Bible

मर्कुसओ नुयङखान

1¹देकमि निनामछेनओ नुसावानामओ तापुङ । ²ओटनि यसैयाह यामाङओ छापलायाकडा छापतानचिनओ याआङ, खाङानुम अङका अकटेट याकेनछाञा खानाओ बुसि बुसि छुतङा, खोक्कोआ खानाओ लाम छुमचुम चुवोङ, ³खोक्लिडा कापात्ओ डोसाङला, हाएसिओ लाम छुमचुम मुवानुम, खोनिनओ चुपलाम बिकु मुलुत्तानुम।⁴हङसानवा पुमि युहन्ना हुमुकवालेकओ निकि लाछुङमिनओ हङसानवाओ रूमरङ मुयाङसा खोक्लिडा दातलुवा । ⁵झारा यहुदिया सिङवाङ का यरूशलेमओ याकखामि मोचिओया लोननि मता, नङ मोकोचिआ आनओ आनओ हुमुकवा देङहुतला चुवाकि मोचि डाङका इताङकु होङकुडा हङसानवा मलोकता । ⁶युहन्नाआ देङकोङपाओ मुआओ टिट का छुमायुडा होक्वाओ छाकछिनमा छुम्ताओ याआङा, का दोममाक नङ खोकलिओ सुइवालेम चासाङा।⁷नङ मोचिआ उसओ यिङयाङसा रूमरङ मचुवा, 'खोक्को अङकाओ नेतलोक बानमानु, खोनिनओ लाङसुपओ सुछु बोम्तुकि हुत्वो मुरूओ अङका याकनुङा। ⁸अङकाआ खानाचिञा चाःवाआ हङसानवा पुउङ, मेन खोनिनआ खानाचिञा वाचोङ साकोङआ हङसानवा पुमा लिवोङ।⁹हान मोलेनडा देकमि गालिलओ नासरत डाङका बानानिन का युहन्ना डाङका इताङकु होाङकुडा हङसानवा तारानिन। ¹⁰नङ वाडाङका थाङमुसा खोनिनआ सारु‌ङ्गा होङसानचिनओ का साकोङञा कुइवाओ नुरुङडा अहाङपाङडा धायाङसा मुवाओ टोक्तानिन। ¹¹नङ् सारूङगाङका अकटेट डोसाङला लिसा, 'खाना अङकाओ स्वावा सावाछा तए, खाना सुत्डा अङका सावालेत याकङा।'¹²नङ् साकोङआ खोनिनञा हालेङे राकामाललाकनिन खोक्लिडा खाटटानिन। ¹³मन्कि खोनिन खोकलिडा तुकिलेन सुलावा डाङका सुकोडा डोट्‌याङसा सायारूचि सुत्दा युङानिन, का सारूङ याकेन्छाचिआ खोनिनओ रोपधामवा मचुवाङा। /s देकमिओ ओकओ यापुङ /s¹⁴हान् युहन्ना लाप्‌माछेक मलिसा नेत्लोक निनाममुओ नुसावानाम् रूमरङ मुयाङसा देकमि गालिलडा बानानिन, ¹⁵का लोवानिन, 'मुयाकला लाट्ला लिसाओ याआङ, नङ् निनाममुओ हाङहोन चुकडा ताबानाओ याआङ। लाछङमिन मुवानुम, का नुयङखानडा मकतुम मुवानुम।'¹⁶हान गालिल वातताम्‌ओ वाचुक वाचुकखाङे कोननियुङहिडा ‌‌खोनिनआ शिमोनञा का शिमोनओ बुबु अन्द्रियासञा साजुमाडा चङखावेत वेतनियुङसाओ टोक्तानिन। देनादि मोकोचि वेत्‌काबा मयाआङा। ¹⁷नङ देकनिआ मोकोचिआ लोवानिन अङका खानाचिञा मनाचिओ वेतकाबा मेतवोङा। ¹⁸हाले आन्‌ओ चङखावेतचि छिराकि मोकोचि खोनिन्‌ओ देङसि मखारा।¹⁹अचि हयानि मखारा नेतलोक खोनिनआ जब्दिओ सावाछा याकुब का मोचिओ निछाक युहन्नाञा टोक्तानिन। मोकोचि छाङ चावासिडा चङखावेत् बोपनियुङसाओ मयाआङा। ²⁰मोबेन हालेङे खोनिनआ मोकोचिञा बुत्तानिन, का मोकोचि अचुपा जब्दिञा याङसुमिचिओ अकनिनडा चाःवासिडा छिराकि खोनिन्‌ओ देङसु मवाङा।²¹हाले खोनिनचि कर्फनहुमडा खारानिन, का मोबेन खोनिन् सावाएमलेनडा यायोकखिमडा वाङनि सालामयड पुसि पुङसानिन। ²²नङ मोकोचि खोनिनओ सालामयङडा स्वमराक मडोट्टा देनादि खोनिनआ मोकोचिञा कायङवानआ उसओ माआङ मेन कोपरूयुङमिचि उसओ चिनलुमा लिसाङा।²³मोवाइडाङे मोकोचिओ यायोकखिमडा असेङअत साकोङ लिमाओ अकपाङ मना याआङा, मोको उसओ यिङयाङसा पात्तु ²⁴देकमि नासरी, आनकानञा खानानिन सुत्डा दि चाखाम? दि खानानिन आन्‌कानञा युनला चुसि बानानिनओ ए? अङका खानानिनञा सिनङा, खानानिन् निननममुओ वाचोङहाङ लिमा नु। ²⁵देकमिआ मोसाञा उसओ यिङयाङसा हेन्तानिन, वाइःया युङे, का मोडाङका लोन्टाकि बाने। ²⁶मन्कि असेङअत साकोङआ मोसाञा सुवालोङथेन मेत्ताकि धिडोसाङलाआ रिखापनि मोडाङका लोन्टाकि ता।²⁷नङ झारा पाङ स्वमराकडा मडोट्टा सेन्मासेन चुसिमलुवा, ओको दि ए ? ओको ना नुङवा सालामयङ ए, ओचिआ कोपरूयुङ सुत्डा असेङअत् साकोङचिञा छाङ इङइवा मचुलुक, का मोकोचिआ ओचिओ इङइवा मकाङ। ²⁸नङ उसओ लिमुसा खोनिनओ मुनुम गालिलओ झारा यापाकडा खुदाखुदि फेया।²⁹हान् खोकोचि यायोकखिम डाङका लोनमुसा याकुब का युहन्नाओ अकनिनडा शिमोन का अद्रियासओ खिमडा बानानिन। ³⁰शिमोनओ छादिमा माआ सारि लिसाओ याआङा का मोकोचिआ खोनिनञा मोबेन ङे मोचिओ छापछोङडा ताछुकफेङडा मचुवा। ³¹नङ चुकडा तांकि खोनिनआ मोचिआ छुक लाप्ताकि मोचिञा छुटुक्का पुलोन्टानिन का माआ मोचिञा छित्तनिलेवा का मोचिआ खोनिनचिओ रोपधामवा मचुवा।³²मन्कि नामपुकडा मुनटोङ नामलुन्ता हाले मोकोचिआ खोनिनओया तुककाबाचि का मामाङसुखा वाङाओ झाराञा मबाटटा । ³³नङ झारा तालावाङ ङे लापटिखोमडा झाराझुम लिसाओ मयाआङा। ³⁴नङ् खोनिनआ ओला माइओ सारिआ दाखासाङ मेत्ताओ तुक्काबाचि बदधेकाञा नुसङ मेत्तानिन का बद्धेका मामाङसुखाचिञा लात्तानिन का मामाङसुखाआ खोनिन्ञा सिन्‌ताओ लिहिडा खोनिनआ मोकोचिञा चेपसि पुमा मानलि।³⁵हान उपमि लिमाबुसि ओङसाङे पोक्तुकि खोनिन हुइया सेनयाङनि खामडा खारानिन का मोडा सोमफोङला मुवानिन। ³⁶नङ शिमोन का मोचिसुत्डा लिवोचि खोनिनञा खेन्याङसा मखारा। ³⁷नङ खोनिनञा धिराकि मयिङा, झाराआ खानानिनञा लामनियुङसाओ मयाआङ।³⁸मोबेन खोनिनआ मोकोचिञा लोवानिन,' बानानुम आनकानका खाउ ङे चुकडाओ तालावाङचिडा खारइनने का मोडा छाङ अङका रूमरङ मुम, देनादि ओसाओ निकि ङे अङका लोननि ताओ एव।' ³⁹मन्कि झारा गालिलडा मोकोचिओ यायोकखिमचिडा रूमरङ मुयाङसा का सुलावाञा लात्‌याङसा खोनिन बियानिन । /sसुखेन्वा नुसङ लिसाओ /s⁴⁰मन्कि अकपाङ खुखेनवा मोडा ताकि ताछुकफेङला मुवाकि उसओ लोयाङसा लाङतुमफु नेपता, "खानानिन्‌आ राका मुवानिन लो अङकाञा सेङवानुमा रूमानु। ⁴¹मोबेन खोनिन्‌आ सोमनुवाकि आनओ छुकआ मोसाञा नोपतानिन का मोसाञा यिङानिऩ, 'अङका राका मुङा खाना साङनुवा लिसानुम। ' ⁴²मन्कि हालेङे मोसाओ खुखेन मोडाङका खाछिरा का मोको साङनुवा लिनिलेवा ।⁴³नङ खोनिनआ मोसाञा चाउक इङइवा पुवाकि हाले छुत्तानिन। ⁴⁴नङ मोसाञा लोवानिन, 'खाङानुम ,खानाआ ओको साङञा छाङ मानियङदे मेन खाराकि खाना आमहाङपाङे बुबकाबाचि ओया खाङमेत्तानुम, का खानाचिञा सिनलेखाओ निकि वाछाप्पाआ लोवाओ ओटनि साङनुवारिओ यामतोकचि हेन्खुवा रिपेन्तानुम।⁴⁵मेन मोको लोनताकि खारा नेतलोक ओको दुमओ उनबद्धे रूमरङ मुवा का मुनुम फेममा पुङसा हे देकमि लादेङ सासापसा तालावाङडा वाङला मुसि रूमा मानलि मेन हुइया सेनयाङनि खारुङडा युङानिन, का मनाचि रिनचोलिपाङका खोनिनओया मबाना।

2¹दिचलेन नेतलोक लादेङ खोनिन मुनटोङ कर्फनहुमडा वाङानिन, मोबेन खोनिन खिमडा लिमानु लोवो एनानचिन ²नङ उनबद्धे मनाचि झाराझुम मलिसा हे मोकोचि मोडा मानछत ,ओडातारि हे लापतिखोमओ चुवाङयोवा अकनिया खाम मानलि। नङ खोनिनआ मोकोचिञा इदुम एनमेत्तानिन।³नङ लुकापाङआ खुनताओ अकपाङ धासारिवाञा ताराकि मनाचि खोनिनओया मता। ⁴मुकलाओ सुन्दुमआ खोनिनओ चुकड़ा बानमा मानरूहिदा मोकोचिआ खोनिन लिसानिनओ खाम धानिओ खापपु महोक्ता, का होक्ताचिया नेतलोक मोको घासारिवा इमनियुङसाओ ङे इमखा मोडाङका हुयनि मइत,ता।⁵देकमि मोकोचिओ मकतुम खाङाकि मोको घासारिवाञा यिङानिन "सावाछा खानाओ हुमुकवा नुनाम्‌लानुत मलिसा।" ⁶मेन मोडा खाउ ङे यङवानमिचि युङनियुङसाओ मयाआङा का आनओ आनओ कोङरिङडा उसओ यिङाकि मिनला मुनियुङसाओ मयाआङ ⁷देना ओको मनाआ मुइसाकिया चेपलुक? ओसाआ ना निनाम्‌मुओ उतनुुङ चुलुक। ओन् अक तामिनतुप् निनाममुआ लेट्‌का निचि साङआ छाङ हुमुकवा नुनामलानुत मुमा रूयाक?⁸मन्कि मोकोचि हाङपोहाङडा उइसाकिया मिनला मचुलुक लोवो देकमिआ हाले आनओ साकोङडा सिनला तोक्तुकि मोकोचिञा लोवानिन, देना खानाचि आनओ आनओ कोङरिङडा उसओ दुम्‌ओ मिनला अचुलुक? ⁹धासारिवाञा आमनो हुमुकवा नुनामलानुत मलिसा यिङमा हे पोक्ते आमनो इमखा थेन्ताकि बिए, यिङमा, खाउ ओलाक नेकता याआङ ?¹⁰मेन मनाओ सावाछाञा हेन्खामाडा हुमुकवा नुनामलानुत मुवो पाङ याआङ लोनि खानाचिआ लेसि रूवानुम। (खोनिनआ धासारिवाञा लोवानिन) ¹¹अङका खानाञा लोङा पोक्ते, आमनो इमखा थेन्तानुम का आपनो खिमडा बिनिलेवानुम। ¹²नङ मोको ठिन्ता का हाले आनओ इमखा थेन्ताकि झाराओ बुसित डाङका खारालेवा, उनतारि हे झारा पाङ स्वमराकआ नाकाक् मलिसा का आनकान्आ उसओ ना देमखा छाङ टोक्तुओ याइमिन लोनि मोकोचिआ निनाममुओ धिनुमसङ मचुवा। /s लेविञा बुतसान /s¹³मन्कि खोनिन् लादेङ वात्ताम वाचुकखाडा खारानिन, का झारा मुकला खोनिनओया मबाना नङ् खोनिनआ मोकोचिञा सालामयङ पुवानिन । ¹⁴नङ खात्याङसा मुहिडा खोनिनआ अल्फयसओ सावाछा लेविञा छोनलाखाडा युङनि युङसाको टोकतानिन का मोचिञा यिङानिन अङकाओ देङसु बानानुम। मोचि पोकताकि खोनिन्‌ओ देङसु मवाङा।¹⁵नङ् उसओ लिसा, हे मोचिओ खिमडा चासिञा खोनिन् युङानिन, नङ बद्धेका छोनकाबाचि का दाखोङवाचि छाङ देकमि का खोनिन्‌ओ खेनमाछाचिओ अकनिनडा युङाओ मयाआङा, देनादि मोकोचि बद्धेका मयाआङ नङ् खोनिनओ देङसु देङसु बियाओ मयाआङा। ¹⁶मेन फरिसिचिओ कायङवानचिआ खोनिन दाखोङवाचि का छोन‌कावाचि सुतडा चानियुङसानिनओ टोक्तुकि खोनिनओ खेनमाछाचिङा मयिङा, मोचि छोनकाबा का दाखोङवा सुत्दा चामादुङमा मुहिडा मयाछा।¹⁷ओको एनाकि देकमिआ मोकोचिञा लोवानिन चावापाडचिञा नुखामिओ चाखाम नुनिन् मेन तुककाबाचिञा, अङका सामयोकमिचिञा ना माआङ मेन दाखोङवाचिञा बुतसि ताओ एव। /s मानचायाकला छापछोङ खासेन /s¹⁸हान युहन्नाओ खेनमाछाचि का फरिसिचि मानचायाकला मयुङाङा का मोकोचि ताकि खोनिनञा मयिङा, युहन्नाओ खेनमाछाचि का फरिसिओ खेनमाछाचि देना मानचायाकला मयुङलुक मेन खानानिन्ओं खेनमाछाचि लो मानचायाकता मयुङनिन ? ¹⁹देकमिआ मोकोचिञा लोवानिन, दि साङकोम मोकोचिओ अकनिन्डा लिदातारि सायाहाङमि मानचायाकला मयुङ का? मुनटोङतारि साङकोम मोकोचिओ अकनिनडा मलि मोकोचि मानचायाकला युङसि मरुनिन्। मेन मोचिलेन मबानवोङ मुनटोङ साङकोम मोकोचि डाङका नियाक ममुमेत्वोङ का मोलेन मोकोचि मानचायाकला मयुङवोङ।²⁰मेन मोचिलेन मबानवोङ मुनटोङ साङकोम मोकोचि डाङका नियाक ममुमेत्वोङ का मोलेन मोकोचि मानचायाकला मयुङवोङ। ²¹साङआ छाङ आसुङ टिटडा नुङवा तेन्तुमा चङनिन् माआङलो मोडाङका मोको चङसाओआ तामिनतुप नुङवाआ आसुङडाङका सातनि मखाट का पेतसु ओलाक लिवोङ।²²नङ साङञा छाङ नुङवा यम्पारावा आसुङ होःवाओ खुङडा लेननिन माआङलो मोको यम्मारावाञा हो वाओ खुङचि केतनि पुयाक का यम्मारावा का हो वाओ खुङ छाङ युनता मलि। मेन नुङवा यम्मारावा नुङवाङे हो:वाओ खुङओ निकि ए। /s सावाएमलेनओ काङलेन छापछोङ खासेन /s²³अक सावाएमओ लेनडा खोनिन चासुमखाचि डाङका लिनि खात्याङसा लिमानुवाङा, का खोनिनओं खेन्‌माछाचिआ बियाङसा मुहिडा चासुमओ वाचुङखुङचि कुपसि मपुङसा। ²⁴फरिसिचिआ खोनिनञा मलोवा, 'खाङाने सावाएम लेनडा खाकको मुमा उतनुवा याआङ, मोकोचि देना मचुलुक? '²⁵खोनिन्आ मोकोचिञा लावानिन, 'दि खानाचिआ देमखा छाङ खिपतुओ तमानुनुङ, दाउदआ मुनटोङ मोचिञा चाखाम डोटटाओ याआङा, मोचि नङ मोसुतडा लिवोचि साकारूहिडा दि मुवाओ मयाआङा? ²⁶खाइसाकिया अवियाथार बुलामबु बुबकाबाओ वाइदा निनाममुओ खिमडा मोचि मवाङा का बुकफेनओ पेमपाक मचो खाकको बुबकाबा लेटका निचिआ चामा उत्नुवा याआङ ,का उहाङपाङसुतडा लिवोचिञा छाङ मपुवा।²⁷मन्कि खोनिनञा मोकोचिमा लोवानिन सावाएमओ लेन मनाओ निकि मेत्ताओ ए। मना सावाएमओ लेनओ निकि माआङ। ²⁸ओसुन्दुम ना मनाओ सावाछा सावाएमओ लेनओ छाङ हाएसि ए।

3¹खोनिन लादेङ यायोकखिमडा वाङानिन, नङ मोडा सिपतुओ छुक लिसाओ अकपाङ मना याआङा। ²नङ खोनिन्‌आ मोसाञा सावाएमओ लेनडा नुसङ मेत्मानु हे लोनि खोनिन्‌ञा खायोङमाञा मोकोचि खोनिनओ सुक्सुखाडा मयाआङा।³मोबेन खोनिनआ सिपतुओ छुक लिसाओ मनाञा लोवानिन 'हुपडा ठानठुक लिसानुम ।' ⁴नङ् खोनिनआ मोकोचिञा लोवानिन सावाएमओ लेनडा नुलोक चुमा हे उवाक चुमा? हाङमाङ रातमा हे युनला चुमा? खाउ ओलाक नुलोक ए? मेन मोकोचि वाःइया मयुङा⁵मोबेन मोकोचिओं कोङरिङओ चाउकला टोकनि तुकखामि लिसाकि माइसुङआ चुवाङयोवा मोकोचि धानि मुकखाङ लुवाकि खोनिनआ मोसाञा लोवानिन "आमनो छुक फेयानुम" मन्कि मोसाआ फेया का मोसाओ छुक बुखुवातनि ङे लिसाखारा। ⁶नङ हुड्या खाराकि फरिचिआ हाले हेरोद सुत्डा खोनिनओ उसादाकडा खोनिनञा खाइसाकिया युनला मेत्तोमने यिङाकि यायोक मचुवा।⁷मोडाङका देकमि आनओ खेनमाछाचिसुत्डा वात्तामलिपा खाछित्ताकि खारानिन। नङ गालिल डाङका मनाचिओ टोप्पो मुक्ला खोनिनओ देङसु मता, ⁸का यहुदियाङका, का यरूशलेम डाङका, का इदुमिआडाङका, का यर्दन हयाधेतदाङका, का टायर डाङका, का सायडनओ चुवाङयोवाङका मनाचिओ टोप्पो मुकला खोनिन्आ खासओ टोप्पो टोप्पो ओकचि मुवानिनओ याआङ लोवो एनाकि खोनिनओया मता।⁹मन्कि खोनिनआ आनओ खेनमाछाचिञा लोवानिन मुकलाओं सुन्दुमआ मुहिडा अकटेट चुप्पो चाःवासि अङकाओ निकि चुकडा छुमचुम लिने माआङलो मोकोचिआ मतिमताङवोङ। ¹⁰देनालो खोनिनआ बदधेकाञा नुसङ मेत्तानिनओ याआङा, उनतारि हे, सारि लिसाओ झाराआ छाङ खोनिनञा नोप्तोमने लोवाकि छुनमाछुन् मचुवाङा।¹¹नङ मुनटोङ असेङअत साकोङचिआ खोनिनञा मटोक्ताङा हाले खोनिनओ बुसित बोम्का लिसाकि उसओ यिङयाङसा मपातताङा खानानिन निनाममुओ सावाछा लिमानु।" ¹²नङ मोकोचिआ खोनिनञा पुक्तु मानमुविने यिङवो चाउक इङइवा खोनिनआ मोकोचिञा चुवानिन। /s देकमिआ हवापौ खेनमाछाचि छेनतानिनओ /s¹³नङ खोनिन भुरूडा वाङानिन का खोनिनआ राका मुवानिनओ उनलोञा बुत्तानिन, का मोकोचि खोनिनओया मता। ¹⁴नङ मोकोचि खोनिनओ ढायुकडा युङसि का मोकोचिञा रूमरङ मुसि छुतसि ¹⁵का मामाङसुखा खालाचि लातवो कोपरु छाङ मोकोचिञा लिने यिङाकि खोनिनआ हवापौपाङञा कावाङसाङ मुवानिन। ¹⁶तामिनतुप, शिमोन, खोसाओ नुङ पत्रुस युङसानिन।¹⁷नङ जब्दिओ सावाछा याकुब, का याकुबओ निछाक युहन्ना, का खोनिनआ मोकोचिञा वोअनर्गेस तामिनतुप कुलुङदिपाओ सावाछाचि लोवो नुङ युङसानिन। ¹⁸नङ अन्द्रियास, का फिलिप, का बर्थलोमै, का मत्ति, का थोमा, का अल्फयसओ सावाछा याकुब, का थेदियस, का शिमोन कनानी, ¹⁹का यहुदा इस्करयोति, खोक्कोआखोनिनञा लुलेनला छाङ मुवा। नङ खोनिन खिमहुड्डा खारानिन। /s देकमि धानि एमसुकोप /s²⁰नङ लादेङ मुक्ला झाराझुम लिसा, उन्तारि हे, खोनिनचिआ चामासेसि चासि छाङ तोकमा मा‌न्लि । ²¹मुनटोङ खोनिनओ रूमिपामिआ ओको मएना, मोबेन खोनिन्ञा खाङओछुङ मुमा मलोनतु देनादि खोनिनओ कोङरिङ छुककोङडा मातदङ लोनि खोकोचिआ मलोवाङा। ²²नङ यरूशलेम डाङका इनिताओ यङवानमिचिआ मयिङा, "मोको सुतडा बालजिबुल याआङ का मामाङसुखाओ हाङछेकुछा डाङका मोसाआ मामाङसुखाचि मलातलुक।"²³मेन खोनिनआ मोकोचिञा अहाङपाङओया मबुत्ता, का मोकोचिञा डोवाङलाचिडा यिङानिन "सुलावा आ सुलावाञा खाइसाकिया लातसि रूलुक् का ? ²⁴खाउङे हाङहोनओ हाङपोहाङडा यङछित्ला लिसा लो मोको हाङहोन पाङचङमा रूनिन् ²⁵खाउ ङे खिमओ छाङ हाङपोहाङडा यङछितला लिसा लो मोको खिम पाङचङसि रुवोनिन।²⁶खोनालो सुलावाआ सुलावाओ ङे उसादाकडा ठानठुक लिसाकि मानतोङवा मुवाओ याआङ लो मोको युङसि रूनिन् मेन मोसाओ वाइचोम लातलिवोङ। ²⁷साङआ छाङ सापसामि मनाओ खिमडा वाङाकि खोसाओ यामतोक ङाकमा रुनिन् मुनटोङ तारि मोकोआ सापसामि मनाञा बुसि छुमनिन्, का मोबेन ओन मोसाआ खोसाओ खिम ङाक्तुउने।²⁸अङका खानाचिञा नुच्चुङङे लोलुकङा, मनाओ सावाछाचिओ झारा हुमुकवा का मोकोचिओ निनामुत्नुङ, खाक्को मोकोचि मिनअतलाडा चुउने, नुनामलानुत मलिवोङ ²⁹मेन खोक्कोआ वाचोङ साकोङओ उसादाक मिनअत चुवोङ मोको देमखा छाङ नुनामलानुत लिवोनिन, मेन मोको सानलेप हुमुकओकओ खायोकमि दोक्याक। ³⁰देनालो खोनिनसुत्डा असेङअत साकोङ याआङ लोनि मोकोचि मलोवाङा।³¹मोबेन खोनिनओ मामा का निछाकचि मता, का हुड्याडे ठानठुक लिसाकि खोनिनञा बुतनि मछुत्ता। ³²मुकला खोनिनओ चुवाङयोवाडा युङनि युङसाओं याआङा, का मोकोचिआ खोनिनञा मयिङा, खाङाने, आमनो मामा, का आमनो निछाकचि खानानिनञा हुझ्या मलामयाङ। "³³खोनिनआ मोकोचिञा लायङ पुवाकि यिङानिन, अङमामा, अडनिछाचि साङ मए?" ³⁴नङ आनओ चुवाङयोवाडा युङकाबाचिञा खाङाकि खोनिनआ लोवानिन, खाङानुम, अङमामा का अहनिछाचि। ³⁵देनादि खोकोआ निनाममुओ राका काङलेन मुवोङ मोकोङे अङनिछा, अङनिछामा का अङमामा मए।"

4¹खोनिनआ लादेङ वाततामओ वाचुकखाडा सालामयङ पुसि पुङसानिन। नङ उन टोप्पो मुकला झाराझुम लिसा, हे खोनिन् चाःवासिडा वाङाकि वात्तामडा ङे युङानिन, का झाराङे मुकला लो वात्तामओ वाचुकखाडा ङे याआङा। ²मन्कि खोनिनआ मोकोचिञा डोयङलाडा बद्धेका दुम चिनलुवानिन, का आन्‌ओ सालामयङडा मोकोचिञा यिङानिन।³एनानुम, खाङानुम, यामाचा तेममि तेममाञा लोन्तु। ⁴नङ उसओ लिसा, तेमहिडा दिच यामाचा लामलिपा मडोटटा, का माइसेचियाआ ताकि मचोलेवा। ⁵दिच धिलुङबाखाडा मडोटटा, मोडा बदधे बाखा मानुनुङा, का बाखाओ गङयु मानलिहिडा मोको चकनिङे थुवा।⁶मुनटोङ नाम लोनता, मोको छोपता का मोसाओ सुङभेन मानलिहिडा सिप्तालेवा। ⁷खाउङे लो सेन्मिचिओ हुपडा मडोटटा, मेन सेन्मिचि पोयाकि ता का मोसाञा साकनाननि मपुवा, का मोसाआ सिवा मानपु।⁸खाउ ङे नुलोक बाखाडा मडोट्टा का थुयाङसा पोन्याङसा खाराकि सुकि फसमि, का तुकि फसमि का भुङकि फसमि सिवा मपुवा। ⁹मन्कि खोनिनआ लोवानिन ,'खोक्कोओ नाबाक याआङ मोसाआ एनने।'¹⁰मुनटोङ खोनिन इकआङे लिसानिन, मोबेन हवापौ पाङ अकनिया चुवाङयोवा लिसाओ निचिआ खोनिन सुतडा ओको छापछोङडा मसेना। ¹¹नङ खोनिनआ मोकोचिञा यिङानिन, निनाममुओ हाङहोनओ तुपतुपला खानाचिञा पुवानचिनओ याआङ मेन हुड्याओचिञा लो झारा दुम डोयङलाचिडा मचुविन्। ¹²हे मोकोचिआ खाङसि ना खाङने, मेन मानटोकने। का एनसि ना एनने, मेन मानतुपने ,माआङलो ना मोकोचि लादेङ लावोङ का मोचिञा नुनामलानुत लिवोङ।"¹³नङ खोनिनआ मोकोचिञा लोवानिन, दि खानाचिआ ओको डोयङला ततुपनिन् ? मोबेन खाइसाकिया झारा डोयङलाचि ततुपतुङने ना? ¹⁴यामाचा तेममिआ इदुम तेमलुक। ¹⁵लामलिपडा वेतत्तानचिनओ इदुम ओको ङे मए, मुनटोङ मोकोचिआ मएन, मोबेन हाले सुलावा बान का मोकोचिडा वेततानचिनओ इदुम खाटनिलेयाक।¹⁶नङ मुइसाकिया धिलुङबाखाडा वेततानचिनओ ओकोङे मए, खोक्कोआ मुनटोङ इदुम एन हाले छेमनसुतडा मोबेन ङे मोको देङहुत। ¹⁷मोसाओ अहाङपाङडा सुङभेन नुनिन का मोचि दिचवाइ पाङचङ ,मेन मुनटोङ इदुमओ सुन्दुम लारूम हे ठिनसु तानिडोट, मोबेन हाले ढुङला मचा। निचि लो मोचि मए,¹⁸खाकको सेन्मिचिओ हुपडा वेततानचिनओ मलि, ओकोचि मोचि ङे मए, खोक्कोआ एनाओ मलि ¹⁹नङ धाधारङओ मिनराक का खाबालुङको राका का निचि यामतोकओ रापचा हुड्डा वाङनि इदुमञा साकनाननि मपु, का मोको मानसिवो लिनिलेयाक। ²⁰खान्नो थाम्पुकडा वेततानचिनओचि ओचि मए, उसओआ इदुम मएन का देङहत्ला मचु का सुकि फसमि का तुकि फसमि का भुङकि फसमि सिवा मपु। /s यामाचा का ओपकि डाङका सानयङ /s²¹मन्कि खोनिन्आ मोकोचिञा लोवानिन,' दि ओपकि पादुकओ ह्यिुनि हे इमखाओ ह्युनी युङसि यिङाकि बाट? दि ओपकियुङखाडा युङसि लोवाकि माआङ? ²²छुप्ताकि छोङ मानलिवो का कोपनिडा युङसाकि मुलुम्पुक मानलिवो दिच छाङ माननुङ। ²³खोनालो खाउ ङे मनाओ एनवो नाबाक याआङ लो मोसाआ एनने।'²⁴नङ खोनिनआ मोकोचिञा लोवानिन, 'खानाचि खाक्को तएन, मोसाडा स्वमलेन पुवानुम, देनादि खाक्को हाकलाआ खानाचि भेपलुक मोको ङे हाक्लाआ खानाचिञा छाङ भेपवोङ नङ खानाचिओ निकि बढ्धे पुवोन। ²⁵देनालो खोक्को ‌सुतडा याआङ मोसाञा पुवोन नङ खोक्को सुतडा मातदङ मोसासुतडा लिसाओछाङ मोसाङका ङाकवोन् ।'²⁶नङ खोनिनआ लोवानिन, 'निनाममुओ हा‌ङहोन उसओ याआङ, हे खाउङे अकपाङ मनाआ थामपुकडा यामाचा तेमने ²⁷नङ खाखुत लेन इमने का पुलोनने का यामचा लो लिमलातने का पोनने, मेन मोको खाइसाकिया लिसाओ ए मोको मोसाआ लेनिन् । ²⁸थामपुक अहाङपाङेआ सिवा सिमेत्, बुसि सुङताङ मोडाङका वाचुङखुड मन्कि वाचुङखुङडा भेप्लो चासुम। ²⁹मेन मुनटोङ चासुम चारू मोबेन हाले मोसाआ हेकमु याङलुक, देनालो चामुसिवाओ मुयाकला ताबानाओ नुयाक।'³⁰मनकि खोनिनआ लोवानिन, 'निनाममुओ हाङहोनओ हाकङहा आन्‌कान खाइसाकिया मुइनने? नङ खाउ डोयङलाडा मोको युङसुमने? ³¹मोको ना होमसिओ लुङवा इसा याआङ, खाको मुन्‌टोङ थामपुकडा तेम्तिन मोबेन हेनखामाडा झारा यामाचाचिडा चुपपो मलिसा ³²मेनछाङ मुनटोङ मोको लित्तिन मोडाङका मोपोन का झारा लिमपुकचि चोङलो टोप्पो नु, का बदधे बदधे खेकचि लिम्लु, उसओ हे नामकदुओ माइसेचियाआ मोकोओ लाछामियु याक्‌मा मरू।'³³नङ मोकोचिआ एनसि रुइन्लोक खोनिनआ उसओ ङे बदधे डोयङलाचि लोवाकि मोकोचिञा इदुम एनमेत्तानिन। ³⁴नङ मायाक डोयङला खोनिन मोकोचि सुत्डा चेम्पा मानलि मेन आनओ दुक्छा खेनमाछाचिञा खोनिनआ कोपनिडा झारा तुपयङ होङनिपुवानिन ।³⁵मोलेन नामपुक मलिसा नेतलोक खोनिनआ मोकोचिञा लोवानिन ,'बानानुम आन्कान ह्याघेतलिप्पा खारिनने।' ³⁶नङ मुकलाञा छिराकि देतनि खोनिन चा:वासिडा लिमानुवाङा, खोवातनि मोकोचिआ खोनिनआ अकनिनङे मखाटटु, नङ निचि चा:वासिचि छाङ खोनिनओ अकनिनङे मयाआङा। ³⁷मन्कि मोडा टोप्पो कुहुक ता का वारेपचि चा:वासिडा वान्ठेनमा मलुवा, उनतारि हे, चाःवासिडा चाःवा भेपमा पुङसा।³⁸खोनिन अहाङपाङ लो देङसिलिप्पा अक्टेट टाङयुङडा टाङ युङसाकि इमनियुङसानिनओ याआङा, का मोकोचिआ खोनिनञा उसओ यिङयाङसा मपुलोन्टा, "रुमु, आन्‌कान युन्ला लिमा पाक्तोम् लोवो दि खानाञा स्वम माननुङ?" ³⁹मोबेन खोनिन पुलोन्तानिन, का कुहुकञा हेनतानिन, का साजुमाञा लोवानिन वाइःया लुए, सावेङला लिसानुम। मन्कि कुहुक नान्ता का टोप्पो सेन्‌याङनिला लिसा।⁴⁰नङ् खोनिनआ मोकोचिञा लोवानिन, 'खानाचि देना मुइसाकिया कुमाकासाङ अलि? खानाचिडा फाननु मकतुम मात्दङ? " ⁴¹नङ मोकोचि धिकुमाकाराकि हाङपोहाङडा मयिङा". खोनिन साङ मए? कुहुक का साजुमाआ खोनिनओ इङइवा मकाङ।"

5¹मन्कि खोनिनचि वात्तामओ हयाधेतलिप्पा गिरासिनीओ सिङवाङडा बानानिन। ²नङ खोनिन चाःवासिडाङका लोनमुसा सुचिनखुम डाङका असेङअत साकोङ वाङाओ अकपाङ मनाआ खोनिनआ धिरू³खोक्कोओ याकखिम एपमाचिडा ङे लिसाङा का खाउ ङे मनाआ मोसाञा चोकछुमचिआ छाङ छुम्मा रूवाओ मान्नुङा । ⁴देनादि मोको बदघेकादु लाङछुमबि का चोक्छुमचिआ हेत्तानचिनओ याआङा का मोसाआ चोकछुमचिञा फङला फङला मेत्नि लाङछुम्बिचिञा छाङ दाङला दाङला मेत्निपुवाओ याआङा, का खाउङे मनाआ छाङ मोसाञा छुककोङडा युङसि रुवाओ माननुङा।⁵मोको खाखुत का लेन् निम्मा एपमाचिडा नङ हेमसुवाचिडा पातयाङसा अहाङपाङआ हाङपाङञा लुङटाकआ फाक्याङसा बियाङा। ⁶नङ मुनयोकदा मोकोआ देकमिञा माङखाङका टोक्ता, हाले लोटयाङसा ता, का खोनिनञा सायालोङ मुवा।⁷नङ धिडोसाङलाआ पाराकि यिङा, "धिवाङ हाएसिओ सावाछा देकमि अङकाओ खानानिन सुत्डा दि चाखाम? अङका निनाममुडा सिस्वदुम चोकि खानानिनञा ताछुकफेङला मुङा, छुयु मान्पुदाङने।" ⁸देनादि खोनिनआ मोसाञा लोवानिनओ याआङा, "असेङअत साकोङ, ओको मनाङका लोन्नि बाने।"⁹मन्कि खोनिनआ मोसाञा सेनानिन, "आमनुङ दि ए?" मोसाआ खोनिनञा यिङा, "अङनुङ ना मुकतला ए, देनादि आनकान बदधे याइनका।" ¹⁰नङ मोसाआ खोनिन सुत्डा मोकोचिञा सिङवाङ लातखाला मानलिने लोनि थिकनिन ताछुकफेङ मुवा।¹¹हान मोडा हेमसुवाओ चुकडा वाकचिओ बदघेका रुहुप चाननियुङसाओं याआङा। ¹²नङ मोकोचिआ उसओ लोनि ताछुकफेङ मचुवा, "आनकानञा वाकचिओया खातसि पुवाने, का आनकान मोचि हुड्डा वाङोम्का।" ¹³मोबेन खोनिनआ मोकोचिञा देङहुतवारि पुवानिन का असेङअत साकोङचि हुझ्या लोन्ताकि बाकचि हुडडा मवाङा, मन्कि हवाहिभुङ मेतलो रुहुप् हेमसुवा डाङका साजुमालिप्पा टोम्तुकि मखारा, का मोकोचि साजुमाडा साकमासोन्तुकि सुवा।¹⁴हान मोकोचिञा चानवोचि मफुङसा का तालावाङ का टेन टेनडा युङखान मपुवा, का दि लिसाओ ए मोको खाङसि मोकोचि मता। ¹⁵मोवाइडा मोकोचि देकमिओया मता का मो खाला वाङाओ मनाञा नुलोककोङओ लिसाकि टिटखान छाङ होङाकि युङनियुङसाओ मटोक्ता, का मोकोचि मकुमाकारा।¹⁶नङ खोक्कोआ ओको टोक्तुओ याआङा मोकोचिआ खालाचि वाङाओ मनाञा का बाकचिओ छापछोङडा दि लिसाओ याआङा मोको मोकोचिञा लोनि मपुवा। ¹⁷मन्कि मोकोआ खोनिनञा मोकोचिओ हायुङडाङका खारालेवाने लोनि ताछुकफेङ मुसि मलुवा।¹⁸नङ खोनिन चाःवासिडा वाङसिलुहिडा मोको खाला वाङाओ मना खोनिनओ ङे अकनिन्डा युङसिओ निकि ताछुकफेङ मुवा, ¹⁹मेन खोनिन्आ मोसाञा देङहुतसु पुमा मानलि। मेन मोसाञा लोवानिन, 'खाना आनओ खिमडा खाराकि आमयावाचिञा एन्‌मेत्नि पुए ।हे घिवाङ हाएसिआ खानाओ निकि देम् बदधेका ओक मुवा, का खानाञा पुनोत् खाङमेत्ता। ²⁰नङ मोको बिनिलेवा, का देकमिआ मोसाओ निकि देम टोप्पो ओक मुनिपुवानिन, मोको डिकापोलिसओ झारालिप्पा रूमरङ मुसिलुवा का झारा मनाचि नाकाकवाडा मडोट्टा। /s याइरसओ मेछाछा /s²¹मन्कि मुन्‌टोङ देकमि लादेङ चाः वासिडा हयाधेतलिप्पा खारानिन, मोबेन अक्टेट टोप्पो मुकला खोनिनओया झाराझुम मलिसा। खोनिन वातताम्‌ओ वाचु‌कखाडा लिमानुवाङा। ²²नङ यायोकखिमओ हाङछाचिखपडा याइरस नुङ लिसाओ अकपाङ खोनिनओया मता, का खोनिनञा टोक्तुकि खोनिननओ लाङडा बोम्का मडोट्टा। ²³नङ उसओ यिङाकि धिथिकनिन् तालुकफेङ मचुवा, अङकाओ चुप्पो मेछाछा सुसिलुवाओ याआङ, बानाकि मोधानि खानानिनओ छुक युङनिपुवाने, का मोको हङने का लेनचाने। ²⁴नङ खोनिन मोचिसुत्डा खारानिन, का अकटेट टोप्पो मुकला खोनिनओ देङसु मता, का खोनिनञा छुनमाछुन् छाङ लिसा ।²⁵नङ हवापौ दोङडाङका हुवा पेतवो सारि लिसाओ अकपाङ मारिछा, ²⁶खोकोआ बदधका नुखामिचिओ छुकडाङका छुयु तोकताओ याआङा, का हाङपाङसुत्डा लिसाओ झारा खाबालुङ याङयाङला मुवाकि छाङ नुसङ मानलिसाकि हेनाक फाननु उवाक यामामुडा डोटटुओ याआङा, ²⁷देकमिओ छापछोङडा दुमचि एनाकि मुकलाओ देङसुलिप्पाङका ताकि खोनिनओ सङनान् नोप्तु।²⁸देनादि मोसाआ यिङाओ याआङा, अङकाआ खोनिनओ सङनान ओन् नोपतुङलो छाङ अङका नुसङ लिवोङा। ²⁹नङ मोबेन ङे मोसाओ हुवा पेतवो छेक्का लिनिलेवा का आनओ साएमपोकडा सारि नुसङ लिसाओ मिनला तोक्तालेवा।³⁰नङ हाङपाङडाङका साएराङ हुइया लोन्ताओ चकनि देकमिआ सिनला तोक्तुकि मुकलाडा देङसुलिप्पा लासाकि यिङानिन, "साङआ अङटिट नोप्तु?" ³¹खोनिनओ खेनमाछाचिआ खोनिनञा मयिङा, 'मुकलाआ छुनमाछुन मुवाओ ना खानानिनआ टोकतानिनओ ङे याआङ, नङ खानानिन यिङमा नु साङआ नोप्ताङ? ³²नङ खोक्कोआ खाक्को मचुवा ,मोसाञा खाङसिञा खोनिनआ रिनचोलिप्पा अमुक खाचोपतानिन।³³मेन् खाक्को मोसाञा लिसाओ याआङा मोको सिनला तोक्तुकि मोको मारिछा कुमाआ धुन्याङसा ताकि बोम्का डोरु, का खोनिनञा झारा नुच्चुङ दुम लोनिपुवा। ³⁴मन्कि खोनिनआ मोसाञा यिङानिन मेछाछा, आमनो मकतुमआ खानाञा डेकताओ याआङ। नुसानसुत्डा खारानुम, आमसारि नुसङ लिनिखात्ने।³⁵खोनिन चेपमा लियाङसा याआङा, यायोकखिमओ हाङछाओया डाङका मनाचि बानाकि मयिङा, "खानाओ मेछाछा सुवा ! रूमुञा हान फाननु छुयु देना पुमा नु?"³⁶मेन मोकोचिआ मुनियुङसाओ दुम देकमिआ मानएन ओटनि मुवाकि यायोकखिमओ हाङछाञा यिङानिन, "मानकुमाकातदानुम, मकतुम ओन मुवानुम।" ³⁷नङ खोनिनआ पत्रुस, याकुब नङ याकुबओ निछाक युहन्नाञा लेटका निचि साङञा छाङ खोनिनओ सुत्डा बानसि देङहुत्‌ला पुमामान्लि । ³⁸नङ खोनिनचि यायोक खिमओ हाङछाओ खिमडा बानानिन का खोनिनआ बदधेका डुमलुङला मुवो, खापवो का धितुकहुयु मुवोचिञा टोकतानिन।³⁹मन्कि हुड्डा वाङाकि खोनिनआ मोकोचिञा यिङानिन, "खानाचि देना डुमलुङला अमु, का अखाप? कामेत्छा सुवाओ मातदङ मेन इमनियुङसाओ याआङ।" ⁴⁰नङ मोकचिआ खोनिनधानि इयावारि मचुवा। मेन खोनिनआ झाराञा सोत्ताकि कामेन्छाओ पापा नङ मामा, का खोनिन् सुत्डा लिवोचिञा अकनिनडा टारूकि कामेत्छा इमसाओ खामहुडडा खारानिन।⁴¹मन्कि कामेत्छाओ छूक लाप्तुकि खोनिनआ मोसाञा यिङानिन, "तलिता कुमि", खाकको तुपयङ ए ,'साएङमि अङका खानाञा यिङडा पुलोन्ते !' ⁴²नङ मोबेनङे मोको छुटुक्का पोक्ता का बिकोन्‌ला मुमा-पुङसा। देनादि मोको ह्वापौ दोङओ याआङा। नङ मोकोचि मिन्तालुक धिस्वमराक मडोट्टा । ⁴³नङ खोनिनआ ओकोचिञा ओको साङआ छाङ सिनला मानतोक्तने लोवो चाउक इङइवा पुवानिन। नङ मोसाञा दिच चामा पुसि लोनि यिङानिन।

6¹मोडाङका लोन्तुकि खोनिन आनओङे सिङवाङडा बानानिन। नङ खोनिनओ खेनमाछाचि खोनिनओ देङसि मवाङा। ²नङ मुनटोङ सावाएमलेनओ लेन ता, खोनिनआ यायोकखिमडा सालामयङ पुसि पुङसानिन। नङ काएनवाचि बद्धेका पाङ उसओ यिङयाङसा स्वमराक मडोट्टा ओचि मनाञा ओचि दुमचि खाडाङका ता? नङ ओको मनाञा पुवानचिनओ ओको ताया दि मए? अङछुकडाङका लिसाओ वक दि ए? ³दि ओचि मरियमओ सावाछा याकुब, योसेस, यहुदा का शिमोनओ बुबु रेककाबा माआङ? दि ओचिओ निछामाचि ओया आनकानका सुत्डा माननुङ का? नङ मोकोचि खोनिन सुत्डा मह्रुकता।⁴मोबेन देकमिआ मोकोचिञा यिङानिन, 'यामाङचिञा आनओ लुङवाङ का आनओ सायाबुङचिओ खपडा का चिखिमडा लेट्‌का हाउसो खातनिङे उत्सानुङवा नुनिन।' ⁵खोनिनआ मोडा खाउङे खाउङे तुक्काबाधानि आनओ छुक युङसाकि मोकोचिञा नुसङ मेत्मा लेट्‌का निचि साएराङओ ओक् मुसि रूमा मानलि। ⁶नङ मोकोचिओ योकोममिनआ मुहिडा खोनिन स्वमराक डोरानिन, का खोनिन टेन्डा चिन्याङसा कोनतानिन ।⁷मन्कि खोनिनआ अकहवापाङञा हाङपाङओया वुत्तानिन का मोकोचिञा हवा हवापाङ मुनि छुतमा लुवानिन, का मोकोचिञा असेङअत साकोङ धानि कोपरू पुवानिन। ⁸नङ लामओ निकि ओन अकटेट टोमफुक लेटका दिच छाङ मानतात्‌मा लोवो चाउक इङइवा पुवानिन मानना पेम्पाक, मान बेखा, मानमा बुकरिमडा फेक ⁹मेन लाङसुप हुममा नङ हवाटेट लोकछुम मान्हुमदामा लोनि खोनिनआ यिङानिन।¹⁰मन्कि खोनिनआ मोकोचिञा यिङानिन, 'मुनटोङ खाउङे खिमडा अवाङउने मुनटोङतारि मोखामडाङका अलोननिन मोबेनतारि मोडाङे युङानुम। ¹¹नङ खाक्को खाक्को खारोङडा खानाचिञा सानुङवा मानलिसुने, का मोकोचिआ खानाचिओ इदुम मएननिन, मोखामडाङका खानाचि लोन्हिडा मोकोचिञा सिनलेखाओ निकि आनओ लाङफेमओ थुलि रुङनिपुमा।"¹²हाले मोकोचि लोनताकि खातनि मनाचिञा लाछङमिन मचुने लोवो रूमरङ मचुवा। ¹³मन्कि मोकोचिआ बदधे खालासाकोङचि मलात्ता, का बद्धेका तुक्काबाचिञा आः वा सोपनिपुवाकि नुसङ ममेत।¹⁴हान हेरोद हेनकोपहाङआ खोनिनओ मुनुम मएना, देनादि खोनिनओ नुङ रुङामि लिसाओ याआङा। नङ मोचिआ मयिङा, हङसानवा पुवि युहन्ना सुवाओ डाङका खोङयाछा, का ओङे सुन्दुम ओचि साएराङचिआ खोसाडा ओक चुलुक। ¹⁵मेन निचिआ मयिङा ,"ओचि ना एलिया मए।" नङ निचिआ मयिङा, ओचि ना खाउङे यामाङखपओ अकपाङ यामाङ मए।¹⁶मेन मुनटोङ हेरोदआ ओको मएना, मोबेन मोचिआ उसओ मयिङा, युहन्ना खोसाओ टाङ अङकाआ हेकमेत्तुङ मोकोङे खोङयाछा। ¹⁷देनालो हेरोद अहाङपाङआ आनओ निछाक फिलिपओ तायामा हेरोदियासओ निकि टाङकारुकचि छुत्ताकि युहन्नाञा लापतुकि मोचिञा छेकखिम्‌डा वाक्तुओ याआङा। देनालो खोचिआ मोचिञा याकाम्‌मु मुवाओं याआङा।¹⁸नङ युहन्नाआ हेरोदञा उसओ यिङाओ मयाआङा, 'आन्‌ओ निछाओ तायामाञा युङमा खानानिनञा नुलोक माननुङ। ' ¹⁹हेरोदियासआ मोचिदु माइसुङ युङसाओ याआङा, का मोचिञा सेतसि लामयाङसा याआङा, मेन रूवाओ माननुङा। ²⁰देनादि युहन्नाञा सामयोकवा का वाचोङ मना लोनि चामलोक्तुकि हेरोद मोचिसुत्डा कुमाकात्ताङा का मोचिञा रात्तुकि युङसाओ मयाआङा, नङ मोचिओ इदुम एनहिडा खोचि बदधेका तुकखामि लिसाङा, मेनछाङ वाया सुत्डा एनाङा।²¹हान लोइसा सुकधिइ मोवाइडा बाना, मुनटोङ हेरोदआ आनओ पुकलेनओ छेमालोकडा आनओ टोप्पो खारूखाहाङछाचि, मुकतलाटाङमिचि, गालिलओ अधुवा अधुवा मनाओ निकि चाचायु मपुवा, ²²का मुनटोङ हेरोदियासओ आनओ मेछाछा हुड्डा ताकि लाकलुवा मोबेन् मोसाआ हेरोद नङ मोडा अकनिनडा चाचायुडा युङकाबा झाराञा वाया मेत्तु का हाङआ मोको मेछाछाञा मयिङा, 'खानाञा नुवानुसाओ यामतोक अङकाकनिन दोरानुम का अङका खानाञा पुवोङा।'²³नङ मोचिआ सिस्वदुम चोकि मोसाञा मयिङा, खाकको खाना अङकासुतडा तदोत् अङकाओ दुकेवा हाङहोन छाङ अङका खानाञा पुवोङा।' ²⁴मन्कि मोसाआ हुड्या लोन्तुकि आनओ मामाञा मयिङा, "अङका दि दोरूम?" मोचिआ मयिङा, "हङसानवा पुमि युहन्नाओ टाङ!" ²⁵मोको मोबेन हालिफुलिकनिन हुड्डा हाङओया खाराकि उसओ यिङाकि दोरा, "खानानिनआ हानदे अङकाञा हङसानवा पुमि युहन्नाओ टाङ चाखुङडा पुवाने, लोवो अङका राकामुङा।”²⁶नङ हाङ घितुकखामि मलिसा, मेन मोचिआ आनओ सिस्वदुम का अकनिन्डा चायायुडा युङकाबाचिओ निकि मोसाञा देङहुतमा राका मानमु। ²⁷मन्कि हाङआ हाले आनओ रात्काबाओ अकपाङ टाङकारूकञा छुत्ताकि युहनाओ टाङ बाटवो इङइवा मपुवा। नङ मोसाआ छेकखिमडा खाराकि मोचिओ टाङ हेक्ता ²⁸नङ मोचिओ टाङ चाखुङडा बाटटुकि मेछाछाञा पुवा, नङ मेछाछाआ मोको आनओ मामाञा पुवा। ²⁹मोचिओ खेनमाछाचिआ मुनटोङ ओको दुम मएना मोबेन मोकोचि ताकि मोचिओ सुपोकवा थेनतुकि सुचिन्खुम खाटुकि मयुङसा।³⁰मन्कि बुलाम्बु खेनमाछाचि देकमिओया झाराझुम मलिसा, नङ मोकोचिआ दि दि मचुवा, का मचिनलुवा मोचि झारा खोनिनञा चेपयङ मचुवा। ³¹नङ खोनिनआ मोकोचिञा यिङानिन, खानाचि आमहाङपाङे छाङ छुटुक्का खोयाङखामडा बानानुम का दिच सावाएमतानुम। देनादि मोडा तावो खात्‌वोचि बदधेका मयाआङा का खोनिनञा चासितारिओ फुसलिवा माननुङा। ³²नङ खोनिनचि चाःवासिडा छुटुक्का अकटेट खोयाङखाम्‌डा खारानिन।³³हान मनाचिआ खोनिनचि खातनियुङसाओ मटोक्तु का बदधेकाआ मसिन्ता का झारा तालावाङ डाङका लाङलाम लोकतुकि मोडा मखारा, का खोनिनञा मलिपता। ³⁴नङ खोनिन लोनहिडा अकटेट टोप्पो मुकला टोक्तानिन का मोकोचिधानि पुनोत्तानिन, देनादि मोकोचि चानकाबा मानलिसाओ सामुवा ओटनि मयाआङा का खोनिनआ मोकोचिञा बदधेका दुमओ सालामयङ पुसिलुवानिन । /s देकमि का ङाहिभुङ मना /s³⁵मन्कि मुनटोङ लेन उनभेप्लो छित्दानि चिया, मोबेन खोनिनओ खेनमाछाचिआ खोनिन्ओया ताकि मयिङा, "ओको खारोङ अखोयाक याआङ, का हान लेन उनभेप्लो लिमनिचिया। ³⁶मोकोचिञा खायोङ पुवाने, का माकोचिआ ओहयानि मोहयानिओ सोहोन का टेनचिलिप्पा खाराकि आनओ निकि दिच चामासेसि मखितने।³⁷मेन खोनिनआ मोकोचिञा यिङानिन, "खानाचिआ मोकोचिञा चासि पुवानुम।" मेन मोकोचिआ खोनिनञा मयिङा, "दि आनकान खाराकि हवाभुङ दिनार मेतलोओ पेमपाक खित्ताकि ओकोचिञा चासि पुम्?" ³⁸नङ खोनिनआ मोकोचिञा यिङानिन, खानाचि सुत्डा देमकाटेट् पेम्पाक मयाआङ, खाराकि खाङानुम् ना। नङ सिनला मलिसा नेतलोक मोकोचिआ मयिङा, "ङा पेम्पाक का हवा ङा।³⁹मनकि खोनिनआ मोकोचिञा लकलकवा सित्चाडा रूहुप रुहुप मुनि युङसिञा इङइवा चुवानिन। ⁴⁰मोकोचि भुङ भुङ नङ ङाकि-ङाकिओ पेलेक्लेकवाडा तोङाकि मयुङसा। ⁴¹खोनिनआ मोचि ङा पेम्पाक का हवा ङा लोक्तुकि निनामखिमलिप्पा खाङनि आलाङने पुवानिन का मोचि पेम्पाकचि ओराकि खेनमाछाचिञा, 'मोकोचिओ बुसित बुसित युङनि मपुने यिङाकि पुवानिन का मोको हवा ङा छाङ खोनिनआ झाराञा हाकनि पुवानिन।⁴²नङ झाराआ मचो का पाकचा मलिसा। ⁴³नङः मोकोचिआ पेम्पाक का ङाचिओ दाङलाचि हवापौ वाइखिप भेप्लो मकोप्ता। ⁴⁴पेम्पाक चावो ङाहिभुङ पाचुपचि मयाआङा।⁴⁵मन्कि खोनिनआ हालेङे आनओ खेनमाछाचिञा चा:वासिडा वाङसि का ह्यानि वेत्सैदाडा खोनिन चोङलो बुसि खातसिञा मोमेतानिन, का मोबेनतारि खोनिनआ लो मुकलाञा खायोङ पुवानिन। ⁴⁶नङ मोकोचिसुतडा खायोङ मलिसा नेतलोक खोनिन लो भुरुडा सोमफोङमाञा खारानिन। ⁴⁷नामपुक ताहिडा चा:वासि साजुमाओ हुपडा याआङा, का खोनिन लो सकलुकपाङे हुड्याडा लिमानुवाङा।⁴⁸नङ खेनमाछाचिञा लेपमाञा छुयुकोप लिनि युङसाओ खाङाकि, देनालो कुहुक मोकोचिओ थाङपाडा याआङा, खाखुतओ लुकालेनकलिपा खोनिन मोकोचिओया साजुमाधानि बियाङसा बानानिन का मोकोचिञा लिमतुकि खात्‌वो राका मुवानिन। ⁴⁹मेन मुन्टोड मोकोचिआ खोनिनञा साजुमाडा बिनियुङसानिनओ मटोक्ता, मोबेन खाला ए लोनि चामलोकतुकि मपारा । ⁵⁰देनादि झाराआ खोनिनञा टोक्तुकि कोङचोनसाङ लिसा, मेन खोनिन हाले मोकोचि सुत्डा चेवाकि मोकोचिञा लोवानिन, स्वमसावा चुवानुम, अङका ङे एव, मानकुमाकातदानुम।⁵¹मन्कि खोनिन मोकोचिओया चाःवासिहुड्डा वाङानिन का कुहुक नाननिलेवा। नङ मोकोचि धिस्वमराक्क मलिसा। ⁵²देनादि मोकोचिआ पेम्पाकओ छापछोङओ दुम मानमित, मेन मोकोचिओ कोङ चाउक लिसाओ याआङा।⁵³मन्कि ओह्यातनि मता नेत्लोक खोनिनचि गनेसरेतओ लुङवाङडा बानानिन, का मोकोचिआ चा :वासि वाचुक्खाडा मपाक्ता। ⁵⁴नङ मुनटोङ खोनिनचि चाःवासि डाङका लोनतानिन, मोबेन हालेङे मनाचिआ खोनिनञा सिननि मलेवा। ⁵⁵का चुवाङयोवाओ मोको सापतेनभेप्लो लोराकि खाडा खाडा खोनिन खातमा लिसाङा लोवो मएनाङा मोडा मोडा तुकयुङवाञा इमखा इमखाडाङे खुनत्ताकि खा‌टमा पुङसा।⁵⁶मन्कि टेनचिडा, हे इन्खावाङचिडा, हे साप्तेनचिडा, खाडा खाडा खोनिन् वाङमा लिसाङा, मोकोचिआ तुकयुङवाचिञा इनखावाङ इनखावाङडा मयुङसाङा का खोनिनओ सङनानओ चुक्टा ओन नोपसि पुइनने लोनि मोकोचिआ खोनिनञा ताछुकफेङ मचुवाङा, का मेतलोआ खोनिनञा मनोप्ता मोकोचि झारा नुसङ मलिसाङा।

