¹Magi aye gubedo kwaro Yecu Kricito, Lakwar Daudi, lakwar Abraim. ²Abraim onywalo Icaka, Icaka onywalo Yakobo, Yakobo onywalo Juda ki omegine. ³ka doŋ Juda ki Tamar gunywalo Perej ki Jera, ci Perej onywalo Kejeron, Kejeron onywalo Aram;⁴Ci Aram onywalo Aminadab, Aminadab onywalo Nakucon, ka Nakucon onywalo Calmon; ⁵Calmon ki Rakab gunywalo Boaj, ci Boaj ki Ruth gunywalo Obed, ki Obed onywalo Yece; ⁶ka yece onywalo kabaka Daudi. Daudi ki dako pa Uria gunywalo Solomon. Daudi ki dako pa Uria gunywalo Solomon.⁷Ci Solomon onywalo Rekoboam, Rekoboam onywalo Abija, Abija onywalo Aca; ⁸Aca onywalo Yekocapat, Yekocapat onywalo Joram, Joram onywalo Ujia.⁹Ujia onywalo yocam, Yocam onywalo Akaj, Akaj onywalo Kejekia; ¹⁰Kejekia onywalo Manace, Manace onywalo Amoc, Amoc onywalo Yocia; ¹¹Yocia onywalo Yekonia ki omegine, i kare ma giterogi woko kwede i Babilon.¹²Lacen ma onoŋo doŋ giterogi woko i Babilon, Yekonia onywalo Cealtiel, ci Cealtiel onywalo Jerubabel; ¹³Jerubabel onywalo Abiud, ka Abiud onywalo Eliakim, Eliakim onywalo Ajor; ¹⁴Ajor onywalo Jadok, Jadok onywalo Akim, Akim onywalo Eliud.¹⁵Eluid onywalo Eleajar, Eleajar onywalo Matan, Matan onywalo Yakobo; ¹⁶Yakobo onywalo Yucepu cwar Maliam mubedo min Yecu ma gilwoŋo Kricito-ni. ¹⁷Kit meno kwaro ducu ma yam ginywalogi cakke ki i kom Abraim o kwede i kom Daudi, ducu onoŋo welgi romo apar wiye aŋwen, dok cakke ki i kom Daudi o wa i kare ma yam giterogi kwede i Babilon, onoŋo romo kwaro apar wiye aŋwen, dok cakke i kare ma giterogi kwede i Babilon o kwede wa i kom Kricito romo kwaro apar wiye aŋwen.¹⁸Man aye obedo kit ma yam ginywalo kwede Yecu Kricito. I kare ma minne Maliam Yucepu doŋ ocunu oye, ma peya kingi orwatte, ginoŋo ni Maliam tye ki ic pa Cwiny Maleŋ. ¹⁹Cware Yucepu yam onoŋo obedo dano ma kite atir, pe omito ni eket lewic i wi Maliam; ento onoŋo mito ni eryem woko liŋliŋ i muŋ.²⁰Ento i kare ma onoŋo Yucepu pud tye ka lwodo lok meno ki i cwinye, cutcut lamalaika pa Rwot onen bote i waŋ lek, kun wacce ni, “Yucepu, lakwar Daudi, pe ilwor kwanyo Maliam me bedo dakoni, pien ic ma en tye kwede-ni obedo ic pa Cwiny Maleŋ. ²¹En binywalo latin awobi, ibicako nyiŋe Yecu, Pien bilaro dano ki i balgi.”²²Lok man ducu otimme wek lok pa Rwot ocobbe kakare kit macalo yam oloko i dog lunebi ni. ²³“Nen, nyako mo ma peya oŋeyo laco biyac, binywalo latin ma laco, gibicako nyiŋe Emmanuel”--te lokke ni, Lubaŋa tye kwedwa''.²⁴I kare ma Yucepu oco ki i waŋ nino, otimo kit macalo lamalaika pa Rwot ocike kwede; okwanyo dakone otero bote, ²⁵ento pe obedo kwede, nio waŋ ma ginywalo latin, ci ocako nyiŋe Yecu.

¹Ka doŋ ginywalo Yecu i Beterekem ma i Judaya i kare me loc pa kabaka Kerode, nen, luryeko mogo ma gua yo tuŋ wokceŋ gubino i Jerucalem, kun gipenyo ni, ²“En latin ma ginywalo me bedo kabaka pa Lujudaya-ni tye kwene? Pien onoŋo waneno lakalatwene yo tuŋ wokceŋ, ci man wabino ka wore.” ³I kare ma kabaka Kerode owinyo lok man, cwinye opoto matek, kadi wa jo Jerucalem bene ducu cwinygi opoto matek.⁴Pi meno omiyo kabaka Kerode ocoko ajwagi madito ki lupwony-cik me rokgi ducu, ci openyogi ni, “Kricito mono gibinywalo kwene?” ⁵Jo-nu gudokke iye ni, “I Beterekem ma i Judaya, pien lanebi yam ocoyo ni, ⁶‘In Beterekem i lobo me Juda, in pe itidi twatwal ki i kin luloc me Juda; pien laloc bia ki i in, en aye ma biloyo jona jo Icrael.’ ”⁷Ci Kerode olwoŋo luryeko i muŋ, guniaŋe kun gititte kare ma lakalatwe onen iye. ⁸Ka doŋ ocwalogi me cito i Jerucalem kun waco botgi ni, “Wuciti wupeny lok kom latin man maber kikore, ce ka wunoŋe ci wudwokka lok, wek an bene acit awore.”⁹I kare ma doŋ guwinyo lok pa kabaka, gucito ki yogi ci guneno lakalatwe ma yam koŋ guneno yo tuŋ wokceŋ ca otelo nyimgi, obino ocuŋ ki malo wa i kabedo ka ma onoŋo latin-nu tye iye. ¹⁰Ka guneno lakalatwe meno, cwinygi obedo yom adada.¹¹Ka gudonyo i ot, ci guneno latin kacel ki minne Maliam cutcut guryebbe piny guwore. Gugonyo yecgi ma onoŋo tye iye lonyo madwoŋ, ci gumiye mot, jabu ki odok luban ki murra. ¹²Lacen Lubaŋa ocikogi ni pe gudok cen ki ŋegi bot Kerode, ci gudok tugi doŋ kun gilubo yo mukene.¹³I kare ma luryeko gucito woko, ci lamalaika pa Rwot onen bot Yucepu i waŋ lek kun wacci, “A malo, kwany latin ki minne, riŋ ilar kwedgi Ejipt, ci wubed kunnu nio waŋ ma awaco lok botwu, pien Kerode doŋ cok yenyo latin man wek enek woko.” ¹⁴Ci Yucepu oa malo okwanyo latin ki minne ki dyewor, ocito kwedgi i Ejipt; ¹⁵gubedo kunnu nio ka Kerode oto. Lok man otimme wek lok ma yam Rwot oloko ocobbe kakare, ma yam olok ki i dog lanebi ni, “Yam alwoŋo Woda nia ki i Ejipt.”¹⁶I kare ma Kerode doŋ oniaŋ ni luryeko gutimo ryeko i kome, akemo omake matek twatwal, ci ocwalo dano guneko litino co woko ducu ki i Beterekem kacel ki i kabedo ducu murumo kenyo, cakke ki i kom litino me mwaka aryo dok kwede piny, kun poro ki kare ma yam luryeko guniaŋe pire ca.¹⁷Man omiyo lok ma yam lanebi Jeremia oloko ocobbe kakare ni, ¹⁸“Koko owinnye ki i Rama, kumo ki koko lyel; Lakeri onoŋo kok pi litinone. Okwero woko ni pe myero gikwe cwinye, pien litinone doŋ gipe.”¹⁹I kare ma doŋ onoŋo Kerode oto woko, lamalaika pa Rwot onen bot Yucepu i waŋ lek ki i Ejipt, kun wacce ni, ²⁰“A malo, kwany latin ki minne, ci idok kwedgi cen i lobo Icrael, pien jo ma onoŋo nene gimito neko latin-ni doŋ guto woko.” ²¹Ci Yucepu oa okwanyo latin ki minne odok kwedgi cen i lobo Icrael.²²Ento ka Yucepu owinyo ni Arkelao aye doŋ tye ka loc i Judaya ma ka wonne Kerode, omiyo lworo omake me dok kunnu; ento Lubaŋa ocike i waŋ lek omiyo owoto ocito i Galilaya. ²³En ocito obedo i gaŋ ma nyiŋe Najaret, wek gin ma yam lunebi guloko ocobbe kakare ni, “Gibilwoŋe ni Lanajaret.”

¹I kare meno Jon Labatija obino kun tito lok i tim me Judaya, ²kun wacci, “Wuŋuti, pien ker me polo doŋ onyiko cok.” ³Pien man aye dano ma yam lanebi Icaya otito pire ni, “Dwan dano mo ma daŋŋe i tim ni, Wuger yo pa Rwot, wutir yone ocuŋ atir.”⁴Jon yam onoŋo ruko boŋo yer kinaga, kun tweyo pyere ki del, onoŋo camo bonyo ki moo kic ma i tim. ⁵Onoŋo pol dano gia ki i Jerucalem, ki lobo Judaya ducu, ki lobo ducu ma tye cok ki Jordan, gimol gibino bote. ⁶Gituco balgi, ci en batijagi i kulu Jordan.⁷Ento i kare ma en oneno Luparicayo ki Lucadukayo gibino kun gimito ni en ebatijagi, owaco botgi ni, “Wun litino twol ororo, aŋa ma owaco botwu ni myero wuriŋ woko ki i akemo pa Lubaŋa ma mito bino-ni? ⁸Doŋ wuti gin ma nyuto ni wuŋut i kom balwu, ⁹pe dok wucak tamo ni, ‘Watye ki kwarowa Abraim.’ Koŋ wunen awaco botwu ni, Lubaŋa tye ki twero me miyo gweŋ magi olokke odok likwayo Abraim.¹⁰Kombeddi doŋ giketo latoŋ woko i lwit yadi, yat acel acel ma pe nyak nyige mabeco, gitoŋo gireto woko piny, ci gibolo woko i mac. ¹¹“An abitijawu ki pii pi nyuto ni doŋ wuŋut woko i kom balwu, ento ŋat ma bino luba-ni tek kata woko; pe amyero me mako war tyene. En bibatijawu ki Cwiny Maleŋ, dok ki mac bene. ¹²Oderone me pyeto bel tye i ciŋe, en biyubo larone woko maber, ci coko kalle dilo i dero, ento cuŋe en biwaŋo woko ki mac ma pe to.”¹³Yecu oa ki i Galilaya obino bot Jon i dog kulu Jordan, wek Jon obatija en. ¹⁴Jon onoŋo mito kwero woko, owaco bot Yecu ni, “Amito in aye ibatija an, ento in dok ibino bota ni an aye abatija in?” ¹⁵Ento Yecu odokke iye ni, “Wek koŋ doŋ obed kumeno kombeddi, pien porre botwa me cobo gin ducu ma tye atir.” ci Jon oye lokke.¹⁶I kare ma doŋ gityeko batija Yecu, ci en okatti woko ki i pii oyotoyot; cutcut polo oyabbe, ci oneno Cwiny Maleŋ pa Lubaŋa ma bino kun lyanne piny macalo akuri, ci opye i kome. ¹⁷Ci dwan ocako winnye ma a ki i polo ma wacci, “Man aye Woda ma amare, ma cwinya yom i kome.”

¹Cutcut Cwiny Maleŋ otero Yecu wa i tim wek Catan obite. ²Ci Yecu ori kec nino pyeraŋwen dyeceŋ ki dyewor, ka lacen kec ocako neke. ³Labit dano obino ci owacce ni, “Ka in i Wod pa Lubaŋa, wac ki godi magi gulokke gudok kwon.” ⁴Ento Yecu odok iye ni, “Yam gicoyo ni, ‘Dano pe bibedo kwo ki kwon keken, ento bedo kwo ki lok ducu ma a ki i dog Lubaŋa.’ ”⁵Catan dok otere i gaŋ maleŋ, ci ocibe ocuŋ i wi labila ot pa Lubaŋa, ⁶ci owacce ni, “Ka in i Wod pa Lubaŋa. koŋ ia ki malo kun ipoto piny pien yam bene gicoyo ni, ‘En biciko lumalaikane piri,’ dok bene ni, ‘Gibijoli ki ciŋgi, wek pe iyok tyeni i kom got.’”⁷Yecu dok ogamo doge owacci, “Yam bene gicoyo ni, ‘Pe iom i Rwot Lubaŋani.’ ” ⁸Catan dok otere malo i wi got mabor adada, ci onyutte ker ducu ma i wi lobo ki deyogi ducu. ⁹Ci Catan owacce ni, “Magi ducu abimiyo boti, ka iryebbe iwora.”¹⁰Ci Yecu owacce ni, “Nyik icit cen, Catan, pien yam gicoyo ni, Wor Rwot Lubaŋani, dok bene iti pire keken.” ¹¹Cutcut Catan oweke, ci lumalaika gubino gukonye.¹²Cutcut ka Yecu owinyo ni gimako Jon gitweyo woko i mabuc, oa obino i Galilaya; ¹³oweko Najaret, ci ocito obedo i Kapernaum ma tye i dog nam, i lobo Jabulon ki Naputali.¹⁴Wek lok ma yam lanebi Icaya oloko ocobbe kakare ni, ¹⁵“Lobo Jabulon ki lobo Naputali, yo tuŋ i nam, loka Jordan, Galilaya pa Lurok. ¹⁶Jo ma yam gibedo i piny macol doŋ guneno dero ceŋ madit, jo ma yam gibedo i lobo ki i tipo me to, ceŋ doŋ otuc woko omenyogi.”¹⁷Cakke i kare meno Yecu ocako tito lok kun wacci, “Wuŋuti, pien ker me polo doŋ onyiko cok.”¹⁸I kare ma Yecu obedo ka wot kun rabo dog nam Galilaya, ci oneno omego aryo, Cimon ma gilwoŋo Petero ki ominne Anderiya, ka gitye ka bolo obwo recgi i nam; pien onoŋo gin lumak-rec. ¹⁹Ci olwoŋogi ni, “Wubin wulub kora, ci an abimiyo wudoko lumak dano.” ²⁰Ci cutcut gutugi weko obwogi, gulubo kore.²¹Ka dok owoto anyim manok, ci oneno omego mukene aryo, Yakobo ki ominne Jon, gin awobe pa Jebedayo, ma onoŋo gitye i yeya kacel ki wongi Jebedayo ka kubo obwo recgi, ci olwoŋogi. ²²Cutcut gutugi weko yeya ki wongi Jebedayo, ci gulubo kore.²³Yecu owoto orumo lobo Galilaya ducu, kun pwonyo i kacokkegi, dok bene onoŋo tito lok me kwena maber me ker pa Lubaŋa, ocaŋo bene kit two ducu ki kit goro ducu ki i kin dano. ²⁴Mumiyo nyiŋe oywek i lobo Ciria ducu, ci dano gukelo jo ducu ma komgi lit bote, jo ma gitwo kit two mapatpat ki jo ma arem obwoyogi, jo ma tye ki cen maraco, jo ma twoyo two alili, ki jo ma twoyo two akweya, ci en ocaŋogi. ²⁵Lwak dano mapol ata ma gua ki i Galilaya, Dekapoli, Jerucalem, Judaya ki loka Jordan ducu gulube.

¹Yecu ka oneno lwak, ci oito woko malo i wi got, ka doŋ obedo piny, ci lupwonnyene gucito bote. ²Ocako pwonyogi kun wacci, ³“Gitye ki gum jo ma giŋeyo ni gin lucan i lok me cwiny, pien ker me polo megi. ⁴“Gitye ki gum jo ma kumo, pien gibikweyo cwinygi.⁵“Gitye ki gum jo ma mwol, pien gibileyo lobo doko megi. ⁶“Gitye ki gum jo ma kec ki orwo pii nekogi pi bedo jo ma kitgi atir, pien gibimiyo giyeŋ. ⁷“Gitye ki gum lukica, pien gin bene gibitimo kica botgi. ⁸“Gitye ki gum jo ma cwinygi leŋ, pien gin aye gibineno Lubaŋa.⁹“Gitye ki gum jo ma kelo kuc, pien gin aye gibilwoŋogi ni litino pa Lubaŋa. ¹⁰“Gitye ki gum jo ma giketo ayelayela i komgi pi bedo jo ma kitgi atir, pien ker me polo megi.¹¹“Wutye ki gum ka dano ŋalowu, kun giyelowu ma giwaco kit lok ducu maraco gobagoba i komwu pira. ¹²Wupwo, cwinywu obed yom atika, pien bakacic ma gibimiyowu me pwoc dit, tye i polo, pien lunebi ma yam gukwoŋo nyimwu dano guketo ayelayela i komgi kit meno.”¹³“Wun wukado me lobo; ento kado ka doŋ odoko bot, ci gibitimo niŋniŋ wek dok odok mit? Konnye doŋ noŋo pe, myero giony woko dano onyon. ¹⁴“Wun wuceŋ me lobo. Gaŋ ma gigero i wi got pe twero kanne.¹⁵Dok pe gicwinyo tara me auma ki aduku, ento gicibo i wi okar, ci lyel caro piny bot jo ducu ma tye i ot. ¹⁶Wun bene wubed jo ma menyo piny calo tara bot dano, wek gunen tic mabeco ma wutiyo ci gumi deyo bot Wonwu ma tye i polo.¹⁷“Pe wutam ni an abino ka geŋo dano ni guwek lubo cik ki lok pa lunebi woko; pe abino ka geŋo dano lubogi, ento me cobogi acoba. ¹⁸Ada awaco botwu ni, nio waŋ ma polo ki lobo bitum woko, latin ton mo acel, kadi ki nukuta mo acel me cik pe birwenyo, nio ka lok ducu ocobbe kakare.¹⁹Pi meno, dano mo ma bimiyo cik mo acel ki i kom cik magi doko yogoyogo, kun pwonyo ki dano kit meno, gibilwoŋo ni en dano matidi i ker me polo; ento ŋat ma gwoko cik magi, kun pwonyo ki dano, gibilwoŋe ni en dano madit i ker me polo. ²⁰Pien awacciwu ni, ka pe kitwu obedo atir makato kit lupwonycik ki pa Luparicayo, ci pe wubidonyo i ker me polo.²¹“Doŋ wuwinyo lok ma yam giwaco bot jo macon ni, ‘Pe ineki; ŋat ma oneko dano gibiŋolo kop i kome.’ ²²Ento an awaco botwu ni ŋat mo ka kiniga omako i kom ominne gibiŋolo kop i kome; dano ma yeto ominne gibitero i Lukiko, ki ŋat ma biwaco ni, ‘In lamiŋ’ gibibolo woko i mac me Geena.²³Pi meno, ka ikelo motti bot Lubaŋa, ma itye ka tyerone i kom keno tyer, ka ce ipo ni omeru onoŋo tye ki lok mo i komi, ²⁴ci myero iwek motti kunnu i nyim keno tyer, ci idok cen; mukwoŋo koŋ wumer wuribbe ki omeru, ka lacen doŋ idwogi ityer motti.²⁵Mak larem woko oyotoyot ki ŋat mudoti, i kare ma pud wutye ka wot kwede i yo wucito i lukiko, wek dano mudoti-ni pe oteri i nyim laŋolkop, ci laŋolkop bimiyi bot lakur-piny, ci teri tweyi woko i mabuc. ²⁶Ada awacci ni, pe ibikatti woko ki kunnu, nio ka iculo ducu, ma wi cente mo pe orem.²⁷“Doŋ wuwinyo ka yam giwaco ni, ‘Pe itim abor.’ ²⁸Ento an awaco botwu ni, dano mo ma neno dako ce paro ni ebed kwede, meno noŋo doŋ otimo abor woko kwede ki i cwinye.²⁹Ka ce waŋi tuŋ lacuc aye ma miyo ipoto i bal, kol ci ibol woko ka mabor; pien bedo ber ka dul komi mo acel orwenyo, kato ma kono gibolo komi woko kulu i Geena. ³⁰Ka ce ciŋi ma lacuc aye miyo ipoto i bal, toŋ iŋun ibol woko; pien bedo ber ka dul komi mo acel orwenyo, kato ma kono gibolo komi woko kulu i Geena.³¹“Yam giwaco ni, ‘Dano mo ma ryemo dakone, myero omiye waraga me keto nyom.’ ³²Ento an awaco botwu ni, dano mo ma ryemo dakone, kono pi lok me tim me tarwaŋ keken, noŋo doŋ omiyo dako-nu odoko latim abor; dok dano ma onyomo dako ma cware oryemo noŋo otimo abor.³³“Dok bene yam wuwinyo lok ma onoŋo giwaco bot jo macon ni, Pe ikwoŋ kwoŋ goba, ento cob kwoŋŋi ducu bot Rwot. ³⁴Ento an awaco botwu ni, Pe myero wukwoŋ kwoŋ mo kadi ki acel, kadi ki nyiŋ polo, pien meno komker pa Lubaŋa, ³⁵nyo ki nyiŋ lobo, pien meno kom me teno tyene, nyo kadi ki nyiŋ Jerucalem, pien meno gaŋ pa Kabaka madit.³⁶Dok bene pe ikwoŋ kwoŋ ki wii, pien in pe itwero loko yer wii mo acel doko matar nyo macol. ³⁷Ento wuwek lokwu obed ni ‘Iyo’ nyo ‘Pe’; gin mukene makato lok man noŋo oa ki bot Larac.³⁸“Doŋ wuwinyo yam ka giwaco ni, ‘Waŋ giculo ki waŋ, lak giculo ki lak.’ ³⁹Ento an awaco botwu ni, Pe icul kwor i kom dano mo ma otimo gin marac i komi. Ka ce ŋat mo odoŋo lemi tuŋ lacuc, lok bote lemi tuŋ lacam wek odoŋ bene.⁴⁰Dok ka ce ŋat mo mito pido kwedi ni wek eter kotini, ci miye kanyini bene. ⁴¹Ka ce dano mo odiyi tektek ni itiŋ yecce icit kwede i wot me mairo acel, wot kwede wot me mairo aryo. ⁴²Ka dano mo olegi gin mo ci myero imiye, dok bene pe myero ikwer pi den bot ŋat ma mito deno jami ki boti.⁴³“Dok wuwinyo bene ka yam giwaco ni, ‘Mar lawoti ento ikwer lakworri.’ ⁴⁴Ento an awaco botwu ni, Wumar lukworwu, dok bene wuleg Lubaŋa pi jo ma keto ayelayela i komwu, ⁴⁵wek wudok litino pa Wonwu ma tye i polo. Pien en miyo ceŋŋe tuc bot jo maraco ki jo mabeco bene, dok miyo kot cwer bot dano ma kitgi atir, ki bot jo ma pe kitgi atir bene.⁴⁶Pien ka wumaro jo ma marowu keken, ci wubinoŋo iye kit pwoc aŋo? Lujog-mucoro kono pe gitimo kit meno? ⁴⁷Ka ce imoto utmegini keken, ci noŋo itimo gin aŋo maber makato jo mukene? Lurok ma pe giŋeyo Lubaŋa-ni bene pe gitimo kit meno? ⁴⁸Wubed jo ma bal mo pe i komwu, kit macalo Wonwu ma tye i polo bal mo pe i kome-ni.

¹“Wugwokke, pe wunyut kitwu ma atir i nyim dano ni wek gunenwu. Ka wutimo kumeno ci pe wubinoŋo bakacic mo ki bot Womwu ma tye i polo. ²“Tye kuman, ka ikonyo lucan pe ikut tum, macalo lugoba mogo gitimo i kacokke ki i yo-gu, ni wek dano opakgi. Ada awaco botwu ni, doŋ gutyeko gamo bakacic woko.³Ento in ka imiyo kony bot lucan, pe iwekciŋi ma lacam oŋe gin ma ciŋi ma lacuc timo, ⁴wek imi kony bot lucan i muŋ; ento Woru ma neni i muŋ bimiyi bakacic.⁵“Dok ka wutye ka lego Lubaŋa, pe wubed calo jo ma lugoba, pien gimaro lego Lubaŋa kun gicuŋ acuŋa i kacokke ki i aŋaka ŋaka yo-gu ducu, ni wek dano onengi. Ada awaco botwu ni, gin doŋ gutyeko gamo bakacicgi woko. ⁶Ento ka ilego, cit idony i kicikani ci ilor doggola woko, ka ileg Woru ma tye i muŋ; ci Woru ma neni i muŋ-ŋi bimiyi bakacic. ⁷“Ka wutye ka lega pe wudur lwak lok mapol kit macalo Lurok ma pe giŋeyo Lubaŋa gitimo-ni; pien gitamo ni Lubaŋa winyo legagi pi lwak lok mapol ma giduro-ni.⁸Pe wubed calo gin, pien Wonwu ŋeyo gin ma wumito ma noŋo peya wupenye. ⁹Doŋ wuleg kit man ni, ‘Wonwa ma tye i polo, giwor nyiŋi maleŋ. ¹⁰Ker meri obin; giti gin ma imito i lobo kit ma gitiyo i polo.¹¹tin camwa me tin. ¹²Iwek balwa, macalo wan waweko bal pa dano ma gibalo botwa. ¹³Pe iterwa i abita, ento ilarwa bot Larac. Pien ker ki tek ki deyo obedo meri matwal. Amen’.¹⁴Ka wutimo kica bot dano pi balgi, ci Wonwu ma tye i polo bene bitimowu kica; ¹⁵ento ka pe wutimo kica bot dano pi balgi, ci Wonwu ma tye i polo bene pe bitimowu kica pi balwu.¹⁶“Ka wuri kec pe wubed macalo lugoba ma waŋgi noŋo olwal woko, pien gibalo waŋgi kit meno ni wek dano onen ni gitye ka ri kec. Ada awaco botwu ni, doŋ gutyeko gamo bakacicgi woko. ¹⁷Ento ka wuri kec, wuwir wiwu woko ki moo, ci wulwok waŋwu woko bene, ¹⁸wek dano pe gunen ni wutye ka ri kec, ento Wonwu ma tye i muŋ aye onen; en Wonwu ma nenowu i muŋ bimiyowu bakacic.¹⁹“Pe wukan lonyo piwu kenwu i lobo, ka ma nyenye ki nyal gibalo woko, dok ka ma lukwo gibino gituro ot ci gikwalo woko. ²⁰Ento wukan lonyo piwu kenwu i polo, ka ma nyenye ki nyal pe gibalo, dok ka ma lukwo pe bino gituro ot ci gikwalo. ²¹Ka ma lonyowu tye iye cwinywu bene bedo iye.²²“Tara me kom aye waŋ. Ka ce waŋi bal mo pe iye, ci komi kulu bibedo leŋ. ²³Ento ka ce waŋi tye ki bal mo i kome, ci komi kulu bibedo i colpiny. Doŋ ka leŋo ma i ii-ni odoko col, ci colle doŋ bedo rom mene! ²⁴“Pe tye dano mo ma twero tic ki rwodi aryo; pien bikwero ŋat acel ci maro mukene-ni, nyo bimoko i kom ŋat acel, ci cayo ŋat mukene-ni. Pe wutwero tic pi Lubaŋa ka dok wutiyo pi lim bene.²⁵“Pi meno awaco botwu ni, pe wubed ki tam mapol pi kwowu, ni wubicamo aŋo, nyo ni wubimato aŋo, nyo pi komwu, ni wubiruko aŋo. Kwo pe pire tek kato cam? Ki kom kono pe pire tek kato ginaruka? ²⁶Koŋ wunen winyo me polo; pe gicoyo kodi dok bene pe gikayo, pe bene gidilo cam i dero, ento Wonwu ma tye i polo pud pitogi. Wun pe piwu tek kato pigi woko?²⁷Doŋ aŋa i kinwu ma twero medo mwaka acel i kom kwone pi bedo ki tam mapol? ²⁸Piŋo wubedo ki par mapol pi ginaruka? Koŋ wutam pi leŋa me tim, kit ma gidoŋo kwede. Pe giwiyo uci, dok bene pe gicweyo boŋo; ²⁹ento pud amedde ki waco botwu ni, kadi bed Solomon orukke ki deyone ducu, ento pe orukke macalo mo acel i kingi.³⁰Ka ce Lubaŋa ruko lum ma i tim kit meno, ma bedo tye pi nino ma tin keken, ento diki inoŋo gibolo woko i keno, ci en pe birukowu makato, wun jo ma niyewu nok? ³¹Pi meno pe wubed ki par mapol kun wuwacci, ‘Wabicamo aŋo?’ nyo ni, ‘Wabimato aŋo?’ nyo ni, ‘Wabiruko aŋo?’³²Pien Lurok gitye ka yenyo jami magi ducu; Wonwu ma tye i polo ŋeyo bene ni wumito jami magi ducu. ³³Ento koŋ wukwoŋ keto cwinywu i kom kerre, ki noŋo kit ma atir ma en tye kwede, ci jami magi ducu gibimedo botwu. ³⁴Pe wubed ki par mapol pi nino ma diki, pien nino ma diki biparo pire kene. Wuwek can me nino acel acel otum ki ninone.

¹“Pe wuŋol kop i kom jo mukene, wek wun bene pe giŋol kop i komwu. ²Pien kop ma wuŋolo-ni bene gibiŋolo i komwu, dok gin ma wupimo kwede jami, en aye doki gibipimo kwede jami botwu.³Piŋo ineno cuŋ kal ma tye i waŋ omeru, ento dul yat ma tye i waŋi in kikomi pe ineno? ⁴Nyo itwero waco bot omeru niŋniŋ ni, ‘Wek akwany cuŋ kal ma tye i waŋi-ni woko’ kun in bene dul yat tye i waŋi? ⁵In lagoba, koŋ ikwoŋ kwanyo dul yat ma tye i waŋi-ni woko, ci miyo doŋ ineno piny maber me kwanyo cuŋ kal ma tye i waŋ omeru ca.⁶“Pe myero wunywak jami maleŋ ki jo ma pe guye Lubaŋa. Pien gibilokke gilwenyo i komwu. Man noŋo rom macalo bolo kidi mo me wel i nyim opego, ma gibinyono megi anyona ki tyengi woko-ni.⁷“Wulegi, ci gibimiyo botwu; wuyeny, ci wubinoŋo; wudwoŋ doggola ci gibiyabo botwu. ⁸Pien dano ma lego gimiye, ki ŋat ma yenyo bene noŋo, ki ŋat ma dwoŋo doggola bene gibiyabo doggola bote. ⁹Aŋa i kinwu ma won latin, ma ka latinne olege ni omiye kwon, ci bimiye gweŋ? ¹⁰Nyo ka olege ni omiye rec, ci bimiye twol?¹¹Doŋ ka ce wun jo maraco wuŋeyo miyo mot mabeco bot litinowu, ci Wonwu ma tye i polo pe bimiyo jami mabeco makato ducu bot jo ma lege! ¹²Kit gin ducu ma wumito ni dano gutim botwu, wun bene wutim botgi kit meno; pien man aye tyen lok me cik pa Moses ki me pwony pa lunebi.¹³“Wudony ki i doggola madiŋ, pien doggola ma tero dano i to lac, dok yone gipiro maber, dok jo ma donyo ki iye pol. ¹⁴Pien doggola ma tero dano i kwo diŋ, ki yone bene rac, dok jo ma noŋo yo meno ginok.¹⁵“Wugwokke i kom lunebi ma lugoba, ma gibino botwu ma gurukke woko calo romi, ento ki i cwinygi noŋo gitye calo orudi muwor. ¹⁶Wubiŋeyogi i kom kitgi. Gitwero pwono olok ki i kom yat okuto, nyo nyig oduro ki i kom yat tworo? ¹⁷Kit meno, yat maber nyako nyige mabeco, ento yat marac nyako nyige maraco.¹⁸Yat maber pe twero nyako nyige maraco, ki yat marac bene pe twero nyako nyige mabeco. ¹⁹Kit yat ducu ma pe nyako nyige mabeco gitoŋo ci gibolo woko i mac. ²⁰Kit meno wun bene wubiŋeyogi i kom kitgi.²¹“Pe dano ducu ma gilwoŋa ni, ‘Rwot, Rwot’ aye gibidonyo i ker me polo, ento ŋat ma tiyo gin ma Wora ma i polo mito. ²²I nino meno jo mapol biwaco bota ni, ‘Rwot, Rwot, yam pe watito lok pa Lubaŋa i nyiŋi, dok pe waryemo cen maraco-gu woko ducu i nyiŋi? Yam pe watiyo tic mogo matek madito i nyiŋi?’ ²³Ci abituco botgi ka maleŋ ni, ‘Onoŋo pe aŋeyowu; wua woko ki bota, wun lutim gin maraco.’²⁴“Dano acel acel ma winyo lokka ce tiyo, bibedo calo dano maryek, ma ogero ode i kom pata got. ²⁵Kot ocwer, lalele omol matek, ci yamo okodo matek i kom ot meno oyeŋo, ento ot pe opoto, pien te gutine gikwinyo i kom pata.²⁶Ento dano acel acel ma winyo lokka ce pe tiyo bibedo calo dano ma lamiŋ ma ogero ode i kom kweyo. ²⁷Kot ocwer, lalele omol matek, yamo okodo matek i kom ot oyeŋo, ci ot opoto woko; potone owinnye matek adada.”²⁸I kare ma Yecu doŋ otyeko loko lok magi ducu, lwak guuro kit pwonnye matek, ²⁹pien opwonyogi calo ŋat ma tye ki twero, pe macalo lupwony-cik.

¹I kare ma Yecu doŋ oa ki i wi got olor piny, lwak dano mapol gulube. ²Ci cutcut ladobo obino bote, orumo coŋe piny i nyime kun wacce ni, “Ladit, ka imito, itwero lonya.” ³Yecu oryeyo bade ogude, kun wacce ni, “Amito; lonnye.” Cutcut dobone otugi caŋ woko.⁴Yecu ocike ni, “Nen ni pe iwaco lok man bot ŋat mo; ento icinyutte bot ajwaka pa Lubaŋa ci ityer mot ma yam Moses ociko pire-ni, wek dano gunen ni ada in kara doŋ icaŋ.”⁵I kare ma Yecu odonyo i Kapernaum, ladit mo ma loyo asakari obino bote, ma lege kun wacci, ⁶“Ladit, laticca tye twoyo two akweya, obuto piny i gaŋŋa, ma noŋo arem doŋ oketo kome woko.” ⁷Ci Yecu odokke iye ni, “Aebino ka caŋe.”⁸Ento ladit ma loyo askari ogamo lokke ni, “Ladit, an pe amyero me wek ibin idony i oda; ento wac lok awaca keken, ci laticca bicaŋ. ⁹An bene dano ma giloya aloya i dog tic, atye ki askari bene ma an aloyogi. Ka awaco bot askari mo acel ni, ‘Citi’, ci cito, dok ka awaco bot ŋat mukene ni, ‘Bin’, ci bino, ka awaco bene bot opiina ni, ‘Tim man’, ci timo.” ¹⁰Yecu owinyo lok man ma dano-nu oloko, ci ouro twatwal. Owaco bot lwak ma gulube-ni ni, “Ada awaco botwu ni, peya anoŋo niye ma rom ki man, kadi i Icrael.¹¹Atittiwu ni jo mapol bia ki tuŋ wokceŋ ki tuŋ potoceŋ gibibedo i dog cam kacel ki Abraim, Icaka ki Yakobo i ker me polo, ¹²ento litino me ker gibibologi woko i colpiny, ka ma dano bikok kun gikayo lakgi iye.” ¹³Lacen Yecu owaco bot ladit ma loyo askari ni, “Citi, myero otimme boti kit macalo doŋ iye kwede-ni.” Ci laticce ocaŋ woko cut i cawa meno.¹⁴Lacen i kare ma Yecu odonyo i ot pa Petero, ci oneno maro Petero obuto piny onoŋo tye ki two lyeto. ¹⁵Yecu ogudo ciŋe, ci two lyeto ocaŋ woko ki i kome, oa malo ocako gwoko Yecu.¹⁶Otyeno me nino meno dano gukelo bote jo mapol ma onoŋo cen maraco tye i komgi; ci oryemo cen woko ki lok keken, dok bene ocaŋo jo ducu ma onoŋo komgi lit. ¹⁷Man otimme wek lok ma yam lanebi Icaya oloko ocobbe kakare ni, “En otiŋo gorowa, dok otiŋo twowa ducu i kome.”¹⁸Ka Yecu oneno lwak dano orume woko dyere, ci owaco ni myero gukat loka nam tuŋcel. ¹⁹Lapwony-cik mo oa obino bote owacce ni, “Lapwony, abilubi ka ma icito iye ducu.” ²⁰Ento Yecu odokke iye ni, “Too tye ki boro, winyo me polo bene tye ki odigi, ento Wod pa dano pe tye ki ka ma myero epyel iye wiye.”²¹Dok dano mo acel i kin lupwonnyene owacce ni, “Ladit, koŋ iwek aciyik wora.” ²²Ento Yecu odokke iye ni, “Luba, wek jo muto guyik jo muto wadigi.”²³Ka Yecu odonyo i yeya, ci lupwonnyene gulube. ²⁴Cutcut pii me nam ocako twagge matek, ma yeya onoŋo doŋ cok lwiny woko i te pii; ento Yecu onoŋo onino woko. ²⁵Ci gucito gucoye, kun giwacce ni, “Larwa Rwot, nen wato woko do.”²⁶En owaco botgi ni, “Piŋo wubedo ki lworo, wun jo ma niyewu nok?” Ci oa woko ojuko yamo ki nam, nam ocako liŋ mot. ²⁷Mumiyo dano guuro matek, kun giwacci, “Man dok kit dano aŋo ma yamo ki nam giwinye-ni?”²⁸Ka Yecu doŋ oo loka nam tuŋcel, i lobo pa Lugadara, cutcut jo aryo ma cen maraco tye i komgi gurwatte kwede; onoŋo gua ki i kin lyel. Onoŋo giger adada ma ŋat mo pe twero kato ki i yo kenyo. ²⁹Ci gudaŋŋe matek ni, “Ilaro aŋo kwedwa, in Wod pa Lubaŋa? In mono ibino kany ka unowa ma kare peya oromo?”³⁰Lwak opego mapol onoŋo gitye ka cam ka ma onoŋo gitye ka lok iye. ³¹Ci cen maraco gubako doggi bote kun giwaco ni, “Kace imito ryemowa woko, cwalwa i opego-gu.” ³²Ci Yecu owaco botgi ni, “Wuciti.” Gua woko ki i kom jo-nu ci gudonyo i i opego; cutcut lwak opego gutwarre ki ŋwec gularo piny i luŋ ci gupoto woko i nam, gumwony guto woko i pii.³³Lukwat guriŋo woko, gucito wa i gaŋ ci gutito lok i kom gin ducu mutimme, wa lok mutimme i kom jo aryo ma cen tye i komgi. ³⁴Mumiyo lwak dano ducu ma i gaŋ meno gubino ka rwatte ki Yecu; ka gunene, ci gubako doggi bote ni en myero oa woko ki i lobogi.

¹Yecu odonyo i yeya oŋolo nam okato loka tuŋcel, ci obino i lobo tugi kikome. ²Ci gikelo bote dano mo ma twoyo two akweya kom kun obuto i wi kitandane. Ka Yecu oneno niyegi, ci owaco bot latwo ni, “Di cwinyi, latinna, balli doŋ giweko woko.”³Mumiyo lupwony-cik mogo gucako loko lok kekengi ni, “Dano man tye ka yeto Lubaŋa.” ⁴Ento Yecu oŋeyo tamgi woko, ci openyogi ni, “Piŋo wutamo tam marac i cwinywu? ⁵Mene mayot makato, me waco ni, ‘Balli doŋ giweko’, nyo ni, ‘A, iwoti’? ⁶Ento man me miyo wek wuŋe ni, Wod pa dano tye ki twero i lobo man me weko bal”, ci owaco bot latwo ni, “A, kwany kabutoni idok paco.”⁷Ci oa odok paco. ⁸Ka lwak guneno gin mutimme, lworo omakogi, ci gumiyo deyo bot Lubaŋa, ma omiyo kit twero macalo meno bot dano. ⁹I kare ma Yecu tye ka kato ki kunnu, ci oneno laco mo ma nyiŋe Matayo obedo ka ma gijogo iye mucoro owacce ni, “Lub kora.” Ci oa malo olubo kore.¹⁰I kare ma Yecu obedo i ot i dog cam, lujog-mucoro mapol ki lubalo gubino gubedo kacel ki Yecu ki lupwonnyene. ¹¹Ka Luparicayo guneno man, guwaco bot lupwonnyene ni, “Piŋo lapwonywu camo kacel ki lujogmucoro ki lubalo?”¹²I kare ma en owinyo ogamo ni, “Jo ma komgi yot pe gimito daktar, ento kono jo ma komgi lit aye. ¹³Wuciti wupwonye tyen lok man ni, ‘Amito kica, pe lee me gitum.’ Pien pe abino ka lwoŋo jo ma kitgi atir, ento lubalo.”¹⁴I kare meno lupwonye pa Jon gubino bot Yecu, gupenye ni, “Piŋo wan kacel ki Luparicayo wari kec, ento lupwonnyeni pe giri kec?” ¹⁵Ci Yecu odok iye botgi ni, “Lurem lanyom twero kumo ma noŋo lanyom pud tye kacel kwedgi? Kare bibino ma gibikwanyo lanyom woko ki botgi, ka doŋ gibiri kec i kare meno.¹⁶Pe tye ŋatti mo ma dabo boŋo manyen i kom ginaruka muti. Pien kiraka biyec woko ki i kom ginaruka, ci waŋ boŋo yec medde nen marac.¹⁷Dok bene pe tye ŋatti mo ma piko koŋo vino manyen i kicaa macon; ka opiko, ci koŋo vino biyeco kicaa woko, koŋo vino bio woko ki kicaa bene biballe. Ento koŋo vino manyen myero gipik i kicaa koŋo vino manyen, wek gin aryo ducu gigwokgi maber.”¹⁸I kare ma Yecu tye ka lok botgi, cutcut laloc mo obino odonyo i ot orumo coŋe, i nyime kun wacce ni, “Nyara oto pud kombeddi, ento alegi ibin iket ciŋi i kome, ci bibedo kwo.” ¹⁹Yecu oa olubo kore kacel ki lupwonnyene.²⁰Ci dako mo ma onoŋo yam otwoyo two agobi pi mwaka apar wiye aryo obino ki tuŋ i ŋe Yecu ogudo dog boŋone, ²¹pien onoŋo otamo ki i cwinye kekene ni, “Ka ce agudo boŋone keken, ci abicaŋ.” ²²Yecu olokke, ka onene owacce ni, “Di cwinyi nyara; niyeni ocaŋi.”²³Ka Yecu obino i ot pa laloc, oneno lukut nyamulere, kun lwak tye ka koko, ²⁴ci owacci, “Wua woko; nyakoni pe oto ento onino anina.” Ci gin gunyere anyera.²⁵Ento i kare ma doŋ oryemo lwak gukato woko, ci en odonyo i ot omako latin nyako-nu ki ciŋe, nyako-nu oa malo. ²⁶Lok meno oywek owinnye oromo lobo meno ducu.²⁷I kare ma Yecu doŋ oa ki kunnu omedde ki wotte, ci lutowaŋ aryo gulube, ma gudaŋe matek ni, “Kica omaki i komwa do, Lakwar Daudi.” ²⁸Ka doŋ Yecu odonyo i ot, lutowaŋ aryo magi gubino bote; ci en openyogi ni, “Wuye ni atwero timo man?” Gudokke iye ni, “Itwero, Ladit.”²⁹Yecu ogudo waŋgi kun wacci, “Myero otimme botwu kit macalo niyewu tye kwede.” ³⁰Cutcut waŋgi otugi yabbe woko.Yecu ocikogi matek twatwal ni, “Wunen ni dano mo pe oŋeyo lok man.” ³¹Ento gin gucito guketo lok man omiyo nyiŋe oywek oromo i lobo meno ducu.³²I kare ma gia me cito woko, dano gukelo bote dano mo ma doge oto, ma onoŋo tye ki cen marac. ³³Ka doŋ Yecu oryemo cen woko, cutcut ladogeoto-nu ocako lok, mumiyo lwak ma onoŋo gitye kenyo guuro matek, kun giwacci, “Cakke yam con kit gin macalo man peya onoŋo onen i Icrael.” ³⁴ento Luparicayo guwacci, “En ryemo cen pi twero pa ladit pa cen.”³⁵Yecu owoto orumo gaŋi mapatpat ki gaŋi matino ma i caro-gu ducu, kun pwonyo i kacokkegi, dok tito kwede lok me kwena maber me ker pa Lubaŋa ki caŋo kit two ducu kadi wa kit goro ducu. ³⁶Ka oneno lwak ci kica omake i komgi mada, pien onoŋo gitye ka unogi matek, doŋ gudoko goro, calo romi ma lakwatgi pe.³⁷Lacen owaco ki lupwonnyene ni, “Kac dwoŋ, ento lutic nok. ³⁸Pi meno, wuleg Won poto wek ocwal lutic ka kayo kacce.”

¹Yecu olwoŋo lupwonnyene apar wiye aryo bote, ci omiyogi twero me ryemo cen maraco, ki me caŋo kit two ducu kadi wa goro-gu.²Nyiŋ lukwena magi apar wiye aryo gin ene: mukwoŋo Cimon, ma gilwoŋo ni Petero, ki Anderiya ominne; Yakobo wod pa Jebedayo, ki Jon ominne: ³Pilipo ki Bartolomayo; Tomaci ki Matayo lajog-mucoro; Yakobo wod pa Alipayo, ki Tadayo; ⁴Cimon ma yam obedo i kin jo ma gimito locken, ki Juda me Keriot, ma odobe.⁵Dano magi apar wiye aryo Yecu oorogi, kun cikogi ni, “Pe wucit i kin Lulork, pe bene wudony i gaŋ pa Lucamaria mo, ⁶ento wucit bot jo Icrael, ma gitye calo romi murwenyo. ⁷I kare ma wutye ka wot wutit lok, kun wuwaco ni, ‘Ker me polo doŋ onyiko cok.’⁸Wucaŋ lutwo, wucer jo muto, wucaŋ ludobo wek gulonnye, wuryem cen maraco. Wun wugamo nono laboŋo cul mo, wumi bene nono laboŋo cul. ⁹Pe wuwot ki jabu, kadi ryal, kadi lim mo i del pyerwu, ¹⁰pe wuter kadi kicaa mo me wotwu, kadi ki bamo kanyi aryo, kadi war tyen, kadi ki odoo; pien latic myero gimiye cam ocam.¹¹Gaŋ madit nyo paco mo ma wudonyo iye, koŋ wuniaŋ aŋa ma myero ma bedo iye, ci wubed bote nio waŋ ma wua ki kenyo. ¹²Ka wuedonyo i ot koŋ wumot dano ma i ot meno. ¹³Ci ka ot meno myero, wumi kuc i kom jo me ot meno; ento ka ce pe myero, ci wuwek kucwu odwog cen botwu.¹⁴Ka ce ŋat mo pe bijolowu nyo pe biwinyo lokwu, ci wuteŋ apwa woko ki i tyenwu i kare ma noŋo wua wuweko ot nyo gaŋ meno. ¹⁵Ada, atittiwu ni, i nino me ŋolo kop can pa Codom ki Gomora bibedo tworatwora, ento can ma gibikelo i kom gaŋ meno doŋ bikato.¹⁶“Nen, doŋ acwalowu me cito woko macalo romi i kin orudi; pi meno wubed ryek calo twol dok wubed laboŋo bal mo i komwu calo akuri. ¹⁷Dok wugwokke i kom dano; pien gibiterowu i lukiko, dok gibigoyowu i kacokkegi, ¹⁸gibiywayowu giterowu i nyim luloc ki luker-gu pira, wubitito lok ma bedo caden botgi ki bot Lurok bene.¹⁹Ka giterowu i lukiko, pe wubed ka tamo kit ma myero wulok kwede, nyo kit lok aŋo ma wubilokone; pien lok ma myero wuloki gibimiyowu i cawa meno; ²⁰pien pe wun aye wubilok, ento Cwiny Maleŋ pa Wonwu aye bilok ki i iwu.²¹Omego bimiyo ominne ni ginek woko, ki wego bene bimiyo latinne ni ginek woko, ki litino gibitugge i kom lunyodogi, gimiyo lunyodogi ni ginekgi woko; ²²dok dano ducu bikwerowu pira. Ento ŋat ma ciro kun diyo cwinye nio i agikki bilarre. ²³Ka inen guketo ayela i komwu i gaŋ acel, ci wuriŋ woko i gaŋ ma cok kwede; pien ada awacciwu ni, pe wubiwoto i gaŋi me Icrael wurumo woko ducu, ma noŋo peya Wod pa dano obino.²⁴“Dano ma pud gipwonyo apwonya pe bedo dit makato ŋat ma pwonye, kadi latic bene pe bedo dit makato laditte; ²⁵ento romo ka dano ma gipwonyo-ni odoko calo ŋat ma pwonye, ki latic bene ka odoko calo laditte. Ka onoŋo gulwoŋo won ot ni Beeljebul, ci doŋ jo ma i pacone gibilwoŋogi ki nyiŋ marac ma rom mene?²⁶“Pi meno, pe wulworgi; pien pe tye gin ma giumo ma pe gibiyabo ka maleŋ, kadi ki gin ma gikano ma pe biŋene. ²⁷Gin ma awaco botwu i colpiny, myero wutit i leŋpiny; ki gin ma gikwilo akwila i itwu lawewe, wutuc lokke wa i wi labila ot.²⁸Pe wulwor jo ma neko kom, ento pe gitwero neko tipo; ento myero wulwor ŋat ma twero neko tipo ki kom ducu i Geena. ²⁹Ojwinyojwiny aryo pe gicato pi cente apar? Ento mo acel pe poto piny i ŋom ma Wonwu pe ŋeyo. ³⁰Kadi bed wa yer wiwu doŋ gikwanogi woko liweŋ. ³¹Pi meno, pe wulwor; pien piwu tek twatwal makato pi ojwinyojwiny mapol.³²Pi meno dano ducu ma bituco nyiŋa i nyim dano, an bene abituco nyiŋe i nyim Wora ma tye i polo, ³³ento ŋat ma bikwera i nyim dano, an bene abikwere woko i nyim Wora ma tye i polo.³⁴“Pe wutam ni abino me kelo kuc i lobo; an pe abino me kelo kuc, ento pala lucwan. ³⁵Pien abino me poko kin dano woko ki wonne, nyako bipokke woko ki minne, ki ci-wod bene bipokke woko ki dane. ³⁶Lukwor pa dano bibedo jo ma i pacone.³⁷ŋat ma maro wonne nyo minne makato an pe myero me bedo danona; ki ŋat ma maro wode nyo nyare makato an pe myero me bedo danona. ³⁸Dok bene dano ma pe tiŋo yatariyane kun lubo kwede kora pe myero me bedo danona. ³⁹Dano ma noŋo kwone, birwenyo kwone woko arwenya; ento ma rwenyo kwone pira binoŋo.⁴⁰“Dano ma jolowu noŋo ojolo an, ki ma jola noŋo ojolo ŋat ma oora. ⁴¹ŋat ma jolo lanebi ni pien obedo lanebi, bilimo bakacic pa lanebi; ki ŋat ma bijolo dano ma kite atir ni pien dano ma kite atir, bilimo bakacic ma rom ki pa dano ma kite atir-ri.⁴²Dok bene dano ma bimiyo pii maŋic me amata bot ŋat acel i kom jo magi matino ni pien en obedo, lapwonnyena, ada awacciwu ni, pe bikeŋ bakacicce.”

¹I kare ma Yecu doŋ otyeko ciko lupwonnyene apar wiye aryo-ni, oa ki kunnu ocito ka pwony ki ka tito lok i gaŋi ma cok ki kunnu. ²I kare ma Jon owinyo pi tic pa Yecu ki i mabuc, ci ooro lupwonnyene bot Yecu ³wek gupenye ni, “In aye ŋat ma myero obin-ni, nyo dok wakur ŋat mukene?”⁴Ci Yecu odok iye botgi ni, “Wucitit bot Jon gin ma wuwinyo ki ma wuneno; ⁵lutowaŋ waŋgi oyabbe guneno piny, luŋolo guwoto, ludobo gilonyogi, ki ludiŋit guwinyo lok, ki jo muto gicerogi woko, ki lucan bene gitito botgi lok me kwena maber. ⁶Dano ma pe tamme oballe i koma tye ki gum.”⁷I kare ma doŋ gitye ka dok woko, Yecu ocako lok ki lwak lok i kom Jon, ni, Onoŋo wucito i tim ka neno gin aŋo? Onoŋo wucito ka neno lagada ma yamo obedo ka yeŋone? ⁸Wucito kunnu kono piŋo? Wucito ka neno dano ma oruko boŋŋi mabeco? Nen, jo ma ruko boŋŋi mabeco noŋo gibedo i odi pa luker.⁹Wucito kunnu piŋo? Wucito ka neno lanebi mo? Iyo, awacciwu ni ka neno ŋat ma kato lanebi. ¹⁰Man aye ŋat ma yam gicoyo lok i kome ni, “Nen, acwalo lakwenana otelo nyimi, ma bigero yoni ma peya noŋo in ibino.”¹¹Ada, awaco botwu ni, pe tye dano mo ki i kin jo ma mon onywalogi ma kato Jon Labatija ki dit; ento ŋat matidi twatwal i ker me polo aye dit kate. ¹²Cakke i kare pa Jon Labatija o kwede wa onyoo ker me polo gilaro ki tek, jo ma gin lutim bwami aye gimayo woko ki tek.¹³Pien cik ki lunebi gibedo ka titone nio wa i kare pa Jon; ¹⁴ka ce wumito ye lokke en aye Elia ma myero obin-ni. ¹⁵ŋat ma ite tye me winyo lok man myero owiny.¹⁶Abiporo yalwak me kare man ki gin aŋo? Girom ki litino ma bedo i cuk ma gilwoŋo litino wadigi kun giwacci, ¹⁷“Yam wakuto nyamulere botwu, ento wun pe wumyelo; wawero wer lyel, ento wun pe wukok.”¹⁸Pien Jon yam obino ma pe camo cam, dok bene onoŋo pe mato gin mo, mumiyo guwacci, “Dano-nu tye ki cen marac.” ¹⁹Wod pa dano dok obino kun camo cam kadi wa mato mat bene, meno bene guwacci, “Nen, dano ma laworo dok lamero bene, larem lujogmucoro ki lubalo! Ento ryeko pa Lubaŋa oloyo kop pi ticce ma en otiyo.”²⁰Lacen Yecu ocako loko lok ki kiniga i kom gaŋi mogo ka ma onoŋo en otiyo iye ticce matego madito, pien jo ma tye iye gukwero ŋut woko. ²¹“Ibikoko aŋee, in Korajin! Ibikoko aŋee, in Betecaida! Kono yam tic madito ma gitiyo i ii gitiyo i Turo ki Cidon, kono onoŋo jone guŋut wa con, kun giruko boŋo cola, ma gibedo i buru bene. ²²Ento atitti ni, can pa Turo ki Cidon bibedo tworatwora i nino me ŋolo kop, makato can ma bipoto i komi.²³Ki in Kapernaum gibitiŋi woko malo i polo? Pe kumeno, gibidwoko malo i polo? Pe kumeno, gibidwoki woko piny i lyel. ²⁴Kono yam tic matek madito ma gitiyo i ii-ni gitiyo i Codom, kono obedo tye nio wa onyoo. Ento atitti ni, can pa Codom bibedo tworatwora i nino me ŋolo kop, makato can ma bipoto i komi.”²⁵I kare meno Yecu otuco ni, “Apwoyi Wora, in Rwot me polo ki me lobo, pien ikano lok magi woko ki bot luryeko ki luŋe-piny, ci inyutogi bot litino lukere. ²⁶Iyo, Wora, pien onoŋo kit meno ineno ber i waŋi, ipwoyo kit yo macalo meno. ²⁷Jami ducu doŋ Wora otyeko miyogi woko bota; ŋat mo pe ma ŋeyo Wod, kono Won keken, dok bene ŋat mo pe ma ŋeyo Won kono Wod keken ki ŋat ma Wod oyero me nyuto Won bote.²⁸Wubin bota, jo ducu muol ki ma yec onurowu, ci abimiyo wuywe. ²⁹Wutiŋ yatta, ci wupwony kita, pien an awor, dok amwol bene i cwinya, mumiyo wun bene wubilimo yweyo i cwinywu. ³⁰Pien yatta yot, ki yecca bene pe pek.”

