa ulamana na ndala gya madu menyu. 20 muchwe na mnunenyu wandi; bibyo binywa byenyu byibangisiwa, na mushihagwa. Noo byabagilile. 21 Baganinane, Winene beswe tumlibile mshiwetu, bululi tumonine asusu a mtima gwage, helitutendelele, na tushimmuliche wa bibyo asusu ano ahutubanga. 22 Leubani gugaile, gubasambile, Nishimsambile, niganine, mushimgilile bisone mmwalubaga? Ata bibyo mushihuliche; wa bibyo mashi mage malihusabwa iyaka. 23 Ata bibyo bashimanine ugana Yusufu gulihubahulicha, bululi habele na mtu guugalula madihawingi habo. 24 Gulibagule nabo nuulila. Hanyuma gubagiwilile, na udogoma nabo, gum'bwatile Simeoni ha mmanga gwabo, gummambile u meeso mabo. 25 Yusufu guganine babigiluche biliwa m'bitanga byabo, na umgiwidiche mtu gegese bumona bwage mnda itanga yage, na ubaha pamba gya mndila. 26 Bibyo noo byabagililwe. Babiile biliwa byabo hegulu ha punda chabo, bagile uya, 27 Gumwe gwabo gusulile itanga yage yulu gahe punda gyage iliwa mnda ndu gya bagenyi, gumonine bomona bwage mndi! Buli umlomo gya itanga yage. 28 Gubasambile bashiwabo, Bumona bwanyi bwagiwichiwa, loolwe, buli mo mnda itanga yanyi. Mitima gyabo gichiminye malanga, bagalwilane balihudanda,baganine, Iyii ino yatugila Abetcha? 29 Bahiile uli Yakobo, sabo, mnda sii gya Bakanaani, bammele mwano gya byose byine bigililwe wabali, baganine, 30 Guya mtu guli mlume gwa giya sii gudogomine netu binywa bya buhuchi, gutuganine tuli badinji ba sii. 31 Tumsambile, Tuli batu ba winene beswe, tushi badinji. 32 Beswe tuli babuswa umi na bopibaana ba setu gumwechi.Gumwechi gushiho, na mnunetu guli hamwechi na setu lino mnda sii gya Bakanaani. 33 Guya mtu, mmulu gwa ibaloo, gutusambile, Wa gino ndila niimana ugana benywe muli batu ba chigilwe; mshiwenyu gumwe gomwechi chimshigwe uno wandi, mugye uguha biliwa ulamana na ndala gya madu menyu, ligilwe. 34 Munjwilile na mnunenyu; haho noo handimana ugane benywe mushi badinji, ugana muli batu ba winene; haho nimgiwidicha mshiwenyu, na benywe mwigila bya ugalulanya mnda ino ibaloo. 35 Hababele huhongolola bitanga byabo, mndi! Tuhwaba twa bumona bwa gegese tuli mnda itanga yage. Nabo habatumonine tuhwaba twa bumona bwabo, boo na sabo bamwene booba. 36 Sabo Yakobo gugasambile, Mwahupanana baana babyi; Yusufu gushiho, na Simeoni nage gushiho, na Banjamini mulihubenje umguha nage; bihisho bobyo byose byandemena nene. 37 Leubani gumsambile sage, guganine, Wabahage baana banyi babili nambo nishimgiwicha oli; Upe gee mmaboo manyi, nene nimgiwicha oli. 38 Yakobo guganine, Mwananyi gushigya hamwechi nenyu, yulu mmulwage guwile, nage gwahushigala gee buchima; buube bwahum'banga mnda ndila gyamwigilila haho noo hamwisacha mbwii chanyi ndaa na usinda.
Chapter 43

1 Ndala gibele giingi mnda ibaloo. 2 Haho habahwile uya biya biliwa byabaleshile uhuma Misili, sabo gubasambile, Giwilwe iyaka uya mtugulile biliwa ata bichoo. 3 Yuda gumsambile guganine, Guya mtu gutulagile abisa guganine, Mushimona yenyi yanyi nambo guya mnunenyu gusahuba hamwechi nenyu. 4 Ubemmila mnunetu hamwechi neyu, twigya na uugulila biliwa. 5 Nambo usahummila, tushigya, bululiguya mtu gutusambile, Mushimona yenyi yanyi mnunenyu gusahuba hamwechi nenyu. 6 Isilaeli guganine, yulu yai mwangile bisone na uhiya uusambila guya mtu ugana mwina gunge mnunenyu? 7 Baganine, guya mtu gutubudiche abisa mwano gwetu na gwa ibushi yetu, guganine, Senyu gwili na mwego? Mwina gunge mnunenyu? Na beswe tumgaile ulamana na ubucha wage. Wi wii! Tumanine ugana gwigana, Mwachwe na mnunenyu? 8 Yuda gumsambile sage Isilaeli, Ummile mmwalubaga hamwechi nayi, tuchuwe, tuligile, yulu tube na mwego, na tushiwe, beswe na gogwe na baana betu. 9 Nene nibi pahali page, wamsabe mmaboo manyi. Nisahumgiwicha iyaka oli, na um'biya mmaboo mobe,hahu nibi na abachi oli milumbu; 10 bululi nambo tusabasinga, chigilwe twisoba twahugiwila lwendo lwa bubili. 11 Sabo Isilaeli, gubasambile,Nambo noo bibyo, iswe bino, guhwe mmaso gwa ino ibaloo mnda tuhwaba twenyu, mumswalile guya mtu gugo mmaso, butongu bucho bwa uhahacha noli (zeli), na bui bocho, buswenge, na malashina na bitu byopi bya mmoga gumwechi na migimba. 12 Muguhe bumona nyendo chopi mmaboo menyu, na buya bumona bwine bubiilwe mtunywa twa ngamiya chenyu bugiwichiwe mmaboo menyu; hange bugibililwe. 13 Mumguhe mnunenyu, muchuwe na mugye uliguya mtu. 14 Abetcha Dambe na amme uleelelwa u meeso ma guya mtu yulu gamsulile guya gunge mshiwenyu, na Benjamini, Nene nabiwilwa na baana banyi, nawilwa. 