Bible

Luka

1¹Wato ngbi wakeli makasi té wakome sambo djinge ikelami la iso, ²Ndenge iwo wango wandjali oweni la maiso wato komeli tée la ebandeli ewo mpe wawumi wa minisitele e loyi; ³Mbai mpe idjwali mokano aloyi ibiliyali djinge sambo kpa tée la ebandeli, te iyo dhingele la molongo owe Teyophila ⁴Laate oyewe la meemene m tiasakoli enge etoti owe.⁵La tango e Helode, likumu e Yudeya, edjali la kanga Mwengei la kombo e Zakali, la litoto e yabiya, moli ondé adjali la oliye ewanawali e Aloni, adjali owelani Eli Sabatha. ⁶Iwo kpa wadjali olamu la mayiso ma Mwengei wadjali odendeli la olamu mati ya sakoli la motomami e likumu. ⁷Wati djali la wana, elizabeta atidjali owoti, iwo kpa wa wumali mbange.⁸Tango edjali Zakali okeli otomo o ende enganga Mwengei edjali ngonga ende, awona mali la djeke. ⁹Mbuse ee Saselodose, la olingeli a Tepelo e likumu ate ohe palafé. ¹⁰liwoke ewato edjaki saa la owangi, ngonga e palafe.¹¹Anzelu likumu amowumelalia Zakali, aa moliya ngambo e lilome eholo e palafé. ¹²Mamungo ma moyetali Zakali oyeni anzelu, alidji atumali la boo. ¹³Kasi anzelu amowaselia: Otiwange Zakali, oloyi owangi oowe endimani. Moli oowe Elizabeta akowota mana opele; okomaha kombo e Yowana.¹⁴Akodja etie oowe ema e mwemu la alegrese wato ngbi wakoyemele la owatami onde. ¹⁵Aloyi akondja mote mosungu liwoso e Mwengei atikenga vinyo, té masanga kpa engé ekolangwisaka, akotumisama la molimo satu tée osali e nango.¹⁶Akowangosa wana wa isalayele ngbi olikumu Mwengei owu. ¹⁷Ako somba liwoso e Mwengei la molimo la okulu e Eliya, laate awongose mitema ewa wawa ngambo e wana wa ndjangi la kandela e meemene laate amowongele likumu wato wango wa koki.¹⁸Zakali aasiya la anzelu: ikoyewa nda ndenge? laate iwumiga mowange; alidji moli ombai masiyo mandé mpe makiya lihele. ¹⁹Anzelu a mowaseliya: idjei Gabiliyele, ikowamalaka liwoso e Mwengei, itomani té iyo wasele, alidji iyo sumbele eele mboli ndamu. ²⁰Denda, oti gbuka kine, okowasa ndji lisiyo linge djinge sambo ekowuma, olikambo ati ndime maloba ma mbayi, engé ekohengemene la ngonga eho.²¹La engé ngonga, wato wadjali olambeli Zakali, la okomwi ndenge ewumweyindé ongo ndondo e Tepelo. ²²Tango epumbia inde, ati waaselali, wa yewali té ayeni saki ndondo e Tepelo, adjali owakeleli la maho, atikalali bubu. ²³Tango masiyo mande ma otomo masiliya, awongoliya atie inde.²⁴Ma masiyo mbuse, Elizabeta, moli onde, awumali la lami, Aayisiya ndeboo itano, adjali owusi: ²⁵Edjei la ngolu likumu a kelali mbayi, olambi mayiso mandé likolo la mbayi laate alongose soni embayi liwoso la wato.²⁶La sandja e motoba, anzelu Gabiliyele atomamali la Mwengei la moki mwesi mo Galileya, mowelami Nazaleta, ²⁷Atié mana omali mwesi atiyewali pele wose e moto mwesi la molako mo Davidi la kombo e Edjefu. kombo emana ongo otiyewe pele edjali maliya. ²⁸Anzelu alingeliya etié inde aasia ihoyi mbaa, owe ongo ngolu ewohekelami, likumu adjei la owe. ²⁹Emo etelali la enge eyaseli, maliya aahuwelia inga enge mbaa eyenga woni.³⁰Anzelu amowaselia: otiwange; maliya; laate adjwi ngolu liwoso e Mwengei. ³¹Denda, okokpala lemi, okowota mana pele oko mohu kombo e Yesu. ³²Akodja osungu, akowelama mana ongo oyeti likolo, likumu Mwengei ako moha ngbelengo e likumu e Davidi, sango. ³³Likumu lande likodja a molako mo Yakobo libela, alidji likumu lande liti la osali.³⁴Maliya aasiya la anzelu: ekokelama nda ndenge iyewiti pele? ³⁵Anzelu amowongeseliya: molimo satu ekodja likolo e wowe, okulu enge eeti likolo ekodiha la elimo endé. ehonde mana osatu ongo oko wotama la owe akowelama mana o Mwengei.³⁶Denda, Elizabeta, manguwa, adjei pe la lemi, mana mwesi la owange onde, ongo odjali iyo omoweli ekomba adjei la ndebo motoba elemi: ³⁷Laate ema teeti ekokiti odjangi atie Mwengei. ³⁸Maliya aasia: idjei motuke mo likumu, ekelame la mbayi ndandenge eyasi owo: anzelu omodeyia.³⁹Ndi laenge engele, malia amalia, pe akeli obangu a moki mwesi dja mikoli mikoli aliwange mwesi dja wa Yuda. ⁴⁰Alingelia la monguta dja Zakalia, a mohekelia Elizabete mbaa. ⁴¹Ndjongo Elizabete ayokali mbote malia, mana ayabandali a solo, pe atumali la molimo santu.⁴²Inde apamali la moli mosungu: pe ahasali ate apambwamia kati e wali kpàa, pe pukapuka enge edjéi la solo epambwamia. ⁴³Nda wahaselia mbai ate nango likumu o mbai akodjaka ahue embai. ⁴⁴Denga, nda iyokali moli la mbote la owe a matoi mambai, mana ndondo esolo dja mbai ahumbwali la oemeli mingi. ⁴⁵Ohemeli edjéi la moli andimia, late sambo kpàa enge Mwengéi amohaselali wekokokisama.⁴⁶Pe malia ahasali ate: molimo mo mbai ekokumisaka Mwengéi. ⁴⁷Pe elimo mombai ekoki ti oya tonesi ohemeli mingi a tina e Mwengéi, mokalesi mo mbai.⁴⁸Nda oheni ate motuke monde omoli adjéi moto pamba. Denda, obandi sikalandjo mabota kpàa wakotolo mbai moto o mwemu. ⁴⁹Nda moto okulu akelelia mbai misala misungu, pe kombo ende edjéi mosatu.⁵⁰Magba ende edjéi likolo la wato wango wa komowangaka inde mabota la mabota. ⁵¹Akelia la okulu a mawo mande; awahandia wango wadjéi la elolo a mamungo la mitema mawu.⁵²Awadimbia wato wa okulu a kiti dja makumu, pe awadjambia wato pamba. ⁵³Atumesia wato wa ndjala la wihoo wilamu, pe awongosia wato wa ogumake mawo ohola.⁵⁴Adia osalesi Isalaele, mokeleli monde, late amungole aleti motema magba lende. ⁵⁵Nda ahaali lawa wawa wasu, atie Abalayama la momboto monde libele.⁵⁶Malia ayabatali ebete kikima la Elizabeti inga sandja isato pe awongwali ebete ende.⁵⁷Tango enge Elizabeti ekokali ate awote pê awotali mana opele. ⁵⁸Wato wango wa lisukaka la wo wonde wayokali ate Mwengéi amosu moli inde motema mo magba, pe wabandali ohemeli ebete kikima la inde.⁵⁹La lisio la mwambe, wamotenali mana oho kombeni pe amowelali Zakalia, nkombo e sango onde. ⁶⁰Kasi nango adjali la loi woasaka, ahasia: te ndjongo, mowelakani ate Yoane. ⁶¹Ndjongo wamohaselali inde moto mwesi a libota la owe ati la enge kombo.⁶²Ndjongo wamowelia sango onde la wilembo inga abali wamowele ndai. ⁶³Zakalia awongoli makoti, pe adingali: kombo wende Yoane. Ndjongo iwo kpàa wakamwali.⁶⁴Ambala esi monoko monde modukwamali, pe olemi onde opumbali, abandali owasi, pe opamboli Mwengéi. ⁶⁵Wato kpàa wango wadjali oyabati alisukaka ewu wawangali, walandali ohaseli sambo kpàa. Enge a moki mosungu dja mokoli mo Yudea. ⁶⁶Pe wato kpàa wango wayokali eho wahisali a mitema ewu, pe wandjali ohasi: oholo mana akondja ndai? late ewoo la Mwengéi edjéi penza la inde.⁶⁷Zakalia, sango onde, otimali la molimo mo santu atiesakolali ate. ⁶⁸Opabwame Engali, mwenge o Isalaele, nda akebesi ga wato wande la owa sikoli iwo.⁶⁹Atopumbeselio iso ndjeka dja mokalo la monguta mo Davidi, mokeleli onde. ⁷⁰Ndi nda ndenge eleholi inde a monoko la mowasakoli wande gala. ⁷¹Ate akotokalesa iso awanguna wasu pe mawo la wango wakototonaka iso.⁷²Late atohinye iso motema magba a tina ewa sangbasu pe amungole aleti ondimani onde mosantu. ⁷³Nda ndenge amola Pelali sangbasu Abalayama. ⁷⁴Late akoke otopûmbesi, mbuse tolongwe a mawo dja wanguna wasu, tomokelele inde otomo esatu la owangi te. ⁷⁵Osombi liwoso lande la osembo pe la omowangi masio kpàa a bomoi wose.⁷⁶Owe, mana mokeke, okodja owelami motiesakoli molikolo; ango okosomba liwoso la elongi e Mwengéi la owongeli mboka ende. ⁷⁷Mbuse ohekeli wande kandela ate akowakelesa a mboka e olimbisi masumu mawu.⁷⁸Atina magba e Mwengéi osu, la tina magba maho tokohene liwusawuse opumbi tokodendaka likolo. ⁷⁹La ekeli wuse la wato wango wa sese a wango wamotulu la wango walihohela la logo. Atina osombesi mangbanda masu mboka e logo.⁸⁰Kaikoase mana oho adjali obeki aumia la okulu la elimo adjali ndi la manganga tee lisio enge eyahiniali liwoso la isalayele.

2¹Engé e mobeko mose zale ogisité wakele tange wato wa moki kpa. ²tango e liwaso edjali tango kilinisi likumu e silia. ³Watokpa wakeli oyakomesi,moto la moki monde.⁴Edjefu indé mpe ateliya a galileya, alongoya nazalette, akiya a yudeya, la moki modandi, betelema,aloyi adjali la molako alidji la oliye o Davidi. ⁵Laate ake owakomesi iwo la molia, wasé onde, adjali elemi.⁶Tango edjali iwo ongo use enge malia akokali ogboti ounia, ⁷Awotiyu mana onde oliwoso opele. Amolingiya, amolangesiya la elakeli ewa meme, aloyi eti djali la ebete la iwo owa buti a ndako efutelake.⁸Edjali nde lenge eholo, wa wokoli wa meme wa djali alokolo wakobate laka nama djawu. ⁹Denda,anzelu olikumu awawumeliya, kembo eli kumu ewalingia.¹⁰kasi anzelu awaaselise: otiwa ngeni, ekodja la wato kpa ema emwemu; ¹¹Keke, a moki modavidi, mokalesi mowe aowata melini adjei, adjali kilisito, likumu. ¹²Denda enge elembo eko yewani ino: okogbotoni mana mwesi wa molingi alidji alangali a elakeli enama.¹³Ndi lenge ngonga ongo anzelu aboliani la weeta wanzelu, wa mokumisia, mwengei waasia; ¹⁴Kembo e Mwengai oyeti likolo, logoo a mbume la wango wadjei la mi tema milamu.¹⁵Tango waatikia wa wongoyia likolo, wa wakoli meme waa sania: toke tee ongo a beteleme, to dende enge ewumi ongo; enge likumu otoyewisi. ¹⁶Wakia obangu, wagbotia maliya la edjefu, la mana mokeke alangali la elekeli e nama.¹⁷Mbuse e weni, waasia enge ewaaselli iwo la loyi loowolo mana mokeke: ¹⁸Iwo kpa watumiya la okamwi lenge edjaki wa wokoli wa meme owaaseli. ¹⁹Malia adjali oyisi djinge sambo kpa, adjali obundoli a motema. ²⁰Wawekoli wa meme wa wongwali, la kembo la omokomisi alidji lenge eeni iwo, eengemani leenge ewa waselali.²¹Masiyo mwambi, laate mana atename kombeni, wa mahia kombo Yesu, kombo enge easali anzelu liwoso te mana a lingeli a solo e nango.²²Alidji, tango masiyo ma opetolami e kokali, ndende mobeko mo Moize, Edjefu la malia wakali la inde a yelusalema, laate wa mo inye la likumu; ²³Ndenge edhingami la mobeko e likumu, Mana ongo opele ongo owotami liwoso wa mohe la likumu, ²⁴La ohekeli likabo ilwa iwale, ndandenge edhengami la mobeko e likumu.²⁵Denda edjali Ayelusaleme moto pele mwesi nkombo ende Simeona, moto ongo adjali sombi olamu pe mowangi, adjali olambeli obondisami dja Isalale, pe elimo santu edjali likolo lande. ²⁶Aleeti amohiniali a mboka elimo santu ate atahene logo liwoso amohene Kilisito e Mwengei.²⁷Adjali a tepelo, la okulu dja elimo. Tango waboti walingesalia la mana mokeke Yesu laate a mokelele inde ndenge wingbundu ewongi. ²⁸Inde amototali a mawo mande apambolali Mwengéi, mpe ahasia. ²⁹Sikalandjo Mwengéi, owe odeiya motuke wowe ake la logo, sa ndenge ohasali.³⁰La tina maiso ma mbai eheni ndja mokalesi. ³¹Ongo ewangeli a maiso la wato wa miki kpàa. ³²Wuse late ehenese miki, pe kembo la Isalaele, wato wa owe.³³Sango la nango wadjali ndi okamwi la sambo kpàa enge wadjali owasi a tina ende. ³⁴Simeona awapamboli iwo ahasali la malia, nango: Denda, oholo mana ayabati a tina olumbesi pe oyamalesi wato mingi la Isalaele, a tina edje lembo enge wato wako aselaka obe. ³⁵Pe laowe mene ewuni mosungu ekoswa molimo mo owe late mamungo ma mitema mingi ehenene.³⁶Edjali pe la moeni omoli, Ana, mana o Fanwele, la libota Ashere. Moli oho ahumali la mbula ngbii pendja, pe ayabatali la molome onde mbula sambo mbuse oyikani atikalali onde. ³⁷Dja ndi mogweli molome, pe la mibu tuku mwambe la inéi, atiumali a tempelo, ayahekeleli la Mwengéi likolo la wuse ndondo owakilisi la oyakomgi. ³⁸Mamungo mawongwea, inde kine ndi la hengele ehoo, akumesia Mwengéi, pe akohasaka atina e Yeu atie wango kpàa wadjali olambeli osikolami dja yelusaleme.³⁹Ango wasilisalia okeli sambo kpàa la otutei wingbndu wa Mwengéi, Josefu la malia wawongwali la Galileya, ongo la Nazarete, liwange ewu. ⁴⁰Kaiko, mana ohoo adjwali obeki la okulu, atumali la okenge, pe libalano e Mwengéi edjali likolo lande.⁴¹Wawoti wa Yesu wadjali oki mbula kpàa a Yelusaleme, la lipati la pasika. ⁴²Ango eumesi inde mibu liomo la iwale wakeli a lipati ehoo ndi ndenge wamesanali oki. ⁴³Aleti, ango masio epotoli oweti, wawongwali, mana Yesu atikalia a Yelusaleme. Sango la nango watiyewali. ⁴⁴Wakanisali ate adjali la ebiba wato wango wadjaki okeli la iwo konde, wasombali lisio mobimba. Mbuse ehoo wabandali omolukani atie wato wa libota pe atie wato wango wayewani la iwo.⁴⁵Ase, nda watimoheneli inde wawongwali a Yelusaleme la omolukani. ⁴⁶Mbuse e masio masato, wamogbotoli inde a tempelo, ayabati ndando e watiesakoli, wamo mo yokaka pe akowa huelaka oopo. ⁴⁷Wango kpàa wadjali omoyoki wadjali sa okamwi a mayele mande la ewongweliseli onde.⁴⁸Ango wawoti wande wamohenia, wakamwali, nango amohaseli ate: Mana ombai , otokelia iso ndjo la tina ende? denga, sangwa la mbai tosombia moto oolukani. ⁴⁹Ase inde awahaseli ate: a tina ende ino okolukakani mbai? ino woyewitini ate mbai ikokelaka sambo dja wawa? ⁵⁰Ango watiyewali enge ekowaselaka iwo.⁵¹Ase adimbali ebete kikima la iwo la oki Nazarete, pe adjali ndi oyadimbesi liwoso lawu. Nango abaniali dinge sambo kpàa a motema monde. ⁵²Pe Yesu abekali la kondela, pe la wenge la libalano, liwoso e Mwengéi pe liwoso la wato.

3¹Mbuse e liomo itano likumu wonde mokondji Cezar, ango mpe Pilato adjali Gouvelenele a Yudeya Helode likumu e Galilayi, manango Philipo likumu e Iture etuka e Talakonite, Lisaniasi likumu e Liabilene ²Masio ma nganga e Mwengei likumu Anna e Caife moaseli mo wawa amoaseliya Yoana mana o Zakali ndondo e manganga.³Ango osombaki a moki mosungu kelekele e yoluani adjali osakoli patisa enge edjei elembo e okukoli motema alikambo la olimbisi e masumu.⁴Ase ango edingami la buku esaseleli e Isaya: moli e moto mongongo manganga akopamaka la motulu wongeleni mboka e Mwengei.⁵Mawela kpa ekodhikana, wa mikoli kpa miko adjimba enge wa bebesaki eko wongo, mboka enge wa bebesake mako wongo. ⁶Aleeti wenge kpa ekohene ondimi e wawa.⁷Adjali owaseli wato ngbi wango wadjali ototi patisimo atié inde: wana wa ndjoo, ndai owoyinyei otili limeme ligeleli?⁸Inyani misala ma okukwami, otiabate oaselani ino amene: todjei la Abalayama nda tata? iyo waseleni la lingelibukeli Mwengei akokiopumbesi weeti wana wa Abalayana.⁹Engboma eyabatiga la masisa mo mote: mote mungo mokowota mbuma mbée wa tene walumbe la misa.¹⁰Wato ngbi, watomia, waasa: tokoki okeli woni? ¹¹Awawongoselia ongo odjei la wisidje iwale amowekele ongo odjangi,ongo adjei la ema e lakake akele ndi ndjongo.¹²Wa putesi pako wadjakali la ototi batisimo, wa moaselia: molakesi, nda ndenge koki iso okeli? ¹³Awawongoselia otiwonge likolo enge easamiali ino.¹⁴Wa soda mpe wamowelia: iso, nda ndenge ekoki iso okeli? awa wongoselia: otitoni ema e mo la otetelake la oyiwi wato, e melani la liputi lanu.¹⁵Sikandjo nda ndenge wato wadjaki omolambi mpe wadjali owaweli iwoamene a mitema mawu eeti tango Yoana ase adjei Masiya. ¹⁶Awawongoselali aasi la iwo ate mbai iko obateseniino a malia moto mwesi motetelake o eti mbai akodjaka. ehongiti odukoli miliki ma ikpokpo ende, inde akobatisa ino la elimo satu mpe la misa.¹⁷ende epoli mbuma edjei la ewo ende a likambo la opetoli amene ebete ende e otangi mbuma mpe ogbotonesi a molako monde mungo moisake ilaka ase akotumba mposo ewo la misa mungo motolimanaka.¹⁸Ango Yoana adjaaki owalendisi wato weeti sungu mpe owa sumbeli mboli mdamu. ¹⁹Ongo yowanu adjali omotekesi ati moyike Helodiasi moli o maanango alidi la sambo mbe ekelali inde. ²⁰Helode abakisali alidi odjeti sambo enge omonangaki Yoana a boloko.²¹Kaiko nde engele wato kpaa wa batisamaki Yesu mpe abatisamaki ango engele adjaaki inde ohakongi likolo edukuanaki. ²²Djimbelia nda ebenga elimo satu emwa ase mooli mookali likolo e asia: odjei mana ombai olibalano iyobali ngbii.²³Yesu engele ebanda te inde otomo wonde adjaali la mbula tuku isato wa djaaki okenesi ate adjei mana e Yozefa, mana ehele, ²⁴Mana e Mateo, mana o Melesi, mana Yanayim mana o Yozefu.²⁵Mana o Matatiasi mana o Amosa manao naumama, mana o Elisi, mana o Nagayi. ²⁶Mana o Mahata, mana o Matatiasi, mana o Semeyi, mana Yosesi mana o yuda.²⁷Mana o Joana, mana o Lena, mana o Zolobabel, mana o Satakiti, mana o Neri. ²⁸Mana o Melaki, mana o Adi, mana o Kasama, mana o Alamadama, mana o Er, ²⁹Mana o Yesu, mana Matha, mana o Levi.³⁰Mana o Simeo, mana o Yuda, mana oYozefu, mana o Eliakime, ³¹Mana o Melea, mana o Mena, mana o Malata, mana o Nata, mana o Dawidi, ³²Mana o Isaya, mana o Jobede, mana o Boze, mana o Salomo, mana o nama,³³Mana o Aminadabe, mana o Adime, mana o Alani, mana o Esilome, mana o Falese, mana o Yuda, v 34 Mana o Yakobo, mana o Isaka, mana o Abalayama, mana o Otara, mana o Nakore, ³⁵Mana o Serite, mana o Rago, mana o Fale, mana o Ebere, mana o Sala.³⁶Mana o Kaina, mana o Afasa, mana o Seme, mana o Nowe, mana o Lamete, ³⁷mana o Matisala, mana o Enoki, mana o Jolede, mana o Malele, mana o Kaina, ³⁸Mana o Enose, mana o Adama, mana o Mwengei.

