To view a copy of the CC BY-SA 4.0 license visit
http://creativecommons.org/licenses/by-sa/4.0/
Marko
11Uku ekutendeka kwa mbila nsuma ya kwa Yesu Kristu, Umwana wakwa Lesa. 2Ngefyo calembwa muli Esaya kasesema, ''Mona, nkotuma inkombe yandi kuli mwebo, uyo uukamipekanishisha inshila yenu. 3Ishiwi lya ukobilikisha mu matololo, 'teyanyeni inshila yakwa Shikulu; pangeni inshila shakwe ishakutambalala.'''4Yohane alishile, akobatisha mu matololo no kulashimika ulubatisho lwa kulapila pakwelelwa kwa membu. 5Icalo conse ica Yudea na bantu bonse aba mu Yerusalemu balifumine ukuya kuli ena. Bali batishiwe kuli ena mu mumana wa Yodani, ukulalapila imembu shabo. 6Yohane alifwele ilaya lya masako ya ngamali no mushipi wa mpapa mu musana wakwe, kabili alikulya ifipaso no buci bwa mpanga.7Alikushimikila, ukweba ati, ''Umo uukesa panuma yandi uwakwatisha amaka ukuncila; ne tambo sha pa ndyato shakwe ntalingile ukukontama no kukakula. 8Nali mibatishe na menshi, lelo akamibatisha no Mupashi wa Mushilo.''9Calicitikile mu nshiku shilya ukwebati Yesu alifumine ku Nasareti mu Galili, kabili alibatishiwe kuli Yohane mu mumana wa Yodani. 10Ulo Yesu aishile kutumpuka ukufuma mu menshi, alimwene imyulu shaisuka no Mupashi ukoisa pali ena kubati lukunda. 11Ishiwi lyalishile ukufuma mu myulu ati, ''Uli Mwana wandi uwatemwikwa. Naliba uwa kubekelwa sana muli webo.''12Elo Mupashi walimuntungulwile ukuya mu matololo. 13Ali mu matololo inshiku amakumi yane, ali kutunkwa na Satana. Ali ne nama sha mpanga, na bamalaika balimupyungile.14Nomba panuma yakwikatwa kwakwa Yohane, Yesu alishile mu Galili akobilikisha imbila nsuma yakwa Lesa. 15Alilandile ati, ''Inshita ilifikilishiwe no bufumu bwakwa Lesa bulipaleme. Lapileni no kusumina imbila nsuma.''16Ulo ali akoenda lubali lwa bemba wa Galili, alimwene Simone na Andrea munyina wakwa Simone bakoposa isumbu muli bemba, pantu bali balondo besabi. 17Yesu alilandile kuli bena ati, ''Iseni, nkonkeni, kabili nkomilenga ukuba abalondo ba bantu.'' 18Elo apopenefye balishiile amasumbu no kumukonka.19Ulo Yesu aendelelako akatalamukila, alimwene Yakobo umwana mwaume wakwa Sebede na Yohane munyina; bali mubwato bakolunda amasumbu. 20Alibetile nabo balishiile wishibo Sebede mubwato pamo na babomfi ba malipilo, kabili balimukonkele.21Nolu baliishile mu Kapernamu, kabili pe Sabata, Yesu alile mu sunagoge no kusambilisha. 22Bonse balisungwike pa kusambilisha kwakwe, pantu ali kubasambilisha kubati ni umo uukwete insambu kabili tali nga bakalemba.23Apopenefye umwaume mu sunagoge yabo uwakwete umupashi wakowela alipundile umusowa, 24ukweba ati, ''Nindo tufwile ukucita na webo, Yesu wa ku Nasareti? Bushe wishile mukutonaula? Ndikwishibile, niwe Uwashila wakwa Lesa!" 25Yesu alikalipile icibanda no kulanda ati, ''Ikala tondolo no kufuma muli ena!'' 26Umupashi wakukowela walimuposele panshi no kufuma muli ena ninshi akolila mwi shiwi lya kupunda.27Abantu bonse balisungwike, eco baliipushenye cila umo, ''Nindo iyi? Ukusambilisha kupya ukwa nsambu! Alapikimuna ne mipashi iya kukowela nayo ikomubela!'' 28Ilyashi lyapali ena lyalile konse mu citungu conse ica Galili.29Panuma ya kufuma Mu sunagoge, balishile mung'anda yakwa Simone na Andrea, pamo na Yakobo na Yohane. 30Nomba nafyala kwa Simone alisendeme nalwala impepo, kabili balyebele Yesu palwa ena. 31Eco alishile, alimwikete pa kuboko, no kumwimya; ne mpepo yalimushile, kabili alitampile ukubapyungila.32Cilya cine cungulo panuma akasuba kawa, baliletele kuli ena bonse abalwele na baiketwe ne ngulu. 33Umusumba onse walikolongene pa mwinshi. 34Aliposeshe abalwele abengi amalwele ayalekana- lekana no kutamfya ingulu ishingi, lelo tasuminishe ingulu ukulanda pantu shali mwishibile.35Alyalamukile bwangu, ulo kucili kulifitile; alifumine no kuya mu ncende iya tondolo na kulya alipepele. 36Simone nabo abali nankwe balimufwaile. 37Balimusangile no kulanda kuli ena ati, ''Bonse bakomufwaya.''38Alilandile ati, ''Natulekuyako kumbi, ukuya mu mishi ishingulwike, pakwebati ningaya kushimikila noko kwine. Eco njishile kuno kunse.'' 39Alipitile mu Galili monse, ukulashimikila muma sunagoge yabo no kulatamfya ingulu.40Uwa fibashi alishile kuli ena. Alikumupapata; alifukeme no kulanda kuli ena ati, ''Umfwa mukofwaya, kuti mwansangulula.'' 41Pakwikatwa ne nkumbu, Yesu alitambalike ukuboko no kumwikata, ukulanda kuli ena ati, ''Nkofwaya. Ba uwakusangululwa.'' 42Palyapene ifibashi fyalimushile, kabili alisangulwilwe.43Yesu alimusopeshe no kumuleka alekuya. 44Alilandile kuli ena ati, ''Ushininkishe ukwebati tawebeleko uuli onse , lelo kabuye, uyekuilanga kuli shimapepo, kabili upele icabupe pa kusangululwa kobe ifyo Mose akonkomeshe, ngo bunte kuli bena.''45Lelo alile kunse kabili alitendekele ukulacilanda palwalala no kulasabankanya icebo, apakalamba icakwebati Yesu taingila mu musumba palwalala lelo aikele mucende ishakufisama. Lelo abantu balikwisa kuli ena ukufuma muncende shonse.
21Ulo abwelele ku Kapernahumu panuma ya nshiku shinono, calyumfwikile ukwebati ali pa ng'anda. 2Eco abengi balilongene tapalipo ne ncende, nangu ni pa mwinshi, kabili alilandile cebo kuli bena.3Nolu abaume bamo balishile kuli ena abaletele umuntu uwali no bulebe; abantu bane eba musendele. 4Ulo basangile ati tekuti bapalame kuli ena pamulandu we bumba, balifumishepo umutenge uwali pamulu wakwa Yesu, kabili panuma yakwisula, baliponeshe ubutanda apali uwabulebe.5Pakumona icicetekelo cabo, Yesu alilandile ku muntu wa bulebe ati, "We mwana mwaume, imembu shobe shaelelwa." 6Nomba bamo aba muli bakalemba balikele palya, kabili bali kutontonkenya mu mitima yabo, 7''Ninshi uyu muntu akolandila muli uyu musango? Akoponta! Nani engelela imembu kano Lesa fye eka?''8Palyapene fye Yesu mu mupashi wakwe alishibile ifyo bali kutontonkanya munda shabo. Alibebele ati, ''Nindo mukotontonkanishisha ifi mu mitima yenu? 9Cindo cayangukapo, ukulanda ku muntu wa bulebe, 'Imembu shobe shaelelwa' nangula ukulanda ati, 'Ima, bula ubutanda bobe, no kwenda'?10Lelo pakwebati mwingeshiba ati Umwana wa Muntu alikwata insambu pe sonde ishakwelela imembu,'' Alilandile ku wa bulebe ati, 11''Nakweba, ima, senda ubutanda bobe, no kuya ku ng'anda yobe.'' 12Alimine apopene no kubula ubutanda, no kufuma mu ng'anda ku ntanshi ya bonse, icakwebati bonse balisungwike no kupela ubukata kuli Lesa, kabili balilandile ati, ''Tatwabala kufimonapo ifya musango uyu.''13Alifumine nakabili no kuya ku mbali ya bemba, ne bumba lyonse lyalishile kuli ena, kabili ali basambilishe. 14Lintu ali akopita, alimwene Lebi, umwana mwaume wakwa Alfeo alikele pe tenti lya kwa kasonkesha wa musonko no ku mweba ati, ''Nkonka.'' Alimine no ku mukonka.15Yesu ali kwete ukulya mu ng'anda yakwa Lebi na bakasonkesha ba musonko abengi na babembu bonse balililile capamo nankwe na basambi bakwe, ico balifulile kabili bali mukonkele. 16Ulo bakalemba, abo abali abaFarise, ba mwene ukwebati Yesu akolya na babembu na bakasonkesha wa musonko, balilandile ku basambi bakwe abati, ''Nindo alila na bakasonkesha wa musonko na babembu?''17Ulo Yesu aumfwile ifi alibebele ati, ''Abantu abali bwino mu mubili tabakabila shing'anga; kano fye abantu abalwala ebakabila umo. Nshaishile mukwita abalungami, lelo ababembu.''18Nomba abasambi bakwa Yohane na ba baFarise bali bakofunga. Abantu bamo balishile no kulanda kuli ena ati, ''Nindo abasambi bakwa Yohane na basambi ba baFarise bafungila, lelo abasambi benu tabafunga?'' 19Yesu alibaswike ati, ''Bushe abasangwa kubwinga kuti bafunga lintu bacili na shibwinga? Nga bacili bali na shibwinga, tekuti bafunge iyo.20Lelo inshiku shili mukwisa ulo shibwinga akasendwa ukufuma pali bena, kabili muli isho nshiku, bakafunga. 21Takuli nangu umo uukambika insalu iipya pa mwingila wa kale. Umfwa cibe fyo icikamba cikokakatukapo, icipya ukufuma pa cakale, kabili kukaba ukulepukisha icabipisha.22Takuli uwingabika umwangashi upya mu nsupa iyakale. Umfwa cikabe fyo umwangashi ukalepula insumpa na fyonse fibili umwangashi ne nsupa fikaloba. Lelo, umwangashi uupya ubikwa mu nsupa iipya.''23Pa bushiku bwe Sabata Yesu alipitile mu mabala ya ng'ano, na basambi bakwe balikutempaula imitwe ya ng'ano. 24AbaFarise bali mwebele ati, ''Mona, nindo bakocitila ifintu ifitasuminishiwa mwifunde pa bushiku bwe Sabata?''25Alibebele ati, ''Tamwabelenga ifyo Dabidi acitile ulo ali mukukabila kabili ali ne nsala - ena na baume ali nabo - 26ifyo aingile mu ng'anda yakwa Lesa ulo Abiatari ali shimapepo mukalamba, no kulya umukate wa ceni, icitasuminishiwa mwifunde ukulya kuuli onse kano fye ba shimapepo, kabili alipeleko umo kubo ali nabo?''27Yesu alilandile ati, ''Isabata lyapangilwe umutundu wa muntunse, te mutundu wa muntunse wapangilwe Sabata. 28Eco, Umwana wa Muntu ni Shikulu, no we Sabata line.''
