¹To kiteri ofik Lobanga kai ko kof ²orioriongo afa kof itongo arusarus oru saye longon imuk lokimuyuk kiluko oto hati okorif lo Lobanga oraf kue lo kifi.³Oto Lobanga ojo, “Ingohi wangun tongon” wangun ko ngonun. ⁴oto Lobanga odeu jimitan ojir wangun, inyi ko kora wangun ko mutohun. ⁵Ilolong Lobanga wangun ojo “far” ojo mutohun ojo, “karue”: oto kurou ongon, o wangu manyu kiwanyi ara na far lo lobito.⁶Oto Lobanga ojo “ingohi ilwe tongon na lokor kifi ko kifi ⁷Lobanga ko fiha ilwe na lokor kifi kuna longon kai lo ilwe ko kuna longon kof oto itiihino jii, ⁸ilolong Lobanga ilwe ojo “kai”. oto olotu kurou, owangu manyu kiwanyi ara na far lo are.⁹Oto Lobanga ojo ingohi kifi kuna longon fotiri lo kai itubaru faji Lobito manyu ingohi kof na itou toboto”, oto itiihino jii. ¹⁰ilolong Lobanga na faji itou ojo “kof” manyu kifi kuna litubaru ilolong ojo “nami” oto Lobanga odeu ojo ojir.¹¹Tinyia ojo Lobanga, “ingohi nyiari tobu to kof, ko cianitok kuna longi kireja to ikoditi kuneicieng ko keyek kuna longi ngak kuna longoni kireja katua to ikoditi kuneicieng gele–gele.” itiihino jii. ¹²itibuju kof nyiari ko cianitok kuna longon ko kireja to ikoditi kuneicieng ko keyek kuna longi ngak ko kireja to katua to ikoditi kuneicieng gele gele. odeu Lobanga ojo ojir. ¹³olotu kurou manyu owangu kiwanyi ara na far lo uni.¹⁴Oto Lobanga ojo, “ingohi sangite kuna linwaha ongon iyo ilwe lo kai ojir okor karue ko far manyu ara kitotorita lo kora lo kari ko ofahin ko kibebelo lo kof ¹⁵manyu ojir icieng ara wangun na longon iyo ilwe lo kai na licwara wangun kof. itiihino jii.¹⁶ofik Lobanga sangite kuna linwaha are kuna hitoha, nahitok nenge na linwaha far ko na sidi nenge na linwaha karue. icieng kolong ko ofa, ikukumahi manyu inyi kanger . ¹⁷Ofik Lobanga icieng iyo ilwe lo kai ojir inwaha kof, ¹⁸ojir inwaha karue ko far, ojir okor karue ko far. oto Lobanga odeu ojo ojir. ¹⁹olotu kurou owangu manyu kiwanyi , ara na far lo ongon.²⁰20 oto Lobanga ojo, “ingohi kifi itad, sangite kuna iwari manyu ingohi kweny tofuho iyo ilwe lo kai to kue lo kof isabitati kiji lo ilwe lo kai ko kof. ²¹tona ofik Lobanga sangite kuna iboroho kuna lowar katua lo kifi ko kuna kude kuna iborengi beciek to ikoditi kuneicieng gele gele ko kweny ko sangite fad kuna ifuhoho to ikoditi kuneicieng gele gele. oto Lobanga odeu ojo ojir.²²22 oto Lobanga icio icieng gum ojo, “itopit itadoro ifut katua lo kifi kulo nami, icwara manyu kweny ifut kof.” ²³olotu kurou ongon owangu manyu kiwanyi ara na far lo miet.²⁴Oto Lobanga ojo, “ingohi kof itad sangite kuna iwari to ikoditi kuneicieng; tyangi ko sangite kuna lokudita kof to ikoditi kuneicieng ko tyangi kuna irieji ko kuna ingereha kulo mwang to ikoditi kuneicieng. itiihino jii. ²⁵ofik Lobanga tyangi kulo mwang to ikoditi kuneicieng, ko sang to ikoditi kuneicieng ko sangite fad kuna lokudita to kof to ikoditi kuneicieng. oto Lobanga odeu ojo ojir.²⁶Tinyia ojo Lobanga, ina ngatiduk cio kitiririhi kohoi iya kitiririta niyang, ojir icieng olanyu kayam kulo nam ko kweny kulo kai ko sang, ko kof fad ko sangite pili kuna lokudita to kof.” ²⁷tona oduk Lobanga tungani itiririhi konyi, iyo ririjon lo Lobanga oduk Inyi inyi. oduk inyi icieng retoni ko ngorwani.²⁸icio Lobanga icieng gum oto ojo, “Itopit iborengi ifutata kof ilanyu. itilanyu kayam kulo katua lo nam ko kweny kulo kai ko sangite pili kuna lokudita to kof. ²⁹tinyia ojo Lobanga, “ahicio nan isi cianitok fad kuna longoni ko kireja ko keyek fad kuna longi ngak kuna longoni kireja katua, itongo ca icieng diho isi ara daha.³⁰ojo diho tyangi kulo kof fad ko kweny kulo kai ko sangite fad kuna lokudita to kof – sangite pili kuna lowirita – acio nan nyiari kuna inyoriha ara daha diho icieng, manyu olotu ori jii. ³¹odeu Lobanga sangite fad kuna kuna lofik inyi orumu ojiri noo. olotu kurou ongon owang manyu kiwanyi ara na far lo ile.

¹jii okeru Lobanga duho kai ko kof ko sangite fad kuna longoni iyo bolojun neicieng. ²To far lo mietare orumu Lobanga lokeru tic na lorumu inyi itiyo fad. ito inyi iyoma to far lo mietare iyo tic nenge. ³oto Lobanga icio gum iyo far lo mietare itinyu manyu tonyio iyo na far iyoma inyi iyo tic lo duho na lorumu inyi itiyo.⁴ara ene tenya lo kai ko kof iya lafa loduhohinorehin, koloduk afa Lahitok Lobanga kof ko kai ⁵orumu orihe lobo ciani ida lobuju manyu orihe lobo dwani oru to kof tonyio orumu Lahitok Lobanga orihe ida icio kuju ocaa kof, manyu orihe lobo tungani na ngoremo kof oru ⁶ati isodu kifi to katua lo kof ocaf kof fad.⁷oduhu Lahitok Lobanga tungani iyo lokulufi lo kof ko wirihino kumeco kunenge ofu lo warun oto tungani ko rahun tohi na iwar. ⁸tona itibulahi Lahitok Lobanga mana Eden ngati lo Okangere olotu ofik na tungani loduk inyi ijia.⁹manyu itibuju Lahitok Lobanga cianitok ikoditi gele gele to kof cianitok kuna idwaruha to deya manyu olemi to daha. Manyu ofihahi kiji lo mana ciani lo warun ko ciani lo yenun rohojun ko jiran. ¹⁰itihita afa kare na litirobia mana to Eden na lolotu okora ara karecio kunahitoha ongon.¹¹11 obara lo ketemoni Pison na lilor kof lo Afila fad faji na longon dab ¹²ojir dab lona kof manyu ongon ciani na longi ngak kuna ijiri manyu ko moru na lilolongoti ojo Onik ongon manyu ijia.¹³Obara kare lo are Gihon, itihita inyi ilor kof lo Kus fad. ¹⁴obara kare lo uni Tigris, itihe inyi iya ngati lo Okangere lo kof lo Asur. Manyu obara kare lo ongon Yuparets.¹⁵Oto Lobanga odumu tungani ofik mana lo Eden lo remo ko kitinyujo mana. ¹⁶Manyu ocik Lahitok Lobanga tungani ojo, “itum isi daha ngak lo cianitok pili kuna longon manahatua, ¹⁷ati kenya ngak lo ciani lo yenun tohi na ijir ko na irohoi, tonyio kalinyia isi ito cia isi iwei.¹⁸18 Ojo Lahitok Lobanga, “ida ojir to tungani kitongo ake. akukum cia nan kalwahani na locam tonyi” ¹⁹Tinya oduk Lahitok Lobanga tyangi kulo kof fad ko kweny kulo kai iyauno ketemoni lo tungani lo deya kitibara nenge manyu karana na litibarahi tungani tyang kode kwenyite iwasihi ara karana nenge na. Ati diho Adam oru kalwahani na ngocam tonyi. ²⁰Oto tungani itibar sang fad, kweny kulo kai ko tyangi kulo mwang. Ati to Adam, oru lobo locam to rahun kalwahani nenge.²¹Oto Lobanga icio tungani ogetoro jio kuna igoli ko logetoro inyi oto Lobanga ko dumuno mariti nenge Lobito ko kitifuta faji lona mariti to tiang. ²²Oto Lobanga ko duhuno ngorwani to na mariti lodumu inyi to ken lo tungani oto iyauno iyo inyi ²³Ojo tungani retoni, “ara dong ene koite lo koi kunei ko tiang lo tyang lo ken nei i lolong cio inyi ojo ngorwani tonyio odumuni inyi to ken lo retoni.”²⁴Tone tenya ongerihi kito retoni monye ko ngotenge oto imoraroti ko ngorwani nenge oto icieng ko fwonuno rahun ken Lobito. ²⁵Itongo orumu retoni ko ngorwani nenge longature ati oru riri lonyia icieng.

¹Orumu ogeny afa munu ilany tyangi kulo mwang kulakude kuna loduk Lahitok Lobanga. Oto inyi ojo diho ngorwani , “Ojo re Lobanga kenyia ngak kulo cianitok kulo manahatua?” ²Ojo ngorwani diho munu, “kidaha ohoi ngak kulo cianitok kulo manahatua ³ati ojo Lobanga Kenya ngak kulo ciani na longon kiji lo mana manyu ketir ojir ite ida iwei.”⁴Oto munu ojo diho ngorwani, “ida cia ite iwei. ⁵Tonyio oyen Lobanga ojo kalinya cia ite, ongaja cia konyeha kuningi ifwonu iri iya Lobanga, iyen tohi na ijir ko na irohoi. ⁶kalodeu ngorwani jimitan olem ngak lona ciani to daha manyu odwaru to deya, manyu icwara genyun ko yenun, oto ko dyeuno onya. Odumu manyu icio diho retoni nenge la lorumu ilihita konyi onyia manyu la.⁷Oto konyeha kuneicieng fad ko ngaja ko yenun jimitan kingoni icieng longature icieng ko dyeuno bene kulo bule imuhore kenite. ⁸Koloning icieng Lahitok Lobanga olot katua lo mana langun lirobi kolong oto retoni ko ngorwani nenge ko kiduharu to ketemoni lo Lobanga kiji lo canitok kulo manahatua.⁹Ati ilolong Lahitok Lobanga tungani ojo, “aji ingon isi?” ¹⁰Inyahahi inyi ojo, “Aning nan isi i lot manahatua ato nan ko bangun aduharu tonyio angon nan longature.” ¹¹Oto itifi ojo, “Ngai lohirihohi isi ojo ingon isi longature? Linyia isi ngak lo langole ciani lacik nan ajo kenyia?”¹²Ifotu tungani ojo, “Ngorwani ene lifik isi kilihita ko nan inyi lohicio nan ngak lona ciani anyia.” ¹³Itifi Lahitok Lobanga ngorwani ojo, “Nyio itii isi jii?” Ojo ngorwani, “Munu lohitinonong nan licio nan anyia.”¹⁴Lahitok Lobanga ko jimitan diho munu, “Tona litiyore isi jii, kificiori isi to kiji lo sang ko tyangi kulo mwang fad! Iyeta cia isi ken to kocehe, manyu idaha cia isi fur faritin kulo warun nino fad.” ¹⁵Manyu afik cia nan omerohoje kiji nino ko ngorwani ko kiji lo lotataha kunino ko kunenge. Obok cia inyi kue nino isi itok tutunye nenge.”¹⁶Ojo inyi diho ngorwani, “Asod cia nan kidak nino iyo tomonun; to mejun nahitok itomon cia isi tee, ongon cia wahun nino iyo retoni nino, manyu kilanyu cia inyi isi.”¹⁷Diho Adam ojo, “Tonyio ining isi tenya lo ngorwani nino inyia ngak lo ciani na lacik nan ajio kenyia; ificiori kof tosi, irumu cia isi daha to tic na ime to faritin kulo warun nino fad. ¹⁸Itibuja cia kof kikwa ko ngaira diho isi, manyu idaha cia isi jationg kulo mwang. ¹⁹To cora lo komom nino idaha cia isi daha nino many iyitorore kof lafa faji lohiduhunorehin isi, tonyio ira isi fur manyu iyite cia iyo fur.²⁰Itibarahi Adam ngorwani nenge ojo Eva tonyio ara inyi ngoto cio kuna iwari fad. ²¹Ikukumu Lahitok Lobanga kyelani to cionitok iticiefore Adam ko ngorwani nenge.²²Lahitok Lobanga ko jimitan, “Lori tungani kohoi, loyen tohi na ijir ko na irohoi. Jijia ojir ida kingerihi inyi ocule kana odieu ngak lo ciani lo warun onyia owarare tur. ²³Oto Lahitok Lobanga ifuhe icieng to manahatua lo Eden olo remo kof lafa loduhunorehin inyi. ²⁴Langun lifuhe inyi oto ofik Malaika na lotehita ngalem latubot lo kima na lilorita idi kone ngati lo Okangere lo mana lo Eden lo kiriria kikoi na loloro iyo ciani lo warun.

¹Itongo Adam ko ngorwani nenge Eva olotu ngorwani ifonga otomonu kito retoni na litibarihini ojo Kain ojo, “To lwaha lo Lahitok latomonu nan tungani.” ²To kifwongi olotu otomonu rece Abel . Tinya olotu Abel ara katibalani lo sang, ara Kain karemoni lo manatak.³Kolofwo faritin iyauno Kain daha na lobuju to kof ara kicorit iyo Lobanga. ⁴Ati iyauno Abel somiana kulo okangi kulo kera kunenge. Isisi Lahitok kicorita lo Abel ⁵Ati ida ode kicorita kulo Kain to kisisio. Tona ilongo Kain, itingosir komom.⁶Oto Lahitok ojo diho Kain, “Nyio ilongo isi? Nyio itingosiro isi komom nino? ⁷Kalitii isi ara na ijir ida kiruhuni? Ati ka lida isi itii ara na ijir, ora kipal agwala nino na lohiwak diloro isi ati o jir isi ilanyu inyi.⁸Ojo Kain diho rece Abel, “Ngafi iya mana.” Kolongoni icieng ijia, Kain ko boho rece ifade. ⁹Oto Lahitok ojo diho Kain, “Aji ongon rece nino Abel? Inyahahi Kain ojo, “Ida nan ayen, ara nan karicani lo rece lei?” Oto Lahitok ojo, “Nyio itii isi? Toning icira okoto lo rece nino diho nan to kof.¹⁰Oto Lahitok ojo, “Nyio itii isi? Toning icira okoto lo rece nino diho nan to kof. ¹¹Jijia lohificiori isi to kof na lomat okoto lo rece nino to kac kunino. ¹²Kaliremo isi ida cia orihe odo manatak iya langun, ira dong cia isi kaparitani to kof. Ojo Kain diho Lahitok, “Obolo kidak nei na lida nan atum dihan. Tode jijia lifuhe isi nan to mana, ara cia nan kaparitani jia na laduharu to ketemoni nino. Manyu kolohirumu lobo tungani nan kifade.”¹³Ojo Kain diho Lahitok, “Obolo kidak nei na lida nan atum dihan. ¹⁴Tode jijia lifuhe isi nan to mana, ara cia nan kaparitani jia na laduharu to ketemoni nino. Manyu kolohirumu lobo tungani nan kifade.” ¹⁵Ati ojo Lahitok dihonyi, “Ida ara jii ‘kalifade lobo tungani Kain, oto cia inyi orumu ilen kakeny mietare manyu ogal.’” Oto Lahitok ko fiha kitotorita ken lo Kain ojir lobo tungani lorumahi inyi ida ifade.¹⁶Tinyia Kain ko loro to ketemoni lo Lahitok ko loro manya kof lo Nod ngati lo Okangere lo Eden. ¹⁷I tong Kain ko ngorwani nenge oto ngorwani ifonga otomonu kito retoni na lobara Enok orumu Kain oduho kang na lolotu inyi itibarihi ojo Enok karana lo kito nenge.¹⁸Olotu Enok otomonu Irad, olotu Irad ara monye lo Meujal, ara Meujal monye lo Metusael . Ara Metusael monye lo Lamek. ¹⁹Oyem Lamek ngorwo are obara karana lo lobiti Ada, Lobito Zilla.²⁰Otomonu Ada Jabal na lolotu ara monye lo cio kuna lomanya kemahin, obaraha manyu sang. ²¹Obara afa rece lenge Jubal, ara afa inyi monye lo kadingok kulo tara ko kakutak kulo omilerehin. ²²Otomonu manyu Zilla kito nenge na lobara Tubal Kain na afa lara monye lo kadongoni lo sangite kuna ikoji fad to biliet ko mwala, obara afa kanece lo Tubal Kain Nama.²³Ojo Lamek iyo ngorwo kunenge; “Ada ko Zilla kining nan, ngorwo kulo Lamek itoning tenya nei. Lafade nan tungani na lohiriafu nan, kito lokilahaji na lohicuk nan. ²⁴Kalilenuni Kain kakeny mietare, oto cia Lamek ara kakeny keek mietare ko mietare.”²⁵Itongo Adam ko ngorwani nenge, ari otomonuni kito retoni na lobara Sett jimitan lohicio Lobanga nan lobo kito ari kitilunyi lo Abel lafa lifade Kain. ²⁶O lotu manyu Sett otomonu kito itibarahi ojo Enos. To kuna faritin iciak cio kilolongo karana lo Lahitok Lobanga.

¹Ara ene bok lo lorejore lo cio iyo Adam. Kaloduk afa Lobanga tungani, oduk inyi itiririhi ko Lobanga. ²Oduk icieng retoni ko ngorwani igatahi icieng gum. Langun loduk icieng ilolong icieng ojo cio.³Kalomany Adam karihin 130 otomonu kito retoni na lori ko inyi itibarahi karana Sett. ⁴Langun lotomonuni Sett olotu Adam itong karihin 800 olotu otomonu tee rei ko kariok kuna kude. ⁵Ofwonu karihin kulo warun lo Adam fad ara 930 olotu inyi owei.⁶Kolomany Sett karihin 105 olotu ara monye lo Enos. ⁷Langun lara inyi monye lo Enos itong Sett karihin 807 otomonu tee rei ko kariok kuna kude. ⁸Ara karihin kulo Sett fad 912 olotu inyi owei.⁹Kolomany Enos karihin 90 olotu ara monye lo Kenan. ¹⁰Langun lara inyi monye lo Kenan, itong Enos karihin 815 otomonu tee rei ko kariok kuna kude. ¹¹Ara karihin kulo Enos fad 905 olotu inyi owei.¹²12 Kolomany Kenan karihin 70 olotu ara monye lo Mahalalel. ¹³Langun lara inyi monye lo Mahalalel, itong Kanan karihin 840 otomonu tee rei ko kariok kuna kude. ¹⁴Ara karihin kulo kenan fad 910 olotu inyi owi.¹⁵Kolomany Mahalalel karihin 65 olotu ara monye lo Jared. ¹⁶Langun lara inyi monye lo Jared itong Mahalalel karihin 830 otomonu tee rei ko kariok kuna kude. ¹⁷Ara karihin kulo Mahalalel fad 895 olotu inyi owei.¹⁸Kolomany Jared karihin 162 olotu ara monye lo Enok. ¹⁹Langun lara inyi monye lo Enok itong Jared karihin 800 otomonu tee rei ko kariok kuna kude. ²⁰Ara karihin kulo Jared fad 962 olotu inyi owei. Kolomany Enok karihin 65 olotu ara monye lo Metusela.²¹Kolomany Enok karihin 65 olotu ara monye lo Metusela. ²²Langun lara inyi monye lo Metusela olotu Enok ilik ko Lobanga karihin 300 otomonu tee rei ko kariok kuna kude. ²³Ara karihin kulo Enok fad 365. ²⁴Ilik Enok ko Lobanga ko rijoro tur tonyio lolotu Lobanga iyaru inyi.²⁵Kalomany Metusela karihin 187 olotu ara monye lo Lamek. ²⁶Langun lara inyi monye lo Lamek, itong Metusela karihin 782 otomonu tee rei ko kariok kuna kude. ²⁷Ara karihin kulo Metusela fad 969 olotu inyi owei.²⁸28 Kolomany Lamek karihin 182 olotu otomonu kito retoni. ²⁹Itibarahi karana nenge ojo Noa, jimitan “itirobi mute inyi taulo kuniyang iyo tic na ime lo kac kuniyang na liyauno kificoro lo kof na lificore Lahitok Lobanga.''³⁰Langun lotomonu Noa, itong Lamek karihin595 otomonu tee rei ko kariok kuna kude. ³¹Ara karihin kulo Lamek fad 777 olotu inyi owei.³²Kolomany Noa karihin 500 olotu ara monye lo Sem, Kam ko Japet.

¹Langun losodoro borengun lo cio to kof manyu otomonuni tee kariok ²odeu tee kilahaji kulo Lobanga jimitan odwaruha tee kariok kulo cio icahi nyumo kuna lowak icieng yema to kiji neicieng. ³Oto Lahitok Lobanga ko jimitan, “Ida Okorif nei otum kisiran ko cio tur, tonyio ara icieng kuna lotum weyaru ojir dong karihin kuneicieng icung mia Lobito ko keek are”.⁴Orumu cio kulo Neplim ongoni kof kuna faritin manyu to kifwongi kalitongo tee kulo Lobanga ko tee kariok kulo cio, manyu otomonuni tee ko icieng, ara afa kuna tee kuneicieng kangerejak kulo berien, cio kuna lokwati.⁵Odeu Lobanga rohojun lo cio to kof manyu odeu jimitan ara kodomo lo tau lo tungani rohojun jia to tik tik. ⁶Oto tau lo Lobanga ome bebe to duhohino cio ene kof oto tau nenge ome noo.⁷Lobanga ko jimitan, “Akeru cia nan cio kulafa laduk nan to komom lo kof, cio ko tiangi ko sangite kuna lokudita to kof ko kweny kulo kai tonyio ome tau nei to duho icieng ene kof. ⁸Ati orumu Noa kisisio to ketemoni lo Lobanga.⁹Ara ene lorejore lo Noa. Ara afa Noa tungani na ibir na loru ko kipal to kiji lo cio kulo karihin kunenge manyu ilihita orumu inyi ko Lobanga. ¹⁰Ongon orumu Noa ko tee rei uni, Seml Kam ko Japet.¹¹Dong orumu kof lipalaru to ketemoni lo Lobanga ifut ko ticitici kulo kifada. ¹²Odeu Lobanga koditi na lipalarore kof tonyio orumu cio fad lipale kikohin kuneicieng.¹³Oto Lobanga ojo iyo Noa, “Aticungo nan warita kulo cio pili tonyio ifut kof ko kipal to icieng. Akeruno nan icieng ara Lobito to kof. ¹⁴Tona, ifaha tigol to keyek kuna igoli manyu tokor kudulehin katwa manyu todwany katwa ko korwong fad to odok. ¹⁵Ara ene koditi na ngifahare isi; ojir karitan lo tigol ara futi 450. Lalatun nenge ara futi 75 ko woita nenge iya kai ara futi.¹⁶Ifaha kai nenge manyu ingohi lohitir nenge ongon faji lobo iwat sidi to kai. Tofik agwala ketemoni nenge manyu ikor katwa ifetiti uni; orof, kiji ko kai. ¹⁷Tonyio aculuno nan kifi isod ene kof lo keruno sangite pili kuna longoni kof, sangite pili kuna iwiritaha. Okeru cia sangite pili to kof.¹⁸Ati afik cia nan ciharu nitole ko isi irute cia isi katwa lo tigol ko ngorwani nino ko tee kunino, ko ngorwo kulo tee kunino. ¹⁹Ojir isi iyauno katwa lo tigol sangite kuna iwari ko tyangi ko kweny ta are ta are retoni ko botor ojir kiwar kosi.²⁰Koditi lo kweny fad tare, tyangi tare ko sangite kuna lokudita to kof ofwonu cia iyo isi lo kitiwara icieng. ²¹Ojir isi iyaru dahi dahi fad kuna lotum ite ko icieng. ²²Itii Noa sangite pili iya na locihare Lobanga inyi.

¹Oto Lobanga ko rihohino Noa ojo, “Torute katwa lo tigol isi ko cio kulo kaji nino fad tonyio arumu nan isi ira tungani na ibir iyo ene kofiangiti. ²Yaru koditi kulo tyangi kuna inyuji to mietare, retoni ko botor nenge ko tyangi kuna lida omyuji are retoni ko botor nenge ³manyu kweny kuna inyuji mietare retoni ko ngorwani lo ricuno koditi neicieng to kof fad.⁴To faritin mietare kuna lofwonuno, aculu cia nan kuju kof na locia to faritin keek ongon ko karwehin keek ongon ato cia nan afic sangite kuna iwari kulafa lafik nan ko fad”. ⁵Otubahi Noa kitiyo sangite fad iya na locihare Lahitok Lobanga inyi.⁶Orumu Noa longon ko karihin kulo obolore nenge mia ile na lolotunore kifi isod kof. ⁷Noa ko tee kilahaji kunenge ko ngorwani nenge ko ngorwo kulo tee kunenge ko rutoro katwa lo tigol lo furare inyi kifi isod.⁸Ofwonu tyangi kuna ijiri ko kuna idwari, ko kweny ko sangite kuna lokudita fad tare, tare ⁹retoni ko ngorwani iyo Noa orutori katwa lo tigol iya na orumu locihare Lobanga. ¹⁰To korwong lo faritin myetare ibul kifi isod kof.¹¹Iyo kari lo mia ile lo warun lo Noa, iyo far lo tomon ko mietare lo ofa lo are otwajuno kifi to katwa lo kof manyu ongaja lokolihin kulo kifi kulo kai. ¹²Oto kuju ocia to faritin keek ongon ko karwehin keek ongon.¹³Tona far token orute Noa ko tee kilahaji kunenge Sem, Kam ko Japet ko ngorwani nenge ko ngorwo kulo tee kunenge karwa lo tigol. ¹⁴Ofwo icieng ko tyangi kulo mwang pili to koditihin kunneicieng ko sang pili to koditihin kuneicieng, sangite kuna lokudita to kof pili to koditihin kuneicieng, ko kweny pili to koditihin kuneicieng ko sangite kuna ifuhoho fad to koditi kuneicieng.¹⁵Ofwonu sangite pili kuna iwari iyo Noa orutori katwa lo tigol. ¹⁶Tyangi fad kuna lorutoro ara retoni ko botor lo sangite kuna iwari fad iya na locihare Lobanga Noa. Oto Lobanga ko kigyenohino agwala lo tigol.¹⁷To faritin keek ongon osodoro kifi kifut kof, manyu iya na losodore kifi oto oting tigol kai to kof. ¹⁸Ifut kifi many osodoro noo to kof manyu ikwanga tigol yo kai lo kifi.¹⁹Osodoro kifi kifut bebe many odile dongeco kuna hitoha to kof fad. ²⁰Osodoro kifi kifut many odile dongeco to futihin kuna logal keek are.²¹Okeroro sangite kuna iwari to kof pili, kweny, sang, tyangi kulo mwang, sangite kuna ifuhoho fad ko cio fad. ²²Sangite pili kuna longon ko wirita lo warun kumeco kuna lorumu ongon tode lo kof ko weyaru fad.²³Sangite kuna iwari to kwe lo kof ko keroro fad, cio, tyangi ko sangite kuna lokudita kof ko kweny ofiaari to kof fad. Otong Noa ko kuna longoni ko inyi katwa lo tigol. ²⁴Ifut kifi kof to faritin mia Lobito ko keek miet.

¹Ati, iiu Lobanga Noa ko tyangi kulo mwang fad ko sang kuna lorumu ongon konyi katua lo tigol ko culuno inyi kiyoma kof iciak kifi juraru ²Oto ipulahi kulo kifi kulo kof lokolihin kulo kifi kulo kai ko kigenoro obenge kuju to kai. ³To lohicungi lo faritin mia Lobito ko keek miet liciak kifi juraru.⁴Iyo far lo tomon ko mietare ofa lo mietare olotu tigol ikac kue lo donge lo Ararat. ⁵Osodoro kifi juraru many ogoru ofa lo tomon iyo far lo Lobito ofa lo tomon obotoho kueci kulo dongeco.⁶To kifwongi lo faritin keek ongon, onga Noa lotupulec na lofik inyi iyo tigol ⁷ko cularu agak olo inyi fuho ara lilorita ene koi di many ojure kifi to kof.⁹Oto inyi ko cularu kuri lo deya kolojure kifi to kof. Ati ida kuri orumu lodohinore tonyio orumu kifi orihe imuhe kof oto ko yituno iyo Noa katua lo tigol. ⁸Ifote inyi kana iniefu kuri inyiahu katua lo tigol.¹⁰Itil inyi to faritin mietare ari ko cularu kuri to tigol. ¹¹Koloitu kuri dihonyi kurou omuhuno beneti lo zaituni na lorihe odieuno ocor, Noa ko yenun jimitan lojure kifi to kof. ¹²Oto itil faritin kuna kude mietare ko cularu kuri ari olo dong ko tongoro ida oyitu dihonyi.¹³To far lo Lobito ofa lo Lobito lo karihin mia ile ko Lobito kulo warun lo Noa orumu kifi lotowe to kof ; ongoje Noa agwala lo tigol ko deuno jimitan lotou kof. ¹⁴To far lo keek are ko mietare ofa lo are orumu kof lotou ngou¹⁵Lobanga ko jimitan diho Noa ¹⁶“Torutu oleng to katua lo tigol isi ko ngorwani nino ko tee kunino ko ngorwo kuneicieng. ¹⁷Iyauno sangite kuna iwari kuna lohingoni ko isi oleng; - kweny, tyangi ko sangite pili kuna lokudita to kof ojir otomoniti kof, opiti manyu oborengi to kof.''¹⁸Tona, orutu Noah Ara Lobito ko tee kunenge ko ngorwani nenge kongorwo kulo tee kunenge. ¹⁹Tyangi fad ko sangite kuna lokudita to kof ko kweny pili, sangite pili kuna lolot to kof ko rutuno to tigol to koditihin gele gele.²⁰Oto Noa ifak ciali lo Lobanga ko dumuno tyangi ko kweny kuna ijiri ofejohi ara kicorita diho Lobanga ²¹Ingwatu Lobanga uron lo kicorita oto ojo to tau nenge, “ida cia na afice kof ari to koditi lo tungani kileng ngorohoi kodomo lo tau nenge many to okisidi; manyu ida mute nan akeru sangite kuna iwari ari iya langole latiyore nan. ²²iya na longonore kof tur, yaa kinyemo ko dengo, kirobi ko nohun, kamieu ko furat, far ko karue ida mute icung.''

¹Oto Lobanga igatahi Noa ko tee kunenge gum ojo diho icieng, “ititomon ipit itifut kof. ²tyangi kulo mwang ko kweny fad kibangiti cia ko rima ite. Acio nan icieng ko sangite kuna lokudita to kof ko kayam kulo namhatua fad kac kuningi.³sangite fad kuna iwari olotita itongo ara daha dihote. Iya na afa lahicorihinore nan isi jatyong kulo mana, ahicio dong jijia sangite fad. ⁴Ati kenyia tyang ko -okoto to -ken nenge.⁵manyu afura cia nan to okoto lo warun ningi. Afura cia nan iyo tyangi fad. Manyu afura cia nan iyo tungani to Lobito to Lobito warun lo tungani kaletoni ⁶Tungani na lijuhe okoto lo tungani, tungani manyu cia lijuhe okoto nenge tonyio iyo ririoro lo Lobanga oduk Lobanga tungani. ⁷ititomon, itopit iborengi itifut kof.⁸Oto Lobanga ojo diho Noa ko tee kunenge ⁹“Tode afiha nan ciharu nei kote ko lotataha kuningi kuna mute lohijifita ite ¹⁰ko sangite kuna iwari fad kulangole lohingoni ko ite; kweny, sang, ko tyangi kulo mwang fad kuna ngole lorutu kote to katua lo tigol, sangite kuna iwari to kof fad.¹¹Afik nan ciharu nei kote: ida mute nan akeru warun to kifi isod ari. ida cia mute lobo isod okeru kof ari. ¹²oto Lobanga ojo, “Ara ene kitotorita lo ciharu na lafiha nan kiji nei kote ko sangite kuna iwari longoni kote. Ciharu lo kofiang pili kuna lofwonuno. ¹³Lafik nan okilok nei iyo idis na cia lara kitotorita lo ciharu nei ko kof.¹⁴kalayauno nan idis kai lo kof oto hati okilok ko boto iyo idis, ¹⁵ayiu cia nan ciharu nei kote ko sangite kuna iwari to koditihin fad, ida mute kifi orihe isod lo keruno warun fad to kof.¹⁶Kaloboto okilok iyo idis adeu cia nan ayiu ciharu na isio na longon kiji lo Lobanga ko sangite kuna iwari fad to kof. ¹⁷Lobanga ko jimitan diho Noa, “Ara ene kitotori lo ciharu na lafik nan kiji nei ko sangite kuna iwari fad to kof.”¹⁸Ara tee kulo Noa kulafa loruto to katua lo tigol; Sem, Kam ko Japet. Ara afa Kama pa lo Kanaan ¹⁹kuno tee kilahaji kulo Noa uni icieng ofwonunore cio kuna lisarihi kof fad.²⁰Noa afa karemoni na lofir kitibula vinare ²¹Langun lomat inyi vino nenge, inyi ko ruma ko geto kema nenge ida imuk ken.²²Kam monye lo Kanaan kololo odeu kingaturo lo monye oto olo orihohi recera kunu are longoni oleng. ²³Oto Sem ko Japet odumu kyela itilorohi okokoho kuneicieng ko kingadaru lokorwonge ibirohini kyela imuhi apa neicieng ida icieng odeu kingaturu lo apa neicieng tonyio ibelori komoma kuneicieng iya oleng.²⁴Langun lokwenyu Noa to ruma nenge olotu orumu tohi na litii kito nenge la sidi ken nenge ²⁵oto ojo, “Ificori Kanaan, itongo mute inyi ara opii lo recera kunenge.”²⁶Ojo manyu, “Ingohi kwatun tara lo Lahitok Lobanga lo Sem! Icwara Kanaan tara opi lo Sem. ²⁷Ingohi Lobanga itilalat kof lo Japet, ingohi inyi tomanya kema lo Sem, manyu ingohi Kanaan tar opii lo Japet.”²⁸To kifwongi lo kifi isod, omany Noa karihin mia uni ko keek miat. ²⁹Ara karihin kulo Noa pili mia mietangon ko keek miet oweyarore.

¹Ara lorejore lo lotataha kulo tee kulo Noa; Sem, Kam ko Japet kuna manyu lotomonu tee kuneicieng to kifwongi lo kifi isod.²Tee kilahaji kulo Japet: Gomer, Magog, Madai, Javan, Tubal, Mesek ko Tiras ³Tee kulo Gomer; Askenaz, Ripat ko Togorma. ⁴Tee kulo Javan; Elisa, Tarsis, Kitim ko Rodanim. ⁵Iyo kuno cio ofwonunore cio kulo kutuk lo nam kuna lisarihi kofikofi kuneicieng to imaniti kuneicieng ko tenyitenyi kuneicieng gele gele.⁶Ara tee kilahaji kulo Kam; Kus, Mizraim, Put ko Kanaan. ⁷Tee kulo Kus; Seba, Avila, Sabtaa, Raama ko Sabteka.⁸Kus afa lara apa lo Nimrod na lolotu ara karemoni na ingere to kof. ⁹Ara afa inyi kamejani na ikwat to ketemoni lo Lobanga, inyi lici cio itiririo ojo, “Iya Nimrod kamejani na ikwat to ketemoni lo Lobanga. ¹⁰Ara afa kangite kuna hitoha kulo okabwe nenge; Babilon, Erek, Akad ko Kalne to kof lo Sinar.¹¹Tona kof olo inyi Asiria oduk Nineve, Rehobot, Ir, Kala ¹²ko Risen na longon kiji lo Nineve ko Kala, kang na hitok inyi na. ¹³Mizraim lotomonu cio kulo Lud, Anam, Lehab, Naptu, ¹⁴Patru, Kaslu kuna lofwonunore cio kulo Pilistina ko Kaptor.¹⁵Otomonu Kanaan Sidon okang nenge ko Itet, ¹⁶Jebus, Amor, Girgas, ¹⁷Ativi, Arak, Sinai ¹⁸Arvad, Zemar ko Kamas. To kifwongi ofwonu imaniti kulo Kanaan.¹⁹Many ogoru lohikorihin kulo kof lo Kanaan many to Sidon iya ngati lo Gerar many Gaza ko iya ngati lo Sodom, Gomora, Adma ko Zeboim many ogoru Lasa. ²⁰Ara kuno tee kulo Kam to imaniti ko tenyitenyi kuneicieng iyo fajihit ko kofikofi kuneicieng.²¹Otomonu manyu afa Sem na lara rece nenge lahitok Japet tee kilahaji. Sem lara fafai lo tee kulo Eber fad. ²²Tee kulo Sem: Elaim, Asur, Arapaksad, Lud ko Aram. ²³Tee kulo Aram; Uz, Hul, Geser ko Mesek.²⁴Otomonu afa Arapaksad Sela, Sela otomonu Eber. ²⁵Otomonu afa Eber tee kilahaji are: obara afa Lobito Peleg tonyo ara afa to faritin kunenge okorare kof; obara afa rece nenge Joktan.²⁶Otomonu Joktan Almodad, Selep, Azarmavet, Jera, ²⁷Adoram, Uzal, Dikla, ²⁸Obal, Abimael, Seba, ²⁹Opir, Avila ko Jobab ara afa kuno fad tee kulo Joktan.³⁰30 Kof na lomanyare icieng iciak to Masa many ngati lo Separ iya okangere kof lo dongecio ³¹Ara kuno tee kulo Sem to imaniti kuneicieng ko tenyitenyi kuneicieng iyo fajihit ko kofikofi kuneicieng.³²Ara kuno imaniti kulo tee kulo Noa to lorejore neicieng to kofikofi kuneicieng. Iyo icieng isarihi cio kof to kifwongi lo kifi isod.

¹Tona otenya afa kof fad tenya lobito. ²Langun lofwo cio iya ngati lo okangere, orumahini faji lo Sinar ko manyati ijia.³Oto otenyuni ojo, “ifwonu ngatiduk matafali kifik otoc”, itiyore icieng matafali ara faji lo morutok ko odok ara kidwanyita. ⁴Oto icieng ojo, “Ifwonu ngafahata kang na hitok ko kaji icadak na logoru olele nenge many kai ojir kikwati ida manyu kisarihi kof fad.⁵Ati olotu Lobanga kof deya na kang ko kaji icadak na lifaha cio. ⁶Ojo Lahitok Lobanga, “Tode kalara icieng cio kuna limoraru otenyati tenya Lobito iciahi kitiyo jii, ida cia lobotohi lowak icieng kitiyo olanyu icieng. ⁷Ifwonu ingafi kitihalut tenya neicieng ojir ida oningoroti”.⁸Tona itisarihi Lobanga icieng tinyia kof pili ko kiticungoti kifaha na kang hitok. ⁹Inyi licio ilolongi na faji ojo Babel tonyio ara afa ijia itihalutore Lobanga tenya lo kof fad.¹⁰Ara ene lorejore lo lotataha kulo Sem. Koloring karihin are tona lokerunore kifi isod kov orumu Sem longon ko karihin mia Lobito olotu otomonu Arpaksad. ¹¹Langun lotomonu Arpaksad itong Sem karihin keek miet otomonu tee kilahaji kulakude ko kariok.¹²Kologoru karihin kulo Arpaksad keek uni ko miet, olotu otomonu Sela. ¹³Langun lotomonu Sela itong Arpaksad karihin mia ongon ko uni otomonu tee kilahaji kulakude ko kariok.¹⁴Kologoru karihin kulo Sela keek uni olotu otomonu Eber. ¹⁵Langun lotomonu Eber itong Sela karihin mia ongon ko uni otomonu tee kilahaji kulakude ko kariok.¹⁶Kologoru karihin kulo Eber keek uni ko ongon, olotu otomonu Peleg. ¹⁷Langun lotomonu Peleg itong Eber karihin mia ongon ko keek uni, otomonu tee kilahaji kunakude ko kariok.¹⁸Kologoru karihin kulo Peleg keek uni, olotu otomonu Reu. ¹⁹Langun lotomonu Reu, itong Peleg karihin mia are ko mietangon otomonu tee kilahaji kunakude ko kariok.²⁰Kologoru karihin kulo Reu keek uni ko are, olotu otomonu Serug. ²¹Langun lotomonu Serug itong Reu karihin mia are ko mietare otomonu tee kilahaji kunakude ko kariok.²²Kologoru Serug karihin keek uni olotu otomonu Naor. ²³Langun lotomonu Naor itong Serug karihin Mia are otomonu tee kilahaji kunakude ko kariok.²⁴Kologoru karihin kulo Naor keek are ko mietangon olotu otomonu Tera. ²⁵Langun lotomonu Tera itong Naor karihin mia Lobito ko tomon ko mietangon otomonu tee kilahaji kunakude ko kariok. ²⁶Kologoru karihin kulo Tera keek mietare otomonu Abraam, Naor ko Aran.²⁷Ara ene lorejore lo lotataha kulo Tera. Otomonu Tera Abraam, Naor ko Aran. Olotu Aran otomonu Lot. ²⁸Orihe monye Tera owar owei Aran to Ur kof lo Kaldaia lotomonore nenge.²⁹Oyema Abraam ko rece Naor. Obara afa ngorwani lo Abraan Sarai, obara ngorwani lo Naor Milka ara afa inyi kito lo Aran na lara monye lo Milka ko Iska. ³⁰Okorif afa Sarai oru lobo kito nenge.³¹Odumu Tera kito nenge Abraam ko lotata nenge Lot kito lo Aran ko ngorwani lo kito nenge Sarai ngorwani lo Abraam ko wojunoti ara Lobito to Ur kof lo Kalidaia ko johitati iya Kanaan. Ati ojo icieng ogoru Aran ko manyati ijia. ³²Itong Tera karihin mia are ko miet ko weihino kof lo Aran.

¹Orihohi Lahitok Abraam ojo, “Ilo to kof ningi, to imanit nino ko to kaji lo apa nino iya kof na cia lahitotorohino nan isi. ²Ahicio cia nan isi ira ilulung lo cio kuna iborengi, manyu ahigatahi cia nan isi gum. Acio cia nan karana nino obolo noo, manyu ahitirak cia nan isi kayaunoni lo gum. ³Acio cia nan gum iyo cio kuna lohigatahi isi gum, manyu kuna lohifico isi afice manyu nan icieng manyu cio pili to kof orumuni cia gum tosi”.⁴Oto Abraam ko loro iya na lorihohinore Lobanga inyi manyu ilihe Lot ko inyi. Lafar licahare Abram lotita to Aran orumu inyi lara karihin kulo obolore nenge keek mietare ko miet. ⁵Odumu inyi ngorwani nenge Sarai ko kito lo rece Lot ko sang kuna lorumu icieng otehita ko cio kuna lorumu icieng to Aran ko johitati iya kof lo Kanaan ofwo icieng ogoru ijia.⁶Owaj Abraam na kof to fajihit ogoru many ciani na hitok na longon More kof lo Sekem, to kuna faritin orumu cio kulo Kanaan ongoni na kof. ⁷Oboto Lobanga iyo Abraam orihohi inyi ojo, “Acwara nan ene kof iyo lotataha kunino”. Oto Abraam ko duhohino ciali iyo Lobanga na loboto iyo inyi ijia.⁸Tinyia osodoro inyi lotita iya dongeco kuna longoni ngati lo okangere lo Betel ko gurohino kema nenge ijia kiji lo Betel ko Ai, Betel iya lodoyorore lo kolong Ai iya ngati lo okangere oduhohi manyu ciali ijia iyo Lahitok manyu iletohi karana lo Lahitok. ⁹Oto Abraam owoju tinyia osodoro lotita iya ngati lo Negeu.¹⁰Tona ongon afa kinga na kof oto Abraam owoju olo iya Ijipt lo loro manya ijia lobo gaa tonyio orumu kinga obolo noo. ¹¹Langun lo loro inyi rutoro Ijipt, oto ko jimitan iyo ngorwani nenge Sarai; iyen isi nan jimitan isi ngorwani na idwaru noo. ¹²Kolohideu cia cio kulo Ijipt isi, ojimi cia, “Ngorwani nenge ene”. Oto cia kifadari nan kingerihini isi. ¹³Torihohi icieng ijio ira isi kanece nei ojir kitii nan ara na ijir manyu orici warun nei tosi.¹⁴Kologoru Abraam Ijipt odeu cio kulo Ijipt jimitan ara Sarai ngorwani na idwaru noo. ¹⁵Kolodeu kabolorok kulo kang lo Parao dwarujon nenge manyu kokiyaroti inyi kang lo okabwe lo Parao. ¹⁶Itii Parao Abraam ara na ijir tonyio manyu orumu Abraam kera, kicu, sigiria botora ko rei cio katiyok kariok ko kilahaji ko lonagahin.¹⁷Ati icio Lobanga mwaita kuna igoli kenite kulo cio kulo kaji lo Parao to ngorwani lo Abraam Sarai. ¹⁸Oto Parao ko kilolonguno Abraam ketemoni nenge itifi inyi Abraam ojo, “Nyio itii isi iyo nan? Nyio ida isi kirihohi nan jimitan ara inyi ngorwani nino? ¹⁹Nyio ijo isi ara inyi kanece nino icio nan atirak inyi ara ngorwani nei? Jijia dong, ngorwani nino ene todumu inyi ilo!” ²⁰Oto Parao ko ciha cio kulo kof nenge to Abraam oto icieng inieme inyi ko ngorwani nenge ko sangite kunenge pili.

¹Abraam ko loro to Ijipt iya Negev, ko ngorwani nenge ko sangite kuna lotehita inyi fad manyu ilik Lot ko inyi. ²Orumu Abraam lobara noo, sang, dab ko rial.³To Negev olo inyi fajihit beciek many ogoru Betel lafa faji longon kiji lo Betel ko Ai lafa logurohinore inyi kema nenge berien ⁴lafa loduhohinore inyi ciali ketemoni . Oto Abraam ilolong karana lo Lahitok.⁵5Manyu, Lot na lorumu lilihita ko Abraam orumu manyu ongon ko sang kicu ko kera ko cio katiyok. ⁶Ati ida kof otum lohitibalare lo sang to icieng are fad tonyio obaraha orumu icieng noo. ⁷Iciak ngolofa ngonun kiji lo katibalak kulo sang kulo Abraam ko katibalak kulo sang lot. Orumu cio kulo kanaan ko cio kulo Perez lomanya na kof.⁸Abraam ko jimitan iyo Lot, “Kecio ngolofa ongon kiji nei ko isi kode kiji lo katibalak kunino ko kunei tonyio kira ohoi kajeba. ⁹Ida ene kof fad ongon ketemoni nino? Ngatikorati kalilo isi iya ikajong nan alo iya iteten kalilo isi iya iteten nan alo iya ikajong.¹⁰Oto Lot ongolo ode ridat lo Jordan na loitoro iya ngati lo Zoar ocaf kifi iya mana lo Lobanga ori iya kof lo Ijipt ara ene orihe Lobanga ida locure Sodom ko Gomora. ¹¹Oto Lot ko nyumuno ridat lo Jordan fad ko loro iya ijia.¹²Oto Abraam kof lo Kanaan, oto Lot itong iyo kangite kulo oleng ogurohi kema nenge onyiha ko Sodom. ¹³Tona orohoi orumu cio kulo Sodom noo manyu ipali kipal nahitok to ketemoni lo Lobanga.¹⁴Langun lokoraru lot, orihohi Lobanga Abraam ojo, “Tode tinyia lingonore isi iya ngati lo okangere ko lodoyore lo kolong, ngati lo kai ko orof. ¹⁵Na kof fad lideya isi acio mute nan isi ko lotataha kunino tur.¹⁶Atiririhi mute nan lotataha kunino ko fur lo kof na kolotum tungani kikenuno fur lo kof, inyiha lotataha kunino ikenuno. ¹⁷Ilo towaj karitan ko lalatun lone kof tonyio ahicwara nan isi. ¹⁸Tona Abraam ko loro manya onyiha ko ciani na hitok to morea to kof lo Ibron, ogurohi kema nenge ijia to duhohino ciali iyo Lahitok

¹To karihin kulo Amrapel kabu lo Sinar, Ariok kabu lo Elsar, Kedorlama kabu lo Elam ko Tolal kabu lo Goim ²ofwo kuno kabuno kitiremo Bera kabu lo Sodom, Birisa kabu lo Gomora, Sinab kabu lo Adama Sember kabu lo Zeboim ko kabu lo Bela kode Zoar.³Ofwonu kuno kabuno lileti to kifwongi imorihini karemok kuneicieng ridat lo Sidim na lara nam lo Balang. ⁴Itongo afa icieng iyo okabwe lo Kedorlama to karihin tomon ko are ati ofwonu Okom silan iyo kari lo tomon ko uni. ⁵Iyo kari lo tomon ko ongon olo Kedorlama ko kuna kabuno limora ko inyi olanyu cio kulo Repi to Asteros, cio kulo Karnaim, cio kulo Zup to Kam, cio kulo Fmit to Save Kiriasaim ⁶ko cio kulo Hor to kof lo donge lo Seir ogoruni many El Paran na lonyiha ko kuny.⁷Oto ibeloti ko fworo En Mispat na lara Kades oto ko lanyunoti kof lo cio kulo Amalek fad imoruni ko kof lo cio kulo Amor kuna lorumu omanya Azezon Tamar. ⁸Oto kabu lo Sodom, kabu lo Gomora, kabu lo Adama, kabu lo Zeboim ko kabu lo Bela na lara Zoar ko kidororo ofwo otuhohini loreunore Sidim ⁹oraarihin Kedorlama kabu lo Elam, Tidal kabu lo Goim, Amurapel kabu lo Sinar ko Ariok kabu lo Elsar- kabuno ongon isiraniti ko kabuno miet.¹⁰Ridat lo Sidim ongon afa ko tulaha kulo odok na irwok, ojo lifeita kabu lo Sodom ko lo Gomora ourohino cio kude katwa lo kuna tulaha ife kula kude dongeco. ¹¹Obele kuna kabuno sangite kulo Sodom ko Gomora fad ko dahi fahi ko fworoti. ¹²Oyorori ko kito lo rece lo Abraam Lot ko sangite kunenge tonyio omanya afa inyi Sodom.¹³Olotu tungani lobo lifeju orihohi Abraam Ibruni, lorumu omanya fotiri lo cianitore lo Mamre na lara Amorani, rece Eskol ko Aner kuna afa lomanya ko Abraam. ¹⁴Koloning Abraam jimitan liyari kito lo rece ilolong rei kuna litiyeni rem cio Mia uni ko tomon ko mietauni kuna lotomonohini kaji nenge ko tiforo kuna merok many kof lo Dan.¹⁵To karwe, okor Abraam karemok kunenge Ipusohini merok ko lanyuno icieng ifuharu icieng many Hoba ngati lo kai lo Damaska. ¹⁶Oruju inyi sangite ko kinyahuno kito lo rece Lot ko sangite kunenge fad ara Lobito ko ngorwo ko cio kuna kude.¹⁷Langun loituno Abraam to rem na lolanyunore Kedorlama ko kula kude kabuno orumu lirumu ko inyi olotu kabu lo Sodom kitirico inyi ridat lo Save (jimitan ridat lo kabuno). ¹⁸Oto Melkisedek kabu lo Salem iyauno mugati ko vino itongo orumu inyi ara kadwarani lo Lobanga na longon kai noo.¹⁹Oto inyi igatahi Abraam gum ojo, “Icio Lobanga na longon kai noo Abraam gum, Lobanga na loduk kai ko kof ²⁰Manyu maja ongon iyo Lobanga na longon kai noo na licio merok kunino kac kunino”. Oto Abraam icio inyi Lobito iyo tomon kulo sangite fad.''²¹Oto kabu lo Sodom ojo iyo Abraam, “Kicio nan cio isi iyaru sangite”. ²²Ati ojo Abraam iyo kabu lo Sodom, “Abutia nan iyo Lobanga na longon kai noo kaduhoni lo kai ko kof to to tingo lo kac kunei kai ²³jimitan ida nan aruk lobo tohi lara nino kileng usi kode kofite lo kamuhe ojir ida mute isi ijio latibar nan Abraam”. ²⁴Ida cia nan aruk kilifuno lobo tohi ingohi acung to tohi na lonyia karemok kunei ko sangite kuna liyaru cio kuna lohilihu ko nan iya Aner, Eskol ko Mamre ingohi icieng iyaru ikoriti kuna locam to icieng”.

¹To kifwongi, olotu tenya lo Lahitok iyo Abraam iyo kitiboti ojo,“Kebang Abraam ara nan buhu nino kiciorit nino na ibolo noo”. ²Ati ojo Abraam, “Kalanyunoni Lahitok nyio ngehicio isi nan ati nan oru kito manyu kalunyoni lo kaji nei inyi Eliaza lo Damaskas?” ³Manyu ojo Abraam, “Lohingony isi nan tee tona katiyoni lo kang nei inyi mute lara kalunyoni lo kalitole”.⁴Oto tenya lo Lahitok olotu iyo inyi na lojo, “Ida cia ene tungani ara kalunyoni lo kang nino ati kito na lara lo ken ko okoto nino inyi cia lara kalunyoni lo kang nino.’’ ⁵Oto iyaru inyi oleng ko jimitan iyo inyi, “Tode kai ikena kanger kalitum ba isi kikena icieng”, ktk ojo iyo inyi, “ori mute lotataha kunino jii.”⁶Iruk Abraam tenya lo Lahitok, oto ikenihini iyo inyi ara biran. ⁷Manyu osod rihohino inyi ojo, “Nan Lahitok na lahiyauno isi to Ur to kof lo Kalidaia lo kicwara isi ene kof ara nino.’’ ⁸Ati ojo Abraam, “Kalanyunoni Lahitok, atum nan yenun aja jimitan ara mute ene kof nei?”⁹Oto Lahitok ojo iyo inyi, “Kiyahahi nan kace botor, kine ko mongo lo ker kuna lara karihin kulo obolore neicieng uni ara Lobito ko kuri ko amam na longarihi.’’ ¹⁰Iyauno Abraam kuna sang fad iyo inyi, ongut tare tare ko kitiparahino ingutiti isiran angati ko angati ida hati inyi ogut kweny. ¹¹Ofwonu kweny kulo kai owahiti daha tyang lo kuna sang ati ifuhe Abraam icieng.¹²Kolodoyoro kolong, ogetoro Abraam jio kuna iriociho, oto lokimuyuk na imutok na litibanga imuk inyi. ¹³Oto Lahitok ojo iyo inyi, “toyen otoc jimitan itong mute lotataha kunino karihin mia ongon kof.¹⁴Na lida ara neicieng manyu itigemi ara opihin to nu kof. ¹⁵Ati isis ilo mute isi iyo fafaico kunino to kisiliban kinuhi langun lingoroyon. ¹⁶Iyo kofiangiti lo ongon oitu mute lotataha junino ene tonyio orihe kipal lo cio kulo Amor ida logoru lohicungi.¹⁷Kolodoi kolong imuhe lokimuyuk kof olotu moti lo furo ko kima inwaha oring ara kiji lo tyang kulo kuna sang. ¹⁸Tona far icio Lobanga Abraam ciharu ojo, “Acio mute nan ene kof iyo lotataha kunino many to wadi lo Ijipt ogoru many nam na hitok lo Yuparets- ¹⁹kof lo cio kulo Kena, Keniz, Kadom, ²⁰Hitit, Perez Repa, ²¹Amor, Kanaan, GIrgas ko Jebus.’’

¹Tona ida Sarai ngorwani lo Abraam otomonu kode tee tonyi ati orumu inyi ongon ko lobo katiyoni nenge Ijiptoni lo baraHagar. ²Dong ojo Sarai iyo Abraam, “lohingony Lahitok nan otomone. Ilo togeto ko katiyoni nei ngohicio ha ba Lobanga tee ara iyo inyi.’’ Iruk Abraam tenya lo Sarai ³dong langun litong Abraam kof lo Kanaan karihin tomon, odumu ngorwani nenge Sarai katiyoni nenge Hagar na lara Ijiptoni icorihi iyo retoni nenge ara ngorwani. ⁴Itong inyi ko inyi itifong. Langun loyen Hagar jimitan lafonga inyi iciak kitikaja ngoto kang.⁵Oto Sarai ojo iyo Abraam, “Isi litehita tenya lo kidak na larumu nan. Afik nan katiyoni nei kana nino ojo loyen ojo lafonga inyi ene dong litikaja nan. Ingohi Lobanga tongot tenya kiji nei ko isi. ⁶Ojo Abraam iyo inyi, “ongon katiyoni nino kackunino, itiyo iyo inyi iya na locam to inyi.’’ Oto Sarai ko kitigema Hagar many ife to ketemoni nenge.⁷Orumu Malaika lo Lahitok Hagar onyiha ko ipulak lo kifi to kuny, ara na ipulak na longon kikoi na loloro Sur. ⁸Ojo Malaika iyo inyi, “Hagar katiyoni lo Sarai, ilotu isi taji manyu iloro aji?” Inyiahahi inyi ojo, “afeita nan iyo nahitok nei Sarai.’’⁹Oteny Malaika lo Lahitok iyo inyi ojo, “Toite iyo nahitok nino manyu icwara ningo iyo inyi.’’ ¹⁰Osodoro Malaika tenya iyo inyi ojo, “Acio mute nan lotataha kunino oborengi ida ikenuno.’’¹¹Ojo manyu Malaika lo Lahitok iyo inyi, “Ifonga jijia isi manyu itomonu cia kito retoni itibarahi cia isi inyi karana Ismail tonyio Loning Lahitok mehino nino ¹²owar mute inyi iya Sigiria lo mwang oliware mute inyi cio fad manyu cio fad oliware inyi ko recera fad.’’¹³Icio inyi ene karana iyo Lahitok na lotenya ko inyi. “Ira isi Lobanga na lo deya nan” tonyio ojo inyi, “ladeu dong nan inyi na lodeya nan.’’ ¹⁴Inyi na lobarare na ipulak lo kifi Beer Lahai Roi orihe ongon kiji lo Kades ko Bered.¹⁵Dong otomonohi Hagar Abraam kito retoni, itibarahi Abraam kito na lotomonu inyi ko Hagar Ismail. ¹⁶Orumu karihin kulo Abraam lara keek mietauni lo ile na kari lotomonunorehin Ismail.

¹Kologoru karihin kulo Abram keek mietangon ko mietangon, oboto Lahitok iyo inyi oto orihohi inyi ojo, “Nan Lobanga Kalanyunoni fad, itongo ketemoni nei to ningo ko nyujon. ²Ato cia nan afik ciharu kiji nei ko isi, manyu acio isi ipit iborengi bebe.’’³Orubuk Abram ketemoni lo Lobanga oto orihohi Lobanga inyi ojo, ⁴“Ara ene ciharu nei ko isi ira isi monye lo misihi beciek. ⁵Lida cia isi irihe ibara Abram libara cia isi Abraham tonyio lahitirak nan isi ara monye lo misihi fad. ⁶Ahitipit cia nan isi; acio mute nan misi ofwonu ara iyo isi, manyu ofwonu mute kabuno to ken nino.⁷Afik cia nan ciharu nei ara ciharu na isio tur kiji nei ko isi ko lotataha kunino to omot nino iyo kofiang kuna lijifita to rahun nan Lobanga nino ko Lobanga lo lotataha kunino kuna mute lijifita isi. ⁸Kof lo Kanaan to tuban ene litongore isi ara kamanyahinoni acio cia nan arak of lo manya lo tur iyo isi ko iyo lotataha kunino manyu ara mute nan Lobanga neicieng.’’⁹Tinyia ojo Lobanga iyo Abraham, “To isi ojir isi iric ciharu nei, isi ko lotataha kunino iyo kofiang fad kuna lofwonuno. ¹⁰Ara ene ciharu nei ko isi ko lotataha kunino to omot nino, ciharu na lojir isi iric; tee rei kuna longoni kiji ningi fad ojir iliri. ¹¹Ojir isi kiliri ara kitotori lo ciharu nei ko isi.¹²To kofiang fad kuna lijifuno tee rei pili kuna logoru faritin mietauni to far na lotomonunorehin, ojir iliri imoru ko kuna lotomonohini kaji nino kode inyiangu isi to robia kunino to misiok, kuna lida isi itomonu. ¹³Kode otomonohini kang nino kode inyiangu isi to robia kunino ojir iliri. Ciharu nei iyo tyang lo ken nino ojir ara ciharu lo tur. ¹⁴Lobo tungani retoni na lida ilirari tyang lo ken nenge ojir odumari oleng to kiji lo cio kunenge tonyio logil inyi ciharu nei.’’¹⁵Ojo manyu Lobanga iyo Abraham, “Manyu to ngorwani nino Sarai, kerihe ilolong inyi ijo Sarai, lobara karana nenge Arah. ¹⁶Agatahi cia nan inyi gum, manyu ahicio cia nan isi kito retoni ara iyo inyi. Agat cia nan inyi manyu atirak inyi ara ngoto misihi, ofwonu mute kubuno kulo cio to katwa nenge.’’¹⁷Ouroro Abraham lorubuhe; oto okweni ojo ake ake, “Otum tungani na lara karihin mia Lobito tomonuno kito? Otum Sarah na lara karihin keek mietangon tomonuno kito?” ¹⁸Oto Abraham ojo iyo Lobanga, “Ngowar hati Ismail iyo gum nino!”¹⁹Tona ojo Lobanga, “Ibo, ati ngorwani nino Sarah, kitomonohi cia isi kito retoni na litibarahi isi karana ijo Isako. Afik cia nan ciharu nei ko inyi ara ciharu lo tur to lotataha kunenge fad to omot nenge. ²⁰Manyu kalara to Ismail laning nan isi, agatahi cia nan inyi gum atipit cia nan inyi manyu atiboreng inyi bebe. ²¹Ara mute inyi monye lo kalanyunok tomon ko are manyu atirak mute nan inyi ara monye lo misi nahitok''.²²Langun lokeru Lobanga tenya ko Abraham, olo ongerihi inyi. ²³To na far bito odumu Abraham kito nenge Imail ko kuna lotomonohini kalenge ko kuna linyiangu inyi to robia kunenge, cio rei fad kulo kalenge ko kilira icieng iya na lorihohinore Lobanga inyi.²⁴Orumu karihin kulo Abraham lara keek mietangon ko mietangon tona far lilirarore inyi ²⁵manyu orumu karihin kulo kito nenge Ismail lara tomon ko uni. ²⁶Iliri Abraham ko kito nenge Ismail la far bito. ²⁷Manyu cio rei kuna longon kolo Abraham ko kuna lotomonuni kalenge ko kuna linyiangun inyi to kiji lo misiok ko kiliraru ko inyi ara Lobito.

¹Oboto Lahitok iyo Abraham to cianitore lo Mamre orumu inyi itongo agwala lo kema nenge to nohun lo far. ²Oting Abraham kwe kai ko deuno cio uni owoita onyiha. Kolodeu inyi icieng, oto oruharu to agwala lo kema nenge kitirico icieng ko gungon kof ketemoni neicieng.³Oto ojo, “Kalarumu nan kisisio lo komom nino Lahitok nei, keringe igal karwaani nino. ⁴Ingohi iyauni kode kifi kuting ilalare ite kejuha kuningi iyoma hati fotiri lone ciani. ⁵Ingohi ahicio nan ite lobo tohi lo daha inyia irumunore golun ifwore iya na lifwonu ite kolo karwaani nino, inyiahahi icieng inyi ojo“Ojir noo, itiyo iya na litenyare isi.’’⁶Abraham ko ruharu iya katwa lo kema iyo Sarah ko rihohino inyi ojo, “Todumu ratil uni kulo kofwo kuna itinyaha, ingol, ifun kude mugatihin.’’ ⁷Oto ko kifejaru lodahare lo sang ko loro nyumuno kacie na longarihi ko kicwara karwaani nenge olo oruk kikukuma. ⁸Oto Abraham iyauno Opopo, lei mucahar ko tyang lona kace likukumi otirohi ketemoni neicieng. Kolodaha icieng owoita inyi tang, fotiri lo ciani.⁹Itifi icieng inyi ojo, “Aji ongon ngorwani nino Sarah? Ojo inyi ongon katwa lo kema.’’ ¹⁰Oto Lobito to kiji neicieng ojo, “Aitu cia nan iyo isi to kuno faritin nu kari orumu ngorwani nino Sarah itinaha kito retoni.’’ Tona orumu Sarah oningo to katwa lo kema na longon ngati lo korwong nenge.¹¹Orumu tona oho Abraham ko Sarah longoroyoni noo manyu orumu Sarah logal karihin kulo tomonun. ¹²Oto Sarah okweni ake ake iiyo ojo, “Langun laniama nan manyu longoroyon lahitok nei orihe cia nan arumu kwama lo kitongo? “¹³Tona ojo Lahitok iyo Abraham, “Nyio okweni Sarah ojo manyu, “Atum cia nan tomonuno kito ati nan langoroyon?” ¹⁴Ongon lobotohi logol olanyu Lobanga? Aitu cia nan to faritin kuna lacik nan nu kari manyu otomonu cia Sarah kito.’’ ¹⁵Obang Sarah oto ko talerun ojo, “Ida nan lakweni; Ati ojo inyi, “Ibo likweni isi.’’¹⁶Kolowoju kuna cio lowahiti fworo, oto odeyati orof iya ngati lo Sodom manyu iniamahi Abraham icieng. ¹⁷Oto Lahitok ojo, “Ngamen ha ba nan iyo Abraham tohi na lawak nan kitiyo? ¹⁸Olotu Anraham rahun Misi na hitok igol manyu Misihi to kof fad orumu cia kigatahino lo gum ara iyo inyi. ¹⁹Tonyio lanyumu nan inyi ojir itotorohi tee kunenge ko cio kulo kalenge to omot nenge lo rica kikoi lo Lahitok iyo kitiyo tohi na ijir ojir Lahitok icio itiihino iyo A braham tohi na locik inyi.''²⁰Tinyia ojo Lahitok, “Obolo kicira iyo Sodom ko Gomorah noo manyu kipal neicieng ibot bebe ²¹na licio nan aloro deya kolobolo kipal neicieng iya na laningore kicira nenge iyo nan. Kalida, ayen cia nan.²²Ibelo kuna cio ofwori iya ngati lo Sodom ati otong Abraham woita ketemoni lo Lahitok. ²³Oto Abraham olo iyo inyi ojo, “Ikeru cia isi cio kuna ijiri ara Lobito ko kuna irohori?²⁴Adi ba ngongoni cio keek miet kuna ijiri katwa lo na kang? Ikeru cia isi na kang ida ilau to kuna cio keek miet longoni katwa nenge? ²⁵Oloma iyo isi kitiyo jii, keruno cio kuna ijiri ko kuna irohori. Ingohi to loma iyo isi! Ida re kangotoni lo tenya lo kof fad itiyo na ijir?” ²⁶Ojo Lahitok, “Kalarumu nan cio kuna keek miet Sodom, alau cia nan na faji to icieng.’’²⁷Oto Abraham otenya ari ojo, “Jijia iya na latigol nan tau tenya ko Lahitok kileng lara nan fur ko ingula, ²⁸adi ba ngikuting cio kajirak to miet iyo keek miet? Ikeru cia isi kang fad to rujon lo kuna cio miet?” Ojo inyi, “kalarumu nan cio keek ongon ko miet ijia, ida cia nan akeru kang.’’²⁹Oteny Abaham iyo inyi ari ojo, “Adi ba ngongon cio kuna ijiri keek ongon tijia?” Ojo inyi, to kuna keek ongon ida cia nan atii.’’ ³⁰Tona ojo inyi, “Kecio hati Lahitok ilongo, ati kicio nan atenya. Adi ba ngorumuno keek uni keken ijia?” Inyiahahi inyi ojo, “Ida cia nan atii kalarumu nan keek uni ijia.’’ ³¹Ojo Abraham, “Jijia iya na logolore tau nei tenya ko Lahitok, adi ba ngorumuno keek are keken ijia?” Ojo inyi, “To kuna keek are ida cia nan akeru kang.’’³²Tona ojo inyi, “Kecio Lahitok ilongo ati ingohi atenya kakeny Lobito ari, Adi ba ngorumuno tomon ijia?” Inyiahahi inyi ojo, “To kuna tomon ifa cia nan akeru kang.’’ ³³Kolokeru Lahitok tenya ko Abraham oto ko loro, oite many Abraham kalenge.

¹Ogoru kuna malaikahin are Sodom kurou, manyu orumu Lot itongo lokoli lona kang. Kolodeu inyi icieng olo itiric icieng,ogung otir komom kof ketemoni neicieng. ²Ojo iyo icieng kulahitoha kunei, ibeloti ifwonu kaji lo karwaani ningi. Itum ite ilal kejuha kuningi, iget ifworore ketemoni kiwanyi berien. Ojo icieng ida kigeto ohoi par. ³Ati ifud inyi to golun many iruk icieng fworo ko inyi kaji nenge, ikukumahi inyi icieng daha, ofun mugatihin kuna loru ibula onyia icieng.⁴4 Orihe icieng ida lofwo geto, ofwonu cio rei to fajihit pili kulo kang lo Sodom, kilahaji ko ngoroyok fad iriti kaji lo Lot. ⁵Ilolongoti Lot ojo, aji kuladi cio lofwonu iyo isi? Iyauno oleng kiwak ohoi getore icieng.⁶6Olo Lot sita kitirico icieng igenihi agwala to kifwongi nenge ⁷manyu ojo iyo icieng, “ida morot kunei ketii ene tohi ibot. ⁸Tode angon nan ko tee kariok are kuna lorihe ida itongo ko rei. Ingohi a yauno nan icieng oleng iyo ite, itum ite itii iyo icieng tohi na liwak ite. Ati ketii lobo tohi iyo kuno cio lofwonu icieng iyo rica lo kaji nei.⁹Inyiahahi icieng Lot ojo, “Ingada to ketemoni niyang. Olotu afa elerok ara kamanyani ene kof niyang jijia libel ken ara kangotoni lo tenya! Kitii ciao hoi ken nino ilany na ngohitii iyo icieng. Osodoro icieng ko cula Lot manyu ofwori ara na lowahiti gila agwala.¹⁰Ati ipihe kunu cio to kaji Lot iya katwa lo ko kigenihino agwala. ¹¹Oto ko kitingodoroti kuna cio to oleng fad kilahaji ko ngoroyok ojir ida odeuni agwala.¹²Ojo kuna cio are iyo Lot, ingon isi ko cio kude ene, komon kode tee rei kode kariok, kode kude cio keken lara kunino to katwa lo ene kang? Todume icieng ten, ¹³tonyio kifworo ohoi keroro ene faji. Kicira na logoru iyo Lahitok tone faji obolo noo manyu kiculu inyi ohoi lo keroro inyi.¹⁴Tona olo lot oleng tenya ko komon kunenge kuna orumu loter tee kariok kunenge ara kulo yemaru. Ojo inyi iyo icieng. Itoruharoti ifwo tone faji tonyio okeroro Lahitok ene kang. Ati ofik komon kunenge ojo isonga ba inyi. ¹⁵Langun lowanguno kof, ifud malaikahin Lot ojo, toruk! Yaru ngorwani nino ko kuno tee kariok kunino are longoni ene tonyio ikeroro cia ite kalolotu kidak iyo ene kang.¹⁶Orihe inyi irungo, inief kuna cio kana nenge ko lo ngorwani nenge ko kulo tee kariok kunenge ko rihoroti inyi to na ijir oleng to katwa lo kang tonyio inief mehino Lobanga to icieng. ¹⁷Deu deu langun liyauni icieng oleng to katwa lo kang, ojo Lobito tungani iyo icieng, “Ifejaroti warita kuningi. Kengolo, manyu kewoita lobo faji ten to oleng! Ifejata iya dongecio ida ikeroro.”¹⁸Ati ojo Lot iyo icieng, Ida kulahitoha kunei, lwak! ¹⁹Lorumu karwaani ningi kisisio to ketemoni ningi lwahuno warun nei. Ati ida nan atum kifejaru many dongecio, kitihoru cia ene rohojun nan awei. ²⁰Tode ongon kang na inyiha ene na ngafe nan ijia, manyu isidi ingohiafe nan ijia-isidi manyu inyi noo afe nan ijia alo awar.²¹Ojo inyi iyo Lot, “Ojir acio cia nan isi ene kilifa manyu. Ida cia nan akeru na kang litenya isi. ²²Ati ifeja ijia deu deu tonyio ida cia nan atii lobo tohi many kaligoru isi ijia ''Inyi licio na kang obara Zoar.²³23 To tik na logorunore Lot Zoar orumu kolong longor kof. ²⁴Tinyia iticau Lobanga terek lo Salfa na inok iyo kangite kulo Sodom ko Gomorah na lolotu to kai iyo Lobanga. ²⁵Tona okeru inyi kuna kangite ko oleng fad, okeru cio fad kuna longoni kuna kangite ko cianitok ko nyari fad na longon na kof.²⁶Ati ongolo ngorwani lo Lot ko lulworo ara wiriti lo balang ²⁷Kiwanyi berien far na lijifita, owoju Abraham olo longole faji lowoitare inyi ketemoni lo Lahitok. ²⁸Ko deya iya ngati lo Sodom ko Gomorah ko oleng fad ko deuno furo na irioci ofuru to kof iya furo lo liti.²⁹Dong kolokeru Lobanga kangite kulo oleng iiu inyi Abraham oto ko lwahuno Lot iyo kidak na lokeru kangite kulo oleng idi afa lomanyare Lot.³⁰Ongerihi Lot ko tee kariok kunenge Zoar ko fworo manya dongecio tonyio orumu inyi obang manya Zoar. Omanya inyi ko tee kunenge kunom.³¹Lobo far, ojo kito nenge na hitok iyo na sidi, “Longoroyon apa niyang manyu oru rei ten na ngohicio ohoi tee iya na longonore kof fad. ³²Ngacwarata apa niyang omat vino ojir kigeto ko inyi kitihuju kaliyang ara iyo apa niyang.’’ ³³Na karwe itimat icieng apa neicieng vino olo kito nenge na hitok ogeto ko apa nenge. Ida inyi oyen tik na logetore inyi kode na lowojunore inyi.³⁴Kiwanyi nenge, ojo na kito hitok iyo na sidi, “Adi karwe lageto nan ko apa nei. Ngatimatata inyi vino ari ene karwe ojir isi ilo igeto ko inyi ojir kitihu kaji niyang ara iyo apa niyang. ³⁵Oto icieng itimat apa neicieng vino ari na karwe oto na kito nenge sidi olo ogeto ko apa nenge. Ari ida inyi oyen tik na logetore inyi kode na lowojunore inyi.³⁶Tona, ifonga tee kariok kulo Lot are fad ko apa neicieng. ³⁷Otomonu kito nenge na hitok kito retoni itabarahi ojo Moab; inyi lara monye lo cio kulo Moab kulo ene far. ³⁸Otomonu manyu na sidi kito retoni itibarahi ojo Ben-Ami; inyi lara monye lo cio kulo Amon kulo ene far.

¹Tona ojiohe Abraham tinyia iya kof lo Negev ko loro manya kiji lo Kades ko Sur. To kude faritin kuting omany inyi Gerar, ²Tinyia ojo Abraham to ngorwani nenge Sarah, "Ara inyi kanece nei.’’ Tona ocule Abimelek kabu lo Gerar cio iyaru Sarah iyo inyi. ³Ati olotu Lobanga iyo Abimelek to kitirija lobo karue ko jimitan iyo inyi, "Iri isi iya kaweyani to na ngorwani liyaru isi, ara inyi ngorwani na loyemaru."⁴Tona orumu Abimelek orihe ida isualahi inyi, oto ko jimitan, "Lahitok itum cia isi ikeru kof na iru ko kipal? ⁵Ida re ara inyi lojo iyo nan, 'Ara inyi kanece nei, manyu ida ene ngorwani lojo, Ara inyi rece nei? Atii nan ene to kue na iwang manyu to kac kuna inyuji.⁶Oto Lobanga ko jimitan iyo inyi to kitirija, "Ibo. Ayen nan ajo isi isi ene to kue na iwang inyi licio nan ahitik isi to kipala iyo nan. Inyi licio nan ahitihore isi tiro inyi. ⁷Jijia inyiahahi ngorwani lo lerok tonyio ara inyi kamocani, manyu kilifahi cia inyi isi ito cia isi iwar. Ati kalida isi inyiahahi inyi, toyen tijo isi ko kuna lara kunino fad iwei cia.⁸Kiwanyi berien lobito far nenge, Abimelek ko tubuno kabolorok kulo kof nenge fad ititimahi na tenya, oto bangun na hitok inief icieng. ⁹Tinyia Abimelek ko kilolonguno Abraham oto ojo diho inyi, "Nyio itii isi iyo ohoi? Nyio tohi apal nan diho isi licio isi iyauno kipal nahitok diho nan ko okabwe nei? Itii isi iyo nan tohi na lida ocam to kitiyo.¹⁰Oto Abimelek itifi Abraham ojo, "Nyio tohi itiyore isi jii?" ¹¹Inyiahahi Abraham ojo aii nan to tau nei ajo, 'oru bangun lo Lobanga tone kof, kifade cia kuno cio nan to ngorwani nei. ¹²to angati manyu ara inyi kanece nei dede kito lo apa nei ati ake ngotenge, tinya olotu inyi ara ngorwani nei.¹³Ojo dong Lobanga kitiratu nan to kolo apa nei, ajo nan diho inyi, 'Ara ene kikoi na ngitotorore isi kimaruno nino diho nan, iyo fajihit fad lohifwo, tijo, 'ara inyi rece nei'." ¹⁴Oto Abimelek iyauno kera, ko kicu ko karwaak rei ko ngorwo icwarahi Abraham manyu inyiahahi ngorwani nenge Sarah diho inyi.¹⁵Manyu ojo Abimelek diho inyi, "Ongon kof nei ketemoni nino tomanya lobo faji keken liwak isi. ¹⁶Ojo inyi iyo Sarah, 'Acwara nan rece nino ratili alif lobito kulo rial. Ara ene lo kimuho kipal na latii nan ken nino to ketemoni lo cio fad kuno lohingoni ko isi; iru isi ko lobo kipal.¹⁷Abraham ko kilifahino Abimelek, oto Lobanga ko kitifurioro Abimelek, ngorwani nenge ko ngorwo karwaak kunenge ojo ojir otomoni ari, ¹⁸Tonyio orumu Lobanga litik ngorwo kuna longoni kolo Abimelek fad tomonun to Sarah ngorwani lo Abraham.