7¹फरिसि का यरूशलेमडाङका ताओ खाउङे खाउङे कायङवानचि खोनिनओया झाराझुम मलिसा²का खोनिनओ खेनमााछाचिहुपडा खाउङे खाउङेआ चेपपा, लामिनतुप मानवासुवाओ छुकआ पेम्पाक चोओ मटोक्ता। ³देनादि फरिसि का झारा यहुदिचि थाङमुथाङ ओनसामि खान्नोकनिन छुक मानवासुदोनि मचानिन। ⁴नङ इनखावाङ डाङका मता नेतलोक मानवाचाकदोनि मोकोचि मचानिन् । मोकोचिआ काङमायाक उसओ दुमचि बदधेका मयाआङ, तामिनतुप कानचुरोचि, का भगुनाचि, का साङलाछुपवा खुङखेनचि ,पुनवो झाराक।⁵मोबेन फरिसि का यहुदिचिआ खोनिनञा मसेना, खानानिनओ खेनमाछाचि देना थाङमुथाङडा मबिनिन्, मेन असेङअत छुकआ पेम्पाक मचा ?⁶खोनिनआ मोकोचिञा यिङानिन, चाकरोङच्यो यसैयाआ खानाचिओ छापछोङडा नुलोकनिन मायुङछामसु मचुवा ओटनि छापतानचिनओ याआङ- ⁷मोकोचि सित्लामडा अङकाओ रेप मचुलुक, देनालो मनाचिओ रिदुम पादुमञा साम्योक नुमितलाम मुमेत्नि सानयङ मपु।'⁸खानाचि निनाममुओ इङइवाञा छिराकि मनाचिओ थापसङञा अकाङ। ⁹नङ खोनिनआ मोकोचिञा यिङानिन, खानाचि आनओ रिदुम काङमाञा देम नेकताकनिन निनाममुओ इङइवाञा थेरेमनि अपु। ¹⁰देनालो वाछाप्पाआ लोवाओ मयाआङ,' आनओ पापा का मामाञा सानुवा मुवानुम, नङ खोकोआ पापा मामा उवाक दुम चुलुक, मोसाञा सेरिनने।'¹¹मेन खानाचि लो अयिङ "मनाआ मान पापा- मामाञा अङका डाङका दुकनुवा लिवो हेनखुवा निनाममुञा पुवानचिन लो ¹²खानाचिआ मोसाञा मोसाओ पापा मामाओ निकि लादेङ दिच छाङ मुमा तपुनिन्। ¹³खानाचिआ काङाओ रिटुम निनाममुओ इदुम थेरेम्ताकि उसओ बदधेका ओकचि खानाचि अचुलुक।¹⁴नङ खोनिनआ मुकलाञा लादेङ हाङपाङओया बुत्ताकि मोकोचिञा यिङानिन, खानाचि झाराआ अङदुम एनानुम का तुप्तानुम। ¹⁵मनाडा उसओ खाउङे याक्क मात्दङ खाकोआ हुद्दा वाङाकि मनाञा असेङअत मेतमारू, मेन मनाओ हुट्टा डाङका हुइया तावो दुमचिआ ङे.ममाञा असेङअत मेत्वो मलि। ¹⁶खोक्कोओ एनवो नाबाक याआङ, मोसाआ एनने।" १७ मन्कि मुकलाडाङका लोन्टाकि खिमहुडडा मवाङा नेतलोक खोनिनओ खेनमाछाचिञा खोनिनआ उसओ डोयङलाओ छापछोङडा मसेना।¹⁷देनालो हेरोद अहाङपाङआ आनओ निछाक फिलिपओ तायामा हेरोदियासओ निकि टाङकारुकचि छुत्ताकि युहन्नाञा लापतुकि मोचिञा छेकखिम्‌डा वाक्तुओ याआङा। देनालो खोचिआ मोचिञा याकाम्‌मु मुवाओं याआङा। ¹⁸नङ युहन्नाआ हेरोदञा उसओ यिङाओ मयाआङा, 'आन्‌ओ निछाओ तायामाञा युङमा खानानिनञा नुलोक माननुङ। ' ¹⁹मोचिदु माइसुङ युङसाओ याआङा, का मोचिञा सेतसि लामयाङसा याआङा, मेन रूवाओ माननुङा।²⁰देनादि युहन्नाञा सामयोकवा का वाचोङ मना लोनि चामलोक्तुकि हेरोद मोचिसुत्डा कुमाकात्ताङा का मोचिञा रात्तुकि युङसाओ मयाआङा, नङ मोचिओ इदुम एनहिडा खोचि बदधेका तुकखामि लिसाङा, मेनछाङ वाया सुत्डा एनाङा। ²¹हान लोइसा सुकधिइ मोवाइडा बाना, मुनटोङ हेरोदआ आनओ पुकलेनओ छेमालोकडा आनओ टोप्पो खारूखाहाङछाचि, मुकतलाटाङमिचि, गालिलओ अधुवा अधुवा मनाओ निकि चाचायु मपुवा, ²²का मुनटोङ हेरोदियासओ आनओ मेछाछा हुड्डा ताकि लाकलुवा मोबेन् मोसाआ हेरोद नङ मोडा अकनिनडा चाचायुडा युङकाबा झाराञा वाया मेत्तु का हाङआ मोको मेछाछाञा मयिङा, 'खानाञा नुवानुसाओ यामतोक अङकाकनिन दोरानुम का अङका खानाञा पुवोङा।' ²³नङ मोचिआ सिस्वदुम चोकि मोसाञा मयिङा, खाकको खाना अङकासुतडा तदोत् अङकाओ दुकेवा हाङहोन छाङ अङका खानाञा पुवोङा।'²⁴मन्कि मोसाआ हुड्या लोन्तुकि आनओ मामाञा मयिङा, "अङका दि दोरूम?" मोचिआ मयिङा, "हङसानवा पुमि युहन्नाओ टाङ!" ²⁵मोको मोबेन हालिफुलिकनिन हुड्डा हाङओया खाराकि उसओ यिङाकि दोरा, "खानानिनआ हानदे अङकाञा हङसानवा पुमि युहन्नाओ टाङ चाखुङडा पुवाने, लोवो अङका राकामुङा।” ²⁶नङ हाङ घितुकखामि मलिसा, मेन मोचिआ आनओ सिस्वदुम का अकनिन्डा चायायुडा युङकाबाचिओ निकि मोसाञा देङहुतमा राका मानमु।²⁷मन्कि हाङआ हाले आनओ रात्काबाओ अकपाङ टाङकारूकञा छुत्ताकि युहनाओ टाङ बाटवो इङइवा मपुवा। नङ मोसाआ छेकखिमडा खाराकि मोचिओ टाङ हेक्ता ²⁸नङ मोचिओ टाङ चाखुङडा बाटटुकि मेछाछाञा पुवा, नङ मेछाछाआ मोको आनओ मामाञा पुवा।²⁹मोचिओ खेनमाछाचिआ मुनटोङ ओको दुम मएना मोबेन मोकोचि ताकि मोचिओ सुपोकवा थेनतुकि सुचिन्खुम खाटुकि मयुङसा। ³⁰मन्कि बुलाम्बु खेनमाछाचि देकमिओया झाराझुम मलिसा, नङ मोकोचिआ दि दि मचुवा, का मचिनलुवा मोचि झारा खोनिनञा चेपयङ मचुवा।³¹नङ खोनिनआ मोकोचिञा यिङानिन, खानाचि आमहाङपाङे छाङ छुटुक्का खोयाङखामडा बानानुम का दिच सावाएमतानुम। देनादि मोडा तावो खात्‌वोचि बदधेका मयाआङा का खोनिनञा चासितारिओ फुसलिवा माननुङा। ³²नङ खोनिनचि चाःवासिडा छुटुक्का अकटेट खोयाङखाम्‌डा खारानिन।³³हान मनाचिआ खोनिनचि खातनियुङसाओ मटोक्तु का बदधेकाआ मसिन्ता का झारा तालावाङ डाङका लाङलाम लोकतुकि मोडा मखारा, का खोनिनञा मलिपता। ³⁴नङ खोनिन लोनहिडा अकटेट टोप्पो मुकला टोक्तानिन का मोकोचिधानि पुनोत्तानिन, देनादि मोकोचि चानकाबा मानलिसाओ सामुवा ओटनि मयाआङा का खोनिनआ मोकोचिञा बदधेका दुमओ सालामयङ पुसिलुवानिन । ³⁵मन्कि मुनटोङ लेन उनभेप्लो छित्दानि चिया, मोबेन खोनिनओ खेनमाछाचिआ खोनिन्ओया ताकि मयिङा, "ओको खारोङ अखोयाक याआङ, का हान लेन उनभेप्लो लिमनिचिया।³⁶मोकोचिञा खायोङ पुवाने, का माकोचिआ ओहयानि मोहयानिओ सोहोन का टेनचिलिप्पा खाराकि आनओ निकि दिच चामासेसि मखितने। ³⁷मेन खोनिनआ मोकोचिञा यिङानिन, "खानाचिआ मोकोचिञा चासि पुवानुम।" मेन मोकोचिआ खोनिनञा मयिङा, "दि आनकान खाराकि हवाभुङ दिनार मेतलोओ पेमपाक खित्ताकि ओकोचिञा चासि पुम्?"

8¹मोचि लेनडा लादेङ मुकला उनखामा याआङा, का मोकोचि सुत्डा चासिञा दिच छाङ माननुङा, मोबेन खोनिनआ खेनमाछाचिञा अहाङपाङेओया बुत्ताकि यिङानिन, ²"अङका ओको मुकला धानि सोमतुकङा, देनालो ओकोचि अङकाकनिन युङसाओ आई सुमाकालेन लिसा, का ओकोचि सुत्डा चामासेसि दिचछाङ मात्दङ। ³नङ ओकोचिञा आनओ खिमडा मानचाङे छुत्तोम लो लामडा ङे आकतुमाग्वोङ। ओकोचिखपडा खाउङे खाउङे ना माङखा डाङका बानाओ मयाआङ।" ⁴खोनिनओ खेनमाछाचिआ खोनिनञा मयिङा, 'ओडा खोयाकखाडा ओचि मनाचिञा पेम्पाकआ पाकचा चुसिञा साङआ खाइसाकिया रूउने का?'⁵खोनिनआ मोकोचिञा सेनानिन,' खानाचि सुत्डा देमका टेट पेम्पाक मयाआङ?' मोकोचिआ मयिङा ‘एक्टेट।’ ⁶६ खोनिनआ मोकोचिआ लुमडा युङवो इङइवा मुवानिन, का मोचि एकाटेट पेम्पाक तात्तुकि आलाङने पुनि ओरानिन, का मोकोचिओ बुसित युङनिपुविनने यिङाकि आनओ खेनमाछाचिञा पुवानिन, का मोकोचिआ मुकलाओ बुसित बुसित युङनि मपुवा।⁷मोकोचि सुत्दा दिच चुप्पो ङाचि छाङ मयाआङा, का खोनिनआ सायोक पुवाकि मोचि छाङ मोकोचिओ बुसित बुसित युङमा लुवानिन। ⁸मन्कि मोकोचिआ मचो, का पाकचा मलिसा। नङ हेन्तुओ दाङलाचि मोकोचिआ एकाखेङ मदुवा। ⁹मोकोचि हाप्पो लुहिभुङ मयाआङा, का खोनिनआ मोकोचिञा खायोङ मुनि बाइसानिन, ¹⁰मन्कि खोनिन आनओ खेनमाछाचि सुत्डा हाले चाःवासिडा वाङाकि दलमनुथाओ थुमचिडा बानानिन ।¹¹मन्कि फरिसिचि मता का खोनिनञा सुको मुवाकि सारुङगाङका अक्टेट सिनछुङ लामयाङसा खोनिन सुत्डा खासेनला चुसिमुलुवा। ¹²नङ आनओ साकोङडा उखाम साकमा सोन्तुकि खोनिनआ लोवानिन, "ओको तालाखुकआ देना सिनछुङ लामलुक? अङका खानाचिञा नुच्चुङ डे लोलुकङा ओको तालाखुकञा खाउ ङे छाङ सिनछुङ पुविनवोनिन।” ¹³नङ खोनिनआ मोकचिञा छिरुकि चाःवासि हुड्डा वाङनि मोह्यातलिप्पा खारानिन।¹⁴नङ मोकोचिआ पेम्पाक खाट्मा ममान्ताकेसा का चाःवासिडा मोकोचिसुत्डा ओन अकटेट पेम्पाक याआङा। ¹⁵खोनिनआ मोकोचिञा उसओ यिङयाङसा छाक्को इङइवा पुवानिन "खानाचि फरिसिओ बोपखा का हेरोदओ बोपखा डाङका लेन्तानुम”¹⁶मोकोचिआ लो चिढायुकडा पेम्पाक मात्दङ लोनि हाङपोहाङडा लाचेपला मुमा लुवा। ¹⁷देकमिआ ओको सिनला तोक्तुकि मोकोचिञा लोवानिन, "खानाचि सुत्डा पेम्पाक माननुङ यिङाकि देना खानाचि लाचेपला अमुलुक ? दि खानाचि फाननु अमितनिन् ? दि खानाचिओ कोङ चाउक लिसाओ ङे याआङ?¹⁸मुक मलिसा मेनछाङ खानाचि अटोकनिन् नङ नाबाक मलिसा मेनछाङ खानाचि अएन्निन, नङ दि खानाचिञा मुकसिन मात्दङ, ¹⁹अङकाआ मुनटोङ ङाकाटेट पेम्पाक मोचि ङाहिभुङओ खपडा ओराङाङ, मोबेन देम खेङ दुनवातदुन खानाचिआ अदुवाङा?" मोकोचिआ खोनिनञा मलोवा "अहवा"²⁰' नङ मुनटोङ मोचि एकाटेट लुहिभुङओखपडा मोबेन देम खेङ दाङलाचि खानाचिआ अदुवाङा?' नङ मोकोचिआ खोनिनञा मलोवा "एका"। ²¹खोनिनआ मोकोचिञा लोवानिन "दि खानाचि फाननु अतुपनिन्?" /s वेत्सैदाओ खाथेप मना /s²²मन्कि खोनिनचि वेत्सैदाडा बानानिन नङ मनाचिआ अकपाङ खाथेप मनाञा खोनिनओया मटारा, का मोसाञा नोप्ताने लोनि ताछुकफेङ मचुवा। ²³खोनिनआ मो खाथेप मनाओ छुक लाप्तुकि मोसाञा टेन्डाङका हुझ्या बाटटानिन का मोसाओ मुकडा थेत्तुकि मोधानि आनओ छुक युङसाकि मोसाञा सेनानिन, ‘खाना दिच त टोकलुक?’²⁴मन्कि धानिलिप्पा खाङाकि मोसाआ मयिङा, ‘अङका मनाचिञा सुङताङइसा बिनियुङसाओ टोकङा।’ ²⁵मोबेन खोनिनआ लादेङ अमुकडा छुक युङसानिन, का मोकोआ सुकमुलुवाकि खाङा, का खुवातनि लिसा ,का झारा यामतोक ताकछेक ङे टोकसिलुवा। ²⁶नङ खोनिनआ मोसाञा टेनडा मानवाङदामा लोनि मोसाओ खिमडा खाइसानिन।²⁷मन्कि देकमि नङ खोनिनओ खेनमाछाचि सिजरिया फिलिप्पिओ टेन्चिडा बानानिन, का लामडा खोनिनञाआ आनओ खेनमाछाचिञा उसओ यिङाकि सेनानिन, "मनाचिआ अङका साङ एवं लोनि मयिङलुक् ?” ²⁸मनकि मोकोचिआ खोनिनञा मयिङा, "हङसानवा पुमि युहना, निचिआ, एलिया, मेन निचि साङआ यामाङचिखपडा खाउङे अकपाङ।”²⁹मोबेन खोनिनआ मोकोचिञा सेनानिन, "खानाचि लो अङका साङ एव लोनि अयिङलुक?" पत्रुसआ लायङ पुवाकि खोनिनञा मयिङा, "खानानिन निनामछेन लिमानु।" ³⁰नङ खोनिन्आ मोकोचिञा उसओ यिङाकि छाक्को इङइवा पुवानिन, "खानाचिआ अङकाओ छापछोङडा साङञा छाङ मानलोदामा।³¹नङ मनाओ सावाछाआ बदधेका छुयुलोकमा, का पासुङ बुलाम्बुचि का धियान बुबमिचि का कायङवान डाङका बुङछुनला लिमा, का सेतमान, का सुमकालेन नेतलोक लाहङसु लिमा, चाखाम याआङ" लोवाकि खोनिनआ मोकोचिञा चिनलुसि लुवानिन। ³²नङ खोनिनआ ओको दुम दुम्‌छुयुकनिन लोवानिन। मेन पत्रुसआ खोनिनञा अकलिप्पा खाटटुकि थोपसिमपुङसा।³³मेन लासुकि खोनिनआ आनओ खेनमाछाचिञा खाङाकि पत्रुसञा उसओ यिङाकि थोपतानिन, सुलावा, अङकाङका खाछितनि खारे, देनादि खाना निनाममुओ माआङ मेन मनाचिओ दुमडा इकमा पुहिडा तयुङयाछा। ³⁴नङ आनओ खेनमाछाचिओ सुत्डा मुकलाञा हाङपाङोया बुत्ताकि खोनिनआ मोकोचिञा लोवानिन, ‘खाउङे मना अङदेङसु बानसि मिनमासा चुलुक लो, मोसाआ हाङपाङञा बुङछुनला मुने, का चिइलाक थेनतुकि अङकाओ देङसु वाङने।³⁵देनादि खोक्कोआ आनओ हाङमाङ रातओ मिनमासा चुलुक, मोसाञा मोको मासुवोङ का अङकाओ नङ नुसावानामओ निकि आनओ हाडमाङ मासुवोआ मोको रातवोङ। ³⁶देनालो मनाआ झारा धाधारङ छुककोङतुकि आनओ हाङमाङ लो मासुवा लो मोसञा दि ढुक्नुवा नु? ³⁷देनादि मनाआ आनओ हाङमाङओ पिपेनडा दि पुमारु? देनादि ओको राकयाङवा का दाखोङवा तालाखुकडा खोक्को अङका नङ अङकाओ इदुम डाङका सिसुवाकात्, मनाओ सावाछा छाङ आनओ पापाओ नुसानुवाडा वाचोङ याकेन्छा चिसुत्डा बानहिडा मोको डाङका सिसुवाकातवोङ³⁸देनादि ओको राकयाङवा का दाखोङवा तालाखुकडा खोक्को अङका नङ अङकाओ इदुम डाङका सिसुवाकात्, मनाओ सावाछा छाङ आनओ पापाओ नुसानुवाडा वाचोङ याकेन्छा चिसुत्डा बानहिडा मोको डाङका सिसुवाकातवोङ

9¹नङ खोनिनआ मोकोचिञा लोवानिन, 'अङका खानाचिञा नुच्चुङे लोलुकङा, ओडा एवानचिनओचिखपडा साङ साङ मयाआङ खोकोआ निनाममुओ हाङहोनञा साएराङडा ताओ मान्‌खाङइनलोक तारि खाउ ङे माइआ सुवाललोङओ दुतछुप तोकवो माननुङ। ²तुकालेन नेतलोक देकमिआ पत्रुस, याकुब का युहन्नाञा अकनिनडा तारानिन, का मोकोचिञा अकटेट टोप्पो भुरूडा खाटानिन, का मोकोचिओ बुसित खोनिनओ युपा फानतु। ³नङ खोनिनओ टिटखानचि छोकछोकवो का धिओमचुक मलिसा, उसओ हे, हेन्खामाडा साङ धापकाबाआ मुसओ ओमचुक मेत्मा रुनिन।⁴नङ मोडा वाछाप्पासुत्डा एलिया मोकोचिओया यादारा, का मोकोचि देकमि सुत्डा दुम मुनियुङसाओ मयाञाङा। ⁵पत्रुसआ देकमिञा मलोवा, रूमु, आनकानञा ओडाङे युङमा नुलोक याआङ, नङ आनकान ओडा सुमकाटेट याक्‌सा मेत्तोमने, अकटेट खानानिनओ निकि, अकटेट वाछापपाओ निकि का अकटेट एलियाओ निकि। ⁶देनादि दि यिङवो लोनि मोचिआ मानले, देनालो मोकोउनखामा कुमाकाराओ मयाआङा।⁷नङ मोकोचिञा लाछामि मुलुत्ताकि मोडा अकटेट युवारि बाना, का युवारि डाङका अकटेट डोसाङला लोन्ता "खोचि अङकाओ स्वावा सावाछा मए, खानाचिआ खोनिनओ इदुम एनानुम।" ⁸नङ हाले चुवाङयोवा खाङहिडा मोकोचिआ आनओ अकनिन्‌डा देकमि लेटका, लादेङ निचि साङञा ममानटोक।⁹मन्कि खोनिन भुरूङका इहिडा खोनिनआ मोकोचिञा उसओ यिङाकि छाक्को इङइवा पुवानिन, 'खानाचिआ खाकको अटोक्ता मनाओ सावाछाओ लाहङसु मानलिसइन्लोक तारि मोको साङञा छाङ मान‌लोदामा वै।" ¹⁰मोकोचिआ लाहङलेन यिङाओ दि ए लोनि हाङपोहाङडा ओकोङे सानुङ लोक्तुकि दुममुमा मलुवा।¹¹नङ मोकोचिआ खोनिनञा उसओ यिङाकि मसेना, ‘बुसि एलिया बानमा डोट लोनि यङवानमिचि देना मयिङ, ¹²नङ नुच्चुङ ङे ए, एलिया बुसि मबान् का झारा चाकखिम मसाङसेन नङ मनाओ सावाछाओ छापछोङडा खाइसाकिया खोसाञा बद्धेका दुमडा छुयुकुपमा का असाओ दोकमान डोट, यिङाकि छाप्तानचिन याआङ लोनि खोनिनआ मोकोचिञा लोवानिन। ¹³मेन अङका खानाचिञा लोङा एलिया बान्निचियाओ याआङ, नङ मनाचिआ खोसाओ छापछोङडा मछाप्तानचिन खुवात्नि मोकोचिओ नुङनुलो दुम खोचि धानि मुनिचियाओ मयाआङ। /s खाला वाङाओ एलोकछा /s /p¹⁴नङ मुनटोङ खोकोचि खेनमाछाचिओया बानानिन, मोबेन अकटेट टोप्पो मुक्ला मोकोचिओ चुवाङयोवा युङाओ का यङवानमिचिआ मोकोचिञा खासेन सेननियुङसाओ टोकतानिन। ¹⁵मन्कि झारा मुकलाआ खोनिनञा टोकमुसा धिनाकाक मकाङा, का खोनिनओया लोराकि खातनि सायालोङ मचुवा। ¹⁶खोनिनआ मोकोचिञा सेनानिन, खानाचि खोचिसुत्डा दि खासेन अचुलुक?¹⁷मुकलाओ अकपाङआ खोनिनञा लायङ मपुवा, रूमु, अङकाआ मेः वा खाला साकोङ वाङाओ अङछाञा खानानिनओया बाटटाओ याआङाङ। ¹⁸मोकोआ मोसाञा खाडडा फेम्याक ढुङनिलेयाक मोसाआ बोसोमपोत् का कुङजोङ साङ का दोम्।अङकाआ खानानिनओ खेनमाछाचिञा मोको लातनिपुने लोउङ मेन मोकोचिआ ममानरू। ¹⁹मोबेन खोनिनआ मोकोचिञा लायङ पुवाकि यिङानिन, 'योकोममिन्वा तालाखुक, अङका देमतारि खानचिसुत्डा युङवोङा का? खानाचिञा देम आङउम? ,मोसाञा अङकाओया बाटानुम।'²⁰मोकोचिआ मोसाञा खोनिनओया मबाटटा। खोनिनञा खाङमुसा मोको खाला साकोङवाआ गोङलोक्तु का मोको लुमडा वेन्तानचिन बोसोम पोत्याङसा यालिमतालिम मुवा। ²¹खोनिनआ मोसाओ पापाञा सेनानिन, ‘देमखाङका मोसाञा ओको लिसाओ ए?’ मोचिआ मलोवा सिसुमवाइ दाङका ङे। ²²नङ मोसाञा युनला मुसिञा खप्याकखप मोकोआ मोसाञा मिडा का चाःवाडा छाङ वेत्तुओ याआङा, खोनालो खानानिनआ दिचछाङ मुमा रूमानु लो आनकानधानि पुनोत मुनि नुनोतला मुवाने,'²³देकमिआ मोसाञा लोवानिन, 'खानाआ ङे तरु लो मक्तुम् मुकाबाओ निकि ना झारा यामतोक कारुयाक याआङ।' ²⁴मोबेन चकनि छाओ पापाआ पात्तुकि मयिङा, 'अङका मकतुम मुङा, अङकाओ योकोममिनञा फामासि मुवाने।' ²⁵मन्कि मुकला झाराङे लोटनिताओ टोक्तुकि खोनिनआ मोको असङअत साकोङञा उसओ यिङाकि योप्तानिन, "एई क:वा नङ मे:वा साकोङ, अङका खानाञा इङइवा मुङा, मोछाङका लोन्तुकि बाने, नङ लादेङ देमखा छाङ मोहुडडा मान्‌वाङदे। '²⁶मन्कि रिखापतुकि मोसाञा गोङतुकि मोको लोन्ता का मोको दुकपाछा सुवाइसा लिसा, उनतारि हे बदधेकापाङआ मोको सुवा लोनि मलोप्ता। ²⁷मेन देकमिआ मोसाओ छुक लाप्तुकि छुटुक्का थिनतानिन का मोको पोक्तु।²⁸नङ मुनटोङ खोनिन खिमडा बानानिन मोबेन खोनिनओ खेनमाछाचिआ खोनिनञा उसओ लोनि मसेना, "आनकानआ मोसाञा देना लातमा रूमिइन्?" ²⁹खोनिनआ मोकोचिञा लोवानिन ओको माइओ लो सोमफोङला लेट्‌का निचि खाउङे सुमतुमआ लोनमा रूनिन।³⁰मन्कि मोडाङका लोन्तुकि खोनिनचि गालिल लिप्पा खारानिन, का साङआ छाङ मानसिनने लोवो खोनिनओ मिनमासा याआङा। ³¹देनादि खोनिनआ आनओ खेनमाछाचिआ उसओ यिङाकि सानयङ पुमा लिसाङा, 'मनाओ दुवाछा मनाचिओ छुकडा पाङपाक्वोङ ,का मोकोचिआ खोसाञा मसेत्‌वोङ, का मसेरानचिन नेतलोक सुमका लेन देङदा लादेङ थिन्वोङ।' ³²मेन ओको लोयङला मोकोचिआ मानतुप् का खोनिन सुत्डा सेनमा मकुमाकारा। /s नोऔलाओ सान्यङ /s /p³³मन्कि खोनिनचि कर्फनहुमडा बानानिन, का खिमडा लिहिडा खोनिनआ मोकोचिञा सेनानिन, 'लामडा खानाचिआ दि मिन्‌फाकमिन मुनियुङसाओ अयाआङा?' ³⁴मेन मोकोचि वाइःया मयुङा, देनादि लामडा मोकोचिआ साङ टोप्पो लोनि हाङपोहाङडा दुम मुनियुङसाओ मयाआङा। ³⁵मोबेन युङाकि खोनिनआ हवापौपाङञा बुत्तानिन, का मोकोचिञा यिङानिन, 'साङ मना बुसि लिवो राका चुलुक लो, मोको झारा चोङलो थेन्यु का झाराओ याङसुमि लिवोङ।'³⁶नङ अकपाङ चुप्पोछाञा लोक्तुकि खोनिनआ मोसाञा मोकोचिओ हुपडा युङसानिन, का मोसाञा छाकेन्छाडा लोक्तुकि खोनिनआ मोकोचिञा लोवानिन, ³⁷'खोक्कोआ मुसओ चुप्पाङ छाचिखपडा अकपाङञा अङनुङडा देङहुतला मुउने, मोसाआ देङहुत्ताङवोङ का खोक्कोआ देङहुत्ताङउने मोसाआ अङका माआङ मेन छुत्ताङमिञा देङहुतला मुलुक ।³⁸युहन्नाआ खोनिनञा मयिङा, 'रूमु अकपाङआ खानानिनओ नुङडा खालाचि लातनियुङसाको आनकानआ टोक्तोम, नङ आनकानआ मोसाञा मानेमिन मुइन, देनादि मोको आनकानओ देङसु लुनिन याआङा।' ³⁹मेन देकमिआ यिङानिन,' मोसाञा मानेमिन मानमुए, देनादि अङनुङडा साएराङओ ओक मुवोआ हाले अङउतनुङ चुमारुवोनिन।⁴⁰देनादि खोक्को आनकानओ यङछितलाडा माननुङ ,मोको आनकानलिप्पा याआङ। ⁴¹देनालो खोक्कोआ खानाचि निनामछेनओ अए, लोवाकि खानाचिञा अक कनचुरो चाःवा दुङमा पुउने, अङका खानाचिञा नुच्चुङ ङे लोलुकङा, मोसाआ खाउ ङे माइआ आनओ उनमाला मासुवो मान्नुङ।'⁴²नङ खोक्कोआ अङकादु मकतुम मुवो चुप्पाङचिखपडा अकपाङञा साकबाय पुउने, मोसाओ निकि ना हेनाक अकटेट बद्धेका चाचेमलुङ मोसाओ पोटडा कुङताकि साजुमाडा वेतनिपुमा मोसाओ निकि खान्नो लिहिडा ए। ⁴³नङ आमछुकआ खानाञा साकबाय पुलो मोसाञा धेतनिपुए, हवाछुक लिसाकि खामारेनओ मानसेक मिडा खातमा चोङलो ना लाङभाङजा लिसाकि अयामडा वाङमा खानाओ निकि खान्नो ए। ⁴⁴खाडा मान मोकोचिओ भेवा मसुयाक नङ मान मि सेतलुक।⁴⁵नङ आमलाङआ खानाञा साकबाय पुलो मोसाञा धेतनिपुए, हवालाङ लिनि खामारेनडा वेतमा चोङलो ना पेसोला लिसाकि अयामडा वाङमा खानाओ निकि नुलोक ए। ⁴⁶खाडडा मान मोकोचिओ भेवा मसुयाक नङ मान मिसेकलुक।⁴⁷नङ आनअमुकआ खानाञा साकबाय पुलो मोसाञा लात्तुकि केनिपुए, का हवाअमुक लिसाकि खामारेनडा वेतमान चोङलो ना अकअमुक लिसाकि निनाममुओ हाङहोनडा वाङमा खानाओ निकि नुलोक ए। ⁴⁸खाडडा मान मोकोचिओ भेवा मसुलुक नङ मान मि सेक।⁴⁹देनादि उकताउक मना मिआ साङनुवा मेत्तिनवोङ। ⁵⁰युम खान्नो ए, मेन युम वाचेक लिसा लो मोको दिआ दुतछुप्लो मुमेत्वो? हाङपोहाङडा युम युङसानुम का हाङपोहाङडा तोङनियुङानुम।

10¹मोडाङका थिन्तुकि खोनिन इताङकु होङकुओ ह्याउलिप्पा यहुदियाओ चोमसिनचि हुड्डा बानानिन। मुकलाचि लादेङ खोनिनओया झाराझुम्मा मलिसा; नङ आनओ सुङसेनवात्नि लादेङ खोनिनआ मोकोचिञा सानयङ पुसिलुवानिन। ²नङ फरिसिचि खोनिनओया ताकि खोनिनञा सुको मुवाकि मसेना,' दि साङ मनाआ आनओ तायामाञा लेटमा नुलोक याआङ? ' ³खोनिनआ मोकोचिञा लायङ पुवाकि लोवानिन, मोसाआ खानाचिञा दि इङइवा पुवाओ मयाआङ?' ⁴मोकोचिआ मलोवा, 'अकटेट, लेटमाछाप छाप्तुकि लेटमा लोनि देङहुतवारि पुवाओ मयाआङ।'⁵मेन देकमिआ मोकोचिञा लोवानिन, 'खानाचिओ कोङओ चाउकलाआ मुहिडा खोचिआ खानाचिञा ओको इङइवा छापनिमपुवा। ⁶छावनछाओ पुङलाङका खोनिनआ मोकोचिञा हाङछा- हाङछामि मुनि मेतानिन।⁷ओसुन्दुम मनाआ आनओ पापा का मामाञा छिराकि आनओ तायामासुत्डा तोङनियुङ , ⁸नङ मोचि हवापाङ अकपोक ङे मलिवोङ, का मोकोचि लादेङ हवा ममाआङ मेन अक्टेटङे साएमपोक मलि। ⁹ओसुन्दुम निनाममुआ खोकोञा अकसुत्डा कामतानिनओ याआङ, मनाआ, मानफोकदाने।'¹⁰नङ खिमडा खेनमाछाचिआ लादेङ ओको सानुङडा खोनिनसुत्डा मसेना। ¹¹खोनिनआ मोकोचिञा लोवानिन,' खोक्कोआ आनओ तायामाञा छिराकि हाउसोसुत्डा याकाम्मु मुवोङ, मोकोआ मोसाओ उसादाकडा राकयाङला मुलुक। ¹²नङ मोको उहाङपाडआ आनओ सायापाञा छिराकि हाउसोसुत्डा याकाम्मु मुलुक लो ना, मोसाआ ङे राकयाङला मुलुक।'¹³मनाचिआ चुप्पाङ छायाङछाचिञा, खोनिनआ मोकोचिञा नोपनिपुने लोवो निम्पिआ खोनिनओया मबाटटा, मेन खेनमाछाचिआ मोकोचिञा महेनता। ¹⁴मेन ओको टोक्तुकि देकमि छेमानुत लिसानिन का मोकोचिञा लोवानिन, चुपपाङ छायाङछाचिञा अङकाओया बानसि पुवानुम, मोकोचिञा माननान्तानुम, 'देनालो निनाम्‌मुओ हाङहोन मुसओचिओङे ए।¹⁵अङका खानाचिञा नुच्चुङ ङे लोलुकङा, खोक्कोआ निनाममुओ हाङहोनञा चुपपाङ एलोछाआ ओटनि काङलेन मानचुउने, मोको दिमुछे मोहुडडा मानवाङवोङ।' ¹⁶मन्कि खोनिनआ मोकोचिञा छाकेन्दा तारूकि मोकोचिधानि आनओ छुक युङसाकि सायोक पुवानिन। /s अथेनअत अयाम /s /p¹⁷खोनिन लामडा खातयाङसा मुहिडा अकपाङआ लोरूकि तानि खोनिनओ बुसित लाङतुमफु नेप्तुकि खोनिनञा सेना, "धिवाङ रूमु, सानलेप अयामओ पाङयि लिमाञा अङकाआ दि चुमा डोट?" ¹⁸देकमिआ मोसाञा लोवानिन, 'खाना देना धिवाङ तलोङाङ, अक तामिनतुप निनाममु लेटका निचि साङ छाङ धिवाङ माननुङ। ¹⁹खाना इङइवाचि ना तसिनलुक, सेतसु मानमुदामा, राकयाङला मानमुदामा, मानखुदामा, मुपसाङ सिनलेमु मानपुदामा, लुलेन मानछाकछेनदामा, आनओ मामा-पापाञा सानुवासात्‌मा। '²⁰मन्कि मोसाआ खोनिनञा यिङा, "रूमुहाङ, ओचि झारा ना अङकाआ अङकाओ छादुमु डाङकाङे काङलेन मुवाओ ङे याक्ङा।" ²¹देकमिआ मोकोदु अमुक मुनि मोसाञा सोम मुवाकि लोवानिन, 'खानाञा फाननु अक्टेट दुमओ मादुङतोक याआङ, खारानुम का आमनो खाक्को मेत्लो मयाआङ इन्तानुम, का छुयुकुप्पाचिञा पुवानुम, मन्कि खानाआ सारुङगाडा खाबालुङ ततोक्‌वोङ, का ताकि अङकाओ देङसिलुवानुम्।' ²²मेन ओको दुमआ मोसाओ नापङुङता, का मोको तुकखामि लिसाकि खातनिलेवा, देनालो मोको बद्धेका खाबालुङ लिसाओ मना याआङा ।²³मन्कि चुवाङयोवा खाङाकि देकमिआ आनओ खेनमाछाचिञा लोवानिन, 'लुङलिचि खासओ चरकवा सुत्दा निनाममुओ हाङहोनहुड्डा मवाङ।' ²⁴नङ खेनमाछाचि खोनिनओ मोचि दुमडा नाकाक् मलिसा। मेन देकमिआ मोकोचिञा लोवानिन, 'एलोकछा च्यो, खाबालुङधानि ताङखोङ युङकामिचिञा निनाममुओ हाङहोन हुट्टा वाङमा खाइसुओ चरकवा याआङ। ²⁵लुङलि मना निनाममुओ हाङहोन हुड्डा वाङमा लोहिडा ना हेनाक लुपमिओ लुप्मकडाङका देङकोङपाञा चोङसि नेकता याआङ।'²⁶मोबेन साङ हङनुमारू ? लोवाकि मोकोचि हाङपोहाङडा दुममुयाङसा बद्धेङे स्वमराक मकाङा। ²⁷देकमिआ मोकोचिधानि अमुक मुनि लोवानिन, 'मनाचिञा ओको अतकारूयाक याआङ, मेन निनाम्‌मुञा ना माआङ, देनादि निनाम्‌मुञा झारा कारूयाक नु।' ²⁸पत्रुसआ खोनिनञा लोमा लुवा,' खाङाने आनकानआ सिरिसाएताममा छिरोम, का खानानिन्ओ देङसि लुवाओ याइन्का।'²⁹देकमिआ लोवानिन, 'अङका खानाचिञा नुच्चुङ ङे लोङा,' खोककोआ अङकाओ निकि खिम हे बुबु निछा हे नाना फेङमामा, हे मामा, हे पापा हे छाचि, हे खारोङ थाम्पुक छित् ³⁰मोसाआ ठिनसुओ अकनिन्‌ङे भुङफसमि बद्धेका खिमचि का बुबु निछाचि का नाना फेङमाचाचि का मामाचि, का एलोकछाचि का खारोङ थाम्पुकचि हान्दे मोवाइदाङे तोक्वोङ का तावो बुलुहुतडा सानलेप अयाम। ³¹नङ बद्धेका बुसित लिवोचि देङसि का देङयाक्को लिवोचि लो बुसि मलिवोङ।³²हान खोनिनचि यरूशलेमलिप्पा लामडा वाङनियुङमा लिसाओ मयाआङा, नङ देकमि मोकोचिओ बुसित बुसित खात्नियुङसानिनओ याआङा, का मोकोचि स्वमराक लिसाकि खोनिनओ देङसु देङसु कुमाकाराकि बियाङसा मयाआङा। हाले खोनिनआ अकहवापाङञा लादेङ अकलिपा खाटटाकि उहाङपाङधानि डोट्‌नितावो दुमचि उससो यिङयाङसा मोकोचिञा एनमेत्मा लुवानिन, ³³'खाङानुम, आनकान यरूशलेमलिप्पा वाङनियुङसाओ याइन्का, का मनाओ सावाछा धियान बुबमिचि का यङवानमिचिओया पाङपाकवोङ, का मोकोचिआ खोसाञा सुमेकसन मपुवोङ, का निसामचिओया पाङपाकनि मपुवोड, ³⁴नङ मोकोचिआ खोसाञा स्यावारि मचुवोङ, का खोसाञा मथेतवोङ, का खोसाञा रमफकआ मधातवोङ, का खोसाञा मसेतवोङ नङ सुमकालेन नेतलोक खोको लादेङ खोङवोङ।³⁵जब्दिओ हवापाङ सावाछाचि, याकुब का युहन्ना खोनिनओया ताकि उसओ मयिङा, 'रूमु, उङकाचि खानानिन सुतडा खाकको दोतवोङचि, खानानिनआ अङकाचिओ निकि मुनि पुवाने लोवो अङकाचि मिनमासा मुवाचि। ³⁶खोनिनआ मोकोचिञा लोवानिन, 'खानाचिओ निकि अङका दि चुउम, लोवो खानाओ राका तयाआङचि?' ³⁷मन्कि मोकोचिआ खोनिनञा मयिङा, 'खानानिन धिनुमसङडा आनकानचिडा अकपाङ खानानिनओ चुपचुछुक लिप्पा का हाउसोञा बेङवाछुकलिप्पा युङमा तोक्वो उङकाचिञा देडहुतवारि पुवाने , ’³⁸मेन देकमिआ मोकोचिञा उसओ लोवानिन,' खानाचि दि तदोतलुकचि, मोको खानाचि तलेनिनचि। दि खाक्को कान्चुरो अङका दुङङा, मोको खानाचि दुङमा तरूचि? हे खाक्को हङसानवा लोकतुओ याकङा, दि मोको हङसानवाआ खानाचि हङसानवा लोकमा तरुचि? ³⁹मन्कि मोकोचिआ खोनिनञा मलोवा, “उङकाचि रुचि”।. देकमिआ मोकोचिञा लोवानिन, “खाक्को कानचुरो अङका दुङङा, मोको खानाचि तदुङवोङचि का खाक्को हङसानवा अङकाआ लोकतुओ याकङा ,मोको ओतमावा खानाचिआ तलोक्वोङचि ⁴⁰मेन अङकाओ चुपचुलिप्पा का अङकाओ बेङसुलिपपा युङसि पुमा लो अङकाआ पुवो माआङ, ओको ना खोक्को खोक्कोओ निकि छुमचुम लिनियुङसाओ याआङ मोकोचिओ ङे निकि ए।,”⁴¹मोको एनाकि पौकापाङे याकुब का युहन्ना सुत्डा मह्रुकता ⁴²मोबेन देकमिआ मोकोचिञा अहाङपाङओया बुत्ताकि लोवानिन, 'खानाचि अलेलुक, हे निरङचिडा हाङमुयाङ मुवोचि मोकोचिधानि थामपुकसाया मचुलुक, का मोकोचिओ टोपाङ टोपाङचिआ ओलाक मोकोचिडा कोपरुयङ मयाङलुक।⁴³मेन खानाचिडा ओलाक उसओ नुनिन, मेन खोक्को खानाचिडा टोप्पाङ लिवो राका मुलुक, मोको खानाचिओ खाङसुमि लिवोङ। ⁴⁴खोक्को खानाचिडा बुसि लिवो राका मुलुक, मोको खानाचि झाराओ रोपधामवा लिवोङ। ⁴⁵देना लो मनाओ सावाछा रोपधाम लोकमा माआङ मेन रोपधाममुमा, का बद्धेकाओ सेममालाओ निकि आनओ हाङमाङ पुमा ताओ ए। खाथेप बर्तिमै⁴⁶मुनटोङ खोनिनचि जेरिकोडा बानानिन, का खोनिन आनओ खेनमाछाचिओ का टोप्पो मुक्ला सुत्डा जेरिको डाङका लोनहिडा तिमैओ सावाछा बर्तिमै अकपाङ खाथेप दोतकाबा, लामओ चुकडा युङनियुङसाओ आआङा, ⁴⁷मोबेन नासरतओ देकमि लिमानु लोवो एनुकि मोको पाराकि यिङमालुवा, 'देकमि, दाउदओ सावाछा,अङकाधानि पुनोतवा चुवाने।' ⁴⁸नङ मोको वाइ:अया लिने यिङाकि बदधे कापाङआ मोसञा मथोपता, मेन मोको फाननु टोप्पो डोसाङलाडा पातमा पुङसा, “दाउदओ सावाछा, अङका धानि पुनोतवा मुवाने”⁴⁹हाले देकमि चोकेप्पा एवानिन का लोवानिन, 'मोसाञा बुत्तानुम।' मन्कि मोकोचिआ मोको खाथेपवाञा उसओ यिङाकि मबुतता, 'टाङखोङ मुए, पोकते, खोनिनआ खानाञा बुत्मा लियाङ।' ⁵⁰नङ आनओ बोपछुम केसाकि फिनयाङसा मोको देकमिओया बाना,⁵¹देकमिआ मोसाञा लोवानिन, “अङका खानाञा दी मुम लोवो खाना राका तचु?” खाथेप मनाआ खोननिनञा यिङा,“रुमु, अङका मुकखाङ तोकतुम” , ⁵²नङ देकमिआ मोसाञा लोवानिन, 'आमनो लाम वाङानुम, आमनो मकतुमआ खानाञा चावापा मेत्तुओ याआङ।' मोबेन मोसाआ मुकखाङ तोकतु का लामडा खोनिनओ देङसु देङसु लुवा।

11¹मुनटोङ खोनिनचि यरूशलेमओ चुकडा जैतुन भुरूडा बेथफागे का बेथानि लोवो खारोङडा ताबानानिन, मोबेन खोनिनआ आनओ खेनमाछाचिखपडा हवापाङञा उसओ लोवाकि छुत्तानिन ²खानाचिओ बुसितओ टेनडा खारानुम, का वाङदावाङहिडा ङे खानाचिआ हान्देतारि खाउङे मना मानवाङाओ खुइवाछा अधितवोङ, मोसाञा हुलुङताकि बा‌ट्टानुम। ³साङआ खानाचिञा, 'उसओ देना अचुलुक?' यिङा लो, हाए‌सिञा ओकोओ चाखाम डोरासो याआङ, का खोनिनआ लादेङ चकनि ओडा छुत्नि पुमा लिवोङ' लोवानुम ।'⁴मोबेन मोकोचि मखारा, का खुइवाछा बुङया चुप्लामडा हुइयालिप्पा लाप्टिखोङ चुकडा छुम्तानओ मधित्ता, का मोसाञा महुत्ता। ⁵मोडा एवानओचिखपडा साङ साङआ मोकोचिञा मयिङा,' खुड्वाछा हुत्ताकि खानाचि दि अमुयाङ? ' ⁶मोबेन मोकोचिञा देकमिआ यिङानिन खोवातनि मुनि मोकोचिआ मयिङा, का मोकचिआ खाटसि मपुवा।⁷मोकोचिआ खुइवाछाञा देकमिओया मबाट्टा, का मोकोचिओ बोपछुमचि मोको धानि युङनि मपुवा, का खोनिन मोकोधानि हाङकोनवा मलिसा। ⁸नङ बद्धेकापाङआ आन- आनओ बोपछुमचि का निचिआ टेम्‌माखाओ सुम्बाकचि हेक्ताकि लामडा मथुङसा।, ⁹नङ बुसि बुसि बिवो का देङसु देङसु बानवोचि उसओ लोयाङसा मपारा, होसन्ना, सायोकसाङ मोचि, खोक्को निनाम्‌मुओ नुङडा बान्‌मानु। ¹⁰सायोकसाङ मोको तावो हाङहोन, आनकानओ पापा दाउदओ ङे हाङहोन, सारूङगाडा होसन्ना।¹¹खोनिन यरूशलेमडा माङखिम हुड्डा वाङानिन, का चुवाङयोवा झारा यामतोकधानि खाचोप्तानिन नेतलोक माअत्ला लिसाओ लिहिडा, हवापाङेओ अकनिन्डा खोनिन बेथानिडा खारानिन। ¹²माङकोलेन्दु खोनिनचि बेथानिङका बानमा लिहिडा खोनिन साकारङानिन।¹³नङ माङखाडा सुम्बाक लिसाओ अक्टेट वासिखुकमाकओ सुङताङ टोक्ताकि खाटनिङे मोसाडा दिच तोकङा हे यिङाकि खोनिन खारानिन, मेन मोडा मता नेतलोक खोनिनआ सुम्बाक लेट्का दिचछाङ तोक्मा- मानलि, देनादि मोवाइडा वासिखुकमाकओ मुयाकला माननुङा। ¹⁴मोबेन खोनिनआ मोसाञा लोवानिन, 'हानङक्यातनि खानाओ सिवा साङछे मनाआ मानचादाने।' खोनिनओ खेनमाछाचिआ ओको मएना।¹⁵नङ खोनिनचि यरूसलेमडा बानानिन, का खोनिन् माङखिम हुड्डा वाङाकि माङखिमडा इनकाबा का खितकाबाचिञा हुइया लातसि लुवानिन, का बाटकाबाचिओ छापबुङचि का कुइवा इनकाबाचिओ युङखा खोनिनआ लिमनि पुवानिन। ¹⁶खोनिनआ साङञा खाउङे खुङखेन माङखिम हुड्‌डाङका खाटसि पुमा मानलि।¹⁷नङ खोनिनआ सानयङ पुवाकि मोकोचिञा लोवानिन, "दि उसओ छापतानचिनओ माननुङ, उङखिम झारा रावाचिओ निकि सोम्फोङलाओ खिम् दारावोङ? मेन खानाचिआ ना ओकोञा ङापकाबाचिओ बुकताङ मेत्ताओ अयाआङ।" ¹⁸नङ अधुवा अधुवा बुबमिचि का यङवानमिचिआ ओको एनाकि खोनिनञा खाइसाकिया युन्ला मुइन्ने लोनि सुमतुम मलामा, देनालो मोकोचि खोनिन सुत्डा मकुमाकाराङा। देनादि झारा मुकलाआ खोनिनओ सानयङडा स्वमराक काङाओ मयाआङा। ¹⁹नङ नाम्पुक लिहिडा खोनिन तालावाङ हुइया लोन्तुकि खारानिन।²⁰२० नङ वायाङ मोडाङका खात्मा लिहिडा खोनिनचिआ मोको वासिसुकमाकओ सुङताङञा भेनडाङकाङे सिप्तुओ टोकतानिन। ²¹नङ मुनटोङ पत्रुसञा मुकसिनमा लिसा, मोबेन मोचिआ खोनिनञा मयिङा, 'रूमु, खाङाने, खानानिनआ यासान्‌ला पुवानिनओ वासिखुकमाकओ सुङताङ ना सिप्तायाछा !'²²देकमिआ मोकोचिञा लायङ पुवाकि लोवानिन, 'निनाम्‌मुडा मकतुम युङसानुम। ²³अङका खानाचिञा नुच्चुङे लोलुकङा खोक्कोआ ओको भुरुञा खाना उक्ताकि साजुमाडा वेतनि' लोग्ने, का आनओ कोङरिङडा देम छाङ मिनछेन मुनिन, मेन उहाङपाङआ यिङाओ दुम अछङ लिमा ता लोवो मकतुम चुलो ,मोसाञा मोको लिवोङ।²⁴ओसुन्दुम अङका खानाचिञा लोङा, झारा यामतोक खाक्कोओ निकि खानाचि सोमफोङला अचुलुक, का अदोत्लुक मोको तोक्ताओ अयाआङ लोवो मकतुम युङसानुम, का मोको खानाचिआ अतोक्वोङ। ²⁵नङ मुनटोङ खानाचि सोमफोङला मुवाकि ठानठुक अलि, मोबेन साङओङे उसादाकडा खानाचिओ दिच याआङ लो नुनाम्लानुत मुवानुम का सारुङगाडा लिमानुवो खानाचिओ चापाआ छाङ खानाचिञा खानाचिओ हआदोङ नुनामलानुत मुमा लिवोङ। ²⁶मेन नुनामलानुत अमुनिन लो ना, सारुङगाडा लिमानुवो खानाचिओ पापाआ छाङ खानाचिओ हआदोङ नुनाम्लानुत् मुमा लिवोनिन ।²⁷नङ लादेङ खोनिनचि यरूशलेमडा बानानिन का खोनिन माङखिमडा बिकोन्नि युङमा लिहिडा अधुवा बुब्काबाचि यङवानमिचि का खोक्पा बुलाम्बुचि खोनिनओया मबाना। ²⁸मोकोचिआ खोनिनञा मयिङा, 'खाउ कोपरूयुङआ खाना ओचि ओक तचुलुक? नङ ओचि ओक मुमा खानाञा साङआ कोपरूयुङ पुवा?'²⁹मोबेन देकमिआ मोकचिञा लोवानिन, 'अङका खानाचिआ अकटेट दुम सेनङा का खानाचिआ , मोसाओ लायङ पुवाङनुम् का अङका दि कोपरूयुङआ ओचि ओक मुङा मोको खानाचिञा लोवोङा। ³⁰युहन्नाओ ओतमावा सारूङगा डाङका लिसाओ हे मनाचि डाङका? लायङ पुवाङनङ ।'³¹मोबेन मोकोचि उसओ यिङयाङसा हाङपोहाङडा तुक्वातुप मुमा मलुवा, सारूङगा डाङका लोइनने लोना खानाचिआ खोनिनदा देना मकतुम अमानचु ? लोनि खोनिनआ मलोवोङ ³²मेन मनाङका लोइनने लो मोकोचि हाङछामि डाङका मकुमाकाराङा देनादि झाराआ युहन्नाञा नुच्चुङ ङे यामाङ लोनि मलोप्ताङा। ³³मोकोचिआ देकमिञा लायङ पुवाकि मयिङा, 'आनकानञा सिनला मात्दङ'। हाले देकमिआ मोकोचिञा लोवानिन, 'अङका छाङ खाउ कोपरूयङआ ओचि ओक मुङा, मोको खानाचिञा लोनुङा।'