31Nakabili Yesu alingile mu sunagoge, kabili mwalipo umwaume uwa cisansa cakulemana. 2Bamo abantu balimukulolekesha ukumona umfwa akomuposha pa bushiku bwe Sabata pakwebati bakwate apa ku mushinina.3Yesu alilandile ku mwaume uwakulemana icisansa ati, ''Ima no kwiminina pakati ka bantu bonse.'' 4Elo alandile ku bantu ati, ''Bushe lifunde ukucita icabune pa bushiku bwe Sabata nangu ukucita icabubi; ukupususha umweo nangu ukwipaya?'' Lelo balifye tondolo.5Elo aceba-ceba pali bena no bukali, kabili aliketwe ubulanda pakutalama kwa mitima yabo, kabili alilandile ku mwaume ati, ''Tambulula ukuboko kobe.'' Ali kutambulwile, no kuboko kwakwe kwalipolele. 6AbaFarise balifuminemo na palya pene balitendekele ukupangana na bena Herode ifyo bengamwipaya.7Elo Yesu, na basambi bakwe, baile kuli bemba, ne bumba lya bantu ilikalambam lyali mukonkele ukufuma ku Galili na ku Yudea 8na ku Yerusalemu na ku Idumea no kucila Yodani no kushinguluka Turi na Sidone. Ulo baumfwile pa fintu alikucita, ibumba ilikalamba lyalishile kuli ena.9Alyebele abasambi bakwe uku mupekanishisha akabwato akanono pa mulandu we bumba, pakwebati ibumba limutitika. 10Ico aliposeshe abengi, icakwebati bonse abakwete amalwele yakulekana lekana balifwaishe ukweba ati ba mwikatemo.11Lyonse ulo imipashi yakukowela ya mumona, yalikuponene panshi ku ntanshi yakwe no kulila, no kulanda ati, ''Uli Mwana wakwa Lesa.'' 12Elo alishinkomesha cibi ukukana lenga eshibikwe.13Alile pa mulu wa lupili, kabili alikutila abo alikufwaya, nabo balile kuli ena. 14Alisontelepo abe kumi na babili (abo ainikile abatumwa) pakwebati bengaba nankwe no kwebati enga batuma ukuya kubila imbila, 15no kukwata insambu shakutamfya ingulu. 16Alisontele abe kumi na babili: Simone, uyo apele ishina lya Petero;17Yakobo mwana mwaume wakwa Sebede, na Yohane munyina Yakobo, abo apele ishina Boanerge, emukutila, abana baume cibulukuto; 18na Andrea, Filipi, Bartolomeo, Mateo, Toma, Yakobo umwana mwaume wakwa Alfeo, na Tadeo, Simone umwina Sealote, 19na Yuda Iskariote, uwali nokwisa ku mufutuka.20Elo abwelelemo ku nga'anda, ne bumba lyalilongene nakabili, icakwebati balifililwe no kulya nangufye mukate. 21Ulo ulupwa lwakwe lwaumfwile palwa ico, balile ukuyakumusenda, pantu balandile ati, "Alipenene." 22Bakalemba abafumine mu Yerusalemu balilandile ati, "aliminwe na Beelsebuli" kabili ''Muli kateka wa ngulu emo alikutamfisha ingulu."23Yesu alibakutile umwine no kubebela mu milumbe ati, "Bushe Satana kuti afumya shani Satana? 24Umfwa ubufumu bwayakanika ubwine, ubo bufumu tekuti bwiminine. 25Umfwa ing'anda yaakanikana iine yeka, iyo ing'anda tayakatale aiminina.26Umfwa Satana aliimine umwine kabili alipatukene, tekuti eminine, lelo alishile kukulekelesha. 27Lelo takwingaba uwingegila mu ng'anda ya mwaume uwa kukosa no kwiba ifintu fyakwe ukwabula ukukakila umwaume wa kukosa pakubala lyena, nolu kuti atapa ing'anda yakwe.28Icine cine nkolanda kuli mwebo, imembu sha bana baume ba bantu shonse shikelelwa, ukubikapofye ne miponto isho balanda, 29lelo uyo onse uupontela Mupashi wa Mushilo takatale abelelwa uluse, lelo ali uwashinimwa no lubembu lwa muyayaya." 30Yesu alilandile ifi pantu balikulanda ati, '' Alikwete umupashi wakukowela."31Elo banyina na bandume yakwe baishile no kwiminina panse. Balimutumine, abakuya kumukuta. 32Ibumba lyalikele lilimushingulwike kabili balilandile kuli ena ati, "Banoko na bandume yobe na bankashi yobe bali panse, kabili bakokufwaya."33Ali baswike ati, "Bamayo na bandume yandi ni bani?" 34Aliloleshe pali abo abaikele balimushingulwike no kulanda ati, "Moneni, aba e bamayo na bandume yandi! 35Pantu uyo onse uucita ubufwayo bwa kwa Lesa, uyo muntu e ndume yandi, kabili nkashi, kabili e mayo."
41Nakabili alitendekele ukusambilisha ku mbali ya bemba, ne bumba ilikalamba lyalikolongene ukumushinguluka. Nao alininine mu bwato ubwali pali bemba, kabili alikeleko mukati. Ibumba lyonse lyali ku cabu mu mbali ya bemba. 2Alibasambilishe ifintu ifingi mu milumbe, na mukusabilisha kwakwe, ifi efyo alandile kuli bena.3''Kutikeni! Umulimi alimine alile kukutanda imbuto shakwe. 4Ulo atandile, shimo shaponene pa musebo, ne fyoni fyalishile no kushiminaula. 5Shimbi shaponene pa mushili wa nsakalabwe, palya tapali umushili uwingi apo pene shalisapwike, pantu tashakwete umushili wakushishika.6Lelo ulo akasuba katulile, ifilimwa fyalifumbile, na pamulandu wa kukanakwata imishila, fyalyumine. 7Shimbi mbuto shaponene mu myunga. Imyunga yalikulile no kushitabilila, kabili tayatwele ifisabo.8Shimbi mbuto shaponene pa mushili wabune no kutwale fisabo ifyakulile no kusanduluka no kutwala amakumi yatatu, amakumi mutanda, nefya myanda." 9Elo alandile ati, "Onse uwakwete amatwi yakutesha, nateshe!"10Ulo Yesu ali eka, nabo abamushingulwike na bekumi babili balimwipwishe palwa milumbe. 11Alilandile kuli bena ati, "Kuli mwebo kwalipelwa icankama ca bufumu bwa kwa Lesa. Lelo kuli abo ababa kunse, fyonse milumbe, 12pakwebati ulo bakololesha, ee bakololesha, lelo tabakomona, kabili pakwebati, ulo bakoumfwa, ee bakoumfwa, lelo tabakoiluka, nga teifyo kuti babweluluka na Lesa kuti ababelela uluse."13Alilandile kuli bena ati, "Bushe tamwilukile uyu mulumbe? "Nomba mukeluka shani imilumbe shonse?" 14Katanda atanda icebo. 15Aba ebali pa mbali ya musebo, apo icebo cibwalwa. Ulo baumfwa, Satana apo pene alesa no kusompola icebo icibyelwe muli bena.16Neshi embuto shabyelwe mu mushili wa nsakalabwe; ni abo, ulo batesha icebo apopene bacipokelela ne nsansa. 17Lelo tabakwete imishila abene, lelo bashipikisha pa kashita akanono. Panuma ulo ubucushi no kupakaswa fyaima pa mulandu wa cebo, apopene bawa.18Na shimbi nasho nisho shatandilwe mu myunga. Ni abo abomfwa icebo, 19lelo amalangulushi ya mu calo ne fyakubeleleka fya bunonshi ne fyakubeleleka fya fintu fimbi fyaingila no kufubalisha icebo, kabili cakana ukusanduluka. 20Isho Ishatandilwe mu mushili wa bune ni abo abomfwa icebo, bacipokelela no kutwala ifisabo, amakumi yatatu, amakumi mutanda, nangu ifya miku mwanda.21Yesu alilandile kuli bena ati, "Bushe mwalitala amutwala inyali mukati ka ng'anda no kukupikapo umuseke nangu mwifungu lya busanshi? Mulengisha no kubika pa cakutekapo. 22Pantu takwaba icafisama icitacakeshibikwe, kabili takwaba ica fisama icitakamoneke pa lwalalala. 23Umfwa onse alikwete amatwi yakutesha, nateshe!"24Alilandile kuli bena ati, "Kutikeni ku fyo mukoumfwa, pantu ku cipimo mubomfya eco bakamipiminako, kabili fikalundwako kuli mwebo. 25Pantu uyo onse uwakwata, kuli ena kukapelelwapo na fimbi, na uyo onse uutakwata, na kantu akwata kakapokwa."26Nakabili alilandile ati, "Ubufumu bwa kwa Lesa bwaba kubati muntu uwabyele mbuto shakwe mu mushili. 27Alisendeme ubushiku no kwalamuka akasuba, ne mbuto shilimenene no kukula, nangu ena taishibile fintu cali. 28Umushili ulatwale ulubuto uwine weka: Pakubala umusonga, elo umutwe, elo ninseke shakoma mu mutwe. 29Ulo icisabo capya, apopene ena atumako icikwakwa pantu ukusombola kulifikile."30Nakabili alilandile ati, "Ni kundo twingapalanya ubufumu bwa kwa Lesa, nangu mulumbe wakuba shani twingabomfya pa kucilondolola? 31Bwaba kubati luseke lwa lubanga, ulo, lintu lwabyalwa, lunono pa nseke sha pano nse. 32Lelo, ulo lwabyalwa, lulakula no kusanguka lukalamba ukucila imiti yonse iya mwibala, kabili lulapatula imisambo iikalamba, pakwebati ne fyoni fya mu mulu kuti fyapikulamo ifinsa mu cintelelwe ca luko."33Ku milumbe iingi iyakuba nge yi alilandile cebo kuli bena, pamo nga fintu bali no kwiluka, 34kabili talandile kuli bena ukwabula umulumbe. Lelo ulo ali eka, alilondolwele ifintu fyonse ku basambi bakwe.35Pali bulya bushiku, ulo icungulo cafikile, alilandile kuli bena ati, "Natulekuya kwishilya." 36Eco balishile ibumba, balisendele Yesu, ifyo finefye ali, mu bwato. Kwailiko na yambi amato ayalikuya pamo nankwe. 37Apo pene icipupu ca mwela icikalamba calimine, na mabimbi yalikuipama mu bwato bwapene bwisulemo amenshi.38Lelo Yesu ali kunuma ku cisolo ca bwato, alisendeme pa mulu wa musao. Balimubushishe, ukumweba ati, "Kasambilisha, bushe tamukosakamikwa ukwebati tuli mukufwa?" 39Alishibwike, alikalipile icipupu, no kulanda kuli bemba ati, "Talala! Ba tondolo!" apo pene ne cipupu calilekele, kabili kwali ukukutumana ukukalamba.40Elo alandile kuli bena ati, "Nindo mwatinina? Bushe na nomba tamulakwata icicetekelo?" 41Baliketwe no mwenso uukalamba nganshi no kulanda kuli umo no munankwe ati, "Nga wa musango shani uyu, pantu ne cipupu na bemba fikomubela?"
51Balishile kwi shilya lya bemba, ku citungu ica bena Gerase. 2Ulo Yesu alikupatuka mu bwato, apo pene umuntu uwali no mupashi wakukowela alishile kumukumanya ukufuma mu manda.3Uyu muntu alikwikala mu manda. Takwali uwali na maka yakumukaka, nangu ni ku minyololo. 4Balemukakila inshita ishingi ku makoli ne minyololo. Aliputawile minyololo na makoli yakwe lyalifunaike. Takwali uwali na maka ya kumwansha.5Cila bushiku na kasuba mu manda na mu mpili alikupunda no kuicekaula umwine na mabwe yakutwa. 6Ulo amwene Yesu akatalamukila, alibutukile kuli ena no kufukama kuli ena.7Alipundile ne shiwi likalamba ati, "Nindo mfwile ukucita na mwebo, mwe Yesu, Umwana wakwa Lesa Wapulamo? Nkomipapata ukupitila muli Lesa umwine, mwincusha." 8Pantu alikulanda kuli ena ati, "Fuma mu muntu, webo we mupashi wakukowela."9Alimwipwishe ati, "Niwe nani ishina?" Alimwaswikile ati, ''Ishina lyandi nine mulalo, pantu tuli bengi.'' 10Alimupapatile nakabili na kabili ukukana itamfya mu citungu cilya.11Nomba umukuni wa nkumba uukalamba walikulya ukolya pa lupili, 12kabili balimupapatile, ukulanda ati, ''Tutumeni mu nkumba; natwingile muli shena.'' 13Eco alishisuminishe, imipashi iyakukowela yalifumine no kwingila mu nkumba, no mukuni walitentemukile pa mutelemuko wa lupili ukuya muli bemba, ne nkumba nalimo amakana yabili shalinwinine muli bemba.14Elo abo abalikulisha inkumba balibutukile no kuyakulanda pa fyacitikile mu musumba na mu mitanda, eco abantu balile mukumona ifyacitikile. 15Elo baishile kuli Yesu no kumona umuntu uwali ne mipashi yakukowela, uyo uwaiketwe ne mipashi ya bu mulalo, alikele palya, alifwele kabili alibwelele mubutuntulu; kabili bali no mwenso.16Abo abamweneko pafya citikile ku muntu uwaiketwe ne ngulu balibebele pali ifi fine mukushika, kabili balibebele na palwa nkumba. 17Elo batendeke ukumupapata ukufuma ku citungu cabo.18Ulo alikupatama mu bwato, umuntu uwa iketwe ne ngulu ali mupapatile ukweba ati engaba nankwe. 19Lelo Yesu tamusuminishe, alimwebele ati, "Kabuye ku ng'anda yobe na ku bantu bobe no kubeba ifyo Shikulu akucitila, nefyo akulanga uluse." 20Eco alile kabili alitendekele ukubila mu Dekapoli ifintu ifikulu ifyo Yesu amucitile, na bonse balisungwike.21Nomba ulo Yesu ayabuka nakabili kwishilya mu bwato, ne bumba ilikalamba lyalimushingulwike, ninshi acili mululamba lwa bemba. 22Elo na umo uwa mubakalamba ba mu sunagoge alishile ishina lyakwe ni Yairo, kabili ulo amumwene, aliwile pa nkasa shakwe. 23Alimupapatile kabili nakabili, akolanda ati, "Umwana wandi umunono umwanakashi ali mupepi no kumfwa. Namupapata, iseni mubike ndupi shenu pali ena ukwebati apole kabili abe no mweo." 24Eco alile nankwe, ne bumba ilikalamba lyalimukonkele no kutitikana ukumushinguluka.25Nomba palya pali namayo uwalikusuma umulopa pa myaka ikumi na ibili. 26Aliculile sana ukufuma kuli ba shing'anga no kuposa fyonse ifyo akwete, lelo mucifulo cakwebati omfweko bwino fyalikwilakofye pantashi. 27Ulo aumfwile ilyashi palwa kwa Yesu, alishile kunuma mwi bumba no kwikata ku nsalu yakwe.28Pantu alilandile ati, "Umfwa naikata fye insalu shakwe, nkopola." 29Ulo amwikete, apopene ukusuma kwa mulopa wakwe kwalilekele, kabili alyumfwile na mu mubili wakwe ukweba ati alyundepwe kubulwele bwakwe.30Yesu apopene alilukulike mu mwine ukweba ati amaka na yafumamo muli ena, alipilibwike mwi bumba no kulanda ati, "Uunkumishe ni nani?" 31Na basamba bakwe balilandile kuli ena, "Muli mwene bumba likomititikisha, kabili mukolanda ati, 'Ninani unjikete?" 32Lelo Yesu alilolekeshe amone uucitele ici.33Umwanakashi, pakwishibe ifyamucitike, alitinine no kututuma. Alishile no kuwa panshi ku cinso cakwe kabili alimwebele cishinka conse. 34Nao alilandile kuli ena ati, "We mwana umwananashi icitetekelo cobe cakuposha. Kabuye umutende kabili uposhiwe ukufuma ku bulwele bobe."35Ulo ali akolanda, abantu bamo balishile ukufuma ku ntungulushi iya mu sunagoge, no kulanda ati, "Umwana obe umwanakashi alifwile. Nindo ukotwalilila ukucusha kasambilisha ?"36Lelo ulo Yesu aumfwile ilyashi ilyalandikwe, alilandile ku ntungulushi ya mu sunagoge ati, "Witina. Cetekela fye." 37Tasuminishe nangu umo ukumukonka kanofye Petero, Yakobo na Yohane, munyina Yakobo. 38Balishile ku ng'anda ya ntungulushi ya mu sunagoge no kumona abantu kulya bali bakopanga icongo saana, bali bakolila no kulosha.39Ulo aingile mu ng'anda, alilandile kuli bena ati, "Nindo mufulilwe kabili nindo mukolila? Umwana tafwile alelefye." 40Balitendeke ukumutumfya. Lelo alibafumishe bonse panse no kubula wishi wa mwana na nyina nabo abali nankwe, kabili alingile umo umwali umwana.41Alibulile ukuboko kwa mwana no kulanda kuli ena ati, "Talita Kumi!" icikopilibula ati, "We mukashana, Nalanda kuli webo, ima." 42Apopene umwana alimine no kwenda (alifye ne myaka ikumi na ibili). Balipeshiwe amano no kupapushiwa saana . 43Alibakonkomeshe ukwebati peba uwakwishiba pali ici. Elo alibebele ukumupelako ifyakulya.
