1 Gima obedo wok i cakirok, ma wawinjo, ma waneno gi wang' wan, ma waketho wang' wan kwong'e, aka cingi wan ogeyo, ma mako kwong wac ma kwo. 2 Ato wac omenyere, waneno, wabedo wajulizi, aka watito ri win kwo makirum ago, m'oido nitie gi Were Baba, aka onyo wang'eyo, 3 Gima waneno to wawinjo wawaco ri win, ng'ey wibedi iyacel kodi wan. Aka iyadier wanitie iyacel kodi Were Baba kodi wodi go Yewsu Kristo. 4 Wandiko ri win gikipiny me ng'ey kisangala mewin wopong'ere. 5 Me a mikwenda ma wawinjo, ma mako kwong' go aka wawaco ri win ni Were obedo lero, aka i go ongoye mudho kicutho. 6 Ka wawaco ni wanitie iyacel gi go, mato wawotho i mudho, meno watwodo aka wakitim giradieri. 7 To ka wawotho i lero paka go nitie i lero, wabedo iyacel kisi dhano gi nyawote, aka remo pa Yesu Kristo Wodi go lonyo wan kwong' reco jie. 8 Ka wawaco ni wangoye gi reco meno wawondere, aka adier ongoye i wan, 9 To ka watuco reco mawan, go ogenere aka otire ma cwako reco mawan to lonyo wan kwong' komo moro jie. 10 Ka wawaco ni fwodi wakitimo reco meno waloko go jatwodo, aka wac pere ongoye i wan.
1 Nyithindho paran mathindho, andiko ri win gikipiny me ng"ey wikir witim reco. Ka moro otimo reco, wanitye gi japido manago Yesu Kristo m'otire . 2 Go amobedo racow maculo banja mawan aka kimawan kende, to ma piny gi pi. 3 Aka me apaka wang'eyo ni wang'eyo Were ka wawinjo or pere. 4 Ng'ata kethere ni ong'eyo Were to kuciel kiwinji or pere, obedo jatwodo aka adier ong'oye i go. 5 To ng'ata winjo or pa Were. adier mar pa Were otundo kakare i go aka apaka wang'eyo ni wanitye i go. 6 Dhano je mawaco ni ochwire i Were, ripo woth paka go won owotho. 7 Wutumera, akindiki ri win or manyen. Me obedo or macon mawiwinjo wok i cakirok. Or macon obedo wac ma tieko winjo wok i cakirok. 8 Andiko ri win or manyien m'obedo adier i Kristo aka nitie i win rupir mudho kadho aka lero otieko cako liel. 9 Dhano makethere ni wotho i lero aka kuciel odak omin fodi nitie i mudho kir g'unyo ni. 10 Ng'at m'omaro omin dong' i lero aka ongoye ndir ma go nyalo cer iye. 11 To ng'ato m'odak omin nitie i mudho aka okuya kama kidhiye, rupir mudho no oculo wang'e. 12 Andiko ri win nyithindho mathindho, rupir reco mewin ocwak ru nyingi go. 13 Andiko ri win bacere ji rupir witieko ng'eyo go wok i cakrok. Andiko ri win yac rupir witieko loyo ng'atakoc. Andiko ri win nyithindho mathindho rupir wing'eyo Were Baba. 14 Atieko ndiko ri win bacere ji rupir witieko ng'eyo Were wok i cakrok. Atieko ndiko ri win yac rupir wicwiny kendo wac pa Were nitie cuny win kendo witieko loyo ng'ata koc. 15 liar mar piny, kosa giki mapiny. Ka dhano mogo jie omaro piny, mar pa Baba ongoye igo. 16 Rupir gik piny, awanya madel gi awanya ma wang, gi winjirok ma piny kobedo apa Baba, to ma piny. 17 Aka piny eyewoko, gi winjirok mere jie: to ngat matimo ito pa were yindara ma swa. 18 Nyithindho mathindho, me ma cowe: aka witieko winjo ni japiem gi Kristo labino, kir pama nitie jopiem gi Kiristo labino, kir pama nitie jopiem gi Kirsto kweth, kir pama nitie jopiem gi Kristo kweth; aka meno miyo wa niangi ne meno hongo ma cowe. 19 Joweyo wan, to nwango jokobedo aciel kwong wan, rupir bed jobe aciel kwong wan, mongoye kiganagana di jomemdere giwan. to jo jowok kwong wan, n'gey jowok kamaler ni nwango jo jie jo ko bedo giwan kada nithe. 20 To win gi wir wok bong n'gata leng, aka wingeyo kis gimoro jie. 21 Akindiko riwin rupir wikuya adier, to wingeyo, aka ni ongoye twodo mawok iyadier. 