¹I kare meno Yecu owoto kun ŋolo ki i poto bel i ceŋ cabit. Onoŋo kec neko lupwonnyene, ci gucako rito wit bel gumwodo. ²Ento ka Luparicayo guneno, ci guwaco bot Yecu ni, “Nen, lupwonnyeni gitiyo gin ma cik ogeŋo ni pe giti i ceŋ cabit.”³Yecu odok iye botgi ni, “Wun pe wukwano gin ma Daudi otiyo, i kare ma onoŋo kec oneke, en kacel ki jo ma onoŋo gitye kwede? ⁴Kit ma en odonyo kwede i ot pa Lubaŋa, ci ocamo mugati ma giketo i nyim Lubaŋa, ma yam cik ogeŋo ni en pe ocam, kadi ki jo ma onoŋo gitye kacel kwede, ento kono ajwagi pa Lubaŋa keken?⁵Dok bene pe wukwano i cik ni i ceŋ cabit ajwagi ma i ot pa Lubaŋa gipyedo ceŋ cabit, ento gipe ki bal? ⁶Atittiwu ni gin madit makato ot pa Lubaŋa tye kany.⁷Ka ce onoŋo wuŋeyo tyen lok man ni, ‘Amito kica, pe lee me gitum’, onoŋo myero pe wuŋol kop olo jo ma pe ki bal. ⁸Pien Wod pa dano aye Rwot me cabit.”⁹Yecu oa ki kunnu ocito odonyo i kacokke. ¹⁰Nen, onoŋo yam tye kunnu dano mo ma bade otal. Ci gupenye ni, “Cik ye ni gicaŋ dano i ceŋ cabit?” Gupenye kit meno pien onoŋo gimito ni gidote.¹¹Yecu openyogi ni, “Aŋa i kinwu ma ka tye ki romo acel ce romo meno opoto i bur i ceŋ cabit, en pe bimako ywayo kelo woko ka maleŋ? ¹²Dano pe pire tek twatwal kato pi romo? Pi meno cik ye ni myero gitim gin maber i ceŋ cabit.”¹³Ci owaco bot dano-nu ni, “Rye badi.” Dano-nu oryeyo bade, ci bade ocaŋ woko maber odoko calo mukene-ni. ¹⁴Ento Luparicayo gukato woko ci guporo lok i kom Yecu, kit macalo myero gineke kwede.¹⁵Ka Yecu oŋeyo lok man, oa woko ki kunnu. Jo mapol gulube, ci en bene ocaŋogi woko ducu, ¹⁶ocikogi ni pe myero gumi pire oŋene. ¹⁷Man otimme wek lok ma yam lanebi Icaya oloko ocobbe kakare, ni,¹⁸“Nen, laticca ma ayero ma amaro, ma cwinya yom I kome. Abiketo Cwiny Maleŋ i kome, en bituco ŋolo kop atir bot Lurok.¹⁹Pe bida, pe bene bidaŋe matek, ŋat mo pe biwinyo dwane I waŋayo; ²⁰pe bituro lagada ma okak, dok pe bineko mac tara ma lyel nio waŋ ma en omiyo ŋolo kop atir oloyo loc; ²¹ento Lurok bigeno gin maber pi nyiŋe.”²²Ci gikelo bote latowaŋ mo ma tye ki cen marac, ma pe loko, ci Yecu ocaŋe. Cutcut ladogeoto otugi lok dok oneno piny bene. ²³Jo ducu ma onoŋo gitye kenyo guuro matek kun giwaco ni, “Man twero bedo Lakwar Daudi?”²⁴Ento Luparicayo guwinyo ci guwacci, “Dano-ni ryemo cen pi twero pa beeljebul, ma en aye ladit pa cen.” ²⁵Ka Yecu oŋeyo tamgi, ci owaco botgi ni. “Ka ker iye opokke aryo, ker meno lobone balle woko, ki gaŋ bene nyo ot ka opokke iye aryo pe twero cuŋ.²⁶Ka ce Catan ryemo Catan, noŋo opokke i dul aryo i kome kekene; ci kerre doŋ bicuŋ niŋniŋ? ²⁷Ka an aryemo cen pi twero pa Beeljebul, ci litinowu kono giryemo cen pi twero pa aŋa? Pi meno gin aye gibibedo luŋolkopwu.²⁸Ento ka ce an aryemo cen pi twero pa Cwiny pa Lubaŋa, ci doŋ nen ni ker pa Lubaŋa doŋ obino woko botwu. ²⁹Dano mo twero donyo i ot pa ŋat ma kome tek niŋniŋ, ci cako yako jamine ducu, nio ka en otweyo laco meno ma kome tek-ki woko? Ka lacen doŋ cako yako ode. ³⁰ŋat ma pe tuŋ bota, meno noŋo en lakworra, dok ŋat ma pe nywako coko kweda, keto mere aketa.³¹Pi meno awacciwu ni, bal ducu ma dano timo, ki lok ducu ma giyeto kwede Lubaŋa, gibiwekone woko, ento bal me yet ma giyeto ki Cwiny Maleŋ pe gibiwekone matwal. ³²Dok dano ma loko lok marac i kom Wod pa dano gibiweko balle; ento ŋat ma loko lok marac i kom Cwiny Maleŋ pe gibiweko balle, kadi i kare man nyo i kare ma bino anyim.³³“Myero wuŋe ni yat maber nyak nyige mabeco, ki yat marac nyak nyige maraco; pien yat giŋeyo i kom nyige. ³⁴Wun litino ororo, wutwero loko lok maber niŋniŋ, ma kun wun jo maraco? Pien lok ma ogurre i cwiny dano, en aye dog bene loko. ³⁵Dano maber kwanyo gin maber ki i kin jamine mabeco ma en okano, dano marac kwanyo gin marac ki i gin maraco ma en okano.³⁶Atittiwu ni, lok ducu me carocaro ma dano giwaco ma pe gigwokke iye-ni, gibipidogi pire i nino me ŋolo kop; ³⁷pien lok pa iloko aye bimiyo iloyo kop, ki dok bene lok ma iloko aye bimiyo giŋolo kop loyi.”³⁸Jo mogo i kin lupwony-cik ki Luparicayo guwaco bot Yecu ni, “Lapwony, wamito neno lanyut mo ma a ki boti.” ³⁹Ento Yecu odok iye owaco botgi ni, “Yalwak pa jo maraco ki lutim abor giyenyo lanyut, ento pe gibimiyo botgi lanyut mo kono lanyut pa lanebi Yona keken. ⁴⁰Pien kit macalo Yona yam otyeko nino adek, dyeceŋ ki dyewor, i i rec, kit meno Wod pa dano bene bityeko nino adek, dyeceŋ ki dyewor i cwiny lobo.⁴¹Jo Nineve bicuŋ kacel ki yalwak me kare man, i kare me ŋolo kop, ci miyo kop loyogi; pien gin yam guŋut pi lok ma Yona onoŋo otito ento nen, gin madit makato Yona tye kany.⁴²Kabaka ma dako ma tye yo tuŋ acuc bicuŋ kacel ki yalwak me kare man, i kare me ŋolo kop, ci miyo kop loyogi; pien en oa ki i agikki lobo obino ka winyo ryeko pa Solomon, ento nen, gin madit makato Solomon tye kany.⁴³“Ka cen marac doŋ oa woko ki i kom dano mo, ci cito wirre i kabedo ka ma pii pe iye kun yenyo ka ma ebiywe iye; ento pe noŋo kabedo mo kadi ki acel. ⁴⁴Ci cako wacci, ‘Abidok gira i oda ka ma yam aa ki iye-ni.’ Ka obino, ci noŋo ode tye nono, giyweyo woko, dok giyubo woko maber. ⁴⁵Ka doŋ cito kelo cen mukene abiro ma giraco gikate woko, ci gidonyo gibedo i ode-ni; lacen dano-nu bibedo marac makato kit ma onoŋo yam obedo kwede con. Bibedo kit meno bene bot yalwak pa jo maraco me kare man.”⁴⁶I kare ma Yecu pud tye ka lok bot lwak, nen, minne kacel ki omegine onoŋo gucuŋ woko, kun giwaco ni gimito lok ki Yecu. ⁴⁷Ci dano mo acel owacce ni, “Nen, meni ki omegini gitye gucuŋ woko gimito lok kwedi.”⁴⁸Ento Yecu odok iye ki dano-nu ni, “Maa aŋa? Ki omegina kono aŋagi?” ⁴⁹Ka oryeyo bade yo tuŋ bot lupwonnyene, ci owaco botgi ni, “Wunen, maa ki omegina aye jo ma tye kany! ⁵⁰Pien dano ma tiyo gin ma Wora ma tye i polo mito, meno aye omera ki lamera, ki maa bene”

¹I nino meno acel-li Yecu oa woko ki i ot, ci ocito obedo i dog nam. ²Lwak madwoŋ twatwal gucokke bote, omiyo en odonyo i yeya ci obedo iye, lwak ducu gucuŋ i wi tura.³Obedo ka loko botgi lok mapol i carolok, kun wacci, “Lacoc ocito ka coyo kodi. ⁴Ka kun coyo, kodi mogo okir i ŋet yo, winyo gubino gucamo woko. ⁵Kodi mukene okir i kom pata ka ma ŋom tye iye manok. Cutcut gutwi, pien ŋom pe tut. ⁶Ento ka ceŋ oryeny, owaŋogi gutwo woko, pien onoŋo lwitgi pe.⁷Kodi mukene okir i kin okuto, okuto olot odiyogi woko. ⁸Kodi mukene okir i ŋom maber, ci gunyako nyiggi, mogo miya acel, mukene pyerabicel, ki mogo pyeradek. ⁹ŋat ma tye ki it me winyone owiny.”¹⁰Lacen lupwonnye gubino bot Yecu gupenye ni, “Piŋo iloko kwedgi i carolok?” ¹¹En odok iye botgi ni, “Wun gimiyo botwu mot me ŋeyo muŋ me ker me polo, ento jo maca pe gimiyo botgi. ¹²Pien ŋat ma tye ki gin ma gibimiyo doki makato, ci en bibedo ki jami mabup; ento ŋat ma pe ki gin mo, kadi gin ma en tye kwede gibikwanyo woko ki bote.¹³Man aye gin mumiyo aloko kwedgi i carolok, pien kadi neno piny pe gineno, kadi winyo lok bene pe giwinyo, dok bene pe giniaŋ. ¹⁴Ento lok pa Lubaŋa ma yam lanebi Icaya otito ocobbe kakare i komgi ni, ‘Winyone mere wubiwinyo, ento pe wubiniaŋ te lokke; nenone wubineno, ento pe wubiŋeyo gin ma tye.¹⁵Pien jo me rok man cwinygi doŋ odoko nwaŋ, ki itgi bene doŋ odiŋ woko ka winyo lok, dok gumiyo waŋgi woko, wek pe ginen ki waŋgi, pe bene giwiny ki itgi, pe bene giniaŋ iye ki cwinygi, pe gilokke gidwog bota acaŋgi.’¹⁶“Ento wun waŋwu tye ki gum, pien gineno piny, itwu bene tye ki gum, pien giwinyo lok. ¹⁷Ada, awaco botwu ni, lunebi mapol ki jo ma kitgi atir yam guparo pi neno gin ma wun wuneno-ni, ento pe guneno, ki me winyo gin ma wuwinyo, ento pe guwinyo.¹⁸“Koŋ doŋ wuwiny carolok i kom lacoc. ¹⁹Ka dano mo owinyo lok me ker pa Lubaŋa ce pe oniaŋ iye, Larac bino ci mayo kodi ma gicoyo i cwinye-ni woko; man aye kodi ma onoŋo gicoyo okir i ŋet yo.²⁰Doŋ kodi ma gicoyo i kom pata tye kit man, man aye dano ma winyo lok ci oyotoyot mako lok meno ki yomcwiny; ²¹ento pe noŋo tye ki lwite i iye, ri pi kare manok. Ka can obino, nyo yelo dano pi lok man, cutcut dano-nu tugi poto woko.²²Doŋ kodi ma gicoyo okir i kin okuto, man aye dano ma winyo lok, ento paro lok me lobo man, ki maro lonyo, diyo lok woko, ci miyo pe nyak. ²³Ento kodi ma gicoyo okir i ŋom maber-ri, aye dano ma winyo lok dok niaŋ iye; en ada cako nyako nyig dok cek, mukene miya acel, ki mukene pyerabicel, ki mukene pyeradek.”²⁴Dok obolo botgi carolok mukene kun wacci, “Ker me polo rom ki dano mo ma ocoyo kodi mabeco i potone. ²⁵Ento i kare ma dano doŋ gubuto woko, lakworre obino ci ocoyo doo i kin kal, ka ocito gire woko. ²⁶I kare ma ginapita-nu otwi odoŋo, kal oŋok, ci doo bene ocako nen.²⁷Lutic pa won ot gucito bot won ot gupenye ni, ‘Ladit, yam onoŋo pe icoyo kodi mabeco i potoni? Piŋo dok waneno doo tye iye?’ ²⁸Won ot odok iye owaccigi ni, ‘Lakwor aye ma otimo man.’ Ci lutic gupenye ni, ‘Imito ni wacit wacok doo magi woko?’²⁹Ento won ot odok iye owacci, ‘Pe, ka wudoyo doo magi woko, miyo wuputo kal woko bene kacel ki doo. ³⁰Koŋ wuwek doo ki kal ducu gudoŋ kacel nio wa i kare me kac; i kare me kac abiciko lutic ni, Koŋ wucok doo woko mukwoŋo ci wutwegi woko i dul i dul me awaŋa, ento kal aye wukaa wuket i derona.’”³¹Dok obolo botgi carolok mukene, kun wacci, “Ker me polo rom ki kodi dek karadali, ma dano okwanyo ci ocoyo i potone. ³²Kodi dek karadali-ni dok tidi twatwal ki i kin kodi ducu, ento ka odoŋo doko yat madit makato dek ducu. Doko yat mo madit ma winyo me polo gibino gigero odigi i jaŋe.”³³Obolo botgi dok carolok mukene ni, “Ker me polo rom ki tobi ma dako mo okwanyo orubo ki moko mugati ma romo adita adek, nio ka moko ducu oyenyo, okwot.”³⁴Lok magi ducu Yecu oloko bot lwak i carolok. I adane en pe obedo ka lok kwedgi lok mo laboŋo bolo carolok, ³⁵wek omi lok ma yam lanebi oloko ocobbe kakare ni, “Abiwaco botwu lok i carolok, abitito botwu lok ma yam okanne woko cakke wa i acakki piny.”³⁶Ka oweko lwak ci ocito odonyo i ot, lupwonnyene gubino bote guwacce ni, “Koŋ itit botwa carolok i kom doo ma i poto.” ³⁷Yecu odok iye ni, “ŋat ma ocoyo kodi mabeco-ni aye Wod pa dano; ³⁸poto aye lobo man, dok kodi mabeco te lokke ni litino me ker pa Lubaŋa, doo aye litino pa Larac. ³⁹Lakwor ma ocoyogi aye Catan; kac, meno agikki piny, lukac aye lumalaika.⁴⁰Kit macalo gicoko kwede doo giwaŋo woko i mac, bibedo bene kit meno i agikki piny. ⁴¹Wod pa dano bioro lumalaikane, gibicoko ki i te kerre gin ducu ma miyo dano gipoto i bal, kacel ki jo ducu ma gin lutim maraco, ⁴²ci bologi woko i ruk mac, ka ma dano bibedo iye ka koko kun gikayo lakgi. ⁴³I kare meno jo ma kitgi atir biryeny calo ceŋ i ker pa Wongi. Ŋat ma ite tye myero owiny.⁴⁴“Ker me polo rom ki lonyo ma gikano i poto, ma dano onoŋo ci dok oyiko woko. Doŋ pi yomcwinye omiyo en ocito ocato jami ducu ma onoŋo en tye kwede, ci owilo poto meno woko. ⁴⁵“Dok ker me polo rom ki lacat-wil ma onoŋo yam obedo ka yenyo tiko mabeco me wel. ⁴⁶I kare ma doŋ onoŋo tiko mo acel me wel, ocito ocato jami ducu ma onoŋo en tye kwede, ci owilo tiko meno woko.⁴⁷“Dok ker me polo rom ki obwo ma giciko i nam ci omako kit kwa rec-gu ducu. ⁴⁸I kare ma doŋ gupoŋo woko ki rec, dano guywayo gukelo woko i wi tura, gucako bedo piny guyero mabecone guketo i aduku, ki maracone gubolo woko.⁴⁹Bibedo kit meno i agikki piny. Lumalaika gibino ci gipoko jo maraco woko ki i kom jo ma kitgi atir, ⁵⁰gibibologi woko i ruk mac, ka ma dano gibikok kun gikayo lakgi.”⁵¹Cutcut Yecu openyogi ni, “Doŋ wuniaŋ i lok man ducu?” Gudokke iye ni, “Iyo.” ⁵²Yecu dok owaco botgi ni, “Pi meno lapwony-cik mo ma gipwonyo pi ker me polo rom ki dano mo ma won ot, ma kwanyo gin manyen ki macon ki i kom lonyone.” ⁵³I kare ma Yecu doŋ otyeko loko carolok magi, oa woko ki kunnu.⁵⁴Ci odwogo i lobo tugi. Opwonyogi i kacokkegi, omiyo guuro matek kun giwacci, “Dano-ni onoŋo ryeko man ki kwene? Dok tic matego macalo magi ma en tiyo-gu oa ki kwene? ⁵⁵Minne pe Maliam? Ki omegine pe Yakobo ki Yucepu ki Cimon ka Juda? ⁵⁶Lumegine ducu pe gitye kacel kwedwa kany? Ci dano-ni onoŋo kit man ducu ki kwene?”⁵⁷Cutcut cwinygi ocako a woko i kome. Ento Yecu owaco botgi ni, “Lanebi giketo deyo i kome, ento pe giketo deyo i kome i lobo tugi ki i ode.” ⁵⁸Pe otiyo tic matego mapol kunnu, pien onoŋo niyegi pe.

¹I kare meno Kerode ma laloc madit owinyo pi yweka pa Yecu; ²mumiyo owaco bot luticce ni, “Man aye Jon Labatija. Lubaŋa ocere woko ki i kin jo muto, en aye mumiyo lakit teko macalo meno tye ka tic i kome-ni.”³Pien onoŋo yam Kerode omako Jon, otweyo ci oketo woko i mabuc pi Kerodia, ci-ominne, dako pa Pilipo; ⁴pien Jon onoŋo owaco bote ni, “Cik pe oye ni ibed ki ci-omeru.” ⁵Kadi bed omito neke woko, ento olworo lwak, pien lwak onoŋo giworo Jon ni en lanebi.⁶Ento ka kare me po pi nywalo Kerode oromo, ci nya pa Kerodia omyelo i nyim welo ci oyomo cwiny Kerode mada. ⁷Mumiyo Kerode ocikke kun kwoŋŋe akwoŋa bot nyakonu ni ebimiye gin ducu ma en bipenyo pire.⁸Minne otitte lok roro, omiyo nyako-nu ocito olego kabaka ni, “Amito imiya wi Jon Labatija i weer kombeddi.” ⁹Ci kabaka Kerode okumo matek; ento pi kwoŋ ma en okwoŋo ki welone omiyo ociko ni myero gimiye.¹⁰Ci ooro dano ocito omiyo giŋolo ŋut Jon woko ki i mabuc, ¹¹ci giketo wiye i weer gikelo gimiyo bot nyako-nu, ka nyako-nu otero bot minne. ¹²Lacen lupwonnye pa Jon gubino gutiŋo kome guyiko woko i lyel; ka gucito gutito pire bot Yecu bene.¹³Ka Yecu owinyo lok man, ci oa woko ki kunnu, owoto ki yeya ocito i kabedo ka ma dano pe iye kaikene. Ento ka lwak guwinyo pire, ci gulube kun giwoto ki tyengi ma gia ki i gaŋi mapatpat. ¹⁴Ka Yecu okato i wi tura, oneno lwak madwoŋ; kica omake i komgi, ci ocaŋo lutwo ma gukelo bote.¹⁵Ka oo otyeno, lupwonnyene gubino bote, guwacce ni, “Man kabedo ka ma dano pe iye, cawa bene doŋ okato woko; cwal lwak gucit i kin paco macokcok, guwil cam pigi kengi.”¹⁶Yecu odok iye ni, “Pe myero gucit woko; ento wun wumi botgi cam gucam.” ¹⁷Guwacce ni, “Watye kany ki mugati abic ki rec aryo.” ¹⁸Yecu owaco ni, “Wukel mugati ki rec aryo-ni bota kany.”¹⁹Ka ociko lwak ni gubed piny i kom lum alita. Ka okwanyo mugati abic ki rec aryo, ci oneno malo i polo, olego gum, obaro i mugati omiyo ki lupwonnyene, ci lupwonnyene gumiyo bot lwak. ²⁰Gin ducu gucamo guyeŋ. Gicoko ŋide cam mudoŋ, opoŋo duku apar wiye aryo. ²¹Jo ma gucamo cam meno onoŋo giromo co alip abic, ma noŋo pe gikwano iye mon ki litino.²²Cutcut Yecu ociko lupwonnyene ni gudony i yeya, gukwoŋ nyime me cito loka ca, kun noŋo en pud eciko lwak. ²³Lacen ma doŋ ociko lwak, ci ocito i wi got ka lega kaikene. I kare ma piny doŋ oyuto, onoŋo en tye kunnu kene. ²⁴Yeya onoŋo doŋ okato woko mairo madwoŋ nia ki i wi tura, kun pii tye ka twago yeya; pien onoŋo yamo kodo bino ki i nyimgi.²⁵I kine okogweno, Yecu oa obino botgi kun woto i wi nam ki tyene. ²⁶Ento ka lupwonnye gunene kun woto i wi nam ki tyene, tipo komgi oto woko lirut, kun giwacci, “Man tipo!” Ci gudaŋŋe matek pi lworo. ²⁷Ento oyotoyot Yecu oloko kwedgi kun waco ni, “Wudi cwinywu, an enni; gwok wulwor.”²⁸Ci Petero ogamo doge owacce ni, “Rwot, ka meno aye in, ci wek abin boti kunnu kun awoto ki i wi pii.” ²⁹Yecu odokke iye ni, “Bin.” Ci Petero oa woko ki i yeya, owoto ki i wi pii obino bot Yecu. ³⁰Ento ka oneno yamo tye ka kodo, ocako doko lwor, onoŋo bene doŋ cako lwiny woko i pii, ci odaŋŋe matek ni, “Rwot, lara do.”³¹Oyotoyot Yecu ocwalo ciŋe ci omake, kun wacce ni, “In dano ma niyeni nok, piŋo onoŋo ibedo ka kalo akala?” ³²Ka doŋ gudonyo i yeya, ci yamo ocako pye mot. ³³Jo ducu ma onoŋo gitye i yeya gucako woro Yecu kun giwaco ni, “Ada, in giri i Wod pa Lubaŋa.”³⁴Ka doŋ gukato loka ca, ci gukato i wi tura i lobo Genecaret. ³⁵Ka jo ma i kabedo meno doŋ guŋeye, ci gucwalo lok i kabedo ducu macokcok ki kunnu, ci dano gukelo bote jo ducu ma yam onoŋo komgi lit. ³⁶Gubako doggi bote ni myero oye gugud dog boŋone keken; jo ducu ma gugudo dog boŋone gucaŋ woko ducu maber.

¹Luparicayo ki lupwony-cik gua ki i Jerucalem gubino bot Yecu, ci gupenye ni, ²“Piŋo lupwonnyeni pe gilubo kit kwer pa ludoŋo? Pien gicamo cam ma pe gulwoko ciŋgi.” ³Yecu odok iye botgi ni, “Piŋo wun kono pe wulubo cik pa Lubaŋa pi lubo kit kwerwu?⁴Pien Lubaŋa yam ociko ni, ‘Wor woru ki meni’, ka dok ni, ‘ŋat ma loko lok marac i kom wonne nyo i kom minne myero ginek woko aneka.’ ⁵Ento wun wuwaco ni, ‘Ka dano mo owaco bot wonne nyo bot minne ni, Gin ma kono akonyi kwede doŋ amiyo woko bot Lubaŋa, en pe myero owor wonne.’ ⁶Kit meno pi kit kwerwu, wumiyo lok pa Lubaŋa doŋ odoko goro.⁷Wun lugoba! Lanebi Icaya yam oloko i komwu kakare i kare ma en owacci, ⁸‘Rok man kara giwora ki doggi nono, ento cwinygi pe i koma wacel; ⁹giwora nono, pwony ma gipwonyo obedo pwony ma mako kit pa dano.’”¹⁰Yecu olwoŋo lwak bote, ci owaco botgi ni, “Wuwiny lokka, ci wuniaŋ iye. ¹¹Pe gin ma donyo i dog dano aye balo dano, ento kono gin ma a ki i dog aye balo dano.”¹²Ci lupwonnye gubino guwacce ni, “Iŋeyo ni Luparicayo cwinygi ocwer twatwal i kare ma guwinyo lok ma in iwaco?” ¹³Yecu odok iye ni, “Kit ginapita ducu ma Wora ma tye i polo pe opito gibiputo woko ki lwite. ¹⁴Wek gubedi; meno gin lutowaŋ ma gipeyo lutowaŋ wadigi. Ka ce latowaŋ peyo latowaŋ lawote, ci gin aryo ducu gibipoto woko i bur.”¹⁵Ento Petero owacce ni, “Gony te lok me carolok man botwa.” ¹⁶Ci Yecu openyogi ni, “Wun kara peya wuniaŋ bene? ¹⁷Pe wuneno ni gin ma donyo i dog dano kato cito i ic, kit meno a ki kunnu kato woko?¹⁸Ento gin ma katti ki i dog a ki i cwiny dano, man aye balo dano. ¹⁹Pien gin ma a ki i cwiny dano aye tam maraco, nek, abor, cot, kwalo kwo, bedo caden me goba, yet. ²⁰Magi aye gin ma balo dano; ento camo cam ma pe gilwoko ciŋ pe balo dano mo.”²¹Ci Yecu oa ki kunnu, ocito wa i lobo ma tye cok ki Turo ki Cidon. ²²Ci nen, dako mo ma en Lakanaan ma oa ki i lobo meno obino kun daŋŋe adaŋa ni, “Ai Rwot, Lakwar Daudi tima kica do; nyara tye ki cen, tye ka une marac twatwal.” ²³Ento Yecu pe ogamo dog dako-nu kadi ki acel. Mumiyo lupwonnyene gubino gubako doggi bote ni, “Ryem dako ni ocit woko cen, pien tye ka daŋŋe yo tuŋ i ŋewa.”²⁴Yecu odok iye ni, “Yam giora bot jo Icrael keken, pien gitye calo romi murwenyo.” ²⁵Ento dako-nu obino oguŋo i nyime, kun wacci, “Rwot, konya.” ²⁶Ci Yecu odok iye ni, “Pe ber me kwanyo cam pa litino me bolone woko bot gwogi.”²⁷Dako-nu odok iye ni, “Rwoda, meno iwaco kakare. Kadi bed kumeno gwogi bene gicamo ŋide cam ma poto ki i wi meja pa ladit do.” ²⁸Ka dok Yecu owaco bot dako-nu ni, “In dako-ni niyeni dit. Myero obed boti kit macalo imito.” Ci nyare otugi caŋ woko cut i cawa meno.²⁹Yecu oa ki kunnu, omedde ki wotte, oŋolo ki i dog nam Galilaya. Ocito oito i wi godi matitino ci obedo kunnu. ³⁰Ci lwak dano gukelo bote luput ki luŋolo, jo ma te lebgi oto, ki lutowaŋ, ki lutwo mukene mapol, gupyelogi piny ka tyen Yecu, ci en ocaŋogi. ³¹Mumiyo lwak guuro twatwal ka guneno lutelebgi oto guloko, jo ma ciŋgi okwe gucaŋ, jo ma tyengi oŋol guwoto, kadi wa lutowaŋ bene guneno piny; gupako Lubaŋa pa jo Icrael matek.³²Yecu olwoŋo lupwonnyene bote ci owaco botgi ni, “Kica maka i kom lwak man, pien doŋ gubedo kweda kany pi nino adek, ma kun pe gitye ki cam mo. Pe amito ni acwalgi woko ki kec, miyo kec bwoyogi woko i yo.” ³³Ci lupwonnye gudokke iye ni, “Kara man wabinoŋo mugati kwene ma twero romo lwak macalo man i tim kany?” ³⁴Yecu openyogi ni, “Wutye ki mugati adi?” Gugamo ni, “Abiro, ki rec mogo matitino manok.” ³⁵Ociko lwak ni gubed piny i ŋom.³⁶ci omako mugati abiro-nu ki rec bene, ka doŋ opwoyo, obaro igi, ci omiyogi bot lupwonnyene, ka lupwonnyene gumiyo bot lwak. ³⁷Gin ducu gucamo guyeŋ; gucoko ŋide cam ma oloyogi, oromo adita abiro mupoŋ. ³⁸Jo ma gucamo cam meno onoŋo giromo co alip aŋwen, ma pe gikwano iye mon ki litino. ³⁹Lacenne ka doŋ ociko lwak, odonyo i yeya, ci ocito i lobo Magadan.

¹Luparicayo ki Lucadukayo gubino, gubito Yecu ni onyut botgi lanyut ma oa i polo. ²Yecu ogamo doggi ni, “Ka piny oyuto, wuwacci, ‘Piny bibedo maber; pien polo nen makwar.’³Dok i odiko wuwacci, ‘Tin kot bicwer madit, pien polo nen makwar, dok ocido woko licuc.’ Wuŋeyo poko kin gin ma nen i pol, ento pe wutwero poko lanyut me kare. ⁴Yalwak pa jo maraco ki lutim abor yenyo lanyut, ento pe gibimiyo botgi lanyut mo kono lanyut pa Yona keken.” Ci oa woko ki botgi ocito ka mukene.⁵I kare ma lupwonnye guo loka tuŋcel, onoŋo wigi owil woko me tero mugati mo. ⁶Ci Yecu owaco botgi ni, “Wugwokke i kom tobi pa Luparicayo ki pa Lucadukayo.” ⁷Gubedo ka laro lok i kingi kekengi kun giwaco ni, “Pe wakelo mugati.” ⁸Ka Yecu oŋeyo, ci openyogi ni, “Piŋo wupennye kekenwu ni mugati pe, wun jo ma niyewu nok?⁹Peya wuniaŋ ce, nyo pe wupo pi mugati abic pi jo alip abic-ci? Yam wucoko ŋide opoŋo aduku adi? ¹⁰Nyo mugati abiro pi jo alip aŋwen, yam wucoko ŋide opoŋo adita adi?¹¹Piŋo pe wuniaŋ ni an pe aloko botwu lok i kom mugati kikome? Wugwokke i kom tobi pa Luparicayo ki pa Lucadukayo.” ¹²Lacen guniaŋ maber ni, Yecu onoŋo pe oloko botgi me gwokke i kom tobi me mugati, ento i kom pwony pa Luparicayo ki pa Lucadukayo¹³Ka Yecu doŋ oo i lobo ma cok ki Cecaria Pilipi, ci openyo lupwonnyene ni, “Dano mono giwacci Wod pa dano en aŋa?” ¹⁴Guwacce ni, “Jo mogo giwacci Jon Labatija, jo mukene giwacci Elia, ki jo mogo giwacci Jeremia nyo ŋat mo acel i kin lunebi.” ¹⁵Ka dok openyogi ni, “Wun kono wuwacci an aŋa?” ¹⁶Cimon Petero ogamo ni, “In i Kricito ma Lubaŋa oyero, Wod pa Lubaŋa makwo.”¹⁷Ci Yecu odokke iye ni, “Itye ki gum, Cimon wod pa Yona! Pien gin mo ma tye i kom ki remo pe onyutti lok man, ento Wora ma tye i polo aye. ¹⁸Doŋ awacci ni in i Petero, ma te lokke Pata, ci abimiyo lwak jo muye an gicuŋ i kom pata man, teko me to pe bitwero loyone.¹⁹Abimii layab me ker me polo, doŋ gin ducu ma in itweyo i wi lobo man gibitweyo bene wa i polo, dok gin ducu ma igonyo i wi lobo man gibigonyo bene wa i polo.” ²⁰Ci ocikogi matek twatwal ni pe gutit bot ŋat mo ni en e Kricito ma Lubaŋa oyero.²¹Cakke i kare meno Yecu ocako nyuto bot lupwonnyene ni myero ecit i Jerucalem, dok myero ecir can madwoŋ ki bot ludoŋo ki ajwagi madito pa Lubaŋa ki lupwony-cik; gibineke, ento i nino me adekke gibicere woko. ²²Ci Petero otere cen, ocako juke, kun wacci, “Lubaŋa myero pe oye ni gitimi kit meno, Rwot! Gin macalo man pe bitimme i komi wacel.” ²³Ento Yecu olokke owaco bot Petero ni, “Dok cen i ŋeya, in Catan! Idoko ariya woko bota, pien tammi pe lubo pa Lubaŋa, ento pa dano.”²⁴Yecu otito bot lupwonnyene ni, “Ka ce dano mo mito lubo kora, myero okwoŋ kwerre kekene, ka ocak tiŋo yatariyane, olub kwede kora. ²⁵Pien dano ma mito laro kwone birwenyone arwenya, ento dano mo ma rwenyo kwone pira aye binoŋone. ²⁶Konyo dano ma olimo lobo ducu ki gin aŋo mono, ka ce kwone gikwanyo woko? Dano dok bimiyo kit gin aŋo ma ka kwone?²⁷Pien Wod pa dano bidwogo ki deyo pa Wonne kacel ki lumalaikane, ci biculo dano acel acel kun lubo kit tic ma yam dano-ni otiyo. ²⁸Adada, awacciwu ni, tye jo mogo ma gucuŋ kany ma pe gibibilo to wacel, ma peya guneno Wod pa dano ka bino i kerre.”

¹Ka nino okato abicel, ci Yecu otero Petero ki Yakobo ki Jon ominne, oito kwedgi i wi got mabor i muŋ gin kengi. ²Kome ocako lokke woko i nyimgi, waŋe oryeny calo ceŋ, ginarukane odoko tar ma wil calo dero ceŋ.³Ci Moses ki Elia gucako nen botgi, gubedo ka lok ki Yecu. ⁴Petero owaco bot Yecu ni, “Rwot, ber mada me bedo kany. Ka ce imito, abigero aduc adek kany, acel meri, acel pa Moses, ki acel pa Elia.”⁵I kare ma pud tye ka lok, nen, tipo pol ma ryeny oumogi woko lipuk, ci dwan owinnye ki i pol ma wacci “Man aye Woda ma amaro; wuwinye.” ⁶Ka lupwonnye guwinyo man, guryebbe piny, lworo omakogi matek. ⁷Yecu obino botgi ogudogi, kun waco botgi ni, “Wua malo; pe wubed ki lworo.” ⁸I kare ma gutiŋo waŋgi malo, pe guneno ŋat mo ento kono Yecu keken.⁹I kare ma doŋ gitye ka lor piny ki i wi got, Yecu ocikogi ni, “Pe wutit bot dano mo gin ma wuneno, nio waŋ ma Wod pa dano ocer ki i kin jo muto.” ¹⁰Ci lupwonnyene gupenye ni, “Piŋo lupwony-cik giwacci, Elia aye koŋ kwoŋo bino?”¹¹Yecu odok iye ni, “Elia aye myero okwoŋ bino, ka wek ocak dwoko jami ducu kakare. ¹²Ento atito botwu ni Elia doŋ otyeko bino wa con, ento gin pe guŋeye, gutimo gin ma gimito i kome. Wod pa dano bene bilimo can madwoŋ ki i ciŋgi kit meno.” ¹³Lacen lupwonnye guniaŋ ni Yecu oloko botgi lok i kom Jon Labatija.¹⁴Ka doŋ guo bot lwak, ci dano mo oa obino bote oguŋo i nyime kun wacci, ¹⁵“Rwot, kica omaki i kom woda, pien two alili omake marac twatwal miyo tyen mapol bolle woko i mac, dok tyen mapol bolle woko bene i pii. ¹⁶Nakanen akele bot lupwonnyeni, ento caŋone oloyogi.”¹⁷Ci Yecu ogamo ni, “Wun yalwak me kare man niyewu pe, kitwu bene doŋ oballe woko, abibedo kwedwu nio wa awene? Wukel en bota kany.” ¹⁸Ci Yecu ogerre i wi cen, cen oa woko ki i kome, cutcut awobi-ni ocaŋ woko i cawa meno.¹⁹Lacen lupwonnye gubino bot Yecu i muŋ gupenye ni, “Gin aŋo mugeŋowa ryemone?” ²⁰Yecu odok iye botgi ni, “Pien niyewu nok. Pien ada, awacciwu ni, ka ce niyewu obedo calo nyig kodi karadali, ci wubiwaco ki got man ni, ‘Dirre i kabedo ma tye loka ca’, kit meno bidirre; ci gin mo pe biloyowu.” ²¹“Kit gin macalo man pe twero katti woko, kono ki lega ki ri kec keken.”²²I kare ma gucokke kacel i Galilaya, Yecu owaco bogti ni, “Wod pa dano gibimiye woko i ciŋ dano, ²³gibineke woko, ento bicer woko i nino me adekke.” Ci gin ducu gukumo matek twatwal.²⁴Ka guo i Kapernaum, jo ma jogo mucoro me ot pa Lubaŋa gucito bot Petero ci guwacce ni, “Lapwonywu pe culo mucoro me ot pa Lubaŋa?” ²⁵Petero ogamo ni, “Culo.” I kare ma odwogo paco, Yecu oloko kwede mukwoŋo, kun penye ni, “Itamo gin aŋo, Cimon? Luker me lobo man gijogo mucoro nyo luwalo ki bot aŋa? Gijogo ki bot litinogi nyo ki bot jo mukene?”²⁶I kare ma ogamo ni, “Ki bot jo mukene”, Yecu owacce ni, “Ka kit meno ci litinogi ducu tye ki kuc. ²⁷Kadi bed kumeno, pe wabal tamgi, cit i dog nam, bol goli i pii, yut rec mukwoŋo moko; ka iyabo doge ci ibinoŋo iye cekel. Kwany cekel meno imi botgi pira ki piri bene.”

¹I kare meno lupwonnye gubino bot Yecu, gupenye ni, “Aŋa ma loyo ki dit i ker me polo?” ²Ci Yecu olwoŋo latin mo bote, ocibo ocuŋ i kingi, ³ka owaco botgi ni, “Ada awaco botwu ni, ka pe wulokke wudoko macalo litino, pe wubidonyo i ker me polo wacel.⁴Dano ma mwolle woko kekene calo latin man, en aye ma loyo ki dit i ker me polo. ⁵Dano ma jolo latin mo acel macalo man i nyiŋa, noŋo ojolo an. ⁶“Ento dano ma miyo ŋat acel ma i kin jo magi matino ma guye an-ni poto i bal, onoŋo bedo ber makato ducu ka gitweyo kidi rego madit i ŋute ci gibole kwede woko wa i nam matut.⁷“Lobo bineno can pi gin ma miyo dano gipoto i bal. Pien gin ma miyo dano poto i bal myero obin, ento dano ma kelo gin ma miyo dano poto i bal bineno can! ⁸Ka ce ciŋi nyo tyeni aye miyo ipoto i bal, ci toŋ iŋun ibol woko; twara ma idonyo i kwo ma ciŋi lakucel peke nyo laput, ber makato ma ibedo ki ciŋi aryo nyo tyeni ducu giboli kwede woko i mac ma pe to.⁹Ka ce waŋi aye miyo ipoto i bal, ci kol woko; twara ma idonyo i kwo ma waŋi lakucel, kato ma kono giboli ki waŋi aryo ducu i mac Geena.¹⁰“Myero wunen ni pe wucayo ŋat mo acel ki i kin jo magi matino-ni; pien awacciwu ni, i polo kuca lumalaikagi neno waŋ Wora ma tye i polo kare ducu. ¹¹Pien Wod pa dano obino ka laro jo murwenyo.¹²Wutamo gin aŋo? Ka ce dano mo tye ki romine miya acel, ka acel i kingi ocito orwenyo woko, pe biweko romi pyeraboŋwen wiye aboŋwen-ni i wi cere-gu, ci cito ka yenyo en murwenyo-ni? ¹³Ka onoŋe, ada awaco botwu ni, cwinye bibedo yom pire makato pi romi pyeraboŋwen wiye aboŋwen ma pe onoŋo gurwenyo-ni. ¹⁴Kit meno Wora ma tye i polo bene pe mito ni ŋat mo acel i kin jo magi matino myero oto.¹⁵“Ka ce omeru obalo bal mo boti, cit bote inyutte balle, i kin in ki en keken. Ka owinyo lokki, ci doŋ inoŋo omeru. ¹⁶Ento ka pe owinyo lokki, kwany dano acel nyo aryo mukene wucit kwedgi, wek lok ma caden aryo nyo adek giloko omok lok ducu.¹⁷Ka ce okwero winyo lokgi, tit pire bot lwak jo muye an; ka ce okwero winyo wa lok pa jo muye an, wek obed boti calo Larok ki lajog-mucoro.¹⁸“Ada awaco botwu ni, gin mo ducu ma wutweyo i wi lobo man gibitweyo kadi wa i polo, gin mo ducu ma wubigonyo i wi lobo man gibigonyo bene wa i polo. ¹⁹Dok bene awaco botwu ni, ka jo aryo i kinwu biye kacel lok i kom gin ma gilego, ci Wora ma tye i polo bitimo pigi. ²⁰Pien ka ma jo aryo nyo adek gucokke kacel i nyiŋa, an bene noŋo atye kunnu i kingi.”²¹Petero oa obino bot Yecu ci openye ni, “Rwot omera mono bibalo bal bota tyen adi, ka dok atim kica bote. Pud dok abitimo bote kica ka obalo tyen abiro?” ²²Yecu owacce ni, “Pe awacci ni ma romo tyen abiro, ento ma romo tyen pyerabiro tyen abiro.²³“Pi meno ker me polo gitwero poro ki kabaka mo ma onoŋo yam omito yubo lok me banya ki luticce. ²⁴I kare ma doŋ ocako kwano wel, ci gikelo ŋat mo acel ma onoŋo tye ki banyane ma romo milion mapol ata. ²⁵Kit macalo onoŋo doŋ pe twero culo banya-nu, ci laditte ociko ni myero gicate woko i opii, en kacel ki dakone ki litino, ki kit jami ducu ma onoŋo en tye kwede, wek gicul ki banya meno.²⁶Cutcut latic-cu orumo coŋe piny i nyime, kun bako doge bote ni, ‘Ladit, koŋ idi cwinyi i koma do, ci abiculli gin ducu.’ ²⁷Ci kica omako ladit i kom laticce-nu, ogonye woko dok oweko banyane bene.²⁸Ento latic-cu i kare ma okato woko, orwatte ki latic mo i kom lutic wadigi ma onoŋo tye ki banyane ma romo ciliŋ miya abic, ci omake ki ŋute kun peye ma wacci, ‘Cul banyana!’ ²⁹Ento latic lawote-ni oryebbe piny kun bako doge bote ni, ‘Koŋ idi cwinyi i koma, abiculo banyani.’³⁰En okwero woko, ocito otweye i mabuc nio ka biculo banyane. ³¹Ka lutic wadigi guneno gin ma otimme-ni, ci cwinygi ocwer matek twatwal, gucito gutito gin ducu ma otimme bot laditgi.³²Cutcut ladit olwoŋe ci owacce ni, ‘In latic marac! Aweki banya ca woko ducu pien onoŋo ilega kun ibako dogi bota; ³³onoŋo in bene pe kica twero maki i kom latic lawoti-nu, kit macalo onoŋo kica omaka i komi-ni?’³⁴Kiniga omako ladit twatwal oweko omiye bot askari lugwok mabuc, nio ka oculo banyane ducu. ³⁵Wora ma tye i polo bene bitimowu kit meno, ka ce pe wutimo kica bot dano ki i cwinywu, dano acel acel ki ominne.”

¹I kare ma Yecu doŋ otyeko loko lok magi, oa woko ki i Galilaya, ci obino i dul lobo me Judaya ma tye loka Jordan. ²Lwak madwoŋ gulube, ci ocaŋogi ki kunnu.³Luparicayo mogo gubino bote, ci gucako omo cwinye kun gipenye ni, “Cik miyo twero ni dano oryem dakone pi tyen lok mo keken?” ⁴Yecu odok iye ni, “Pud pe wukwano lok ma wacci, cakke i acakki piny Lacwec ocweyogi co ki mon?⁵Dok owaco ni, ‘Pi tyen lok man dano biweko wonne ki minne ci moko i kom dakone, gin aryo-nu gicako doko kom acel’? ⁶Kit meno pe doŋ gibedo kom aryo ento kom acel. Pi meno gin ma Lubaŋa oribo kacel, dano pe opok kingi.”⁷Dok gupenye ni, “Ka kumeno, piŋo Moses yam ociko ni gimi waraga me keto nyom, ki ryemo dako woko?” ⁸En owaco botgi ni, “Pi nwaŋ cwinywu oweko Moses oye ni wuryem monwu, ento cakke i acakki piny onoŋo yam pe tye kit meno. ⁹Ento awaco botwu ni, dano mo ma oryemo dakone, ma pe pi tim me tarwaŋ, ce onyomo dako mukene, noŋo otimo abor.”¹⁰Lupwonnye guwacce ni, “Ka ce lok i kom laco ki dakone tye kit meno, ci doŋ pe myero dano gunyomme do.” ¹¹Ento Yecu owaco botgi ni, “Dano ducu pe twero mako pwony macalo man, ento kono jo ma gimiyo botgi keken aye. ¹²Pien tye jo mogo ma gikolo cakke wa i i megigi, ma ginywalogi kit meno; tye mukene ma gidoko jo ma gikolo pien noŋo dano mukologi; tye jo mukene ma gikolle kengi pi ker me polo. Dano ma twero ye lok man, wek oye.”¹³Lacen gikelo litino bot Yecu ni oket ciŋe i komgi kun lego Lubaŋa. Lupwonnye gujuko dano woko. ¹⁴Ento Yecu owaco botgi ni, “Wuwek litino gubin bota, pe wugeŋgi, pien ker me polo tye pi jo macalo gin.” ¹⁵Ci oketo ciŋe i komgi, ka doŋ oa woko ki kunnu.¹⁶Nen, dano mo obino bot Yecu kun penye ni, “Lapwony, atim gin aŋo maber wek alim kwo ma pe tum?” ¹⁷Yecu openye ni, “Piŋo ipenya pi gin maber? Ŋat maber tye acel keken. Ka imito donyo i kwo, ci igwok cik.”¹⁸Openyo Yecu ni, “Cik mene?” Yecu owacce ni, “Pe ineki, Pe itim abor, Pe ikwal, Pe ibed caden me goba, ¹⁹Wor woru ki meni, ki dok ni, Mar lawoti macalo imarre keni.”²⁰Awobinu odokke iye ni, “Magi ducu doŋ atyeko makogi; gin aŋo ma pud odoŋ?” ²¹Yecu ogamo doge ni, “Ka ce imito bedo maber laboŋo roc mo i komi, cit icat jami ducu ma itye kwede, ci imi limme ki lucan, ci ibibedo ki lwak lonyo ma gikano piri i polo; ka doŋ ibin ilub kora.” ²²Awobi-nu ka owinyo lok man, ocako cito woko kun cwinye cwer twatwal; pien onoŋo yam tye ki lim madwoŋ.²³Ci Yecu owaco bot lupwonnyene ni, “Ada awaco botwu ni, bibedo tek mada bot dano ma lalonyo me donyo i ker me polo. ²⁴An dok awaco botwu aye ni, kinaga twero donyo i waŋ libira oyot, makato lalonyo me donyo i ker pa Lubaŋa.”²⁵Ka lupwonnye guwinyo lok man, ci guuro twatwal kun gipenye ni, “Aŋa ma dok twero larre?” ²⁶Ento Yecu onenogi ci owaco botgi ni, “Ki bot dano man pe twerre, ento ki bot Lubaŋa jami ducu twerre.” ²⁷Petero ogamo kun wacci, “Nen, wan waweko jamiwa ducu ci walubi. Wabinoŋo iye gin aŋo?”²⁸Yecu owaco botgi ni, “Ada awaco botwu ni, i kare ma Lubaŋa oketo lobo manyen, ka Wod pa dano bibedo i wi komkerre me deyo, wun jo ma doŋ wulubo kora bene wubibedo i wi komker apar wiye aryo, kun wuŋolo kop i kom kaka apar wiye aryo me Icrael.²⁹Doŋ dano acel acel ma yam oweko odi, nyo omege nyo nyimege, nyo wonne, nyo minne, nyo litino, nyo pottine, pi nyiŋa, binoŋo jami makato magi tyen miya, ci en binoŋo kwo ma pe tum. ³⁰Jo mapol ma gubedo jo mukwoŋo yo gibidoŋ cen, ki jo ma gudoŋ cen gibibedo jo mukwoŋo.

¹“Ker me polo rom ki dano ma en won ot ma opuk woko odiko con ocito ka wako lutic i poto olokke. ²Oyubo lok kwedgi ni ebiculogi i wel lim ma mitte pi nino acel acel macalo kite tye, ci ocwalogi i poto olokke.³I cawa adek en ocito woko, ci oneno jo mukene ma gucuŋo acuŋa i cuk laboŋo gin ma gitiyo. ⁴Won ot owaco botgi ni, Wun bene wucit i poto olokka, dok abimiyowu gin ma atir. Ci gucito.⁵I kare ma dok en okato ocito woko i cawa abicel ki cawa aboŋwen, otimo ma rom ki me wiati. ⁶I kin cawa apar wiye acel en dok ocito onoŋo jo mukene gucuŋo acuŋa kunnu; ci openyogi ni, ‘Piŋo wucuŋ kany dyeceŋ jwi laboŋo tiyo gin mo?’ ⁷Gudokke iye ni, ‘Pien dano mo pe owakowa.’ Ci won ot owaco botgi ni, ‘Wun bene wuciti i poto olokka.’⁸Ka oo otyeno, won poto olok owaco bot lakan jamine ni, ‘Lwoŋ lutic, ci icul mucaragi. Cak ki i kom jo ma gucako tic lacen, nio kwede wa i kom jo ma gukwoŋo bino.’ ⁹Ka jo ma gucako tic i cawa apar wiye acel-li gubino, ci dano acel acel i kingi ogamo mucara me nino acel kulu. ¹⁰Ka jo ma onoŋo gukwoŋo cako tic-ci gubino, gutamo ni gwok nyo gibinoŋo mabup makato; ento ŋat acel acel i kingi gimiye mucara me nino acel.¹¹Ka doŋ gugamo, gucako ŋur bot won ot, ¹²kun giwacci, ‘Jo magi ma gubino lacen-ni gutiyo tic pi cawa acel keken, ento in imiyo gubedo rom kwedwa kun wacanne i tic i ceŋ malyet dyeceŋ jwi.’¹³Ento won poto odok iye ki dano acel i kingi ni, ‘Larema, pe atye ka timi marac. Yam pe icikke kweda ni ibigamo wel mucara meno? ¹⁴Gam meri en, citi. An amito me miyo bot dano man ma lacen kit ma amiyo boti-ni.¹⁵Pe myero ati ki jamina kit macalo iya mito? Gwok nyo cwinyi oballe woko pi gin maber ma atiyo-ni ba?’ ¹⁶Kit meno jo ma gudoŋ cen gibibedo jo me ati, ki jo me ati gibidoko jo ma lacen.”¹⁷I kare ma Yecu tye ka ito cere me cito i Jerucalem, otero lupwonnyene i muŋ. Ka gitye i yo owaco botgi ni, ¹⁸“Wunen, doŋ watye ka ito cere wacito i Jerucalem. Wod pa dano doŋ gibimiye i ciŋ ajwagi madito pa Lubaŋa ki lupwony-cik, gibiŋolle kop me to, ¹⁹ci gibimiye i ciŋ Lurok wek guŋale, gupwode ki del; gibigure woko i kom yatariya, ento bicer woko i ŋe nino adek.”²⁰Lacen megi litino pa Jebedayo obino bot Yecu kacel ki litino awobene, ci oguŋo piny i nyime, ci olege pi gin mo. ²¹Yecu openye ni, “Imito aŋo?” Odok iye ni, “Cik pi litinona aryo-ni ni, ŋat acel obed i kom badi tuŋ lacuc, ki acel bene obed i kom badi tuŋ lacam, i ker meri.”²²Ento Yecu odokke iye ni, “Wun pe wuŋeyo gin ma wulego. Wun wutwero mato ki kikopo ma abimato kwede-ni?” Gudokke iye ni, “Watwero.” ²³Yecu dok owaco botgi ni, “Kikopo ma an abimato kwede-ni wun bene wubimato kwede, ento lok me bedo i kom bada ma lacuc nyo ma lacam pe an aye apoko. Meno bibedo pa jo ma yam Wora oyubo pigi wa con.” ²⁴Ka jo mukene apar guwinyo lokke, ci cwinygi ocwer mada i kom omego aryo-nu.²⁵Ento Yecu olwoŋogi bote, ci owacci, “Wun wuŋeyo ni, jo ma gilwoŋogi ni gin lulo Lurok giloyo dano ki tek, dok luditogi bene gibedo ki twero i komgi. ²⁶Pe bibedo kit meno i kinwu; ento ŋat ma mito bedo ladit i kinwu aye myero obed laticwu, ²⁷ki ŋat ma mito bedo mukwoŋo i kinwu, en aye myero obed opiiwu ducu. ²⁸Kumeno Wod pa dano bene pe obino ni gitine, ento ni wek en aye eti ki dano, ki pi miyo kwone me koko jo mapol.”²⁹I kare ma doŋ gubea woko ki i Jeriko, lwak madwoŋ gulubo kore. ³⁰Nen, lutowaŋ aryo ma gubedo piny i ŋet yo ka guwinyo ni meno aye Yecu ma obekato-ni, ci gudaŋŋe matek ni, “Lakwar Daudi, timwa kica ba!” ³¹Lwak gujukogi, kun giwaco botgi ni guliŋ; ento gin gumedde ameda ki daŋŋe ni, “Rwot, timwa kica do, Lakwar Daudi!”³²Yecu ocuŋ ci olwoŋogi, kun wacci, “Wumito atim gin aŋo piwu?” ³³Gudokke iye ni, “Rwot wamito waŋwa oyabbe.” ³⁴Cutcut kica omako Yecu i komgi, ci ogudo waŋgi. Oyotoyot gucako neno piny, ka doŋ gulubo kore.

¹I kare ma doŋ gicok o i Jerucalem, gubino i Betepage, i kor got Jeituni. Ci Yecu ooro lupwonnyene aryo, ²ocikogi ni, “Wucit i gaŋ ma tye i nyimwu. Cutcut wubinoŋo kana ma gitweyo, tye gin ki latinne; wugonygi ci wukelgi bota. ³Ka ce dano mo biwaco lok mo botwu, wubidokke iye ni ‘Rwot aye mitogi’, ci en bicwalogi kany oyotoyot.”⁴Man otimme wek lok ma yam lanebi oloko ocobbe kakare ni, ⁵“Wuwac bot jo Cion ni, Nen ka kabakawu bino botwu, kun obedo i wi kana ki mwolo, i wi latin kana.”⁶Lupwonnye gucito gutimo kit macalo Yecu ocikogi kwede-ni, ⁷gukelo kana ki latinne, gupeto boŋŋigi i kome ka doŋ Yecu obedo i wiye. ⁸Jo mapol i kin lwak gupeto boŋŋigi i dye yo, ki jo mogo gutoŋo jaŋ yadi gupeto i dye yo.⁹Ci jo ma gutelo yo ki jo ma gulubo kore gudaŋŋe ni, “Ojana, wupak Lakwar Daudi! Lubaŋa omi gum i kom ŋat ma bino i nyiŋ Rwot! Ojana malo i wi polo!” ¹⁰Ka doŋ odonyo i Jerucalem ci gaŋ ducu otugge woko pire, kun dano giwacci, “Man aŋa?” ¹¹Lwak gugamo ni “Man aye lanebi Yecu ma oa ki i Najaret me Galilaya.”¹²Yecu odonyo i ot pa Lubaŋa, ci oryemo jo ducu ma onoŋo gicato wil ki ma giwilo jami i ot pa Lubaŋa. Oryebo meja pa lulok cente, ki kom pa lucat amam. ¹³Ci owaco botgi ni, “Gicoyo ni, ‘Oda gibilwoŋo ni ot me lega’; ento wun wuloko odoko boro pa luyak.” ¹⁴Lutowaŋ ki luŋolo gubino bote i ot pa Lubaŋa ci en ocaŋogi.¹⁵Ento i kare ma ajwagi madito pa Lubaŋa ki lupwony-cik guneno gin me aura ma en otiyo, ki litino ma daŋŋe i ot pa Lubaŋa kun giwaco ni, “Ojana, wupak Lakwar Daudi!” man omiyo kiniga omakogi matek. ¹⁶Gupenye ni, “Iwinyo gin ma jo-nu tye ka wacone?” Yecu ogamo ni, “Awinyo. Yam pe wukwano ni, ‘Wer ma litino lukere ki litino ma pud dot giwero me paki ber atika’?” ¹⁷Lacen owekogi, oa ki i gaŋ ocito i Betania ci obuto kunnu.¹⁸Odiko ma en doŋ dok i Jerucalem, kec oneke. ¹⁹Ka oneno yat oduro mo i ŋet yo, ci oŋak i tere, pe onoŋo iye gin mo, ento onoŋo pote keken. Yecu owaco bot yat oduro-nu ni, “Pe dok ibinyako nyigi matwal.” Cutcut oduro meno otugi tal woko.²⁰Ka lupwonnye guneno ci guuro twatwal, kun giwacci, “Yat oduro-ni dok otugi two woko niŋniŋ?” ²¹Yecu odok iye botgi ni, “Ada awaco botwu ni, ka onoŋo wutye ki niye, kun pe wukalo akala, onoŋo pe wutwero timo gin ma otimme i kom oduro-ni keken, ento kadi bed wuwac ki got man ni, ‘Mukke wek itiŋŋe ipot wa i nam’, ci bitimme bene. ²²Gin ducu ma wupenyo i legawu, wubinoŋo, ka ce wutye ki niye.”²³I kare ma Yecu odonyo i ot pa Lubaŋa, ci ajwagi madito pa Lubaŋa ki ludoŋo pa lwak gubino bote ma onoŋo en tye ka pwony, gupenye ni, “Twer mene mumiyo itimo gin magi, dok aŋa ma omiyoni twero meno?” ²⁴Yecu ogamo doggi ni, “An bene abipenyowu ki peny acel; ka ce wudokka iye, ci doŋ abitito botwu gin mumiyo atimo gin magi.²⁵Batija pa Jon twerone oa ki kwene? Oa ki i polo nyo ki bot dano?” Ci gucako pyem i kingi kekengi kun giwacci, “Ka wawacci, ‘Twer man oa ki i polo’, ci en bipenyowa ni, ‘Piŋo kono onoŋo pe wuye en?’ ²⁶Ento ka ce wawacci, ‘Oa ki bot dano’, walworo lwak; pien gin ducu giŋeyo maber ni Jon aye lanebi atika.” ²⁷Mumiyo gudok iye bot Yecu ni, “Pe waŋeyo.” Yecu bene owaco botgi ni, “An bene pe abitito kit twer mumiyo atiyo gin magi.46Gutemo make, ento gulworo lwak, pien lwak onoŋo ŋeyo ni en lanebi.²⁸“Wutamo aŋo? Laco mo onoŋo yam tye ki awobene aryo. Oa ocito bot latin mukwoŋo, owacce ni, ‘Latinna, tin cit ka tic i poto olok.’ ²⁹Latin-nu ogamo ni, ‘Pe abicito’, ento lacen oŋut ci ocito ka tic i poto olok. ³⁰Laco-nu dok oa ocito bot latinne me aryo ci owacce lok ma rom ki maca; ci wode odok iye ni, ‘Ladit, abicito’; ento pe omedo ki cito.³¹I kin awobe aryo-nu aŋa ma otiyo gin ma onoŋo wonne mito?” Gudokke iye ni, “Latin mukwoŋo.” Yecu owaco botgi ni, “Ada awaco botwu ni, lujog-mucoro ki mon ma malaya bikwoŋo donyo i ker pa Lubaŋa ati botwu. ³²Pien Jon yam obino botwu kun lubo yo me kit ma atir, ento wun wukwero ye en woko; ento lujogmucoro ki mon ma malaya guye en. Dok bene kadi bed wuneno gin mutimme, lacen pe wuŋut, dok pe wuye en.³³“Koŋ dok wuwiny carolok mukene. yam tye dano mo ma opito olok i potone, ci orumo woko ducu ki cel, ka okwinyo iye bur me biyo pige, ogero iye lubele, oweko bot lupur, ci ocito woko i lobo mukene. ³⁴Ka kare me pwono nyig olok doŋ onyiko cok, ci ocwalo luticce bot lupur ka kelo nyig olokke.³⁵Lupur gumako luticce, gugoyo ŋat acel, ki ŋat acel guneko woko, ki mukene gucelo woko ki got. ³⁶En dok ocwalo lutic mukene mapol, ma gikato jo mukwoŋo ca, jo-nu bene gitimogi ki kit tim acel ma gitimo i kom lutic mukwoŋo ca. ³⁷Lacen doŋ en ocwalo wode kikome botgi, kun waco ni, ‘Gibiworo woda.’³⁸Ento ka lupur guneno wode, gucako lok kekengi ni, ‘Man aye doŋ lale lim; wubin waneke woko, wek lim ma en bileyo-ni obed mewa.’ ³⁹Ci gumake gubole woko ki i poto olok, ka guneke woko.⁴⁰Pi meno ka won poto olok obino, bitimo lupur niŋniŋ?” ⁴¹Ci gugamo ni, “En bineko lupur woko ki kit nek marac atika, ci miyo poto olok woko bot lupur mukene ma gitwero miye nyig olok ka karene oromo.”⁴²Yecu ogamo doggi ni, “Yam pe wukwano lok ma gicoyo i ginacoya ni, ‘Got ma lugedo gukwero-ni en aye odoko got madit ma i twok ot; man Rwot aye ma otiyo, obedo botwa lok me aura’?⁴³Pi meno awaco botwu ni, gibikwanyo ker pa Lubaŋa woko ki botwu, ci gimiyo bot rok ma binyako nyig ma mitte iye kikome.” ⁴⁴Dano ma bipoto i kom got man tur ŋidde woko matitino; ento ka got man opoto i kom dano mo, ci nyoto woko.⁴⁵Ka ajwagi madito pa Lubaŋa ki Luparicayo guwinyo carolokke, ci guniaŋ ni onoŋo kara Yecu tye ka lok i komgi. ⁴⁶Gutemo make, ento gulworo lwak, pien lwak onoŋo ŋeyo ni en lanebi.

¹Yecu dok oloko kwedgi i carolok kun wacci, ²Ker me polo rom ki kabaka ma yam otedo karama me nyom pa wode, ³ci ooro luticce me cito ka lwoŋo jo ma onoŋo yam gilwoŋogi i karama meno, ento gukwero bino woko.⁴Dok ooro lutic mukene, kun waco botgi ni, “Wuwac bot jo ma onoŋo gilwoŋogi ni, Nen, doŋ ayubo cam ducu tye, twonina ki rocina ma moo doŋ ginekogi woko, doŋ giyubo jami ducu tye; wubin i karama me nyom.”⁵Ento pe guketo cwinygi iye, gucito citogi, ŋat acel ocito i potone, ŋat mukene ocito i cato wille, ⁶jo mukene ma gudoŋŋe gumako luticce, gutimogi ki tim me lewic, ci gunekogi woko. ⁷Kiniga omako kabaka, ci ocwalo monye guneko lunek-gu woko, dok guwaŋo gaŋigi woko bene.⁸Dok owaco bot luticce ni, “Karama doŋ giyubo, ento jo ma onoŋo nene gilwoŋogi pe doŋ gimyero. ⁹Pi meno wucit i yo madito, wulwoŋ jo mapol ma wubinoŋo, wuwek gubin i karama me nyom.” ¹⁰Lutic magi gucito i yo gudo ci gucoko jo ducu ma gunoŋo; jo maraco kacel ki jo mabeco; mumiyo ot me nyom opoŋ woko ligwik ki welo.¹¹“Ento i kare ma kabaka odonyo i ot ka neno welo, ci oneno laco mo obedo kunnu ma pe onoŋo oruko boŋo me nyom. ¹²Cutcut otugi penye ni, ‘Larema, idonyo kany niŋniŋ ma kun pe iruko boŋo me nyom?’ Laco-nu oliŋ aliŋa litik.¹³Mumiyo kabaka ociko lugwok-welo ni, ‘Wutwe ciŋe wa ki tyene woko, ci wubole kwede woko i piny macol; kunnu dano gibikok kun gikayo lakgi.’ ¹⁴Pien jo ma gilwoŋo pol, ento ma giyero nok.”¹⁵Luparicayo gucito guporo lok kit macalo myero gimak kwede lok ma a i doge. ¹⁶Ci guoro bote lupwonnyegi kacel ki jo pa Kerode, kun giwacci, “Lapwony, wan waŋeyo ni in dano me ada, dok ipwonyo yo pa Lubaŋa ki ada, dok bene pe iparo pi dano mo, pien in pe ineno kom dano ki woko. ¹⁷Tit botwa gin ma itamo. Cikwa ye ni gicul mucoro bot cecar nyo pe?”¹⁸Ento Yecu oŋeyo raccwiny ma gitye kwede, ci owaco botgi ni, “Wun wubwola piŋo, wun lugoba? ¹⁹Koŋ wunyutta kom lim ma giculo kwede mucoro-ni.” Ci gukelo bote.²⁰Yecu openyogi ni, “Cal ki coc ma gicoyo i kome-ni pa aŋa?” ²¹Gugamo ni, “Pa Cecar.” Ci owaco botgi ni, “Wudwok jami pa Cecar bot Cecar, ki jami pa Lubaŋa wudwok bot Lubaŋa.” ²²I kare ma guwinyo lokke guuro matek; ci guweke gucito woko.²³I nino meno bene Lucadukayo gubino bot Yecu, gin aye jo ma onoŋo giwacci jo muto pe gicer. Ci gupenye ki peny mo acel, ²⁴ni, “Lapwony, Moses yam owaco ni, ‘Ka ce laco mo oto ma pe onywalo latin, ci ominne myero olak dakone, wek onywal kwede litino ma ka-ka ominne.’²⁵Yam onoŋo tye co abiro i kinwa ma gin ducu omego. Laco mukwoŋo onyomo dako, ci oto woko ma pe obwoto latin mo, oweko dako bot ominne. ²⁶Dano me aryo ki me adekke bene ducu kit meno, nio wa i kom dano me abirone. ²⁷Lacen ki i ŋegi ducu, dako bene oto. ²⁸Doŋ i kare me cer dako-nu bibedo pa aŋa i kin co abiro-nu? Pien gin ducu onoŋo gubedo kwede.”²⁹Ento Yecu odok iye ni, “Wun wurwenyo, pien pe wuŋeyo gin ma gicoyo i ginacoya, kadi wa teko pa Lubaŋa bene wukwiya. ³⁰Pien i kare ma dano gibicer woko, doŋ pe gibinyomme, ento gibibedo macalo lumalaika ma i polo.³¹Ento i kom lok man me cer ki i kin jo muto-ni, yam pe wukwano lok ma Lubaŋa oloko botwu ni, ³²‘An Lubaŋa pa Abraim, ki Lubaŋa pa Icaka, ki Lubaŋa pa Yakobo’? En pe Lubaŋa pa jo muto, ento Lubaŋa pa jo makwo.” ³³Ka lwak guwinyo, ci guuro pwonye matek.³⁴I kare ma Luparicayo guwinyo ni Yecu otwoyo dog Lucadukayo woko ki lok, ci gucokke kacel. ³⁵Dano mo i kingi onoŋo lapwony-cik, oteme openye ki peny acel, ni ³⁶“Lapwony, cik mene madit makato cik ducu?”³⁷Yecu odokke iye ni, “Mar Rwot Lubaŋani ki cwinyi ducu, ki tiponi ducu, ki tammi ducu. ³⁸Man aye cik madit dok mukwoŋo.³⁹Ki me aryone ma rom kwede en ene ni, Mar lawoti macalo imarre keni. ⁴⁰I kom cik magi aryo lok ducu ma tye i cik ki i pwony pa lunebi gucuŋ iye.”⁴¹I kare ma Luparicayo doŋ gucokke kacel, Yecu openyogi kun wacci, ⁴²“Wutamo gin aŋo i kom Kricito ma Lubaŋa oyero? En lakwar aŋa?” Gudokke iye ni, “Lakwar Daudi.”⁴³Yecu dok openyogi ni, “Piŋo kono Cwiny Maleŋ dok omiyo Daudi olwoŋe ni Rwot? Pien yam oloko ni, ⁴⁴‘Rwot owaco bot Rwoda ni, Bed i kom bada ma lacuc, i kabedo me deyo, nio ka abiketo lukworri piny i te tyeni.’⁴⁵Ka en Daudi aye yam olwoŋe ni Rwot, ci en dok bedo lakwarre niŋniŋ?” ⁴⁶Dano mo pe ma otwero dokke iye lok mo kadi ki acel, dok cakke i kare meno ŋat mo pe oette me penye ki kit peny mo.