¹Tona, inief kisa Lobanga to Sarah iya lafa lotenyare inyi, manyu itii Lobanga iyo Sarah tohi lafa locik inyi. ²O lotu Sarah ifonga otomonohi Abraham kito to ongoroyone nenge to kulafa faritin locik Lobanga inyi to ken. ³Itibarahi Abraham la kito lotomonohi Sarah inyi ojo Isako. ⁴Kologoru faritin kulo Isako mietauni, ilir Abraham inyi iya lafa locihare Lobanga.⁵Orumu karihin kulo Abraham lara mia lobito na lotomonunorehin Isako. ⁶Ojo Sarah, 'Liyauno Lobanga kwenita diho nan, manyu cio pili kuna loning ene tenya, kikweni cia ko nan'. ⁷Manyu osod inyi ojo, 'Ngai afa ngorihohi Abraham ojo itinak mute Sarah tee, ati latomonohi nan inyi kito retoni to ongoroyone nenge!''⁸Obolo kito ongerihi ikine, to far na longerihinore Isako ikine, ofik Abraham karama na hitok. ⁹Ati odeu Sarah ojo itidara na kito retoni lotomonohi Hagar na Ijiptoni Abraham.¹⁰Oto ojo iyo Abraham, "Ifuhe na ngorwani opiini ko kito nenge tonyio ida cia na kito lona ngorwani opiini ongar lunyo sangite ko kito nei Isako. ¹¹Iyauno na tenya kiudo bebe iyo Abraham tonyio ara tenya lo ken lo kito nenge.¹²Ati ojo Lobanga diho inyi, "Keudo to kito lo ngorwani opii nino. Toning tohi na lohirihohi Sarah isi tonyio ara iyo Isako ikenare Lobanga lotataha kunino. ¹³Acio cia nan kito lona opiini ara misi tonyio ara inyi kito nino.¹⁴Kiwanyi berien lobito far nenge, odumu Abraham lobo daha ko okodo lo kifi icio Hagar. Itahi inyi kuna sangite ko lahahino olo ko kito. Olo inyi loro nenge olo kibunyita kuny lo Beerseba. ¹⁵Langun loru kifi to okodo lo kifi, oto inyi ofik kito iyo lobo tim tonyio obuk inyi ojo, "ida nan awak deya weyaru lo kito nei. ¹⁶Oto inyi ingade faji na ngotum ngone na longorori to kawo dohino, ko kiciaha kicira tinyia litongore inyi.¹⁷Oning Lobanga kicira lo kito oto malaika lo Lobanga ko kilolongo Hagar to kai ko jimitan diho inyi, 'Nyio tenya Hagar? Kebang; Loning Lobanga kicira lo kito to nu faji logetore. ¹⁸Itiwoju kito, torik inyi to kana tonyio atirak mute nan inyi ara misi na hitok''.¹⁹Tinyia onga Lobanga konyeha kunenge itideu inyi itibi lo kifi. Oto inyi ko loro itifut okodo to kifi icio manyu kito omat. ²⁰Ongon orumu Lobanga ko na kito olotu inyi obolo. Omanya inyi kuny ko lotuno rahun katetenani to kawo. ²¹Kolomanya inyi kuny lo Paran, olotu ngotenge isufahi inyi ngorwani to ijipt.²²To kuna faritin ojo Abimelek ko Pikol lahitok lo karemok kunenge iyo Abraham, "Ongon Lobanga ko isi iyo sangite fad kuna litiyo isi. ²³Jijia ibutia iyo nan ene ketemoni lo Lobanga jimitan ida cia isi itiyo to kitinononga iyo nan ko tee kunei ko lotataha kunei. Kitotorohi nan ko ene kof limanyare isi ara missiohoni jiran na lori kona lahitotorohi nan isi. ²⁴Ojo Abraham, "Abuti nan."²⁵Tinyia imomodohi Abraham Abimelek tenya lo itibi lo kifi na loruje karwaak kulo Abimelek diho inyi. ²⁶Ati ojo Abimelek, "Ida nan ayen ngai litii ene. Ida manyu isi kirihohi nan, ninguno ene elefar." ²⁷Oto Abraham iyauno kera ko kicu icio Abimelek, tona oyomo kula cio are.²⁸Onyumu Abraham kera purno mietare itingade to kiji lo kaletok, ²⁹manyu itifi Abimelek Abraham ojo, "Nyio fotiri lo kuno purno kulo kera mietare litingade isi to kiji lo kaletok?" ³⁰Inyiahahi inyi ojo, "Ilifu kuno purno kulo kera mietare to kac kunei lo kitotoro jimitan nan labok na itibi lo kifi.''³¹Tona itibarahini na faji ojo Beerseba to nyio oyomo afa kuna cio are itibutiati ija. ³²To kifwongi lona yomo to Beerseba, oite Abimelek ko Pikol lahitok lo karemok kunenge kof lo Palestina.³³Itibulahi Abraham kwai Beerseba ko kilolongo karana lo Lahitok Lobanga na losio tur. ³⁴Oto Abraham omany kof lo Palestina faritin kuna iborengi.

¹To kifwongi lo kude faritin otem Lobanga Abraham ojo diho inyi, "Abraham" Inyiahahi Abraham ojo, "Nan ene." ²Tinyia ojo Lobanga, "Todumu kito nino, kito nino lobito hilong, na limaru isi - Isako - yaru kof lo Moria. Tofejohi inyi iyo nan ara kicorita locurat kai lo donge na lahitotorohi cia nan isi. ³Kiwanyi berien far na lijifita, owoju Abraham ko kitinafa sigiria nenge. Ilihe inyi ko karwaak kunenge are ko kito nenge Isako. Langun longutu inyi keyek kuna lotum cura kiciorita, ko lotita iya nu faji lorihohi Lobanga inyi.⁴To far lo uni nenge Abraham ko deuno nu faji orihe oloma gaa. ⁵Ojo inyi iyo karwaak kunenge, "Itongoti ene ko sigiria kifwo re ohoi ko ene lokilahaji idi. Kifwo ohoi kiwor Lobanga kiitu ene diho ite. ⁶Odumu Abraham keek itahi iyo kito nenge Isako, otek hati inyi kima ko ngalem. Ka liliharu icieng ara lobito.⁷Oto Isako ko tenya itifi apa nenge ojo, "Apa" Inyiahahi Abraham ojo, "Ee kito nei.’’ Ojo Isako, "kima ko keyek kuno ati ani hati ker lo kiciorita locurat?" ⁸Inyiahahi Abraham ojo, "Lobanga token cia licio ker lo kiciorita locurat kito nei." Oto icieng are ilik ara lobito.⁹Kologoru icieng faji na lorihohi Lobanga Abraham, oto Abraham ko kikukuma ciali ijia ko kicianahino keyek kai nenge. Otor inyi kito nenge Isako ko kitigetohino kue lo ciali kai lo keyek. ¹⁰Inyi ko cularu kana odumu ngalem ara na lowak kifadaru kito nenge.¹¹Ati ilolong malaika lo Lahitok inyi to kai ojo, "Abraham! Abraham!" Inyiahahi inyi ojo, "nan ene." ¹²Ojo malaika diho inyi, "kefik kana iyo kito. Ketii lobotohi keken ken nenge. Jijia layen nan jimitan ibang isi Lobanga tonyio ida isi lohingony nan kito nino, kito nino lobito hilong."¹³Ongolo Abraham ko deuno mongo lo ker to katua lo tim inief muriaha iyo tel - guma. Ko loro olahu na mongo lo ker ko fejohino ara kiciorita locurat faji lo kito nenge Isako. ¹⁴Inyi na itibarahi Abraham na faji ojo, "Icio cia Lobanga" ojimitarehin ko jijia ojo, "Kai lo donge lo Lahitok iciori cia."¹⁵Ilolong malaika lo Lahitok Abraham to kai ari ¹⁶ko jimitan, "Abutia nan to ken nei, oteny Lahitok jimitan, tonyio itii isi jii manyu ida kingony nan kito nino, kito nino lobito hilong. ¹⁷Dede ahigatahi cia nan isi gum atiboreng lotataha kunino iya kanger kulo kai, manyu iya singeti lo kalele lo nam. Oruju mute lotataha kunino kangite kulo merok kuneicieng.¹⁸Manyu to lotata nino orumu mute misihi fad gum to ningo na liningore isi nan. ¹⁹Tona Abraham ko itoro iyo karwaak kunenge ko kiliharoti ara lobito oitori Beerseba. Manyu Abraham ko manya Beerseba.²⁰To kifwongi lo kude faritin, orihohini Abraham jimitan lara manyu Milkah ngoto tee; lotomonohi inyi rece nino Nahor tee. ²¹Ara tee kunenge; Uz, okang nenge, rece Buz, Kemuel monye lo Aram ²²Kesed, Hazo, Pildas, Jidlap ko Betuel.²³Olotu Betuel ara monye lo Rebeka. Otomonohi Milka kulo tee rei mietauni iyo Nahor rece lo Abraham. ²⁴Ngorwani manyu nenge lobo na lobara Ruma otomonu manyu tee rei: Teba, Gaham, Tahas, ko Maaka.

¹Omany Sarah ogoru karihin kulo warun nenge mia lobito ko keek are ko mietare. ²Oweihi inyi Kiriat Arba na lara Hebron iyo kof lo Kanaan oto Abraham olo kicira ngorwani nenge Sarah orubuk ken nenge icira.³Tinyia owoju Abraham tinyia loweihinore ngorwani nenge ko tenya ko cio kulo Hittit ojo, ⁴"Ara nan misiohoni ko kamanyani kiji ningi, kitilotohiti nan lobo faji ara lonuhare ene ojir nan anuhahinore kaweyani nei.''⁵Inyiahahi cio kulo Hittit Abraham ojo, ⁶"lahitok, kining ohoi. Ira isi kabu na hitok to kiji niyang. Tonuhahi kaweyani nino iyo kwecere na idwaru ten iyo ohoi. Ida cia lobo ten to kiji niyang kimitere isi kwecere nenge na nginuhahinore isi kaweyani nino."⁷Oto Abraham owoju ko cohun ketemoni lo cio kulo Hittit. ⁸Oto ojo iyo icieng, "kaliruhunore ite nan nuha kaweyani nei dong kiningoto nan ileliati iyo Epron kito lo Zohar to nan ⁹ojir kitilotohi nan kunom lo Makpela na lara nenge na longon lohicungi lo mana nenge. Itifiata inyi ingohi kitilotohi nan to wel na ituba ara lonuhare to kiji ningi.''¹⁰Orumu Epron Hittitani itongo kiji lo cio kunenge, oto inyi inyiahahi Abraham na loningo cio kulo Hittit fad kuna lorumu otuba lokoli lo na kang ojo, ¹¹"Ida lahitok nei, kining nan. Ahicio nan isi mana ko kunom na longon ijia, acio nan iyo isi to ketemoni lo cio kunei fad. Tonuk kaweyani nino."¹²Ocok Abraham ketemoni lo cio kulo na kof ari ¹³manyu ojo iyo Epron oningo icieng, "Kining nan kaliruk isi, ahidumahi nan isi wel lo mana. Iruho kilifuno kidumi ojir anuhahi kaweyani nei.''¹⁴Inyiahahi Epron Abraham ojo, ¹⁵"Kining nan lahitok nei, ara na mana ratili mia ongon kulo rial ati ara ha kuna nyio kiji nei ko isi? Tonuk kaweyani nino." ¹⁶Iruk Abraham tenya lo Epron ko kipimo na wel loteny inyi oningo cio kulo Hittit; ratili mia ongon kulo rial lo kipimo na litiyorihin iyo katilotok to kuna karihin.¹⁷Dong mana lo Epron na longon Makpela na lonyiha ko Mamre, mana ko kunom ara lobito ko cianitok kuna longoni katua lo lohikorihin kulo na mana olotu ibelohino ¹⁸iyo Abraham ara nenge to ketemoni lo cio kulo Hittit fad kuna lotuba lokoli lo kang.¹⁹To kifwongi, onuhahi Abraham ngorwani nenge Sarah katua lo kunom mana lo Makpela na lonyiha ko Mamre (na lara Hebron) to kof lo Kanaan. ²⁰Tinyia na mana ko kunom na longon katua ibelohino iyo Abraham to kac kulo cio kulo Hittit ara lonuhare.

¹Orumu dong Abraham longoroyon noo manyu ligatahi Lobanga inyi gum iyo sangite fad. ²Ojo inyi iyo karwaani na lolanyu karwaak fad to kalenge, na lolanyu sangite fad, “Tofik kana nino fotiri lo bongbong nei. ³Awak nan isi ibuti to karana lo Lahitok Lobanga lo kai ko kof jimitan ida cia isi itahahi kito nei ngorwani to kiji lo kariok kulo ene kof lo Kanaan ene lamanyare nan ⁴ati ilo many kof nei many iyo cio kulo kaliyang ilo iyauno ngorwani lo kito nei Isako tijia.⁵Itifi karwaani inyi ojo, “Adi ba ngoberu nu ngorwani kilihuno ko nan iya ene kof, ojir nan anyiaharu kito nino nu kof lilotunore isi? ⁶Ojo Abraham tode jimitan ojir isi ida inyiahe kito nei ijia. ⁷Lobanga lo kai na lohiyauno nan to kolo apa nei ko to kof lotomonunore nei na loteny iyo nan manyu ocik iyo nan to kibutia ojo, ‘acio mute nan ene kof iyo lotataha kunino’ ocule cia inyi malaika nenge ketemoni nino kicio isi irumu ngorwani iyo kito nei tijia.⁸Koloberu nu ngorwani kilihuno ko isi iya ene ito cia isi ilaharu tone lobuti nei. Ati kenyiaharu kito nei ijia.” ⁹Tinyia ofik la karwaani kana fotiri lo bongbong lo lahitok nenge Abraham ko kitbutia iyo inyi tone tenya.¹⁰Oto la karwaani owoju iyaru lonagahin kulo lahitok nenge tomon kuna locuna sangite kuna ijiri to kolo lahitok nenge. Oto inyi ko kicaha owele iya Aram Naharim ko loro iya kang lo Nahor. ¹¹Itibalohi inyi lonagahin kalele lo itibi lo kifi na longon oleng to kanghatua, orumu lara kurou langun tik lofwonunitare ngorwo yoho kifi.¹²Oto hati inyi ko kilifa ojo, “Lahitok Lobanga lo lahitok nei Abraham, kicio nan tenuno elefar manyu itotoru jiran nino iyo lahitok nei Abraham. ¹³Tode awoita nan kalele lone itibi lo kifi na lofwonuno tee kariok kulo cio kulo ene kang yoho. ¹⁴ingohi ja tara kalajo nan iyo kito karioni, ‘Itau ja moti lo kifi nino kitimat nan’ oto ojo diho nan, ‘Tomat, ayohohi manyu cia nan lonagahin kunino kifi.’ – ingohi tara inyi na linyumohi isi karwaani nino Isako. Tone ato cia nan ayen ajo litotor isi jiran iyo lahitok nei.¹⁵Orihe inyi ida lokeru kilifa, ogoru Rebeka oriongita moti lo kifi nenge. Ara orumu inyi kito lo Betuel kito lo Milka na lara ngorwani lo rece lo Abraham na lobara Nahor. ¹⁶Odwaru orumu na kito karioni noo, kito karioni na lorihe oricaru na lorihe ida oyen lobo retoni . Iculoro inyi katua lo itibi itifut moti nenge to kifi ko kirwohuno oleng.¹⁷Oruharu na karwaani kitiricio inyi ko jimitan diho inyi, “kitimat ja kude kifi to moti nino.” ¹⁸Inyi ko kitauno moti otek to kac ojo, “Tomat Lahitok nei” Icio inyi omat kifi.¹⁹Langun lokeru kitimata inyi, ko jimitan, “Ayohohi manyu cia nan lonagahin kunino kifi many okeru icieng fad mata. ²⁰Tinyia deu deu ijuhohi inyi kifi to moti katua lo tigol oite ari katua lo kare, ilielieng inyi kifi otum lonagahin kunenge fad.²¹Iriangaru lerok deya inyi na loru ko tenya, loyenun kalicio ba Lobanga owele nenge otenuno. ²²Langun lokeru lonagahin mata, odumu lerok geloti lo kume na lara dahab na lotum kiricio nenge beka Lobito ko oguli kulo dahab kuna lotum kirioci neicieng ratili tomon. ²³Ko kitifia inyi ojo, “Isi kito lo ngai? kirihohi ja nan ongoni kajihit kolo apa nino na ngotum kitigeto ohoi?”²⁴Inyiahahi inyi ojo, “Nan kito lo Betuel kito na lotomonohi Milka Nahor.” ²⁵osod inyi ojo, “Kingon ohoi ko daha lo sang nyari ko dwani na itou manyu ko kajihit kuna ngitum ite geto.”²⁶Oto lerok ko cumo iwor Lobanga, ²⁷ojo, “ingohi kwatun tongon iyo Lobanga lo lahitok nei Abraham na lida ingohi jiran ko kigenoro nenge iyo lahitok nei. Ka lara to nan lohirihu Lobanga nan iyo ene owele many kaji lo cio kulo lahitok nei.²⁸Ife na kito karioni olo orihohi kolo ngotenge kuna tenyitenyi. ²⁹Tinyia orumu Rebeka ongon ko rece la lobara Laban oto inyi oruharu imuri iyo nu tungani idi kare. ³⁰Inyi deuno geloti lo kume ko oguli to okokoho kulo kanece manyu oning Rebeka ititima kuna tenyitenyi lorihohi na tungani inyi, imuri inyi iyo na tungani. Olo orumu inyi owoita iyo lonagahin kunenge kalele lo itibi.³¹Ko jimitan iyo inyi, “Ou isi na lohigatahi Lobanga gum. Nyio iwoita isi ene oleng? Lakukumahi nan kaji ko faji iyo lonagahin. ³²Na tungani ko loro kanghatua, itauni sangite to lonagahin oto iciori nyiari ko dwani na itou iyo lonagahin, ko kifi kuna lilalare inyi ko cio kuna lilihita ko inyi kejuha³³Tinyia iyauni daha ketemoni neicieng ati ojo na tungani, “Ida nan adaha many kalakeru rihohino ite tenya na lawak nan rihohino ite.” Ojo Laban diho inyi, “Kirihohi bo ohoi” ³⁴Oto inyi ko jimitan, “Ara nan karwaani lo Abraham ³⁵Licio Lobanga lahitok nei gum lahitok, manyu lobara inyi noo. Licio Lobanga inyi kera ko kicu, rial ko dahab, karwaak beciek rei ko ngorwo ko lonagahin ko sigiriahin.³⁶Lotomonohi ngorwani lo lahitok nei Sarah inyi kito retoni to ongoroyone nenge, manyu licio lahitok nei inyi sangite fad kuna lotehita inyi. ³⁷Manyu kico lahitok nei nan abuti ajo, ‘Ke tahahi kito nei ngorwani to kiji lo tee kulo kof lo Kanaan kuna lamanya nan kof neicieng. ³⁸Ati ilo kaji lo apa nei manyu iyo imanit nei ilo torumahi kito nei ngorwani tijia.’³⁹Ato nan atifi lahitok nei ajo, “Adi ba ngoberu nu ngorwani kilihuno ko nan?” ⁴⁰Kinyiahahi inyi nan ojo, ‘Lahitok Lobanga na lalot nan to kiruk ko kigenoro ketemoni nenge, ocule cia malaika nenge ketemoni nino icio cia inyi owele nino otenuno, icio cia isi irumu ngorwani iyo kito nei to imanit nei manyu to kaji lo apa nei. ⁴¹Ilaharu cia isi iyo lobuti nei kalilo isi iyo imanit nei oberuni hati kicwara inyi diho isi, ito cia isi ilaharu iyo lobuti nei.⁴²Ojo adi lalotu nan iyo itibi, ajo nan, ‘Lahitok Lobanga lo lahitok nei Abraham, ngicio ja isi nan tenuno iyo ene owele lalotu nan. ⁴³Tode awoita nan kalele lone itibi lo kifi kololotu kito karioni yoho, ajo hati nan iyo inyi ‘kitimat hati nan kude kifi kuting to moti nino’, ⁴⁴oto hati inyi ojo diho nan, ‘Tomat, ayohohi manyu cia nan lonagahin kunino kifi.’ ingohi tara inyi lonyumu Lobanga ara ngorwani lo kito lo lahitok nei’.⁴⁵Orihe nan ida lakeru kilifa to tau nei, olotu Rebeka oriongita moti lo kifi nenge. Iculoro inyi katua lo itibi oyohu kifi, ato nan ko jimitan diho inyi, ‘kicio hati amat.’ ⁴⁶Itau inyi moti nenge deu deu otad to kac ko jimitan iyo nan, ‘Tomat, ayohohi manyu cia nan lonagahin kunino kifi’. Dede nan ko mata, oyohohi manyu kifi lonagahin.⁴⁷Atifi nan inyi ajo, ‘kito longai isi?’ ojo inyi, ‘Nan kito lo Betuel, kito lo Nahor na lotomonohi Milka inyi.’ Ato nan ko fiha geloti kume nenge ko oguli okokoho Kunenge, ⁴⁸ato nan ko cumo awor Lahitok. Aciharu nan iyo Lahitok Lobanga lo lahitok nei Abraham na lohirihu nan to kikoi na ibehi lo rumuno lotata lo rece lo lahitok nei ara ngorwani lo kito nenge.⁴⁹Jijia kalitum ite kitotorohino jiran ko kigenoro iyo lahitok nei, kirihohiti nan ojir ayenare aji na ngai ngolo.”⁵⁰Inyiahahi Laban ko Betuel ojo, “Ara ene tenya lo Lahitok, oru lobo tohi na ngohirihohi ohoi isi ngati ko ngati. ⁵¹Rebeka ene yaru ingohi tolo ara ngorwani lo kito lo lahitok nino iya na likukumare Lobanga.⁵²Koloning karwaani lo Abraham tenya na loteny icieng oto ogung otir komom kof ketemoni lo Lobanga. ⁵³Oto karwaani odumu sangite kulo rial ko dahab ko kyelani icio Rebeka, icio manyu inyi sangite kulo wel iyo rece lo Rebeka ko ngotenge.⁵⁴Oto inyi ko cio kuna lorumu ilihu ko inyi odahati, omati manyu ogeti ijia. Kolokwenyu icieng kiwanyi, ojo inyi, “Kiniamahiti nan alo iyo lahitok nei.” ⁵⁵Ati ojo rece ko ngotenge, “Ingohi re kito kitong ko ohoi faritin tomon, koloru, ite hati ifwo.”⁵⁶Ati ojo inyi diho icieng, “Kehitik nan iya na licio Lobanga tenuno iyo owele nei, kiniemahiti nan kikoi ojir alo iyo lahitok nei.” ⁵⁷Tinyia ojo icieng, “Ngalolonguti re kito, kitifi inyi.” ⁵⁸Icieng ko kilolonguno Rebeka itifi inyi ojo, “Iloro isi kole tungani?” Inyiahahi inyi ojo, “Aloro nan.”⁵⁹Oto icieng ko lahahino kanece neicieng Rebeka olo ko karwaani nenge ko karwaani lo Abraham ko cio kunenge. ⁶⁰Manyu igatahi icieng Rebeka gum ojo diho inyi, “Icwara lotataha kunino oruju lokoliho kulo merok kuneicieng.”⁶¹Rebeka ko karicani nenge ko kikukumahino irwohi lonagahin ko kiliharoti ko karwaani lo Abraham. Odumu karwaani Rebeka ko lotita. ⁶²Tinyia olotu Isako to Beer Lahai Roi tonyio orumu inyi omanya Negev.⁶³Isabe inyi iya mana lobo kurou ki gigilo tinyia, ojo inyi iyol komom odeu lonagahin ofwonuno. ⁶⁴Iyol manyu Rebeka konyeha ko deuno Isako, ko kiculuno to kai lo lonaga ⁶⁵ko kitifia karwaani ojo, “ngai nu tungani to mana lolotuno kitirico ohoi?” Inyiahahi karwaani ojo, “Inyi lahitok nei.” Oto inyi ko dumuno kimuhi nenge ko buburaru. Oto karwaani ko rihohino Isako sangite fad kuna litii inyi.⁶⁶Iyauno Isako inyi katua lo kema lo iyang nenge Sarah, ko yema Rebeka. Oto Rebeka ko rahun ngorwani nenge, imaru inyi inyi bebe. ⁶⁷Oto itirobi tau lo Isako to wei lo iyang nenge Sarah

¹Olotu Abraham orumu lobo ngorwani lobara Ketura. ²Olotu inyi otomonohi Abraham tee: Zimran, Joksan, Medan, Midian, Isbak ko Suah. ³Ara afa Joksan monye lo Seba ko Dedan; ara afa lotataha kulo Dedan cio kulo Asur, cio kulo Letus ko cio kulo Leumm. ⁴Ara afa tee kulo Midian oho Epa, Eper, Hanok, Abida, ko Eldaa. Ara afa kuno fad lotataha kulo Ketura.⁵Ingohi Abraham sangite kunenge pili iyo Isako. ⁶Ati orihe inyi owar, icio inyi kiciorita iyo tee kulo na ngorwani nenge ko cularu icieng ingadari to lohitongore lo kito nenge Isako, ofwo iya kofikofi kulo ngati lo okangere.⁷Omany Abraham karihin mia lobito ko keek mietare ko miet. ⁸Oto Abraham ko wiriaru wirita nenge lo lohicungi ko weyaru longoroyon bebe, tungani na lomany loborengi karihin.⁹Onuhahi tee kunenge; Isako ko Ismael inyi kunom lo Makpela na lonyiha ko Mamre mana lo Epron kito lo Zohar Hittitani, ¹⁰mana lafa linyiangu Abraham iyo cio kulo Hittit. Onuhahini Abraham ijia ko ngorwani nenge Sarah. ¹¹To korwong lo wei lo Abraham, igatahi Lobanga kito nenge Isako gum na lomanya Beer Lahai Roi tona.¹²Ara ene irejit lo kaji lo kito lo Abraham na lobara Ismail, na lotomonohi Hagar na lara Ijiptoni, opii lo Sarah inyi.¹³Ara kuno karanacio kulo tee rei kulo Ismail ijifita otomone necieng: Nabios, okang lo Ismail, Kedar, Adbeel, Mibsam, ¹⁴Misma, Duma, Massa, ¹⁵Hadad, Tema, Jetur, Napis, ko Kedma. ¹⁶Ara kuno karanacio kulo tee rei kulo Ismail manyu icieng lara kulahitoha kulo imaniti tomon ko are iya na longonore to kofikofi kulo lomanyarihin ko kemahin kuneicieng.¹⁷Omany Ismail kof karihin mia lobito ko keek uni ko mietare. Owiri inyi wirita nenge lo lohicungi ko weyaru. ¹⁸Omanya lotataha kunenge kof kiciaha to Havila many Sur onyiha ko lohikori lo ngati lo okangere lo Ijipt, kaliloro iya ngati lo Asur. Ati omanya icieng ijoriati ko imaniti fad kuna likajio ko icieng.¹⁹Ara ene irejit lo kaji lo Isako, kito lo Abraham. Olotu Abraham ara monye lo Isako, ²⁰manyu olotu Isako langun lara karihin kunenge keek ongon, oyem Rebeka kito lo Betuel lo kof lo Aram lona faji lojimi Padan Aram, kanece lo Laban Aramani.²¹Ilifa Isako Lobanga to ngorwani nenge tonyio ida inyi otomonu tee. Ifotu Lobanga kilifa nenge, manyu olotu ngorwani nenge ifonga. ²²Ifufulinga tee to kocehe nenge, oto inyi ojo, "Nyio itiyo ene ken nei?" Tona olo inyi kitifia Lobanga.²³Ojo Lobanga diho inyi, "Ongoni misihi are katua nino, manyu okoraru mute cio are to kocehe nino, manyu ogol mute cio kuna kude ilany kude, manyu irwa mute lahitok iyo Lasidi."²⁴Langun logoru far lo tomonun nenge, oturu inyi tee rei. ²⁵La litem rutuno, odo oto oju ken fad iya kyela na iju. Tona itibarahini inyi ojimi Isau. ²⁶To kifwongi olotu rece, omuruhuta tutunye lo Isau, tona itibarahini inyi ojimi Jakob. Orumu monye neicieng Isako logoru karihin keek ile tona lotomonunore Rebeka icieng.²⁷Oboroho tee, olotu Isau ara kamejani na iteten, retoni lo mwang, ati ara Jakob kito na ibuho na lowak kitongo kalele lo kemahin. ²⁸Olotu Isako imaru Isau tonyio limang inyi jijiman lo tyang lo mwang, ati imaru Rebeka Jakob.²⁹Lobo far koloyer Jakob jati na idik, olotu Isau to mwang ara na lonyia kinga noo. ³⁰Oto ko jimitan iyo rece, "kicio nan jati ido lobo, deu, kinyia kinga nan noo! Inyi licio inyi obara tolobo Edom.³¹Inyiahahi Jakob inyi ojo, "Kitilotohi re nan obolore nino." ³²Ojo Isau, "Tode anyiha nan weyaru. Nyio ha jiran lona obolore diho nan?" ³³Ati ojo Jakob diho inyi, "Ibutia re diho nan." Oto inyi ibuti diho Jakob itilotohi inyi obolore nenge. ³⁴Oto Jakob ko kicwara Isau mugati ko agira lo ades. Oto inyi ko daha, omatahi kifi ko wojuno olo. Tona itikaj Isau obolore nenge.

¹Tinyia olotu kinga ongon kof to kifwongi lo kinga lafa longon to faritin kulo Abraham, olotu Isako olo iyo Abimelek kabu lo cio kulo Palestina to Gerar.²Oboto Lobanga iyo Isako orihohi inyi ojo, "kelo iya Ijipt, itongo kof na lajo nan ojir isi itongo. ³Itongo ene kof to kude faritin, manyu ahingon cia nan ko isi, manyu ahigatahi isi gum. Tonyio ahicorihino nan isi ko lotataha kunino ene kof fad lo kitifuta kibutia na lacio nan diho apa nino Abraham.⁴Atiboreng cia nan lotataha kunino iya kanger kulo kai manyu acio ca nan icieng kuno kofikofi fad, manyu to lotata nino, misiok fad to kof orumu mute gum, ⁵tonyio oningo afa Abraham tenya nei manyu itii sangite dot kuna latifak nan inyi kitiyo, oric manyu cihicihi kunei, tenyitenyi ko kisingita kunei"⁶Oto Isako ko manya Gerar. ⁷Kalitifia cio kulo na kof inyi to ngorwani nenge, ojo inyi, "Ara inyi kanece nei" tonyio orumu inyi obang tulohino icieng jimitan 'ara inyi ngorwani nei'. Ii inyi ojo, 'kitum cio kulo ene kof kifadaru nan to Rebeka tonyio odwaru inyi.' ⁸Langun lomany Isako ijia faritin kuna iborengi, odeu Abimelek kabu lo Palestina to lotupulec Isako itisonga ngorwani nenge Rebeka.⁹Oto Abimelek ilolongu Isako ojo diho inyi, "Ara inyi ngorwani nino dede, nyio licio isi ijo, 'Ara inyi kanece nei'?" Inyiahahi Isako inyi ojo, "Tonyio orumu nan aiiyo ajo, ngatum nan kitiririoro warun nei to inyi." ¹⁰Ojo Abimelek diho inyi, "Nyio ene litii isi iyo ohoi? Otum lobo tungani to kiji niyang getore ngorwani nino, itum isi kiyauno kipal lo lomuna kenite kuniyang." ¹¹Oto Abimelek ko ciha cio fad ojo, "Tungani lobo na litii lobo rohojun iyo ene tungani kode iyo ngorwani nenge ojir ifadari."¹²Orem Isako mana na kof to na kari bito ko denguno samatati na lotum kakeny mia lobito, tonyio igatahi Lobanga inyi gum. ¹³Obara Isako noo, manyu osodoro bara ko samun nenge many olotu obara ogal. ¹⁴Obar inyi kera ko kicu olohe ko karwaak many itikaino cio kulo Palestina inyi.¹⁵Oto cio kulo Palestina konuha karecio kulafa lobok karwaak to faritin kulo apa nenge Abraham fad. ¹⁶Tinyia Abimelek ko jimitan iyo Isako, "Ingade to kiji niyang tonyio lilany golun nino niyang." ¹⁷Oto Isako ko johoro tijia olotu manya ridat lo Gerar, faji na lolotu inyi itongohinore.¹⁸Olotu Isako itingejuk kuto kulafa karecio itimihin lobok monye Abraham kuna lofwonu cio kulo Palestina onuk icio icieng kulafa karanecio litibar monye.¹⁹Obok karwaak kulo Isako katua lo gura otuluni kifi kuna inyuji to katua. ²⁰Ati itingolof katibalak kulo Gerar katibalak kulo Isako ojo, "Ara kuno kifi kuniyang! Itibarahi Isako na itibi ojo Esek, tonyio itingolofi inyi.²¹Tinyia ofwo icieng obok lobo itibi ake, itingolofi manyu icieng tona, itibarahi na itibi ojo Sitnah. ²²Isiol icieng tijia ofwo obok lobo itibi ake, oru lobo tungani litingolof icieng tona. Itibarahi inyi na ojo Rehobot, ojo, "Jijia lohicio Lobanga ohoi faji na licio ca ohoi kitenu manya ene kof."²³Tinyia owoju inyi olo iya Beerseba. ²⁴Na karue oboto Lobanga iyo inyi ojo, " Nan Lobanga lo apa nino Abraham, kebang tonyio angon nan ko isi. Ahigatahi cia nan isi gum manyu atipit lotataha kunino iborengi to giglo lo karwaani nei Abraham ²⁵Oduhohi Isako ciali ijia ko kilolongohino karana lo Lahitok Lobanga. Ogurohi inyi kema nenge ijia manyu obok karwaak kunenge itibi lo kifi.²⁶Manyu tinyia olotu Abimelek diho inyi to Gerar ilihuni ko Ahusat kasingani nenge ko Pikol lahitok lo asegere kunenge. ²⁷Itifi Isako icieng ojo, "Nyio ifwonu ite diho nan ati afa ite itiswa nan manyu ifuhe nan oleng to kiji ningi?"²⁸Inyiahahi icieng ojo, "Lohideu ohoi otoc jimitan ongon Lobanga ko isi, tona kiiu ohoi kijo ojir lobuti lo yomo ongon kiji niyang - kiji niyang ko isi, ngatifik yomo ko isi ²⁹jimitan ida cia isi itii diho ohoi rohojun, iya na afa lida ohoi kitiyore rohojun diho isi ati kitong ko isi ara na ijir manyu kicio isi ilotu to kisiliban. Manyu jijia lohigatahi Lobanga isi gum.³⁰Oto Isako ikukum karama to icieng odahati manyu omati imatiti. ³¹Kiwanyi berien ibuti icieng lobuti lo yomo kiji neicieng. Isako ko kiniamahino icieng kikoi, icieng ko fworo to kisiliban iya kof neicieng.³²Lafar ofwonu karwaak kulo Isako orihohi inyi kare itibi na lobok icieng, ojimi iyo inyi, "lohirumu ohoi kifi!" ³³Itibarahi inyi na itibi ojo, "Seba" obarare na kang 'Beerseba' ko jijia.³⁴Kologoru karihin kulo Isau keek ongon, olotu inyi oyem Judit kito lo Beeri Hittitani, manyu oyem Besimat kito lo Elon Hittitani. ³⁵Icio afa kuna ngorwo kidak iyo Rebeka ko Isako.

¹Langun longoroyon Isako, lofafari konyeha na lida orihe otum deya, ilolongu inyi Isau kito nenge lahitok oto ojo diho inyi, “kito lei” Inyiahahi inyi ojo, “Nan ene” ²Ojo Isako, “Langoroyon nan manyu ida ayen far lo wei nei.³Jijia todumu kawo ko sohobo lo ngonecio kunino tomejaru mwang kifadahi nan lobo tyang lomwang. ⁴kikukumahi nan jati tyang na ijijim langun lamaru nan, kiyahahi anyia ojir ahigatahi gum nei orihe ida lawei.”⁵Tona orumu Rebeka oningo ko lociha Isako kito lenge Isau. Langun Isau loro iya mwang mejaru tyang lo kiyauno, ⁶ojo Rebeka iyo kito nenge Jakob, “Tode, aning nan apa nino ojo iyo rece nino Isau, ⁷“Ilo tomejaru lobo tyang lomwang ilotu kiyerihi nan jiati na ijijim anyia ojir ahigatahinore isi gum nei to ketemoni lo Lobanga orihe ida lawei.⁸“Jijia kito nei, toning tenyia nei otoc, manyu itiyo iya na latenyare nan. ⁹Ilo lodahare lo sang kiyahahi nan korecio are kuna ifufuho kuna lorihe ongarihino ojir nan alotu ayerihi jiati na ijijim iyo apa nino iya langun lowak inyi. ¹⁰Ito hati iyaru iyo apa nino onyia ojir kigatahinore isi gum nenge orihe ida lowei.”¹¹Ojo Jakob iyo iyang nenge Rebeka, “Ati oju bo ken lo rece nei Isau, onyu nei. ¹²Adi cia ngohitir apa nei nan? Ato cia nan aboto mejo atinononga inyi ato ayauno kificioro ken nei ida ara kigata lo gum.”¹³Ojo iyang nenge iyo inyi, “Kito nei, ingohi na kificioro tolotu ken nei. Itiyo isi iya na latenyare nan yama kuna kiri iyahahi nan.” ¹⁴Olo inyi iyamaru kuna kiri olotu icio iyang nenge olotu ikukum jiati na ijijim iya langun lowak apa nenge.¹⁵Rebeka ko dumuno kyela lo kito nenge lahitok Isau na ijir noo, na orumu longon inyia kaji ko kiticiefohohino kito nenge lasidi Jakob. ¹⁶Oto inyi obubur kac ko murut nenge to kyela lo kine ¹⁷Oto ko kicwara kito nenge Jakob na jiati ijijim loyer inyi ko mugatihin kuna lofun inyi.¹⁸Olo Jakob iyo monye ojo, “Apa nei.” Ifotu inyi ojo, “Ee kito lei, isi ngai?” ¹⁹Ojo Jakob iyo apa nenge, “Nan Isau kito lilo lahitok, latii nan iya ladi litenyare isi iyo nan. Towoju bo tonyia tyang na layauno nan ojir igatahinore nan gum nino.”²⁰Itifi Isako kito nenge ojo, “Aja isi irumu deu deu jii kito nei?” Inyiahahi inyi ojo, “Lahitok Lobanga nino lohititenu nan.” ²¹Isako ko jimitan iyo kito nenge Jakob, “Isiolu tonyihu ojir nan ahitir isi kito nei, ojir ayenare kalira isi kito nei Isau dede kode ida.”²²Isiole Jakob tang iyo apa nenge Isako na lotir inyi oto ojo, “Ara ogoro ogoro lo Jakob ati ara kac kac kulo Isau.” ²³Ida inyi oheru inyi tonyio ojuji kac kunenge iya kulo rece Isau, tona osodoro inyi kigatahino inyi gum.²⁴Itifi inyi ojo, “Ira re isi kito nei Isau dede?” Inyiahahi Jakob inyi ojo, “Ara nan.” ²⁵Oto ko jimitan, “Kito nei yau tyang nino anyia ojir ahigatahi isi gum nei.” Iyauno Jakob diho inyi oto inyi ko daha, iyauno manyu vino omat.²⁶Oto apa nenge Isako ojo diho inyi, “Ou ene kimaruk nan kito nei.” ²⁷Oto inyi olo imaruk apa nenge. Kalingwatu Isako lis lo kyela nenge, ko kigatahino inyi gum ojo, “Ah, ori lis lo kito nei iya lis lo mana na ligat Lobanga.²⁸Ingohi Lobanga kicio isi lokolukolu lo kai ko ibariti kulo kof. Samun lo ngamang beciek ko vino ngejuk.²⁹Ingohi misihin kirwaa isi, ko misiok fad ogung ketemoni nino. Tara lahitok na lilanyu reciera kunino. Ingohi tee kulo iyang nino ogung kof ketemoni nino, ingohi cio fad kuna lohificio isi ificiori. Ko kuna lohigatahino isi gum, igatahini gum.''³⁰Langun lokeru Isako kigatahino Jakob gum orihe inyi orutuno to ketemoni lo apa nenge tangtang, ogoruno rece Isau to meja. ³¹Ikukum manyu inyi daha na ijijim iyauno iyo apa nenge. Oto ko jimitan diho inyi, “Apa towoju tonyia tyang nei ojir igatahinore nan gum nino.”³²Apa nenge Isako ko kitifia inyi ojo, “Isi ngai?” Inyiahahi inyi ojo, “Nan kito nino, kito nino lahitok, Isau.” ³³Ihihirita Isako to na igol ko jimitan, “Ngai hati ladi lomejuno tyang kicio nan? Arihe nan akeruno daha ilotunore hati isi, manyu lagatahi nan inyi gum, manyu liwasihi cia inyi ko gum.''³⁴Koloning Isau tenya lo apa nenge, oto ko kicira to ogoro na ikwat to dwarun lo tau manyu ojo iyo apa nenge, “kigatahi manyu nan gum apa.” ³⁵Ati ojo apa nenge diho inyi, “Lolotu rece nino to kitinononga ko kiyaru gum nino.”³⁶Ojo Isau, “Ida re otenuni kitibarahino na karana lojimi Jakob? Kakeny lo are nenge ene lohilabare inyi nan: odume afa oboloje nei, ene manyu lodume gum nei iyo apa nei. Oto inyi itifi ojo, “Ida isi ititongohi gum lobo iyo nan?” ³⁷Inyiahahi Isako Isau ojo, “Lafik nan inyi ara lahitok na lohilanyu isi manyu latirak nan cio kulo imanit nenge fad ara karwaak kunenge, manyu lagatahi nan inyi samun lo ngamang ko vino. Tona nyo ba lobo na ngatii nan to isi kito nei?”³⁸Ojo Isau iyo monye, “Ara gum nino Lobito hilong apa? kigatahi manyu nan gum apa nei!” Oto Isau ko kicira bebee.³⁹Inyiahahi apa nenge Isako inyi ojo, “Oloma cia lomanyare nino ko ibariti kulo kof, oloma ko lokolukolu lo kai ⁴⁰imanya ca isi to ngalem latubot, manyu irwaa cia isi rece lilo. Ati kalifufulinga isi, ibire cia isi okol nenge to murut nino.”⁴¹Itiliwa Isau Jakob to gum na licio apa neicieng inyi. Oto ojo to tau nenge ake ake, “Lonyiha faritin kulo tai lo apa niyang, keruno kicira apa niyang, nan afadaru Jakob.” ⁴²Kolorihohini Rebeka tenya lo kito nenge lahitok Isau, ocule tungani ilolongu kito nenge lasidi Jakob oto ojo diho inyi, “Ivita rece nino Isau kileno to kifadaru isi.⁴³Dong jijia kito nei, itiyo tohi na lahirihohi nan isi; ifirio deu deu iyo rece nei Laban idi Harran. ⁴⁴Itongo ijia iyo inyi many re ohuliete kilongo lo rece lilo. ⁴⁵Kalida dong rece lilo orihe ilongo ken nino, olulworo kue tohi na litii isi diho inyi, acule cia nan tenya lo iituno nino tijia. Ngahitivi nan ite are fad to far Lobito ajia?⁴⁶Tinyia ojo Rebeka iyo Isako, “Losohona manyu diho nan to kuno ngorwo Hittit. Koloyema manyu Jakob ngorwani to kiji lo ngorwo kulo ene kof lo Hittit iya kuno, ida dong cia warun nei ocam to warun.”

¹Tona, Isako ko kilolonguno Jakob ko kigata inyi oto ko ciha inyi ojo, "Keyem ngorwani Kanaanani. ²Towoju deu ilo iya Padan Aram iya kolo apa lo iyang nino Betuel. Ilo toyemu ngorwani nino tijia to kiji lo tee kariok kulo Laban rece lo iyang nino.³Ingohi Lobanga la lolanyu sangite fad kigatahi isi gum kitipit manyu kitiboreng isi many ilotu ira ilulung lo cio. ⁴Ingohi inyi kicio isi ko lotataha kunino gum lafa licio inyi iyo Abraham ojir mute ilanyu ene kof jijia limanyare isi, kof lafa licio Lobanga iyo Abraham.⁵Oto Isako ocule Jakob olo inyi owele iya Padan Aram iyo Laban kito lo Betuel Aramani rece lo Rebeka na lara ngoto Jakob ko Isau.⁶Tinyia olotu Isau oyen ojo ligatahi Isako Jakob gum manyu ocule inyi iya Padan Aram lo rumuno ngorwani tijia manyu ojo langun ligatahi inyi gum, ocik inyi ojo, "Keyem ngorwani Kanaanani.'' ⁷manyu ojo loning Jakob tenya lo apa nenge ko iyang nenge ko loro iya Padan Aram.⁸Isau ko yenun koditi na litilongojitare kuna ngorwo kulo Kanaan apa nenge Isako ⁹tona inyi ko loro iyo Ismail ko yemuno Mahalat kanece lo Nabiot kito lo Ismail kito lo Abraham osodore kuna ngorwo lotehita inyi.¹⁰Owoju Jakob to Beerseba ara na loloro iya Harran. ¹¹Ojo inyi logoru lobo faji, iyoma inyi ijia tonyio orumu kolong lodoi. Oto odumu lobo moru itenore kue langun logeto inyi.¹²Oto itirija inyi ojo, odeu inyi lohirwohi na licid fotiri kof ogoru kue many kai manyu iculunitare malaikahin kulo Lobanga manyu irwohoritarehin iya kai. ¹³Idi kai nenge owoita Lobanga oteny ojo, "Ara nan Lahitok Lobanga lo apa nino Abraham ko Lobanga lo Isako. Ahicio mute nan isi ko lotataha kunino ene kof ligeto isi.¹⁴Ori mute lotataha kunino iya fur lo kof manyu isarihi mute isi iya ngati lo kai ko ngati lo orof ko ngati lo okangere ko ngati lo lodoyore lo kolong. Cio fad kulo kof orumu mute gum ara diho isi ko ara diho kinyiemoti nino. ¹⁵Angon nan ko isi manyu ahiriria cia nan isi fajihit fad kuna lilot isi manyu ahinyiahu cia nan isi ene kof. Ida cia nan ahingohi isi many atii nan tohi na lahicik isi.''¹⁶Kolokwenyu Jakob to jio, oto ibuk ojo, "Dede ongon Lobanga ene faji ida hati orumu nan ayen. ¹⁷Orumu bangun linief inyi oto ojo, "Itirima ene faji jii! Ida ene ara lobo faji ake ko kaji lo Lobanga, ara ene lokoli lo kai."¹⁸Kiwanyi berien odumu Jakob longole moru litenore inyi icidohi ara wiriti ko kijuhohino ngoroni kai nenge. ¹⁹Ilolong inyi na faji ojo Betel kileng orumu na faji obara Luz.²⁰Oto Jakob ko kibutia ojo, "Kolohingon cia Lobanga ko nan manyu kiriria nan iyo ene owele laloro nan, manyu kicio nan daha anyia ko kyelani kulo kiciefita, ²¹manyu aitu ara na ijir kolo apa nei, oto cia Lobanga ara Lobanga nei ²²oto cia ene moro lacidohi nan ara wiriti ara kaji lo Lobanga. Manyu iyo sangite pili kuna lohicio isi nan, ahicio cia nan isi lobito iyo tomon."

¹Jakob ko sodoro owele nenge many ogoru kof lo cio kulo ngati lo okangere. ²Tinyia odeu inyi itibi lo kifi na longon par, ko olehi kulo kera uni ibalo kalele nenge tonyio itimatitati sang to na itibi. Obolo orumu kiribolok na lotuhorihin kutuk lona itibi. ³Kolotubuno twoli fad inyiha katibalak itibobore moru to kutuk lo itibi itimatarihin sang. Kolokeru sang mata inyiahahini na moru otuhohini kutuk lo itibi.⁴Itifi Jakob katibalak ojo, "Recera, ira ite kulo aji?" Inyiahahi icieng ojo, "Kira ohoi cio kulo Harran." ⁵Ojo iyo icieng, "Iyen ite Laban, lotata lo Nahor?" Inyiahahi icieng ojo, "Ibo, kiyen ohoi." ⁶Tinyia itifi Jakob icieng ojo, "Ongon inyi ara na ijir?" Inyiahahi icieng ojo, "Ibo, ongon inyi. Tode kito nenge Racel ene lolotuno ko kera."⁷Ojo inyi, "Tode, orihe kolong obolo. Ida ara tik lo kifuro sang ene. Itimatata sang inyiahe olemore ofwo daha." ⁸Inyiahahi icieng inyi ojo, "Ida ohoi kitum kitiyo jii many kolotubuno twoli fad, itiboborori kiribolok to kutuk lo itibi, inyiha kitimat sang.''⁹Orihe inyi otenya ko icieng, olotu Racel ko kera kulo monye tonyio ara orumu inyi katibalani. ¹⁰Kolodeu Jakob kito lo mamai nenge Racel ko sang kulo mamanyi nenge Laban, olo inyi ko butoro moru kiribolok to kutuk lo itibi ko yohohino kera kulo mamanyi nenge kifi.¹¹Oto Jakob imaruk Racel ko kicira to ogoro na ikwat. ¹²Orumu inyi lorihohi Racel ojo ara inyi okeu lo apa nenge kito lo Rebeka. Oto inyi ko kifejaru olo orihohi apa nenge.¹³Laban ningo Layomit lo Okeu nenge kito lo kanece, ko ruharu kitirico inyi. Oto ofony inyi imaruk ko kiyauno inyi kalenge. Tinyia ititimahi Jakob inyi tenyitenyi fad. ¹⁴Tinyia ojo Laban diho inyi, "Ira isi okoto ko tyang lo ken nei." Langun litong Jakob kalenge ofahin beciek.¹⁵Ojo Laban diho inyi, "Ngitum isi kitiyo iyo nan arus to rahun okeu nei? Kirihohi nan tohi na ngahidumare nan isi." ¹⁶Na ha orumu Laban ongon ko tee kariok are; obara karana lo nahitok Lea, obara nasidi Racel. ¹⁷Ara afa Lea na linori konyieha, ati ibuta afa Racel odwaru manyu. ¹⁸Orumu Jakob ongon ko wahun to Racel ko jimitan, "Atii cia nan iyo isi to karihin mietare to kito karioni nino na sidi Racel."¹⁹Ojo Laban, "Ocam diho nan kicwara inyi diho isi ilany kicwara iyo lobo tungani ake. Itongo ene diho nan. ²⁰Tona itii Jakob karihin mietare lo rumuno Racel, ati ori diho inyi mejo faritin kude kuting to kimaruno nenge na limarunore inyi.²¹Oto Jakob ojo diho Laban, "Kicio nan ngorwani nei. Lotuba karihin kunei, lawak nan kitongo ko inyi." ²²Tona Laban ko tubuno cio kulo na kang fad ko fiha karama.²³Ati langun lolotu kurou odumu inyi kito nenge Lea iyauno inyi iyo Jakob manyu itongo Jakob ko inyi. ²⁴Manyu odumu Laban karwaani nenge icio iyo kito nenge ara kalwahani. ²⁵Langun lowang kof, ara Lea longon! Dong ojo Jakob iyo Laban, "Nyio ene litii isi iyo nan? Ida re orumu nan atiyo iyo isi to Racel? Nyio kitinonong isi nan?"²⁶Inyiahahi Laban inyi ojo, "Itidwara tone kof kicwara kito na sidi oyemi orihe na hitok." ²⁷Tokeru re sabit lo kiteran lone kito ojir kiciori manyu isi na sidi to karihin mietare kunakude kulo tic.²⁸Oto Jakob itii iya na, okeru inyi sabit ko Lea. Icio manyu Laban inyi kito nenge Racel ara ngorwani nenge. ²⁹Icio Laban karwaani nenge Bilha iyo kito nenge Racel ara kalwahani nenge. ³⁰Itongo Jakob ko Racel oto kimaruno nenge lo Racel ilany lo Lea. Ati itii inyi iyo Laban to karihin kunakude mietare.³¹Kolodeu Lobanga ojo ida imaruni Lea, icio inyi otomone ati ongony Racel tomonun. ³²Ifonga Lea otomonu kito retoni, itibarahini karana ojo Reuben. Ojo ara to na lodeunore Lobanga mehino nei. Dede kimaru dong cia retoni nei nan.''³³Olotu inyi ifonga ari, ojo inyi otomonu kito retoni, ojo, "Tonyio odeu Lobanga ojo ida kimaruni nan, lohicio nan ene ari." Tona Itibarahi inyi na ojo Simeon. ³⁴Ari olotu inyi ifonga, ojo inyi olotu otomonu kito retoni, olotu ojo, "Jijia dong imoraru cia retoni nei nan, tonyio latomonohi nan inyi tee rei uni." Tona itibarahini inyi ojo Levi.³⁵Ifonga inyi ari, ojo otomonu kito retoni, ojo inyi, "Jijia dong amaj cia nan Lobanga" Tona, itibarahi inyi ojo Juda. Oto inyi ongot tomonun.

¹Kolodeu Racel ojo ida inyi latomonohi Jakob tee, inief okaine inyi ken lo kanece menge. Tona ojo inyi iyo Jakob, "Kicio nan tee, koloru awei nan! ²Ilongojihi Jakob inyi, oto ojo iyo inyi, "Ara nan Lobanga na lohingony isi tomonuno tee?"³Inyi ko jimitan, "Kai karwaani nei Bilah itongo ko inyi ojir otomonohi nan tee ojir manyu nan afak kang ara diho inyi." ⁴Oto inyi icio inyi karwaani nenge Bilah ara ngorwani, itongo Jakob ko inyi.⁵Olotu inyi ifonga otomonu kito retoni. ⁶Oto Racel ojo, "Lohiwak Lobanga nan, loning inyi kicira nei lohicio nan kito retoni. Tona, itibarahi karana nenge ojo Dan.⁷Ifonga Bilah ari otomonohi Jakob kito retoni lo are. ⁸Oto Racel ojo, "Labak nan ko kanece nei baha na igol many alanyu nan, itibarahi inyi na Naptali.⁹Kolodeu Lea ojo longot otomone iyo inyi, odumu inyi karwaani nenge Zilpa icio iyo Jakob ara ngorwani. ¹⁰Otomonohi karwaani lo Lea Zilpa Jakob kito retoni. ¹¹Oto Lea ojo, "Obolo gum nei!" Tona itibarahi Lea inyi ojo Gad.¹²Otomonohi karwaani lo Lea Zilpa Jakob kito retoni lo are. ¹³Lea ko jimitan, "obolo kwama nei!" kilolong cia ngorwo nan ojo kakwamani, tona itibarahi inyi na kito ojo Aser.¹⁴To faritin kulo dengo lo ngano, isabe Reuben iya manatak olo orumu kude ciani lo tomonun iyauno iyo iyang nenge Lea. Ojo Racel iyo inyi, "Kicio hati kude iyo na ciani lo tomonun kulo kito nino." ¹⁵Ati ojo Lea diho inyi, "Ida kitum isi retoni na liruje isi iyo nan? Iwak manyu kiyaru ciani lo tomonun lo kito nitole?" Ojo Racel diho Lea, "Ojir itum isi geto ko inyi cia karue ara faji lo lo ciani lo tomonun kulo kito nino."¹⁶Tinyia, ojo Jakob olotu to manatak na kurou orute Lea olo kitiricio inyi. Ojo iyo inyi, "Ojir isi kigeto ko nan ene karue, tonyio lahidum nan isi to ciani lo tomonun kulo kito nei." Tona ogeto Jakob ko inyi na karue. ¹⁷Oning Lobanga kilifa lo Lea olotu inyi ifonga otomonohi Jakob kito retoni kitimieti. ¹⁸Tona ojo Lea, "Lohidum Lobanga nan to kicwara karwaani nei iyo retoni nei, tona itibarahi inyi na kito karana ojo Issakar.¹⁹Ifonga Lea ari otomonohi Jakob kito retoni lo ile. ²⁰Oto Lea ojo, "Lohigomahi Lobanga nan kiciorit na idwaru, tone kideya cia retoni nei nan to rima tonyio latomonohi nan inyi tee rei ile." Tona itibarahi inyi kito nenge karana ojo Zebulun. ²¹To kifwongi olotu inyi otomonu kito ngorwani na lobara Dina.²²Tinyia iiu Lobanga Racel, oning kilelia nenge icio inyi ifonga. ²³Olotu inyi ifonga otomonu kito retoni, ko jimitan, "Lodume Lobanga riri nei." ²⁴Itibarahi inyi ojo Josep, manyu ojo, "Ingohi hati Lahitok kisodohi nan lobo kito retoni."²⁵Langon lotomonu Racel Josep, ojo Jakob iyo Laban, "Kilahahi nan alo ojir aite iya kof nei. ²⁶Kicio nan ngorwo ko tee kunei kuna latiu nan diho isi, ojir alot. Iyen isi bolojun lo tic na latii nan diho isi."²⁷Ati ojo Laban diho inyi, "Kalohideya isi nan ara na ijir, itongo ja re. Lalotu nan ayen to kimoca jimitan lohicio Lobanga nan gum to isi." ²⁸Osodohi inyi ojo, "Kirihohi nan kidumit nino ojir nan ahicio isi."²⁹Ojo Jakob diho inyi, "Iyen isi tic na latii nan diho isi ko koditi na litongore sang kunino iyo rica nei. ³⁰Kulafa kuting litehita isi orihe nan ida lalotu, litadoro bebe. Manyu lohicio Lobanga isi gum to fajihit fad kuna langon nan. Ati dong jijia anu cia atii nan lobo tohi to kalitole?"³¹Itifi Laban inyi ojo, "Nyio ngahicio nan isi?" Inyiahahi Jakob ojo, "Kehicio nan lobo tohi, ati ngitii isi ene tohi bito diho nan, ngasodoro cia nan kitibala ko rica sang kunino: ³²ingohi aher nan sang kunino fad, agele kera kuna igiriha ko kuna ikomoli fad. Tee kulo kera kuna irwohi fad ko kiri kuna igiriha ko kuna ikomoli fad, ojir icieng ara kidumita kunei.³³Ojir itibotu kigenoro nei mute, kalilotu isi hera sang kuna lohidumare isi nan. Sang pili kuna lida igiriha kode ikomoli ko tee kulo kera kuna lida irwohi ojir oboto ara sang kuna lokokoluni." ³⁴Ojo Laban diho inyi, "Laruk nan. Ingohi tori iya na liteny isi."³⁵La far bito Laban ko loro kigegelaru sang kuna igiriha ko kuna ikomoli kode ikoriho (sang fad kuna longon ko kihapel na ikwe) ko tee kulo kera kuna irwohi fad ko kicwara iyo tee rei kunenge. ³⁶Oto ko kitijohoro kuna sang oloma ko Jakob owele lo faritin uni, ongerihi Jakob itibala sang kunakude kulo Laban.³⁷Ogitu Jakob lomurlang, iyau ko bukoi opote kobokobo to fajihit kude itongo ara kuna li gero ikomoli kode ikoriho. ³⁸Oto ko fiha kuna keyek onyiha ko tigoli kuna lomatare sang ojir ongon ketemoni lo sang ko lofwonu mata.³⁹Ikobati ketemoni lo kuna keyek. Manyu itad sang kirieho kuna ikomoli ko kuna ikoriho. ⁴⁰Igele Jakob kirieho kulo sang ofik ake to kiji lo sang, manyu ofik kuna ikweri fad ko kuna ingiroho ko kuna irwohi ake ara kulo Laban. Tona igele inyi sang kunenge ake ida imorahi ko kulo Laban.⁴¹Manyu kalikobo kore kode mongo lo ker purnoti na ifufu ilotir, ofik Jakob kuna keyek ketemoni nenge ojir ikobati ketemoni lo kuna keyek ⁴²ati kalara kiri kode kera botora kuna iniamaha ida inyi ofik keyek ketemoni neicieng. Tona ofwonu sang kuna iniamaha ara kulo Laban, kuna ilotiri ara kulo Jakob.⁴³Tona olotu Jakob obara noo, obar kiri, kera, sigiriahin ko lonagahin ko karwaak rei ko ngorwo.

¹Oning Jakob ojo otenya tee rei kulo Laban ojo, "Liyaru Jakob sang kulo apa niyang fad, manyu orumu ene bara fad iyo sang kulo apa niyang." ²Manyu odeu Jakob jimitan lida kitongo lo Laban ko inyi orihe ori iya langun. ³Tinyia ojo Lobanga diho Jakob, "Ilo toite iya kof lo apaicio kunino iyo cio kunino manyu angon cia nan koisi."⁴Tinyia ocule Jakob tenya iyo Racel ko Lea ojir ofwonuni mwang idi liboriare inyi sang. ⁵Ojo inyi iyo icieng, "Adeu nan jimitan kitongo lo apa ningi ko nan, lida orihe ori iya langun ati kingon Lobanga lo apa nei ko nan. ⁶Iyen ite jimitan latii nan iyo apa ningi to golun nei fad.⁷Ati lohitinonong apa ningi nan to kibebelo kidumit kunei kakeny tomon. Oto hati ida Lobanga iruk inyi kitiyo lobo rohojun ken nei. ⁸Ko lojo inyi, "Sang kuna ikomoli cia lara kunino, oto sang fad itado kirieho kuna ikomoli. Manyu ko lojo kuna ikoriho cia lara kunino, itado sang fad kirieho kuna ikoriho. ⁹Tona lodumu Lobanga sang kulo apa ningi fad lohicio nan.¹⁰To ofahin kulo kitado lo sang, kitirija afa nan ojo, adeu nan korecio kuna likoba kiri ara kuna ikomoli, kuna ikoriho ko kuna igiriha. ¹¹Ojo malaika lo Lobanga diho nan iyo kitirija, 'Jakob'. Anyiahahi nan inyi ajo, "Nan ene."¹²Oto ojo iyo nan, "Tode jimitan korecio kuna likoba sang ara kuna ikomoli, kuna ikoriho ko kuna igiriha tonyio ladeu nan tohi na litii Laban ken nino. ¹³Nan Lobanga lo Betel lafa faji litware isi wiriti manyu ibutiare diho nan. Jijia towoju tone kof deu ilo iya kof na lohitomonunorehin isi."¹⁴Tona Racel ko Lea ko kiyiahahino inyi ojo, "Orihe lobo tohi ongon na ngohiluny ohoi iyo sangite kulo apa niyang? ¹⁵Ida inyi kideya ohoi ara misiok? Ida manyu inyi kitilote ohoi keken litiyore manyu sang kuna lohiyemarihin ohoi fad. ¹⁶Dede bara na lodume Lobanga to kac kulo apa niyang ara niyang ko tee kuniyang. Tona itiyo tohi na lohirihohi Lobanga isi."¹⁷Oto Jakob ko kitirwohohino tee ko ngorwo kunenge korwonga kulo lonagahin, ¹⁸ko mira sang kunenge fad ara lobito ko sangite kunenge kunakude kuna lorumu inyi to Padan Aram fad ko johoro iyo apa nenge Isako na longon kof lo Kanaan.¹⁹Ko lolo Laban gita kera kunenge, okokole Racel lopidingahin kuna lara Lobangahin kulo kolo monye. ²⁰Tona itinonong Jakob Laban Aramani ida orihohi inyi lotita nenge. ²¹Oto inyi ko rwaaru ko sangite kunenge fad orang nam lo Euparets ara na loloro kof lo dongeco kulo Gilead.²²To far lo uni, orihohini Laban ojo lifiri Jakob. ²³Inyi ko tubuno kaleicieng fad omot lo Jakob lo tiforo inyi to faritin mietare itohorori inyi kof lo dongeco kulo Gilead.²⁴Oto Lobanga olotu iyo Laban Aramani iyo kitirija karue ojo diho inyi, "Togeny, keteny lobo tenya iyo Jakob; na ijir kode na irohoi." ²⁵Orumu Jakob ogurohi kema nenge kof lo dongecio kulo Gilead to na litihorunore Laban inyi, Laban ko cio kunenge manyu ko gurohinoti kemahin kuneicieng ijia.²⁶Oto Laban ojo iyo Jakob, "Nyio itii isi? Lohitinonong isi nan manyu irweunore tee kunei iya cio kuna liniefuni to rem. ²⁷Nyio irweu isi lolit, itinonong nan? Nyio ida isi irihohi nan, ji nan ahiniamahi isi to kwama ko wolo iyo dingo lo oja ko adunguhin? ²⁸Ida manyu isi icio nan acik lotataha kunei ko tee kunei ofwo to kisiliban. Itii isi tic lodataru.²⁹Atehita nan golun lo kiriafuno isi ati adi karue kirihohi Lobanga lo apa nino nan, "Togeny, keteny lobo tenya iyo Jakob na ijir kode na irohoi." ³⁰Jijia irweita isi tonyio lohidam isi iitoro kolo apa nino. Ati nyio ikokoluno ite lopidingahin kuna lara Lobangahin kunei?''³¹Inyiahahi Jakob Laban ojo, "Orumu nan abang jimitan iruje cia isi tee kunino to kana nei. ³²Ati kalirumu isi tungani na lotehita lopidingahin kulo Lobangahin kunino, ida cia na tungani owar. To ketemoni lo cio kuniyang totak kolongon lobo tohi nino ene iyo nan, kolongon todume. Tona orumu Jakob ida oyen jimitan lokokolu Racel lopidingahin kulo Lobangahin.³³Tona orute Laban kema lo Jakob ko lo Lea ko kemahin kulo kuna karwaak ngorwo are ida orumu lobo tohi. Kolorutu inyi to kema lo Lea, orute kema lo Racel.³⁴Tona orumu Racel odumu kuna lopidingahin kulo Lobangahin kulo kaleicieng ofik iyo ogogor lo kitongi lo lonaga nenge itongore. Otak Laban sangite kuna longoni katwa lo kema fad ida orumu lobo tohi. ³⁵Ojo Racel iyo apa nenge, "Kelongo lahitok nei jimitan ida nan awoita ketemoni nino, adeya nan ofa." Tinyia otak inyi ati ida orumu lopidingahin kulo Lobangahin kulo kalenge.³⁶Ilongo Jakob noo, itingolof Laban ojo, "Nyio kipal nei? Aja apal nan diho isi many imejare isi nan? ³⁷Naha jijia litak isi sangite kunei fad, lirumu isi nyio na lara lo kaji nino? Tofik ene ketemoni lo cio kunino ko cio kunei ingohi icieng tongot tenya kiji niyang.³⁸Latong nan ko isi karihin keek are, ida kera ko kiri kunino obut, manyu ida nan akony mongi kulo kera kunino. ³⁹Ida nan ayauno sang kuna lokony itiraha diho isi, akenahi nan kuna iyo nan. Manyu kitidum isi nan sang kuna lokokolari to far kode to karue. ⁴⁰Ori afa warun nei jii; kicura afa kolong far, kidaha kirobi karue many ife jio to konyeha kunei.⁴¹Ori afa warun nei jii to karihin keek are kuna lamanyare nan kalilo. Atii nan diho isi to karihin tomon ko ongon to tee kunino ko karihin ile to sang kunino, manyu ibel isi kidumita kunei kakeny tomon. ⁴²Ngida Lobanga lo apa nei, Lobanga lo Abraham ko bangun lo Isako kingon ko nan, ji isi ifuhe nan alo to kac. Ati lodeu Lobanga kidak nei ko tic lo kac kunei, manyu kirieng isi adi karue.''⁴³Inyiahahi Laban Jakob ojo, "Ara kuno ngorwo tee kunei, ara kuno tee tee kunei. Manyu ara kuno sang sang kunei, kuno sangite lideya isi fad ara kunei. Ati ngatum nan kitiyo nyio iyo tee kunei ko tee kuna lotomonu icieng? ⁴⁴Jijia ou ngatifik ciharu nan ko isi manyu ojir itongo ara saden kiji niyang.''⁴⁵Tinyia Jakob ko dumuno moru icidohi ara wiriti. ⁴⁶Ojo iyo cio kunenge, ifurohiti kude morutok. Oto icieng ko kiyauno morutok ifurohini, oto icieng odaha inyia lifurohinore icieng morutok. ⁴⁷Ilolong Laban na ifurit lo morutok ojo Jegar Sahaduza, manyu ilolong Jakob ojo Galeed.⁴⁸Ojo Laban, "Ara ene ifurit saden kiji nei ko isi ele far. Inyi licio obara Galeed ⁴⁹obara manyu Mizpa tonyio ojo inyi, "Ingohi Lobanga iriria kiji nino ko nan ka lohilomaha. ⁵⁰Kalitiyo isi tee kunei ara na irohoi kode iyem ngorwo kude isodohi iyo tee kunei, kileng ngoru tungani lohideya ohoi ibuha jimitan ara Lobanga saden kiji nei ko isi."⁵¹Ojo manyu Laban iyo Jakob, "Ene ifurit ene, manyu ene wiriti ene na lafik nan kiji nino ko nan ⁵²ara ene ifurit saden, ara manyu ene wiriti saden, jimitan ida cia nan alo agal ene ifurit ngati nino lo kitiyo isi na irohoi, manyu, ida manyu cia isi ilotu igal ene ifurit ko ene wiriti ngati nitole lo kitiyo nan na irohoi. ⁵³Ingohi Lobanga lo Abraham, Lobanga lo Nahor, Lobanga lo apa neicieng tongot tenya kiji niyang. Oto Jakob ko kibutia to karana lo Lobanga lo apa nenge Isako.⁵⁴Opulohi inyi kiciorita ijia kof lo dongecio, ilolongu cio kunenge daha. Langun lokeru icieng daha, ogeti ijia. ⁵⁵Kiwanyi nenge berien imaruk Laban lotataha kunenge ko tee kunenge igatahi gum. Oto inyi ko lotita oite kang.

¹Olo manyu Jakob loro nenge, itiric malaikahin inyi. ²Kolodeu Jakob icieng, oto ojo, "Ara ene lomanyare lo Lobanga!" Itibarahi inyi na faji ojo Mahanaim.³Ocule Jakob jayona ketemoni nenge iyo rece Isau Seir kof lo Edom. ⁴Ising inyi icieng ojo, "Tenya na ngirihohi ite lahitok nei Isau inyi ene, 'Ojo karwaani nino Jakob, 'Atongo orumu nan kolo Laban many to nu ko jijia. ⁵Atehita nan kicu ko sigiriahin, kera ko kiri, karwaak rei ko ngorwo. Jijia aculuno nan jayona diho lahitok nei lo tahita rumuno kisisio to ketemoni nino."⁶Koloitu jayona diho Jakob, ojimi iyo inyi, "Lohifwo ohoi iyo rece nino Isau, jijia olotuno inyi kitiricio isi ko cio mia ongon. ⁷To bangun na hitok ko kiudo okor Jakob cio kuna lotehita inyi fajihit are, sang, kicu ko lonagahin manyu. ⁸Orumu inyi ibuha ojo, "Kololotu Isau iburahino lobito olek, ojir nu bito ofur."⁹Oto Jakob ko kilifa ojo, "Lobanga lo apa nei Abraham, Lobanga lo apa nei Isako. Lahitok, isi lafa lijo diho nan, 'Ilo toite kof nino iyo cio kunino manyu ahicio cia nan isi bara.' ¹⁰ida nan acam to jiran ko kigenoro na lohicio isi nan karwaani nino. Atehita afa nan iluk jia lafar larangitare ene kare lo Jordan, ati jijia lara nan olehi kulo cio are.¹¹Alifa nan ajo, 'kilwahu nan to kana lo rece nei Isau, tonyio abang nan jimitan olotu cia inyi iburahino kitiremo nan ko ngorwo ko tee kuneicieng.' ¹²ati iteny isi ijo, 'Ahicio cia nan isi bara manyu itiboreng mute lotataha kunino iya singeti lo kutuk lo nam na lida ikenuno."¹³Oget inyi ijia na karue, manyu iyo sang kulafa lotehita inyi, onyum inyi kuna licwara inyi rece Isau; ¹⁴kiri purno mia are ko korecio keek are, kera purno mia are ko mongi kulo kera keek are, ¹⁵ngotengeri kulo lonagahin keek uni ko tee kuneicieng, kicu botora keek ongon ko mongi tomon ko ngotengeri kulo sigiriahin keek are ko kokili tomon. ¹⁶Icio inyi kuna sang ara karwaak kunenge lomirita iyo koditihin kuneicieng ake ake, ko rihohino karwaak kunenge kuna lomirita ojo, "Ifwo ketemoni nei ilolomaha."¹⁷Orihohi inyi iyo karwaani nenge na litemita ojo, "Ko lohitiric rece nei Isau isi kitifi ojo, 'Ira isi longai? manyu iloro isi aji? Manyu kulo ngai kuno sang limirita isi? ¹⁸Ojir isi ijo, 'Ara kulo karwaani lilo Jakob. Ara kiciorita kuna liyauni diho lahitok lei Isau, manyu olotuno inyi to kifwongi niyang'."¹⁹Ocik manyu inyi lo are, lo uni ko kulakude kula lijifata fad ojo, "Itorihohiti Isau na tenya bito ko lohitiric inyi ite. ²⁰Manyu ketifur rihohino ijo, 'Olotuno karwaani lilo Jakob to kifwongi niyang'." Tonyio orumu inyi ibuha ojo, "Atirobi cia nan tau nenge to kuno sang lacularu nan ketemoni, ojir kalohiric inyi ko nan to kifwongi kuya kitum inyi kifwotuno nan." ²¹Tona itetemohi Jakob kiciorita kunenge ketemoni nenge ati oget inyi inyia laperit.²²Owoju Jakob na karue iyaru kuna ngorwo kunenge are ko kunakude ngorwo karwaak are ko tee kilahaji kunenge tomon ko lobito itirang kare lo Jabok ²³Langun litirang inyi icieng tode lo kare, ko sang kunenge fad.²⁴Otong Jakob ake olotu lobo tungani tingo lotir ko inyi na karue many tomorong. ²⁵Ko lodeu la tungani jimitan ida inyi atum borihino Jakob, oto ko tiro lohilos nenge itifiru koite lo lohilos to lohikubore nenge orihe inyi osodoro tingo lotir ko inyi. ²⁶Oto la tungani ojo diho inyi, "Kilahahi nan alo, tonyio lonyiha kof wangun." Inyiahahi Jakob inyi ojo, "Ida nan ahilahahi isi many kaligatahi isi nan gum."²⁷Itifi la tungani inyi ojo, "Ngai karana nino?" Inyiahahi Jakob inyi ojo, "Jakob" ²⁸Oto la tungani ojo, "Ida cia isi irihe ibara Jakob, ati ibara dong cia isi Israel, tonyio lifufulinga isi ko Lobanga manyu ko cio ilanyu."²⁹Ojo Jakob diho inyi, "Kirihohi hati nan karana nino." Ati Inyiahahi inyi ojo, "Nyio itifiare isi karana nei?" Oto inyi ko kigatahino Jakob gum tinyia. ³⁰Tona itibarahi Jakob na faji ojo, "Peniel" lo jimitan, "Tonyio, adeu nan komom lo Lobanga tiribiny ati ingohi nan arihe awar."³¹Orumu kolong lifiru kai kologal inyi Peniel, manyu orumu inyi ongura to na lohilos nenge ³²Inyi licio cio kulo Israel ida okonya tyang lo lohilos ko jijia tona lotirorihin afa koite lo lohilos lo Jakob.

¹Oto Jakob ko deya, odeu Isau ko kula cio kulenge mia ongon ofwonuno. Oto inyi ko kora tee kiji lo Lea, Racel ko kuna ngorwo karwaak are. ²Ofik inyi ngorwo karwaak ko tee kuneicieng ketemoni, itijifahi Lea ko tee kunenge ititongohi Racel ko kito nenge Josep kifwongi. ³Inyi token nenge ko loro ketemoni olo ogung kof kakeny mietare langun loloro ketemoni lo rece.⁴Ati ife Isau kitiricio Jakob ipusohino inyi imaruk. Oto icieng ko kicira. ⁵Oto Isau ongolo ko deuno ngorwo ko tee kuneicieng, itifi ojo, "Oho ngai kuno lohilihita ko isi?" Inyiahahi Jakob ojo ara kuno tee kuna licio Lobanga karwaani nino.⁶Oto ngorwo karwaak ofwonu ko tee kuneicieng ogungiti. ⁷Ijifahi Lea ko tee kunenge ofwonu ogung, lohicungi olotu Josep ko Racel ogungiti. ⁸Itifi Isau Jakob ojo, "Nyio fotiri lo kuno sang lohiric ko nan?" Inyiahahi Jakob ojo, "Kulo rumunore kibaya to ketemoni nino lahitok nei."⁹Ati ojo Isau, "Langonore nan beciek rece nei, toricahi kuno litehita isi ara kunino." ¹⁰Ojo Jakob, "Ida Kalarumu nan kibaya to ketemoni nino, ofotu kuno icioriti to kana nei tonyio ori deya lo komom nino diho nan mejo deya lo komom lo Lobanga iya na lifotunore isi nan to kibaya. ¹¹Tode, iruho iciorit na liyauni diho isi tonyio lohilwak Lobanga nan manyu langon nan ko sangite fad kuna lawak nan." Tona lifudare Jakob, iruk Isau.¹²Tinya oto Isau ojo, "Lara lohifwo, ahilik nan ko isi." ¹³Ati ojo Jakob, "iyen isi lahitok nei jimitan isidiha tee manyu ojir nan aric ikojeha kulo kera, kiri ko kicu. Kalomiri bebe otum kirieho ko kacau oweiha lobito far. ¹⁴Jijia ilo ketemoni lahitok nei, ingohi nan alotu cafi ko kirieho ko kacau ikojeha ko tee many cia agoru diho isi lahitok nei idi Seir."¹⁵Tinyia ojo Isau, "Ingohi hati bo angerihi cio kude kunei kiniemuno isi." Itifi Jakob ojo, "Nyio itiyore isi jii? Kicio ja nan arumu kibaya to ketemoni nino lahitok nei." ¹⁶Dong tona far iciak Isau owele nenge lo itoro iya Seir. ¹⁷Jakob oite iya Sukos, faji na lolo inyi oduhohi faji lohitongore nenge ko kifaha twoli kulo sang kunenge. Inyi licio ilolongi na faji ojo Sukos.¹⁸Langun lolotu Jakob to Padan Aram, olotu ogoru siti lo Sekem ara na ijir, na longon kof lo Kanaan. Ogurohi inyi kema nenge onyiha ko Sekem. ¹⁹Inyiangu inyi kof to robia mia lobito iyo tee kulo Hamor, apa lo Sekem, ogurohinore kema nenge. ²⁰Inyia oduhohi inyi ciali lo kiciorita na lilolong inyi ojo 'El Eloe Israel.