12¹मन्कि खोनिनआ मोकोचिञा डोयङलाडा लोसि लुवानिन,' अकपाङ मनाआ यमसिखा पाक्तुकि मोसाओ चुवाङयोवा तामसे ममेत्ता, का आःवासुङ मपोन्तुवा, का अकटेट खाचोपखा मेत्ताकि खारूमिचिञा मोको खाछोनलुङडा पुवाकि नियुङखा मखारा। ²यमसिवा कुप्वो वाइदा मोचिआ अकपाङ खाङसुमिञा खारूमिचिओया यमसिखाओ दिच सिवाचि मोचि खारुमिचि डाङका टाटसि लोनि मछुता। ³मेन मोकोचिआ मोचिञा लाप्ताकि मधात्ता, का उहुपछुक मछुत्ता।⁴नङ लादेङ मोचिआ मोकोचिओया हाउसो खाङसुमिञा मछुत्ता, का मोकोचिआ मोको ओलाकओ टाङ मकेरा का मोसाञा मिनअत मचुवा। ⁵मोचिआ हाउसोञा मछुत्ता, का निचि बदधेका पाङञा छाङ मछुत्ता मेन् मोकोचिआ साङञा मधात्ता का साङञा मसेरा।⁶मोचिओ हान अकपाङ ओन याआङा मोचिओ स्वमपोवा सावाछा। मोकोचिआ अङसावाछाञा ना सानुवा अछङ मचुवोङ यिङाकि झारा चोङलो देङसु मोचिआ ओकोङेञा मोकोचिओया मछुत्ता। ⁷मोबेन मोचि खारूमिचिआ हाङपोहाङडा मयिङा, "ओको ना पाङयि ए, बानइनने आनकानका खोसाञा सेरूम का कोपरू आनकाओ लिवोङ।"⁸नङ मोकोचिआ मोसाञा लाप्तुकि मसेरा, का यमसिखाओ हुइयालिप्पा वेतनि मपुवा, ⁹ओसुन्दुम यमसिखाओ नामसोङमिआ दि मचुवोङ? मोचि मबान्वोङ, का खारूमिचिञा युनला मचुवोङ, नङ यमसिखा निचिञा मपुवोङ।¹⁰दि खानाचिआ सामयोक यङवानओ ओको इदुम खिप्ताओ अमाननुङ? डाककाबाचिआ खाकको लुङटाकञा असाओ मचुवा, मोकोङे ओलाक केङकुओ सायालुङ मेत्तानचिन, ¹¹ओको हाएसि डाङका लिसाओ ए, नङ ओको ङे आनकाओ मुक्खाङडा नाकाकताओ याआङ। ¹²नङ मोकोचिआ खोनिनञा लापमासुङा मेन मुकला सुत्डा कुमामकारा, देनादि मोको डोयङला खोनिनआ मोकोचिओ यङछितलाडा लोवानिनओ, ए लोनि मोकोचिआ मतुप्ता का मोकोचिआ खोनिनञा छिरूकि खातनिलेवा। /s सिजरञा छोन्‌लुङ छोन्‌वो छापछोङडा खासेन /s¹³खोनिनञा दुमडा खेखुपतानुम यिङाकि मोकोचिआ फरिसिचि का हेरोदिचिखपओ साङ साङञा खोनिनओया मछुता। ¹⁴मोकोचिआ मताकि खोनिनञा मयिङा, 'रुमुच्यो, आनकान लेइन्का खाना निसवान लिमानु, का साङओ छाङ लिपालाम मुमा नुनिन, देनादि खानानिन डोखाङाकि ओक मुमानुनिन मेन निनाममुओ लाम नुसुप्तुमआ चिनलुमानु, लोवाने सिजरञा छोनलुङ पुमा नुलोक याआङ हे माननुङ। ¹⁵आनकान पुइन्ने हे पुइमिन्ने? खोनिनआ मोकिचिओ रूङचाला सिन्ला तोकताकि मोकोचिञा लोवानिन्, 'खानाचि देना सुको अचुवाङयाक ? अकटेट दिनार बाट्टानुम, का अङका खाङुम?'¹⁶नङ मोकोचिआ मबाट्टा। का खोनिनआ मोकोचिञा लोवानिन, 'ओको सेमफोक का थेपसुवा साङओ ए ?' मोकोचिआ खोनिनञा यिङा 'सिजरओ' ¹⁷मोबेन देकमिआ मोकोचिआ लोवानिन, सिजरओ यामतोक सिजरञा पुवानुम, का निनाममुओ यामयोकचि निनाममुञा। मोकोचि खोनिन सुत्डा धिनाकाकता मकाङा। /s लाहङेन छापछोङयि खासेन /s¹⁸हान लाहङलेन नुनिन लोवो सदुकिचि खोनिन्ओया मता, का खोनिनञा उसको यिङाकि मसेना, ¹⁹रुमु, वाछाप्पाआ आनकानञा छापनिपुवाओ मयाआङ हे साङओ बुबु सुवा का छालुक्पा लिसाकि तायामा ओलाक छिरू लो अनिछाकआ बुसुनिमा खाटने , का आनओ बुबुओ निकि आङखेप पुक्तु मुने।²⁰एकापाङ सावाछा मयाआङा नङ तोङदाआ सायाकाम्मु मुवा, का मोको छालुक्पा लिसाकि सुवा। ²¹नङ जुम्दाआ मोसाञा सायाकाम्मु मुवा, मन्कि मोको छाड़ छालुक्पा लिसाकि सुवा नङ पिपदोआ मुसओङे सुवा। ²²नङ एकपाङओ ङे आङखेप मानलि। झारा चोङलो नेत्लोक मोको छामिन्‌छा छाङ सुवा। ²³हान लाहङलेनडा मोकोचिखपडा साङओ दापयामा मोको लिवो निमाङ? देनादि मोचि एकापाङआ मोसाञा दापयामा मेत्ताओ मयाआङा।²⁴देकमिआ मोकोचिञा लोवानिन, 'खानाचि होइसेङलाडा डोटटाओ सुन्दुम ओकोङे माआङ? खानाचि मानना इयङवान मान निनाम्‌मुओ साएराङञा असिनलुक ²⁵देनादि मुनटोङ मोकोचिओ लाहङलेन नुयाक, मोबेन मानना सायाकाम्मु मचु, मानना सायाकाम्मुडा मपु ,मेन मोकोचि सारुङगाडा याक्केनाछाचि इसा मलि।²⁶मेन सुपोकवाचिओ छापछोङडा लो मोकोचिओ लाहङलेन नुयाक, लोनि दि खानाचिआ वाछाप्पाओ छापलायाकडा वाहिलाओ चेपयङडा खिपताओ अमाननुङ? खाइसाकिया निनाम्‌मुआ मोचिसुत्डा 'अङका सुन्तुमदिवाओ निनाममु, यङचावाछा निनाममु का सोझामुओ निनाम्‌मु एव, लोनि लोवानिनओ याआङा। ²⁷खोनिन सुपोकवाचिओ निनाम्‌मु माआङ मेन अहडङसाङचिओ लिमानु, खानाचि बद्धेङे होइसेङलाडा डोट्टाओ अयुङयाछा।' /s झारा चोङलो टोप्पो इङइवा /s²⁸यङवानमिचि खपडा अकपाङ खोनिनओया मता का खोनिनचिञा हाङपोहाङडा तुकवातुप मुनियुङसाओ मएना। खानिनआ ओकोचिञा नुलोक लायङ पुवानिनओ सिन्‌ला तोक्तुकि खोनिनञा मसेना, 'झारा इङइवाचिडा बुसि ओलाक खाउ ए?' ²⁹देकमिआ लायङ पुवानिन, 'बुसि ओलाक ओको ए,हेइ! इस्राएल एने, धिवाङ हाएसि आनकाओ निनाम्‌मु अकपाङे धिवाङ हाएसि लिमानु, ³⁰नङ खानाआ धिवाङ हाएसि आनओ निनाममुञा आनओ झारा कोङआ, आनओ झारा हाङमाङआ, आनओ झारा खारूआ का आनओ झारा साएराङआ नुसोम मुए। ³¹हवासि ओलाक ओको ए, खानाआ आनओ डाकनिञा हाङपाङञा ओटनि सोम् मुए। ओचि चोङलो बद्धेका इङइवा निचि मातदङ। '³²यङवानमिआ खोनिनञा मयिङा ,'नुच्चुङ ङे रुमु, खानानिनआ नुलोक ङे लोवानिन, खोनिन अकपाङे लिमानु, खोनिन् लेटका निचि मात्दङ। ³³नङ खोनिनञा कोङ‌आ, झारा नुतनुआ, का झारा सावाआ सोममुमा, का डाकनिञा उहाङपाङञा ओटनि सोम मुमा, झारा हेन्खुयुहुत का हुयुकमुचि चोङलो मुलुमरङ ए। ³⁴मोचिआ तायामुकनिन् लायङ पुवाओ टोकताकि देकमिआ मोचिञा लोवानिन, खाना निनाम्‌मुओ हाङहोन डाङका माङखा तमाननुङ। मोनेत्लोक खोनिनञा खासेन मुवो साङओ सापसा मानलि।³⁵मन्कि माङखिमडा चिनलुमानुहिडा देकमिआ लोवानिन, खाइसाकिया निनामछेन दाउदओ सावाछा ए लोनि यङवानमिचि मयिङलुक। ³⁶दाउद अहाङपाङेआ वाचोङ साकोङ डाङका यिङाओ मयाआङ, 'धिवाङ हाएसिआ अङहाएसिञा लोवानिन, अङकाआ खानाओ नुकसाचिञा आमनो लाङओ लाङटक मानमेतइन्लोकतारि खाना अङचुप्चुछुक लिप्पा युङानुम। ³⁷दाउद उहाङपाङे खोनिनञा हाएसि मयिङलुक लो खादाङका खोको मोचिओ सावाछा मलिसा? नङ मुकलाआ खोनिनओ इदुम वायाकनिन मएना।³⁸आनओ सान्यङडा खोनिनआ लोवानिन, यङवानमिचि डाङका चानचुप यङानुम, खोक्को उखाम टिटखान हुमसाकि ओडा मोडा कोन्मा का इन्खावाङडा सायालोङ लोकमा ³⁹नङ यायोकखिमचिडा यामुयुङखा का चाचायुडा टोप्पोखा नुवानुयाक् ⁴⁰खोक्कोआ सासाममिओ खिम मङाक्लुक् का खाउनतुङ निकि उखाम उखाम सोमफोङला मचुलुक। ओकोचिआ बढ्धेका बानछूप मतोक्वोङ। /s सासाममिआ पुवाओ पुनोत् /s⁴¹मन्कि खोनिन खाबाखाओ बुसित युङानिन, का मुकलाआ खाबाडा फेक रिपेन्‌ताओ खाङानिन, का बदधेका लुङलिचिआ बदधेङे रिपेन्ताङा। ⁴²नङ अकपाङ छुयुप्मा सासाममिआ ताकि हवा माइट तामिन्तुप केङवा याङ मेत्लो रिपेनन्तु⁴³नङ आनओ खेनमाछाचिञा अहाङपाङओया बुत्ताकि खोनिनआ मोकोचिञा लोवानिन, अङका खानाचिञा नुच्चुङे लोङा खाबाखाडा रिपेनकाबा चिखपडा ओको छुयुमि सासाममिआ झारा चोङलो बदधे रिपेन्ता। ⁴⁴देनालो झाराआ आन-आनओ सायाथाक्ला डाङका मरिपेन्ता मेन् ओकोआ ना आनओ ताङछुतलाङका मोसाओ खाक्को मेत्लो याआङा ,तामिनतुप आन्‌ओ झारा मुचाङे रिपेन्लेन मुवा।

13¹नङ मुन्टोङ खोनिन् माङखिम डाङका लोन्याङसा लिमानुवाङा, मोबेन खोनिनओ खेनमाछाचिखपडा अकपाङआ खोनिनञा मयिङा, 'रूमु खाङानुम, खासओ खासओ लुङताङचि का खासओ खासओ धिखिमिचि,' ²देकमिआ मोचिञा लोवानिन, 'दि खाना ओकोचि टोप्पो टोप्पो धिखिमचि तटोकलुक? लुङटाक् धानि लुङटाक छित्‌वोन्निन ,खाक्को फेनतिमिन।³नङ माङखिमओ बुसित जैतुन भुरुडा युङमानुहिडा पत्रुस, याकुब, युहन्ना का अन्द्रियासआ खोनिनञा छुतुक्का मसेना, ⁴'आन्‌कान्‌ञा लोवाने, ओकोचि दुम देमखा मलिवोङ? का ओकोचि दुम लिमानुहिडा दि सिन्‌मेत लिवोङ?'⁵देकमिआ मोकोचिञा लोसिलुवानिन, चानचुप युङानुम, साङआ छाङ खानाचिञा होइसेङलाडा मान्मुलुतने। ⁶बद्धेकापाङ अङकाओ नुङडा अङका खोकोङे एव लोयाङसा मबानवोङ, का मोकोचिआ बदधेकापाङञा लुलेन मपुवोङ ।⁷नङ मुनटोङ खानाचिआ म्हु का म्हुओ अत्छङदुम अएनवोङ मोबेन मानहेङतानुम, देनादि ओको लिमा चाखाम याआङ, मेन थेनयुओ मुयाकला मोको माआङ। ⁸देनादि रावाओ उसादाकडा रावा, का लुडवाङओ उसादाकडा लुङवाङ ठानठुक लिवोङ, खाम खामडा लुटलि खात्वोङ, साङसाङवा लिवोङ। यातुकलाओ तापुङ ओकोङे ए।⁹खानाचि आन्‌ओ सानुङडा चानचुप युङानुम, खानाचिञा धियायोक्खाडा मपाङपाक्वोङ। खानाचि अधात्तिनवोङ का खारुखाहाङछाचि का हाङओ बुसित अङकाओ निकि सिनलेखा पुसिओ निकि खानाचि ठानठुक अलिवोङ ¹⁰मेन बुसि झारा रावाञा नुसावानाम रूमरङ मुवाओ लिमा डोट।¹¹नङ मुन्टोङ मोकोचिआ खानाचिञा लापनि खाट्टाकि पाङपाकवोङ ,मोबेन दि चेइनने लोनि बुसिङका मिनराक मान्मुदानुम, मेन मोको ङे मुयाकला खाक्को खानाचिञा पुविन् मोकोङे चेवानुम देनादि चेपमि खानाचि अमाआङ मेन वाचोङ साकोङ लिमा लिवोङ। ¹²नङ वात्तोङआ वात्तोङञा सुवालोङओ निकि पाङपाक्वोङ, पापाआ सावाछाञा नङ छाचि पापा-मामाओ उसादाकडा ठानठुक मलिवोङ का मोकोचिञा सेतसि मलुमेत्वोङ। ¹³नङ अङनुङओ निम्पि खानाचि झारा डाङका चिमासाङ अलिवोङ ,मेन् खोक्को थेन्युतारि लोमान्टका युङउने मोसाओङे सेममाला लिवोङ।¹⁴मुनटोङ खानाचि नामबुकलो यामामुओ चिमासाङ याक्कञा खाडडा मुरु मातदङ मोडाङे एवानचिनओ अटोक्वोङ (खिपकाबाआ तुपने) मोबेन यहुदियाडा युङकाबाचि भूरुलिप्पा मफुङने। ¹⁵खिमओ छान्‌बाकखाडा युङकाबाचि हृयुनि मानधाने, मानना आनओ खिमडाङका दिच लात्‌माञा हुड्डा वाङने। ¹⁶कायाखाडा युङकाबाचि आनओ बोपछुम तात्माञा देङसि मान्‌लादाने।¹⁷मेन मोचिलेनडा आमोचुनो! बुखुन्डिमा का नुपुन फपकामाचिञा! ¹⁸ओको नाङदोङडा मानलिदाने लोनि सेमफोङला मुवानुम। ¹⁹देनादि मोचिले‌नचि उसओ छुयुओ मलिवोङ, उमओ निनाममुआ मेत्तानिनओ मेट्‌लेनओ पुङला डाङका हान्‌देतारि ना मानना लिसाओ याआङ, का देम्खाछे लिवोङ। ²⁰नङ धिवाङ हाएसिआ मोचिलेन् मानदुनिपुवाओनिन् ना खाउङे साएमछामि हङवो माननुङा, मेन खोनिन‌आ छेनतानिनओचिओ निम्पि मोको लेन दुन्तानिन।²¹मोको मुयाक्लाडा साङआ छाङ खानाचिञा खाङानुम निनामछेन ओडा मयाआङ, हे मोडा मयाआङ, यिङा लो खानाचिआ मानयाआतानुम। ²²देनालो मुपसाङे निनामछेन का मुपसाङ यामाङचि ठानठुक मलिवोङ का लिमारू लो छेन्तान्‌ओचिञा होङसेङलाडा मुलुतमाञा माकोचिआ सिनछुङचि का नाकाक वकचि मचुवोङ। ²³मेन खानाचि लो चान्चुप युङानुम ,खाङानुम अङकाआ खानाचिञा झारा दुम बुसिङकाङे लोनि पुवाओ ङे याक्ङा ओनेउ ।²⁴मेन मोचि लेनडा मोको हुपरुवा छुयु नेतलोक नाम कुइया मलिवोङ का लादिप्माआ आनओ छोकलासि पुवोनिन ²⁵नङ साङगेनचि नामकुदु डाङका मधावोङ, का नामचोकडा लिसाओ साएराङचि मरुखोकवोङ । ²⁶मन्कि मोकोचिआ मनाओ सावाछाञा साएराङ का धिमुमसङ सुत्डा बान्याङसा मुवाओ मटोक्वोङ। ²⁷मोबेन खोसाआ सारूङ याकेनछाचिञा मछुतवोङ का हेन्खामाओ थेन्यु डाङका नामकुदुओ थेन्यु तारि लुकाङे होनडाङका आनओ छेनतानचिनओञा अकखाम्डा मकोपवोङ।²⁸वासिखुकमाकओ सुङताङ डाङका डोयङला चिन्तानुम, मुनटोङ मोसाओ खेक् नोत्नो लिसाओ नुयाक,ल का चोकखान बात मोबेन चोकफोवा चुकडा बान्याछा लोवो सिन्‌ला अतोकयाक। ²⁹उइसाकिया ङे खानाचिआ छाङ मुनटोङ ओचि दुम लिनियुङसाओ अटोकवोङ मोबेन खोको चुकडा याआङ, लाप्टिखोङडाङे याआङ लोवो लेसानुम।³⁰अङका खानाचिञा नुच्चुङ ङे लोलुकङा, ओको झारा दुम लिनि मानरुइनलोकतारि ओको तालाखुक छितदावो माननुङ। ³¹सारुङगा का हेन्खामा खालेतनि मखात्वोङ, मेन् अङको इदुम खालेत्‌वोनिन। ³²मेन मोलेन, हे मोवाइदाओ सानुङडा पापाआ लेटका निचिसाङआ छाङ लेनिन, मानना सारूडगाडा लिवो सारूङ याकेनछाचिआ, मान् सावाछाआ।³³चानचुप युङानुम, माइमसक युङानुम का सोम्फोडला मुवानुम, देनादि मोको मुयाकला देम्खा लिवो ए मोको खानाचि अलेनिन्। ³⁴ओको ना खाङसुमिचिआ कोपरूयुङ का उकताउकञा आनओ आनओ वक पुनि, हुङकाबाञा 'खाना माइमसकङे युङमा लोवो इङइवा अकनिया पुवाकि चिखिम छिरूकि नियुङखा खाराओ खाउङे अकपाङ मना ओटनि ए।³⁵ओसुन्दुम पोकसुमि युङानुम, देनादि खिम्‌पाङ वावाङ हे नाम्पुकखपडा, हे वापा ओकहिडा, हे वायाङ देमखा तावो ए मोको खानाचि अलेनिन् । ³⁶माआङलो ना मिन्तालुक ताहिडा मोचिआ खानाचिञा इमनियुङसाओ मधित्‌वोङ । ³⁷नङ खाक्को अङका खानाचिञा लोलुकङा, मोको अङका झाराङेञा लोलुकङा "माइमसकङे युङानुम।"

14¹हान हवालेन नेत‌लोक सेमलायोक का बोपखा मात पेमपाकओ छेमालोक याआङा। धियान बुबमिचि का यङवानमिचि खोनिनञा खाइसाकिया मुपलाकनिन लाप्तुकि सेरोमने लोवो लामसुडा मयाआङा। ²देनालो मोकोचिआ लोवाओ मयाआङा छेमालोकओ मुयाकलाडा ना माआङ, माआङलो मनाचिडा डोमोसाङ लिवोङ।³खोनिन देङयाकनिडा शिमोन खुखेनकाबाओ खिमडा चासि युङहिडा अकपाङ छामा वाचोङ नामनुवाओ छुओ ओकति ओमसुवाङलुङओ वात्तामखुङडा तारूकि बाना, का मोको वात्तामखुङ केराकि खोनिन्‌ओ टाङडा लेन्तु। ⁴मेन साङ साङआ माइसुङ मुवाकि हाङपोहाङडा यिङमा मपुङसा, ओको फोङनुवाओ मायाक्सा देना लिसाओ ए? ⁵देनादि ओको फोङनुवा सुमका भुङ दिनार चोङलो बदधेडा इनताकि छुयुकुप्पाञा पुमा रूवोन् याआङा। नङ मोकोचि मोको सुतडा आरियङआ छोलोकवा मलिसा।⁶मेन देकमिआ लोवानिन, लिनिखारा, मोसाञा देना छुयु पुनि अयुङयाङ। मोसाआ अङकाधानि खाननो ङे मुवाओ याआङ। ⁷देनालो छुयुकुप्पाचि ना खानाचिसुत्डा निम्मा मलि का नुङनुसाओ मुयाक्लाडा खानाचिआ मोकोचिओ नुओकला मुमा अरू मेन् अङका ना निम्मा खानाचिओ अकनिन्डा लिनुङा ⁸मोसाआ खाक्को मुमा रुवाङा मोकोङे मुवाओ याआङ, मोसाआ अङकाओ पोकञा खुमसिओ निकि बुसिङका ङे फोङनामिक ओकति सोपनि पुवाओ याआड़। ⁹अङका खानाचिञा नुच्चुङ ङे लोङा झारा हेन्खामाडा खाडा खाडा ओको नुसावानाम रूमरङ मुउनने, मोसाआ खाक्को मुवाओ याआङ मोडा मोडा मोसाओ मु्कसिन्‌ओ निकि ओको यिङवोन।¹⁰हवापौखपडा अकपाङ यहुदा इस्करयोति ओलाक खोनिनञा मोकोचिओ छुकडा लापनि पुमाञा धियान बुबमिओया खारा। ¹¹मोकोचि छाङ ओको एनाकि छेमन् मलिसा, का मोसाञा फेकवा पुवो चङमुदुम मुवा नङ खानिनञा खाइसाकिया लापमेत्तुम लोनि मोसाआ लोइसा सुकधिइ लाममालुवा । /s थेन्यु चाचायु /s¹²बोपखामात पेम्पाकओ साकेओ बुसिलेनडा मुनटोङ सेमलायोक साकेओ हेनखुवा लिसाङा, खोनिनओ खेनमाछाचिआ खोनिनञा मयिङा, खाडा खाराकि खानानिनआ चामादुङमाओ निकि आन्‌कान् सेमलायोकओ छेमालोकओ चाचायु छुमचुम मुइनने लोवो खानानिनओ राका याआङ? ¹³मन्कि खोनिनआ आनओ खेनमाछाचिखपडा हवापाङञा उसओ यिङाकि छुत्तानिन, तालावाङडा खारानुम का खानाचिआ वाखुडडा चाःवा तारूकि खात्‌वो अकपाङ मनाञा अधित्‌वोङ, मोसाओ देङसि लुवानुम। ¹⁴नङ मोको खाड्डा वाङउने, मोखिमओ नामसोङमिञा लोवानुम, रुमु यिङमानु, अङतावाङखाम् खाडा याआङ? खाड्‌डा अङका अङखेनमाछाचिसुत्डा सेमलायोक साकेओ चाचायु चोउम् ?¹⁵नङ मोचि अहाङपाङेआ खानाचिञा नियिक यामतोकआ लक्लात् लिनि छुमछुम मुलुत्ताओ अकटेट धाककोबेन्ओ युङ्खा मखाङमेत्वोङ का मोडाङे खानाचिआ आन‌कानओ निकि छुमचुम मुवानुम। ¹⁶हाले मोचि खेनमाछाचि खातनि मलेवा का तालावाङडा मता, नङ खोनिन् मोकोचिआ लोवानिन ओटनि मतोक्ता, का मोकोचिआ सेमलायोक छेमालोकओ चाचायु छुमछुम मचुवा।¹⁷वावाङ लिहिडा खोनिन हवापाङे सुत्डा बानानिन। ¹⁸खोनिनचि युङाकि चासिलुहिडा देकमिआ लोवानिन, अङका खानाचिञा नुच्चुङ लोङा, खानाचिखपडा अङकासुत्डा चावो एकपाङआ अङकाञा लुलेन पुवोङ। ¹⁹मोकोचि तुक्खामि लिसाकि फान्अफान सुत्डा खोनिनञा दि मोको अङका एव? यिङाकि सेनसिलुवा।²⁰खोनिनआ मोकोचिञा यिङानिन, हवापाडखपडाओ अकपाङ, अङकासुडा चाखुङडा पेम्पाक काछुम ओलाक। ²¹देनादि मनाओ सावाछा ना उछापछोङडा छाप्तानचिनओ खुवात्नि खा‌तनिलेयाक मेन नङफिसा मोको मनाञा खोक्को दाङका मनाओ सावाछाञा लुलेनला नु! मोमनाओ पुक्तुङे मानलिसाओनिन ना मोसाओ निकि नुलोक लिवो याआङा कि।²²मन्कि खोनिनचि चानियुङमानुहिडा खोनिनआ पेम्पाक लोक्तुकि सायोक पुवानिन का ओराकि मोकोचिआ पुवानिन का लोवानिन, लोक्तानुम् ओको अङसाएमपोक ए। ²³नङ कनचुरो लोक्ताकि आलाङने पुवानिन नेतलोक खोनिनआ मोकोचिञा पुवानिन, का मोकोचि झाराआ मोडाङका मदुङा। ²⁴मन्कि खोनिनआ मोकोचिञा लोवानिन, ओको यङचकलाओ उङहुवा ए खाक्को बदधेकाओ निकि पेततिन। ²⁵अङका खानाचिञा नुच्चङ ङे लोङा, अङका लादेङ यमसिओ सिवाङका मोलेन तारि दुङवोनुङा मुनटोङतारि निनाममुओ हाङहोनडा मोको नुङवा दुङनुङा।²⁶नङ अकटेट् सङमुसान छाममुवाकि खोनिनचि लोन्ताकि जैतुन भुरूलिपा खारानिन। ²⁷मन्कि देकमिआ मोकोचिञा लोवानिन, "खानाचि अङकालिपा रूहुकमि अलिवोङ देनादि उसओ छापतान्चिनओ याआङ, अङका चानकाबाञा धित्वोङा का सामुवाचि टुङटेम मलिवोङ।²⁸मेन्‌छाङ अङकाओ लाहङसु मलिसा नेतलोक अङका खानाचि चोङलो बुसि गालिलडा खात्वोङा। ²⁹नङ पत्रुसआ खोनिनञा मलोवा, "झारापाङ खानानिनसुत्डा ह्रुकमि मलिसा मेन्‌छाङ अङका लो रूहुकमि लिवोनुङा ।"³⁰मोबेन देकमिआ मोकोचिञा लोवानिन, अङका खानाचिञा नुच्चुङ ङे लोङा, आइ, ओखाखुतडाङे वापा हवाफेन ओकमा बुसित खानाआ अङकाञा सुम्‌कादु बुङछुनला तमुवोङ।" ³¹मेन् मोचिआ फाननु अराङकानिन मयिङा, "खानानिन सुत्डा अङका सुमा मडोट्टु मेनछाङ अञका खानानिनञा बुङछुनला मुवो मानयाकदोङ, निचि झाराआ छाङ उइसाकिया ङे मयिङा। /s देकमि गेतसमनिडा /s³²नङ खोनिनचि गेतसमनि नुङ लिसाओ अकटेट खाम्‌डा बानानिन का खोनिनआ आनओ खेनमाछाचिञा लोवानिन "अङकाआ सोमफोङला मानमुइनलोकतारि खानाचि ओडा युङानुम।" ³³मोबेन खोनिनआ पत्रुस, याकुब का युहनाञा हाङपाङसुत्डा खाटानिनका खोनिन कोङचोनसाङ का बदधेका नुङचिमु लिसि लुवानिन। ³⁴नङ खोनिनआ मोकोचिञा लेवानिन, अङहाङमाङ³⁵नङ दिच याखाराकि खोनिन लुमडा बोमका डोटानिन, का उसओ यिङयाङसा सोमफोङला मुवानिन, “लिमारू लो ओको मुवाक्ला अडकाङका खाछितने। ³⁶नङ खोनिनआ लोवानिन, ‘पापा खानानिनआ झारा दुम कारुयाक याआङ, ओको कन्चुरो खाछि‌तनि पुवाने। मेन अङराका खुवात्नि माआङ मेन् खानानिन देतनि राका मुमानु।³⁷मन्कि खोनिन ताकि मोकोचिआ इमनि युङसाओ धिरानिन, का खोनिनआ पत्रुसञा लोवानिन, ‘ए शिमोन दि खाना इमनियुङसाओ तयाआङ दि अकटोङ छाङ पोकसुमि युङमा तमानरु ? ³⁸माइमसक युङानुम का सोमफोङला मुवानुम, का सुकोडा मानडोटटानुम, साकोङ ना नुच्चुङे छुमचुम याआङ, मेन साएमपोक रूपरू याआङ। ³⁹नड लादेङ खाराकि खोनिनआ खोकोङे दुम यिङयाङसा सोमफोङला मुवानिन ।⁴⁰लादेङ ताकि खोनिनआ मोकोचिञा इमनि युङसाओ धिरानिन , देनालो मोकोचिओ अमुक धिमाइमलिसाओ मयाआङ का खोनिनञा दि लायङ पुवो ए. मोको मोकोचिआ ममानले। ⁴¹नङ खोनिन सुमकादु बानानिन का मोकोचिञा लोवानिन, हान इमनि युङानुम का सावाएमला मुवानुम। लिनिचिया, मुयाकला बाननिचिया, खाङानुम मनाओ सावाछा हआदोङमिओ छुक्‌डा लाप्माछेक लिसिलुवाओ याआङ। ⁴²पोक्लानुम, खारइन्ने, खाङानुम अङकाञा लापमाछेकवो चुकडा ङे याआङ। /s देकमिओ लाप्माछेक /s⁴³खोनिनआ उसओ लोयाङसा लिमानुवाङा, धियान बुबमिचि, यङवानमिचि का पासुङ बुलामबुचि बान्छोन भेचोम लोक्ताओ मनाचिओ अकटेट रुहुप टारुकि हवापाङखपडाओ अकपाङ यहुदा चकनि ताबाना। ⁴⁴मुनटोङ खोनिनञा लापमेत्‌काबाआ मोकोचिञा उइसा यिङाकि उसओ अकटेट खोतला पुवाओ याआङा, खोककोञा अङका चुपला मुवोङा, मोचि मोकोङे मए मोकोङेञा लाप्तानुम का रातलाकनिन खाट्टानुम। ⁴⁵नङ हाले खोनिनओया ताकि मोसाआ चुकडा खाराकि ‘रुमुहाङ’ ⁴⁶मन्कि मोकोचिआ खोनिनधानि छुकपाकताकि खोनिनञा मलाप्ता।⁴⁷चुकडा एपवोनचिखपड़ा खाउङे अकपाङआ बान्छोन लाततुकि बुसिवा बुबकाबाओ याङसुमिञा धाततु का मोसाओ नाबाक हालिक हेकनि-पुवा । ⁴⁸देकमिआ मोकोचिञा लोवानिन, दि खानाचि खुसावाओ उसादाकडा खुवातनि बानछोन का भेचोम अकनिया लोक्ताकि अङकाञा लापसि अता। ⁴⁹उङका ना लेनओलेन खानाचिओ अकनिनडा लिनि माङखिमडा चिनलुयाङसा याआङाङ, का छाङ खानाचिआ अङकाञा अमानलाप। मेन साम्योक सामकालिन लाटला लिने यिङाकिङे ओको लिसाओ ए। ⁵⁰मन्कि झारा खेनमाछाचिआ खोनिनञा छिराकि मफुङसा।⁵¹मन्कि आनओ असकलक साएमपोकञा अकटेट बाङगासिटिट्‌आ रिम्तुओ खाउ ङे एकपाङ फानटा खोनिनओ देङसु लुवा। नङ मोकोचिञा मोको फान्टाञा मलाप्ता। ⁵²मेन टिट्खान छिरूकि मोको असकलक ङे फुड़सा। /s धियान बुबमिओ बुसित /s⁵³हाले मोकोचिआ देकमिञा धियान बुबमिओया खाट्टुकि झारा बुबकाबाचि का पासुङ अधुवाचि यङवानमिचि खोनिन अकनिन अकनिन ङे मता। ⁵⁴पत्रुस लो माङखाङकाङे धियान बुबमिचिओ - धियुङखिमओ बुकलुङ तारिङे खोनिनओ देङसि-मताओ याआङा। का मिबुक्याङसा टाङकारूङ सुत्डा युङनियुङसाओ याआङा।⁵⁵हान धियान बुबमिचि का झारा धियायोकलाआ देकमिञा सेत‌माञा खोनिनओ उसादाकडा सिनलेखा मलामा मेन साङछाङ ममानतोक। ⁵⁶देनालो बद्धेआ खोनिनओ उसादाकडा सोज्जे सिनलेमु मपुवा मेन मोकोचिओ सिनलेमु उक्नुरुङे मान्नुङा।⁵⁷नङ साङ पोक्तुकि खोनिन्‌ओ यङछित्‌डा उसओ यिङयाङसा सोज्जे सिनलेमु मपुवा, ⁵⁸छुकआ मेत्तुओ ओको माङखिम अङका फेनवोङा का मायाक छुकआ मुवाओ सुमकालेनडा हाउसो ठानठक मुवोङा, लोनि ओसाआ यिङाओ आनकानआ एनाओ याइन्, ⁵⁹मेन ओसाङेडा छाङ मोकचिओ सिनलेमु तोङसि मानता।⁶⁰हाले बुसिवा बुबकाबाआ एवाकि देकमिञा उसओ यिङाकि मसेना, दि खाना दिचछाङ लायाङ तपुनिन् । ओकोचिआ आमनो छापछोङडा दि सिनलेमु मपुयाङ?” ⁶¹मेन खोनिन वाइ:अया युङानिन, का दिच लायङ पुमा मानलि, लादेङ धियान बुबमिआ खोनिनञा सेनुकि मयिङा, “दि खाना धिवाङ धियानओ सावाछा निनामछेन तए?” ⁶²देकमिआ लोवानिन, “अङका एवं नङ खानानिनआ मनाओ सावाछाञा रूमरुहाङओ चुपचु छुकडा युङनियुङसाओ का नामकुदुको योवारिडा इनियुङसाओ टोकमा लिवोङ।⁶³धियान बुबमिचिआ आनओ तितखान पेराकि मयिङा, “आनकानञा सिनलेखाचिओ निचि दि चाखाम याआङ? ⁶⁴खानाचिआ निनामुतनुङ ना एननि अलेवा, खानाचि दि अलोप्?” मन्कि मोकोचि झाराआ खोनिनञा सुवालोङ मेकसन्‌ओ मुरु मदोकता। ⁶⁵साङ साङआ खोनिनञा थेत्मा मलुवा का खोनिनओ ङालुङ दिपतुकि खोनिनञा फेकला पुवाकि मयिङा, “मायाङछाम्सु चेउवे”, नङ खारुखाहाङछाचिआ खोनिनञा अपुम-अपुम पुवाकि पाङखुनडा मलोक्ता। /s पत्रुसओ बुङछुनला /s⁶⁶पत्रुस ह्युनि बुक्लुङडा लिहिडा धियान बुबमिओ याङसुमिमाचिखपडा अक्पाङ बाना ⁶⁷का पतरुसञा मिबुकनियुङसाओ टोक्तुकि मोचिञा खाङाकि मयिङा, “खाना छाङ देकमि नासरिसुत्डा तयाआङा। ⁶⁸मेन मोचिआ उसओ यिङयाङसा बुङछुनला, मचुवा, खाना दि तयिङ, मोको मानना अङकाञा सिनताङयाक मानना अङका तुपङा।नङ मोचि हुड्या केपसाडा मलोनतु मन्कि वापा ओक्तु।⁶⁹नङ याङसुमिमाआ मोचिञा टोक्तुकि ओया-मोया एकाबाचि सुत्दा लादेङ लोसि लुवा, ओचि ना मोकोचिखपडाओङे मए।' ⁷⁰मेन मोचिआ लादेङ बुङछुनला मचुवा, का दिच वाइदा नेतलोक ओया मोया एपकामिचिआ लादेङ पत्रुसञा मयिङा, नुच्चुङ खाना मोकोचिखपडाओ तए, देनादि खाना गालिलि तए।⁷¹मेन मोचिआ अहाङपाङेञा नङफिसा मुमा का सिस्वदुम पाक्तुकि यिङसि मलुवा, खोक्कोओ छापछोङडा खानाचि तयिङ, मोमनाञा अङका सिननुङा। ⁷²मन्कि हाले हवादु वापा ओक्तु का पत्रुसञा मोको दुमओ मुकसिन लिसा, खाक्को देकमिआ मोचिञा लोवानिनओ तयाआङा - वापा हवादु ओकमा बुसित खानाआ समकादु बुङछुनला तमुवाङवोङ। नङ मोदुमञा मित्ताकि मोचि परु परू म खावा।

15¹मन्कि ओङसाङे बुसिवा बुबमिचिआ, पासुङटाङ का यङवानमिचि सुत्डा, झारा धियायोक्लाआ हाङपोहाङडा यायोक मुनि देकमिञा छुम्ताकि मखाट्टा, का पिलातसओया पाङपाकनि मपुवा। ²पिलातसआ खोनिनञा मसेना, 'दि खाना यहुदिचिओ हेन्‌कोपहाङ तए?' खोनिनआ मोचिञा लायङला पुवानिन, ³'खानानिन ङे लोयाङसा लिमानु।' धियान बुबमिआ खोनिनधानि बद्धेका दुमओ एमसु मपाक्ता।⁴नङ पिलातसआ खोनिनञा लादेङ उसओ यिङाकि मसेना, 'दि खाना दिच लायङ तपुनिन? खाङानुम खानाओ उसादाकडा मोकोचिआ देम दुमचिओ खायोक मपाकयाङ।' ⁵मेन देकमिआ लादेङ दिच छाङ लायङ पुमा मानलि उनतारि हे, पिलातस स्वमराक मडोटटा।⁶साकेओ मुयाक्लाडा मोकोचिआ दोराओ अकपाङ छेकमिञा मोकोचिओ निकि खोचिआ छितनि पुवाङा। ⁷नङ हाङदुमलोङडा हाकलोक्तुकि सेतसु मुवो बरब्बा नुङओ अकपाङ मना छेकछाखिमडा याआङा। ⁸नङ मुक्लाआ वाङाकि मोकोचिओ निकि बुखुवातनि मुनिपुवाने लोनि सोमफोङला मचुवा।⁹पिलातसआ उइसाकिया लायङ मपुवा, 'दि अङका खानाचिओ निकि यहुदिचिओ मोचि हेनकोपहाङञा छितनि पुम? लोवो खानाचि राका अचुलुक ?' ¹⁰देनादि नुङछिनआ मुहिडा बुसिवा बुबमिचिआ खोनिनञा पाङपाकताओ मयाआङा। ¹¹मेन हेनाक बरब्बाञा मोकोचिओ निकि मोचिआ छितनि मपुने यिङाकि बुसिवा बुबमिचिआ मुकलाञा मचोङमेत्ता ।¹²पिलातसआ लादेङ मोकोचिञा लायङ पुवाकि मयिङा, 'खोक्कोञा खानाचि यहुदिचिओ हेनकोपहाङ अयिङ खोसाञा ओलाक अङका दि चुम ?' ¹³मोकोचि लादेङ रिखाप्ता 'मोसाञा इलाकडा लाक्ताने।¹⁴पिलातसआ ओकोचिञा मयिङा, 'देना? मोचिआ दि उवाक मचुवाओ मयाआङ?' मेन मोकोचि धिडोसाङलाआ मरिखाप्ता, 'इलाकडा लाक्ताने।' ¹⁵हाले पिलातमआ मुकलाञा साववासा मुलुत्त्वो मिनला मुनि मोकोचिओ निकि बरब्बाञा छितनिमपुवा का देकमिञा रमफक धातलाम मचुवा नेतलोक इलाकडा लाकसिञा पाङपाकनि मपुवा।¹⁶खारातमिचिआ खोनिनञा धियुङखिमहुड्डा मखाटटा, का झारा मुक्तलाञा झाराझुम मुमेत्ता। ¹⁷मन्कि मोकोचिआ खोनिनआ हललिपचुकवा टिट्‌खान हुममेत्नि मपुवा, सेनमिओ डोलोकुम चङताकि हुममेतनि मपुवा, ¹⁸नङ 'सेवानने यहुदिचिओ हेनकोपहाङ' लोयाङसा मोकोचिआ सायालोङ चुसि मलुवा।¹⁹मनकि मोकोचिआ खोनिनओ टाङडा दङआ धातयाङसा मथेतता, का लाङतुमफु नेप्ताकि खोनिनञा सायालोङ मचुवा। ²⁰नङ मुनटोङ खोनिनञा चुतनि मचिया, मोबेन मोकोचिआ हलचुकवा टिट्खान् होङनिमपुवा का खोनिनओ आनओङे टिटचि हुममेतनि मपुवा, का खोनिनञा इलाकदु लाकसिञा हुइया मखाट्‌टा। ²¹नङ टेनडाङका बाननियुङसाओ लामदुवा मना सिकन्दर का रूफसओ पापा साइरेनिओ शिमोनञा खोनिनओ इलाक खुन्तुकि खाटमाञा मोकोचिआ हियुक मलुवा।²²हाले मोकोचिआ खोनिनञा गलगथा लोवो खारोङडा मबाटटा। मोसाओ तुपयङ टाङखोकइवा खाम ए। ²³नङ मोकोचिआ खोनिनञा नामनुवा मोम्ताओ यमसि खामावा मपुवा। मेन खोनिनआ हेङहतलेन मुमा मानलि । ²⁴अन्कि मोकोचिआ खोनिनञा इलाकदु मलाकता, का साङआ दि तोक्वो लोनि मोचिडा छापलाद मपाक्ताकि मोकोचिआ खोनिनओ टिट्खानचि हाङपोहाङडा महाक्ता।²⁵बुसि लेनक् लिसाओ याआङा, मोकोचिआ खोनिनञा इलाकदु मलाक्ता। ²⁶नङ यहुदिचिओ हेमकोपहाङ लोवो खोनिनओ खायोकछापला छापतानचिनओ याआङा । ²⁷खोनिन सुत्डा मोकोचिआ हवापाङ खुसावाचिञा इलाकदु मलाक्ता, अकपाङञा खोनिनओ चुप्चुलिप्पा , हाउसोञा बेङसिलिप्पा ²⁸(का साम्योयङवानओ इदुम उइसाकिया लाटला लिसा, खोनिन हआदोङमिचि सुत्डा इखिपतानचिन)²⁹नङ ताखातसुकामिचिआ आनओ टाङ ङाङयाङसा उसओ यिङाकि खोनिनञा स्यावारि मचुवा, 'आहा! खाना माङखिम ओत्‌काबा, का सुमकालेनडा मेत्वो, ³⁰इलाक डाङका धासाकि अहाङपाङेञा लेउए,'³¹मुइसाकिया ङे धियान बुबमिचिआ छाङ यङवानमिसुत्डा खोनिनञा चुतमुयाङसा हाङपोहाङडा मयिङा , 'ओसाआ निचिञा डेकता, उहाङपाङञा लो डेकसि रूनिन्। ³²इस्राएलओ हेनकोपहाङ, निनामछेन, हान इलाक डाङका धासाकि ताने, का आनकान टोक्ताकि मकतुम मुइनने।' खोनिन सुत्डा इलाकडा लाकतिनवोचिआ छाङ खोनिनओ उतनुङ मचुवा। /s देकमिओ सुवालोङ /s³³हवालेनक डाङका सुमकालेनकतारि झारा हाङहोनडा मुकछुलुमआ रङा । ³⁴सुमकालेनकडा उसओ यिङाकि देकमि धिडोसाङलाआ पारानिन-' इलोइ, इलोइ, लामा सबखथानि? खाक्कोओ तुपयङ ए,हेइ! अङनिनाममु, अङनिनाममु, खानानिनआ देना छिराङनिन?' ³⁵ओह्यात मोहयात एपवोखपडा साङ साङआ ओको एनाकि मलोवा , 'खाङानुम, मोसाआ एलियाञा बुतयाङ ।'³⁶नङ अकपाङआ लोरूकि खातनि अकटेट वाफपसा सुनहेङवाआ भेपतुकि अकटेट दङडा पाकनि उसओ यिङाकि खोनिनञा दुङसि पुवा,' खाङइनने, खा‌टनिङे एलिया मोसाञा वाहोप्लातसि मता हे?' ³⁷मोबेन देकमिआ धिडोसाङलाआ पाराकि हाङमाङ छिरानिन। ³⁸मन्कि माङखिम्‌ओ टिछेकवा धानिङका भेन्तारि हवा दाङला लिसाकि पेरू।³⁹खोनिनआ उइसाकिया हाङमाङ छिरानिनओ टोक्ताकि खोनिनओ बुसित एवानचिनओ खारातमिटाङआ मयिङा , 'ओचि मना ना नुच्चुङङे निनाममुओ सावाछा मयाआङा।' ⁴⁰मोकोञा माङखाङका खाङनि युङवो माचुप छाङ मयाआङा। मोकोचिओ खपडा मरियम, मग्दालिनि, का चुप्पो याकुब, नङ मोचिओ मामा मरियम, का सलोमि याआङा। ⁴¹मुन्‌टोङ खोनिन गालिलडा लिमानुवाङा मोबेन ओकोचि खोनिनओ देङसु लुवाओ मयाआङा, का खोनिनओ खाङओछुङ मचुवाङा , निचि बद्धेका माचुप छाङ खोनिन सुत्डा यरुशलेम बानाओ मयाआङा ।⁴²वावाङताहिडा मोको छुमचुमओ मुयाकला, तामिनतुप सावाएमओ बुलेन लिसाओ लिहिडा, ⁴³अरिमथियाओ युसुफ अकपाङ सानुङमि यायोकछा, खोक्को उहाङपाङे छाङ निनाममुओ हाङहोनओ लाम खाङयाङसा मयाआङा, सापसाकनिन पिलातसओया खारूकि देकमिओ सुपोकवा मदोरा। ⁴⁴नङ खोनिन बुसिङे सुनिचियानिन लोनि पिलातस स्वमराक मडोट्टु, का खारात्मिटाङञा हाङपाङओया बुत्ताकि मोचि बुसिङे सुवाओ मए, हे यिङाकि खासेन मचुवा।⁴⁵मोबेन खारातमिटाङ डाङका सिनला मतोक्ता नेत‌लोक मोचिआ युसुफञा सुपोकवा खाटसि देङहुत्वारि मपुवा। ⁴⁶नङ मोचिआ बाङगिटिटखान मखिपतु, का खोनिनञा धासाकि मोको बाङखिटिटडा रिम्ताकि धिलुङखाडा पोन्तुवाकि मेत्तुओ अकटेट सुचिनखुमडा खोनिनञा मयुङसा, का रुपाखिमओ लापटिखोमडा लुङटाक हुछुननिपुवा। ⁴⁷मरियम मगदालिनि , योसिओ मामा मरियमआ खोनिनञा युङसाओ खाम खाङनियुङसाओ मयाआङा।

16¹सावाएमलेन खालेरा नेतलोक मरियम मग्दालिनि, का याकुबओ मामा मरियम, का सलोमिआ नामनुवा नुफोङचि खोनिनओ पोकडा सोपमाञा मखित्ता। ²नङ एखपओ बुलेनडा वायाङ ओङसाङे नामलोनहिडा मोकोचि रुपाखिमडा मता।³नङ मोकोचिआ हाङपोहाङडा मयिङा, 'साङआ आनकानओ निकि रुपाखिमओ लापतिखोमओ लुङटाक हुछुननि पुउने?' ⁴नङ धाक्कोलिप्पा खाङहिडा मोकोचिआ लुङटाक हुछुननि युङसाओ मटोक्ता, देनादि मोको धिटोप्पो याआङा,⁵नङ सचिनखुमहुडडा वाङाकि मोकोचिआ ओमचुक सङनान हुमसाओ अकपाङ मनाञा चुपचुलिप्पा युङनियुङसाओ मटोक्ता, का मोकोचिआ नाकाकता मकाङा। ⁶मेन मोचिआ मोकोचिञा मयिङा,' स्वमराक मानकाङदानुम, खानाचि इलाकडा लाकताननिनओ देकमि नासरिञा अलामलुक। खोनिनओ लाहङलेन लिसाओ याआङ। खोनिन ओडा लिमानुनिन्। मोकोचिआ खोनिनञा युङसाओ खाम खाङानुम ! ⁷मेन खारानुम, का खोनिनओ खेनमाछाचि का पत्रुसञा खानाचिओ बुसि बुसित गालिलडा खात्मानु लोनिपुवानुम। खोनिनआ मोकोचिञा यिङानिनओ ओटनि खानाचिआ खोनिनञा अटोक्वोङ।'⁸नङ मोकोचि लोन्ताकि सुचिनखुम डाङका मफुङसा। देनादि कुमा नङ स्वमराकआ मोकोचिञा रङाओ याआङा। नङ मोकोचिआ साङञा छाङ ममान्लो देनादि मोकोचि कुमाकाराओ मयाआङा।⁹मेन एखपओ बुसिलेन खोनिनओ लाहङलेन मलिसा नेतलोक खोनिन बुसि मरियम मग्दालिनिओया यादारानिन, खोक्को डाङका खोनिनआ एकाटेट खालाचि लात्तानिनओ याआङा । ¹⁰मोचिआ खाराकि खोनिनओ अकनिनडा युङवोचिञा मिनराक नङ तुक्हुयु मुनियुङसाओ वाइदाडा यङखान मपुवा। ¹¹नङ खोनिन अहङसाङ लिमानु, का मोकोचिओया यादारानिन लोवो दुम एनाकि मोकोचिआ मान्‌याआत्ता।¹²ओको मलिसा नेत‌लोक सापटेनलिप्पा खात्हिडा बिनियुङसाओ मोकोचिखपड़ा हवापाङओया अलामडा खोनिन हाउसो युपाडा यादारानिन। ¹³नङ खोकोचि लासाकि खा‌त्नि निचिञा मलोवा। मेन खोकोचिञा छाङ मोकोचिआ मकतुम ममानचु।¹⁴नेतलोक डाङका खोनिन अकपौ ओया, मोकोचि चासि युङहिडा यादारानिन, का मोकोचिओ योकोममिन् का चुवालुङओ छाक्कोउलाञा खोनिनआ थोपतानिन, देनालो खोनिनओ लाहङलेन मलिसा नेतलोक टोककामिचिओ दुम मोकोचिआ याआत्ला ममानचु। ¹⁵मन्कि खोनिनआ मोकोचिञा लोवानिन,' झारा बुलुहुतडा खाराकि झारा साएमछामिञा सावानाम रूमरङ मुवानुम। ¹⁶मकतुम मुवो का हङसानवा लोकवोआ फाखालाम तोक्वोङ, मेन योकोममिन मुवो खायोङवा मदोकवोन् ।¹⁷नङ मकतुम मुकाबाचि सुत्डा ओचि सिनछुङचि मलिवोङ - 'अङनुङडा मोकोचिआ खालाचि मटुङवोङ, का नुङवा अयङचि मोकोचिआ मचेपवोङ। ¹⁸मोकोचिआ पुछापचि मलाप्‌वोङ का खाउङे नुङयि यामतोक मदुङा मेन्‌छाङ खाउङे सुमतुमआ मोसाआ मोकोचिओ मायाक्सा मुवोनिन, मोकोचिआ योम्मुचिधानि छुक मयुङवोङ, का मोकोचि नुसङ लिनिमखात्वोङ।'¹⁹मोबेन उइसाकिया हाएसि देकमि मोकोचि सुत्डा चेपनिचियानिन नेत्‌लोक सारुङथाङलेन लिसानिन का निनाममुओ चुप्चुछुक लिप्पा युङानिन ²⁰नङ मोकोचि लोन्ताकि खादानुछेङे रूमरङ मचुवा। हाएसि मोकोचिओ साएमुकामि लिसानिन, का अकनिन - अकनिनङे मलिसाओ। सिन्छुङचिङका इदुमञा नुअछङ मुलुत्तानिन। आमेन ।