¹Lacen Yecu owaco bot lwak ki bot lupwonnyene ni, ²“Lupwony-cik ki Luparicayo gibedo i wi kom pa Moses; ³pi meno lok ducu ma gipwonyowu kwede, wuti dok wugwok bene, ento pe wuti gin ma gin tiyo, pien giloko aloka keken pe gitiyo.⁴Gitweyo yec mapek ma yeyone tek, ci giketo i wi gwok dano; ento gin kikomgi pe gitwero dirone ki lwet ciŋgi acel. ⁵Gitiyo ticgi ducu ni wek dano onengi; pien giyaro pulakiterigi bedo malac, dok bene gimedo dog boŋŋigi bedo maboco adada.⁶Dok gimaro bedo i kabedo me deyo i karama, ki bedo i kom me dito i kacokke. ⁷Dok bene gimito ni dano omotgi wa i cuk-gu, gimaro bene ni dano myero gulwoŋgi ni, ‘Lapwony.’⁸Ento wun pe myero gilwoŋwu ni, ‘Lapwony’, pien wutye ki lapwony acel, pi meno wun ducu doŋ wudoko omege. ⁹Dok bene pe wulwoŋ dano mo ni wonwu i wi lobo, pien Wonwu tye acel, en aye ŋat ma tye i polo. ¹⁰Pe bene gilwoŋwu ni lutel, pien wutye ki latelwu acel, ma en aye Kricito ma Lubaŋa oyero.¹¹Dano madit ma loyo ki i kinwu aye bibedo laticwu. ¹²Pien ŋat ma kette kene ni edit, gibidwoke piny, ento ŋat ma mwolle kene gibimiyo doko dit.¹³“Wubineno can, wun lupwony-cik ki Luparicayo, wun lugoba! Pien wuloro doggola me ker me polo woko bot dano; wun kikomwu pe wudonyo iye, dok bene wugeŋo jo ma mito donyo iye woko. ¹⁴Wubineno can wun lupwony-cik ki Luparicayo, wun lugoba! Pien wumayo odi pa mon-to, dok wulego lega maboco me buta keken. Gibiŋolo kop madit makato ducu i wiwu. ¹⁵“Wubineno can, wun lupwony-cik ki Luparicayo, wun lugoba! Pien wuwoto wuloŋo piny ki i dye nam kun wuwoto wa i wi tura-gu wek wulok dano acel owek dinine odwog i mewuni, ento ka doŋ olokke, wumiyo doko latin me Geena ma rom aroma kwedwu tyen aryo.¹⁶“Wubineno can, wun lutel dano ma waŋwu oto, ma wuwaco ni, ‘Ka ce dano mo kwoŋo kwoŋ ki ot pa Lubaŋa, lok mo bedo pe iye, ento ka ŋat mo okwoŋo kwoŋ ki jabu ma i ot pa Lubaŋa, kwoŋŋe-ni bimake gire.’ ¹⁷Wun lutowaŋ ma lumiŋ! Gin mene ma pire dit kato, jabu nyo ot pa Lubaŋa ma omiyo jabu odoko maleŋ?¹⁸Dok wuwaco ni, ‘Ka ce dano mo okwoŋo kwoŋ ki keno tyer, lok mo pe iye, ento ka ce ŋat mo okwoŋo ki mot ma giketo i wi keno tyer, kwoŋŋe-ni bimake woko gire.’ ¹⁹Wun lutowaŋ! Gin mene madit makato, mot nyo keno tyer ma miyo mot doko maleŋ?²⁰Pi meno dano ma kwoŋo kwoŋ ki keno tyer, kwoŋo bene ki jami ducu ma tye i wi keno tyer. ²¹Dano ma kwoŋo ki ot pa Lubaŋa, noŋo okwoŋo ki ot pa Lubaŋa kadi wa ki ŋat ma bedo iye. ²²Dano ma kwoŋo ki polo, noŋo kwoŋo ki komker pa Lubaŋa kadi wa ki ŋat ma bedo i wiye-ni.²³“Wubineno can, wun lupwony-cik ki Luparicayo, wun lugoba! Pien wumiyo dul acel me apar me malakwaŋ ki toke ki okwerwu, ento wutenyo lok ma pigi tego me cik woko, gin macalo ŋolo kop atir, timo kica ki bedo jo ma tye ki niye. Magi ducu myero wutim, kun bene pe wuweko mukene ca. ²⁴Onoŋo gitamo ni wun aye myero wubed lutel, ento wun lutowaŋ, pe wuŋeyo gin mo. Wuketo cwinywu i lok ma pe pigi tego, ento wubwoto lok ma pigi tego-gu woko. Meno rom macalo wukwanyo lwaŋo ki i pii amatawu, ento wumwonyo kinaga woko kacel ki pii-nu, pien onoŋo pe wuŋeyo ni tye iye!²⁵“Wubineno can, wun lupwony-cik ki Luparicayo, wun lugoba! Pien wulwoko ŋe kikopo ki caani ki woko wek obed leŋ, ento ki igi noŋo gupoŋ ki tim me yako dano ki miti mogo ma pe twero jukke. ²⁶Wun Luparicayo ma lutowaŋ! Mukwoŋo myero koŋ wulwok i kikopo ki i caani obed leŋ, ka wek ŋeye bene obed leŋ.²⁷“Wubineno can, wun Lupwony-cik ki Luparicayo, wun lugoba! Pien wurom ki lyel ma gipuyo ki gin matar, kun ki yo tuŋ woko nen maber, ento igi noŋo opoŋ ki cogo pa jo muto, ki jami ducu ma keni keken. ²⁸Wun bene kit meno, ki woko wunen bot dano ni wun jo ma kitwu atir, ento iwu noŋo opoŋ ki gin maraco keken.²⁹“Wubineno can, wun lupwony-cik ki Luparicayo, wun lugoba! Pien wucano got i wi lyel pa lunebi, ka dok wudeyo kom gin ma yam gigero pi po pi jo ma kitgi atir, wuyubo woko onen maber, ³⁰kun wuwacci, ‘Ka nene onoŋo wabedo i kare pa kwarowa, kono onoŋo pe waribbe kwedgi ka neko lunebi.’ ³¹Wun giwu wutuco kenwu ni wun likwayo pa jo ma yam guneko lunebi-ni.³²Ber, doŋ wucob tic pa kwariwu! ³³Wun twol, litino ororo, wubibwot niŋniŋ ki i ŋolo kop me bolowu i Geena?³⁴Pi meno abioro botwu lunebi ki luryeko ki lupwony-cik, ma jo mogo i kingi wun wubinekogi ci wugurogi woko i kom yatariya, ki jo mogo wubigoyogi ki del i kacokkewu, kun wuyelo ki gaŋ ki gaŋ; ³⁵wek remo pa jo ducu ma kitgi atir ma ginekogi i lobo obed i wiwu, cakke ki i kom remo pa Abel ma balle pe-ni nio kwede i kom remo pa Jekaria wod pa Barakia, ma yam wuneko i kin kabedo maleŋ ki keno tyer pa Lubaŋa. ³⁶Ada awaco botwu ni, lok man ducu bipoto i kom jo ma gin yalwak me kare man.³⁷“Jerucalem, Jerucalem, in ma ineko lunebi, ma icelo jo ma gioro boti woko ki got, tyen adi ma nene amito coko litinoni woko macalo min gweno ma coko litinone i te bwome, ento wun pe wuye giwu! ³⁸Nen, doŋ gitenyo otwu botwu, iye odoŋ nono. ³⁹Atito botwu ni pe wubinena nio ka wubiwacci,‘Gipwo ŋat ma bino i nyiŋ Rwot!’”

¹Yecu okato woko ki i ot pa Lubaŋa. Ma doŋ tye ka cito, lupwonnyene gubino gunyutte gedo me ot pa Lubaŋa. ²Odok iye botgi ni, “Wuneno gin magi ducu, pe kumeno? Ada awaco botwu ni, pe gibiweko got acel mo kany ma ododde i wi wadi, ma pe gibicoro woko piny.”³I kare ma Yecu obedo i wi got Jeituni, lupwonnye gubino bote i muŋ gucako penye ni, “Tit botwa, lok man bitimme awene, dok kit gin aŋo ma binyuto dwogoni, ki agikki piny?” ⁴Ci Yecu odok iye botgi ni, “Wugwokke, ŋatti mo owek rwenyowu. ⁵Pien jo mapol gibibino i nyiŋa, ma giwacci, ‘An aye a Kricito ma Lubaŋa oyero’, ci gibimiyo jo mapol rwenyo woko.⁶Dok bene wubiwinyo pi mony, ki lok ma yweko pi mony; pe wuwek tipo komwu oto woko lirut; pien koŋ myero man otimme, ento noŋo nino me agiki pud peke. ⁷Pien rok bilweny ki rok wadi, ki ker bene bilweny ki ker wadi, ki kec bene bipoto i lobo, ki oyeŋoyeŋ biyeŋo lobo i kabedo mapol; ⁸gin magi ducu gin aye acakki me te can ma bipoto i lobo.⁹“I kare meno gibiketo lok roro i komwu wek wunen can, gibinekowu woko; jo me rok ducu bikwerowu pi nyiŋa. ¹⁰I kare meno jo mapol bipoto, gibiketo lok roro i kingi gidotte kekengi, dok gibibedo ki adagadaga i kingi kekengi. ¹¹Lunebi mapol ma lugoba bibino ma gibirwenyo jo mapol.¹²Kit macalo tim maraco bibedo ka medde ameda-ni, mar pa jo mapol bikwe woko. ¹³Ento ŋat ma biciro nio wa i agikki bilarre. ¹⁴Doŋ lok man me kwena maber me ker pa Lubaŋa gibitito i wi lobo ducu, me bedo caden bot rok ducu; ka doŋ lacen agikki piny bibino.¹⁵“Doŋ ka wubineno gin mo me kwer, malik, ma balo cwiny dano, ma yam Daniel otito pire, kun ocuŋ i kabedo maleŋ (dano ma kwano myero oniaŋ iye), ¹⁶i kare meno jo ma tye i Judaya myero guriŋ woko i wi godi. ¹⁷Dano ma onoŋo tye i wi ot pe dok olor piny me bino ka kwanyo gin mo ma tye i ode; ¹⁸ki dano ma tye i poto bene pe odok cen paco ka omo ginarukane.¹⁹Dok mon ma giyac gibineno can i kare meno, ki mon ma gidoto litino bene! ²⁰Wuleg wek ŋwecwu pe otimme i cwir nyo i ceŋ cabit. ²¹Pien i kare meno twon can madit atika bitimme iye, ma yam peya onen i lobo, nia wa i acakki lobo nio kwede wa onyoo, dok pe bene binen. ²²Kono nene Rwot pe ojwiko kare-nu obedo manok mo, kono dano mo pe obwot; ento pi jo ma giyero, miyo gibijwiko wel nino bedo manok.²³“I kare meno ka ce dano mo biwaco botwu ni, ‘Nen, Kricito ma Lubaŋa oyero tye kany’, nyo ni, ‘Nen, tye kuca’, pe wuye. ²⁴Pien Kricito ma lugoba, kacel ki lunebi-gu ma lugoba gibibino, gibinyuto lanyut ki tyo jami me taŋo, wek girweny jo mapol ka gitwero, wek girweny wa ki jo ma Lubaŋa oyero bene. ²⁵Nen, doŋ atyeko tito botwu con.²⁶Ka ce gibiwaco botwu ni, ‘Nen, en tye i tim kuca’, pe wucit kunnu, nyo ni, ‘Tye i kicika ot ma i iye’; pe wuye. ²⁷Kit macalo lutkot a ki yo tuŋ wokceŋ ci wil menyo piny wa yo tuŋ potoceŋ, dwogo pa Wod pa dano bene bibedo kit meno. ²⁸ka ma kom dano muto tye iye, acut bene gicokke kunnu.²⁹“Oyotoyot i ŋe can madit me kare meno bibedo kit macalo yam gicoyo ni ‘Ceŋ bicido woko macol licuc, ki dwe bene pe biryeny, lakalatwe bia ki i polo gipoto piny, ki twer ducu ma i polo bene biyeŋŋe.³⁰“ka doŋ gin ma nyuto Wod pa dano binen i polo. Ci i kare meno kaka ducu ma i wi lobo bikumo, ci gibineno Wod pa dano ka bino ki i wi pol me polo, ki twero madwoŋ, ki deyo madit. ³¹En bioro lumalaika ki tum ma kok maloŋo, gibicoko jone ma en oyero ki i twok piny aŋwen ducu, nia ki i agikki polo tuŋcel nio kwede wa i agikkine mukene.³²“Wupwony carolok i kom yat oduro. Cutcut ka jaŋe olot, ci pote luk, ci doŋ wuŋeyo ni oro cok. ³³Ki wun bene ka ce wuneno gin magi ducu, ci wuŋe ni en doŋ tye cok, tye wa i doggola.³⁴Ada awaco botwu ni, yalwak man pe bitum, nio waŋ ma lok magi ducu otimme. ³⁵Polo ki lobo bitum, ento lokka pe bitum.³⁶“Ento nino meno ki cawa meno, pe tye ŋat mo ma ŋeyo, kadi wa lumalaika ma i polo, kadi wa Wod, ento kono Lubaŋa Won keken aye ŋeyo gire.³⁷Kit macalo ceŋ otimme i kare pa Nua, bitimme kit meno bene i kare me dwogo pa Wod pa dano. ³⁸I kare ca ma peya pii aluka ocorre i wi lobo onoŋo gicamo, gimato, dok awobe ki anyira ginyomme, nio wa i nino ma Nua odonyo kwede i yeya; ³⁹pe gumedo ki ŋeyo gin mo nio ka pii aluka opoŋ, ci omologi woko ducu. Bibedo kit meno bene i kare ma Wod pa dano bidwogo iye.⁴⁰I kare meno co aryo bibedo i poto; gibikwanyo ŋat acel, gibiweko ŋat acel doŋ. ⁴¹Mon aryo bibedo ka rego kacel; gibikwanyo ŋat acel, gibiweko ŋat acel doŋ. ⁴²Pi meno, wubed ma waŋwu twolo, pien pe wuŋeyo nino ma Rwotwu bibino iye.⁴³Ento myero wuŋe man, ni, ka ce nene won ot oŋeyo cawa mene i dyewor ma lakwo onoŋo obebino kwede, kono obedo ka kiyo piny, kono pe oweko gituro ode. ⁴⁴Pi meno, wun bene wubed ma wuyubbe; pien Wod pa dano bibino i cawa ma noŋo pe wutamo pire.⁴⁵“Aŋa ma lagwok ot ma lagen dok maryek, ma laditte biweko dano ducu ma bedo i ode i te locce, wek opok botgi camgi i kare ma mitte? ⁴⁶Latic meno tye ki gum, ma laditte ka obino onoŋo en tye ka tiyo ticce kit meno. ⁴⁷Ada awaco botwu ni ladit-tu bimiye twero me loyo jamine woko ducu.⁴⁸Ento ka latic meno oloko kekene ni, ‘Laditta doŋ ogalle ka bino’, ⁴⁹ci cako goyo lutic luwote, kun camo, mato dok mer kacel ki lumero, ⁵⁰ladit pa latic meno bidwogo i nino ma en pe tamo pi dwogone, dok i cawa ma en pe ŋeyo, ⁵¹bipwode, ci kete kacel ki lugoba; ka ma dano gibibedo iye ka koko kun gikayo lakgi.

¹“I kare meno ker me polo gibiporo ki anyira apar ma yam gutero taragi, gucito ka jolo lanyom. ²Jo abic i kingi onoŋo lumiŋ, ki jo abic onoŋo luryeko. ³Anyira ma lumiŋŋu gutero taragi laboŋo moo, ⁴ento jo ma luryeko gutero moo i cupa kacel ki taragi.⁵I kare ma lanyom pud ogalle, gin ducu nino omako waŋgi, ci gunino woko. ⁶Ka doŋ oo i cwiny dyewor woo owinnye madwoŋ ni, ‘Nen, lanyom doŋ bino! Wukat woko ka jole.’⁷Anyira ca ducu gua cut, ci guyubo taragi. ⁸Ento anyira ma lumiŋŋu gulego anyira ma luryeko-ni, ni, ‘Wumiwa moowu-ni mogo do, pien mac tarawa mito to woko.’ ⁹Ento anyira meno ma luryeko-ni gudok iye botgi ni, ‘Nen calo moo ma watye kwede pe biromowa ki wun bene; myero wucit bot lucat-wil, ci wuwil mewu.’¹⁰I kare ma gucito ka wilo moo, cutuct lanyom obino; jo ma nene gitye ma guyubbe gudonyo kacel kwede i ot i karama me nyom, ci giloro doggola woko. ¹¹Lacen anyira ca ma lumiŋ-ŋi gubino, kun gibako doggi ni, ‘Ladit, ladit, yab doggola botwa do!’ ¹²Ento en odok iye botgi ni, ‘Ada awaco botwu ni, an gira pe aŋeyowu.’ ¹³Pi meno wuki, pien pe wuŋeyo nino kadi wa cawa.¹⁴“Pien bibedo rom ki dano ma cito ka wot i lobo mukene, olwoŋo luticce, ci oweko jamine i ciŋgi ni gulo. ¹⁵Ci omiyo bot latic acel ciliŋ alip abic, bot dano mukene omiyo ciliŋ alip aryo, ki bot ŋat mukene omiyo ciliŋ alip acel; omiyo bot dano acel acel dul lim kit macalo en romo tic kwede. Ci oa gire ocito i wotte. ¹⁶Dano ma onoŋo ciliŋ alip abic-ci ocako tic kwede woko oyotoyot i cato wille; onoŋo magoba ciliŋ alip abic bene.¹⁷Ki ŋat ma ogamo ciliŋ alip aryo-ni bene onoŋo magoba ciliŋ alip aryo. ¹⁸Ento dano ma nene ogamo ciliŋ alip acel-li ocito okwinyo bur i ŋom, ci okano lim pa laditte woko iye.¹⁹Ka doŋ kare okato malac, ladit pa lutic magi odwogo, ocako kwano lim kacel kwedgi. ²⁰Dano ma nene ogamo ciliŋ alip abic-ci okwoŋo bino anyim, kun okelo ciliŋ alip abic mukene, owacci, ‘Ladit, nene imiya ciliŋ alip abic; nen dok anoŋo ciliŋ alip abic mukene.’ ²¹Laditte owacce ni, ‘Itimo ber mada, in latic maber dok lagen. Onoŋo ibedo lagen i kom jami matidi mo, abiketi doŋ ibedo ki twero i kom jami mapol. Dony i yomcwiny pa laditti.’²²Lacen ŋat ma gimiye ciliŋ alip aryo-ni bene obino anyim, owacci, ‘Ladit, onoŋo nene imiya ciliŋ alip aryo; nen dok anoŋo ciliŋ alip aryo mukene.’ ²³Laditte owacce ni, ‘Itimo ber mada, in latic maber dok lagen. Onoŋo ibedo lagen i kom jami matidi mo, abiketi doŋ ibedo ki twero i kom jami mapol. Dony i yomcwiny pa laditti.’²⁴Ka dok ŋat ma nene ogamo ciliŋ alip acel-li bene obino anyim, owacci, ‘Ladit, onoŋo aŋeyo ni in dano magwa, ikayo ka ma yam pe icoyo iye kodi, icoko bene ka ma pe iketo; ²⁵oweko abedo ki lworo, acito akano ciliŋŋi woko piny i ŋom. Ene, gam giri limmi.’²⁶Ento laditte odokke iye ni, ‘In latic marac dok bene in lawackom! Onoŋo iŋeyo ni akayo ka ma pe acoyo iye kodi, dok bene acoko ka ma yam pe aketo iye? ²⁷Aŋo mugeŋi tero limma bot jo ma loyo beŋŋe, wek i kare ma abino agam limma kacel ki magobane?²⁸Pi meno wukwany ciliŋ alip acel-li woko ki bote, wumi bot dano ma tye ki ciliŋ alip apar-ri. ²⁹Pien dano acel acel ma tye ki gin mo, gibimiye doki makato, ci en bibedo ki jami mabup. Ento ŋat ma pe ki gin mo, kadi wa gin ma en tye kwede gibikwanyo woko ki bote. ³⁰Wubol latic ma konnye pe-ni i colpiny ma tye woko, ka ma dano gibikok kun gikayo iye lakgi.’³¹“I kare ma Wod pa dano bidwogo ki deyo kacel ki lumalaikane ducu, ci en bibedo i wi komkerre me deyo. ³²Rok ducu bicokke kacel i nyime, en bipoko kingi woko patpat, kit macalo lakwat poko kwede romi ki i kom dyegi. ³³Biketo romi yo tuŋ ciŋe ma lacuc, ento dyegi en biketo yo tuŋ ciŋe ma lacam.³⁴Ci kabaka biwaco bot jo ma tye yo tuŋ ma lacuc ni, ‘Wubin, wun jo ma Wora omiyowu gum, wule ker ma yam giyubo piwu cakke wa i acakki keto lobo. ³⁵Pien nene kec oneka, wun wumiya cam, orwo oneka, wumiya pii amato, onoŋo a welo, wun wujola; ³⁶nene onoŋo atye munero, wuruko boŋo i koma, koma obedo lit, ci wubino ka lima, dok i kare ma atye i mabuc, wun wubino bota.’³⁷Ci jo ma kitgi atir bidok iye bote ni, ‘Rwot, yam waneni awene ka kec neki, ci wamii cam, nyo ka orwo neki, ci wamii pii imato? ³⁸Yam waneni awene ka i welo, ci wajoli; nyo ka itye munero, ci waruko boŋo i komi? ³⁹Dok onoŋo waneni awene ka komi lit nyo ka itye i mabuc, ci walimi?’ ⁴⁰Kabaka bidok iye botgi ni, ‘Ada awaco botwu ni gin ma wutimo bot dano acel i kin utmegina magi matino, meno wutimo bota.’⁴¹Lacen en doŋ biwaco bot jo ma tye yo tuŋ ciŋe ma lacam ni, ‘Wun jo ma giceno, wua woko ki i nyima, wudony i mac ma pe to ma giyubo pi Catan ki lumalaikane. ⁴²Pien nene kec neka, wun pe wumiya cam, orwo pii oneka, pe bene wumiya pii me amata; ⁴³yam a welo, ento pe wujola, onoŋo atye munero ci pe wuruko boŋo i koma, nene koma lit dok abedo i mabuc, ento wun pe wubino ka lima.’⁴⁴Gin bene gibidokke iye ni, ‘Rwot, waneni awene ka kec neki nyo ka orwo neki, nyo ka i welo, nyo ka itye munero, nyo ka komi lit, nyo ka itye i mabuc, ci pe wakonyi?’ ⁴⁵En bidok iye botgi ni, ‘Ada awaco botwu ni, kit macalo pe wutimo bot dano mo acel i kin jo magi matino, pe wutimo bota.’ ⁴⁶Ci gibicito woko i can ma pe tum, ento jo ma kitgi atir bicito i kwo ma pe tum.”

¹I kare ma Yecu doŋ otyeko loko lok magi ducu, owaco bot lupwonnyene ni, ²“Wuŋeyo ni odoŋ nino aryo ci doŋ bedo nino madit me Kato (Paska), ci Wod pa dano gibimiye woko me agura i kom yatariya.”³I kare meno ajwagi madito pa Lubaŋa ki ludoŋo pa lwak gucokke i gaŋ kal pa ajwaka madit pa Lubaŋa, ma nyiŋe Kayapa, ⁴ci guporo lok kacel me mako Yecu ki ryeko ka doŋ gineke. ⁵Ento guwacci, “Pe i nino madit, miyo lwak bitugge.”⁶I kare ma Yecu tye i Betania i ot pa Cimon ladobo, ⁷ci dako mo obino bote kun tye ki adomo moo ma ŋwece kur, ma welle bene dit, ci oonyo i wiye ma onoŋo en obedo ka cam. ⁸Ento ka lupwonnye guneno, cwinygi ocwer, guwacci, “Piŋo moo man gibalo abala kit man? ⁹Pien moo man ka kono gicato acata, onoŋo kono okelo lim madit atika, ka wek gimi bot lucan.”¹⁰Ento Yecu oŋeyo lok man, ci owaco botgi ni, “Wuyelo dako-ni piŋo? En otiyo gin maber twatwal i koma. ¹¹Pien wun wutye kacel ki lucan kare ducu, ento pe wubibedo kweda kare ducu.¹²Moo man ma dako-ni oonyo i koma-ni en otimo man pi yubo koma me ayika. ¹³Ada awaco botwu ni, i wi lobo ducu ka ma gibitito iye lok man me kwena maber-ri, gin ma dako-ni otiyo bene gibitito pire, wek obed me po en.”¹⁴I kare meno Juda Lakeriot, ma en dano acel ma i kin jo apar wiye aryo-ni, ocito bot ajwagi madito pa Lubaŋa, ¹⁵ci openyogi ni, “Wubimiya gin aŋo ka amiye i ciŋwu?” Ci gucule ki lim ryal pyeradek ma onoŋo obedo lim me kare ca. ¹⁶Cakke i cawa meno cutcut Juda ocako yenyo kare maber ma eromo miyo kwede Yecu i ciŋgi.¹⁷I nino mukwoŋo me nino madito me Mugati ma Tobi Pe Iye, lupwonnye gubino bot Yecu, ci gupenye ni, “Imito waciyubbi kabedo kwene wek icam iye cam me Kato?” ¹⁸Yecu ogamo ni, “Wucit i Jerucalem bot dano mo-ni, ci wuwacce ni, ‘Lapwony owaco ni, Karena doŋ cok. Abicamo cam me Kato i odi kacel ki lupwonnyena.’ ” ¹⁹Lupwonnye gucito gutiyo kit macalo Yecu ocikogi kwede, ci guyubo cam me Kato kunnu.²⁰Ka piny doŋ oyuto, ci Yecu obedo piny kacel ki lupwonnye apar wiye aryo. ²¹I kare ma doŋ gitye ka cam, Yecu owaco botgi ni, “Ada, awaco botwu ni, ŋat acel i kinwu bidoba.” ²²Ci lupwonnye gucako kumo cut, kun gipenye ki acel acel ni, “An bo, Rwot?”²³Yecu odok iye ni, “Dano ma tye ka gweyo dek i atabo acel kwedani aye bidoba. ²⁴Wod pa dano tye ka wot kit macalo yam gicoyo i kome-ni; ento dano ma odobo Wod pa dano-ni bineno can mada! Kono nene obedo ber ka dano-nu pe ginywalo.” ²⁵Juda ma en ŋat ma odobe openye bene ni, “Lapwony, an mono?” Yecu odokke iye ni, “In iwaco giri kit meno.”²⁶Ka gitye ka camo cam, Yecu omako mugati, ci olego gum i kome, ka ocako baro iye, omiyo bot lupwonnye, kun wacci, “Wugam, wucam; man aye koma.”²⁷Ka dok otiŋo kikopo, ka doŋ opwoyo, ci omiyo botgi, kun wacci, “Wun ducu wumat man; ²⁸pien man aye remona me gicikke, ma oo pi jo mapol pi weko bal. ²⁹Atito botwu ni, cakke tin, pe dok abimato pig olok, nio wa i nino maca ka abimatone doki kacel kwedwu i ker pa Wora.”³⁰I kare ma doŋ gutyeko wero wer, gua gucito i wi got Jeituni. ³¹Yecu owaco botgi ni, “I dyewor matin, wun ducu wubitenya woko kena, pien yam gicoyo ni, ‘Abigoyo lakwat, ci romi gibiket woko ata.’ ³²Ento lacen ka doŋ acer woko abitelo nyimwu me cito i Galilaya.”³³Petero otuco bot Yecu ni, “Kadi ka jo mukene ducu gibitenyi woko, ento an pe abitenyi ata.” ³⁴Yecu owacce ni, “Ada awacci ni, tin ki i dyewor, ma noŋo twon gweno peya okok, ibikwera woko tyen adek.” ³⁵Ento Petero dok ogamo ni, “Kadi bed mitte ni myero ato kacel kwedi, pe abikweri.” Lupwonnye mukene-ni bene ducu guwaco kit meno.³⁶Lacen Yecu ocito kwedgi i kabedo mo ma nyiŋe Gececemane, ci ociko lupwonnyene ni, “Wun koŋ wubed kany, an koŋ acit kuca ka lego Lubaŋa.” ³⁷Okwanyo Petero ki litino pa Jebedayo aryo me wot kwede, ci cwinye ocako poto matek ki kumo bene madwoŋ. ³⁸ci owaco botgi ni, “Cwinya tye ka waŋ matek, mito neka woko. Wubed ka kiyo piny kacel kweda.”³⁹Ocako cito anyim manok, ci oguŋo oryebbe piny olego ni, “Wora, ka ce imito, kwany kikopo man woko ki i koma; ento pe obed kit macalo an amito, gin ma in imito aye myero otimme.” ⁴⁰Ka oa odwogo bot lupwonnye onoŋo gunino woko, ci owaco bot Petero ni, “Pe itwero kiyo piny pi cawa acel mo kacel kweda? ⁴¹Wuki wuleg Lubaŋa, wek pe wudony i abita mo; cwiny kikome mito loyo abita pa Catan, ento kom aye nyap.”⁴²Dok odok ka lego Lubaŋa tyen me aryo kun lego ni, “Wora, ka kikopo man pe twero kato ma pe amato, wek gin ma imito otimme.” ⁴³Dok odwogo onoŋo gunino woko, pien onoŋo nino doŋ omako waŋgi twatwal. ⁴⁴Ka dok owekogi ocito olego lubaŋa tyen me adekke, kun nwoyo lego lega acel-lu.⁴⁵Ka oa odwogo bot lupwonnye openyogi ni, “Wun pud wunino ce? Pud wutye ka yweyo bo? Nen, cawa doŋ onyiko cok, Wod pa dano doŋ gimiyo woko i ciŋ lubalo. ⁴⁶Doŋ wua malo, wacitu; nen dano ma doba doŋ tye cok.”⁴⁷I kare ma Yecu pud tye ka lok, Juda otugi bino; en yam ŋat acel i kin jo apar wiye aryo-ni. Obino ki lwak ma gua bot ajwagi madito pa Lubaŋa ki ludoŋo pa lwak, kun gitye ki pala lucwan ki odoo-gu. ⁴⁸Juda ma odobe-ni yam omiyo botgi lanyut. En owacci, “Dano ma abimoto kun anoto leme, meno aye en kikome; wutugi makone woko.”⁴⁹Cutcut obino bot Yecu atir, ocako mote ni, “Lapwony itye!” Ci onoto leme. ⁵⁰Yecu owaco bot Juda ni, “Larema, ibino kany piŋo?” Ci gubino gutugi poto i kome, gumake woko cut.⁵¹Ento dano mo acel i kom jo ma onoŋo gitye kacel ki Yecu oryeyo ciŋe ci owoto pala lucwanne, otoŋo ki opii pa ajwaka madit pa Lubaŋa, oŋuno ite woko. ⁵²Ci Yecu owaco ki dano-nu ni, “Dwok pala lucwanni kakare i akura; pien jo ducu ma mako pala lucwan, gibinekogi bene ki pala lucwan. ⁵³Itamo ni pe atwero lego Wora wek ocwalla lumalaika makato dul mony apar wiye aryo woko, i cawa man? ⁵⁴Ci lok ma yam gicoyo i ginacoya-ni doŋ bicobbe kakare niŋniŋ, ni myero obed kit meno?”⁵⁵I kare meno Yecu owaco bot lwak ni, “Wubino bota ki pala lucwan ki odoogu me maka, macalo wubino i kom layak? Abedo ka pwony i ot pa Lubaŋa jwijwi, ci pe yam wumaka do. ⁵⁶Ento gin magi ducu doŋ otimme, wek lok ma yam gicoyo i buk pa lunebi ocobbe kakare.” I kare meno cut lupwonnye gubwote guriŋo woko.⁵⁷Jo ma gumako Yecu gutere bot Kayapa ajwaka madit pa Lubaŋa, ka ma onoŋo lupwony-cik ki ludoŋo-gu gucokke iye. ⁵⁸Ento Petero obedo ka lubo kor Yecu ki cencen, nio kwede wa i dyekal pa ajwaka madit; odonyo ci obedo kacel ki lukur-piny kun kuro wek enen gin ma bitimme.⁵⁹Ajwagi madito ki jo ma i Lukiko ducu guyenyo lok me caden me goba i kom Yecu wek gineke woko. ⁶⁰ento pe gumedo ki noŋo lok mo, kadi bed lucaden ma lugoba mapol gukelo lok goba. Me agikkine jo aryo gubino, ⁶¹guwacci, “Dano-ni owaco ni, ‘Atwero keto ot pa Lubaŋa, ka dok agero woko kakare i nino adek.”⁶²Cutcut ajwaka madit pa Lubaŋa oa malo ci owacci, “Pe idok iye lok mo? Kit lok aŋo ma jo-ni gudoti kwede-ni?” ⁶³Ento Yecu oliŋ woko aliŋa. Ajwaka madit pa Lubaŋa dok owacce ni, “Amito ikwoŋ kwoŋ ki nyiŋ Lubaŋa makwo, tit botwa ka ce in aye i Kricito ma Lubaŋa oyero, Wod pa Lubaŋa.” ⁶⁴Yecu odokke iye ni, “In iwaco giri kit meno; ento awaco botwu ni, cakke kombeddi wubineno Wod pa dano ka obedo piny i kabedo me deyo ka ŋet Won Twer tuŋ lacuc, kun bino ki pol me polo.”⁶⁵Ci ajwaka madit pa Lubaŋa ocako yeco ginarukane woko kekene, kun wacci, “Oyeto Lubaŋa; pud dok wumito caden me ŋo? Kombeddi doŋ wuwinyo kit ma en oyeto kwede Lubaŋa. ⁶⁶Wutamo iye lok aŋo?” Gudokke iye ni, “Balle romme to.”⁶⁷Cutcut guŋulo laa i waŋe, ka gudoŋe. Jo mogo gudoŋe kun giwaco ni, ⁶⁸“In lanebi-ni! In Kricito ma Lubaŋa oyero-ni, tuci! Aŋa mugoyi?”⁶⁹Petero onoŋo tye woko, obedo piny i dyekal. Ci aŋeca mo obino bote, owacce ni, “In bene onoŋo itye kacel ki Yecu Lagalilaya.” ⁷⁰Ento Petero okwero woko i nyim dano ducu, kun wacci, “An pe aniaŋ gin ma ibeloko-ni.”⁷¹Ka Petero okato woko i doggaŋ, aŋeca mukene dok onene, ci owaco bot jo ma onoŋo gucuŋ kunnu ni, “Dano man bene onoŋo tye kacel ki Yecu me Najaret.” ⁷²Petero dok okwero woko kun kwoŋŋe akwoŋa ni, “An gira pe aŋeyo dano-ni.”⁷³Ka kare okato manoknok, jo ma onoŋo gucuŋ kenyo gubino guwaco bot Petero ni, “Ada, in i ŋat acel i kingi, pien kit ma iloko kwede nyuti woko.” ⁷⁴Petero ocako kwoŋŋe kun lamme kekene ni, “Pe aŋeyo danoni.” Cutcut twon gweno otugi kok. ⁷⁵Ci Petero ocako po lok ma nene Yecu owacce ni, “Ma noŋo twon gweno peya okok, ibikwera woko tyen adek kulu.” Ci okato woko okok ki cwercwiny madwoŋ.

¹Ka piny doŋ oru, ajwagi madito pa Lubaŋa ki ludoŋo pa lwak guporo lok i kom Yecu kit me neke woko. ²Ci gutweye gutere gumiye bot Pilato ma onoŋo laloc i kare meno.³Ka Juda, ŋat ma yam odobe-ni, oneno ni doŋ giŋolo kop oloyo Yecu, oŋut ci odwoko lim ryal pyeradek ca bot ajwagi madito pa Lubaŋa ki ludoŋo, ⁴kun waco botgi ni, “Abalo pi dobo dano ma pe ki bal.” Gudokke iye ni, “Meno obedo lokwa bo? Meno lokki giri.” ⁵Juda obolo lim piny i ŋom i ot pa Lubaŋa, ci ocito odene woko.⁶Ento ajwagi madito gukwanyo lim meno kun giwaco ni, “Cik pe ye ni myero giket lim man i kicaa lim me ot pa Lubaŋa, pien giwilo ki remo.” ⁷Ci guporo lok kacel, guwilo lim meno woko ki poto pa lacwe-agulu, odoko ka yiko lurok. ⁸Pi meno omiyo gilwoŋo poto-nu ni poto me remo nio wa onyoo.⁹Mumiyo lok ma yam lanebi Jeremia oloko ocobbe kakare ni, “Yam gutero ciliŋ pyeradek, i wel ma jo mogo i kin likwayo pa Icrael oŋolo kwede welle, ¹⁰ci gimiyo pi poto pa lacwe-agulu ca kit macalo Rwot ocika kwede.”¹¹Yecu ocuŋ i nyim laloc ci laloc openye ni, “In i kabaka pa Lujudaya bo?” Yecu ogamo ni, “Iwaco kakare gire.” ¹²Ento i kare ma ajwagi madito pa Lubaŋa ki ludoŋo gudote, en pe ogamo iye gin mo. ¹³Pilato openye ni, “Pe iwinyo kit lwak adot mapol ma gidoti kwede-ni?” ¹⁴Ento Yecu pe odok iye lok mo kadi ki acel i lok ducu ma gikelo i kome; man omiyo laloc ouro twatwal.¹⁵I kare me nino madito onoŋo yam Pilato gonyo iye lamabuc mo woko pi lwak ma gin mito. ¹⁶I kare-nu onoŋo gitye ki lamabuc mo ma ŋene ma nyiŋe Baraba.¹⁷I kare ma doŋ onoŋo gucokke kacel, Pilato openyogi ni, “Wumito ni agony botwu aŋa, baraba nyo Yecu ma gilwoŋo Kricito?” ¹⁸Pien Pilato onoŋo oŋeyo woko ni gumiyo Yecu bote pi nyeko. ¹⁹Dok bene i kare ma doŋ Pilato obedo i wi kom me ŋolo kop, dakone ocwalo kwena bote ni, “Pe itim gin mo i kom dano meno ma kite atir-ri, pien tin i waŋ lek aneno can madit twatwal pire.”²⁰Ento ajwagi madito pa Lubaŋa ki ludoŋo gubito lwak ni myero gupeny pi Baraba, guwek ginek Yecu woko. ²¹Laloc dok openyogi ni, “I kin jo aryo-ni wumito agony botwu aŋa?” Lwak gudokke iye ni, “Baraba.” ²²Pilato dok openyogi ni, “Ci Yecu ma gilwoŋo Kricito-ni doŋ abitimo niŋniŋ?” Gin ducu gudokke iye ni, “Wek gigure i kom yatariya.”²³Pilato dok openyogi ni, “Piŋo kaa, otimo kit gin aŋo marac?”. Ento lwak gumedde ki wo ni, “Wek gigure woko i kom yatariya.” ²⁴Pilato ka oneno ni lok man onoŋo doŋ pe twerre, woo onoŋo tye ka medde ameda, ci okwanyo pii, olwoko ki ciŋe i nyim lwak kun wacci, “Bal me remo pa dano-ni gire pe i koma, lokwu giwu.”²⁵Dano ducu gugamo ni, “Remone obed i wiwa ki i wi litinowa!” ²⁶Ci ogonyo botgi Baraba; lacen ka doŋ otyeko goyo Yecu ki del omiye woko ni gigure i kom yatariya.²⁷Askari pa laloc gutero Yecu i Praitorion, ci gucoko buca monygi ducu i nyime. ²⁸Gulunyo boŋone woko ki i kome, ka doŋ guruke ki boŋo makwar. ²⁹Gucweyo lalukana okuto, gurwako i wiye, ci guketo odoo lagada i ciŋe lacuc. Gurumo coŋgi piny i nyime, gucako ŋale kun giwacci, “Itye ba, kabaka pa Lujudaya!”³⁰Guŋulo laa i kome, gukwanyo odoo lagada ci gugoyo ki wiye. ³¹Ka doŋ gutyeko ŋale, ci gulunyo boŋo makwar woko ki i kome, ka dok guruke ki boŋone kikome, ci gutere kwede woko ka gure i kom yatariya.³²I kare ma doŋ onoŋo gikato woko, gurwatte ki dano mo me Cirene ma nyiŋe Cimon, ci gudiye tektek me tiŋo yatariya pa Yecu. ³³I kare ma guo i kabedo ma gilwoŋo ni Golgota, ma te lokke ni kabedo me cogo wic, ³⁴gumiye koŋo vino ma girubo ki keda ni omati, ento i kare ma obilo, pe oye matone.³⁵Ka doŋ gugure i kom yatariya, ci gupoko boŋŋine woko i kingi kun gibolo iye kwir. ³⁶Ka lacen doŋ gubedo piny kunnu ka kiye. ³⁷Lok me adot ma gidote kwede-ni giguro malo ka wiye, kun gicoyo ni, “Man aye Yecu kabaka pa Lujudaya.”³⁸Gigure kacel ki luyak mogo aryo, dano acel tuŋ lacuc ki acel tuŋ lacam. ³⁹Jo ma gimol gikato ki ka ŋete gubedo ka yete, kun giyeŋo wigi, ⁴⁰ma giwacci, “Nye, in ma imuko ot pa Lubaŋa woko, ci igero pi nino adek-ki, doŋ ilarre keni ba! Ka ce in i Wod pa Lubaŋa, lor woko piny ki i kom yatariya.”⁴¹Ki ajwagi madito pa Lubaŋa ki lupwonycik ki ludoŋo bene guŋale kit meno kun giwacci, ⁴²“Yam bedo ka laro jo mukene, pe twero larre kene. En kabaka pa jo Icrael do; wek olor piny ki i kom yatariya, ci wabiye en.⁴³En geno Lubaŋa, wek Lubaŋa koŋ olare kombeddi, ka mite; pien yam owacci, ‘An a Wod pa Lubaŋa.’” ⁴⁴Ki luyak bene ma onoŋo gigurogi kacel kwede gucaye i kit acel-lu.⁴⁵Cakke i cawa abicel, piny ocido woko macol i lobo ducu, nio wa i cawa aboŋwen. ⁴⁶I kin cawa aboŋwen Yecu odaŋŋe ki dwan maloŋo ni, “Eloi, Eloi, lama cabaktani?” ma te lokke ni, “Lubaŋana, Lubaŋana, itenya woko piŋo?” ⁴⁷Ka jo ma onoŋo gucuŋ kunnu guwinyo lokke, ci guwacci, “Laco man tye ka lwoŋo Elia.”⁴⁸Cutcut dano acel i kingi oriŋo okwanyo amor, ci oluto i koŋo vino mawacce, orwako i wi tal lagada, ka omiyo bot Yecu ni omati. ⁴⁹Ento jo mukene guwacci, “Koŋ wukur, wek mono wanen ka Elia bino ka lare.” ⁵⁰Yecu dok odaŋŋe ki dwan maloŋo, ka doŋ omiyo kwone woko.⁵¹Ci nen, boŋo kicika ma i ot pa Lubaŋa oyec opokke woko i dul aryo, cakke ki malo, nio kwede wa i tere piny. Piny oyeŋŋe, ki pata-gu gubar woko; ⁵²ki lyel bene doggi oyabbe woko, ki kom jo maleŋ mapol ma yam guto gucer woko. ⁵³Gukatti woko ki i lyelgi i kare ma Yecu doŋ ocer, gucito i Jerucalem gunyutte bot jo mapol.⁵⁴Ladit ma loyo askari kacel ki jo ma onoŋo gitye kwede, ma gubedo ka kiyo Yecu, ka guneno kit ma piny oyeŋŋe kwede ki gin ma doŋ otyeko timme, gubedo ki lworo madit mada, ci guwacci, “Adada, man onoŋo Wod pa Lubaŋa!” ⁵⁵Dok bene onoŋo nene tye mon mapol kunnu ma gucuŋ ki cen ka nenone, ma gulubo kor Yecu cakke ki i Galilaya, gubedo ka konye bene. ⁵⁶I kin mon magi onoŋo tye iye Maliam Lamagdala ki Maliam min Yakobo ki Yucepu, ki min litino pa Jebedayo.⁵⁷I kare ma piny doŋ oyuto, dano mo ma lalonyo me Arimataya ma nyiŋe Yucepu obino; en kikome bene onoŋo yam obedo lapwonny pa Yecu. ⁵⁸Ocito bot Pilato ci olego kom Yecu. Ci Pilato ociko ni gimiye.⁵⁹Yucepu okwanyo kom Yecu, ci oboyo woko ki boŋo camanini maleŋ-ŋe, ⁶⁰ka opyelo i lyelle kikome manyen, ma yam onoŋo okwinyo oroko i i got; ci oŋilo got madit oloro ki dog lyel, ka doŋ oa ocito gire. ⁶¹Maliam Lamagdala ki Maliam mukene-ni bene onoŋo gitye kunnu gubedo piny gukemme ki lyel.⁶²Orwone, ma en aye nino ma lubo nino me Yubbe, ajwagi madito pa Lubaŋa ki Luparicayo gucokke i nyim Pilato, ⁶³guwaco bote ni, “Ladit, wapo kit ma dano ma lagoba ca oloko kwede, i kare ma pud en kwo; ma owaco ni, ‘I ŋe nino adek abicer woko doki.’ ⁶⁴Pi meno cik gigwok lyel maber adada nio wa i nino me adekke, wek lupwonnyene pe gucito gukwal kome woko, ka doŋ giwaco bot lwak ni, ‘En doŋ ocer woko ki i kin jo muto’, man bimiyo bwola man bedo rac makato mukwoŋo ca.”⁶⁵Pilato owaco botgi ni, “Wutye ki askari ma gin lukur-piny; wuciti, wugwok maber mada kit macalo wutwero.” ⁶⁶Ci gucito guloro dog lyel woko maber kun gimwono lanen iye i kom got, ka guketo lukur-piny me gwokone.

¹Ka cabit doŋ okato, i kine okogweno me nino mukwoŋo me cabit, Maliam Lamagdala ki Maliam mukene gucito ka neno lyel. ²Ento oyeŋyeŋ madit oyeŋo piny; pien lamalaika pa Rwot olor ki i polo obino piny ci oŋilo got woko ki i dog lyel, ka obedo i wiye.³Lamalaika meno onoŋo nen calo lutkot ma wil, ki ginarukane onoŋo nen matar calo pee. ⁴Pi lworo en omiyo lukur-piny komgi omyel, ci gudoko calo jo muto.⁵Ento lamalaika owaco bot mon ni, “Pe wulwor; pien aŋeyo ni wutye ka yenyo Yecu ma yam giguro i kom yatariya-ni. ⁶Pe tye kany, pien ocer woko kit macalo nene en owaco. Wubin wunen ka ma onoŋo en obuto iye. ⁷Ci wuciti oyotoyot wutit bot lupwonnyene ni en doŋ ocer woko ki i kin jo muto, nen, en doŋ okwoŋo nyimwu me cito i Galilaya; wun wubinene ki kunnu. Nen, doŋ atyeko tito botwu.”⁸Ci gua woko ki i wi lyel oyotoyot ki lworo ki yomcwiny madwoŋ, guriŋo gucito ka tito bot lupwonnyene. ⁹Ento nen, Yecu orwatte kwedgi, ci omotogi ni, “Wutye ba!” Gin gubino bote gumako tyene ci guwore. ¹⁰Ka dok Yecu owaco botgi ni, “Pe wulwor; wuciti wutit bot utmegina ni myero gucit i Galilaya, ci gibinena ki kunnu.”¹¹I kare ma gitye ka wot, jo mogo ki i kin lukur-piny gudok i gaŋ ka dwoko lok bot ajwagi madito pa Lubaŋa pi gin ducu ma doŋ otimme-ni. ¹²Ka doŋ gucokke kacel ki ludoŋo, ma doŋ guporo lok, ci gumiyo lim madit bot askari, ¹³kun giwacci, “Wuwac bot lwak ni, ‘Lupwonnyene gubino ki dyewor ci gukwalo kome i kare ma onoŋo wanino woko.’¹⁴Ka ce laloc biwinyo lok man, ci wan wabiniaŋe ki lok ducu, wek can mo pe opot i komwu.” ¹⁵Askari bene gugamo lim, ci gutimo kit macalo gicikogi kwede; omiyo lok man obedo ka ywek i kin Lujudaya nio wa onyoo.¹⁶I kare meno lupwonnye apar wiye acel gucito i Galilaya, i wi got ma yam en ocikogi ni gucit iye. ¹⁷Ka gunene ci guwore; ento jo mogo gubedo ka kalo akala.¹⁸Yecu obino ci owaco botgi ni, “Twero ducu ma i wi polo ki i lobo doŋ gityeko miyo woko bota. ¹⁹meno doŋ wuciti wucilok jo me rok ducu gudok jo ma luba, kun wubatijagi i nyiŋ Won ki Wod ki Cwiny Maleŋ.²⁰wupwonygi me gwoko gin ducu ma doŋ atyeko cikowu kwede. Nen, atye kwedwu kare ducu, nio i agikki piny.”

¹Acakki me lok me kwena maber i kom Yecu Kricito, Wod pa Lubaŋa, ²kit ma gicoyo kwede i buk pa lanebi Icaya ni, “Nen, acwalo lakwenana otelo nyimi, ma bigero yoni; ³dwan dano mo ma daŋŋe ki i tim ni, Wuger yo pa Rwot, wutir yone ocuŋ atir.”⁴Kit meno, Jon Labatija ocako nen i tim, kun tito lok ni, “Wuŋut wek wulim batija, wek Lubaŋa owek balwu.” ⁵Ci jo ma i lobo Judaya ducu ki jo ducu ma i gaŋ Jerucalem gucito bote. Gutuco balgi, ci en obatijagi i kulu Jordan. ⁶Jon yam ruko boŋo yer kinaga, ka tweyo pyere ki del, kun camo bonyo ki moo kic ma i tim.⁷En obedo ka tito lok kun wacci, “Dano mo obebino kun lubo kora ma kato an ki dit, ma an pe aromo guŋo piny ka gonyo del war tyene. ⁸An abatijawu ki pii, ento en bibatijawu ki Cwiny Maleŋ.”⁹I kare meno Yecu oa ki i Najaret me Galilaya obino bot Jon, ci Jon obatija en i kulu Jordan. ¹⁰Ka Yecu obea woko ki i pii, otugi neno ka polo yabbe, ki Cwiny Maleŋ ma bino kun lyanne piny macalo akuri ci opye i kome. ¹¹Ci dwan ocako winnye ma a ki i polo kun wacci, “In aye i Woda ma amaro, ma cwinya yom i komi.”¹²Cutcut Cwiny Maleŋ otero Yecu woko wa i tim. ¹³Ci obedo i tim nino pyeraŋwen; Catan ocako bite, ma onoŋo en tye kacel ki lee tim, kun lumalaika gikonye.¹⁴I kare ma gitweyo Jon woko i mabuc, Yecu ocako bino i Galilaya kun tito lok me kwena maber ma a ki bot Lubaŋa; ¹⁵owacci, “Kare doŋ oromo, ker pa Lubaŋa onyiko cok; wuŋut, wuye lok me kwena maber.”¹⁶Ka Yecu onono woto rabo dog nam me Galilaya, ci oneno Cimon ki ominne Anderiya, ka gitye ka bolo obwo recgi i nam; pien gin lumak-rec. ¹⁷Yecu ocako lwoŋogi ni, “Wubin wulub kora, ci an abimiyowu wudoko lumak dano.” ¹⁸Ci cutcut gutugi weko obwogi, gulubo kore.¹⁹Ka dok guwoto anyim manok, ci oneno Yakobo ki ominne Jon, gin awobe pa Jebedayo, ma onoŋo gitye i yeya ka lubo obwo recgi. ²⁰En otugi lwoŋogi cut, ci giweko wongi Jebedayo odoŋ ki luticce i yeya, gucako lubo kore.²¹Gucako cito wa i Kapernaum, ci cutcut i ceŋ cabit Yecu odonyo i kacokke, ocako pwonyogi. ²²Dano guuro kit pwonnye matek, pien owonyogi macalo won twero, pe macalo lipwony-cik.²³Ci cutcut dano mo ma tye ki cen marac onen i kacokke; ²⁴ocako daŋŋe matek ni, “Ilaro gin aŋo kwedwa kaa, in Yecu Lanajaret? Doŋ ibino ka tyekowa bo? An aŋeyi, in i dano maleŋ pa Lubaŋa.” ²⁵Ento Yecu ojuke, kun wacce ni, “Liŋ mot, a woko ki i kome!” ²⁶Cen marac oryeye ki koko matek, ka oa woko ki i kome.²⁷Dano ducu guuro matek, kun gipenye kekengi ni, “Man gin aŋo? Man aye dok kit pwony manyen bo? Nen en ka ciko wa cen maraco-gu ki twero, ci gin bene giwinyo doge.” ²⁸Ci pire oywek oromo kabedo ducu murumo lobo Galilaya.²⁹Ci cutcut gua woko ki i kacokke, gudonyo i ot pa Petero ki Anderiya, gunywako wot ki Yakobo ki Jon. ³⁰Maro Petero onoŋo tye ki two lyeto, obuto piny, ci cutcut gutito pire bot Yecu. ³¹Yecu ocito omako ciŋe otiŋe kwede malo, ci two lyeto ocaŋ woko ki i kome, ka ocako gwokogi.³²Otyeno ma ceŋ opoto woko, gucako kelo bote lutwo ducu ma komgi lit, ki jo ma cen marac omakogi. ³³Jo ducu ma i gaŋ gucokke i doggola. ³⁴Ci en ocaŋo lutwo mapol ma onoŋo gitye ki kwa two mapatpat, kun ryemo ki lwak cen-gu mapol; pe oye cen mo oloko, pien onoŋo giŋeye.³⁵Odiko con ma piny pud col, Yecu oa malo, ci opuk ocito woko wa i kabedo ma dano pe iye, ci obedo ka lego Lubaŋa kunnu. ³⁶Cimon ki jo ma gitye kwede gucako lubo kore; ³⁷ka gunoŋe ci guwacce ni, “Dano ducu gitye ka yenyi.”³⁸En ogamo doggi ni, “Dok wakobu woko i gaŋ mukene ma tye cok ki kany, wek acitit lok kunnu bene; pien meno en aye gin mumiyo abino.” ³⁹Ci Yecu ocako tiŋo wot orumo lobo Galilaya ducu, kun woto ki tito lok i kacokkegi ki ryemo cen-gu bene.⁴⁰Ladobo mo obino bot Yecu, kun orumo coŋe piny obako doge bote, olege ni, “Ka imito, itwero lonyo koma.” ⁴¹Ci kica omako Yecu i kome, ocako ryeyo ciŋe ogudo kome, kun wacce ni, “Amito; komi olony.” ⁴²Ci cutcut dobo ocaŋ ki i kome, kome odoko leŋ.⁴³Yecu ocike matek, ka ocwale kwede ocito. ⁴⁴Ocike ni, “Winy ba, pe icitit ki dano mo; ento ber icit ci icinyutte keni bot ajwaka pa Lubaŋa, wek imi gityer pi komi ma doŋ ocaŋ-ŋi, kit ma yam Moses ociko, wek obed lanyut botgi.”⁴⁵Ento en ocito, ocako tito lokke atyer bot lwak, ci lokke oywek. Pieno omiyo Yecu pe doŋ twero donyo i gaŋ mo ka maleŋ; ocako bedo i kabedo ma dano pe iye, ento lwak gumol gucito bote ma gua ki i kabedo ducu.

¹Ka nino okato manok, Yecu dok odwogo i Kapernaum, ci pire owinnye ni en tye paco. ²Ci lwak gucokke kacel, ma kabedo odoko diŋ, pe romogi, piny opoŋ wa i doggola-gu; en obedo ka tito lok botgi.³Jo mogo gukelo bote dano ma twoyo two akweya kom, jo aŋwen aye gutiŋo en. ⁴Ka yo me tere i nyim Yecu oloyogi pi lwak, ci guyabo wi ot ki malo ka ma en tye iye. Ka gutyeko mukone ci gucwalo kitara ma latwo obuto iye piny i nyime.⁵Yecu ka oneno niyegi, ci owaco bot latwo ni, “Latinna, balli doŋ giweko woko.” ⁶Ka lupwony-cik mogo, ma onoŋo gibedo kunnu, gubedo ka pyem kekengi wa i cwinygi ni, ⁷“Dano man loko kuman piŋo? En oyeto Lubaŋa! Aŋa ma twero weko bal kono ŋat acel keken, en aye Lubaŋa?”⁸Oyotoyot Yecu ocako niaŋ ki i cwinye kene ni gitye ki pyem ma kit meno i cwinygi, ci openyogi ni, “Piŋo cwinywu tye ka pyem lok macalo man? ⁹Lok mayotte tye kwene ka awaco bot latwo ni, ‘Balli doŋ giweko woko’, kono nyo ni, ‘A malo wek itiŋ kabutoni, icit wa paco’?¹⁰Ento kombeddi abinyuto botwu ni Wod pa dano tye ki twero me weko bal i wi lobo.” Ci cut owaco bot latwo akweya kom ni, ¹¹“An awacci ni, a malo, itiŋ kabutoni, icit giri paco.” ¹²En ocako a malo, otiŋo kabutone oyotoyot, ocito woko ki i nyimgi; omiyo gin ducu guuro twatwal, gucako pako Lubaŋa kun giwacci, “Ma naka yam peya waneno kit gin macalo man.”¹³Yecu dok ocito i dog nam Galilaya; ci lwak ducu gubino bote, ocako pwonyogi. ¹⁴Ka okato i yo, ci oneno Levi, wod pa Alipayo, ka obedo piny ka jogo mucoro, ci owacce ni, “Luba.” Ci oa malo, olubo kore.¹⁵Ka doŋ en obedo piny i ode, ci lujog-mucoro ducu ki lubalo gubino gubedo piny kacel ki lupwonnyene; pien ceŋ onoŋo tye jo mapol ma kit meno ma gubedo ka lube ¹⁶Lupwonycik ma i kin Luparicayo, ka guneno ni en ocamo kacel ki lubalo ki lujog-mucoro, gupenyo lupwonnyene ni, “Piŋo en camo kacel ki lujog-mucoro ki lubalo?”¹⁷Yecu owinyo ci ogamo ni, “Jo ma komgi yot pe gimito daktar, pe abino ka lwoŋo jo ma kitgi atir, ento lubalo.”¹⁸Lupwonnye pa Jon ki pa Luparicayo onoŋo gitye ka ri kec; jo mogo gubino gupenye ni, “Piŋo lupwonnye pa Jon ki pa Luparicayo giri kec, ento lupwonnyeni pe giri kec?” ¹⁹Yecu odok iye botgi ni, “Lurem lanyom twero ri kec ma kun lanyom tye kwedgi? Pi kare ducu ma lanyom tye kwedgi pe gitwero ri kec.²⁰Ento kare bibino ma gibikwanyo lanyom woko ki botgi, ka doŋ gibiri i kare meno. ²¹Pe tye ŋatti mo ma dabo boŋo manyen i kom ginaruka muti. Ka otimo kit meno, ci kiraka ma gidabo kwede-ni telo boŋo meno; en manyen-ni juŋ woko ki kom muti, ci waŋ boŋo yec medde.²²Pe tye ŋatti mo ma piko koŋo vino manyen i kicaa macon; ka opiko, ci koŋo vino biyeco kicaa woko, koŋo vino bio woko, ki kicaa bene biballe. Ento koŋo vino manyen myero gipik i kicaa manyen.”²³Ka yam onoŋo Yecu woto kun ŋolo dye poto bel i nino me cabit, ka gitye ka wot, lupwonnyene gucako rito wit bel. ²⁴Luparicayo gupenye ni, “Piŋo lupwonnyeni gitiyo gin ma cik okwero ni pe giti i ceŋ cabit?”²⁵En odok iye botgi ni, “Wun pe wukwano gin ma Daudi otiyo ka en tye ma kec oneko marac, en ki jo ma tye kacel kwede? ²⁶Kit ma en odonyo kwede i ot pa Lubaŋa i kare ma Abiatar aye ajwaka madit pa Lubaŋa? Ocamo mugati ma giketo i nyim Lubaŋa, ma yam cik okwero ni dano mo pe ocam, kono ajwagi pa Lubaŋa keken. Daudi ocamo, dok opoko ki jo ma tye bote.”²⁷Otittigi ni “Cabit giketo pi dano, pe dano aye giieto pi cabit. ²⁸Kumeno Wod pa dano aye rwot me cabit.”

¹Yecu dok odonyo i kacokke, ma onoŋo tye iye dano mo ma bade otal. ²Gukiye ka nyo bicaŋe i ceŋ cabit, wek gikel kop i kome.³Yecu owaco bot labade otal ni, “A malo icuŋ i dyere.” ⁴Openyogi ni, “I ceŋ cabit, cik ye ni gitim iye gin maber nyo gin marac, gilar iye kwo nyo ginek woko?” Ento gin guliŋ aliŋa.⁵En olworo waŋe i komgi ki kiniga, cwinye ocwer pi nwaŋ cwinygi. Owaco bot dano-nu ni, “Rye badi.” En oryeyo bade ci bade ocaŋ. ⁶Luparicayo gukato woko, cutcut gucako poro lok kacel ki jo pa Kerode kit ma myero gineke kwede.⁷Yecu ki lupwonnyene gua gucito i dog nam. Lwak madwoŋ ma gua i Galilaya gulube ki jo ma gua i Judaya, ⁸ki i Jerucalem, ki Idumea ki loka Jordan, ki i lobo ma orumo Turo ki Cidon; lwak madwoŋ gucokke bote, pien guwinyo pi tic mapol ma en otiyo.⁹En ociko lupwonnye ni guyub yeya matidi pire, wek pe lwak gubed ka diyo en. ¹⁰Pien onoŋo ocaŋo jo mapol, ma omiyo jo ducu ma komgi lit gidine i kome ka boŋe.¹¹Ka cen maraco gunene, ci guryebbe i nyime, gukok kun giwaco ni, “In giri Wod pa Lubaŋa.” ¹²Yecu ojukogi ni pe myero giwek dano oŋeye.¹³Yecu oito malo i wi got, ocako lwoŋo jo ma en mito bote; ci gucito bote. ¹⁴Oyero jo apar wiye aryo wek gubed kacel kwede, dok wek eorgi gubed lukwena me tito lok, ¹⁵dok gubed ki twero me ryemo cen. ¹⁶Mukwoŋo Cimon ma en ocako nyiŋe Petero;¹⁷ki Yakobo wod pa Jebedayo, ki Jon omin Yakobo, ma en ocako nyiŋgi ni Boanergi, te lokke ni, jo ma gimor calo kot; ¹⁸ki Anderiya ki Pilipo ki Bartolomayo ki Matayo, ki Tomaci, ki Yakobo wod Alipayo, ki Tadayo, ki Cimon ma obedo i kin jo ma gimito locken, ¹⁹ki Juda me Keriot, ma yam odobe.²⁰lwak dok gucokke, omiyo en ki lupwonnyene pe gitwero noŋo kare me cam. ²¹Ka jo tugi guwinyo, ci gubino ka make pien giwaco ni, “En opo woko.” ²²Lupwony-cik ma gua i Jerucalem guwaco ni, “En tye ki jok Beeljebul,” dok ni, “En ryemo cen pi twero pa ladit pa cen.”²³Yecu olwoŋogi bote, oloko kwedgi i carolok ni, “Catan twero ryemo Catan niŋniŋ? ²⁴Ker ka opokke aryo, ker meno pe twero cuŋ. ²⁵Dok ot ka iye opokke aryo, ot meno pe twero cuŋ.²⁶Dok ka Catan ocako lweny i kome kekene ce opokke kene, ci pe twero cuŋ, kerre gik woko. ²⁷Ento pe tye ŋatti mo ma twero donyo i ot pa dano ma kome tek ka yako jamine; ento koŋ kwoŋo tweyo dano ma kome tek-ki, ka doŋ biyako jamine ma i ode.²⁸Ada awaco botwu ni, bal ducu ma dano timo, ki lok ducu ma giyeto kwede Lubaŋa, gibiwekone woko, ²⁹ento ŋat ma yeto Cwiny Maleŋ pe gibiweko balle matwal, pien noŋo otimo bal ma ri nakanaka,” ³⁰pien onoŋo guwaco ni, “En tye ki cen marac.”³¹Minne ki omegine gubino, gucuŋ woko, gucwalo kwena me lwoŋe. ³²Lwak onoŋo gubedo kun gurume dyere. Giwacce ni, “Nen, meni ki omegi gitye woko, giyenyi.”³³En openyo ni, “Maa ki omega gin aŋagi?” ³⁴Olworo waŋe i kom jo ma gurume ma gubedo piny, owaco ni, “Maa ki omega gin ene. ³⁵Dano ma tiyo gin ma Lubaŋa mito, en aye omera, ki lamera, ki maa.”

