¹ Paulo, uwakutilwe na Kristu Yesu ukubo mutumwa kukufwaya kwakwa Lesa, na Sostene munyinefwe, ² ku lukuta lwa kwa Lesa ulwa mu Korinti, abo abasangulwilwa muli Kristu Yesu no kwitwa abantu ba mushilo, pamo na bonse abali muncende shonse abo abeta peshina lyakwa Shikulwifwe Yesu Kristu, uuli Shikulu wabo kabili uwesu. ³ Ukusenamina no mutende fibe kuli mwebo ukufuma kuli Lesa Shifwe na Shikulu Yesu Kristu. ⁴ Nebo lyonse ndapelo kutasha kuli Lesa wandi pali mwebo pamulandu wa kusenamina kwa kwa Lesa uko Kristu Yesu apele kuli mwebo. ⁵ Alimilengele mwebo ukuba abakankala munshila shonse, mukulanda konse na mukwishiba konse, ⁶ nga filya ubunte bwapali Kristu Ubwa shininkishiwa ubwacine pakati kenu. ⁷ Eco mwebo tamwabulisha icabupe ca mupashi ulo mukololela ukusokololwa kwakwa Shikulwifwe Yesu Kristu. ⁸ Kabili akamikosha ukufika ku mpela, pakwebati mwebo mukabe abakaele pabushiku bwakwa Shikulwifwe Yesu Kristu. ⁹ Lesa wacishinka, uyo wamikutile mwebo mwi senge lya Mwana wakwe, Yesu Kristu Shikulwifwe. ¹⁰ Nomba nkomipapata mwebo, bamunyinane, mwishina lyakwa Shikulwifwe Yesu Kristu, ukwebati mwebo bonse musumine, no kweba ati pebo kupatukana pakati kenu. Nkomupapata ukweba ati mwebo mube abakwikatana capamo ne tontonkanyo limo no buyo bumo bwine. ¹¹ Pantu nebo na lyebwa pali mwebo mwe, bamunyinane, ku bantu baku Kloe ukweba ati muli fikansa mukati kenu. ¹² Nalosha mukweba ati: Onse uwa muli mwebo alanda ati, "Nebo ndi wakwa Paulo, " nangu ati "Nebo ndi wakwa Apolo," nangu ati "Nebo ndi wakwa Kefa," nangu ati "Nebo ndi wakwa Kristu. ¹³ Bushe Kristu alyakanikamo? Bushe Paulo alitanikilwe pali mwebo? Bushe mwebo mwabatishiwilwe mwishina lyakwa Paulo? ¹⁴ Nkototela Lesa ico nebo ntabatishepo nangu umo pali mwebo, kano fye Krispi na Gai. ¹⁵ Ici cali pakweba ati nangu umo ekalanda ati ena abatishiwilwe mwishina lyandi. ¹⁶ (Nalibatishepo naba mu ng'anda ya kwa Stefana. ukucilapo, nshishibile nga nali batishepo na bambi.) ¹⁷ Pantu Kristu tantumine mukubatisha lelo ni mukushimikila imbila nsuma - teku cebo ca mano, epa kweba ati umusalaba wakwa Kristu wiba uwakubulwa maka ya uko. ¹⁸ Pantu icebo ca pa musalaba buwelewele kuli abo abako onaika. Lelo kuli abo abakopusuka, maka ya kwa Lesa. ¹⁹ Pantu calilembwa aciti, "Nkonaula amano yaba mano. Nkasula no kwiluka kwaba mucetekanya." ²⁰ Alipi umuntunwa mano? Alipi umusambi? Ali pi uwafikansa muli cino calo? Bushe Lesa taalula amano ya mu calo mu buwelewele? ²¹ Ico icalo mu mano yaciko tacaishibile Lesa, Lesa alibekelwe ukupususha abo abatetekela ukupitila mu buwelewele bwa mbila nsuma. ²² Pantu aba Yuda bafwaya ifishibilo fya fisungusho na ba Hela bafwaya amano. ²³ Lelo fwebo tubila Kristu uwatanikilwe, ilibwe lya kuipununako kuba Yuda kabili ubuwelewele ku bena fyalo. ²⁴ Lelo kuli abo Lesa akuta, bonse aba Yuda na ba Hela, tubila Kristu nga maka na mano yakwa Lesa. ²⁵ Pantu ubuwelewele bwakwa Lesa bwa mano ukucila abantu, no kunaka kwakwa Lesa kwa kukosa ukucila bantu. ²⁶ Lolesheni pa bwite bwenu, bamunyinane. Te bengi muli mwebo abali aba mano ku buntunse. Te bengi muli mwebo abali aba maka. Te bengi muli mwebo abali abakankala mucifyalilwa. ²⁷ Lelo Lesa alisalile ifintu ifya buwelewele ifya mu calo kukusebanya abamano. Lesa alisalile ifyakunaka ifya mu calo kukusebanya ifyakukosa. ²⁸ Lesa alisalile ifya sulwa nefya salulwa mu calo. Kabili alisalile ne fintu ifishaba kantu, ku kufumuna ifintu ifipendwa ukucindama. ²⁹ Acitile ifi pakweba ati umutunse eba napakuitashisha kuli Lesa. ³⁰ Pamulandu wafyo Lesa acitile, nomba muli muli Kristu Yesu, uyo uwaishile kuba kuli fwebo amano yakufuma kuli Lesa. Alishile kubo bulungami bwesu, bumushilo, no kulubuka kwesu. ³¹ Eco kanshi, ngafilya calembwa ati, "Uyo uukoitakisha, alekuitakishisha muli Shikulu."

¹ Lintu naishile kuli mwebo, ba munyinane, nshaishile no kupulama kwa cebo nangu amano pa kubila icine ca nkama pali Lesa. ² Pantu naipangile ukubula ukwishiba akantu lintu nali pali mwebo kano fye Yesu Kristu, untu batanikwe. ³ Kabinge nali na mwebo mu kunaka, mu mwenso, na mukututuma nganshi. ⁴ Kabili imbila yenu ne mibilile yandi tayali mu fyebo fya kulembeleka ifya mano. Lelo fyali ne fyakushininkisha kwa Mupashi na maka, ⁵ pakwebati icitetekelo cenu cibela mu mano ya buntunse, kano mu maka yakwa Lesa. ⁶ Nomba fwebo tulanda amano mu bakalamba, lelo te mano ya muli cino calo, nangu aya ba kateka ba ubu bwikashi, abakopita. ⁷ Lelo, tulanda amano yakwa Lesa mu cine ica nkama, amano aya fisama yantu Lesa alingile libela ulo inshita ya bukata bwesu tailabako. ⁸ Takwaba uwa muli bakateka ba bwikashi buno abaishiba ici, pantu umfwa balishibile ici, nga tabatanikile Shikulu wa bukata. ⁹ Lelo ngefyo calembelwe, "Takwali ilinso ilya fimona, takuli ukutwi kwaumfwa, takuli umutima wa muntu waelenganya ifyo Lesa apekanishisha abo aba mutemwa" - ¹⁰ Pantu Lesa alisokolola ifi fintu kuli fwebo ukupitila mu Mupashi. Pantu Umupashi ufwailisha fyonse, ne fintu fya shika ifyakwa Lesa. ¹¹ Pantu ninani uwaishiba amatontonkanyo ya muntunse kano fye umupashi wa muntu uwaba muli ena? Eco kanshi, takwaba uwaishiba ifintu ifyashika ifyakwa Lesa kanofye Umupashi wakwa Lesa. ¹² Lelo tatwapokelele umupashi wa pa calo lelo Mupashi uwafuma kuli Lesa, pakweba ati twingeshiba ifya bupe twapelwa ukufuma kuli Lesa. ¹³ Tulalanda pali ifi fintu mu fyebo tefisambilishiwa na mano ya bantunse lelo ukupitila mu Mupashi, ukwilwila ifintu fya bu mupashi kubantu ba bu mupashi. ¹⁴ Umuntu wa ku mubili tapokelela ifintu fya Mupashi wakwa Lesa, pantu fya buwelewele kuli ena. Tekuti afishibe pantu fishibikilwa ku mupashi. ¹⁵ Uwa bu mupashi apingula ifintu fyonse, lelo tapingulwa kuli bambi. ¹⁶ "Pantu ninani uwingeshiba umutima wakwa Shikulu, pakuti amusambilishe?" Lelo fwebo tulikwete umutima wakwa Kristu.