61Alile ukufuma kulya no kuya ku mushi kwabo, na basambi bakwe balimukonkele. 2Ulo ubushiku bwe Sabata bwafikile, alisambilishe mu sunagoge. Abantu abengi balimumfwile kabili balisungukile. Balilandile ati, "Nikwi afumya aya masambilisho?" "Mano nshi ayapelwa kuli ena?" "Fisungusho nshi ifi akocita ne minwe yakwe?" 3"Bushe uyu tali kapala wa mbao, umwana mwaume wakwa Maria kabili munyina wakwa Yakobo na Yose na Yuda na Simone? Bushe ba nkashi yakwe tatwaba nabo kuno?" Balikalifiwe na Yesu.4Nolu Yesu alilandile kuli bena ati, "Kasesema tabulwa mucinshi, kano fye umo afyalilwe na kuli balupwa lwakwe na ba ng'anda yakwe." 5Tacitile ifisungusho fimbi, kanofye ukubika indupi pa bantu abanono abalwele no kubaposha. 6Alisungwike pakubulwa ukucetekela kwabo. Nolu alile akoshinguluka mumishi kukusambilisha.7Nolu alikutile abekumi na babili no kubatuma babili babili, kabili alibapele nsambu pa mipashi ya kukowela, 8kabili aliba konkomeshe ukukana piita nangu cimo palwendo lwabo, kanofye inkonto - umukate iyo , icola iyo, no lupiya iyo mu mishipi yabo - 9kanofye ukufwala indyato, no kukana fwala amalaya yabili.10Alilandile kuli bena ati, "Lyonse ulo mwaingila mung'anda, mukalekwikalilila mpakafye mukafumeko no kuya. 11Umfwa umushi uuli onse taumisengele nangu ukukutika kuli mwebo, ulo mwafumako ku ncende iyo, mukunte ulukungu ku makasa yenu ngo bunte kuli bena.''12Balile no kubilikisha ukwebati abantu bafwile ukulapila. 13Balitamfishe ingulu ishingi, no kusuba abalwele abengi na mafuta no ku baposha.14Imfumu Herode yalyumfwile ifi, pantu ishina lyakwa Yesu lyalilumbwike. Bamo balikulanda abati, "Yohane kabatisha alibukile kubafwa, kabili emulandu wine aya amaka ya fisungusho yakobombela muli ena." 15Bambi balikulanda ati, "Ni Eliya." Bambi nabo abati, "Ni kasesema, kubati ni umo pali bakasesema ba nshita ya kale."16Lelo ulo Herode aumfwile ifi alilandile ati; "Yohane, untu naputwile umutwe alibukile." 17Pantu Herod alitumine abakuya kwikata Yohane no ku muposa mucifungo pamulandu wakwa Herodia (Umukashi wakwa Filipo munyina), Pamulandu wakwebati alimupile.18Pantu Yohane alyebele Herode ati, "Tacilungeme webo ukupa umukashi wakwa ndume yobe." 19Lelo Herodia alimufulilwe kabili alikufwaya ukumwipaya; lelo alifililwe, 20pantu Herode alikutina Yohane; alishibile ukwebati ali mulungami kabili muntu washila, kabili alimusungile bwino. Ukukutika kuli ena alepeshiwa mano nganshi, lelo alikumumfwa no kusekelela.21Elo inshita iyayana yafikile ulo Herode alikusefya ubushiku bwakufyalwa kwakwe kabili alipangile umutebeto kubantu bakwe na bacilolo na bakalamba bafita ne ntungulushi shamu Galili. 22Umwana mwanakashi wakwa Herodia alishile no kubacindila, kabili alitemwine Herode na beni bakwe, Imfumu yalilandile ku mukashana, "Lomba icili conse ico ukofwaya kuli nebo kabili nkokupela."23Alilapile kuli ena ukulanda ati, "Conse ico ukolomba kuli nebo, nkokupela ukufika nakuli citika wa bufuma bwandi." 24Alifumine panse no kuya kwipusha nyina ati, "Findo nkomulomba?" Nyina alilandile ati, "Umutwe wakwa Yohane kabatisha." 25Apopene alibwekelemo ku mfumu, nokuya kulomba, ukwebati, nkofwaya mumpele, apapene, umutwe wakwa Yohane kabatisha pa nsani iya mbao."26Nangula ici casakamike imfumu, yalifililwe ukukana ico alombele pantu yalilapile mulapo na pamulandu wa beni baiko. 27Eco imfumu yalitumine umushilika waiko ukufuma pali bakalinda no kumukonkomensha ukwebati kalete umutwe wakwa Yohane. Umushilika aliile nokuya kumuputula umutwe mucifungo. 28Aliletele umutwe pa nsani iya kuselebala iya mbao no kuupela ku mukashana nao umukashana alipele nyina. 29Ulo abasambi bakwe baumfwile balishile no kwisa kusenda icitumbi cakwe, nokuya kushika mu nshishi.30Abatumwa balishile capamo na Yesu no kumulondolwela fyonse ifyo bacitile no kusambilisha. 31Nolu alilandile kuli bena ati, "Iseni natulekuya akatalamukila ku ncende iishingemeko no kutushako.'' Pantu abengi balikwisa no kuya, kabili tabakwetepo ne nshita ya kulya 32Eco balile abene beka mu bwato ku ncende iya kutalala.33Lelo balibamwene uko balikuya na bengi balibeshibile, kabili balibutukile capamo pa nkasa ukufuma mu mishi shonse, no kubatangilila no kuyakufika bwangu pali bena. 34Ulo bafikile ku mbali ya mu mana, alimwene ibumba ilikalamba kabili alibakwatile inkumbu pantu balikumoneka kubati ni mpanga ishakubula kacema. Eco alitendeke ukubasambilisha ifintu ifingi.35Ulo bwailile, abasambi bakwe balishile kuli ena no kulanda ati, "Ino ni ncende ya matololo kabili ne nshita ilipwile. 36Batamfyeni balekuya mu ncende sha mupepi na mumishi nokuya kushitako ifilyo fyakwisakulya abene."37Lelo alibasukile no kulanda kuli bena ati, "Mwebo bapeleni ifilyo." Balilandile kuli ena ati, "Bushe tuye kushita imikate palupiya lwa myanda ibili no kubapela balye?" 38Alilandile kuli bena ati, "Mukwete imikate inga? Kabuyeni no kumona." Ulo bailekumona balilandile ati, "Imikate isano ne sabi libili."39Alikonkomeshe abantu bonse ukwikala mu mabumba panshi pafyani fya katapa-katapa. 40Balikele panshi mu mabumba ya myanda na mu makumi yasano. 41Alibulile imikate isano ne sabi libili, kabili alipunamine mu mulu alipalile no kumokaula umukate no kupela ku basambi ukuteyanya ku bantu. Kabili alishile kwakanya isabi libili kuli bonse.42Bonse balilile mpaka baikuta. 43Balikushilepo utupimfya twa mikate, imiseke ikumi limo na ibili iyakwisula, no tupimfya twe sabi. 44Bali abaume amakana yasano abalile imikate.45Palyapenefye alyebele abasambi bakwe ukupatama mu bwato no kutangilako ukuya kwishilya,ku Betsaida, elo alisalangenye ne bumba. 46Panuma abashile, alile ku lupili mu kupepa. 47Icungulo califikile, ninshi ubwato buli pakati ka bemba, kabili ena ali eka kululamba.48Alimwene ukweba ati balikushomboka na mabimbi, pantu umwela walibemine. Nakalimo pansa yakulenga isano ubushiku alishile kuli bena, akoenda pali bemba, kabili alikufwaya ukubapitilila. 49Lelo ulo baishile kumumona akoenda pali bemba, balitontokenye ukwebati ali ciwa nokwisa kupunda, 50pantu balimumwene kabili balicushiwe. Palyapenefye alilandile kuli bena nokwisa kubeba ati, "Shipeni! Ninebo! Mwiba na mwenso!"51Alininine nabo mu bwato, no mwela walilekele ukupupa. Balisungukile umupwilapo. 52Pantu babulile ubwishibilo umo imikate yalolele. Lelo, imitima yabo yalikosele.53Ulo baabukile kwishilya, balifikile pa mpanga ya Genesarete kabili balikakile ubwato. 54Ulo bafumine mu bwato, abantu balimwishibe apo penefye, 55kabili balibutukile mu citungu conse no kutendeka ukulaleta abalwele pa matanda yabo konse uko balikumfwa ukwebati eko ali.56Lyonse ulo aleingila mu mishi, nangu mu misumba, nangu mu calo, balikubika abalwele mufisankano. Balimupapatile ukwebati abasuminishe ukwikata ku mpela yelaya lyakwe, kabili bonsefye abali kumwikata balipolele.