¹Yecu dok ocako pwony i dog nam. Lwak madwoŋ twatwal gucokke bote; pi meno oito i yeya, obedo iye i dye nam, lwak ducu gubedo i witura. ²Opwonyogi ki lok mapol i carolok. I pwonnye owaco ni.³“Wuwiny! Lacoc ocito ka coyo kodi. ⁴Ka kun coyo, kodi mogo okir i ŋet yo, winyo gubino, gucamo woko. ⁵Kodi mukene okir i kom pata ka ma ŋom tye iye manok. Cutcut gutwi, pien ŋom pe tut.⁶Ka ceŋ oryeny, owaŋogi gutwo woko, pien lwitgi pe odonyo matut. ⁷Kodi mukene okir i kin okuto, okuto olot odiyogi woko, pe gunyako nyiggi.⁸Kodi mukene okir i ŋom maber, gutwi, gujany, gunyako nyiggi, mukene pyeradek, mukene pyerabicel, mukene miya.” ⁹Lacen owaco ni, “ŋat ma tye ki it me winyone, owiny.”¹⁰Ka onoŋo Yecu odoŋ kene, ci jo murume dyere kacel ki jone apar wiye aryo, gubino gupenye lok i kom carolok meno. ¹¹En ogonyo botgi tere ni, “Wun gimiyowu me ŋeyo muŋ me ker pa Lubaŋa, ento bot jo maca ma gitye woko giloko kwedgi i carolok, ¹²wek ka gineno, gunen, ento pe guniaŋ maber, dok ka giwinyo, guwiny, ento pe guniaŋ tere maber; wek pe gudwog cen, ci Lubaŋa owek balgi.”¹³Yecu openyogi ni, “Pe wuniaŋ te carolok man? Wubiniaŋ niŋniŋ carolok ducu? ¹⁴Lacoc coyo lok pa Lubaŋa. ¹⁵Magi gin aye jo ma i ŋet yo, ka ma lok gicoyo iye; ka guwinyo, cutcut Catan bino, kwanyo lok ma gicoyo i igi woko.¹⁶Kit meno magi gin aye ma gicoyo i ŋom ma obedo pata; gin ka guwinyo, oyotoyot gimako lok ki yomcwiny; ¹⁷ento pe gitye ki lwitgi i igi, giri pi kare manok; ka can obino, nyo libo dano ocakke, pi lok meno, cutcut gipoto woko.¹⁸Tye mukene ma gicoyo i kin okuto; gin aye jo ma giwinyo lok, ¹⁹ce paro lok me lobo man, ki maro lonyo, ki miti me jami mukene, ka odonyo i cwinygi ci diyo lok, pe nyak. ²⁰Ento maca ma gicoyogi i ŋom maber-ri, gin aye jo ma giwinyo lok, ci gigamo, ginyako nyiggi, mukene pyeradek, mukene pyerabicel, mukene miya.”²¹Lacen openyogi ni, “Tara mono gikelo i ot me auma ki aduku, nyo me aketa i te kitanda? Pe gicibo i wi okar? ²²Pien pe tye gin mo ma okanne ma pe biŋene, kadi gin ma giumo ma pe binen kamaleŋ. ²³Ka ŋatti mo tye ki it me winyone, owiny.”²⁴Owaco botgi ni, “Wugwokke i kom lok ma wuwinyo; kit gin mo ma wupimo kwede-ni, en aye gibipimo ki mewu bene, dok gibimedone botwu. ²⁵Pien ŋat ma mere tye, gibimedde, ŋat ma mere pe gibikwanyo woko ki bote kadi wa gin ma en tye kwede ducu.”²⁶Yecu owaco ni, “Ker pa Lubaŋa tye kit man, macalo dano ma coyo kodi i ŋom. ²⁷En buto piny i dyewor, dok a i dyeceŋ, ci kodi cako twi, doŋo, kun en pe ŋeyo kit ma timme kwede. ²⁸ŋom kene aye miyo kodi nyako nyige; mukwoŋo koŋ twi, lacen ŋok, ka nyig bel corre. ²⁹Ento ka bel ocek, ci dano cako kayone cut, pien noŋo kare me kayo bel doŋ oromo.”³⁰Dok owaco ni, “Wabiporo ker pa Lubaŋa ki kit gin aŋo? Nyo wabinyuto ki kit carolok aŋo? ³¹Ker pa Lubaŋa rom ki kodi dek karadali; ka gicoyo i ŋom, kadi bed en tidi twatwal makato kodi ducu ma i wi lobo-ni, ³²ento ka gicoyo, ci doŋo, doko dit makato dek ducu, jaŋe jany madito, miyo winyol me polo twero gero odigi i te tipone.”³³Otito botgi lok i carolok mapol calo meno, kit ma gitwero niaŋ kwede. ³⁴Pe oloko kwedgi laboŋo carolok, ento ka en tye ki lupwonnyene, ci gonyo te lok ducu botgi.³⁵I nino meno ka piny doŋ oyuto, Yecu owaco botgi ni, “Wakatu loka ca.” ³⁶Guweko lwak, ci gukwaŋo en ki yeya ma onoŋo en tye iye-ni; ki yeya mukene bene onoŋo tye kacel kwedgi. ³⁷Yamo madwoŋ ocako kodo, pii otwagge, ocorre i yeya, omiyo i yeya ocako poŋ woko.³⁸Ento en onoŋo tye i tik yeya, kun onino i kom laten-wic. Gucoye, guwacce ni, “Lapwony, in pe iparo? Nen, wato woko do.” ³⁹En ocako co woko ci ojuko yamo, owaco ki nam ni, “Liŋ, pye mot.” Yamo ocako kwe, nam oliŋ mot.⁴⁰Openyogi ni, “Piŋo wulwor kit man? Wun pe wutye ki niye?” ⁴¹Gubedo ki lworo madwoŋ, ci gucako penye kekengi kun giwaco ni, “Man aŋa kaa, ma yamo ki nam giwinye-ni?”

¹Gubino i loka nam tuŋcel, i lobo pa Lugeraca. ²Ka Yecu okato woko ki i yeya, ci cutcut dano mo ma tye ki cen marac obino bote, ma oa ki i kabedo ka ma giyiko iye jo muto.³En bedo i kin lyel, pe tye dano mo ma twero tweyo en kadi ki nyor; ⁴pien yam gitweye tyen mapol ki atego ki nyor, ento ocodo nyor, oturo atego woko, pe tye dano mo ma tye ki tek ma loye.⁵Nino ducu, dyewor ki dyeceŋ, en bedo i kin lyel ki i wi cere kun kok, dok ŋolo kome kene ki kidi. ⁶Ka oneno Yecu ki ka mabor, ci oriŋo, oryebbe i nyime, owore.⁷Ci odaŋŋe ki dwan maloŋo ni, “Ilaro aŋo kweda, Yecu Wod pa Lubaŋa Mamalo Twal? Alami ki nyiŋ Lubaŋa, pe iyela.” ⁸Pien onoŋo ocike ni, “A woko ki i kom dano man, in cen marac.”⁹Yecu openye ni, “Nyiŋi aŋa?” Ogamo ni, “Nyiŋa Legion, pien wapol.” ¹⁰En obako doge bote matek ni, pe myero ocwal cen maraco woko ki i lobo meno.¹¹Lwak opego mapol onoŋo gitye ka cam i kor got kunnu; ¹²gubako doggi bote kun giwaco ni, “Cwalwa i opego, wek wadony i igi.” ¹³Yecu oyegi. Cen maraco gua, gudonyo i opego, lwak opego ma gimito romo ka alip aryo, gutwarre ki ŋwec gucorre i loŋo got, gumwony woko i nam.¹⁴Lukwat guriŋo gutito lokke i gaŋ madit, ki i kin paco. Dano mapol gumol gubino ka neno gin ma otimme. ¹⁵Gubino bot Yecu, guneno dano ma yam tye ki cen maraco, obedo piny, oruko boŋo, odoko ryek, en ma yam onoŋo tye ki buca mony me cen maraco; lworo ocako makogi.¹⁶Jo ma guneno gutito botgi lok ducu ma otimme i kom dano ma yam tye ki cen maraco, ki gin ma otimme i kom opego-gu. ¹⁷Gubako doggi bot Yecu ni myero oa woko ki i lobo tugi.¹⁸Ka en tye ka ito i yeya, ci dano ma yam tye ki cen maraco obako doge bot Yecu ni myero ebed bote. ¹⁹Ento Yecu okwero woko, owacce ni, “Dok paco bot lutuwu, icitit gin madit ma Rwot otimo i komi, ki kit ma otimi kwede kica.” ²⁰En ocito, ocako tito lok madit ma Yecu otimo i kome i Dekapoli, omiyo jo ducu guuro.²¹Ka Yecu doŋ okato loka nam tuŋ ca, lwak madwoŋ gucokke bote; en obedo i dog nam. ²²ŋat acel ma i kin ludito me kacokke ma nyiŋe Yairo obino; ka onene, ci oryebbe piny ka tyene, ²³obako doge bote matek ni, “Nyara matidi mito to woko. Bin iket ciŋi i kome wek ocaŋ, obed makwo.” ²⁴Yecu ocito kacel kwede, kun lwak madwoŋ gilube, kun gidiye.²⁵Onoŋo tye dako mo ma yam otwoyo two agobi mwaka apar wiye aryo. ²⁶En olimo can madwoŋ ki bot ludaktar mapol; olanyo limme ducu pe okonye ento twone medde ameda. ²⁷Ka owinyo lok i kom Yecu, obino ki i yo ŋeye ki i kin lwak, ci ogudo dog ginarukane.²⁸pien otamo ni, “Ka agudo kadi kom ginarukane keken, ci abicaŋ.” ²⁹Oyotoyot two agobine ocaŋ woko, ci oŋeyo ki i kome kene ni doŋ ecaŋ woko ki i twone.³⁰Ka Yecu oŋeyo ki i kome ni tek oa ki i kome, ci olokke i dye lwak cut, openyo ni, “Aŋa ma ogudo ginarukana?” ³¹Lupwonnyene gugamo ni, “Ineno lwak tye ka diyo in, ka dok pud ipenyo ni, ‘Aŋa ma oguda?’ ” ³²Ci olworo waŋe wek enen ŋat ma ogude-ni.³³Ci dako meno, ka oŋeyo kit gin ma otimme i kome, obino bot Yecu ki lworo, kun kome myel, oryebbe i nyime, otitte lok ducu me ada. ³⁴Yecu owacce ni, “Nyara, niyeni ocaŋi; wot ki kuc, twoni doŋ otyeko caŋ matwal.”³⁵Ma kun en pud loko, jo mogo gubino ma gua ki i ot pa ladit me kacokke, guwaco ni, “Nyari doŋ oto woko, pud dok iyelo Lapwony piŋo?”³⁶Yecu pe oketo cwinye i kom lok ma guwaco, ento ociko ladit me kacokke ni, “Pe ilwor, in iye meri ayeya keken.” ³⁷Pe oye dano mo olube, kono nyo Petero ki Yakobo ki Jon omin Yakobo keken. ³⁸Gubino i ot pa ladit me kacokke, Yecu oneno lwak ma giwo, kun gikok ma gidaŋŋe matek.³⁹Ka odonyo i ot, openyogi ni, “Piŋo wuwo ki koko? Latin man peya oto, ento onino anina.” ⁴⁰Gunyere matek, ci oryemogi ducu woko, ocako tero won latin ki minne ki jo ma onoŋo gitye kacel kwede, gudonyo ka ma latin tye iye.⁴¹Omako ciŋe, owacce ni, “Talita kum”, te lokke ni, “Latin anyaka, awacci ni, a malo.” ⁴²Oyotoyot nyako oa malo, owoto, pien onoŋo mwaka me ditte doŋ romo apar wiye aryo. Guuro matek twatwal. ⁴³Yecu ocikogi matek ni ŋatti mo pe myero oŋe lok man; ocikogi ni gimi ki nyako-nu cam mo ocam.

¹Yecu oa woko ki kunnu, odok i lobo tugi, lupwonnyene gulube. ²Ocako pwonyogi i kacokke i ceŋ cabit. Jo mapol ma guwinye, guuro, kun giwaco ni, “Laco man onoŋo ryeko man ducu ki kwene? Kit ryeko aŋo ma gimiye-nu? Dok kit tic aŋo matek madito ma rom man ma en tiyogi-ni? ³Man pe lapac, wod pa Maliam, omin Yakobo, ki Yoce, ki Juda ki Cimon? Dok nyimegine pe gitye botwa kany?” Ci cwinygi ocako a woko i kome.⁴Yecu owaco ni, “Lanebi giketo deyo i kome, ento pe giketo deyo i kome ki i lobo tugi ki i kin jo tugi, ki i ode.” ⁵Pe otwero tiyo tic matego kunnu, ento oketo ciŋe i kom lutwo mogo, ocaŋogi. ⁶Yecu ouro pien pe gitye ki niye. En obedo ka wirre i kin gaŋi kun pwonyo dano.⁷Yecu olwoŋo bote jone apar wiye aryo, ci oorogi ki aryo aryo, omiyogi twero i kom cen maraco. ⁸Ocikogi matek ni pe guwot ki gin mo, kono odoo keken, laboŋo cam mo, kadi kicaa, kadi lim mo i del pyergi; ⁹ento guwot kun giruko war tyengi, pe guwot ma gubamo kanyi aryo i komgi.¹⁰Ocikogi ni, “Ka wudonyo i ot mo, wubed kenyo nio ka wubia ki i kabedo meno. ¹¹Kabedo ducu ma pe bijolowu, ma pe biwinyowu, ka ce wubia woko ki kunnu, ci wuteŋ apwa woko ki i tyenwu wek obed caden botgi.”¹²Kit meno gucako cito, gutito lok ni myero dano oŋuti. ¹³Guryemo lwak cen mapol, dok guwiro lutwo mapol ki moo kun gicaŋogi.¹⁴Kabaka Kerode owinyo pire, pien onoŋo nyiŋ Yecu doŋ oywek twatwal. Jo mogo guwaco ni, “Jon Labatija aye ocer woko ki i kin jo muto; en aye mumiyo lakit teko macalo meno tye ka tic i kome.” ¹⁵Ento jo mukene guwaco ni, “En Elia”, jo mukene ni, “En lanebi, cal ki ŋat mo i kin lunebi macon.”¹⁶Ka Kerode owinyo pire ci owacci, “Jon ma yam atoŋo wiye en aye ocer woko.” ¹⁷Pien Kerode yam ooro dano, gumako Jon, gutweyo i mabuc, pi Kerodia ci-ominne, dako pa Pilipo, ma yam okwanyo me bedo dakone.¹⁸Pien Jon owaco bot Kerode ni, “Cik pe oye ni ibed ki ci-omeru.” ¹⁹Kerodia obedo ki keccwiny i kome, omito neke woko, ento pe otwero, ²⁰pien Kerode onoŋo lworo Jon, kun ŋeyo ni en dano ma kite atir, ki maleŋ, ci obedo ka gwoke maber. Ka owinyo lok ma en otito, lokke otwoyo doge woko, ento pire obedo mit bote ka winyo lokke.²¹Ento kare maber oromo i nino ma Kerode oyubo iye karama me po pi nywale, ci olwoŋo iye luditone ki lutel-wi-lweny ki ludoŋo me Galilaya. ²²Nya pa Kerodia odonyo i ot omyelo, ci oyomo cwiny Kerode ki welone. Kabaka owaco bot nyako ni, “Legga gin ducu ma imito, abimiyi.”²³Okwoŋo akwoŋa kun wacce ni, “Gin ducu ma ibilegga abimiyi, kadi bed nucu kerra.” ²⁴Nyako okato woko, openyo minne ni, “Abilego gin aŋo?” Odok iye ni, “Leg wi Jon Labatija.” ²⁵Oyotoyot odwogo i ot bot kabaka ki mit kome, olege ni, “Amito imiya wi Jon Labatija i weer kombeddi.”²⁶Kabaka okumo matek, ento pi kwoŋŋe ki pi welone omiyo pe omito twonne. ²⁷Oyotoyot kabaka ooro askari ma lakur, ocike ni okel wi Jon. Ocito oŋolo ŋute ki i ot mabuc, ²⁸okelo wiye i weer, omiyo bot nyako; nyako omiyo bot minne. ²⁹Ka lupwonnye pa Jon guwinyo pire, gucito gutiŋo kome, guyiko i lyel.³⁰Lukwena gudwogo bot Yecu gutitte lok ducu ma gutiyo ki ma gupwonyo. ³¹En owaco botgi ni, “Wubin kenwu ka ma dano pe iye, wuywe manok.” Pien jo mapol onoŋo gibedo ka bino, gidok cen, kun gigwennye agwenya, omiyo pe gubedo ki kare mo me cam. ³²Gucito kengi ki yeya i kabedo ma dano pe iye.³³Jo mapol gunenogi ka gicito, guŋeyogi, ci guriŋo kunnu ki tyengi kun gia ki i gaŋi ducu; gin aye gukwoŋo o kunnu wiati. ³⁴Ka Yecu okato i wi tera, oneno lwak madwoŋ; kica ocako make i komgi, pien gitye macalo romi ma gipe ki lakwat; ci opwonyogi ki lok mapol.³⁵Ka oo otyeno, lupwonnyene gubino bote guwacce ni, “Kabedo man tye i dye tim, cawa bene doŋ okato. ³⁶Cwal lwak gucit i kin paco ki i gaŋi ma cokcok, guwil ginacama pigi kengi.”³⁷Ento en odok iye ni, “Wun aye wumigi ginacama.” Gin gugamo ni, “Wacit wawil kwon me ciliŋ miya aryo, wami botgi wek gucam?” ³⁸Ento en openyogi ni, “Wutye ki mugati adi? Koŋ wucit wunen.” Ka guŋeyo guwacce ni, “Abic, ki rec aryo.”³⁹Yecu ociko jo ducu ni gubed piny i dul ki dul, i kom lum alita. ⁴⁰Kit meno lwak gubedo piny i dul ki dul, miya miya, ki pyerabic pyerabic. ⁴¹Okwanyo mugati abic ki rec aryo, oneno malo i polo olego gum, obaro i mugati, omiyo ki lupwonnyene wek guket i nyim lwak; dok opoko rec aryo i kingi ducu.⁴²Gin ducu gucamo, guyeŋ ⁴³Gicoko ŋide mugati ma obaro-nu mudoŋ, ki rec bene, opoŋo aduku apar wiye aryo. ⁴⁴Jo ma gucamo mugati giromo co alip abic.⁴⁵Oyotoyot Yecu ociko lupwonnyene ni gudony i yeya, gukwoŋ nyime me cito loka ca, wa i Betecaida, kun en pud ciko lwak. ⁴⁶Ka doŋ ocikogi, ci ocito i wi got ka lega. ⁴⁷Ka piny oyuto, yeya onoŋo doŋ tye wa i dye nam, en kene aye onoŋo tye i wi tura.⁴⁸En onenogi kun gicanne ki cero yeya, pien onoŋo yamo kodo bino ki i nyimgi. I kine me koko gweno, en ocako bino botgi kun woto i wi nam ki tyene. Omito katogi akata, ⁴⁹ento ka gunene kun woto i wi nam ki tyene, gutamo ni gwok nyo tipo, ci gudaŋŋe matek; ⁵⁰pien gin ducu gunene, ci tipo komgi oto woko. Ento oyotoyot oloko kwedgi kun waco ni, “Wudi cwinywu. An enni; gwok wulwor.”⁵¹Odonyo botgi i yeya, ci yamo oliŋ mot. Gin guuro matek twatwal ki i cwinygi, ⁵²pien nakanen pe guniaŋ lok ma i kom mugati, ento cwinygi pud obedo nwaŋ.⁵³Ka doŋ gukato loka ca, ci gukato wi tura i lobo Genecaret, gutweyo yeya kunnu. ⁵⁴Ka gutyeko a woko ki i yeya, ci lwak guŋeyo Yecu oyotoyot. ⁵⁵Gucako riŋo gurumo kabedo ducu ma tye kunnu, kun gikelo lutwo ma gutiŋogi ki kitara, giterogi i kabedo ducu ma guwinyo ni en tye kunnu.⁵⁶I kabedo ducu ma yam en obino iye, i kin paco-gu, ki i gaŋi-gu, ki i kin caro, gipyelo lutwo wa i cuk-gu, kun gibako doggi bote ni oye wek gugud kadi dog ginarukane keken; ci lutwo ducu ma gugudo gucaŋ.

¹Luparicayo ki lupwony-cik mogo ma gua ki i Jerucalem gucokke bot Yecu.²Guneno jo mogo ma i kin lupwonnyene ma pe gilubo kwer, ento gicamo ma pe gulogo ciŋgi. ³Pien Luparicayo ki Lujudaya ducu ka pe gulogo ciŋgi kakare pe gicamo, pien gumako kit pa ludoŋo ⁴Ka gudwogo ki i cuk pe gicamo, nio ka gulwokke. Dok gitye ki lwak kit kwer mapol ma gilubo, macalo kit me lwoko kikopo-gu ki agulu-gu ki jami mola-gu ducu.⁵Luparicayo ki lupwony-cik gupenyo Yecu ni, “Piŋo lupwonnyeni pe gilubo kit kwer pa ludoŋo? Piŋo gicamo ki ciŋgi ma pe gulogo ma lubo kwer?”⁶Yecu odok iye botgi ni, “Wun lugoba, Icaya con oloko i komwu kakare, macalo en ocoyo ni Lubaŋa owacci, ‘Rok man kara giwora ki doggi nono, ento cwinygi pe i koma wacel; ⁷giwora nono, pwony ma gipwonyo obedo pwony ma mako kit pa dano.’⁸Wuweko cik pa Lubaŋa, kun wuketo cwinywu ka lubo kit pa dano.” ⁹Yecu dok owaco botgi ni, “Wutimo ber pi kwero cik pa Lubaŋa, wek wulub giwu kit cikwu! ¹⁰Moses yam owacci, ‘Wor woru ki meni’; dok ni, ‘Ka ŋatti mo oceno wonne nyo minne, gibineke woko’;¹¹ento wun wuwaco ni, ‘Ka dano mo owaco ki wonne nyo minne ni, Gin ma kono akonyi kwede en lim me Korban’ (te lokke ni, gin ma gimiyo ki Lubaŋa), ¹²en pe dok omi lim mo me konyo wonne nyo minne, ¹³kun wumiyo lok pa Lubaŋa doko goro, pien wupwonyo dano ni gulub kit cikwu. Dok wutiyo bene gin mapol macalo meno.”¹⁴Yecu dok olwoŋo lwak bote, ci owaco botgi ni, “Wun ducu wuwiny lokka, ci wuniaŋ. ¹⁵Pe tye gin mo ma donyo i i dano ma oa ki woko ma twero balo en, ento gin ma a ki i dano en aye balo dano. ¹⁶Ma tye ki it me winyone, ci owiny.”¹⁷Ka oweko lwak woko, ci odonyo i ot, lupwonnyene gucako penye pi carolok meno ma obolo-ni. ¹⁸En ogamo ni, “Kara wun bene peya wuniaŋ tere bo? Pe wuŋeyo ni, gin ducu ma donyo i dano ma a ki woko pe twero balo en? ¹⁹Pien pe odonyo wa i cwinye, ento wok kato i cin iye, ci kato woko.” (Ka otyeko wacone ki meno, nyuto ni olonyo kwa cam ducu.)²⁰Yecu dok owaco ni, “Gin ma a ki i dano aye balo dano. ²¹Pien gin ma a ki i cwiny dano, en aye bedo tam maraco, cot, kwalo kwo, nek, abor, ²²paro lim, bal maraco, bwolo dano, kwele, nyeko, yet, wakke ki miŋo. ²³Tim magi maraco-ni ducu gia ki i cwiny dano, gin aye gibalo dano.”²⁴Yecu ocako a ki kunnu, ocito wa i lobo ma tye cok ki Turo ki Cidon. Ci odonyo i ot mo kunnu; onoŋo en pe mito ni ŋatti mo oŋe ni etye kunnu, ento pe twero kanne. ²⁵Cutcut dako mo ma nyare tye ki cen marac owinyo pire, ci obino oryebbe ka tyene. ²⁶Dako-nu onoŋo Lagrik, ma rokke Curo-Poiniki. Ocako lego Yecu ni oryem cen woko ki i kom nyare.²⁷Yecu owacce ni, “Koŋ iwek litino gukwoŋ yeŋ, pe ber gikwany cam pa litino, gibol ki gwogi.” ²⁸Dako-nu odok iye ni, “Rwoda, meno iwaco kakare; kadi bed kumeno ci litino gwogi ma gitye i te meja gin bene gicamo ŋide cam pa litino do.”²⁹Yecu owacce ni, “Pi lok ma iloko-ni, ber doŋ idok paco, cen doŋ otyeko a woko ki i kom nyari.” ³⁰En odok paco, ci onoŋo latin tye obuto i wi kitanda, ma cen doŋ otyeko a woko ki i kome.³¹Yecu oa ki i lobo ma cokcok ki Turo, ci owok ki i cidon, ka okato ocito wa i nam Galilaya, ka otuc kwede wa i dye lobo Dekapoli. ³²Ci gikelo bote dano ma ite odiŋ ma te lebe oto, gucako bako doggi bote ni oket ciŋe i kome.³³Yecu ocako mako en ki i kin lwak otere cen i muŋ, ci oketo ciŋe i it dano meno, ka oŋulo laa ci ogudo lebe; ³⁴ocako neno malo i polo, ocur, kun waco ni, “Eppata”, te lokke ni, “Yabbe.” ³⁵Ite oyabbe woko ki te lebe bene ogonnye, ocako lok atir.³⁶Yecu ocikogi ni pe gutit ki ŋatti mo; ento kadi bed ocikogi kumeno, gin bene gumedde ameda ki tito pire. ³⁷Gin gubedo ka urone makato ducu, ma kun giwacci, “En otimo gin ducu maber; pien omiyo jo ma itgi odiŋ giwinyo lok, ki jo ma te lebgi oto giloko.”

¹I kare meno, ka lwak dok gucokke mapol, kun pe gitye ki camgi, ci Yecu olwoŋo lupwonnyene bote, ocako waco botgi ni, ²“Kica maka i kom lwak man, pien gutyeko bedo kweda kany pi nino adek ma kun pe gitye ki camgi mo. ³Ka acwalogi ni gudok wa tugi ki kec, ci kec bibwoyogi woko i yo, pien jo mukene i kingi gua ki ka mabor.” ⁴Lupwonnyene gudok iye ni, “Kara man, dano twero miyo mugati ma romo dano-ni i tim kany niŋniŋ?”⁵Yecu openyogi ni, “Wutye ki mugati adi?” Gugamo ni, “Abiro.” ⁶Ociko lwak ni gubed piny i ŋom, ci omako mugati abiro-nu, opwoyo, ka obaro igi, ocako miyo bot lupwonnyene guket i nyimgi, ci guketo i nyim lwak.⁷Onoŋo gitye ki rec matino manok bene; ka doŋ olego iye gum, ociko ni magi bene myero giket i nyimgi. ⁸Lwak gucamo nio ka guyeŋ; gucako coko ŋide cam ma oloyogi-ni, oromo adita abiro mupoŋ. ⁹Jo ma onoŋo gitye kunnu welgi romo jo alip aŋwen. ¹⁰Ka ociko lwak, ci odonyo i yeya cutcut kacel ki lupwonnyene, ocito wa i lobo Dalmanuta.¹¹Luparicayo gubino bot Yecu ci gucako pyem kwede, kun gimito lanyut ma a ki bot Lubaŋa, me laom iye. ¹²Yecu ocur ki i cwinye matek kun wacci, “Piŋo yalwak me kare man gimito lanyut? Adada, awacciwu ni, pe gibimiyo lanyut mo bot yalwak me kare man.” ¹³Yecu oa woko ki botgi, ci odonyo i yeya, oŋolo nam okato wa loka ca.¹⁴Lupwonnyene wigi onoŋo owil woko ka tero mugati, onoŋo gitye kimugati acel keken i yeya. ¹⁵Yecu ocikogi matek twatwal kun wacci, “Wugwokke i kom tobi pa Luparicayo ki tobi pa Luparicayo ki tobi pa Kerode.”¹⁶Lupwonnye gubedo ka laro lok kekengi kun giwacci, “Pe watye ki mugati.” ¹⁷Ka Yecu oŋeyo ci openyogi ni, “Piŋo wubedo ka laro lok ni pe wutye ki mugati? Peya wuniaŋ ce? Pe wumako maber? Cwinywu pud nwaŋ?¹⁸Wutye ki waŋwu, ci pe wuneno kwede? Wutye ki itwu, pe wuwinyo kwede? Wun pe wupo ce? ¹⁹Ka yam abaro i mugati abic pi jo alip abic-ci, ci wucoko ŋide aduku adi?” Gugamo ni, “Apar wiye aryo.”²⁰“Ka yam abaro i mugati abiro pi jo alip aŋwen-ni, onoŋo wucoko ŋide opoŋo adita adi?” Dok gugamo ni, “Abiro.” ²¹En openyogi ni, “Peya wuniaŋ aye?”²²Gin gucako bino i Betecaida, ci jo mogo gukelo bote dano ma waŋe oto woko, gubako doggi ni oboŋ kome. ²³Yecu ocako mako ciŋ lawaŋe-oto, ci otere woko wa i ŋe gaŋ; ci oŋulo laa i waŋe, ka dok oketo ciŋe i kome, openye ni, “Ineno gin mo doŋ?”²⁴Laco meno otiŋo waŋe malo, ocako waco ni, “Aneno kom dano; ento pud ginen macalo yadi ma woto.” ²⁵Yecu dok onwoyo keto ciŋe i waŋ lawaŋe-oto; ci ociko waŋe matek, waŋe odok kakare ma neno piny maber. ²⁶Yecu ocwalo en wa i paco tugi, kun cike ni, “Pe idony i gaŋ kunnu.”²⁷Yecu ki lupwonnyene gucito i kin gaŋi me Cecaria Pilipi. I kare ma gitye i yo, openyo lupwonnye mere ni, “Dano mono giwacci an aŋa kaa?” ²⁸Guwacce ni, “Jon Lubatija; jo mogo giwacci, ‘Elia’, ki jo mukene ni in ŋat acel i kin lunebi.”²⁹Dok openyogi ni, “Ento wun kono wulwoŋa mono ni an aŋa?” Petero ogamo ni, “In i Kricito ma Lubaŋa oyero.” ³⁰Yecu ociko matek ni pe gitit pire ki dano mo.³¹Yecu ocako pwonyo lupwonnye mere ni, “Wod pa dano myero olim can madwoŋ, dok ludoŋo ki ajwagi madito pa Lubaŋa ki lupwony-cik myero gukwere woko, ci guneke, ento en cako cer woko i ŋe nino adek.” ³²Yecu oloko lok meno atyer ka maleŋ. Petero otero en cen, ocako juke matek.³³En olokke bot lupwonnyene ci oloko ki Petero matek, kun wacci, “Dok cen i ŋeya, in Catan! Pien tammi pe lubo pa Lubaŋa, ento pa dano.” ³⁴Yecu olwoŋo lwak bote kacel ki lupwonnyene, ci otito botgi ni, “Ka ce dano mo mito lubo kora, myero okwoŋ kwerre kekene, ka ocak tiŋo yatariyane, olub ki kora.³⁵Pien dano ma mito laro kwone birwenyone arwenya, ento ka dano mo orwenyo kwone pira ki pi lok me kwena maber, en aye bilaro kwone. ³⁶Konyo dano ma olimo lobo ducu ki gin aŋo mono, ka ce kwone gikwanyo woko? ³⁷Dano dok bimiyo kit gin aŋo ma ka kwone?³⁸Ka ce dano mo lewic omake i koma ki i lokka i kare man me bal ki weko Lubaŋa, Wod pa dano bene lewic bimake i kome i kare ma en bidwogo ki deyo pa Wonne kacel ki lumalaika maleŋ.”

¹Dok oloko botgi, ni “Adada awacciwu ni, tye jo mogo ma gucuŋ i kinwu kany ma pe gibibilo to wacel, nio waŋ ma guneno ka ker pa Lubaŋa doŋ otyeko bino ki tek.” ²Ka nino okato abicel, ci Yecu otero Petero ki Yakobo ki Jon, ocako yito kwedgi i wi got mabor i muŋ gin kengi. Kome ocako lokke i nyimgi, ³ginarukane odoko tar ma wil, matar dok twatwal; pe tye lalwok boŋo mo i wi lobo ma twero lwoko lony matar ma rom meno.⁴Ci Elia ki Moses gucako nen botgi, gubedo ka lok ki Yecu. ⁵Petero ocako penyo Yecu ni, “Lapwony, bedo kany ber mada; wek doŋ wager aduc adek, acel meri, acel pa Moses, ki acel pa Elia.” ⁶Onoŋo Petero pe doŋ ŋeyo kit gin ma myero eloki, pien onoŋo lworo omakogi mada.⁷Pol ocako bino ci tipone oumo komgi woko lipuk, ci dwan owinnye ki i pol, ma wacci, “Man aye Woda ma amaro; wuwinye.” ⁸Lupwonnye gucako ŋiyo piny oyotoyot, ci waŋgi pe omedo ki neno dano mo, guneno kom Yecu ma tye kwedgi-ni keken.⁹I kare ma doŋ gitye ka lor piny ki i wi got, Yecu ocikogi ni pe gutit lokke bot dano mo i kom gin ma guneno, nio waŋ ma Wod pa dano ocer ki i kin jo muto. ¹⁰Lupwonnye gumako lok meno, gubedo ka penye kekengi ni, “Cer ki i kin jo muto kono te lokke aŋo?”¹¹Gucako penyo Yecu ni, “Piŋo lupwony-cik guwacci, Elia aye koŋ kwoŋo bino?” ¹²Yecu otito botgi ni, “Adada Elia aye myero okwoŋ bino, ka wek ocaka dwoko jami ducu obed kakare. Ento lok man dok gicoyo i kom Wod pa dano piŋo kaa, ni, myero en koŋ olim can madwoŋ, ka dok ni, gibicaye matek? ¹³Ento doŋ atito botwu atir ni Elia doŋ otyeko bino wa con, ci gutyeko timo gin ma gimito i kome, macalo yam gicoyo i kome.”¹⁴Ka gubino piny bot lupwonnye mukene, ci guneno lwak mapol gurumogi dyere, kun lupwony-cik gitye ka pyem kwedgi. ¹⁵Ka lwak guneno Yecu, guuro en mada, gutwarre oyotoyot guriŋo ka mote. ¹⁶Yecu openyogi ni, “Wubedo ka pyem kwedgi pi lok aŋo?”¹⁷Ci dano mo acel ki i kin lwak ogamo doge ni “Lapwony, wayi onoŋo akelo woda boti. En tye ki cen marac ma pe loko, ¹⁸ka tekke cen omako i kabedo mo, ci tugi retone woko piny likuŋ, ci bwoyo yenyo i doge, cako kayo lake-gu matek, kun poyo kome lirikrik. Apenyo lupwonnyeni ni guryem woko, ci ryemone oloyogi.” ¹⁹Yecu ocako gamo ni, “Wun yalwak ma niyewu lam, abibedo kwedwu nio wa awene? Dok abidiyo cwinya i komwu nio wa awene ba? Wukel en bota kany.”²⁰Gukele bot Yecu. Ka cen marac-ci onene, ci oyeŋo kom awobi-nu, orete woko piny; ocako ŋenne i ŋom ma kun bwoyo yenyo i doge-gu. ²¹Yecu openyo wonne ni, “Two man obedo ka timme kit man pi lwak kare ma rom mene?” Wonne ogamo ni, “Nia wa ka tinone. ²²Otemo neke woko tyen mapol; kine mogo rete i mac kadi wa i pii-gu. Ka ce itwero timo iye gin mo, ci tim ber, ikonywa do.”²³Yecu ogamo doge ni, “Ka ce atwero? Gin ducu twerre ki bot dano ma ye Lubaŋa.” ²⁴Won latin ogamo doge oyotoyot kun daŋŋe matek ni, “Aye; kony niyena ma lam-mi.” ²⁵Ka Yecu oneno lwak giriŋo gibino bote, ogerre i wi cen marac, kun wacce ni, “In cen ma pe loko-ni, ma iti odiŋ-ŋi, aciki ni, a woko ki i kom awobi-nu, pe dok idwog i kome matwal.”²⁶En okok, ci ocako ryene aryeya ki tek, ka oa woko i kome. Awobi-nu koŋ obedo macalo dano muto, omiyo jo mapol doggi ocer ni, “En doŋ oto woko ada.” ²⁷Ento Yecu omako ciŋe, oile kwede malo, ci en ocuŋ.²⁸Ka Yecu odonyo i ot, ka ma gubedo iye kengi, ci lupwonnyene gupenye ni, “Gin aŋo mugeŋowa ryemone?” ²⁹En owaco botgi ni, “Kit cen macalo man pe ryemme pi gin mo, ento ki lega keken.”³⁰Gua woko ki kunnu, guŋolo ki i Galilaya. Yecu pe omito ni dano mo oŋe pire, ³¹pien onoŋo en tye ka pwonyo lupwonnyene kun waccigi ni, “Wod pa dano gibimiye i ciŋ dano; gibineke woko, ci en bicer woko i ŋe nino adek.” ³²Ento gin pe guniaŋ kit lokke-nu, dok gulworo penye.³³Gibino i Kapernaum. Ka gitye i ot, Yecu ocako penyogi ni, “Wubedo ka laro lok aŋo i waŋayo kekenwu-ni?” ³⁴Gin guliŋ aliŋa, pien gubedo ka laro lok kekengi i waŋayo ni, “Aŋa ma ladit i kingi?” ³⁵Yecu ka obedo piny ci olwoŋo jone apar wiye aryo, ocako waccigi ni, “Ka dano mo mito bedo mukwoŋo, myero en aye odoŋ cen i ŋe luwote ducu, en aye obed latic megi ducu.”³⁶Okwanyo latin mo, ci omiyo ocuŋ i kingi, ka otiŋo i kore ci okwako, ocako waco botgi ni, ³⁷“Dano mo ma ojolo latin acel macalo man pi nyiŋa, meno rom ki ma ojolo an; ka dok dano ma ojolo an, meno rom ki ma ojolo ŋat muora-ni.”³⁸Jon owaco bot Yecu ni, “Lapwony, waneno ŋatti mo ka tye ka ryemo cen ki nyiŋi, ma en pe nywako wot kwedwa, ci wajuke woko.” ³⁹Ento Yecu ogamo ni, “Pe wujuke; pien pe tye dano mo ma tiyo tic matek ki nyiŋa, ma twero waco lok mo marac i koma oyot.⁴⁰Pien ŋat ma pe lakworwa, en aye lawotwa. ⁴¹Adada awacciwu ni, dano mo ma bimiyowu pii me amata i kikopo, pien wun jo pa Kricito, limo motte pe biloyo en kadi matidi mo.⁴²“Ka dano mo miyo ŋat mo acel ma i kin jo magi matino ma guye an-ni gupoto i bal, ci bedo ber makato ducu ka gitweyo kidi rego madit i ŋute ci gibole kwede wa i nam. ⁴³Ka ce ciŋi aye omiyo ipoto i bal, ci toŋ iŋun woko, twara ma idonyo i kwo ma ciŋi lakucel peke, ber makato ma giboli i Geena ma itye ki ciŋi aryo ducu, kun idonyo kwedgi i mac ma pe to, ⁴⁴ka ma kwidi ma camogi pe to, ki macce bene pe to.⁴⁵Ka ce tyeni aye omiyo ipoto i bal, ci toŋ woko, twara idonyo i kwo ma tyeni lakucel peke, ber makato ma kono giboli ki tyeni aryo i Geena, ⁴⁶ka ma kwidi ma camogi pe to, ki macce bene pe to.⁴⁷Ka ce waŋi aye omiyo ipoto i bal, ci kol woko; twara ma idonyo i ker pa Lubaŋa ma waŋi lakucel, kato ma kono giboli ki waŋi aryo ducu i Geena, ⁴⁸ka ma kwidi ma camogi pe to, ki macce bene pe to.⁴⁹Pien kado ma bilonyo kom dano acel acel en aye mac. ⁵⁰Kado ber, ento kado ka odoko bot, ci dok gibiyubo niŋniŋ wek odok mamit? Wubed ki kado i iwu, dok wubed ki kuc kekenwu.”

¹Yecu oa woko ki kunnu, ci obino wa i lobo Judaya ma loka Jordan, ci lwak dok gucokke bote; ocako pwonyogi doki, macalo kit pwonnye tye kwede. ²Luparicayo mogo gubino bote, ci gucako omo cwinye kun gupenye ni, “Cik miyo twero ni laco oryem dakone woko?” ³Yecu ocako gamo doggi ma kun penyogi ni, “Moses yam ocikowu niŋniŋ?” ⁴Gugamo ni, “Moses yam oye miyo twero ki laco ni myero omi waraga me laryem dakone woko, nyomgi oket woko.”⁵Yecu owaco botgi ni, “Moses omiyowu cik meno pi cwinywu manwaŋ. ⁶Ento nia i acakki keto lobo ‘Lubaŋa oketo laco ki dako.’⁷‘Pienno dano twero weko wonne ki minne, moko i kom dakone matwal. ⁸Ci gin aryo-nu gicako doko kom acel.’ Gin pe dok gibedo kom aryo, doŋ gibedo kom acel keken. ⁹Gin ma Lubaŋa oribo kacel dano pe opok kingi.”¹⁰Ka onoŋo gitye i ot, ci lupwonnyene gupenye i kom lok meno. ¹¹En owaco botgi ni, “Ka dano mo oryemo dakone woko, ce dok onyomo dako mukene, lanyom meno otimo abor, noŋo obalo i nyim dakone; ¹²ki dako bene kit meno, ka ce oa woko ki bot cware dok ogero laco mukene, ci dako-nu otimo abor.”¹³Ka lwak gukelo litinogi bot Yecu ni wek en oboŋ komgi, ci lupwonnyene gujukogi. ¹⁴Ka Yecu oneno ci cwinye ocwer matek, ocako wacogi ni, “Wuwek litino gubin bota, pe wugeŋgi; pien ker pa Lubaŋa tye pi jo macalo gin.¹⁵Adada awacciwu ni, dano ma pe oye ker pa Lubaŋa macalo latin, pe bidonyo i kerre kadi matidi mo.” ¹⁶Ocako tiŋogi i kore omiyogi gum, kun keto ciŋe i komgi.¹⁷Ka Yecu oa obino wa i yo, ci dano mo ocako riŋo i kore, ci orumo coŋe i nyime kun penye ni, “Lapwony maber, atim aŋo wek alim kwo ma pe tum?” ¹⁸Yecu owaco ni, “Piŋo ilwoŋa ni aber? Pe tye dano mo maber, Lubaŋa kene aye ber. ¹⁹In iŋeyo cik, ni, ‘Pe ineki, Pe itim abor, Pe ikwal gin mo, Pe ibed caden me goba, Pe ibed, Pe ibum dano mo, Wor woru ki meni.’ ”²⁰En ocako gamo ni, “Lapwony, atyeko mako cik magi ducu nia wa i ka tinona.” ²¹Yecu ociko waŋe onene ci cwinye omare, owacce ni, “Gin mo acel aye pud orem boti. Koŋ icit icat jamini ducu ma itye kwede ci imi limme ki lucan, ci ibibedo ki lwak lonyo ma gikano piri i polo. Ka doŋ ibin icak lubo kora.” ²²Awobinu ka owinyo Yecu oloko bote kit meno, ci waŋe oballe woko, ocako dok cen ki cwercwiny, pien onoŋo en tye ki lwak limme madwoŋ.²³Yecu olworo waŋe ci owaco bot lupwonnyene ni, “Bibedo tek mada bot jo ma lulonyo me donyo i ker pa Lubaŋa!” ²⁴Lupwonnyene guuro lokkenu matek. Yecu dok ocako wacogi ni, “Litino, donyo i ker pa Lubaŋa tek marac! ²⁵Kinaga twero donyo i waŋ libira oyot, makato lalonyo me donyo i ker pa Lubaŋa!”²⁶Ci omiyo lwak guuro matek, ci gupenyo ni, “Ka kumeno, ci aŋa dok ma larre?” ²⁷Yecu ocako nenogi, ci owacci, “Ki bot dano pe twerre, ento ki bot Lubaŋa twerre, pien gin ducu twerre ki bot Lubaŋa.” ²⁸Petero ocako wacce ni, “Ce wan kono ma waweko jamiwa ducu, ci walubi-ni?”²⁹Yecu owacce ni, “Adada awacciwu ni, pe tye ŋatti mo ma oweko ode, nyo omege, nyo nyimege, nyo minne, nyo wonne, nyo litino, nyo pottine, pira ki pi lok me kwena maber, ³⁰ma en pe bilimo lwak jami makato meno tyen miya i kare man, gin aye odi, omego, lamego, mego, litino, ki potti, kacel ki libo; ka dok wa i kare me anyim en binoŋo kwo ma pe tum. ³¹Lwak jo mapol ma gubedo jo mukwoŋo yo gin aye gibidoŋ cen, ki jo ma gudoŋ cen, gin aye dok bitelo yo.”³²I kare ma gicito i yo ma cito Jerucalem, ma kun Yecu aye tye ka telogi yo, guuro matek, dok lupwonnyene gubedo ki lworo. En dok ocako tero lupwonnyene apar wiye aryo, ci otito botgi kit ma bitimme i kome, ³³kun wacci. “Nen ba, wan doŋ watye ka ito malo i yo Jerucalem. Wod pa dano doŋ gibimiye i ciŋ ajwagi madito pa Lubaŋa ki lupwony-cik, gibiŋolle kop me to, ci gibimiye i ciŋ Lurok; ³⁴giŋale, giŋulo laa i kome dok gibipwode ki del, ci gibineke; ento en bicer woko i ŋe nino adek.”³⁵Yakobo ki Jon gin litino pa Jebedayo, gubino i nyim Yecu, ci guwacce ni, “Lapwony, wamito in itim ki wan gin ma walegi pire-ni.” ³⁶En ocako penyogi ni, “Wun wumito ni atimmiwu kit gin aŋo?” ³⁷Gugamo, ni, “Ye wek ŋat acel obed i kom badi tuŋ lacuc ki acel bene obed i kom badi tuŋ lacam i kare me deyoni.”³⁸Yecu owaco botgi ni, “Wun pe wuŋeyo gin ma wulego. Wun wutwero mato ki kikopo ma abimato kwede-ni; nyo wutwero limo batija kit ma gibatija kwede an-ni?” ³⁹Gugamo ni, “Watwero.” Yecu dok owaco botgi ni, “Kikopo ma an abimato kwede-ni, wun bene wubimato kwede, ki kit batija ma an abibatija kwede-ni, wun bene gibibatijawu kwede; ⁴⁰ento lok me bedo i kom bada ma lacuc nyo me lacam pe an aye apoko. Meno bibedo pa jo ma yam doŋ giyubo pigi wa con.”⁴¹Ka jo mukene apar-ri guwinyo lokke, ci cwinygi ocako cwer i kom Yakobo ki Jon. ⁴²Yecu ocako lwoŋogi bote, ci owaco botgi ni, “Wun wuŋeyo ni, jo ma gilwoŋogi ni gin lulo Lurok giloyo dano ki tek, dok luditogi bene gibedo ki twero i komgi.⁴³Pe myero wun wubed kit meno; ento ŋat ma mito bedo ladit i kinwu en aye myero obed laticwu, ⁴⁴ki ŋati ma mito bedo mukwoŋo i kinwu, en aye myero obed opiiwu ducu. ⁴⁵Kadi wa Wod pa dano bene pe obino ni gutine, ento en aye eti ki dano; en obino pi miyo kwone me lakok lwak dano mapol.”⁴⁶Ka gubino i Jeriko, ci i kare ma en doŋ obea woko ki i Jeriko, kacel ki lupwonnyene ki lwak madwoŋ, ci latowaŋ ma nyiŋe Bartimayo, wod pa Timayo, onoŋo obedo piny i ŋet yo. ⁴⁷Ka owinyo ni meno aye Yecu me Najaret, ocako daŋŋe ni, “Yecu Lakwar Daudi, timma kica ba!” ⁴⁸Lwak gujuke matek ni oliŋ, ento en omedde ameda ki daŋŋe ni, “Lakwar Daudi, timma kica ba!”⁴⁹Ka Yecu ocuŋ, ci owacci, “Wulwoŋe obin.” Gucako lwoŋo lawaŋe-oto ni, “Doŋ idi cwinyi, a malo, olwoŋi.” ⁵⁰En otugi bolo ginarukane woko, ci oa malo, obino bot Yecu.⁵¹Yecu ocako penye ni, “Imito atimmi gin aŋo?” Ci latowaŋ ogamo ni, “Lapwony, amito waŋa onen piny do.” ⁵²Yecu ocako wacce ni “Doŋ iciti, niyeni ocaŋi.” Ocako neno piny cut, ci olubo kor Yecu kun woto kwede i yo.

¹I kare ma doŋ gicok o i Jerucalem, ki tuŋ Betepage ki Betania, i kor got Jeituni, ci Yecu ocako oro jo aryo ki i kin lupwonnyene, ²ocikogi ni, “Wucit i gaŋ ma tye i nyimwu. Ka ce wudonyo iye, ci wutugi noŋo latin kana ma gitweyo, ma ŋatti peya oito i wiye; ci wugony, wek wukel. ³Ka ce dano mo openyowu ni, ‘Wugonyo woko piŋo kaa?’ wudokke iye ni, ‘Rwot aye mito; ci bicwalo dwoko woko kany oyotoyot.’ ”⁴Gucako cito, gunoŋo gitweyo latin kana i doggola woko ki i ŋet yo, ci gugonyo. ⁵Jo mogo ma gucuŋ kunnu gupenyogi ni, “Wubetimo gin aŋo, ma wugonyo ki latin kana-ni?” ⁶Gudok iye kit ma Yecu ocikogi kwede, ci guye ni gucit kwede.⁷Ci gukelo latin kana bot Yecu, gucako peto boŋŋigi i kome, ocako bedo i wiye. ⁸Jo mapol gupeto boŋŋigi i dye yo, ki jo mogo gupeto jaŋ yadi ma potgi oluk ma gu jako ki i potti. ⁹Ci jo ma gutelo yo ki jo ma gilubo kore gidaŋŋe ni, “Ojana! Lubaŋa omi gum i kom dano ma bino i nyiŋ Rwot! ¹⁰Lubaŋa omi gum i kom ker pa kwarowa Daudi ma obebino-ni! Ojana malo i wi polo!”¹¹Yecu ocako donyo i Jerucalem ki i ot pa Lubaŋa bene, oŋiyo kit jami-gu ducu, ka odok i Betania kacel ki jone apar wiye aryo, pien onoŋo piny doŋ oyuto woko. ¹²Orwone dok gua ki i Betania, ma kun kec neke.¹³Ka oneno yat oduro ki cen ma pote oluk, ci ocito ka nenone ni gwok nyo enoŋ iye mucekke. Ka oo i te yat, ci pe onoŋo iye gin mo, onoŋo pote keken, pien onoŋo peya kare me cekke. ¹⁴Lupwonnyene guwinyo ka en wacci, “ŋat mo pe ocam nyigi matwal.”¹⁵Ka gubino i Jerucalem, ci Yecu odonyo i ot pa Lubaŋa, ocako ryemo lucat-wil ki luwil jami i ot pa Lubaŋa. Ci oryebo meja pa lulok cente, ki kom pa lucat amam; ¹⁶pe onoŋo dok ye ni dano mo oŋol i ot pa Lubaŋa ki yec mo.¹⁷Ka dok ocako pwonyogi kun loko ni, “Pe yam gicoyo ni, ‘Oda gibilwoŋo ni ot me lega pa rok ducu’? Ento wun wuloko odoko boro pa luyak.” ¹⁸Ajwagi madito pa Lubaŋa ki lupwony-cik gubedo ka winyo lokke, ci gucako yenyo kit yo mo me neke woko; pien gin gitye ka lworo en. Pien onoŋo lwak ducu gitye ka uro kit pwonnye. ¹⁹Ka piny oyuto, ci ocako a woko ki i Jerucalem.²⁰Odiko ka gitye ka wot i yo meno, guneno oduro otal nia wa i lwite. ²¹Petero ocako po pire, ci owacci, “Lapwony, nen yat oduro ma iceno-ni otal woko.”²²Yecu ogamo ni, “Wuye Lubaŋa. ²³Adada awacciwu ni, dano ma biwaco ki got man ni, ‘Mukke wek itiŋŋe ipot wa i nam,’ ma kun pe kalo akala i cwinye, ento noŋo oye ni gin ducu ma elego-ni bitimme, ci bitimme ada.²⁴Pi lok man mumiyo awacciwu ni, gin ducu ma wupenyo ci wulego Lubaŋa pire, ber wuye ni doŋ wulimo ci wubinoŋone ada. ²⁵Ka ce wutye ka lega i nyim Lubaŋa, ka onoŋo wutye ki kop mo i kom dano mo, ci wutimme kica, ka wek Wonwu ma tye i polo bene otimwu kica i kom balwu. ²⁶Ento ka pe wutimo ki dano kica, ci Wonwu ma tye i polo pe bitimowu kica i kom bal mewu.”²⁷Gin dok gudwogo i Jerucalem. Ka onoŋo en tye ka wot i ot pa Lubaŋa ci ajwagi madito pa Lubaŋa ki lupwonycik ki ludoŋo gubino bote. ²⁸Gupenye ni, “Twer mene mumiyo itimo lok macalo man? Dok aŋa mumiyi twero meno?”²⁹Yecu ogamo doggi ni, “An koŋ apenyowu ki peny mo acel; wek wun bene wudokka iye, ka an abititowu kit twero mumiyo atiyo lok man. ³⁰Batija pa Jon twerone oa ki bot Lubaŋa nyo oa ki bot dano? Wun wudokka iye.”³¹Gucako bedo ki pyem i kingi kekengi, kun gipyem ni, “Ka koni wawacci, ‘Twerone oa ki bot Lubaŋa’, ci en dok bipenyowa ni, ‘Ci piŋo pe wuye lokke?’ ³²Ka dok wawacci twerone oa ki bot dano kono?” Ento gin gulworo lwak, pien lwak ducu giŋeyo maber ni, Jon aye lanebi atika. ³³Guwaco bot Yecu ni, “Wan pe waŋeyo.” Yecu bene owacogi ni, “An bene pe abitito botwu kit twero mumiyo atiyo man.”

¹Yecu ocako lok kwedgi i carolok ni, “Yam tye dano mo ma opito olok i potone, ci orumo woko ducu ki cel, ka okwinyo bur me biyo pige, ci ogero iye lubele, oweko i ciŋ lupur, ci ocito woko wa i lobo mukene. ²Ka kare oromo, ci ocako cwalo laticce bot lupur ka omo nyige mucekke i potone. ³Lupur gumake, ci gupwode, ka guryeme kwede woko, omedo ki dok ki ciŋe nono.⁴En dok ocwalo laticce mukene; gin gugoyo en bene, gugoyo wiye lero, gutime ki tim me lewic. ⁵Ka dok omedde oro dano mukene, ci guneko dano meno woko. Gubedo ka keto can i kom jo mapol; jo mukene gupwodogi apwoda, ki mukene gunekogi aneka.⁶Pud onoŋo en odoŋ ki dano mo acel bote, en aye wode ma en maro-ni. Lacen en ocwalo wode kikome botgi, kun wacci, ‘Gibiworo woda. ⁷Lupur gucako lok kekengi ni, ‘Man aye doŋ lale lim; wubin waneke woko, wek lim ma en bileyo-nu obed mewa.'⁸Ci gumake, guneke woko, gubole woko wa i ŋe poto olok. ⁹Ci won poto olok bitimogi niŋniŋ? En bibino, ci neko lupur woko ducu, ci miyo poto olok woko bot jo mukene.¹⁰Yam pe wukwano lok ma gicoyo i ginacoya ni, ‘Got ma lugedo gukwero-ni en aye odoko got madit ma i twok ot; ¹¹man Rwot aye ma otiyo, obedo botwa lok me aura’?” ¹²Gutemo pi make, ento gulworo lwak, pien guniaŋ atir ni obolo carolok meno i komgi. Ci gua gucito gigi woko.¹³Gin gucako oro Luparicayo ki jo pa Kerode bene, wek gumak lok ma a i doge. ¹⁴Ka gin gubino bote, ci gucako wacce ni, “Lapwony, wan waŋeyo ni in i dano ma itye ki ada, dok pe ito i kom ŋatti mo, pien in pe ineno kom dano ki woko, in ipwonyo yo pa Lubaŋa ki ada. Ci myero gicul mucoro bot Cecar nyo pe? ¹⁵Wacul nyo pe wacul?” Yecu oŋeyo bwolagi, ocako waco ni, “Wun mono wubwola piŋo kaa? Koŋ wucikella kom lim ma giculo kwede, anen.”¹⁶Gin gucako kelone bote, ci en openyogi ni, “Cal ki coc ma gicoyo i kome-ni pa aŋa?” Ci gugamo ni, “Pa Cecar yo.” ¹⁷Yecu ocako wacogi ni, “Wudwok jami pa Cecar bot Cecar, ki jami pa Lubaŋa wudwok bot Lubaŋa.” Gin gucako urone matek.¹⁸Lucadukayo gucako bino bot Yecu; gin aye jo ma giwacci cer pa jo muto pe tye kulu. Gucako penyo peny ni, ¹⁹“Lapwony, Moses yam ocoyo ni, ka laco mo oto woko, ce oweko dakone, ma kun pe obwoto latin mo, ci myero ominne olak dakone, wek onywal kwede litino ka wi ominne.²⁰Ci yam onoŋo tye co abiro ma gin ducu omego. Ka laco mukwoŋo nyomo dako-nu oto woko ma pe obwoto latin mo, ²¹ci me aryo ocako lako dako-nu, en bene oto woko ma pe obwoto latin mo; ki dano me adekke bene kumeno; ²²ci gin ducu abiro pe gubwoto latin mo. Lacenne en dako bene oto woko. ²³I kare me cer ki i kin jo muto, dako-nu doŋ bibedo dako pa aŋa? Pien gin co abiro-ni ducu gubedo kwede.”²⁴Yecu ocako wacogi ni, “Wun wurwenyo pi lok man, pien wukwiya ginacoya, wa tek pa Lubaŋa bene wukwiya. ²⁵Ka ce dano gibicer woko ki i kin jo muto, ci doŋ pe gibinyomme, doŋ gibibedo macalo lumalaika ma i polo.²⁶Ento i kom lok man me cer ki i kin jo muto-ni, wun pe mukwano i buk pa Moses, ka ma ocoyo lok i kom caka, ki kit ma Lubaŋa yam oloko kwede ni, ‘An Lubaŋa pa Abraim, ki Lubaŋa pa Icaka, ki Lubaŋa pa Yakobo’? ²⁷En pe Lubaŋa pa jo muto ento en Lubaŋa pa jo makwo; wun wuŋak wurwenyo woko marac.”²⁸Ka lapwony-cik mo obino cok, ci obedo ka winyo ka gilaro lok. Ka oneno kit ma Yecu dok iye ki gin lok maber ma atir, ocako penyo Yecu ni, “Cik mene maditte mukwoŋo ki i kom lwak cik ducu?” ²⁹Yecu ogamo ni, “Cik mukwoŋo en ene, ‘Wuwiny wun jo Icrael, Rwot Lubaŋawa en Rwot acel. ³⁰Ci mar Rwot Lubaŋani ki cwinyi ducu, ki tiponi ducu, ki tammi ducu ki tekki ducu.’ ³¹Ki me aryone en ene ni, ‘Mar lawoti macalo imarre keni.’ Pe dok tye kit cik mo ma pire tek makato cik magi aryo-ni.”³²Lapwony-cik ogamo ni, “Iloko kakare, Lapwony; iloko atir ni, Lubaŋa tye acel, pe dok tye Lubaŋa mo mukene, kono en kene. ³³Dok ni gimare ki cwiny ducu, ki ryeko ducu, ki tek ducu, ki maro lawoti macalo imarre keni, cik magi aye pigi tek makato gitum ma giwaŋo ducu ki berre ki gitum mukene ducu.” ³⁴Ka Yecu oneno ni odok iye maber ki ryeko, ocako dok wacce ni, “In pe ibor ki ker pa Lubaŋa.” Lacen pe dok tye ŋat mo ma odiyo cwinye ka penye ki lok mo.³⁵Ka Yecu onoŋo tye ka pwony i ot pa Lubaŋa, ci openyo ni, “Lupwony-cik mono giwacci Kricito lakwar Daudi piŋo? ³⁶Ki tuŋ bot Daudi kikome en dok oloko i tek pa Cwiny Maleŋ ni, ‘Rwot owaco bot Rwoda ni, Bed i kom bada ma lacuc, i kabedo me deyo, nio ka abiketo lukworri piny i te tyeni.’ ³⁷Ka ce en Daudi aye yam olwoŋe ni Rwot, ci en dok bedo lakwarre niŋiŋ?” Lwak mapol guwinyo lokke ki yomcwiny madwoŋ mada.³⁸I kare ma Yecu tye ka pwonyo dano, owacci, “Wugwokke i kom lupwony-cik ma gimaro wot ma guruko boŋŋi maboco-ni, dok gimito dano gubed ka motogi wa i cuk-gu, ³⁹dok gimaro bedo i kom pa ludito ka gitye i kacokke, dok gimaro bedo i kabedo me deyo i karama. ⁴⁰Gin gimayo odi pa mon-to, dok gibedo ka lego lega maboco me buta keken. Gibiŋologi kop madit makato ducu.”⁴¹Yecu obedo i ot pa Lubaŋa ka ma okemme ki canduk me coko lim, ci obedo ka neno kit ma lwak gibolo ki motgi i canduk lim; lwak lulonyo gubolo iye mapol. ⁴²Ento dato ma lacan obino ci obolo iye cente aryo, ma rom ki cente abic me kare-ni.⁴³Ocako lwoŋo lupwonnyene bote, ci owacogi ni, “Adada awacciwu ni, dato man ma lacan-ni en aye dok obolo lim madwoŋ makato jo ducu; ⁴⁴pien jo mapol gugito but limgi madwoŋ-ŋi aye gubolo, ento en i canne-ni, obolo limme ducu ma en tye kwede ma onoŋo konyo kwone.”