15 Haho babo batu baguhile guya mmasobaguhile na bumona nyndo chopi mmaboo mabo, na Benjamini; bachuwile na bagile ndaa na Misili, bagimene umbele wa Yusufu. 16 Nage Yusufu helimmonine Banjamini hamwechi nabo, gumsambile mgimaninyi gwa ndu gyage, ubagingiche bano batu mndu, ushinje, na uhiya yulu bano batu biya hamwechi nanyi gino kunyiya meno. 17 Guya mtu gugilile nahi biya bimsambile Yusufu, Nage gubahyiche babo batu mndu gya Yusufu. 18 Haho babo batu bamonine booba bululi bahiichiwa mndu gya Yusufu, baganine, Yulu ya buya bomona bwine bugiwichiwe mnda bitanga byetu lwendo lwa lutangi twahuhiichiwa mno, bululi gatushitaki, gatuguhe, gatuguhe tube bacha bage na punda chetu. 19 Bahyile uli guya mgimaninyi gwa ndu gya Yusufu, badogonine nage ha mchango gwa ndu. 20 Bamsambile, Loola, mlume, tuchwile lwendo lutangi yulu tugule biliwa. 21 Mengo, matuhyile undu gya bagenyi, tususile bitanga byetu, mndi! bumona bwa mtu gegese buli mnda bitanga, bumona nahi bya bubele bose; bibyo na beswe twachwa nabo mmabo metu. 22 Na beswe twachwa na bunge bumona mmaboo metuyulu tugule biliwa; tushimanine ii nanyi gubiile bumona mnda bitanga byetu. 23 Gubasambile, Talala, gibe wa mli,mishimone booba, Abetcha enyu, nao noo Abetcha a senyu, gummele lindo mnda bitanga byenyu; bumona bwenyu bumgiwilile. Hanyuma gubahele Simeoni. 24 Guya mtu gubahyiche mndu mwa Yusufu, gubahele madi, baligogile magulu, guhele punda chabo biliwa. 25 Babiile alibu guya mmaso mpage bihiila Yusufu ha kunyiya meno, bululi bahuliche ugana biya biliwa uya. 26 Halihiile Yusufu mndu mwage, bammele guya mihaso gyine bibele mmaboo mabo mnda ndu gyage, bamginamine moaga hasi. 27 Gubabudiche mwano gwa mwego gwabo, guganine, Wi wii! Senyu guya gwamuganine, guli poo? Gwili na mwego? 28 Baganine, Mcha gobe setu guli poo, gwili na mwego; baginamine, babungile machwii. 29 Yusufu guginunine meeso mage, gumonine Benjamini mnunage, mwaana gwa mnage, guganine, Guno noo mnunenyu gwamusambile mwano gwage? Gumganine Abetcha amonye yano yage oli, mwananyi. 30 Yusufu guitile abilo, bululi mtima gwage gummonene keene mnunage, guengile ihana ya ulilila, gugingile myumba yage gee nuulila mmo. 31 Gunawile yenyi, gutobowile, gulichibile, guganinwe, Leswe iliwa. 32 Bambiile iliwa gee buchima, na baya boo buchima, na baya Bamisili bene basuya hamwechi nage boo buchima; bululi Bamisili bashinaya hamwechi na Baeblaniya, yulu m'bisone u Bamisili. 33 Bashamine umbele wage, m'buswa gwa mtangi ha ihana ya bubuswa bwa butangi, na mnuna batu ha bununa batu bwage,babo batu bagagilwe boo wa boo. 34 Bahililwe ibaa ya iliwa uhuma u bulilo bwa Yusufu, haho gugiluche ibaa ingi ya Binjamini ibe myendo chitano uli bange. Banywine, Baseelele hamwechi nage.
Chapter 44

1 Gumsambile guya mgimaninyi gwa ndu gyage guganine, Ugiluche bitanga bya bano batu na biliwa ulamana na uosha wa uswala wabo, wabiye na bumona umilimo gwa itanga ya mtu gegese. 2 Na isengo yanyi, isengo iya ya lufeza, waibiye u anywa a itanga ya guya mnuna batu hamwechi na bumona na biliwa gyage. Guitile nahi biya bimsambile Yusufu. 3 Halwelo habuyele, babo batu bahelwe luhusa, boo na punda chabo. 4 Na habatoboile mmbuga, na bashi nagya koo, Yusufu gusambile guya mgimenyi gwa ndu gyage, Chuwa, ubalame baya batu, na gogwe holibabanga, ubasambile, Yulu yai mwagiwiche buube u busoga? 5 Wi wii! Ino isengo ishi iya yine isumwina mlumyanyi? Nage busubuwa na iyo. Mwagila bisone wa ugila bibyo. 6 Gubalamine, gubabangile, naubasambila biya binywa. 7 Bamsambile, Yulu yai mlumyanyi udogoma binywa nahi bino? 8 Nangu! Bacha bobe bashinagila bino; loola, buya bumona bwamumonine utunywa twa bitanga byetu, tuuhele boo iyaka uhuma nabo u giya sii gya Bakanaani. Tunaosha wi ugiba nda ndu gya mlumyobe bumona na nolo? 9 Gwimoneya uba nayo hawingi ha bacha bobe, na gawe, na beswe nabo tubi bacha ba mlumyanyi. 10 Mgimenyi guganine, Mndi na bibe bibyo nahi bwamwagana, Mtu gwimoneya uba nayo gubi mcha gwanyi, na benywe mubi mushi na abachi. 11 Baitile abilo, basadiche bose bitanga byabo, na bose usula bitanga byabo. 12 Nage guengile, gutulile uli mmosobu ndaa na uli mnuna batu. Isengo imoneye mmitanga ya Benjamini. 13 Bagulile bichwalaganywa byabo, babiile kila mtu mchigo gwage hegulu ha punda gyage, bagiwile umbuga. 14 Yuda na bashiwabo bahiile undu gya Yusufu. Nage Yusufu gubele mo mndu, nabo bamgwilile mmachwi. 15 Yusufu gubasambile, Ino iyihisho nai yamwapisha? Mushigidu ugana mtu nahi nene ninaosha ubuwa? 