22 Ere nga ma jafwondo mak n'got ma kwedewere ni yesu kubedo Kristo? Go obedo japiem gi Kristo, ma kwedere kwon Baba gi Wode. 23 N'gat mogo jie ma kwedore kwom Wode, bende onfoye gi Baba: n'gat ma yeyo wode bende nig Baba. 24 Riame wey gimo ma wi tieko winjo wok icalcirok wodong i win. Ka gima witieko winjo wok i calcirok odong i win, wi la madere i wode kiri gi Baba. 25 Aka go otieko ciko wan kwo makirum. 26 Gime atieko ndiko ri win ma mako joma jo nyalo komo win. 27 To wir ma watieko jolo i iyi win kendo kimiti ni dhano moro jie wofonji win kendo kuciel wir no won fonjo win kis gimoro jie kendo wir no obedo mar'adyer kendo k'obedo twodo aka kir go paka go otieko fonjo win apaka wila cwire i iy go. 28 Onyo pama nyithindho mathindo, dong' win i go ngeyi i ndelo ma go omenyere iye wabende wanyali bedo gi miseni kendo wiy wan wokir wokwoti ru wangé'. 29 Ka wing'eyo ni go obedo nga'ta leng', meno bende wing'eyo ni dhano matimo gi tiro onywole i go.
1 Neni nger mar ma Bawan ntie gine ri wan ni olwong’ wan ni nyithindho pa Were. Riameno piny okuya wan rupiri piny okuya go. 2 Neni nger mar ma Bawan ntie gine ri wan ni olwong’ wan ni nyithindho pa Were. Riameno piny okuya wan rupiri piny okuya go. 3 Aka nyatoro manitie gi geno igo lonyo kwo pere kadanende go olony. 4 Nyatoro jie ma timo reco meno turo cik rupiri reco obedo turo cik. 5 Aka wang’eyo ni go obino kwanyo woko reco mawan: aka go bureco. 6 Aka ng’ata oridhere i go kitim reco: To ng’ata timo reco fwodi koneno go, odoko kuya go. 7 Nyithidho paran, ongoye dhano wondo win: Ng’ata timo gimotire, meno otire paka Yesu won. 8 Ng’ata timo reco obedo apa jwogi; rupiri jwogi jareco wok con. Ri atong’a no Wodi Were obino nyeko tic pa jwogi. 9 Ng’ata onywole i Were odoko kitim reco: rupir kodhi pere nitie i go aka kitim reco rupir go obedo anywola pa Were. 10 I gime ama nyithindho pa Were nenere iye paka jopokere gi nyithindho pa jwogi: ng’ata kitim gimotire kosa ng’ata odak omin kobedo apa Were. 11 Me a wac ma wiwinjo wok i cakirok ni waripo marere. 12 Ki paka Kain ma ru tim pere marac ma nyajwogi jwogi omako nyieko toneko omin ru tic pere maber. 13 Wutumere, wikiri wibedi gi dhier ka piny odak win. 14 Wang’eyo ni watieko wok i tho watundo i kwo, rupir wamaro wutimin wan. Ng’ata odak omin meno nitie i tho. 15 Ng’ata odak omin meno janek; aka wang’eyo ni ongoye janek ma ladonjo i kwo makirum. 16 Me apaka waniang’ kwong’ mar pa Were, rupir omiyo kwo pere ri wan: aka wabende waripo miyo kwo mawan ri wutimere. 17 To ng’ata nitie gi gikiny ma piny me, to neno omin nitie i mito, to kwero mako kisa gine, onyo mar pa Were nitie kune i go? 18 Nyithindho paran, wakir wamar ji gi wac, kosa luwo kende: to i tim kodi adieri bende. 19 Aka me apaka wang’eyo ni wabedo joradieri, aka walaridho i cuny wan ruwang’ go. 20 To ka cuny wan thumo ri wan banja, Were dwong’ loyo cuny wan aka ong’eyo kisi gimoro. 21 Jomomare, k’inen cuny wan kithum ri wan banja wabedo gi misen ruwang’ Were. 22 Ameno, gimoro jie ma wakwayo walanwang’o wok bonge rupir wakuro cik pere aka watimo gimasangala go. 23 To me a cik pere ni wayey i nyingi nyath pereYesu Kristo aka wamarere paka cik pere Waco. 24 Aka jomakuro cik pere jobedo i go aka go bende bedo i jo. Me apaka wang’eyo ni go nitie i wan, luwo kwong Cuny Maleng’ m’omiyo wan.