¹Oto Dina, na kito karioni lo tomonohi Lea Jakob olo waja ngorwo kulo na kof. ²Kolodeu Sekem, kito lo Hamor, Hivitani, kabu lo na kof inyi, oto ko kiyaru inyi olo getore. ³Olo tau nenge iyo Dina kito lo Jakob, imaru inyi na kito karioni, ititeny inyi ara na ijir.⁴Manyu ojo Sekem iyo apa nenge Hamor, "kitiyemahi nan ene kito ara ngorwani nei." ⁵Koloning Jakob jimitan lisongarihin kito nenge Dina, orumu tee rei kunenge ongoni mwang ko sang kunenge. Tona ida inyi itii lobo tohi many ofwonu icieng.⁶Tinyia olo Hamor, monye lo Sekem tenya ko Jakob. ⁷Orumu tona, tee rei kulo Jakob loitu to mwang ko ningunoti tohi na litiihino. Obul na tenya icieng many ilongoho noo tonyio itii Sekem tohi na litilongojita noo to Israel lo getore kito lo Jakob, tohi na lida ocam to kitiyo.⁸Ati ojo Hamor diho icieng, "Ofik kito nei Sekem tau iyo kito nino. Icwara ja ingohi to yem ara ngorwani nenge. ⁹Kiyemaru ko ohoi; kicio ohoi tee kariok kuningi, ite manyu iyem tee kariok kuniyang ara ngorwo diho ite. ¹⁰Itum ite imanya kiji niyang, owat kof diho ite. Itomanyati, itiloto, manyu itorumu bara tone kof.''¹¹Oto Sekem ojo iyo apa lo Dina ko recera, "Ingohi nan arumu kibaya to ketemoni ningi, manyu ahicio cia nan ite sang pili kuna liwak ite. ¹²Itingot kiyemi ko kiyalita itigal iya na liwahare ite, adum cia nan lobo tohi keken lingotohi ite nan. Tohi na lawak nan inyi ene kito karioni ara ngorwani nei." ¹³Tonyio linywari kanece neicieng, inyiahahi tee kulo Jakob Sekem ko monye Hamor to kitinononga.¹⁴Ojimi diho icieng, "Ida ohoi kitum kitiyo jii, ida ohoi kitum kicwara kanece niyang diho tungani na lida iliri. Ara cia na tohi lo riri diho ohoi. ¹⁵Ara kikoi lobito na ngotum kiyauno kiruk kiji niyang tone tenya, lo jimitan ojir cio rei kuningi fad iliraru iya ohoi. ¹⁶Oto cia ohoi kicio tee kariok kuniyang diho ite manyu ohoi kiyem tee kuningi, kimanya cia ohoi kiji ningi kira lobito ko ite. ¹⁷Ati kalida ite iruk kiliraru, kidumu cia ohoi kanece niyang ko fworo."¹⁸Oto na tenya neicieng ori mejo ojir iyo Hamor ko kito nenge Sekem. ¹⁹Oto na lokilahaji oruk kitiyo na tenya tonyio orumu inyi imaru kito lo Jakob noo, orumu ara inyi iworati noo to kolo monye.²⁰Tinyia ofwo oho Hamor ko kito nenge Sekem lokoli lo kang neicieng tenya ko cio kulo na kang. ²¹Ojo icieng, "Kiyomo kuno cio ko ohoi. Ingohi tomanyati kof niyang itilototi ijia, olalat manyu kof otum icieng. Kitum ohoi kiyem tee kariok kuneicieng, icieng manyu kuniyang.²²Ati iruk cia kuna cio kimora ko ohoi ara lobito to tohi lobito, jimitan ojir cio rei kuniyang iliraru iya icieng. ²³Ida cia sang kuneicieng ko sangite ko sang kuneicieng kunakude fad ara kuniyang? Jijia ngaruhoto tenya neicieng oto cia icieng kimoraru ko ohoi.²⁴Iruk cio kulo kang kuna lotubuno fad tenya lo Hamor ko kito lenge Sekem, manyu iliraru cio rei kulo na kang fad. ²⁵Koloring faritin uni, orihe icieng fad omwaiha korongan, ofwonu tee kulo Jakob are; Simeon ko Levi, recera kulo Dina, odumu ngalemo latuboti kuneicieng ko kiburahino kang na lida oyeniti ko kifadaru cio rei kulo na kang fad. ²⁶Ifadari Hamor ko kito nenge Sekem ko dumuno Dina to kolo Sekem ko fworo.²⁷Tee kulo Jakob ko fwonuno na kang orumu linywararihin kanece neicieng ko belaru sangite fad. ²⁸Obelari kiri, kera, kicu, sigiriahin ko sangite fad to katwa lo kang ko kuna longoni mwang. ²⁹Iyaru icieng sangite kulo kuna cio fad ko ngorwo ko tee ko sangite fad to kajihit.³⁰Ojo Jakob iyo Simeon ko Levi, "Liyauno ite kidak diho nan ko kicwara karana nei ongwo iyo cio kulo Kanaan ko Perezihin ko cio kuna lomanya ene kof. Kikutingi ohoi kalimorahino kuna cio ofwonuni kitiremo nan, kikeruni nan ko kalitole." ³¹Ati Inyiahahi icieng ojo, "Ojir orumu inyi itongore kanece niyang iya kasomoni?"

¹Tona ojo Lobanga iyo Jakob, "Ilo iya Betel manyia ijia manyu toduhohi ciali lo kiciorita ijia iyo Lobanga lafa loboto iyo isi na lifejarore isi to kana lo rece nino Isau. ²Oto Jakob ojo iyo kaji nenge ko cio fad kuna longoni ko inyi, "Ibirete lobangahin misiok kuna litehita ite manyu itinyujoto kenite kuningi manyu ibel kielani. ³Ito hati ifwonu kifwo iya Betel faji na laloro nan duhohino ciali lo kiciorita diho Lobanga lafa lohinyiahahi nan kilelia nei to faritin kulo kidak nei manyu kingon ko nan fajihit fad kulafa lalot nan.''⁴Icieng ko kicwara Jakob lobangahin misiok kuna lotehita icieng fad ko gelo kulo kiyoha kuneicieng onuhahi Jakob icieng fotiri lo bule na longon Sekem. ⁵Icieng ko fworo oto lokavikavi lo Lobanga ko urohino iyo cio kulo kangite kuna lirit icieng oru lobo tungani lotiforo icieng.⁶Ogoru Jakob ko cio kunenge fad Luz na lara Betel kof lo Kanaan. ⁷Oto inyi oduhohi ciali lo kiciorita iyo Lobanga ijia, itibarahi ojo El Betel, tonyio ara afa ijia obotore Lobanga diho inyi to na lifeitare inyi rece nenge. ⁸Tinyia owei Debora karwaani lo Rebeka onuhahini inyi fotiri lo bule na longon oleng to Betel, ilolongi na faji ojo 'Alon Bakus.⁹Langun loitu Jakob to Padan Aram, olotu Lobanga oboto diho inyi ari igatahi inyi gum. ¹⁰Ojo Lobanga diho inyi, "Ibara isi Jakob adi ida cia karana nino orihe ara Jakob, ara cia karana nino Israel." Tona itibarahi inyi ojo Israel.¹¹Manyu ojo Lobanga diho inyi, "Nan Lobanga lolanyu fad, topit isodoro borengun. Misi manyu imaniti kulo misihi ofwonu cid to ken nino manyu ongoni mute kabuno iyo lofafaicio kunino. ¹²Ene kof afa lacio nan Abraham ko Isako, ahicio manyu isi. Manyu acio cia nan ene kof diho lofafaicio kunino to omot nino." ¹³Oto Lobanga ko loro tinyia lotenyare ko inyi.¹⁴Icidohi Jakob wiriti lo moru inyia lotenyare Lobanga ko inyi, manyu ijuhohi imatit ko ngoroni kai nenge. ¹⁵Ilolong Jakob na faji lotenyare inyi ko Lobanga ojo Betel.¹⁶Icieng ko fworo to Betel. Orihe icieng olomaha gaa to Eprat, iciak Racel kiboria manyu ogol otomone nenge noo. ¹⁷Iya na logolore otomone nenge, ojo katitomononi nenge diho inyi, "Kebang, tonyio litomonu isi kito retoni ari ¹⁸iya na lowiritare inyi wirita nenge lo lohicungi, tonyio orumu inyi loweyaru, itibarahi inyi kito nenge ojo Ben-Oni. Ati ilolong apa nenge inyi ojo Benjamin. ¹⁹Iya na, owei Racel manyu onuhahini inyi kikoi lo Eprat na lara Betelehem. ²⁰Icidohi Jakob moru ara wiriti kwecere nenge. Ko jijia ongon na wiriti lo moru litotoro kwecere lo Racel.²¹Osodoro Israel ko lotita ari olo ogurohi kema nenge kifwongi lo Migdal Eder. ²²Ko lomanya Israel na faji, olo Reuben ogetore ngorwani lo apa nenge Bilah. Olotu Israel oning na tenya. Ongon afa Jakob ko tee rei tomon ko are.²³Tee kulo Lea: Reuben okang lo Jakob, Simeon, levi, Juda, Isaka ko Zebulun, ²⁴Tee kulo Racel: Josep ko Benjamin ²⁵Tee kulo Bilah karwaani lo Racel: Dan ko Naptali Tee kulo Zilpa karwaani lo Lea: Gad ko Aser.²⁶Tee kulo Zilpa karwaani lo Lea: Gad ko Aser. ²⁷Ogoru Jakob kang diho apa nenge Isako na longon mamre, na lonyiha Kirias Arba, na lara Hebron lafa faji lomanyare Abraham ko Isako.²⁸Itong Isako karihin mia lobito ko keek mietanui. ²⁹Oto ko wirita wirita nenge lo lohicungi ko weyaru, oite iyo cio kunenge orumu lobolo lomany karihin beciek. Onuk tee kunenge; Isau ko Jakob inyi.

¹Ara ene tifo lo lohujit lo kaji lo Isau na lara Edom ²Oyem Isau ngorwo kunenge to kiji lo ngorwo kulo Kanaan; Ada kito lo Elon Hittitani ko Oholibama kito lo Ana manyu lotata lo Zibeon Hivitani ³ko Basemas kito lo Ismail kanece lo Nabeios.⁴Otomonohi Ada Isau Elipaz, otomonu Basemas Reuel ⁵manyu otomonu Oholibama Jeus, Jalam ko Kora. Ara afa tee kulo Isau kuno kuna lotomonohini kof lo Kanaan.⁶Odumu Isau ngorwo kunenge, tee kunenge rei ko kariok ko cio kulo kalenge kunakude fad ara lobito ko sang kunenge ko sangite fad kuna lorumu inyi to kof lo Kanaan ko johoro kof lobo iloma gaa tinyia longonore rece lenge Jakob. ⁷Orumu sang kuneicieng oborengi noo ida iruk icieng kimora ara lobito, ida orumu na kof lomanyare icieng otum icieng fad to borengun lo sang kuneicieng. ⁸Tona, Isau na manyu lobara Edom ko loro manya kof lo donge lo Seir.⁹Ara ene tifo lo lohujit lo kaji lo Isau, monye lo cio kulo Edom kuna lomanya donge lo Seir. ¹⁰Ara kuno karanacio kulo tee rei kulo Isau: Elipaz kito lo ngorwani lo Isau, Ada ko Reuel kito lo ngorwani lo Isau Basemas. ¹¹Ara tee rei kulo Elipaz: Teman, Omar, Zepo, Gatam, ko Kenaz ¹²Ongon afa Elipaz kito lo Isau ko lobo ngorwani manyu lobara Timna na lotomonu kito retoni na lobara Amalek. Ara afa kuno lotataha kulo ngorwani lo Isau na lobara Ada.¹³Tee rei kulo Reuel: Nahas, zera, Sama, ko Miza. Ara orumu kuno lotataha kulo Basemas ngorwani lo Isau. ¹⁴Tee rei kulo ngorwani lo Isau Oholibama kito lo Ana, lotata lo Zibeon kuna lotomonohi inyi Isau icieng; Jeus, Jalam, ko Kora.¹⁵Ara orumu kuno kabuno iyo lotataha kulo Isau: Tee rei kulo Elipaz okang lo Isau; Kebuno: Teman, Omar, Zepo, Kenaz, ¹⁶Kora, Gatam ko Amalek. Ara orumu kuno kabuno kuna lofwonu iyo Elipaz to Edom, ara afa icieng lotataha kulo Ada.¹⁷Tee rei kulo kito lo Isau Reuel icieng; Kabuno: Nahas, Zera, Samma, ko Miza. Ara afa kuno kabuno kuna lofwonu iyo Reuel to Edom, ara afa icieng lotataha kulo ngorwani lo Isau Basemas. ¹⁸Tee rei kulo ngorwani lo Isau Oholibama; Kabuno: Jeus, Jalam ko Kora. Ara orumu kuno kabuno kuna lofwonu iyo ngorwani lo Isau Oholibama kito lo Ana. ¹⁹Ara orumu tee kulo Isau (na lara Edom) manyu kabuno kuneicieng orumu kuna.²⁰Ara orumu kuno tee kulo Seir Horitani na orumu lomanya na kof; Lotan, Sobal, Zibeon, Ana, ²¹Dison, Ezer ko Disan. Ara afa kuna tee rei kulo Seir to Edom kabuno kulo Horit; ²²Tee rei kulo Lotan: Hori ko Homam. Ara afa Timna kanece lo Lotan.²³Tee kulo Sobal : Ayan, Manhas, Ebal, Sepo ko Onam. ²⁴Tee rei kulo Zibeon: Aiah ko Ana. Ara ene Ana lafa lorumu ipulahi kulo kifi kuna inohi katua lo kuny na litibalare inyi sigiriahin kulo apa nenge Zibeon.²⁵Tee kulo Ana: Dison ko Oholibama kito karioni lo Ana. ²⁶Tee rei kulo Dison; Hemdan, Esban, Isran ko Keran ²⁷Tee rei kulo Ezer: Bilhan, Zavan, ko Akan. ²⁸Tee rei kulo Disan: Uz ko Aran.²⁹Ara afa kuno kabuno kulo Horit; Lotan, Sobal, Zibeon, Ana, ³⁰Dison, Ezer ko Disan. Ara afa kuno kabuno kulo Horit na lijifata agwalahin kunei to kof lo Seir.³¹Ara afa kuno kabuno kuna lolanyu Edom many orihe ko lobo kabu oru to kof lo Israel; ³²Olotu Bela kito lo Beor ara kabu lo Edom, obara afa taya nenge Denhaba. ³³Ojo Bela owei oluny Jobab kito lo Zera lo Bozra faji nenge ara kabu.³⁴Ojo Jobab owei, oluny Husam lo kof lo Teman faji nenge ara kabu. ³⁵Ojo Husam owei, oluny Hadad kito lo Bedad na lolotu olanyu cio kulo Median to kof lo Moab faji nenge ara kabu. Obara afa taya nenge Avis. ³⁶Ojo Hadad owei, oluny Samla lo Masereka faji nenge ara kabu.³⁷Ojo Samla owei, oluny Saul lo Rehobos na longon kutuk lo kare faji nenge ara kabu. ³⁸Ojo Saul owei, oluny Baal-Hanan kito lo Akbor faji nenge ara kabu. ³⁹Ojo Baal-Hanan kito lo Akbor owei, oluny Hadad faji nenge ara kabu. Obara afa taya nenge Pau manyu obara ngorwani nenge Mehetabel kito lo Mafred kito lo Me Zahab.⁴⁰Ara afa kuno kabuno kuna loreu iyo Isau to Karanacio ko imaniti ko kofikofi kuneicieng; Timna, Alva, Jeses, ⁴¹Oholibama, Ela, Pinon, Kenaz, Teman, Mibzar, ⁴²Kenaz, Teman, Mibzar, ⁴³Magdiel ko Aram. Ara orumu kuno kabuno kulo Edom to lomanyarihin kuneicieng iyo kof na litongo icieng. Ara ene iforit lo kaji lo Isau, monye lo cio kulo Edom.

¹Omanya afa Jakob lafa kof lomanyare apa nenge, kof lo Kanaan. ²Ara ene lohujit lo kaji lo Jakob. Josep kito lokilahaji karihin tomon ko mietare orumu itibala sang kulo apa nenge ko recera kunenge tee kulo Bilah ko Zilpa ngorwo kulo apa nenge iyaunita inyi tenyitenyi kuneicieng kuna irohoi iyo apa nenge.³Orumu Israel imaru Josep ilany tee rei kunenge kulakude tonyio otomonohini inyi Josep to ongoroyone nenge manyu orifahi inyi kyela na idwaru itibibili otoc. ⁴Kolodeu recera jimitan imaru apa neicieng inyi ilany icieng kulakude, oto oberuni inyi ilany na lida kileng otenyati ara na ijir ko inyi.⁵Itirija afa Josep, ojo inyi olotu orihohi recera kulenge, oto osod oberwe neicieng ken nenge noo. ⁶Ojo inyi diho icieng, "Itoning ba ene kitirija nei.⁷Ojo kitora orumu ohoi ngamang mana. Oto hati itorit nei ko woita obir ofwonu itoriti kuningi irit nei oto orubuhiti iyo itorit nei." ⁸Ojo recera kunenge diho inyi, "Iwak mute isi lanyuno ohoi?" Tona osodoro icieng beruno inyi noo to na kitirija nenge ko tenya na loteny inyi.⁹Tinyia itirija inyi ari, olotu inyi orihohi recera kunenge ojo, "Itoning. Kitirija nan ari ojo, olotu kolong, ofa ko kanger tomon ko lobito ogungiti ketemoni nei." ¹⁰Kolorihohi inyi apa lenge ko recera kulenge, irieng apa lenge inyi ojo, "Nyio fotiri lo na kitirija nino? Atum cia nan ko iyang nino ko recera kulilo fwonuno gungon ketemoni nino?" ¹¹Itikaino recera kulenge inyi, ati oricahi apa lenge na tenya kue nenge.¹²Tona ofwo recera kunenge kiboria sang kulo apa neicieng lobo faji lonyiha ko Sekem. ¹³Oto Israel ojo diho Josep, "Iyen isi jimitan iboria recera kunino sang idi lonyiha ko Sekem, ou ahicularu nan isi diho icieng." Inyiahahi inyi ojo, "Ojir noo." ¹⁴Oto ko jimitan diho inyi, "Ilo tode kolongoni recera kulilo ko sang ara na ijir, kinyiahahi nan tenya." Oto ko cularu inyi to ridat lo Hebron. Kologoru Josep Sekem.¹⁵Orumu lobo tungani inyi iratita lodahare lo sang oto itifi inyi ojo, "Nyio itahita isi? ¹⁶Inyiahahi inyi ojo, "Atahita nan recera kunei, ngitum ha ba isi rihohino nan faji na liboriare sang kuneicieng?" ¹⁷Inyiahahi la tungani inyi ojo, "Lojiohori ten, aning nan icieng ojo, 'ingafi iya Dosan'." Josep ko tiforo recera olo orumu icieng onyihati Dosan.¹⁸Ati odeu icieng inyi lolomaje orihe ida logoru diho icieng, iciak icieng kikukuma lo kifadaru inyi. ¹⁹Ojo icieng, "Lolotu bo katirijani! ²⁰Ifwonu ngafadeti kibirohi katua lo lobo to kiji lo kuno tulaha, kijo hati lokony itira inyi. Ojir kideunore lohicungi lo kuna kitirijita kunenge."²¹Koloning Reuben jii, otem lwahuno inyi to kac kuneicieng. Ojo diho icieng, "Kefade inyi. ²²ketiiju lobo okoto, ibirohiti inyi katua lo ene tula to mwangatare. Ati kefik kana ken nenge." Oteny Reuben jii lo lwahuno inyi ojir anyiaharore inyi iyo apa nenge.²³Tona, Kologoru Josep iyo recera kunenge, opuce icieng kyela nenge. Na kyela litibibili liciefita inyi ²⁴ko dumunoti inyi ibirohini katua lo tula na loru kifi tijia.²⁵Langun litongo icieng kof daha, odeu icieng ilulung lo cio kulo Ismail ofwonuno to Gilead. Otingita orumu lonagahin kuneicieng canitok kuna iuri; soya ko iheru ara na lofworoti iyaroti kuna sangite iya Ijipt. ²⁶Ojo Juda iyo recera kunenge, "Ani tohi cia kirumu ohoi iyo kifadaru rece niyang kimonahi okoto nenge?²⁷Ifwonu ngatilotohiti inyi iyo cio kulo Ismail manyu ida kitir inyi, ara manyu inyi rece niyang, tyang ko okoto lo kenite kuniyang." Iruk recera. ²⁸Dong langun lofwonu katilotok kulo Midian, ipihu recera kunenge Josep to katua lo tula itilotohini inyi iyo cio kulo Ismail to riali keek are iyaru kuna katilotok inyi iya Ijipt.²⁹29 Koloite Reuben tula orumu Josep oru to katua, oto ko cira kyelani kunenge. ³⁰Oite inyi iyo recera kunenge olo ojo, "Oru kito to tula! Alo nan aji jijia?"³¹Oto icieng odumu kyela lo Josep, ongoti kine ko kilutohino kyela nenge iyo okoto. ³²Iyaru icieng na kyela litibibili iyo apa neicieng, ofwori ojimi, "Kirumu ohoi ene kyela, tode ba kalara lo kito nino." ³³Oheru apa neicieng kyela ko jimitan, "Ara kyela lo kito nei, lokony lobo tyang ingere inyi. Litisare itira Josep.''³⁴Tinyia ocir Jakob kyelani kunenge, iciefohi kyelani kulo tai ko kicira kito nenge to faritin beciek. ³⁵Ofwonu tee kunenge kilahaji ko kariok fad kitirobia tau nenge, ati oberu inyi kitirobia lo tau. Ojo inyi, "Ida, atiring cia nan kicira many alo amora ko kito nei tula." Tona icir apa nenge inyi. ³⁶Ojo tinyia, ofwo cio kulo Midian itilotohi Josep Ijipt diho Putifar la lara lobito to kiji lo kulahitoha kulo karemok kulo Parao, Kaboloroni lo kaririak kunenge.

¹To kuna faritin, ongerihi Juda recera kunenge olo kitongo ko lobo tungani to Adulam lobara Hira. ²Tijia iric Juda ko kito ngorwani lo lobo Kanaanani lobara Sua. Oyem inyi na kito itongo ko inyi.³Ifonga inyi otomonu kito retoni la lobara Er. ⁴Ifonga inyi ari otomonu kito retoni itibarahi karana nenge ojo Onan. ⁵Otomonu inyi kito retoni lobo ari itibarahi ojo Sela. Otomonohi inyi lobo faji lobara Kezib.⁶Itiyemahi Juda kito nenge okang Er ngorwani la lobara karana nenge Tamar. ⁷Ati Er okang lo Juda orumu ara tungani na irohoi to ketemoni lo Lobanga, Lobanga ko kifadaru inyi.⁸Oto Juda orihohi Onan ojo, "Tojung ngorwani lo rece nino ojir itomonu tee itihu kue lo rece nino." ⁹Ati oyen Onan jimitan ida cia tee ara kunenge. Tona kologeto inyi ko ngorwani lo rece, ijuhohita inyi kula kunenge kof lo kitiho tomonohino rece tee. ¹⁰Na tohi litii Onan, ibot to ketemoni lo Lahitok. Tona ifade Lahitok inyi manyu.¹¹Orihohi dong Juda kokwa nenge Tamar ojo, "Ilo itongo ara lafuserito kolo apa nino many obolo kito lei Sela." Tonyio orumu inyi iiyo ojo, 'Ngowei ha manyu cia ele iya recera'. Tona olo Tamar manya kolo apa nenge.¹²To kifwongi lo faritin beciek, owei ngorwani lo Juda, kito lo Sua. Langun lokeru Juda kitoyo, olo inyi iya Timna iyo cio kulafa logita kera kunenge, manyu ilihe inyi ko morte lenge Hira lo Adulam. ¹³Kolorihohini Tamar ojo, 'Oloro kokonyi nino iya Timna gita kera kunenge', ¹⁴opuce inyi kyelani kulo kitoyo nenge, imuk ken to tirika lo kitirijoro komom nenge ko loro kitongo lokoli lo taya lo Enaim na longon kikoi na loloro Timna. Tonyio odeu inyi jimitan kileng lobolo Sela, orihe ida kiciori inyi ara retoni nenge.¹⁵Kolodeu Juda inyi, iiyo ojo ara ba mulayani tonyio imuk inyi komom nenge. ¹⁶Ida inyi oheru jimitan ara ene kokwa nenge, ogere diho inyi kalele lo kikoi, ojo diho inyi, "Ou ngatigetoti." Itifi inyi ojo, "Nyio cia icio isi nan to geto ko isi?"¹⁷Inyiahahi inyi ojo, "Aculu cia nan purnoti lo kine to twol nei." Itifi inyi ojo, "Icio ca isi nan lobo tohi loterot many iculunore isi na kine?" ¹⁸Itifi inyi ojo, "Nyio nu tohi loterot ngahicio nan isi?" Inyiahahi inyi ojo, "Iyenit nino ko kofite nenge ko na iluk to kana nino." Oto inyi icio kuna sangite diho inyi, ogeto ko inyi, itifong inyi.¹⁹Langun loite inyi olo odume tirika kimuhi ko kiciefo kyelani kulo kitoyo ari. ²⁰Tinyia oculu Juda na purnoti lo kine iyauno morte nenge na Adulamani ojir inyiahe kuna sangite loterot iyo na ngorwani, ati ida orumu inyi.²¹Itifi inyi cio kuna lomanya ijia ojo, "Aji ongon lobo ngorwani mulayani ngun litongita kalele lo kikoi lo Enaim?" Inyiahahi icieng ojo, "Oru ngun lobo mulayani longon ene." ²²Inyi ko itoro diho Juda orihohi inyi ojo, "Ida nan larumu inyi, cie manyu ojo cio kuna lomanya ijia, 'oru ngun lobo mulayani ten'." ²³Ojo Juda diho inyi, "Ingohi inyi totek kuna longoni iyo inyi, tolobo kikwenitare cia cio ohoi. Tonyio lacule manyu nan ene purnoti lo kine ida isi irumu inyi."²⁴Koloring ofahin uni, orihohini Juda, 'Limulaya kokwa nino Tamar, tona, lifonga manyu'. Ojo Juda, "Iyaunoti inyi oleng ojir ocurari owei." ²⁵Kaliyaunoti inyi oleng, ocule inyi tenya iyo kokonyi nenge ojo, "Afonga nan ko monye lo kuno sangite." Osodoro inyi ojo, "Tode ba kalitum isi heruno ngai ene iyenit ko kofite ko iluk?" ²⁶Oheru Juda kuna sangite ko jimitan, "Obir inyi kilany nan tona lida nan acwarare inyi iyo kito lei Sela." Manyu ida inyi oitohi geto ko inyi.²⁷Kolotumohino faritin kulo tomonun nenge, oboto jimitan ongoni tee rei turot kocehe nenge. ²⁸Kolongon inyi tomonun, oculu lobito kito kana. Oto katitomononi ko dumuno kofite na ifurang otorihi murut lo kana ojo, "Ene litemu.’’²⁹Ati kalinyiahe inyi kana nenge, orutu rece oleng, ojo katitomononi, "Koditi na lipusunore isi ene!" Itibarahini inyi ojo Perez. ³⁰To kifwongi, olotu rece ladi ko kofite na ifurang to murut lo kana. Itibarahini inyi ojimi Zera."

¹Tinyia iyari Josep iya Ijipt. Olo Putifar Ijiptoni lahitok lo karemok kulo Parao, Kaboloroni lo kaririak kunenge inyiangu inyi iyo cio kulo Ismail kuna liyaru inyi ijia. ²Ongon orumu Lahitok ko Josep icio inyi otenu manya kolo lahitok nenge Ijiptoni.³3 Kolodeu lahitok nenge ojo ongon Lobanga ko Josep manyu ititenu inyi sangite fad kuna litiyo inyi, ⁴orumu Josep kisisio to ketemoni nenge ko kitiraha inyi ara kaririani nenge. Ofik Putifar inyi ara kalanyunoni lo kalenge ko fiha sangite kunenge fad kac kunenge.⁵Kiciaha to faritin kuna lofihahinore inyi Josep ara Kaboloroni lo kalenge ko kalanyunoni lo sangite kunenge fad, igatahi Lobanga gum kolo na Ijiptoni to Josep. Ongon orumu gum lo Lobanga iyo sangite kulo Putifar fad kuna longoni kaji ko mwang. ⁶Tona ongerihi Putifar sangite kunenge fad kana lo Josep, to rica lo Josep ida inyi iudo lobo tohi ara na loyen inyi daha ko kutuk nenge keken. Naha, orumu Josep ara kito lokilahaji na ifufu odwaru manyu noo.⁷To kude faritin odam ngorwani lo lahitok nenge inyi ko jimitan iyo inyi, "Ou kigetore nan!" ⁸ati oberu inyi orihohi inyi ojo, "To lanyuno nei ida lahitok nei ibuha lobo tohi to kaji nenge; sangite kunenge pili lofik iyo lanyuno ko rica nei. ⁹Oru lobo tungani lobolo tone kaji kilany nan. Oru lobo tohi lomitere lahitok nei iyo nan, ara isi keken tonyio ira isi ngorwani nenge. Aja hati ngatii nan ene tohi ibot to ketemoni lo Lobanga?"¹⁰Kileng isufa inyi Josep faritin fad, oberu Josep geto ko inyi kode kileng nyiha faji na longon inyi. ¹¹Lobo far bito, olo Josep kajihatua kitiyo tic nenge manyu oru lobo karwaani lo kang longon ijia kajihatua. ¹²Inyi ko kiniefa kyela lo Josep, ipihita inyi ojo, "Ou kigetore nan." Ati inyi ko kifejaru iya sita opucahi kyela nenge kac kunenge.¹³Kolodeu na ngorwani ojo lopucahi inyi kyela nenge kac kunenge, manyu life iya sita, ¹⁴ilolongu inyi karwaak kulo kaji nenge ko jimitan iyo icieng, "Itode iyauni ele Iburuni ene iyo ohoi lo kisongare ohoi! Olotu ene kiwak getore nan, nan ko kiluluo. ¹⁵Ojo oning nan aluluo ajo ojir kilwahi nan, ko kifejaru sita ingohi kyela nenge inyia iyo nan."¹⁶Otun inyi kyela lo Josep many olotu lahitok nenge kang. ¹⁷Inyi korihohino retoni nenge ene tenya, ojo, "Na karwaani Iburuni linyiangu isi lolotu kisongare nan. ¹⁸Ati ojo nan alulu ojir kilwahi ko ngerihino kyela nenge inyia Langonore nan, ife iya sita."¹⁹Koloning lahitok lenge tenya na lorihohi ngorwani nenge inyi, ojo, "Kitii karwaani nino nan jii?" ocuraru inyi ko kilongo noo. ²⁰Iyaru lahitok lo Josep inyi olo ofik mabus na lotorarihin mabusi kulo kabu. Ati kolongon Josep ijia mabus.²¹Ongon orumu Lahitok ko inyi, itotorohi inyi jiran manyu icio inyi kisisio to ketemoni lo karicani lo mabus. ²²Tinyia ofik karicani lo mabus Josep obolorohi mabusi kuna lotora inyia fad. Manyu ara inyi lolanyu sangite fad kuna litiihino ijia. ²³Ida karicani lo mabus ibuha tohi na longon iyo twero lo Josep, tonyio ongon Lahitok ko Josep manyu icio inyi tenuno iyo sangite kuna litiyo inyi fad.

¹To kifwongi lo kude faritin, ipal kaniefitani lo kubaya ko kafunani lo mugatihin kulo kabu iyo lahitok neicieng, kabu lo Ijipt. ²Ilongo afa Parao iyo kuno kulahitoha kulo tic lo kalenge; lahitok lo katehitak kulo kubaya, ko lahitok lo kafunak kulo mugati ³ko torahino icieng mabus kaji lo lahitok lo kaririak, iyo na mabus bito lotorare Josep.⁴Icio lahitok lo kaririak icieng iyo Josep oricahi dong inyi icieng. Langun litong icieng katua lo mabus iyaru kude faritin, ⁵ofwonu icieng kuna cio are; lahitok lo katehitak kulo kubaya ko lahitok lo kafunak kulo mugati kulo Parao ongon ko kitirija iyo karue lobito manyu ongon kitirija kuneicieng ko fotiricio gelegele.⁶Kololotu Josep iyo icieng kiwanyi odeu icieng idisi komoma, ⁷oto inyi itifi icieng kulahitoha kulo Parao kulorumu lo tora ko inyi kolo lahitok lenge ojo, "Nyio ipalaru komoma kuningi ele far jii?" ⁸Inyiahahi icieng ojo, "kingoni adi ohoi are fad ko kitirija, ati oru lobo tungani ngohilahahi ohoi tenyitenyi kuneicieng." Oto Josep ojo diho icieng, "Ida re Lobanga lolaha kitirija? Kirihohiti nan kitirijiti kuningi."⁹Oto lahitok lo kaniefitak kulo kubaya ititimahi Josep kitirija nenge ojo, "Iyo kitirija nei adeu nan ciani lo vino ketemoni nei ¹⁰manyu ocar na ciani tanitani uni. Deudeu okwerihi na ciani lo vino ko ngijuno ngak otohoro manyu. ¹¹Orumu kubaya lo Parao ongon kana nei, nan ko dyeuno kuna ngak lotohoro ko kipiyahino iyo kubaya lo Parao acio manyu kubaya kana nenge."¹²Ojo Josep diho inyi, "Fotiri lo na kitirija nino inyi ene. Kuna tanitani uni icieng faritin uni. ¹³To faritin uni, kilak cia Parao isi kinyiahahi faji lo tic nino manyu ilo cia isi ifik kubaya kana lo Parao iya lafa litiititare isi lirahare katehitani lo kubaya nenge.¹⁴Ati kalojir cia diho isi, kiiu nan kitotorohi nan lwaha kiletohi nan diho Parao kilahe nan tone mabus. ¹⁵kirosuni nan kiyauno to kof lo cio kulo Iburu, manyu kileng ten oru tohi na lapal nan acamare tora mabus."¹⁶Kolodeu lahitok lo kafunak kulo mugati jimitan lolahahini kaniefitani lo kubaya ara na ijir, ojo inyi diho Josep, "Kitirija manyu adi nan ojo ayuhita nan aduhuhin uni to kue kuna longoni mugati katua. ¹⁷Iyo aduhu na licadoho to kai, ongoni koditihin kulo mugati fad kulo Parao ati okwara kweny kuna mugati to aduhu to kue nei."¹⁸Ojo Josep, "Fotiri nenge inyi ene, ara kuna aduhuhin uni faritin uni. ¹⁹To faritin uni kilahu cia Parao isi kigore to ihahino iyo kete, manyu ofwonu cia kweny onyia tyang lo ken nino."²⁰Dong ara afa far lo uni far lo otomone lo Parao, manyu ofik inyi karama na lotubu kabolorok kulo kof nenge fad. Olak inyi lahitok lo kaniefitak kulo kubaya nenge ko lahitok lo kafunak kulo mugati nenge to ketemoni lo kabolorok kunenge. ²¹Inyiahahi inyi lahitok lo kaniefitak kulo kubaya nenge faji nenge ojir inyi oitohi kicorihita kubaya lo Parao kana nenge, ²²ati ogore inyi lahitok lo kafunak kulo mugati iya na lolahahinore Josep icieng to mabus. ²³Ida hati lahitok kaniefitani lo kubaya iiu Josep, oluluhi inyi.

¹Koloring karihin are, itirija Parao ojo, "Awoita nan tode lo nam Nail ²ato adeu kicu mietare ofwonu to katua lo nam kuna ifiri onyuji odahati kiji lo odada to kutuk lo kare. ³To kifwongi neicieng ofwonu manyu kicu kunakude mietare to katua lo nam kuna imotaha ikarami orohori owoitati kiji lo kuna adi kude kutuk lo kare.⁴Kuna kicu imotaha ikarami irohori ko daha kuladi ifiri inyuji. Tinyia Parao ko kwenyuno. ⁵Ogetoro inyi ari oto itirij kitirija lo are: odeu kueci kulo ngamang mietare kuna ingiji many ifuti nyige kuna lowoju iyo bahalie lo ngamariti lobito. ⁶To kifwongi neicieng ofwonu kueci kulo ngamang kunakude mietare kuna lifohe kuna lojurute kiyoma lo ngati lo okangere.⁷Odile kuna kueci kulo ngamang mietare kuladi ingiji lifuti. Parao ko kwenyuno, orumu ojo ara kitirijia. ⁸Okwenyu inyi na kiwanyi ome tau oto ko cularu tenya ilolongu ibwonok ko kagenyak kulo kof lo Ijipt fad. Orihohi Parao icieng kitirijiti kunenge ati oru tungani lotum lahahino inyi.⁹Oto lahitok lo kaniefitak kulo kubaya ojo iyo Parao, "Ene far lohiti iiu nan lulworita lo kue nei. ¹⁰Afa ka lilongo Parao iyo karwaak kunenge, kitorihi nan ko lahitok lo kafunak kulo mugati kaji lo lahitok lo kaririak. ¹¹Kitirija ohoi lobito karue manyu ongon kitirijiti kuniyang ko fotiricio gelegele.¹²Ongon afa lobo Iburuni lokilahaji ko ohoi ara lobito ijia, na lara karwaani lo lahitok lo asegere kaririak. Kirihohi ohoi inyi kitirijiti kuniyang, Kilahahi inyi ohoi; icio tungani lobito lobito fotiri lo kitirija nenge. ¹³Itiihino iya na lotenyare inyi token; kinyiahahini nan faji lo tic nei, ogorori lafa kaletoni nei."¹⁴Tinyia ocule Parao cio iyamaru Josep, ko kiyaunoti inyi deudeu to mabus. Langun logit inyi kue ko musula ibel ko kyelani, olotu inyi ketemoni lo Parao. ¹⁵Ojo Parao diho Josep, "Kitirija adi nan oto hati oru tungani lohilahahi nan, ati aning nan ojimi kalining isi kitirija itum isi laha fotiri nenge." ¹⁶Ojo Josep diho inyi, "Ida nan atum laha, ati icio cia Lobanga Parao kinyiahit na lotahita inyi."¹⁷Oto Parao ojo diho Josep, "Iyo kitirija nei, awoita nan tode lo nam Nail ¹⁸oto kicu mietare orutu to katua lo nam kuna ifiri inyuji odahati iyo odada kutuk lo nam.¹⁹To kifwongi neicieng ofwonu kunakude kicu mietare kuna imotaha ikarami orohori, ida nan ladeu kude kicu irohori iya kuna to kof lo Ijipt fad. ²⁰Onyia kuna kicu imotaha kuladi kicu ifiri litemu. ²¹Ati kileng lonyia icieng kuna ifiri ida obotoho mejo lonyiai tonyio iwasihi icieng orohori omotaha jii. Nan ko kwenyuno.²²Iyo kitirija nei adeu nan kueci kulo ngamang mietare kuna ijiri ongiji ifut iyo ilupeti lobito. ²³To omot neicieng ofwonu kunakude kueci kulo ngamang mietare kuna lifohe oweiha ojurute kiyoma lo ngati lo Okangere. ²⁴O fwonu kuna kueci kulo ngamang mietare lifohe odile kunadi ingiji ijiri. Arihohi nan ene tenya diho ibwonok ati oru lobo lohititimahi nan fotiri nenge.''²⁵v 25 Oto Josep ojo diho Parao, "Ara kitirija kulo Parao lobito manyu oriworo. Litotorohi Lobanga Parao tohi na lo loro inyi kitiyo ²⁶Ara kuna kicu mietare ifiri karihin mietare, manyu kuna kueci kulo ngamang mietare ingiji ara karihin mietare. Ara kitirijit na iriworo manyu lobito.²⁷Ara manyu kuna kicu imotaha mietare lo fwonu to katua lo nam to kifwongi karihin mietare, icieng manyu kuna kueci kulo ngamang mietare lifohe kuna lojurute kiyoma lo ngati lo Okangere ara karihin mietare kulo kinga. ²⁸Ori cie iya ladi larihohinore nan Parao, litotorohi Lobanga Parao tohi na lolo inyi kitiyo. ²⁹Ofwonuno karihin mietare kulo samun na hitok kof lo Ijipt fad.³⁰ati ijifu cia karihin mietare kulo kinga icieng. Oto cia na samun hitok to kof lo Ijipt oluluhini manyu ipale mute kinga kof ³¹Ida mute iiuni na samun hitok tonyio orohoi cia kinga na lolotu to kifwongi noo. ³²Tohi na licio inyiahati ene kitirija diho Parao kakeny are itotoro jimitan ogol ene tenya noo manyu lokeru Lobanga fiha iyo tic manyu itiihino cia to kuno faritin tang.³³Dong jijia, ingohi Parao to tahu tungani na igeny ilefere ofik inyi olanyu kof lo Ijipt. ³⁴Ingohi Parao to nyumu cio kuna lobolorohi kof ojir osofuni lobito iyo miet lo daha na lodo kof lo Ijipt to kuno karihin mietare kulo samun.³⁵Ojir icieng osofu daha lo kuno karihin mietare kulo samun oricahini kuno ngamang iyo twero lo Parao ojir ikumahini iyo tayahin ara kulo daha. ³⁶Ojir ene daha oricahini ara moto lo kof na lolwaharihin kof to kulo karihin mietare kulo kinga kuna lofwonuno kof lo Ijipt, ojir kinga ida ipale kof.³⁷Ori na kikukuma mejo ojir iyo Parao ko kula hitoha kulenge fad. ³⁸Oto Parao itifi icieng ojo, "Kitum ohoi rumuno lobo tungani lori ko ele tungani na longon ko Okorif lo Lobanga?"?" ³⁹Oto Parao ojo diho Josep, "Iya na lohitotorohinore Lobanga isi kuno tenyitenyi, oru lobo tungani logeny ilefere iya isi. ⁴⁰Ilanyu cia isi kang lo okabwe nei manyu ojir cio fad oning tenya nino. Ara to seger lo okabwe jia ahilanyunore nan isi." ⁴¹Oto Parao ojo diho Josep, "Tone ahifiha nan isi ara kalanyunoni lo kof lo Ijipt fad."⁴²Tinyia opucu Parao iyenit kimadit nenge to kafiele nenge opucahi kafiele lo Josep. Iticef inyi kanyihin kulo kyela iribi ko pucahino tongos lo dahab murut nenge. ⁴³Icio inyi ifeita to gadigadi ara kajifitani nenge ko cio irienga to ketemoni nenge ojo, "Itigany kikoi" Tona ofik inyi ara kalanyunoni lo kof lo Ijipt.⁴⁴Parao ko jimitan diho Josep, "Nan Parao ati ka lida ara to tenya nino, oru tungani loting kana kode keju to kof lo Ijipt fad." ⁴⁵Itibarahi Parao Josep ojo, Zapenas Panea, manyu iciorihi inyi Asenas kito lo Putifera, kadwarani lo On ara ngorwani nenge. Manyu ilor Josep kof lo Ijipt fad.⁴⁶Orumu Josep lara karihin keek uni na lorutohinore inyi tic iyo Parao kabu lo Ijipt, manyu olo Josep to ketemoni lo Parao ilor kof lo Ijipt fad. ⁴⁷To kuna karihin mietare, odo kof racak.⁴⁸Otubu Josep daha lo kuna karihin mietare kulo samun to kof lo Ijipt oricahi iyo derona kulo imiri to tayahin. To taya lobito lobito oricahi inyi daha iyo dero lo imiri na lodo iyo na kof lirit na taya. ⁴⁹Oricahi Josep samata - daha na hitok na lori iya singeti to tode lo nam. Obolo daha olanyuno ko kigero nenge tonyio ida otemuno.⁵⁰Orihe karihin kulo kinga ida lofwonu, otomonu Josep tee rei are ko Asenas kito lo Putipera kadwarani lo On. ⁵¹Itibarahi Josep okang nenge ojo Manasi, jimitan, "Tonyio lohicio Lobanga nan alulworo iyo kidak nei ko kolo apa nei fad." ⁵²Oboi nenge Itibarahi inyi ojo Epraim, jimitan, "Tonyio lohitipit Lobanga nan nan to kof lo kidak nei."⁵³Ofwonu karihin kulo samun to kof lo Ijipt icung, ⁵⁴manyu iciak karihin mietare kulo kinga iya na afa lotenyare Josep. Ongon afa kinga kofikofi fad ati Ijipt ongon ko daha.⁵⁵Langun liciak kof lo Ijipt kimanga kinga, iciak cio kicira iyo Parao to tenya lo daha. Oto Parao ko rihohino cio kulo kof lo Ijipt fad ojo, "Ifwo iyo Josep, manyu itiyoto tohi na lorihohi inyi ite." ⁵⁶Langun li sarahi kinga kof fad, onga josep derona kulo imiri iciak kitilotohino cio kulo Ijipt ngamang tonyio orumu kinga lolanyuno to kof lo Ijipt fad. ⁵⁷Manyu ofwonu cio to kofikofi fad Ijipt kinyianga ngamang iyo Josep, tonyio orumu kinga olanyuno kofikofi fad.

¹Koloning Jakob ojo ongoni ngamang Ijipt, ojo inyi iyo tee kunenge, “Nyio itiringa ite deya kenite kuningi?” ²Osodoro inyi jimitan, “Aning nan ojo ongoni ngamang Ijipt. Ifwo inyangutu kude iyo ohoi ojir kiwari ida kiwei.’’ ³Oto recera kulo Jodep tomon ofwo kinyianga ngamang Ijipt. ⁴Ati ida Jakob ocule Benjamin rece lo Josep ara Lobito ko kuna kude tonyio obang inyi jimitan ngitiihino lobo tohi irohoi iyo inyi.⁵Tona ongon afa tee kulo Israel kiji lo cio kuna lofwo kinyianga ngamang tonyio ongon afa kinga many kov lo Kanaan. ⁶Tinyia orumu ara Josep lara Gavona lona kov, inyi litiloto ngamang iyo cio kulo kov fad. Dong kologoru recera kulo Josep ofwonuni ogungiti iyo inyi otir komoma kov.⁷Josep deuno recera kunenge jii, ko heruno icieng ati ofik inyi ken mejo misiohoni na lolunyia icieng ititenya icieng to ngere itifi icieng ojo, “Ifwonu ite taji?” Inyiahahi icieng ojo, “to kov lo Kanaan kifwonu kinyianga daha.’’ ⁸Kileng loheru Josep recera kunenge ida icieng oheru inyi.⁹Oto ko kiiuno lafa kitirija nenge to icieng ko jimitan iyo icieng, “Ira ite ka sifak kulo kov! Ifwonu ite deya faji na iwat to kov niyang.’’ ¹⁰Inyiahahi icieng inyi ojo, “Ida lahitok, ofwonu karwaak kunino kinyianga daha. ¹¹Kira ohoi fad tee kulo Lobito tungani. Ara karwaak kunino cio katenak ida ara kasifak.’’¹²Ojo inyi iyo icieng, “Ida ifwonu ite deya faji na iwat to kov niyang.’’ ¹³Ati inyiahahi icieng ojo, “Ara afa karwaak kunino tomon ko are tee kulo Lobito tungani na lomanya kov lo Kanaan otong okalu niyang iyo apa niyang manyu lori afa Lobito.’’¹⁴Ojo Josep iyo icieng, “Ori cie iya na larihohinore nan ite: ira ite kasifak kulo kov! ¹⁵Ara ene kikoi na cia loyenarihin ite: iya na lowarare Parao, ida ci ite ifwo ten many olotu rece ningi na sidi ene. ¹⁶Itocule Lobito tungani olo iyauno rece ningi na sidi, itong ite kuna kude mabus, ojir otemarihin tenya ningi kalitenya ite tenya lo dede. Kalida, iya na lowarare Parao ira ite kasifak kulo kov!” ¹⁷Ko fiha icieng fad mabus to faritin uni.¹⁸To far lo uni nenge ojo Josep iyo icieng, “Itiyoti jii ito cia ite iwari tonyio abang nan Lobanga: ¹⁹kalira ite cio katenak, ingohi rece ningi totong ene mabus, ojir ite kuna kude ifwo iyaru daha iyo kajihit kuningi kuna lodaha kinga. ²⁰Ati ojir ite iyauno rece ningi na sidi iyo nan ojir oyenarihin tenya ningi manyu ojir ida iwei.’’ Itii icieng iya na.²¹21 Ojo icieng iyo kenite kuneicieng ake ake, “Dede kirumu ohoi ene kidak to rece niyang. Kideu afa ohoi mehino nenge lafar lileliare iyo ohoi to warun nenge ati ida ohoi kining; inyi licio ene kidak olotu iyo ohoi.’’ ²²Inyiahahi Reuben inyi ojo, “Ida afa nan lahisony ite ajo kepal iyo kito? Ati ida ite ining! Jijia ojir ohoi kidum okoto nenge.’’²³23 Ida orumu icieng oyen ojo oningo Josep icieng tonyio orumu inyi itiyore katifotoni. ²⁴Ibele inyi komom tinyia iyo icieng iciak kicira, ati oitu iyo icieng otenya ko icieng ari. Odumu inyi Simeon to kiji neicieng otori odeya icieng. ²⁵Icio Josep tenya lo kitifuta okodoho kuneicieng to ngamang, lo kinyiahahino robiahin kuneicieng katwa lo okodoho kuneicieng ko kicwara icieng pehe lo daha lo owele neicieng , langun lokeruni kitiihino icieng jii.²⁶Otingohi icieng okodoho kai lo sigiriahin kuneicieng ko fworo. ²⁷To faji na lofik icieng taban lo geto to kikoi, onga Lobito tungani okodo nenge lo ngonyohino sigiria nenge ngamang, ko deuno robia munenge to kutuk lo okodo nenge. ²⁸Ojo iyo kula kude, “Linyiahahini robia kunei, kuno to okodo nei.’’ Odou taulo kuneicieng ongoloti iyo kenite kuneicieng ihihirati ojimi, Nyio ene litii Lobanga iyo ohoi?''²⁹Kologoruni iyo apa neicieng Jakob kov lo Kanaan, orihohi icieng inyi sangite fad kuna litiihino iyo icieng. Ojo icieng, ³⁰“Nu tungani lobolorohi nu kov kiteny ohoi to ngere kifik ohoi mejo kasifak kulo kov. ³¹Ati kijio ohoi iyo inyi, “Kira ohoi cio katenak ida ohoi kira kasifak kulo kov. ³²Kira afa ohoi tomon ko are tee kulo Lobito tungani. Lori afa Lobito, otong nasidi iyo apa niyang idi Kanaan'.³³Oto na tungani lara lahitok lo na kov ojo iyo ohoi, “Ara ene kikoi na ngayenare cia nan jimitan ira ote cio katenak. Itongerihiti rece ningi Lobito ene iyo nan; iyaroti daha iyo kangite kuningi kuna ikingaha ifwo. ³⁴Ati iyaunoti rece ningi na sidi ene iyo nan ojir ayenare jimitan ida ite ira kasifak kulo kov ati cio katenak. Ato cia nan anyiahahi ite rece ningi manyu ito cia ite inyianga ko kitiloto ene kov.''³⁵Langun lolaha icieng okodoho kuneicieng ojuhi orumahini ogogori kulo robia kuneicieng iyo okodoho kuneicieng fad to Lobito. Kolodeu icieng ko apa neicieng ogogori kulo Robia inief bangun icieng. ³⁶Ojo apa neicieng Jakob iyo icieng, “liruje ite nan tee kunei, loru Josep manyu loru Simeon iwak manyu jijia kiyaru Benjamin. Loberu sangite fad nan.³⁷Oto Reuben ojo iyo apa nenge, “itum cia isi ifade tee kunei fad are kalida nan anyiahuno kito nino iyo isi. Icorihi inyi kana nei ato cia nan anyiahuno inyi iyo isi.’’ ³⁸Ati ojo Jakob, “ida kito nei oloro ijia ko isi, lowei rece lotong inyi Lobito hilong. Kalitiihino lobo tohi irohoi ken nenge to ene owele lifworo ite icio cia isi nan awei ko kidak.’’

¹Tona orihe orumu kinga obolo bebe kov. ²Oto hati, langun lokeru icieng daha ngamang fad kuna lorumu liyauno icieng to Ijipt, ojo apa neicieng, “Itoite ifwo kinyiangahi ohoi ngamang kude kuting ari.’’³Ati ojo Juda iyo inyi, “kicik nu tungani ohoi rik rik ojo, “ida cia ite ideu komom nei ari kalida ite ilihu ko rece ningi” ⁴kalicule isi rece niyang ko ohoi kifwo ciao hoi kinyianguno daha iyo isi. ⁵Ati kalida isi icule inyi ida ciao hoi kifwo tonyio ojo nu tungani iyo ohoi, “ida cia ite ideu komom nei kalida ite ilihu ko rece ningi.’’⁶Itifi Israel ojo, “Nyio iyauno ite kidak iyo nan to rihohino nu tungani ijio ingon ite ko rece lobo?” ⁷Inyiahahi icieng ojo, “Kitifi nu tungani ohoi bebe to kenite kuniyang ko kaji niyang ojo, “Orihe apa ningi owar? Ingon ite ko lobo rece?” Kinyiahahita orumu ohoi kitifita kunenge keken. Orumu ohoi kiyen aja jimitan ojo cia inyi iyo ohoi, “Iyaunoti rece ningi ene?”⁸Oto Juda ojo iyo apa nenge Israel, to cule kito ko nan ito ciao hoi kifwo deu, ojir ohoi ko isi ko tee kuniyang ida owei ati owar. ⁹Nan token cia laricuno warun nenge. Itum isi kitifia nan to inyi. Kalida nan anyiahuno inyi iyo isi, atiwoitahi inyi ketemoni nino, ating cia nan mongiyo nenge to ketemoni nino to warun nei fad. ¹⁰Jijia, ngida ohoi kiminingaru jii ohoi lohifwo kiitu kakeny are.’’¹¹Oto apa neicieng Israel ojo, “Kolojir ori jii, ojir itii iya ene; itofik kude sangite ijiri tone kof iyo okodoho kuningi iyaru iyo nu tungani ara kiciorita, ngoroni na iur lobo sidi, otoro, soya ko iheru ko ngak kulo cianitok. ¹²Iyaroti robia kakeny are tonyio ojir ite inyiahe kulafa robia lofihahini kutuhe kulo okodoho kuningi. Ngai loyen itongo nyafa ara to ringaru.¹³Iyaroti manyu rece ningi ifwo deu iyo nu tungani. ¹⁴Manyu ingohi Lobanga na lolanyu fad kicio ite irumu kisa to ketemoni lo nu tungani ojir kilahahi ite nu rece ningi ko Benjamin iitu ara Lobito. Kalara to nan, kolorohoi iyo nan, orohoi.’’ ¹⁵Tona odumu kuna cio kiciorit, osodi robia ko Benjamin manyu. Oruharu icieng iya Ijipt itotorihini kenite iyo Josep.¹⁶Kolodeu Josep icieng ilihu ko Benjamin, oto ojo iyo karicani lo kaji nenge, “Yaru kuno cio kaji nei, tongot kine manyu ikukuma daha, tonyio ojir icieng kidaha ko nan cia far.’’ ¹⁷Itii na tungani iya na lorihohinore Josep inyi manyu iyaru kuna cio iya kaji lo Josep.¹⁸Tinyia obang kuna cio kaliyaroti icieng kaji nenge. Ibuha icieng ojo, “Kiyaunoti ohoi ene to kulafa robia linyiahahini okodoho kuniyang afa ketemoni. Owak inyi kipusohino ko lanyuno ohoi kitirak ara opiihin kunenge ko kiyaru sigiriahin kuniyang.’’ ¹⁹Oto icieng ofwo iyo katiyoni lo Josep otenyati ko inyi to agwala lo kaji. ²⁰Ojo icieng, “kining ohoi lahitok niyang, kifwonu afa ohoi ene ketemoni kinyianga daha.²¹Ati nu faji lohigetore ohoi, kinga ohoi okodoho kuniyang ko rumuno robia kuniyang kutuhe kulo okodoho kuniyang fad robia to tuban. Dong lenyiahuno ohoi. ²²Kiyauno manyu ohoi robia kuna kude kinyiangare cia daha. Ida ohoi kiyen ngai lofik robia kuniyang iyo okodoho kuniyang.’’ ²³Ojo na tungangi iyo icieng, “Ojir, kebangi, Lobanga ningi, Lobanga lo apa ningi licio ite robia kuningi.’’ Oto olo iyauno Simeon oleng iyo icieng.²⁴Iyaru na katiyoni kuna cio kaji lo Josep, icio icieng kifi kulo kilala lo kejuha manyu icio daha iyo Sigiriahin kuneicieng. ²⁵Ikukumahi icieng kiciorita kuneicieng itilarihin lotunore lo Josep kil lo far tonyio orumu icieng loning ojo kidaha cia icieng ijia.²⁶Kololotu Josep kang icio icieng inyi kiciorita kuneicieng kuna liyauno icieng kaji hatwa manyu ogungiti kof ketemoni nenge. ²⁷Itifi inyi icieng lo yenun kolongoni icieng ara na ijir manyu ojo, “Aja ngoroyoni, apa ningi lafa lohirihohi ite nan? Orihe inyi owar?²⁸Inyiahahi icieng inyi ojo, “Orihe karwaani nino apa niyang owar manyu ongon ara na ijir.’’ Manyu ogungiti many rubuhon ketemoni nenge. ²⁹Koloher inyi icieng odeu rece nenge Benjamin kito lo iyang nenge token, itifi inyi ojo, “Inyi rece ningi lasidi ene lafa litany ite iyo nan? Ko jimitan iyo inyi, “Ingohi Lobanga kilwak kito nei.’’³⁰To kwama lo deuno rece, oruharu Josep tinyia otaharu faji lohicirare. Olo inyi kudule lo kaji nenge olo kicira ijia. ³¹Langun lilal inyi komom nenge, orutu oleng idony tau ko jimitan, “Iyaunoti daha.’’³²Okorahini inyi daha nenge ake, recera manyu ake ko cio kulo Ijipt kuna lodahita kalenge manyu ake, tonyio ida cio kulo Ijipt odahita ko cio kulo Ibru tonyio odua iyo cio kulo Ijipt. ³³Opar orumu kuna cio ketemoni nenge ijifita karihin ko otomonehin kuneicien, kiciaha iyo lahitok many iyo lasidi: oto icieng ode kenite kuneicieng to kipany. ³⁴Langun lokorati daha iyo icieng to meja lo Josep, ara ikorit lo Benjamin kakeny miet na lilany kulo kuna kude cio. Oto icieng odaha manyu omatati to kisiliban ko inyi.

¹Tinyia ocik Josep kaririani lo kaji nenge ojo, “Itifuta okodoho kulo kuno cio iya na lotum icieng kiyuhita, manyu tofik robia kulo tungani Lobito Lobito kutuk lo okodo nenge. ²Itohati ifihahi kubaya nein a litongo ara rial kutuk lo okodo lo na sidi ilany, ara Lobito ko robia kunenge kulo ngamang.’’ Oto inyi itii iya na locihare Josep.³Kolowangu kiwanyi, iniemahini kuna cio ko sigiriahin kuneicieng. ⁴Orihe orumu icieng ida lofwo to taya na lorihohinore Josep karwaani nenge ojo, “Ilo omot lo kuna cio deu manyu kalitihoru isi icieng, torihohi icieng tijio, “Nyio idum ite jiran to rohojun? ⁵Ida inyi na kubaya omatitare lahitok nei manyu ilamare? ara ene tohi na irohoi litii ite.’’⁶Kalitihoru inyi icieng inyiahat kuna tenyi tenyi iyo icieng. ⁷Ati ojo icieng iyo inyi, “Nyio otenya lahitok tenyi tenyi kuna lori iya kuna? Ida ohoi karwaak kunino kitum kitiyo tohi na lori iya na.⁸Kinyiahu manyu afa ohoi many to kov lo Kanaan robia kulafa lohirumu ohoi kutuhe kulo okodoho kuniyang. Dong nyio ngohicio ohoi kikoko rial kode dah aba to kaji lo lahitok nino? ⁹Kolorumuno ene kubaya iyo lobo to kiji lo karwaak kunino ojir inyi owei manyu ohoi kulakude kira karwaak kulo lahitok niyang.’’ ¹⁰Ojo inyi iyo icieng, “Ojir bebe ingohi tori iya na lijo isi. Na lorumuni otehita inyi cia lara karwaani nei; ite kuna kude ilaharu iyo tenya.''¹¹Itau icieng okodoho kuneicieng deu deu, ongaji manyu. ¹²iciak dong na karwaani tahita okodoho, iciak to lahitok manyu iyo lasidi. Oto orumahini kubaya iyo okodo lo Benjamin. ¹³Deunoti jii ko cirati kyelani kuneicieng. Oto ko tingohino okodoho iyo sigiriahin oitori iya taya.¹⁴Orumu Josep orihe ongon kaji koloitu Juda ko recera, ko urohinoti kof ketemoni nenge. ¹⁵Ojo Josep iyo icieng, “nyio ene litii ite? Ida ite iyen ijo otum tungani na lori iya nan heruno sangite to kilama?”¹⁶Inyiahahi Juda inyi ojo, “Nyio ha ngateny nan iyo lahitok nei? ngohitum ohoi peha aja? Litibotu Lobanga kipal lo karwaak kunino. Lohira dong ohoi opiihin kulo lahitok niyang- ohoi to kenite kuniyang ko ladi lorumuni otehita kubaya.’’ ¹⁷Ati ojo Josep, “Ida nan atum kitiyo tohi na lori jii! inyi ladi tungani lorumuni otehita kubaya ake lara opii nei ite kuna kude ifwo iyo apa ningi to kisiliban.’’¹⁸Oto Juda ko loro many iyo inyi ojo, “Tolau karwaani nino lahitok ingohi arihohi nan tenya iyo lahitok nei. Kelongojihi karwaani nino kileng liri isi ko Parao token. ¹⁹Itifi afa lahitok nein karwaak kunenge ojo, “Ingon ite ko apa ningi kode ko rece?²⁰Kinyiahahi ohoi kijio, “kingon ohoi ko apa niyang na longoroyon manyu ongon kito nenge na lotomonohini to ongoroyone nenge. Lowei afa rece manyu inyi lara kito lo iyang nenge Lobito hilong manyu imaru apa nenge inyi.’’ ²¹Tinyia isi ko jimitan iyo karwaak kunino, “Iyaunoti inyi ojir nan to ken nei adeu inyi.’’ ²²Manyu kijo ohoi iyo lahitok niyang, “Ida nu kito otum kingohino apa nenge. Kolongerihi inyi, owei cia apa niyang.'²³Ati irihohi isi karwaak kunino ijo, “Many kalilihu ite ko rece ningi na sidi koloru ida cia ite ide komom nei ari.’’ ²⁴Langun lohiite ohoi iyo karwaani nino apa nei, kirihohi ohoi inyi tenya na litany isi lahitok nei. ²⁵Tinyia ojo apa niyang, “Itoite ifwo inyiangunoti daha lobo sidi ari.’’ ²⁶Ati kijo ohoi iyo inyi, “Ida ohoi kitum fworo. Manyu kolohilik ohoi ko rece niyang na sidi inyi ha ohoi kifwo. Ida ohoi kitum deya komom lo nu tungani many kolohingon ohoi ko rece niyang na sidi.'²⁷Ojo karwaani nino apa nei iyo ohoi, “iyen ite jimitan kitomonohi afa ngorwani nei nan tee rei are. ²⁸Olo afa Lobito iyo nan, manyu ajo nan, “Lokonye itira inyi, manyu lida nan adeu inyi many to nu ²⁹kaliyaru manyu ite ene to ketemoni nei oto hati lobo tohi itiihino ken nenge ito cia ite icio nan ayaru kwe nei na ikwe tula to kidak.’³⁰Dong jijia ka lida ene kito kifwo ko nan kolohiitoro ohoi iyo karwaani nino apa nei manyu apa nein a lorifa warun nenge ara Lobito ko ene kito ³¹kolodeu ojo oru kito, oto cia owei. ³²Locik afa karwaani nino rican lo warun lo ene kito iyo apa nei: ajo nan, “kalida nan anyahuno inyi iyo isi, ato cia nan ating mongiyo nenge to ketemoni nino apa nei karihin kulo warun nei fad.'³³Dong jijia lahitok, ingohi karwaani nino totong ene ara opii lo lahitok faji lo ene kito ojir ene kito oite ko recera kunenge. ³⁴Aja cia nan aite iyo apa nei kalida ene kito kingon ko nan? Ida! Kecio nan ade mehino na cia ngolotu iyo apa nei.

¹Tinyia ida dong Josep otum kidonyo tau nenge to ketemoni lo karwaak kunenge fad oto inyi igore ojo, "Ingohi katiyok pili tofwo to ketemoni nei!" Tona orumu oru lobo tungani orumu longon ka litotorohino Josep ken iyo recera kunenge. ²Icira inyi to ogoro na ikwat oning ko cio kulo Ijipt inyi manyu oningoro na tenya many kolo Parao. ³Ojo Josep iyo recera kunenge, "Nan Josep! Orihe apa nei owar?" Ati ida recera kunenge otum kinyiahahino inyi, tonyio orumu bangun linief icieng noo to ketemoni nenge.⁴Oto Josep ko jimitan diho recera kunenge, "Isolutu tang diho nan." Langun lisiolu icieng, ojo diho icieng, "Nan rece ningi Josep lafa litilote ite iya kof lo Ijipt! ⁵Dong jijia, ke udo manyu Kelongo ake ake to kitilotoro nan ene tonyio ara afa lo kitiwara ite kiculu Lobanga nan ene ketemoni ningi. ⁶Liyaru jijia karihin are na longon kinga kof, manyu iyo karihin miet kuna lijifita kuno oru cia remo ko dengo.⁷Ati kiculu Lobanga nan ketemoni ningi lo rica otonge kuningi to kof ko lo rica warun ningi to lwahuno na hitok. ⁸Tona dong, ida afa ara ite liculu nan ene ati Lobanga. Olotu kitirak nan ara apa lo Parao, lahitok lo kalenge fad manyu kalanyunoni lo kof lo Ijipt.⁹Jijia, itoruharoti iite iyo apa nei. Ifwo itojo iyo inyi, "Tenya na loteny kito nino Josep ene, 'Lohifik Lobanga nan ara lahitok lo kof lo Ijipt fad. ¹⁰Ou ene diho nan, kerungo. Imanya cia isi ngati lo Gosen inyiha ko nan; Isi, tee kunino ko lotataha, kiri, kera ko kicu kunino ko sangite pili kuna litehita isi. ¹¹Ahicio cia nan isi daha tijia tonyio orihe karihin miet kulo kinga ofwonuno. Kalida ara jii, isi ko kalilo fad ko cio pili kuna lara kunino otum keroro.''''¹²Itum ite ideu to kenite kuningi ko rece nei Benjamin jimitan nan token nei lahitenya ko ite. ¹³Itorihohiti apa nei kwatun fad na lohiciori nan to kof lo Ijipt ko sangite fad kuna lideu ite. Manyu Iyaunoti apa nei ene deu deu."¹⁴Oto imaruk rece Benjamin ko kicira, imaruk manyu Benjamin inyi icira. ¹⁵Ko kimaruha recera fad icira okokoho kuneicieng, to kifwongi iyada recera kunenge ko inyi.¹⁶Kologoru tenya kang lo okabwe lo Parao jimitan lofwonu recera kulo Josep, okwama Parao ko kunahitoha kunenge fad. ¹⁷Ojo Parao iyo Josep, "Torihohi recera kunino, ingohi itii jii, 'itofik daha kai lo sigiriahin kuningi iite iya kof lo Kanaan, ¹⁸ifwo iyauno apa ningi ko ngorwo ko tee kuningi ene diho nan. Ahicio cia nan ite kof na ijir ilany ten to Ijipt, ito cia ite irumu lemun lo ene kof.'¹⁹Kirihohini manyu isi lo ciha icieng ijo, 'itiyoto jii, iyaroti kude gadigadihin ten to Ijipt kulo tingo ngorwo kuningi ko tee, manyu itodumu apa ningi ifwonu. ²⁰Ke udo to sangite kuningi tonyio sangite kuna ijiri noo to kof lo Ijipt ara cia kuningi."²¹Dong itii tee kulo Israel iya na. Icio Josep icieng gadigadihin iya na lotenyare Parao, icio manyu icieng pehe lo owele. ²²Iyo icieng to lobito to lobito icio inyi kyelani ngejuho ati iyo Benjamin icio inyi ratili mia uni kulo rial ko kyelani miet. ²³Manyu sangite kuna locule inyi iyo apa nenge kuno; sigiriahin tomon kuna liyuhita sangite kuna ijiri ilany to Ijipt, ko ngotengeri kulo sigiriahin tomon kuna liyuhita ngamang, mugati ko dahidahi kuna kude kulo owele nenge.²⁴Inyi ko kiniemahino recera kunenge manyu ocik icieng ojo, "Kefwo ha ngolofa kikoi!" ²⁵Oto icieng ofwo to Ijipt ofwonuni iyo apa neicieng Jakom, kof lo Kanaan. ²⁶Ofwonu orihohini inyi ojo, "Orihe Josep owar, inyi manyu lara lahitok to kof lo Ijipt." Ijiringa Jakob, ida iruk tenya neicieng.²⁷Ati ojo icieng ititimahi icieng tenyitenyi fad kuna lorihohi Josep icieng, manyu odeu gadigadihin kuna loculu Josep ojo ojir otingororehin inyi, ikwaru okorif lo apa neicieng Jakob. ²⁸Oto Israel ojo, "Laruk nan! Orihe kara kito nei Josep owar. Alo cia nan adeu inyi orihe ida lawei."

¹Iciak Israel lotita ko cio ko sangite kunenge fad. Ojo olo ogoru Beerseba, ifotohi kiciorita iyo Lobanga lo apa nenge Isako. ²Oto Lobanga otenya ko Israel karue iyo kitirija, ilolong inyi ojo, "Jakob! Jakob!" Ifotu inyi ojo, "Nan ene.’’ ³Ojo Lobanga diho inyi, "Nan Lobanga lo apa nino. Kebang loro iya Ijipt tonyio ahitirak cia nan isi ara misi nahitok tijia. ⁴Alik cia nan iya Ijipt ko isi manyu ahinyiahu mute nan isi ene. Manyu kac kulo Josep cia lofiehi konyeha kunino."⁵Oto Jakob ongerihi Beerseba, oto tee kulo Israel iyaru apa neicieng Jakob, tee ko ngorwo kuneicieng to gadigadihin kuna loculu Parao ojo ojir otingorihin inyi. ⁶Oto Jakob ko tee kunenge fad ko fworo iya Ijipt iyari ko sang kuneicieng ko sangite fad kuna lorumu icieng to kof lo Kanaan. ⁷Iyauno Jakob ko inyi iya Ijipt tee rei, ko lotataha kunenge rei fad ko tee kariok ko lotataha kunenge kariok, cio kuna lofwonu to ken nenge fad.⁸Ara kuno karanacio kulo tee kulo Israel (Jakob ko lotataha kunenge) kulafa lofwo iya Ijipt: Reuben okang lo Jakob. ⁹Tee kulo Reuben icieng; Hanok, Pallu, Hezron, ko Karmi. ¹⁰Tee kulo Simeon; Jemuel, Jamin, Ohad, Jakin, Zohar, ko Saul, tee kulo ngorwani Kanaanani. ¹¹Tee kulo Levi; Geresom, Kohas, ko Merari.¹²Tee kulo Juda; Er, Onan, Sela, Perez ko Zera (ati orumu Er ko Onan lowei to kof lo Kanaan) Tee kulo Perez; Hezron ko Hamul. ¹³Tee kulo Isakar; Tola, Pua, Jasub ko Simron. ¹⁴Tee kulo Zebulun; Sered, Elon, ko Jahalel. ¹⁵Ara kuno tee kulafa lotomonohi Lea Jakob to Padan Aram ko kito karioni nenge Dina, ara afa kuno tee rei ko tee ngorwo kunenge keek uni ko uni.¹⁶Tee kulo Gad; Zepo, Hagi, Suni, Ezbon, Eri, Arodi ko Areli. ¹⁷Tee kulo Aser; Imna, Isva, Isvi, ko Beria. Obara afa kanece neicieng Sera. Tee kulo Beria; Heber ko Malkiel. ¹⁸Ara kuno tee kulafa lotomonohi Zilpa Jakob. Lafa ngorwani licio Laban iyo kito nenge Lea ara karwaani. Ara icieng fad tomon ko ile.¹⁹Tee kulo ngorwani lo Jakob Racel; Josep ko Benjamin. ²⁰To Ijipt; Manasi ko Epraim kuna lotomonohi Asenas kito lo Putipera kadwarani lo On Josep. ²¹Tee kulo Benjamin; Bela, Beker, Asbel, Gera, Naaman, Ehi, Ros, Mupim, Hupim, ko Ard. ²²Ara kuno tee kulo Racel kuna lotomonohi inyi Jakob, ara fad tomon ko ongon.²³Kito lo Dan; Husim ²⁴Tee kulo Naptali; Jaziel, Guni, Jezerko, Silem. ²⁵Ara kuno tee kuna lotomonu Jakob ko Bila na licio Laban iyo kito nenge Racel ara karwaani. Ara afa icieng fad mietare.²⁶Kuna fad lilik ko Jakob iya Ijipt, kuna lara lotataha kunenge na lida ikeni ngorwo kulo tee kunenge ara fad cio keek ile ko ile. ²⁷Ko kunu tee are lotomonohini Josep, ofwo cio kulo kaji lo Jakob kuna lofwo iya Ijipt ara keek mietare fad.²⁸Tinyia ocule Jakob Juda ketemoni iyo Josep lo rumuno kikoi lo Gosen. Kologoru icieng ngati lo Gosen, ²⁹orumu Josep likukumahi gadigadi nenge ko loro iyo Gosen kitirico apa nenge Israel. Josep deuno monye jii ipusohino inyi ko kicira tektek. ³⁰Ojo Israel diho Josep, "Jijia dong lakukumahino nan weyaru iya na ladeunore nan to ken nei jimitan irihe isi iwar."³¹Tinyia ojo Josep iyo recera kunenge ko kolo apa nenge, "alo cia nan atenya ko Parao, alo ajo diho inyi, 'Recera kunei ko kolo apa nei kulafa lomanya kof lo Kanaan, kuno lofwonu diho nan. ³²Ara kuno cio kaboriak: obara icieng sang, liyauno icieng ko kiri, kera, kicu ko sangite kuneicieng fad.'³³Kalohilolong Parao ite manyu kitifi ite ojo, 'Nyio tic ningi?' ³⁴Inyiahahiti inyi ijo, 'Ara karwaak kunino kaboriak kulo sang many to okisidi iya na afa larahare lohitwaha kuniyang.' Oto cia kiruk ite imanya ngati lo Gosen tonyio itidwara cio kulo Ijipt kimora ko kaboriak."

¹Josep ko loro rihohino Parao ojo, "Lofwonu oho apa nei ko recera kunei to kof lo Kanaan ko kiri, kera ko kicu ko sangite kuneicieng fad ongoniti ngati lo Gosen." ²Onyume inyi recera kunenge ongon ko loro kitotorohino icieng ketemoni lo Parao.³Itifi Parao recera ojo, "Nyio tic ningi?" ⁴Inyiahahi icieng Parao ojo, "Ara karwaak kunino kaboriak ko katibalak kulo sang iya lafa larahare lohitwaha kuliyang."Ojo manyu icieng, "Lohifwonu ohoi manya ene lobo gaa, tonyio oririk kinga to kof lo Kanaan manyu oruhi olemo sang kulo karwaak kunino. Tona, icwara ja karwaak kunino omanya ngati lo Gosen."⁵Ojo Parao iyo Josep, "Olotu apa nino ko recera kunino diho isi, ⁶manyu ongon kof lo Ijipt ketemoni nino. Tofihahi apa nino ko recera kunino faji na ijir noo tone kof. Ingohi icieng to manya Gosen. Manyu kaliyen isi lobo to kiji neicieng na longon ko genyun lo bara sang tofik inyi olanyu sang kunei manyu."⁷Oto Josep iyauno apa nenge Jakob itotorohi inyi ketemoni lo Parao. Langun ligatahi Jakob Parao gum, ⁸itifi Parao inyi ojo, "Lara karihin kunino baya?" ⁹Ojo Jakob iyo Parao, "Ara karihin kulo owele nei ene kof mia lobito ko keek uni. Ara karihin kunei kude kuting manyu ara kulo kidak ida ori ko karihin kulo owele kulo monyeri kunei. ¹⁰Oto Jakob igatahi Parao gum ko rutoro to ketemoni nenge.¹¹Tinyia ofihahi Josep apa nenge ko recera kunenge kof lo Ijipt manyu icio icieng sangite iyo faji na ijir ilany tona kof iyo distrik lo Ramases iya na loutahinore Parao. ¹²Icio manyu Josep apa nenge ko recera kunenge ko kolo apa nenge fad daha ijifita borengun lo tee kuneicieng.¹³Oru afa daha to kof tonyio orumu kinga obolo noo, ipalaru kofikofi kulo Ijipt ko Kanaan to tenya lo kinga. ¹⁴Itutube Josep robia fad kuna longoni kof lo Ijipt ko Kanaan kuna lodumarehin ngamang kuna liyianga icieng, iyauno iyo Parao kang lo okabwe nenge.¹⁵Koloru robia to kac kulo cio kulo Ijipt ko Kanaan, otubuno cio kulo Ijipt fad iyo Josep ojimi diho inyi, "Kicio ohoi daha. Tonyio kiweyaru ohoi to ketemoni nino? Loru robia kunino fad." ¹⁶Ojo Josep diho icieng, "Iyau sang kuningi. Ahitolotohi cia nan ite daha to sang kuningi iya na loru robia diho ite. ¹⁷Oto icieng iyauno sang kuneicieng diho Josep, oto inyi icio icieng daha otobore lakwenyi, kera, kiri, kicu ko sigiriahin. Oto inyi okeru ko icieng na kari ara na lotobo daha to sang kuneicieng.¹⁸Koloru na kari, ofwonu icieng diho inyi lobito kari ojo, "Ida ohoi kitum kiduha diho lahitok niyang jimitan loru robia to kac kuniyang, manyu lara sang kuniyang kunino. Tohi na jijia lohitongore ohoi inyi kenite kuniyang ko kof. ¹⁹Aja hati cia kiweihi ohoi ketemoni nino, ohoi ko kof niyang fad? Kinyiang ohoi ko kof niyang itobore daha oto cia ohoi ko kof niyang kira opiihin kulo Parao. Kicio ohoi kinyiemo ojir kiwari ida kiwei, manyu ojir kof ida imura."²⁰Oto Josep inyiangu kof lo Ijipt fad ara lo Parao. Itilot cio kulo Ijipt fad tolobito tolobito manatak kuneicieng, tonyio orumu kinga lorohoi noo iyo icieng. Oto kof fad ara lo Parao, ²¹icio Josep cio fad ara karwaak kiciaha to ngati lo kai many orof, manyu kiciaha to ngati lo okangere lo kof lo Ijipt many lodoyorore lo kolong. ²²Oto hati ida afa inyi inyiang kof lo kadwarak, tonyio orumunita afa icieng ikorit na rief iyo Parao manyu orumahitati daha na ligomahita Parao icieng. Inyi licio icieng ida itilot kof neicieng.²³Ojo Josep iyo cio, "Iya ene dong lahinyiangu nan ite ko kof ningi fad ara lo Parao ele far, ikai kinyiemo ojir itibulahi kof. ²⁴Ati kalidengu ite manatak kuningi, icwarata lobito iyo miet iyo Parao. Ongon iyo miet na lotong ara kinyiemo, daha iyo ite, kangite ko tee kuningi."²⁵Ojo icieng diho inyi, "Lilwahu isi warita kuniyang, ingohi ohoi kirumu kisisio to ketemoni lo lahitok niyang. Kira cia ohoi karwaak kulo Parao." ²⁶Josep ko fiha na tenya ara cik na lijifita kof to Ijipt na lorihe itiyo ko jijia, jimitan lobito iyo miet lo daha na lodenguni to manatak fad ara lo Parao. Ara afa kof lo kadwarak ake lida ara lo Parao.²⁷Tona omanya cio kulo Israel kof lo Ijipt ngati lo Gosen, orumu icieng sangite ijia manyu opiti osodoroti borengun. ²⁸Omany Jakob kof lo Ijipt karihin tomon ko mietare, ofwo karihin kulo warun nenge fad ara mia lobito ko keek ongon ko mietare.²⁹Kolonyihu karihin kulo wei lo Israel, ilolongu inyi kito nenge Josep ko jimitan diho inyi, "Kalarumu nan kisisio to kokom nino, tofik kana nino fotiri lo bongbong nei manyu icik jimitan itotorohi cia isi nan kibaya ko kigenoro. Kehinuhahi nan kof lo Ijipt, ³⁰ati kalayoma nan ko monyeri kunei. Kitinge nan to kof lo Ijipt ilo kinuhahi idi afa lonuhahinorehin icieng." Ojo Josep diho inyi, "Atii cia nan iya na litenyare isi." ³¹Ojo inyi, "Ibutia iyo nan." Oto Josep ibuti iyo inyi manyu iwor Israel Lobanga iya na logangare inyi kai lo col nenge.