4¹Yesu atumesamia la molimo satu olongoya la Jordani pe molimo mo motomia ongo odjaka manganga. ²Ongo omekehekeni la esisi masio tuku inei wuse la likolo odjangi olaki kati emango masio ndjongo, mbuse emango masio ndjongo aokia djala.³Esisi a mwaselia ndjo: Inga odjéi mana o mwengéi, asa la ma mabukeli makukwane makoke. ⁴Yesu amowongoselia ate: madingo masiate: moto atikalaka sa la ilaka ilakake.⁵Esisi emotombolia likolo la mokoli, amoineisia okondji o mbume.⁶MPe asia lainde ikohekele u otetelake, la okumu ehele moki okodji, late waheli mbai, ikoki ohi la moto ongo omobali mbai. ⁷Pe inga oya konga la mbai, mbai ikohekele uwo.⁸Yesu amohongoselia: longua longuango Etota! madhingani moasi ate: okoki omongumbameli la omokeleli ndji likumu mwengei oowe,⁹Esisi, emototia ekia lainde ongo la Yelusalem, amoyamalesia likolo la tempelo mpe asia aleti: inga odjéi mana mwenge alumba yo ongo sésé late edingami djongo. ¹⁰Akohekele mitindo edje wadjelu la tina owe late wobatele. ¹¹Pe wakokpala la mawo mau late makolo maowe ma titime hesele.¹²Yesu amowongoselia: easani ate itikoke omomeki likumu Mwengéi. ¹³Mbuse omomeki la sambo ebele esisi emotilia, Yesu atikalia inde¹⁴Yesu atumesamia la otetelake molimo awongoya a Galilea, mpe mboli ende eyandjia la miki mango ma kelekele. ¹⁵Ateyakali la Sinagoga, pe okumu wonde osombia ibete kpaa.¹⁶Awongoia la Nazareth amoki mungo mobekalinde, okokani la okoko owu alingelia la Sinagoga use oyenga ayamalia late atange buku . ¹⁷Pe wamohekelia buku e mosakoli Isaya: ohengesia kasi dja buku akadjua ebete esi ekomate.¹⁸Molimo mo Mwengei modjéi likolo la mbai, late amunoli mbai la maita late iteye sango ndamu etie watundake atomi koto mbai ate ikalese wato wango wadjéi la mitema mikodjoi. ¹⁹Late tuke ikangolame, wango wakpi waiso waene ate, wango wako nyokwamaka wakale, alidji la otiesakoli mbula eholi e likumu.²⁰Mbuse eho adikia madingo amongoselia mosali, mpe ayabatia. Wato wango kpàa wadjakalia la losambo wa kukolia maiso atie nde. ²¹Pe abadia owaseli: keke eheli djinge sambo ilongoiya mbaio otangi makokesamioa kekehele. ²²Wato kpàa wadimia misala mande, pe wakamoya la maloba mango makumaka la monoko monde: wadjali owasi ate Teolo nde mana o Yozefu?²³Yesu awaaselia okowaselani mbai ehele lisekpe: monganga akalesa owe amene, alidi okowasani la mbai, kela ala la moki moowe djinge samboeyoki iso okeli la Kapelenauma. ²⁴pe abakesia asiate: iwaselini meemene mosakoli te mokikima wakokio mondimaka la moki monde.²⁵Ikowaselakani meemene: edjakali latango e mosakoli Elia wali wa gbelete pele ngbii la Isalaahele tango edikamali likolo ilanga isato la sandja motoba, edjakate la odjangi wilaka la moki mobimba. ²⁶Tango eho Eliya atitomanaate ebete tweti la wango wali molongose ndi moli ongo gbeleli molome ongo la Saleta la moki mo Sidon. ²⁷Edjakate la wato ipuisi la Isalayelela enge hengele e osakoli Elisa, tweti la iwo ati peto la mite molongose ndi Namana oto o Siliya.²⁸Iwo kpàa wamemelia la sinagoga tango okia iho djinge sambo. ²⁹Wayamalia, pe wa humbwa la inde la moki, pe wakia lainde te la songe mokoli e liwange ongo omaliwo monguta, pe wawongoia lainde obangu te ongo sésé e mokoli. ³⁰Kasi Yesu aetia ndondo ehu pe akia.³¹Ayadjimbia la moki mo Capelenauma la liwange la Galile, pe abandia otei huse o Sabata. ³²Wakamwali la mateya mande odjali otei nda moto odjei la okumu.³³Edjakali la ndondo esinagoga moto mwesi odjakali la molimo mbe ambandali ohumbi pui makai. ³⁴Nda loyi edjei atie iso la owe: Yesu o Nazalete owe odji ate otowungese, iyoyewi olamu odjei mosatu ongo Mwengei amotomi.³⁵Yesu amokelia minga, pe asia: dika monoko mowe pe pumba atielo moto esisi emolumbia ndondo e losambo pe mopumbia ndondo ende odjaki omokeli obe. ³⁶Wato kpàa wawangia, wabadjia wasani osu sambo eyinyei woni? akohumbaka la isisi pe yo mowanganga! ³⁷Mboli ende ebengea la moki mobimba.³⁸Opumbi wonde la Sinagoga akia la monguta mo simo. Okio osimo adjakali la fefele, wamwaselia likambo laho. ³⁹Oyakukolia ngambo ende pe aumbia la fefele eho fefele emosilia mbala kikima, pe ayamalia pe abadiaomosaleli.⁴⁰Mbuse ehuse oli wakadjia la wato wa ikoni ndenge la ndenge, pe awabatelia mawo mwesi la mwesi pe awakalesia. ⁴¹Milimo mbe mipumbia edje wango wato wadjali ohumbi pui la owasi: odjei mana o Mwengei, Awa kelia matata, abalakali ate wakpome late minge miliko miewakali ate inde adjéi kilisito.⁴² Tango etania huse, apumbia akia ebete e manganga. Wato engbii wabandia omoluki, tee waka mokpotia watibalakali ate wakabuane lainde. ⁴³Awaselia ate: ewongi pe ike Ameti miki la okatei mboli poli e Mwengéi, late la tina eho nde etomami mbai. ⁴⁴Ndjongo abandali otei iholo kpaa la wasinagogo e Galilea.

5¹Tango Yesu aumali kelekele e ligbutu e Nazalete, mpe wato ngbii wayandogbali ongo edjaali inde la ooki luundo o Mwengei, ²Aenia keekele emalya maamasula keekeke iwaale, ndjongo wato wanduki wayadjimbia la okpoli witanga. ³Atelya la wato eesin enge edjaaki Simoni, amoongia ate andongbe waato lihele e mbume, sikandjo ayabata, mpe ango la wato abandia owateyiwato.⁴Ango etimei inde la waasi, aasia la Simoni: yandongba ongo ebeki malia, mpe lumba itana eowe la malia. ⁵Simoni amowongweselia: moteisakoli , iso tokeli otomo likolo kpaa tooliti ema; kasi, la luundo wowe, ikolumba etanga. ⁶Alumbia etanga, atotia suu sungu, mpe etanga eatiaa. ⁷Wawelali wiino wahu wango wadjaaki la eeti waato la odii oasungi wadia mpe watumesia djinge waato waale, elukali olindi.⁸Ango eenia iwo ndjo, Simoni Petelo, akpia la mauli ma Yesu, mpe aasiandjo: otiyatole la mbai, la loyi atembai idjei moto omasumu. ⁹Iwo la wato wango wa djali la inde la wato waumali la owangi la likambo la djinge suu eolali iwo. ¹⁰Wadjaki iwo amene Zaki mpe la Yoani mana o Zebedeyo, watingali mongindi la Simoni, ndjongo Yesu aasia la Simoni: otiwange te, obandi keke okodja molobi ma wato. ¹¹Mpe wandingbia waato kondolo, wa dheyia kpaa, mpe wa motuteya.¹²Yesu adjali la moki mosungu eesindjoo, mpe denga, moto mwesi mokwe la ekoni embala, a moenia, amomaelia mauli, mpe amwaselia aya kongia lainde: likumu lambai, inga obala, kalesambai. ¹³Mana o Mwengei amobatelia mawo, amohelia, aasia: kala, ndji la enge tango ekoni embala emosiha.¹⁴Alaho amotekesia ate atiasele moto tweti. kasi, keke oya inyei la watuke Mwengei, mpe waha likolo la tina e mokalo mowe oengemeni la mandingo ma Moyize, late enge ema ewandimese.¹⁵Otwa onde obangiali la moki, mpe wato ngbii wadjawali odji la omooki mpe late wakale la wikoni djau. ¹⁶Aseko inde, aya lomolali akia la manganga, mpe aya kongali.¹⁷Lisio liesi Yesu akoteyaka , wafalizeyo mpe la watiasakoli wa mibeko wadjali ango wayabati, wadii ongo la wato waGalileya, la wa Yuda mpe la wato wa Yelusaleme; mpe okolu e likumu edjei waneni la okalesi.¹⁸Mpe denga, wato, wamodjeleli moto ogui makolo alangali la litoko, wakolukakali omolingesi la omobati liwoso e inde. ¹⁹Nda ndenge edjangali holo emolingesake la loyi e kaka e wato, watelali likolo e molako wa soyia wa modjimbesia la litoko lande liwoso la Yesu.²⁰Yesu aenia andimi owu, Yesu aasi: manima, masumu mowe malimbisami. ²¹Wa tiasakali mibeko la wafalisayo wabandali omungoli mpe la waasi: oholo ndjo adjei, ndai ongo okoki olimbisi masumu, eti ndi Mwengei inde amene?²²Yesu, ayewaali sambo dinge emungolaki iwo kpaa, atotia liloba mpe awahuelia: nda sambo emungolaki ino a loho eino? ²³Ndaeema ongo edjei pete, okoki waasi: masumu ma oye malimbisane, te waasi ate yamala, mpe somba? ²⁴Laate ayeweni ate mana o moto adjei ala ambume la okulu olimbisake masumu: mbai yoluhuelini mboka, ase la moto obukanaki makolo, oyotomi aasia la moto ogui ma kolo, omalakola litoko lowe keke la makolo mowe.²⁵Ongo moto oyamalali, ndjinge wako mweneki watotya litoko lilangalaki inde, mpe akia la molako monde, amogumei Mwengei. ²⁶Iwo kpaa wadjaali la oyahueli, mpe wa mogumeya Mwengei, watumisamiali mwemu, wabandi waasi lainde: iso tweni keke sambo dinge yeenekiate iso.²⁷Mbuse eeho, Yesu apumbia, mpe aenia mo putisi pako la kombo e Lewisi, moto aabotali la molako mo putesaka la inde ate: tutia mbai. ²⁸Mpe, adheyia kpaa, ayamalya, mpe amotuteiya.²⁹Lewi amohekelali wilaka wisungu ongo la molako monde, mpe waputesi pako ngbii weeti wato walakali ebete eikima la inde. ³⁰Wafalisayo mpe la wadingi wabandia ondungwani, mpe waasia la wa tutiani ate: nda ndenge ekolakaka ino mpe la okengi la waputesi pako mpe la wato wango wakokalaaka obee? ³¹Yesu, atotya loyi, aasia laiwo: etii wango wakokalaaka olamu nde wadjei la posa e okali, kaasi wakoni. ³²Mbai iditii owaweli wato wolamu kasi oweli wato wabe ate wa kukoli ekelelisia lande wayekoli wa Yoani la wango wa Felisayo wakokilaka wilaka, wa Yakobo mbala la mbala, kasi wango waowe wakolakaka wa koke ngaka.³³Asi la iwo: wayekoli wa zaa, nda wango wa falizeyo, kilani wilaka la enwenwe mpe la oyatoti, tee eko enga mwengele lakake mpe la okengi. ³⁴Yesu awawongoselia: inga owe la wato la fete e liwala okokini owa okokini owalangalesi ndola ndji molome oliwala adjei ongo? ³⁵Kasi masio wakolongola molome ndondo ewu wakokila wilaka mango masio.³⁶Yesu aawahali lisekpe liesi moto tweti atitotaka esuki e esindje eholi laate abambe esindje egala inga okela ndjongo abetesi esindje eholi alidji esuki eesindje epoli eengemeniti la esuki e esindje egala.³⁷Mpe moto tweti atabonge mana moholi ndjongo la mokeba mo gala, tee inga mana maholi ma kwaate mokebe, ekosuakana, mpe mokeba mokobitanei; ³⁸Kaasi ewongi obongi mana la mokeba moholi. ³⁹Alidji moto tweti atibalaka okenge lihoso, maana magala mbuse maana eholi, inga ndjongo okoasa ate: Magala maeti maana poli,

6¹Easemia,wusé wo sabato ewelami mbuse la poo ase Yesu akpandesania la wilanga wa bule. Watutiani wandé wadjakali olongosi poso asé walaka,mbuse eodjipakisi la mowo. ²Wafalisai wadi waasia la indé nda likambo likokelaka ino sambo ndjingé ikokiti okelani wuse wo sabato.³Yesu awawongoselia: otitangalini nda ekelali Davidi, ango emwanali ndjala, indé la wato wango wandjakali indé la iwo; ⁴Woni nda elengelali inde la monguta mo Mwengei, aotia wokoke wungo woindjake, alakia, awahekelia wango wadjakali iwo la inde, wungo wotekesami ate moto atilake,ndji wanganga wa Mwengéi wakoki olaki? ⁵Ase awaselia: mana omoto andjéi menemene e sabato.⁶Eumia, wodi wuse wo sabato, ase Yesu alingelia la sinagonga, ase abandia otiesakoli amogbotia moto mwesi ewo ende ekakati. ⁷Wadingeli la wafalisai, ate wa momeke Yesu inga akomokalesa moto wuse wo sabato: edjali ngonga ate waluke ndenge eomokawi. ⁸Kasi aewali mamungwene mawu, ase aasia la moto ongo djali la ewo ekakati: amala ase, ase abata ango la wodja. alongoya, ase amalia likolo.⁹Ase Yesu awaselia ate: iyohuelini inga edjéi wolamu omokalesi moto wolamu te, okeli olamu to okeli obe lisio la sabata. ¹⁰Ase,awadedia iwo kpàa, aasia la moto ongo: nanola ewo owe. akelia ndjongo, ase ewo ende ekalia. ¹¹Wamemelia makasi, wabandia waasani iwo la iwo nda ema ekomokela iwo Yesu.¹²La enge engele,Yesu akia la mokoli okaakongi,ase akelia ongo likolo mobimba woakongi la Mwengei. ¹³Ango otaniani wuse, awawelia watutiani wande, ase awonia liomu la wale, wango wawahali inde nkombo.¹⁴Simoni wamoweli petelo, Andele,manango; Yakobo; Yowane;Pilipo; Batelemi. ¹⁵qwer ¹⁶Yuda mana o Yakobo, la Yuda mokeliota ongo motambali.¹⁷Adjimbia la iwo mongindi ase aamalia la ebetesi edjei wolamu, ango odjakali ebele ewato la watutiani wa nde la ebele ewato wango wakalongwali la Yudea, la Yerusaleme, la moki e Sidona.wadjali la likambo la omooki la ate wakale la wikoni wau. ¹⁸Wango wadjakali okwesi la wisisi wibe wakalali. ¹⁹Ase wato ngbii walukia ate wamopote wenge, alikambo ate wokulu wungo madjakali aatie ende madjakali owakalesi iwo kpaa.²⁰Ango ndjoongo Yesu,alongosia maiso awadendia watutiani,aasia ate: Mwemu la ino wango wa ndjangi nde wokumu wo Mwengéi wodjei la ino. ²¹Mwemu la ino wango wandjei la ndjala ango ino okogbetani mwemu la wango wakolelaka sika ahala ango ino okwemele.²²Mwemu la ino ango okotonakaniwato, ango okoumbaka iwo la ino la otangakoli ino,la obitesi nkombo ndamu, la Mana omoto nda odjéini wato wabe. ²³Emeleni la wungo wuse, ase humbwahumbwani la woemeli, denda lisute lanu lisungu lindjéi ongo likolo; nde ndjoongo ewakelakali iwo wasangbau wawakela waaseli.²⁴Kasi magba la ino,wato wagumake,alikambo ate okondjini walamu wonu kpàa.²⁵Ase magba la ino wango wagbeti ase mbuse okookani ndjala.²⁶Magba, ango okowaselakani wato kpàa wolamu, alikambo ate endjéi sambo ehenge nde watata wau wandjakali woasi la waaseli wa moleho.²⁷Ase ikoaselakani ino wango wokoyokakani: balani wanguna wonu, wakelani olamu; la wango wako otonakani. ²⁸Pambolani wango wako lakelakani obe oyakongila wango wakotangakani ino.²⁹Inga moto aobinga la likeke mwesi moekeli eti ase motongo a opwesi mokoto elikolo otitone mohekele te esindje enge sese. ³⁰Mohekele moto kpaa ongo ohongi iwe ase inga moto a opwesi iwo wowe oti wonge ate ahongwesele.³¹Aleeti ndji nda nbdenge ino okobalakani wato waheokeleni ino kelelani iwo ndji ndjongo. ³²Ase inga okobalakani wango wakobalakani ino ewo edjnei la nda litomba atie ino? laate te wapangano wakobalaka wango wakobalaka pe iwo. ³³Ase inga wokokelakani olamula wango wakokelakani ino olamu oho e djei a nda litimba atie enu? te wapanganu pe wakokelaka ndji ndjongo. ³⁴Aleeti inga oko,bekisakani wango weewini ate wakowongwesele ino, eho edjei nda litomba atie enu? te wapangano p,e wakobekisaka odjangi oluki matabisi atie wapangano weti laate la mbuse watote enge wahekeleli.³⁵Ase balani wanguna wanu wakelani olamu wabekisani odjengi oluki matabisi likiani odjui ma ema la mbuse; ase mbano wonu ekodja osungu wakodja wana la ongo weti likolo laate inde akokelelaka wato wango wati la ondimi pe wato wabe sambo dja oemeli. ³⁶Djaakani wato dja motema magba ndi nda sangbanu adjei moto o motema magba.³⁷Aleeti deeni osambesi laate watiosambesani te keke deeni olumbesi wato la sambo laate watiolumbesani la sambo te keke. dukolelani wato ase wako dukolelani ino.³⁸Hekelekeni, ase wato wakohekeleni ino wakoswa la mabenga wonu wiwo ngbi enge epkotokoli, wadjadjesia etumia laate wakomekeleni ino la epimo enge wokomekeleni iwo.³⁹Ndjongo ahekeleli iwo aleeti lisekpe mwesi: moto ngo ogwi maiso akokiti o inyei moto ngo ogwi maiso mboka. te ndjongo? iwo kpaa waale wakokwa la liwela. ⁴⁰Mano o kelasi a etiti motiesiakoli onde, ase moto kpaa ongo o inyami olamu olamu akodja nda motiesiakoli wonde.⁴¹Nda ndenge okoeneke okasi a maiso e mino owe, ase otieneke osoto enge edjei ndondo e maiso lowe? ⁴²Nda ndenge okoki ohaseli miino owe; dhee mbai ilongose osoto enge edjei ndondo e maiso lowe otieneke osoto enge edjei atie owe? moleho, longosewo osoto la maiso mo owe, ase okohene olamu ndenge ohumesi osoto enge edjei la maiso e miino owe.⁴³Motee molamu etikpalaka pukapuka obe ndinda motee mobe eti kpalaka pukapuka elamu. ⁴⁴Laate mote la motee ekoyewanaka la pukapuka djande wahibukaka a motee lawa keke te.⁴⁵Moto molamu akopumbesaka sambo dja olamu la olamu enge ehisi inde a motema monde ase moto mobe akopumbesaka sambo mbee la obe enge eyisi inde; laate monoko nonde ekohasaka ndji sambo enge etumi a motema.⁴⁶Djongo atina ende okowelakani mbai nkolo! nkolo! ase otikelakani sambo enge mbai ikohasaka. ⁴⁷Moto kpaa ongo akodjaka atie mbai pe akoyokaka loi lo mbai ase akokelelaka eho ayengemeni la ndai? ⁴⁸Ayengemeni la moto ongo omaali monguta enge atongali liwela molindake pe ase abatali mikolo la mabukeli ndjongo ango pela edjali ewale embingambingali monguta eho, ase etikwali esungu te laate emaanali olamu.⁴⁹Aleeti motongo akoyokaka pe aikelelaka, aengemeni la moto ongo omaali monguta likolo la ngene ase atibatali olamu, ango edjeeli pela ebingabingali ewo ase la mbala kikima ekwali.