71Aba Farise na bamo bakalemba abafumine ku Yerusalemu bali mushingululwike.2Balimwene ukwebati bamo abasambi bakwe balilile umukate ku minwe iyabula ukusangululwa, iya kubula ukusambako. 3(Ico abaFarise na baYuda bonse tabalikulya ukwabula ukusamba ku minwe bwino - bwino, pantu cali cishilano ukufuma ku bakalamba babo. 4Ulo abaFarise bafuma pa cisankano, tabalikulya kanofye baisambika, kabili balikatilila ku fintu ifingi ifyo bapokelela, pamo nga ukusuka inkombo , imitondo, ifipe fya mikuba, na fyonse ifyo bali kulilapo.)5AbaFarise na bakalemba balipwishe Yesu ati, ''Nindo abasambi bobe tabakoendela umwabela icishilano ca bakalamba, lelo bena bakolya umukate wabo ne minwe yakubula ukusangululwa?''6Lelo alibebele ati, ''Esaya kasesema aliseseme bwino pali mwebo ba bumbimunda. Ngefyo calembwa ukwebati, 'Aba bantu balincindikilefye ne milomo yabo, lelo imitima yabo yaba ukutali na nebo. 7Banshinshimuna apafye, ukusambilisha ifipope fya bantu kubati efintu basuminamo.'8Mukosha amafunde yakwa Lesa no kukonka ifishilano fya bantu." 9Nakabili ali bebele ati, "Mukana shani bwino amafunde yakwa Lesa ukwebati mwingabaka ifishilano fyenu! 10Pantu Mose alilandile ati, 'Cindika wiso na noko,' Kabili, 'Noyo uulanda ifyabubi pali wishi na nyina icine cinefye ali no kufwa.'11Lelo mulanda ukwebati, 'Umfwa umuntu alanda kuli wishi na nyina ati, ''Ico conse ica bwafwilisho ubo mwapokelele kuli nebo ni Korbani,'' (emukulanda ati, 'Cabupe'), 12ninshi tamukomusuminisha ukucita icili conse kuli wishi nangu kuli nyina. 13Mukolenga icebo cakwa Lesa ukuba ica fye ku mulandu wa cishilano cenu ico mwashilana. Na fimbi fintu ifyakupalana ifyo mucita.''14Alikutile ibumba nakabili no kulanda kuli bena ati, ''Kutikeni kuli nebo, mwebo bonse, no kwiluka. 15Tapali nangu cimo icifuma kunse ya muntu icinga mukowesha umfwa caingila muli ena. Nifilya fifuma mu muntu efimukowesha .'' 16Umuntu uuli na matwi yakumfwa na omfwe.17Nomba ulo Yesu ashile ibumba no kwingila mu ng'anda, abasambi bakwe balimwipwishe palwa mulumbe. 18Yesu alilandile ati, ''Bushe na mwebo mucili tamulailuka? Bushe tamwaishiba ukwebati icingila mu mubili wa muntu ukufuma kunse tekuti cimukoweshe, 19pantu tekuti cingile mu mutima wakwe, lelo fiya munda no kufuma kunse?'' Na pali ukukulanda Yesu alilengele ifilyo fyonse ukusanguluka.20Alilandile ati, ''Nifyo ififuma mu muntu efimukowesha. 21Pantu ukufuma mukati ka muntu, ukufuma mu mutima, emufuma amatontonkanyo ya kubipa, ubulalelale, ukwiba, ukwipaya, 22ubucende, ulunkumbwa, ububifi, ubucenjeshi, bucilende, umufimbila, imiponto, amataki, ubuwelewele. 23Ifya bubifi ifi fyonse fifuma mukati, kabili efikowesha umuntu.''24Alimine ukufuma kulya no kuya ku ncende ya Turi na Sidone. Kulya alile mu ng'anda, kabili talikufwaya nangu umo ukwishiba uko ali, lelo tekuti afisame. 25Lelo apopenefye umwanakashi untu akana kakwe akanakashi kali no mupashi uwakukowela aumfwile palwa ena kabili alishile no kwisakuwa pa nkasa shakwe. 26Nomba uyu mwanakashi ali mu Hela, uwa muluko lwa bena Surofoinike. Alimupapatile ukutamfya ingulu ukufuma mu mwana wakwe umwanakashi.27Alilandile kuli ena ati, ''Leka abana babale balye. Pantu tacayana ukusenda icakulya ca bana no kuposela imbwa.'' 28Lelo alyaswike no kulanda kuli ena ati, ''Ee, mwe Shikulu, ne mbwa shine shilalyako ubufungau ubukoponya bana mwisamba lye tebulo.''29Alilandile kuli ena ati, ''Pamulandu wafyo wa landa, uli muntungwa kabiye. Ingulu ilifumine mu mwana obe umwanakashi,'' 30Alibwelelemo ku ng'anda yakwe no kuyakusanga umwana alilele pa busanshi, ne ngulu ilile.31Nolu alifumineko nakabili ku citungu ca Turi, no kuya kupita mu Sidone ukuya kuli bemba wa Galili no kufika ku citungu ca Dekapoli. 32Baliletele kuli ena umo uwali nkoma matwi kabili ali cimeme talikulanda bwino, kabili balimupapatile ukutambalika ukuboko kwakwe pali ena.33Nolu balimusendele pa mbali ukumufumya pe bumba mu bumfisolo, alibikile utukumo twakwe mu matwi yakwe, nakabili alisakile amate no kwikata ululimi lwakwe. 34Nolu alipunamine mu mulu, no kubwesha icefu, no kulanda kuli ena ati, ''Efifata,'' icikolola mukweba ati, ''Isuka!'' 35Apopenefye amatwi yakwe yalikomonweke, na kalimba ka lulimi lwakwe kaliputwike, kabili alyambile ukulanda bwino.36Yesu alibakenye ukwebako umuntu nelyo umo. Lelo ulo alikubakonkomesha, elo bacililemo ukulisabankanya. 37Balipapwike sana, ukulanda ati, ''Alicitilefye ifintu fyonse bwino. Kabili akolenga na nkomya ukumfwa ne cimeme ukulanda.''
81Muli shilya nshiku, kwali kabili ibumba ilikalamba, kabili tabakwete filyo ifili fyonse.Yesu alikutile abasambi bakwe no kulanda kuli bena ati, 2"Ndikwatile bumba inkumbu pantu inshiku shitatu balitwalilile ukuba nanebo kabili ukwabula ukulya nangu cimo. 3Umfwa nabeba ukuya ku mayanda yabo ukwabula ukulya, kuti bafwa ulushile munshila. Bamo bafumine ukutali." 4Abasambi bakwe balimwasukile ati, ''Nipi tukosanga imikate iingi muno mu matololo ifya kuti aba bonse abantu bekute?''5Alibepwishe ati, ''Bushe mikate inga mukwete?'' Balilandile ati, ''Cinelubali.'' 6Alyebele ibumba ukwikala panshi. Alibulile imikate cinelubali, no kutasha, kabili aliimokawile. Alipele ku basambi bakwe ukupekanya, kabili balipele kwi bumba.7Kabili balikwete utusabi utunono, na panuma ya kutasha, alikonkomeshe abasambi ukubapela nefi fine. 8Balilile kabili balikwite, kabili balikolonganike utupimfya utwashelepo, imiseke iikalamba cinelubali. 9Kwali abantu napamo amakana yane. Elo alibalekele baye. 10Napopenefye alipateme mu bwato na basambi bakwe, kabili baile mu citungu ca Dalmanuta.11Elo abaFarise balifumine panse kabili balitendekele ukutalikana nankwe. Balikufwaya icishibilo kuli ena icakufuma mu mulu, ku kumwesha. 12Alibweseshe icefu mu mutima wakwe nokweba ati, ''Nindo ino nkulo iko fwaila icishibilo? Mucine nkolanda kuli mwebo ati, inkulo ino tayakapelwe icishibilo." 13Nolu alibashile, alininine mu bwato nakabili, no kuya kwishilya.14Nomba abasambi balilabile ukusenda imikate. Tabakwete umukate ukucila pali umo mu bwato. 15Alibakonkomeshe, ukulanda ati, "Cenjeleni ku citutumushi ca baFarise ne citutumushi ca kwa Herode."16Abasambi balitalikene umo no munankwe pakukana kwata umukate. 17Ulo aishibefi, alibepwishe ati, ''Nindo mukotalikanina ukweba ati tamukwete mukate? Bushe tamukomona nangu ukwiluka? Bushe mulikwete imitima iyakukosa?18Mulikwete amenso, bushe tamukomona? Mulikwete amatwi, bushe tamukoumfwa? Bushe tamukoibukisha? 19Ulo na mokawile imikate isano ku bantu amakana yasano, Bushe miseke inga mwalonganike iyaisulamo imikate?" Balilandile kuli ena ati, "Ikumi na ibili."20''Ulo na mokawile imikate cinelubali kuba makana yane, bushe miseke inga iyabufungau iyo mwalonganike?'' Balimwebele ati, ''Cinelubali.'' 21Alilandile ati, ''Bushe na nomba tamukoiluka?''22Balifikile ku Betsaida. Abantu kulya baliletele umuntu uwali mpofu kabili balipapete Yesu ukumwikata. 23Yesu alikete umuntu wali mpofu pa kuboko noku mutwala kunse ya mushi. Ulo asakille amate mu menso yakwe no kubika indupi shakwe pali ena, alimwipwishe ati, ''Bushe ukomonapo ifili fyonse?''24Aliloleshe , nokulanda ati, ''Nkomona abantu abakomoneka kubati fimuti fikoenda.'' 25Elo nakabili alibikile indupi shakwe pa menso yakwe, no muntu aliswile amenso yakwe, ukumona kwakwe kwalibwelelepo, kabili alimwenekeshe ifintu bwino. 26Yesu alimulekele ukuya ku mwabo no kumweba ati, ''Wiingila mu mushi.'27Yesu alifumine na basambi bakwe ukuya mu mishi ya mu Kaisarea Filipi. Na mu nshila alipwishe abasambi bakwe, ''Bushe abantu beba ati ninebo nani?'' 28Nabo balimwaswike abati, ''Yohane kabatisha. Bambi nabo ati, 'Eliya,' na bambi, 'Umo uwa muli bakasesema.''''29Alibepwishe ati, ''Lelo mwebo mweba ati ninebo nani?'' Petero alimwebele ati, ''Nimwe Kristu.'' 30Yesu alibasokele ukukana eba umuntu nangu umo palwa ena.31Alitendeke ukubasambilisha ati Umwana wa Muntu alingile ukucula mu fintu ifingi, no kusulwa ku bakalamba na bashimapepo bakalamba naba kalemba, kabili akepaiwa, na panuma ya nshiku shitatu akabuka. 32Alilandile palwa mbila palwalala. Nolu Petero alimusendele pambali no kutendeka ukumukalipila.33Nomba Yesu alipilibukile no kulolesha pa basambi bakwe kabili alikalipile Petero nokulanda ati, ''Kabiye kunuma yandi, Satana! Taukobika amano yobe pa fintu fyakwa Lesa, lelo pa fya buntunse.'' 34Elo akutile ibumba na basambi bakwe capamo, no kubeba ati, ''Umfwa umo akofwaya ukunkonka, afwile ukuikana umwine, asende icapinda cakwe no kunkonka.35Pantu onse uukofwaya ukupususha umweo wakwe akaulofya, lelo onse uulofya umweo wakwe pamulandu wa ine na pa mbila nsuma akaupususha. 36Bunonshi ndo buli mu muntu ukunonka icalo conse no kulofya umweo wakwe? 37Cindo umuntu engapela mukukabushanya no mweo wakwe?38Onse uungumfwila insoni ne fyebo fyandi muli ino nkulo ya bucende no lubembu, Umwana wa Muntu akamubela insoni ulo akabwela mubukata bwa kwa Wishi pamo na bamalaika abamushilo."