¹To kifwongi lo kude faritin, orihohi Josep ojimi, "Omwai apa nino.’’ Oto inyi iyaru tee kunenge Manasi ko Epraim ko inyi ara lobito. ²Kolorihohini Jakob ojo, "Lolotu kito nino Josep diho isi", itikwaru Israel golun nenge ko wojuno itongo iyo kigetit.³Ojo Jakob iyo Josep, "Lobanga kagoloni, oboto afa iyo nan to Luz to kof lo Kanaan kigatahi nan gum tijia, ⁴manyu ojo diho nan, "Ahitipit cia nan manyu ahitiboreng isi. Ahitirak cia nan isi ara ilulung lo cio, manyu ahicio isi ene kof ara tohi lolunyot nino ko lotataha kunino to omot nino.'⁵Tona, kuno tee kunino are lotomonuni ten to Ijipt orihe nan ida lalotu ene diho isi, ikenihini cia ara kunei. ⁶Kude tee cia lohitomohini isi to omot neicieng, icieng lara kunino. Iyo kof na lomanya icieng, ikenahini cia icieng iyo recera kuneicieng. ⁷Kunu faritin laitunore nan to Padan Aram, to kitoyo na hitok owei Racel to kof lo Kanaan orihe kingoni kikoi lohinyiharu Epras. Nan ko nuhahino inyi kalele lo kikoi lo Epras'' ( na lara Betelehem).⁸Kolodeu Israel tee kulo Josep, itifi ojo, "Oho ngai kuno?" ⁹Inyiahahi Josep apa nenge ojo, "Ara icieng tee kuna lohicio Lobanga nan ten." Oto Israel ojo, "Iyauno icieng diho nan ojir agatahi icieng gum." ¹⁰To kuna faritin orumu Israel lofafari konyeha manyu lida otum deya. Oto Josep iyauno tee kunenge tang diho inyi, imaruk apa nenge icieng.¹¹Ojo Israel diho Josep, "Ida orumu nan ayen jimitan ade cia komom nino ari, ati jijia lohicio Lobanga nan adeu ko tee kunino." ¹²Tinya Josep ko tinguno icieng to kunga kulo Israel ko gungon many otir komom kof. ¹³Oto Josep odumu icieng are fad otek Epraim to iteten nenge iya ikajong lo apa nenge ko Manasi to ikajong nenge iya iteten lo Israel oto iyauno icieng tang iyo Israel.¹⁴Ati ocule Israel kana nenge iteten ofik kue lo Epraim, kileng lara inyi lasidi ko kitibahasa kac kunenge ofik kana nenge ikajong kue lo Manasi kileng lara Manasi okang. ¹⁵Oto inyi igatahi Josep gum ojo, "Ingohi Lobanga lafa litibala monyeri kunei Abraham ko Isako ijif icieng to kigenoro. Lobanga lafa lara katibalani nei iyo warun nei fad ko ene far. ¹⁶Malaika na lohilwahu nan iyo rohojita fad, ingohi inyi igatahi kuno tee gum. Ingohi ilolongi icieng to karana nei ko to karana lo monyeri kunei Abraham ko Isako, manyu ingohi icieng opit osodoro oborengi bebe to kof."¹⁷Kolodeu Josep apa nenge ofik kana nenge iteten kue lo Epraim, ida tau nenge okwe. Oto inyi odumu kana lo apa nenge to kue lo Epraim ofik kue lo Manasi. ¹⁸Ojo Josep iyo inyi, "Ida apa nei, ene lara kito okang, to fik kana nino iteten kue nenge."¹⁹Ati oberu apa nenge ojo, "Ayen nan kito nei, ayen nan. Ara manyu mute inyi ilulung manyu obolo manyu mute inyi. Ati obolo mute rece na sidi ilany inyi, manyu ara mute lotataha kunenge ilulung lo misihi." ²⁰Igatahi inyi icieng gum la far ojo, "To karana nino igata mute Israel ene gum, ingohi Lobanga kitirak isi iya Epraim ko Manasi." Tona ofik inyi Epraim ketemoni lo Manasi.²¹Oto Israel ojo iyo Josep, "Lanyiha nan weyaru, ati kingon cia Lobanga ko ite manyu kinyiahe mute ite kof lo monyeri kuningi. ²²Manyu iyo isi asodohi nan ingutit lobito lo kof ilany na lacio nan recera kunino, ingutit lo kof lafa laruju nan iyo cio kulo Amor to ngalem ko kawo nei.''

¹Oto Jakob ko kilolonguno tee kunenge, oto ojo, "Itotubunoti iyo nan ojir ahirihohi sangite kuna mute litiihino iyo ite faritin kuna mute lofwonuno. ²Itotubati ining, tee kulo Jakob. Itoning apa ningi Israel.³Reuben isi Okang nei, kilotir nei, ketemoni lo kitotori lo golun nei. Ilany iyo kwatun, ilany iyo golun. ⁴Ilotir iya kifi, ida cia isi irihe ilany tonyio lirwok isi logetore lo apa nino, kai lo lohiyomare nei ilo itibot.⁵Ara Simeon ko Levi recera, ara ngalemo kuneicieng kiremita kulo kisasuo. ⁶Kecio nan arutohi iyo kifura neicieng, kecio nan amorahino iyo lotubare neicieng. Tonyio lifad icieng cio iyo kilongo neicieng, manyu ogili kejuha kulo mangi iya na lowahare icieng.⁷Ificiori na kilongo neicieng igol ko awo neicieng na imoc. Akokorahi cia nan icieng iyo Jakob, atisarahi cia nan icieng katua lo Israel.⁸Juda, kimaj cia recera kunino isi. Ongon cia kana nino murut lo merok kunino. Ogung cia tee kulo apa nino ketemoni nino.⁹Ira isi kito lo ngatuny Juda: iitu isi to fada lo tyang kito nei, iya ngatuny ogeto inyi orada kof. Iya ngoto ngatuny, ngai lotum kitiwojuno inyi?¹⁰Ida cia iluk lo obolore ingad to Juda kode col lo kalanyunoni to kiji lo kejuha kunenge many olotu inyi na lara iluk nenge, manyu ara cia ningo lo misihi nenge.¹¹Otorahi mute inyi sigiria nenge iyo vino ko kito lo sigiria nenge iyo tanitani na lonyumu. Ilala mute inyi kyela nenge to vino, kanyi nenge to okoto lo ngak kulo vino. ¹²Irwohi cia konyeha kunenge ilany vino, ko kala kunenge okweri ilany lei.¹³Omanya mute Zebulun tode lo nam ara lohitaware lo tigoli, okaritaru cia lohikori nenge iya ngati lo Sidon.¹⁴Ara Isakar sigiria na ilotir na logeto kiji lo twoli kulo kera. ¹⁵Kolodeu inyi jiran lo lohiyomare nenge, ko dwarujon lo kof nenge, olahahi cia inyi okokoho kunenge iyo ter manyu iruk kipanyar.¹⁶Dan mute kangotoni lo tenya to kiji lo cio kunenge iya imanit lobito to Israel. ¹⁷Ara Dan munu lo kalele lo kikoi, lokuruba na longon kikoi na lotok tutunye lo lakweny icio karwohitani ouroro lohibate. ¹⁸Atahita nan lwahuno nino, lahitok.¹⁹Itirem mute merok Gad ati onyion cia inyi icieng tutunyehin. ²⁰Ofir mute daha lo Aser, iyauno mute inyi daha na ilem na locam to kabolorok. ²¹Ara Naptali mirihica na lolaharu, na lotomon kacau kuna idwaruha.²²Ara Josep ciani lo vino na ingi ijar, ciani kangijani na lonyiha ko ipulak na lirwohita tanitani kiwata lo lohitir. ²³To dwarun lo taulo itiremo monyeri kulo kawona ongoroti inyi to kijoria lo taulo.²⁴Ati iwasihi kawo nenge ogulo, iwasihi kac kunenge golun to kana lo kagoloni lo Jakob, to katibalani, moru lo Israel.²⁵To Lobanga lo apa nino na lohilwaha isi, to kagoloni na lohigatahita isi gum; gum lo ilwe na longon kai, gum lo kiluko lo ipulak na longon kof, gum lo ikine ko kocehe.²⁶Ilany gum lo apa nino gum lo dongecio kulo lohitwaha, ilany lo dumi ongoro kulafa losio. Ingohi kuno pili iyoma kwe lo Josep, kai lo komom lo lahitok to kiji lo recera kunenge.²⁷Ara Benjamin lowoho na ingere okonya tyang na lifade inyi kiwanyi. Okora bara na lobelu inyi kurou.''²⁸Ara kuno fad imaniti tomon ko are kulo Israel manyu ara kuno tenyitenyi kuna loteny apa neicieng na ligatahinore icieng gum, icio lobito lobito kigata lo gum na locam to inyi. ²⁹Oto ocik icieng kuno tenyitenyi ojo, "Lolelek nan awei, alo iyo cio kunei. Kinuhahi nan ko monyeri kunei idi kunom mana lo Epron Hittitani, ³⁰kunom na longon mana lo Makpela na lonyiha Mamre, kof lo Kanaan na linyiangu Abraham ko mana nenge ara lonuhare iyo Epron Hittitani.³¹Ijia onuhahini Abraham ko ngorwani nenge Sara, ijia onuhahini Isako ko ngorwani nenge Rebeka, manyu ijia anuhahi nan Lea. ³²Na mana ko kunom na longon katua inyianguni afa iyo cio kulo Hittit. ³³Langun lokeru Jakob cihahino kuno tenyitenyi iyo tee kunenge, ko kinyiahuno kejuha kunenge kai lo lagere. Owiri wirita nenge lo lohicungi ko weyaru olo iyo cio kunenge.

¹Ourohino Josep ken lo apa nenge icira imaruk inyi. ²Oto Josep ko rihohino daktarihin kuna litiyo diho inyi ojo ojir ikukumi ken lo apa nenge Israel. Ikukum dong daktarihin inyi, ³iyaru faritin keek ongon tonyio ara afa kuna faritin kuna lotumohino to kikukuma lo ken lo tungani kaweyani. Icir cio kulo Ijipt inyi to faritin keek mietare.⁴Koloring faritin kulo kicira, ojo Josep iyo lotubare lo Parao, "Kalarumu nan kibaya to ketemoni ningi, ititeny ko Parao to nan. Itorihohiti inyi ijo, ⁵"icio afa apa nei nan abutia ojo, 'Lanyiha nan weyaru, kinuhahi nan tula lafa labok nan ara nei idi kov lo Kanaan.' jijia kicio nan alo anuhahi apa nei aitu hati. ⁶Ojo Parao, "Ilo tonuk apa nino iya na lohibutiare inyi isi ojo ojir itii."⁷Dong, olo Josep nuha apa nenge, ilik lohitwaha kulo Parao fad ko inyi - kabolorok kulo lotubare nenge ko kabolorok kulo kof lo Ijipt fad ⁸ara lobito ko cio kulo kaji lo Josep ko recera kunenge ko cio kulo kaji lo apa nenge. Otong afa tee ko sang; kiri, kera ko kicu lotong kof lo Gosen. ⁹Ilik manyu gadigadihin kulo rem ko asegere kuna lifeita to lakweny ko inyi. Ara afa ilulung na hitok bebe.¹⁰Kologoruni kilongoni lo Atad, tode lo Jordan, icira icieng noo to mejun lo taulo. Tinyia okeru Josep faritin mietare kulo kicira apa nenge. ¹¹Kolodeu cio kulo Kanaan kuna lomanya ijia na kicira to kilongoni lo Atad, oto icieng ojo, "Ongon cio kulo Ijipt kikwera itidwar lo kicira.’’ Inyi licio itibarahini na faji to tode lo Jordan ojo, 'Abel Mizarim'.¹²Dong itii tee kulo Jakob iya na locihare apa neicieng icieng, ¹³otingori inyi many kof lo Kanaan manyu onuhahini inyi mana iyo kunom na longon Makpela na lonyiha ko Mamre na afa linyiangu Abraham ko mana na longon ijia iyo Epron Hittitani ara lonuhare. ¹⁴Langun lokeru nuha apa nenge, oite Josep iya Ijipt ko recera kunenge ko cio pili kuna orumu lilik ko inyi fworo nuha apa nenge.¹⁵Kolodeu recera kulo Josep ojo lowei apa neicieng, ojo icieng, "Adi ba ngotehita Josep loguce to tau nenge kilenohi ohoi to lafa rohojun lohitii ohoi ken nenge fad?" ¹⁶Tona ocule icieng tenya iyo Josep na lojo, "Ongerihi afa apa nino ciha orihe ida lowei, ¹⁷"tohi na lojir ite irihohi Josep inyi ene, 'Ajo nan tolau recera kunino kipalipali kuna lipal icieng ko ticitici kuna irohori kuna litii icieng ken nino.' Jijia dong to lau kipalipali kulo karwaak kulo Lobanga lo apa nino." Kologoru ene tenya neicieng diho inyi, icira Josep.¹⁸Ofwonu dong recera ko urohinoti lorubuhe ketemoni nenge, ojimi diho inyi, "ohoi opiihin kunino" ¹⁹Ati ojo Josep diho icieng, "Kebang. Angon nan faji lo Lobanga? ²⁰Iwak afa ite kitiyo nan na irohoi ati owak Lobanga kitiyore na ijir lo kikukumare tohi na jijia longon kitiihino, lwahuno lo warita kuna iborengi. ²¹Dong jijia, kebang. Ahikora cia nan ite ko tee kuningi daha." Itigol inyi taulo kuneicieng manyu oteny to kibaya diho icieng.²²Omany Josep Ijipt ara lobito ko kolo apa nenge fad ²³manyu odeu kofiangiti lo uni lo tee kulo Epraim. Manyu tee kulo Makir kito lo Manasi otirohitati bongibongi kulo Josep kolotomonuni.²⁴Oto Josep ojo iyo recera kunenge, "Lanyiha nan weyaru, ati olotu mute Lobanga luaha manyu kiyaru mute ite tone kof iya kof lafa locik inyi to kibutia diho Abraham, Isako ko Jakob." ²⁵Oto Josep icio cio kulo Israel ibuti ojo, "Olotu mute Lobanga luaha ite manyu ojir ite itinge koi kunei tone faji." ²⁶Dong owei Josep kologoru karihin kunenge mia lobito ko tomon. Manyu langun lokeruni kikukuma ken nenge, ofihahini inyi katua lo sanduk ijia kof lo Ijipt.

¹Ara kuno karanecio kulo tee kulo Israel kulafa lofwo iya Ijipt ko apa neicieng ko ngorwo ko tee kuneicieng. ²Reuben, Simeon, Levi ko Juda; ³Kakar, Zebulun ko Benjamin; ⁴Dan ko Naptali; Gad ko Aser; ⁵Ara afa lotataha kulo Jakob fad keek mietare; orumu Josep longon Ijipt.⁶Tinyia ofwonu Josep ko recera ko na kofiangiti fad owei. ⁷ati ofwonu Israel opit noo; otomonoro icieng bebe, osodoro wel neicing oborengi bebe many olotu kof ifut ara icieng.⁸Tinyia olotu kabu na lida Josep ara lobo tohi iyo inyi olanyu Ijipt. ⁹Ojo inyi iyo cio kunenge, “Itode! lofwonu Israel loborengi iyo ohoi. ¹⁰Ifwonu ngatiyoreti icieng to genyun, kalida ara jii oto cia osodoroti pitan oborengi, na kololotu jore kov niyang otumiti kimora ko merok kuniyang kitiremo ohoi ko kifirioro tone kov”.¹¹Tona ofik icieng kulahitoha kulo tic lo kitigema icieng to tic panyar itiduk icieng taya lo Parao. ¹²Ati iya na litigimarihin icieng noo otomoniti manyu noo oborengi ipude kof oto cio kulo Ijipt obangi Israel bebe.¹³manyu itiyoti icieng to kisasuo. ¹⁴Icio icieng warun neicieng ogol noo to tic na igol lo nyona lokulufi ko boho matafali ko ticitici kulo manatak; iyo tic na igol na litiyo icieng itiyore cio kulo Ijipt icieng to kisasuo ko kimoc.matafali ko ticitici kulo manatak; iyo tic na igol na litiyo icieng itiyore cio kulo Ijipt icieng to kisasuo ko kimoc. ¹⁵Tinyia manyu orihohi kabu lo Ijipt katitomonok kulo ngorwo kulo Ibru na lobara Lobito Sipra ko Lobito Pua ojo, ¹⁶“Kalilwaha ite ngorwo kulo Ibru kititomono ko kitara tee kolongon icieng iyo seger lo tomonun, ka lideu ite jimitan ara kito retoni, ifade inyi; ati kalara kito karioni ingohiti owar. ¹⁷Ati orumu katitomonok obang Lobanga ida itii iya na locihare kabu lo Ijipt icieng ojo ojir itii; icio icieng tee rei owari. Ilolongu kabu lo Ijipt katitomonok itifi icieng ojo, “Nyio itii ite jii? Nyio ingerihi ite tee rei owari.¹⁸Ilolongu kabu lo Ijipt katitomonok itifi icieng ojo, “Nyio itii ite jii? Nyio ingerihi ite tee rei owari?” ¹⁹Inyiahahi katitomonok Parao ojo, “Ida ngorwo kulo Ibru ori ko ngorwo kulo Ijipt; ilotiri icieng manyu otomoniti deu deu orihe katitomonok ida logoru.”²⁰Tona ibaya tau lo Lobanga iyo katitomonok manyu osodoro cio tomonun oborengi. ²¹Tonyio obang katitomonok Lobanga, icio inyi icieng tee kuneicieng. ²²Tinya icio Parao ene ciha iyo cio kunenge fad ojo, “tee rei kulo Ibru fad kuna lotomoniti ojir ibirohini katwa lo nam Nail ati ingohiti tee kariok owari.”

¹Tinyia oyem lobo tungani lo imanit lo Levi ngorwani nenge Levini ²manyu olotu inyi ifonga ko tomonuno kito retoni. Kolodeu inyi ojo ara kito retoni na idwaru, iduk inyi to ofahin uni.³Ati langun lodeu inyi ojo lida inyi atum kiduha inyi, oto odumu aduhu na loduho to farakaka ko dwanya katwa ko oleng to odok. Oto inyi ko kitigetohino kito katwa ko kiyaru otirohi katwa lo farakakare kutuk lo kare. ⁴Owoita kanece lolomaje lo deya tohi na ngitiihino iyo inyi.⁵Oto kito karioni lo Parao olo kare kilala, oto kalihitak ko inyi olotitati, itolitati kutuk lo kare. Odeu inyi aduhu to kiji lo farakaka ko cularu opiini nenge karioni loro tinguno. ⁶Onga inyi ko deuno kito, icira kito oto omehino diho inyi. Ojo inyi, “Ara ene Lobito to kiji lo tee kulo Ibru.”⁷Oto kanece ko kitifa kito lo Parao ojo, “Ngalo ha nan ayauno lobo ngorwani Iburuni kitinahahi isi ene kito?” ⁸Ojo inyi, “Ibo ilo”. Oto na kito olo iyauno ngoto kito.⁹Ojo kito lo Parao iyo inyi, “Yaru ene kito ilo kiricahi nan, manyu ahidum cia nan isi. Dong iyaru na ngorwani kito olo itinak. ¹⁰Langun lobolo kito iyaru ngotenge inyi iyo kito lo Parao olo ara kito nenge. Itibarahi inyi ojo Moses jimitan “awadu nan inyi to katwa lo kifi.”¹¹Lobo far, langun lobolo Moses, isabe inyi iya faji lo cio kunenge deya icieng iyo tic lo igim neicieng. Odeu inyi Ijiptoni oluno Ibruni Lobito to kiji lo cio kunenge. ¹²Ongolo angati ko angati kolodeu ojo oru tungani lodeya, ifade inyi na Ijiptoni ko nuhahino singetare.¹³Kiwanyi nenge olo inyi orumahi Ibru are obaha. Itifi inyi Lobito na lipal ojo, “Nyio ilumo isi Ibruni kaletoni?” ¹⁴Ojo na tungani iyo inyi, “Ngai lofik isi ara kalanyunoni ko kangotoni lo tenya iyo ohoi? Ibuha isi kifadaru nan iya na langole lifadarore Ijiptoni?” Oto Moses ko bangun ibuha ojo, “Ojir loyeniti langole tohi latii nan.”¹⁵Koloning Parao ene tenya, oto otem kifadaru Moses ati ifiri Moses iyo Parao ko loro kitongo Midian, olo itongohino kalele lo itibi ¹⁶Na ha orumu lobo kadwarani lo Median ongon ko tee kariok mietare, manyu ofwonu icieng yohohino kifi iyo tigol omatare kera kulo apa neicieng. ¹⁷Ofwonu kude katibalak ifuhe icieng ati owoju Moses olwahu icieng ko yohohino kera kulo apa neicieng kifi.¹⁸Koloite kuna tee kariok iyo apa neicieng Revel, itifi inyi icieng ojo, “Nyio iitu ite berien elefar?” ¹⁹Inyiahahi icieng inyi ojo, “Lobo Ijiptoni lohilwahu ohoi iyo katibalak, oyok manyu kifi itimat kera kuniyang. ²⁰Itifi Revel tee kunenge ojo, “Ongon hati inyi aji? Nyio ingohi ite inyi? ilolongutu inyi olotu onyia lobo tohi.”²¹Iruk Moses kitongo kolo na tungani icio inyi kito nenge Zipora iyo inyi ara ngorwani. ²²Otomonu Zipora kito retoni itibarahi Moses inyi ojo Geresom jimitan lara nan misiohoni to kof lo misiok.²³To kuna faritin iborengi, olotu kabu lo Ijipt owei. Itudita cio kulo Israel iyo na ticitici lo opii neicieng icirati oto na kicira neicieng to lwaha to na tic lo opii neicieng olo kai iyo Lobanga. ²⁴Oning Lobanga kitudita neicieng oto iiu ciharu nenge ko Abraham, Isako ko Jakob. ²⁵Oto Lobanga ode cio kulo Israel manyu ibuha to icieng.

¹Dong orumu Moses itibala kera kulo komoni nenge Jesro, kadwarani lo Median, oto inyi itibalaru many faji na iloma to mwang ko lotuno many Horeb, donge lo Lobanga. ²Tijia oboto Malaika lo Lobanga iyo inyi iirangi lo kima iyo tim. Odeu Moses jimitan kileng locura kima ida tim ocuraru. ³Dong ii Moses ojo, “Alo ja nan ade ene tohi ……, nyio ida tim ocuraru.⁴Kalodeu Lobanga jimitan logere inyi olo deya, ilolong Lobanga inyi to katwa lo tim ojo, “Moses! Moses! Oto Moses ojo, “Nan ene”. ⁵Ojo Lobanga iyo inyi, “Kerihe inyihu, to puce kamuha to kejuha kunino tonyio onyu ene kof liwoitare isi”. ⁶Oto ojo iyo inyi, “Nan Lobanga lo apa nino, Lobanga lo Abraham, Lobanga lo Isako ko Lobanga lo Jakob”. To ningo jii, iduhahi Moses komom nenge tonyio orumu obang deya Lobanga.⁷Ojo Lahitok, “Ladeu nan dede mehino lo cio kunei to kov lo Ijipt. Laning nan icieng icira to kulahitoha kuna lititiyo icieng, manyu abuha bab to kidak neicieng. ⁸Dong laculuno nan lwahuno icieng to kac kulo cio kulo Ijipt ko kiyauno icieng oleng tona kov iyo kov na ijir ilalat, kov na litihita lei ko otoro, kov lo cio kulo Kanaan, Hitit, Amor, Periz, Hivit ko Jebus.⁹Dong jijia logoru kicira lo cio kulo Israel iyo nan manyu ladeu nan koditi na litigimare cio kulo Ijipt icieng. ¹⁰Jijia dong ilo acularu nan isi iyo Parao lo kiyauno cio kunei kulo Israel oleng to Ijipt.”¹¹Ati ojo Moses iyo Lobanga, “Ngai nan na lojir alo iyo Parao lo kiyauno Israel to katwa lo Ijipt?” ¹²Manyu ojo Lobanga, “Angon cia nan ko isi manyu ara cia ene kitotorita jimitan nan lacularu isi: Kaliyauno cia isi cio to katwa lo Ijipt, ifwonu cia ite iwor Lobanga kai lo ene donge.¹³Ojo Moses iyo Lobanga, “Adi ba ngalo nan iyo cio kulo Israel ajo, “lohiculu Lobanga lo apa ningi nan iyo ite”, oto icieng kitifi nan ojo, “Ngai karana nenge? Dong ojir nan arihohi icieng ajo aja?” ¹⁴Ojo Lobanga iyo Moses, “NAN INYI NAN”. Tohi na ngirihohi isi cio kulo Israel inyi ene, “lohiculu NAN nan iyo ite”. ¹⁵Orihohi manyu Lobanga Moses ojo, “Tijio iyo cio kulo Israel, “Lahitok Lobanga lo apaico kuningi, Lobanga lo Abraham, Lobanga lo Isako ko Lobanga lo Jakob, lohiculu nan iyo ite”. Karana nei ene tur, Karana na lohilolongore ite nan to kofiangiti many kofiangiti.¹⁶Ilo to tubahi lohitwaha kulo Israel manyu irihohi icieng ijo, “Lahitok Lobanga lo apaico kuningi, Lobanga lo Abraham, Isako ko Jakob loboto iyo nan manyu ojo; laning nan ite manyu ladeu tohi na litiyoti iyo ite to kov lo Ijipt, ¹⁷manyu lacik nan lo kiyauno ite iyo mehino na lingonore ite kov lo Ijipt ko kiyaru ite kov lo cio kulo Kanaan, Hivit, Amor, Perez, Hitit ko Jebus kov na litihita lei ko otoro”. ¹⁸Oning cia lohitwaha kulo Israel kutuk nino. Oto hati isi ko lohitwaha kulo Israel ifwo iyo kabu lo Ijipt ifwo ijo iyo inyi, “Lohiric Lahitok Lobanga lo cio kulo Ibru ko ohoi. Kingohi ohoi kifwo owele lo faritin uni katwa lo mwang kifwo kifotohi kicorita iyo Lahitok Lobanga niyang.”¹⁹Ati ayen nan jimitan ida cia kabu lo Ijipt kingohi ite ifwo manyu kalifudahi kana na igol inyi. ²⁰Dong adong cia nan kana nei abok Ijipt to tanguhin fad kuna cia latii nan kiji neicieng. To kifwongi lo na, kilahahi cia ite ifwo. ²¹Manyu acio cia nan cio kulo Ijipt imoroti iyo iyo kuno cio ojir kaliwoju ite, ida ifwo otowi kac. ²²Ojir ngorwo fad ilifu iyo loryehati kuneicieng sangite kuna cia liticiefohi ite iyo tee kuningi rei ko kariok. Dong tona kikoi ibel cia ite cio kulo Ijipt.

¹Inyiahahi Moses ojo, "Adi ba ngida iruhi tenya nei kode ida oningi nan, manyu ojimi, "Ida Lahitok loboto diho isi?" ²Oto Lahitok ojo diho inyi, "Nyio na kana nino?" Inyiahahi inyi ojo, "Iluk" ³Ojo Lahitok diho inyi, "Ibirohi kof." Ibirohi Moses iluk kof, oluluoro ara munu. Ife inyi iyo iluk.⁴Ojo Lahitok diho inyi, "Yaru kana iniefa kalicik." Dong ocule Moses kana inief munu, oto ko luluoro ara iluk ari to kana nenge. ⁵Ojo Lahitok, "Ara ene ojir icieng iruk jimitan Lahitok Lobanga lo apaicio kuneicieng, Lobanga lo Abraham, Lobanga lo Isako ko Lobanga lo Jakob loboto diho isi.⁶Ojo Lahitok, "Tofik kana katua lo kyela nino." Oto Moses ko fiha kana katua lo kyela nenge, ojo odumu oleng, ongon talulu kana. Okwe kana iya lofalanga. ⁷Ojo Lahitok iyo inyi, "Inyiahahi katua lo kyela." Inyiahahi Moses kana nenge katua lo kyela, ojo odumu, orumu loitu oriworo ko ken nenge fad.⁸Tinyia ojo Lahitok, "Kalida icieng iruk tenya nino kode itibasari na kitotori lo lobito, otum cia icieng iruk lo are. ⁹Ati kalida icieng iruk kuno kitotorihin are fad kode ida oningi tenya nino, toyohu kude kifi to nam lo Nail, ijuhohi kof na itou. kuna kifi liyohu isi to kare, ibelo cia ara okoto kalijuhohi isi kof."¹⁰Ojo Moses diho Lahitok, "Tolau karwaani nino Lahitok. Ida nan ara katenyani otoc many to okisidi ko jijia litenyare isi ko karwaani nino. Ara nan tungani na loyeta tenya caafi manyu itola ngadief." ¹¹Ojo Lahitok diho inyi, "Ngai licio cio kutuhe? Ngai lofik icieng otuhoho kode otulaha? Ngai licio icieng konyeha kode ofik icieng ongodoho? Ida nan Lahitok? ¹²Jijia ilo alwak cia nan isi to tenya manyu ahiteyen isi tohi na ngiteny isi." ¹³Ati ojo Moses, "Tolau karwaani nino Lahitok, tocule ja lobo tungani ake."¹⁴Oto Lahitok ilongojihi Moses many ojo, "Adi rece nino Aaron Levini? Ayen nan ajo otum inyi tenya otoc. Longon manyu inyi kikoi lolotuno kitiricio isi, manyu okwama cia inyi deuno isi. ¹⁵itenya cia isi ko inyi ifik tenyitenyi kutuk nenge, ahilwak cia nan ite are fad to tenya manyu ahitiyen ite tohi na ngitii ite. ¹⁶Otenya cia inyi ko cio to isi, manyu ori cia inyi iya kutuk nino. Manyu iri cia isi mejo Lobanga diho inyi. ¹⁷Ati yaru ene iluk to kana nino ojir itiyore kitotorita."¹⁸Tinyia oite Moses iyo komoni nenge Jetro, olo ojo diho inyi, "Ingohi ba aite nan iyo cio kunei idi Ijipt alo ade kolorihe ba lobo owar." Ojo Jetro diho inyi, "Ilo ara na ijir." ¹⁹Tinyia orumu Lahitok lojo iyo Moses to kof lo Midian, "Toite iya Ijipt tonyio loweiha kulafa cio lohitahita kifadaru isi." ²⁰Dong odumu Moses ngorwani nenge ko tee kunenge ofik kai lo sigiria ko kiciaha iitoro iya Ijipt. Manyu iyaru inyi iluk lo Lobanga to kana nenge.²¹Ojo Lahitok iyo Moses, "Kaliite isi Ijipt, itiyo ketemoni lo Parao kuna kitotorita fad lahicio nan isi golun lo kitiyo. Ati atigol cia nan tau nenge ida iruhunore cio fworo. ²²Tinyia toteny diho Parao ijo, "Tohi na loteny Lahitok inyi ene, 'Ara Israel kito nei okang ²³manyu ahirihohi isi ajo ingohi kito nei tolo, ojir olo kiwor nan. Ati iberu isi ngerihino inyi olo, tona afade cia nan kito nino okang."²⁴To laperit to kikoi, itiric Lahitok Moses manyu omana kifadaru inyi. ²⁵Ati odumu Zipora ngalem na iko ko ngutuno belelie lo ketemoni lo kito nenge otirore kejuha kulo Moses. Ojo inyi iyo Moses, "Dede ira isi iyo nan lateran lo okoto", ²⁶oto Lahitok ko ngerihino inyi tona tik lojo inyi, 'lateran lo okoto' to tenya lo kiliraru.²⁷Ojo Lahitok diho Aaron, "Ilo mwangatare kitiricio Moses." Dong itiric inyi Moses gum lo donge lo Lobanga ko kimaruha inyi. ²⁸Tinyia orihohi Moses Aaron sangite fad kuna loculahi Lahitok inyi tenya manyu ko kitotorita fad kuna lojo ojir inyi itii.²⁹Otubu oho Moses ko Aaron lohitwaha kulo Israel fad, ³⁰manyu orihohi Aaron icieng sangite fad kuna loteny Lahitok diho Moses. Itii manyu inyi kitotorita to ketemoni lo cio, ³¹manyu iruk icieng. Manyu koloning icieng ojo ibuha Lahitok to icieng manyu lodeu mehino neicieng, ogungiti iwori Lobanga.

¹To kifwongi ofwo oho Moses ko Aaron iyo Parao orihohi inyi ojo, “Tohi na loteny Lahitok Lobanga lo Israel inyi ene: “Ingohi cio kunei to fwo, ojir ofwori onyia karama iyo nan to mwang”. ²Ojo Parao, “Lahitok inyi ngai na nganing nan inyi acio Israel ofwo? Ida nan ayen Lahitok manyu ida nan angerihi Israel ofwo.”³Tinyia ojo icieng, “Lohiric Lobanga lo cio kulo Ibru ko ohoi. Jijia ingohi kifwo ohoi owele lo faritin uni mwangatare kifwo kifotohi kiciorita iyo Lahitok Lobanga niyang koloru, kikeru ciao hoi to jiok kode to fere.” ⁴Ati ojo kabu lo Ijipt, “Moses ko Aaron nyio idumaru ite cio to tic neicieng? Itoite tic ningi!” ⁵Oto parao ojo, “tode loborengi jijia cio kulo kov manyu itiho ite icieng to tic neicieng.”⁶Lafar bito Parao ko kicwara ene cik iyo katitiyok ko kaririak kulo tic kuna lolanyu cio: ⁷Kerihe icio kuno cio nyiari kulo doho matafali; ingohi icieng tofwo ongeru nyiari kuneicieng to kenite kuneicieng. ⁸Ati ingohi tobohi langun wel lo atafali lo tik tik, ketingor na wel. Okaruha icieng inyi licio otenyati ojo, “ingohi kifwo kifotohi kiciorita iyo Lobanga niyang.” ⁹Itofik tic ogol iyo cio ojir itiyoti ida ongoti tenyi tenyi kulo talerun.”¹⁰Oto katitiyok ko kaririak kulo tic ofwo orihohi cio ojo, “tenya na loteny Parao ene: “Ida nan arihe ahicio ite nyiari.” ¹¹Ifwo itotak nyiari to kenite kuningi faji na litum ite rumahino ati ida cia itingori tic ningi ko lobo sidi.”¹²Dong isarihi cio kov lo Ijipt fad gara tanyanya ara faji lo nyiari. ¹³Oruha katiyok icieng ojo, “itifutata tic na lowahiti iyo ite to faritin fad iya langun licioritarihin ite nyiari.” ¹⁴Manyu olumo katitiyok kulo Parao kaririak kuna lara Israel kuna lofik icieng olanyu cio itifiati ojo, “Nyio ida ite itifut wel lo matafali kuningi ngole ko enefar iya langun lo tik tik?”¹⁵Tona ofwo kaririak kulo tic kuna lara Israel kitifia Parao: Nyio itiyo isi karwaak kunino jii? ¹⁶Ida iciori karwaak kunino nyiari, ati ojimi iyo ohoi, “itibok matafali!” Olumoti karwaak kunino ati kipal ara lo cio kunino. ¹⁷Ojo Parao, “Kakarwak, icieng ira ite, kakarwak! Inyi licio ite itiringa tenya ijio, “Ingohi ohoi kifwo kifotohi kiciorita iyo Lobanga.” ¹⁸Jijia ifwo kitiyo. Ida cio kiciori ite nyiari, ati ojir ibok matafali ifut wel.¹⁹Ofwonu Israel kaririak oyen ojo kingon icieng iyo kidak tona lorihohinorehin icieng ojo, “Ojir ida itong wel lo matafali kuna lowahiti ite ibok to far Lobito. ²⁰Kolongerihi icieng Parao, orumuni Moses ko Aaron itila kirico ko icieng, ²¹icieng ko jimitan, “Ingohi Lahitok kide ite manyu ongot tenya ningi! Licio isi ohoi kingwoji iyo Parao ko kulahitoha kunenge manyu lifik ite ngalem kana nenge lo kifada ohoi.”²²Oite Moses iyo Lobanga olo ojo, “Nyio Lahitok, nyio iyauno isi kidak iyo kuno cio? Inyi ene tenya liculunore isi nan ene? ²³Manyu to loro nan iyo Parao tenya to karana nino, liyauno inyi kidak iyo kuno cio ida manyu isi ilwahu cio kunino tur.”

¹Tona ojo Lahitok iyo Moses, “Jija ideu cia isi tohi na latii nan iyo Parao: to golun lo kana nei olahahi cia inyi icieng ofwo; to golun lo kana nei ifuhe cia inyi icieng ara kifuharu to kov nenge.²Ojo manyu Lobanga iyo Moses, “Nan Lahitok. ³Aboto afa nan iyo Abraham, iyo Isako ko iyo Jakob ara Lobanga na lolanyu fad ati to karana nei LAHITOK ida afa nan atiyore icieng. ⁴Atigol manyu afa nan ciahru nei ko icieng lo kicwara kov lo Kanaan idi afa lomanya icieng ara misiok. ⁵Oto hati laning nan kiboria lo cio kulo Israel kuna litigima cio kulo Ijipt manyu laiu nan ciharu nei.⁶Tona tijio iyo cio kulo Israel, “Nan LAHITOK manyu ayauno cia nan ite oleng to ayok lo cio kulo Ijipt. Alak cia nan ite iyo rahun opiihin kuneicieng manyu alahu cia nan ite to kana na ilotir manyu to ticitici kuna hitoha kulo ngoto lo tenya. ⁷Ayaru cia nan ite ara cio kunitole manyu ara cia nan Lobanga ningi. Ito cia ite iyen jimitan nan LAHITOK na layauno ite oleng to cuna lo rahun opiihin iyo cio kulo Ijipt.⁸Manyu ayauno cia nan ite iyo lafa kov labuti nan many ating kana kai lo kicwara iyo Abraham, iyo Isako ko iyo Jakob. Acio cia nan ite ara ningi. Nan LAHITOK.” ⁹Inyiahatahi Moses kuno tenyi tenyi iyo cio kulo Israel ati ida icieng oning to kidak neicieng ko tic lo panyar na igol lotum icieng.¹⁰Tinyia ojo Lobanga iyo Moses, ¹¹“Ilo torihohi Parao kabu lo Ijipt ojir olahahi cio kulo Israel ofwo to kov nenge.” ¹²Ati ojo Moses iyo LAHITOK, “Kalida cio kulo Israel kining nan oto hati aja cia Parao kining nan iya na lajajahare nan tenya?” ¹³Tinyia otenya LAHITOK ko Moses ko Aaron to cio kulo Israel ko Parao kabu lo Ijipt manyu orihohi icieng lo kiyauno cio kulo Israel to kov lo Ijipt.¹⁴Ara afa kuno kabolorok kulo kajihit kuneicieng. Tee kulo Reuben okang lo Israel icieng Hanok ko Palu, Hezron ko Karmi. Ara afa kuno imaniti kulo kaji lo Reuben. ¹⁵Tee kulo Simeon icieng; Jamuel, Jamin, Ohad, Jakin, Zohar ko Saul tee kulo ngorwani Kanaanani. Ara afa kuno imaniti kulo kaji lo Simeon.¹⁶Ara afa kuno karanecio kulo tee kulo Levi iya na lijifitare kofiang kuneicieng; Gereson, Koas ko Merari. Itong Levi karihin mia Lobito ko keek uni ko mietare. ¹⁷Tee kulo Gereson to imaniti icieng Libni ko Simi. ¹⁸Ara afa tee kulo Koas Amram, izhar, Hebron ko Uzziel. Itong Koas karihin mia Lobito ko keek uni ko uni. ¹⁹Ara afa tee kulo Merari Mahali ko Musi. Ara afa kuno imaniti kulo Levi to kofiang kuneicieng.²⁰Oyem Amram kanece lo apa nenge Jokebed na lotomonohi inyi Aaron ko Moses. Itong Amram karihin mia Lobito ko keek uni ko mietare. ²¹Tee kulo Izhar icieng, Kora, Nepeg ko Zikri. ²²Tee kulo Uzziel icieng, Misael, Elizapan ko Sitri.²³Oyem Aaron Eliseba kito lo Aminadab kanece lo Nahson olotu otomonohi inyi Nadab ko Abihu, Eleazar ko Ismar. ²⁴Tee kulo Kora icieng Assir, Elkana ko Abiasap. Ara afa kuno imaniti kulo Kora. ²⁵Oyem Eliezar kito lo Aaron kito Lobito to kiji lo tee kariok kulo Putiel, olotu otomonohi inyi Pinehas. Ara afa kuno kabolorok kulo imanit lo Levi to kajihit.²⁶Ara afa iyo ene Aaron ko Moses ojo LAHITOK, iyaunoti cio kulo Israel to kov lo Ijipt to agwalahin kuneicieng. ²⁷Icieng afa lititeny Parao kabu lo Ijipt tenyia lo kiyauno cio kulo Israel to kov lo Ijipt- icieng oho Moses ko Aaron.²⁸Dong kolotenya Lahitok iyo Moses to Ijipt, ²⁹ojo iyo inyi, “nan Lahitok. Torihohi Parao kabu lo Ijipt tenyi tenyi pili kuna larihohi nan isi. ³⁰Ati ojo Moses iyo LAHITOK, adi iya ene lajajahare nan tenya, nyio ngicio Parao kiningo nan?"

¹Tinyia ojo LAHITOK iyo Moses, “Tode lafik nan isi iya Lobanga iyo Parao manyu rece nino Aaron cia litongo ara kamocani nino. ²Ojir iteny sangite fad kuna larihohi nan isi, ojir rece nino Aaron orihohi Parao olahahi cio kulo Israel ofwo to kov nenge.³Ati atigol cia nan tau lo Parao na kokileng ngatii nan ticitici ko tanguhin ko kitotorita kunei kov lo Ijipt, ⁴ida cia inyi kining isi. Ato hati cia nan afik kana nei kov lo Ijipt manyu to ticitici kuna hitoha kulo ngoto lo tenya ayauno cia nan kajihit kunei, cio kunei Israel. ⁵Oto cia cio kulo Ijipt oyen ojo nan Lahitok kalacule cia nan kana nei Ijipt manyu ayauno Israel oleng tijia.”⁶Itii oho Moses ko Aaron iya na lotenyare LAHITOK iyo icieng. ⁷Orumu karihin kulo Moses lara keek mietauni kulo Aaron keek mietauni ko uni na lotenyare icieng iyo Parao.⁸Tinyia ojo LAHITOK iyo Moses ko Aaron, ⁹“Kolojo Parao iyo ite, ‘itiyoto tangu’, tijio iyo Aaron, ‘todumu iluk nino ibirohi ketemoni lo Parao oto cia ko lulworo ara munu’. ¹⁰Dong ofwo oho Moses ko Aaron iyo Parao itii iya idi lotenyare LAHITOK. Ibirohi Aaron iluk nenge ketemoni lo Parao ko kulahitoha kunenge oto iluk ko lulworo ara munu.¹¹Parao ko kilolonguno kangenyak ko kalam ko ibwonok kulo Ijipt itii manyu icieng iya na to genyita kuneicieng: ¹²icieng tolobito tolobito ibirohini iluhi kof olulworo ara muniok. Ati odile iluk lo Aaron iluhi kuneicieng fad. ¹³Ati orihe tau ko Parao ogol ida inyi oning tenya neicieng, iya na lotenyare Lahitok to ken.¹⁴Ojo LAHITOK iyo Moses, “Ida tau lo Parao olaha, oberu inyi lahahino cio ofwo. ¹⁵Ifwo iyo Parao kiwanyi kuru langun loloro inyi kare. Itiricoto inyi kutuk lo Nail manyu itotek na iluk ngole lo lulworo ara munu.¹⁶Tinyia tijo iyo inyi, “kiculu Lahitok Lobanga lo cio kulo Ibru nan iyo isi lo rihohino isi ojo; ‘Ingohi cio kunei ofwo, ojir ofwori kiwori nan to mwang. Ati ko jijia irihe isi ida ining. ¹⁷Tohi na loteny Lahitok ene, tone iyen cia isi jimitan ara nan Lahitok: to iluk na longon kana nino abok cia nan kifi kulo Nail ofwonu olulworo ara okoto. ¹⁸Owei cia kayam to katwa lo Nail many ongwo kifi kulo kare many ida cio kulo Ijipt otum mata.”¹⁹Tona Lahitok ko jimitan iyo Moses, “torihohi Aaron, todumu iluk nino manyu to fetahi kac kunino kai lo kifi kulo kov lo Ijipt, kai ocerihin, ko kareco, kai lo itibihin ko tafara ko fajihit kuna longon kifi fad- oto cia ibelo ara okoto. Ongon cia okoto fajihit fad to kov lo Ijipt many katwa lo motiongo kulo morutok ko keyek.''²⁰Itii oho Moses ko Aaron iya na lotenyare Lobanga to ken. Oting inyi iluk nenge to ketemoni lo Parao ko kunahitoha kunenge ko boho kifi kulo Nail kifi fad ko lulworo ara okoto. ²¹Owei kayam to katwa lo Nail kare ko ngwojun bebe many ida cio kulo Ijipt otum mata kifi kunenge ongon afa okoto fajihit fad to kov lo Ijipt. ²²Ati itii manyu ibwonok jii to genyita kuneicieng dong ogol tau lo Parao, ida inyi owak ningo Moses ko Aaron iya na lojo Lahitok.²³Ibelo honyi orute kang lo okabwe nenge ida manyu kileng ibuha ene tenya. ²⁴Oto cio kulo Ijipt fad obok kalelehin kulo kare Nail lo rumuno kifi kulo mata kifi kulo kare. ²⁵Oring farihin mietare tona lobohore Lahitok Nail.

¹Ojo Lahitok iyo Moses, “ilo iyo Parao tijo iyo inyi, ‘tohi na loteny lahitok inyi ene, Ingohi cio kunei to fwo ojir ofwori kiwori nan. ²Kalimitere isi icieng fworo aculu cia nan jiok lo ikordohi kof nino fad. ³Ifut cia Nail ko ikordohi. Ofwonuni cia kang hatwa lo obolore nino many logetore nino ko kai lo lagere nino, katwa lo kajihit kulo kulahitoha kunino, ko iyo cio kunino many katwa lo cialito kuningi ko lohingolare lo ibuneha. ⁴Ofwonu cia ikordohi iyo isi ko cio kunino ko kulahitoha kunino fad.”⁵Tinyia ojo Lahitok iyo Moses, “Torihohi Aaron tijio, itifete kana nino ko iluk nino kai lo karecio, ocerihin, ko tafara, icwara ikordohi tojuhu kov lo Ijipt.” ⁶Tinyia ofetehi Aaron kana nenge kai lo kifi kulo Ijipt, oto ikordohi ko fwonuno ipude kov. ⁷Ati itii manyu ibwonok iya na to genyita kuneicieng icio manyu icieng ikordohi ofwonu kov lo Ijipt.⁸Ilolonge Parao Moses ko Aaron ojo iyo icieng, “Ilifati iyo Lahitok odume ikordohi iyo nan ko cio kunei ato cia nan alahi cio kunino ofwo ifotohi kiciorita iyo Lahitok.” ⁹Ojo Moses iyo Parao, “Angerihi nan tenya lo ciha lo far iyo isi na ngalifahinore isi ko kulahitoha ko cio kunino ojir ikordohi okerorore ojir otong kuna longoni katwa lo kare lo Nail keken.”¹⁰Ojo Parao iyo Moses, “Kiwanyi.” Inyiahahi Moses inyi ojo, “Ori cia iya na litany isi ojir isi iyenare jimitan oru lobo lori ko Lahitok Lobanga niyang. ¹¹kingerihi cia ikordohi ite ko kajihit kuningi, kuna hitoha kuningi ko cio kuningi, otongiti cia katwa lo Nail keken.” ¹²Langun longerihi Moses ko Aaron Parao, ilelia Moses iyo Lahitok to ikordohi kuna liyauno inyi iyo Parao.¹³Manyu itii Lahitok tohi na litifi Moses oweiha ikordohi to kajihit, to sitana ko to manatak. ¹⁴Ifuri icieng iyo ifuriti kuna hitoha many omura kof ara icieng. ¹⁵Ati kolodeu Parao ojo loru ikordohi, itigol inyi tau nenge ida owak ningo tenya lo Moses ko Aaron iya na afa lotenyare Lahitok to ken.¹⁶Tinyia ojo Lahitok iyo Moses, “torihohi Aaron tijio, todong kana nino tobok fur lo kof to iluk. manyu to kov lo Ijipt fad olulworo cia fur ara ilakye.” ¹⁷Itii icieng jii, manyu ojo Aaron odong kana nenge ko iluk ko boho fur lo kof, ofwonu ilakye iyo cio ko sang. Ara fur to kov lo Ijipt fad ilakye.¹⁸Ati ojo ibwonok otem kiyauno ilakye to genyita kuneicieng, ida itweruni. Tonyio ongon afa ilakye kenite kulo cio ko sang fajihit fad, ¹⁹ojo ibwonok iyo Parao, “ara ene kafiele lo Lobanga.” Ati ogol tau lo Parao ida oningo, iya na loteny Lahitok to ken.²⁰Oto Lahitok ojo iyo Moses, “Towoju kiwanyi berien itiric Parao langun loloro inyi kare ilo ijo iyo inyi, “Tohi na loteny Lahitok ene: ojo, Ingohi cio kunei ofwo kiwor nan. ²¹Kalida isi ilahahi cio kunei ofwo ahijuhohi cia nan isi kujanga ilwahuno iyo isi ko kulahitoha kunino, iyo cio kunino ko katwa lo kajihit kuningi. Ifut cia kujanga kajihit kulo cio kulo Ijipt imuhe cia kujanga ko kof.²²Ati na far akore cia nan kov lo Gosen faji na lomanya cio kunei; oru cia kujanga lojuk ijia, ojir isi iyen ijo nan Lahitok langon ene kov. ²³Akor cia nan cio kunei ko cio kunino. Itihino cia ene kitotori kiwanyi.” ²⁴Manyu itii Lahitok jii. Ilwahuno kujanga kaji lo Parao ko kajihit kulo kulahitoha kunenge. Ipale kujanga kov lo Ijipt fad.²⁵Oto Parao ilolongu Moses ko Aaron ko jimitan iyo icieng, “Ifwo ifotohiti kiciorita iyo Lobanga ningi ene kov.” ²⁶Ati ojo Moses, “Ida cia na obir. Kiciorita kuna lohifotohino ohoi iyo Lahitok Lobanga niyang odwa iyo cio kulo Ijipt. Manyu kolohifotohi ohoi kiciorita kuna litidwara iyo cio kulo Ijipt ida cia icieng kicak ohoi to morutok?” ²⁷Owak ohoi kifwo owele lo faritin uni mwangatare ifotohino kicioriti iyo Lahitok Lobanga niyang iya na lohicihare inyi ohoi.”²⁸Ojo Parao, “Ahilahahi cia nan ite ifwo ifotohi kiciorita iyo Lahitok Lobanga ningi mwangatare ati kefwo ilomaha noo. Jijia kilifahi nan. ²⁹Inyiahahi Moses ojo, “Deu jijia kalahingerihi nan isi ahilifahi cia nan isi Lahitok, manyu kiwanyi ingohi cia kujanga Parao, kulahitoha kunenge ko cio kunenge. Ati owak Parao oyen jimitan ojir ida kitinonong ohoi to mitere cio fworo kifotohino kiciorita iyo Lahitok.³⁰Oto Moses ko ngerihino Parao olo ilifa iyo Lahitok. ³¹Manyu itii Lahitok tohi na lilifa Moses. Ongerihi kujanga Parao ko kulahitoha kunenge ko cio kunenge, oru kujangati lotong. ³²Ati ene tik manyu itigol Parao tau nenge, ida olahahi cio ofwo.

¹Tinyia ojo Lahitok iyo Moses, “Ilo iyo Parao irihohi inyi, ‘ara ene tohi na loteny Lahitok Lobanga lo cio kulo Ibru; Ingohi cio kunei ofwo ojir kiwori nan. ²Kaliberu isi lahahino icieng irihe igoritare icieng, ³iyauno cia kana lo Lahitok jiok na irohoi iyo sang kuningi kuna longoni oleng iyo lakwenyi kuningi, sigiriahin ko lonagahin ko iyo kicu, kiri ko kera kuningi. ⁴Ati okor cia Lahitok sang kulo Israel ko kulo cio kulo Ijipt ojir lobo tyang to Israel ida owei.⁵Ofik Lahitok tik ojo, kiwanyi itii cia Lahitok ene tenya kov. ⁶Manyu kiwanyi nenge itii Lahitok jii: Owei sang kulo cio kulo Ijipt fad ati oru lobo tyang bito lo cio kulo Israel lowei. ⁷Ingingij Parao na tenya orumahi ojo oru kolobo tyang bito lo cio kulo Israel lowei. Ati orihe tau nenge oberu kiruk manyu ida olahahi cio ofwo.⁸Tinyia orihohi Lahitok Moses ko Aaron ojo, “Itongonyu kirike to kaka lo ciali ifut kana icio Moses orwace kai iyo kiyoma to ketemoni lo Parao. ⁹Olulworo cia na kirike ara fur na itinya kwe lo kov lo Ijipt fad manyu iciak cia lofunoho kuna hitoha kiniefa cio ko sang to kov lo Ijipt fad. ¹⁰Oto icieng ongonyu kirike lo kaka lo ciali ko fwonuno woita ketemoni lo Parao. Orwace Moses na kirike iyo kiyoma, iciak lofunoho kuna hitoha kiniefa cio ko sang.¹¹Ida ibwonok otum woita ketemoni lo Moses to lofunoho kuna lodaha icieng ko cio kulo Ijipt fad. ¹²Ati itigol Lahitok tau lo Parao oberu ningo oho Moses ko Aaron, iya na lotenyare Lahitok iyo Moses to ken.¹³Tinyia ojo Lahitok iyo Moses, “Towoju kiwanyi berien ilo torumu Parao irihohi inyi ijio, “Tohi na loteny Lahitok Lobanga lo cio kulo Ibru ene: tolahahi cio kunei ofwo kiwor nan, ¹⁴kalida tone kakeny, aculu cia nan johi johi kuna igoli iyo isi, iyo kulahitoha kunino ko iyo cio kunino, ojir isi iyenare jimitan oru lobo lori ko nan to kov fad.¹⁵Tonyio ko jijia ji nan laculu kana nei ahibok isi ko cio kunino to jiok ite na ngohikeru ite to kwe lo kov fad. ¹⁶Ati ahitiboloru nan isi tone tenya bito ojir ahitotorohi isi golun ko kilotir nei ojir karana nei oyeniti iric kov fad. ¹⁷Orihe cie isi igoritare manyu itiliwa cio kunei iberu lahahino icieng ofwo.¹⁸Tone dong, kiwanyi tone tik aculu cia nan igewa na irohoi ilany fad na lorihe afa ida litiihino kov lo Ijipt many to lohiciahi nenge ko ene far. ¹⁹Icwara tenya jijia lo kiyauno sang ko sangite fad kuna longoni mwang faji loracare, tonyio odou cia lofalanga iyo cio ko sang fad kuna lorihe ongoni oleng ida oraca ifade icieng.²⁰Kula kude kuna hitoha kulo Parao kuna lobang tenya lo Lahitok orocoro kiyauno opiihin ko sang kuneicieng kajihit. ²¹Ati kuna litikaj tenya lo Lahitok, ingohi opiihin ko sang kuneicieng manatak.²²Tinyia ojo Lahitok iyo Moses, “Toting kac kunino iya kai ojir lofalanga obok kov lo Ijipt fad, iyo cio ko iyo sang ko iyo sangite pili kuna lobu ene kov lo Ijipt.” ²³Langun loting Moses iluk nenge iya kai, oculu Lahitok kigurita ko lofalanga, manyu imedek hila ogoru many kof, tona oculu Lobanga hila obok kov lo Ijipt; ²⁴ocia lofalanga manyu imedek hila ketemoni ko kifwongi. Ara orumu na igewa na irohoi ilany to kov lo Ijipt many to lohicahi lo na kov rahun imiri.²⁵To kov lo Ijipt fad obok lofalanga sangite fad kuna longon manatak ifade cio ko sang; ilieny sangite fad kuna lobu to kov manyu igwere cianitok fad. ²⁶Faji Lobito keken na lida lofalanga obok inyi kov lo Gosen faji na lomanyare cio kulo Israel.²⁷Oto Parao ilolongu Moses ko Aaron ojo iyo icieng, “Ene far lapal nan. Otenu Lahitok ati apal nan ko cio kunei. ²⁸Ilifa iyo Lahitok, tonyio lohitum kigurita lo hila ko lofalanga ohoi. Ahilahahi cia nan ite ifwo; ida owak ite irihe itongo.”²⁹Inyiahahi Moses ojo, “Kalalo nan oleng to katwa lo taya ating cia nan kac kai lo kilifa iyo Lahitok. Icung cia kigurita lo hila manyu oru cia lofalanga losodoro ojir isi iyen ijo ara kov lo Lahitok. ³⁰Ati ayen nan jimitan orihe isi ko kulahitoha kunino ida ibang Lahitok Lobanga.”³¹Ipale lofalanga Obira ko Sayiri tonyio orumu Sayiri loturo ko Obira lokwerihi. ³²Ida ngano ko geme ipalaru tonyio odorita icieng to kifwongi. ³³Oto Moses ongerihi Parao ko loro oleng to Taya. Oting inyi kac iyo Lahitok; icung kigurita lo hila ko lofalanga obienge manyu kuju ida orihe oca kov.³⁴Kolodeu Parao ojo loru kuju ko lofalanga ko kigurita lo hila, olotu ipal ari. Itigol inyi tau ko kulahitoha kunenge fad. ³⁵Dong ogol tau lo Parao manyu ida olahahi Israel ofwo, iya na lotenyare Lahitok iyo Moses to ken.

¹Tinyia ojo Lahitok iyo Moses, Ilo iyo Parao tonyio latigol nan tau nenge ko taulo kulo kulahitoha kunenge ojir atiyore kuno kitotoriti kunei to kaji neicieng ²Ojir ite irihohi tee kuningi ko lotataha kuningi koditi na latiyore nan cio kulo Ijipt to ngere ko koditi na latiyore nan kitotorita kunei to kiji neicieng manyu ojir ite iyen jimitan nan Lahitok.”³Dong ofwo oho Moses ko Aaron iyo Parao ko jimitan iyo inyi, “Tohi na loteny Lahitok Lobanga lo cio kulo Ibru inyi ene ojo, “many anu cia iberu isi kitirieja ken to ketemoni nei? Tolahahi cio kunei ofwo ojir kiwori nan. ⁴Kalimitere isi icieng fworo, aculu cia nan iterebuk kov nino kiwanyi.⁵Imuhe cia icieng kov many ida oboto. Okeru cia icieng na daha sidi lititongu igewa ara Lobito ko cianitok kuna longoni mana nino. ⁶Ifutihi cia kajihit kunino ko kulo kulahitoha kunino ko kulo cio kulo Ijipt fad, tohi lafa lida apaico kode lohitwaha kuningi odeu many to fwonuno neicieng manya ene kov ko jijia.” Oto Moses ko kibelo olo ongerihi Parao.⁷Ojo kulahitoha kulo Parao iyo inyi, “Many anu cia itongo ene tungani ara owic iyo ohoi? Ingohi kuno cio tofwo ojir ofwo iwori Lahitok Lobanga neicieng. Orihe isi ida iyen jimitan lipalaru kov lo Ijipt?” ⁸Tinyia inyiahahuni Moses ko Aaron iyo Parao ojo inyi iyo icieng, “Ifwo iworata Lahitok Lobanga ningi. Ati kirihohi nan oho ngai lofworo.”⁹Inyiahahi Moses inyi ojo, “kifworo ohoi ko tee ko ngoroyok ko tee kilahaji ko tee kariok kuniyang ko sang, kiri, kera ko kicu tonyio kifworo ohoi daha karama iyo Lahitok.” ¹⁰Ojo Parao, “Ingohi Lahitok kingon ko ite kalahilahahi nan ite ifwo ko ngorwo ko tee! Oboto jimitan itongo ene fworo ningi ara lo rohojun. ¹¹Ida! Ingohi rei keken tofwo kiwora Lahitok, ara tohi na litifia ite inyi na.” Oto ko kifuharoti Moses ko Aaron to ketemoni lo Parao.¹²Oto Lahitok ojo iyo Moses, “Todong kana nino kai lo kof lo Ijipt ojir iterebuk ibuluno ene kof okeru sangite fad kuna lobu to manatak, sangite fad kuna lititongu lofalanga.” ¹³Oto Moses ko fetaru iluk nenge kai lo kov lo Ijipt, oto Lahitok icio kiyoma lo ngati lo okangere okuta na far doony ko karwe mwaa kai lo kov. Kiwanyi liyauno na kiyoma iterebuk.¹⁴Ipude kov lo Ijipt fad manyu odohini fajihit kulo kov fad, oborengi ilany. Ida orumu lobo jiok lo iterebuk na lori iya na litiihino kov lo Ijipt oru manyu lobo to kifwongi. ¹⁵Imuhori kov fad many irwok kov ara icieng. Okeruni sangite pili kuna litotongu lofalanga- sangite pili kuna lobu manatak ko ngak kuna to kai lo cianitok. Oru lobo tohi inyiori lotong kai lo cianitok kode manatak to kov lo Ijipt fad.¹⁶Ilolongu Parao Moses ko Aaron deu deu ko jimitan iyo icieng, “Lapal nan ketemoni lo Lahitok Lobanga ningi ko ketemoni ningi. ¹⁷Jijia itolau kipal nitole ari manyu ilifa iyo Lahitok Lobanga ningi odume ene jiok litibanga to ken nei.” ¹⁸Ingohi dong Moses Parao ko kilifa iyo Lahitok.¹⁹Manyu ibel Lahitok na kiyoma ara kiyoma lo ngati lo lodoyore lo kolong na igol ko tingoro iterebuk fad ijuhohi katwa lo nam na ido, oru lobo iterebuhiti bito lotong kov lo Ijipt. ²⁰Ati itigol Lahitok tau lo Parao ida iruk lahahino Israel ofwo.²¹Oto Lahitok ojo iyo Moses, “Toting kac kunino iya kai ojir mutohun olotu kov lo Ijipt- mutohun lokimuyuk na irioci. ²²Oto Moses lo tingo kac kunenge iya kai, oto lokimuyuk ipude kof lo Ijipt fad to faritin uni. ²³Oru lobo tungani lodeu kaletoni kode olo lobo faji to faritin uni. Adi hony cio kulo Israel ongon ko wangun fajihit kuna longoni icieng.²⁴Tinyia ilolongu Parao Moses oto ojo, “Ifwo iworata Lahitok. Otum ngorwo ko tee kuningi fworo ko ite, itongerihiti sang keken otong kifwongi. ²⁵Ati ojo Moses, “Ojir isi iruk ohoi kiyaru kiciorita kuna lohifworo fejohino iyo Lahitok Lobanga niyang. ²⁶Ojir sang kuniyang manyu kilik ko ohoi ida lobo otong kifwongi. Kifwo ohoi kitiyore kude to kiji neicieng kiworare Lahitok Lobanga niyang many kigoru ohoi ijia, ida ohoi kitum yenun nyio kiworare ohoi Lahitok Lobanga niyang.”²⁷Ati itigol Lahitok tau lo Parao, manyu ida inyi owak lahahino icieng ofwo. ²⁸Ojo Parao iyo Moses, “Ilo to ketemoni nei. Tode jimitan ida isi inyiahat boto ketemoni nei ari! Far na lideunore isi komom nei iwei cia isi.” ²⁹Inyiahahi Moses iyi ojo, “Iya na litany isi. Ida cia nan anyiahat lotuno ketemoni nino ari.”

¹Ojo Lahitok diho Moses, "Ayauno cia nan jiok lobito ari iyo Parao ko kof lo Ijipt. To kifwongi kilahahi cia inyi ite ifwo ten, manyu ko lohilahahino inyi ite kifuhe cia ite tur. ²To rihohi cio tijo ojir rei ko ngorwo ara lobito ilif loriehati kuneicieng sangite kuna likukumi to dahab ko rial. ³(Icio Lahitok cio kulo Ijipt imorati bebe iyo cio kulo Israel manyu Moses token manyu obang kulahitoha kulo Parao ko cio kulo kof lo Ijipt fad.⁴Ojo Moses iyo cio, "Tohi na loteny Lahitok inyi ene, 'To tik lo kiji lo karue alo cia nan katua lo kof lo Ijipt fad. ⁵Tee okangi fad to kof lo Ijipt oweiha cia kiciaha iyo kito okang lo Parao na litongo iyo seger lo okabwe many iyo kito okang lo ngorwani opiini na liria ngamang ko tee okangi kulo sang fad.⁶Obolo cia kiluluo kof lo Ijipt na lida afa itiihino manyu na lida mute itiihino ari. ⁷Ati to kiji lo cio kulo Israel ida cia kileng ikure igwok lobo tungani kode tyang. Ito cia ite iyen ijio okor Lahitok kiji lo Ijipt ko Israel. ⁸Kulo kulahitoha kunino fad ofwonuni cia diho nan ogungiti ileliati ojo, 'Ilo ko cio fad kuna lohijifita isi!' To kifwongi ato cia nan alo" Oto Moses lotum kilongo ko loro to ketemoni lo Parao.⁹Orumu Lahitok lorihohi Moses ojo, "Oberu cia Parao ningo tenya nino, ojir ticitici kulo tangu nei itiborengohini kof lo Ijipt." ¹⁰Itii Moses ko Aaron kuno tanguhin fad to ketemoni lo Parao, ati itigol Lahitok tau lo Parao manyu ida owak lahahino cio kulo Israel ofwo to kof nenge.

¹Ojo Lahitok diho Moses ko Aaron to kof lo Ijipt, ²"Ingohi ene ofa tara diho ite ofa lo lobito, ofa lo lobito lo kari ningi.³Torihohi tuban lo cio kulo Israel jimitan to far lo tomon lone ofa ojir tungani lobito lobito onyumu kilelo to kaji nenge lobito to kaji lobito lobito. ⁴Kalisidi lobo kaji ida otum keruno kilelo ingohi tongari ko loryehat neicieng na inyiha noo, langun loyeniti borengun lo cio kuna longoni. Ojir ite itutum borengun lo cio ko tyang na lotum tungani lobito lobito konya.⁵Ingohi kuna sang linyumuno ite tara mongi kulo kera kode korecio kuna lara kari lobito manyu onyuji oru lobo lofunyia, lokamalahanyang kode lohabohoi. ⁶Itoric kuna kirieho many far lo tomon ko ongon lo ene ofa, far na longotore cio kulo Israel to tuban icieng kurou langun lodoyoro kolong. ⁷Ojir icieng itaru lobo okoto otwehini kai ko angatihin kulo bauhin kulo agwalahin kulo kajihit kuna lokonyare icieng kuna kirieho. ⁸Na karue bito ojir icieng okony tyang na lofejo to kima ko cianitok kuna idwari ko mugati kuna lofuni oru ibula.⁹Kekony na tyang owar kode oyeri to kifi ati itofej ara fejo to kima fad ko kue, meselek ko sangite kulo kocehe. ¹⁰Ketitongohi lobo many owang kof. Kolotong lobo ko kiwanyi, ojir icure. ¹¹Koditi na ngidahare ite inyi ene: ko kyelani otorahino komoci to gasi, kamuha kejuha, ko iluhi kuningi kac. Itoruk daha nenge; Ara daha lo rangaru lo Lahitok.¹²Iyo na karue bito arang cia nan ara kof lo Ijipt afade tee okangi fad kulo cio ko kulo sang, manyu ayauno cia nan ngoto lo tenya iyo lobangahin kulo Ijipt fad. Nan Lahitok. ¹³Itongo cia okoto ara kitotorita ningi iyo kajihit kuna lingoni ite, manyu kaladeu nan okoto ahirang cia nan ite. Oru lobo jiok lo wei cia lohitir ite kalabok nan Ijipt. ¹⁴Ara ene far na likwera ite; to kofiang fad kuna lofwonuno ojir ite idaha ara karama lo Lahitok itidwar lo karihin fad.¹⁵To faritin mietare ojir ite idaha mugati na lofuni oru ibula. To far lo lobito itidume ibula to kajihit kuningi, tonyio tungani na lonyia lobo tohi likukumi to ibula many to far lo lobito many far lo mietare ojir odumari inyi to Israel. ¹⁶To far lo lobito itofik tuba manyu ifik lobito far lo mietare. Ketir lobo tic tur to kuno faritin, ingohi tara kikukuma lo daha keken, tohi na ngitii ite inyi na.¹⁷Itonyia karama lo mugati kuna lida ofuni to ibula tonyio ara enefar token, ayaunore nan agwalahin kuningi to kof lo Ijipt. Ikwerati ara itidwar lo karihin fad to kofiang fad kuna lofwonuno. ¹⁸Iyo ofa lo lobito ojir ite inyia mugati kuna lofuna oru ibula many to kurou lo far lo tomon ko ongon many kurou lo far lo keek are ko lobito.¹⁹To faritin mietare ojir ibula ida orumahino kajihit kuningi. Manyu lobo tungani kode misiohoni kode monye lo kof na lonyia lobo tohi likaruto ko ibula ojir odumari to kiji lo cio kulo Israel. ²⁰Kenyia lobo tohi likaruto ko ibula. Fajihit fad kuna limanya ite ojir idaha mugati kuna lofuni oru ibula.²¹Oto Moses ko tubuno lohitwaha kulo Israel fad ko jimitan diho icieng, "Ifwo deu itonyum kirieho to kajihit kuningi, ingot kilelo lo rangaru. ²²Itodumu itorit lo lodwa icafahi iyo okoto to besen itwehi iyo bauhin kulo agwala kai ko ngatihin are fad, ojir lobo tungani to kiji ningi ida orute sita many owang kof.²³Kololoro Lahitok kilorita kof fad boho cio kulo Ijipt, odeu cia inyi okoto kai ko angatihin kulo bauha kulo agwalahin kuningi ko rangita kuna agwalahin manyu ida ingohi kafadani orute kajihit kuningi kifada ite.²⁴Itoric kuno tenyitenyi ara cik to ite ko to lotataha kuningi tur. ²⁵Kalingon ite nu kof lohicwara Lahitok ite iya lafa locihare inyi, ijifata ene tic.²⁶Ojir kalitifia mute tee kuningi ojo, "Nyio fotiri lone tenya?" ²⁷Itorihohiti icieng ijo, "Ara ene kikumi lo Rangaru Paska lo Lahitok, tonyio orang afa inyi kajihit kulo Israel to kof lo Ijipt ingohi kajihit kuniyang na karue lifadare inyi cio kulo Ijipt." Oto cio ogung kof iwori Lobanga. ²⁸Itii cio kulo Israel iya na locihare Lahitok Moses ko Aaron token.²⁹Kologoru tuk lo karue, ifade Lahitok tee okangi kulo cio kulo Ijipt fad, kiciaha to kito okang lo Parao la litongo iyo seger lo Okabwe many iyo kito okang lo mabusoni na lotora faji na imutok ko okangi kulo sang fad ara lobito. ³⁰Owoju Parao karue ko kulahitoha kunenge fad ko cio kulo Ijipt fad, oto kicira na litibanga igor kof lo Ijipt tonyio oru lobo kaji to kajihit kulo cio kulo Ijipt lida tungani owei katua.³¹Ilolongu Parao Moses ko Aaron na karue ko jimitan diho icieng, "Itiwoju ifwo ite ko cio kulo Israel, kingerihiti nan ko cio kunei! Ifwo iworata Lahitok iya na litenyare ite. ³²Iyaroti ko sang kuningi iya na litenyare ite, ito hati ifwo. Kigatahi manyu nan gum. ³³Oruk cio kulo Ijipt Israel fworo to kof neicieng ojo, "Tonyio ngohikeroro ha ohoi fad.''³⁴Tona icio cio oting kofwo kuneicieng kuna lingoli orihe ida ofihi ibula oryongohini okokoho kuneicieng ara na lobuburahini kingolihin iyo kyelani. ³⁵Itii cio kulo Israel iya na lorihohinore Moses icieng ilifuni sangite kulo rial ko dahab ko kyelani iyo cio kulo Ijipt. ³⁶Icio Lahitok cio kulo Ijipt imoroti noo iyo cio kulo Israel iciori icieng sangite kuna lilifa icieng fad, tona obelaru icieng Ijipt.³⁷Iciak cio kulo Israel lotita to Ramases many Sukos. Ara afa cio rei kuna lotum alif mia ile na lida ikeni ngorwo ko tee. ³⁸Ilik cio beciek ko icieng ko sang beciek; kiri, kera ko kicu. ³⁹To kuna kofwo lingoli liyauno cio kulo Israel to Ijipt, ifun icieng mugati kuna loru ibula. Oru afa ibula iyo kuna kofwo lingoli, tonyio ifuhuni icieng to kof lo Ijipt oruhi icieng tik lo kikukuma daha neicieng. ⁴⁰Tona orumu kitongo lo cio kulo Israel lotum karihin mia ongon ko keek uni.⁴¹To lohicungi lo kuna karihin mia ongon ko keek uni many ogoru la far, ofwonu cio kulo Lahitok to kof lo Ijipt kajihit fad. ⁴²Tonyio iriria Lahitok icieng na karue lo kiyauno icieng oleng to kof lo Ijipt, ojir na karue cio kulo Israel iriria na karue to kofiang fad lo kibuhunita ko kiwora Lahitok.⁴³Orihohi Lahitok Moses ko Aaron ojo, "Cihicihi kulo daha lo Rangaru kuno: Ojir lobo misiohoni ida onyia. ⁴⁴Otum lobo opii linyiangu isi daha langun lilir isi inyi.⁴⁵Ati ida katangunoni kode tungani na lidum isi lo kitiyo lobo tic to faritin kude kuting onyia. ⁴⁶Ojir odahahini kajihatua, kerutorore lobo tyang sita. Kegil lobo koite nenge.⁴⁷Ojir cio kulo Israel fad onyia na karama. ⁴⁸Misiohoni na lomanya kiji ningi kolowak daha Rangaru lo Lahitok ojir ilir cio ko tee rei kulo kalenge fad,oto inyi ko rijon iya tungani na lotomonohini kiji ningi kidaha ko ite ara lobito. Ida tungani retoni na lida iliri onyia daha lo karama lo Rangaru.⁴⁹Inyi na cik bito litiyo to tungani lo kof lo Israel ko misiohoni na lomanya kiji ningi. ⁵⁰Itii cio kulo Israel fad tohi na locik Lahitok ara iyo Moses ko Aaron. ⁵¹Manyu to la far bito iyauno Lahitok cio kulo Israel oleng to kof lo Ijipt to agwalahin kuneicieng ko imaniti kuneicieng.

¹Ojo Lahitok diho Moses, ²"Kikwerahi nan tee rei okangi fad. Kito ketemoni lo koceheri fad to Israel ara kunei; kode kulo cio kode kulo sang.³Tona ojo Moses diho cio, "iiunitati ene far, far na lifwonunore ite to kof lo Ijipt, to kof lo rahun opii. Tonyio kiyauno Lahitok ite tijia to kana nenge na igol. Kenya lobo tohi likukumi to ibula. ⁴Ele far ofa lo Aviv ifworo ite. ⁵Kolohiyauno Lahitok ite katua lo kof lo cio kulo Kanaan, Hitit, Amor, Hivi, ko Jebus - kof lafa locik inyi diho lohitwaha kuningi lo kicwara ite, kof na litihita lei ko otoro. Ijifata koditi lone tic iyo ene ofa.⁶To faritin mietare itonya mugati na lofuna oru ibula, manyu far lo mietare nenge ojir inyia karama na hitok diho Lahitok. ⁷Itinyia mugati kuna loru ibula to kuno faritin mietare ojir lobo tohi lo ibula ida ongon kiji ningi manyu ojir ibula ida ongoni lobo faji to katua lo lohikorihin kulo kof ningi.⁸Tona far torihohi kito nino ijo, "Atiyo nan ene to tohi na litii Lahitok to nan lafar lalotunore nan to kof lo Ijipt. ⁹Itongo mute ene kiiyo ara kitotori na lotora iyo kac kuningi ko kitiiunita na longon komoma kuningi jimitan ojir ene cik lo Lahitok ongon kutuhe kuningi. Tonyio kiyauno Lahitok ite to kof lo Ijipt to kana nenge na igol. ¹⁰Ojir ite iric ene cik iyo faritin kunenge kari ko kari.¹¹Langun lohiyauno Lahitok ite iyo kof lo cio kulo Kanaan manyu icio diho ite iya lafa locihare to kibutia iyo ite ko lohitwaha kuningi, ¹²ojir ite icio diho Lahitok kito ketemoni lo koceheri fad. Okangi kulo sang kuningi fad ara kulo Lahitok. ¹³Itilaha okang lo sigiriati to mongo lo ker, oto hati kalida isi itum kitilaha inyi, togil murut nenge. Itilaha tee rei okangi kunino fad.¹⁴Mute kude karihin kalitifia kito nino ojo, 'Nyio fotiri lone tenya?' torihohi inyi ijo, 'to kana nenge na igol kiyauno afa Lahitok ohoi to kof lo Ijipt, kof lo rahun opii. ¹⁵Afa kalitigol Parao kue oberu lahahino ohoi, ifade Lahitok okangi kulo cio ko kulo sang to kof lo Ijipt. Inyi ene licio nan acwara okangi kulo sang kunei fad manyu atilaha tee rei okangi kunei fad.' ¹⁶Manyu ori mute iya kitotori to kana nino ko kitiyenita to komom nino jimitan kiyauno Lahitok ohoi to kof lo Ijipt to kana nenge na igol."¹⁷Kololahahi Parao cio ofwo, ida Lobanga orik icieng ara kikoi lo kof lo Palestina kileng lorumu ara kikoi na isuk na. Ojo Lobanga, "Kaliriciti ko rem, ibeli cia kueci oitori iya kof lo Ijipt." ¹⁸Tona orik Lobanga cio lokorwonge ara kikoi lo kuny na loloro iya nam na Ido. Ofwo cio kulo Israel to Ijipt ara na likukumahinoti to rem.¹⁹Oyororo Moses koi kulo Josep tonyio orumu Josep licio cio kulo Israel ibuti, orumu inyi lojo, "Olotu mute Lobanga luaha ite, dong tinyia ojir ite iyaru koi kunei tone faji." ²⁰Langun lofwonuni to Sukos, ofwonu icieng ofik taban neicieng Etam, kalele lo kuny. ²¹To far olot Lahitok ketemoni neicieng to wiriti lo idis lo kitotorohino icieng kikoi, manyu ojo karue to wiriti lo kima lo kicwara icieng wangun ojir icieng olot to far kode karue. ²²Ida wiriti lo idis far kode wiriti lo kima karue ingohi faji nenge ketemoni lo cio.

