To view a copy of the CC BY-SA 4.0 license visit
http://creativecommons.org/licenses/by-sa/4.0/
Below is a human-readable summary of (and not a substitute for) the
license.
You are free to:
-
Share — copy and redistribute the material in any medium or
format.
-
Adapt — remix, transform, and build upon the material for any
purpose, even commercially.
The licensor cannot revoke these freedoms as long as you follow the
license terms.
Under the following conditions:
-
Attribution — You must attribute the work as follows: "Original
work available at https://BibleInEveryLanguage.org." Attribution
statements in derivative works should not in any way suggest that we
endorse you or your use of this work.
-
ShareAlike — If you remix, transform, or build upon the
material, you must distribute your contributions under the same
license as the original.
-
No additional restrictions — You may not apply legal terms or
technological measures that legally restrict others from doing
anything the license permits.
Notices:
You do not have to comply with the license for elements of the material in
the public domain or where your use is permitted by an applicable
exception or limitation.
No warranties are given. The license may not give you all of the
permissions necessary for your intended use. For example, other rights
such as publicity, privacy, or moral rights may limit how you use the
material.
Matthew
11ذيه نسب عيسى المسيح ابن داود ابن ابراهيم
2ابراهيم ولد اسحاق واسحاق ولد يعقوب
ويعقوب ولد يهوذا واخوته
3ويهوذا ولد فارص وزارح من ثامار وفارص ولد حصرون
وحصرو ولد ارام
4وارام ولد عميناداب وعميناداب ولد نحشون
ونحشون ولد سلمون
5وسلمون ولد يوعز من راحاب ويوعز ولد عوبيد من راغوث
وعوبيد ولد يستى
6ويستى ولد داود الملك وداود ولد سليمان من مرة اوريا
7وسليمان ولد رحبعام ورحبعام ولد أبيا
وأبيا ولد آسا
8وآسا ولد يوشافاط ويوشافاط ولد يورام
ويورام ولد عزيا
9وعزيا ولد يوثام ويوثام ولد أحاز
وأحاز ولد حزقيا
10وحزقيا ولد منسى ومنسى ولد آمون
وآمون ولد يوشيا
11ويوشيا ولد يكنيا واخوته وقت الأسر إلى بابل 12وبعد السبي إلى بابل يكنيا ولد شألتيل
وشألتيل ولد زربابل
13وزربابل ولد أبيهود وأبيهود ولد ألياقيم
وألياقيم ولد عازور
14وعازور ولد صادوق وصادوق ولد أخيم
وأخيم ولد أليود
15وأليود ولد أليعازر وأليعازر ولد متان
ومتان ولد يعقوب
16ويعقوب ولد يوسف رجل مريم اللي ولدت عيسى اللي يسموه المسيح 17ويطلع مجموع الأجيال من إبراهيم إلى داود 14 جيل ومن داود إلى الأسر البابلي 14 جيل ومن الأسر البابلي إلى المسيح 14 جيل18وتيه سيرة ميلاد عيسى المسيح : كانت امه مريم مخطوبه ليوسف ، ودروا قبل ما تسكن معه انها واحمه من الروح القدس 19وكان يوسف رجال صالح وما كانش يشتي يفضحها ، وخلاها سر 20ولوما كان بيفكر في تيه الحاجه ، بدي له ملاك من الرب في الحلم وقال له : يا يوسف ابن داود ، لا تفتجعش انك تشل مريم زوجه لك ، لأنها واحمه من الروح القدس 21وعتولد ابن تسميه عيسى ، علميد هو يجي يساعد شعبه من خطاياهم 22وقع ذيه كله علميد يتم اللي قاله الرب على لسان النبي 23عتوحم العذراء ، وتولد ابن يسموه (عمانوئيل) يعني الله معانا 24فلوما قام يوسف من النوم ، عمل ساع ما قاله الملاك ، وجا بمرته لبيته 25ولكنه ما جامعهاش لوما ولدت ابنها ، وسماه عيسى21ولوما ولد عيسى في بيت لحم اليهوديه ، في زمن الملك هيرودس ، جو علماء من الشرق للمقدس 2وقالوا : وين هو المولود ، ملك اليهود؟ احنا ابسرنا نجمه في الشرق ، وجينا علميد نسجد له 3وسمع الملك هيرودس وقلق هو وكل اورشليم4وجمع كل رؤساء الكهنة وفقهاء الشعب كلهم وسألهم : وين يولد المسيح؟ 5فجاوبوا : في بيت لحم اليهوديه ، لأن ذيه ما كتب النبي 6يا بيت لحم ، أرض يهوذا مش انتي الصغيره في مدن يهوذا
لأن منش يخرج رئيس
يرعي شعب بني اسرائيل
7فصيح هيرودس العلماء بالسر وتأكد منهم متى بدي النجم 8وبعدا رسلهم لبيت لحم وقال لهم : سيروا ودورو سوا على الجاهل ، ولوما تلقوه حاكوني علميد اسير انا والكل واسجد له 9فلوما سمعوا كلام الملك ساروا وهم في الطريق النجم اللي ابسروه في المشرق ابسروه يمشي قبلهم لوما وصل المكان اللي بينه الجاهل ووقف فوقه 10ولوما ابسروا النجم فرحوا قوي قوي11ودخلوا البيت وابسروا الجاهل مع امه مريم ، فركعوا له وسجدوا له ، وبعدا فتحوا اكياسهم وادوا له هدايا ذهب وبخور ومر 12وحذرهم الله في الحلم ان ما يرجعوش إلى هيرودس ، فرجعوا من طريق ثانيه لبلادهم13وبعدما راحولهم العلماء ، بدي ملاك الله ليوسف في الحلم وقال له : قوم شل الجاهل وامه واهربوا لمصر واجلس فيها ، لوما اقلك ايحين ترجع ، لأن هيرودس عيدور على الجاهل علميد يقتله 14فقام يوسف وشكل الجاهل وامه في الليل وساروا لمصر 15وجلس بينها لوما مات هيرودس ، علميد يتم ما قال الله بلسان النبي : من مصر دعوت ابني 16ولوما ابسر هيرودس ان العلماء ضحكوا عليه ، زعل قوي وامر انهم يقتلوا كل جاهل في بيت لحم واللي جنبها ، من ابن سنتين وماتحت ، حسب الوقت اللي قالوا عليه العلماء17وتم ما قال النبي إرميا: 18صياح سمع في الرامه بكاء وعوي خيرات
راحيل تبكي على جهالها
وماتشتيش انها تتعزى
لأنهم زالوا عن الوجود
19ولوما مات هيرودس بدي ملاك الله ليوسف في الحلم وهو في مصر 20وقال له : قم شل الولد وامه وارجع إلى اسرائيل ، لأن اللي كانوا يشتوا يقتلوه ماتوا 21فقام وشل الولد وامه ورجعوا لأرض اسرائيل22لكنه سمع ان أرخيلاؤس يملك على بقعة يهوذا مكان ابوه هيرودس ، وافتجع انه يسير لها ونذره الله في الحلم فسار إلى الجليل 23وجاء إلى مدينة اسمها الناصرة وسكن فيها علميد يتم ما قال الأنبيء : يسموه ناصرياً 31وفي تيك الأيام جاء يوحنا المعمدان يبشر في صحراء اليهودية 2ويقول : توبوا ، لأن ملكوت السماوات قرب 3ويوحنا هو اللي قال عنه النبي إشعيا بقوله: صوت يصيح في الصحراء
جهزوا طريق ربنا
وخلوا سبله مستقيمه
4وكان يوحنا يلبس ثوب من وبر الجمال ، وفي وسطه حزام من جلد ، وكان ياكل الجراد والعسل 5وكان الناس يخرجوا له من اورشليم وجميع اليهوديه وكل البقع القريبه بالأردن 6علميد يعمدهم في نهر الأردن ، معترفين بخطاياهم 7وابسر يوحنا ان خيرات من الفريسيين والصدوقيين يجوا له علميد يتعمدوا ، فقال له : يا اولاد الأفاعي ، من علمكم تهربوا من الغضب الجاي لكم؟ 8افعلوا حاجات تدل على توبتكم 9ولا تقولوش لنفسكم ان ابونا هو ابراهيم ، اقول لكم : ان الله قادر يخلي من تيه الحجاره عيال لإبراهيم10هوذا الفأس جاهزه عى جذوع الشجر ، وكل شجره ماعتديش ثمر حالي تنقطع وترتمي في النار 11انا اعمدكم بالماء علميد التوبه ، واما اللي عيجي بعدي فهو اقوى مني ، وانا ما استحق اني اشل حذاه ، هو عيعمدكم بالروح القدس والنار 12ويشل مذراته بيده وعينقي بيدره ، ويجمع القمح في مخزنه ويحرق التبن بنار ما تنطفيش13وجاء عيسى من الجليل للأردن علميد يتعمد على يد يوحنا 14وحاول يوحنا يمنعه وقال له : انا اشتي انك انت تعمدني ، وانت تجي لي؟ 15فجاوبه عيسى : لازم ذيح ذلحينه ، علميد نتم مشيئة الله ـ ووافقه يوحنا 16وتعمد عيسى وخرج على طول من الماء وافتتحت له السماء ، وابسر روح الله ينزل عليه كأنه حمامه 17وقال صوت من السماء :( ذيه هو ابني الحبيب اللي به رضيت ) 41وبعدا شل الروح القدس عيسى للصحراء علميد يجربه ابليس 2فصام اربعين يوم واربعين ليله لوما جاع 3فجاء له ابليس وقال له : لو انت ابن الله قول لتيه الحجره توقع خبز 4لكن عيسى جاوبه : يقول الكتاب ( مش بالخبز وحده يعيش الآنسان ولكن بكل كلمه تخرج من فم الله ) 5وشله ابليس للمدينه المقدسه ، ووقفه على قمة الهيكل 6وقال له : لو انت ابن الله ارجم بنفسك لتحت ، لأن الكتاب يقول : يوصي ملائكته بك ويحملوك على ايديهم علميد ما تصدمش رجلك بحجر
7فجاوبه عيسى : يقول الكتاب كمان ( لا تجربش الله إلهك ) 8وشله ابليس لجبل عالي قوي ، ورواه كل مماليك الدنيا ومجدها 9وقال له : اديلك كل ذيه لو سجدت لي وعبدتني 10فجاوبه عيسى : رحلك مني ياشيطان ! لأن الكتاب يقول للرب إلهك تسجد وإياه وحده تعبد 11وبعدا فلته ابليس وجو شوية ملائكه يخدموه12وسمع عيسى انهم مسكوا يوحنا ، فرجع للجليل 13وفلت الناصره وسكن في كفر ناحوم على شاطئ بحر الجليل في بلاد زبولون ونفتالي14عسم يوقع ساع ما قال النبي إشعياء 15يا أرض زبولون وأرض نفتالي على طريق البحر ، غرب الأردن
يا جليل الأمم
16الشعي اللي يعيش في الظلام ابسر نور عظيم
والجالسين في أرض الموت وظلاله
أشرق عليهم النور
17وبدأ عيسى من ذيك الوقت يبشر ويقول :(توبوا ، لأن ملكوت السماوات اقترب)18وكا عيسى يمشي على شاطئ بحر الجليل ، وابسر اثنين اخوه هم سمعان اللي يلقبوه بطرس واخوه اندراؤس ، يرموا الشبكه في البحر لأنهم كانوا صيادين 19فقال لهم :(الحقوني ، شاخليكم صيادين بشر) 20وفلتوا الشبك حقهم على طول ولحقوه 21وسار من هاناك وابسر اثنين اخوه ثانين ، وهم يعقوب بن زبدي واخوه يوحنا ، مع ابوهم زبدي في قارب بيصلحوا الشبك حقهم ، فصيح لهم 22وفلتوا القارب وأبوهم على طول ولحقوه23وكان عيسى يسير في كل بقعه في الجليل ، ويعلم في المجامع ويعلن إنجيل الملكوت ، وشافي الناس من كل مرض 24وانتشر صيته في سوريا كلها ، فجوا عنده بكل المرضى بأمراض متنوعه ، مصروعي ومشلولين واللي بيه مس ، وشفاهم 25وتبعوه ناس خيرات من الجليل والمدن العشر واورشليم واليهوديه ومن شرق الأردن 51ولوما ابسر عيسى الناس ، طلع للجبل وجلس وقرب من طلابه 2وجلس يعلمهم وقال لهم: 3هنيئاً للمساكين في الروح لأن معاهم ملكوت السماوات
4يهنا للي هم غاثين لأنهم يعزو
5يهنا للودعاء لأنهم يورثوا الأرض
6يهنا للجاوعين والعاطشين للحق لأنهم عيشبعوا
7يهنا للي يرحموا لأنهم عيرحموا
8يهنا للي قلوبهم صافيه لأنهم يبسروا الله
9يهنا للي يعموا سلام لأنهم أبناء الله يسموهم
10يهنا للي يلاحقوهم علميد الحق لأن لهم ملكوت السماوات
11يهنا لكم لو عايروكم ولاحقوكم وقالوا عليكم كذب كل كلمه مش حاليه من سبتي 12افرحوا واتبسموا ، لأن اجركم في السماوات عظيم ، كذيه لاحقوا الأنبياء قبلكم13انتوا ملح الأرض ، فلو خرب الملح ، ايش عيملحه؟ ما يصلحش ، إلا يرموه في الخارج ويدعسوه الناس