¹ Kabili nebo, mweba munyinane, ntalikulanda kuli mwebo kubati bantu ba ku mupashi, lelo kubati bantu ba ku mubili, nga ku bana banono muli Kristu. ² Nebo nalikuminwishafye umukaka, tefilyo fyakukosa, pantu mwali tamulalinga ukulya; kabili nangu ni nomba tamulati mulinge. ³ Ico mwebo mucilifye kuli bu mubili. Pantu apo akalumwa no mufimbila fikosangwa mukati kenu, bushe tamu koikala ukulingana na bumubili, kabili tamukoendela mu mubela wa buntunse? ⁴ Pantu ulo umo aeba ati, "Nebo nkonka Paulo," kabili umbi nao ati, "nebo nkonka Apolo," bushe uyu mubela tewa buntunse fye? ⁵ Bushe nomba ninani uyo wine Apolo? Bushe ninani Paulo? Babomfi fye umo mwebo mwasuminine, ngefyo Lesa apele milimo kuli onse. ⁶ Nebo nalibyela kabili Apolo alitapilile, lelo Lesa alipele ukukula. ⁷ Eco kanshi, te uyo uukobyala nangu uyo ukotapilila ali akantu iyoo. Lelo ni Lesa eupela ukukula. ⁸ Nomba uyo ukobyala na uyo ukotapilila bonse balifye cimo, kabili cila umo akapokela icilambu ukulingana ne milimo yakwe. ⁹ Ico bonse tuli babomfi ba kwa Lesa abakobombela pamo. Nemwe muli bala lya kwa Lesa, ing'anda ya kwa Lesa. ¹⁰ Ukulingana no kusenaminwa kwa kwa Lesa ukwapelwe kuli nebo nga kakuula incenshi umwine wa bukuule, nebo nalipangile umufula na umbi akokulapo. Lelo cila muntu acenjele ifyo akokula pa mufula. ¹¹ Ico takuli nangu umo uwingapanga umufula ukucila pali uyo uwapangwa, uyo uli, ni Yesu Kristu. ¹² Nomba umfwa umo akokula pa mufula na golide, silfere, amabwe yaluma umutengo, imbao, kasanse, nangu ifyani, ¹³ umulimo wakwe ukapitulukwamo, pantu ubushiku bulya bukaulanga. Pantu ukosokolwelwa mu mulilo. Umulilo ukesha ifyo cila umo alikubomba. ¹⁴ Umfwa umulimo wa umo wasangwa taupile, ena akapokelela icilambu; ¹⁵ lelo umfwa umulimo wa umo wapya, ena akabwelapofye, lelo umwine akapusushiwa, kubati apusumukafye ukufuma mu mililo. ¹⁶ Bushe tamwaishiba ukweba ati mwebo muli tempele lya kwa Lesa kabili Umupashi wa kwa Lesa waikala muli mwebo? ¹⁷ Umfwa umo aonaula itempele lya kwa Lesa, Lesa akonaula uyo muntu. Ico Tempele lya kwa Lesa lya mushilo, kabili ifi efyo nemwe mwaba. ¹⁸ Mwileka nangu umo ailufye. Umfwa umo muli mwebo aimona uwa mano muli iyi nkulo, lekeni ena abe "Umuwelewele" pakwebati esekuba uwa mano. ¹⁹ Pantu amano ya calo cino buwelewele ku mulola wa kwa Lesa. Pantu calilembwa aciti, "Alekata ba mano mu bucenjeshi bwabo." ²⁰ Na kabili, "Shikulu alishiba ukwebati umucetekanya waba mano wena wa cimpeleshafye." ²¹ Napali ili langulushi, mwilakuleka nangu umo alekuitakisha mu bantu. Fyonse fintu fyenu, ²² cibe ni Paulo nangu Apolo, nangu Kefa, nangu calo, nangu mweo, nangu ni nimfwa, nangu fintu filipo, nangu fintu fikoisa. Fyonse fintu fyenu, ²³ kabili nemwe muli ba kwa Kristu, na Kristu wa kwa Lesa.

¹ Ifi efyo umuntu afwile uku twishiba Fwebo, nga babomfi bwakwa Kristu na kabili ba kasunga ba cine ica fiswa ica kwa Lesa. ² Nomba ifikabilwa muli ba kasunga fya kweba ati bafwile ukusangwa aba cine. ³ Lelo nebo cintu ica cepesha ukwebati mpingulwe kuli mwebo nangu ku cilye ca bantu icili conse. Pantu nebo nshi ipingula ne mwine. ⁴ Nebo nshishibile umutunganya uuli onse uukopangwa pali nebo, Lelo teciko ndenga nebo ukuba uwa kaele. Uupingula nebo ni Shikulu. ⁵ Eco mwicito bupingushi pa cintu icili conse libe inshita tailafika, libe Shikulu talaisa. Ali nokuleta mu lubuto ifintu fya fiswa ifya mu mfifi no ukusokolola amapange ya mutima. Elo cila umo akapokelela ukutasha kwakwe ukufuma kuli Lesa. ⁶ Nomba, ba munyinane, Nebo nalibikileko ifi fipope kuli ne mwine na Apolo pamulandu wenu, pakweba ati ukufuma kuli fwebo mwebo mu sambilileko ubupilibulo bwa nsoselo, "Mwiya ukucila pa calembwa." Ifi fya belako ukwebati mwebo mwiba abakutumikwa mu kapatulula kuli kasambilisha umo no munankwe. ⁷ Pantu bushe nani amona ubupusano ubuli bonse pakati kenu na bambi? Findo ifyo mwebo mwa kwata ifyo tamwapokelele? Umfwa mwali fipokelele, nindo mwebo mukoitakishisha kubati mwebo tamwa fipokelele? ⁸ Kale kale mwebo mulikwete fyonse ifyo mwinga fwaya! Kale kale muli nonkele! Mwebo mwalitendeka ukuteka - no kucile fwebo! Mucine, Nebo nkosubila nimwe mwali kuteka, ukweba ati fwebo tuteke pamo nemwe. ⁹ Pantu nebo nkotontonkanya ati Lesa alibika fwebo fwe batumwa pa bwelu nga balekelesha mu mulongo, mu mutande kabili kubati ni bakalume ba pingulwa ukwipaiwa. fweba twaliba aba kutambwa ku calo - kuli ba malaika, na ku bantu. ¹⁰ Fwebo tuli bawelewele pa mulandu wakwa Kristu, lelo mwebo muli ba mano muli Kristu. Fwebo tuli bakunaka, lelo mwebo muli bakukosa. Mwebo mwali ba abacindamikwa, lelo fwboe twaliba abasulwa. ¹¹ Ukufika napali kano kene kashita fwebo tuli aba nsala ne cilaka, fwe tuli fwele nsamu sha bubusu, fwebo tulapumwa, kabili aba bula ama yanda. ¹² Fwebo tulabombesha, ukubomba ne minwe shesu. Lintu fwebo tupontelwa, tulapaala. Lintu fwebo tupakaswa, tulashipikisha. ¹³ Lintu fwebo tupontelwa, fwebo tulanda ne nkumbu. Fwebo twaba nga ba kanwa mu calo kabili abasulwa pa fintu fyonse, ukufika na nomba. ¹⁴ Nebo nta kolemba ifi fintu kuku musebanya, lelo uku `musoka mwebo nga abana bandi abatemwikwa. ¹⁵ Pantu nangu mwa kwata amakana ikumi aba kumisunga muli Kristu, mwe tamwa kwata ba shinwe abengi. Pantu nebo na belako shinwe muli Kristu Yesu ukupitila mu mbila nsuma. ¹⁶ Eco nebo nkomikonkomesha mwebo ukuba abakunkonkelesha. ¹⁷ E mulandu nebo namitumine Timote, umu temwikwa wandi kabili umwana wacishinka muli Shikulu. Ali nokulamwibikisha mwebo imbela yandi muli Kristu, ukulingana nefyo mfunda konse na mu nkuta monse. ¹⁸ Nomba bamo pali mwebo muli abaitutumuna, ukulekucita kubati nebo ntakoisa kuli mwebo. ¹⁹ Lelo nebo nkoisa kuli mwebo nomba line, umfwa Shikulu asuminisha. Elo nebo nkeshiba te mashiwi fye ya abo abaitutumuna, lelo nebo nkamona amaka yabo. ²⁰ Pantu ubufumu bwakwa Lesa tebwa mashiwi lelo mu maka. ²¹ Findo mwebo mukofwaya? Bushe nebo nkese kuli mwebo no bwembya nangu ne citemwiko na mu mupashi wa kutekanya?

¹ Twalyumfwile akasebo kakweba ati muli ubulalelale muli mwebo, umusango wa bulalelale ubushasuminishiwa na mu basenshi: Umwaume ali kwete umukashi wakwa wishi. ² Muli itutumike! Bushe tamufwile ukuloosha pali ico, pa kwebati uyo uucitile ifi atamfiwe muli mwebo? ³ Pantu nangu nebo nshilipo ku mubili, ku mupashi kwena tulifyepamo. Ndili bikile kale no bupingushi pali uyo ucitile ici, kubati fye ndi uko muli. ⁴ Ulo fye mukolongana pamo mwi shina lya kwa Shikulu nandi bo mu mupashi tukolongana na mwebo, na maka yakwa Shikulu Yesu tuli nayo pamo, ⁵ peleni uyu muntu kuli Satana kukonaula umubili wakwe, pakwebati umupashi wakwe ukapusushiwa pa bushiku bwakwa Shikulu. ⁶ ukuitakisha kwenu te kwabune. Bushe tamwaishiba ukwebati icitutumushi cinono citutumusha umufuba onse? ⁷ Eco fumyeni intutumushi iyakale pakwebati mube umufuba upya, abashatutumushiwa, ngefyo mwaba. Pantu Kristu, umwana wa mpanga wa cakucilila cesu, aalipaiwa. ⁸ Kanshi natusefye umutebeto, uwakubula icitutumushi ca kale, icitutumushi ca misango ya kubipa ne ya bubifi. Lelo lekeni tusefye no mukate wa bune kabili uwa cinshinka. ⁹ Nalilembele kuli webo muli kalata wandi ukushampana na bantu ba bulalelale. ¹⁰ Ntakolosha mu bantu ba bucilende aba muli cino calo, nangu ababulili, nangu abapupu, nangu abapepa utulubi, apo pakutaluka kuli bena kano mwafuminishiwa pa calo. ¹¹ Lelo nomba nkolemba kuli mwebo ukukana ampana no uli onse uukoitwa munyinane lelo uwa ikala mubulalelale, nangu umulili, nangu uupepa utulubi, nangu uutukana mu kulanda, nangu uuli cakolwa, nangu umupupu. Tekwesha no kulekulya nao ifilyo umuntu wa kubefii. ¹² Pantu bushe mulimo wandi ukulekupingula ababa kunse ya lukuta? Mucifulo cakwebati, nimwebo ukulekupingula aba mukati ka lukuta? ¹³ Lelo Lesa alapingula aba kunse. "Fumyeni umuntu imbifi pakati kenu."

