¹ 1هَادُو هُمَا اَلْسْمِيَاتْ تَاَعْ جْدُودْ يَسُوْع اَلْمَسِيحْ بَنْ دَاوْدْ بَنْ بْرَاهِيمْ : ² إِبْراهِيمُ وَلَدَ إِسْحَاقَ. وَإِسْحَاقُ وَلَدَ يَعْقُوبَ. وَيَعْقُوبُ وَلَدَ يَهُوذَا وَإِخْوَتَهُ. ³ وَيَهُوذَا وَلَدَ فَارِصَ وَزَارَحَ مِنْ ثَامَارَ. وَفَارِصُ وَلَدَ حَصْرُونَ. وَحَصْرُونُ وَلَدَ أَرَامَ. ⁴ وَأَرَامُ وَلَدَ عَمِّينَادَابَ. وَعَمِّينَادَابُ وَلَدَ نَحْشُونَ. وَنَحْشُونُ وَلَدَ سَلْمُونَ. ⁵ وَسَلْمُونُ وَلَدَ بُوعَزَ مِنْ رَاحَابَ. وَبُوعَزُ وَلَدَ عُوبِيدَ مِنْ رَاعُوثَ. وَعُوبِيدُ وَلَدَ يَسَّى. ⁶ وَيَسَّى وَلَدَ دَاوُدَ الْمَلِكَ. وَدَاوُدُ الْمَلِكُ وَلَدَ سُلَيْمَانَ مِنَ الَّتِي لأُورِيَّا ⁷ وَسُلَيْمَانُ وَلَدَ رَحَبْعَامَ. وَرَحَبْعَامُ وَلَدَ أَبِيَّا. وَأَبِيَّا وَلَدَ آسَا. ⁸ وَآسَا وَلَدَ يَهُوشَافَاطَ. وَيَهُوشَافَاطُ وَلَدَ يُورَامَ. وَيُورَامُ وَلَدَ عُزِّيَّا ⁹ وَعُزِّيَّا وَلَدَ يُوثَامَ. وَيُوثَامُ وَلَدَ أَحَازَ. وَأَحَازُ وَلَدَ حِزْقِيَّا. ¹⁰ وَحِزْقِيَّا وَلَدَ مَنَسَّى. وَمَنَسَّى وَلَدَ آمُونَ. وَآمُونُ وَلَدَ يُوشِيَّا. ¹¹ وَيُوشِيَّا وَلَدَ يَكُنْيَا وَإِخْوَتَهُ عِنْدَ سَبْيِ بَابِلَ ¹² وَبَعْدَ سَبْيِ بَابِلَ يَكُنْيَا وَلَدَ شَأَلْتِئِيلَ. وَشَأَلْتِئِيلُ وَلَدَ زَرُبَّابِلَ. ¹³ وَزَرُبَّابِلُ وَلَدَ أَبِيهُودَ. وَأَبِيهُودُ وَلَدَ أَلِيَاقِيمَ. وَأَلِيَاقِيمُ وَلَدَ عَازُورَ. ¹⁴ وَعَازُورُ وَلَدَ صَادُوقَ. وَصَادُوقُ وَلَدَ أَخِيمَ. وَأَخِيمُ وَلَدَ أَلِيُودَ ¹⁵ وَأَلِيُودُ وَلَدَ أَلِيعَازَرَ. وَأَلِيعَازَرُ وَلَدَ مَتَّانَ. وَمَتَّانُ وَلَدَ يَعْقُوبْ ¹⁶ وَيَعْقُوبُ وَلَدَ يُوسُفَ رَاجلَ مَرْيَمَ الَّتِي وُلِدَ مِنْهَا يَسُوعُ الَّذِي يُدْعَى الْمَسِيحَ. ¹⁷ ڨَاعْ ْلجِيلْ مَنْ إْبرَاهِيمْ حَتَّى لْدَاوَدْ رْبَعْطَاشْ نْجِيلْ وَمَنْ دَاوْدْ حَتَّى َلْوَقْتْ سَبْيْ الْيَهُودْ لْبَابْلْ رْبَعْطَاشْ نْجِيلْ وَمَنْ سَبْيْ بَابْلْ حَتَّى الْمَسِيحْ رْبَعْطَاشْ نْجِيلْ ¹⁸ لَوْلَادَة تَاعْ َيَسُوعُ اْلَمَسِيحْ. وْبَصَّحْ لْوْلَادَة نْتَاعْ يَسُوعْ الْمَسِيحْ كَانْتْ هَكَّا: كَانْتْ مَرْيَمْ أُمَهُ مَخْطُوبَة لْيُوسَفْ، وْقْبَلْ مَا تَتْزَوَجْ بٍيهْ لْقَاتْ رُوحْهَا حَامْلَة بِقُوَةْ الَرُوحْ اْلقُدُسْ. ¹⁹ وْيُوسَفْ رَاجَلْهَا كَانْ رَاجْلْ مُتَّقِي الله وْمَابْغَاشْ يَفْضَحْهَا وْبْغَا يَتْفَارَقْ مْعَاهَا فَي اَلسَرْ ²⁰ . وْكِي كَانْ إِخَمَمْ في دَاكْ الَشِّي ، بَانْ لَهْ فْي لْمْنَامْ وَاحَدْ مَلَاكْ وْڨَالَهْ " يَايُوسَفْ بَنْ دَاوْدْ مَاتْخَافْشْ بَاشْ تَتْزَوَجْ بْمَرْيَمْ عْلَى خَاَطَرْ هَاذَاكْ اَللِّي رَافْدَاتَهْ فِي كَرْشْهَا هُوَ مَنْ اَلرُوحْ اْلقُدسْ. ²¹ وْغَادِي تَوْلَدْ وَلْدْ وْ تْسَمِيهْ يَسُوعْ عْلَى خَاطَرْهُوَ لِي غَادِي ْيسَلَكْ اَلشَعْبْ مَنْ دْنُوبْهُمْ ²² وْهَذَا ڨَاْع صْرَا بَاشْ يَتْحَقَقْ كْلَامْ رَبِّى بَلْسَانْ الَنْبٍي : ²³ هاَ يَلاَ لْعَذْرَى تَرْفَدْ وْتَوْلَدْ وَلْدْ وَيَتْسَمَى عَمَّانُوئِيلِ اَللِّي َمعْنَاتَهْ الله مْعَاَنَا ²⁴ وْكِي فْطَنْ يُوسَفْ ، دَرْ كِيمَا ڨَالَهْ مَلاَكْ اَلرَبْ وْتْزَوَجْ بْمَرْيَمْ ²⁵ وْبَصَّحْ مَتْزَوَجْشْ بِهَا حَتَى لِوَلْدَتْ الْوَلْدْ وْسَمَّاتَهْ يَسُوعْ.

¹ وْكِي زَادْ يَسُوعْ فِي بِيتْ لْحَمْ فَاليَهُودِيَة، فِي عَهْدْ هِرُودُسْ، جَاوْ عُلَمَاءْ النْجُومْ لْأُورُشَلِيمْ ² إِسَقْسُوا : " وِينْ هُو مَلِكْ الْيَهُودْ الِّي تَوْلَدْ؟ عْلَى خَاطَرْ شَفْنَا النَّجْمَة تَاعَهْ فِي المَشْرِقْ وْجِينَا نَسَّجْدُو لَهْ". ³ وْكِي سْمَعْ المَلِكْ هِرُودُسْ دَاكْ الشِّي خَافْ هُوَ وْڨَاعْ أُورُشَلِيمْ ⁴ لَمْ ڨَاعْ رُؤَسَاءْ رِجَالْ اَلدِّينْ وَاْلكَتَبَة وْسَقْسَاهُمْ،" وٍينْ غَاِدي يْتَوْلَدْ اَلمَسِيحْ؟" ⁵ ڨَالُوا لَهْ: فِي بِيتْ لْحَمْ الْيَهُودِيَة، عْلَى خَاطَرْ هَكَّا مَكْتُوبْ بَالَنْبٍي لِي قَالْ: " ⁶ وْأَنْتِ يَابِيتْ لْحَمْ اَليَهُودِيَة أَرْضْ يَهُودَا، مَاشِي أَنْتِ هِيَ الَصْغِيرَة فِي مْدُنْ يَهُوذَا عْلَى خَاطَرْ مَنَكْ يَخْرَجْ مْدَبَرْ يَرْعَى شَعْبِي إِسْرَائِيلْ" ⁷ وْمَمْبَعْدْ رْسَلْ هِرُودَسْ لْعُلَمَاءْ اَلْنُجُومْ فَي الَسَرْ وْتْحَقَقْ مَنْهُمْ عْلَى اْلوَقْتْ اللِّي بَانِتْ فِيهْ اَلْنْجُومْ ⁸ أَمْبَعْدْ أَرْسَلْهُمْ لْبِيتْ لْحَمْ وْڨَالْ: " رُوحُو وْحَوْسُوا غَايَا عْلَى الْوَلْدْ، وْكِي تَلْقَوَهْ أَرْوَاحُوا خَبْرُونِي بَاشْ أَنَا ثَانَي نْرُوحْ مْعَاكُمْ وْنَسْجَدْ لَهْ " ⁹ وْكِي سَمْعُوا مَنْ الْمَلِكْ رَاحُو، وْشَافُو الَنَّجْمَة تْبَانَلْهُمْ فَي اَلشَرْقْ وْهِيَ غَادِيَة قُدَامْهُمْ حَتَّى لِوَقْفَتْ فَالْبْلاَصَة لِكَايَنْ فِيهَا لْوَلْدْ ¹⁰ وْغِيرْ شَافُو اَلنَّجْمَة فَرْحُوا بَزَافْ ¹¹ وْكِي دَخْلُوا لَدَّارْ شَافُوا لْوَلْدْ وْأَمَّهْ مَرْيَمْ ، رَكْعُوا وْسَجْدُوا لَهْ .وْحَلُّوا كْنُوزْهُمْ وْ مَدُّولَهْ ذْهَبْ وْلْبَانْ وْلْمُرْ ¹² .وْكِي نَبَّهُمْ الَرَّبَ ْفَمْنَامْ بَاشْ مَا يْوَلُوشْ لْهِرُودُسْ،رَاحُو فِي طْرِيڨْ وَحْدُو خْرَى وْوَلاَوْ لَبْلاَدْهُمْ ¹³ وْكِي رَاحُوا، بَانْ مَلاَكْ اَلرَّبْ لْيُوسَفْ فِي مْنَامْ وْڨَالَه : " نُوضْ وْدِّي لْوَلْدْ وْأَمَهْ وَأَهْرَبْ لْمَصَرْوْڨَعَدْ تَمْ حَتَّى نْڨُولْكْ. عْلَى خَاطَرْهِرُودُسْ رَاهْ بَاغِي يَكْتَلْ ْلَولْدْ ". ¹⁴ نَاضْ وَآَدَى لْوَلْدْ وْأَمَّهْ وْرَاحُوا لْمَصَرْ ¹⁵ وْڨَعْدُوا تمَّ حَتَّى لِيمَاتْ هِرُودُسْ . َباشْ يَتْحَقَقْ وَاشْ قَالْ اَلرَّبْ بِالنْبٍي لِي قَالْ:" مَنْ مَصَرْدْعِيتْ وَلْدِي " ¹⁶ وْكِي شَافْ هِرُودُسْ بَلِي عُلَمَاءْ الَنْجُومْ زَعْقُواعْلِيهْ زْعَفْ بَزَافْ. أَرْسَلْ وْكْتَلْ ڨَاعْ لَوْلَادْ اللِّي فِي بِيْتْ لْحَمْ وْڨَاعْ جْوَايَهْ مَنْ لِعَنْدْهُمْ عَامِينْ لْتَحْتْ عْلَى حْسَابْ لْوَقْتْ لِتْحَقَقْ فِيهْ مْعَ ْلمَجُوسْ ¹⁷ وْتْحَقَقَ لِتْڨَالْ عْلَى فَمْ اَلْنبِي إِرْمْيَا ¹⁸ "نَسْمَعْ صُوتْ فَي اَلرَّامَة ، زْڨَا، بْكَا وْالَنْوَّاحْ، رَاحِيلْ تَبْكِي عْلَى وْلاَدْهَا وْ مَابْغَاتْشْ تَتْعَزَى عْلَى خَاطَرْ مَابْقَاوْشْ كَايْنِينْ." ¹⁹ كِي مَاتْ هِرُودُسْ، مَلاَكْ اَلرَّبْ بَانْ لْيُوسَفْ فْْمنَامْ فِي مَصْرْ ²⁰ ڨَالَهْ: " نُوضْ وَدِي لْوَلْدْ وَأَمَّهْ وْوَلَاَوْا َلَأرْضْ إِسْرَائِيلْ عْلَى خَاطَرْ هَادُوكْ لِي كَانُوا َباغْيِينْ يُكَتْلُوااَلَوَلْدْ ". ²¹ أَيَا نَاضْ وْدَا ْلوَلْدْ وْأَمَّهْ وْجَاوْ لْإَسْرَائِيلْ ²² وْبَصَّحْ كِي سْمَعْ بَلِي أَرْخِيلاَسْ مَلِكْ عْلَى الْيَهُودِيَة فِي بْلاَصَة هِيرُودُسْ بُوهْ، خَافْ بَاهْ يْرُوحْ لْتَمْ. وْتْوَحِى لَهْ فَي حُلْمْ ، إِرُوحْ لَجْوَايَهْ اْلجَلِيلْ ²³ وْجَا وْسْكَنْ فِي مْدِينَة اَلنَاصِرَة بَاشْ يَتْحَقَقْ ِلنْڨَالْ "غَادِي َيتْسَمَى نَاصِرَي".

¹ وْ فْدِيكْ الَلِيَامْ جَا يُوحَنَا اَلْمَعْمَدَانْ يْبَشَرْ فْي ْلْخلَا نْتَاعْ بْلاَدْ اَلْيَهُودِيَة ² وْيْڨُولْ:" تُوبُواعْلَى خَاطَرْ ڨَرَبْ مَلَكُوتْ اَلسَمَاوَاتْ" ³ وْهَذَا لِي ڨَالْ عْلِيهْ الَنْبِي إٍشْعِيَاءْ صُوتْ يْزَڨِي فْي َلْخَلَا وْيْڨُولْ: "وَجْدُوا طْرِيڨْ الَرَّبْ وْصَڨْدُوا طَرْقَانَهْ " ⁴ وْكَانْ لْبَاْس يُوحَنَا مَنْ وْبَرْ ْجَمْلْ وْمْحَزَّمْ بْحْزَامْ الْجَلْدْ وْيْعِيشْ بْالَجْرَادْ وْلَعْسَلْ اْلحُرْ ⁵ وْجَاوْ عَنْدَهْ ڨَاعْ النَّاسْ نْتَاعْ أُورُشَلِيمْ وْالْيَهُودِيَة وْڨَاعْ الْجْوَايَهْ نْتَاعْ وَادْ الْأُرْدُنْ وَتْغَطْسُوا مَنَهْ فَي اْلأُرْدُنْ ⁶ مَسْتْعَرْفِينْ بِذُنُوبٍهِمْ ⁷ وْكِي شَافْ يُوحَنَا بَزَافْ اَلنَاسْ مَنْ الْفَرِيسَيِينْ وْاَلصَدِوقَيِينْ إِيجُو لْعَنْدَهْ بَاشْ يَتْعَمْدُوا ڨَالْهُمْ: " يَاوْلاَدْ اْلَفاعِي، شْكُونْ نَبَهْكًمْ بَاشْ تَهَرْبُوا مَنْ زْعَافْ الله الَجَايْ؟ ⁸ " أَيَا بَيْنُو تُوبْتْكُمْ بِاَعْمَالْكُمْ الَصَالْحَة ⁹ وْمَاتْڨُولُوشْ فَي رْوَاحْكُمْ عَنْدْنَا ْبرَاهِيمْ بُونَا عْلَى خَاطَرْ نْڨُولْكُمْ : الله قَادَرْ إِيدِيرْ مَنْ هَاذْ الْحَجَرْ وْلَادْ لِإبْرَاهِيمْ ¹⁰ وْدُرْوَكْ هُوَلاَ اْلفَاسْ مَحْطُوطْ عْلَى جَذْرْ اَلشْجَرْ، وْكُلْ شَجْرَة مَاتَعْطِيشْ غَلَّة مْلِيحَة تَنْڨَطَعْ وْتَنْقَاسْ فَالنَّارْ ¹¹ أَنَا نْغَطَّسْكُمْ فِالْمَا لَلتُّوبَة، بَصَّحْ غَادِي إِيجِي وَاحَدْ مَمُّورَايَا قْوِيْ مَنِّي وْمَانَسْتَهَلْشْ حَتَّى نَڨْلَعْ صَبَّاطَهْ وْهُوَ يْعَمَّدْكُمْ بَالرُّوحْ القُدُسْ وَالنَّارْ ¹² وْفِي يَدَّهْ المَدْرَى يْنَقِّي بِهَا اْلدَّرْسْ نْتَاعَهْ وَيْلَمْ الڤَمْحْ فِي لَمْخَازَنْ نْتَاوْعَهْ ، بَصَّحْ التْبَنْ غَادِ يَحَرْڤَهْ بَالنَّارْ الِّي عُمَّرْهَا مَا غَادِي تَنْطْفَا>> ¹³ وْمَنْ بَعْدْ جَا يَسُوعْ مَالجَلِيلْ حَتَّى لْوَادْ الأُرْدُنْ لْعَنْدْ يُوحَنَّا بَاشْ يْغَطْسَهْ ¹⁴ بَصَّحْ يُوحَنَّا مَاخَلاَّهْشْ وْڤَالَّهْ: " أَنَا لِي مَحْتَاجْ نَتْغَطَّسْ مَنَّكْ وَنْتَ جِيتْ لِيا نْغَطْسَكْ؟ ", ¹⁵ جَاْوَبَهْ يَسُوعْ وْڤَالَهْ: "غِيرْ قْبَلْ بْهَاذْ الشِّي دَرْوَكْ عْلَى خَاطَرْ ِإلِيقْ نْكَمْلُوا مُرَادْ الَلَّه " وْتَمْتَمْ خَلَّاهْ يَتْغَطَّسْ ¹⁶ وْغِيرْ تْغَطَّسْ يَسُوعْ طْلَعْ مَلْمَا تْحَلَّتْ لَهْ السْمَا وْشَافْ رُوحْ الله نَازَلْ عْلَى صُورَةْ حْمَامَة وَتْحَطَّتْ عْلِيهْ ¹⁷ وْصُوتْ مَنْ السْمَا يْڤُولْ :" هَذَا بْنِي لَحْبِيبْ الِّي بِيهْ فْرَحْتْ بَزَّافْ".

¹ وْمَنْ بَعْدْ دَا رُوحْ الله يَسُوعْ لَلَخْلاَ بَاشْ يْجَرْبَهْ إبْلِيسْ ² وْ صَامْ رَبْعِينْ يُومْ وْرَبْعِينْ لِيلَة، وْمَنْ بَعْدْ جَاهْ الجُوعْ. ³ وْجَا عَنْدَهْ إِبْلِيسْ الِّي يْجَرْبْ وْڤَالَّهْ: " الاَ كُنْتْ إِبْن الله، تْڤُولْ لْهَاذْ لَحْجَرْ إِيوَلِّي خُبْزْ ⁴ " وْرَدْ عْلِيهْ يَسُوعْ وْڤَالْ: " مَكْتُوبْ فِي كْتَابْ الله، مَشِي غِيرْ بَالخُبْزْوَحْدَه يْعِيشْ البْنَادَمْ، بَصَّحْ يْعِيشْ بِكُلْ كَلْمَة ْيڤُولْهَا الهُ " ⁵ مَنْبَعْدْ دَاهْ إبْلِيسْ لَمْدِينَة أُورُشَلِيمْ المْقَدْسَة، أوَڤْفَهْ فِي مَوْضَعْ عَالِي فُوڤْ بِيتْ الله. ⁶ وْڤَاَّلهْ: "إِلَا كُنْتْ إِبْن الله ، قِيسْ رُوحَكْ لَتَّحْتْ عْلَى خَاطَرْ مَكْتُوبْ فَ كْلاَمْ الله غَادِي يْوَصِّي الْمَلاَيْكَة انْتَاعَهْ عْلِيكْ ، وَعْلَى إِيدِّيهُمْ َيدُّوكْ بَاشْ مَتُدْرُبْشْ رَجْلِيكْ مْعَ لَحْجُرْ" ⁷ وْجَاوْبَهْ يَسُوعْ : " مَكْتُوبْ فِي كْتَابْ الله ثَانِي مَاتْجَرَّبْشْ الرَّبْ إلَهَكْ" ⁸ مَنْبَعْدْ طَلْعَهْ إْبَلِيسْ لْوَاحَدْ لَجْبَلْ عَالِي بَزَّافْ، وْوَرَّالَهْ ڤَاعْ الْمَمَالَكْ تَاعْ الدَّنْيَا وْالْعَزْ لْلِّي عَنْدْهُمْ ⁹ وْڤَاَّلهْ: " ڤَاعْ هَاذْ الْشِّي غَادِي أَنْمَدَّهْلَكْ إِذَا اسْجَدَتْلِي وَعْبَدْتْنِي" ¹⁰ تَمْتَمْ رَدْلَهْ َيسُوعْ:" رُوحْ يَاشِيطَانْ أَعْلاَ خَاطَرْ مَكْتُوبْ فَكْتَابْ الله، لَلْرَّبْ إِلاَهَكْ تَسْجُدْ وْغِيرْ لِيهْ وَحْدَهْ تَعْبَدْ ". ¹¹ وْمَنْ بَعْدْ هَادْ الْشِّي خَلَّاهْ إِبْلِيسْ، وْجَاوْ المَلاَيْكَة وْبدَاتْ تَخَدْمَهْ ¹² وْكِي سْمَعْ يَسُوعْ بَلِّي يُوحَنَّا الغَطَّاسْ تْشَدْ فَالْحَبْسْ، رَاحْ لَلْجَلِيلْ ¹³ خَلَّى النَّاصِرَة وْرَاحْ سْكَنْ فْكَفَرْنَاحُومْ الْلِّي حْدَا بْحَرْ الْجَلِيلْ فَبْلاَدْ زَبُولُونَ وْنَفْتَالِي ¹⁴ بَاشْ يَتْحقَّقْ الْلِّي ڤَالَهْ الْنْبِيْ إِشْعِيَاءْ ¹⁵ " بْلاَدْ زَبُولُونْ وْبْلاَدْ نَفْتَالِي الْلِّي فِي طْرِيڤْ لَبْحَرْ، مَنْ جِهَة لُخْرَى انْتَعْ وَادْ الأُرْدُنْ بْلاَدْ الجَلِيلْ نْتَاعْ الشُّعُوبْ الْلِّي يَهُوذَا ¹⁶ الشَّعْبْ الجَالَسْ فَالظَّلْمَة شَافْ نُورْ عَظِيمْ، وَالْجَالَسِينْ فِي بْلاَدْ الْمُوتْ شْرَقْ عْلِيهُمْ وَحْدْ النُّور" ¹⁷ مَنْ دَاكْ الْوَقْتْ بْدَا يَسُوعْ اخَبَّرْ النَّاسْ وَيْڤُولْ : " تُوبُوا عْلَى خَاطَرْ مَلْكُوتْ السَّمَوَاتْ" ¹⁸ كِي كَانْ يَسُوعْ يَتْمَشَّى حْدَى بْحَرْ الجَلِيلْ شَافْ زُوجْ خَاوَة، سِمْعَانْ الْلِّي يْعَيْطُولَهْ بُطْرُسْ وْأَنْدْرَاوُسْ خُوهْ، كَانُوا يْقِيسُوا الشَّبْكَة فِالْبْحَرْ عْلَى خَاطَرْشْ كَانُوا صَيَّادِينْ الْحُوتْ ¹⁹ وْڤَالْهُمْ يَسُوعْ:" تَبْعُونِي وَانَا نْرَدْكُمْ صَيَّادِينْ النَّاسْ". ²⁰ تَمْتَمْ خَلاَّوْ الشَبَّاكْ تَاعْهُمْ وْتَبْعُوهْ ²¹ وْمَنْ بَعْدْ رَاحْ مَنْ تَمَّا وْشَافْ زُوجْ خَاوَة وَحْدُخْرِينْ، يَعْقُوبْ إْبنْ زَبَدِي وْخُوهْ يُوحَنَّا، مْعَ بُوهُمْ زَبَدِي فِي وَحْدْ لَفْلُوكَة يْصَڤْدُوا الشَّبَاكْ تَاعْهُمْ وْغِيرْ عَيَّطَلْهُمْ ²² خَلاَّوْ بُوهُمْ وَالفْلُوكَة وْتَبْعُوهْ ²³ يَسُوعْ يُعَلِمْ وَيَشْفِي الْمَرْضَى وْرَاحْ يَسُوعْ لْڤَاعْ الْمْكَانْ فِي بْلاَدْ الْجَلِيلْ يْعَلَّمْ فِي دْيَارْ الْصْلاَةْ وَيْخَبَّرْ بَبْشَارَة مَمْلَكَة الله وْكَانْ يْبَرِّي ڤَاعْ ضْعِفْ وْمْرِضْ ²⁴ وَتْشَيَّع ْخْبَارَهْ فِي ڤَاعْ سُورِيَا وْجَابُولَهْ ڤَاعْ الْمَرْضَى لِّي كَانُو يَتْوَجْعُوا وَالْمَسْكُونِينْ الْلِّي فِيهُمْ الأَرْوَاحْ وَاْلمَشْلُولِينْ وْبَرَّاهُمْ ²⁵ وْتَبْعَهْ بَزَّافْ الْنَّاسْ مَنْ الْجَلِيلْ وْالمْدُنْ العَشْرَة أُورُشَلِيم وْبْلاَدْ الْيَهُودِيَة وْمَنْ جِهَة لُخْرَى انْتَاعْ بْلاَدْ الأُرْدُنْ.

¹ وْكِشَافْ يَسُوعْ لْجْمَاعَاتْ تَاعْ النَاسْ طْلَعْ لَلْجْبَلْ ، وْكِجَمَّعْ جَاوْ عَنْدَهْ التَلَاميذْ تَاعَهْ وْبْدَا يْعَلَمْهُمْ وْ ² ڤَالْ: ³ "سَعْدَاتْ المْسَاكِينْ بارُوحْ عْلَاخَطَرْ لِيهُمْ مَمْلَكَة السَمَوَاتْ ⁴ سَعْدَاتْ لِيحْزِينِينْ عْلَاخَطَرْ غَادِي يَتْعَزَاوْ ⁵ سَعْدَاتْ المَتْوَاضْعِينْ عْلَاخَطَرْ غَادِي يَوَرْثُوا الاَرْضْ ⁶ سَعْدَاتْ هَادُوكْ الجِيعَانِينْ والعَطْشَانِينْ لَلْبِرْ عْلَاخَطَرْ غَادِي يَشَبْعُوا ⁷ سَعْدَاتْ هَادُوكْ لِيَرَحْمُوا عْلَاخَطَرْ اللَهْ غَادِي يَرْحَمْهُمْ ⁸ سَعْدَاتْ هَادُوكْ لِقَلْبْهُمْ بْيَضْ عْلَاخَطَرْ غَادِي يْشُوفُوا اللَّهْ ⁹ سَعْدَاتْ هَادُوكْ لِيْعِيشٌوا فالَهْنَا عْلَاخَطَرْ غَادِي يْتْسَمَاوْ وْلَادْ الَّلهْ ¹⁰ سَعْدَاتْ المَطْرُودِينْ مِن اجْل البِرْ عْلَاخَطَرْ غَادِي يْكُونْ لِيهُمْ مَلَكُوتْ السَمَوَاتْ ¹¹ سَعْدَاتْ هَادُوكْ لِعَايْرُوهُمْ وْ يْطَرْدُوهُمْ وْيْقُولوا عْلِيهُمْ كْلَامْ كَاذَبْ عْلَاجَالِي ¹² افَرْحُوا عْلَاخَاطَرْ اَبُوكُمْ عَظِيمْ في السَمَوَاتْ عْلَاخَاطَرْ هَاكْدَا طرْدُوا الاَنْبِيَاءْ لِي قْبَلْكُمْ ¹³ نْتُومَا مِلْحْ الاَرْضْ ، بَصَّحْ اذَا خْسَرْ الملْحْ ، بَاشْ غَادِي يْتْمَلَّحْ ؟ مَايَصْلَحْ حَتَى لْحَاجَة ، غِيرْ يْنْقَاسْ بَرَا وْيَعفْسُوا عْلِيهْ النَاسْ ¹⁴ نْتُمَا نُور هَادْ الدَّنْيَا ، مَايْمْكَنْشْ لْمَدِينَة فٌوڤْ الارْضْ تْدَّرَّڤْ ¹⁵ وْمَاكَاشْ وَاحَدْ يَشْعَلْ القَنْدِيلْ وْيْحَطَّهْ تَحْتْ المِكْيَالْ بَصَّحْ يْحَطَّهْ في بْلَاصَة بَاشْ يْضَوِي عْلى ڤَاعْ الدَّارْ ¹⁶ وْهَكَا خَلِيوْ النُورْ تَاعْكُمْ يْضَوِي ڤُدَّامْ النَّاسْ ، بَاشْ يْشُوفوا فْعَالْكُمْ لْمْلِيحَة وْيَعْطُوا العِزْ وْ المَجْدْ لْبُوكُمْ لِفْسْمَا" . ¹⁷ رَدُّوا بَالْكُمْ تَحَسْبُوا بَلِّي جِيتْ بَاشْ نَڤْلَعْ وَلَاَّ نَنْقُدْ الشَرِيعَة تَاعْ مُوسَى وَلَاّ كُتُبْ الاَنْبِيَاءْ . مَاجِيتْشْ مَاجِيتْشْ بَاشْ نَنْقُذْ بَصَّحْ بَاشْ نْكَمَّلْهُمْ . ¹⁸ وْنْڤُولْكُمْ الحَقْ غَادِي تْزُولْ السْمَا والاَرْضْ وْ بَصَّحْ مَايْزُولْ حَتَى حَرْفْ وَاحَدْ وْكَلْمَة وَاحَدَة مَنْ هَادِ الشَرِيعَة حَتَى يَتْحَقَّقْ كُلْ شِي لِيفِيهْ ¹⁹ وَلِّي مَايْدِيرْشْ وَحْدَة من الوَصَايَا الصْغِيرَة وْيْعَلَّمْ بِهَا لُخْرِينْ بَاشْ يْدِيرُوهَا غَادِي يْكُونْ هُوَ الصْغِيرْ في مَلَكُوتْ السَمَوَاتْ وْ اللِّي دَارْ بِهَا وْ عَلَّمْهَا لْنَّاسْ غَادِي يْكُونْ كْبِيرْ في مَلَكُوتْ السَمَوَاتْ . ²⁰ وْ اَنَا نْڤُولْكُمْ : "يْلَا مَاكَانَتْشْ الطَاعَة تَاعْكُمْ كْتَرْ مَنْ عُلَمَاءْ الشَرِيعَة والفَرَسِيينْ غَادِي عَمَرْكُمْ مَا تَدَخْلُوا لْمَمْلَكَة السَمَواتْ ". ²¹ رَاكُمْ سْمَعْتُوا بَلِّي نْڤَالْ لْنَّاسْ اللَّوْلِينْ مَاتَكَتْلُوشْ وْ لِيَكْتَلْ مْسْتْحِقْ الحُكْمْ ²² بَصَّحْ اَنَا نْڤُولْكُمْ ڤَاعْ لِيَزْعَفْ عْلَى خُوهْ فِي البَاطَلْ يَسْتْحَقْ الحُكْمْ وْلِي يْڤُولْ لْخُوهْ مَافِيكْشْ فَايْدَة يْسْتْحَقْ يَتَحْكَمْ عْلِيهْ في المَحْكَمَة الكْبِيرَة وْ لِي ڤَالْ لْخُوهْ احْمَقْ غَبِي يْسْتَاهَلْ نَارْ جَهَنَمْ ²³ وْ يْلَا جَبْتْ قُرْبَانَكْ لَلْمَذْبَحْ وْ تْفَكَرْتْ بَلِي نْتَا زَعْفَانْ عْلَى خُوكْ ²⁴ خَلِي قُرْبَانَكْ تَمَّا ڤُدَّامْ المَذْبَحْ وْرُوحْ وْصَالَحْ خُوكْ وْمْبَعْدْ ارْوَاحْ وْ قَدَّمْ قُرْبَانَكْ ²⁵ تْصَالَحْ مْعَ الِّي مُدَّعِي عْلِيكْ مَادَامْ تَتْمَشَاوْ مْعَ بَعْضْ في طْرِيڤْ وَحْدَة ، بَاشْ مَيْسَلْمَكْشْ عْدُوَّكْ لَلْقَاضِي وْيْسَلْمَكْ لْقَاضِي لَلْبُولِيسِي وْتَنَرْمَى في الحَبْسْ ²⁶ الحَقْ نْڤُولْكُمْ :"مَاتَخْرجْشْ مَنَّا حَتَى تْكَمَلْ الدُورو التَالِي لِي عْلِيكْ" . ²⁷ وْسْمَعْتُوا بَلِّي نْڤَالْ لَلَّوْلِينْ مَتَزْنِيشْ ²⁸ وبَصَّحْ انَا نْڤُولْكُمْ ڤَاعْ الِّلي شَافْ مْرَا بَاشْ يَتْشَهَاهَا رَاهْ هُوَ زْنَا مْعَاهَا فِي ڤَلْبَهْ ²⁹ وْ يْلَا عِينَكْ لِمْنَى طَّيْحَكْ فِي الذَّنْبْ ڤْلَعْهَا وْ قِيسْهَا عْلِيكْ عْلَى خَاطَرْ الَّلاهُمَ تَخْسَرْ طَرْفْ مَنْ ذَاتَكْ وْلَا يْنْقَاسْ ڤَاعْ جَسَدَكْ في النَارْ ³⁰ وْيْلَا يَدَّكْ لِمْنَى طَّيْحَكْ في الذْنُوبْ ڤْطَعْهَا وْقِيسْهَ عْلِيكْ عْلَا خَاطَرْ الَّلهُمَ تَخْسَرْ طَرْفْ مَن ذَاتَكْ وْلا يْنْقَاسْ كَامَلْ جِسْمَكْ فِي جَهَنَمْ . ³¹ وْنْڤَالْ لِي يْطَلَّڤْ مَرْتَهْ الِيقْ يَعْطِيهَا وَرْقَتْهَا تَاعْ الطْلَاڤْ ³² وْبَصَّحْ اَنَا نْڤُلْكُمْ لِيْطَلَقْ مَرْتَهْ عْلَى سْبَابْ وَحْدَاخُرْ مَنْ غِيرْ الزِنَا رَاهْ يْرُدْهَا تَزْنِ وْلِيَتْزَوَجْ بْمْطَلْقَة يْرُدْهَا تَزْنِ . ³³ وْ سْمَعْتُوا نْڤَالْ لَلَّوْلِينْ :مَاتَحْلَفْشْ بَصَّحْ يْلَا حْلَفْتْ مَاتَحْنَتْشْ ³⁴ و بَصَحْ انَا نْڤُلْكُمْ عُمَرْكُمْ مَا تَحَلْفُوا بالسْمَا عْلَى خَاطَرْ هِيَ عَرْشْ الَّلهْ ³⁵ وْلَا بالارْضْ عْلَا خَطَرْ هِيَ مَوْضِعْ رجْلِيهْ ولا بأُرْشَالِيمْ عْلى خَاطَرْ هِيَ مْدِينَة المَلِكْ العَظِيمْ ³⁶ وْمَاتَحْلَفْشْ بْرَاسَكْ عْلىخَاطَرْ مَتقْدَرْشْ تْرُدْ شَعْرَة وَحْدَة مَنَهْ كَحْلَا وَلا بَيْضَا ³⁷ بَصَّحْ يْلِيقْ تْكُونْ هَدْرَتْكُمْ وَاهْ وَاه ، وْ لَا لَا وْلِي يَنْزَادْ عْلَى هَدَا هُوَ مَنْ ابْلِيسْ ³⁸ سْمَعْتُوا بَلِي نْڤَالْ :"عَيْنْ بْعَيْنْ ،وْسِنْ بْسَنْ" ³⁹ وْبَصَّحْ اَنَا نْڤُولْكُمْ مَاتْرُدْشْ الشَرْ بالشَرْ بَصَحْ لِيَصَفْعَكْ عْلَى خَدَّكْ لِمْنَى عْطِيهْ الخَدْ لَاخُرْ ⁴⁰ وْلِبْغَا يْعَادِيكِ وْيَدِيلَكْ عْبَايْتَكْ خَلِيلَهْ حَتَى البَرْنُوسْ تَاعَكْ . ⁴¹ وْيْلَا وَاحَدْ سَيَّفْ عْلِيكْ بَاشْ تَمشِي مْعَاهْ اَلْفْ خُطْوَة ، تْمَشَى مْعَاهْ اَلْفِينْ . ⁴² وْلِي يَطْلَبْ مَنَكْ شِي حَاجَة عْطِيهَا لَهْ وْلِي بْغَا يَتْسَلَّفْ مَنَّكْ مَاتْرُدَهْشْ خَاوِي . ⁴³ سْمَعْتُوا بَلِّي نْڤَالْ :"تَبْغِي قْرِيبَكْ وْتَكْرَهْ عْدُوَكْ ⁴⁴ وبَصَحْ تَنَا نْڤُلْكُمْ بْغِيوْ عَدْيَانْكُمْ ، وْبَارْكُوا الِلي لَعْنُوكُمْ وْدِيروا لَحْسَنْ اللِي يَكَرْهُوكُمْ وْدْعِيوْ بَاشْ يَصْطَاهْدُكُمْ وْ يْطَرْدُكُمْ ⁴⁵ بَاشْ تْكُونُوا وْلَادْ بُوكُمْ اللِي فْسْمَا الِيَشْرَقْ شَمْسَهْ عْلَى الاَشْرَارْ وْ الصَالْحِينْ ، وْ يْنَزَلْ النُّوْ عْلَى الحَقِيينْ و الظَالْمِينْ ⁴⁶ يْلَا بْغِيتُوا غِيرْ الِّلي يَبْغِيكُمْ وَاشْ مَنْ اَجْرْ عَنْدْكُمْ ، مَاشِي حَتى العَشَارِينْ تَانِي ايْدِيرُوا كِيف كِيفْ ؟ ⁴⁷ وْ يْلَا سَلَمْتُوا عْلَى خُوتْكُمْ بَرْكْ وَاشْ مَنْ فَضْلْ دَرْتُوا؟ مَشِي العَشَارِينْ ايْدِيرُوا هَكَا ؟ ⁴⁸ كُونُوا نْتُومَا كَامْلِينْ كِيمَا بُوكُمْ اللِّي فْسْمَا هُوَ كَامَلْ ".

