¹Paulo, Jamoor pa Yesu Christo luwo kwong mito pa Were kodi Timothe omin wan, ²Ri jomaleng kodi wutumego majogenere i Kristo majonitye Kolosia: Wor obedi ri win, kodi siem, woki bongi Were Bawan kodi Ruoth Yesu Christo. ³Wamiyo foyo ri ma Ba Ruoth Yesu Kristo ka wa kwayo ri win hongo jie,⁴Woki indelo mawabino wawinjo kwong yeyo mewin i Kristo Yesu, kodi mar mawinigine ri jomaleng jie, ⁵Ru geno ma okan riwin i polo, mabende wityeko winjo i wac maradyeri ma njir; ⁶Wac ago ma otyeko tundo ri win, paka bende ri piny gipi; aka kelo ranyak, paka bende nitye i win bende wok i ndelo mawibino wiwinjo iye, aka towingeyo kisa pa Were i yeyo.⁷Paka Epafras jatic kanyaciel gi wan m'omare bende ofuonjo win, go obedo jacwayo pa Kristo ma ogenere; ⁸Go bende amuwaco ri wan mar mewin i Cuny Maleng.⁹Aka ro atonga me bende, wok indelo mawawinjo iye, waki keng mawaki kwayo ri win, kodi kigomba ni wipong gi ng'eyo mito Pere i ryeko jie kodi nia'ng manya cuny cuny; ¹⁰Ngeyi wi nyali wotho woth ma ripo aka masangala Ruoth. K'onyo nyak i kis tic maber, aka wimedo dongo ing'eyo ma pa Were;¹¹Kanyo wimedere medi gi mbaka i dwong ma nyalo pere, luwo kwong meni pere madidwong, i dic ic gi ciro kanyaciel kodi kisangala; ¹²Ka wamiyo foyo ri Baa wan, ma oloko wan joma ripo limo giralunja ma leero kanyaciel kodi jomaleng.¹³Ma ogonyo wan kwong men ma mudho to rwako wan donjo i ker pa Wode m'omaro: ¹⁴Aka i Woude me ama wanigi both luwo i remo pere, kiri gi cwak ma gimareco:¹⁵Go amubedo cal manenere ma pa Were makinenere awang, kendo kayo ma cwec pa Were jie. ¹⁶Rupiri go am'ocweyo gimocwey gye manitye i polo kodi ipiny, manenere kodi makinenere, obedi kombe, adhumbe, ker, kosa meni: gimoro jie ocweyere gigo aka ri go. ¹⁷Aka go oyido nitye mafwodi gimoro jie kobedo, aka luwo i go ama gimanitye jie nitye.¹⁸AKa go awic del, m'obedo kanisa: go aya cako, kayo kwong j'omotho, ngeyi go onwangi telo ma gimoro jie. ¹⁹Piri osiemo Baa wan ni i Kristo ama gimoro jie opong iye; ²⁰Aka munyo go ocowo kelo siem luwo kwong remoma musalaba Pere, luwo igo wokel dwoko wat ma gimoro jie bonge; aka luwo igo adyeri awaco, obedi gikipiny ma ipiny kosa ma ipolo.²¹Aka win ma oido wibedo jopath kendo jokwor i paro mewin ro reco, to pama wicowo yiko wat. ²²I del pere luwo i tho, ngeyi go wokeli win ro wang Were manyo wileng, mawingoye g'apuse kosa kama mito atwenya moro jie. ²³Ka winomedere i yeyo manyo wicwiny aka wiridhere, ma wiki eye woko igeno ma njiri ma wicowo winjo, m'otiti ri cwec jie manitye i pendi polo, ma an Paulo olokan jacwayo mere.²⁴Ma pama asangala i candirok paran ri win, aka ayere gi litho jie ma pama Kristo i del paran, ro del pere, mobedo Kanisa. ²⁵Am'omiyo olokan jacwayo i hongo pa Were ma go omiyan ri win, pongo wac pa Were. ²⁶Aka nyalingling m'opondo opokere, to pama oyawi ri jomaleng pere. ²⁷Ma Were omiyo jo ng'eyo ng'an'ngo ma dwong ma nyalingling me ri jopath, aya Kristo i win, m'obedo geno ma dwong.²⁸Ama watito, kanyo wagwoko dhano moro jie, aka wafonjo ji jie irieko jie, nyaka waloki dhano jie ngat'oripo i Kristo Yesu. ²⁹Ma atiyo iye gimbaka, gi kinen paka tic Pere nitye, matimere i an gi meni swa.

¹Amito wingey lweny m'anigine ri win, kodi ri ji ma Lawodesiya, kodi ri ji jie mafuodi jok'onenan idel. ²Atonga paran obedo ni miseni wopong i cuny jo aka ngeyi jowobedi kanyaciel i mar. Amito ni jolim silwany ma niang wac kicutho, meno aka jobino ngeyo nyalingling pa Were, m'obedo Kristo won gipi. ³I go ama sandukere marieko kodi ning wac okanere iye.⁴Awaco ri win ama ngeyi wikiri wiweyi moro owondi win gi dhok mamit. ⁵Kole kad'angoye gi win i del, jie fuodi anitye gi win i cuny, aka asangala ka aneno cungo mewin matek kodi yeyo ma wiridho i Kristo.⁶Paka wityeko jolo Routh Kristo Yesu, wothi wini i go. ⁷Kanyo wipidhere aka wigetere win i go, bende wiridhi yeyo, paka ofonji win, kanyo i hongo jie winyay munyo kendo wifoyo Were.⁸Gwokere wini, ngeyi moro wokiri owondi win luwo i ryeko ryeko manya piny gi twodo mungoye, mamakere gi kolokolo fonji ma tim pa ji, meno ma nya thenethene ma piny, aka makobedo ma woki bongi Kristo. ⁹Kole cowe gi gike ma wicWere gipi opongere kwong Kristo.¹⁰Aka win wiromo aroma kare kicutho i Kristo, ma obedo wic adhumbe kodi meni jie. ¹¹Ma bende i go wilimo thumirok makobedo thumirok ma itimo gi cingi jo, kanyo wilunyo woko del ma reco ma manya del luwo kwom ithumirok pa Kristo. ¹²Kole munyo wilimo batisimo, meno kareno oyiki win gi Kristo, aka bende wicerino gi go ro yeyo mewin i meni nyalo pa Were, m'ocerino go kwong jomotho.¹³Kad'obedi ni con oyido witho i del ro reco mewin odoko rupiri oyido wikilimo thumirok madel, to Were omiyo win kwo kanyaciel gi Kristo, munyo otyeko cwako reco mewin jie. ¹⁴Were ogolo woko randiko moro jie manyacik ma dolweny gi wan, ma oyido kiyere gi wan, to kwanyo woko munyo oguro gino kwong musalaba. ¹⁵Aka Kristo omayo woko jor'adhumbe gi rwodhe macuny meni, to thango jo i leero munyo nyutho loyo ma go olimo kwong jo.¹⁶Ri ameno, wikiri wiyeyi moro opusa win kwong gima icamo, kosa gir'amadha, kosa gima mako kwong kalima mandelo madwong, kosa ma dwe manyien kosa ndelo ma sabato. ¹⁷Gikipiny no jie obedo nyaka tipo pa gikipiny m'oido labino to gim'aradyeri won nwangere i Kristo.¹⁸Wikiri wiyeyi moro womayi win kemba mewin kanyo ridhere mito neno gikipiny ma fuodi k'oneno to limo kwoto nono ro ngico pere manyadhano . Dhano ma pameno pakirok am'opong kwonge, aka paro pere obedo manyadhano. ¹⁹Go otieko weyo cwirok kwong Kristo, mobedo Jatel mowan, ma kwong go ama del pere gi pi, ma fuce oriwo kanyaciel to makere, nwangiye meni madongo paka Were mito ni wodongi.²⁰K'ineni witieko tho gi Kristo aka okethi win i siem munyo wieye woko kwong cung madhumo polo gi piny, r'ango mafuodi kwo mewin bedo paka apa ji ma piny me? Rango ma wikuro cik masirisiri paka ni: ²¹"Wikiri wi maki gime, wikiri wibil ginica, wikiri wigeyi meca?" ²²Kole gikipiny me jie bedo gim'ongoye kony tekin oor jo. Jobedo nyaka cik ma dhano am'omito aka ofonjo. ²³Ato kiti cik no nenere pa girieko i lamo jomalaika m'otiek cuko gine jo, kodi bwonirok ma rendirok, gi cando del kwong gin, to iyadyeri jongoye kodi kony i dhumo awanya madel.