16 Yuda gugaile, Tumsambile ii mlumyanyi? Tuganewi! Tulihe wi kiine? Abetcha amona buube bwa bacha bobe. Loola, beswe tuli bacha ba mlumyanyi, beswe na guya mine gwamoneya ma isengo mmuboo wage. 17 Yusufu guganine, Nangu! Nishigila bibyo; mtu guya minne isengo yamoneya mmuboo wage, noo gubo mcha gwanyi. Na benywe muligile wa talala uli senyu. 18 Haho Yuda gumshenene,guganine, Ibumbu ino, mlumyanyi, mcha gobe gadogome inya imwechi mmatu ma mlumyanyi, na sungu chobe chishimlamine mcha gobe, yulu gogwe uli nahi Falao. 19 Gogwe, mlumyanyi, utubudiche beswe bacha bobe,uganine, Wi wii! Mwina senyu, na mnunenyu? 20 Tuusambile, gogwe, mlumyanyi, Tuli nage setu, nage gusili mmosu, na mwaana gwa buungu bwage gwili mcho mcho, na mulwage guwile; gwahishigala gee buchimamnda gumo lya mnage, na sage gulihummunda abisa. 21 Utusambile beswe bacha bobe, mnunenyu muchwe nage wandi yulu meeso manyi mammone. 22 Tuusambile,mlumyetu, mmwalubaga gushinaosha ushiga sage,yulu gabemshiga sage, sage gwiiwa. 23 Utusambile bacha bobe, Gusahuchwa mnunenyu hamwechi nanyu, mushimona yenyi yanyi iyaka. 24 bibyi hatugile uli mcha gobe, setu, tumsambile binywa byobe, mlumyanyi. 25 haho setu gutusambile, Guwilwe uya mutugulile biliwa bicho. 26 Tuganine, Tushinagya; mnunetu gwahuba hamwechi netu, twigya, bululi tushiosha umona yenyi ya guya mtu, nambo mnunenyu gusahuba hamwechi netu. 27 Mcha bobe, tata,gutusambile, Mugidi ugana mmachanyi gumbitile mwana gwa bubuili; 28 Gumwe guhumine mandi, biganine, Nishi na adugwa guhagilwe, na nishimmonine iyaka utla haho. 29 Na m'benguha guno nage, na gabebangwa na usona, mwisacha mbwii chanyi na asusu ndaa na usinda. 30 Nambo nabegya uli mcha gobe, tata, na gugo mmwalubaga gushi hamechi netu, ugana mtima gwage guli guumbatilane hamwechi na mtima gwa mmwalubaga. 31 haho helimona ugana guya mmwalubaga gushiho, gwiwa; na beswe bacha bobe twisacha mbwii cha mcha gobe, setu, wa uchigililwa msinda. 32 Bululi nene mcha gobe nibiile ha ihana ya gugo mmwalubaga uli tata, niganine, Nisahumgiwicha oli, nibi na abachi uli tata masugu mose. 33 haho, bino, nilihuutendelela, umbiye nene mcha gobe nashame, na ihana ya gugo mmwalubaga uba mcha gwa mlumyanyi; na gugu mmwalubaga gagye hamwechi na bashiwabo. 34 Bululi, niusha wii ugyauli tata, na guno mmwalubaga gushiho hamwechi nanyi? Nashichwe umona buube bwine bwim'banga tata.
Chapter 45

1 Haho Yusufu gushioshiche ulichibila u mbele wa bose bene babele bagimanyu alibu nage. Wa lidi mbila, guganine, Bahunyiwe batu boseu meeso manyi. Na hashigimene mtu hamwechi nage, Yusufu helilimaninye u bashiwabo. 2 Wa lidi lyage lyata nuulila, nabo Bamisili boo nuhulicha. Batu ba mndu gya Falao nabo nuhulicha. 3 Yusufu gusambile bashiwabo, Nene noo Yusufu; tata gwili na mwego ka? Ata bashiwabo bashioshiche umgaa, bululi bagingilwe na iduba u mbele wage. 4 Yusufu gusambile bashiwabo, Alibu wanyi; haho bahiile wage. Guganine, Nene noo Yusufu mshiwenyu, mine gwamugudiche ugya Misili. 5 Haho bino, mushuchigililwe, na nangu uuziki m'bichuli-chuli byenyu bya mwego, yulu ya uungucha uno; Abetcha apilile uba hambele henyu yulu ya ubisa mwego gwa batu. 6 Bululi myaa gino gibili ndala gisili mnda ibaloo, nahaliiyaka myaa gitano gishi gya ulima na usola. 7 Abetcha apilike hambele henyu yulu ya um'bisila byushigala mnda ibalo, na uumogononya benywe wa uhugonona wata. 8 Bino bashi benywe mupilile uno, ii Abetcha ka; nage gwambiya nahi sege gwa Falao, na nahi mlume mnda ndu gyage gyose, na mmyilichi mnda ibaloo yose ya Misili. 9 Iswe abilo abisa ugya uli tata, mugye umsambila, Bino noo bilihudogoma mwanobe Yusufu, Abetcha ambiya uba mlume mnda ibaloo yose ya Misili, hano hoka uchwe na ushisinge. 10 Gogwe wishama mnda ibalo ya Gosheni, ubi hoka nanyi, gogwe na baana bobe, na bedulu bobe, na nyama chobe, ng'ombe chobe, na byose byoli nabyo. Na nene niulisha uya; 11 bululi gyili gishigachi myaa gitano gya ndala; ushichwe uba mtu gwa usaba, gogwe, na ndu gyobe, na byose byoli nabyo. 12 Na loola, meeso menyu malihumona na meeso ma mnunanyi Benjamini , ugana iyi anywa anyi nene noo alihudogoma nenyu. 13 Na benywe mwimsambila tata mwano gwanyi na ugengeda wanyi ose mnda ibaloo ya Misili, na wa byose byine byamwamona; mwite abila uchwa na tata uno. 14 Gumgwilile mnunage Benjamini, mioshi nuulila; Benjamini nage nuulila mioshi mwa mmulwage. 