91Alilandile kuli bena ati, "Mucine nkomweba nati, palipo bamo pali mwebo mwebeminine pano abasha kasonde imfwa ilyo tabalamona ubufumu bwakwa Lesa bukoisa na maka. 2Awe ulo papitile inshiku mutanda, Yesu alisendele Petero na Yohane na Yakobo no kunina nabo pa lupili ulutali, ku mbali beka. Nolu alyalwike pa cinso cabo, 3Ifyakufwala fyakwe fyalyalwike, ifyakubuta tutu, ukubutisha ukucila ifyo ulubuto lwa pano isonde lwinga butisha.4Nolu Eliya na Mose balimonekele kuli bena, kabili balikulanda na Yesu. 5Na Petero alilandile kuli Yesu ati, "Rabi, cabune fwebo ukuba pano, eco kanshi tulekeni tukulepo imitanda itatu umo wenu, umo wakwa Mose, na umo wakwa Eliya." 6(Pantu taishibe icakulanda, ico balitine nganshi.)7Kwalishile ikumbi no ku bafimba. Nolu ishiwi lyalifumine mwi kumbi likotila aliti, "Uyu e Mwana wandi uwatemwikwa. Mulekumumfwila." 8Mukupumikisha, ulo bacebwike, tabamwenepo nangu umo uwali nabo, lelo Yesu eka.9Ulo balikutentemuko lupili, alibakonkomeshe ukutalondolwelako umuntu nangu umo ifyo bamwene kano fye ulo Mwana wa muntu akema ku bakufwa. 10Eco balisungile ifyebo ifi pakati kabo, lelo balikulanshanya abene beka umo ''ukubuka kubakufwa" kwingalola.11Balimwipwishe ati, "Nindo bakalemba balandile ati Eliya afwile ukubalilapo ukwisa?" 12Na ena alandile kuli bena ati, kwena Eliya ewa kubalilapo ukwisa mukubweseshapo ifintu fyonse. Nindo fyalembelwe ati Umwana wa Muntu ali no kucula mu fintu fingi no kusulwa? 13Lelo nkolanda kuli mwebo ati, "Eliya aliisa, kabili balicitile kuli ena fyonse ifyo batemenwe, ngefyo calembelwe pali ena."14Ulo bafikile ku basambi, balimwene ibumba lya bantu ilikalamba, lilibashingulwike, na ba kalemba balikutalikana nabo. 15Kabili apo penefye bamwene Yesu, ibumba lyonse lyalipapile kabili balibutukile kuli ena balamusengelela. 16Alipwishe abasambi bakwe ati, "Nindo mukotalikanapo nabo?"17Umo mwi bumba alimwasukile ati, "Kasambilisha, ndiletele umwana wandi umwaume kuli mwebo. Alikwata umupashi wa bucibulu. 18Ulamwikata kabili ulamufuntula panshi, no kumufumya amafulo kukanwa, alaisumanya na meno, kabili alakosa. Nacipusha abasambi benu ukweba ati ba ufumyemo, lelo balifililwe." 19Nao alibaswike ati, "Mwe nkulo iyakubula icicetekelo, nkekala nenu ukufika ku nshita ndo? Bushe nkashipikisha namwe ukufika lwisa? Muleteni kulinebo."20Balitwele umulumendo kuli ena. Ulo umupashi wa mwene Yesu, apopenefye walimulengele ukusamfula. Umulumendo aliponene panshi alafulukuta no kufumye pofu ku kanwa. 21Yesu aipwishe wishi ati, "Nililali apo ca mutendekele ukubefi?" wishi alilandile ati, "Ukufuma ku bwaice bwakwe. 22Libili libili ulamuposa mu mulilo nangu mu menshi no kufwaya ukumonaula. Umfwa pali ifyo mwingacita, tubeleleniko uluse no kutwafwa."23Yesu alilandile kuli ena ati, "Nga wingacita'? Ifintu fyonse kuti fyacitika kuli uyo uwacetekela." 24Apopenefye wishi wa mwana epakubilikisha no kulanda ati, "Ndincetekele! ngafweni ukukana cetekela kwandi!" 25Ulo Yesu amwene ibumba likobutukilako alikalipile umupashi wakukowela no kuweba ati, we mupashi wa bucibulu no wabu nkoma matwi, nkokweba nati, "Fumamo muli ena, kabili wikabwekeshapo ukwingila muli ena nakabili."26Walipundile no kumusamfula umulumendo apakalamba kabili walifuminemo. Umulumendo amonekele kubati alifwile, eco abengi baebele ati, "Alifwile." 27Lelo Yesu alimwikete kukuboko no kumwimya, no mulumendo aliminine.28Ulo Yesu aingile mu ng'anda, abasambi bakwe balimwipwishe ku mbali ati, "Nindo fwebo twacifililwa ukuutamfyamo?" 29Alilandile kuli bena ati, "Uwa musango uyu tekuti ufume ku kantu kambi iyoo, kanofye kwipepo."30Kabili ulo bafumineko kulya no kupita mu Galili. Talikufwaya nangu umo ukwishiba uko bali, 31pantu ali kusambilisha abasambi bakwe. Alilandile kuli bena ati, "Umwana wa Muntu akopelwa mu minwe ya bantu, kabili bali no ku mwipaya. Ulo ba mwipaya, panuma ya nshiku shitatu akabuka nakabili." 32Lelo bena tabailwike pali aya mashiwi, kabili balitinine ukumwipusha.33Nolu balifikile ku Kapernahumu. Panuma aingile mu ng'anda alibepwishe, "Nindo mwacilalashanya mu nshila?" 34Lelo balifye tondolo. Pantu balikutalikana umo no munankwe ukweba ati umukulu ninani. 35Ulo aikala panshi, alikutile abekumi na babili capamo no kulanda kuli bena ati, "Umfwa umo akofwaya ukuba uwa ntanshi, abe uwa kunuma pali bonse kabili umubomfi wa bonse."36Alibulile akana akanono noku keminika pakati kabo. Alikakumbatile mu maboko yakwe no kulanda kuli bena ati, 37"Uyo onse uwasekelela akana akakubefi ninshi nandi ansekelela, kabili uwa nsekelela tasekele nebo lelo ni uyo uwa ntumine."38Yohane alilandile kuli ena ati, "Mwe kasambilisha, twalimwene umuntu akotamfya ingulu mwishina lyenu kabili twalimukenye, pantu tatukonka." 39Lelo Yesu alyebele ati, "Mwimukanya, pantu takuli nangu umo uwingacita umulimo wa maka mwishina lyandi, kabili alande icabubi panuma.40Pantu uutakopinkana nafwebo ninshi ali kulubali lwesu . 41Pantu uwa mipela ulukombo lwa menshi ya kunwa mwi shina lyandi, pakuba abakwa Kristu, nkomweba icine cine ati, takalofye icilambu cakwe.42Uyo onse uwalenga umo uwa mutunono utwancetekela ukuipununa, camuwamina apakalamba ukumukobeka icimpelo icikalamba mu mukoshi no kumuposa muli bemba. 43Umfwa ukuboko kobe kwakulenga ukuipununa, kuputuleko. Cawamina webo ukwingila mu mweo makunkutu ukucila ukukwata maboko yabili no kuposwa kumbo , mu mulilo uutashima. 4445Umfwo lukasa lobe lwakulenga ukuipununa, luputuleko, cawama webo ukwingila mu mweo uwakulemana ukucilo kuposwa kumbo uli na makasa yabili. 4647Umfwe liso lyobe lyakulenga ukuipununa, lilobolemo. Cawama webo ukwingila mu bufumu bwakwa Lesa ne linso limo ukucila ukuposwa kumbo uli na menso yabili, 48uko imititi yabo taifwa, no mulilo taushima.49Pantu onse akalungwamo umulilo. 50Umucele wa bune, lelo umfwa umucele wasunduka, winga lowa shani? Mukwate umucele muli mwebene, kabili mube aba mutende umo no munankwe."
101Yesu alifumine pali ilya ncende no kuya ku citungu ca Yudea na kubushilya bwa nika ya Yordani, ne bumba lyalishile kuli ena nakabili. Alikubasambilisha nakambi, ifyo abebele ukucita 2Nolu abaFarise balishile kuli ena ku kumwesha no kumwipusha ati, "Bushe calisuminishiwa umulume ukuleka umukashi wakwe?" 3Nao alibasukile ati, "Nindo Mose amikonkomeshe?" 4Balyasukile ati, ''Mose alisuminishe umwaume ukulemba icitupa ca kulekaninapo no kumuleka alekuya."5"Nipa mulandu wa bunkosa mitima yenu amulembele ili funde," efyo Yesu alandile kuli bena. 6"Lelo ukufuma fye ku kutendeka kwa bubumbo, 'Lesa alibalengele umwaume no mwanakashi.'7Pamulandu wa ici umwaume akasha wishi na nyina no kulambatila ku mukashi wakwe, 8nabo babili bakaba umubili umo.' 9Kanshi ico Lesa abika pamo, mwileka umuntu alekanye."10Ulo bali mung'anda, abasambi nakabili balipwishe pali ici. 11Alilandile kuli bena ati, "Onse uwaleka umukashi wakwe no kupa umbi ninshi acita ubucende kuli ena. 12Kabili umfwa mwanakashi aleka umulume wakwe no kupwa ku mwaume umbi, nao acita ubucende."13Nolu baliletele abana abanono kuli ena pakwebati abekatepo, lelo abasambi bakwe balibakalipile. 14Lelo ulo Yesu amwene ifi, alifulilwe no kulanda kuli bena ati, ''Lekeni abana abanono bese kuli nebo, mwibakanya, pantu ubufumu bwa kwa Lesa bwaabo ababa kubati ni bena.15Mucine nkomweba ati, onse uutakapokelele ubufumu bwa kwa Lesa ngo mwana umunono mucine takengilemo." 16Nolu alibulile abana mu maboko yakwe kabili alibapalile ulo abikapo indupi shakwe pali bena."17Ulo atendekele ulwendo, umwaume ali mubutukile no kumufukamina kabili alimwipushe ati, "Mwe Kasambilisha wa Bune, nindo ningacita pakweba ati mpyane umweo wa muyayaya?" 18Yesu alyebele ati, "Nindo ukonjitila ati uwa bune?" Takwaba wa bune kano Lesa fye eka. 19Mwalishiba amafunde: 'Wilakwipaya, wicita ubucende, wilakwiba, wilakupela bukamboni bwabufi, wilakufinsha, cindika wiso na noko.'''20Uyu muntu alilandile ati, "Mwe kasambilisha, fyonse ifi ndabela ukutula ku bulumendo bwandu." 21Yesu alimuloleshe no ku mutemwa. Alilandile kuli ena ati, "Walibulisha icintu cimo. Ufwile ukushitisha fyonse ifyo wakwata no kupela ku balanda, kabili ukakwata ifyuma mu mulu. Elo wise kunkonka." 22Lelo pamulandu wa mashiwi aya alimonekele uwa bulanda nokuya uwalunguluka, pantu alikwete ifyuma ifingi.23Yesu alilolekeshe no kulanda ku basambi bakwe ati, " Ifyo caafya abafyuma ukwingila mu bufumu bwa kwa Lesa!" 24Abasambi balipapile pakumfwa ifyebo fyakwe. Lelo Yesu alilandile kuli bena nakabili ati, "Mwebana, Ifyo caafya ukwingila mu bufumu bwa kwa Lesa! 25Cakwangukapo ingamali akupula mu linso lya nshindano ukucila umukankala ukwingila mu bufumu bwa kwa Lesa.''26Balipapile apakalamba nokulanda kuli cila umo na umo ati, "Ninshi nani uwinga pusuka?" 27Yesu alibaloleshe no kulanda ati, "Ku bantu caliba icakukosa, lelo te kuli Lesa. Pantu kuli Lesa ifintu fyonse fyakwanguka." 28Petero alitendekele ukulanda kuli ena ati, "Lolesheni, twalisha ifintu fyonse no kukonka mwebo."29Yesu alyaswikile ati, "Mucine nkolanda kuli mwebo, takuli uwasha ing'anda yakwe nangu ba ndume nangu ba nkashi nangu nyina nangu wishi nangu abana nangu ifisompe pamulandu wandi ne mbila nsuma 30uutakapokelele imiku umwanda umo mu nshita ino: Amayanda ne ndume ne nkashi na banyina na bana ne fisompe, pamo ne fya kupakaswa, na mu calo cikoisa, umweo wa muyayaya. 31Lelo abengi abantanshi ebakaba aba numa, na banuma bakaba abantanshi."32Bali munshila bakoya ku Yerusalemu, na Yesu alibatangilile. Abasambi balisungukile, nabo abalikunkoka munuma balitinine. Elo Yesu asendele abekumi na babili ku mbali no kubeba ifikoisa ku mucitikila mu kashita akakopalama. 33Moneni, "tukoya ku Yerusalemu, no Mwana wa Muntu akapelwa kuli bashimapepo mukalamba na bakalemba. Bakamupingwila ukufwa no kumupela ku bena Fyalo. 34Bakamutumfya, ukumusakila amate, ukulopaula, no ku mwipaya. Lelo panuma ya nshiku shitatu akabuka."35Yakobo na Yohane, bamwana Sebede, balishile kuli ena no kulanda ati, "Mwe kasambilisha, tukofwaya mutucitileko ifyo tukomilomba." 36Alilandile kuli bena ati, "Nindo mukofwaya nebo mucitile?" 37Nabo balandile ati, "Tusuminisheni ukwikala nemwe mu bukata bwenu, umbi ku kuboko kwa kulyo na umbi ku kuso."38Lelo Yesu alibaswike ati, "Tamwishibile ifyo mukolomba. Bushe mwinga nwina mu lokombo nkanwinamo no kushipikisha mu lubatisho bakambatishamo?" 39Bali mwaswike ati, "kuti twacite co." Yesu alibebele ati, "Ulukombo nkanwinamo mukanwinamo, no lubatisho bakambatishamo, mukabatishiwamo. 40Lelo uwakwikala ku kuboko kwa kulyo kwandi nangu ku kuboko kwandi ukwa kuso tacili candi ukupela, lelo caabo abo baciteyanishisha."41Ulo abasambi bambi ikumi baumfwile palwa ici, balitendeke ukufulilwa Yakobo na Yohane. 42Yesu alibakutile ukwisa uko ali no kubeba ati, "Mwalishiba ifyo abo ababa bakateka pa bena Fyalo babanyantilila, na ba filolo ba pa mulu babomfya amaka pali bena.43Lelo tacakabe muli iyi nshila pali mwebo. Uyo onse uukofwaya abe umukulu pali mwebo afwile aba umubomfi wenu, 44noyo onse uukofwaya ukuba uwa ntanshi afwile aba musha wa bonse. 45Pantu Umwana wa Muntu taishile mukumupyungila, lelo mukupyunga, no kupela umweo wakwe bulilambo bwa bengi."46Balishile ku Yeriko. Ulo afumine ku Yeriko na basambi bakwe ne bumba ilikalamba, umwana mwaume wa kwa Timeo, Bartimeo, uwali impofu kalombalomba, alikele mu mbali ya musebo. 47Ulo aumfwile ukweba ati ni Yesu umwina Nasarete, alitendeke ukupunda no kulanda ati, "Yesu, Mwana Dabidi, mbeleleni uluse!" 48Abengi balikalipile umwaume mpofu, ukumweba ukutalala. Lelo alibilikishe ukucilapo, "Mwana Dabidi, mbeleleni uluse!"49Yesu aliminine no kukonkomesha ukumukuta. Balikutile mwaume mpofu, ukweba ati, "Shipa! Ima! Akokukuta." 50Aliposele pa mbali ilaya lyakwe, alicilwike, kabili alishile kuli Yesu.51Yesu alimwasukile no kweba ati, "Nindo ukofwaya nkucitile?" Impofu iyaume nayo yalyaswike ati, Raboni, nkofwaya ukumona." 52Nolu Yesu alilandile kuli ena ati, "Kabiye. Icicetekelo cobe cakuposha." Napopenefye alitendeke ukumona, kabili alimukonkele mu musebo.