¹Ka inen wibedo jocerino gi Christo, dwar gikipiny manitie malo. Kama Christo i cing maracuc pa Were. ²Kethi win kigomba mewin i gikiiny manitie malo, kiweno gikipiny ma i piny. ³Rupiri witieko tho, aka kwo mewin okani gi Christo i Were. ⁴I hongo ma Christo, ma obedo kwo mawan, bino nyuthere i leero, gi kenyo win bende wibino wok ileero kanyaciel kodi go i dwong.⁵Ri ameno, chudhi win kicutho acel acel makitipa madel mewin mafodi nitye ipiny, meno paka cot, koco, mito ma cilo, kigomba marac, kodi woro m'obedo lamo cal. ⁶Rupiri ru gikipiny acel me won, nge pa Were bino podho kwom nyithindhi cay. ⁷Paka kole win bende con ca yido wiwotho munyo fodi wikwo i tim ago no. ⁸To onyo pama me, lunyi win gikipiny ma cale gama, nge, derino, paro timo marac, anyieka nyingi, yet gi luwirok kicaro jie kwanyi win woko idhoki win.⁹Wikiri wiwondo kendo wad win, kole paka witieko lunyo woko jal ma otii ca kanyaciel gi tic pere jie. ¹⁰Aka nyo witieko ruko jal manyien, meno ma nyienere luwo i ngeyo ma cal pa ngato mocweyo go. ¹¹Kenyo ma ongoye rapok idier Jopayelen, kosa Joyuda, Jomothumere kosa Majokothumere, Jopath, Jolul, Angeca kosa Jomanitye thwolo; to Christo aya jie aka nitye i jojie.¹²Ri amen, paka wibedo jomoyer pa Were, Majoleng aka Momare, ruki win kia ma'radundo, kisa ma miyo kony, bwowirok i paro, mwolo kodi mako moth. ¹³Kanyo widiyo cuny win gi nyapo pa wad win, wicwakere kendo ka nyatoro obedi gi gut moro gi nyawote, kiri paka Christo obin'ocwako win, cwaki win bende. ¹⁴Aka ma loyo me jie, ruki win mar, ma obedo ariwa ma bero makicutho.¹⁵Kendo weyi siem pa Were odhumi i cuny win, kole meno aya atonga ma lwongo mewin i del acel; aka bedi win ka wimiyo foyo. ¹⁶Wey wac pa Christo wobedi i iy win ithutho, i rieko jie, i fuonji, itiro jowoti win, i wero were ma zabuli, kodi wer ma cuny, kanyo wiwero gi neema icuny win ri Routh. ¹⁷Aka gimogo jie mawinotim, i wac kosa i tim, timi win jie no i nyingi Routh Yesu, kanyo wimiyo foyo ri Were Ba'wn luwo kwom go.¹⁸Mon, bwowere win ri cwo mewin wegi, paka ripere i Routh. ¹⁹Cwo mar win mon mewin, aka wikiri wi oro nge gi kecho. ²⁰Nyithindho, winji win jonywol mewin ikis gimoro jie, rupiri gime siemo Routh. ²¹Bachere, wikiri witugila nge inyithindho mewin, ngeyijowokiri jo joki gi win.²²Angeca, winji win ruodhe mewin i gimoro jie manya del, kiweno tiyo maber ka inenin, makubedo tica siemo wang joma neni, to tic gi cunyin acel, kanyo wiworo Were. ²³Kendo, gimogo jie ma itimo, kethi iye adundo, paka ngato matimo ri Routh to kiweno ro dhano. ²⁴Ka onyo wingeyo ni wibino lino cul ma lungi wok bongi Routh piri wicwayo ri Routh Christo. ²⁵To ngato matimo gimarac bende bino limo alima ameno won pika timo. Adyeri ongoye teyeko jo i atonga me.

¹Rodhe miy win jotic mewin gima ripere aka ma rom; kole Routh mewin bende nitie i polo.²Medere win ikwayo, munyo winitye milengela kodi medo miyo fuoyo. ³Bende kwayi win ri wan nike Were woyawi ri wan royo ma tuco wac pere ngeyi watiti nyalingling pa Kristo, m'omiyo anitye itwec. ⁴Ngeyi anyali tito ka awodho ilero paka ripere.⁵Bedi win maryek inger ma witero jono mafuodi jo koyeyo, kareno wi oro hongo mewin maber. ⁶Luwo mewin ndir jie wobedi iye wor, gi kado cumbi, nyaka wino nyal ngeyo kite ma dwoko nyatoro jie.⁷Gikipiny jie ma mako kwongan , omin wan Tikikola waco ri win, go obedo omin ma omare, ja cwayo mogenere aka jatic nyawotan iRouth. ⁸A oro go bothi win ri atonga acel ni bnde wonyali ngeyo gima wiluwo iye, aka wodiy cuny win. ⁹Kodi Onesimas, ngata ogenere aka omin m'omare, ma bende obedo acel kwong win. Jola waco ri win gikipiny je matimere.¹⁰Aristakas, ja twec nyawotan dhiro ri win moth kodi Mariko bende kodi nyakewi Barinaba (wityeko winjo mamako kwong'e; joli win go kobino bongi win) ¹¹aka Yesu mabende ilwongo ni Jusito. ma jowok ithumirok: me kende aya jotic wadan iker pa Were, aka jobedo ka jomiyan thiel madwong swa.¹²Epafras, ma obedo acl kwong win kendo jatic pa Kristo, motho win aka i hola jie riwin ikwayo ri win, ngei winyal cungo matek aka go kululu itimo mito pa Were jie. ¹³anitye gi ridho ni go tiyo gi kinen i gima mako kwong win gi jono jie manitye Lawodesia kodi Hirapolis. ¹⁴Luka, jamilerwa momare, gi Demas, jodhiro ri win moth.¹⁵Dhiriwin moth ri jowotiwan majunitie Lawodesia gi ri Nifas kodi kitipa pa jom'oyeyo ma joromo i ot pere. ¹⁶Aka baliwa kinen otyeki kisoma idyeri win, neni win bende ni wosoma ro kanisa manitie Lawodesia bende. ¹⁷Aka waci win ri Arukupas ni wotim tic pa Routh ma omiy go kir igike.¹⁸Wac ma cowe me andiko gi cingan won, an a Paulo. Poy win lijegere twec paran. Wor pa Ruoth obedi kodi win.