¹ احَرْزُوا رْوَاحْكُمْ تْصَدْقُوا قُدَامْ النَاسْ بَاشْ يْشُوفُوكُمْ ولَا مَاغَادِيشْ يْكُونْ عَنْدْكُمْ اجْرْ عَنْدْ بُوكُمْ الِّلي فْسْمَا ² وْيْلَا بْغِيتْ تْصَدَقْ مَاتْبَرَّحْشْ بِهَا بالْبُوقْ قُدَامْ النَّاسْ كِيمَا يْدِروا المُنَافِقِينْ في دْيُورْ الصْلَاةْ وْ الزُنْقَا بَاشْ النَاسْ تَشْكَرْهٌمْ وْتَعْطِيهُم العِزْ ، نڤُولْكُمْ الحَقْ هَادُوكْ النَاسْ دَّاوْ الاَجْرْ تَاعْهُمْ مَنْ عَنْدْ النَاسْ ³ وْ بَصَّحْ نْتَا كِي تَعْطِي صَدَقَة يْلِيقْ يَدَّكْ لْيُسْرى مَتَعْرَفْشْ وَاشْ تْدِيرْ يَدَّكْ لِمْنى ⁴ بَاشْ تَبْقى الصَدَقَة تَاعَكْ فِي السِرْ وْ بُوكْ لِفْسْمَا لِي مَا يْخْفَى عْلِيهْ حَتَى حَاجَة هُوَ غَادِي يْجَازِيكْ ." ⁵ وْكِتْصَلُوا مَاتْدِيرُوشْ كِيمَا المُنَافِقِينْ ، لِّي يَبْغُوا يْصَلُوا وْهُمَا وَاڤْفِينْ في الدْيُورْ الصْلَاةْ وْ في الطُرڤَانْ بَاشْ يْبَانُوا للنَّاسْ . نْڤُولْكُمْ الحَقْ هَادُوكْ النَّاسْ دَّاوْ اجْرْهُمْ ⁶ بَصَّحْ انْتَ مِينْ تَبْغِي تْصَلِّي دْخُلْ لَلْمَخْدَعْ تَاعَكْ وْ غْلَقْ بَابَكْ وْ صَلِّي لْبُوكْ الِّلي هُوَ في الخَفَاءْ وْبُوكْ الِّلي هُوَ في الخَفَاءْ يْشُوفْ وْ يْجَازِيكْ في العَلانْ ⁷ وْ كِتْصَلُّوا مَا تْعَاوْدُوشْ الهَدْرَة فِي البَاطَلْ كِيمَا يْدِيروا هَادُوكْ النَّاسْ لِيَعْبْدُوا الاصْنَامْ ، عْلَاخَطَرْ يَحَسْبُوا بْكَثْرَة الهَدْرَة غَادِي يُسْتَجَابْ لِيهُمْ ⁸ مَاتْكُونُوشْ كِيفْهُمْ عْلَى خَاطَرْ بُوكُمْ يَعْرَفْ وَاشْ تَسْتْحَقُوا قْبَلْ مَا تَطَلْبُوهْ صَلُّوا نْتُومَا هَكَا: ⁹ " بَابَا الِّلي في السْمَا اِسْمَكْ يَتْقَدَّسْ ¹⁰ وْ مَمْلَكْتَكْ تْجِي وْمَشِيئْتَكْ تْكُونْ كِيمَا في السْمَا هَكَا عْلَى الاَرْضْ ¹¹ الخُبْزْ الِّلي يَكْفِينَا اليُومْ ¹² غْفَرْ لِينَا ذْنُوبْنَا كِيمَا نَغَفْرُوا لْهَادُوكْ لِيذَنْبُوا في حَقْنَا ¹³ وْحْفَظْنَا بَاشْ مَانْطِيحُوشْ في التَجْرُبَة وْ نَجِينَا من الشِريرْ عْلَاخَطَرْ لِيكْ المُلْكْ وْ القُوَة وْ المَجْدْ الى الابَدْ ، امِينْ" ¹⁴ وْيْلَا غْفَرْتُوا للنَاسْ ذْنُوبْهُمْ بُوكُمْ في السْمَا يْغْفَرْلْكُمْ تَانِي ¹⁵ وْيْلَا مَاغْفَرْتُوشْ للنَاسْ دْنُوبْهُمْ حَتَى بُوكُمْ السْمَاوِي مَيْغْفَرْلْكُمْشْ دْنُوبْكُمْ . الصيام ¹⁶ وْكِيتْصُومُوا مَاتْكُونُوشْ مذْبَالِينْ كيمَا المُنَافِقينْ كِيْبَيْنُوا وْجُوهْهُمْ للنَاسْ بَلِّي صَايْمِينْ ¹⁷ وْ بَصَّحْ نْتَا كِيتْصُومْ ، دْهَنْ شَعْرَكْ وْ غْسَلْ وَجْهَكْ ¹⁸ عْلَاخَطَرْ مَاشِي للنَاسْ لِخَصَّكْ تْبَان صَايَمْ بَصَّحْ لْبُوكْ السْمَاوِي الِّلي في السَّرْ وْبُوكْ الِّلي في السَّرْ يْجَازِيكْ عَلَانِيَة . كنوز في السْمَا ¹⁹ مَاتْلَمُوشْ لِيكُمْ كْنُوزْ في الارْضْ وِينْ يَفْسَدْ السُّوسْ وْ الصْدَا وْ وِينْ يَحَفْرُوا الخِيَّانْ وْيَخَوْنُوهْ ²⁰ بَصَّحْ لَمُّوا لِيكُمْ كْنُوزْ في السْمَا وِينْ مَا يَفَسْدَهْ لَا سُوس ولا وِينْ مَايَحْفَرْشْ الخَايَنْ بَاشْ يَخَوْنَهْ ²¹ عْلَى خَاطَرْ وِينْ مَاكَانْ كَنْزَكْ تَمَا غَادِي يْكُونْ قَلْبَكْ ²² العِينْ هِي نُورْ الجَسَدْ اذا كَانتْ عِينَكْ مْلِيحَة جَسدَكْ يْكُونْ مْنَوَرْ ²³ وْ اذا كَانتْ عِينَكْ شَرِيرَة جَسَدَكْ ڤَاعْ يْكُونْ مْظَلَّمْ وْ يْلَا كَانْ النُّورْ اللِّي فِيكْ ظْلَامْ ايَّا ظْلَامْ كِيفَاهْ غَادِي يْكُونْ . ²⁴ مَايقْدَرْشْ وَاحَدْ يْخَدَّمْ زُوجْ سْيَادْ عْلى خَاطَرْ غَادِي يَبْغِي وَاحَدْ وْ يَكْرَهْ وَحْدَاخُرْ ولَا يْكُونْ امِينْ لْوَاحَدْ وْيَحْڤَرْ لَاخُرْ مَاتَقَدْرُوشْ بَاشْ تَخَدْمُوا اللَّهْ والدْرَاهَمْ . الله يعْتَنِي بِنَا ²⁵ وْعْلى هَادْ الشِي نْڤُولْكُمْ :مَاتْقَلْقُوشْ عْلى حْيَاتْكُمْ ، وَاشْ تَاكْلُوا ولاْتَشَرْبُوا ولَا وَاشْ تَلْبْسُوا مَاشِي الحْيَاةْ مُهِمَة كْتَرْ مالْمَاكْلَة وْالذَاتْ مُهِمَّة كْتَرْ مالَّبْسَة ؟ ²⁶ شُوفُوا طْيُورْ السْمَا رَاهَا مَاتَزْرَعْ مَاتَحْصَدْ وْمَاتْلَمْشْ فالْمَخَازِنْ وْبُوكُمْ اللِّي فالسْمَا يَرْزَقْهَا مَاكْلَتْهَا . وَاشْ مَاشِي نْتُومَا خيرْ مَنْهَا بزَاف ؟ ²⁷ شْكُونْ مَنْكُمْ يْلا تْقَلَقْ غَادِي يْزِيدْ غِيرْ سَاعَة فِي عُمْرَهْ ؟ ²⁸ عْلَاشْ رَاكُمْ تَتْقَلْقُوا عْلى اللَّبْسَة شُوفُوا غَايَا الوَرْدْ الِّلي في الحقُولْ كِيفَاشْ تَكْبَرْ ، مَاتَتْعَذَبْ مَاتَغْزَلْ ²⁹ وْ بَصَّحْ نْڤُولْكُمْ الحَقْ حَتَّى سلَيْمَانْ بْرُوحَهْ في العَزْ تَاعَهْ عُمْرَهْ مَالْبَسْ كِيمَا شِي وَرْدَة فِيكُمْ ³⁰ يَاقْلِيلِي الايمَانْ اذا كَانْ الحْشِيشْ اللِّي في الحْقُولْ اللِّي اليُومْ تْشُوفَهْ وْغَدْوَ الِّلي عْلِيهْ يْنْقَاسْ في النَارْ اِلَبْسَهْ الَّله هَاكَا ، كِيفَاشْ مَايْلَبَسْكُمْشْ نْتُمَا لِي خِيرْ مَنَّهْ ؟ ³¹ مَاتَتْقَلْقوشْ وَاشْ نَاكُلْ ؟ وَاشْ نَشْرَبْ ؟ وَاشْ نَلْبَسْ ؟ ³² ڤَاعْ هَادَا تَطَلْبَهْ النَاسْ لِمَتَعْرَفْشْ الَّلهْ . عْلَى خَاطَرْ بُوكُمْ الِّلي فْسْمَا يَعْرَفْ بَلِي تَسْحَقُوا لْكُلْ هَادْ الشِي ³³ بَصَّحْ طَلْبُوا في الَّلوَلْ مَلَكُوتْ الَّلهْ وْ البِرْ تَاعَهْ وْڤَاعْ هَادْ الشِي غَادِي يَنْزَادْلْكُمْ ³⁴ مَاتَتْقَلْقُوشْ عْلَى غَدْوَة خَلِي هَمْ غَدْوَة لْنَفْسَهْ وْكُلْ نْهَارْ بَرْكَاهْ غِيرْ هَمَهْ

¹ مَاتْحْكْمُوشْ عْلَى حَدْ بَاشْ مَايْنْحْكَمْشْ عْلِيكُمْ ² عْلَى خَاطَرْ بالْحُكْمْ الِّلي تْحْكْمُوا بِيهْ يَنْحْكَمْ عْلِيكُمْ بِيهْ ³ عْلَاشْ تْشُوفْ القَشْرَة لِي فِي عِينْ خُوكْ وْ بَصَحْ مَاتْشُوفْشْ الخَبْشَة لِي فِي عِينَكْ . ⁴ وْلَا كِيفَاشْ تْقُولْ لْخُوكْ خَلِينِي نَڤْلَعْ القَشْرَة مَنْ عِينَكْ وْنْتَ فِي عِينَكْ كَايَنْ خَبْشَة ؟ ⁵ يَالْمُنَافِقِينْ ، خَرَّجْ قْبَلْ العُودْ مَنْ عِينَكْ وْمَمْبَعْدْ تْشُوفْ غَايَا بَاشْ تَڤْلَعْ القَشْرَة تَاعْ التِينْ مَنْ عِينْ خُوكْ ⁶ مَاتَعْطُوشْ الحَاجَة المْقَدْسَة لَلْكْلَابْ وْمَاتْقِيسُوشْ الجُوهَرْ تَاعْكُمْ لَلْحْلَالِيفْ لَئِلَا يَعْفْسُوا عْلِيهْ بْرَجْلِيهُمْ اسئلوا ، اطلبوا ، اقرعوا ⁷ سَالُوا يْنْعْطَالْكُمْ ، حَوْسُوا غَادِي تَلْڤَاوْ .ضَرْبُوا في البَابْ وْغَادِي يَنْحَلْ لْكُمْ ⁸ رَاهْ ڤَاعْ لِي يَطْلَبْ يَنْعْطَالَهْ وْ الِّلي يْحَوَسْ يَلْقَى وْ الِّلي يَضْرَبْ في البَأبْ يَنْحَلْ لَهْ ⁹ شْكُونْ فِيكُم الِّلي اِيلا طْلَبْ مَنَّهْ وَلْدَهْ الخُبْزْ يَعْطِيهْ حَجْرَة ¹⁰ وْ ايلَا طْلَبْ مَنَهْ حُوتَة يَعْطِيهْ لَفْعى ¹¹ كِيفَاشْ نْتُمَا الشْرَار تَعْرْفُوا تَعْطُوا وْلَادْكُمْ الحَاجَاتْ مْلِيحَة ، كِيفَاشْ بُوكُمْ الِّلي فِي السمَاواتْ مَيَعْطِيشْ الخِيراتْ لَلِّلي يْسَقْسِيوَهْ ؟ ¹² ڤَاعْ لِتَبْغُوا يْدِيرَهْلْكُمْ النَّاسْ دِيرُوهْ نْتُمَا تَانِي لِيهُمْ عْلَى خَاطَرْ هَاكَا مَوْجُودْ في تَعْلِيمْ الشَرِعَة والانْبِيَاء . ¹³ دُخْلُوا مَالْبَابْ الضَيَّقْ عْلَى خَاطَرْ البَابْ الِّلي يَدِي لَلْهْلَاكْ وَاسَعْ وْطْرِيڤَهْ سَاهْلَهْ وْبَزَافْ لِي يَدَخْلُوا مَنَّهْ ¹⁴ شْحَالْ ضَيَّقْ البَابْ وْ شْحَالْ وَاعْرَة الطْرِيڤْ الِّلي تَدِّي للْحْيَاةْ وْقْلَالْ هُمَا لِي يَلْقَاوْهَا " الشَجْرَة وثْمَرْهَا ¹⁵ احَرْزُوا رْوَاحْكُمْ مَنْ الانْبِيَاء الكدَابِينْ الِّلي يْجِيوْ عَنْدْكُمْ لَابْسِينْ لْبَاسْ الخِرْفَانْ وْبَصَّحْ هُمَا منْ الدَاخَلْ دْيَابْ خَطَافَة ¹⁶ رَاهْ منْ غَلَتْهُمْ تَعْرْفُوهُمْ ، وَاشْ تَقَدْرُوا تَجْنِيوْ لَعْنَبْ ما الشُوكْ ولَا الكَرْمُوسْ ما السَدْرَة ¹⁷ وْهَكَا كُلْ شَجْرَة مْلِيحَة تَعْطِي غَلَّة مْلِيحَة وْكُلْ شَجْرَة مَاشِي مْلِيحَة تَعْطِي غَلَّة مَاشِي مْلِيحَة ¹⁸ وْ الشَجْرَة مَاشِي مْلِيحَة مَاتْقْدَرْشْ تَعْطِي غَلَّة مْلِيحَة ¹⁹ وْكُلْ شَجْرَة مَاتَعْطِيشْ غَلَة مْلِيحَة تَنْڤْطَعْ وْتَنَرْمَى في النَارْ ²⁰ مَنْ غَلَتْهُمْ تَعْرْفُوهُمْ ²¹ مَاشِي ڤَاعْ الِّلي يْڤُولي :يَارَبْ ،يَارَبْ يَدْخُلْ مَلَكُوتْ السَمَوَاتْ ²² بَزَافْ غَادِي يْڤُولُولِي في دَاكْ نْهَار:ْيَارَبْ، يَارَبْ مَاشِي باسْمَكْ تْنَبَّانَا وْبَسْمَكْ خَرَجْنَا الشَيَاطِينْ وْباسْمَكْ صْنَعْنَا بَزَافْ قُواتْ ؟ ²³ وْفْدَاكْ النْهَارْ غَادِي نْزَڤِّي عْلِيهُمْ ، انَا مَعْرَفْتْكُمْشْ رُوحُوا عْلِيَا يَاللِّي تْدِيروا الاثْمْ. البناؤون الحكماء والبناؤون الجهلاء ²⁴ ڤَاعْ الِلي يَسْمَعْ هَدَّرْتِي هَاذِ وْيْدِيرْ بِيهَا ، نْشَبْهَهْ بْرَاجَلْ عَاقَلْ بْنى دَارَه عْلى صْخَرْ ²⁵ صَبَّتْ النُّوْ وْفَاضُوا الوْدْيَانْ وْجَاتْ رِيحْ قْوِيَة وْضَرْبَتْ دِيكْ الدَّارْ مَاطَحْتْشْ عْلىخَاطَرْ السَاسْ تَاعْهَا كَانْ مَبْنِي عْلَى الصْخَرْ ²⁶ وْڤَاعْ لِي يَسْمَعْ هَادْ لْكْلَامْ تَاعِيوْمَايْدِيرْشْ بِيهْ رَاهْ يْشَبَهْ لْوَاحْدْ الرَاجَلْ جَاهَلْ بْنِى دَارَهْ عْلَى الرْمَلْ ²⁷ طَاحَتْ النُّوْ وْضَرْبَتْ رِيحْ قْوِيَة وْضَرْبَتْ دِيكْ الدَّارْ ، طَاحَتْ وْكَانْ طْيَاحْهَا يْخَوَّفْ ²⁸ كِكَمَلْ يَسُوعْ هَادْ الكْلَامْ ، تْعَجْبُوا النَّاسْ من التَعْلِيمْ تَاعَهْ ²⁹ عْلى خَاطَرْ كَانْ يْعَلَمْهُمْ كِيمَا لِي عَنْدَهْ سُلْطَانْ وْمَاشِي كِيمَا عُلَمَاء الشَرِيعَة تَاعْهُمْ .

¹ وْكِنْزَلْ مالْجْبَلْ تَبْعُوهْ بْزَافْ النَّاسْ . ² وْجَاعَنْدَهْ وَاحَدْ مَجْرَبْ وْسْجَدْ لَهْ وْڤَالْ :"يَاسِيدِي اذَا بْغِيتْ ، رَاكْ تْقْدَرْ تْرُدْنِي طَاهَرْ " . ³ مَدْ يَسُوعْ يَدَّهْ وْلَمْسَهْ وْڤَالَهْ :" بْغِيتْ ،كُونْ طَاهَرْ "وْتَمْتَمْ نْڤْلَعْ مَنَّهْ البَرْصْ وْوَلَى طَاهَرْ . ⁴ وْڤَالَهْ يَسُوعْ :" تحْرَزْ تْڤُولْ لْشِي وَاحَدْ بصَّحْ رُوحْ وْوَرِّي جَسدَكْ لْرَاجَلْ الدِّينْ وْاعْطِي العْطِيَة الِّلي وْصَّى بِهَا مُوسَى بَاشْ يْكُونْ هَادْ الشِي شْهَادَة لِيهُمْ " ⁵ وْكِدْخَلْ يَسُوعْ لْكَفْرْ نَاحُومْ جَا عَنْدَهْ وَاحَدْ الڤَايَدْ تَاعْ العَسْكَرْ يَطْلَبْ مَنَّهْ ⁶ وْيْڤُولَهْ :"يَا سِيدِي ، الخَدَامْ تَاعِي في الدَارْ طَايَحْ في الفْرَاشْ ، مَشْلُولْ وْيَتْعَدَّبْ بَزَافْ" ⁷ ڤَالَهْ يَسُوعْ:" غَادِي نْجِي وْنَشْفِيه"ْ. ⁸ وْجَاوْبَهْ ڤَايَدْ العَسْكَرْ :" اَنَا مَنْسْتَاهَلْشْ يَا سِيدِي تَدْخُلْ تَحْتْ السْقَفْ تَاعْ دَارِي وْ بَصَّحْ ڤُولْ غِيرْ كَلْمَة وَحْدَة وْالخَدَّامْ تَاعِي غَادِي يَبْرَا ⁹ عْلى خَاطَرْ حَتى انَا كَايَنْ لِي يَحْكَمْ فِيَّ وْتَنِي عَنْدِي عَسْكَرْ وْنَحْكَمْ فِيهُمْ وْنْڤُولْ لْوَاحَدْ رُوحْ يْرُوحْ وْلْوَحْدَاخَرْ ارْوَاحْ يْجِي وْنْڤُولْ لَلْعَبْدْ تَاعِي دِيرْ هَادِي وْيْدِيرْهَا " ¹⁰ وْ كِي سْمَعْ يَسُوعْ تْعَجَّبْ وْڤَالْ لْهَادُوكْ الِّلي تَابْعِينَهْ :" نْڤُولْكُمْ الحَقْ مَالْقِيتْشْ حَتَى وَاحَدْ في اسْرَائِيلْ عَنْدَهْ اِيمَانْ قْوِي كِيمَا هَادَا ¹¹ وْرَانِي نْڤُولْكُمْ بْزَافْ نَاسْ غَادِي يْجُو منْ الشَرْقْ وْ مَن الغَرْبْ وْغَادِي يَتَكَاوْ مْعَ ابْرَاهِيمْ وْاسْحَاقْ وْيَعْقُوبْ في مَلَكُوتْ السَمَواتْ . ¹² وْبَصَّحْ هَادُوكْ لِيكَانْ خَاصْهُمْ يْكُونُوا في المَلَكُوتْ غَادِي يْنْقَاسُوا بَرَّا في الظَلْمَة ، وِينْ غَادِي يْكُونْ البْكَا وْصَرِيرْ السْنَانْ" . ¹³ وْمَمْبَعْدْ ڤَالْ يَسُوعْ لَلْڤَايَدء تَاعْ العَسْكَرْ :" رُوحْ ، وْكِيمَا امَنْتْ غَادِي يْكُونْ لَكْ " .وْبْرَا الخَدَامْ تَاعَهْ تَمْ تَمْ ¹⁴ وْكِدْخَلْ يَسُوعْ لْدَارْ بُطْرُسْ ، لْڤَا نْسِيبَة بُطْرُسْ طَايْحَة فْرَاشْ وْفِيهَا الحُمَّى ¹⁵ وْغِيرْ مَسْ يَسُوعْ يَدْهَا ، الحُمَّى رَاحْتْلْهَا وْنَاضَتْ وْضَيْفَتْهُمْ ¹⁶ وْكِجَاتْ العْشِيَة ، جَابُولَهْ بْزَافْ نَاسْ ، مْسْكُونِينْ بالارْوَاحْ وْبْدَا يْخَرَجْ الارْوَاح بْكَلْمَة وْڤَاعْ المَرْضى بَرَّاهُمْ . ¹⁷ بَاشْ يَتْحَقَّقْ الِّلي نْڤَالْ في اشْعِياءْ النَبِي ، لِڤَالْ :" هُوَ الِّلي دَّا وْجَعْنَا وْرْفَدْ مَرْضْنَا ". ثمن التبعية ¹⁸ وْكِيشَافْ يَسُوعْ بْزَّافْ نَاسْ مْدَّاوْرِينْ بِيهْ اْمَرْ التَلامِيذْ تَاوْعَهْ بَاشْ يَڤَطْعُوا لَلْجِهَة لُخْرَى تَاعْ البْحَرْ ¹⁹ وْڤَرَبْ عَنْدَهْ وَاحَدْ من العُلَمَاءْ تَاعْ الشَرِيعَة وْڤَالَهْ :"يَا مُعَلِمْ نْتَبْعَكْ وِينْ مَا تْرُوحْ " ²⁰ ڤَالَهْ يَسُوعْ :" التْعَالَبْ عَنْدْهَا غِيرَانْهَا وْطْيُورْ السْمَا عَنْدْهَا عْشَاشْهَا وْبَصَّحْ وَلْدْ الانْسَانْ مَاعَنْدَهْشْ حَتَى وِينْ يْحَطْ رَاسَهْ ²¹ وْڤَالَهْ وَحْدَاخُرْ نا التَلَامِيذْ :"يَاسِيدِي خَلِينِي غِيرْ نْرُوحْ وْنَدْفَنْ بُويَا" ²² وبَصَّحْ يَسُوعْ جَاوْبَهْ :" تَبَعْنِي وْخَلِي المُوتى يَدَفْنُو المُوتى تَاعْهُمْ" تهدئة العاصفة ²³ وْكِدْخَلْ يَسُوعْ الفْلُوكَة تَبْعُوهْ تَلَامِيذَهْ . ²⁴ وْجَاتْ وَحْدْ الرِيحْ قْوِيَة فالْبْحَرْ حَتى المْوَاجْ عَمْرُوا الفْلُوكَة وْيَسُوعْ كَانْ رَاڤدْ . ²⁵ وْڤَرْبُوا عَنْدَهْ تَلَامِيذَهْ وْنَوْضُوهْ وْڤَالُولَهْ :"سَلَكْنَا يَاسِيدي رَانَا نْمُوتُو ²⁶ وْهُوَ ڤَالْهُمْ :"مَالْكُمْ خَايْفِينْ يَاقْلَالْ الايمَانْ ؟" وْمَنْبَعْدْ نَاضْ وْنْتَهَرْ الرِيحْ وْ البَحْرْ وْتْهَدْنَتْ الحَالَة . ²⁷ وْتْعَجْبُوا النَّاسْ وْڤَالُو :" شْكُونْ هُوَ هَادْ الرَاجَلْ الِّلي الرِيحْ وْ البْحَرْ يْطِيعُوهْ ." ²⁸ وْكِوْصَلْ يَسُوعْ للجِهَة لُخْرَى مالْبْحَرْ حْدى بْلَادْ الجَرْجَسِيِّينْ ، لَاقَاهْ زُوجْ مالْمْجَانِينْ خَارْجِينْ مالْقْبُورْ ، كَانُوا بْزَافْ هَايجِينْ وْبَسْبَابْهُمْ مَاكَانْ حَتئ وَاحَدْ يْفُوتْ منْدِيكْ الطْريق ²⁹ وْ غِيرْ شَافُوهْ بْدَاوْ يْزَڤُوا وْ يْڤُولُوا:"وَاشْ بِينَّا وْ بِينَكْ يَايَسُوعْ اِبْنْ الَّلهْ ؟ جِيتْ هْنَا قْبَلْ الوَقْتْ بَاشْ تْعَذَبْنَا ؟" ³⁰ وْكَانْ وَاحدْ الڤطِيعْ تَعْ الحْلَالَفْ كْبِيرْ يَسْرَحْ فْوَحْدْ المَوْضِعْ ڤْرِيبْ لْهُمْ ³¹ الشْوَاطَنْ طَلْبُوا مَنَهْ وْ ڤَالُولَهْ اذَا بْغِيتْ تْخَرَّجْنَا رْسَلْنَا نَدَّخْلُوا فالڤْطِيعْ تَاعْ الحْلَالَفْ " ³² وْهُوَ يْڤُولَلْهُمْ رُوحُوا ،خَرْجُوا وْرَاحُوا لَلْقطِيعْ تَاعْ الحْلَالِيفْ وْجْرَا ڤَاعْ القطِيعْ وْطَاحْ مالْحَافَة تَاعْ الجْبَلْ لَلْبْحَرْ وْعَرْفُوا فِيهْ ³³ وْ بَصَحْ السُّراحْ هَرْبُوا وْرَاحُوا للْمْدِينَة وْخَبْرُوا بْڤَاعْ دَاكْ الشِي لِصْرَا ³⁴ وْمَمْبَعْدْ ڤَاعْ نَاسْ تَاعْ المْدِينَة خَرْجُوا بَاشْ يَتْلَاقَاوْ مْعَ يَسُوعْ . وْكِي شَافُوهْ طَلْبُوا مَنَّهْ بَاشْ يَخْرَجْ منْ بْلَادْهُمْ .

¹ دْخَلْ يَسُوعْ لَلْفْلُوكَة وْڨْطَعْ لَبْحَرْ ْووَلَى لَمْدِينْتَهْ. ² وْ جاَبُولَهْ وَاحَدْ المَشْلُولْ رَاڨَدْ فَلْفْرَاشْ. وْكِيشَافْ يَسُوعْ إِيمَانْهُمْ ڨَالْ لَلْمَشْلُولْ: " ثِقْ يَاوَلْدِي . نَتْغَفْرَتْ لَكْ دْنُوبَكْ". ³ وَوَحْدِيْنْ مَنْ عُلَمَاءْ الشَرِيعَة ڤَالُو فِي نْفُوسْهُمْ:" هَادْ الرَاجَلْ رَاهْ اِجَدَفْ!". ⁴ عْرَفْ يَسُوعْ أَفْكَارْهُمْ وْ ڤَالْ:"عْلاَهْ رَاكُمْ تْفَكْرُو بِالشَّرْ فِي ڤْلُوبْكُمْ؟" ⁵ وَاشْ لِسَاهَلْ، يَنْڤَالْ :" مَغْفُورَة دْنُوبَكْ، وْ لاَ نُوضْ وْ امْشِي؟ ⁶ بَصَحْ اِبْنْ الانْسَانْ عَنْدَهْ سُلْطَانْ عْلَى الارْضْ يَغْفَرْ الخَطَايَا". امَبْعَدْ ڤَالْ لَلْمَشْلُولْ : "نُوضْ وَرْفَدْ فْرَاشَكْ وْ رْجَعْ لْدَارَكْ." ⁷ ايَ نَاضْ وْرَاحْ لْدَارَهْ. ⁸ وْ كِشَافُو النَاسْ وَاشْ صْرَا تْعَجْبُوا وْ أَعْطاَوْ المَجْدْ لله أَلِي أَعْطَى كِمَا هَادْ السُلْطَانْ لِلْنَاسْ. ⁹ وْكِكَانْ يَسُوعْ غَادِي مَنْ ثَمَ ، شَافْ وَاحَدْ الرَاجَلْ إِسَمُوهْ مَـــتَى مْجَمَعْ فِي دَارْ الضَريِبَة، وْ ڤَالْ:"تَبَعْنِي". نَاضْ وْ تَبْعَهْ. ¹⁰ وْ كِكَانْ هُوَ مَتَكِي فِي دَارَهْ ، جَاوْ عَنْدَهْ بَزَافْ مَالِينْ الضَريِبَة وْ المَذْنِبيِنْ وْ ڤَعْدُوا مْعَ يَسُوعْ وْ مْعَ تْلاَمْذَه. ¹¹ وْ كِشَافُوا رْجَالْ الدِّينْ ڤَالُوا لْتَلاَمِيذَهْ :"عْلاَشْ المُعَلِّمْ نْتَاعْكُمْ يَاكُلْ مْعَ مَالِينْ الضْرِيبَة وْ المُذْنِبِينْ؟" ¹² وْ كِسْمَعْهُمْ يَسُوعْ جَاوَبْهُمْ وْ ڨَالْ : "المَرْضَى هُمَ لِمَحْتَاجِينْ لَطْبِيبْ مَاشِي الصْحَاحْ. ¹³ رُوحُوا وْ تْعَلْمُوا المَعْنَى نْتَاعْ الكْلَامْ: أَنَا بْغِيتْ الرَحْمَة مَاشِي الذَبِيحَة،عْلَى خَاطَرْ مَا جِيتْشْ نْعَيَطْ لِلْمُتَقِينْ الله. بَصَّحْ نَدْعُوا الخُطَاةْ لِلْتَوْبَة". ¹⁴ وْ مَمْبَعْدْ جَاوْ عَنْدَهْ تَلاَمِيذْ تَعْ يُوحَنَا وْ ڨَالُو لَهْ:"عْلاَشْ أَحْناَ وْ رْجَالْ الدِينْ نْصُومُوا بَزَافْ، وْ تَلاَمِيذَكْ مَا يْصُومُوشْ؟". ¹⁵ جَاوَبْهُمْ يَسُوعْ وْ ڨَاْلهُمْ : "وَاشْ يَقَدْرُو المَعْرُوضِينْ لَلْعَرْسْ يَحَزْنُوا وْ العْريِسْ مْعَاهُمْ؟ غَادِي يْجِي الوَقْتْ وِينْ العْرِيسْ غَادِي يَتْرَفَعْ مَنْ بِينَاتْهُمْ، فِي دَاكْ الوَقْتْ غَادِي ْيصُومُوا. ¹⁶ حَتَى وَاحَدْ مَايْرَقَّعْ لْبَاسْ قْدِيمْ بِطَرَفْ كَتَّانْ مَنْ لْبَاسْ جْدِيدْ، عْلَى خَاطَرْ التَرْقِيعَة غَادِى تَتْكَمَشْ،وَيْزِيدْ يَكَبَرْ التَڨْطَاعْ ¹⁷ وْحَتَى وَاحَدْ مَايْدِيرْ الشْرَابْ الجْدِيدْ فىِ ڨُرْبَاتْ قْدُمْ،عْلَى خَاطَرْ غَادِي يَطَرْدْڨُو، وْيْضِيعْ الشْرَابْ الجْدِيدْ وْيَتْشَقُّوا الڨُرْبَاتْ، وْبَصَحْ يَنْدَارْ الشْرَابْ الجْدِيدْ فىِ ڨُرْبَاتْ جْدُدْ بَاشْ مَايْضِيعْ حَتَّى حَاجَة ". إقامة إبنة يايرس وشفاء نازفة الدم ¹⁸ وْكِيكَانْ يَهْدَرْ مْعَاهُمْ بْهَادْ الشِي، وْجَالْعَنْدَهْ وَاحَدْ الرَايَسْ وْسْجَدْ لَهْ وْڨَالَهْ:" بَنْتِى هْذَا وِينْ مَاتَتْ، بَصَحْ أَرْوَاحْ وْحَطْ يَدَكْ عْلِيهَا وْتَحْيَا". ¹⁹ نَاضْ يَسُوعْ وْتَبْعَهْ هُوَ وْتَلاَمِيذْ تَاعَهْ. ²⁰ وْكَانَتْ تَمَ وَاحَدْ لَمْرَة مْرِيضَة طْنَاعَشْ نْعَامْ وْهِيَ تَدْمَى ڨَرْبَتْ مَنْ مُورَ يَسُوعْ وْلَمْسَة جَلَابْتَهْ، ²¹ عْلَي خَاطَرْ ڨَالَتْ فِي نَفْسْهَا: إِذَا "لْمَسْتْ غِيرْ قَشَّهْ نَبْرَى". ²² دَارْ يَسُوعْ وْشَافْهَا، وْڨَالْ: "ثِقِي يَاْبنَتىِ، إيِمَانِكِ شَفَاكِ". وَفْهَدِيكْ السَّاعَة بَرَاتْ لَمْرَا. ²³ وْكِي وْصَلْ يَسُوعْ لَدَّارْ الرَائِيسْ، وْشَافْ النَّاسْ يْنَوْحُوا وَيْزَڨُّوا، ²⁴ ڨَاْلهُمْ:" خُرْجُوا مَنَّا، البَنْتْ مَامَتَتْشْ رَاهِي غِيرْ رَاڨْدَة". وْهُمَا يَظَّحْكُوا عْلِيهْ ²⁵ وْكِخْرَّجْهُمْ يَسُوعْ لْبَرَّا دْخَلْ وْشَدْ البَنْتْ مَنْ يَدْهَا، وْنَاضَتْ البَنْتْ. ²⁶ وْخْرَجْ لَخْبَرْ فْ ڨَاعْ دُوكْ لَجْوَايَهْ . ²⁷ وككان يسوع فايت، تبعوه زوج عَمْيِينْ وَيْڨُولُوا: " إرْحَمْنَا يَا إبْنْ دَاوَدْ ". ²⁸ وْكِدْخَلْ لَدَّارْ ڤَرْبُوا لْعَنْدَهْ، وْ ڨَالْهُمْ يَسُوعْ :" تْأَمْنُوا بَلِّي نَقْدَرْ نَشْفِيكُمْ؟". وْجَاوْبُوهْ: "وَاهْ يَاسِيدِي " ²⁹ وْتَمْ تَمْ تْلَمَّسْ يَسُوعْ عَيْنِيهُمْ وْڨَالْ:"عْلَى قَدْ إْيمَانْكُمْ غَادِي يْكُونْ لِيكُمْ الشِّي لِبْغِيتُوهْ". ³⁰ وَنْتْحَلَّتْ عَيْنِيهُمْ. وْنْهَاهُمْ يَسُوعْ وْڨَالْهُمْ: "عَنْدْكُمْ تْڨُولُوا، هَادْالشِّي لِصْرَا لْكَاشْ وَاحَدْ". ³¹ وْبَصَّحْ هُمَا خَرْجُوا وْشَنْعُوا لَخْبَرْ فْڨَاعْ هَدُوكْ جْوَايَهْ. ³² وْكِي جَاوْ خَارْجِينْ، جَابُولَهْ وَاحَدْ الرَّاجَلْ بَكُّوشْ وْمَسْكُونْ. ³³ وْكِخْرَجْ يَسُوعْ الرُّوحْ الشَرِّيرْ هْدَر البَكُّوشْ، تْعَجْبُوا النَّاسْ وْڨَالُوا:" عَمُرْنَا مَاشَفْنَا هَذَا الشِّى فِي إسْرَائِيلْ". ³⁴ وْبَصَّحْ رْجَالْ الدِّينْ ڨَالُوا:" رَاهْ إخَرَّجْ الشّيَاطِينْ بْرَئِيسْ الشَّيَاطِينْ!". الفعلة قليلون ³⁵ وْكَانْ يَسُوعْ يْرُوحْ لْڨَاعْ لَمْدُنْ وَ دْوَاوِيرْ وَيْعَلَّمْ فَدْيُورْ الْصْلَاة، وَ يْبَشَّرْ بَالْبْشَارَة نْتَاعْ مَلَكُوتْ الْلَّه، وْ كَانْ يْدَاوِي ڨَاعْ الْمَرْضَى وْ كُلْ ضُعْفْ فَالْشَّعْب. ³⁶ وْ كِي شَافْ جْمَاعَة تَاعْ الْنَّاسْ تْحَنَّنْ عْلِيهُمْ، عْلَى خَاطَرْ كَانُوا مَتْعَذْبِينْ وْ مَتْشَتَتِينْ كِيمَا لَغْنَم الِّي مَعَنْدَهْش سَرَّاح ³⁷ مَنْ بَعْدْ ڨَالْ لْتَلَامِيذَة:" لْحَصَادْ بَزَّافْ بَصَّحْ الْخَدَّامَة قْلَالْ. ³⁸ اطَّلْبُوا لْمُولْ الْحَصَادْ بَاشْ يَرْسَلْ الْخَدَّامَة لَحْصَادْ نْتَاعَه".

