¹ክራ ሳኦልድዅ ደምቢ፡ ዳዊት ኣማሌቅሲ ቂልሲሶ ወንተሮ፡ ጺቅላግትል ለጛ ኳራ ጨበሩዅ። ²እን ሲዀር ኳሪልኻ፡ እናሓን፡ ላዅ ግርዋ መስከብ ሳኦልድዅልድ ኒሰረጝሲ ቐደዶ ኒኣዀርልኽር ቝሻ ነስነሶ እንቱዅ፣ ዳዊትል ገእዮሰናኻ፡ ብሪል ሉም ዮ ፍግም ይዅሉ።³ ዲዊትኻ፡ “ኣወትልድ እንትሩዅን፧” ዮ ወጝቀርዅሉ። ንኻ፡ “መስከብ እስራኤልዱዅልድ ሹልቝራኽር ግን” ዮ ወንተስዅሉ። ⁴ዳዊትኻ፡ “እን ጋር ኣውሰና ኣኽዅን፧ ኵዓይብ ድዊለ” ዮ ወጝቀርዅሉ። ንኻ፡ “እን እክ ሓርብልድ እግሩዅ፡ እን እክልድር ገሪው ለብኑዅር ክርኑዅር፡ ሳኦልዲ ዮናታን ኒእዅረድኽ ክርኑዅ” ይዅሉ። ⁵እንሲን ዳዊት እን ድወዅሉ ሻሎተስ፡“ሳኦልዲ ዮናታን ኒእዅረዲ ክርነት ኣዋህብርደ ኣለለይርዅን፡” ይዅሉ።⁶እን ድወዅሉ ሻሎታኻ፡ “ይገራሃትድ ጊራ ጊልባዖሩኽሊ እንትዅን፡ እናሕንኻ ሳኦል እኝሽኽሊ ተንከብሶ ደውዮ ዋኑ፡ ሰረገላትዲ ኣፍሩስዲ ለሸክንዅሉ፣ ⁷ኒገሽ ደምቢራ ግልጭ ዮሰና ቋልዅለ እማ ሽጝዅለ፡ ኣጝር፡ ‘ውራ እሲን’ ይዅንሉ።

¹ኒደምብኻ ሲም ዓሞንዱዅ ክሩዅ፡ ኒኣካንልኻ ኒእዅራ ሓኑን ሰየምሱዅ። ²ዳዊትኻ፡ “ሓኑን ናሕሽዅረስ፡ እን ኒእኽር ብሕልየሰነለ ኣጝር ብሕል የሉ ግን” ዩዅ። ዳዊትኻ ኒእኽር ሰበትድ ኒገኝሺንድ ደፍእድሮሉ ንሽቕ ፈስዅሉ። እን ገኝሺን ዳዊትሩኻ በለድ ዓሞንድቝርሊ ቱኑዅ። ³እን ዓሞንዱርሲ መርሓው ሲምሲ ንሰና ይንዅሉ፦ “ዳዊት ኵእርሲ ከበርዶ ደፍእደው ፈሰዅካማ ተካዅንካ እⶖኵዅን፧ ዳዊት እና ዕርዲረት መርመርዶላኽር፡ ሰለይሮላኽር፡ ድሂስሮላኽር ኣኽለማ፣ ኒ፡ኒገኝሺንሲ ፈሶልካ ህምባዅ፧” ይንዅሉ።⁴እንሲን ሓኑን ገኝሺን ዳዊትሩሲ አዶ፡ ገፍ-ገፍ ናሸከምስኻ ሊሾ፡ ገፍ-ገፍ ናሰረጝስኻ ናሞኲል ኣኽታሲክ ቀረጮ ፈስዅሎም። ⁵ኒስ ዳዊትድ ዲዊነሪትል፡ እን እኝሻቕሶ እርገው ገሪዅድክ ስማርኖ እርግንነዲን ከለብርድኖሎም ንኝሽቕ ፈስዅሎም፡ እን ሲምኻ፡ “እንታ ሸከም ቦኰልዳሲክ ያሪኮትል ግጃ እማ፡ ኒደምቢ ወንተራ” ይዅሎም።

¹ዮኣብ ጽሩያዅራ፡ ለባካ ሲሙዅ ኣቤሴሎምቲ ሰፍለልተት ኣለለዩዅ። ²ዮኣብኻ ተቆዓትል እኝሻቆ ንርትልድ ላእዂና ኣምሪ ናቕሱዅ፣ ንሰናኽር ይዅላ፡ “እዅና ሓዘንትሪ ተክረ፡ ታኵን ሓዘኑ ሰሪ፣ ደድ ሸመትስግ፡ ክራዅ አዳምድ ገሪ ወክት ሓዘንደሪ እዂናሰና ኣኽሮ ቋልስቲ። ³ኒደምብኻ፡ ሲምሊ ፈርዶ ንሰና ይሉ።” ኒደምብኽር ዮኣብ እን ንሪ ጋብረው ቆላትሲ ድዊዅላ።⁴እን ተቆዓዊራ እዂናኻ ሲምሊ ቱሮ ጋቢቲሉ፣ ንርብሶትድ ብሪል ፍግ ይቲ እማ፡ “ዎ ሲም! እልሊለ” ይቲሉ።

¹ዳዊትኻ እን ጊራ ኣወይስልድ ግናዪ ዶኵ የሪት፣ እናሓን፡ ጺባ ገጂና መፊቢሸትሩዅ፡ ለጛ ሊኽ ሳንሰዓዲ፡ ሊኽ ንሽዋ ደቢቡዅዲ፡ ሊኽኻ ሕምባሸራ በልሱዅዲ፡ ላዅ ሃወት ሚድ-ዲ ጨዓንሰው ለጛ ድዃራ ሸኾ ከለብርዅሉ። ²ሲምኻ፡ “እና ነስ ናትክ ውራ መታን ናቕስርዅንሎም፧” ዮ ወጝቀርዅሉ።

ጺባኻ “ዎ ሲም! እን ድቋልሲ ኵአዳም ጨዓንስድኖለን፡ እን ሳንሰዓዲ በለስዲትኻ ሻሎት ቍድኖሎም፡ ሚድ ወይኒሩስኻ እን ኣው ከደንሊ ቂልሰው ጅእድኖሎም ዮ ግን” ይዅሉ።

¹ኣሒቶፌል ኣቤሴሎምቲ ንሰና ይዅሉ፡ “ሽካ ለጛ ስሕ ግርው ፍሪሮ፡ ንኪ ቂር ኵእኽርሲ ሳደድየሉ ኣጃ ይለ ኵዓይብ፣ ²ቂልሶ ሳዳ ቀበጮ ምልዮ ዋኑ እንቶ በኸኽድየሉ እማ፣ እን ኒዲ ህምበው ከው ባርኖሉ እግርድኖ፡ እንሲን ኣንኻ ሲምሲ ኒቱ ኣሮ ክውየሉ ግን፣ ³ሱርጕ ንርግርዊል ወንተርድረሪሰና ኒት ተለዩ እርገው ናውክ ኵል ወንተርኖ እንተረነሰና እስያ ግን፣ ደአም እንቲ ጀረብራዅ ላኣዳትምቲ ኵቶ ግን፡ እን ከብተው እክኻ ሰላም መንደርትድኖ ግን።” ⁴ኒኰድጛኻ ኣቤሴሎምዲ ናውክ መርሓት እስራኤልዱዲሲ ትክያዅ ኣኾ ቋልስትዅሎም።⁵ኣቤሴሎምኻ፡ “እስከ ናንኻ ሑሻይ ኣርኪሩዅሲ ሽጘሉ፣ ኒየውስ ዋስኖ” ይዅ። ⁶ሑሻይ እንተሰና ኣቤሴሎም፡ “ኣሒቶፌል እዋዅና ኰድጛ ኒን ግን እማ፡ ኒትማ ተለይኒን ወሪ ውራ እሲኖ ክምነት እንትኽር ድውራዅና ዋኒረካ፧” ዮ ወጝቀርዅሉ። ⁷ሑሻይኻ ኣቤሴሎምቲ፡ “እና ወክትኒሲ ኣሒቶፌልዱዅ ኰድጛ ትክያዅ ኣኽላ፣⁸ኵእኽር ዳዊት እን ኒዲ ህምበው ከውዲ ንርቍርሲ ባሪሰውላ ድቢሪሰና ናፊዅት መረረውሎም ኣኽነ እንቲ እንቲ አርእሩዅ። ኵእኽርኻ ሓርቡዅ ግርዋ ግን እማ፣ እን እክዲ ካላ፣ ⁹እናሓን ናን ድኳ ላጎቕሊ ወሪ ላኣካኒ ትብቶ ዋኒራ፣ ዳዊት ጃቢቶ ምልሰ ጠዓምበንኵም እማ ኵልድ ገለ ክረነን ኒስ ዋሰው ናውክ፣ ኒድ-ኒድ ኵዓስከር ለተቕስነ ሃቢነ ውሪስድኖ ግን፣ ¹⁰ኵእኽር አርእስታዅ ተሓረባዅ፣ እን ኒዲ ህምበውኻ ፈርሳን ኣከነት እስራኤል ንርውክ አርእረውድ፣ ኒለበካ ገመኒዅሰና ጒኢታጋዅ ግን ይስታዅ ዓስከራ ድኳ ጓቂሲ ታንትሮ ግን።¹¹ “እማ ኣን ኰድⶖሳዅካ ኒን ግን፡ ቊሻ ባሓራዅሰና በጀኽድኖ መታን፡ ናውክ እስራኤልዱ ዳንትልድ ብኤር-ሸባዕ ኣኽታሲክ ኵል እክብስድኖ፡ እንቲ ኵላውድር ሓርብሊ መርሕቶሎም ግን፣ ¹²ኒደምብኻ፡ ኒ፡ ትዋ ኣካን ኒትክሊ ቱኖ አርኖሉ ግን፣ በርድ ብሪል ገመሰና ግምኖሉ ግን፡ ኒኣኽን ኒት ተለየው ላኽ ድኳ ፊዅትድ ከብቲሮ ኣኽላ።¹³ላዕርዲረትል ትወንኻ፡ እንሲን እስራኤልዱቍር ገመትድ እን ዕርዲረት ላክርጛ ከብተጋሰና እስነ፡ እንር ዓጝቀይሊ ህምባዅ ዓጝቀርሊ ወተርኖ ቱስኖላ ግን።” ¹⁴እንሲን ኣቤሴሎምዲ ከው እስራኤልዱዲ ናውክ፡ “ኰድጛ ኣሒቶፌልዱዅልድ ሒሻይዱዅ ኰድጛ ኪዳዅ” ይኑዅ፣ ጃር ኣቤሴሎምሊ ድዳ ናቕስሮ መታን ትክያዅ ኰድጛ ኣሒቶፌልዱዅሲ ከለብርስጋሰና እሲዅ።¹⁵ኒደምብኻ ሑሻይ፡ እን ከዳታት ጻዶቅዲ ኣብያታርዲት ንሰና ይዅሎም፡ “ኣሒቶፌል ኣቤሴሎምዲ ከው እስራኤልዱዲት ንሰናዲ ንሰናዲ ዮ ኰድጚዅሎም፣ ኣንኻ ንዲ-ንዲ ዮ ኰድጚዅንሎም። ¹⁶እማ ናን፡ ሲምዲ እን ኒዲ ህምበው እክዲ ዋሓጥስግኒን፡ ሃብረዅስክ ሃብረ ካሪ ግራ እና ቂርድ እን ካሲሰጝ ከደⶖዅሊ ኪግ፡ ይኖ ድዊድኖሉ፡ እሽሽድኖ እኝሻቃሉ” ይዅሎም።¹⁷ዮንታንዲ ኣሒማዓጽዲኻ ዔን-ሮጌትል ደው ይኖ እርግኑዅ፣ ዕርዲረትል ቱኖ ቋልስትድኖ ገረስኒ እማ፡ ላዓጝቂ ገኝሺና ፈሮ ድዊቲሎም፡ ናውኻ ሲም ዳዊትል ፈርኖ ድዊኒዅሉ። ¹⁸ኣኾኻ ላሻሎታ ቋልዅሎም እማ ኣቤሴሎምድ ድዊዅሉ፣ ናው ደአም፡ ለጛረክ ኣሻሻዅድ ፈርኑዅ፣ ባሑሪምትልኻ ልጝን ላግርዊዅሊ ቱኑዅ፡ እን ግርዋ ኒልጝን ገቢል ኣባ እርግቲሉ፣ ንርትልኻ ቱኑዅ።¹⁹እን እዅናኻ፡ ኣዳም ቋልጊንሎም ኵሲሳና አድሮ እን ኣብር አብሲ ኒድ ኣበድቲሉ፡ ኒኣኾርልኻ ከትከትሰው ስክም አድሮ ወድቲ እማ፡ ላዅ ድኳ አርእስትኒ። ²⁰ከው ኣቤሴሎምሩኻ እን እዅነትል እንትኖ “ኣሒማዓጽዲ ዮናታንዲ ኣወት ህምበናኵን፧” ይኑዅላ። እን እዅናኻ፡ “ወረበስ ካርን ፈርኑዅ” ይቲሎም።²¹እን ጀረቡሎም እርገው ፈርነሰናኻ እን ኣበትልድ ፍኖ ፈርኑዅ፡ ሲም ዳዊትኻ “ኣሒቶፌል ኵል ንሰናዲ-ንሰናዲ ዮ ኰድጘ ህምባዅ እማ፡ እሽሻዅ ጒሮ ወረበስ ካሪ!” ይኑዅሉ። ²²እንሲን ዳዊትዲ እን ኒዲ እርገው እክዲ ናውክ ጒኖ ወራባ ዮርዳኖስሩዅሲ ካርኑዅ፣ ብራ ክሰሪት ካርጊ ከብተዅ ላአዳምር እርግላ።²³ኣሒቶፌል ኒ ኰድጘስ ተለይግነት ቋላ ወክት፣ ኒድዃረስ ጨዓኖ፡ ጐ ኒዕርዲረትል ኒልጝል ፈሩዅ። ኒልጝንሲ ጠፍሕደሪት ሸናቕሶ ክሩዅ፣ አርብ ኒኽርዱዅልኻ ደብስቲዅ።²⁴ኣቤሴሎምዲ ከው እስራኤልዱዲ ዮርዳኖስቲ ካርና ወክት፣ ዳዊት ማሓናይም ይስትሮ ሽጝስትረሪ ግናዪ ዕርዲረትል ገእዮ እርጉዅ፣ ²⁵ኣቤሴሎም ዮኣብሩዅ ኣካንሊ ዓማሳት ኒዓስከር ኣወይሲ ሰየምዅሉ፣ ዓማሳ ዪትራ ይስታዅ እስራኤላዊራዅራ ግርዋ እርጉዅ። ኒ፡ ኣቢጋል ናሓሽቍራ፡ ጽሩያሲ ኒሻኒ ዮአብር ገና፡ ቱሶላ እርጉዅ። ²⁶እስራኤልዲ ኣቤሶልምድኻ ጊልዓድ ብሪል ከፍ ይኑዅ።²⁷ኣኾኻ ዳዎት ማሓናይምትል ትዎሰና፣ ሾቢ ናሓሽዅራ ወራባ ዓሞንድቍሩዅልድ፡ ማኪር ዓሚኤልድዅራኻ ሎ-ድባርትልድ፡ ባርዚላይ ጊልዓዳዎራኻ ርግሎምትል፣ ²⁸ገኝጂሰን ወሸቕዲ፡ ጥሕሎታትዲ ጭቀድ ከደምሰው እራኵዲ ሸኽኖ እንትኑዅ፣ ኒሰናኽር ጀሩጒዲ ስክምዲ፡ ላቅዲ ሸዊት ተኰድሰውዲ፡ ባልደንጓዲ ብርስንዲ፣ ²⁹ሰኻረዲ ርግኦዲ፡ ልዊሩዅ ሰናዲ ቝድኖ፡ ዳዊዲ ኒእክዲሲ ናቕስንዅሎም፣ ኒስ ናእስናኻ፡ “እን እክ ኣው ከደንሊ ከኣርትኑዅ፡ ቂልስኑዅ፡ ስቛንትኑዅ” ይነድ

¹ዳዊትኻ፡ እን ኒዲ እርገው እክሲ ሺብዅሎም እማ፡ ናአወይሲ ሓላቓ ስሑዲ ሓላቓ ሊዅዲ ሰየሙዅ። ²ዳዊትኻ እን እክሲ፡ ወልትረጝንሲ ናን ዮኣብሩዅሊ፡ እን ወልትረጝንስኻ ናን ኣቢሻይ ጽሩያዅራ ዮአብድ ዳንሊ፡ እን ወልትረጝንስኻ ናን ኢታይ ጊታዊረዲ ሃበ ፈስዅሎም። ሲም፡ “እጝር እምንድክ እንተዲ ላት ፍያ ግን” ይዅሎም።³እን ከውኻ፡ “እንቲ ይነዲ ፋግረን ኪዳዅ ውረድ፡ ይንጝ እግርኖ ቀሰብስነን፣ ናው ይና ሰበትድ ሓሰበኒ፡ ይና ገፍ ክረነጝር ሓሰበኒኒክ፡ እንቲ ደአም ይነልድ ሽካ ስሕድ ኪድራዅ እማ ዕርዲረትል ኣኽሮ እልልደና ኪዳዅ” ይኑዅሉ። ⁴ሲምኻ፡ “ትክያዅ ኣኾ ቋልስታዅሲኵኩም ኒትክ እስያ ግን” ይዅሎም። እማ፡ እን እክ ናውክ ሊኽዲ ስሕዲሲ ኣኺነክ ተሪትኖ ተረገሱኑ፡ ሲም ባብ ደንአቡዅሊ ደውዮ እርጉዅ።⁵ሲምኻ ዮአብዲ፡ ኣቢሻይዲ ኢታይዲት፡ “ይማታን ይድኖ ሻሎታ ኣቤሴሎምቲ ሃሽከብገሉ” ይዅሎም። ሲም ኒእዅራ ኣቤሴልምሲ ቋላዅድ ዓስከርሲ ኣደደውድ ትእዳድ እዉ ናውክ ዓስከር ዋስኑዅ።⁶እን እክኻ፡ እስራኤልቲ ታሓረብሮሉ ሕዳርሊ ፊዅ፡ እን ሓርብኻ ገርበት ኤፍሬምሩዅሊ ኣኺዅ። ⁷ኒልኻ እክ እስራኤልዱ ከው ዳዊትሩ ጃብሊ ለተቕስኑዅ፣ እን ግርጋ እንድሂስኻ ተባዅ ድዳ ኣኹዅ፡ ለጘረጝን ስሕ ኣከው ከውኻ ክርኑዅ። ⁸እን ሓርብኻ ንርውክ ብሪል ዳሕ ዩዅ፣ እን ግርጋ እንድሂሲ፡ እን ሰፍድ ድደውልድ እን ገርበት ዋሓጠውሎም በጀኻናዅ።⁹ኣቤሴሎም ከው ዳዊቱሲ ናጃብድ ጎፍ ይዅሎም፣ ኣቤሴሎምኻ በኽሊል ጨዓንሶ እርጉዅ፡ እን በኽላኻ ገርው ለጝክክ ሻዅ በሀር ድዋ ዓጝቀይ ቱቲ፣ ኒኣዀርኻ እን ድዋትል ሻኽስቱዅ እማ፡ ሰመዲ ብረዲር ነበክሊ ጠልጠልዩዅ፣ እን ኒሱቓይሲ እርግረሪ በኽላኻ ደኵቲ። ¹⁰ላግርዋ ቆሎሉ ዮአብቲ፣ “እናሓን፡ ኣቤሴሎም ላድዋትል ጠልጠልዮ ቋልዅንሉ፡” ዮ ድዊዅሉ። ¹¹ዮአብኻ እን ድወዅሲሉ፡ “ውራ ይራዅን! ቋልድዅሉ፧ እማ ውራመታን ጠዓምብሮ ብረዲ ተከንድለሉ፧ ሽካ ሲቃል ወርከትዲ ተሓረበው ደበልተናዅዲ እውሪድካ ሻዅ ግን” ይዅሉ።¹²እን ግርዋኻ ንሰና ይዅሉ፡ “ላስሕ ወርኰ ድኳ ይናንሊ እውረንለ፡ ይናንሲ ሲምዅራ ዳግሊ ገምደሊ፣ ሲም ኵዲ ኣቢሻይዲ፡ ኢታይዲት ‘ይድ ይዱኑ ሻሎታ ኣቤሴሎምሊ ክሪል ገእሳዅ እሲገሉ’ ዩ እዋዅኩም ትእዳድሲ ይን ናውክ ዋስንዅን፣ ¹³እማ ኣን ትእዳድ ሲሙዅሲ ደኰ ኣቤሴሎምቲ ኵዋዅሉ ኣከን፣ ሲም ኒትክ ዋሰዅሰና ኒስኽር ኒዋስና ከብተላ፡ እንትኽር ኣክረን ይት ደአንድቶ ገበበለለ።”¹⁴ዮአብኻ፡ “ደአም እና ነወያዅድ ኵዲ ይወክትሲ ድሂስያ ጀረበሊ” ይዅሉ እማ፡ ሰዃ እኝሽኽ ኒናንተል እርገውሲ ኣዶፈሮ ኣቤሴሎም ኒርሕድ ድዋትል ጠልጠልዮ ዋኑ፣ ለበካ ኣቤሴሎምሩዅሊ ቱስዅለን። ¹⁵ሽካ ሻሎት ዮአብሩ፡ ኣቤሴሎምቲ ክልውኑዅሉ እማ፣ ጠዓምኖ ኵኑዅሉ።¹⁶ዮአብኻ እን ሓርብ ደው ይሮ መታን መለኸት ጠዓምቡዅ፡ እንሲን እን ዓስከር እስራኤልቲ ሳደድኒልድ ወንተርኑዅ። ¹⁷ኣቤሴሎምትኻ፡ አድኖ እን ገርበትሊ ኣረርሳዅ ጎቝሊ ማልኑዅሉ፣ ኒዳግልኻ ገሪው ክርጝ ኰመርኑ። እና ወክት ኒስኻ፡ እስራኤል ላዅክ ኒልጝንሊ እግሩዅ።¹⁸ኣቤሴሎም ኒሱⶖሲ ሽጚሳዅ ቍራ እዅራ እርግለሉ፡ እማ ኒርሕድ ዋኑ “ዓጝቀር ሲሙዅ” ይስቶ ሽጝስታዅሊ ኒሹሺ ሓወልቲ ከደሞ እርጉዅ፣ ኒሹር ሱⶖድ ሽጞሉ እርግነዲን ንኪ ኣኽታሲክ “ኣቤሴሎምሩዅ ሓወልቲ” ይስቱ ሽጝስታዅ።¹⁹እን ወክት እንድሂሲ ጻዶቅዅራ ኣሒማዓጽ፡ “ጃር ኒኣፋይትል ደአንደትሉ፡ እና ብሽራትሲ ድወይሉ ሲምሊማ ጋጝይን” ይዅሉ።

“” ‘’

¹ኒልኻ ላዅ ቢልያልዱዅ፡ ሸባዕ ይስታዅ ቢክሪርዱዅራ፣ ብንያማዊራ ግርዋ እርጉዅ። ንኻ፡ ይን ዳዊትል በና ሻኽኒ፣ እሴይዅሪልኻ መራስ ሻኽኒ እማ፣ ዎ እክ እስራኤልዱ፡ ላዅክ ኒልጝንሊ ወንተርን ዮ መለከት ጠዓምቡዅ። ²ናውክ እክ እስራኤልዱኻ ዳዊቲ ተለይኒልድ ወንተርኖ፡ ሸባዕ ቢክሪርዱዅረስ ተለይኑዅ፣ እን ከው ይሁደሩኻ ናሲምሊ ተከኖ ወረባ ዮርዳኖስሩዅልድ ዮርሳሌምትል ኣኽታሲክ ተለይኑዅሉ።³ዳዊትኻ፡ ዮርሳሌምሊ ኒልጝን ሕክሙዅሊ እንቱዅ፣ እንሲን ሲም እን ኒልጝን ሕክሙዅሲ ተከውድኖ ባሮለን እርገው ሽካ እኲን ኒሸሉሲ አድዅለን፣ ተከውስድኖኻ፡ ልጝንሊ እሰ፡ ቝሱለን እርጉዅ ግራ፣ ናል ቱላ። ናውኻ መፍልታን ኣኽኖ፡ ክርድናሲክ ኣበድስኖ እርግኑዅ።⁴ሲምኻ፡ ዓማሳት “ከው ይሁደሩ ናትክሲ እና ሰዃ ኳሪል፡ ይል እንትድኖ ሽጚሎም፣ እንቲኽር ናዲ እንቲ” ይዅሉ። ⁵እንሲን ዓማሳ ከው ይሁደሩሲ ሽጝሮ ፈሩዅ፣ ኣኽን ግራ ሲም ኣደዳዅሉ ግርጋት ኣወይሲ ግጁዅ።⁶እንሲን ዳዊት ኣቢሻይቲ “ናን ሸባዕ ቢክሪርዱዅራ ኣቤሴሎምትልድ ጂብሮና ግን፣ ትብቲሰን ዕርዲታት እርጊን እማ፡ ይና ዕልድ ሹልቝርጊን፡ እንቲ ዓስከር ኵአደሪውሲ ኣዲ እማ ሳደዲሉ” ይዅሉ። ⁷እንሲን ከው ዮአብሩዲ፡ ክረታውያንዲ ጵለታውያንዲ፡ ናውክ ፋርሳንዲ ኒጉርጒርበት ተለይኑዅ፡ ሸባዕ ቢክሪርዱዅረስ ሳደድኖኻ ዮርሳሌምልድ ፍኑዅ።⁸እን ጊብዖንትል ህምብዅ በሀር ክርጚል ገእይነሰናኻ፡ ዓማሳ አርዅሎም፣ ዮአብኻ፡ ዓስከሩዅ ኒሰረነስ ሰሮ ኒኣወይስኻ ሰፍ ኒመስከብዲ ኒየውሊ ደበልቶ እርግዅ፣ ኒገሽ ጃብራ ፈረሰንኻ፡ እን ሰፍ ኒምስከብልድ ፌ ለቡዅ።⁹ዮአብኻ ዓማሳት፡ “ዎ ይዳን፣ ውራ ህምብራዅን፧ ይዅሉ፣ ኒደምብኻ ዓማሳት ሰለማዅሉ ተከ ኒልው ናንድ ኒሸከምሲ ሻዅሉ። ¹⁰ዓማሳኻ ናን ዮአብሩዅሊ ሰፍ እርገት ለበካ ግምድላ እማ፡ ጠንቐቕስላ፣ እማ ዮአብ፡ እን ሰፍሲ ኒጐድጕል ሸከትዅል፣ ኒጅልልኻ ብሪል ቡቍቲዅ፡ ሊጘር ወክት ሰብግሉኻ ክሩዅ፣ ዮአብዲ ኣቢሻይ ኒዳንድኻ ሸባዕ ቢክሪርዱዅረስ ሳደድኑዅሉ።¹¹ግናደት ዓማሳሩዅ ገቢል ደውየው ላዅ ከው ዮአብሩልድ፡ “ዮአቲ እጝከላዅ፡ ዳዊትሩዅ ኣኻዅ ኒውክ ዮአብቲ የለይን!” ዩዅ። ¹²እን ወክት እንድድ ግናደት ዓማሳይሩዅ ብርድ መጝከልሶ ደርብ ነበክሊ ለቦ እርጉዅ፣ እን ኒድ ደከው ዓስከር ናውክ ናደው ይነስ እና ግርዋ ቋሉዅ፡ እን ግናደትሊ ገእያዅክ ዓስከራ ደውይነት ፋሃማ ወክት፣ ግናደት ዓማሳይሩዅሲ ደርብልድ ሸሊሶ ታዊንድ ኵስዅሉ። ¹³ግናደት ዓማሳሩዅ ደርብልድ ጌሰና፡ ናውክ እን ከው ዮአብቲ ተለይኖ ሸባዕ ቢክሪርዅረስ ሳደድድኖ ፈርኑዅ።¹⁴ንኻ፡ ናውክ ፈራዕ እስራኤልድዉዅድ እሰ ኣቤልዲ ለጝ-ማዓካንዱዅዲሲ፡ ናውክ በርያውያንዱውዅድ ደኵኑዅ፣ ናውኻ እክብስኖ ኒጉርጒርበት ፈርኑዅ። ¹⁵እንትኖኻ ኣቤል ልጝን-ማዓካሩዅሊ ክልውኑዅሉ፣ እን ዕርዲረትኻ እን ንር ሐጠትዲ ድውያዅ ካሲሰና ገበርኑዅ፡ እን ዮአብዲ እርገው ናውክ ከውኻ እን ሐጠትሲ ለብድድኖሉ ሃገግድኑሉ እርግኑዅ። ¹⁶እንሲን፣ ላሪ ኣስተብህልድረሪ እዅና፡ “ዋሳ! ዋሳ! እንታ ዓይብ ዮአብቲ ድዋዅሉ ጋር ዋነውድለ ናራ ሱክርዶ ድወል” ይቲሎም።¹⁷ዮአብኻ ንርትል ሱኵርዅ፣ ንርኻ፡ “ዮአብ ይስትርራኽር እንቲማ፧” ይሩ ወጝቀርቲሉ፣ ንኻ፡ “የዋ ኣንግን” ይዅላ፣ ንርኻ፡ “ይአደራ፡ እስከ ዋሲለ” ይቲሉ፣ ንኻ፡ “እናሓን ዋሳዅንኪ እⶖኵዅን” ይዅላ።

¹ጃር ዳዊቲ ሳኦልዲ፡ አሪው ኒኣፋይትዲትል ደአንደሉ ወክት፡ እና ሕላይሲ ጃር ክብርድ ሓለዩዅ፣ ²“ጃር ይሸሻዲ ይጊረዲ፡ ኒደአናዅ ሒልዲ፡ ተባዅ መሐገይዲ ግን።³ይጃር፡ ተንከብሳዅሉ ሸሻዲ፡ ይወልተዲ ይደአኒዅ ጊኽዲ ግን፣ ኒ፡ ተባዅ ይመሐገይ ግን፣ ተንከብሲነዲ ደአንዱረዲ ግን፣ አዳም ሒለቱርድ ደአንድራዅለ። ⁴ሓምደ ኣስተሀላዅሉ ጃርሲ ሽጛኵን፡ ንኽር ይኣፋይትልድ ደአንዳዅለ።⁵“ኣፍሉት ክሪው ክልውዅለ፣ ኵራ ድዲዅር ተራቝድዅለ። ⁶ገመት ኣርፍፉዅ ሎለይስዅለ፣ ሸረክ ክሪዅኻ እስቲዅለ፣⁷ጅርበት ገእየለ ወክትድ ጃርሲ ሽጝዅኑሉ፣ እልልዶለኽር ይጃርሲ ሺዊዅኑ፣ ኒልጝን ሻትክሊ ኣኾ ይደሀይሲ ዋሱዅ።⁸“ጃር ቀጠብስነዲን ብራ ተናወጥትኽር ውልቅትኽር፣ መሱን ሰሚውር ናሹር-ናሹ ደረረክስኑዅር ውልቅኑዅር። ⁹ኒቍምፍፍልድኻ ቀጥቡዅ ትዳ ፊዅ፣ ኒኣብልድር ቋዅ ለኻ ሓውዩዅ፣ ኒጅዊልድኽር ጋጋእያዅ ገኣ ፊዅ።¹⁰ዓስተርሲ በጢሶ ሱቖት ገሙዅ፣ ኒሉኲኵ ሱቖይስኻ ቡኳና አረባ እርጉዅ፣ ¹¹ኪሩቤል ዳግል ኣኾ ዋዉዅ፡ ካምፍፍ ውልዋሉሊኻ ቋልስቱዅ። ¹²ጭልም ኒላው ሸጝገብድ ክልውሮሉ፣ አረባ ኣኻዅ ሰሚዅ ስዋ ብኳናኻ ኵስሮሉ እሲዅ።¹³ኒገሽሊ ህምባዅ በርህልድኻ፣ ምርኲዅ ተልዋሕታ ፊዅ። ¹⁴ጃር ሰሚልድ ጓⶖጕዅ፡ ጃር ጻበኦት ኒደሀይሲ ዋሲሱዅ። ¹⁵ኒፍላጸስ ማሎ፡ ኒ ኣፋይትስ ፋሕሲዅሎም፣ ኒ፡ ምርክሲ እኝሸቆኻ ሳደድዅሎም።¹⁶ተግሳጥ ጃሩዅድር፡ ኒ ቍምቢልድ ፋዅ ትንፋስድር፡ ቆር በሓሩዅ ቋልስቱዅ፡ ሰረት ብሪዅር ገልህስቱዅ።¹⁷“ወይልድ ኒናንሲ መደዶ ሻዅለ፣ ዓቍ በህሊንልድር ፍድዅለ። ¹⁸ይልድ ሒለቲተው እርግኑዅ እማ፣ እን ሒለቱዅ ይኣባይልድር፡ እን እንጠርውለትልድር ደአንድዅሉ።¹⁹ይጅርበትድ ግርገድ ምልዮ ዋኑ እንትኑዅለ፣ ጃር ደአም ተከውዅለ። ²⁰ኣካን እዳናዅሊ ፍድዅለ፣ ይድ ፍርሕነዲንኻ ደአንድዅለ። ²¹“ጃር ይጭድቅሰና ወንተስዅለ፣ ይናን ላጭሕሰናኽር ፈደይዅለ፣²²ደርፍፍ ጃሩሲ ተከውዅን እማ፣ ይጃርልድ ዓገብድ ሲርሊ።