¹Ka Yecu okato woko ki i ot pa Lubaŋa; ci ŋat acel mo ki i kin lupwonnyene owacce ni, “Lapwony, nen kit ma godi magi dito kwede ki kit ma gedone beco kwede!” ²Yecu ogamo ni, “Wuneno gedo magi madito twatwal-li? Godi ducu gibimukogi gireto woko piny, pe gibiweko got acel mo kany ma ododde i wi wadi.”³Yecu ka obedo piny i wi got Jeituni, kun otikke ki ot pa Lubaŋa, ci Petero ki Yakobo ki Jon ki Anderiya gucako penye i muŋ ni, ⁴“Tit botwa, lok man bitimme wa awene, dok kit gin aŋo ma binyuto ni lok meno doŋ cok cobbe kakare?”⁵Yecu ocako wacogi ni, “Wugwokke, ŋatti mo owek rwenyowu. ⁶Pien jo mapol gibibino ki nyiŋa, ma giwacci, ‘An aye a en!’ ci gibimiyo jo mapol girwenyo woko.⁷Dok ka wubiwinyo pi mony, ki lok ma yweko pi mony, pe tipo komwu oto woko lirut; myero koŋ meno otimme, ento noŋo nino me agik pud peke. ⁸Pien rok bilweny ki rok wadi, ki ker bene bilweny ki ker wadi, ki oyeŋyeŋ biyeŋo lobo i kabedo mapol, ki kec bene bipoto; meno gin aye acakki me te can ma bipoto i lobo.⁹“Ento wun aye myero wugwokke kenwu; pien gibiterowu i lukiko, dok gibigoyowu i kacokke-gu. Wubicuŋ i nyim luloc ki luker-gu pira, wubitito lok ma bedo caden botgi. ¹⁰Myero koŋ gikwoŋ tito lok me kwena maber bot rok ducu.¹¹Ento ka giterowu i lukiko wek giŋol kop i komwu, pe wubed ka tamo kit lok aŋo ma wubilokone, ento wulok ma gibimiyowu i cawa meno; pien pe wun aye wubilok, ento Cwiny Maleŋ aye bilok. ¹²Omego en aye bimiyo omegine i to, ki wego bimiyo litinogi i to, litino bitubbe i kom lunyodogi, miyo gineko lunyodogi woko. ¹³Jo ducu gibikwerowu pi nyiŋa; ento ŋat ma diyo cwinye nio wa i agik, en aye bilarre.¹⁴“Ka wuneno gikelo gin mo me kwer, malik, giketo i kabedo ma myero pe giket iye (wek dano ma kwano oniaŋ) ci jo ma i Judaya myero guriŋ woko wa i godi; ¹⁵dano ma onoŋo tye i wi ot pe dok olor piny, pe bene odony i ot ka kwanyo iye gin mo, ¹⁶ki dano ma tye wa i poto pe odok cen paco ka omo ginarukane.¹⁷Dok mon ma giyac gibineno can i kare meno, ki mon ma gidoto litino bene! ¹⁸Wuleg wek pe obin otimme i cwir. ¹⁹Pien i kare meno bibedo iye twon can madit atika ma yam peya onen i lobo, nia wa i acakki lobo ma Lubaŋa oketo-ni, nio kwede wa onyoo, dok bene pe binen. ²⁰Kono nene Rwot pe ojwiko nino-nu obedo manok mo, kono dano mo pe obwot; ento pi jo ma giyero, ma en oyerogi, omiyo en ojwiko wel nino obedo manok.²¹“I kare meno ka ce dano mo owacciwu ni, ‘Nen, Kricito ma Lubaŋa oyero tye kany’, nyo ni, ‘Nen en tye kuca’, pe wuye. ²²Kricito ma lugoba kacel ki lunebi-gu ma lugoba gibibino, gibinyutowu lanyut ki tiyo jami taŋo, wek girweny jo mapol ka gitwero, wek girweny wa ki jo ma giyero bene. ²³Ento wun aye wugwokke, doŋ atyeko titowu gin ma bibedo i anyim con.²⁴“Ento i kare meno ki i ŋe can madit-ti, bibedo kit macalo yam gicoyo ni. ‘Ceŋ bicido woko macol licuc, ki dwe bene pe biryeny; ²⁵lakalatwe bia ki i polo, gipoto piny ki twer ducu ma i polo bene biyeŋŋe.’ ²⁶Ka doŋ gibineno Wod pa dano ka bino ki pol, ki twero madwoŋ, ki deyo. ²⁷Ci en bioro lumalaikane ka coko jone ma en oyero, kun gicokogi ki i twok piny aŋwen ducu, nia kwede wa i agikki lobo nio kwede wa i agikki polo.²⁸“Wupwony carolok i kom yat oduro. Ka ce jaŋe doŋ olot, ci pote luk, ci doŋ wuŋeyo ni oro doŋ cok. ²⁹Ki wun bene ka ce wuneno gin magi gutimme, ci wuŋe ni en doŋ cok, tye wa i doggola.³⁰Adada awacciwu ni, yalwak me kare man pe gibitum, nio waŋ ma lok magi ducu bitimme. ³¹Polo ki lobo gibitum ento lokka pe bitum. ³²“Ento nino meno ki cawa meno pe tye ŋat mo ma ŋeyo, kadi wa lumalaika ma i polo, kadi wa Wod, ento Lubaŋa Won kene aye ŋeyo gire.³³Wugwokke, waŋwu obed twolo ma nen, pien wun pe wuŋeyo nino ma kare biromo iye. ³⁴Bedo rom ki dano ma ocito welo. Ka yam a weko gaŋŋe, ci omiyo twero bot luticce, kun miyo ŋat acel acel ki ticce, kun ociko lagwok doggola ni obed ka kiyo piny.³⁵Mumiyo wun wubed ka kiyo piny, pien pe wuŋeyo kare ma won ot bidwogo kwede; gwok dwog wi otyeno, nyo cwiny dyewor, nyo okogweno, nyo odiko. ³⁶Wugwokke, ka ce obino oyotoyot pe onoŋwu wunino woko. ³⁷Lok ma awaco botwu-ni, awaco bot dano ducu ni, Wuki piny.”

¹Nino madito me Kato (Paska) ki me Mugati ma Tobi Pe Iye onoŋo odoŋ nino aryo, ajwagi madito pa Lubaŋa ki lupwony-cik guporo lok me mako Yecu ki ryeko ka wek gineke. ²Pien onoŋo guloko ni, “Pe gimak i nino madito, miyo lwak bitugge.”³I kare ma Yecu tye i ot pa Cimon ladobo, i kare ma obedo ka cam, dako mo obino ma kun tye ki adomo moo nard kikome ma welle dwoŋ-ŋi; ocako turo dog adomo moone, ci oonyo i wiye. ⁴Ento cwiny jo mogo ocwer, ci gucako lok kekengi ni, “Piŋo moo man gibalo abala? ⁵Pien moo man kono nene gicato woko, kono nene okelo lim ma romo ciliŋ miya adek kulu ki makato bene, ka wek gimi ki lucan.” Ci gucako tugge i kom dako-nu matek.⁶Yecu ocako waco ni, “Wuweke obed mot, wuyelo piŋo? En otiyo gin maber twatwal i koma. ⁷Pien wun wutye kacel ki lucan kare ducu, dok wutwero konyogi i kare ducu ma wumito; ento an pe abibedo kwedwu kare ducu. ⁸En otiyo gin ma en twero; dok en aye okwoŋo onyo moo i koma me yika. ⁹Adada awacciwu ni, i kabedo ducu ma i wi lobo ma gibitito iye lok me kwena maber, gin ma dako-ni otiyo bene gibitito pire, wek obed me po en.”¹⁰Juda Lakeriot, ma en dano acel ma i kin jo apar wiye aryo-ni, ocito bot ajwagi madito pa Lubaŋa pi miyo Yecu i ciŋgi. ¹¹Ka guwinyo lokke oyomo cwinygi, gucako cikke me miye lim; ki en bene ocako yenyo kare maber ma eromo miyo ki Yecu i ciŋgi.¹²I kom nino mukwoŋo me nino madito me Mugati ma Tobi Pe iye, ma gitumo iye latin romo me Kato, lupwonnye gupenye ni, “Imito waciyubbi kabedo mene wek icam iye Kato?” ¹³En ooro lupwonnyene aryo ki i kingi kun cikogi ni, “Wucit wa i Jerucalem; ci wubirwatte iye ki laco mo ma oyeyo agulu pii, en aye wulub kore. ¹⁴Ka ma en odonyo iye-ni, en aye wupeny iye won ot ni, ‘Lapwony owacci, ot welo ma atiro iye tye kwene, ka ma abicamo iye cam me Kato, kacel ki lupwonnyena?’¹⁵Ci en binyuto botwu kicika ot ma malone, ma gipeto, giyubo maber, wuyubwa kabedo kunnu.” ¹⁶Lupwonnye gucito, ci gudonyo i Jerucalem, gunoŋo kit macalo en owaco botgi-ni, gucako yubo cam me Kato kunnu.¹⁷Ka piny doŋ oyuto ci obino ki jone apar wiye aryo. ¹⁸Ka gubedo piny ci gucako camo cam, ci Yecu owacogi ni, “Adada awacciwu ni, ŋat acel i kinwu bidoba, en aye dano ma camo kacel kweda.” ¹⁹Gin gucako kumo cut, kun dano acel acel penye ni, “An bo?”²⁰Yecu owacogi ni, “Tye ŋat acel i kinwu wun jo apar wiye aryo-ni, en aye dano ma tye ka gweyo i atabo acel kweda-ni. ²¹Pien Wod pa dano tye ka wot kit man pi cobo kit ma gicoyo i kome-ni; ento dano ma odobo Wod pa dano-ni bineno can! Kono nene obedo ber ka dano-nu pe ginywalo.”²²Ka gitye ka camo cam, Yecu omako mugati; ci olego gum i kome, ocako baro iye, omiyo bot lupwonnye, kun wacci, “Wugam man, man aye koma.” ²³Dok otiŋo kikopo, ci opwoyo, ocako miyone botgi, gin gumato. ²⁴Yecu owaco botgi ni, “Man aye remona me gicikke ma ocwer pi jo mapol. ²⁵Adada awacciwu ni, pe dok abimato pig olok, nio wa i kare ma abicako dok matone manyen wa i ker pa Lubaŋa.”²⁶Ka doŋ gutyeko wero wer, ci gucito i wi got Jeituni ²⁷Yecu owaco botgi ni, “Wun ducu wubitenya woko kena, pien yam gicoyo ni, ‘Abigoyo lakwat, ci romi gibiket woko ata.’²⁸Ento lacen ka doŋ acer woko ci abitelo nyimwu me cito i Galilaya.” ²⁹Petero ogamo ni, “Kadi ka jo mukene ducu gibitenyi woko, ento an pe abitenyi ata.”³⁰Yecu owacce ni, “Adada awacci ni, tin ki i dyewor, ma noŋo twon gweno peya onwoyo koko kiryo, noŋo in doŋ ityeko kwera woko tyen adek kulu.” ³¹Ento Petero dok ogamo matek twatwal ni, “Twara ma ato kacel kwedi, pe abikweri.” Gin ducu gucako loko kit meno bene.³²Gucito i kabedo ma nyiŋe Gececemane, ci ociko lupwonnyene ni, “Wun koŋ wubed kany, an koŋ acileg Lubaŋa.” ³³En otero Petero ki Yakobo ki jon, ci cwinye ocako poto matek ki kumo bene madwoŋ. ³⁴Ocako wacogi ni, “An cwinya tye ka waŋ matek, mito neka woko. Wubed ka kiyo piny kany.”³⁵Ocito anyim manok, ci oguŋo oryebbe piny olego ni, “Ka ce twerre, lakit cawa-ni doŋ oa woko i koma.” ³⁶Ci olego ni, “Abba, Wora, jami ducu twerre ki boti; kwany kikopo man woko ki i koma; ento pe obed kit ma an amito, obed kit ma in imito.”³⁷Ka odwogo botgi onoŋo gunino woko, ci owaco bot Petero ni, “Cimon, inino woko ce? Pe itwero kiyo piny pi cawa acel mo? ³⁸Wuki, wuleg Lubaŋa, wek pe wudony i abita mo; cwiny kikome mito loyo abita pa Catan, ento kom aye nyap.” ³⁹Dok odok ka lego Lubaŋa, kun nwoyo lego lega acel-lu.⁴⁰Ka dok odwogo onoŋo gunino woko, pien onoŋo nino doŋ omako waŋgi twatwal; pe doŋ giŋeyo gin ma myero gidokke iye. ⁴¹Ka dok odwogo botgi tyen me adekke, openyogi ni, “Wun pud wunino ce? Pud wutye ka yweyo bo? Doŋ otum, ki cawa bene doŋ oromo; wod pa dano doŋ gimiyo woko i ciŋ lubalo. ⁴²Doŋ wua malo, orya wunu wacitu; nen dano ma odoba doŋ tye cok.”⁴³Cutcut ma Yecu pud tye ka lok-ki, Juda otugi tuc; en yam ŋat acel ma i kin jo apar wiye aryo-ni. En obino ki lwak ma gua bot ajwagi madito pa Lubaŋa ki lupwony-cik ki ludoŋo, ma gitye ki pala lucwan ki odoo-gu. ⁴⁴Juda ma odobe-ni yam omiyogi lanyut. En owacci, “Dano ma abimoto kun anoto leme, meno aye en kikome; wutugi make woko, wutere kun wugwoke maber.” ⁴⁵Ka Juda obino ci okemo bot Yecu atir, ocako mote ni, “Lapwony,” ci onoto leme. ⁴⁶Gin bene gutugi poto i kome, gumake woko cut.⁴⁷Dano mo acel ma onoŋo ocuŋ ka ŋete ocako woto pala lucwanne, otoŋo ki opii pa ajwaka madit pa Lubaŋa, oŋuno ite woko. ⁴⁸Yecu owaco botgi ni, “Wubino bota ki pala lucwan ki odoo-gu me maka, macalo wubino i kom layak mo? ⁴⁹Abedo ka pwony i ot pa Lubaŋa jwijwi, ma kun abedo iye kwedwu, ci pe yam wumaka do. Doŋ wumaka, wek ginacoya ocobbe kakare.” ⁵⁰Gin ducu guriŋo woko, guweke odoŋ kene.⁵¹Awobi mo odwalo cuka boŋo camanini keken i kome, ci olubo ki kor Yecu; gin gumake bene, ⁵²ento en oweko cukane odoŋ, ci oriŋo woko nono laboŋo mo.⁵³Gutero Yecu bot ajwaka madit pa Lubaŋa, kun onoŋo ajwagi madito ki ludoŋo-gu ki lupwony-cik gucokke kacel. ⁵⁴Petero obedo ka lubo kor Yecu ki cencen nio kwede wa i dyekal pa ajwaka madit; obedo ka oyo mac kacel ki lutic.⁵⁵Ajwagi madito ki jo ma i Lukiko ducu guyenyo lok me caden ma mako kom Yecu ma miyo gineke; guyenyo kwe pe gunoŋo mo. ⁵⁶Lwak lucaden mapol gubedo ka kelo lok goba i kome, ma lokgi ducu pe rwatte.⁵⁷Jo mukene gua malo, ci gukelo lok goba i kome ni, ⁵⁸“Wan wawinyo ka en loko ni, ‘An amuko ot pa Lubaŋa-ni woko, ma yam gigero ki ciŋ-ŋi, ci dok agero mukene-ne nino adek keken, ma pe gitiyo ki ciŋ.’ ” ⁵⁹Kadi bed gukelo lok goba kit meno, ento lok ma gukelo pe rwatte.⁶⁰Ajwaka madit otirre malo ci ocuŋ i dyere, ocako penyo Yecu ni, “Lwak adot ma lucaden gudoti kwede-ni in igamo niŋniŋ?” ⁶¹Yecu pe ogamo, oliŋ gire aliŋa. Ajwaka madit dok openye ni, “In aye Kricito ma Lubaŋa oyero, Wod pa Lubaŋa ma gipwoyo-ni bo?” ⁶²Yecu ogamo ni, “An aye a en; dok bene wubineno ka Wod pa dano obedo ki Won Twer atena i wi kom me deyo ka ŋete, tuŋ acucce; ka dok bino ki pol me polo-gu.”⁶³Ajwaka madit ocako yeco ginarukane woko kekene, kun wacci, “Pud dok wumito kit caden aŋo kaa? ⁶⁴Doŋ wutyeko winyo kit ma en yeto kwede Lubaŋa. Wutamo iye lok aŋo doŋ?” Gin ducu guŋolo lokke ni, balle romme to. ⁶⁵Jo mukene gucako ŋulo laa i kome, kun giumo waŋe woko, ka gidoŋe kwede, ma kun giwacci, “In ma lanebi-ni, tuc ba,” ki lutic-gu gupoto i kome kun gipale ki ciŋgi.⁶⁶I kare ma onoŋo Petero tye piny i dyekal, ci aŋeca pa ajwaka madit acel mo obino kenyo. ⁶⁷Ka oneno Petero ka oyo mac, ka obolo waŋe i kome ci owacce ni, “In bene onoŋo itye ki dano meno mua ki i Najaret, en Yecu.” ⁶⁸Petero ocako kwero woko, ma kun wacci, “An pe aŋeyo, pe bene aniaŋ gin ma ibeloko.” Ka Petero okato woko i doggaŋ, ci twon gweno otugi kok cut.⁶⁹Aŋeca meno dok onene, ci dok ocako tito bot jo ma gucuŋ kunnu ni, “Dano man en bene ŋat acel ma i kingi.” ⁷⁰Petero dok ocako kwerone woko aye. Kare dok okato manok mo, jo ma onoŋo gucuŋ kenyo dok guwaco ki Petero ni, “Ada in i ŋat acel ma i kingi, pien in Lagalilaya.”⁷¹En ocako kwoŋŋe kun lamme kekene ni, “An pe aŋeyo dano man ma wun wuloko pireni.” ⁷²Dok cutcut twon gweno okok tyen me aryone. Petero ocako po lok ma nene Yecu owacce ni, “Ma noŋo twon gweno peya onwoyo koko kiryo, noŋo in doŋ ityeko kwera woko tyen adek kulu.” Ci ocako koko matek cut.

¹Ka piny doŋ oru, oyotoyot ajwagi madito ki ludoŋo ki lupwony-cik ki jo ma i Lukiko ducu, gupiro lok kacel. Ci gutweyo Yecu woko gutere kwede gumiye bot Pilato. ²Pilato ocako penye ni, “In i kabaka pa Lujadaya bo?” Yecu ogamo ni, “Iwaco kakare gire.” ³Ajwagi madito gucako dote ki lwak adot mapol.⁴Pilato dok openye ni, “Pe koŋ idok iye ce? Pe ineno kit lwak lok mapol ma gidoti kwede-ni?” ⁵Yecu dok pe omedo ki dok iye lok mo, omiyo Pilato ouro matek.⁶Ka i kare me nino madito onoŋo Pilato gonyo lamabuc mo woko ma dano gulege pire. ⁷I kare-nu onoŋo tye laco mo ma nyiŋe Baraba, ma yam gitweyo i mabuc i kin jo mujemo ma guneko dano i kare me jemogi-nu. ⁸Lwak gucako cito bot Pilato, gupenye wek otim kit ma yam tiyo-ni.⁹Pilato openyogi ni, “Wumito mono ni agonnyiwu kabaka pa Lujudaya?” ¹⁰Onoŋo Pilato oŋeyo ni ajwagi madito gumiyo Yecu bote pi nyeko. ¹¹Ajwagi madito gupiyo lwak ni twara gigonnyigi Baraba.¹²Pilato dok openyo lwak ni, “Dano ma wulwoŋo ni kabaka pa Lujudaya-ni doŋ abitimo niŋniŋ?” ¹³Lwak gucako wo ni, “Gure woko i kom yatariya.”¹⁴Pilato dok openyogi ni, “Piŋo kaa, otimo kit gin aŋo marac?” Ento lwak gumedde ki wo ni, “Gure woko i kom yatariya.” ¹⁵Pi mito kweyo cwiny lwak, omiyo Pilato oye gonnyigi Baraba, ocako pwodo Yecu ki del, ka omiye wek gigure woko i kom yatariya.¹⁶Askari gutero Yecu wa i ot pa kabaka, ma gilwoŋo Praitorion, ci gulwoŋo buca monygi ducu gucokke kacel. ¹⁷Ka gucako ruko Yecu ki boŋo makwar, ka gucweyo lulakana okuto, gurwako i wiye, ¹⁸kun gimote ni, “Itye ba, kabaka pa Lujudaya!”¹⁹Gucako goyo wiye ki gayi, ka guŋulo laa i kome-gu, kun girumo coŋgi me miye woro. ²⁰Ka doŋ gutyeko ŋale, ci gulunyo boŋo makwar woko ki i kome, ka dok guruke ki boŋone kikome, ci gutere kwede woko ka gure i kom yatariya. ²¹Gucako mako dano mo ma onoŋo obekato mua ki i kin gaŋ ci gudiye ka tiŋo yatariya pa Yecu, nyiŋe Cimon dano me Cirene, ma won Alegijanda ki Rupo.²²Gutero Yecu i kabedo ma gilwoŋo ni Golgota, ma te lokke ni kabedo me cogo wic. ²³Gucako miye koŋo vino ma girubo iye yat murra; ento en okwero matone woko. ²⁴Ka doŋ gugure i kom yatariya, ci gupoko boŋŋine woko i kingi, kun gibolo kwir wek ginen boŋŋi ma ŋat acel acel bitero.²⁵Giguro Yecu i kom yatariya i cawa adek me odiko. ²⁶Gicoyo i waraga gin ma nyuto lok ma gidote iye ni, “Kabaka pa Lujudaya.” ²⁷Gigure kacel ki luyak mogo aryo, dano acel tuŋ lacuc ki acel tuŋ lacam. ²⁸Omiyo ginacoya ocobbe kakare ni, “Gikwane i kin lubalo.”²⁹Jo ma yam gimol gikato ki ka ŋete gubedo ka yete, kun giyeŋo wigi, ma giwacci, “Nye, in ma imuko ot pa Lubaŋa woko, ci igero pi nino adek-ki, ³⁰doŋ ilarre keni, a woko ki i kom yatariya!”³¹Ki ajwagi madito bene guŋale, ma giloko ki luwotgi kacel ki lupwony-cik-gu, kun giwacci, “Yam bedo ka laro jo mukene, pe twero larre kene. ³²Wek tin Kricito, ma kabaka me Icrael, olor piny ki i kom yatariya, wek wanen ka wacak ye.” Wa jo ma gigurogi kacel kwede bene gucaye.³³Ka cawa oromo abicel, piny ocido woko macol i lobo ducu, nio kwede wa i cawa aboŋwen. ³⁴I kom cawa aboŋwen Yecu odaŋŋe ki dwan maloŋo ni, “Eloi, Eloi, lama cabaktani?” ma te lokke ni, “Lubaŋana, Lubaŋana, itenya woko piŋo?” ³⁵Ka jo ma onoŋo gucuŋ kunnu guwinyo lokke, ci guwacci, “Winyu ka en lwoŋo Elia ca.”³⁶Ci dano acel oriŋo, okwanyo amor, oluto i koŋo vino mawacce, orwako i wi tal gayi, omiyo ki Yecu ni omati, kun wacci, “Weku mono koŋ wanen ka Elia bino ka kwanye woko ki i kom yatariya.” ³⁷Yecu dok odaŋŋe ki dwan maloŋo, ka oto. ³⁸Ci boŋo kicika ma i ot pa Lubaŋa ocako yec woko opokke dul aryo, oyec ki malo, nio kwede wa i tere piny.³⁹Ladit ma loyo askari, ma onoŋo ocuŋ cok i nyime, ka oneno kit ma Yecu oto kwede, owacci, “Adada, dano man onoŋo Wod pa Lubaŋa!” ⁴⁰Dok onoŋo tye mon mogo ma gucuŋ ki cen ka nenone; onoŋo tye Maliam Lamagdala, ki Maliam min Yucepu matidine ki Yoce, ki Calume. ⁴¹Gubedo ka lubo kor Yecu ki i Galilaya, gubedo ka konye bene, dok onoŋo tye lwak mon mapol ma gubino kwede wa i Jerucalem.⁴²I kom nino me Yubbe, en nino ma i nyim cabit, ka piny doŋ oyuto, ⁴³Yucepu me Arimataya obino; en yam dano madit ma lamemba me Lukiko ma gipwoyo bene, en kikome obedo ka kuro ker pa Lubaŋa. En odiyo cwinye, ci odonyo wa bot Pilato, olego kom Yecu. ⁴⁴Pilato ouro ka doŋ otyeko to woko oyot kumeno; ci olwoŋo ladit ma loyo askari, openye ka ce doŋ oto woko.⁴⁵Ka ladit ma loyo askari otyeko niaŋo en, ci omiyo kom Yecu bot Yucepu. ⁴⁶Yucepu owilo boŋo camanini, ci okwanyo kom Yecu woko ki i kom yatariya, oboyo ki boŋo camanini, otero kome opyelo i lyel ma en okwinyo oroko i got, ci ocego wiye woko ki got ma oloro ki dog lyel. ⁴⁷Maliam Lamagdala ki min Yoce guneno ka ma giyiko iye kome.

¹Ka cabit doŋ okato, ci Maliam Lamagdala ki Maliam min Yakobo, ki Calume guwilo aŋwece pi wot kwede ka wiro kom Yecu. ²I kom nino mukwoŋo me cabit mon gupuk odiko con ma ceŋ otuc, ci gucito i wi lyel.³Gucako pennye kekengi ni, “Aŋa mono ma bidirowa got woko cen ki i dog lyel?” ⁴Ka gutiŋo waŋgi ci guneno got meno doŋ gidiro woko cen; onoŋo gotte dit twatwal.⁵Ka gudonyo i lyel, ci guneno latin orobo mo ma oruko boŋo matar, obedo kwede yo tuŋ acuc; gucako urone mada. ⁶En owaco botgi ni, “Pe wubed ka urone; wun wubeyenyo Yecu me Najaret ma giguro i kom yatariya-ni. En doŋ ocer woko, pe doŋ tye kany. Koŋ wunen ka ma gipyelo iye kome. ⁷Ento wucit wutit ki lupwonnyene, ki bot Petero bene ni, en doŋ tye ka wot me telo nyimwu wa i Galilaya kuca; wubineno kome kunnu, kit ma yam en otito botwu-ni.”⁸Ci mon gukatti woko ki i lyel, gucako ŋwec ki myelkom pi lworo ma omakogi matek twatwal; lworo ogeŋogi tito lokke ki ŋatti mo.⁹Ka en doŋ ocer odiko con i nino mukwoŋo me cabit, okwoŋo nyutte bot Maliam Lamagdala, ma yam en oryemo cen abiro i kome-ni. ¹⁰En otugi tero lok bot jo ma yam gibedo kwede, i kare ma gitye ki cola ki kumu-gu. ¹¹Ka guwinyo ni en tye gire makwo, dok ni otyeko nyutte, kome onen bot Maliam, pe guye lokke.¹²Lacen Yecu dok onyutte onen bot jo mukene i kit mapatte; onen bot lupwonnye ma onoŋo gicito ka wot i kin gaŋ. ¹³Gin dok gucito gutito bot jo mudoŋ-ŋi, gin bene dok pe guye lokgi.¹⁴Ka lacen dok onyutte onen bot jone apar wiye acel ma onoŋo gitye i dog cam. Ocako da i komgi pi kwero ye lok, ki pi tekcwinygi, pien gukwero ye lok pa jo ma doŋ guneno kome i kare ma ocer-ri. ¹⁵Ka doŋ owaco botgi ni, “Wucit i lobo ducu, wucitit iye lok me kwena maber bot ginaketa ducu. ¹⁶Dano ma oye, ce gibatija en, ci bilarre; ento dano ma okwero ye aye kop biloyo en.¹⁷Lanyut magi binen ki bot jo ma giye: gibiryemo cen pi lwoŋo nyiŋa, gibiloko ki leb manyen, ¹⁸gibimako wa twol-gu, dok ka gibimato gin ma neko dano, ci pe bitimogi marac; gin bene gibiketo ciŋgi i kom lutwo ci gibicaŋ”¹⁹Ka Rwot Yecu doŋ otyeko lok kwedgi, ci gitiŋe gitere woko malo i polo, ci ocako bedo piny ka ŋet Lubaŋa atena i kabedo me deyo yo tuŋ acucce. ²⁰Ci lupwonnye gucito ka tito lok i kabedo ducu, kun Rwot kikome bene tye ka tic kwedgi, kun moko lok ma gitito ki lanyutte.

¹Jo mapol doŋ gutemo coyo lok i kom gin ma otimme i kinwa, ²macalo jo ma guneno ki waŋgi nia i acakki, dok ma gudoko lutic me lok meno, gukwaŋo botwa. ³Pi meno, Ladit Teopilo, ka doŋ aŋiyo gin ducu nia i acakki, an bene atamo ni bedo ber ka acoyo piri, kun aryeyo kikore, ⁴wek iniaŋ ada me lok meno ma yam gipwonyi kwede.⁵I kare pa Kerode kabaka me Judaya, onoŋo tye ajwaka pa Lubaŋa mo ma nyiŋe Jekaria, me waŋ tic pa Abia; yam tye ki dakone ma i kin anyira pa Aron, nyiŋe Elicabet. ⁶Gin aryo ducu yam kitgi atir i nyim Lubaŋa, kun gilubo cik pa Rwot ducu laboŋo bal. ⁷Ento onoŋo gipe ki litino, pien Elicabet yam lalur, gin aryo ducu onoŋo doŋ guti woko.⁸I kare ma Jekaria tye ka tiyo tic me ajwaka i nyim Lubaŋa, i kare me waŋ ticce, ⁹macalo kit pa ajwagi tye, kwir okwanye me donyo i ot pa Rwot ka waŋo gitye woko ka lega i cawa me waŋo odok eceta. ¹⁰Lwak dano ducu onoŋo gitye woko ka lega i cawa me waŋo odok eceta.¹¹Lamalaika pa Rwot onen bote kun ocuŋ yo tuŋ lacuc i ŋet keno tyer me waŋo odok eceta. ¹²Ka Jekaria onene, ci cwinye opoto, lworo omake. ¹³Ento lamalaika owacce ni, “Pe ilwor, Jekaria, pien legani doŋ Lubaŋa owinyo. Dakoni Elicabet binywalli latin laco, ibicako nyiŋe Jon.¹⁴Ibibedo ki yomcwiny, cwinyi bikwe, jo mapol cwinygi bibedo yom pi nywalle; ¹⁵pien en bibedo madit i nyim Rwot. En pe bimato koŋo vino kadi gin ma mero dano; en bipoŋ ki Cwiny Maleŋ, nia i i minne.¹⁶En bidwoko Luicrael mapol bot Rwot Lubaŋagi, ¹⁷en bitelo nyime i cwiny ki tek pa Elia, pi loko cwiny wegi litino i kom litinogi; pi dwoko dano ma pe winyo cik i ryeko pa jo ma kitgi atir, dok me yubo pi Rwot dano ma doŋ guyubbe.”¹⁸Jekaria openyo lamalaika ni, “Abiŋeyo man niŋniŋ? Pien an doŋ ati woko, dakona bene doŋ oti.” ¹⁹Lamalaika ogamo doge ni, “An Gabriel, acuŋ i nyim Lubaŋa; giora ka lok kwedi, akelli kwena man maber. ²⁰Winy ba, ibiliŋ ma pe itwero lok, nio i nino meno ma lok man bitimme iye, pien pe iye lokka, ma bicobbe ka kare oromo.”²¹Lwak onoŋo gubedo ka kuro Jekaria, guuro rune twatwal i ot pa Lubaŋa. ²²Ka Jekaria okatti woko, onoŋo pe twero lok kwedgi, omiyo guniaŋ ni oneno ginanyuta i ot pa Lubaŋa macalo lek. En obedo ka gwelogi kun pe twero lok. ²³Ka kare me ticce otum, ci odok i pacone.²⁴Ka kare okato manok, dakone Elicabet ogamo ic. Okanne kwede pi dwe abic, kun waco ni, ²⁵“Rwot otimo kit meno i koma, i kare ma onena iye, me kwanyo lewic woko ki i koma i kin dano.”²⁶I dwe me abicel Lubaŋa ooro lamalaika Gabriel i gaŋ mo i Galilaya, ma nyiŋe Najaret, ²⁷bot nyako ma peya oŋeyo laco, ma laco ma nyiŋe Yucepu otoŋo keny i kome; nyako meno nyiŋe Maliam. ²⁸Lamalaika obino bote, omote ni, “Itye ba, in ma gimiyi gum! Rwot tye kwedi! ²⁹Ento Maliam cwinye opoto pi lok man, obedo ka tamo te lok me mot man.³⁰Lamalaika owacce ni, ‘Pe ilwor, Maliam pien ilimo pwoc ki bot Lubaŋa. ³¹Nen, ibiyac, ibinywalo latin laco, ibicako nyiŋe Yecu. ³²En bibedo dit, gibilwoŋe ni, Wod pa En Mamalo Twal; Rwot Lubaŋa bimiye komker pa kwarone Daudi. ³³En biloyo jo me ot pa Yakobo matwal; kerre pe bigik.”³⁴Maliam openyo lamalaika ni, “Lok man bibedo niŋniŋ, ma kun an pe aŋene ki laco?” ³⁵Lamalaika odokke iye ni, “Cwiny Maleŋ bibino i komi, tek pa En Mamalo Twal biumi macalo tipo; pi meno latin ma gibinywalo-ni gibilwoŋe Maleŋ, Wod pa Lubaŋa.³⁶Nen, watti Elicabet doŋ oyac i tiyone, binywalo latin laco; en ma yam gilwoŋo ni lalur kombeddi doŋ tye ki ic me dwe abicel. ³⁷Pien pe tye gin mo ma loyo Lubaŋa.” ³⁸Maliam owaco ni, “Nen, an aŋeca pa Rwot; wek obed bota kit macalo iwaco.” Lacen lamalaika oa woko ki bote.³⁹I kare meno Maliam oa, ocito oyotoyot i lobo ma obedo gotgot i gaŋ mo me Juda. ⁴⁰ci odonyo i ot pa Jekaria, omoto Elicabet. ⁴¹Ka Elicabet owinyo mot pa Maliam, ci latin otiŋŋe ki i iye. Elicabet opoŋ ki Cwiny Maleŋ.⁴²odaŋŋe ki dwan maloŋo ni, “Itye ki gum i kin mon, latin ma i ii bene tye ki gum! ⁴³Lok man kono oa ki kwene, lutuwa, min Rwoda me bino bota? ⁴⁴Pien nen, ka awinyo dwan me motti, latin ma i iya otiŋŋe ki yomcwiny. ⁴⁵Itye ki gum, in ŋat ma oye, pien lok ma Rwot otito boti bicobbe kakare.”⁴⁶Maliam owaco ni, “Kwona pako Rwot, ⁴⁷cwinya yom i kom Lubaŋa Lalarra.⁴⁸pien oneno can pa aŋecane. Nen, nia tin yalwak me kare ducu gibilwoŋa ni lagumkom; ⁴⁹pien Won Twer Ducu otima gin madit, nyiŋe bene leŋ.⁵⁰Kicane tye bot yalwak me kare ducu, i kom jo ducu ma gilwore. ⁵¹Otiyo tic matek ki bade, olalo luwakke i tam me cwinygi.⁵²Oreto luker ki i wi komkergi omiyo dito bot lucan. ⁵³Jo ma kec nekogi omiyo giyeŋ ki gin maber, oryemo lulonyo gudok cen nono.⁵⁴Okonyo laticce Icrael, opo pi timo kica, ⁵⁵macalo oloko bot kwariwa, bot Abraim ki bot likwaye matwal.”⁵⁶Maliam ori bot Elicabet dwe adek, ka lacen odok i pacone. ⁵⁷Ka kare me nywal pa Elicabet doŋ oromo, ci onywalo latin laco. ⁵⁸Ka luwote ki wadine guwinyo ni Rwot onyuto kicane madwoŋ i kome kuman, cwinygi obedo yom kacel kwede.⁵⁹I nino me aborone gubino ka liro latin. Gumito cako nyiŋe ki nyiŋ wonne Jekaria, ⁶⁰ento minne ogamo ni, “Pe kit meno, gibilwoŋe ni Jon.” ⁶¹Gudokke iye ni, “Pe tye ŋat mo ma nyiŋe calo meno i kin wadiwu ducu do.”⁶²Gugwelo wonne ni en mito cako nyiŋe aŋa? ⁶³En openyo pi got coc, ci ocoyo ni, “Nyiŋe Jon.” Gin ducu guuro.⁶⁴Cutcut dog Jekaria oyabbe, te lebe ogonnye, ci oloko kun pako Lubaŋa. ⁶⁵Lworo omako dano ducu ma bedo cok i ŋetgi; lok meno ducu oywek i lobo Judaya ducu ma obedo gotgot. ⁶⁶Dano ducu ma guwinyo gumako i cwinygi, kun giwaco ni, “Latin man kite bibedo niŋniŋ?” Pien ciŋ Rwot tye kwede.⁶⁷Wonne Jekaria opoŋ ki Cwiny Maleŋ, oloko macalo lanebi ni, ⁶⁸“Gipwo Rwot Lubaŋa pa Icrael, pien doŋ olimo jone, okokogi.⁶⁹Otiŋo piwa lalar matek i ot pa laticce Daudi, ⁷⁰macalo yam oloko i dog lunebine maleŋ ma gubedo nia con ki con, ⁷¹me larowa ki bot lukworwa, ki i ciŋ jo ducu ma kwerowa.⁷²pi timo kica bot kwariwa kun opo pi gicikkene maleŋ ⁷³ki kwoŋ ma okwoŋo bot kwarowa Abraim, ⁷⁴ni ebimiyowa watiyo bote laboŋo lworo, kun olarowa ki i ciŋ lukworwa, ⁷⁵kun waleŋ, dok kitwa atir i nyime pi nino me kwowa ducu.⁷⁶In bene latin, gibilwoŋi lanebi pa En Mamalo Twal pien ibitelo nyim Rwot pi yubo yone, ⁷⁷kun imiyo ŋec me lar bot rokke ma bino pi weko balgi,⁷⁸pi kica madwoŋ pa Lubaŋawa ma oweko piny oru piwa ki malo, ⁷⁹me menyo jo ma bedo i piny macol ki i tipo me to, ki me tiro tyenwa i yo me kuc.”⁸⁰Latin odoŋo, tek omedde i cwinye, obedo i tim nio i nino ma ginyute iye bot jo Icrael.

¹I kare meno cik oa bot Cecar Augucito ni gico nyiŋ dano ducu ma i wi lobo. ²Man obedo coc mukwoŋo ma gicoyo, i kare ma Kurenio loyo lobo Ciria. ³Dano ducu gucito ka cone, ŋat acel acel i gaŋgi.⁴Yucepu bene oa ki i Galilaya, ki i gaŋ me Najaret, ocito i Judaya, i gaŋ pa Daudi ma gilwoŋo Beterekem, pien en yam ŋat acel i kin likwayo pa Daudi, ⁵wek econe ki dakone Maliam ma onoŋo otoŋo keny i kome, ma onoŋo oyac.⁶I kare ma gitye kunnu, kare me nywalle oromo. ⁷Onywalo latin kayone ma laco, oumo kome ki boŋo, opyele kwede i weer pa dyaŋ, pien onoŋo ot opoŋ woko pigi i ot welo.⁸I lobo kunnu onoŋo tye iye lukwat ma gibedo i tim, kun gigwoko romigi dyewor. ⁹Cutcut lamalaika pa Rwot oturo ki bino, ocuŋ i kingi, deyo pa Rwot oryeny orumogi, ci lworo omakogi matek.¹⁰Lamalaika owaco botgi ni, “Pe wulwor, pien nen, akelliwu lok maber me yomcwiny ma bibedo bot dano ducu. ¹¹Tin i gaŋ pa Daudi ginywalo piwu lalar, en Kricito Rwot. ¹²Man bibedo gin ma nyuto: wubinoŋo latin ma giumo ki boŋo, ma gipyele, obuto i weer pa dyaŋ.”¹³Oyotoyot lwak mony me polo onoŋo tye kacel ki lamalaika meno; ci gipako Lubaŋa kun giwaco ni, ¹⁴“Deyo obed bot Lubaŋa malo i wi polo kuc obed i kin jo ma en pwoyo!”¹⁵Ka doŋ lamalaika oa woko ki botgi, odok i polo, ci lukwat guloko kekengi ni, “Koŋ wacitu mono wa i Beterekem, wek wacinenu gin man ma otimme, ma Rwot otittiwa pire-ni.” ¹⁶Gucito oyotoyot, gunoŋo Maliam ki Yucepu, ki latin lakere ma gipyelo i weer pa dyaŋ.¹⁷Ka guneno, gutito bot dano lok ma yam gitito botgi i kom latin meno; ¹⁸dano ducu ma guwinyo guuro lok ma lukwat gutito botgi. ¹⁹Ento Maliam okano lok magi ducu, kun tamo ki i cwinye. ²⁰Lukwat gudok kun gimiyo deyo bot Lubaŋa, gipake pi gin ducu ma guwinyo, dok guneno, macalo yam gitito botgi.²¹Ka nino aboro doŋ oromo me liro latin, gicako nyiŋe Yecu, nyiŋ ma lamalaika yam ocako ka en pud peya tye i ic.²²Ka kare doŋ oromo me lonnyegi macalo cik pa Moses tye, ci gutere i Jerucalem wek gityere bot Rwot, ²³macalo gicoyo i cik pa Rwot ni “Litino kayo ducu ma co gibilwoŋogi maleŋ bot Rwot”, ²⁴dok wek gityer gitum, macalo gicoyo i cik pa Rwot ni, “amam aryo, nyo litino akuri aryo.”²⁵Yam tye i Jerucalem dano mo ma nyiŋe Cimeon. En yam dano ma kite atir ma lworo Lubaŋa, kun kuro kare ma gibikweyo iye cwiny jo Icrael; Cwiny Maleŋ onoŋo tye kwede. ²⁶Cwiny Maleŋ onoŋo otyeko nyuto bote ni, en pe bito ma peya oneno Kricito pa Rwot.²⁷En obino i ot pa Lubaŋa kun Cwiny Maleŋ aye tele. Ka lunyodo gukelo latin Yecu wek gitimme macalo kit me cik tye, ²⁸Cimeon otiŋe i bade, opwoyo Lubaŋa kun waco ni, ²⁹“Koni doŋ icik laticci, Rwot, ocit ki kuc macalo yam iciko.³⁰pien waŋa doŋ oneno larri ³¹ma iyubo i nyim rok ducu, ³²me bedo ceŋ ma yabo muŋ bot Lurok, ki deyo pa joni Icrael.”³³Wonne ki minne guuro lok ma giwaco i kome. ³⁴Cimeon olego gum i komgi, kun waco bot minne Maliam ni, “Nen, latin man giketo wek Luicrael mapol opoti, wek gua doki ki me bedo lanyut ma giyeto, ³⁵dok bene pala lucwan bicobo cwinyi pil, wek tam ma i cwiny dano mapol oyabbe ka maleŋ.”³⁶Yam tye lanebi mo ma dako, nyiŋe Anna, nya pa Panuel, pa jo Acer. Onoŋo doŋ oti twatwal, pien otyeko mwaka abiro bot cware cakke i kare ma en pud nyako; ³⁷ka doŋ cware oto ori nio i mwaka pyeraboro wiye aŋwen me ditte. En yam pe a ki i ot pa Lubaŋa, obedo ka woro Lubaŋa kun ri kec dok lego dyewor ki dyeceŋ. ³⁸En obino i cawa-nu, opwoyo Lubaŋa, otito pi latin-nu bot dano ducu ma yam kuro kare me koko jo Jerucalem.³⁹Ka lunyodone doŋ gutyeko cobo lok ducu ma tye i cik pa Rwot, ci gudok i Galilaya, i gaŋgi Najaret. ⁴⁰Latin odoŋo odoko matek, kun opoŋ ki ryeko; cwiny Lubaŋa obedo yom i kome.⁴¹Lunyadone yam gicito i Jerucalem mwaka ki mwaka pi nino madit me Kato. ⁴²Ka mwaka me ditte oromo apar wiye aryo, ci gucito kunnu macalo kit me nino madit tye. ⁴³Ka nino madito doŋ otum, ma gidok paco, latin Yecu odoŋ woko i Jerucalem. Lunyodone onoŋo pe giŋeyo, ⁴⁴ento gutamo ni en tye i kin lwak. Guwoto wot me nino acel, guyenye i kin lutugi ki i kin luwotgi.⁴⁵Ka pe gunoŋe, ci gudok cen i Jerucalem ka yenye. ⁴⁶Ka nino adek okato, ci gunoŋe i ot pa Lubaŋa; obedo i kin lupwony, kun winyo pwonygi, dok penyogi. ⁴⁷Dano ducu ma yam guwinye guuro niaŋŋe, ki kit ma en dok kwede i peny.⁴⁸Ka lunyodone gunene, guuro; minne openye ni, “Latinna, piŋo itimowa kit man? Nen woru ki an wabedo ka yenyi kun wakumo.” ⁴⁹En ogamo doggi ni, “Wuyenya piŋo? Pe wuŋeyo ni myerona me bedo i ot pa Abana?” ⁵⁰Ento pe guniaŋ lok ma en oloko botgi.⁵¹Owoto kacel kwedgi, obino Najaret, obedo kun winyogi; minne okano lok meno ducu i cwinye. ⁵²Yecu odoŋo kun medde i ryeko, dok kun medde ki noŋo pwoc ki bot Lubaŋa ki bot dano bene.

¹I mwaka me apar wiye abic me loc pa Tiberio Cecar, Pilato onoŋo loyo Judaya, Kerode onoŋo loyo Galilaya, ominne Pilipo kono onoŋo loyo lobo Ituria ki Trakoniti, Lucania onoŋo loyo Abilene, ²Anac ki Kayapa aye onoŋo gin ajwagi madito pa Lubaŋa. I kare meno lok pa Lubaŋa obino bot Jon wod pa Jekaria i tim.³En owoto i lobo ducu ma cokcok ki Judaya kun tito lok me kwenane ni, “Wuŋut, wek gibatijawu, ci Lubaŋa biweko balwu.⁴Macalo gicoyo i buk me lok pa lanebi Icaya ni,“Dwan dano mo ma daŋŋe i tim ni, Wuger yo pa Rwot, wutir yone ocuŋ atir.⁵Luŋ ducu gibitoro woko, godi ki cere ducu gibidwokogi woko piny, ka ma ogonne gibitiro cuŋ atir, dok yo ma obedo burbur gibipiro woko. ⁶Dano ducu gibineno kit ma Lubaŋa olarowa kwede.”⁷Jon owaco bot lwak ma gubino bote pi batija ni, “Wun litino ororo, aŋa ma otito botwu ni wuriŋ kiniga ma mito bino?⁸Doŋ wuti gin ma nyuto ni wuŋut i kom balwu, pe dok wucak tamo ni, ‘Watye ki kwarowa Abraim’. Koŋ wunen, awaco botwu ni, Lubaŋa tye ki twero me miyo gweŋ magi olokke odok likwayo Abraim.⁹Kombeddi doŋ giketo latoŋ woko i lwit yadi; yat acel acel ma pe nyak nyige mabeco, gitoŋo gireto woko piny, ci gibolo woko i mac.”¹⁰Lwak gupenye ni, “Watim aŋo doŋ?” ¹¹En odok iye botgi ni, “ŋat ma tye ki kanyi aryo opok bot ŋat ma pe kwede; ŋat ma tye ki cam otim kit meno bene.”¹²Lujog-mucoro bene gubino wek gibatijagi, gupenye ni, “Lapwony, wan kono watim aŋo?” ¹³Owaco botgi ni, “Pe wujog makato wel ma gicikowu.”¹⁴Askari bene gupenye ni, “Wan kono watim aŋo” En owaco botgi ni, “Pe wuyak ŋatti ki tek, pe wudot dano mo ki lok goba, wek mucarawu oromwu.”¹⁵Ka lwak gitye ka kuro, kun gipennye ki i cwinygi pi Jon, ka kono en Kricito ma Lubaŋa oyero, ¹⁶Jon odok iye botgi ni, “An abatijawu ki pii, ento ŋat ma kata ki tek tye ka bino, ma an pe amyero me gonyo warre. En bibatijawu ki Cwiny Maleŋ, dok ki mac.¹⁷Oderone tye i ciŋe me pyeto bel ducu ma i larone, en bidilo belle i dero, ento cuŋe en biwaŋo woko ki mac ma pe to.”¹⁸Jon otito lok me kwena maber bot lwak kun cuko cwinygi ki lok mukene mapol. ¹⁹Ento Kerode rwot madit ma yam Jon ojuko pi Kerodia ci-ominne, ²⁰otweyo Jon i mabuc, opoŋo kwede wi balle mukene ducu.²¹Ka doŋ obatija dano ducu, ma Yecu bene doŋ gibatija, ma kun en tye ka lega, ²²ci polo oyabbe, Cwiny Maleŋ olyanne piny macalo akuri i cal me kom, ci opye i kome. Ci dwan ocako winnye ma a ki i polo kun wacci, “In aye i Woda ma amaro, ma cwinya yom i komi.”²³I kare ma Yecu ocako ticce onoŋo doŋ tye ki mwaka ma mito romo pyeradek me ditte. Yam en wod pa Yucepu, macalo gitamo, ma en wod pa Eli, ²⁴wod pa Matat, wod pa Levi, wod pa Melki, wod pa Janai, wod pa Yucepu.²⁵wod pa Matatia, wod pa Amoc, wod pa Nakum, wod pa Eceli, wod pa Naggai, ²⁶wod pa Maat, wod pa Yocek, wod pa Yoda.²⁷wod pa Yoanan, wod pa Reca, wod pa Jerubabel, wod pa Cealtiel, wod pa Neri, ²⁸wod pa Melki, wod pa Addi, wod pa Kocam, wod pa Elmadam, wod pa Er, ²⁹wod pa Yecu, wod pa Eliejer, wod pa Yorim, wod pa Matat, wod pa Levi.³⁰wod pa Cimeon, wod pa Juda, wod pa Yucepu, wod pa Yonam, wod pa Eliakim, ³¹wod pa Melea, wod pa Menna, wod pa Matata, wod pa Natan, wod pa Daudi, ³²wod pa Yece, wod pa Obed, wod pa Boaj, wod pa Cala, wod pa Nakucon.³³wod pa Aminadab, wod pa Admin, wod pa Arni, wod pa Kejeron, wod pa Perej, wod pa Juda, ³⁴wod pa Yakobo, wod pa Icaka, wod pa Abraim, wod pa Tera, wod pa Nakor, ³⁵wod pa Cerug, wod pa Reu, wod pa Peleg, wod pa Eber, wod pa Cela.³⁶wod pa Kainan, wod pa Arpakcad, wod pa Cem, wod pa Nua, wod pa Lamek, ³⁷wod pa Metucela, wod pa Enok, wod pa Jared, wod pa Maalalel, wod pa Kainan, ³⁸wod pa Enoci, wod pa Ceji, wod pa Adam, wod pa Lubaŋa.

¹Yecu odwogo ki i Jordan kun opoŋ ki Cwiny Maleŋ, cutcut Cwiny Maleŋ otere wa i tim. ²Ci ori i tim pi nino pyeraŋwen, kun Catan obedo ka bite. Pe ocamo gin mo i kare meno ducu; ka otum, ci kec oneke.³Catan owacce ni, “Ka in i Wod pa Lubaŋa, wac ki got man olokke odok kwon.” ⁴Ento Yecu odok iye ni, “Yam gicoyo ni, ‘Dano pe bibedo kwo ki kwon keken.''⁵Catan dok otere malo, onyutte ker ducu ma i wi lobo i kine me kare matidi mo, ⁶owacce ni, “Abimiyi twer man ducu ki deyo man ducu, pien gityeko miyo bota, atwero miyo bot ŋat ma an amito. ⁷Pi meno, ka iwora, ci jami magi ducu bibedo meri.”⁸Yecu odokke iye ni, “Yam gicoyo ni, ‘Wor Rwot Lubaŋani, dok bene iti pire keken.'”⁹Dok otere i Jerucalem, ci ocibe ocuŋ i wi labila ot pa Lubaŋa, ci owacce ni, “Ka in i wod pa Lubaŋa, a ki malo kany ipot piny, ¹⁰pien yam bene gicoyo ni, ‘En biciko lumalaikane piri, wek gugwoki,’ ¹¹dok bene ni, ‘Gibijoli ki ciŋgi, wek pe iyok tyeni i kom got.’”¹²Yecu dok ogamo doge owacce ni, “Yam giwaco ni, ‘Pe item i Rwot Lubaŋani.’ ” ¹³Ka Catan doŋ otyeko bite, ci oweke kun kuro kare maber.¹⁴Yecu odwogo i Galilaya pi tek pa Cwiny Maleŋ; pire oywek i lobo ducu ma orumo kunnu. ¹⁵Opwonyo i kacokkegi, dano ducu guketo deyo i kome.¹⁶Obino i Najaret ka ma yam odoŋo iye, odonyo i kacokke i ceŋ cabit, kit macalo kite onoŋo tye. Oa malo ka kwan; ¹⁷gimiye buk pa lanebi Icaya. Oyabo buk, oyenyo ka ma gicoyo ni.¹⁸“Cwiny pa Rwot tye i koma, pien doŋ owira woko ki moo wek atit lok me kwena maber bot lucan. Oora me tito bot jo ma tye i opii ni gibigonyogi, ki bot jo ma waŋgi oto ni gibiyabo waŋgi, ki me gonyo jo ma giunogi wek gucit ki kuc, ¹⁹dok pi tito pi mwaka ma Rwot binyuto iye berre bot dano.”²⁰Ci odolo buk, odwoko bot latic, obedo piny ka tito lok; dano ducu ma i kacokke guciko waŋgi i kome. ²¹Ocako tito botgi ni, “Tin ginacoya man ocobo kakare kun wuwinyo ki itwu.” ²²Dano ducu guloko lok maber i kome, kun giuro lok me kica ma oa ki i doge. Gupenyo ni, “Man pe wod pa Yucepu?”²³En ogamo doggi ni, “Aŋeyo atir ni wubibolo carolok man i koma, ni, ‘Daktar, caŋŋe keni, tic ma yam wawinyo itiyo i Kapernaum, ti kany bene i pacowa kikome.’ ” ²⁴Dok omedde kwede ni, “Ada awacciwu ni, lanebi mo pe ma gijole i lobo tugi.²⁵Ento atito botwu atir ni, i lobo Icrael i kare pa Elia yam tye iye mon mapol ma coggi oto, ka kot okwero cwer pi mwaka adek ki dwe abicel, ci kec laparanat opoto i lobo meno ducu; ²⁶ento Lubaŋa pe ocwalo Elia bot ŋat mo i kingi, kono bot da to mo ma i Carepat i lobo Cidon. ²⁷Dok i lobo Icrael i kare pa lanebi Elica onoŋo yam tye iye ludobo mapol; ento pe gilonyo mo i kingi, kono Naaman Laciria keken.”²⁸Ka dano ducu ma i kacokke guwinyo lok man, kiniga omakogi matek. ²⁹Gutwarre malo, gutere woko ki i gaŋ, gukele i wi got ma gigero gaŋgi i wiye wek gicore piny. ³⁰Ento Yecu opucce woko ki i dyegi, ci ocito gire.³¹Yecu ocito i Kapernaum ma en gaŋ ma i Galilaya. Obedo ka pwonyogi i ceŋ cabit; ³²guuro pwonnye, pien oloko ki twero.³³I kacokke onoŋo tye iye dano ma tye ki cen marac; odaŋŋe ki dwan maloŋo ni, ³⁴“Ilaro gin aŋo kwedwa kaa, in Yecu Lanajaret? Doŋ ibino ka tyekowa bo? An aŋeyi, in iŋat Maleŋ pa Lubaŋa.”³⁵Ento Yecu ojuke kun wacce ni, “Liŋ mot, a woko ki i kome!” Cen orete piny i nyimgi, ci oa woko ki i kome kun pe otime marac. ³⁶Dano ducu guuro, kun gipenye kekengi ni, “Man lok aŋo? Pien en ciko cen maraco ki twero ki tek, ci gia woko.” ³⁷Pire oywek i kabedo ducu ma orumo kunnu.³⁸Yecu oa okato woko ki i kacokke, odonyo i ot pa Cimon. Maro Cimon onoŋo tye ki two lyeto ma obwoye matek; gubako doggi bote pire. ³⁹Yecu ocuŋ ka ŋete, ojuko lyeto, ci two ocaŋ woko ki i kome; cutcut oa malo, ocako gwokogi.⁴⁰Ka ceŋ doŋ mito poto, dano ducu ma tye ki lutwo, ma twogi patpat, gukelogi bote. Oketo ciŋe i kom ŋat acel acel ki i kingi ocaŋogi. ⁴¹Cen maraco bene oa ki i kom jo mapol, kun gidaŋŋe ni, “In i Wod pa Lubaŋa!” Ento Yecu ojukogi, pe oye cen mo oloko, pien giŋeye, ni en Kricito ma Lubaŋa oyero.⁴²Ka piny oru, Yecu ocito i kabedo mo ma dano pe iye. Ento lwak gubedo ka yenye, ci gubino bote, gutemo juke wek pe oa ki botgi. ⁴³Ento en owaco botgi ni, “Myero atit lok me kwena maber me ker pa Lubaŋa i gaŋ mukene bene, pien giora pi lok man.” ⁴⁴En obedo ka tito lok i kacokke me Judaya.

¹I kare ma gudiyo Yecu cok pi winyo lok pa Lubaŋa, onoŋo ocuŋ i dog nam Genecaret. ²Onoŋo yeya aryo i dog nam; lumak-rec onoŋo gua woko ki i igi, gitye ka lwoko obwogi. ³Oito i yeya acel ma onoŋo pa Cimon, olege ni koŋ okwaŋ manok i nam. En obedo piny, opwonyo lwak kun tye i yeya.⁴Ka doŋ otyeko lok, ci owaco bot Cimon ni, “Kwaŋ icit i kut, wubol obwowu wumak rec.” ⁵Cimon odokke iye ni, “Ladit, wayelle dyewor benebene, pe wamako gin mo. Ento pi lokki abibolo obwo.” ⁶Ka gutimo kit meno, ci gumako lwak rec mapol ata, obwogi ocako cot. ⁷Ci gugwelo lutic wadgi ma i yeya mukene ni gubin gukonygi. Gubino guloko rec i yeya aryo ducu gupoŋ woko, omiyo gucako mwony.⁸Ka Cimon Petero oneno, opoto piny i coŋ Yecu, owaco ni, “Rwot, cit giri, iweko, pien an labalo.” ⁹Pien en ki dano ducu ma tye kwede guuro pi rec ma gumako. ¹⁰Yakobo ki Jon litino pa Jebedayo, ma gin yam ribbe ki Cimon i dog tic, bene guuro. Yecu owaco bot Cimon ni, “Pe ilwor; cakke koni ibimako dano.” ¹¹Ka doŋ gukelo yeyagi i wi tera, guweko gipinygi ducu gulube.¹²Ka yam tye i gaŋ mo, dano mo obino ma dobo orwato i kome. Ka oneno Yecu, ci oryebbe piny olege ni, “Ladit, ka imito, itwero lonya.” ¹³Yecu oryeyo ciŋe ogudo kome, kun wacce ni, “Amito; komi olony.” Cutcut dobo ocaŋ ki i kome.¹⁴Yecu ocike ni pe myero otit bot dano mo; ento ni, “Cit, inyutte keni bot ajwaka pa Lubaŋa, imi gityer pi komi ma doŋ ocaŋ-ŋi, kit ma yam Moses ociko, wek obed lanyut botgi.”¹⁵Ento pire oywek matek makato, lwak mapol ocokke ka winye dok wek ocaŋgi ki i kom twogi. ¹⁶Ento Yecu yam lwitte kare ki kare cito ka lega i tim.¹⁷I nino mo acel onoŋo Yecu tye ka pwony, kun Luparicayo ki lupwony-cik ma gua ki i kin gaŋi ducu me Galilaya ki Judaya ki Jerucalem gubedo kunnu; tek pa Rwot me caŋo dano onoŋo tye i kome.¹⁸Cutcut dano gukelo bote lagoro mo ma twoyo two akweya kom, ma obuto i wi kitara. Guyenyo yo me tere i ot wek gikete i nyim Yecu; ¹⁹ento ka pe gunoŋo yo, pi pol pa lwak, guito i wi ot, gucwale ki kitarane ki i kin mategula i dye ot i nyim Yecu.²⁰Ka Yecu oneno niyegi, ci owaco ni, “In ba, balli doŋ giweko woko.” ²¹Lupwony-cik ki Luparicayo gucako pennye kekengi, kun giwaco ni, “Man aŋa ma loko lok me yeto Lubaŋa-ni? Aŋa ma twero weko bal, kono Lubaŋa keken?”²²Ka Yecu oniaŋ penygi, ci odok iye botgi ni, “Piŋo wutye ka pennye i cwinywu? ²³Mene ma yot, me waco ni, ‘Balli doŋ giweko,’ nyo ni, ‘A, iwoti’? ²⁴Ento meno wek muŋe ni Wod pa dano tye ki twero me weko bal i wi lobo” ci ociko lagoro ni, “Awacci ni, A, ikwany kitarani, idok paco.”²⁵Cutcut oa malo ocuŋ i nyimgi, okwanyo gin ma onoŋo obuto iye odok paco kun pako Lubaŋa. ²⁶Dano ducu guuro matek twatwal, gupako Lubaŋa. Lworo omakogi, guwaco ni, “Waneno gin me aura tin.”²⁷Ka man otum, ci Yecu okato woko, oneno lajog-mucoro mo ma nyiŋe Levi, kun obedo piny i ka jogo mucoro; ci owacce ni, “Luba.” ²⁸Levi oweko jamine ducu, oa olubo kore.²⁹Levi otedo karama madit i ode pi Yecu, lwak lujog-mucoro mapol ki jo mukene gubedo piny i dog cam kacel kwedgi. ³⁰Luparicayo ki lupwony-cik guŋur i kom lupwonnyene, kun gipenyo ni, “Piŋo wucamo dok wumato kacel ki lujog-mucoro ki lubalo?” ³¹Yecu odok iye botgi ni, “Jo ma komgi yot pe gimito daktar; ento jo ma komgi lit aye mito. ³²An pe abino ka lwoŋo jo ma kitgi atir, ento lubalo, wek guŋuti.”³³Guwacce ni, “Lupwonnye pa Jon giri kec kare ki kare, dok gilego bene, ki pa Luparicayo bene kit meno, ento lupwonnyeni gicamo dok gimato do.” ³⁴Yecu openyogi ni, “Wutwero miyo luwot lanyom ri kec ma kun lanyom tye kwedgi? ³⁵Ento kare bibino ma ka gikwanyo lanyom woko ki botgi, ka doŋ gibiri kec i kare meno.”³⁶Dok obolo botgi carolok ni, “Pe tye ŋatti mo ma yeco kiraka ki i kom ginaruka manyenne woko, ci dabo i kom ginaruka muti; ka otimo kit meno, ci biyeco manyen-ni woko, dok kiraka ma i kom manyen-ni pe birwatte ki muti-ni.³⁷Dok pe tye ŋatti mo ma piko koŋo vino manyen i kicaa macon; ka opiko, ci koŋo vino biyeco kicaa woko, kicaa bene biballe. ³⁸Ento koŋo vino manyen myero gipik i kicaa manyen bene. ³⁹Pe tye ŋat mo ma ka omato koŋo vino macon ci dok mito manyenne, pien wacci, ‘Macon-ni mit.”