¹Tinyia ojo Lahitok diho Moses, ²"Torihohi Israel ingohi ibeloti iya kifwongi ofihi taban onyiha ko Pi Hahiros, kiji lo Migdol ko nam isiran ko Baal Zepon. ³iiyo cia Parao ojo, 'ibunyita Israel katua lo mwang otimane ara na lolihi kuny.'⁴Manyu atigol cia nan tau lo Parao manyu otifuno cia inyi icieng. Ati arumu cia nan kwatun iyo ken nei to Parao ko karemok kunenge fad oto cia ko cio kulo Ijipt oyen jimitan nan Lahitok", manyu itii Israel iya na.'' ⁵Kolorihohini kabu lo Ijipt jimitan lifiri cio, ibel Parao ko kunahitoha kunenge kweci to icieng many ojimi, "Nyio kitii ohoi? Lohicio ohoi Israel ofwo kingotohi kirwa neicieng."⁶Tinyia icio inyi ikukumahini gadigadi nenge ko kiyaru karemok kunenge ko inyi. ⁷Iyaru inyi gadigadihin mia ile kuna lojiri ilany ara lobito ko gadigadihin kulakude kulo Ijipt fad, ko kabolohinok kuna lolanyu icieng. ⁸Itigol Lahitok tau lo Parao kabu lo Ijipt icio inyi otiforo Israel kuna lolotita iya ketemoni to golun lo taulo. ⁹Cio kulo Ijipt, lakwenyi kulo Parao fad ko gadigadihin, karemok to lakwenyi ko kuna lolot to kejuha ko kijifaru cio kulo Israel ofwo itihorori inyia logilahinore icieng taban neicieng kutuk lo nam onyiha ko Pi Hahiros na lisiran ko Baal Zepon.¹⁰Kolonyihu Parao, oting cio kulo Israel konyeha ko deunoti cio kulo Ijipt ofwonuno to omot neicieng. Obangi icieng ko kicirati iyo Lahitok. ¹¹Ojo icieng diho Moses, "Ara orumu to jimitan oru kwecerehin to kof lo Ijipt iyaunore isi ohoi weihino ene katua lo kuny? Nyio itii isi iyo ohoi to kiyauno ohoi to kof lo Ijipt? ¹²Ida afa ohoi lohirihohi isi to kof lo Ijipt kijo, "Kingohi ohoi kiruhi cio kulo Ijipt? Orumu ngociam diho ohoi kirwa cio kulo Ijipt ilany wei kunyhatua."¹³Inyiahahi Moses cio ojo, "Kebang, itiwoitati igoli ito cia ideu lwahuno na liyauno Lahitok diho ite elefar. Kuno cio kulo Ijipt lideya ite jijia, ida cia ite irihe ideu ari. ¹⁴Orem cia Lahitok to ite, owak ite iwoita igoli."¹⁵Tinyia ojo Lahitok diho Moses, "Nyio icira ite diho nan? Torihohi cio kulo Israel olot ketemoni. ¹⁶Toting iluk nino manyu to fete kana nino kai lo nam lo kora kifi ojir cio kulo Israel ofwo to katua lo nam to kof na itou. ¹⁷Atigol cia nan taulo kulo cio kulo Ijipt ojir ofwori ijifari icieng. Ato cia nan arumu kwatun to Parao ko karemok kunenge ko to gadigadihin kunenge ko karemok to lakwenyi. ¹⁸Oyen cia cio kulo Ijipt jimitan nan Lahitok kalarumu nan kwatun to Parao, gadigadihin kunenge ko karemok to lakwenyi.''¹⁹Oto Malaika lo Lobanga na lorumu olot ketemoni lo karemok kulo Israel ko iituno olo kifwongi neicieng. Oitu manyu wirita lo Idis to ketemoni iya kifwongi neicieng owoita, ²⁰ara na lolotu kiji lo karemok kulo Ijipt ko cio kulo Israel. Tona karue fad icio na idis wangun angati, mutohun angati. Icio icieng ida onyihahi kenite, tona oru lobo lonyihahi kaletoni tona karue fad.²¹Oto Moses ko fetaru kana nenge kai lo nam, oto na karue fad okor Lahitok nam to kiyoma lo ngati lo okangere na igol ibele ara kof na itou. Okora kifi are ²²ofwo Israel to katua lo nam to kof na itou ko lohitir lo kifi owoita ngati lo iteten ko ngati lo ikajong neicieng.²³Ijifaru cio kulo Ijipt icieng manyu ijife gadigadihin, lakwenyi ko karemok to lakwenyi katua lo nam. ²⁴To tomorong, odeya Lahitok to wiriti lo idis ko kima cio kulo Ijipt ko kitidaha icieng timan. ²⁵Itigorohi inyi kejuha kulo gadigadihin kuneicieng ojir itirumu icieng golun lo lotita. Tinyia ojo cio kulo Ijipt, "Ingafi ten iyo cio kulo Israel! Ongon Lahitok rem to icieng iyo cio kulo Ijipt.²⁶Tinyia ojo Lahitok diho Moses, "Tofete kana nino kai lo nam ojir kifi oite ibule cio kulo Ijipt ko gadigadihin kuneicieng ko karemok to lakweny." ²⁷Ofete Moses kana nenge kai lo nam manyu to kiwanyi oite nam faji nenge. Orumu cio kulo Ijipt ongon kifejaru iya tode ati inyiahahi Lahitok icieng katua lo nam. ²⁸Oite kifi imuhe gadigadihin, karemok to lakwenyi ko karemok kulo Parao kuna lijifaru cio kulo Israel katua lo nam fad. Oru lobo bito lofur.²⁹Ati ofwo Israel ara katua lo nam to kof na itou, ko lohitir lo kifi ngati lo iteten ko ngati lo ikajong neicieng. ³⁰La far, olwahu Lahitok Israel to kac kulo cio kulo Ijipt manyu odeu Israel karemok kulo Ijipt ogeto ibaloti loweiha kutuk lo nam. ³¹Dong kolodeu Israel golun lo kana lo Lahitok na litii kenite kulo cio kulo Ijipt, oto obangiti Lahitok ko fiha kigeno neicieng diho Inyi ko diho karwaani Nenge Moses.

¹Oto Moses ko cio kulo Israel owol ene wole diho Lahitok. “Awol cia nan diho Lahitok tonyio otul inyi ko lanyino lo deyo. Lakweny ko karwohitani Libirohi inyi katwa lo nam.²Lahitok lara golun nei ko karicani nei Lobotu inyi ara livahuno nei. Inyi Lobanga nei manyu amaj cia nan inyi Lobanga lo apa nei nanyu, otikwat cia nan inyi. ³Ara Lahitok Karemoni Lahitok karana nenge.⁴Gadigodihin kulo Parao ko karemok kunenge Libirohi inyi katwa lo nam Kulahitoha kulo Parao kuna lilany, Lokeroroti katwa lo nam na ido. ⁵Lodile kifi kuna ilukoho ilieng, Odoyori katwa lo nam iya moru.⁶Kana nino iteten Lahitok Monye lo golun ko kwatun Kana nino iteten Lahitok ⁷To bolorun lo Okabwe nino Iborihi isi kuna lohitipeha isi I cio isi awo nino nan inok Ocure icieng iya ingarum. ⁸To ofu lo kume nino Ifuroro kifi Owoita kifi obir iya lohitir Ifuroro kifi kiji lo kiluko lonam.⁹Oteny meroni to pufa ojo, “Afuharu cia nan icieng, atihoru cia nan icieng. Akor cia nan sangite kuna laruju; Amonere cia nan icieng. Asutu cia nan ngalem latubot nei manyu Okeru cia kana nei icieng.” ¹⁰Ati ikut isi to wirita nino Oto nam ko kimuhoro icieng Odiloroti nam katwa Iya iluk lolubang. ¹¹Ngai to kiji lo lobangahin Lohiri ko isi Lahitok? Ngai Lohiri ko isi iyo deyo ko nyijoro? Ihihirita kenite kulo cio iyo tohi nan litiyo isi, Itiyo isi sangite kuna litirima.¹²Ifete isi kana nino iteten, Kof ko diloro merok kunino. ¹³To kimaruno nino na lida icieng irik Cia isi cio kuna lilwahu isi to golun nino ikenge cia isi icieng Iya lomanyare nino na inyu.¹⁴Oning cia misihi ihihiritati; Inief cia irode cio kulo Pilistia. ¹⁵Ocolie cia taulo kulo kabuno kulo Edom Manyu inief cia kihihirita Kulahitoha Kulo Moab. Ocolaru cia cio kulo Kanaan olengi.¹⁶Inief cia bangun ko lokafikafi icieng. To golun lo kana nino ijiringa cia icieng iya morutok Many oring cio kunino Lahitok Many oring cio kuna Liyauno isi.¹⁷Iyauno cia isi icieng many itibulahi Donge lo lunyo nino. Faji na lingumu isi ara lomanyare nino Lahitok Lomanyare nino na inyu Lahitok na likukumahi kana nino. ¹⁸Olanyu Lahitok karihin ko karihin.''¹⁹Kaliculoro lakwengi, gadigadihin ko karemok to lokwenyi kulo Parao katwa lo nam, olahahi Lahitok kifi kulo nam oitu Odile icieng, ati ofwo Israel to katwa lo nam to kov na itou. ²⁰Oto Miriam Kamocani, kanece lo Aaron, ko dumuno ojati to kana nege manyu ijifahi ngorwo fad inyi ko ojahin to kac okiati. ²¹Owolohi Miriam icieng ene wole ojo, “Itowol diho Lahitok, Tonyio otul inyi ko lanyuno lo deyo. Lakweny ko karwohitani libirohi inyi katwa lo name.”²²Tinyia Moses Korihoro cio kulo Israel to nam na ido ko fworoti katwa lo kuny lo Sur. Oto icieng katwa lo kuny to faritin uni ida Orumuni kifi. ²³Kolofwonu icieng Mara, ida otumiti mata kifi kunenge tonyio orumu odwari inyi licio na faji obara Mara.²⁴Oto cio ko ngungunita ken lo Moses ojo, “Ojir ohoi kimat nyio?” ²⁵Moses Ko kicira diho Lahitok, oto Lahitok itotorohi inyi ingutit lo kete, ibirohi inyi na kete katwa lo kifi kifi kojiran to mata. Tijia icio Lahitok icieng cik ko tinyi teny kuna ngijifi manyu ko filia icieng iyo tema. ²⁶Ojo inyi, “Kalining ite otoc tenyia lo Lahitok Lobanga ningi many itii tohi na ibehi to ketem. Oni nenge, kaliric ite tenya nenge ko cihichi kunenge fad, ida ca nan ayouno diho ite kulafa jiohi jiohi layauno nan iyo cio kulo Ijipt, tonyio nan Lahitok na lahitifurio ite.”²⁷Tinyia ofwonu icieng Elim, faji na longoni ipulahi kulo kifi tomon ko are ko ogoroho keek mietare oto icieng ogil taban inyi kalele lo kifi.

¹Owoju cio kulo Israel fad to Elim ofwonuni kuny lo Sin na longon kiji lo Elim ko Sinai, to far tomon ko miet iyo ofa lo are to lofwonunore icieng to kov lo Ijipt. ²To kuny, ongungunita cio fad iyo Moses ko Aaron. ³Ojo cio kulo Israel diho icieng, “Ngara jia kiwei ohoi to kana lo LAHITOK kov lo Ijipt! Idi afa lohi tongore ohoi kirit motyong kulo tyang manyu kinya daha fad na lohiwak ohoi, ati iyauno ite ohoi ene kuny lo kifadaru ene ilulung fad to kinga.”⁴4 Lahitok ko jimitan iyo Moses, “Aticau cia nan tafa gati to kai diho ite. Ingohi cio tofworita to faritin fad inumi na lotumohino to la far. Ojir adeyare kolotum icieng kijifita cik nei kode ida. ⁵Far lo ile ojir icieng ikukum tohi na liyauno icieng ojir lo la far ara kakeny are ilany langun lo Lobito far.”⁶Tona ojo Moses ko Aaron diho cio kulo Israel ojo, “Ene kurou, iyen cia ite jimitan ara afa Lahitok loliyauno ite to kof lo Ijipt, ⁷manyu kiwanyi ideu cia ite deyo lo Lahitok tonyio loning ngungunita ningi iyo inyi. Kira ohoi nyio na ngingungunita ite ken ite kuniyang? ⁸Ojo manyu Moses, Iyen cia ite ijio ara afa LAHITOK kolohicio cia inyi ite tyang kurou ko tafa fad na liwak ite kiwonyi tonyio loning inyi ngungunita ningi iyo inyi. Nyio ohoi? Ida ite ingu ngunita iyo ohoi ati iyo Lahitok.⁹Tona Moses ko jimitan iyo Aaron, “Torihohi ilulung lo cio kulo Israel fad tijo, ifwonu ketemoni lo Lahitok tonyio loning inyi ngungunita ningi. ¹⁰Kolorihe Aaron otenya ko ilulung lo cio kulo Israel fad, ode icieng iya kuny ko deunoti deyo lo Lahitok oboto iyo idis. ¹¹Ojo Lahitok iyo Moses, ¹²“Laning nan ngungunita lo cio kulo Israel, Torihohi icieng tijio, “To doyoro lo kolong ikony cia ite tyang manyu kiwanyi ifut cia ite ko tafa tinyia iyen cia ite ijio nan Lahitok Lobanga ningi.”¹³Na kurou ofwonu aluruho imuhe kem manyu kiwanyi ipude lokolukolu kof kalele lo kem. ¹⁴Langun lojure lokolukolu, otong kude saye lori iya buru kulo kayam, kuna inyirimi iya otonge kulo lofalang oto hati irufahino kof lo kany. ¹⁵Kolodeu cio kulo Israel oto ojimi iyo kenite kune icieng ake ake, “Nyio inyi? Tonyio ida icieng oyen jimitan nyo inyi ojo Mose diho icieng, “Ara are tafa na lohicio Lahitok ite.¹⁶Tenya na locik Lahitok inyi ene, “Ojir tungani Lobito Lobito inuna na lotum iya na lowahare. Inumu itutumohi lokirie na ngotum cio kulo kem nino. ¹⁷Itii cio kulo Israel na lorihohi norehin icieng ifuru kude obolo kude isidi. ¹⁸Ati ojo otem inyi to lokirie, tungani na lifuru obolo ida manyu obolo no na lifuru isidi ida manyu isidi noo, ifuru icieng fad area na lotutum.¹⁹Oto Moses orihohi icieng ojo “Kecio lobo tungani ingohi lobo otong oget many kiwanyi. ²⁰Ati ida kude oning tenya lo Moses: ingolini lobo oget many kiwanyi, ati orumuni likuru liciak manyu ngwojun oto moses ilongojihi icieng. ²¹To kiwanyihin fad inumu tungani Lobito Lobito iya na lotumohino iyo icieng, ojo kolong obolo ocolie.²²To far lo ile inumu icieng na lotum kakeny are lokirehin are to tungani manyu ofwnu lohitwaha kulo iluhing orihohi diho Moses. ²³Ojo inyi diho icieng, “Tohi na locik Lahitok inyi ene, “Ara kiwanyi far lo Sabit lo kiyoma, Sabit na inyu iyo Lahitok. Tona itofun tohi na liwak ite funa manyu itoyer tohi na liwak year. Ikumahiti na lotong many kiwanyi.²⁴Dede ikumahi icieng otonge many kiwanyi iya na locihare Moses ati ida ongwo kode ikuru. ²⁵“Ojo Moses diho icieng, “Itinyia jiyia tonyio itongo ele far ara Sabit iyo Lahitok. Ida ite itum rumuno lobo ko enle far.²⁶26 To faritin ile ojir ite inum ati to far lo mitare Sabit oru lobo longon. ²⁷Ofwo kude to far lo mietare kinumo, ida orumahini lobo tohi.²⁸Tona ojo LAHITOK diho Moses, “Iberu cia ite kijifita tenya nei ko cihicihi kunei many anu? ²⁹Itofik taulo jimitan lohicio Lahitok ite Sabit inyi tohi licio kicio ite daha lo faritin are to kolongfar lo ile. Ojir tungani tolobito tolobito itongo faji na longon inyi far lo mitare, kecio lobo tungani orute oleng.” ³⁰Tona iyoma cio far lo mietare.³¹Ilolong cio kulo Israel na tafa ojo Manna. Okwe afa inyi iya kireja kulo kuro manyu olem mejo ibune na lofihi otoro katwa. ³²Ojo Moses, “Tohi na loteny Lahitok ene, “Itodumu lokirie Lobito lo manna ikamahi to kofiang kuna mute lofwono ojir icing odeu tafa na lahicio nan ite inyia to mwang lafa lahiyaunore nan ite to kov lo Ijipt.³³Tinyia ojo Moses diho Aaron, “Todumu moti biliet ifik lokirie Lobito lo manna katwa tofik ketemoni lo Lahitok oricahini kofiang kuna mute lofwonuno. ³⁴Iya na lorihohinore Lahitok Moses, ofik Aaron manna ko moruto kulo cihicihi kulo cik ojir oricahini. ³⁵Onya cio kulo Israel Manna to karihin keek Ongon many ogoruni ko na lomanya cio: Onyia icieng manna many ogoruni lohikorihin kulo kov lo Kanaan. ³⁶Ara afa lokirie na lotemarihin tonu Lobito iyo tomon lo sufia.

¹Owoju ilulung lo cio kulo Israel fad to kuny lo sin ara na lolotitati to faji iya faji iya idi locihare Lahitok. Ogilahi icieng kem Repidim ati orumu oru kifi kuna ngomat cio. ²Dong itingolof icieng Moses ojo, “Kicio ohoi kifi kulo mata.” Inyiahahi Moses icieng ojo, ‘Tonyio kitingolofa ite nan? Nyio ifiha ite Lahitok iyo tema? ³Ati orumu cio our kure lo kifi, manyu ongungunitati iyo Moses. Ojo icieng, “Nyio kiyauno isi ohoi to kov lo Ijipt lo kicwara ohoi ko tee kuniyang ko sang kuniyang kiwei ko kure⁴Oto Moses ko kilelia iyo Lahitok, Nyio ha ngatii nan ko kuno cio? Likukumahinoti locaha nan to morutok.” ⁵inyiahahi Lahitok ojo, “Ilo iya ketemoni lo cio, Iliha ko lohitwaha kulo Israel kude totek lafa iluk likohore isi nam lo Nail ito hati ilo. ⁶Iwoitacia nan iji ketemoni nino iyo tabak lo moru lo Horeb. Tobo tabak, oto cia kifi ofwonu omat cio.” Oto Mose itii jii to ketemoni lo lohitwaha kulo Israel. ⁷Hibarahi inyi na faji Moses a kode Meriba tonyio faji na litingolofare Israel inyi manyu tonyio ara faji na lotemarehin Lahitokojo, “Ongon Lahitok kiji niyang kode oru?⁸Ofwonu cio kulo Amalek kitiremo cio kulo Israel to Repidim. ⁹Ojo Moses diho Josua, “Tonyumu kude cio kuniyang ifwo rem ko cio kulo Amalek. Kiwanyi awoita cia nan kai lo donge ko iluk lo Lobanga to kana.” ¹⁰Dong orem Josua ko cio kulo Amalek iya na lorihohinare Moses, oto ono Moses, Aaron ko Hur ofwo kailo donge.¹¹Kaliwasihi Moses tingo kac kunenge kai, irumu Israel Ongon lanyuno rem ati Kalinyiahu inyi kac kof ara cio kulo Amalenk longon lanyuno. ¹²Longun loniamaha kac kulo Moses, odumu icieng moru itongore inyi. Oting oho Aaron ko Huiwasihi kac kunenge biran tingo kai many odoi kolong. ¹³Oto Josua ko Lanyuno cio kulo Amalek to ngale latubot.¹⁴Dong Lahitok ko jimitan diho Moses, “Igerohi ene tenya iyo buk ara kitiiunita manyu tode jimitan oningo Josua ene tenya, tonyio afufuse cia nan karana lo Amalek to fotiri lo kai.” ¹⁵Oto Moses oduhohi ciali ilolong ojo Lahitok inyi beru nei. ¹⁶Ojo inyi, Tonyio otingo afa kacia iyo seger lo okabwe lo Lahitok orem mote Lahitok ko cio kulo Amalek kiciaha iyo kafiang many iyo kofiang.”

¹Tona oning Jesero kadwarani lo Midian ara manyu komoni lo Moses sangite pili kuna litii Lobanga to Moses ko to cio kunenge Israel ko koditi na liyaunore Lahitok cio kulo Israel to kov lo Ijipt. ²Orumu afa Jesro komoni lo Moses ifotu kito nenge Zipora ngorwani lo Moses tona linyiaharore Moses inyi iyo apa nenge ³ko tee kunenge rei are. Obara orumu Lobito kito Geresom tonyio orumu Moses ojo, “Lara nan misiohoni to kof lo misiok.” ⁴manyu itibarahini lobito ojo, Eliezer tonyio ojo inyi, “Ara orumu Lobanga lo apa nei kalwahani nei, Kilwahu inyi nan iyo ngalau latubot lo Parao.''⁵Olotu Jesro komoni lo Moses ko tee kulo Moses ko ngorwani nenge iyo Moses mwangatare faji na lorumu inyi ogurohi kenra onyiha ko donge lo Lobanga. ⁶Orumu Jesro locule tenya diho inyi ojo, “Nan komoni lilo Jesro alotuno nan diho isi ko ngorwani nino ko tee rei kunenge are.”⁷Tona, olo Moses kitiricio komoni lenge, ogung kof ketemoni nenge, owoju imaruk inyi. Ofony icieng kenite ko rutoroti katwa lo kema. ⁸Itifimahi Lahitok dilio Parao ko cio kulo Ijipt to cio kulo Israel ko kidak pili na lorumu icieng to kikoi ko koditi na lolwahumore Lahitok icieng.⁹Okwama Jesro ningo sangite kuna ijiri fad kuna titii Lahitok iyo cio kulo Israel to lwahuno icieng to kac kulo cio kulo Ijipt. ¹⁰Ojo inyi, “Kwafun ongon diho Lahitok na lolilwahu isi to kana lo cio kulo Ijipt ko Parao ko lwahuno cio to kac kulo cio kulo Ijipt. ¹¹Iyia layen nan ajo ogal Lahitok ilany lobangahin kulakude fad tonyio itii inyi ene tic diho cio kuna litiyore cio kudo Israel to kitidara.¹²Tinyia iyaun Jesro komoni lo Moses kikumi locurat ko icoriti kunakude diho Lobanga manyu ofwonu oho Aaron ko lohitwaha kulo Israel fad ngara daha ko komoni lo Moses ketemoni lo Lobanga.¹³Kiwanyi nenge itongohino Moses iyo lokiho lo ngoto lo tenya lo cio, owoita icieng irit inyi many to kiwanyi many kurou. ¹⁴''Kolodeu komoni lenge tohi litiyo isi iyo kuno cio? Nyo arahare isi ake lira kangotoni lo tenya owoita cio kirit isi many to kiasanyi many kurou?''¹⁵Inyiahahi Moses inyi ojo, “Tonyio ofwonunita cio diho nan tahita wahun lo Lobanga. ¹⁶Kolongon ngolofa kiji neicieng angot nan tenya neicieng manyu asingahi icieng cihi cichi kulo Lobanga ko tenyi tenyi kunenge.¹⁷Inyiahahi komoni lo Moses ojo, “Ida na tohi litiyo isi ojir.” ¹⁸Kitiniama ene tic isi ko kuno cio lofwanunita iyo isis irioci ene tic noo iyo isi ida isi itumtehita ake. ¹⁹Toning dong tenya nei ahici isis lobo kisinga manyu ingohi Lobanga kingon ko isi. Ojir isi ira kawoitahinoni lo kuno cio iyo Lobanga na liyaunita tenyi tenyi kuneicieng diho inyi. ²⁰Itiye na icieng cihi cihi kunenge ko isingiti manyu itotorohi icieng koditi na ngowarare icieng ko manya neicieng.²¹Ati tonyumu cio kuna igoli to kiji lo cio fad, cio kuna Lobanga Lobanga, cio kuna ligenoro kuna lida otahita bara to kitumumuna, tofik icieng ara cio karihitak kulo cio cilif Lobito mia Lobito, keek miet ko tomon. ²²Ingohi icieng tara kangotok kulo tenyi tenyi kiji lo cio faritin fad ati ingohi icieng iyaunita tenyi tenyi kuna igoli diho isi, kuna itatwahi icieng okeru to kenite kuneicieng. Icio cia na tic nino otawak tonyio kingar cia icieng tic ko isi. ²³Kalitii isi jii manyu iya na lowahare Lobanga, ito cia isi ilanyu cuna manyu ofwo cia kuno cio fad kangite to kwama.''²⁴Oning Moses tenya lo komoni lenge manyu iti sangite fad iya na lotenyare inyi. ²⁵Onyum inyi cio kuna igoli to kiji lo cio kulo Israel fad ofik icieng ara kulahitoha kula lolanyu cio alif Lobito, mia Lobito, keek miet ko cio tomon. ²⁶Itiyo icieng ara kongotok kulo tenyi tenyi kiji lo cio to faritirifad tenyi tenyi kuna igoli iyauno icieng iyo Moses ati kuna itawahi okeru icieng to kenite kuneicieng. ²⁷Dong iniamahi Moses komoni lenge, manyu oite Jesro iya kov nenge.

¹To far lo Lobito iyo ofa lo uni lo fwonuno lo cio kulo Israel to kov lo Ijipt, iyo inyi la far bito ofwonu icieng iyo kung lo Sinai. ²Langun lowgu icieng to Repidim, orutohi icieng kuny lo Sinai ete cio kulo Israel ko gurohino kema ijia kuny gum lo donge lo Sinai.³Oto Moses irwok diho Lobanga manyu ilolong Lahitok inyi to kai lo donge ko jimitan, “Tohi na lojir isi iteny iyo lotataha kulo Jakob inyi ene, na lojir isi irihohi cio kulo Israel. ⁴Lideu ite to kenite kuningi tohi na latii nan iyo kov lo Ijipt ko koditi na lahitingunore nan ite to fuho kulo logiga ahiyauno ite diho nan. ⁵Dong kaliningo ite nan otoc manyu iric ciha nei ito cia ite to misihi dot ira bara lo tau nei. Kileng lara kov fad nei ⁶ito cia ite ira diho nan okabwe lo kadwarak manyu misi na inyu. “Tenyi tenyi kuno kuna lojir isi irihohi cio kulo Israel.”⁷Oite Moses olo otubahi lohitwaha kulo cio ko rihohino ketemoni neicieng tenyi tenyi pili kuna locik Lahitok inyi ojo ojir oteny. ⁸inyiahahi cio ara Lobito ojo, “kitii cia ohoi sangite fad kuna loteny Lahitok. Dong iyauno Moses tenya na linyaiahu icieng diho Lahitok. ⁹Ojo Lahitok diho Moses, “Alotunoi nan diho ite iya idis na hitok, ojir cio oning nan ahititenya isi ojir ofihi kigeno neicieng ken nino tiktik. “Tinyia orihohi Moses Lahitok tohi na loteny cio.¹⁰Manyu ojo Lahitok iyo Moses, Ilo diho cio itinyujo icieng ele far ko kiwanyi. Ingohi ilali kyelani kuneicieng ¹¹manyu ikukumahinoti to far lo uni tonyio la far olotu cia Lahitok iculuno kai lo donge lo Sinai odeya cio fad.¹²Tofik lohikorihin gum lo donge to cio manyu torihohi icieng ijo, “Itogeny ida lobo olo onyiha ko donge kode otir fotiri nenge. Tungani na lotir donge ojir ifadari. ¹³Ojir ocahi to morutok kode ongori to ngonecio kulo kawo; ojir ida otiri to kana. Oru lobo tungani kode tyang longerihini owar.” Many kolokuti muriak lo ker icir tektek inyiha cio ofwo onyiha ko donge.''¹⁴Longun licuhuno Moses to kai lo donge ko iyo cio, itinyu inyi icieng manyu ilal icieng kiyelani kuneicieng. ¹⁵Oto inyi ko jimitan iyo cio, “Ikukumahinoti to far lo uni. Ingohiti kilihita ko ngorwo iyo geto.¹⁶To kiwanyi lo far lo uni itirita manyu imedek hila ko idis na imutok kai lo donge ko ture na ikwat noo. Ihihirita cio dot to katwa lo kem. ¹⁷Oto Moses orihoro cio to katwa lo kem lo fworo kirico ko Lobanga, manyu ofwo icieng owoitati fotiri lo donge. ¹⁸Ipude furo donge lo Sinai tonyio icuhino Lobanga kai nenge to kima. Ofuru kima to kai lo donge iya furo lo furnuk manyu itinienienga donge fad noo.¹⁹Kolosodoro kwatun lo ture bebe, otenya Moses manyu itifot ogoro lo Lobanga tenya nenge. ²⁰Iculuno Lahitok kai lo donge lo Sinai manyu ilolonge Moses iya kai lo donge. Dong olo Moses kai ²¹manyu ojo Lahitok diho inyi, “Iculoro kof ilo to cik cio jimitan kefuduno iya ene longonore Lahitok ida beciek kuneicieng okeroro, ²²Kileng kadwarak kuna lonyihahi Lahitok ojir re itinyuji kenite kde otum Lahitok kiburahino icieng.”²³23 Ojo Moses diho Lahitok, “Ida cio otum fwonuno kai lo donge lo Sinai tonyio isi token nino licik ohoi ijio, “Itifik lolukorihin irit donge, ikore inyi ake ara na inyu.” ²⁴Inyiahahi Lahitokinyi ojo, “Iculoro ifwo ilihutu ko Aaron kai. Ati kecio kadwarak ko cio ifuduno kai diho Lahitok tenyio ojir inyi ida iburahino icieng. ²⁵Dong iculoro Moses diho cio olo orihohi icieng.

¹Manyu oteny Lobanga kuno tenyi tenyi fad: ²Nan Lahitok Lobanga nino na lohiyauno isi to kov lo Ijipt, to kov lo lahun opii. ³Ketek Lobanga lobo na lake ko nan.⁴Ojir ida igat kode iduk lopidinga lo lobo lohi to kai kode to kov kode to katwa lo kifi. ⁵Kegung kov ketemoki kuneicieng kewor icieng tonyio nan Lahitok Lobanga nino, Lobanga na likaino, afiha kidak iyo tee to kipalpali kulo fafaicio kuneicieng many iyo koficingiti lo uni ko lo ongon lo cio kuna lohiberu nan, ⁶ati atotoro kumaruno nei iyo kofiang alif lo cio kuna lohimaru nan kuna lorica cihi chihi kunei.⁷Kelet karana lo Lahitok Lobanga nino arus, tonyio ida cia tungani na lisongare karana lo Lahitok ingohi.⁸Iiunita far lo sabit to rica inyi ara na inyu. ⁹To faritin ile itiyo tici tici kunino fad ¹⁰ati ara far lo mietare sabit lo Lahitok Lobanga nino. Iyo na far ketii lobo tic, kode isi kode kito nino retoni, kode kito karioni nino, kode karwaani nino retoni kode ngorwani, kode mongo kode sigiria kode misiohoni na lomanya taya ningi. ¹¹Tonyio to faritin ile ofik Lahitok kai ko kov, nam ko sangite fad kuno longoni katwa ati iyoma iyo far lo mietare. Tona igatahi Lahitok far lo mietare itinyu inyi.¹²Tobang apa nino ko iyang nino ojir irung manya ko na lohicwara Lahitok Lobanga nino isi. ¹³Kefade tungani. ¹⁴Ketii lomuna.¹⁵Kekoko. ¹⁶Kegulihi tenya lo talerun ken lo loryehat nino. ¹⁷Kedam kaji lo loryehat nino, kedam ngorwani lo loryehat nino kode karwaani nenge retoni kode ngorwani, kode mongo, sigiria kode lobotohi lara lo loryehat nino.”¹⁸Kolodeu cio kigurita ko kimedek lo hila, manyu oningi kwatun lo ture manyu odeuni furita lo donge, ihihiritati to bangun. Owoitati to faji na iloma ¹⁹manyu ojimi iyo moses, “Kitenya isi to ken nino ko ohoi kining cia ohoi. Ait kecio Lobanga kitenya ko ohoi kode kiwei cia ohoi. ²⁰Ojo Moses iyo cio, “Kebang Olotu Lobanga tema ite ojir bangun lo Lobanga iwasihi taulo kuningi ojir kitik ite kipal. ²¹Iwasihi cio woita lolomaje ko loloro Moses iyo mutohun na lorumu Lobanga ongon ijia.²²Tinyia ojo Lahitok dilio Moses, “Torihohi cio kulo Israel ene tenya ijio, “Lideu ite to kenite kuningi jimita latenya nan ko ite to kai: ²³keduk lobo lobanga kitisiranahi ko nan; kekukum lobangahin kulo rial kode lobangahin kulo dahab.²⁴“Ikukumahiti ciali to lokulufi iyo nan ifejohi kicioriti kuningi ko kiciorit kulo Kimora, kiri, kera ko kicu. Faji na mute lafik nan obangarihin karana nei alotu cia nan diho ite ahigatahi ite gum. ²⁵Kalikukuma ciali nei to moruto, kekukum to moruto kuna likefi tonyio ipale cia ite kuna Moruto kalikef ite to sangite kulo tic kuna lara bilieta. ²⁶Manyu kefwo iyo ciali nei to lohirwohi tonyio itiboro kenite kuningi iyo nan.''

¹"Ara kuno cihicihi kuna lojir isi ifik ketemoni neicieng:²Kaliyiangu isi Iburuni kaletoni nino ara karwaani ojir kirwa isi to karihin ile, ati to kari lo mietare ojir inyi olaharu na lida odum ko lobo tohi. ³Kololotu afa inyi ake ojir manyu olaharu ake, ati kololotu afa inyi ko ngorwani ojir manyu olaharu ko ngorwani nenge. ⁴Kalitiyemahi afa Lahitok nenge inyi ngorwani na lotomonohi inyi tee rei kode kariok, ara na ngorwani ko tee kunenge kulo Lahitok nenge ojir la tungani olaharu olo ake.⁵Ati kolojo na karwaani, "Amaru nan Lahitoklei ko ngorwani nei ko tee kunei, tona ida nan awak laharu", ⁶tona ojir Lahitok nenge iyaru inyi ketemoni lo kangotok kulo tenya. Ojir inyi iyaru na karwaani agwala kode iyo bau lo agwala otul kiyok nenge to ngone. Oto cia inyi ara karwaani nenge tur.⁷Kalitilote tungani kito karioni nenge ara karwaani, ojir inyi ida olaharu iya na litiyore karwaak rei. ⁸Kalida inyi itikwama Lahitok nenge na lonyumu inyi ara nenge, ojir inyi iruk itilahi inyi. Ida inyi ongon ko twero lo kitilotoro inyi iyo misiohoni, tonyio litinonong inyi na kito arus.⁹Kolonyumu inyi inyi ara lo kito nenge, ojir inyi icio inyi rima ara kokwa. ¹⁰Koloyem kito nenge lobo ngorwani ake, ojir ida ongony ene ngorwani ketemoni daha, kyelani ko obolore lo yemaru nenge. ¹¹Kalida inyi icwara inyi kuno sangite uni, ojir inyi olaharu na loru ko lobo kidumi lo robia.¹²Tungani na lobok kaletoni ifade, ojir ifadari. ¹³Ati kalida itii ara lo atii ati icio Lobanga itiihino, ojir inyi ife iya faji na cia lanyumu nan. ¹⁴Ati kalikukum tungani oto hati ifade kaletoni ara lo atii, ojir na tungani ipihori to ciali nei ofwori ifadari.¹⁵Tungani na litibak apa nenge kode iyang nenge, ojir na tungani ifadari. ¹⁶Tungani na liduhe tungani, ojir ifadari kileng ngorumu inyi litilote na tungani kode orihe ongon kana nenge. ¹⁷Tungani na lific apa nenge kode iyang nenge, ojir na tungani ifadari.¹⁸Kolongolofa cio oto hati lobito tungani obok kaletoni to moru kode to kana oto hati na lobohi ida owei ati ogeto logetore, ¹⁹ida cia itifurati kabohoni kolowoju na tungani itehita to col oleng ati ojir kapalani odum faritin kuna lipale la tungani liriafuni manyu ojir itimwai na tungani liriafu inyi many ofurie tur.²⁰Tungani na lobok karwaani nenge retoni kode ngorwani to iluk ifade, ojir itigemi. ²¹Ati ojir ida itigemi inyi kalofurie na ngorwani to far lobito kode to faritin are tonyio ara na karwaani nenge.²²Kolobaha cio oto hati obohi ngorwani na lifonga icio inyi otomon orihe faritin kunenge ida hati iriafaru noo, ojir kariafunoni odum tohi na longot retoni lo na ngorwani na manyu liruk lokiho. ²³Ati kolobolo okiriafe nenge ojir idum warun to warun, ²⁴konyek to konyek, kale to kale, kana to kana, keju to keju, ²⁵madati to madati, korongani to korongani, pota to pota.²⁶Monye lo karwaani na lobok karwaani nenge retoni kode ngorwani otoj konyek nenge, ojir olahahi na karwaani olo ara kidumita lona konyek. ²⁷Manyu monye lo karwaani na lobok karwaani nenge retoni kode ngorwani ogile kale ojir olahahi na karwaani olo ara kidumita lona kale nenge.²⁸Kalogum mongo tungani retoni kode ngorwani owei, ojir ocahi na mongo to morutok ifadari manyu ojir ida onyai tyang nenge. Ati ida otumiti kitiduma monye lo mongo. ²⁹Ati kologumitita na mongo cio manyu orihohini monye ida hati inyi otor mongo nenge oto hati ifade tungani retoni kode ngorwani, ojir ocahi na mongo to morutok ifadari monye manyu ifadari. ³⁰Ati kolowahiti kidumi, otum monye kitilahuno ken nenge to duma tohi na lowahiti.³¹Itiyo manyu ene cik bito kologum mongo kito retoni kode karioni. ³²Kalogum mongo opii retoni kode ngorwani, ojir monye odumahi sekeli kulo rial keek uni iyo monye lo na opiini, manyu na mongo ojir ocahi ifadari.³³Kolokut tungani kode obok tula ida hati imuk oto hati mongo kode sigiria ouroro katua, ³⁴ojir kabohani lo tula odum monye lona mongo inyi iyaru na mongo iwei ara nenge³⁵Kaliriafu mongo lo lobo tungani mongo lo kaletoni owei, ojir icieng monyeri are fad itilote mongo na iwar manyu okori robia ko na mongo iwei ara na iriworo. ³⁶Ati kolorumu oyeniti jimitan ogumitita na mongo kaletok manyu oyen monye ida hati otor, ojir monye odum mongo to mongo inyi iyaru na iwei ara nenge.

¹Tungani na lokokole mongo kode ker olo ongot, kode itilote ojir odum kicu miet to mongo kode kera ongon to ker. ²Kalorumuni kakokoni otema gila agwala lo tungani karue oto hati obohi owei, ida monye lokang ipal. ³Ati kalitiihino orumu kolong lotulu ara na kipal iyo monye lo kang. Kakokoni na liniefuni ojir odum na tohi lokokolu inyi, ati koloru kidumita diho inyi, ojir itilotori inyi odumarihin na koko nenge. ⁴Kolorumuni na tohi lokokolu inyi orihe owar to kana nenge; kode mongo kode sigiria kode ker ojir odum idodu kakeny are.⁵Kalitidaha lobo tungani sang mana kode vinore oto hati ongerihi ofwo mana kode vinore lo lobo tungani ake, ojir monye lo sang odumahi monye lo mana kode vinore mana nenge kode vinore nenge na ijir noo.⁶Kaliciak kima cura oto hati odaharu timitimi oringe olo ocur ngamang to kilongoni kode ngamang kuna lorihe owoita mana, ojir kacurani lo kima oduma.⁷Kalicio lobo tungani loryehat nenge rial kode dahab ojo ojir oricahi oto hati okokolari to kaji lo loryehat nenge, kaliniefuni na kakokoni ojir odum irwat kakeny are. ⁸Ati kalida kakokoni orumuno, ojir monye lo kaji olo ketemoni lo kangotok kulo tenya ojir icieng ode kalara monye lo kaji lodume tohi lo kaletoni. ⁹Iyo tenyitenyi kulo sangite kuna lori iya mongo, sigiria, ker, kyela kode lobo tohi keken lori na lolotu tungani ojo, "Ara ene nei" ojir kuna cio fad are iyauno tenya neicieng ketemoni lo kangotok kulo tenya. Na lorumu kangotok kulo tenya ojo ipal, ojir odum irwat kakeny are iyo lu bito.¹⁰Kalitibarahi tungani sigiria kode mongo, kode ker nenge iyo loryehat oto hati owei, kode iriafuni kode okokolari ida tungani odeu, ¹¹otum tenya kiji neicieng keruno to kibutia ketemoni lo Lobanga jimitan ida loryehat lofik kana iyo tohi lo kaletoni. Ojir monye lo tohi iruhohi, manyu oru lobo kidumi lowahiti. ¹²Ati kolokokolari na tohi iyo loryehat, ojir odumahini monye tohi nenge. ¹³Kalara tyang na ingere lokony, ojir kabarani iyauno otonge kuna lokonyare tyang lo mwang lo kitotoro ojir lobo kidumi iyo monye oru.¹⁴Kalilifu tungani mongo, kode kine, kode ker iyo loryehat nenge oto hati na tohi iriafuni kode owei oru monye, ojir odumi. ¹⁵Ati kolongon monye inyia ida cia kalifunoni oduma, koligomahini monye kude sangite ojir itiyorihin tohi nenge, otum na kigoma odum inyi.¹⁶Kalitinonong tungani kito karioni na lorihe ida lisufi iyau inyi, ojir icio sang kulo kiyemi ojir na kito ara ngorwani nenge tur. ¹⁷Koloberu apa lo kito kicwara inyi kito nenge, orihe cie owak inyi icio sang kulo duma lo kito karioni na lorihe ida lisufi.¹⁸kecio ngorwani kamomolani owar. ¹⁹Tungani na logetore tyang ojir ifadari.²⁰Tungani na licio kiciorita iyo lobo lobanga ake ida ara Lahitokojir ifadari. ²¹Keyeyel kode itii misiok ara na irohori tonyio ira afa ite misiok to kof lo Ijipt.²²Ketimumun lafuserito kode okidahi. ²³Kalitii isi jii oto hati icieng icira, aning cia nan kicira neicieng. ²⁴Ato cia nan alongo ahifade ite to ngalem latubot oto cia ngorwo kuningi manyu ara lafuseritohin ko tee kuningi ara okidahi.²⁵Kalitidenohi isi robia iyo lobo tungani to kiji lo cio kunei na ikidak, kefik mejo tujar, kititomonohi kueci. ²⁶Kaliniefe isi kyela lo loryehat nino ara kigangi lo mongiyo inyiahahita inyi kurou ²⁷tonyio ara na kyela kimuhi lobito hilong iyo loryehat nino. Nyio cia lobo tohi ngimuhore inyi kologeto? Kalicira icieng diho nan, aning cia nan tonyio abolo nan ko kisa.²⁸Kemor Lobanga manyu kefic kalanyunoni lo cio kuningi.²⁹Kegolore kiciorita to derona kuningi kode vino ko ngoroni na lingonore ite. Ojir ite kicio nan tee okangi kuningi. ³⁰Itiyoto na tohi bito to okangi kulo sang; kicu, kera, ko kiri kuningi. Icwara itongoti ko ngotengeri to faritin mietare ati iyaunoti iyo nan to far lo mietauni. ³¹Itira cio kunei kuna inyuji. Tona kekony tyang lo tohi na lokony tyang na ingere lo mwang, ibirohiti ikurieho.

¹Ketikwat tenyitenyi kulo talerun. Kesisi tungani kapalani to kisaden to tenyitenyi loguliati. ²Kejif ilulung iyo kitiyo tohi na irohoi. Kalicwara isi tenya lo kisaden to lokiho kejif ilulung iyo kudo lo tenya na ibir ³manyu kesisi tungani na ikidak to lokiho.⁴Kalilufu isi mongo kode sigiria lo meroni nino orijoro, tode jimitan inyiahe iyo monye. ⁵Kalideu isi sigiria lo tungani na lohiberu isi ourohino orubuk ko ter, kengohi jii, tode jimitan ojir ilwak kitiwojuno inyi.⁶Kengony cio kunino to tenya lo dede iyo lokiho neicieng. ⁷Ketiyore kidoro lo talerun manyu kecio ifadari tungani na lida ipal kode na ligenoro, tonyio ida cia nan alahahi kapalani. ⁸Keruk kidumi lokof lokof tonyio itingodo na kidumi kadeyak manyu itihaluto tenya lo tungani na lida ipal. ⁹Ketigema misiok, iyen ite to kenite kuningi mejun lo rahun misiohoni tonyio ira afa ite misiok to kof lo Ijipt.¹⁰To karihin ile ojir ite iremo manatak kuningi idengo manyu daha, ¹¹ati iyo kari lo mietare, ingohiti kof toget ida oremi ida manyu itiyorihin. Ojir kakidahak to kiji lo cio kuningi orumu daha iyo cefat ojir manyu tyangi kulo mwang onyia otonge. Itiyoto manyu jii to manatak kulo vino ko cianitok kulo ngoroni.¹²Itiyoti ticitici kuningi to faritin ile ati to far lo mietare ketii lobo tic, ojir manyu mongo nino ko sigiria iyoma, manyu ojir opii na lotomonohini kaji nino ko misiohoni na lomanya kiji ningi orumunore golun lo kenite kuneicieng. ¹³Iniefata kuno tenyitenyi lateny nan diho ite fad. Keleleto karanacio kulo kude lobangahin , kecio icieng oninguno to kutuhe kuningi.¹⁴Kakeny uni iyo kari ojir itii kikwera iyo nan. ¹⁵Itonyia kwer lo mugati kuna loru ibula. To faritin mietare itinyia mugati kuna loru ibula iya na afa lacihare nan ite. Itiyoti ene iyo far na ibehi iyo ofa lo Aviv, tonyio iyo na ofa afa ifwonunore ite to kof lo Ijipt. Kecio lobo tungani olotu ketemoni nei to kac.¹⁶Itinyia kwer lo dengo to ketemok kulo dahidahi kuna liihi ite manatak kuningi. Itinyia manyu kwer lo tubuno daha derona kuningi to lohicungi lo kari langun litubu ite to manahatua fad. ¹⁷Kakeny uni iyo kari ojir cio rei pili otubuno ketemoni lo Lahitokna lolanyu.¹⁸Kefotohiti nan okoto lo kikumi na limora ko tohi na litii to ibula. Ojir ida ingohini somia lo kikumi na liyauni iyo nan oget many kiwanyi. ¹⁹Iyaunoti sangite kuna longiju to kof ningi kuna ifiri ilany katua lo kaji lo Lobanga. Keyer kilelo to lei kulo ngotenge.²⁰Tode acularu nan Malaika ketemoni ningi lo kitotoro ite kikoi lo kiyauno ite faji na lakukumahi nan. ²¹Itoric tenya nenge manyu itoning tohi na loteny inyi. Kesil diho inyi, ida cia inyi olau silan ningi tonyio ongon karana nei ken nenge. ²²Kalining ite tohi na loteny inyi otoc manyu itii sangite fad kuna lateny nan, ara cia nan meroni lo merok kuningi manyu atirem cia nan katiremok kuningi.²³Olo cia Malaika nei ketemoni ningi many kiyauno ite kof lo cio kulo Amor, Hitit, Perez, Kanaan, Hivi ko Jebus, manyu afie cia nan icieng oleng. ²⁴Kegung ketemoni lo lobangahin kuneicieng kode iwor icieng kode ijif ticitici kuneicieng. Ojir ite igil icieng manyu ibor kuna morutok liwora icieng tinytiny. ²⁵Iworati LahitokLobanga ningi oto cia icio gum iyo daha ko kifi kuningi. Adume cia nan mwaita to kiji ningi.²⁶Manyu oru cia ngorwo kuna lobuta tee kode ikorifi to kof ningi. Ahicio cia nan ite warun na ifut. ²⁷Acule cia nan irode nei ketemoni ningi itibahas kueci kulo misiok fad kuna lirumu ite. Acio cia nan merok kuningi fad ife kibelihi ite korwonga. ²⁸Acule cia nan lokafikafi ketemoni ningi ifuhe cio kulo Hivi, Kanaan ko Hitit to kikoi ningi. ²⁹Ati ida cia nan afuk icieng to kari lobito, tonyio oto cia kof imura manyu ofwonu tyangi kulo mwang kiborengohi ite.³⁰Afuk cia nan icieng to ketemoni ningi to lobo sidi to lobo sidi many ifwonu ite iborengi itum kiniefa kof fad. ³¹Afik cia nan lohikorihin kuningi many to nam na Ido many nam lo Mediterenian, ko many to kuny many kare lo Euparets. Acio cia nan cio kuna lomanya na kof kac kuningi manyu ifuhe cia ite icieng to ketemoni ningi. ³²Kefik yomo ko icieng kode ko lobangahin kuneicieng. ³³Kengerihi icieng omanya kof ningi tonyio kicio cia icieng ite ipal diho nan, tonyio itongo cia kiwora lo lobangahin kuneicieng ara owic diho ite.''

¹Tinyia ojo Lahitokdiho Moses, "Ou diho Lahitok, isi ko Aaron, Nadab ko Abiu ko lohitwaha kulo Israel keek mietare. Ojir ite iwora lolomaje ²ati Moses ake loringu diho Lahitokojir kulakude cio ida ofwonu onyihu. Manyu ojir cio ida ilihu ko inyi."³Ko lolo Moses orihohi cio tenyitenyi kulo Lahitokfad ko cihicihi kunenge, inyiahahi icieng to ogoro lobito ojo, "Sangite fad kuna loteny Lahitok, kitii cia ohoi." ⁴Oto Moses ko kigero sangite fad kuna loteny Lahitok. Owoju inyi berien kiwanyi nenge ko duhohino ciali fotiri lo donge ko kicidohino morutok tomon ko are kuna lowoita to imaniti tomon ko are kulo Israel.⁵Oto inyi ko cularu tee kilahaji kulo Israel ofwo icieng ifotohi kiciorita locurati ko kicwara mongi kuna lorihe ongarihi ara kiciorita kulo kimora diho Lahitok. ⁶Odumu Moses nusu lo okoto ofik iyo ilebuha, odumu nusu na lotong orwacahi iyo ciali.⁷Oto inyi ko dumuno buk lo ciharu ikenahi diho cio. Inyiahahi icieng ojo, "Kitii cia ohoi sangite fad kuna loteny Lahitok, kining cia ohoi." ⁸Oto Moses ko dumuno okoto orwacare cio ko jimitan, "Ara ene okoto lo ciharu na lofik Lahitokko ite iya na longonore iyo kuno tenyitenyi fad."⁹Oto Moses, Aaron, Nadab, Abiu, ko kuna lohitwaha kulo Israel keek mietare ofwo kai ¹⁰ko deya Lobanga lo Israel. To lonyonare lo kejuha kunenge ongon lobo tohi lofeta iyo tabak lo moru na imedek ifurang iya kai to ken. ¹¹Ati ida Lobanga oting kana lo kifada kuno lohitwaha kulo Israel, odeu icieng Lobanga odahati manyu omatati.¹²Ojo Lahitokdiho Moses, "Ou ene diho nan kai lo donge manyu itongo ene ato cia nan ahicio isi morutok kuna ligero cik ko cihicihi ara kulo kiteyena icieng." ¹³Tinyia olo moses ko kajifitani nenge Joshua, oto Moses irwok kai lo donge lo Lobanga.¹⁴Ojo inyi iyo lohitwaha, "Itongoti ene kitila ohoi many kiitu ohoi diho ite. Ongon Aaron ko Hur ko ite, kolongon lobo tungani ko tenya otum olo diho icieng. ¹⁵Ko lolo Moses kai lo donge, imuhe idis donge.¹⁶oto kimedek lo Lahitokko kitongo kai lo donge lo Sinai. To faritin ile imuhe idis donge ojo far lo mietare ilolong LahitokMoses to katua lo idis. ¹⁷Diho cio kulo Israel oboto kimedek lo Lahitokori mejo kima na locura okeru to kai lo donge. ¹⁸Oto Moses orute iyo idis kololoro inyi kai lo donge, manyu itong inyi kai lo donge faritin keek ongon ko karuehin keek ongon.

¹Ojo Lahitokdiho Moses, ²"Torihohi cio kulo Israel iyauno kiciorita diho nan. Ojir isi ilifu kiciorita kunei iyo tungani na lorihohi tau nenge inyi kicwara.³Ara kuno kiciorita kuna lojir isi ilifu diho icieng: dahab, rial ko mwala; ⁴usi na ifurang, na imalang ko na idorie ko kyela iribi; Ko fofi kulo kiri ⁵kyelani kulo mongi kulo kera ko koditi lo lobo kiyeni isisik, bau lo ciani lyerati; ⁶ngoroni lo lomo, ko cianitok kuna iuri kuna likarutorihin ngoroni kitweita ko longorlehin ko iheru: ⁷ko moru oniks ko morutok kuna imedehi kunakude kuna lojir odwanyahini iyo kyela epod ko ogogor lo locolo.⁸Ingohi manyu icieng ikukumahi lohitongore nei na inyu kiji neicieng ato cia nan amanya kiji neicieng. ⁹Ikukumata na lomanyare inyu ko sangite kuna longoni katua itiririhi ko na lahitotorohino nan isi token.¹⁰Ingohi togatuni sanduk iyo bau lo ciani lyerati na lara karitun nenge futi ongon, lalatun nenge futi are ko woita nenge futi are. ¹¹Itodwany katua ko oleng fad to dahab na locoli manyu ifik lohileleri lo dahab kutuk nenge iric.¹²Itoculu oguli ongon itiryehahi ko kejuha kunenge, oguli are lobito ngati are manyu lobito ngati. ¹³Itogatu keyek kitingihin are iyo ciani lyerati idwany kenite kuneicieng to dahab. ¹⁴Itirutohiti kuna keyek kitingihin iyo oguli kuna loryeha ko kejuha otingororehin sanduk.¹⁵Ojir kuna keyek kitingihin iwasihi iyo oguli ida outoritati oleng. ¹⁶Ito hati ifik morutok kulo cihicihi kuna cia lahicwara nan isi katua lona sanduk. ¹⁷Ikukumata kimuhi lo kisa to dahab na ilihinya na lara karitan nenge futi ongon ko lalatun nenge futi are. ¹⁸Manyu ikukuma cerubihin are to dahab na lidonguni ifihahi lohicungihin kulo na kimuhi.¹⁹Tofik lobito cerubi lohicungi lobito lo kimuhi, lobito manyu lohicungi lobito. Ingohi kuna cerubihin ikukumuni ara lobito ko kimuhi iyo lohicungihin. ²⁰Ojir fuho kulo cerubihin otingo ofeta iya kai imuk kimuhi. Ojir cerubihin odeya kenite otany iyo kimuhi. ²¹Tofik na kimuhi kue lo sanduk orumu lifik katua lo sanduk morutok kuna ligero cihicihi ijia kuna cia lahicio nan isi.²²Inyia kue lona kimuhi kiji lo cerubihin kuna longon kai lo sanduk lo cik, kiric cia nan ko isi manyu ahicio isi cihicihi kunei fad to cio kulo Israel.²³Ikukumuti meja to bau lo ciani lyerati na lara karitun nenge futi uni, lalatun nenge futi lobito ko nusu ko woita nenge futi are. ²⁴Itodwany ken nenge to dahab na locoli manyu ifik lohileleri kalele nenge iric.²⁵Tofik itadit nenge na lotum rijon ko tadati lo kana manyu ifik lohileleri lo dahab iyo itadit nenge. ²⁶Ikukumu ogulihin kulo dahab ongon kulo meja manyu iticurahiti iyo rukuni kunenge kuna longoni kejuha kulo meja. ²⁷Ingohi oguli tongon tang ko lohileleri ojir itirutohinorihin keyek kitingihin kulo meja.²⁸Itigatu keyek are iyo bau lo ciani lyerati idwany kenite kuneicieng to dahab itingore meja. ²⁹Manyu ikukumu ikoriti ko sahani kunenge to dahab ara lobito ko motiongo ko ilebuha kunenge kuna lijuhorihin kiciorita. ³⁰Itofik mugati ketemoni nei kai lona meja faritin fad, tiktik.³¹Ikukumu lomo to dahab; idongu fotiri, kiniefi, tanitani, bene ko lohimosi ko katurahak kunenge ara lobito. ³²Ojir tanitani ile ocaru to kiniefi lo lomo uni angati ko uni lobito angati.³³Iyo kuna tanitani kunenge angati ojir ongoni kubayahin uni kuna lori iya katurahak kulo iyau ojir lobito lobito ongon ko lohimos nenge ko katurahiti manyu, ojir iyo tanitanihin kulo angati manyu ongoni kubayahin uni kuna lori iya katurahak kulo iyau na longon lobito lobito ko lohimos ko katurahiti nenge na lopar tanitanihin ile fad irit kiniefi lo lomo iya na. ³⁴Ojir iyo kiniefi lo lomo token ongon kubayahin ongon kuna lori iya katurahak kulo iyau.³⁵Ongon cia kubaya lobito locarare lo tanitanihin ketemok, kubaya lo are iyo locarare lo tanitanihin kulo are ko kubaya lo uni locarare lo tanitanihin kulo uni - tanitanihin ile fad. ³⁶Ojir kuna kubayahin ko kiniefi lo lomo ara na lidonguni lobito iyo dahab na ilihinya.³⁷Tinyia ikukumu lomohin kunenge mietare itedohi kai lo kuna tanitanihin kulo kalele ko lo kiji, ojir inwaha faji na longon ketemoni nenge. ³⁸Ojir kingutita kulo kofi kunenge ko sahani kunenge idonguni iyo dahab na ilihinya. ³⁹Ojir dahab na lotum kirioci nenge ratili mia lobito ikukumarihin lomo ko sangite kunenge kunakude fad. ⁴⁰Ojir iric jimitan ikukumi kuna sangite dot itiririhi ko kitotori na lohitibotohini isi to donge.

¹Ikukuma kema lomanyare to cukahin tomon kulo kyela iribi kuna litibibili kuna ifurangi, imalangi ko kuna lodoriari kuna loduhohini kitiririta kulo cerubihin ijia na litii katibibilani na igeny. ²Ojir kuna cukahin oriworo, karitun yadihin tomon ko ongon, lalatun yadihin are. ³Totubahi cukahin miet ara lobito kunakude miet manyu ara lobito.⁴Tofihahi fajihit kulo jarara kutuhe kulo cukahin iyo itubit lobito to usi na ifurang, itiyo many ori iyo na itubit bito manyu jii. ⁵Tofihahi fajihit kulo jarara keek miet iyo cukahin kulo itubit lobito ifik manyu fajihit kulo jarara keek miet iyo itubit lo are ingohi fajihit kulo jarara isirani ko kuna longon to lobito ngati. ⁶Ito hati ikukumu jarara to dahab kuna kuna limorunore kuna cukahin ara lobito ojir kema olotu ara lobito.⁷Ikukumu cukahin kulo fofi kulo kiri ara kimuhi lo kema lo lomanyare, ojir kuna cukahin ara tomon ko lobito. ⁸Ojir karitun kuneicieng ara yadihin tomon ko miet ko lalatun kuneicieng ara yadihin are. Ojir kuna cukahin tomon ko lobito oriworoho. ⁹Imorahi cukahin miet ake, imorahi manyu kunakude ile ake. Itulo cuka kiti ile are ketemoni lo kema.¹⁰Tofihahi fajihit kulo jarara keek miet lohicungi lo cukahin kulo ketemoni manyu ifik fajihit kulo jarara keek miet lohicungi lo kuna cukahin kude. ¹¹Ito hati ikukumu jarara to mwala kuna limorunore kuna cukahin ojir kema ara lobito.¹²Ojo na cuka lotong, ojir na cuka bito lotong imuk kifwongi lo kema. ¹³Otong cia karitun lo cuka futi lobito ko nusu fajihit fad, inyi cia limuk marihin kulo kema. ¹⁴Ikukumu kimuhi lo kema to fofi kulo mongi kulo kera na libuyi to renge na ido manyu icadohohi kiyene na isisik kai nenge.¹⁵Togatu bauhin kuna ibiri kulo ciani lyerati ara guri kitiwoitita kulo kema. ¹⁶Ingohi karitun lo kuna bauhin guri ara futi tomon ko miet ko lalatun futi are to guriti lobito lobito. ¹⁷Ingohi guriti lobito lobito tongon ko kejuha are ara tedohin imorahinorihin icieng. Ikukuma guri kulo kema fad oriworo iya na. ¹⁸Ikukuma guri kulo kema kulo ngati lo orof keek are.¹⁹Manyu ikukumu tedohin keek ongon to rial kuna litiricorehin icieng tedohin are to guriti lobito lobito to keju lobito. ²⁰To lobito ngati, ngati lo kai lo kema ikukumahi guri keek are ²¹ko tedohin kulo rial keek ongon, are to guriti lobito lobito.²²Ikukumahi guri ile ifik ngati lo lodoyorore lo kolong lo kema ²³manyu ikukumahi guri are kulo rukun lo ngati lo lohicungi. ²⁴Iyo kuno rukuni are ojir icieng irwata many to kof many kai many opucahino iyo oguliti lobito ojir icieng are fad ori jii. ²⁵Tona ara cia guri mietauni ko tedohin kulo rial tomon ko ile, are iyo guriti lobito.²⁶Manyu togatu riho iyo bau lo ciani lyerati, icieng miet to lobito ngati lo kema, ²⁷miet manyu kulo lobito ngati, miet manyu kulo ngati lo lodoyorore lo kolong, lohicungi lo kema. ²⁸Ojir riho ongon kijihin kulo guri to lohiciahi many lohicungi lo kema.²⁹Todwany guri to dahab manyu tofik oguli kulo dahab opucahinorehin riho. Todwany manyu riho to dahab. ³⁰Itiwoitahi kema ori iya kitotori na lohitibotohini isi to donge.³¹Torifu kyela kiyenit to usi na ifurang, na imalang ko na ido, kyela iribi na lorifahini kitiririt lo cerubihin ken na litii katibibilani na igeny. ³²Toihahi to oguli kulo dahab iyo guri ongon kulo bau lo ciani lyerati kuna lodwanyi to dahab owoita to tedohin kulo rial ongon. ³³Toihahi kyela kiyenit to oguli iyo riho kai lo guri ifik sanduk lo cihicihi korwong nenge. Okor cia kyela kiyenit faji na Inyu ko faji na Inyu Ogal.³⁴Tofik kimuhi lo kisa kai lo sanduk lo cihicihi iyo faji na Inyu Ogal. ³⁵Tofik meja ele ngati lo kyela to ngati lo kai lo kema ifik hati lomo isiran ko inyi to ngati lo orof.³⁶Torifu manyu kyela kigenit lo agwala lo kema to usi na ifurang, na imalang ko na ido, kyela iribi na likukum katibibilani na igeny. ³⁷Ikukuma kigolihin kulo dahab ko guri miet kuna logatuni iyo ciani lyerati idwany to dahab ito hati ikukumu tedohin kulo mwala miet iihahinore na kyela kigenit.

¹Ikukumu ciali to bau lo ciani lyerati, na lara karitun nenge futi mietare ko nusu ko lalatun nenge manyu futi mietare ko nusu. Ojir karitun lo ciali ko lalatun nenge oriri, woita nenge kai ara futi ongon ko nusu. ²Tofik muriaha rukuni kulo ciali, ojir ciali ko muriaha kunenge ogatuno ara lobito ito hati idwany ciali to mwalati.³Ikukumu sangite kunenge fad to mwalati; motiong, kiworiti kulo ingula, kikuriti kulo kima, ilebuha kulo rwaca, kiculuta kulo tyang ko kitehita kulo kima. ⁴Ikukumu keikei nenge, bwai lo mwalati, manyu ikukumahi oguli kulo mwala ifik rukuni kulo ciali ongon fad kulo bwai.⁵Tofihahi lociolo lo ciali ojir okor ciali to kiji. ⁶Togatu keyek kitingihin to bau lo ciani lyerati idwany kenite kuneicieng to mwalati.⁷Ojir kuno keyek kitingihin iturutohini iyo oguli ojir ongoni marihin kulo ciali otingorehin. ⁸Ikukumu ciali owat to bauhin, ojir ikukumuni iya na lohitotorohinorehin isi to donge.⁹Ikukumahi sita lo kema lo lomanyare, ojir orof nenge ara karitan yadihin keek miet ojir iticemi to kyela kigenit iribi na loiro, ¹⁰ko gurihin keek are ko tedohin kuna lara mwala keek are ko kigolihin kulo rial oguli iyo gurihin.¹¹Ojir manyu ngati lo kai ara yadihin keek miet iyo karitun nenge manyu ojir ongon ko gurihin keek are ko kyela iribi kiticemita ojir kuna gurihin owoita to tedohin kuna lara mwala ko kigolihin ko oguli kuna lara rial. ¹²Ojir ngati lo lodoyorore lo kolong ara sita yadihin keek are ko miet ko kyela kiticemi ko gurihin tomon ko tedohin manyu tomon. ¹³Iya ngati lo okangere ojir manyu sita ara lalatun yadihin keek are ko miet.¹⁴Ojir kyela kigenit na lara karitun yadihin mietare ko nusu ojir ofihi na ngati itiwoitahini to gurihin uni iyo tedohin manyu uni, ¹⁵ojir manyu kyela kigenit na lara karitun yadihin mietare ko nusu ko gurihin uni iyo tedohin manyu uni ongon manyu nu ngati bito. ¹⁶Lo lokoli lo sita, torifu kyela kigenit na lara karitun nenge yadihin tomon na litididila to na ifurang, na imalang ko na ido. Usi kunenge kyela iribi na litii katibibilani na igeny, ko gurihin ongon ko tedohin manyu kuneicieng ongon.¹⁷Gurihin kulo sita fad ojir ongon ko oguli ko kigolihin kuna lara rial ko tedohin kulo mwala. ¹⁸Ojir karitun lo sita ara yadihin keek miet, lalatun nenge ara yadihin keek are ko miet. Ko kyelani kigeniti kuna liticemarihin, kyela iribi na loiri na lara woita nenge yadihin are ko nusu ko gurihin kuna lara tedohin kuneicieng mwala. ¹⁹Bilieta ko sangite pili kuna litiyorehin sita lo kema lomanyare ojir ara mwala ko kigurita kulo kema fad.²⁰Tocik cio kulo Israel ingohi tocoluni ngoroni lo kirja kulo ciani oliv na litiituni otoc ara lo kima ojir lomohin iwasihi kinwaha. ²¹Katua lo kema lo kirico korwong lo kyela kigenit, na lokor kiji lo faji na Inyu ko faji na Inyu Ogal, ojir Aaron ko tee kunenge icio lomohin iwasihi nohun many to kurou owang. Ojir ene ara cik na lojir cio kulo Israel ijif to kofiang kuna lofwonuno fad.

¹Ingohi iyauni rece nino Aaron ko tee kilahaji kunenge; Nadab, Abihu, Eleazar ko Ismar to kiji lo cio kulo Israel iyo isi tonyio ojir icieng itiyo diho nan ara kadwarak. ²Torifahi rece nino Aaron kyelani kuna inyuji ojir icio inyi kwatun manyu iworati. ³Torihohi katiyok kagenyak fad kuna lacio nan lofiero iyo koditi lo kuno ticitici ikukumahi ko rifahino kyelani iyo Aaron lokikwera inyi ojir itiyo diho nan ara kadwarani.⁴Ara kuno kyelani kuna lojir icieng orifi; ogogor lo locolo, kol lo kyela, kyela na ijoro, kanyi na litibibili, turubuc ko gas na lara kyela. Ojir icieng orifahi kuno kyelani iyo rece nino Aaron ko tee kilahaji kunenge, ojir icieng irwa diho nan ara kadwarak. ⁵Itorif icieng itiyore dahab ko usi na ifurang, na imalang ko na ido ko kyela iribi.⁶Ikukuma kol lo kyela to dahab ko usi na ifurang, na imalang ko na ido ko kyela iribi na likadi odwaru itibibili tic lo katibibilani na igeny. ⁷Ojir ongon ko fajihit kulo okokoho are kuna litudohinorehin iyo rukuni kulo okokoho are ojir imorahinorehin. ⁸Ojir gas lo komoc nenge na likadi itibibili otoc ori ko inyi, ara lobito ko kol lo kyela na likukumuni to dahab ko usi na ifurang, na imalang ko na ido ko kyela iribi na likadi itibibili otoc. ⁹Todumu morutok oniks are kuna iriworoho igerohi kenite kuneicieng karanacio kulo tee kulo Israel.¹⁰Itiparahi ijifita otomone necieng, karanacio ile iyo moru lobito, kunakude manyu ile iyo lobito moru. ¹¹Tokorodohi karanacio kulo tee kulo Israel iyo kuna morutok iya na lokorodohitare kagenyani iyo morutok kiherihin. Ito hati itod fotiriciok kulo kuna morutok to dahab, ¹²itedohinore iyo okokoho kulo kol lo kyela ara morutok kitiiunita kulo tee kulo Israel. Ojir Aaron otingita kuna karanacio kulo tee kulo Israel kai lo okokoho kunenge ara kitiiunita to ketemoni lo Lahitok.¹³Ikukumu tedohin kulo dahab are ¹⁴ko tongosi are kulo dahab na ilihinya iya kofi itudohi kuna tongosi iyo tedohin.¹⁵Ikukumu ogogor lo locolo lo ngoto lo tenya - tic lo katibibilani. Ikukumu inyi ori ko kol lo kyela to dahab na ilihinya ko to usi na ifurang, na imalang ko na idorie ko kyela iribi na likadi. ¹⁶Ojir karitun nenge ko lalatun nenge oriworo, ojir ara tadati lo kana lobito manyu ituli are.¹⁷Ito hati itiparahi idufiti kulo morutok gelegele ongon ken nenge. Iyo idufit ketemoni ojir ongon karnelian, krisolit, ko beril ; ¹⁸Iyo idufit lo are ojir ongon tarkuois, lapis la zuli ko emirald; ¹⁹Iyo idufit lo uni ojir ongon jakint, aget ko amasist; ²⁰Iyo idufit lo ongon ojir ongon topaz, oniks ko jaspar. Itiparahi icieng iyo tedohin kulo dahab.²¹Ingohi kuna morutok tara tomon ko are lobito lobito to tee kulo Israel. Ojir icieng fad okorodohini karanacio kulo kuna imaniti tomon ko are lobito to lobito. ²²Tona ogogor lo locolo, ikukumu tongosi are iya kofi to dahab na ilihinya. ²³Ikukumu oguli kulo dahab are ikolohinore inyi iyo kol lo kyela. ²⁴Ikolohi kuna tongosi kulo dahab are iyo oguli kuna longon rukuni kulo kol lo kyela.²⁵Ko angati lo kuna tongosi iyo kunu tedohin are ikolohi iyo okokoho kulo kol lo kyela to ngati lo ketemoni. ²⁶Ikukumu oguli kulo dahab are ifik iyo kunakude rukuni kulo ogogor lo locolo to ngati lo katua iyo kol lo kyela.²⁷Ikukumu kunakude oguli are to dahab itiniefahi fotiri lo okokoho to ngati lo ketemoni lo kol lo kyela onyiha ko lorifare iyo kai lo gas lo kyela lo kol lo kyela. ²⁸Ojir oguli kulo ogogor lo locolo otorihini iyo oguli kulo kol lo kyela to kofite na ifurang na litudohi inyi ko gas lo kyela ojir ogogor lo locolo ida okoraru iyo kol lo kyela.²⁹Kolorutoro Aaron faji na Inyu, otehita cia inyi karanacio kulo tee kulo Israel to kai lo tau nenge iyo ogogor lo locolo lo ngoto lo tenya ara kitiiunita na losio to ketemoni lo Lahitok. ³⁰Manyu tofik Urim ko Tumim katua lo ogogor lo locolo ojir ongoni kue lo tau lo Aaron kalorutorita inyi iyo ketemoni lo Lahitok. Tona otingita cia Aaron sangite kulo ngoto lo tenya kiji lo Israel to kue lo tau nenge to ketemoni lo Lahitok³¹Torifu kyela na ijoro lo kol lo kyela iyo kyela na ifurang, ³²na longon ko lopucahinore lo kue kiji nenge. Ojir kalelehin kulo ene lopucahinore orifahini murut lo na kyela ijoro ojir ida ocira.³³Ikukumahi kitidwarijita kulo kyela kuna lori iya katurahak kulo ciani to usi na ifurang, na imalang ko na idorie itididilahi hati kijihin to igoloho kulo dahab. ³⁴Ojir kuna igoloho kulo dahab ko katurahak itididilahino irit kutuk lo na kyela ijoro. ³⁵Ojir Aaron iciefita na kyela kalirwa inyi. Oningoro cia kwatun lo igoloho kolorute inyi faji na Inyu ketemoni lo Lahitokko kalorutuno oleng ojir inyi ida owei.³⁶Ikukumu sahan to dahab na ilihinya ito hati igerohi katua nenge ojo, "Onyu Diho Lahitok.” ³⁷Toruhohi kofite na ifurang ken nenge itorahinore ketemoni lo turubuc, ojir ongon ngati lo ketemoni lo turubuc ³⁸ojir ongon komom lo Aaron ojir inyi oting kipal na longon iyo kicioriti kuna inyuji kuna liyauno Israel kode iyo kuna kicioriti kuneicieng. Ojir iwasihi ngonun komom lo Aaron ojir iruhunorihin icieng to ketemoni lo Lahitok.³⁹Ikukumu kanyi na litibibili manyu Ikukumu turubuc lo kyela iribi. Ingohi gas lo kyela tara na likukumu katibibilani na igeny.⁴⁰Torif kanyihin, gasi kulo kyela ko turubuci iyo tee kulo Aaron lo kicwara icieng kimedek many obangiti. ⁴¹Langun liticiefihi isi rece nino Aaron ko tee kunenge kuno kyelani, to dir icieng ito hati itwe icieng. Ikwera icieng ojir kirwaati nan ara kadwarak.⁴²Torifahi icieng palihin kulo kyela iribi ara kyelani kulo katua kuna limuk kenite kuneicieng many to komoc many bongibongi. ⁴³Ingohi Aaron ko tee kunenge iciefita icieng kalorutoroti kema lohiricore kode kolofworoti ciali kirwa iyo faji na Inyu, ojir ida ipaliti manyu oweiha. Ara ene cik lo tur iyo Aaron ko lotataha kunenge.