14انتوا نور العالم ، ماتخفاش مدينه على جبل15ولا يوقد نار ويطرحوه تحت المكيال ، ولكن في بقعه مرتفعه ، علميد يضوي لكل اللي هم في البيت 16فخلوا نوركم يضوي كذيه قدام الناس علميد يبسروا اعمالكم الصالحه ، ويمدوا ابوكم اللي في السماء17لاتظنوش إني جيت علميد اخرب الشريعه وتعاليم الأنبياء ، ما جيتش اخرب ولكن علميد أكمل 18اقول لكم الصدق :(لوما تنتهي الأرض والسماء ما عينتهيش حرف واحد أو نقطه واحده من الشريعه لوما يتم كل شي)19ومن يخالف ولو وصيه من أصغر تيه الوصايا وخلا الناس يفعلوا ساع ما هو توقع له أقل مكانه في ملكوت الله ، واللي يفعل بها ويعلمها لغيره توقع له مكانه عاليه في ملكوت الله 20اقول لكم :( لو ان ايمانكم ما يزيدش عن الفقهاء والفريسيين ماعتدخلوش ملكوت الله )21سمعتوا انهم قالوا زمان :(لاتقتلوش ، ومن عيقتل يتحاكم) 22واما انا اقول لكم :(من يصيح على اخوه يتحاكم ، ومن يقو لأخوه يا جاهل يواجه المجلس ، ومن قال له يا اهبل يستاهل نار جهنم 23ولو كنتو تقدموا قربانكم للمذبح وذكرت ان اخوك له حاجه عليك 24فلت قربانك وسير اول شي وتصالح مع اخوك ، وبعدا جي وفدم قربانك 25ولو زعل منك حد ، اسرع علميد ترضيه حتى وانت معه في الطريق ، علميد ما يسلمك الغثى للقاضي ، والقاضي للشرطه وتدخل السجن 26اقول لكم الصدق :(ما عاد تخرجش من هاناك إلا لوما توفي آخر ريال27وسمعتوا انهم قالوا :(لا تزنيش) 28اما انا اقول لكم :(من ابسر لمره بحق شهوه زنى بها في قلبه)29فلو كانت عينك اليمين خلتك تغلط اقلعها وارجمها بعيد ، لأنه احسن لك ترجم عضو من أعضائك ولا انك ترتجم في جهنم بجسمك كله 30ولو خلتك يدك اليمين تغلط اقطعها وارجمها بعيد منك ، لأنه احسن لك تقطعها ولا انك تسير انت بكلك للنار31وقالوا كمان : من طلق مرته ، يدي لها ورقة طلاقها 32واما انا اقول لكم :(من طلق مرته وهي مش زانيه يخليها تزني ، ومن يتزوج مطلقه يزني)33وسمعتوا انه قالوا من زمان :(لا تخلفش وعدك ، ولكن اوفي ما نذرت به) 34اما انا اقول لكم :(لا تحلفوش نهائي ، مش بالسماء لأنها عرش الله) 35ومش بالأرض لأنها بقعة ما يطرح ارجله ، ولا بمدينة اورشليم لأنها مدينة الملك العظيم36ولا تحلفش براسك ، لأنك ما تسترش تخلي ولو شعره واحده منه بيضاء او سوداء 37خلو كلامكم ايوه ولا مشي ، وما زاد عن ذيه فهو من الشرير38سمعتوا انهم قالوا زمان : العين بالعين والسن بالسن 39واما انا اقول لكم : لا تنتقموش من اللي يغلط عليكم ، من لطمك على صابرك اليمين فقرب له الصابر الثاني40ومن كان يشتي يزاعلك علميد يشل ثوبك ، فلت له ثوبك كمان 41ومن كان يشتيك تمشي معه كيلو متر واحد سير معه انت اثين كيلو متر 42ومن طلب شي منك اديه له ، ومن يشتي يتسلف منك شي لا ترجعش فاضي43سمعتوا انه قالوا زمان : حب قريبك واكره عدوك 44واما انا اقول لكم : حبوا أعدائكم وصلوا علميد اللي يلاحقوكم 45وتوقعوا عيال ابوكم اللي في السماوات ، لأنه يطلع شمسه على الأشرار والصالحين ، ويمطر على الأبرار والظالمين46فلو كنتوا تحبوا اللي يحبوكم فهو اجر لكم ، مش يعملوا جباة الضرايب هكذا؟ 47وإذا كنتوا ما تسلموش إلا على اخوتكم ، ذيه مش شي غريب ، لأن اللي ما يعرفوش الله يفعلوا هكذا 48اوقعوا انتوا كاملين ساع ما ان ابوكم السماوي كامل 61اوبهوا انكم تفعلوا الخير قدام الناس علميد يبسروكم ، وإلا ما عيقعش لكم اجر عند ابوكم اللي في السماوات 2فلو عملتوا خير في احد ، فلا تعلنوهاش للكل ساع المنافقين في بيت العباده والشارع علميد يمدحهم الناس ، اقول لكم الصدق : انهم شلو أجرهم3ولكن لوما تدي صدقه لا تخليش شمالك ايش بتدي يمينك 4علميد تكون صدقتك في السر ، وابوك اللي يبسر في الخفيه هو يجازيك5ولوما تصلوا لا توقعوش ساع المنافقين ، لأنهم يحبوا انهم يوقفوا للصلاه في بيت العباده وعند تقاطع الشوارع علميد يبسروهم الناس ، اقول لكم الصدق : قد شلوا اجرهم 6اما انت فلو صليت داخل غرفتك وغلقت الباب عيوصل لأبوك اللي ماتبسره أي عين ، وابوك اللي يبسرك في الخفيه هو يجازيك 7ولوما تصلوا لا تكونوش ترددوا الكلام ساع الوثنيين ، قصدهم ان الله عيستجيب لهم من كثرة هدارهم8لا توقعوش ساعهم ، لأن الله ابوكم داري ايش تشتوا من قبل ما تسألوه 9فصلوا انتوا تيه الصلاه ابونا اللي في السماوات
ليتقدس اسمك
10يجي ملكوتك علميد توقع مشيئتك
في الأرض ساع مافي السماء
11ادي لنا خبزنا اليومي
12واغفر لنا ذنوبنا ساع ما سامحنا للي غلطوا علينا
13ولا تدخلناش في المحنه ولكن نجينا من الشرير
14فلو سامحتوا الناس على غلطهم ، يغفر لكم ابوكم السماوي 15وإذا ما سامحتوش الناس ، ما عيغفرش لكم ابوكم ذنوبكم16ولوما تصوموا لا تكونوش قالبين وجوهكم ساع المنافقين ، لأنهم يقلبوا وجوههم علميد يروو الناس انهم صايمين ـ اقول لكم الصدق : هولا شلوا اجرهم 17واما انت لو صمت اغسل وجهك ودهن شعرك 18علميد ما يعرفش الناس انك صايم ، بس ابوك اللي ماتبسره أي عين ، وأبوك اللي يبسر في الخفيه هو يجازيك19لا تجمعوش لكم ثروه على الأرض ، لأنه يفسدها السوس والذحل ، ويدوروا عليها السرق ويشلوها 20ولكن جمعوا لكم ثروه في السماء ، بقعة مابش لا سوس ولا ذحل يخربها ، ولا به سرق يدوروا عليها ويشلوها 21وبقعة ما يطرح كنزك يطرح قلبك22سراج الجسم هو العين ، فلو عينك سليمه يوقع جسمك كله منور 23ولو كانت عينك تاعبه ، عيوقع جسمك كله ظلام ، فلو كان النور اللي فيك كله ظلام فهو أشد الظلام فيك 24ما يقدرش أي احد انه يخدم سيدين ، لأنه عيكره واحد ويحب الثاني ، او يوقع وفي للأول والثاني ماشي ، ما تقدروش انكم تخدموا الله والفلوس سوا25علميد ذيه اقول لكم : ما يهمكمش في حياتكم ايش تاكلوا وايش تشربوا ، ولا لجسمكم ايش عتلبسوا ، مش الحياه احسن من الطعام والجسم أهم من اللبس؟ 26ابسروا الطيور في السماء ، كيف انها ما تزرعش ولا تحصد ولا تخزن في مخازن ، وأبوك السماوي يرزقها ، مش انتوا افضل منها بخيرات؟27به أي احد منكم كيف ما قلق انه يزيد ولو ساعه واحده على عمره؟ 28وليش تقلقوا على الملابس؟ ابسروا كيف زنابق الحقل وكيف تكبر ، وهي لا تتعب ولا تغزل 29اقول لكم : ولا حتى سليمان في كل جلاله كان يلبس ساع واحده منها30فلو كان الله كذيه يلبس عشب الجربه وهو يرتمي غدوه في النار ، انتوا اولى منه انكم تلبسوه يا قليلين الايمان 31علميد ذيه لا تهتموش وتقولوا : ايش ناكل؟ وايش نشرب؟ وايش نلبس؟32فذيه يدوره الوثنيين ، وابوكم السماوي داري انكم تحتاجوا ذيه كله 33اطلبوا اول شي ملكوت الله ومشيئته ، وهو يزيدكم الله ذيه كله 34لا يهمكمش غدوه ، لأن كل يوم يوبه لنفسه ، ولكل يوم من التعب كفايته 71لا تحكموش على أحد ، وكذيه محد يحكم عليكم 2ساع ماتدينوا تدانوا ، وساع ما تكيلوا يكال لكم 3للمه تبسر للقشه في عين اخوك ، وما تنتبهش للخشبه اللي في عينك؟ 4كمان كيف تقول لأخوك : خليني أخرج القشه من عينك ، وهو اللوح في عينك انت؟ 5يا منافق ، خرج اللوح من عينك اول شي ، وبعدا تستر انك تخرج القشه من عين اخوك 6لا تدوش الحاجات المقدسه للكلاب ، ولا ترجموش ذهبكم للخنازير علميد تدعسها بأرجلها ، بعد عتبسركم وتقطعكم7اسألوا تعطوا ، اطلبوا تلاقوا ، دقوا الباب يفتتح لكم 8واللي يسأل يوقع له ، ومن يطلب يلاقي ، ومن يدق الباب يفتح له 9منه منكم لوما يطلبه ابنه خبزه يدي له حجره؟ 10او طلبه سمكه يدي له حنش؟11فلو هو انتوا الأشرار عتدوا حاجات صالحه لعيالكم ، فكم اولى انه ابوكم اللي في السماوات يدي الخيرات للي يطلبو منه 12عاملوا الثانين ساع م تشتوا انهم يعاملوكم ، تيه خلاصة الشريعه وتعاليم الأنبياء13ادخلوا من الباب الضيق ، يا ما اوسع الباب واسهل الطريق اللي تودي للتهلكه ، وما اكثر اللي يمشوا فيه 14وما اضيق الباب وأصعب الطريق اللي تودي للحياة ، وما اقل اللي يهتدوا لها15اوبهوا من الأنبياء الكذابين ، يجوا لكم وهم ساع لأبرياء ، وفي الصدق هم ذئاب 16من ثمارهم تعرفوهم ، هو يصلح اننا نجني من الشوك عنب ولا من العليق بلس؟ 17كل شجره سابره تدي ثمار سابره ، وكل شجره شوعه تدي ثمار شوعين18ومابش شجره حاليه تدي ثمار شوعه ومابش شجره شوعه تدي ثمار حاليه 19كل شجره ماتديش ثمار حاليه تتقطع وترتجم في النار 20ومن ثمارهم تعرفوهم21مش كل من يقول لي : ياسيدي ياسيدي !! يدخل ملكوت الله ، ولكن الل يعمل بما يشتي أبي اللي في السماوات 22عيقولوا لي ناس خيرات في يوم الحساب : يا سيدي ياسيدي ، مش بأسمك نطقنا بالنبوءات ؟ وبأسمك طردنا الشيطان ؟ وبأسمك فعلنا معجزات خيرات؟ 23وانا شاقول لهم : ما اعرفكمش ، ريحولكم مني يا أوغاد24فمن سمع كلامي ذيه وعمل به يوقع ساع الرجال العاقل عمر بيته على الحجر 25ونزل المطر وامتلت السيول وجت رياح قويه على ذيك البيت وما نكعش ، لأن أساسه قوي على الحجر26ومن سمع كلامي ذيه وما عملش به يوقع ساع الرجال البليد عمر بيته على التراب 27ونزل المطر وامتلت السيول وجت رياح قويه على ذيك البيت ونكع قوي 28ولوما تم عيسى ذيه الكلام ، اتفاجئ الناس من تعليمه 29لأنه كان يعلمهم ساع من له سلطان ، مش ساع الفقهاء حقهم 81ولوما نزل عيسى من الجبل ، لحقوه ناس خيرات 2وقرب منه واحد ابرص وسجد له وقال : يا سيدي لو تشتي انت عتستر انك تطهرني 3ومد عيسى يده ولمسه وقال :(أشتي ، وعد اطهر) وشفي من برصه على طول4فقال له عيسى :(اوبه انك تجابر احد ، ولكن سير للكاهن ورويه نفسك ، وبعدا ادي القربان اللي أمر به موسى شهاده انك تعافيت5ودخل عيسى كفر ناحوم وجاء صليه ظابط روماني وجلس يترجاه ويقول له: 6(يا سيد ، خادمي مطروح فوق الفراش في البيت جالس يتوجع قوي وما يسترش انه يتحرك) 7فقال له عيسى :(عد اسير واشفيه) 8فجاوب الظابط :(انا ما استحقش يا سيد انك تدخل تحت سقف بيتي ، ولكن يكفي انك تقول كلمه وعيتعافى الخادم 9انا داري بذيه لأن عليا رؤساء وكمان معي جنود ، اقول لأي حد سير ويسير ، والثاني جي ويجي ، وللخادم افعل ويفعل 10واستغرب عيسى من كلامه وقال للي كانوا معه :(اقول لكم الصدق ، ماقد ابسرتش ساع ذيه الايمان في احد من اسرائيل11اقول لكم :( عيجوا ناس خيرات من الشرق والغرب ويجلسوا على المائده مع ابراهيم واسحاق ويعقوب في ملكوت الله) 12واما اللي لهم المملكه عيجلسوا خارج بين الظلام ، مكان البكاء وصرير الاسنان 13وقال عيسى للظابط :(سير ، وعلى قد ايمانك عيوقع ما طلبت) وتعافى الخادم في تيك الساعه نفسها14ودخل عيسى لبيت بطرس ، وابسر حماة بطرس على الفراش تاعبه من الحمى 15ولمس يدها وفلتتها الحمى ، فقامت وجلست تخدمه 16وفي الليل جو ناس خيرات من اللي بينهم شياطين ، فخرجهن بكلمه منه ، وشفى كل المرضى 17فتم اللي قاله النبي إشعياء (شل أوجاعنا
وبعد أمراضنا)
18وابسر عيسى الناس عنده فقال لطلابه يسيروا للشاطئ في الجهه الثانيه 19وقرب منه واحد من الفقهاء وقال له :(يا استاذ ، الحقك وين ماسرت) 20فجاوبه عيسى :(مع الثعالب بيوت ومع الطيور عشش ، ولكن ابن الانسان مابش معه وين يطرح راسه) 21وقال له واحد من طلابه :(يا سيد ، خليني اسير اول شي ادفن ابي) 22فقال له عيسى :(خلي الموتى يدفنوا الميتين حقهم)23وركب عيسى القارب ، ولحقه طلابه 24وجت عاصفه قويه في البحر لوما غطت الأمواج القارب ، وكان عيسى نايم 25فقرب منه طلابه وصحوه وقالوا له :(نجينا يا سيد احنا عنغرق) 26فجاوبهم عيسى :(مالكم مفجوعين ياقليلين الايمان؟) وقام وصيح على الرياح والبحر ووقع هدوء قوي 27واستغرب الناس وقالوا :(من ذيه لوما تسمع كلامه الرياح والبحر؟)28ولوما وصل عيسى للشاطئ في الجهه الثانيه في بلاد الجدريين ، استقبله اثنين رجال خرجوا من المقابر ، وبينهم شياطين وكانوا مستوحشين قوي ، وكان محد يقدر انه يمشي من تيك البقعه 29وجلسوا يصيحوا :(مالنا ومالك يا ابن الله؟ او جيت هانا علميد تعذبنا قبل وقتنا؟) 30وكان يرتعي عيد من تيك البقعه خنازير خيرات 31فترجوا الشياطين عيسى وقالوا له :(لو طردتنا رسلنا للخنازير) 32فقال لهم :(سيروا !) وخرجوا وساروا دخلو في الخنازير ، وتداهفت الخنازير من الجبل ونكعوا بين البحر وغرقوا في الماء33وهرب الرعاه حق الخنازير للمدينه وحاكوا الناس باللي وقع وايش وقع بالاثنين الرجال اللي كان بينهم شياطين 34وخرجوا أهل المدينه كلهم لعيسى ولوما ابسروه طلبوه انه يرحله من بلادهم 91وركب عيسى القارب ومشي البحيره علميد يرجع لبلاده 2فجوا بعض الناس ومعاهم واحد مشلول ممدد عى سرير ، ولوما ابسر عيسى ايمانهم قال للمشلول :(اتشجع يا ابني ، مغفوره لك ذنوبك) 3فقالوا بعض الفقهاء في نفسهم :( ذيه الرجال يكفر) 4ودرا عيسى بأفكارهم ، فقال :(للمه تفكروا بالشر في قلوبكم؟) 5ايش الأسهل؟ انه يقال : مغفوره لك ذنوبك ، ولا نقول قم وامشي؟ 6عد ارويكم ان ابن الانسان معه سلطان على الأرض علميد يغفر الذنوب ، وقال للمشلول : قم شل سريرك وسير لبيتك7فقام الرجال وسار لبيته 8ولوما ابسروا الناس ايش وقع ، خافوا ومجدوا الله اللي ادى البشر ساع ذيه السلطان 9وسار عيسى من هاناك ، وابسر رجال جالس في بيت الجبايه اسمه متى ، فقال له عيسى :(الحقني) فقام ولحقه 10ولوما عيسى ياكل في بيت متى ، جو خيرات من جباة الضرايب والمذنبين وجلسوا مع عيسى وطلابه 11وابسر بعض الفريسيين ذيك ، فقالوا لطلابه :(للمه بياكل استاذكم مع جباة الضرايب والمذنبين؟) 12وسمع عيسى كلامهم فجاوبهم :(ما يحتاجوش المتعافين لدكتور ، ولكن اللي هم مرضى) 13سيروا وتعلموا معنى تيه الآيه :(اشتي رحمه مش ذبيحه ، وما جيتش ادعي الصلحين ، ولكن المذنبين)14فجوا طلاب يوحنا المعمدان لعيسى وقالوا له :(ليش احنا والفريسيين خيرات ، وطلابك ما يصوموش؟) 15فجاوبهم عيسى :(او يسبر ان اهل العريس انهم يزعلوا والعريس عندهم؟ لكن عيجي وقت يرفع فيه العريس من بينهم ويرجعوا يصوموا) 16محد يرقع ثوب قديم برقعه من قماش جديد لأنها عتنكمش وتبعد عن الثوب ، ويوقع الخزق اخس17ومحد يفعل خمر جديد في اوعيه جلد قديمه ، علميد ما تتشطط الأوعيه وتسيل الخمره وتخرب الأوعيه ، ولكن ينطرح الخمر في أوعيه جديده وتسلم الخمره والأوعية18ولوما كان يتحاكا قرب منه رئيس يهودي وسجد ه وقال :(ذلحينه ماتت بنتي ، جي اطرح عليها يدك علميد تحيا) 19فقام عيسى ولحقه طلابه 20وكان به هاناك مره بينها نزيف دم من 12 سنه ، فقربت من عيسى ولمست طرف ثوبه 21لأنها حاكت نفسها وقالت :(يكفيني أعس ثوبه علميد اتعافي) 22والتفت عيسى وابسرها وقال :(اثقي يا بنتي ، ايمانك شفاك) وتعافت المره على طول 23ولوما وصل عيسى بيت الرئيس اليهودي ، ابسر الجنائزيين والناس متوترين 24فقال :(اخرجوا ما ماتتش البنت ، بس هي نايمه) وضحكوا عليه25وبعدما خرج الناس ، دخل وشل يد البنت وقامت 26وانتشر الخبر في تيك المنطقه كلها27ورحله عيسى من هاناك ولحقه اثنين عميان بيصيحوا :(ارحمنا يا ابن داود) 28ولوما دخل البيت قربوا منه العميان ، فقال لهم عيسى :(انتوا مؤمنين اني قادر على ذيه؟) فجاوبوا :(ايوه يا سيد)