¹ጃር ክብ ክብሰዅሉ፡ ያእቆብር ጃርድ ቐብእስታዅ፡ እስራኤልድ እጝከልሱራ ዘማሪራ/ሓለየንታ ኣኻዅ፣ እሴይዅራ ዳዊትር ደⶖጐቢዅ ቆል ኒን ግን። ²“መንፈስ ጃሩዅ ይድ ሃበ ጋቢዅ፡ ኒቆልኻ ይላጝቂል እርጉዅ፣³ጃር እስራኤልዱዅ ጋቢዅ፣ ሸሻ እስራኤልዱዅ ንሰና ይዅሉ፣ ከውሲ ጭድቅድ ገዝኣዅ፡ ጕኢ ጃሩዅድ ኣማሕደርዳዅ ሲም፣ ⁴ኒ፡ እን ቡኳና እጝግጋዅ፡ ብራክስናድ ኳራ ፍራ ወክትድ ህምባዅ በርህሰና ግን፣ ኒሰናኽር፡ እን ስዋ ደምቢ ጭሮርሕድ ብሪልድ ሻጝካ በኰልዳዅሉ፡ በርህ ብርክስጚዅሰና ግን።”⁵“ይልጝን ጃርሊ ራትዒማ ኣኽላ፧ ኒትክሲ ደለምዶኽር ተከዎኽር፣ ይዲ ዲመሩዅ ሟእኰት እሰዅ ኣኽለማ፧ ይደአነስ ደንጐቢል ገእሳዅሉ፣ ኒትክ ኣን ጀረባዅሲክ እዋዅለ ንማ ኣኽላ፧⁶ደአም፡ እን ብልያል ድቍር ናውክ፣ ናንድ እክብሰገውሰና እክክምሰና ማልስድኖ ግን። ⁷እክክምሲ ተመዳዅ ኒውክ፡ ሸኻ ወሪ እኝሽኽ ሓርቡኽ ሻካዅ፣ እን ኒል ህምበና ኣካንልኻ ኣቕትራሲክ ለኸድ ሓውየናኵ።⁸ፋርሰን ዳዊትሩውድ ሱጙⶖ ነን ግን፡ ታሕክሞንዱዅ ዮሼብ-ባሸቤት ሰዃሩዅ ሓለቃ ኣኲ፣ ኒ፡ እኝሽኽድ ሓርብሊ ሰዀታ ሊኽ አዳም ክዋዅ ግን።⁹ኒልድ ተለዮኻ፡ ኣልኣዛር ዶዶ ኣሖሓዊሪዅራ፣ ኒ፡ እን ሰኻ ዳዊትዲ እርገው ፋርሳንልድ ግን፣ ናው እን ኒል ታሓረብድኖ እክብሰው ፍልስጢም ቃየርናሰንክሎም፣ እን ከው እስራኤልዱኻ ደምቢራ እግርናሰና፡ ¹⁰ኒ፡ ደአም እን ኒል ደውያ ኣክንልድ ላው ሸጝገብ ይላ፣ ኒናንሰፍሊ ተከንዳሲክ ፍልስጢምሲ ኲዅሎም። ጃርኻ እን ግርጋ እንድሂቲ/ሲ በሀር ደአና እሲዅ፣ እን እክኻ ገፈፍድኖ ካያ ኒጉርጒርበት ወንተርኑዅ።¹¹ኒልድ ተለዮኻ፡ ሻማ ኣጌ ሃራራዊሪዅራ እርጉዅ፣ ፍልስጢምሩኻ ሌሒ ይስትረሪ ኣካንሊ ብርስን እንታኽተሪላ ላኪድጚትል፣ ላት እክብስኖ ዋኑኑ፡ ዓስክር እስራኤልዱ ፍልስጢምሩ ገሸልድ እግርኑዅ፣ ¹²ሻማ ደአም፡ እን ኪድጚ ነበክል ደውዮ ደአንድዅላ፣ ፍልስጢሩስኽር ቂልዅሎም። ጃርኻ በሀር ደአና እሲዅ።¹³እን ሰኾረጝን ኣሕሉቕለድኻ ሰዃ ገምኖ፡ እሽርና ወክትድ ዳዊትል ጋኻ ኣዱላምሩዅሊ እንትኑዅ። ደሽ ፍልስጢምሩኻ ዓጝቀር ረፋይምሩዅሊ ፊዅኖ እርግኑዅ። ¹⁴እና ወክት ኒሲ ዳዊት መሐገይሊ እርግዅ፣ ደሽ ፍልስጢምሩኻ እንሲን ቤት-ልሄምትል እርግኑዅ።¹⁵ዳዊትኻ፡ “እና ቤት-ልሄምሩዅ ሔጠቱዅ መራብ ገቢል ህምብረሪ ኣቢልድ ኣውኒ ዓቝ ጅእስረለ!” ዮ ሸንሕስቱዅ። ¹⁶እንሲን እንሰኻ ፋርሳን፡ ደሽ ፍልስጢምሩውድ ነበክድ በጥስኖ ደኵነድ፣ መራ ቤት-ልሄሩዅድ ገቢል ህምብረሪ ኣቢልድ ዓቝ ገለልኖ ዳዊትድ ናቕስኑዅሉ። ዳዊት ደአም ጅእሮ ጀረቢላ እማ፡ ጃር ጃብል ሰደቀት እሰ ቡቝሲዅሎም፣ ¹⁷“ዎ ጃር! እና ዓቝሲ በታተን ጀአሊሎም! ኣን፡ ነስ ጅአን፣ ናፊዅትሲ ቀበጭኖ ፈርነው እና ፋርሳን ብርሲ ጀኣሰና ሺብስታዅ!” ዩዅ፣ እን ዓቝሲ ጅእሮኻ እምቢ ዩዅ። እማ፡ እን ሰዃ ፋርሳን ዓስክር እስነዅሉ ንሰና እርጉዅ።¹⁸ጽሩይዅራ ኣቢሻይ ዮኣብሲ ኒዳንኻ፣ ኒ፡ እን ሰዃ ፋርሳንድ ናሓላአቓ እርጉዅ፣ ንኻ እኝሽኽ አዶ ሰዃ ሊኽሲ ክዉዅሎም። እን ሰዃ ነበክልኻ ሸጝስታ/አርእስታዅ እርጉዅ። ¹⁹ኒ፡ እን ሰዃትልድ ኪዳዅማ እርግላ፧ ናልድ፡ ናላዅሰና እርግገጝር ናሓለቓ እርጉዅ።²⁰ቀብጽኤልዱዅ ኣኻዅ በናያ የሆያዳዅራ በሀር ጋር ከደማዅ፣ ኒ፡ እን ለጛ ኣሪኤልዱቍር ከው ሞኣብሩሲ ኵውዅሎም፣ ኒሰናኽር፡ በርድ ወክትድ ግብሊ ትዎ ገመና ክዉዅ። ²¹ኰዶኽር፡ ላዅ አርእስታዅ ምስሩዅሲ ክዉዅ። እን ምስሩዅ ናንልኽር እኝሽኽ እርጉዅ፣ ኒ፡ ደአም ግቢ አዶ ኒል ገሙዅ እማ፣ እን እኝሽኽሲ እን ምሱሩዅልድ መንተሎ ኒሹር እኝሽኽድ ኵውዅሉ።²²በናያ የሆያዳዅራ እና ጋርኒስ እሶ እርጉዅ እማ፣ እን ሰኻ ፋርሳን ነብክል ሽጝስታዅ/አርእስታዅ እርጉዅ። ²³እን ሰኹርጝንልድ ሳብስታዅ እርጉዅ፣ እን ሰኻ ሰልፉሊ ደአም ገእይላኒክ። ዳዊታኻ ኰድጝሳዅ እሲዅሉ።²⁴ዓሳሄል ዮኣብሲ ኒዳን እን ሰዃረጝንልድ ላዅ ግን፣ ቤት-ልሄምሩዅ ኤልሓንስን ዶዶዅራ፣ ²⁵ሓሮዳዊራ ሻማዲ፡ ሓሮዳዊራ ኤሊቃዲ፣ ²⁶ጳልጣዊራ ሔለጽዲ፡ ተቆዓዊራ ዒራ ዒቄሽዅረዲ፣ ²⁷ዓናቶታዊራ ኣቢዔዘርዲ፡ ሑሻታዊራ ሜቡናይዲ፣ ²⁸ኣሖሓዊራ ጻልሞንዲ፡ ነጦፋታዊራ መሓራይዲ፣²⁹ነጦፋታዊራ ሔለብ ባዓናዅራዲ፡ ብንያም ገፍልድ ጊብዓሩዅ ኢታይ ሪባዅራዲ፣ ³⁰ጲርዓቶናዊራ በናያሓደዲ፡ሂዳይ ወርፍ ጋዓሽሩዅዲ፣ ³¹ዓርባታዊራ ኣቢ-ዓልቦንዲ፡ ባርሑማዊራ ዓዝማወት ይስታዅዲ፣ ³²ሻዓልቦናዊራ ኤልያሕባዲ፡ ብኔያሸዲ ዮናታንዲ፣³³ሃራራዊራ ሻማዲ፡ ሃራራዊራ ኣሒያም ሻራርዅረዲ፣ ³⁴ላዅ ማዓካታዊራ ኤሊ ፈለጥ ኣሓስባይዅረዲ፡ ጊሎናዊራ ኤሊዓም ኣሒቶፌልዅረዲ፣ ³⁵ቀርሜሎሳዊራ ሔጽራይዲ፡ ኣርባዊራ ጳዓራይዲ፣ ³⁶ጾባሩዅ ዪጋል ናታንዅረዲ፡ ጋታዊራ ባኒዲ፣³⁷ዓሞናዊራ ጸለቅዲ፡ ጽሩይዅራ ዮኣብድ ኒእኝሽኽሲ ሙዅራዅ ብኤሮታዊራ ናሓራይዲ፣ ³⁸ዪትራዊራ ዒራዲ፡ ዪትራዊራ ጋሬብዲ፣ ³⁹ሔታዊራ ኡሪያዲ፡ ናውክ ላትኻ ሰዀረጝንዲ ለጛታ እርግኑዅ።

¹ሓዲስድ ጃር እስራኤልት ገሪዅድክ ቀጥብሱዅ፣ እማ፡ ዳዊቲ “ፈሪ፡ እስራኤልዲ ይሁደዲት ሺቢ” ይዅሉ። ²ሲምኻ ዮኣብዲ ኒዲ ህምበው ዓስከርሲ ኣደደውዲት፡ “ዳንትልድ ብኤር-ሸባዕ ኣኽታሲክ ሀምበው ፈራዕ እስራኤልዱሊ ናትክሊ ፈራ፡ ናብጅኽ ውሪከው ኣከነት አርእያ መታን ተሓረበውሲ ሺባ” ይዅሎም።³ዮኣብ ደአም ሲምቲ፡ “ኵአደራ ጃር ኵዓስከርስኪ ሊኽ እሽባ እሲናት፣ ዕልል ይአደሪውኻ ኒስ ቋልኒል ገእይኒን፣ ይአደራ ሲም ኒስ እሲሮ ጀረበዅ ውሪ መታን ግን፧” ዮ ወጝቅርዅሉ። ⁴ደአም ሲም ዮኣብዲ ዓስከርሲ አደደውዲት ትእድድሲ እሲድኖ ቀሰብነዲንሎም፣ ኒጃብል ፍኖ ደሽ እስራኤልዱሲ ሺብድኖ ፈርኑዅ።⁵ዮርዳኖስቲ ካርነሰና፡ ዓጝቀርሊ ህምብረሪ ዕርዲረር ላው ሸጝገብድ ህምብርሪ ዓሮዔርትል ፊዅኑዅ፣ ኒልድኻ፡ ጋድድ ሃቢነ ያዕዜርትል ፈርኑዅ፣ ⁶ጊልዓድትል እንትኖኻ ብራ ታሕቲም-ሖድሺትል ቱኑዅ፣ ኒልድኻ፡ ዳን-ያዓንድ እሲነኻ ጅልውኖ ሲዶንትል ፈርኑዅ። ⁷ኒሰናኽር ትብቲሰና ጢሮስሩዅድ፡ ሃዋውያንዲ ከነኣናውያንዲትል እንትኑዅ፣ ግብልት ይሁደሩዅድ ብኤር-ሸባዕትል እንትኑዅ።⁸ንርውክ ብረስ ጅልውኖ ሰሳ አርበዲ ልጘረጝን ኳራዲር ደምቢ ዮርሳለምሊ ወንተርኑዅ። ⁹ዮኣብ እን ተሓረብውድ ሺብሲ ሲምድ አእሲሱዅ፣ እስራኤልትል ሰዃታ ሊኽ ስሕ፣ ይሁደትልኻ ኣⶖኳ ሊኽ ስሕ ሰፍ ሻኽድኖ ገረሰው ታምማን ዋኒነት ድዊዅሉ።¹⁰ዳዊት እን ተሓረበውሲ ሺበሰና ኒለበካ ወቀስነዲንሉ ጃርሲ፣ “ኣን ኒስ ይእስነድ በሀር በደል ከደምዅን፣ ዓወድናሩዅ ክድመት ከደምነዲን ኵዓይብ ብሕል ይለ!” ዩ ሺዊዅ።¹¹ዳዊት ክሰራ ጐሰና፡ ቆል ጃሩዅ ነቢራ ጋትል፡ እን ዳዊትሩዅ ቋላዅሊ እንቱዅ፣ ¹²ንሰናኻ ይዅሉ፡ “ፈሪ እማ ዳዊቲ፣ ‘ጃር ንሰና ያኵ፡ ሰዃ ጋራት ፍሪርቶ ሱክስየልካ ግን፣ ናልድ ላሪት ፍሪሪ እማ፡ ንርቲ እስየልካ ግን’ ያኵ እⶖኲዅ ይሮ ጋቢሉ”።¹³ጋድኻ ዳዊትል እንቶ፡ “ኵብሪል ሰኻ ኣመራ ከአር እንትሮከማ ጀረብራክውን፧ ወሪ ሰዃ አርባ ኵኣፋይታ ገሸልድ እግርቶ፧ ወሪ ይኼ ኵብሪል ሰዃ ኳረድ ዕድር እንትሮ ጀረብራዅን፧ እማ ናን እን እኝሻቃዅሰለ ውራ ወንተሰትሉ ሓሰብሮ ኰድጚ” ይዅሉ። ¹⁴ዳዊት ጋድቲ፣ “ገሪዅድክ ጨነቅሶ ህምበኵን፣ ደአም፡ ኒብሕልታ ገሪዅ ግን እማ፣ ናን ጃሩዅሊ ለብና ግራ፡ ናን አዳምሩዅሊታዲ ለበሊ” ይዅሉ።¹⁵እንሲን ጃር ብርክስኒልድ ተርሰ እን ኒ ኰድጘ እራጋዅ ወክት ኣኽታሲክ እስራኤልትል ዕድር ፈሱዅ፣ እን እከልድኻ ዳንትልድ ብኤር-ሸባዕ ኣኽታሲክ፡ ለጘትረጝን ስሕ ከው ክርኑዅ። ¹⁶መልኣክ ጃሩዅ ዮርሳሌምቲ ድሂስሮ ኒናንሲ መደዶሰናኻ፣ እን ገእያዅ እኪትድ ጃር ጥዒሱዅ፡ እን እክሲ ድሒሳዅ መልኣክስኻ “በቃ! ኵናንሲ ወንተሲ” ይዅሉ። እን ወክት እንድሂስኻ፡ እን መልኣክ ጃሩዅ ወረና ኣራውና እን ይቡሳዊሪዅ ገቢል እርጉዅ።¹⁷ዳዊትኻ ኣን እክሲ ድሂሱ እርጋዅ መልኣክሲ ቋለሰነክሉ፡ ጃርሲ “እናሓን፡ ሓራም ከደማኽርዲ ከተኽርዲ ኣን ግን፣ ነን ደአም በግ ግንናው፣ ውራ እሲኒዅን፧ ኵናን ይዲ ይኽርድ ልጝንዲትል ኣኽርን” ይዅ።¹⁸እን ግርጋ እንድሂስኻ ጋድ ዳዊትል እንቶ፡ “ወረና ኣራውና እን ይቡሳዊሪዅሊ፡ ጃርድ ሰደቒሰና ከደሚ” ይዅሉ። ¹⁹እማ፡ ዳዊት ጃር ጋድድ እሰ ያዅሰነሉ ፊዅ/ተረገሱዅ። ²⁰ኣራውናኻ ሱቖት መኸልተሪት፡ ሲምዲ ኒኝሺንዲ እንተሩኑ ቋሉዅ፣ ኒልድ ፈኻ ሲምድ ብሪል ፍግም ዮ ክብር ኡዅሉ።²¹ኣራውናኻ፡ “ይአደራ ሲም ኒገጂኒል/ኒኣገልገልደንቲል እንታዅ ውራ መታን ግን፧” ይዅሉ። ዳዊትኻ “እና መቕዘፍቲ እከልድ ገበብስሮ፡ ጃርድ ሰደቒሰና ከደምየሉ እና ኲወረነስ ጅብያ ግን” ይዅሉ።

¹ ኣፋይቲ ኣይሁዱዲ ብንያምሩዲ ሰልብስትኒል ወንተረው ከው አደራ ጃር እስራኤልዱዅድ ልጝን ሻትክ ከደመነትሉ ዋስኖሰና፣ ²ዘሩባቤልዲ ኒኣዳምዲትል ኣሕሉቅ እንትኖ፣ “ይጝር እንተሰና እንታ ጃርሲ ጀረብናኽር ግን፡ እን ኤሳርሓዶን ሲም ኣሲርዱዅ ናራ ናቕሳዅና ወክትልድ ተርሰ፣ ኒድ ሰደቕኑ ግጅንዅን፣ እማ ናን፡ እንተቲ ከደምኖ ጀረብንናዅን” ይኑዅሎም።³ዘሩባቤልዲ እያሱዲ፡ እን አሪው እስራኤልዱ አዳምድ ናእሕሉቅ ደአም፡ “ይና ጃርድ ልጝን ሻትክ ከደምትኖ ይነዲ አረሪሳዅኩም ወላ ላጋርድኳ እላ፣ ይን እን ቂሮስ ሲም ፋርስሩዅ ኣደዳዅሰነና ይነቱ አደራ ጃር እስራኤልድዅድ ልጝን ሻትክ ከደምኖሉ ግን” ይኑዅሎም።⁴እንሲን፡ እን ከው ብሪው እክ ይሁደሩሲ ሳዳ ቀበጭድኖ፡ እን ክድመትኻ ከደምስጊን ጒእሲስጝና ተርሲኒዅ። ⁵እና ኰድጘስ ፋሕሲድኖኻ ኰድጛ ኰድጘው ጅቢኒዅ፣ ኒንኻ ኒውክ ወክት ቂሮስ ሲም ፋርሱዅልድ ሕክም ዳርዮስ ሲም ፋርስሩዅሊ ኣኽታሲክ ኣኺዅ።

¹እን ነበዋትኻ፡ ነቢራ ሃጌዲ ዘካርያስ ዒዲንዱዅረዲ፡ ይሁደዲ ዮርሳሊምዲትል መንደርተው ያሁድሲ፡ ናት ሱⶖ ጃር እስራኤልዱዅድ ነበይስኑዅሎም። ²እንሲን ዘሩባቤል ሸኣልትኤልዅረዲ እያሱ ዮጻድቅዅረዲ ጒኑዅ፣ ዮርሳሌምትልኻ ልጝን ጃሩዅሲ ከደምድኖ ተርሲኒዅ። ናዲ ኣኽኖኽር ነበዋት ጃሩ ከቡኑሎም እርጉኑዅ።³እን ወክት እንዲሲ፡ እን ካርጝ ወረባ እንደረዱዅሊ መልካይ እርጋዅ ታትናይንዲ፡ ሽታር-ቦዝናይንዲ፡ እን ናጨርዲ እንትኖ ንሰና ይኑዅሎም፣ “እና ልጝን ሻትክሲ ከደምትኖሉ፡ እና መንደቕሲኻ ሓዲስድ ከደምትኖ አዊ ኣደድዅኑኩም፧” ይኖ ወጝቀርኑዅሎም። ⁴ኒሰናኽር “እና መንደቅ ኒስ ነደቐው ከው ናሱⶖ ኣውረው ይስተናኵን፧” ይኖ ወጝቀርኑዅ። ⁵እን መርሓት ያሁዱሲ ጃር ተከዉሎም እርጋዅ ኣኽነዲን፡ እን ጋር ዳርዮስትል ገእዮ ንሽቃ ክቱቡዅ አርድናሲክ ናክድመትሲ በኾርድኒኒክ።⁶ካርጝ አፍራጥሩዅሊ መልካይ እርጋዅዲ፡ ሽታር-ቦዝናይንዲ፡ እን ካርጝ ወረቢዅሊ እርገው ናጨር ኣፋርሳካውያንዲ፡ ሲም ዳርዮስትል እኝሻቕናዅ ዳብዳበራ ኒን፣ ⁷ኒል ዳብዳበራ ፈስኑዅ፣ ኒልኻ ነዋያዅ ክቱ ከተብሶ እርጉዅ፣ ኒውክ ሰላም ሲም ዳርዮስድ።⁸ይን ምልክ ያሁደሩዅሊ ልጝን በሀር ጃሩዅሊ ፈርነት፡ ሲም አርእን፣ እን እክ ልጝን ሻትክሲ ክርጝ በህሊልድ ደቕኑ እን መንዳቕስኽር ዓካይክ መሱንድ ከደማናኵ እⶖኲኑዅ፣ እን ክድመትር ተውሃትድ ናመርሓትድት ኣሸሻዅድ ከደምሳዅ እⶖኵዅ።

¹እንሲን ሲም ዳርዮስ፡ እን ባቢሎትል ክቱብ ገሞላ እርግረሪ ልጝን ኣክትበታዅሊ ጀረቢድኖ ኣደዱዅ። ²ምልክ ሜዶንዱዅሊ ኣረርስረሪ ዕርዲራ ኣሕመታ ይስትሮ ሽጝስትረሪትል ላክታብ አርሱዅ፣ ኒልኻ ክቱብ ንሰናያዅ ከተብሶ እርጉዅ፣³“ኒኣመራ ሰልፍሪትል ሲም ቂሮስ፡ እና ትእዳድ ኒስ ኣደዱዅ፣ እን ዮርሳሌምትል ህብረሪ ልጝን ጃርትሪ፣ እን ሳደቐት ሰደቕሳዅላ ኣካን፡ እን ልጝኒ ከደምስርን፣ ንር ሰረትስናኻ ተባዅ ኣኽኒ። ንርሺርጝ ለጘረጝንዲ ለጛታ ምትር፡ ንርፈያሓትኻ ለገረጝንዲ ለጘታ ምትር ኣኽርን። ⁴ሰዃ ጅልዋናኻ በህሊል ክርጝድ፡ ላጅልዋናኻ ካንልድ ከደምስን፣ ናኣራኻኻ ልጝን ሲሙዅልድ ፈደይስን። ⁵እን እራኵ ልጝን ጃሩ ደሀብዲ ወርካዲ ነቢክነጻር ልጝን ሻትክ ዮርሳሌምሩዅልድ አዶ ባቢሎንትል ናቕሰውሎምስኽርል፣ ልጝን ሻትክ ዮርሳሌሙዅሊ ናኣክንሊ ወንተርን፡ ልጝን ጃሩዅልኻ ገምድዅሎም።⁶እንሲን ዳርዮስ ንሰና ያዅ፡ “ኤፍራጥ ካርጝሊ መልካይ ድውላቱ ኣኽራኽር ታትናይዲ፡ ሽታር-ቦዛንይዲ፡ እንትጝር እኒል ህምበው ደገጊትል ህምብደናኽር ናጨር ኣኽድናኽርዲ፡ ልጝን ሻትክልድ ሺራ፣ ⁷እን ክድመት ሻትክ ልጝን ጃሩዅሲ ከደምስሮ ባረሉይ፣ እን መልካይ ያሁዱዅዲ መርሓት ያሁዱዲ እን ልጝን ጃሩዅሲ ኒኣክንሊ ከደሚኒንሉ።⁸እን መርሓት ያሁዱሲ እሲትኖሎም አስተሃላዅሲኩም፣ እን ልጝን ጃሩዅ ከደምስሮ፡ እን ክድመትር ደው ይጊን፣ እን ከፈልሰው ወረቢ ካርጝልድ ፈው ወርኮትልድ፣ ማል ሲሙልድ እን ከውድ እውስትሮ ኣደድዅን። ⁹ጃር ሰሚዅድ ሰደቐት ሓውያዅ ኣኽሮር ጀረብደውሎም፡ ቲምትዲ፡ መደፍዲ፡ ኒሰናኽር ጀሩኵዲ ሽዋዲ፡ ወይኒዲ ደዲ፡ እን ዮርሳሌምትል ህምበው ከዳታት ናው ይነውሲኵኩም ካረምግድኒ ግርግል እውስትንሎም። ¹⁰ኒን ኒኣካዅኻ፣ ጃር ሰሚዅሲ ባህሳዅ ሰደቐት ሱክስድኖ፣ ሲምዲ ኒቍርዲሲኻ ጠለይድኖ ግን።¹¹እና ትእዳድ ኒስ ለወታዅ ኣዳምትኻ፡ ኒልጝንልድ ጉንዳይ አዲኒን እማ ተከልኖ ኒል ከርከርዲኒንሉ፣ እና ጋር ንድ ሰበትድኻ ኒልጝን ድግድግ ኣኽሮ ኣደዶ ህምበኵን። ¹²እና ትእዳድ ኒስ ፋሕሲሮ ወሪ እን ዮርሳሌምትል ኣረርሳዅ ልጝን ሻትክሲ ፋሕሲሮ ኒናንሲ ጉዳዅ ኣኻዅክ ኣኽን ሲም ወሪ እክ፣ ኒሱⶖ ኒል መንደርትሮ እሰዅ ጅር ድሂስኒት። ኣን ዳርዮስ ኣደድዅን፣ ጠንቀቕስነድ እሲኒንሉ።¹³እንሲን ሲም ዳርዮስ ኣደዳዅሰና ካርጝ ኤፍራጥስሩዅሊ መልካይ ደውለቱዅ እርጋዅ ታትናይዲ፡ ሽታር-ቦዝናይዲ፡ ናጨርዲ እን ክድመትሲ ተውሃትድ ከደምሶ ተመምሮ እሲኒዅ። ¹⁴እማ መርሓት ያሁዱ ነቢራ ሃጌዲ ዘካርያስ ዒዶዅረዲር ነበይነድ ደፍእነድ ከደምነስ ተለይድኑዅ፣ እን ክድመት ልጝን ሻትኵዅኻ ትእዳድ ጃር እስራኤልዱዅዲ ሰየም ፋርስሩ ቂሮስዲ፡ ዳርዮስዲ፡ ኣርታሕሻስታዲ ኡናዅ ትእዳድ ከደምኖ ተመምድኑዅ። ¹⁵እን ልጝኒኻ ወልተር አመራ ሕክም ዳርዮስሩኵድ፣ አርባ ኣዳርዱዅልድ ሲዀር ኳሪል ተመምቲ።¹⁶እስራኤዱቍርዲ፡ ከዳታትዲ፡ ሌዋውያንዲ ናውክ እን ከብተውዲ ሰልብስተውዲ ኣኽኖ፣ ገውራ ልጝን ጃሩዅሲ ፈርሓትድ በዓልድኑዅሉ። ¹⁷ገውራ ልጝን ጃሩዅድኻ፡ ሊኽ ትምዲ፡ ለጛሊኽ መደፍዲ፡ ሰጃሊኽ ዓያዊዲ፡ እን ሺብ ፈራዕ እስራኤዱሰናኻ ናውክ እስራኤልድውድ ሰደቐት ሓራሙዅድ ስካ ለጛ ዓምብላ ሱክስኑዅ። ¹⁸እን ክታብ ሙሴሩዅሊ ከተብሶ ህምባዅሰናኻ፣ እን ከዳታትር ናፍትሕሰና፡ እን ሌዋውያጝር ናበናሰነክ፣ ዮርሳሌምትል ጃርሲ ኣገልገልድድኖ የመምኑዅሎም።¹⁹እን ሰልብስትኒልድ ወንተረውኻ፡ እን አርባ ሰልፍሪትል ንርሽካ ሰጃ ኳሪል ፋጅኸስ በዓልድኑዅ። ²⁰ከዳታትዲ ሌዋውያንድኻ ላኣዳምሰና ኣኽኖ፣ ለጭሕኖ እርግኑዅ እማ፣ ናውክ ለጭሕኑዅ። እን ሰልብሰትኒልድ ወንተርው ናውክ ናሻን ከዳታትዲ ናሹትኽር ፋጅኸድ በረኽኑዅ።²¹እን ሰልብስትኒልድ ወንተረው እስራኤልድቍርዲ፡ እን ጃር እስራኤልዱዅሲ ጀረቢድኖ ሮዀስኒል ሲረው ናውክዲ ቊኑዅ። ²²ጃር ኒላውድ ሲም ኣሶርዱዅሊ እጝከሊ አርኖ ጃር እስራኤልዱዅ ሓመድሳዅሉ ልጝን ሻትክ ሓድሲድ ከደምና ገረስድኖ መታን፡ ናክድመትን ኒድክድ ካቢሮሎም እሲነዲንሎም፣ በዓል ቅጨሪዅሲ ለጘታ ኳራ ፈርሓትድ በዓልድኑዅ።

¹እና ጋርት ደምቢ፡ ሕክም ኣርታሕሻስታሩዅድ ሲም ፋርስሩዅ እዝራ ሰራያዅራ፡ ሰራያ ኣዛርያዅራ፡ ኣዛርያ ሒልቂያዅራ፣ ²ሒልቂያ ሻሎምዅራ፡ ሻሎም ጻዶቅዅራ፡ ጻዶቅ ኣሒጡብዅራ፣ ³ኣሒጡብ ኣማርያዅራ፡ ኣማርያ ኣዛርያዅራ፡ ኣዛርያ መርዮትዅራ፣ ⁴መርዮት ዘራሕያዅራ፡ ዘራሕያ ዑዚዅራ፡ ዑዚ ቡቂዅራ፣ ⁵ቡቂ ኣቢሹዓዅራ፡ ኣቢሹዓ ፊንሃስዅራ፡ ፊንሃስ ኤልዓዛርዅራ፡ ኤልዓዛር ኣሮን ከዳ ኣዋዅራ።⁶እዝራኻ ባቢሎትልድ እንቱዅ። ኒ እን ጃር አደራ እስራኤልዱዅ እዋዅ ፍትሕ ሙሴሩዅሲ ገሪዅድክ አርኣዅ ክንሱራ ፍትሑዅ እርጉዅ። ኒአደራ ጃሩዅ ናን ኒዲ እርጉዅ እማ፣ እን ኒትክ ኒጀረበዅሲ ሲም ኡዅሉ። ⁷እስራኤልዱቍርልድር፡ ከዳታተልድር፡ ሌዋውያንልድር፡ ዘመረውልድር፡ መረስ ተከወውዲ፡ ልጝን ሻትክሲ ኣገልገልደውዲ ኣኽኖ ለጘተር አመሪል ሲም ኣርታሕሻስታዲ ኣኽኖ ዮርሳሌምሊ እንትኑዅ።⁸እዝራ ለጘተር አመራ ሲሙዅሊ ኣⶖከር አርቢል ዮርሳሌምትል እንቱዅ። ⁹እን በኪቲ ናኒ ጃርትሪ ኒዲ እርግርነዲን፣ ባቢሎትልድ አርባ ሰልፍሪሲ ሰልፍ ኳሪል ጐ፡ እን ኣⶖኰር አርቢል ሰልፍ ኳሪል ዮርሳሌምትል እንቱዅ። ¹⁰እዝራ ፍትሕ ጃሩዅሲ ነበብድነዲ እስነዲሲ፣ እስራኤልድውድኻ ፍርዲ ፍትሕዲት ክንሲሮ ኒሹቲ ደኵሶ እዎ እርጉዅ።¹¹ጃር እስራኤልድውድ እዋዅሎም ፍትሕዲ ትእዳዲት አርኡ እርጋዅ ከዳዲ ክንሰረዲ እዝራሲ ሲም ኣርታሕሻስታ እዋዅሉ ዳብዳበራ ኒን ግን፣