¹Tohi na lojir isi itii lo kikwera icieng inyi ene, ojir icieng irwaa diho nan ara kadwarak: todumu mongo na lorihe ongarihi ko mongi kulo kera are kuna loru ko lobo madati. ²Manyu iyo kofwo kulo geme kuna itinyaha, tofun mugati kuna ilulungaha kuna lida ikaruti to ibula, mugati kuna isisihi kuna lida ikaruti to ibula kuna likaruti to ngoroni, ko capat kuna igereweha ida ikaruti to ibula manyu osibi to ngoroni.³Tofik icieng fad iyo akuhu iyauno ongoni katua ara lobito ko na mongo ko mongi kulo kera. ⁴Ito hati iyauno Aaron ko tee kunenge agwala lo kema lohiricore, ilal hati icieng to kifi.⁵Todumu kyelani iticief Aaron to pali, kyela na ijoro lo kol lo kyela, kol lo kyela token ko ogogor lo locolo. Totorahi kol lo kyela ken nenge to gas lo kyela na likukum katibibilani na igeny. ⁶Topucahi turubuc kue nenge ito hati ikolohi kitidwarit na inyu iyo ngati lo komom lo turubuc. ⁷Todumu ngoroni kitweita itwe inyi to kijuhohino na ngoroni kue nenge.⁸Iyauno tee kunenge iticiefohi kanyihin kuna litibibili ⁹ko kiticiefohino icieng turubuci kuna sidiha. Ito hati itorihi gasi kulo kyela iyo Aaron ko tee kunenge. Ara dwarun neicieng to ciharu na lida icung. Ito hati isi ikwer Aaron ko tee kunenge.¹⁰Iyauno mongo ketemoni lo kema lohiricore, ojir Aaron ko tee kunenge ofik kac kuneicieng kue nenge. ¹¹Tongotohi na mongo ketemoni lo Lahitokagwala lo kema lohiricore.¹²Todumu lobo okoto lo na mongo ifik iyo muriaha kulo ciali to kafiele nino icuhohi na lotong fotiri lo ciali. ¹³Ito hati idumu somia fad na longon iyo sangite kulo kocehe; iyo monyi, iyo munya ko talangur are fad ko somia na lobubur icieng tocurahi ciali. ¹⁴Ati tocurahi tyang lo na mongo ko cioni nenge ko monyi oleng lo kema tonyio ara inyi kikumita lo kipal.¹⁵Todumu mongo lo ker lobito ofik Aaron ko tee kunenge kac kue nenge. ¹⁶Tongot idumu okoto nenge irwacahi iyo ciali ngatihin fad. ¹⁷Ingunguto na mongo lo ker ilal monyi ko meselek ifik ara lobito ko kue ko fajihit kunakude. ¹⁸Ito hati icurahi na mongo lo ker fad iyo ciali. Ara inyi kiciorita na locurahini iyo Lahitok, kiciorita na iur, daha na liciori itikwamarihin Lahitok.¹⁹Todumu ladi mongo lo ker bito icio Aaron ko tee kunenge ofik kac kue nenge. ²⁰Tongot idumu okoto nenge ifik iyo ipediti kulo kiyoha kulo Aaron ko tee kunenge ngati lo iteten, kafiela kuna hitoha kulo kac ngati lo iteten ko kafiela kuna hitoha kulo kejuha ngati lo iteten. Ito hati ifohohi okoto marihin kulo ciali fad.²¹Manyu todumu okoto to ciali ko ngoroni kitweita, torwacahi ken lo Aaron ko kyelani kunenge ko kenite kulo tee kunenge ko kyelani kuneicieng. Oto cia inyi ko kyelani kunenge ko tee kunenge ko kyelani kuneicieng itinyujoro.²²Todumu somia lone mongo lo ker; tima, somia na longon iyo monyi, somia na loraf munya, talangur are fad ko somia na loraf icieng ko bongbong iteten. Ara ene mongo lo ker lo kikwera. ²³To katua lona akuhu lo mugati kuna lofuni oru ibula na longon ketemoni lo Lahitok, todumu mugati na ilulunga lobito, mugati na isisik na likaruto to ngoroni lobito ko capat lobito.²⁴Tofik kuno fad kac kulo Aaron ko tee kunenge ingohi itilori to ketemoni lo Lahitokara kiciorita lo kitilora. ²⁵Ito hati idume to kac kuneicieng icurahi to kai lo ciali ara lobito ko kikumi na lo curati ara daha na iur na litikwama Lahitok, daha na liciori Lahitok.²⁶Koloru idumu hati locolo lo mongo lo ker na likwerarihin itilora to ketemoni lo Lahitokara kiciorita lo kitilora, ara na kicait nino. ²⁷Itinyujo kuna fajihit kulo ker lo kikwera lara lo Aaron ko tee kunenge: locolo na litilori ko bongbong na liciori. ²⁸Ojir ene ara kicait lo tiktik na licahi Israel Aaron ko tee kunenge. Ara sofo na ojir Israel osofo diho Lahitokiyo kicioriti kulo kimora kuneicieng.²⁹Ojir kyelani kuna inyuji kulo Aaron ara kulo lotataha kunenge ikwerarihin icieng. ³⁰Kito na loluny faji nenge ara kadwarani na lolotu iyo kema lo kirico kirwaa iyo faji na Inyu, ojir icief kuna kyelani to faritin mietare.³¹Todumu tyang lo na mongo lo kikwera iyerahi to faji na Inyu. ³²To agwala lo kema lo kirico, ojir Aaron ko tee kunenge onya na tyang ko mugati na longon iyo akuhu. ³³Ojir icieng onyia kuno kiciorita litinyujorihin icieng to kikwera neicieng ko kitigatahino. ³⁴Manyu kolotong lobo tyang lo na mongo lo ker lo kikwera kode kolotong lobo mugati many kiwanyi, tocure. Ojir ida onyai tonyio Onyu.³⁵Itiyo iyo Aaron ko tee kunenge sangite fad kuna lahicik nan isi, ojir ikwer icieng to faritin mietare. ³⁶Ojir icuhohita mongo to faritin fad ara kikumi lo dumaru kipal ojir ilalarihin kipal. Itinyujo ciali to kikuma inyi manyu totwe inyi lo kitinyujo inyi. ³⁷Topul ciali lo kitinyujore inyi to faritin mietare. Oto cia ciali onyu noo manyu lobo tohi lotir inyi onyu cia.³⁸Ara ene tohi na lojir ikumi to ciali faritin fad: tee kulo kera are kuna lara obolore neicieng kari lobito. ³⁹Tofejohi lobito kiwanyi, lobito kurou langun lodoyoro kolong.⁴⁰Ara lobito ko ker lo lobito kicwara lokirie lo kofwo ikarut to cupahin are ko nusu kulo ngoroni lo oliv na lipiuni ko vino cupahin are ko nusu ara kiciorit imatit.⁴¹Tocurahi na ker bito kurou lodoyoro kolong ko kofwo ori iya kulo kiwanyi na likaruto to ngoroni ko vino kiciorit imatit iya lo kiwanyi - iciorit na iur na lifotohini iyo Lahitok. ⁴²To kofiang fad kuna lijifita, ojir ene kiciorit ifotohitati to faritin fad to lokoli lo kema lohiricore ketemoni lo Lahitok. Ijia aric cia nan ko isi ahititeny isi.⁴³Ija manyu aric cia nan ko cio kulo Israel manyu itinyu cia kimedek nei na faji. ⁴⁴Tona atinyu cia nan kema lohiricore ko ciali manyu atinyu cia nan Aaron ko tee kunenge ojir irwaati diho nan ara kadwarak.⁴⁵Ato cia nan atongo kiji lo cio kulo Israel ara Lobanga neicieng. ⁴⁶Oyen cia icieng jimitan ara nan Lahitok Lobanga neicieng na liyauno icieng to kof lo Ijipt ojir amanya kiji neicieng. Nan Lahitok Lobanga neicieng.

¹Ikukumu ciali to bau lo ciani lyerati na locurarihin iheru. ²Ojir ara na loriri lalatun nenge ko karitun nenge futi lobito ko nusu woitahino nenge to kof ara futi uni, ojir muriaha kunenge ara lobito ko inyi.³Todwany kue, ken ko muriaha kunenge fad to dahab na ilihinya ifik manyu lohileleri nenge to dahab irit. ⁴Ikukumu oguli kulo dahab ongon ara kulo na ciali, tofik are angati, are manyu lobito ngati ongoni tang ko lohileleri ojir itirutohinorehin riho kuna lotingitarihin inyi.⁵Ikukumu riho are to bau lo ciani lyerati idwany kenite to dahab. ⁶Tofik ciali ketemoni lo kyela kigenit na litik sanduk lo cik na limuk kitongit lo kisa na longon kai lo sanduk imuk morutok kulo cik faji na lahiricore nan ko isi.⁷Ojir Aaron ocurahita iheru kiwanyi to faritin fad kalikukuma inyi lomohin. ⁸Ojir ocurahi iheru ari kalinwahahino inyi lomohin langun lodoyoro kolong ojir iheru ofurita tiktik ketemoni lo Lahitokto kofiang fad kuna lofwonuno. ⁹Kecurahi lobo odok ake iyo ene ciali kode lobo kiciorita na locurati, kode ngamang manyu kejuhohi lobo kiciorit lo imatit kue lone ciali.¹⁰Kakeny lobito iyo kari ojir Aaron ikum muriaha kunenge. Ojir ene kikuma lo kari ikumi to okoto lo kikumi lo dumaru lo kipal, to kofiang kuna lofwonuno. Ara inyi ciali na Inyu noo iyo Lahitok.''¹¹Tinyia ojo Lahitokdiho Moses, ¹²"Kalikena isi cio kulo Israel lo rumuno borengun neicieng, ojir lobito lobito odum robia kitobita lo warun nenge diho Lahitokkalikeni inyi. Oto cia lobo jiok ida olotu diho icieng kaliken isi icieng. ¹³To lobito tungani na lorute iyo cio kuna likeni ojir odumu nusu lo sekel iyo sekel lo faji na Inyu na lipimuno gerahin keek are. Ara ene nusu lo sekel kicwara iyo Lahitok. ¹⁴Cio fad kuna lofwo iyo kuna likeni, cio kuna lara karihin kuneicieng keek are olorore iya ketemoni ojir odumu kiciorita iyo Lahitok.¹⁵Ojir kabarak ida icio ogal nusu lo sekel kode kakilwahak ida icio ongor kalifotohino kiciorita diho Lahitokitobore warita kuningi. ¹⁶Ilifu robia kulo kikumaru lo kipal diho cio kulo Israel itiyore katua lo kema lo kirico. Ara cia kuna robia kitiiunita lo cio kulo Israel to ketemoni lo Lahitok, kicwara lo kitobita lo warita kuningi."¹⁷Tinyia ojo Lahitokdiho Moses, ¹⁸"Idongu besen mwalati ko kiwoita kunenge mwala, lo kilala. Totirohi kiji lo kema lo kirico ko ciali, itifutahi kifi katua.¹⁹Ingohi Aaron ko tee kunenge ilalita kac ko kejuha kuneicieng to kifi kuna loyohuni to na besen. ²⁰Kolorutoro icieng kema lo kiricio, ojir ilalati to kifi ojir ida oweiti, kalofworo icieng iyo ciali kirwaa lo kicwara kiciorita kulo daha diho Lahitok ²¹ojir icieng ilal kac ko kejuha kuneicieng ojir ida oweiti. Ara ene itidwar na isio to Aaron ko lotataha kunenge to kofiang fad kuna lofwonuno."²²Tinyia ojo Lahitokdiho Moses, ²³"Todum kuno sangite iuri: Mayr na ilib sekel mia miet, cinamon na iur sekel mia are ko keek miet, kalmus na iur sekel mia are ko keek miet, ²⁴ko kassia sekel mia miet fad ori ko sekel lo faji na Inyu ko ngoroni lo oliv na lotum cupahin tomon. ²⁵Ikarutohi kuna fad ikukumunore ngoroni lo twa na inyu, kikaruto na iur, tic lo kagenyani lo uron. Itongo cia ara ngoroni kitweita na inyu.²⁶Ito hati itiyore inyi idirore kema lo kirico, sanduk lo cik, ²⁷meja ko sangite kulo tic nenge fad, lomo ko sangite kunenge fad, ciali lo iheru, ²⁸ciali locurare lo icioriti ko sangite kunenge fad ko besen ko kitiwoitita kunenge.²⁹Ojir isi idir icieng ojir onyuji manyu tohi fad na lotir icieng oto ko nyujon. ³⁰Totwe Aaron ko tee kunenge manyu idir icieng ojir kirwaati nan ara kadwarak. ³¹Torihohi cio kulo Israel ijio, "Ojir ene ara ngoroni kitweit nei na inyu to kofiang fad kuna lofwonuno.³²Kejuhohi ene ngoroni ken lo lobo tungani, manyu kekukumu lobo ngoroni to kuna sangite likukumunorehin inyi. Onyu ene ngoroni, ojir manyu ite ideya inyi ara na inyu. ³³Tungani na likukumu lobo ngoroni itiririhi ko inyi manyu ijuhohi ken lo lobo tungani lida ara karwaani ojir na tungani odumari to kiji lo cio kunenge."³⁴Tinyia ojo Lahitokdiho Moses, "Todumu sangite kuna iuri; gam resin, onik ko galbanum ko frankinsen na ilihinya idumu fad itiriri, ³⁵ko kikukumuno iheru na iur, tic lo kagenyani lo uron. Ojir ikaruti to balang itongo ara na ilihinya onyu. ³⁶Inyutu lobo otinya ifik ketemoni lo sanduk lo cik katua lo kema lohiricore, faji na laricore nan ko isi. Ojir ara tohi na inyu diho ite.³⁷Kekukumu lobo iheru to kuno sangite iuri ara ningi, itifik ara tohi na inyu diho Lahitok. ³⁸Tungani na likukumu lobo iheru ori ko inyi lo tenuno uron nenge, ojir odumari to kiji lo cio kunenge.

¹Tinyia ojo Lahitokdiho Moses, ²"Tode lanyumu nan Bezalel kito lo Uri lotata lo Hur lo imanit lo Juda.³Manyu latifut nan inyi to Okorif lo Lobanga, kilefere, yenun, genyun ko kigingi gelegele fad ⁴lo kikukuma sangite kuna idwaruha kuna litibibiluno iyo dahab, rial ko mwala ⁵lo nguto ko tedo morutok, lo gata keyek ko fihahino tau lo kitiyo sangite kulo dwarujon fad.⁶To angati manyu ladumu nan Oholiab kito lo Ahisamak lo imanit lo Dan lo lwaha inyi. Manyu lacio nan kirunga diho katiyok kagingak fad lo kikukuma sangite fad kuna lacik nan diho isi: ⁷Kema lo kirico, sanduk lo cik ko kitongi lo kisa kai nenge ko sangite kulo katua lo kema fad; ⁸meja ko sangite kunenge fad, lomo lo dahab na ilihinya ko sangite kunenge fad, ciali lo iheru, ⁹ciali lo cura kiciorita ko sangite kunenge fad, besen ko kitiwoitita nenge.¹⁰Ko kyelani kuna litibibili, kyelani kuna inyuji kulo Aaron kadwarani ko kyelani kulo tee kunenge kalirwaati diho nan ara kadwarak ¹¹ko ngoroni kitweita ko iheru na iur kulo faji na Inyu. Ojir icieng ikukum iya idi lacihare nan isi."¹²Tinyia ojo Lahitokdiho Moses, ¹³"Torihohi cio kulo Israel tijo, ' Ojir ite iric sabit nitole. Ara cia ene kitotori kiji nei ko ite to kofiang fad kuna lofwonuno, ojir ite iyenare ijo nan Lahitokna lahitinyujo ite. ¹⁴Itoric sabit tonyio ara far na Inyu diho ite. Tungani na licome ojir ifadari. Cio kuna litiyo lobo tic to la far ojir odumari to kiji lo cio kuneicieng. ¹⁵To faritin ile ojir itiyoti ticitici, ati far lo mietare itongo ara far lo kiyoma lo sabit na Inyu diho Lahitok. Tungani na litii lobo tic to sabit ojir ifadari.¹⁶Ojir cio kulo Israel oric far lo sabit, ikwerati inyi to kofiang kuna lofwonuno ara ciharu na losio tur. ¹⁷Ara cia kitotori kiji nei ko cio kulo Israel tur, tonyio to faritin ile ofik Lahitokkai ko kof ojo far lo mietare iyoma inyi.'"¹⁸Kolokeru Lahitoktenya ko Moses to kai lo donge lo Sinai, icio inyi morutok kuna ikedeveti are kuna ligero cik. Morutok kuna ikedeveti kuna lokorodohi kafiele lo Lobanga kigero cihicihi.

¹Kolodeu cio ojo lirung Moses kiculuno to kai lo donge, otubunoti iriti Aaron ojimi diho inyi, "Ou ikukumu lobangahin kuna ngitem ketemoni niyang. Ojo kalara to ele lerok Moses afa lohiyauno ohoi to kof lo Ijipt, ida ohoi kiyen tohi na litiihino diho inyi." ²Inyiahahi Aaron icieng ojo, "Itodumu gelo kulo dahab kuna liciefita ngorwo kuningi ko tee rei ko tee kariok kuningi, iyaunoti diho nan."³Tona odumu cio fad gelo kulo kiyoha kuneicieng iyauno diho Aaron. ⁴Odumu inyi kuna sangite liciorihi cio inyi ikukumunore lopidinga lo dahab na lori ko kace na lidongu inyi to nyol. Oto icieng ojo, "lobangahin kuningi kuno Israel kuna lohiyauno ite to kof lo Ijipt."⁵Kolodeu Aaron jii, oduhohi ciali ketemoni lona lopidinga lo kace ko rihohino cio ojo, "Kiwanyi ongon cia karama diho Lahitok." ⁶Tona, kiwanyi nenge owoju cio berien ocuri kiciorita manyu ifotohini kiciorita kulo kimora. To kifwongi itongohinoti daha ko mata ko wojunoti kisonga.⁷Tinyia ojo Lahitokdiho Moses, "Iculoro kof tonyio lipalaru cio kunino kulafa liyauno isi to kof lo Ijipt. ⁸Libeloroti deu deu iyo tohi lafa lacik nan diho icieng manyu likukumuni lopidinga na lori iya kace. Logungiti ketemoni nenge kiwora inyi ocurahini ko kiciorita kuneicieng manyu otenyati ojo, ' lobangahin kuningi kuno Israel kulafa lohiyauno ite to kof lo Ijipt'."⁹Ojo Lahitokdiho Moses, "Ladeu nan kuno cio, ara icieng cio kuna logoli kutuhe. ¹⁰Jijia cie, kingohi nan ojir kilongo nei ocuraru to icieng ojir akeru icieng. Ato hati ahitirak isi ara misi na ibolo noo." ¹¹Ati ilelia Moses diho LahitokLobanga nenge ojo, "Lahitok nyio kilongo nino obolo iyo cio kunino kuna liyauno isi to kof lo Ijipt to golun nino ko kana nino na ilotir?¹²Nyio cia icio isi cio kulo Ijipt ojo, ' Ara to rohojun iyaunore inyi icieng, lo kifadaru icieng to gum lo dongecio ko keroro icieng to kof. Ibelo to kilongo na inok, ibelo keyauno keroro diho cio kunino. ¹³Iiu karwaak kunino; Abraham, Isako ko Jakob kulafa libutihi isi token nino ijo, ' Atiboreng mute nan lotataha iya kanger kulo kai manyu ahicio cia nan lotataha kunino ene kof afa lacik nan jimitan ara mute lolunyiot neicieng tur. ' ¹⁴Oto Lahitokko kirwo ida dong iyauno diho cio na tohi irohoi orumu lowak inyi kiyauno iyo icieng.¹⁵Moses ko kibelo iculuno to donge otehita morutok are kulo cik to kac kunenge. Igero orumu icieng fajihit are fad ketemoni ko korwonga. ¹⁶Ara orumu kuna morutok kuna litii Lobanga. Lobanga manyu liger kigeriti, okorodohi iyo kuna morutok ikedefeti.¹⁷Koloning Joshua kigorita lo cio, oto ojo diho Moses, "Ongon kigorita lo rem katua lo kem." ¹⁸Inyiahahi Moses inyi ojo, "Ida ara kigorita lo lanyuno, ida manyu ara kilelia lo cio kuna lolanyuni; ara kigorita lo wolo aningo nan."¹⁹Kolonyihu Moses kem odeu lopidinga lo kace ko kia, ifuru kilongo nenge ko kibiroro morutok to kac kunenge, ibirohi gum lo donge obora isaraha. ²⁰Inyi ko dumuno na lopidinga lo kace likukum cio ko cura to kima ko kiriaru ara fur orwacahi iyo kifi icio cio kulo Israel omat.²¹Ko jimitan diho Aaron, "Nyio orumu itii kuno cio diho isi licio isi irihe icieng iyo ene kipal hitok jii? ²²Ojo Aaron, "Kelongo Lahitoknei. Iyen isi koditi na lotutuhore taulo kulo kuno cio iyo kipal. ²³Ojo bo icieng diho nan, "Kikukumahi ohoi lobangahin kuna litemita ketemoni niyang, ojo kalara to ele lerok Moses afa lohiyauno ohoi to kof lo Ijipt, ida ohoi kiyen tohi na litiihino diho inyi. ²⁴Tinyia arihohi dong nan icieng ajo, ' Tungani na longon ko sangite kulo kiciefita kuna lara dahab, ingohi topucu '. Tinyia kicio icieng nan dahab, ato nan abirohi kimatare, ene lopidinga lo kace ko rutuno. "²⁵Odeu Moses jimitan loturoro kueci kulo cio manyu losili manyu licio Aaron icieng ida otafuno tona larahiti tohi lo kwenitare lo merok kuneicieng. ²⁶Tona inyi ko woita lokoli lo kem ko jimitan, "Tungani na longon ngati lo Lahitokingohi tolotu diho nan." Oto rei kulo imanit lo Levi fad ifuroro diho inyi. ²⁷Tona ojo inyi diho icieng, "Tohi na loteny LahitokLobanga lo Israel inyi ene, ' Tungani lobito lobito igohi to subohi ngalem latubot komoc nenge. Ifwo kifwongi ko ketemoni katua lo kem to lobito ngati many lu ngati lobito lobito ifade rece, morte ko loryehat nenge."²⁸Itii cio kulo Levi iya na locihare Moses icieng manyu tona far owei cio kuna lotum alif uni. ²⁹Tinyia ojo Moses, "Lohitingadari ite ake ara kulo Lahitokele far, tonyio lifad ite rei kuningi ko recera kuningi, manyu lohiciori ite gum ele far."³⁰Kiwanyi nenge ojo Moses diho cio, "Litii ite kipal na hitok. Ati jijia alo cia nan diho Lahitok, tolobo amuk cia nan kipal ningi." ³¹Tona oite Moses diho Lahitokojo, "Oh obolo kipal lo kuno cio bebe! Likukumu icieng lobanga neicieng lo dahab. ³²Ati jijia Lahitoktolau kipal neicieng kode kalida ara jii, kifufuse nan to buk na liger isi."³³Inyiahahi Lahitokdiho Moses ojo, "Tungani na lipal, inyi lafufuse nan to buk nei. ³⁴Jijia ilo torihe kuno cio iya nu faji afa lateny nan manyu olo cia Malaika nei ketemoni ningi. Oto hati kololotu tik nitole lo kitigema, atigem cia nan icieng to kipal neicieng. ³⁵Manyu Lahitokko boho cio to jiok to tohi na litii icieng to na lopidinga lo kace likukumu Aaron.

¹Tinyia ojo Lahitokdiho Moses, "Ingohiti ene faji, isi ko kuno cio liyauno isi to kof lo Ijipt. Ifwo many kof lafa lacik nan to kibutia diho Abraham, Isako ko Jakob ajo, ' Acio cia nan diho lotataha kunino '. ²Acule cia nan Malaika ketemoni ningi ifuhe cio kulo Kanaan, Amor, Hitit, Perez, Hivi ko Jebus. ³Ifwo kof na litihita lei ko otoro. Ati ida cia nan alo ko ite, tonyio ira ite cio kuna igoli kutuhe, manyu atum nan keruno ite to kikoi."⁴Koloning cio kuno tenyitenyi irohori, icahi kitoyo na lida cio icief lobo kiciefita lo ngoto. ⁵Tonyio orumu Lahitokojo diho Moses, "Torihohi cio kulo Israel tijio, ' Ira ite cio kuna igoli kutuhe. Ngahilik nan ko ite kode to kude faritin kuting, ngahikeru nan ite. Jijia itopucete kitingotiti kuningi ato cia nan aii tohi na ngatii nan ko ite '." ⁶Tona cio kulo Israel ko puca kingotiti kuneicieng to gum lo donge lo Horeb.⁷Tona orumu Moses ogurorita lobo kema oleng to kem faji na iloma gaa, na ilolongi inyi ojo, "Kema lo kirico." Kolowak tungani kitifia Lahitok, olo inyi iya kema lo kirico oleng to kem. ⁸Manyu kolorutoro Moses kema lo kirico, owoju cio fad owoitati agwalahin kulo kemahin kuneicieng, odeyati Moses many orute katua lo kema. ⁹Kalolo Moses katua lo kema, olotu wiriti lo idis kof owoita agwala kolotenya Lahitokko Moses.¹⁰Tiktik kolodeu cio wiriti lo idis owoita agwala lo kema, owoitati fad iworati lobito lobito to agwala lo kema nenge. ¹¹Otenyitita Lahitokko Moses tarany iya na lotenyare tungani ko morte nenge. Tinyia oitu hati Moses kem ati kajifitani nenge Joshua kito lo Nun ida ingohi kema.¹²Ojo Moses diho Lahitok, "Itenyitita isi diho nan ijo, ' Torik kuno cio ' ati ida isi lohicio nan ayen ngai icularu isi ko nan. Ijo isi, ' ahiyen nan isi to karana manyu lirumu isi kisisio iyo nan. ' ¹³Kalohikwama isi nan, kitiyen nan kikohin kunino ojir nan ahiyen isi manyu asodoro rumuno kisisio nino. Iiyo jimitan ara ene misi lo cio kunino."¹⁴Inyiahahi LahitokMoses ojo, "Kilik cia ngonun nei ko ite manyu ahicio cia nan ite kiyoma." ¹⁵Tinyia ojo Moses diho inyi, "Kalida ngonun nino kilik ko ohoi, kehicule ohoi ten. ¹⁶Aja cia oyen cio ojo kikwama isi nan kode ikwama isi cio kunino kalida isi kilik ko ohoi? Nyio cia lohikor nan ko cio kunino ko cio kunakude to kof?"¹⁷Oto Lahitokojo diho Moses, "Atii cia nan na tohi token litifi isi tonyio ahikwama nan isi manyu ahiyen nan isi to karana." ¹⁸Tinyia ojo Moses, "Jijia kitotorohi nan kimedek nino."¹⁹Oto Lahitokojo, "Acio cia nan jiran nei oring to ketemoni nino manyu alet cia nan karana nei, Lahitokiyo ngonun nino. Atii cia nan kisa iyo kuna latiihino nan kisa, manyu alau cia nan kuna lawak nan launo. ²⁰Ati ida isi itum deya komom nei, tonyio oru lobo tungani lohideu nan, manyu owar."²¹Tinyia ojo Lahitok, "Ongon faji na lohinyiha ko nan na ngiwoita isi kai lo moru, ²²Koloringaru kimedek nei, ahifik cia nan isi iyo borok lo moru manyu ahimuk isi to kana nei many aringe nan. ²³Ato hati adume kana nei, ito hati isi ideu korwong nei, ati ida odeitati komom nei."

¹Ojo Lahitokdiho Moses, "Ikefu morutok are kuna igereweha iya kulafa kulo ketemoni, manyu agerohi cia nan tenyitenyi kulafa longoni iyo kulafa morutok kulo ketemoni libor isi. ²Ikukumahino kiwanyi ito hati ilotu kai lo donge lo Sinai. Itotoro ken nino ijia diho nan kai lo donge.³Kecio lobo tungani kilihu ko isi kode ongon lobo faji to donge, kecio kileng kiri, kera ko kicu odaha gum lo donge." ⁴Tona ikefu Moses morutok kuna igereweha are kuna lori ko kulafa ketemok ko kirwohoro kai lo donge lo Sinai kiwanyi berien iya na locihare Lahitokinyi, otehoro inyi kuna morutok igereweha are to kac kunenge.⁵Tinyia olotu Lahitokto idis ko woita ijia ko inyi otulu karana nenge Lahitok. ⁶Oto inyi oring to ketemoni lo Moses ileto, ' Lahitok, Lahitok Lobanga lo kisa manyu imaru cio ida ilongo deu, obolo kimaruno nenge na lida ibelo, igenoro inyi bebe. ⁷Oric inyi kimaruno nenge na lida ibelo to cio alifi ko alifi manyu ola rohojun, kisai ko kipal neicieng. Ati ida inyi ingohi kapalani ida itigem, itigema inyi tee ko tee kuneicieng to kipal lo monyeri many iyo kofiangiti lo uni ko lo ongon.⁸Moses ko gungon kof deu iwora. ⁹Ojo inyi, "Lahitok, Kalarumu nan kisisio to ketemoni nino, ojir isi Lahitokkifwo ko ohoi. Kileng ngohira ohoi cio kuna igoli kutuhe, tolau rohojun ko kipal niyang manyu kiyaru ohoi kira lolunyot nino."¹⁰Tinyia ojo Lahitok, "Afiha nan ciharu nei ko isi to ketemoni lo cio kunino fad, atii cia nan ticitici kuna litirima kuna lida itiihino iyo lobo misi to kof fad. Odeu cia cio kuna lomanya tang ko ite kitirima lo tic na cia latiyo nan diho ite. ¹¹Itining tohi na lacik nan diho ite elefar, afuhe cia nan cio kulo Amor, Kanaan, Hittit, Perez Hivi ko Jebus to ketemoni ningi.¹²Itogeny ke fik ciharu lo yomo ko cio kuna lomanya na kof lifworo ite, oto cia icieng ibelo ara kilohit ningi. ¹³Itibor cialitok kuneicieng, itibore tifinehin kuneicieng manyu itingode wirihin kulo Asera kuneicieng. ¹⁴Kewor lobo lobanga ake tonyio Lahitokna lobara karana nenge Kikaino ara Lobanga na likaino.¹⁵Itogeny kefik lobo ciharu lo yomo ko cio kuna lomanya na kof, tonyio kaliwora icieng lobangahin kuneicieng to ticitici kulo somun manyu opuloti kikumihin kuneicieng, kilolongi cia ite ifwo ikony tyangi kulo kuna kikumihin. ¹⁶Manyu kaliteyemahi ite tee kariok kuneicieng iyo tee kuningi ara ngorwo, manyu ofwo kuna ngorwo kiwora kuna lobangahin kuneicieng, orihe cia icieng tee rei kuningi kitiyo na tic bito. ¹⁷Kekukum kude lopidingahin.¹⁸Ikwerati karama lo mugati kuna loru ibula. To faritin mietare itodahati mugati kuna lida itii to ibula iya lafa lahicihare nan ite. Itiyoto na to faritin kuna lotumohino iyo ofa lo Aviv tonyio ara afa na ofa ifwonunore ite to kof lo Ijipt.¹⁹Ara tee okangi fad kunei ara lobito ko okangi kulo sang fad; kiri kera kode kicu. ²⁰Totob okang lo sigiria to kito lo ker, ati kalida isi itum tobo inyi togil murut nenge. Totob tee rei okangi kuningi fad. Kecio lobo tungani olotu ketemoni nei oru tohi lotehuno to kac.²¹Itiyoti ticitici kuningi fad to faritin ile, ati ojir iyoma far lo mietare, kileng faritin kulo remo kode kulo dengo ojir iyoma. ²²Ikwerati karama lo sabit, ko ketemok kulo ngamang geme, ko karama lo keruno dengo to lohicungi lo kari.²³Ojir cio rei kuningi ofwonu ketemoni lo Lahitok Lobanga lo Israel kakeny uni iyo kari. ²⁴Afuhe cia nan misihi to ketemoni manyu atilalat kof ningi. Manyu oru mute tungani lodam kof ningi kalifworita ite kakeny uni ketemoni lo Lahitok Lobanga ningi to kari.²⁵Kehifotohi nan okoto lo kikumi ara lobito ko tohi na likaruti to ibula manyu kecio lobo tyang lo kikumi lo Rangaru oget ko kiwanyi. ²⁶Iyaunoti ngak ketemok kuna lonyumuni kulo kof ningi kaji lo LahitokLobanga ningi. Keyer kito lo kine kode lo ker to lei kulo ngotenge.²⁷Tinyia ojo Lahitok diho Moses, " Igero kuno tenyitenyi tonyio to kuno tenyitenyi lafik nan ciharu ko isi ko cio kulo Israel fad." ²⁸Ongon orumu Moses ijia ko Lahitok faritin keek ongon ko karuehin keek ongon na lida onya tafa kode omat kifi. Manyu igerohi iyo morutok kuna igereweha tenyitenyi kulo ciharu - cihi tomon.²⁹Kaliculuno Moses to kai lo donge lo Sinai otehita morutok are kulo cik to kac kunenge, orumu inyi ida oyen jimitan ifarang komom nenge tonyio lotenya inyi ko Lahitok. ³⁰Kolodeu Aaron ko cio kulo Israel fad Moses orumu komom nenge ifarang, oto icieng obang fwonuno diho inyi. ³¹Ati ilolong Moses icieng, tona ofwonu oho Aaron ko lohitwaha kulo cio fad diho inyi manyu otenya inyi ko icieng.³²To kifwongi onyihu cio kulo Israel fad diho inyi manyu icio inyi icieng cihicihi fad kuna locik Lahitok inyi to kai lo donge lo Sinai. ³³Langun lokeru Moses tenya ko icieng, orafahi kimuhi komom nenge.³⁴Ati kolorutoro inyi ketemoni lo Lahitok tenya ko inyi, odume inyi kimuhi to komom nenge many kolorutuno oleng. Manyu kolorutu inyi oleng orihohi cio kulo Israel tohi na locihi inyi, ³⁵odeu icieng jimitan ifarang komom nenge. Tinyia orafahi Moses kimuhi komom nenge ari many koloite tenya ko Lahitok.

¹Otubu Moses cio kulo Israel fad orihohi icieng ojo, “Sangite kuna locik Lahitok ojo ojir ite itii icieng kuno: ²To faritin ile ojir tici tici itii ati ara far lo mietare far lo kiyoma ningi far lo Sabit lo kiyoma iyo Lahitok. Tungani na litii lobo tic na far ojir ifadari. ³Kenohahi kima lobo lomanyare ningi to far lo Sabit.⁴Ojo Moses iyo cio kulo Israel fad, “Tohi na locik Lahitok inyi ene: ⁵iyo sangite kuna litehita ite todumu kiciorita iyo Lahitok. Tungani fad na liruk to tau nenge ojir iyauno iyo Lahitok kiciorita kulo dahab, rial ko mwala; ⁶usi na ifurang na imalang ko na idorie ko kyela iribi kyela lo fofi kulo kiri, ⁷kyela lo mongi kulo kera kuna libuyi to renge na ido ko koditi lo kiyenehin kuna isisihi: bau lo ciani lyerati ⁸ngoroni lo oliv lo lomo kitiurita kulo ngoroni lo twa ko kulo iheru lo cura; ⁹morutok oniks ko morutok kuna kude kuna lojir ofihahini iyo kol lo kyela ko ogogor lo locolo.¹⁰Cio kagingak fad to kiji ningi ojir ofwonuni ikukumi sangite fad kuna locik Lahitok: ¹¹Lomanyare ko kema nenge ko kimuhihin, kigolihin kunenge ko gurihin, riho, wiri kunenge ko ledohin kulo fotiricio ¹²sanduk lo cik ko kitingihin kunenge ko kitongi lo kisa ko kyela kigenita nenge.¹³Meja ko kitingihin kunenge ko sangite kunenge fad ko mugati lo ngonun; ¹⁴kiniefit lo lomo ko sangite kunenge fad lomohin ko ngoroni lo kinwaha; ¹⁵ciali lo iheru ko kitingits kunenge, ngoroni lo twa ko iheru lo kitifuro na iur, kyela kigenit lo lokoli lo lomanyare; ¹⁶ciali lo cura lo kiciorita ko kei kei nenge mwalati, kitingihin kunenge ko ilebuha kunenge; besen mwolati ko kitweitita nenge.¹⁷Kyelani kiticemita kulo sita ko gurihin ko tedohin kunenge ko kyela kigenit lo lokoli lo sita. ¹⁸gusumarihin kulo kema lomanyare ko kulo sita ko kofi kuneicieng; ¹⁹kyelani kuna litibibili kuna liciefitati irwaarihin katwa lo faji na inyu- kyelani kuna inyuji kulo kadwarani Aaron ko kyelani kulo tee kilahaji kunenge kalitiyo icieng ara kadwarak.”²⁰Tinyia ingade cio kulo Israel fad to ketemoni lo Moses, ²¹oto tungani Lobito Lobito na liruk na lokwama tau nenge olotu iyauno kiciorita iyo Lahitok lo tic lo kema lo kirico lo ticitici kunenge fad ko kulo kyelani kuna inyuji. ²²Cio fad kuna liruk rei ko ngorwo ara Lobito ofwonun iyauno ingotiti kulo dahab gele gele abohi, pang galihin, gelo ko ingotiti kunakude. Ifotohi icieng dahab neicieng ara kiciorita lo kitilora iyo Lahitok.²³Cio fad kuna lotehita usi na ifurang, na imalang ko na idorie kode kyela iribi, kode kyela lo fofi kulo kiri, kyela lo fofi kulo mongi kulo kera kuna libiyi to renge na ido kode kyela lo kiyene na isisik, iyauni icieng fad. ²⁴Cio kuna liyauno icioriti kulo rial ko mwala iyauni ara kiciorita iyo Lahitok ko cio fad kuna lotehita bauhin kulo ciani lyarati kuna lowahiti to tic iyauno.²⁵Ngorwo kagingak fad kuna likada usihin usi na ifurang, na imalang na idorie ko kyela iribi, iyauno sangite kuna likadi to kac kuneicieng. ²⁶Manyu ngorwo fad kuna lowak manyu ongoni ko kigingi lo kikada ikad fofi kulo kiri.²⁷Iyauno kabolorok morutok Onik ko morurok kuna kude kulo fiha iyo kol lo kyela ko ogogor lo locolo. ²⁸Iyauno manyu icieng sangite kuna iuri ko ngoroni Oliv lo lomo ko ngoroni kitweita ko kikaruti lo iheru na iur. ²⁹Israel fad ngorwo ko rei kuna liruk iyauni kiciorita kulo kwama iyo Lahitok kulo tici tici kuna locik Lahitok iyo Moses ojo ojir itii.³⁰Tinyia ojo Moses iyo cio kulo Israel, “Itode, lonyumu Lahitok Bezalel kito lo Uri lotata lo Hur lo imanit lo Juda, ³¹manyu litifut inyi to okorif lo Lobanga manyu litifut inyi to kilefere, to yenun, to genyun, ko to koditi lo kilefere fad ³²lo kitiyo kitibibiliti kuna idwaruha to dahab, rial ko mwala, ³³lo nguto ko tedo morutok, lo gata keyek ko fihahino tau lo kitiyo sangite kulo dwarujon fad.³⁴Many licio inyi icieng ko Oholiab kito lo Ahusamak kirunga lo kitiyena cio kulakude. ³⁵Litifut inyi icieng to kigingi lo kitiyo ikoditi kulo ticitci fad ara kakorodo katibibilak, katididilak to usi na ifurang, na imalang ko na idorie ko kyela iribi ko ikoditi icieng fad ara katiyok kagingak ko katibibilak.

¹Tona Bezalel, Oholiab ko cio kagingak fad kuna licio Lahitok kigingi ko kirunga lo yenun koditi lo kitiyo ticitici kulo duho faji na inyu ojir itii tic iya na locihare Lahitok Moses token.²Tinyia ilolongu Moses Bazalel ko Oholiab ko cio kagingak fad kuna licio Lahitok kirunga manyu kuna liruk fwonuno kitiyo tic. ³Ifotu icieng sangite fad kuna licio Israel lo kitiyo tic lo duho faji na inyu to kac kulo Moses. Manyu osodoro cio kiyaunita kiciorita to kiruk kiwanyi ko kiwanyi. ⁴Tona ongerihi kagingak fad tic na lorumu icieng itiyo lo duho faji na inyu.⁵Ko jimitan iyo Moses, “liyauno cio sangite ogal kuna lowahiti to duho lo faji na inyu na locik Lahitok ojo ojir itii. ⁶Tinyia icio Moses cik manyu iyari tenya nenge katwa lo kem fad: Kecio lobo tungani retoni kode ngorwani orihe odumu lobo tohi ara kiciorita lo faji na inyu. Tona itihi cio sodoro kiyauno sangite ari, ⁷tonyio tohi na lotehita kaduhok orumu lobolo ogal na lowahiti lo keruno tic.⁸Cio fad kuna igingiha to kiji lo katiyok ko kikukuma kema lomanyare ko kyela kigeniti tomon kulo usihin kuna ifurangi, imalangi ko kuna idoriari kuna likadi, ko cerubihin ikadahini kenite to kac kuna lomohoro. ⁹Oriworo afa kyela kigeniti fad karitun neicieng yadi tomon ko ongon manyu lalatun yadi are. ¹⁰Odumuni kyelani kigeniti miet imorihini ara lobi- imorihini manyu kuna kude miet iya na.¹¹Oto icieng ikukumahini konyeha kulo jararahin kuna ifurangi kutuk lo kyela kigeni lo lohicungi iyo Lobito itubit, itii manyu jii iyo itubit lo are. ¹²Ikukumahi manyu icieng konyeha kulo jararahin keek miet iyo kyela kigenit na lara lohicungi iyo itubit lo Lobito itii manyu jii iyo itubit lo are ara na lisirani konyeha kulo jararahin iyo kuna itubiti. ¹³Oto ko kikukumunoti jararahin kulo dahab keek miet imorunorihin kuna itubiti are fad ojir kema lomanyare olotu imoruno fad ara Lobito.¹⁴Ikukumu icieng kyela kigeniti to fofi kulo kiri ara kimuhi lo kwe lo kema lomanyare kuna lotum tomon ko Lobito. ¹⁵Icieng kuna kyela kigeniti tomon ko Lobito fad ara kuna iriworo kuna lara karitun neicieng yadi tomon ko miet ko lalatun yadi are to kyela Lobito lobit. ¹⁶Imorahi icieng kyela kigeniti miet ara itubitlobito ko kuna kude ile manyu ara itubit lo are. ¹⁷Oto icieng ikukumu konyeha kulo jararahin keek niet iyo kutuk lo kyela kigenit lo lohicungi iyo itubit lo Lobito manyu itii iyo kyela iribi lo lohicungi lo nu itubit bito.¹⁸Ikukumu manyu icieng jarara kulo mwala keek miet ojir imoru kema lomanyare ara Lobito. ¹⁹Tinyia ikukum icieng kimuhi lo kema lomanyare to fofi kulo mongi kulo kera kuna libuyi to renge na ido manyu to kai lona, icadduhini kiyeni na isisik na lonota otoc.²⁰Ikukum icieng gurihin kulo kema lomanyare kuna ibiri to bau lo ciani lyerati. ²¹Ara afa karitun lo guri Lobito Lobito futi tomon ko miet lalatun nenge futi are. ²²Ko riho are kuna lopar isirani. Ikukum icieng guri kulo kema lomanyare itiriri fad jii. ²³Ikukum icieng guri keek are ngati lo orof lo kema lomanyare.²⁴Manyu ikukum icieng todohin keek ongon kuna lofihi fotiricio kuneicieng tedohin are fotiri lo guri Lobito Lobito fotiri lo rihoti Lobito. ²⁵To ngati lo kai lo kai lo kema lomanyare manyu ofihi guri keek are, ²⁶ko tedohin keek ongon. are fotiri lo guri Lobito.²⁷Ikukumahi manyu icieng guri ile ngati lo lodoyore lo kolong lo kema lomanyare, ²⁸Manyu ikukumahini guri are iyo rukun lohicungi lo kema lomanyare.²⁹Iyo kuno rukuni are oryeha orumu guri many to kof many kai manyu itirutohini iyo oguliti Lobito itii icieng are fad ara na iriworo. ³⁰Tona ara afa guri mietauni ko tedohin tomon ko ile- are fotiri lo guri Lobito.³¹Ikukumu manyu icieng riho to bau lo ciani lyerati- miet iyo guri kulo Lobito ngati lo kema lomanyare, ³²miet manyu iyo Lobito ngati, ko miet iyo guri kuna longoni ngati lo lodoyore lo kolong iya lohicungi lo kema lomanyare. ³³Ikukum icieng riho kulo kiji kuna lopar many to lohiciahi many lohicungi. ³⁴odwany icieng guri to dahab manyu ikukumuni oguli kulo dahab kuna linief riho odwany manyu icieng riho to dahab.³⁵Ikukumu manyu icieng kyela kigenit to usi na ifurang, na imalang ko na idorie ko kyela iribi na likadi na likadahini cerubihin ija to tic lo kagingak. ³⁶Ikukumu icieng guri ongon to bau lo ciani lyerati manyu odwanyi to dahab. Ikukumu icieng kigolihin kuneicieng ko kikukumuno tedohin kuneicieng.³⁷To agwala lo kema ikukumu icieng kyela kigenit to usi na ifurang, na imalang ko na idori ko kyela iribi na liked katibibilani, ³⁸manyu ikukumahini guri miet ko kigolita kuneicieng. Odwany icieng kweci kul guri ko riho kuneicieng to dahab manyu ikukumahini tedohin kuneicieng tomon to mwalati.

¹Ikukumu Bezalel sanduk lo cik to bau lo ciani lyerati na lara karitun nenge futi ongon lalatun nenge futi are ko woita nenge futi are. ²Odwany inyi oleng ko katwa fad to dahab na ilihinya ko fihahino lohileleri to dahab iric kutuk nenge. ³Ikukumu inyi oguli kulo dahab ongon itiriehahi ko kejuha kunenge, oguli are angati oguli manyu are Lobito ngati.⁴Oto inyi ogatu keyek are kitingihin iyo bau lo ciani lyerati odwany kenite to dahab. ⁵Oto inyi itirutohi kuna keyek kiting iyo oguli kuna longoni marihin kulo sanduk otingorihin. ⁶Ikukumu inyi kimuhi lo seger lo kisa karitun nenge futi ongon ko lalatun nenge futi are.⁷Oto hati ikukumu cerubi are iyo dahab na lidonguni iyo lohicungihin kulo kimuhi. ⁸Ofik inyi cerub Lobito Lobito angati lo kimuhi ko Lobito manyu angati idongu icieng ara Lobito ko kimuhi. ⁹Otingo fuho kulo cerubi iya kai imuk kimuhi. Otong cerubi iya kiji na litirici deya iya kiji lo kimuhi.¹⁰Ikukumu icieng meja to bau lo ciani lyerati na longon karitun nenge futi uni lalatun nenge futi Lobito ko nusu ko woita nenge futi are. ¹¹Oto icieng odwany ken nenge to dahab na ilihinya ko fiha lohileleri lo dahab kalelehin irit. ¹²Ofik manyu icieng itaditi nenge na lotum rijon ko ladati lo kana ko fihahino manyu lohileleri lo dahab iyo itadi. ¹³Oculu manyu icieng oguli ongon ofihahini iyo rukuni kunenge oryeha ko lodufa lo kejuha.¹⁴Ofihi oguli onyiha ko lohileleri ojir itirutohinorehin keyek kitingita kulo meja. ¹⁵Ogatuni keyek kiting kulo meja iyo bau lo ciani iyerati manyu odwanyi to dahab. ¹⁶Manyu ikukumuni sangite kulo meja to dahab na ililinya, sahani kunenge, beseni ko ilebuha ko motiong kuna lijuhorihin kiciorita imatiti.¹⁷Ikukumu icieng lomo to dahab na ilinya, idongu icieng fotiri, kiniefi, tanitani manyu ikukumahi kubayahin kuna lori iya katurahak, bene ko lohimosi ara Lobito ko lomo fad. ¹⁸Ocar tanitanihin ara na lopar ile to kalelehin kulo kiniefi lo lomo uni angati, uni manyu Lobito ngati. ¹⁹Kubayahin kuna lori iya katurahak kulo iyau bene ko iturit kuneicieng uni ongoni iyo Lobito tani tani, uni manyu iyo lobo. Ara iya na to tani tanihin fad ile kuna locaru iyo kiniefi lo lomo.²⁰Manyu iyo kiniefi lo lomo, ongoni kubayahin ongon kuna lori iya katurahak kulo iyau ko bene ko iturit kuneicieng. ²¹Ongon kubaya Lobito locarare lo tanitanihin ketemok, kubaya Lobito locarare lo tanitanihin kulo are ko kubaya manyu Lobito locarare lo tanitanihin kulo uni tanitanihin ile fad. ²²Kubayahin ko tanitanihin ojir ara Lobito ko kiniefi lo lomo ara na lidonguni to dahab na ilinya²³Ikukumu icieng lomohin kunenge mietare ara Lobito ko kingutita kulo kofi kunenge ko sahani kunenge fad to dahab na ilinya. ²⁴Ikukumu icieng lomo ko sangite kulo tic nenge fad to dahab na ilinya na lotum kirioci ratil mia Lobito.²⁵Ikukumu icieng ciali lo iheru iyo bau lo ciani lyerati. Oriri afa inyi ara karitun nenge futi Lobito ko nusu lalatun manyu nenge futi Lobito ko nusu ara woita nenge futi uni ko muriaha kunenge kuna lara Lobito ko inyi. ²⁶Odwanyi kwe nenge ko ken nenge fad ko muriaha to dahab na ilinya manyu ofihi lohileleri kalele nenge iric.²⁷Ikukumu icieng oguli ongon ofihahini onyiha ko lohileleri are angati ko are manyu Lobito ngati ojir itirutorihin keyek kitingihin kunenge. ²⁸Ogatuni keyek kitingihin iyo bau lo ciani lyerati manyu odwanyi kenite to dahab na ilihinya. ²⁹Ikukumu manyu icieng ngoroni kitwei na iur ko iheru na likaniti na litii katiurok kagingak.

¹Ikukumu icieng ciali lo cura kiciorita to bau lo ciani lyerati na lara woita nenge to kof futi ongon ko nusu manyu karitun nenge futi mietare ko nusu lalatun nenge manyu futi mietare ko nusu. ²Ofik icieng muriaha iyo rukuni kunenge ongon fad na lara muriaha ko ciali Lobito odwanyi ken lo ciali to mwalati. ³Ikukumu icieng sangite kunenge fad to mwalati motiong, kiworiti kulo ingula, ilebuha kirwaciti kulo okoto, kicuhita kulo tyang ko kikuriti kulo kima.⁴Ikukum icieng kei kei lo ciali bwai lo mwalati ojir ongon locolo lo ciali ojir okor ciali to kiji. ⁵Ociolu icieng oguli kuna lojir itirutohinorehin keyek kitingita kulo ciali ofihi iyo rukuni ongon kulo kei kei lo ciali.⁶Ikukumu icieng keyek to bau lo ciani lyerati odwanyi kenite kuneicieng to mwalati. ⁷Itirutohi icieng kuna keyek iyo oguli ojir ongon to marihin kulo ciali otingitarihin ciali. Ikukumu icieng ciali ara na iwat to bauhin.⁸Ikukumu icieng besen mwalati ko kitiwoitita nenge mwalati iyo madarahin kulo ngorwo kuna lirwa lokoli lo kema lohiricore.⁹Na lijifahi, ikukumu icieng sita lo kema. Ara afa ngati lo orof karitan nenge yadihin keek miet ko kyela kigeniti iribi na loiro ¹⁰ko guri keek are ko tedohin keek are kuna lara mwala ko kigolihin ko ogulihin kulo rial lo guri.¹¹Ara manyu afa ngati lo kai karitan nenge yadihin keek miet na lara guri kunenge keek are ko tedohin mwala manyu keek are ko kigolihin ko oguli kulo rial kai lo guri. ¹²Ara afa lalatun nenge to ngati lo lodoyore lo kolong yadi keek are ko miet manyu ongon ko kyela kigeniti ko guli kulo rial kai lo guri.¹³Ngati lo okangere manyu ara yadi keek are ko miet. ¹⁴Kyela kigenita kuna lara yadi mietare orumu ongoni angati lo lokoli ko guri uni ko tedohin manyu uni, ¹⁵Ko kyela kigeniti kuna lara yadi mietare manyu ongoni angati lo lokoli ko guri uni ko tedohin manyu uni. ¹⁶Ara afa kyela kigeniti kuna liticemarihin sita fad kyela iribi na loiro.¹⁷Ara afa tedohin kulo guri mwala. Ara kigolihin ko oguli kuna longoni kai lo guri fad rial, manyu kweci kulo guri fad odwanya to rial, tona ongoni afa ogulihin kulo rial kai lo guri fad kulo sita. ¹⁸Ara afa kyela kigeniti kulo lokoli lo sita fad kuna litii lo usi na ifurang, na imalang ko na idorie ko kyela iribi na loiro tic lo katibibilani. Ara afa karitan nenge yadi tomon oto hati woita nenge iya kai ara futi mietare, ¹⁹ko guri ongon ko tedohin mwala ongon. Ara afa kigolihin kuneicieng ko oguli rial manyu odwanyi kweci kuneicieng to rial. ²⁰Itongo afa kiguriti kulo kema lomanyare ko kulo sita ara mwala fad.²¹Ara ene tuban lo sangite kuna litiyorehin kifaha kema lomanyare, kema lomanyare lo cik kuna ligeri to ciha lo Moses iyo cio kulo imanit lo Levi iyo riho lo Ismar kito lo Aaron kadwarani. ²²Itii Bezalel kito lo Uri lotata lo Hur lo imanit lo Juda sangite pili iya na locihare Lahitok iyo Moses ²³orumu Oholiab kito lo Ahismak lo imanit lo Dan ongon ara Lobito ko inyi- ka ngadani katibibilani manyu karifani na loyen kikaruto usihin kuna ifurangi imalangi ko kuna idoriari ko kyela iribi.²⁴Tuban lo dahab na litiyorihin kema lomanyare iyo kiciorita lo kitilora ara afa taleni keek are ko mietangon ko sekeli mia mietare ko keek uni iyo sekel na litiyorehin to kema lomanyare na inyu. ²⁵Rial na litubuni iyo ilulung kulafa likeni orumu ara taleni mia Lobito ko sekeli Alif Lobito ko mia mietare ko keek mietare ko miet to sekel na litiyorehin kema lomanyare na inyu. ²⁶Bek Lobito to tungani Lobito na lara nusu lo sekel to sekel na litiyorehin kema lomanyare na inyu iyo tungani na lorutohi kiji lo kuna likeni na lara karihin kulo obolore nenge keek are kode ogal ara afa kuna cio to tuban neicieng rei alif mia ile ko uni ko mia miet ko keek miet.²⁷Itiyorehin taleni mia Lobito lo kikukumuno tedohin kulo kema lomanyare ko faji na inyu ko kulo kyela kimuhihin, tedohin mia Lobito iyo taleni kulo rial mia Lobito, talen Lobito to tedoti. ²⁸Itiyore icieng kuna sekeli alif Lobito ko mia mietare ko keek mietare ko miet ara kikukumita kulo gulihin ko oguli kulo guri ko kidwanyita lo kweci kulo guri. ²⁹Mwalati na lorumuni iyo kiciorita lo kitilora ara afa taleni keek mietare ko sekeli alif are ko mia ongon.³⁰Itiyore afa icieng lo kikukuma tedohin kulo kema lotubare, ko ciali mwalati lo cura kiciorita ko kei kei nenge ko sangite kunenge fad, ³¹Tedohin kuna lirit sita fad ko kulo lokoli nenge ko bilieta kuna logurorehin kema lomanyare na inyu ko kulo kema na lirit sita fad.

¹To usihin kuna ifurangi, imalangi ko kuna idoriari, ikukumu icieng kyelani kuna litibibili kuna litiyorehin kirwaa kema lomanyare na Inyu. Orifahi manyu icieng kyelani kuna inyuji iyo Aaron iya na locihare Lahitok Moses.²Ikukumu icieng kol lo kyela, iyo dahab ko usi na ifurang, na imalang ko na idorie ko iyo kyela iribi na loiri. ³Idongu icieng tadahin kulo dahab kuna igereweha ko kilirati ara kofi kuna litibibilarehin usi na ifurang, na imalang ko na idorie ko kyela iribi na loiri tic lo kac kulo cio kagingak.⁴Ikukumu icieng kitiherita kulo okokoho kulo kol lo kyela kuna litiniefahini iyo rukuni kunenge are ojir otorahinorehin. ⁵Ori gas lo komoc nenge na likukumi to kigingi iya inyi - ara lobito ko kol lo kyela manyu ikukumi to dahab ko to usi na ifurang, na imalang ko na idorie ko to kyela iribi na loiri iya na locihare Lahitok Moses.⁶Otod icieng fotiricio lo kuna morutok oniks to dahab manyu igerohini kenite kuneicieng karanacio kulo tee kulo Israel. ⁷Oto hati ikolohini icieng iyo kitiherita kulo okokoho kulo kol lo kyela ara morutok kitiiunita kulo tee kulo Israel iya na locihare Lahitok Moses.⁸Ikukumu icieng ogogor lo locolo na lara tic lo katibibilani na igingi. Ikukum icieng inyi to dahab, usi na ifurang, na imalang ko na idorie ko to kyela iribi na loiri. ⁹Ara orumu inyi na litulo are ara lalatun ko karitan nenge fad tadati lo kana lobito lobito.¹⁰Oto hati itiparahini morutok kuna longoni gelegele idufiti ongon ken lo ogogor lo locolo. Iyo idufit ketemoni, ongon afa karnelian, krisolit ko beril; ¹¹Iyo idufit lo are ara tarkuois, lapis la zuli ko emirald; ¹²Iyo idufit lo uni ara jakint, aget ko amasist; ¹³iyo idufit lo ongon ara topas, oniks, ko jaspar. Itiparahini icieng iyo tedohin kulo dahab.¹⁴Ara orumu kuna morutok tomon ko are na longon lobito lobito ko karanacio kulo tee kulo Israel lobito lobito okorodohini karana lo lobito imanit lo Israel. ¹⁵Ikukumu icieng tongosi kulo dahab na ilihinya kulo ogogor lo locolo kuna lori iya kofi. ¹⁶Ikukumu icieng tedohin kulo dahab are ko oguli kulo dahab are ikolohini oguli rukuni kulo ogogor lo locolo.¹⁷Ikolohi icieng tongosi kulo dahab iyo oguli kuna longoni rukuni lo ogogor lo locolo, ¹⁸manyu angati lo lohicungihin kulo tongosi iyo kuna tedohin are iyo okokoho kulo kol lo kyela to ngati lo ketemoni.¹⁹Ikukumu icieng oguli kulo dahab are ikolohini iyo kunakude rukuni kulo ogogor lo locolo to ngati lo katua onyiha ko kol lo kyela. ²⁰Oto hati ikukumuni kunakude oguli kulo dahab are ikolohini fotiri lo ogogor lo locolo ketemoni lo kol lo kyela onyiha ko lorifare kai lo gas lo kyela lo kol lo kyela.²¹Otorahi icieng oguli kulo ogogor lo locolo iyo oguli kulo kol lo kyela to kofite na ifurang orihohinorehin inyi iyo gas lo kyela ojir ogogor lo locolo ida okoraru iyo kol lo kyela, iya na locihare Lahitok Moses.²²Ikukumuni kanyi lo kol lo kyela to kyela na ifurang tic lo kakadani, ²³ko lohiburahinore kiji lo kanyi na lori iya faji lo murut ko lohileleri irit ene faji lo murut ojir ida ocira. ²⁴Ikad icieng katurahak to usi na ifurang, na imalang ko na idorie itiric kutuk lo kanyi to orof.²⁵Ko kikukumahinoti igoloho to dahab na ilihinya ikolohini iyo kutuk lo kanyi itididilahini kijihin kulo kuna katurahak iric. ²⁶Itilililahino igoloho ko katurahak kutuk lo kanyi na lirwaarehin iya na locihare Lahitok Moses.²⁷To Aaron ko tee kunenge orifahi icieng kanyihin kuna litibibili to kyela iribi - tic lo kakadani ²⁸ko turubuc lo kyela iribi ko turubuci kuna sidiha ko curuwal kulo kyela iribi na litibibili. ²⁹Ikukumi kingotit na ijoro to kyela iribi na likadi to usi na ifurang, na imalang ko na idorie tic lo tungani katibibilani iya na locihare Lahitok Moses.³⁰Ikukumu icieng sahan kiherit na inyu to dahab na ilihinya oto hati igerohini kiji nenge ara na lokorodohini ojo, ' Onyu Diho Lahitok .'' ³¹Oto hati otorahini kofite na ifurang keju nenge otorahinorehin iyo kokom lo turubuc iya na locihare Lahitok.³²Tona okeruni tic lo lomanyare na Inyu kode kema lohiricore. Itii cio kulo Israel sangite pili iya na locihare Lahitok Moses. ³³Oto hati iyauni sangite kulo kema lomanyare iyo Moses, kema ko sangite kunenge fad; guri, tedohin, riho, oguli, kigolihin, kofi, kyela kigenit ko bilieta kiguri kunenge fad, ³⁴kyela lo fofi kulo mongi kulo kera na libuyi to renge na ido ko kiyene na isisik ko kyela kigeniti; ³⁵Sanduk lo cik ko keyek kitingiti kunenge ko kimuhit lo lohitongore lo kisa;³⁶Meja ko sangite kunenge fad ko mugati lo ngonun lo Lahitok; ³⁷lomo lo dahab na ilihinya ko parun lo lomohin kunenge ko sangite kunenge fad ko ngoroni lo oliv lo kinoha; ³⁸ciali lo iheru na likukumuni to dahab, ngoroni kitwei, iheru na likaruti na iur ko kyela kigenit lo kema na Inyu; ³⁹ciali mwalati ko keikei nenge mwalati, keyek kitingiti kunenge ko sangite kunenge fad ko besen ko kitiwoita nenge fad.⁴⁰Kyela kigeniti kulo sita ko guri ko tedohin kunenge, ko kyela kigeniti kulo lokoli, kofi ko bilieta kiguriti kulo sita, sangite pili kulo lomanyare na Inyu kode kema lohiricore; ⁴¹ko kyelani kuna likadi kulo kiciefita irwaarehin lomanyare na Inyu, kyelani kulo Aaron kadwarani ko kulo tee kunenge kuna litiyorehin ara kadwarak.⁴²Litii cio kulo Israel tic fad na locik Lahitok Moses. ⁴³Oher Moses tic neicieng odeu ojo litii icieng iya na locihare Lahitok, oto Moses ko kigatahino icieng.

¹Tona ojo Lahitok diho Moses, ²"Ifahahi lomanyare lohiricore far lo lobito iyo ofa lo lobito.³Tofik sanduk lo cik katua nenge manyu igenohi na sanduk to kyela kigenit. ⁴Iyauno meja manyu ifik kai nenge tohi na locam to ngonun kai. Ito hati iyauno lomo ikukumahi lomohin kunenge.⁵Tofik ciali dahab lo iheru ketemoni lo sanduk lo cik ito hati ifik kyela kigenit agwala lo kema lomanyare. ⁶Tofik ciali kicurita lo icioriti ketemoni lo agwala lo lomanyare, kema lohiricore. ⁷Tofik besen kiji lo kema lohiricore ko ciali lo cura lo icioriti, tofik kifi katua nenge.⁸Togurohi sita irit ito hati ifik kyela kigenit lo lokoli. ⁹Todumu ngoroni kitwei, totwe kema lomanyare ko sangite fad kuna longoni katua. Itinyujo inyi ko sangite kunenge fad oto cia inyi onyu. ¹⁰Tinyia totwe ciali kicurita lo icioriti ko sangite kunenge fad, itinyujo ciali oto cia onyu noo. ¹¹Totwe besen ko kiwoitita nenge manyu itinyujo icieng.¹²Iyauno Aaron ko tee kunenge agwala lo kema lohiricore manyu ilala icieng to kifi. ¹³Tinyia iticiefo Aaron to kyelani kuna inyuji, totwe inyi manyu itinyujo ojir inyi kirwaa nan ara kadwarani.¹⁴Iyauno tee kunenge iticief icieng to kanyihin. ¹⁵Totwe icieng iya na litware apa neicieng ojir icieng kirwaa nan ara kadwarak. Itongo twa neicieng ara lo dwarun na litongo ara neicieng iyo kofiang kuneicieng fad. ¹⁶Itii Moses sangite fad iya na locihare Lahitok.¹⁷Tona ifahahini kema lomanyare far lo lobito ofa lo lobito iyo kari lo are. ¹⁸Kalifahahi Moses kema lomanyare, ofik inyi tedohin fajihit kuneicieng ko dufahino guri ko kikokolohino riho manyu itiwoitahi wirihin. ¹⁹Oto ko fetahino kema kai lo lomanyare ko fiha kimuhihin kai lo kema iya na locihare Lahitok inyi. ²⁰Odumu inyi morutok kuna ligerohini cik ofik katua lo sanduk lo cik ko kisudahino keyek kitingi iyo oguli to marihin kulo sanduk ko fiha kitongi lo kisa kai nenge.²¹Oto ko kiyauno sanduk lo cik katua lo kema lomanyare ko kitihohino kyela kigenita, igenore sanduk lo cik iya na locihare Lahitok inyi. ²²Ofik Moses meja katua lo kema lohiricore ngati lo kai lo kema lomanyare oleng lo kyela kigenit ²³ko kicadohohino mugati kai nenge ketemoni lo Lahitok iya na lorihohinore Lahitok inyi.²⁴Ofik inyi kiniefi lo lomo katua lo kema lomanyare isiran ko meja iya ngati lo orof lo kema lohiricore ²⁵ko kitiparahino lomohin ketemoni lo Lahitok iya na locihare Lahitok inyi.²⁶Ofik Moses ciali lo dahab ketemoni lo kyela kigenit to katua lo kema lomanyare ²⁷ko curahino iheru kai nenge iya na locihare Lahitok inyi.²⁸Oto ko fihahino kyela kigenit agwala lo kema lomanyare. ²⁹Otorihi inyi ciali kicurita lo icioriti onyiha ko agwala lo kema lomanyare lohiricore ko curahino kai nenge icioriti kuna lara sang ko icioriti kulo ngamang iya na locihare Lahitok inyi. ³⁰Ofik inyi besen kiji lo kema lohiricore ko ciali lo cura icioriti ko kijuhohino kifi katua kuna ngilalarehin.³¹oto Moses ko Aaron ko tee kunenge ilalare kac ko kejuha kuneicieng. ³²Ilalare icieng kalorutoroti kema lohiricore kode kolofworoti iyo ciali lo cura icioriti iya na locihare Lahitok Moses. ³³Tinyia ifahahi Moses kiwata lo sita irit kema lomanyare ko ciali ko fiha kyela kigenit lokoli lo sita. Tona okeru Moses tic fad.³⁴Tinyia imuhe idis kema lohiricore, manyu ifute kimedek lo Lahitok kema lomanyare. ³⁵Ida Moses otum rutoro kema lohiricore tonyio limuhe idis kema manyu ifut kimedek lo Lahitok kema lomanyare.³⁶Iyo lotita lo cio kulo Israel fad, kolotingoro idis to kai lo kema lomanyare, owoju manyu icieng ojiok, ³⁷ati kalida idis otingoro, ida manyu icieng ojiok many far na lotingorore idis. ³⁸Tona ongon afa idis lo Lahitok kai lo lomanyare to far manyu ongon kima katua lona idis karue to ketemoni lo cio kulo Israel fad iyo lotita neicieng fad.

¹I lolong Lahitok Moses manyu o tenyati ko inyi to kema lohiricore. O joo diho inyi, ²"To tenya ko cio kulo Israel to rihohi icieng i joo, ' Ka li yauno lobo to kiji ningi kiciorita diho Lahitok, i yauno kode kiteng kode ker kode kine.³Ka li tongo kiciorit ara kiciorit locurat to twol lo kicu kunino, o jir ara mongo na lo ru ko lobo imorony. O jir inyi i yauno i totorohi to lokoli lo kema lohiricore, o jir Lahitok i fotu. ⁴O jir inyi o fik kac kunenge kue lo na kiciorit locurat, oto cia i fotuni ara kitobit nenge, o pulorehin inyi.⁵O jir inyi o ngotohi na mongo lo rihe o ngarihi ketemoni lo Lahitok, oto hati tee kulo Aron kadwarak i yauno okoto o rwacahini ken lo ciali fajihit fad ko agwala lo kema lohiricore. ⁶O jir inyi o yang na kiciorita locurat i ngungut.⁷Tee kulo Aron kadwarak o fik kima ciali manyu i canahini keyek kai lo kima. ⁸O jir dong tee kulo Aron kadwarak i canahi tyang kai lo keyek kuna lo ngoni kimatare ara lobito ko kue ko somia. ⁹O jir inyi i lal sangite kulo katua lo kocehe ko kejuha fad to kifi o jir kadwarani o curahi icieng fad kimatare. Ara na mongo kiciorita locurat, kiciorita na li fotohini Lahitok to kima na li iti kwama uron nenge Lahitok.¹⁰Ka lara kiciorita kiciorita locurat na lara ker kode kine, o jir inyi i cio kore kode mongo lo ker na lo ru lofunya to ken. ¹¹O jir inyi o loo o ngotohi iya ngati lo kai to ciali, ketemoni lo Lahitok, manyu o jir tee kulo Aron kadwarak o dumu okoto nenge o rwacahini ken lo ciali fajihit fad.¹²O jir inyi i ngungut o jir kadwarani i canahi kai lo kima ko kue ko somia. ¹³O jir inyi i lal sangite kulo katua lo kocehe fad ko kejuha to kifi o jir kadwarani o curahi icieng fad ciali. Ara na kore kode mongo lo ker kiciorita locurat, kiciorita na lo curahini diho Lahitok to kima na li iti kwama uron nenge Lahitok.¹⁴Ka lara kiciorita na li cwarati Lahitok kiciorita kuna lara kweny, o jir inyi i cio kuri kode amam na lo ngarihi. ¹⁵O jir kadwarani i yauno na kwenyite ciali i nire murut o ngute kue i pulohi hati ciali, o jir iti yijahini okoto nenge ngatihin kulo ciali fad.¹⁶O jir inyi o dumu ojune nenge i bire iya ngati lo kai idi lo ngon lokuroni. ¹⁷O jir inyi o cir na kwenyite to fuho ida hati o kore are oto hati kadwarani o curahi ciali hatua. Ara inyi kiciorita locurat, kiciorita na li fotohini Lahitok to kima na li iti kwama uron nenge Lahitok.

¹Ka li yauno lobo tungani kiciorita lo ngamang diho Lahitok, o jir kiciorita nenge ara kofwo kuna i tinyaha. O jir inyi i juhohi ngoroni, manyu o fik iheru katua ²i yaru hati diho tee kulo Aron kadwarak. O jir kadwarani o ngonyu kuna kofwo li karuto to ngoroni ko iheru i fut kana o curahi ciali ara kiciorita kitiiunita, kiciorita na li fotohini diho Lahitok to kima na li iti kwama uron nenge Lahitok. ³Kuna kude kofwo fad ara kulo Aron ko tee kunenge ara kiciorita na i nyu noo na li fotohini Lahitok to kima.⁴Ka li yauni kiciorit lo ngamang na lo funi to furnuk lo mugati, o jir ara na li tiyi to kofwo kuna i tinyaha lido, kode mugati kuna isisihi kuna lo funi o ru ibula to katua ida manyu i karuti to ngoroni lo oliv, kode kuna i gereweha ida i karuti to ibula ati o lilingi to ngoroni lo oliv. ⁵Ka lara kiciorita lo ngamang kunino lo mugati kuna lo feji to tobok lo biliet, o jir i tiyi to kofwo kuna i tinyaha lido kuna li karuti to ngoroni ati o ru ibula.⁶To culuyuk ito hati i juhohi ngoroni, ara kiciorita lo ngamang. ⁷Ka lo ngoji kiciorita lo ngamang kunino to ongojit, o jir ara to kofwo kuna i tinyaha lido ko ngoroni lobo.⁸I yauno kiciorita lo ngamang kuna li tiyi to kuno sangite iyo Lahitok, i fotohi diho kadwarani o jir i yaru ciali. ⁹O jir inyi o dumu lobo iyo kiciorita ara ki iti iyita o curahi kai lo ciali ara daha kiciorita na lo curahini na i ur iti kwama Lahitok. ¹⁰Beciek lo kuna kiciorita kulo ngamang ara kulo Aron ko tee kunenge tonyio ara daha na i nyu noo na li fotohini diho Lahitok.¹¹Kicioriti kulo ngamang fad kuna li yauno ite diho Lahitok, o jir i tiyi o ru ibula tonyio o jir ite ida i curahi ibula kode otoro iyo daha na li cwarati diho Lahitok. ¹²I tum ite ki fotohino ara kiciorita kulo kwama lo denguno ati o jir ida i fotohini ara kiciorita locurat kue lo ciali na li iti kwama uron nenge Lahitok. ¹³Iti jijimata kiciorita kuningi fad to balang. Ke ngohi balang lo ciharu lo Lobanga ningi iyo kiciorita lo ngamang kuningi, iti fik balang iyo kicioriti kuningi fad.¹⁴Ka li yauno ite kicioriti ngamang kulo daha ngejuk diho Lahitok, i yaunoti ngamang kuna lo siduni i bonyi manyu o feji to kima. ¹⁵To fik ngoroni ko iheru katua, ara na kiciorita ngamang. ¹⁶O jir kadwarani o curahi ngati lo kuna ngamang li bonyi, ko ngoroni ko iheru fad ara daha na li ciori diho Lahitok.

¹Ka lara kiciorita nino kiciorita lo kimoraru, ito hati isi i cio kiteng mongo kode botor, o jir isi i cio diho Lahitok kiteng na lo ru lofunya to ken. ²O jir isi i fik kac kunino kue lo kiciorita nino i ngotohi inyi agwala lo kema lohiricore. Oto hati kadwarak tee kulo Aron o rwacahi okoto nenge ngatihin fad kulo ciali.³Iyo kiciorita lo kimoraru o jir i yauno daha lo ki cwara diho Lahitok; sangite kulo katua lo kocehe ko somia fad na lo bubur icieng, ⁴talangur are fad fad ko somia na lo bubur icieng na lo nyiha ko irafu, ko opei lo munya na lo jir i tiimu ara lobito ko talangur. ⁵Oto hati tee kulo Aron ko curahino kai lo ciali kai lo kicioriti locurat na lo ngon kai lo keyek kulo kima kuna lo daha kima, ara inyi daha kiciorita na li iti kwama uron nenge Lahitok.⁶Ka li cwara isi kiciorita nino to twol lo kiri kode kera ara kiciorita lo kimoraru diho Lahitok, o jir isi i cio kore, mongo lo ker kode botor na lo ru lofunya to ken. ⁷Ka li cwara isi kito lo ker o jir i fotohi ketemoni lo Lahitok, ⁸i fik kac kunino kue nenge ito i ngotohi agwala lo kema lohiricore. Oto hati tee kulo Aron o rwacahi okoto nenge ngatihin kulo ciali.⁹Iyo na kiciorita lo kimoraru o jir i yauno daha lo ki cwara diho Lahitok; somia nenge ko tima na lo ngutuni many to lohirici lo komoc, sangite kulo kocehe fad ko somia na lo bubur icieng fad, ¹⁰talangur are fad ko somia na lo bubur icieng o nyiha ko irafu, ko opei lo munya na lo jir i tiimu ara lobito ko talangur. ¹¹O jir kadwarani o curahi icieng ciali ara daha lo ki cwara na li fotohini diho Lahitok.¹²Ka lara kiciorita nino kine o jir isi i fotohi ketemoni lo Lahitok, ¹³to fik kac kunino kue nenge, i ngotohi hati ketemoni lo kema lohirimorare. Oto hati tee kulo Aron o rwacahi okoto nenge ngatihin kulo ciali. ¹⁴Iyo na kiciorita nino o jir isi i cio ene kicwara lo daha diho Lahitok; sangite kulo katua lo kocehe ko somia na lo bubur icieng.¹⁵talangur are fad ko somia na lo bubur icieng o nyiha ko irafu ko opei lo munya na lo jir i tiimu ara lobito ko talangur. ¹⁶O jir kadwarani o curahi icieng ciali ara daha kiciorita na li iti kwama uron nenge, ara somia fad lo Lahitok. ¹⁷Ara ene itidwar na lo sio to kofiang fad kuna li jifita, fajihit fad kuna li manyare ite o jir ite ida i nyia lobo somia kode okoto.

¹O joo Lahitok diho Moses, ²"To teny diho cio kulo Israel tijio, 'Ka li pal lobo tungani ara na lida o fik ara lo atii, i tiyi tohi na li iti dwara iyo cik lo Lahitok. ³Ka li pal kadwarani na lo twei, i yauno loguce iyo cio. O jir inyi i yauno mongo na lo ngarihi diho Lahitok na lo ru lofunya ara kiciorita lo kipal to kipal na li tiyi inyi.⁴O jir inyi i yauno na mongo agwala lo kema lohiricore i fotohi ketemoni lo Lahitok. O jir inyi o fik kac kunenge kue nenge oto hati o ngotohi inyi inyia ketemoni lo Lahitok. ⁵Tinyia o jir kadwarani na lo twei o dumu lobo okoto lo na mongo o rutorore kema lohiricore.⁶O jir inyi i lutohi kafiele nenge katua lo na okoto o rwac iyo ketemoni lo Lahitok kakeny mietare ken lo kyela kigenit lo faji na i Nyu. ⁷Oto hati kadwarani i juhohi okoto lobo iyo muriaha kulo ciali lo iheru na lo ngon ketemoni lo Lahitok katua lo kema lohiricore. Otonge lo okoto lo na mongo fad o jir i juhohi fotiri lo ciali locurare lo kiciorita na lo ngon ketemoni lo agwala lo kema lohiricore.⁸O jir inyi o wadu somia fad iyo na mongo lo kiciorita lo kipal, somia fad na lo bubur sangite kulo katua lo kocehe, ⁹talangur are fad ko somia na lo bubur icieng fad na lo nyiha ko irafu ko opei lo munya na li tiimuni ara lobito ko talangur ¹⁰iya na lo dumaritarehin somia iyo kiciorita lo kimoraru. Oto hati kadwarani o curahi icieng kai lo ciali lo kiciorita.¹¹Ati cioni lo na mongo ko tyang nenge fad ko kue ko kejuha ko monyi, ¹²sangite kulo ken lo na mongo kula kude fad o jir inyi i yaru oleng to katua lo kem iya faji na li iti nyuji na lara lokuroni lo ingula o jir o curahi inyi ijia kai lo ingula.¹³Ka li pal ilulung lo cio kulo Israel fad kipal na lida ara lo atii, i tiyi tohi na na lo beru cik lo Lahitok, kileng ngida ilulung o yen na tenya ara icieng kapalak. ¹⁴Ka lo fwonu icieng o yen kipal neicieng, o jir ilulung i yauno mongo na lo rihe o ngarihi ara kiciorita lo kipal, i totorohini ketemoni lo kema lohiricore. ¹⁵O jir lohitwaha kulo cio o fik kac kuneicieng kue lo na mongo to ketemoni lo Lahitok manyu o ngotohini na mongo inyia ketemoni lo Lahitok.¹⁶Oto hati kadwarani na lo twei i yaru lobo okoto lo na mongo o rutorore kema lohiricore. ¹⁷I lutohi cia inyi kafiele iyo na okoto o rwace ketemoni lo Lahitok iyo kigenit kakeny mietare.¹⁸O jir i juhohi lobo okoto iyo muriaha kulo ciali na lo ngon ketemoni lo Lahitok iyo kema lohiricore. Otonge lo okoto fad o jir i juhohi fotiri lo ciali locurare lo kiciorita na lo ngon ketemoni lo kema lohiricore. ¹⁹O jir inyi o wonyu somia na lo ngon katua nenge fad o curahi kue lo ciali.²⁰O jir i tiyore ene mongo iya na li tiyore mongo lo kiciorita lo kipal token. Tona, oto cia kadwarani o caf icieng oto manyu o launi icieng l. ²¹Oto cia inyi i yaru na mongo oleng to kem o loo o cure iya na lo curarore inyi lo ketemoni. Ara ene mongo kiciorita lo kipal lo ilulung.²²Ka li pal kaboloroni lolunyaje, manyu i tiyi lobo tohi na lo beru cik lo Lahitok Lobanga nenge, lo cifu inyi loguce. ²³Ka lo lotu inyi o yen kipal nenge, o jir i yauno kore ara kiciorita lo kipal nenge na lo ru madati.²⁴o jir inyi o fik kac kunenge kue lo na kore manyu o ngotohi inyi faji na lo ngotorehin kiciorita ketemoni lo Lahitok. Ara na kiciorita lo kipal. ²⁵O jir kadwarani o dutu lobo okoto lo na kiciorita lo kipal to kafiele nenge o twehi muriaha kulo ciali locurare lo kiciorita, i juhohi hati otonge lo okoto fotiri lo ciali lo cura lo kiciorita.²⁶O jir inyi o curahi somia nenge fad ciali iya na lo curare kiciorita lo kiciorita lo kimoraru. Tona o caf cia kadwarani kipal lo na tungani oto cia o launi inyi.²⁷Ka li pal lobo tungani to kiji lo ilulung lolunyaje, manyu i tiyi lobo tohi lo beru cik lo Lahitok, lo cifu inyi loguce. ²⁸Ka lo lotu inyi o yen kipal nenge, o jir inyi i yauno kiciorita lo kipal na li pal inyi, kine botor na lo ru madati.²⁹O jir inyi o fik kac kunenge kue lo na kine oto hati o ngotohini longotore lo kiciorita locurat. ³⁰Oto hati kadwarani o dutu lobo okoto to kafiele nenge o twehi muriaha kulo ciali locurare lo kiciorita manyu i juhohi otonge lo okoto fotiri lo ciali locurare lo kiciorita.³¹I ngohi inyi to dumu somia fad iya na lo dumarorehin somia iyo kiciorita lo kimoraru o jir kadwarani o curahi ciali ara na li iti kwama uron nenge Lahitok, tona o pul cia kadwarani inyi manyu o launi cia inyi.³²Ka li yauno inyi kito lo ker ara kiciorita lo kipal nenge, o jir i yauno botor na lo ru madati. ³³O jir inyi o fihahi kac kunenge kue nenge o ngot hati ara kiciorita lo kipal faji na lo ngotorehin kiciorita kuna lo curati.³⁴Tinyia o jir kadwarani o dutu lobo okoto lo na kiciorita lo kipal to kafiele nenge o twehi muriaha kulo ciali lo cura lo kiciorita, i juhohi otonge lo okoto fotiri lo ciali lo cura lo kiciorita. ³⁵O jir inyi o dumu somia fad iya na lo dumunitarehin somia iyo kiciorita lo kimoraru, manyu o jir kadwarani o curahi ciali kai lo kiciorita na li fotohini Lahitok to kima. Tona o pul cia kadwarani inyi iyo kipal na li tiyi inyi manyu o launi cia kipal nenge.