29وعسعس عيسى عيونهم وقال :(لكم على قدر ايمانكم) 30وتفتحت عيونهم ونبههم عيسى فقال :(اوبهوا يدرا احد) 31ولكنهم خرجوا ونشروا الخبر في تيك المنطقه كلها32ولوما خرج العميا ، جو بعض الناس بواحد أعجم بينه شيطان 33ولوما طرد عيسى الشيطان تحاكا الأعجم ، وطننوا الناس ، وقالوا :(ما ابسرناش ساع ذيه في اسرائيل) 34ولكن الفريسيين قالوا :(برئيس الشياطين تنطرد الشياطين)35وتمشى عيسى في كل المدن والقرى علميد يعلم الناس ويعلن بشارة الملكوت ، ويشفي الناس من كل مرض 36ولوما ابسر الناس امتلا قلبه بالرحمه عليهم ، لأنهم كانوا يائسيين متفرقين ساع غنم بلا راعي37فقال لطلابه :(الحصاد خيرات ، ولكن العمال قليلين 38اطلبوا من رب الحصاد انه يرسل عمال للحصاد 101ودعا عيسى طلابه ال 12 وادا لهم سلطان يطردوا به الشياطين ويشفوا الناس من الأمراض
2وتيهأسماء الرسل ال 12 :
اولهم سمعان الملقب ببطرس واخوه اندراؤس
ويعقوب بن زبدي واخوه يوحنا
3وفيلبس وبرتولماؤس وتوما ومتى حق الضرايب
ويعقوب بن حلفي وتداوس
4وسمعان الوطني الغيور ، ويهوذا الإسخريوطي اللي سلم عيسى
5هولا هم ال 12 اللي ارسلهم عيسى ووصاهم وقال :(لا تسيروش للأجانب ولا تدخلوش اي مدينه سامرية) 6ولكن سيروا للأطلى الضايعه من بني اسرائيل 7وبشروا في الطريق بأن ملكوت السماوات اقترب8وعالجوا المرضى ، وقيموا الموتى ، وطهروا الجرب واطردوا الشياطين ، مجا شليتوا ومجان ادو 9لا تشلوش زلط من ذهب ولا من فضه ولا من نحاس في جيوبكم 10ولا تشوش كيس للطريق ولا ثوب ثاني ولا حذاء ولا عصيه ، لأن العامل يستاهل أكله11واي مدينه او قريه تدخلوها ، اسألوا فيها عن اللي يستاهل انه يضيفكم واجلسوا عنده لوما تريحولكم من هاناك 12ولوما تدخلوا البيت سلموا عليه 13فلو هو يستحق السلام يطرح سلامكم عليهم ، وإلا لوما يستحقش عيرجع سلامكم لكم14ولو مارضيوش انهم يقبلوكم او يسمعوا كلامكم ، اخرجوا من ذيك البيت او من تيك القريه ونفضوا الغبار من ارجيلكم 15اقول لكم الصدق :(عيوقع حال سدوم وعموره يوم الحساب أكثر من حاة تيك القريه16هوذا انا ارسلكم ساع الأطلى بين الذئاب ، انتبهوا واوقعوا مفتحين ساع الثعابين ، ولطيفين ساع الحمام 17واوبهوا لأن الناس عيسلموكم للمحاكم ، ويجلدوكم بين الناس 18ويشلوكم للحكام والملوك من سبتي ، علميد تشهدوا عندهم وعند باقي العالم19ولا تقلقوش لوما يشلوكم كيف او ايش عتقولوا ، لأن في تيك الساعه عيجيلكم الكلام اللي تتحاكوا به 20لأن مش انتوا اللي عتتحاكوا ، ولكن روح ابوكم السماوي عيتحاكا فيكم 21عيسلم الأخ اخوه للموت ، والأب ابنه ، ويقوموا الأبناء على أباءهم ويقتلوهم 22ويكرهكم كل الناس من سبة اسمي ،واللي يثبت للنهايه ، عينجي 23ولو لاحقوكم في مدينه اهربوا لمدينه ثانيه ، اقول لكم الصدق :(ما عاد تتموش عملكم في مدن اسرائيل كلها لوما يجي ابن الانسان) 24مابش طالب اغلى من استاذه ، ولا خادم اعظم من سيده 25يكفي الطالب انه يوقع ساع استاذه ، والخادم ساع سيده ، إذا كانوا لقبوا صاحب البيت بعلزبول ، فكيف أهل بيته؟26لا تفتجعوش ، مابش مستور إلا وعينكشف ، ولا مغطى إلا ويظهر 27والي احاكيكم به في الظلام اتحاكوا به في النور ، واللي تسمعوه بالهمس صيحوا به على الجبى28لا تفتجعوش من اللي يقتلوا الجسم وما يقدروش يقتلوا النفس ، ولكن افتجعوا من اللي يقدر يهلك الجسم والنفس في جهنم سوا 29مش يبيعوا عصفورين بفلس واحد ، ومع ذيه ما يوقعش واحد منهم للأرض بدون مايدرا ابوكم السماوي 30اما انتوا حتى شعر رؤوسكم نفسها معدوده 31لا تفتجعوش انتوا اغلى من عصافير خيرات32من يعترف بي قدام الناس ، اعترف به قدام ابي اللي في السماوات 33ومن انكرني قدام الناس ، أنكره قدام أبي اللي في السماوات34لا تظنوش اني جيت علميد انشر السلام في العالم ، ما جيتش اخمل السلام ولكن سيف 35جيت علميد افرق بين الأبن وابوه ،
والبنت وامها ،
والزوجه وحماتها
36ويوقع عدو الانسان أهل بيته 37من يحب ابوه وامه أكثر من مايحبني ، ما يستحقنيش ، ومن يحب ابنه او بنته أكثر من مايحبني ما يستحقنيش كمان 38ومن مايشلش صليبه ويلحقني ما يستحقنيش 39من حفظ حياته عيخسرها ، ومن خسر حياته علميدي يحفظها40من قبلكم قبلني ، ومن قبلني قبل اللي رسلني 41ومن قبل نبي علميد هو نبي عيشل جزاء نبي ، ومن قبل رجال صالح علميد هو رجال صالح عيشل جزاء رجال صالح42ومن سقى احد هولا الصغار ولو كاس ماء بارد لأنه طالبي ، اجره اقول لكم الصدق :(ما يضيعش)111لوما تم عيسى وصاياه لطلابه ال 12 ، خرج من هاناك علميد يعلم ويبشر في المدن القريبه 2وسمع يوحنا وهو في السجن بأعمال المسيح ، فرسل له بعض طلابه 3علميد يقولوا له :(هو انت اللي يجي ، ولا نريع لواحد ثاني؟) 4فجاوبهم عيسى :(ارجعوا وحاكوا يوحنا باللي تسمعوا وتبسروه) 5العميان يبسروا ، والعرج يمشوا ، والجرب يطهروا ، والصنج يبسروا ، والموتى يقوموا ، والمساكين تجيلهم البشاره 6ويهنا لمن ما يفقدش ايمانه بي 7فلوما رجعوا طلاب يوحنا المعمدان ، تحاكا عيسى للناس عن يوحنا ، فقال :(ليش خرجتم للصحراء وايش ابسرتوا؟ مش ساق نبات تهزها ريح؟ لا) 8طيب لوما خرجتوا ايش ابسرتوا؟ هل هو رجال لابس ملابس ضخمه؟ لاـ اللي يلبسوا الملابس الضخمه هم في قصور الملوك9حاكوني ، ايش خرجتوا وابسرتوا؟ أنبياء ؟ اقول لكم :(ايوه ، وافضل نبي) 10هو اللي يقول فيه الكتاب :(انا ارسل رسولي تجاهك ،
علميد يجهز الطريق قدامك)
11اقول لكم الصدق :(ما بدي في الناس اعظم من يوحنا المعمدان ، وكن أصغر اللي في ملكوت الله أعظم منه) 12ومن أيام يوحنا المعمدان لليوم والناس بيحاولوا يدخلوا في ملكوت الله ، والمجاهدين يدخلوها13وحين جاء يوحنا كان به هاناك نبوءات الأنبياء وشريعة موسى 14فلو انتوا تشتوا تصدقوا ، وتعرفوا ان يوحنا هو إيليا المنتظر 15من كان معه اذان يسمع 16بمن اشبه أبناء ذيه الجيل؟ هم ساع اولاد جالسين في الشوارع يتصايحوا 17زمرنا لكم وما رقصتمش
ونوحنا لكم
فما بيكتم
18جاء يوحنا ما ياكلش ولا يشرب ، فقالوا :(بينه شيطان) 19وجاء ابن الانسان ياكل ويشرب فقالوا :(ذيه رجال اكول وسكير وصاحب لجباة الضرايب والمذنبين ، لكن الحكمه تبرزها أعمالهم20وجلس عيسى يصيح على المدن اللي فعل بينها اكثر معجزاته وما تابوش أهلها 21فقال :(ويلش يا كورزين ! ويلش ي بيت صيدا ! فلو كانت المعجزات اللي عملتها هاناك وقعت في صور وصيدا انهم تابوا أهلها من زمان ، ولبسوا الخيش وكوزروا على الرماد) 22لكني اقول لكم :(عيوقع مصير صور وصيدا يوم الحساب أسهل من مصيركم)23وانتي يا كفر ناحوم ! قصدش عترتفعي للسماء؟ ماشي عتنكعي في الهاويه ، فلو وقع في سدوم اللي وقع فيش من المعجزات ، كانت عتبقى ليوم الدين 24لكني اقول لكم :(عيكون مصير سدوم يوم الحساب أسهل من مصيرش)25وتحاكا عيسى في ذيك الوقت فقال :(أحمدك ياأبي ، يا رب السماء والأرض ، لأنك رويت البسطاء اللي ما ابسروه الحكماء والفهماء) 26أيوه ي أبي ، تيه مشيئتك 27أبي ادا لي كل شي ، ماحد يعرف الأبن إلا الأب ، ولا أحد يعرف الأب إلا الابن ، ومن يشتي الابن ان يبدي له 28جو لعندي يا كل التاعبين واللي احمالهم ثقيله ، وانا عد اريحكم 29شلوا نيري وتعلموا مني عتلاقوا الراحه لنفوسكم ، لأني وديع ومتواضع القلب 30ونيري هين وحملي خفيف 121وفي تيك الأيام مر عيسى في السبت وسط الجرب ، وجوعوا طلابه وجلسوا يقطفوا الذره وياكلوا 2ولوما ابسرهم الفريسيين قالوا لعيسى :(ابسر ، طلابك يفعلوا اللي ما يجوز في السبت) 3فجاوبهم عيسى :(ما قريتوش ما عمل داود لوما جوع هو ورجاله؟) 4كيف دخل بيت الله وأكلوا الخبز حق القربان ، وأكله ما يجوز لهم ، ولكن للكهنة وحدهم؟)5أو ما قريتمش في شريعة موسى أن الكهنة في السبت ينتهكوا حرمة السبت في الهيكل ومابش عليهم لوم؟ 6اقول لكم :(هنيه من هو أعظم من الهيكل)7ولو فهمتوا معنى تيه الآيه :(اشتي رحمه مش ذبيحه)، انكم ما حكمتوش على من مابش عليه لوم 8لأن ابن الانسان هو سيد السبت9ورحله من هاناك لبيت العباده اللي عندهم 10وابسر رجال يده يابسه ، فسألوه علميد يتهموه :(يجوز الشفاء يوم السبت؟) 11فجاوبهم عيسى :(من منكم معه طلي واحد ونكع في غرقه يو السبت مش عيمسكه ويخرجه؟) 12والانسان كم هو أفضل من الطلي؟ علميد ذيه يجوز فعل الخير في السبت 13وقال عيسى للرجال :(مد يدك !) فمدها الرجال ورجعت سليمه ساع اليد الثانيه 14فخرجوا الفريسيين وتشاوروا علميد يقتلوا عيسى15ولوما درا عيسى رحله من هاناك ولحقه ناس خيرات ، وشفى كل مرضاهم 16وامرهم انهم ما يحاكوش أحد عنه 17علميد يوقع ساع ما قال النبي إشعياء 18(ذيه هو عبدي اللي اخترته حبيبي اللي رضيت به
شطرح روحي عليه
ويعلن للعالم إرادتي
19ما يخاصمش ولا يصايح وفي الشوارع محد يسمع صوته
20ما يكسرش حتى عودي هش وما يطفيش حتى ذبله مدخنه
يجاهد لوما تنتصر إرادتي
21وعلى اسمه رجاء العالم
22وجوا بعض الناس لعيسى ومعاهم رجال أعمى وأعجم ، بينه شيطان ، فشفاه عيسى لوما تحاكا الرجال وابسر 23واستغربوا الناس كلهم وتساءلوا :(مش ذيه ابن داود او ماشي؟) 24وسمع الفريسيين كلامهم فقالوا :(هو يطرد الشياطين ببعلزبول رئيس الشياطين) 25ودرا عيسى بأفكارهم فقال لهم :(كل مملكه تنقسم على نفسها تخرب ، وكل قريه أو عائله تنقسم على نفسها ما تصمدش26ولو كان الشيطان يطرد الشيطان عيكون انقسموا على بعض وكيف تثبت مملكتهم 27وإن كنت ببعلزبول أطرد الشياطين ، بمن يطرده اصحابكم؟ علميد ذيه هم يحكموا عليكم28واما اذا كانت بروح الله اطرد الشياطين ، يعي ان ملكوت الله قد قام بينكم 29كيف يقدر الواحد انه يدخل بيت رجال قوي ويسرق حاجاته ، إلا لوما يربط الرجال القوي اول شي ، وبعدا يجلس ينهب بيته 30من ما يكونش معي فهو ضدي ، ومن ما يجمعش معي فهو يفرق31علميد ذيه اقول لكم :(كل ذنب وكفر يغتفر للناس ، ولكن الكفر بالروح القدس ما يغتفرش) 32ومن قال كلمة على ابن الانسان يغتفر له ، ولكن من يقول كلمه على الروح القدس ما يغتفرش له ، لا في تيه الدنيا ولا في الآخره33لو زرعتوا شجره طيبه يوقع محصولها طيب ، ولو زرعتوا شجره شوعه يوقع محصولها شوعه ، لأننا ندرا بالشجره من محصولها 34يا اولاد الثعابين ، كيف تستروا تقولوا كلام حالي وانتوا أوغاد؟ لأنه من صفاء القلب ينطق اللسان 35الاسنان الصالح من كنزه اصالح يخرج ماهو صالح ، والانسان الوغد من كنزه الشرير يخرج ماهو شر36اقول لكم :(كل كلمة فارغه يقولها الناس عيتحاسبوا عليها يوم القيامه) 37لأنك بكلامك توقع بريئ وبكلامك تتهم38وقال له بعض الفقهاء والفريسيين :(يا استاذ ، نشتي نبسر منك آية) 39فجاوبهم عيسى :(جيل وغد وفاسق يشتي آية !،ما عيوقع لكم إلا آية النبي يونس 40وساع ما بقي يونس ثلاثة أيام بلياليها في بطن الحوت ، ساعها عيبقى ابن الانسان ثلاثة أيام بلياليها في بطن الآرض41عيقوم أهل مدينة نينوي في يوم الدين مع ذيه الجيل ويحكموا عليه ، لأن أهل نينوي تابوا لوما نبههم يونس ، وهانا هم أعظم من يونس42وملكة الجنوب عتقوم يوم الحساب مع ذيه الجيل وتحكم عليه ، لأنها جت من طرف الأرض علميد تسمع حكمة سليمان ، وهانا الآن أ‘ظم من سليمان43لوما يخرج الروح النجس من اي انسان يسير للصحراء يدور بعد الراحه ، وما يلاقيهاش 44ويرجع يقول :(شرجع لبيتي اللي خرجت منه ، وعيرجع ويبسر البيت فاضي ونظيف ومرتب) 45ويسير ويدي معه 7 ازواج ثانيه اكثر شر منه ، وتدخل الأرواح وتسكن هاناك ، وتوقع حالة ذيك الانسان الأخيره اخس من حالته الأوله ، وذيه نفسه يوقع مع ذيه الشعب الوغد46ولوما كان عيسى يتحاكا مع الناس ، جت امه واخوته ووقفوا في خارج الدار يشتوا يحاكوه 47فقال له واحد من الموجودين :(امك واخوتك مسنبين خارج الدار يشتوا يحاكوك) 48فجاوبه عيسى :(من هي امي؟ ومن هم اخوتي؟) 49وأشر بيده لطلابه وقال :(هولا هم امي واخوتي) 50لأن من يفعل بمشيئة ابي اللي في السماء هو أخي وأختي وأمي) 131وخرج عيسى من الدار في ذيك اليوم وجلس شق البحر 2واتزاحموا عليه الناس خيرات ، حتى انه طلع على القارب والناس كلهم جالسين في الشاطئ3فكلمهم بأمثال على حاجات خيرات قال :(خرج الزارع علميد يزرع 4ولوما كان يزرع نكع شوية من الحب على جنب الطريق ، وجت الطيور وأكلته 5ونكع شويه منه على أرض حجر ترابها قليل ، واتزرع على طول لأن ترابتها مش عميقه 6ولوما شرقت الشمس حرقة الزرعه لأنه مابش معاها جذور ويبست7ونكع شويه منه على الشوك ، ونبت بين الشوك وخنقه 8ومنه اللي نكع في أرض حاليه ، وادا بعضه ميه وبعضه ستين وبعضه ثلاثين 9من معه آذان يسمعني !)10فقربوا منه طلابه وقالوا له :(ليش بتحاكيهم بالأمثال؟) 11رد عليهم :(انتوا اديت لكم معرفة أسرار ملكوت الله وأما هم ما اديت لهم 12لأن من كان له حاجه يزداد ويفيض ، ومن مابش معه شي يشلوا منه حتى اللي معه13وانا بين احاكيهم بالأمثال لأنهم يفتحوا عيونهم وما يبسروش ،