¹ Ulo umo akwato ubulwi no munankwe, bushe enga leta umulandu ku cilwe kubashili bakulungama ukucila ukuya kubashila abakwa Lesa? ² Bushe tamwaishiba ukwebati abashila abakwa Lesa bakapingula icalo? Umfwa mukapingula abena fyalo, bushe tekuti mukwanishe ukupwisha amafya ayakucepa? ³ Bushe tamwaishiba ati tukapingula ba malaika? cacilapo shani, kanshi, ukupingula amafya ya bwikashi buno? ⁴ Nga kuti mulikwete ukupingula ifya muli buno bwikashi, nga kanshi cinshi mutwalila imilandu ku bashili ba mulukuta? ⁵ Nkolanda ifi ku musebanya mwenu. Bushe mukati kenu tamulipo uwa mano uwingapwisha amafya pakati ka babwa nanyina? ⁶ Lelo munyina umo atwala munyina munankwe ku cilwe - kabili ku bashatetekela! ⁷ Icakwebati mulikwete ukuitwala kufilye ninshi kale kucimfishiwe kuli mwebo. Nindo mushisulilakofye ilyo umunenu amilufyanya? Nindo kanshi ta musuminishisha ukufyengwa? ⁸ Lelo mwebo mwebene mulacita ifyakubipa kabili mulafyenga, kabili mucitefi kuli ba munyinenwe! ⁹ Bushe tamwaishiba ukweba ati abashili ba kulungama tabakengile mu bufumu bwa kwa Lesa? kanshi mwilakubepwa: cibe ni bacilende, nangu abapepa utulubi, nangu abantu ba bulalelale, nangu abaipela ku bucende na baume banabo, nangu abacita ubucende na baume banabo, ¹⁰ nangu abapupu, nangu abalwinso, nangu bacakolwa, nangu abamusalula, nangu abacenjeshi, tabakapyane ubufumu bwakwa Lesa. ¹¹ Ifyo efyo bamo pali mwebo bali. Lelo mwalisambwa, mwali sangululwa, mwali lungamikwa mwishina lyakwa Shikulu Yesu Kristu no kupitila mu Mupashi wakwa Lesa wesu. ¹² "Fyonse fyali suminishiwa kuli nebo," lelo tefyonse fyakwata ubukumu." Fyonse fyali suminishiwa kuli nebo," lelo nshisumine ukutekwa ne cili conse pali fyena. ¹³ "Ifilyo fyakuya mwi fumo, ne fumo lya filyo," Lelo Lesa akafyonaula fyonse. Umubili tewa bulalelale. Lelo, umubili wa kwa Shikulu, na Shikulu akalisha umubili. ¹⁴ Lesa alibushishe Shikulu kabili akatubusha na fwebo ku maka yakwe. ¹⁵ Bushe tamwaishiba ukwebati ifilundwa fyenu fyakwa Kristu? Bushe ningasenda ifilundwa fya kwa Kristu no ku fikumika kuli cilende? Tacifwile kubefyo! ¹⁶ Bushe tamwaishiba ukwebati uwakumika kuli cilende aba umubili umo nankwe? Ngefyo amalembo yalanda, "Babili bakesa kuba umubili umo." ¹⁷ Lelo onse uwakumika kuli Shikulu aba umupashi umo nankwe. ¹⁸ Fulumuka ku bulalelale! Ulubembu lonse ulo umuntu acita lwa kunse ya mubili, lelo umuntu ucita ubulalelale abembukila umubili wakwe wine. ¹⁹ Bushe tamwaishiba ukwebati imibili yenu litempele lyakwa Mupashi wa Mushilo? Uwikala muli mwebo, uyo mwakwata ukufuma kuli Lesa? Bushe tamwaishiba ukwebati tamuli benu mwebene? ²⁰ Pantu mwalishitilwe no mutengo. Eco cindikeni Lesa ne mibili yenu no mupashi wenu, ifyaba ifyakwa Lesa.

¹ Nomba pa mulandu uyo mwalembelepo: "Cabune umwaume ukukana kumako ku mwanakashi." ² Lelo pa mulandu wa bulalelale ubwingi, onse umwaume abe no mukashi wakwe, no mwanakashi abe no mulume wakwe. ³ Umwaume afwile apele umukashi ico afwile amupele na munshila imo ine umukashi apele umulume wakwe ifyo fine. ⁴ Te mukashi akwete insambu pa mubili wakwe, mulume wakwe. Mu nshila imo ine, umulume nao takwete nsambu pa mubili wakwe, lelo mukashi eukwete. ⁵ Mwilekutanana, kano mwaumfwana na pa kashita kaibela. Mucite ifi pakwebati mube abakuipela kwi pepo. Kabili mufwile mwaisa pamo nakabli, pakwebati Satana ekwata ukumutunka mu kukana tekanya kwenu. ⁶ Lelo nkolanda ifi fintu kuli mwebo mu kusuminishanya kabili te muntu mwalole funde. ⁷ Ndekabila ukwebati bonse bali kubati ni nebo. Lelo cila umo na umo alikwata ica bupe ukufuma kuli Lesa. Umo icabupe ca musango uyu, na umbi ica musango ulya. ⁸ Ku bashaupa naba mukamfwilwa nkolanda ukwebati cawama kuli bena nga baikala ukwabula ukupwa, ifyo nanebo naba. ⁹ Lelo nga bafilwa ukutekanya, bafwile ukupa. Pantu cawama bena ukupa ukucila ukwikala abacushiwa ne nsuna. ¹⁰ Nomba kubaupa nkopela ilifunde - te nebo, lelo ni Shikulu - nati umukashi tafwile kulekana no mulume wakwe ¹¹ (lelo umfwa alekana no mulume wakwe, ekalilile ubushimbe atemwa awikishanye no mulume wakwe), no mulume tafwile kuleka umukashi wakwe. ¹² Lelo kuli bambi Nkolanda - Nebo, te Shikulu - nati umfwa munyina uuli onse ali no mukashi uushatetekela, kabili umfwa alitemenwe ukwikala nankwe, tafwile ku mutamfya ¹³ umfwa umwanakashi ali no mulume uutatetekela, kabili umfwa alitemenwe ukwikala nankwe, tekuti alekane no mulume wakwe. ¹⁴ Pantu umulume uutatetekela alishishiwe pa mulandu wa mukashi wakwe, no mukashi utatetekela alishishiwe pa mulandu wakwa munanyinane uo aupwako. Nga teifyo abana benu bakaba abakukowela, lelo nomba balisangulwilwe. ¹⁵ Lelo umfwa uutatetekela aya, amuleke alekuya. mu milandu ngeyo, munyina nangu nkashi tatekwo busha mu milapo yabo. Lesa alitwitila ukwikala mu mutende. ¹⁶ Pantu wishibe shani, we mwanakashi, nalimo ukapususha umulume obe? Nangu wishibe shani, we mwaume nalimo ukapususho mukashi obe? ¹⁷ Lelo, ngefyo Shikulu apela cila umo icakaniko cakwe, lekeni cila umo ende ifyo Lesa amwita. Efunde lyandi ili mu nkuta shonse. ¹⁸ Bushe uuli onse alisembulwilwe ulo aitilwe ku kutetekela? Tefwile ukumoneka uutasembululwa. Bushe uuli onse tasembulwilwe ulo aitilwe ku kucetekela? Tafwile ukusembululwa. ¹⁹ Pantu cibe kusembululwa nangu kukana sembululwa kwaba kantu. Icikankala ku bela amafunde yakwa Lesa. ²⁰ Cila umo afwile ukwikalila mu bwite umo ali ulo Lesa amwitiile ku kutetekela. ²¹ Bushe wali umusha ulo Lesa akwitile? wisakamana pali ico. Lelo umfwa wa waba umuntungwa, emo wikalilile umo mwine. ²² Pantu uwaitilwe kuli Lesa lintu ali umusha muntungwa wakwa Shikulu. Munshila imo ine, uwali umuntungwa ulo aitilwe ukutetekela musha wakwa Kristu. ²³ Mwalishitilwe no mutengo, eco mwiba abasha ba bantu. ²⁴ Mwe bamunyinane, umo mwine ali ilintu aitilwe, lekeni cila umo ekale na Lesa umo mwine. ²⁵ Nomba pali bana cisungu, nshikwetepo ifunde ukufuma kuli Shikulu. Lelo nkopanda amano nga umo uo, ukupitila mu luse lwakwa Shikulu, uwabo wa cishinka. ²⁶ Eco, nkotontonkanya ukwebati pa mulandu wa lukakala ulukoisa, cabune ku muntu ukwikalilila ifyo ali. ²⁷ Bushe uli uwa kakwa ku mukashi? Wifwaya ukulekana. Umfwa ulikakwilwe ku mukashi, wifwaya ukupa umukashi. ²⁸ Lelo umfwa waupa, taubembukile, kabili umfwa na cisungu aupwa, tabembukile. Lelo bonse abacita ici bakwata mafya yalekana lekana aya ku mubili ayengi, kabili nkofwaya ukumicingililako kuli ifi. ²⁹ Lelo nalanda ici, bamunyinane: Inshita ilicepele. Ukufuma nomba ukuya kuntashi, lekeni abo abakwete abakashi balekwikala kubati tabakwata. ³⁰ Bonse abo abalelila bafwile baba kubati tabalelila, nabo abakosansamuka kubati tabakosansamuka, nabo abakoshita kubati tabakwete kantu nelyo kamo, ³¹ nabo abakosangalala ne calo beba kubati baleciyemfya. umupwilapo. Pantu icalo icili pali ino nshita cikoya mu kupwa. ³² Nkofwaya mwebo mukakulye ku masakamiko. Umwaume ushaupa asakamana pa fintu fya kwa Shikulu, ifya ku musekesha. ³³ Lelo umwaume uwaupa asakamana pa fintu fya mu calo, efyo enga sansamusha umukashi wakwe - ³⁴ alyakanikemo. Umwanakashi uushaupwapo nangula na cisungu asakamana pa fintu fyakwa Shikulu, efyo enga sangululwa ku mubili naku mupashi. Lelo namayo umwaupwa asakamana ifintu fya mu calo, efyo enga sansamusha umulume wakwe. ³⁵ Nkolanda ifi ni mubunonshi bwenu mwebene, no kukana bikapo icakumutitikisha. Nkolanda ifi ni kucayana, pakwebati mube abaipela kuli Shikulu ukwabula icakupusaula. ³⁶ Lelo umfwa uuli onse atontonkanya ukwebati tacindikile na cisungu wakwe - kabili umfwa alicilile imyaka ya cupo kabili cifwile ukuba ifyo - acite ico atemenwe. talebembuka, Bafwile ukupana. ³⁷ Lelo umfwa aliminine ndi mu mutima wakwe, umfwa talepatikishiwa lelo ali na maka pa kufwaya kwakwe umwine ukucita ifi, kabili aipingula mu mutima wakwe. ukusunga uwakwe nga na cisungu, akacite cabune. ³⁸ Eco uyo uleupa na cisuma wakwe wine acite cabune, na uyo uwasala ukukana upaacita icabune ukucilapo. ³⁹ Umwanakashi nakakwa ku mulume ulo ali no mweo. Lelo umfwa umulume afwa, muntungwa ukupwa kuo atemenwe, lelo ni muli Shikulu epela. ⁴⁰ Lelo mukupingula wandi alishuka umfwa aikala fye ifyo ali. Kabili nkotontonkanya ukwebati nanebo ndikwete Umupashi wakwa Lesa.