पावल लोहोनमिओ कोरिनथिचिआ

1¹पावल निनाममुओ राकाडका देकमि निनामछेनओ लोहोनमि दारावाओ, का निछाक सोस्वेनस डाडका, ²कोरिन्थडा लिसाओ निनाममुओ रिमिञा, तामिन्तुप खोक्को निनामछेन देकमिडा वाचोङ लिसाओ मयाआङ, का झारा खारोङडा, मोकोचिओ का आनहाएसि निनामछेन देकमिओ नुङ लोककाबाचि झारा सुत्डा बुतसान लिसाओ वाचोङ मनाचिञा – ³खानाचिञा निनाममु आनपापा का हाएसि देकमि निनामछेन डाङका नुनुतछोङ का नुसाने।⁴निनामछेन देकमिडा खानाचिञा पुवानचिनओ निनाममुओ नुनुतछोङओ छापछोङडा अङका आनओ निनाममुडा निम्मा आलाङने रिपेनङा, ⁵हे झारा छापछोङडा, तामिनतुप झारा इदुम का झारा तायाडा, खानाचि खोनिनडा लुङलिवा लिसाओ अयाआङ। ⁶निनामछेनओ छापछोङओ सिनलेखा खानाचिडा नुःछङ लिसा ओनसामि छाङ⁷उनतारि हे आनहाएसि देकमि निनामछेनओ छोङ हुङनियुङहिडा खानाचिडा खाउङे इछुकसिवाओ मादुङतोक माननुङ। ⁸खोनिनआ खानाचिञा आनहाएसि देकमि निनामछेनओ लेनडा अथेपमात लिमाञा सानलेपतारि नुअछङ मुनि युङमानुवोङ। ⁹निनाममु मकतुममुरू लिमानु, खोक्कोङका खानाचि उसावाछा आनहाएसि देकमि निनामछेनओ रिमिटोङडा बुतसान लिसाओ अयाआङ।¹⁰हान हेइ! निछाच्यो, आनहाएसि देकमि निनामछेनओ नुङआ अङका खानाचिजा ताछुकफेङनि सोमफोङला मुलिकङा, खानाचि झाराआ अकटेटङे दुम चेवानुम, का खानाचिडा खाउङे मिनफाक मानलिने, मेन खानाचि अककोङ का अकमिनलाडा सेनलेन लिसाओ लिसानुम। ¹¹देनादि हेइ! अङनिछाच्यो, खानाचिडा खिमुवा याआङ लोवो खानाचिओ छापछोङडा क्लोएओ युवाखिमवाचिङका अङकाञा सिनमेतला छुकलाप लिसाओ याआङ।¹²हान अङकाओ लोवो तुपयङ ओकोङे ए, खानाचि साङआ 'अङका पावलओ', साङआ 'अङका अप्पोलसओ', का साङआ केफासओ, नङ साङआ 'अङका निनामछेनओ एव' तयिङ, निमाङ ¹³दि निनामछे हासानचिननिनओ याआङ का? दि पावल आमनो निकि इलाकडा लाकतानचिन? हे दि पावलओ नुङडा खानाचि हङसानवा अलिसा कि ?'¹⁴अङका निनाममुञा आलाङने पुङा, हे अङकाआ खानाचिखपडा क्रिस्पस का गायसञा लेटका निचि साङछाङञा हङसानवा पुवाओ याकनुङा, माआङलो, ¹⁵खानाचि अङकाओ नुङडा हङसानवा लिसइन लोनि खाउङे खाउङे मनाचिआ लोवो याआङा । ¹⁶१६ नङ अङकाआ स्तिफनसओ इवाखिमञा छाङ हङसानवा पुउङ। मोलेटका अङकाआ साङञा छाङ हङसानवा पुउङ, हे मानपुदोङ, मोको अङका सिनताङयाकनिन।¹⁷देनालो निनामछेनआ अङकाञा हङसानवा पुमा माआङ, मेन नुयङखान रूमरङ मुसिञा छुत्तानिनओ ए, दुमओ ताकछेकयुडा माआङ, माआडलो निनामछेनओ इलाक असाहोक लिवो याआङा ।¹⁸देनालो इलाकओ दुम युनला लिकाबाचिओ निकि निसिनउला ए, मेन आनकान सेममाला तोककाबाचिओ निकि ना निनाममुओ साएराङ ए । ¹⁹देनालो छापतानचिनओ याआङ ,'अङका तायामिओ ताया फेनला मुलुतवोङा, नङ खारूछेकमिओ खारूञा असाहोक मुलुतवोङा।'²⁰तायामि खाडायाक? यङवानमि खाडा? ओको कपदोङओ मिनफाकमिन मुवो खाडा? दि निनाममुआ ओको हेन्खामाओ तायाञा निसिनवा मुलुतमा मानलि? ²¹देनादि मुन्टोङ निनाममुओ तायाओनसामि हेन्खामाआ निनाममुञा तायादाङका मानसिन, मोबेन रूमरङओ निसिनउलाङका मकतुम मुकाबाचिञा सेममाला मुमा निनाममुञा नुलोक लुवा।²²यहुदिचिआ सिन्छुङ मदोत, नङ ग्रिकचि तायाओ लामसुडा मयाआङ, ²³मेन आनकान लो इलाकडा लाकतानचिननिनओ निनामछेनओ रूमरङ मुइन्का, खोक्को यहुदिचिओ निकि साकबाय, का निरावाओ निकि निसिनउला याआङ।²⁴मेन मोचि बुतसान लिसाओचिओ निकि, मादे यहुदिचि लिने, मादे ग्रिकचि लिने, निनामछेन निनाममुओ साएराङ, का निनाममुओ ताया लिमानुयाक। ²⁵देनालो निनाममुओ निसिनउला मनाचिओ ताया चोङको मुलुमरङ याआङ, नङ निनाममुओ रूपरूयु मनाचिओ सावारु चोङलो साएराङमि याआङ।²⁶देनलो हेइ! निछाच्यो, खाना आमबुतसानञा मिनला मुवानुम, साएमपोक ओनसामि बदधेकापाङ रूङमुनुङवा, बदधेकापाङ तायामुलेन, नङ बदघेकपाङ इवाखिमयिञा बुतसान लिसाओ माननुङ। ²⁷मेन तायामुलेनञा नासुङडा मुलुतसिञा हेनखामाओ निसिनवा दुमचिञा छेन्तानिन, का साएराङमि दुमचिञा नासुङडा मुलुतसिञा निनाममुआ हेन्खामाओ रूपरूवा दुमचिञा छेन्तानिन।²⁸नङ निनाममुआ हेन्खामाओ ह्युनवा का पायोकवा दोकतानचिनओ याक्कचिञा, तामिन्नुप लिनियुङसाओ दुमचिञा असाहोक मुमेतमाओं निकि, लियाङसा मानलिसाओ याक्कचिञा रासानिन। ²⁹ओको ओलाक खाउङे साएमछामिआ निनाममुओ बुनेकडा माइस्वम मुमा मानतोकने लोवाकि ए।³⁰मेन खोनिनदाडका खानाचि निनामछेन देकमिडा लिसाओ अयाआङ, खोको आनकाओ निकि निनाममुङका ताओ ताया, सामयोमिकला, वाचोङउला का फाखालाम लिसानिनओ याआङ। ³¹देतनि छापतानचिनओ याआङ,' माइस्वम मुकाबाआ हाएसिडा हे माइस्वम मुने।'

2¹हेइ! निछाच्यो, मुनटोङ अङका खानाचिओया बानुङ, मोबेन दुम का तायाओ मुलुमरङलेनलाडा निनाममुओ रिपचि एनमेत्मा बानाओ माननुङाङ। ²देनालो अङकाआ खानाचिओ दुमडा देकमि निनामछेन का खोनिनञा इलाकडा लाकतुओ दुम लेटका निचि दिच मानसिन्तुओ लिमाङे दुमखुङमु चुवाओ याआङाङ।³नङ उङका रूपरूवा लिसाकि कुमाकातयाङसा का घिधुनलाडा खानाचि सुत्डा युङुङ। ⁴नङ अङइदुम का अडरूमरङ मनाओ तायाओ रापचालुवो दुमचिडा माआङ, मेन साकोङ नङ रङओपरङओ याखाङसाडा याआङा। ⁵हे खानाचिओ मकतुम मनाचिओ तायाडा माआङ, मेन निनाममुओ साएराङडा युङने।⁶मेनछाङ पासुङचिओ हुपडा आनकान तायाओ दुम मुइन्का। मेन ओको हेन्खामाओ ताया का ओको हेन्खामाओ युनला लिवो हाङमुयाङछाओ ताया माआङ, ⁷मेन आनकान निनाममुओ ताया कोपनिडा चेइन्का, तामिनतुप मोको कुम्साकि युङाओ ताया खाक्को निमाममुआ आनधिनुमसङओ निकि कपदोङकप चोडलो बुनेक ङे दोक्ताओ याआङा,⁸ओको हेन्खामाओ खाउङे छाङ हाङमुयाङछाचिआ लेनिन। देनालो मोकोचिआ लेसाओनिन ना धिनुमसङओ हाएसिञा इलाकडा लाकवोङे माननुङा। ⁹मेन देतनि छाप्तानचिनओ याआङ -'अमुकआ मानटोक्ताओ का नाबाकआ मानएनाओ , नङ मनाओ कोडरिङडा मानवाङदाताओ, उसओ खाउडे छाङ दुम निनाममाआ खोनिनञा, सोममुकामिचिओ निकि छुमचुम मुलुत्तानिनओ याआङ।'¹⁰मेन निनाममुआ आन्कानओ निकि साकोङदाङका मोचि यापुक्तु मुवानिनओ याआङ। देनालो साकोङआ झारादुम गङवा गङवा दुमचिञा लामसु मुमानुयाक। ¹¹देनादि हाङपाङडा लिसाओ साकोडआ मनाचिखपडा साङआ मनाचिओ दुमचि लेलुक कि ? मुइसाइया ङे निनाममुओ दुमचि निनाममुओ साकोडआ लेटका निचि साङआ छाङ सिननिन।¹²मेन निनाममुङका आनकानआ उलुङमातडा पुवानिनओ दुम सिन्तोमने लोवाकि आनकानआ हेन्खामाओ माआङ, मेन निनाममुङकाओ साकोङ तोकताओ याइनका । ¹³नङ खाक्को दुम छाङ चेइन्का, मोचि मनाओ तायाआ चिन्लुवाओ दुमचिडा माआङ, मेन साकोङआ चिनलुवानिनओ दुमचिडा साकोङमिक दुम साकोङसुत्डा ङे हाकङहा मुवाकि चेइन्का।¹⁴१४. हान पोकमिक मनाआ निनाममुओ साकोङओ दुम काङलेन मुनिन, देनादि मोकाचि मोसाओ निकि निसिनउला नुयाक, का मोसाआ मोचि तुपमा रूनिन, देनादि मोचि साकोङमिक सुमतुमआ खाचेतानचिनओ मलि। ¹⁵मेन साकोङमिक मनाआ झारादुमओ सुको मुलुक, मेन उहाङपाङलो खाउङे मनाङका खाचेत्तानचिनओ नुनिन। ¹⁶देनालो साङआ हाए‌सिओ कोङञा लेसुओ याआङ, का मोसाआ खोनिनञा चिन्लुमा रूयाक? मेन हान आनकान सुत्डा ना निनामछेनओ कोङ याआङ।

3¹नङ हेइ! निछाच्यो खानाचि सुत्डा साकोङमिकचि अकनिन चेवाइसा चेपमा ना माआङ, मेन पोकमिकचिसुत्डा, निनामछेनडा छाकेनछाचि ओटनि अङका चेप्मा रूउङ। ²अङकाआ खानाचिञा बितनुङे चामेतुङ। सुफुङ याक्क ना माआङ। देनादि खानाचि चामा रूनिन अयाआङा, हानतारि छाङ चामा अरूनिन,³देनालो खानाचि फाननु साएमपोकमिक अयाआङ। देनालो खाडातारि खानाचिडा आरिमिन का रङपुसुम याकयाङ, दि खानाचि पोकमिक का मनाओ सुडसेनडा बिवो अमानलि कि? ⁴देनादि मुन्टोङ अकपाङआ 'अङका ओलाक पावलओ', हाउसोआ 'अङकालो अप्पोलसओ', यिङ लो खानाचि पोकमिक मना अमानलि कि ? ⁵मोबेन अप्पोलस दिए? का पावल दि ए? उकताउकञा हाएसिआ पुवानिन इसा खाङसुमिचि मए, का खोक्कोङका खानाचिआ मकतुम अमुवा।⁶अङकाआ लित्तुङ अपोल्लसआ चाःवा पाक्तु, का निनाममुआ ओलाक पोयानिन। ⁷ओसुन्दुम मानना लितकाबा दिच ए, मान चाःवा पाकवो, पोन्वो निनाममुङे लिमानुयाक।⁸हान आनकान लित्वो का चाःवा पाकवो अकटेटडे ऐन्का। मेन उकताउकआ आनआनओ मुयुला ओन्सामि आनआनओ उनमाला मतोकवोङ। ⁹९देनालो आनकान निनाममुओ युकमुकामि ऐन्का, खानाचि निनाममुओ बेङसिखा का निनाममुङका मेतलेन लिसाओ खिम अए।¹⁰पुवाङओ निनाममुओ नुनुतछोङ ओन्सामि अकपाङ तायामुलेन खिम मेत्काबा बुसिवाआ देतनि अङकाआ योकलाङ युङसुङ, नङ हाउसोआ मोधानि मेत्याङसा खात। मेन उकताउक मनाआ स्वमलेन पुने, उहाङपाङआ मोसाडा खाइसाकिया मेत्याङसा खाट। ¹¹देनालो युङसानचिनओ योकलाङ लेटका, खोको निनामछेन देकिमिङे लिमानुयाक, खाउङे मनाआ हाउसो योकलाङ युङमा रूनिन।¹²मन ओको धाधारङ धानि साङआ हाराक्वा, रूपावा, धिएइमालुङ ,सङ, सितचा, रूसोओ खिममेत लो । ¹³उकताउक मनाओ वक खाङमुखाङ लिवोङ। मोको मिडाडङे यापुक्तु लिवो लिसाओ लिहिडा मोकोङे लेनआ मोसाञा लोवोङ, का उकताउक मनाओ वक खासओ माइओ याछा, लोवो मिआङे सिनलेखा पुवोङ।¹⁴मोधानि मेत्ताओ खाउङे मनाचिओ वक लोमान्टका युङालो मोसाआ छुकसिवा तोकवोङ। ¹⁵साङओ ओक लेराकि युनला लिसालो मोसाआ मायाक्सा थाआङमा डोट। मेन मोहाङपाङ ओलाक मिडाङका लोन्ताकि लेइसा इसा लेवोङ।¹⁶खानाचि निनाममुओ माङखिम अए, नङ निनाममुओ साकोङ खानाचिडा याकमानुयाक लोवो दि खानाचिञा सिन्ला माननुङ । ¹⁷साडआ निनाममुओ माङखिमञा युन्ला मुलुक लो. निनाममुआ मोसाञा युन्ला मुमालिवोङ देनालो निनाममुओ माङखिम वाचोङ याआङ खाक्को खानाचिङे अए।¹⁸साडआ छाङ हाङपाङञा लुलेन मानछाकछेनदाने, खानाचिखपडा साङआ ओको हेन्खामाडा उहाङपाङञा तायामुलेन मित्याक लो मोको बोयोङ लिने का मोको तायामुलेन लिवोङ। ¹⁹देनालो हेन्खामाओ ताया निनाममुओ बुनेकडा निसिनउला ए। देनादि छाप्तानचिनओ याआङ, 'खोनिनआ तायामुलेनवाचित्रा मोकोचिओ लुलेनयुडा ककमानुयाक।' ²⁰नङ लादेङ 'हाएसिआ तायामुलेनवाचिओ मिनफाकमिन सोज्जेओ मए लोनि लेमानुयाक।'²¹मनाचिडा साङआछे माइस्वम मानमुने। देनालो झारायाम्तोक खानाचिओङे मए। ²²मादे पावल, हे एपोलल्स, हे केफास, हेना हेन्खामा, हे अयाम, हे सुवालोङ, हे आइदुमुओ, यामतोकचि, हे मायुङदुमुओ दुमचि झारा खानाचिओ मए। ²³नङ खानाचि निनामछेनओ अए, का निनामछेन‌ ओलाक निनाममुओ लिमानुयाक।

4¹उइसाकिया मनाचिआ आनकानञा निनामछेनओ याङसुमिचि का निनाममुओ रिपचिओ मुसाममुमि मितने। ²हान, निचि दुम लेटका मुसाममुचिडा ङे मना मकतुमि तोकतिन्ने लोवो चाखालिसाओ याआङ।³मेन खानाचिङका हेना मनाचिओ सान्नोसान ओन्सामि उङदुमसेङला लिमा ओको ना अङकाओ निकि धिचुप्पो दुम याआङ, अङका अङहाङपाङ छाङ आनओ साननोसान मुनुङा। ⁴देनादि अङका आनओङे उसादकडा दिच छाङ लेनुङा मेनछाङ ओकोडा अङका साम्योकमि दोकनुङा, मेन अङसाननोसान मुवो हाएसि ङे लिमानुयाक।⁵ओसुन्दुम हाएसि मानताइन्लोक मुयाकला बुसिङे दिच दुमओ दुमखुङ मानमुदानुम। खोनिनआ खाचङडा इप्ताओ दुमचिञा ओपरङओपडा खाटमा लिवोङ, का कोङरिङओ यायोक यापुक्तु मुमा लिवोङ, मोबेन उकताउक मनाआ निनाममुङका यानिमसङ तोकवोङ।⁶हेइ! निछाच्यो ! अङकाआ मोचिदुम खानाचिओ निकि अङका अङहाङपाङ का अपोल्लसओ छापछोङडा फस्याओ युपाडा पुवाओ याक्डा, हे छापतानचिनओ दुम चोङलो बद्धे मुमानुनिन लोवो खानाचिआ आनकानकाङका चिन्तानुम, का खानाचिखपडा खाउले छाङ अकपाङ निचिओ उसादाकडा धुनतिमआ मानचोनदामा। ⁷देनालो खानाञा साङआ खापचुप कि ? खानाआ मान्तोकताओ दि याआङ कि ? मेन खानाआ तोक्ताओ अयाआङ लो, मोको मान्तोकता इसामुनि देना माइस्वमआ अचोन्लुक ?⁸खाना ना पाक्चा लिनिचियाओ अयाआङ, खानाचि लुङलि लिनिचियाओ अयाआङ, मेन खानाचिआ हाङमुयाङ मुवाओनिन लिवो याआडा, का आनकान छाङ खानाचि सुत्डा हाङमुयाङ मुवाओनिन ना लिसाङा, का आनकानछाङ खानाचि सुत्डाडे हाडमुयाङ मुवो याइन । ⁹देनालो अङका मिनला मुलुकङा, निनाममुआ आनकान लोहोनिमिचिञा सुवालोङओ निकि मेकसन तोक्ताओचिआ वातनि झारा चोङलो देङसि याखाङसा मुमेतानिनओ याआङ, देनादि आनकान हेन्खामाडा सारूङकेन्छाचि का मनाचिओ निकि खाचोपला लिसाओ याइन्का।¹⁰आनकान निनामछेनओ निकि बोयोङ लिसाओ याइन्का ,मेन खानाचि निनामछेनडा तायामुलेन मेत्ताओ अयाआङ। आनकान रूपरूवा याइन्का, मेन खानाचि सावामि अयाआङ, खानाचिओ यानुमसङ याआङ, मेन आन्काओ मिनअत। ¹¹ओको वाइदातारि छाङ आनकान मानचा का वामितवा हवाडे याइन्का, नङ सकलुकपा याइन्का, कापम चायाइन्का, का खिममायाकओ याइन्का,¹²आनओ छुकआ ओकमुवाकि मुयुला मुयाइन्का, हेन्वा तोकहिडा सायोकदुम पुइन्का, ठिनसुरि लिहिडा आनकान आङइन्का। ¹³उतनुङ लिहिडा, ताछुकफेङला मुइन्का, हान्देतारि आनकान हेन्खामाडा योङछुवा का झारायाम्तोकओ गोन्द्रा मेत्ताओ याइन्का।¹⁴खानाचिञा नासुङडा डोटमाञा ना माआङ, मेन अडङसोमपोवा छाचिआ देतनि सालामयङ पुसिञा अङका ओचि दुम छापङा। ¹⁵देनादि निनामछेनडा खानाचिओ पौहिभुङकि सानदिवाचि मलिसा मेन्छाङ खानाचिओ बद्धेका पापाचि ना माननुङ, देनालो नुयुडखान दाङका अङकाआ खानाचिञा निनामछेन देकमिडा पुक्तुङ। ¹⁶ओसुन्दुम अङका खानाचिञा ताछुकफेङदोनि सोम्फोङला मुलुकङा, खानाचि अङखाङचिनवा मुकाबाचि लिसानुम।¹⁷ओसुन्दुम अङकाआ खानाचिओया तिमोथिञा छुत्ताओ याकङा, मोचि हाएसिडा अङसोमपोवा मक्तुमि सावाछा मए। अङकाआ झारा खामडा, झारा रिमिडा चिन्लुवा ओन्सामि निनामछेनडा लिसाओ अङचालाङवा मोचिआ खानाचिञा मुकसिन मचुमेतवोङ। ¹⁸अडका खानाचिओया तासामान्तावो देतनि मुनि खाउङे ना धुनतिमआ चोन्ताओ मयाआङ निमाङ।¹⁹मेन हाए‌सिओ मिनमासा लिसालो अङका खानाचिओया चकनि बान्वोङा, नङ धुनतिमआ चोन्ताओचिओ दुमओ माआङ, मेन साएराङओ ओलाक सिन्ला तोकवोङा। ²⁰देनालो निनाममुओ हाडहोन दुमडा माआङ, मेन साएराङडा याआङ। ²¹खानाचि दि राका तमुयाक? अङका खानाचिओया तोमफुक तारूकि बानुम, हे स्वोम का नुऔलाओ साकोङडा?

5¹खानाचिओ हुपडा राकयाङला याआङ लोवो दुम्छुयुक एनियान, नङ उसओ राकयाङला खाक्को निरावाचिडा छाङ नुनिन, हे खानाचिडा अकपाङआ चिपापाओ दाप्यामा युङसाओ याआङ निमाङ। ²उसओ वक मुकाबा खानाचिङका यासोरिनने, लोवाकि खानाचिआ मिनराक ना अमानमु, मेन खानाचि फाननु माइस्वमआ चोन्ताओ अयाआङ।³देनालो पोकडा मानतायाकता, मेन साकोङडा ओलाक तायाकता लिसा ओटनि मुनि उसओ वक मुकाबाओ सान्नोसान अङकाआ मुनिचियाओ याकङा। ⁴आनहाएसि देकमि निनामछेनओ साएराङ आनहाए‌सि देकमि निनामछेनओ नुङडा खानाचिओ, का अङकाओ साकोङ सुत्डा झाराझुम लिहिडा, ⁵उसओ मनाआ पोकओ युनलाओ निकि सुलावाओया पुविनने, का हाएसि येशुओ लेनडा उसाकोडआ ओलाक कपलेनकप तोकने।⁶खानाचिआ माइस्वम मुमा नुलोक माआङ। उनछुपलो बोपखाआ झारा वोपसिञा वोपखाइ मेतनिलेयाक लोवो दि खानाचिञा सिनला माननुङ ? ⁷आसुङ वोपखाञा लात्तानुम, का खानाचि मायाक वोपखाओ लिसा वातनि नुडवा वोपसि लिसानुम। देनालो आनसेमलायोक साकेओ हेन्खुवा लिनिचियाओ याआङ, खोक्को निनामछेन लिमानुयाक। ⁸ओसुन्दुम आनकान मानना आसुङ बोपखाआ, मान सुवकआ का उवाकलाओ वोपखाआ, मेन एङलामात का नुच्चुङउलाओ वोपखामात पेम्पाकआ साके नुवालोक्तोमने।⁹अङकाआ उङछापलाडा खानाचित्रा राक्याङवाचिओ निन्ता मानमुदामा, लोवाकि छापतुओ याआङाङ। ¹⁰ओको माआङ, हे ओको हेन्खामाओ राक्याङवाचि, हेना रापचालमिचि, हेना फेम्काबाचि, हेना सेमफोक बुबकाबाचि सुत्डा वोपलाटङे निन्ता मानमुदामा, माआङलो खानाचि हेन्खामाडाङका लोननि खातमा डोट।¹¹मेन हान अङका खानाचित्ञा मोसाओ निन्ता मानमुदामा लोवाकि छापडा, खोक्को निछाक दारावाकि राक्याङवा, हेना रापचालमि, हेना सेम्फोक बुबमि, हेना हेन्वो हे सेतकाबा, हेना फेम्काबा नुयाक, मुसओ मनासुत्डा ना चासाङे मानचासानुम। ¹²देनादि हुइयापाचिओ सान्नोसान मुमा अङकात्ञा दि चाखाम? दि खानाचि हुड्डाओचिओ सान्नोसान मुनिन ? ¹³मेन हुड्यापाचिओ सान्नोसान निनाममुआ ङे मुमानुयाक। खानाचिआ खानाचिओ हुपडाङका उवाक मनाञा यासोरानुम।

6¹दि खानाचिखपडा खाउडेआ निचि साङओ उसादाकड़ा दिच याक्क डोरालो सान्नोसानओ निकि मोसाआ सेङहाङछाचिओया मानखाराकि हआदोङमिचिओ बुसित दुमसेङखाडा खातवो सापसा अमुयाक? ²सेङङहाङचिआ ङे हेन्खामाओ साननोसान मचुलुक लोवो खानाचिञा सिन्ला माननुङ? हेन्खामाओ सान्नोसान खानाचिङका नुयाक लो चुुप्पो चोङलो चुप्पो दुमओ सान्नोसान दि खानाचि मुसि मुरूअत अयाआङ कि? ³आनकान सारूङकेनछाओ सान्नोसान मुवोम्का लोवो दि खानाचिआ सिन्ला मान्ननुङ ? ओको अयाम वेतनातमिक दुमडा फान्नु देम उनखामा लिसुने?⁴ओको अयाम छापछोङमिक दुमओ सान्नोसान मुमायाक लो दि रिमिखाडा दिच मिनला मानलिसाओचिञा साननोसान मुसि कावाङसाङ अमुयाक? ⁵खानाचिञा नासुङडा मुलुतसिञा अङका ओको लोलुकङ, आनओ बुबुनिछाओ हुपओ खियुमा तोङमा रूवो उसओ खारूछेक मना दि नुच्चुङ खानाचिडा साङ छाङ तोकतिमिन? ⁶मेन दकछानिछाओ अकनिनडा दुमसेङखिमडा खातवो का मोको छाङ मक्तुम मानमुवोचिओ बुनेकडा?⁷हान अकपाङ धानि निचिओ खियुमा लिमा ओको खानाचिओ धिअतमु ए। हेनाक सानउत देना मानआङदामा? माआङलो देना रूङचानसिनकि ङे मानयुङदामा? ⁸माआङ मेन खानाचिडे सानउत अमुलुक, का अरूङचालुक मोको छाङ खोनङछाचिञा ।⁹हआदोङमिचि निनाममुओ हाङहोनओ पाङमि नुनिन लोवो दि खानाचिञा सिन्ला माननुङ ? मानरूङचासानुम । राकयाङमिचि, सेमफोकबुबमिचि, कामुकि मुकाबाचि, चिरूप्पाचि, राकयाङमाचि, ¹⁰खुसावाचि, रापचालमिचि, सेतकाबाचि, हेन्युकाबावि ङापकाबाचि निनामुओ हाङहोनओ पाङमि लिवोनिन । ¹¹नङ खानाचिडा साङ साङ उसओङे मयाआडा, मेन हाएसि देकमि निनामछेओ नुङडा का आननिनाममुओ साकोङआ खानाचि वालेकतानचिनओ, वाचोङ लिसाओ का सामयोकमि दोक्तानचिनओ अयाआङ।¹²झारा यामतोक अङकाओं निकि सान्नोलकयि मयाआङ, मेन झारा यामतोक दुकनुवाओ निकि ममाननुङ। झारा यामतोक अङकाओ निकि साननोलकयिङे मयाआङ, मेन अङका साङनुछे कोपरूङडा डोटवो याकनुङा। ¹³चामासेसि बुकओ निकि, का बुक चामासेसिओ निकि, मेन निनाममुआ ओको छाङ का मोको छाङ असाहोक मुलुतमा लिवोङ। मेन साएमपोक राकयाङलाओ निकि माआङ, मेन हाए‌सिओ निकि नङ हाए‌सि साएमपोकओ निकि।¹⁴निनाममुआ हाए‌सिञा हङत्तानचिननिन का आनओ साएरङआ आनकानञा छाङ हङनुमा लिवोङ। ¹⁵खानाचिओ साएमपोक निनामछेनओ पोकयाम मए लोवो दि खानाचिञा सिन्ला माननुङ? ना दि अङका निनामछेनओ पोकयाम लोकतुकि मोचिआ माचोमओ पोकयाम मेत्तुम? मुइसा मानलिने।¹⁶राकयाङमा सुत्डा मोमहोनवो मोको सुत्डा अकटेट पोकओ नुयाक, लोवो दि खानाचिञा सिनला माननुङ? देनादि खोनिन यिङमा नुयाक, हे मोचि हवाडे अकटेट पोकओ मलिवोङ। ¹⁷मेन खोक्को हाएसि सुत्डा तोङ मोको अकटेट साकोङओ मेतलुक।¹⁸राकयाङलाङका माङखा युङानुम। निचि खाक्कोनुछे हआदोङ खोक्को मनाआ चुलुक, मोको साएमपोक डाङका हुड्या नुयाक, मेन राकायाङला मुवोआ आनओङे साएमपोकओ उसादाकडा हुमुकवा चुलुक।¹⁹खानाचिओ साएमपोक खानाचिडा लिसाओ वाचोङ साकोङओ माङखिम ए, खाक्को निनाममुङका खानाचिआ तोकताओ अयाआङ लोवो दि खानाचिञा सिन्ला माननुङ? नङ खानाचि आमहाडपाङ ना आनओडङे अमाआङ। ²⁰देनालो खानाचि स्वङखित छोन्ताकि खित्तानचिनओ अए, ओसुन्दुम आनओ साएमपोकडा निनाममुओ घिनुमसङ मुवानुम।

7¹हान खानाचिआ छाप्ताओ दुमचिओ छापछोङडा ओलाक सोरोछाआ मारिछाञा माननोपदामा डे नुलोक ए। ²मेन बदधेङे राक्याङला लिसाओआ उकताउक मनाओ चितायामा लिने।³सायापाआ तायामा सुत्दा मुमायाक सुङसेन मुने, नङ मुइसाकिया ङे तायामाआ छाङ सायापासुन्डा। ⁴तायामाओ उसाएमपोकडा दिच कोपरूङ नुनिन, मेन सायापाओ नुयाक, मुइसाकियाङे सायापाओ छाङ उपोकधानि दिच कोपरू नुनिन, मेन तायामाओ नुयाक।⁵सोम्फोङलाओ निकि खानाचिआ कानमाला तोकसिञा का लादेङ अकनिन लिमाञा हाङपोहाङओ युक्यामिनलाआ उन्तोम मुयाकलाओ निकि लेटका, अकआ हाउसोञा बुङछुनला मानमुदानुम, हे खानाचिओ अत्साएअमानरआ मुहिडा सुलावाआ खानाचिओ सुको मानमुने । ⁶ओको अङका खानाचिञा इङइवाओ युपाडा माआङ, मेन देडहुतवारिओ युपाडा यिङा। ⁷मेन झारा मना अङका ओटनिङे मलिने लोवो अङका मिनमासा मुङा। मेनछाङ उकताउक मनाडा निनाममुङका आनआनओ इछुकसिवा याआङ, अकपाङआ ओकोमाइओ, हाउसोआ मोकोमाइओ ।⁸मेन काम्मुतसाङ का साएसाममिचिञा अङका लोङा खानाचि उङखुवातनि लिसाकि मयुङा मोकोचिओ निकि नुलोक लिवोङ । ⁹मेन हाङपाङआ छुककोङडा युङमा रूनिन लोना मोकोचिआ सायाकाम्मु मचुने, देनालो युकछुमिआ लेत्मा चोङलो सायाकाम्मु मुमा नुलोक ए।¹⁰हान सायाकाम्मु मुकाबाचिञा अङका छाक्को इङइवा पुङा, अङकाआ माआङ, हाएसिआ पुमानुयाक, हे तायामा सायापाङका हासाकि मानयुङने। ¹¹मेन हासाकि युङालो मोसाआ याकाम्मु मानमुनि युङने, हेना सायापासुत्डा नुतोङमासिडा युङने, नङ सायापाआ तायामाञा मानछितने।¹²मेन खाना दकयाकञा अङका लोलुकङा हाएसिआ माआङ, खाउङे छुक्काफेकमिओ मकतुम मान्मुवो तायामा याआङ, का ओको उसुत्दा युङमा चाखालि लो खोकोआ मोसाआ मानलेटने। ¹³नङ खोक्को छामिन्माओ मकतुम मानमुवो सायापा याआङ लो मोकोआ उसायापाञा मानलेटने। ¹⁴देनालो मकतुम मान्मुवो सायापा, तायामाडा वाचोङ नुयाक, का मकतुम मानमुवो तायामा छुक्काफेकमि सायापाडा सेङवा नुवाक, माआङलो ना आमछायाङछाचि असेङअत ङे लिवो मयाआडा, मेन उसओ लिसाओआ मोचि वाचोङ मलि।¹⁵मेनछाङ मकतुम मानमुवो ओलाक हासिन लो, महासने, उसओ यामामुडा मोको मुकतुमि सायापा हेना तायामा खाउङे खेखुपडा युङवोनिन। मेन निनाममुआ आनकानआ तोङमुतोङडा बुत्तानिनओ याआङ। ¹⁶खानाआ आमसायापाञा देमतारि लेइवो ए, हेइ! छामिन्मा खाना ओको खाइसाकिया तलेलुक? हेना खानाआ आमतायामाञा देमतारि डेकवो ए, हेइ! दुकपाछा खाना ओको खाइसाकिया तलेलुक?¹⁷मेन खाइसाकिया हाए‌सिआ उकताउक मनाञा आनओ आनओ हाकला पाकनि पुवानिनओ याआङ, का देतनि निनाममुआ बुत्तानिनओ याआङ ,मुइसाकिया ओन मोको बिने। नङ इरिमिचिडा अङका उसओङे इङइवा पुङा। ¹⁸दि खाउङे मना पोकनिखेनला लिसा नेतलोक बुतसान लिसाओ याआङ? मुइसा लो मोको पोकनिखेनमातओ मानलिने। दि साङ पोकनिखेनला मानलियाङसा बुतसान लिसाओ याआङ, मोको पोकनिखेन मानलिने। ¹⁹निनाममुओ इङइवा काङलेन मुमा लेटका पोकनिखेनला दिचछाङ माआङ।²⁰खाक्को यामामुडा मोको बुतसान लिसाओ याआङ, मोकोडाङे उकताउक मना युङनियुङने। ²¹दि चोकरिछाओ यामामुडा खाना बुतसान लिसाओ तयाआङ? मोसाओ निकि स्वावा मानमुए, मेन खाना सायानुलेन लिमा तरू लो हेनाक सुकधिइ मानमासुदे। ²²देनालो चोकरिछा लिदोनि खोक्को हाए‌सिडा बुतसान नुयाक, मोको हाए‌सिओ खायोङछाप लिसाओ मना ए। ²³स्वङखित छोन्तुकि खानाचि इन्तानचिनओ मए। मनाचिओ चोकरिछा मानलिदामा। ²⁴हेइ! निछाच्यो खाक्को यामामुडा उकताउक मना बुतसान लिसाओ याआङ, मोको मोसाडाङे निनाममुसुत्डा युङनियुङने ।²⁵साएङमिचिओ छापछोङडा हाए‌सिओ इङइवा उङका सुत्डा दिच्छाङ माननुङ, मेन मकतुममुरू लिमाञा हाएसिङका पुनोत तोक्ता इसा अङका आनओ यायोकला पुङा । ²⁶आइदुमुओ यातुकलाआ मुहिडा मना ओटनि याआङ मुसओडे मयुङा नुलोक लिसुने, लोवो अडका मिनला मुलुकङा।²⁷दि खाना याकाम्मुओ खेखुपडा डोटटाओ तयाआङ? मुइसा लो सायानुलेन लिमा मानलाम्दे। दि खाना काम्मुओ खेखुपडाङका खायोङसाङ तयाआङ? मुइसालो सायाकाम्सुमा मानसुङदे। ²⁸मेन खानाआ सायाकाम्पु तमुवालो छाङ हुमुकवा मुवाओ तनुनिन, साएङछेकुत्माआ सायाकाम्मु मुवाओडा हुमुकवा चुनिन। मेनछाङ उसओचिञा साएमपोकडा तुकला लिवोङ, का अडङका खानाचिञा रातमा चाखालिङा।²⁹मेन हेइ! निछाच्यो, अङका ओको लोलुकङा, हे मुयाकला ओन्तोम लिसाओ याआङ, का हानडक्यातनि तायामा लिसाओ मनाचि तायामा लिसाङे मानलिसाओचि ओटनि मलिने। ³⁰खाप्वोचि मानखाप्काबाचि ओटनि, सावलेतकावाचि सावालेत मानमुकाबा ओटनि मलिने, ³¹नङ ओको हेनखामाओ सुलाम्देमुडा बिवोचि मानबिकामिचि ओटनि मलिने, देनालो ओको हेन्खामाओ युपा खालेत्ताकि खात्याङ।³²मेन खानाचि झारा स्वमफेनमात लिसानुम, लोवो अङका चाखालिङा । सायाकाममु मानलिसाओआ अङका हाएसिञा खाइसाकिया छेमा युङसुम लोवो हाएसिओ ङे दुमओ छापछोडडा स्वमफेन चुलुक। ³³मेन सायाकाम्मु लिसाओआ अङका तायामाञा खाइसाकिया छेमा युङसुम लोवाकि हेन्खामाओ दुमओ स्वमफेन चुलुक। ³⁴सायाकाममु लिसाओ का साएङमिचिडा नियाकला याआङ। सायाकाम्मु मानलिसाओआ अङका साएमपोक का साकोङडा वाचोङ युङुम लोवाकि हाएसिओ दुमओ छापछोङडा मिनराक चुलुक, मेन सायाकाममु लिसाओआ खाइसाकिया, आन्ओ सायापाञा वाया युङसुम लोवाकि हेन्खामाओ दुमओ मिनराक चुलुक ।³⁵नङ अङका ओको खानाचिञा लाकचकमाञा ना माआङ, मेन सालेनसानओ निकि, का साकबाय मायाक हाएसिओ सानुवासाम मुमा रूवानुम लोवाकि खानाचिओ आनओङे दुकनुवाओ निकि लोलुकङा ।³⁶सायाकाम्मु मानलिसाओ मेछाछालिपा सालेनसानओ सुङसेन मुवाओ माननुङ लोवो खाउडे मनाआ मित्याक का मोसाओ फानटासि छाङ लिनिचियाओ याआङ, का सायाकाममु मुमा चाखाम याआङ लो मोसाआ खोकोञा मुइसा मुमा पुने, तामिन्तुप मोकोचिआ सायाकाम्मु मुमा पुने। मोसाञा हआदोङ लुनिन। ³⁷मेन खोक्कोआ कोडरिङडा नुअछङ मुलुक, नङ खोसाआ चाखाम छाङ माननुङ, का आनओ राकाओन्सामि युङमा रूवो सापसा याआङ, का आनओ मेछाछाआ साएङमि ङे युङमा आनओ कोङडा अछङ मुवाओ याआङ लो मोसाआ नुलोकङे मुलुक। ³⁸उइसाकिया खोक्कोआ आनओ साएङमिओ सायाकाममु मुनिपुयाक खोकोआ नुलोकङे मुलुक, का याकाम्मु मुनि पुवोआ ना फान्नु नुलोक मुलुक।³⁹लेइन्लोक तायामा सायापाओ खेखुपडा युङयाक, मेन सायापा मसुवा नेतलोक ओलाक मोसाआ खोक्कोञा राका मुयाक, मोको सुत्डा सायाकाम्मु मुमा नुसायालेन नुयाक, मेन हाएसिडा ओन। ⁴⁰मेन उङमिनलाडा मोको मुसओडे युङ लो फाननु छियामि नुयाक ,नङ अङका मित्डा हे अङकाडा छाङ निनाममुओ साकोङ लिमानुयाक।

8¹हान वोपताङचिओ बुबफेनओ छापछोङडा ओलाक आनकान लेसइन्का, हे आनकान झाराञा ओकोओ ताया याकयाङ। तायाआ माइस्वम पोन्, मेन सोमआ पोनुनोत मुमेत। ²अङकाआ दिच लेसुओ याक्ङा, लोनि साङआ मित्याक लो मेत्लो लेमायाक मोसाआ फाननु दिच्छाङ लेसुओ नुनिन। ³मेन साङआ निनाममुञा सोम मुलुक लो मोको खोनिन दाङका सिन्तानचिनओ नुयाक।⁴ओसुन्दुम वोपताङचिओ बुबफेन चावो छापछोङडा ओलाक, आनकान लेसइन्का, हे हेन्खामाडा वोपताङ दिच याक्क माआङ, का अक लेटका हाउसो निनाममु माननुङ। ⁵देनालो बद्धेका माङचि का बद्घेका नामसोङमिचि मलिसा, ओटनि मादे नामकुडुडा, मादे हेन्खामाडा माङ दारावाओ ना मयाआङ। ⁶मेनछाङ आन्काओ निकि ना निनाममु अकटेटङे लिमानुयाक, तामिन्तुप पापा, खोक्कोओ झारा याम्तोकचि मए, का आनकान खोनिनओङे ऐन्का, नङ अकटेटडे हाए‌सि देकमि निनामछेन खोक्कोङका झारा याम्तोकचि लिसाओ मयाआङ, का आनकान छाङ खोनिन दाङकाङे लिसाओ ऐन्का।⁷मेनछाङ झारा मनाडा ओको ताया नुनिन, मेन मोकोचिआ फाननु तारि वोपताङचिओ चालाङवा युङाओआ खाउ खाउङेआ वोपताडवो बुबफेनञा बुकफेन मितनि मचा, नङ मोकोचिओ इन्दु रूपरूवा लिहिडा हुकमाङलिनि मलेयाक।⁸मेन चामासेसिआ आनकानञा निनाममुलिप्पा खाउङे दुकनुवा नुनिन। मानचासाकि चुप्पाङ नुनिन, नङ चासुकि टोप्पाङ नुनिन। ⁹मेन चानचुप, खानाचिओ ओको सायानुलेनलाआ रूपरूवाचिञा साकबाय मानमेतने। ¹⁰देनालो खाना लेकाबा सिन्काआ वोपताङओ खिमडा चामा युङनियुङसाओ खाउङे मनाआ टोक्ता लो, का मोको रूपरूवा मना याआङ लो दि मोसाओ इन्दु वोपताङओ बुबफेन चासिञा सापनिन कि?¹¹देनादि रूपरूवा निछा खोक्कोओ निकि निनामछे सुवानिन, आमतायाआ मुहिडा युन्ला नुयाक। ¹²हान उइसाकिया निछाकचिओ उसादाकडा हुमुकवा मुहिडा का मोकोचिओ रूपरूवा इन्दुञा खेन्वाट पाकहिडा खानाचि निनामछेनओ उसादाकडा हुमुकवा अचुलुक। ¹³ओसुन्दुम चामासेसिआ अङनिछाञा साकबाय मुलुत लो अङका आनओ निछाकञा साकबाय मानमुलुतदामाञा देम्खाछाङ सा चावोनुङा।

9¹दि अङका सायानुलेन याकनुङा? दि अङका लोहोनमि मानएदोङ? दि अङकाआ देकमि आनहाएसिञा टोक्तुओ मानयाकदोङ? दिहाए‌सिडा खानाचि अङछुकओ वक अमाआङ? ²अङका निचिओ निकि लोहोनमि मानलिसु छाङ ओन्तोमत्तोम खानाचिओ निकि ना एव, देनालो अङकाओ लोहोनमिनओ थेपसुवा ना हाएसिडा खानाचिङे अए।³खाचेचताङमिचिञा अङकाओ ओकोङे लायङ याआङ। ⁴दि आनकानञा चावो का दुङवो कोपरू माननुङ। ⁵दि निचि लोहोनमिचि हाएसिओ निछाचि का केफासञा ओटनि आनकानञा छाङ छुक्काफेकमि तायामा लोकतुकि बिमाञा कोपरू माननुङ कि? ⁶हे दि अङका का वर्णावासञा ओन वकडाडका नियाक युङवो कोपरू माननुङ?⁷खाउङे टाङकारूङआ देम्खाछाङ आन्ओ याङयाडा हाङमुचा मुलुक कि? साङआ यमसि मुसामसङ पाक्तुकि मोसाओ सिवा चानिन? हेना साङआ सामुवाओ रूहुप केन्तुकि मोसाओ बित्नु दुङनिन? ⁸दि मनाआ चेवा ओटनि अङका ओचि दुम चेपडा? हेना दि खापलाआ छाङ ओकोङे दुम लोनिन का?⁹देनालो वाछाप्पाओ खापलाडा छाप्तानचिनओ याआङ, चानुकमुवारि मुवो पित्मुत्रा डोखेङ मानपाकदे। दि पित्मुचिओ छापछोङडा ओन निनाममुआ मिनराक मुमानु? ¹⁰दि खोनिनआ आनकाओ निकि उसओ लोमानुयाक? आनकानओडे निकि ना उसओ छापतानचिनओ ए, देनादि बोककाबाआ यामित्याडा बोकमाडोट का चासुम धामकाबाआ हाकला तोकवो यामित्याडा धातमा, डोट। ¹¹खोनालो आनकानआ खानाचिओ निकि साकोङमिक यामतोकचि वेतनि पुवाओ याइन्का, लो खानाचिओ हेन्खामिक चासुम हेकमा टोप्पो दुम ए कि?¹²निचिआ खानाचि धानिओ ओको कोपरू लोकमा युक्याहाकमि मलि लो आनकानञा फान्नु दि बद्धेका कोपरू माननुङ? मेनछाङ आनकानआ ओको कोपरूओ याङमालाम मुइमिन, मेन निनामछेनओ यङखानडा साकबाय मानमुलुत्तोमने लोवाकि आनकान दुम आङतोम्का। ¹³दि खानाञा सिनला माननुङ, हे माङखिमडा वक मुकाबाचिआ माङखिमओ यामतोक डाङका मचा, का बुबदुलुङओ रोपधामकावाचिआ हेन्खुवा डाङका हाकला मलोक? ¹⁴मुइसाकिया डे नुयडखान एनमेत्वोचिआ छाङ नुयङखान डाङकाडे मुचाका याङमा लोनि हाएसिआ इङइवा पुवानिनओ याआङ।¹⁵मेन ओकोचि दुमचिखपडा अङकाआ खाउङेओ याङमालाम मुवाओ याकनुडा, नङ अङकाओ निकि उसओङे लिने लोवाकि अङकाआ ओकोचि दुम छाप्तुओ मानएदोङ, देनालो साङआ उङमाइस्वम सोज्जे दोकमा चोङलो हेनाक उङकाओ निकि सुमा अङकाञा नुलोक याआङ। ¹⁶देनालो अङकाआ नुयुङखान एनमेतुङ लो अङकाञा माइस्वम मुयायाक दिचछाङ मान्नुङ, देनादि अङकाआ हियुकङे काराओ याआङ, देनादि नुयङखान मानएनदोङ लो ना अङकाञा नङफिसा याआङ।¹⁷नुवानुवानआ अङका ओको ओक मुङा लो अङकाञा उनमाला याआङ मेन अङकाओ नुवानुवानआ माआङ लोना अकटेट टोप्पो टाङखुनला रिपेन्ताङचिनओ याआङ । ¹⁸मुइसा लो हान उङउनमाला दि ए ना? नुयङखानडा लिसाओ पाङओ लाटला याङमालाम मानमुदामाञा नुयङखान एनमेतहिडा अङका नुयङखानञा उलुङ मायाकओ मेतमारूम।¹⁹देनालो झारा मनाचिङका सायानुलेन मलिसा मेन्छाङ फाननु बद्धेङे छुकलोक्तुम लोवाकि अङकाआ अङहाङपाङञा झाराओ खेखुपडा मुलुत्तुङ। ²⁰नङ यहुदिचिञा छुलोक्तुम लोवाकि अङका यहुदिचिखपडा यहुदिइसा लिसुङ, खापलाओ छुककोङलाडा लिसाओचिओ निकि खापलाओ छुककोङलाडा लिसाओ ओटनि अङका लिसुङ।²¹खापलाओ छुककोङडा मानलिसाओचिञा छुकलोकमाञा निनाममुओ छुककोङलाडा मानलिदोनि मेन निनामछेको खापलाओ छुककोङडा लिसाकि खापलाओ छुककोडलाडा मानलिसाओ निकि अङका खापलाडा मानलिसाओ ओटनि लिसुङ। ²²रूपरूवाचित्रा छुकलोक्तुम लोवाकि रूपरूवाचिओ निकि अङका रूपरुवा ङे लिसुङ। खाउडे माइआ साङ साङमा लेइनिलेउम लोवाकि झाराओ निकि अङका झारा याक्क लिसुङ। ²³नङ अङका खोसाओ युक्याहाकमि लिसुम लोवाकि नुयङखानओ निकि झारा यामतोक मुलुकङा।²⁴दि खानाचिञा सिनला मान्नुङ, लोत्सुडा लोतकाबाचि झारा मलोत, उनमाला अकपाङआ ओन तोक? मुइसाकिया ङे लोरानुम, का उनमाला तोक्तानुम। ²⁵नङ सेलाडा यातोङवो उकताउक मनाचि झारा छापछोङडा साएमानरूमि लिमाडोट। हान मोकोचि लो युनला लिवो डोलोकुम तोकमाञा मेन आनकान ओलाक युनला मानलिवो डोलोकुम तोकमाआ उसओ मुइन्का। ²⁶ओसुन्दुम अङका उइसाकिया लोतङा, नाखोकसिखोक माआङ, अङका उइसाकिया पमकापम मुङा, ओनिक हुकड़ा आतवो ओटनि माआङ। ²⁷मेन अङका आनओ साएमपोकञा धातड़ा का छुककोङडा टाटङा, माआङलो ना निचिञा रूमरङ मुवा नेतलोक अङका उङहाङपाङ लो बुङछुनला मुवोङान।

10¹देनालो हेइ! निछाच्यो, आनसाकुदिपाचि झारा युवारि हयुनि मयाआङा का झारा साजुमा फाकोपलेन्तु लोवो दुमडा खानाचि मानसिनवा युङानुम लोवो उङराका माननुङ। ²झाराआ युवारि का साजुमाडा वाछाप्पाओ हङसानवा मलोकता। ³झाराआ अकटेटङे साकोङमिक चामासेसि मचो। ⁴झाराआ अकटेटके साकोङमिक याक्क मदुङा, देनादि मोकोचिओ देङसि देङसि लुवाओ अकटेट साकोङमिक धिलुङखाओ चाःवा मोकोचिआ मदुङा। नङ मोको घिलुङखा ओलाक निनामछेनङे लिमानुवाङा।⁵मेनछाङ मोकोचिखपडा बदधेकासुत्दा निनाममु सावालेत लिसानिनओ माननुडा, देनादि मोकोचि खोकलिखाडा याउससाङ मलिसा। ⁶मोकोचिआ रापचा मुवा इसा आनकानआ उवाक यामतोकओ रापचा मुमा नुनिन लोवो तातुपमिनआ ओचिदुम आनकानओ निकि फस्या लिसाओ मए।⁷नङ मोकोचिखपडा साङ साङ मलिसा ओटनि खानाचि सेम्फोकबुबमि मानलिदासानुम, देतनि छाप्तानचिनओ याआङ, 'मनाचि चासि का दुङसिञा मयुङा मन्कि कोङछिमु मुमा मथिन्ता । ⁸आनकान राकयाङला मानमुइनने, खाइसाकिया ओकोचिखपडा खाउ खाउङेआ राक्याङला मचुवाङसाङ, का अकङे लेनडा सुमहकि हिभुङ मसुवाङसाङ।⁹आनकान हाएसिओ सुको मानमुइन्ने, देतनि मोकोचि खपडा साङ साङआ मचुवाङसाङ, का पुछाप डाङका युन्ला मलिसाङसाङ। ¹⁰खानाचि डोचकला मानमुवानुम, देतनि मोकोचि खपडा साङ साङआ डोचकला मचुवाङसाङ का युन्काबाङका युन्ला मलिसाङसाङ।¹¹ओचि दुमचि खानाचिञा फस्याओ युपाडा मलिसाङसाङ का आनकानओ चानचुवारिओ निकि छापतानचिनओ मए, खाक्को धानि तालाखुकओ थेन्यु लिमालुवाओ याआङः। ¹²ओसुन्दुम अङका ठान्ठुक याकङा लोवो खोक्कोआ मिनला मुलुक, मोको चानचुप युङने, माआङलो ना मोको धाम। ¹³मनाआ आङमारूवो माइओ लेटका हाउसो सुकोडा खानाचि डोटाओ अमाननुङ, मेन निनाममु मकतुममुरू लिमानुयाक, खोक्कोआ खानाचिञा खानाचिओ साएराङ डाङका हुइयाओ सुकोडा डोटसि पुमा लिवोनिन, मेन खानाचिआ आङमा रूने लोवाकि सुकोओ अकनिन अकनिनडाङे तानदिवो लामछाङ पुमानुयाक।¹⁴ओसुन्दुम हेइ! सोम्पोवाच्यो, सेम्फोकबुब डाङका नियाकडङे युङानुम। ¹⁵तायामुलुमि मनाचिआ ओटनि मुनि अङका लोलुकङा। अङका खाक्को लोङा, मोसाओ सुको मुवानुम। ¹⁶सायोकओ मोको कान्चुरो खोक्कोओ निकि आनकान सायोक दोरइन्का, दि मोको निनामछेनओ साएमपोकओ युक्याहाकतुमि माआङ कि? ¹⁷देनादि आनकानका बद्धे याइन्का, मेन्छाङ अकटेटङे पेम्पाक, अकटेटङे साएमपोक ऐन्का, देनालो आनकान झारा अकटेटङे पेम्पाक डाङका चोम्का।¹⁸पोकओन्सामिओ इस्राएलञा खाङानुम, हेन्खुवाओ तोकयाम चाकाबाचिओ युक्याहाकतुमि दि बुबदुलुङखा सुत्डा नुनिन कि? ¹⁹मुइसालो अङका दि लोउम, दि सेम्फोकञा रिपेन्तुओ तोक्याम दिच ए? हेना दि सेम्फोक दिच याक्क ए का?²⁰मेन निरावाचि खोक्को हेन्खुवा मधान निनाममुञा माआङ, मेन खाला, मामाङसुकाञा मरिपेन, नङ खानाचि खालासुलाहुङओ युक्याहाकमि लिसानुम लोवो अङका मिनमासा मुनुङा। ²¹खानाचिआ हाएसिओ कान्चुरो का खाला सुलाहुडओ कान्चुरो हवाडे डाङका दुङमा अरूनिन। खानाचिआ हाएसिओ चाठाक का खाला सुलाहुङओ चाठाक हवाङे डाङका चामा अरूनिन। ²²हेना दि आनकान हाएसिञा माइसुङ-कारानुम? दि आनकान खोनिन चोङलो साएराङमि याइन्का कि?²³झारा याक्क सान्नोलक मयाआङ, मेन झारा याक्क दुकनुवाओ ममाननुङ। झारा याक्क नुलोक मयाआङ, मेन झारा याक्कआ साङसेसान मनुनिन ²⁴हाङपाङओ माआङ, मेन आननो नोकचियाओ नोतनुयु लामानुम।²⁵साइनकाबाओया खाक्को इनतिन, नुतनुओ निकि दिच्छाङ सेनखासेन मानमुनि चासानुम। ²⁶देनालो हेन्खामा का उलकलातसि हाए‌सिओङे मए। ²⁷मकतुम मानमुकाबाचि खपडा साङआ खानाञा बुतमि पुवाकि खानाचिओ खात्वो राका लिसालो, खानाचिओ बुसित खाक्को युङनि पुवाओ नुयाक, नुतनुओ निकि दिच्छाङ सेनखासेन मानमुनि चासानुम।²⁸मेन साङ मनाआ खानाजा ओको ना सेम्फोकओ बुबफेन लोनिपुवा लो, मोको यङकाबाओ निकि का नुत्नुओ निकि मानचादानुम। ²⁹अङका लोलुकङा, आमनुतनुआ ना माआङ, मेन निचिओ निकि, देनादि उङसायानुलेनलाओ सान्नोसान निचिओ नुतनुआ देना लिवो कि? ³⁰खोनालो आलाङने मुवाकि अङका चाचायुडा युक्याहाकमि लिङा लो, खाक्को याक्क अङकाआ निनामनुत रिपेन्तुङ मोसाडा देना अङकाओ अतनुवारि चेप्मा?³¹. ओसुन्दुम मादे खानाचि चासानुम, हेना दुङानुम, हेना खानाचि खाक्कोनुछे मुवानुम, झारा निनाममुओ धिनुमसङओ निकि मुवानुम। ³²खानाचिआ यहुदि हेना ग्रिकचि हेना निनाममुओ रिमिटोङञा खाउङे माइओ साकबाय मुलुतवो सुकधिइ मानपुदावानुम, ³³खाइसाकिया अङका छाङ अङकाओङे तोक्नुछुक माआङ, मेन बद्धेकाओ तोक्नुछुक लामयाङसा, का मोकोचिओ फाखालाम लिने लोवाकि झारा मनाचित्रा झारा छापछोङडा सावालेत मेतमा चोकमेत मुङा ।