ومهما سمعوا ما يفهموش
14وفيهم تتم نبوءة إشعياء : (مهما سمعتوا ما تفهموش
ومهما ابسرتوا ما تبسروش
15لأن ذيه الشعب تصلب قلبه وسدوا آذانهم
وغمضوا عيونهم
علميد ما يبسروش بعيونهم
ويسمعوا بآذانهم
ويفهموا بقلوبهم
ويتوبوا واشفيهم)
16وأما انتوا يهنا كم لأن عيونكم بتبسر وآذانكم تسمع 17اقول لكم الصدق :(أنبياء خيرات والأبرار اتمنوا انهم يبسروا اللي انتوا تبسروه وما استروش ، وان يسمعوا اللي بتسمعوه وما استروش)18اسمعوا انتوا معنى مثل الزارع 19من يسمع كلام الملكوت وما يفهمش ، هو المزروع في جنب الطريق ، ويجي الوغد ويشل اللي هو مزروع في قلبه20ومن يسمع كلام الملكوت ويتقبله على طول وفارح ، فهو المزروع بين ارض متحجره 21مابش بينه جذور في نفسه ويوقع لوقت ، ولوما يوقع ضيق ولا ملاحقه من سبة كلام الملكوت يرتد عنه طوالي22ومن يسمع كلام الملكوت وما يديش محصول ، فهو المزروع بين الشوك ، بينه من هموم الدنيا وحب الغنى اللي يخنق المحصول فيه 23واما من يسمع كلام الملكوت ويفهمه ، فهو المزروع في الأرض الحاليه ، ويخرج من المحصول ويدي بعضه ميه وبعضه ستين وبعضه ثلاثين24وادا لهم عيسى مثل ثاني ، قال :(يشبه ملكوت الله رجال زرع زرع حالي في جربته) 25ولوما كانوا الناس راقدين ، جاء عدوه وزرع زوان وسط القمح ومشي 26ولوما طلع المحصول وخرجت السنابل بدي الزوان معه 27وجو الخدم حق صاحب الجربه وقالوا له :(يا سيد ، انت زرعت زرع حالي في الجربه ، من اين بدي ذيه الزوان) 28فجاوبهم :(عدو فعل تيه الحركخ) فقالوا له :(تشتي نسير نجمع الزوان؟)
29فجاوبهم :(ماشي ، علميد ما تقلعوش القمح وانتوا بتجمعوا الزوان 30خلو القمح ينمو مع الزوان ليوم الحصاد ، وبعدا شاقول للحاصدين يجمعوا الزوان اول شي ويحتزم علميد نحرقه ، والقمح يجمعوه لمخزني)31وادا لهم مثل ثاني ، قال :(يشبه ملكوت السماوات حبة من خردل شلها رجال وزرعها في جربته 32هي أصغر الحبوب كلها ، ولكن لوما انزرعت كانت أكبر البقول ، ووقعت شجره حتى ان طيور السماء تجي وتعشعش في اغصانها)33وقال لهم ذيه المثل :(يشبه ملكوت السماوات خميرة شلتها مره وطرحتها في ثلاثة أكيال من الدقيق لوما أختمر العجين كله) 34ذيه كله كان يقوله عيسى للناس بالأمثال ، وكان ما يحاكيهمش إلا بالأمثال 35فتم ما قال النبي : (بالأمثال أنطق
وأعلن اللي كان مخفي من يوم نشأة العالم)
36وفلت عيسى الناس ودخل للبيت ، وجاء له طلابه وقالوا له :(فسر لنا مثل الزوان في الجربه) 37فجاوبهم :(اللي زرع زرع حالي هو ابن الانسان 38والجربه هو العالم ، والزرع الحالي هم أبناء الملكوت ، والزوان هم أبناء الشرير 39والعدو اللي زرع الزوان هو ابليس ، والحصاد هو نهاية العالم ، واللي بيحصدوا هم الملائكه 40وساع ما يجمع الزارع الزوان ويحرقه في النار ، كذيه يوقع في نهاية العالم 41عيرسل ابن الانسان ملائكته ، وعيجمعوا من ملكوته كل المنافقين والأشرار 42ويرموهم في أتون النار ، هاناك البكاء وصرير الأسنان 43وأما الصالحين ، عينوروا ساع الشمس في مملكة ابوهم ، اسمعوني يامن لكم آذان)44ويشبه ملكوت السماوات ساع كنز مدفون في جربه ، ولقاه رجال ودسه ، ومن فرحته سار وباع كل ما معه واشترى تيك الجربه 45وتشبه مملكة السماء هي ساع تاجر يدور على لؤلؤ وأحجار كريمه 46ولقى لؤلؤة غاليه ، وسار باع كل ما يملك واشتراها47ويشبه ملكوت السماوات شبكة رجمها الصيادين في البحر ، ولمت اسماك من كل نوع 48ولوما امتلت خرجها الصيادين للشاطئ ، وطرحوا السمك الحالي في سلاتهم ورجموا الشوعه49وكذيه يوقع نهاية العالم ، تجي الملائكه ، ويفرقوا الأشرار من بين الصالحين 50ويرجموهم في أتون النار ، وهاناك البكاء وصرير الأسنان 51وسأل عيسى طلابه :(فهمتوا ذيه كله؟) فجاوبوا عليه :(ايوه)
52فقال لهم :(لو انه كل من وقع من الفقهاء طالب في ملكوت السماوات ، يشبه رب بيت يخرج من كنزه كل جديد وقديم 53ولوما تم عيسى تيه الأمثال سار من هاناك54ورجع لبلدته وجلس يعلم في مجامعهم ، واستغربوا منه وجلسوا يتساءلوا :(من اين له تيه الحكمه وتيه المعجزات؟) 55مش هو ابن النجار؟ امه اسمها مريم ، واخوته يعقوب ويوسف وسمعان ويهوذا؟ 56مش كل اخوته عندنا؟ من اين له كل ذيه؟57وما قبلوه وقال لهم عيسى :(مابش كرامه لنبي في بلدته وبين أهله)
58وما فعلش هاناك معجزات خيرات ، لأنهم مش مؤمنين به 141وفي ذيك الزمان سمع الحاكم هيرودس بأخبار عيسى 2فقال للناس حقه :(ذيه يوحنا المعمدان قام من بين الأموات ، علميد هذا توقع المعجات على يده) 3وكان هيرودس مسك يوحنا وقيده وسجنه علميد هيرودية مرة اخو فيلبس 4لأن يوحنا كان بيقول ل :(ما يسبرش انك تتزوجها) 5وكان يشتي يقتله وافتجع من الشعب لأنهم كان يبسروه نبي 6ولوما فعل هيرودس عيد ميلاده ، رقصت بنت هيرودية في الحفلة ، واعجبت هيرودس 7وحلف لها انه يدي لها ايش ما تشتي8فكلمتها أمها ، وقالت له :(ادي لي بين ذيه الصحن رأس يوحنا المعمدان) 9وزعل الملك ، ولكنه أمرهم يدوا لها اللي تشتي ، على سب اليمين اللي حلف به قدام الناس10فرسل وقطع رأس يوحنا في السجن 11وجوا به على طبق ، وسلمه للبنت ، وهي شلته لأمها 12وجوا طلاب يوحنا ، وشلوا الجثة ودفنوها ، وبعدا ساروا وحاكوا عيسى13ولوما سمع عيسى رحله من هاناك في قارب لمكان قفره علميد يجلس بينه لوحده ، وعرفوا الناس ولحقوه ماشين على ارجيلهم من المدن 14وحين نزل من القارب ابسر الناس خيرات ، ورحمهم وشفى مرضاهم 15وفي الليل قربوا منه طلابه وقالوا له :(مشي الوقت يا سيد في تيه البقعه القفراء ، حاكي الناس انهم يسيروا القرى القريبه ويشتروا لهم آكل) 16فجاوبهم عيسى :(مابش داعي يريحولهم ، ادوا لهم انتوا اللي ياكلوا) 17فقالوا له :(مابش عندنا هانا إلا خمس خبزات وسمكتين) 18فقال عيسى :(ادوا اللي عندكم)19وبعدا قال للناس انهم يجلسوا على العشب ، وشكل الخبزات الخمس والسمكتين ، ورفع عيونه للسماء وبارك كسر الخبز وادا لطلابه ، والطلاب وزعوا للناس 20واكلوا لوما شبعوا ، وبعدا رفعوا 12 سفره ملان من الكسر اللي بقت 21وكان اللي اكوا حوالي 5000 رجال ، من غير النسوان والجهال22وحاكا عيسى طلابه انهم يطلعوا فوق القارب ويسبقوه للشق الثاني من الشاطئ ، لوما يرجع الناس 23ولوما خلاهم يروحوا طلع للجبل علميد يصلي لحاله ، وكان هاناك وحده حين جا الليل 24وأما القارب بعد خيرات عن الشاطئ ، وغطته الأمواج ، لأن الريح كانت عكسه 25وقبل الفجر ، جاء عيسى لطلابه وهو ماشي على البحر 26ولوما ابسروه طلابه ماشي على البحر افتجعوا وقالوا :(ذيه جني) وصاحوا من كثر الفجيعه 27فقال لهم عيسى على طول :(لا تفتجعوش ، انا هو لا تفتجعوش) 28فقال له بطرس :(لو هو انت يا سيدي ، قلي اجيلك على الماء) 29فقال له عيسى :(تعال) ونزل بطرس من القارب ومشي على الماء جهة عيسى ...
30ولكنه افتجع لوما ابسر الريح قويه وبدا يغرق ، وصاح :(انقذني يا سيدي) 31ومد عيسى يده طوالي ومسكه وقال له :(يا قليل الايمان ، ليش شكيت؟) 32ولوما طلعوا للقارب هدأت الريح 33فسجدوا له اللي كانوا في القارب وقالوا :(الصدق ، انت ابن الله) 34ومشي عيسى وطلابه لشاطئ جنسرت 35وعرفوه أهل تيك البقعه ، وحاكوا بالخبر اللي في المنطقه كلها ، وادوا له كل المرضى 36وطلبوا منه انه يسمح للمرضى انهم يلمسوا طرف ثوبه ، وكل من لمس طرف ثوبه يشفى 151وجوا لعيسى شويه من الفريسيين والفقهاء من اورشليم وسألوه : 2(ليش بيخالف طلابك تقاليد الأولين ، وما بيغسلوش ايديهم قبل الأكل؟) 3فجاوبهم عيسى :(وليش انتوا تخالفوا وصية الله علميد تقاليدكم؟)4قال الله :(أكرم اباك وأمك ، ومن يسب أبوه أو أمه لازم ينقتل) 5وأما انتوا تقولوا :(من كان معه شي يساعد به ابوه وامه وقال لهم ذيه اقدمه لله) 6وما يلزمه ان يكرم ابوه ، وكذيه ابطلتوا كلام الله علميد تقاليدكم7يا منافقين ، صدق إشعياء في نبوءته عنكم حين قال : 8ذيه الشعب يكرمني بفمه واما قلبه بعيد عني
9يعبدني عباده مالهاش قيمه بوصايا من تأليف الناس
10وبعدا صيح للناس يجوا وقال لهم :(اسمعوا وافهموا) 11اللي يدخل الفم ما ينجسش الانسان ، ولكن اللي يخرج من الفم هو اللي ينجس الانسان 12وقربوا منه الطلاب وقالوا له :(انت داري ان الفريسيين انصدموا لوما سمعوا ذيه الحكا؟) 13فجاوبهم :(كل غرسه ما غرسهاش ابي سماوي تنقلع من جذورها) 14فلتوهم هم عميان يقودوهم عميان ، ولوما الأعمى يقوده أعمى عينكعوا سوا في الغرقه 15فقال له بطرس :(فسر لنا ذيه المثل) 16فرد عليه :(هو أنتم للأن ما بتفهموش؟) 17ماتعرفوش انه اللي يدخل فم الانسان ينزل لبطنه ، ومنه لخارج الجسم؟18واما اللي يخرج من الفم ، فهو من القلب يخرج ، وهو ينجس الانسان 19لأن من القلب تخرج الأفكار الشوعه : القتل والزنى والفسق والسرقه وشهادة الزور والنميمه 20وتيه اللي تنجس الانسان ، أما الأكل بيد مش هي مغسوله ما تنجس الانسان21وخرج عيسى من هاناك وسار لأطراف صور وصيدا 22وجت له مره كنعانيه من تيك البلاد وصاحت :(ارحمني ياسيدي ، يا ابن داود ، بنتي بينها شيطان ، ويعذبها خيرات) 23وما جاوبهاش عيسى بكلمه ، فقربوا منه طلابه وترجوه وقالوا له :(ابعدها عننا لأنها بتلحقنا بصياحها) 24فجاوبهم عيسى :(ما رسلني الله إلا للأطلى الضايعه من بني اسرائيل) 25ولكن المره جت له وسجدت له وقالت :(ساعدني ياسيدي) 26فجاوبها عيسى :(ما يصلحش إننا نشل خبز الجهال ونرجمه للكلاب) 27فقالت له المره :(ايوه يا سيدي ، حتى الكلاب تاكل من الفتافت اللي تنكع من موائد اصحابها) 28فجاوبها عيسى :(ما أعظم إيمانك يامره ، وعيوقع ما تشتي) وشفيت بنتها من تيك الساعه29وخرج عيسى من هاناك وسار لشاطئ بحر الجليل ، وطلع الجبل وجلس هاناك 30وجوه ناس خيرات ومعهم عرج وعميان وعجم وغيرهم كثير ، وطرحوهم عن ارجيله فشفاهم 31واستغربوا الناس لوما ابسروا العجم بيتحاكوا والعرج والمقعدين بيمشوا والعميان يبسروا ، وسبحوا رب بني اسرائيل32وصيح عيسى لطلابه وقال لهم :(انا راحم لهولا الناس ، لأنهم من ثلاثة أيام بلا أكل ، ومابش معاهم ما ياكلوه ، وما شتيش ارجعهم جاوعين علميد ما يتعبوش في الطريق) 33فقالوا له الطلاب :(منين لنا في تيه الصحراء خبز يشبع مثل هولا الناس كلهم؟) 34فقال لهم عيسى :(كم خبز معاكم؟) قالوا :(سبع حبات خبز وسمكات صغار)