¹²1-2. ዮናስ ኣሚታይ ዱዅሪል ጒ እማ፡ ነነወትል እን በህሪ ዕርዲረትል ፈሪ፡ እን ከዋ እኪት ይጃብል ነት ገእዩዅ እማ፡ ናኣንጻር ሰምዕዲ፡ ያዅ ቆል ጃሩዅ እንትዅሉ።3. ³ዮናስኻ ጃር ገሽልድ ተርሰስ ኣኽታሲክ እግርዶ ዮ ብርፍ ዩዅ፡ ያፋ ይስታ ኣካንልኻ ገሙዅ፡ ንርትልድ ተርሰስ ኣኽታሲክ ደኵረሪ ባክራትኻ ኣሩዅ። ናዲ ተርሰስ ኣኽታሲክ ፈርዶኻ ኣረኻ ከፈሎ ባኽረትሊ ትዉዅ፡ ጃር ገሽልድኻ ሺሩዅ፡።⁴4. ጃር ይኸ እን ባሓርሊ ውልዋልዲ ሸማልዲ እንሻቁዅ፡ እን ባኽረት ከርቲታሲክ እን ባሓርሊ ሒለቱዅ ኣፍሉት እስቲዅ።⁵5. እን ባኽረትሲ መርሑ እርገዋ ጒኢትኑዅ፡ ላዅክ ናልዳ ናጃርሊክ ማህለልስጚኒዅ። ስዳውይሮሎምኻ፡ እን ባኽረትሊ እርጋ እራኲሲ ባሓርሊ ማልንዅሎም። ዮናስ ደኣም እን ስቛዅ በና መርከቡዅል ገኝጆ እርጉዅ።⁶6. እን ሹም ባኽረቱዅ ይኸ ኒል ስኲሮ፡ እንቲ ገኝጅራኽር፡ ውራ እስራዅን እንኩርዅን ጒ፡ ኣዊ ኣርእዅን እን ኲጃር ድድግኒን ሺበና፡ ኲጃርሊ ማህለልሲ፡ ይዅሉ።⁷7. ናሹር ናሹ ይኸ፡ እና ጅርበት ኒን ኣውር ሰበትድ ኣረትና ኣርእኖር ማታን፡ ላዃ ቕሻ ገምድንን፡ ይስትጚኒዅ። ቕሻኻ ገምድኑዅ፡ እን ቕሻኻ ዮናስትል ገእይቲ።⁸8. እኝሲጝ ናዋ ኲዓይብ ድዊና፡ እና ኣሮና ህምባዅ ኣውር ሰበብድ ግን፡ ኲ ክድመታ ውራንግን ኣወትልዳ እንትሩዅን ኣዊልኻ ግን ኲበለድ ኣወን እክልድ ግንኻ እንቲ ፡ ይኑዅሉ።⁹9. ንኻ ኣጝ እብራዊራ ግን፡ እን በሓርሲ ኢዲሳዅ ጃር ሰሚዅሲ ጓቚታዅንሉ፡ ይዅሎም።¹⁰10. እንሲጛ እን ከው ኒ ኒላውድ ድወዅሎም ኣኸውድ፡ ጃርልድ ሺሮ እግረት ኣለላይኑዅ፡ ገሪ ጒኢኽር ጒኢትኑዅ እማ፡ ውራ መታን ኒሂሰና እስሪዅንኻ ይንዅሉ።¹¹11. እን ባሓርኻ ኒ ኣፍሉት በጀዅ እርግንነዲን፡ ናውኻ፡ ባሐር ደፍእሮር መታን ውራ እስኒን፡ ይንዅሉ።¹²12. ንኻ እና ሒለቱዅ ኣፍሉት ይሰበብድ ገእየትኩም ኣራኦ ህምበኲን እማ፡ ኣድኖ ባሐርሊ ማለለ እማ ፡ እን በሓር እንሲን ደፍእሮልኩም ግን፡ ይዅሎም።¹³13. እን ከውኻ ብሪል ወንተርድኖ ናህምባ ሒልድ ለመላም ዩኑ እርግኑዅ፡ ደኣም እን ባሓር ኒኣፍሉት ትክሰ ሒሊቱ ፍርንነዲን፡ ገረስትለሎም።¹⁴14. እንሲጛ፡ ዎ ይናኽር ጃር ፡ እና ግርዋር ርሕ ሰበብድ ድሂስግሪና ሺውናኲንካ እንኲንዅን ። እንቲ ዎ ይናኽር ጃር ፡ እን እንቲ እንከልደሰና እስሩዅ እማ፡ ላጪሕ ብርሲ ይናዳግ ገምድግ፡ ይኖ ጃርሊ መውዒ እሲኒዅ።¹⁵15. ዮናስቲኻ ኣድኖ ባሐርሊ ማሎኖሉ ደንቢ፡ እን በሓር ደፍኡዅ።¹⁶16. እን ከዋ ጃርሲ ትክሲነ ጒኢትንዅሉ፡ ጃርድር በዳ ስኩስኑዅሉ፡ ቆልር ትውኑዅ።¹⁷17. ጃር ዮናስቲ፡በሀር ስጛዅ ዓሳ ደለምድዂሉ። ዮናስኻ ዓሳ ጐድጒል ሰዃ ኳራዲ ሰዃ ቂርዲ እሲዅ።

¹1.ዮናስ ጐዱግ ዓሲዅል ኣኾ ፡ ኒ ጃርሊ ጠለዪዅ።²2. ይጅርበትሊት ጐዅ፡ ጃርሊ ዋዕዩዂን፡ ኒኻ ዋንስዅለ። ስኦል ጐድጐል ኣኾ ዋዕይዅን፡ ኣንትኻ ይደሃይሲ ዋስሪዅለ ዩዅ።³3.እንቲ እን ቆርሊ፡ ለበካ በሓር ነበክል ማልድዅለ፡ ኩርር ክልውዅለ፡ ናውክ ኣፍሉት ይዳግድ ገምፈሎ ደኩዂ።⁴4.ኣንኻ ነዋ ይዅን፡ ኩዕልል ጃብልድ ዳገንስዅን፡ ደኣም ድሞ ኩልጝን ሻትክሊ መኸልትያ ግን።⁵5.ዓቚ ይፍዂተል ኣኽራሲክ ክልውርዅለ፡ ቆር ይገብሊ እርጉዅ፡ ሻጝኪ በሓሩ ይኣዅርሊ ለዋለይስዂለ።⁶6.መሰረት ጊታዂሊ ገምዅን፡ ስሪር ብሪው ድመሲ ይዳግል ኣኹዅ። እንቲ ደኣም፡ ዎ ይኽር ጃር፡ ይርሕሲ ግብልድ ፍድሪዅላ።⁷7.ይፊዅት ይጅዊል ቅልስሮሰና፡ ጃርሲ እልብድዅንሉ። ይጠሎት ኲሊጝን ሻትክሊ ትውዅ።⁸8.እን ብጒትሊ ቀልብ ገምደው፡ ናገድ ኣስተኲ።⁹9.ኣጛ ደሃይድ ሓምደ ስኲስየካ፡ እን ተመባጽዓዅሲኻ ሃብየሉ ግን፡ ደኣና ጃርልድ ግን።¹⁰10.ጃር እን ዓሰስ ኣደድዅሉ፡ ንኻ ዮናስቲ ብራ ዳፍፍሊ ፍድዂሉ።

¹²1-2. ዮናስትልኻ ጕ እማ፡ ነነወትል እን በህሪ ዕርዲራትል ፈሪ፡ እን ኣን ኣደዳዅሲካ ሰምዕሲኻ ሰምዕዲልዕም፡ ያዅ ቆል ጃሩዅ ሊጘር ወክት እንትዅሉ።³3. ዮናስኻ እን ቆል ጃሩዅ ያዅሰናሉ ጔ፡ ነነወትል ኣኽታሲክ ፈሩዅ። ደኣም ነነወ ኣቕትራሲክላ በህሪ ዕርዲራ፡ ሰኻኳራ ደርብ ግንሪ።⁴4. ዮናስ ደኣም እን ዕርዲረትል ቱሮ ላግርጋ ደርብ ተርሲዅ እማ፡ ነነወ ኣርብያ ኳራ ዲይሮ ገለበትስቶ ግን ዮ ፡ ሰምዕዱዅ።⁵5. ከው ነነወሩኻ ጃርድ እምኑዅ፡ ሹም ሹምድኖኻ ሰምዕ ሰምዕድኑዅ፡ ናብሀርልድ ናግናይል ኣኽታሲክ ዕዳፍ ሰርኑዅ።⁶6፡ እና ህድግ ኒን ሲም ነነወሩዅል ገእዩዅ፡ ኒቒጦሪልድ ጔኻ፡ ኒሰራጝሲ ፍዱዅ፡ ዕዳፋ ሰሮኻ ሽባርሊ ኮፈ ዩዅ።⁷7. ነነወትል ትእዳድ ሲሙዅዲ ኒ መኳንንቲዲ ነዋ ዩዅ ሰምዕ ሰምዕሱዅ፡ ኣዳም ወሪ ማል (ሞጋሰ) ወስ ወሪ ይኸ (ሞጋሰ) በግ ላሪኽር ታምግኒን፡ ሰገርግኒንኽር፡ ዓቁር ጅእግኒን።⁸8. ኣዳምዲ ማልዲ ዕዳፍ ሰሪኒን፡ ዋዕ ይኖኽር ጃርሊ መውዒ እሲኒን፡ ላዅክ እን በዳን ኒደርብልድር እን እንኒናተል ህምባ ዓመጭልድር ጥዒስን (ወንተርን)።⁹9. ኣዊ ኣርእዅን ጃር ጥዒሰጝር ወንተረጝር፡ ይጝ ድድግኒንኻ እን ኒጋእጋያዅ ሓረቕርቆትልድ ወንተረን፡ ኣዊ ኣርዅን።¹⁰10. ዳኣም ጃር እን እኩይ ደርብልድ ወንተርነት፡ ና ግብርሲ ቋሉዅ፡ ጃርኻ እን ገምድሮሎም ዮ ጋባ ማዓትሲ ጥዒሱዅ እማ፡ እሲለሉ።

¹1.ደኣም ኒን ዮናስቲ ትክሰ ጓሃይድዅሉ፡ ሓረቁዅር።²2.ነወዮ ጃርሊ ጠለዩዅ፡ ዎ ይኽር ጃር ሺወኩንካ እንኩዅን፡ እን ይበለድሊ ዋኑ ጋበዅሉ ኒንማ ኣኽላ፡ ብሕል ይራኽርዲ ሩሕሩሕዲ ሓረቅርናድ እሽሸግራኽር በሀር እንከሊሩዅ፡ በዳንድ ጥዒስራኽር ጃር ኣክረት ኣርኣዅ ኣኸውድ፡ እና ንድ ሰበብድ ግን ጃቢሶ ተርሰስ ኣኽታሲክ እግራኽር።³3.ዎ ይኽር ጃር፡ ደኣም ናን ይርሕድ መንደርትኒልድ ክራ ኪዳኵለ እማ፡ ይርሕሲ ይልድ ኣቶላ ሺውኵንካ እኝኵዅን።⁴4.ኵሓረቅርነድ ትክያዅማ እስረኵን እንኩርዅን፡ ይዅሉ።⁵5.ዮናስኻ እንዕርዲረትልድ ፌ፡ እን ዕርዲራ ኳራ ለብና ገፍድ ኮፍዩዅ። ኒል ኒድ ዳስ ከደሙዅ። እን ዕርዲራትል ገማዅሲ ቋልዶር ማታጛ፡ ሻም ዓጝቀይል ኮፍዩዅ።።⁶6.ይና እኽር ጅርኻ፡ ዮናስቲ ኒኣኻርሲ ሻሚስረሪ ኒእኪትልድር ወአንተስረሪ፡ ጒልቋ ደለምዱዅ፡ ኒ ኣወይሲኻ ለገድዅላ፡ ዮናስኻ እን ጒልቋ ሰበትድ ትክሰ ፈርሑዅ።⁷7.ኒ ኣመሪትኻ ብራ ክሰሪት፡ ጃር ቅሻ ደለምዱዅ፡ እን ቅሻኻ ጒልቋት ቊዅላ፡ እማ ኢድቲ፡⁸8.ኳራ ፍርደሪትኻ፡ ጃር ውልዋል(ሸማል) ብራዅ ኳራ ለብና ገፍድ ደለምዱዅ፡ ኳራኻ ዮናስቲ ቂልስራሲክ ኒኣዃርሲ ጠዓምብቲሉ፡ ኒኻ፡ ርሕድ መንደርትኒልድ ክርና ኪደኵለ ዮ፡ ኒርሕድ ክራ ሺዊዅላ።⁹9.ጃርኻ እና ጒልቋድማ ሓረቕርቶ ወጀባኵንካ ይዅሉ፡ ኒኻ፡ የዋ ክርና ኣኽታሲክር ሓረቅርድያ ተገባኣኵለ፡ ይዅሉ።¹⁰10.ጃርኻ ነወይዅሉ፡ እንቲ እን ቂልሰግረሪትልር በሀርድግረሪትልር፡ ላቂርድ ለገድረሪ ላቂርድኻ ድረሪ ጒልቋድማ ሓረቅርደኵን።¹¹11.ኣጝኻ እን በህሪ ነነወትሪት፡ ናላውሲ ናሸንግብልድ ፈለይድኖ ገረሰጋው፡ ሊኽዲ ለጘርጝንዲ ስሕልድ በጀኻው፡ ከውዲ ገሪ ማልዲ ህምብረሪትላማ፡ ብሕል የሊላ።

¹ ክቱበ ኢክ ዳዊትኹራ ዳዊት ኣብራሃምኹረድ እኽርስከው። ²ኣብርሃም ኢሳቅቲ እዃሩኹ ኢሳቅኻ ያዕቆብቲ ያዕቆብኻ ይሁዳዲ ኒሻንዲት። ³ይሁዳ ትእማርትልድ ፋሬስዲ ዳራድት እዃሩዅ ፋሬስ ኤስሮምቲ እኳሩዅ ኤስሮም አራምቲ እኳሩዅ።⁴4 አራም አሚናዳብቲ እዃሩዅ አሚናዳብኻ ነኣሶንቲ ነኣሶንኻ ሰለሙንቲ እዃሩዅ። ⁵ሰለሙንኻ ራኬብትልድ ቦኤዝቲ እዃሩዅ ቦኤዝኻ ሩትልድ እዮቤድቲ እዃሩዅ።እዮቤድ እሰይቲ እዃሩኽ። ⁶እሰይ ንጉስ ዳዊቲ እዃሩዅ ንጉስ ዳዊትኻ ኡርያ ቊትልድ ሰለሙንቲ እዃሩኹ።⁷7 ሰለሙን ሮብዓምቲ እዃሩዅ ሮብዓምኻ አብያት እዃሩዅ አብያኻ አሳፍቲ እዃሩዅ። ⁸8 አሳፍ ዮሳፊትቲ ዮሳፊት ኢዮኣራምቲ ኢዮኣራምኻ ኣዝያትቲ እዃሩዅ።⁹ኣዝያን ኢዮኣታምቲ እዃሩዅ ኢዮኣታምኻ ኣካዝቲ እዃሩዅ ኣካዝኻ ሕዝቅያስቲ እዃሩዅ። ¹⁰ሕዝቅያስ ምናሴት፡ምናሴኻ ኣማንቲ ኣማንኻ ኢዮስያስቲ እዃሩዅ። ¹¹ኢዮስያስኻ ባቢሎንር ህረብ ሁመትሊ ኡኮንያንዲ ነሻንዲት እዃሩዅ።¹²ባቢሎንዲ ህረብ ደምቢ ኡኮንያን ሰላትየልቲ እዃሩዅ ሰላቴልኻ ዘሩባቤልቲ እዃሩዅ። ¹³ዛሩባቤል ኣብዮድቲ ኣብዮድኻ ኤልያቄምቲ እዃሩዅ ኤልያቄምኻ ኣዛርቲ እዃሩዅ። ¹⁴ኣዛር ሶዶቅቲ ሳዶቅኻ ኣኪምቲ ኣኪም ኤልዮድቲ እዃሩዅ።¹⁵ ኤልዮድ ኣልኣዛርቲ ኣልኣዛር ማታንቲ ማታን ያዕቆብቲ። ¹⁶ያዕቆብኻ እንማርያምር ሕጩይ ዮሴፍቲ እዃሩዅ።ንርትልድኻ ክርስቶስ ይስታኹ ኢዮሱስ እዃርሱዅ። ¹⁷እማ ገድም ኒዉክ ኤሰል ኣብርሃምትልድ ዳዊትል ኣኽታሲክ ሽካ ሰጃ ኣሰል ኣከናኩ ዳዊትልድ ባቢሎንዲር ህረብሊ ኣኽታሲክ ሽካ ሰጃ ኣከናኩ ባቢሎንዲር ህረብልድ ክርስቶስትል ኣኽታሲክ ሽካ ሰጃ ኣከናኵ።¹⁸18 ኢየሱስ ክርስቶስር እዃርስና ንድሰና ግን፡ኒገና ማርያም ዮሴፍትል ሐጨይስሮ ዋንትሩንሲክ እኺርኺልሊ ሸኤግኒ መንፈስ ቅዱስ ሒልድ ሐነንዶ ኤርስቲ።¹⁹19 ዮሴፍ ንር ሕጩይ ግርዋ እካኹራ እርግነዲን ኒስተካ ወራትሲ ቋሎሰና ፈይሕል ፍድሮላ ጀረቢላ ትብታንድ ባርዶላ ዮ ገሪ ሀመትሊ ትዉዅ።²⁰20 ነዋዮ ኒስቁብድ ኮድኞ ቁርቁርቱኻ እናሓን ነበኺሲ ንሽቃ ጃሩኹ ቋ ልስትኹሉ እማ “ዮሴፍ ዳዊቱኹራ ማርያም ኩሕጪት ኩዲሻክነስ ላሪጉኢትግ ንሪ ሐነንዶ ህምብራዅ መንፈስ ቅዱስ ሒልድ ግን። ²¹21 ቁራ እዃርቶግን ኒሱኝስዃ ኢየሱስ ፍድቶሉ ኒ ኒከውሲ ናዓገብልድ እልልዶ ግን።²²²³22-23 ኒን ኒኣክናኻ እንጃር ኣን ነቢረድ እናሐን ዓንቂ ድንግሊ ሐነንቶ ግን ቁራኻ እዃርቶ ግን ኣማኑኤል ይኖኻ ሱኙ ፍድኖሉ ግን ንኻ ጃር ይነዲ ይና ግን” ዮ ጋበ እርጋኹ ኣኽሮር መታን ኣኻዅ ግን።²⁴24 ዮሴፍ ገንጂልድ ጌሰና እን ንሽቃ ጃሩኹ ያኹድ ሰናሉ ኒ ሕጪቲ ኒዲ ኣዱኹላ። ²⁵25 እኺርኺርሊ ስኩርግንኻ ቁራ ንር በኽርሲ እዃርቲ።ኢየሱስ ዮኻ ሱኝ ፍድኹሉ።

¹ 1 ኢየሱስ ንጉስ ሄሮዱስር ወክትሊ ቤትልሄም ይሁዳትሪትል እኽእዃርሰሰና እናሐን ከው አርአው ብርክስኚልድ ኢየሩሳሌምትል እንትኖ ኣይሁድ ንጉስ ኤዊል እዃርሶ ዋንተት ወንቀርኑዅ። ²2 ውረድ ብርክስኚል “ኒሽንግርወስ ቋልንነዲን ወጅህስትኖሉ እንትኖ ህምብናኽር ግን” ይኖ ጋቢኒኹ። ³3 ነስ ዋሰሰና ንጉስ ሄሮዱስ ረገስቱዅ ንርዉክ ኢዮርሳሌምር ታንትኝድ ኒድ ኮሰስትቲ።⁴ 4 ናትክ አምራን አቅሽታ በህሊንዲ ክታበን ክወው ዲት ሽኘኻ መሲሕ አወት እዃርሰት ወንቀሩዅሎም። ⁵⁶5-6 ናዉኻ “ቤተልሄም ይሁደትሪትልዋ” ይንኹሉ፡ውረድ እን ነቢ “እንቲ ኦቤተልሔም ይሁደር ብራ እንደገጊት በህሊን ይሁዳር ብሪውልድ እንትኽር ላሪ ሽጐላ ኩልድ ሲም ይእስራኤልቲ ተከዋዅ እዃርስሮ ግን” ያዅ ከተብሶ ህንበኲ ይንኹሉ።⁷7 እንሲን ሄሮዶስ ነስ ዋሶሰና እንከው አርአውሲ ናቱ ሽኘ እን ሽንግርዋ ውሪ ሁመትሊ ቋልስተትሎም ትክሰ ደለይዶ ወንቀሮሎም ደንቢ ፈራ ቤተልሄምትል ኒላ ወንቀራኽር ፈጠንድኖ ደለይዳኽር። ⁸8 ኣርድኖሰናኻሉ ይኸ ወንተርድኖ ድወልለ አኝር ወጅህስትየሉ ይኹሎም ።⁹9 ናውኻ ንጉሲ ዋስኖ ብርፍ ይኑዅ እናሐና እንሽንግርዋ ብርክስኘድ ቋልስታኹሎም ናጃብጃብል ፈሩ እርጋዅ ሐዲስድ ቋልስትኹሎም እንዓለታ ህንባኹል ገእዮኻ ኣንጦጦልኹ። ¹⁰10 አቅትራሲክኻ ፈርሕኑዅ።¹¹11 ጋኺል ቱኖኻ ዓለታዲ ኒ ገና ማርያምዲት ቋልኑዅ እማ ኒ ጃብል ሐርበጥኖ ና እንድባትሲ እንክኖኻ ደሃበዲ ልባናዲ ኰርበራዲ ስኲስንኹሉ። ¹²12 ሄሮዱስትል ወንተርግኒንኻ ነባኺሲ ገልህስቶሎም ኤሪ ጉግድ ይኖ ና ኮል ወንተርኑዅ።¹³ ምስሪትል ህረብርና13 ናው ፈርኖሰና ንሽቃ ጀሩዅ ዮሴፍቲ ነባኺሲ “ጒ ዓለታዲ ኒ ገነዲት አድሮ ምስሪትል እግሪ አንይሪሲክካ ኒል ጨበሪ ውረድ ሄሮዱስ ዓለተስ ኩሮ የመሞ ህንበኲ” ይዅሉ። ¹⁴14 ንኻ ቂር ከርተፍዮ ዓለታዲ ኒ ገነዲት አዶ ምስር ብሪል እግሩኹ። ¹⁵15 ሄሮዱስ ክርዳሲክኻ ኒል ህንቡኑኹ።ኒንኻ ጃር እን ነቢር አብድ “ ይኹረስ ምስር ብሪልድ ሽኝኹንሉ” ያኹ ተመምሮር መታን አኻዅ ግን።¹⁶16 ሄሮድስ ከው አምራን ምሊነትሉ አርእስተሰነሉ አቅትራሲክ ቀጠቡዅ እማ አምራን ድዊነ ዃሪልድ ተርሰ ቤተልሄምዲ ኒገቢል ህምባ ደገጊሩ ግናቲትሲ “ለኛ አመሪውሊ አኽታሲክ ናትክ ክዋ” ዮ ንሽቃ ደኲሱዅ።¹⁷¹⁸17-18 ናኸ እንኤርምያስ ነቢ “ራመትል ደሃይዲ ገሪ ስረናዲ መውዒታትዲ ዋስስቱዅ ራሄል ንርቁርድ ስሪቲ ናዋ ዋኒገው አኸንነዲን ትምይነስ ጉሽቲ” ዮ እርጋዅ እንሲን ተመሙዅ።ኢየሱስር ህረብልድ ወንትራ¹⁹ 19 ሄሮዱስ ክሮሰና ንሽቃ ጃሩዅ ነባኺሲ ዮሴፍትል ተለው ዮ፡ ²⁰20 “ጒ ኤብልዲ ኒ ገናዲት አድሮ እስራኤልዲ ብሪል ወንተሪ ውረድ እንቁሪ ፊዅትሲ ጀረቡ እርገው ክርኑዅ” ይኹሉ። ²¹21 ንኻ ቁረስ ኒገነዲ አዶ እስራኤልዲ ብሪል አተዪዅ።²²22 ደአም አርኬላዎስ ኒኽር ሄሮዱስር ኤብሊክ ሰየምሰት ዋስነዲን ኒል አተይነስ ጓቊቱዅ ነበኺሲ ቋልስቶሰነሉኻ ገሊለር ድሪል አተዩዅ። ²³23 ኒንኻ እን ነቢሲ “ናዝሬትሩዅ ይስቶ ሽኝሰትሮ ግን” ዮ እርግእዅ ኒውክ ተመምሮር መታን ናዝሬት ይስታ ድገትል ዐሩዅ።

¹²1-2 እንሰከር አውካትሊ ዮሕንስ ጠመቕደንታ “ሲመር ጃሩኹ ሱኩሩዅ እንታ ለፈክሊ-ወንተራ” ዩንሲክ አውከደንሊ ያሁድ ብሪል እንቱዅ። ³3 ውረድ እንነቢ እሳይያስሲ “ጉግ ጃሩኹሲ ጠፍሕዳ መለዋሊትሲ ጠለቃ እሮትሲኽር ተኳእሳ” ያኹ አውከደንሊ ዋስስቶ እርጋ ደሃይ ግን።⁴4 ዮሐንስ ኒ ሰረና ዓዶራ ግሚሊዅ ኒ ከቦረሳ ማጨይድ ደበልቶ ኒ ነብራኻ አንበጠዲ ሳኻራ ጪደኒ ኹድ እርጉኹ። ⁵5 እንሲን እየሩሳሌምትልድ አከኝር ኒውክ ይሁዳትል ህንባ ደገጊትልድር ኒል ደነክሱኑ እርግኑኹ። ⁶6 ናውካ ና ዓገብ ባርስትሮሎም ዮርዳኖስር ወርቢል ኒድ ተመቕሱኑ እርግኑኹ።⁷7ፈሪሳንዲ ሰዱቃንዲ ከላእ ኒል ጠመቅስድኖ እን ተረውሲ ቋሎሰና፡ “አጀዋ ነበንቲ አሰል አፍዖቱ እንተትኻ እና እንታ አወይሲ ገምራ ፈራ መሀግልድ እግርነስ አውኒ ድወኩም” ይኹሎም። ⁸8 እንታ ከተስ ባሪሰውኩም ኪዳ ፈደን ፍሪታ። ⁹9 እንተለፈክድ ይን አብርሃምቁር ግን ይዲነክ ጀመርገኩም፡እምንዲክ ድውየኩም ጃር አብርሃምሲ እና ክርኝልድ እቁር ኡሮሉ ገረሰኩ።¹⁰10 ሰንኮታ እማና ስሊ ገሞ ህንበኲ ትክያ ፈደን ፍሪታጋ ካነክ ቀረጭሶ ላኺል ማልስሮ ግን። ¹¹11 አን እንታ ዓገብ ባርስትሮኩም ዓቁድ ጠመቕደኩንኩም እንኩኹን እንይደምቢ እንተራዅ ሐይስ ይልድ ሒለታዅ ኒ ሻንፍፍሲ ምኹርድያ ድኳ ወጀበጋኹለ ኒ መንፈስ ቅዱስዲ ላኻዲሲ ጠመቅድሮኩም ግን። ¹²12 ኒ ወረነስ ገሰስሮ መጨለይሲ ኒናንተል ሻኾ ህንበኲ፡አርሲ ኒሐበሲተል ጉድሮ፡ጉርድስኻ ኒድማ ስንተጋ ላኺል ማልዶ ግን።¹³“ ይናደራ ኢ-ክርስቶስር ጥምቀት ”13 እንሰከር ግርጋትልኻ ኢየሱስ ገሊለትልድ ዮርዳኖስትል ዮሐንሲ ጠመቕስሮ እንቱዅ። ¹⁴14 የሐንሲኻ “አን ግን ኩድ ጠመቅስያ ወጀበኩለ ግራ እንቲማ ይድ ጠመቕስቶ እንተርዳኹን” ዩንሲክ ከሐድስኚኹሉ። ¹⁵15 ኢየሱስኻ “ገድም ናና ዓደትሲ እሲኖ ባሪ” ይኹሉ።እንሲን ኒ ምራድሲክ እሲኹሉ።¹⁶16ኢየሱስ ጠመቅሶ ዓቁልድ ፈሰና እናሐን ኒ አወይሲ ዐስተር ብስቱዅ ኒ አዀርሊኻ መንፈስ ቅዱስ ኳትራ ተኩንሲክ ገሙ ቋልስትዅ። ¹⁷17 ኒዳግይኸ ጋባ ዐስተርልድ “ኒን ይኩራ አን እንከላዅ ኒድ ባህ ዮለ ህንባዅ ግን” ያዅ ዋስስቱዅ።

¹1 ንደምብኻ ኢየሱስ ሰጣንድ ወጠንስሮ መንፈስ አው ከደንሊ አድኹሉ። ²2 አርብያ ኳረዲ አርብያ ቂርዲ ሹመስናኻ ከአርትጼ። ³3 ሰጣን እንቶ ኒል ስኩር ዮኻ “እንደ እምንድክ ጃርኹራ አክረን እናክርኝሲ ሳንስዒል በደሊ” ይኹሉ። ⁴4 እዮሱስ “አዳምር መናብረት እንጋባ ጃር አብልድ ፍረሪሲ ግራ ሳንስዓድ ካያ ኣከላ ያዅ ክቱብ ህምባኲ” ዮ ወንተስኹሉ።⁵5 ንደምቢ ሰጣን ድገ ሻትክል አዶኹሉ እማ እን ጸሎት ልጝሊ ትካ ሺራ አካንሊ ዓረግድኹሉ ሸልሊ ደው-ሰሉኻ፡ ⁶6 ናን ዋሲና “እንደ አበዲ ጃርኹራ አክረን ኩሉክ ክርኝል ጐለቄምስጊንካ ኒ ንሽቕሲ ናናንትተል ከለብርድኖካ አደድሮ ግን ያኹ ክቱብ ህንበኩ እማ እንደ ንድ ትንኩሪር” ይኹሉ።⁷7 ኢየሱስኻ ኮዶ “ኩአደራ ጃርሲ ወጠንግ ያኹር ከተብሶ ህንባኲ” ይኹሉ። ⁸8 ሰጣን ይኸ ኮዶ ጊራ ሺራኹል ፍዱኹሉ ኒትክ ብሪል ዋንተ ሕክምስኻ ቋሊስኹሉ። ⁹9 እንቲ “ይጃብል ሐርበጥሮ ወጀህረንለ ነስ ናትክ ኡሪካ” ይኹሉ።¹⁰10 እንሲን እየሲስ እን ሰጣንሲ “ፈሪ እንደራ ነዊ ይልድ ኩጃርሊ ካያ ሰገድቶ ሻኽሩዅ ያዅ ጹጳዶ ንጨዱኲ” ዮ ኒልድ ሺሽድኹሉ። ¹¹11 ሰጣን ኒልድ ፈሮሰናኻ መላእኽቲ እንትኖ እንሻቅስንኹሉ።ይናደራ ኢየሱስር ኒሰልፋ ሰብከት¹²12 ኢየሱስ የሐንስር እንሸውስነስ ዋሰሰና ገሊላትል ፈርኹ። ¹³13 ናዝሬት ባሮኻ ዳብሎንዲ ንፍታሌምዲር ብሪል እንቶ እንደራ ቅፍርናሆምድ ደገጊታ ገፍል ካርዅ።¹⁴¹⁵¹⁶14—16 ኒን ኒአክነኻ ኣንነቢ ኢሳያስ “ዳብሎንዲ ንፍታሌምዲር ብርቲ ዓይግ ሸልላት ዮርዳኖስር እንደረሲ ህንባ ደገጊት ገሊላ አረሜን ዱከው ጭልምልር ክሪዉድ ሻሚልር መንደርቱ ሰጘው ቲዃ ከላእኮት ቋልኑኽ” ያዅ ተመምሮር መታንእኻዅ ግን።¹⁷17 ንደምቢ ኢየሱስ “ሲመር ጀርዅስኲርዅ እማ እንታ ለፈክሲ ዓገብልድ ለጭሕዳ” ዩንሲክ ሰበክሮ ተርሲዅ።¹⁸18 ኢየሱስ ገሊለር በሐር ሽልድ ደኩ ለጋ ሻን እን በጥሮስ ይስታዅ ስምዖንዲ ኒዳን እንድርያስዲት ዓሳ ሻከው አኽንነዲን ናሰቀሊትሲ በሐርሊ ማሉኑ ቋልኹሎም። ¹⁹19 ኢየሱስ “ጓ ይዲ ለዃ ተለየለ ንደምቢ ከው ሻከውእስየኩም ግን” ይኹሎም። ²⁰20 ናውኻ ንርድንርድ ናሰቀሊትሲ ባርኖ ኒዲ ፈርንኹ።²¹21 ኒልድ መደት ደኩኖሰና ያቆብዲ የሐንስዲ ለጛ ሻን ናኽር ዘብዲዎስዲ ታንኳትል ናሰቀሊት ሸረቡኑ ቋሎ ሽጝኹሎም።²²22 ናዋ ንርድንርድ ታንኳዲ ናኽርዲት ባርኖ ናዲ ብርፍ ይኑኹ።²³23 ኢየሱስኻ ናጸሎት ልጝንታ አካናትሊ ኪሰሪር ብሽራት ወንጌል ሲመር ጃርኹሲ መሀርዱንሲክር አኸ ሸኹዲውሲክር እቢሱ ኒልክ ገሊለር ብሪል ጅልውኹ። ²⁴24 ኒልክ ሶርይልኻ ድሪስትኹ እማ ናትክ ምግዱራንዲ ምጨትድ አላላ የውሲ ትልልኹ መጃኒን ሻውሲኽር ናቅስንኹሉ እማ ናትር እቢሱኹ። ²⁵25 ገሊለትልድኽር ሽካ ደገጊትልድኽር ኢየሩሳሌምትልድኽር ይሁዳትልድኽር ዮርዳኖስ ካርጝንድኽር ቅብሊ ህንባ ደገጊትልድኽር ከላእ ተለይንኹሉ።