¹ مَنْ بَعْدْ عَيَّطْ لَتَّلَامِيذْ الطنَاعَشْ وَ عْطَاهُمْ سُلْطَانْ عْلَى الْأَرْوَاحْ الْنَّجِسَة بَاشْ يْخَرْجُوهَا، وْ يَشْفِيوْ مْكُل مَرْضْ و مْكُلْ ضُعْفْ ² وَ سْمِيَاتْ تَاعْ طنَاعَشْ تَلْمِيذْ هِيَ: هَذِي الْلَّوَلْ سَمعَانْ لِّي يَنْڨَالَّهْ بُطْرُس،وانْدْرَاوُسْ خُوهْ. و يَعْقُوبْ بَنْ زَبَدِي، وْ يُوحَنَّا خُوهْ. ³ فِيلِبُوسْ، وْبَارْثُولْمَاوَسْ. تُومَا، مَتَّى مُولْ الْضْرِيبَة، يَعْقُوبْ بَنْ حَلَفِي، تَدَّاوُسْ. ⁴ سَمْعَانْ الْقَنَاوِي، وْ يَهُودَا الْاسْخَرْيُوطِي الِّي خَانَه. ⁵ هَادُوكْ الْطْنَاعَشْ رْسَلْهُمْ يَسُوعْ وْ وَصَّاهُمْ وْ ڨَالْهُمْ:" مَتْرُوحُوشْ عَنْدْ الْشُّعُوبْ الِّي مَشِي يْهُودْ، وْ مَتَدُّخْلُوشْ مْدِينَة الْسَامِرَة. ⁶ بَصَّحْ رُوحُوا لْعَنْد الْخِرْفَانْ الْمْوَدْرِينْ الِّي مَنْ شَعْب اسْرَائِيل. ⁷ وْ فَطْرِيڨْكُمْ خَبْرُوا الْنَّاسْ: بَلِّي الْوَقْت نْتَاعْ مَلَكُوتْ الْسَّمَواتْ ڨَرَّبْ ⁸ بَرُّوا الْمَرْضَى. طَهْرُوا الِّي فِيهُم الْبْرَصْ. وْ حَيِّيوْ الموتى. وْ خَرْجُوا الْارْوَاحْ الْشَّرِيرَة. ⁹ دِيتُوا بْلَاشْ أَيَّ اعْطُوا بْلَاشْ. وْ مَتَدُّوشْ فِي جْيُوبْكَمْ لاَ ذْهَبْ وْلَا فَضَّة وْلَا نْحَاسْ، ¹⁰ وْ لَا رَزْمَة لَلْطْرِيڨ وْ لَا زُوجْ لَبْسَات وْ لَا صَبَابَط وْ لَا حَتَّى عْصَا، عْلَا خَاطَرْ الْخَدَّامْ يَسْتَاهَل مَاكْلَتَّه. ¹¹ "و الْمدِينَة وْ لَا الْدُّوَارْ الِّي تَدَّخْلُوهُم سَقْسُوا عْلَى لِشْكُونْ يَسْتَاهَل، إِضَيَفْكُم و ڨُعْدُوا عَنْدَه حَتَّى لِتُخُرْجُوا مَنْتَم. ¹² و اذَا دْخَلْتُوا الْشِي دَارْ سَلْمُوا عْلَى مَّالِيهَا، ¹³ و الَا كَانُوا مَّالِينْ الْدَّار يَسْتَاهْلُوا سْلَامْكُم، أَيْ سْلاَمْكُمْ يَوْصُلْهُمْ وْ إِلَى مَا كَانُوشْ يَسْتَاهْلُوا ، سْلاَمْكُمْ يْوَلِّيلِكُمْ ¹⁴ وْلِّي مَايَقْبَلْكُمْشْ وْ مَا يَسْمَعْشْ كْلاَمْكُمْ أَخُّرْجُوا مَنْ دَارَهْ وْمَنْ دِيكْ المْدِينَة، وْ أَنَّفْظُوا الغُبْرَة الِّي فِي رْجْلِيكُمْ . ¹⁵ نْڨُولْكُمْ الْحَقْ :" حَالَة سَدُومْ وْ عَمُّورَة غَادِي تْكُونْ قَلْ مَنْ حالة هديك المدينة. ¹⁶ غَادِي نَرْسَلْكُمْ كِمَا الغْنَمْ فِي وَسْطْ الذْيُوبَ ، كُونُوا حُكَمَا كِلْفَاعِي وْ ظْرَيْفِينِ كِي الْحْمَامْ . ¹⁷ أَحَّرْزُوا أَرْوَاحْكُمْ مَالْنَّاسْ، عْلَى خَاطَرْ غَادِي يْسَلْمُوكُمْ لَلْمْحَاكَمْ، وْ فِي دْيُورْهُمْ تَاعْ الصْلاَةْ غَادِي يْضَرْبُوكُمْ وْ يَجَّلْدُوكُمْ. ¹⁸ وْغَادِي يْجَرُّوكُمْ ڨُدَّامْ الحُكَامْ و ْالْمْلُوكْ عْلَى جَالِي شْهَادَة لِيهُمْ وْ لَنَّاسْ وْ لْمَاشِي يْهُودْ. ¹⁹ وْ كِي يَدِّيكُمْ مَا تَتْقَلْقُوشْ كِيفَاشْ وْ لاَ وَاشْ غَادِي تَهَّدْرُوا ، ²⁰ بَصَّحْ الْرُّوحْ تَعْ بُوكْمْ الِّي فِي السْمَا هُوَ الِّي غَادِي يَعْطِيكُمْ الْكْلاَمْ لِّي تْڨُولُوهْ ²¹ وْ غَادِي الْخُو يْسَلَّمْ خُوهْ، وَ الْبُو يْسَلَّمْ وَلْدَهْ وْ الْوْلاَدْ يْنُوضُو ضَدْ وَالْدِيهُمْ وْ يُكَّتْلُوهُمْ ، ²² وْ غَادِي تْكُونُوا مَكْرُوهِينْ مَالنَّاسْ عْلىَ جَالْ إِسْمِي. بَصَّحْ لِيْصْبُرْ حَتَّى التَّالِي وْ يَثْبَتْ فِيَّ غَادِي يَسْلَكْ . ²³ وْ كِيْطَرْدُوكُمْ مَنْ هَادْ الْمْدِينَة هَرْبُوا لْوَحْدُ أُخْرَى. الْحَقْ نْڨُولْكُمْ : " مَا غَادِيشْ تْكَمْلُوا مْدُنْ اسْرَائيلْ حَتَّى يْجِي ابْن الْإِنْسَانْ. ²⁴ "مَشِّي الْتِّلْمِيذْ خِيرْ مَنْ مْعَلَّمْ، تَاعَهْ وْ مَشِّي الْعَبْدْ خِيرْ مَنْ سِيدَه. ²⁵ بَرَكَا عْلَى التَّلْمِيذْ إِكُونْ كِمَا مُعَلِّمْ تَاعَهْ ،و ْلاَ الْعَبْدْ كَمَا سِيدَهْ. وْلِّي سَمَّاوَهْ مُولْ الْدَّارْ بَعْلَزَبُولْ، مَالِينْ الْدَّارْ كِيفَاشْ غَادِي يْسَمُّوهُمْ! ²⁶ مَا تْخَافُوهُمْشْ. عْلَى خَاطَرْ ڨَاعْ لْمَسْتُورْ غَادِي يَعَّرْفُوهْ، وْ ڨَاعْ لْمَدْسُوسْ غَادِي يْبَانْ. ²⁷ وْعْلَى دَاكْ الشِّي ڨَاعْ لِنْڨُولَهَلْكُمْ فِالظَّلْمَة ڨُولُوهْ فَالنُّورْ، وْ لِّي تْسُمُعُوهْ بْوَذْنِيكُمْ بَرْحُوا بِيهْ فُوڨْ السْطُوحْ، ²⁸ مَا تْخَافُوشْ مَنْ هَادُوكْ لِيكَتْلُوا الجَسَدْ وْ مَا يَقَّدْرُوشْ يَكَّتْلوُا الْرُّوحْ ، بَصَّحْ خَافُوا مَنْ هَادَاكْ الِّي قَادَرْ يَهْلَكْ الْرُوحْ وْ الجَسَدْ فِي زُوجْ فِي جَهَنَّمْ. ²⁹ مَشِّي زُوجْ زْوَاوَشْ يَنْبَاعُو بْدِينَارْ؟ وْ غَادِي مَا يْطِيحْ عْلَى لَرْضْ حَتَّى وَاحَدْ فِيهُمْ إِلاَ إِذَ بْغَا بُوكُمْ الِّي فَالْسْمَا. وْ ³⁰ بَصَّحْ نْتُمَا حَتَّى شْعَرْ رَاسْكُمْ رَاهْ ڨَاعْ مَحْسُوبْ. ³¹ مَا تْخَافُوشْ! رَاكُمْ نْتُمَا خِيرْ مَنْ بَزَّافْ الزْوَاوَشْ! ³² ڨَاعْ لِيَسْـتَعْرَفْ بِيَا ڨُدَّامْ النَّاسْ ، نَسْتَعْرَفْ بِيهْ ڨُدَّامْ بُويَا الِّي فَالْسْمَا، ³³ وْ لِّي يَنْكَرْنِي ڨُدَّامْ النَّاسْ نَنُّكْرَهْ ڨُدَّامْ بُويَا الِّي فَالسْمَا ³⁴ مَا تَحَسْبُوشْ جِيتْ بَاشْ نْدِيرْ لَهْنَا فَالأَرْضْ. مَاشِّي لَهْنَا بَصَّحْ السِّيفْ . ³⁵ جِيتْ بَاشْ نْفَرَّقْ الوَلْدْ عْلَى بُوهْ، وْ بِينْ البَنْتْ وَ مْهَا، وْ بِينْ الكَنَّة و عْجُوزَتْهَا. ³⁶ لْعَدْيَانْ تَعْ بْنَادَمْ لْعَايْلَة تَعَهْ. ³⁷ أَلِّي يَبْغِي بُوهْ وَ لاَّ مَهْ كْثَرْ مَنِّي مَا يَسْتَهَلْنِيشْ، وْ لِي يَبْغِي بَنْتَهْ وَلَّا وَلْدَه كْتَرْ مَنِّي مَا يَسْتَهَلْنِيشْ، ³⁸ وْلِمَيَرْفَذْشْ صَلِيبَهْ وَ يْتَبَّعْنِي مَا يَسْتَهَلْنِيشْ. ³⁹ عْلَى خَاطَرْ لِبْغَى يَرْبَحْ حْيَاتَهْ يَخْسَرْهَا ، وْ لِيَخْسَرْهَا عْلَى جَالِي غَادِي يَلْقَاهَا. ⁴⁰ ِليَقْبَلْكُمْ يَقْبَلْنِي، وْ لِيَقْبَلْنِي يَقْبَلْ لِرْسَلْنِي . ⁴¹ وْ لِيَقْبَلْ كَاشْ نْبِيْ وْ هُوَ عَارَفَهْ نْبِي غَادِي يَاخَذْ أَجَرْ كِمَا تَعْ نْبِيْ ، وْالِّي يَقْبَلْ بْوَاحَدْ مَتَقِّي الله وْ هُوَ عَارَفَهْ مَتَقِّي الله غَادِي يَاخَذْ أَجْرْ كِمَا تَاعْ مَتَقِّي الله، ⁴² وَ الِّي إِيمَدْ غِيرْ كَاسْ مَاء بَارَدْ لْهَادُوكْ الصْغَارْ بْسَمْ غِيرْ تَلْمِيذِ ، الحَقْ نْڨُولْكُمْ :هَادَا مَا غَادِيشْ إِضِيعْ أَجْرَهْ".

¹ وْ كِي كَمَّل يَسُوعْ كْلَامَهْ و الْوْصَايَا الِّي أَعْطَاهَا لَتْلَامْذَه الْطْنَاعَشْ، رَاحْ مَنْ تَمْ بَاشْ يْعَلَّمْ وَيْخَبَّرْ بَالْبْشَارَة فَالْمْدُنْ نْتَاعْ الْيَهُودْ. يَسُوعْ وْ يُوحَنَّا الْمَعْمَدَانْ وْ كِي سْمَعْ يَسُوعْ يُوحَنَّا ² وْ هُوَ فَالْحَبْسْ بْهَادْ الْشِّي لِرَاهْ يْدِيرْ فِيه ، رْسَلْ زُوجْ مَنْ الْتْلَامَذْ نْتَاعَهُمْ ، ³ وْ ڤَالَه:" أَنْتَا هُوَ لِغَادِي يْجِي وَلَّا نْسْتَنَّاوْ وَحْدَاخُر؟". ⁴ وْ جَاوْبَهُمْ يَسُوعْ وْ ڤَالْهُمْ:" رُوحُوا وْ خَبْرُوا يُوحَنَّا بْڤَاعْ لِرَاكُمْ تَسَّمْعُوا وَ تْشُوفُوا: ⁵ الْعُمْيِينْ وَلَّاوْ يْشُوفُوا، وَ الْقَجْعِينْ وَلَّاوْ يَتْمَشُّوا، وَ الْبْرُصْ تْنَقَّاوْ، وَ الْطَّرْشِينْ رَهُمْ يَسَّمْعُوا، وَ الْمُوتَى حْيَاوْ، وَ الْمْسَاكَنْ رَاهُمْ يَقَّبْلُوا لَبْشَارَة. ⁶ وْ سَعْدَاتْ هَدَاكْ الِّي مَغَادِيشْ يْشَكْ فِيَّ". ⁷ وْ كِي رَاحُوا تْلَامِيذْ يُوحَنَّا بْدَا يَسُوعْ يْڤُولْ لَلْجْمَايَعْ عْلَى يُوحَنَّا: " وَاشْ خْرَجْتُوا تْشُوفُوا فَالْصَّحْرَء ؟ قَصْبَة يْحَرَّكْهَا الْرِّيحْ؟ ⁸ وَلَّا وَاشْ خْرَجْتُوا تْشُوفُوا؟ بْنَادَمْ لَابَسْ لْبَاسْ حْرِيِرْ؟ ڤَاعْ لِيَلَبْسُوا لْبَاسْ حْرِيرْ هَادُوك سَاكْنِين فِي قْصُور الْملُوك ⁹ ڤُولُولِي وَاشْ خْرَجْتُوا تْشُوفُوا ؟ شِي نْبِي ؟ نْعَمْ، نْڤُولْكُمْ رَاهْ خِيرْ و اكْتَرْ مَنْ نْبِيْ. ¹⁰ هَدَا هُوَ أَلِّي ڤَالْ عْلِيهْ الْلَّه فِي كْتَابَهْ: غَادِي نَرْسَلْ ڤُدَّامَه مْلَاكِي يْوَجَّدْلَه الْطْرِيڤْ. ¹¹ وَ نْڤُولْكُمْ الْحَقْ : مَبَانْشْ مَنْ الِّي نْزَادُوا مَانْسَا شِي وَاحَد خِير مَنْ يُوحَنَّا الْغَطَّاسْ، وْ بَصَّحْ الصْغِير ڤَاعْ فِي مَمْلَكَة السَّمَوَاتْ رَاه خِيرْ مَنَّه. ¹² وْ مَنْ لِيَّامْ يُوحَنَّا الْغَطَّاسْ حَتَّى لْيُومْ مَمْلَكَة الْسَّمَوَات هُمَا الْقْوِيِينْ، لِيْدِيرُوا جَهْدْهُمْ بَاشْ يَخَّطْفُوهَا ¹³ وْ ڤَاعْ الْأَنْبِيَاء وشَرِيعَة نْتَاعْ مُوسَى تْنَبَّاْ حَتَّى الْوَقْت الِّي جَا فِيه يُوحَنَّا الْغَطَّاس. ¹⁴ وْ إِدَا بْغِيتُوا تَقَّبْلُوا، فْيُوحَنَّا الْغَطَّاسْ هَذَا هُوَ إِلِيَّا الِّي خَاصَّه إِيجِي. ¹⁵ وَ الِّي عَنْدَه وَدْنِينْ يَسْمَع . ¹⁶ بَشْكُونْ غَادِي نْشَبَّه هَاد الْجِيلْ؟ اشَبْهُوا لَوْلَادْ ڤَاعْدِينْ فَالْسُّوڤْ يْعَيْطُوا لْبَعْضِيَاتْهُمْ ¹⁷ وَ يْڤُولُوا: زَمَّرْنَالْكُمْ وْ مَارْڤَصْتُوشْ! وَ نْدَبْنَالْكُمْ و مَابْكِيتُوشْ! ¹⁸ عْلَى خَاطَرْ جَا يُوحَنَّا مَايَكُلْ مَا يُشْرُبْ، وَيْڤُولُوا: فِيه شِيطَانْ. ¹⁹ وْ جَا ابْنْ الإِنْسَانْ يَاكُلْ وْ يُشْرُبْ، وَ يْڤُولْ: هَوَلَا ابْنْ الإِنْسَانْ وَكَّالْ ويَشْرَبْ اَلشْرَابْ، وَ مْصَاحَبْ غِيرْ مَلِمينْ الْضْرِيبَة و الْمَدَّنْبِينْ. وْ بَصَّح حَكْمَة الْلَّه تْبَانْ صَالْحَة مَالعَلَّة نْتَاعْهَا. ويل للمدن التِي لَمْ تَتُب ²⁰ وْ فْدَاكْ الْوَقْتْ بْدَى يْلُومْ الْمْدُن الِّي دَارْ فِيهُمْ الْمُعْجِزَاتْ كْثَرْ مَنْ الْمدُنْ لُخْرِينْ عْلَى خَاطَرْ الْنَّاسْ تَاعْهُمْ مَاتَبُوشْ: ²¹ "يَاوِيلَك يَا كُورَزِين! وْ يَاوِيلَكْ يَابِيتْ صَيْدَا! عْلَى خَاطَرْ لُوكَانْ انْدَارَتْ الْمُعْجِزَاتْ فِي صُورْ وْ صَيْدَا كِيمَا نْدَارُوا فِيكُمْ، رَاهُمْ شْحَالْ هَدِي تَابُوا مَمَّالِيهُمْ فِي لَمْسُوحْ وَ الْرْمَادْ. ²² بَصَّحْ نْڤُولْكُمْ: الْآخْرَة نْتَاعْ صُورْ وْ صَيْدَا فِي يُومْ لَحْسَابْ غَادِي تْكُونْ قَلْ مَنْ آخِرَتْكُم. ²³ وَأَنْتِ أَكَفَرْنَحُومْ الْعَالْيَة فَالْسْمَا! غَادِي تْهَوْدِي لَلْهَاوْيَة. عْلَى خَاطَرْ لُوكَانْ نْدَارَتْ الْمُعْجِزَاتْ فِي سَدُومْ كِمَا نْدَارَتْ هْنَا لَڤَعْدَتْ حَتَّى لْيُومْ . ²⁴ وْ بَصَّحْ نْڤُولْكُم: أَرْضْ سَدُومْ وْ عَمُّورَة غَادِي تْكُونْ آخْرَتْهَا قَلْ مَنْ آخْرَتْكُمْ فِي يُومْ لَحْسَابْ". ²⁵ وْ فِي دْيكْ الْسَّاعَة تْكَلَّمْ يَسُوعْ وْ ڤَالْ: "نَحْمَدْ الْابْ يَارَبْ الْسَّمَاوِي و لَرْضْ عْلَى خَاطَرْ دَسِّيتْ دَاكْشِي عْلَى الْحُكَمَا وَ الْفَاهْمِينْ وْ وَرِّيتَه لَوْلَادْ الْصْغَارْ. ²⁶ وَاهْ يَالْآبْ، هَكَّا كَانْ مُرَادَكْ بُويَا. ²⁷ أَعْطَانِي كُلْشِي، وْ حَتَّى وَاحَدْ مَايَعْرَفْ الابْنْ غِيرْ الْبُوا، وْ حَتَّى وَاحَدْ مَا يَعْرَفْ الْبُوا غْير الْإِبْنْ وْ لِبْغَى وَ قْبَلْ الْإِبْنْ غَادِي يْوَرِّيلَه. ²⁸ رْوَاحُوا عَنْدِي نْتُمَا ڤَاعْ الْعَيَّانِينْ وْ لِرَافْدِينْ الْثْقِيلْ، وْ أَنَا نَعْطِيكُمْ الْرَّاحَة. ²⁹ رَفْدُوا نِيرْ نْتَاعِي وَ تْعَلْمُوا مَنِّي، عْلَى خَاطَرْ أَنَا ضْرِيفْ وْ مَتْوَاضَعْ، وْغَادِي تَلْقَاوْ الْرَّاحَة لَنْفُوسْكُمْ. ³⁰ عْلَى خَاطَرْ الْنِّيرْ نْتَاعِي سَاهَلْ وْ الْحْمَلْ نْـتَاعِي خْفِيفْ".

¹ وْ فيِ دَاكْ الوَقْتْ فِي النْهَارْ السَبْتْ رَاحْ يَسوُع ْفِي وَسَط ْالزُرُوعْ، جَاعُو تلْاَمَذَه وْ بْداَوْ يَڤَطْعوُ السْبوُل ْو ْياَكْلوُا . ² وْ كِشاَفُوهُمْ رِجاَلْ الدِينْ قاَلوُ لَه: "شوف تلامذك راهُم ْايْدِيرُوا حْوَايَحْ لِماَخَصْهوُمَشْ ايْدِيِرُها فِي نَهاَرْ السَبْتْ!". ³ وْ رَدْ عْليِهُم ْ: "مَا قْرِيتُوشْ شَا دَارْ دَاوَدْ ولِمْعَاهْ مِينْ جَاعُو؟" ⁴ كِدْخَلْ لْبِيتْ اللهْ وْ كْلَ الخُبْزْ لِيْقْدْمُوهْ للهْ اللِي مَا كَانْشْ خَاصَهْ ياَكْلَهْ لاَ هُوَ وْ لاَ هَادُوكْ اللِي مْعَاه ْ،مَنْ غِيرْ رْجَالْ الدِينْ . ⁵ وْ مَا قْريتُوشْ فِي التُورَاة ْبَلِي رْجَالْ الدِينْ وْ هُماَ يَخَدْمُو فِي بِيتْ اللهْ فِي نْهَارْ السَبْتْ يَتْغَدَاوْ عْلَى نْهَارْ السَبْتْ وْ هُمَا مَا عْلِيهُمْ لُومْ ؟ ⁶ وْ بْصَحْ نْقُولَلْكُمْ: رَاهْ كَايْنْ هْناَ اللِي هُوَ كْبَرْ مَنْ بِيتْ اللَهْ! ⁷ وْ لُكاَنْ فْهَمْتُوا مَعْنَى لْلآيَهْ اللِي رَانِي نْقُولَلْكُمْ : بْغِيتْ الْرَحْمَهْ مَا شِي دْبيِحَه، كِحْكَمْتُو عَلَى اللِي مَا فِيهُومْشِ الُومْ ! ⁸ اِبَنْ الِأنْسَانْ هُوَ رَب السَبْتَ تاَن". ⁹ وْ رَاحْ مَنْ تْمَا وْ جاَ لْدَارْ الصْلاَة ْنْتَاعْهُمْ ، ¹⁰ وْ لْقَا وَاحَدْ الرَاجَلْ يْدَهْ ياَبْسَه، سَقْسَاوَهْ وْ قاَلُولَه : "وَاشْ حْلاَلْ الشْفاَ فِي السْبُت ؟" سَقْسَاوَهْ بَاشْ ايْلَصْقُولَهْ تَهْمَهْ ¹¹ جاوَبْهُمْ : "اِذاَ وَاحَدْ فِيكُمْ عَنْدَهْ خْرُوفْ، اِذَا طَاحْ فِي حُفِرَهْ فِي نْهَارْ السَبْتْ مَا غَادِيشْ اِيْشَدْلَهْ يَدْهْ وْ يْخَرْحه ؟ ¹² شْحَالْ بْناَدَمْ خِيرْ مْلَخْرُوْف! عْلَى هَادْ شِي حْلَالْ تْدِيرْ لْخِيرْ فِي السْبُت! ". ¹³ وْ مَمْبَعْدْ قَالْ لَلْاِنْسَانْ: "مَدِ يَدَكْ". وْ مَدْهاَ. وْوَلَاتْ صْحيِحَهْ كِماَ لْيَدْ لُخْرَى. ¹⁴ وْكِخَرْجُوا الفَرِسِيِينْ تْشَاوْرُو عْلِيهْ بَاهْ يَقَتْلُوهْ، ¹⁵ كِعْرَفْ يَسُوعْ رَاحْ مَنْ تَمْ . وْ تَبْعُوهْ جْمَايَعْ بَزَافْ نْتاَعْ النَاسْ وْ شْفَاهُمْ ڤَاعْ. ¹⁶ وَوْصَاهُمْ باَشْ مَا يْخَبْرُوا حَتَى وَاحَدْ، ¹⁷ بَاشْ يَتْحَقَقْ وَاشْ نْقاَلْ بَالنْبِي أشْعِياَءْ ¹⁸ : "هَذَا هُوَ بْنِي اللِي خْيَرْتْ ،وْ لْعْزِيْز نْتاَعِي اللِي بِيهْ نَفْسِي فَرْحَانَهْ بَزَافْ.غَادِي نْحَطْ عْلِيهْ رُوحِي وْ يْخَبَرْ الشْعُوبْ بالْحَقْ ¹⁹ مَا يْعاَدِي مَا يْزَڤِي،وْ مَا يَسْمَعْ حْتَى وَاحَدْ صُوتَهْ فَطْرِيقْ ²⁰ قصبه مَشْقَوقَه مَا يْهَرَسْ،وفتيله تَطْلَقْ الدُخَانْ ماَ تَطْفَي، حَتَى يَخْرَجْ الْحَقْ هُوَ الْغاَلَبْ. ²¹ وْ باَسْمَهْ غَادِي يْكُونْ رَجَاءْ لْشْعُوبْ لِمَايْعَرْفُوشْ الرَبْ ". يسوع و بعلزبول ²² وْ فِي ذَاكْ الْوَقْتْ جَابُوا لْعَنْدَهْ وَاحَدْ الْمَجْنُونْ عْمَى وْ بْكُوشْ وْ بْرَاهْ ،حْتَى الآعْمَى وْ الْبْكُوْش هْدَرْ وْ شَافْ. ²³ تْعَجْبُوا جْمَاعَاتْ نْتَاعْ النَاسْ وْ قَالوُا: "باَلاَكْ هَدَا هُوَ اِبْنْ دَاوْدْ؟". ²⁴ وْ بَصَّحْ رْجَالْ الدِينْ كِسَمْعُوا هَادْ الشِّي ڤَالُوا: "هَادَا مَا رَاهْشْ يْخْرَجْ الشْياَطِينْ غِيرْ بْبَعْلَزَبُولْ رَئِيسْ الشَياَطِينْ". ²⁵ وْعْرَفْ يَسُوعْ أَفْكَارْهُمْ،و ڤَالْهُمْ : "كُلْ مَمْلَكَهْ تَنْخْرَبْ ، وْ كُلْ مْدِينَهْ وْلَا عاَيْلَهْ تَنْقْسَم ْمَا غَادِيشْ تْدُوم ْ. ²⁶ وْ اِدَا كاَنْ الشِيطَان يْخْرَجْ الشِيطاَنْ غَادِي يْكوُنْ الشِيطَانْ نْڤَسَمْ وْوْلَى ضَدْ رُوحَهْ وِيلاَ نْقْسَمْ وْوْلاَ ضَدْ رُوحَهْ. كِيفاَشْ غَادِي تَبْقَى مَمْلَكْتَهْ تاَبْتَهْ؟ ²⁷ وِيِلاَ كُنْتْ أَناَ بَعْلَزَبوُلْ وْ نْخَرَجْ الشَيَاطِينْ، وَوْلاَدْكُمْ بْشْكوُنْ رَاهُمْ يْخَرْجُوهُمْ ؟عْلىَ هَادْ الشِي رَاه ْوْلاَدْكُمْ لِغَادِي يْحَكْمُوا عْليِكُمْ ! ²⁸ كُنْتْ بْرُوحْ اللهَ نْخْرَجْ الشَياَطِينْ، فْمَمْلَكَةْ اللَه جَاتْ فْوْسْطْكُمْ ²⁹ !شْكُونْ يْقْدَرْ يْدْخُلْ لْداَرْ وَاحَدْ صْحِيحْ وْ قْوِي وْ يَخْوَنْ لَه ْصْوَالْحَهْ، بْلاَماَ يْكْتْفَهْ الصْحِيحْ هُوَ الُلْوَلْ ،وْ عَادْ يْخْوَنْ لَه ْدَارَهْ ؟ ³⁰ الْليِ مَاشِي مْعاَياَ هُوَ ضْدِي وْ لِمَا يْلْمْشْ وْ يْجْمَعْ مْعاَياَ رَاه هُوَ يْفَرَقْ. ³¹ عْلَى دَاك ْالشِّي أَنَا نْقُولْلْكُم: كُلْ ذَنْبْ وْ كْلاَمْ كْفَرْ رَاهْ يْنْغْفَرْ لْلْناَسْ، ³² و بَصَّحْ كْلاَم ْ الْكْفَرْ عْلَى الرُوحْ القُدُسْ مُا يَتَغْفْرْشْ . وْ لِيْقُولْ كْلْمَهَ ضْدْ اِبْنْ الِانْسَانْ يْتَغْفَرْلَه ْ،وْ بَصَحْ لِيْقُولْ كْلْمَه ضْدْ الرُوحْ القُدُسْ ماَ يْتْغْفَرْلَهْشْ، فِي الدْنيْاَ وْلاَ فِي الاَخْرَه . ³³ غَرْسوُا شَجْرَهْ مْليِحَه، وْ غْلَتْهاَ مْليِحَه وْلا غْرْسوُا شْجْرَهْ مَاشِي مْليِحَهْ وْ غْلَتْهاَ مَاشِي مْليِحَه ،رَاهْ مَالْغْلَه تْنَعْرَفْ الشْجْرَهْ . ³⁴ ياَ وْلاَدْ الْلفَاعِي! كِيفَاشْ تْقْدْرُوا تَهْدْرُوا عْلَى الصَالْحَاتْ وْنْتُماَ اَشْرَارْ؟ عْلَى خَاطَرْ لِمْعْمَرْبِيه الڤَلْبْ يْهْدْرْ بِيهْ الفُمْ. ³⁵ الاِنْساَنْ الصَالَحْ يْخْرَجْ الصْوَالَحْ لْمْلاَحْ مْنْ كْنْزْ الَصاَلَحْ لِفْي قَلْبَهْ. وْ البْنَادْم ْالشرِيرْ مَالْكْنْزْ الشرِيرْ يْخْرَجْ الشرُ. ³⁶ وْ بْصَحْ نْقوُلْلكُمْ :كُلْ كَلْمَه بَاطْلَة يْهْدْرُوا بيِهاَ النَاسْ غاَدِي يْعْطُوا عْليِهَا حْسَابْ فِي يوُمْ الدِينْ. ³⁷ عْلىَ خاَطَرْ رَاه ْبْكْلَامَكْ غاَدِي يْنْحْكُمْ عْليِكْ اِمَا تَتْبْرَرْ وْلاَّ تُنْداَنْ". ايه يونان ³⁸ وْ فِدِيكْ الْسَاعَهْ جَاوْبَهْ قُومْ مَنْ عُلَمَاءْ الْشَرِيعَهْ وْ رْجَالْ الْدِينْ وْ قاَلوُا : "يَا سِيدِي ،بْغيِنَا أَنْشُوفُوا مْنَكْ مُعْجِزَه". ³⁹ جَاوْبْهُم ْو ڤَاَلَلْهُمْ: " جِيلْ فاَسَقْ وْ شْرِيرْ يْطْلَبْ مُعْجِزَهْ، وْ مَا يْنَعْطَالَهْشْ غيِرْ مُعْجِزَة ْيُوناَنْ النْبيِ . ⁴⁰ عْلىَ خَاطَرْ كيِماَ كاَنْ يُوناَنْ فِي كَرْشْ الحُوتْ ثَلْتْ أِياَمْ وْ ثْلْتْ لِياَلِي، هَكَا غَادِي يْكُونْ اِبْنْ الِانْساَنْ فِي قْلْبْ لَرْضْ ثْلْتْ أِياَم ْو ثَلْتْ ليِاَلِي. ⁴¹ وْ ناَسْ نيِنِيوِى غَادِي يْقوُمُوا فِي يُومْ الدِينْ وْ الْحِساَبْ مْعَ هَاذْ الْجِيلْ وْ غَادِي يَشَهْدُوا عْليِهْ ،عْلَى خاَطَرْ هُمَا تاَبوُا كِنَبَهْهُمْ يوُناَنْ وْ دَرْوَكْ رَاهْ هْناَ وَاحَدْ اَحْسَنْ وْ اَفْضَلْ مَنْ يُوناَنْ ! ⁴² مَلِكَةْ الْجَنوُبْ التَيْمَنْ غاَدِي تَنْبْعَثْ مْعَ هَادْ الْجِيلْ فِي يُومْ الْحْسَابْ وْ تَشْهَد ْعْلِيهْ، عْلَى خَاطَرْ جَاتْ مَنْ أَرْضْ بْعيِدَهْ بَاشْ تَسْمَع ْحِكْمَةْ سْليِماَنْ، وْ هَاهُوَ دَرْوَكْ هْناَ وَاحَدْ اَحْسَنْ وْ اَفْضَلْ مَنْ سْليِماَنْ! ⁴³ رَاهْ كِيَخْرُجْ الرُوحْ الشْرِيرْ مَالبْناَدَمْ يْرُوحْ فِي بْلاَيْصْ مَا كاَنَشْ فِيهُمْ الْمَاء، وْ يْحَوَسْ. ⁴⁴ وْ يْقوُلْ:" أَناَ نْوَلِي لْدَارْ لِخْرَجْتْ مَنْهَا. وْ يْوَلِيلِهَا وْ يَلْقاَهَا خَاوْيَهْ وْ مَصْلُوحَه وْ مْصَڤدة. ⁴⁵ وْ يْرُوحْ وْ يَدِي مْعاَهْ سَبْعَه نْتاَع ْالآرْوَاحْ وْحَدْ خْرِينْ أَشَرْ مَنهَ، وْ كِيَدَخْلُوا يَسَكْنوُا تَمْ ،وْ تْوَلِي حَالَه هَادَاكْ البْناَدَمْ أَشَرْ مَا الْلوَلْ! وْ هَكْذاَ غاَدِي يْصْرَا لْهَادْ الْجِيلْ لِيْديِرْ الْشَرْ حَتَى هُوَ". عمل مشيئة الله ⁴⁶ وْ كِكاَنْ يَهدرمْعَ الْجْمَاعاَتْ نْتاَعْ الْناَسْ جَاتْ مُه ْوْ خُوتَهْ وْوَقْفُوا بَرَا باَغِينْ يَهَدْرُوا مْعاَه، ⁴⁷ ڤَالَّه وَاحَدْ مَالْحاَضْرِينْ :"هَيَالَ مُكْ وْ خُوتَكْ وَاقْفِينْ بْرَا وْ باَغِينْ يَهَدْرُوا مْعاَكْ". ⁴⁸ وْ يْجَاوَبْهُمْ يَسُوع ْوْ يْقُولَلْهُم ْ: "شْكُونْ هِيَ اَمَّا وْ شْكُونْ هُمَا خُوتِي؟". ⁴⁹ وْ نَعَتْ بْيَدَه ْلْجِهَةْ تْلاَمْذَهْ وْ ڤَاَلْ :"هاَهُمَا اَمَّا وْ خُوتِي. ⁵⁰ عْلَى خَاطَرْ هَادُو هُماَ لِيْديِرُوا مَشِيئَةْ اَبِي لِيفيِ السْمَاوَاتْ".