7¹Ango esesali Yesu wasi djinge sambo kpaa atie wato, ase akia la kapalanaume.²Ongo ndjongo likumu mwesi owa sodo adjaali la mituke monde ongo omobalakali inde ngbii, moto oho adjali la ekoni ahue e logo. ³ Ango okali inde mboli e Yesu, awatomali la weeti wiloko wato ewa Yuda wake o mokongi adje omokulesi motuke monde. ⁴Waumia atie Yesu, wamowongia ate: oho a wongi la omokeleli enge. ⁵Inde abali moki mosu, inde moto otomaeli ehele Sinagoga.⁶ndjongo Yesu akia la iwo mongindji. Ango ewuma inde pene imolako monde, likumu ewa soda atomali wato la omowasele Yesu ate likumu otiatungese. Mbai edjei ndai laate olingela la molako mo mbai? ⁷Nde la ndjongo etiya ene olamu adjii mbai amene odjii ati owe. Kasi asa saa loyi loyikima motuke mo mbai akokala. ⁸Alikambo ate mbai idjei sese e makumu ma mbai, idjei la masadje sese e mbai. Inga iyasa la mwesi, keke ase akoke, enga lya sa alidji djaka! akadja, inga yasa la moto ombai iwotomi: kela ndjo! ase akokela ndindjongo.⁹Ango okali Yesu, djihinge sambo, am ondimolioholo moto yakukolia, awaselia wato selini tee ala la Isalayeli etimowene moto otimake iyowa wango wamotuti. ¹⁰wato wango wawatomali likumu ewa soda kapiteni,wawongoya la monguta, wa mogbotia moto owotomu, ndi akaliga wolamu.¹¹Mbuse eho Yesu akia la gbata e waine watutiani wande la wato ngbii wakia la inde mongindi. ¹²Ango ewana inde la moduhe mo gbata, wato wakpali molonda okii la moho la kabali, e mana opele mwesi omoli ongo ogweli molome, wato wa djaali la moli oho mongi ndje. ¹³Ango e mwenali likumu moli oho, amoyokelali magba la motema amawaseliaate: otilele. ¹⁴mbuse eho Yesu akia ahue a bandia sanduki wato wango wagbalali molonda wamalia: Yesu asia: mana opele yasi la owe! amala likolo! ¹⁵Moto mogwake alongoya, aabatia ase apotia okpomi. Yesu amohekelia la nango.¹⁶wato kpaa wawangia, wamo emelia mwengei, waasia: mwaseli mosungu aumiga atie su! wasia koto Mwengei aumiga owakalesi wato wande. ¹⁷ndondo e Yudea kpaa wibeta wa keleele kpaa wato waokia mboli a lungo loi ekeli Yesu.¹⁸Watutiani wa Yoani mopatesi wa mwaselia sambo djinge. Yoani awelalia wato wale ndondo ewu. ¹⁹Ase awatomia atie likumu la omohueli ate: odjei moto ongo wewi iso ate ageleli, inga tomolambele odi? ²⁰ango eumia iwo atie yesu, wa moaselia; Yoani mopatesi, atotomi iso ate tohuele: odjei motoongo wewi iso ate ageleli inga tomolambele odi?²¹la engele eho Yesu awakalesia wato ngbii wa wikoni, la wato wango waliti wenge wibe la awaduholia wato ngbii maiso. ²²mbuse eho awawongoselia watutiani wa Yoani, mopatesi: kekeni omwaseleni yoani mopatesi loi wungo woeni ino wungo woki ino: wato wagbi maiso wakoeneke, wato wabukakani makolo wakosombaka, wato wa ekoni e mbala wakooka, wato wadikami matoi wakokalaka wato waguaki wakosusuaka, wato wango wadjangi wa kokaka mboli ndamu. ²³mwemu la moto ongo obanei wondimi wonde!²⁴ango okio watutiani wa Yoani, Yesu apotia wasi loi wo Yoani, atie wato ngbii asia, dengakininanda ema ongo la lisobe? mboli djinge ikoni nganesaka ehoho? ²⁵Ndjongo okadengakini nde? moto ongo okpali wisindje wilamu? ase wato wango wakpali wisindje wa motio moatasungu, la wato wa wadjenge ngbii wadjei la minguta ma makumu. ²⁶Ndjongo okadendakini nde? mwaselia? memena yoiwaselini, la wato kpa moto tueti atimoete Yoani .²⁷Alika mbo ate Yoani adjei moto ongo eyasi e kpa ta e Mwengei la gbondo ende: mwengei aasia: denda imotomi motomani mo mbai liwoso la owe, alikambo la odukoli mboka alikambo la owe. ²⁸Yesu asia alidi: yasi la ino: ndondo e wato wango wawotami la moli tweti odjei mo sunguomoleki Yoani, ase moto ongo ongo odei mokeke oleki la moki e Mwengei adjei mosungu omoleki inde.²⁹wato kpaa la wandombe wa oputesimamelo; wadjali omooki Yesu, waewali ate Mwengei adjali memene; ase wapatali watisimo e Yoani. ³⁰Ase wafalisayo la wa mwalimo wapui watonia mwano mo Mwengei alekambo lawu, ase watonia lipatesi la Yoani.³¹Yesu asia koto: ikowa kokanesa wato wa ehele engele lande? ³²Wadjei nda wana wango wabati la ebete e liho; wakowaselaka iwo ameme ate: tobinge lalini ino malinga ase otiwinalini te! toolembali elembo dja magba ase oti lelalini te!³³Alikambo Yoani mopatesi adjali inde atilakali wokoke te, la atikengali ase woasa lini: adjali la molimo mobe. ³⁴Mbai man a o moto edjia ikolakaka la ikokengaka, ase woasiani: modendani oholo moto akomungwaka ndi olaki la okengi wino, inde aewani la wato wali. ³⁵Ase wato wa wondimi wakoeneke la wohola ate lokenge wo Mwengei wodjei memene.³⁶Mofalisayo mwesiamowelia Yesu la olaki la monguta monde yesu aumia atie nde, ase aabatia la mesa. ³⁷Moli mobe mwesi adjali la moki moho, angae okali inde ate Yesu akolakaka la mongutha mo Mofalisayo akadjia la molangi mokelami alibanga la malasi. ³⁸Aamali mbuse, la makolo na Yesu. Adjaali oleli, adjaali oluleyi makolo ma yeni la poo, la ohuholi la sue djande, ambo mbia moho alidji omonolali malasi.³⁹Ango woenia ohongo mafalizayo omowelali Yesu luhungo loi asia la motema monde inde oholo motoadjaaki memene mwaseli nda amwewi ohongomoli okomobandaka ate adjei moli mobe.⁴⁰Yesu apotia wasi la Mofalisayo simo, edjei la ma loi wokele la owaseli, Simo asia mwalimo; asa.⁴¹Yesu asia: wato wale wadjali la nongo e moto ongo okahaka nongo mwesi adjalila nongo e wadjenge tuku itano. ⁴²Nda ndenge idjangali iwo falanga efutake. Ongo moto awalimbisia iwo wale ndai okomobala ohongao moto oleki? ⁴³Simona awongosia: imungoli ongo odjei la nongo sungu oleki. Yesu amwaselia owongosiga wolamu.⁴⁴Mbuse eho Yesu akukolia atie moli ase asia la Simo omweni oholomoli? mbai ilingeli la monguta mo owe, ase otihekele mbai malia ma wakpoli la makolo ma mbai te, ase oholo moli akpoliga mbai mokolo la malia ma maiso mande, ase akuholiga la sue ndjande. ⁴⁵Otihekele mbai mobale la wasasi tee ndinda elengeli mbai la monguta inde adeiti opotopoti, makolo lo mbai la ombombi.⁴⁶Otisuele mbai maita lamoto ase inde asuiga malasi la makolo ma mbai. ⁴⁷La ngo iwaseli libalano lisungu lienesi inde, enesi ate masumu mande ngbii malimbisami kasi ongo wakomolimbisa maakeke abali keke.⁴⁸Asembuse Yesu asia la moli oho: masumu ma owe malimbisamia. ⁴⁹Wato wandjaki olaki la Ysesu mongindinwasia la mitema mawu: oholo moto adjei ndai? ongo wongi olimbesi masumu? ⁵⁰Ase Yesu amwaselia moli: wondisi wowe wookalesi owe.

8¹Mbuse eho Yesu akeeli gbata la gbata, ase mokii moosaa la mokii moosaa. atie sakolia alidji awa sumbelia mboli ndambu ookumu e Mwengei wakomotutiaka. ² La ndambo e wali wango kalali la milimo mibe la wikoni; maliya edjali iwo omoweli magadala ongo omopumbesali witita sambo. ³La Yoani, moli o kuza kapita o Elode la Suzana la weti wali wango wadjali ohekeli wihoo djau a tina owasalesi iwo.⁴Sikalandjo ango ebiba e wato wayaboleali ebete kikima la wato wadjaali odi a mokii la mokii wakodja atie inde. awahaselali iwo la lisepke liesi: ⁵Mohoni mwesi apumbali oki ohoni mboto ende pe ango edjaali inde ohoni pukapuka eheti ekwali pembeni e mboka wakpotokolali eho, pe mbulu e likolo walakali eho. ⁶Ndambo eeti ekwali likolo la libukeli pe mbuse opumbi ekaukali laate etidjaali la malia te.⁷Ndambo eeti ekwali ndondo e keke, ase keke enge ebekali la eho ebete kikima ewolali eho ani. ⁸Ndamboeeti ekwali a mbume enge elamu, ase mbuse ebekali e wotali, puka puka mbo kama la mokama. Ango esiselali ide owasi, aasia alidji la mooli mo pamake: ongo odjei la matoyi maake.⁹Ase watutiani wande wabamdali omoweli ndimbola la enge lisekpe. ¹⁰Inde ahasali ate: ino okoki la oyewi wihisaneli mosantu e likumu Mwengei, ase ikohasaka la weti ndi la wingbundu laate te wakodendaka, watiyeneke, te ndenge ekoyoka iwo watihele tinate.¹¹Sikalandjo ndimbola e ndakisa enge eholele: mboto edjei liloba e Mwengei. ¹²Enge ekowali pembeni e mboka edjei wato wango wayoki, la mbuse etota edia alongosia liloba a mitema mawu laate watindime pe watikale. ¹³Enge ekwali likolo e libukeli edjei wato wango inga wayokia liloba, wayambia eho la ohemeli, ase wati la mindili te; wandimia tango keke, ase atango amekamia iwo wadeiya ondimi.¹⁴Enge ekwali likolo la keke ehonde wato wango wayoki, ase nda sambo e mabundo, la ohemeli sambo dja moki, puka puka djahu eti komelali. ¹⁵Enge ekwali likolo la mbume e olamu edjei wato wango mbuse e oyoki liloba la motema molamu, wat tike onde wawu, wa wotia mbuma.¹⁶Moto te mwesi mbuse ololesi mwinda, monde adhihe obati sese epee, ase okobataka eho ndi la katini alidji watibaka sese eepe,wakobandaka likolo la mesa alikambo inga motoalingela a molako ayene. ¹⁷Laate djinge sambo eyisami ekoyewana alidji sambo djinge etiye wane ekopumba a hoho. ¹⁸Eho enge kebani la ndenge okoyokakami, laate moto ongo odjei, la iwo ngbi, wokomohekele ngbii, ase moto ongo ati la ema te, mopuesa te enge keke enge ebateli inde motema.¹⁹Sikalandjo nango la wa ma nango wadjali atie inde ase ogbotoni, la inde latina ewato wadjali ngbi. ²⁰Ndjongo wamohaselali inde ate: ngwa la wa mangwa wahamali ongo saa, wabali ate wa ohene. ²¹Inde awawongweselia ate: ima ombai a wa manima wa mbai edjei wango wakoyokaka liloba e Mwengei pe wakobalaka eho.²²A lisio liesi, Yesu iwo la watutiani wande walingelali a masuwa, ase ahasali la iwo ate: tokpande a ngambo eti e malia ndjongo wakeeli. ²³Tango edjali iwo oki, Yesu adjali olangali ilo. Ehoho ekelali ngbii, pe malia ebandali olingeli a masuwa pe wadjali pene e olindji.²⁴Mbuse wayekoli, wakeli ebete elangalaki inde pe wamosusolia wahasia; motiesi, topoti ogwi! ango esusoiya inde apamelia ehoho malia ebandali owadjimbi, ali ase logo elingelia. ²⁵Ndjongo awahaselia ate: eni ondimi wonu? ase wawangali ngbii, wakamwali mingi, wahasia: oholo adjei mpedja ndai? laate adjei ohekeli te la ehoho pe malia wingbundu e eho ekomoyokaka?²⁶Waadjimbali la moki mo Wagesenia, mungo modendani la Galilaya. ²⁷Ase ango Yesu aandjimbia la mbume, motopele mwèsi o mungo moki, adjali la milimo ebele. eumoya masio atokpalaka esindjè te atidjaali owabati la molako ndji la kabuli.²⁸Amoenya Yesu, apamia akuya la makolo mande,aasia la moli mosungu:iso la owe todjéi loi,Yesu mana o Mwengéi olikolo? yaleli la owe, otiudjeenese mbai wodidi.²⁹Ase Yesu asia la enge esisi eume atie moto oho. Alikambo ewumuyi gaala ekomokweseke masio kpàa wani obaniakali,la omonangi seni la wibende la makolo, kasi adjakali otenakoli wiho kpàa wimonangakali iwo.ase adjali otomalali la djinge witota owabati la manganga.³⁰Yesu amohuelia:nkombo owe ndai? amowongoselali: ngbii laate wadjali ngbi la wenge wande. ³¹Ase wamongokoli Yesu atiwalumbe la liwele lilindake.³²Edjakali ango, la mokoli, lihoke lisungu la walu. Ase wisisi Yesu ate walingele la liwoke laho, awandimelia.³³Wisisi wipumbia atie motooho, wilingelia la liwoke la ngulu, owa longwali emokli, eyasuali la ligbutu iwogbali waguali³⁴Ango eyenia wato wango wadjali obanei djege ngolu, watilia obangu akasumboli la gbata la miki mikeke. ³⁵Wato wakia okeni nda ekelani sambo djaho, wakia ahue djéi Yesu ase wamogbotia ongo moto omoumali milimo aabati la makolo mande akpali esindjè eklamu,lomungo wonde woumia wolamu ndjongo ewawangesia makasi.³⁶Wango waeneli nda oleki sambo djaho wawaselia wato nda ekali moto o milimo mbe. ³⁷Wato kpàa wa moki Gerasa wasia la Yesu ate alongwe ahue la iwo, alikambo ewawangesali makasi Yesu atilia la wato awongoya.³⁸Ongo moto omoumali milimo mbe amwongia wabate iwo la inde kasi Yesu aumbia la inde aasia ate:³⁹Wongwa la ndako ase akowasela ndjinge kpàa eyokeleli Mwengéi.Akia adjawaselia la gbata ndjinge sambo kpàa imokeleli Yesu.⁴⁰Ango ewongoya Yesu, wato ngbii wamoemelia, alikambo iwo kpàa wandjakali omolambeli.⁴¹Ase denda amoemia moto mwèsi nkombo ende yalusi ongo odjéi likumu la Sinagoga. Akuya la makolo mande,ase aasia lainde ate alingele la ndako eende. ⁴²Alikambo ate andjali la mana omoli ombula liomi la iwale anguali, ango okia Yesu wato wabandali omopotipoti.⁴³Ndiango,moli mwèsi andjali la ekoni ewoumi makila mbuse ewilanga liomu la wiale,ongo osilali wambele wande kpàa aatie e minganga, tee ango moto tweti te amokaleli. ⁴⁴Aandongbia mbuse eende ase ahelia esindjè e Yesu ndila engele eho makila madeya omoumi.⁴⁵Ase Ysu aasia ate: moto mwèsi aheli mbai? wato kpàa wawungania,Petelo la wato wango wandjakali ango waasia ate:likumu,ebele ewato watumi a la gboo ase walengi la owe, ase woasia ate:Ndai oheli mbai? ⁴⁶Kasi Yesu awongosia ate:Moto mwèsi aheli mbai alikambo yewi ate wokulu wondjumi mbai.⁴⁷Ongo moli, aeniate loi wungo wouminga saa, akia andja kpamakpame akuya la makolo mande,aasia liwoso la wato kpàa nda emoheli inde nda ndenge ekali inde la mbala kikima. ⁴⁸Yesu amwaselia: Mana o mbai omoli wondi wo owe wokalesi, keke logoo.⁴⁹Ango edjakali inde owasi moto mwesi alongoyi la molako mo likumu mo sinagogi asia ate: Mano owe omoli agwi, atimwaselake likumu. ⁵⁰Kasi Yesu, aokya ndjoongo amwaselia likumu la Sinagoga: otiwangete ndimela mana akokala.⁵¹Ango eumia inde la moguta atekesia ate moto twèti atilingele la inde mongindi, elingele ndi petelo,la Yoani ase la yakobi, ase la sango la nango ongo mana. ⁵²Wato kpàa walelia waokia magba masungu: ase Yesu aasia ate:deeni oleli,agwiti,kasi alali wilo.⁵³Ase wamosekia,waasia ndi ate agui.⁵⁴Kasi amohelia la mawo; aasia la moli mopambake: Mana, amala. ⁵⁵Ase elimo ende emowongoya,ndiango aamalia; ase Yesu awaseli ate wamohewilaka alake. ⁵⁶Wawoti wa ongo mana omoli waahuelia, awaselia ate watimwaselake moto te weti sambo ndjinge.