15 Gubaumbatile bashiwabo bose, gulile nabo, hanyuma ha bibyo, bashiwabo bagombole nage. 16 Mwano guhulichiwa u ndu gya Falao ugana, Bashiwabo na Yusufu bachwa. Bibele bisoga u meeso ma Falao, na u meeso ma bacha bage. 17 Falao gumsambile Yusufu, Ubasambile bashiwenyu, Muite bino; muswiye nyama chenyu michigo, bachuwe bagya ibaloo ya Bakanaani; 18 hanyuma mwamguhe senyu, na batu bose ba mmadu menyu, mwachwe, Nene nimma busoga bwa ibaloo ya Misili, na benywe wiya manona ma ibaloo. 19 Na benywe mwasambilwa, gilwe bino, muguhe tubilibili mnda sii gya Misili yulu ya baana benyu ba bacho bacho na baachi benyu, mumguhe senyu muchwe. 20 Na mushibilochi bidagulanywa byenyu, bululi busoga bwa ibalo ya Misili ii bwenyu. 21 Noo byabagili baana ba Isilaeli. Yusufu gubahele tubilibili nahi biganine Falao, gubahele na pamba gya mndila. 22 Gubahele bose bichwalaganywa bya ugalula mndila; haho Yusufu gummele Benjamini bumona sambi chitatuna bichwalaganywa bitano bya ugalula. 23 Na sage gummilile nahi bino;punda umi chiswalile busoga bwa Misili, na punda cha maota umi chiswalile biliwa, na mikati, na biliwa bwa sage byabuya mndila. 24 Gulagene na bashiwabo, boo nugya, nage gubasambile, Mushigumane mndila. 25 Bachuwile uhuma Misili, boo nuuhiya Kanaani wa Yakobo, sabo. 26 Bammele Yakobo mwano, baganine, Yusufu gwili poo; nage noo gulihihyililaibalo yose ya Misili. Mtima gwa Yakobo gushiminye umana, bululi bushi bagitabidiche. 27 Bamsambile binywa byose bya Yusufu, byelibasambile; na helimonime tubilibili twelihilile Yusufu, yulu ya uuswala, mtima gwa Yakobo guchuwile uhuma usinda. 28 Isilaeli guganine, Byawilila! Yusufu mwananyi gwili na mwego; nigya, nammone hambele ha nene uwa.
Chapter 46

1 Isilaeli gugile, hamwechi na byose byelibele nabyo, guhiile Beel-sheba, gushinjiche lutangi lwa Abetcha a sagi Isaka. 2 Abetcha adogomine na Isilaeli u malo ma m'busugu, guganune, Yakobo, Yakobo. Gugaile, Nene guno. 3 Guganine, Nene noo Abetcha, Abetcha a sobe, nangu umona booba ugya Misili; bululi niuita ube mmoga gwata ubo. 4 Nene nigya nobe hamwechi mpaga Misili; na nene niugiwicha iyaka hashi adugwa; na Yusufu gwibiya uboo wage hegulu ha meeso mobe. 5 Yakobo guchuwile uhuma Beel-sheba; baana ba Isilaeli bamswalile sabo na baana babo ba bacho bacho, na baachi babo hegulu ha tubilibili tuya tuhilile Falao yulu ya umswala . 6 Baguhila na nyama chabo, na bitundu byabo byose byine byababele nabyo mnda sii gya Bakanaani, bahiile Misili, Yakobo na ibushi yage hamwechi nage. 7 Baana bage, na bedulu bage, hamwechi nage,misiha gyage na misiha gya baana babge, na ibushi yage yose, gulule nayo ndaa na Misili. 8 Mano noo machina ma baana ba Isilaeli bene bagingile Misili, Yakobo na baana bage; Leubeni, bubele bwa Yakobo, 9 Na baana ba Leubeni; Hanoki, na Palu, na Hesloni, na Kalmi. 10 Na baana ba Simeoni; Yemueli, na Yamini, na Ohadi, na Yakini, na Sohali, na Shauli, mwana gwa mmachana gwa Mkanaani. 11 Na baana ba Lawi; Gelshoni, na Kohathi, na Melali. 12 Na baana ba Yuda; Eli, na Onani, na Shela, na Pelesi, na Zela; mndi Eli na Onani bawile mnda sii gya Bakanaani. Na baana ba Pelesi, ii Hesloni,, na Hamuli. 13 Na baaba ba Isakali; Yola, na Puva, na Yashubu, na Shimloni. 14 Na baana ba Zabuloni; Seledi, na Eloni, na Yaleeli. 15 babo noo baana ba Leya, belim'butile Yakobo uya Padan-alamu, na Dina, msiha gwage, Bichuli-chuli byoe bya mwego bya bawalubaga na bawamisiha gyage babele maumi matatu na batatu. 16 Na baana ba Gadi; Sefoni, na Hagi, na Shuni, na Esboni, na Eli, na Alodi, na Aleli. 17 Na baana ba Asheli; Imna, na Ishva, na Ishvi, na Belia, na Sela, kachabo. Na baana ba Belia noo Hebeli, na Malkieli. 18 Babo noo baana ba Zilpa, mine Labani gwelihele Leya, msiha gwage, nage gum'butile Yakobo bibyo bichuli-chuli umi na mtuba. 19 Baana ba Laeli, mmachi gwa Yakobo noo Yusufu na Benjamini. 20 Uya mnda sii gya Misili Yusufu gubushile, Manase na Eflahimu, Asenathi msiha gwa Potifala belim'butile Yusufu, ibuli ya Oni. 21 Na baana ba Benjamini; Bela, na Bekeli, na Ashbeli, na Gela, na Naamani, na Ehi, na Loshi, na Mupimu, na Hupimu, na Aldi. 22 Babo noo baana ba Laeli, belibutile Yakobo, bichuli-chuli- bya mwego umi na bana. 23 Na baana ba Dani; Hushimu. 24 Na baana ba Naftali; Yaseeli, na Guni, na Yaseli, na Shilemu. 25 Na babo noo baana ba Bilha, mine Labani gwelihele Laeli, msiha gwage, nage gum'bitile Yakobo bibyo; bichuli-chuli bya mwego bibele njwii. 26 Bichuli-chuli bya mwego bichile hamwechi na Yakobo ndaa na Misili bihumine mlubunda lwage, nangu na baachi ba baana ba Yakobo, bichuli-chuli byose bibele maumi mtuba na mtuba. 