35وأمر عيسى الناس يجلسوا على الأرض36وشل الخبز والسمكات وشكر الله ، وكسرها وادا لطلابه والطلاب وزعوهن للناس 37وأكلو كلهم لوما شبعوا ، وبعدا رفعوا اللي بقي من الكسر حوالي سبع سفر ملان 38وكان اللي أكلوا اربعه الف رجال من غير النسوان والجهال 39وصرف عيسى الناس وركب القارب وجاء لمنطقة مجدان 161وجو لعنده بعض الفريسيين والصدوقيين وطلبوا منه يرويهم آية من السماء ، علميد يختبروه 2فجاوبهم :(تقولوا لوما تغرب الشمس عيوقع الجو ضخم لأن السماء حمراء ساع النار3وفي الفجر تقولوا اليوم عتجي عاصفه ، تستروا تفسروا منظر السماء وماتقدروش تفسروا علامات الأزمنه 4شعب شرير وفاسقبتطلبوا آية وما يقعش لكم غير آية يونس)5ولوما عدا الطلاب للشاطئ الثاني ، نسيوا انهم يشلوا خبز 6فقال لهم عيسى :(اوبهوا من خمير الفريسيين والصدوقيين) 7فقالوا في نفسهم :(يقول ذيه لأننا ماشليناش خبز) 8ودرا عيسى وقال لهم :(ياقليلين الايمان ، كيف بتقولوا في نفسكم ان مابش معانا خبز؟)9ماقد فهمتوش؟ قد نسيتوا الخبزات الخمس للخمسه الف وكم سفره مليتو؟ 10والخبزات السبع للأربعه الف وكم سفره مليتو؟11كيف ماتفهموش اني ماقصدت الخبز بكلامي؟ اوبهوا من خمير الفريسيين والصدوقيين 12وفهموا الطلاب انه قال لهم لازم يوبهوا من تعليم الفريسيين والصدوقيين ، مش من الخمير اللي يعملوه بين الخبز13ولوما وصل عيسى إلى اطراف قيصريه فيلبس سأل طلابه :(من هو ابن الانسان في نظر الناس؟) 14فجاوبوا :(بعضهم يقولوا يوحنا المعمدان ، وبعضهم يقولوا إيليا ، وبعضهم يقولوا إرميا او واحد من الأنبياء) 15فقال لهم :(ومن انا في رأيكم انتوا؟) 16فجاوب سمعان بطرس :(انت المسيح ابن الله الحي) 17فقال له عيسى :(يهنا لك يا سمعان بن يونا ، ماكشف لك تيه الحقيقه أحد من الناس ، ولكن أبي اللي في السماوات 18وانا اقول لك انت صخره وعلى تيه الصخره عد ابني كنيستي ، وبوابات الموت ماتقدرش عليها19وشديلك مفاتيح ملكوت السماوات ، واللي عتربطه في الأرض عيكون مربوط في السماء ، واللي تحله في الأرض عيوقع محلول في السماء 20ووصى عيسى طلابه ان مايحاكوش احد بأنه المسيح21وبدأ عيسى من ذيك الوقت يوضح لطلابه انه لازم يسير إلى اورشليم ويتوجع خيرات على يد شيوخ الشعب ورؤساء الكهنة والفقهاء ، ويموت مقتول ، وفي اليوم الثالث يقوم 22وحاكاه بطرس على جنب وعاتبه وقال :(الله لا قال يا سيد ، ذيه ماعيوقعش بك) 23والتفت وقال لبطرس :(رحلك عني ياشيطان ، انت تشتي توقع عقبه في طريقي ، لأن افكارك تيه افكار البشر مش افكار الله) 24وبعدا قال عيسى لطلابه :(من يشتي يلحقني ينكر نفسه ويشل صليبه ويلحقني 25لأن اللي يشتي ينقذ حياته يخسرها ، ولكن اللي يخسر حياته علميدي يلاقيها 26وايش ينفع الانسان لو كسب العالم كله وخسر نفسه؟ وبأيش يفتدي الانسان نفسه؟27عيجي الانسان في مجد ابيه مع ملائكته ، ويجازي كل واحد حسب اعماله 28اقول لكم الصدق :(بعض الموجودين هانا م عيموتوش إلا لوما يبسروا ابن الانسان في ملكوته 171وبعد سته أيام شل عيسى بطرس ويعقوب واخوه يوحنا ، وانفرد بهم على جبل عالي 2وتغيرت هيئته قدامهم ونرو وجهه ساع الشمس ، ووقعت ثيابه بيضاء ساع النور3وفجأه بدي لهم مسى وإلياس ، وهم بيتحاكوا مع عيسى 4فقال بطرس لعيسى :(يا سيد ، ما احلى اننا هانا سوا ، ولو تشتي افعل هنيه ثلاثه خيمات ، واحد لك واحده لموسى واحده لإلياس) 5ولوما كان يتحاكا غطتهم سحابه مضويه ، وقال صوت من السحابه :(ذيه هو ابني الحبيب اللي يفرحني اسمعوا له) 6ولوما سمع الطلاب ذيه الصوت نكعوا على وجيههم وافتجعوا قوي 7وقرب منهم عيسى ولمسهم وقال لهم :(سنبوا ، لا تفتجعوش) 8ورفعوا عيونهم وما ابسروش إلا عيسى لوحده 9ولوما كانوا نازلين من الجبل وصاهم عيسى وقال :(لا تحاكوش أحد باللي ابسرتوه لوم يقوم ابن الانسان من بين الأموات) 10فسأله الطلاب :(ليش يقولوا الفقهاء : لازم يجي إيليا اول شي؟) 11فجاوبهم عيسى :(ايوا ، يجي إيليا ويصلح كل شي) 12ولكني اقول لكم ان إيليا قد جاء وما عرفوه ، وفعلوا به على مزاجهم ، وكذيه ابن الانسان عيتوجع على ايديهم 13ففهم الطلاب انه كان يحاكيهم عن يوحنا المعمدان14ولوما رجعوا للناس ، قرب منه رجال وسجد 15وقال له :(ارحم ابني ياسيدي ، لأنه بينه صرع وبيتوجع قوي وينكع خيرات بين النار والماء 16واديته لطلابك وما استروش انهم يشفوه 17فجاوب عيسى :(انتوا جيل مش مؤمن وفاسد ، ليحين شجلس معاكم؟ وليحين اتحملكم؟ ادوا الجاهل هنيه) 18وصيح عيسى على الشيطان وخرج من الجاهل ، واتشافى على طول 19فجوا الطب لعيسى وحاكوه لحالهم وقالوا له :(ليش احنا ما استرناش اننا نخرجه؟) 20فقال لهم :(لأن ايمانكم ضعيف ، واقول لكم الصدق : لو كان فيكم ايمان ساع حبة الخردل كنتوا عتقولوا لذيه الجيل انتقل من هانا وينتقل ولا يوقف قدامكم شي) 21وذيه النوع مايخرج إلا بالصلاه والصوم22وكان الطلاب مجتمعين في الجليل ، فقال لهم عيسى :(عيتسلم ابن الانسان لأيدي الناس 23فيقتلوه ، وفي اليوم الثالث يقوم من بين الأموات) وغثيوا الطلاب قوي24ولوما رجع عيسى وطلابه إلى كفر ناحوم ، جو جباة الضرايب حق الهيكل لبطرس وسأوه :(سيدكم بيدفع ضريبة الهيكل او ماشي؟) 25فرد عليهم :(ايوه) ولوما دخل بطرس للبيت باشره عيسى بسؤال وقال له :(ايش رأيك ياسمعان ، من اللي يشلوا منه جباة الضرايب الجزيه؟ من اولاد البل ولا من الغرباء؟)
26فجاوبه بطرس :(من الغرباء) فقال له عيسى :(يعني عيال البلد احرار من دفعها ...
27ولكن عشان مانشتيش نحرج احد ، سير للبحر وارجم السناره حقك وامسك اول سمكه تخرج وافتح فمها ، عتلاقي فيها قطعه قيمتها اربعه دراهم ، شلها وادفعها عني وعنك) 181وقربوا الطلاب من عيسى في ذيك الوقت وسألوه :(من هو الأعظم في ملكوت الله؟) 2فصيح عيسى لجاهل وسنبه وسطهم 3وقال :(اقول لكم الصدق : لو انتوا ما عتتغيروش وتوقعوا ساع الجهال ، ماعتدخلوش ملكوت الله4من عيتواضع ويوقع ساع ذيه الجاهل ، هو أعظم واحد في مملكة الله 5ومن عيقبل طف ساعه بأسمي كأنه قبلني 6ومن عيتسبب ان أي جاهل من اللي يؤمنوا بي انه يغلط ، فأحسن له انه يطرح حجر طاحون ثقيله على رقبته ويغرق نسه في البحر7ياويل العالم من الحاجات اللي تخلي الناس يغلطوا ، تيه الحاجات لازم عتوقع ، لكن ياويله من يوقع سبب انها نوقع 8وإذا اوقعتك يدك أو رجلك انك تغلط وتوقع في الذنب ، اقطعها وارجمها بعيد عنك ، لأنه خير لك انك تدخل الحياة الأبدية ومعك يد او رجل واحده ولا يكون معك يدين ورجلين وترتجم في النار الأبدية9وإذا اوقعتك عينك في الغلط والذنوب ، اقلعها وارجمها بعيد عنك ، لأنه احسن لك انك تدخل الحياة الأبدية بعين واحده ، ولا انه يوقع معك عينين وترتجم في نار جهنم 10اوبهوا انكم تضحكوا على أي واحد من هولا الجهال ، لأني اقول لكم ان ملائكتهم في السماء يبسروا واصل وجه أبي اللي في السماء 11لأن ابن الانسان جا علميد ينقذ الهالكين12وايش رأيكم رجال معه 100 طلي ، وضاع واحد منهن ، مش عيفلت ال99 في الجبال ويسير يدور بعد الطلي الضايع؟ 13ولوما يلقاه مش عيفرح به؟ اقول لكم الصدق :(انه يفرح به أكثر من فرحته بالتسعه وتسعين اللي ما ضاعينش 14وكذيه ما يشتيش ابوكم اللي في السماوات انه يهلك واحد من هلا الجهال15واذا غلط اخوك عليك سير له وعاتبه بينك وبينه ، ولو سمع لك تكون ربحت اخوك 16واذا مارضيش انه يسمع لك ، شل معك رجال او اثنين علميد تثبت كل شي بشهادة شاهدين او ثلاثه17ولو مارضيش انه يسمع لهم ، حاكي الكنيسه ولو مارضيش انه يسمع للكنيسه عامله ساع الأجنبي او من حقوت الضرايب 18اقول لكم الصدق :(كل اللي تمنعوه في الأرض يمتنع في السماء ، واللي تسمحوا به الأرض يوقع مسموح في السماء 19اقول لكم الصدق : اذا اتفق اثنين منكم في الأرض انهم يطلبوا حاجه ، توقع لهم من ابي اللي في السماوات 20واين ما يجتمع اثنين او ثلاثه بأسمي ، توقع هاناك بينهم)21فقرب بطرس وقال لعيسى :(ياسيد ، كم مره يغلط عليا اخي واغر له؟ حق سبع مرات!؟) 22فجاوبه عيسى :(مش سبع مرات ، ولكن سبعين مره) 23لأن ملكوت الله هو ساع ملك يشتي ان يحاسب عبيده 24ولوما بدأ يحاسبهم وصل عنده واحد منهم عليه عشرة الف درهم من الفضه 25وكان مابش معه اللي يسدد به دينه ، فأمر سيده بأن يباع هو ومرته واولاده وكل مايملك حتى يوفي دينه 26فركع العبد له وسجد وقال : امهلني واديلك كل مالك علي! 27ورحمه وفلته واعفاه من الدين 28ولما رج الرجال لقى عبد من أصحابه كان له عليه مية دينار ، فمسكه برقبته لوما كان عيخنقه وهو يقول له : ادي زلطي اللي عليك! 29فركع صاحبه يترجاه ويقول له : اصبر عليا وعد احاسبك 30ومارضيش ، وشل الرجال وطرحه بالسجن لوما يدي زلطه 31وابسروا العبيد اصحابه اللي وقع ، وزعلوا قوي وساروا حاكوا سيدهم بكل ما وقع 32فصيح له سيده وقال له :(يا عبد السوء عفيت عن دينك كله لأنك تمنعتني 33وانت ما عفيت ولا رحمة صاحبك ساع ما رحمتك؟)34وزعل سيده قوي ، فسلمه للجلادين علميد يوفيه كل ما له عليه 35كذيه يفعل بكم ابي السماوي ان كان كل واحد منكم ما يغفرش لأخوه من كل قلبه 191ولوما تم عيسى ذيه الكلام ، فلت الجليل وجاء لبلاد اليهوديه من عبر الأردن 2فلحقوه ناس خيرات ، وشفاهم هاناك 3وقرب له بعض الفريسيين وسألوه علميد يحرجوه :(هل يجوز للرجال انه يطلق مرته لأي سبب كان؟) 4فجاوبهم :(ما قريتوش ان الخالق من البداية خلهم ذكر وانثى5وقال : علميد ذيه يفلت الرجال ابوه وامه ويتحد مع زوجته ، ويوقع الاثنين جسد واحد 6فما يوقعوش اثنين ، وكن جسم واحد ، وما يجمعه الله ما يفرقه الانسان 7وسأله الفريسيين :(وليش اوصى موسى بأن يعطي الرجال مرته كتاب طلاق وتطلق؟) 8فجاوبهم عيسى :(من قساوة لوبكم اجاز لكم موسى أن تطلقوا نسوانكم ، وما كان الموضوع من البدايه كذيه) 9اما انا اقول لكم :(من طلق مرته إلا في حالة الزنى وتزوج غيرها زنى) 10فقال له طلابه :(اذا كانت تيه حال الرجال مع المره فأحسن له انه مايتزوجش) 11فجاوبهم عيسى :(مايقبلش ذيه الكلام إلا اللي وقع لهم انهم يقبلوه) 12لأنه به من ولدتهم امهاتهم عاجزين عن الزواج ، وفيهم من خصاهم الناس ، وبه اللي مايشتوش يتزوجوا في سبيل مملكة الله ، من يستر يفهم ذيه يفهم13وجو بعض الناس بجهالهم علميد يطرح عيسى يده عليهم ويصلي ، وصيحوا فوقهم الطلاب 14فقال عيسى :(فلتوا اجهال يجوا لعندي ولا تمنعوهمش ، لأن لهولاء ملكوت السماوات) 15وطرح يده عليهم ومشي من هاناك16وجاء له شاب وقال له :(يا استاذ ، ايش افعل من الصلاح علميد يوقع لي حياة الخلود؟) 17فقال له عيسى :(ليش بتسألني عن الصالح ، مابش صالح إلا واحد بس ، لو تشتي توقع لك حياة الخلود افعل بالوصايا) 18فقال له :(اي وصايا؟) فقال له عيسى :(لا تقتلش ، لا تزنيش ، لا تسرقش ، لا تشهدش بالزور
...
19أكرم ابوك وامك ، وحب قريبك ساع ماتحب نفسك) 20فقال له الشاب :(عملت بتيه الوصايا كلها ، ايش باقي؟) 21جاوبه عيسى :(لو تشتي توقع كامل سير وبيع كل ما معك ووزع قيمته على الفقراء ، وعيوقع لك كنز في السماوات ، وجي بعدا الحقني) 22فلوما سمع الشاب ذيه الكلام رجع مهموم وزاعل لأنه كان غني قوي 23وقال عيسى لطلابه :(اقول لكم الصدق ، من الصعب على الغني انه يدخل مملكة الله 24وكمان لو تمشي جمل من خزق الابره اسهل من دخول الغني لملكوت الله) 25واستغربوا الطلاب خيرات من ذيه الكلام وقالوا :(من يستر انه ينجو؟) 26ابسر لهم عيسى وقال لهم :(الناس مايستروش على ذيه ، اما الله فهو على كل شي قدير) 27وقال له بطرس :(هوذا احنا فلتنا كل شي ولحقناك ، ايش هو نصيبنا؟) 28فجاوبه عيسى :(اقول لكم الصدق ،، ايحين ماجلس ابن الانسان على عرش مجده ، تجلسوا انتوا اللي لحقتوني عى 12 عرش علميد تحاسبوا قبل إسرائيل ال 1229وكل من فلت بيوت او اخوه او اخوات او اب او ام او جهال او جرب على سب اسمي يوقع له ميه ويورث الحياه الأبدية 30وكثير من الأولين يوقعوا اخرين ، ومن الآخرين يوقعوا اولين) 201فملكوت الله ساع صاحب جربه خرج من الفجر علميد يستأجر عمال لجربته 2واتفق مع العمال على دينار في اليوم ورسلهم لجربته 3وبعدا خرج تقريباً الساعه تسعه الصبح ، وابسر عمال ثانين واقفين في الساحه بلا عمل 4فقال لهم : سيروا انتوا والكل لجربتي ، وشديلكم حقكم5فساروا ، وخرج كمان بعد الظهر حوالي الساعه 3 ، وعمل نفس الشي ...