¹ Nomba palwa fyakulya fyaipailwa utulubi: Twalishiba ati fwebo bonse twalikwata ubwishibilo. Ukwishiba kulatumika, lelo ukutemwa kulakuula. ² Umfwa uuli onse akotontonkanya ati alishibapo icintu, ulya muntu talaishiba ifyo afwile ukwishiba. ³ Lelo umfwa uuli onse alitemwa Lesa, ulya muntu alishibikwa kuli ena. ⁴ Eco, palwa kulya ifyakulya fyaipailwa utulubi: Talishiba ukwebati akalubi muli cino calo takali cintu no kwebati takwaba Lesa kanofye umo. ⁵ Eco nangu ingabako iitwa milungu, cibe nu mu mulu nangu pe sonde ( ngefyo yaba iingi "imilungu" naba "Shikulu" abengi), ⁶ lelo kuli fwebo kwaba fye Lesa umo, Shiwe, kuo ifintu fyonse fyafuma noyo fwebo twikalila, na Shikulu Yesu Kristu umo, muli uyo ifintu fyonse fya belako, kabili muli uyo twa belako. ⁷ Lelo, uku kwishiba takuli muli bonse. Lelo, bamo kale balikupepa utulubi, kabili balikulya ifi fyakulya kubati nifyo ifyaipailwa akalubi. Kampingu wabo pali ici alikowela pantu alinaka. ⁸ Lelo icakulya tacakatupalamika kuli Lesa. Tatubipishe umfwa tatulile, nangu abakuwama umfwa twafilya. ⁹ Lelo sakamaneni ukwebati ubuntungwa bwenu tabwishile kuba mulandu kuli umo uwakunaka mucicetekelo nge cipunwisho. ¹⁰ Pantu nga cakwebati ulya umo amona webo, uwakwata ubwishibilo, ukolya icakulya mwitempele lya tulubi. bushe kampingu wakwe uwanaka takakoshiwe ukulya ifyaipailwa utulubi? ¹¹ Pa mulandu wakwishiba kobe palwa tulubi, uyo uwakunaka, munyina uo Kristu afwilile, aonaika. ¹² Eco, nga wabembukila ba munyina no kucena kampingu wabo uwakunaka, ninshi wabembikila Kristu. ¹³ Eco, umfwa icilyo calenga munyina ukuipununa, nshakalye nama na kabili, pakweba ati nshilengele munyina ukuwa.

¹ Bushe nebo nshili mutungwa? Bushe nebo nshili mutumwa? Bushe nebo nshamwene Yesu shikulwifwe? Bushe mwebo tamuli mulimo wandi muli Shikulu? ² Umfwa nshili mutumwa kuli bambi, lelo ndimutumwa kuli mwebo. Pantu mwebo muli cakakatilo ca butumwa bwandi muli Shikulu. ³ Ici ecakuicingilila candi kuli abo abakondubulwisha nebo: ⁴ Bushe fwebo tatwakwata nsambu shakulya no kunwa? ⁵ Bushe fwebo tatwakwata nsambu shakwendela pamo no mukashi uwatetekela, ngafilya ba cita abatumwa banensu, na bamunyina bakwa Shikulu, na Kefa? ⁶ Nangula ninebo fye na Barnaba tutakwete nsambu sha kuleka ukubomba? ⁷ Mushilika nshi uiteyanishisha umwine eka? Ninani ubyala ibala lya myangashi kabili akano kulyako ifisabo? Nangu ninani ucema umukuni kabili takonwako mukaka ukufuna kufitekwa? ⁸ Bushe nkolanda ifi fintu umwalola maka ya buntunse? Bushe amalango nayo tayakolanda ifi? ⁹ Pantu calilembwa mu mafunde yakwa Mose ati, "Wikaka kukanwa ka ng'ombe ulo ikokululule ng'ano." Bushe icine cine ni ng'ombe eyo Lesa asakamaka po? ¹⁰ Bushe tepali fwebo akolandapo? Calembelwe pali fwebo, pantu uukolima afwile ukulima mukusubila, no ukokululula afwile ukukululula mwisubilo lya kukumako mukusepa. ¹¹ Umfwa twalibyele ifintu fya mupashi pakati kenu, bushe cilicililepo pali fwebo kukusepa ifintu fya ku mubili ukufuma kuli mwebo? ¹² Nga bambi bakumako kubuntungwa bwa kufuma kuli mwebo, nga fwebo tatukwete no kucilapo? Lelo tatwafwaile ishi nsambu. Lelo twashipikishe fyonse ukucila twaba icakucingilisha ku mbila nsuma yakwa Kristu. ¹³ Bushe twamwaishiba ukweba ati balya bonse ababomba kufya mushilo bafumya ifilyo fyabo mwi tempele? Bushe tamwaishiba ukweba ati balya abapyunga pa cipailo bakumako kufitulwa pa cipailo? ¹⁴ Munshila imo ine, na Shikulu alikonkomeshe ukweba ati abo bakobila imbila nsuma bafwile bafumya imikalile yabo mu mbila nsuma. ¹⁵ Lelo nebo nshafwailepo kantu pali ishi nsambu. Kabili nebo nshilembele ifi pakweba ati fimo kuti fyacitilwa nebo. Kuti cawama kuli nebo ukufwa ukucila - uuli onse ukusangula icakutakishishapo candi nge cafye! ¹⁶ Pantu umfwa nashimikila imbila nsuma, nebo nshili na cakuitakishishapo, pantu nebo mfwile fye ukucite ifi. Kabili kalanda kuli nebo umfwa nshilebila imbila nsuma! ¹⁷ Pantu umfwa nacita ifi mukuitemenwa, ndi kwete icilambu. Lelo umfwa temukuitemenwa, nalyo line ndikwete umulimo uyo uwapelwe kuli nebo. ¹⁸ Nomba kanshi icilambu candi nindo? Ukwebati ulo na shimikila, ningapela imbila nsuma ukwabula amalipilo na pali ico nshibomfya insambu shandi shonse mu mbila nsuma. ¹⁹ Pantu nangu naba umuntungwa muli bonse, nalishile kubo musha kuli bonse, pakweba ati nonke abengi. ²⁰ Ku ba Yuda nasangukile ngo mu Yuda, pakweba ati nonke aba Yuda. Ku bena malango, nalishile kuba ngo mwina malango pakweba ati nonke abo aba malango. Nalicitile ifi nangu nebo ne mwine nshali mwina malango. ²¹ Kuli abo aba kunse ya malango, nalishile kuba ngo wali kunse ya malango, nangula cakweba ati nshali kunse ya malango yakwa Lesa nemwine, lelo mu malango yakwa Kristu. Nalicitile ifyo pakweba ati nonke abo abali kunse ya malango. ²² Ku bakunaka nalishile kuba uwakunaka, pakweba ati nonke abakunaka. Nalishile kuba fyonse kuli bonse abantu pakweba ati munshila shonse mpusushishemo bamo. ²³ Ndacitile fintu fyonse pamulandu wa mbila nsuma, pakweba ati nkumeko ku mapalo ya mbila nsuma. ²⁴ Bushe tawaishiba ukweba ati mu lubilo aba bukutuka bonse balabutuko lubilo, lelo umo fye uupokelela icilambu? Eco kanshi butukeni ku kupoka icilambbu. ²⁵ Onse uubutuka alatekanya muli fyonse. Balacita ifyo pakwebati bapokelele icitebo ico icibonsa, lelo fwebo tucitefi pakwebati tupokelele cimo ico icishibonsa. ²⁶ Eco kanshi ifi efyo nebo mbutuka, tepamo ngo uubutuka ukwabula ubuyo; ifi efyo nebo nkolwa, tepamo nga umo uukopumaula umwela. ²⁷ Lelo nebo ntutaula umubili wandi no kuucita ubusha, pakweba ati ulo nebo nabila kuli bambi, nebo nemwine nika kanwa.