¹Ka li pal tungani to buhorore tohi na lo tenyati o ning inyi o deu manyu o yen, ida hati o tulu, ara kipal nenge. ²Kode ka lo tir tungani lobo tohi i dwa, kode tyang na i dwa lo mwang kode lo kang kode tohi na lo kudita to kof kileng ngida o yen, i rumu inyi li bot manyu lo cifu loguce.³Kode ka lo tir lobo tohi i dwa to ken lo tungani kode lobo tohi na ngo tum ki iti bota inyi kileng ngida inyi o yen, ka lo lotu inyi o yen to kifwongi o lotu cia loguce i nief inyi. ⁴Kode ka li buti tungani to dataru ara na lo cik ki tiyo lobo tohi i jir kode na i rohoi to tenya na li butia tungani to dataru lolunyaje, ati ka lo lotu inyi o yen, lo cifu inyi loguce.⁵Ka lo cifu tungani lobo loguce to kuno kikoihin, o jir o tulu kikoi na li palare inyi ⁶manyu ara kidumi lo kipal na li tiyi inyi, o jir inyi i yauno diho Lahitok kito lo ker kode lo kine botor to twol nenge ara kiciorita lo kipal o lotu kadwarani o pul kipal nenge.⁷Ka lida inyi o tum rumuno kito lo ker, o jir inyi i yauno kurihin are kode amami are diho Lahitok ara kitobita lo kipal nenge ara lobito kiciorita lo kipal, lobito kiciorita locurat. ⁸O jir inyi i yauno icieng diho kadwarani o jir re i tem ki cwara lobito ara kiciorita lo kipal. O jir inyi i niru kue nenge to murut ida hati o ngote tur, o jir ⁹o rwacahi okoto nenge ngatihin kulo ciali, otonge lo okoto nenge o jir i tiijahi fotiri lo ciali. Ara inyi kiciorita lo kipal.¹⁰Oto hati kadwarani i cio na bito ara kiciorita locurat iya na li iti mohunorehin o jir o pul inyi to kipal na li tiyi inyi, oto cia o launi inyi.¹¹Ati ka lida inyi o tum rumuno kurihin kode amami are, o jir inyi i yauno lokirie lo kofwo kuna i tinyaha lobito ara kiciorita lo kipal nenge. O jir inyi ida i karut to ngoroni kode iheru tonyio ara na kiciorita lo kipal.¹²O jir inyi i yauno diho kadwarani o ngonyu kana lobito ara kitiiunita o curahi kue lo ciali iyo kiciorita kuna lo curahinoti to kima diho Lahitok. Ara na kiciorita lo kipal. ¹³To na kikoi, o pul cia kadwarani inyi to kuno kipalipali li tiyi inyi oto cia o launi inyi. Otonge lo kiciorita fad o jir ara lo kadwarani iya na lo ngonore to kiciorita lo ngamang.¹⁴O teny Lahitok diho Moses o joo, ¹⁵"Ka li iti bahas tungani lolunyaje i pal to tenyitenyi kuna lo cihi iyo sangite kuna i nyuji, o jir inyi i yauno diho Lahitok mongo lo ker na lo ru madati to twol nenge ara kidumita na manyu lo tumohino wel nenge iyo rial na lo tumohino ko sekel na lo temitarehin to faji na i Nyu. Ara inyi kiciorita lo loguce. ¹⁶O jir inyi i cio kidumi to tohi na lida inyi i tiyi na li jifita sangite kuna i nyuji o sodohi manyu kitimieti lo tomon iyo na i cio fad diho kadwarani, na lo pul inyi to mongo lo ker ara kiciorita lo loguce oto cia o launi inyi.¹⁷Ka li pal tungani manyu i tiyi tohi na lo beru cik lo Lahitok, kileng manyu adi ngo lunyia inyi, lo cifu inyi loguce manyu i niefita na tenya inyi. ¹⁸O jir inyi i yauno mongo lo ker na lo ru madati diho kadwarani ara kiciorita lo loguce na lo cam to wel. To na kikoi o pul cia kadwarani inyi to kipal na li tiyi inyi lolunyaje, manyu o launi cia inyi. ¹⁹Ara na kiciorita lo loguce, tonyio o cifu inyi loguce lo ki pala diho Lahitok.

¹O joo Lahitok diho Moses, ²"Ka li pal lobo tungani ida i jif tenya lo Lahitok to ki iti nononga loryehat nenge to lobo tohi li iti barahini inyi kode i kumahini diho inyi kode o kokole hati inyi kode iti mumun inyi, ³kode ka lo rumu tohi na lo ri oto hati i dohe to talerun, kode i buti to talerun kode i pal to kuna kikoihin ngun li palare cio, ⁴ka lo cifu inyi loguce to koditi lo na kipal, o jir inyi i nyiahahi tohi na lo kokolu inyi kode i dohe to kitimumuna kode tohi na li iti barahini diho inyi, kode na tohi i ri lo rumahi inyi.⁵kode na tohi li butiare inyi to talerun. O jir inyi o dum i fut, o sodohi kitimieti lo tomon, i cio fad diho monye inyi na far li cwarare inyi kiciorita lo loguce nenge. ⁶Manyu ara kidumita nenge o jir inyi i yauno diho kadwarani kode diho Lahitok kiciorita lo loguce nenge, mongo lo ker na lo ru madati to twol nenge, na manyu lo cam iyo wel. ⁷To na kikoi, o pul cia kadwarani inyi to ketemoni lo Lahitok, oto cia o launi inyi iyo kuna sangite li tiyi inyi o cifunore loguce."⁸O joo Lahitok diho Moses, ⁹"To cik Aron ko tee kunenge tijo, ' Ara kuno cihicihi kulo kiciorita locurat. O jir kiciorita locurat i wasihi kiji lo ciali karue fad many o wang manyu o jir kima i wasihi nohun ciali.¹⁰I cief hati kadwarani kyela nenge iribi ko pali iribi na lo raf ken nenge manyu o wor ingula lo kiciorita na lo keru kima to ciali o tirohi o nyiha ko ciali. ¹¹Tinyia o jir inyi o puce kuna kyelani i cief kude ake o tinge hati ingula oleng to kem iya faji na li iti dwari o Nyu.¹²O jir kima i wasihi nohun ciali ida o dunye. To kiwanyihin fad o jir kadwarani o sodohi keyek iyo kima manyu i canahi kicioriti locurat kai lo kima manyu o curahi somia kulo kicioriti kulo kimoraru kai lo ciali. ¹³O jir kima i wasihi nohun ciali lohisidik ida o dunye tur.¹⁴Ara kuno cihicihi kulo kiciorita kuna lara ngamang, o jir tee kulo Aron i yauno ketemoni lo Lahitok ketemoni lo ciali. ¹⁵O jir kadwarani o ngonyu kofwo kuna i tinyaha to kana ara lobito ko ngoroni ko iheru na lo ngon iyo kiciorita o jir o curahi ciali ara kitiiunita na li iti kwama uron nenge Lahitok.¹⁶O jir otonge o nyia Aron ko tee kunenge, ati o jir o nyai o ru ibula iyo faji na i Nyu, o jir icieng o nyia to sita lo kema lohiricore. ¹⁷O jir ida o funi to ibula; La cio nan ara kicait neicieng lo kiciorita kuna li fotohini nan to kima. O dwa kuna kofwo iya kiciorita lo kipal ko kiciorita lo loguce, o nyuji icieng noo. ¹⁸O tum lobo lotata lo Aron na lara retoni o nyia. Ara kicait nenge lo tiktik iyo kicioriti kuna lo curahitati diho Lahitok to kima to kofiang fad kuna li jifita. Tohi na lo tir icieng o lotu ara tohi na i Nyu.¹⁹O joo manyu Lahitok diho Moses, ²⁰"Ara ene kiciorita na lo jir Aron ko tee kunenge i yauno diho Lahitok to far na lo twarehin icieng; lokirie lobito lo kofwo kuna i tinyaha ara kiciorita kuna lara ngamang lo tiktik nusu nenge to kiwanyi, nusu to kurou.²¹O jir o yeri to ngoroni to tobok lo biliet, i yauno ara na li karuti otoc i fotohi na kiciorita na lara ngamang i bebenyi o curahini ara na li iti kwama uron nenge Lahitok. ²²Kito na cia lo luny faji lo apa nenge ara kadwarani na lo twei inyi li fotohino na kiciorita. Ara na kicait lo Lahitok lo tiktik na lo jir o curahini kuyuk. ²³Kiciorita lo ngamang lo kadwarak fad o jir o jir o curari kuyuk, o jir ida o nyai."²⁴O joo Lahitok diho Moses, ²⁵"To rihohi Aron ko tee kunenge i joo, ' Ara kuno cihicihi kulo kiciorita lo kipal: O jir o ngotohini kiciorita lo kipal faji na lo ngototitarehin kiciorita locurat ketemoni lo Lahitok tonyio o nyu inyi noo. ²⁶Kadwarani na li fotohino inyi, inyi lo nyia, o jir o dahahini faji na i Nyu, sita lo kema lohiricore.²⁷Lobo tohi lo tir na tyang o lotu o nyu manyu ka lo dohi okoto nenge iyo kyela, o jir i lali to faji na i Nyu. ²⁸Moti lokulufi na lo yerarehin na tyang o jir o borari, ati ka lara moti mwalati o yerarehin, o jir o curi to kima i loloji to kifi.²⁹Lobo kito retoni to kaji lo kadwarani o tum daha na tyang, o nyu inyi noo. ³⁰Ati lobo kiciorita lo kipal na li yari okoto nenge katua lo kema lohiricore o pulorehin faji na i Nyu o jir ida o nyai, o jir o curari kuyuk."

¹Ara kuno cihicihi kulo kiciorita lo loguce; na i Nyu noo ²o jir o ngotohini kiciorita lo loguce faji na lo ngotorehin kiciorita locurat manyu o jir okoto nenge o rwacahini ngatihin kulo ciali fad. ³O curahini cia somia nenge fad, tima ko somia na lo raf sangite kulo kocehe fad, ⁴talangur are fad ko somia na lo raf icieng o nyiha ko irafu ko somia na lo raf munya na lo jir o dumari ara lobito ko talangur.⁵O curahi cia kadwarani icieng ciali ara kiciorita na li fotohini Lahitok to kima. Ara inyi kiciorita lo loguce. ⁶O tum lobo kito retoni to kolo kadwarani daha ati o jir o nyai to faji na i Nyu tonyio o nyu inyi noo.⁷Inyi na cik bito i tiyorehin iyo kiciorita lo kipal ko kiciorita lo loguce: Ara icieng kulo kadwarani na lo pulore icieng. ⁸Kadwarani na li fotohi kiciorita locurat lo lobo tungani o tum ki yaru cioni ara nenge.⁹Kiciorita na lara ngamang fad na lo funi to furnuk kode o ngoji to ongojit kode o yeri to tobok lo biliet ara lo kadwarani na li fotohi, ¹⁰manyu kiciorita na lara ngamang fad kode i karuti to ngoroni kode o tou ara lo tee kulo Aron fad.¹¹Ara kuno cihicihi kulo kiciorita lo kimoraru na ngi yauno tungani diho Lahitok; ¹²ka li cio inyi ara kitotorita lo kwama o jir ara lobito ko ene kicwara lo kwama nenge i yauno mugati na lida o funi i karuti to ibula manyu i karutohi ko mugati kuna i tadaha lo yeri to ngoroni o ru ibula manyu o fyei to ngoroni ko mugati kulo kofwo kuna i tinyaha kuna li ngoli otoc o tum ngoroni.¹³Ara lobito ko na kicwara lo kimoraru lo kwama nenge, o jir inyi i fotohi kiciorita kulo mugati kuna li karuti to ibula. ¹⁴O jir inyi i yauno lobito to koditihin fad ara kiciorita na lo sofuno diho Lahitok: ara inyi lo kadwarani na lo rwac okoto lo kiciorita lo kimoraru.¹⁵O jir o nyai tyang lo kiciorita lo kimoraru lo kwama far na li fotohinorehin: ke cio i ngohi lobo ko kiwanyi. ¹⁶Ati ka lara kiciorita nenge to lobiti kode lo kibaya, o jir kiciorita nenge o keruni na far li cwararehin ati lobo lo tong o tumiti daha kiwanyi nenge.¹⁷Lobo tyang lo kikuma lo tong many far lo uni o jir o curari. ¹⁸Ka lo nyai lobo tyang lo kiciorita far lo uni, ida cia i ruhiti. Ida cia i ruhohini to kacwarani tonyio lida o nyu: tungani na lo nyia na tyang inyi lo duma.¹⁹Tyang na lo tir tohi na lo dwa o jir ida o nyai, o jir o curari. Ati to tyang lobo, o tum tungani na lo nyu daha. ²⁰Ati ka lo nyia lobo tungani lida o nyu tyang lo kiciorita lo kimoraru na lara lo Lahitok o jir na tungani o dumari to kiji lo cio kunenge.²¹Ka lo tir lobo tungani lobo tohi i rohoi kode lobo rohojun lo ken lo tungani kode tyang na i rohoi kode lobo tohi i rohoi na li iti dwarati oto hati o nyia lobo tyang lo kiciorita lo kimoraru na lara lo Lahitok o jir na tungani o dumari to kiji lo cio kunenge!"²²O joo Lahitok diho Moses, ²³"To rihohi cio kulo Israel tijo, 'Ke nyia lobo somia lo kiteng, lo ker kode lo kine. ²⁴I tum ki tiyore somia lo tyang na lo wei kode o kony tyang na i ngere lobo tohi ati ke nyia. diho Lahitok to kuny lo Sinai.²⁵Tungani na lo nyia somia lo tyang na lo cam ngo curahini diho Lahitok o jir o dumari to kiji lo cio kunenge. ²⁶To lomanyarehin kuningi fad o jir ite ida i nyia okoto lo lobo kwenyite kode tyang. ²⁷Ka lo nyia lobo tungani okoto o jir na tungani o dumari to kiji lo cio kunenge."²⁸O joo Lahitok diho Moses, ²⁹"To rihohi cio kulo Israel tijo, ' Ka li yauno tungani kiciorita lo kimoraru diho Lahitok, o jir i yauno angati nenge kikumita nenge diho Lahitok ³⁰to kac kunenge o jir inyi i yauno kiciorita na li fotohini Lahitok to kima, o jir inyi i yauno somia ara lobito ko locolo manyu iti lorahi locolo ketemoni lo Lahitok ara kiciorita lo kitilora.³¹O curahi cia kadwarani somia ciali ati ara locolo lo Aron ko tee kunenge. ³²O jir isi i ciorihi kadwarani bongbong lo iteten lo kiciorita lo kimoraru nino ara kisofit nino.³³Kito lo Aron na li fotohi okoto ko somia lo kiciorita lo kimoraru i yaru cia inyi bongbong iteten ara kicait nenge. ³⁴Iyo kicioriti kulo kimoraru kulo cio kulo Israel la dumu nan locolo na li iti lorati ko bongbong na li fotohini a cio diho Aron kadwarani ko tee kunenge iyo cio kulo Israel ara kicait neicieng lo tiktik.³⁵Ara ene angati lo kiciorita na li fotohini diho Lahitok to kima na li cahini diho Aron ko tee kunenge to far lafa li cwararehin icieng o joo o jir i rwaati diho Lahitok ara kadwarak. ³⁶Lafar lo twarehin icieng, o cik Lahitok cio kulo Israel o joo o jir i ciori icieng na ara kicait neicieng lo tiktik to kofiang fad kuna lo fwonuno.³⁷Ara kuno cihicihi kulo kiciorita locurat, kiciorita kuna lara ngamang, kiciorita lo kipal, kiciorita lo loguce, kiciorita lo kikwera ko kiciorita lo kimoraru, ³⁸kuna lo cik Lahitok Moses to donge lo Sinai to far na lo cihare inyi cio kulo Israel lo ki yauno kicioriti kuneicieng

¹O joo Lahitok diho Moses, ²"I yauno Aron ko tee kunenge, kyelani kuneicieng, ngoroni kitweita, mongo lo kiciorita lo kipal, mongi kulo kera are ko akuhu na lo ngoni mugati kuna lida i karuti to ibula katua, ³ito hati i tubu ilulung fad lokoli lo kema lohiricore."⁴I tiyi Moses iya na lo cihare Lahitok inyi manyu o tubuno ilulung lokoli lo kema lohiricore. ⁵O joo Moses diho ilulung, " ara ene tohi na lo cik Lahitok o joo o jir i tiyi."⁶Oto Moses ko ki yauno Aron ko tee kunenge ketemoni i lal icieng to kifi. ⁷O pucahi inyi kanyi diho Aron ko torahino kitodita komoc nenge ko ki iti ciefohino inyi kyela na i joro ko ki burahino inyi kol lo kyela. Inyi ko torahino kol lo kyela ken nenge to gas lo kyela na li kadi iti bibili to kigingi.⁸O fik inyi ogogor lo locolo ken nenge ko fiha Urim ko Sumim iyo ogogor lo locolo. ⁹Oto ko pucahino turubuc kue lo Aron ko ranyahino na sahan lo dahab kitikangani na i nyu komom lo turubuc iya na lo cihare Lahitok Moses.¹⁰Tinyia o dumu Moses ngoroni kitweita, ko twa lomanyare ko sangite fad kuna lo ngoni katua, tona ko ki iti nyujo icieng. ¹¹O rwacahi inyi ngoroni lobo iyo ciali kakeny mietare. O twe inyi ciali ko sangite kunenge fad ko besen ko kitiwoita nenge lo ki iti nyujo icieng.¹²I juhohi inyi ngoroni lobo kue lo Aron lo twa inyi ko lo ki iti nyujo inyi. ¹³Oto inyi ko ki yauno tee kulo Aron ketemoni ko pucahino kanyihin kenite kuneicieng ko torahino kitoditi komoci kuneicieng ko torahino tambarahin kulo kueci iya na lo cihare Lahitok Moses.¹⁴Oto inyi ko ki fotohino mongo manyu o fik Aron ko tee kunenge kac kue nenge. ¹⁵O ngot Moses mongo o dumu okoto kunenge kude o dutu to kafiele nenge o twehi iyo muriaha kulo ciali fad lo ki iti nyujo ciali. I juhohi inyi otonge kulo okoto fotiri lo ciali. To na iti nyu inyi ciali manyu o pul.¹⁶O dumu manyu Moses somia lo katua lo kocehe fad na lo raf munya ko talangur are fad ko somia neicieng ko curahino ciali. ¹⁷Ati mongo ko cioni nenge ko tyang ko monyi kunenge fad o curahi inyi oleng to kem iya na lo cihare Lahitok.¹⁸O dumu dong inyi mongo lo ker na lara kiciorita locurat o fik Aron ko tee kunenge kac kue nenge. ¹⁹Oto Moses o ngot mongo lo ker o rwacahi okoto nenge ngatihin kulo ciali fad.²⁰I ngongot inyi na mongo lo ker ko curahino kue ko tyang ko somia. ²¹I lal inyi sangite kulo kocehe ko meselek to kifi ko curahino mongo lo ker fad ciali ara kiciorita locurat na li iti kwama uron nenge, kiciorita na li fotohini diho Lahitok to kima iya na lo cihare Lahitok Moses.²²O dumu dong inyi mongo lo ker lobito na lara lo kikwera o fik Aron ko tee kunenge kac kue nenge. ²³O ngot Moses na mongo lo ker o dumu okoto nenge o dutohi tadati lo kiyok lo Aron ngati lo iteten, kafiele nahitok lo kana iteten ko kafiele nahitok lo keju iteten. ²⁴I yauno manyu Moses tee kulo Aron ketemoni ko dutohino okoto lo na mongo lo ker tadatihin kulo kiyoha kuneicieng iteteni, kafiela kunahitoha kulo kac iteteni ko kafiela y kulo kejuha iteteni kuneicieng. Ko rwacahino okoto ngatihin kulo ciali fad.²⁵O dumu inyi somia; tima ko somia lo katua lo kocehe fad na lo raf munya, talangur are fad ko somia na lo raf icieng ko bongbong iteten. ²⁶Oto hati o dumu mugati iyo akuhu lo mugati kuna lo ru ibula na lo ngon ketemoni lo Lahitok, o dumu mugati ko lobito na lo yeri to ngoroni ko lobito na i gerewe o fik kai lo somia ko bongbong iteten. ²⁷O fik kuna fad kac kulo Aron ko tee kunenge iti lor icieng to ketemoni lo Lahitok ara kiciorita lo kitilora.²⁸Oto Moses ko dumuno kuna sangite to kac kuneicieng o curahi ciali kai lo kiciorita locurat ara kiciorita lo kikwera na li iti kwama uron nenge, kiciorita na li fotohini Lahitok to kima. ²⁹O dumu manyu locolo kicait lo Moses iyo mongo lo ker lo kikwera iti lor to ketemoni lo Lahitok ara kiciorita lo kitilora iya na lo cihare Lahitok Moses.³⁰Moses ko dumuno lobo iyo ngoroni kitweita ko lobo okoto to ciali o rwacahi ken lo Aron ko kyelani kunenge ko kenite kulo tee kunenge ko kyelani kuneicieng. To na iti nyu inyi Aron ko kyelani kunenge ko tee kunenge ko kyelani kuneicieng.³¹Oto Moses ko jimitan diho Aron ko tee kunenge, "Iti yerihi na tyang to lokoli lo kema lohiricore i nyia tijia ko mugati to akuhu lo kiciorita lo kikwera iya na la cihare nan a joo, 'O jir Aron ko tee kunenge o nyia ' ³²ito hati i cure otonge lo tyang ko mugati. ³³Ke fwo to agwala lo kema lohiricore many o ru faritin mietare kulo kikwera ningi, tonyio i yaru cia kikwera ningi faritin mietare.³⁴Ene tohi li tiyi enefar ara na lo cik Lahitok ara lo pulore ite. ³⁵O jir ite i tongo agwala lo kema lohiricore faritin mietare karue ko far manyu i tiyi tohi na lo wak Lahitok o jir ida i wei, tonyio tohi na lo cihi nan inyi na. " ³⁶Tona i tiyi Aron ko tee kunenge sangite fad kuna lo cik Lahitok Moses.

¹To far lo mietauni i lolongu Moses Aron ko tee kunenge ko lohitwaha kulo Israel. ²O rihohi inyi Aron o joo, "To dumu kace mongo lo kiciorita lo kipal nino ko mongo lo ker lo kiciorita locurat nino. O jir icieng fad o ru madati, i yauno ketemoni lo Lahitok.³Ito hati i rihohi cio kulo Israel i joo, ' Ito dumu kore lo kiciorita lo kipal ito hati manyu i dumu kace ko kito lo ker kuna lara kari lobito o jir icieng fad o ru ko madati ara kiciorita locurat, ⁴ko mongo ko mongo lo ker ara kiciorita lo kimoraru kulo ki fotohino diho Lahitok ara lobito ko kiciorita kuna lara ngamang i karuto to ngoroni. Tonyio o boto cia Lahitok diho ite elefar. ⁵I yaru icieng kuna sangite lo cik Moses ketemoni lo kema lohiricore manyu o fwonu ilulung fad o nyihuni o woitati ketemoni lo Lahitok.⁶Tinyia o joo Moses, "Ara ene tohi na lo cik Lahitok o joo o jir ite i tiyi, o jir deyo lo Lahitok o botore diho ite. ⁷O joo Moses diho Aron, "Ou ciali i fotohi kiciorita lo kipal nino ko kicwara locurat nino o jir i pul ken nino ko cio; i fotohi kiciorita na lara lo cio o jir i pul icieng iya na lo cihare Lahitok.⁸Tona o lotu Aron ciali o ngot kace ara kiciorita lo kipal lo ken nenge. ⁹I yauno tee kunenge okoto diho inyi oto inyi i dutohi kafiele iyo okoto o twehi muriaha kulo ciali, otonge lo okoto fad i juhohi inyi fotiri lo ciali.¹⁰To ciali o curahi inyi somia, talangur ko kirafi lo munya lo na kiciorita lo kipal iya na lo cik Lahitok Moses; ¹¹tyang ko cioni nenge o cure inyi to oleng lo kem.¹²Oto inyi ko ngoto kiciorita locurat. I ciorihi tee kunenge inyi okoto, o rwacahi inyi ngatihin kulo ciali fad. ¹³I cio icieng inyi kiciorita locurat to fajihit to lobito to lobito ara lobito ko kue o curahi inyi fad ciali. ¹⁴I lal inyi sangite kulo kocehe ko meselek to kifi o fik kai lo kiciorita locurat o curahi fad ciali.¹⁵Oto Aron i yauno kiciorita na lara lo cio. O dumu inyi kine na lara kiciorita lo kipal lo cio ko ngoto ko ki fotohino ara kiciorita lo kipal iya lo adi lo ketemoni. ¹⁶I yauno inyi kiciorita locurat i fotohi iya na lo ciharehin. ¹⁷O dumu manyu inyi kiciorita na lara ngamang o ngonyu i fut kana o curahi ciali o sodohi iyo kiciorita locurat lo kiwanyi.¹⁸O ngot inyi mongo ko mongo lo ker ara kiciorita lo kimoraru lo cio. I fotohi tee kunenge inyi okoto, o rwacahi inyi ngatihin kulo ciali fad. ¹⁹Ati fajihit kuna i firi kulo mongo ko kulo mongo lo ker; tima, irafuhin kulo somia, talangur ko kirafi lo munya.²⁰i cadohohi icieng iyo locolo manyu o curahi Aron somia ciali. ²¹Iti lorahi Aron locolo ko bongbong iteten ketemoni lo Lahitok ara kiciorita lo kitilora iya na lo cihare Moses.²²Tinyia o ting Aron kac iya ngati lo cio ko ki gatahino icieng. Manyu langun li fotohi inyi kiciorita lo kipal, kiciorita locurat, ko kiciorita lo kimoraru, i culuno inyi. ²³O fwo dong oho Moses ko Aron katua lo kema lohiricore. Ojo icieng o rutu oleng, i gatahi icieng cio manyu o boto deyo lo Lobanga diho cio fad. ²⁴O lotu kima to ketemoni lo Lahitok ko keruno curaru kiciorita locurat ko fajihit kuna i firi kuno lo ngoni ciali. Manyu ka lo deu cio fad na kima, ko ki gororo to kwama ko urohinoti kof lorubuhe.

¹O dumu tee kulo Aron, Nadab ko Abihu ilebuha kulo iheru kuneicieng o kurohini kima katua neicieng ko sodohino iheru katua i fotohini iheru to kima na lo beruni diho Lahitok o bahasa ko koditi na lo cihare inyi. ²Tona o lotu kima to ketemoni lo Lahitok ko keruno icieng manyu o weihi icieng ketemoni lo Lahitok.³Oto Moses o joo diho Aron, "Ene tohi ene lo teny Lahitok na lo joo inyi; "Diho kuna lo fwonuno ketemoni nei, a totorohi nan jimitan A nyu nan. To ketemoni lo cio fad, ki bangiti cia nan." I wasihi Aron buho. ⁴I lolongu Moses Misael ko Elizapan, tee kulo mamanyi lo Aron Uziel ko jimitan diho icieng, "I fwonu ene. I to tinge iyangicio kuningi oleng to kem o loma to ketemoni lo faji na i Nyu."⁵Tona o fwonuni o tingori icieng o rihe i buritati kanyihin kuneicieng iya oleng to kem iya na lo cihare Moses. ⁶Tinyia o joo Moses diho Aron ko tee kunenge; Elieza ko Ismar, "Ke ngerihiti fofi kuningi o juji manyu ke cir kyelani kuningi tonyio i wei cia ite manyu i longojihi cia Lahitok ilulung fad. Ati o tum kajimunyi ko cio kulo Israel fad ki toyo to kuna lo keru Lahitok to kima. ⁷Ke ngohi agwala lo kema lohiricore to na i wei cia ite tonyio o ngon ngoroni lo twa lo Lahitok kenite kuningi." Tona i tiyi icieng iya na lo tenyare Moses.⁸Tona o joo Lahitok diho Aron, ⁹"O jir isi ko tee kunino ida i mat vino kode kude meria ka li rutoro ite kema lohiricore tonyio i wei cia ite. Ara ene itidwar to kofiang kuna lo fwonuno. ¹⁰O jir ite i kor kiji lo nyujon ko kibas, kiji lo jiran ko rohojun ¹¹manyu o jir ite iti yen Israel cihicihi kuna li cio Lahitok diho Moses."¹²O joo Moses diho Aron ko tee kunenge kuna lo tong; Elieza ko Ismar, "I to dumu kiciorita na lara ngamang na lo tongu iyo kiciorita kuna li fotohini Lahitok to kima i to nyia ida i kukumi to ibula to kalele lo ciali tonyio o nyu inyi. ¹³Iti nyia to faji na i nyu tonyio ara kicait nino ko kicait lo tee kunino iyo kiciorita na li fotohini Lahitok to kima tonyio ki cihi nan jii.¹⁴Ati i tum isi ko tee kunino; rei ko kariok fad daha mugati na li iti lori ko bongbong na li cauni. I to nyia icieng to faji na i nyu, i ciori icieng diho isi ko tee kunino, ki ciori diho ite ara kicait ningi iyo kiciorita lo kimoraru lo cio kulo Israel. ¹⁵O jir bongbong na li cauni ko locolo na li iti lori i yauni ko somia lo kiciorita na li fotohini Lahitok to kima o jir i yauni iti lori to ketemoni lo Lahitok ara kiciorita lo kitilora. Ara mute ene kicaita lo tiktik nino ko tee kunino iya na lo cihare Lahitok."¹⁶Ojo Moses i tifi kine lo kiciorita lo kipal o rumu o joo lo curaru, i longojihi inyi Elieza ko Ismar, otonge kulo tee kulo Aron ko ki tifia icieng o joo, ¹⁷"Nyio ida ite i nyia na kine to faji na i nyu? O nyu inyi bebe. Ki ciori diho ite lo dumaru loguce to ilulung lo pulo icieng to ketemoni lo Lahitok. ¹⁸Iya na li ida i yari okoto nenge faji na i nyu, ji ite i dahahi kine o nyiha ko faji na i nyu iya na la cihare nan."¹⁹I nyiahahi Aron Moses o joo, "Elefar i fotohi adi icieng kiciorita lo kipal neicieng ko kiciorita locurat neicieng ketemoni lo Lahitok, ati li tiyihino kuna sangite diho nan. Ngo kwama ha ba Lahitok ngara a nyia nan kiciorita lo kipal elefar?" ²⁰Ka lo ning Moses jii, o tum na tenya inyi.

¹O joo Lahitok diho Moses ko Aron, ²"Iti rihohiti cio kulo Israel iti joo, " Iyo tyangi fad kuna lo ngoni kof, ara kuno kuna ngi nyia ite.³I tum ite daha tyang na lo kora mececek lo keju manyu o nyahala nyiari. ⁴O ngoni kude kuna lo nyiahala nyiari jia kode o koraha mececek kulo kejuha jia ati o jir ite ida i nyia icieng. Lonaga kileng lo nyiahala nyiari ida mececek kulo kejuha o kora, o dwa inyi diho ite.⁵Kileng ngo nyiahala iduhu nyiari, ida kejuha o kora, o dwa diho ite. ⁶Kileng ngo nyiahala afoyo nyiari, ida kejuha o koraha, o dwa diho ite. ⁷Kileng lo koraha kejuha kulo iborok, ida inyi o nyiahala nyiari, o dwa diho ite. ⁸O jir ite ida i nyia tyangi kuneicieng kode i tir kenite kuneicieng ka lo weiha, o dwa icieng diho ite.⁹Iyo sangite fad kuna lo ngoni katua lo kifi kode karecio, i tum ite daha kuna lo ngoni ko jangir ko buruno. ¹⁰Ati sangite fad kuna lo ngoni katua lo nam kode karecio kuna lo ru ko jangiri ko buruno kode iyo sangite fad kuna li kwanga kode iyo kuno sangite kude lo war katua lo kifi, o jir ite iti dwara icieng.¹¹Iya na li iti dwarare ite icieng o jir ida i daha tyangi kuneicieng o jir manyu iti dwara kenite kuneicieng. ¹²Lobo tohi lo war katua lo kifi o ru jangir o ru buru lo ken, o jir o dwa diho ite.¹³Ara kuno kweny kuna lo jir ite iti dwara, na lo jir ida i nyia tonyio o dwari icieng: logiga, taruhani, taruhani na i rwok ¹⁴igori na i do, lobo igori i rwok keken, ¹⁵lobo lowari keken, ¹⁶susum na ko muriaha, susum na i ngore, okuluk, koditi lo lobo lopiu.¹⁷susum na sidi, turum, susum na hitok, ¹⁸susum na i kwe, susum lo kuny, imuu, ¹⁹lokwom, ikuruk, ngatak, ko iradi.²⁰Sangite kuna i fuhoho fad kuna lo lot to kejuha ongon fad o dwari diho ite ²¹Oto hati o ngoni manyu kude sangite i fuhoho lo kudita to kejuha ongon kuna li tum ite i nyia, kuna li kubo kejuha kuna li firitare icieng to kof. ²²Iyo kuna i tum ite daha koditi lo lobo iterebuk keken, lojufejufe, igiri kode mai. ²³Ati sangite kuna i fuhoho kuna kude fad kuna lara kejuha ongon, o jir ite iti dwara.²⁴I come cia ite ka li tiyi ite jii: tungani na lo tir na i wei lo kuno sangite, i come many kurou. ²⁵Tungani na li numu na i wei lo kuno sangite o jir i lal kyelani kunenge ati i wasihi kicom many kurou. Tyang na i gwaha keju ida hati mececek o kora ida manyu o nyiahala nyiari, o dwa diho ite; tungani na lo tir na i wei nenge, i come inyi.²⁶Tyang na i gwaha keju ida hati mececek o kora ida manyu o nyiahala nyiari, o dwa diho ite; tungani na lo tir na i wei nenge, i come inyi. ²⁷Iyo tyangi kulo kejuha ongon fad na lo lot to kafiela o dwa diho ite; tungani na lo tir na i wei nenge, i come many kurou. ²⁸Tungani na li numu na i wei nenge, o jir i lal kyelani kunenge manyu i wasihi inyi i come many kurou. Ara icieng kuna i dwari diho ite.²⁹Iyo tyangi kuna lo kudita to kof, o dwa kuno diho ite: lonyole, deroti, lohotol, ³⁰lokidiediefe, lohire, iharas, lorilik, ko igoge.³¹Iyo sangite kuna lo kudita to kof fad, o dwari kuno diho ite. Tungani na lo tir lobo i wei neicieng, i come inyi many kurou. ³²Ka lo wei lobo oto hati o dohi iyo lobo tohi, na tohi kileng ngi tiyorehin nyio oto cia o dwa kode i kukumuni na tohi iyo kete, kyela, kiyene, kode kire. O jir o cafahini iyo kifi, o dwa cia inyi many kurou o jirare hati. ³³Ka lo dohi lobo iyo moti lokulufi, sangite fad to katua lo na moti li palaru, o jir manyu i bor na moti.³⁴Ka lo ngon daha na lo wahiti daha oto hati kifi to na moti o dohi, lo dwa na daha. Manyu lobo tohi lo tumiti mata to na moti lo dwa. ³⁵Lobo tohi lo dohi tohi na i wei iyo kuna sangite li keni, lo dwa; ciali kode moti lo jati o jir o borari. O dwari icieng manyu o jir ite iti dwara icieng.³⁶Oto hati ipulak kode itibi lo kifi i wasihi o nyu, ati ka lo tir tungani na lo tir na i wei lo kuno sangite li come. ³⁷Ka lo dohi na i wei lo kuno sangite iyo kinyiemo kuna lo wahiti ki iti bula, i wasihi icieng o nyuji. ³⁸Ati ka lo cafa kinyiemo iyo kifi oto hati tohi na i wei o dohi, o dwa diho ite.³⁹Ka lo wei tyang na lo cam to daha, tungani na lo tir na tyang li come many kurou. ⁴⁰Tungani na lo kony lobo iyo na tyang o jir i lal kyelani kunenge manyu i tongo inyi ara na li come many kurou. Tungani na lo tingu na tyang i wei o jir i lal kyelani kunenge ati i wasihi ara na li come many kurou.⁴¹Sangite kuna i wari kuna lo kudita to kof fad, o dwa. O jir ida o nyiai. ⁴²O jir ite ida i nyia lobo tohi lo kudita to kof kode o yeta ken to kocehe kode o kudita to kejuha ongon, kode o kudita to kejuha kuna i borengi. O dwari icieng.⁴³Ke iti come kenite kuningi to kuno sangite, ke iti come kenite kuningi to icieng manyu ke cio icieng i come kenite kuningi. ⁴⁴Ara nan Lahitok Lobanga ningi, iti nyujoto kenite kuningi. Iti ara kuna i nyuji tonyio a Nyu Nan. Ke come kenite kuningi to lobo tohi lo kudita to kof. ⁴⁵Ara Nan Lahitok na lahi yauno ite to kof lo Ijipt lo rahun Lobanga ningi, tona iti nyu tonyio a Nyu Nan.⁴⁶Ara kuno cihicihi kuna li jifita tyangi, kweny, sangite kuna i wari katua lo kifi fad ko sangite fad kuna lo kudita to kof. ⁴⁷O jir ite i kor kiji lo sangite kuna lo dwa ko sangite kuna i jiri, kiji lo sangite kuna i wari kuna lo cam to daha ko kuna lo jir iti dwari.

¹O joo Lahitok diho Moses, ²"Tijio diho cio kulo Israel, ' ngorwani na li fonga o tomonu kito retoni, i tongo cia inyi iyo kicomaru to faritin mietare iya na li tongore inyi to faritin kulo deya lo ofa nenge. ³O jir i lirari kito to far lo mietauni.⁴O jir na ngorwani manyu i tila to faritin keek uni ko uni iti nyujorehin inyi iyo okoto na li juhuno to ken nenge. O jir inyi ida o tir lobo tohi i nyu kode o loo o nyiha faji na i nyu many ka lo keruno faritin kulo ki iti nyujoro nenge. ⁵Ka lo tomonu inyi kito karioni, o jir inyi i tongo iyo kicomaru to sabiti are iya na li tongore inyi to faritin kulo deya lo ofa nenge. O jir manyu inyi i tila to faritin keek ile ko ile iti nyujorehin inyi iyo okoto na li juhuno to ken nenge.⁶Ka lo keruno faritin kulo ki iti nyujoro nenge to kito retoni kode karioni, o jir inyi i yauno kito lo ker na lara kari lobito iyo kadwarani ketemoni lo kema lohiricore ara kiciorita locurat ko amam na lo ngarihi kode kuri ara kiciorita lo kipal.⁷I fotohi cia inyi kuno kiciorita diho Lahitok lo pulo inyi oto cia inyi iti nyujoro iyo ki juhuno lo okoto to ken nenge. ⁸Ka li ida inyi o tum rumuno kito lo ker, o jir inyi i yauno kurihin are kode amami kuna lo ngarihi are; lobito ara kiciorita locurat, lobito ara kiciorita lo kipal. Tona o pul cia kadwarani inyi oto cia inyi ko nyujon.

¹O joo Lahitok diho Moses ko Aron, ²"Ka lo ngon tungani ko ulan kode kifuru kode lobo faji lo lalabu to ken nenge o tum na rahun mwai lo ken na li iti diho, o jir i yauni inyi diho kadwarani Aron kode lobito iyo tee kunenge kadwarani.³O jir kadwarani o her na korongani to ken nenge, ka li belo fofi to katua lo na korongani o kweri manyu o ri na korongani mejo o ridoro to belelie lo ken, ara cia na mwai lo ken na li iti diho. Ka lo her kadwarani inyi o jir o tulu jimitan ida inyi o nyu. ⁴Ka lo kwe na madati to ken nenge ida hati o ridoro to belelie manyu ida fofi kunenge i beloro o kweri o jir kadwarani o fik na kamwani o polo ake to faritin mietare.⁵To far lo mietare o jir kadwarani o her inyi manyu ka lo rumu jimitan ida na madati i belo manyu ida li nyaru iyo belelie lo ken, o jir inyi kadwarani o fik inyi o polo to faritin mietare ari. ⁶To far lo mietare o jir kadwarani o her inyi ari ka lo rumu jimitan lo ri na madati ida manyu i nyaru iyo belelie lo ken, o jir kadwarani o tulu jimitan o nyu inyi, ara nyafa kifuru jia. O jir na tungani i lal kyelani kunenge, inyi manyu ko nyujon.⁷Ati ka li nyaru na madati iyo belelie lo ken to kifwongi lo ki totorohino inyi ken nenge diho kadwarani o tulunorehin o joo o nyu inyi, o jir inyi o lotu diho kadwarani ari. ⁸O jir kadwarani o her inyi manyu ka li nyaaru madati iyo belelie lo ken, o jir o tulu o joo ida inyi o nyu i rumu na madati ara lo na li iti diho.⁹Ka lo ngon tungani ko mwai lo ken na li iti diho, o jir i yauni inyi diho kadwarani. ¹⁰O jir kadwarani o her ken nenge manyu ka lo ngon lobo faji lo ul o kwe ken na li bel ko fofi o kweri manyu ka lo ngon korongani iyo na ulan, ¹¹ara na mwai lo ken na li iti diho o jir kadwarani o tulohi jimitan ida inyi o nyu. O jir o fik inyi o poloro tonyio lida inyi o nyu.¹²Ka lo keru na mwai ken nenge fad manyu o deu kadwarani jimitan li pude na mwai ken lo na tungani imwai many to kue many kejuha, ¹³o jir kadwarani o her inyi manyu ka li pude mwai ken nenge fad, o jir o tulu o joo lo nyu na tungani. Iya na lo kwe ken nenge fad, lo nyu inyi. ¹⁴Ati ka lo boto korongani na iyes to ken nenge ida cia inyi o nyu.¹⁵Ka lo deu kadwarani korongani o jir o tulu jimitan ida inyi o nyu, o ngon inyi ko mwai na li iti diho. ¹⁶Ka li belo na korongani o kwere o jir inyi o loo diho kadwarani. ¹⁷O jir kadwarani o her inyi, ka lo deu jimitan lo kwerari korongan o jir kadwarani o tulu jimitan lo nyu na kamwaani, oto cia inyi o nyu.¹⁸Ka lo ngon tungani ko lofuno ken nenge oto hati o furie, ¹⁹oto hati iyo kaforoti lo na lofuno o luny lobo ulan i kwe kode lobo tohi i kwe i dorie, o jir inyi o lotu i totorohi ken diho kadwarani. ²⁰O jir kadwarani o her na faji, ka lo rumu o joo o rido inyi i luko to belelie, manyu li belo fofi to faji nenge o kweri, o jir kadwarani o tulu jimitan ida inyi o nyu. Ara mwai lo ken na li iti diho lo luny faji lo lofuno.²¹Ati ka lo her kadwarani inyi o rumu o joo o ru fofi to katua ida o kweri manyu ida faji nenge o ridoro to belelie, manyu lo furioro, o jir kadwarani o fik inyi o polo to faritin mietare. ²²Ka li nyaaru iyo belelie lo ken, o jir kadwarani o tulu o joo ida inyi o nyu, ara mwai na li iti diho. ²³Ati ka lida faji nenge i belo ida manyu i nyaaru, ara kaforoti lo lofuno jia, o jir kadwarani o tulu o joo o nyu inyi.²⁴Ka lo ngon tungani ko korongani lo kima ken nenge oto hati lobo faji i kwere i do kode o kwe o ngon iyo nan korongani lo kima, ²⁵i ngohi kadwarani to her na faji. Ka li belo fofi to katua nenge o kweri manyu o rido faji nenge i luko to belelie lo ken, ara mwai na li iti diho li ciaha iyo korongani lo kima. O jir kadwarani o tulu o joo ida na tungani o nyu, i tongo na korongani ara mwai lo ken na li iti diho.²⁶Ati ka lo her kadwarani o rumu fofi ida o kweri to katua ida manyu o ridoro to ken manyu o kutiaru, o jir kadwarani iti polohi inyi to faritin mietare. ²⁷To far lo mietare o jir kadwarani o her inyi, ka lo rumu i nyaaru iyo belelie o jir kadwarani o tulu jimitan ida inyi o nyu, ara na mwai lo ken na li iti diho. ²⁸Ati ka lida na korongani i belo ida i nyaaru iyo belelie manyu o kutiaru, ara na ulan na lara kima li yauno manyu o jir kadwarani o tulu jimitan o nyu inyi; ara na kaforoti lo korongani lo kima.²⁹Ka lo ngon tungani retoni kode ngorwani ko korongani kue kode makal, ³⁰o jir kadwarani o her na korongani manyu ka lo ri mejo o ridoro, i luko to belelie manyu i buleho fofi to katua o liliwi, o jir kadwarani o tulu jimitan ida na tungani o nyu; ara na mwai lo kue kode makal na i iifa na li iti diho.³¹Ati ka li deu isi kadwarani o her koditi lo na korongani, o rumu o joo ida o ridoro to belelie manyu o ru fofi kuna i rwohi to katua, to na o jir kadwarani o fik na tungani imwai iyo polo to faritin mietare.³²Iyo far lo kitimietare o jir kadwarani o her na korongani, ka lo rumu jimitan ida na iifa li nyaaru manyu o ru fofi kuna i buleho to katua, ida manyu o ridoro to belelie lo ken, ³³o jir inyi o gitari o ngerihini faji lo korongani jia, o jir kadwarani i ngohi inyi o polo to faritin mietare ari.³⁴Far lo kitimietare o jir kadwarani o her na faji iifa ari, ka lo rumu jimitan ida i nyaaru ida manyu o ridoro to belelie lo ken, o jir kadwarani o tulu jimitan o nyu inyi. O jir inyi i lal kyelani kunenge oto ko nyujon.³⁵Ati ka li nyaaru na iifa iyo belelie lo ken to kifwongi lo tuluno jimitan o nyu inyi, ³⁶o jir kadwarani o her inyi manyu ka li nyaaru na iifa iyo belelie lo ken, ida manyu dong kadwarani o tohoro hera fofi ka li buleho to katua, ida na tungani o nyu. ³⁷Oto hati iyo deya nenge ida na korongani i belo obu manyu fofi kuna i rwohi katua o furie manyu na iifa. O nyu inyi, o jir manyu kadwarani o tulu inyi o joo o nyu.³⁸Ka lo ngon tungani retoni kode ngorwani ko madahin kuna i kweri ken, ³⁹o jir kadwarani o her icieng ka lara kuna madahin kuna i ngailaha, ara kifuru na lida o rohoi noo li ciaha ken. o nyu na tungani.⁴⁰Ka lo ru fofi iyo tungani o toloro kue, o nyu inyi. ⁴¹Ka lo ru fofi kunenge to ngati lo komon, i filany hati to komom, o nyu inyi.⁴²Ati ka lo ngon madati na i dorie filany nenge kode kue kode ngati lo komon, ara mwai lo ken na li iti diho lo ngon ki ciahahino kue kode filany nenge. ⁴³O jir kadwarani o her inyi manyu ka lo ul korongani na i kwe i dorie kue kode komom nenge iya mwai lo ken na li iti diho, ⁴⁴o mwai na tungani manyu ida inyi o nyu. O jir kadwarani o tulu jimitan ida inyi o nyu to korongani lo kue nenge.⁴⁵Tungani na lo mwai koditi lo na mwai lo kitidiho, o jir i ciefita kyelani kuna i ciraha, o ngerihi fofi o ju, i muk komom nenge to ngati lo rof, i gore o joo, ' Ida nan a nyu! Ida nan a nyu! ' ⁴⁶Ka lo rihe inyi o mwai na mwai, i wasihi inyi ida o nyu. O jir inyi o manya ake: O jir o manya oleng to kem.⁴⁷Ka li nief riok lobo kyela; kyela lo fofi kulo kera kode kyela iribi, ⁴⁸lobo kyela lo usi na i bir kode usi na i riwa, lobo kiyene kode lobo tohi li kukumi to kiyene. ⁴⁹Ka li deu ryok na lo ngon iyo kyela kode kiyene kode usi na i bir kode na i riwa kode lobo tohi li kukumi to kiyene o nyori kode o dorie, ara ryok na lo ngon ki nyaaru manyu o jir i totorohini kadwarani.⁵⁰O jir kadwarani o her na ryok manyu iti ngade na tohi to faritin mietare. ⁵¹To far lo mietare i cwara inyi to her na tohi manyu ka li nyaaru na ryok iyo kyela kode iyo usi na i bir kode na i riwa kode kiyene kode i tiyorehin ba na tohi nyio, ara na ryok na i rohoi, inyi jimitan ida na tohi o nyu. ⁵²O jir inyi o cure na kyela kode usi na i bir kode na i riwa, lo fofi kulo kera kode kyela iribi kode lobo tohi li kukumuni to kiyene na lo ngon ko ryok na i rohoi. Tonyio ara na ryok na i rohoi, o jir o curari na tohi.⁵³Ati ka lo her kadwarani o rumahi o joo ida na ryok i nyaaru iyo kyela kode usi na i bir kode na i riwa kode kiyene, ⁵⁴o jir inyi o cik o joo; i ngohi i lali na tohi li nief ryok. To na o jir inyi iti ngade na tohi to faritin mietare ari. ⁵⁵To kifwongi lo ki lala na tohi lo ngon ryok, o jir kadwarani o her inyi. Ka lo rumu o joo ida ryok i belo koditi nenge kileng ngida i nyaaru, ida na tohi o nyu. To cure to kima kileng ngi nief ryok angati keken.⁵⁶Ojo ka lo her kadwarani o rumu o joo lo furie ryok to kifwongi lo ki lala na kyela, o jir inyi o cire na ngati orumu li nief ryok iyo na kyela kode kiyene. ⁵⁷Ati ka li nyahat ryok boto iyo na kyela, kode iyo usi na i bir kode na i riwa kode kiyene, inyi jimitan ara ryok na li iti diho. O jir tohi na li nief ryok o curari to kima. ⁵⁸Kyela kode usi na i bir kode na i riwa kode lobo tohi lara kiyene na li lali lo ru ryok to ken nenge, o jir i lali ari oto cia o nyu.⁵⁹Ara kuno cihicihi kuna li jifita kitidiho lo ryok iyo sangite kuna li kukumi to kete, kode kyela; iribi, usi na i bir kode na i riwa kode lobo tohi lara kiyene lo tuluno icieng jimitan o nyuji kode ida o nyuji.

¹O joo Lahitok diho Moses, ²Ara kuno cihicihi kulo itidwar lo tungani kamwani to far na li iti nyujorehin inyi ka li yauni diho kadwarani.³O rute kadwarani oleng to kem o loo o her inyi. Ka lo furie tungani iyo mwai lo ken na li iti diho, ⁴o cik cia kadwarani o joo o jir kweny kuna i nyuji kuna i wari are i yauni ko kete lo ciani ceda ko usi na imalang ko lodwa i yauni to tungani na li iti nyujoti. ⁵Oto hati kadwarani o cik o joo o jir i fadari lobito kwenyite to kai lo kifi kuna i libi iyo moti lokulufi.⁶Oto hati inyi o dumu na kwenyite bito i war i lutohi ara lobito ko kete lo ceda ko usi na imalang ko lodwa katua lo okoto na li iti yijahini iyo kifi kuna i libi to katua lo moti lokulufi. ⁷O jir inyi o rwacahi kuna kifi li karuto ko okoto kakeny mietare ken lo na tungani orumu lo mwai mwai lo ken na li iti diho manyu o tulu o joo lo nyu inyi. O jir dong inyi o lahahi na kwenyite i war oleng faji na i wang.⁸O jir na tungani li iti nyujoti i lal kyelani kunenge, o gite fofi kunenge fad manyu i lala to kifi oto cia inyi ko nyujon. To kifwongi lo ene o tum inyi lotuno katua lo kem ati o jir i tongo sita lo kema nenge faritin mietare. ⁹To far lo mietare o jir inyi o gite fofi kunenge fad; o jir o gite kue, musula, lokoir kulo konyeha ko fofi kuna kude to ken nenge fad. O jir inyi i lal kyelani kunenge manyu i lala to kifi oto inyi ko nyujon.¹⁰To far lo mietauni o jir inyi i yauno tee kulo kera mongi are ko botor lobito kuna lara kari lobito kuna lo ru madati ara lobito ko kofwo kuna i tinyaha lokiriehin uni kuna li karuto to ngoroni ara kiciorita kuna lara ngamang ko ngoroni na lo tum cupa lobito. ¹¹Oto hati na kadwarani lo tulu na tungani o joo lo nyu i fotohi inyi ko kiciorita kunenge ketemoni lo Lahitok iyo agwala lo kema lohiricore.¹²Oto hati kadwarani o dumu kito lo ker mongo lobito i fotohi ara kiciorita lo loguce ara lobito ko cupa lo ngoroni, iti lor cia inyi icieng ketemoni lo Lahitok ara kiciorita lo kitilora. ¹³O jir inyi o ngotohi na kito lo ker faji na i Nyu na lo ngotoritarehin kiciorita lo kipal ko kiciorita locurat. Iya kiciorita lo kipal, ara manyu kiciorita lo loguce lo kadwarani tonyio o nyu inyi noo.¹⁴O jir kadwarani o dumu lobo okoto lo kiciorita lo loguce o dutu to kafiele o fik iyo ipedit lo kiyok iteten, kafiele nahitok lo kana iteten ko kafiele nahitok lo keju iteten lo tungani na li iti nyujoti. ¹⁵I ngohi kadwarani iti yitahi na ngoroni lobo to cupa iyo tadati lo kana ikajong nenge, ¹⁶O dutu na ngoroni to tadati lo ikajong nenge to kafiele lo kana iteten o rwace ketemoni lo Lahitok kakeny mietare.¹⁷O jir kadwarani o twehi otonge lo na ngoroni to tadati lo kana ikajong nenge iyo tadati lo kiyok lo iteten lo na tungani li iti nyujoti, iyo kafiele nahitok lo kana iteten ko kafiele nahitok lo keju iteten kulo adi faji lo fik inyi okoto lo kiciorita lo loguce. ¹⁸Otonge lo na ngoroni to kana nenge o jir kadwarani o twehi kue lo na tungani li iti nyujoti o pulore inyi to ketemoni lo Lahitok.¹⁹Oto hati kadwarani i fotohi kiciorita lo kipal o pulore tungani na li iti nyujoroti iyo rujon lo nyujon to ken nenge. To kifwongi lo na o ngot cia kadwarani kiciorita locurat, ²⁰i fotohi ciali ara lobito ko kiciorita na lara ngamang o pulore inyi oto cia inyi ko nyujon.²¹Ati ka li ikilwaha inyi ida o tum rumuno kuna sangite, o jir inyi i yaru kito lo mongo lo ker ara kiciorita lo loguce o jir iti lori o pulorehin inyi ara lobito ko lokirie lo kofwo kuna i tinyaha kuna li karuti to ngoroni ara kiciorita na lara ngamang, cupa lo ngoroni, ²²ko kurihin are kode amami kuna lo ngarihi are kuna lo tum inyi rumuno, lobito ara kiciorita lo kipal, lobito ara kiciorita locurat. ²³O jir inyi i yauno icieng ara kitinyujita nenge to far lo mietauni iyo kadwarani ketemoni lo kema lohiricore ketemoni lo Lahitok.²⁴O jir kadwarani o dumu na kito mongo lo ker lara kiciorita lo loguce ara lobito ko cupa lo ngoroni iti lor to ketemoni lo Lahitok ara kiciorita lo kitilora. ²⁵O ngot cia inyi kito mongo lo ker na lara kiciorita lo loguce o dumu okoto kunenge o dutohi tadati lo kiyok iteten lo na tungani li iti nyujoti, kafiele nahitok lo kana iteten ko iyo kafiele nahitok lo keju iteten.²⁶O jir kadwarani i tiyitahi lobo ngoroni tadati lo kana nenge ikajong ²⁷manyu o dutu na ngoroni to kafiele iteten nenge o rwace ketemoni lo Lahitok kakeny mietare.²⁸Ngoroni lobo o jir o dutohi iyo kuna fajihit lo dutohi inyi okoto lo kiciorita lo loguce; iyo tadati lo kiyok iteten lo na tungani li iti nyujoti, iyo kafiele nahitok lo kana iteten, ko iyo kafiele nahitok lo keju iteten. ²⁹Otonge lo na ngoroni to kana nenge o jir kadwarani o twehi kue lo na tungani li iti nyujoti, o cafare inyi ketemoni lo Lahitok.³⁰Oto hati inyi i fotohi kurihin kode amami kuna lo tum inyi rumuno; ³¹lobito ara kiciorita lo kipal ko lobito ara kiciorita locurat ara lobito ko kiciorita na lara ngamang. To na kikoi i tiyi cia kadwarani pulo ketemoni lo Lahitok to na tungani li iti nyujoti. ³²Ara kuno cihicihi na li jifita lobo tungani lo ngon ko mwai lo ken na li iti diho na lida o tum rumuno kiciorita kulangun lo wahiti kulo ki iti nyujo lo tungani.³³O joo Lahitok diho Moses ko Aron, ³⁴"Ka li rute ite kof lo kanaan na la cwara nan ite ara ningi, ato hati nan a fihahi ryok na li iti diho iyo kaji to na kof, ³⁵o jir monye lo na kaji o loo o rihohi kadwarani jimitan, ' La deu nan lobo tohi lo ri mejo ryok na li iti diho kaji nei'.³⁶O jir kadwarani o cik o joo o jir o beluni sangite fad to na kaji o rihe inyi ida lo rute hera ryok, o jir lobo tohi to na kaji ida o tuluni o joo ida o nyu. To kifwongi lo na o jir kadwarani o rute o loo hera kaji. ³⁷O jir inyi o her ryok to lohitir, ka lo rumu o ngoni ongon madahin kuna i nyoriha kode kuna i doriari kuna lo ri mejo i lukoho to lohitir, ³⁸o jir kadwarani o rute to na kaji i genahi na kaji to faritin mietare.³⁹To far lo mietare o jir kadwarani o yitu hera na kaji. Ka li nyaaru ryok to lohitir, ⁴⁰o jir inyi o rihohi o dumari kuna morutok lo ngon ryok i birori faji na lara lokuroni oleng to kanghatua.⁴¹O jir inyi o rihohi o kotori lohitir lo na kaji o jir na buru ko fur lo kotuni to lohitir lo na kaji i juhori lokuroni na i loma to kanghatua. ⁴²O jir icieng o rumu morutok ngejuho iti lunyorehin kunu ko ryok oto hati o dafi na kaji ari.⁴³Ka lo yitu ryok o boto to na kaji ari ati lo bunyori morutok kuna li nief inyi manyu iti ngejuhi kaji dafa, ⁴⁴o jir kadwarani o loo o her. Ka lo rumu o joo o ngon ryok dede, ara na ryok na i rohoi, ida na kaji o nyu.⁴⁵O jir na kaji o bunyori okalaha, lohitir ko keyek kulo kai ko sangite kunenge fad o jir i lieliengari lokuroni na i loma to kanghatua. ⁴⁶Lobo tungani lo rute na kaji lafar li genahini ida o nyu many kurou. ⁴⁷Lobo tungani lo get na kaji kode o nyia lobo tohi to katua lo na kaji o jir i lal kyelani kunenge.⁴⁸Ati ka lo lotu kadwarani hera inyi ida hati ryok i nyaaru langun lo dafari kaji, o jir inyi o tulu kaji o joo o nyu tonyio lo ru ryok.⁴⁹Lo ki iti nyujo kaji o jir inyi o dumu kweny are ko kete lo ciani lo ceda, usi na imalang ko lodwa. ⁵⁰O jir inyi i fadahi kwenyite lobito kai lo kifi kuna i libi to moti lokulufi. ⁵¹Oto hati inyi o dumu na kete lo ceda, lodwa, usi na imalang ko na kwenyite i war i lutohi iyo okoto lo na kwenyite li fadari iyo kifi kuna lo ngoni moti lo lokulufi, o dumu o rwacare kaji kakeny mietare.⁵²Iti nyu cia inyi kaji to okoto lo na kwenyite, kifi kuna i libi, kwenyite na i war, kete lo ceda, lodwa, ko usi na imalang. ⁵³O jir dong inyi o lahahi na kwenyite i war oleng faji na i nyu. To na kikoi o pul cia inyi kaji o lotu o nyu.⁵⁴Ara kuno cihicihi kulo mwai lo ken na li iti diho, lo iifa, ⁵⁵lo ryok iyo kyelani kode iyo kaji, ⁵⁶ko lo ulan, kificati, kode faji na i lalabu, ⁵⁷lo yenun jimitan o nyu lobo tohi kode ida o nyu. Ara kuno cihicihi kulo mwai lo ken na li iti diho ko ryok.

¹O joo Lahitok diho Moses ko Aron, ²"I to tenyati ko cio kulo Israel iti joo diho icieng: Ko lo yit lobo tohi to ken lo tungani, ida yitan o nyu. ³Kode i tiringa kitihita to ken lo tungani kode i gurahino, i cio cia inyi ida o nyu. Kikoi na li yaunore na yitan ida inyi o nyu ene:⁴Lobo kigeti lo getohino tungani na lo yit ken ijia ida o nyu, manyu lobo tohi li tongore inyi ida o nyu. ⁵Tungani na lo tir kigetita nenge o jir i lal kyelani kunenge, i lala to kifi manyu i wasihi inyi ida o nyu many kurou.⁶Tungani na li tongohino iyo tohi na li tongore tungani na lo yit lobo tohi to ken, o jir i lal kyelani kunenge, i lala manyu inyi to kifi ati i wasihi cia inyi ida o nyu many kurou. ⁷Tungani na lo tir tungani na lo yit lobo tohi to ken, o jir i lal kyelani kunenge i lala manyu to kifi ati i wasihi inyi ida o nyu many kurou.⁸Ka lo mitahi na tungani lo yit lobo tohi to ken kamilak ken lo lobo tungani i nyu, o jir na tungani i lal kyelani kunenge i lala manyu to kifi ati i wasihi inyi ida o nyu many kurou. ⁹Lobo tohi keken li tongore lerok ka li feita to lakweny ida o nyu.¹⁰manyu lobo tungani lo tir tohi na lo orumu o ngon fotiri lo na tungani i wasihi cia ida o nyu many kurou; tungani na li numu kuna sangite o jir i lal kyelani kunenge, i lala manyu to kifi ati i wasihi inyi ida o nyu many kurou. ¹¹Lobo tungani lo tir tungani na lo yit lobo tohi to ken ida i loloj kac to kifi o jir i lal kyelani kunenge manyu i lala to kifi ati i wasihi inyi ida o nyu many kurou. ¹²Moti lo kifi na lo tir na tungani o jir o borari manyu ka lara lobo tohi li kukumuni to kete, o jir i loloji to kifi.¹³Ka li iti nyujori tungani to yitan nenge, o jir inyi i ken faritin mietare kulo kitinyujo inyi. O jir inyi i lal kyelani kunenge, i lala to kifi kuna i libi oto cia inyi ko nyujon. ¹⁴To far lo mietauni o jir inyi o dumu kurihin are kode amami kuna lo ngarihi are o lotunore ketemoni lo Lahitok agwala lo kema lohiricore i ciorihi icieng diho kadwarani. ¹⁵O jir kadwarani i fotohi icieng; lobito ara kiciorita lo kipal, lobito ara kiciorita locurat. To na kikoi o pul cia inyi na tungani to ketemoni lo Lahitok iyo yitan nenge.¹⁶Ka li palu tungani retoni kula kulo otomone, o jir i lal ken nenge fad to kifi ati i wasihi ida o nyu many kurou. ¹⁷Lobo kyela kode cioni na lo dohi kula kulo otomone ijia o jir i lali to kifi ati i wasihi ida o nyu many kurou. ¹⁸Ka lo geto ngorwani ko retoni i juhoro kula kulo otomone o jir icieng fad i lala to kifi ati i wasihi icieng ida o nyuji many kurou.¹⁹Ka lo deya ngorwani ofa, i wasihi cia inyi ida o nyu to okoto nenge to faritin mietare. Manyu tungani na lo tir inyi i wasihi ida o nyu many kurou. ²⁰Lobo tohi lo getore inyi kode lobo tohi li tongore inyi ida cia o nyu.²¹Tungani na lo tir kigetita nenge o jir i lal kyelani kunenge manyu i lala to kifi ati i wasihi ida o nyu many kurou. ²²Tungani na lo tir kitongi nenge o jir i lal kyelani kunenge manyu i lala to kifi ati i wasihi ida o nyu many kurou. ²³Kode ka lara kigeti kode kitongi o tir lobo tungani, i wasihi na tungani ida o nyu many kurou.²⁴Ka lo geto tungani retoni ko inyi o tir hati okoto nenge inyi, ida cia inyi o nyu to faritin mietare; Lobo kigetita lo getore inyi, ida o nyu.²⁵Ka li juho okoto to ken lo ngorwani to faritin kuna i borengi ida ara okoto lo ofa nenge, kode o ngon ko yitan na lo gal faritin kulo ofa nenge, i wasihi cia inyi ida o nyu to faritin kulo na yitan lo okoto to ken nenge fad iya na lo ngonore to faritin kulo ofa nenge. ²⁶Lobo kigeti lo getore inyi o rihe na yitan lo okoto nenge o sodoro, ida cia o nyu iya logetore nenge to faritin kulo ofa nenge manyu lobo kitongi li tongore inyi ida cia o nyu iya na lo ngonore to faritin kulo deya lo ofa nenge. ²⁷Tungani na lo tir icieng ida cia o nyu, o jir i lal kyelani kunenge manyu i lala to kifi ati i wasihi ida o nyu many kurou.²⁸Ka li iti nyujori inyi to yitan nenge, o jir i kene faritin mietare to omot lo kuna faritin oto cia inyi ko nyujon. ²⁹To far lo mietauni o jir inyi i yaru kurihin are kode amami kuna lo ngarihi i yauno diho kadwarani agwala lo kema lohiricore. ³⁰O jir kadwarani i fotohi lobito ara kiciorita lo kipal, lobito ara kiciorita locurat. To na kikoi o pul cia kadwarani inyi to ketemoni lo Lahitok to yitan nenge na li ida inyi o nyujore.³¹O jir ite i ric cio kulo Israel iyo sangite kuna li cwara icieng ida o nyuji, o jir icieng ida o weiha iyo rujon lo nyujon to ki iti bota lomanyare nei na lo ngon kiji neicieng.³²Ara kuno cihicihi to tungani na lo ngon ko yitan, to tungani na li ida o nyu to ki juhoro kula kulo otomone, ³³to ngorwani na lo deya ofa nenge, to tungani retoni kode ngorwani na lo ngon ko yitan, ko to tungani retoni na lo geto ko ngorwani na li ida o nyu.

¹O tenya Lahitok ko Moses to kifwongi lo wei lo tee kulo Aron are kuna lo weihi ketemoni lo Lahitok. ²O joo Lahitok diho Moses, "To rihohi rece nino Aron ke cio o lotunita iya na lo wahare inyi iya faji na i Nyu noo korwong lo kyela kigenit ketemoni lo seger lo kisa na lo ngon kai lo sanduk lo cik to de o wei cia inyi tonyio a lotunita nan to idis kai lo seger lo kisa.³Ara ene koditi na lo rutoritare Aron faji na i Nyu o jir o lotu ko mongo na lo ngarihi ara kiciorita lo kipal ko mongo lo ker ara kiciorita locurat. ⁴O jir inyi i cief kanyi na i nyu na lara kyela iribi ko pali lo kyela iribi o raf ken nenge: o jir inyi o todohi gas lo kyela ken nenge manyu o pucahi turubuc lo kyela iribi kue. Ara kuno kyelani kuna i nyuji orumu re li lal ken nenge to kifi o rihe re ida li ciefohi icieng. ⁵Iyo ilulung lo cio kulo Israel o jir inyi o dumu korecio are kiciorita lo kipal ko mongo lo ker ara kiciorita locurat.⁶O jir Aron i fotohi mongo ara kiciorita lo kipal nenge lo pulo ken nenge ko kaji nenge. ⁷Tinyia i yaru hati kuna korecio are i fotohi Lahitok agwala lo kema lohiricore.⁸O jir inyi i bir tobotobo to kuna korecio are - lobito lo Lahitok ko lobito aviria. ⁹I ngohi Aron i yauno kore na lo dohi tobotobo nenge ara lo Lahitok i fotohi ara kiciorita lo kipal. ¹⁰Ati kore na lo urohino tobotobo nenge ara lo aviria, o jir i fotohini ara na i war diho Lahitok o jir i tiyorehin inyi ara lo pulo lo ilulung lo lahahino inyi o loo katua lo kuny ara kore lo aviria.¹¹I yauno cia Aron mongo ara kiciorita lo kipal lo pulo ken nenge ko kaji nenge, manyu o jir inyi o ngot mongo lo kiciorita lo kipal nenge to ken nenge.¹²O jir inyi o dumu ilebu lo iheru na li fut katalange to ciali na lo ngon ketemoni lo Lahitok ko kac are kulo iheru na i nyidita manyu i karuto o loorore korwong lo kyela kigenit. ¹³O jir inyi o fik iheru katua lo kima ketemoni lo Lahitok oto cia furo lo iheru i muhe seger lo kisa na lo ngon kai lo sanduk lo cik o jir inyi ida o wei.¹⁴O jir inyi i yaru lobo okoto lo mongo o loo o rwacahi ketemoni lo seger lo kisa to kafiele nenge oto hati to kafiele nenge o rwacahi ken lo seger lo kisa kakeny mietare.¹⁵O ngot hati inyi kore lo kiciorita lo kipal lo ilulung lo cio manyu i yaru okoto nenge korwong lo kyela kigenit o loo i tiyi iya na li tiyore to okoto lo mongo o loo cia inyi o rwacahi iyo seger lo kisa ko ketemoni nenge. ¹⁶To na kikoi o pul cia inyi faji na i Nyu noo to kipal ko silan lo cio kulo Israel kileng ngara kipal neicieng nyio. O jir inyi i tiyi o ri ji to kema lohiricore na lo ngon iyo icieng kiji lo rujon lo nyujon neicieng.¹⁷O jir cio o ru to kema lohiricore many to rutoro Aron faji na i Nyu noo many o rutu oleng lo looro pulo ken nenge, kaji nenge ko ilulung lo cio kulo Israel fad. ¹⁸Oto hati o rutu o lotu ciali na lo ngon ketemoni lo Lahitok manyu o pul inyi. I yaru cia inyi lobo okoto lo mongo ko lo kore o loo o fik iyo muriaha kulo ciali fad. ¹⁹O rwacahi cia inyi lobo okoto kakeny mietare iyo ciali lo ki iti nyujo inyi ko fiaru inyi iyo kipal lo cio kulo Israel.²⁰Langun lo keru Aron pulo faji na i Nyu noo, kema lohiricore, ko ciali, i yauno cia inyi na kore bito i war. ²¹O jir inyi o fik kac kunenge fad kue lo na kore i war manyu o tulohi rohojun ko silan lo cio kulo Israel fad ko kipalipali kuneicieng pili o fik kue lo na kore i war. O cule cia inyi na kine katua lo kuny iyo kenga lo tungani na lo nyumuni to na tic. ²²O tingoro cia na kore kipalipali kuneicieng iya faji na i loma o jir na tungani o rihoro inyi o loo o lahahi katua lo kuny.²³Tinyia o jir Aron o rute katua lo kema lohiricore o loo o puce kyelani iribi kulo adi li cief inyi o rihe ida o rute faji na i Nyu noo o jir inyi o ngerihi icieng ijia. ²⁴O jir inyi i lal ken nenge to kifi to katua lo faji na i Nyu oto hati i ciefohi kyelani kunenge kulo tiktik. O jir hati inyi o rutu i fotohi kiciorita locurat lo ken nenge ko kiciorita locurat lo cio lo pulo ken nenge ko kenite kulo cio.²⁵O curahi manyu inyi somia lo kiciorita lo kipal kai lo ciali. ²⁶Na tungani lo lahahi kine ara kore lo aviria o jir i lal kyelani kunenge manyu i lal ken nenge to kifi, langun lo keru o tum inyi lotuno katua lo kem.²⁷Mongo ko kore lo kiciorita lo kipal na li yari okoto neicieng katua lo faji na i Nyu noo o pulorehin o jir i yari iya oleng to kem; cionitok, tyangi ko monyi kuneicieng o jir o curari. ²⁸Na tungani lo cur icieng o jir i lal kyelani kunenge manyu i lala to kifi, langun lo keru o tum inyi rutuno katua lo kem.²⁹O jir ene i tongo ara itidwar lo tur diho ite, far lo tomon lo ofa lo mietare o jir ite i toyo to mejun lo taulo ida i tiyi lobo tic kode tungani na lo tomonohini kiji ningi kode misiohoni kamanyani kiji ningi - ³⁰tonyio ene far ki puloti cia ite lo kitinyujo ite, ito cia ite i nyuji iyo kipalipali kuningi fad to ketemoni lo Lahitok. ³¹Ara Sabit lo kiyoma o jir ite i toyo to mejun lo taulo ara itidwar lo tur.³²Kadwarani na li kweri manyu o twei lo lunyon faji lo apa nenge ara kadwarani na hitok o jir ara inyi lo pulo. O jir inyi i cief kyelani iribi kuna i nyuji ³³manyu o pul faji na i Nyu noo, kema lohiricore, ko ciali, ko kadwarak kula kude ko cio pili kulo Israel.³⁴O jir ene ara itidwar lo tur iyo ite: o jir o puli kipalipali kulo Israel fad kakeny lobito iyo kari." Manyu o fwonuni i tiyi iya na lo cihare Lahitok.

¹O joo Lahitok diho Moses, ²"To rihohi Aron ko tee kunenge ko cio kulo Israel fad tijio diho icieng, ' Tohi na lo cik Lahitok ene: ³Lobo Israelani li fotohi mongo nenge, kito lo ker kode kine katua lo kem kode oleng ⁴ida i yauno ketemoni lo kema lohiricore lo ki fotohino ara kiciorita diho Lahitok ketemoni lo lomanyare lo Lahitok, i rumu na tungani lo cifu loguce lo ki iti yija okoto; li iti yiju inyi okoto o jir o dumari inyi to kiji lo cio kunenge.⁵Ara ene o jir cio kulo Israel i yauno kitorita kuna li fotohita icieng to oleng diho Lahitok. O jir icieng i yauno kitorita diho kadwarani inyi jimitan diho Lahitok ketemoni lo kema lomanyare i fotohini ara kiciorita lo kimoraru. ⁶O jir kadwarani o rwacahi okoto iyo ciali lo Lahitok ketemoni lo agwala lo kema lohiricore o jir o curahi somia ara na li iti kwama uron nenge Lahitok.⁷O jir icieng ida o sodoro ki foto kiciorita kuneicieng diho lopidinga lo kine na lo ngoni icieng ki wora to ticitici kulo somun. O jir ene ara itidwar lo tur to icieng ko to kofiang kuna mute li jifita.⁸To rihohi icieng i joo, ' Lobo Israelani kode lobo misiohoni lo manya kiji neicieng li fotohi kiciorita locurat kode ki fotohino lobo kipulit ⁹ida hati i yauno ketemoni lo kema lohiricore ki fotohino diho Lahitok, o jir na tungani o dumari to kiji lo cio kunenge.¹⁰Lobo Israelani kode lobo misiohoni lo manya kiji neicieng lo nya okoto, a ngorwa cia nan na tungani lo daha okoto manyu a dume cia nan inyi to kiji lo cio kunenge. ¹¹Tonyio o ngon warun lo tohi fad iyo okoto manyu ahi ciorihi nan ite lo pulore kenite kuningi kai lo ciali: ara okoto o pulorehin warun lo tungani.¹²Tona a joo nan diho cio kulo Israel, o ru tungani lobo to kiji lo tum o nya okoto ida manyu misiohoni na lo manya kiji ningi o tum o nya okoto. ¹³Lobo Israelani kode lobo misiohoni lo manya kiji ningi lo mejaru lobo tyang kode kwenyite na lo cam to daha, o jir iti yije okoto oleng o nuhahi kof.¹⁴tonyio ara okoto lo tohi warun nenge. Inyi li cio nan a joo iyo cio kulo Israel, "O jir ite ida i nya okoto lo lobo tyang tonyio warun lo tohi inyi okoto nenge, tungani na lo nya o jir o dumari."¹⁵Lobo tungani kode na lo tomonohini ene kode misiohoni na lo manya, na lo nya tohi na lo wei ake kode na lo kony tyang na i ngere, o jir i lal kyelani kunenge manyu i lala to kifi ati i wasihi inyi ida o nyu many kurou, tinyia o nyu cia inyi. ¹⁶Ati ka lida inyi i lal kyelani kunenge manyu ida i lala, o woita cia na tenya kue nenge.