6وخرج كمان الساعه خمسه العصر وابسر عمال واقفين فقال لهم : مالكم واقفين هانا طول النهار بطالين؟ 7فقالوا له : ما استأجرناش ولا أحد ، فقال لهم : سيروا انتوا والكل لجربتي
8ولوما جاء الليل قال صاحب الجربه لوكيله : داعي للعمال كلهم وادفع لهم اجورهم ، وابدأ من اخر ناس لوم توصل للأولين 9فجوا له اللي استأجرهم في السعه خمسه مساء وش كل واحد منهم دينار 10ولوما جوا الأولين ظنوا انهم عياخذوا زياده ، ووقع لهم من دينار والكل لكل واحد منهم11وكانوا يشلوا حسابهم وهم ضابحين من صاحب الجربه 12ويقولوا هولا اخر الناس اشتغلوا ساعه واحده وساويتهم بنا واحنا اللي اشتغلنا من الصبح بين الشمس والحر 13فجاوب صاحب الجربه لواحد منهم ، يا صديقي انا ما ظلمتكش اتفقت معك على دينار؟ 14شل حقك ورحلك وذيه اللي جاء في الأخر اشتي اديله ساعك15وانا حر اصرف زلطي كيف ما اشتي؟ ولا انت حسود علميد انا كريم؟ 16وقال عيسى :(كذيه يوقع الأخرين أولين ، والأولين آخرين)17وكان عيسى طالع إلى اورشليم ، وبز الطلاب ال 12 على جنب لحالهم وقال لهم في الطريق : 18(هوذا احنا طالعين لاورشليم وعيسلم ابن الانسان لرؤساء الكهنة والفقهاء فيحكموا عليه بالموت 19ويسلموه لأيدي الغرباء ويستهزئوا به ويجلدوه ويصلبوه وفي اليوم الثالث يقوم)20وجت له أم يعقوب ويوحنا عيال زبدي ومعها عيالها وسجدت له تطلب منه حاجه 21فقال لها :(ايش تشتي؟) قالت :(اشتي تأمر انه يجلس عيالي واحد على يمينك واحد على شمالك في مملكتك)
22فجاوب عيسى :(انتوا ماتعرفوش ايش بتطلبوا ، عتستروا انكم تشربوا من الكاس اللي عد اشرب منها؟) قالوا له :(نستر!)
23فقال لهم :(ايوه ، عتشربوا كاسي ولكن الجلوس عن يميني وعن شمالي ما يحقش لي اني اديه لكم ، لأنه للي قد جهزه لهم ابي) 24ولوما سمعوا بقية الطلاب العشره زعلوا من الأخوه25فصيح لهم عيسى وقال لهم :(انتوا دارين ان حكا الشعوب بيتسيدوا عليهم وعظمائهم يتسلطوا عليهم 26فلا يوقعش ذيه بينكم ، ولكن من يشتي انه يوقع عظيم فيكم يوقع لكم خادم 27ومن يشتي ان يكون الأول فيكم ، يوقع عبد 28كذيه جا ابن الانسان مش علميد يخدمه الناس ولكن علميد هو يخدمهم ويفدي بحياته كثير منهم)29ولوما كانوا خارجين من اريحا ، لحقوا عيسى ناس خيرات 30وسمع اثنين عميان جالسين على الطريق ان عيسى ماشي من هانك ، وجلسوا يصيحوا :(ارحمنا ياسيد ، يا ابن داود !) 31فصيحوا فوقهم الناس علميد يسكتوا وهم صاحوا بأعلى صوتهم :(ارحمنا ياسيد ، يا ابن داود) 32فوقف عيسى وصيح لهم وقال لهم :(ايش تشتو اني اسوي كم؟) 33جاوبوا :(نشتي نفتح عيوننا ياسيد) 34ورحمهم عيسى ولمس عيونهم وابسروا على طول ولحقوه 211ولوما قربوا من اورشليم ووصوا لبيت فاجي عند جبل الزيتون ، رسل عيسى اثنين من طلابه 2وقال لهم :(سيروا للقريه اللي قدامكم ، وعتلاقوا حماره مربوطه ومعاها جحشها ، فكوا رباطهم وادوهن لي 3وان قال لكم احد شي قولوا :(السيد محتاج لهن ، وعيرجعهن على طول) 4وكان ذيه علميد يتم ما قال النبي 5قولوا لأبنة صهيون ها هو ملكك جاي لك
وديعا وراكب على حماره
وجحش ابن الحماره
6فساروا الطالبين وفعلوا ساع ما قلهم عيسى 7وادوا الحماره والجحش ، وطرحوا عليهم ثيابهم وركب عليهن عيسى 8وبسط كثير من الناس ثيابهم على الطريق ، وكسروا بعضهم اغصان الشجر وفرشوا بها الطريق9وكان الناس يتقدموا عيسى واللي تلحقه تصيح المجد لأبن داود
تبارك الآتي بأسم الرب
المجد في العلى
10ولما دخل عيسى اورشليم ضجت المدينه كلها وسألت :(من ذيه؟) 11فجاوبوا الناس :(ذيه هو النبي عيسى من ناصرة الجليل)12ودخل عيسى الهيكل وطرد كل اللي يبيعوا ويشتروا بينه ، وقلب بسطات الصرافين ومقاعد بياعين الحمام 13وقال لهم :(جا في الكتاب ، بيتي بيت الصلاة ، وانتوا فعلتوه مغارة سرق) 14وجوا له العرج والعميان وهو في الهيكل فشفاهم15وزعلوا رؤساء الكهنة والفقهاء لوما بسروا المعجزات اللي فعلها ، والجهال يصيحوا في الهيكل :(المجد لإبن داود) 16فقالوا له :(بتسمع ايش بيقولوا هولا؟) فجاوبهم :(ايوه ، ماقريتوش تيه الآية : من لقوف الصغار والجهال اخرجت كلام المجد)
17وبعدا فلتهم وخرج من المدينه لبيت عنيا وجلس فيه18وفي الصبح لوما كان راجع للمدينه ، حس بالجوع 19وابسر شجرة تين جنب الطريق ، وسار لها وما لقيش بينها إلا ورق ، فقال لها :(ماعتثمريش للأبد) ويبست التينه على طول 20وابسروا الطلاب ماوقع واستغربوا ، وقالوا :(كيف لوما يبست التينه على طول؟) 21فجاوبهم عيسى :(اقول لكم الصدق : لو انتوا تؤمنوا وماتشكوش عتفعلوا بتيه التينه ساع مافلت ، وكمان لو قلتوا لذيه الجبل قم واطرح في البحر عيوقع ساع ماقلتوا 22فكل شي تطلبوه وانتوا تصلوا بإيمان يوقع لكم)23ودخل عيسى للهيكل ولوما كان جالس يعلم ، جوا له رؤساء الكهنة والفقهاء وشيوخ الشعب وقالوا له :(بأي سلطه تعمل تيه الحاجات؟ ومن ادالك تيه السلطه؟) 24فجاوبهم عيسى :(وانا اسألكم سؤال واحد ، لو جاوبتوني عليه عد اقلكم بأي سلطه افعل تيه الحاجات :25من اين ليوحنا سلطة المعمودية؟ من السماء ولا من الناس؟) فقالوا في نفسم :(لو قلنا من الله عيقول لنا وليش ما امنتوا به؟
...
26وان قلنا من الناس ، نفتجع من الشعب لأن كلهم يعتبروا يوحنا نبي) 27فجاوبوا :(مانعرفش) فقال لهم عيسى :(وانا ماعاد اقول لكمش بأي سلطه بين افعل تيه الحاجات)
28وقال عيسى :(ايش رأيكم ، كان به رجال معه ولدين ، فجاء له الأول وقاله يا ابني سير اليوم واشتغل في جربتي 29فجاوبه : ماعه ما اشتيش ، ولكنه ندم بعدها وسار للجربه 30وجاء للولد الثاني وطلب منه ساع ما طلب من الأول فجاوبه : انا شاسير ، ولكنه ماسارش 31فمنهو اللي عمل على مايشتي ابوه؟) فقالوا له :(الأول) فقال لهم عيسى :(اقول لكم الصدق ، جباة الضرايب والزناه يسبقوكم لملكوت الله)
...
32جاكم يوحنا المعمدان ماشي طريق الحق وما امنتوش به ، وآمن به جباة الضرايب والزناه ، وانتوا ابسرتوا ذيك وما ندمتوش ولو بعد فتره علميد ترجعوا تؤمنوا به33اسمعوا مثل ثاني ، غرس رجال جربته وفعل حوله سور وحفر بينه معصره وبنى فيه برج حراسه واجره لفلاحسن ، وسافر للخارج 34ولوما جاء يوم القطاف ، رسل خدمه لهم علميد يشلوا نصيبه من الثمر 35ومسكوا الفلاحين خدمه وضربوا واحد منهم والثاني قتلوه والثالث رجموه 36ورسل صاحب الجربه خدم غيرهم اكثر من الأولين ، وفعلوا بهم ساع مافعلوا بالأولين 37واخر شي رسل لهم ابنه وقال انهم عيحترموا ابني 38ووما ابسر الفلاحين الولد قالوا بينهم البين :(هوذا الوارث ، جوا نقتله ونشل ورثته) 39فمسكوه ورجموه خارج الجربه وقتلوه 40فأيش يفعل صاحب الجربه بهولاء الفلاحين لوما يرجع؟ 41قالوا له :(يقتل هولا الأوغاد ويسلم الجربه لفلاحين ثانين يدوا له نصيبه في وقته) 42فقال لهم عيسى :(ماقريتوش في الكتب المقدسه : الحجر اللي ماقبله البنائيين وقع رأس الزاويه ، ربنا فعل ذيه وهو شي عجيب 43علميد ذيه اقول لكم : عيشل الله ملكوته منكم ويسلمه لشعب يخليه يثمر 44من نكع على تيه الحجر تقطع ، ومن نكع على تيه الحجر تكسر) 45ولوما سمع رؤساء الكهنة والفريسيين هولا المثلين من عيسى ، فهموا انه قال ذيه الكلام عليهم 46وكانوا يشتوا يمسكوه ، بس افتجعوا من الناس لأنهم كانوا يعتبروه نبي 221ورجع عيسى يتحاكا مع الناس بالأمثال ، فقال : 2(يشبه ملكوت الله ملك فعل عزومه في عرس ابنه 3ورسل خدمه للمعزومين علميد يجوا للعرس ، ومارضيوش يجوا 4فرسل خدم ثانين علميد يقولوا للمعزومين : جهزت عزومتي وذبحت ابقاري وعجولي المسمنه وجهزت كل شي ، تعالوا للعرس 5ولكنهم استهانوا بالعزومه فمنهم من خرج لجربته ومنهم من سار لتجارته 6والبقيه مسكوا خدمه وسبوهم وقتلوهم 7فزعل الملك ورسل عساكره ، ودمر هولا قتله واحرق مدينتهم 8وبعدا قال لخدمه : العزومه جاهز ولكن المعزومين ما يستحقوهاش 9فأخرجوا للشوارع واعزموا م تلاقوه 10فخرج الخدم للشوارع وعزموا كل من لقيوا من اشرار وصالحين ، وامتلت قاعة العرس بالمعزومين 11فلوما دخل الملك علميد يبسر المعزومين ، ابسر رجال مش لابس ثياب العرس ، فقال له : 12كيف دخت هانا يا صاحبي ، وانت مش لابس ثياب العرس؟ فسكت الرجال 13فقال الملك للخدم : اربطوا ايديه وارجله واطرحوه خارج بين الغدره بقعة البكاء وصرير الاسنان 14لأن المعزومين خيرات ولكن المختارين قليل15وسار الفريسيين وتشاوروا كيف يمسكوا عيسى بكلمه 16فرسلوا له بعض الطلاب حقهم وبعض الهيرودسيين يقولوا له :(يا استاذ احنا دارين انك صادق تعلم بالصدق طريق الله ، وما يهمكش أحد ، لأنه ما يهمكش مقام الناس 17فقل لنا ايش رأيك يجوز لنا ندفع الجزيه للقيصر ولا ماشي؟) 18ودرى عيسى بخبثهم فقال لهم :(يا منافقين ، ليش بتحاولوا تحرجوني؟ 19رووني العمله اللي بتدفعوها ضريبه ! وادو له دينار20فقال لهم : تيه صورة من واسم من ذيه؟ 21فقالوا : للقيصر فقال لهم : ادفعوا للقيصر اللي هو حق القيصر ولله اللي هو حق الله)
22فأستغربوا من اللي سمعوه وفلتوه ومشيو23وفي ذيك اليوم جا لعيسى بعض الصدوقيين ، وهم اللي ينكروا القيامه ، وسألوه 24يا استاذ ، قال موسى لو مات رجال ومابش معه جهال ، فليتزوج اخوه مرته علميد يفعل نسل لأخوه25وكان عندنا سبعة اخوة ، فتزوج الأول ومات بدون جهال ، وفلت مرته لأخوه 26ومثله الثاني والثالث إلى السابع 27وبعدا ماتت المره من بعدهم كلهم 28فلمن توقع زوجه في القيامه؟ لأنها كانت زوجتهم كلهم ! 29فجاوبهم عيسى :(أنتم في ضلال لأنكم ماتعرفوش الكتب المقدسه وقدرة الله 30لأن في القيامه ما يتزاوجوش ، بس يوقعوا ساع الملائكه في السماء31واما قيامة الأموات ، ماقريتوش ايش قال الله لكم 32انا هو رب ابراهيم ورب اسحاق ورب يعقوب ، فهو رب احياء مش رب أموات) 33وسمع الناس ذيه الكلام ، واستغربوا من تعليمه34وعلن الفريسيين أن عيسى سكت الصدوقيين ، فأجتمعوا سوا 35فسأله واحد منهم ، وهو من علماء الشريعه علميد يحرجه 36يا استاذ ، ماهي أعظم وصية في الشريعة؟ 37فجاوبه عيسى :(حب الرب إلهك بكل قلبك ، وبكل نفسك وبكل عقلك 38تيه الوصية الأولى والعظمى39والوصية الثانية مثلها : حب قريبك ساع ماتحب نفسك 40تيه الوصيتين تقوم الشريعه كلها وتعاليم الأنبياء)41ولوما كانوا الفريسيين مجتمعين ، سألهم عيسى : 42(ايش رأيكم في المسيح؟ ابن من هو؟ قالوا له : ابن داود
43قال لهم : طيب كيف يداعيه داود يارب ، وهو يقول بوحي من الروح 44قال الرب لربي : اجلس على يميني علميد اخلي اعداءك تحت ارجيلك 45فلو كان داود يداعي المسيح رب ، فكيف يوقع المسيح ابنه؟ 46فما استرش اي احد انه يجاوبه ولا بكلمه ، وما سطيش أي احد من ذيك اليوم انه يسأله عن اي شي 231وحاكا عيسى الناس وطلابه 2قال :(الفقهاء والفريسيين على كرسي موسى جالسين 3فافعلوا كل اللي يقولوا لكم عليه ، ولكن لا تعملوش ساع اعمالهم ، لأنهم يقولوا وما يفعلوش4يربطوا حاجات ثقيله ومتعبه ويطرحوها على اكتاف الناس ، وهم ما يحركوش ولا اصبع علميد تساعدهم 5وهم ما يعملوش عمل إلا علميد يبسرهم الناس ، ويخلوا سمايطهم عريضه على جباههم واكتافهم ، ويطولوا أطراف ثايبهم6ويحبوا مجالس الشرف في العزايم وراس المجلس بين الناس 7والتحيات في الأسواق ، وان يصيحوا لهم الناس : يا استاذ 8اما انتوا فلا تخلوش احد يداعي لكم يا أستاذ ، لأنكم كلكم اخوه ومعاكم استاذ واحد 9ولا تداعوش أحد على تيه الأرض يا ابونا ، لأن لكم أب واحد وهو الأب السماوي 10ولا تسمحوش بأن يصيح لكم احد يا سيد ، لأن لكم سيد واحد وهو المسيح11ويوقع اكبركم خادم لكم 12فمن يرفع نفسه يهبط ومن يهبط نفسه يرتفع 13يا ويلكم يا فقهاء والفريسيين المنافقين ! تقفلوا ملكوت السماء في وجيه الناس ، لا انتوا اللي عتدخلوا ولا بتخلوا الداخلين يدخلوا 14ويلكم يا فقهاء والفريسيين المنافقين ! تأكلوا بيوت الأرامل وانتم بتمثلوا انكم بتطولوا الصلاه ، عيوقع لكم اشد العقاب 15يا ويلكم يا فقهاء وانتوا يافريسيين يامنافقين ! تسافروا بر وبحر وتخلوا ولو شخص واحد يدخل في ديانتكم ، ولوما يدخل تخلوه يستاهل ضعف ما تستاهلوه 16يا ويلكم يالقاده العميان ! تقولوا من حلف بالهيكل ما يلتزمش بيمينه ولكن من حلف بذهب الهيكل يلتزم بيمينه 17يا عميان يا جهال ، ايش الأعظم الذهب ولا بيت الله اللي قدس الذهب؟18وتقولوا من حلف بالمذبح ما يلتزمش بيمينه ، ولكن من حلف بالقربان اللي على المذبح يلتزم بيمينه 19ايش الأعظم يا عميان ، القربان ولا المذبح اللي يقدس القربان؟20ماتبسروش انه اللي يحلف بالمذبح هو يحلف به وكل ما عليه 21واللي يحلف بالهيكل يحلف به وبالساكن فيه 22واللي يحلف بالسماء هو بيحلف بعرش الله وبالقاعد عليه 23يا ويلكم يا فقهاء والفريسيين المنافقين ، تدوا العشر من النعنع والصعتر والكمون ، ولكنكم ماتوبهوش لأهم مافي الشريعه : العدل والرحمه والأمانه ، كان لازم تفعلوا تيه الحاجات من غير ماتفلتوش العشر 24يا قاده يا عميان ، بتبعدوا الذبابه من الماء وتبلعوا الجمل 25يا ويلكم يا فقهاء وانتوا يا فريسيين يا منافقين ، تنظفوا الكاس والصحن من الخارج ، وهم ملان من الداخل باللي وقع لكم من النهب والطمع 26يافريسي يا اعمى ، اول شي نظف الكاس من الداخل وعيوقع خارجه نظيف والكل 27يا ويلكم يا فقهاء وانتوا يا فريسيين يا منافقين ، انتوا ساع القبور المبيضه ، توقع حاليه من الخارج وهي من الداخل ملان بالعضام والنجاسه 28وانتوا كذيه ترووا الناس انكم صالحين ومن داخلكم نفاق وشر 29يا ويلكم يا فقهاء وانتوا يا فريسيين يا منافقين ، تبنوا قبور الأنبياء وتزينوا مدافن الصالحين 30وتقولوا : لو عشنا في زمن ابائنا اننا ما شاركناهمش في دم الأنبياء 31وتشهدوا على انفسكم بأنكم أبناء اللي قتلوا الأنبياء32خلاص كملوا اللي بدأه اباؤكم 33يا حنشان يا اولاد الأفاعي ، كيف عتهربوا من عذاب الجحيم؟34علميد ذيه انا ارسل لكم الأنبياء والحكماء والاساتذه ، وتقتلوا بعضهم وبعضهم تصلبوهم في بيوت العباده وبعضهم تلاحقوهم من مدينه لمدينه 35لوما ينزل عليكم العقاب على دم كل بريء على الأرض ، من اول دم هابيل الصديق إلى دم زكريا بن يوحنا اللي قتلتموه بين المذبح وبيت الله 36اقول لكم الصدق : ذيه كله عيوقع على ذيه الجبل37اورشليم اورشليم ، يا قاتلت الأنبياء وراجمة المرسلين لها ، كم ره كنت اشتي اجمع ابناءك ساع ما تجمع الدجاجه فراخها تحت جناحها ، ومارضيتوش 38ابسروا ، بيتكم عتجلس لكم خراب 39اقول لكم : ما عتبسروني إلا يوم تصيحوا : تبارك الجاي بأسم الرب 241وخرج عيسى من الهيكل ، ولوما كان بعيد عنه قرب منه طلابه يلفتوا نظره لمباني الهيكل 2فقال لهم :(بتبسروا كل ذيه؟ اقول لكم الصدق : ما عيبقاش هانا ولا حجره ، عيتهدم كله)