¹kare meno Yecu owoto kun ŋolo ki i poto i ceŋ cabit. Lupwonnyene gurito wit bel, gutinyo i ciŋgi, gumwodo. ²Ento jo mogo i kin Luparicayo gupenyogi ni, “Piŋo wutimo gin ma cik okwero ni pe giti i ceŋ cabit?”³Yecu odok iye botgi ni, “Wun pe Wukwano gin ma nene Daudi otiyo ce? Ka nene kec oneke, en ki jo ma onoŋo gitye kacel kwede, ⁴en odonyo i ot pa Lubaŋa, ocamo mugati ma giketo i nyim Lubaŋa, ma yam cik okwero ni dano mo pe ocam, kono ajwagi pa Lubaŋa keken, dok omiyo bot jo ma onoŋo en tye kwede.” ⁵Owaco botgi ni, “Wod pa dano aye rwot me cabit.”⁶I cabit mukene Yecu odonyo i kacokke, opwonyo; onoŋo tye iye dano mo ma bade malacuc otal. ⁷Lupwony-cik ki Luparicayo gukiye ka en bicaŋe i ceŋ cabit, wek giyeny yo me kelo kop i kome. ⁸Ento Yecu oŋeyo tamgi woko, owaco bot labade otal ni, “Bin icuŋ kany.” Oa, ocuŋ kunnu. ⁹Yecu owaco botgi ni, “Apenyowu ni, i ceŋ cabit cik ye ni gitim iye gin maber, nyo gin marac, gilaro iye kwo nyo gineko woko?” ¹⁰Olworo waŋe i komgi ducu, owaco bot dano-nu ni, “Rye badi.” Ci labade otal oryweyo bade, ci bade ocaŋ. ¹¹Ento kiniga omakogi matek, guporo lok i kingi kekengi, gin ma myero gitim i kom Yecu.¹²I kare meno Yecu ocito i kin godi ka lega; obedo ka lego Lubaŋa dyewor benebene. ¹³Ka piny oru, olwoŋo lupwonnyene bote, oyero jo apar wiye aryo ki i kingi, omiyogi nyiŋ ni gin lukwena; gin ene:¹⁴Cimon ma en ocako nyiŋe ni Petero, ki Anderiya ominne, Yakobo ki Jon, Pilipo ki Bartolomayo, ¹⁵Matayo ki Tomaci, Yakobo wod pa Alipayo, Cimon ma gilwoŋo ni dano ma mito locken, ¹⁶Juda wod pa Yakobo, ki Juda me Keriot, ma yam olokke odobe.¹⁷Olor kwedgi piny, ci ocuŋ ka ma olanne. Lwak ki lupwonnyene mapol onoŋo gitye kunnu, ki lwak dano mapol ma gua ki i Judaya ki i Jerucalem ki i dog nam me Turo ki Cidon ma gubino pi winyo pwonnye, dok wek ocaŋgi i kom twogi; ¹⁸jo ma cen maraco yelogi gucaŋ bene. ¹⁹Lwak ducu gubedo ka yenyo yo me gudo kome, pien tek onoŋo a ki i kome ci caŋogi ducu.²⁰Otiŋo waŋe bot lupwonnyene, owaco botgi ni, “Wutye ki gum, pien ker pa Lubaŋa mewu. ²¹“Wutye ki gum, wun jo ma kec nekowu koni, pien wubiyeŋ. “Wutye ki gum, wun jo ma wukok koni, pien wubinyero.²²“Wutye ki gum ka dano dagwu, ka ce gityemowu woko ki i kingi, ka giŋalowu, ka gicayo nyiŋwu ni rac, pi Wod pa dano! ²³Cwinywu obed yom i nino meno, kun wupye ki yomcwiny, pien bakacic ma gibimiyowu me pwoc dit, tye i polo; pien kwarigi yam gutimo lunebi kit meno.²⁴“Ento wubineno can, wun lulonyo pien doŋ wutyeko gamo gin maber me kweyo cwinywu. ²⁵“Wubineno can, wun jo ma yeŋ koni, pien kec binekowu. “Wubineno can, wun jo ma nyero koni, pien wubikumo, wubikok.²⁶“Wubineno can, ka dano ducu pwoyowu, pien kwarigi yam gupwoyo lunebi ma lugoba kit meno.²⁷“Ento wun jo ma winyo, awaco botwu ni, Wumar lukworwu, wutim ber bot jo ma dagwu. ²⁸Wulam gum i kom jo ma cenowu, wuleg pi jo ma nywarowu.²⁹ŋat ma owoŋo lemi tuŋcel, lokke tuŋcel bene; ŋat ma omayo kanyini, pe itwonne koti bene. ³⁰Mi bot dano ducu ma legi; ŋat ma omayo jami ni, pe ipenygi doki ki bote.³¹Kit ma wumito dano gutimwu, wun bene wutimgi kumeno ³²“Ka wumaro dano ma marowu, pwoc aŋo ma wulimo iye? Pien lubalo bene maro jo ma marogi. ³³Ka wumito ber bot dano ma timowu ber, pwoc aŋo ma wubilimo iye? Pien lubalo bene gimito kit meno. ³⁴Dok ka wumiyo banya bot dano ma wugeno ni gitwero culowu, pwoc aŋo ma wulimo iye? Lubalo bene miyo banya bot lubalo wek giculgi marom.³⁵Ento wumar lukworwu, wutim ber, wumi banya, kun pe wugeno ni gibiculowu, ci mot me pwoyowu bibedo madwoŋ, dok wubibedo litino pa En Mamalo Twal; pien en timo ber bot jo ma pe pwoye ki bot jo maraco. ³⁶Wubed lukica macalo wunwu lakica.³⁷“Pe wuŋol kop i kom jo mukene, wek wun bene pe gibiŋol kop i komwu; pe wuŋol kop olo jo mukene, wun bene pe gibiŋolo kop loyowu. Wutim kica bot dano pi balgi, ci wun bene gibiweko balwu.³⁸Wumi, gibimiyowu. Gibimiyowu gin ma gipimo maber i korwu, ma gidilo, ma giyeŋo, ma o. Pien kit gin ma wupimo kwede jami en aye bene gibipimo kwede Jami botwu.”³⁹Yecu obolo botgi carolok. Owacci, “Latowaŋ twero peyo latowaŋ lawote Gin aryo ducu pe gibipoto woko i bur? ⁴⁰Lapwonnye pe dit kato dano ma pwonye; ento dano ducu ka doŋ gipwonyogi maber, gibidoko macalo lapwonygi.⁴¹Piŋo ineno cuŋ kal ma tye i waŋ omeru, ento dul yat ma tye i waŋi in kikomi pe ineno. ⁴²Nyo itwero waco bot omeru niŋniŋ ni, ‘Omera, wek akwany cuŋ kal ma tye i waŋi-ni woko,’ kun in kikomi pe ineno dul yat ma tye i waŋi In lagoba, koŋ ikwoŋ kwanyo dul yat ma tye i waŋi-ni woko, ci miyo doŋ ineno piny maber me kwanyo cuŋ kal ma tye i waŋ omeru ca.⁴³“Pien pe tye yat maber ma twero nyako nyige maraco; ki yat marac bene pe twero nyako nyige mabeco; ⁴⁴yat acel acel giŋeyo pi nyige. Pe gipwono olam ki i kom oryaŋ, dok bene pe gipwono olok ki i kom ocok.⁴⁵Dano maber kwanyo gin maber i kin jami mabeco ma en okano i cwinye, dano marac kwanyo gin marac ma i kin jami maraco ma en okano, pien dog dano loko gin ma opoŋ i cwinye.⁴⁶“Piŋo wulwoŋa ni, ‘Rwot, Rwot,’ kun pe wutiyo gin ma acikowu? ⁴⁷Dano ducu ma bino bota ma winyo lokka, dok tiyo, abinyuto botwu ŋat ma en cal kwede. ⁴⁸Rom ki dano ma ogero ot ma okwinyo matut, ma ocibo guti i kom pata got; ka pii opoŋ, ci kulu ocorre i kom ot, ento pe otwero yeŋone, pien bigero maber.⁴⁹Ento dano ma winyo lokka kun pe tiyo, rom ki dano ma ogero ot i ŋom laboŋo guti; ka kulu omol ki tek i kome, oyotoyot opoto, ogannye woko piny lirubuku.”

¹Ka Yecu doŋ otyeko lokke ducu kun dano giwinyo, ci odonyo i Kapernaum.²Ladit mo ma Laroma ma loyo askari miya yam tye ki laticce ma en maro twatwal, ma kome lit, cok to. ³Ka en owinyo pi Yecu, ci ooro ludoŋo pa Lujudaya bote kun lege ni obin ocaŋ laticce. ⁴Ka gubino bot Yecu, gubako doggi bote ki cwinygi ducu kun giwaco ni, “En ber, myero itimme man, ⁵pien maro rokwa, en aye ogero kacokkewa.”⁶Yecu ocito kacel kwedgi. Ka doŋ oo cok ki gaŋ, ladit ma loyo askari ooro lureme bote, kun wacce ni, “Ladit, pe icanne, pien an pe amyero me wek ibin idony i oda, ⁷en aye gin mumiyo atamo ni, kadi an bene pe aromo bino boti. Ento wac lok awaca keken ci laticca bicaŋ. ⁸Pien an bene a dano ma giloya aloya i dog tic, atye ki askari bene ma an aloyogi. Ka awaco bot askari mo acel ni, ‘Citi,’ ci cito, dok ka awaco bot ŋat mukene ni, ‘Bin’, ci bino dok ka awaco bene bot laticca ni, ‘Tim man,’ ci timo.”⁹Yecu ka owinyo man, ci ouro twatwal, olokke bot lwak ma lube, owaco botgi ni, “Atito botwu ni, peya anoŋo niye ma rom ki man, kadi i Icrael.” ¹⁰Ka luor doŋ gudok paco, gunoŋo latic doŋ kome yot.¹¹Ka kare okato manok, ocito i gaŋ ma gilwoŋo Nain; lupwonnyene ki lwak madwoŋ guwoto kacel kwede. ¹²Ka doŋ onyiko cok ki dogcel me gaŋ, nen, gitye ka lebo dano muto, latin ma minne onoŋo onywale en kene, minne yam da-to. Lwak dano ma gua ki i gaŋ onoŋo gitye kacel kwede. ¹³Ka Rwot onene, kica omake i kome, owacce ni, “Wek koko obedi.” ¹⁴En obino ogudo kitara, ci jo ma gitye ka lebo lato gucuŋ mot. Yecu owaco ni, “Awobi, awacci, a malo.” ¹⁵Dano ma oto-ni oa, obedo, ocako lok. Yecu omiye bot minne.¹⁶Lworo omakogi ducu, gupako Lubaŋa kun giwaco ni, “Lanebi madit doŋ onen i kinwa!” dok ni, “Lubaŋa doŋ olimo jone!” ¹⁷Lok man ma en otiyo-ni oywek i lobo Judaya ducu ki i lobo ducu ma orumo.¹⁸Lupwonnye pa Jon gutito lok magi ducu bote. ¹⁹Jon olwoŋo jo aryo ki i kin lupwonnyene oorogi bot Rwot ka penye ni, “In aye ŋat ma myero obin-ni, nyo dok wakur ŋat mukene?” ²⁰Ka jo-nu gubino bot Yecu, guwacce, ni, “Jon oorowa boti, kun penyo ni, ‘In aye i ŋat ma myero obin-ni, nyo dok wakur ŋat mukene?’ ”²¹I kare meno onoŋo Yecu ocaŋo lutwo mapol ma gitye ki arem ki cen maraco, omiyo lutowaŋ mapol guneno piny. ²²Yecu odok iye botgi ni, “Wucitit bot Jon gin ma wuneno ki ma wuwinyo; lutowaŋ guneno piny, luŋolo guwoto, ludobo gilonyogi, ludiŋit guwinyo lok, ki jo muto gicerogi woko, ki lucan bene gitito botgi lok me kwena maber. ²³Dano ma tamme pe oballe i koma tye ki gum.”²⁴Ka doŋ lukwena pa Jon gudok, Yecu ocako lok ki lwak i kom Jon ni, “Onoŋo wucito i tim ka neno gin aŋo? Onoŋo wucito ka neno lagada ma yamo obedo ka yeŋone? ²⁵Onoŋo wucito kunnu kono ka neno gin aŋo? Wucito ka neno dano ma oruko boŋŋi mabeco? Nen, jo ma ruko boŋŋi me deyo, dok ma bedo ki jami me wel, gibedo i gaŋ kal pa luker. ²⁶Doŋ onoŋo wucito kunnu ka neno gin aŋo? Wucito ka neno lanebi mo? Iyo, awaco botwu ni ŋat madit makato lanebi.²⁷Man aye ŋat ma yam gicoyo lok i kome ni, ‘Nen, acwalo lakwenana otelo nyimi, ma bigero yoni ma peya in ibino.’ ²⁸Awaco botwu ni, pe tye dano mo ki i kin jo ma mon onywalogi ma kato Jon ki dit; ento ŋat matidi twatwal i ker pa Lubaŋa aye kate.”²⁹Ka guwinyo lok man, lwak ducu wa lujog-mucoro guye ni Lubaŋa oporre, pien yam gibatijagi ki batija pa Jon, ³⁰ento Luparicayo ki lupwony-cik gukwero gin ma Lubaŋa oyubo pigi, pien nene pe gulimo batija ki bot Jon.³¹Yecu dok owacci, “Doŋ abiporo jo me kare man ki gin aŋo? Gin calo aŋo? ³²Girom ki litino ma gibedo i cuk ma gilwoŋo litino wadigi kun giwaco ni, ‘Yam wakuto nyamulere botwu wun pe wumyelo; wawero wer lyel, wun pe wukok.’³³Pien Jon Labatija doŋ obino kun pe camo kwon, pe mato koŋ vino bene wun wuwaco ni, ‘En tye ki cen marac.’ ³⁴Wod pa dano dok obino kun camo dok mato bene, wun wuwaco ni, ‘Nen, dano ma owor ki lameno, larem lujogmucoro ki lubalo.’ ³⁵Ento ryeko pa Lubaŋa oloyo kop pi litinone ducu.”³⁶ŋat acel i kin Luparicayo olwoŋe ka cam bote; Yecu ocito i ot pa Laparicayo ci obedo piny i dog cam. ³⁷Nen, tye dako mo ma labalo i gaŋ meno. Ka oŋeyo ni Yecu tye ka cam i ot pa Laparicayo, ci okelo adomo moo ma ŋwece kur. ³⁸Ocuŋ i ŋe Yecu tuŋ tyene kun kok, pig waŋe oton i tyen Yecu, obedo ka jwayo ki yer wiye kun noto tyene, owiro ki moo.³⁹Ka Laparicayo ma onoŋo olwoŋe-ni oneno, oloko i iye kekene ni, “Kono dano man lanebi, kono oniaŋ i kom dako ma ogude-ni, ki kite, ni en labalo.” ⁴⁰Yecu odokke iye ni, “Cimon, atye ki lok mo ma amito awacci.” Cimon ogamo ni, “Wacca, Lapwony.”⁴¹Yecu ogamo ni, “ŋat mo ma lami-banya yam tye ki dano aryo ma gucamo banya bote. ŋat acel onoŋo tye ki banya me ciliŋ miya abic, ŋat mukene pyerabic. ⁴²Ka culone oloyogi, otimo kica botgi gin aryo ducu. Mene i kingi ma bimare makato?” ⁴³Cimon odokke iye ni, “Atamo ni en ma gitimo kica pi wel banya madwoŋ-ŋi.” Ogamo ni, “Iŋolo kakare.”⁴⁴Olokke bot dako, openyo Cimon ni, “Ineno dako man? Adonyo i odi, pe imiya pii me lwoko tyena, ento en otono pig waŋe i tyena, ojwayo ki yer wiye. ⁴⁵In pe imota kun inoto lema, ento cakke i kare ma adonyo i ot, en pe oweko noto tyena.⁴⁶In pe iwiro wiya ki moo, ento en owiro tyena ki moo ma ŋwece kur. ⁴⁷Pi meno atitti ni, doŋ giweko balle mapol-gu ducu, kit ma marre madwoŋ-ŋi nyuto-ni; ento ŋat ma giweko balle manok, marre nok.⁴⁸Owaco bot dako ni, ‘Balli doŋ giweko.’” ⁴⁹Jo ma onoŋo tye i dog cam gucako lok i kingi kekengi ni, “Man aŋa, ma weko bal-li?” ⁵⁰Owaco bot dako ni, “Niyeni olari; wot doŋ giri ki kuc.”

¹Ka kare okato manok, Yecu owoto i kin gaŋi madoŋo ki matino kun tito dok nyuto lok me kwena maber i kom ker pa Lubaŋa. Jone apar wiye aryo onoŋo tye kwede, ²kacel ki mon mogo ma yam en ocaŋogi i kom cen maraco ki i kom two; Maliam ma gilwoŋo ni Maliam me Magdala, ma cen maraco abiro yam oa woko ki i kome, ³Joana dako pa Kuja, lagwok-lim pa Kerode, Cucana, ki mon mukene mapol, ma yam gikonye ki limgi.⁴Ka lwak mapol gucokke kacel, kun dano gubino bote ma gia ki i gaŋi mapol, Yecu oloko i carolok ni, ⁵“Lacoc ocito ka coyo kodine. Ka kun coyo, ci kodi mogo okir i ŋet yo, dano gunyono, winyo me polo gubino gucamo woko. ⁶Kodi mukene okir i kom pata; ka odoŋo, otwo woko, pien pii pe i tere.⁷Kodi mukene okir i kin okuto; okuto odoŋo kacel kwede, odiye. ⁸Kodi mukene okir i ŋom maber, ci odoŋo, guceko ma dodo tyen miya.” Ka doŋ oloko lok man, ci odaŋŋe owaco ni, “ŋat ma tye ki it me winyone, owiny.”⁹Ka lupwonnyene gupenye te lok me carolok man, ¹⁰ci en ogamo ni, “Wun gimiyowu me ŋeyo muŋ me ker pa Lubaŋa; ento jo mukene gimiyogi i carolok wek ka gineno, pe gunen, dok ka giwinyo, pe guniaŋ tere.¹¹“Carolok-ki tere ene: Kodi aye lok pa Lubaŋa. ¹²Gin ma i ŋet yo gin aye jo ma winyo; lacen Catan bino, kwanyo lok ki i cwinygi woko, wek pe guye, pe gularre. ¹³Gin ma i kom pata aye jo ma winyo, ci gigamo lok ki yomcwiny; ento pe gitye ki cwitgi, giye pi Kare manok, ento i kare me omo cwiny gipoto woko.¹⁴Gin ma okir i kin okuto, gin aye jo ma winyo, ento ka kare okato, ci tam mapol, ki lim, ki yomcwiny me kwo man diyogi, nyiggi pe cek maber. ¹⁵Gin ma i ŋom maber, gin aye jo ma ka guwinyo lok, ci gimako matek ki cwiny ma genne ki maber, ginyak nyiggi kun gidiyo cwinygi.¹⁶“Pe tye ŋat mo ma cwinyo tara, ci dok umo woko ki aduku, nyo keto i te kitanda, ento keto i wi okar, wek jo ma bino i ot gunen mac. ¹⁷Pien pe tye gin mo ma gikano ma pe binen ka maleŋ, dok pe tye gin mo ma giumo ma pe gibiŋeyo, dok ma pe gibiyabo ka maleŋ. ¹⁸Pi meno wugwokke kit ma wuwinyo ki lok; pien ŋat ma mere tye gibimedde, ŋat ma mere pe, gibikwanyo woko ki bote kadi wa gin ma en tamo ni etye kwede.”¹⁹Minne ki omegine gubino, ento onoŋo pe gitwero o bote pi lwak. ²⁰Gititte ni, “Meni ki omegini gitye gucuŋ woko, gimito neni.” ²¹Ento Yecu odok iye botgi ni, “Maa ki omegina gin aye jo ma winyo lok pa Lubaŋa, dok gitiyo.”²²I nino mo acel Yecu odonyo i yeya kacel ki lupwonnyene, owaco botgi ni, “Wakatu wacitu loka nam tuŋ ca.” Gucako wot; ²³i kare ma gitye ka wot ki yeya, Yecu onino woko. Yamo okodo matek i dye nam, pii ocako poŋ i yeya, onoŋo gitye marac.²⁴Guwoto, gucoye kun giwaco ni, “Ladit, wato woko do!” Yecu oco, ci ojuko yamo, ki pii ma onoŋo twagge; opye mot, ki nam oliŋ. ²⁵Openyogi ni, “Niyewu tye kwene?” Lworo omakogi, guuro kun gupennye kekengi ni, “Man aŋa kono kaa, ma ciko yamo ki pii, ci giwinye-ni?”²⁶Gubino i lobo pa Lugeraca, ma okemme ki Galilaya. ²⁷Ka Yecu okato i wi tera, ci dano mo me gaŋ meno ma tye ki cen obino bote. Dano-nu onoŋo ori pi kare malac ma pe ruko boŋo, pe bedo i ot bene, ento bedo mere i kin lyel keken.²⁸Ka oneno Yecu, ci odaŋŋe oryebbe i nyime, owaco ki dwan maloŋo ni, “Ilaro aŋo kweda, Yecu, Wod pa Lubaŋa Mamalo Twal? Abako doga boti, pe iyela.” ²⁹Pien onoŋo Yecu ociko cen marac ni oa woko ki i kom dano-nu. Pien tyen mapol dwogo i kome. Onoŋo gigwoke agwoka kun gitweye ki nyor ki nyonyo, ento yam turo gin ma gitweye kwede woko, cen ryeme, tere i tim.³⁰Yecu openye ni, “Nyiŋi aŋa?” Ogamo ni, “Legion’’; pien cen mapol onoŋo tye i kome. ³¹Cen gubako doggi bote ni pe ocikgi ni gicit i Bur.³²Lwak opego mapol onoŋo gitye ka cam i kor got kunnu. Cen gubako doggi bote ni owek gidony i opego. ³³Cen gua ki i kom dano-nu, gudonyo i opego, lwak opego gutwarre ki ŋwec nia ki i kor got malo, ci gumwony woko i nam.³⁴Ka lukwat guneno gin ma otimme, ci guriŋo, gutero lokke i gaŋ madit ki i kin paco. ³⁵Dano gucito ka neno gin ma otimme, gubino bot Yecu, gunoŋo dano ma cen oa ki i kome-ni obedo ka tyen Yecu, oruko boŋo, odoko dano; lworo omakogi.³⁶Jo ma guneno lok man gutito botgi kit ma dano me no ma yam tye ki cen ocaŋ kwede. ³⁷Jo ducu ma gibedo i lobo pa Lugeraca ma orumo kunnu gulego Yecu ni myero oa woko ki botgi, pien onoŋo lworo omakogi matek; omiyo Yecu odonyo i yeya, odok cen.³⁸Dano ma cen oa ki i komeni obako doge bot Yecu ni myero ebed bote; ento Yecu ocwale kun cike ni, ³⁹“Dok i paconi, icitit gin madit ma Lubaŋa otimo i komi.” Ocito otito i kin gaŋa meno ducu lok madit ma Yecu otimo i kome.⁴⁰Ka Yecu odwogo, lwak gujole ki yomcwiny, pien onoŋo gin ducu gitye ka kure. ⁴¹Dano mo obino, nyiŋe Yairo, ma onoŋo ladit me kacokke. Oryebbe piny ka tyen Yecu, obako doge bote ni obin i ode, ⁴²pien onoŋo yam tye ki nyare ma onywalo acel keken ma onoŋo doŋ cok to; mwaka me ditte mito romo apar wiye aryo. I kare ma Yecu tye ka wot, lwak odiye.⁴³Dako mo onoŋo tye kunnu ma yam onoŋo twoyo two agobi pi mwaka apar wiye aryo, ma doŋ obalo limme ducu bot daktar, ento pe otwero caŋ. ⁴⁴Obino cok i ŋe Yecu, ci ogudo dog ginarukane; cutcut remo ma cwer ocok woko.⁴⁵Yecu openyo ni, “Aŋa ma oguda-ni?” Ka dano ducu gukwero woko, ci Petero ki jo ma tye kacel kwede, gugamo ni, “Ladit, lwak orumi dyere, gidine i komi.” ⁴⁶Ento Yecu owaco ni, “ŋat mo oguda gire, pien awinyo tek oa woko ki i koma.”⁴⁷Dako-nu oneno ni pe etwero kanne, ci obino kun kome myel, oryebbe i nyime, otito i nyim lwak ducu gin ma omiyo egude, ki kit ma ecaŋ kwede oyotoyot. ⁴⁸Yecu owacce ni, “Nyara, niyeni ocaŋi; wot ki kuc.”⁴⁹I kare ma Yecu pud tye ka lok, dano mo obino ma oa ki i gaŋ pa ladit me kacokke, owaco ni, “Nyari doŋ oto woko, pe doŋ iyel Lapwony.” ⁵⁰Ento ka Yecu owinyo, owacce ni, “Pe ilwor, ye ayeya keken, ci en bicaŋ.”⁵¹Ka obino i ot, pe oye ni dano mo odony kwede i ot, kono Petero ki Jon, ki Yakobo, ki won latin ki minne keken. ⁵²Dano ducu onoŋo gitye ka koko kun gikumo pire; ento Yecu owaco ni, “Wuwek koko obedi; pien nyako-ni pe oto, ento onino anina.” ⁵³Gunyere matek, pien giŋeyo ni nyako-ni oto woko.⁵⁴En omako bad latin, olwoŋe, owacce ni, “Nyako, a malo.” ⁵⁵Ci cwinye odwogo, oa malo oyotoyot, Yecu ociko ni gimine cam. ⁵⁶Lunyodone guuro mada; ento Yecu ocikogi matek ni pe myero gutit pi gin ma otimme-ne bot dano mo.

¹Yecu olwoŋo jone apar wiye aryo kacel, omiyo botgi tek ki twero i kom cen ducu, ki me caŋo two, ²oorogi ka tito lok i kom ker pa Lubaŋa ki ka caŋo lutwo.³Ocikogi ni, “Pe wuwot ki gin mo, kadi ki odoo, kadi kicaa, kadi kwon, kadi lim, dok pe wubed ki kanyi aryo. ⁴Ot ma wubidonyo iye, wubed kunnu, nio ka wubia, wucito giwu.⁵Ka ma pe gijolowu iye, ka wua ki i gaŋ meno, wuteŋ apwa tyenwu obed caden botgi.” ⁶Gua gucito i kin gaŋ, gutito lok me kwena maber kun gicaŋo lutwo bene i kabedo ducu.⁷Ento Kerode rwot madit ka owinyo pi gin ducu ma obedo ka timme, wiye ocuŋ woko, pien jo mogo guwaco ni Jon Labatija aye ocer ki i kin jo muto, ⁸jo mukene ni, Elia aye doŋ onen, jo mukene ni, ŋat acel i kin lunebi macon aye ocer. ⁹Kerode owaco ni, “Jo yam atoŋo wiye woko do; ento man aŋa ma dok awinyo lok macalo magi i komeni?” Oparo pi nene twatwal.¹⁰Ka lukwena gudwogo, gutitte lok ducu ma gutiyo. Yecu oterogi, ocito kwedgi i gaŋ ma gilwoŋo Betecaida i muŋ. ¹¹Ka lwak guwinyo, ci gulubo kore, en ojologi, otito botgi lok i kom ker pa Lubaŋa, ocaŋo jo ma komgi lit.¹²Ka piny doŋ mito yuto, jone apar wiye aryo gubino bote, guwacce ni, “Cwal lwak gucit i kin gaŋ ki i pacci ma orumo kany, wek guyeny kabuto, gunoŋ cam; pien kany watye i dye tim.” ¹³Ento Yecu odok iye botgi ni, “Wun wumi botgi cam.” Gugamo ni, “Watye ki mugati abic ki rec aryo keken, nyo ka ce imito waciwil cam pi lwak man ducu.” ¹⁴Pien onoŋo gimito romo dano alip abic. Ociko lupwonnyene ni, “Wumi dano gubed piny i dul, i dul acel acel dano pyerabic.”¹⁵Gutimo kumeno, gumiyo dano ducu gubedo piny. ¹⁶Yecu okwanyo mugati abic ki rec aryo-nu, oneno malo i polo, olego iye gum, obaro iye, omiyo bot lupwonnyene wek guket i nyim lwak. ¹⁷Gin ducu gucamo guyeŋ. Gicoko ŋide mudoŋ oromo aduku apar wiye aryo.¹⁸Ka onoŋo en tye ka lega kaikene, kun lupwonnyene bene tye kacel kwede, en openyogi ni, “Dano mono giwacci an aŋa?” ¹⁹Gudok iye ni, “Jon Labatija, jo mukene giwacci Elia, ki jo mukene ni ŋatti mo acel i kin lunebi macon aye doŋ ocer.”²⁰Openyogi ni, “Wun kono wuwacci an aŋa?” Petero ogamo ni, “In i Kricito ma Lubaŋa oyero.” ²¹Ento Yecu ocikogi matek ni pe myero gutit lok man bot dano mo. ²²Dok owaco ni, “Wod pa dano myerone okany can madwoŋ, dok ludoŋo ki ajwagi madito pa Lubaŋa ki lupwony-cik myero gukwere woko, ci guneke, ento myero gicere woko i nino me adekke.”²³Dok owaco bot dano ducu ni, “Ka dano mo mito lubo kora, myero okwoŋ kwerre kekene, otiŋ yatariyane nino ducu, ci olub ki kora. ²⁴Pien dano ma mito laro kwone, birwenyone arwenya, ento dano ma rwenyo kwone pira, bilaro kwone. ²⁵Pien konyo dano ma olimo lobo ducu ki gin aŋo kun kwone rwennye woko, nyo balle?²⁶Dano ma lewic make pira ki pi lokka, Wod pa dano bene lewic bimake i kome, i kare ma en bidwogo i deyone ki deyo pa Lubaŋa Won kacel ki pa lumalaika maleŋ. ²⁷Ento atito botwu ni, tye jo mogo ma gucuŋ kany ma pe gibibilo to, ma pud peya guneno ker pa Lubaŋa.”²⁸Ka nino ma mito romo aboro okato i ŋe lok magi, Yecu otero Petero ki Jon ki Yakobo, oito kwedgi i wi got ka lega. ²⁹I kare ma onoŋo en tye ka lega, waŋe olokke mapat, ginarukane odoko matar ma ryeny lidaŋdaŋ.³⁰Nen, jo aryo gubedo ka lok kwede, jo-nu onoŋo aye Moses ki Elia, ³¹ma gunen kun gitye ki deyo, guloko pi ane ki i lobo man, ma en myero ocob i Jerucalem.³²Petero ki jo ma tye kacel kwedgi onoŋo nino omako waŋgi matek, ento gubedo ma waŋgi twolo, guneno deyone ki jo aryo ma gucuŋ kacel kwede. ³³Ka jo aryo-nu mito a woko ki bote, ci Petero owaco ni, “Ladit, bedo kany ber; kono wagero aduc adek, acel meri, acel pa Moses, ki acel pa Elia”. Onoŋo Petero pe ŋeyo gin ma myero eloki.³⁴ka pud loko lok man, pol obino, oumogi; lworo omakogi ka gidonyo i pol. ³⁵Dwan oa i polo ni, “Man aye Woda ma doŋ ayero; wuwinye.” ³⁶Ka dwan man doŋ oloko, ci ginoŋo Yecu odoŋ kene. Lupwonnye guliŋ aliŋa; i kare meno, pe gutito bot dano mo lok mo i kom gin ma guneno.³⁷Orwone, ka doŋ gulor piny ki i wi got, lwak madwoŋ gurwatte kwede. ³⁸Nen, laco acel ki i kin lwak odaŋŋe ni, “Lapwony, abako doga boti, inen woda, pien anywalo en acel kene. ³⁹Nen, cen bino i kome, ci miyo kok cut; ryeye, kelo bwoyo i doge, nyoŋo kome woko, pe a ki i kome oyotoyot. ⁴⁰Abako doga bot lupwonnyeni ni guryem woko, ento ryemone oloyogi.”⁴¹Yecu odok iye ni, “Wun yalwak me kare man, pe wutye ki niye, kitwu doŋ oballe woko. Abibedo kwedwu wa awene? Abidiyo cwinya i kwomwu nio wa awene? Kel wodi kany.” ⁴²Ka onoŋo tye ka bino, cen orete woko piny, oryeye matek. Ento Yecu ogerre i wi cen marac, ocaŋo awobi-nu, odwoke bot wonne. Dano ducu guuro dit pa Lubaŋa.⁴³Ento ka pud gitye ka uro gin ducu ma en otiyo, Yecu owaco bot lupwonnyene ni, ⁴⁴“Wuwek lok man odony i itwu; pien Wod pa dano gibimiye i ciŋ dano.” ⁴⁵Ento lupwonnyene pe guniaŋ lok man; lok man okanne woko ki botgi wek pe guniaŋ iye; ci gulworo penye pi lok meno.⁴⁶Pyem yam ocakke i kingi, ni aŋa ma i kingi ma loyo ki dit. ⁴⁷Yecu ka oŋeyo pyem ma i cwinygi, okwanyo latin matidi, omiye ocuŋ i ŋete, ⁴⁸owaco botgi ni, “Dano ducu ma jolo latin man i nyiŋa, noŋo ojolo an, dano ducu ma jolo an, noŋo ojolo ŋat ma oora; pien ŋat matidi twatwal i kinwu ducu en aye ŋat madit.”⁴⁹Jon ogamo ni, “Ladit, waneno ŋat mo ma ryemo cen i nyiŋi, wageŋe, pien en onoŋo pe lubi kacel kwedwa.” ⁵⁰Ento Yecu odok iye ni, “Pe wugeŋe, pien ŋat ma pe lakworwu, noŋo tye tuŋ botwu.”⁵¹Ka kare doŋ mito romo me tiŋe malo, ociko waŋe matek me cito i Jerucalem. ⁵²Ooro lukwena gukwoŋo nyime; gucito, gudonyo i gaŋ mo pa Lucamaria pi yubbe kabedo. ⁵³Ento Lucamaria pe gujole, pien waŋe okemo Jerucalem.⁵⁴Ka lupwonnyene Yakobo ki Jon guneno, guwaco ni, “Rwot, imito wacik mac oa ki i polo, otyekgi woko?” ⁵⁵Ento Yecu olokke, ojukogi, kun waco ni, “Pe wuŋeyo kit cwiny ma wutye kwede; ⁵⁶pien Wod pa dano pe obino ka tyeko kwo pa dano, ento pi larogi.” Gucito i gaŋ mukene.⁵⁷Ka gitye ka wot i yo, dano mo owacce ni, Abilubi ka ma ibicito iye ducu. ⁵⁸Yecu odokke iye ni, “Too tye ki boro, winyo me polo tye ki odigi, ento Wod pa dano pe tye ki ka ma myero epyel iye wiye.”⁵⁹Owaco bot dano mukene ni, “Luba.” Ento danonu ogamo ni, “Ladit, koŋ iwek aciyik wora.” ⁶⁰Yecu odokke iye ni, “Wek jo muto guyik jo muto wadigi; ento in iciti, inya lok i kom ker pa Lubaŋa.”⁶¹ŋat mukene owaco ni, “Abilubi, ladit; ento koŋ iwek acit, acik jotuwa.” ⁶²Yecu owacce ni, “Pe tye dano mo ma mako kweri dyaŋ, ka dok neno ŋeye, ma biromo bedo i ker pa Lubaŋa.”

¹Ka man otum, Rwot oyero jo mukene pyerabiro, oorogi ki aryo aryo wek gukwoŋ nyime, me cito i gaŋi ducu ki i kabedo ducu ka ma en kikome bibino iye. ²Owaco botgi ni, “Kac tye dwoŋ, ento lukac aye nok; pi meno wuleg Won poto, wek ocwal lutic ka kac.³Wucit giwu; nen, acwalowu macalo litino romi i kin orudi. ⁴Pe wuwot ki kicaa lim nyo opiro, kadi war; pe wumot ŋat mo i waŋayo.⁵Ot ducu ma wudonyo iye, wukwoŋ waco ni, ‘Kuc obed i ot man.’ ⁶Ka latin me kuc tye kunnu, ci kucwu bibedo i kome; ento ka pe, ci kucwu bidwogo botwu. ⁷Wubed i ot meno, kun wucamo dok wumato gin ma gimiyowu, pien latic myero gimiye mucarane. Pe wubed ka kobo i ot ki ot.⁸Ka wudonyo i gaŋ mo, ce gijolowu, wucam gin ma giketo i nyimwu; ⁹wucaŋ lutwo ma tye iye, wutit botgi ni, ‘Ker pa Lubaŋa doŋ onyiko cok botwu.¹⁰Ento ka wudonyo i gaŋ mo, ce pe gijolowu, ci wucit i waŋayo me gaŋ meno, wuwac ni, ¹¹‘Wa apwa me gaŋwu ma omoko i tyenwa, wateŋo i komwu; kadi bed kit meno, myero wuŋe man ni, ker pa Lubaŋa doŋ onyiko cok.’ ¹²Atito botwu ni, i nino meno can pa Codom bibedo twaratwara makato pa gaŋ meno.¹³“Ibikoko aŋee, in Korajin! Ibikoko aŋee, in Betecaida! Pien kono yam tic madito me twer ma gitiyo botwu gitiyo i Turo ki Cidon, kono jone guŋut wa con, kun giruko boŋo cola ma gibedo i buru bene. ¹⁴Ento can pa Turo ki Cidon bibedo twaratwara i nino me ŋolo kop, makato can ma bipoto i komi. ¹⁵Ki in Kapernaum, gibitiŋi woko malo i polo? Pe kumeno, gibidwoki woko piny i Lyel.¹⁶“ŋat ma winyowu, noŋo owinyo an, ŋat ma kwerowu, noŋo okwero an; ŋat ma kwera, noŋo okwero ŋat ma oora.”¹⁷Dano pyerabiro-nu gudwogo cen ki yomcwiny, kun giwaco ni, “Rwot, wa cen maraco bene guwinyo cikwa pi nyiŋi!” ¹⁸En odok iye ni, “Yam aneno Catan kun poto piny nia ki i polo macalo lutkot. ¹⁹Nen, doŋ amiyowu twero me nyono twol ki oton, ki me loyo tek ducu pa lakwor; gin mo pe bitimowu marac. ²⁰Kadi bed kumeno cwinywu pe obed yom pi man ni, cen guwinyo cikwu; ento cwinywu obed yom, pien nyiŋwu gicoyo i wi polo.”²¹I cawa meno Yecu obedo ki yomcwiny i Cwiny Maleŋ kun waco ni, “Apwoyi, Wora, in Rwot me polo ki me lobo, pien ikano lok magi woko ki bot luryeko ki luŋe-piny, ci inyutogi bot litino lukere; iyo, Wora, pien onoŋo ipwoyo kit yo macalo meno.²²Jami ducu doŋ Wora otyeko miyogi woko bota; ŋat mo pe ma ŋeyo ni Wod en aŋa, kono Wod keken, dok bene ŋat mo pe ma ŋeyo ni Wod en aŋa, kono Won keken, ki ŋat ma Wod oyero me nyuto Won bote.”²³Yecu olokke bot lupwonnyene, owaco botgi i muŋ ni, “Tye ki gum, dano ma neno gin ma wun wuneno! ²⁴Pien atittiwu ni, lunebi ki luker mapol yam guparo pi neno gin ma wun wuneno, ento pe guneno, ki winyo gin ma wun wuwinyo, ento pe guwinyo.”²⁵Nen, ŋat mo acel lapwony-cik oa malo, otemo i Yecu kun penye ni, “Lapwony, atim aŋo wek alim kwo ma pe tum?” ²⁶Yecu openye ni, “Gicoyo ni ŋo i cik? Ikwano niŋniŋ?” ²⁷Odok iye ni, “Mar Rwot Lubaŋani ki cwinyi ducu, ki tiponi ducu; ki tekki ducu, ki tammi ducu; mar lawoti bene macalo imarre keni.” ²⁸Yecu ogamo doge ni, “Idok iye kakare; tim kit meno, ci ibikwo.”²⁹Ento dano-nu pi mito loyo kop, openyo Yecu ni, “Lawota aŋa?” ³⁰Yecu odok iye ni, “Yam tye dano mo ma oa ki i Jerucalem, cito piny tuŋ Jeriko, ci orwatte ki luyak; gulunyo boŋŋine ki i kome, gupwode, gucito, guweke kun doŋ cok to.³¹Ajwaka mo pa Lubaŋa onoŋo bene tye ka lubo yo meno; ka onene, ci obarre okato ki i ŋete. ³²Kit meno Lalevi ka oo i kabedo meno, onene, obarre okato ki i ŋete.³³Ento Lacamaria mo ma onoŋo bene tye ka wot i yo-nu, oo ka ma en tye iye. Ka onene, kica omake i kome. ³⁴Ocito bote, oonyo moo jeituni ki koŋo vino i waŋ rette, otweyo. Lacen okete i wi kanane, otere i ot welo, ogwoke. ³⁵Orwone okwanyo lim, omiyo bot ŋat ma gwoko ot welo, ocike ni, ‘Twoye; gin ducu ma ibimiyo makato, an abiculi ka adwogo.’³⁶Aŋa i kin jo adek-ki ma itamo ni obedo lawot dano-nu ma orwatte ki luyak-ki?” ³⁷Odok iye ni, “ŋat ma otime kicani.” Yecu owacce ni, “In bene cit, icitim kit meno.”³⁸Ka gitye ka wot i yo, ci Yecu odonyo i gaŋ mo, ci dako mo ma nyiŋe Marita ojole i ode. ³⁹Yam tye ki laminne nyiŋe Maliam ma obedo ka tyen Yecu kun winyo lokke.⁴⁰Ento Marita onoŋo obedo ka canne ki tic mapol; ocito bot Yecu, openye ni, “Ladit, pe iparo ni lamera oweka atye ka tic kena? Wac bote wek okonya.” ⁴¹Ento Rwot ogamo ni, “Marita, Marita, ibedo ki tam mapol, cwinyi oŋabbe pi jami mapol, ⁴²ento tye gin acel keken ma mitte. Maliam oyero dul maber ma pe gibikwanyo woko ki bote.”

¹Yecu onoŋo yam tye ka lega i kabedo mo; ka doŋ otyeko, ci ŋat acel i kin lupwonnyene owacce ni, “Rwot, pwonywa ki lega, kit macalo yam Jon opwonyo lupwonnyene.”²Yecu odok iye botgi ni, “Ka wulego, wuwac kit man ni, ‘Wonwa, giwor nyiŋi maleŋ. Ker meri obin.³Miwa nino ki nino camwa me nino ducu. ⁴Iwek balwa, pien wan kikomwa waweko bal pa dano ducu ma gibalo botwa. Pe iterwa i abita.’”⁵Dok owaco bitgi ni, “Aŋa i kinwu ma tye ki lareme ci bicito bote cwiny dyewor ka penye ni, ‘Larema, konya ki mugati adek; ⁶pien larema mo oa i wot, ocora, ci pe atye ki cam mo ma myero aket i nyime.’ ⁷En bidokke iye ki i ot ni, ‘Wek yela; doŋ acego doggola woko, wan ki litinona doŋ wabuto; pe atwero a malo ka mini gin mo.’ ⁸Atito botwu ni, kadi bed en pe bia malo ka miye gin mo pi bedo lareme, ento pi dide ci bia, bimiye gin ducu ma en mito.⁹Dok acikowu ni, Wulegi, ci gibimiyo botwu; wuyeny, ci wubinoŋo, wudwoŋ doggola, gibiyabo botwu. ¹⁰Pien dano ma lego gimiye, ki ŋat ma yenyo bene, noŋo; ŋat ma dwoŋo doggola bene, gibiyabo doggola bote.¹¹Aŋa i kinwu ma won latin, ka latinne olege ni omiye rec, ci bimiye twol ma ka rec? ¹²Nyo ka olege ni omiye toŋŋweno, ci bimiye oton? ¹³Ka wun jo maraco wuŋeyo miyo mot mabeco bot litinowu, ci Wonwu ma tye i polo pe bikatowu, bimiyo Cwiny Maleŋ makato bot jo ma lege?”¹⁴Yam onoŋo Yecu tye ka ryemo cen ma pe loko; ka cen doŋ oa ki i kom dano ma onoŋo tye ki cen, ma te lebe oto, oloko, ci lwak guuro. ¹⁵Ento jo mogo i kingi guwaco ni, “En ryemo cen pi twero pa Beeljebul ladit pa cen.”¹⁶Jo mukene onoŋo giyenyo lanyut ki bote ma a ki i polo, pi teme. ¹⁷Ento Yecu oŋeyo tamgi, ci owaco botgi ni, “Ka ker iye opokke aryo, ci ker meno lobone balle woko; ot poto i wi wadi.¹⁸Catan bene ka opokke kene i dul aryo, ci kerre bicuŋ niŋniŋ? Pien wun wuwaco ni aryemo cen pi twero pa Beeljebul. ¹⁹Ka an aryemo cen pi twero pa Beeljebul, ci litinowu kono giryemo cen pi twero pa aŋa? Pi meno gin aye gibibedo luŋolkopwu. ²⁰Ento ka ce an aryemo cen pi ciŋ Lubaŋa, ci doŋ wuŋe ni ker pa Lubaŋa doŋ obino botwu.²¹Ka oteka ma oruko jami lwennye ducu tye ka gwoko gaŋ kalle, jamine ducu bedo ki kuc, ²²ento ka dano ma kate ki tek olwenyo i kome ce oloye, bicoko jami lwennye ma ya en geno, bipoko jami ma yam en oyako ki bote. ²³ŋat ma pe tuŋ bota, meno noŋo en lakworra, dok ŋat ma pe nywako coko kweda, keto mere aketa.²⁴“Ka cen marac doŋ oa ki i kom dano mo, ci cito wirre i kabedo ma pii pe iye kun yenyo ka ma ebiywe iye; ento ka noŋone oloye woko, ci wacci, ‘Abidok gira i oda ka ma yam aa ki iye-ni.’ ²⁵Ka obino, ci noŋo giyweyo i ot woko maleŋ, giyubo maber. ²⁶En dok, cito kelo cen mukene abiro ma giraco gikate woko, ci gidonyo gibedo i ode-ni; lacen dano-nu bibedo marac makato kit ma onoŋo yam obedo kwede con.”²⁷Ka oloko lok man, ci dako mo ki i kin lwak owoto dwane, owacce ni, “Tye ki gum ic ma onywali, ki tuno ma idoto!” ²⁸Ento Yecu ogamo ni, “Makato gitye ki gum, jo ma giwinyo lok pa Lubaŋa, dok gigwoko!”²⁹Ka lwak gumedde mapol, ci Yecu ocako waco ni, “Yalwak pa jo maraco giyenyo lanyut, ento pe gibimiyo botgi lanyut mo, kono lanyut pa lanebi Yona keken. ³⁰Pien kit macalo Yona yam odoko lanyut bot jo Nineve, kit meno Wod pa dano bene bidoko lanyut bot yalwak me kare man.³¹Kabaka ma dako ma tye yo tuŋ acuc bicuŋ kacel ki yalwak me kare man i kare me ŋolo kop, ci miyo kop loyogi; pien en oa ki i agikki lobo obino ka winyo ryeko pa Solomon, ento nen, gin madit makato Solomon tye kany.³²Jo Nineve bicuŋ kacel ki yalwak man i kare me ŋolo kop, ci miyo kop loyogi, pien gin yam guŋut pi lok ma Yona onoŋo otito, ento nen, gin madit makato Yona tye kany.³³“Pe tye ŋatti mo ma cwinyo tara ci kano i gul, nyo umo auma ki aduku; ento cibo i wi okar, wek dano ducu ma gibino i ot gunen derone. ³⁴Tara me komi aye waŋi; ka ce waŋi bal mo pe iye, ci komi kulu bibedo leŋ. Ento ka ce waŋi tye ki bal mo i kome, ci komi kulu bibedo i colpiny. ³⁵Gwokke wek leŋo ma tye i ii-ni pe odok col. ³⁶Doŋ ka komi kulu bedo i leŋo, kun colpiny pe iye, ci komi kulu bibedo leŋ, macalo tara ma menyi ki derone ka tye ka lyel.”³⁷Ka yam onoŋo tye ka lok, Laparicayo mo olwoŋe ka cam bote; Yecu odonyo i ot, obedo i dog cam. ³⁸Laparicayo ouro ka oneno ni ocako cam ma pe koŋ ologo ciŋe.³⁹Rwot owacce ni, “Wun Luparicayo wulwoko ŋe kikopo ki ŋe atabo, kun iwu opoŋ yak ki tim maraco. ⁴⁰Wun lumiŋmiŋ! Ŋat ma tiyo gin ma woko pe en aye bene otiyo gin ma i iye? ⁴¹Wumi gin ma i atabowu bot lucan wek okonygi; ci nen, jami ducu bibedo maleŋ botwu.⁴²“Ento wubineno can, wun Luparicayo, pien wumiyo dul me apar me oyado ki ocobo ki kit pot dekwu ducu, kun wuweko ŋolo kop atir ki maro Lubaŋa; meno ducu myero wutim kun pe wuweko magi bene.⁴³Wubineno can, wun Luparicayo, pien wumaro kabedo me dito i kacokke, dok wumito ni dano gumotwu i cuk. ⁴⁴Wubineno can! Pien wurom ki lyel ma pe ginen ma dano woto i wigi kun pe giŋeyo.”⁴⁵ŋat acel i kin lupwony-cik ogamo doge ni, “Lapwony, ka iwaco kit man nyuto ni iyeto wa wan bene.” ⁴⁶Yecu odokke iye ni, “Wubineno can, wun lupwony-cik bene! Pien wumiyo dano yeyo yec mapek, ma yeyone tek, kun wun kikomwu pe wugudo kadi ki lwet ciŋwu acel.⁴⁷Wubineno can, pien wucano got i wi lyel pa lunebi ma yam kwariwu guneko. ⁴⁸Kit meno wun wucaden, wupwoyo tic pa kwariwu, pien gin guneko, wun wucano got i wi lyelgi.⁴⁹Pi man Ryeko pa Lubaŋa owaco ni, ‘Abioro botgi lunebi ki lukwena, jo mogo i kingi gibinekogi gibilibogi,’ ⁵⁰wek remo pa lunebi ducu ma gionyo nia i acakki piny gicul kworre i kom yalwak me kare man, ⁵¹cakke i kom remo pa Abel nio kwede i kom remo pa Jekaria ma oto i kin keno tyer pa Lubaŋa ki kabedo maleŋ. Iyo atito botwu ni, gibiculo kworre i kom yalwak me kare man.⁵²Wubineno can, wun lupwony-cik, pien wumayo layab me ŋeyo piny woko, kun wun kikomwu pe wudonyo iye, dok wugeŋo dano ma mito donyo iye bene.”⁵³Ka doŋ oa ki kunnu, ci lupwonycik ki Luparicayo gucako dine matek ma girobo doge ki peny mapol, ⁵⁴kun gikiye wek gimak lok ma a ki i doge.

¹I kare meno, lwak dano alip ki alip gucokke kacel, kun doŋ ginyonne kekengi. Mukwoŋo, Yecu ocako waco bot lupwonnyene ni, “Wugwokke i kom tobi pa Luparicayo, ma en aye buta.²Pe tye gin mo ma giumo ma pe gibiyabo ka maleŋ, kadi gin ma gikano ma pe biŋene. ³Lok ducu ma wuloko i colpiny biwinnye i leŋpiny; dok gin ducu ma wukwilo lokke i tyelo, gibitito lokke i wi ot malo.⁴“Lurema, atito botwu ni, pe wulwor jo ma neko kom, ma pe dok gitwero timo gin mo makato meno. ⁵Ento abinyuto botwu ŋat ma myero wulwor; wulwor ŋat ma ka doŋ oneko, ci tye ki twero me bolo i Geena; iyo, atito ni, wulwore.⁶Ojwinyojwiny abic pe gicato pi cente pyeraryo? Ento pe tye mo acel i kingi ma wi Lubaŋa twero wil iye. ⁷Kadi bed wa yer wiwu ducu bene doŋ gikwanogi woko liweŋ. Pe wulwor; pien piwu tek twatwal makato pi ojwinyojwiny mapol.⁸“Atito botwu ni, dano ducu ma tuco nyiŋa i nyim dano, Wod pa dano bene bituco nyiŋe i nyim lumalaika pa Lubaŋa; ⁹ento ŋat ma kwera i nyim dano, gibikwere bene i nyim lumalaika pa Lubaŋa. ¹⁰Dano ducu ma loko lok marac i kom Wod pa dano gibiweko balle; ento ŋat ma yeto Cwiny Maleŋ pe gibiweko balle.¹¹Ka giterowu i nyim kacokke ki i nyim luloc ki wegi twer, pe wubed ka tamo kit ma myero wulok kwede, nyo ni wubigamo niŋniŋ, nyo ni kit lok aŋo ma wubiloko. ¹²Pien Cwiny Maleŋ bipwonyowu i cawa meno i gin ma myero wuwaci.”¹³ŋat acel i kin lwak owaco bot Yecu ni, “Lapwony, wac bot omera wek wapok ginaleya kwede.” ¹⁴Ento Yecu ogamo doge ni, “Nyeri, aŋa ma oketa me bedo laŋolkop ki lapok jamiwu?” ¹⁵Owaco botgi ni, “Wunen, wugwokke i paro lim; pien kwo pa dano pe cuŋ i wel lim mapol ma en tye kwede.”¹⁶Obolo botgi carolok ni, “Yam tye dano mo ma lalonyo ma cam ocek madwoŋ i potone. ¹⁷Dano-nu opennye kekene ki i cwinye ni, ‘Abitimo aŋo, pien pe atye ki ka onyo bella?’ ¹⁸Owaco ni ‘Abitimo kit man: abimuko derona ducu, abigoyo mukene maditone, abionyo bella ki jamina ducu i igi. ¹⁹Abiwaco ki cwinya ni, Cwinya, itye ki jami mapol ma birommi pi mwaka mapol; ywe, cam, mati, bed ki yomcwiny.’²⁰Ento Lubaŋa owacce ni, ‘In lamiŋ! I dyewor ma tin gibikwanyo kwoni woko ki boti; jami ma iyubo-ni bibedo pa aŋa ce?’ ²¹Tye kit meno ŋat ma kano lonyo pire kene, kun pe tye ki lonyo bot Lubaŋa.”²²Yecu owaco bot lupwonnyene ni, “Pi meno awaco botwu ni, pe wubed ki tam mapol pi kwowu, ni wubicamo aŋo; nyo pi komwu, ni wubiruko aŋo. ²³Pien kwo pire tek kato cam, kom pire tek kato ginaruka.²⁴Koŋ wupar mono pi agak; pe gicoyo kodi, dok bene pe gikayo, pe gitye ki dula kadi dero, ento Lubaŋa pitogi. Wun pe piwu tek kato pi winyo? ²⁵Aŋa i kinwu ma twero medo mwaka acel i kom kwone pi bedo ki tam mapol? ²⁶Ka gin manok macalo man timone loyowu, piŋo wubedo ki tam mapol pi lok mukene?²⁷Koŋ wutam pi lega me tim, kit ma gidoŋo kwede; pe giwiyo uci, dok bene pe gicweyo boŋo; pud amedde ki waco botwu ni, kadi bed Solomon yam orukke ki deyone ducu, ento pe orukke macalo mo acel i kingi. ²⁸Ka ce Lubaŋa ruko lum ma i tim kit meno, ma bedo tye pi nino ma tin keken, ento diki inoŋo gibolo woko i keno, ci en pe birukowu makato, wun jo ma niyewu nok?²⁹Pe wuyeny gin ma wubicamo, nyo gin ma wubimato; cwinywu pe obed ka tamo lok mapol. ³⁰Pien rok ducu ma i wi lobo yenyo jami magi; Wonwu ma tye i polo ŋeyo ni wumitogi.³¹Ento ma ka meno, wuket cwinywu i kom kerre, ci jami magi ducu gibimedo botwu. ³²“Pe wulwor, wun romi manok, pien Wonwu oye atika me miyo botwu ker.³⁴Wucat jamiwu, wukony ki lucan; wukwo kicaa lim ma pe ti, wukan lonyo ma pe tum i polo, ka ma lakwo pe o iye, dok nyenye pe balo. ³³Pien ka ma lonyowu tye iye, cwinywu bene bedo iye.³⁵“Wubed ma wutweyo pyerwu, kun tarawu lyel; ³⁶wubed macalo jo ma kuro laditgi ka bidwogo nia ki i karama me nyom, wek giyabbe doggola oyotoyot ka en obino, odwoŋo.³⁷Tye ki gum lutic meno ma laditgi ka odwogo noŋo peya gunino. Ada awaco botwuni, en bitweyo pyere kene, bimiyo gibedo i dog cam, ci bibino, cako miyogi cam. ³⁸Ka obino cwiny dyewor nyo okogweno, kun onoŋogi kit meno, lutic meno gitye ki gum.³⁹Ento myero wuŋe man ni, Kono nene won ot ŋeyo cawa ma lakwo bibino iye kono okiyo ma pe oweko dano oturo ode. ⁴⁰Pi meno, wun wubed ma wuyubbe pien Wod pa dano bibino i cawa ma pe wutamo.”⁴¹Petero openyo ni, “Rwot, ibolo carolok man botwa keken, nyo bot dano ducu?” ⁴²Rwot ogamo ni, “Aŋa ma lagwok-ot ma lagen dok ma laryeko, ma laditte biweko dano ducu ma bedo i ode i te locce, wek opok botgi camgi i kare ma mitte? ⁴³Latic meno tye ki gum, ma laditte ka odwogo binoŋe kun tye ka tiyo ticce meno. ⁴⁴Ada awaco botwu ni, ladit-tu bimiye twero me loyo jamine woko ducu.⁴⁵Ento ka litic meno oloko kekene ni, ‘Laditta doŋ ogalle ka bino’, ci cako goyo lutic ma co ki ma mon, kun camo, mato, dok mer, ⁴⁶ladit pa latic meno bidwogo i nino ma en pe tamo pi dwogone, dok i cawa ma en pe ŋeyo; bipwode, bikete i kin jo ma pe genne.⁴⁷Latic meno ma oŋeyo gin ma laditte mito, ento pe oyubbe iye, dok pe olubo gin ma laditte mito, gibipwode matek twatwal. ⁴⁸Ento ŋat ma pe oŋeyo, ce otiyo gin ma twero miyo gipwode pire, gibipwode manok. Dano ma gimiye madwoŋ, gibimito madwoŋ ki bote; dok ŋat ma gikano jami mapol bote, gibipenye mapol makato.⁴⁹“Abino ka cwinyo mac i lobo; kono doŋ omoko, kono ber! ⁵⁰Atye ki batija ma myero abatija kwede; kit ma aridde kwede nio ka ocobbe!⁵¹Wun wutamo ni abino ka kelo kuc i lobo? Atito botwu ni pe; kono apokapoka. ⁵²Cakke tin jo abic ma i ot acel gibibedo kun gipokke; jo adek bikwero jo aryo, jo aryo bikwero jo adek. ⁵³Won latin bipokke woko ki latinne, latin bene bipokke woko ki wonne; mego bipokke ki nyare, nyako bipokke woko ki minne; dayo bipokke woko ki ci-wode, ki ci-wod bene bipokke woko ki daane.”⁵⁴Yecu dok owaco bot lwak ni, “Ka wuneno pol otiŋŋe tuŋ potoceŋ, oyotoyot wuwaco ni, ‘Kot koni cwer’; ci cwer bene. ⁵⁵Dok ka wuneno yamo kodo ki i but piny tuŋ acuc, wun wuwaco ni, ‘Piny bibedo lyet matek’; ci timme bene. ⁵⁶Wun lubuta! Wuŋeyo poko kin gin ma nen i lobo ki i polo; piŋo pe wuŋeyo poko kin lanyut me kare man?⁵⁷“Piŋo pe wuŋolo gin ma tye atir piwu kenwu? ⁵⁸Ka icito bot laŋolkop kun inywako yo ki ŋat ma doti, tem matek me yubo lok kwede ma kun pud wutye i yo, wek pe oteri i nyim laŋolkop, laŋolkop owek miyi bot askari, askari owek teri i mabuc. ⁵⁹Atitti ni, pe ibia ki kunnu nio ka iculo ducu ma wi cente mo pe orem.”