111Nomba ulo baishile ku Yerusalemu, balipaleme ku Betfate na ku Betani pa lupili lwa Miolife, kabili Yesu alitumine abasambi bakwe babili 2kabili alibebele ati, "Kabiyeni mu mushi uuloleshenye na fwebo. Amukengilafye mulya, mukosanga umwana wa mpunda uusha ninwapo. Mu mukakule no ku muleta kuli nebo. 3Umfwa umo alande kuli mwebo ati, 'Nindo mukocitile fi?' mu mwebe ati, 'Shikulu ako mukabila kabili akobwesha mukwangufyanya."'4Balile no kuya kusanga umwana wa mpunda balimukakile pa mwinshi ku mbali ya musebo, kabili balimukakwile. 5Bamo abantu baimininepo palya balilandile kuli bena ati, "Nindo mukocita, mukokakula umwana wa mpunda?" 6Balibelele ifyo Yesu alandile, na bantu balibalekele baya.7Ekuleta umwana wa mpunda kuli Yesu kabili ba posele insalu shabo pa mwana wa mpunda, kabili alikelepo. 8Abantu abengi ba yanshike insalu shabo mu musebo, bambi nabo imisambo ya mabula basabile mu mpanga. 9Elo abamutangilile kabili na bashalile balibilikishe ati, "Hosana! Alipalwa uwishila mwi shina lya kwa Shikulu. 10Bwalipalwa ubufumu ubukoisa ubwa kwa Shifwe Dabidi! Hosana mu myulu iyakulepesha!"11Nolu Yesu alingile mu Yerusalemu no kuya mwi tempele kabili alilolekeshe pali fyonse. Nomba pamulandu wa kupwa kwa nshita, alile ku Betani pamo na bekumi na babili. 12Ubushiku bwakonkelepo ulo balikuya ukufuma ku Betani, alyumfwile nsala.13Pakumona icimuti ca mukunyu akatalamukila icakwete amabula, alileko no kumona umfwa kuti asangako icisabo ku cimuti, ulo afikile pa cimuti, asangile takuli nangu cimo kanofye amabula, pantu tayali ni nshita ya fisabo. 14Alilandile kuli cena ati, "takwakatale akuba nangu umo uukalyako kuli webo icisabo nakabili." Na basambi bakwe balyumfwile ci.15balishile ku Yerusalemu, kabili alingile mwi tempele no kutendeka ukutamfya abalikushitisha na balikushita mwi tempele. Alipilibawile ne fintamba fya bakakabusha wa ndalama ne fipuna fya bakashitisha ba nkunda. 16Tasuminishe nangu umo ukwingisha icakushitisha mwi tempele.17Alibasambilishe no kulanda ati. "Bushe tacalembwa ati, 'Ing'anda yandi iketwa ing'anda ya mapepo ku nko shonse'? 18Bashimapepo bakalamba na bakalemba balyumfwile ifyo alandile, kabili balifwailishe umusango benga mwipailamo. Ico balikumutina pantu ibumba lyonse lyalipapile ukusambilisha kwakwe. 19Ulo cali icungulo, balifumine mu musumba.20Ulo balikupita mu lucelo, balimwene umukunyu ulyumine ukufika na kumishila. 21Petero alibukishe no kulanda ati, "Rabi, loleshene! Umukunyu mwatipile ulyumine"22Yesu alibaswike ati, "Kwateni icicetekelo muli Lesa. 23Nkomyeba icine nati umfwa umo alanda ku lupili ulu ati, 'Ima no kuiposa muli bemba,' kabili umfwa takotwishika mu mutima lelo asumina ukwebati ifyo alandile fikocitika, na Lesa akacita ifyo fine.24Eco nkomweba nati: Fyonse ifyo mwapepa no kulomba, sumineni ukwebati mulipokelele, kabili fikaba fyenu. 25Ulo mwaiminina no kupepa, mufwile ukwelela conse mukwatile uuli onse, pakwebati Shinwe wa mumulu nao akamyelele ifilubo fyenu." 2627Balishile ku Yerusalemu nakabili. Lintu Yesu alikwenda mwi tempele, bashimapepo bakalamba, bakalemba, na bakalamba balishile kuli ena. 28Balilandile kuli ena ati, ''Nikumaka nshi ucitila ifi fintu, kabili nani wakupele insambu ucitilako ifi?"29Yesu alilandile kuli bena ati, "Nkomipushako ilipusho limo. Njebeni nanebo nkomyeba ku nsambu ncitila ifi finfu. 30Ulubatisho lwakwa Yohane, bushe lwafumine ku mulu nangu ku bantu? Ngasukeni."31Balilanshenye umo babelele no kutalikana kabili balyebele ati, "Umfwa twebe ati, 'ni ku mulu,' akotweba ati, 'Nindo mushamucetekelele?' 32Lelo umfwa twebe ati, 'Kufuma ku bantu,'... ." Balikutina abantu, pantu bonse balishininkishe ukwebati Yohane ali ni kasesema. 33Elo balyaswike Yesu no ku mwebati, "Tatwishibile." Kabili Yesu alilandile kuli bena ati, "Nanebo nshamyebe insambu ncitila ifi fintu."
121Nolu Yesu alitampile ukubasambilisha mu milumbe. Alilandile ati, "Umuntu alilimine ibala lya myangashi, alishingulwisheko ulubao, nokwimba icilindi cakukaminamo umwangashi. Alikulile ulupungu no kushila ibala lya myangashi ku balimi ba myangashi. Nolu alile palwendo. 2Pa nshita yakulinga, alitumine umubomfi ku balimi ba myangashi kukuya kupokako kuli bena ifisabo fya myangashi. 3Lelo balimwikete, balimumine, no ku mutamfya aile iminwe - nkutwa.4Nakabili alitumineko na umbi umubomfi, kabili nao balimucenene mu mutwe no ku musebanya. 5Lelo alitumine na umbi, kabili uyu ena balimwipeye. Balicushishe abengi mu nshila imo ine, ukupuma bamo no kwipaya bambi.6Alishelepo no muntu umo uwakutuma, umwana uwatemwikwa. Ewali uwakulekelesha ukutuma kuli bena. Alilandile ati, 'Bakacindikako umwana wandi.' 7"Lelo abalimi ba myangashi balilandile kuli umo no mubiye ati, 'Uyu empyani. Iseni, na tumwipaye, nefya bupyani fikaba fyesu.'8Balimwikete, balimwipeye, kabili balimuposele kunse ye bala. 9Eco, bushe nindo umwine we bala akacita? Akesa konaula abalimi ba myangashi no kupela ibala kuli bambi.10Bushe tamwa belenga ilembo ili? ilitila ati, 'Ilibwe ilyo bakakula basulile elyo baisakupanga ilyapa cifutu. 11Ici cafumine kuli Shikulu, kabili cipesha mano ku menso yesu.'" 12Panuma ya ifi intungulushi shaba Yuda shalifwailishe inshila shakwikatilamo Yesu pantu balilwike ukwebati ebo alikumina uyu mulumbe. Lelo balikutina ibumba. Eco balimushile kabili balile.13Nolu balitumineko bamo abaFarise na bena Herode ukwebati bamu beleleke ne fyebo. 14Ulo baishile, balimwebele ati, "Kasambilisha, ifyo abantu bakotontokanya tafimikumine pantu tamulanga kapatulula kuuli onse. Mwebo icine cinefye musambilisha inshila yakwa Lesa. Bushe lifunde ukupela umusonko kuli Kaisare nangula iyo? Bushe tufwile ukulipila nangula iyo?" 15Lelo Yesu alishibe bu bumbi munda bwabo no kulanda kuli bena ati, "Nindo mukongesesha? Ndeteleniko indalama yakuti ndoleshepo."16Baliletelepo imo kuli Yesu. Alilandile kuli bena ati, "Bushe cimpasho kabili malembo yakwa ni aya?" Balyasukile ati, yakwa Kaisare." 17Yesu alilandile ati, "Kanshi peleni kuli Kaisare ifintu fyakwa Kaisare, na kuli Lesa ifintu fyakwa Lesa." Awe balimupapile.18Nomba abaSaduki, abalanda ati takwaba kushukuka, balishile kuli ena, Balimwipwishe, ukwebati, 19"Kasambilisha, Mose alitulembele ati, "Umfwa munyina wa muntu afwa kabili asha umukashi, ukwabula umwana, munyina afwile abula mukamunyina, no kufyalila munyina abana.'20Kwali bamunyina cinelubali; uwa ntanshi alyupile kabili alifwile, ukwabula abana. 21Elo uwa cibili alimupile nao alifwile, tashilemo mwana, nowa citatu inshila imo ine. 22Abali cine lubali tabashilemo abana. Pakulekelesha pali bonse, umwanakashi nankwe alifwile. 23Mukushukuka, ulo bakabuka na kabili, akaba mukashi wakwa nani? Pantu ba munyina bonse cinelubali balimupile ukuba umukashi wabo."24Yesu alilandile ati, "Bushe uyu temulandu mwakwatila icilubo, ico tamwaishiba amalembo nangula amaka yakwa Lesa? 25Pantu ulo bakabushiwa ku bafwa, tabakope nangula ukupwa, lelo bakaba kubati ni bamalaika mu mulu.26Lelo palwa bafwa abakabushiwa, bushe tamwabelenga mu citabo cakwa Mose, pa mulandu wa cimpukusa, ifyo Lesa alandile kuli ena no kwebati, 'Ninebo Lesa wakwa Abrahamu kabili Lesa wakwa Isaki kabili Lesa wakwa Yakobo'? 27Te Lesa wa bakufwa, lelo aba mweo. Mwaliluba."28Umo uwa muli bakalemba alishile no kumfwa ifyo balikulanshanya; Alimwene ukwebati Yesu alibaswike bwino. Alimwipwishe ati, "lifunde nshi ilya cindama ukucila yonse?" 29Yesu alyaswike ati, "llyakucindamisha nili 'Umfwa, we Israeli, Shikulu Lesa wesu, Shikulu abafye umo. 30Ufwile ukotemwa Shikulu Lesa obe no mutima obe onse, no mweo obe onse, na mano yobe yonse, na maka yobe yonse.' 31Ifunde lya bubili nili, 'Ulekutemwa umwina mupalamano obe nga fintu waitemwa.' Takuli ifunde ilikalamba ilyakucila pali aya."32Kalemba alilandile ati, "Kasambilisha, wabune! "Mulilandile icine ati Lesa umo, kabili takuli umbi ukucila pali ena. 33Ukumutemwa no mutima onse na ku mucetekanya onse na ku maka yonse, no kutemwa umwina mupalamano nga fintu waitemwa kwa cilapo ukucila ifya ocewa fyonse na malambo." 34Ulo Yesu amwene ukwebati alyaswike bwino, alilandile kuli ena ati, ''Tauli kutali no bufumu bwa kwa Lesa." Panuma ya ifyo, tapali nangu umo uwafwaile ukumwipusha amepusho na yambi.35Lintu Yesu alikusambilisha mwi tempele, alilandile ati, "Bushe ninshi cabela ukwebati bakalemba balanda ati Kristu mwana wakwa Dabidi? 36Dabidi umwine, mu Mupashi wa Mushilo, alilanda ati, Shikulu alilandile kuli Shikulu wandi, "Ikala kukuboko kwa kulyo kwandi nkasuke nkabike abalwani bobe ica kunyantapo amakasa yobe."' 37Dabidi umwine amwita ati, 'Shikulu,' eco Kristu engaba shani umwana wakwa Dabidi?" Ibumba ilikalamba lyalisekelele ukukutika kuli ena.38Mukusambilisha kwakwe Yesu alilandile ati, "Cengeleni na bakalemba, abatemwa ukwenda na malaya ayatali no kulabaposhiwa mu ncende ya mu mishika, 39nokwikala pa fipuna fya bucindami muma sunagoge ne ncende sha kucindama pa mitebeto. 40Kabili balapokolola bamukamfwilwa amayanda, kabili balapepa amapepo ayatali pakwebati abantu ba bamone. Aba bantu bakapokelekela ukusekwa kukalamba."41Kabili Yesu aikela apalungatene ne cipao mu ncende ye tempele; alikulolekesha ifyo abantu balikuposa indalama mu cipao. Abakankala abengi balibikilemo indalama ishingi. 42Nolu mukamfwilwa umo umupina aishile kubikamo tu ndalama twa mukuba tubili, utukwete fye akabukumu kanono.43Alikutile abasambi bakwe no kulanda kuli bena ati, "Mucinefye nkomweba nati, uyu mukamfwilwa umupina abikamo ukucila bonse fye abacisangwila mukuposa mu cipao. 44Pantu bonse bapele ifya mu bwingi bwabo. Lelo uyu mukamfwilwa, ukufuma mu bupina, aliposelemo shonse isho akwete mu bwikashi bwakwe."