¹ Ntakofwaya mwebo ukubulo kwishiba, mweba bwananyina, ukwebati bashifwe bonse bali mwisamba lye kumbi kabili bonse balipitile muli bemba. ² Bonse bali batishiwilwe kuli Mose mwi kumbi na muli bemba, ³ kabili bonse balilile icakulya cimo cine ica mupashi. ⁴ Bonse bali nwine ica kunwa cimo cine ica mupashi. Pantu balikunwa ukufuma ku cilibwe ca mupashi ico icali kubakonka neco icilibwe cali ni Kristu. ⁵ Lelo Lesa tali kusekelamo mu bengi, ne fitumbi fyabo fyalisalangene mpanga yonse mu matololo. ⁶ Nomba ifi fyonse fyali filangililo kuli fwebo, eco twilekukumbwa ifyabubi ngefyo balikukumbwa. ⁷ Mwile kuba bakapepa wa tulubi, nge fyo bambi bali abamuli balya. Ngefyo calembwa ati, "abantu balikele pakulya no kunwa, kabili baliimine mukwangala." ⁸ Twilekucita bulalelale, nga filya abengi muli balya balikucita. Namukasuba kamo, abantu ukufika naku makana amakumi yabili na yatatu balifwile pamulandu wa ici. ⁹ Kabili twilekwesha Kristu, filya bambi aba muli balya balikumwesha kabili bali bonawile ku nsoka. ¹⁰ Kabili mwileikuisosha, filya bamo aba muli balya balikuisosha bali bonawile ku mu malaika wa mfwa. ¹¹ Nomba ifi fintu fyali citikile kuli bena nge filangililo kuli fwebo. Fyalembelwe pa kulangililwa kwesu - kuli fwebo abo impela sha nshita shikofikilapo. ¹² Eco lekeni, uyo onse uukotontonkanya ati aliminine ndi acenjele epali awa. ¹³ Takuli itunko ilimishila ili tapitamo bantu bambi. Lelo, Lesa wacishinka. Takaleke mwebo ukutunkwa ukucila maka yenu. Kumatunko akacita ne nshila ya kufuminamo, pakwebati mube na maka y akushipikishamo. ¹⁴ Eco, mwebatemwikwa bandi, butukeniko mukutotela utulubi. ¹⁵ Nkolanda kuli mwebo nga bantu abakwata ukwiluka, ukwebati mupingule ifyo nkolanda. ¹⁶ Ulukombo lwe palo ulo tupaala, bushe tesenge lya mulopa wakwa Kristu? Umukate uo tumokaula, bushe tesenge lya mubili wakwa Kristu? ¹⁷ Pantu kwaba fye umukate umo fwebo fwe bali abengi tulifye umubili umo bonse. Fwebo bonse tumokaula mukate umo capamo. ¹⁸ Lolesheni ku bena Isreali umwabelo buntunse. Bushe abalya amalambo te besenge limo ne cipailo? ¹⁹ Nindo nkolanda nomba? Ukweba ati akalubi te kantu? nangu ukweba ati icakulya icaipailwa kalubi cintu? ²⁰ Lelo nkolanda pafyo abena fyalo bapela amalambo, ukweba ati bepela aya malambo ku fibanda kabili te kuli Lesa iyo. Ntakofwaya mwebo ukuba ne senge ne fibanda! ²¹ Tekuti munwine mulukombo lwakwa Shikulu no lukombo lwa fibanda. Tekuti mulile pe tebulo lyakwa Shikulu na pe tebulo lya fibanda. ²² Nangu bushe tulenge Shikulu akalumwa? Bushe tulikosele ukucila ena? ²³ "Fyonse fyali suminishiwa," lelo tefyonse ifya bukumu. "Fyonse fyali suminishiwa," lelo tefyonse fikuula abantu. ²⁴ Takuli nangu umo afwile ukuifwaila fye eka ifyabune. Lelo, cila umo afwile ukuifwaila ubune bwa mwina mupalamano wakwe. ²⁵ Lyeni fyonse ifikoshitishiwa mucisankano ukwabula ukuipusha amepesho muli kampingi. ²⁶ Pantu "isonde lyakwa Shikulu, ne fyaisulamo fyonse." ²⁷ Umfwa uutatetekela amikuta ku kulya icilyo, nemwe mwatemwa ukuyako, lyeni conse ico bamiteyanishishe ukwabula ukuipusha amepusho ya muli kampingu. ²⁸ Lelo umo nga alanda kuli mwebo ati, ''Ici pailwe utulubi,'' ninshi mwicilya, pamulandu waulya umyebele, na pamulandu wa kampingu. ²⁹ kampingu wa muntu umbi, emona nalosha, kabili te obe. Pantu nindo ubutungwa bwandi bwingapi ngwilwa kuli kampingu wa muntu umbi? ³⁰ Umfwa nalya icakulya no kutotela, nindo nkotukilwa paco ntotelepo? ³¹ Eco kanshi, nga mukolya nangu mukonwa, nangu conse ico mukocita, citeni fyonse kubukata bwakwa Lesa. ³² Mube abakaele kuba Yuda nangu ku bena Hela, na ku lukuta lwakwa Lesa. ³³ Munshila imo ine esheni ukusekesha bantu bonse mu fintu fyonse. Ntakofwaya fye ifyandi, lelo ne fya bengi. Nkocite fi pakwebati benga pusuka.

¹ Mube abakupashanya nebo, ngefyo nandi naba uwakupashanya Kristu. ² Nomba nkomitasha mwebo pantu mulanjibukisha nebo muli fyonse. Nkomitasha mwebo pantu mwalikatilila kufishilano ngefyo nafishile kuli mwebo. ³ Nomba nebo nkomfwaya mwebo mwishibe ukweba ati Kristu emutwe wa mwaume onse, ukwebati umwaume emutwe wa mwanakashi, no kweba ati Lesa emutwe wakwa Kristu. ⁴ Umwaume onse uukopepa nangu uukosesema ali fimbile kumutwe akosalusha umutwe wakwe. ⁵ Lelo umwanakashi onse uukopepa nangu uukosesema tafimbile kumutwe asalusha umutwe wakwe. Pantu cimo cine fye no ubeyele kumutwe. ⁶ Pantu umfwa umwanakashi tafimbile umutwe wakwe, afwile aputula imishishi yakwe. Umfwa cansoni ku mwanakashi ukuputula umushishi wakwe nangu kubeya ku mutwe wakwe, afwile afimba ku mutwe. ⁷ Pantu umwaume tafwile ukufimba ku mutwe, apo ena cipasho no bukata bwakwa Lesa. Lelo umwanakashi ena bukata bwa mwaume. ⁸ Pantu umwaume tapangilwe ukufuma ku mwanakashi. Lelo umwanakashi apangilwe ukufuma ku umwaume. ⁹ Pantu umwaume talengelwe umwanakashi. Lelo, umwanakashi alengelwe umwaume. ¹⁰ Emulandu wine umwanakashi afwile ukuba ne cishibilo cakutekwa pa mutwe wakwe, pamulandu waba malaika. ¹¹ Lelo, muli Shikulu, umwanakashi tali na buntungwa ukufuma ku mwaume, no mwaume tali na buntungwa ukufuma ku mwanakashi. ¹² Pantu nga filya umwanakashi afuma ku mwaume, efyo no mwaume afuma ku mwanakashi . Ne fintu fyonse fifuma kuli Lesa. ¹³ Pinguleni palwenu mwebene: Bushe cili fye bwino umwanakashi ukupepa kuli Lesa tafimbile ku mutwe? ¹⁴ Bushe icifyalilwa cine tacimifunda mwebo ukweba ati umfwa mwaume ali no mushishi uutali, musalula kuli ena? ¹⁵ Bushe icifyalilwa taci mifunda mwebo ukweba ati umfwa mwanakashi ali no mushishi uutali, ebukata bwakwe? Pantu umushishi wakwe walipelwa kuli ena nge cifimbo cakwe. ¹⁶ Lelo umo umfwa akofwaya ukutalika pali fi, fwebo tatwaba na mwata umbi, nangu ni nkuta shakwa Lesa. ¹⁷ Lelo pa kumikonkomesha ci, nebo ntakomitasha mwebo. Pantu ulo mwebo mulongana pamo, te mubusuma lelo ni mu bubi. ¹⁸ Pantu mu cantashi, nebo ndomfwa ukweba ati ulo mwebo mulongana mu lukuta, mulaba ukupatukana muli mwebo, kabili lubali nebo ndasumina. ¹⁹ Pantu mufwile ukuba ifyakaniko muli mwebo, pakweba ati abo abashininkishiwa balekumoneka muli mwebo. ²⁰ Ulo mwebo mulongana capamo, te mulalilo wakwa Shikulu uo mwebo mulya. ²¹ Ulo mwebo mulya, cilaumo alya ifilyo fyakwe ulo bambi tabalalya ifilyo fyabo. Umbi ali ne nsala, na umbi alikolelwe. ²² Bushe mwebo tamwakwata amayanda umwakulila no kunwina? Bushe mwebo mwasula ukukuta lwakwa Lesa no ku cefya abo abashi kwete nangu cimo? Nindo nkolanda kuli mwebo? Bushe nebo mitashe mwebo? Nebo nshamitashe mwebo pali fi! ²³ Pantu nebo napokelele ukufuma kuli Shikulu ico nandi kabili na pele kuli mwebo, ica kweba ati Shikulu Yesu, mu bushiku ubo afutwikwemo alibulile umukate. ²⁴ Panuma yakutotela, ali mokawile no kweba ati, "Uyu mubili wandi, uwa pamulandu wenu. Mulekucitefi mukunjibukisha." ²⁵ Munshila imo ine alibulile ulukombo panuma ya mulalilo, no kulanda ati, "Ulu lukombo cipangano cipya mu mulopa wandi. Mulekucite fi lyonse ulo mwebo mukonwamo, ni mukunjibukisha." ²⁶ Pantu inshita yonse mwebo mulya uyu mukate no kunwa ku lukombo, mwebo mubila imfwa yakwa Shikulu akasuke akese. ²⁷ Eco, uuli onse, uukolya umukate no ukonwa ulukombo lwakwa Shikulu mu musango wabubi akaba no mulandu ku mubili no mulopa wakwa Shikulu. ²⁸ Lelo umuntu aipime imwine pakubala, elyo engalya umukate no kunwa mulukombo. ²⁹ Pantu onse uulya nokunwa ukwabulo kushininkisha mubili alila no kunwena ubupingushi umwine. ³⁰ Ecalenga abengi muli mwebo babela abakunaka naba kulwala, na bambi muli mwebo balilalo. ³¹ Lelo ngatwaipima fwe bene, twatwakapingulwe. ³² Lelo ulo fwebo twapingulwa na Shikulu, tulasapulwa, pakweba ati fwebo twisekelwa pamo naba pano calo. ³³ Eco, mweba munyinane, ulo mwalongana capamo mukulya, mulekuipembela umo no munankwe. ³⁴ Umfwa umo alikwete nsala, alye kwakwe kunganda, pakweba ati ulo mwalongana tamulonganine mukusekwa. Napali fimbi ifintu mwebo mwalembele, nkesa ku mitungulula ulo nkesa.