¹ وْ فِي دَاكْ النْهَارْ خْرَجْ يَسُوعْ مَنْ الدَّارْ وْ جَمَّعْ عَنْدْ البْحَرْ، ² وْ تْلَايْمُوا عْلِيهْ بَزَّافْ،النَّاسْ ،وْمَنْ كَثْرَةْ الدْمِيرْطْلَعْ لَلْفَلُوكَه وْ جَمَّعْ. فِيهاَ وْوَڤْفُوا ڤَاعْ هَدُوكْ النَاسْ عَنْدْ الشَّطْ. ³ وْهْدَرَلْهُم ْبْزَّافْ بْاِلَمْتُولْ وْ ڤَاَلْ : "وَاحَدْ الرَّاجَلْ خْرَجْ بَاشْ يَزْرَع ْ، ⁴ وْ كِكَانْ يَزْرَعْ طَاحُولَهْ حَباَتْ فِي الطْرِيڤْ ،وْ جَاوْ الزْوَاوَشْ وْ كْلاَوْهُمْ. ⁵ وْ طَاحُوا حْبَاتْ وَحْدْ خْرِينْ فْوَحَدْ الْأَرْضْ مْحَفْرَه، مَا فِيهَاشْ تْرَابْ بْزَافْ وْ تَمْ تَمْ نَبْتُوا عَلَى خَاطَرْ التْرَابْ مَاكَانْشْ غَامَقْ. ⁶ وْ كِشَرْقَتْ الشَمْسْ نْحَرْڤُوا، عْلَى خَاطَرْ مَاكَانَشْ عَنْدَهُمْ الجْذُورْ أَيَّا يَبْسُوا. ⁷ وْ طَاحُوا حْبَاتْ وَاحَدْ خْرِينْ فْوَسْطْ الشُّوكْ وْ كِكْبَرْ الشُّوكْ جَيَّفْهُمْ . ⁸ وْ طَاحُوا حْباَتْ وَاحَدْ خْرِينْ فِي أَرْضْ مْليِحَه وْ عْطَاوْ الْغَلَة، كاَيَنْ فِيهُمْ لِعْطَى مِيَهْ وْ كَايَنْ لِعْطَى سَتِينْ وْ كاَيَنْ لِعْطَى تْلاَتِينْ. ⁹ أَيَّا لِعَنْدَه ْ وَدْنِينْ يَسْمَعْ" ¹⁰ وْ ڤَرْبُوا عَنْدَهْ تْلاَمْذَه وْ ڤَالوُلَهْ :" عْلاَ شْ رَاكْ تَهْدَرْ مْعَانَا بْالَمْتُولْ؟". ¹¹ وْ هُوَ يْجَاوَبْهُمْ وْ يْڤُولْ : "عَلَى خَاطَرْ نْتُماَ نَعْطَالْكُمْ بَاشْ تَفَّهْمُوا سْرَارْ مَلَكُوتْ السَّمَاوَاتْ،وْ بْصَّحْ هَادُوكْ مَانَعْطَالْهُمْشْ بَاشْ يَفَهْمُوهُم. ¹² عْلَى خَاطَرْ لِعَنْدَهْ غَادِي يْتَعْطَالَهْ وْ يَنْزَادْلَهْ، كْتَرْ وْ لِماَعَنْدَهْشْ حَتَى دَاكْ الشِّي لِعْنْدَهْ غَادِي ينَقْلَعْلَهْ ¹³ وْ عْلَى هَادَا أَنَا رَانِي نْكَلَمْكُمْ بْالْمْتُولْ، عْلَى خَاطَرْ مَلِي يْشُوفُوا مَا يْشُوفُوشْ، وْ كِيَسَمْعُوا مَايَسَمْعُوشْ. ¹⁴ وْ هَكَا تْحَقَّتْ فِيهُمْ الْنًبُوَّه تَاعْ إشْعِيَاءْ: تَسَّمْعُوا لِتَسَّمْعُوهْ وْ مَتَفَّهْمُوشْ، وْ تْشُوفُوا اللِي شَفْتُوا وْ مَايْبَانْ لْكُمْ وَالُوا . ¹⁵ عْلَى خَاطَرْ ڤَلْبْ هَادْ الشَّعْبْ قَاسَحْ، وْوَدْنِيهُمْ وْلَّاتْ تْقِيلَهْ بَاشْ تَسْمَعْ. وْغَمْضُوا عَيْنِيهُمْ، بَاشْ مَا يْشُوفُوشْ، وْ مَا يَسْمَعُوشْ بْوَدْنِيهُمْ ،وْ يْفَّهْمُو بْڤْلُوبْهُمْ ، وْ يْوَلُولِي بَاشْ نَشْفِيهُمْ. ¹⁶ بَصَحْ سَعْدَاتْ لْعَيْنِيكُمْ عْلَى خَاطَرْ رَاهَا تْشُوفُ، وْ لوَدْنِيكُمْ رَاهَا تَسْمَعْ. ¹⁷ وْ نْڤُولَلْكُمْ الْحَقْ:" رَاهْ بْزَّافْ تَاعْ الأَنْبِيَاءْ وْ الصَالْحِينْ تْمَنَاوْ بَاشْ يْشُوفُوا لِرَاكُمْ تْشُوفُوهْ نْتُمَا، وْمَاشَافُوهْشْ وْ يَسَّمْعُوا لِرَاكُمْ تَسَّمْعُوهْ وْ مَاسْمَعُوهْشْ. " ¹⁸ أَسَّمْعُوا نْتُمَا مْتَلْ الرَّاجَلْ الِّي يَزْرَعْ: ¹⁹ لِيَسْمَعْ الْكْلَامْ تَاعْ مَمْلَكَةْ اللَهْ وْ مَايَفْهَمْشْ، وَ يْجِي الشِّيطَانْ وْ يَخْطَفْ لِنَزْرَعْ فِي قَلْبَهْ .هاَدَا هُوَ المَزْرُوعْ عْلَى الطْرِيقْ. ²⁰ وَ الْمَزْرُوعْ عْلَى الْبْلَايْصْ الْمْحَجْرَهْ هُوَ لِيَسْمَعْ الْكَلْمَهْ، وْ يَقَبَلْهَا بْلْخُفْ بْالْفَرْحَه، ²¹ وْ بْصَّحْ كَلْمَةْ اللَّهْ مَاعَنْدْهَاشْ أَصْلْ فِي ڤَلْبَهْ، وِيلَا فَاتْ مَالضِّيقْ وَلَّا الأَضْطَاهَادْ عْلَى جَالْ الْكَلْمَهْ يْبَعَّدْ بَلْخَفْ عْلَى الإِيمَانْ . ²² وْ الْمَزْرُوعْ فِي وَسْطْ الشُّوكْ هُوَ لِيَسْمَعْ كْلَامْ، الّلَهْ وْ بَصَّحْ هَمْ الدَّنْيَا وْ مَحَبَّةْ الدْرَاهَمْ يْجَيْفُوا كْلاَمْ اللَّه مَايَلْقَاشْ كِيفَاشْ يَعْطِي الْغَلَة. ²³ وْ بَصَّحْ الْمَزْرُوعْ فِي لَرْضْ صَالْحَه وْ مْلِيحَه هُوَ الِّي يَسْمَعْ كْلَامْ اللَّهْ .هُوَ لِيَعْطِي الْغَلَّهْ ،يَعْطِي مِيَّة وْ مَنْبَعْدْ سَتِينْ وْ مَنْبَعْدْ تْلَاِتينْ". مَثَلْ القَمْحْ وَ الْزَّوَانْ ²⁴ وَ عْطَاهُمْ مْثَلْ وَاحْدَاخُرْ وْ ڤَالْ : "يْشَبَّهْ مَلَكُوتْ السَّمَاوَاتْ إنْسَانْ زْرَعْ وَاحَدْ الزَرِّيعَه مْلِيحَه فِي أَرْضَه. ²⁵ وْ كِكَانُوا النَّاسْ رَاڤْدِينْ جَا عْدُوَّهْ زْرَعْلَهْ الزْوَانْ وَسْطْ الڤَمْحْ وْ رَاحْ. ²⁶ وْ كِي نْبَتْ الزْرَعْ وْ خْرَجْ السْبُولْ، بَانْ مْعَاهْ الزْوَانْ حَتَّى هُوَ. ²⁷ وْ جَاوْ الخَدَّامَا تَاعْ مُولْ الدَّارْ وْڤَلُولَهْ: يَا سِيدِي، َمشِّي زْرَعْتْ زْرَعْ مْلِيحْ فِي أَرْضَكْ؟ مْينِنْ جَا الزْوَانْ؟. ²⁸ وْهُوَ يْجَاوَبْهُمْ : رَاهْ كَاشْ عْدُوْ دَارْ هَادْ الشِّي. ڤَالُولَهْ الخَدَّامَا ،إِدَا بْغِيتْ نْرُوحُوا وَ نْلَمُّوه؟ ²⁹ ڤَالْ: أَلَّا! بَاشْ مَايَتَڤْلَعْشْ الْڤَمْحْ مْعَ الزْوَانْ ³⁰ . خَلُّو الْڤَمْحْ يَكْبَرْ مْعَ الزْوَانْ حَتَى يَوْصَلْ وَقْتْ الْحْصَادْ، وْ دِيكْ السَّاعَه نْڤُولْ لَلْحَصَادِينْ:" جَمْعُوا فِي اللَوَلْ الزْوَانْ وْ أَحَزْمُوهْ حْزَامَاتْ بَاشْ يَنْحْرَڤْ، بْصَّحْ الْڤَمْحْ نْلَمُوهْ وْ نَدُّوهْ لْمَخْزَنْ تَاعِي". مَثَلْ حبة الخردل و مثل الخميرة ³¹ وْ عَاوَدْ ڤَالْهُمْ مْثَلْ وَحَداخُرْ: "مَلَكُوتْ السَّمَاوَاتْ إِشَبَّهْ لْحَبَّةْ الخَرْدَلْ أَدَّاهَا وَاحَدْ الرَّاجَلْ وَ زْرَعْهَا فِي أَرْضَهْ، ³² وْ هِيَ الْحَبَّهْ الصْغِيرَه فِي الزَرٍيعَه. وْ بَصَّحْ كِتَكْبَرْ، تْوَلِي شَجْرَه كْبِيرَه كْبَرْ مَنْ ڤَاعْ الغَرْسْ، حَتَى طْيُورْ السْمَا تْجِي وْ تَتْعَشَّشْ فِيهَا". ³³ وْ زَادْ أَعْطَاهُمْ مْثَلْ وَحْدَاخُرْ: "مَلَكُوتْ السْمَا إِشَبَّهْ لَخْمِيرَ دَارَتْهَا مْرَا فِي تَلْثْ كْيَالْ فَرِينَه حَتىَ خَمْرَتْ ڤَاعْ الْعْجِينَه". ³⁴ ڤَاعْ هَذَا الْهَدْرَهْ هْدَرْهَا يَسُوعْ لَلنَاسْ بْالَمْثُولْ، وْ بْلَا الْمْثُولْ مَا كَانْ إِڤُولْهُمْ حَتَى حَاجَهْ، ³⁵ بَاشْ يَتْحَقَقْ الْكْلَامْ اللِي ڤَالَه النْبِي: "بْالَمْثُولْ نَتْكَلَمْ، وَ نْخَبَّرْ بْڤَاعْ لِكَانْ مَدْسُوسْ مَا الْيُومْ لِتْخَلْقَتْ فِيهْ الدَنْيَا". مثل القمح و الزوان ³⁶ دِيِكْ السَّاعَه خَلَّا يَسُوعْ الجُمُوعْ إِرُوحُوا وْجَا لَلْدَّارْ. ڤَدْمُوا عَنْدَهْ تْلَامْذَه وْ ڤَالُوا: "فَسَرَّنَا مْثَلْ الزْوَانْ أَلِّي فْلَرْضْ". ³⁷ وْ جَاوَبْهُمْ وْ ڤَالْ: "لِيَزْرَعْ الزَرِيعَه الْمْلِيحَه هُوَ إِبْنْ الإِنْسَانْ. ³⁸ وْ الْحَقَلْ هُوَ الدْنْيَا. وْ الزَرْعْ الْمْلِيحْ هُوَ بَنُوا مَلَكُوتْ اللَّه. ³⁹ وَ الزْوَانْ هُوَ بْنُوا إِبْلِيسْ. وْ الْحْصَادْ هُوَ آخَرْ الزْمَانْ. وْ الْحَصَّادَه هُمَا الْمْلَايْكَه. ⁴⁰ كِمَا يَنْجْمَعْ الزْوَانْ وْ يَنْقَاسْ فَاالنَارْ، هَكَا غَادِي يْكُونْ فِي آخَرالزْمَانْ: ⁴¹ غَادِي يَبْعَتْ إِبَنْ الإِنْسَانْ الْمْلَايْكَه نْتَاعَهْ وْ يْلَمْ مَنْ الْمَمْلَكَه نْتَاعَهْ ڤَاعْ الْصْوَالَحْ أَلِّي تْعَتَّرْ و ڤَاعْ المَذْنُوبِينْ، ⁴² وْ يْقِيسْهُمْ فَالنَارْ. وِينْ غَادِي يْكُونْ البْكَا وْ تَغْزَازْ الْسْنَانْ، ⁴³ بَصَّحْ الصَالْحِينْ وْ لِكَانُوا يَطِيعُوا اللَهْ غَادِي يْضَوِي وْ كِي الشَمْسْ فِي مَمْلَكَةْ بُوهُمْ. لِعَنْدَهْ وْدْنِينْ يَسْمَعْ، غِيرْ يَسْمَعْ.امثلة الكنز و اللؤلؤ و الشبكه " ⁴⁴ وْعَاوَدْ تَانِي يْشَبَّهْ مَلَكُوتْ السَّمَاوَاتْ لْوَاحَدْ الكَنْزْ مَدْفُونْ فِي وَاحَدْ لَرْضْ، لْقَاهْ وَاحَدْ الرَّاجَلْ وْ عَاوَدْ دَفْنَهْ. وْمَالْفَرْحَه رَاحْ بَاعْ ڤَاعْ مَلْكَهْ وْ شْرَا دِيكْ لَرْضْ. ⁴⁵ وْ يْشَبَهْ تَانِي مَلَكُوتْ السَّمَاوَاتْ لْوَاحَدْ تَاجَرْ كَانْ إِحُوَّسْ عْلَى الْجَوْهَرْ الصَافِي، ⁴⁶ وْ كِلْقَى الجَوْهَرْ غَالِي بْزَافْ، رَاحْ وْ بَاعْ ڤَاعْ أَلِّي عَنْدَهْ وَ شْرَاهَا. ⁴⁷ وْ تَانِ يْشَبَهْ مَلَكُوتْ السَمَاوَاتْ ،شَبْكَه قَاسُوهَا الصِيَادَه فِي البْحَرْ، وْ لَمَتْ ڤَاعْ لَنْوَاعْ تَاعْ الحُوتْ. ⁴⁸ وْ كِتْعَمْرَتْ خَرْجُوهَا الصِيَادَه حْدَى البْحَر، وْ جَّمْعُوا وْ بْدَاوْ يْفَرْزُوا لَمْلِيحْ دَارُوهْ فَالسْلَلْ، وْ لِّمَيَصْلَحْ لْوَالُوا يْقِيسُوهْ. ⁴⁹ وْ هَكَا غَادِي يْكُونْ فِي آخَرْ الزْمَانْ: "غَادِي يْجُوا الَمْلَايْكَهْ وْ يَعَزْلُوا المُدَنْبِينْ مَنْ بِينْ لْمَتْقِنينْ اللهَ، ⁵⁰ وْ يْقِيسُوا الْمَدَنْبِينْ فِي النَارْ وِينْ غَادِي يْكُونْ الْبَكَا وْ تَغْزَازْ السْنَانْ". ⁵¹ وْ ڤَالْهُمْ يَسُوعْ: "فْهَمْتُوا ڤَاعْ هَادْ الشِّي؟". وْ جَاوْبُوهْ:"واه،يَاسِدِي" ⁵² وْهُوَ يْڤُولْهُمْ:"عْلَى جَالْ دَاكْ الشِي، كُلْ وَاحَدْ مَنْ عُلَمَاءْ الشَرِيعَه عْرَفْ مَمْلَكَةْ السَمَاوَاتْ إِشَبَهْ لْوَاحَدْ مُولَ دَارْ اللِي خَرَّجْ مَا الْكَنْزْ تَاعَهْ كُلْ حَاجَه قْدِيمَه وْ جْدِيدَه". ⁵³ وْ كِكَمَلْ يَسُوعْ هَادْ الْمْثُولْ رَاحْ مَنْ تَمْ.الناصرة ترفض يسوع ⁵⁴ وْ كِجَا لَمْدِينْتَهْ كَانْ يْعَلَّمْهُمْ فِي دَارْهُمْ تَاعْ الصْلاَةْ حَتَى نْخَلْعُوا فِيهْ وْ ڤَالُوا: "مِينْ عَنْدَهْ ڤَاعْ هَادْ الْحِكْمَه وْ السُّلْطَانْ؟ ⁵⁵ مَشِي هُوَ هَذَا وَلْدْ النَجَّارْ،مَشِي امَهْ يْسَمُوهَا مَرْيَمْ وْ خُوتَهْ يَعْقُوبْ وْ يُوسِي وْ سِمْعَانْ وْ يَهُودَا؟ ⁵⁶ وْ مَشِي خُوَاتَاتَهْ ڤَاعْ هُمَا مَنْ عَنَدْنَا؟ آيَّا مِينْ جَاهْ ڤَاعْ هَادْ الشِي؟". ⁵⁷ مَا عْجَبْهُمْشْ الْحَالْ. وْ بَصَحْ يَسُوعْ ڤَالْهُمْ :"النْبِي هُوَ بْلُا كَرَامَه غِيرْ فِي بْلَادَهْ وْ فِي وَسْطْ عِيلْتَهْ". ⁵⁸ وْ مَادَارْشْ فْدِيكْ البْلَاصَه بَزَافْ المُعْجِزَاتْ عْلَى خَاطَرْ مَا كَانَشْ عَنَدْهُمْ إِيمَانْ .

¹ الْمُوتْ نْتَاعْ يُوحَنَّا مَالمُوت! عْلَى جَالْ دَاكْ الْشِّي الْمَعْمَدَانْ وْ فْدَاكْ الْوَقْتْ سْمَعْ هِيرُودُسْ الْحَاكَمْ بَخْبَارْ يَسُوعْ، ² وْ هُوَ يْڤُولْ لْخَدَّامَة نْتَاعَه: "هَذَا هُوَ يُوحَنَّا الْمَعْمَدَان لِقَامْ الْمُعْجِزَات انْدَارُوا عْلَى يَدِّيهْ". ³ وْهِيرُودُسْ ڤْبَضْ يُوحَنَّا وْ كَتْفَهْ وْ دَخْلَهْ لَلْحَبْسْ عْلَى جَالْ هِيرُودْيَا مَرْتْ خُوهْ فِيلِبُسْ ، ⁴ عْلَى خَاطَرْ يُوحَنَّا كَانْ إِيڤُولَّه:"مَشِّي حْلَالْ عْلِيكْ بَاشْ تَتْزَوَّجْهَا". ⁵ وْ كَانْ بَاغِي يُكَّتْلَهْ وْ بَصَّحْ خَافْ مَالْشَّعْب ،عْلَى خَاطَرْ كَانُوا يْأَمْنُوا بِيهْ بَلِّي هُوَ الْنْبِي . ⁶ وْ فْحَفْلَة عِيد الْمِيلَادْ نْتَاعْ هِيرُودُسْ ، رَڤْصَتْ بَنْتْ هِيرُودْيَا فَالْحَفْلَة وْ عَجْبَتْ هِيرُودُسْ . ⁷ وْ مَنْ تَمَّا حْلَفْ بَاشْ يَعْطِيهَا ڤَاعْ الْلِّي تُطُلْبَهْ. ⁸ وْ كِيمَا وَصَّاتْهَا أَمْهَا شَاتدِيرْ ڤَالَتْ لْهِيرُودُسْ : " جِيبْلِي دَرْوَكْ رَاسْ يُوحَنَّا الْمَعْمَدَانْ فِي طَبْسِي". ⁹ انْتْغَمْ الْمَلِكْ. بَصَّحْ عْلَى جَالْ الْحَلْفْ الْلِّي حَلْفَهْ وَ الْنَّاسْ الْلِّي كَانُوا حَاضْرِينْ أْمَرْ بَاشْ يَنْتْمَدَّلْهَا الْشِّي الْلِّي طُلْبَاتَهْ. ¹⁰ وَرْسَلْ الْلِّي يَڤْطَعْ رَاسْ يُوحَنَّا فَالْحَبْسْ. ¹¹ وْ جَابُوهْ فَوَحْدْ الْطَّبْسِي وَ عْطَاوَهْ لْبَنْتْ هِيرُودُسْ، دَاتَهْ لَمْهَا. ¹² وْ جَاوْ تَلَامِيذْ يُوحَنَّا وْ دَاوْ الْجَتَّة انْتَاعَهْ وْ دَفْنُوهَا. وْمَنْبْعْدْ مْشَاوْ وْخَبْرُوا يَسُوعْ. يسوع يوكل خمسلاف واحد ¹³ وكِي سْمَعْ يَسُوع رَاحْ مَنْ تَمْ فِي وَحْدْ لَفْلُوكَة لْوَاحَدْ الْمُوضَعْ خَاوِي. و كِعَرْفُوا جْمَاعَاتْ الْنَّاسْ وِينْ رَاهْ رَايَحْ تَبْعُوهْ مَلْ الْمْدُنْ عْلَى كَرْعِيهُمْ. ¹⁴ و كِينْزَلْ يَسُوعْ مَنْ الْفْلُوكَة شَافْ جْمَاعَة كْبِيرَة تَاعْ الْنَّاسْ وْ حَنْ عْلِيهُمْ وَشْفَى الْمَرْضَى نْتَعْهُمْ ¹⁵ وْكِي جَاتْ لَعْشِيَة ڤَرْبُوا عَنْدَه تْلَامْدَه وْ ڤَالُولَه: " رَاهْ رَاحْ الْحَالْ وَحْنَا مَازَلْنَا فِي هَاد لَخْلَا . ڤُولْ لَجْمَاعَاتْ الْنَّاسْ إِيرُوحُوا لَدْوَاوِيرْ وْ يَشْرُوا لَرْوَاحْهُمْ شَا يَاكْلُوا". ¹⁶ بَصَّحْ يَسُوعْ ڤَالْهُمْ : " مَكَانْلَّهْ غِيررُوحُوا. أَعْطُوهُمْ أَنْتُومَا شَا يَاكْلُوا". ¹⁷ وْ ڤَالُولَه : "عَنْدْنَا هْنَا غِيرْ خَمْسْ خُبْزَاتْ وْ زُوجْ حُوتَاتْ". ¹⁸ وْ ڤَالْهُمْ: " جِيبُوهُمْ لِي هْنَا". ¹⁹ وْ أْمَرْ جْمَاعَتْ نْتَاعْ الْنَّاسْ بَاشْ يْجَمْعُوا عْلَى لَحْشِيشْ. وَأَدَّى هَدُوكْ لْخَمْس خُبْزَات و زُوجْ حُوتَأتْ، وْ طَلَّعْ عَيْنِيه لَسْمَا وَ شْكَرْ الْلَّه وْ كِي ڤَسَّمْ الْخُبْز أَعْطَى لَتَّلَامِيذْ، وَ الْتَّلَامِيذْ أَعْطَاو لَلْجُومُوعْ. ²⁰ وَ كْلَاوْ ڤَاعْ حَتَّى شَبْعُوا. وْ مَنْ بَعْدْ لَمُّوا طْنَاعَشْ ڤُفَّة مْعَمْرَة بَالْطْرُوفَة الْخُبْزْ الِّي بْقَاوْ. ²¹ وْ كَانُوا هَدُوكْ الِّي كْلَاوْ خَمْسَالَافْ وَاحَد، مَنْ غِيرْ الْنْسَا وْ لَوْلَاد. معجزة المشي على الماء ²² وَأْمَرْ يَسُوعْ تَلَامِيذَه بَاشْ يَكَّتْبُوا فَالْفْلُوكَة وْ يَسَّبْڤُوه لَلْجِيهَة الُّخْرَى بِيلَامَا مَا يْرَوَّحْ الْجْمَاعَاتْ تَاعْ الْنَّاس. ²³ وْ كِيرْسَلْهُمْ طْلَعْ لَجْبَلْ وَحْدَه بَاشْ يْصَلِّي .وَ ڤْعَدْ تَمَّا وَحْدَه حَتَّى لَعْشِيَة . ²⁴ وَ الْفْلُوكَة تَاع الْتَّلَامِيذ بَعْدَتْ بَزَّافْ فْوَسْط لَبْحَر غَلْبُوهَا لَمْوَاجْ .عْلى خَاطَرْ كَانَت الْرِّيح مْعَاكْسَة. ²⁵ وْ فَالْفَجْر جَا يَسُوع عَنْد الْتَّلَامِيذ وْ هُوَ يَمْشِي فُوڤ الْمَاء. ²⁶ تْخَلْعُوا وْ ڤَالُوا: " هُو خْيَال". وْ مَالْخَوْف بْدَاو ازَڤُّوا ! ²⁷ وْ تَمْتَمْ هْدَرْ مْعَاهُمْ يَسُوعْ وْ ڤَالْهُمْ : " اتْشَجْعُوا! أَنَا هُوَ . مَاتْخَفُوش". ²⁸ جَاوْبَه بُطْرُس وْ ڤَالْ: " يَاسِيدِي، إِلَا أَنْتَ هُوَ، بَصَّحْ آمَرْنِي بَاشْ نْجِي عَنْدَكْ نَتْمَشَّى فُوڤْ الْمَاء". ²⁹ وْ ڤَالَّه يَسُوع :" أَرْوَاح". وَنْزَلْ بُطْرُسْ مَالْفْلُوكَة وَتْمَشَّى عْلَى الْمَاء لْجِيهَة يَسُوع. ³⁰ و بَصَّحْ كِي شَافْ الْرِّيحْ قْوِيَّة خَافْ وَتَخْلَعْ. و بْدَا يَغْرَقْ، و يْزَڤِّي وَ يْڤُولْ : " يَارَبْ سَلَّكْنِي !" ³¹ تَمْتَمْ مَدْ يَسُوعْ يَدَّه و شَدَّه و ڤَالَّه :" يَاقْلِيلْ الْإِيمَانْ عْلَاشْ شَكِّيتْ؟". ³² و كِي دَخْلُوا لَفْلُوكَة تْهَدْنَتْ الْرِّيح . ³³ وْ هَدُوكْ لِي كَانُوا فَالْفْلُوكَة جَاوْ سَجْدُولَهْ وْ ڤَالُوا:"حَقِيقَة أَنْتَ ابْنَ الْلَّه. !" ³⁴ وْ ڤَطْعُوا لَلْجِيهَة لُخْرَى مَالْبْحَر و جَاوْ لَبْلَاد جَنِّيسَارتَ، ³⁵ عَرْفُوه رْجَالْ دِيكْ لَبْلَادْ. شَيْعُوا خَبْرَه فِي ڤَاعْ هَادُوكْ الجْوَايَه وْ جَابُولَهْ ڤَاع هَادُوكْ الْمَرْضَى نْتَاعْهُم، ³⁶ و طَلْبُوه بَاشْ إِمَسُّوا غِيرْ طَرْفْ مَنْ لَبْسَتَّه. و ڤَاعْ أَلِّي تَلَمْسُوه بْرَاوْ.

¹ و مَبْعْدْ جاوْ عَنْد يسوع فرِسيِن و عُلما الشريعة مَنْ أُرشَلِيمْ ﭭالوُلهْ : ² "عْلاَشْ تْلاَمْذَك يَتْعَدَّاوْ عْلَى العَادة تَاعْ الشْيُوخْ ، عْلىَ خَاطَرْ مَايَغَسْلُوشْ يَدِّيهُمْ قْبَل مَا يَاكْلُوا؟". ³ بَصّحْ هُوَ جَاوَبْهُمْ وْ ﭭالْ : " وْنْتُمَا تَاِني، عْلاَشْ تَتْعَدّاوْ وْصِيَّةْ الّله بَاشْ تبْعُوا العَادَة نْتَاعْكُمْ؟" ⁴ و اللّيِ يْعَايَرْ بُوه وْ لاَ مَّهْ خَاصّهْ يْمُوتْ. ⁵ بَصَّحْ نْتُمَا تڤُولوا: اللّي ﭭَال لْبُوهْ وَ لاّ لَمُّهْ : هَادَاك الشِّي اللّي نْعَاوَنْكُمْ بِيهْ عْطِيتُوا هدِّية لِله . مَارَاهْشْ يَتْهَلّى فِي بُوه وْ مَّهْ . ⁶ وْهَكَّا بَطَّلْتُوا وْصِّيّةْ اللّه بَاشْ تَبْعُوا العَادَة نتَاعْكُمْ! ⁷ يَا مُنَافقين! أشعِياءْ كَانْ عَنْدهْ الحقْ مِينْ تْنَبَّأْ عْلِيكُمْ وْ ﭭَالْ : ⁸ "هَادْ الشعب يْقرّب لّيِ غِيرْ بْفمّهْ، بصَّحْ ﭭَلْبَهْ بْعِيدْ عْلِي. ⁹ وْ فِي بَاطَلْ هُمَا يَعْبْدُونِي وْ يْعَلْمُوا تَعالِيمْ هِيَ غِيرْ وْصِيّاتْ تَاع النَّاس". ¹⁰ وْعَيّطْ للنَّاس بَاشْ إيجُوا و ﭭَالْهُمْ : " آسَمْعُوا ¹¹ وْ فَهْمُوا. مَاشِ لِيَذْخُلْ مَنْ فُمْ البْنَادَمْ، لِيَنْجَسَهْ بَصَّحْ لِيُخْرَجْ مَنْ فَمَهْ لِيْنَجَسَهْ". ¹² وْ مَمْبَعْدْ جَاوْ عَنْدَهْ التَّلآمَدْ وْ ﭭَالُولَهْ : " عْرَفْتْ بَلِي الفَرِسِينْ زَعْفُوا كِسَمْعُوا هَدْرتكْ؟". ¹³ وْجَاوْبْهُمْ و ﭭَالْ : " كُلّْ غَرْسْ مَاغَرْسَهْشْ بُويَا السَّمَاوِي يَنْڨْلَعْ. ¹⁴ خَلُّوهُمْ. هَادُوا رَاهُمْ عُمْيِين إﭭُعْدُوا عُمْيِينْ. وْبْزُوجْهُمْ غَادِي يْطِيحُوا فِي الحُفْرَة". ¹⁵ وْ ﭭَالَهْ بُطْرُس :"فَسَّرَلْنَا هَادْ لَمْثَلْ". ¹⁶ وﭭَالْ يَسُوعْ : "حَتَّى نْتُمَا مَازَالْ مَافْهَمْتُوشْ ؟ ¹⁷ مَاتَعَرْفُوشْ بَلِّي ﭭَاعْ لِيَذْخُلْ لْفَمْ لْبْنَادَمْ إرُوحْ لْكَرْشَه وْمَمْبَعْدْ يَخْرُجْ لْبَّرَا؟ ¹⁸ وْ بَصَّحْ لِيَخْرُجْ مَنْ فُمْ البْنَادَمْ يَخْرُجْ مَا الڤَلْبْ، وْ هُوَ لِيْنَجَسْ البْنَادمْ، ¹⁹ عْلَى خَاطَرْمَا الڨَلْبْ تَخْرُجْ الأفْكَارْ الشَريرَة :الَقْتِيلَة, الزِنَّى, فُسْقْ, الخِيَانَة,وْ شَهَادَةْ الزُورْ, التَجْدِيفْ. ²⁰ وْ هَادَا هُوَّ لِيْنَجَسْ البْنَادَمْ. مَاشِ المَاكْلَة بِيَدِّينْ مَاشِي مَغْسُولِينْ لِيَنْجْسُوا البْنَادَمْ". إِيمَان المرأَة الكَنْعَانِيَة ²¹ وْ خْرَجْ يَسُوعْ مَنْ تَمَّ وْ رَاحْ لَجْوَايَهْ صُورْ صَيْدَا. ²² وَاحْدْ المْرآ كَنْعَّانِيَة خَرْجتْ مَنْ هَادُوكْ الجْوَايَهْ وْزَڨَتْ وْ ﭭَالَتْ : "رْحَمْنِي، يَاسَيِدِي، يَا بَنْ دَاوَدْ! بَنْتِي رَاهْ سَاكَنْهَا جَنْ و رَاهْ مْعَدَّبهَا بَزَّافْ". ²³ وْ بَصَّحْ هُوَ مَاجَاوَبْهَاشْ حَتَّى بَكَلْمَة. ڨَدْ مُوَهالَهْ تَلآمْذهْ وْ طَلْبُوهْ : "خَلِيهَا تْرُوحْ ،على خَاطَرْ رَاهْ تَبَّعْ فِينَا وْتْزَڨِ!" ²⁴ وْجَاوْبَهُمْ يَسُوعْ وْ ڨَالْ : "أنَا مَا تَرْسَلْتْشْ غِير لَلْخَرْفَانْ الَمْوَدْرة تَاع بِيتْ إسْرَائِيل". ²⁵ جَاتْ وْ سَجْدَتْلَهْ وْڨَاتْلَهْ: " يَا سِيدِي، عَاوَنِي !" ²⁶ وْجَاوَبْهَا وْ ڨَال: " مَاشِي مْلِيحْ يَتَرْفَدْ خُبْز الوْلادْ وَ يَتَرْمَى لَلْكلاَبْ". ²⁷ وْ ڨَاتْلَهْ الَمْراة: " وَاه، يَا سِيدِي ! بَصَّحْ حَتّى الكْلاَبْ يَاكْلُوا مَالْفْتَاتْ الِلّي يْطِيحْ مَالْمَايْدَة تَاعْ مَالِيهَا!". ²⁸ وْ جَاوْبْهَا يَسُوعْ وْ ڨَالْ : "إيمَانَكْ كْبِيرْ! غَاذِي إيكُونْ لَكْ هَاذَاكْ الشِّي اللِّي بْغِيتِيهْ". وْ بْرَاتْ بَنْتْهَا تَمْ تَمْ.إِشْبَاع الأَرْبَعة الآلَاف رَجل ²⁹ وْ مَمْبَعْدْ رَاحْ يسوع منْ تَمْ لَحْدَى البْحَرْ تَاعْ الجَلِيلْ، وْ طْلَعْ وَ ﭭْﻌَدْ تّمَّ. ³⁰ وْجَاوْ لْعَنْدَه جْمَاعاتْ، مْعَاهُم قَجْعِينْ وْ عُمْيينْ وْ طُرْشِينْ وْ مَشْلولين وْ نَاسْ وَحْدُخْرِينْ بَزاّفْ، وْ حَطُّوهُمْ عَنْدْ رَجْلِيهْ. وْبَرَّاهُمْ ³¹ حَتَّى تْعَجْبُوا الجْمَاعَات كِشَافُوا الْبْكَاكِيشْ يَهَدْرُوا، و الْمَشْلُولِين بْرَاوْ، و الْقَجْعِينْ يَتْمَشَاوْ، وَ الْعُمْيِينْ يْشُوفُوا. وْ مَجْدُوا إلاَهْ إسْرَائِيل. ³² وْ بَصَّحْ يَسُوعْ عَيَّطْ لَتَلَاْمْذَهْ وْ ﭭََالْ : "شَفُّونِي هَادْ اَلْنَّاس، عَلى خَاطَر هَادِي ثَلْتْ يَّامْ وْهُمَا مْعَايَ وْ مَاعَنْدْهُمْشْ شَايَكْلُوا. وْ مَا بْغِيتْشْ إِرُوحُوُا صَايْمِينْ بَاشْ مَايَسَخْفُوشْ فالطْرِيقْ. ³³ " ﭭَالُولَهْ تْلَامْذَهْ : " مِينْ غَاذِي نْجِيبُوا فِي هَادْ اَلْخَلاَ اَلْخُبْزْ، لِيَشَبَعْ جْمَاعَة كْبِيرَة كِمَا هَادِي؟". ³⁴ وْﭭَالْهُمْ يَسُوع :"شْحَالْ عَنْدْكُمْ مَا لْخُبْزْ؟". ﭭَالُوا:" سَبْعَة و شْوِيَّ حُوتَاتْ صْغَارْ". ³⁵ أْمَرْ اَلْنَّاسْ بَاشْ إِجَمْعُوا عَلَى اَلْأَرْض، ³⁶ وَ دَّى اَلْسَبْعْ خُبْزَاتْ وْ اَلْحُوتْ، وْ شَكَرْ رَّبِي وْ ﭭَطَعْهُمْ وْعْطَى لَتلَامَذْ، واَلْتَلَامْذْ عْطَوْ لَجْمَاعَاتْ تَاعْ الْنَّاسْ. ³⁷ وْ كْلاَوْ ﭭَاَعْ حَتَى شَبْعُوا. وْ دَّاوْ سَبْعْ ﭭُفَّاتْ مَعَمْرِينْ مَا اَلْخُبْزْ لِيبْقَى، ³⁸ وْ كَانُوا اَلْنَّاسْ لِكْلاَوْ رَبْعَا لاَفْ رَاجَلْ مَنْ غِيرْ اَلْنْسَا وْ اللوْلاَدْ . ³⁹ وْ كِرَوَّحْ يَسُوعْ اَلْنَّاسْ رْكَبْ فَالْفْلُوكَة وْ جَا لَجْوَايَهْ بَلاَدْ مَجْدالْ.