131Ulo Yesu alikufuma mwi tempele, umo uwa pa basambi bakwe alilandile kuli ena ati, ''Kasambilisha, lolesheni amambwe yabune ne fikulwa fyabune!" 2Yesu alilandile kuli ena ati, "Bushe ukomona ifi fikulwa ifikalamba? Takuli ilibwe nangu limo ilikashala pa libwe linankwe ilitakapone panshi."3Ulo aikele pa Lupili lwa Miolife apalungatene ne tempele, Petero, Yakobo, Yohane na Andrea balimwipwishe ku mbali ati, 4"Twebeni, bushe nililali ulo ifi fintu fikacitika? Cinshi cikaba icishibilo ulo ifi fintu fyonse fyalapamina ukucitika?"5Yesu alilandile kuli bena ati, Mucenjele ukwebati nangu umo emilufya. 6Abengi bakeshila mwi shina lyandi no kulanda ati, 'Nine ena,' kabili bali no kulufya abengi.7Ulo mukomfwa pa nkondo na ma ngufu - ngufu ya nkondo, mwikatina; ifi fintu fifwile fyacitika, lelo impela tailafika. 8Pantu uluko lukemina uluko, no bufumu bukemina ubufumu. Kukaba ifinkukuma mu ncende ishingi, ne fipowe. Iyi entendekelo ya bucushi bwa pa kupapa.9Mube abalola. Bakamutwala ku filye, kabili mukalopolwa muma sunagoge. Mukeminina ku finso fya bakateka ne shamfumu palwa nebo, ngo bunte pali bena. 10Lelo imbila nsuma ifwile yabilwa ku nko shonse.11Ulo bamwikata no kumipela ku cilye, mwikasamikwa nefyo mufwile ukulanda. Pantu pali ilya nshita, ifyo mufwile ukulanda fikapelwa kuli mwebo; te mwebo mukalalanda, lelo Mupashi wa Mushilo. 12Munyina akapela munyina ku kwipaiwa, na wishi akafutukila umwana wakwe. Abana bakemina abafyashi babo no kubalenga ukwipaiwa. 13Mukapatwa kuli bonse pamulandu we shina lyandi. Lelo uyo onse uukashipikisha ukufika ku mpela, uyo muntu akapusuka.14"Ulo mwamona ica muselu ica makankamike caimanina epo tacilingile ukuba," (lekeni uukobelenga eluke) "lekeni abo abali mu Yudea bafulumukile ku mpili, 15lekeni uyo uuli pa mutenge eya mu ng'anda nangu ukusendamo icili conse, 16kabili lekeni uyo uuli mwibala ebwelela mukusenda insalu yakwe.17Lelo akalanda kubali na mafumo na ba koonsha muli isho nshiku! 18Pepeni ukweba ati cikaba mu nshita ya mpepo. 19Pantu isho shikaba ni nshiku sha kumanama, isho ishishatala ashibako ukufuma ku kutendeka kwa bubumbo, ubo Lesa alengele, ukufika na lelo, iyo, kabili takwakatale akuba nakabili. 20Kanofye Shikulu acefya inshiku, takuli muntunse nangu umo uwingapusuka. Lelo pamulandu wa basalwa, abo abo aisalile, akacefya inshiku.21Nolu umfwa uuli onse alanda kuli mwebo ati, 'Lolesheni, Kristu ali kuno!' nangu 'Lolesheni, uyo ali uko!' mwikasumina. 22Pantu kukesa ba Kristu ba bufi na ba kasesema ba bufi bakalanga ifilangililo ne fisungusho mukulufya, nga cingacitwa, na basalwa. 23Mulekulola! Namyebela limo ifi fintu fyonse.24"Lelo panuma ya bucushi bwa nshiku shilya, 'akasuba kakafimbwa nemfimfi, umweshi tawakapele ulubuto lwa uko, 25intanda shikapona ukufuma mu mulu, ne fya maka ifyaba mu mulu fikatenkanishiwa.' 26Elo bakamono Umwana wa Muntu akoisa mu makumbi na maka yakalamba no bukata. 27Nolu akatuma bamalaika bakwe kabili akalonganika abasalwa bakwe muntupinda tune, ukufuma kumpela ye sonde no kufika kumpela ya mulu.28Sambilileni isambililo ku cimuti ca mukunyu. Ilintu fye umusambo wakwata amabula ayateku no kulukusha amabula ya uko, mwishibe ati amainsa yalipalamine. 29Eco kanshi, ulo mwamona ifintu ifi fikocitika, ishibeni ukuti akoisa ali mupepi, mupepi ne mpongolo.30Mucinefye nkomweba nati, iyi nkulo tayakapite mpaka ifi fintu fyonse fikacitike. 31Umulu ne sonde fikapita, lelo ifyebo fyandi tafyakapite. 32Lelo pali bulya bushiku ne nshita ilya, takwaba uwaishiba, nangu ni bamalaika mu mulu, nangu Mwana, lelo kano Tata.33Cenjeleni! Loleni, pantu tamwaishibile akashita. 34Cili kubati muntu asha ing'anda no kuya kumbi palwendo - asha apela ababomfi bakwe amaka pa ng'anda, cila umo no mulimo wakwe, no kukonkomesha kalinda wa pa mwinshi ukuba uwa kulola.35Eco mube abakulola pantu tamwaishiba ulo shikulu wa ng'anda akesa; na limo ku cungulo, na limo ubushiku pakati, ulo mukolwe alila, nangu ulucelo. 36Umfwa aisa mukupumikisha, mwileka akamusange mulilele. 37Ifyo naeba mwebo efyo nkoeba bonse: Loleni!"
141Nomba kwashele inshiku shibili ku Cakucilila no Mutebeto wa Mukate Uutatutumuka. Bashimapepo bakalamba na ba kalemba balikufwailikisha umwa kwikatila Yesu mu bucenjeshi no ku mwipaya. 2Pantu balikulanda ati, "Tekuti tumwikate pa mutebeto, pantu kuti fyaleta icimfulunganya ku bantu."3Lintu Yesu ali mu Betani mu ng'anda yakwa Simone uwali ne fibashi, ulo ali alikuweme kwi tebulo ku kulya, kwalishile umwanakashi alikwete ne botolo lya alabastere wa mafuta ya mutengo, yali ayeneyene nardi. Alitobele ibotolo no kwitila amafuta ya nardi pa mutwe wakwe. 4Lelo pali bamo abafulilwe. Balikulanshanya umo babelele no kulanda ati, ''Ninshi kwabela ubu bonaushi bwa mafuta? 5Amafuta aya nga yalishitishiwe indalama ishacila pa indalama imyanda amakumi yatatu, no kupela ku bapina.'' Nolu balikalipile umwanakashi.6Lelo Yesu alilandile ati, ''mulekeni umwine. Nindo mwebo mukomucushisha? Alicitile icintu icabune kuli nebo. 7Abapina mwaba nabo lyonse, na lyonse ulo mukofwaya kuti mwabacitila icabune, lelo te lyonse tukaba nemwe. 8Uyu alicitile efyo engacita. Asubila limo umubili wandi amafuta yapa kushikwa. 9Mucinefye nkolanda kuli mwebo nati, konse uko imbila nsuma ikabilwa mu calo conse, uyu mwanakashi ifyo acita fikalalandwapo,mu kumwibukisha.''10Elo Yuda Iscariote, umo uwa mu bekumi na babili, aile kuli bashimapepo bakalamba pakwebati amupele kuli bena. 11Ulo bashimapepo bakalamba baumfwile ifi, balisansamwike kabili balimulaile ukumupa indalama. Alitendeke ukufwaya inshila yakumufutukilamo pakwebati amupele kuli bena.12Pa bushiku bwa kubalilapo ubwa mukate uutatutumuka, ulo bepaya ica kucilila,abasambi balilandile kuli ena ati, ''Nikwi mukofwaya fwebo ukuya kupekanya, ukwebati muyekulya ica kucilila?'' 13Alitumine babili aba mu basambi bakwe no kulanda kuli bena ati, ''kabiyeni mu musumba, mukokumanya umwaume uusendele umutondo wa menshi. Mu mukonke. 14Apo akoya kwingila mu ng'anda, mukonkeni mukati no kweba umwine wa ng'anda, ukweba ati 'Kasambilisha alilanda ati, ''Bushe umuputule wandi uwa beni ulikwi umo tukolila icakulila na basambi bandi?''15Ako mulanga umuputule wa pamulu uukalamba uwabune. Mutupekanishe mulya.'' 16Abasambi balimushile nokuya mu musumba. Balisangile fyonse ifyo alandile kuli bena, kabili bapekenye ica kucilila.17Ulo cali icungulo, alishile na bekumi na babili. 18Elo bakuweme kwi tebulo no kulya, Yesu alilandile ati, ''Mucinefye nkolanda kuli mwebo nati, umo uo tukolya nakwe akomfutuka.'' 19Bonse baliketwe no bulanda, kabili umo na umo balilandile kuli ena abati, "Mucinefye te nebo?''20Yesu alyaswike no kulanda kuli bena ati, "ni umo uwa be kumi na babili, uletobela nanebo mu lunweno. 21Pantu Mwana wa Muntu ali no kuya ifyo calembwa pali ena. Lelo akalanda kuli ulya muntu uyo Mwana wa Muntu akofutukwako! Nga caliweme kuli ena umfwa tafyelwe."22Ulo bali bakolya, Yesu alibulile umukate, ali upalile, no kuumokaula. Alipele kuli bena no kulanda ati, "Buleni. Uyu mubili wandi." 23Alibulile ulukombo, alitotele, no kupela kuli bena,nabo balinwinemo. 24Alilandila kuli bena ati, "Uyu mulopa wandi uwa cipangano, umulopa uukoitikila abengi. 25Icinefye nkolanda kuli mwebo nati, nshakanweko na kabili icisabo ca kuli uyu myangashi mpaka bukafike ubushiku bulya ulo nkanwa icipya mu bufumu bwakwa Lesa."26Ulo baimbile ulwimbo, balile ku lupili lwa Miolife. 27Yesu alilandile kuli bena ati, "Bonse mwebo mukoya, pantu calilembwa aciti, nkoma kacema ne mpanga shikasalangana.'28Lelo panuma ya kubuka kwandi, nkamitangilila ku Galili." 29Petero alilandile kuli ena ati, ''Nangulafye bonse bengaya, nebo iyo.''30Yesu alilandile kuli ena ati, ''Mucinefye nkokweba nati, ilelo - ee, lelolinefye ubushiku - libe mukolwe talalila imiku ibili ukonkana imiku itatu.'' 31Lelo Petero mu maka alilandile ati, ''Nangufye kufwa nenu, nshaka mikane.'' Bonse balilaile icilayo cimo cine.32Balishile ku ncende itwa Getsemani, kabili Yesu alilandile ku basambi bakwe ati, ''Ikaleni pano ulo nkopepa.'' 33Alisendelepo Petero , Yakobo, na Yohane ukuya nabo kabili alitendekele ukusakamikwa no kucushiwa nganshi. 34Alilandile kuli bena ati, ''Umweo wandi uliketwe no bulanda ubukalamba nganshi, uku fikafye naku cipimo cakufwa. Shaleni pano kabili mulekulola.''35Ukuyako akatalamukila, Yesu aliwile panshi kabili alipepele ukwebati umfwa cingacitwa aka akashita ukumupita pali ena. 36Alilandile ati, ''Abba, Tata, ifintu fyonse fyakwanguka kuli mwebo. Fumyenipo ulu lukombo pali nebo. Lelo tekufwaya kwandi, kano ukufwaya kwenu.''37Alibwele kabili asangile balilele, kabili alilandile kuli Petero ati, ''Simone, mulillele? Tekuti mulolefye pa nsa imo? 38Loleni no kupepa pakwebati mwiponena mu matunko. Umupashi mucinefye ukofwaya, lelo umubili ulinakile.'' 39Nakabili alibwelelemo nukuya kupepa,kabili alibomfeshe amashiwi yamoyene.40Ulo abwelele nakabili, alisangile balilele, pantu amenso yabo yalifinine. Tabaishibile ifyakulanda kuli ena. 41Alibwelele umuku wakulenga butatu no kulanda kuli bena ati, ''Bushe mucili mulilele kabili mukotusha? Fyafula! Inshita yafika. Lolesheni! Umwana wa Muntu bako mufutukila mu maboko ya bamasambi. 42Bukeni; natulekuya. Lolesheni, uyo uuko mfutuka alipaleme.''43Ulo acili akolanda, Yuda, umo uwa pa bekumi na babili, alifikile, ne bumba ilikalamba lyali pamo nankwe balikwete bapanga ne nkonto, ukufuma kuli bashimapepo bakalamba, bakalemba, na bakalamba. 44Nomba uwa kumufutuka alibapele icilangililo, ukwebati, ''Uo nalatomona ninshi eo. Mwikateni kabili mumupite no kumusopa.'' 45Ulo Yuda afikile apopenefye alishile kuli Yesu no kulanda ati, ''Rabbi,'' kabili alimutomwene. 46Nolu balimwikete no ku mupita.47Lelo umo uwa muli bena uwaiminine lubali alifumishe ulupanga no kukoma umubomfi wakwa shimapepo mukalamba no kumuputula ukutwi. 48Yesu alilandile kuli bena ati, ''Bushe mwishile kubati mwimine akapondo, na bapanga ne nkonto, mukunjikata? 49Ulo nali nenu cila bushiku kabili nali kusambilisha mwi tempele, ta mwanjikete. Lelo ifi fyalicitikile pakwebati amalembo ya fikilishiwe.'' 50Bonse abo abali na Yesu balimushile no kubutuka.51Umulumendo, uwafwelefye insalu ya kolokondwe iyo iya mukubenye, alikukonka Yesu. Ulo abaume bamwikete, 52alishile ilaya lya kolokondwe kabili alibutukile ubwamba.53Balitwele Yesu kuli shimapepo mukalamba. Kulya balikolongene nankwe pamo bonse bashimapepo bakalamba, abakalamba, na bakalemba. 54Nomba Petero alikubakonka akatalamukila, ukufikafye na mulubansa lwakwa shimapepo mukalamba. Alikele apaikele ifita, akoonta umulilo.55Nomba bashimapepo bakalamba na bonse bashi cilye ba baYuda balikufwaya ubunte bwabufi pali Yesu pakwebati bamwipaye. Lelo tababusangile. 56Pantu abengi baliletele amabunte ya bufi kuli ena, lelo no bunte bwabo tabwasuminike.57Bamo balimine no kuleta ubunte bwabufi pali ena; balilandile ati, 58''Twalimumfwile akolanda ati, 'Nkabongolola ilitempele ilya pangwa ne minwe, na mu nshiku shitatu nkakula limbi ilishapangwa ne minwe.''' 59Lelo no bunte bwabo bwine tabwasuminike.60Shimapepo mukalamba alimine pali bena no kwipusha Yesu ati, '' Bushe taukwete bwasuko? Findo ifi aba bantu bakolanda pali webo?'' 61Lelo alifye tondolo kabili taaswike nangu cimo. Nakabili shimapepo mukalamba alimwipwishe no kulanda ati, ''Bushe niwe Kristu, Umwana Wa Wapalwa?'' 62Yesu alilandile ati, ''Ninebo; kabili ukamona Umwana wa Muntu ulo akekala kukuboko kwa kulyo ukwa maka no kwisa na makumbi ya mumulu.''63Shimapepo mukalamba alilepwile amalaya yakwe no kulanda ati, ''Bushe tucili tukofwaya bakambone? 64Mulyumfwile imiponto. Mukopingula shani?'' Bonse balimusekele nga umo uulingile ukufwa. 65Bamo balitendeke ukumusakila amate no kumufimba pa menso kabili balimumine na makofi no kulanda kuli ena ati, ''Sesema!'' Abashilika balimusendele no kumuma.66Ulo Petero ali mulubansa, umo pa babomfi banakashi abakwa shimapepo mukalamba alishile kuli ena. 67Alimwene Petero akoonta umulilo, kabili alilolekeshe sana pali ena no kulanda ati, '' Nebo wine wali pamo no mwina Nasarete, Yesu.'' 68Lelo alikene, ukwebati, ''Nebo nteshibile nangula ukwiluka ifyo ukolandapo.'' Nolu alifumine no kuya pampongolo. Na mukolwe alililile.69Lelo umubomfi umwanakashi alimumwene kabili alitendeke ukulanda nakabili kuli abo abaiminine palya, ''Uyu mwaume ni umo pali bena!'' 70Lelo alikene nakabili. Panuma fye ya kashita akanono abo abaiminine palya balikulanda kuli Petero ati, '' Mucinefye webo uli umo uwa muli bena, pantu webo nobe wine uli mwina Galili.''71Lelo alitendeke ukuitipwilafye umwine no kulapa, ''Nshimwishibile uyu muntu mukolandapo.'' 72Apopenefye na mukolwe alililile umuku wakulenga bubili. Nolu alibukishe amashiwi ayo Yesu alandile kuli ena ati: ''Ulo mukolwe talalila imiku ibili, ukonkana imiku itatu,'' kabili aliwile panshi no kulila.