¹ Palwa fya bupe fya mupashi, mweba munyinane, ntakofwaya ukweba ati mube abakuteshiba. ² Mulishibile ati ulo mwali abataishiba Lesa, mwalilufishiwe ku tulubi uto ututalanda, mu nshila shonse umo twaliku mitungululamo. ³ Eco nkofwaya ukweba ati mwishibe ati tapali nangu umo uulandila mu Mupashi wakwa Lesa ungeba ati, "Yesu atipwe." Tapali nangu umo ungalanda ati, "Yesu ni Shikulu," Kano fye mu Mupashi wa Mushilo. ⁴ Nomba ifya bupe fyalipusana pusana, lelo Umupashi umo wine. ⁵ Kwaliba ukulekana kwa bupyungishi, lelo Shikulu ni umo fye; ⁶ kabili kwaliba ukulekana kwa fitukutwa, lelo ni Lesa umo wine uubomba muli fyonse. ⁷ Nomba kuli cila umo kwalipelwa ukumoneka kwa kunse ukwa Mupashi ku kwafwa bonse fye. ⁸ Pantu kuli umo alipelwa Umupashi wa cebo ca mano, na kuli umbi nao icebo ca kwishiba ku Mupashi umo wine. ⁹ Na kuli umbi kwalipelwa icitetekelo ku Mupashi umo wine, na kuli umbi ica bupe cakundapa ku Mupashi umo fye. ¹⁰ Kuli umbi kwalipelwa imilimo ya kucite fisungusho, na kuli umbi ukusesema. Nakuli umbi amaka ya kulingulula palwa mipashi, kuli umbi indimi ishakulekana lekana, kuli umbi ukwilula indimi. ¹¹ Yonse iyi emilimo imo ine iya Mupashi umo fye, ukupela ifyabupe kuli cila umo, ukulingana nefyo asala. ¹² Pantu ngefyo umubili waba fye umo kabili walikwata ifilundwa ifingi ne filundwa fyonse fyaba fya mubili umo wine, efyo caba na kuli Kristu. ¹³ Pantu ku Mupashi umo wine bonse eko twa batishiwile mu mubili umo, cibe ba Yuda nangu ba Hela, cibe basha nangu batungwa, twalilengelwe ukunwa ku Mupashi umo wine. ¹⁴ Pantu umubili tawaba icilundwa cimo, lelo fingi. ¹⁵ Umfwo lukasa lwaeba ati, "Pantu nshili kuboko, nshili ciputulwa ca mubili," tekweba ati tacabako no lubali ku mubili. ¹⁶ Kabili umfwa ukutwi kwaeba ati, "Pantu nshili linso, nshili cilundwa ca mubili," kabili ici tekuti cikulenge ukukana ukuba icilundwa ca mubili. ¹⁷ Umfwa umubili onse wali ilinso, ngo kumfwa nga kwaba pi? Umfwo mubili onse wali fye kutwi, nge cakununsha nga cali pi? ¹⁸ Lelo Lesa alisonta cila cilundwa, cimo na cimo, mu mubili ukulingana nefyo alikufwaya. ¹⁹ Umfwa fyonse fyali fulundwa fya musango umo, umubili nga wali pi? ²⁰ Eco nomba ifilundwa fyali fula, lelo umubili umo wine fye. ²¹ Ilinso teti lilande ku kuboko, "Nta kokukabila webo." Nangu umutwe tawebapo amakasa ati, "Nta kokukabila webo." ²² Lelo ne filundwa fya mubili ifimoneka ifyakunaka fyaliba ne milimo, ²³ ne filundwa ifyo tutontonkanya ati tafyaba na bucindami, tulafisansabika, ne filundwa ifitamoneka bwino efyo tucindamikisha. ²⁴ Nomba ifilundwa ifitamoneka bwino tafikabila ifi. Lelo Lesa alipanga umubili ukupelesha umucinshi kuli ifyo ifilundwa ifitacindikwa. ²⁵ Alicitile fi pakweba ati mwiba akapatulula mweka mu mubili, lelo ukweba ati pabe ukusakamanana pakati ka filundwa nokutemwana kumo. ²⁶ Eco ulo icilundwa cimo cacula, fyonse ifilundwa fila culila pamo; nangu ulo icilundwa cimo casansabikwa fyonse filasekelela capamo. ²⁷ Nomba muli umubili wakwa Kristu na cila umo palwakwe aliba cilundwa ca uko. ²⁸ Kabili Lesa alisontele mu lukuta abakubalilapo abatumwa, abakonkelepo niba kasesema, abacitatu niba kafundisha, elo ni abo abacita ifisungusho, elo ubupe bwakundapa, nabo abafwilisha, abo ababomba imilimo ya batungulushi, noba aba kwata indimi shakulekana lekana. ²⁹ Bushe bonse batumwa? Bushe bonse niba kasesema? bushe bonse niba kafundisha? Bushe bonse balacita ifisungusho? ³⁰ Bushe abantu bonse balikwata ifya bupe fya kundapa? Bushe bonse balalandila mu ndimi? Bushe bonse balelula indimi? ³¹ Fwaisheni ifyabupe ifyacilapo. Kabili nomba nkomilanga inshila iya kucilamo.

¹ Nga cakwebati nebo nandile mu ndimi sha bantu ne sha bamalaika. Lelo umfwa nebo ntakwete ukutemwa, naba ica safwali icilelila napamo amalimba ya nyenjele. ² Umfwa nebo ndikwete icabupe ca kusesema no kwishiba ifyonse fishinika ifya fiswa no bwishibilo, kabili ukwebati nebo ndikwete citetekelo conse icakwebati nkosesha ne mpili. Lelo umfwa nebo ntakwete kutemwa, nebo ndi wafye. ³ Umfwa nebo mpele fyonse ifikwatwa fyandi mukulisha ababusu, kabili nokupa mubili wandi ku kocewa. Lelo nga ntakwete ukutemwa, nebo ntanokelemo kantu. ⁴ Ukutemwa kulatekanya kabili congwe. Ukutemwa takwaba na kalumwa kabili takucita mataki. Takwaba no kuitumika ⁵ nangu icipyu. Takuifwala ifya kuko. Takucita bukali, nangu ukusunga ifilubo. ⁶ Takusekelela mu fitalungeme. Lelo, kusekelela mu cine. ⁷ Ukutemwa kushipikisha fyonse fintu, kutetekela ifintu fyonse, kusubila ifintu fyonse, kabili kushipikisha ifintu fyonse. ⁸ Ukutemwa takupwa. Umfwa kuli amasesemo, ya kapita. Nga kuli ndimi, shikaleka. Umfwa kuli ubwishibilo, bukapita. ⁹ Pantu fwebo twaishiba lubali kabili tusesema lubali. ¹⁰ Lelo ulo icapwililika cikesa, ico icishafikapo cikapita ¹¹ Ulo nebo nali umwaice, nali kulanda kubati mwaice, nali kutontonkanya kubati mwaice, nali kupelulula kubati mwaice. Ulo nebo naishile kuba umukalamba, nalifumishepo ifintu fya bwaice. ¹² Pali nomba fwebo tumona mukushoka mu cilola, lelo lulya tukamonana amenso na menso. Pali nomba naishibako fye lubali, lelo lilya nkeshiba ukufikapo ngefyo naishibwa ukufikapo ¹³ Lelo nomba ifi fitatu filishele: ukutetekela, isubilo, no kutemwa. Lelo icakulisha pali fi kutemwa.