¹Paulo, Silvano kodi Timothewo ri kanisa ma Thesalonika manitie i Were Baba kodi i Rwoth Yesu Kristo; Wor wobedi ri win kodi siem, wok bongi Were Bawan, kodi Rwoth Yesu Kristo.²Wafwoyo Were noknok ri wijoje, ka watuco win i kwayo mawan; ³Ka wapoyo tic mewin ma yeyo ma wakikeng’, kodi tim ma mar, kodi diyo cuny mewin i Rwoth Yesu Kristo, ruwang’ Were Bawan;⁴Kareno wang’eyo, wutimere momar, paka Were odiero win. ⁵Ato njir mawan kobino ri win nyaka i wac kende, to obino i men kodi i Cuny Maleng’ gi ridho paka wibende wing’eyo nger ji ma wabedo i dier win ri bero mewin.⁶To win wilokere jomaluwo wan kodi Rwoth, munyo wijolo wac i candirok madit, gi siem pa Cuny Maleng’: ⁷Ng’ey wibedo giranena ri ji jie majoyeyo i Masedonia kodi Akaya.⁸To wac pa Rwoth owok bongi win ki i Masedonia kodi Akaya kende, to i kisi kamoro yeyo mewin i Were onyay wiloka ma wakidoki wanyal waco gimoro: ⁹To jowegi jonyutho wan yo madonjo bongi win kodi paka wiwire bongi Were wok i lamo cal bino tic ri Were makwo aka maradier; ¹⁰k'onyo wakuro Wode wok i polo mocerino wok i tho, obedo yesu, m'ogonyo wan kwong nge ma bino.

¹Kole wiwegi wutumego, wing'eyo, ni donjo mawan bongi win kobino obedo ma nono. ²To kiri rumacen munyo watieko limo acanda cien mere ca, aka t'itimo riwan tim manya wickwot, paka wingeyo maber, yu piny pa Jofilipo, wabino wabedo gi miseni i Were mawan munyo wa tito ri win njir pa Were idier aruwa kweth.³Rupiri fonji mwan kobin obedo ma nyatwodo, kadanende ma koco, kosa kada marendirok: ⁴To paka Were oyeyo ni watim, munyo igeno pere oketho njir pere icingi wan, ameno bende won apaka bende watito; ki kanyo wa sieemo Ji, to kawasiemo Were, meno ma temo cuny wan.⁵Rupiri wakibino waoro dhok ma mit, paka bende wingeyo, kosa kada tim maráwanya, Were won aya janeno mawan: ⁶Kendo wakibino wayenyo apaka pa ji, kadabedi amewin kosa apa joman, i hola madowabedi peko ri win paka jomoor pa Christo.⁷To wabino wamwole idyeri win, kiri paka japiidi dwongo nyithidhe: ⁸To wabedo gi kine gi kigomba ro win, aka wayikere ayika miyo win kikende njir pa Were, to bende kiri adundo mowan won, rupiri oido wibedo gima kacuny wan swa. ⁹To kole wipoyo maber wutumego, yindin kodi ii gitic: mawatiyo wor g'odieceng, rupiri wakimito doko bedo mugugu ri win, wabin watito ri win njir pa Were.¹⁰Wiwegi wibedo joneno, kiri Were bende, paka gilen'go kodi tiro aka mongoye apuse, wateere ruwang win wijomoyeyo. ¹¹Paka wing'eyo kit ma waluwo kendo wadiyo cuny win aka wamiyo cik ri kis acel kwom win, paka ba nyathindho tero nyithindo pere. ¹²Ngeyi nyaka winyal wotho paka ripo ri Were m'olwong'o win i ker gi dwong pere.¹³Kole ro atonga me wafoyo Were m'ongo'cok, piri i hongo mawibino wijolo wac pa Were mawibino wiwinjo wok bongi wan, wikibin wijolo wac no pa wac ma pa dhano, to paka adieri, aka wac pa Were won, aka meno aya wac onyo me tiyo gi men i win ma wiyeyo.¹⁴Piri win wutumego, wibin wilokere jomaluwo kanisin pa Were ma i piny Yudeya jonitye i Christo Yesu: rupiri win bende wilimo acanda wok bongi jopiny mewin won kiri paka wilimo acanda icingi Joyudeya: ¹⁵Jono no majubin Joneko Routh Yesu, aka ki go kende to kiri jonabi pa jo wegi, aka bende jonono tyendi wan; doko jokisiem Were, aka jokiyere gi dhano mogo jie. ¹⁶Jokiyey wan luwo gi jopath ngeyi jolim both, aka kajotimo ama, jopongo reco paco kis ndelo: aka nge nge pa Were bino oy kwong jo kiri igike.¹⁷To wutumgo, wan paka obin okwany wan woko idyeri win ihongo macek, mabende obedo nyaka manyadel to ki icuny. Wadong kanyo wariwin mongoye ol neno ni waneniye wang win doko gi kigomba mathoth. ¹⁸Ma adyeri do wabin bongi win, kiri an Paulo won, to makidiciel kosa dirio to Sitani obin ogengo wan. ¹⁹To, geno mawan aya ang'o? kosa siem mawan, kadanende sangaria mawan ma siemirok? Aneni win, manago kobedo win wegi rowang Roudhiwan Yesu Christo idwoko pere. ²⁰Kole wina aya dwong' gi siem mawan.

¹Magikenyo wabino wadiero ni wowey waye cien kendiwan yu Asene munyo waneno ni wakinyal ciro. ²Towadhiro Timothe, omin wan kendo jacwayo pa Were, mabende obedo jatic kanyaciel kodiwan i njir pa Christo, ngeyi go onyal ridho win, doko odiy cuny win mako kwom yeyo mewin. ³Ngeyi kada acel kwom win wokir odhire ro tekoteko mawilimo: kole wiwegi wingeyo ni meno aya atonga ma yer mowan.⁴Rupiri adyeri, mafodi ido wanitie gi win, wabino wawaco ri win con no, ni ripere waluwi iyacanda; kiri paka obino otundo to timere paka bende wing'eyo. ⁵Aka ro atonga me, munyo otundo kama oido doko akinyal kuro, adhiro dhano obin oloki ran cungo mewin iyeyo, ma okiri obedi ni i kit moro, jaratem otieko temo win, aka nyo tic gi lwenyo mowan otho gaya.⁶To onyo minyo Timothe owok both win todwoko both wan, okelo ri wan wac maber mamako kwom yeyo mewinkodi tim mar, kodi paka winigi poyo maber mamako kwom wan kis ndelo, paka bende winigi kigomba madwong ma neno wan wan kiri paka bende wagomba neno win: ⁷Ri ameno wutumego, cuny wan odire mako kwom win idyer acanda kodi litho mawaluwo iye ro yeyo mewin.⁸Aka paka waluwo ama won, wanigi kwo, ka ineni wicungo matek i Ruoth. ⁹To kit foyo ang'o mawanomiy Were doko ri win, ro siem me jie mawa siemere giye kawang kawan'g win ruwang Were; ¹⁰Wor g'odiocen'g wakwayo ithotho ni wanyal neno ye wan'g wi, ngeyi wa cudhi gino mafodi kotundo ikare i yeyo mewin.¹¹Onyo Were won, kodi Bawan, kiri gi Routhiwan Yesu Christo, wotel yo mawan tundo bongi win. ¹²Kendo Routh onyay win ni winyal medere i mar ri jowot win, kiri bende ri ji jie, kiri paka wanbende wanigi mar ri win. ¹³Ni i gike, Routh oridhi cuny win m'ongoye apuse i lengo ruwan'g Were, mabende Bawan, i bino pa Routh Yesu Christo gi jomalen'g jie.