9¹Yesu awawelia wango liomu la wale, awahekelia wokulu la makoki likolo la ndiwa,la makoki ma okalesi wikoni. ²Awatomia osakoli wokumu wo Mwengéi,la owakalesi wato wa wikoni.³Otiikakeni ema teeti ango okia ino, awaaselia ate,esuki emote,te wapasa te wokoke,te waambele woidjakeni la wisindjè wasese wiale. ⁴Minguta kpàa mikolingela ino abatani ango,angonde eobalini iwo.⁵Ase inga wato watiwoemeleni, umani la enge gbata,ase huholani motuluemo makolo manu,ehoemesi wobe wou. ⁶Wakia ase waumia moki la moki,osakoli mboli ndamu,la okalesi wato.⁷Herode modengeli aokia sambo ndjinge yasanali la ndjinge ilkali,ase mamungwene mamosilia. Alikambo ate wato wadi wakoasaka ate Yoane ongo asusoi gaala logo. ⁸Wato wadi, waasia ate Elia ongo olimwali,ase wadi waasia ate mwesi o waaseli ongo osusoi gaa. ⁹Kasi Herode asali ate,mbai imotenali Yoane moto; ndai kasi ongo,enge ekokaka mbai ndjinge sambo?ase amolukia ate omoene.¹⁰Waapositolu, wakawongoya,wa mwaselia Yesu sambo kpàa ndjinge ikeli iwo. Awatotia lainde mongindi, wakia ebete esi aati e gbata esi enge ewelani ate Betesaida. ¹¹Ebele ewato waewia,wamotuteya.Yesu awaemelia, ase awaselia likambo la wokumu wo Mwengéi; awakalesia wango wandjakali la mposa eokali.¹²Ango abandia wuse otitimi, wango liomu la wale waandogbia ahue la inde wa mwaselia ate wawongosa wato, la ate wake la miki la wibete winge windjéi ahue, wakonde ebete elangalake la ndenge eokali; la ate iso tondjéi ala la lisobe. ¹³Yesu awaaselia ate ino wahekeleni wilaka. Ase wamowongoselia ate:Eondjéi sa la makoke matano la su iwale la qte toke iso mene toke okasombi wilaka wa wato kpàa. ¹⁴Kaiko nde wato wandjaali koto itano, Yesu awaselia watutiani wande ate waaselani waabate la mbume wato la wato melengo mwèsi wato tuku itano.¹⁵Wakelia ndindjongo, wawaaselia iwo kpàa waabate la mbume. ¹⁶Yesu atotia mango makoke matano la ndinge su iwale, ase alongosia maiso dendia likolo, amapamboya.mbuse abukkolia,awahekelia watutianiwawakawele wato. ¹⁷Iwo kpàa walakia wagbetia ase waonia wisuki winge witikali, mindjangi liome la miale.¹⁸Wuse woesi Yesu aakongokoli saa inde mene, andjakali la watutiani wande, awahueliaate ebete e wato wakwasaka ate mbai indjéi ndai?¹⁹Wamowongoselia ate: Yoane mobatesi; wadi ate, Elia, mwèsi owaaseli wa gala osusoyi.²⁰Awahuelia, ino okwasa kani ate mbai indjéi ndai? Petelo awangoselia ate: Kilisito o Mwengei. ²¹Yesu awatekesia makasi ate watimwaselake moto twèti. ²²Aasia alidi ate ewongi wolamu ate Mana omoto aene wodidi ngbii, wato wagala wakomolumba mla wadingeli la wakawi la wato wabe, wakomoola, ase akosusua wuse wo misato.²³Mbuse eho awaselia iwo kpàa inga moto abali ate atutie mbai, aatone inde mene, akpale mosalaba monde masio kpàa, ase atutie mbai. ²⁴La ate ongo obali okalesi wenge wande akowungesa, kasi ongo okowungesa wenge wande la likambo la mbai ako kala. ²⁵Ase nda ema ekokondja moto inga andjwa moki mwèsi kpàa, kasi awungesa wokongi wonde.²⁶Alikambo ate ongo okooka nsoni la likambo la mbi la sambo nda mbai, Mana omoto akomookela nsoni, ango okondja inde la wongengi wonde, la wungo wo Wawa la waahumbwa wausatu. ²⁷Iwoaselini memene, wato wadi wango wandjéi ala watoguate ndi waene wokumu wo Mwengei.²⁸Elekia msio mwambi mbuse ewasi ndjinge sambo,Yesu awatortia lainde Petelo, Yoani la Yakobo,ase atelia la mokoli la okaakongi. ²⁹Ango wakongokoli inde,elongi ende ekukwania, wisindjè wande wiumia pèe oleki.³⁰Ase denda,wato wale wakokpomesanaka la inde: endjakali Moise la Elia, ³¹Wango weueneli la wongengi ase wapotia woasi woki wonde wokelame la Yelusaleme.³²Petelo la wino wande wandjakali la wilo;kasi,ango okosusoya iwo,waenia wongengi wo Yesu la watpo wale wandjéi la inde mongindi. ³³Ango edenia inde la wango wato wale la Yesu,Petelo amoaselia ate: Likumu,endjéi wolamu toabate ahala; tokele minguta misato, mwèsi mo owe,mwèsi mo Moise, mwèsi mo Elia. Atiewakali enge ema la sakali inde.³⁴Ango andjakali inde woasi, lipata liesi; ase lipata liesi liwadihia; ase watutiani wa wangia wamwenia akolingela la mapata. ³⁵Ase mooli mwèsi mwasia la mapata, mwasia ate: oholo andjéi Mna ombai omwoni mbai mookani. ³⁶Ango ookania mungo mooli ndjoongo, Yesu atikalia inde moikima. watutiani wadakia longoo,ase te omwaseli moto, la enge engele la sambo ndjinge yeneli iwo.³⁷Wuse wodi wolekia,ango wandjimbakali iwo la mokoli, liwoke la wato ebele wakanjia liwosa la Yesu. ³⁸Ase denda,awondja wo wato moto mwèsi apamia: Likumu, iwongi, modenda mana ombai opele, andjéi mana ombai moikima opele. Esisi emohelia, ndiango ahumbia pui. ³⁹Ase esisi emohelia makasi eomokwèse emoumesa mahulo la monoko, ekomokelaka makasi, mbuse ende okwakwi la mbume. ⁴⁰Iwaongia watutiani wa owe waumbe la eho, ase iwo te okoki.⁴¹Liwota lindjangi wondimi la liyaimbi, ewawongoselia Yesu, ikoumwa l ino tee nda eengele, la ikonanga ino motema la sambo ndjanu ndjaka la mana wo we. ⁴²Ango eumia inde ahue, esisi emolumbia la mbume, emohelia makasi. Kasi Yesu aumbia la esisi ebe, amokalesia mana ase mowongosia atie sango.⁴³Ase iwpo kpàa waahuelia la wosungu wo Mwengéi. Kaiko nde mwèsi la mwèsi wandjakali waahueli la sambo kpàa ndjinge ikelakali Yesu, asia la watutiani wande: ⁴⁴La ino okani wolamu luhulu loi: Mana omoto awongi wamokawe la mawo ma wato. ⁴⁵Kasi watutiani watiokali lungo loi, loi loho woyaisali, ate watioke gbondo eho ase wawangia omohueli gbondo eho.⁴⁶Kaiko nde mamugwene ma wadjelia la elimo, la wewi inga ndai odjéi moto mosungu la kati eewu. ⁴⁷Yesu, aenia mamunwene mau la ndondo e motema amootia mana mokeke, amobatia ahue wande. ⁴⁸Ase awaselia ate: ongo moto okomoemele mana mokeke oholo la nkombo embai, aeeli mbai amoeli ongo atomali mbai. Inga moto adja mokeke liwoso la nu kpàa, inde ondjéi mosungu.⁴⁹Yoani aotia loi ase asia telikumu,iso to mwèni moto mwèsi akoumba la wisisi la nkomboeowe; ase iso tomotekesia, alikambo ate atotuteiti iso. ⁵⁰Otimotekeseni, Yesu awawongoselia; alikambo ate moto ongo oti motone monu adjéi atienu.⁵¹Ango eumia eho engele ende olongoi la mokili eumia ahue, Yesu aotia mamungwene ma okii la Yerusaleme. ⁵²Awatomia liwoso lande wasumbi mboli, wakia la mboka ase walingelia la ebete esi ewasamalia, alikambo lka omowongeleli ebete eabatake. ⁵³Kasi waeniti te, alikambo ate aanali okii la Yelusaleme.⁵⁴Watutiani, Yakobo la Yoani, waenia ndjoongo wasia ate: Likumu obali ate toonge misa minde ongo likolo miwalongose?⁵⁵Yesu aakukolia aatie wu, aenia ndjoongo, asia ate, awatekesia, aasia ate: wewitini enge ema akwasakani ino. ⁵⁶Inga mana omoto andji te la owungesi milimo ma wato, kasi la owakalesi. Ase wakia atie edi.⁵⁷Ango ondakali iwo la mboka; moto mwèsi amwaselia ate: Likumu, ikotutia wiati kpàa wikoke owe. ⁵⁸Yesu amowongoselia ate: masika mandjéi la wibete wilangalake, mbulu ndja likolo indjéi l wilako: kasi Mana omoto ati la ebete ebatake moto.⁵⁹Aasia la odi: Eutia mbai. Ase awongosia ate: Likumu dee yo mbai ike okamokundi wawa. ⁶⁰Kasi Yesu aasia la inde ate: dee wato wagwake wakundane iwo mene ase owe, keke kaase loi lo wokumu wo Mwengei.⁶¹Odi aasiate:Ikotutia,Likumu,dee yo mbai ikawasela wato wa monguta mo mbai. ⁶²Yesu amowongoselia ate: kpàa ongo obati gaa wiho wande wibukelaki la seleti, la odendi mbuse,ati wolamu la wokumu wo

10¹Mbuse eho, Likumu aonia watutiani tuku sambo awa tomia wale wale la miki misungu mpe ibete kpàa ibete winge ibalakali nde oki.²Awaselia: elanga edjéi esungu kasi watuke wadjéi wakeke. Akongani la memene elanga laate atome watuke la obuki.³Kekeni. Dhenga, iyotomini nda wana wa kondolo ndondo e pange. ⁴Otikpaleni ema te e kikima, te wuka te wikpokpo, otihekelekeni moto ewo la mboka.⁵A minguta minge mikolingela ino asayoni liwoso: otwa e Mwenei odje la mu monguta. ⁶Inga edja la moto mwesi ologoo, logoo enu ekoyabata likolo lande, inga te ndjongo okowongwa etie nu.⁷Abatani la mungo monguta, lakani pe kengani iho kpàa ekohohekeleni iwo late motuke awongi la liputa. otikeni monguta la monguta.⁸La miki misungu minge mikolingela ino, la kanio ilaka kpàa winge ikohekeleni ino.⁹Kalesani wato wa ikoni wango wakogboto ino pe waaselani ate okumu wo Mwengéi wo umi la hue.¹⁰Kasi la miki minge mikolingelani ino alidji mitiooyambani ino amalani la mboka pe asani ate.¹¹TOhuholani la limemu te motubu e gbata enu enge ehelanaki la matindji masu; ase yewani ate okumu wo Mwengei e wumiga ahue. ¹²Iyowaselini ate enge lisio, Sodome akweene odjidji maa keeke kasi enge moki ekweetela.¹³Magba la owe, Kolazina! magba laowe, Betesada laate inga sambo dja kamwake makelamali atie ino, ekelamali ongo la Tile, la Sidonia, ekokiti oeti masio ngbi late wakukule mitema mau pe wakpale saki mpe wayabate la miwutu.¹⁴Tile la Sidonia wa tidja la loi la use wungo osambesamake nda ino. ¹⁵Kasi owe Kapalanauma, eyadjambi owe tee likolo la mapata, okoyadjimba sésé tee la ehomeli e logo.¹⁶Ongo akookani ino, andjoki mbai, ongo akootonani, atoni mbai, mpe amotoni ongo otomi mbai.¹⁷Wango wato tuku sambo wawongwali la mwemu wa mwaselia ate: Likumu, te mindjili, la isisi itotosi la tina e kombo e owe. ¹⁸Yesu awawongoselia ate: imweni esisi olongwi likolo tee okpi la mbume nda libuga. ¹⁹Dhenda mbai iyohekelini okumu ate osombeni likolo la ndjo, likolo la gake, pe otetelake likolo la moto kpàa ongo okokelaka likaka la mbai, pe ema te ekikima etiokelani. ²⁰Otiemeleni ango e otosini isisi, emele ate inga kombo e owe edhingami ongo likolo.²¹La enge engele Yesu atumisamali la mwemu e molimo satu, asia ate: iyodemei owe wawa, laate owe nde okelali likolo la mbume, laate oyisi dji sambo atie wato walomungo, pe wakandela, kasi oenisi sambo djao atie wana wakeke, iyemeli la ndenge ekeli owe ndjongo.²²Iho kpàa wawa nde opekeleli mbai, moto toeti ayewi ndai adjei mana, inga etidje wawa, te ndai odjei wawa, inga etidje mana, alidji la ongo mana amoyinei.²³Ayakukolia atie watutiani wande awaselia iwo amene ate: mwemu la maiso mango meeni sambo djinge iyeni ino. ²⁴ Iyowaselini ate, wasakoli ngbi la makumu walukali oeni dji sambo eeni ino, kasi waeniti, alidji ooki enge ekookakani ino, kasi watioke.²⁵Mwalimo o mibeko ma Moise aamalia, aasia la Yesu, la omomeki: Likumu ikele woni laate itote mokalo mo libela? ²⁶ Yesu amwaaselia ate: edhingani woni la mobeko mo Moize? Eni e tangi owe? ²⁷Amowongoselia: okomobala Likumu, Mwengéi e owe la motema mo owe kpa, la molimo mo owe kpa, la otetelake e owe, la omungo o owe, alidji mobala miino owe nda owe amene. ²⁸ Yesu amwaselia, oasi olamu; kela ndjongo, okokala.²⁹Kasi inde, abalia nda ate ayagalele, asia la Yesu: ndai odjéi miino o mbai? ³⁰Yesu awongwanelia oasi, aasia: Moto mwesi a longwali la Yelusalema la oki la Eliko. Akpia la mawo ma wato wabe, wamopuesia ihoo kpàa,wa mobingia ibhotu, wakia, wamodheyia pene e logo.³¹Nganga Mwengei mwesi nda nano aetali ndji enge mboka, amwenia ongo moto, amolumbelia ehoi, amobabia. ³²Molevi mwesi, awumia enge ebete, amwenia, amobabia.³³Kasi Mosamalia mwesi odjakali la okendo, awumia ango, atumali la magba ango emwenia inde ongo moto olangali la mboka.³⁴Amototia amokpolia pota amomunolia maita la maana, amobatia likolo la punda ende, akamotikia la lopitalo laate wamosalese, abongia ewo la wuka wonde aumesia Falanga yale amohekelia memene lopitalo, asiaa lainde ate.³⁵Mosalesa oholo moto djinge Falanga ikohungesa owe ango ekowongwa mbai ikoowongosela.³⁶Ndondo e wango wato wasato ndai pendja odjéi minoongo moto akwali la mawo ma wato wabe? ³⁷Motiesakoli o mibeko awongosia: Ongo omookelali magba. Yesu amwaselia: keke owe mpe kela ndjongo.³⁸Ango edjali osombi Yesu la watutiani wande la mboka, walingelia la moki mwesi ndjo mpe moli mwesi oyewani la kombo e Malata awa yambia la monguta monde.³⁹Inde adjakali la manango koto o moli omowelakali iwo Malia, ayaabatakali la makolo ma Yesu ooki mateya mande.⁴⁰Malata ahelanali la tomo ngbi e monguta. Akadjia asia la Yesu ate: enge edjei olamu Malia ayabati ango sa pamba te ogamesi mbai? Mwasela agamese mbai. ⁴¹Yesu amowongoselia ate: Malata, Malata okoyatungesaka alidji okowabingakolaka la sambo ngbii. ⁴²Kasi Malia aoni emesi emotiyo enge eti mopuesama.

11¹Yesu andjakali wakongi la ebete esi ndjoongo.Ango aseselia inde, mwèsi owatutiani wande amwaselia ate: Likumu, topundesa iso waakongi, nda ewapundesali ndjooni watutiani wande.²Awaselia ate: Inga wakongoni, asani ndjo:wawa nkombo eowe ekumesane; wokumu wo owe wodjee.Ha iso wokoke masio kpàa. ⁴Tolimbesa masumu masu nda ekowalimbesaka iso wino wasu; ase otitodhe la womekami.⁵Awaselia alidji ate:inga mwèsi onu adja la mino onde, ase akamogbotia a likolo amwaselia ate: Manima, bekesa mbai makoke masato. ⁶Alikambo ate manima mwesi adji atie mbai, iti la ema emohake. ⁷Aseko, la ndondo e monguta, manango awongoselia ate: otilembese mbai idhihi gaa moluhe,la wana wa mbai tolangaliga, ikokiti olongoi laate iyohekele makoke. ⁸Iyowaaselini, ingatate akokiti olongoi la omohi la loyi adjei maanango, akolongwa la loyi ate amotungesiga, akomoha djinge kpa idjei inde la eho posa.⁹Ase mbai, iyowaselini: ongo, wakooha; luka, okotota; binga moluhe, wakoodhukola. ¹⁰Ongo okoongo wakomoha, ongo okoluka akotota, wakomodhuhuela ongo okobhingaka modhuhe.¹¹Ndai ndondo enu sango akomoha mana onde libukeli, inga mana amoongo okoke? te inga amoongo su, amohe ndjo te ate amohe su? ¹²Ate inga aongo likei, inde amohe gake? ¹³Inga ino wato wabe, nda edjei ino,oyewini ohi wana wanu wiho wilamu, edjei olamu ndjongo wawa o likolo akohekele elimo satu la wango wakomoongoko.¹⁴Yesu aumbia la etota enge etokpomaka. Ango opumbia enge etota, moto oho abandjia okpomi,ase wato ngbi wamondjimali. ¹⁵Weeti waasia: akowumbaka la witota la kombo e Bezebule likumu e witota.¹⁶Ase wadji wato,la loyi e omomekake, wamoongia elembo enge ekodja likolo. ¹⁷Nda eyewali Yesu mamungwène ma wu, awaaselia ate: wokumu kpàa wokawani eho amene, wobhitani, ase monguta mokubhukia likolo laeti monguta.¹⁸Inga Etoto akawana ndondo eende amene, wokumu wonde wokoamala nda ndenge, alikambo ate ino woasini ate mbai ikoumbaka la Etota la okulu e Bezebule? ¹⁹Ase inga mbai, ikoumbaka la itota la okulu e Bezebule, wana wanu, la kombo endai ekowumbaka iwo la witota? Edjei ndjongo wakodja iwo amene wadjodji wanu. ²⁰Kasi inga edjéi ate ikowumesaka witota la mosei mo Mwengéi, okumu wo Mwengéi wodji etie ino.²¹Kasi inga moto owokulu adja la wisaneli, akodhendaka monguta monde, ema teeti etobitana. ²²Kasi inga moto ongo omoleki la okulu akadjia asane la inde, akomopwèsa wisaneli kpàa winge wibatelaki inde motema, ase akokawakola kpàa wiho winge wipuesi inde. ²³Moto ongo oti atie mbai adjéi motone mo mbai, ase ongo owanesaniti la mbai, akawani la mbai.²⁴Ango elimo mbe epumba la wenge e moto, ekoke la wiholo wiomake, la oluki ohomi. Ango etiene inde, akwasa: ikowongwa la monguta mo mbai ongo opumbali mbai. ²⁵Ase inga auma ongo akogboto ebete ekpasani wolamu mpendja.²⁶Ase akoke,ase akatoti wilimo sambo winge widjéi la otetelake omoyeti, wilingelia la monguta, wiyabatia, moto oho akoumia obe oeti nda ndenge edjakali inde liwoso.²⁷Ango edjakali Yesu oasi ndjongo, moli mwèsi adhumbeya ndondo e wato ngbi, aasia: mogano la solo enge eogbalate la mawele maonungesali! ²⁸Yesu awongosia: Mogano la wato wango wakokaka loyi lo Mwengéi, alidji wakoisaka.²⁹Nda eyakokyaali wato ngbii, apotali oasi: waawato wa keke wadjei moonga; wakoongoko ikamwa; etiwahekelama eeti ikamwa ndji enge e Yona. ³⁰Ndenge kikima nda Yona adjali elembo e wato wa Ninive, ekodja ndjongo la mana o moto la wa wato.³¹Likumu o moli o Midji akoyamala, la lingo lisio e esambake, la wato wa maa masiyo, akowahelesa, la loyi adjali gboo e mbume la ooki kandela e Salomo, ndhenda edjei ala la ongo o moeti Salomo.³²Wato wa Ninive wakoyamala, linge lisiyo lisambake, la wato wa ehele engele, wakowahelesa, la loyi ate wayakukolali la mateya ma Yona, mpe denda, adjei ala oyeti te Yona.³³Moto tweti akokiti olole lotambe abate la ebete eyisani te la seese e eboka, kasi okobata nde la ebete e likolo, la ate wango wakolingela weene hoho ngbai. ³⁴Liso la owe edjei lotambe la wenge wowe. Inga liso la owe edja olamu, aseko wenge wowe kpaa ekodja ngbai, kasi inga liso la owe libitana, wenge wa owe ekodja la la likolo. ³⁵Djaa la oyabanei late hoho linge lidjei wowe etiume likolo. ³⁶Inga wenge wowe kpaa edjei ngbai, esuki teeti etidjaa la molili, ekodjaa masio kpaa la hoho, nda engele enge ekweneseke lotambe mbai.³⁷Ango edjakali Yesu oasi, mofalizeyo mwesi amowelia ake olaki atie inde. Yesu alingelia ayabatia la mesa. ³⁸Mofazeyo aenia la oyahueli la ndenge enge eyakpoliti inde mawo liwoso la olaki wilaka.³⁹kasi Likumu amwaselia: ino, Wafalizeo, okoyagbolokoni saa ekopo la e sani, kasi ndondo etumi la sambo mbe la omemelake. ⁴⁰Wato wadjangi sambo ndamu! Ongo okeli saa atikele pe ndondo? ⁴¹Kawa yo enge edjei owe la eho ndondo, kpaa ekowumela langaa.⁴²Kasi magba la ino, Wafalizeyo! aloyi ate okohaka mwesi la liomu e makabo ma mite milamu, la itutaki kpaa, mpe la djeti songosongo kpaa, kasi okwetakani lihele e omeemene la libalano e Mwengei. Okokakini okeli dji sambo, pe otiwosaneni djinge sambo djeti.⁴³Magba la ino, wafalizeyo! la loyi ate obalini oyabati wiholo wa poo la sinagoga, la ototi mibale la witutaki. ⁴⁴Magba la ino watiesakoli wa mibeko la Wafalizeyo: la loyi ate odjeini nda mbila djinge etieneneke, enge wato wakosombaka likolo laho pe watiyewaka eho.⁴⁵Mwesi ewatiesakoli wa mobeko atotia luundo, amwaaaseli ate: mwalimo, nda easi owe ndjongo, idjei iso pe okototangakolaka. ⁴⁶ Yesu awongosia: magba la ino mpe, watiesakoli wa mibeko! a loyi ate okokpalisakani wato mikpali ma minga migbalake, enge etibandaka ino amene te la mosei moikima.⁴⁷Magba la ino! la loyi ate okomakani mbila ewa sakoli, wango ewaolali wasangbanu. ⁴⁸Oinyeini sambo e watata wanu alidji okondjimesakani djaho, laate iwo, waolate wasakoli, ino okomaakani mbila djawu.⁴⁹La loyi eeho akili o Mwengei easi ndjo: ikowatomela wasakoli la waposolu, wakoola weti, wakwahelesa wadji, ⁵⁰La gboo waonge wato wa ma masio motio ma midjimi e wasakoli kpaa enge eswamate tee la lipoteli e moki. ⁵¹Opoti la midjimi M'abele tee la midjimi ma Zakalya, waolami la milako mpe la minguta ma Mwengei, ndjongo, iyowaaselini, ekohuelama motio la wato wa ma masio.⁵²Magba la ino, watiesakoli wa mibeko! la loyi ate olongwesini pungola e oyewi, ase otilingeleni ino amene, alidji wango walukali olingeli, owatekesiani.⁵³Ango edjali Yesu owaaseli ndjongo, watiesakoli wa mibeko la Wafalizeyo wapotali omwamaleli la omokpomesi sambo ngbi. ⁵⁴Wadjali omwaleleli masala la omoheli la maloba makupumbaka la monoko monde laate wamokambe.