1 Jomomare wikiri wiyey chuny moro jie, to temi win cuny no winiang' ka jowok bongi Were - rupir jofwonji matwodo jotieko donjo i piny. 2 Me a nger ma wanyalo ng'eyo gine Cuny pa Were - cuny moro jie ma tuco ni Yesu Kristo obino i del obedo apa Were, 3 aka cuny moro jie ma kiyey ni Yesu Kristo obino i del kobedo apa Were. Meno obedo cuny mapiemo gi Kristo, ma wiwinjo ni labino, aka pama won me nitie i piny 4 To win wibedo apa Were, nyithindho paran, aka witieko nyalo jo, rupiri ng'ata nitie i win dwong' loyo ng'ata nitie i piny. 5 Jo jobedo apa piny, riameno gima jowaco obedo gima wok i piny, aka ji ma piny winjo jo. 6 Wan wabedo apa Were, ng'ata ong'eyo Were winjo wan. Ng'ata kubedo apa were kiwinji wan. Me apaka wang'eyo cuny maradier kodi man mokom. 7 Jowotiwan momare, wey wamarere win, rupiri mar wok bongi Were, aka nyatoro jie ma maro nyawote meno onywole gi Were aka ong'eyo Were. 8 Ng'ata kimarnyawote meno kuya Were, rupir Were obedo mar. 9 Rugime, mar pa Were omenyere ri wan rupiri Were odhiro Wode acel g'acel i piny aka ng'ey wanyal kwo ru go. 10 I mar me, ki ni wamaro Were, to ni go omaro wan to dhiro wode paka racow ma reco mawan. 11 Jompomare, kinen Were omaro wan, wabende waripo marere. 12 Ongoye ng'ata otieko neno Were i hola moro jie. Ka wamarere Were bedo i wan, aka mar pere medere dongo i wan. 13 Me apaka wang'eyo ni wanitie i go aka go bende i wan, rupir go ofudo ri wan cuny pere. 14 Aka bende watieko neno to waridho ni Were Baba odhiro wode bedo Jaboth pa piny, 15 Ng'ata tuco ni Yesu obedo Wodi Were, Were bedo i go aka go bende i Were. 16 Aka bende, watieko ng'eyo to wayeyo mar ma Were nigine ri wan, Were obedo mar, aka ng'ata nitie i mar nitie i Were, aka Were nitie i go. 17 Ru gime, mar mawan onyo olok motire i dier wan, aka ng'ey wabedi gi misen i ndelo ma thumo banja, rupir paka go nitie apaka wan bende i piny ka. 18 Ongoye lworo i mar, Kucel, mar motire riemo woko lworo, rupir lworo nitie iye giracula. Aka ng'atalwor meno fwodi kulok go motire i mar. 19 Wamaro go rupiri go ama otelo maro wan. 20 Ka nyatoro waco ni omaro Were, mato kere odak omin, meno go jatwodo. Rupiri ng'ata komaro omin, ma go neno, kinyal maro Were ma go fwodi koneno. 21 Kendo, me a or ma wanwang'o wok bongi go: Ng'ata omaro Were bende ripo maro omin go won.