¹1 ከው ገሪዉሲ ቋሎሰና ጊሪል ተረገሶ ከፍ ይኹ ኒታለይቱትር-ኒል ስኩርንኹ። ²2 አብሲ ብዶኻ ነዋዮ መሃርደኹሎም። ³3 እን ናለበከዲክ ድቡራን ሻትካን ግን ውረድ ሲመር ጃርኹ ናድ ግን። ⁴4 እን ቁርቁርተው ሻትካን ግን ውረድ ነገስድኖ ግን፡⁵5 እን ናስሐን ሽትካን ግን ውረድ ብረስ ለውድኖ ግን። ⁶6 እን ሻታከት መታን ከአርተውዲ ሱቋንተውዲ ሻትካን ግን ውረድ ብትድኖ ግን። ⁷7 እን ብሕል የው ሻትካን ግን ውረድ ብሕል ይስትሮሎም ግን። ⁸8 እን ለፈክ ላጭሐነው ሻትካን ግን ውረድ ጃርሲ ቋልድኖሉ ግን።⁹9 እን አረከው ዕሹራን ሻትካን ግን ውረድ ጃር ቁር ይስትድኖ ግን። ¹⁰10 እን ሸታከት መታን ጋይተው ገዱ ግን ውረድ ሲመር ጃሩዅ ናዲ ግን።¹¹11 ይሰበትድ እንጠረነንኩምር ጃኸነንኩምር ውሪይኸ ብንድ እንተ አወይሲ ሙቅል የነን እንትን ገዱ ግን ውረድ እንተበና ዓስተርሊ በሄርኮት ግን። ¹²12 ፈርሐኽር ነገሳኽር ውረድ እምንእምንድክ እንታ በና ከላእ ግን፡እንታ ጃብ ነብያታትስኸር እንዳ ሀቢነ ዳገነውር ህረብደውርግን።¹³ታለይቱት ሽዋ ከወውዲ ቲዃ ብሪውዲ13. እንትን ሽዋ ብር ግን፡ሽዋ ኒ ታሚትሲ ድሂሰን ውረድ ግን ኒ ታሚትና ከውድ ዳድስትሮ ድግድግል ማልሰገን ላሪ ነፍዓላ።¹⁴14.እንትን ቲኳ ብሪው ግን ጊሪል ገበርሳ ድገ ሔገይስሮ አከለሉ።¹⁵15.ኒሰና ይኸ ቲጋ ኒ ቲኹስታኹ ናትክ ልጝሊ ህንበውሲ በርህድሮር መታን ክብ ያኹል ገምዲስተኩ ግራ ሕንኩል ዓንቀይሊ ገምድስተላ።¹⁶16.እማ ኒሰና፡እንትጝር እንታ ጋር ትክያኹሲ ቋልኖ እንታኽር ዓስተርሊ ህምባኹሲ፡ሐመድድኖሉ፡እንታ ቲዃ ከዋ ጃብል በርህኒ።¹⁷17.አን ኦርትዲ ነቢታትዲት ጠሐስያ እንቶ ህንባኽር ተከጊንኩም፡ኒሰና አኽላ ሐደሲየሎም እንቶ ህንባኽር ግራ ያዕየሎም አኽሊ።¹⁸18.እምን እምንድክ ይየኩም ዓስተርዲ ብረዲ ደኩራሲክ ኒው ክር አኽራሲክ ትእዳድልድ ላሪ ግናይሩራይቲ አክረጝር ደኮግረት አርአኩም።¹⁹19.ሽኑርድንኹማ እናትእዳድ ግናቲትልድ ላሪ ቃበባኹስኮት ክመን ይኸ እንዳሀበኽር አሪውድ ክንሰን ሲመር ጃርኹል ግናይ ሽጝስትሮ ግን።እንትእዳዳትሲ ተከዋኹዲ ትክሰ ክንሳኹዲ ደአም ሲመር ጃርኹል ብሄር ይስትሮ ግን።²⁰20.እንተትክ ከታበንኹልድር ፈሪሳንኹልድር ትክሰ ኪዳገን ሲመር ጃርኹል ትወግደነት አርአኩም።²¹ትእዳድ ሐዲስ21.እማኒውሰኢ ኩውግ ኩዋኹክ ፈረድስሮ ግን ይስቶ ዋንተት ዋስድኖ ህንብደነኩ።²²22.እን ደአም የኩንኩም ኒ ዳንድ አወይሲ ቀጠባኹ ስኮት ክመን እማ “ነበንታ ሃስስ” ዮ ጅኸኹስኮት ክመን ዲቢል ፈረድስሮ ግን ፡ይኸ እንዳሃበ “ነበንታ ግኑኹ” ያኹስኮት ክመን ላኹል ፈረድስሮ ግን የኩንኩም።²³23.ይኸ፡ከዶ ሰደቀት ገምዱቶ ታቦትሊ ስኩርዱንሲክ ኩዳንዲ ዋኺትሮ ዋንትረት እልብድረን፡²⁴24.ኩሰደቀትሲ ታቦት ጃብል ባርዶ ፈሪ በደርዶ ኩዳንዲ አረክሲ ንደምቢ ኩሰደቀት ሱክስረን ወጀ በኩካ።²⁵25.ኩዋኺኹዲ ኮዶ ጐግል ዋንትሩ ኣሸሽኹድ አረክሲካ ውረድ ሕክምድ ሻኺስጊንካ ኒንኻ ተከወውድ ናንተል ላምስጊንካ እማ ንሽዊል ማልጊንካ።²⁶26.እምንድክ የካ ሶልዲራ ግናይሊ አኽታሲክ ፈደይግሪ ኒልድ ፈግረት ኤርኢካ።²⁷27.ደነይግ ይስቶ ዋነት ዋስድኖ ህንብደነኩ።²⁸28.አንደአም የኩንኩም ላኹ አኻኹክ አኽኒ ኡሰሪት ሸንሀትድ መኸልታኹስኮት ክመን ኒ ለበከድ ንርዲ ደነዮኹ።²⁹29.ኩዕሊ ላውሪ ከቲስረንካ ኩልድ ቆቀልዶ ፍድሮ ማሊላ ኩገሮብ ኒውክ ላኺል ትወውልድ ላኹ ነቀሰን ኪደኩካ።³⁰30.ይኸ ኩናን ላውኩ ከቲሰንካ ኩልድ ነተፍሮ እን ደራ ማሊሉ ኩገሮብ ኒውክ ላኺል ትወውልድ ነቀስሮ ደኤንደን ኪደኩካ።³¹31.ኒ እኹነት ደቀራኹክ ንርፍትሕ ድቅሩሩኹሲ እዎ ስብድንላ ይስቶ ዋንተት ዋስድኖ ህምብደንኩ።³²32.አንኻ የኩንኩም ደነይና ሰበትድ አከገን ላኹ ኒእዂነት ደቀራኹ ደነይደኩላ እን ንርትል ትዋኹር ንርዲ ደነዮክ።³³33.እማኒውሲ ኩሸርነስ ጅርድ ባሪ ግን ግራ ብንድ ሽርግ ይስተት ዋስድኖ ህንብደነኩ።³⁴34.አን ደእም ኒ ኾርሲክ ውሪ ዓስተርድ ሸርጋ ውረድ ቂጦራ ጃሩኹ ግን።³⁵35.ውሪ ይኸ ብረድ ሸርጋ ውረድ ድኩር ኒልኩካኹ ግን፡ውሪ ይኸ ኢዮሩሳሌምድ ውረድ ድገ በሄርቱኹ ግን የኩንኩም።³⁶36.ኩአኹርድር ሸርግ ውረድ ኩአኾር ሽብከልድ ላሪ ጫዕደሪስቶ ወሪ አረቢስቶ ገረሰላ።³⁷37.እንታ ጋብ ወሪ የዋ ወሪ ይኸ አኽላ አኽላ አኽኒ ግን ግራ ኒልድ በጀኸን ምቁሊልድ ግን።³⁸38.ዕልሲ-ዕልድ እርኩስ-እርኩድ ይስተዋነት ዋስድኖ ህንብደነኩ።³⁹39.አጛ የኩንኩም ምቁለዲ ለመለም ይጋ፡ ቃሽ ላውኹሲ በርግዓኹሲካ ቃሽ ሸንገቡኹሲኽር ሱኩሲሉ።⁴⁰40.እንሸከይሮካኽር ቀምሺ ባሪስሮካኽር ጀረበኹሲ ታዊነስር እዊሉ።⁴¹41.ይኸ ላኹ ኒዲ ላስብዳ ፈርቶ ጀረበንካ ኒዲ ለጛ ስብዳ ፈሪ።⁴²42.ሺወኹድካ እዊ፡ይኸ እድኹ ጀረባኹድካ አደኽዲ።⁴³43.ኩጨረስ እንከሊ እንጠራኹሲካኻ እንጠሪ ይስቶ ዋነት ዋስድኖ ህንብደነኩ።⁴⁴⁴⁵44-45.አጛ የኩንኩም እንጫ ዓስተርሊ ህንባ እንታ ኽርድ እቁር አኽትኖ ጀረብደነን እንጠረውሲኩም እንከላ፡እንምቑላ እሰውድኩምር ትክያኹ ሺዋ ውረድ ጃር ኒ ኳረስ ምቁልዲ በካይትዲር አወይሲ ፍደሰና በርህደሰና ኒሰና ስወስር ሻትካንዲ ዓገቡዲር አወይሲ እሰኩ።⁴⁶46.እንታሻሙሲ እንከልደነን ላሪ በና ሻኽድኒ ኒ ሰንስ ወርኮት ፍደውር እሰነኩሉ።⁴⁷47.ይኸ እንተሻንሲ ወርካማ ይደነን እስዲነኹ እስዲነኹ ሻኽድኒ ኒሳ አረመጝር እንደሃበነኩሉ።⁴⁸48.እማ እንታኽር ዕስተርሊ ህንባኹ እምንድክ ወርካ ግን እማ ኒ ሰና ወርኪታ።

¹1.እንታ ሸተክና ከው ቋሎ ጀንጀንዶኩም ይድኖ እስደናዅ አኽጊን ፈጠነኩም፡ንድሰና አከን ዓስተርሊ ህንባኹ ኣንታኽርልድ ላሪ በና ሻኽድ።²2.ኮዶ ይኸቱኒ ሺዋነድ ኡሩንሲክ ኣንፋሻተው ከው ቋሎ ሳቢሮሎም ይኖ ቤት ጸሎታትልኽር ጉጋትልር እሰነሰና ኩጃብል ዕንድር ፊቁርዱ ፈርግ እምንድክ ነን ነት ብሪል ናስድቅሲ ከለብርኑዅ።³3.እንቲ ደአም ወሽ ይሩንሲክ ኩላውናን እሳዅሲ ኩሸንገብ ናን አርእጊኒት።⁴4.እንኩኽር ሰሚል ህንባዅ ትብታኒኹሲ ቋላዅ ፈይሕል ፈደይሮከር መታን ወሽ ይሩንሲክ ትብታንድ አኽኒ።⁵5.ጸሎት እስዱኑይኸ እንፋሻተውድሰና ከውቋልዶሎም ልጝንቲ ጸሎታቱዲ ቃዕረትልኽር ደርፍፍ ሸልኽር አኪነክ ጠለ የውድሰና አኽጋ።ነን እምን እምንድክ ይየኩም እማና ብሪልናስድቅሲ ከለብርኑዅ።⁶6.እንቲ ደአም ሺውሩንሲክ ኩልጝሊ ቱሮ እድሲ አበድሮ ወደንሊ አኽሮ እንኩኽር ትብታኑዅሲ ሺዊሉ እን ስቱርሲ ቋላዅ ኩኽርኻ ኡሮካ ግን።⁷7.ይኸ ሺውሩ አረመንሰና ጋብ ብጅኽድ ዋስሰተው ተከዉሎም ጋብ በጀኽድጋ።⁸8.እንታኽር እንትን ይግድኒሉ ውራ ጀረብደትኩም በደሮ አርኡኹ እማ ናሰና አኽጋ።⁹9.እንትን ነሃብዲነ ሺዋ።¹⁰10.ይንኽር ዐስተርሊ መንደርትራኽር(ህንብራኽር) ኩሱጝ ሸተክኒ ኩሲመር እንትኒ ኩምራድ ዐስተርሊ አኸሰና ብሪልር አኽኒ።¹¹11.ይና ሳንሰዓ ግርጊኹሲ ንኪ ናኽና።¹²12.ይን ይነት ጂብደውሲና ብሕል ይነሰና።¹³13.እንትኽር ይና ጂብድነስ ብሕል ይና ምቊሊል ቱስግና ሸርልድር እርግሲና።¹⁴14.ውረድ እንትን ጂብደውሲኩም ናጂበስ ባርድነሰነሎም ኒሰና ሀበ እንታኽር ዕስተሩኹ ባርዶኩም ግን።¹⁵15.እንትን እንተት ጂብዳኹሲ ባረግደነን ኒሰና እንታኽር ዓስተሩኹ ባረለኩም።¹⁶16.ሹምድኑ ይኸ እንፋሻተውድሰና ከውድ ቋልስትድኖ ገሽሺ እንሸወውድሰና እንሸውጋ ውረድ ነን እምንድክ ድውየኩም ብሪል ና በነስ ከለብርኑዅ።¹⁷17.እንቲ ደአም ሹምሩንሲክ ኩኽር ዐስተርሊ ህንባኹ ቋልዶካ ካያ ከው ቋልጊንካ አዀርሲ ሸመቲ(ቋሪ)።¹⁸18.ገሽሺ ጀለጥሲ እንኩኽር ትብታንድ ቋለዅ ኡረካ።እንድባ ገዱኹዲ ቲዃ ገሮቡኹዲ¹⁹19.እና መናበረት ብሪኹል ኒል ፍርፍርዲ ልኽንጅዲ ቋኹሉኽር ሱኳን አረረና አካንልኽር እንታ ርድቅሲ እንኩልኩልጋ።²⁰20.ፍርፍርዲ ልኽንጅዲ ቊሮሎም ገረሰጋ አካንሊ አወት ዐስተርሊ እንኩልኩላ።ኒሰና ይኽ ስኳን አርድኖሉ ገረሰና አካንሊ እንታ ገድሲ ኒል እንኩልኩልጋ።²¹21.ውረድ ኩገድ ህምባ አካንሊ ኩለበካ ኒል አኸት አርኢ።²²22.ኩገሮብ ቲዃ ኩዕልል ግን ።ኩዕልል ሽርዊተን ኒውክ ኩገሮብ በርህሮ ግን።²³23.አከገጛ ኩዕል ምግዱር አከን ኒውክ ኩገሮብ ጨልመትሮ ግን እንኩል ህምባ ጭልምኻ ኒ ጨልመትና እምንድክ ጂብሮ ግን።²⁴24.ለጛ አርደትድ ወቀይሮ ገረሳዅ ላዅ ድኳ እላ ውረድ ወሪ ላኹሲ እንጠሮ እንላኹሲ እንከልዶ ግን ወሪይኸ እንላዅሲ አጃ ዮ እንላዅድ ጉሽሮ ግን።ጃርዲ ገድዲት ላት ከደምትኖ ወጅሃለኩም።²⁵25.ንድ ሰበትድ ውራ ቊኖ ውራ ጅእኖ ውራ ሰርኖ ይድኖ ጐሄይጋ የኩንኩም።ፊኹት ሳንሲዒልድ ገሮብኻ ሰረኒልድ ኪደለማ ?²⁶26.ጀከል ዕስተሩሲ መኸልታ ነን ፈደንኽር አረመንኽር ሐበሲትልኽር እንኩረኒ እን ዐስተርሊ ህምባ እንታኽር ዓየሸኩሎምር፡ዓወነኩሎምር።እማ አለማ ናልድ እንትን ትክስዲነ ኪደነት አርእድኒማ ?²⁷27.አወኒኒ እንተልድ ኒቊርቊርትነድ ኒ ዕቁብሊ ላስድር ኰድሮ ገረሳኹ።²⁸28.እማ ውሪኹ ናአኽዲነ ውራ ሰርደነት ጐሄይድናዀን እንደ ዓራይበል በኰሎ ህንባ ዕንቦብሲ ፈስተገውር አረምሰገውር ናው አኾ በኰለውዲ ዓንበበውዲት ቋለውር።²⁹29.ሰለሙን ድኳ ኒ ንስካ ሲመርዲ ኒኾርሲክ ናሰና ሰርገይስላ የኩንኩም።³⁰30.እማ ገድም ጃር ሻንካ ጊሪኹሲ ንኪኻ ህምባዅ አመሪኻ ሞሪል ማልሳኹሲ ናሀበ ሰርገያዅ አለማ እንተት ከው ከለላ አማነቱ ትክሰ በጃኽዶ ሰስጊድማ ተካኹንኩም።³¹31.እማ ውራ ቁኖ ውራ ጅእኖ ውራ ሰርኖ ይድኖ ግምሽድ እንታዐቅል ሽብውድጋ፡³²32.ኒስ ኒትክ አሬንኽር ጀረበነኩሉ።እንትንኻ እንተት ጀረብዳኹሲኩም እንታኽር ዐስተርሊ ህምባኹ ትክሰ አርእኹ።³³33.እንትን ሰልፍ ሲመርዲ ኒ ሸታከድትዲት ጀረባ ኒደምቢ እን ከብተኹካ ኰሲሰና እውስትረኩም።³⁴34.እማ አማሪሲ ይዱኑ ሳደድስጋ ግርገስክ ኒ ማሕገድ አቅንሉ።

¹1.እንትን ፈረድና ፍርድድ ፈረድስትኖ ግን።²2.እን ምክራ መከርድናኹድኻ መከርስሮልኩም ግን እማ ፈረድጋ የኩንኩም።³3.አበዲ ውሪዅ እንቲ እን ቀበር ኩዳንድ ዕሊ ህምባኹሲ መኻልትራኹን ውራ በደርዶ እንጫ ኩዕሊ ህምባ ኩርማድሲ ቋለላ።⁴4.አበዲ ኩዕሊ ኩርማድ ከላእኮት ዋኑንሲክ አወሃብረ ኩዳንሲ ግጂ ኩዕሊ ህንባ ቀበርሲ ፍድያካ ይራኹንሉ።⁵5.ነበንታ ብጛ በደርዶ ኩዕሊ ህምባ ኩርማድሲ ፍዲ ኒ ደምቢ ኩዳንድ ዕሊ ህንባ ቀበርሲ ፈጠንዶ ቋልዶ ፍቶሉ ግን።⁶6.ሻትክ ሰንዓታስ ግሽጝድ ኡጋ።ይኸ እንታ ሰርጎት ወንኪሪ ጃብል ገምድጋ ናት ዳድድጘ እንተል ግልጭዮ ነጀርጊንኩም።ሒል ጸሎቱዅ⁷7.ሺዋ እውስትሮኩም ግን ጀረባ አርትኖ ግን እድሲ ቀርቅሓ ብስትሮኩም ግን።⁸8.ኒውክ ሺዋኹክ እውስትሮሉ ግን ጀረበዃ አርዶ ግን ቀርቅሓኹዳ ብስትሮሉ ግን።⁹9.እንተልድ አወያዅ እኽር ግን ኒኹራ ሳንሳዓ ሺወሰነሉ ክርጛ እዋኹሉ።¹⁰10.ወሪ ይኸ ዓሳ ሺወሰነሉ ምራዋ እዋኹሉ።¹¹11.እማ እንትን ድኳ ምቁል አክዱኑ እንታቁርድ ትክያኹ ኡና አርእድናኽር እግዳ እንታኽር ሰሚኹ ሺወውድሉ ትክያኹ እዋጋኹማሎም ተካኹንኩም።¹²12.እማ ገድም እን አዳም እንተድ እሲሮኩም ጀረብደናኹድሰና እንትጝር ኒሰና እሰሉ።ውረድ ነት ግን ኦሪትዲ ነብያዲ ናው አረርሳኹ።¹³13.መራቢ ሽብዊሲ ትዋ ውረድ እን ድዲል አድረሪ መራቢ እዳንደሪ ግን ንር ጉግኻ ፋይሕ ግን ንርድ ፈረውኻ ገሪው ግን።¹⁴14.እን መራቢ ደኤንድረሪኻ ሽብዊ ግን ጉግኻ ሕንጣነሪ ግን እንንርቲ አረረዋ ከለለው ግን።ነቢታት ቡኑ¹⁵15.ነቢያት ብኑልድ ፈጠናና እውስትጋ ናጐስኩድ በቁጨው ትኹል አኩኑንሲክ ዒዶራ በጉኽ ሰርኖ እንተረው ግን።¹⁶16.ሃመልስጋ ናፍርርድ ፈረግትኖሎም ግን።ቀጠብልድ ፍርር ወይኒሩ ወሪ ይኸ ሕንጉልድ ባምፊ ቀንጠሽትሮ ገረስታኹማ ተካኹንኩም ?¹⁷17.እማ ኒሰና ግን ካና ትክይረሪ ትክየ ፈደን ፈደን እወቲ ካና ክያውረሪኻ ፈደን ክያወው እወቲ።¹⁸18.ካና ትክይረሪ ፍርር ክያወው ፍሪተላ፡ኒ ሰና ይኸ ካና ክያውረሪ ትክያ ፍርር ፍሪተላ።¹⁹19.ትክያ ፍርር ፍሪተግረሪ አኽራ ካነክ ቀረጭሾ ለኺል ማልስሮ ግን።²⁰20.እማ ኒሰና ና ፍርርድ ፈረግትኖሎም ግን የኩንኩም።²¹21.እን ዓስተርሊ ህንባዅ ይኽርድ ምራድሲ እሳኹ ግን ግራ እን ዎ ያደራ ዎ ያደራ ያኹ አኽላ ሲመር ጃሩኹሊ ትዋዅ።²²22.እን ኒ እንተራ ግርጋትሊ ገሪው ዎ ይናደራ ዎ ይናደራ ይን ኩስጝድ ተንብህንማ ይን ኩስጝድ መጂኒንሲ ፍድኑ ሰጝነሊማ ይን ኩስጝድ ትአምራት እሰኑ ሰጝነልማ ዩኑ እንትድኖ ግን።²³23.አጛ እንትን ቲስ ምቁል ጋራት እስደናኽር እንደራ ነወያ(ስርግያ) ይልድ አን አርእሊኩም ይየሎም ግን።ለበኪኹዲ ዓወዲ²⁴24.አኻኹክ ይጋበት ከለብሮ ትክያኹል እርግሳዅ ግርዋ ለበኪኹ ኒ ልጝንሲ ሸሺል ገበራኹሲ ተከኩ።²⁵25.ስዋ ሒለቱኹ ለቡኹ ኒውካ ኩርዲርኩር አኹዅ መታዊኻ እንልጝንሲ ገንፈልኹሉ(ብርግዕድ ኹሉ) ደአም ሸሺል ገበርሶ ዋንቲነዲን ላሪ አኽላ።²⁶26.እን ይጋበት ዋሶ ከለብረጋኹ ኒውክ ደአም እን ግርዋ ዓወድ ኒ ልጝንሲ ቁሺል ገበራኹሲ ተከኩ።²⁷27.ስዋ ሒለቱኹ መታዊ ከላእዲክ ለቡኹ ኒውካ ኩርድ ኩር አኹኹ።እን ልጝንሲ ገነፎ ባሮሰነኸሉ ፍልውይኹ ኒ ለብናኻ አቅትራሲክ ክያውኹ።²⁸28.ኢየሱስ ነዋዮ ጋበሰና ከውኒጋብድ ፈከርስኖ “አላ ጋዶ ግን” ይኑኹ።²⁹29.ናት ፈከርዳዃ ና ከታበንሰና አኽጊ ላኹ አደሪሰና አኾ ክንሳኹሲ ቋልንነዲን ግን።

¹1.ጊሪልድ ገመሰናኻ ከው ከላእ ተለይንኹሉ።²2.ግርዋ በርሰትድ መግደራዅ “ዎ ያአደራ እንቲ ጀረብረዶልክ ነገይድቶለ ገረስራኩ” ዩ ኒ ጃብል ሐርበጡኹ።³3.ኢየሱስኻ ኒ ናንሲ ኒልአኽታሲክ ጠለቆ፡ተመዶሉኻ “የዋ ይምራድ ግን ነገዪ” ይኹሉ።ንርድን ንርድኻ ነገይዅ።⁴4.ኢየሱስኻ ፈሪ ቀሺሪል ቋልስቲ እን ሙሴ መዃዃኹድሰና ሳምዕ አኽሮልካ ሰደቀት ገምዲ ላኹድኻ ድወግ ሰተሪ ይኹሉ።ግርዋ ሊኽ አደራ⁵5.ኢየሱስ ቅፍር ናሆምትል ዔረሰና ግርዋ ሊኽ አደራ ኒል እንቶ፡ኒ ጃብል ሐርበጥዅ እማ “ዎ ይአደራ እልሊለ ይኹራ መግደሮለ መግደሮለ ላሪትል እላ አርግል ማልሶ ምጨትድ አላለ የኩ” ዩንሲክ ሺዊኹሉ።⁶⁷6-7.ኢየሱስ “እጃ ኒል እንቶ እቢስየሉ ግን” ይኹሉ።⁸8.እንሊኽ አደራኻ ክልብርሰ “ይአደራ እንቲ ይልጝሊ ቱቶ ወጀበለለ ነት ዋንትሩ ላጋባ ካያ ዪ ይኹራኻ እቢርደለ”።⁹9.ውረድ አጝር ከዋ ሲመር ስቆይሲ ህንባ ግርዋ ግን።ይስቆይሲ ዓሰከር ሻኹን ናልድ ላኹሲ ፈሪ የኩንሉ ንኻ ፈረኩ፡ይኸ ላኹ የኩን ንኻ እንተረኩ ይገንጀነስ ይኸቱነ ኒስ እሲ የኩንሉ ንኻ እሰኩ ይኹሉ።¹⁰10.ኢየሱስ ነስተካ ጋብሲ ዋሰሰና አቅተራሲክ ፈከርሱኹ እማ እን ኒል እርጋ ከወል ግልጭዮኻ “እምን እምንድክ የኩም ንስካ እምነት እስራኤልትል ድኳ ቃሊ” የኩንኩም።¹¹¹²11-12.ብርክስጚልድር ኳራ ለብልድኽር ከው ከላእ እንትድኖ ሲመር ጃርኹል አብርሃምዲ ይስሐቅዲ ያዕቆብዲ ዲ መአዲሪል ዓገልስድኖ ግን እን ሲመር ቁርኻ እንደራ ከደን ጭልምሊ ማልስድኖ ግን ኒልኻ ስረናዲ እርኩክ ሐርቀቅነዲ አኽሮ ግን የኩንኩም።¹³13.እንሲን ኢየሱስ እን ሊኽ አደሪል ግልጭዮ “ፈሪ ኩእምነተሰና አኹንኩት” ይኹሉ፡እን ወክቲትልኻ እን ኒኹራ እቢርኹ።በጥሮስር ተንሺኒዲ ገሪው አሪውዲት እቢሰት¹⁴14.በጥሮስር ልጝሊ ቱዎሰናኻ ቤጥሮስር ተንሺኒ ሻማ ሻኾላ አርግል ዲዊቲሉ።¹⁵15.ንኻ ናንሲ ተመድኹላ ንርድንርድ ሻማ ባሮላኻ ጉሮ ዓወንቲሉ።¹⁶¹⁷16-17.ኩንጝ አኾሰነኻ ገሪው መጃኒን ናቅስንኹሉ ናትካ ላጋበሲ እቢስኹሎም።ይኸ ኒሰና ገሪ ምስ ምስድ መግደረው ናዕስንኹሉ ነስር እቢስኹሎም።ኒንኻ እን ነቢ ኢሰያስ “ይና ሕይምንተዲ ይና ሽኹደዲት ኒሹትል አድኹ ” ዮ እርጋኹ አኽሮር መታን አኻኹ ግን።¹⁸18.ኢየሱስ ከው ከላእ ከለልኖሉ እንደራ ወረበስ ካርዶ ጐና ይኹሎም። ኢየሱስቲ ተለይና ተባተክና ጀረብደት¹⁹19.ላ ከታባኻ ኒል ስኩር ይኹ እማ “መምህር እንቲ ፈርዳኹልክ አን ኩዲ ፈርያ ግን” ይኹሉ።²⁰20.ኢየሰስኻ “ቈንሸል ናግፍፍሲ ሻኽንኹ ጀከልር ናልጝንቲ ሻኽንኹ አዳሚንድኹራኻ ኒ አኾርሲ ድኩርታኹ አካን ድኳ ሻኽላ” ይኹሉ።²¹21.ኒ አጋርልድ ላኹ ይኸ “ዎ ይአደራ ሰልፍ ይኽርሲ ደቢያ ባሪለ” ይኹሉ።²²22.ኢየሱስ “ተለዪለ ክሪውሲ ክሪው ደቢድኖሎም ባሪ” ይኹሉ። ደሃፈት በሐሩሲ ሀንእደት²³23.ታንኳትል ቱዎሰና ኒታለይቱት ተለይንኹሉ።²⁴24.እናሐና ወላውል ሒለቱ ታንኩተሲ ኩስራሲክ አፍሎት ከላአንሲ እሰኹ፡ኢየሱሳ ጅምኹ አዶሉ ቀምሰ ግጅኹ።²⁵25.ኒ ታለይቱታ ኒል ስኩርኖ “ዎ ይና አደራ ድድንኹን እልሊና” ዩኑ ጉድንኹሉ።²⁶26.ኒኻ “ነበንቲ ከለላ አማነቱ ውሪኹ ንስኮት ጓቚደናኹን” ይኹሎም።እንሲን ጐኻ እን ወላውልዲ በሐርዲት ዋኺትኹሎም ኒውካ ድግ ይኹ።²⁷27.ኒል እርጋ ከው ነስተካ ወራትሲ ቋልኖሰና “ኒን አወያኹኒ ወላውልዲ በሐርዲ ዋሰውሉ አላ ጋዶ ግን ኒና” ዩኑ ፈከርስንኹ።መጃኒን²⁸28.ገርጌሶንዲ ብሪል እንደራ ወረበስ ካሮሰነኻ ለጛ ግርው መጃኒን ሻዉ አርፍልድ ፍኖ ጋጙኑ እንትንኹሉ ነን ገሪኹ ምቑልዲስኖ ሰጘው ግን እንናው እርግና አካንድ ላኹ ደኩሮ ገረሱ ሰጘላ።²⁹29.ነን ኢየሱስር ጃብል አኽነሰና “እንቲ ኢየሱስ ጃርኹራ እንቲ ይነዲ ውራ ሻኽርኹን ይና ወክት ገእይጊ ነሀብረ ሳደድርኹና” ዩኑንሲክ ዋዕ ይድኖ ተርሲኒኹ።³⁰30.ናልድ ስርግ ይሮኻ ወንኪር ሸፈልስሮ ቊሩ እርግቲ።³¹31.እንሲን እን መጃኒን “ፍቶና አክረን ኩዐይብ እንጫ ወንኪርሊ ቱስቶና ” ይንኹሉ።³²32.ኢየሱስ “ፈራ ቱዋ” ይኹሎም ናዋ እን ግርዊልድ ፍኖ እን ወንኪርሊ ሩኑኹ።ናውኻ ገለብሮ በኸረድ ትንኩሪርዶ በሐርሊ ሸመምስቲ።³³33.እን ምቓቕ ኒልድ እግረው ኮል ዔርኖ ኒትክ ድሪስንኹ።³⁴34.እንኮቕርኻ ነስተካ ወራትሲ ዋስነሰና ኢየሱስቲ አርድኖሉ እን አካንሊ ፈርንኹ ናኮልድ ወረቢልድ ዓጨጭስሮሎም ሺዊኒኹሉ።