3ولوما كان عيسى جالس في جبل الزيتون ، سأله طلابه على جنب :(حاكينا ايحين عيوقع الخراب؟ وايش هي علامة بداية ونهاية الزمان؟) 4فجاوبهم عيسى :(اوبهوا انه يضحك عليكم احد 5عيجوا ناس خيرات بأسمي ويقولوا : أنا هو المسيح ، ويخدعوا ناس خيرات6وعتسمعوا بالحروب وبأخبار الحروب ، واوبهوا تنكزوا لأن ذيه لازم يوقع ، ولكنها ما توقعش في الأخره 7عتقوم امه على امه ، ومملكه على مملكه ، وتوقع مجاعات وزلازل في بقع خيرات 8وذيه كله بداية الأوجاع 9وفي ذيك الوعد عيسلموكم للعذاب ويقتلوكم ، وتكرهكم كل الأمم علميد أسمي 10ويرتد عن الايمان كثير من الناس ، ويخونوا بعضهم البعض وكل واحد يكره الثاني 11ويبدي أنبياء خيرات كذابين ويغوو ناس خيرات12ويوقع الفساد زياده في اكثر القلوب 13ومن يثبت للنهاية ينجوا 14وتجي النهايه بعدما تعلن بشارة ملكوت الله في العالم كله ، وتوصل بشارتي لكل الناس15فلوما تبسروا نجاسة الخراب اللي تحاكا عليها النبي دانيال موجوده في المكان المقدس (افهم ذيه ياللي بتقرا) 16فاللي في منطقة اليهودية يهربوا للجبال 17ومن كان على الجبى ما ينزلش علميد يشل اللي في بيته 18ون كان في الجربه ما يرجعش علميد يشل ثوبه19يا تعب الحبالى والمرضعات في تيك الأيام 20صلوا علميد ما يوقعش هروبكم في الشتاء او في السبت 21لأنه عتنزل في ذيك الوقت نكبة ماقد اوقع ساعها من بداية العالم إلى اليوم ، وما عيوقعش 22ولولا أن الله فعل تيك الأيام قصيرة ، انه ما نجي أي حد من البشر ، ولكن علميد اللي اختارهم تيك الأيام وقعين قصار23فلو قال لكم احد : هوذا المسيح هانا او هناك ، فلا تصدقوه 24لأنه عيبدي مسحاء ودجالين وأنبياء كذابين ، يفعلوا الأيات والعجايب العظيمه علميد يظللوا الناس ، حتى اللي اختارهم الله 25انا بين احذركم 26فلو قالوا لكم : هوذا هو في الصحراء فلا تسيروش لهاناك ، او يقولوا هوذا هو داخل البيوت فلا تصدقوهمش 27لأن جيت ابن الانسان توقع ساع البرق اللي يلمع من المشرق ويضوي في المغرب 28بقعة تكون الجيفه تجتمع النسور29وعلى طول بعد مصايب تيك الأيام تظلم الشمس وما يضويش القمر
وتتناكع النجوم من السماء
وتتزعزع قوات السماء
30ويبدي في ذيك الوعد علامة ابن الانسان في السماء ، فينتحبوا كل من في الأرض ويبسره الناس يجي على سحاب السماء في عزه وجلال 31ويرسل ملائكته ومعاهم بوق عظيم ويجمعوا اللي اختارهم من الجهات الأربع ومن كل بقعه تحت السماء 32تعلموا من التينه ، لوما تلين اغصانها وتورق اعرفوا ان الصيف قريب 33وكمان لو ابسرتوا ذيه كله ، اعرفوا ان الوقت قريب على الأبواب34اقول لكم الصدق : كل تيه الحاجات عتوقع قبل ما يموت ذيه الجيل 35السماء والأرض عينتهين أما كلامي ما عينتهيش36اما ذيك اليوم وتيك الساعه ما يعرفهاش احد ، لا ملائكة السماوات ولا الابن إلا الأب وحده37وساع ما وقع ايام نوح عيوقع عند جيت ابن الانسان 38كان الناس في تيك الأيام اللي سبقت الطوقان ياكلوا ويشربوا ويتزاوجوا ، لوما دخل نوح الفلك 39وما كانوش دارين ايش عيوقع ، لوما وقع الطوفان وشلهم كلهم ، فلوما يجي ابن الانسان عيوقع ساعه40في ذيك الوقت يكونوا اثنين رجال في الجربه ، يشلوا واحد ويفلتوا الثاني 41ويكونين ثنتين نسوان بيطحنين ، ويشلوا واحده ويفلتوا الثانيه 42فاسهروا ، لأنكم ماتعرفوش أي يوم يجي ربكم43واعرفوا ان رب البيت لو درى في اي ساعه من الليل يجي السارق كان عيسهر وما يخليش يفتش بيته 44وانتوا والكل كونوا مستعدين ، لأن ابن الانسان يجي في ساعه ما تراعوش لها45فمن هو الخادم الأمين العاقل اللي وكه سيده انه يدي لخدمه اكلهم في وقته؟ 46يهنا لذيك الخادم اللي يلقاه سيده لوما يرجع ويقوم بعمله ذيه 47اقول لكم الصدق : انه يوكل له كل زلطه48اما لو كان ذيك الخادم شرير وقال في نفسه : عيتأخر سيدي 49وجلس يضرب اصحابه وياكل ويشرب مع السكيرين 50وعيرجع سديه في يوم مشو داري بها ولا ساعه يعرفها 51ويعاقبه عقاب شديد ، ويخلي مصيره مع المنافقين ، بقعة البكاء وصرير الاسنان 251ويشبه ملكوت الله عشر بكارى شلين فوانيسهن وخرجين لقين العريس 2وكان خمس منهن جاهلات وخمس عاقلات 3فشلين الجاهلات فوانيسهن ، وما شلينش معاهن زيت 4وانا العاقلات شلين الفوانيس وشلين زيت في وعاء5واتأخر العريس وهن نايمين كلهن 6وفي نص الليل صاحوا الناس (جا العريس) فرجين علميد يلاقينه 7فقامين العذارى العشر وجهزين فوانيسهن 8فقالت الجاهلات للعاقلات : ادين لنا شويه من الزيت حقكن ، لأن فوانيسنا عتنطفي 9فجاوبين العاقلات : يمكن انه ما يكفيش لنا ولكن ، سيرين للبياعين واشترين حاجتكن 10ولوما سارين عشان يشترين وصل العريس فدخلين معه المستعدات لمكان العرس وغلق الباب 11وبعد قليل رجعين العذارى الباقيات وقالين : يا سيد يا سيد ، افتح لنا 12فجاوبهن العريس : اقول لكم الصدق : انا ما اعرفكنش 13فأسهروا ، لأنكم ماتعرفوش اليوم ولا الساعه14وذيه رجال مسافر من بعيد ، فصيح لعبيده ولمهم املاكه 15وادى للأول خمس وزنات والثانس وزنتين والثالث وزنه واحده وسافر 16فاللي شل خمس وزنات سار بها سريع للسوق وتاجر بها وربح خمس وزنات ثانيات17وكمان اللي شل وزنتين سار وربح وزنتين 18واما اللي شل وزنه واحده فسار وحفر حفره ودفن الزلط حق سيده 19وبعد مده طويله ، رجع سيدهم وحاسبهم 20فجاء اللي شل خمس وزنات ودفع معاهن خمس وزنات وقال : يا سيدي اديت لي خمس وزنات وشل هولا خمس وزنات ربحتهن 21فقال له سيده احسنت يا خادم يا ايها الخادم الصالح ، كنت امين على القليل وعد اخليك امين على الكثير ادخل لنعيم سيدك 22وجاء اللي شل الوزنتين فقال يا سيدي اديت لي وزنتين فشل معاهن وزنتين ربحتهن 23فقال له سيده احسنت يا خادم ، كنت امين على القليل وانا عد اقيمك على الكثير ، ادخل لنعيم سيدك 24وجاء اللي شل وزنه واحده فقال : يا سيدي عرفتك رجال قاسي ، تحصد من بقعة ماتزرعش ، وتجمع من بقعة ماتطرحش البذور 25وافتجعت وسرت دفنت زلطك في الأرض ، وهوذا تيه زلطك 26فجاوبه سيده : انت خادم وغد وكسل ، دريت اني احصد بقعة ما ازرعش واجمع بدون ما ابذر 27وكان عليك انك تطرح زلطي في البنك ، ولوما ارجع استلمها مع الأرباح 28وحاكا خدمه انهم يشلوا منه الوزنه ويدوها لصاحب العشر الوزنات 29لأن من عنده يوقع له أكثر ، واللي مابش معه حتى القليل اللي معه يشلوه منه 30وذيه الخادم اللي مابش فايده منه ، ارجموه خارج في الظلام بقعة البكاء وصرير الأسنان31ولوما يجي ابن الانسان في مجده ومعه كل الملائكه ، يجلس على عرشه العظيم 32وتحتشد قدامه كل الشعوب ، فيفرز بعضهم من بعض ، ساع ما يفرز الراعي الأطلى من التيوس 33ويشل الأطلى على يمينه والتيوس على شماله 34ويقول الملك للي على يمينه : جو يامن باركهم ابي ، شلو نصيبكم من المملكه المجهزه لكم من بداية انشاء العالم 35لأني جوعت واكلتوني وعطشت ورويتوني وكنت غريب وسكنتوني 36وعريان وكسيتوني ، ومريض وتزاورتوني ومحبوس وجيتوا لي 37ويجاوبه الصالحين : يا رب ، ايحين ابسرناك جاوع واكلناك؟ او عطشان وسقيناك؟ 38وايحين ابسرناك غريب وسكناك؟ أو عريان وكسيناك؟ 39وايحين ابسرناك مريض او محبوس وزرناك؟ 40ويجاوبهم الملك : اقول لكم الصدق ، كل مره فعلتوا ذيه لواحد من اخوتي الصغار هولا ، فهو لي فعلتوه 41وبعدا يقول للي على شماله : ريحولكم مني يا ملاعين للنار الأبديه ، المجهزه لإبليس واصحابه 42لأني جوعت ما اكلتونيش وعطشت وما سقيتونيش 43وكنت غريب وما سكنتونيش ، ومرضت وانسجنت وما زرتونيش 44ويجاوبوه هولا : يارب ، ايحين ابسرناك جاوع او ضامي ، غريب ولا عريان ، مريض ولا مسجون وما اسعفناكش 45فيجاوب عليهم الملك : اقول لكم الصدق : كل مره فعلتوا ذيه لواحد من اخوتي هولا الصغار ، فلي ساع ما فعلتوه 46فيسيروا هولا للعذاب الأبدي ، والصالحين للحياة الأبدية 261ولوما خلص عيسى من ذيه الكلام ، قال لطلابه : 2(تدروا ان الفصح بعد يومين ، وفيه عيسلم ابن الانسان علميد يصلب) 3وفي ذيك الوعد اجتمعوا رؤساء الكهنة وشيوخ الشعب في قصر قيافا رئيس الكهنة 4وتشاوروا علميد يمسكوا عيسى ويقتلوه 5ولكنهم قالوا : مانفعلش ذيه في العيد ، علميد ما يوقعش قلق ويثور الشعب6ولوما كان عيسى جالس في بيت عنيا عند سمعان الأبرص 7قربت منه مره معاها قارورة عطر غاليه قوي ، فسكبته على راسه وهو جالس ياكل 8فلوما ابسروها الطلاب ايش فعلت ، غثيوا منها وقالوا : ايش ذيه التبذير؟ 9كان تستري تبيعيها بسعر غالي ، ويتوزع قيمته على الفقراء 10ودرا عيسى وقال لهم : ليش بتزعجوا تيه المره؟ فهي عملت عمل صالح 11الفقراء عندكم دايما ، واما انا مشنا عندكم في كل وقت12ولو هي سكبت ذيه العطر على جسمي ، فهو علميد تجهزه للدفن 13اقول لكم الصدق : لوما تنتشر تيه البشرى في كل العالم ، عيتحاكا العالم كه بعملها ذيه ويتذكروها14وفي ذيك الوعد سار واحد من الطلاب ال 12 وهو يهوذا اللي يلقبوه بالإسخريوطي لرؤساء الكهنة 15وقال لهم : ايش عتدوا لي علميد اسلم لكم عيسى؟ ، ووعدوه بثلاثين من الفضه 16وجلس يهوذا من تيك الساعه وهو يراقب الفرصه علميد يسلمهم عيسى17وفي اول يوم من عيد الفطر جو الطلاب لعيسى وقالوا له :(اين تشتي نجهز لك عشاء العيد؟) 18فقال لهم :(سيروا لفللان في المدينه وقولوا له : يقول لك المعلم : جت ساعتي ، وانا عد اجي اكل في بيتك مع طلابي) 19وفعلوا الطلاب ساع ما قلهم عيسى وجهزوا العشاء حق العيد 20وفي الليل كوزر عيسى علميد ياكل مع طلابه ال 12 21ولوما كانوا ياكلوا ، قال عيسى :(اقول لكم الصدق : واحد منكم عيسلمني) 22وزعلوا الطلاب وجلسوا يسألوه على واحد واحد :(هو انا يا سيد؟) 23فجاوبهم :(من يسكع لقمته في الصحن معي هو اللي عيسلمني) 24وابن الانسان عيموت ساع ما جاء عليه في الكتاب ، ولكن ياويله اللي عيسلم ابن الانسان ، كان احسن له انه ما يولدش 25فسأله يهوذا اللي عيسلمه :(هو انا يا سيد؟) فجاوبه عيسى :(انت تحاكيت)
26ولوما كانوا ياكلوا ، شل عيسى خبز وبارك وكسره ، ومكن طلابه وقال :(خذوا كلوا ، ذيه هو جسمي) 27وشل كاس وشكر وناولهم وقال :(اشربوا منها كلكم 28ذيه هو دمي ، دم العهد اللي عيسفك علميد ناس خيرات ، لغفران الذنوب 29اقول لكم : ما عاد اشربش بعد اليوم عصير الكرمه ذيه مره ثانيه ، لليوم اللي اشربه جديد معاكم في مملكة ابي) 30وبعدا سبحوا وخرجوا لجبل الزيتون 31وقال لهم عيسى :(في تيه الليله عتفلتوني كلكم لأن الكتاب يقول : عد اضرب الراعي
وتتشتت الأطلى)
32ولكن من بعد ما اقوم من بين الأموات عد اسبقكم للجليل 33فقال بطرس :(لو فلتوك كلهم انا ما عاد افلتكش) 34فقال له عيسى :(اقول لك الصدق : في تيه الليله قبل ما يصيح الديك ، عتنكرني ثلاث مرات) 35فجاوبه بطرس :(ما عد انكركش ولو عد اموت معك) والطلاب قالوا نفس الشي36وبعدا جا عيسى مع طلابه لبقعه اسمها جتسماني ، فقال لهم :(كوزروا هانا ، علميد اسير واصلي هاناك) 37وشل معه بطرس وعيا ربدي ، وبدأ يحس بالغثى والكآبه 38فقال لهم :(نفسي غاثيه لدرجة الموت ، ريعوا هانا واسهروا معي) 39وبعدا ابتعد عنهم شويه وارتمى على شه وصلى فقال :(لو هو ممكن يا ابي تبعد عني تيه الكاس ، ولكن توقع ارادتك مش ارادتي انا) 40ورجع للطلاب ولقاهم نايمين فقال لبطرس :(هكذا ماتستروش تسهروا معي ساعه واحده؟ 41اسهروا وصلو علميد ماتوقعوش في محنه ، تشتوا تفعلوا الصح لكن الطبيعه البشريه ضعيفه) 42ورحله مره ثانيه وصلى وقال :(يا ابي و كان ما يمكنش تعبر تيه الكاس ولازم اشربها ، فتوقع ارادتك) 43وبعدا رجع ولقاهم راقدين ، لأن النعاس ثقل عيونهم 44وفلتهم ورجع مره ثالثه يصلي ، وردد الكلام نفسه 45وبعدا رجع للطلاب وقال لهم :(ليش بتناموا وترتاحوا؟ ابسروا جت الساعه علميد اتسلم ليد الأشرار 46قوموا نرحلنا ، ابسروا اللي جاء يخونني47ولوما كان عيسى يتحاكا اقبل يهوذا ، واحد من الطلاب ال 12 ، ومعه عصابه كبيره ومعاهم السيوف والعصي رسلوها رؤساء الكهنة وشيوخ الشعب 48وكان اللي خانه قد اتفق معاهم على علامة وقال اللي عد احبه هو المطلوب ، امسكوه هو49وقرب يهوذا على طول لعيسى وقال له : السلام عليك يا استاذ ، وحبه 50فقال له عيسى :(افعل ماجيت على سبه يا صاحبي) وتقدموا ومسكوه ...