27 Na nbaana ba Yusufu belibutile uya Misili bibele bichuli-chuli bya mwego byopi. Bichuli-chuli byose bya mwego byine bingile Misili bibele maumi njwii. 28 Yakobo gummilele Yuda uli Yusufu lutangi, yulu gamlombwele ndila gya ugya Gosheni. Bahiile ibalo ya Gosheni. 29 Yusufu gugandile abilibili age, gugile umgaa Isilaeli, sage, uya Gosheni; gulimoninywe weli, gumgwilile mioshi mwa Isilaeli, gulile mioshi mwage ihindi ilaila. 30 Isilaeli gumsambile Yusufu, Bino nabewa hano, bululi naumona yenyi yobe, ugana wili na mwego. 31 Yusufu gusambile bashiwabo na batu ba mndu gya sage, Nigya umsambila Falao mwano; niimsambila, Bashiwetu na batu ba mndu gya tata, bene babele mnda ibalo ya Bakanaani bahunjwila. 32 Na babo batu m'basugi, bululi basushama batu ba uusa nyama, nabo bachwa na miyoo gyabo na ng'ombe chabo na byose byabali nabyo. 33 Byahabi Falao helimgita, na um'bucha mgilo bwenyu iyii? 34 Mwagane, Bacha bobe tuli baushi ba nyama utula buwalubaga bwetu, na ata lino, beswe, na setu; haho noo hamwihewa ibalo ya Gosheni; bululi gegese bwa uusa nyama ii byuchigilicha u Bamisili.
Chapter 47

1 Haho Yusufu gugile umsambile Falao, gumganine, Tata na bashiwetu, na miyoo gyabon na ng'ombe chabo, na byose byabali nabyo, bahiya uhuma iya ibaloo ya Bakanaani, nabo basili uya Gosheni. 2 Guguhile haya batu batano hawingi ha bashiwabo, gubagimiya u meeso ma Falao. 3 Falao gubabudiche baya bashiwabo, Mgilo gwenyu ii mgilo nai? Bamsambile Falao, Bacha bobe tuli baushi ba nyama, beswe na bamasetu. 4 Bamsambile Falao, Twachwa ushama u bugenyi mnda gino sii, bululi nyama cha bacha bobe chishi na ihana ya ulila, bululindala gili giingi abisa mnda ibaloo yose ya Bakanaani. Bino, tuli huutendelela, utugitabiche beswe bacha bobe tushame uya Gosheni. 5 Falao gumsambile Yusufu, guganine, sobe na bashiwenyu buchwilila; 6 ibaloo ya Misili umbele obe, ihana yoyose iya yolimona isoga ubabiye sobe na bashiwenyu; na bashame mnda ibaloo ya Gosheni. Iyaka nambo ubagidi ugana hali batu buosha hawingi habo, ubabiye babe bahele ba uusa nyama chanyi. 7 Yusufu gummyiche sage Yakobo mnda ndu gya Falao, gummalile Falao mihaa. 8 Falao gum'budiche Yakobo Wi wii! masugu ma myaa gyobe mmanga? 9 Yakobo gumgaile Falao, Masugu ma myaa gya ushama wanyi ii myaa sambi na maumi matatu; masugu ma myaa gyanyi gisili gocho, itaka gya asusu, na mashihyile masugu ma myaa gya tata nahi masugu ma mwego gwabo 10 Yakobo gu mmalile Falao mihaa guhumine u meeso ma Falao. 11 Yusufu gubashaminye sage na bashiwabo, na ubaha buoolomnda ibaloo ya Misili, wi ihama isoga ya ibaloo, mnda ibalo ya Lamesese, nahi biganine Falao. 12 Nage Yusufu gubalishiche sage na bashiwabo na ndu gyose gya sabe, wa ulamana na lubalo lwa baana babo. 13 Ata bibyo hashibele na biliwa nda sii gyose, yulu ndala gibele gya bushito abisa, na ata mnda ibalo ya Misili, na ibaloo ya Bakanaani isusulwe abisa, bululi bwa ndala. 14 Yusufu guongole bumona bose bwine bumoneye mnda ibaloo ya Misili na mnda ibaloo ya Bakanaani, bwa biliwa byabagulile. Yusufu guhyiche buya bomona mnda ndu gya Falao. 15 Bumona bose habuhwile uongolwa mnda ibaloo ya Bamisilina ibaloo yose ya Bakanaani, Bamisili bose bachwile bamchwilile Yusufu, baganine Beswe utuhe iliwa, yulu yai tuwe u mbele wa meesomobe? bululi bumona bwetu bwahuhwa. 16 Yusufu guganine, Hanywe nyama chenyu, na nene nimma biliwa, ugulana na nyama chenyu, nambo bumona bwenyu bwahuhwa, 17 Bachwile na nyama chabo uli Yusufu; Yusufu gubahele biliwa, bya falasi, na bya miyoo, na bya ng'ombe, na bya punda, nage guchiliche nyama chabo chose guya mwaa. 18 Na guya myaa haguhwile, bamchwilile mwaa bubili, bamsambile, Tushihum'bisa mlumyetu ugana bumona bwetu bwahuhwa, na bihichi bya nyama chetu noo bibya bya mlumyetu, hashishigele itu umbele wa mlumyetu, nambo mibili gyetu ba bibaloo byetu. 19 yulu yai tuwe umbele wa meeso mobe, beswe na ibaloo yetu? Ubetugula beswe na ibaloo yetu na biliwa, beswe na ibaloo yetu tubi bacha ba Falao; hanyuma utuhe matete, twabe na mwego na tushiwe, na ibaloo yetu ishichimine. 20 Haho Yusufu nuumgulila falao ibaloo yose ya Misili; bululi Bamisili bagudiche kika mtu lubala lwage; wa ibalo ya ndala gibele gibaoshe abisa, ibalo yo nuba ibya ya Falao. 21 Gubabulule babo batu, gubabiile mnda mabuga, utula lulu luubi lwa Misili ndaa na luya luubi. 