¹Medo iwiy meno, wakwayo win wutumego, aka doko wa poyo win luwo i Routh Yesu, ni paka wibino wijolo wok both wan, kite ma ber wiwothi iye gibende siemo Were, ameno won apika repere wimedere ameda. ²Kole win'geyo tim or ma wabino wamiyo win luwo i Ruoth Yesu.³To me aya aya mito pa Were, aka ama yeko wan, ni wiripere kecere kwom cot: ⁴Ni kis acel kwom win ripere ni ongey kit ma onywom del pere i yek kodi wor; ⁵Kiweno i kigomba ma wangdel, kiri paka jopath majokuya Were jotimo iye. ⁶Ni ongoye kada acel ma ohanga to kalo paka ripere maromo tokwalo omin i yo mogo jie: rupiri Routh jacul banja magima cale ameno, kiri paka wabino wagwoko win bende towa tuco ri win.⁷Rupiri Were kolon'go wan nbino donjo ikoco, to ilengo. ⁸Aka ameno won apaka ng'ato macayo, kicay dhano, to cayo Were won ma omiyo wan Cuny pere Maleng.⁹To mamako kwom mar manya wutumego, doko kiripi ni adoko andiki riwin, rupiri Were won fonjo win kit maber wimar iye jowot win. ¹⁰Aka adieri witimo ameno ri wutumego jie majonitie Masedonia: to wakwayo win ni wimedere ameda ameno. ¹¹Aka fonjere win bedo ling, aka kethi wa'ngin i tic perin, aka tiy atiya gi cingin won paka bende wabin wa oro win; ¹²Ngeyi winyal wotho i adyeri rowang jono mafodi jonitye woko, aka ngeyi bende wikiri wicandi gimogo jie.¹³To akinyal weyo win dong ma wingoye gi ng'eyo mamako kwom jom'onindo, ni wikiri wikudere gi ywak paka joman majingoye gi geno. ¹⁴Rupiri ka wayeyo ni Yesu otho doko tocerino kendo, kole i yo acel won meno bende, jono majonindo i Yesu, Were bino dwoko jo kanyaciel gi go. ¹⁵Aka wawaco ri win ama luwo i wac pa Ruoth, ngeyi wan mafodi wanitie tundo idwoko pa Routh, wakugeng jono majonindo.¹⁶Rupiri Routh won bino loro wok ipolo gi koko, gi dwondi malaika madwong, kodi furumbeta pa Were; aka joma jotho i Christo jolatelo cerino. ¹⁷Aka nyaka wan ma fodi wakwo aka wadong, waleridhere to wa ay romo gi jo ipondeponde, kidho romo gi Routh i koyo: aka ameno apika waledong kodi Routh cil gi cil. ¹⁸Ri ameno diy win cuny jowoti win gi wac me.

¹To mamako kwom sawa gi hola wutumego, ongoye atonga madomiy andiki riwin amanago. ²Piri wiwegi wingeyo kicutho ni ndelo pa Routh adieri bino pa jakwo dier wor. ³Rupiri i hongo ma jonowaci iye ni, "siem siem kendo bero"; gikenyo reyrok bino podho kwom jo arwat, kiri paka litho ojiwo podho kwom dhako manigi iye; aka jokurudhere.⁴To win wutumego, win wikinitye icolo, ngeyi ndelo no oyombi win pa jakwo. ⁵Wijojie wibedo nyithindhi leero, aka nyidhindho ma odioceng: wakibedo jocolo kadanende jo mudho. ⁶Ri ameno, wakiri wanindi wini, paka jomegi; to wa thangi wang wan aka wabedi milengela. ⁷Rupiri jomanindo jonindo wor aka jomamer bende jomer wor.⁸To weyi wan mawabedo jor'odioceng, wabedi milengela, kanyo waruko giraruka ma kor jo meno ma yeyo, kodi mar; kodi junga ma geno ma both. ⁹Kole Were koyero wan ri derino ma nge, to ni walim both luwo kwom Ruodhiwan Yesu Christo. ¹⁰M'obino otho ri wan, nyaka ngey ni kada obdi ni wanindo kosa wakwo, wanyal kwo kanyaciel gi go. ¹¹Aka riameno diyere win cuny kanyacel, kendo kis nyatoro wogeti nyawote, kiri paka witimo no won.¹²Aka wakwayo win, wutumego, wi'ngeyi jono majo yindin gi tic idier win, aka majotelo win i Ruoth kendo bende jo gwoko win. ¹³Ni winyal miyo jo wor ma malo swa i mar ro ato'nga tic pajo. Aka bende bedi win i siem idier wiwegi. ¹⁴Kendo wapoyo win wutumego, gwoki win jono majokidhumere, diy win cuny jomalwor, konyi win jomanyap, bedi win gi mako moth gi ji jie.¹⁵Neni win ni ongoye ngata culo reco gi reco ri dhano mogo jie; to neni win ni wiluwo bero, idier wiwegi kodi bende ri ji jie. ¹⁶Siemere wini kisandelo. ¹⁷Kway win mongoye cok. ¹⁸Ikisa gimoro, miy win foyo: kole me aya mito pa Were i Christo Yesu mako kwom win.¹⁹Wikiri wineki derino pa Cuny Maleng. ²⁰Wikiri wicay dhonabi. ²¹Tieki win gikipiny jie. Maki win mateko gino meno maber. ²²Kecere win kwom gimoro jie manigi cal ma reco.²³Aka Were ma siem no won otyeki win gi kolo.; aka akwayo ni cuny win gi adundo mewin kiri gi del mewin gipi Were wokuri onyal dong mongoye apuse tundo atunda i bino pa Ruodhiwan Yesu Christo. ²⁴Go no m'olwo'ngo win ogenere, aka bende la timo ameno.²⁵Wutumego, kway win ri wan. ²⁶Moth win wutumego jie gi apodha kor. ²⁷Amiyo win cik luwo i Ruoth ni baluwa me wosoma ri wutumego maleng jie. ²⁸Neema pa Ruodhiwan Yesu Christo wobedi kodi win. Amen.

¹Paulo, kedi , Silvanos kod i Timotheo, ri kanisa pa Jothesalonika i Were Ba'wan kodi Rwoth Yesu Christo ²Wor obedi ri win , kodi siem , wok bongi Were Ba wan gi Rwoth Yesu Christo³Wanitye gi kineni ma miyo foyo ri Were ri win, Wutumego paka ripere, rupiri yeyo mewin dongo gi derino, aka mar pa kis acel kwong win ri nyawote bende medere ameda ⁴Ma onyo kiri wan won waker gi win i kanisin ps Were ru kudirok mewin kodi yeyo mawikuro i achanda kodi teko teko ma wi chiro ⁵Ma obedo adei mathin motyeko thangere kwong thumo banja pa Were , ngeyi okwan win paka jono ma joripo Limo ker pa Were, mabende obedo atoga ma omiyo siem wilimo acanda⁶Paka obendo gi lengo ri Were chulo joma jochnado win no bende gi teko ⁷Giri win mawilimo achanda kanyachiel gi wan, wabino limo iywomirok ka Rwoth Yesu la menyere wok ipolo gi malaikin majomeni ⁸i mach ma odheth ka onyogo chulo kwor kwong Jono majokuya Were, kodi jono majokwero winjo njir pa Rwothwan Yesu Christo⁹a julalimo giracula ma reyrok macil gi cil wok ruwang Rwoth gi didwong ma mani Pere ¹⁰i ndelo ma go la bino limo dwong i juma oyeyo Pere , doko ogombere ijono jye ma joyeyo (piri bijulizi mawan idyer win wobin oyey) i ndelo no¹¹Momiyo bende wakwanyo ri win ma ongoye gike, ni Were mawan okwan win paka jono ma joripo ri Lwong pere aka kendo ochul mito abero pere jye gi kare. kodi tic maayeyo gi men. ¹²Ngeyi nyingi Rwot Yesu Christo womiy dwong iy win aka win bende i go , luwo kwong wor pa Were maawan kodi Rwoth Yesu Christo.