¹1.ታንኰትድኻ ኒራ እንደራ ወረበስ ካሮ ኒኮል እንትኹ።²2.ኒልኻ ዓቀልሶ ህምባ ግርዋ ዓራትሊ ምኹርኖ ናቕስንኹሉ ኢየሱሳ ና አማነትሲ ቋልነዲን እን ምግዱርሲ አረጊ ይኹራ ኩሓራም ባርስትኹካ ይኹሉ።³3.ኒስ ዋስነሰና ላው ኒል ዲወው ከታበንልድ “ኒን አበዲ ውራያኹን ጃርሲ ጀኸኩ እንኩኽ” ዩኑ ናለፈክድ ምቊል ሀመትኑኹ።⁴4.ኢየሱስኻ ናለበካ ምቊልናርሲ ቋልነዲን “ውሪኹ እንታ ለፈክድ እከይ ሐሰብድናኹን።”አበዲ ይኹሎም።⁵5.አዊን ስዳዋኹን ኩዓገብ ባርስትኹካ ይናማ ወሪ ጉ ፈሪ ይና።⁶6.እማ አርእትኖ አዳሚንድኹራ ብሪል ሓራምሲ ባርዶ ሒል ክመት አርእትኖ ዮ።እማ እን ምግዱርሊ ግልጭዮ፡ጒ ኰዓራትሲ ምኹርዶ ኩልጝሊ ፈሪ ይኹሉ።⁷7.ንኻ ጌ ኒ ዓራትሲ ከስል ምዅሮ ኒ ልጝል ወንተሩዅ።⁸8.ከው ነስ ቋልነሰናኻ ታንቲኒዅ፡ጃርሲ ነወያ ሒል አዳምሲ ኒ ኡነድ ሐመድንኹሉ። ማቴዎስር ሽጝስትና⁹9.ኢየሱስ ኒልድ ላመደት ደኰሰና ግርዋ ማቴዎስ ይስታዅ ወርኮር አካንሊ ከፍዮ ህንባዅሲ ቋልዂ “ጒ ይዲ ለሄኪለ” ይኹሉ።¹⁰10.ንኻ ጌ ኒዲ በገስቱዅ ኢየሱስ ኒልጝል ቱዎ ኒዲ ቁሮ ዓገልሱዅ ይኸ ገሪው ወርኮ ፍደንቲዲ ሓራሙዲ እንትኖ ኢየሱስዲ ኒአጋርዱ ድኻ ዓገልስኑዅ።¹¹11.ፈሪሳን ኔስተካ ጋርሲ ቋልነሰና ኒ አጋርሲ አበዲ ውሪኹ እና እንታ መምህር ወርኮ ፍደውዲ ሓራሙዲ ሕበርሰ ቋኹን ይንኹሎም።¹²12.ኢየሱስ ዋሶሎምኻ ትልላዅሲ ጀረበው ሽኹሽተው ግን ግራ ሽርው አኽኒ ይኹሎም።¹³13.አን ብሕል ጀረበኩን ግራ ሰደቀት ጀረበሊ ያዅሲ ውራ አኸት ፈራ ክንታ አን ይእንተርና ድደውሲ ጀረብያ ግን ግራ ሻትካንሲ አኽሊ ይኹሎም።¹⁴14.ላግርጋ የሐንስር አርጋ ኒል እንትኖ ኤበዲ ውሪ ምስምስድ ይነዲ ፈሪሳንዲ ገሪዅ ሽምናኽር ኲ አጋርኻ ሹመገው ይኑኹሉ።¹⁵15.ኢየሱስ ማስ መርዓዊራ ናዲ ዋንቱ ቊርቊርትድኖ ገረስትሮሎም ተካኹመኩም መርዓዊራ ናልድ አስታ ግርጋ እንትሮ ግን እንሲን ሹምድና ይኹሎም።¹⁶16.ትከባ ሐዲስ ታዊና ባልይዲ ተከብሰላ አከገጛ እን ትከባ ታዊነስ ትክሰ ሔቅሰኩሉ እን ኒ ሐቅይነኻ አቅትራሲክ ጂበኲ።¹⁷17.ሚድ ሐዳይሲ ሐርብ ባልይሊ ኣሰለሉ አከገጛ ሐርብ ቀደስሮ ግን ሚድ ከደንሲ ብቊቲሮ ግን ሚድ ሐዳይስ ሐርፍፍ ሐዳይሰል አኽሮ ሻኲ እንሲን ኒውክ ትክዮ እንኩርሰኩ።¹⁸18.ኢየሱስ ናኸ ጋቡ እንሐን ናልድ ላግርዋ ልጝ ጸሎትሲ ተከወውልድ ኒል እንቶ ኒ ጃብል “ይቊራ ናንናን ክርቲ ላዅ ኲናንሲ ገምዲላ እቢርቶለ” ዮ ሺዊኹሉ።¹⁹19.ኢየሱስ ኒ አጋርዲክ ጌ ኒዲ ፈሩዅ።²⁰20.ፈሩኻ ላ እዅና ብር ፈስሩ ሽካ ለጛ አመራ እስረሪ ኒጉርበትድ ቃጨውሩ እንትሮ ኒታዊና ቊጭንሲ ትምድሲቲ።²¹21.ንርለበከድ “ኒታዊና ቊጭንሲ ተመደን ግን ግራ እቢርድያ ግን” ይሮ ሳዳ እስሩ እርግቲ።²²22.ኢየሱስ ግልጭዮ መኸልትኹላ እማ “አረጊ ይቊራ ኩእማነት እቢስኹኪ” ይኹላ።እንሲንትልድ ተርስረኻ ብር ሻጝኹላ።²³23.ኢየሱስ እን ልጝ ጸሎት አደሪ ላጝሊ ገእየሰና ከው ስረውዲ ሄቦ የውዲ ውጭጨውዲት ቋሎዅ።²⁴24.ኒኻ “ስርግያ ስርጋ እና ዓንቂ ክርዶ እልላ ገጝጅሮ ህንበቲ” ይኹሎም።ነዋዮ ጋበሰናኻ እንቋሪኒኹሉ።²⁵25.ከው ልጝልድ ፈሰናኻ ትውዅ እማ ናንሲ ሻኹኹላ ንርኻ ጉቲ።²⁶26.ኒንኻ እንኮል ድሪስቱኹ (ወሪስቱኹ) ።ለጛ ዓረፍ²⁷27.ኢየሱስ ኒልድ ደኮሰና ለጛ ዓርፍ ዎ ዳዊትዅራ ሳኸንቲና ይኖ ጨርሑኑንሲክ ኒ ጉርበት እንትኹሉ።²⁸28.ልጝሊ ትዎሰናኻ ኒል እንትንኹሉ ኢየሱስኻ “እና እንትን ጀረብደናኹሲ እስየልኩም ሒል ክመት እምንደናኹማ” ይኹሎም።ናውኻ “የዋ ይና አደራ” ይንኹሉ።²⁹29. እማ እንታ እማነትሰና አኽንተት ዮ ናዕልልሲ ተመድኹሎም።³⁰30.እንሲን ናዕልል ብስትኹሎም፡ ላኹድ ድወግኒጛ ተብዶ መኾኹኹሎም።³¹31.ደአም ኒልድ ፍኖ ኒልክ ድሪስኑዅ።³²32.ነን ፈርነሰና ላዅ ልጉም ጅኑን ሻኹሲ ናቅስንኹሉ።³³33.ጅኑንሲ ፍደሰነኸሉ ጋቢዅ ኒል እርጋ ከዋ ኒስተካ ወራትሲ ቋልነስና “እስራኤልትል ነዋያዅ ኒኾርሲክ ቋልስቶ አርእላ” ይኑ ፈከርስኑዅ።³⁴34.ፈሪሳን ኒን አበዲ ሸዋጢና አደራድ ግን ሽዋጢንሲ ንፍዳዅ።³⁵35.ኢየሱስኻ ና ልጝ ጸሎታትልኽር ናደገጊትልኽር ጅልልወክ ናምግዱራንሲኽር ትልሉ ሲመር ጃሩኹሲኽር ክንሱሎም ሰጘኲ።³⁶36.ከው ገሪውሲ ቋሎሰና በግ ምቃቅ እንግግረሪርሰና አኽኖ ቋልስትንኹሉ እማ እምንድክ ሰኻንዲስንኹሉ።³⁷37.እንሲን ኒአጋርሲ “ኪሽጝ ካብስተው ገሪው ግን አረስኻ ኡቊቱግን እማ፡³⁸38.ኪሽጝ አደረስ ሺወሉ አረስ ኰድሮ” ይኹሎም።

¹1.እን ሽካ ለጛት ኒል ሽጞ መጃኒንሲ ፍድኖኽር ምግዱራንሲ እቢስድኖኽር አኻ ሽዅ ዲውሲክ ትልልድኖ ሒል እዎ እንሻቕኹሎም።²2.እንሽካ ለጛር ስጙጝጛ ነን ግን፡ሰልፍ እን ቤጥሮስ ይስታዅ ስምዖንዲ ኒ ዳን እንድርያስዲ ያዕቆብ ዘብዴዎስዅራዲ የሐንስ ኒ ዳንዲ ግን።³3.ፍሊጶስዲ በርተሊሞስዲ ቶማስዲ ማቴዎስ ወርኮሩዅዲ ያዕቆብ እልፍዮብኹረዲ ታዲዎስዲ።⁴4.ስምዕን ቃና ሩዅዲ እን ደኲሶ እዋዅሉ ይሁዳ አስቆሮታዊራዲ ግን።⁵5.ሽካ ለጛ ነስ ኢየሱስ እንሻቅኹሎም፡ነዋዮኻ መኾኹዅሎም አረመዲ ጉጋት ፈርጋ፡ኮዶ ይኸ ደገጊት ሳምራውኮልዱልኽር ዔርጋ።⁶6.እን እስራኤልዲ ፈራዕልድ ድድራ በገሊ ካያ ፈራ።⁷7.ፈርዱኑንሲካ ሲመር ጃሩዅ ስኲሩዅ ይዱኑ ሰበከሎም።⁸8.ሽዅሽተውሲ እቢሳ ክረውሲ ጉዳ በርሰቱሲ ለጭሕዳ መጃኒንሲ ፍዳ ካየድ እውስታዅሲኩም ካየድ እዋ።⁹9.እንታ ማሕፈዳትሊ ደሃብዲ ወርካዲ እስራዲራዲ አድጋ።¹⁰10.ዋቕይድ ኒበና ህንበኩሉ እማ ደርብድ አኽሮኩም ይድኖ ሊኳ ውሪ ለጛ ታዊና ውሪ ሻንፍፍ ውሪ ይኸ ግንቢ አደጋ።¹¹11.አተይድኖ ኮልክ ግርዋ እካዅራ ዋነን ወንቀራ እማ ኒል አተያ ፈርትናሲክኻ ኒል አኻ።¹²12.እንልጝሊ ቱደነሪት ሰላም የላ።¹³13.እንልጝን እንታ ገውራ ወጀበኹሉ አከን ገእይሮሉ ግን አከገጛ እንታ ገውራ እንተል ወንተርደኩም።¹⁴14.ከለብረግነንኩም ወሪ ይኸ እንታ ጋብሲ ዋሰግነን እንልጝንልድ ወሪ እንድገትልድ ፋ እማ እንታ ሻንፍፈውሲ ከፍከፍድኖ ፈራ።¹⁵15.ፍርድ ወክተል እንድገትልድ ሶዶምዲ ገሞራዲሲ ስዳወት ድወኩንኩም እንኩኹን።¹⁶16.እናሐን አን በግሰና ቱኹል ዓንቀይል ፈሰኩንኩም እንኩኹን።በሳረን ምራውሰና ናሰሐንኻ ኳትሪ ሰና አኻ።¹⁷17.ከው ናዲቢል ገምድድኖኩም ግን ናልጝን ጸሎታትልኽር አድኖ ቀለጥድኖኩም ግን እማ አዳምትልድ ምልይጋ።¹⁸18.ናድር አረመንድር ሰማዕ አኽሮ ይሰበትድ በሄሊልዲ ሰየምዲር ጃብል ገወድኖኩምር አድኖኩምር ግን።¹⁹19.ዲቢል ደው ይድኖሰና ውራይኖ ጋቢኖ ግን ይዱኑ ሳደድስጋ። እንሲን ውራ ጋብደነት እውስትሮኩም ግን።²⁰20.እንሲን እንትን አኽድኒ ጋብደናኽር እን መንፈስ ጃር እንታኽርዱኹ ግን እንተድ እሰ ጋባኹ።²¹21.ዳን ዳንሲ እኽርኻ እኹረስ ክሪል ደኩሶ ኡሮ ግን፡እቊር ና እክልዲ ና ገንዲር አወይሲ ጉኖ ኩድኖሎም ግን።²²22.ይሱጝ ሰበብድ ናውክ እንጠርድኖኩም ግን።እን ደንጎቢል አኽራሲክ ዓቅል እሰኹካ ደአንዶ ግን።²³23.ላ ድገትል እንጠረነንኩም ኣሪ ድገትል እግራ እምንድክ ይየኩም አዳሚንድኹራ እንትራሲክ እስራኤልዲ ደገጊትሲ ናልክ ገእይደኒለን።²⁴24.ኒ መምህርልድ ኩጛኹ ተመሃራይ ኒ አደሪልድ ኩጛኹ ገንጂና እላ የኩንኩን።²⁵25.ተመሃራይ ኒ መምህርስና አከን ገንጄናኻ ኒ አደሪ ኮት አከን አቅትረሉ።ልጝን አደረስ ብዔል ዘቡል ይኖ ደንቢ ኒ ዕያልሲ ኒልድ ጂባኹ ይድኖሎም ግን።ኩእምነትሲ ጓቊትግሪ ቋሊስና²⁶26.ላኹ ስቱር ቀልዕስተጋኹ እላ ይኸ ትብታኹ ፈይሕል ፋጋኹ እላ።²⁷27.እን ጭልምሊ ኩሩኩ ያኹሲኩም አድሐ ጫዕዳኹል ጋበሉ ይኸ እንቊዊል ሕሽኩሽኩ ይስታኹ ሲኩም እራሪል ዓረግድኖ ሰበከሉ።²⁸28.እንፊኹትዲ ስኻዲት ድሂስሮ ገረሳኹሲ ጓቚታ ግራ እንስኻስ ኩሮ ፊኹትስኻ ላሪ ሄቢሮ ገረሰገውሲ ጓቚትገሎም።²⁹29.ለጛ ጀከል አንኳ ሳንቲምድ አኽለማ ናክስትና እንታኽርድ ምራድ አከገን ላሪ ድኳ ናልድ ብሪል ለበላ የኩንኩም።³⁰30.እንታ አኾርሊ ህንባ ሽብክር ላሪ ከብተግሪ ሺብስተው ግን።³¹31.እማ እንትን ላሪ ጓቊትጋ ውረድ እንትን ጀከልድ ትክሲዲነ ኪደነኲ።³²32.ላዅ ከዋ ጃብል አምነንለ አጝር እን ዓስተርሊ ህንባ ይኽርድ ጃብል እምንየሉ ግን፡³³33.ላዅ ከዋጃብል በረያዅስኮትለ ከመን አንኽር እን ዓስተርሊ ህንባ ይኽርድ ጃብል በረይየሉ ግን።ክርስቶስቲ ተለይና ሻግራይ አክና ጀረብደት³⁴34.አን ብሪል ነት እንቶ ህንባዅ እንሽኽ ተከልድያ ግን ግራ ወርክናይ ናቅሰያ አኽሊ።³⁵35.ውረድ እዅረስ እኸርልድ እቚረት ገነትልድ ስርጒት ንዃዅትልድ ሲድያ ግን ይእንትና።³⁶36.አዳምቲ ኒት እንጠረው ኒ ከው አኽድኖ ግን።³⁷37.ኒኽርዲ ኒገነዲት ይልድ ክብሰ እንከላዅ ይድ ወጀባዅ አኽላ ኮዶ ይኸ ኒዅረስ ውሪ ኒቚረት ይድ አወይሲ እንከላዅ ይድ ዋጅብ አኽላ።³⁸38.ኒመስቀል ደንደኖ ተለየጋዅክለ ይድ ኣከዅ አኽላ።³⁹39.ኒ ፊዅትሲ እንከላዅ ድሂስሮላ ግን እን ኒፊዅትሲ ይመታን ዲሂሳዃ ደኤንድሮላ ግን።⁴⁰ክርስቶስቲ አወሃብረ ከለብርደትሉ40.እንተት ከለብራዅ ይት ከለብረኲ እንይት ከለብራዃ እንይት እንሻቃዅሲ ከለብራኲ።⁴¹41.ነቢራስ ነቢራ ስጝድ ከለብራዅ ኒበና ነቢሪዅድ ሰና አኽሮ ግን።⁴²42.ሻትክሲ ሻትክ ስጝድ ከለብራዅ ኒ ገፍሲ ሻትኲዅድ ከለብርዶ ግን።

¹1.ኢየሱስ እን ሽካ ለጛ ኒ ታለይቶትሲ ትእዳድ ኡዎ ደምቢ ክንሲሮኽር ኒልድ ና ደገጊትል ደኲዅ።²2.ዮሐንስ ንሽዊል ዋንቱ ኢየሱስር ጋርሲ ዋሱዅ እማ ለጛ ኒ አጋርልድ ኒል እንሻቆ፡³3.እንትሮ ህንባዅ እንትማ እማ ኤሪዅ ጨበርኖ ፈርናኽር ይዅሉ።⁴4. ኢየሱስ ፈራ ወንተርድኖ እና ዋሰደነውስኽር ቋልደነውስኽር የሐንስሲ ድወሉ።⁵5.ዓረፍ ቋለነኲ ደልጓሳት ፈረነኲ በርሰቱ ለጭሐነኲ ጨማማን ዋሰነኲ ክረው ጓነኲ ድብራንድኻ ኪሰሪ ድውስተኩሎም።⁶6.እን ይድ ኰለፍሰጋዅካ ሻትክ ግን ዮንሲክ ወን ስዅሉ።ኢየሱስ ዮሐንስ መጥመቅቲ ሳበትሉ⁷7.ናው ፈርኖሰና ኢየሱስ እንከውሲ የሐንስሩዅድ ነዋ ይዅሎም ውራ ቋልትኖ ግን እንትን አውከደንሊ ፍድናዅ፡ወላውልድ ነነይ ያዅ ሻንብቆራማ።⁸8.እንደ አበዲ ውራ ቋልትኖ ፍድንዅን ደበላናት ሰሮ ህንባ ግርዋ ቋልትኖማ አኽለባ ሐራይር ሰረው አስያማ ልጝንትተል ግን ናው አረርሰናዅ።⁹9.እማ ውሪዅ ግን እንታፍና ነቢራ ቋልትኖማ የዋ እለማ ነቢሪልድ ድኳ ክብያዅ ግን የኩንኩም።¹⁰10.ኒን እን ኲ ጉግሲ ደለምደዅካ ኲ ጃብል ይንሽቀስ ፈስያ ግን ይስቶ ከተበሳኹሉ ግን።¹¹11.እምን እምንድክ ይየኩም እኲንልድ እዃርሰውልድ የሐንስ መጥምቅልድ ላዅ ግርዋ ኲጛዅ እላ ደአም ሲመር ጃሩዅል እንሽጓዅ ኒልድ ኲጛዅ አኽሮግን።¹²12.የሐንስ መጥምቅትልድ ንኪ አክራሲክ ሲመር ጃሩዅ ሒልድ ትውስተቲ እንኲቲ፡ሒለቱውክኻ ሸተፈነኩላ እንኲኑዅ።¹³13.ውረድ ናውክ ኦሪትዲ ነብያትዲ የሐንስትል አኽራሲክ ተንብህኑዅ።¹⁴14.ከለብርትኖሉ ጀረብደናኽር አክደነን እን እንትሮ እርጋዅሉ ኤልያስ ኒ ግን።¹⁵15.እንዋሳ እንቁው ሻዅክ ዋስኒ።ሻኪሰና እንጋ ከው¹⁶¹⁷16-17.አበዲ እና አሰል ነስ አውዲ መጢስንሎም ነን እንግናቲት ቃዕረትሊ እንኲልኲልስኖ ና መስዋትሲ ሽጝው እማ ዕንድርሲ ጠዓምብንኹን እንትጛ ጐሊትድኒ ይኸ መውዒት ሄበብንኹን እንትጛ ስርዲኒ የውሲ ተከነኲ።¹⁸18.ቋጋኹር ጅአጋኹር የሐንስ እንትዅ ኒን ሸጣን ሻኲ ይኑዅ።¹⁹19.ቋዅዲ ጅአዅዲ አደሚንዱዅራ እንትዅ እናሐን ከላእ ቋንታዲ ጅኤንታዲ ወርኮ ፍዲሰውዲ ሐራሙዲር ማዳ ይንዅሉ።ደአም አምር ንር ውራታትድ ወርኪትቲ(ሸተክቲ)።²⁰20.ንድደንቢ ኢየሱስ እን ገሪ ተአምራት እሰ ደገጊትሲ ናሐራምድ ጥዕስና ብንነዲን ቀጠቦ ነጨጉኹለን።²¹21.ነዋኻ ይኹለን አጀዋ ኲራዚ አጀዋ ቤተ ሳይዳ እንተል እስተው አምራት ጢሮስዲ ሲዶናዲትል አኸው አከን እማና አክያስ ሰርኖ ሽባር ቋርኖ ብሕል ሺዊድንድ ሻው ግን።²²22.ንድሰበትድ ፍርድ ግርግል እንተልድ ጢሮስዲ ሲዶናዲሲ ስዳውሮ ግን የኩንኩም።²³23.እንትኻ ቅፍርናሆም ዓስተርሊ አኽታሲክማ ክብይቶ ተካኹንኪ አኽላ የውመላልኪ ገሃነብሊ አኽታሲክ ኲልኲልትቶ ግን፡ውረድ ኩል አኻ አምራት ሶዶምትል አከን ናን አኽታሲክ ዋንቲትድ ሻኽረሪ ግን።²⁴24.አጃና ፍርድ ኳሪል ኲልድ ሶዶምር ድገሲ ስዳውርዶ ግን የኩንኪ።ወንጌል ናስሐንድ²⁵25.እንሰከር ግርጋትሊ ኢየሱስ ነዋዬ ጋቢዅ ዎ ኣበ ብረዲ ዓስተርዲር አደራ እና ጋራት ነስ አረአውዲ ለበኪውዲትልድ ትብስሮ ግናቲትድ በርህድራኽር ሐመደኲንካ።²⁶26.የዋ ኣቤ ኩምራድ ኒሰና አኽነዲን ግን።²⁷27.ይኽርልድ ኒውክ እውስቶለ ህንበኰ እዅረስ እኽር እኽጋዅ ላዅ ኤርእለሉ እኽርሲ ይኸ እዅራዲ እን እኽር ኒድ ጋሊህድሮሉ ጀረባዅዲክ አከገን ላዅ አርእለሉ።²⁸28.እንትን ናውክ ሐገስትድናኽርዲ ምኹርሲ ቂልስድናኽርዲ ይል ላዃ አን ፊዅዲያኩም ግን።²⁹29.አን በኪትዲ ምእክር ለበኪዅዲ ግን እማ እንታ ፊዅትድ ፊዃ አርትኖ ይል ለዃ።ይወኽደምሲ ሙኹራ ይልድ ኪንታ።³⁰30.ውረድ ይወኽደምኻ ታሚታዅ ይምዅራ ስዳዋዅ ግን።

¹1.እንሰከር ወክታትል ሰንበርድ ኪሽጛ ነበክድ ደኩ ኒታለይቱት ከአርትኖ ሱር ሸልዒነክ ናናንትትድ ሐሰዪነክ ቊድኖ ተርሲኒዅ።²2.ላው ፈሪሳንልድ ነስ ቋልነሰና ውራ ቋለለማ እንቲ እና ኲታለይቱት ሰንበር ግርገድ እስተጋ ወራት እሰውሲ ዩኑ ሸከይንኹሉ።³3.ንኻ ውራ ዳዊት ከአርተሰና ኒ ጨርዲ አኾ እሰዅሲ አምበብድግድናኽርማ።⁴4.ቤት ጸሎትሊ ኒ ጨርዲ ቱዎ ካህናት ካያ ቋና ሳንሳዓስ ቄት።⁵5.ወሪ ይኸ ካህናት ሰንበርድ ቤት ጸሎትሊ ቱወነት ከታ ሺብስተገትሎም ኦሪትል አምበብድግድናኽርማ።⁶6.እማ እርእኖ እናሐን ነት ቤት መቅደስልድ ኲጛዅ የኩንኩም።⁷7.እን አን ብሕል ጀረበኩን ግን ሰደቀት አኽላ ያዅሲ ፈሀምደናኽር አክደነን ላሪ ከታ እንጋ ከውሲ ምቊልዲኒዅ ይግድኒድ ሻኽድናኽር ግን።⁸8.እማ አርእትኖ አዳሚንድዅራ ሰምበር አደራኽር ግን ይኹሎም።ላግርዋ ኒ ናን ኢዳዅሲ እቢሰት⁹9.ኒልድ ደኮሰናኻ ሰንበርድ ናቤት ጸሎትል ትዉዅ።¹⁰10.ኒላ ግርዋ ኒ ናን ኢዳዅሲ ናቅስንዅሉ።ኒድ ሸከየና ምስምሳ ጀረቢነኻ ሰንበርድ አዳምቲ እቢስና ገረስታዅማ ይንዅሉ።¹¹11.ኒኻ አውኒ እንተልድ ላ በጋ ሻዅ እማ ሰንበርድ ጎቊል ለብረን ፍደጋዅላ።¹²12.እማ በጋትልድ አዳም ትክሰ ኪደለማ ኒን አኾ ደንቢ ሰንበርድ ትክስና ወርካ ግን ይኹሎም።¹³13.እንሲን እንግርወስ ኩናንሲ ጠለቂ ይኹሉ ንኻ ጠለቊዅ ኒዳ እን ንርጨረርሰና እርዊቲ።¹⁴14.ፈሪሳን ኒስ ቋልኖሰና ኒልድ ፍኖ አወሃቢነ ኲወነትሉ ኰድጚኒዅ።¹⁵15.ኢየሱስ ናኰድጛ አርእስቶሉ ኒልድ ስርግ ይዅ ገሪው ምግዱራንኻ ተለይንኹሉ ናትካ እቢስኹሎም።¹⁶16.ላዅድ ድወግኒንኻ ተብዶ መኾዅዅሎም።¹⁷17.ኒንኻ እንነቢ ኢሳይያስ ነዋዮ እርጋ ጋብ አቅትሮር መታን አኻዅ ግን።¹⁸18.እናሐን ይዅራ አን ፍሪራዅ ኒድ ይፊዅት ቀሽቀሻኲ ይመንፈሲ ኒል ገምድያ ግን።ኒ አረመንድ ፍትሕ በሸርድሮ ግን ያዅ ግን።¹⁹19.ኒ ዋኺትሮኽር ኒጋበት ዲቢል ላዅድ ዋሲስሮ አኽላ።²⁰20.ፍትሕ ሄለልይራስክ ሻምብቆራ በጢራዅሲ ከረላ ቲዃ ትድጛዅሲ ስንስደላ።²¹21.አረመን ከዋ ኒ ሱጝድ ሳዳ አርድኖ ግን።ላዅ ጅን ሻዅድ እቢርናዲ መንፈስ ቅዱስ ጀኸንዲ²²22. ላ ግርዋ ዓረብዲ ልጉምዲ ጅኑን ሻዅዲ ናቅስንዅሉ።ንኻ እቢስዅሉ።ዓረብዲ ልጉምዲ እርጋዃ ቋልዶኽር ጋቢሮኽር ገረስዅ።²³23.ከው ኒስ ቋልኖሰና ፈከርስኖ ዋሃ ጋዶ ድዋ የሄው ኒን አውአርእዅን እንዳዊቱዅራ ክርስቶስ አኽርድ አኽላማ ዩኑ ገሪዅ ከሐሐሲጚኒኹ።²⁴24.ፈሪሳን ደአም ነስ ዋስነሰና ኒን መጃኒንሲ ብዓል ዘቡል መጃኒና አደራ ሒልድ ግን መጃኒንሲ ንፍዳዅ ዩኑ ልኺኒኹሉ።²⁵25.ኢየሱስ ናለፈካ ምቊልናርሲ ፈጠኖ ነዎዩ ዋኺትኹሎም “አኻ ሲመር ኒሹር ኒሹትል ጓን ኒ ድዳግን፡ ኒሰና ይኸ ኣ ድገ ወሪ ዕያል እኺርኺርሊ ጓዶኲ ኒድዳ ግን የኩንኩም።²⁶26.እማ ገድም ሰጣን ሰጣንሲ ዳገናዅ አኾ ደንቢ እኺርኺርልድ ፈተታሕ ዩዅ ማለት ግን።ኒን አኾ ደምብኻ ሲመር ናዅ ጠፍሕራማ ተካዅንኩም።²⁷27.አንሸጣንሲ ብዓል-ዘቡል ሒልድ ፍደኸር አኾ ደምቢ እንታቊር አውርሒልድ ግን ናው ፍዳናኹሎም እማ ገድም ናው ፈረድኖኩም ግን።²⁸28.እማ አን ሰጣንሲ ጃር ሒልድ ፍዳኽር አከጛ ሲመር ጃሩዅ እንተል ገእዩዅ የኩንኩም።²⁹29.እንደ እበዲ አወያ ግርዋ ግን እንልጝን አደራ ሒለቱዅሲ በደሮ እንሸውጊ ኒ ልጝልትዎ ኒ እራኲሲ ረሰይሮ ገረሳዅ ኒት እንሸዎ ደምቢ ግን ኒ ጃሕጃሕና።³⁰30.ይዲ አኽጋዅ ይአባይ ግን፡ይዲ አኾ ለከመጋዅ (እክበጋዅ) ድሂሰኲ የኩንኩም።³¹31.እማ የኩንኩም አኻ ዓገብዲ አኻ ጀኸንዲ ከውድ ባርስትሮሎም ግን ደአም መንፈስ ቅዱስ አወይሲ ጋበዅክ ነትኽር ኒራኽር ባርስተለሉ።³²32.አኻዅክ እዅሪ አወይሲ ምቁላ ጋበዅስኮት ክመን ባርስትሮሉ ግን መንፈስ ቅዱስ አወይሲ ጋበዅካ ነት አከጝር ኒራ አከጝር ኒኾርስክ ባርስተለሉ።³³33.ካና ትክይረሪ አክረን ንር ፍርር ትክየው ግን በዳኒ አክረጛ ንር ፍርር በዳናን ግን ውረድ ንርፍርርድ ግን ንርፈረግሰና።³⁴34.ነበንታ አሰል አፍዑቱ እንትን ምቁል አክዱኑ አወሃብዲነ እንታለፈክልድ ጋብ ሽርው ፍድትኖ ገረስደናዅን ውረድ አብ ጋበው እንለበኪ ትክልድ ግን።³⁵35.አዳም በኪት ኒትክያ እንድቢልድ ትክየው ፍደኩ ምቊላኻ ኒ እንዲባ ምቊሊልድ ምቊል ፍደኩ።³⁶36.እምንድክ ይየኩም አኻጋባ ጥመሐት ጋብዲነሪክ ፍርድ ኳሪል ሺብስትቶኩም ግን።³⁷37.ውረድ ኩጋብድ ፈረድስቶ ግን እማ ወሪ ደኤንት ግን ወሪ ድቶ ግን።ዮናስር ሻሮት³⁸38. ኢየሱስኻ፡ኣውንኻ ይገና ኣውሮውኻናው ይሻን፧ ዮ ወንቀርዅሉ እንድወኹሲሉ። ³⁹39.ኒኻ “እና ምቁልዲ ዳንያንዲር አሰል ሻርት ቋልድኖ ጀረበነኩ እንኩኑዅ ደአም ነቢ ዮናስሩዅልድ ኩጛዅ ሻሮት እውስትሮሎም ወጀበለሎም” ዮ ወንተስኹሎም። ⁴⁰40.ኒንኻ ዮናስ ዓሲ ጐድጉል ሰዃ ቂርዲ ሰዃ ግርገዲ ግጃዅድሰና ኒሰና አደሚንዱዅራኽር ብሪ ስቚይሊ ሰዃቂርዲ ሰዃ ግርግዲ ግጅሮ ግን።⁴¹41.ነነዌር ኮቁር ዮናስር ስብከትሲ ዋስኖ ና ለበኪል ወንተረው ፍርድ ደንጐቢዅል እና አሰል ነዲ ጉድኖ ግን እማ ፈረድኖሎም ግን።ውረድ ናው ዮናስር ስብከትድ ናለፈክል ወንተርው ግን።እናሐንኻ ነት ዮናስትልድ ኩጛዅ የኩንኩም።⁴²42.ንግስቲ ብርክስጚሪ ፍርድ ወክትል እናአሰል ነዲ ጉቶ ግን እማ ለተቅቶሎም ግን።ውረድ ንሪ ሰለሙንዲ ለፈኲ ጋብሲ ዋስቶር መታን ብሪግን ድልድ እንትረሪ ግን እናሐን ነት ሰለሙንትልድ ኲጛዅ ህንበኩኩም።⁴³43.መንፈስ ምቊላ አዳምትልድ ፈሰና ኒል ትዋዅ ጀረበ ከራብድ ጅልወኩ ደአም ላሪ አረረላ።⁴⁴44.በሰናኻ እን እማና ሰጛ ልጝሊ ወንተረን ኪዳኲለ ዮ ወንተረሰና ገሰስትሮኽር ሰርገይስሮኽር አረረኩላ።⁴⁵45.እንሲን ፈሮ ኒ ልድ ጂበው አሪው ለጘታ ሽዋጢን አዶ ኒልትወኲ እማ እን አዳም ኒ መናበረት ጃበሪልድ ደንበራ ጂብሮሉ ግን እና አሰል ምቊልድሪ ኒሰና አርዶላ ግን።ኢየሱስር ወንዲ⁴⁶46.ናኸ ከውዲ ጂጝስቱ ኒ ገናዲ ኒ ሻንዲ አርድኖሉ እንትኑዅ እማ ጭምድሊ አኽኖ ጨበርንዅሉ።⁴⁷47.ላ አዳም-ኻ “ነት ኲገናዲ ኩሻንዲ ጭምድል ጋቢድኖካ ጨበረነኩካ” ይኹሉ።⁴⁸48.ኢየሱሳ “አውኒኻ ይገና አውሮውኻናው ይሻን”። ⁴⁹⁵⁰49-50. ኒ ናንሲ ኒ ታለይቶትሊ ኣኽታሲክ ሐበሮኻ፡ ይገነዲ ይሻንዲ ነን ግን። ውረድ ዓስተርሊ ህንባ ይኽርድ ምራድሲ እሰው ካያ ግን ይዳንዲ ይሻኒዲ ይገነዲ ይኹሎም።