22 Haya ibalo ya bibuli gushiigulile; bululi babibuli babele na pamba gyabo uhuma wa Falao, babele huya pamba gyabo gyababele huhewa na Falao. Wa bibyo bashigudiche ibaloo yabo. 23 Yusufu gusambile batu, Loolwe, namgula lino, benywe na ibaloo yenyu, uba bibya bya Falao; bino, matete menyu m'bemauna mnda ibalo. 24 Hamihiya mengo na uesa mwimma Falao iba ya bitano, na ibaa ya bina ibi yenyu benywe bene, uba ii matete ma ibaloo, na uba biliwa byebyu, na biliwa bya baya bali mnda madu menyu, na biliwa bya baana benyu. 25 Baganine, Watubiya na mwego, tulihusaba tuhewe ugitabichiwa u meeso ma mlumyetu, na beswe tubi bacha ba Falao. 26 Yusufu gubiile m'bindo gwa mwano gwa ibaloo ya Misili ndaa nalino, ugana ibaa ya bitano ibi bibya bya Falao. Iya ibaloo ya bibuli kaa noo ishibi ibya ya Falao. 27 Isilaeli gushamine mnda ibaloo ya Misili, mnda ibaloo ya Gosheni. Bapashile bibya mmo, babulile naugulilila wine ubo, 28 Yakobo gushamine iyakaginge myaa umi na njwii mnda ibaloo ya Bamisili, bino, masugu ma myaa gya mwego gwa Yakobo gobele myaa sambi na maumi mana na njwii. 29 Masugu ma uwa wa Isilaeli mo nuhiya; gumgitile mwanage Yusufu, gumsambile, nambo nagitabichiwa, u meeso mobe, biya uboo obe hasi ha tango lyanyi, wangitile uleelela ea chigilwe; nuutendelela ushinjiye mnda ibaloo ya Bamisili. 30 Mengo mandilala hamwechi na bamatata, waswale uhuma Misili, wanjiye mnda sinda cha bamatatulu. Yusufu guganine niita nahi byolihudogoma. 31 Yakobo guganine, undahile, Yusufu gumlahile Isilaeli guliginaminye uli mwamba gya ingo.
Chapter 48

1 Bibele, hanyuma na bibyo bihisho, Yusufu gusambilwe, Loola, sobe, gushihuosha; guguhile baana bage bopi, Manase na Eflaimu, hamwechi nage. 2 Nage Yakobo gusambilwe ugana, Loola mwanone Yusufu gwahuhiya oli,Isilaeli guliomenenye, gushamine wiingo. 3 Yakobo gumsambile Yusufu, Abetcha Dambe gutobwele uya Luzu, mnda sii gya Bakanaani, gupalile mihaa, 4 gusambile, Loola, nigaile Nene guno, guganine, nibucha ibushi yobe, na uulibiya, nene niuita ube ihichi ya mioga; hanyuma niiha ibushi yobe gino sii hanyuma hobe,ibe buoolo bwa milumbu. 5 Bino hano, baana bobe babili bolibushile mnda ino ibaloo ya Bamisili haya nishi nachwa Misili ii baana banyi, noo Eflaimu na Manase babi banyi, nahi Leubenina Simeoni. 6 Na ibushi inge yine yolibuta hanyuma ha bano noo babi bobe; wa china lya bashiwabo bigiswa mnsa buhyana bwabo. 7 Na nene handichwileuhuma Padan, Laeli gumbwilile mnda sii gya Bakanaani, mndila, hashi lwendo lulahu ushinahiya Eflathi, nimchiile mndila gya Eflathi noo Bethlehemu. 8 Isilaeli gubamonine baana ba Yusufu, guganine, ii bananyi bano? 9 Yusufu gumsambile sage, Bano noo baana banyi, Abetcha apele hano,Yakobo guganine, Ibumbu ino ubahyiche wandi nene nubahalila mihaa. 10 Na meeso ma Isilaeli mabele maimu na uota, na gushioshiche umona, gubashininye weli, gubahele yambi na ubaumbatila. 11 Isilaeli gumsambile Yusufu, Nishilangile ugana niumona yenyi yobe, na Abetcha amonya na ibushi yobe nayo. 12 Yusufu gubahiminye umachwi mage, nage guginamine sula
14 Isilaeli gugolole uboo wage wa ulume nuubiya hegulu ha mswe gwa Eflaimu, mine gubele mnuna batu, na uboo wage wa uachi guubile hegulu ha mswe gwa Manase, haho gulihumana byelihubiya maboo; bululi Manase noo gubushilwe mtangi. 15 Gummalile Yusufu mihaa, guganine, Abetcha aya a bamatata, Iblahimu na Isaka, bagile hambele hao, gee Abetcha mine gundichiche, mwego gwanyi gose, ndaa nalusugu luno lwa lino, 16 namo malaika mapogononye na usona ose, na gabahalile mihaa bano bawalubaga; china lyanyi na lilumbulwe yulu yabo, na china lya tata Iblahimu na Isaka; na babe batu beengi hawingi ha ibaloo. 17 Yusufu helimonine ugana sage gwabiya uboo wage wa ulume hegulu ha mswe gwa Eflaimu, bibele bisone u meeso mage. Guuginune uboo wa sage gauhunye u mswe gwa Eflaimu, yulu gaibiye hegulu ha mswe gwa Manase. 18 yusufu gumsambile sage, bishi bibyo, tata, bululi gugu noo bubele,; ubiye uboo obe wa ulume u mswe gwage. 19 Sage guhaninye, guganine, Nigidi, mwananyi nigidi, gee nage gudi mmoga, gee nage gubi mmata; bino mnunage gubi mmata ummima gee, na ibushu yage bai beengi ba mioga. 20 Gubahalile mihaa luya lusugu guganine, Uhitila benywe Baisilaeli bihalilwa mihaa, bigana, Abetcha na uite uba nahiEflaimu na Manase, Gum'biile Eflaimu hambele ha Manase. 21 Isilaeli gumsambile Yusufu,Loola, nene niwa, haho Abetcha abi hamwechi nenyu, nao ibagiwicha mpaga sii gya bamasenyu. 22 Nene nuuha gogwe ibaa imwechi uhima bashiwenyu, yandiguhile mnda maboo ma Baamoli, wa ahilu anyi na buta bwanyi.