12¹La engele eho, wato ngbi wayaboliali ebete e kikima, wadjaali wato inga mbuka, ase wadjali ohotoni, Yesu apotali owasi liwoso la watutiani ate: huakani la levile e wafalisai wadjei la moleho.²Ase edjeiti la ema esi, enge eyisani, edjange oeneni; alidji eti la sekele esi enge etiyewane. ³La ndjongo, sambo djinge ekowasaka ino la likolo ekopumba la hoho, ase enge wokwasaka ino la moli mo sese la wisuki dja ndondo e monguta, ekwasana a likolo la monguta.⁴Aleeti ikoaselakani ino wino wa mbai: otiwangeni wango wakolaka wenge pe la mbuse wakokiti okeli ema teeti. ⁵Ase ikoeneseni ino moto ongo okokini omowangi: wangani moto ongo mbuse e owoli adjei la okumu e olumbi la misa. Ndji ongo nde iyoyewisini ino mowangani ndji ongo moto.⁶Watitambaka susele itano la ladjene iwale e motiyo mokeke, Mwengei atiwosanaka te mwesi a tina eho. ⁷Ase te swee kpaa dja mito manu etangani. otiwangeni; ino oyetini wa susele la motiyo.⁸Ndjongo ikwaselakani ongo akwasa la hoho liwoso la wato ate mbai la inde todjei la oyokani, mana o moto pe akwasa la hoho liwoso e wahumbua e Mwengei ate adjei la oyokani la inde. ⁹Ase moto ongo owungani mbai liwoso la wato, wakomowungana inde liwoso e wahumbwa wa Mwengei. ¹⁰Ase moto ongo owasi loi la oyamaleli mana o moto, wakomolimbesa ; ase moto ongo otangi elimo santu wata molimbese.¹¹Ango ekookpalani ino la wasinagoga, te liwoso e wadjodji, la makumu, otiasumbweni la ndenge ekwasani ino, te la djinge ekopumbisani ino. ¹²Laate elimo santu ekotiesakolani ino ndji enge engele enge ekokini ino owasi.¹³Moto mwesi ndondo ebiba e wato aasali la Yesu ate: Motiesakili, moyewesa manima o mbai akawole wiho wasu wa uma. ¹⁴Yesu amowongweselia: owe ndai obati mbai djodji te mokawoli wa wiho wanu? ¹⁵Ndjongo aasali la iwo ate: angatalani olamu la posa e okondji wiho, laate mokalo mo moto motidje sa la wiho, ingate adjei la wio ngbi.¹⁶Awahali ehele lisekpe: mbume dja moto ogumake mwesi ewotali olamu. ¹⁷Ndjongo abandali omungoli la motema monde ate: ikokela nde sikalandjo nda eti mbai la ebete la obolei mogono mo mbai? ¹⁸Ndjongo aasali: ikokelaka ndjo. Ikobukolaka minguta ma mbai ma isake la wiho pe ikomaa minge misungu oeti, pe ongo ikobolea pukapuka kpaa pe wihoo ndamu kpaa; ¹⁹Ase ikwasa la molimo mo mbai ate: molimo mo mbai odjei la wihoo wilamu ngbii enge eyisami laate la mbula ngbii. Homa, laka kenga alidji hemela.oyahemelese.²⁰Mwengei amwaselia ate: ekete! la likolo lili wakowongo molimo mo owe ndjongo ndai akotota wiho wiwi obondji? ²¹Edjei ndjongo laate ongo oyayiseli wihoo wa wotio ase ati mogumake la maiso ma Mwengei.²²Yesu aasia la watutiani wande ate: eho lenge ikwaselaka ino ate: dheni oyasumboyi la tina e mokalo monu la enge ekolaka te la enge ekokpala la tina e wenge wanu. ²³Laate molimo eeti wilaka alidji wenge eeti wisindje.²⁴Wadhendani wayanganga, wationaka, watibukaka, wati la ebete eyisake te monguta moisake wiho, Mwengei akowaalakisaka. ²⁵Ndai ndondo enu la oyasumboyi wonde, akoki obakesi te engele eikima la bomoi onde? ²⁶Eho enge inga okokiti okeli loyi enge eeti maakeke, ndandenge okoyasumbwakani la djenge sambo?²⁷Denga olamu nda ekoumaka fulele ndamu: itikelaka otomu, etisonaka esindje, etitongaka esindje; ase ikwaselakani ino: te Salomo inde amene la kembo ende kpaa, atikpalali akpaali nda mwesi le eho te. ²⁸Ndjongo inga Mwengei akokpalisate isoki keke wala wilanga enge ekundu wakolumba la misa, akookpalisani ino oeti, ino wato wa ogemei wokeke.²⁹Eho lenge dheni obundoi enge ekolakani ino la enge ekokengani ino, ase dheni oyasumboyi. ³⁰Laate djinge wiho kpa, edjei wato wa ekaleli mbe wa moki nde wakolukaka. Sangbanu ayewi ate odjeini la posa eho.³¹Lukaniyo okumu wo Mwengei, djeeti wiho wikoohekelemeni oyeti. ³²Otiwangeni oliye eokeke, laate sangbanu aeni olamu oohi okumu.³³Tambani wiho wanu ase hekeleni likawo e motema magba. Kelelani molambola enge eigbaka, likondja linge litisilaka ongo likolo enge iwa etiwumaka aliddji te ekese etibitisaka. ³⁴Ase ebete wihoo wamotiyo midjei motema mo owe mokodja ongo.³⁵Awongeleni alidji miinda manu elole. ³⁶Djani nda ato wango wakolambelaka molome o liwala awongwe, laate wamodhukole modhuhe engele ekouma inde la engele ekobinga inde modhuhe.³⁷Mwemu la watuke wango engele ekouma molome, akowagboto wasusoi! Iyowaselini meemene, akobata mokaba monde, akowaha ibete eyabatake, akoyandongbala owakeleli. ³⁸Awume te ndondo e likolo te gboo e likolo, mwemu la watuke wango inga akowagboto wa susoi.³⁹Oyewini olamu ate inga memene monguta ayewake engele enge moto oyiwa akoki odji, akokaki oyabati angbilia, atikokake odhei wabuke etutu e monguta monde. ⁴⁰Ino pe yawongeleni la loyi mana o moto akodja la engele enge otiyewani.⁴¹Petele amowongoselia: iso nde okotowaselaka li lisekpe, inga edjei e wato kpa. ⁴²Yesu aasia: nda kapita ongo molamu alidji okandela, ongo likumu lande akomobata la osindjili watuke wande kpa ate awahake mawuna minge mibali iwo la engele enge ewongi? ⁴³Mwemu la motuke mungo likumu lande, ango ekowuma inde akomogboto ndji akokela otomo. ⁴⁴Iyowaselini meemene, akomobata ate adje sindjili e wiho kpa.⁴⁵Kaiko nde inga ongo motuke ayaasela ate: likumu la mbai akowumwaka la odji, inga ayabata la weeti watuke wapele la wawali, la olaki, la okengi alidji la olangwi. ⁴⁶Likumu e ongo motuke akodja lisio linge inde atimolambela, la engele enge inde atiyewa. Akomoha etumbu e tetelake, akomobata eholo e kikima la wato wati la omeemene.⁴⁷Motuke mungo ayewali posa e likumu lande kaiko atiyawongelali, alidji atikelelali posa ende te, wakomobhinga pimbo ngbi. ⁴⁸Kaikonde ongo atiyewali gbondo, kasi akelia sambo ndjinge ewongi laobingami, akobingama pimbo keeke. Moto kpa wamohi ngbi, wakomoongo ngbi, alidji moto ongo wamohekeli mokpali mosungu, wakomoongo sungu oyeti.⁴⁹Idji ololei misa la mbume ase inga eloliana, ikoluka alidji nda ema? ⁵⁰Edjei la patisa enge ekoki la mbai ototi, ikookaka magba tee lisiyo linge ndjinge sambo ikoyengemene.⁵¹Okomungolakani ate idji obati logo la mbume? te ndjongo, oyowaselini; idji obati okawani. ⁵²Aloyi, obandji sikalandjo, inga edja la wato watano,la monguta, wasato wako amalela waale, ase waale wako amalela wasato. ⁵³Wato wakokawana: wawa akomomalela mana onde opele ase mana opele akomomalela sango, ima akomomalela mana o moli aseko mana o moli akomomalela nango; okio o moli akomomalela moli o mana aseko moli o mana okomomalela akio onde o moli.⁵⁴Aasia alidji la iwo: engele enge ekoenekeni ino lipata lilongoiya la elangeli e wuse, okwasakani ate: ewongo egeleli, ekokelamaka ndjongo. ⁵⁵Aseko engele ekoenekeni ino ehoho elongoiya la mbole, okwasakani ate ehela etetelake ekodja, ekokelamaka ndjongo. ⁵⁶Wato wa moleho,oyewini odhendji olamu ndenge mbume la likolo ekoeneneke ase nda ndenge otiyeweni odhendeli olamu ehele engele?⁵⁷Ndandenge ino amene oyewini ate lu loyi ndjo edjei meemene? ⁵⁸Engele enge ekokeke la monguna moowe liwoso la djodji, kela obangu ate ango edjei yo owe la mboka, osilisane la inde, la owangi ate aotube liwoso la djodji, alidji djidji atiohe la mawo ma likumu e wapulusu, mbuse pulusu eolumbe la boloko. ⁵⁹Ikowaselakani meemene otipumba; ndji ate opute waadjenge wa wibende e motiyo mokeke enge e gboo

13¹Lainge engele djongo, ndambo e wato wango wadjakali ango, wamosumbelia Yesu enge eetali la wagalileya ate Pilato awanesali makila la enge e nama.²Yesu awawoongoselia ate: ino ondjimi ate wango Wagalileya nde wakeli masumu oyeti wango weti? ongo okeli iwo djongo? ³Kasi, eti djongo, mbai iwaaselini inga otikukoleni mitema manu ,okogbani mpe nda iwo.⁴Kasi wango wato liomu la mwambi wawakpeleli etutu esiloe, toase ate iwo wakelali obe oweti wato kpàa wango wayabati la Yelusalema?

⁶Pe ahekelia li lisekpe: edjakali la moto mwesi adjakali la moto mwesi la elanga ende e vino, akadija late abuke mbuma adjuiti mbuma te kikima.⁷Asia la watuke wa elanga e vino ate dhenga mbula isato djidji ikodjaka ate ilake mbuma la mu mote idjuitiaka, ase tena mu mote late woni ekohelaka mbume pamba?⁸Watuke wa elanga wa mowongoselia: Likumu, modhee yo ehele mbula ndjo! ikotonga liwela kelekele eho, mbuse ikolumba isoki.⁹Etimbala masio mageleli ekowota; inga te ndjongo, okomokoto.¹⁰Ango Yesu atiesakolali ungo wuse la Sinagoga lisio la Sabata. ¹¹Edjakali la moli mwesi odjakali, la esisi, edjali omowumisi eketi; ilanga liomu la mwambi aimbamakali atakoke oyananoli.¹² Ango e mwenia Yesu ongo moli amwaselia: moli, okaliga la ekoni e owe. ¹³Pe amobatelali mawo mpe moli oho akalali mpe amogemeiya Mwengéi. ¹⁴Likumu la Sinagoga amemelia ango omokalesi Yesu moto lisio la Sabata. Asia la wato: edjéi la masio motoba mango makoki ino okeli mosala, djakani okalesame mango masiyo ndjongo, te lisiyo e Sabata.¹⁵Yesu amowongoselia ndjo: Moto mokosake wato! lisiyo e sabata ndondo enu moto tueti atimotokolaka ngombe ende, te punda ende ebete e lakake la omokengesi malia? ¹⁶Oholo moli addjei mana o Abalayama, ongo etota amonangali ilanga liomu la mwambi ekokiti omotokoli la ehele moliki lisiyo la sabata.¹⁷Ango edjakali inde owasi djinge sambo waamaleli wande wabandali ooki soni, kasi ebiba e wato kpa wango wadjakali owemeli la djinge sambo ndamu edjakali okeli Yesu.¹⁸Yesu aasia alidji: nda ema ekwali la okumu o Mwengei, nda ema ekoki mbai oyengemesi la uho? ¹⁹Edjéi nda pukapuka esi e motalada enge moto mwesi atotali, akeeli ooni la elanga ende, ekpomali, ewumali mote mosungu enge mbulu dja likolo widjali owabati la wite wao.²⁰Aasia alidji: nda ema ekoki mbai oyengemesi la okumu e Mwengei? ²¹Edjéi nda levile enge moli mwesi atotali alidji ayisali ndondo e wimekelo isato wisungu dja moteke tee engele mogbuku mokundali.²²Yesu akpandali la miki mikeke mpe misungu, otiesakoli mpe obileyi mboka la oki la Yelusalema. ²³Moto mwesi amohuelia ate Likumu toase edjéi ndji la wato wakeke nde wokokala? Inde amowongoselia.²⁴Kela makasi late olingele la modhuhe mungo mokeke. Laate iyowaselini wato ngbi wakoluka ate walingele kasi watilingela.²⁵Ango ekoyamala memene molako adhike modhuhe, ino wango wadjéi saa kpà okobingani modhuhe, okowasani ate: Likumu, Likumu, to dhukola! Akoowongoselani ate: iyewiti inga odjeini wa ndai. ²⁶Alidji, okopotani owasi ate: tolakali alidji tokengali la owe ebete kikima, alidji otiesakolali la wa mboka ndjasu. ²⁷Akowawongesela ate: iyowaselini, iyewiti inga odjeini wa ndai, longwani ahue e mbai, ino kpaa wato wakokelaka sambo odjangi o meemene.²⁸Ango nde ekodja oleli la olaki maino, late enge engele okomweneni Abalayama, Isaka, Yakobo alidji watiesakoli kpàa la okumu o Mwengéi onu akoolumbani saa.²⁹Wakolongwa likolo la mbole la mabusu kpàa, la ewo e lilome la ewo e moli, la elongéweli e wuse la elangeli e wuse la okulu e Mwengei. ³⁰Njongo ekodja la wato wa mbuse wakowuma wato wa liwoso, wato waliwoso wakowuma wato wa wa mbuse.³¹Ndji ungo use Falizeo wadjia, wamoaselia ate: longwa alandjo keke laate Elode akolukaka aole. ³²Inde awa wongoselia asia ate: kekeni okamwaseleni enge lisika : dhenda, ikowumaka la witota, ikokalesaka wato wa wikoni keke la ekundu; lisiyo la misato ikosilisa. ³³Ewongi ate mbai isombe keke, la e kundu, alidji une use, ekokiti ate motiesakoli agbe saa e Yelusalema.³⁴Yelusalema, Yelusalema, owe moto okolaka watiesakoli, alidji okwabingaka wato wango watomami mabukeli, mbala woni ebalakali mbai ate iwabole wana wowe ebete ekikima? nda ekoboleyaka koko wana wande la mabulu mande, owe otibalali!³⁵Dhenga monguta mowe mokotikala pamba, kasi mbai iwaseli ndjo, otienekineni mbai, tee ekowuma engele enge okwasani: Moto ongo okodja la kombo e likumu, ademiane.

14¹Yesu alingelali use wesi o Sabata, la monguta mo Likumu liesi e wafalizeyo, la olaki ilaka; wa Falizeo wadjali omodendji. ² Moto mwesi wekoni amalali liwoso lande. ³Yesu atotia maloba asia la watiesakoli wa mibeko alidji la wa Falizeyo; etekesami, to edimisami omokalesi moto use o sabata?⁴Iwo kpàa wabatia bii, Yesu amokeeselia ongo moto ewo, amokalesia pe amowongolia. ⁵Mbuse eho awahueliua: ndai ndondo enu inga mana onde te ngombe ende ekpa la liwela, atibumbesa huse o Sabbata? ⁶Waedjali la eyano ewongolake.⁷Mbuse eho awahekelia lisekpe liesi etie wango wato wadjakali ango, awaenia wolukaka oyabati ebete e liwoso. awaselia: ⁸Inga moto aowela la lipati otiyabatake ebete e liwoso laate ekodja la moto mwesi o lokumu okoki odji mbuse. ⁹Laate ongo oweli ino atidje oowaseli: dhee ehele nbgelengo la oholo moto. Okotota soni oki okaabati eholo e gboo.¹⁰Kasi inga waowela la lipati balaka okabati la ngbelengo e e gbo, laate ongo moto ooweli inga adja akoowasela owe ate keke okabate la ngbelengo e liwoso, djongo ekookela mwemu liwoso la wato wango waya bati la owe la mesa kikima. ¹¹Laate moto ongo okoyadjamba, wakomodjimbisa, mpe moto ongo okoyadjimbisa, wakomodjamba.¹²Asia mpe la moto ongo owaweli wato: tango enge okowahekeleke owe wato ilaka wa midji te wa pokwa, otiwawelake wino wowe, te wamangwa, te pe sangwa la ngwa, te wato wasukani la owe la ogumake laate iwope watiowele eeti huse, waokelele nda owakelelali.¹³Inga owongele lipati wawela: watundake, watowabukei makolo, wato wango wo tengulaka alidji la wango wagbi maiso. ¹⁴Okodja la mwemu late iwo watio wongosela owe ema laate okofutama lisiyo e lisekwa la wato walamu.¹⁵Mwesi ewato wango wadjakali la mesa, mbuse ooki mango maloba asia la Yesu: mwemu la moto okolaka ilaka la okumu wo Mwengei! ¹⁶Yesu amowongoselia, asia ate: moto mwesi alambesali ilaka ngbi pe awawelia wato ngbi. ¹⁷La engele eho e ilaka amotomia motuke monde ate akawawela wato, late ilaka iweliga.¹⁸Wato kpàa waongia bolimbisi ate wakokiti odji. Ongo oliwose asia te mbai isombali elanga, djongo iyokeke ndji keke ehele Ndjo late ikahene, limbesa mbai. ¹⁹Ongo weti asia mbai isombali ngombe liomi, keke nde okeke mbai okawalakesi. ²⁰Ongo weti asia ate mbai iyikia moli ndji sikasika ndjo ilongiti oki.²¹Motuke monde awongoyia amwaselia Likumu, la limemu amwaselia motuke monde ate keke obangu la mboka owawele wato ongo la liwange, odje pe la watundake, wato wabukei makolo, wato wagbi maiso, pe watengumi.²²Motuke monde amowongoselia: enge etomi owe, ekelami, kasi iholo widjeiyo.²³Likumu amwaselia keke la mboka wato kpaa wango wakowene owe djaka la iho, late monguta mo mbai motume ²⁴Mbai iyasi ndjo ndondo e wato wango djongo wawelali mbai watilaka ilaka wa mbai.²⁵Wato ngbi wamobilakali Yesu la mboka, ayakukolia pe awadhendjia pe awaaselia.²⁶Inga moto abila mbai, ewongi amotone Sango, nango, moli onde wana wande, wamango wawali la wapele, ayatone pe inde amene ase akoke odjéi motiesakoli mo mbai.²⁷Moto ongo atikpala ekulusu ende amene, aebilake mbai, ata koke odjéi motiesakoli mombai.²⁸La ewo ndondo enu inga aenga omai monguta, ewongiyo abundole olamu odengi inga ekomongo Wadjenge woni. ²⁹Late engele enge ekobanda inde omai esile, late inga atisésé wato wako moseke. ³⁰Wakwasa la inde ate: oholo moto abandji omayi, akokiti osilisi.³¹Ndji la enge engele, inga Likumu liesi inga aluka ate asanese wita la oeti likumu, akoyabatayo la odhendji inga akoki, la wato koto liomu, tango eti, enge ngambo wadjei la wato koto tuku iwale. ³²Tango enge enika inde ate aekoka akoki o watomi wato ate waokane la kimia.³³Inga etidje ndjongo, ndjiyo ongo eti likumu adjei yo lihele, akomotoma moto la oongi logoo.³⁴Mokpa modjéi olamu ngbi , kasi inga mosila oleli oho mokodja kine la tina? ³⁵Eti olamu la mbume, pe la miutu. Late walumbe saa. Ongo odjéi la matoi maokake, awoke.