¹1.ኢየሱስ እንስከር ግርጋትሊ ልጝልድ ፈ ባሐር ሸሊ ፈሮከፍዮዅ።²2.ከው ከላእኻ እንኲልኲልስኖ እንትንኹሉ።እንሲን ታንኳትል ትዎ፡ከፍይራስክ እንከውናውክ ባሐር ሸሊ እንኲልኲልስኑዂ።³3.ድግምድ እሴኻ ገሪ ወሪታትድ ጂጝስቲኹሎም።⁴4.ፈደንታ ግርዋ አረሳ፡ጐዲሮ ሰገሩዂ፡ፈዱንሱካ እንፈደንልድ ላው ደርብል ለቡዅ፡ጀከል እንቶኻ አባበይኹሎም።⁵5.ላዋ ብታ እንጋ ተርኰሪል ለቢዅ፡ወለይዶኻ በኰሉዅ።⁶6.ኳራ ፍሮሰናኻ ንርድ ንርድ ሰዋሰይስጚዅ፡ብታ ብናዲጛ ኢዱዅ።⁷7.ላው ይኸ እክክማ ነበክል ለቡዅ፡እማ እክክምድ ለለቅሶ ክሩዅ።⁸8.ላውኻ ትክያ ከረመኒል ለቡዅ እማ፡ሊኽ ፍሪተውልድ፡ወልትረጝን ፍሪተውልድ፡ሰዀረጝን ፍሪተውልድ አዅኲ።⁹9.ዋሳእ ንቊዋ ሻዅክ ዋስኒኻይኹሎም።¹⁰10.ኒ ታለይቱት ስኲር ይኖ “አበዲ እንቲ ውረድ ግን ድግምድ ካያ ጋብራኹንሎም” ይንኹሉ።¹¹11.ኒኻ ነዋዮ ወንተስኹሎም፡ “ስቱር ሲመር ጃሩዅሲ አርእርኖ እንተድ ካያ ግን እውስቶ ህንባዅ ግን ግራ ናድ እውስቶሎም እላ።¹²12.ውረድ ክመዅድ እውስትሮሉ ግን፡ገድኻ ተበብሮ ግን፡እን እንጋኹድ ደአም እን ከለለው ህንበውስኽር አስትሮሉ ግን።¹³13.ነን ቋሉኑኻ ቋለገው፡ዋሱኑኻ ዋሰገው አኽነውድ ሰበትድ ግን አን ድግምድ ጋባኹሎም።¹⁴14-15.እን ነቢ ኢሰይያስ “ዋስነሳኻ ዋሰድኖ ግን ደአም ላሪ ድኳ ፈጠንድኖ አኽኒ፡ና ዕልልድ መኸልትድኖ ግን፡ደአም ላሪ ፈሃምድኖ አኽኒ ውረድ ናዕንቊቁውድ ዋሰግኒን፡ናዕልልድኻ ቋልግኒን፡ና ለበከድር ፈሃም ግኒን እማ ወንተርግኒን፡አንኻ ትልል ጊኒልም ና ዕንቊቁውሲ አበድኑዅ፡ናዕልልስኻ ሽጙስኑዅ፡እናለበካ ከውነዱኽው ገሪዅ ሒለቱዅ ግን” ያዅ ና አኾርሊ አቅትሮር መታን ኒን አኹዅ።¹⁶16.ደአም እንትን እንታ ዕልልኻ ነስ ቋለው፡እንታ ዕንቊቁውኻ ነስ ዋሰው ገዱ ግን።¹⁷17.ውረድ ገሪው ሻትካንዲ ነቢያትዲ እና እንትን ቋልደናዅስኽር ዋስደናዅስኽር፡ቋልድኖኽር ዋስድኖኽር ሸንህስቱኑ ሰጘነኲ አክለሎምኻ።እንክና ድግም ኤረሲዅሲ¹⁸18.እማ ገድም ስቱር እና ድግሙዅሲ በርህድያኩም ሸኑረለ።¹⁹19.ላዅ እን ጋባ ሲመር ጃርኲዲት ዋሰኩላ፡ደአም ላሪ ድኳ ፈጠነለላ።አባይ እንቶኻ እን ጋበት ሸተፈኩላ፡ኒኒ እንፈደና ደርብል ለብረሪር ድግም ግን።²⁰20.እንተርኰሪል ለብረሪ ፈደናኻ ላዅ እንጋበት ዋሶሰና ንርድ ንርድ ፈርሐትድ ከለብራዅላ ግን።²¹21.ደአም ሰልወሻኻ ውረድ እን ጋበር ሰበትድ ማሕገዲ ህርብዲ አረርሰነሉ አሸሾ ከየነኲ።²²22.እን እክክመል ለብራ ፈደናኻ፡እን ግርዋ ጋበት ዋሳዅ ግን ደአም ኒ ቀልብ ብሪዅድ ካያ ግን።ሃመት ገዲ ተባብዲሩዅድ እን ጋባ ለለቅስሮ ፍግሪ ከብተቲ።²³23.እን ከረመና ሳዅል ለብራ ፈደናኻ እን ጋበት ፈጠኖ ዋሳዅዲ ፈሃማዅዲትሪ ግን።ኒን እምንድክ ሊኽልድ፡ወልትረጝንልድ፡ሰዅረጝንልድ ፍሪሰኩላ።²⁴ድግም ጀርጉዅዲ ክርዳዲዅዲ(ቊልላሕዲ)24.ይኸ ነዋዮ ኤሪ ድግም ኮዶ ጂጝስቲኹልሎም፡ “ሲመር ጃሩዅ ላአረሳ ኒ ከረመኒል ፈደን ትክየው ፈደዅሲ ተከኲ።²⁵25.ደአም ቂር ከው ገንጁ ኒ አባይ እንቶ ትክያ ፈደን ነበክል ክያወውሲ ፈዲኹሉ።²⁶26.በኰሎ ሱሪቶሰናኻ እንሲን እን ክያወውር ና ነበክል ቋልስቱዅ።²⁷27.አረስ ነስ ቋልኖሰና፡እን ኪድጝ አደሪል እንትኑዅ እማ “ድዊና እንቲ ኲኪድጝሊ ትክያ ፈደን ፈዲግራ ኽርማ፡ነን እና አሪ ድክር አዊልድ እንተው ናው” ይንኹሉ።²⁸28.ኒኻ “ነስ ሃበ ህንባዅ ይአባይ ግን” ይኹሎም እን ኤረስኻ “እማ ኲምራድማ ምኲድኖሎም፧” ይንኹሉ።²⁹29.ኒኻ “ኢፋልኩም ህምባ ግጃ፡ክያወውሲ ያዕይትኖ ይዱኑ ትክየውሲ ናዲ ለከምግድኒን(ምኲድግድኒን)።³⁰30.መሹው አኸራሲክ ላት ለገድሮ ባራ ክብኒ ወክት አኾሰና እን አረስሲ በደርድኖ እን ኤሪ ድክርሲ ከባ፡እማ ላት ኰመረሎም፡ሐውይሮር መታን።ደንበረድ እን ትክየውሲ ከባ እማ ሐበሲተል ዔሰሎም ይያሎ ግን ይኹሎም።እድሪ ፈደነዲ መኮት ዐቊዲ³¹31.ይኸ አሪ ድግም ነወዮ ጂጝስቲኹሎም፡ሲመር ዓስተርዅ ላ አረሳ ኒ ኪድጝል ፈደሪት ፈደና እድሪሪት ተከኲ፡³²32.እምንድክ ኒኒ ናድከልድ ሽጉረሪ ፈደና ግን በኮልደሰና ደአም ጀከል እንቶ ንር ለንክከል ከፍ ይራሲክ ካና ከላእኮት አከቲ።³³33.ይኸ ኮዶ ሲመር ጃርዅ፡ላ እዅና፡እቅቱገ መኮት አቊአድሮ ሰዃ ርብዒት ላቅሲ ቊጥድራኲሲ ተከኲ።³⁴34.ነሀበ ኢየሱስ ኒትክ ድግምድ ካያ ጋብሎም ሰጝኲ።³⁵35.ኒንኻ ነቢያትድ “ይ አብድ ድግም ጋቢያ ግን እርድ መሀድ ሰንትልድ ንኪትል አኽታሲክ ትብቶ ሰጛዅሲ በርህድያ ግን” ያዅ አኽሮር መታን ግን።³⁶36.ኒድ ኒድ ከውሲ ስብዶኻ ልጝል ትዉዅ።ኒ ታለይቱት ኒል ስኲር ይኖኻ እና ፈደን ኪያወውድ ድግምሲ እንኪልና ይንዅሉ።³⁷37.ንኻ ፈደን ትክየውሲ፡ፈደዅ አዳሚንድዅራ ግን።³⁸38.ኪድጛ እርድግን፡ፈደን ትክየዋ ጀነት ቊር ግን፡ፈደን ኪያወዋ ሸጣን ቊር ግን፡³⁹39.ፈደን ኪያወውሲ ፈዳዅ እን አባይ ሸጣን ግን፡ከብና ወክት፡ደንጎባ እርድ ግን አረስ ከበንቲኻ መላአኽቲ ግን።⁴⁰40.እን በዳናንሲ እን ኩልኲልኖ ሐውይሮ ላኺል ማለውሰና፡ደንጎባ እርድሊኽር ኒሰና አኽሮ ግን።⁴¹41.አዳሚንድዅራ-ኒ መለክሲ እንሸቅራ ናዋ ናትክ እን አንቃራ ከውዲ ሀሽከበውዲ እን ኩልኩልድኖሎም ግን።⁴²42.መለለዖት ትክሰ ሐውያዅላ ማልድኖሎም ግን፡ኒላ ስረነዲ እርኩኳ ሕርቂቅርነዲ አኽሮ ግን።⁴³43.እንሲን እንሐላል ቊር ሲመር ናኽር ጃርድኹል ካኒ ሰና ትልጭይድኖ ግን፡እን እንቊዋ ዋስረሪ ክመዅክ ሰኑርኒ።⁴⁴ጘዲ ከባ ሶሚተዲ44.ሲመር ዓስተሩዅ ገድ ላግርዋ ኪድጝል ትብትሮ አራኹ ድሰና ግን፡ኒን አረሰነላ ትብሰኲላ እማ ፈርሐትድ ኒሻኻ ርድቅሲ ክዶ እንብረስ ጅባዅሲ ተከቲ።⁴⁵⁴⁶45-46.ኮዶ ሐዲስድ ይዅሎም ሲመር ዓስተርዅ፡ላሰቃጣ፡ሶሚት (ከብ) ሸኻሩ ጀረቡ ፈራኲሲ ተከቲ፡ላሶሚት ምልምሊት አሮሰናኻ ኒ ሻውሲክ ክዶ ጅባዅሲ ተከቲ።⁴⁷47.ኮዶ ይኾ ሲመር ዓስተሩዅ ሰቅለት ባሐርሊ ማልሶ ገሪ ጅንስ ዓሳታት አባባያኲ፡⁴⁸48.እማ እን ሸቕሌጥ እንታ ኻሰና፡ከደመው በሐር ሸሊ አኽኖ ፍሪርኖ ትክየው ሲክ ና እራኮል እሰው በዳናንስኻ ከደን ማለውሲ ተከቲ።⁴⁹49.ደንጎቢ እርድሊ ኒሰና ኒሰና አክሮ ግን፡ማላእኽቲ እን ምቚልሲ፡በካይታ ነበክልድ ሲዲድኖሎም ግን።⁵⁰50.መለለዖ ሐውያዅሊኻ አጎድኖሎም ግን።ኒልኻ ስረነዲ እርኩኳ ሐርቀቀምንርዲ አኽሮ ግን።⁵¹51.ነስናትክ ፈጠንድኖማ፡ህንብደናዅን፡ይኹሎም ናዋ የዋ ይንዅሉ።⁵²52.ንኻ “ኒውክ ሲመር ጃርዅድ መሃርሳዅ ከታባ፡እን ኒ እንድቢልድ ሐዳይስዲ ገዳይምዲ ፍዳዅልጝን አደረስ ተከቲ ይዅሎም። ኢየሱስቲ ኒኮቕር ቃበብነትሉ⁵³53. ኢየሱስ እና ድግም ነስ ዮሎም ደምቢ ኒልድ ፈርዅ፡⁵⁴54. ኒ ኮል አተየሰናኻ ና ቤት ጸሎትሊ ቱዎ ክንሲሮሎም ተርሲዅ፡ናዋ ፍክር አኾሎም፡ “ነስካ አርእጝዲ ለበኪትነዲ፡ኒን አዊልድ ክንተው ናው ?⁵⁵55. አበዲ ኒን፡እን ካን ሸረበንታ አኽለማ ኒ ኽር? ኒ ገና ኻ ማርያም አኽግረሪማ ንርስጙ፡ኒ ሻጛ ያዕቆብረው ዮሰፍረው፡ስምዖንደው ይሁደረው አኽገውማ ናው?⁵⁶56. ኒ ሻን እንቃቓ ናውክ ነት ይነዲ አልኒማ ? እማ ኒን ንስካ ለበኪትነስ አዊልድ ናቅሶሉ ይንዅ።⁵⁷57.ንድኻ የናዅሲክ አርእንብስቲዅሎም።እንሲን ኢየሱስ ና አማነት፡ሽጉ፡ፈከርዶሉ “ነቢ ኒኮልር ኒ ልጝንሊኽር፡ካያ ቃበብሰኲ”ይኹሎም።⁵⁸58.ና አማነት ነቀስነድኻ ከለላ አምራት ካያ እሲዂ።

¹1.እንሰከር ግርጋትሊ ንጉስ ሄሮድስ ሰጀር ሲመርዅ ኢየሱስር ሳብርሲ ዋስዅ እማ፡²2.ኒ ሐይሳንሲ ሽጘ ኒን የሐንስ ጠመቅደንታ ግን።ኒን ንግን ክሪልድ ጐ አምራት እሰኲ እንኲዅ ዩንሲክ ጂጚስቲዅሎም።³3.ሄሮድስ የሐንስቲ ኒ ዳን ፍሊጶስቊ ሄሮዲያደር ሰበትድ እንሸዎሉ ሰጘኲ።⁴4.ኒንኻ የሐንስ ኩዳን ድቊት ለውቶ ወጀበከካ ያኹሉ አኽነዲን ኩሮሉ ጀረቡ ሰጘኲ።⁵5.ደአም ከው የሐንስቲ ነቢርሰና ከለብሩኑ ሰጚኒነዲን ናት ጓቊቱኽ።⁶6.ሄሮድስ ኒ እዃርሳ ግርጊላ በዐል እሲዅ፡ኒላ ሄሮዲያዳሲ ንርቊራ ካተርዶ ገቢለታ ጃብል ሰስዕርዶ ሄሮዱስቲ ፈርሕድቲሊ።⁷7.ንድኻ ንሪ ጀረብራኹሲክ ኡሮላ፡ወላ ኒ ሲመር ገፍ አከጝር ሸክኹላ፡⁸8.ንርኻ ንርገነር ኰድጘስ ዋስሮ፡ “የሐንስ መጥምቅር አኾርሲ ነት እና ግባርሊ እስረ ነኸለ” ይቲሉ።⁹9.ንጉስ ገሪኹ ቊርቊርትዅ ደአም፡ኒ ሸርኒ ሰበትድኽር ኒገ ቢለትሲስማርነድር፡ ንሪ ጀረብረሰነክ አኽሮላ አጃ ይዅ።¹⁰10.እን ኒ እንሸውሳ እርጋ አካንሊ እንሸቆኻ፡የሐንስቲ በረኺስኹሉ።¹¹11.እንበረኸውኻ አኾርሲ፡ግባርሊ እሲነ ነቅስንዅ እማ እን አኢሲ ኡንኹላ፡አይኢኻ ንርገነሲ ኡቲሉ።¹²12.ኒ አጋር ዋስነሰና ኒ ግናደትሲ አድኖ ደቢኒኹሉ።ፈርኖኻ ኢየሱሲ ድዊኒኹሉ፡ይና አደራ ኢየሱስ ኒ ሰልፍ ወክት ሳንሳዓስ በጀኽደት¹³13.ኢየሱስ እና ወራት ኒስ ዋሶሰና ታንኳትል አኾ ኒልድ ዕጭጭ ይሮ አው ከደንሊ ፈርዅ።እን ከው አዊል ዋንተት ዋስንነዲን ደገጊተልድ ናል ኲኩድ ገሪው ለሄክንኹሉ።¹⁴14.ብሪል ገሞሰናኻ ፡ጨበረውሲሉ ቋለሶና ሰኸንድንኹሉ።ናትክ ና ምግዱራንሲካ እቢስዅሎም።¹⁵15.ዐመቅረብ አኾሰና ኒ ታለይቱት ስኩር ይኖ፡ “እና ይን ህንብናዃ ከደን ግን፡ኳራኻ ለበቲ ውራ እንቲ እና ከውሲ ደገጊተል ዔርኖ ሙነት ጀረቢድኖ ስብደለሎ ይንዅሉ።¹⁶16.ኢየሱስኻ ላሪ ስብድና ጀረብደለሎም እንትን ቊሰሎም ይዅሎም።¹⁷17.ናዋ ይናዲ አንኳ ሳንስዓዲ ለጛ ዓሰዲ ካያ ህንባኲና፡ነዲክ ውራ አቅትሮሎም ገረሳኹን ይንኹሉ።¹⁸18.ንኻ እንደ ነት ይል ነቅሰለ ይኹሎም።¹⁹19.እንሲን ከውሲ ሻንኪል ከፍ-ያ ዮኻ፡እን አንኳ ሳንሳዓዲ ለጛ ዓሰዲት አዶ፡ዕልልሲ ዓስተርሊ አኽታሲክ ሰምሰ፡ገውሮ ሳንስዕሲ ሸረፎ ኒ ታለይቱትድ እውዅሎም፡ናውኻ እንከውድ ስኩስንዅሎም።²⁰20.ናውክ ቊኖ ብትኖኻ፡ሽካ ለጛ ሰባ ከብተው እንሰኽኖ ጉድንዅ።²¹21.እን ቄው እኲንዲ ግናቲዲት ሺብግሪ ግርው ካያ አንኳ ስሕ አከው እርግንዅ።ኢየሱስ አቊድ አቊ ፈረት²²22.እንሲን ኢየሱስ እንከውሲ ስብድራሲክ ኒ ታለይቱሲ ፈራ ወለይዳ ታንኳትድ በሐርሲ ካርድኖ ዲየለ ይኹሎም።²³23.ከውሲ ስብዶኻ ጸሎት እሲሮ ኒቱ ጊሪል ተረገስዅ፡አመቅረብ አኽራሲካ ኒል ኩንዅ፡²⁴24.እንታንኳኻ ወላውል ጃብረድ እሲነዲስ ሒል እሰላ ደንቢራ ወንተርስኹላ፡ብሪልዳ ሺሽድሮ፡እንደራ በሐር ነበክል እርግቲ።²⁵25.ኢየሱስ ሰዓት ሰጃ ቂራኹድ አቚ ፈሩ ናል አኽታሲክ እንትኹሎም።²⁶26.ኒ ታለይቱት፡አቊድ አቚ ፈራዅሲ ቋልነሰና ሸጣን ተከሎም በኻኽርንዅ፡ጓቊስኻ መውዒታትሲ ትብልንዅ።²⁷27.ኢየሱስኻ እሽሽዮ አረጋ ጓቊትጋ አን ግን ይዅሎም።²⁸28.በጥሮስኻ ክልብርሰ “እማ እንቲ አክረን ይአደራ እንደ አቊድ አቚ ኩል እንትያ ሽጚለ” ይዅሉ።ኢየሱሳ “ላዅ” ይኹሉ።²⁹29.እንሲን በጥሮስ ታንኳ-ትልድ ገሞ አቚደቚ፡ኒ ል አኽራሲ ፈርዶ ተርዩዅ።³⁰30.ፈሩኻ ወላውል ከለአንሲ እሲዅ እማ ተረቅሮ ጉዅ፡እንሲን ታንተ “ዎ ይአደራ እልሊለ” ዩንሲክ መውዒት ሄበቡዅ።³¹31.ኢየሱስኻ ንርድ ንርድ፡ናንሲ ጠለቆ ለመጭሲኹሉ እማ “ኣማነት እንጋ ግርዋ፡ውሪዅ ተሐደብርኹን” ይኹሉ።³²32.ታንኳትል ቱውነሰነኻ እንወላውል ድግ ይዅ።³³33.እንታንኳትል እርገዋ ኒስተካ ጋርሲ ቋልኖሰና፡ “እንቲ እምንድክ ጃር ኹራ ግን ዩኑ ኒ ጃብል ሐርበጥንኹ፡³⁴34.በሐርሲ ካርኖሰነኻ፡ገንሳረትር ብሪል እንቱዅ።³⁵35.ኮቊር ኒ እንተር ነስ ዋስኖሰና ደገጊተል ናልክ እንሸቅኖ ዋንተ ሽኹሽታኹሲክ ነቅስንኹሉ።³⁶36.ቊጭን ኒ ታዊኒ ኹሲ ካያ ተመድኖኻ ሸንሁኑ እርግኑዅ፡እን ተመደውካ ናውክ እቢሩኑ እርግንኹ።

¹1.ላው ኢዮሩሳሌምትልድ እንተው ከታበንዲ ፈሪሳንዲ ኢየሱስትል ስኩር ይኖ፡²2.“አበዲ ውራ ማዕነትድ ግን እና ኩታለይቱት፡ናንትትሲ እንቃርግኒ፡ቊነድ እኽርስኮ ዕደትሲ ዳደናኹን” ይንኹሉ።³3.ኢየሱስ ክልብርሰ ፡እንትን⁴4.ውሪ ማዕነትድ እንታ ስርዕትሲ እሲትኖ ይድኖ ትእዳዳት ጃሩሲ ዳደናኹን።⁵5.ውራ ጃር “ኩኹርዲ፡ኩገነዲት ከበርዲ ይጋዅማ፡ይኸ ኒኽርዲ ኒገነዲት እሸዅክ ክውስትኒ ይስቶ እለማ፡ደአም እንትን “አኻኹክ ይድ ሰደቀት ሽትክ አኽሮለ ግን” ያዅ ኒኽርዲ ኒገነዲት ከበርድሮ እለሉ፡ይደነኲ።⁶6.ንድኻ እንታ ስርዕ መታን ፡ጃር ጋበት ዳደነኲ(ዐበስድደነኲ)።⁷7.ነበንቲ ካይናን፡ነቢ ኢሳያስ ኒእምንለ፡⁸8. “እና ከው ነን ና አብድ ሳበነኩለ ግራ፡ና ለፈክድ ይልድ እንደራ ሺሮ ህንበው ግን።⁹9.ነን ከዋ ስርዕ ካያ ክንሱኑ ይት ግምሽድ ሳበነኩለ ዩንሲክ እንተድ ግርም ጋበ ህንበኲ።¹⁰10.ከውሲ ኒ ሹትል ሽጘኻ “ናን ሸኑራኽር ፈጠናኽር፡¹¹11.ከውሲ አማቅዳዅ አብድ ትዋዅ አኽላ፡እን አብድ ፋዅ፡ግን ኒት አመቅዳኹ”፡ይኹሎም።¹²12.ኒታለይቱት እንሲን ኒል ስኩር ይኖ “እንቲ ኩላንቅድ ፈሪሳንድ አንቋራ አኽሮ ዋንትረት አርእስቶማካ ህንባኹን”፡ይንኹሉ።¹³13.ንኻ “ዓስተርሊ ህንባ ይኽር ተከልጋ ካነክ ኒውክ ኒ ስርልድ ምኩርስሮ ግን።¹⁴14.እንደራ የሎም፡ ዓረብ ዓረብሲ ዋለየው ግን፡ዓረብ ዓረብሲ ዋለየን ለጛክ ጎቅል ግን ና ለብና።¹⁵15.በጥሮስ “እንደ በርህዲና”፡ይኹሉ¹⁶16.ኢየሱስ “እንትጝርማ ናን አኽራሲክ ለበኪድኖ እልድኒ፡¹⁷17.እን አብል ትዋዅክ ጎድጉል፡ደኮክ ጎድጉልዳ ድግድግል ፈረት አርእድንማ ?¹⁸18.እን አብድ ፋዅ ለበኪልድ ፋዅ አኽነዲን፡ ኒን ግን አዳምቲ አማቅዳዅ።¹⁹19.ውረድ አበኪልድ፡ሀመት ምቊላዲ፡ተነኽነዲ፡ኩነዲ፡ነፈስነዲ፡ስዋንዲ፡ብንድ ሽርነዲ ጃኸንዲ ልኽነዲ²⁰20.ነን ናውክ ለበኪልድ ፋው ግን።ነን ግን አዳምቲ አመቅደው ግን ግራ ናንትትሲ እንቃርግሪ ቊና አኽላ ይኹሎም።እዅና ከነንትሪ²¹21.ኢየሱስ ኒልድ ጐ ጢሮስዲ ሲዶና ዲር ብሪል ገለድዅ።²²22.ኒልኻ እና ሐን፡ላ እዅና ከንአንትሪ እንትሮ “ዎ ይአደራ ዳዊትዅራ፡ይቊረት ጅኑን ሻኾላ ገሪዅ ሐተር ደኩላ እንኩዅ እማ ሰኸንቲለ” ይሩንሲክ ኒ ጃብል መውዒት እስረ ሐርበጥቲ።²³23.ኢየሱሳ ላሪ ወንተስላላ።ኒ ታለይቱት ኒል ስኩር ይኖ “ይና ጉርበትል አኽሮ ጀረብድረሪትና ውራ ስብደለላ” ይንዅኩ።²⁴24.ንኻ “አን እስራኤልድ ኮልድ ድድሮ ህንብረሪ በግሲ ካያ ጀረቢያ እንሻቅሶ ፡ህንባኽር ግን”ይዅሎም።²⁵25.ንርኻ “ዎ ይአደራ እልሊለ” ይሩ ኒ ጃብል ለብቲ።²⁶26.ናኻ “ሳንስዓ እቊርልድ ባሪስሮ ግሸጝድ ኡና ትክያኹ አኽላ”፡ይዅላ።²⁷27.የዋ ኩ እምን ግን ይአደራ ግሽጝኽር ና አደርታ ግባርልድ ላባዅሲ ቋነኲ ይቲሉ።²⁸28.እንሲን ኢየሱስ ንርጋብድ ፈከርሶ “እንቲ፡እዂና ኩ እምነት ንሄር ኮት ግን ፈሪ እንቲ ጀረብራዅ ሰና አኹንኩት” ይኹላ።እንሲንጛ ንርቊራ እቢርቲላ።ኢየሱስ ሊጘር ወክት ሳንስዓ በጀኽደት²⁹29.ኢየሱስ ኒልድ ጐ ገሊለር ባሐር ሸሊ አኽታሲክ ፈሮ ጊሪል ተረገስዅ።³⁰30.ኒላ፡ከው ከላእ ዓቀልሰውዲ ደልጓሳንዲ፡ዐረፍዲ፡ጨማማንዲ፡ልጉማንዲ፡ኤሪው ገሪ ሽዅዳ ሻውዲ ናቅስንዅሉ እማ ኒ ጃብል ስኩስንዅሉ፡ንኻ፡ናትክ ትልልዅሎም።³¹31.እን ከውኻ ልጉማንኻ ጋበው ደልጓሳንኻ ጠለቅሶ ፈረው፡ዕቊላንኻ እርወትል ዳደው፡ዐረፍኻ ቋለው፡ኒስ ተካ ብሽራትሲ ቋልነሰና፡እምንድክ ፈከርስንዅ እስራኤልዲ ጃር ስኻ ሐመድንዅ።³²32.ንደምቢ ኢየሱሳ ኒ ታለይቱትሲ ሽጘ “እና ከው ሰኸን ደነኩለ ና ሲኾር ኳራ ግን ናው ይዲ ናው ህንበናኹ ላሪ ቊስታዅ፡እንገት ና አብድ ፈሲያሎም ጀረበሊ፡ደርብል ቂልስግኒን” ይኹሎም።³³33.ኒ ታለይቱታ “ይን ህንብናዃ ከደን ነዲክ አቅታ ሳንሲዕ አዊልድ ነቅስኖሎም” ይንኹሉ።³⁴34.ኢየሱስ “ውሪካ ሳንሲዕ ሻኽድንዅን” ይኹሎም።³⁵35.እንሲን ከውሲ ብሪል ዓገሊስዅሎም።³⁶36.እን ለጘታ ሳንስዓዲ ከለላ ዓሰዲት አዶኻ ጃርሲ ሐመዶ ሸረረፎ ኒ ታለይቱትድ እውኹሎም፡ናዋ ከለብርኖ፡ከወድ በንንጚኒዅሎም።³⁷37.ናውኻ ናውክ ብድናሲክ ቊኖ ከብተው (ባረንሲ) ለጘታ ሰባ እን ስኽኖ ጉድኑዅ።³⁸38.እን ቄው እኲንዲ ግናቲዲት እንገት፡ሰጃ ስሕ እርግንዅ።³⁹39.ከውሲ ስብዶኻ ታንኮድ፡መግደለር ሸሊ እንቱዅ።

¹1.ፈሪሳንዲ ሰዱቃንዲ ኒል እንትኖ፡ቀየስድኖሉ ይኖ ዓስተርልድ ላሻረት ቋሊስሮሎም ሺዊኒኹሉ።²2.ኒኻ “እንትን ኲርጚረድ ብርጃር ሰረራዅሲ ቋልድነን ንኪ ወክት ምልምል አኽሮ ግን፡ይደነኲ።³3.ጉራብድ ብኳን ሰረውሲ እሰን ንኪ ስዋ ሒለቱዅ፡ለብሮ ግን ፡ይደነኲ።ንድሰና ሃብዲነ እንትን ትክስዲነ ሐለት ዓሰተሩዅሲ ፈረግደናኽር፡እሻረት ውክቱዅ አዋኸ አርእንብስታኹንኩም።⁴4.ነበንቲ አሰል ጠራራንዲ ናፍሳንዲ እሻረት ሺወነኲ እንኲኑዅ፡ላኪን ዮናስር እሻረት ንኻ ኤሪዅ እውስተለሎም፡ዮ ባሮሎም ፈሩዅ።⁵5.ኒራ እንደራ ወረበስ ካሮሰናኻ ኒ ታለይቱት ሳንሰዓ አድነስ ምኺርኑዅ።⁶6.ኢየሱስኻ “መኰት ዓቊ ፈሪሳንዲሩዲ ሰዱቃኑዲትልድ ፈጠናና፡እውስትጋ” ይኹሎም።⁷7.ናዋ ሳንሳዓ ምኽርንነዲን ግን ኒ ነስ ያዅና ይኖ ናሹርናሹ ሕሽኲሽኲ ይኑዅ።⁸8.ኢየሱስ ና ሐሳብሲ ፈሃሞ “ነበንቲ ከለላ እምነቱ፡ውራ አኽዲነ ግን እንተሹር እንተሹ ሳንሳዓ አድግናኽር አኽንነዲን ይድኖ ጉድዕድዕ ይደናኹን ?⁹9.ናን አኽራሲክማ ለበኪትድኖ እልድኒ ምኺርድኖማ እን አንኳ ሳንስዓ አንኳ ሲሕ ግርወድ አቅተድ ውሪኮ ሰበኻ እንታኾ ከብተት።¹⁰10.ወሪይኸ እን ለጘታ ሳንሳዓ ሰጃስሕ ግርወድ አቅተድ ውሪኮ ሰባ እንሳኽድኖ ጉድነት ?¹¹11.መኰት ዓቊ ፈሪሳኑልድኽር ሰዱቃኑልድኽር የንኩም ሳንስዓድ አኽገት አን ጋበኹኩም ፈሃመግደናኽርማ ? ይኹሎም።¹²12.እንሲን ና ምህሮትልድ ግን ግራ ና ሳንስዕልድ አኽገት አርእስትኹሎም።በጥሮስር እምነትዲ-ሲመርዲ¹³13.ኢየሱስ ቂሳርያ ፍሊጶስሩዅል ዔረሰናኻ ኒ ታለይቱትሲ ነዋዮ ወንቀሩኹሎም “ ከው አዳሚንድዅረስ ኤውኒ ግን የናኹንሉ” ይኹሎም።¹⁴14.ናዋ “ላዋ የሐንስ መጥምቅ ግን የነኩካ፡ላዋ ኤልያስ፡ላዋ ይኸ ኤርምያስ ወሪ ነብያትልድ ላዅ ግን የነኩካ” ይንኹሉ።¹⁵15.”እንትጛ ኤውኒ ግን ይደናኹንለ?” ይኹሎም።¹⁶16.ቤጥሮስ ክልብርሰ “እንቲ ክርስቶስ መሲሕ ጃር ዲማ ዳይም ህንባኹዲ እዅራ ግን” ይኹሉ።¹⁷17.ኢየሱሳ ነዋ ይኹሉ፡ “ስምዖን ዮናዅራ እንቲ ገዱዅ ግን፡ስኻኽር ብርኽር አኽላ ኒስ አርእሳኢሳኹካ፡እን ዓስተርሊ ህንባ ይኽር ግን”።¹⁸18.አጛ የኹንካ እንቲ ሸሻ ግን፡አና ሸሻ ኒልኻ ይበክስታንሲ ገበሪያግን፡ሰጣጝር አባይር ቂልዶላ፡ላሪ ዓቅም እለሉ።¹⁹19.መፈትሕ (መርሖራ) ሲመር ዓስተሩዅሲ እውየካ ግን።እን ብሪል እንሸውራዅክ ኒ ውክ ሰሚል እንሸውስሮ ግን፡እንቲ ብሪል እንክራዃ ሰሚልር እንክሰትሮ ግን” ይኹሉ።²⁰20.ንደምቢ ኒ ታለይቱትሲ ኒ ክርስቶስ አኸት ላዅድ ድወግኒን ተብዶ ገቢኹሎም።²¹21.ኢየሱስ ኒ ታለይቱትሲ ኢየሩሳሌምትል ፈርዶ ዋነትሉ፡ኒልኻ ከዋ በህሊንድኽር-አምራን አቅሽትድ አከጝር ከታበንድር፡ገሪማሕገድ አርዶሉ አኸት፡ክርዶኽር አኸት፡ደአም ኒ ሲዀር ኳሪል ጓት በርህዶ ጋቢሮልም ተርሲዅ።²²22.ብጥሮስ ኒቱ ዕጭጭሰሉ “ዎ ያደራ ኒስተካ ጋራዲ ኩል ገእይጊን” ዩ መዀኹኹሉ።²³23.እንሲን ኢየሱስ ኒል ግልጭዮ ቤጥሮስቲ “ነበንታ ሸጣን ስርግዪ እንደራ ይልድ፡እንቲ ይድ አንቄራ ግን፡ውረድ ስኻ ወራት አኽጋኹ ጃር ደርብ እንግግራኽር ግን” ዩንሲክ ሀለትኹሉ።²⁴24.እንሲን ኒ ታለይቱትሲ ነዋ ይኹሎም፡ “እን ይት ተለይሮ ጀረባዅክ ኒሹት እንጠርን ኒ መስቀል ደንደኖ ለሄክንለ።²⁵25.ውረድ ኒ ፊዅትሲ ደኤንድሮ ጀረባዅክ ድሂስሮላ ግን፡እን ኒ ፊዅትሲ ይመታን ድሂሳኹኲላኻ አርዶላ ግን።²⁶26.ግርዋ እርድሊ ዋነ ገድስክ ኒ ናንተል ሻከን፡ኒ ፍዅትስኻ ድሂሰን ውራ አኽረሉ?ውሪ ይኸ ኒፈዅት አብልክ ውራ ኡጊድ ሻዅ?²⁷27.አድእሚንድዅራ ኒ መላእኽትድክ ኒ ኽርድ ሒልድኽር ሳብርድኽር እንተራካክ ላዅሲክ ኒ ወራትሰነክ ኒበነስ ኡሮሉ ግን።²⁸28.እምንድክ ይየኩም እና ነት እንተዲ ህንበውልድ አዳሚንድዅረድ ሳቡርሲ ቋልግኒ ክረግነት ፡እምንድክ የኩንኩም”።