11¹अङका निनामछेनडा लिसा ओटनि खानाचि छाङ अङखाङचिनला मुवो लिसानुम। ²अङका खानाचिओ साएमुङला मुलुकङा, हे झारा छापछोङडा खानाचिआ अमित्ताङयाक का अङकाआ खानाचिञा पाङपाकतुङ ओटनि सानयङओ काङमालाम अमुलुक। ³मेन खानाचिआ ओको सिन्तानुम लोवो अङका चाखालिङा, हे उकताउक मनाओ साया निनामछेन लिमानुयाक, नङ मारिछाओ साया सोरोछा ए, का निनामछेनओ साया निनाममु लिमानुयाक। ⁴साया दिपतुकि सोमफोङला मुवो हेना मायुङदुम चेपवो उकताउक सोरोछाआ उसायाओ मिनअत मुलुक।⁵मेन साया मानदिपदोनि सोमफोङला मुवो हेना मायुङदुम चेप्वो उकताउक मारिछाआ उसायाओ मिन्अत मुलुक, देनादि ओको ना मोसाआ टाडखोप्तुओ ओटनिङे ए। ⁶देनादि खाउङे मारिछाआ साया मानदिप लो हेनाक मोसाआ टाडखोपने, मेन टाडखोपमा मारिछाओ निकि सिसुवा ए. लो ना मोसाआ टाङडुम्मा हुमने ।⁷देनालो सोरोछा निनाममुओ युपा का मेच्छोङ ए, का साया दिपमा डोटनिन मेन मारिछा लो सायापाओ मेच्छोङ ए। ⁸देनालो सोरोछा ना मारिछाओ माआङ, मेन मारिछा लो सोरोछाओ ए।⁹देनादि सोरोछा मारिछाओ निकि मेटलेन लिसाओ माआङ, मेन मारिछा सोतोछाओ निकि ए। ¹⁰ओसुन्दुम सारूडकेन्छाओ सुन्दुम मारिछाआ कोपरूओ सिन्छुङ उटाङडा युङने।¹¹मुइसा लिसा मेन्छाङ हाएसिडा मारिछा मायाक सोरोछा नुनिन, मान सोरोछा मायाक मारिछा नुयाक। ¹²देनादि देतनि मारिछा सोरोछाङकाओ ए, मुइसाकियाङे सोरोछा छाङ मारिछाङकाङे ए, मेन झारा यामतोक लो निनाममुओ मए ।¹³साया मानदिपदोनि निनाममुञा सोमफोङला मुसि दि मारिछाञा ठात? खानाचि आमहाङपाङआ मिन्ला मुवानुम। ¹⁴सोरोछाआ बानको टाङमुआ केन्तु लो मोको खोसाओ निकि नासुङओ दुम ए लोनि दि खामलिखा हाङपाङआ छाङ खानाचिञा चिनलुनिन का? ¹⁵मेन खोनालो मारिछाओ बान्को टाङमुआ याआङ लोना मोको खोसाओ निकि मेच्छोङ ए, देनादि उटाङमुआ खोसाओ डालोङटिट लिसिञा पुवानचिनओ याआङ। ¹⁶मेन साङ मना राकामालला मुयाक लोना मान हाएसिओ रिमिटोङओ, मान आनकानओ उसओ दिच याथाङ याआङ।¹⁷हान ओको इङड्वा पुहिडा अङका खानाचिओ साएमुङ मुनुडा, देनादि खानाचि फान्नु खाननोओ निकि माआङ, मेन अतनुवारिओ निकि अझाराझुम। ¹⁸देनादि बुसि ना अडङका ओको एन्ङा, हे खानाचि रिमिटोङओ यायोकलाचिडा मानतोङवा छाङ नुयाक निमाङ, नङ अङका दिच मकतुम छाङ मुलुकङा। ¹⁹खानाचिखपडा देङहुतमु लिसाओचि ओलाक यापुक्तु मलिने लोवाकि खानाचिओ हुपडा मिन्वा यङछितवाचि लिमाङे डोटलुक।²⁰ओसुन्दुम मुन्टोङ खानाचि झाराझुम-अलि मोबेन हाएसि-चाचायु चासि याकरूका मानलिसुने, ²¹देनादि चाहिडा उकताउकआ आन्ओ चाचायु बुसिङे चानिलेयाक, नङ हाउसो मानचाङे युङयाक, का हाउसो लो खामावा दुङनियुङसाओ नुयाक। ²²चासि का दुङसिआ दि खानाचि आन-आन्ओङे खिम माननुङ का? हेना दि खानाचि निनाममुओ रिमिटोङञा पायोक्या अदोक, का मानलिकाबाचिञा नासुङडा अमुलुत? अङका खानाचिआ दि लोउम ? दि ओकोडा अङका खानाचिओ साएमुङ मुम? अङका खानाचिओ साएमुङ मुनुङा।²³देनादि अङकाआ हाएसिङका खाक्को तोक्तुङ मोको खानाचित्रा रिपेननि छाङ पुउङ, तामिनतुप, खाक्को खाखुतडा खोनिन लाप्माछेक डोरानिन मोको खाखुत हाएसि देकमिआ पेम्पाक लोक्तानिन, ²⁴नङ आलाङने मपुवानिन नेतलोक खोनिनआ मोको ओरानिन, का लोवानिन ओको खानाचिओ निकि अङसाएमपोक ए। ओको अङमुकसिनओ निकि मुवानुम।²⁵मुइसा मुनि चानिचियानिन नेतलोक कान्चरो लोक्तुकि उसओ लोवानिन, मोको कान्चुरो अङहुवाडा लिसाओ नुङवा चङमुडुम ए, मुन्टोङ मुन्टोङ खानाचि अदुङ अङमुकसिनडा ओको निरुङमु मुवो चुवानुम। ²⁶देनालो मुन्टोङ मुन्टोङ खानाचि ओको पेम्पाक अचा का कान्चुरो डाङका अदुङ ,खोनिन मान्ताइन्लोक खानाचि हाएसिओ सुवालोङओ रूमरङ अमुयाक।²⁷ओसुन्दुम खोक्कोआ मुरूअत सुत्डा हाएसिओ पेम्पाक चायाक, हे कान्चुरो डाङका ढुड्याक लो, मोको हाए‌सिओ साएमपोक का हुवाओ खायोकमि लिवोङ। ²⁸मेन मनाआ उहाङपाङञा खाचेतने, का मुइसाकिया ङे मोसाआ पेम्पाक चाने का कान्चुरोङका दुङने। ²⁹देनादि हाएसिओ साएमपोकओ स्वावा मानयुङदोनि चावो का दुङवोआ उहाङपाङ धानि मेकसनओ इङइवा बाटयाक। ³⁰ओसुन्दुमआ खानाचिखपडा बद्धेकापाङ रूपरूवा का योम्मुवा अयाआङ। का बद्धेकापाङ मसुवा।³¹मेन आनकान आन्हाङपाङआ आन्ओ स्वावा मुवाओनिन ना आनकान सान्नोसानडा डोटवो याइमिन। ³²हान आनसान्नोसान लिहिडा आनकान हेन्खामा सुत्डा खायोकमि, मानदोक्तिइन्ने लोवाकि हाएसिङका आनकान चानचुवारि तोक्तोमका।³³ओसुन्दुम हेइ ! उङनिछाच्यो, चासिञा झाराझुम्म लिहिडा अकनिचिञा हुडसानुम। ³⁴खानाचि चासि झाराझुम लिहिडा खायोकमि मान्दोकदामाञा साङ साकारङयाक लो, मोसाआ खिमडा चाने। हान निचि दकयाक दुम ओलाक अङका बानाकि तोङुमने।

12¹हान हेइ! निछाच्यो, साकोङमिक इछुकसिवाओ छापछोङडा खानाचि मानसिन युङानुम लोवो उङराका मानुनुङ। ²खानाचि असिन, मुन्टोङ खानाचि सेम्फोक बुबमि अयाआङा, मोवेन मेःवा सेम्फोकलिप्पा खाडा खाडा खाट्टा मोडा मोडाङे बिरानचिनओ अयाआङा। ³ओसुन्दुम अङका खानाचिञा सिनला पुङा, निनाममुओ साकोङडा लिसाकि चेप्वो साङआ देकमि यासानसाङ लिमानुयाक लोनि लोनिन, नङ वाचोङ साकोङडा लेटका साङआ देकमिञा हाएसि ए यिङमा रूनिन।⁴हान इछुकसिवा माइ माइओ मयाआङ, मेन साकोङ ना खोकोङे ए। ⁵नङ रोपधामवारिचि माइ माइओ मयाआङ, मेन हाएसि ना खोनिनङे। ⁶नङ वकचि माइ माइओ मयाआङ, मेन निनाममु ना खोकोङे, खोक्कोआ झाराडा झारा वक मुमानुयाक।⁷मेन झाराओ तोक्नुछुकओ निकि ना साकोङओ याखाङसाङ उकताउकञा पुवानचिनओ याआङ। ⁸देनादि अकपाङञा साकोङदाङका तायाओ दुम पुवाओ याआङ, नङ निचिञा मोकोङे साकोङ ओन्सामि खारूओ दुम,⁹साङञा खोकोङे साकोङडा मकतुम का साङञा अकटेटङे साकोङडा नुयोक मुलुत्वो इछुकसिवा, ¹⁰साङञा नाकाकमुओ वक साङञा मायुङदुम चेप्वो, का साङञा साकोङचि छिम्वो, साङञा माइ माइओ अयङचि चेप्वो, का साङञा अयङओ तुपयडवो, ¹¹मेन ओको झारा ओक आन्ओ मिनमासा ओन्सामि उकताउकञा वारावाराङ माइआ हानिपुवाकि खोकोङे अकटेट साकोङडा ओक मुमानुयाक।¹²देनादि ओटनि साएमपोक अकटेटङे ए, मेन मोसाओ बद्धेका पोकयाम मलि, का साएमपोकओ झारा पोकयामचि बद्घेका मलिसा मेन्छाङ अकटेटङे साएमपोक ए, निनामछेन छाङ मुसओङे लियानुयाक। ¹³देनादि मादे यहुदि, मादे ग्रिक, मादे चोकरिछा मादे सायानुलेन्छा, आनकान झारा छाङ अकटेटङे साएमपोक लिनि अकटेटङे साकोङडा हङसानवा लिसइन, का झाराञा अकटेटङे साकोङ डाङका दुङसिञा पुवानचिन ।¹⁴देनादि साएमपोक अकटेट ङे यामपोक माआङ, मेन बद्धे। ¹⁵खोन्नालो लाङआ अङका छुक मानएदोङ, ओसुन्दुम अङका साएमपोकओ मानएदोङ लोवा लो दि मोसुन्दुम मोको साएमपोकओ नुनिन? ¹⁶नङ नाबाकआ अङका अमुक मानएदोङ, ओसुनदुम अङका साएमपोकओ मानएदोङ लोवा लोना दि मोको साएमपोकओ नुनिन? ¹⁷खोन्नालो झारा साएमपोक अमुक लिहिडा ए ना, एनवो खाडाङका लिवो? खोन्नालो झारा एनवो लिहिडा ए ना नामसुवो खाडाङका लिने ?¹⁸मेन हान निनाममुआ आनओ राका ओन्सामि साएमपोकडा उकताउक यामपोक युङनि पुवानिनओ याआङ। ¹⁹हान खोन्नालो मोकोचि झारा अकटेटङे साएमपोक लिहिडा मए, ना साएमपोक खाडा? ²⁰मेन मोकोचि बद्धेका मए, का साएमपोक लो अकटेटङे।²¹नङ अमुकआ छुकञा आमचाखामसाङनिन, हेना सायाआ लाङञा खानाचिओ चाखामसाङनिन, लोमा रूनिन। ²²माआङ मेन साएमपोकओ धिरूपरूवा यामपोकचि ङे हेनाक धिचाखामयि मयाआङ। ²³नङ साएमपोकओ धिमिन्अत मित्ताओ यामपोकचिञा आनकानआ धिसानुवा पुइन्का, नङ मेच्छोङ मानलिसाओ यामपोकचिओ धिमेच्छोङ नुयाक। ²⁴मेन मेच्छोङ लिसाओ आनयामपोकओ चाखामला नुनिन मेन निनाममुआ उनछुप्प्लो लिसाओ यामपोकञा बद्धेङे सानुवा पुवाकि साएमपोकञा ठाक्कनिन तोङनि पुवानिनओ याआङ।²⁵उइसाकिया साएमपोकडा यङछितला मानलिने, मेन यामपोकचि अकटेटआ निचिओ निकि अकमाइओ स्वावा मयुङने। ²⁶नङ अकटेट यामपोकञा छुयु लिसालो झारा यामपोकआ ओकोओ अकनिनडा छुयुकुप, हेना अकटेट यामपोकओ सानुवा लिसालो झारा यामपोकआ ओकोकनिनङे सावालेत मचुलुक। ²⁷हान खानाचि निनामछेनओ साएमपोक का मोसाओङे वाराराङ पोकयामचि अए।²⁸नङ निनाममुआ देमञा रिमिटोङडा कावाङसाङ मुवानिनओ याआङ, बुदा लोहोनमिचि, हवासि यामाङचि, सुमसि चिनकाबाचि मोनेतलोक नाकाकवक मुकाबाचि मनकि नुयोक मेत्वो इछुकसिवा तोकताओचि, साएदुतवा मुकाबाचि, हाङमुयाङ मुकाबाचि, वारावाराङ अयङ चेप्काबचि। ²⁹दि झारा लोहोनमि, दि झारा यामाङ, दि झारा चिन्काबा, दि झारा नाकाकवक मुकाबाचि मए कि?³⁰दि झारा सुत्डा नुयोक मेत्वो इछुकसिवा याआङ? दि झारा वारावाराङ अयङ मचेप्लुक? दि झाराआ मिनमायिसिनमा मरू? ³¹मेन फान्नु चोमलो इछुकसिवाओ निकि वाराङ राका मुवानुम। नड अङका खानाचिञा फान्नु मुलुमरङ लाम लोङा।

13¹खोनालो अङका मनाचि का सारूङकेन्छाचिओ अयङडा चेउङ, मेनछाङ अङकाडा सोम माननुङ लो, अङका डोसाङला का उहुपसाकेक मुवो चुचिकेन हे चामुखि ओन लिङा। ²खोनालो अङकाआ मायुङदुम चेप्वो साएराङओ इछुकसिवा याआङ, का अङका झारा रिपचि का झारा खारू लेलुकङा, नङ भुरूचि यासातसि तारिओ मकतुम अङका सुत्डा याआङ, मेन अङकाडा सोम माननुङ लो, अङका दिच छाङ मानएदोङ। ³खोनालो अङकाआ उङझारा खाबालुङ छुयुकुपवाञा चामेत्माआ पुउङ, का उङसाएमपोक ङे लेतनि पुउङ, मेन अङका सुत्डा सोम माननुङ लो, अङकाञा दिचछाङ तोकनुछुक नुनिन् ।⁴सोम छङनुस्वममि का पुनुतनुमि नुयाक। सोमआ नुङछिन मुनिन, सोमआ उहाङपाङ धुनतिम मुनिन, का माइस्वमआ ताहोपनिन। ⁵उहाङपाङ सुमतुममात बिनिन, आनओ हाङनोत लामनिन्, माइसुङकातनिन् अतनुवारिओ स्वावा मुनिन। ⁶अतसाम्योडा छेमा नुनिन, मेन नुच्चुङडा छेमा नुयाक, । ⁷झारादुम आङ, झारा दुमओ याआत्ला मुयाक, नङ झारा यामतोकओ यामित्या मुयाक, नङ झारायाक्कडा लोमान्टका युङ ।⁸सोम देम्खा याचोतनिन, मेन मादे मायङदुम मलिने, मोचि याचोतनि मखात, मादे अयङचि मए, मोचि मनानतिन, मादे खारू लिने मोको असाहोक नुयाक। ⁹देनादि आनकान दिच ओन लेइन्का, नङ दिच ओन मायुङदुम चेइन्का। ¹⁰मेन मुन्टोङ सेनलेनमि ओलाक बान, मोबेन अमानयाक दुम याचोत्ताकि खात।¹¹मुन्टोङ अङका एलोकछा याआडाङ, मोबेन एलोकछाआ ओटनि चेवाङाङ, एलोकछाआ ओटनि मित्ताङाङ, एलोकछाआ ओटनि मिनला मुवाडाङ, मेन हान अङका फान्टा लिसाओ याकङा का साएङछाछिओ दुम छितनि पुवाओ याकङा। ¹²हान्दे आनकान लाइतामडा थेमथेमवा सुत्डा टोक्तोमका, मेन मोवाइदाडा ओलाक डोवाडो, हान्दे अङका दिच ओन लेलुकङा, मेन मोवाइदाडा देतनि अङका सिन्तानचिनओ याकङा मुइसा मुनि अङका दुम्छुयुक मुनि सिन्वोङा। ¹³मेन मकतुम, यामित्या, सोम, ओचि सुम मयुङ, का ओकोडा साए मुलुमरङ ओलाक सोम ए।

14¹सोमओ देङसि वाङानुम, मेन्छाङ साकोङमिक इछुकसिवाचिओ निकि छोसाग राका मुवानुम, मेन साखुबु मुनि मायुङदुम चेप्माञा। ²देनादि नियङडा चेप्वोआ मनाचि सुत्डा माआङ। मेन निनाममु सुत्डा चेप्लुक, देनादि साङआ छाङ तुपनिन, मेन साकोङडा कोपनिङेओ दुम मोको चेप्लुक । ³मेन मायुङदुम चेप्वोआ मनाचिओ साङसेसान, सापसा, नुसान, का नुटाडखोङओ दुम चेप्लुक। ⁴नियङडा चेप्वोआ आनओ साङसेसान मुलुक, मेन मायुङदुम चेप्वोआ रिमिटोङओ साङसेसान मुयाक।⁵हान खानाचि झारापाङ वारावाराङ अयङ चेवानुम, लोवो अङका चाखालिङा मेन निरूङ मुनि याछामसु मुवानुम। नङ रिमिटोङओ साङसेसान लिने यिङाकि तुपयङसि लेटका याछाम्सु चेप्काबा ओलाक वारावारङ अयङडा चेप्वो चोङलो मुलुमरङ ए। ⁶हेइ निछाच्यो, अङका खानाचिओया वारावाराङ अयङ चेप्याङसा बानुङ, मेन अङकाआ छोङडा, हे तायाडा, हेना मायुङदुमडा, हेना सानयङडा, मानचेप्दोङ लोना अङकाङका खानाचिया दि तोक्नुछुक याआङ कि?⁷खाङलि साङलावा लात्वो अतहङसक याक्कचिडा छाङ, मादे मुदालिसङ ,हेना तायाइकेन लिने, मोकोचिआ साङलावाओ नियाकला मपुनिन लोना मुदालिसङ हेना ताया केन दि साङाओ ए खाइसाकिया सिनमा कि ? ⁸खोनालो साङतुकआ मानतुपवो साङलावा पुवा लोना म्हुओ निकि साङ छुमचुम लिसुने कि ? ⁹मुइसाङे खानाचिआ छाड नेकताकनिन तुपमा रूवोन वारावाराङ अयङडा अमानचेप लोना, दि चेवाओ ए, खाइसाकिया तुप्वो? देनादि खानाचि ना सितनामडा चेप्नि युङसाओं अलिवोङ।¹⁰हेन्खामाडा कारूयाक ओला माइओ अयङचि मयाआङ, का खाउङे छाङ तुपयङमातओ ममाननुङ। ¹¹ओसुन्दुम खोनालो चेवाओ अयङओ तुपयङ अङकाआ मान्तुपदोङ लोना चेपकाबाओ निकि अङका निसिङवाङमि लिवोङा।¹²देनादि देतनि खानाचि छाङ साकोङमिक इछुकसिवाओ साखाचोङडा अयाआङ, मुइसाडे मुनि खानाचि रिमिटोङओ साङसेसानओ निकि सायाथाक्ला लिमाञ चोकमेत मुवानुम। ¹³ओसुन्दुम नियङडा चेप्काबाआ मोसाओ तुपयङसिञा सोम्फोङला मुने। ¹⁴देनालो अङकाआ नियङडा सोम्फोङला मुउङ लो अङसाकोङआ ना सोम्फोङला मुलुक मेन अडङनुतनु लो असाहोक नुयाक।¹⁵हान अङकाआ दि मुवो ना? साकोङआ सोम्फोङला मुहिडा अङका नुतनुआ छाङ सोम्फोङला मुवोडाङ। अङका साकोङआ सङमुसान मुहिडा नुतनुआ छाङ सङमुसान मुवोङा। ¹⁶साकोङआ निनामनुत रिपेनहिडा खानाआ लोवाओ दुम दिच मानतुप्दोनि हुड्याओ ताकपेतनि यामामुडा युङवो मनाआ खानाआ निनामनुत रिपेन्तुओडा खाइसाकिया आमिन लोउने?¹⁷मेन देनालो खानाआ ओलाक ना खान्नोकनिन निनामनुत पुवाओ तलि मेन हाउसोओ साङसेसान लिसाओ नुनिन। ¹⁸अङका निनाममुञा निनामनुत रिपेनडा, अङका खानाचि झारा चोङको बद्धे वारावारङ अयङडा चेपङा। ¹⁹मेनछाङ रिमिटोङडा नियङडा पौ हिभुङकि यङसिवाडा चेपमा चोङलो ना अङकाआ निचिञा अङखारूआ ङाकाटेटङे यङसिवा चेवाकि सानयङ पुमा रूउम लोवो अङका चाखालिङा।²⁰हेइ! निछाच्यो, नुतनुडा छायाङछाछि मानलिसानुम, अतनुवारिडा छायाङछाचि अए, मेन नुतनुडा मना इसा लिसानुम। ²¹खापलाडा छापतानचिनओ याआड, हाएसि यिङमा नुयाक, अङका निसिङवाइ अयङ चेप्वो मनाङका का निसिङवाइ डोडाङका ओचि मनाचि सुत्डा चेप्वोङा, का छाङ मोकोचिआ मुइसाकिया एन्वोनिन।²²ओसुन्दुम अयङचि मकतुम मुकाबाचिओ निकि माआङ, मेन मानमुकाबाओ निकि सिन्छुङ ए. मेन याछाम्सु ओलाक मकतुम मानमुकाबाओ निकि माआङ, मेन मुकाबाचिओ निकि सिन्छुङ ए। ²³झारा रिमिटोङ अकखामडा झाराझुम्म लिहिडा झारापाङआ वारावाराङ अयङडा चेवालो का अतखिपसान, हेना मकतुम मानमुकाबाचि मोडा बानालो दि मोकोचिआ खानाचिञा हिमसाले लोवोनिन का?²⁴मेन झारापाङआ याछाम्युडा मचेवा, का साङ मकतुम मानमुकाबा हेना हुइयाओ अनुमा मना हुड्डा तालो मोको झाराङका खायोकमि दोकवोङ का झाराआ उसुओ मचुवोङ। ²⁵उकोडओ रिपचिदुमचि यापुक्तु मलिवोङ, का मुइसाकिया मोको बोम्का डोरूकि नुच्चुङडे हाएसि खानाचिओ हुपडा लिमानुयाक लोवाकि देडहुतमु मुयाङसा मोसाआ निनाममुञा सायालोङ मुवोङ।²⁶मुइसालो ओको दिए ना, निछाच्यो? खानाचि अकनिनडा झाराझुम्म लिहिडा उकताउक सुत्डा सङमुसान नुयाक, सालामयङ नुयाक, यापुकमुलेन नुयाक, दुम नुयाक हेना तुपयङवो साएराङ नुयाक। झारा दुम साङसेसानओ निकि मुविने। ²⁷साङआ नियङडा चेप्लुक लो हवापाङआ ओन हेना बद्धेडा सुमकापाङ तारिआ, मोको छाङ तातलो तात्लो सुत्डा मचेपने, का अकपाङआ तुपयङने। ²⁸मेन तुपयङवो साङ छाङ मानलिसालो मोको रिमिटोङओ यायोकलाडा वाइ:या युङने, का मोको उहाङपाङ सुत्डा का निनाममु सुत्डा चेपने।²⁹नङ यामाङचि ओलाक हवा हेना सुमकापाङ लिसाकि मचेपने, का निचिआ मोकोचिओ सुको मचुने। ³⁰मेन यायोकलाडा युङनियुङवो हाउसोआ दिच यापुकमुलेन लिमाता लो बुसिपाङ वाइःया युङने।³¹देनादि झाराआ मचिनने, का झाराआ नुटाङखोङ मतोकने, लोवाकि खानाचि झाराआ अककाअक मुनि याछाम्सु चेपमा अरू। ³²नङ यामाङओ साकोङ यामाङओडे कोपरूडा मलि। ³³देनादि सेङहाङछाओ झारा रिमिटोङडा ओटनि निनाममु खारकोङओ निनाममु माआङ, मेन नुसानओ निनाममु लिमानुयाक।³⁴छामिनमाचि रिमिटोङओ यायोकलाडा वाइःया मयुङने, देनालो मोकोचिआ चेप्वो इङइवा माननुङ, मेन खापलाआ यिङा इसा मोकोचि छुककोङ मयुङने। ³⁵नङ मोकोचि दिच दुम चिन्मा मचाखालि लो खिमडा आनआनओ सायापाञा मसेनने, देनालो छामिनमाचिञा रिमिटोङडा चेप्मा सिसुवाओ दुम ए। ³⁶दि निनामदुम खानाचिङका हुझ्या लोन्ताओ मए? हेना दि खानाचिओया ओन ताओ ए?³⁷साङआ उहाङपाङञा यामाङ हे साकोङमिक मना मित्लुक लो, अङकाआ छाप्तुओ ओको दुम हाए‌सिओ इङइवा ए, लोवो सिन्तुकि मिनला मचुने। ³⁸मेन साङ निसिनवा याआङ लो, मोको निसिनवाडे युङने।³⁹ओसुन्दुम हेइ! निछाच्यो, याछाम्सु चेपमाञा छोसाग राका मुवानुम, नङ वारावाराङ अयङडा चेपसिञा माननान्दानुम। ⁴⁰मेन झारा वक सालेनयुपाआ का नुनुतनुङ सुत्दा मुमा।

15¹हेइ! निछाच्यो, अङका खानाचिञा मोकोङे नुयङखान लोङा, खाक्को अङकाआ रूमरङ मुवाङाङ, का खानाचिआ देडहुतलेन छाङ अमुवाङसाङ, खाक्कोडा खानाचि पाङचङताओ छाङ अयाआङ। ²अङकाआ खानाचिञा रूमरङ मुवाओ नुयङखानडा अयुङनियुङा लो, का खानाचिआ सितनामडा मकतुम मानमुवालो, खानाचिओ फाखालाम छाङ लिवोङ।³देनालो झारा चोङलो बुसित अङकाआ खानाचिञा मोको रिपेननि पुउङ खाक्को अङकाआ तोक्तुओ छाङ याआङाङ, तामिन्तुप साम्योसामकालिन ओनसामि खाइसाकिया निनामछेन आनकानओ निकि मसुवा, ⁴का मखुम्तानचिन नङ साम्योसामकालिन ओनसामिङे सुमकालेनडा खोनिनओ लाहङलेन लिसा,⁵नङ खोनिन केफासओया, मनकि हवापौपाङओया दातलुवानिन ⁶का मोनेतलोक खोनिन अक्दु अभुङकि चोङलो बद्धेका निछाचिओया दातलुवानिन, खोक्को खपडा बद्घेइसा हान्देतारि याक्याङ, मेन खाउ खाउडे इमनि मचिया। ⁷मोनेतलोक खोनिन याकुबओया मन्कि झारा लोहोनमिचिओया दातलुवानिन।⁸मन्कि झारा चोडलो देङसि मुयाकला मानलिनि पुक्तुओ मना इसा अङकाओया छाङ खोनिन दातलुवानिन। ⁹देनादि लोहोनमिचि खपडा अङका झारा चोडलो चुप्पाङ एव। अङका ना लोहोनमि दारामान छाङ थातनुङा। देनालो अङकाआ निनाममुओ इरिमिञा टुङमाला मुउङ।¹⁰मेन निनाममुओ नुनुतछोङआ अङका खोक्को याकङा, मोकोङे याकडा, का अङकादु लिसाओ नुनुतछोङ सितनामडा मानलि। मेन मोचि झाराआ चोङलो बद्धेका अङकाआ मुयुला मुउङ। मेनछाङ अङकाआ ना माआङ, मेन अङका सुत्डा लिसाओ नुनुतछोङआ। ¹¹ओसुन्दुम अङकाआ मलिसा छाङ, मोकोचिआ मलिसा छाङ, आनकान उइसाकियाङे रूमरङ मुइन्का, का खानाचिआ उइसाकियाङे मकतुम अमुवा।¹²सुवाओचिङका लाहडलेन लिसानिनओ याआङ लोवो निनामछेनओ रूमरङ नुयाक लो, खानाचि खपडा साङ साङआ सुवाओचिओ लाहडलेन नुनिन लोनि खाइसाकिया अयिङ? ¹³मेन सुवाओचिओ लाहडलेन लिनिन लो ना निनामछेन छाङ खोङतानिनओ माआङ। ¹⁴नङ खोनालो निनामछेन छाङ खोडतानिनओ माआङ लोना आनरूमरङ सोज्जे ए, का खानाचिओ मकतुम छाङ सोज्जे लिसा।¹⁵आनकानका निनाममुओ मुपसिनलेमु दोक्तोम्कान, देनालो आनकानआ निनाममुओ छापछोङडा खोनिनआ निनामछेनञा खोङतानिनओ लोवो सिनलेमु पुवाओ याइन। सुकाबाचि मानहङमेत्वो लिसाओनिन ना खोनिनञा निनाममुआ हङनुमा मानलि। ¹⁶खोनालो सुकाबाचि मानखोङवो लिसाओनिन ना निनामछेन छाङ खोङमान मानलि। ¹⁷नङ निनामछेन मानखोङमान लिसाओनिन खानाचिओ मकतुम सितनाम नुयाक, खानाचि फान्नु तारि आनओ हुमुकवाडा अयाक्याङ।¹⁸मोबेन निनामछेनडा सुकाबाचि छाङ युनला लिसाओ मयाआङ। ¹⁹ओकोङे अयामडा ओन निनामछेनडा आनकानआ यामित्या युङसाओ याइन्का लो, आनकान झारा मनाचि चोङलो बद्धेङे पुनुतनुतयि याइन्का।²⁰मेन हान सुवोचिडा बुसिवा लिसाकि निनामछेन सुकाबाचिङका हङनुवानिनओ याआङ। ²¹देनालो सुवालोङ अकपाङ मनाङका लिसाओ लिहिडा सुवाओचिओ लाहङलेन छाङ अकपाङे मनाङका लिसा ।²²देनादि देतनि खामबुहाङडा झारा मसुयाक, मुइसाकिया के निनामछेनडा छाङ झारा अहङसक मलियाक। ²³मेन उकताउक आनआनओडङे दकओनसामि निनामछेन बुसिवा, मोनेतलोक खोनिनओ ताइलेनडा निनामछेनओचि मेतलो ।²⁴मुनटोङ खोनिनआ झारा हाएमिनला, झारा कोपरूडला, का साएराङ मासुवाकि निनाममु हेना पापाञा हाङहोन पाङपाकनि पुमा लिवोङ, मोबेन थेन्साङ लिवोङ। ²⁵देनादि खोनिनआ झारा नुकसाञा आनओ लाङ ह्युनि मानयुङइन्लोक खोनिनआ हाङमुयाङमा ङे डोट। ²⁶झारा चोङलो नेतलोक वोपयुन्ला लिवो नुकसा सुवालोङ ए।²⁷देनालो निनाममुआ झारा दुमञा खोनिनओ लाङओ कोपरूडा युङसानिन। मेन मुन्टोङ 'खोनिनआ झारा याम्तोक छुककोङडा युङसानिन' लोनि लोमानुयाक, मोबेन मोको सेङवा टोकतिन्, हे खोक्कोआ झारादुम आनओ छुककोङडा युङमानुयाक, खोनिन ओलाक लेटका लिमानुयाक। ²⁸नङ मुन्टोङ झारादुम खोनिनओ छुककोङडा लिसाओ नुयाक, मोबेन निनाममु झाराडा मुलुमरङ लिमाञा झारायाम्तोक खोनिनओ छुककोङडा बाटमालिवो सावाछा छाङ खोनिनओ छुककोङडा लिमालिवोङ।²⁹माआडलो ना सुवाओचिओ निकि हङसानवा लोकवोचि दि मचुवोङ? सुपोकवाचि मानखोङवोन मलिसा ना मोकोचिओ निकि देना हङसानवा मपुयाक ? ³⁰देना आनकान छाड उकताउक वाइदा लारूमडा युङनियुङिनने?³¹मेन हेइ! निछाच्यो, आनकान हाएसि देकमि निनामछेनडा खानाचिओ निकि अङका सुत्डा लिसाओ धुनतिमओ यङचकला चासुकि लोङा, अङका लेनओलेन सुलुकङा । ³²अङकाआ एफिससडा खोकलि सायारूचि सुत्डा मनाओ तुङलामडा ङेनताओनिन अङकाञा दि तोकनुछुक लिसाङा कि? सुवाओचि मानखोङवो मलिसा ना, बानइनने, आनकान चोमने का दुङइनने, देनालो माङकोलेन ना आनकान सुनिलेइन्का।³³छेङसिमिनने, उवाक निनताआ नुलोक सुङसेनञ रोङयाक। ³⁴साम्योकओ निकि पोकसुमि युङानुम, का हुमुकवा मानमुदानुम, देनादि साङ साङञा निनाममुओ तायाङे माननुङ, खानाचिञा सिसुवाडा मुलुतमाञा अङका ओको लोलुकङा।³⁵मेन सुवाओचि खाइसाकिया मखोङ कि ? मन्कि मोकोचि खासओ माइओ साएमपोक तारूकि मबान? लोनि साङआ लोउने। हेइ! खारुमात मना, ³⁶खाक्को खाना अतेमलुक मोको मानसुदोनि अहङसक नुनिन।³⁷मेन खाक्को खाना अतेमलुक मोको देङसि यापुक्तु लिवो साएमपोक ना माआङ, मेन ओनिक लिमपुक अतेमलुक, मादे मोको छुमाचा लिने हेना निचि खाउङे चासुमओ लिने। ³⁸मेन निनाममुआ उहाङपाङञा छेमा मलुवा ओटनि मोसाञा अकटेट साएमपोक पुमानुयाक, का उकताउक लिम्पुकञा मोङे ओनसामिओ साएमपोक। ³⁹झारा साएमपोक अकमाइओ साएमपोक नुनिन, मेन मनाओ साएमपोक अकमाइओ, का सायारूओ हाउसोङे माइओ, सेचिमाइओ हाउसोङे साएमपोक, का ङाचिओ हाउसोङे माइओ साएमपोक नुयाक।⁴⁰नङ माङमिक साएमपोक का खाउनमिक साएमपोक छाङ मलि। माङमिक साए‌मपोकओ छोङ अकमाइओ, का खाउनमिक साएमपोकओ छाङ हाउसो माइओ। ⁴¹नामओ छोङ अकमाइओ, लादिपओ लानङ हाउसोङे का साङगेनचिओ छोङ हाउसोङे माइओ नुयाक। देनालो छोङडा अकसाङगेन निचि साङगेन चोङलो वारावाराङ नुयाक।⁴²सुवाओचिओ लाहडलेन छाङ मुसओङे ए। युनफेनडा मोको वेततिन, अत्युनफेनडा खोङमेततिन। ⁴³सानुत्वाडा मोको वेततिन, छोङडा खोङमेतनिन। अतरमुङलाडा मोको वेततिन, साएराङडा खोङमेततिन। ⁴⁴खामलिखामिक साएमपोकडा वेततिन, साकोङमिक साएमपोकडा खोङमेततिन। खामलिखामिक साएमपोक याआङ लो साकोङमिक साएमपोक छाङ नुयाक।⁴⁵उसओ छाङ छाप्तानचिनओ याआङ बुसि मना खामबुहाङ हङसक सायसकमि लिसा। थेन्का खामबुहाङ अयाम पुवो साकोङ लिसानिन। ⁴⁶मेनछाड बुसिवा लो ना साकोङमिक माआङ, मेन खामलिखामिक ए। मोनेतलोकओ ओलाक साकोङमिक ए।⁴⁷बुसि मना खामबोकदिमाओ, बाखाओ ए, हवासि मना सारूङगाङकाओ ए। ⁴⁸ओटनि बाखाओ मना, मुसओ मोकोचि बाखाओ मनाचि छाङ, ओटनि सारूङगायि मना, मुसओङे मोचि सारूङगायि मनाचि छाङ। ⁴⁹नङ देतनि आनकानआ बाखाओ युपा लोकतानचिनओ याइन्का, मुइसाकियाडे सारूङगायि युपा छाङ लङलेन मुवोम्का।⁵⁰हान हेइ! निछाच्यो, अङका ओको लोलुकङा, सा का हुवा सारूङगाको हाङहोनओ पाङमि लिमा रूनिन, मानना युनफेन अतयुनफेनओ पाङमि लिमा रूयाक। ⁵¹खाङानुम, अङका खानाचिञा अकटेट कोपनि लोलुकङा, आनकान झारा सुनिखारिमिनका, मेन आनकान झाराओ वाइफान लिवोङ।⁵²इकटोङडा अमुकओ सप्मुटोङडा साङतुकओ थेन्युवारि साङलावाडा, देनालो साङतुक साङवोङ, का सुवाओचि अतयाइमि युपाडा मखोङवोन, नङ आनकाओ ओलाक वाइफान लिवोङ। ⁵³देनादि ओको अयुन्कामिआ अतयुन्कामि का ओको सुवाननुमिआ हलेनहङ युपा लङलेन मुमाडे डोट।⁵⁴मेन मुन्टोङ ओको युन्कामिआ अतयुन्कामि लङलेन मुवाओ, का सुवाननुमिआ हलेनहङ युपा लङलेन मुवाओ नुयाक, मोबेन छापतानचिनओ ओको दुम लाटला लिवोड, सुवालोङ चुङतामडा खुङतानचिन। ⁵⁵हेइ! सुवालोङ आमचुङताम खाडा? हेइ ! सुवालोङ आमथोङसु खाडा?⁵⁶सुवालोडओ थोङसु हुमुकवा ए, का हुमुकवाओ साएराङ खाप्ला ए। ⁵⁷मेन निनाममुञा आलाङेने लिने, खोक्कोआ आनकानञा आनहाए‌सि निनामछेनदाङका चुङताम पुमानुयाक।⁵⁸ओसुन्दुम हेइ! अङनुस्वममि निछाच्यो, लोवानटका का लोमानटका युङानुम, निम्मा हाए‌सिओ वकडा सायाथाक्ला लियाङसा खारानुम। देनादि खानाचि अलेलुक, हे खानाचिओ मुयुला हाएसिडा सितनाम नुनिन।

16¹हान सेङहाङछाचिओ निकि फालुङओ छापछोङडा , अङकाआ गलातिओ इरिमिञा इङइवा पुउङ ओटनि खानाचिआ छाङ मुवानुम। ²उकताउक एखपओ बुसिलेन खानाचि उकताउकआ आनआनओ पोनुनोत ओन्सामि रापताकि चुकनि युङने , का अङका बानहिडा खाउङे फालुङदुवो वक लिवोनिन ।³नङ मुनटोङ अङका ताबाननिवोङा , मोबेन फालुङ यरुशलेमडा खाटमाञा खोल्नको खोक्कोञा खानाचि अचाखालि , मोकोचिञा अङका छापलाचि पुवाकि छुतवोङा। ⁴मेन खातमा योकमायोक छाङ डोराङ लो मोकोचि अङकाकनिन मखारुने ।⁵मेन म्यासिडोनियाओ कोन्या मचुवा नेतलोकअङका खानाचिओया बानवोङा ।देनालो अङका म्यासिडोनिया लिसाकि बानवोङा। ⁶मेन कारुयाक अङका खानाचिओया दिचलेन युङवोङा ,हेमा नाङदोङङे छाङ छितवोङा, मनकि खाडडा खारुउने खानाचिआ दिच ह्यानि तारि छोङताङनि पुवानुम ।⁷देनालो लामडाङे मधिरा इसा खानाचिञा हान्दे धितसि अङका राका मुनुङा ।मेन हाएसिआ देङहुतवारि पुवानिन लो दिच मुयाकला तारि खानाचि अकनिनङे युङवो मिनमासा मुलुकङा । ⁸मेन ङाकिलेनओ साके तारि अङका एफिससडा युङवोङा, ⁹देनालो अङकाओ निकि अकटेट टोप्पो तामिनदुम लाटला मुवो लापतिखोम होक्का लिसाओ याआङ । नङ मोडा लादेङ बद्धेका पारिमुचि मयाआङ ।¹⁰हान तिमोथि मबाना लो मिचि खानाचिओया कुमाकामात मुयुङने । देनादि अङकाआ मचुवा ओटनि मोचि छाङ हाएसिओ वक मचुलुक। ¹¹ओसुन्दुम साङआ छाङ मोचिञा अतला मानमुने। मेन नुसान सुत्दा मोचिञा चिकोन्याडा खाइनि पुवानुम, का मोचि अङकाओया मबानने ।देनालो मोचिञा निछाचिओ अकनिनडा अङका याहुङलाम मुयाङा। ¹²मेन निछा अपोल्लसओ छापछोङडा ओलाक , मोकोचि निछाचिओ अकनिनडा खानाचिओया मबानने यिङाकि अङकाआ मोचिञा बद्धे सोमफोङला मुउङ , का हान्दे बानसि मोचिञा वोपलाटङे राका मानलि, मेन सुकधिइ तोकमुसा मोचि मबानवोङ ।¹³चानचुप युङानुम, मकतुमडा नु:छङ लिनियुङानुम दुवापोङ लिसानुम, सावारु लिसानुम। ¹⁴खानाचि खाक्को अमुयाक मिचि झारा सोमडा मुवानचिनओ मलिने ।¹⁵हेइ! निछाच्यो, अङका खानाचिञा ताछुकफेङ मुलुकङा, खानाचिआ स्टिफनसओ इवाखिमओ सानुङ अलेलुक , मोचि अखैयाओ बसिसिवा मए, का मोकोचिआ सेङहाङछाचिओ रोपधामवाओ निकि उहाङपाङञा रिपेनलेन मुवाओ मयाआङ, ¹⁶हे मोकोचिआ छाङ उसओचिओ , का वक फामि का मुयुला मुवो उकताउकओ छुककोङडा हाङपाङञा युङसानुम ।¹⁷नङ स्टिफनस , फोटुनाटस का अखाइकसओ ताइलेनडा अङका सावालेत मुलुकङा, देनादि खानाचिञा खाक्को याक्कओ मादुङतोक याआङा , मोको मोकोचिआ लाटला मुनि मपुवा । ¹⁸देनादि मोकोचिआ अङका का खानाचिओ साकोङञा मपुवा , ओसुन्दुम उसओचिञा खानाचिआ उनुलोक सानुवा मुवानुम।¹⁹एसियाओ इरिमिचिआ खानाचिञा सायालोङलेन खाइसाओ मयाआङ । अक्विला का प्रिस्का का अचुखिमडा लिसाओ इरिमिआ हाएसिडा खानाचिञा बद्धे बद्धे सेवानने खाइसाओ मयाआङ। ²⁰झारा निछाचिआ खानाचिञा सेवानने खाइसाओ मयाआङ। अक निचिञा वाचोङ सुपलेनआ सायालोङ मुवानुम।²¹२१ अङका पावलओ चिछुकआ छापतुओ नुसानने । ²²साङआ हाएसिञा सोम मुनिनलो,मोको यासानसाङ लिने । ²³आनहाएसि बानमाङेनुवोङ। हाएसि देकमि निनामछेनओ नुनुतछोङ खानाचिसुत्डा लिने । ²⁴निनामछेन देकमिडा अङसोम मोकोचि झारासुत्डा युङने। आमिन ।

पावल लोहोनमिओ कोरिन्थिचिञा हवासि छापला

1¹²१.पावल, निनाममुओ राका ओन्सामि देकमि निनामछेनओ लोहोनमि का आननिछाक तिमोथिङका अखैयाडा लिवो निनाममुओ रिमिटोङञा। २.खानाचिञा निनाममु आनपापा का देकमि निनामछेन डाङका नुनुनछोङ नङ नुसान्ने।³आनहाएसि देकमि निनामछेनओ निनाममु का पापा का झारा नुटाङखोङओ निनाममु सायोकसाङ लिमानुयाक। ⁴निनाममुङका खाक्को नुटाडखोङ आनकानआ तोक्ताओ याइन्का, मोङे नुटाङखोङआ खाउङे छाङ लारूमलाडा लिकाबाचिञा नुटाङखोङ पुसि रुइन्ने लोवाकि ए। खोनिनआ आनझारा लारूमलाडा नुटाडखोङ पुवानिनओ याआङ।⁵देनादि देतनि आनकानञा निनामछेनडा यातुक्ला सायाथाकलाडा नुयाक , ओटनिङे आननुटाङखोङ छाङ निनामछेन दाङका उनभेप्लो हाकङलाडा नुयाक। ⁶मेन आनकानआ लारूमलाम तोक्ता मेनछाङ ओको खानाचिओ नुटाङखोङ का फाखालामओ निकि ए। आनकानआ नुटाङखोङ मतोक्ता मेन्छाङ खाक्को यातुकला आन्कान थाआङतोम्का मोङे यातुकलाओ छङनुसानलाआ मुहिडा मोको खानाचिओ नुटाङखोङओ निकि लिसाओ ए। ⁷नङ ओको लेसुकि हे खानाचिओ निकि आनयामित्या नुअछङ याआङ देनादि देतनि खानाचि मोचि छुयुओ युक्याहाकतुमि अयाआङ मुइसाङे मुनि नुटाङखोङओ छाङ युक्याहाकतुमि अयाआङ।⁸देनादि हेइ! निछाच्यो एसियाडा आनकानञा डोराओ यातुकलाओ छापछोङडा खानाचिञा सिनला लिने लोवो अङका चाखालिङा। देनालो आनकान उनतारि छाकओ मुनि तिम्तानचिनओ याइन, हे आनरूङमुनुङ डाडका हुइया लिनि अयामतारि सोयोक चामा डोराओ याआङा। ⁹आनकान आनहाङपाङडा माआङ मेन सुकाबाचिञा खोङमा लिवो निनाममुडा टाडखोङयुङनि उहाङपाङआ सुमेकसनओ इङइवा उहाङपाङधानि तोक्ताओ याइन, ¹⁰खोक्कोआ आनकानञा उनटोप्पो सुवालोङ डाङका खापचुप्तानिन का खोनिन फाननुतारि आनकानञा खापचुपमा लिवोङ लोवो आनकानआ खोनिनधानि यामित्या युङसाओ याइन्का ।¹¹हे बदघेका पाङदाङका आनकानञा पुवाओ इछुकसिवाओ निकि आनलिपाडा लिसाकि बदधेकापाङआ आलाङने मपुने लोवाकि खानाचि छाङ आनलिपालामडा लिनि आनकानओ अकनिन अकनिनडा खानाचिओ खपमिनफोङडा साएदुत अमुवोङ।¹²देनादि आनमाइस्वम मुवो याक्क ओकोङे ए आनइन्दुओ सिनलेमु, हेन्खामाडा का खानाचिलिप्पा आनसुङसेन उसओ वाचोङला का नुच्चुङलाडा याआङा खाक्को पोकमिक तायाडा माआङ मेन निनाममुओ नुनुतछोङडा याआङा। ¹³देनादि आनकान खानाचिञा निचि दुम छापतिमिनका ओनिक खाक्को खानाचि अखिपलुक का काङमालाम अचुलुक का अङका यामित्या मुङा खानाचिआ थेन्युतारि छाङ देउहुतला अचुवोङ। ¹⁴खानाचिआ छाङ आनदुम दिच तुप्ताओ लिहिडा आनहाएसि निनामछेनओ लेनडा खानाचि छाङ आनमाइस्वम मुवो दुम अलिवोङ देतनि खानाचि छाङ आनकाओ अयाआङ।खोनिन बानमा युमाला मुवाओ¹⁵नङ ओको टाङखोङडा खानाचिञा हवाखोम तोकनुछुक लिने लोवाकि अङका खानाचिओया बुसिङे बानवो, ¹⁶का खानाचिङका लिसाकि म्यासिडोनियालिप्पा खातवो का म्यासिडोनियाङका लादेङ खानाचिओया बान्वो का अङकोन्याडा खानाचिआ यहुदियालिप्पा दिच ह्यानि तारि छोङनि अपुयाक लोवो मिनला मुवाओ याआङाङ।¹⁷मोबेन ओको सुङहिडा दि नुच्चुङङे अङका याइ लिसुङङाङ ना? देना अङका खाक्को सुङङा दि साएमपोक ओनसामि मुङा का? ए छाङ लोवो माआङ छाङ लोवो अङका एव का? ¹⁸मेन ओटनि निनाममु मकतुममुरु लिमानुयाक आनइदुम खानाचिञा ‘ए’ का ‘माआङ’ लोवो नुनिन।¹⁹देनालो निनाममुओ सावाछा निनामछेन देकमि,खोक्को आनकान डाङकातामिनतुप अङका सिल्भानस का तिमोथिङका खानाचिडा रूमरङवानिन खोनिनडा ए का माआङ हवाङे माननुङा। मेन खोनिनडा ए लोवो ओन याआङ। ²⁰देनालो निनाममुओ खाक्कोनुच्छे सिस्वदुमचि छाङ खोनिनडा ए ङे लोवानचिनओ मयाआङ। ओसुन्दुम खोनिनदाङका निनाममुओ छिदामदामओ निकि आमिन लोवो छाङ याआङ।²¹हान आनकानञा खानाचि सुत्डा निनामछेनडा ठानमुसाङ मुवो का आनकानञा ओतलावा मुवो निनाममु खोनिनङे लिमानुयाक। ²²खोकोआ आनकान धानि थेपसुवा छाङ सेपतानिन का आनकोङरिङडा लाहापफुमओ युपाडा साकोङ पुवानिन।²³मेन अङका निनाममुञा आनओ हाङमाङओ सिनलेमु युङसाकि लोङा, खानाचिञा रातमाञा अङका हान्देतारि कोरिन्थिडा वानमाञा नानतानचिनओ एव। ²⁴आममकतुमडा आनहाएसिमिन लिसाकि माआङ मेन खानाचिओ सावालेतओ साएदुतमि ऐन्का देनादि मकतुम डाङकाडे खानाचि लोमान्टका अयाआङ।

2¹मेन खानाचिओया लादेङ यङचकला लिसाकि मानतादानुम लोवो अङकाआ हाङपाङडा ओकोङे अछङ मुउङ। ²देनादि अङकाआ खानाचिञा यङचकला मेत्तुङ लो अङकाङका यङचकला लिसाओआ लेटका अङकाञा निचि साङआ छेमन मेत्वो का?³नङ अङसावालेत खानाचि झाराओ ए लोवो खानाचिधानि टाङखोङ युङसाकि, खोक्को सुत्डा अङका छेमाकातमायाक ए मोकोचि सुत्डा अडकाञा यङचकला लिमा मानडोटने लोवाकि अङकाआ ओकोङे दुम छाप्तुङडाङ। ⁴देनालो खानाचिञा माआङ मेन खानाचिसुत्डा सायाथाकला हाकलासिडा लिसाओ अङसोम खानाचिआ सिन्तानुम यिङाकि बद्धेका यातुकला का कोङओ मावाआ, का बदधेङे मुकवा पेत्याङसा अङकाआ खानाचिञा छाप्तुङडाङ।⁵मेन साङआ मिनराक मुवायाछा लो मोसाआ अडकाञा माआङ मेन खानाचि झाराञा (वद्धे खुन्यु मानपुउम लोवाकि) दिच हाकलासिडा मिनराक मुलुताओ याआङ। ⁶मुसओआ बदधेइसाङका पुवानचिनओ ओको मेकसन सायथाकला याआङ। ⁷हे हेनाक हयुम्पा खानाचिआ नुनुतछोङ मुनि नुनामलानुत मुमा का नुटाङखोङ पुमा डोटलुक माआङलो ना खाउङे माइआ मुसओ मना फान्नु उनखामा मिनराकआ बोपलुप्का लुम्वोङ।⁸ओसुन्दुम मोसाआ आनओ सोमओ सिनलेखा पुवानुम लोनि अङका खानाचि सुत्डा ताछुकफेङनि सोमफोङला मुङा। ⁹देनादि झारा दुमडा खानाचि काकाङमि अयाआङ हे अमाननुङ लोवाकि खानाचिआ खाचेत्ताकि सिनला तोकमाओ निकि अङकाआ छाप्तुङङाङ।¹⁰मेन खोक्कोआ खानाचि दिचदुमडा नुनामनुत अमुलुक, अङका छाङ मुङा, देनादि खोनालो अङकाआ साङछेया दिचयाक्कडा नुनामनुत मुवाओ याकङा लो खानाचिओङे निकि निनामछेनओ बुनेक मोको नुनामनुत मुवाओ याकङा। ¹¹का आनकानधानि सुलावाओ दिच खामसुक्ला मानकातने देनादि मोसाओ सुमतुमचिओ छापछोङडा आनकान निसिनवा याइमिन्का।¹²हान निनामछेनओ नुयङखानओ निकि त्रोआसडा बानहिडा मुन्टोङ हाएसिडा अङकाओ निकि अकटेट लापतिखोम छाङ होङतानचिनओ याआङा, ¹³मोबेन आनओ निछाक तितसञा अङकाआ मानधितहिडा अडकाञा अङसाकोङडा सावानुत मानलि, मेन मोकोचिङका खायोङ तारूकि अङका म्यासिडोनियालिप्पा खारुङ।¹⁴मेन निनाममुञा आलाङने लिने, आनकानञा निनामछेनडा निममा चुम्मालाओ निकि चुनुतछोड मुमानुयाक का खोनिनओ तायाओ नुफोङनाम आनकानडाङका उकताउक खारोङडा यापुक्तु मुमानुयाक। ¹⁵देनादि फाखालाम तोक्ताओचिडा का युन्ला लिवोचिडा आनकान निनाममुओ निकि निमामछेनओ चानु नुफोङनाम ऐन्का।¹⁶अकलिप्पा सुवालोङओ निकि सुवालोङओ खानाम, हाउसोलिप्पा अयामओ निकि अयामओ नुफोङनाम नङ मोचि दुमओ सायाथाकला साङ याआङ ना? ¹⁷देनादि बद्धेका पाङआ ओटनि आनकान निनाममुओ इदुमञा इनलाम, मुवो ऐमिन्का। मेन एङलामात मनाइसा निनाममुङका छुरानचिनओ ओटनि निनाममुओ बुसित आनकानका निनामछेनडा चेवइन्का।