¹ وْ جَا عَنْدَه اَلْفَرِسِّيُونْ وْ اَلْصَدُقِيُونْ بَاشْ يْجَرْبُوه، وْ طلبُو مَنَّهْ مُعْجِزَة مَالسْمَا. ² بَصَّحْ هُوَ جَاوَبْهُمْ وْ ﭭَالْ : "كِتَغْرَبْ اَلْشَمْس تْڨُولُوا: اَلْحَالْ غَاذِي يْكُونْ صَافِي عْلَى خَاطَرْاَلْسْمَا حَمْرَا. ³ وْ فِي اَلْصَبَاحْ بَكْرِي تْڨُولُوا: اَليُوم غَاذِي يْكُونْ اَلْشْتَا عْلَى خَاطَرْ اَلْسْمَا حَمْرَا و مْضَّبَبة. يامُرَاؤُونْ! تْعَرْفُوا تَمَيْزُوا وَجْهْ اَلْسْمَا، وْ بَصَّحْ عَلاَمَاتْ الْزَّمَانْ مَاتَقْدْرُوشْ تْفَسْرُوهَا! ⁴ جِيلْ قْبِيحْ وْ فَاسَدْ اَلِّلِي يطلب معجِزه، وْ مَا تَنعْطَالَهْشْ غِيرْ معجِزة يُونَانْ اَلْنَّبِي" . و مَمْبْعَدْ رَاحْ وْخلاهُمْ. خمير الفرسيين ⁵ وْ كِجاوْ تَلاَمْذه لَجِهَة لُخْرَا مَنْ لَبْحَر نْسَاوْ بَاشْ يَدُّوا مْعَاهُمْ اَلْخُبْزْ. ⁶ وْ ﭭَالْهُمْ يَسُوعْ :" مَيِّزُوا، و أحَرْزُوا مَنْ خَمِيرْ اَلْفَرِسِيينْ و اَلْصدِّقِين". ⁷ خَمُّوا فِي نَفْسْهُمْ وْ ﭭَالُوا: " مَاجَبْنَاشْ مَعَانَا اَلْخُبْزُ". ⁸ عْرَفْ يَسُوعْ وْ ﭭَالْهُمْ: "عْلاَشْ رَاكُمْ تْخَمْمُوا فِي رْوَاحْكُمْ يَا قْلِيلي اَلْإيمَانْ مَاشِي مَاجَبْتُوشْ مْعَاكُمْ اَلْخُبْزْ؟ ⁹ حَتَّى لْدَرْوَكْ مَاتَفَهْمُوشْ؟ وْ مَا تَعَقْلُوشْ اَلْخَمْسْ خُبْزَاتْ وَ اَلْخَمْسَتَلاَفْ وْ شَحَالْ مَنْ ڤُفَّة دِّيتُوا مَا اَلْلِّي بْقَى؟ ¹⁰ وْ لاَّ سَبْعْ خُبْزَاتْ اَلْلأربَعْتَلاَفْ وْ شَحَالْ مَنْ ﭭُفَّة دِّيتُوا ؟ ¹¹ كِيفَاشْ مَا تَفَهْمُوشْ بَلِّي مَا كُنْتْشْ نْڨُولْكُمْ عَلَى اَلْخُبْزْ بَصَّحْ بَاشْ تَحَرْزُوا مَنْ خَمِيرْ اَلْفَرِسِيينْ و اَلْصَّدُوقِينْ؟". ¹² و فِي دَاك اَلْوَقْت عَادْ بَاشْ فَهْمُوا بَلِّي مَاكَانْشْ يَهْدَرْ عْلَى خْمِيراَلْخُبْزْ، بَصَّحْ بَاشْ يَحَرْزُوا مَنْ تَعْلِيمْ اَلْفَرِسِيين و اَلْصَدّوقين. إعْتِرَافْ بُطْرُسْ بِاَلْمَسِيحْ ¹³ وْ كِجَا يَسُوع لَجْوَايَهْ قَيْصَرِيَة فِلِبُسْ سَقْسَ تْلاَمْدْ وْ ڨَالْ: " شَا إِقُولُوا عْلِّيَّ اَلْنَّاسْ أَنَا إبْن اَلْإنْسَانْ؟" ¹⁴ ڨَالُوا : "قَوْم إِقُول: يُوحَنَّا اَلْمَعْمَدَانْ، وْ وَحْدُ خْرِينْ إِڤُولُوا: اَلْنَّبِي إِليَّا وْ وَحْدُخْرِينْ: تَان إِيڨُولُوا أَرْمِيَا وْ لاَ وَاحَدْ مَا اَلْأنبِيَّاء". ¹⁵ وڨَالْهُمْ: "وْ نْتُمَا ،شْكُونْ أَنَا بِالنِسْبَة لِيكُمْ؟". ¹⁶ وجَاوَبْ سَمْعان بُطْرُسْ وْڨَالْ :"أَنْتَ هُوَ اَلْمَسِيحْ إِبْن اللَّه اَلْحَيّْ!". ¹⁷ و جَاوْبَهْ يَسُوعْ :" سَعْدَاتَكْ يَا سَمْعَان بَنْ يُونَا ، لَى خَاطَرْ مَاشِي اَلْبَنادَمْ لِوَرَّاكْ هَادْ اَلْحَقْ، بَصَّحْ بُويَا لِيفْسَمَّاوَات لِأَعْلَنْ لَكْ هَادْ اَلْحَقْ. ¹⁸ و أَنَا نْڨُولَكْ تَانِي:"أَنْتَ بُطْرُسْ، وْ عْلَى هَادْ اَلْصَخْرَة غَاذِي نَبْنِي كَنِيسْتِي، وْ قُوَّة اَلْمَوْتْ مَا غَاذِيشْ تَقْدَرْ عْلِيَهَا ¹⁹ وْ نَعَطِيكْ مْفَاتِيحْ مَلَكُوتْ اَلْسَمَاوَاتْ، وْ ڨَاعْ لِتَرْبْطَه فِي اَلْأَرْضْ غَاذِي يْكُونْ مَرْبُوطْ فِي اَلْسّْمَا. وْ ڨَاعْ لِتْحَلُ فِي اَلْأَرْضْ غَادِي يَنْتْحَلْ فِي اَلْسْمَا". ²⁰ وْ مَمْبَعْدْ وَصَّى تْلاَمْذَه بَاه : مَا يْڨُولُوا حَتَّى لْوَاحَدْ بَلِّي هُوَ اَلْمَسِيح. يسوع ينبئ بموته و قيامته ²¹ وْ مَنْ دَاك اَلْوَقْتْ بْدا يَسُوعْ إبْيَّنْ لَتَلامْذة بَّلِي خَصَّهْ إِرُوحْ لْأُرْشَلِيمْ وْ يَتْعَذَّبْ بَزَّافْ مَنْ اَلْشُيُوخْ وْرُؤسَاء رْجَالْ الدِّينْ و عُلماَ اَلْشَرِيعَة، وْ خَصَّه يَتَقْتَلْ، وْ فِي اَلْيُومْ اَلْثَالِثْ يْقُومْ مَنْ اَلْمُوتْ. ²² وأدَّاه بُطْرُسْ عْلَى جَنْبْ وْ بْدَا يَنْتَهْرَه و يْڨُولَهْ :"حَاشَا يَا سِيدِي! بَاشْ يَصْرَلَكْ هَادْ اَلْشِي!". ²³ دَار وْ ڨَالْ لِبُطْرُسْ :" بَعَّدْ عْلِيَّ يَا شَيْطَانْ! أَنْتَا سَبَّتْ عَثْرَة لِيَّ ،عْلىَ خَاطَرْ تْخَمَّمْ فِي أُمُورْ اَلْنَّاسْ مَاشِي فِي أُمُورْ اَلْلَّه". ²⁴ وْ تَّمَ ڨَالْ يَسُوعْ لَتْلاَمْذَه :" إِذَا بْغَى وَاحَدْ يْتَبَعْنِي يُنْكَرْ نَفْسَهْ وْ يَحْمَلْ صَلِيبَهْ وْيْتَبَّعْنِي، ²⁵ عْلَى خَاطَرْ لِبْغَى يْسَلَّكْ حْيَاتَهْ غَاذِي يْضَيْعْهَا، بَصَّحْ لِيْضَيِّعْ حْيَاتَهْ عْلىَ جَالِي غَاذِي يَلْقَاهَا. ²⁶ وَاشْ مَانْفَعْ عَنْدَهْ اَلْبَنَادَمْ إِذَا رْبَحْ اَلْدُّنْيَا ڨَاعْ وْ ضَيَّعْ حْيَاتَهْ؟ شا غَاذِّي يَعْطِي اَلْبْنَادَمْ فِدَاءْ لِنَفَسَهْ؟ ²⁷ رَاهْ غَاذِي يْجِي إِبْن اَلْإنْسَانْ مْعَ اَلْمَلاَيْكَة، نْتَاعَهْ فِي مَجْدْ بُوهْ وْ غَاذِّي يْجَازِي كُلّْ وَاحَدْ عْلَى حْسَابْ اَلْأَعْمَالْ نْتَاعَهْ. ²⁸ وْنْڨُولْكُمْ :اَلْحَق رَاه كَايَنْ فِي اَلْحَاضْرِينْ هْنَا لِمَا غَادِيشْ إيمُوتُوا حَتَّى يْشُوفُوا إِبْن اَلْإِنْسَان جَايْ فِمَمْلَكْتَهْ".

¹ وْمَمْبَعْدْ سَتْ يَّام دَّا يَسُوعْ بُطْرُسْ وَ يَعْقُوبْ وْيُوحَنَّا خُوهْ وْ طْلَعْ بِيهُم لْوَاحَدْ جْبَلْ عَالِ غِير بْوَحَدْهُمْ. ² وْ تْبَدَّل اَلْشَكْلْ نْتَاعَه ڨُدأمْهُمْ، وْ وَجْهَهْ بَدَا يْضَوِّي كِالْشَمْسْ، وْ وَلاَّتْ لَبْسَتَهْ بَيْضَا كِاَلْنُّورْ ³ وْ تَمّْ بَانَلْهُمْ مُوسَى إلِيَّا يَهَدْرُوا مْعَاهْ. ⁴ وْ ڨاَلْ بُطْرُسْ لِيَسُوعْ :"شْحَالْ غَايَا نْكُونُوا هْنَا يَا سِيدِي، إِذَا بْغِيتْ نَصَنْعُوا تَلْتْ خَيْمَاتْ: وَحْدَة لِيكْ، و لْمُوسَى وَاحْدَة، و لِإلِيَّا وَاحْدْ خْرَى" ⁵ وْ فِي اَلْوَقْتْ لِكَانْ يَهْدَرْ فِيه ضَلَّلَتْ عْلِيهُمْ، وَاحَدْ اَلْسْحَابَة مْضَوْيَّة وَتَكَلَّمْ صُوتْ مَنْ اَلْسْحَابَة وْ ڨَالْ:" :"هَادَا هُوَ وَلْدِي اَلْعَزِيزْ اَلْلِي بِيهْ أَنَّا فْرَّحْتْ بَّزَافْ. سَمْعُوا لِيهْ" . ⁶ وْ كِسَمْعُوا اَلْتْلاَمَذْ هَادْ اَلْشِي طَاحُوا عْلَى وْجُوُهُمْ وْ خَافُوا بَزّاف. ⁷ جَا يَسُوعْ وْ مَّسْهُمْ وْڨَالْهُمْ :" نُوضُوا، مَا تْخَافُوشْ". ⁸ وْ طَلْعُوا عَيْنِيهُمْ وْ شَافُوا غِيرْ يَسُوعْ وَحْدَهْ. ⁹ وْ كِهَوْدُوا مَالَجْبَلْ وَصَّاهُمْ يَسُوعْ وْ ڨالْ:" مَا تْڨُولُوا حْتَى لْوَاحَدْ وَاشْ شَفْتُوا حْتَّى يْقُومْ إِبْنْ اَلْإِنْسَانْ مَالْمُوتْ". ¹⁰ وْ سَقْسَاوَهْ تْلاَمْذَه وْڨَالُولَهْ: "أَيَّ عْلأَشْ عُلَمَاءْ اَلْشَرِيعَة: يْڨُولُوا إِلِيقْ إِلِيَّ اجِي هُوَ اَلْلَّوَّلْ؟" ¹¹ جاوْبهمْ يَسُوعْ وْ ڤَالْهُم ׃" إِلِيَّا يْجِي هُوَ اَلْلَوَّلْ و يْصَلَّح كُل شي. ¹² وْ بَصَّحْ نْڤُولْكُمْ: إِلِيَّا جَا وْمَاعَرْفُوهْشْ، بَصّحْ دَاروْ بِيَا ڤَاعْ وَاشْ بْغَاوْ. وْ هَاكَا تَانِ إِبنْ اَلْإِنْسَانْ هُوَغَاذِي يَتْعَذّْبْ عْلَى يَدْهُمْ". ¹³ وْ فْدَاكْ اَلْوَقْتْ فْهَمُوا اَلْتَلأَمَذْ بَلِي كَان يَهدَرْ لْهُمْ عَلَى يُوحَنَّا اَلْمَعْمَدَانْ. شفاء غلام به شيطان ¹⁴ كِوَصْلُوأ عَنْدْ اَلْجَمعْ، ڤَدَمْ عَنْدَه وَاحْدْ اَلْرَاجَلْ وْ سْجَدْ لَهْ ¹⁵ وْڤَالْ : " يَاسِيدي، إرْحَمْ وَلْدِي عْلَى خَاطَرْ رَاهْ يَتْعَّدَبْ بَزَافْ، وْشْحَالْ مَنْ خَطْرَة يْطِيحْ فَاَلْنَّارْ وْ فَلْمَاء. ¹⁶ وْ جَبْتَهْ لَتْلاَمْذَكْ بَصَّحْ مَانَجْمُوشْ يْبَرُّوهْ". ¹⁷ جَاوْبْهُمْ يَسُوعْ وڤَالْ: "يَاهَادْ اَلْجِيلْ لِمَا عَنْدَهْشْ إِيمَانْ، حَتَىّ لْوِينْتَى غَاذِي نَتْحَمَّلْكُمْ ؟ ڤَدْمُوهْلِي هْنَّا !". ¹⁸ انتهْرَهْ يَسُوعْ، وْ خْرَجْ مَنَّهْ اَلْشَيْطَانْ. وْبْرَى اَلْوَلْدْ فِي دِيكْ اَلْسَاعَه ¹⁹ وْمَمْبَعْدْ ڤَدْمُوا اَلْتَلاَمَذْ عَنْدْ يَسُوعْ وْسَقْسَاوَهْ غِيرْ بِينْهُمْ وْ بِينَهْ وْ ڤَالُوا : " عْلاَشْ حْنَا مَانَجَمْنَاشْ نْحَرْجُوا اَلْرُوحْ اَلْشَرِيرَة ؟". ²⁰ وْ ڤَالَلْهُمْ :" بَسْبَابْ قَلَة إيمَانْكُمْ. وْ نْڤُولْكُمْ اَلْحَقْ: إِلاَ كَانْ عَنْدَكُمْ إِيمَانْ قَدْ حَبَّة اَلْخَرْذَلْ ، غَاذِي نْڤُولْ لْهَادْ اَلْجْبَلْ: تْحَوَلْ مَنْ هْنَا رُوحْ لْهِيهْ غَاذِي يَتْحَوَلْ وْ مَاكَانْ حْتَى حَاجَة مُحَالْ عْلِيكُمْ. ²¹ وْ بَصَّحْ هَاذْ اَلْنَّوْعْ مَالَرْوَاحْ مَا يَخْرُجْشْ غِيرْ بِاَلْصَلاَة وَ اَلْصُوْمْ" ²² وْ كِكَانُوا مُجْتَمْعِينْ فِي اَلْجَلِيلْ ڤَالْهُمْ يَسُوعْ :" إِبْنْ اَلْإِنْسَانْ غَاذِي يَتْسَلَّمْ لْيَدِّينْ اَلْنّاسْ ²³ وْ غَادِي يَكْتْلُوهْ، وَ فِي اَلْنَّهَارْ اَلْثَالث غَاذِي يْنُوضْ". وْ حَزْنُوا اَلْتلاَمَذْ بَزَّافْ. ضَريبةِ اَلْهَيْكَلْ ²⁴ وْ كِوَّلاَيَسُوع وْتْلاَمَذْ هْ لْكَفْرْ نَاحُومْ جَاوْ مَّالِينْ اَلْضْرِيبَةْ تَاعْ بِيتْ اَلْلَّه عَنْدْ بُطْرُسْ وَ سَقْسَاوَهْ :" اَلْمُعَلِّمْ نْتَاعْكُمْ مَا يْخَلَّصْشْ اَلْضَرِيبَة تَاعْ بِيت اَلْلَّه ؟". ²⁵ وْجَاوَبْهُمْ :"وَاهْ غَاذِي يْخَلَصْهَا ". وْ كِدْخَلْ لَدَّارْ سَبْڤَهْ يَسُوعْ وْ ڤَالْهْ :" وَاشْ تْخَمَّمْ يَا سَمْعَانْ ؟ مَنْ عَنْدْ مَنْ يَدُّوا مُلُوكْ اَلْأرْضْ اَلْضْرِيبَة وْ لاَ اَلْجِيزْيَّة، مَنْ عَنْدْ اَلْبَرّانِي ؟"َ. ²⁶ وْجَاوْبَهْ بُطْرُسْ: "مَاَلْبَرَّانِي ". و ڤُالَهْ يَسُوعْ :"عْلَىَ هَادْ اَلْشِي وْلاَدْهُمْ رَاهُمْ مَعْفِيِّينْ مَا اَلْضَرِيبَة. ²⁷ وْ بَصَّحْ بَاشْ مَا تَتْسَبُوشْ فِي مُشْكِلْ، رُوحْ لَلْبْحَرْ وْقِيسْ اَلْصَّنَارَة، و اَلْحُوتَه اَلْلَوْلَىَ لِغَاذِي تْشَدْهَا، حَلَلْلَهَا فُمْهَا وْ غَاذِي تَلْقَى فِيهْ رَبْعَة تَاعْ اَلْدْرَاهَمْ ، دِّيهُمْ وْ رُوحْ خَلَّصْ عْلِيكْ وْ عْلِيَّا.

¹ وْ فِي دِيك اَلْسَاعَةَ ڤَرْبُوا اَلْتَلاَمذْ عَنْدْ يَسُوعْ وْ سَقْساوَه ׃" شْكُونْ هُوَّ اَلْمْخْيَّرْ فِي مَلَكُوتْ اَلْسَمَاوَاتْ ؟" ² عَيَّط يَسُوع لْوَاحَدْ اَلْوَلْدْ وْوَڤْفَهْ فِي وَسْطْهُمْ. ³ وْڤَالْ نْڤُولْكُمْ اَلْحَقْ ׃" إِذَا مَا تْبَدّلْتُوشْ وْ مَوَلِيتُوشْ كِمَا اَلْوْلاَدْ اَلْصْغَارْ غَادِي عُمُّرْكُمْ مَا تَدْخْلُوا مَلَكُوتْ اَلْسَمأوَاتْ ⁴ وْلِّي يَتْواضَعْ كِمَا هَادْ اَلْوَلْدْ اَلْصَغِيرْ غَادي يْكُونْ اَلْمْخَيَّرْ فِي مَلكُوتْ اَلْسْمَا. ⁵ وْلِّي يَقْبَلْ بْوَلْدْ كِمَا هَادَا بِإسْمِي رَاه قْبَلْنِي أَنَّايَا. ⁶ وْلِي طَيَّحْ فَاَلْذُنُوبْ وَاحَدْ مَنْ هَادْ اَلْصْغَارْ الِّي يْآَمْنُوا بِيَّ، غِيرْ خِيرْ لَهْ تْتْعَلٌّقْ فِي عُنْقَهْ حَجْرة كْبِيرَة تَاعْ اَلْرْحَى وْ يَتْقَاسْ فِي ڤَاعْ اَلْبَحَر ⁷ يَاوِيلْ اَلْعَالَمْ مَاَلْأُمُورْ وْ بَصَّحْ يَاوِيلْ هَادُوكْ لِيَتْسَبُوُّا فِي هَادْ اَلْأُمُورْ . ⁸ وْ إِلاَ الْيَّدْ نْتَاعَكْ وْ لاَ رَجْلَكْ طَيْحُوكْ فِي اَلْذُنُوبْ ! ڤَطَعْهُمْ وْ قِيسْهُمْ عَلىَ خَاطَرْ خِيرْ تَدْخُلْ اَلْحَيَاةْ اَلْدَايْمَةْ قْجَعْ وْ لاَ بْيَدْ وَحْدة وْ لاَ يَكُونُوا عَنْدَكْ بْزُوجْ وْ تَدْخُلْ لِلْنَّارْ ⁹ و إِلىَ طَيْحَتَكْ عَيْنَكْ فِي اَلْذُنُوبْ ڤْلَعْهَا وْ قِيسْهَا ، خِيرْ لَكْ تْذْخُلْ اَلْحَيَاة اَلْدَّايْمَة عْوَرْ وْلاَ تَنْقَاسْ فِي اَلْنَّارْ وَ أَنْتَ عَنْدَكْ عَيْنِيكْ اَلْزوُجْ. " ¹⁰ أَحَرْزُوا تَحَڤْرُوا وَاحَدْ مَنْ هَادُوكْ اَلْصْغَارْ عْلَىَ خَاطَرْ نْڤُولْكُمْ اَلْمَلأيْكَة نْتَاعْهُمْ رَاهُمْ فِي فَاَلْسْمَا دِيمَا مْعَ بُويَا اَلْلِّي فِي اَلْسْمَا . ¹¹ عْلَىَ خَاطَرْ إِبْنْ اَلْإنْسَانْ رَاهْ جَا بَاشْ يْسَلَكْ اَلْنَّاسْ اَلْضَايْعِينْ . ¹² وَاشْ تْخَمَّمُوا؟ إِلاَ وَاحَدْ عَنْدَهْ مْيَّه خْرُوفْ وْ تَوَدَرْلَهْ وَاحَدْ مَنْهُمْ، مَاشِي غَاذِي يْخَلِّي اَلْتَسْعَ وَ اَلْتَسْعِينْ فَاَلْجْبَلْ وْ يْرُوحْ يْحَوْسْ عْلَىَ اَلْخْرُوفْ اَلْمْوَدَّرْ؟.نْڤُولْكُمْ اَلْحَقْ :" ¹³ إِلاَ لْقَاهْ، غَاذِي يَفْرَحْ بِيهْ كْثَرْمَا اَلْفَرْحَة نْتَاعَهْ باَلْتَسْعَه وَ اَلْتَسْعِينْ اَلِلِّي مَاتَوَدْرُوشْ". ¹⁴ وْهَاكَّ بُوكُمْ لِفْسْمَا مَا يَبْغِيشْ حْتَّى وَاحَدْ يْضِيعْ مَنْ هَادُوكْ اَلْصْغَّارْ ¹⁵ وْ إِذَا ذْنَبْ خُوكْ فِي حَقَكْ ، رُوحْ عَنْدَهْ وْعَاتْبَهْ بِينَكْ وْ بِينَهْ، وَحَدْكُمْ وْ إذَا يَسْمَعْ مَنَّكْ رْبَحْتْ خُوكْ. ¹⁶ وْإلاَ مَابْغَاشْ يَسْمَعْ دِّي مْعَاكْ وَاحَدْ وْلاَ زُوجْ بَاشْ كُلْ كَلْمَة تَتْبُثْ بِاَلْشْهَادَة تَاعْ زُوجْ وْ لاَ ثَلاَتَ تَاعْ اَلْشُهُودْ. ¹⁷ وْ إِلَىَ مَابْغَاشْ يَسْمَعْ لْهُمْ ڤُولْهَا لَلْكْنِيسَة وْ إِلاَ مَابْغَاشْ يَسْمَعْ مَا اَلْكْنِيسَة أَحَسْبَهْ (أعْتَبْرَه) كِمَا وَاحَدْ يَعْبَّدْ اَلْأَصْنَّامْ وْ لاَ وَاحَدْ مُولْ اَلْضَرِيبَة ¹⁸ نْڤُولْكُمْ اَلْحَقْ :" ڤَاعْ لِغَادِي تْرَبْطُوهْ فَاَلْأرْضْ غَاذِي يْكُونْ مَرْبُوطْ فْاَلْسْمَا. ¹⁹ وْ نْڤُولْكُمْ تَانِي إِذَا تَافْقُوا زُوجْ مَنْكُمْ فَاَلْأَرْضْ بَاشْ يَطْلْبُوا حَاجَة غَاذِي يَتْحَقَقْ لْهُمْ مَنْ بُويَا لِفْسْمَا. ²⁰ عْلَىَ خَاطَرْ وِينْ مَا إِجْتَمْعُوا زُوجْ وَ لاَ تْلاَثَ بِإِسْمِي تَمْ نْكُونْ فِي وَسْطْهُمْ". ²¹ ڤَرَّبْ لِيهْ بُطْرُسْ وْ ڤْالْ :" يَا رَبْ، شْحَالْ مَنْ مَرَّة نْغَفَرْ لْخُويَ كِيَذْنَبْ فِحَقِيّ؟ حتّى لْسَبْعْ مَرَّاتْ ؟". ²² وْڤأَلَهْ يَسُوعْ مَاشِي غِيرْ سَبْعْ مَرَّاتْ بَصَّحْ سَبْعِينْ مَرَة سَبْعْ مَرَّات ²³ عَلَىَ هَادْ اَلْشِي يَشْبَهْ مَلَكُوتْ اَلْسَمَاوَاتْ لْوَاحَدْ اَلْمَلِك بْغَا يَتْحَاسَبْ مْعَ اَلْعَبِيدْ نـتاوْعَهْ، ²⁴ وْ مَلِّي بْدَا يَتْحَاسَبْ مْعَاهُمْ جَابُولَه وَاحَدْ عْلِيهْ اَلْدِّينْ نْتَاعْ مْلاَيَينْ دِينَارْ تَاعْ اَلْفَضَة. ²⁵ وْكِمَا كَانْشْ عَنْدَهْ بَاشْ يرَدْ لَهْ أَمَرْ سِيدَه بَاشْ يَتْبَاعْ هُوَّ وْمَرْتَهْ وْوْلاَدَهْ وْ ڤَاعْ مَا يَمْلَكْ بَاشْ إِرُدْ اَلْدِينْ لِعْلِيهْ ²⁶ وْ سْجَدْ لَهْ اَلْعَبْدْ وْ ڤَالْ صْبَرْ عْلِيَّا يَا سِيدِي وْ غَاذِي نْرُدْ لَكْ ڤَاعْ اَلْشِي لِي عْلِيّاَ. ²⁷ حَنْ عْلِيهْ سِيدَهْ وْ طَلْڤَهْ وْ سَمَحْلَهْ فِي اَلْدِّينْ لِي عْلِيهْ. ²⁸ وْ كِخْرَجْ دَاكْ اَلْعَبْدْ لْقَا وَاحَدْ مَا اَلْعَبِيدْ صْحابَهْ كَانْ إسَالَهْ مْيَّة دِينَارْ فِضَة، شَدَّهْ فِي عُنْڤَهْ وْڤَالَهْ:" رُدْلِي وَاشْ نْسَالَكْ !". ²⁹ وْطَاحْ صَاحْبَهْ عَنْدْ رْجْلِيهْ يَطُلَبَهْ وْ يْڤُولَهْ، صْبَرْ عْلِيَّا وْ غَاذِي نْرُدْ لَكْ وَاشْ تْسَالْنِي ³⁰ بْصَّحْ مَابْغَاشْ وَ دَّاهْ وْ قَاسَهْ فِي اَلْحَبْسْ حْتَىَ يْرُدْ اَلْدِّينْ لِي عْلِيهْ. ³¹ وْ كِشَافُوأ اَلْعْبِيدْ صْحَابَهْ وَاشْ صْرَا حَزْنُوا بَزَّافْ وْ رَاحُوا خَبْرُوا سِيدْهُمْ بْڤَاعْ لِصْرَا. ³² وْعيّْطْ لَهْ سِيدَهْ وْ ڤَالَهْ :" يَا عَبْدْ يَا شَرِيرْ، ڤَاعْ هَادَاكْ اَلْشِي لِسْمَحْتْ لَكْ عْلَىَ خَاطَرْ مَاعَنْدَكْشْ وَتْوَسَلْتْنِي. ³³ مَاشِي كَانْ لاَزَمْ نْتَا تَانِي تَرْحَمْ اَلْعَبْدْ صَاحْبَكْ كِمَا رْحَمْتَكْ أَنَايَا؟" ³⁴ وَزْعَفْ سِيدَهْ بَزَّافْ وْقَاسَهْ فِي اَلْحَبْسْ بَاشْ يْعَذْبُوهْ حْتَىَ يْرُدْ وَاشْ عْلِيهْ. ³⁵ هَكَا يْدِيرْ بُويَ اَلْسَّمَاوِي بِيكُمْ إِذَا مَا سْمَحْتَشْ كُلّْ وَاحَدْ فِيكُمْ لْخُوهْ مَنْ قَلْبَهْ.

¹ وْكِكَمَلْ يَسُوعْ هَادْ الَكْلاَمْ خْرَجْ مَالْجَلِيلْ وْ رَاحْ لَجْوَايَهْ الْيَهُودِيَة لِهَيَّا مَالْجِيهة لُخْرَى تَاعْ الأُرْدُنْ. ² وْتَبْعُوهْ بَزَّافْ النَّاسْ وْ شَفَاهُمْ تَمَّ ³ وْجَاعَنْدَهْ الْفَرِّسِيِنْ بَاشْ إِجَرْبُوهْ وْڤَالُولَهْ: "وَاشْ حْلاَلْ إِطَلَقْ الرَاجَلْ مَرْتَهْ لِأَيِ سَبَّة؟". ⁴ وْجَاوَبْهُمْ وْيْڤُولْهُمْ: "مَاقْرِيتُوشْ فَكْتَابْ اللَّهْ بَلِّي اللَّهْ خْلَقْ الْبْنَادَمْ مَا الْبَدْيَة ذْكَرْ وَأُنْثَى؟ ⁵ وْڤَالْ : هَادْ الشِي عْلاَهْ إِلِيقْ إِيخَلِّي الَرَاجَلْ بُوهْ وْامَّهْ وْيَتَّحَد مْعَ مَرْتَهْ ويْوَّلُوا فَى زُوجْ جَسَدْ وَاحَدْ. ⁶ وْاللِّي جَمْعَهْ اللَّهْ مَايْفَرْقَهْ حَتَّى إِنْسَانْ". ⁷ وْڤَالَولَهْ: "عْلاَشْ وَصَّى مُوسَى بَاشْ يَعْطِي الَرَاجَلْ لْمَرْتَهْ وَرْقَةْ الطْلاَقْ كِطَلَقْهَا". ⁸ وْجَاوَبْهُمْ يَسُوعْ: "عْلَى جَالْ قْسُوحِيَةْ ڤْلُوبْهُمْ خَلاَّهُمْ مُوسَى اطَلْقُوا نْسَاهُمْ. وْبَصَّحْ هَادْ الشِي رَاهْ مَاكَانْشْ كِخْلَقْ اللَّهْ آدَمْ وْ حَوَّاء فَاللَّوَلْ. ⁹ وْنْزِيدْ نْڤُولْكُمْ: الاَّ إِطَلَقْ مَرْتَهْ عْلَى شِي سَبَّة مَنْ غِيرْ الزْنَا وْتْزَوَجْ بْوَاحْدْ خْرَى رَاهْ زْنَى، وَلِّي يَتْزَوَجْ بَمْطَلْقَة رَاهْ يَزْنِي". ¹⁰ ڤَالُو لَهْ التْلاَمَذْ: "إِلاَ كَانَتْ هَادِي هِيَّ حَالَةْ الرَاجَلْ مْعَ المْرَا خِرْلَهْ مَايَتْزَوَجْشْ ڤَاعْ". ¹¹ وْجَاوْبْهُمْ يَسُوعْ: "مَاشِي ڤَاعْ النَّاسْ يَقَبْلُوا هَادْ الكْلاَمْ غِيرْ هَدُوكْ لِنْعَمْ عْلِيهُمْ اللَّهْ بَاشْ يَقَبْلُوهْ، ¹² عْلَى خَاطَرْ كَايَنْ نَاسْ تْوَلْدُوا مَنْ كْرُوشْ مَّاتْهُمْ وْ مَا قَادْرٍينْشْ عْلَى الزْوَاجْ، وْكَايْنِينْ اللِّي رَدُّهُمْ النَّاسْ هَكَّا، وْكَايْنِينْ لِمَا يَتْزَوْجُوشْ عْلَى جَالْ مَمْلَكَةْ السَمَاوَاتْ. وْلِقْدَرْ بَاهْ يَقْبَلْ هَادْ الشِي يَقَبْلَهْ". ¹³ وْ جَابُولَهْ وْلاَدْ صْغَارْ بَاشْ إِحَطْ يَدِّيهْ عْلِيهُمْ وْ يَدْعَى لْهُمْ، بَصَّحْ التْلاَمَذْ زَعْفُوا عْلَى اللِّجَابُوهُمْ. ¹⁴ وْبَصَّحْ يَسُوعْ ڤَالْ : "خَلُّوا الدْرَارِي إِيجُوا لْعَنْدِي وْ مَا تْحَبْسُوهُومْشْ عْلَى خَاطَرْ كِمَا هَادُوا اللِّي غَادِي إِكُونَلْهُمْ مَلَكُوتْ السَمَّاوَاتْ". ¹⁵ حَطْ يَدِّيهْ عْلِيهُمْ، وْ رَاحْ مَنْ تَمَّ ¹⁶ وْجَا عَنْدَهْ وَاحَدْ الشَابْ وْ ڤَالَهْ: "يَا مُعَلِمْ الصَّالَحْ، وَاشْ مَنْ صْلاَحْ نْدِيرْ بَاشْ تْكُونْ لِيَّ الحْيَاةْ الدَايْمَة؟". ¹⁷ ڤَالَهْ يَسُوعْ: "عْلاَشْ رَاكْ تْعَيَطْلِي صَالَحْ؟ مَاكَانْشْ وَاحَدْ صَالَحْ مَنْ غِيرْ وَاحَدْ وْهُوَ اللَّهْ. بْصَّحْ إِذَا بْغِيتْ تَدْخُلْ الْحْيَاةْ الدَايْمَة طِيعْ الوَصَايَا". ¹⁸ ڤَالَهْ: "وَاشْ مَنْ وْصَايَا؟" وْجَاوْبَهْ يَسُوعْ: "مَاتُكْتَلْشْ. مَتَزْنِيشْ. مَتَخْوَنْشْ. مَاتَشْهَدْشْ بَاالزُورْ. ¹⁹ قَادَرْ بُوكْ وِا مُّكْ، وْبْغِي لِقْرِيبْ لِيكْ كِمَا تَبْغِي نَفْسَكْ". ²⁰ وْ يْڤُولَهْ الشَابْ: "رَانِي دَرْتْ بْڤَاعْ هَادُو الوْصَايَا، وَاشْ خَاصْنِي ثَانِي نْدِيرْ؟" ²¹ وْجَاوْبَهْ يَسُوعْ: "إِلَى بْغِيتْ تْكُونْ بْلاَعِيبْ، رُوحْ بِيعْ ڤَاعْ دَاكْ الشِي لِعَنْدَكْ وْعْطِي دُوكْ الدْرَاهَمْ لَلْمْسَاكِينْ، وْغَادِي يْكُونْ عَنْدَكْ كَنْزْ فَي السْمَا، وَأَرْوَاحْ وْ تَبَعْنِي". ²² بَصَّحْ كِسْمَعْ الشَابْ دَاكْ الكْلاَمْ رَاحْ حْزِينْ، عْلَى خَاطَرْهُوَ مْرَفَّهْ. ²³ وْڤَالْ يَسُوعْ لَتْلاَمَذْ: "نْڤُولْكُمْ الْحَقْ: رَاهْ صْعِيبْ عْلَى وَاحَدْ مَتْرَفَهْ يَدْخَلْ لْمَمْلَكَةْ السَمَاوَاتْ ²⁴ وْنْزِيدْ نْڤُولْكُمْ : رَاهْ دْخُولْ الجَمَلْ مَنْ عِينْ لَبْرَة سَاهَلْ مَنْ دْخُولْ وَاحَدْ مَتْرَفَهْ لْمَمْلَكَةْ اللَّهْ!". ²⁵ وْتْعَجْبُوا التْلاَمَذْ بَزَّافْ كِسَمْعُوا هَادْ الكْلاَمْ وْ ڤَالُوا: "عْلَى هَادْ الحْسَابْ، شْكُونْ غَادِي يَقْدَرْ يَسْلَكْ؟". ²⁶ وْشَافْ فِيهُمْ يَسُوعْ وْ ڤَالْهُمْ: "النَّاسْ مَايَقَدْرُوشْ عْلَى هَادْ الشِي، بَصَّحْ اللَّهْ يَقْدَرْ عْلَى كُلْ شِي". ²⁷ وْجَاوْبَهْ بُطْرُسْ وْ ڤَالْ: "هَا حْنَا خَلِّينَا كُلْ شِي وْ تَبَعْنَاكْ وَاشْ غَادِي يْكُونْ الجْزَاءْ نْتَاعْنَا؟". ²⁸ وْڤَالْهُمْ يَسُوعْ: "نْڤُولْكُمْ الَحَقْ: كِغَادِي يَڤْعَدْ إِبْنْ الإِنْسَانْ عْلَى عَرْشْ الْعَزْ تَاعَهْ فَالزْمَانْ اللِّي غَادِي يْوَلِي فِيهْ كُلْ شِي جْدِيدْ، نْتُمَا لِتَبَعْتُونِي غَادِي تُڤَعْدُوا عْلَى طْنَاعْشْ عَرْشْ بَاشْ تَحَكْمُوا عْلَى قْبَايَلْ إِسْرَائِيلْ الطْنَاعْشْ. ²⁹ وْكُلْ مَنْ تْخَلَّى عْلَى دْيَارْ وْلاَ خُوتْ وْلاَ خْوَاتَاتْ وْلاَ بَوهْ وَلاَ مَّهْ وْلاَ أَرَاضِي مَنْ أَجْلْ اسْمِي، غَادِي يَنْتْرَدْلَهْ دَاكْ الشِي لِسْمَحْ فِيهْ مْيَة مَرَّة، وْغَادِي يَوْرَتْ الَحْيَاة الَدَايْمَة عَنْدْ اللَّهْ. ³⁰ وْبَصَّحْ بَزَاّفْ مَنْ هَادُوكْ لِكَانُوا لَوْلِينْ يْوَلِيوْ اللَّخْرِينْ، وْ بَزَّافْ لِكَانُوا لَخْرِينْ يْوَّالُوا اللَّوْلِينْ".