¹Onyo wakwayo win wutumego luwo kwom dwoko pa pa Ruodhiwan Yesu Christo, kodi cokirok mowan kanyakiel kidho bonge. ²Ni wikiri wiyengere mayot-yot iparo mewin, kada nende obedi cuny moro, kosa iwac mawinowinji, kosa baliwa manocale pageni owoki bongiwan kanuwaci ri win ni ndelo pa Christo otundo.³Wikiri wiyey moro owondi win i nger mogo jie: rupiri ndelo no kibino tundo kende ka podho otyeki peno, aka jal ma reco no odhangi kamaler, meno m'obedo wodi reirok. ⁴Go no ma piemo aka won tingere malo loyo kisa gima ilwongo ni Were, kosa gimogo jie ma ilamo; aka nyaka go bino thundhere i Kalamo pa Were, kanyo go nyuthere ni go aya Were.⁵Wikipoyi ni i hola ma fodi anitye gi win abino awaco ri win gikipiny me? ⁶And onyo ama wangeyo gima fodi galo go ngeyi ni othangi go kamaler i sawa m'otire. ⁷Rupiri nyalingling ma reco otyeko kiri cako tic kiri onyo me: nyaka ni ngata pama me miyo thwolo la miyo thwolo, tundo i ndelo ma ilakwanyo woko go i yo.⁸Aka gi kenyo nya Jareco no ibino thango go, ma Ruoth bino reyo woko gi luya ma woki idhoke, aka bino nginyo go gi derino leero ma bino pere. ⁹Kiri go ca ma bino pere labedo rumacien ka Sitaani tiyo gi meni kodi ranyuth kodi giraura ma twodo ¹⁰Aka gi nyalotwodo jie ma ngotirok manitie ijono majorere; rupiri jokujolo mar ma adyeri, ngeyi nyaka jolim both.¹¹Aka ro atonga me, Were bino dhiro kigayagaya idyer jo, ngeyi nyaka joyeyi twodo. ¹²Ngeyi banja oloy jono majokoyeyo adyeri, to josiemere i ngotiro.¹³To wan waripere bedo kanyo wamiyo foyo kis hola ri Were ru win wutumego momare i Routh, rupiri Were wok awok i cakirok obin oyero win ri bulokozi luwo kwom tiek ma pa Cuny Maleng kodi yeyo adyeri. ¹⁴Magikenyo go obin olwongo win luwo kwom njir mowan, tundo win limo didwong ma pa Roudhiwan Yesu Christo. ¹⁵Ri ameno wutumego, cung win matek, aka ridhi win fonji gi tim ma ofonji win, obedi luwo i wac awinja, kosa ndiko baluwa ma wadhiro ri win.¹⁶Onyo ama, Routhiwan Yesu Christo won kiri kodi Were ma Bawan m'omaro wan, kendo omiyo ngono macil gicil, kodi geno maber luwo i neema. ¹⁷Ere piel win cuny win, bende cwiny win i kis tic maber kendo tiy win.

¹Macowe, wutumego, kwayi ri wan win, ngeyi wac pa Routh onyal wotho ithwolo, aka kendo wolim dwon kir paka timere idyer win. ²Aka bende ni walim gonyirok i idyer ji masisiri mareco; rupiri kubedo ni kis dhano nigi yeyo. ³To Ruoth ogenere, aka go la rigdo win kendo la gengo win kwom reco.⁴Aka wanigi misen in Routh mako kwom win, ni wla timo aka wiladong ka witimo gino jie mawaciko win. ⁵Weyi Routh otel cuny win winyal donjo i mar pa Were, kodi kinen ma kuro dwoko pa Christo.⁶Onyo wamiyo win cik wutumego, inyingi Roudhiwan Yesu Christo, ni wikecere win kwom kis omin ma wotho inger makotire, aka makobedo i luwo fonji ma go olimo wok bongi wan. ⁷Kole wiwegi wingeyo yo ma br wiluwiye wan: rupiri wakibino wateere i kit makotire idier win; ⁸Paka wakibino wacamo cemo pa nyatoro mogo jie manono; to paka wabino watiyo to wayindira wor gi odiecieng, ngey wakiri wabedi peko ri kada aciel kwom win. ⁹Kiweno ni wangoye gi meni macalo gameno, to walokere gir'anena ri win ngeyi wiluw wan.¹⁰Rupiri kiri munyo wanitye gi win, wabino waciko win, ni kinen moro okwer tic, bende wokir ocemi. ¹¹Kole wawinjo ni nitye jomegi majonitye idier win majowotho i kit makotire, majokitiy kada mathi, tic pajo kigiyagiya. ¹²Onyojono meno majonitye ameno, waciko win ni wilwong jo githenge wigwoki jo luwo kwom Ruodhiwan Yesu Christo, ni jonyali bedo ling kanyo jotiyo wegi ngeyi jonyal camo cemo ma meni pajo wegi.¹³To win wutumego, wikiri wijoki i timo maber. ¹⁴Aka kineni nyatoro okwer winjo wac mawan ma luwo i baliwa me, kangasa win ngato aka wikiri wibedi iyacel gigo ngeyi wiye wokwoti. ¹⁵To kende wikiri witeri go pa jakwor, to kethi win go piny wifonji go paka omin win.¹⁶Ri ameno, Ruoth ma siem won omiy win siem kisa ndelo paka nyalere jie. Routh obedi kodi wijojie. ¹⁷An Paulo awon andiko ri win moth me gi cingan won, kole me amobedo ranyuth makis baluwa awon adhiro. ¹⁸Neema pa Routh Yesu Christo wobedi gi win jojie. Ameno.

¹Gima obedo wok i cakirok, ma wawinjo, ma waneno gi wang' wan, ma waketho wang' wan kwong'e, aka cingi wan ogeyo, ma mako kwong wac ma kwo. ²Ato wac omenyere, waneno, wabedo wajulizi, aka watito ri win kwo makirum ago, m'oido nitie gi Were Baba, aka onyo wang'eyo,³Gima waneno to wawinjo wawaco ri win, ng'ey wibedi iyacel kodi wan. Aka iyadier wanitie iyacel kodi Were Baba kodi wodi go Yewsu Kristo. ⁴Wandiko ri win gikipiny me ng'ey kisangala mewin wopong'ere.⁵Me a mikwenda ma wawinjo, ma mako kwong' go aka wawaco ri win ni Were obedo lero, aka i go ongoye mudho kicutho. ⁶Ka wawaco ni wanitie iyacel gi go, mato wawotho i mudho, meno watwodo aka wakitim giradieri. ⁷To ka wawotho i lero paka go nitie i lero, wabedo iyacel kisi dhano gi nyawote, aka remo pa Yesu Kristo Wodi go lonyo wan kwong' reco jie.⁸Ka wawaco ni wangoye gi reco meno wawondere, aka adier ongoye i wan, ⁹To ka watuco reco mawan, go ogenere aka otire ma cwako reco mawan to lonyo wan kwong' komo moro jie. ¹⁰Ka wawaco ni fwodi wakitimo reco meno waloko go jatwodo, aka wac pere ongoye i wan.