¹1.ወልታ ኳራ ደምቢኻ ኢየሱስ በጥሮስዲ ያዕቆብዲ የሐንስ ኒ ዳንዲት አዶ ታቦትር ጊሪል አዶ ፊኹሎም።²2.ኒልኻ ና ጃብል ኒ ቋላ በደልስዅ፡ኒ ገሽ ኳሪሰና በርህዅ፡ኒ ታኲንዃ በረድ ሰና ብልታውርዅ፡³3.እናሐን እንሲን ሙሴዲ ኤልያስዲ ኒዲ ጋቡኑ ቋልስትንዅሎም።⁴4.በጥሮስኻ “ዎ ይአደራ ይነድ እምንድክ፡ነት አክና ወርካ ግን፡ኩምራድ አከን ሰዃ ዳስ ላዅሲ ኩድ ላዅሲ ሙሴሲ ላዅሲኻ ኤልያሲ ተከልኖ” ይዅሉ።⁵5.ነሀበ ጋቡኻ ብኳና ባርህ ኩስዅሎም፡እን ብኳኒ ልድኻ “ኒን ይዅራ አን እንከላዅ ኒድ ነገሶ ህንባዅ ግን ፡ኒት ዋሰሉ” ይዅ፡ጋባ እንትዅ።⁶6.ኒ ታለይቱት፡ ኒስ ዋስነሰናብሶትድ ብሪል ክብር ኑዅ።⁷7.ደአም ኢየሱስ ናል ስኩርዮ ተመድዅሎም እማ “ጓ አረጋ ላሪ ጓቊትጋ” ይዅሎም።⁸8.ጉኖ መኸልትነሰነኻ ኢየሱስርንኻ ላሪ ቋልኒ።⁹9.ጊሪልድ ገሙኑኻ አዳሚንድዅራ ክሪልድ ጉራሲክ እና ቋልድና ወራትሲ ላዅድ ድወጋ ይ ዅሎም።¹⁰10.ኒ ታለይቱታ “እማ ውሪዅ ከታበን ሰልፍ ኤልያስ እንትሮ ግን ያናዅን” ይንዅሉ።¹¹11.ንኻ “የዋ እንታ እምን ግን፡ሰልፍድ ኤልያስ ኒትክ ጠፍሕድሮ፡እንትሮ ግን።¹²12.እማ አን ድውየኩም ኤልያስ እማና ጃቢቶ እንትዅ ናዋ ኒ ኦወይሲ ና ምራድ ሰነክ እሲኒዅ።ኒሰና አዳሚንድዅረስ ና ሰበትድ ገሪ ማሕገድ አርዶሉ ግን የኩንኩም”¹³13.እንሲን ኒ ታለይቱት የሐንስ መጥመቅድ አኸት አርእስትዅሎም።ግርዋ ጅን ሻዅሲ እቢሰት¹⁴14.ኒደምቢ ከወል ገእይኖሰና ላግርዋ ኢየሱስትል እንቶ፡ኒ ጉርብል ለቦ፡¹⁵15.”ዎ ይአደራ ይዅራ ሽዅዳ አርቢዅ ሸኾሉ አቅትራሲክ፡እምንድክ፡መጭጭ፡ ይኩሉ፡ላዶንትክ ላኺል ላዶንትካ አቆል ማለኲሉ እማ፡ሰኸንቲለ፡¹⁶16.ኩታለይቱትሊ ነቅስኹንሉ ናዋኻ እቢስድኖሉ ገረስኒ”።¹⁷17.እንሲን ኢየሱስ “ዎ እንትን አሰል ምእክር እንገውዲ ና ደንዲ አውን አኽራሲክ እንተዲ መንደርትያ፡አውን አኽራሲክ ሰብር እስየኩም ግን፡እንደ ነት ይል ነቅሰሉ” ይዅሎም።¹⁸18.እንሲን ኢየሱስ ቀጡበትድ ጋበሰነሉ፡እንጅን ቊሪልድ መጭዮ ፊዅ፡ኒልድ ተርሰኻ፡እን ቊራ ሽርዊቱኽ።¹⁹19.ኒ ታለይቱትኻ ኢየሱስቲ ላገፍድ እጭጭ ሲነ አድኖሉ፡ “አበዲ ይን ውረድ ግን ኒ ፍድነስ ቂልስንዅን” ይንዅሉ።²⁰20.ንኻ “እንታ አማነት ሽጉነድዋ፡እምን እምንድክ የኩም፡እድሪ ፍሪኮት አኽረሪ አማነት ዋንተንኩም፡እና ጊረስ ጒ እንደራ ስርግ ዪ ፡አር አካንሊ አኺ ይደነንሉ አኽርድኩም ገረሰተጋዅኩም ወራት ዋነገት እምንድ የኩንኩም እንኩዅን²¹21.በደሮ ይኸ ኒሰተካ ጅኑን፡ሹምዲ ጸሎትዲሲ አከገን፡አሪዅድ ፋላኒ”²²22.ገሊላ አክራሲ ላት ፈሩኑ ኢየሱስ “አዳሚንድዅራ፡ካዋ ናንተል ደኮ እውሰታ ግርጋ ስኩረኲ እንኲዂ።²³23.ናዋ ኩድኖሉ ግን፡ደአም ኒ ሲኾር ኳሪል ጉሮ ግን”ይኹሎም እማ ገሪዅ በኻኻርኑኹ።ወርኮ ቤት - ጸሎትድ²⁴24.ቅፍርናሆምትል ዔርነስና፡እን ወርኮታት ቤት ጸሎት ፍዲስው፡በጥሮሰትል ስኩር ይኖ “ውራ እና እንታ መምህር ወርኮራ ቤት ጸሎትዅሲ ፍደጋዅማ” ይንዅለ።²⁵25.ንኻ “ፍዶኲባ” ይዅሎም።ልጝሊ ትዎሰና ኢየሱስ በደሮ “ድዊንደ ስምዕን፡እንደ አበዲ ውራ ተካዅንካ፡አስያም ብሪው፡ወርኮትሲ ናቊር ልድማ አደናዅን፡እማ ገፍርልድ? ዩ ወንቀርዅሉ”።²⁶26.በጥሮስኻ፡ “ገፍርልድባ” ይዅሉ።ኢየሱስኻ እማ ናቊራዲ ልላ ግን።²⁷27.እማ እምጨደት እንቄራ አኸግኒን ኩሰቕሌት አድሮ ፈርዶ በሐርሊ ማሊ፡እን ሰልፍ ሸኸራ ዓሳ አብል ላሶውልዱራ ወርኪኹ አርቶ ግን ኒት አድሮ፡ይዲ ኲዲሲ እዊሎም ይዅሉ።

¹1.ኒ ታለይቱት ኒል ስኩር ይኖ “ድዊንደ መምህር ሲመር ዓስተርዅል አወያዅ ግን ቅዳዅ አካዅ” ይንዅሉ።²2.ኢየሱስ ላቊራ ግናይሲ ኒ ሹትል ሽጐ ናነበክል፡ደውሲዅሉ እማ፡³3. “እምንድክ የኩም እና ግናቲትሰና አከግደነን ሲመር ዓስተርዅል ትወግደነት ይእምንድክ የኩንኩም።⁴4.ናድክልድ በሄር አካዅ ሲመር ጃርዅል እና ግናቲት-ሰና ኒሹት ለጥሰዅ ግን። ⁵5. እና ነወየው ቆልዕሲ ይሱጝድ ከለብራዅ፡ ይትግን ንከለብራዅ። ⁶6. ደአም ኣኻዅክ አኽን እና ግናቲት ይድ እምነውሲ አንቆሪሰን፡ መጥሓን ድዃሪዅሲ ጉርጕሚል እንሸዎ እንደራ በሐር ነበክል ማለነንሉ ኪድርድሉ።⁷7.አጅዋ እርድ፡አንቆራ እንትሮ ከብተጋዅ ግን ደአም እን ግርዋ ኒ ሰበትድ አንቆራ እንተራዅ ማላሉ።⁸8.ኩናን ወሪ ኲልኲ ከቲሰንካ ነተፍሮ ኩልድ እንደራ ማልዶ ባሪ፡ኩለጛ ናንትትድ ኩለጛ ልኩኩዲዲ ላኻ ዲመዳይምዅል ቱኒልድ ኲቁሩጭድ ወሪ ኩሐንካስድ ሲመር ጃርዅል አተይረን ኩደኩካ።⁹9.ይኸ ኩዕሊ ከቲስረንካ፡ኩልድ ቆቆልዶ ፍድሮ ማሊላ፡ወረድ ኩለጛ ዕልልዲ ላኽሊ ቱረውልድ ላዕሊዲ ጨላሕ አኽሮ ሲመር ጃርዅል ቱና ኪደኩካ።¹⁰10.እና ግናቲልድ ላዅሲ ቃበብግድኒን ፈጠነኩም ውረድ ዓስተርሊ ናመላእኽጢ ዲማ ዳይም፡ይኽርድ ገሺ ዓፈየው ግን፡የኩንኩም።¹¹11.ውረድ አርእትኖ፡አደሚንድኹራ፡ኒ እንቶ ህንባዅ ድዶውሲ እልልዶ ግን።¹²በጋ ድድረሪር ድግም12.እንደ ዋሳ ውራ ተካዅንኩም፡ላግርዋ ሊኽ በግ ሰጘቲሉ ፡ናልድኻ ላሪ ድድረንሉ፡ንሂት ጀረቢሮዮ፡እን ሰስረጝንዲ ሰሰት ባሮ ፈርጊድማ ?¹³13.አረስነኻላ እን ሰስረጝንዲ ሰሰትልድ ንርድ ፈርሕሮ ግን የኩንኩም።¹⁴14.እማ ኒሰና እና ግናቲትልድ ላዅ ድኳ ድድሮ፡እን እንተኽር ዓስተርሊ ህንባዅድ ምራድ አኽላ፡ኩዳንሲ መኾዅና¹⁵15.ኩዳን ደመለንካ ኒቱ አድሮ መኾዅሉ።¹⁶16.ዋስንካ ኩዳን አርድዅ፡አበዲ ዋስነስ ጉሸንካኻ፡ኲዲ ላዅ ውሪ ለጛ አድሮ ጋቢሉ፡ውረድ ውል ለጛ ወሪ ይኸ ሰዀር ጃብል አኾ ድጙስትሮ።¹⁷17.ነስር ዋስነሰ ጉሽን በክስታንድ ድዊ፡ይኸ በክስታንሲኽር ጉሸን፡ምእክር እንጋዅሰና ሀብረ ቋሊሉ።¹⁸18.እምንድክ ድውየኩም፡ኒውክ ብሪል እንሸውድናዅክ ዓስተርሊኽር እንሸውስሮ ግን፡ኒውክ ብሪል እንክድናዅካ፡ዓስተርሊኽር እንክስትሮ ግን።¹⁹19.ይኸ ለጛ እንተልድ ላለበከድ አኽኖ እና ብሪል፡እን ዓስተርሊ ህንባ ይኽርሲ ሺወነን ኡሮሎም ግን።²⁰20.ውረድ ለጛ ወሪ ሰዃ ይስጙድ ዲቢተነን፡አን ናነበክል ህንበኲን። ደመላዅሲካ ብሕል ይና ጀረብደት²¹21.በጥሮስ ኒል ስኲርዮ፡ “ድዊ መምህር ይዳን ደለመንለ፡ውሪካ ዶል ብሕል ይየሉ፡ለጛታ ዶልማ” ይኹሉ።²²22.ኢየሱስ “ለጛታ ዶል የሊካ፡ለጘታ ዶል ለጘትረጝን፡አኽታሲክ የኩንካ።²³23.ንድ መታን ሲመር ጃርዅል ላሲም ዕሹር፡ጅልውድሮ ዮ ገንሺንሲ እንሸቃዅሲ ተከኲ።²⁴24.ሺብሮ ተርሰሰና ላዅ ሸካ ሲሕ መክሊት አወዳዅሲሉ ሰኲስንዅሉ፡ኒልድ ፈደያዅሲ በሰናኻ ኒ እዅነዲ ኒ ቊርዲ ኒ ውክ ኒሸኻ ማልዲ ክስቶ ኒ እድዅ ገንጂስሮ አደድዅ።²⁵25.ደአም እንሲን፡እን ገንጂና፡ ኒጃብል ለቦ “ዎ ይአደራ ደለሚሲል ግን ግራ ናትክ፡ፈደይየካ ግን ዩ” ሺ ዊኹሉ።²⁶26.እንሲን እንኒአደራ ሰኸንዲሶሉ፡ናትካክ ኒ እድኹት ባርዅሉ።²⁷27.እንገንጂና ጠራር ኒልድ ፈሰና ላዅኒጨራ፡ሊኽ ዲናር አወዳዅሲ አርዅ እማ፡ጉርጉመድ ለመጭ-ሰሉ “እን አን አወደውሲካ ይማክልሲ መንተሲለ” ይዅሉ።²⁸28.ንኻ ኒ ልኲል ለቦ “ይሀ ደልም ነኽለ፡ናትክ ፈደይየካ ግን” ዮ አቅትራሲክ ሺዊዅሉ።²⁹29.ንኻ ጋዕ ዮ ጉሾ ናትክ ፈደይራሲክሉ፡እንሸዊ ስዅሉ።³⁰30.ኒጨራ ኒስ ተካ ምክርሂነስ ቋልነሰና፡እምንድክ በኻኽርኖ ናአደሪል ፈርኖ፡እን አኻ ጋርሲ ድዊኒዅሉ።³¹31.እን አደረኻ ነስ ዋሰሰና እን ገንጂና ጠራርሲ ኒልሽጘ፡ “ድዊና እንቲ ነበንታ ገንጂና ጥረትዅ፡አን ሺሪነዲ ንለ፡ኩ እድኹት ባርኹንካ፡³²32.ውራ እንቲ እን አን ሰኸንድሮለ፡ኲ እድንዅት ባረዅሰነካ፡እንደሃብረ ኩጨረስ ሰኸንተላማ?”ይኹሉ።³³33.እንሲን እን አደራ፡ሐረቅሮ ናትክ ኒ እድዅት ፈደይራሲክ ሳደደውድ ናትተል ደኲሶ እውዅሉ።³⁴34. እንሲን እን አደራ፡ሐረቅሮ ናትክ ኒ እድዅት ፈደይራሲክ ሳደደውድ ናትተል ደኲሶ እውዅሉ። ³⁵35. ኒሰና ይኸ እንተን፡እንታ ለበከዲክ እንታ ዳንሲ ብሕል የግደነን፡እን ይኽር ዓስተርሊ ህንምባዅር እንተት እንዳሀቢሮኩም ግን።

¹1.ኢየሱስ ነሀበ ጋበ ደምቢ ገሊለት ባሮ ዮርዳኖስር እንደረሲ ይሁዳር ብሪል እንቱዅ።²2.ከው ከላእ ተለይንዅሉ ናትካ ናው ሻኽና ሸዅዲ ልድ እቢስዅሎም።³3.ፈሪሳንልድ ላው ኒል ስኩር ይኖ፡ቀየስድኖሉ ጀረቢነ “ግርዋ አኻ ሰበብዲክ ኒ እዅነት ደቀርዶ ዋጅብመሉ” ይንዅሉ።⁴4.ንኻ “እን መሀደንታ እማና መሀዱ ነሳዅዲ ኡሰሪዲ ሀበ መሀደት ቀርዕ ግድናኽርማ?⁵5.ንድ መታን ግርዋ ኒኽርዲ ኒገነዲት ባሮ ኒ እዅነዲ ሕበርሰ ለጛ አኩኑንሲ፡ላ ስኻ አኽድኖ ግን።⁶6.ንድ ለጛ ስኻ አኩኑ ላስኻ አክድኖ ግን እማ፡ጃር እንሸዋኲሲ ግርዋ እንክጊኒት ይዅሎም።⁷7.ናዋ “እማ ውሪኹ ሙሴ ንርፍትሕ ድቅሩርዅሲ እዎ ስብድንላ ዮ አዘዝዅንሎም” ይንዅሉ።⁸8.ኢየሱስኻ “እንታ ለበካ ተብድ እንደዋ ይዅኩም ግን ግራ እማናት ሂሰና ሰጘላ”።⁹9.አን ላኪን ላዅ ኒ እዅነት ደቀረን ኤሪሪኻ ክኻንተን ነፈደኲ፡ይኸ እን ደቀርስረሪት ክኻንታዅር ነፈደኲ ይኹሎም።¹⁰10.ኒ ታለይቱት ነስ ተካ ጋብሲ ዋስነሰና፡ “ንሰና አከና ግርዋዲ እኲነዲ ስሪዕ፡ክኻንተግሪ ከተትና ኪደኲ” ይንዅሉ።¹¹11. ንኻ፡ “እና ጋባ ንሂት፡እን እዋኲልድ እውስቶሎም ህንበው ካያ አከግነን ናውክ ፈሀምድኖሉ ገረሰኒ።¹²12.ውረድ ላው ናገነር ጎድጉልድ እንገው አኽኖ እዃርሰው ህንበነዅ፡በልጛ አዳም መለኮሎም ህንበው ምሉካን ህንበነኲ፡በልጛ ሲመር ጃርዅድ መታን ናሹት መለኮ ህንበው ምሉካን ህንበነኲ፡እና ኒስ ፈሀምሮ ቀደራዅክ ፈሀምኒት”።ኢየሱስ ግናቲትሲ ገውረት¹³13.እንሲን ኢየሱስ ገውርዶሎም ይኖ ግናቲትሲ ኒል ናቅስንኹሉ።ዳአም ኒ ታለይቱት ዋኺትንኹሎም።¹⁴14.ኢየሱስ “ሀበገሎም ግናቲትሲ ይል እንትድኖ ባራ፡ውረድ ሲመር ጃርዅ ናሰና የውዱዅ ግን”፡ይዅሎም።¹⁵15.ናንሲ ና አኾርሊ ገምዶ ገውሮሎም ደምቢኻ ኒልድ ፈሩዅ።¹⁶16.ላቊራ በጥሕ ኒል እንቱዅ እማ “መምህር ሲመር ጃርዅሲ ለውያ አውያ ወራት እስያ ጀረብዳዅንለ?” ይኹሉ።¹⁷17. “ውሪዅ ትክያዅድ ወንቅርዳኹንለ፡ላዅ ጃር ካያ ግን ትክያዅ።ደአም ሲመር ጃርዅሲ ለውቶ ጀረብረን ትእእዳዳትሲ ተከዊ” ይኹሉ።¹⁸18.ንኻ “አወን ናው”፡ይኹሉ።ኢየሱስ “ኩውግ፡ነፈድግ፡ብንድ ሰምዕግ፡¹⁹19.ብሪል ኲዕለት ሺርዶ ኲዅርዲ ኲገናዲት ከበርዲ፡ይኸ ኲጨረስ ኲሹር ሰና ሃብረ እንከሊ” ይኹሉ።²⁰20.እንቊራኻ “ነስ እማና ይሽጉድክ ተርሰ ተከውንሲክ ግን፡አሪው ውራ ከብተውለ ህንባዅን?” ይኹሉ።²¹21. ኢየሱስ “እማ እምንድክ ሸተክቶ ጀረብረን ፈሪ ክምረ ገድሲ(ርድቅሲ) ክድሮ ድቡራንድ በንዶ ዓስትርሊ ገዲቶ ጒ ተለዪለ” ይዅሉ።²²22.ነስተካ ጋብሲ ዋሰሰና ቊራ ገሪ እርግነዲንሉ ኒልድ ቊርቊርቱ ፈሩዅ።²³23.ኢየሱስኻ ኒ ታለይቱትሲ “ይእምንድክ ይየኩም ገድ ሻዅ ጀነትሊ ቱሮ ገሪዅ ተባዅ ግን፡የኩንኩም።²⁴24.ወኮዶ ወንተሶ እምንዲክ ይየኩም ገሪ ገድ ሻዅ ጀነትሊ ትዋዅልድ ግሚላ መርቢ-ዕልድ ደኲሮ ስዳውኲ”፡ይኹሎም።²⁵25.ኒ ታለይቱት ነስ ተካ ጋብሲ ዋስነድ ገሪዅፈከር ስኑዅ “ንድሰና አኾ ደንቢ አወያዅ ግን ደኤንዶ ገረሳዅ” ይኑዅ።²⁶26.እየሱስ ተንሰ መኸልቱሎም እማ ኒን ከውድ ገረስተላ ግን ግራ ጃርድ ኒውክ ገረስተኲሉ” ይኹሎም።²⁷27.በጥሮስኻ ክልብርሰ “ይን እናሐን ኒትክ ባርኖ ተለይንኹንካ፡ውራቶክ አርኖ ግን፡” ይኹሉ።²⁸28.ኢየሱስ “እምንድክ ይየኩም እንትን እና ይት ተለይድኖ ህንብደናኽር፡ደንጐቢ እርድሊ አዳሚንዱዅራ ኒ ሳቡርዲ እንቶ ኒቂጦሪል ከፍዮሰና እን ትጝር እንሽካ ላጛ እስራኤል ድቁርሲ ፈረድትኖር መታን ሽካ ለጛ ቂጦታተል ከፍ-ይትኖ ግን፡የኩንኩም።²⁹29.አኻዅክ ይመታንዮ ኒ ልጝንዲ፡ሻንዲ፡እኽርዲ፡ገናዲ፡እቊርዲ፡ከረመናዲት ባራዅ፡ ሊኽ እሽባ አርዶ ግን፡ኒ ድምብኻ ዲመዳይም ሲመር ዓስተሩዅሲ ለውሮ ግን።³⁰30.ሰአም ገሪው ሰልፍ ሰጘው ደምቢትድኖ፡ግን፡ገሪው ደምቢራ ሰጘዋ ሰልፍል አኽድኖ ግን”።

¹1.ሲመር ጃርዅ ግርዋ ኒ ከረመኒል ኤረስ ጃረቢሮዮ ጉራብድ ልጝልድ ፋዅሲ ተከኲ።²2.ከደመው አሮሰናኻ፡ግርግል ላዲናር አሮሎም ዋስስትጘ ኻ ሰገስኹሎም።³3.ሰዓት ሰዃ ፈሰና ይኸ ላው ክድመት እንገት ዕዳጊል ሰሰው ዩኑ አርዅሎም እማ “ፈራ እንትጝር ይከረመኒል ሰገራ፡እንታ ስድቅሰነክ ኡሪኩም ይኹሎም፡⁴4.ናውኻ ሰገርኑዅ።⁵5.ከዶ ሐዲስድ ሰዓት ቀልታዲ ሰዓት ሰሳዲሲ ፈኒሰና እሲኹ።⁶6.ሰዓት ሽካ ላዅ ገቢል ኤርው ላሪ ክድመት እንገት ድጌር ነበክል እንጎገየውሲ ቋልዅ እማ፡ውሪዅ ግርግስክ ላሪ እሰግዲኒ አንጦጠል ደናኹን ይኹሎም።⁷7.ናዋ-“ላዅ ሰገሳኹና ብንኹን” ይንኹሉ ናኻ “ፈራ እንትጝር፡ይከረመኒል ሰገራ” ይኹሎም።⁸8.ኲንጝ አኾ ሰና፡እን ከረመኒ አደራ ናዲ ሰገሮ እርጋዅሲ ሽጘ “ደንበርልድ ተርስረ ጃበርሊ አኽታሊክ ናስድቅሲ እዊሎም” ይኹሉ።⁹9.እን ሰዓት ሽካ ላዅ ሰገረው ሰልፍ እንትኖ ላዅክ ላዲናር ናዅ ከለብርኑዅ።¹⁰10.እን በደሮ ሰገሮ እርገው ናተሪሲ የአይ በጀኽድኖ ከለብርድኖ ተኪኹሎም።ደአም ናውር ላዲናር ካያ ከለብርኑዅ።¹¹¹²11-12.ከአብርኖሰና “አበዲ ነን ደንቢረድ እንትሮ ላ ሰዓት ከደምኖ አወሃቢነ ግን ይን ግርግ ሺራዅሲክ ከደምናኽርዲ ይና እርዋ ኡርኹንሎም” ዩኑ እንከረመኒ አደራ አውይሲ ጉድዕድዕ ይኑዅ።¹³13.ንኻ ናልድ ላዅሲ ሽጘዅ እማ “ውራ እንቲ ይዲ ላ ዲናርድ አኽጋዅማ ዋስስትጝረ እርግራዅ፡አን ላሪ ሃበኹካ ሻኽሊ።¹⁴14.ኩድ አካዅሲ አድሮ ብርፍ ዪ፡እና ደምበርሲ ኲውስከው እውያሎም ይምራድ አኸነዲን ግን፡¹⁵15.ይማልሲ አን ጀረበሰነክ እስያ ገረሰጋኽርማ?ውሪ አን እንጅቢና ይአክነድማ ኲዕል እዳንዅን?¹⁶16.እማ ኒሰና ጀበር ደምቢትድኖ ግን፡ደንጎባኻ ጃቢትድኖ ግን።ውረድ ሽጝስተውኻ ገሪው ግን፡ፍሪርሰውኻ እቊቱ ግን።¹⁷17.ኢየሩሳሌምትል አኽራሲክ ፈሩኻ ኢየሱስ እን ሽካ ለጘት ላ ገፍድ ናቱ ዕጭጭሰሎም ነዋ ይኹሎም፡¹⁸18. “እናሐን ኢየሩሳሌምትል አኽራሲክ ተረገሰነኩን እንኲን፡ኒል አዳሚንዱዅራ አቅሸታ በህሊንዲ ከታበንዲር ናንተል መጠይስሮ ግን።¹⁹19.ናዋ ክሪል ፈረድኖሉ ግን፡እማ አረመንድ ሻኺስድኖሉ ግን ነጛ ቃበብድኖሉኽር፡ኒዳግ ማዕቢድኖኽር ግን፡ኒ ደምብኻ ቀለጥኖ ስቀልድኖሉ ግን፡ደአም ሲዀር ኳሪል ጉሮ ግን” ይኹሎም።ዘብዴዎቊርድ ሐበን²⁰20.ዘብዴዎስቊርድ ገናኻ ንርቊርዲ ኒል እንትሮ ላዅሲክ ሺዊቶሉ ይሮ ኒጃብል ውጅህስትቲ።²¹21.ኢየሱስኻ “ውራ ጀረብራኹን?”ይኹላ።ንርኻ “ እና ለጛ ይቁርሲ ኲሲመርሊ ኩላውዲ ኲሸንገብዲትል ጠፍሕድቶሎም ሸንህዲለ” ይቲሉ።²²22.ኢየሱስኻ “እንትን ይደነውሲ ላሪ አርእድኒ፡እን አንጅእያ ፈራ ዋንጨስ ጅእትኖ ገረስትናማ” ይኹሎም።ናውኻ “ገረስና” ይንኹሉ።²³23.ንኻ “ይዋንጨስኻ የዋ ጅእትና፡ደአም ይላውዲ ይሸንገብዲትል ጠፍሕድየኩምታ ይት ቋላ ጋር አኽላ፡እን ይኽር ደላምዶ ህንባዅድ ግን ግራ”፡ ይኹሎም።²⁴24.እንሽካ ነስ ዋስነስና፡እን ለጛ ሻን አኾርሊ እንጠርንኹሎም ገደብኹሎም።²⁵25.ኢየሱሳ ናቱ አዳሎም ነዋ ይኹሎም፡ “ሰየም ከዋ አወይሲ ሰየምሰነት አርእድኑዅ ናምራድሰነካ ሃበነኩሎም።²⁶26.እንተል ኒሰና አኽጊኒ፡እን እንተልድ ሰየምስሮ ጀረበዅ-ክ እንታ ገንጂና አኽኒ፡²⁷27.ይኸ እንተልድ ላዅ ጃብራ አኽሮ ጀረበን እንታ ገንጂና አኽኒ።²⁸28.አዳሚንዱዅራ ኒ እንቶ ህንባዅ እንስቅስሮኽር ኒፊኲትሲ ገሪውድ መታን ደኲሶ ኡሮ ኽር ግን ግራ፡እንሳቅሮ እንትላ”።ለጛ ዓረፍ አያሪሆሩ²⁹29.ያሪኮትልድ ፈኻ ከው ገሪው ለሄክንኹሉ።³⁰30.እና ሐና ለጛ ዓረፍ ደርብ ሸሊ ከፍይኖ ዋንቱኑ ኢየሱስ ንድ ዶኰኲ እንኩዅ ይነሰነሎም “ዎ ይና ደራ ኢየሱስ ዳዊቱዅራ ሳኸንቲና” ዩኑ ጨርሕዅ።³¹31.ከዋ ትምይድኖ ዋኺትንኹሎም።ኰዲነካ “ዎ ይናአደራ ዳዊትዅራ ሰኸንቲና ዩኑ” ዋዕይንዅ።³²32.ኢየሱሳ ኒል ሽጘሎም “ውራ እሰየኩም ጀረብደናዅን” ይዅሎም።³³33.ናዋ “ዎ ይናደራ ይናዕልልሲ ብቶና” ይንኹሉ።³⁴34.ኢየሱስኻ ሳኸንድኖሰነሉ፡ናዕልልሲ ተመዱኹሎም ንርድ ንርድኻ ቋልኑዅ እማ ተለይንዅሉ።

¹1.ኢዮሩሳሌምር፡ገቢል ቤት ፋጊ፡ጊራ ዋኸትኹድ ገቢል አረርስረሪ ድጌትል ገእዮሰና፡ኢየሱስ ለጛ ኒ ታለይቱትሲ ሸጞ፡ነወዩ እንሸቅዅሎም።²³2-3. “እን ጫ እንታ ቅብሊ፡ህንባ ድገትል ፈራ፡ኒል ድዃራ ኒር ዕሉረዲ እሸውስሮ አርትኖ ግን፡እን ክድኖ ነት ይል ናቅሰላ፡ላዅ ወራሀብደናዅን የንኩማ ይናደራ ጀረበኩሎም፡ናኻ ላሪ የለኩም፡አሸሽእዅድ ወንተስሮሎም፡ግን፡የሉ” ይኹሎም።⁴⁵4-5.ኒንኻ፡እን ነቢይ ዮ-እርጋኹ ተመምሮር መታን አኻዅ ግን፡ኒጛ ንሰና ግን “ጽዮን ድቊረት የላ፡ኩሲም በኪት ናድከልድ ሽጓዅ ድዃራ ዕሉሪል ጨዓንሶ እንተረኩኪ ያኹ ግን”⁶6.ኒ ታለይቱት ፈርኖ ኒ ያዅሰነሎም ሀቢኒዅ።⁷7.ድዃራ ንር ዕሉረዲ ናቅስንኹሉ፡ናታዅንሲ ዓደፍድኖ ኒዳግ ጨዓንዅሉ።⁸8.እን ከወልድ ላዋ ኒ ጃብጃብል፡ናታኲንሲ ወሸቅዱኑ፡ላዋ ይኸ፡ካነልድ ሸለሽልሲ(ለንክክሲ) ሸልዒነክ ኒጃብል ወዱኑ እርግንዅ።⁹9.ነበኪስኖሉኻ፡ኒጃብዲ ኒጉርበዲትል፡ፈሩኑ “ሆሳዕና ዳዊትኹረድ፡እን ጃር ስጙድ እንተራኹክ ገውርሳዅ ግን፡ሆሳዕና ዓስተርሊ አክታሲክ” ዩኑ፡ሆርያ እሱኑ፡እርግኑኽ።¹⁰10.ኢየሱስ ኢዬሩሳሌምትል ዔርሰና ናውክ ኮቊር “ኒን አውንኒ፡” ዩኑንሲክ፡ረወጭስንዅ።¹¹11.ከዋ “ኒን ኢየሱስ ነቢይ ናዝሬት ገሊለርዅ ግን”፡ይንዅ።¹²12.ኢየሱስ ናቤይ ጸሎትሊ ቱዎኻ፡ኒል ክደውዲ ጅበውዲት ናትክ ዳገንዅሎም፡እን ሰናዱቅ፡ሰላዲ በደለውዱሲ ክብስዱዅ፡እን ኳትርክዱ እርገው ስኽር፡ና መናብርሲ ክብሶ ዳገንዅሎም። ¹³13.እን ይልጝን፡ልጝን ጸሎትዅ ይስትሮ ግን፡ያዅ ክቱብ ህምንባኵ፡እንትጛ ጋኻ ስኳንዅ ሀብዲኒዅሉ፡ይኹሎም።¹⁴14.ልጝን ጠሎትዅልኻ ዓረፍዲ ደልጓሳንዲ እንትንዅሉ ናትካ እቢስዅሎም።¹⁵¹⁶¹⁷15.አቅሸታ በህሊንዲ ከታበንዲ፡እን ንእሰ አምራትዲ፡እን ግናቲት ልጝን ጠሎትሊ ክብሲነ፡ “ሆሳዕና ዳዊትዅረድ” ዩኑ ጀን ጀነውሲ:ቋልንነዲስ ቀጡበትድ ሐውይኖ። 16.እንቲ እና ናው የነውሲ ዋሰግራኽርማ፧ይንዅሉ።ኢየሱስኻ “የዋ እን ግናቲዲ ዓለትዲር ሐምዳ ስኩስሩኽ ያዅሲ አንበብድግድናኽርማ፧” ይኹሎም። 17.ባሮሎምኻ ድገትልድ ፌ ቢታንያትል ፈሩዅ፡ኒልኻ ኪዅ።¹⁸¹⁹18.ጉራብድ ዕርዲረትል ወንተሩዅ ከአርቱዅ፡ 19. ደርብ ሸሊ ላ በለሳ ቋልዅ እማ፡ ፍርር ዋንተንላ ዮ፡ ንርትል አኽራሲክ፡ ገለዱዅ። አሽ ንኻ ላሪ አርለላ። የድቦ ዲመድ ፍሪትግ ዮኻ እሺዅላ። ንርድ ንርድኻ ኢድቲ።²⁰²¹²²20. ኒታለይቱት፡ኒስ ቋልነሰና “ቋላ አዋኽረ ንርድ ንርድ ኢድቲን”ይስቲጚኒዅ። 21-22. ኢየሱስስኻ፡እምንድክ የኵም አማነት ክምደነጝ ተሐዳበግደነጝር፡እና በለሰት እሰዅሰና ኒልድ ኩጛዅ እሲትንድ፡እና ጊረስ ጒ፡ነትድ በሐርሊ ማልሲ ይደነንሉ፡አኽርድኵም።ኒውክ እምነትድ ሺውደነኲክ እውስትሮኵም ግን ይኹሎም።²³23. ልጝን ጠሎትዅል ክንሱኻ፡ከዳታት አወውልዲ ሽማግለ ድገሩዲ ኒል እንትኖ፡አበዲ እንቲ አውር ምራድድ ግን እና እንቲ ሀብረውሲ አውሲ ግን ኩድ እና ምራድ ኒስ እዋዅ፧” ይንዅሉ። ²⁴24. ኢየሱስ አጝኽር ላሪ ወንቀርድየኵም፡ንሂትል ወንትስደነንለ፡አጝኽር አውር ምራድድ ነስ እሰት ድውየኩም ግን።²⁵25. የሐንስር ጥምቀት አዊልድ ግን፧ ዐስተርልድ መኒ እማ ብሪልድ፧” ናውኻ ናሹር ናሹ ኰድጚነ፡ “ዓስተርልድ ይነጛ፡እማ ውሪዅ ደአም ከለብር ግድኒሉ ይሮና ግን።²⁶26. ብሪልድ ግን ይነጛ ከውሲ ጓቊትነኲን፡ውረድ ከው ናውክ የሐንስቲ ነቢር ሰና ከለብርኖሉ፡እርግንዅ። ²⁷27. ንድኻ ከንዶ ይንታ ላሪ አርእኒ” ይንዅሉ።ንኻ “አንኽር አውር ምራድድ ነስ እሰት ድወሊኩም” ይኹሎም።²⁸28. ውራ ተካኹንኩም፡ላግርዋ ለጛ እቊር ሰጘነኩሉ፡እንቅዳዅሲ ሽጞ “ላዅፋ ንኪ እንቲ ኪድጝል ፈሪ” ይኹሉ። ²⁹29. ንኻ “ፈረሊ” ዮ ጉሹዅ፡ደምብርጛ ጥዕሶ ሰገሩዅ። ³⁰30. እን ሊጘርሊ እንቶሰነኻ ኒሰና ይኹሉ፡ንኻ “አጃ ፈርዲ” ዩዅ፡ደአም ሰገርጊ ከብቲዅ።³¹31. እና ለጘርድከልድ አውኒ ግን ናልድ ኒኽርድ ምራድሲ እሰዅ፧ ይኹሎም።ናዋ “እን ጃበራዋ” ይንዅሉ።ኢየሱስኻ ነዋ ይኹሎም፡እምን እምንድክ ይየኩም ዓገብዲ፡ናፍሳንዲ ሲመር ጃሩዅል በደርድኖኩም ግን። ³²32.የሓንስ ደርብ ሸታከትኹድ እንትኹኩም፡ደአም ዓገቡዲ ናፍሳንዲ ካያ እምንኑኹሉ ግን ግራ እንትን ከለብርድኒሉ።ናት ቋልድኖኽር አምንግኒሉ ወሪ ይድኖ ደምበረድር ጥዕስድኒ።³³33. እና አሪሲ ድግምሲ ሸኑራ፡ላ ግርዋ ኒኪድጝል ጭንድቅ እሲዅ።ቅፍጥንሰኻ ምዃዅኹሉ፡ኒል ሚድ ደቍደቍሰና ልጝን በሄር ገበሩዅ፡እማ አረሰድ ላምሶሉ ሺሽዶ ኤሪኮል ጋሺቱዅ። ³⁴34. መሽው አኾሰና ኒ ገፍሲ ናቅስድኖሉ ዮ ኒ ገንሺንሲ እን አርስሊ እንሻቅኹሎም።³⁵35. ደአም እን አረስ እንሽቅሲ አድኖ ላዅስኻ ግንፍፍድ የዓምብኑኹሉ፡እን ሊጘርስኻ ኩንኹሉ፡እንሲዀርስኻ ክርጝድ ለኸንድንኹሉ። ³⁶36. ሐዲስድ ኮዶ ጀበርልድ በጀኸው አሪው ፈስኹሎም፡ነስር አድኖ እንጃበርሰና እሲኒኹሎም። ³⁷37. ናድካ ደምብኻ፡ገድም ይዅረስታ ስመርድነሉ ዮ ኒዅረስ ፈሱዅ።³⁸38. ደአም እን አረስ እንደራ ቅብለድ እንተራዅሲ ቋልነሰና፡ናሹር ናሹ ኒን ግን እን ለወንታ፡ላዃ ናኒ ከረመነስ ለውኖ ኩንንሉ፡ይስቲጚኒዅ። ³⁹39. ሻኽኖኻ እንደራ ጭንድቅልድ ፍድኖ ኩኑኹሉ።⁴⁰40. እን አደራ ወንተራካ ክውራሃቢሮሎም ተካ ኹንኩምሲን አረሲ፡ይኹሎም። ⁴¹41. ናዋ እን አርስ ጠራራንሲ ምቍለድ ድሂሶ ኒ ጭንድቅሲ አሪው ኒወክወክትሊ ኒምህርሲ እውውድሉ ኡሮሉ ግን፡ይንኹሉ⁴²42. ኢየሱስኻ ነዋ ይኹሎም፡ እን በናየን ቃብብኖ ማልነሪ ክርጛ፡ላመሔገይድ ድኩር አኽቲ፡ኒንኻ ጃርድ አኻዅግን።ይና ዕልላ ጃብላ ፈከርዳዅ ግን፡ያዅሲ እን ሻትካን ክቱ ባንሊ አንበብድግድናኽርማ፧⁴³43. ንድ ሰበትድ ሲመር ጃሩዅ እንተልድ አስትሮ ግን፡ትክያ ፈደን ፍሪሳ ከውድኻ እውስትቶ ግን የኩንኩም። ⁴⁴44. እና ክርጛኒል ለባኹካ ከርቲሮ ግን፡እን ክርጛ ለብሩኹሉኻ ኮዶ ሃርጀክስሮ ግን፡የኩንኩም እንኩኹን።⁴⁵45. ከዳታት አወውዲ ፈሪሳንዲ እን ድግም ኒዅሲ ዋስነሰና፡ናት አኸት አርእስትኹሉም እማ ሸኽድኖሉ ጀረቢኒዅ። ⁴⁶46. ደአም እንከው ኒቢርሰና ከለብርኖሉ እርግንነዲን፡ናት ጓቍትኑዅ።