3¹दि आनकान आनहाङपाङआ सायनङमुमा लुवाओ याइन्का? हे दि आनकानञा, निचिञा ओटनि याङमाछापला खानाचिओया पुवो हेना खानाचिङका तात्वो चाखाम याआङ का? ²झारा मनाचिङका सिनवोन का खिपवोन आनसाकोङडा छाप्तानचिनओ छापलाचि खानाचि ङे ए। ³आनकानकाङका रोपधाम तोक्ताओ खानाचि निनामछेनओ छापला अए यिङाकि दुमखाङमु लिनियुङसाओ याआङ, खाक्को छोकवाआ माआङ मेन अइङसक निनाममुओ साकोङआ लुङटाकओ छापखाडा माआङ मेन साओ कोङरिङओ छापखाडा छापतानचिनओ मए।⁴नङ निनामछेनका निनाममुलिप्पा आनकाओ उसओङे टाङखोङ याआङ। ⁵खाउङे दुम आनकान आनओङे लिप्पाङका ए लोनि मिनला मुमाञा आनकान आनहाङपाङङे सायाथाकला याइन्का यिडाकि माआङ मेन आनसायाथाकला निनाममु लिप्पाङका याआङ। ⁶खोक्कोआ नुङवा यङचङमुओ याङसुमिञा इसा आनकानआ छाङ मुरूओ मेत्तानिन। छापसुओ माआङ मेन साकोङओ। देनालो छाप्सुआ सेत्लुक मेन साकोङआ अयाय पुयाक।⁷मेन ओकोङे लुङटाकडा छाप्तानचिनओ का पोन्तुवाओ सुवालोङओ रोपधामला धिनुमसाङ लिसाओ याआङा लो, ओयातारि हे इस्राएलओ सुन्तुमआ वाछाप्पाओ ङालुङओ छोङआ मुहिडा उङालुङ सुक्ताकि खाङमा मानरूवाङा, खाक्को छोङ दुन्ताकि खात्याङसाछे याआङा। ⁸साकोङओ रोपधाम नुच्चुङ फान्नु खाइसाकिया धिनुमसाङ मानलिसुने ना?⁹देनालो खायोकमि दोकवो रोपधामला धिनुमसङ याआङा लो सामयोकमि दोकवो रोपधामला फाननु बदधे मुनि धिनुमसङ लिवोङ। ¹⁰देनालो ओको यामामुडा नुच्चुङ ङे खाक्को धिनुमसङ लिसाओ याआङा, हान्दे उनको धिनुमसङआ मुहिडा मोको घिनुमसङ लिमामान्ता। ¹¹देनालो खाक्को खाछिरूकि खातनियुङसाओ याआङ मोको घिनुमसङ सुत्डा बानाओ याआङा लो हान्दे युङनियुङसाओ लो फाननु बद्धे धिनुमसङडा लियाक।¹²ओसुन्दुम उसओ यामित्या लिसाकि आनकान चेपमाया टोप्पो सापसा मुइन्का। ¹³नङ देतनि खाछिरूकि खातवो दुमओ थेन्ययलिप्पा इस्राएलओ सुन्तुमआ सुक्ताकि मानखाङने लोनि वाछाप्पाआ उङालुङञा बोपछुम डिप्ताडा, मुसाकिया ना माआङ।¹⁴मेन अचुकोङ छाकओ लिसाओ मयाआङा। देनादि आइओलेनतारि आसुङ, नुनुतनुङओ खिप्सुडा मोकोङे बोपछुम मानथिन्तान चिनओ लिनियुङयाक, खाक्को बोपछुम निनामछेनदाङका थेन्यु लिसाओ याआङ। ¹⁵मेन आइतारि वाछाप्पाओ छापलायाक खिपहिडा मोकोचिओ कोङडा बोपछुम लुनियुङसाओ नुयाक। ¹⁶मेन मुनटोङ हाएसिलिप्पा मना लायाक मोबेन मोको बोपछुम पोकतिन।¹⁷हान हाएसि ना साकोङ लिमानुयाक। नङ खाड्डा हाएसिओ साकोङ लिमानुयाक, मोडा सायानुलेनला नुयाक। ¹⁸मेन आनकान झारापाङ मानदिप्ताओ डालुङआ डो खाङवो लाछेपलाडा ओटनि हाएसिओ छोङयिञा खाङमेत्ताकि हाएसि खोक्को साकोङ लियानुयाक मोकोङे युपाडा अक छोङथि डाङका हाउसो छोङथिलिप्पा फान्तुकि खारिन्का।

4¹ओसुन्दुम पुनोत तोक्ताकि आनकान सुत्डा ओको रोपधाम लिसाओ लिहिडा आनकान सोयोक चासइमिन्का। ²मेन एङलाडा मानतुङाकि, निनाममुओ इदुमडा रूङचालाम मानमुवाकि आनकानआ सिसुवाओ कोपचि दुमचि छिराओ याइन्का। मेन नुच्चुङआ सेङवा खाङमेत्याङसा, निनाममुओ मुकखाङडा, मनाचिओ खायामडा आनकान आनहाङपाञा वालानमुसाङ मुइन्का ।³मेन आननुयङखानडा छाङ बोपछुम लुवाओ याआङ लो ओको युनला लिवोचिओ निकि लुवाओ नुयाक। ⁴खाक्कोडा निमामछेन खोक्को निनाममुओ युपा लिमानुयाक खोनिनओ धिनुमसङओ नुयङखान मोकोचि धानि मानछोकने लोवाकि ओको हेन्खामाओ माङआ योकोममिनपाचिओ नुनुतराङञा खाथेप मेतनि पुवाओ याआङ,⁵देनालो आनकान आनहाङपाङञा माआङ मेन निनामछेन देकमिञा हाएसिइसा का आनकान हाङपाङञा लो देकमिओ निकि खानाचिओ चोकरिछा ओटनि मुनि रूमरङ मुझ्न्का। ⁶देनालो कुइयाङका छोङ छोकयोङ लोवो निनाममुङे लिमानुयाक, खोक्को देकमि निनामछेनओ ङालुङडा निनाममुओ धिनुमसङओ तायाओ छोङ खाङमेतमाञा आनकोडरिङडा छोकतानिन।⁷मेन साएराङओ मुलुमरङ तुप्मुयङ आनकान डाङका माआङ, मेन निनाममुओ लिने लोवाकि आनकान सुत्डा ओको खाबालुङ बाखाखुङडा याआङ। ⁸आनकान झारालिपपाङका तिम्तानचिनओ याइन्का मेनछाङ चेम्बुन मुलुत्ताओ याइमिन्का। ⁹खारुठेसडा डोराओ याइन्का मेनाछाङ यामित्यामात लिसाओ याइमिन्का।। ठेन्तानचिनओ याइन्का मेनछाङ युन्ला लिसाओ याइमिन्का। ¹⁰देकमिओ अयाम छाङ आनसाएमपोकडा यापुक्तु लिने लोवाकि आनकान देकमिओ सुवायामामु निम्मा आनसाएमपोकडा लङलेन मुइन्का।¹¹देनानि देकमिओ अयाम छाङ सुवानयक्मि साएमपोकडा यापुक्तु लिने लोवाकि ङे आनकान खोक्को अहङसक याइन्का, देकमिओ निकिडा निम्मा सुवालोङओ निकि पाङपाक्तुओ लिसिन्का। ¹²उइसाकिया सुवालोङआ आनकानकाडा ओक मुलुक मेन अयामआ खानाचिडा।¹³अङकाआ मक्तुम मुउङ, ओसुन्दुम अङकाआ चेउङ लोवो मछापतानचिन ओन्सामि मकतुमओ मोकोङे साकोङ लिसाओ लिहिडा आनकान छाङ मकतुम मुइन्का, ओसुन्दुम ङे आनकान चेइन्का छाङ। ¹⁴ओको लेसाकि हे, हाएसि देकमि खोङमा लिवोआ आनकानञा छाङ देकमि अकनिनङे खोङमा लिवोङ, का खानाचि सुत्डाडे खोनिनओ बुसित आनकानञा तायाकसाङ मुमेतमा लिवोङ। ¹⁵देनालो नुनुतछोङ बदधेका पोनुनोत लिसाकि निनाममुओ धिनुमसङओ निकि, आलाङने पुवो ओक छाङ सायाथाकला पोन्वो लिहिडा झारा याक्क खानाचिओ निकि लिसाओ मए।¹⁶ओसुन्दुम आनकान सोयोक चासइमिन्का मेन आनकाओ हुइयायि हाङछानुला युनला लिनियुङसाओ नुयाक मेनछाङ आनकाओ हुइत हाङछानुला लो लेनओलेन नुङवा लियाङसा बानाओ नुयाक। ¹⁷देनालो आनकाओ टोङमुलकओ याइतुकलाआ आनकाओ निकि फाननु बदघे मुवाकि धिनुमसङओ सानलेप खुन्यु पुकलोन मुनि पुयाक। ¹⁸आनकान दातवो यामतोकञा माआङ मेन मानदातवो यामतोकञा खाङयाङसा युङइन्का देनालो दातवो यामतोकचि खाउनमिक ओन मए मेन मानदातवो यामतोक लो अथेनमात मए।

5¹देनालो आनकाञा सिनला याआङ हे आनहेन्खामिक याक्खा ओटनि खिम ओराओ छुकआ मानमेत्ताओ खिम सारुङगाडा आनकानञा निनाममुङका सानलेप धिखिम तोङवोङ। ²देनादि सारूङगाङकाओ आनयाक्सा आनकानञा लङलेन मुसि यामित्या मुवाकि अछङडे ओकोडा ना आनकान हाङपाङहुड्डा नुङचिमा लिसइन्का। ³खोनालो उसओ एलो ना लङलेन मुवाकि आनकान असकलक धितवोन याइमिन्का।⁴देनालो आनकान ओको याक्साडा लिकाबाचि खुन्युआ तिम्तानचिनओ लिनि हाङपाङ हुड्डा नुङचिमा लिसइन्का, देनादि आनकान टिटखान होङतानचिनओ लिमाञा माआङ, मेन हुम्ताओ ओटनि लिमाञा राका मुझ्न्का, का मोको खाक्को लो सुवानयुक याआङ, मोको लो अयाम दाङका खुङतिनने। ⁵हान अङकाञा ओको दुमओ निकि छुमचुम मुलुतनि पुवो का साकोङओ लाहापफुम पुवो निनाममु लिमानुयाक।⁶ओसुन्दुम आनकान झारा सापसामि लिसइन्ने का ओको लेसुकि हे मुनटोङ आनकान साएमपोकडा युङइन्का मोबेन हाएसिङका नियाक युङइन्का। ⁷(दिनादि आनकान मुकखाङआ माआङ मेन मकतुमआ बिइन्का) ⁸आनकान सापसामि लिसाओ याइन्का हेनाक साएमपोकडा मानतायाक लिसाकि हाएसि सुत्डा नुतोममि अकनिन युङमा आनकान चाखालिसइन्का ।⁹ओसुन्दुम छाङ मादे तायाकसाङ लिसइन्ने मादे मान्तायाक लिसइन्ने खोनिनओ निकि नुवानुवो लिमाञा आनकान आन्तालाखाम मेत्तोम्का। ¹⁰देनालो उकताउकआ मादे नुलोक मादे उवाक खाक्को ओटनि साएमपोकडा मुवाओ याआङ मोओन्सामिओ सिवा तोकमाञा आनकानः झारापाङ निनामछेनओ सान्नोसानयुङखाओ बुसित खाङमुखाङ मुनि यापुक्तु लिमायाक।¹¹ओसुन्दुम ओको सिन्तुकि हाएसिओ कुमाकात्याङसा आनकान मनाचिञा काङमुइन्का मेन निनाममुडा आनकान खाङमुकखाङ मुनि पुक्तु लिसाओङे याइन्का, का आमनुतनुडा छाङ खाङमुकखाङ मुनि पुक्तु लिसाओ याइन्का, लोवो अङका यामित्या मुङा ¹²आनकान लादेङ आनहाङपाङञा खानाचिओ बुनेक वालानमुसाङ मुइमिन्का, मेन खानाचिआ छाङ कोङआ माआङ मेन डोआ ओन माइस्वम मुकाबाचिञा लायङ पुमाञा आनलिपाडा लिसाकि माइस्वम मुमाञा खानाचिञा सुकधिइ पुइन्का।¹³देनादि खोनालो आनस्वम युङयाकखाडा मानलिसा ना निनाममुओ निकि ए, नङ खोनालो आनकानका चानचुप याइन्का लो ओको खानाचिओ निकि ए। ¹⁴देनादि निनामछेनओ सोमआ आनकानञा हियुकडा मुलुतलुक, देनालो आनकान उइसाकिया मिनला मुइन्का हे झाराओ निकि अकपाङ सुवानिनओ लिहिडा झारा मसुवा, ¹⁵नङ खोनिन झाराओ निकि सुवानिन, नङ हान लेइन्कावाचिआ हाङपाङ हाङपाङ लेनचावो माआङ, मेन खोनिनओ निकि लेइमा टोड, खोक्को मोकोचिओ निम्पि सुवानिन का लादेङ हङमा छाङ लिसा।¹⁶उइसाकिया हान आनकान खाउङे मनाञा पोकओनसामि सिनमिन्का नङ आनकानआ निनामछेनञा पोकओन्सामि सिन्ताओनिन मेनछाङ हान खोनिनञा मुइसाकिया सिनमिन्का। ¹⁷उइसाकिया साङछाङ खोन्नालो निनामछेनडा याआङ लो मोको नुङवा छावनछा नुयाक। आसुङ दुमचि खाछितनिचिया, खाङानुम मोचि नुङवा लिनिचियाओ मयाआङ।¹⁸मेन झारा याक्क निनाममु मए, खोक्कोआ आनकानञा निनामछेनदाङका हाङपाङसुत्डा तोङमाला मुमेतानिन, नङ आनकानञा तोङमालाओ रोपधाम पुवानिनओ याआङ। ¹⁹तामिननुप निनाममु निनामछेनडा लिसानिन का हेन्खामाञा हाङपाङ सुत्डा तोङमालाडा बाट्टानिन नङ मोकोचिओ हआदोङओखिपमाला मानलोक्ताकि तोङमाला मुमेतवो ओकओ इदुम खोनिनआ आनकानञा पाङपाकनि पुवानि।²⁰निनाममुआ आनकानदाङका ताडछुकफेङला मुवानिन ओटनि निनामछेनओ लिपाडा आनकान हाङयङकोङमि ऐन्का। निनामछेनओङे लिपाडा आनकान खानाचिञा ताछुकफेङलक सोमफोङला मुइन्का, हे खानाचि निनाममु सुत्डा तोङमाला युङसानुम। ²¹आनकान खोनिनडा निनाममुओ सामयोमिकला लिसि तोकतोमने लोवाकि हुमुकवाङे सिनला मान तोकदामा लिवोञा छाङ खोनिनआ आनकानकाओ निकि हुमुकवा मेत्तानिन।

6¹नङ खोनिन अकनिनङे ओक मुयाङसा आनकान खानाचिञा ताछुकफेङलक सोमफोङला छाङ मुइन्का हे निनाममुओ नुनुतछोङ सितनामडा देङहुतला मानमुदानुम। ²(देनालो खोनिन लोमानुयाक, ³नङ आनसेवाडा थेपवा मानकात्ने लोवाकि आनकान खाउङे दुमडा दिचछाङ साकबाय पुइमिन्का।⁴मेन उक्ताउक दुमडा आनकान आनहाङपाङञा निनाममुओ चोकरिछा ओटनि खाङमेत्तोम्का, बद्धेङे छङनुसानडा, लारूमडा,छुयुकलाडा, ⁵रमफक धातसुडा, छेकखाडा, मुकलाखिडा, मुयुलाडा, पोकरूङलाडा, मानचायाकलाडा, ⁶साङनुउलाडा, तायाडा, हुङलासिडा, पुनुतडा, वाचोङ साकोङडा, सासुबुसा सोमडा, ⁷निसवान इदुमडा, निनाममुओ साएराङडा, चुप्चु का बेङसु हवालिप्पा सामयोमिकलाओ बोपटिटआ,⁸धिनुमसङ का मिनअतआ, उतनुङ का नुनुङआ, रूङचामिसा, मेनछाङ नुच्चुङमि, ⁹मानमसिन्ताओ इसा मेनछाङ खान्नोकनिन सिन्तानचिनओ, सुमालुवाओ इसा का खाङानुम आनकान लेयाओङे याइन्का, खारूचुकताओ इसा, मेनछाङ मानसेरानचिनओ इसा, ¹⁰मिनराकमि इसा मेन्छाङ निम्मा सावालेत, छुयुकुपा इसा मेन्छाङ बद्धेञा लुङलि मेत्वो, दिचछाङ मानलिवो इसा, मेन्छाङ झारायामतोक लिसाओ।¹¹हेइ! कोरिन्थिच्यो, आनकानआ हुत्ताकिङे खानाचिञा लोनिपुवाओ याइन्का, आनकोङरिङ टोप्पो याआङ। ¹²खानाचि आनकानडा चुप्लो लिसाओ अमाननुङ, मेन खानाचि आनओङे नुस्वमडा चुपलो लिसाओ अयाआङ ¹³मेन हान मोकोङे माइओ बारालाडा (अङका आनओङे छाचि सुत्डा इसा लोङा) खानाचि छाङ टोप्पो कोङओ मए।¹⁴मकतुम मानमुवोचि सुत्डा युक्या लिसाकि अकटेटङे हाराइडा अमानबोकदामान, देनादि सामयोक का हआदोङओ दि युकछोङला नुयाक? कुइया सुत्डा छियाओदि रिमिटोङ? ¹⁵नङ निनामछेनओ सुलावासुत्डा दि युक्यामिन्वा? दि मकतुम चुवोओ मकतुम मानचुवो सुत्डा दि हाक्ला? ¹⁶नङ सेम्फोकलाचि सुत्डा निनाममुओ माङखिमओ दि वेतनात? देनालो खानाचि अहङसाङ निनाममुओ माङखिम अए देतनि निनाममुआ यिङानिनओ याआङ, अङका मोकोचिडा याकमुवोङडा का मोकोचिओ हुपडा बिकोन मुवोङा, अङका मोकोचिओ निनाममु लिवोङा का मोकोचि उङहाङछामि मलिवोङ।¹⁷ओसुन्दुम, ¹⁸नङ खानाचिओ पापा लिवोङा

7¹ओसुन्दुम हेइ! नुङनामिच्यो, ओचि यङचकला लिसाओ लिहिडा साएमपोक का साकोङओ झारा माइओ असेङअतमिनचिङका आनकान आनहाङपाङआ वाचोङ मुलुतोमने नङ निनाममुओ कुमा युङसाकि वाचोङउलाञा सेनलेन मुलुत्तोने।²आनकानञा खानाचिओ कोङ होङनि पुवानुम। आनकानआ साङओ अनुत्वारि मुइमिन आनकान आ साङञा सोपसावा मुलुतइमिन। आनकानआ साङछे मनाञा छेङइमिन। ³खानाचिञा खायोकमि दोकमाञा अङकाआ ओको यिङाओ मानएदोङ, देनालो अङकाआ बुसिङे लोनि पुवाओ याकङा हे खानाचि आनकानओ अकनिन-अकनिनडा सुसि का लेइसिञा आनकोङरिङ हुडडाङे अयाआङ। ⁴अङका खानाचि सुत्डा धिकुमाकामात सुत्डा चेपङा, खानाचिओ लिपाडा अङकाञा धिमाइस्वम याआङ, अङका नुटाङखोङआ भेप्तानचिनओ याकङा का आनकाओ झारा यातुकलाडा अङका सावालेतआ चोमसाकि थोकङान्।⁵देनालो आनकान म्यासिडोनिया बानहिडा छाङ आनसाएमपोकडा दिच छाङसावानुत माननुङस, मेन झारालिपाङका आनकानञा यातुकला डोराओ याआङा, हुइया ङेन्साङ हुड्डा कुमाङे कुमा मयाआङ। ⁶मुइसा मलिसा मेनछाङ नोअमिचिञा चुटाङखोङ पुमालिवो तामिनतुप निनाममुआ आनकानञा तितसओ ताबान्सुआ नुटाङखोङ पुवानिन ⁷नङ उताबान्सुआ ओन माआङ, मेन मो नुटाडखोङआ छाङ, खाक्को नुटाङखोड खोचिञा खानाचिडा तोङाओ याआङा, का मुन्टोड माचिआ खानाचिओ रापचा, आमतुकहुयु का अङका धानि खानाचिओ धुङरुडओ यङखान आनकानञा मलोवा, मोबेन अङका फान्नु बद्धे मुनि छेमन लिसुङ।⁸देनालो लिसिना अङकाआ आनओ छापलाङका खानाचिञा कोङराकसाङ मुमेतुङ का उङकाआ देङसुमिन मुउङ, मेनछाङ अङका हान देङसुमिन मुनुङा, देनालो अङका टोकङा, हे मोको छापलाआ खानाचिञा अचिमुयाकलाओ निकि मलिसा छाङ मिनराक मुमेत्ता ⁹हान खानाचि मिनराकमि अलिसा लोवाकि अङका कोङछिसान मुवाओ माआङ मेन खानाचि अछङमिनओ निकि मिनराकसाङ अलिसा देनालो आनकानलिपाङका खानाचिआ लोकअसा मानलिने लोवाकि खानाचि निनाममुओ राकाओन्सामि मिनराकमि अलिसा। ¹⁰देनालो निनाममुओ राका ओन्सामिओ मिनराकआ देङसुमिन मुमा मानडोटवो मुनि फाखालाएओ निकि अछङमिन मुयाक, मेन हेन्खामाओ मिनराकआ सुवालोङ पुकलोन मुयाक।¹¹देनादि खाङानुम ओकोङे ओलाक दुमआ निनाममुओ राका ओन्सामि खानाचिञा मिनराकमि मेत्ता, मोसाआ देम बदधे खानाचिडा हेन्नाम राका, देम माइसुङ देम कुमा, देम राफ्या, देम साखाचोङ, देम वाराला खानाचिडा पुक्लोन मुनिपुवा। ओको झारादुमडा खानाचिआ आमहाङपाङञा सेङवा लिसाओ सिनलेखा अपुवा। ¹²अङकाआ खानाचिञा छाप्तुङ मेनछाङ मानना सानउत मुकाबाओ निकि मान सानअत आङकाबाओ निकि, मेन निनाममुओ मुकखाङडा आनकानधानिओ खानाचिओ हेन्नाम मिनराक पुकलोनन लिने लोवाकि छाप्तुओओ एव।¹³ओसुन्दुमा आनकानञा नुटाङखोङ लिसाओ ए, का तितसओ सावालेतआ मुहिडा आनकाओ नुटाङखोङडा आनकानञा फाननु बद्धेङे सावालेत लिमाता, देनालो मोचिओ साकोङञा खानाचि झाराङका सावाएमला तोङाओ याआङ। ¹⁴देनालो मोचिओ बुनेक खानाचिओ लिपाडा अङकाआ मोसाडा दिच माइस्वम मुवाओ याकङस लो अडकाञा मोसाडा दिचसिसुवा माननुङ, मेन खाइसाकिया आनकानआ खानाचिञा झारादुम नुच्युङसुन्दा लोइन मुझसाकियाङे तितसओ बुसित अङकाआ माइस्वम मुवाओ छाङ नुच्चुङ दोक्तानचिन।¹⁵नङ खाइसाफिया कुमा का धुन्ता सुत्डा खानाचिआ मोचिञा सायानुत अचुवा। मोचिआ खानाचि झाराओ काकाङलेनओ मुकसिन मुहिडा उहुडडायि नुस्वम खानाचि लिप्पा फाननु बदधे नुयाक। ¹⁶उकताउक दुमडा खानाचिड़ा अङलाटला सापसा लिसाओ लिहिडा अङका वायासाङ लिङा।

8¹हेइ! निछाच्यो, म्यासिडोनियाओ रिमिटोडडा लिसाओ निनाममुओ नुनुतछोङ आनकान खानाचिञा सिनलेसाङ मुमेत्तोम्का ²हे खाइसाकिया छुयुओ टोप्पो सुकोडा मोकोचिओ उनखामा सावालेत का अतोकसु चखयङला लो मोकोचिओ सागतामलाओ खाबालुङ लिसाकि सायाथाकसाङ पोया।³देनालो अङका सिनलेमु पुङा हे मोकोचिओ खोम ओनसामि का खोम चोङलो बदधे छाङ आनओङे नुवानवानआ मपुवा ⁴का सेङहाङछाओ सेवाओ नुनुतछोड का रिमिटोङडा आनकान हाक्ला लोकसि तोकतोमने लोनि बदधेङे छुकफेङलामसुत्डा आनकानञा ताछुकफेङलक सोमफोङला मचुवा ⁵नङ आनकानआ मिनमासा मुवाओ ओन्सामि ना माआङ मेन मोकोचिआ बुदा हाङपाङञा हाएसिडा मरिपेन्ता मन्कि निनाममुओ राकादाङका आनकानञा मपुवा।⁶ओयातारि हे मोचिआ बुसिङकाडे पुङला मुवाओ ओन्सामि, खानाचिडा छाङ मोको नुनोओक थेन्यु मचुने लोवाकि आनकानआ तितसञा सालामयङ पुइन्। ⁷मेन देतनि झारा याक्कडा खानाचि सायाथाक्ला लिनियुङसाओ अयाआङ मुइसाङे मुक्तुमडा, सवाछङडा, तायाडा, झारा साखाचोङडा, का आनकानलिप्पाओ आमसोमडा का खानाचि ओको नुनोओकडा छाङ सायाथाक्ला लिसानुम।⁸इङइवाओ युपाडा ना माआङ मेन निचिओ साखाचोङ दाङका खानाचिओ सोमओ नुच्चुङला छाङ सुको मुवाकि अङका चेपङा। ⁹देनालो आनहाएसि देकमि निनामछेनओओ नुनुतछोङ खानाचिञा सिनलाङे याआङ हे खोनिनओ चखयङलाङका खानाचि लुङलि लिसानुम लोवाकि, खोनिन लुङलि लिसाकि छाङ खानाचिओ निकि चखयङ लिसानिन।¹⁰नङ ओकोडा अङका उङमिन्तोङ पुङा देनालो ओको खानाचिओ निकि दुकनुवाओ दुम याआङ। खानाचि अकदोङ बुसि मुमाञा ओन माआङ, मेन राका मुमाञा छाङ, तापुङ मुसि बुसिवा लिसाओ अयाआङा। ¹¹मेन हान मुवो ओक छाङ थेन्यु मुवानुम का ओटनि राका मुसि छुमछुम अयाआङा मुसओङे आमखोम ओनसामि थेन्यु छाङ लिने ¹²देनालो छुमचुमला याआङलो हाङपाङसुत्डा मानलिसा ओनसामि माआङ मेन हाङपाङओया मलिसा ओन्सामि ओको देङहुतमुरू नुयाक।¹³देनालो निचिआ नुतोम्ला का खानाचिञस लो छुयु लिने लोवाकि अङका ओको यिङनुङा, ¹⁴मेन युक्यालाओ मिनलाआ, ओको आइदुमुओ मुयाकलाडा खानाचिओ पोन्सु मोकोचिओ टाङछुतलाओ निकि का अचुपोन्सु को आमटाडछुतलाओ निकि लिने, का झाराडा युक्याला, लिने, ¹⁵ओटनि छाप्तानचिनओ याआङ- वदधे कोपकाबाओया उनखामा मानलि का अचि कोपकाबाओया टाङछुतला मानलि।¹⁶मेन निनाममुञा आलाङने लिने खोक्कोआ तितसओ कोङडा खानाचिओ निकि मोकोङे हेन्नाम मिनराक पुमानुयाक। ¹⁷देनालो मोचिआ आनकाओ सालामयङ ना काङमाला मचुवा मेन धिसाखाचोङमि लिसाकि आन्ओङे राकाआ मोचि खानाचिओया खातनिलेवा।¹⁸नङ आनकानआ मोचिसुत्डा मोको निछाआ खाइयाइन, खोक्कोओ नुसङमुसान नुयङखानओ छापछोडडा झारा रिमिटोडडा फेयानचिनओ याआङ। ¹⁹नङ उनओन माआड मेन आनकानकाङका सेवा तोकतुओ ओको नुनुतछोङको ओकडा हाएसिओ धिनुमसङ का आन्छुमचुमला खाङमेतमाओ निकि मोचि आनकान अकनिनडा कोन्या मुमाञा रिमिटोङ डाङका कावाङसाङ मलिसा।²⁰आनकानआ सेवा मुवाओ ओको सायाथाक लुङओ छापछोङडा खाउङे मनाआ आनखायोक मानतोकने, लोनि आनकान रातमान चाखालिसइन्का, ²¹देनालो आनकान हाए‌सिओ मुकखाङडा ओन माआङ मेन मनाचिओ मुकखाङडा छाङ सानुवायि ओकओ खायाममु युङसोम्का।²²नङ आनकानआ खानाचि सुत्डा आननिछाञा खाइयाओ याइन्का। खोक्कोञा आनकानआ बदधेकादु बदधेङे दुमडा खाचेत्तुकि साखाचोङमि याछा लोवो धिराओ याइन्का। मेन खानाचि लिप्पा लिसाओ उटोप्पो टाङखोङआ मुहिडा मोचि हेन्नाम धिसाखाचोङमि लिसाओ मयाआङ। ²³खोनालो साङआ तितसओ छापछोड्डा मसेना, मोचि उङयुक्याहाकतुमि का खानाचिलिपाओ साएमुकामि मए हेना निछाचिओ छापच्छोङडा मसेना मोकोचि रिमिटोङओ याकेन्छा का निनामछेनओ धिनुमसङ मए। ²⁴खानाचिओ सोम का खानाचिओ लिपाडा आनमाइस्वमओ सिनमेतला मोकोचिञा रिमिटोङओ बुनेकडा पुवानुम।

9¹सेङहाङछाचिओ निकि लिनियुङसाओ सेवाओ छापछोङडा खानाचिञा छापनियुङमा अडकाञा चाखाम माननुङ। ²देनालो अङका खानाचिओ छुमचुमला सिनङा खाक्कोओ छापछोङडा अङका म्यासिडोनियाचिओ बुनेक खानाचिओ लिपाडा माइस्व मुङा हे आनेमनुङ दोङडाङकाङे अखैया छुमचुम लिनियुङसाओ याआङ, का खानाचिओ सावाचोङआ मोकोचिओ बदधेइसाञा चोडसाङ मुलुत्ताओ याआङ।³मेन ओको छापछोङडा खानाचिओ लिपाडा आनमाइस्वम सित्नामडा मानलिने लोवाकि अङकाआ निछाचिञा खाइयाओ याकङा, का खासओ अडकाआ यिङाओ याक्ङा मोओन्सामि खानाचि छुमचुम अयुङवोङ। ⁴माआङलो साङ म्यासिडोनियनचि खाउङे माइआ अङका सुत्डा बानाकि खानाचिञा छुमचुम मानलिसाओ मधिरा लोना आनकान (खानाचि लोनि आनकान लोइमिन्का) ओकोङे टाडखोङओ निकि सिसुवाडा डोटवोम्का। ⁵ओसुन्दुम अङकाआ निछाचिञा ताछुकफेङलक सोमफोङला मुमा नियिक मित्तुङ हे मोकोचि खानाचिओया बुसिङकाङे खाराकि, खानाचिआ बुसिङका यङचकला मुनियुङसाको पुनोत बुसिङकाडे छुमचुम मुलुतनि मयुङने का उइसाकिया छुमचुम लिने, हे हियुक राङआ माआङ मेन सागतामलाओ पुनीत ओटनि लिने।⁶मेन दुम ओकोङे ए, हे हेनाङवारि सुत्डा थोकवोआ हेनाङवारि सुत्डाङे हेक का सायाथाकला सुत्डा धोकवोआ सायाथाकला सुत्डा हेक। ⁷उकताउक मनाआ उकोङडा मथामा ओन्सामि मुने, मानना स्वमतुक्ताकि मान चाखाम लिसाओआ। देनालो वायाकनिन पुकाबाञा निनाममुआ सोम मुमानुयाक।⁸देनालो झारा दुमडा उकताउक मुयाकला खानाचि सायायाकला लिसाकि उकताउक नुओकडा लातलक लिनि पोन्याङसा खारानुम लोवाकि निनाममुआ खानाचिञा झारा नुनुतछोङ सायाथाकला मुनि पुमा रूमानुयाक। ⁹ओटनि छाप्तानचिनओ याआङ-¹⁰नङ थोककाबाआ यामाचा का चासिञा पेम्पाक पुमालिवोआ खानाचिञा वेतमाञा यामाचा पुमालिवोङ का पोन्सु मुमेतमालिवोङ का खानाचिओ सामयोमिकलाओ सिवा पोन्मा-लिवोङ, ¹¹उकताउक दुमडा झारा सागतामलाआ खानाचि लुङलि लिसाकि, आनकानदाङका निनाममुञा आलाङने रिपेनवो ओक नुयाक।¹²देनालो ओको सेवाओ ओकआ वाचोङ मनाचिओ चाखामला याचोत्वोन ओन माआङ मेन निनाममुडा छाङ आनकानदाङका बदधेङे आलाङने सायाथाकला हाकङहाडा छाङ नुयाक। ¹³ओको सेवाओ सिनलेखा पुवाकि निनामछेनओ नुयङखानडा खानाचिओ देङहुतलाओ काकाङलाओ निकि, का मोकोचिञा का झाराञा फामासि मुमाडा सागतामला खाङमेत्ताकि मोकोचिआ निनाममुओ धिनुमसङ मचु। ¹⁴मोकोचि हाङपाङ छाङ खानाचिओ लिपाडा खपमिनकफेङला मचु का खानाचि धानि निनाममुओ अतोक नुनुतछोङ लिसाओ लिहिडा खानाचिओ वाततिम मचु। ¹⁵निनाममुञा खोनिनओ चेपयङ मुनि मानरूवो इछुकसिवाओ निकि आलाङने लिने।

10¹हान अङका पावल उङहाङपाङे निनामछेनओ नोऔला का नोयोमउलाआ खानाचिञा मिनमायिसिनङा, अङका खोक्को आमबुदा लिहिडा खानाचिओ हुपडा नोअमि याआङाङ मेन मानतायाक लिहिडा खानाचिलिपा सापसामि याकङा। ²अङका सोमफोङला मुङा, हे आनकानआ साएमपोक ओन्सामि बिवो लोनि दोककाबाचिओ उसादाकडा, मो टाडखोङडा सापसामि लिवो मिनला मुङा, खाक्को टाङखोङडा अङका तायाकसाङ लिहिडा अङका सापसामि खाङमेतमा मानडोटने।³देनालो आनकान साएमपोक ओन्सामि बिइन्का, मेन्छाङ साएमपोक ओन्सामि ङेन मुइमिन्का। ⁴(देनालो आनङेनओ बान्छुमि पोकमिक मयाआङ, मेन रूलेनखाचि फेनमारूवो इसा मयाआङ, मोचि निनाममुओ बुसित साएराङमि मयाआङ)⁵निनाममुओ तायाओ उसादाकडा ठानठुक लिवो मिन्छोङ का उकताउक चोम्लो दुमञा आनकानका यङछितला मुइन्का, का उकताउक मिनलाआ निनामछेनओ इङइवा काडसिञा कोपरूङडा मुलुत्तोम्का। ⁶नङ मुन्टोङ खानाचिओ इङइवा काङलेन मुवो ओक लाटला लिसाओ नुयाक मोबेन झारा इङइवा थापछुनला मुवो ओकञा दुकमेतवो छुमचुमडा आनकानका युङइन्का।⁷खानाचि अमुकबुदा लिसाओ यामतोकचि अखाङ। खाउङे मनाआ अङका निनामछेनओ एव लोवो उहाङपाङ मकतुम युङलो मोसाआ उहाङपाङ लादेङ मिनला मुने हे ओटनि मोको निनामछेनओ ए, आनकान छाङ मुसओङे ऐन्का। ⁸देनादि आनकोपरूङओ छापछोङडा अङकाआ दिच हाकलासिडा माइस्वम मुउङ लो छाङ (दनालो खाक्को खानाचिआ रोङमाञा माआङ, मेन साङसेसानमाओ निकि हाए‌सिआ पुवानिनओ याआङ) अङका नासुङडा डोटवोनुङा,⁹का उङछापलाचिआ खानाचिञा कुमा खाङमेतवो ओटनि अङका मानदारूम । ¹⁰देनादि मोकोचि मयिङ, वाछाप्पाओ छापलाचि कुकचुवा का सायराङमि मलि, मेन बुसितडा साए‌मपोकओ डोलुकवा का दुम लो दिच ओकओ माननुङ।¹¹मुसओआ ओको मुकसिन युङने हे आनकान आनओ मानतायाकडा छापलाचिओ दुमडा खाक्को याइन्का आनओ तायाकलाडा छाङ ओकडा मुसओङे याइन्का। ¹²देनालो आनओ साएनङमु उहाङयाङ मुकाबाचि साङ साङसुत्डा आनकान आनहाङपाङञा इखिपमा हेना मोकोचि सुत्डा आनहाङपाङञा यातोङसि सापसा मुइमिन्का मेन मोकोचि हाङपाङआ अचुहाङपाङञा हाक्ताकि खाङहिडा का हाङपाङहाङ सुत्डा यातोङहिडा मोकोचि हाङपाङ नुतनुमातओ मयाआङ।¹³मेन हान निनाममुआ आनकानञा हाक्लाओ निकि पुवानिनओ नाटुङसुङओ चोमसिन ओन्सामि, खाक्को चोमसिन खानाचि तारि ताबान, मोडाङका लेटका हान आनकान खाउङे दुमडा चोमसिन हुइया माइस्वम मुवोमिनका। ¹⁴देनालो खानाचिओया ताबानसि मानरूवो इसा आनकान बदघे मुनि फेइमिन्का, देनादि आनकान निनामछेनओ नुयङखानडा खानाचिओया तारि छाङ बाननिचियाओ याइन्का।¹⁵आनकान चोमसिन हुइया निचिओ मुयुलाडा माइस्वम मुइमिन्का मेन खानाचिओ मकतुम पोन्याङसा खातहिडा खानाचिडा आनचोमसिन ओन्सामि फाननु सायाथाक मुवाकि पोन्याङसा खातवोम्का लोवो यामित्या मुइन्का ¹⁶का खानाचिङका मोधेत ह्याक्कोलिपा नुयङखान एनमेत्माओ निकि का आनछुकडा छुमचुम युङाओ दुमचि लोकताकि निचिओ निसिङवाङ हुड्डा माइस्वम मुसिञा लो माआङ।¹⁷मेन माइस्वम मुकाबाआ हाए‌सिडा माइस्वम मुने। ¹⁸देनालो खोक्कोआ आनओ साएनङमु मुयाक, मोको माआङ, मेन खोक्कोञा हाए‌सिआ वालानमुसाङ मुमानुयाक मोको देङहुतला मुवानचिनओ नुयाक।

11¹खानाचिआ अङदोयोङलाडा आङनि पुवाओनिन ना लिवो याआङा, नुच्डुङडे खानाचिआ अङकाञा आङयाङसा छाङ अयाआङ। ²देनालो इमसोङयि मिनछेनआ अङका खानाचि धानि मिनछेनमि लिसुओ याकङा, देनादि खानाचिआ निनामछेनओ निकि अकपाङ साङनुवा कामेत्छा इसामुनि रिपेनमाञा अङका खानाचिञा अकपाङे छामिन्छा सुत्डा दोतलाम मुनि पुवाओ याकङा।³मेन देतनि पुछापआ आनओ रूङचालाआ हव्वाञा छेङसु मुइसाकिया निनामछेनलिपाओ खानाचिओ नातेपमिन का साङसमलाङका खानाचिओ मिनलाचि युन्ला मनुङने हे लोवो अडकाञा कुमाकाराओ याआङ। ⁴देनालो साङ ताकि आनकानआ रूमरङ मानमुवाओ हाउसो देकमिओ रूमरङ मुलुक हेना खानाचिआ मानतोकताओ हाउसोङे साकोङ हेना खानाचिआ काङलेन मानमुवाओ हाउसोङे नुयङखान खानाचि अतोक लो ना खानाचिआ ओको खान्नोकनिन आङदा अयाछा।⁵देनालो अङका चामलोकङा, हे अङका खाउङे दुमडा मोचि बुसिवा लोहोनमिचि, चोङलो ओन्तोम याकनुङा, । ⁶मेन अङका दुमइदुमडा अत्सालेन मलिसा मेन्‌छाङ तायाडा ना मुसओ याकनुङा मेन झारा मनाचिओ हुपडा खानाचिलिपा आनकानआ ओको यापुक्तु मुवाओ याइन्का।⁷हेना निनाममुओ नुयङखान अङकाआ उलुङमातडा खानाचिञा एनमेत्तुकि हाङपाङ लो नेप्चुवाकि खानाचिञा चोमलो मुलुताओडा दि अङकाआ हुआदोङ मुउङ ना? ⁸खानाचिओ सेवा मुमाञा निरिमिटोङडाङका साएदुतवा लोक्तुकि अङकाआ खानाचिञा खासेकतुङ। ⁹नङ अङका खानाचि सुत्डा तायाकता युङहिडा मुन्टोङ अङकाआ चाखामला डोराङसाङ, अङका साङओछाङ खुन्यु मानलिदोङ, देनालो म्यासिडोनियाङका बानहिडा मोचि निछाचिआ अङचाखामला लाटला मुनिमपुवा, का झारा माइङका खानाचि धानि खुन्यु डोटसिङका अङका उङहाङपाङ रात्तुङ का रातवोङा।¹⁰निनामछेनओ नुच्चुङला अङकाडा याइनलोक अखैया लुङवाङडा साङआ अङकाञा ओको माइस्वम डाङका नान्वोनिन । ¹¹देना? देनालो खानाचिञा सोम मुनुङा लोवाकि? निनाममु ङे सिनमानुयाक।¹²मेन मोकोचि खाक्कोडा माइस्वम मचु आनकान इसा मधिरूने लोवाकि सुकधिइ लामवोचिञा सुकधिइ मानपुदामाञा अङका खाक्को मुङा मोको मुवोङे याक्ङा। ¹³देनालो मुसओ मनाचि सोज्जे लोहोनमि, रूङचाला ओक मुवो, निनामछेनओ लोहोनमिओ मुपयुपाडा उहाङपाङञा वाइफान मुकाबाचि मए। नङ ओको दिच नाकाकता माआङ,¹⁴देनादि सुलावा छाङ उहाङपाङञा छोकछोकवा याकेनछाचिओ मुपयुपाडा वाइफान मचुलुक। ¹⁵मोसाओ याङसुमिचिआ छाङ उहाङपाङ साम्योकओ याङसुमिओ मुपयुपाडा वाइफान मचुलुक लो ओको दिच टोप्पो दुम माआङ खोक्कोओ थेन्यु अचुओक ओन्सामि लिवोङ।¹⁶अङका लादेङ लोङा, खाउङे मनाआ अडकाञा निसिन्वा मानमितने। मेन खानाचि अमित लो मेनछाङ बोयोङआ देङहुतलाम मचुवा ओटनि अङकाआ देडहुतलाम मुवानुम, का अङका दिच माइस्वम मुसिरूउम। ¹⁷माइस्वम मुवो दुमओ ओको मकतुमडा खाकको अङका चेपङा हाएसिओ ओन्सामि माआङ मेन निसिनलाडा इसा चेपङा। ¹⁸देनादि बदधेकाआ साएमपोक ओन्सामि माइस्वम मुवो लिहिडा अङका छाङ माइस्वम मुवोङा।¹⁹देनालो खानाचि आमहाङपाङ नुतनुमि लिसाओ लिहिडा छेमाकनिन निसिन्वाचिञा अआङ। ²⁰देनादि खोनालो साङआ युनमाला मुलुत, साङआ हापचोक, साङआ उहाङपाङआ चोम्लो मेत साङआ खानाचिञा डोडाङे धातलो खानाचि मोमनाञा अआङ। ²¹आनकान डोलुकवा मलिसा ओटनि मुनि नेप्चुलुत्ताकि अङका चेपङा। मेन खाक्कोनुछेडा साङआ सापसा मुलो (अङका निसिनलाडा चेपडा) अङकाञा छाङ सापसा बान,²²दि मोकोचि हिब्रु मए? अङका छाङ एव। दि मोकोचि इस्राएलि मए? अङका छाङ एव। दि मोकोचि सुन्तुमदिवाओ दुक्छाइवा मए? अङका छाङ एव। ²³दि मोकोचि निनामछेनओ रोपधामवाचि मए, (अङका फान्नु अचरप्तुकि लोङा) अङका फाननु बखेका मुनि एवं, मुयुलाडा फाननु सायायाकला मुनि, छेकलामडा फाननु सायाथाक्ला मुनि, रमफकतुम्मुडा इखिपमात, सुवाललॊङडा खप्याकखप।²⁴ङाकादु अङकाआ यहुदिचिओ छुकडाङका भौसुकि रमफक चोउङ। ²⁵सुमकादु तोमफुकआ धात्ताङन। अक्दु लुङटाकआ आप्ताङनङ। सुमकादु अङका वाङाओ वाचाकमा केरा। अकलेन अकखाखुत अङकाआ साजुमाडा ङे छितदासाओ याकङा। ²⁶खप्याकखप कोन्याचिडा, होङकुचिओ युन्कारू, खुसावाचिओ युन्कारूडा चिरावाचिङका युनकारुडा, निरावाचिङकाओ युन्कारूडा, तालावाङडा युन्कारू, सेन्याङनिखाडा युन्कारू, साजुमाडा युन्कारू, मुप्साङ निछाचिओ हुपडा युन्कारू।²⁷मुयुलाडा का छुयुडा, खप्याकखप हुङवो ओकडा, साका-वात्तिम डा, खप्याकखप मानचायाकडा, चुङ नङ सकलुकडा। ²⁸हुइयाओ ओको झारा दुमचि लेटका अडकाञा लेनकालेन, खातिमला पुवो दुम ना झारा रिमिटोडचिओ निकिओ मिनराक ङे ए। ²⁹साङ डोलुकवा याआङ, का अङका डोलुकवा याकनुङा? साङञा ओलाक साकवाय डोटमा बान् का अङका लो माइसुङआ लेतनुङा?³⁰माइस्वम मुमाङे नियिक याआङ लो अङका आनओ रूपरूयुओ छापछोडडा माइस्वम मुवोङा। ³¹हाएसि देकमिओ निनाममु का पापा, खोक्को सानलेपसान सायोकसाङ लिमानुयाक खोनिनआ लेमानुयाक हे अडका मुपनुङा।³²दमिसकडा अरितस हेन्कोपहाङओ धिखारुखाहाङछाआ अङकाञा दमिसकओ तालावाङडा खाचोपवा युङसाओ याआङा ³³नङ लापतिम डाङका अकटेट वाइखुङडा ह्युनि धामेत्तुकि अङकाउछुक डाङका फुरुउ।

12¹ओको तोक्नुछुकओ ना माननुङ मेन्छाङ अङकाआ माइस्वम मुमा मिननुलोक याआङ, मेन अङका हाएसिओ खाङकामेतचि का याखाङसाङ दुम मुयाङा। ²आङका निनामछेनओ अकपाङ मनाआ सिनङा,साएङलुदोङ लिसा (पोकडा ए हे मायाक पोकडा ए मोको अङकाञा सिनला मान्नुङ निनाममु लेमानुयाक) उसओ अकपाङ मना सुमसि सारुङगातारि लाप्तुकि खाट्टान्चिन।³नड अड़का उसओ मनाआ सिनडा (पोकड़ा ए हे मायाका पोकडा ए मोको अडकाजा सिनला मान्दड निनाममा लेभानुयाक) ⁴हे मोको लाप्तानचिनकि सारूडगालिपा खा‌ट्टानचिन का मोसाआ चुछान मुनि मानचिनवो दुमचि एनु। खाक्को ओकमाला मुमा मनाओ निकि सान्नोसाकलक माननुङ ⁵उसओङे मनाओ लिपाडा अङका माइस्वम मुङा, मेन आनओङे लिपाडा लो उङरूपरूयुडा लेटका अङका माइस्वम मुवोनुङा।⁶देनादि अडकाआ माइस्वम चुवोङे राका मुउङ लो छाङ अङका निसिनवा लिवोनुङा। देनालो अडका नुच्चुङ चेप्वोङा, माआङलो टोक्ताङ हेना एनाङओ चोङलो बदधे मानचामलोकने लोवाकि अङका नानङान। ⁷नङ याखाङसाङओ बद्धेङे मुलुमरङलाओ सुन्दुमआ मुहिडा अङका सावालेतआ बदघे मानचोन्तुम लोवाकि अडकाञा साएमपोकडा अकमाइओ फङलासुङ का अङका सावालेतआ मानचोन्नुम लोवाकि अडकाञा पुममाञा सुलावाओ अकटेट याकेच्छा पुवानचिनओ याआङा।⁸ओकोओ छापछोङडा ओको अङकाङका यासोतने यिङाकि अङकाआ सुमकादु हाएसि सुत्डा सोमफोङला मुउङ। ⁹नङ खोनिनआ लोवाङनिन, उङनुनुतुछोङ आमनो निकि सायाधाकला याआङ, देनालो उङसाएराङ अराङमातलाडा सेनलेन नुयाक। ओसुदुम निनामछेनओ साएराङ अङकाडा याकमुने यिङाकि अङका हेनाक उङअराङमातलाडा बद्धेङे सावालेत सुत्डा माइस्वम मुवोङा। ¹⁰ओसुन्तदुम निनामछेनओ निकि अराङमातलाचिडा, मायाक्साचिडा चाखामलाचिडा, ठिनमालाचिडा, लारूमदाचिडा अङका सावालेत लिङा, देनलो अराङमात लिहिडा अङका साएराङमि लिङा।¹¹अङका निसिनवा लिसाओ याकङा, खानाचिआङे, अडकाञा अहियुक्ता, देनादि खानाचिङका अङकाओ वालानमुसाङ लिमाडोराङा। देनादि अङका दिचछाङ मानएदोङ मेच्छान मोचि बुसिवा बुसिवा लोहोनमिचि चोङलो अङका दिचदुमडा ओन्तोम माननुङाङ। ¹²लोहोनमिओ सिन्छुङवाचि नुच्चुङङे झारा हुडलासिडा, सिन्छुङचि नाकाकओकचि, का साएराङओ ओकचिडा खानाचिओ हुपडा लिसाओ मयाआङा। ¹³देनालो अङकाआ उङहाङपाङञा खानाचि धानि खुन्यु मानपुवाओ लेटका निचि रिमिटोड चोङलो खानाचि दि दुमडा ओन्तोम लिसाओ अयाआङा? ओको सानउतओ निकि नुनामलानुत मुवाङनङ।¹⁴खाङानुम ओको सुमसिदु, खानाचिओया बानसि अङका छुमचुम लिसुओ याकङा का अङका खानाचिओ खुन्यु लिवोनुङा देनादि खानाचिओ खाबालुङ माआङ मेन खानाचिञा ङे लामङा, देनालो मामा पापाओ निकि सावाछा-मेछाछाआ माआङ, मेन छावारिओ निकि मामा-पापाआ लुङ चुकमा डोटलुक। ¹⁵हान अङका खानाचिओ हाङमाङओ निकि वदधेङे छेमन सुत्डा याङयाला मुवोङा का याङला लिवो छाङ याकङा। खोनालो अङकाआ खानाचिञा सायाथाक सोम मुउङलो दि ओन्तोम सोम तोकवोङा का?¹⁶मेन लिमारू अङकाआ खानाचिञा खुन्यु मानखुन्मेतदोङ, मेन कोङरोकवा लिसाओ लिहिडा अङकाआ खानाचिञा रुङचालाआ फेमतुङ। ¹⁷अङकाआ खानाचिओया खाइयाओचि खपओ खाउङेङका खानाचिङका दि अङकाआ तोकनुछुक पोक्तुङडाङ का? ¹⁸अङकाआ तितसञा मिन्तुयिसिन्तुङ का निछाञा अकनिनडा खाइसुङ। दि तितसआ खानाचिङका दिच तोकनुछुक मयोक्ताङा का? दि आनकान अकङे साकोङ दाङका बिइमिन? दि आनकान अकङे याङयुपडा बिइमिन?¹⁹आनकान आनओ रातकोप निकि खानाचि सुत्डा चेपनियुङसाओ याइन्का लोवो खानाचि उन्तारि अमित्याङ? निनाममुओ बुसित आनकान निनामछेनडा चेइन्का। मेन हेइ! नुस्वममिच्यो! झारादुम खानाचिओ साङसेसानओ निकि मए।²⁰देनालो अङका बानहिडा अङकाआ मिनमासा मचुवा इसा खानाचिञा मानधिरूङने लोवो, का अङका लो खानाचिआ राका मानचुवा ओन्सामि अधितवोङ लोवो अङकाआ कुमाकात्, माआङलो खाउडङे माइआ खिमु नुङछिन, माइसुङ, यङछितला. दुमकुपवो, युसाकयङ, माइस्वम, दुमलुङलाचि मलिसुने। ²¹नङ अङका लादेङ बानहिडा खानाचिओ बुसित उङनिनाममुआ अडकाञा नोअ मेतमालिसुने, का उनतारिडा हुमुकवा मुवो का खानाचिआ मुवाओ असेङअतला, राक्याङला युकछिमिनवाङका अछुङमिन मानचुवोचि बदधेकाओ निकि अङकाआ मिनराक मुमायाक।

13¹सुमसिदु अङका खानाचिओया तानियुङसाओ याकङा। हवा हे सुम सिनलेमुचिओ डोडाङका उकताउक दुमओ नुःछङ मुवोन। ²अका बुसिङे खानाचिञा लोवाओ याकङा, का बुदाङकाङे लोयाङसा बानाओ याकङा, हवासिदु तायाकसाङ लिहिडा देतनि लोवाडाङ मुइसाकिया हान अङका मानतायाक हिलिडा मोचि बुनेक हुमुकवा मुवोचि का निचि झारा दकयाकचिञा, अङका लादेङ बानुङलो दकयाक युङवो याकनुङा।³देनादि निनामछेन अङकाडा चेपमानुयाक लोवो सिनलेखा खानाचि अलाम खोक्को खानाचिलिपा अराङमात लिमानुनिन, मेन खानाचिडा क्षेसामि लिमानु। ⁴देनालो अराङमातलाडा खोनिन इलाकडा लाकताननिन मेनछाङ निनाममुओ साएराङ डाङका अहडसाङ लिमानुयाक। देनादि आन्कान छाङ खोनिनडा अराङमात याइन्का, खानाचिलिपा निनाममुओ साएराङ डाङका आनकान खोनिन सुत्डा अहङसाङ लिवोम्का।⁵खानाचि मकतुमडा अयाआङ हे अमाननुङ लोनि आमहाङपाङआ आमहाङपाङञा खानाचि आनओ सिनलेखा पुवानुम। हेना दि देकमि निनामछेन उहाङपाङ खानाचिडा लिमानुयाक लोवो खानाचिञा सिन्ला माननुङ? खानाचि सुकोडा धासाङ अलिसा लो ओन। ⁶मेन अङका यामित्या मुङा हे आनकान धासाङ लिसाओ याइमिन्का लोनि खानाचिआ सिन्ला अतोकवोङ।⁷हान आनकान निनाममुडा सोमफोङला मुझ्न्का, हे खानाचिआ दिच अतनुवारि मानमुदानुम, आनकान, मुरूअत ओटनि मलिसा मेन्छाङ मुरू लिसाओ दातलुवो माआङ, मेन खानाचिआ खाकको सानुवामुरू याआङ मोकोङे मुवाओ लिसानुम। ⁸देनादि आनकान नुच्चुङओ उसादाकडा दिच मुसि रुमिन्का, ओनिक नुच्चुङओ निकि ओन।⁹देनादि मुन्टोङ आनकान अराङमात का खानाचि क्षेसामि अलियाक मोबेन आनकान छेमा लिसिन्का। ओकोओ निकि छाङ आनकान सोमफोङला मुइन्का, तामिनतुप खानाचिओ सेनलेनलाओ निकि। ¹⁰ओसुन्दुम मान्तायाकसाङ लिहिडा अङका ओको दुम छापङा, हे तायाकसाङ लिहिडा हाएसिङका अडकाञा रोङमालामओ निकि माआङ मेन साङसेसानओ निकि पुवानिनओ मोको कोपरूयङ ओन्सामि चाउक सुङसेन मुमा मानडोटने।¹¹थेन्युडा हेइ! निछाच्यो, खायोङओ सेवान्ने। खानाचि सेनलेन लिसाओ लिसानुम, नुटाङखोङ तोक्ताओ लिसानुम, नुमाननेडा युडानुम, का सोम नङ नुसाननेओ निनाममु खानाचि सुत्डा युङमा लिवोङ। ¹²अकपाङआ हाउसोञा वाचोङ चुप्लाआ सेवान्ने मुवानुम।¹³झारा सेङहाङछाचिआ खानाचिञा सेवान्ने मयिङलुक। ¹⁴हाएसि देकमि निनानछेनओ नुनुतछोङ, निनाममुओ सोम का वाचोङ साकोङओ रिमिटोङ खानाचि झाराङे सुत्डा मलिने।