¹Nyithindho paran mathindho, andiko ri win gikipiny me ng"ey wikir witim reco. Ka moro otimo reco, wanitye gi japido manago Yesu Kristo m'otire . ²Go amobedo racow maculo banja mawan aka kimawan kende, to ma piny gi pi. ³Aka me apaka wang'eyo ni wang'eyo Were ka wawinjo or pere.⁴Ng'ata kethere ni ong'eyo Were to kuciel kiwinji or pere, obedo jatwodo aka adier ong'oye i go. ⁵To ng'ata winjo or pa Were. adier mar pa Were otundo kakare i go aka apaka wang'eyo ni wanitye i go. ⁶Dhano je mawaco ni ochwire i Were, ripo woth paka go won owotho.⁷Wutumera, akindiki ri win or manyen. Me obedo or macon mawiwinjo wok i cakirok. Or macon obedo wac ma tieko winjo wok i cakirok. ⁸Andiko ri win or manyien m'obedo adier i Kristo aka nitie i win rupir mudho kadho aka lero otieko cako liel.⁹Dhano makethere ni wotho i lero aka kuciel odak omin fodi nitie i mudho kir g'unyo ni. ¹⁰Ng'at m'omaro omin dong' i lero aka ongoye ndir ma go nyalo cer iye. ¹¹To ng'ato m'odak omin nitie i mudho aka okuya kama kidhiye, rupir mudho no oculo wang'e.¹²Andiko ri win nyithindho mathindho, rupir reco mewin ocwak ru nyingi go. ¹³Andiko ri win bacere ji rupir witieko ng'eyo go wok i cakrok. Andiko ri win yac rupir witieko loyo ng'atakoc. Andiko ri win nyithindho mathindho rupir wing'eyo Were Baba. ¹⁴Atieko ndiko ri win bacere ji rupir witieko ng'eyo Were wok i cakrok. Atieko ndiko ri win yac rupir wicwiny kendo wac pa Were nitie cuny win kendo witieko loyo ng'ata koc.¹⁵liar mar piny, kosa giki mapiny. Ka dhano mogo jie omaro piny, mar pa Baba ongoye igo. ¹⁶Rupir gik piny, awanya madel gi awanya ma wang, gi winjirok ma piny kobedo apa Baba, to ma piny. ¹⁷Aka piny eyewoko, gi winjirok mere jie: to ngat matimo ito pa were yindara ma swa.¹⁸Nyithindho mathindho, me ma cowe: aka witieko winjo ni japiem gi Kristo labino, kir pama nitie jopiem gi Kiristo labino, kir pama nitie jopiem gi Kirsto kweth, kir pama nitie jopiem gi Kristo kweth; aka meno miyo wa niangi ne meno hongo ma cowe. ¹⁹Joweyo wan, to nwango jokobedo aciel kwong wan, rupir bed jobe aciel kwong wan, mongoye kiganagana di jomemdere giwan. to jo jowok kwong wan, n'gey jowok kamaler ni nwango jo jie jo ko bedo giwan kada nithe.²⁰To win gi wir wok bong n'gata leng, aka wingeyo kis gimoro jie. ²¹Akindiko riwin rupir wikuya adier, to wingeyo, aka ni ongoye twodo mawok iyadier.²²Ere nga ma jafwondo mak n'got ma kwedewere ni yesu kubedo Kristo? Go obedo japiem gi Kristo, ma kwedere kwon Baba gi Wode. ²³N'gat mogo jie ma kwedore kwom Wode, bende onfoye gi Baba: n'gat ma yeyo wode bende nig Baba.²⁴Riame wey gimo ma wi tieko winjo wok icalcirok wodong i win. Ka gima witieko winjo wok i calcirok odong i win, wi la madere i wode kiri gi Baba. ²⁵Aka go otieko ciko wan kwo makirum. ²⁶Gime atieko ndiko ri win ma mako joma jo nyalo komo win.²⁷To wir ma watieko jolo i iyi win kendo kimiti ni dhano moro jie wofonji win kendo kuciel wir no won fonjo win kis gimoro jie kendo wir no obedo mar'adyer kendo k'obedo twodo aka kir go paka go otieko fonjo win apaka wila cwire i iy go. ²⁸Onyo pama nyithindho mathindo, dong' win i go ngeyi i ndelo ma go omenyere iye wabende wanyali bedo gi miseni kendo wiy wan wokir wokwoti ru wangé'. ²⁹Ka wing'eyo ni go obedo nga'ta leng', meno bende wing'eyo ni dhano matimo gi tiro onywole i go.

¹Neni nger mar ma Bawan ntie gine ri wan ni olwong’ wan ni nyithindho pa Were. Riameno piny okuya wan rupiri piny okuya go. ²Neni nger mar ma Bawan ntie gine ri wan ni olwong’ wan ni nyithindho pa Were. Riameno piny okuya wan rupiri piny okuya go. ³Aka nyatoro manitie gi geno igo lonyo kwo pere kadanende go olony.⁴Nyatoro jie ma timo reco meno turo cik rupiri reco obedo turo cik. ⁵Aka wang’eyo ni go obino kwanyo woko reco mawan: aka go bureco. ⁶Aka ng’ata oridhere i go kitim reco: To ng’ata timo reco fwodi koneno go, odoko kuya go.⁷Nyithidho paran, ongoye dhano wondo win: Ng’ata timo gimotire, meno otire paka Yesu won. ⁸Ng’ata timo reco obedo apa jwogi; rupiri jwogi jareco wok con. Ri atong’a no Wodi Were obino nyeko tic pa jwogi.⁹Ng’ata onywole i Were odoko kitim reco: rupir kodhi pere nitie i go aka kitim reco rupir go obedo anywola pa Were. ¹⁰I gime ama nyithindho pa Were nenere iye paka jopokere gi nyithindho pa jwogi: ng’ata kitim gimotire kosa ng’ata odak omin kobedo apa Were.¹¹Me a wac ma wiwinjo wok i cakirok ni waripo marere. ¹²Ki paka Kain ma ru tim pere marac ma nyajwogi jwogi omako nyieko toneko omin ru tic pere maber.¹³Wutumere, wikiri wibedi gi dhier ka piny odak win. ¹⁴Wang’eyo ni watieko wok i tho watundo i kwo, rupir wamaro wutimin wan. Ng’ata odak omin meno nitie i tho. ¹⁵Ng’ata odak omin meno janek; aka wang’eyo ni ongoye janek ma ladonjo i kwo makirum.¹⁶Me apaka waniang’ kwong’ mar pa Were, rupir omiyo kwo pere ri wan: aka wabende waripo miyo kwo mawan ri wutimere. ¹⁷To ng’ata nitie gi gikiny ma piny me, to neno omin nitie i mito, to kwero mako kisa gine, onyo mar pa Were nitie kune i go? ¹⁸Nyithindho paran, wakir wamar ji gi wac, kosa luwo kende: to i tim kodi adieri bende.¹⁹Aka me apaka wang’eyo ni wabedo joradieri, aka walaridho i cuny wan ruwang’ go. ²⁰To ka cuny wan thumo ri wan banja, Were dwong’ loyo cuny wan aka ong’eyo kisi gimoro. ²¹Jomomare, k’inen cuny wan kithum ri wan banja wabedo gi misen ruwang’ Were. ²²Ameno, gimoro jie ma wakwayo walanwang’o wok bonge rupir wakuro cik pere aka watimo gimasangala go.²³To me a cik pere ni wayey i nyingi nyath pereYesu Kristo aka wamarere paka cik pere Waco. ²⁴Aka jomakuro cik pere jobedo i go aka go bende bedo i jo. Me apaka wang’eyo ni go nitie i wan, luwo kwong Cuny Maleng’ m’omiyo wan.