1 Dhano je ma yeyo ni Yesu obedo Kristo onywole i Were, aka ng'ata omaro ba nyathi bende maro nyathi ma ng'ato onywolo. 2 Me apaka wang'eyo ni wamaro nyithindho pa Were: ka wamaro Were kodi winjo or pere. 3 Rupiri me a maro Were: ni wakur or pere. Aka or pere kibedi matek. 4 Rupiri dhano jie m'onywole i Were nyalo piny, aka me a loyo motieko nyalo piny, manago yeyo mawan. 5 Ng'a ma nyalo piny me? Ng'ata yeyo ni Yesu obedo wod pa Were. 6 Me a ng'ata obino i piny luwo kwong' pi kodi remo: obedo Yesu Kristo. Go kobino gi pi kende, to bende kodi pi gi remo. Cuny ama ridho, rupir Cuny obedo adieri. 7 Ato nitie jadek ma joridho: 8 Cuny, pi, kodi remo. Jadek me joyeyere. 9 Wayere gi gime ji joridho to ridho pa Were loyo apa ji rupir obedo ridho pa Were mamako kwong' Wode. 10 Dhano je mayeyo i Yesu Kristo yeyo kendo jolo wac moridhi me. Dhano je makiyeyi Were, tero go paka jatwodo rupir ng'ato kiyeyi gima Were ridho mamako kwong' Wode. 11 Aka me amobedo wac mondikere ni Were otieko miyo wan kwo ma cil gi cil, aka kwo no nitie i Wode. 12 Dhano ma ni gi Wodi Were, nitie gi kwo me aka ng'ata ongoye gi Wodi Were ongye gi kwo me. 13 Andiko gikipiny me ri win mawiyey i nyingi Wodi Were ng'ey winiang' ni witie gi kwo ma cil gi cil kendo winyali yeyo i nyingi Wodi Were. 14 Aka me a miseni ma nigine ru wang' Were nike kawakwayo gimoro jie go winjo wan. 15 Aka kawang'eyo ni go winjo gimoro jie ma wakwayo wang'eyo ni go nitie gi radwok mawan kendo otieko miyo wan gima wakwayo go no. 16 Ka ineno nyawotin timo reco ma kiteri jo i tho iripo kwayo ri go aka Were bino miyo go kwo. To nitie reco matero jo i tho. Akiwaci ni ikway ri ng'ata timo kit reco no. 17 Kis nyeko je obedo reco. Nitie reco ma kiter dhano i tho. 18 Wang'eyo ni dhano je mobedo nyathi pa Were, kosa monywolere i Were, kitimi reco. To ng'ata obedo nyathi pa Were gwokere aka jwogi kosa sitan kigey go. 19 Wang'eyo ni wanyithindho pa Were aka piny gi pi jonitie i cingi ngata rac. 20 Wang'eyo ni Wodi Were otieko bino kendo omiyo wan niang' ' ng'ey wang'yi Were maradieri kendo wanitie i go mobedo adieri aka manago Yesu Kristo. Me amobedo Were mar'adieri kendo a kwo ma cil gi cil. 21 Nyithindho paran mathindho thindho gwokere win kwong cal ma kicar.
1 Motho dokkdwon'g moyer Ri dhokodwon'g m'oyer gi nyithindho pere mamaro iyadieri aka n'gata akamoro win kendan to kanyacici kodi jono jie majong'eyo adyeri, 2 ma manitie i wan kendo ladon'g i wan cil gi cil. 3 Wor gi ng'ono kodi siem lebedo gi win wok bongi Were Bawan kodi Rwoth Yesu KristoWode iyadieri kodi i mar. 4 Asangala swa tektek munyo anwango nyithdho perin megi jowotho iyadier paka wanwang'o or wok both Bawan. 5 Pama onyo akwayin mondo dwako dwong' ki ni rupir andiko or manyien to obedo or mawiwinjo wok i cakarok ni wamare wini. Aka me amobedo mar, ka wawotho i or pa Were. 6 Aka me amobedo or nago, nike paka wicowo winjo wok i cakrok wiwothi iye. 7 Rupir jotwodo majokituci ni Yesu Kristo obino idel jotieko wok i piny. Jo jobedo jotwodo kendo jopiemo gi Kristo. 8 Gwokere win ni wikiri wirwenyi gima watieko tic ri go, ng'eyi wanwang'i kiremba mawan gi kululu. 9 Ng''at maturo cik aka kidong' i Kristo ongoye gi Were. Ng'at ma dong' madong' i Kristo nitie gi Bawan kir gi Wode. 10 Ka nyatoro obino bongi win ma kokelo fonji me wikir wijol go i udi mewin kendo wikir wimothi go. 11 Rupir ng'at mamotho go bedo iyacel gi go i tim pere marac. 12 Anitie gi gikipiny kweth mandiko ri win to akamito ndiko i papila kodi bwino. To ageno ni alebino luwo gi win awang' g'awang' aka siem mewin wopong' kakare. 13 Nyithindo pa nyamin in moyer jomotho win. Wobedi ameno.