¹ مَلَكُوتْ السَمَاوَاتْ يْشَبَه لْوَاحْدْ الرَّجلْ عَنْدَه جْنَانْ تَاعْ لَعْنَبْ خْرَجْ مْعَ الصْبَاحْ بَكْرِي بَاهْ يْكرِيْ خْدَامَا للْجْنَانْ نْتَاعَه، ² وْتْفَاهْمْ مْعَاهُم عْلَى دِيْنَارْ لْلنْهَارْ، وَرْسْلْهُم للْجْنَان نْتَاعَه ³ وْمَنْ بَعْد خْرَج عْلَى جْوَايَه التَّسْعَة تَاعْ الصْبَاح وْلْقَى خْدَاما وَاحْد خْرين وَاڨفِين فِالسُوڨ بْلاَ خْدْمَة، ⁴ وَڨالْهُم:" رُوْحُوا نْتُمَا تَانِيْ لْلجْنَانْ نْتَاعِيْ وْغاَدِيْ نَعْطِيْكُم حَقْ خَدْمَتْكُمْ". وْ رَاحُوا. ⁵ وخْرَجْ تَانِيْ جْوَايَه الطْنَاعَشْ تَاعْ النْهَار وْعَاوَد خرَج عْلَى التْلاَثَة تَاعْ النْهَارْ وْ دَارْ كِيفْ كِيفْ. ⁶ خرَجْ مَرَة خْرَى جْوَيَه الخْمْسَة تَاعْ لَعْشِيَة وْلْقَا خْدَامَا وَحْدُخْرِينْ وَاڤْفِين، وْڨالْهُم: "عْلاشْ رَاكُم واڨْفيِن هْنَا ڨاعْ الْنْهَار بْلاَ خْدْمَة ؟" ⁷ وْجَاوْبُوه:" حْتَى وَاحَدْ مَاخْدْمْنَا عَنْدَه" ، وڨالْهُم: "رُوْحُوا نْتُوْمَا تَانِي لْجْنَان نْتَاعِيْ" ⁸ كِيْ جَاتْ الَعْشِيَة ڨالْ مُولْ الجْنَانْ لْلوْكِيْل نْتَاعَه:"عَيَطْ لْڨاعْ الخْدَّامَا وْخْلّصْهُمْ مَنْ الْتْوَالَا لَلْوَالَا. ⁹ وْجَاوْ هَادُوكْ النَاسْ اللِي كَرَاهُم عْلَى الخَمْسَة تَاعْ الَعْشِيَة وْ دَا كُلْ وَاحَدْ دِينَارْ. ¹⁰ وْكِي جَاوْ اللَّوْلِيْن كَانُوا يَحَسْبُوا غَادِيْ يدُوا كْثَرْ. بْصَّح دَّاوْ غِيْر دِيْنَار لْلوَحَد. ¹¹ كِي كَانُوا يْتْخَلْصُوا بْدَاوْ يَشْتْكُوا عْلَى مُولْ الْجْنَانْ ¹² وْيْڨوْلُوا :"هَادُوكْ اللَّخْرِيْن خَدْمُوا غِيْرْسَاعَة ، وَسَاوِيْتهُم مْعَانَا تْحَمْلْنَا الثُقْلْ والسْخَانَة تَاعْ ڨاعْ النْهَارْ! " ¹³ وْمُولْ المَلْكْ إِيْجَاوَب وْيقُوْل لْوَاحَد فِيِهُم:" يَاصَاحْبِي، أَنَا مَاضْلَمْتَكْش! مَاشِي تْفَاهَمْتْ مْعَايَا عْلَى دِيْنَارْ؟ ¹⁴ أَدِيْ حَقَكْ وْرُوحْ، أَنَا نْبْغِي نَعْطِيْ كِيفَك لِجَا التَّاليْ. ¹⁵ مَشِي مَنْ حَقِيْ نْدِيرْ بَدْرَاهْمِيْ شَا نَبْغِي؟ وْلاَ عَيْنَكْ هِيَ لِشَرِيْرَة عْلَى خَاطَرْ أَنَا صَالِح؟ ¹⁶ هَكَا يْكُوْنُوا اللَخْرِيْنْ هُمَا اللَّوْلِينْ، واللَّولِينْ هُمَا لَخرِينْ عْلَى خَاطَرْ بَزَافْ يدْعُوهُم وبَصَح غِيْر لَقْلِيْل لِيُنْتَخْبُوا". ¹⁷ وْ كِيْ كَانْ يَسُوعْ طَالَعْ لأُورْشَلِيْمْ أَدَّا مْعَاه الطْنَاعْشْ تَلْمِيْذْ وَحْدْهُم وْڨَالْهُم فالطْرِيڤْ: ¹⁸ "هَاحْنَا طَالْعِيْن لأُرْشَلِيْمْ وْإِبْنْ الإنْسَانْ غَادِي يَتْسَلَّم لْرُؤَسَاءْ رْجَالْ الدّينْ وْ عُلَمَاء الشَرِيْعَة، وْيَحْكْمُوا عْلِيْه بْالمُوتْ، ¹⁹ وَيْسْلْمُوه لْلِي مَايْعَرْفُوشْ الله بَاهْ يْضَّحْكُوا وْيَتْمَسْخْرُوا بِيْه وْيجَّلْدُوْه وَيَصَلْبُوهْ، وْفِيْ النْهَارْ الثَّالَثْ يْقُومْ مْن المُوت". طَلَب يْمَاتْ ولاد زَبَدِي. ²⁰ وْڤَدْمَتْ عَنْدَه أُمْ وْلاَد زَبَدِي هِيَ وْ وْلاَدْهَا عَنْدْ يَسُوع، وْسَجْدَت وْطَلْبَتْ مْنَه وَاحْد الشِيْ. ²¹ وْڤَالْهَا:" شَا بْغِيْتِي؟" . وْڤَاتلَه:" أْمَرْ بَاشْ يَڤُعْدُواوْلاَدِيْ هَادُوا، وَاحَدْ عْلَى يْمِيْنَك ولَّخُرْ عْلَى يْسَارَك فِي مَلَكُوْتَكْ". ²² جَوَبْهَا يَسُوْع وْڤَالْهَا:" مَارَكُمْشْ عَارْفِينْ وَاشْ رَاكُم تُطُلْبُوا. تْقَدْرُوا تَشَرْبُوا الكَاس اللِّي غَادِيْ نَشْرُبْهَا أَنَا، وَتَنْغَبْنُوا لَغْبِينَة لِغَادِيْ نَنْغْبَنْهَا؟". ڤَالو له:" نقَدْرُوا". ²³ ڤَالهُم يَسُوعْ:" كَاسِي غَادِي تَشَرْبُوْهَا، بْصَّح الْڤْعَاد عْلَى يَمِينِي وْيَسَارِي مَانَعْطِيهْشْ غِيْر لْهَادُوك لِوَجدَهْلهُمْ بُويَا". ²⁴ كِسَمْعُوا التْلاَمَذْ العَشْرة هَادْ الهَدْرَة زَعفُوا عْلَى يَعْقُوب وخُوه يُوحَنَا ²⁵ وْعَيطْ لْهُمْ يَسُوع وْڤَال:" أنْتُمَا تعَرْفُوا بَلِّي الرؤسَاء يَتْحكمُوا في الشُعُوب نْتَاعْهُم وَالمَسؤولينْ الكِبَارْ. يَتْسَلْطُوا عَلَى لِتَحتْ مَنْهُم. ²⁶ وْنْتُمَا مَا خَاصْشْ إِيْكُون هَدَا بِينَاتْكُم وْاللّي بْغَا يْوَّلِي كْبِير فِيْكُم خَصَّهْ إِيولٍي الخَدَامْ نْتَاعْكُمْ، ²⁷ واللّي بْغَا يْوّلِي اللَّولْ فِيكُم خَاصَه يْوَّلِي العَبْدْ نْتَاعْكُم، ²⁸ وْهَكَّا إِبْنْ الإنْسَان مَاجَاشْ بَاشْ يَخَدْمُو النَاس، وبَصَّح بَاشْ يَخْدَم ويَفْدِي بَزَّاف النّاس بَحياتَه". شفاء أعميين في أريحا ²⁹ وْ فَلْوَقْتْ لِخَرْجُوا مَنْ أَرِيْحَا تَبْعُوه نَاسْ بَزَافْ، ³⁰ وْكَانُوا زُوجْ عُمْيينْ ڤَاعْدِين عْلى الطْرِيْق. وغِيْر سَمْعُوا بَلِيْ يَسُوع كَان فَايَت مَنْ تَمْ بْدَاوْ إِيزٌڤُّوا وْيْڤُولُوا:" أَرْحَمْنَا يَاسِيدِي، يَاإبنْ دَاوُدْ!"، ³¹ زْڤُّوا عْلِيهُمْ الْجْمَاعَة تَاعْ النَّاس بَاش يْسَّكْتُوا ،بْصَّح هُمَا زَادُوا يزڤُّوا كْثَر وْيْڤُولُو:" رْحمْنَا يَاسِيديْ يَا بَنْ دَاوُد!". ³² وَ وْڤَفْ يَسُوع وعَيَّطلْهُم وْڤَال:" وَاش بْغِيتُوا نْدِيرَلْكُمْ؟". ³³ وْجَاوبُوه:"يَاسِيدِي، بْغِينَا عَينِينَا يَتْحَلُوا" ³⁴ وْتْحَنَّنْ يَسُوع عْلِيهُم وغِير مَسْ عَيْنِيهُم، بْداوْ إيشُوفُو وْهُمَا يْتَبْعُوه.

وْكِڤَرْبُوا لأُورْشَلِيمْ ¹ وْوَصلُوا لْدُوَار بِيتْ فَاجِي اللِّي حْدَّا جْبَل الزِيْتُون،أ رْسَل يَسُوع زُوجْ مَا التْلاَمَذْ ، ² وْڨَالْهُم:" رُوحوا لَلْدّوَار اللّي كَايَن ڨدَامْكُم، غَادِي تْلْقَاوْ وَاحْدْ الحْمَارَة مَرْبُوْطَة مْعَاهَا وَاحْد الجَحْشْ، طَلْقوه وْجِيبُوهُمْ لِيْ. ³ وْ إِلاَ ڨالْكُمْ وَاحَد شِيْ حَاجَة، ڤُولُولَه: رَاه الرَّب مَحْتَاج لِيهُم. وْغَادِي يْرُدْهُمْ بَلْخَفْ". ⁴ وْصْرَى ڨَاع هَادْ الشِي بَاشْ يَتْحقَق كْلاَم النْبِي لِڨالْ: ⁵ " قُولُوا لْبَنْت صَهْيُون: هَاهُوَ المَلِك نْتَاعَك جَايْ لْعَنْدَك مَتوَاضَع، وْرَاكْب عْلَى حْمَارْة وْجَحْشْ وُلْد حْمَارَة" ⁶ وْرَاحُو التْلاَمَذ وْدَارُوا كِمَا أْمَرْهُم يَسُوعْ، ⁷ وْجَابُو له الحْمَارَة والجَحْش، وْحَطُّوا عْلِيهُم حْوَايْجْهُم وْركَبْ يَسُوع فُوڨهُم. ⁸ وْفَرشُوا جْمَاعَة كْبِيرَة مَا النَاس حْوَايَجهُم فالطْرِيق. وْنَاسْ وَحْدُخْرِيْنْ ڨطْعُوا الأغْصَانْ تَاع الشْجَر وفَرْشُوهُم في الطْرِيْقْ. ⁹ وكَانُوا النَاسْ لِيَتَبْعُوا يَسُوع وْسَابْڨينَه يْزْقُوا يْقُولُوا: "أُوصَنَا لإبْنْ دَاوُد! مٌبَارَك هَادَا اللِجَايْ بإِسْم الرَّب! العَزْ للَّه فْي السْمَا العَالْيَة! " ¹⁰ وْكِدْخَلْ لأُورْشَلِيم هَاجُوا نَاسْ المْدِيْنَة ڨاع وْبْدَاو يْڨولُوا: " شْكُون هُوَ هَذا ؟". ¹¹ وْجَاْوبُهُم النَاسْ: "هَادَا هُوَ يَسُوع النْبِي الِلي مَن نَاصِرَة اللِي في الجَلِيل". تَطْهِير الهَيْكَل ¹² وْدْخَل يَسُوع لْبِيت الله وْخرَّجْ ڨاعْ اللِّي كَانُوا يْبِيعُوا وْيَشْرُوا تْمَ، وْڨلَبْ ڨاعْ الْطوَابل نْتَاع النَاسْ اللِّيْ يْصَرْفُوا الدّْرَاهْم وَالكَرَاسَ نْتَاع اللِّي يْبِيعُوا الحْمَامْ ¹³ وڨالهُم :" مَكْتُوب: فِي كْتَابْ اللَّه بْلِي دَّارِّي تَتْسمَى دَّارّْ الصْلاَة . بْصَح نْتُمَا رْدِيْتُوهَاغَارْ للسَرَّاقِين". ¹⁴ وْجَاو عَنْدَه عُمْيِين وْقُجْعِينْ وْشْفَاهُم ¹⁵ وِكِي شَافُوا رؤساء رجَالْ الدِين وْعُلَمَاء الشَرِيْعَة وَاشْ دَارْ، وَالولاَد يْزَقُوا فِي بِيْت اللَه وْيْڤُولُو:" أوصَنَا لإبْن دَاوَد!". زَعْفُوا وْ ¹⁶ ڨَالُولَه :" رَاكْ تَسْمَع وَاشْ رَاهُم إيقُولوا؟" وڤَالْهُم يَسُوع :" وَاه ! مَاقْرِيتُوشْ بَلِي: مَن فْوَام الوْلاَد الصْغَارْ و اللِي يْرضْعُوا يَخْرُجْ كْلاَم التَسْبِيح؟". ¹⁷ ومَمبَعد خَلاَهُم وْخْرَج مَن المْدِيْنَة لْبِيت عَنْيَا وْبَات تَمَ. شجرة التين اليابسة ¹⁸ وْفِي الصْبَاح كِي كَان مْوَلْي لَلْمْدِيْنَة جَاعْ، ¹⁹ وْشَافْ شْجْرَة الكَرْمُوس عْلَى الْطرِيڤ، وْجَا لْعَنْدْهَا وْمَا لْقَا فِيْهَا حْتَى حَاجَة مَنْ غِيْر الوْرَاق. ڨَالْهَا :" عُمْرّْ الْغَلَّة مَاغَادِي تْكُونْ فِيْك لَلَّبْدا !". يَبْسَتْ شَجْرَةْ الكَرْمُوس تَم تَم. ²⁰ وْكِيْ شَافُوا التْلاَمَذْ دَاكْ الشِي اللّي صْرّى تْعَجْبُوا وْڨالُوا :" كِيْفَاش يَبْسَت شْجْرَة الكَرْمُوس بَلْخَف؟". ²¹ جَاِوبهُم يَسُوع وڨالْهُم :" نْڨولْكُم الحَقْ: إِلاَ كْان عَنْدْكُم إِيْمَانْ وْمَاتْشُكُوشْ، رَاه مَاغَادِيشْ دِيرُوا غِير هَادَاك لِدَرْتَه أَنَا لْشَجْرَة الكَرْمُوسْ وْبْصَّح إِلا ڨلْتُوا لْهَادْ الجْبَل: يَتْحَرك وْيْطِيح في الْبحَرّْ غَادِي يْصْرَّا. ²² دَاكْ الشِي لِڨولْتُوا وْڨاعْ الّْلي تَطَّلْبُوه فَالْصْلاَة بالإِيْمَان تَاخْذُوه". السؤَالْ عْلَى سُلْطَانْ يَسُوع ²³ وْكِي جَا لْبِيت اللّه يْعلَّم فِيه جَاوْ لْعَنْدَه رُؤسَاء رْجَالْ الدّين وشْيُوخْ الشَعْب وْڨالُو لَه :" وَاشْ مَنْ سُلْطَة رَاكْ دِيْر هَاد الشِي؟ وْشكُونْ عْطَاهَالَك؟"، ²⁴ وْجَاوْبهُم يَسُوع وْڨالْهُم:" حْتَى أَنَا بَاغِي نْسَقْسِيكُم، سُؤَال وَاحَد وْ إلاَ جَاوَبْتُوا عْلِيه غَادِي نْڨولكٌم بْوَاش مَنْ سُلْطَة رَانِي نْدِيرْ هَادْ الشْي: ²⁵ مِينْ جَات المَعْمُودِيَة تَاع يُوحَنَا المَعمَدان: من الله ولاَ مَنْ النَاس؟". وْتْشَاوْرُوا مْعَ بَعْضْيَاتْهُم وْ ڨالُوا: " إلاَ ڨلْنَا جَاتْ مَنْ عَنْد الله، غَادِي يْقُولو لْنَا: عْلاَش مَا أَمنْتُوشْ بْيُوحَنَا؟ ²⁶ وإِلاَ ڨلْنَا: مَنْ عَنْد النَاس، نْخَافوا مَن الشَعب، عْلَى خَاطَر يُوحَنَا عَنْد النَاس كِمَا النْبِي". ²⁷ وْجَاوبُوا يَسُوع وْڨالُو:" مَاعْلاَبَلْنَاشْ". وْڨالْهم:" أَنَا تَانِي مَانْڨولْكُمْش بْوَاش سُلْطَة رَانِي نْدِير هَاد الشِي. " ²⁸ وَاشْ تفَكْرُوا؟ فِي وَاحَد البْنَادَام ،عَنْدَه زُوجْ وْلاَد وْرَاح عَنْد اللَّول وْڨالَه: رُوح يَاوَلْدِي، وْخدَم اليُومْ فَلجْنَان تَاعْ العْنَب تَاعِي. ²⁹ جَاوْبَه وَلْدَه وْڨالَه : مَابْغِيتْش. وْبَصَح مْعَ التَالي نْدَم وْرَاح. ³⁰ وْرَاحْ البُو عَنْد الوَلْد الزَاوَج وْڨالَه كِمَا ڨال لْلُوَّل. وْهُوَّ جَاوْبَه وْڨالَه: وَاه يَاسِيدي. وْمَرَاحْشْ ³¹ بْصَح مَارَاحْشْ ، أَيَا، شْكُون مَن هَادْ الزُوجْ اللِّي دَار إِرَادَة بُوه؟". وْقَالُولَه "اللَّوَّل". وْڤَالْهُم يَسُوع:" نْڨولْكُم الحَق: مَّالِين الضْرِيبَة والزُنَاة غَادِي يَسَبْقُوكُم لْمَمْلَكَة الْلَّه، ³² عْلَى خَاطَر يُوحَنَا جَاكُم مْتَبَع طْرِيْقْ الحَقْ وْمَأمَنْتُوش بِيه، وْبَصَح مَالِين الضْرِيْبَة وْالزُنَاة أَمْنُوا بِيه". ³³ إسمْعُو مَثَل وَاحْدَ أخُر: وَاحَد الرَجَل عَنْدَه أَرض وْغْرَس جْنَان الدَالْيَة العْنَب، وْدَوَّر عْلِيه السُورْ، وَحْفَر مْعَصْرَة، وَبْنَى بُرْج، وكَرَاه لْؤَحْدِين جْنَايْنِيَة وْسَافَر. ³⁴ وْكِي وْصَل الوَقْت وِيْن غَادِي يَجْنِيو الغَلَة رْسَل العَبِيد تَاعَه لَلْجْنَاينِيَة بَاشْ يجِيبُو الغَلَة تَاعَه ³⁵ نَاضُوا هَادُوك الْجْنَايْنِيَة وْضَربوا واَحَد العَبْد مَنْ هَادُوك العَبِيد وقَتْلُوا وَاحَد ورَجْمُوا وَاحَد آخُر بالحَجْرَة. ³⁶ وْعَاوَد رْسَل عْبِيد وَحْدُخرين كْثَر مَالَّوْلِين، ودَارُولهُم الجْنَاينِيَة كِمَا دَارُوا لَلْولِيْنْ. ³⁷ وْمْعَ التَّالِي رْسلَلْهُم وَلْدَه وْڨال: "غَادِي يْحْتَرْمُوا وْلدِي"! ³⁸ وْكِي شَافُوا الجْنَايْنِيَة وَلْدْ مُول الجْنَان قَالُوا بِينَاتْهُمْ: " هَادَا هُوَ لِغَادِي يَوْرَث! أَيَا نُكُتْلُوه ونَدُوا الوَرث نْتَاعَه! ³⁹ وْيْشَدُوه وْيخَرْجُوه بَرَّا الجْنَان وكَتْلُوه ⁴⁰ وْدَرْوَك، إلاَ جَا مُول الجْنَان، وَاشْ إِلِيق إِيدِير لْدُوك الجْنَايْنِيَة ؟". ⁴¹ وْهُمَا يْجَاوْبُوه:"هَادُوك المَشْرَارِين غَادِي تْكُون أَخْرَتْهُم وَاعْرَة، وْغَادِي يَعطِي الجْنَان تَاع العْنَب لَجْناَيْنِيَة وَحْدَ خرِين لِغَادِي يَعْطُوا الغَلَة فِي وَقْتهَا". ⁴² ڨالْهُم يَسُوع :"عُمَرْكُم مَاقْرِيتُوا فِيْ كْتَاب اللَّه: الحَجْرَة اللِّي مَاقَبْلُوهَاشْ البَنَايَا هِيَ لِغَادِي تِوَلِي حَجْرَة الْسَاسْ؟ هَادْ الشِّي مَن عَنْد الرَّب وْهُوَ عَجِيبْ فِي عَيْنَيَا! ⁴³ عْلَى هَاد الشِي أَنَا نْڨولْكُم:" مَلَكُوت اللَّه يَنْڨلَعْلْكُم وْيْنَعْطَى لْنَاس لِتَعْطِي الثِمَارْ . ⁴⁴ وَاللِّي يْطِيح عْلَى هَاد الحْجَر غَادِي يَتَقردْ طْرَاف، وبَصَحْ اللِّي طَاحَت عْلِيه الحَجْرَة غَادِي تْسَحْقَه. !" ⁴⁵ وْكِي سَمْعُوا رُؤَسَاء رْجَال الدِين والفَرِيْسِيين المْثُول نْتَاعَه، عَرفٌوا بَلِي رَاه يَهْدَر عْلِيهُم. ⁴⁶ وْبْدَاو إيحَوْسُوا كِيْفَاش إشَدُوه، بْصَح خَافُوا مَاالنَاس، عْلى خَاطَر كَان يْشُوفُوه كِمَا نْبِي.

¹ ومَرَه لَخْرَى يَسُوع ْبدَا يَهْدَرْ مْعَاهُمْ بْالْمتُولْ وْ ڤَالْ : ² "يْشَبَهْ مَلَكُوتْ السَمَاوَاتْ لْوَاحَدْ الْمَلِكْ دَارْ عَرْسْ لْوَلْدَهْ، ³ وْ رْسَلْ لْعَبِيدْ نْتَاعَهْ بَاشْ يْعِيَطْ لْلمَعْرُوضِينْ بَصَّحْ مَابْغَاوَشْ إيْجُوا ⁴ وْ عَاوَدْ رْسَلْ عَبِيدْ وَحْدْ خْرِينْ ڤَالْهُمْ: ڤُولُوا لْلمَعْرُوضِينْ رَانِي وَجَدْتْ لَلْعَرْسْ وْ دْبَحْتْ الْبْڤْرِى وَالَوَكْرِيِفْ السْمَانْ ، وْ كُلْ شِي رَاهْ مْوَجَدْ . أَرْوحُوا لَلْعَرْسْ! ⁵ وْ بَصَّحْ هُمَا مَادَاوْهَاْش فِيهْ ,وَاحَدْ رَاحْ لَلْرْضْ تَاعَهْ يَخْدَمْهَا وْ وَحَدَ اخُرْ رَاحْ لْتِجَارْتَهْ . ⁶ وْ وَحَدخْرِينْ شَدُوا لْعَبِيدْ نْتَاعَهْ وْ عَايَرُوهُمْ وْ كتْلوُهُمْ. ⁷ وَزْعَفْ الْمَلِكْ وْ رْسَلْ الْعَسْكَرْ وْ هْلَكْ هَادُوكْ الْقَتَالَه وْ حْرَڤْ مَدِينَتْهُمْ ⁸ وْ مَنْبَعَدْ ڤَالْ لْعَبِيدَهْ:" الْعَرْسْ هَاهُو كَايَن ْبَصَّحْ هَاذُوكْ الْمَعْرُوضِينْ مَايَسْتَاهْلُوشْ. ⁹ رُوحُوا دَرْوَكْ وِينْ يَتْلاَقَاوْ الطُرْڤَانْ، وْعَرْضُوا كُلْ وَاحَدْ لْقِيتُوهْ لَلْعَرْسْ". ¹⁰ خَرْجُوا هَادُوكْ لْعَبِيدْ لَلطْرِيڤْ، وْ لَمُوا ڤَاعْ هَادُوكْ لِلْقَاوْهُمْ أَشْرَارْ وْ صَالْحِينْ حَتَى عَمْرُوا دَارْ الْعَرسْ بْالضِياَفْ . ¹¹ وْ كِدْخَلْ الْمَلِكْ بَاشْ إِشُوفْ الْمَتَكْيِينْ فِي الْعَرْسْ ,شَافْ وَاحَدْ البْنَادَمْ مَالْبَسَشْ صْوَالَحْ الْعَرَسْ. ¹² ڤَالَهْ :"يَا صَاحْبِي، كِيفَاشْ دْخَلْتْ هْنَا وْمَالْبَسْتَشْ صْوَالَحْ الْعَرْسْ ؟" وسْكَتْ ¹³ أَيَ ڤَالْ الْمَلِكْ لَلْخَدَامَا تَاعَهْ:" أَرَبْطُورَجْلِيهْ وْ يَدِيهْ، وْدُوهْ وْ قِيسُوهْ بَرَا فِي الضُلْمَهْ. وِينْ يْكُونْ البْكَا وْ تَغْزَازْ السْنَانْ. ¹⁴ عْلَى خَاطَرْ بْزَّافْ لِيَنْعَرْضُوا وْ بَصَّحْ لِيْتَخْتَارُوا هُمَا قْلَال" . ¹⁵ وْرَاحُوا الْفَرِسيِيِن ْوْ تْشَاوْرُوا بَاشْ إِشَدُوا كَاشْ غَلْطَة على يَسُوع ْفِكْلاَمَهْ. ¹⁶ رَسْلُولَهْ تْلَامْذَهْ مْعَ الْهَرُودُوسِيِينْ وْ ڤَالُولَهْ: "يَا مُعَلِمْ نَعَرْفُوا بَلِي رَاكْ صَادَقْ وْ تْعَلَمْ طْرِيقْ اللهْ بْالْحَقْ، وْمَاعْلَابَالَكْ بْحَتَّى وَاحَدْ، عْلىَ خَاطَرْ مَادِيرَشْ بْالَوْجُوهْ. ¹⁷ أَيَ ڤُولْنَا: وَاشْ تْفَكَرْ ؟وَاشْ حْلَالْ نَعْطِي الجَزْيَة لْقَيْصَرْ وَلَا ؟". ¹⁸ وَعْرَفْ يَسُوعْ الحِيلَة نْتَاعْهُمْ وْ ڤَالْهُمْ: "عْلَاشْ جَرْبْتُونِي يَا مُنَافِقِينْ؟ ¹⁹ وَرِوْلِي الدْرَاهَمْ لِتْخَلْصُوا بِهَا الضْرِيبَة ". وْجَابُولَهْ دِينَارْ. ²⁰ وْ سَقْسَاهُمْ :"هَادْ التَصْوِيرَة وْهَادِ الكْتْبَة اللِّي فِي الدْرَاهَمْ تَاعْمَنْ؟". ²¹ ڤَاَلُولَهْ: "تَاعْ قَيْصَرْ". وْ هُوَ يْڤُولَهُمْ: "أَعْطُوا لْقَيْصَرْ مَالْقَيْصَرْ وَعْطُوا لَلَّهْ مَا لَلَّه". ²² وْ كِسَمْعُوهْ تْعَجْبُوا وْ خَلَاوَهْ وْ رَاحُوا ²³ فِي دَاكْ النْهَارْ جَاوْعَنْدَهْ صَدُوقِينْ، اللِي يْڤُولُوا مَاكَانْشْ قِيَامَه أَياَ سَقْسَاوَهْ ²⁴ ڤَالُولَهْ: "يَا مُعَلِمْ ڤَالْ مُوسَى: إِذَا مَاتْ وَاحَدْ مَاعَنْدَاهَشْ وْلَادْ، خُوهْ يَتْزَوَجْ بْمَرْتَه ْو ْيْكُونْ عَنْدَهْ وْلاَدْ وْ يْدِيرْ نَسَلْ لْخُوهْ. ²⁵ كَانْ عَنْدَنَا سَبْعَ خوُتْ وَ تْزَوَجْ اللَّوَلْ وْمَاتْ. وْ كِمَاعَنْدَهَشْ لَوْلَادْ خَلَى مَرْتَهْ لْخُوهْ. ²⁶ ومَنبَعْد للزَاوَجْ وَ الثَالَثْ حَتَى السَابَعْ. ²⁷ وْمْعَ التَالِي ڤَاعْ مَاتُوا وْ حَتَّى لَمْرَا مَاتَتْ هِيَ تَانِي. ²⁸ وْ فِي الْقِياَمَة شْكُونْ اللِّي غَادِي يْكُونْ رَاجَلْ هَادِيكْ لَمْرَا؟ عْلَى خَاطَرْ تْزوجُوْا بِهَا ڤَاعْ" ²⁹ جَاوَبْهُمْ يَسُوعْ :"رَاكُمْ غَالْطِينْ وْ ضاَلِينْ عَلَى خَاطَرْ مَاتَعَرْفُوشْ كْتَابْ اللَهْ وْلَا قُوَةْ اللَهْ. ³⁰ عْلَى خَاطَرْ فيِ القِيَامَة مَايْزَوْجُوشْ وْ مَايَتْزَوْجُوشْ، بَصَحْ إِيْكُونُوا كِالْمَلَاْيْكة فْي السْمَا ³¹ وْ مَنْ جِهَةْ قِيَامَةْ المُوتَى، مَاقْرِيتُوشْ كْلَامْ اللَهْ لِيكُم كڤَالْ: ³² "أَنَا هُوَإِلَهْ إِبْرَاهِيمْ وْ إِلَهْ إِسْحَاقْ وْإلَهْ يَعْقُوبْ؟ اللَهْ مَاشِي إِلَهْ المُوتَى بَصَّحْ إِلَهْ الأَحْيَاءْ". ³³ كِسَمْعُوا جْمَاعَة النَاسْ التَعْلِيمْ تَاعَهْ تْعَجْبُوا فِيهْ . ³⁴ وْ كِسَمْعُوا الفَرِسِيِينْ بْلِّي سَكَتْ الصَدُوقِينْ تْلَّامُوا مْعَ بَعْضْيَتْهُمْ، ³⁵ وْ سَقْسَاهْ وَاحَدْ مَنْهُمْ وْهُوَ مَنْ عُلَمَاءْ الشَرَعْ بَاشْ ايْجَرْبَهْ: ³⁶ "ياَ مُعَلِمْ وَاشْ هِيَ الوَصِيَة الْكْبِيرَة فَاالشَرِيعَة؟". ³⁷ وْ جَاوَبْهُمْ يَسُوعْ وْ ڤَالَهْ: " تَبْغِي الرًبْ إِلاَهَكْ مَنْ ڤَاعْ ڤَلْبَكْ، وْمَنْ نَفْسَكْ، وَمَنْ ڤَاعْ عَقْلَكْ. ³⁸ هَادِي هِيَ الْوَصِيَة اللَّوْلَى وْالكْبِيرَة. ³⁹ وْ الزَاوْجَة كيِفْهَا: تَبْغِي لِقْرِيبْ لِيكْ كِمَا تَبْغِي رُوحَكْ. ⁴⁰ وْعَلَى هَادْ الزُوجْ الوْصَايَا تَنَبْنَى ڤَاعْ الشَرِيعَة وْ كُتُبْ الأَنْبِيَاء ⁴¹ وْ كِكَانُوا الفَرِيسِييِنْ مَتْلَايْمِينْ سَقْسَاهُمْ يَسُوعْ: ⁴² "وَاشْ تْڤُولُوا عْلَى المَسِيحْ؟إِبَنْ شْكُونْ؟" ڤَالُولَهْ: "إِبَنْ دَاوُدْ". ⁴³ ڤَاْلُهْمْ:"كِيفَاشْ دَاوُدْ باْلْوَحِيْ تَاْع رُوحْ اللَّه إيْعِيَطْلَهْ رَبِي؟ كِيْ ڤَاَلْ: ⁴⁴ ڤَاَلْ الرَّبْ لْرَبِي: ڤْعَدْ عْلَى الْيَمِينْ نْتَاعِي حَتَّى نْدِيرْعَدْيَانَكْ تَحْتْ رَجْلِيكْ ⁴⁵ إِذَا كَانْ دَاوُدْ إيْعِيَطْلَهْ رَبِي، كِيفَاشْ إِكُونْ الْمَسِيحْ إِبْنَهْ ؟". ⁴⁶ وْمَاقْدَرْحَتَّى وَاحَدْ إِسَقْسِيهْ أَسْئِلَة وَاحَدْخْرَى.

¹ تْكَلَمْ يَسُوعْ مْعَ جْمَاعَاتْ النَاسْ وْ تْلَامْذَهْ ² وْقَالْ: "عُلَمَاءْ الشَرْعْ وْ الفَرِسِيِينْ ڤعْدُوا عَلَى كُرْسِي مُوسَى هُمَا لِعَنْدْهُمْ الحَقْ بَاشْ إِفَسْرُوا الشَرِيعَة تَاعْ مُوسَى، ³ ڤاعْ لِيْقُولُولْكُمْ دِيرُوهْ وْ تَبْعُوهْ، وْبَصَحْ مَاتْدِيرُوشْ فْعَايَلْهُمْ عْلَى خَاطَرْ مَايْدِيرُوشْ هَادَاكْ الشِّي لِيْقُولُوهْ ⁴ هُمَا إِحَزْمُوا حْزَامَاتْ تْقَالْ وْ صْعَابْ وْ يْحَطُوهُمْ عْلَى كْتَافْ النَّاسْ، وْ بْصَح ْهُمَا ماَيْحَرْكُوا حْتَى صْبَعْهُمْ بَاشْ يَرَفْدُوا مْعَاهُمْ، ⁵ وْ إِلاَ دَارُوا حَاجَة، يْدِيرُوهَا غِيرْ بَاشْ إِشُوفُوهُمْ النَاسْ: وْيْوَسْعُوا العِصَابَاتْ عْلَى جْبَاهيِهُمْ وْ يْطُوْلُوا جْلَايَلْهُمْ، ⁶ وْ يَبْغُوا يْكُونُوا فَا البْلَايَصْ المْخَيْرِينْ فَالَوْلَايَمْ، وْ فَدْيُورّْ الصْلَاةْ، ⁷ وْ يَبْغُوا اِسْلْمُوا عْلِيهُمْ النَّاسْ فْلَسْوَاقْ، وْ يَعْيطُولْهُمْ النَّاسْ: يَا سِيدِي يَا سيِدِي! ⁸ وْ بْصَحْ نْتُومَا مَاتْخَلِيوْشْ حَتَى وَاحَدْ اِيْعِيَطَلْكُمْ سِيدِي، عْلَى خَاطَرْ نْتُمَا قَاعْ خُوتْ، وْ عَنْدَكُمْ سِيدْ وَاحَدْ. ⁹ وْ مَانْسَمُوشْ حَتَى وَاحَدْ عْلَى هَادْ الأَرْضْ بُوكُمْ، عْلَى خَاطَرْ بُوكُمْ وَاحَدْ وْ هُوَ الأَبْ اللِي فِي السْمَا. ¹⁰ وْ مَا تْسَمِيوْشْ أَرْوَاحْكُمْ مْعَلْمِينْ، عْلَى خَاطَرْ مْعَلِمْكُمْ وَاحَدْ وْ هُوَ المَسِيحْ. ¹¹ وْالْكْبِيرْ فِيكُمْ اِيْكُونْ خَدَامْ لِيكُمْ . ¹² وْ لِيَرْفَدْ رُوحَهْ وْ يْعَلِي شَّانَهْ اِيْطِيحْ، بْصَحْ اللِّي يْتْوَاضَعْ الرَّبْ اِيْعَلِيهْ". ¹³ بْصَحْ يَاوِيلْكُمْ يَا عُلَمَاءْ الشَرِيعَة وْ الفَرِسِيِينْ المُنَافِقِينْ! عْلَى خَاطَرْ تْبَلْعُوا مَلَكُوتْ السَّمَاوَاتْ قُدَامْ النَّاسْ، مَاتَدَخْلُوشْ نْتُمَا وْ مَاتْخَلُوشْ لُخْرِينْ يْدَخْلُوا. ¹⁴ يَا وِيلْكُمَ يَا عُلَمَاءْ الشّرِيعَه وَ الفَرِسِييِنْ وْ المُنَافِقِينْ! عْلَى خَاطَرْ تَاكْلُوا رَزْقْ الهَجَالَاتْ، وْطُوْلُوا فِي صْلَاتْكُمْ غِيرْ بَاشْ تْبَانُوا. عْلَى هَادْ الشِّي الْعِقَابْ نْتَاعْكُمْ غَادِي يْكُونْ صْعِيبْ مَنْ نْتَاعْ النَّاسْ لَخْرِينْ. ¹⁵ يَاوِيلْكُمْ يَا عُلَمَاءْ الشَرِيعَه وَ الفَرِسِيِينْ وْ المُنَافِقِينْ! عْلَى َخَاطَرْ رَاكُمْ تَقَطْعُوا البَّرْ وْ البْحَرْ بَاشْ تْرَدُوا شِّي وَاحَدْ يْهُودِي، وْ كِيْوَليِ يْهُودِي تْرَدُوهْ يَسْتَاهَلْ جِهَنَمْ كْتَرْ مَنْكُمْ زُوجْ مَرَاتْ. ¹⁶ يَا وِيلْكُمْ يَا لمَسْؤُولِينْ الْعُمْيِينْ! اللِّي تْقُولُوا لِيَحْلَفْ بْبِيتْ اللَه مَا عْلِيهْ حَتَى شِي، بْصَحْ لِيَحْلَفْ بْذْهَبْ تَاعْ بِيتْ الله يْوَفِي حَلْفَهْ. ¹⁷ يَاجُهَالْ، يَا عُمْيِينْ! وَاشْ لِكْبِيرْ وْ عَنْدَهْ القِيمَةْ: الدْهَبْ وْلَا بِيتْ الله اللِّي يْرَدْ الدْهَبْ مْقَدَسْ؟ ¹⁸ وْاللِّي يَحْلَفْ بْالمَدْبَحْ حْلَفْ مَاشِي مَقْبُولْ، وْ بَصَحْ إلاَحْلَفْ بْالفدِيَة اللِّي فُوڤ مَنْهَا خَاصَهْ يُوفِي بْحَلْفَهْ. ¹⁹ يَا جُهَالْ يَا عُمْييِنْ! وَاشْ لِخِيرْ: الدْبِيحَة وْلَا الْمَدْبَحْ اللِّي يْرَدْ الدْبِيحَه مْقَدْسَة؟ ²⁰ لِيَحْلَفْ بْالْمَدْبَحْ رَاهْ حْلَفْ بِيهْ وْ بْقَاعْ دَاكْ الشِّي لِفُوڤهْ ²¹ وْاللِّيَ حْلَفْ بْبِيتْ الله رَاهْ يَحْلَفْ بِيهْ وْ بْالله اللِّي سَاكَنْ فِيهْ، ²² وْلِحْلَفْ باْلسّْمَا يَحْلَفْ بْعَرْشْ الله وْ حَتَى بالله اللِّي قَاعَدْ عْلِيهْ. ²³ يَا وِيلْكُمْ يَا عُلَمُاءْ الشَرِيعَة وْالفَرِسِيِينْ وْ المُنَافِقِينْ! تْعَشْرُوا النَعْنَاعْ وْالبْسْبَاسْ وَ الْكَمُونْ، وْخَلِيتُو الحْوَايَجْ المُهِمِينْ فالشَرِيعَة اللِّي هُمَا الحَقْ الرَحْمَة. وَ الإِيمَانْ ,كَانْ خَاصْكُم ْتْدِيرَوا هَادْ الشِي بْلَامَا تْخَلِيوْ الاُمُورْ لُخْرَي. ²⁴ يَاالْمَسْؤُولِينْ الْعُمْيِينْ! اللِي يْصَفِيوْ الْمَا مَنْ النَامُوسْ وَ يْصَرْطُوا الْجْمَلْ ²⁵ يَا وِيلْكُمْ يَا عُلَمُاءْ الشَرِيعَهْ وْ الفَرِسِيِينْ المنافقين! رَاكُمْ تْنَقُوا الكَاسْ وْ الطَبْسِي مَنْ بَرَا، وَتْخَلُوا لدَاخَلْ مْعَمَرْ بْهَادَاكْ الشِي لِجَاكُمْ مَاالسَرْقَة وْالطْمَعْ. ²⁶ يَا الْفَرِيسِي الْعْمَى! نْقِي فَااللَوَلْ الكَاسْ وْالطَبْسِي مَاالدَاخَلْ بَاشْ اِيْوَلِي نْقِي حَتَى مَنْ بَرَا. ²⁷ ياَوِيلْكُمْ يَا عُلَمَاءْ الشَرِيعَة وَ الفَرِسيِيِنْ الْمُنَافِقيِنْ نْتُمَا كِمَا الَقْبُورْ الْمَبِيضْ اللِي تْبَانْ شَابَة مَنْ بَرَا، وْبَصَحْ مَالدَاخَلْ مْعَمَرْ بَعْضَامْ المُوتَى وْ بْكُلْ حَاجَة نَجِسَة، ²⁸ وْهَكَا حَتَى نْتُمَا تْبْانُوا لَنَاسْ مَنْ بَرَا مَتْقِينْ الله، وَبَصَحْ مَاالدَاخَلْ رَاكُمْ مْعَمْرِينْ بالنِفَاقْ وْ الدْنُوبْ. ²⁹ ياَ وِيلْكُمْ يَا عُلَمَاء الشَرِيعَه وَ الفَرِسِيِينْ المُنَافِقِينْ! عْلَى خَاطَرْ رَاكُمْ تْبْنُوا قْبُورْ الأَنْبِيَاء وَ تْزَيْنُوا مَدَافِنْ الصَالْحِينْ، ³⁰ وْتْقُولُوا: لُكَانْ عَشْنَا فُوقْ جْدُودْنْا كَانْ قَاعْ مَا شَارَكْنَاهُمْ فِي الَقْتِيلَة تَاعْ الأَنْبِيَاء. ³¹ وْهَكَا غَادِي تْشَهْدُوا عْلَى رْوَاحْكُمْ بَلِي اَنْتُمَا وْلَادْ هَادُوكْ لِقَتْلُوا الأَنْبِيَاء ³² أَيَ كَمْلُوا أَنْتُمَا دَاكْ الشِي لِبْدَاوَهْ جْدُودْكُمْ. ³³ يَالَحْنُوشَة وْ وْلَادْ الْفَاعِي! كِيفَاشْ تْهَرْبُوا مَنْ دَيْنُونَةْ جِهَنَمْ؟ ³⁴ عْلَى دَاكْ الشِي غَادِي نَرْسَلَلْكُمْ الأَنْبِيَاء وَ الْحُكَمَاء وْعُلَمَاء الشَرِيعَة، كَايَنْ مَنْهُمْ لِغَادِي تَكَتْلُوهُمْ وْ اللِي غَادِي تْصَلْبُوهُمْ، وْمَنْهُمْ لِغَادِي تْضَرْبُوهُمْ فِي دْيُورْ الصْلَاةْ نْتَاعْكُمْ وْ طَرْدُوهُمْ مَنْ مَدِينَة لَمْدِينَة، ³⁵ بَاشْ يَنْزَلْ عْلِيكُمْ الْعِقَابْ تَاعْ كُلْ دَمْ مَغْدُورْ طَاهَرْ سَالْ عْلَى الأَرْضْ، مَنْ دَمْ هَابِيلْ اللِي كَانْ مَتْقِي الله حَتَى دَمْ زَكَرْياَ بْنْ بَرْخِيَا اللِي قَتْلُوه بِبنْ المَوْضِعْ الْمُقَدَسْ وْ الْمَذْبَحْ. ³⁶ وْرَانِي نڤولكم الحَقْ:" هَادْ الْعِقَابْ قَاعْ غَادِي يَنْزَلْ عْلَى هَادْ الجِيلْ" ³⁷ يَا أُرْشَلِيمْ ياَ أُرْشَلِيمْ يَا اللِي تُكْتَلْ الأَنْبِيَاء وْ تَرْجَمْ الْمَرْسُولِينْ لِيهَا، شْحَالْ مَنْ مَرَا بْغِيتْ نْلَمْ وْلَادَكْ كِمَا تْلَمْ الْجَاجَه فْلَالِيسْهَا تَحْتْ جْنَاحْهَا، بَصَحْ مَابْغِيتْيشْ! ³⁸ هَاهِيَ دَارْكُمْ غَادِي تَبْقَالْكُمْ خَرِبَة. ³⁹ عْلَى خَاطَرْ نْقُولْ:" مَا غَادِيشْ تْشُوفُونِي مَاالْيُومْ حَتَى تْقُولُوا مْبَارَكْ اللِي جَايْ بِاسَمْ الرَّبْ!".