¹Jomomare wikiri wiyey chuny moro jie, to temi win cuny no winiang' ka jowok bongi Were - rupir jofwonji matwodo jotieko donjo i piny. ²Me a nger ma wanyalo ng'eyo gine Cuny pa Were - cuny moro jie ma tuco ni Yesu Kristo obino i del obedo apa Were, ³aka cuny moro jie ma kiyey ni Yesu Kristo obino i del kobedo apa Were. Meno obedo cuny mapiemo gi Kristo, ma wiwinjo ni labino, aka pama won me nitie i piny⁴To win wibedo apa Were, nyithindho paran, aka witieko nyalo jo, rupiri ng'ata nitie i win dwong' loyo ng'ata nitie i piny. ⁵Jo jobedo apa piny, riameno gima jowaco obedo gima wok i piny, aka ji ma piny winjo jo. ⁶Wan wabedo apa Were, ng'ata ong'eyo Were winjo wan. Ng'ata kubedo apa were kiwinji wan. Me apaka wang'eyo cuny maradier kodi man mokom.⁷Jowotiwan momare, wey wamarere win, rupiri mar wok bongi Were, aka nyatoro jie ma maro nyawote meno onywole gi Were aka ong'eyo Were. ⁸Ng'ata kimarnyawote meno kuya Were, rupir Were obedo mar.⁹Rugime, mar pa Were omenyere ri wan rupiri Were odhiro Wode acel g'acel i piny aka ng'ey wanyal kwo ru go. ¹⁰I mar me, ki ni wamaro Were, to ni go omaro wan to dhiro wode paka racow ma reco mawan.¹¹Jompomare, kinen Were omaro wan, wabende waripo marere. ¹²Ongoye ng'ata otieko neno Were i hola moro jie. Ka wamarere Were bedo i wan, aka mar pere medere dongo i wan. ¹³Me apaka wang'eyo ni wanitie i go aka go bende i wan, rupir go ofudo ri wan cuny pere. ¹⁴Aka bende watieko neno to waridho ni Were Baba odhiro wode bedo Jaboth pa piny,¹⁵Ng'ata tuco ni Yesu obedo Wodi Were, Were bedo i go aka go bende i Were. ¹⁶Aka bende, watieko ng'eyo to wayeyo mar ma Were nigine ri wan, Were obedo mar, aka ng'ata nitie i mar nitie i Were, aka Were nitie i go.¹⁷Ru gime, mar mawan onyo olok motire i dier wan, aka ng'ey wabedi gi misen i ndelo ma thumo banja, rupir paka go nitie apaka wan bende i piny ka. ¹⁸Ongoye lworo i mar, Kucel, mar motire riemo woko lworo, rupir lworo nitie iye giracula. Aka ng'atalwor meno fwodi kulok go motire i mar.¹⁹Wamaro go rupiri go ama otelo maro wan. ²⁰Ka nyatoro waco ni omaro Were, mato kere odak omin, meno go jatwodo. Rupiri ng'ata komaro omin, ma go neno, kinyal maro Were ma go fwodi koneno. ²¹Kendo, me a or ma wanwang'o wok bongi go: Ng'ata omaro Were bende ripo maro omin go won.

¹Dhano je ma yeyo ni Yesu obedo Kristo onywole i Were, aka ng'ata omaro ba nyathi bende maro nyathi ma ng'ato onywolo. ²Me apaka wang'eyo ni wamaro nyithindho pa Were: ka wamaro Were kodi winjo or pere. ³Rupiri me a maro Were: ni wakur or pere. Aka or pere kibedi matek.⁴Rupiri dhano jie m'onywole i Were nyalo piny, aka me a loyo motieko nyalo piny, manago yeyo mawan. ⁵Ng'a ma nyalo piny me? Ng'ata yeyo ni Yesu obedo wod pa Were.⁶Me a ng'ata obino i piny luwo kwong' pi kodi remo: obedo Yesu Kristo. Go kobino gi pi kende, to bende kodi pi gi remo. Cuny ama ridho, rupir Cuny obedo adieri. ⁷Ato nitie jadek ma joridho: ⁸Cuny, pi, kodi remo. Jadek me joyeyere.⁹Wayere gi gime ji joridho to ridho pa Were loyo apa ji rupir obedo ridho pa Were mamako kwong' Wode. ¹⁰Dhano je mayeyo i Yesu Kristo yeyo kendo jolo wac moridhi me. Dhano je makiyeyi Were, tero go paka jatwodo rupir ng'ato kiyeyi gima Were ridho mamako kwong' Wode.¹¹Aka me amobedo wac mondikere ni Were otieko miyo wan kwo ma cil gi cil, aka kwo no nitie i Wode. ¹²Dhano ma ni gi Wodi Were, nitie gi kwo me aka ng'ata ongoye gi Wodi Were ongye gi kwo me.¹³Andiko gikipiny me ri win mawiyey i nyingi Wodi Were ng'ey winiang' ni witie gi kwo ma cil gi cil kendo winyali yeyo i nyingi Wodi Were. ¹⁴Aka me a miseni ma nigine ru wang' Were nike kawakwayo gimoro jie go winjo wan. ¹⁵Aka kawang'eyo ni go winjo gimoro jie ma wakwayo wang'eyo ni go nitie gi radwok mawan kendo otieko miyo wan gima wakwayo go no.¹⁶Ka ineno nyawotin timo reco ma kiteri jo i tho iripo kwayo ri go aka Were bino miyo go kwo. To nitie reco matero jo i tho. Akiwaci ni ikway ri ng'ata timo kit reco no. ¹⁷Kis nyeko je obedo reco. Nitie reco ma kiter dhano i tho.¹⁸Wang'eyo ni dhano je mobedo nyathi pa Were, kosa monywolere i Were, kitimi reco. To ng'ata obedo nyathi pa Were gwokere aka jwogi kosa sitan kigey go. ¹⁹Wang'eyo ni wanyithindho pa Were aka piny gi pi jonitie i cingi ngata rac.²⁰Wang'eyo ni Wodi Were otieko bino kendo omiyo wan niang' ' ng'ey wang'yi Were maradieri kendo wanitie i go mobedo adieri aka manago Yesu Kristo. Me amobedo Were mar'adieri kendo a kwo ma cil gi cil. ²¹Nyithindho paran mathindho thindho gwokere win kwong cal ma kicar.

¹Motho dokkdwon'g moyer Ri dhokodwon'g m'oyer gi nyithindho pere mamaro iyadieri aka n'gata akamoro win kendan to kanyacici kodi jono jie majong'eyo adyeri, ²ma manitie i wan kendo ladon'g i wan cil gi cil. ³Wor gi ng'ono kodi siem lebedo gi win wok bongi Were Bawan kodi Rwoth Yesu KristoWode iyadieri kodi i mar.⁴Asangala swa tektek munyo anwango nyithdho perin megi jowotho iyadier paka wanwang'o or wok both Bawan. ⁵Pama onyo akwayin mondo dwako dwong' ki ni rupir andiko or manyien to obedo or mawiwinjo wok i cakarok ni wamare wini. Aka me amobedo mar, ka wawotho i or pa Were. ⁶Aka me amobedo or nago, nike paka wicowo winjo wok i cakrok wiwothi iye.⁷Rupir jotwodo majokituci ni Yesu Kristo obino idel jotieko wok i piny. Jo jobedo jotwodo kendo jopiemo gi Kristo. ⁸Gwokere win ni wikiri wirwenyi gima watieko tic ri go, ng'eyi wanwang'i kiremba mawan gi kululu.⁹Ng''at maturo cik aka kidong' i Kristo ongoye gi Were. Ng'at ma dong' madong' i Kristo nitie gi Bawan kir gi Wode. ¹⁰Ka nyatoro obino bongi win ma kokelo fonji me wikir wijol go i udi mewin kendo wikir wimothi go. ¹¹Rupir ng'at mamotho go bedo iyacel gi go i tim pere marac.¹²Anitie gi gikipiny kweth mandiko ri win to akamito ndiko i papila kodi bwino. To ageno ni alebino luwo gi win awang' g'awang' aka siem mewin wopong' kakare. ¹³Nyithindo pa nyamin in moyer jomotho win. Wobedi ameno.