¹ Konkeni ukutemwa kabili fwaisheni ifya bupe fya ku mupashi, lelo icakucilapo kwebati museseme. ² Pantu uukolanda mu lulime lumbi takolanda ku bantu lelo ni kuli Lesa. Pantu takuli uuko mumfwa pantu akolanda ifya nkama mu Mupashi. ³ Lelo uukosesema akolanda ku bantu ku kubakula, ukubakoselesha, no ku basansamusha. ⁴ Lelo uukolanda mu lulimi aikula umwine eka, lelo ukosesema akula aba lukuta. ⁵ Nomba nkofwaya mwebo bonse ukulandila mu ndimi. Lelo no kucila pali ifyo, ukwebati mwinga sesema. Uyo uukosesema alicilapo pali uyo ukolanda mu ndimi (kano fye umo akoilula pakwebati ulukuta lukulwe). ⁶ Lelo nomba, ba munyinane, umfwa naisa kuli mwebo nkolanda mu ndimi, nkomwafwa cinshi mwebo? tekuti mwafwe, kano nalanda kuli mwebo no busokololo, na pamo mu bwishibilo, na pamo mukusesema, na pamo mu ku sambilisha. ⁷ Munshila imo ine, ulo ifipe fishakwata fikofumya iciunda - na pamo icimpeta nangu isese - umfwa tafikopusana mukulila, nga kuti umo aishiba shani ukulila kwa cimpeta nangu ukulila kwe sese? ⁸ Pantu umfwa ipenga lyalila umusango umbi, nani uli onse engeshiba ukwebati ni nshita ya ku ipekanya ukuya ku bulwi? ⁹ Cimo cine kuli mwebo no lulimi. Umfwa mwebo mukolanda ifitakoumfwika, kuti ca umfwika shani icilandilwe? Mwakulalandila fye mu mwela. ¹⁰ Pantu ukwabula ukutwishika kwaba indimi ishingi ishakupusanapusana mu calo, kabili takwaba lushakwata bupilibulo. ¹¹ Lelo umfwa nshishibile ubupilibulo bwa lulimi, ndi nokuba umweni kuukolanda, kabili uukolanda akoba umweni kuli nebo. ¹² Efyo caba kuli mwebo. Apo mukofwaisha ukusokoloka kwa Mupashi, fwayeni ukucishapo ukukula ulukuta pakwebati mwinga kula. ¹³ Eco uyo uukolanda mu lulimi afwile ukupepa ukwebati alekwilula. ¹⁴ Pantu umfwa nkopepa mu lulimi, mupashi wandi akopepa, lelo umucetekanya wandi taukotwala. ¹⁵ Nga cindo nkocita? Nkopepa no mupashi wandi, lelo nkopepa kabili no mucetekanya wandi. Nkoimbila mu mupashi wandi, kabili nkoimbila na mu mucetekanya wandi. ¹⁶ Nga teifyo, umfwa wapalila Lesa mu mupashi, uwakunse kuti alanda shani, "Ameni" ulo ukototela umfwa teshibile ifyo ukolanda? ¹⁷ Pantu webo kwena ukototela bwino sana, lelo umbi umuntu takokulwa. ¹⁸ Nkototela Lesa ico ndalandila mu ndimi ukucila mwebo bonse. ¹⁹ Lelo mu lukuta kuti cawama nalanda ifyebo fisano ku mfwa kwandi pakwebati na sambilishako bambi, ukucila ifyebo amakana ikumi mu lulimi. ²⁰ Mwe bamunyinane, mwiba abaice mu mitontonkanishishe yenu. Lelo, ku kulola kububi, beni kubati tunya. Lelo mu kutontonkanya beni abakalamba. ²¹ Mu malango ca lilembwa, "Mu baume ba indimi shimbi na ku milomo ya bena fyalo nkalanda kuli aba bantu. Nalyo line tabakangufwe." Efya landa Shikulu. ²² Eco kanshi, indimi shabo ecakumwenako, te ku batetekela, lelo kuba shatetekela. Lelo busesemo e cimweno, te ku bashatetekela, lelo ku batetekela. ²³ Eco, umfwa, lonse ulukuta lwaisa pamo elo bonse ukulanda mu ndimi, elo aba kunse na ba shatetekela baingila, bushe ta bengalanda ukwebati muli penene? ²⁴ Lelo umfwa mwebo bonse mu kosesema kabili ushatetekela nangula uwa kunse aingila, ali no kushininwa pali fyonse aumfwako. Ali no kupingulwa kuli bonse ku fyalandwa. ²⁵ Inkama sha mu mutima wakwe kuti sha sokoloka. Na pali ici, kuti awa icinso cakwe panshi no kushinshimuna Lesa. Akobilikisha ukwebati Lesa icine cine aba muli mwebo. ²⁶ Cinshi calakonkapo, ba munyinane? Ulo mukolongana pamo, cila umo ali ne lumbo, ali ne sambilisho, ali no busokololo, no lulimi, nangu ukwilula. Citeni fyonse ukwebati mukule ulukuta. ²⁷ Umfwa umo akolandile mu lulimi, kubeko babili nalimo batatu, kabili umo mukukonkana, kabili umbi afwile ukwilula ifi kolandwa. ²⁸ Lelo umfwa takuli uwa kwilula, lekeni cila muntu atalale tondolo mu lukuta. Lekeni cila umo alande ku mwine eka na kuli Lesa. ²⁹ Lekeni bakasesema babili nangu batatu balande, kabili lekeni bambi bomfwe no kulingulula ifikolandwa. ³⁰ Lelo umfwa kwaba ubusokololo kuli umo uwikeleko, lekeni uwa kubalilapo ekale tondolo. ³¹ Pantu bonse muli mwebo kuti mwasesema umo umo ukwebati cila umo asambililako na bonse benga koseleshiwa. ³² Pantu mipashi ya ba kasesema ilanakila kuli bakasesema. ³³ Pantu Lesa taba Lesa wa cimfulumfulu, lelo uwa mutende. Ili likambisha monse mu nkuta sha kwa Lesa mu bantu bashila bakwe. ³⁴ Abanakashi bafwile ukwikala tondolo mu nkuta. Pantu taba suminishiwa ukulanda. Lelo, bafwile ukunakula, ngefyo na malango yalanda. ³⁵ Lelo umfwa kuliko fimo ba kofwaya ukusambilila, ba lekeni bayekwipushe abalume babo ku mayanda. Pantu ca nsoni ku mwanakashi ukulanda mu lukuta. ³⁶ Bushe icebo ca kwa Lesa cifuma kuli mwebo? Bushe ni kuli mwebo mweka cafikileko? ³⁷ Umfwa uuli onse akoitontonkanya umwine ukuba kasesema nangu uwa mu mupashi, afwile ukwishiba ukwebati ifintu nkolembela mwebo fipope fya kwa Shikulu. ³⁸ Lelo umfwa umo takofwaya ukufipokelela, lekeni ena abe uwa kukana pokelelwa. ³⁹ Eco kanshi, ba munyinane, fwaisheni ukusesema, kabili mwilekanya nelyo umo ukulandila mu ndimi. ⁴⁰ Lelo lekeni fyonse fibombwe bwino kabili mu muyano.