¹ خرَجْ يَسُوعْ وْرَاحْ لْبِيتْ اللَّهْ، وْڤَدْمُوا عَنْدَهْ تْلاَمْذَهْ بَاشْ يْوَرِيوَهْ البَنْيْ تَاعْ اللَّهْ. ² ڤَالْهُمْ يَسُوعْ: "شَفْتُوا ڤَاعْ هَادْ الشِي رَانِى نْڤُولْكُمْ الْحَقْ: مَاغَادِي تَبْقَى هْنَا حَتَّى حَجْرَة عْلَى حَجْرَة". ³ وْكِكَانْ يَسُوعْ ڤَاعَدْ فجْبَلْ الزَيْتُونْ، وْسَقْسَاوَهْ بِينْتهُمْ وْ بِينَهْ: "ڤُولْنَا يَاسِيدِي وِينْتَ غَادِي يَصْرَا هَادْ الشِي؟ وْوَاشْ هِيَ الْعَلاَمَة تَاعْ الْمَجْيَ نْتَاعَكْ وْنْتَاعْ آخَرْ الزْمَانْ؟" ⁴ وْجَاوْبْهُمْ يَسُوعْ وْڤَالْ: "رَدُّوا بَالْكُمْ! لَيْغَلَطْكُمْ شِي وَاحَدْ. ⁵ عْلَى خَاطَرْ غَادِي يْجِيوْ بَزَّافْ النَّاسْ بِاسْمِي وْيْڤُولُوا أَنَا هُوَ الْمَسِيحْ! وْغَادِي يَغَلْطُوا بَزَافْ النَّاسْ. ⁶ وْ غَادِي تَسَمْعُوابَالَحْرُوبْ وَأَخْبَارْ الْحُرُوبْ، شُوفُوا، وْعْنْدَاكُمْ تَنْخَلْعُوا!. عْلَى خَاطَرْ هَادْ الشِي ڤَاعْ لاَزَمْ يَصْرا وْبَصَّحْ مَاغَادِيشْ إِيكُونْ هُوَ آخَرْ الزْمَانْ. ⁷ عْلَى خَاطَرْ غَادِي يَهْجَمْ شَعْبْ عْلَى شَعْبْ وْ مَمْلَكَة عْلَى مَمْلَكَة، وْغَادِي تْكُونْ مَجَاعَاتْ وْ مَرْضْ وْ زْلاَزْلْ بْزَّافْ. ⁸ وْبَصَّحْ هَادْ الشِي غِيرْ البَدْيَا تَاعْ الوْجَعْ ⁹ وْ فْدِيكْ السَاعَة غَادِي يْسَلْمُوكُمْ لَلِغَادِي يْعَدْبُوكُمْ وْ يْكَتْلُوكُمْ وْغَادِي تْكُونُوا مَكْرُوهِينْ مَنْ ڤَاعْ الشُعُوبْ عْلَى جَالْ إِسْمِى. ¹⁰ وْفْدِيكْ السَاعَة، بَزَافْ غَادِي يْخَلُّوا إِيمَانْهُمْ وْغَادِي يْبِيعُوا بَعْضَاهُمْ بَعْضْ. ¹¹ وْ غَادِي يْبَانُوا بَزَافْ الأَنْبِيَاءْ الْكَذَّابِينْ وْ يْغَلْطُوا بَزَافْ النَّاسْ. ¹² وْمَنْ كَثْرَة الدْنُوبْ غَادِي تَبْرَدْ المْحَبَة نْتَاعْ بَزَاّفْ النَّاسْ. ¹³ وْبَصَّحْ لِيَبْقَى تَابَتْ حَتَّى لَّخَرْ هَادَاكْ غَادِي يَسْلَكْ. ¹⁴ وْيْبَشَرْ بَبْشَارَة المَلَكُوتْ فِڤَاعْ الدَّنْيَا وْغَادِي يْكُونْ شَهَادَةْ لْشُعُوبْ الدَّنْيَا ڤَاعْ وْفِي هَادِيكْ السَاعَة غَادِي يْجِي آخِرْ الزْمَانْ". ¹⁵ وْكِتْشُوفُوا فَالْمَوْضِعْ الْمُقَدَّسْ النَّجَاسَة تَاعْ الخَرَابْ اللِّي هْدَرْ عْلِيهَا النْبِي دَانْيَالْ - لِيَقْرَا يَفْهَمْ -. ¹⁶ فْدِيكْ السَاعَة اللِّي فِي بْلاَدْ الْيَهُودِيَة يَهَرْبُوا لَلْجْبَالْ، ¹⁷ وْلِفُوقْ السْطَحْ مَايْهَوَدْشْ يَدِّي وَاشْ كَايَنْ فِي دَارَهْ، ¹⁸ وَاللِّي فِي اللَرْضْ تَاعَهْ مَايْوَلِيشْ بَاشْ يَدِّي اللَّبْسَة تَاعَهْ. ¹⁹ وْيَاوَيْلْ النْسَا اللِّي بَالْكَرْشْ وْلِيْرَضْعُوا فِي ذِيكْ اللَّيَامْ! ²⁰ صَلُّوا بَاشْ مَايْكُونْشْ هْرُوبْكُمْ فِي نْهَارْ السَبْتْ وْلاَ فِي الشْتَا، ²¹ عْلَى خَاطَرْ غَادِي يْكُونْ ضِيقْ كْبِيرْ عُمَّرْ مَاكَانْ كِيفَهْ مَنْ الْوَقْتْ اللِّي خْلَقْ فِيهْ اللَّهْ الدَّنْيَا حَتَّى لَلْيُومْ وْ عَمُّرْهَا مَاغَدِي تَتْعَاوَدْ تَصْرَى مَمْبَعْدْ. ²² بَصَّحْ مَا قَصَّرْشْ اللَّهْ دِيكْ اللِّيَامْ لُكَانْ حَتَّى وَاحَدْ مَسْلَكْ مَا النَّاسْ، وبَصَّحْ بَسْبَابْ هَادُوكْ لِخْتَارُهُمْ اللَّهْ دِيكْ لِيَّامْ غَادِي تَقْصَر. ²³ وْدِيكْ السَاعَة إِلاَ ڤَالْكُمْ شِي وَاحَدْ: هَاالْمَسِيحْ هْنَا! وْلاَرَاهْ لْهِيهْ! مَا تَيْقُوهشْ. ²⁴ عْلَى خَاطَرْ غَادِي يْبَانُوا نَاسْ يَكَدْبُوا وْأَنْبَيَاءْ كَدَابِينْ وْغَادِي يْوَرِيوْ مُعْجِزَاتْ، بَاشْ يَغَلْطُوا بَزَافْ النَّاسْ وَإِذَا قَدْرُوا إِغَلْطُوا حَتَّى هَادُوكْ لِخْتَارْهُمْ اللَّهْ. ²⁵ هَارَانِي عْلَمْتْكُمْ مَنْ قَبْلْ ²⁶ إِلاَ ڤَالُولْكُمْ رَاهْ فِي الصَحْرَاء! مَاتْخُرْجُوشْ وْ لاَ هَاهُوَّ فِى الدْيَارْ الدَحْلاَنِيَة مَا تَيْقُوهٌومْشْ. ²⁷ عْلَى خَاطَرْ كِمَا يَضْرَبْ الْبَرْقْ فَالشَرْقْ وْيْبَانْ فَى الْغَرْبْ هَكَا غَادِي تْكُونْ المَجْيَ تَاعْ إِبْنْ الإِنْسَانْ. ²⁸ وِينْ مَا غَادِي تْكُونْ الْجِيفَة تَمَّ غَادِي يَتْلاَمُوا النْسُورْ ²⁹ وْمَمْبَعْدْ ضِيقْ نْتَاعْ دِيكْ اللَّيَامْ غَادِي تَضْلاَمْ الَشَمْسْ، وْالْقْمَرْ مَايَضَوِيشْ، وْالنْجُومْ غَادِي طِيحْ مَا السْمَا، وْغَادِي تَتْزَعْزَعْ القُوَاتْ نْتَاعْ السْمَا ³⁰ وْفْدِيكْ السَاعَة غَادِي تْبَانْ الْعَلاَمَة نْتَاعْ إِبْنْ الإِنْسَانْ فَاالسْمَا. وْمَمْبَعْدْ غَادِي يَنَدْبُوا قْبَايَلْ اللَرْضْ، ڤَاعْ وْغَادِي يْشُوفُوا إِبْنْ الإِنْسَانْ جَايْ فُوقْ سْحَابْ السْمَا بْقُوَة وْ عِزْ كْبِيرْ. ³¹ وْغَادِي يَرْسَلْ مَلاَيْكَة نْتَاعَهْ وْمْعَاهُمْ بُوقْ صُوتَهْ، قْوِيْ بَاشْ إِيلَمُّوا اللِّتَخْتَارُوا مَنْ رَبْعَةْ تَاعْ الْجِيهَاتْ، مَنْ كُلْ مَوْضِعْ تَحْتْ السْمَا ³² مَنْ شَجْرَة الْكَرْمُوسْ تْعَلْمُوا لَمثَلْ: كِيْوَّلِي غْصُنْهَا رُطْبِينْ وْيْوَّلُو خُضْرِينْ وَتَخَرَّجْ الوْرَاقْ نْتَاعْهَا تَعَرْفُوا بَلِّي الضِيقْ رَاهْ ڤَرَّبْ. ³³ وْهَكَّا حَتَّا نْتُمَا، مَلِّي تْشُوفُوا هَادْ الأُمُورْ كُلْهَا تَصْرَى عَرْفُوا بَلِّي رَاهْ قَرَبْ إِيجِي وْرَاهْ حْدَا الْبِيبَانْ ³⁴ نْڤُولْكُمْ الْحَقْ :" مَا يَنْقْضَاشْ هَادْ الجِيلْ حَتَّى يَصْرَوا ڤَاعْ هَادْ الأُمُورْ. ³⁵ السْمَا وَ اللَرْضْ غَادِي يَفْنَاوْ وْبَصَّحْ كْلاَمِي عُمْرَهْ مَاغَادِي يَفْنَى" ³⁶ دَاكْ النْهَارْ وْدِيكْ السَاعَة مَايَعْرَفْ بِهَا حَتَّى وَاحَدْ، لاَمَلاَيْكَة السَمَاوَاتْ، إِلاَّ بُويَا وَحْدَهْ ³⁷ وْكِمَا كَانَتْ يَامَاتْ نُوحْ غَادِي ثَانِي تْكُونْ المَجْيَ تَاعْ إِبْنْ الإِنْسَانْ. ³⁸ عْلَى خَاطَرْ كِمَا كَانُوا فْالْيَامْ قْبَلْ الطُوفَانْ , يَاكْلُوا وْيَشَرْبُوا وْيَتْزَوْجُوا وْ يْزَوْجُوا، حَتَّى الْيَوْمْ أَلِدْخَلْ فِيهْ نُوحْ الفْلُوكَة، ³⁹ وْمَاعَرْفُوشْ حَتَّى جَا الطُوفَانْ وَدَّاهُمْ ڤَاعْ، هَكَا ثَانِي غَادِي تْكُونْ المَجْيَ تَاعْ إِبْنْ الإِنْسَانْ ⁴⁰ تَمَّ غَادِي يْكُونُوا زُوجْ فَي اللَّرْضْ، يَتَخَذْ وَاحَدْ وْ لاَخُرْ يُڤْعَدْ. ⁴¹ زُوجْ نْسَا يَطَحْنُوا فَى الرْحَى، تَتَاخَذْ وَاحْدَة وْ لُخْرَى تُڤْعَدْ". ⁴² أَسَهْرُوا عْلَى خَاطَرْ مَاتَعْرَفُوشْ وَاشْ مَنْ سَاعَة يْجِي الرَّبْ نْتَاعْكُمْ ⁴³ وْعَرْفُوا هَادْ الشِي: لُكَانْ يَعْرَفْ مُولْ الدَّارْ أَمَا سَاعَة فَي اللَّيلْ غَادِي يْجِي الْخَايَنْ لُكَانْ سْهَرْ وْمَا يْخَلِيهْشْ يَخْوَنْ لَهْ دَارَهْ. ⁴⁴ هَادْ الشِي حَتَّى نْتُمَا كُونُوا وَاجْدِينْ، عْلَى خَاطَرْ إِبْنْ الإِنْسَانْ غَادِي يْجِي فِي وَاحَدْ الْوَقْتْ مَاعْلاَبَالْكُمْشْ بِيهْ ⁴⁵ وْ شْكُونْ هُوَّ الْعَبْدْ الأَمِينْ الْحَكِيمْ اللِّي كَلَفَهْ سيدَهْ بَالْعْبِيدْ تَاعْ دَارَهْ بَاشْ يَعْطِيهُمْ الْمَاكْلَة فَالْوَقْتْ؟ ⁴⁶ سَعْدَاتْ هَادَاكْ الْعَبْدْ اللِّي فَي الْوَقْتْ اللِّي غَادِي يْجِي سِيدَهْ غَادِي يَلْقَاهْ إِيدِيرْ الْخَدْمَة اللِّي وَصَّاهْ عْلِيهَا!. ⁴⁷ نْڤوُلْكُمْ الْحَقْ : "رَاهْ غَادِي يْكَلْفَهْ بْكُلْ مَايَمْلَكْ. ⁴⁸ وْإِلاَ كَانْ دَاكْ الْعَبْدْ قْبِيحْ وْڤَالْ مْعَ رُوحَهْ سْيدِي غَادِي يَبْطَى بَاهْ إِيْوَّلِي. ⁴⁹ وَيَبْدَا يَضْرَبْ صْحَابَهْ الْعْبِيدْ وْيَاكُلْ وْيَشْرَبْ مْعَ السْكَايْرِيَة. ⁵⁰ غَادِي يْجِي سِيدْ دَاكْ الْعَبْدْ فِوَاحَدْ النْهَارْ مَاقَارْعَهْشْ، ⁵¹ وْغَادِي يْعَاقْبَهْ بَزَّافْ وْ يْدِيرَهْ مْعَ الْمُنَافْقِينْ تَمَّ وِينْ غَادِي يْكُونْ الْبْكَاوْ تَغْزَازْ السْنَانْ".

¹ وَفْداكْ الْوَقْتْ غَادى تْكُونْ مَمْلَكَة الَسَّمَاوَاتْ تَشَبَهْ لْعَشْرَ تَاعْ الْعَزْبَاتْ، دَاوْ مْصَابِيحْهِمْ وْخَرْجُوا بَاشْ يَتْلاَقَاوْ مْعَ الْعَرِيسْ. ² وْكَانُوا خَمْسَ مَنْهُمْ جَاهْلاَتْ، وْخَمْسَ وْحَدَخْرِينْ عَاقْلاَتْ بَصَّحْ. ³ هَادُوكْ الْجَاهْلاَتْ دَّاوْ مْعَاهُمْ الْمَصَّابِيحْ نْتَّاعْهُمْ بَصَّحْ مَادَارُوشْ فِيهُمْ الَزِيتْ، ⁴ وْالْخَمْسَة لُخْرِينْ الْعَاقْلاَتْ دَّاوْ مْعَاهُمْ الْمَصَّابِيحْ تَاعْهُمْ ْدَّاوْ الَزِيتْ فِي الْقْرُعْ. ⁵ وْكِبْطَى الْعَرِيسْ بْدَاوْ الْعَزْبَاتْ ڤَاعْ يَنَعْسُوا وْفَرْشُووْرَڤْدُوا. ⁶ وْفْنَصْ الِلّيْلْ تَسْمَعْ وَاحَدْ الَصُوتْ قْوِيْ وْيْڤْولْ: "هَالَعْرِيسْ جَايْ، خَرْجُوا بَاشْ تَتْلاَقَاوْ مْعَاهْ! ⁷ وْنَاضُوا الْعَزْبَاتْ ڤَاعْ وْصَڤْدُوا الْمَصَّابِيحْ نْتَاعْهُمْ. ⁸ وْڤَالُوا الْعَزْبَاتْ الْجَاهْلاَتْ: عْطُونَا شْوِيَ مَاالَزِيْتْ نْتَاعْكُمْ عْلَى خَاطَرْ الْمَصَّابِيحْ نْتَاعْنَا قْرِيبْ يَنَطْفَاوْ. ⁹ بَصَّحْ الْعَقْلاَتْ جَاوْبُهُمْ وْڤَالُوا: يَقْدَرْ مَايْقَدْنَاشْ حْنَّا، وْنْتُمَا رُوحُوا وْاشْرُوا مَنْ عَنْدْ الّلي يْبِيعُوا. ¹⁰ وْكِكَانُوا غَادْيِينْ يَشْرُوا الَزِيتْ، جَالَعْرِيسْ وْدَخْلُوا مْعَاهْ هَادُوكْ الِّلى كَايْنِينْ لَلْمَوْضِعْ تَاعْ الَعْرِسْ، وْتْبَلَعْ الْبَابْ. ¹¹ وْمَمْبَعْدْ وْلاَوْ الْعَزْبَاتْ لُخْرِينْ وْڤَالُوا: يَاسِيِدِي، يَاسِيدِي، حَلْ عْلِينَا! ¹² وْبَصَّحْ الَعْرِيسْ جَاوَبْهُمْ وْ ڤَالْ: فَاالْحَقِيقَة اَنَا مَنَعْرَفْكُمْشْ. ¹³ عْلَى هَادْ الَشِي سَهْرُوا عْلَى خَاطَرْ مَاتَعَرْفُوشْ لاَ الَنْهَارْ وْلاَ السَاعَة الِلِي غَادِي يْجِي فِيهَا إِبْنْ الْإِنْسَانْ". ¹⁴ وْيَتْشَبَهْ مَلَكُوتْ الَسَّمَاوَاتْ لْوَاحَدْ مْسَافَرْ عَيَّطْ لَلْعَبِيدْ نْتَاعَهْ وْكَلَفْهُمْ بَدْرَاهْمَهْ، ¹⁵ عْطَى لْوَاحَدْ خَمْسَ وَزْنَاتْ، وْوَاحَدْ اخُرْ زُوجْ وَزْنَاتْ، وْوَحْدَاخُرْ وَزْنَة وْحَدَة. وْكُلْ وَاحَدْ عْلَى قَدْ جُهْدَهْ. وْهُوَسَافَرْ. ¹⁶ وْرَاحْ هَادَاكْ الِّلى دَّا خَمَسْ وَزْنَاتْ تَاعْ الَدْرَاهَمْ وْ بْدَا يْبِيعْ وْ يَشْرِي بِيهُمْ، وْرْبَحْ خَمَسْ وَزْنَاتْ وَحَدْ خْرِينْ ¹⁷ وْهَادَاكْ اللِّي دَّا زُوجْ وَزْنَاتْ، رْبَحْ زُوج وَحدَخْرِّين. ¹⁸ وْهَادَاكْ اللِّي دَّا وَزْنَة وَحْدَة رَاحْ وْحْفَرْ حَفْرَة فِي الأَرْضْ وْدَسْ فِيهَا هَادِيكْ الْوَزْنَة اللِّي عْطَاهالَهْ سِيدَهْ. ¹⁹ وْمَمْبَعْدْ وَاحَدْ الْمُدَة طْوِيلَة , وَلَّى الَسَّيِدْ نْتَاعْ هَادُوكْ الْعَبْيدْ وْ تْحَاسَبْ مْعَاهُمْ. ²⁰ وْجّا عَنْدَهْ اللِّي دَّا خَمْسْ وَزْنَاتْ وْأَعْطَاهْ خَمْسْ وَزْنَاتْ وَحَدْخْرِينْ وْڤَالْ :" يَاسَيِدِي، عْطِيتْنِي خَمَسْ وَزْناتْ وْهَامَلاَ خَمْسْ وَزْنَاتْ وَحَدْخْرِينْ رْبَحْتْهُمْ". ²¹ ڤَالَهْ سِيدَهْ :" مَاعَنْدِي مَانْسَالَكْ رَاكْ عَبَدْ مْلِيحْ وْأَمِينْ! كُنْتَ أَمِينْ فِي الْقَلِيلْ نْوَكْلَكْ عْلَى الْكَثِيرْ. دْخَلْ وْفْرَحْ مْعَ سِيدَكْ. ²² وْمَمْبَعْدْ جَا اللِّي دَّا زُوجْ وَزْنَاتْ وْڤَالَ:" هَكْ مْعَاهُمْ زُوجْ وَحَدْخْرِينْ لِرْبَحْتْهُمْ زَايْدِينْ". ²³ وْڤَالَهْ سِيدَهْ:" مَا عَنْدِي مَانْسَالَكْ! نْتَ عَبَدْ مْلِيحْ وْ أَمِينْ، كُنْتْ أَمِينْ مْعَايَ فِي الْقْلِيلْ وْدَرْوَكْ غَادِي نْكَلْفَكْ بَالْكَثِيرْ. أَرْوَاحْ وْفْرَحْ مْعَ سِيدَكْ. ²⁴ وْمَنْبَعَدْ جَاعَنْدَهْ هَادَاكْ اللِّي دَّا وَزْنَة وَاحْدَة حَتَّى هُوَ وْڤَالْ:" يَاسِيدِي أَنَا عْرَفْتْ بَلِّى نْتَ رَاجَلْ قَاسَحْ تَحْصَدْ دَاكْ الَشِّي اللِّي مَازْرَعْتَهْشْ، وْتَجْمَعْ دَاكْ الَشِّي لِمَادَرْتَهْشْ. ²⁵ وْعَلَى هَادْ الَشِّى خَفْتْ وْدَسِيتْ الْوَزْنَة تَاعَكْ فَى الَلَرْضْ. وْدَرْوَكْ هَاوَلَارَزْقَكْ ²⁶ وْيْجَاوْبَهْ سِيدَهْ: "يَالْعَبْدْ الَشَرِيرْ وْالْفَنْيَانْ، يَاكْ عْرَفْتْنِي نَحْصَدْ دَاكْشِ لِمَازْرَعْتْشْ، وْنَجْمَعْ دَاكْ الَشِّي لِمَا دَرتَهشْ، ²⁷ كَانْ عْلِيكْ تْحَطْ دْرَاهْمِي عَنْدْ التُّجَارْ تَاعْ الَدْرَاهَمْ، بَاشْ كِنْوَلِي نَدِّي الَرْبَحْ تَاعَهْ ²⁸ ودُولَهْ هَادْ الْوَزْنَة وْزِيدُوهَا لْهَادَاكْ لِعَنْدَهْ عَشْرَة وَزْنَاتْ. ²⁹ عْلَى خَاطَرْ ڤَاعْ لِكَانْ عَنْدَهْ غَادِي يَتَعْطَالَهْ وْيَتْزَادْلَهْ كْتَرْ مَنْ الاَزَمْ، وْبَصَّحْ اللِّي مَاعَنْدَهْشْ حَتَّى هَادَاكْ الَشِّي لِعَنْدَهْ غَادِي يَنْڤْلَعْلَهْ. ³⁰ وْهَادْ الْعَبْدْ لِمَصَالَحْ لْوَالُوا قِيسُوهْ بَرَّا فَاالَضَلْمَة، وِينْ غَادِي يْكُونْ الَبْكَا وْ تَغْزَازْ السْنَانْ". ³¹ وْكِغَادِي يْجِي إِبْنْ الإِنْسَانْ فِي الْعَّزْ وَالْمَجْدْ نْتَاعَهْ وْ مْعَاهْ ڤَاعْ الْمَلاَيْكَة، وْفْدَيكْ الَسَاعَة غَادِي يَڤْعَدْ عْلَى الْعَرْشْ تَاعْ الَعْزْ وَالْمَجْدْ نْتَاعَهْ. ³² وْغَادِي يَتْجَمْعُوا ڤَاعْ الَشُعُوبْ، ڤُدَامَهْ وْغَادِي يَعْزَلْهُمْ عْلَي بَعْضَاهُمْ كِمَا يَعْزَلْ السُرَاحْ الْخِرْفَانْ مَاالْمَعِزْ، ³³ وْغَادِي يْدِيرْ الْخِرْفَانْ عْلَى لْيْمِينْ تَاعَهْ وَالْمْعَازْ عْلَى الْيْسَارْ تَاعَهْ. ³⁴ وْمَمْبَعْدْ غَادِي يْقُولْ الْمَلِكْ لْهَادُوكْ اللِّي عْلَى لْمِينْ تَاعَهْ:" أَرْوَاحُوا يَااللِّي بَارَكْهُمْ بُويَا إِوَرْثُوا مَمْلَكَةْ اللهْ اللِّي مْوَّجَدْهَالْكُمْ مَالْوَقْتْ لِتْخَلْقْتْ فِيهْ الَدَّنْيَا. ³⁵ عْلَى خَاطَرْ جُعْتْ وْوَكَلْتُونِي. وْعْطَشْتْ شَرَّبْتُونِي. وْكُنْتْ غْرِيبْ وْضَيَفْتُونِي. ³⁶ عَرْيَانْ وْكْسِيتُونِي وْمْرِيضْ وْزورْتُونِي. وْفَالْحَبْسْ وْجِيتُوا لْعَنْدِي. ³⁷ وْفْدِيكْ الَسَّاعَة غَادِي يْجَاوْبُوهْ هَادُوكْ لِدَارُو مُرَادْ اللَّهْ ويْڤُولُوا: "يَارَبِّي وْقْتَاشْ شَفْنَاكْ جِيعَانْ وْوَكَلْنَاكْ، وْلاَّ عَطْشَانْ وْشَرَّبْنَاكْ؟، ³⁸ ووْقْتَاشْ غْرِيبْ وْضَيَفْنَاكْ، وْلاَ عَرْيَانْ وْكْسِينَاكْ؟، ³⁹ وْقْتَاشْ شَفْنَاكْ مْرِيضْ وْلاَفَاالَحَبْسْ وْجِينَاعَنْدَكْ؟، ⁴⁰ وْغَادِي يْجَاوْبْهُمْ الْمَلِكْ: نڤْولْكُمْ الْحَقْ:" كُلْ خَطْرَة دَرْتُوا هَادْ الَشِّي لْوَاحَدْ مَنْ خُوتِي الَصْغَارْ، رَاكُمْ دَرْتُوهْ لِى". ⁴¹ وْغَادِي يْڤُولْ تَانِي لْهَادُوكْ عْلَى لْيْسَارْ نْتَاعَهْ: رُوحُوا عْلَيَ يَامَلاَعِينْ لَلْنَّارْ الَدَّايْمَة اللِّي مْوَجْدَة لإِبْلِيسْ وْلْمَلاَيْكَة لِمْعَاهْ، ⁴² عْلَى خَاطَرْ جُعْتْ وْمَاوْكَلْتُونِيشْ. وْعْطَشْتْ وْمَاشَرَبْتُونِيشْ. ⁴³ وْكُنْتْ غْرِيبْ وْمَاضَيَفْتُونِيشْ. وْعَرْيَانْ وْمَا كْسِيتُونِيشْ. وْمْرِيضْ وْمَحْبُوسْ وْمَاجِيتُوشْ لْعَنْدِي ⁴⁴ وْفْدِيكْ الَسَّاعَة غَادي يْجُو هُمَا تَانِي وْيْڤُولُوا: يَارَبْ ، وِينْتَ شَفْنَاكْ جِيعَانْ وعَطْشَانْ، عَرْيَانْ و مْرِيضْ وْلاَ مَحْبُوسْ وْمَخْدَمْنَاكْشْ؟ ⁴⁵ وْغَادِي يْجَاوَبْهُمْ الْمَلِكْ وْيْڤْولْهُمْ: الْحَقْ نْڤُولْكُمْ: إلاَ مَادَرْتُوشْ هَادْ الَشِّي لْهَادُوكْ الَصْغَارْ رَاكُمْ مَادَرْتُوشْ لِى. ⁴⁶ هَادُوكْ غَادِي يْرُوحُوا لَلْعَذَابْ الَدَّايْمْ وْ لِدَارْ مُرَادْ الَّلهْ غَادِي يْرُوحْ لَلْحْيَاة الأَبَدِيَة".