पावल लोहोनमिओ छापला एफिसिचिञा

1¹पावल निनाममुओ राकाङका निनामछेन देकमिओ लोहोनमि डाङका एफिससडा लिसाओ साङसम पोकपाङचि का निनामछेन देकमिडा मक्तुम मुकाबाचिञा – ²खानाचिआ निनाममु आनपापा का हाएसि देकमि निनामछेन डाङका नुनुतछोङ का नुसान तोङने।³आनाहाएसि देकमि निनामछेनओ निनाममु का पापाञा आलाङने लिने, खोकोआ आनकानञा सारूङखामचिड़ा उक्ताउक साकोङमिक सायोकआ निनामछेनडा सायोकदुम पुवानिनओ याआङ। ⁴देतनि खोनिनआ आनकान खोनिनओ बुसित सोमडा साङसम का खातेपमात लिसइन्ने लोवाकि हेन्खामाओ मुलुमपुक चोङलो बुनेक डाङकाङे छेनतानिन,⁵मुइसाकिया आनकानआ खोनिनआ राकाओ तामिन्दुम ओन्सामि आनओ निकि निनामछेन देकमि दाङका साम्योकछा लिमाञा खोनिनआ आनकानआ बुसिङकाङे कावाङसाङ मुवानिन, ⁶हे खोनिनओ नुनुतछोङओ धिनुमसङओ यानुमसङओ निकि, खाक्को खोनिनआ आनकानञा खोकोङे स्वमपोवाडा ओलुङमातडा यानुत्नुवानिन।⁷खाक्कोडा आनकानञा खोनिनओ हुवाङका फाखालाम तामिन्नुप खोनिनओ नुनुतछोङओ लुङ ओनसामि हआदोङचिओ नुनामलानुत नुयाक, ⁸खाक्को नुनुतछोङ खोनिनआ झारा ताया नङ नुतनुडा आनकानलिपा उनखामा लिवो मुनि मेत्तानिन ।⁹आनकानाआ खोनिनओङे राकाओ रिपचि लेसि पुवानिनकि खोनिनओ तामिन्दुम ओन्सामि, खाक्को खोनिनआ निनामछेनडा दोक्तानिन। ¹⁰मादे सारूङगाओ मादे हेन्खामाओ, झारा दुम निनामछेनडा तेपसिञा मुयाकलाओ लाटलासिओ चुङयापलाओ निकि,¹¹झारातोकञा आनओ राकाओ यायोक इसा मुमेतमा लिवो खोनिनओ तामिनदुम खुवातनि बुसिङकाङे कावाङसाङ लिसाकि आनकानआ खोनिनडाङे कोपरू छाङ तोक्तोम। ¹²ओको सुन्दुमआ हे आनकान निनामछेनडा बुसिङका यामित्या युङकाबाचि खोनिनओ धिनुमसङओ यानुमसङओ निकि लिसइन्ने,¹³खाक्कोडा खानाचिआ छाङ नुच्चुङ इदुम, तामिन्तुप खानाचिओ फाखालामओ नुयङखान एनाकि, खाक्कोडा मकतुम अकनिया मुवाकि सिस्क्दुमओ साङसम साकोङआ खानाचि थेपसुवा पाक्तुओ अयाआङा। ¹⁴खाक्को खोनिनओ धिनुमसङओ यानुमसङओ निकि आननिनामुओ खोनङ खाबालुङओ फाखालामओ कोपरूओ लाहापफुम ए।¹⁵ओसुन्दुमआ खानाचिडा हाएसि देकमिलिपाओ मकतुम का झारा साङसम मनाचिलिपा खानाचिआ खाङमेत्ताओ सोमओ छापछोड्डा एनाकि, ¹⁶खानाचिओ निकि आलाङने पुसि का अङसोमफोडलाडा खानाचिञा मितसि अङका नाननुङा,¹⁷का आनहाएसि देकमि निनामछेनओ निनाममु, धिनुमसङओ पापाआ खोनिनञा सिनमाओ निकि खानाचिञा ताया नङ छोङओ साकोङ मपुने। ¹⁸खानाचिओ कोङओ अमुक छोकछोकवा लिसाकि खोनिनओ बुतसानओ यामित्या दि ए, का साङसम पोकचिडा खोनिनओ कोपरूओ धिनुमसङओ खाबा दि ए लोवाकि खानाचिआ लेमा रूवानुम।¹⁹नङ खोनिनओ राङओ छेसामओ मुसानमु ओन्सामि आनकान मकतुम मुकाबाचिलिपा खोनिनओ साए‌राङओ हेननाम धिमिउला दि ए। ²⁰खोक्को निनामछेनआ सुपोकचिङका हङमेतहिडा का आनओ चुप्चु नोछुकलिपा झारा हाङमुयाङ, ²¹का कोपरूयङ, का साएराङ, का हाएसिमिन, का मान ओनिक ओको हेन्खामाडा मेन तावो हेन्खामाडा छाङ युङसानचिनओ उकताउक नुङ चोङलो धिमुलुमरङ सारूङगायि खारोङचिडा युङमेतहिडा खोनिनआ ओकडा पाक्तानिन,²²नङ झारादुम खोनिनओ लाङथेपओ छुककोङडा युङनि पुवानिन, का खोनिनञा झारा याम्तोकओ साया लिमाञा रिमिटोङञा पुवानिन। ²³खाक्को खोनिनओ साएमपोक ए, तामिनतुप खोनिनडाङे झारा यामतोक लकलात मुवो सेनमुलेनमुला ए।

2¹नङ मुनटोङ खानाचि आनओ हआदोङ का हुमुकवाडा सुवाओ अयाआङा, मोबेन खोनिनआ खानाचिञा अहङसाङ मुलुत्तानिन। ²खाक्कोडा ओको हेन्खामाओ रिदुम ओन्सामि, नामकुदुओ साएराङओ नामसोङमि खुवातनि माकाकाङलाओ छावारिडा ओक मुवो साकोङ ओन्समि खानाचि बुसि अकदु अबियाङा। ³खोक्कोखपडा आनकान छाङ आनपोक का कोङओ राका लाटला मुवाकि आनओङे साएमपोकओ मिनमासाडा अकदु युङाओ याइन, का निचि दकयाक ओटनि आनकान छाङ हाङचालाङआ ङे माइसुङओ सुन्तुम लिसाओ याइन।⁴मेन निनाममुआ उनुतनुमि लासाकि खोनिनओ धिसोमआ मुहिडा आनकानआ सोम मुवानिन। ⁵आनहआदोङ दाङका आनकान सुवाओ याइन मेनछाङ आनकानञा निनामछेनओ अकनिन अकनिनङे अहडसक मुलुत्तानिन् (नुनुतछोङ डाङका खानाआ फाखालाम तोक्ताओ तयाआङ) ⁶नङ निनामछेन देकमिडा आनकानञा खोनिन अकनिन अकनिनङे थेन्तानिन, का खोनिन अकनिनङे सारूङगायि खारोङचिडा युडसानिन। ⁷हे नेकलो विकुपडा निनामछेन देकमिडा आनकानलिपा लिसाओ पुनुतडाङका खोनिनआ आनओ नुनुतछोङओ हेननाम खाबालुङ खाङमेतमाञा ए।⁸देनालो खानाचिआ मकतुम दाङका नुनुतछोङडाङका फाखालाम तोक्ताओ अयाआङ का ओको ना खानाचि आमहाङपाङ डाङका माआङ, ओको निनाममुओ इछुकसिवा ए। ⁹ओक डाडका माआङ, माआङलो साङआ माइस्वम मुवोङ । देनालो आनकान खोनिनओ छावनछा ऐन्का। ¹⁰आनकान मोचिखुवातनि बिसिञा निम्माआ बुसिङकाङे सुमतुम मुवानिनओ नुलोक ओकओ निकि निनामछेन देकमिडा छावनछा मचुवानचिनओ ऐन्का।¹¹ओसुन्दुम मुकसिन्तानुम, खानाचि साएमपोकडा बुसि अकदु निरावा लिसाओचि, खोक्कोञा साएमपोकडा छुक डाडका पोकनिखेन मुकाबाचिआ पोकनिखेनमात मयिङ। ¹²हे खानाचि मोवाइदा निनामछेन डाङका नियाक, इस्राएलओ हाङछामि कोपरुडाङका हुइया लिसाओ, का यङचकमुओ सिस्वदुमओ निपाङ, यामित्या मानलिसाओ, का ओको हेन्खामाडा निनाममु यामात लिसाओ अयाआङा।¹³मेन हान खानाचि खोक्को अक्दु निनामछेन देकमि डाङका माङखा अयाआङा निनामछेनओ हुवाआ चुकडाङे लिसाओ अयाआङ। ¹⁴देनालो आननुसान खोनिनङे लिमानुयाक, खोक्कोआ हुपओ कोमवो रापखा ओराकि। ¹⁵हवाङेञा उइसाकिया तोङमासि मुमेताकि हाङपाङडा अकपाङ नुडवा मना पुक्तु मुमाञा साम्योमिक खापलावुङचिडा लिसाओ इङइवाचिओ खापला, हेना नुकसाउलाञा खोनिनआ हाङपाङे साएमपोकडा असाहोक मुवाकि, ¹⁶नङ ओडाङका नुकसाउलाञा युनला मुवाकि इलाकदाङका निनाममु सुत्डा हवाङेञा अकटेटङे साएमपोकडा तोङमासि मुमेत्ताकि,¹⁷नङ बानाकि खोनिनआ खाना माङखा लिसाओचि का चुकडा लिसाओचिञा तोङमासिओ नुयङखान एनमेत्तानिन, ¹⁸देनालो खोनिन दाङका आनकान हवाङेआ अकटेटङे साकोङडा पापाओया कावाङमु तोक्ताओ ए।¹⁹उइसाकिया हान खानाचि लादेङ नियुङखामि का निहेन्कोपमि अमाननुङ, मेन साङसम पोकपाङसुत्डा खानाचि युक्याहाङछामि का निनाममुओ इवाखिमओ मनाचि लिसाओ अयाआङ। ²⁰लोहोनमि का यामाङचिओ योकलाङ धानि युङमेतदोनि निनामछेन देकमि उहाङपाङ लो अधुवा केङकुलुङ मामुसानचिनओ याआङ, ²¹खाक्कोडा उकताउक खिम अकनिन अकनिनङे नुलोकनिन काम्ताकि हाए‌सिडा अकटेटङे साङसम माङखिम लिमाञा लोङयाङसा खात, ²²खाड्‌डा खानाचि छाङ साकोङडा निनाममुओ याक्खाम लिमाञा अकनिन अकनिनङे मामुसान्याङसा अख

3¹ओसुन्दुमङे अङका पावल निरङचिओ निकि निनामछेन देकमिओ छेकमि, ²अङकाञा खानाचिलिपा पुवानचिनओ नुनुतछोङओ चुङयापलाओ छापछोङडा खानाचिआ छाङ एनाओ अयाआङ लो ना।³अङकाआ खानाचिञा सानुङसाडा छाप्तुङ इसा छोङओ युपाडा मोको रिपचि खाइसाकिया सिनला लिसाङओ ए? ⁴खाक्को दुमआ, मुन्टोङ खानाचि अखिप मोबेन निनामछेनओ रिपचिडा अङनुतनु खानाचिञा सिन्लेसाङ लिमारू, ⁵खाक्को दुम हान साङसम लोहोनमिचि का यामाङचिञा साकोङडा यापुक्तु मलिसा ओट्नि मुनि निचि तालाखुकओ मनाओ सुन्तुमआ सिनला लिसाओ माननुङा,⁶तामिन्तुप नुयङखान दाङका देकमि निनामछेनडा निरावाचि खोनिनओ यङचकमुओ युक्यापाङमि का साए‌मपोकओ युक्यायोक्छा का सिस्वादुमओ युक्याहाकमि लिसाओ मयाआङ। ⁷खोनिनओङे साएराङओ मुसानमु ओन्सामि अडकाञा पुवानचिनओ निनाममुओ मोनुनुतछोङओ इछुकसिवा खुवातनि, खोक्कोओ अङका रोपधाममि लिसुङ,⁸झारा सेङहाङछाचिडा अङका झारा चोङलो च्युनिक निरावाचिडा नुयङखान हेना निनामछेनओ मानसिनलुङओ रूमरङ मुमाञा ओको नुनुतछोङ अडकाञा पुवानचिनओ ए। ⁹नङ झारायाम्तोक मुलुमपुकमानुवो निनाममुडा दोङकपदोङ डाङका तिमनियुङसाओ रिपचिओ चुङयापला दि ए मनाञा मोचि झारा छुकमिनमाञा,¹⁰हान सारूङगायि खारोङचिडा हाङमुयाङपा का कोपरूयङपाचिञा निनाममुओ ओला माइओ ताया रिमिटोङञा मचुमेतने लोवो मिनमासाआ, ¹¹ओको थाङमुथाङओ तामिन्दुम ओन्सामि, खाक्को खोनिनआ आनहाएसि देकमिडा मुवानिनओ याआङा,¹²खाक्कोडा खोनिन धानिओ आनमकतुम दाङका सापसा का कावाङसु ओ टाडखोङ आनकान तोकतोम्का। ¹³ओसुदुमङे अङका खानाचिञा सोमफोङला मुङा हे खानाचिओ निकि अङतुकलाचिडा खानाचि सोयोक मानचादानुम, खाक्को खानाचिओ धिनुमसङ मए।¹⁴ओसुन्दुम अङका आनओ लाङतुमफु पापाओ बुसित नेपङा, ¹⁵खाक्कोङका सारूङगा का हेन्खामाडा उकताउक छामानओ नुङ युङसानचिनओ याआङ, ¹⁶का खानाचिञा हुइत हाङछानुउलाडा खोनिनओ साकोङदाङका खोनिनओ धिनुमसङओ खाबालुङ ओन्सामि साएराङआ सावामि मेतमा खानाचिञा खोनिनआ देडहतला मचुने,¹⁷हे खानाचिओ कोङडा निनामछेन मकतुम दाङका याकमुनुङने, ¹⁸ओको सुन्दुमआ, हे सोमडा भेनलेन्ताओ का योकलाङ युडसानओ लिसाकि झारा सेङहाङछाचिसुत्डा धापपु, उखामयु, चोमयु का गङयु दि याछा मोको खानाचिआ तुपमाया सावामि लिसानुम। ¹⁹नङ निनाममुओ झारा सेनलेनलाडा लाटला लिमाञा तायाञा मान्छोमुवो निनामछेनओ सोमञा लेमा रूवानुम।²⁰हान खोनिनञा आनकानडा मुसानमु मुवो साएराङ ओन्सामि आनकानआ दोराओ का मित्तुओ चोङलो बद्धेङे सायाथाकला मुनि पुमारूमा लिवो, ²¹खोनिनञा ङे सानलेप सानदक झारा तालाखुक तारि रिमिटोङ का निनामछेन देकमिडा धिनुमसङ लिने। आमिन।

4¹ओसुन्दुम अङका, हाएसिडा छेकमिआ, खाक्को बुतसानडा खानाचि बुत्तानचिनओ अयाआङ मोसाओ मुरु छामलाडा बियानुम लोनि खानाचिञा ताछुकफेङलक सोमफोङला मुङा। ²झारा नुसालेन का नुओला सुत्डा छङनुसान अकनिन अकपाङआ निचिञा सोमडा आङतुकि, ³साकोङओ इकभोमला युङसिञा नुसानओ खेखुपडा मुयुला मुवानुम।⁴ओटनि खानाचि छाङ आनओ बुतसानओ अकटेटङे यामित्याडा बुत्तानचिनओ अयाआङ मुइसाकियाङे अकटेट साएमपोक का अकटेट साकोङ याआङ, ⁵अकटेटङे हाएसि अकटेटडे मकतुम, अकटेटङे हङसानवा, ⁶झाराओ अकटेटङे निनाममु का अकपाङे पापा, खोक्को झाराधानि झाराओ हुपडा का झाराडा लिमानुयाक।⁷मेन आनकानखपडा उकताउकञा निनामछेनओ इछुकसिवाओ हाकङहा ओन्सामि नुनुतछोङ पुवानचिनओ याआङ। ⁸ओसुदुमङे खोनिन लोमानुयाक,⁹(हान ओको थाङानिन लोवाओ ओलाक दि ए? ओन ओकोङे, हे खोनिन हेन्खामाओ फान्नु ह्युक्को हाक्खाडा धामाछे लिसा? ¹⁰धावो खोनिनङे लिमानुयाक खोक्को झारादुमआ लाटलक मेतसिञा झारा सारूङगाचि चोङलो बदधे धानि थाङमा छाङ लिसा)¹¹नङ खोनिनआङे खाउङेञा लोहोनमि, खाउङेञा यामाङ खाउङेञा रूमरङमि का खाउङेञा रिमिटोङओ चानकाबा का सानदिवा लिमाञा, ¹²रोपधामलाओ ओकडा का निनामछेनओ साएमपोकओ टोङखाङलाडा सेङहाङछाचिओ सेनलेनला लिमाओ निकि कावाङसाङ मुवानिन, ¹³मुन्टोङतारि आनकान झारापाङ मकतुमओ का निनाममुओ सावाछाओ तायाओ इकभोमला छुकलाप मुइमिन्का, हेना निनामछेनओ लाटलाओ पोक्सुसानओ हाकङलातारिओ धिपासुङ मना लिसइमिन्का,¹⁴हे आनकान फोमलावाओ लुलेन मुयाकमुवारिचि ओन्सामि एङलाडा मनाचिओ लुलेनलाआ नुमितलामओ उकताउक कुहुक डाङका हेन्कालाम-राङकालाम मुलुत्ताकि ओयामोया यालोटवो छाचि हान लिसइमिन्ने, ¹⁵मेन सोमडा नुच्चुङ चेवाकि आनकान झारादुमडा खोनिनतारिङे तामिन्तुप निनामछेन तारिङे पोन्याङसा खारइने, खोक्को साया लिमानुयाक, ¹⁶खोडाङका उकताउक हाकलाञा नुलो हाकङहाओ वकओन्सामि उकताउक कामखालाञा सुफुङ मुलुतनि पुवाओआ झारा साएमपोक नुलोकनिन अकसुत्डाङे चङसाकि अक लिनि सोमडा आनओङे मेटमालाओ निकि साए‌मपोकओ पोनमासि मुमेत्।¹⁷ओमुन्दुम अङका ओको लोङा, का हाएसिडा सिनलेखा पुङा, हे खानाचि लादेङ उसओ छतछाङला मानतुङदानुम देतनि निरङचि आनआनओ कोङओ सित्नामलाडा मतुङ। ¹⁸मोकोचिओ कोङ छाकको लिसाओ का मोकोचिडा लिसाओ वाइलिङलाओ नुतनु गायोङवा लिसाओ लिसिआ निनाममुओ अयाम डाङका निपाङवा मलिसा, ¹⁹खोक्कोआ नुनुतमात लिसाकि रापचासुत्डा झारा असेङअत ओक मुसिओ निकि उहाङपाङञा युक्छिमिनडा पाङपाकनि मपुवा।²⁰मेन निनामछेनञा ना खानाचिआ उइसाकिया अमानचिन, ²¹खानाचिआ खोनिनञा एनाओ का देकमिडा लिसाओ नुच्चुङ ओन्सामि खोनिनडा चिन्ताओनिन ना ²²खानाचिआ बुसिबुसिओ सुङसेन ओनसामिओ आसुङ मनाञा खोक्को रूङचालाओ रापचाओन्सामि सोपसावा लिसाकि खातवो नुयाक छिरानुम,²³आनओ कोङओ साकोङडा नुङवा लिसानुम। ²⁴का नुडवा मनाञा वातमाला मुवानुम। खोक्को निनाममुओन्सामि सामयोमिकला का नुच्चुङओ वाचोङलाडा छावनछा लिसाओ याआङ।²⁵ओसुन्दुम सोज्जे छिरूकि उकताउकआ आनओ चिटेन्याङचि सुत्डा नुच्चुङ चेवानुम, देनादि आनकानका अकनिचिओ यामसावा ऐन्का। ²⁶आरियङ मुवानुम मेन हुमुकवा मानमुदानुम, नामलुनमा बुसिङे खानाचिओ माइसुङ सुने। ²⁷सुलावाञा सुकधिइ मानपुदानुम। खुसावाञा लादेङ मानखुने।²⁸हेनाक मोसाआ मुयुला मुने, का खाक्को नुलो याआङ मोको चिछुकआ ओक मुवाकि चाखाम लिकाबाचिञा दिच पुमाञा मोको सुत्डा लिने। ²⁹दिच सुदुम खानाचिओ डोडाङका मानलोनने मेन तालुवाओ वाइदाडा साङसेसानओ निकि खान्नी याक्म लियाकलो ओन हे मोडाङका काएनवाचिजा नुनुतछोङ तोडने। ³⁰नङ निनाममाओ साडसम साकोडन्या स्वमतुकला मानपुदे, खाक्कोडा फाखालाम लेनओ निकि खानाचि थेप्सुवा पाक्नुओ अयाआङ।³¹झारा खुकसि, रहुक, माइसुङ, रङसाङ मिनअत झारा यङछितमिन अकनिनङे खानाचिङका छिरिनने। ³²नङ देतनि निनाममाआ छाङ खिष्टडा खानाचिजा नुनामलानुत मुवानिन मुइसाकिया के अकनिचित्रा नुनामलानुत मुवाकि खानाचि अकनिचिलिपा नोलो कोडरिङओ का पुनोतनमि लिसानुम।

5¹ओसुन्दुम खानाचि स्वमपोवा छाचिइसा निनाममुओ खाङचिनला मुकावाचि लिसानुम, ²नङ देतनि निनामछेन छाङ खानाचि सुत्डा सोम मुवानिन का निनाममुओ निकि चानु फोङनाम लिमाञा रिपेन्छेम हेन्युवा लिसाकि हाङपाङआ आनकानओ निकि रिपेन्तानिन, मुइसाकिया खानाचि छाङ सोमडा बियानुम।³मेन राक्याङला उसेङअतलासि हेना रापचाओ नुङकनिन छाङ खानाचिङका मानलोकने ओटनि हे सेङहाङछाचिञा नुलोक नुयाक। ⁴नङ मान अतसालेनला मान मिन्तुपमातओ तुम हेना चुतमाला मोचि नुलोक ममाआङ, मेन हेनाक आलाङने पुवो ओक लिने।⁵देनालो ओकोना खानाचि अछङङे असिनलुक, हे खाउङे राकायाङवा, हे असेङअत मना, हेना रापचालमि मनाआ खोक्को सेम्फोक बुबमि ए निनामछेन का निनाममुओ हाङहोनडा खाउङे कोपरू तोकवो माननुङ। ⁶खाउङे मनाआ खानाचिञा रोकरोमदुमआ लुलेनला मानपुने, देनालो ओचिङे दुमओ सुन्दुमआ माकाकाङलाओ सुन्तुम धानि निनाममुओ माइसुङ तायाक। ⁷ओसुन्दुम खानाचि मोकोचि सुत्डा युक्याहाकमि मानलिदानुम।⁸देनालो अक्दु खानाचि खाचङडा अयाआ ङा मेन हान हाए‌सिडा ओपमि अलिसा, छोङओ सुन्तुम इसा विकोनला मुवानुम। ⁹(देनालो छोङओ सिवा झारा नुओकयु, सामयोमिकला, का नुच्चुङलाडा नुयाक?) ¹⁰हाए‌सिआ नुबानुवो दि ए, मोको खाचेत्ताकि, ¹¹गायोङलाओ सिवामात ओकचिसुत्डा टुपतोङ मानमुदे मेन हेनाक मोकोचिओ एमसु खाङमेतनि पुए। ¹²देनालो मोकोचिआ रिपचिडा मुवाओ ओकचि चेप्मा छाङ सिसुवाओ दुम याआङ।¹³मेन मोकोचिओ खायोक खाङमेतनि पुहिडा मोचि झाराङे ओपमिडा यापुक्तु मलि देनालो यापुक्तु लिसाओ उकताउक दुम छोङ नुयाक। ¹⁴ओकोआङे उसओ लोवानचिनओ याआङ, ‘ए। इमकावा थिन्तानुम का सुपोकवाङका पोकते, का निनामछेनओ छोङ खाना धानि छोकवोङ।‘¹⁵ओसुन्दुम खाइसाकिया अबियाक नुलोकनिन खाङानुम, खारूमात ओटनि माआङ मेन तायामुलेन मनाइसा, ¹⁶मुयाकलाओ सुकधिइ चाम्तुकि मित्तानुम, देनालो मुयाकला उवाक याआङ। ¹⁷ओसुन्दुम पायोकवा मानलिदे मेन हाएसिओ मिनमासा दि याछा मोको तुप्तानुम।¹⁸नङ यमखामावा मानसेतदानुम, खोक्कोडा युकछिमिनलासि नुयाक, मेन साकोङआ लकलात लिसाओ लिसानुम। ¹⁹अकपाङआ निचिसुत्डा साङमुसान, छाम का साकोङमिक सङलानडा चेप्याडसा हाए‌सिओ निकि आनओ कोङआ छाममुयाङसा साङयाङसा, ²⁰उकताउक मुयाकला झारा दुमओ निकि आनहाएसि देकमि निनामछेनओ नुङडा खोनिनञा तामिन्तुप, निनाममु का पापाञा आलाङने रिपेन्याङसा, ²¹निनामछेन कुमाडा अकपाङ हाउसोओ छुककोङ युङानुम।²²ए दापयामा च्यो। हाए‌सिओ छुककोड मयुडा ओनि आनआनओ सायापाओ छुककोङ मुवानुम, ²³देनादि दापःयामाचिओ साया सायापा मए, ओटनि निनामछेन साएमपोकओ खायोङनोमि लिनि रिमिटोङओ साया लिमानुयाक। ²⁴मेन देतनि रिमिटोङ निनामछेनओ कोपरूडा याआङ मुइसाकिया दापयामाचि छाङ उकताउक दुमडा सायापाचिओ छुककोङ मयुङने।²⁵ए सायापा च्यो! आनओ तायामाचिञा सोम मुवानुम देतनि निनामछेनआ छाङ रिमिटोङञा सोममुवानिन का मोसाओ निकि उहाङपाङञा रिपेन्ला मुवानिन, ²⁶का खोनिनआ मोसाञा इदुमदाङका चाः वाआ वासुवाकि वासेसाम मुलुतनि सेङतानिन, ²⁷हे खोनिन उहाङपाङआ उसओ खाउङे माइओ थेप हे चोनथि मानलिसाओ अकटेट घुमतिमि रिमिटोङ आनओ निकि ठानटुक मुमाञा ए। मेन मोको लोना वाचोङ नङ खायोकमात लिमाडोट।²⁸मुइसाकियाङे सायापाचिआ छाङ आनओ आनओ तायामाञा आनओ साएमपोक ओट्टिन सोम मुमाडोट। आनओ दापयामाञा सोम मुकाबाआ उहाङपाङञा सोम मुयाक। ²⁹देनालो खाउङे मनाआ देमखा आनओ साएमपोकञा चिमा मुनिन, मेन रिमिटोङञा निनममछेनञा मचुवानिन इसा मोसाओ खाङओछुङ मुलुक। ³⁰देनालो आनकान खोनिनओ पोकओ पोकयाम ऐन्का।³¹ओसुन्दुमङे मनाआ खोनङ मामा पापाञा छिरूकि उतायामा सुत्डा तोङनियुङ का मोचि हवाङे अकटेटङे साएमपोक मलिवोङ। ³²ओको रिपचि ना टोप्पो याआङ, मेन अङका निनामछेन नङ रिमिटोङओ वेतनातडा चेपङा। ³³मेनछाङ खानाचि उकताउकआ आनओ तायामाञा हाङपाङञा इसा मुनि सोम मुवानुम, नङ तायामाआ छाङ आनओ सायापाओ कुमा काङने।

6¹हेइ। छाच्यो, हाएसिडा आनओ मामा-पापाओ इङइवा काङलेन मुवानुम, देनालो ओको नुलोक याआङ। ²आनओ मामा पापाओ सानुवा सारानुम (खाक्को सिस्वदुम अकनिनओ बुसि इङइवा ए) ³का खानाञा नोतनु लिने का हेन्खामाडा आमनो धियुयाम लिने।⁴नङ हेइ! पापाच्यो आमछाचिञा माइसुङ मानकातदानुम मेन मोकोचिञा हाएसिओ सालामयङ का चानचुवारिडा केनमाला होमफिलाम मुवानुम।⁵⁶⁷⁸ओसुन्दुमङे मनाआ खोनङ मामा पापाञा छिरूकि उतायामा सुत्डा तोङनियुङ का मोचि हवाङे अकटेटङे साएमपोक मलिवोङ। ओको रिपचि ना टोप्पो याआङ, मेन अडका निनामछेन नङ रिमिटोङओ वेतनातडा चेपङा। मेनछाङ खानाचि उकताउकआ आनओ तायामाञा हाङपाङञा इसा मुनि सोम मुवानुम, नङ तायामाआ छाङ आनओ सायापाओ कुमा काङने।⁹नङ हेइ। नामसोङमि, मोकोचि सुत्हा मुइसाहे मुवानुम का थोपमासि खाङमेत्मा छिरानुम, ओको लेसाकि हे मोकोचिओ का खानाचिओ छाङ सारूङगाडा नामसोङमि लिमानुयाक का खोनिनडा मनाओ लिपालाम चुनिन।¹⁰थेन्युडा, हाए‌सिडा का खोनिनओ साएराङओ रूङमुनुङडा सावामि लिसानुम। ¹¹सुलावाओ सुलाममुओ उसादाकडा ठानठुक लिमा रूसिञा निनाममुओ झारा बान्दछुमि बिछुमि लङतानुम।¹²देनादि आनकाओ ओको म्हु मनाचिओ उसादाकडा माआङ, मेन अधुवालाचि, कोपरूचि ओको गायोङवाओ हेन्खामिक हाङमुयाङछाचि का सारूडगायि खारोङचिडा लेइछावारिओ साकोङमिक मुकतलाओ उसादाकडा ए। ¹³ओसुन्दुमङे निनाममुओ झारा बान्तुमि बिछुमिचि थेन्तानुम का उवाकलेनडा तुम्सुमा का झारा ओक मुवाकि ठानठुक लिमारूवो लिसानुम।¹⁴ओसुन्दुम आनओ छुमायु नुच्चुङउला छुम्ताकि सामयोमिकलाओ कोङकुछेकला वारूकि, ठानठुक लिसानुम। ¹⁵नङ लाङडा तोङमासिओ नुयङखानओ छुमछुमओ लाङसुप वारानुम, ¹⁶मोचि लेटका मकतुमओ छेकला थेन्तानुम खाक्कोङका खानाचि लेइछावाओ मिभे सेतमारूवो अलिवोङ।¹⁷नङ सायानुलेनओ बोपमाया तारानुम का साकोङओ बान्छोन खाक्को लो निनाममुओ इदुम ए। ¹⁸झारा सोमफोङला का खपमिनफेङलाङका, उकताउक मुयाकलाडा साकोङडा सोमफोङला मुवाकि, ओकोङेडा झारा सेङहाङछाचिओ निकि चानचुप लिसाकि सानलेपलेपवा खपमिनफेङला मुवानुम।¹⁹नङ अङलिप्पाडा छाङ हे नुयङखानओ रिपचि सापसासुत्डा लेमेतमाञा अङकाआ उङडो होडहिडा अडकाञा ओकमाला मुसि पुविनने, ²⁰खोक्कोओ निकि अङका कारूपडा डोराओ अकपाङ हाङयङकोङमि एव, का देतनि अङकाआ चेपमा डोटवो ए, मोकोडा अङका सापसा सुत्डा चेपमा रूउङ।²¹मेन अङका खासओ याकङा, का दि मुनियुङसाओ याकङा, मोचि खानाचिञा सिनला लिने लोवाकि सोम्पोवा निछाक का हाए‌सिडा मकतुमि रोपधामसुमि टाइकिकसआ झारा दुम खानाचिञा सिनला मपुवोङ। ²²खानाचिआ आनछापछोङडा दुमचि सिन्तानुम का खोचिआ आमकोङआ नुटाङखोङ मपुने लोवाकि अङकाआ, ओकोङे तामिन्दुमआ खानाचिओया मोचिञा छुत्ताओ एव ।²³निनाममु पापा का हाए‌सि देकमि निनामछेन डाङका निछाचिञा नुसान का मक्कतुमओ हिया तोङने। ²⁴आनहाएसि देकमि निनामछेन अतयाइमि सोम मुकाबाचि झारा सुत्डा नुनुतछोङ युङने।

हिब्रुचिओ निकि छापला

1¹आसुङ मुयाकलाडा निनाममु पापा साकुदिपाचि सुत्डा ओला हाकला हाकला का ओला सुमतुमआ यामाङचिङका चेवानिन, ²नङ ओचि लेनओ थेन्युडा आनओ सावाछाङका आनकान सुत्डा चेवानिनओ याआङ खोक्कोञा खोनिनआ झारा याक्कओ पाङयि कावाङसाङ मुवानिन। ³झारा यामतोकञा आनओ साएराङओ इदुमआ सास्वनताकि खाक्को खोनिनओ धिनुमसङ नुओपनु का निनाममुओ ङे मायोक्तुओ लाछामिङे लिसाकि हुमुकवाओ साङसेसान मुमाहिड़ा चोमखाडा धिवाङ रूमुरुहाङओ चुप्चु छुकलिपा नुथातसाङ लिसानिन,⁴खोनिन सारूङकेन्छा चोङलो मुनतिकाङे मुलुमरङ दोकतानचिननिनओ याआङ मेत्लो हे खोनिनआ मोकोचिञा चोङलो नुए नुङ कोपरूडा छुकलापसाङ मुवानिनओ याआङ। ⁵देनादि मोचि सारूङकेन्छाचिडा खाउ ओलाकञा खोनिनआ देमखा यिङानिन?⁶नङ लादेङ खोनिनआ बुसुछाञा हेन्खामाडा टाटमा लिहिडा खोनिन यिङमानुयाक निनाममुओ झारा सारूङकेन्छाचिआ खोनिनञा इसाननुने। ⁷नङ सारूङकेन्छाचिओ छापछोङडा खोनिन लोमानुयाक, खोक्कोआ आनओ याकेन्छाचिञा कुहुक का आनओ रोपधामवाचिञा मिओ मिलाप मेतमानुयाक।⁸मेन सावाछाओ सानुङ खोनिन लोमानुयाक हे निनाममु खानानिनओ धियुङखा सानलेपसानओ निकि याआङ का खानानिनओ हाङहोनओ हाङसिनफक साननोसानओ हाङमेकसन ए। ⁹खानानिनआ सामयोमिकलाञा सोम मुवानिनओ याआङ का अतसामयोकञा चिमा मुवानिनओ याआङ ओसुन्दुम निनाममु, खानानिनओ निनाममुआ खानानिनञा, खानानिनओ यावाचि चोङला बदधे मुवाकि छियाओ आःवाआ ओतलावा मुवानिनओ याआङ। '¹⁰नङ, हेइ! हाएसि खानानिनआ बुसुथाक्या हेन्खामाओ योकलाङ युङमेत्तानिनओ ए, का सारूङगाचि खानानिनओ नोछुकओ ओक मएः ¹¹मोकोचि ना युन्ला मलिवोङ, मेन खानानिन ओलाक सानलेप युङनि युङमानुयाक नङ टिटखान ओटनि झारा आसुङ लिनिलेवोङ, ¹²नङ हुम्वो ओटनि खानानिनआ मोचिञा रिम्मा लिवोङ टिटखान इसा मोकोचि वाइफान लिवोङ मेन खानानिन इकयुक्या लिमानुयाक, का खानानिनओ दोङओ थेन्यु देमखाछाङ लिवोनिन¹³मेन सारूडकेन्छाचिडा खाउङे ओलाक खोनिनआ खाउङे वाइदाडा लोवानिनओ याआङ? खाना अङचुप्चु छुकलिपा युङानुम, मुन्टोङ तारि अङका आमनुकसाचिञा आमलाङओ लाङटक मेतनुङा। ¹⁴दि कपलेनकपओ पाङयि लिकाबाचिओ निम्पि रोपधामवा मुमाञा बाइसानचिनओ मोचि रोपधामवा मुवो साकोङचि ममाआङ ?

2¹ओसुन्दुम आनकानआ एनाओ दुमचिञा आनकानआ फाननु ब्दधे छोसाग स्वमलेन पुमा डोटलुक, माआङलो आनकान मोकोचिङका फुङलिप्ताकि खातवोम्का।²देनालो खोनालो सारूडकेन्छाचिङका चेवानचिनओ इदुम अछङ सिनलेसाङ लिसा लो का उकताउक हआदोङ का माकाकाङमिनलाआ ठाक ठाक दुकमेत मतोक्ता लो, ³खोनालो आनकानआ उनटोप्पो कपलेनकपओ स्वावा मानमयुङसा, आनकान खाइसाकिया फुकुत्तुङने? खोक्को बुसिङे हाएसिडकाडङे यिङानचिनओ ए, का निचिञा लो एनवो मनाचिङका अछङमु लिसा। ⁴निनाममु छाङ, सिन्दुङचि, नाकाकता वकचि, ओलामाइओ साएराङचि का वाचोङ साकोङओ इछुकसिवाङका खोनिनओ खोनङ राका खुवातनि मोकोचिओ सिनलेमु लिसानिन।⁵देनालो हान्दे आनकानआ लोवाओ नेकलो हेन्खामाञा निनाममुआ सारूडकेन्छाचिओ छुककोङडा युङमा मानलि। ⁶मेन साङआ खाडा उसओ यिङाकि सिनलेखा पुवाओ मयाआङ-'मना दि ए, का खानानिन मोसाओ मुकसिन। युङमानुयाक? हेना मनाओ सुन्तु का खानानिन मोसाओ स्वावा मुमानुयाक?⁷खानानिनआ मोसाञा सारूङकेन्छाचि चोङलो दिच ओन्तोम कोपयापतानिन। खानानिनआ मोसाञा धिनुमसङ का सानुवाओ डोलोकुम युनिपतानिन, का आनओ नोछुकओ ओकचिधानि मोसाजा खप्मेत्तानिन, ⁸खानानिनआ झारा यामतोक मोसाओ लाङथेपओ छुककोङडा युङनि पुवानिन।'। देनादि मनाओ छुककोङडा झारा याम्‌तोक युङहिंडा खोनिनआ मोसाओ छुककोङडा मानलिसाओ दिच छाङ लिसि पुमा मानलि। मेन हान ना फाननु झारा यामतोक मोसाओ छुककोङडा लिसाओ आनकान टोक्तइमिन्का ।⁹मेन निनाममुओ नुनुतछोङ डाङका खोनिन उकताउक मनाओ निकि सुवालोङओ दुत्छुप छेम्माडोट यिङाकि खोनिनञा तामिन्तुप देकमि निनामछेनञा, खोक्कोञा सारूङकेन्छा चोङलो दिच ओन्तोम मेत्तानिनओ याआङा, सुवालोङओ मेकसनओ सुन्दुम धिनुमसङ का सानुवाओ डोलोकुम युनिप्तानिनओ आनकान टोक्तोम्का। ¹⁰देनालो खोक्कोओ निकि झारा यामतोक मयाआङ, का खोक्कोङका झारा यामतोक मलि, खोनिन बद्धेका सुनतुमचिञा कपलेनकपडा छोङमा लिहिडा मोकोचिओ कपलेनकपओ मुमाहाङञा मेकसनचिङका सेनलेन मेतमा नुलोक याआङा।¹¹देनादि वाचोङ मेतवो छाङ वाचोङ लिवो छाङ, झारा अक्टेट डाङका मए। ओसुन्दुम मोकोचिञा उसओ यिङाकि निछा लोसिञा खोनिन सिमुवाकातमा मानलि, ¹²अङनिछाकचिञा खानानिनओ नुङ अङका चुछान मुवोङा, यायोकलाओ हुपडा अङका‌ खानानिनओ यानुमसङ मुवोङा।¹³नङ लादेङ ‘अङका खोनिनधानि आनओ टाडखोङ युडवोङा ।‘ का लादेङ खाङानुम अङका का मोचि सावाछा मेछाछाचि, खोक्को निनाममुआ पुवाङनिनओ याआङ।' ¹⁴सावाछा मेच्छाछाचि हुवा-साओ युक्याहाकमि लिसाओ लिहिडा, खोनिन छाङ सुवालोङओ क्षेसाम लिसाओ, तामिनतुप सुलावाञा सुवालोङ दाङका असाहोक मेतमाञा, ओचिओ युक्याहाकमि लिसानिन। ¹⁵नङ सुवालोङओ कुमाआ अयाम भेपनि सुङसेममुलाडा हाप्ताओ झाराञा फोकमाञा छाङ ए।¹⁶देनादि नुच्चुङङे खोनिन सारूडकेन्छाचिञा माआङ ,मेन सुनतुमदिवाओ सुन्तुमञा सास्वनमा नुयाक। ¹⁷ओसुन्दुम मनाचिओ हुमुकवाओ लाछङमिन मुसिञा निनाममु वेतनातओ दुमडा खोनिन पुनोतनुमि का मक्तुममुरू अधुवा बुबमि लिमाञा झारा दुमडा आनओ निछाचि इसा खोनिनञा मुमान डोरा। ¹⁸देनादि उहाङपाङे खाचेतसाङ लिनि मेकसन थाआङतानिनओआ खाचेतसाङ लिकाबाचिञा खोनिनआ साएदुत मुसि रूमानुयाक।

3¹ओसुन्दुम हेइ! सारूङगायि बुतसानओ युक्याहाकमि सेङवा निछाच्यो, आनकानआ देङहुतला मुवाओ लोहोनमि का अधुवा बुबमि तामिन्तुप देकमिञा मिनला मुवानुम। ²वाछाप्पा निनाममुओ झारा खिमडा मलिसा ओटनि खोनिन छाड खोनिनञा कावाङसाङ मुमालिवोडा मकतुम मुरु लिसानिनओ याआङा। ³मेनछाङ देकमि वाछाप्पा चोङलो मुन्तिका मुरू दोकतानिनओ याआङ, मेत्लो खिम चोङलो खिममेतकाबाओ सानुवा लियाक। ⁴देनालो उकताउक खिम खाउ नाखाउङे मनाङका मेत्तानचिनओ नुयाक, मेन झारा यामतोक मेतवो ना निनाममुङे लिमानुयाक।⁵हान देङसिङका चेप्वोन झारा दुमओ सिनलेखाओ निकि वाछाप्पा नुच्चुङडे निनाममुओ खिमडा चोकरिछा खुवातनि मकतुम मुरू लिसाओ याआङा । ⁶मेन निनामछेन ओलाक निनाममुओ खिमडा सावाछा इसा लिनि मकतुम मूरू लिमानुवाङा, का थेन्युतारि आनकानआ आनसापसा का यामित्याओ माइस्वमञा खुन्दोनियुङसोम लो ना आनकान ङे खोनिनओ खिम ऐन्का।⁷ओसुन्दुम देतनि वाचोङ साकोङ लोमानुयाक, ‘आइ खानाचिआ खोनिनओ डोसाङल अएना लो ना, ⁸माइसुङ पोक्ताओ लेनडा ओटनि मुनिखानाचिओ कोङ छाक्को मानमुलुतदानुम,नामबुकलो खारोङडा लिसाओ सुकोओ मोको लेन इसा,⁹खाड्डा आमसाकुदिपाचिआ अङसुको मुमाञा उडखाचेतलाम मचुवा, का लुसि दोङतारि अङवकचि मटोक्ता। ¹⁰ओसुन्दुम अङका ओको तालाखुकसुत्डा छेमात लिसुङ, का लोउङ, 'मोकोचिओ कोङ निममा मफोममुयाक, का मोकोआ अङकाओ लामचि ममानसिन।' ¹¹अङकाआ आनओ माइसुङडा यङचकमु मचो इसा उङसावाएमलाडा मोकोचि मवाङवोनिन ।¹²हेइ! निछाच्यो, चानचुप युङानुम, माआङलो, अहङसक निनाममुङका थासाङ लिमाञा खानाचिडा साङओ योकोममिनओ उवाक कोङरिङ लिवोङ। ¹³मेन आइओ लेन चोङलो अकपाङआ निचिञा लेनओलेन ङे सालामयङ पुवानुम। माआङलो, खानाचिखपडा खाउङे हुमुकवाओ छेङसुआ छाक्को लिवोङ।¹⁴देनालो खोनालो आनकानआ आनतापुङओ मकतुमञा थेन्युतारि खुन्दोनि युङसोम्का लो ना, आनकान निनामछेनओ युक्याहाकमि लिसाओ याइन्का, ¹⁵देतनि लोवानचिनओ याआङ, आइ खानाचिआ खोनिनओ रङसाङ अएना लोडङका, माडसुङपोक्ताओ लेनडा ओटनि मुनि खानाचिओ कोङरिङ छाक्को मानमुलुतदानुम।¹⁶देनादि एनदोनि माइसुङ पोकवो साङ साङ मए ना? वाछाप्पा दाङका मिस्र सिङवाङ डाङका लोन्ताकि तावो दि झारा ममाआङ? ¹⁷नङ साङ साङ सुत्दा खोनिन लुसि दोङतारि माइसुङ कारानिन। दि मोचि हुमुकवा मुकाबाचिसुत्डा माआङ? खोक्कोओ सुपोकवाचि नामुकलोखामडा सुम्बाकिलि मडोराङसाङ। ¹⁸दि ओनिक मोचि इङइा मानकाङवोचिञा लेटका निचि साङआ खोनिनओ सावाएमलाडा वाङमा तोकवोनिन लोनि खोनिनआ सिस्वदुम चासानिनओ याआडा? ¹⁹योकोममिनओ सुन्दुमआ ङे मोकोचि वाङसि मानरूवाओ आनकान टटोक्तोम्का।

4¹ओसुन्दुम खोनिनओ सावाएमडा कावाङमु चुवो सिस्वदुम फाननु लिनि युङसाओ लिहिडा आनकान कुमाकारइनने, माआङलो आननि खानाचिखपडा खाउङे ओन्तोमला लिसाओ अदातवोङ। ²देनादि नुच्चुङङे आनकानञा छाङ मोकोचिञा ओटनि नुयङखान रूमरङ मुवाओङे ए। मेन एनाओ इदुमआ मोकोचिञा दिचछाङ दुकनुवा मानलि। देनालो एनकावाचि सुत्डा मोकोचि मकतुमडा तोङसि ममानरू।³देनादि आनकान मकतुम मुवोचि लोना मोसावाएमडा कावाङला मुवोम्काङे, देतनि खोनिनआ लोवानिनओ छाङ याआङ। अङकाआ आनओ माइसुङडा सिस्वदुम पाक्ता इसा अडसावाए‌मडा मोकोचि मवाङवोनिन। मेन्छाङ खोनिनओ मुयाकमु हेन्खामाओ मुलुम्पुक डाङकाङे लिनिचियाओ याआङा। ⁴देनादि खोनिनआ निचि खारोङडा एसि लेनओ छापछोङडा ओकोमाइआ लोवानिनओ याआङ, नङ निनाममुआ झारा वकचिङका एसिलेनडा सावाएमसानिन, ⁵का मोखामडा लादेङ यिङमानुयाक, अङसावाएमलाडा मोकोचि मवाङवोनिन।⁶ओसुन्दुम खाउङे खाउङेञा मोडा कावाङला मुसि दकयाकङे लिसाओआ का बुसिङकाङे नुयङखान एनमेत्तानचिनओचि छाङ माकाकाङमिन लिसाओ सुन्दुम कावाङला मुसि छाङनुउत लिसाओ लिहिडा ⁷खोनिनआ लादेङ खाउङे अकलेन बुसिङे लोनिचियाओ इदुमडा उनतिका वाइदा नेतलोक दाउद दाङका ‘आइ’ लोवाकि उसओ दोकमानुयाक, 'आइ खानाचिआ खोनिनओ रङसाङ अएना, लो खानाचिओ कोङ छाक्को मानमुलुतदानुम।⁸देनादि रातकोपमिआ मोकोचिञा सावाएम पुवाओनिन ना खोनिनआ नेतलोक डाङका हाउसो लेनओ छापछोङडा यिङमा लिवो माननुङा। ⁹९ओसुन्दुम निनाममुओ मनाचिओ निकि सावाएमलेनओ खोङवाताम दकयाकङे याआङ। ¹⁰देनादि खोनिनओ सावाएमडा कावाङमु मुकाबाआ निनाममु उहाङपाङआ मुवानिन इसा आनओ वकडाङका मोसाआ छाङ सावाएमला लोक्ताओ लिमाडोट । ¹¹ओसुन्दुम आनकान मोको सावाएमडा कावाङमु चुसिञा चोकमेत मुइनने का मोकोडङे माकाकाङमिनओ फस्याडा साङछाङ मना धासाङ मानलिने।¹²देनादि निनाममुओ इदुम अहङसक का याराङ, का खाउडे हवाहुपहेकवा बान्छोन चोङलो छाङ बेन्छोकवा, नङ हाङमाङ का साकोङआ अकाम-अकामखा का युवाओ युछुमञा हाकला हाकला मुलुतिनलोकतारि रोनयालेन धुपवो का कोङरिङओ मिनछोङ का मिनलाञा खाचेतसि रूवो नुयाक। ¹³नङ खोनिनओ मुकखाङडा हङपोकमुओ खाउङे याक्क इप्ताओ नुनिन, मेन खोक्कोसुत्डा आनकानआ सुङसेन मुमाडोट, खोनिनओ अमुकओ बुनेकडा झारा दुमचि दुम्छुयुक का होङसाङ युङसानचिनओ मयाआङ।¹⁴नामकुदु लेन्तुकि खारानिनओ आनकाओ अकपाङ धिमि बुबमि तामिन्तुप निनाममुओ सावाछा देकमि लिसानिनओ लिहिडा आनकानआ देङहुतमु मुवाओ आनसामयोक खुन्दोनि युङसोमने। ¹⁵देनादि आनअधुवा बुबमि आनराङमातलाडा आनकान सुत्डा छुयुमि लिमा मानरूवो माआङ। मेन झारा दुमडा आनकान ओटनि खाचेतसाङ काछाङ हुमुकवामायाक लिमानुयाक। ¹⁶ओसुन्दुम नुनुतछोङओ धिनारोम्खाओ चुकडा आनकान कुमाकामात अकनिन ताइन्ने, का पुनोत तोकतोमने, नङ चाखामलाओ वाइदाडा आननुनोतओ निकि खोनिन दाङका नुनुतछोङ तोकमा रूड्ने।

5¹देनालो मनाचिङका तारूओ अकताउक अधुवा बुबमि मनाचिखपडा, निनाममु वेतनातयि दुमडा हुमुकवाओ निकि रिपेन्छेम का हेन्खुवाचि धानमाञा मनाचिओङे निकि कावाङसाङ लिसाओ नुयाक। ²मोचिआ निसिनवा का सुलामलिपा वाङाओचि सुत्डा ना नुऔलाकनिन सुङसेन मुमा रूलुक, देनालो खोको उहाङपाङ छाङ राङमातलाआ कोम्तानचिनओ मलि। ³ओसुन्दुम मनाचिओ निकि ओटनि आनओङे हुमुकवाओ निकि छाङ हेन्खुवाधानमा लाङेकवा मलि।⁴नङ उहाङपाङआ उहाङपाङञा ओको सानुवा खाउङे मनाआ लोकनिन, मेन हारूनआ इसा निनाममुङका बुतसान लिसाओ नुयाक। ⁵उइसाकिया निनामछेनआ छाङ अधुवा बुबमि लिमाञा उहाङपाङआ उहाङपाङञा वालानसाङ मुलुतमा मानलि, मेन खोनिनआ उसओ लोमानुवोखानाञा अङकाआङे आइ पुक्तुओ याकङा। डाङकाङे कावाङसाङ लिसानिन। ‘खाना उङसावाछा तए,⁶देतनि हाउसो खामडा छाङ खोनिन लोमानुयाक, 'म‌ल्किसेदेकओ सेमयोक खुवातनि। खाना लेनमुलेनओ निकि बुबकाबा तए।'⁷आनओ साएमपोकओ लेनडा खोक्कोआ थिसाकिया पातनि, मुकवा पेत्ताकि खोनिनआ सुवालोङ डाङका डेकमा रूमानुवो सुत्डा सोमफोङला का खपमिनफेङला मुवानिन, का खोनिनओ सानुवासामओ कुमाआ मुहिडा खोनिनओ एनसु-लिसा। ⁸खोनिन सावाछा लिमानुवाङा मेन्छान खोनिनआ थाआङसानिनओ मेकसन दाङका खोनिन इङइवा काङलेन मुसि चिन्तानिन।⁹नङ सेनलेनवा मेतदोनि खोनिनओ इङइवा काङमिचि झाराओ निकि खोनिन सानलेप कपलेनकपओ मुकाबा लिसानिन, ¹⁰निनाममुङका मल्किसेदेकओ सेमयोक खुवातनिओ अधुवा बुबमिओ तालक खोनिनआ तोक्तानिन। ¹¹खोनिनओ छापछोङडा आनकानआ बदधेङे दुम लोमायाक, खाक्को खानाचिओ सोमा नाबाक लिसाओआ तुपयुङमा छाङ चरकवा याआङ।¹²देनादि उन्तिका मुयाकलातारि ना खानाचि सान्दिवा लिनिचिमा डोट्टाङा, मेन फान्नु खानाचिआ साङआ निनाममुओ इदुमओ तापुङओ सालामयङचि चिनलुनि पुमा डोट्‌टाओ याआङ। खानाचिञा चावा चामासेसिओ माआङ, मेन फान्नु ओमपिओङे चाखामला डोटवो इसा खानाचि लिसाओ अयाआङ। ¹³देनालो ओमपिवाओ युक्याहाकमि लिवो उकताउक मना साम्योमिकलाओ इदुमओ तोकमुक मुसि मानरूवो नुयाक, देनादि मोको एलोकछा ङे ए। ¹⁴मेन चावा चामासेसि लो लाटला लोङछाओ निकि ए, खोक्को मोसाओ याङमालाम डाङका उवाक का खान्नो छेनमाञा खायामसिनपोकओ मुखाम लिसाओ मलि ।