¹1.ኢየሱስ ኮዶ ሐዲስዲ ድግምድ ጅጝስቲሮሎም ተርሲዅ፡ነዋኻ ይኹሎም፡²2. “ሲመር ጃርዅ ላሲም ኒዅረድ ክኻንዳዅሲ ተከኲ።³3.እን ኰሸረውሲ ሽጝድኖ ኒ ገንጂንሲ እንሻቁዅ፡ናዋ እንተርነስ ጉሽኑዅ።⁴4.ኮዶ ሐዲስድ እን ሽጝስተውስ” እና ሐን ቢልሳቊዲ ቲምትዲት በረኾ ኒውክ ምድ ደለሞ ንባአኲ ላዃ ይክኻንሊ ይድኖሎም ኤሪ ገንጂንሲ ፈሱዅ።⁵5.ናዋ ኒሕስር እሲኒሉ፡ላዋ ና ኪሽጝል፡ላዋ ናው ጀረብና ጋርልከ ፈርኑዅ።⁶6.እን ከብተውኻ እን ገንጂንሲ አድኖ ጠዓምብንዅሎምር ኩኑኹሎምር።⁷7.እንሲን እን ሲም ቀጠቦ ኒ ክራውሲ ፈሶ እን ከውሲ ድሂሶ ና ደገጊት ሐውሲዅ።⁸8.ንድ ደምቢ ኒ ገንጂንሲ “ክኻን ደለሙዅ፡እን ሽጝስተውኻ ጉሽኑዅ እማ ታሚሰለሎም።⁹9.ፈራ ቁምሺባ፡መሔገይያትልኽር ደርፍፈልር አርድነውሲክ ሽጛ” ይኺሎም።¹⁰10.እንሲን እን ገንጂን ኒልክ ደርፍፈል ፍኖ አርነውሲክ ሽጝንዅ፡እን ዳስኻ ትክየውዲ ምቊልዲሲ እንትኽ ይዅ።¹¹11.እን ሲም ሽጝስተውሲ(እንተውሲ) ቋልዶ ዮ ዳስሊ ትውዅ፡ኒላ ግርዋ ታዊና ክኻኑዅ ሰርጋዅ ቋሎዅ እማ፡¹²12. “ድዊና ይማዱ እንቲ አበዲ አወሃብረ ግን ታዊና ክኻኑዅ ሰርግሪ ዳስል ቱሮ ህምብራኹን?” ይኹሉ።ንኻ ወንተሳዅሲክ ኤርእምበ ትም ዮዅ።¹³13.እንሲን እንሲም ኒ ገንጂንሲ ነዋ ይኹሎም፡ “እና ግርወስ አድኖ ሉኩኲዲ ናትትዲት እን ሸውድኖ እንደራ ከደን ጭልምሲ ማለሉ፡ኒላ ስረናዲ እርኩካ ሐርቀቅነዲ እኽሮ ግን።¹⁴14.ውረድ ሽጝስተው ከላእ ግን፡ ፍሪርሰውኻ ከለለው ግን”።ቄሳርሲ ወርኮት ኡና¹⁵15. ንድ ደምቢ ፈሪሳን ፈርኖ አውሀቢነ ኒጋብድ ከቲሰነትሉ ኰድጚኒዅ።¹⁶16.ና አጋርሲ ሄሮዲሳንዲ እን ሻቅኖኻ ነዋ ይንኹሉ፡ “መምህር እንቲ ላሪ ጓቊትግሪ እምን ጋብረት ይኸ ላዅሲ ጉኢትግሪ ጃር ደርብሲ ክንስረት አርእንኹን።ውረድ አዳምር ገሽ ቋልዶ ስማረላ።¹⁷17.እማ እንቲናን ኲት ተካዅሲክ ድዊና፡ቄሳርሲ ወርኮት ኡና ወጀባኹማ እማ ወጀበላ”።¹⁸18.ኢየሱስኻ ናምቊልናርሲ ኤሌለዩዅ እማ “ነበንቲ ብጙት ውሪዅ ወጠንደናዅንለ?¹⁹19.እንደ እን ሶልዲራ ወርኮትዅሲ ቋሊሳለ” ይኹሎም ናዋ ላዲናር ናቅስንኹሉ።²⁰20.ንኻ “እና ገሽዲ እና ክቱብዲ አውሩ ናው” ይኹሎም።²¹21.ናዋ “ቄሳርዱዋ” ይንኹሉ።ንኻ “እማ ቄሳርዱዅሲ ቄሳርሲ፡ጃርዅሲኻ ጃርድ እዋ” ይኹሎም።²²22.ነስተካ ጋብሲ ዋስኖሰና ፈከርዶሎም ባርኖሉ፡ፈርነዅ።²³ሰዱቃንዲ ክሪልድ ጉናዲ23.ናደምቢ እርድ ደንጐቢ ግርገድ ጉና እላ የው ሰዱቃን ኒል እንትኑዅ።²⁴24.ነዋይኖኻ ወንቀር ንኹሉ፡ “መምህር ሙሴ ላዅ ክኻንተ እዃርጊ ክረን፡እን ባይኦረት ኒዳንለዎ፡ኒዳንድ ፈደን ባርንሉ” ዮ ህንበኲ።²⁵25.እና ሐና ይና ነበክል ለጘታ ሻን ሰጘነኲ፡እንቅዳዅ ክኻንቲዅ፡ላሪ ባርግኻ ክሩዅ፡እንባይ ኦረታ ኒዳን ለውኹላ።²⁶26.ኒሰና ለጘርዲ ሲዀርዲ ናውክ ለጘተክ።²⁷27.ና ደምቢ እን እዅናኽር ክርቲ።²⁸28.ናውክ ክኻንቲነላ እርግኑዅ እማ፡ደንጐቢል ክሪልድ ጉና ወክትሊ አውኒ ግን ንራጝ አኽሮ ህንባኹ?”²⁹29.ኢየሱስኻ ነዋዮ ወንተስኹሎም፡ “እንትን ክቱብስኽር ጃር ሒልሰኽር ኤርእምብነድ ከትደነኲ እንኲድኑዅ፡³⁰30.ክሪልድ ጓናካክ ዓስተርሊ መላእኽቲ ጃሩውድሰና አኽድኖ ግን ግራ ክኻንደውር እላ ከኻንሰውር።³¹³²31-32.ክሪውድ ጉና ይኸ እንጃር ሙሴሲ “አን ጃር አብራሃምሩዅዲ፡ይስሐቅሩዅዲ፡ያዕቆብሩዅዲ ግን” ዮ እርጋዅሲ አንበብድድኒማ? እማ ገድም ጃር ህንበውዱዅ ግን ግራ ጃር ክሪውዅ አኽላ”³³33.እንከው ነስተካ ጋብሲ ዋስኖሰና ኒ ምህሮሲ ገሪዅ ፈከርስንዅ።ትእዳድ በሄር³⁴34.ፈሪሳን ኢየሱስ ሰዱቃንሲ አብሲ አበደት ዋስነሰና፡ገለልስጚዅ እማ ላት አኽኑዅ፡³⁵35.ላዅ ናልድ ሕጊ መሄርሳዃ ቀየስሮሉ ዮ፡³⁶36. “መምህር ኦሪትል ናድ ከልድ ኩጛዅ ትእዳድ ኤውን ግን” ዮ ውንቀሩዅሉ።³⁷37.ኢየሱስኻ ነዋ ይኹሉ፡ “ኲአደራ ጃርሲ ኲለበካዲክ ኲፊዅትዲክ፡ኲሒለትዲክ እንከሊ።³⁸38.ኒን ግን ናድ ከልድ ኩጛዅዲ፡ትእዳድ።³⁹39.እን ሊጘር ኒት ተካዃ ኲጨረስ ኲሹርሰና እንከሊ ያዅ ግን።⁴⁰40.ኦሪትዲ ነብያትዲ እና ለጛ ነል አረርሰኲ”።ክርስቶስ ዳዊቱዅራ አኸት⁴¹41. ኢየሱስ፡አሪሳን ዲባ ዓገልስኖ ዋኑኑ አሮሎም ንዋዮ ወንቀሩኹሎም፡⁴²42. “እንትን መሲሕድ ውራ ተካኹንኩም፡ ኒ አውዅራኒ” ይኹሎም።ናዋ “ዳዊቱዅራዋ” ይንኹሉ።⁴³⁴⁴43-44. ንኻ “እማ ዳዊት አዋህበ ግን አደራ ያደረስ አንኲት እንጣረውሲ ድኩር ኲልኩኮው እሲሪስክ ይላውል አኺ፡ዮ መንፈስድ ይአደራ ሽጛኹንሉ?⁴⁵45.እማ ዳዊት ያደራ ዩንሲክሉ አዋኸ ግን ኒዅራ ኒአከና” ይኹሎም።⁴⁶46.ላዅ ናልዳ ጋባ ወንተሳኹሉ ቢስቱዅ።ንድ ደንቢ ላዅ ረደዮ(ደይዎ) ወንቀሪኹሉ እርግላ።

¹1.ንድ ደምቢ ኢየሱስ ከውዲ ኒታለይቱትዲት ነዋ ዮ ጋቢኹሎም፡²2. “ከትታበንዲ ፈሪሳንዲ ሙሴር ቂጦሪል ከፍይኖ ህንበነኲ እማ።³3. ናው ይና ዅሲክኩም እሳኽር ተከዋኽር።ደአም ና ወራታትስና እሰጋ ወረድ ነን የነኲ ግራ ላሪ ድኳ እሰኒ።⁴4. ክብየጋ ምዅርሲ ለደድና (እንሸውኖ) ኒከሰል ምቊሰነኩሉ ፡ ናው ላኪን ጭብዖሲ ተመድኖሉ ጀረበኒ።⁵5. ይኸ ናጋርክ ህንቡክ ከው ቋልዳሎም ካያ እሰነኩ።⁶6. ክታበት እንሸውነዲ ቊጨን ቀማይሸውሲ እዳን ድነዲ ፡ ሙነትሊ ሽጝስትነ ሰና ቂጣታት ሰልፈሊ በደ ራረጝይነዲ፡ ኒሰና ይኸ ቤት ጸሎትሊ መናብር ላቡሩ ዲትል ኣክነስ እንከለነዅ፡⁷7.ኮዶ ይኽ ደርፍፈል ሀደፍ ይረንሎምር ዲቢል ኣከጝር፡ ሰላም ይድኖሎምር ፡መምህራን ሽጝስትድኖኽር እንከለነኩ።⁸8. እንትን ደኣም መምህር እንታዅ ላዅ ግን እማ መምህራን ሽጝሰትትኖ ጀረብጋ ። እንትን ና ዀርክሻን ግን ።⁹9.ካዶ ይኸ እንታኸር ዓስተርሊ ህምባኹድ ንኻ እናብሪል ላዅሲ ድዃ ኣብ ይጋ።¹⁰10.ይኸ ኒኻርሲክ ኣርደት ይስትትኖ ጀረብጋ ፡ ውረድ እንታ ኣደራ ላዅ ግን ፡ ንኻ ክርስቶስ ግን።¹¹11. እን እንተልድ ቅዳዅክ እንታ ንሽቃ ኣኺኒ ።¹²12. ውረድ ኣኻዅክ ኒሹት ክብሳዅክ ለጥ ይሮ ግን፡ እን ኒሹት ጀረብዳኹካ (ለጠቅሰኹካ) ክብ ይሮ ግን፡¹³13.ኣጀዋ ከታበንዲ ፈሪሳንዲ ብጘት ከውድ ጃር ዶርብሲ ኣበድደናኽር፡ ሲመር ጃሩኹል እንትጝር ቱደኒ ኣረውስኽር ቱድኖ ባር ደኒ።¹⁴14.ኣጀወ ከታበንዲ ፈረሳንዲ ብጙት ፡ ባያኦታታ ልጝቲ ማነይደናኽር ፡ ቋልስትትኖ ይድኖ ይኸ ጸሎትሲ ሺሽደናኽር ግን እማ ፍርድ ተባዅ ክለብርትኖ ግን።¹⁵15ኣጀዋ ከታበንዲ ፈረሳንዲ ብጙት፡ ላዅሲ እንታ እምነትሊ ተለይሮኩም ባሓርዲ ብራዲሲ ደላህ ይደነኩ፡ ላዳን ትዊሰናኻ እንታ እሽባ ድዲዅ ራእስደነኩሉ።¹⁶16.ኣጀዋ እንትን ዓረፍ፡ ላዅ ቤት ጸሎትዲ ሸረጛላረ ኣኽላ ይደናኽር፡ ኒል ህምባ ደሃብዲ ወርካዲሲ ኣከጛ ከታ ኣከኩሉ ይደናኽር።¹⁷17.ነበንቲ ዓወዲ(ገድኣንዲ) ዓረፍዲ ኣዊን ኩጛኹን እን ደሃብማ እማ እን ደሃብሲ ሸትክዳዅ ቤት ጸሎት፡¹⁸18.ኮዶ ይኸ ላዅሰደቀትዅድ ሸረን ላሪ አኽላ፡እን ሰደቀትል ገሞ ህምባዅድ አከጛ ሸርና አከኩሉ ይደነኲ።¹⁹19.ነበንታ ዓረፍ አዊን ኩጛኹን?እን ሰደቀትማ እማ እንታቦት ሰደቀትሲ ሸተክዳዅ።²⁰20.አጀና ታቦትድ ሸራዅ ሸሩንሲክ ኒል ገሞ ህምበ ውድር ሸረኲ።²¹21.እን ቤት ጸሎትድ ሸራዅ እን ኒል መንደርታዅድር ሸረኲ።²²22.እን ዓስተርድ ሸራዅ ቂጦራ ጃርኹድር እን ኒል ከፍዮ ህንባኹድር ሸረዅ።²³23.አጀዋ ከታበንዲ ፈሪሳንዲ ብጙጥ፡ናና ዓዲ ጨና አዳም ዲትልድ ሽከር ፍዲስደናኽር፡እን ትእዳድ ብሕልዲ ፍ-ትሕዲ እምነትዲትኻ ባርደናኽር፡ እን ደስ ባርግድኒ በደሮ ነስ ተከውትኖ እርግኹኩም።²⁴24.ነበንቲ-ሻንሹትስኻ ቀምዕደናኽር-ግሚለስኻ ስጙደናኽር ዓረፍ አርደት.²⁵25.አጀዋ እንትን ከታበንዲ ፈሪሳንዲ ብጙት፡ግባርዲ ጣሕሊራዲት ከደንድ ለጭ-ሕደናኽር፡ዓንቀይ ረድኻ ስዋንዲ ድብጥናርዲዲ እንትኽዮ ዋኑ ባርደናኽር፡በሪ እንተልድ።²⁶26.ነበንታ ፈሪሳዊራ ዓረብ በደርዶ ግባርዲ ጣሕሊራዲት ዓንቀይረድ ትክስረ እንቃሲ፡እን ከደንደድኻ ለጭሕሮ ግን።²⁷27.አጀዋ ከታበንዲ ፈሪሳንዲ ብጙት አርፍ ሽኻሩሲ ተክደናኽር ከደንድ ቋልድንሲክሎም ሽኻሩ ዓንቀይረዳ ናሽሽዲ ዓመቅዲሲ እንታኾ ህንበውሲ ተክደነኲ።²⁸28.ኒሰና እንትጝር ጐስኲድ ብንዲ፡አመቅዲ፡ሙቊልናርዲሲ እንታኽድኖ፡ዋንትዱኑ፡ከደንዳድ ከውድ በካይትዲ ሻትካንዲ ተክደነኲ።²⁹³⁰29-30.አጀዋ ከታበንዲ ፈሪሳንዲ ብጙት፡ነብያታ አርፍፍ በነይደናኽር፡ሻትካና ሐወ ቲትሰኻ(ሰዋርስኻ) ሰርገይደናኽር።ይና እክላ ወክትሊ ሰጝናኽር አክነን ኒቢያታ ብር ብቊስኒል ሕበርስግኒድ ሻኽናኽር ግን፡እማ በሪ እንተድ።³¹31.እንደዋ ይዱኑ እን ነብያትሲ ክዎውድ እቁር አኽድነት እንተ ላውድ ሰምዕደነኲድኑዅ።³²32.እንትጝር እንታ-ክል ምክረስ መልእዳ³³33.ነበንቲ ምራው፡አፍዖቲቊር፡አወሃብዲነ ግን ገሃነብልድ እንተ እግርና፡³⁴34.ንድ ግን አን ነብያትዲ፡ለፈኩዲ፡ከታበንዲ፡ፈሰኩንኩም፡እንትጛ ነልድ ላውሲ ኩይኖ ሎም፡ላውሲ ካነል ሰቀልትኖሎም፡ላውሲ ይኸ እንታ ቤት ጸሎታተል ቀለጥትኖሎም፡እማ ድገትልድ ድገ ድገንይኖሎምግን።³⁵35.እን ብር ሻትክ አቤል ዱልድ ተርሰ፡ዘካርያስ በራክያስዅሪ ብር ቤት ጸሎትሊ አኸታሲክ ናውክ እንታ ወይሊ ለብሮ(ገእይሮ) ግን።³⁶36.ነን ናውክ እና አሰል ነድ ዳግል ገመት ይእምንድክ የኩንኩም።³⁷37. ዎ ኢየሩሳሌም፡ኢየሩሳሌም ነብያትሲ ኩራኽር፡እንኩል እንሻ-ቅሰውስኽር ክርጝድ ጨፍጨፍራኽር፡አጀዋ እንቲ ዲርዋ ንርጫቊትሲ ንርካንፍፋ ዓንቀይሊ እን-ኩልኩል-ደሪርሰና አንኽር ኲቊርሲ ውሪካዶል እንኩልኩልድየልም ጀረቢኹን(ሕንግይኹን)፡እንትኻ ጋዕ ይሮ ጉሽሩኹለ፡³⁸38.እና ሐንዋ ናን እንታ ድገ ድምነት አኾ ከብቲሮ ግን።³⁹39.ንድ ደንቢ እንጃር ስጙድ እንተራዅ ገውርሳዅ ግን ይትናስክ ይገሽሺ ቋልደኒኒ የኩንኩም እንኩኹን።

¹1.ኢየሱስ ቤት ጸሎትልድ ፈ ፈርዅ፡ኒ ታለይቱትኻ ግብራ ቤተ መቅደስዅሲ ቋሊስድኖሉ ይኖ ኒል ስኲር ይንዅ።²2.ኢየሱሳ “ኒስ ኒትክ ቋልደናዅማ፡ክርጛ ክርጚዳግል አኾ ከብተላ ኒን ኒውክ ድምነት አኽሮ አኸት ይእምንድክ የኩንኩም፡ይኹሎም።³3.ጊራ ዋኻትኩል ተረገሶ ከፍ ዬሰነኻ፡ኒታለይቱት ኒል ስኲር ይንዅ እማ፡ “እማ እንደ ድዊና፡እና እንቲ ይራ ጋር አውን ግን ኒ አኽሮ ህንባዅ?እን ኩእንተርነዲ፡ደንጎባ እዲነዲ ውረኒ ግን-እሸረት? ዩኑ ወንቀርንዅሉ።⁴4.ኢየሱስ “ላዅ ከቲሰጊንኩም፡ፈጠና፡⁵5.ውረድ፡አን ግን፡ክርስቶስ ዩኑ ይስጝድ፡ከላእ እንትድኖኩም ግን፡ገሪውስኻ ከቲስድኖ ግን።⁶6.እንሽኽዲ ጂጛ እንሽኹዅድ ጋባውዲ ዋስትኖ ግን፡አረጋ ላሪ ታንትጋ፡ውረድ ኒን ኒውክ፡አኽሮ እሙን ግን።ደአም ኒደንጎባ አኽላ።⁷7.ከው እኺር ኺርሊ ጉሮ ግን፡ሲመር ሲመር፡አወይሲ ጉሮ ግን፡ኒልክ ብሪል ትግርዲ ሽዅደዲ፡ብሪውልእነዲ አኽሮ ግን።⁸8.ኒን ኒውክ ማሕገድ ሰልፍ ግን።⁹9.እንሲን ከያነትድ ኩድኖኩም ደኩስኖ ሻኺስድኖኩም ግን፡ይሱጝ ሰበብድ ናውክ እንጠር ድኖኩም ግን።¹⁰10.ገሪው ከቲድኖ ግን፡እኺር ኺርሲ ከየንድኖኽር፡ እንጠርስጚድኖኽር ግን።¹¹11.ገሪው ከቲድኖ ግን፡እኺር ኺርሲ ከየንድኖኽር፡እንጠርስጚድኖኽር ግን።¹²12.ምቊልናር(ዐመጭ) ብጅኽድ ገሪውል ውፋቅ ቀሽቀሽሮግን።¹³13.ደአም እንደንጎቢል አኽራሲክ ሀናእ ያዅክ ኒን ደአንዶ ግን።¹⁴14.ደአም በደሮ፡ወንጌል ሲመር ጃሩዅ፡አረሜንድ ሳሚዕ አኽሮር መታን፡ኒልክ እዲኒል ዋስስትሮ ህንበኩሉ።¹⁵15.እንዳንኤል ነቢይ ያዅሰና፡ምቊል፡ነፈሰአኩ፡ሻትክ አከንሊ ደውዬ፡ህንባኲሲ ቋልድነሰና፡አን በብደዅክ ፈሀምኒ።¹⁶16.እንሲን ያሁድ ብሪል ዲወውክ ጊተል እግሪኒን።¹⁷17.እን እራሪል ድየዅክ፡እራኳ አድሮ ዮ ልጝል ቱጊኒ።¹⁸18.ኪድጝል ድየዅር ኒታዊና አድሮ ዮ ድምቢራ ወንተርጊን።¹⁹19.እን ግርጋት ኒል እኲን ሐነኖ ህንበውዲ ነብሰውዲሲ መላለን።²⁰20.እንታ ህረብ ሽቅዲ ሰንበርዲሲ አኸጊን ሺዋ።²¹21.እዲና መሀድሰንትልድ ተርሰናን አኽራሲክ፡ንደምቢኽር አካጋዅ፡ቋልስትጋ ማሕገድ አኽሮ ግን።²²22.እን ግርጋት እንደን ድርጝገን፡ስኻ ሰረኲልድ ላኲ ደአንጊድ ደአም እን ግርጋት ፍሪርሰውድ መታን ድርጝሮን ግን።²³23.እንሲን ላዅ ክርስቶስ ናሐን ነራ ውሪ እንጫሓኒ እንጨደት የነንኩም እምንጋ።²⁴24.ውረድ እንግርጋትሲ ብጝት መሲሕንዲ ነብያትዲ ጉድኖ ግን።አከንሎምር እን ፍሪርሰውሲ ከቲስድኖ አምራትዲ ፈከርዳ ወራታትዲ እሲድኖ ግን።²⁵25.እናሐን በደሮ ድወኩም ህንበኩን ፈሀማኩም።²⁶26.እንጨሐኒ ክርስቶስ፡አው ከደንሊ የነንኩም ፈርጋ፡ወሪ ይኸ እናሐኒ ነት እና ንጝንሊ የነንኩም ዋስገሎም።²⁷27.አዳሚንድዅሪ እንተርና፡እን ምርክ ብርክስጘድ ተልዋሕዮ ኳራ ለቢል ቋልስታኹሰና ኒሰና አኽሮ ግን።²⁸28.በድን(ግናደት) ህንባ አካንሊ ግን ዓይ ናው እንኩልኩልሳዅ።²⁹ደንጎባ እዲነዲ ክርስቶስር ወንተርነዲ29.እን ግርጋት ማሕገዱውድ ደምቢኻ፡ኳራ ጨልምቶ ግን፡አርባኽር፡ንበርህሲ፡ኡቶ አኽላ፡ሽንግርው ዓስተርልድ ለብሮ ግን።³⁰30.ዓስተር ሒል ኒውክ ለለክስሮ ግን፡እንሲን አዳ ሚንድኲሪ ዱመት ዓስተርሊ ቋልስትሮ ግን።ከው ናውክ ብሪል ህንበው ስሪድኖ ግን።አዳሚንድዅረስ ሒል በሄርዲ ሳቡርዲ ግን።አዳሚንድ ዅረስ ሒል በሄርዲ ሳቡርዲ ብኳና ዓስተርዅድ ክልውርሶ፡እንተሩ ቋልድኖሉ፡ግን።³¹31.እንሲን ኒድ ፍሪርሰውሲ ሰጃ ወላውልድ እን ኩልኩልድኖሎም፡ኒ መላእኽቲት፡ዕንድር ከላእ ኮት ሲ፡ዓንደሩኑ እን ሽቅሮሎም ግን።³²32.ኒ እሻረትሲ ካና በለሲዅልድ ፈሀማሉ፡ውረድ ጠጥዕሮ ተርሰሰና ሐጋይ ሰኩረት አርእድንዅ።³³33.ነስተካ ብሳረትሲ ቋልድኖሰና ምል ይገኲም አዳሚንድዅራ ጭምድሊ ስኲሮ ዋንተት ፈሀመኲም።³⁴34.እምን እምንድክ፡የኩም፡በደሮ ነን ናውክ ከኽጊ እና አሰል ነን ደኮግነት።³⁵35.ሰመዲ ብረዲ ደኩሮ ግን ይጋበኻ ኒ ኾርሲክ ደኮላ።³⁶36.እንግርጋት አውት አኸት መልአኽቲ ዐስተርሩ አከነጝር አዳሚንድዅራ አከጝር፡አርእኒላ፡እክር ካያ ግን ንርቲ አርአዅ።³⁷37.አዳሚንድዅሪ፡ እንተርና ኖህር ግርጋትስና አኸሮ ግን። ³⁸38.እን ስዋ ሒለቱኽ ናዳግ ለብራሲክ እን ከው ላሪ ድኳ ፈሀምግኒ ቁኑኽር ጅኡኑኽር፡ክኻንዱኑኽር ክኻንቱኑኽር እርግኑዅ። ³⁹39. ኒትክ ዱሂስራሲክ አርእግኒ ዲወ ውሰና፡አዳሚንድዅሪ እንተርናኽር ኒሰና አኽሮ ግን።⁴⁰40.እንግርጋትሊ ለጛ ግርው ኪድጝል ዲዊድኖ ግን፡ላዃ አስትሮ፡ግን፡ላዃ ባርስትሮ ግን፡⁴¹41.ለጛ እኲን ላት ላመጥቃንሊ ተእኑኑ፡ዲዊድኖ ግን፡ላሪት አድኖ ናላሪት ባርድኖ ግን።⁴²42.እንታ አደራ ውሪ ሁመት እንተረት አርእድኒኒ እማ ሐሶሰያኽር ተርሃኽር።⁴³43.እንደ ኒስ አትዋየንዳ፡ልጝን አደራ ስዋና ቂር ውሪ ወክትድ እንተረት አርአን፡ደለሞ ዲርድ፡ኒልጝን ጓሕጉሕስራሲክ ሀመልስጊድ።⁴⁴44.አደሚንድዅራ፡እንትን አርእግድና ወክትል ግን ኒእንተርና እማ እንትጝር ደለምድኖ ድየሉ።⁴⁵45.ኒ አደራ ፍሪራዅ ገንጂና፡ምእክርዲ ተውሀዲሲ፡ወክትድ ኒ እዕያልድ ናነብራ ግርጊዅሲ ኒ ወክወክትል፡እዋዅ አወያዅኒ?⁴⁶46.እን ገንጂና፡እንዳህቡንሲክ፡ኒ አደራ ውንትሪል አረራዅሉ ቅስምዅ ግን።⁴⁷47.እምንድክ የኩም ኒልክ ኒማላ አወይሲ ሰየምሮሉ ግን።⁴⁸48.ደአም፡እንገንጂና ምቊላ ኒ ለበከድ ይ አደራ ሺሽሮ ግን ዮ፡⁴⁹49.ኒጨር ገንጂንሲ ጠዓንብሮ፡ሸከሮ ህንበውዲ ቊሮኽር ጅእሮኽር ተር ሰን፡ ⁵⁰50. አደራ እን ገኝጂኒዅ ኒጨበርጋ ግርገዲ ኒሐሰብጋ ሰዓዲትል እንትሮ ግን። ⁵¹51. ለጘትል በጥስሮሉግን፡ ኒበኽትኻ፡ እን ምቁልዲ አኽሮ ግን። ኒልኻ ስረነዲ እርኵክ ሓርቀምነዲ አኽሮ ግን።