Chapter 49

1 Yakobo gugishile baana bage, guganine, Sumbilwe, yulu namsambile byimoneya wa mli masugu ma isula. 2 Sumbilwe, hulichiwe, benywe baana ba Yakobo, Mumulichiwe Isilaeli, senyu. 3 Leubeni, uli bubele bwanyi, Uoma wanyi, na mtomwe gwa uoma wanyi. Wabahima babge wa buosobu na wa uoma. 4 Waitowa lugumba nahi madi, bino, ushibe na buosobu, Bululi uichinine ingo ya sobe, Uibiile bunyenye; guichinine ingo yanyi. 5 Simeoni na Lawi ii babuswa; Tuhilu twabo ii maputu ma buhulihuli. 6 Ichuli-chuli yanyi ya mwego, ushigingile mnda lubisagulu lwabo, Ugengeda wanyi ushi hulichane na sumbilo lyabo, Bululi yulu ya bichigililwa byabo bahagile mtu, Na yulu ya paa chabo bagedile mmi gwa ng'ombe; 7 Bichigililwa byabo bilogwe, bululi bibele biingi, Na sungu chabo, bululi chishibele na misa. Nibagabula hawungi ha Yakobo, Nibasala hawungi ha Isilaeli. 8 Yuda, bashiwenyu biutona, Uboo obe ubi umaoshi ma tumangu tobe. Baana ba sobe biuginamina. 9 Yuda m mwana-tambwe, Uhuma ubuhibi, mwananyi, wasila; Guginamine nulilacha nahi tambwe, Na nahi tambwe gya ota; mnanyi gunaosha ugibyula? 10 Lubango lwa buoolo bushihuma wa Yuda, Na gugeda milandu hawingi ha magulu mage, Ndaa na byichwa Gee, mine gwihyilila, Guya mine mioga gyimnyemya. 11 Gwihamba punda gyage u mti gwa mzabibu, Na mwana-punda gwage u mti gwa mzabibu gusoga, Gufulule bichwalaganywa byage m'byunywa, Na bisanjwa byage nda mashi ma zabibu. 12 Meeso mage mabi magachichu yulu ya byuochana, Na meno mage mabi mahaha yulu ya mabele. 13 Zabuloni gwishama wibega na habudabwilo, Nage gubi nahi m'bege gwa uhambila maato, Na lugumba lwage lubi mibamba mwa Sidoni. 14 Isakali ii punda gyuoma, Gilihulilacha hawungi ha liha lya miyoo; 15 Gumonine ihana ya ulitudicha, uba habenju, Na sii, uba gili gisoga, Guchinjiche umbe lyage liswale michigo, Gee nuba mgichi gwa migilo gigumu. 16 Dani gwionona batu bage, Nahi gumwe gwa mmoga gwa Isilaeli; 17 Dani gubi ambalambala a mndila, Nahi kunga mndila, Gisuchiga tushindagulu twa falasi, Ata mine gwichina gwigwa agale. 18 Uhogonona obe nauhemba, Ee MLUME. 19 Gadi, bilume pambwa byimchunguluwa, Haho nage gwibachunguluwa ndaa na utushindagulu. 20 Asheli, iliwa yage ibi inunyu, Nage gwihana mmaso gya buoolo. 21 Naftali ii kulungu gwagisulwe; Gulihulusha binywa bya bisoga. 22 Yusufu ii mtu gucho gucho guli huhaa, Mti gucho gucho gulihuhaa hoka na msula gwa madi, Matabi mage maganda na wibambacha. 23 Bashi ba migwi bamgilile bisone. Bamtelile, bamchigiliche. 24 Bibyo buta bwage bushamine masugu mose, Maboo mage mabele na uoma, Wa maboo ma Dambe gwa Uoma gwaYakobo; Wa chinalya mmushi, gee liwe lya Isilaeli, 25 Ehe, wa Abetcha a sobe ene iuwatilicha; Wa mihaa gya hegulu ha gulu. Mihaa gya mabenga mene mali malahu ugya hasi, Mihaa gya mabele, na gya magumo. 26 Mihaa gya sobe, Gyahima mihaa gya koono cha ala. Butu bilihuunjwa bya tuono twa milumbu; Na bishame hegulu ha mswe gwa Yusufu, Hegulu ha lubumbo lwa mswe gwage guya guli mmata hawingi ha bashiwabo . 27 Benjamini ii mlunga guli husambula sambula, halwelo gwiya buhibi, Na igolo gwigaba kole. 28 Gigyo gyse noo mioga gya Isilaeli umi na gyopi. Na bibyo noo bibasambile sabo, na ubahalila mihaa; gumwechi gumwechi wa mihaa gyage gubahalile mihaa. 29 Gubasambile, ugana, Nene nagya usumbichiwa hamwechi na batu banyi; mwanjiye hamwechi na bamatata, mnda mgumbo gyine guli mlubaja lwa Efloni, Mmiti; 30 mnda guya mgumbo gulimo mlubalalwa Makpela, gulu umbele wa Mamlemnda sii gya Bakanaani, lwelugulile Iblahimu hamwechi na lubala wa Eloni Mmiti, habe ihana yage ya uchiila. 31 Mya mwabachiile Iblahimu, na Sala mmachage; mmo bachiile Isaka na Lebeka mmachage; na nene mmo nichiile Leya; 32 lubala lwa mgumbolulimo lugulilwe u baana ba Hethi. 33 Haho Yakobo helihwile ubalaga baana bage, gubungile magulu mage wiingo, gee nuuwa, gusumbichiwe hamwechi na batu bage.