¹I kare meno onoŋo tye jo mogo kunnu ma gutitte pi Lugalilaya mogo ma yam Pilato orubo remogi kigitumgi. ²En odok iye botgi ni, “Wutamo ni Lugalilaya meno gin lubalo makato Lugalilaya mukene ducu, ma omiyo guneno can kit meno-ni? ³Atito botwu ni, pe; ento ka pe wuŋut, ci wun ducu wubito kit meno.⁴Nyo jo apar wiye aboro meno ma yam ot ma wiye bor opoto i komgi onekogi i Ciloam, wutamo ni gin onoŋo gutimo bal makato jo mukene ducu ma bedo i Jerucalem? ⁵Atito botwu ni, pe; ento ka pe wuŋut, ci wun ducu wubito kit meno.”⁶Yecu obolo carolok ni, “Yam tye dano mo ma onoŋo tye ki oduro ma gipito i poto olokke. En obino kun yenyo nyige, ento pe onoŋo. ⁷Owaco bot lapur ni, ‘Nen, koni doŋ odoko mwaka adek kun abino, ayenyo nyig oduro man, pe anoŋo. Toŋ woko; piŋo balo ŋom nono?’⁸Lapur odokke iye ni, ‘Ladit, koŋ iwek obed pi mwaka man doki, nio ka abako ŋom i tere, aonyo iye cet dyaŋ mutwo. ⁹Ka binyak i mwaka ma bino-ni, ci ber; ento ka pe, ci ibitoŋo giri.”¹⁰Yam onoŋo Yecu tye ka pwony i kacokke mo i ceŋ cabit. ¹¹Dako mo onoŋo tye kunnu ma tye ki cen ma okelo goro i kome pi mwaka apar wiye aboro; onoŋo doŋ ogome woko, ma pe twero tirre.¹²Ka Yecu onene, olwoŋe, owacce ni, “Dako, gigonyi woko i kom goroni.” ¹³Oketo ciŋe i kome; cutcut dako-nu otirre, ci opako Lubaŋa. ¹⁴Ento kiniga omako ladit me kacokke, pien Yecu ocaŋo dano i ceŋ cabit. Owaco bot lwak ni, “Tye nino abicel ma myero giti iye tic; wubin i nino meno wek gicaŋwu, pe i ceŋ cabit.”¹⁵Rwot odokke iye ni, “Wun lubuta! ŋat acel acel ki i kinwu pe gonyo twonne nyo kanane ki i ka-camgi, ci tero i pii i ceŋ cabit. ¹⁶Dako man, ma en nya pa Abraim,, ma ceŋ Catan otweye pi mwaka apar wiye aboro kulu, pe myero gigonye ki i twec man i ceŋ cabit?”¹⁷I kare ma Yecu oloko lok man, ci lewic omako lukworre ducu; lwak ducu cwinygi obedo yom pi tic me deyo ducu ma en otiyo.¹⁸Pi meno en owaco ni, “Ker pa Lubaŋa rom ki gin aŋo? Abiporo ki gin aŋo? ¹⁹Rom ki kodi dek karadali ma dano mo okwanyo, ocoyo i potone; ci odoŋo, odoko yat madit, winyo me polo gibino gigero odigi i jaŋe.”²⁰Dok owaco ni, “Abiporo ker pa Lubaŋa ki gin aŋo? ²¹Rom ki tobi ma dako mo okwanyo, orubo ki moko mugati ma romo adita adek, nio ka moko ducu oyenyo, okwot.”²²Yecu omedde ki wotte i kin gaŋi madito ki matino, kun pwonyo, dok kwede tuŋ Jerucalem. ²³ŋat mo openye ni, “Jo manok aye bilarre?” Yecu owaco botgi ni, ²⁴“Wuket tek wek wudony ki i doggola madiŋ; pien awaco botwu ni, jo mapol gibitemo donyo, ento pe gibitwero.²⁵Ka won ot doŋ oa malo ocego doggola, wun wubicuŋ ki woko wudwoŋo doggola kun wuwaco ni, ‘Ladit, yab botwa doggola ba!’ En bidok iye botwu ni, ‘An pe aŋeyo ka ma wua iye.’ ²⁶Ci wun wubiwaco ni, ‘Yam wacamo dok wamato kacel kwedi, dok bene ipwonyo dano i dye gaŋwa.’ ²⁷Ento en biwaco botwu ni, ‘Awaco botwu ni, pe aŋeyo ka ma wua iye; wua woko ki i nyima, wun lutim maraco ducu!’²⁸Kunnu wubikok, wubikayo lakwu, ka wuneno Abraim ki Icaka ki Yakobo ki lunebi ducu kun gitye i ker pa Lubaŋa, ento wun kikomwu gibolowu woko. ²⁹Dano gibibino kun gia ki tuŋ wokceŋ, ki tuŋ potoceŋ, ki yo tuŋ acam, ki tuŋ yo acuc, gibibedo piny i dog cam i ker pa Lubaŋa. ³⁰Nen, jo mogo ma lacen gibibedo meati, ki jo mogo meati gibibedo me lacen.”³¹I cawa meno luparicayo mogo gubino, guwaco bot Yecu ni, “Cit woko ki kany, pien Kerode mito neki.” ³²Yecu odok iye botgi ni, “Wucit, wuwac bot too can ni, ‘Nen, abiryemo cen dok abicaŋo dano tin ki diki, i nino me adekke abicobone. ³³Kadi bed kit meno, myero amedde gira ki wotta, tin ki diki ki diki maca; pien lanebi pe myero oto ka mukene ma pe i Jerucalem.’³⁴Jerucalem, Jerucalem, in ma ineko lunebi, ma icelo dano ma gioro boti woko ki got, tyen adi ma nene amito coko litinoni woko, macalo min gweno coko litinone i te bwome, ento wun pe wuye giwu! ³⁵Nen, doŋ gitenyo otwu botwu. Atito botwu ni, pe wubinena nio ka wubiwacci, ‘Gipwo ŋat ma bino i nyiŋ Rwot.’ ”

¹I ceŋ cabit mo acel, ka Yecu ocito ka cam i ot pa laloc mo ma Laparicayo, gubedo ka kiye matek. ²Onoŋo tye i nyime dano mo ma twoyo two akwota kom. ³Yecu openyo lupwony-cik ki Luparicayo ni, “Cik ye ni gicaŋ dano i ceŋ cabit, nyo pe?”⁴Ento guliŋ aliŋa. Yecu omako latwoni, ci ocaŋe, ocike ni ocit gire. ⁵Openyogi ni, “Aŋa i kinwu ma ka tye ki kanane nyo twonne ka opoto i waŋ it matut ci pe biywaye woko cutcut i ceŋ cabit?” ⁶Dok i lok meno oloyogi woko.⁷Ka oneno kit ma dano ma gilwoŋogi giyero ki kabedo mabeco, ci obolo botgi carolok ni, ⁸“Ka gilwoŋi i karama me nyom, pe icibed i kabedo maber; gwok nyo gilwoŋo bene dano madit makati, ⁹ci lalwoŋ wun aryo ducu bibino, biwaco ni, ‘Wek kabedo bot dano man.’ Ibidok i kabedo mapiny ki lewic madwoŋ.¹⁰Ento ka gilwoŋi, cit ibed i kabedo mapiny, wek ka dano ma olwoŋi obino en biwacci ni, ‘Larema, nyik i kom mamalo’, ci ibibedo ki deyo i nyim dano ducu ma wubedo kwedgi i dog cam. ¹¹Pien ŋat ma kette kene ni edit, gibidwoke piny, ŋat ma mwolle kene gibimiye doko dit.”¹²Owaco bene bot dano ma olwoŋe ni, “Ka ilwoŋo dano i cam me dyeceŋ nyo me otyeno, pe ilwoŋ luremi, nyo omegini, nyo watti, nyo lulonyo ma bedo cok ka ŋeti; wek gin bene guwek lwoŋi, wek gucul waŋ lwoŋoni.¹³Ento ka itedo karama, lwoŋ lucan, luŋolo, jo ma komo, ki kutowaŋ, ¹⁴ci ibibedo ki gum, pien pe gitwero culo waŋ lwoŋoni. Culi bibedo i kare ma jo ma kitgi atir bicer iye.”¹⁵Ka ŋat acel ma gubedo kwede i dog cam owinyo lok man, owaco ni, “Tye ki gum dano ma bicamo kwon i ker pa Lubaŋa!” ¹⁶Ento Yecu odokke iye ni, “Dano mo yam otedo karama madit, olwoŋo iye jo mapol. ¹⁷Ka kare me karama oromo, ci en ooro laticce ka poyo wi jo ma gilwoŋogi ni, ‘Wubin, pien doŋ giyubo jami ducu.’¹⁸Ento gin ducu gucako bako doggi ni gitim kica botgi. ŋat mukwoŋo owacce ni ‘Awilo poto, myero acit ka nenone alegi itima kic.’ ¹⁹Dano me aryo owaco ni, ‘Awilo twoni apar me pur, acito ka ŋiyogi, alegi itima kica.’ ²⁰ŋat mukene owaco ni, ‘Pud anyomo dako anyoma nyen, pi meno pe atwero bino.’²¹Latic-cu odwogo otito bot laditte kit meno. Kiniga omako won ot, owaco ni, ‘Cit oyotoyot i waŋayo, ki i kin gaŋ, icikel lucan, luŋolo, lutowaŋ ki jo ma komo.’ ²²Ci latic owaco ni, ‘Ladit, watimo gin ma iciko, ento kabedo gire pud tye.’²³Ladit owaco bot laticce-nu ni, ‘Cit i gudo madito ki i ŋet yo, icuk dano ki tek wek gudony i ot, wek odaa opoŋ. ²⁴Pien atito botwu ni, pe tye ŋatti mo i kin jo ma yam gilwoŋogi ma bibilo karamana.’ ”²⁵Lwak mapol guwoto kacel ki Yecu, ci Yecu olokke botgi owaco botgi ni, ²⁶“Ka ŋat mo obino bota, ma kun pe okwero wonne ki minne, dakone ki litinone, omegine ki nyimegine, kadi wa kwone kikome, pe twero bedo lapwonynyena. ²⁷ŋat ma pe tiŋo yatariyane, kun luba, pe twero bedo lapwonnyena.²⁸Pien aŋa i kinwu ka mito gero ot ma wiye bor, ci pe koŋ kwoŋo bedo piny ka kwano wel lim ma mitte, ka ce etye kwede ma eromo tyekone? ²⁹Ka pe kumeno, miyo ka ocibo guti, ma tyekone oloye woko, dano ducu ma gibineno gibicako ŋale, ³⁰kun giwaco ni, ‘Dano man ocako gedo, ento tyekone oloye woko.’³¹Nyo kabaka mene, ma oecito i mony ka lweny ki kabaka mukene, pe koŋ bedo piny poro lok, ka ce etwero tero dano alip apar me romo ki jo alip pyeraryo? ³²Ka pe kumeno, en cwalo kwena ma kabaka ca pud tye ka mabor, pi ribbe kwede ki kuc. ³³Kit meno, dano ducu ma i kinwu ma iye pe twero cayo gin ducu ma etye kwede, pe twero bedo lapwonnyena.³⁴“Kado ber; ento ka doŋ odoko bot gibitimo niŋniŋ wek odok mit? ³⁵Pe doŋ ber me aketa i poto, dano gibolo woko ata. Ŋat ma tye ki it me winyo lok, owiny.”

¹Lujog-mucoro ki lubalo onoŋo yam ginyiko cok ka winyo lok pa Yecu. ²Luparicayo ki lupwony-cik guŋur kun giwaco ni, “Dano man jolo lubalo dok camo kwedgi.”³Omiyo Yecu obolo botgi carolok man ni, ⁴“Aŋa i kinwu ma tye ki romi miya acel, ka ŋat acel i kingi orwenyo, pe biweko romi pyeraboŋwen wiye aboŋwen i olet, ci cito ka yenyo en murwenyo-ni, nio waŋ ma onoŋe? ⁵Ka onoŋe, ci bolo i wi gwoke, kun cwinye yom.⁶Ka oo paco, lwoŋo lureme ki luwote kacel, ci waco botgi ni, ‘Cwinywu obed yom kacel kweda, pien doŋ anoŋo romona ma yam orwenyo-ni.’ ⁷Kit meno atito botwu ni, bibedo yomcwiny madit twatwal i wi polo i kom labalo acel ma oŋut, makato i kom jo pyeraboŋwen wiye aboŋwen ma kitgi atir ma pe mito ŋut.⁸“Nyo dako mene, ma tye ki ciliŋ apar, ka ciliŋ acel orwenyo pe bicwinyo mac tara, ci yweyo ot kun yenyo matek nio waŋ ma onoŋo? ⁹Ka doŋ onoŋo, ci lwoŋo lureme ki luwote kacel, kun waco botgi ni, ‘Cwinywu obed yom kacel kweda, pien doŋ anoŋo ciliŋ-ŋa ma onoŋo orwenyo-ni.’ ¹⁰Kit meno atito botwu ni, bibedo yomcwiny i nyim lumalaika pa Lubaŋa i kom labalo acel ma oŋut.”¹¹Dok owaco ni, “Yam tye dano mo ma tye ki awobene aryo. ¹²Matidine owaco bot wonne ni, ‘Aba, miya dul lim ma ka mera.’ Wongi opoko limme i kingi.¹³Lacen ka nino okato manoknok, awobi matidi-ni ocoko jamine ducu, ocako wotte me cito i lobo mabor; obalo limme kunnu pi bedo me carocaro. ¹⁴Ka limme doŋ otum ducu, ci kec laparanat matek opoto i lobo meno, awobi-nu ocako mal ata.¹⁵Ocito odak bot ŋat mo ma i lobo meno; dano nu ocwale i olette ka kwayo opego. ¹⁶Iye oparo yeŋ ki pok cam ma opego camo; pe tye ŋat mo ma omiye gin mo.¹⁷Ento ka oniaŋ pire kene, ci owaco ni, ‘Lutic pa wora tye adi ma gicamo kwon loyogi, ento an kono ato kec kany! ¹⁸Abia, acito bot wora, abiwacce ni, “Aba, doŋ abalo bot polo ki i nyimi; ¹⁹doŋ pe amyero gilwoŋa ni an a wodi; loka abed macalo ŋat acel i kin liticci.”²⁰Ci oa obino bot wonne. Ento ka onoŋo pud tye cen ka mabor, wonne onene. Kica omake i kome, oriŋo okwako ŋute, onoto leme. ²¹Wode owacce ni, ‘Aba, doŋ abalo bot polo ki i nyimi, pe doŋ amyero gilwoŋa ni an a wodi.’²²Ento wonne owaco bot luticce ni, ‘Wukel jor maber makato ducu oyot, wuruk i kome; wurwak agit i lwet ciŋe, ki war i tyene. ²³Wukel bene wod twon mucwe, wuneki, wek wacamu, wabed ki yomcwiny; ²⁴pien latinna-ni yam oto, koni doŋ kwo; yam orwenyo, doŋ ginoŋe.’ Gucako bedo ki yomcwiny.²⁵“Wode madit onoŋo tye i poto; ka dwogo ma onyiko cok ki ot, owinyo wer ki myel. ²⁶Olwoŋo ŋat acel i kin lutic, openye ni, ‘Man kono gin aŋo ma tye ka timme-ni?’ ²⁷Latic-cu odokke iye ni, ‘Omeru doŋ odwogo, woru onekke wod twon mucwe, pien ogame ma kome yot kun kwo.’²⁸Ento kiniga omake, okwero donyo i ot. Wonne okatti woko obako doge bote, ²⁹ento en odokke iye ni, ‘Nen, pi mwaka magi mapol ata an atiyo boti, ma naka yam peya akwero winyo cikki, ento peya imiya kadi ma latin dyel mamwa, wek cwinya obed yom ki lurema. ³⁰Ento latinni man obino ma olanyo limmi ducu i kom mon ma lucoco, in inekke wod twon mucwe.’³¹Wonne ogamo doge ni, ‘Latinna, in nino ducu itye kweda, jamina ducu meri. ³²Ber wacam kun wabedo ki yomcwiny, pien omeruni yam oto, koni doŋ kwo, yam orwenyo, doŋ ginoŋe.’ ”

¹Yecu owaco bot lupwonnyene ni, “Yam tye ŋat mo ma lalonyo, ma tye ki lagwok-jamine. Gidoto danonu bote ni tye ka lanyo jamine. ²Olwoŋe, openye ni, ‘Lok aŋo mono ma awinyo i komi-ni? Kella wel jami ma ikano, pien pe dok itwero bedo lagwok-jami.’³Lagwok-jamine oloko kekene ni, ‘Abitimo gin aŋo? Pien laditta mito kwanya woko ki i tic me gwoko jami. Pe atek ma aromo pur, lewic bene maka ka lego lim alega. ⁴Aŋeyo gin ma abitimo, ka giryema woko ki i tic me gwoko jami, wek dano gujola i odigi.’⁵Olwoŋo lubanya pa laditte ki acel acel, owaco bot dano mukwoŋo ni, ‘Wel banya adi pa laditta ma tye boti?’ ⁶En odokke iye ni, ‘Moo jeituni ma romo agulu miya acel.’ Owacce ni, ‘Kwany waraga banyani, ibed piny oyotoyot, ico pyerabic.’ ⁷Lacen openyo ŋat mukene ni, ‘In kono itye ki wel banya adi?’ En ogamo ni, ‘ŋano ma romo dwoŋo miya acel.’ Owacce ni, ‘Kwany waraga banyani, ico pyeraboro.’⁸Laditte opwoyo lagwok-jami ma pe lagen, pien otiyo ki ryeko; pien dano me lobo man giryek i yalwakgi, makato dano me ceŋ. ⁹Atito botwu ni, wumak lurem pi tic ki lim ma pe atir, wek ka bitum, gijolwu i kabedo ma bedo matwal.¹⁰“ŋat ma lagen i kom jami matidi mo, bibedo lagen bene i kom jami madwoŋ; ŋat ma pe lagen i kom jami matidi mo, pe bibedo lagen bene i kom jami madwoŋ. ¹¹Doŋ ka yam pe wubedo lugen i kom lim ma pe atir, aŋa ma bimiyowu lonyo me ada? ¹²Ka yam pe wubedo lugen i kom jami pa dano mukene, aŋa ma bimiyowu jamiwu kikome?¹³Pe tye latic mo ma twero tiyo ki rwodi aryo; pien bikwero ŋat acel, bimaro ŋat mukene, nyo bimoko i kom ŋat acel, bicayo ŋat mukene. Pe itwero tic pi Lubaŋa ka dok pi lim bene.”¹⁴Luparicayo ma yam lumar lim guwinyo lok man ducu, ci gunyware. ¹⁵Ento Yecu owaco botgi ni, “Wun aye jo ma nyuto kit ma atirwu bot dano, ento Lubaŋa ŋeyo cwinywu; pien gin ma dano dworo, en aye gin me kwer i nyim Lubaŋa.¹⁶“Cik ki lunebi obedo tye nio wa i kare pa Jon; cakke i kare meno gitito lok me kwena maber i kom ker pa Lubaŋa, dano ducu gitye ka donyo iye ki tek. ¹⁷Ento bedo yot bot polo ki lobo me tum woko, makato ton acel me cik me balle.¹⁸“Dano ducu ma oryemo dakone, ka dok onyomo mukene otimo abor, ki ŋat ma onyomo dako ma cware oryemo bene otimo abor.¹⁹“Yam tye dano mo ma lalonyo ma ruko boŋo ma lamar lamar ki kanyi maber me boŋo camanini kun camo cam me wel madwoŋ nino ducu. ²⁰I dog gaŋŋe lacan mo onoŋo buto iye, nyiŋe Lajaro, ma kome orwato bur, ²¹kun iye paro yeŋo ki gin ma oo piny ki i wi meja pa lalonyo-nu; gwogi bene onoŋo gibino ginaŋo waŋ burre.²²Ka lacan oto, ci lumalaika gutiŋe, gutere i kor Abraim. Lalonyo bene oto, ci giyike woko. ²³Oilo waŋe ki i Lyel kun tye ki can, oneno Abraim tye ka mabor kun Lajaro ojeŋŋe i kore.²⁴Odaŋŋe ni, ‘Wora Abraim, tima kica, cwal Lajaro olut lwet ciŋe i pii, okwe ki leba, pien atye ki arem madwoŋ i mac man.’²⁵Ento Abraim odokke iye ni, ‘Woda, po ni, i kare me kwoni gimiyi gin mabeco, ki Lajaro kit meno gimiye gin maraco; ento koni doŋ gikweyo cwinye kany, in kono itye ki arem. ²⁶Dok bene i kom lok man ducu, i kin wan ki wun giketo iye loŋo matut, wek ka jo ma gimito ŋolo nia ki kany, me bino botwu, pe otwerre, wek ŋat mo bene pe oŋol nia ki kunnu me bino botwa kany.’²⁷En owaco ni, ‘Doŋ alegi ba, wora, ore i ot pa abana, ²⁸pien atye ki omegina abic, wek en ocitit botgi, gin bene guwek bino i kabedo man me can.’²⁹Ento Abraim odokke iye ni, ‘Gitye ki Moses ki lunebi; wek guwiny lokgi.’ ³⁰En owaco ni, ‘Pe, wora Abraim; ento ka ŋat mo i kin jo muto ocito botgi, ci gibiŋut.’ ³¹Abraim owacce ni, ‘Ka pe giwinyo lok pa Moses ki lunebi, ci kadi bed ŋat mo oa ki i kin jo muto bene, pe gibiye lokke.”

¹Yecu owaco bot lupwonnyene ni, “Gin ma miyo dano poto i bal pe bigeŋŋe; ento bineno can ŋat ma kelo gin ma miyo dano poto i bal! ²Kono obedo ber bot dano meno ka gitweyo kidi rego i ŋute, gibolo kwede i nam, kato ma en weko ŋat acel i kin litino matino magi poto i bal.³Wugwokke kenwu; ka omeru obalo, juke, ka oŋut, ci timme kica. ⁴Ka otimo bal i komi tyen abiro i nino acel, ce olokke boti tyen abiro, kun legi ni, ‘Aŋut,’ time kica.”⁵Lukwena guwaco bot Rwot ni, “Med niyewa!” ⁶Rwot ogamo ni, “Kono yam wutye ki niye macalo nyig kodi dek karadali, kono wuwaco ki yat man ni, ‘Putte keni, ipitte i dye nam,’ kono owinyo dogwu.⁷“Aŋa i kinwu ma tye ki laticce ma puro ki kweri dyaŋ nyo kwayo romi, ma ka odwogo ki i poto ci wacce ni, ‘Bin oyotoyot ibed piny ka cam’? ⁸Pe koŋ en biwacce ni, ‘Yubba cam me otyeno, itwe pyeri ikella cam, nio ka an acamo, amato, lacen in ibicamo ibimato’?⁹En pwoyo latic-cu pien olubo lok ma gicike kwede? ¹⁰Pe gire. Wun bene kit meno, ka wutyeko tiyo gin ducu ma gicikowu, myero wuwac ni, ‘Wan lutic ma pe konyo gin mo; watiyo gin ma myero keken.”¹¹Ka onoŋo Yecu oecito Jerucalem, ci owok ki i waŋ apokki me Camaria ki Galilaya. ¹²Ka odonyo i paco mo, ci ludobo guromo kwede, kun gucuŋ ka mabor, ¹³gudaŋŋe ni, “Yecu, Ladit, timwa kica.”¹⁴Yecu onenogi, owaco botgi ni, “Wucit wunyutte kenwu bot ajwagi pa Lubaŋa.” Man pud gitye ka cito, komgi olony. ¹⁵ŋat acel i kingi ka oneno ni ecaŋ woko, ci odwogo cen kun pako Lubaŋa ki dwan maloŋo; ¹⁶oryebbe piny ka tyen Yecu, kun pwoye. En onoŋo Lacamaria.¹⁷Yecu openyo ni, “Yam pe gilonyo dano apar? Jo aboŋwen kono gitye kwene? ¹⁸Pe tye ŋat mo i kingi ma odwogo cen ka pako Lubaŋa, ento kono larok man keken?” ¹⁹Owacce ni, “A, icit giri, niyeni ocaŋi.”²⁰Luparicayo gupenyo Yecu ni, “Ker pa Lubaŋa bibino awene?” En odok iye botgi ni, “Ker pe Lubaŋa pe bibino ki lanyut ma gineno. ²¹Pe gibiwaco botwu ni, ‘Nen, en ene!’ nyo ni, ‘En ca!’ pien nen, ker pa Lubaŋa doŋ tye i kinwu.”²²Owaco bot lupwonnyene ni, “Kare bibino ma wubiparo pi neno nino acel mo pa Wod pa dano, ento pe wubineno. ²³Gibiwaco botwu ni, ‘Nen, en ene!’ nyo ni, ‘Nen, en ca!’ Pe wucit iye, pe wulubgi. ²⁴Pien macalo lutkot wil, ci menyo but lobo tuŋcel nio tuŋcel, Wod pa dano bene bibedo kit meno i ninone.²⁵Ento myero koŋ okany can madwoŋ, kun yalwak me kare man gikwere. ²⁶Macalo yam otimme i kare pa Nua, bitimme kit meno bene i kare pa Wod pa dano. ²⁷Yam gicamo, gimato, awobegi ki anyira ginyomme, nio i nino ma Nua odonyo kwede i yeya, pii aluka ocorre otyekogi ducu.²⁸Kit meno bene i kare pa Lot, onoŋo gicamo, gimato, giwilo jami, gicato jami, gipito ginapita, gigero odi; ²⁹ento i nino ma Lot oa woko ki i Codom mac ki gweŋ calfa ma mac oliyo ocwer ki i polo, otyekogi ducu.³⁰Bibedo kit meno i kare ma gibinyuto iye Wod pa dano. ³¹I nino-nu, ŋat ma tye i wi ot kun jamine tye i ot, pe myero olor piny ka cokogi; kit meno bene ŋat ma tye i poto pe myero odwog paco.³²Wupo mono i kom dako pa Lot. ³³ŋat ma mito laro kwone birwenyone, ento ŋat ma rwenyo kwone, bigwoko.³⁴Atittiwu ni,, i dyewor meno co aryo bibuto wi kitanda acel, gibikwanyo ŋat acel, gibiweko ŋat acel doŋ. ³⁵Mon aryo gibibedo ka rego kacel; gibikwanyo ŋat acel, gibiweko ŋat mukene doŋ. ³⁶Co aryo bibedo i poto, gibikwanyo ŋat acel, gibiweko ŋat acel doŋ.”³⁷Gupenye ni, “Kwene, Rwot?” En owaco botgi ni, “Ka ma kom dano muto tye iye, acut bene gicokke kunnu.”

¹Obolo botgi carolok ma pwonyogi ni myero guleg jwijwi, guwek ol. ²Owaco botgi ni, “Yam tye laŋolkop i gaŋ mo, ma pe lworo Lubaŋa kadi woro dano.³I gaŋ meno yam tye iye dato mo ma bino bote jwijwi kun wacce ni, ‘Cul kworra i kom lukworra.’ ⁴Tyen mapol laŋolkop obedo ka kwero; ento lacen oloko kekene ni, ‘Kadi bed pe alworo Lubaŋa ba, kadi woro dano, ⁵ento dato man yela, abiculo kworre; gwok nyo bijonya nono ki bino bota nino ducu.’ ”⁶Rwot owaco ni, “Wuwiny lok ma laŋolkop ma pe kite atir owaco. ⁷Lubaŋa pe biculo kwor pa jo ma en oyero, ma gikok bote dyeceŋ ki dyewor? En bigalle ma pe timo gin mo i komgi? ⁸Atito botwu ni, en biculo kworgi oyotoyot. Ento Wod pa dano ka bibino, tika binoŋo niye i lobo?”⁹Dok obolo carolok bot jo ma genne kengi, ni kitgi atir, kun gicayo jo mukene. Owaco ni, ¹⁰“Jo aryo yam gucito ka lega i ot pa Lubaŋa, ŋat acel Laparicayo, ŋat mukene lajog-mucoro.¹¹Laparicayo ocuŋ, olego gire kene kun waco ni, ‘Lubaŋa, apwoyi pien an pe acalo jo mukene, lubuma, jo ma pe genne, lutim abor, pe bene acalo lajogmucoro man. ¹²Ari kec kiryo i cabit acel; amiyo dul me apar me jamina ducu ma alimo.’¹³Ento lajog-mucoro ocuŋ ka mabor, onoŋo pe mito ilo waŋe malo i plo, ento en odoŋo kore, kun waco ni, ‘Lubaŋa, tima kica, pien an labalo!’ ¹⁴Atito botwu ni, dano man odok i ode kun oloyo kop makato ŋat mukene ca; pien dano ducu ma kette kene ni edit gibidwoke piny, ento ŋat ma mwolle kene gibimiye doko dit.”¹⁵Gukelo bote litino matino, wek oket ciŋe i komgi; ka lupwonnyene guneno, gujukogi. ¹⁶Ento Yecu olwoŋogi bote, owaco ni, “Wuwek litino gubin bota, pe wugeŋgi; pien ker pa Lubaŋa tye pi jo macalo gin. ¹⁷Ada awaco botwu ni, ŋat ma pe jolo ker pa Lubaŋa macalo latin matidi, pe bidonyo iye.”¹⁸Laloc mo openye ni, “Lapwony maber, atim gin aŋo wek alim kwo ma pe tum?” ¹⁹Yecu openye ni, “Piŋo ilwoŋa ni aber? Pe tye ŋat mo maber kono Lubaŋa keken. ²⁰Iŋeyo cik, ni, ‘Pe itim abor, Pe ineki, Pe ibed caden me goba, Wor woru ki meni.’ ” ²¹Ogamo ni, “Amako lok magi ducu cakke wa ka tinona.”²²Ka Yecu owinyo, ci owacce ni, “Pud iweko lok acel; cat jami ducu ma itye kwede, mi limme ki lucan, ci ibibedo ki lwak lonyo ma gikano piri i polo; ka doŋ ibin icak lubo kora.” ²³Ento ka owinyo lok man, okumo, pien onoŋo en lalonyo twatwal.²⁴Yecu kun tye ka nene, owaco ni, “Tek mada bot lulonyo me donyo i ker pa Lubaŋa! ²⁵Pien bedo yot bot kinaga me donyo ki i waŋ libira, kato lalonyo me donyo i ker pa Lubaŋa.”²⁶Dano ducu ma guwinyo guwaco ni, “Ci aŋa ma twero larre?” ²⁷Ento Yecu owaco ni, “Gin man pe twerre ki bot dano, ento ki bot Lubaŋa twerre.”²⁸Petero owaco ni, “Nen, wan waweko pacciwa, walubi.” ²⁹Owaco botgi ni, “Ada, awacciwu ni, pe tye ŋatti mo ma oweko ode, nyo dakone, nyo omegine, nyo lunyodone, nyo litinone, pi ker pa Lubaŋa, ³⁰ma pe bilimo makato meno tyen mapol i kare man, ki i kare ma bibino anyim en binoŋo kwo ma pe tum.”³¹Yecu otero jone apar wiye aryo i muŋ, owaco botgi ni, “Wunen, waecito Jerucalem, lok ducu ma lunebi gucoyo i kom Wod pa dano bicobbe kakare. ³²Pien gibimiye bot Lurok, gibiŋale, gibitimo aranyi i kome, gibiŋulo laa i kome; ³³gibipwode ki del anino, gibineke, i nino me adekke en bicer.”³⁴Ento pe guniaŋ lok ma en owaco; gikano te lok man woko botgi, pe gumedo ki ŋeyo lok ma giwaco botgi.³⁵Ka doŋ gunyiko cok ki Jeriko, latowaŋ mo onoŋo obedo piny i ŋet yo kun lego lim. ³⁶Ka owinyo lwak tye ka mol ki ka ŋete, ci openyo ni, “Meno kono gin aŋo?” ³⁷Gititte ni, “Yecu me Najaret aye tye ka kato.”³⁸Latowaŋ odaŋŋe ni, “Yecu Lakwar Daudi, tima kica ba!” ³⁹Dano ma onoŋo gutelo nyim Yecu gujuke ni, “Liŋ, nye;” ento en omedde ameda ki daŋŋe ni, “Lakwar Daudi, tima kica!”⁴⁰Yecu ocuŋ, ociko ni gikele bote. Ka obino cok, Yecu openye ni, ⁴¹“Imito atimmi gin aŋo?” Latowaŋ ogamo ni, “Ladit, amito waŋa onen piny.”⁴²Yecu owacce ni, “Nen giri piny, niyeni ocaŋi.” ⁴³Oyotoyot ocako neno piny, ci olubo kor Yecu kun miyo deyo bot Lubaŋa. Dano ducu ka guneno, ci gupako Lubaŋa.

¹Yecu odonyo i Jeriko kun oekato akata. ²Onoŋo tye kunnu dano mo ma nyiŋe Jakayo, lajogmucoro madit, dok lalonyo bene.³Oparo pi neno Yecu, ento pe otwero pi lwak, pien en cek. ⁴Oriŋo anyim, oito i wi yat olam wek enen, pien Yecu onoŋo oewok ki i yo-nu.⁵Ka Yecu oo i kabedo-nu, oneno malo, owacce ni, “Jakayo, lor piny oyotoyot; pien tin myero abed i odi.” ⁶Jakayo olor oyotoyot, ojole ki yomcwiny. ⁷Ka dano ducu guneno, ci guŋur kun giwaco ni, “En odonyo i ot ka bedo welo pa dano ma labalo.”⁸Jakayo oa malo, owaco bot Rwot ni, “Nen, Ladit, abimiyo nucu jamina bot lucan; ka abumo ŋat mo i gin mo, abicule waŋ aŋwen.” ⁹Yecu owacce ni, “Tin lar obino i ot man, pien en bene lakwar Abraim. ¹⁰Pien Wod pa dano obino ka yenyo ki ka laro jo ma orwenyo.”¹¹Ka pud giwinyo lok man, Yecu omedde ki lokke, obolo botgi carolok, pien onoŋo doŋ cok ki Jerucalem, dok pien onoŋo gitamo ni ker pa Lubaŋa binen cutcut. ¹²Pi meno owaco ni, “Yam tye wod ker mo ma oa ocito i lobo mabor ka limo twerone me loc ka doŋ odwog cen.¹³Olwoŋo luticce apar, opoko botgi ciliŋ alip acel, owaco botgi ni, ‘Wucat ki wil nio waŋ ma an adwogo.’ ¹⁴Ento dano me lobone gukwere, gucwalo lukwena i kore ki lok ni, ‘Pe wamito dano man olowa.’ ¹⁵Ka doŋ en odwogo, ma doŋ ocamo ker, ociko ni gilwoŋ lutic ma yam emiyogi lim-mi, wek eŋe wel magoba ma gulimo i cato wilgi.¹⁶Dano mukwoŋo obino i nyime, owaco ni, ‘Ladit, ciliŋ miya ma imiya-ni omedde iye ciliŋ alip acel mukene.’ ¹⁷Ogamo ni, ‘Ber, in latic maber! Pien yam ibedo lagen i kom jami matidi mo, ibibedo ki twero i kom gaŋi apar.’¹⁸Dano me aryone obino, owaco ni, ‘Ladit, ciliŋ miya dok omedde iye ciliŋ miya abic mukene.’ ¹⁹Owacce ni, ‘In bene ibibedo ki twero i kom gaŋi abic.’²⁰ŋat mukene dok obino, owaco mere ni, ‘Ladit, limmi en, agwoko, aboyo i kitambara, ²¹pien onoŋo alwori, pien in i dano magwa; ikwanyo gin ma pe ikano, ikayo ka ma pe icoyo.’²²Owacce ni, ‘Abiŋolo kop loyi kun lubo lok ma oa ki i dogi keni, in latic marac! Yam iŋeyo ni an a dano magwa, akwanyo gin ma pe akano, akayo ka ma pe acoyo, ²³piŋo doŋ pe ikano limma i beŋŋe, wek ka adwogo, anoŋ kun acoko limma ki magobane?’²⁴Owaco bot jo ma gucuŋ ka ŋete ni, ‘Wugam ciliŋ miya-ni woko ki bote wumi bot won ciliŋ alip acel-li.’ ²⁵Guwacce ni, ‘Ladit, en doŋ tye ki ciliŋ alip acel.’²⁶Ci en owacci, ‘Atito botwu ni, dano ducu ma mere tye gibimedo bote gin mo; ento ŋat ma mere pe, gibikwanyo woko ki bote kadi wa gin ma tye bote. ²⁷Ento lukworra magi, ma gin gukwera ni pe alogi-ni, wukelgi kany, wunekgi ki pala lucwan i nyima.’ ”²⁸Ka Yecu otyeko loko lok man, ci owoto anyim kun cito malo i Jerucalem.²⁹Ka doŋ onyiko cok ki Betepage ki Betania, i te got ma gilwoŋo Jeituni, Yecu ocako oro jo aryo ki i kin lupwonynyene, ³⁰kun cikogi ni, “Wucit i gaŋ ma tye i nyimwu. Ka ce wudonyo iye wubinoŋo latin kana ma gitweyo, ma ŋat mo peya oito i wiye; ci wugony, wukel kany. ³¹Ka ŋatti mo openyowu ni, ‘Wugonye piŋo?’ wun wubidok iye kit man ni, ‘Rwot aye mito.”³²Kit meno jo ma giorogi gucito, ci gunoŋo kit macalo Yecu otito botgi-ni. ³³Ka gitye ka gonyo latin kana, wegine gupenyogi ni, “Wugonyo latin kana piŋo?” ³⁴Gudok iye botgi ni, “Rwot aye mito.” ³⁵Gukelo latin kana bot Yecu. Ka doŋ gupeto ginarukagi i wiye, ci gicibo Yecu i wiye. ³⁶Ka en oewoto, gipeto ginarukagi i waŋayo.³⁷Ma doŋ onyiko cok ki Jerucalem, i luŋ me got Jeituni, lwak lupwonnyene ducu cwinygi obedo yom, gupako Lubaŋa ki dwan maloŋo pi tic madito ma guneno, ³⁸kun giwaco ni, “Lubaŋa omi gum i kom Kabaka ma bino i nyiŋ Rwot! Kuc obed i wi polo, ki deyo obed i kabedo ma malo twal!”³⁹Luparicayo mogo ma i kin lwak guwacce ni, “Lapwony, juk lupwonnyeni.” ⁴⁰Yecu odok iye ni, “Atito botwu ni, ka kono jo-ni guliŋ, godi magi kikomgi kono gudaŋŋe.”⁴¹Ka doŋ onyiko cok, ma oneno gaŋ, okok pire, ⁴²kun waco ni, “Tin-ni ka kono iŋeyo lok ma kelo kuc boti, kono ber! Ento koni gikano woko ki boti.⁴³Pien kare bibino i komi ma lukworri gibitoro lobo rumi dyere, gibidiri tuŋŋi ki tuŋŋi, ⁴⁴gibireti piny, in ki litinoni; pe gibiweko gweŋ mo acel i ii doŋ ma ododde i wi wadi; pien yam pe iŋeyo kare ma gibilimi iye.”⁴⁵Yecu odonyo i ot pa Lubaŋa, ocako ryemo lucat-wil woko ki iye, ⁴⁶kun waco botgi ni, “Yam gicoyo ni ‘Oda bibedo ot me lega’; ento wun wuloko odoko boro pa luyak.”⁴⁷Yecu obedo ka pwony i ot pa Lubaŋa nino ducu. Ajwagi madito pa Lubaŋa ki lupwony-cik ki jo madito i kin lwak guyenyo yo me neke; ⁴⁸ento pe gunoŋo gin mo ma myero gutim i kome, pien dano ducu guketo cwinygi ka winyo lokke.

¹I nino mo acel ka Yecu tye ka pwonyo dano i ot pa Lubaŋa kun tito lok me kwena maber, ajwagi ki lupwony-cik ki ludoŋo gubino, ²gupenye ni, “Tit botwa, twer aŋo mumiyo itimo gin magi; nyo aŋa ma omiyoni twero man.''³Yecu odok iye botgi ni, “An bene abipenyowu ki peny acel; wudokka iye. ⁴Batija pa Jon twerone oa ki i polo nyo ki bot dano?”⁵Guporo lok kekengi kun giwaco ni, “Ka wawacci, ‘Oa ki i polo,’ en bipenyowa ni, ‘Piŋo pe wuye en?’ ⁶Ento ka wawaco ni, ‘Oa ki bot dano,’ dano ducu bicelowa ki got; pien dano ducu giye atika ni Jon aye lanebi.”⁷Mumiyo gudok iye bot Yecu ni pe giŋeyo ka ma oa iye. ⁸Yecu owaco botgi ni, “An bene pe abitito botwu kit twer mumiyo atiyo lok magi.”⁹Yecu ocako bolo carolok man bot lwak ni, “Yam tye dano mo ma opito olok i potone, ci oweko bot lupur, ocito woko wa i lobo mukene, ori kunnu pi kare malac. ¹⁰Ka kare oromo, ci ooro luticce bot lupur ni myero gumine nyig olok mogo; ento lupur gugoye, guryeme ci odok ki ciŋe nono.¹¹En dok ooro latic mukene; gin gugoyo en bene, gutimo tim aranyi i kome, guryeme kwede odok ki ciŋe nono. ¹²Dok ooro me adekke; guketo ret i kom man, gucwale woko.¹³Lacen won poto olok owaco ni, ‘Abitimo gin aŋo doŋ? Abioro woda ma amaro; gwok nyo gibiwore.’ ¹⁴Ento ka lupur gunene, guloko kekengi ni, ‘Man aye doŋ lale lim; waneke woko, wek lim ma en bileyo-ni obed mewa.’¹⁵Gucwale woko ki i poto olok, guneke. Won poto bitimogi niŋniŋ? ¹⁶En bibino, ci neko lupur meno woko ducu, miyo poto olok bot jo mukene.” Ka guwinyo lok man, guwaco ni, “Pe kumeno!”¹⁷Ento Yecu ociko waŋe i komgi, owaco ni, “Man kono gin aŋo ma yam gicoyo ni, ‘Got ma lugedo gukwero-ni en aye odoko got madit ma i twok ot’? ¹⁸Dano ducu ma poto i kom got man bitur woko; ento ka got man opoto i kom ŋat mo, binyote woko.”¹⁹Lupwony-cik ki ajwagi madito pa Lubaŋa gumito make i cawa-nu, ento gulworo lwak; pien guniaŋ ni en obolo carolok man i komgi. ²⁰Giŋiyo kare maber, ci gioro lurot, ma giporo bedo ni gin jo ma genne, wek gimak lok ma a i doge, wek gimiye i te loc ki twero pa laloyo.²¹Gupenye ni, “Lapwony, waŋeyo ni in iloko dok ipwonyo lok ma tye atir, pe ipoko kin dano, ento ipwonyo yo pa Lubaŋa ki ada. ²²Myero wacul mucoro bot Cecar nyo pe?”²³Ento en oniaŋ ryekogi, openyogi ni, ²⁴“Koŋ wunyutta lim ma giculo kwede. Cal ki coc ma tye i kome-ni pa aŋa?” Gugamo ni, “Pa Cecar.”²⁵Yecu owaco ni, “Wudwok jami pa Cecar bot Cecar, ki jami pa Lubaŋa wudwok bot Lubaŋa.” ²⁶Pe gutwero mako lok mo ma oa ki i doge i nyim lwak; ento guuro kit ma en ogamo kwede lok, ci guliŋ aliŋa.²⁷Lucadukayo mogo gubino bot Yecu, gin aye jo ma onoŋo giwacci jo muto pe gicer. ²⁸Gupenye ni, “Lapwony, Moses yam ocoyo botwa ni, ka laco mo oto woko oweko dakone ma pe ki litino, ominne myero olak dako-nu, wek onywal kwede litino ka wi ominne.²⁹Yam tye omego abiro; ŋat mukwoŋo onyomo dako, ci oto laboŋo litino; ³⁰me aryone, ³¹ki me adekke bene gulako dako-nu, kit meno gin abiro ducu gubedo ki dako-nu, guto laboŋo litino. ³²Lacen dako-nu bene oto. ³³I kare me cer ki i kin jo muto, dako-nu bibedo dako pa aŋa i kingi? Pien gin co abiro-ni ducu gubedo kwede.”³⁴Yecu owaco botgi ni, “Jo me kare man ginyomme; ³⁵ento jo ma gikwanogi ni myero guo i lobo maca, ki i cer ki i kin jo muto, pe ginyomo, pe gibigero co, ³⁶pien pe dok gitwero to, doŋ girom ki lumalaika; gin litino pa Lubaŋa, ma gin litino me cer.³⁷Ento ni jo muto twero cer, Moses kikome bene onyuto, i dul ma gikwano iye lok i kom caka, ka ma en olwoŋo iye Rwot ni, ‘Lubaŋa pa Abraim, Lubaŋa pa Icaka, ki Lubaŋa pa Yakobo.’ ³⁸Doŋ Lubaŋa pe Lubaŋa pa jo muto, ento Lubaŋa pa jo makwo; pien dano ducu bedo kwo pire.”³⁹Jo mogo i kin lupwony-cik gugamo doge ni, “Lapwony, iwaco kakare.” ⁴⁰Pien pe dok gudiyo cwinygi me penye ki lok mo.⁴¹Ento Yecu openyogi ni, “Giwaco niŋniŋ ni Kricito ma Lubaŋa oyero en lakwar Daudi? ⁴²Pien Daudi kikome bene owaco i buk me Jabuli ni ‘Rwot owaco bot Rwoda ni, Bed i kom bada malacuc, i kabedo me deyo ⁴³nio ka abimiyo lukworri doko kom me teno tyeni.’ ⁴⁴Kit meno ka ce Daudi yam olwoŋe ni Rwot, ci dok en bedo lakwarre niŋniŋ?”⁴⁵I kare ma lwak ducu winyo lokke, Yecu owaco bot lupwonnyene ni, ⁴⁶“Wugwokke i kom lupwony-cik ma gimaro wot ma guruko boŋŋi maboco, dok gimito ni dano gubed ka motogi wa i cuk-gu, gimaro bedo i kom pa wa ludito, ka gitye i kacokke, dok gimaro bedo i kabedo me deyo i karama. ⁴⁷Gin gimayo odi pa mon-to, dok gibedo ka lego lega maboco me buta keken. Giŋolo kop madit i wigi makato.”

¹Yecu otiŋo waŋe malo, ci oneno lulonyo kun gibolo motgi i canduk lim i ot pa Lubaŋa. ²Oneno dato mo ma lacan, ma obolo cente aryo ma rom ki cente abic me kare-ni. ³Owaco ni, “Adada awaco botwu ni, dato man ma lacan-ni obolo lim madwoŋ makato dano ducu; ⁴pien gin ducu gugito but limgi madwoŋ-ŋi aye gubolo, ento en i canne-ni, obolo lim ducu ma tye bote, ma konyo kwone.”⁵Ka onoŋo jo mogo i kin lupwonnyene gubedo ka lok pi ot pa Lubaŋa, kit macalo gideyo kwede ki godi mabeco ki gityer ma gimiyo pire, ci Yecu owaco ni, ⁶“Gin magi ducu ma wuneno-ni, kare bibino, ma pe gibiweko got acel mo ma ododde i wi wadi ma pe gibicoro woko piny.”⁷Lupwonnye gupenyo Yecu ni, “Lapwony, man bitimme awene, dok kit gin aŋo ma binyuto ka man doŋ cok timme?” ⁸Yecu ogamo ni, “Wugokke, ŋatti mo owek rwenyowu; pien jo mapol gibibino i nyiŋa, ma giwacci, ‘An aye a en!’ dok ni, ‘Kare doŋ onyiko cok!’ Pe wulubgi. ⁹Dok ka wubiwinyo pi lweny ki pi arubaruba, pe wubed ki lworo, pien meno koŋ myero otimme, ento agik pe bibino oyotoyot.”¹⁰Lacen owaco botgi ni, “Rok bilweny ki rok wadi, ker bilweny ki ker wadi; ¹¹ki oyeŋyeŋ madoŋo biyeŋo lobo, kec laparanat ki two gemo mapatpat bipoto i kabedo mapol; ki gin ma miyo lworo mako dano, ki lanyut madoŋo bene, bia ki i polo.¹²Ento ma peya gin meno ducu otimme, koŋ gibimakowu, gibilibowu, gibiterowu i nyim kacokke, gibitweyowu i mabuc, gibikelowu i nyim luker ki i nyim luloc pi nyiŋa. ¹³Man aye bibedo kare botwu me tito lok me caden i koma.¹⁴Pi meno, wumok i tamwu ni pe wubitamo con kit ma wubidok iye, ¹⁵pien abimiyowu twero me dok ki ryeko, ma ŋat mo i kin lukworwu pe bitwero ette i kome, kadi pyem kwede.¹⁶Kadi wa lunyodowu ki omegiwu ki wadiwu ki luremwu bene gibidobowu, jo mogo i kinwu gibinekogi; ¹⁷dano ducu bimon kwedwu pi nyiŋa. ¹⁸Ento yer wiwu acel mo pe birwenyo. ¹⁹Ka wudiyo cwinywu, ci wubilaro kwowu.²⁰“Ento ka wuneno mony orumo Jerucalem, ci wuŋe ni kare me ketone doŋ onyiko cok. ²¹Jo ma tye i Judaya myero guriŋ i wi godi, jo ma tye i gaŋ myero guriŋ woko ki iye, jo ma tye woko i kin paco pe dok gudony i Jerucalem. ²²Pien kare meno bibedo kare me culo kwor, ki cobo lok ducu ma yam gicoyo.²³Dok mon ma giyac gibineno cam i kare meno, ki mon ma gidoto litino bene! Pien can man madit bipoto i lobo, ki kiniga madwoŋ bipoto i kom jo me rok man. ²⁴Gibinekogi ki pala lucwan, gibiterogi me bedo opii i kin rok ducu; Lurok gibinyono Jerucalem piny, nio ka kare pa Lurok ocobo kakare.²⁵“Lanyut binen i kom ceŋ, i kom dwe ki i kom lakalatwe, rok mapol ma i wi lobo bikumo kun noŋo cwinygi oŋabbe aŋaba pi mor me biamwonyi. ²⁶Kom dano bimyel ki lworo, ka gibitamo gin ma bipoto i kom lobo; pien twer ducu ma i polo biyeŋŋe.²⁷Lacen gibineno Wod pa dano kun bino i wi pol ki tek ki deyo madit. ²⁸Ka gin magi ocako timme, myero wunen malo, myero wutiŋ wiwu malo, pien kare me kokowu doŋ onyiko cok.”²⁹Dok obolo carolok botgi ni, “Koŋ wunen yat oduro, ki yadi mukene ducu; ³⁰ka doŋ olot, wuneno piwu kenwu, ci wuŋeyo ni oro doŋ cok. ³¹Kit meno wun bene, ka wuneno gin magi otimme, myero wuŋe ni ker pa Lubaŋa doŋ onyiko cok.³²Ada awaco botwu ni, yalwak me kare man pe bitum nio waŋ ma lok magi ducu otimme. ³³Polo ki lobo gibitum, ento lokka pe bitum.³⁴“Ento wugwokke kenwu, cwinywu owek doko nwaŋ pi woro cam, ki mero koŋo, ki pi lok me kwo man ma miyo wubedo ki tam mapol, wek nino-nu pe obin oumwu atura macalo akum; ³⁵pien bibino i kom jo ducu ma bedo i wi lobo ducu.³⁶Ento wubed ma waŋwu twolo i kare ducu, kun wulego ni myero wubed ki tek me bwot ki i lok magi ducu ma bitimme, ki cuŋ i nyim Wod pa dano.”³⁷Nino ducu onoŋo Yecu pwonyo i ot pa Lubaŋa dyeceŋ, ento dyewor woto buto i wi got ma gilwoŋo got Jeituni. ³⁸Odiko con dano ducu gibino bote i ot pa Lubaŋa ka winyo lokke.

¹Nino madito me Mugati ma Tobi Pe Iye ma gilwoŋo Kato (Paska) onoŋo onyiko cok. ²Ajwagi madito pa Lubaŋa ki lupwony-cik gubedo ka yenyo kit yo ma myero gineke kwede; pien onoŋo gilworo lwak.³Catan odonyo i cwiny Juda Lakeriot ma en onoŋo dano acel i kin jo apar wiye aryo-ni. ⁴Ocito oporo lok ki ajwagi madito pa Lubaŋa ki ludito askari me ot pa Lubaŋa, kit ma myero emiye kwede botgi.⁵Cwinygi obedo yom, gucako cikke me miye lim. ⁶Omiyo Juda oye, ci oyenyo kare maber ma myero emiye kwede botgi ma noŋo lwak pe.⁷Nino me Mugati ma Tobi Pe Iye oromo, ma gitumo iye latin romo me Kato. ⁸Yecu ooro Petero ki Jon, kun cikogi ni, “Wucit wuyub cam me Kato piwa, wek wacam.” ⁹Gupenye ni, “Imito ni waciyub kwene?”¹⁰Yecu owaco botgi ni, “Nen, ka wudonyo i gaŋ me Jerucalem, ci laco mo birwatte kwedwu kun oyeyo agulu pii; en aye wulub kore wa i ot ma en bidonyo iye, ¹¹wutit bot won ot ni, ‘Lapwony penyi ni, Ot welo tye kwene, ka ma abicamo iye cam me Kato kacel ki lupwonnyena?''¹²Ci en binyuto botwu kicika ot malac ma malo ma gipeto, giyubo maber; wuyub kabedo kunnu.” ¹³Gucito gunoŋo kit macalo Yecu owaco botgi-ni, guyubo cam me Kato kunnu.¹⁴Ka cawa oromo, Yecu obedo piny i dog cam, kacel ki lukwena. ¹⁵Yecu owaco botgi ni, “Abedo ka paro mada me camo cam me Kato man kwedwu, ma kun pud peya aneno can; ¹⁶pien awaco botwu ni, pe dok abicamo nio ka ocobo kakare i ker pa Lubaŋa.”¹⁷Ci otiŋo kikopo, ka doŋ orwoyo owaco ni, “Wumak man, wupok i kinwu; ¹⁸pien awaco botwu ni, nia koni pe dok abimato pig olok nio waŋ ma ker pa Lubaŋa obino.”¹⁹Omako mugati, ka doŋ opwoyo, ci obaro iye, omiyogi kun wacci, “Man aye koma [ma gimiyo piwu, wutim kuman me po pira.” ²⁰Kumeno ka gucamo otum otiŋo kikopo, kun wacci, “Kikopo man aye gicikke manyen i remona ma oo piwu.²¹Ento, nen, ŋat ma bidoba ciŋe tye kacel kweda i dog cam. ²²Pien Wod pa dano cito gire kit macalo yam giciko; ento dano meno ma dobo Wod pa dano bineno can!” ²³Lupwonnye gucako pennye kekengi ni, aŋa i kingi ma bitimo lok man.²⁴Pyem bene ocakke i kin lupwonnye ni aŋa i kingi ma gitamo ni bedo ladit. ²⁵Yecu owaco botgi ni, “Luker pa Lurok gibwoyo lwakgi ki tek, jo ma tye ki twero i komgi gilwoŋogi ni lutim-ber.²⁶Ento pe kit meno botwu; ŋat madit i kinwu myero odok macalo ŋat matidi, ki latel-wic myero obed macalo ŋat ma tiyo pi dano. ²⁷Pien aŋa madit, ŋat ma bedo i dog cam, kece mono ŋat ma kelle cam? Pe ŋat ma bedo i dog cam? Ento an abedo i kinwu macalo ŋat ma tiyo pi dano.²⁸“Wun aye jo ma wubedo ka ŋeta jwijwi i kare ducu ma gibedo ka tema. ²⁹Macalo Wora omiya ker, an bene abimiyowu, ³⁰wek wucam, wumati i dog mejana i kerra, dok wubed i wi komker kun wuŋolo kop ki kaka apar wiye aryo pa jo Icrael.³¹“Cimon, Cimon, nen Catan otyeko penyo piwu me apyeta macalo bel, ³²ento alego piri ni niyeni pe odok cen. In bene ka doŋ ilokke, myero ijiŋ cwiny utmegini.”³³Petero owacce ni, “Rwot, doŋ ayubbe me cito kwedi i mabuc ki i to.” ³⁴Yecu odokke iye ni, “Petero, awacci ni, tin twon gweno pe bikok, nio waŋ ma ikwera tyen adek ni pe iŋeya.”³⁵Yecu openyo lupwonnyene ni, “I kare ma yam aorowu laboŋo kicaa lim, nyo opiro, kadi war, gin mo oremowu?” Gugamo ni, “Pe.” ³⁶Ocikogi ni, “Ento koni, ŋat ma tye ki kicaa lim, myero oter, ki opiro bene kit meno. ŋat ma pe ki pala lucwan myero ocat kanyine, wek owil kwede.³⁷Pien awaco botwu ni, ginacoya man myero ocobbe kakare i koma ni, ‘Gikwane kacel ki lubalo’; pien lok ma gicoyo i koma tye ka cobbe kakare.” ³⁸Guwacce ni, “Rwot, nen, pala lucwan tye kany aryo.” En odok iye botgi ni, “Meno romo.”³⁹Yecu okato woko, ocito i wi got Jeituni macalo kite tye; lupwonnye gulubo kore. ⁴⁰Ka oo i kabedo meno, ci owaco botgi ni, “Wuleg Lubaŋa, wek pe wudony i abita mo.”⁴¹Opokke kwedgi ma rom ki ka ma gibayo iye lakidi, ci otumo coŋe piny, olego ni, ⁴²“Wora, ka imito, kwany kikopo man woko ki bota, ento pe obed macalo an amito; gin ma in imito aye myero otimme.”⁴³Lamalaika ma oa ki i polo onen bote kun miye tek. ⁴⁴Ka kun onoŋo tye ki kumo twatwal, omedde ki lega matek; omiyo kwok ocorre i kome macalo remo ma ton cwer i ŋom.⁴⁵Ka oa ki ka lega, obino bot lupwonynye, onoŋo gunino woko pi cwercwiny, ⁴⁶openyogi ni, “Wunino piŋo? Wua, wuleg Lubaŋa, wek pe wudony i abita mo.”⁴⁷Ka onoŋo Yecu pud tye ka lok, lwak gubino, kun dano ma nyiŋe Juda aye otelo wigi, en ŋat acel i kin jo apar wiye aryo-ni. Onyiko cok bot Yecu wek emote kun enoto leme. ⁴⁸Ento Yecu openye ni, “Juda, in idobo Wod pa dano ki noto lem?”⁴⁹Ka jo ma i ŋete guneno gin ma mito timme, ci gupenyo ni, “Rwot, watoŋ dano ki pala lucwan?” ⁵⁰ŋat acel i kingi otoŋo opii pa ajwaka madit pa Lubaŋa, oŋuno ite malacuc woko. ⁵¹Ento Yecu owacci, “Ogik doŋ ki man keken!” Oboŋo ite, ocaŋe.⁵²Lacen Yecu owaco bot ajwagi madito pa Lubaŋa ki ludito pa askari me ot pa Lubaŋa, ki ludoŋo ma gubino i kome, ni, “Wubino i koma ki pala lucwan ki odoo-gu me maka macalo wubino i kom layak mo? ⁵³Yam abedo kwedwu jwijwi i ot pa Lubaŋa, pe wumaka. Ento koni aye karewu ki twero me colpiny.”⁵⁴Ci gumako Yecu, gutere, gukele i ot pa ajwaka madit pa Lubaŋa. Petero olubo kore kun tye ki cen ka mabor. ⁵⁵Ka gimoko mac i dyekal, ma gubedo piny kacel, Petero bene obedo piny i kingi.⁵⁶Aŋeca mo onene kun obedo ka ma mac ocaro; ka oŋiye matek, ci owaco ni, “Dano man bene nakanen tye kacel kwede.” ⁵⁷Ento Petero okwero woko kun waco ni, “Dako, pe aŋeye gira.” ⁵⁸Kare okato manok, ŋat mukene onene, owacci, “In bene i ŋat acel i kingi.” Ento Petero owaco ni, “Nye, an ko.”⁵⁹Ka kare okato ma mito romo cawa acel, ŋat mukene oloko kun moko ni, “Ada, dano man nakanen tye kacel kwede; pien en Lagalilaya.” ⁶⁰Ento Petero ogamo ni, “Nye, an akwiya lok ma itye ka wacone-ni.” Cutcut ma pud en waco lok man, twon gweno otugi kok.⁶¹Rwot olokke oneno Petero. Ci Petero opo lok pa Rwot, kit macalo nene Yecu owacce ni, “Ma noŋo twon gweno peya okok tin, ibikwera woko tyen adek kulu.” ⁶²Ci okato woko okok ki cwercwiny madwoŋ.⁶³Jo ma gumako Yecu gunyware, gugoye; ⁶⁴guboyo waŋe woko bene ki kitambara kun gipenye ni, “Ka in lanebi tuci! Aŋa mugoyi?” ⁶⁵Guloko lok mukene mapol i kome, kun giyete.⁶⁶Ka piny doŋ oru, ludoŋo pa lwak, kacel ki ajwagi madito pa Lubaŋa ki lupwony-cik, gucokke kacel; gukele i nyim Lukikogi, guwaco ni, ⁶⁷“Tit botwa ka ce in aye i Kricito ma Lubaŋa oyero.” Ento Yecu owaco botgi ni, “Ka atito botwu, wun pe wubiye; ⁶⁸ka apenyowu wun pe wubidokka iye.⁶⁹Ento nia koni Wod pa dano bibedo piny i kabedo me deyo ka ŋet Lubaŋa Won Twer tuŋ lacuc.” ⁷⁰Gin ducu gugamo ni, “Doŋ in i Wod pa Lubaŋa do?” Yecu ogamo ni, “Wun wuwaco ni an a en.” ⁷¹Guwaco ni, “Dok wamito caden me ŋo? Wan doŋ wawinyo piwa kenwa ki i doge kene.”

¹Lwak ducu gutwarre, gutero Yecu i nyim Pilato. ²Gudote kun giwaco ni, “Dano man wanoŋo tye ka rwenyo rokwa, ogeŋowa ni pe wacul mucoro bot Cecar, kun lwoŋŋe kene ni en Kricito, kabaka.”³Pilato openye ni, “In i Kabaka pa Lujudaya bo?” Yecu ogamo ni, “Iwaco kakare gire.” ⁴Pilato owaco bot ajwagi madito pa Lubaŋa ki lwak ducu ni, “Pe anoŋo kop marac i kom dano man.” ⁵Ento gin gudiye kun giwaco ni, “Dano-nu poyo lwak, kun pwonyo i lobo Judaya ducu, cakke ki i Galilaya nio kwede wa kany.”⁶Ka Pilato owinyo lok man openyo ka gwok nyo Yecu Lagalilaya. ⁷Ka oniaŋ ni en tye i te loc pa Kerode, ci ocwale bot Kerode, ma en kikome bene onoŋo tye i Jerucalem i kare-nu.⁸Ka Kerode oneno Yecu, cwinye obedo yom twatwal, pien onoŋo yam con paro pi nene, pien owinyo pire, dok onoŋo geno ni ebineno lanyut mo ma en bitiyo. ⁹Omiyo Kerode openyo Yecu ki peny mapolpol; ento Yecu pe omedo ki dok iye lok mo. ¹⁰Ajwagi madito pa Lubaŋa ki lupwony-cik gucuŋ i ŋete kun gidote ki tek.¹¹Kerode ki askarine bene guŋale, gunyware; guruke ki boŋo me deyo, gudwoke kwede bot Pilato. ¹²Kerode ki Pilato gudoko lurem i nino meno cut, pien yam con onoŋo gimon kekengi..¹³Pilato olwoŋo ajwagi madito pa Lubaŋa ki luloc ki lwak kacel, ¹⁴owaco botgi ni, “Wun wukelo dano man bota ni en ŋat ma rwenyo lwak, an apenye i nyimwu, ci nen, pe anoŋo kop mo marac i kome i kom lok ducu ma wudote kwede.¹⁵Kadi Kerode bene pe onoŋo, pien Kerode odwoko en botwa. Nen, pe otimo gin mo ma myero gineke pire; ¹⁶pi meno abigoye, ci abigonye. ¹⁷I kare me karama, yam mitte ni myero ogony botgi ŋat acel pigi.”¹⁸Ento lwak ducu gudaŋŋe lawaŋacel ni, “Tere woko! Gony botwa Baraba!” ¹⁹Baraba kono yam dano ma gitweye i mabuc pi tugo lwak i Jerucalem ki pi nek.²⁰Pilato dok oloko botgi, kun mito gonyo Yecu; ²¹ento lwak gumedde ki daŋŋe ni “Gure woko i kom yatariya, gure woko i kom yatariya!” ²²Pilato owaco botgi tyen me adekke ni, “Piŋo kaa? Otimo kit gin aŋo marac? An gira pe anoŋo kop mo marac i kome ma myero gineke pire; pi meno abigoye, ci abigonye.”²³Ento lwak guwo ki daŋŋe kun gidiye ni myero gigure i kom yatariya. Dwangi oloyo. ²⁴Omiyo Pilato oŋolo kop ni myero gitim Yecu kit macalo gimito. ²⁵Ogonyo dano ma yam gitweyo i mabuc pi tugo dano ki pi nek, ma lwak gubako doggi bote pire; ento omiyo Yecu botgi wek gutime kit macalo gimito.²⁶Ka gitye ka tere doŋ woko, ci gimako Cimon, dano mo me Cirene ma onoŋo donyo i gaŋ kun oa ki i kin paco, gucibo yatariya i kome, wek otiŋ, olub ki kor Yecu.²⁷Lwak dano madwoŋ gulube, ki mon mapol ma gikumo kun gikok pire. ²⁸Ento Yecu olokke botgi owaco ni, “Anyira Jerucalem, pe wukok pira, ento wukok piwu kenwu ki pi litinowu.²⁹Pien nen, kare bibino ma gibiwaco ni, ‘Tye ki gum lulur, kiot nyodo ma pe nywal, ki tuno ma pe gidoto!’ ³⁰Lacen dano biwaco bot godi matino ni, ‘Wupot i komwa’; ki bot godi matino ni, ‘Umwa.’ ³¹Pien ka gitimo man ma yat pud dyak, bibedo niŋniŋ ka yat doŋ otwo?”³²Jo aryo mukene bene, ma lutim maraco, giterogi wek ginekgi kacel kwede.³³Ka guo i kabedo ma gilwoŋo Cogo Wic, gigure i kom yatariya kunnu, ki lutim maraco, ŋat acel tuŋ lacuc, ŋat acel tuŋ lacam. ³⁴Yecu owaco ni, “Aba, wayi tim kica botgi, pien pe giŋeyo gin ma gitye ka tiyone.” Gubolo kwir pi poko ginarukane.³⁵Lwak gucuŋ kun gineno; ento luloc guŋale kun giwaco ni, “Yam olaro jo mukene, koŋ olarre kene ka en Kricito pa Lubaŋa, ma en oyero.”³⁶Askari bene gunyware, gubino gumine koŋo vino mawac, ³⁷kun giwaco ni, “Ka in i Kabaka pa Lujudaya, larre keni!” ³⁸I waraga ma giketo ka wiye, gicoyo nukuta me leb Grik, ki me leb Roma, ki me leb Ibru ni, “Man aye Kabaka pa Lujudaya.”³⁹ŋat acel i kin lutim maraco ma giguro kacel kwede ocaye kun waco ni, “In pe i Kricito ma Lubaŋa oyero ce? Larre keni wa ki wan bene!” ⁴⁰Ento lawote-ni ojuke kun waco ni, “In pe ilworo Lubaŋa, ma kun giŋolo kop i komi kwede ma rom? ⁴¹Wan giwa giŋolo kop i komwa kakare; pien watye ka limo cul ma myero, pi timwa; ento dano man pe otimo gin mo marac wacel.”⁴²Ci owaco ni, “Yecu, po pira ka ibidonyo i kerri.” ⁴³Yecu odok iye bote ni, “Ada, awacci ni, tin wabibedo kwedi i Paradic.”⁴⁴Ka cawa doŋ mito romo abicel, piny ocido macol i wi lobo ducu nio wa i cawa aboŋwen, ⁴⁵kun waŋ ceŋ oumme woko; boŋo kicika me ot pa Lubaŋa obar, dyere opokke aryo.⁴⁶Yecu odaŋŋe ki dwan matek, owaco ni, “Aba, amiyo cwinya i ciŋi!” Ka owaco lok man, ci oto. ⁴⁷Ka ladit ma loyo askari oneno gin ma otimme, opako Lubaŋa kun waco ni, “Ada, dano man kara dano ma kite atir.”⁴⁸Lwak ducu ma gucokke ka nene, ka guneno gin ma otimme, gudok paco kun gidoŋo korgi. ⁴⁹Lureme ducu ki mon ma yam gubino kwede nia i Galilaya, gucuŋ ki cen kun gineno gin man.⁵⁰I kare-nu onoŋo dano mo ma nyiŋe Yucepu tye kunnu ma oa ki i gaŋ mo pa Lujudaya ma gilwoŋo Arimataya. En onoŋo ŋat acel i kin jo ma bedo i Lukiko, en dano maber, dok kite atir, ⁵¹yam pe ocwako tamgi kadi ki ticgi, ento onoŋo kuro ker pa Lubaŋa.⁵²Dano man ocito bot Pilato, olego pi kom Yecu. ⁵³Okwanye ki i kom yatariya, ci oboye ki boŋo camanini maleŋŋe, ka opyele i lyel ma gikwinyo i got, ka ma peya gipyelo iye kom ŋat mo.⁵⁴Nino-nu onoŋo nino me Yubbe, cabit bene onoŋo doŋ cok cakke. ⁵⁵Mon ma yam gubino kwede nia ki i Galilaya, guneno lyelle, ki kit ma gipyelo kwede kome; ⁵⁶gudok, guyubo aŋwece ki moo wir. I cabit, guywe kit macalo cik tye.