51ومد واحد من اصحاب عيسى يده لسيفه وخرجه وضرب خادم رئيس الكهنة وقطع اذنه 52فقال له عيسى :(رجع سيفك لمكانه ، لأن من يستعمل السيف بالسيف عيموت) 53أو قصدك اني ما اقدرش اطلب من ابي ويرسل لي على طول اكثر من 1 2 جيش من الملائكه؟ 54ولكن كيف عتتم الكتب المقدسه اللي تقول ان ذيه لازم يوقع؟ 55وقال عيسى للناس :(هل انا سارق علميد تخرجوا عليا بسيوفكم وعصيكم؟ كل يوم كنت اجلس اعلم في بيت الله وما مسكتونيش 56ولكن وقع ذيه علميد تتم كتب الأنبياء) وفلتوه الطلاب كلهم وهربوا57فاللي مسكوا عيسى شلوه الى قيافا رئيس الكهنة وكان الفقهاء والشيوخ مجتمعين عنده 58ولحقه بطرس من بعيد الى بيت رئيس الكهنة ودخل وكوزر مع الحرس علميد يبسر النهايه 59وكان رؤساء الكهنة وكل أعضاء المجلس يطلبوا شهادة زور على عيسى علميد يقتلوه 60وما لقيوش مع ان كثير من شهود الزور تقدموا علميد يشهدوا ، وبعدا قام اثنين شهود ...
61وقالوا :(ذيه الرجال قال انا استر اني اهدم بيت الله وابنيه في 3 أيام) 62فقام رئيس الكهنة وقال لعيسى :(معك رد على تيه التهم اللي بيقولوها عليك؟) 63وجلس عيسى ساكت فقال له رئيس الكهنة :(احلفك بالله الحي ان تقول لنا : هو انت المسيح ابن الله ولا ماشي؟)
64فجاوبه عيسى :(انت قلت الصح ، وانا اقول لكم : عتبسروا بعد اليوم ابن الانسان جالس على يمين الله القدير وجاي على سحاب السماء) 65وشطط رئيس الكهنة ثيابه وقال : قد كفر ، ليش عادكم محتاجين لشهود؟ انتوا ذلحينه سمعتوا الكفر 66فأيش رأيكم ؟ جاوبوه : انه يستحق الموت
67وتفلوا في وشه وضربوه ، وبعضهم لطموه 68وقالوا قلنا ايها المسيح من ضربك؟69وكان بطرس قاعد في ساحة البيت وقربت منه خدامه وقالت :(انت والكل كنت مع عيسى الجليلي!) 70وأنكر قدام كل الموجودين وقال :(مشنا داري ايش بتقولي) 71وخرج لمدخل الساحه وابسرته خدامه ثانيه ، وقالت للي كانوا هاناك : ذيه الرجال كان مع عيسى الناصري 72فأنكر بطرس مره ثانيه وحلف ، قال ما اعرفش ذيه الآدمي 73وبعد قليل جو الموجودين وقالوا لبطرس : شكلك انت والكل واحد منهم ولهجتك تبين حقيقتك 74وجلس يلعن ويحلف : انا ما اعرفش ذيه الآدمي ، وصاح الديك على طول ...
75وتذكر بطرس كلام عيسى :(قبل ما يصيح الديك عتنكرني ثلاث مرات) وخرج وبكاء قوي 271ولوما طلع الصبح ، تشاوروا رؤساء الكهنة والفقهاء على عيسى علميد يقتلوه 2وبعدا قيدوه وبزوه سلموه لـ بيلاطس الحاكم3ولوما ابسر يهوذا انهم قد حكموا على عيسى كذيه ، ندم وسار يرجع الثلاثين فضه لرؤساء الكهنة والشيوخ 4وقال : انا اخطيت لأني خنت انسان بريء فقالو له : واحنا ايش يهمنا ، دبر حالك
5ورجم الفضه في بيت الله وخرج ، وسار شنق نفسه 6فشل رؤساء الكهنة الفضه وقالوا : ما يجوز اننا نطرح تيه الفضه بين اموال الله لأنها قيمة دم انسان 7وجلسوا يتشاوروا بيناتهم البين واتفقوا يشتروا بها جربة الفخاري علميد توقع مقبره للأجانب 8وعلميد هذا يسموها الناس جربة الدم لليوم9وتم اللي قاله النبي إرميا :(وشلوا الثلاثين فضه وهي اللي اتفقوا عليها بعض بني اسرائيل علميد تكون قيمته) 10ودفعوها قيمة جربة الفخاري ، كذيه امرني الله11ووقف عيسى قدام الحاكم فسأله الحاكم :(هو انت ملك اليهود؟) وجاوبه عيسى :(انت تحاكيت)
12وكان رءساء الكهنة والشيوخ بيتهموه وما يجاوبش ولا بشي 13فقال له بيلاطس :(ما بتسمعش ايش بيقولوا عليك؟) 14وما جاوبه عيسى ولا بشي ، لوما انه استغرب الحاكم قوي15وكان من عادة الحاكم في كل عيد انه يخرج واحد من المساجين يختاره الشعب 16وكان عندهم في ذيك الوعد محبوس معروف اسمه ابن عباس17ولوما تجمعوا الناس سألهم بيلاطس :(من تشتوا اني اخرج لكم ابن عباس ولا عيسى اللي اسمه المسيح؟) 18وكان بيلاطس داري انهم من حسدهم سلموا عيسى 19ولوما كان بيلاطس جالس على الكرسي رسلت له زوجته تقول :(اوبه توجع ذيه الرجال الصالح ، لأني اليوم استوجعت قوي بسببه في حلم) 20لكن رؤساء الكهنة والشيوخ قالوا للناس انهم يطلبوا ابن عباس ويقتلوا عيسى 21فلوما سألهم الحاكم :(من تشتوا اني اخرج لكم؟) جاوبوا :(ابن عباس)
22فقال لهم بيلاطس :(وايش افعل بعيسى اللي اسمه المسيح؟) فجاوبوه كلهم :(اصلبه)
23فقال لهم :(ليش ، ايش الذنب اللي فعله؟) وصاحوا اقوى :(اصلبه)
24فلوما ابسر بيلاطس انه مابش فايده وزادة الغاغه ، شل ماء وغسل يده قدام الناس وقال :(انا بريء من دم ذيه الرجال ! ابسروا لكم انتوا حل) 25فجاوبه الناس لهم :(دمه علينا وعلى اولادنا) 26فخرج لهم ابن عباس ، واما عيسى جلده وسلمه علميد يصلب27وبعدا شلوا جنود الحاكم عيسى لقصر الولاية وجمعوا عليه الفرقه كلها 28وخلسوه ثيابه ولبسوه ثياب كبدي 29وظفروا له تاج من الشوك وطرحوه على راسه ، وطرحوا عصيه في يده اليمين ، وركعوا على ركبهم قدامه ، واتمهزؤا به وقالوا له : حياك يا ملك اليهود30ومسكوا العصيه وجلسوا يضربوه على راسه بها ، وهم بيتفلوا عليه 31وبعد ما استهزؤا به خلسوه الثوب الكبدي ولبسوه ثيابه وشلوه للصليب32ولوما كانوا خارجين من المدينه قابلوا رجال من القيروان اسمه سمعان ، وخلوه يشل صليب عيسى بالقوه 33ووما وصلوا لبقعه اسمها الجلجثة ، يعني بقعة الجمجمة 34ادوا له خمر بينها مر ، ولوما ذاقها مارضيش يشربها35فصلبوه وشلوا ثيابه ووزعوها بينهم بالقرعه 36وجلسوا هاناك يحرسوه 37وطرحوا فوق راسه لوحه مكتوب عليها سبب الحكم عليه :(ذيه عيسى ملك اليهود) 38وصلبوا شقه اثنين سرق ، واحد من يمينه والثاني على يساره 39وكان اللي يمشوا قدامه ويقولوا له 40يا هادم الهيكل وبانيه في ثلاثه أيام ، لو انت ابن الله فك نفسك وانزل من الصليب41وكان رؤساء الكهنة والفقهاء والشيوخ يستهزؤا به ويقولوا 42نجا غيره وما استرش ينجي نفسه !، هو ملك اسرائيل ، ينزل ذلحين من الصليب ونؤمن به43توكل على الله وقال :(انا ابن الله ، هيا ينجيه الله الان لو كان راضي عليه 44والسرق كان يعايروه كمان بنفس ذيه الكلام45وفي الظهر وقع ظلام على الأرض كلها للساعه الثالثه 46وعند الساعه الثالثه صاح عيسى بصوت عظيم وقال :(ايلي ، ايلي ، لماذا سبكتاني؟) ومعناها الهي الهي للمه فلتني 47فسمعوا بعض الناس هاناك فقالوا انه ينادي النبي ايليا 48فجرى واحد منهم وشل اسفنجه وبللها بالخل ، وطرحها على عصيه طويله ، ورفعها له علميد يشرب 49فقالوا له البقيه :(راعي علميد نبسر عيجي ايليا ينجيه) 50وصاح عيسى مره ثانيه صيحه قويه قوي وطلعت روحه 51واتقسمت الستاره الموجوده في الهيكل نصين من فوق لتحت ، واهتزت الأرض وتشققت الحجار 52وافتتحت القبور ، وخيرات من الميتين الصالحين قاموا للحياة بأجسامهم 53وبعد قيامة عيسى ، خرجوا من القبور ودخلوا للمدينه المقدسه وبدوا على بعض الناس 54ولوما ابسر القايد وعساكره اللي يحرسوا عيسى الزلزال وكل ما وقع افتجعوا وقالوا :(الصدق كان ذيه الرجال ابن الله) 55وكان به هاناك نسوان خيرات مريعات من بعيد ، وهن اللي لحقين عيسى من الجليل علميد يخدمينه 56وبينهن مريم المجدليه ومريم أم يعقوب ويوسف وأم عيال زبدي57وجا في العشي رجال غني من الرامه اسمه يوسف ، وكان من طلاب عيسى 58فدخل على بيلاطس وطلب منه جسم عيسى ، فقلهم بيلاطس انهم يسلموه الجثه59فشل يوسف جثة عيسى ولفه في كفن نظيف 60وطرحه في قبر جديد كان قد حفره لنفسه في الحجر ، وبعدا ادى حجره كبيره على باب القبر ورحله 61وكانت مريم المجدليه ومريم الثانيه مكوزرات قدام القبر من الجهه الثانيه62وفي اليوم الثاني بعد التجهيز ليوم السبت ، سارو رؤساء الكهنة والفريسيين لبيلاطس 63وقالوا له :(احنا ذكرنا يا سيد ، ان ذيك الدجال قال وهو حي انه عيقوم بعد ثلاثه أيام) 64ونشتيك تدي أمر بحراسة القبر لليوم الثالث ، علميد ما يجوش طلابه ويسرقوه ويقولوا للشعب : انه قام من بين الأموات ، لأنها عتوقع تيه الخدعه اخس من الأوله 65فقال لهم بيلاطس :(عندكم العساكر وسيروا احرسوا القبر ساع ما تشتوا) 66فساروا وتأكدوا من القبر وطرحوا عليه حراس 281ولوما كمل السبت ، وحين طلع فجر يوم الأحد ، سارت مريم المجدليه ومريم الثانيه علميد يزورين القبر 2وفجأه وقع زلزال قوي ، لأن ملاك الله نزل من السماء ودحرج الحجره على باب القبر وجلس عليها3وكان شكله ساع البرق وثوبه أبيض ساع الثلج 4وافتجعوا الحراس من الخوف لوما ابسروه واوقعوا ساع الميتين 5فقال الملاك للنسوان :(لا تحافينش ، انا داري انكن بتدورين على عيسى اللي صلبوه 6هو مشو هانا ، لأنه قام ساع ما قال ، اقربين وابسرين البقعه اللي كان مطروح بينها 7وسيرين طوالي لطلابه وقولين لهم : انه قام من بين الأموات ، وهو يسبقكم إلى الجليل ، وهاناك تبسروه ، انا بلغتكن الرساله) 8وفلتين النسوان القبر سريع وهن خايفات وفارحات قوي ، وكانين يجرين علميد يبشرين الطلاب 9فلقيهن عيسى في الطريق وقال لهن :(السلام عليكما) وقربين منه ومسكين ارجله وسجدين له 10فقال لهن عيسى :(لا تخافينش ، سيرين لإخوتي وقولين لهم انهم يسيروا للجليل ، وهاناك عيبسروني)11ولوما كانين سايرات رجع بعض الحرس للمدينه وحاكوا رؤساء الكهنة باللي وقع 12فأجتمعوا رؤساء الكهنة والشيوخ وبعد ما تشاوروا رشوا الحراس بزلط خيرات 13وقالوا لهم :(حاكوا الناس الناس ان طلاب عيسى جو في الليل وسرقوه واحنا راقدين14ولوما يسمع الحاكم ذيه الخبر احنا عنراضيه ونبعد العقاب عنكم) 15وشلوا الحراس الزلط وفعلوا ساع ما قالوا لهم ، وانتشرت تيه الحكايه بين اليهود لليوم16واما الطلاب ال 11 ساروا للجليل ساع ما امرهم عيسى 17ولوما ابسروه سجدوا له ولكن بعضهم شكوا18فقرب منهم عيسى وقال لهم :(وقع لي كل سلطان في السماء والأرض) 19فسيروا وخلوا الناس كلهم طلاب وعمدوهم بأسم الأب والأبن والروح القدس20وعلموهم ان يعملوا بكل ما وصيكم به ، وانا معاكم طول الوقت لوما ينتهي الزمان