¹ وْكِكَمَلْ يَسُوعْ ڤَاعْ هَادْ لَكْلاَمْ ڤَالْ لْتْلاَمِذَهْ: ² "تَعَرْفُوا بَلِي يُومِينْ مَنْبَعْدْ غَادِي يْكُونْ عِيدْ الْفَصْحْ، وْإِبْنْ الإِنْسَانْ غَادِي يْسَلْمُوهْ بَاهْ يَتَصْلَبْ" ³ وْفْدَاكْ الْوَقْتْ تْجَمْعُوا رُؤَسَاءْ رْجَالْ الَدِّينْ وْشْيُوخْ الشَعْبْ فِي دَارْ قَيَافَا رَئِيسْ رْجَالْ الَدِّينْ، ⁴ وْتْشَاوْرُوا بِينَاتْهُمْ بَاشْ يَشْدُوا يَسُوعْ بَالْحِيلَة وَيْكَتْلُوهْ. ⁵ وْڤَالُوا: "بَصَّحْ مَانْدِيرُوشْ هَادْ الَشِّي فَالْعِيدْ بَاشْ مَتْنُوضْشْ الْفَوْضَى فِي وَسْطْ الَشَعْبْ". ⁶ وْكِكَانْ يَسُوعْ فِي بِيتْ عَانْيَا فِدَارْ سَمْعَانْ الْمَجْدَامْ، ⁷ وْهُوَ مْتكِي ڤَرْبَتْ عَنْدَهْ وَاحَدْ الَمْرَا عَنْدْهَا قَرْعَة رِيحَة غَالِيَة بَزَافْ وْكُبَتْهَا عْلَى رَاسَهْ. ⁸ وْكِيشَافُوا الَتْلاَمِدْ تَاعَهْ لِدَارْتَهْ الْمْرَا مَا عْجَبْهُمْشْ الْحَالْ وْ ڤَالُو: "عْلاَشْ هَادْ الضْيَاعَة؟ ⁹ هَادْ الرِيحَة كَانَتْ تَقْدَرْ تَتْبَاعْ بْسُومَا غَالِيَة يَتْقَسْمُوا دْرَاهَمْهَا عْلَى لْمْسَاكَنْ". ¹⁰ وْكِعْرَفْ يَسُوعْ ڤَالْهُمْ: "عْلاَشْ رَاكُمْ تْصَدْعُوا فَالْمْرَا؟ رَاهِي دَارَتْ مْعَايْ غِيرْ الْخِيرْ! ¹¹ عْلَى خَاطَرْ الْمْسَاكَنْ رَاهُمْ دِايمَنْ مْعَاكُمْ، بَصَّحْ أَنَا مَغَدِيشْ نْكُونْ دِيمَا مْعَاكُمْ. ¹² وْهِيْ كِخَواَّتْ الرِيحَة عْلَى الْجْسَدْ تَعِي هِيَ رَاهَا تْوَجَدْنِي لَلْدْفِينَة. ¹³ نْڤُولْكُمْ الْحَقْ: وِينْ مَاغَادِي يْبَشْرُوا بَالإِنْجِيلْ فِي ڤَاعْ الْعَالَمْ، غَادِي يَهْدْرُوا عْلَى هَادْ الَشِّي لِدَارَتَهْ هَادْ الْمْرَا وْيَتْفَكْرُوهَا". ¹⁴ وْفْدَاكْ الْوَقْتْ رَاحْ وَاحَدْ مَاالَتْلاَمِيذْ الطْنَاعْشْ، اللِّي سَمُوهْ يَهُوذَا الإِسْخَرْيُوطِي لْعَنْدْ رُؤَسَاءْ رِجَالْ الَدِينْ ¹⁵ وْڤَالْهُمْ: "شَا غَادِي تَعْطُونِي إلاَ سَلَّمْتَهْلْكُمْ؟". وْتَافْڤُوا مْعَاهْ عْلَى تْلاَتِينْ قِطْعَة تَاعْ الْفَضَة. ¹⁶ وْمَنْ دَاكْ الْوَقْتْ هُوَ يْحَوَّسْ عْلى فُرْصَة بَاشْ يْسَلْمَهْ. ¹⁷ وْفَالَنْهَارْ اللَّوَلْ تَاعْ عِيدْ الْفْطِيرْ جَاوْ الَتْلاَمِذْ عَنْدْ يَسُوعْ وْسَقْسَاوَاهْ : "وِينْ بْغِيتْ نْوَجْدُولَكْ العْشَا تَاعْ عِيدْ الْفَصْحْ؟". ¹⁸ وْجَاوَبْهُمْ وْڤَالْهُمْ: "رُوحُوا لَلْمْدِينَة، لْعَنْدْ فْلاَنْ وْڤُولُولَهْ: رَاهْ إِيڤُولَكْ سِيدْنَا: رَاهْ سَاعْتِي ڤَرْبَتْ وْ غَادِي نْجِي نْفَوَّتْ عِيدْ الْفَصْحْ أَنا وْ تْلاَمِيذِ تَاعِي عَنْدَكْ". ¹⁹ ودَارُوا الَتْلاَمِيذْ كِمَا ڤَالْهُمْ يَسُوعْ وْوَجْدُوا لَعْشَا تَاعْ عِيدْ الْفَصْحْ. ²⁰ وْكِڤَرَبْ وَقْتْ لَعْشَا ڤْعَدْ يَسُوعْ حْدَا الْمَايْدَا بَاشْ يَاكُلْ مْعَ الَتْلاَمِيذْ الَطْنَاعْشْ. ²¹ وْهُمَا يَتْعَشَاوْ ڤَالْهُمْ: "نْڤُولْكُمْ الْحَقْ: رَاهْ وَاحَدْ مَنْكُمْ غَادِي يْسَلَمْنِي". ²² وْحَزْنُوا الَتْلاَمِيذْ بَزَافْ وْبْدَا كُلْ وَاحَدْ فِيهُمْ إِسَقْسِى: "أَنَا يَاسِيدِي؟". ²³ وْجَاوَبْهُمْ وْ ڤَالْ: "اللِّي مَادْ يَدَّهْ مْعَايْ فَاالَطَبْسِ هُوَ لِغَادِي يْسَلَمْنِي! ²⁴ إِبْنْ الإِنْسَانْ غَادِي يْمُوتْ كِمَا مَكْتُوبْ عْلِيهْ فِي كْتَابْ اللَّهْ، وْبَصَّحْ يَاوِيلَهْ الرَاجْلْ لِغَادِي يْسَلَمْ إِبْنْ الإِنْسَانْ. كَانْ خِيرْلَهْ لُكَانْ مَتَّوْلَدْشْ". ²⁵ وْيْسَقْسِيهْ يَهُوذَا اللِّي غَادِي يْسَلْمَهْ ڤَالَهْ: "أَنَا هُوَ سَيدِي؟". ڤَالَهْ: "أَنْت ڤُلْتْ". ²⁶ وْكِكَانُوا يَاكْلُوا جْبَدْ يَسُوعْ الْخُبْزْ، وِبَارْكْ وْقْسَمْ وْعْطَى لَتَلاَمِذْ وڤَالْ: "هَاكُوا كُولُو هَذَا هُوَ جَسْدِي". ²⁷ وْجْبَدْ الْكَاسْ وْشْكَرْ اللَّهْ وْعْطَاهُمْ وْڤَالْ: "شُرْبُوا مَنْهَا ڤَاعْ، ²⁸ عْلَى خَاطَرْ هَادَا هُوَ دَّمِي، دَّمْ تَاعْ الْعَهْدْ جْدِيدْ لِغَادِي يْسِيلْ عْلَى جَالْ بَزَافْ الَنَّاسْ لْمَغْفِرَةْ الَدْنُوبْ ²⁹ وْنْڤُولْكُمْ: مَالْيُومْ مَا غَادِيشْ نْعَاوَدْ نَشْرَبْ مَنْ هَادْ لَعْصِيرْ تَاعْ لَعْنَبْ حَتَّى يْجِي الَنْهَارْ اللِّي غَادِي نَشُّرْبَهْ مْعَاكُمْ جْدِيدْ فَلْمَمْلَكَة تَاعْ بُويَا". ³⁰ وْمَمْبَعْدْ سَبْحُوا الَّلهْ وْخَرْجُوا وْرَاحُوا لَجْبَلْ زَيْتُونْ. ³¹ وْڤَالْهُمْ يَسُوعْ: "فْهَادْ اللِّيْلَة غَادِي تَسَمْحُوا ڤَاعْ فِيَّ عْلَى خَاطَرْ مَكْتُوبْ فِي كْتَابْ اللَّهْ: تَضْرَبْ السَرَّاحْ و يَتْفَرْقُوا الْخِرْفَانْ تَاعْ الْقْطِيعْ. ³² وْبَصَّحْ مَنْبَعْدْ الْقِيَامَة نْتَاعِي نْسَبْقْكُمْ لَلْجَلِيل". ³³ وْجَاوْبَهْ بُطْرُسْ وْڤَالَهْ: "لُكَانْ إِشْكُّوا ڤَاعْ فِيكْ أَنَا عُمْرِي مَا نْشْكْ فِيكْ". ³⁴ ڤَالَهْ يَسُوعْ: "نْڤُولَكْ الْحَقْ: قْبَلْ مَايْصِيحْ الَدِّيكْ غَادِي تُنْكَرْنِي ثَلْثْ مَرَاتْ". ³⁵ وْجَاوْبَهْ بُطْرُسْ: "وْلُكَانْ يَتْحَتَمْ عْلِيَ نْمُوتْ مْعَاكْ مَا نُنْكْرَكْشْ!". وْهَاكَ ڤَالُوا ڤَاعْ الَتْلاَمِيذْ ³⁶ وْفْدَاكْ الْوَقْتْ جَا يَسُوعْ مْعَ الَتْلاَمِذْ تَاوَعَهْ لْوَاحَدْ الجْنَانْ إِسْمُوهْ جِتْسِمَانِي، وْڤَالْهُمْ: ُ"ڤعْدُوا هْنَا بِلَمَا نْرُوحْ لْهِيهْ وْنْصَلِي". ³⁷ وْمْبَعْدْ دَّا مْعَاهْ بُطْرُسْ وَوْلاَدْ زَبَدِي فِزُوجْ، وْبْدَا يْحَسْ بَالْغَمْ وْلَحْزَنْ. ³⁸ وڤَالْهُمْ: "نَفْسِى حْزِينَة بَزَّافْ حَتَّى لَلْمُوتْ ڤَعْدُوا هْنَا وَاسَهْرُوا مْعَايَ". ³⁹ وْبَعَّدْ عْلِيهُمْ شْوِيَ وْسَجَدْ وْبْدَا ، يْصَلِي ڤَالْ: "يَا بُويَا، إِذَا تَقْذَرْ تْبَعَدْ عْلِيَ هَادْ الْمَحْنَة وْبَصَّحْ مَاشِي كِيمَا بْغِيتْ أَنَا، كِيمَا تَبْغِي أَنْتَ". ⁴⁰ وَمَنْبَعْدْ وَلَّى عَنْدَ الَتّْلاَمِذْ وْلْقَاهُمْ رَاڤْدِينْ، وْڤَالْ لْبُطْرُسْ: "مَقْدَرْتُوشْ تَسَهْرُوا مْعَايَ غِيرْ سَاعَة وَاحْدَة؟ ⁴¹ سَهْرُوا وْ صَلُوا بَاشْ مَاطِحُوشْ فَاالَتَجْرِبَة. رَاهْ الَرُوحْ قْوِيَة وْبَصَّحْ الَذَاتْ ضْعِيفَة". ⁴² وَيْرُوحْ وْ يْصَلِي لَلْخَطْرَة الَزَاوْجَة وْصَلَّى وْڤَالْ: "بُويَا، إِلاَ مَا يَمْكَنْشْ تْبَعَدْ عْلِيَ هَادْ الْمَحْنَة حَتَّى نْذُوقْهَا، مَا يْكُونْ غِيرْ مُورَادَكْ". ⁴³ وْعَاوَدْ وَلَّي وْلْڤَاهُمْ رَاڤْدِينْ عْلَى خَاطَرْ غْلَبْهُمْ النْعَاسْ، ⁴⁴ وْخَلَاهُمْ وْرَاحْ وْصَلَّى لَلْمَرَة الثَالْثَة وْعَاوَدْ نَفْسْ الَكْلاَمْ ⁴⁵ وْمَنْبَعْدْ جَاوْلْعَنْدَهْ الَتّْلاَمِذْ تَاوْعَهْ وْڤَالْهُمْ: "رُڤْدُوا وْرَيْحُوا! هَاهِيَ الَسَاعَة ڤَرْبَتْ، وْإِبْنْ الإِنْسَانْ غَادِي يَتَسْلَمْ لَلْيَدِينْ تَاعْ الَمَدَنْبِينْ. ⁴⁶ أَيَاوْ نْرُوحُوا! هَادَاكْ لِغَادِي يْسَلَمْنِي ڤَرَبْ إِيجِي". ⁴⁷ وْكِكَانْ يَسُوعْ مَازَالْ يَهْدَرْ وْصَلْ يَهُوذَا لِهُوَ وَاحَدْ مَا الطْنَاعْشْ وْمْعَاهْ جْمَاعَة كْبِيرَة مْسَلْحِينْ بَالسْيُوفَة وْ الْمْطَارڤْ رَسْلُوهُمْ رُؤَسَاءْ رْجَالْ الدِّينْ وْشُيُوخْ الَشَعْبْ. ⁴⁸ وْهَادَاكْ لِسَلْمَهْ كَانْ عْطَاهُمْ وَاحَدْ الإِشَارَة وْڤَالْهُمْ: "الَرَاجْلْ لِغَادِي نْسَلَمْ عْلِيهْ هَادَاكْ هُوَ لِتْشَدُوهْ". ⁴⁹ وْفْدِيكْ الَسَاعَة ڤَرْبْ يَهُوذَا عَنْدْ يَسُوع ، سَلَمْ عْلِيهْ وْ ڤَالَهْ: "سْلاَمْ عْلِيكْ يَاسِيدِي!" ⁵⁰ وْڤَالَهْ يَسُوعْ: "يَاصَاحَبْ، عْلاَهْ جِيتْ؟" وْڤَرْبُوا عَنْدْ يَسُوعْ وْشَدُوهْ ⁵¹ وْ مَدْ وَاحَدْ مَنْ هَادُوكْ لِكَانُوا مْعَ يَسُوعْ يَدَّهْ وْجْبَدْ الَسِيفْ تَاعَهْ وْضْرَبْ الْعَبْدْ تَاعْ رَئِيسْ رِجَالْ الَدِّينْ، وْحَلَّهْ وَدْنَهْ. ⁵² وْڤَالَهْ يَسُوعْ: "رُدْ سِيفَكْ لَلْدَاخْلْ، عْلَى خَاطَرْ ڤَاعْ هَادُوكْ لِيْخَدْمُوا بَالسِيفْ، إِيمُوتُوبِهْ! ⁵³ حَسَبْتْ مَانَقْدَرْشْ نْعَيَطْ لْبُويَ وْيَرْسَلْي طْنَاعْشْ جِيشْ مَالْمَلاَيْكَة ؟ ⁵⁴ وْبَصَّحْ كِيفَاشْ غَادِي يَتْحَقَقْ الَكْلاَمْ لِتَكْتَبْ: وْاللِّي يڤُولْ بَلِي هَكَا إِلِيقْ إِيكُونْ؟". ⁵⁵ وْفْدِيكْ الَسَاعَة يَسُوع ڤَالْ لَلْجْمُوعْ: "كَلِّي جِيتُوا تَدُّوا خَايَنْ وْلاَ مُجْرِمْ بَالسْيُوفْ وْ الْعْصَا ! كُلْ يُومْ كُنْتْ مْعَاكُمْ فَي الْهَيْكَلْ وْمَاشَدِيتُونِيشْ. ⁵⁶ وْبَصَّحْ هَادَا ڤَاعْ بَاشْ يَتْحَقَق ْلِنْڤَالْ فَي كْتُبْ الأَنْبِيَاءْ". خَلاَوَه ْڤَاعْ تْلاَمِذَهْ وْهَرْبُوا. ⁵⁷ وْهَادُوكْ لِشَدُّوا يَسُوعْ دَّوَاهْ عَنْدْ قَيَافَا رَئِيسْ رْجَالْ الَدِّينِ، وْينْ كَانُوا مَلْمُومِينْ عُلَمَاءْ الْشَّرْع وَ الْشُيُوخْ. ⁵⁸ وْتَبّْعَهْ بُطْرُسْ مَنْ لْبْعِيدْ حَتَّى لَدَّارْ نْتَاعْ رَئِيسْ رْجَالْ الْدِّينْ، وْهُوَ يُدْخُلْ وْ يُڤْعُدْ مْعَ الْخَدَّامَا بَاشْ يَعْرَفْ وَاشْ غَادِي يَصْرَا مْعَ الْتَّالِي. ⁵⁹ وْ كَانُوا رُؤَسَاءْ رْجَالْ الْدِّينْ وَ كْبَارْ الْمَحْكَمَة يْحَوْسٌوا يْشَدُّوا عْلِيهْ شْهَادَةْ الْزُّورْ بَاشْ يَكَّتْلُوهْ، ⁶⁰ وْبَصَّحْ مَلْقَاوْشْ. وْ ڤَاعْ حَتَّى كِي جَاوْ شْهُودْ زُورْ بَزَّافْ بَصَّحْ مَالْقَاوْشْ. وْمْعَ لَخَّرْ ڤَدْمُوا زُوجْ شْهُودْ زُورْ ⁶¹ وَيْڤُولُوا: "هَاذَا الْرَّاجَلْ ڤَالْ: رَانِي نَقْدَرْ نْهَّدَمْ بِيِتْ الْلَّهْ و فْتَلْتَيَّامْ نَبْنِيه". ⁶² وَيْنُوضْ رَئِيسْ رْجَالْ الْدِّينْ وَ يْسَقْسِي يَسُوعْ: "وَاشْ مَاغَادِيشْ تْجَاوَبْ حَتَّى حَاجَة عْلَى هَادْ الْشِّي لِرَاهُمْ يَشَّهْدُوا عْلِيكْ هَادْ الْرْجَالْ؟". ⁶³ وْبَصَّحْ يَسُوعْ ڤْعَدْ سَاكَتْ. وَيْڤُولَّه رَئِيسْ رْجَالْ الْدِّينْ: "نَحْلَفْلَكْ بَاللَّهْ الْحَيْ بَاشْ تْڤُولْنَا إِلَا أَنْتَ هُوَ الْمَسِيحْ ابْنَ الْلَّه؟". ⁶⁴ ڤَالْ يَسُوعْ: " أَنْتَ ڤُلْتْ! وتَانِي نْڤُلْكُمْ مَنْ دَرْوَكْ: غَادِي تْشُوفُوا ابْنَ الْإِنْسَانْ ڤَاعَدْ عْلَى يَمِينْ الْلَّه الْقُدْرَة، وْجَايْ عْلَى سْحَابْ الْسْمَا" ⁶⁵ فْدِيكْ الْسَّاعَة ڤَطَع رَئِيسْ رْجَالْ الْدِّينْ حْوَايْجَهْ وْ ڤَالْ: "هَذَا رَاهْ يَكْفَرْ! وْمَعَدْنَا مَنْدِيرُوا بَالْشْهُودْ؟ رَاكُمْ سْمَعْتُوا كْلاَمْ الْكُفْرْ تَاعَهْ! ⁶⁶ وَاشْ تَفَكْرُوا؟". وْجَاوْبُوهْ وْڤَالُولَهْ: "رَاهْ يَسْتَاهَلْ الْمُوتْ". ⁶⁷ وْدَفْلُوا عْلَى وَجْهَهْ، وْضَرْبُوهْ ⁶⁸ وْڤَالُو: "تْنَبَّأْ أَلْمَسِيحْ مَنْ ضَرْبَكْ". ⁶⁹ بَصَّحْ بُطْرُسْ كَانْ ڤََاعَدْ بَرَّا الَدَّارْ، وْ جَاتْ عَنْدَهْ وَاحَدْ الْمْرَا وْڤَالَتْ: «أَنْتَ كُنْتْ مْعَ يَسُوعْ الْجْلِيلِى!». ⁷⁰ نْكَرْ ڤُدَامْ ڤَاعْ الْغَاشِى وْڤَالْ :"مَنِيشْ عَارَفْ وَاشْ رَاكِى تْڤُولِي!". ⁷¹ وْمَنْبَعْدْ خْرَجْ لَلْحَوْشْ وْشَافْتَهْ وَحْدُ خْرَى، وْڤَالَتْ لَلِي كَانُوا تَمَّ: "هَذَا كَانْ مْعَ يَسُوعْ الَنَّاصِرِي!". ⁷² وْنْكَرْ وْهُوَ يَحْلَفْ: "أَنَا مَا نَعْرَفْشْ هَادْ الَرَّاجْلْ!". ⁷³ وْمَنْبَعْدْ جَاوْ وَقْفِينْ وْڤَالُوا لْبُطْرُسْ: "بَصَّحْ نْتَّ تَانِي مَنْهُمْ، لَهْجْتَكْ تْبَيَنَكْ!". ⁷⁴ وْبْدَا يَلْعَنْ وْيَحْلَفْ: "أَنَا مَانَعْرَفْشْ الَرَّاجْلْ!". وْتَّمْ تَّمْ صَاحْ الَدِّيكْ. ⁷⁵ تْفَكَرْ بُطْرُسْ هَدْرَةْ يَسُوعْ اللِّي ڤَالَهْ: "قْبَلْ مَايْصِيحْ الَدِّيكْ غَدِي تُنْكَرْنِي ثَلْثْ مَرَّاتْ وْخْرَجْ بَرَّا وْبْكَا بَكَيَتْ الْمْرَارْ".

¹ وْ فِي الصْبَاحْ بَكْرِي تْشَاوْرُوا ڤَاعْ رُؤَسَاءْ الْكَهَنَة وْ شُيُوخْ الَشَعْبْ عْلَى يَسُوعْ بَاهْ يَكْتْلُوهْ ، ² سلْسْلُوهْ مَنْ يَدَّهْ وْدَّاوَهْ وْسَلْمُوهْ لَلْوَالِي بِيلاَطُسْ الْبُنْطِي. ³ وْفْي دِيكْ الَسَّاعَة كِي شَافْ يَهُوذَا اللِّي سَّلْمَهْ بَلِي حَكْمُوا عْلَى يَسُوعْ، نْدَمْ وْرَدْ الَتْلاَثِينْ مَا الْفَضَّة لْرُؤَسَاءْ رْجَالْ الَدِينْ وْ الَشُيُوخْ ⁴ وْڤَالْهُمْ : "رَانِي غْلَطْتْ مِينْ سَلَّمتْ وَاحَدْ مَا عْلِيهْ حَتَّى ذَنْبْ". وْڤَالُولَهْ :"مَاشِي شُغْلْنَا دَبَّرْ رَاسَكْ!". ⁵ وْ قَاسْ يَهُودَا هَدِيكْ الْفَضَّة فْبِيتْ اللَّه وْ مَنْبَعْدْ رَاحْ وْ جَيَّفْ رُوحَهْ. ⁶ وْدَّاوْ رُؤَسَاءْ رْجَالْ الدِّينْ الْفَضَّة وْڤَالُوا : "مَاشِي حَلاَلْ نْدِيرُوهُمْ فَصَنْدُوقْ تَاعْ بِيتْ اللَّهْ عْلَى خَاطَرْ هَذِهِيَ الَسُومَى تَاعْ دَّمْ بْنَادْمْ". ⁷ وْتْشَاوْرُوا وْشْرَاوْ بِيهُمْ لَرْضْ الفَخَارِي مَقَبْرَة لَلْبَرَاوِيَ. ⁸ وْعْلَى دَاكْ الَشْى إِسْمُوا هَادِيكْ اللَرْضْ "حَقْلْ الدَّمْ" لَلْيُومْ ⁹ وْ فْدِيكْ الَسَاعَة تْحَقَّقْ دَاكْ الَشِي لِڤَالَهْ الَنَبِي إِرْمْيَا: "وْدَّاوْ تْلاَثِينْ مَالْفَضَة، الَسًومَى لِتَافْقًوا عْلِيهْ شِي وَحْدِينْ مَنْ شَعْبْ إِسْرَائِيلْ بَاشْ تْكُونْ الَسُومَى تَاعَهْ، ¹⁰ وْبْهَادْ الَسُومَى شْرَاوْ الأَرْضْ الفَّخَارِي كِيمَا وْصَانِى الرَّبْ". ¹¹ وْقَفْ يَسُوعْ ڤُدَامْ الْوَالِي وْسَقْسَاهْ : "نْتَ هُوَ مَلِكْ الْيَهُودْ؟". رَّدْ عْلِيهْ يَسُوعْ : "أَنِتَ ڤُلْتْ". ¹² وْكِكَانُو رُؤَسَاءْ رْجَالْ الَدِّينْ وْ الَشْيُوخْ تَّهْمُوهْ مَاكَانْ إِجَاوْبْهُمْ بْحَتَى حَاجَة. ¹³ وْڤَالْه بِيلاَطُسْ:"وَاشْ مَاسْمَعْتْشْ ڤَاعْ الَشِي لِيْشَهْدُوا بِيهْ عْلِيكْ؟". ¹⁴ وْ مَا جَاوْبَهْمْشْ يَسُوعْ حَتَّى بْكَلْمَة، وْعْلَى هَادْ الَشِي تْعَجَبْ فِيهْ الْحَاكَمْ بَزَافْ. ¹⁵ وْكَانَتْ الْعَادَة عَنْدَ الْحَاكَمْ فِى كُلْ عِيدْ الْفَصْحْ يَطَلْڤُوا وَاحَدْ مَالْمَحْبُوسِينْ اللّي بْغَاوْه النَّاسْ. ¹⁶ وْكَانْ عَنْدْهُمْ فْدِيكْ السَاعَة وَاحَدْ الْمَحْبُوسْ مَشْهُورْ سَمُوهْ بَارَابَاسْ. ¹⁷ وْكِتْجَمْعُوا النَّاسْ سَقْسَاهُمْ بِيلاَطُسْ :"شْكُونْ لِبْغِيتُوا نَطَلْڤَهْ لْكُمْ؟ بَارَابَاسْ وْلاَيَسُوعْ لِيَتْسَمَى الْمَسِيحْ؟". ¹⁸ عْلَى خَاطَرْ كَانْ عْلاَبَالَهْ سَلْمُّو يَسُوعْ عْلَى خَاطَرْ كَانُوا حَاسْدِينَهْ. ¹⁹ كِكَانْ ڤَاعَدْ عْلَى كُرْسِيْ الْحُكْمْ رَسْلَتْلَهْ مَرْتَهْ وْڤَاتْلَهْ:" حْرَزْ تْآدِي هَادَاكْ الَرَاجْلْ الْبَّارْ عْلَى خَاطَرْ تْعَدْبَتْ الْيُومْ بَزَافْ فَلْمْنَامْ مَنْ جِيهْتَهْ". ²⁰ وْبَصَّحْ رِؤَسَاءْ رْجَالْ الدِّينْ وْالشْيُوخْ حَرْشُوا جْمَاعَاتْ تَاعْ الَنَّاسْ بَاشْ يَطَلْبُوا مَنْ بِيلاَطُسْ يَطْلَڤَلْهُمْ بَارَابَاسْ وْيَكْتَلْ يَسُوعْ. ²¹ وْسَقْسَاهُمْ بِيلاَطُسْ :"شْكُونْ فِي هَادْ الَزًوجْ بْغِيتُوا نَطْلَڤَهْلْكُمْ ؟". وْجَاوْبُوهْ بَارَابَاسْ!". ²² ڤَالْهُمْ بِيلاَطُسْ وَاشْ غَادِي نْدِيرْ بْيَسُوعْ اللِّي سَمَّوَهْ الْمَسِيحْ ؟ وْجَاوْبُوهْ كُلْهُمْ: "صَلْبَهْ !". ²³ وْڤَالْهُمْ : "وَاشْ مَنْ شَرْ دَارْ؟". بَصَّحْ هُمَا زَادُوا فِي زْڤَاهُمْ وْڤَالُولَهْ : "صَلْبَهْ!" ²⁴ وْكِشَافْ بِيلاَطُسْ بَلِّي مَانْفَعْ مْعَاهُم حَتَّى حَاجَة وْ الشَعْبْ زَادْ هَاجْ، جْبَدْ المَا وْغْسَلْ يَدِّيهْ ڤُدَامْ الَنَّاسْ وْڤَالْ : "أَنَا رَانِي مَتْبَرِّي مَنْ دَّمْ هَادْ الَرَّاجَلْ! شُوفُوا نْتُمَا مْعَاهْ!". ²⁵ وْيْجَاوْبَهْ ڤَاعْ الَشَعْبْ : "غِيرْ خَلِّي دَّمَهْ عْلِينَا وْعْلَى وْلاَدْنَا". ²⁶ وْفْدِيكْ الَسَاعَة طْلَڤْلْهُمْ بَارَابَاسْ، وْبَصَّحْ يَسُوعْ سَّلْمَهْ بَاشْ يَتَصْلَبْ. مَنْبَعْدْ مَا جَلْدُوهْ ²⁷ الْعَسْكَرْ تَاعْ الْحَاكْمْ دَّاوْ يَسُوعْ لْدَارْ الْوِلاَيَة وْلَمُّوا عْلِيهْ ڤَاعْ الْفِرْقَة تَاعْ الْعَسْكَرْ، ²⁸ وْعَرَّاوَهْ وْلَبْسُوهْ لْبَاسْ أَحْمَرْ، ²⁹ وْضَّفْرُوا تَاجْ الَشُوكْ وْحَطُوهْ عْلَى رَاسَهْ، وْدَارُولَهْ فِي يَدَهْ لِمْنَى ڤَصْبَة . وْبْدَاوْ يَرْكْعُوا ڤُدَّامَهْ وْيَضَحْكُوا عْلِيهْ وْ يْڤُولُوا لَهْ:"سَلاَمْ عْلِيكْ يَامَلِكْ لِيهُودْ!". ³⁰ وِتفْلُوا عْلِيهْ وْڤَلْعُولَهْ الْڤَصْبَة وْضَرْبُوهْ بِيهَا عْلَى رَاسَهْ . ³¹ وْمْبَعْدْ ضَحْكُوا عْلِيهْ، ڤَلْعُولَهْ اللْبَاسْ وْلَبْسُوهْ قَشَهْ، وْ دَّاوَهْ بَاهْ يَصَلْبُوهْ ³² وْكِكَانُوا خَارْجِينْ بِيهْ مَالْمْدِينَة تْلاَقَاوْ مْعَ وَاحَدْ الَرَاجَلْ مَالْقِيرَوَانْ إِسَمُّوا سَمْعَانْ، وْسَّيْفُوا عْلِيهْ بَاشْ يَرْفَدْ الَصَلِيبْ تَاعْ يَسُوعْ الْمَسِيحْ. ³³ وْوَصْلُوا لَلْمَوضِعْ لِسَمُّوهْ الْجُلْجُثَة لِيعْنِي "الْجُمْجُمَة " ³⁴ وْعْطَاوَهْ يَشْرَبْ الْشْرَابْ مْخَلَطْ بْوَاحَدْ الْعُشْبَة سَمُّوهَا الْمُرْ. وْكِدَاقَهْ مَابْغَاشْ يُشَرْبَهْ. ³⁵ وْصَلْبُوهْ وْڤَسْمُوا بِينَاتْهُمْ حْوَايْجَهْ بَعْدْ مَادَارُوا عْلِيهُمْ الْقُرْعَة، بَاشْ يَتْحَقَقْ وَاشْ نْڤَالْ عْلَى لْسَانْ الَنَبِيْ: "تْڤَاسْمُوا قَشِّي بِينَاتْهُمْ وْ دَارُوا عْلِيهُمْ الْقُرْعَة". ³⁶ وْمَنْبَعْدْ ڤَعْدُوا إِعَسُّوا عْلِيهْ. ³⁷ وْدَارُوا فُوْقْ رَاسَهْ لُوحَة مَكْتُوبْ فِيهَا: "هَذَا هُوَّ يَسُوعْ مَلِكْ الْيَهُودِ". ³⁸ الْيَهُودِيَة وْ دِيكْ الَسَاعَة صَلْبُوا مْعَاهْ زُوجْ خَيَّانْ وَاحَدْ عْلَى لَيْمِنى وْلاَخَرْ عْلَى لْيَسْرَى تَاعَهْ. ³⁹ وْكَانُوا ڤَاعْ لِكَانُوا يْفُوتُوا عْلِيهْ يَكَفْرُوا وْيْعَايْرُوا فِيهْ وْهُمَا يْدَّوْرُوا فِي رِسَانْهُمْ ⁴⁰ ويڤولو: "يَالِي هَدَمْتْ بِيتْ اللَّهْ وْغَادِي تْعَاوَدْ تَبْنِيهْ فِي تَلْتْ يَّامْ، سَلَّكْ رَاسَكْ! إِلَى كُنْتْ إِبْنْ اللَّهْ وْهَوَّدْ مَنْ فُوقْ الَصَلِيبْ!". ⁴¹ وْكَانُوا رُؤَسَاءْ رْجَالْ الَدِّينْ وْعُلَمَا الَشَرْعْ وَالشُيُوخْ حَتَّى هُمَا يَضَحْكُوا عْلِيهْ وْيْڤُولُوا: ⁴² " سَلَّكْ نَاسْ خْرِينْ وْ مَاقْدَرْتشْ يسَلَّكْ رُوحَه! إِلَى كَانْ هُوَ مَلِكْ إِسْرَائِيلْ يَنْزَلْ دَرْوَكْ فُوقْ الَصَلِيبْ وْغَادِي نْأَمْنُوا بِيهْ ! ⁴³ يَكْ هُوَ تْكَلْ عْلَى اللَّهْ، أَيَ يْعَتْقَهْ دَرْوَكْ إِلَى بْغَا! عْلَى خَاطَرْ هُوَّ ڤَالْ:" أَنَا إِبْنْ اللَّهْ!". ⁴⁴ وْ حَتَّى الْخِيَانْ اللِّي تَصَلْبُوا مْعَاهْ عَايْرُوهْ كِمَا لُخْرِينْ ⁴⁵ وْطَاحَتْ الَضَلْمَة عْلَى ڤَاعْ الْبِلاَدْ مَا الطْنَاعْشْ تَاعْ النْهَارْ حَتَّى التْلاَتَة تَاعْ العْشِيَة. ⁴⁶ وْمَنْ جْوَايَهْ تْلاَثَة تَاعْ العْشِيَة زْڤَا يَسُوعْ بْصوتْ عَالِي : "إِلِي إِلِي لِمَا شَبَقْتَنِي؟" أَلِي مَعْنَاتْهَا: إِلَهِي، إِلَهِي، عْلاَشْ سْمَحْتْ فِيَّ ؟ ⁴⁷ وْسَمْعُوهْ وْحْدِينْ مَنْ هَادُوكْ لِكَانُوا وَاڤْفِينْ تَمَّ وْڤَالُوا : "رَاهْ يْعَيَطْ لْإِلِيَا ⁴⁸ وْجْرَى وَاحَدْ مَنْهُمْ وْ دَّا طَرْفْ تَاعْ الْقَشْ وْعَمْرَهْ خَلْ وْعَصْرَهْ فِي قَصْبَة وْشَرْبَهْ لَهْ. ⁴⁹ وْبَصَّحْ لُخْرِينْ ڤَالُوا: "خَلٍّى نْشُوفُوا إِلِيَّا إلَى إِيجِي يْسَلْكَهْ!". ⁵⁰ وزَڤَا يَسُوعْ ثَانِي بْصَوْتْ قْوِيْ وْسَلَمْ الَرُوحْ ⁵¹ وْتْڤَطَعْ حْجَابْ بِيتْ اللَّهْ عْلَى زُوجْ مَالْفُوقْ لَتَحْتْ، وْ تْزَلْزْلَتْ لَرْضْ، وْالْحْجُرْ الْكْبَارْ تْشَقْقَتْ، ⁵² وْتْحَلُّوا القْبُورْ، وْقَامُوا بَزَّافْ النَّاسْ المْقَدْسِينْ مَالْمُوتْ، ⁵³ وْخَرْجُوا مَالْقْبُورْ بَعْدْ قِيَامَتِه، وْدَخْلُوا المْدِينَة المْقَدْسَة، وْبَانُوا لْبزَافْ النَّاسْ. ⁵⁴ وْڤَايْدْ العَسْكَرْ وْ اللِّي مْعَاهْ عَسَّاسَا عْلَى يَسُوعْ شَافُوا الَزْلْزْلَة وْلْصْرَا، خَافُوا بَزَّافْ وْ ڤَالُوا : "بَصَّحْ هَادْ الَرَاجَلْ كَانْ إِبْنْ اللَّهْ!". ⁵⁵ وْكَانُوا تَّمْ نْسَا بَزَّافْ لِتَبْعُوا يَسُوعْ مَالْجَلِيلِ وْيْخَدْمُوهْ كَانُوا ڤَاعْدِينْ تَمَّ وْيْشُوفُو فِيهْ مَالْبْعِيدْ، ⁵⁶ وْمَنْ بِينَاتْهُمْ مَرْيَمْ الْمَجْدَلْيَة، مَرْيَمْ أُمْ يَعْقُوبْ وْيُوسَفْ، وْأُمْ وْلاَدْ زَبَدِي. ⁵⁷ وْفَالْعْشِيَة، جَا وَاحَدْ الرَاجَلْ لاَبَاسْ عْلِيهْ مَالرَّامَة إِسَمُّوهْ يُوسَفْ، وْكَانْ هُوَّ تَانِي تَلْمِيذْ يَسُوعْ. ⁵⁸ وْدْخَلْ هَادْ الَراجَلْ عَنْدْ بِيلاَطُسْ وْ طَلْبَهْ بَاهْ يَعْطِيهْ الجَسَدْ تَاعْ يَسُوعْ. وْفْدِكْ الَسَاعَة أْمَرْ بِيلاَطُسْ بَاهْ يَعْطُوهْلَهْ. ⁵⁹ وْدَّا يُوسَفْ الجْسَدْ وْكَفْنَهْ فِكَتَانْ نْقِيْ، ⁶⁰ وْحَطَّهْ فَالْقْبَرْ الجْدِيدْ اللِّي فَالصْخَرْ، وْبَلَّعْ بَابْ الْقْبَرْ بْحَجْرَة كْبِيرة وْرَاحْ. ⁶¹ وْكَانَتْ تَمَّ مَرْيَمْ الْمَجْدَلِيَة وْ مَرْيَمْ لُخْرَى ڤَاعْدِينْ ڤُدَامْ القْبَرْ ⁶² وْ لْغَدْوَا كِينَا مَنْبَعْدْ النْهَارْ اللِّي يْوَجْدُوا فْيهْ السَبْتْ، تْلَّمُوا رُؤَسَاءْ رْجَالْ الدِّينْ وَالْفَرِيسِيِنْ عَنْدْ بِيلاَطُسْ ⁶³ وْڤَالُولَهْ: "يَاسِيدِى، تْفَكَرْنَا بَلِّي هَادَاكْ الْكَذَّابْ كِكَانْ حَيْ كَانْ إِقُولْ:" بَلِّى مَنْبَعْدْ تَلْثْ يَّامْ غَادِي يْقُومْ. ⁶⁴ أَيَ أَعْطِي أَمْرْ بَاشْ تْكُونْ العَسَّة عْلَى القَبْرْ حَتَّى النْهَارْ الثَالْثْ بَاشْ مَايْجُوشْ التْلاَمَذْ تَاعَهْ فَالْيلْ أُيْخَوْنُوهْ، وْ يْڤُولُوا لَلْشَعْبْ: بَلِّي قَامْ مَالْمُوتْ، وْغَادِي تْكُونْ هَادِي الكَذْبَة لَخْرَة أَشَرْ مَالْوْلَى!". ⁶⁵ وْيْقُولْهُمْ بِيلاَطُسْ : "عَنْدْكُمْ عَسَّاسِينْ أَيَ رُوحُوا وْعَسُّوا القْبَرْ كِمَا بْغِيتُوا". ⁶⁶ وْرَاحُوا وْشَّمْعُوا الحَجْرَة تَاعْ القْبَرْ وْ دَارُوا عْلِيهْ العَسَة.

¹ وْمَمْبَعدْ نْهَارْ الَسَبْتْ طْلَعْ الْفْجَرْ تَعْ نْهَارْ الأَحَدْ، جَاتْ مَرْيَمْ الْمَجْدَلِيَة وْمَرْيَمْ لُخْرَى بَاشْ يْشُوفُوا لَقْبَرْ. ² وْعْلَى غَفْلَة صْرَاتْ زَلْزْلَة قْوِّيَة، عْلَى خَاطَرْ مَلاَكْ نْزَلْ مَالَسْمَا وْجَا وْ لَزْ الْحَجْرَة اللِّي عْلَى بَابْ الَقْبَرْ، وْجَمَّعْ عْلِيهَا. ³ وْكَانْ إِيضَوِّي كِمَا الْبَرْقْ، وْقَشَّهْ بْيَضْ كِمَا الثَلْجْ. ⁴ وْتْرَعْدُوا الْعَسَّاسَا مَاالْخُوفْ وْوَلاَوْ كِمَا الْمُوتَى. ⁵ وْبَصَّحْ الْمَلاَكْ ڤَالْ لَزُوجْ الَنْسَا: «مَاتْخَافُوشْ أَنَا عَارَفْ بَلِّى رَاكُمْ تْحَوْسُوا عْلَى يَسُوعْ لِتَصْلَبْ. ⁶ رَاهْ مَارَاهْشْ هْنَا عْلَى خَاطَرْ قَامْ كِمَا َڤَالْ! رُوحُوا المُوضَعْ لِكَانْ مَحْطُوطْ فِيهْ. ⁷ وْرُوحُوا بَلْخَفْ وْڤُولُوا لَتْلاَمَذْ: رَاهْ قَامْ مَالْمُوتْ. وْهَاهُوَّ غَادِي يَسْبَقْكُمْ لَلْجْلِيلْ. تَمَّ غَادِي تْشُوفُوهْ. هَاأَنَا رَانِي ڤُلْتَلْكُمْ». ⁸ خَرْجُوا بَلْخَفْ مَالْقْبَرْ وْهُمَا خَايْفَاتْ وْ فَرْحَانَاتْ، وْرَاحُوا يَجْرُوا بَاشْ إِخَبْرُوا التْلاَمَذْ. ⁹ وْكِكَانُوا رَايْحِينْ فَالطْرْيڤْ لاَقَاهُمْ يَسُوعْ وْڤَالْهُمْ: «سَلاَمْ لِيكُمْ». لَزُّوا عَنْدَهْ وْشَدُّوا رَجْلِيهْ وْ سَجْدُوا لِيهْ. ¹⁰ وڤَالْهُمْ يَسُوعْ : «مَاتْخَافُوشْ. رُوحُوا وْ ڤُولُوا لْخُوتِي بَاشْ إِيرُوحُوا لَلْجْلِيلْ، وْتَمَّ غَادِي يْشُوفُونِْى». ¹¹ وْكِكَانُوا النْسَا لْزُوجْ غَادْيَاتْ فَى الْطْرِيقْ رَاحُوا شِي عَسَّاسَا لَلْمْدِينَة وْخَبْرُوا الرُؤَسَا تَاعْ رْجَالْ الدِّينْ بْڤَاعْ دَاكْ الشِي لْصْرَا. ¹² وْتْلَّمُوا مْعَ الشْيُوخْ، وْتْشَاوْرُوا فْهَادْ الشِي، وْرْشَاوْ الْعَسْكَرْ بَدْرَاهَمْ بَزَّافْ ¹³ وْڤَالُولْهُمْ: «ڤُولُوا بَلِّى التْلاَمَذْ تَاعَهْ جَاوْ فَاللَّيلْ خَوْنُوهْ وَحْنَا رَاڤْدِينْ. ¹⁴ وْ إِلاَ عْرَفْ الْحَاكُمْ حْنَا غَادِي نَقَنْعُوهْ، وْمَا غَادِي يْصْرَالْكُمْ حَتَّى حَاجَة». ¹⁵ وْدَّاوْ العَسَّسَا الْدَرَاهَمْ وْ دَارُو كِمَا وَصَّاوْهُمْ، وَتَنْشَرْ الخْبَرْ عَنْدْ لِهُودْ حَتَّى هَادْ الْيُومْ. ¹⁶ وْالطْنَاعْشْ التْلْمِيذْ رَاحُوا لَلْجْلِيلْ لَجْبَلْ، كِمَا وَصَّاهُمْ يَسُوعْ. ¹⁷ وْغِيرْ شَافُوهْ سَجْدُوا لَهْ، وْبَصَّحْ وَحْدِينْ مَنْهُمْ شَكُّوا. ¹⁸ يَسُوعْ وْتْكَلَّمْ مْعَاهُمْ وْڤَالْ:«اللَّهْ عْطَانِي ڤَاعْ السُلْطَة فِي السْمَا وْعْلَى اللَرْضْ، ¹⁹ رُوحُوا وْ تَلْمْذُهُمْ جمِيْع النَاسْ وْعمدُوهُمْ بإسْم الأَب والإبن والرُّحْ القُدُسْ ²⁰ وْعَلْمُوهُمْ بَاشْ إِيدِيرُوا بْڤَاعْ الدَاكْشِي اللِّي وْصِيتْكُمْ بِيهْ. وْغَادِي نْكُونْ مْعَاكُمْ حَتَّى اللَّخَرْ تَاعْ الزْمَانْ». آمِينَ.