Chapter 50

1 Yusufu gumgwilile sage umeeso, nuumlilila, gummele yambi. 2 Yusufu gubagishile bagichi bage bagundahi bamshinye sage buganga yulu gashibole. Bagundahi bamshininye Isilaeli buganga. 3 Masugu mage maumi mana moo nuhwa, bululi bibyo noo masugu ma ushinyiwa buganga. Bamisili bamlilile masugu maumi njwii. 4 Masugu ma umlilila hamahwile, Yusufu gubasambila batu ba ndu gya Falao, guganine, Nambo nimona misa u meeso menyu, ibumbu ino mwadogome u matu ma Falao, mwagane, Tata gundahiche, guganine, 5 Nene nisili hoka na uwa, wanjiye mnda sinda lyanyi lyandilidabile mnda sii gya Bakanaani. Bino ibumbu ino undeye nagye hano umchiya tata,nene nigiwila, 6 Falao guganine, Ubegya, umchiya sobe, nahi byeliulahile. 7 Haho Yusufu gugile umchiya sage, na bacha bose ba Falao bagile hamwechi nage, miungu gya mndu mwage, na miungu gyose gya ibaloo ya Bamisili. 8 Na ndu gyose gya Yusufu, na bashiwabo, na ndu gya sage; bashigile baana babo na miyoo gyabo, na ng'ombe chabo, mnd ibaloo ya Gosheni. 9 Hanyuma bagile hamwechi nage bachinine Falasi, na tubilibili; babele ihichi yata abisa. 10 Bahiile ndaa na mgongo gwa Atadi, guli m'bwala mwa Yoldani. Balilile ubo malilo mata, manyemu abisa. Guitile lilo lya sage masugu njwii. 11 Na baya bene babele bashame mgiya sii, baya Bakanaani, habamonine lilo mnda mgongo gwa Atadi, baganine, Lino lilo lya Bamisili mmata wa bibyo iya ihana ya haya igishilwe Abel-Misili, yine ili m'bwala mwa Yoldani. 12 Baana bage bamgilile nahi byelibalagile; 13 wa yulu baana bage bamshlile ndaa na Kanaani, nabo bamchiile mnda mgumbo bwa lubala lwa Makpela, luli umbele wa Mamle, lweligulile Iblahimu hamwechi na lubala lwa Efloni Mmiti, habe ihana yage ya uchiila babu. 14 Yusufu gugiwile Misili gee na bashiwabo, na bose bene bagile hamwechi nage umchiya sage, hanyuma na umchiya sage. 15 Bashiwabo na Yusufu habamonine ugana sabo gwahuwa, baganine, Hange Yusufu gwituonywa; nage gwitugiwidicha buube bwa tumgilile. 16 Bahilile batu uli Yusufu, ugana, Sobe, guuhele alago hambele ha uwa wage,guganine, 17 Msambilwe Yusufu bino; Nilihuusaba ubaleelele bashiwenyu buube bwabo, bululi baugilile bisone; bino tulihuusaba utuleelele buube bwa bacha ba Abetcha a sobe. Yusufu gulilile helibele hudogoma nabo. 18 Bashiwabo bagile iyaka weli, bamgwilile umagulu, baganine, Loola, beswe tuli bacha bobe. 19 Yusufu gubaganine, Mushimone booba, wi wii! Nene nili ha ihana ya Abetcha? 20 Winene benywe munabgile bisone, mndi haho Abetcha anangile uba bisoga, bululi uhogonona mmoga gwata nahi byaguli lino. 21 Hano bino mushimone booba nene nimlisha benywe na baana benyu. Gubahungiche, na udogoma nabowa talala. 22 Yusufu gushamine mnda Misili, gee na mndu gya sage. Yusufu gushamine myaa sambi na umi. 23 Yusufu gumonine baana ba Eflaimu na wibushi ya butatu; na baana ba Makili, mwana gwa Manase, babushilwe u machwi ma Yusufu. 24 Yusuifu gusambile bashiwabo, nene nisili huwa, bibyo Abetcha ii mchwila hashi adugwa, gwimmunya mmino ibaloo, nuumyicha iya ibaloo yelibalahile Iblahimu, na Isaka, na Yakobo. 25 Yusufu gubalahiche baana ba Isilaeli, guganine, Hashi adugwa Abetcha imchwilila bwenywe, na benywe mwiswala mauda manyi na umahyicha uya. 26 haho Yusufu nuuwa, gwina myaa sambi na umi; bamshininye buganga bam'biile mnda sandugu uya Misili.