¹ Nomba nkofwaya ukulenga ukwishibikwa kuli mwebo, ba munyinane, imbila nsuma iyo nabilile kuli mwebo, iyo mwapokelele kabili iyo mwaimininapo, ² kabili iyo mukopusukilamo, umfwa mwaikatisha ku cebo na mibilile, kano fye nga mwatetekela apafye. ³ Pantu nalipele kuli mwebo ifikankala ifya ntanshi ifyo nandibo napokelele, ukweba ati Kristu alifwilile pa membu shenu ukulingana na malembo, ⁴ ukweba ati alishikilwe, kabili alibushiwe ubushiku bwalenga shitatu ukulingana na malembo. ⁵ Kristu alimonekele kuli Kefa, elo na ku be kumi na babili; ⁶ nolu alimonekele kuli ba munyinane abakucila imyanda isano pamuku umo wine. Abengi na nomba epo bacili bakolola, lelo bambi balilala utulo twamfwa. ⁷ Elo amonekele kuli Yakobo, elo na kuli bonse abatumwa. ⁸ Pakulekelesha, alimonekele kuli nebo, kubati untu afyelwe akapopo. ⁹ Pantu ninebo wacepeshapo pa batumwa. Nshilingilwe no kukutwa umutumwa pantu nebo nalipakese ulukuta lwakwa Lesa. ¹⁰ Lelo ku kusenaminwa kwakwa Lesa ndi ifyo ndi, no kusenaminwa kwakwe muli nebo takwali ukwafye. Lelo, nalibombeshe sana ukucila pali bonse. Lelo tenebo, lelo kusenaminwa kwakwa Lesa ukuli nandibo. ¹¹ Eco kanshi nangu ninebo nangu nibena, efyo tubila kabili efyo mwatetekele. ¹² Nomba umfwa Kristu abilwa uwabushiwa ku bakufwa, nomba bamo muli mwebo kuti balanda shani ati takwaba ukututubuka kwa bakufwa? ¹³ Umfwa takwaba ukututubuka kwa bakufwa, kanshi na Kristu wine ninshi tabushiwe; ¹⁴ kabili umfwa Kristu tabushiwe, ninshi imbila yesu yafye, ne citetekelo cenu naco cafye. ¹⁵ Nakabili, twasangwa bakambone wa bufi pali Lesa, pantu twalishimikile ati Lesa alibushishe Kristu ku bakufwa. Lelo tamubushishe, nga cakuti mucine abakufwa tababushiwa. ¹⁶ Pantu umfwa abakufwa tababushiwa, ninshi na Kristu wine tabushiwe; ¹⁷ kabili umfwa Kristu tabushiwe, icitetekelo cenu ninshi cafye kabili mucili mu membu shenu. ¹⁸ Elo abo abalalila muli Kristu ninshi baliloba. ¹⁹ Umfwa fye ni muli buno bwikashi tusubila muli Kristu, ninshi pa bantu bonse ni fwebo bankumbabulili. ²⁰ Lelo nomba Kristu alibishiwa ku bakufwa nge cisabo cantanshi kuli abo abalala. ²¹ Pantu apo imfwa yalishile mu muntu, kabili ni mu muntu emwaishile ukututubuka kwa bakufwa. ²² Pantu ifyo fine muli Adamu bonse balafwa, ifyo fine muli Kristu bonse bakalengwa aba mweo. ²³ Lelo cila umo mu mutande wakwe: Kristu, uuli cisabo cantanshi, na abo bonse abakwa Kristu bakalengwa aba mweo pakwisa kwakwe. ²⁴ Elo pakakonka impela, ulo akalubwila ubufumu kuli Lesa Wishi, ulo akonaula ifunde lyonse no buteko bonse na maka. ²⁵ Pantu afwile ateka mpaka akabike abalwani bakwe panshi ya makasa yakwe. ²⁶ No mulwani wakulekelesha ukonaulwa ni mfwa. ²⁷ Pantu, "alibikile fyonse panshi ya makasa yakwe." Lelo umfwa caebwa ati, "alibikile fyonse," tekweba ati naye uwo uubikile fyonse ukunakile abikwamo. ²⁸ Ulo fyonse fyaba ifyakunakila pe samba lyakwe, elo Mwana umwine akaba uwakunakila kuli uyo uwalengele fyonse akuba pe samba lyakwe, ukweba ati Lesa abe fyonse muli fyonse. ²⁹ Nga teifyo bakacita shani ababatishiwila pa bakufwa? Umfwa abakufwa tababushiwa iyoo, nindo ba batishiwila pali bena? ³⁰ Nindo iyo twabela mu busanso inshita shonse? ³¹ Ndafwa cila kasuba! Nkoshininkisha ici pakuitakishisha muli mwebo, pali ico nakwata muli Kristu Yesu Shikulwifwe. ³² Findo nkononka, kulubali lwa buntunse, umfwa nalwile ne fiswango ku Efese, umfwa abakufwa tababushiwa? "Lekeni ninshi tulye no kunwa pantu mailo tukafwa." ³³ Mwilufiwa: "Ukubishanya kwabubi kulonaula imibele ya bune." ³⁴ Shilimukeni! Ikaleni abalungami! Mwitwalilila ukubembuka. Pantu bambi pali mwebo tabaishiba Lesa. Nalandefi kuku milenge nsoni. ³⁵ Lelo umbi akeba ati, Abakufwa babushiwa shani? Kabili bakeshila mu mubili wa musango shani?" ³⁶ We muwelewele! Ico ubyala taciba no mweo kano cabala cafwa. ³⁷ Ico ubyala tauli emubili uukamena, lelo lubuto fye. Kuli caisa kuba ingano nangu umusango umbi. ³⁸ Lelo Lesa akacipela umubili ukulingana no kufwaya kwakwe, na kuli cila lubuto no mubili waluko. ³⁹ Imibili yonse tayalingana. Nomba kwaliba umubili wa bantunse, umbi wa finama, na umbi wa fyuni, kabili umbi we sabi. ⁴⁰ Kwaliba ne mibili ya mu mulu ne mibili ya pano nse. Lelo ubukata bwa mubili wa mu mulu bwakuibela no bakata bwa pano nse bwakuibela. ⁴¹ Kwaliba abukata bwa kasuba, no bukata bumbi bwa mwenshi, na bumbi ubukata bwa ntanda. Pantu cila intanda lwakuibela kulu nankwe mu bukata. ⁴² Efyaba no kututubuka kwa bafwa. Icibyalwa cakuloba, kabili icitutubushiwa cakutabola. ⁴³ Cibyalwa mukusaluka; no kubushiwa mu bukata. Cibyalwa mukunaka; cibushiwa mu maka. ⁴⁴ Cibyalwa no mubili wa cifyalilwa; cibushiwa no mubili wa bumupashi. Umfwa kwaliba umubili wa cifyalilwa, no mubili wa bumupashi eko naba. ⁴⁵ Efyo calembwa ati, "umuntu wantashi Adamu ali uwa mweo." Adamu wakulekelesha alishile kuba umupashi uupela mweo. ⁴⁶ Lelo ica bumupashi tacabalilepo ukwisa lelo cacifyalilwa, elo ica bu mupashi. ⁴⁷ Umuntu wa ntanshi wa pano nse, uwa bumbwa ku lukungu. Umuntu wa bubili waku mulu. ⁴⁸ Ngefyo umuntu umo abumbwa ku mushili aba, efyo na bonse abo ababumbwa ku lukungu baba, kabili ngefyo umuntu wa ku mulu aba, efyaba nabo ababa ku mulu. ⁴⁹ Ngefyo fine twakwata icimpasho ca muntu wa kulukungu, tukakwata ne cimpasho ca muntu wa ku mulu. ⁵⁰ Nomba nkomyeba ici, mwe ba munyinane, ukweba ati umubili no mulopa tekuti fipyane ubufumu bwa kwa Lesa. Nangu icibola ukupyana icitabola. ⁵¹ Moneni! nkomweba ica nkama: Fwebo bonse tatwakalale, lelo bonse tukalulwa ⁵² Tukalulwa mukashita fye akanono, mukukapakapa kwa linso, pe penga lya kulekelesha. Pantu ipenga likalila, na bakufwa bakabushiwa mukutabola, kabili tukalulwa. ⁵³ Pantu uyu mubili uubola ulingile ukufwala icitabola, noyu mubili uwakufwa ufwile ukufwala icitafwa. ⁵⁴ Lelo ulo uyu mubili uubola ukafwala icitabola, nolo uyu mubili uwakufwa ukafwala icitafwa, elo cikafikilishiwa icebo icalembwa ati, "imfwa baiminwa ku kucimfya." ⁵⁵ "We mfwa we, kulipi ukucimfya kobe? we mfwa we, lulipi ulubola lobe?" ⁵⁶ Ulubola lwa mfwa lubembu, na maka ya lubembu malango. ⁵⁷ Lelo kube ukutotela kuli Lesa, uukotupela ukucimfya muli Shikulu Yesu Kristu! ⁵⁸ Eco kanshi, mwe ba munyinane abatemwikwa, mube abakupikintika mu milimo yakwa Shikulu, pakwishiba ati imilimo yenu muli Shikulu te yafye.

¹ Lelo ulwa musangulo ya bashila bakwa Lesa: ngefyo na konkomeshe inkuta sha mu Galatia, efyo mufwile mwacita. ² Pa bushiku bwa tanshi ubwa mulungu, cila umo muli bwebo abike kamo pambali no kubikaa umo enga kwatila. Citeni ici pakwebati kwikaba umusungulo ulo nkesa. ³ Ulo nkafika, kuli bonse abo mukosonta, nkamupela amakalata ya kubeshibisha kuli bena elo nkabatume no bupe bwenu ku Yerusalemu. ⁴ Umfwa cangwamina ukuya nanebo, bakaya nanebo. ⁵ Lelo nkesa kuli mwebo ulo nkapita mu Makedonia. Pantu nkapita mu Makedonia. ⁶ Nalimo kuti naikala na mwebo nangula fye ukupwisha umwela, pakwebati mukangafweko mulwendo lwandi, konse uko nkoya. ⁷ Pantu ntakofwaya ukumona mwebo nomba mulupita fye. Pantu nkosubila ukwikala na mwebo inshita iikulu, umfwa Shikulu asuminisha. ⁸ Lelo nkekala mu Efese kukasuke akuba pentekoste, ⁹ pantu umwinshi uukalamba ulisukile kuli nebo, kabili kuli abalwani abengi. ¹⁰ Nomba ulo Timote akesa, mu mone ati aikala na mwebo ukwabula umwenso, pantu akoculila umulimo wakwa Shikulu, ngefyo nkocita. ¹¹ Mwileka nangu umo amusushe. Mwafweni ende umutende, pakwebati engesa kuli nebo. Pantu nkomusubila ukwisa pamo na ba munyinane. ¹² Lelo ulwakwa wesu Apolo, nkomukoselesha na maka ukumitandalila na ba munyinane. Lelo takwali kufwaya kwakwe ukwebati ese nomba. Lelo, akesa inshita nga yalinga. ¹³ Loleni, iminineni shilili mu citetekelo, beni kubati baume, koseni, ¹⁴ Lekeni conse ico mukocita cicitwe mu citemwiko. ¹⁵ Mwalishiba abang'anda yakwa Stefana, ukweba ati ebali ifisabo fya ntanshi mu Akaya, no kweba ati bali ipelesha abene ku mulimo wa bantu bashila bakwa Lesa. Nomba nkomipapata, ba munyinane, ¹⁶ ukuba mu kunakila ku bantu nga bo na kuli onse uwafwilisha mu mulimo no kucula na fwebo. ¹⁷ Ndi sansamukile pa kwisa kwakwa Stefana fortunati na Akaiki. Pantu balibombele pa ncende yenu. ¹⁸ Pantu balipembula umupashi wandi ne yenu. Eco kanshi, sekeleleni abantu bakuba kubati ni bena. ¹⁹ Inkuta sha mu Asia shamiposha. Akula na Priskila bamiposha muli Shikulu, pamo no lukuta ululi mung'anda yabo. ²⁰ Bonse ba munyinane bamiposha. Muposhanye mukutomona kwa mushilo. ²¹ Nebo, Paulo, nalemba ifi no kuboko kwandi. ²² Umfwa umo tatemenwe Shikulu, abe uwakutipwa. Shikulu wesu, isa! ²³ Ukusenaminwa kwa kwa Shikulu Yesu kube na mwebo. ²⁴ Icitemwiko candi cibe na mwebo bonse muli Yesu Kristu. Ameni.