¹²³⁴1 Baluwa m'owok bongi Jadwong ma Kanisa: Ri Gayo makacunyan m'amaro i adyeri.2 Mere paran, akwayo ni gimoro jie wokidhi rin maber aka ibedi m'ilama i del kiri paka cunyin olama.3 Abedo gi kisangala madwong munyo jomo'yeyo wadi wan jotundo tojowaco paka initye gi genirok i adieri kodi paka ndir jie iwotho i adyeri.4 Ongoye gima sangala an loyo ka awinjo ni nyithindo para wotho i adyeri.⁵⁶⁷⁸5 Mere paran, igenere swa i tic m'itimo ri jom'oyeyo kiri kodi ri joma ikuya. 6 Ma bende jobedo ka jowaco bero perin i wang kanisa. Mondo konyi jo jowomedere gi woth pa jo i royo mabino kisangala Were.7 Kole jocako tich ri Christo idyeri jopath ma jok'ojolo kony moro jie bongi jo.8 Am'omiyo waripo konyo nger jome, ngeyi wariwere gi jo itic ri adyeri.⁹¹⁰9 Andiko baluwa ri kanisa, to Dyoterefe mamito bedo marapena i gimoro jye, kiyeyi jolo wan.10 Am'omiyo, ka abino, alewodho gimoro jie ma go otyeko timo kamaler: Gikipiny mareco ma go luwo kwong wan, kodi twodo pere. To cale pa meno jie kirom go, fuodi go kijol jom'oyeyo ka jobino aka go juko kiri joma jomito jolo jo to riemo woko jo i kanisa.¹¹¹²11 Mere paran, ikir'iliew ranen marac no, to luw gimaberi mere ayino. Nyatoro jie matimo gimaber bedo apa Were, aka ngata timo gimarac meno fuodi kongeyo Were.12 Dhano jie luwo maber kwong Demeturyo. Aka giradyeri won ama iluwo kwong go. Wan bende waluwo maberi kwong go, aka wingeyo ni gimawawaco obedo giradieri.¹³¹⁴¹⁵13 Onwango anitye gi madit awaca rin, to ak'otim ameno i vino gi kalami.14 To ageno nenin mayot, aka nyaka wabino luwo awang. Siem wobedi kodin. Merin mawan jie jodhiro rin moth. Ibende mothi riwan merin mawan jie.

¹²1 Yuda jatic pa Yesu Kristo ma omin Yakobo, ri jono ma Were Baaba olonyo jo to kano jo i Yesu Kristo, mabende jobedo j'omolwong: 2 Wor wobedi ri win, siem gi mar wonyay i win.³⁴3 Jom'omar, munyo aketho kinen jie ma ndiko riwin mamako kwong both mawan wajojie, oyido ripere bende ni andiki riwin kendo amiyi win ngeyo ni wiripere lwenyo gi kinen ri yeyo ma jomaleng jobino jokelo ri win. 4 Rupiri nitye cwo ma jo roc tojudonjo makongeyere, ma chango con otyeki cano ri loc banja makicutho, cwo majongoye gi Were, majoloko Kisa pa Were bedo gikoco, kajokwero Ruoth Were aciel kende, kodi Ruodhwan Yesu Kristo.⁵⁶5 Ri ameno alepoyo win, kadanende yido con wingeyo, paka Ruoth munyo otyeko gonyo ji pere wodho jo wok i piny ma Misiri, cien mere to reyo woko jono ma jokuyeyo. 6 Aka kiri jomalayika majokudong paka obin ocwey jo, tojoweyo kifo ma oyido okethi iye jo. kole manago okan jo itwec ma lijegere ma cil gi cil i mudho ka jokuro ndelo madwong ma thumo banja.⁷⁸7 Kiri Sodom gi Gomora, kodi tindin ma oyido othoko jo paka rom, ma ido jomiyere ri tim ma cot, gi luwo del makicaro, kole obin okethi jo pa ranyuth, paka jolimo acanda ma culo kwor ma mac makitho. 8 Aka pa ameno won, jolek makoc me jokoco del, jocayo tel, aka joluwo marac kwong gidwong.⁹¹⁰¹¹9 To Mikayili jamalaika madwong, munyo piemo gi jwogi mako kwong del pa Musa, okwero donjo wilo wac ipiem acwoka nyingi , to waco ri Sitan ni, Ruoth obwokin. 10 Kit jome joluwo marac kwong gikipiny majokuya: to gima jongeyo iniang manyadhano, me ogwange mamingo, aka wegi jokocere gi gikipiny paka ameno. 11 Kibenga ri jo! pri joluwo yo pa Kain, aka jongweco gi wooro luwo podho pa Balam ka jomito lim, aka joreyere i luwirok kicaro pa Kore.¹²¹³12 Kit ji me jo duwo kalima mewin ma mar, ka nyo jo ciemo gi win, jopidhere gi lworo: jobedo pondeponde mongoye pii, ma koyo kwadho ama ga amaca; tyendi yen ma nyak mere thwo woko, tifudho woko wok awoka i fuc to tho diryo; 13 Mor pa pii ma ule i nam, jochoko bwoyo ma wic kwot pajo wegi; mucalin ma lekaleka, ma okan ri jo mudho ma colo cil gi cil.¹⁴¹⁵¹⁶Aka Enoka bende, nywol marabiryo i thol-nyol pa Adam, obino owaco bunabi mamako kwong gime ka waco ni, Aneni, Ruoth bino gi pyero ganin ma pa jomaleng, 15 Bino timo thumo banja ri ji jie, kendo niango joreco jie majonitye idyeri ji mako kwong reco pajo jie majotim reco jotimo, gi luwirok pajo madongo ma jomareco joluwo kwong Go. 16 Me jokingunyangunya , jokigesa, majowotho i kew pa jo wegi; aka dhoki jo luwo wac kwoto kweth, aka jomiyo ji kigomba jo ri cal kwoto no.¹⁷¹⁸¹⁹17 To Jomomare, poyi win wac m'obin owacere ri win gi Jomoor pa Routhwan Yesu Kristo; 18 Paka nike jowaco ri win ni indelo marumacien ji la bino majomiyo fuonji twodo, majolawotho ikew ma mito pajo makinyawere. 19 Kole me aya jokecere, jongico, majongeyo ge Cuny.²⁰²¹20 To win, jom'omar, bedi kanyo wigetere wiwegi i yeyo mewin maleng kicutho, kawikwyo i Cuny Maleng, 21 Kurere wini i mar pa Were, ka wirango kisa pa Ruoth Yesu Kristo tundo ikwo makirum.²²²³22 To maki win wor gi jomegi, kanyo wikelo rapok. 23 Aka jomegi bothi win gi lworo, kanyo wifudhu jo wok i mac; to sarago widak kiri ruk ma oduwere gi tim del.²⁴²⁵24 Onyo ri Ngato manigi nyalo ma gengo win wok ipodho, aka bende tero win ruwang kabedo madwong pere m'ongoye apusa gi siem m'okale, 25 Dwong, wor, adhum gi meni obedi ri Were mawan aciel Mariek, both mawan, cil gi cil. Amen.