6¹ओसुन्दुम निनामछेनओ तापुङओ सालामयङचिओ छापछोङ चेपमा छिराकि सेनलेनला लिपा आनकान पोनयाङसा खारइनने। सुवाओ वकचिङका लाछुङमिनओ, का निनाममु लिपाओ मकतुमओ योकलाङ लादेङ युङमेतको हङसानवाचि ²का छुक युङवो दुमचि, सुकाबाचिओ लाहङलेन का सानलेपसान सान्नोसानओ सालामयङओ योकलाङ युङमेतवो दुम छिरोमने। ³खोनालो निनाममुआ इङइवा पुवाओनिन ना आनकान उसओडे मुवोम्का।⁴देनादि मोकोचिओ छापछोडडा, तामिनतुप खोक्को खोक्कोआ अकदु छोङ तोक्ताकि सारूङगायि इछुकसिवा छेम्सा, का वाचोङ साकोङओ युक्याहाकमि मलिसा ⁵निनामममुओ मुलुमरङ इदुमओ का तावो कपदोङओ साएराङओ नुछप मतोक्ता ⁶मोनेतलोक मोकोचि धासाङ मलिसा लोना मोकोचिञा लादेङ अछुङमिनओ निकि नुङवा मेतमातञा अतकारूयाक याआङ। देनालो मोकोचिआ ना निनाममुओ सावाछाञा मोकोचिओ निकि लादेङ इलाकडा मलाक, का खोनिनञा सासापसा नासुङडा ममुलुतयाक ।⁷देनादि खाक्को थामपुकआ खपयाकखप नावाचाओ वा तोक, का खाक्कोओ निकि छोसानचिनओ ए मोकोचिओ निकि नुडनुलो लिमखान लिमलात लो, मोसाआ निनाममुओ सायोक तोक। ⁸मेन मोसाआ तुङखोप का वाटुङमा लिमलात लो ना मोको असाहोक लिनि निनाममुओ यासानला मोसाडा डोट का मोसाओ थेन्यु मिफुङ नुयाक।⁹आनकान उइसाकिया चेइन्का, मेनछाङ खानाचिओ छापछोङडा लो हेइ!, नुडनामि, कपलेनकप वेतनातओ दुमचिडा बदधे टाडखोङ युङसोम्का। ¹⁰देनादि खानाचिओ वक का मोको सोम खाक्को खोनिनओ नुङलिपा, का सेङहाङछाचिओ रोपधामताओ का मुयाङसा युङाओडा खानाचिआ खाङमेत्ताओ अयाआङ ,मोको मानमाकेमाञा निनाममु अत्सामयोकमि लिमानुनिन ।¹¹नङ खानाचि उकताउकआ लाटला यामित्याओ निकि थेन्युतारिङे मोकोङे माइओ चेकुप अखाङमेत्वोङ लोवो आनकान राका मुइन्‌का, ¹²हे खानाचि सोमा मना माआङ, मेन मकतुम का छङनुस्वम दाङका चङमुदुमओ पाडयि लिकाबाचिओ खाङचिनला मुकाबा लिसानुम।¹³देनादि निनाममुआ सुन्तुमदिवाआ यङचकला मुमा लिहिडा उहाङपाङ चोङलो टोप्पो निचि खाउङे नुङडा सिस्वदुम पाकमा मानतोक्ताकि आनओङे नुङडा उसओ लोवाकि सिस्वदुम पाकतानिन ¹⁴अछङमु अङका खानाञा झारा सायोक पुवोङा का खानाओ छावारिओ टोप्पो पोन्सु मुमेतवोङा। ¹⁵नङ उड्साकिया खोचिआ छङनुस्वम लङलेन मुवाकि सिस्वदुम लिसाओ दुम छुकलापसाङ मचुवा।¹⁶देनादि मनाचि ना उहाङपाङ चोङलो टोप्पाङओ सिस्वदुम मपाकलुक, का मोकोचिओ उकताउक मिनफाकमिन सिस्वदुम डाङकाङे हाड़खा लुयाक। ¹⁷मुन्टोङ निनाममुआ आनओ देमखा छाङ लिमा मानरूवो मिचिनङ चङमुदुमओ पाङयिचिञा फाननु टाकछेकनिन खाङमेतनि पुवो राका मुमा लिसाङसाङ, मोबेन खोनिनआ सिस्वदुम डाडकाडे नुःछङ मुवानिन। ¹⁸उइसाकिया ओचि हवापाङ देमखाछाङ लिमा मानरूवो दुम डाङका खाक्कोडा निनाममुञा सोज्जे चेपमा अतकारूयाक याआङ, आनकान वाइपमिचिञा आनबुनेकडा युङनि पुवाओ यामित्या देहुतलेन मुसिजा हेन्नाम साखाचोङ लिने¹⁹खाक्को आनकानञा हाङमाङओ ओकचुङ खेकइसा याआङ, तामिन्तुप अकटेट यामित्या, खोक्को लोमान्टका का नुअछङ हवाडे, टिठेक्वाङका हुड्डाओ खारोङ तारिङे ताबान ²⁰खाडडा निममाओ निकि मल्किसेदेकओ सेम्योक ओन्सामिओ अधुवा बुबमि लिसाकि देकमि आनकानओ निकि बुलाम्बु इसा लिनि हुड्डा वाङानिनओ याआङः।

7¹देनालो हेन्कोपहाडचिञा सेराकि लासाओ सुन्तुमदिवाआ ओचि मल्किसेदेक, सालेमओ हेन्कोपहाङ धिचोम निनाममुओ बुबमिआ धिराकि मोचिञा सायोक मपुवा। ²खोचिञा सुन्तुमदिवाआ झारा यामतोकओ पौसिहाकलासि हानि छाङ मपुवा, (खोचि उनुङओ तुपयङ ओनसामि बुसि सामयोमिकलाओ हेन्कोपहाङ का मोनेतलोक लो सालेमओ हेन्कोपहाङ छाङ, तामिनतुप नुसानओ हेन्कोपहाङ मए। ³मायाक पापा, मायाक मामा, मायाक इवाछापला मान ना लेनओ केङयु, मान अयामओ थेन्यु लिसाओ, मेन निनाममुओ सावाछा ओटनि कोपयापतुओ) खोचि सानलेप बुबमि लिनि मयुङ।⁴हान मिनला मुवानुम ना, खोचि खासओ धिमि छामिन्छा मयाआङा, खोक्कोञा सुन्तुमदिवा सामकाहाङपाआ छाङ फेममावाओ खाननोमा याक्कचिओ पौहाकलासि मपुवा। ⁵नङ नुच्चङडे बुबमि वक तोकवो लेविओ सेन्तुमचि, खोक्को सुन्तुमदिवा डाङकाङे पुक्ताओ मए, मेनछाङ खापला ओन्सामि मोकोचिआ मनाचि तामिन्तुप मोकोचिओङे बुबु निछाचिङका पौहाक्लासि तोकवो मोकोचिञा इङइवा याआङ, ⁶मेन मोकोचिओ इवाछापलाडा मानखिप्तानचिनओ ओकोचि मनाचिआ सुन्तुमदिवा सुत्डा पौहाकलासि लोक्ताओ मए, का खोक्कोआ चङमुदुम तोक्वोञा ङे सायोकदुम पुवाओ मए।⁷नङ ओको दिचछाङ मिनफाकमिन मुवो दुमङे माननुङ, हे चुपपाङआ टोपपाङका सायोक तोक। ⁸ओडा सुमायाक मनाचिआ पौहाकलासि मलोक्, मेन मोडा खोकोङे अकपाङआ, खोक्कोओ सानुङडा खापलाआ निममा हङनियुङवो लोवो नुःछङ मुवाओ याआङ। ⁹हान उइसाकिया छाङ लोमा रूविन, हे पौहाकलासि तोक्यो लेविआ छाङ सुन्तुमदिवा दाङकाङे पौहाकलासि मपुवा। ¹⁰देनालो मल्किसेदेकआ सुन्तुमदिवाञा धितहिडा मोचि ना आनओ पापाओ साएमपोकडाङे मयाआङा।¹¹हान खोनालो लेविओ बुबमि सेम्योक दाङका सेनलेनला छुकलापसाङ लिहिडा ए ना (देनालो उसओ वाइदाडा मनाचिञा खापला तोङाओ ए) हारूनओ दकओन्सामिङे बुखुवातनि मानलिसाकि, लादेङ मल्क्सेिदेकओ सेम्योकओन्सामि हाउसो बुबमि ठानठुक लिमाञा दि चाखाम डोटटाङा? ¹²देनादि बुबमि सेम्योकओ फानअफान लिहिंडा खापलाओ छाङ फानअफान लिवो चाखाम नुयाक।¹³देनालो खोक्कोओ छापछोङडा ओचि दुमचि लोवानचिनओ मए, खोनिन ना हाउसोङे दुक्छाओ लिमानुयाक, खोक्कोङका लिसाओ साङआ देमखा बुब्दुलुङखाओ रोपधामताओ ममाननुङा। ¹⁴देनालो ओको दुम्छुकलाङे याआङ, हे आनहाएसि ना यहुदाओ दुक्छाङका पुकदुलोन लिसानिनओ ए। खाक्को दुक्छाओ वेतनातडा वाछाप्पाआ बुबमिचिओ छापछोङडा दिच छाङ लोवाओ मातदङ।¹⁵खोनालो मल्किसेदेक ओटनि मुनि हाउसो बुबकाबा ठानठुक लिवो ए लोना आनकानआ लोवाओ दुम फान्नु धिदुम्छुकङे नुयाक। ¹⁶खोक्को साएमपोकमिक इडइवाओ खापला ओन्सामि माआङ, मेन अतयाइमि अयामओ साएराङ ओन्सामि बुबकाबा मुवाननिनओ ए। ¹⁷देनादि खोनिनओ छापछोङडा ओको सिनलेखा पुवानचिनओ याआङ‌, 'मल्किसेदेकओ सेमयोक ओन्सामि। खाना निम्मालकओ निकि बुबमि तए।'¹⁸देनालो मोको बुसि ओलाक इङइवा रूपरूवा का दुकनुमातओ लिसाओ लिहिडा असाहोक लिसाओ याआङ, ¹⁹(देनादि खापलाआ खाउङे दुम छाङ सेनलेन मानमेत) का उखारोरूङडा मोको चोङलो मुलुमरङ यामित्या टारानचिनओ याआङ, खाक्कोडका आनकान निनाममुओ चुकडा ताबानइनका।²⁰नङ उनतारि हे ओको ओलाक ना मायाक सिस्वदुम माआङ। ²¹(देनालो मोकोचि ना नुच्चुङङे मायाक सिस्वदुम बुबमि लिसाओ मए। मेन खोनिन ओलाक खोनिनओ छापछोङडा उसओ लोवो सिस्वदुम ए , 'हाएसिआ सिस्वदुम पाकतानिन, का आनओ कोङ फानमा लिवोनिन खाना निम्मालकओ निकि बुबमि तए।' )²²उनतिकाआङे छाङ देकमि मुलुमरङ चङमुदुमओ लेयातलुङपा मुवाननिन। ²³सुवालोङआ मोकोचिञा याकनियुङसि मानपुवाओआ नुच्चुङडे बदघेका इखिपलाडा बुबमि मुवानचिनओ मयाआङा , ²⁴मेन खोनिन ओलाक निम्माङे याकनियुङमा लिवो लिसाओ लिहिडा खोनिनओ बुबमि सेम्योक लोमान्टका युङ।²⁵ओसुन्दुमङे छाङ खोनिन दाङका निनाममुओ चुकडा तावोचिञा खोनिनआ लाटला सेममाला मुसि रूमानुयाक। देनालो मोकोचिओ निकि खपमिनफेङला मुमाआ खोनिन निम्मालक युङमानुयाक । ²⁶देनालो उसओङे अधुवा बुबकाबा आनकानओ निकि नुलोक याआङा, खोक्को वाचोङ, एङलामात, थेपवामात हुमुकमिचिङका नियाक लिसानिनओ, का सारूङगाचि चोङलो चोमलो मेतमानचिनओ याआङ।²⁷खोनिनआ निचि बुबमिचिञा ओटनि मुनि, बुसि आनओङे खोनङ हुमुकवाओ, मन्कि मनाचिओ हुमुकवाओ निकि हेन्खुवा लेनओलेन रिपेननि युङमा चाखाम मातदङ। देनादि ओको ना खोनिनआ उहाङपाङजा रिपेनला मुमा लिहिडा अकदुङे मुनिचियानिन। ²⁸देनालो खापलाआ अराङमात मनाचिआ अधुवा बुब्काबा कावाङसाङ मुयाक, मेन खापला चोङलो नेतलोक डाडका तावो सिस्वदुमओ इदुमआ कपदोङफानओ निकि सेनलेन लिसानिनओ अक सावाछाञा कावाङसाङ मुयाक।

8¹हान आनकानआ मुनियुङसाओ दुमचिडा धियान दुम ओकोङे ए, 'आनकानओ उसओ धियान बुबमि लिमानुयाक, खोक्को सारूङगाचिडा धिवाङ रूमुहाङओ धिनारोम्खाओ चुप्चुछुकलिपा मनाचिआ ठानठुक मुवाओ माआङ, ²मेन हाएसिआ ठानठुक मुवानिनओ वाचोङखाम का निसवान याकखामओ रोपधामवा लिसाकि युङानिन।³देनादि खाक्कोनुछे धियान बुबमि छाङ रिपेन्छेम का हेन्खुवा धानमा कावाङसाङ लिसाओ नुयाक। ओसुन्दुम ओको धियान बुबमिञा छाङ दिच रिपेनमा चाखाम डोट। ⁴हान खोनिन ओको हेनखामाडाङे लिमालिहिडा ए ना खोनिन बुब्काबा लिदाङे नुनिन, देनालो खापला ओनसामि रिपेन्छेम धानकाबाचि ना याकयाङ। ⁵मोकोचिआ सारूङगाडा लिसाओ दुमचिओ चिपयोङ का लाछेपओ रोपधामवा मचु, देतनि हे वाछाप्पाआ याकखाम मेत्वो वाइदाडा उसओ लोवो निनाममुओ छामसु मतोकताडा, हे खोनिन यिङमा नुयाक,' खानाञा भुरूडा खाङमेतनि पुवाओ फस्याखुवातनि झारा यामतोक खानाआ मेत्‌मा।'⁶मेन हान ना खोनिनआ मुन्तिकाङे बद्धे मुलुमरङलेन रोपधामवा तोक्तानिनओ याआङ, मेत्लोओ खोनिन फाननु मुलुमरङ चङमुदुमओ खपमिवा लिमानुयाक, खाक्को चङमु फाननु मुलुमरङ सिस्वदुमचिडा छुम्तानचिनओ याआङ। ⁷देनालो बुसि यङचकला खायोकमात लिसाओनिन ना हवासिओ निकि सुकधिइ लाममायाक माननुङा ।⁸देनालो मोकोचिधानि खायोक पाक्तुकि खोनिन यिङमानुयाक;खाङानुम, मोचि लेन मबान, धिवाङ हाएसि यिङमानुयाक, ' हे इस्राएलिओ दुक्छा का यहुदाओ दुक्छासुत्डा अङका नुङवा चङमु छुमवोङा। ⁹मोकोचिओ पापा दिवालापचि सुत्डा छुम्ताओ यङचकला खुवातनि ना माआङ, खाक्कोलेन अङकाआ मोकोचिञा मिश्र सिङवाङडाडका लात्ताकि बितमाञा मोचिओ छुक लापतुङडाङ। देनादि मोकोचि अङयङचकलाडा युङनि मानयुङ नङ अङकाआ मोचिओ दिच स्वावा मानमुदोङ, घिवाङ हाएसि यिङमानुयाक।¹⁰देनालो खाक्को यङचकला इस्राएलओ ढुक्छाकनिन अङका। छुम्वोडा मोको ओकोङे ए, मोको लेन नेतलोक धिवाङ हाएसि लोमानुयाक, अचुकोङडाङे अङका उङखापलाचि युङनिपुवोङा, का अचुकोङडा छाङ अङका छापनि पुवोङा नङ अङका अचुनिनाममु लिवोङा, का मोकोचि ओलाक उङहाङछामि दिछामि मलिवोङ।¹¹नङ मोकोचि उकताउकआ आनआनओ तालावाङ याकखामिचिञा सालामयङ पुमायाक माननुङ, ‌‌ का उकताउकआ आन आनओ निछाञा 'निनाममु सिन्तानुम' लोनि चिनलुमा डोटवोनिन, देनालो मोकोचिओ चुप्पाङका लोक्तुकि टोप्पाङतारि झाराआ मसिनताङवोङ। ¹²देनालो मोकोचिओ अत्सामयोकलिपा अङका पुनुतनुमि लिवोङा का मोकोचिओ हुमुकवा अङका लादेङ मितवोनुङा ।¹³नुङवा यङचकला यिङानिनओआ बुसिञा ओलाक आसुङ मेत्तानिन। मेन खाक्को ओलाक आसुङ लिसाकि रोकरोवा लियाङसा खात, मोको सुस्ताकि ङे खातमा छुमचुम याआङ।

9¹हान बुसि यङचकलाडा छाङ निनाममुओ रोपधामवाओ सामयोरिदुमचि का मोसाओ याकखिम, ओको हेन्खामाओ याकखिम, मयाआङा। ²देनालो यङपखाम छुमचुम लिसाओ याआङा, खाक्को हुड्डा बुनेकडा ओलाक ओपकियुडखा, छापबुङ का रिपेन्छेमओ पेम्पाक मलिसाङा, खाक्कोञा सेङवा खारोङ लोविन।³नङ हवासि टिक्छेकवाओ देङसि हेनाम वाचोङ लोवोन ओलाक यङपखाम युङाङा, ⁴खाक्कोडा स्वनाओ मिबुङखा का स्वनाआ मोपतानचिनओ यङचकलाओ छेककुसि का खाक्लो हुड्डा इचालुङ पाक्तुओ स्वानाओ खुडखेन का हारूनओ नुकबुङ लुवाओ तोमफुक का यङचकलाओ माकछापखाचि मयाआङा। ⁵नङ ओधानि धिनुमसङओ सारूडकेन्छाचिआ लाछामि मुलुतनियुङाओ पुनुतथुङखा युङाङा। खाक्को दुमओ छापछोङडा हान अक अक मुवाकि आनकान लोमा रूइमिन्का।⁶हान ओचि दुमचि उइसाकिया मेत्ताकि बुबमिचि बुसि ओलाक यङपखाडा रोपधामओं वक मुयसङसा हाकमाहाक मखात। ⁷मेन हवासि ओलाकडा ना धियान बुबमि इकआडे दोङडा एक्दु खातवो मचु, मोको छाङ हुवा मायाक माआङ। खाक्को हुवा खोचिआ आनओ निकि का मनाओ हुआदोङओ निकि मरिपेन।⁸ओकोङे डाङका वाचोङ साकोङ खाङमेतमा नुयाक, हे बुसि यङपखा युङइन्लोक वाचोङ खारोडङ हुड्डा खातवो लाम फाननु यापुक्तु लिसाओ माननुङ। ⁹नङ ओको ना हान्दे आइदुमुओ निकि अक फस्या ए। ओको ओन्सामिओ रोपधामवाडा रिपेन्छेम का हेनखुवाचि रिपेनतिन, खाक्कोङका हुब मुकाबाओ खायामओ सानुङडा ओलाक सेनलेन मेतमा रूनिन, ¹⁰मेन ओन (चावो का दुङवो का वारावाराङ खारोङचि) साएमपोकमिक साम्योरिदुम मए, खाक्को साङसेसानओ मुयाकला मानबानइन्लोक युङसानचिनओ मयाआङा।¹¹मेन निनामछेन देङसि तावो नुए दुमओ धियान बुबमि लिसाकि, छुकआ मेत्ताओ माआङ, तामिन्तुप ओको छावनछाडाङे मानलिसाओ फाननु टोप्पो का सेनलेन यङपखाङका ¹²पोप्चुचि का बोपराङचिओ हुवा माआङ, मेन आनओङे हुवाङका सानलेपसान फाखालाम छुकलापसाङ चुवाकि अक्दुङे वाचोडखामहुडडा वाङानिन।¹³देनादि पोप्चु का बोपराङओ हुवा का हुकमाङलिकामिओ धानि दोपवो कोनमाओ थाबुतआ पोकओ सामसेङलाडा वाचोङ मेत लो ना, ¹⁴अहङसक निनाममुओ रोपधाममुसिञा निनामछेनओ हुवाआ खानाचिओ खायामञा अराङमात वकचिङका देम बद् धे मुनि सेङवा मलुतुने ? खोक्कोआ सानलेप साकोङ दाङका उहाङपाङञा निनाममुओया अखेनमात रिपेन्ला मुवानिन। ¹⁵नङ ओसुन्दुमङे बुसि यङचकलाडा लिसाओ हआदोङचिओ फाखालामओ निकि सुवालोङ लिनिचियाओ लिहिडा बुतसान लिसाओचिआ सानलेप कोपरूओ सिस्वदुम मतोकने यिङाकि नुङवा यङचकलाओ खपमिवा खोनिन लिसानिनओ ए।¹⁶देनालो खाडडा राकाछापला नुयाक, मोडा मोको मेत्काबाओ सुवालोङओ चाखामला छाङ डोट। ¹⁷देनालो सुवालोङ मलिसा नेतलोक ओन राकाछापला अछङ नुयाक, देनादि दि राकाछापला मुवो हङइन्लोक मोको अछङ दोकयाक कि ?¹⁸ओसुन्दुम बुसि यङचकला छाड हुवा मायाक छुम्तानचिनओ माननुङा। ¹⁹देनालो वाछाप्पाआ मुन्टोङ खापला ओनसामिओ उकताउक इङइवा झारा मनाचिञा एनमेतनिचियाओ मयाआङा, मोबेन खोसाआ बोपराङचि का पोपचुचिओ हुवाकनिनडा चाःवा, हालचुकवा साममङ का सामपुकवा लोक्तुकि छापलायाक का मनाचि झारा धानि ²⁰उसओ लोयाङसा दोप्ताओ मयाआङा, ‘निनाममुआ खानाचिलिपा इङइवा चुवानिनओ यडचकलाओ हुवा ओकोङे ए।‘²¹उइसाकिया ङे खोचिआ यङपखा, का बुबओ खुङखेङचि झाराडा छाड मोकोङे माइआ हुवा दोपताओ मयाआङा । ²²नङ साखुबुडा खापला ओनसामि ना हुवाआ हाप्पो झारा यामतोक सेङवा मुलुतलुक, का हुवा मानपेतदोनि हुमुकवालेकलाम देम्खाछे नुनिन।²³ओसुन्दुमङे सारूङगाओ दुमचिओ सेम्बुङचि ओलाक ओकोङे डाङका, मेन सारूङगाडाङे लिसाओ दुमचि उहाङपाङ ना ओको चोङलो बद्धे मुलुमरङ हेन्खुवाआ सेङवा मेत्‌मान चाखाम याआङा, ²⁴देनालो निनामछेन साखुबुसाओ सेम्बुङ मुनि छुकआ मेत्ताओ वाचोङखा हुड्डा माआङ, मेन हान आनकाओ निकि निनाममुओ बुनेकडा यापुक्तु लिमाञा उहाङपाङ सारूङगाडाङे कावाङमु लिसानिनओ याआङ।²⁵फाननु खपयाकखप उहाङपाङआ रिपेनला मुइनने यिङाकि माआङ, देतनि धियानबुबमि दोडअदोङ आनओङे माआङ, मेन हाउसोओ हुवा लोक्तुकि सेङवा खारोडहुड्डा वाङवो मचुलुक, ²⁶माआङलो हेन्खामाओ मुलुमपुक डाङकाडेङे खोनिनआ खपयाकखप छुयुकुप्पा डोराङा, मेन हान कपदोडओ थेन्युडा आन्ओङे हेन्खुवाआ हुमुकवा यासोतमाञा खोनिन अक्दुङे यापुक्तु लिसानिनओ याआङ।²⁷नङ ओयातारि हे, देतनि मनाओ निकि अकदु सुवालोङ का मोनेतलोक साननोसान कावाङसाङ लिसाओ याआङ ²⁸उइसाकिया निनामछेन छाङ बद्धेकापाङओ हुमुकवा खुनमाञा अकदुङे हेनखुवा लिसाकि, हुमुकवाओ हुकताकि खोनिनओ याहुङमालाम मुकाबाचिओ कपलेनकपओ निकि हवासिदु खालोनमा लिवोङ।

10¹देनालो खापलाडा हान तावो नुए दुमचिओ उहाङपाङ लोङसान मानलिनि लाछेप ओन लिसाओ लिहिडा दोङलादोङ मोकोचिआ निम्मा रिपेननि युङवो मोकोङे माइओ हेन्खुवाचिआ चुकडा तावोचिञा दिमुछे सेङवा मेतमारूनिन। ²२ माआङलो ना मोचि रोपधाममिचि अकदु सेङवा मलिसा नेतलोक खोनालो उखायामआ मोचिञा लादेङ हुमुकमि मानदोकवो मलिसा, दि मोचि हेन्खुवाचि रिपेन्मा छेकसाङ लिवो मयाआङा ना? ³मेन मोचि हेन्खुवाचिडा हुमुकवाओ मुकसिन दोङअदोङङे लियाङसा खात्। ⁴देनादि सामपुरूचि का पोपचुचिओ हुवाआ हुमुकवा सायालोकमा अतकारूयाक याआङ।⁵ओसुन्दुम हेन्खामाडा बानमानुहिडा खोनिनआ यिङानिन, हेन्खुवा का रिपेन्छेम खानानिनआ चाखालिमा मानलि, मेन अङकाओ निकि अक साएमपोक छुमचुम मुलुतनि पुवानिन। ⁶युहुत हेन्खुवाचि हुमुकहेन्युवाचिडा खानानिन सावालेत लिमा मानलि, ⁷मोबेन अङकाआ लोउङ खाङाने हेइ! निनाममु खानानिनओ राका लाटला मुमाञा अङका ताओ याकङा। (छापलायाकओ छुम्पाडा उङछापछोङडा छापतानचिनओ याआङ)⁸धानि लोवानचिनओ याआङ, हेन्खुवाचि, रिपेन्छेमवाचि, युहुत हेन्खुवाचि, हुमुकहेन्खुवाचि खानानिनआ नुछप चुमा मानलि। खानानिन मोकोचिडा सावालेत लिमा मानलि (खाक्को खापलाओन्सामि रिपेनतिन्) ⁹मन्कि नेकलोङका लोवानिनओ याआङ, ‘खाङाने, खानानिनओ ङे राका लाटला चुमाञा अङका ताओ याकङा ।' हवासिञा ठानमुसाङ चुमाञा खोनिनआ बुसिवाञा असाहोक चुमानुयाक। ¹⁰नङ मोङे राकाङका ना देकमि निनामछेनओ साएमपोकओ अकदुङेओ रिपेनलाङका आनकान सेङवा लिसाओ याइन्का।¹¹नङ उकताउक बुबमि लेनओलेनओ रोपधाममुयाङसा हुमुकवाञा दिमुछे सायासोतलाम चुमा मानरूवो अकसामओ हेन्खुवाचि खपयाकखप रिपेनयाङसा ठानठुक मलि। ¹²मेन निनामछेनआ ना हुमुकवाओ निकि निम्माञा अकटाङे हेन्खुवा धान्तुकि खोनिन निनाममुओ चुप्छुचुकलिपा युङानिन। ¹³मोनेतलोक खोनिनओ नुकसाचि खोनिनओ लाङटक मानलिसइन्लोक खोनिन हुङनियुङमा नुयाक। ¹⁴देनादि अकटेटङे हेनखुवाआ सेङवा लिसाओचिञा खोनिनआ निनाममुओ निकि सेनलेन मुमेत्तानिनओ याआङ।¹⁵नङ वाचोङ साकोङ छाङ आनकानञा सिनलेखा पुमानुयाक। देनालो बुदा उसओ मलोवा नेतलोक, ¹⁶मोकोचि सुत्डा अङकाआ छुम्वो यङचकला ओकोङे ए, धिवाङ हाएसि लोमानुयाक, मोचिलेन नेतलोक, मोकोचिओ कोङरिङडा अङका उङखापला युङनिपुवोङा, मोकोचिओ कोङडा छाङ अङका मोचि छापनिपुवोङा, मन्कि खोनिन लोमानुयाक¹⁷नङ मोकोचिओ हुमुकवा का मोकोचिओ अतसामयोक अङका लादेङ मितवोनुङा । ¹⁸हान खाड्डा ओकोचिओ हुमुकवा नुनामलानुत लिसा, मोडा हान लादेङ हुमुकवाओ निकि हेनखुवा नुनिन।¹⁹ओसुन्दुमङे हेइ! निछाच्यो, देकमिओ हुवाआ मोको नुङवा का अहङसक लामडाङका वाचोङखारोङडा कावाङमु चुमा आनकानञा सापसा लिसाओ लिहिडा ²⁰मोनुङवा का अहङसक लाम डाङका खाक्को टिछेकवा तामिनतुप, खोनिनओ सादाङका आनकानओ निकि ठानमुलेन मुवानिनओ याआङ, ²¹का निनाममुओ छामानडा अधुवा धमि बुबमि लिसानिनओ लिहिडा ²²आनकोङरिङ उवाक खायाम डाङका सेङवाकनिन दोप्तानचिनओ का आनसाएमपोक वाचोङवाआ वालेकतानचिनओ लिनि आनकान निस्वान कोङसुत्डा मकतुमओ लाटला टाङखोङआ चुकडा बिइनने।²³नङ मानरूखोकने यिङाकि आनकाओ यामित्याओ देङहुतलाञा आनकान अछङमुकनिन खुन्दोनि युङसोमने। देनालो सिस्वदुम चुमालिवो खोक्को लिमानुयाक, खोनिन मकतुम मुरू लिमानुयाक। ²⁴नङ सोम का नुवकडा चोङसाङ मुमेत्ताकि अकपाङआ हाउसोओ मिनला युङवो मचुने। ²⁵साङ साङओ चालाङवा मलिसा ओटनि आनकान अकखामडा झाराझुम्मा मानछिरोमने। मेन लेन चुक चुकडा ताबानाओ खानाचिआ टोक्ताओङे लिहिडा अकपाङआ हाउसोञा फाननु बद्धे मुवाकि सालामयङ पुयाङसा मुइनने।²⁶देनादि आनकानआ मोसाओ ताया मतोक्ता नेतलोक छाङ लेनि लेदोनि हुमुकवा मुइन्का लो ना ²⁷हुमुकवाचिओ निकि मेकसनओ कुमाकाइतलो हुङमाला का पारिमुचिञा हुतनि मुवो मिओ खेलोकला लेटका लादेङ खाउङे हेनखुवा दकयाक युङनिन।²⁸वाछाप्पाओ खापलाञा थेकवो मना हवा हे सुमपाङ सिनलेमुचिओ दुमआ पुनुतमायाक मसुलुक लो ²⁹निनाममुओ सावाछाआ लाङह्युनि नेप्वो का उहाङपाङआ सेङवा मुलुत्ताओ यङचकलाओ हुवाञा असेङअत याक्क इखिपवो का नुनुतछोङओ साकोङञा मिनअतला चुवो फाननु देम बद्धे छाक्को मेकसनओ मुरू दोकवोन ? लोवो खानाचि मिनला मुवानुम।³⁰देनालो बाराला पुवो वक अङकाओ ए, अङका दुकमेतवोङा, यिङमा लिवोञा आनकान सिन्तोम्का। नङ लादेङ हाएसि दक्छामनाचिओ सान्नोसान मुमा नुयाक। ³¹अहङसक निनाममुओ छुकडा डोटमा कुमाकाइतलो दुम ए।³²मेन बुनेकओ लेनचिञा मित्तानुम, खाक्कोडा खानाचिआ छोङ मतोक्ता नेतलोक टोप्पो टोप्पो बान्छुपओ ङेनथेनला अआङत्ता। ³³देमखा ना मिनअत का छुयुचिआ निचिओ खाचोपंला मेत्तानकि नङ देमखा ओलाक उसओङे यामामुडा डोराओचिओ युक्याहाकमि लिसाकि ए। ³⁴देनादि खेखुपडा डोराओचिञा खानाचिआ स्वमतुकला खाङमेत्ताकि खानाचि तुकखामि अलिसा, नङ खाना आमहाङपाङओया धिमि का याकयुङवो हाउसो अकटेट खाबालुङ याआङ, लोवो लेसुकि आमनो खाबालुङ सावालेत सुत्डा खासेकसि अपुवा।³⁵मोसुन्दुम आनओ ओको सापसा मानछितदानुम, खाक्कोडा उनमालाओ टोप्पो यादुमखुङ याआङ। ³⁶निनाममुओ राका काङलेन मुवाकि यङचकलाओ सिवा तोकवो लिसाओ लिहिडा मोकोचिञा छडनुस्वमओ चाखामला याआङ। ³⁷देनादि हान अकटोङडाङे बानमालिवो खोक्को ए, मोको बानमाङे लिवोङ ,का चोमफि मुमा लिवोनिन।³⁸मेन उङसाम्योमिक मना ओलाक मकतुम डाङका लेनचावोङ, नङ खोनालो खोचि देङसि खाछित लो ना, उङकाओ कोङ खोचिसुत्डा वाया युङवोनिन। ³⁹मेन आनकान ओलाक युनलातारि तालावो मुनि देङसि खाछितकाबाचि खपडाओ ऐमिन्का, मेन साकोङओ फाखालामओ निकि मकतुम मुकाबाचि खपडाओ ऐन्का।

11¹हान मकतुम ओलाक यामित्या युङसाओ याक्कओ अछङमुला का दातनित याक्कओ सिनलेखा ए। ²देनादि ओकोडा मुलुमदुमिक मनाचिओ निकि सिन्लेमु लिसाओ याआङा। ³मकतुमङे डाङका आनकान तुप्तोम्‌का, हे झारा कपदोङचि निनाममुओ इदुम डाङका मामुसानताओ मए, उइसाकिया हे खाक्को दात, मोको दातलुवाओ दुमचिङका मामुसानताओ माआङ।⁴मकतुम डाङकाडङे हाबिलआ कयिन चोङलो निए हेनखुवा निनाममुडा रिपेन्तु, खाक्कोङका मोचि सामयोकमि मए लोवो मोचिओ सिनलेमु लिसा । मोचिओ रिपेन्छेम छापछोङडा निनाममुआङे सिनलेमु पुवानिन, का ओकोङे दाङका खोचि सुनिचिया मेन्छाङ फाननु मचेप्याङ।⁵मकतुम डाङकाङे हनोक सुवालोङ मानलिनि सारूङथाङलेन मलिसा, का निनाममुआ सारूडथाङलेन मुनि पुवानिनओआ मोचि धितमासि मानडोट, देनालो खोचिओ सारूङथाङलेन लिमा चोङलो बुसि खोचिआ निनाममुञा सावालेत्ताओ मयाआङा लोवो उसिनलेमु लिसाओ याआङा। ⁶नङ मायाक मकतुम खोनिनञा सावालेतमा अतकारूयाक याआङ। देनालो खोक्को निनाममुओया बान, मोसाआ खोनिनओ सानुङवा याआङ ,लोवो का खोनिनञा लामकाबाचिञा यादुमखुङ पुमानुयाक लोवो अछङडे मकतुम मुमाडोट।⁷मकतुमडाङकाङे मोवाइदातारि मानदाराओ दुमडा निनाममुङका सिनमेतला मतोक्ता नेतलोक आनओ छामानञा डेकमा नुहआ चाःवामा छुमचुम मुलुत्ता। मोदाङका खोसाआ हेन्खामाञा खायोकमि दोक्ताकि मकतुम ओन्सामिओ साम्योमिकताओ पाङयि मलिसा।⁸मकतुमङे डाङका बुतसान मलिसा नेतलोक कोपरूओ निकि हाङपाङआ तोक्वो खारोडडा लोन्तुकि खातमाञा सुन्तुमदिवाआ इङइवा काङलेन मचुवा, का खाटनि खातवो ए मोको मानलेदोनि ङे खोचि लोन्तुकि मखारा। ⁹मकतुमङे डाङका खोनङ माआङ, मेन निसिङवाङडा ओटनि मुनि मोडाङे सिस्वदुमओ पाङमिचि लिसाकि हकटिटखाडा याकमुनि यङचावाछा का सोझामुओ अकनिनडा सिस्वदुमओ सिङवाङडा मोचि नियुङखामि मलिसा। ¹⁰देनादि मोचिआ मोडाङे योकलाङ लिसाओ तालावाङओ हुङमाला मुलुक्ताङा, खाक्कोओ मेतवो का मेतलेन मुवो निनाममु ङे लिमानुयाक।¹¹मकतुमङे डाङका साराआ छाङ आनओ युयाम लेननिचिया नेतलोक कोङवातवो साएराङ मतोक्ता। देनालो सिस्वदुम मुकाबाञा मोचिआ मकतुम मुरुओ इखिप्ताओ याआङा। ¹²ओसुन्दुमङे सुपोकयुक्या लिनिचियाओ अकपाडे मनाओ नामकुदुओ साङगेन मेत्लोङे बद्धे , का साजुमाओ केम्युडा वाचेतलुङ मेत्लोङे इखिपमात सुन्तुमचि पुकदालेन मलिसा।¹³ओकोचि झारा यङचकलाचि मानतोक्दोनि मेन मोकोचिञा माङखाङकाङे टोक्ताकि सायानुत मुनि मोको हेन्खामाडा नियुङखामि का निपाङ मए लोवो देडहुतमु मुयाङसा मकतुमङे डाङका मोचि मसुवा। ¹⁴देनालो उसओ दुम यिङवो खोक्को खोक्को मए, मोकोचिआ चिसिङवाङ लामाओ यापुक्तु मचुलुक।¹⁵नङ नुच्चुङङे खोनालो मोकोचि खाक्कोनुछे सिङवाङ डाङका लोन्ताकि खाराओ मए, मोकोङे सिङवाङ मित्ताओनिन ना मोकोचिञा लावो सुकधिड़ तोङवो याआङा। ¹⁶मेन हान मोकोचि फाननु खान्नो हेन्कोप तामिन्तुप सारूङगायि हेन्कोपओ राका मचु। ओसुन्दुम अचुनिनाममुङे एव यिङमाञा निनाममु मोकोचि सुत्डा सिसुवाकातमा मानलि, देनालो खोनिनआ मोकोचिओ निकि अकटेट तालावाङ छुमचुम मुनिपुवानिन।¹⁷मकतुमङे डाङका सुन्तुमदिवाआ सुको लिहिडा यङचावाछाञा रिपेन्तु। नङ खोक्कोआ वायाकनिन यङचकलाचि देडहुतला मुवाओ मयाआङा, मोचिआ आनओ लिसाओ अकपाङे सावाछाञा रिपेन्मा लुवाओ मयाआङा। ¹⁸ओचिडा उसओ लोवानचिनओ याआङा,' यङचावाछाडाङे आन्दुक्छा दारावोङ।' ¹⁹सुवाओ डाङका छाङ निनाममुआ लाहङमा रूमानुयाक लोवो मिनला मुवाकि ओकोङे फस्याओ युपाडा मोचिञा लाइला मतोक्ता।²⁰मक्तुमङे डाङका यङचावाछाआ नेतलोक लिवो दुमचिओ छापछोङडा छाङ सोझामु का ुआमिञा सायोक्दुम मपुवा। ²¹मकतुमङे डाङका सुवो वाइदाडा सोझामुआ उतोमफुकओ चोमडा हेन्तुकि निनाममओ बुब मचुवा, का मागपालिओ उकताउक सावाछाञा सायोकदुम मपुवा। ²²मकतुमङे डाङका मागपालिओ आनओ थेन्यु चुकडा तानिचिया नेतलोक सोझामुओ छावारिओ याखातमालामओ छापछोङडा खाछोपछाप मुवाओ मयाआङा, का आनओ युवातुङओ सानुङडा इङइवा पुवाओ मयाआङा।²³मकतुमङे डाङका वाछाप,पा पुकहिडा उमामा पापाआ मोचिञा नुरूङछा टोकताओ लिहिडा सुम हिब्लातारि ओचिञा कुमनि मयुङसा का हेन्कोपहाङओ इङइवाओ मोकोचिआ कुमाङे ममानकात् । ²⁴२४ मकतुमङे डाङका वाछाप्पा फान्टा मलिसा नेतलोक फिरउनओ मेछाछाओ सावाछा दारामाञा बुड्छुनला मचुवा। ²⁵२५ दिच मुयाकला तारि हुमुकवाओ छियाकोप थाआङमा लोहिडा हेनाक निनाममुओ मनाचिओ अकनिनडा तिमखातिमडा डोटसि मरासा; ²⁶मिस्र सिङवाङओ रूप्पाखा चोङलो निनामछेनओ निकि मिनअतसाङ लिमा धिखाबालुङ ममित्तु, देनालो मोचिआ उमुकखाङ यादुमखुडलिप्पा पाक्ताओ मयाआङा।²⁷मकतुमङे डाङका हेन्कोपहाङओ माइसुङ सुत्डा मानकुमाकाराकि मोचिआ मिस्र सिङवाङ मछिरा, देनादि दातनितआ टोक्ता इसा मुनि मोचि लोमान्टका मयुङा। ²⁸मकतुमङे डाङका बुसुछाञा युन्ला मुकाबाआ मोकोचिञा नोपमा मान्तोकने लोवाकि मोचिआ सेमलायोक साके का हुवा दोपवो रिदुम मकाङा।²⁹मकतुमङे डाङका मोकोचिआ हाङफुकनि थामपुक इसा मुनि हालसाजुमा बियाकि मोधेतखा फाकोपलेनता, खाक्को दुम मिश्र याकखामिचिआ चोकमेत मुहिडा लुमसाकि मसुवा। ³⁰मकतुमङे डाङका एलेनतारि चुवारूतला मचुवा नेतलोक यरिहोओ ढाकखाचि मधामसा। ³¹मक्तुमङे डाङका गिनपुङचिआ यावामिक सानुवा साराओ लिहिडा मकतुम मानमुकाबाचिओ अकनिनडा राहाब राक्याङमा मानसु।³²निचि बदधे अङका दि लोउम, का देनादि गिदोन, बारक, शिमसन, यिप्तहओ सानुङडा नङ दाउद, शमुएल का यामाङचिओ सानुङडा लोसि मुयाक्लाओ मादुङतोक नुवाङयाक ³³खोक्कोआ मकतुम दाङका हेन्कोपचि छुक्कोङला मचुवा, सामयोकओ ओक मचुवा, सिस्वदुमचि मतोक्ता, धिनाराओ डोचि छेकनिपुवा, ³⁴मिओ मिलाप मसेकता, बान्छोनओ हुपहेकवा डाङका मफुङसा, रूपरूवारिडका सावामि मुवानचिन, म्हुडा रमुङमि मलिसा, निसिङवाङचिओ मुकतलाञा मठिनता,³⁵छामिनमाआ आनओ सुवाओचिञा लाहङसुङका अहङसाङ मतोक्ता, का निचिआ बदधे नुए लाहङलेन छुकलापसाङ मुमाञा सेममालाओ मिनमासा मानचुवाकि मेकसन चासाकि मसुवा। ³⁶नङ निचिआ स्यावारि रमफक छोकला, नङ फाननु बद्धे खेखुप का छेकमिओ सुको थाआङमा डोरा। ³⁷मोकोचि लुङटाकआ मआपतानचिन, युछुकरेकआ मचेन्तानचिन, मोकोचि सुकोडा मडोरा, मोकोचि बान्छोनआ मसेरानचिन, सामुवा का छेङ्ग्राओ होः वा महुमसा, छुयुकुपवारि लिनि छुयुरि का छुयु तोक्ताकि मोकोचि ओह्यात -मोह्यात कोनमा डोरा, ³⁸(हन्खामा मोकोचिओ निकि मुरूओ माननुङा) कुतलेखा, हेमसोडचि, बुकताङ का धाधारङओ राखाकलिप्पा कोननि बिमाडोरा।³⁹नङ ओकोचि झाराआ अचुमकतुमङे डाङका खोनङओ सिनलेमु तोकताओ मयाआङा। मेन्छाङ यङचकलाओ दुम ओलाक मानतोक। ⁴⁰आनकान मायाक मोकोचि सेनलेन ममानलिने यिङाकि निनाममुआ आनसानुङडा दिच खान्नो याक्कओ चुङयापला तोङानिनओ याआङा ।

12¹ओसुन्दुमङे आनकान छाङ उनतिका सिनलेमुओ योवारिआ कोमतानचिनओ लिहिडा, उकताउक माइओ सिन्जोकवा का आनकानआ नेकताकनिन फोमलुवो हुमुकवाञा यासोराकि आनकाओ बुनेकडा युङनि पुवाओ लोतसु छडनुस्वमसुत्डा लोरिन्ने। ²नङ मकतुमओ मुकाबा का सेनलेन मेतमालिवो देकमिञा खाङोमने। खोक्कोआ खोनिनओ बुनेक युङनिपुवाओ सावालेतलाओ निकि नासुङञा चिमाकाराकि इलाकओ बान्छुप थाआङत्तानिन, का निनाममुओ धनारोम्खाओ चुप्चुलिपा युङानिनओ याआङ। ³देनालो हुमुकचिङका खोनिनओ उसादाकडा लिसाओ उनतिका मिनफाकचि आङमालिवोञा मिनला मुवानुम, नङ कोङ छोलोकवा लिनि खानाचि होराकि मानखातदानुम।⁴खानाचिआ फाननुतारि हुमुकवाओ उसादाकडा डेन्ताकि हुवाचोकमि लिवोमुनि यहछितला चुवाओ अमाननुङ। ⁵खानाचिआ मोको सालामयड मानतुकेसुओ अयाआङ, खाक्कोआ सावाछाञा इसा खानाचि सुत्हा दुम मुलुक। ⁶देनालो खोक्कोञा निनाममु सोम मुमानुयाक मोसाञा काङमासिन मुमानुयाक, का हाङपाङआ देङहुतलेन चुवानिनओ उकताउक सावाछाञा रमफक याछोकमा नुयाक।'⁷काङमासिनओ निकिङे खाना अआङयाक। निनाममुआ खानाचि सुत्डा सावाछा मेछाछाचि ओटनि यकपुङ मुमानुयाक। देनालो पापाआ काङमासिन मानमुवाओ खाउडे सावाछा नुयाक कि? ⁸मेन खोनालो झारापाङ युक्याहाकमि लिसाओ मोको काङमासिन मानतोक्ताओ अमाननुङ लोना खाना सावाछा तमाआङ,⁹मेन राकयाङलाङका पुक्तुओ सावाछा तए। लादेङ आनकानञा काङमासिन मुवो आनकानओ पोकमिक पापा मयाआङा, का आनकानआ, मोचिओ सानुवा सारोमने ।दि आनकानआ फाननु बदधे साकोङमिक पापाओ छुककोङडा युङाकि लेनचामा डोटनिन ? ¹⁰देनादि मोकोचिआ ना नुच्चुङङे हाङपाङआ खान्नो चामलोक्ता ओनसामि दिच लेन आनकानआ काङमासिन मचुवा। मेन खोनिनआ आनकान खोनिनओ वाचोङउलाओ युक्याहाकमि ऐन्का लोवाकि आनदुकनुवाओ निकि काङमासिन मुमानुयाक। ¹¹झारा काङमासिन हानदेङेओ निकि कोङछि नुनिन, मेन छुयुओ नुयाक, मेन्छाङ आङतुकि चारूमि लिसाओचिञा देङसिङका नुसानओ सिवा तामिनतुप, सामयोमिकलाओ सिवा पुविन।¹²ओसुन्दुम रूपरू छुकचि का रूपरूयु लाङतुम्फुचि धानि पोक्तानुम। ¹³नङ लाङफेङतुवाओ तुमचकसि मान फुकुतने, मेन नुसङ लिने लोवाकि आमलाङचिओ निकि बिकुलाम मेत्तानुम।¹⁴झारापाङसुत्दा तोङझोङलाम मुवानुम, का वाचोङउलाओ देङसि वाङानुम, खाक्को लेटका खाउङे मनाआ हाएसिञा टोकवो माननुङ। ¹⁵खाउङे मना निनाममुओ नुनुतछोङ डाङका ओन्तोम लिमा मान्तोकने यिङाकि चानचुपलाकनिन खाङानुम। माआङलो खाउङे तानदिसाकि ताओ खुखसुङभेन्आ खानाचिञा छुयु पुउने, का बद्धेकापाङञा अत्साङनुवा मेत्तुङने। ¹⁶माआङलो ना अकदाङसा चावो याक्कआ आनओ पुक्तुओ वाप्कोप इन्वो मुआमि खुवातनि साङ राक्याङवा का असेङअत मना लिवोङ। ¹⁷देनालो खानाचिञा सिनलाडे याआङ, हे देङसिङका सायोक्दुम तोकमा सुङहिडा छाङ (देनादि मोचिआ लाछुङमिनओ छाङ सुकधिइङे ममान्तोक) खावाकि मुयुलाकनिन लामाओ मयाआङा, मेनछाङ मोचि बुङछुनसाङ मलिसा।¹⁸देनादि नोपमालिवो, मि लेतनियुङसाओ, माक मुइवा, खाचङ, खेलोक कुहुक ¹⁹साङतुकओ साङलाडा खानाचि चुकडा बानाओ अमाननुङः। खाक्को रङसाङ खानाचिआ एनहिडा हान लादेङ मोकोचिआ धिबद्धे अक इदुम चेविमिनने, लोनि मोकोचिआ सोमफोङला मुवाओ मयाआङा, ²⁰खोनालो खाउङे सायारूआ छाङ मोभुरू नोप्ता लो लुङटाकआ आपतुकि सेरिन्ने; लोवो इडइवा मोकोचिआ आङमा मानरू, ²¹का मोडाओ मुरूखाङ उसओ कुमाकातलो याआङस, हे वाछाप्पाआ छाङ 'अङका बदधेङे कुमाआ धुनलुकङा' लोवाओ मयाआङा।²²मेन खानाचि ना सियोन भुरूडा, सारूङगायि यरूशलेम तामिन्तुप, अहङसक निनाममुओ तालावाङडा, इखिपमात सारूडकेन्छाचिओ मुकतलाडा, ²³सारूङगाडा नुङ छापमुलान लिसाओ, बुसिवा इखिप्तानंचिओ याहाङछामिक कोपसाम, का रिमिओया, झाराओ खाचुमि निनाममुओया, सेनलेन लिसाओ सामयोकमि मनाचिओ साकोङडा, ²⁴नुङवा यङचकलाओ खपमिवा देकमिओया, का हाबिलओ चोङलो खान्नोकनिन चेपवो हुवाओ दोपसिवाड़ा बानाओ अयाआङ।²⁵चानचुप युङानुम, चेप्मानुवोञा खानाचिआ बुडछुनला मानमुदानुम। देनादि खोनालो ओको हेनखामाडा चानचुवारि पुमिञा बुड्छुनला मुकाबाचि ममानफुकुत लो सारूडगाङका चानचुपला पुमालिवोङका ङालुङ लावो, आनकान खाइसाकिया फुकुतमा – रूड्न्का ? ²⁶खोक्कोओ डोसाङलाआ हेन्खामा धुन्ता मेन हान ना खोनिनआ उसओ यिङाकि यङचकला मुवानिनओ याआङ, 'फान्नु अक्दु छाक्लोमुनि हेन्खामा ओन माआङ, मेन सारूङगाञा अकनिया अङका ङाङवोङा ।'²⁷'फाननु अकदु छाकको मुनि लोवो ओको इदुमआ, ङाङतुओ दुमचि ओलाक हङपुकमु लिसाओ याक्कचिञा ओटनि यासोतवो का मानङाङताओ याक्कचि ओलाक युङमा पुवो, यापुक्तु मुलुक । ²⁸ओसुन्दुम ङाङमान मानरूवो हाङहोन तोक्ताकि आनकानञा नुनुतछोङ लिने, खाक्कोङका निनाममुञा नुङनुलो रोपधामवा, सानुवासाम का कुमाआ रिपेनमा रूइनने । ²⁹देनालो आनकानओ निनाममु हुतनि मुवो छुमि लिमानुयाक।

13¹नाङदुक सोम मामुसाननि युङने ²नियुङखामिचिओ तावाड- सानुवासातमा मानदामाकेदानुम, देनालो ओकोडाङे साङ साङआ सिनलाङे मान्तोकताकि सारूङकेन्छाचिओ सानुवा साराओ मयाआङ।³खेखुपडा लिवोचिञा मोकोचिओ अकनिनडा खेखुपडा मलिसा ओटनि का डासुङडा डोटकाबाचिञा खानाचि हाङपाङ छाङ साएमपोकडा अयाआङ लोवो मुनि मित्तानुम। ⁴झारा सायाकाममु ओलाक सानुवायि लिने, इमखा मानहुकमाङ लिने, देनादि राकयाङचि का कामुकि मुवोचिञा निनाममुआ सान्नोसान मुमा लिवोङ।⁵फेकवा- याङओ रापचा डाङका नियाक युङानुम। खानाचिसुत्डा लिसाओ याक्कडा बुकतोम युङानुम। देनादि खोनिन उहाङपाङआ यिङानिनओ याआङ, अङका खानाञा खाउङे रिदुमआ छितवोनुङा, अङका खानाञा लेतवोनुङा। ⁶ओसुन्दुम कुमाकामात सुत्डा आनकान लोइन्का, हाएसि अङसाएदुतवा लिमानुयाक, अङका कुमाकातवोनुङा। मनाआ दि मुमा रूवाङयाक ?⁷खानाचिञा निनाममुओ इदुम एनमेतवो का खानाचिओ बुलामबुचिञा मित्तानुम, का खानाचिओ अयामओ दुमखुङञा मिनला मुवाकि मोकोचिओ मकतुमओ खाङचिनला मुवानुम। ⁸देकमि निनामछेन आखुमाङ, आइ का निम्मालक अकयुक्या लिमानुयाक।⁹ओला माइओ का नाकाकता सालामयङ चिङका खारूठेसडा मानडोटदानुम, देनालो नुनुतछोङ डाङका कोडरिङ लोमान्टका मुमेतमा नुलोक याआङ, चामासेसिङका माआङ, देनादि मोसाडा खाकलुकाबाचिञा दुकनुवा लिसाओ माननुङ। ¹⁰आनकाओ अकटेट बुब्दुलुङखा याआङ, खाड्डाङका चामाञा यङपखाओ रोपधाम मुकाबाचिञा कोपरू मान्नुङ। ¹¹देनादि धियान बुबमिआ हुमुकहेन्खुवाओ हुवा वाचोडखामडा टारूओ सायारूचिओ पोक लालङ हुझ्या खाट्टाकि हुत्तिन।¹²ओसुन्दुमङे दकमिआ छाङ खोनिनओ आनओङे हुवाङका मनाचिञा साङनुवा मुमेत्माञा लाप्तिखोम हुझ्या बान्छुप थाआङसानिन। ¹³ओसुन्दुम आनकान छाङ खोनिनओ निकि मिनअत आङतुकि लालङ हुइयाङे खोनिनओया खारइन्ने। ¹⁴देनादि आनकाओ ओया याकनियुङवो तालावाङ माननुङ, मेन हान तावो ओलाक आनकान लामलुइन्का।¹⁵मोबेन खोनिन दाङकाङे आनकान सानलेपसान यासुडलानओ हेनखुवा निनाममुञा रिपेन्तोमने, खोक्को खोनिनओ नुङ देडहुतला मुवो आनडोसिवाओ सिवा ए। ¹⁶मेन पुनोत मुमा का साएदुतमि लिमा मानमाकेमा नुनिन, देनादि उसओङे हेनखुवाचिडा निनाममु वाया लिमानुयाक। ¹⁷खानाचि धानि हाङमुयाङ मुकाबाचिओ काकाङमि लिसानुम, का मोकोचिओ छुककोङका युङानुम। देनादि इखिपछापला पुमायाक इसामुनि खानाचिओ हाङमाङओ मोकोचिआ खाङओछुङ मचु, ओको मोकोचिआ वायाकनिन मचुने। छुयु काङाकि माआङ, देनादि मोडाङका मोकिचिञा दुकनुवालक नुनिन।¹⁸आनकानओ निकि सोमफोङला मुवानुम, देनादि झारा याक्कडा खाडखतमि अकनिन युङवो राका मुवाकि आनकानओ नुलोक खायाम याआङ लोनि आनकान मकतुम मुलुकतोम्का। ¹⁹नङ ओको मुसिञा बद्धेङे ताछुकफेङला मुलुकङा, हे अङका खानाचिञा चकनिङे धितमाला मुसि तोक्तुम लोवो आनकाओ निकि सोमफोङला मुवानुम।²⁰हान नुसानओ निनाममु, खोक्कोआ सामुवाओ थिमि चानकाबा, तामिनतुप आनकाओ हाए‌सि देकमिञा सानलेपसान यङइचकलाओ हुवाआ सुवाओचिङका पोक्तानिन, ²¹खोनिनओ मुकखाङडा नुवानुवो वक आनकानआ चुवाकि, नुलोक याक्क्डा खोनिनओ राका ओन्सामि मुसिञा देकमि निनामछेन दाङका खानाचिञा सेनलेन मुलुतने। खोनिनञा सानलेप सान्दक धिनुमसङ लिनि युङने। आमिन।²²मेन हेइ! निछाच्यो, अङका खानाचिञा ताछुकफेङला मुलुकङा, हे सालामयङओ दुमञा काङानुम। देनादि अङकाआ खानाचिञा अचिचि दुम छाप्तुओ याकङा। ²³खानाचि ओको लेसानुम, हे आननिछाक तिमोथि फुकुत्तानचिनओ मयाआङ। खोनालो खोचि चकनिङे मबान लो, अङका खोचिओ ढायुकडा खानाचिञा टोकवोङा।²⁴खानाचिओ झारा हाङमुयाङमि का झारा सेङहाङछाचिञा सेवान्ने पुवानुम। इटालिओचिआ खानाचिञा सेवान्ने मलोलुक । ²⁵खानाचि झाराञा नुनुतछोङ लिने। आमिन।

Formatted for Translators

मर्कुसओ नुयङखान

पावल लोहोनमिओ कोरिनथिचिआ

पावल लोहोनमिओ कोरिन्थिचिञा हवासि छापला

पावल लोहोनमिओ छापला एफिसिचिञा

हिब्रुचिओ निकि छापला

याकुबओ छापला

पत्रुसओ बुसिछापला

पत्रुसओ हवासि छापला