15¹Waputesi pako la wato wamasumu wadjali ahue e Yesu la omooki. ²Wafalizeo la wa tiesakoli wa pui wadjali ondungwani la oowasi ate: oholo moto akoyambaka wato wabe pe aolakaka laiwo mongindji.³Awaselia li lisekpe: ⁴Ndai ndondo enu inga adja la kondolo kamakikima, inga aungesa esi, ewongiti atikeyo djinge tuku libwa la libwa la esobe, late ake oluki enge esi ewungi tee ekomwene inde? ⁵Ango enia inde enge esi akoekpala la mwemu la makookoto.⁶Ango ewongoiya inde la monguta, awelia wino wande la wato wango wasukami la inde, aasia la iwo ate: yemeleni mongindji la mbai, laate iyeni kondolo embai ewungi. ⁷Edjéi ndenge kikima inga mopagano mwesi akukola motema ekodja la mwemu osungu ongo likolo weti wato tuku libwa la libwa wango walamu wango wakokiti kine okukoli ekaleli.⁸Alidji inga moli mwesi adjei la wadjenge liomu e wibende, inga awungesa esi, ati lolwa lotambe akpase monguta aluke olamu tee ekoene inde eho? ⁹Inga aenia, akowawela waino wande la wango wayabati eholo kikima la inde akwasa: yemeleni la mbai mongindji, laate iyeni adjenge enge ewungisi mbai. ¹⁰Edjéi ndenge kikima ekowaselakani mbai, edjéi la mwemu etie wana wa Mwengéi inga moto mwesi mopagano akukola motema.¹¹Asia aleeti ate: moto mwesi adjakali la wana wapele wale. ¹²Ongo elenge amoaselia sango ate: wawa pekele mbai esuki elikondja wungo okoki la mbai pe sangbu awa kawelelia ogumake wonde.¹³Mbuse emasio makeke ongo elenge atotia ogumake wonde akia la eeti moki mwesi molihele; ongo abitisali ogumake wonde la ekaleli e witeba. ¹⁴Ango esesia inde Falanga kpàa djala EWumia la mungo moki, olaki wonde wowumia la minga.¹⁵Akalukia otomu etie moto mwesi; ongo Likumu amotomia ate akakengelaka nama dja nde.¹⁶Adjali la posa olaki wilakate wangulu, moto tueti adjali omohi te ema.¹⁷Inde amene abandia oyaseli la motema: wawa adjéi la watuke ngbi, pe wadjéi la ilaka ngbi mbai iyogbaka ndjala ahala ndjo.¹⁸Ikolongwa ahalandjo iwongwe etie wawa, ase ikomwasela ate: wawa mbai ikeli obe.¹⁹La maiso ma Mwengéi, alidji la maiso ma owe, wotitotekine mbai nda mana owe, tota mbai nda motuke mowe.²⁰Ayamalia ayadjimbia mboka owongoi etié sango, ndji edjaki inde yo lihele, tango emuenia sango magba ma mokelia akia obangu okamokweli la kingo amolingia. ²¹Mana amwaselia ate: wawa mbai ikeleli likolo obe mpe lowe okokiti kine ototi mbai nda mana owe tota mbai nda motuke mowe.²²Sango asia la watuke wande, kelani obangu djaka la isindjè ilamu sikasikandjo omokpaleseni; mobongani mpe mopete la mosei mpe omokpaleseni wikpokpo la makolo. ²³Djakani la mana o ngombe opele omaita omooleni, tomolake, toemele. ²⁴Laate mana o mbai oholo ogbakali, awongoi la mokalo; awungali, awongoi. Wapotali oemeli.²⁵Ndjoka manango eloko adjakali la ilanga, ango ewongoiya inde la moki aokia sa ngungu la mbonda ikobinga.²⁶Amowelia mou mwesi a mohoelia tina engungu la mbonda.²⁷Motuke moho a moaselia ate mangwa nde owongoi uho wungo oli sangwa mana ongombe opele omatamu, laate amweni wenge olamu.²⁸Inde amemelia, atonia o lingeli ongo la lopango lou, sangbau apumbia ayakongia la inde ate alingele.²⁹Kasi amohongoselia sango: denda mbula ngbi ikokelaka otomu woowe, itibukaka mibeko moowe ; owe use te okikikima ohala mbai mana ongombe opele ate ikele lipati la wino wa mbai. ³⁰Ango owumia mana owe ongo olaki Falanga djowe la wali wa ndumba omokelia lipati.³¹Sango amowongoselia: ate mana o mbai, owe nde odjéi la mbai ebete ekikima, iho ndjo kpàa wa mbai widjéi wowe.³²Ewongi tokele lipati, toemele, laate maangua ongo ogwaki awongoi la makolo, awungaki aenania.

16¹Yesu awaselia alidji watutiani wande ate, moto mwesi ndjongo adjali moto mo gumake ngbii, ase adjali la kapita onde mwesi. Wato wadjali omwaseli ate akobitisaka wiho wande sa ndjongo. ²Ndjongo amowelali amwaselia ate: nda loi okookaka mbai atie owe? hekele mbai laPolo wo wotomu woowe, alikambo ate otoamalela kine alidji wungo wotomu³Ndjongo kapita oho asia la motema monde ate; ikele woni nda epotia Likumu la mbai olongosi mbai la wotomu? Iti la wokulu wo obuki. iongolo? Ikooka soni. ⁴Iyewi wungo wokela mbai alikambo ate wato wabatese mbai la minguta mawu ango okondongose iwo mbai la wotomu.⁵Ase amowelia moto mwesi la mwesi ongo odjali la nongo e Likumu lande ase amwaselia ongo opoo ate: odjei la nongo woni e Likumu la mbai? ⁶Asia ate: teni kama esi e maita ma olive, amwaselia ate tota ekpata e tuku itano.⁷Mbuse eho asia la ongo odji ate, ase owe odjéi la nongo woni? asia ate: saki kama e ndongo. Amwaselia ate, tota ekpata e owe e wookani dhiga tuku mwambi.⁸Ase Likumu lande amondjimali kapita oho.Te nda etidjakali inde moto molamu, alikambo ate aeneseli lokenge wonde. Alikambo ate wana wa muu moki wadjéi la lokenge la ehele engele wou, owaleki wana wa moi.⁹Alidji iyasi la ino ate wakelesani wino wanu la mboka e wogumake enge eti la womemene, alikambo ate ango ekosila woho, iwo wakowemeleni ino la wibete e wabati libela.¹⁰Ongo moto odjéi memene a loi wokeke, adjéi koto memene a loi wosungu, ase moto ongo oti memene te aloi wokeke ati koto memene a loi wosungu.¹¹Nde ndjongo inga otini memene a loi wowogumake wungo wodjangi womemene, ndai okohani ino wogumake wo memene amene? ¹²Ase inga otidjeni memene la ema e moto odji ndai okohani ino ema enu amene?¹³Moto owotomu la ndondo e monguta aengiti odjéi motuke mo makumu male, alikambo ate akomotona ongo, la akomobala ongo odji, te okoahelela la odji la akomodhe odji. Woengitini odjéi mituke ma Mwengéi alidji ma waambele.¹⁴Sikahala wa Falisayo wato wabali wadjenge wadjali oki djihinge sambo kpàa, ase wapotia omoseki.¹⁵Yesu awaselia ate: ino ,nde wato wango wakoatoloko ino amene wato wa memene liwoso la wato ase Mwengéi aewi mitema manu, alikambo ate ema elamu la maiso ma wato edjéi ema e wonalili la maiso ma Mwengei.¹⁶Pui la otiesakoli edjakali tee la Yoani. Pota ndji la engele enge mboli ndamu e wokumu wo Mwengéi ekoasanaka ase wato kpàaa wakogueleke okii atie eho.¹⁷Memene, eti obe ate likolo la mbume lileke la ebete ate ma esuki eikima e pui engesame.¹⁸Moto kpàa ongo oli liwala la moli onde ase amoikia odji, akeliga eteba ase moto ongo omoiki moli ongo ooli liwala la molome onde akokelaka eteba.¹⁹Ase moto mwesi ndjo adjali mogumake, ase adjali okpali wisindje witanake ngbaa la oemeli wuse la wuse, adjali la wiho wilamu wilamu mene.²⁰Ase moto o wiongolo mwesi nkombo ende Azalo, adjali olangali liwoso la modhuhe monde, wenge wande witumu la mpota.²¹Ase inde odjakali la ehoha e olaki wilaka winge widjakali okwakani sese emesa ma moto oho owogumake. Mbwa idjakali odji ohelekoli pota djande.²²Ase mbuse moto wiongolo oho aguya, waahumbua wa mototia wamobatia la mokpoto mo Abalayama. Moto owogumake aguya koto wamokundjia. ²³Ase la ndondo e kabuli adhukolia maiso mande ango edjakali inde la wodjidji, ase omoenia Abalayama lihiele la Lazalo la mokpotomonde.²⁴Ndjongo awelia ase asia ate wawa Abalayama ndjokela mbai magba ase motoma Lazalo alulie mosei monde la malia ase adhokesele mbai la lolemi, alikambo ate ikoeneke wodjidji wo misa minge mikololaka.²⁵Ase Abalayama amwaselia ate: mana otiwosanake ate ango odjakali owe la mokalo odjakali la wiho wilamu wilamu ngbii, ase Lazalo atidjakali la wiho. Sikalandjo aumiga olamu ahala; kasi owe okoeneke odjidji. ²⁶Olongosi djinge sambo kpàa, liwela liesi lisungu litokawanesi iso la ino ase wato wango wabali olongoi ahala wake atie nu waengiti ase la wato wa olongoi ongo la okpandji atie su watikoke okeli.²⁷Moto oogumake asia ate: nda edjéi eho ndjongo iwongi owe, wawa motoma ongo la monguta mo wawa. ²⁸Alikambo ate idjéi la wamanima itano wapele, alikambo ate awasele wolamu wolamu, alikambo ate iwo watindje ahala la wuhuwu²⁹Ase Abalayama asia ate, wadjéi la Moize, la waaseli; wa waoke iwo.³⁰Moto e ogumake aasia: Te ndjongo wawa Abalayama, inga moto mwesi ndondo e wato waguake akee atie wu wakohengese mitema.³¹Ase asia la inde ate inga watimoke Moize la waseli te, watondima koto te moto ongo agui ase abasia la logo.

17¹Ndjongo asia la watutiani wande ate, sambo djinge ikobingesaka ekikimi itodjangaka te. Ase magba la moto ongo okodjaka la djaho.²Ewongi wolamu wa monange libukeli la nkingo linge likokpotokolaka iwo la pukapuka, ase wamolumbe la ebale, la ebete ate amobingese mwesi o wato wakeke ekikimi.³Huakani inga mangua akela lisumu mopamela ase inga ahengese motema, molimbesa.⁴Te inga aokelela obe mbala nsambo la wuse wesi ase adjia atie owe mbala nsambo asia ate ihengesiga motema ewongi omolimbese.⁵Watutiani wasali la Likumu ate totaliela iso wondimi.⁶Ndjongo Likumu asia ate inga odjakini la wondimi wosungu nda pukapuka e Motalade, nda owasini la mote ate abukola ase keke oyawoni la ebale, mote mokootosani.⁷Ndai ndondo eenu ongo odjéi la motuke ongo okobukaka mbume, te ongo okokengeleke nama akoasa la inde engele ewongoiya inde la elanga ate djaka ahala galagala abata la mesa? ⁸Akwasa ndji ate: wongele mbai ilaka, kpala esindje, hekele mbai ilaka tee ekolaka mbai alidji e e kokenga mbai, mbuse eho, owe okolaka alidji okokenga?⁹Akomoemele nde mungo motuke alikambo akeli sambo djinge imotomi iwo ate akele? ¹⁰Ndji ndjongo ino koto ango okosesela ino okeli sambo djinge eyotomini iwo ate okeleni, asani ate todjéi mituke mpamba wungo wokeli iso ewongi tokele.¹¹Ase ango ekeli inde la Yelusalema alekia ndondo e Samalia la Galilea.¹²Ase ango elingelali inde la moki mwesi ndjongo wato wapele liomu wango wadjakali la ekoni e mbala wagbotononia lainde ase wamalali lihele.¹³Wapotali omowaseli: Yesu mwalimo, ndjokela iso magba.¹⁴Ase ango ewaeneli inde asi ala iwo ate: kekeni okayainiani atie wanganga Mwengéi. Ndjongo ango edjakali iwo oki, wakalali ndji la mboka. ¹⁵Ango weneli mwesi owu ate akaliga, akawongoya akomoemeleke Mwengéi la moli mopamake. ¹⁶Ase akuiya panda la sese e makolo ma Yesu ase amohekelia keke dhinge; kaikonde adjali Mosamalia.¹⁷Yesu awongosia ate: te wato liomu nde wakali? ndjongo wango wadji libwa wadjéi eni? ¹⁸Moto tweti te atiwongwali omotemei Mwengéi, ndji moto ongo o etondo edji? ¹⁹Ase asia la inde ate, Amala, keke, wondimi wo owe e okalesi.²⁰Ase wa Falizeyo wamohuelia, nda engele ekodja okumu wo Mwengéi, Yesu awawongoselia: okumu wo Mwengéi wotidja la ndenge enge wato kpàa wakoki oyewi. ²¹Etiyasana ate: adjei ala, inga: adjei ongo, laate dhenda, okumu wo Mwengei wodjei mongindji la ino.²²Ndjongo asia la watutiani: masio mageleli ango ekodja ino la ehoha e woeni wuse wesi wo mana o moto ase otieneni. ²³Ase wato wakwasa la ino ate dhendani ongo! te dhendani ahala! otiumakeni te otiwatutiakeni. ²⁴Aloyi ate, ndji nda ndenge ekobalimaka mokalikali ango ekongengaka muho mokoumaka opoti la ebete esi ongo likolo weneni e Mana omoto ekodja ndji ndjongo.²⁵Ase awongi liwoso aene yo odjidji ngbii la wolie wungo wokomotona inde.²⁶Alidi, ndenge edjakali la masio ma Noa, ekodjaa ndji ndjongo la wuse wo mana omoto.²⁷Wadjakali olaki, la okengi, pele idjakali woiki wali, wadjakali woikesani tee ndji wungo wuse wo Noa alingelali la masua, ase mpela ekadjia, ase ewaolia iwo kpaa.²⁸Ekodjaa koto ndenge edjali eho la masio ma Lota wadjakali olaki la okengi osombi la otambi, oni, omai minguta.²⁹Ase wungo wuse wopumbali Lota la Sodoma, misa misungu milongwali ongo likolo miluya ase miwaolia iwo kpaa.³⁰Ekodjaa ndji ndjongo wuse wungo wokoenene mana omoto.³¹Wungo wuse ndjongo, moto ongo okodjaa likolo la monguta, ase wiho wande widjéi la monguta atiadjimba ototi, te la moto ongo odjéi la ilanga, inde atikawongwa ototi wiho wande.³²Momungwani moli o Lota.³³Moto kpàa ongo okolukaka okalesi wenge wande akowiwungesa waho, ase ongo owungesi waho akobania mokalo.³⁴Ikowaselakani ino la linge lisio, wato wale wakolangala la epe, mwesi akokee mwesi akotikala.³⁵Wali wale wakotanga la eboka eikima mwesi akokee, mwesi akotikala.³⁶Wato wale wakodja la elanga Mwengéi akomotota moesi, akomotika mwesi.³⁷Ndjongo wamowongoselia ate: nda ebete likumu? awaaselia ate: ebete elangali molonda, koka koto ikwabolia.

18¹Ndjongo Yesu awahali ekpangele esi alikambo la owaenesi gbondo ewakongi wiengele kpàa te olembi . ²Asia: la djodji mwesi ndjo atidjakali omowangi Mwesi ongo odjakali omowangi Mwengéi la omodemei moto tweti.³Ase la moki moho, edjakali la moli mwesi ongo ogueleli la molome ase adjakali oki mbala la mbala atie inde la omowaseli ate: kela ate imolonge moto ongo okosambaka mbai la inde.⁴La woumoi wo engele esindjo, adjakali okili. Ase mbuse asia lamotema monde ate: te ndenge itimowangaka Mwengéi, te itimodemiaka moto. ⁵Ase nda moli oholo ogueli molome adjéi wiengele kpàa ondembesi mbai, ikokela ate alonge, laate atidje masio kpa ondembesi mbai.⁶Ndjongo Likumu abakesia: okani nda easi ohongodjodji mobe. ⁷Ndjongo Mwengéi atikela ate loi lo wato wande wango awawonoli inde, wango waomowelakolaka likolo la moi lititenie la womemene nda ekowaeneseke inde motema molai? ⁸Iyowaselini, akowakelela galagala meemene. Ase ango ekodja mana omoto akogboto alidji wondimi ahala la mbume?⁹Awaaselali leeti ekpangele la loyi ewango wadjali owayewi ate wadjei wato walamu, wadjali owatoni weeti wato. ¹⁰Wato waale watelali la tepelo oyakongi; mwesi mofalizeo, ongodji moputesi pako.¹¹Mofalizeo ayamalali apotia oyakongi la owasi sambo dja motema monde ate ee Mwengéi, iyodemei alikambo iti nda wato wadji te, wapuesi, wato wadjangi womemene wato wa eteba te koto nda moputesi mamelo oholo. ¹²IKokilaka wilaka mbala la iwale la poso esi, ikohekeleke esi eesuki e liomu e wiho kpàa wikokondjaka mbai.¹³Ase moputesi mamelo, amalia lihiele atibalakali te odendesi maiso mande likolo, ase adjakali waabingakoli la mokpoto monde la owasi ate ee Mwengéi ndjokela mbai magba mbai moto mobe. ¹⁴Iyowaselini ango oholo moto awongwali la monguta monde, aeneneli nda moto molamu; kasi te Mofalizeo. Eho, moto ongo okowatelesa, akoadjimba, kasi ongo okoadjimbesa, akotela.¹⁵Kaikonde wato wapotali omodjeli la wana wau wakeke wakeke alikambo awapote pote, ase ango weneli wa tutiani ndjongo, wapotia owapameli.¹⁶Kasi Yesu awawelali wana waho wakeke wakeke wadje atie nde; ase asia ate: wadheni wana wakeke wakeke wadjee atie mbai otiwatekeseni, laate okumu o Mwengei wodjei e wato wango waengeni la iwo.¹⁷La meemene ikowaselakani ino ate moto kpàa ongo ondjimi wokumu wo Mwengéi nda mana mokeke te atolingela la wuho te okeke.¹⁸Ase moto mwesi amohuelali poopoo,asia: mwalimo molamu, ikele woni alikambo ikondje liwongoseli la mokalo mo libela?¹⁹Yesu amwaselia ate: lalikambo lande okowelaka owe mbai molamu? moto molamu ati te, longosa sa mwesi Mwengéi. ²⁰Woewi pui, otikelake eteba, otiasake moleho, otiolake moto, otiwake, modemia sangua la ngua.²¹Ndjongo ongo moto asia ate: idemei djinge kpàa tee opoti wo lenge wo mbai.²²Mbuse ewoki ndjongo, Yesu amwaselia ate: edjéi la ema esi enge edjangi owe tamba wiho kpàa winge widjéi owe la waho ase wakawela watundake ase okokondja ema e motio ongo likolo ase djaka tutia mbai.²³Ango okia inde ndjongo aokia magba ngbii alikambo adjali la ogumake.²⁴Yesu amodendia ase asia ate: ekodja loi womonga amene alikambo la wango wadjéi la wadjenge walingele la wokumu wo Mwengéi! ²⁵La memene, olingeli wokamela la bu etonga edjéi petee oleki olingeli wo moto mogumake la wokumu wo mwengei.²⁶Wango wadjali omooki waasali: ndai okoki okali? ²⁷Awaaselia ate: sambo djinge iyengiti okelami, la likkambo la wato, iyengi okelami la likambo la mwengei.²⁸Ase Petele asia ate denda! iso todhei wiho wasu amene ase totuteya owe.²⁹Asia la iwo ate: lamemene iyasi la ino ate eti la moto tweti ongo odhei monguta monde te moli onde, te wamanango wa pele te wamanango wa wali te wawoti te wana alikambo la wokumu wo Mwengéi.³⁰Ongo okodjanga okondji ngbi la ehele engele, la moki mogeleli, te la mokalo mo libela.³¹Ndjongo awawelia watutiani liomi la wale kelekele, ase asia la iwo ate denda! tokotelaka la Yelusaleme ase sambo djinge kpàa idhingamali la waseli alikambo la mana omoto yengesame.³²La ekpangele wakomokawa, la mawo ma wato wa miki ase wakomoseke, ase wakomosambwesa wobe, la wakomosuele nsoi.³³Ase mbuse e omobingi inde pimbo wakomola ase wuse wo misato akosusua.akosusua.³⁴Kaikonde watihelali gbondo e djihinge sambo djaho, la eyaseli enge watiyewali olimboli.³⁵Ango edjakali inde oumi ahue la Yeliho, moto mwesi ogui maiso ayaabatali kelekele e mboka wongongi wiho.³⁶Nda eokali inde wato ngbii wakolekaka, apotali ohuela hueli inga edjéi nde.³⁷Wamoewsia ate Yesu o Nazaleta indongo okolekaka.³⁸Ndjongo apamia ase asia ate Yesu, mana o Dawidi ndjokela mbai magba! ³⁹Ase wato wango wadjakali osombi liwoso wapotia omopameli ate anange monoko, ase adjakali ndji opami abolo alidji oleki ate: mana o Dawidi ndjokela mbai magba.⁴⁰Ndjongo Yesu amalia ase atomia wamodjele la moto oho. Mbuse eho ango oumali inde ahue, Yesu amohuelia ate: ⁴¹Obali iyokele nde? inde asia ate Likumu ipote oeni.⁴²Ndjongo Yesu asia la inde ate pota eni, wondimi wo owe wokalesi. ⁴³Ndji la engele eho apotia oeni ase apotia omotutei inde ase omodemei Mwengéi, alidji ango weneli wato kpàa ndjongo wamodemiali Mwengei.