151Ulucelo celo, bashimapepo bakalamba, pamo na bakalamba na bakalemba ne cilye conse ica ba Yuda balipandishenye amano. Nolu balikakile Yesu no kumupiita. Balimutwele noku mupela kuli Pilato. 2Pilato alimwipwishe ati, "Bushe uli mfumu yaba Yuda?" Ali mwaswike ati, "Ulilandile ifyo fine." 3Bashimapepo bakalamba balikumutunganya ifintu ifingi.4Pilato nakabili alimwipwishe ati, "Bushe taukopela bwasuko?" Mona ifintu ubwingi bakokutunganya nafyo!" 5Lelo Yesu tali kwasuka Pilato iyo, kabili nefyo fyalimusungwishe.6Nomba pa nshita ya mutebeto, ilingi Pilato alikulekelelako kuli bena umufungwa umo, umufungwa uo balikufwaya abene. 7Kabili kwali umuntu uwalikwitwa Baraba mu cifungo na ba cisanguka abali ne milandu ya kwipaya mu nshita ya busangu. 8Ne bumba lyalishile kuli Pilato kabili balitendeke ukumwipusha ukubacitilako ifyo alikucita na mu nshita sha kale.9Pilato alibaswike no kubeba ati, "Bushe mukofwaya nebo mikakwileko Imfumu yaba Yuda?" 10Pantu alishibe ukwebati ni pamulandu wa kalumwa bashimapepo bakalamba bapelele Yesu kuli ena. 11Lelo bashimapepo bakalamba balisongelekenye ibumba ukubilikisha ukwebati kanshi Baraba eo akakulwe.12Pilato alibasukile nakabili no kubeba ati, "Nindo nkocita ne Mfumu yaba Yuda?" 13Balibilikeshe na kabili abati, "Mutanikeni!"14Pilato alilandile kuli bena ati, "Bubi ndo acitile?" Lelo balicilimofye ukubilikisha ati, "Mutanikeni." 15Pilato alikufwaya ukusekesha ibumba, eco alibakakwilile Baraba. Alifupawile Yesu kabili alimupele ukuya kutanikwa.16Abashilika bali mutwele mukati ka lubansa (ulo ulwali cipango ca buteko), kabili balikutile ne mpuka yonse iya bashilika. 17balimufwikile Yesu no mwingila wa kukashikila, kabili balipikwile ne cilongwe ca myunga no kumufwika. 18Balitendeke no kumuposha kapuni - kapuni ukwebati, "Mulopwe, we Mfumu yaba Yuda!"19Balimumine ku mutwe ne cetete no kumusakila amate. Balifukeme no kukontama pali ena. 20Cilya bamupumya, balimufulile umwingila wa kukashikila no kumufwika amalaya yakwe, kabili bali mupitile no kuya mukumutanika. 21Umwaume umo, Simone waku Kurene ali akoisa ukufuma mu mpanga (ali ni wishi wakwa Alekesandere na Rufu), kabili balimupatikishe ukumusendelako icapindama.22Abashilika baliletele Yesu pa ncende iyo balikwita Golgota ( icalola mukwebati "Incende ya Cipanga"). 23Balimupele umwangashi wasankana na muri, lelo taunwine. 24Balimutanike kabili balyakene amalaya yakwe pakuteya ifyakupendula pakwishiba cila mushilika icipimfya akosenda.25Yali ni nsa yakulenga shitatu ulo bamutanike. 26Pa cishibilo balilembelepo umulandu wakwe ati, "Imfumu yaba Yuda." 27Pamo nankwe balitanikilepo utupondo tubili, kamo ku kulyo nakambi nako ku kuso kwakwe. 2829Na balikupita balimusalwile, balikupukunya ne mitwe no kulanda ati, "Tepapa! Webo we wingatoba itempele no kulikula mu nshiku shitatu, 30ipusushe kabili ikila pa capindama!"31Munshila imo ine bashimapepo bakalamba balikumupumya umo no munankwe, pamo na bakalemba, no kweba ati, "Alipuswishe bambi, lelo tekuti aipusushe umwine. 32Lekeni Kristu, Imfumu yakwa Isaeli, ikile nomba ukufuma pa capindama, pakwebati tumone no kusumina.'' Balya batanikilwe pamo nankwe nabo balimusalwile.33Pa nsa yakulenga mutanda, kwalishile kuba imfinshi pa calo conse ukufika na ku nsa yakulenga pabula. 34Na pa nsa yakulenga pabula Yesu alililile ne shiwi likalamba ati, " Eloi, Eloi, lama sabaktani?" Icilepilibula ukwebati, "Lesa wandi, Lesa wandi, nindo mwandekelesesha?" 35Kabili bamo abaiminine mupepi balyumfwile amashiwi yakwe no kwebati, "Moneni, akokuta Eliya."36Umbi alibutwike, ukuya kubika umwangashi wakukantuka ku mwepu, uwali kwitete, no kumupela ukwebati anwe. Umwaume alilandile ati, "Lekeni tumone umfwa Eliya akoisa kumwikisha panshi." 37Kabili Yesu alililile umusowa uukalamba kabili alifwile. 38Ne cisalu ca mwi tempele calilepwike ukufuma pa mulu ukufika panshi.39Ulo umukalamba wa bashilika uwaiminine aliloleshe Yesu alimwene umusango afwililemo, alilandile ati, "Cinefye uyu muntu ali Mwana wa kwa Lesa." 40Kabili kwali bana mayo abalikulolesha akatalamukila, Palibo pali Maria umwina Magadala, Maria (Nina wakwa Yakobo umwaice na Yose), na Salome. 41Ulo ali mu Galili balimukonkele no kumupyungila. Na ba namayo abengi balishile nankwe ku Yerusalemu.42Ulo icungulo cafika, pantu bwali Bushiku bwa Kupekanya, ekwebati, ubushiku bwatangilila Isabata, 43Yosefe waku Arimatea alishile palya. Alipelwe umucinshi paba mucilye uwali kulolela ubufumu bwakwa Lesa. Alingile mukushipa kuli Pilato no kulomba umubili wakwa Yesu. 44Pilato alipapile ukwebati Yesu alifwile kale, alikutile umukalamba wa bashilika no ku mwipusha umfwa Yesu alifwile.45Ulo Pilato aishiba ukufuma ku mukalamba wa bashilika ukwebati Yesu alifwile, alipele umubili kuli Yosefe. 46Yosefe alishitile insalu ya kolokondwe. Alimwikishe ukumufumya pa capindama, amukubanya mu nsalu ya kolokondwe, no kumulalika mu nshishi iya imbwa mwi libwe. Elo akunkulushishapo ilibwe pa mwinshi wa nshishi. 47Maria umwina Magadala na Maria nina wakwa Yose balimwene incende epo bashikile Yesu.
161Ulo Isabata lyapitile, Maria umwina Magadala, Maria nyina wakwa Yokobo, na Salome balishitile ifya cena cabune pakweba ati baye kusuba umubili wakwa Yesu. 2Ulucelo celo pa bushiku bwa ntanshi ubwa mulungu, balile ku nshishi ulo akasuba katulile.3Balikulanda kuli umo no munakwe ati, ''Ninani akoya kutukunkulushishapo icilibwe pa mwinshi wa nshishi?'' 4Ulo balolekeshe, balimwene ati icilibwe cili kunkulushiwepo, pantu calikulishe.5Balingile mu nshishi no kumona umulumendo uwafwele ilaya lya kubuta, alikele ku kulyo, balitinine. 6Alilandile kuli bena ati, ''Mwitina. Mukofwaya Yesu, umwina Nasarete, uwatanikwe. Alibukile! Tali muno. Lolesheni apo bamulalike. 7Lelo kabiyeni, muyekweba abasambi bakwe na Petero, 'Akomitangilila ku Galili. Kulya eko mukamumona, ngefyo amyebele.'''8Balifumineko no kufulumuka ku nshishi; balikututuma kabili balipeshiwe amano. Tabaebeleko umuntu nangu umo pantu balitinine nganshi.9Lucelo celo pa bushiku bwa ntanshi ubwa mulungu, panuma ya kubuka, abalilepo ukumonekela kuli Maria umwina Magadala, uo Yesu atamfishemo ingulu cinelubali. 10Alile no kuya kweba abo ali nabo, ulo balikulosha no kulila. 11Balyumfwile ati wa Mweo kabili ali mu mwene, lelo tabasumine.12Panuma ya ifi fintu alimonekele mu musango wa ibela kuli babili ulo balikwenda mu mpanga. 13Balibwekelemo no kuya kushimikilako abanabo, lelo tababasumine.14Panuma Yesu alimonekele kube kumi na umo ulo bakuweme kwi tebulo ku kulya, kabili alibakalipile pakukana cetekela kwabo na bunkosa mitima bwabo, pantu tabacetekele abo abamumwene ulo abukile ku bafwa. 15Alilandile kuli bena ati, ''Kabiyeni mu calo conse, no kubila imbila nsuma ku fibumbwa fyonse. 16Uyo onse uwacetekela no ku batishiwa akapusuka, lelo uushakacetekele akasekwa.17Ne fishibilo ifi fikakonka abacetekela: Mwishina lyandi bakatamfishamo ingulu. Bakalandila na mundimi shimbi. 18Bakekata insoka ku minwe, kabili umfwa banwa icili conse icakubepaya, tacakabacite akabi. Bakabika indupi shabo pa balwele nabo bakaposhiwa.''19Panuma Shikulu Yesu apwile ukulanda nabo, alisendelwe alile mu mulu no kwikala ku kuboko kwa kulyo kwa kwa Lesa. 20Abasambi balile kabili balishimikile konse, na Shikulu alikubombela pamo nabo no kushininkisha icebo kufishibilo ifyali kubakonka.