¹O joo Lahitok diho Moses, ²"To teny diho cio kulo Israel to rihohi icieng i joo, ' Nan Lahitok Lobanga ningi. ³Ke manya iya nu lo manyarehin to Ijipt idi afa li tongore ite, o jir ite ida i manya iya na lo manyarehin to kof lo kanaan idi lahi yaru nan ite. Ke jif koditi lo warun neicieng.⁴O jir ite i jif cik nitole manyu o jir i ningo tenyitenyi kunei fad. Nan Lahitok Lobanga ningi. ⁵Ito ningoti tenyitenyi kunei manyu i jif cihicihi kunei, tonyio tungani na lo ric icieng o war cia to icieng. Nan Lahitok.⁶Ke cio lobo tungani o loo geto ko tungani na li kajio ko inyi. Nan Lahitok. ⁷Ke iti kaj apa nino to loro getore iyang nino. Ara inyi iyang nino, ke getore inyi. ⁸Ke getore ngorwani lo apa nino, ara na ki iti kaja apa nino.⁹Ke getore kanece nino; kode kito lo apa nino, kode kito lo iyang nino, kode o tomonohini inyia kang kode lobo faji ake. ¹⁰Ke getore kito lo kito nino retoni kode kito lo kito nino ngorwani, ki iti kaja na koditi isi. ¹¹Ke getore kito lo ngorwani lo apa nino na lo tomonohi apa nino, ara inyi kanece nino.¹²Ke getore kanece lo apa nino, ara inyi tungani na i nyiha iyo apa nino - ijanyi nino. ¹³Ke getore kanece lo iyang nino tonyio ara inyi tungani na i nyiha iyo iyang nino. ¹⁴Ke iti kaj rece lo apa nino to loro iyo ngorwani nenge i tahita getore, ara inyi iyang nino.¹⁵Ke getore kokwa nino, ara inyi ngorwani lo kito nino. Ke loo getore inyi. ¹⁶Ke getore ngorwani lo rece nino, ara na ki iti kaja rece nino.¹⁷Ke getore ngorwani ko kito nenge karioni. Ke getore kito lo kito nenge retoni kode kito lo kito nenge karioni, ara icieng cio kuna i nyihaha diho inyi. Ara na tic na i bot. ¹⁸Ke dumu kanece lo ngorwani nino iti rak ara kaini lo ngorwani nino o rihe ngorwani nino o war.¹⁹Ke loo iyo ngorwani getore inyi o rihe o deya ofa. ²⁰Ke getore ngorwani lo loryehat nino jimitan iti bot ken nino to inyi.²¹Ke pote lobo kito nino ara kiciorita diho Molek tonyio o jir isi ida i siri karana lo Lobanga nino. Nan Lahitok.²²Ke getore retoni kaletoni iya ngorwani, i bot na. ²³Ke getore tyang manyu iti bot ken nino to inyi. Ke cio ngorwani i cio ken nenge iyo tyang lo geto ko inyi, ara na imomol.²⁴Ke iti bot kenite kuningi to lobo bito iyo kuno kikoihin tonyio ara ene koditi na li iti botare kunu misiok la loro nan ki fuharu to ketemoni ningi kenite kuneicieng. ²⁵Kileng kof li bot tona ati gem nan inyi to kipal nenge oto kof ko siearu kamanyak kulo katua nenge.²⁶Ati o jir ite i ning tenyitenyi kunei ko cihicihi kunei. Cio kuna lo tomonohini iyo ite ko misiok kuna lo manya kiji ningi o jir ida iti tiyi kuno ticitici i boti ²⁷tonyio ara afa kuno sangite kuna li tiyo cio kulo na kof o rihe ite many o lotu kof i bot. ²⁸Manyu ka li iti bot ite kof, ki siee cia ite oleng iya na lo siearare misiok kulafa li tem manya ijia diho ite.²⁹Tungani fad na li tiyi lobo iyo kuno ticitici i boti, o jir na tungani o dumari to kiji lo cio kunenge. ³⁰Ito ric ifahiti kunei manyu ke jif lobo iyo kuno kitimohiti irohori afa li tiyo cio to ketemoni ningi, i fwonu manyu ke iti bot kenite kuningi ara lobito ko icieng. Nan Lahitok.

¹Ojo Lahitok diho Moses, ²"Totenya ko ilulung lo Israel fad orihohi icieng ijo, ' Itinyu tonyio anyu nan Lahitok Lobanga ningi. ' ³Ojir tungani tolobito tolobito obang iyang nenge ko apa nenge, manyu ojir ibang Sabit nei. Nan Lahitok Lobanga ningi. ⁴Kefwo iyo Lopidingahin kode kikukuma lobangahin kulo bilieta ifwo kiwora icieng. Nan Lahitok Lobanga ningi.⁵Kalifotohino kiciorita lo kimoraru diho Lahitok, iciorihi iyo kikoi na lojir iruhuni ara faji nino. ⁶Ojir onyai lafar lifotohinore isi inyi kode lobito far nenge, lobo na lotong many far lo uni ojir ocurari. ⁷Kolonyai lobo to far lo uni lida onyu manyu ida cia iruhuni. ⁸Tungani na lonyia otong cia na tenya kue nenge tonyio lipale inyi tohi na inyu na lifotohini diho Lahitok ojir na tungani odumari to kiji lo cio kunenge.⁹Kalidengo ite daha lo kof ningi, kedeng many kalelehin kulo mana kode kebabau ko logalioti kulo dengo ningi. ¹⁰Kenyiahat dya vinore nino kakeny are kode kode kinunumo ngak kuna lodoi kof. Ingohiti kuna iyo kakilwahak, kakidahak ko misiok kuna lokoya. Nan Lahitok Lobanga ningi.¹¹Ke koko, ke taler, ke iti nononga kenite. ¹²Ke butia to talerun to karana nei, ito iti kaj karana lo Lobanga nino. Nan Lahitok.¹³Ke iti mumun loryehat nino kode iruje tohi nenge. Ke tek mucara lo tungani na litii tic nino ko kiwanyi. ¹⁴Ke fic katuhoni kode ke fik kitihita ketemoni lo kangodoni ati to bang Lobanga nino. Nan Lahitok.¹⁵Ke iti gere ngoto lo tenya; ke kor kakilwahani kode ke i sisi kabarani, ati to ngot tenya lo loryehat nino ara na iriworo. ¹⁶Ke lorita kiji lo cio kulo kalingi monga karaneco kuneicieng, ke tii lobo tohi li yauno wei iyo loryehat nino. Nan Lahitok.¹⁷Ke beru rece nino to tau. To rihohi loryehat nino tenya kue nenge ojir isi ida ingar loguce nenge ko inyi. ¹⁸Ke leno kode kitifitina lobo to kiji lo cio kunino, ati imaru loryehat nino iya ken nino. Nan Lahitok.¹⁹Ito ric cihicihi kunei, "Ke iti koba sang kuna longoni gelegele. Ke iti bulahi koditi lo kinyiemo are iyo mana lobito. Ke cief kyela na li kadi to usihin are kuna longoni gelegele."²⁰Kaliyau lobo tungani kito karioni na lara opii na orumu loter lobo tungani ake ati na lo rihe ida li iti lahi kode liciori laharu nenge. Ojir iciori kitigema na i cam. Ati ida o tumiti ki fadaru icieng tonyio o rihe ida iti lahi inyi. ²¹Ati ojir na tungani i yauno mongo lo ker agwala lo kema lohiricore ara kiciorita lo loguce diho Lahitok. ²²O jir kadwarani o pul inyi tona mongo lo ker lara kiciorita lo loguce to ketemoni lo Lahitok to kipal na li tii inyi oto cia o launi na kipal nenge.²³Kalifwo ite nu kof ito hati iti bulahi ciani na lo dahati ngak kunenge, iti dwara re ngak kunenge to karihin uni o jir ngak kulo na ciani iti dwari o jir ida o nyai. ²⁴Iyo kari lo ongon ara cia ngak kunenge kuna inyuji, kiciorita lo maja diho Lahitok. ²⁵Ati to kari lo miet i tum ite daha ngak kunenge. To ene kikoi o sodo cia dengo ningi. Nan Lahitok.²⁶Ke nyia lobo tyang na lo rihe o ngon ko okoto. Ke iti mohu kiyeha kode boho lo kamuha. ²⁷Ke git fovi to kalelehin lo kueci kuningi kode ke ngut kueci kulo musula kuningi. ²⁸Ke ngot kenite to kicira lo tungani na i wei kode fiha kingudo kenite kuningi. Nan Lahitok.²⁹Ke iti fajie kito nino karioni to kicwara inyi ara mulaya oto cia kof i belo ara lo kimulaya manyu i fut ko tic na i bot. ³⁰Ito ric Sabit nei manyu iti ngon ko bangun iyo faji nei na Inyu. Nan Lahitok.³¹Ke fwo iyo ibwonok kode i taharu kalalamitak oto cia icieng ki iti bot ite. Nan Lahitok.³²To woju to ketemoni lo ngoroyok i totoro bangun diho lohitwaha manyu to bang Lobanga nino. Nan Lahitok.³³Ko lo manya misiohoni ko ite kof ningi, ke tii inyi ara na i rohoi. ³⁴Misiohoni na lo manya kiji ningi o jir i wori o ri ko tungani na lotomonohini inyia, i maruti inyi iya na li marunore ite kenite kuningi tonyio ira afa ite misiok to kof lo Ijipt. Nan Lahitok Lobanga ningi.³⁵Ke tiyore kitemihin kulo ki iti mumuna ka li tema karitan, kiryoci kode kifut. ³⁶I tiyoreti kitemihin kuna lara kulo dede ko kitemi lo kiryoci na lara lo dede, kitemi lo ngamang na lara lo dede, ko kitemi lo ngoroni na lara lo dede. Nan Lahitok Lobanga ningi na lahiyauno ite to kof lo Ijipt. ³⁷Ito ric tenyitenyi kunei ko cihicihi kunei manyu i jifata icieng. Nan Lahitok.

¹Ojo Lahitok diho Moses, ²"Tijio iyo cio kulo Israel: Lobo Israelani kode lobo misiohoni lo manya kof lo Israel licio lobo kito nenge iyo Molek, o jir i fadari. O jir cio ilulung o cak inyi to morutok.³A ngorwa cia nan deya na tungani manyu a dume cia nan inyi to kiji lo cio kunenge, tonyio to kicwara tee kunenge iyo Molek, li iti bot inyi faji nei na Inyu manyu iti kaj karana nei na Inyu. ⁴Kalida cio ilulung o nga konyeha ida o deyati na tungani li cio kito nenge iyo Molek ida icieng i fade, ⁵a ngorwa cia nan na tungani ko kaji nenge manyu a dume inyi ko cio kuna li jifita inyi kuna li cio kenite kuneicieng diho Molek to kiji lo cio kuneicieng.⁶A ngorwa cia nan tungani na lo loo iyo ibwonok ko kalamak ki tiyo tic lo kinguler to ki jifita icieng manyu a dume cia nan inyi to kiji lo cio kunenge. ⁷Iti nyujoto kenite kuningi o jir i tongo ara kuna i nyuji tonyio nan Lahitok Lobanga ningi.⁸Iti ric tenyitenyi kunei manyu i jif icieng. Nan Lahitok na lahi iti nyujo ite. ⁹Ka li fic tungani apa nenge kode iyang nenge, o jir inyi i fadari. I fic inyi apa nenge kode iyang nenge manyu o yite okoto nenge kue nenge.¹⁰Ka li yiau tungani ngorwani lo lobo tungani, ko ngorwani lo loryehat nenge, inyi ko na ngorwani fad o jir i fadari. ¹¹Ko lo getore lobo tungani ngorwani lo apa nenge, li iti kaj inyi apa nenge. O jir inyi ko na ngorwani i fadari, o yite cia okoto kuneicieng kueci kuneicieng. ¹²Ko lo getore tungani kokwa nenge, o jir icieng are fad i fadari. Ara na tohi li tii icieng imomol, o yite cia okoto kuneicieng kueci kuneicieng.¹³Ko lo getore tungani retoni kaletoni iya ngorwani, li tii icieng are fad tohi na i bot. O jir i fadari icieng are fad: O yite cia okoto neicieng kueci kuneicieng. ¹⁴Ko lo yem tungani ngorwani ko iyang nenge fad, imomol na. O jir inyi ko kuna ngorwa are fad o curahini to kima o jir imomol ida o sodoro ngonun kiji ningi.¹⁵Ko lo getore tungani tyang, o jir inyi i fadari. O jir manyu i fadari na tyang. ¹⁶Ka li cio ngorwani ken nenge iyo tyang o joo o jir o getore inyi, i fadeti na ngorwani ko na tyang. O jir icieng i fadari, o yite cia okoto kuneicieng kueci kuneicieng.¹⁷Ko lo yem tungani kanece nenge kito lo apa kode lo iyang nenge oto hati icieng o geto, i tongo na ara riri, o wak icieng o dumari to konyeha kulo cio kuneicieng. Lida inyi o bang kanece nenge o jir na o ngon kue nenge. ¹⁸Ko lo getore tungani ngorwani o deya ofa, li iti botu inyi lohitihitare lo na ngorwani, lo ngajahi manyu na ngorwani diho inyi. O jir icieng are fad o dumari to kiji lo cio kuneicieng.¹⁹Ke getore kanece kode lo iyang nino kode lo apa nino tonyio iti kaja na okajimonye na i nyiha, o jir na o ngon kueci kuningi kulo cio are fad. ²⁰Ka lo getore tungani ngorwani lo mamai nenge ara na kitikaja lo mamai nenge, o ngon cia na kueci kuneicieng - o weiha cia icieng are fad o ru tee. ²¹Ka li tongore tungani ngorwani lo rece nenge, ara na tic lo kibot, li iti kaj inyi rece. O ru cia tee diho icieng.²²Ito ric tenyitenyi ko cihicihi kunei fad manyu i jifata icieng, o jir nu kof lahi yaru nan ite ijia ida kisieye ite oleng. ²³O jir ite ida i manya to kitimohiti kulo misiok kuna la loro nan ki fuharu to ketemoni ningi. Tonyio i tii icieng kuno sangite fad, a beru nan icieng.²⁴Ati a joo nan diho ite, i luny cia ite kof neicieng. Ahi ciorihi cia nan ite ara lolunyot, kof na li tihita lei ko otoro. Nan Lahitok Lobanga ningi na lahi iti ngade ite to kiji lo misihi. ²⁵O jir ite i yen kora kiji lo tyangi kuna i nyuji ko kuna lida o nyuji ko kiji lo kweny kuna i nyuji ko kuna lida o nyuji. Ke iti bot kenite kuningi to lobo tyang kode kwenyite kode lobo tohi lo kudita to kof kuna la gele nan jimitan ida o nyuji diho ite.²⁶O jir ite ira kuna i nyuji diho nan tonyio Nan Lahitok a nyu nan manyu lahi iti ngade nan ite oleng iyo misihi lo rahun kunitole.²⁷Tungani retoni kode ngorwani to kiji ningi na lara ibwoni kode kalamani o jir i fadari, o jir ite i cak icieng to morutok - o yite cia okoto neicieng kueci kuneicieng.

¹O joo Lahitok diho Moses, "To tenya ko kadwarak tee kulo Aron, tijio diho icieng: ke cio kadwarani o fik ken nenge ida o nyu to cio kunenge kuna lo wei, ²omayak kalara to tungani na i nyiha bebe iya apa nenge kode iyang nenge kode kito nenge retoni kode karioni kode rece nenge ³kode kanece nenge na lo rihe ida lo yemari na lo rihe o ngon kana nenge iya na lo rihe o ru retoni nenge, to inyi o tum inyi ki cwara ken nenge ida o nyu.⁴O jir inyi ida i cio ken nenge ida o nyu to cio kulo ngati lo komon kunenge, oto i pale ken nenge. ⁵O jir kadwarak ida o git kueci kode i susub musula kode ingud kenite. ⁶O jir icieng o nyuji diho Lobanga neicieng manyu o jir ida iti kaji karana lo Lobanga neicieng, tonyio icieng li cwara kiciorita kuna li fotohitati Lahitok to kima, daha lo Lobanga neicieng. O jir icieng o nyuji.⁷Ke cio icieng o yem ngorwo kuna li palaru to kimulaya kode o jaharu iyo rei, tonyio o nyuji kadwarak diho Lobanga neicieng. ⁸Ito deyati icieng ara cio kuna i nyuji tonyio i fotohita icieng daha lo Lobanga ningi. Iti fik icieng ara kanyujok tonyio Nan Lahitok a nyu nan - Nan na lahi iti nyujo ite. ⁹Ka li pale kito lo kadwarani ken nenge to rahun mulayani, i yauno inyi riri iyo apa nenge, o jir o curari inyi to kima.¹⁰kadwarani na hitok na lo nyumuni to kiji lo recera kunenge na li juhohini ngoroni kitweita kue nenge, manyu na li kweri lo ki ciefita kyelani kulo dwarun, o jir ida i ngohi fofi kulo kue nenge i sara kode o cir kyelani kunenge. ¹¹O jir inyi ida o rute kaji na lo ngon tungani na i wei. Ke cio inyi o fik ken nenge ida o nyu, kileng to apa nenge kode to iyang nenge. ¹²Kode o ngerihi faji na Inyu lo Lobanga nenge kode iti fyak tonyio li kweri inyi to ngoroni lo twa lo Lobanga nenge. Nan Lahitok.¹³Ngorwani na lo yema inyi o jir ara karioni na lo rihe ida o yen retoni. ¹⁴O jir inyi ida o yem lafuserito, ngorwani na lo jahi, kode ngorwani na lo tem kimulaya, ati karioni na lo rihe ida lo yen retoni to kiji lo cio kunenge. ¹⁵O jir inyi ida iti gela tee kunenge to kiji lo cio kunenge. Nan Lahitok na lahi iti nyujo inyi.¹⁶O joo Lahitok diho Moses, ¹⁷"To rihohi Aron tijio, ' To kofiang kulo lotataha kunino fad kuna lo fwonuno o ru lobo lotata nino li ngwal lo tum o lotu ki fotohino daha lo Lobanga nenge.¹⁸O ru lobo tungani i ngwal lo tum o nyihu: o ru lobo tungani i ngodo, kode o ngura, i yongo kode i gila ¹⁹O ru lobo tungani lo wei keju kode kana ²⁰kode lo gil rupangati kode li guhi kode ko lototile kode lo ngon ko longodoco kode i legeler. ²¹O ru lobo lotata lo kadwarani Aron li ngwal lo tum o nyihu ki fotohino daha na li cwarati Lahitok to kima. I ngwal inyi: o jir inyi ida o nyihu ki fotohino daha lo Lobanga nenge.²²O tum inyi daha daha lo Lobanga nenge na Inyu noo, ko daha na inyu fad ²³oto hati to kingwal nenge, o jir inyi ida o nyiharu iyo kyela kigenit kode loro ciali iti kaj faji nei na Inyu. Nan Lahitok na lahi iti nyujo icieng. ²⁴To na o rihohi Moses Aron ko tee kunenge kuno pili ko cio kulo Israel fad.

¹O joo Lahitok diho Moses, ²To rihohi Aron ko tee kunenge o jir i tiyore kiciorita kuna lohi fotohi cio kulo Israel nan to bangun ko rima, o jir ida iti fiahi karana nei na Inyu. Nan Lahitok. ³To rihohi icieng i joo, "To kofiang fad kuna lo fwonuno ka lida lobo lotata nino o nyu oto hati o nyihu iyo kicioriti kuna i nyuji kuna li fotohi cio kulo Israel diho Lahitok, o jir na tungani o dumari to ketemoni nei. Nan Lahitok.⁴Ko lo ngon lotata lo Aron ko mwai lo ken na li iti diho kode ko iitan lobo to ken nenge, o jir inyi ida o nyia kicioriti kuna i nyuji many iti nyujori inyi. Ara manyu cia inyi tungani na lida o nyu ko lo tir tohi na li iti bot ken lo tungani na i wei, kode na lo tir tungani na li iti bot kijuhuno to kula kulo otomone, ⁵kode ko lo tir lobo tohi lokudita na li cio inyi ida o nyu kode lobo tungani na li cio inyi ida o nyu, lobo tohi keken li cio inyi ida o nyu. ⁶Tungani na lo tir kuna sangite i wasihi ida o nyu many kurou, o jir inyi ida o nyia kiciorita na i nyu many ka li lal inyi ken nenge to kifi.⁷Ko lo doi kolong o nyu cia inyi, o tum dong inyi daha kicioriti kuna i nyuji tonyio ara icieng daha nenge. ⁸O jir inyi ida o nyia lobo tohi lo wei ake kode na lo kony tyang na i ngere, i cio inyi ida o nyu to na. Nan Lahitok. ⁹O jir kadwarak o ric ifahiti kunei o jir ida o cifuni loguce o weiha to kitikaja icieng. Nan Lahitok na lahi iti nyujo icieng.¹⁰O ru lobo tungani na lida ara lo kaji lo kadwarani lo tum o nyia kiciorita na i nyu, ida kileng lobo weloni lo kadwarani kode karwaani nenge o tum daha. ¹¹Ati ka li nyiangu kadwarani opii to robia, kode ko lo tomonohini opii kalenge, o tum na opii daha daha nenge.¹²Ko lo yem lobo tungani lida ara kadwarani kito karioni lo kadwarani, ida na kito ngorwani o tum o nyia daha na i nyu na lo sofuni. ¹³Ati ka lara kito lo kadwarani ngorwani lafuserito kode ko lo jahi o ru hati tee o yitu hati inyi ki tongo kolo apa nenge iya lafa li tongore to okarione nenge, o tum inyi o nyia daha lo apa nenge. Ida lobo tungani lida i ruhiti o tum daha na daha.¹⁴

¹O joo Lahitok diho Moses, ²"To teny diho Israel to rihohi icieng i joo, "Ara kuno karamahin kunei, faritin kuna hitoha kulo Lahitok kuna lo jir ite i tulu ara faritin kulo tuba na Inyu.³O ngon faritin ile kuna ngi tum ite ki tiyo ticitici ati far lo mietare ara Sabit lo ki yoma, far lo tuba na Inyu. O jir ite ida i tii lobo tic iyo fajihit kuna li manyare ite. Ara na far Sabit iyo Lahitok.⁴Ara kuno karamahin kulo Lahitok kuna lo nyumuni faritin kulo tuba na Inyu kuna lo jir ite i rihohi iyo faritin kuna lo nyumuni. ⁵I caha rangaru lo Lahitok to kurou lo doyoro kolong iyo far lo tomon ko ongon ofa lo lobito. ⁶To far lo tomon ko miet lo na ofa, i ciaha karama lo mugati kuna lida o fihi ibula na lo cik Lahitok to faritin mietare o jir ite i daha mugati kuna li kukumi o ru ibula.⁷To far lo lobito ito tubati tuba na Inyu manyu ke tii lobo tic lo tiktik. ⁸To faritin mietare i fotohiti kiciorita kuna li fotohini Lahitok to kima, manyu to far lo mietare ito tubati tuba na Inyu manyu ke tii lobo tic lo tiktik.⁹O joo Lahitok diho Moses, ¹⁰"To tenya ko cio kulo Israel, to rihohi icieng i joo, ' Ka li rute ite nu kof lahi cwara nan ite ito hati i dengu ngamang kunenge, i yauno kitorita lo ngamang kuna li tem isi denguno. ¹¹O jir inyi iti lor na kitorit lo ngamang to ketemoni lo Lahitok to na i ruhuni cia na kitorit ara faji nino o jir kadwarani iti lor inyi to far lo korwong lo Sabit.¹²To far na li iti lorarehin na itorit lo ngamang, o jir isi i fotohi diho Lahitok kito lo ker na lara kari lobito na lo ru madati ara kiciorita, ¹³ara lobito ko lokiriehin are kulo kofwo kuna i tinyaha i karuto to ngoroni kiciorita na li fotohini Lahitok to kima na li iti kwama uron nenge, ko kiciorita kimatit nenge vino na lo tum cupahin are ko nusu. ¹⁴O jir ida i nyia lobo mugati kode ngamang ngejuho kuna lo keji many far na li yaunore isi ene kiciorita diho Lobanga nino. O jir ene ara itidwar na lo sio many iyo kofiang kuna lo fwonuno, iyo fajihit fad kuna li manya ite.¹⁵To far lo korwong lo Sabit far lafa li yaunorehin itorit lo ngamang ara kiciorita lo kitilora, i kenata sabiti mietare. ¹⁶I kenata faritin keek miet many far lo kifwongi lo sabit lo mietare ito hati i fotohi kiciorita lo ngamang ngejuho diho Lahitok.¹⁷To lohitongore ningi o jir i yauno mugati are kuna li kukumuni iyo lokiriehin kulo kofwo kuna i tinyaha are kuna li kukumi to ibula ara kiciorita lo kitilora diho Lahitok. ¹⁸I yauno ara lobito ko kuno mugati tee kulo kera mongi mietare kuna lara kari lobito kuna lo ru ko madati, mongo na lo rihe o ngarihi lobito ko mongi kulo kera are. I tongo cia icieng ara kiciorita locurat diho Lahitok ara lobito ko kiciorita na lara ngamang ko kiciorita lo mata, kiciorita na li fotohini Lahitok to kima na li iti kwama uron nenge Lahitok.¹⁹Ito hati i fotohi kore lobito ara kiciorita lo kipal ko tee kulo kera mongi are kuna lara kari lobito ara kiciorita lo kimoraru. ²⁰O jir kadwarani iti lor kuna tee kulo kera to ketemoni lo Lahitok ara kiciorita lo kitilora ara lobito ko mugati kulo ngamang ngejuho. Ara icieng kicioriti kuna i nyuji kulo Lahitok diho kadwarak. ²¹Iyo inyi na far bito o jir ite i lolonguno i tuba tuba na i Nyu manyu ida i tii ticitici kulo tiktik. Ara ene itidwar lo tur to kofiang kuna lo fwonuno iyo fajihit kuna li manyare ite.²²Ka li dengo ite ngamang to manatak kuningi, ke dengoro many kalelehin kulo manatak, kode i babau logalioti kulo ngamang. Ito ngerihiti kuna iyo kakilwahak, kakidahak ko misiok kuna lo koyia. Nan Lahitok Lobanga ningi.²³O joo Lahitok diho Moses, ²⁴"Ti joo iyo cio kulo Israel, ' To far lo lobito iyo ofa lo mietare o jir ite i ngon ko far lo kiyoma, tuba na i nyu na li kwerati to kuta lo turena. ²⁵Ke tii lobo tic lo tiktik ati i fotohiti kiciorita na li fotohini Lahitok to kima.²⁶O joo Lahitok diho Moses, ²⁷" Far lo tomon lo ene ofa lo mietare ara far lo pulo, ito tubati tuba na i nyu manyu i toyoti to mejun lo taulo manyu i fotohiti kiciorita na li fotohini iyo Lahitok to kima.²⁸Ke tii lobo tic na far tonyio ara far lo pulo far na lo pulorehin kipalipali kuningi to ketemoni lo Lahitok Lobanga ningi. ²⁹Tungani na lida i toyo to mejun lo tau la far o jir o dumari to kiji lo cio kunenge.³⁰A fade cia nan to kiji lo cio kunenge lobo tungani li tii lobo tic la far. ³¹O jir ite ida i tii lobo tic tur. I ngohi ene to ara itidwar lo tur to kofiang fad kuna lo fwonuno iyo fajihit kuna li manyare ite. ³²Ara sabit lo kiyoma diho ite manyu o jir ite i toyo to mejun lo taulo many to kurou lo far lo mietangon many kurou lo la far lo tomon o jir ite itidwar sabit ningi.³³O joo Lahitok diho Moses, ³⁴"Ti joo iyo cio kulo Israel, ' Far lo tomon ko miet lo ofa lo mietare, i ciaha karama lo Lahitok lo tuguno na li yaru faritin mietare.³⁵Ara far lo lobito far lo tuba na i nyu ke tii lobo tic lo tiktik. ³⁶To faritin mietare i fotohiti Lahitok kicioriti kuna li fotohini inyi to kima, manyu far lo mietauni ito tubati tuba na i nyu manyu i fotohiti kicioriti kuna li fotohitati Lahitok to kima. Ara na tuba lo kiticungo, ke tii lobo tic.³⁷(Ara kuno karamahin kulo Lahitok kuna lo cihi kuna lo jir ite i lolong ara kulo itubiti kuna i nyuji kulo ki yauno icioriti kuna li fotohitati Lahitok to kima - kicioriti locurati; kicioriti kuna lara kulo ngamang, kikumihin ko kicioriti kulo mata kuna lo wahiti to kuna faritin. ³⁸Ara kuno kicioriti kuna lo sod kulo sabiti kulo Lahitok ko kuna lo sod kicioriti kuningi ko kuna li buti ite ko kicioriti kulo kibaya fad kuna li cwara ite diho Lahitok.)³⁹Tona ki ciaha to far lo tomon ko miet langun li tubu ite denguno manatak, i kwerati karama diho Lahitok to faritin mietare; ara far lo lobito far lo kiyoma ara manyu far lo mietauni far lo ki yauno.⁴⁰Iyo far lo lobito o jir ite i dyeu ngak kuna i lemi iyo cianitok ko tanitanihin kulo otit ko kulo cianitok kuna li muk bene ko gereca kuna lo ngon kutuk lo gura ito hati i kwanare ketemoni lo Lahitok Lobanga ningi to faritin mietare. ⁴¹Iti nyia ene ara karama diho Lahitok to faritin mietare to karihin fad. O jir ene ara itidwar lo tur to kofiang kuna lo fwonuno, iti dahitati ene karama to ofa lo mietare.⁴²Ito manyati tuguno to faritin mietare: Israel kuna lo tomonohini kof fad o jir o manyati tuguno ⁴³o jir lotataha kuningi mute o yenare o joo ati manya afa nan cio kulo Israel tuguno na la yaunore nan icieng to kof lo Ijipt. Nan Lahitok Lobanga ningi. ⁴⁴Oto Moses ko rihohino cio kulo Israel karamahin kulo Lahitok kuna lo cihi.

¹Ojo Lahitok diho Moses, ²"Tocik cio kulo Israel ingohi iyauni ngoroni na ilib na lipiuni iyo nyige kulo oliv ara lo kima ojir lomohin iwasihi nohun lohisidik.³To oleng lo kyela kigenit na limuk sanduk lo cik to katua lo kema lohiricore, ojir Aron ikukuma lomohin ketemoni lo Lahitok many to kurou many kiwanyi, lohisidik. Ojir ene ara itidwar to kofiang kuna lofwonuno. ⁴Lomohin kuna lotedo iyo kiniefita lo dahab na ilihinya na longon ketemoni lo Lahitok ojir ikukumati lohisidik.⁵To dumu kofwo kuna itinyaha ifun mugati tomon ko are, iyo mugati lobito lobito ojir iyaru kofwo lokiriehin are. ⁶Itiparahi icieng kai lo meja lo dahab na longon ketemoni lo Lahitok idufiti are, ile iyo idufit lobito.⁷Iyo idufit fad tofihahi iheru na itinya ara kitiiunita ara faji lo mugati ojir ara kiciorita na lifotohini Lahitok to kima. ⁸Ojir koditi lo ene mugati itiparahitati ketemoni lo Lahitok iya na to Sabiti fad ara faji lo cio kulo Israel ara ciharu lo tur. ⁹Ara icieng kulo Aron ko tee kunenge, kuna lojir odahati to faji na Inyu tonyio ara na angati lo kicait lo daha neicieng na Inyu noo, ko kiciorita na lifotohini Lahitok to kima.¹⁰Tinyia lobo kito retoni lara iyang nenge Israelani ara apa nenge Ijiptoni ko loro iya kiji lo tee kulo Israel, tinyia iciak baha ngonun katua lo kem kiji nenge ko Israelani. ¹¹Omor na kito lona ngorwani karana lo Lobanga to kificio, oto iyauni inyi diho Moses (Obara orumu iyang nenge Selomis kito lo Dibri lo imanit lo Dan). ¹²Otorahini inyi itilarehin ningo wahun lo Lahitok na ngorihohi icieng.¹³Tinyia ojo Lahitok diho Moses, ¹⁴" Iyaroti na kamoroni oleng to kem. Ojir cio pili kuna loning inyi ofik kac kuneicieng kue nenge oto hati ilulung fad ocak inyi to morutok.¹⁵Tijio iyo cio kulo Israel, 'kolific lobo tungani Lobanga nenge, ongon cia na kue nenge. ¹⁶Tungani na lomor karana lo Lahitok ojir ifadari. Ojir ilulung fad ocak inyi to morutok, kode Israelani kode misiohoni na lomor karana lo Lobanga ojir ifadari.¹⁷Kolodume tungani warun lo tungani kaletoni ojir manyu inyi ifadari. ¹⁸Kalifade tungani tyang lo lobo tungani (Kiteng, kine, ker, sigiria, lonaga kkb) ojir odum warun to warun.¹⁹Kaliriafu tungani loryehat nenge ojir nu tohi litii inyi iyo kaletoni, itii manyu diho inyi; ²⁰gila to gila, konyek to konyek, kale to kale. Iya na liriafunore inyi kaletoni ojir manyu itii diho inyi jii. ²¹Tungani na lifade tyang ojir odum ati tungani na lifade tungani ojir ifadari.²²ojir cik ara na iriworo iyo monyeri kulo kof ko iyo misiok kuna lomanya kiji neicieng. Nan Lahitok Lobanga ningi.' ²³Oto Moses ko tenya ko cio kulo Israel iyaru icieng na kamoroni oleng to kem ko cahati inyi. Itii cio kulo Israel iya na locihare Lahitok Moses.

¹O joo Lahitok diho Moses to kai lo donge lo Sinai, ²"To tenya ko cio kulo Israel tijio diho icieng, ' Ka li rute ite nu kof lahi cwara nan ite, o jir manyu kof to ken i kwer Sabit diho Lahitok.³To karihin ile ito yi kinyiemo kuningi manyu to karihin ile i bubusoto vinorehin kuningi manyu ito dengu daha nenge. ⁴Ati to kari lo mietangon o jir kof o rumu sabit lo kiyoma nenge, Sabit diho Lahitok. Ke yi kinyiemo kuningi kode i bubus vinorehin kuningi.⁵Ke deng daha ciefat kuna lo buju ake kode i dieu vino kulo vinore nino na lida i kukumi. O jir kof o rumu kari lo kiyoma. ⁶Tohi na lo doru to kof to ene kari lo Sabit i tongo cia ara daha diho tee - iyo isi to ken nino iyo karwaani nino retoni, iyo karwaani nino ngorwani ko tungani na li tiyo lejeleje ko misiok kuna lo manya kiji ningi, ⁷ko diho sang kuningi ko tyangi kulo mwang to kof ningi. Tohi na lo doru to kof i tum ite daha.⁸I kene sabiti mietare kulo karihin - karihin mietare kakeny mietare o jir kuna sabiti mietare kulo karihin o fwonu ara karihin keek ongon ko mietangon. ⁹Ito hati i cio o kuti turena to fajihit fad to far lo tomon lo ofa lo mietare iyo far lo pulo, ito kut turena to kof ningi fad.¹⁰Iti nyujoto kari lo keek miet manyu ito rihohiti laharu iyo cio kulo kof fad. I tongo cia ara Jubili diho ite, o jir lobito lobito o yite iyo kof lo kaji neicieng manyu lobito lobito iyo imanit nenge.¹¹O jir kari lo keek miet ara Jubili diho ite, ke yi kinyiemo manyu ke dengu tohi na lo doru to kof kode dia ngak kulo vinore na lida i kukumi. ¹²Tonyio i tongo kof ara Jubili o nyu diho ite, ito dahati tohi na li yauni to mwang rierie.¹³Iyo ene kari lo Jubili o jir tungani lobito lobito o yite kalenge iyo tohi na lara nenge. ¹⁴Ka li iti lotohi isi kof iyo lobo tungani lo kof ningi kode i nyiangu lobo diho inyi, ke iti mumunaru.¹⁵O jir i nyiangu kof diho tungani lo kof ningi i tetemahi ko wel lo karihin kulo Jubili, o jir manyu inyi ki iti lotohi isi i tutumohi ko karihin kuna ngi dengunore isi daha to na kof. ¹⁶Ko lo borengi karihin o jir manyu wel o sodo, ojo manyu karihin i kuting o jir manyu wel iti ri. Tonyio tohi na li iti loto inyi diho isi ara bolojun lo daha na ngi dengu isi to na kof. ¹⁷Ke iti mumun kenite ati o jir ite i bang Lobanga. Nan Lahitok Lobanga ningi.¹⁸I jifata tenyitenyi kunei manyu iti geny iyo ningo cihicihi kunei ito cia ite i manya to kisiliban manyu ara na i jir kof. ¹⁹Oto cia kof o doru ngak kunenge manyu i daha cia ite i moneho manyu i manya to kisiliban.²⁰I tum ite ki tifia i joo, ' nyio hati cia ki daha ohoi to kari lo mietare ka lida ohoi ki remo kode ki iti bul kinyiemo? ' ²¹A culu cia nan gum iyo kari lo ile na li cio kof o doru daha na ngo tum to karihin uni. ²²Ka li fwonu ite remo iyo kari lo mietauni i daha cia ite ngamang ongoro manyu i wasihi cia ite daha icieng many ngamang kulo kari lo mietangon o rumu.²³O jir kof ida iti lotori tur tonyio ara kof nei manyu ira ite kamanyak ko karwaak kunei. ²⁴To kof fad na li tehita ite ara ningi o jir ite i tiyo to laharu lo kof. ²⁵Ka li kilwaha lobo tungani lo kof ningi oto hati iti lote lobo kof nenge o jir lokajimonye na i nyiha noo o lotu iti lak tohi na li iti lote lokajimonye.²⁶Ojo manyu ko lo ru inyi ko tungani na ngi iti lahahi inyi oto hati manyu inyi lo rumu bara manyu o tehita sangite kuna lo tum kitilaha, ²⁷o jir inyi o de wel lo na kof many to na li iti lotorore inyi, i nyiahahi otonge iyo na tungani li iti lotohi inyi, o tum dong inyi yitoro iyo kof nenge. ²⁸Ati ka lida inyi o rumu robia kuna ngi nyiahahi inyi iyo inyi, o jir na kof i tongo ara lo na kanyiangani many kari lo Jubili o yitorore hati inyi iyo kof nenge.²⁹Ka li iti lote tungani kaji na lo ngon kang na lo lia to lohitir, o rihe inyi o ngon ko golun lo kitilaha to kari lobito lo lohi iti lorore nenge, to kuna faritin o tum inyi ki iti laha kaji nenge. ³⁰Ka lida iti lahi langun lo keru kari lobito, na kaji to kang na lo lia to lohitir ko rahun lo kanyiangani ko lotataha kunenge tur ida o tumiti ki nyiaharu to kari lo Jubili.³¹Ati kajihit kuna lo ngoni kangite kuna lida o lia o ri iya kof na i wat o tumiti ki iti laha icieng kode ki nyiahahino to kari lo Jubili. ³²O ngon cio kulo imanit lo Levi ko golun lo kitilaha kajihit kuneicieng to kangite kuna lara kuneicieng.³³Tona ara sangite kulo cio kulo imanit lo Levi kuna lo tumiti ki iti laha - inyi jimitan kajihit kuna li iti lote icieng to kang na lara neicieng manyu o tumiti ki nyiaharu iyo kari lo Jubili tonyio kajihit kulo cio kulo imanit lo Levi kuna lo ngon kangite kuneicieng, icieng lara sangite kuneicieng to kiji lo cio kulo Israel. ³⁴Ati lodahare lo sang na li rit kangite kuneicieng ida ara lo kitiloto, ara kof neicieng tur.³⁵Ka li kilwaha lobo tungani lo kof ningi ida o tum lwaha ken nenge to kiji ningi, ito lwak inyi iya na ngi lwahare misiohoni kamanyani kode katimanyani o jir inyi o sodoro warun kiji ningi. ³⁶Ke dumu lobo murucan to ken nenge ati to bang Lobanga nino o jir tungani lo kof ningi o sodoro warun kiji ningi. ³⁷O jir ite ida i kurohi inyi robia ko murucan kode iti lotohi inyi daha ko magoba. ³⁸Nan Lahitok Lobanga ningi na lahi yauno ite to kof lo Ijipt lo ki cwara ite kof lo kanaan manyu lo rahun nan Lobanga ningi.³⁹Ka li kilwaha lobo tungani lo kof ningi oto hati ki iti lotohi isi ken nenge, ke cio inyi i tiyo iya opii. ⁴⁰O jir i tiyore inyi iya tungani na li tiyo mucara kode katimanyani kiji ningi, o jir inyi i tiyo diho isi many kari lo Jubili. ⁴¹Tinyia o jir inyi o lahahini ko tee kunenge manyu o jir inyi o yite iyo imanit nenge manyu iyo kof lo fafaicio kunenge.⁴²Tonyio ara cio kulo Israel karwaak kunei kuna la yauno nan to kof lo Ijipt o jir icieng ida iti lotori ara opii. ⁴³Ke lanyu icieng to kimoc ati to bang Lobanga. ⁴⁴O jir opiihin kuningi rei ko ngorwo o fwonu iyo kofikofi kuna lohi korio ko ite, i tum ite ki nyianguno opiihin diho icieng.⁴⁵I tum manyu ite ki nyianga cio kuna lo manya to kude faritin kuting kiji ningi ko cio kulo imaniti kuneicieng kuna lo tomonohini kiji ningi o fwonu ara sangite kuningi. ⁴⁶I tum isi ki cwara icieng diho tee kunino ara sangite kuneicieng lolunyot manyu i tum ki iti raha icieng opiihin to warun neicieng fad, ati o jir isi ida i lanyu Israelani kaletoni nino to kimoc.⁴⁷Ko lo lotu misiohoni kode kamanyani kiji ningi o bara oto hati lobo tungani lo kof ningi ikilwaha iti lote hati ken nenge iyo misiohoni na lo ngon kiji ningi kode iyo lobo tungani to imanit lo na misiohoni, ⁴⁸o rihe inyi o ngon ko golun lo kitilahuno ken nenge to kifwongi lo kitilotoro inyi ken nenge. O tum lobo lokajimonye ki iti lahuno inyi.⁴⁹O tum mamanyi nenge kode iyanyi kode lobo tungani lo okoto nenge to kiji lo cio kunenge ki iti lahuno inyi. Kode ko lo bara inyi, o tum inyi iti lahu ken nenge. ⁵⁰O jir inyi ko kanyiangani nenge i ken faritin many to na li iti lotorore inyi ken nenge many kari lo Jubili. O jir wel lo kitilaha nenge o ri ko wel na lo dumarihin tungani na li tiyo mucara to kuna karihin.⁵¹Ko lo tong karihin o borengi, o jir inyi o dum kitilaha nenge to robia kuna i borengi lo kuna li nyiangarehin inyi. ⁵²Ka li kutingi karihin kuna lo tong o lorore kari lo Jubili, o jir inyi i gigil na o dum laharu nenge i tutumohi.⁵³O jir inyi i tiyorehin iya tungani na li tiyo mucara to kuna faritin fad, o jir manyu ite i deya jimitan ida kanyiangani nenge o lanyu inyi to kimoc. ⁵⁴Kileng ngida iti lahi inyi to kuno kikoihin, o jir inyi ko tee kunenge o lahahini kari lo Jubili: ⁵⁵tonyio ara Israel karwaak kunei. Ara icieng karwaak kunei kuna la yauno nan to kof lo Ijipt. Nan Lahitok.

¹Keduk lopidingahin kode icidohi lobo kitiriri kode icidohi lobo tifine to kenite kuningi kode icidohi lobo lopidinga lo moru kof ningi lo gungon ketemoni nenge. Nan Lahitok Lobanga ningi. ²Itoric sabit nei manyu iworati faji na Inyu nei, nan Lahitok.³Kalijif ite tenyitenyi kunei manyu ikum rica ko ningo cihicihi kunei, ⁴ahiculahi cia nan ite kuju to faritin kunenge manyu odoru cia kof daha manyu ongiju cianitok ngak kuneicieng.⁵Itiring cia ite kimuco many ogoru dia lo vino, itiring manyu dia vino many olotu remo manyu inyia cia ite daha na liwak ite fad manyu imanya to kisiliban kof ningi. ⁶Acio cia nan kisiliban kof manyu igeto cia ite oru tungani na lohitibang ite. Adume cia nan tyangi kuna ingereha to kof manyu ida cia ngalem latubot ihaling kof ningi.⁷Ifuhe cia ite merok kuningi manyu ouroritati ketemoni ningi to ngalemo kuningi: ⁸ifuk cia cio kuningi miet cio mia lobito, manyu ite mia lobito ifuk alifi tomon manyu ouroro cia merok kuningi to ngalem ningi ketemoni ningi.⁹Ahideya cia nan ite lo kisisio manyu acio ite ipiti manyu asod borengun ningi manyu aric cia nan ciharu nei ko ite. ¹⁰Orihe cia ite idaha ngamang kulo kari na loring iwak manyu kitijoho ifihahinore ngejuho.¹¹Afik cia nan lomanyare nei kiji ningi manyu ida ahiberu ite. ¹²Alot cia nan kiji ningi ara Lobanga ningi, ite manyu ira cio kunei. ¹³Nan Lahitok Lobanga ningi na lahiyauno ite oleng to kof lo Ijipt ojir ite ida isodoro rahun opiihin iyo cio kulo Ijipt. Agile nan bauhin kulo ayok to muruto kuningi manyu ahicio ilot oru riri, ongoni kueci kai.¹⁴Ati kalida ite iningo nan iberu kijifita kuno cihicihi fad, ¹⁵manyu kaliberu ite tenyitenyi manyu iberu cihicihi kunei manyu ida itii iya na lacihare nan ito hati igil ciharu nei, ____¹⁶ato cia nan atii ene diho ite: ayauno cia nan kenite kuningi bangun lorunyat, mwaita kuna lipale kenite kuningi ko nohun lo kenite na litingodo konyeha kuningi manyu ojure kenite kuningi. Iremo cia ite arus tonyio ara cia merok kuningi lo daha daha ningi. ¹⁷Ahingorwa cia nan ite ojir merok kuningi kilanyu ite; cio kuna lohiberu ite cia lohilanyu ite manyu ifeita cia ite kileng ngoru tungani lohifuhita ite.¹⁸Kalitiihino kuno fad orihe ite ida iwak ningo nan, ato cia nan ahitigem ite ogal kakeny mietare. ¹⁹Agil cia nan na pufa lo tuho ningi, afik kai to kueci kuningi ori iya biliet ko kof to na litongore ite iya mwalati. ²⁰Oran cia golun ningi arus tonyio ida cia kof ningi itidora ngamang, cianitok manyu ida ongi ngak.²¹Kolorihe ite kitiliwa nan iberu ningo tenya nei, asod cia nan kidak ningi kakeny mietare ogal iya na locamare kipal ningi. ²²Aculu cia nan tyangi kuna ingereha diho ite okwara tee kuningi, okeru sang kuningi manyu kitikuting ite manyu iyuhi kikoihin kuningi.²³Kolorihe iyo kuno fad ida ite iningo kisinga nei irihe isodoro kitiliwa nan, ²⁴Ato manyu cia nan token nei ahitiliwa ite manyu ahitigem ite to kipalipali kuningi kakeny mietare ogal.²⁵Ato cia nan ayauno rem kenite kuningi alenore gila lo ciharu nei. Kileng ngifwo ite igenoro kangite kuningi, aculu cia nan johijohi kangite kuningi many iciorihino ite kac kulo merok kuningi. ²⁶Kalangote nan rutul lo daha ningi, ongoja cia ngorwo tomon tafa ningi to ciali lobito. Ojo manyu ongoji okori itutumi na linyia ite ida manyu imone.²⁷Kalorihe iyo kuna fad ida ite kiningo nan ati irihe isodoro kitiliwa nan, ²⁸ato cia nan to kilongo nei ahitiliwa ite, ato cia nan token ahitigem ite to kipalipali kuningi kakeny mietare ogal.²⁹Ikony cia ite tyang lo tee rei ko lo tee ngorwo kuningi. ³⁰Agile cia nan dongecio kuningi, angode lobeleha kulo iheru kuningi, alirohi kaweyak kuningi kai lo lopidingahin kuningi kuna loru ko warun manyu ahisiri ite.³¹Abel cia nan kangite kuningi ara murana manyu alwehi fajihit kuna inyuji kuningi manyu ida cia nan arihe akwama uron lo cura lo kiciorita kuningi. ³²Alwehi cia nan kof ningi ojir merok kuningi kuna lohikorio ko ite ipany to bangun. ³³Ahitisarahi cia nan ite kiji lo misihi manyu auta ngalem latubot nei ahitirwangaru ite. Ojue cia kof ningi otong kangite ara murana.³⁴Oto cia otenu Sabit nenge kuno karihin fad limurare irumu ite ingoni kof lo merok kuningi; oto cia kof iyoma otenu sabiti kunenge. ³⁵Kuno karihin fad logetore kof ara mura, orumu cia kof kiyoma na lorumu iyo sabiti kulafa limanyare ite ijia. ³⁶Ojo manyu iyo kude lara otonge kuningi, afik cia nan bangun taulo kuneicieng to kof lo merok kuneicieng na lotum kwatun lo beneti na itou na lokuta kiyoma kitirwangita icieng. Ifeiti cia mejo itirwangitati to ngalem latubot many ouroritati kileng ngoru tungani litirwangita icieng.³⁷Itangahinoti cia akeake ouroritati icadohoti mejo itirwangitati to ngalem latubot kileng loru lobo tungani lifuhita icieng. Tona ida cia ite itum woitahino merok kuningi. ³⁸Ikeroro cia ite to misihi, kidile cia kof lo merok kuningi ite. ³⁹Kude diho ite kuna lotong ipalaru cia kenite kuneicieng to kofikofi kulo merok kuneicieng to tenya lo kipalipali kuneicieng manyu to tenya lo kipalipali kulo monyeri kuneicieng, ipalaru cia kenite kuneicieng.⁴⁰Ati kalirwo icieng to kipalipali kuneicieng ko kipalipali kulo monyeri kuneicieng ko laba neicieng na lohilabarehin nan ko liwa neicieng na lohitiliwarehin nan ⁴¹na licio nan atiliware icieng licio nan afuharore icieng iya kof lo merok kuneicieng, tona kolofwonu taulo kuneicieng kuna lida iliraru oryeji manyu odum icieng kipalipali kuneicieng, ⁴²aiu cia nan ciharu nei ko Jakob ko ciharu nei ko Isako ko ciharu nei ko Abraham, manyu aiu cia nan kof.⁴³Tonyio ingohi cia icieng kof imura many otenu cia kof sabit nenge iya liyuhinore oru icieng to katua. Odum cia icieng kipalipali kuneicieng tonyio loberu icieng cihicihi kunei manyu ibirori tenyitenyi kunei.⁴⁴Ati ko kileng ngara jii, kolongoni icieng kof lo merok kuneicieng, ida cia nan aberu icieng kode abire icieng ara lo keroro icieng tur lo gila ciharu nei ko icieng, Nan Lahitok Lobanga neicieng. ⁴⁵Ati to icieng aiu cia nan ciharu nei ko lohitwaha kuneicieng kuna layauno nan to kof lo Ijipt to ketemoni lo misihi lo rahun Lobanga neicieng, Nan Lahitok.⁴⁶Ara kuno tenyitenyi, cihicihi, ko isingiti kuna litimok Lahitok to donge lo Sinai kiji nenge ko cio kulo Israel ara diho Moses.

¹Ojo Lahitok diho Moses, ²"Totenya ko cio kulo Israel torihohi icieng tijo; Koloteny lobo tungani lobuti na igol.³Lo kifotohino cio diho Lahitok to kicwara wel na itutum, tofik wel to tungani retoni na longon karihin kunenge kiji lo keek are ko keek ile iyo sekeli keek miet kulo rial. Ijifita wel lo sekel na litiyorehin to faji na inyu. ⁴Ojo kalara tungani ngorwani, ojir ingot wel nenge ara sekeli keek uni kulo rial.⁵Kalara tungani na longon kiji lo karihin miet ko karihin keek are tofik wel lo retoni ara sekeli keek are ko lo ngorwani ara sekeli tomon. ⁶Kalara tungani na longon kiji lo ofa lobito ko karihin miet tofik wel lo retoni ara sekeli miet kulo rial, lo ngorwani ara sekeli uni kulo rial.⁷Kalara tungani na lara karihin kunenge keek ile kode logal, tofik wel lo retoni ara sekeli tomon ko miet kulo rial ko lo ngorwani ara sekeli tomon kulo rial. ⁸Kalideu isi tungani na loteny kikwonga ikilwaha, ida otum duma na wel limohi, o jir inyi iyauno na tungani iyo kadwarani na cia lolotu ongot wel lona tungani iyo wel na lotum na tungani libuti duma.⁹Kalara na tohi libuti inyi kicwara Lahitok kiteng, ker kode kine, ibuti inyi kifotohino ara kicorita, olotu na tohi liciori Lahitok ara tohi na inyu. ¹⁰Ojir ida ojahe inyi kode otob na ijir tona irohoi kode na irohoi tona ijir, kolotob inyi na to lobo oto inyi ko kitobita fad ara kuna inyuji.¹¹Kalara na tyang li buti inyi kicwara na lida onyu, na lida otum kiruhiti ara kicorita diho Lahitok - ojir na tyang iyauni diho kadwarani, ¹²na lolotu oher koditi nenge jimitan ojir kode orohoi. Na wel nenge longot kadwarani, itongo cia iya na. ¹³Kolowak monye kitilaha na tyang ojir osodohini miet lo tomon diho wel nenge.¹⁴Kalifotohi tungani kaji nenge ara tohi na inyu diho Lahitok, olotu cia kadwarani oher manyu ongot kire nenge jimitan ojir kode orohoi. Na koditi loteny kadwarani iwasihi cia iya na lotenyare inyi. ¹⁵Kalitilak tungani na lifotohi kaji nenge na kaji, ojir osodohi miet lo tomon lo wel nenge iyo kitilahita oto cia kaji oitohi ara nenge.¹⁶Kalifotohi tungani angati lo kof nenge loluny inyi iyo lohitwaha kunenge diho Lahitok, ojir wel nenge ongoti itutumi na ko borengun lo kinyiemo kuna li ngohini ijia. Kolotum na mana kiyaru okodoho uni kulo osihe ojir wel nenge ara sekeli keek miet kulo rial.¹⁷Kalifotohi inyi mana nenge to kari lo Jubili iwasihi wel nenge iya na longotorehin. ¹⁸Ati Kalifotohi inyi mana nenge langun lorang kari lo Jubili, ongot cia kadwarani wel nenge itutumohi ko wel lo karihin kuna lotong ogorunore iyo nu kari lo Jubili lolotuno oto cia inyiahuni wel nenge iyo na wel longoti.¹⁹Kolowak na tungani lifotohi mana kitilaha na mana nenge, ojir osodohi miet lo tomon iyo wel nenge oitohinore mana ara nenge. ²⁰Ojo kalida inyi itilak na mana, kode kalitilote inyi iyo lobo tungani ake, ida cia orihe otumiti kitilaha. ²¹Kololahahini na mana iyo kari lo Jubili, olotu cia ara na inyu iya mana na lolungahini iyo Lahitok, olotu cia ara tohi lo kadwarak tur.²²Kalifotohi tungani kof na linyiangu inyi ida ara kof lolunyot lo imanit, ²³ongot cia kadwarani wel nenge itutumohi iyo kari lo Jubili manyu ojir na tungani odum na wel nenge la far ara tohi na inyu diho Lahitok.²⁴Iyo kari lo Jubili oite cia na kof diho lafa tungani linyiangu inyi diho inyi, tungani lafa lara na kof nenge. ²⁵Ojir wel fad ongototi ijifita sekel lo faji na inyu na lara sekel lobito gerahin keek are.²⁶Oru ha tungani ngifotohi okang lo tyang tonyio ara okangi fad kulo Lahitok kode mongo kode kore kode mongo lo ker, ara lo Lahitok. ²⁷Kalongon na tyang iyo kuno tyangi likeni ojo ida onyuji, otum inyi kinyaharu inyange iyo wel na longoti, osodohi miet lo tomon iyo wel nenge. Kalida inyi itilak ojir itilotori to wel na longotohini.²⁸Ati oru lobo tohi lara lo tungani oto hati ifotohi diho Lahitok, kode tungani kode tyang kode kof lolunyot, lotumiti kitiloto kode kitilaha lobo tohi lolungahini tona kikoi olotu ara na inyu diho Lahitok. ²⁹Oru lobo tungani lifadaroti lotumiti kitilaha, ojir inyi ifadari.³⁰Lobito iyo tomon lo sangite kulo kof fad kode ngamang to manatak kode ngak kulo cianitok ara kulo Lahitok, onyuji icieng diho Lahitok. ³¹Kalitilaha tungani lobo lobito lo tomon nenge ojir osodohi miet lo tomon iyo wel nenge.³²Lobito lo tomon lo twol fad; lo kicu, kiri kode kera, kititomoni kulo sang fad kuna lorutunita to fotiri lo iluk lo katibalani, ara cia kuna inyuji diho Lahitok. ³³Ojir inyi ida onyumu kuna ijiri iyo kuna irohori kode iciak lobo tobo. Kaliciak inyi tobo, oto cia kuna sang ara fad na lifotohini ko kitobita nenge ara kuna inyuji na lida otumiti kitilaha.³⁴Ara kuno cihicihi kuna liciorihi Lahitok Moses to kai lo donge lo Sinai to cio kulo Israel.

¹O teny Lahitok diho Moses to katua lo kema lohiricore to kuny lo Sinai to far lo lobito iyo ofa lo are kari lo are na lo fwonunore icieng to kof lo Ijipt. O joo inyi, ²" I kena cio kulo Israel fad to imaniti ko to kajihit, ara na li ger tungani retoni lobito lobito to karani. ³O jir ite ko Aron i ken wel lo cio to olehi kuneicieng cio rei kuna lo ngoni Israel to tuban kuna lo goru karihin keek are kode o gal kuna lo tum rutohino ara karemok.⁴O jir lobito tungani to imanit lobito na lara kaboloroni lo kaji neicieng ki lwak ite. ⁵Ara kuno karaneco kulo cio kuna lo jir ki lwak ite: to imanit lo Reuben, Elizur kito lo Sedeur; ⁶to imanit lo Simeon, Selumiel kito lo Zerusadai;⁷to imanit lo Juda, Nason kito lo Aminadab; ⁸to imanit lo Isakar, Nesanel kito lo Zuar; ⁹to imanit lo Zebulun, Eliab kito lo Elon;¹⁰to imaniti kulo tee kulo Josep: to Epraim, Elisama kito lo Amihud; to Manase, Gamaliel kito lo Pedalizur; ¹¹to imanit lo Benjamin, Abidan kito lo Gideoni;¹²to imanit lo Dan, Ahiezer kito lo Ammisadai; ¹³to imanit lo Aser, Pagiel kito lo Okran; ¹⁴to imanit lo Gad, Eliasap kito lo Deuel; ¹⁵to imanit lo Naptali, Ahira kito lo Enan.''¹⁶Ara kuno cio kuna lo nyumuni to kiji lo ilulung, kabolorok kulo imaniti kuneicieng. Ara afa icieng karihitak kulo imaniti kulo Israel.¹⁷O dumu Moses ko Aron kuno cio li leti karanecio kuneicieng ene ¹⁸ko ki lolonguno ilulung fad iyo far lo lobito ofa lo are. I totoru cio irejiti kuneicieng to imaniti ko agwalahin manyu cio rei kuna lo tum karihin kuneicieng keek are kode o gal o fwonu i geri karanecio kuneicieng to lobito to lobito ¹⁹iya na lo cihare Lahitok Moses. Manyu i ken inyi icieng fad to kuny lo Sinai.²⁰To lotataha kulo Reuben okang lo Israel: Cio rei pili kuna lara karihin keek are kode o gal kuna lo tum rutohino ara karemok, o fwonu i geri icieng to karanecio to lobito to lobito i jifita irejiti kuneicieng, imaniti ko kajihit. ²¹Ara afa wel lo cio kulo imanit lo Reuben, alifi keek ongon ko ile ko mia miet.²²To lotataha kulo Simeon: Cio rei pili kuna lara karihin keek are kode o gal kuna lo tum rutohino ara karemok, o fwonu i geri icieng to karanecio to lobito to lobito i jifita irejiti kuneicieng, imaniti ko kajihit. ²³Ara afa wel lo cio kulo imanit lo Simeon, alifi keek miet ko mietangon ko mia uni.²⁴To lotataha kulo Gad: Cio rei pili kuna lara karihin keek are kode o gal kuna lo tum rutohino ara karemok, o fwonu i geri icieng to karanecio to lobito to lobito i jifita irejiti kuneicieng, imaniti ko kajihit. ²⁵Ara afa wel lo cio kulo imanit lo Gad, alifi keek ongon ko miet ko mia ile ko keek miet.²⁶To lotataha kulo Juda: Cio rei pili kuna lara karihin keek are kode o gal kuna lo tum rutohino ara karemok, o fwonu i geri icieng to karanecio to lobito to lobito i jifita irejiti kuneicieng, imaniti ko kajihit. ²⁷Ara afa wel lo cio kulo imanit lo Juda alifi keek mietare ko ongon ko mia ile.²⁸To lotataha kulo Isakar: Cio rei pili kuna lara karihin keek are kode o gal kuna lo tum rutohino ara karemok, o fwonu i geri icieng to karanecio to lobito to lobito i jifita irejiti kuneicieng, imaniti ko kajihit. ²⁹Ara afa wel lo cio kulo imanit lo Isakar, alifi keek miet ko ongon ko mia ongon.³⁰To lotataha kulo Zebulun: Cio rei pili kuna lara karihin keek are kode o gal kuna lo tum rutohino ara karemok, o fwonu i geri icieng to karanecio to lobito to lobito i jifita irejiti kuneicieng, imaniti ko kajihit. ³¹Ara afa wel lo cio kulo imanit lo Zebulun alifi keek miet ko mietare ko mia ongon.³²Iyo tee kulo Josep: To lotataha kulo Epraim: Cio rei pili kuna lara karihin keek are kode o gal kuna lo tum rutohino ara karemok o fwonuni i geri icieng to karanecio to lobito to lobito i jifita irejiti kuneicieng, imaniti ko kajihit. ³³Ara afa wel lo cio kulo imanit lo Epraim alifi keek ongon ko mia miet.³⁴To lotataha kulo Manase: Cio rei pili kuna lara karihin keek are kode o gal kuna lo tum rutohino ara karemok o fwonuni i geri icieng to karanecio to lobito to lobito i jifita irejiti kuneicieng, imaniti ko kajihit. ³⁵Ara afa wel lo cio kulo imanit lo Manase alifi keek uni ko are ko mia are.³⁶To lotataha kulo Benjamin: Cio rei pili kuna lara karihin keek are kode o gal kuna lo tum rutohino ara karemok o fwonuni i geri icieng to karanecio to lobito to lobito i jifita irejiti kuneicieng, imaniti ko kajihit. ³⁷Ara afa wel lo cio kulo imanit lo Benjamin alifi keek uni ko miet ko mia ongon.³⁸To lotataha kulo Dan: Cio rei pili kuna lara karihin keek are kode o gal kuna lo tum rutohino ara karemok o fwonuni i geri icieng to karanecio to lobito to lobito i jifita irejiti kuneicieng, imaniti ko kajihit. ³⁹Ara afa wel lo cio kulo imanit lo Dan alifi keek ile ko are ko mia mietare.⁴⁰To lotataha kulo Aser: Cio rei pili kuna lara karihin keek are kode o gal kuna lo tum rutohino ara karemok o fwonuni i geri icieng to karanecio to lobito to lobito i jifita irejiti kuneicieng, imaniti ko kajihit. ⁴¹Ara afa wel lo cio kulo imanit lo Aser alifi keek ongon ko lobito ko mia miet.⁴²To lotataha kulo Naptali: Cio rei pili kuna lara karihin keek are kode o gal kuna lo tum rutohino ara karemok o fwonuni i geri icieng to karanecio to lobito to lobito i jifita irejiti kuneicieng, imaniti ko kajihit. ⁴³Ara afa wel lo cio kulo imanit lo Naptali alifi keek miet ko uni ko mia ongon.⁴⁴Ara afa kuno cio kuna li ken Moses ko Aron ko kabolorok kulo Israel tomon ko are na lo woita lobito lobito to imanit nenge. ⁴⁵Cio kulo Israel fad kuna lo tum karihin keek are kode o gal kuna lo tum rutohino ara karemok kulo Israel lo fwonuni i keni i jifita irejiti, imanit ko kajihit kuneicieng. ⁴⁶Ara afa wel neicieng fad alifi mia ile ko uni ko mia miet ko keek miet.⁴⁷Ida hati afa i kenahini cio kulo kajihit kulo imanit lo Levi ara lobito ko kulakude imaniti. ⁴⁸Lo joo Lahitok diho Moses; ⁴⁹" O jir isi ida i ken imanit lo Levi kode i morahi icieng iyo kikena lo cio kulo Israel kulakude.⁵⁰Ati to nyumu cio kulo imanit lo Levi o jir icieng ara karicak kulo lomanyare na Inyu lo cik o riciti kifahita kunenge ko sangite pili kuna lara kulo katua nenge. O jir icieng ara katingitak kulo lomanyare na Inyu ko kifahita kunenge fad: o jir icieng o ric inyi manyu o gurohita kemahin kuneicieng i rit inyi.⁵¹Ka li iti johoti lomanyare na Inyu o jir ara cio kulo imanit lo Levi lo ket i yuhi manyu sangite kunenge, manyu ka lo goru faji na li tahinorehin lomanyare na Inyu, o jir ara cio kulo imanit lo Levi li fahahi, i ngohi ta ara cio kulo imanit lo Levi li tiyi. Lobo tungani ake na lo loo o nyiha ijia, o jir i fadari. ⁵²O jir cio kulo Israel o gur kemahin kuneicieng to olehi, tungani lobito lobito iyo kema nenge iyo kiherit nenge.⁵³Ati cio kulo imanit lo Levi o jir o gurohi kemahin kuneicieng i rit lomanyare na Inyu lo cik o jir kilongo lo Lahitok ida o lotu iyo ilulung. O jir cio kulo imanit lo Levi o ric manyu o tuniti lomanyare na Inyu lo cik." ⁵⁴I tiyi cio kulo Israel kuno sangite pili iya na lo cihare Lahitok Moses.

¹O joo Lahitok diho Moses ko Aron: ²O jir cio kulo Israel o fik kemahin kuneicieng i rit kema lohiricore lolomaje. Tungani lobito lobito fotiri lo kiherit nenge iyo beru lo imanit nenge.³To ngati lo okangere iya lotulunore lo kolong o jir olehi kulo Juda o fik kemahin kuneicieng fotiri lo kiherit neicieng. Ara Lahitok lo cio kulo imanit lo Juda Nahason kito lo Aminadab. ⁴Ara wel lo cio kulo olek nenge alifi keek mietare ko ongon ko mia ile.⁵I jifahi cia kem lo imanit lo Isakar icieng. Ara lahitok lo cio kulo imanit lo Isakar Netanel kito lo Zuar. ⁶Ara wel lo cio kulo olek nenge alifi keek miet ko ongon ko mia miet.⁷I jifahi cia kema lo imanit lo Zebulun icieng. Ara lahitok lo cio kulo imanit lo Zebulun Eliab kito lo Helon. ⁸Ara wel lo cio kulo olek nenge alifi keek miet ko mietare ko mia ongon.⁹Ara tuban lo cio kuna li caahini kem lo Juda na li jifita olehi kuneicieng alifi mia lobito ko keek mietauni ko ile ko mia ongon. Icieng lo lot ketemoni.¹⁰To ngati lo orof o ngoni cia olehi kulo kema lo Reuben fotiri lo kiherita neicieng. Ara lahitok lo cio kulo imanit lo Reuben Elizur kito lo Sedeur. ¹¹Ara wel lo cio kulo olek nenge alifi keek ongon ko ile ko mia miet.¹²I jifahi cia kema lo imanit lo Simeon icieng. Ara lahitok lo cio kulo imanit lo Simeon Selumiel kito lo Zerusadai. ¹³Ara wel lo cio kulo olek nenge alifi keek miet ko mietangon ko mia uni.¹⁴I jifahi cia kema lo imanit lo Gad icieng. Ara lahitok lo cio kulo imanit lo Gad Eliasap kito lo Deuel. ¹⁵Ara wel lo cio kulo olek nenge alifi keek ongon ko miet ko mia ile ko keek miet.¹⁶Ara tuban lo cio kuna li caahini kem lo Reuben alifi mia lobito ko keek miet ko lobito ko mia ongon ko keek miet. Icieng lo lot ara olek lo are.¹⁷Oto hati kema lohiricore ko kem lo cio kulo imanit lo Levi oculohino kiji lo kemi. O lotita cia icieng i jifita na koditi lo fihare icieng kemi kuneicieng, lobito lobito faji nenge fotiri lo kiherit nenge.¹⁸To ngati lo lodoyorore lo kolong ara cia olehi kulo kema lo Epraim fotiri lo kiherit neicieng. Ara lahitok lo cio kulo imanit lo Epraim Elisama kito lo Amihud. ¹⁹Ara wel lo cio kulo olek nenge alifi keek ongon ko mia miet.²⁰I jifahi cia kema lo imanit lo Manase icieng. Ara lahitok lo cio kulo imanit lo Manase Gamaliel kito lo Pedazur. ²¹Ara wel lo cio kulo olek nenge alifi keek uni ko are ko mia are.²²I jifahi cia kema lo imanit lo Benjamin icieng. Ara lahitok lo cio kulo imanit lo Benjamin Abidan kito lo Gideoni. ²³Ara wel lo cio kulo olek nenge alifi keek uni ko miet ko mia ongon.²⁴Ara tuban lo cio kuna li caahini kem lo Epraim alifi mia lobito ko mietauni ko mia lobito. Icieng lo lot ara olek lo uni.²⁵To ngati lo kai o jir ara olehi kulo kem lo Dan fotiri lo kiherit neicieng. Ara lahitok lo cio kulo imanit lo Dan Ahieza kito lo Ammisadai. ²⁶Ara wel lo cio kulo olek nenge alifi keek ile ko are ko mia mietare.²⁷I jifahi cia kema lo imanit lo Aser icieng. Ara lahitok lo cio kulo imanit lo Aser Pagiel kito lo Okran. ²⁸Ara wel lo cio kulo olek nenge alifi keek ongon ko lobito ko mia miet.²⁹I jifahi cia kema lo imanit lo Naptali icieng. Ara lahitok lo cio kulo imanit lo Naptali Ahira kito lo Enan. ³⁰Ara wel lo cio kulo olek nenge alifi keek miet ko uni ko mia ongon.³¹Ara tuban lo cio kuna li caahini kem lo Dan alifi mia lobito ko keek miet ko mietare ko mia ile. Icieng lo lot loruhit fotiri lo kiheriti kuneicieng.³²Ara kuno cio kulo Israel kuna li keni i jifita kajihit kuneicieng. Cio fad kuna lo ngoni kem na li jifita olehi kuneicieng ara wel iyo tuban neicieng fad alifi mia ile ko uni ko mia miet ko keek miet. ³³Oto hati, ida afa i kenahini imanit lo Levi ara lobito ko imaniti kulo Israel kulakude, iya na lo cihare Lahitok Moses.³⁴Tona, i tiyi cio kulo Israel sangite fad kuna lo cik Lahitok Moses: Ara na koditi na lo fihare icieng kemi kuneicieng iyo kiheriti kuneicieng, inyi manyu na koditi na lo lotitare icieng to kajihit ko to imaniti kuneicieng.

¹Ara ene itifit lo kaji lo oho Aron ko Moses to kuna faritin lotenyare Lahitok ko Moses to kai lo donge lo Sinai. ²Ara afa karanecio kulo tee kulo Aron Nadab okang nenge, Abihu, Eleaza ko Ismar.³Karanecio kulo tee kulo Aron kuno kadwarak kuna lo twei, kuna li kweri lo ki tiyo ara kadwarak. ⁴Ati o weihi Nadab ko Abihu ketemoni lo Lahitok to kifotohino kiciorita to kima na lida i ruhiti to kuny lo Sinai. O ru afa tee kuneicieng to na, Ara afa Eleaza ko Ismar lo fwonu i tiyo ara kadwarak to karihin kulo warun lo apa neicieng Aron.⁵O joo Lahitok diho Moses: ⁶"I yauno imanit lo Levi i fotohi icieng diho Aron kadwarani o jir o lwak inyi.⁷O jir icieng i tiyi ticitici diho inyi ko to ilulung fad to kema lohiricore to kitiyo tic lo lomanyare na Inyu. ⁸O jir icieng o ric kifahita kulo kema lohiricore fad, lo kitifuta ticitici kulo Israel fad to kema lohiricore iyo lomanyare na Inyu.⁹I corahi imanit lo Levi diho Aron ko tee kunenge, ara icieng imanit lo cio kulo Israel kuna lo jir i fotohini inyi fad. ¹⁰To nyumu Aron ko tee kunenge i tiyo ara kadwarak, lobo tungani ake lo tem loro lomanyare na Inyu o jir i fadari.¹¹O joo manyu Lahitok diho Moses, ¹²"La nyumu nan imanit lo Levi to kiji lo cio kulo Israel ara faji lo tee okangi kulo ngorwo kulo Israel fad. Ara cio kulo imanit lo Levi kunei ¹³tonyio ara tee okangi pili kunei. Lafar la kerunore nan tee okangi kulo cio kulo Ijipt fad, ati ngade nan tee okangi kulo Israel fad ara kunei. Nan Lahitok."¹⁴O joo Lahitok diho Moses to kuny lo Sinai, ¹⁵"I kena cio kulo imanit lo Levi to kajihit ko agwalahin kuneicieng. I kena tungani retoni fad many to kito retoni na lara ofa lobito o lorore iya ketemoni." ¹⁶To na i ken Moses icieng iya na lo cihare tenya lo Lahitok inyi.¹⁷Ara afa karanecio kulo tee kulo Levi icieng; Geresoni, Koas ko Merari. ¹⁸Ara kuno karaneco kulo cio kulo agwala lo Geresoni; Libni ko Simei. ¹⁹Agwalahin kulo Koas: Amram, Izhar, Hebron ko Uziel. ²⁰Agwalahin kulo Merari; Mahali ko Musi. Ara afa kuno agwalahin kulo imanit lo Levi to kajihit kuneicieng.²¹Ara agwalahin kulo Geresoni kolo Libni ko kolo Simei; ara afa kuna kajihit kulo agwala lo Geresoni. ²²Ara afa wel lo cio rei kuna lara ofa lobito kode o gal, kuna li keni alifi mia mietare ko mia miet. ²³O jir agwala lo Geresoni o fik kem fungot lo lomanyare na Inyu iya ngati lo lodoyorore lo kolong.²⁴Ara afa lahitok lo agwala lo Geresoni Eliasap kito lo Lael. ²⁵To kema lohiricore ara afa tic lo cio kulo agwala lo Geresoni lo rica kema lo lomanyare na Inyu; kemahin ko kimuhihin, kigenihin kulo kema lohiricore ²⁶kigeniti kulo sita, kigeniti kulo lokoli lo sita na li rit lomanyare na Inyu ko ciali ko kofi kunenge ko sangite pili kuna li tiyorehin icieng.²⁷Ara agwalahin kulo Koas kolo Amram, kolo Izhar, kolo Hebron ko kolo Uzel. Ara afa kuno kajihit kulo agwala lo Koas. ²⁸Ara afa wel lo cio rei kuna lara ofa lobito kode o gal, kuna li keni alifi mia mietauni ko mia ile. Ara afa tic lo cio kulo agwala lo Koas rica lomanyare na Inyu. ²⁹O jir agwala lo Koas o fik kem neicieng ngati lo Orof to lomanyare na Inyu.³⁰Ara afa lahitok lo agwala lo Koas Elisapan kito lo kito lo Uziel. ³¹Ara afa tic neicieng rica lo sanduk lo cik, meja, lomohin, cialitok, sangite kulo lomanyare na Inyu kuna li tiyorehin ijia kigenit ko sangite fad kuna li tiyorehin icieng. ³²Ara afa lahitok lo imanit lo Levi fad Eleazar kito lo Aron kadwarani. O nyumuni afa inyi lo bolojohino cio karicak kulo lomanyare na Inyu.³³Ara agwalahin kulo Merari kolo Mahali ko kolo Musi, ara afa kuno kajihit kulo Merari. ³⁴Ara afa wel lo cio rei kuna lara ofa lobito kode o gal, kuna li keni alifi ile ko mia are. ³⁵Ara afa lahitok lo agwala lo Merari Zuriel kito lo Abihail. O jir icieng o fik kem neicieng ngati lo kai to lomanyare na Inyu.³⁶O nyumuni afa cio kulo agwala lo Merari lo rica guri, riho, wirihin, tedohin ko sangite kuna li faharehin lomanyare na Inyu ko sangite kuneicieng fad ³⁷ara lobito ko guri kulo sita ko tedohin ko kofi ko bilieta kuna lo gurorehin fad.³⁸O jir Moses, Aron ko tee kulo Aron o fik kem neicieng ngati lo okangere ketemoni lo kema lohiricore iya lotulunore lo kolong. Ara afa tic neicieng rica lomanyare na Inyu ara faji lo cio kulo Israel. Lobo tungani ake na lo tem lotuno o nyiha ko lomanyare na Inyu o jir i fadari. ³⁹Tuban lo cio kulo imanit lo Levi fad kuna li keni iya na lo cihare Lahitok Moses ko Aron i jifita agwalahin kuneicieng ara lobito ko tee rei kuna lara ofa lobito kode o gal ara afa alifi keek are ko are.⁴⁰O joo Lahitok diho Moses, " I kena okangi kulo cio kulo Israel fad kuna lara ofa lobito kode o gal manyu i gero karanecio kuneicieng iti par. ⁴¹To fik cio kulo imanit lo Levi ara kunei faji lo okangi kulo cio kulo Israel ko sang kulo cio kulo imanit lo Levi ara faji lo okangi kulo sang kulo cio kulo Israel. Nan Lahitok."⁴²Oto Moses ko kikena okangi kulo cio kulo Israel fad iya na lo cihare Lahitok inyi. ⁴³Ara afa wel lo okangi fad kuna lara ofa lobito kode o gal kuna li geri to karanecio alifi keek are ko are ko mia are ko keek mietare ko uni.⁴⁴O joo manyu Lahitok diho Moses, ⁴⁵"To dumu cio kulo imanit lo Levi ara faji lo okangi kulo cio kulo Israel ko sang kulo cio kulo imanit lo Levi ara faji lo okangi kulo sang kulo cio kulo Israel. O jir cio kulo imanit lo Levi ara kunei. Nan Lahitok."⁴⁶Lo kitilaha kuna okangi kulo Israel mia are ko keek mietare ko uni lo gal cio kulo imanit lo Levi, ⁴⁷i tutubu sekeli miet kulo rial to tungani lobito lobito, i tetemahi ko sekel lo lomanyare na Inyu na lara sekel lobito gerahin keek are. ⁴⁸I ciorihi kuna robia kulo kitilaha Israel kuna lo gal diho Aron ko tee kunenge.⁴⁹Oto Moses i tutubu robia kulo kitilahita lo kuna Israel lo gal wel lo cio kulo Levi. ⁵⁰Iyo kuna okangi kulo Israel i tutubu inyi rial na lo tum kirioci nenge sekeli alif lobito ko mia uni ko keek ile ko miet na li jifita sekel lo faji na Inyu. ⁵¹I co Moses kuna robia kitilahita iyo Aron ko tee kunenge iya na lo cihare tenya lo Lahitok inyi.