19¹Yesu, alingelali la Yeliiko, akpandali liwange. ²Edjali la motopele mwesi la kombo Djakayo, adjali Likumu e waputesi mamelo, alidji, adjali moto e ogumake. Alukali oeni Yesu.³Ase atikokalii omweni, la tina e ebiba e wato, laate adjali mokwe.⁴Atilali liwoso, atelia la mote laate amoene, late Yesu apotali oyeti la enge mboka.⁵Sikalandjo ango Yesu awumia la ebete ehoo, adhendali likolo amwaselia: Djakayo, adjimba sese; late keke ikoyabata la monguta mo owe.⁶Djakayo ayadjimbali sese, ase amototali la oyemeli.⁷Ango eenia iwo ndjongo, iwo kpàa wabandali ondungwani, pe owasi ate: alingelia oyabati atie moto ongo owungu.⁸Ase Djakayo, ayamalali liwoso la Likumu omwaaselia: dhenda, Likumu, ndambo dja wihoo wa mbai ekohekele la watundake. Pe ema kpàa epwesali mbai moto, la ohengeli, ikowongola ehoo mbala inéi.⁹Yesu amwaselia: la lisio la keke mokalo molingeli la mu moguta, late inde pe adjei mana o Abalayama.¹⁰Late mana o moto adjali a tina e oluki la okalesi wato wango¹¹Wango wadjali ooki djinge sambo, Yesu ahekeleli alidji eeti ekpangela, late adjali ahue e Yelusaleme, pe wadjali la mamungo ate Okumu e Mwengéi wokoenene ndji enge engele. ¹²Ndongo aasali ate: motopele mwesi la kita a akelali okendo la moki mwesi e lihele laate ayawumese likumu, mbuse awongwe.¹³Awelali mituke mande liomu, awahekelia wambele liomo, mbuse awaaselia: kelani milunga tee ekowongwa mbai.¹⁴Ase wana wa moki wa motonali, alidji wamotomelali wato mbuse ende, waasia ate: tobaliti ate moto oholo awume Likumu lasu.¹⁵Ango ewongwea inde mbuse, e ototi okulu e Likumu, awelali mituke wango awahekeleli iwo wambele, la oyewi nda litomba etoti iwo la milunga.¹⁶Ongo poo adjia, aasia: Likumu, wambele wa owe ewoti wambele liomu .¹⁷Ndjongo amowaselia ate: Edjéi olamu, motuke molamu, late oenesi ate odjéi la omeemene la sambo keke pendja, okotota Okumu likolo la gbata liomu.¹⁸Ongo wale adjia, aasia: Likumu wambele enge owe ebakesi wambele itano.¹⁹Aasali la inde: owepe, tota mokpali la gbata itano.²⁰Weti adjali, ahasia: Likumu, dhenga wambele dja owe, ihisali ehoo la esindjè.²¹Late idjaki oowangi, la loyi odjéi moto o minga; okototaka enge otihisali alidji okobukaka mbuma enge otonali.²²Amwaaselia ate: ikoosambesa ndji la enge eyasi owe la monoko moowe amene; motuke mobe, oyewaki ate idjéi moto ominga, ikootaka enge ehisiti mbai, alidji ikobukaka mbuma enge eoniti mbai. ²³Woni otiyisali wambele waa mbai dja wibende la baki laate ango ekowongwa mbai itote la asumbelia?²⁴Alidji aasia la wango wadjali ango: mopwesani djinge falanga, mohekeleni moto ongo odjei la wambele liomu. ²⁵Wamwaaselia: Likumu inde adjéi la wambele liomu.²⁶Iyo waselini, moto kpàa ongo odjéi la ema wako mohekele ngbi, ase ongo oti la ema, wakomopwesa te enge edjaki inde la eho. ²⁷Watonani wa mbai wango watibalali ate iwume Likumu la wu, djaka la iwo ahala, wawolani liwoso la mbai.²⁸Mbuse oasi ndjongo, Yesu asombia liwoso la ebiba ewato, late atele la Yelusalema.²⁹Ango eyandongbali inde ahue e Betefage la Betania la mokoli wakowelaka mokoli ma oliva, atomali watiesakoli wale.³⁰Aasia: kekeni la moki mungo modhendani la ino; mbuse olingeli ndondo, okogbotoni mana opunda wamonangi moliki, moto tueti atelakiyo likolo lande; motokolani djakani la inde. ³¹Inga moto aohuelani: nda ndenge okomotokolakani? okokini oasi ndjo: Likumu adjéi la posa eho.³²Wango wawatomali wakeeli, wagbotoli ndji nda ndenge Yesu awaaselali.³³Ango wadjali otokoli mana punda wamemene ehoo wawaselali ate: nda ndenge okotokolakani enge mana o punda? ³⁴Wawawongweselali: Likumu adjei la posa eho.³⁵Wakpalali ongo mana o punda atie Yesu, walumbali wisindjè wawu likolo la ongo mana o punda pe wamobatisali Yesu likola laho.³⁶Ango edjali inde osombi, wato wadjali owandji wisindjè wawu la mboka.³⁷Ango ayandongbia inde la Yelusalema,ngambo eyadjimbeli la mokoli mo oliva, watutiani wapotali oemeli, alidji olembeli Mwengéi la moli likolo la loyi e sambo kpaa kamwake eenali iwo. ³⁸Wabandali oasi: opambwame owe Likumu ongo okodjaka la kombo e Mwengéi! logoo e likolo pe ekumesame wiholo wieti likolo.³⁹Ndondo e wato, weeti Wafalisai waasali la Yesu: Motiesakoli, wapamela watutiani wa owe. ⁴⁰ Yesu awawongoselali ate: ikoyewisakani inga iwo waybata logoo mabukeli ma kopama!⁴¹Ango ehumali inde la gbata, Yesu adhengali ateniali la ilelo liko laho, pe aasia.⁴²Inga owe, ososolali a lisio la keke sambo dja logoo! sikalandjo eho eyayisi la maiso ma owe.⁴³Late masio ekodja la tina owe, la tango eho watonani wa owe wakolinga lopango makasi wakokela lisukaka ahue e owe mpe wakonanga owe la lisusuka kpàa.⁴⁴Wakoola, owe alidji wana wa owe ndondo e owe, watidhee libukeli teeti likolo la libukeli eeti, la loyi otibalali oyewi engele enge odhendamaate.⁴⁵Alingelali la tempelo, ase abandali oumbi la wango wadjali otambi.⁴⁶Aasali la iwo: edhingami ate: monguta mo mbai ekodja monguta mo oyatati ase ino, owumesia ehoo ebete e iwa.⁴⁷Adjali ohinye masio kpàa la tempelo. La makumu dja mangumba, la wadingeli la wato wasungu wa miki wadjali olukani omowoli.⁴⁸Ase watiyewali ndenge ototi, late wato kpoàa wamoyokali la owangi.

20¹Mwesi la enge masio, Yesu adjia otiesakoli wato ndondo e tepelo, adjali owasumbeli mboli ndamu. Wiloko e wanganga Mwengei la watiesakoli wa mibeko, la wiloko wadjaali. ²Wamwaaselia: towasela nda okumu okokelaka dji sambo, alidji ndai aohi ehele okumu?³ Awawongoselia: mbai pe ikohuelakani poopo esi, ndjaselani mbai, ⁴Patisa e Yoani edji la likolo inga la wato?⁵Wabandali obundoyi iwo amene: inga towongosa ate: elongoyi likolo, akwasa ate, wonini otimondjimalini? ⁶Alidji inga towongosa ate: elongoyi la wato, watokpa wakotobinga mabukeli, laate, watokpaa wayewi ate Yoani adjali mwaseli.⁷Wamowongoselia: wayewiti inga edji eni. ⁸Yesu awaaselia: mbai pe itiowaselani nda okumu ikokelaka dji sambo.⁹Abandali owaseli wato li lisekpe: Moto mwesi aonali elanga e vino, awahia watuke, akia okendo e masiyo ngbi. ¹⁰ Ango ewumali masiyo mabukake vino, amotomia motuke monde mwesi atie watuke wa elanga e vino, laate wamohekele djinge ebuki iwo la elanga e vino. Watuke wa elanga e vino wamobingia, wamowongosia mawo ohola.¹¹Amotomia weeti motuke monde, wamobhingia inde pe, wamotangia alidji wamowongosia maho ohola. ¹²Amotomia ongo osato, wamokotokolia, alidji waumbia la inde.¹³Memene elanga e vino aasia: ikokela woni? Ikomotoma mana o mbai o libhalano, eti mbala, ango ekomwene iwo, wakomotosa. ¹⁴Kasi ango watuke wa elanga e vino wamwenia, wabhundoyia iwo amene, alidji waasia: dhenda ongo okotikalela la ogumake. Tomoole, laate ogumake eume esu.¹⁵Wamulumbia saa e elanga e vino, alidji wamoolia. Sikalandjo memene elanga e vino akowakela woni? ¹⁶Akodja, akoola wango watuke kpa wa elanga e vino, akoha elanga e vino la weeti wato. Ango eokia iwo ndjongo, waasia: ekokiti odjei ndjongo.¹⁷Kasi Yesu awadhendali, aasia: eyinei woni enge edhingami ate: Libukeli enge elumbali wamai, ewumali likule la monguta? ¹⁸Ongo moto okokwa likolo la enge libukeli, akokondjoa, alidji ongo moto enge libukeli ekomokwela, ekomwandjakola.¹⁹Wiloko e wanganga Mwengei, la wiloko e watiesakoli wa mibeko, walukali ate wamohele ndji enge engele, kasi wadjali owangi wato. Wayewali ate edjei loyi ewu nde Yesu ahali linge lisekpe.²⁰Wabandali omodhendji Yesu, alidji watomali wato wayakele ate wadjei wato walamu laate wamohele la eyaseli e inde amene, ase wamohe la okulu alidji la okumu e likumu e moki.²¹Wamohuelali ehele poopo: Mwalimo, toyewi ate okwasaka alidji okotiesakolaka la meemene, alidji otidhenaka elongi, kasi okotiesakolaka mboka e Mwengei la meemenekpa. ²²Endjimami, inga etindjimane ate toputa limelo e Sezale?²³Yesu ayewali mamungo mau mbe, awawongoselia: woni okwalelekani mbai lisala? ²⁴Inyani mbai enge adjenge. Ehele edjei elongi e ndai alidji madhingo ma ndai? Wawongosia: e Sezale.²⁵Awaaselia: hani Sezale enge e Sezale, enge e Mwengei la Mwengei. ²⁶Watimohelali la ema teeti e obe la enge edjali inde oasi liwoso la wato, wakamwali la ewongweseli ende, wayabatali bi.²⁷Weeti Wasadukayo, wango wakwasaka ate obasi la logo oti, wayandongbali, wamohuelia Yesu ehele poopo: ²⁸Mwalimo, dhenda ehele Moize atodhingelali: inga moto opele ongo oyiki agwa, atikiti wana, maananga akomoyika moli ongo omotiki inde, laate awotele maanango wana.²⁹Kaikonde, edjali la wana wapele sambo. ongo oliwoso ayikali, agwiyia te otiki wana. ³⁰Ongo o wale ayikia ongo moli ogweli, inde pe agwiyia te otiki wana. ³¹Tee ongo osato amoyikia; ekeli ndenge kikima la iwokpa sambo watikiti wana. ³²Mbuse moli pe agwiyia. ³³La obasi e logo, akodja moli ondai? laate iwokpaa wamoyikali.³⁴Yesu awawongoselia: pele la wali wa mu moki wakoyikanaka; ³⁵Kasi wango wakoenene olamu olingeli la moki mungo mokodja, mbuse e obasi e logo, watiyikana alidji. ³⁶Watigwa kine alidji, laate wakouma nda wahumbua, alidji wakodja wana wa Mwengei nda wana wabasi la logo.³⁷Wango wagwi, wabase a logo, ndjongo nde Moize ayenyali engele e maa mote mokeke mungu modjali ololeyi, engele akowelaka likumu, Mwengei o Abalayama, Mwengei o Isaka, alidji Mwengei o Yakobo. ³⁸Kaiko Mwengei ati Mwengei e wato wagwake, kasi wango wakalake, laate iwokpaa wadjei la mokalo la loyi e inde.³⁹Weeti wiloko e watiesakoli mibeko, watotali liloba, waasia: Mwalimo oasi olamu. ⁴⁰Watikokali kine omohueli te poopo esi.⁴¹Yesu awaaselia: woni okokokani oasini ate Masiya adjei mana o Davidi? ⁴²Davidi inde amene aasi ndondo e buku ende e lembo: Likumu amwaseli Likumu la mbai: Abata la ewo e mbai e lilome, ⁴³Tee ikowumisa watonani wa owe wisuleli e makolo ma owe. ⁴⁴Davidi akomowelaka likumu. Ndandenge akoki odjei mana onde?⁴⁵ Ango edjakali wato omooki, aasia la watutiani wande. ⁴⁶Otuandjimeni wiloko wawatiesakoli wa mibeko; wakokpalaka walobe ilai ilai alidji owahi mibele wiholo wisungu, wakolukaka owabati la wangbeleno e liwoso la wasinagoga, la wiholo wilamu la wafeti. ⁴⁷Wakopwesaka wali wagweli milome wiho wau, la okeli maongi malayi malayi la tina oyayisi. Wakosambisama makasi.

21¹yesu atombolia maiso aenia wato wagumake wokohekeleke falanga dja makabo la ekolo e likawo ²Amoenia moli mwesi ogbeli molome ahekelia wana wa falanga wale wa kekewakeke ³Awaaseliate: oholo moli ogbeli molone ahekeli falanga weti wato kpa wango wabongi ewo la libenga e likawo. ⁴Late wango wato wagumake wahekeli falanga djinge iti la otomu kaiko inde ohekeli djinge idjaki inde ladjao ongo la monguta monde.⁵Mbuse, ndenge weeti wato wadjali oasi la loyi e tepelo ndenge etulami eho la mabukeli malamu la iho wikpalami la likawo Yesu asiate. ⁶Lamasio mageleli ehele tepelo ekobukia libukeli tekikima etitikala likolo leeti libukeli ehokpa ekokua sese.⁷Wamohuelia ate nda engele kokelama djinge sambo alidji nda elembo ekoyewesa iso ate engele eho ekokia? ⁸Yesu awaaseliate : yabanyani ate otiwungeni, late wato ngbi wakodja la kombo e mbai wakoasaate : mbai idjei inde, alidji ate: engele eho epotia owumi. Otiwaabile. ⁹Tango ekokani ino mboli e wita alidji wato wakoamalelanaka, otiwangakeni, laate ewongi ate djinge sambo kpa ewume liwoso, kasi eho etidja gboo e moki.¹⁰Awaaselia ate : eeti moki ekosana kindo la eeti moki, eeti okumu la eeti okumu. ¹¹Mbume ekoduduma ebete la ebete, ikoni ikodja ndenge la ndenge, mpe ndjala e ilaka ilakake, ekodja, la sambo e minga, mpe ilembo isungusu ikoenene ongo likolo.¹²Liwoso la djinge sambo wakoolukani ate waowoleni, wakohengelani la makunu ma wasinagoga, wakobongani la wa boloko, wakosambesani liwoso e makumu ma miki misungu, la makumu ma miki mikeke la tina e kombo e mbai. ¹³Djinge sambo okowumelani la tina ate litatoli lanu liyewane.¹⁴Batani la mamungo manu ate otilukeni ndenge enu esambake, ¹⁵Late mbai ikohekeleni maloba mpe kandela liwoso la wanguna wanu watilonga owamaleli ino, te ookokeyi.¹⁶Te wawoti wanu wakookawani, mpe wasangbanu, la wabola wanu, mpe la wato wapembeni, wakoola ngbi ndondo enu. ¹⁷Wato kpa wakootonani la tina e kombo embai ¹⁸Kasi mosue te mokikima mo moto monu motiwunga. ¹⁹La onangi mitema manu okokalesani milimo manu.²⁰Inga oenekeni Yelusaleme elingamia la wasoda, yewakani ate obitani oho owumiga pene. ²¹Late wango wakodja la Judea watile ngambo emikoli, wango wakodja ndondo e Yelusaleme wapumbe, wango wakodja la ilanga watiwongwe kine la moki. ²²Laate ekodja masio mawongosake limemu la oyengemani la sambo djinge idhingami.²³Ekodja makpa etie wali wango wakodja la lemi, mpe wango wakonungia wana late wato wakogba ngbi, latina elimemu e Mwengei. ²⁴Wakokua la mabeha miwotake, wakokee mituke la mikikpa, Yelusalema ekowotono la wango wati Wayuda tee engele ehani la miki esile.²⁵Ekodja la ilembo ndondo e liwusa wuse, ndondo e ndebo, alidji ndondo e minoto. Ahala la mbume miki mikodja la boo, watiyewa ndenge ekelake laate ewale ekoduduma la mbonge. ²⁶Wato wakogba la owangi ndondo e losambo enge ekodja la mbume laate okulu wolikolo wikokawana.²⁷Wakomoene mana omoto ageli ongo la mapata, la okulu la mwemu. ²⁸Ango ekopota ino oeni djinge sambo, djambani mito manu laate mokalo munu mopotia owumi.²⁹ Mbuse awahali ekpangele eesi: Ndendani mote mo figi la mite meeti kpa: ³⁰Tango e okponaka muho ngasi ekoewaka ate engele e elanga ekokia. ³¹ndenge kikima, inga oenekeni djinge sambo ewumia, ewani ate okumu wo Mwengei wowumia pene.³²Iyowaselini meemene ehele olie otieta ndji ndjinge sambo wiume. ³³Likolo la mbume ikoeta, kasi maloba ma mbai matiyeta.³⁴Angatalani inoamene laate mitema manu matilite la oetesi olaki la okengi, la mabundo ma moki, laate lisiyo luho etiowumeleni nda iwa. ³⁵Late ekoyabinga nda lisala likolo la watokpa wa mbume.³⁶La eho oilangaleni ilo, alidji awongoni engelekpa, laate ototeni otetelake la otili djinge sambokpa igeleli, laate owawumeseni likolo liwoso e mana o moto.³⁷La moi Yesu adjakali otiesakoli la tepelo, la likolo adjali oki olangali la mokoli mo weli iwo mokoli mo oliva. ³⁸Watokpa wadjali oki boo atiende laate wamooke.

22¹Lipati la mapa linge lindjangi okundji, linge liweli iwo ate Pasika, liumali ahue.²Wiloko wato wawa nganga Mwengéi la walimo wa pui wadjakali oluki ndenge eomoli Yesu, alikambo wadjaki owa wangi wato.³Ndjongo Satana alingelia la motema mo Yuda ongo omoweli iwo ate Kaliota, mwesi o watutiani wande liomu la wale.⁴Yuda akia okpomesani la wiloko wato wa wanganga Mwengéi ase la wiloko wato wa wamaleli monguta mo Mwengéi nda ndenge ekomokawa inde Yesu la mawo mawu.⁵Waumali la mwemu ase wamowunelia omohi wadjenge.⁶Yuda andimia, ase apotia oluki engele elamu e omokawi Yesu la mawo mawu, ndjongo wato ngbii watiewete.⁷Lisio e mapa edjangi okundi, use oho edjakali iwo ooli kondolo e pasika ewumali.⁸Ndjongo Yesu amotomia Petele la Yoani, awaselia kekeni okawongeli wilaka wa lipati la Pasika alikambo lasu.⁹Wamohuelia: obali ate tokawongele eni?¹⁰Inde awaselia okani! ango okolingela ino la gbata, okogbotononi la moto akpali molugu mo malia. Motutiani ebete enge ekolingela inde.¹¹Ase asani la memene monguta, mwalimo akohuelaka ate esuki e monguta edjéi eni ebete ekolaka iso wilaka wa lipati la Pasika ebete eikima la watutiani wa mbai?¹²Inde akowoiniani ebete esungu la monguta mo likolo, ongonde ekowongelani ino wilaka wa pasika.¹³Wakia, ase wagbotia sambo kpàa nda ewaaselali Yesu ase wawongelia wilaka wa lipati la pasika.¹⁴Ango eengali engele, Yesu aabatia la mesa ebete kikima la watutiani wande.¹⁵Inde awaselia: ibalaki ngbii olaki wilaka wa Pasika ehele mongindi la ino liwoso la mbai woeni wodjidji! ¹⁶Laate, iyowaselini, itilakakine tee ekoengene eho la okumu o Mwengei.¹⁷Ndjongo atotia etotu, a moongia Mwengéi ase asia: totani ehele etutu kawanani ndondo enu.¹⁸Alikambo, iyowaselini sikahala itokenga kine Vino alidi te wokoke tee ndjiango wuse wokodja wokumu wo Mwengei.¹⁹Mbuse eho, atotia mapa, mbuse eakongi la Mwengei abukia awahekelia aasia: ehele edjei wenge wa mbai ikokawa la likambo lanu; kelakanindjo la omungoi mbai. ²⁰Mbuse e olaki atotia etutu awahekelia aasia: kopo ehele edjéi wuuma woholi wo Mwengéi ehele edjéi makila ma mbai mango makosuakana alikambo lanu.²¹Ase dengani moto okawi mbai atie wanguna adjéi la mbai mongindji ahala la mesa! ²²Meemene, mana o moto akoke nda ndenge etenanate, ase maga la moto ongo omokawi ²³Wapotia ohuelani ndondo ewu, ndai opoti oluki okeli lungo loyi.²⁴Watutiani wapotia okokiani makasi, alikambo la oyewi nda moto ndondo ewu odjéi moto mosungu oleki.²⁵Yesu awaselia: makumu ma miki wakokondjaka wato wawu, la wango wakoyinyaka okulu, wawelami wakeli wa lamu.²⁶Enge etidje ndjongo etie ino. Ase moto ongo odjéi mosungu oleki ndondo enu ewongi adje nda mana, ewongi moto ongo okohaka mitinda adje nda moto owotomu! ²⁷Ndai odjéi mosungu oleki, moto owabati la mesa inga moto owotomu? moto owabati la mesa, te ndjongo? wolamu! mbai idjéi ndondo enu nda moto owotomu.²⁸Ino wabatigani la mbai mongindji engele elai ndondo ewomekami wo mbai.²⁹Ndji ndjongo nda ehekeli wawa mbai wokumu, mbai pe iyohekelini ino.³⁰Okolakani alidji okengani la mesa ma mbai ndondo e wokumu wo mbai, okoabatani likolo la ngbelengo dja wokumu alikambo la oteni loi la wiati liomu la wiale wa Isalaele.³¹Likumu Yesu, asia Simoni, Simoni oka! Mondjili aongiga owohehi owe nda ekoheheke wato wahehe pukapuka alikambo la odjikawi djaho la wisoki mpamba.³²Ase iyakongi alikambo la owe ndjongo wondjimi woowe wotilembe; ango ekowongwa owe, waha wamangua woteteli.³³Petele asia la inde; Likumu indjimi wolamu la oki la owe la woyogo mongindji, la ogui la owe mongindji.³⁴Yesu amowongoselia: Petele, iwaseli kekehele, liwoso ate koko e molome ebekwe okwasa mbala isato ate ondjewiti mbai.³⁵Mbuse eho Yesu asia la iwo: ango iyotomeni mbai la opasa te, la saki te ase la sapato te, odjangini nda ema? wawongosia: ema teeti te.³⁶Ase inde awaselia: ase sikahala etikine ndjongo, moto ongo odjéi la opasa, ewongi alitote, ndindjongo moto odjéi la saki ase moto ongo oti la lipata ewongi atambe kasaka ende alikambo ate asombe lipata.³⁷Alikambo ate, yasi la ino ewongi loi luhulu wodhingama la gbondo embai wokokisame, ate inde atangemaate ndondo e wato wabe. La meemene loi wungo wodhingama la gbondo e mbai okokisame.³⁸Watutiani wasia Likumu mapata male madjéi ahala inde asia wungo wokoki.³⁹Apumbia, akia nda ndenge emeseni inde la mokoli mo Olive,watutiani wande wamotuteya.⁴⁰Ango oumia inde la ebete eho, inde awaselia yakongoni alikambo ate otikweni ndondo eomekami.⁴¹Mbuse eho inde ayandongbia ma lihiele la iwo, akwa la mauli ase abandali oyakongi.⁴²Wawa, inga obali longose etotu e wodidi ehele atie mbai ase atikelame nda ebali mbai ase nda ebali owe.⁴³Ndjongo ahumbwa mwesi olikolo aumia alikambo la omohi wokulu.⁴⁴Yesu aokia magba ayakongia alidji makasi oleki. Malia ma wenge mande maumia nda makila mango madokakania la mbume.⁴⁵Mbuse eoyakongi inde alongoya ongo likolo, akawongoya atie watutiani, ase awagbotia walali wilo alikambo walembali la magba.⁴⁶Inde asia la iwo: alikambo lande ekolalaka ino wilo? Amalani likolo, oyakongeni, alikambo ate otikweni ndondo e womekami.⁴⁷Yesu adjali wasi engele eumali wato ngbii, Yuda, mwesi o watutiani wande liomu la wale, adjali oleki liwoso inde aumia ahue e Yesu alikambo la omohi mobale mowalingi la inde.⁴⁸Ase Yesu amwaselia: Yuda, okohaka mobale mowalingi la likambo la omohi mana o moto la mawo ma watonani?⁴⁹Ango wato wango wadjali la Yesu mongindji iwaenia wungo loi wopotia oumi wamohulia: Likumu, ewongi tosane la mapata masu? ⁵⁰Mwesi owu amokotia moto owotomu onganga Mwengéi mosungu, ase amotenia litoi.⁵¹Ase Yesu asia: Otkeleni ndjongo dheni. Atotia litoi e moto oho, ase awngosia.⁵²Mbuse eho, Yesu asia la wiloko wato wa wanganga-Mwengéi, ase la wiloko wato wawadendji wa monguta mo Mwengéi ase la wiloko wato wango wadji omoheli inde: Ogelelini la mapata, la mite nda idjéi iwa? ⁵³Masio kpàa idjaki la ino mongindJi ebete eikima la monguta mo Mwengéi ase otipotalini oheli mbai, ase ehele edjéi engele enu la engele ewokumu wo likolo.⁵⁴ Wamohelia yesu wakia la inde wakamotikia la monguta monganga Mwengéi mosungu. Petele amotuteya, ma lihele mbuse.⁵⁵Ase ndondo egbingi waloliali misa, ase Petele ayabatia ndondo e wato wango wakotoko misa.⁵⁶Moto owotomu mwesi omoli amwenia Petele ayabati kelekele emisa, inde amodendjia Petele makasi, ase asia: oholo moto koto adjaki la Yesu mongindji! ⁵⁷ Petele amokokiali, aasiali: moli, imwewiti. ⁵⁸Mbuse eho moto odi amoenia ase asia: owe koto odjéi mwesi owu.” Ase Petele asia la moto oho ate; iti inde te.⁵⁹Pene la engele esi mbuse, moto odji asia makasi: memene oholo koto adjaki mongindji la inde alikambo ate inde adjéi moto o Galilaya.⁶⁰Ase Petele asia la moto oho yewiti wungo loi wokwasaka owe. La engele eho ango edjakali inde wasi koko e molome ebekoiya.⁶¹Likumu ayakukolia, ase amodendia Petele makasi ndjongo Petele amungolia loi wungo wasali Likumu lainde: Liwoso koko e molome ebekwe okowungana mbai mbala isato ate ondjewiti mbai. ⁶²Petele apumbia ase alelia la magba.⁶³Wato wango wamosekeli Yesu, ase wamobingia.⁶⁴Wamodhihia maiso ase wamohuelia: towasela inso inga ndai oobingi? ⁶⁵Ase wasia lainde sambo ngbii dja wiliko.⁶⁶Wuse wotania wiloko wato wa wa Yuda, wiloko wato wawanganga Mwengéi la walimo wa pui wagbotononia wakadjia la Yesu liwoso la wabolei wou wosungu.⁶⁷Ase wamohuelia towasela iso odjéi Masiya? inde asia la iwo inga iyasa laino, otondjimani mbai. ⁶⁸La inga yohuelani poopoo otowongoselani mbai ema.⁶⁹Obandji ndji keke, mana o moto ekoabata la ewo e lilome e Mwengéi eowokulu. ⁷⁰Ndjongo wato kpàa wahuelia odjéi inde mana o Mwengéi? inde awawongoselia iwo: Owasigani, idjéi inde. ⁷¹Ndjongo wasia: Todjeikineni la posa e wadhemei? Tooki isoamene la monoko monde.

23¹Wayamalia iwo kpaa wakia la Yesu ongo edjei Pilato. ²Wabandali omokambi waasali ate : tomogboti oholo moto ndjo akwasaka la wato ate watindjime mibeko ma Moize, alidji watipute mamelo e Sezale, akwasaka alidji la wato ate inde adjei kilisito, likumu.³Pilato amohuelia : owe nde likumu la wayuda? e edjei mabi, owasiga koto. ⁴Pilato asia la makumu ma wanganga Mwengei, la wato kpaa wadjaki ango: iyeniti loi ungo okeli oholo moto. ⁵Kasi wamwamalelia waasia ate : akowatomaka wato la oya maleli mateya ma Moize obandi la yudea, galilea tee alandjo.⁶Ango eokia pilato ndjongo, ahuelia inga inde adjei moto o galilea; ⁷Ango eokia inde ate adjei moto o sese e okumu e Elode, amotomia ongo edjei Elode, laate mango masio Elode adjakali la Yelusalema.⁸Ango Elode amwenyia Yesu, aemelali laate tee la gala adjali la posa e omweni la djinge sambo edjakali inde ooki, adjakali omolambeli ate amokelele ma ema ekamwesake. ⁹amohuelia poopoo ngbi, kasi Yesu atiwongolali loyi te okikima. ¹⁰Makumu ma wanganga Mwengei la watiesakoli wa mibeko wango wadjakali ango, wadjali omokambi la sambo mbe mbe.¹¹Elode la sindjili djande wadjakali omokeli sambo mbe, la omoseki. Mbuse e omokpalesi esindje etanake, wamowongosia Yesu etie Pilato. ¹²Ndji ungo use, Pilato iwo la Elode waumali wa bola, iwo wato wango watonanali iwo wale mbuse e mbula ngbi.¹³Pilato awaboliali makumu ma wanganga Mwengei, la watiesakoli wa mibeko, la wato; awaaselia: ¹⁴Ino odjelelini mbai oholo moto, owasiani ate akowatomaka wato ate wamalele mibeko ma Moize, kasi imohueli liwoso lanu, mpe itimoene la likambo te likikima e sambo djinge emokambini ino.¹⁵Te ongo kine etie Elode, laate atowongwesi, dhenda oholo moto atikele ema enge ekoki la inde la logo. ¹⁶Kasi mbai ikomopumbesa la boloko mbuse e omobingi pimbo ¹⁷Yenga kpaa edjali mobeko ate wapumbesake moto mwesi la boloko ate wamoole.¹⁸Iwo kpaa wahumbali pui: moolesa Yesu, todheela Balanabasi. ¹⁹Balanabasi alingelate la boloko la loyi e olake wato la djeti sambo mbe mbe.²⁰Pilato aasia alidji la iwo laate amodhe Yesu. ²¹Iwo kpaa wapamia la moli motetelake, wasia: agbe, agbe la ekulusu ²²Pilato awaselia, mbala esato : nda obe okelinde? iyeniti loi ungo oki inde ogbi, ikomodhe mbuse e omobingisi pimbo.²³Kasi wapamia la moli motetelake ate agbe, opami owu obolianali la enge e makumu ma wanganga Mwengei. ²⁴Pilato andjimia owahi enge e ongi iwo. ²⁵Amopumbesia moto ongo odjakali la boloko la sambo mbe mbe,mooli o wato; awahekelia Yesu la posa ewu.²⁶Ango odjaki iwo oki la inde, la mboka, wagbotonia la Simona mo Silene, adjakali owongoyi la ilanga, wamokpalesia ekulusu, late amoikele Yesu ongo mbuse.²⁷Edjakali la wato ngbi wango wadjakali omobileyi, wali wadjali oyabingi mikpoto, la ooki magba la tina ende. ²⁸Yesu ayakukolia asia la wango wali ate: wali wa yelusalema, otileleni la tina e mbai, lelani la tina enu amene la wana wanu.²⁹Late la masiyo mango mageleli wakwasa ate : mwemu la wali wango wikomba, mwemu la wali wati la wana, la wango watinungisaka. ³⁰Wakoyabata oasi la mokoli ate : tokpele, alidji la milindalinda, todhiha! ³¹Inga wakela dji sambo la mote mowesu, ekodja woni la mote moomake?³²Wadjakali pe oki la wato wale wango watingakali la iwo laate wawabake ebete ekikima la Yesu la ekulusu.³³Ango eumia iwo la enge ebete eweli iwo ate mikwa ma moto wamobakia Yesu la ekulusu ebete ekikima la djinge iwa, mwesi la ewo e lilome odji la ewo e liali. ³⁴Yesu asali: wawa walimbesa, la loyi wayewiti ema enge ekokelaka iwo.³⁵Wato wayamalali lihele wakowadhenda. Watiesakoli wa mibeko, la wango wadjakali ango, wadjakali omoseki Yesu, la oasi ate: awakalesali weeti wato; ayakalese inde amene inga adjei Masiya ongo owononi la Mwengei!³⁶Wasodha koto wamosekekeli, wakia ahue ende, wamohiya mana magagake. ³⁷Wasia la inde ate: inga odjei likumu la wayuda, yakalesa yo owe amene! ³⁸Edjakali likolo lande madhingo mango madhingali iwo : oholo adjei likumu la wayuda.³⁹Moto moesi ongo omobakali iwo la ekulusu ebete ekikima la yesu, amotangia asia ate : te owe nde kilisito? yakalesa yo owe amene, mbuse otokalese! ⁴⁰Ongo eti amowongoselia : owe otimowangaka Mwengei? iso kpa todjei la odjidji okikima. ⁴¹Laiso, ekoki ate togbe la loyi tokelali obhe, kasi inde akeliti loyi te lokikima.⁴²Asia la Yesu: mungolaka mbai ango ekodja owe la okumu wowe. ⁴³Yesu amowongoselia : iyowaseli meemene ndji keke ehele okodja la mbai ebete ekikima la Paladizo⁴⁴Edjakali ango la engele e motoba likolo lilingelia la moki kpa tee la engele e libwa. ⁴⁵Moi molimanali, esindje e Tepelo esalanali la odja.⁴⁶Yesu apamia la moli motetelake aasia: wawa iwongosi molimo mo mbai la mawo ma owe. ⁴⁷Ango enia sindjili ndjongo, wamodemeiya Mwengei, waasia: oholo moto adjaali sembo.⁴⁸Wato kpaa wango wadjakali ango mbuse e oeni djinge sambo, wawongoyia wakoyabinga mokpoto. ⁴⁹Wango wato kpa wamoewakali Yesu mpe la wali wango walongwali, lainde tee la Galileya, wayamalali maa lihele, wakodhendaka djinge sambo edjakali oyeti.⁵⁰Edjakali la moto mwesi ndondo e wahi simbisi, moto osambo ndamu, kombo e inde Edjepu. ⁵¹Inde atiyawanesali la mungo mobeko, la djinge sambo, adjali moto o moki mo Alimateyo, liwange la wayuda, inde adjaali olambeli okumu wo Mwengei.⁵²Akeli ogbotoni la Pilato, aongia wenge wa Yesu. ⁵³AmodjimBali la ekulusu, alingali eho la bolangiti, akeli omolangesi a mbila enge ekelami ndondo e mabhukeli, enge watimolangesaliyo moto tueti.⁵⁴Edjakali use elengelake sabata ⁵⁵wali wango walongwali la Yesu tee la galileya wakia la Edjepu ebete ekikima la omokundji Yesu. ⁵⁶Ango ewongoyia iwo, wawongelia malasi. Lisiyo e sabata wahomali la ndenge edhingani la mobeko.

24¹Lisiyo la yenga ,wakeli la hilihili ongo la mbila,wakpali isokisoki elumba elamu enge ewngelali iyo. ²Wagbotoli libukeli lilongoyi liwoso la mbila. ³Walingelia, watigbotoli wenge e likumu Yesu.⁴Ango etidjake iwo oyewi inga enge sambo eyinyei woni,denda walome wale wawapumbelali,wakpali wisinje wingalake. ⁵Watumali la owangi, wayimali wilongi wawu la mbume. Wango pele wawaselia: woni okolukakani moto omokalo ono wato wagwi?⁶Ati ala, abasi. Sumbwani enge awowaselate ino,engele edjaki inde la Galileya.⁷Ekoki ate mana o moto wa mokawe la mawo ma wato wabe, wamobake la ekulusu, abase lisiyo la misato.⁸Ango wadjaali alidi obundoyi maloba ma Yesu. ⁹Tango ewongoiya iwo la mbila, wasumbia djinge sambo kpa la watutiani wande liomu la esi alidji la wato kpa. ¹⁰Waango wadjali osumbi enge mboli la wa posotolu, edjali Malia magadala, Yoana, Malia nango Yakobo alidji la weeti wali wango wadjaali la iwo.¹¹Kasi waokali djinge sambo nda pamba, watidjali owandjimeli wango wali. v 12 Ase Petelo ayamalalia, akia obangu ongo la mbila. Ayayimbia , ahenia ndji isuki dja isindje ekwi la mbume, mbuse awongoiya atiende, akobunduaka la djinge sambo ewumi.¹³Ndji enge lisiyo, watutiani wale wakeli la moki mwesi moweli iwo Emawusu lihele la Yelusaleme inga wakilometele liomu la iwale. ¹⁴Wadjali owasi iyo kpa djinge sambo iyeti.¹⁵Tango edaki iyo okpomi la owasani, Yesu ayandokpia inde amene, akia la iwo mongindji. ¹⁶Kasi maiso mawu mawatekisali ate watimoyewe.¹⁷Yesu awaaselia: okowasakani nde la okosombakani, alidji odjeini la ilongi emagba? ¹⁸Mwesi la ewu kombo ende Kelopasa, amowongoselia: odjei owe amene maamasiyo ala la Yelusaleme ongo oyewiti djinge sambo eeti maamasio?¹⁹Woni? awahuelia. Wamowongoselia: enge e mowumeli Yesu o Nazaleta,ongo odjakali mwaseli ookulu la sambo la oasi liwoso la Mwengei la liwoso la wato, ²⁰Ndenge wiloko wa wakanga Mwengei la wa zuzi wa su wa moheli laate wamowole wamobake alidji la ekulusu.²¹Todjaki oyewi ate inde moto akokaki okalesi Isalayele, kaiko la djinge kpaa,denda keke ehele masiyo masato djinge sambo ikelani.²²Wali wesi la mongindji mosu watokamwesi. Waki la hilihili ongo la mbila. ²³Kasi watigbote wenge wande ; wadji oasi ate waahumbwa wawawimeli, wawaaseli te adjei la bomoyi. ²⁴Aseko weeti la ndondo e wato wango wadjaakali mongindji la iso wakeli la mbila eho, ase wagboti ndji ndjongo nda ndenge wango wali waasi kasi wati moene.²⁵Ndjongo Yesu awaaselia ate: wato wandjangi mayele, wango mitema mawu militi la ondjimi djinge ehasemate la waaseli! ²⁶Etihongoli ate Masia aene odidi la dji sambo laate alingele la elolo ende? ²⁷ Obandi la madhingami ma Moize, oki la waaseli kpaa, awaaselia ndondo e madhingami kpaa djinge sambo ewadhendali.²⁸Ango eyandongbali iwo la moki modjali iwo oki,Yesu alukali oki nda ma lihele. ²⁹Wamotekisali la oyakongi, waasia: tikala la iso laate likolo lipotia oli. Alingelia la iwo.³⁰Aseko ango eyabatali inde la iwo la mesa, atotia okoke eowasi yongolo eopamboli, abokia eho, awahia. ³¹Ndjongo maiso mawu madukwania, wamoyewia, a salamatia liwoso la wu . ³²Ase wayaaselia ate: mitema masu mitidjali obingi ango edjakali inde otowaseli a mboka la otoyignei madhingami.³³Wayamalali ndji enge ngonga, wawongwali la Yelusalema, ongo wawagbotoli wango liomu la esi la weeti ongo eyabondali iwo. ³⁴Wawaaselia ate: likumu abasi meemene, ayeneni pe la Simoni. ³⁵Asa watutiani wawaaselia djinge sambo ewawumelali la mboka, la ndenge emoyewali iwo Yesu engele ebuki inde okoke.³⁶Ndji edjaki iwo owasi Yesu inde amene awapumbelia liwoso lawu awaaselia: logoo edje la ino. ³⁷Watumali la owangi wayewali ate waeni etota.³⁸Awaaseli: woni ekowangani ino? alidji woni maa mamungo mbe makoyabataka la mitema manu? ³⁹Denda mawo ma mbai la makolo ma mbai, edjei meemene mbai. Potoni mbai alidji dendani: etota ti la wini la kua, la ndenge ekohenekeni ino, mbai edjei la eho. ⁴⁰Ango eyasia inde ndjono, awaaenesia maho mande la makolo.⁴¹La eho,la oyemeli owu, watidjaali ondimiyo,wadjaali okamwi. Ase awaaselia: odjeni la ema e lakake ahala? ⁴²Aseko wamohekelia esuki e su e ndjomake. ⁴³Ase atotia ehoo ase alakaki eho la maiso mawu.⁴⁴Ase awaaselia ate: edjei ehonde iyoowaselalini ango edjaali yo mbai la ino: ewongoli ekokesame dji sambo kpaa edhingani la tina e mbai ndondo e buku e mibeko e Moize, la waaseli,la ndondo e lembo.⁴⁵Ase awadukolia mayele laate wayewe olamu madhingani. ⁴⁶Ase aasia laiwo ate: ndjongo e dhinganaali ate,ekoki djinge sambo ewume, ate Masia onyokwame; agwe ase asuswe mbuse e masiyo masato. ⁴⁷laate alikambo la kombo ende okukoli mitema la olimbesi masumu ekoke otiesakolami laa miki kpaa, opoti ala la Yelusaleme⁴⁸Ino odjeini watotoli la djii sambo. ⁴⁹Denda ikootomelani ino enge wawa awunate; la ngambo enu, abatani yo la moki mo Yelusaleme tee ekokpalani ino okulu o likolo.⁵⁰Akia la iwo tee ongo la Betania, aseko mbuse atombolia ewo likolo, awa pambolia. ⁵¹Ango adjali inde owapamboli, akawania laiyo ase abamdia oteli likolo.⁵²Aseko iyo mbuse eomodemei, wawongoiya la Yelusaleme, watumali la oyemeli. ⁵³Wadjali engele kpaa ongo la tepelo, odemei la opamboli Mwengei.

Babango: Bible for Luka

Formatted for Translators

Luka