¹I nino mukwoŋo me cabit, mon gupuk kwarpiny, gubino i wi lyel, kun gikelo aŋwecegi ma guyubo. ²Gunoŋo ni giloro got woko ki i dog lyel, ³ento ka gudonyo iye, pe gunoŋo kom Rwot Yecu.⁴Ka onoŋo pud guro lok man, nen, co aryo gucuŋ i ŋetgi ma guruko jor ma ryeny lidaŋdaŋ. ⁵Ka komgi oryaŋŋe, ci guryebbe piny, co-nu gupenyogi ni, “Piŋo wuyenyo dano makwo i kin jo muto?⁶En pe tye kany, ento ocer woko. Wupo lok ma yam en owaco botwu i kare ma pud en tye i Galilaya, ⁷ni, Wod pa dano myero gimiye i ciŋ lubalo, gigure i kom yatariya, ki cer woko i nino me adekke.”⁸Gupo lokke, ⁹ka gua ki i wi lyel gudok, gutito lok man ducu bot jo apar wiye acel ca, ki bot jo mukene ducu. ¹⁰Jo ma yam gutito lok man bot lukwena gin aye Maliam Lamagdala, Joana, ki Maliam min Yakobo, ki mon mukene ma onoŋo tye kwedgi.¹¹Lokdgi obedo calo lok miŋo ki bot lukwena, pe guye lokgi. ¹²Ento Petero oa, oriŋo wa i wi lyel; ka ocuŋ oneno lyel, oneno boŋŋi camanini ma tye kengi pat; odok paco kun uro gin ma otimme.¹³I nino-nu kikome jo aryo ki i kingi onoŋo nene gicito i paco ma gilwoŋo ni Emau, ma mito romo mairo abiro ki i Jerucalem, ¹⁴kun giboko lok kekengi i kom gin ma otimme.¹⁵Ka kun giboko lok ma bene gilaro kacel, Yecu kikome onyiko cok, owoto kwedgi. ¹⁶Ento waŋgi oumme woko, pe guŋeye.¹⁷Owaco botgi ni, “Wularo lok aŋo kekenwu kun wutye ka wot-ti?” Gucuŋ ma waŋgi nen ki can. ¹⁸ŋat acel i kingi ma nyiŋe Kelopa, odok iye bote ni, “In i welo keni i Jerucalem ce, ma pe iŋeyo lok ma otimme kunnu i kare man?”¹⁹Yecu openyogi ni “Gin aŋo?” Gudokke iye ni, “Lok i kom Yecu Lanajaret, ma yam obedo lanebi matek i lokke ki i ticce i nyim Lubaŋa, ki i nyim dano ducu, ²⁰ki kit ma ajwagi madito pa Lubaŋa ki lulocwa gudobe wek giŋol kop i kome me neke, gugure i kom yataria.²¹Ento yam wageno ni en aye ŋat ma bikoko Icrael. Iyo, medo i kom meno ducu, tin doŋ nino me adek nia ma lok man otimme.²²Mon mogo i kinwa bene gumiyowa ur. Gupuk i wi lyel odiko con, ²³pe gunoŋo kome; gudwogo cen kun giwaco ni guneno lumalaika ma onyutte botgi, kun giwaco ni en kwo gire. ²⁴Jo mukene ma onoŋo tye kacel kwedwa gucito i wi lyel, gunoŋo tye kit macalo mon guwaco; ento pe guneno kome.”²⁵Yecu owaco botgi ni, “Wun lumiŋ, ki luwackom i cwinywu pi ye lok ducu ma lunebi yam guloko! ²⁶Pe myero ni Kricito ma Lubaŋa oyero onen can magi, wek odony i deyone?” ²⁷Cakke wa i kom Moses, ki lunebi ducu, en ogonyo botgi lok ducu ma i ginacoya ma mako kome.²⁸Ka gunyiko cok ki paco ma onoŋo gicito iye-ni, Yecu otimo macalo mito kato akata ki wotte, ²⁹ento gudiye matek kun giwaco ni, “Bed botwa, pien piny doŋ cok yuto, ceŋ bene doŋ cok poto woko.” Odonyo i ot obedo kwedgi.³⁰Ka tye i dog cam kacel kwedgi, omako mugati, opwoyo, obaro iye, omiyo botgi. ³¹Waŋgi oyabbe, guŋeye; ci cutcut orwenyo woko ki i waŋgi. ³²Gupennye kekengi ni, “Cwinywa nakanen pe obedo ka pukke i kare ma en tye ka lok kwedwa i waŋayo, kun yabbiwa ginacoya?”³³Gua i cawa-nu, gudok i Jerucalem; gunoŋo jo apar wiye acel ca gucokke kacel, ki jo ma onoŋo tye botgi. ³⁴Jo-nu guwaco ni, “Rwot ocer ada, onyutte bot Cimon!” ³⁵Gutito lok ma otimme i waŋayo, ki kit ma giŋeye kwede i kare ma obaro mugati.³⁶Ka pud gitye ka loko lok man, Yecu kikome ocuŋ i kingi, owaco botgi ni, “Kuc obed i komwu!” ³⁷Ento komgi oto woko lirut, gulworo kun gitamo ni gineno tipo.³⁸Yecu openyogi ni, “Piŋo cwinywu opoto? Piŋo wupennye kekenwu i cwinywu? ³⁹Wunen ciŋa, ki tyena, man an kikoma; wuboŋa, wunena; pien tipo pe tye ki kom ki cogo kit macalo wuneno an atye kwede.” ⁴⁰Ka doŋ owaco lok man, ci onyuto ciŋe ki tyene botgi.⁴¹Ento ka pud peya giye pi yomcwiny, kun giuro, owaco botgi ni, “Wutye ki gin mo kany me acama?” ⁴²Gumiye but rec ma gubulo, ⁴³ogamo, ci ocamo i nyimgi.⁴⁴Lacen owaco botgi ni, “Man aye lokka ma yam aloko botwu i kare ma onoŋo pud atye kwedwu, ni, lok ducu ma gicoyo i koma i cik pa Moses, ki i lunebi, ki i jabuli myero ocobbe kakare.”⁴⁵Oyabo tamgi wek giniaŋ ginacoya, ⁴⁶owaco botgi ni, “Yam gicoyo kit man ni, Kricito ma Lubaŋa oyero myero onen can, ci i nino me adekke myero ocer ki i kin jo muto, ⁴⁷dok myero gitit lok i kom ŋut ma kelo weko bal i nyiŋe bot rok ducu kun gicako ki i Jerucalem.⁴⁸Wun wucaden me lok man. ⁴⁹Nen, abicwalo botwu gin ma Wora ociko; ento myero wubed i Jerucalem, nio ka gibirukowu ki tek ma a ki i polo.”⁵⁰Lacen oterogi woko nio wa Betania, otiŋo ciŋe malo olamo gum i komgi. ⁵¹Ma kun pud lamo gum i komgi, ci opokke woko ki botgi, [gitiŋe, gitere i polo.⁵²Guwore, lacen gudwogo i Jerucalem ki yomcwiny madwoŋ, ⁵³guri i ot pa Lubaŋa jwijwi, kun gipwoyo Lubaŋa.

¹I acakki piny Lok onoŋo tye, Lok tye bot Lubaŋa, Lok en Lubaŋa. ²En ceŋ tye bot Lubaŋa i acakki piny; ³jami ducu en aye ceŋ otiyo, pe tye gin mo ma ceŋ giketo laboŋo en.⁴I en con tye kwo, kwo meno con ceŋ pa dano. ⁵Ceŋ oryeny i piny macol, ento piny macol pe ogeŋo ryeny.⁶Yam tye dano mo ma Lubaŋa ooro, nyiŋe Jon. ⁷En obino pi bedo caden me tito lok i kom ceŋ, wek dano ducu guye pi lokke. ⁸En kikome onoŋo pe ceŋ, ento obino pi tito lok me caden i kom ceŋ.⁹Ceŋ me ada ma menyo dano ducu onoŋo oebino i lobo.¹⁰En con tye i lobo, en aye ceŋ otiyo lobo, ento lobo pe obedo ki ŋec i kome. ¹¹En obino tugi, ento jone pe gujole.¹²Ento dano ducu ma ceŋ gujole, ma guye nyiŋe, omiyogi twero me doko litino pa Lubaŋa; ¹³ma pe ginywalogi ki remo, kadi pi miti me kom, kadi pi mit pa dano, ento pi miti pa Lubaŋa.¹⁴Lok odoko dano, obedo i kinwa, kun opoŋ ki kica ki ada; wan waneno deyone, deyo macalo pa latin acel keken ma oa bot Won. ¹⁵Jon obolo lok me caden i kome kun daŋŋe ni, “Man aye ŋat ma yam atittiwu pire ni, ‘ŋat ma bino i ŋeya kata ki dit, pien en okwoŋo nyima con.’ ”¹⁶Nia i lonyone mapol wan ducu gimiyowa kica i kom kica. ¹⁷Pien cik yam gimiyo kun wok ki bot Moses, ento kica ki ada, Yecu Kricito aye okelo. ¹⁸Pe tye ŋat mo ma yam oneno Lubaŋa; Wod acel keken, ma tye i kor Won, omiyo Won oŋene.¹⁹Man lok me caden ma Jon obolo, ka Lujudaya guoro ajwagi ki jo Levi nia Jerucalem pi penye ni, “In aŋa?” ²⁰En otuco ka maleŋ, pe omuŋo, otuco ni, “An pe a Kricito ma Lubaŋa oyero.” ²¹Gupenye ni, “In doŋ aŋa? In Elia bo?” En odok iye ni, “Pe.” “In lanebi meno?” En ogamo ni, “Pe”.²²Dok gupenye ni, “In aŋa kaa? Tittiwa, wek wadwok lok bot jo muorowa. Ilwoŋŋe kekeni ni in aŋa?” ²³En odok iye ni, “An a dwan ŋat ma daŋŋe i tim ni, ‘Wutir yo pa Rwot ocuŋ atir,’ macalo lanebi Icaya owaco.”²⁴Jo mogo ma ceŋ gioro nia i kin Luparicayo ²⁵gupenye ni, “Doŋ piŋo ibatija dano, ka in pe i Kricito ma Lubaŋa oyero, nyo Elia, nyo lanebi meno?”²⁶Jon odokkigi iye ni, “An abatija dano ki pii; ento i kinwu ocuŋ ŋatti mo ma wun wukwiya, ²⁷en aye ŋat ma bino ki i ŋeya, ma an pe amyero ka gonyo del warre.” ²⁸Lok man ducu otimme i Betania loka Jordan, ka ma Jon yam obedo ka batija iye dano.²⁹Orwone Jon oneno Yecu kun woto bino tuŋ bote, owaco ni, “Nen Latinromo pa Lubaŋa ma kwanyo bal me lobo! ³⁰Man aye ŋat ma yam awaco pire ni, ‘I ŋeya bibino ŋat ma kata ki dit, pien en okwoŋo nyima con.’ ³¹An kikoma onoŋo pe aŋeye, ento pi lok man omiya abino kun abatija dano ki pii, wek ginyute bot jo Icrael.”³²Jon otito lok me caden i kome ni, “Ceŋ aneno Cwiny Maleŋ kun bino nia ki i polo macalo amam, opye, obedo i kome. ³³An kikoma yam pe aŋeye; ento ŋat ma oora ka batija dano ki pii-ni owacca ni, ‘ŋat ma ibineno Cwiny Maleŋ bino, pye, bedo i kome, en aye ŋat ma bibatija dano ki Cwiny Maleŋ.’ ³⁴Doŋ aneno, dok atito lok me caden i kome ni, man en Wod pa Lubaŋa.”³⁵Orwone doki, Jon ka ocuŋ ki jo aryo i kom lupwonnyene, ³⁶oneno Yecu kun woto, owaco ni, “Nen Latin-romo pa Lubaŋa!” ”³⁷Lupwonnye meno aryo guwinyo kun waco lok man, ci gulubo Yecu. ³⁸Yecu olokke, onenogi kun gilube, openyogi ni, “Wuyenyo aŋo?” Gin gupenye ni, “Rabbi (ma te lokke ni, Lapwony) ibedo kwene?” ³⁹Odok ki gin ni, “Wubin, wunen.” Gubino, guneno ka ma en onoŋo bedo iye; ci gubedo bote i nino meno, pien cawa doŋ onoŋo cok romo apar.⁴⁰ŋat acel i kin jo aryo ma yam guwinyo Jon kun loko, ci gulubo Yecu, onoŋo Anderiya, omin Cimon Petero. ⁴¹En okwoŋo noŋo ominne Cimon, owacce ni, “Watyeko noŋo Meciya” (ma te lokke ni, Kricito). ⁴²En okele bot Yecu. Yecu onene, owacce ni, “In aye Cimon, wod pa Jon? Gibilwoŋi ni, Kepa” (ma te lokke ni, Petero).⁴³Orwone Yecu omito cito i Galilaya. Orwatte ki Pilipo, owacce ni, “Luba.” ⁴⁴Pilipo yam Labetecaida, ma gaŋgi kacel ki Anderiya ki Petero. ⁴⁵Pilipo onoŋo Natanael, otitte ni, “Watyeko noŋo ŋat ma Moses yam ocoyo pire i cik, ma lunebi bene gucoyo pire, en aye Yecu me Najaret, wod pa Yucepu.”⁴⁶Natanael openye ni, “Gin mo maber twero katti ki i Najaret?” Pilipo odokke iye ni, “Bin, inen.” ⁴⁷Yecu oneno Natanael kun bino bote, oloko i kome ni, “Nen Laicrael me ada, ma pe tye ki goba mo i cwinye!” ⁴⁸Natanael openye ni, “Iŋeya niŋniŋ?” Yecu odokke iye ni, “Ma peya Pilipo olwoŋi, kun ibedo i te olam, an aneni.”⁴⁹Natanael odokke iye ni, “Lapwony, in giri i Wod pa Lubaŋa. In i Kabaka me Icrael!” ⁵⁰Yecu odokke iye ni, “In iye pien awacci ni, ‘Aneni kun ibedo i te olam’? Ibineno lok madito makato magi.” ⁵¹Dok owacce ni, “Adada awacciwu ni, wubineno polo kun oyabbe, kun lumalaika pa Lubaŋa giito dok gilor piny i kom Wod pa dano.

¹I nino me adekke nyom obedo i Kana, gaŋ mo me Galilaya. Min Yecu onoŋo tye kunnu, ²Yecu ki lupwonnyene bene gilwoŋogi i nyom.³Ka koŋo vino otum, min Yecu otitte ni, “Vinogi doŋ pe.” ⁴Yecu odokke iye ni, “Maa, walaro aŋo wan kwedi? Cawana pud peya oromo.” ⁵Minne ociko lutic ni, “Wutim gin ducu ma en biwacciwu.”⁶Onoŋo tye kunnu dak pii me got abicel ma gicibo pi kit me lonnye pa Lujudaya; i dak acel acel twero a iye agulu abic nyo abicel. ⁷Yecu owaccigi ni, “Wuony pii i dak” Guonyo opoŋ woko libyeny. ⁸Owaccigi ni, “Doŋ wutwom, wuter bot ladit me nyom”; gutero.⁹Ka ladit me nyom obilo pii ma doŋ olokke odoko vino, kun pe oŋeyo ka ma oa iye (ento lutic ma gutwomo pii giŋeyo), ladit me nyom olwoŋo lanyom. ¹⁰owacce ni, “Dano ducu koŋ kwoŋo miyo jo vino mamit; ka doŋ dano gumato oromogi, ka gikelo ma pe mit twatwalle; ento in ikano meri vino maber nio koni.”¹¹Lanyut meno mukwoŋo Yecu otiyo i Kana me Galilaya, kun nyuto kwede deyone; lupwonnyene guye en.¹²Ka man otum, Yecu ocito i Kapernaum kacel ki minne ki omegine ki lupwonnyene; guri kunnu pi kare manok.¹³Kato (Paska) pa Lujudaya onoŋo doŋ tye cok, omiyo Yecu ocito malo i Jerucalem. ¹⁴I ot pa Lubaŋa onoŋo tye iye jo ma cato twoni ki romi ki amam, ki lulok-cente ma gubedo piny.¹⁵Yecu okedo anino ogwil matino, ci oryemogi ducu woko ki i ot pa Lubaŋa, kacel ki romi ki twoni. Oketo lim pa lulok-cente, oryebo mejagi. ¹⁶Ociko lucat amam ni, “Teru jami magi woko, pe wulok ot pa Abana odok cuk.”¹⁷Lupwonnyene gupo lok ma yam gicoyo ni, “Arima pi odi mito neka woko.” ¹⁸Pi man Lujudaya gupenye ni, “Lanyut aŋo ma inyuttiwa ma omiyo itiyo jami magi?” ¹⁹Yecu ogamo doggi ni, “Wuket ot pa Lubaŋa man woko, an abigerone pi nino adek.”²⁰Lujudaya guwacce ni, “Ot pa Lubaŋa man gigero pi mwaka pyeraŋwen wiye abicel kulu. In ibigerone pi nino adek keken?” ²¹Ento en onoŋo loko pi kome ma ot pa Lubaŋani. ²²Ka doŋ gicere ki i kin jo muto, lupwonnyene gupo ni yam owaco lok man; ci guye ginacoya ki lok ma yam Yecu oloko.²³Ka onoŋo en tye i Jerucalem i nino madit me Kato (Paska), jo mapol guye nyiŋe pi neno lanyut ma en obedo ka tiyogi; ²⁴ento Yecu kikome pe obedo ki gen i komgi, ²⁵pien en ŋeyo jo ducu, pe omito ni ŋat mo otit lok i kom dano mo bote, pien en kikome ŋeyo gin ma tye i cwiny dano.

¹Ceŋ tye dano mo i kin Luparicayo ma nyiŋe Nikodemo, ma en ŋat acel i kin jo madito me Judaya. ²En obino bot Yecu dyewor, owacce ni, “Lapwony, waŋeyo ni in lapwony ma ia ki bot Lubaŋa; pien pe tye ŋatti mo ma twero tiyo lanyut meno ma in itiyo, ka Lubaŋa pe tye kwede.”³Yecu odokke iye ni, “Adada awacci ni, dano ka pe ginywale tyen me aryo* pe twero neno ker pa Lubaŋa.” ⁴Nikodemo openye ni, “Dano gitwero nywale niŋniŋ ka doŋ oti? Twero donyo doki i ot nyodo pa minne tyen me aryo, ci ginywale?”⁵Yecu odok iye ni, “Adada awacci ni, dano ka pe ginywale ki pii ki Cwiny, pe twero donyo i ker pa Lubaŋa. ⁶Ma ginywale ki kom en kom, ma ginywale ki Cwiny en cwiny.⁷Pe iŋur pien awacci ni, ‘Myero ginywalwu tyen me aryo.’ ⁸Yamo kodo dok ka ma en mito; iwinyo dwane, ento pe iŋeyo ka ma oa iye, nyo ka ma dok iye; dano ducu ma ginywale ki Cwiny tye kameno.”⁹Nikodemo openye ni, “Man twero timme niŋniŋ?” ¹⁰Yecu odokke iye ni, “In lapwony pa Icrael, pe iŋeyo lok man? ¹¹Adada awacci ni, wan waloko i kom gin ma waŋeyo, wabedo caden i kom gin ma waneno, ento wun pe wuye lok ma watito botwu.¹²Ka attitiwu lok me lobo, wun pe wuye, wubiye niŋniŋ ka atittiwu lok me polo? ¹³Pe tye ŋat mo ma yam oito i wi polo, kono en ma ceŋ olor piny nia ki i polo, en aye Wod pa dano, ma bedo i polo.¹⁴Kit macalo Moses yam otiŋo twol malo i tim-mi, Wod pa dano bene myero gitiŋe malo kumeno, ¹⁵wek dano ducu ma ye en olim kwo ma pe tum.”¹⁶Pien Lubaŋa con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum. ¹⁷Lubaŋa pe ooro Wode i lobo ni oŋol kop i kom lobo, ento wek lobo olarre pi en. ¹⁸ŋat ma ye en pe doŋ giŋolo kop i kome, ento ŋat ma pe ye en, doŋ giŋolo kop oloye con; pien pe oye nyiŋ Wod acel keken pa Lubaŋa.¹⁹ŋolo kop tye kit man, ceŋ con obino i lobo, ento dano gumaro piny macol makato ceŋ, pien timgi rac. ²⁰Pien dano ducu ma timo gin marac dag ceŋ, pe bino i ceŋ, wek timme pe onen ka maleŋ. ²¹Ento ŋat ma timo gin me ada bino i ceŋ, wek ticce onen ka maleŋ, ni en tiyo i Lubaŋa.²²Ka man otum, Yecu ocito i lobo Judaya kacel ki lupwonnyene; obedo kwedgi kunnu kun batija dano. ²³Jon bene onoŋo tye ka batija dano i Ainon, cok ki Calim; pien pii onoŋo dwoŋ kunnu, dano gubino, en obatijagi. ²⁴Onoŋo peya gitweyo Jon i mabuc.²⁵Pyem ocakke i kin lupwonnye mogo pa Jon ki Lajudaya mo i kom lok me lonnye. ²⁶Gubino bot Jon, guwacce ni, “Lapwony, ŋat ma ceŋ itye kwede loka Jordan, ma ceŋ ibolo lok me caden i kome-ni, nen, en tye ka batija dano, jo ducu gibino bote.”²⁷Jon odok iye ni, “Dano pe twero noŋo gin mo pire kene, ka pe gimiye nia ki i polo. ²⁸Wun kikomwu onoŋo wubedo cadenna ni yam atito ni, ‘An pe a Kricito ma Lubaŋa oyero ento giora akwoŋo nyime’.²⁹ŋat ma cuŋ i ŋet nyako aye lanyom; larem lanyom ma cuŋ i ŋete kun winye, cwinye bedo yom twatwal pi winyo dwan lanyom; pi meno an bene cwinya yom kakare. ³⁰En myero omedde, ento an myero adok piny.”³¹ŋat ma oa ki malo loyo ducu; ŋat ma oa i lobo en dano me lobo, loko lok me lobo; ŋat ma oa i polo loyo ducu. ³²En bedo caden i kom gin ma oneno ki i kom gin ma owinyo, ento pe tye ŋat mo ma ye lok ma en otito. ³³ŋat ma ye lokke, nyuto tamme ni, Lubaŋa en me ada.³⁴ŋat ma Lubaŋa ooro loko lok pa Lubaŋa, pien Lubaŋa pe miyo Cwiny kun pimo apima. ³⁵Won omaro Wod, ci omiyo jami ducu i ciŋe. ³⁶Dano ma ye Wod tye ki kwo ma pe tum; ŋat ma pe winyo dog Wod, pe bineno kwo, ento kiniga pa Lubaŋa bedo i kome.

¹Ka Rwot oŋeyo ni Luparicayo guwinyo ni Yecu tye ka loko jo mapol doko lupwonnyene ki batijagi, makato Jon, ²(kun Yecu kikome pe obatija dano, kono lupwonnyene aye gubatijagi), ³ci en oa ki i lobo Judaya, odok i Galilaya.⁴Ceŋ myero en oŋol ki i Camaria. ⁵Obino i gaŋ mo me Camaria ma nyiŋe Cukar, cok ki poto ma Yakobo yam omiyo bot wode Yucepu.⁶Waŋ it pa Yakobo onoŋo tye kunnu; Yecu ool ki wot, ci obedo piny i ŋet waŋ it. Onoŋo doŋ cawa oromo ka abicel. ⁷Dako mo me Camaria obino ka twomo pii. Yecu owacce ni, “Miya pii, amati.” ⁸Pien onoŋo lupwonnyene gucito i gaŋ ka wilo cam.⁹Dako Lacamaria openye ni, “In Lajudaya ikwaya pii piŋo, ma kun an a dako me Camaria?” Pien Lujudaya pe gimer ki Lucamaria. ¹⁰Yecu odok iye bot dako ni, “Kono yam iŋeyo mot ma Lubaŋa miyo, dok ka kono iniaŋ i kom ŋat ma kwayi ni, ‘Miya pii, amat-ti’, kono ikwayo en, kono omii pii me kwo.”¹¹Dako odokke iye ni, “Ladit, in ipe ki gitwomo, waŋ it bene tut; inoŋo pii me kwo meno ki kwene? ¹²In i dit ikato kwarowa Yakobo, ma yam omiyowa waŋ it man, ma omato piine, en ki litinone ki lwak limme?”¹³Yecu odokke iye ni, “Dano ducu ma mato pii man, orwo dok bineke aye; ¹⁴ento dano ma bimato pii ma an abimiye, orwo pe bineke nino ducu. Pii ma an abimiye, bidoko waŋ it ma gunnye i iye nio wa i kwo ma pe tum.”¹⁵Dako okwaye ni, “Ladit, miya pii meno, wek orwo pe dok oneka, awek bino wa kany ka twomo pii.” ¹⁶Yecu owacce ni, “Cit ilwoŋ cwari, ci idwog kany.”¹⁷Dako odokke iye ni, “An cwara pe.” Yecu owaco ki dako ni, “Iwaco kakare ni cwari pe. ¹⁸Yam ibedo ki co abic, man ma koni itye kwede-ni pe cwari; man iwaco kakare.”¹⁹Dako owacce ni, “Ladit, aneno in giri lanebi. ²⁰Kwariwa yam giworo Lubaŋa i kom got man, ento wun wuwaco ni kabedo ma myero giwor iye Lubaŋa tye i Jerucalem.”²¹Yecu ogamo dog dako ni, “Dako, ye lokka; kare bibino ma pe wubiworo Won i kom got man, kadi i Jerucalem. ²²Wun wuworo gin ma pe wuŋeyo, wan waworo gin ma waŋeyo, pien larre oa ki bot Lujudaya.²³Ento kare bibino, dok bene doŋ oo, ma ka jo ma woro i ada gibiworo Won i cwiny ki ada, pien Won yenyo jo macalo meno pi wore. ²⁴Lubaŋa en cwiny, jo ma wore myero guwore i cwiny ki ada.”²⁵Dako owacce ni, “Aŋeyo ni Meciya bibino (en ma gilwoŋo Kricito); en ka bibino, bitittiwa lok ducu.” ²⁶Yecu odokke iye ni, “An a en ma loko kwedi-ni.”²⁷Cutcut lupwonnyene gubino. Ci guuro pien onoŋo en tye ka lok ki dako, ento pe tye ŋat mo i kingi ma owaco ni, “Imito aŋo?” nyo ni, “Piŋo iloko kwede?”²⁸Dako oweko agulu piine, ocito i gaŋ, owaco bot dano ni, ²⁹“Wubin, wunen laco mo-ni ma otitta gin ducu ma yam atiyo. Man mono pe en aye Kricito ma Lubaŋa oyero?” ³⁰Dano gua ki i gaŋ, gucito bote.³¹I kine-nu lupwonnyene gubako doggi bote kun giwaco ni, “Lapwony, cam ba.” ³²Ento en owaccigi ni, “Atye ki cam ma acamo ma wun pe wuŋeyo.” ³³Omiyo lupwonnyene gupennye kekengi ni, “ŋatti mo okelle cam?”³⁴Yecu owaco botgi ni, “Camma en tiyo gin ma ŋat ma oora mito, ki cobo ticce. ³⁵Wun pe wuwaco ni, ‘Pud odoŋ dwe aŋwen me cako kac’? Atittiwu ni, wutiŋ waŋwu malo, wunen kit ma doŋ poto ocek kwede me akaya. ³⁶ŋat ma kayo limo mucara, coko nyig pi kwo ma pe tum, wek lacoyone ki lakayone igi obed yom kacel.³⁷Pien carolok man tye kakare. ni, ‘Lacoyo pat, lakayo pat.’ ³⁸Ceŋ aorowu ka kayo gin ma yam pe wucanne iye; jo mukene gucanne iye, wun wudonyo i cannegi.”³⁹Lucamaria mapol ma i gaŋ meno guye en pi lok pa dako, ma owaco ni, “Otitta gin ducu ma yam atiyo.” ⁴⁰Ka Lucamaria gubino bote, gukwaye ni koŋ myero obed kwedgi; ci en ori kunnu nino aryo.⁴¹Jo mukene mapol guye en pi lokke. ⁴²Guwaco bot dako ni, “Koni pe waye pi lokki keken, pien wawinyo giwa ki itwa, doŋ watyeko niaŋ ni, ada dano man en Lalar me lobo.”⁴³Lacen ka nino aryo meno okato, en ocito i Galilaya. ⁴⁴Pien Yecu kikome otito ni, “Lanebi mo pe ma giketo deyo kome i lobo tugi.” ⁴⁵Ka obino i Galilaya, Lugalilaya gujole, pien guneno gin ducu ma en otiyo i Jerucalem i kare me nino madit, pien gin bene ceŋ gucito pi kwero nino madit.⁴⁶En dok odwogo i Kana me Galilaya ka ma yam oloko iye pii odoko koŋo vino. Yam tye latic mo madit i kal pa kabaka ma kom wode lit i Kapernaum. ⁴⁷Ka owinyo ni Yecu oa i Judaya, obino i Galilaya, ocito obako doge bote ni obin ocaŋ wode, pien onoŋo doŋ cok to.⁴⁸Yecu odokke iye ni, “Ka pe wuneno lanyut ki taŋo, ci pe wubiye kadi matidi mo.” ⁴⁹Latic i kal owacce ni, “Ladit, bin ma peya latinna oto.” ⁵⁰Yecu owacce ni, “Cit giri, wodi bikwo.” Dano meno oye lok ma Yecu owacce, ci ocito.⁵¹Ka pud tye ka bino i yo, orwatte ki luticce. Guwacce ni, “Latinni doŋ kwo.” ⁵²En openyogi cawa mene ma twone ocako dok cen. Gin gugamo ni, “Laworo cawa abiro aye lyeto oa ki i kome.”⁵³Wonne oniaŋ ni meno aye cawa ma Yecu owacce iye ni, “Wodi bikwo”; omiyo en ki jo ma i ode ducu guye. ⁵⁴Man doŋ lanyut me aryo ma Yecu otiyo ka oa ki i Judaya, obino i Galilaya.

¹Lacen ka man otum, Yecu ocito i Jerucalem pi nino madit pa Lujudaya ma onoŋo tye. ²I Jerucalem, i ŋet dogcel me romo, yam tye iye kut ma gilwoŋo i dog jo Ibru ni Beteceda, ma tye iye bolo abic. ³Lwak lutwo mapol onoŋo buto iye, lutowaŋ, luŋolo ki lugoro, [ma gikuro twagge me pii. ⁴Pien kare mogo lamalaika pa Rwot bino i kut, rubo pii. ŋat ma okwoŋo lutte i pii kun pud girubo aruba, caŋ i kom kit two ducu ma yam tye i kome.⁵Onoŋo tye kunnu laco mo ma twone doŋ ori i kome mwaka pyeradek wiye aboro. ⁶Ka Yecu onene kun obuto, dok oŋeyo ni en ori kunnu pi kare malac, openye ni, “Imito icaŋ?”⁷Latwo ogamo ni, “Ladit, pe atye ki ŋat ma bola i kut ka pii orubbe. Ka atye ka komo, ŋat mukene dok kwoŋo leŋŋe iye i nyima.” ⁸Yecu odokke iye ni, “A, ikwany gibutoni, iciti.”⁹Oyotoyot dano meno ocaŋ; okwanyo gibutone, ocito gire. Onoŋo ninone ceŋ cabit.¹⁰omiyo Lujudaya guwaco bot dano ma gicaŋo ni, “tin cabit, cik pe ye ni ikwany gibutoni.” ¹¹Ento en odok ki gin ni, “ ŋat ma ocaŋa aye owacca ni, ‘Kwany gibutoni, iciti.’ ”¹²Gupenye ni, “Dano meno ma owacci ni, ‘Kwany gibutoni, iciti-ni’, en aŋa?” ¹³Dano ma gicaŋo pe ŋeyo ŋat ma ocaŋe, pien onoŋo Yecu ocito gire woko, lwak onoŋo opoŋ kunnu.¹⁴Lacen Yecu onoŋe i ot pa Lubaŋa, owacce ni, “Nen, doŋ icaŋ. Pe dok ibal, wek gin marac makato meno pe opot i komi.” ¹⁵Danonu ocito, otito bot Lujudaya ni, “Yecu aye ocaŋa.”¹⁶En aye gin mumiyo Lujudaya gulibo Yecu, pien otimo jami magi i cabit. ¹⁷Ento Yecu odokkigi iye ni, “Wora tye ka tic nio koni, an bene atye tic.” ¹⁸En gin mumiyo Lujudaya dok gumedde ka yenyo yo me neke, pe pi turo cabit keken, ento bene pi lwoŋo Lubaŋa ni wonne, ma kun kette kene ni erom ki Lubaŋa.¹⁹Yecu odok iye ni, “Adada awacciwu ni, Wod pe twero tiyo gin mo pire kene, ento tiyo gin ma eneno Won tiyo; pien gin ma en tiyo, Wod bene tiyo kit meno. ²⁰Won maro Wod, ci nyutte gin ducu ma en tiyo; dok binyutte tic madito makato magi, wek wuur.²¹Pien macalo Won cero jo muto, miyogi kwo, kit meno Wod bene miyo kwo bot jo ma en mito. ²²Won pe ŋolo kop i kom dano mo, ento doŋ otyeko miyo twer me ŋolo kop ducu bot Wod, ²³wek dano ducu oket deyo i kom Wod, macalo giketo deyo i kom Won. ŋat ma pe keto deyo i kom Wod, pe keto deyo i kom Won ma ceŋ oore.²⁴Adada awacciwu ni, dano ma winyo lokka, ma ye ŋat ma oora, tye ki kwo ma pe tum; pe gibiŋolo kop i kome, ento doŋ oa i to, oo i kwo.²⁵“Adada awacciwu ni, kare bibino, dok bene doŋ oo, ma jo muto biwinyo iye dwan Wod pa Lubaŋa; jo ma guwinyo bikwo.²⁶Pien macalo Won tye ki kwo i iye kene, kit meno en bene omiyo Wod bedo ki kwo i iye kene, ²⁷dok omine twer me ŋolo kop, pien en Wod pa dano.²⁸Pe wuur lok man; pien kare bibino ma jo ducu ma tye i lyel biwinyo iye dwane. ²⁹ci gibikatti woko. Jo ma ceŋ gutimo maber bidonyo i cer me kwo, jo ma ceŋ gutimo marac bidonyo i cer me ŋolo kop.³⁰“An pe atwero tiyo gin mo pira kena; aŋolo kop kit macalo awinyo; kop ma aŋolo tye atir, pien pe ayenyo yo me tiyo gin ma iya mito kena, ento ma ŋat ma ceŋ oora mito. ³¹Ka abolo lok i koma kena, lok ma abolo pe bedo me ada. ³²Tye ŋat mukene ma en aye cadenna, aŋeyo ni lok ma en bolo i koma lok me ada.³³Wun ceŋ wuoro kwena bot Jon, en obolliwu lok me ada me caden. ³⁴An pe aye lok ma dano bolo i koma; ento awacciwu lok magi wek wularre. ³⁵En ceŋ tara ma gicwinyo, ma lyel, yam wumito bedo ki yomcwiny pi kare manok i dero macce.³⁶Ento atye ki lok me caden ma pire dit makato pa Jon; pien tic ma Won omiya me acoba, tic magi kikomgi ma atye ka tiyogi, bedo caden i koma ni Won aye oora. ³⁷Doki Won ma ceŋ oora en kikome obedo cadenna. Wun yam pe wuwinyo dwane, pe wuneno wa calle; ³⁸pe wubedo ki lokke i iwu, pien pe wuye ŋat ma en ooro.³⁹Wuyenyo i ginacoya, pien wutamo ni i gin wutye ki kwo ma pe tum, kun gin aye caden ma tito lok i koma; ⁴⁰ento wukwero bino bota, wek wulim kwo.⁴¹An pe alimo deyo ki bot dano, ⁴²ento aŋeyo ni pe wutye ki mar pa Lubaŋa i iwu.⁴³An abino i nyiŋ Wora, ento wun pe wujola; ka ŋat mukene obino i nyiŋe kene, wun wubijole. ⁴⁴Wun wutero ye niŋniŋ, ka ŋat acel limo deyo ki bot lawote, ento pe wuyenyo deyo ma a bot Lubaŋa ma en acel keken?⁴⁵Pe wutam ni abidotowu bot Won; ŋat ma dotowu en Moses, ma wun wugeno. ⁴⁶Ka kono wuye Moses, kono wuye an bene; pien en ocoyo lok i koma. ⁴⁷Ento ka pe wuye lok ma en ocoyo, wubiye niŋniŋ lok ma an atittiwu?”

¹Ka man otum, Yecu ocito loka nam Galilaya, ma en nam me Tiberia. ²Lwak madwoŋ olube, pien ceŋ guneno lanyut ma en otiyo i kom lutwo. ³Yecu oito malo i wi got, obedo piny kunnu kacel ki lupwonnyene.⁴Kato (Paska), ma en nino madit pa Lujudaya, onoŋo doŋ cok. ⁵Ka Yecu otiŋo waŋe, oneno lwak madwoŋ kun bino bote, openyo Pilipo ni, “Wabiwilo kwon kwene wek jo man ocam?” ⁶En oloko lok man pi teme, pien en kikome onoŋo ŋeyo gin ma ebitiyo.⁷Pilipo odokke iye ni, “Kwon me denari miya aryo pe biromogi, wek ŋat acel acel ogam manok.” ⁸ŋat acel i kin lupwonnyene, en Anderiya omin Cimon Petero, owacce ni, ⁹“Latin awobi mo tye kany, ma tye ki mugati abic me cayiri, ki rec aryo; ento magi konyo aŋo bot lwak ma rom man?”¹⁰Yecu owacci, “Wuwek lwak obed piny.” Lum onoŋo olot twatwal i kabedo meno; dano ma gubedo piny welgi mito romo alip abic. ¹¹Lacen Yecu okwanyo mugati, opwoyo, opoko bot jo ma gubedo piny, ki rec bene, kit macalo gimito. ¹²Ka doŋ guyeŋ, ci owaco bot lupwonnyene ni, “Wucok ŋide ma odoŋ, gin mo owek rwenyo.”¹³Gucoko ŋide, gupoŋo aduku apar wiye aryo ki i kom mugati abic me cayiri ma lwak gucamo odoŋ. ¹⁴Ka lwak oneno lanyut ma en otiyo, guwaco ni, “Ada, man en lanebi meno ma bino i lobo.” ¹⁵Ka Yecu oniaŋ ni gimito bino ka make tetek pi kete me bedo kabaka, ci olwi, ocito i wi got kene.¹⁶Ka piny oyuto, lupwonnyene gucito i dog nam, ¹⁷gudonyo i yeya, gucako ŋolo dye nam me cito Kapernaum. Piny onoŋo doŋ col, Yecu onoŋo peya obino botgi. ¹⁸Nam otiŋŋe pi yamo ma onoŋo tye ka kodo.¹⁹Ka onoŋo doŋ gucero yeya ma romo mairo adek nyo aŋwen, ci guneno Yecu kun woto i wi nam ki tyene. Lworo omakogi, ²⁰ento en owaccigi ni, “An ennu, gwok wulwor”, ²¹omiyo guye odonyo i yeya. Cutcut yeya oo i wi tera ka ma gimito cito iye.²²Orwone jo ma yam gudoŋ loka nam tuŋcel guneno ni onoŋo tye yeya acel keken kunnu, dok ni Yecu nene pe oito i yeya kacel ki lupwonnyene, ento lupwonnyene ceŋ gucito kengi. ²³Kadi bed kumeno, yeya mukene ma gia Tiberia gubino cok ki kabedo ka ma dano gucamo iye kwon ma Rwot opwoyo.²⁴Ka lwak guneno ni Yecu pe kunnu, kadi wa lupwonnyene bene, gin kikomgi guito i yeya, gucito Kapernaum ka yenyo Yecu. ²⁵Ka gunoŋe loka nam tuŋ ca, gupenye ni, “Lapwony, ibino kany awene?”²⁶Yecu odokkigi iye ni, “Adada awacciwu ni, wutye ka yenya pe ni pien yam wuneno lanyut, ento ni pien wucamo kwon, wuyeŋ. ²⁷Pe wuti pi cam ma top woko, ento pi cam ma ri nio wa i kwo ma pe tum, ma Wod pa dano bimiyowu; pien Lubaŋa Won oketo lanen mere i kome.”²⁸Gin dok gupenye ni, “Myero watim gin aŋo wek wati tic pa Lubaŋa?” ²⁹Yecu odok iye botgi ni, “Man en tic pa Lubaŋa, ni wubed ki niye i kom ŋat ma en ooro.”³⁰Gupenye ni, “Lanyut aŋo ma in itiyo, wek wanen, waye in? Tic aŋo ma in itiyo? ³¹Kwariwa yam gucamo manna i tim, macalo gicoyo ni, ‘Omiyogi kwon me acama mua ki i polo.’ ”³²Yecu ogamo doggi ni, “Adada awacciwu ni, pe Moses aye yam omiyowu kwon meno mua ki i polo; ento Wora en aye tye ka miyowu kwon me ada nia ki i polo. ³³Pien kwon pa Lubaŋa en kwon ma bino piny nia ki i polo, ma miyo kwo ki lobo.” ³⁴Guwacce ni, “Rwot, miwa kwon meno nino ducu.”³⁵Yecu owaco botgi ni, “An a kwon me kwo; ŋat ma bino bota, kec pe bineke; ŋat ma ye an, orwo pe dok bineke matwal. ³⁶Ento yam atito botwu ni, wun doŋ wunena, ento pe wuye. ³⁷Dano ducu ma Wora omiya bibino bota; ŋat ma bino bota, pe abiryeme.³⁸Pien doŋ alor piny ki i polo, pe ka tiyo gin ma iya mito pira kena, ento ka tiyo gin ma ŋat ma yam oora mito. ³⁹Man en gin ma ŋat ma oora mito, ni i kom dano ducu ma en omiya awek rwenyo iye ŋatti mo, ento acergi woko ducu i nino me agik. ⁴⁰Man en gin ma wora mito, ni, dano ducu ma neno Wod, ma ye en, myero olim kwo ma pe tum; ci an abicere woko i nino me agik.”⁴¹Lujudaya guŋur i kome pien owaco ni, “An a kwon ma olor piny nia i polo.” ⁴²Guwaco ni, “Man pe Yecu, wod pa Yucepu, ma wonne ki minne waŋeyo? Piŋo en dok waco ni, ‘An alor piny nia i polo’?”⁴³Yecu odok iye ki gin ni, “Pe wuŋur i kinwu kenwu. ⁴⁴Dano mo pe twero bino bota, ka Wora ma yam oora pe opeye; ci an bene abicere woko i nino me agik. ⁴⁵Gicoyo i buk pa lunebi ni, ‘Lubaŋa bipwonyogi ducu.’ Dano ducu ma owinyo lok ki bot Won, ce omako lokke, bino bota.⁴⁶Pe ni ŋat mo yam oneno Won, kono ŋat ma yam oa bot Lubaŋa, en aye oneno Won. ⁴⁷Adada awacciwu ni, ŋat ma ye an tye ki kwo ma pe tum.⁴⁸An a kwon me kwo. ⁴⁹Kwariwu yam gucamo manna i tim, guto woko.⁵⁰Man en kwon ma lor piny nia i polo, ma ka dano mo ocamo, pe bito. ⁵¹An a kwon makwo, ma olor piny nia i polo; ka ŋat mo ocamo kwon man, en bibedo kwo nakanaka. Kwon ma abimiyo en koma, ma amiyo wek lobo obed ki kwo.”⁵²Lujudaya guero pyem i kingi kekengi, kun giwaco ni, “Dano man twero miyowa kome me acama niŋniŋ?” ⁵³Yecu owaccigi ni, “Adada awacciwu ni, ka pe wucamo kom Wod pa dano, wumato remone, pe wutye ki kwo i iwu.⁵⁴ŋat ma camo koma, ma mato remona, tye ki kwo ma pe tum, ci an abicere woko i nino me agik. ⁵⁵Pien koma en cam meada, remona en ginamata meada. ⁵⁶ŋat ma camo koma, ma mato remona, bedo i an, an bene abedo i iye.⁵⁷Macalo Won makwo ceŋ oora, kun an abedo kwo pi Won kit meno ŋat ma cama bikwo pira. ⁵⁸Man en kwon ma olor piny nia i polo, pe kit kwon ma yam kwariwu gucamo, guto woko; ŋat ma camo kwon man bibedo kwo nakanaka.” ⁵⁹En oloko lok magi i kare ma en pwonyo i kacokke i Kapernaum.⁶⁰Lupwonnyene mapol ka guwinyo, guwacci, “Man lok matek; aŋa ma twero winyo?” ⁶¹Ento Yecu ka oŋeyo ki i cwinye kene ni lupwonnyene tye ka ŋur i kom lok man, openyogi ni, “Lok man obalo tamwu?⁶²Bibedo niŋniŋ ka kono wuneno Wod pa dano kun ito ka ma yam en tye iye con? ⁶³Gin ma miyo kwo en aye cwiny, kom pe konyo gin mo; lok ducu ma awacciwu gin aye cwiny ki kwo.⁶⁴Ento tye jo mogo i kinwu ma pe giye.” Pien nia i acakki Yecu onoŋo ŋeyo jo meno ma pe ye, ki ŋat ma bidobe. ⁶⁵En dok owaco ni, “Man en gin mumiyo ceŋ atittiwu ni, pe tye ŋat mo ma twero bino bota, ka Won pe omiye twer.”⁶⁶Cakke i kare meno, lupwonnyene mapol gudok cen, pe dok gubedo ka wot kacel kwede. ⁶⁷Yecu openyo jone apar wiye aryo ni, “Wun bene wumito ket woto?” ⁶⁸Cimon Petero ogamo doge ni, “Rwot, wabicito bot aŋa? In itye ki lok me kwo ma pe tum. ⁶⁹Wan waye, dok watyeko niaŋ ni, in i ŋat Maleŋ pa Lubaŋa.”⁷⁰Yecu odokkigi iye ni, “Ceŋ pe ayerowu wun apar wiye aryo? Ento acel i kinwu pa Catan.” ⁷¹En onoŋo oloko i kom Juda wod pa Cimon me Keriot, ŋat acel i kin jo-nu apar wiye aryo, ma bidobe.

¹Ka man otum, Yecu obedo ka wot i kin Galilaya; pe omito cito i Judaya, pien Lujudaya gimito neke. ²Nino madito me Bolo pa Lujudaya onoŋo cok.³Omegine guwacce in, “A ki kany, icit i Judaya, wek lupwonnyeni gunen tic ma in itiyo. ⁴Pe tye dano mo ma tiyo tic i muŋ, ka en kikome mito ni dano guŋeye. Ka itiyo tic magi, nyutte keni bot lobo.”⁵Pien kadi omegine kikome bene pe guye en. ⁶Yecu owaccigi ni, “Karena pud peya oo, ento karewu nino ducu tye. ⁷Lobo pe twero kwerowu, ento okwero an, pien an atuco lok i kome, ni ticce ducu racu.⁸Wun wucit ka kwero nino madito; an pe acito i nino madito, pien karena peya oromo maber.” ⁹Ka doŋ oloko lok man botgi, ci odoŋ i Galilaya.¹⁰Ento ka omegine doŋ gutyeko cito pi nino madito, ci en bene ocito, pe atyer, ento i muŋ. ¹¹Lujudaya gubedo ka yenye i nino madito kun gipenyo ni, “En tye kwene?”¹²Lwak onoŋo giŋur twatwal pire. Jo mukene guwaco ni, “En gire dano maber,” jo mukene ni, “Pe, en rwenyo lwak.” ¹³Ento pe tye ŋat mo ma waco nyiŋe ka maleŋ, pien gilworo Lujudaya.¹⁴Ka doŋ oo i dye nino madito, Yecu ocito i ot pa Lubaŋa, ocako pwonyo dano. ¹⁵Lujudaya guuro, kun giwaco ni, “Dano man oŋeyo nukuta niŋniŋ, kun kono pe okwano?” ¹⁶Yecu odok iye ki gin ni, “Pwony mera pe mera kikoma, ento pa ŋat ma ceŋ oora.¹⁷Ka ŋat mo mito tiyo gin ma Lubaŋa mito, en biniaŋ ka ce pwony man oa ki bot Lubaŋa, nyo ka aloko pira kena. ¹⁸ŋat ma loko pire kene yenyo deyone pire kene, ento ŋat ma yenyo deyo pi ŋat ma oore, dano-nu en me ada, gin ma pe atir pe i iye.¹⁹Moses ceŋ pe omiyowu cik? Ento pe tye ŋat mo i kinwu ma gwoko cik. Piŋo wumito neka?” ²⁰Lwak odok iye ni, “In giri itye ki cen! Aŋa ma mito neki?”²¹Yecu ogamo doggi ni, “Yam atiyo tic acel, wun ducu wuuro. ²²Moses ceŋ omiyowu cik me lirre (pe ni oa ki bot Moses, ento ki bot kwaro), wun bene wuliro dano i ceŋ cabit.²³Ka giliro dano i ceŋ cabit, wek cik pa Moses pe oballe, piŋo iwu waŋ i koma pi caŋo dano i ceŋ cabit? ²⁴Pe wuŋol kop pi neno ki waŋ, ento wuŋol kop atir.”²⁵Jo mogo me Jerucalem guwaco ni, “Man pe dano ma gimito neko-ni? ²⁶Ento, nen, en tye ka lok ka maleŋ, gin pe guwacce lok mo. Luloc tika niaŋ ni man en Kricito ma Lubaŋa oyero? ²⁷Ento wan waŋeyo ka ma dano man oa iye; ka Kricito binen, pe tye dano mo ma biŋeyo ka ma en oa iye.”²⁸I kare ma Yecu pwonyo i ot pa Lubaŋa, en odaŋŋe, owaco ni, “Wun wuŋeya, wuŋeyo ka ma aa iye? An pe abino pira kena. ŋat ma oora en me ada, wun pe wuŋeye. ²⁹Ento an aŋeye, pien aa ki bote, en aye oora.”³⁰Gumito make, ento pe tye ŋat mo ma oketo ciŋe i kome, pien karene peya oromo. ³¹Ento jo mapol i kin lwak guye en. Guwaco ni, “Ka Kricito ma Lubaŋa oyero binen, bitiyo lanyut mapol makato ma dano man tiyo?” ³²Luparicayo guwinyo ka lwak tye ka ŋur i kome, omiyo ajwagi madito pa Lubaŋa ki Luparicayo gucwalo askari ka make.³³Yecu owaco ni, “Pud dok abibedo kwedwu pi kare manok, lacen abidok bot ŋat ma yam oora. ³⁴Wubiyenya, ento pe wubinoŋa; ka ma abedo iye, wun pe wutwero o iye.”³⁵Lujudaya gupennye kekengi ni, “Dano man mito cito kwene, ma wan pe wabinoŋe-ni? En mito cito bot jo mewa muket ata i kin jo Grik, ka pwonyo jo Grik? ³⁶Man te lokke niŋo, ni, ‘Wubiyenya, ento pe wubinoŋa,’ dok ni, ‘Ka ma abedo iye, wun pe wutwero o iye’?”³⁷I nino me agikki me nino madito, ma en aye nino madit, Yecu oa malo, odaŋŋe, owaco ni, “Ka orwo neko dano mo, en myero obin omat bota. ³⁸ŋat ma ye an, macalo ginacoya owaco, ‘Kulu me pii makwo bimol nia i iye.”³⁹En yam oloko lok man i kom Cwiny Maleŋ, ma jo ma giye en bilimo; pien onoŋo Cwiny Maleŋ peya gimiyo, pien onoŋo Yecu peya giketo deyo i kome.⁴⁰Ka guwinyo lok magi, jo mogo i kin lwak guwaco ni, “Adada, nye man en lanebi meno.” ⁴¹Jo mukene guwaco ni, “Man gire Kricito ma Lubaŋa oyero.” Jo mukene dok gipenyo apenya ni, “Kricito ma Lubaŋa oyero yam a i Galilaya? ⁴²Ginacoya pe tito ni, Kricito ma Lubaŋa oyero a ki i anywalli pa Daudi, ki i Beterekem, i gaŋ ma yam Daudi bedo iye?”⁴³Kumeno apokapoka obedo i kin lwak pire. ⁴⁴Jo mogo i kingi omito make, ento pe tye ŋat mo ma oketo ciŋe i kome.⁴⁵Askari gudwogo bot ajwagi madito pa Lubaŋa ki Luparicayo. Gin gupenyogi ni, “Piŋo pe wukele?” ⁴⁶Askari gugamo doggi ni, “Pe tye ŋat mo ma yam oloko macalo dano man.”⁴⁷Luparicayo gudok iye ni, “Wun bene gityeko rwenyowu? ⁴⁸Tye ŋat mo i kin luloc nyo i kin Luparicayo ma oye en? ⁴⁹Ento lwak man ma kwiya cik doŋ gicenogi.”⁵⁰Nikodemo ma yam obino bote, ma en bene ŋat acel i kingi, openyogi ni, ⁵¹“Cik mewa ŋolo kop i kom dano kun peya giwinyo lok ma a i doge, pi niaŋ i kom gin ma en timo?” ⁵²Gudokke iye ni, “In bene ia ki i Galilaya? Koŋ iyeny, ibineno ni pe tye lanebi mo ma bia ki i Galilaya.”⁵³ŋat acel acel odok i ode.

¹Ento Yecu ocito wa i wi got Jeituni. ²Odiko con en dok odwogo i ot pa Lubaŋa; jo ducu gucokke bote, en obedo piny, opwonyogi. ³Lupwonycik ki Luparicayo gukelo dako mo ma gimako ka timo abor. Gukete i dyere.⁴guwacce ni, “Lapwony, dako man gimako ka timo abor, ginoŋe iye kikome. ⁵I cik Moses ocikowa ni, dano macalo man myero gicel woko ki got. I kono iŋolo niŋniŋ?” ⁶Guwaco lok man pi teme, wek ginoŋ lok ma gibidote kwede. Ento Yecu okulle piny, ocoyo ŋom ki lwete.⁷Ka gumedde ka penye, en oille malo, owaccigi ni, “ŋat ma i kinwu ma pe ki bal okwoŋ cele ki got.” ⁸En dok okulle piny, ocoyo ŋom ki lwete.⁹Ka guwinyo lok man, ci guket ki acel acel, kun ocakke ki i kom jo madito; ci Yecu odoŋ kene kun dako-nu pud ocuŋ i dyere. ¹⁰Yecu oille, openyo dako ni, “Dako, gin kono gitye kwene? Pe tye ŋat mo ma oŋolo kop loyi?” ¹¹En ogamo ni, “Pe tye ŋat mo, ladit.” Yecu owaco ni, “An bene pe abiŋolo kop loyi. Cit giri; cakke tin pe dok ibal.”¹²Yecu dok oloko ki gin kun waco ni, “An a ceŋ me lobo; ŋat ma luba pe biwoto i piny macol, ento bibedo ki ceŋ me kwo.” ¹³Luparicayo guwacce ni, “In giri ibolo lok me caden i komi keni, lok ma ibolo pe me ada.”¹⁴Yecu odok iye ni, “Kadi bed abolo lok i koma kena, lok ma abolo me ada, pien aŋeyo ka ma aa iye, ki ka ma acito iye, ento wun pe wuŋeyo ka ma aa iye, ki ka ma acito iye. ¹⁵Wun wuŋolo kop i kit pa dano, ento an pe aŋolo kop i kom ŋat mo. ¹⁶Kadi bed aŋol kop, ŋolo koppa tye atir, pien pe atye kena, ento wan ki ŋat ma oora.¹⁷I cikwu gicoyo ni, lok pa caden aryo bedo ada; ¹⁸an abolo lok me caden i koma kena, dok Wora ma oora bene cadenna.”¹⁹Gipenye ni, “Woru tye kwene?” Yecu odok iye ni, “Wun pe wuŋeyo an, kadi Wora. Kono wuŋeya, kono wuŋeyo Wora bene.” ²⁰En oloko lok man i kare ma pwonyo dano i ot pa Lubaŋa, i ot lim, ento pe tye ŋat mo ma omake, pien karene peya oromo.²¹En dok owaco ki gin ni, “An abicito woko. Wun wubiyenya, wubito i balwu; ka ma acito iye, wun pe wutwero bino iye.” ²²Lujudaya guwaco ni, “En binekke kene, pien owaco ni, ‘Ka ma acito iye wun pe wutwero bino iye’?”²³En owaccigi ni, “Wun wua ki piny, an aa ki malo; wun jo me lobo, an pe a dano me lobo. ²⁴Atyeko wacciwu ni, wubito i balwu; pien wubito i balwu ka pe wuye ni an a en.”²⁵Gupenye ni, “In aŋa?” Yecu odok ki gin iye ni, “An a ŋat ma yam atittiwu con nia i acakki. ²⁶Atye ki lok mapol me aloka i komwu, ki kop mapol me aŋola; ento ŋat ma oora en me ada, atito ki lobo gin ma doŋ awinyo ki bote.” ²⁷Pe guniaŋ ni en tye ka tittigi pi Lubaŋa Won.²⁸Omiyo Yecu owaco ki gin ni, “Ka doŋ wutiŋo Wod pa dano malo, ci wubiniaŋ ni an a en, dok ni pe atiyo gin mo pira kena, ento aloko gin ma Wora opwonya iye. ²⁹ŋat ma oora tye kweda; pe oweka kena, pien nino ducu atiyo gin ma iye mito.” ³⁰Ka oloko lok man, jo mapol guye en.³¹Yecu owaco bot Lujudaya ma guye en ni, “Ka wumoko i lokka, ci wun lupwonnyena adada; ³²miyo wubiŋeyo lok me ada, lok me ada bigonyowu.” ³³Gudokke iye ni, “Wan likwayo pa Abraim; ma naka yam peya wabedo opii pa ŋatti mo. Man doŋ in iwaco niŋniŋ ni, ‘Gibigonyowu’?”³⁴Yecu odokkigi iye ni, “Adada awacciwu ni, dano ducu ma timo bal, en opii me bal. ³⁵Opii pe bedo i ot nakanaka, ento latin anywalli bedo gire nakanaka. ³⁶Pi meno, ka Wod ogonyowu gibigonyowu atika.³⁷Aŋeyo ni wun likwayo pa Abraim; ento wumito neka, pien lokka pe noŋo kabedo i iwu. ³⁸An aloko gin ma aneno ki bot Wora, wun wutiyo gin ma wuwinyo ki bot wonwu.”³⁹Gudok iye ni, “Abraim en wonwa.” Yecu owaccigi ni, “Kono wun litino pa Abraim, kono wutiyo macalo Abraim. ⁴⁰Ento koni wumito neka, an dano ma atittiwu lok me ada ma awinyo ki bot Lubaŋa; Abraim yam pe otiyo kit meno. ⁴¹Wun wutiyo gin ma wonwu otimo.” Gidok iye bote ni, “Wan pe ginywalowa i abor; watye ki wonwa acel, en aye Lubaŋa.”⁴²Yecu ogamo doggi ni, “Kono Lubaŋa wonwu, kono wumara, pien an aa ki bot Lubaŋa, koni doŋ atye kany; pe abino pira kena, en aye oora. ⁴³Piŋo pe wuniaŋ lok ma awaco? Pien pe wutwero winyo lokka. ⁴⁴Wun wua ki bot wonwu, Catan, wumito cobo gin ma wonwu mito. Nia i acakki piny en con lanek, pe cuŋ i ada, pien lok me ada pe i iye. Ka en loko lok goba, en lok macalo kite tye, pien en lagoba, doki won goba.⁴⁵Ento pe wuye an, pien an aloko lok me ada. ⁴⁶Aŋa i kinwu ma nyuto lok me bal i koma ma loya? Ka atito lok me ada, piŋo pe wuye an? ⁴⁷ŋat ma oa bot Lubaŋa winyo lok pa Lubaŋa; gin ma omiyo wun pe wuwinyo, pien pe wua bot Lubaŋa.”⁴⁸Lujudaya gudokke iye ni, “Wan pe wawaco kakare ni, in Lacamaria, itye ki cen?” ⁴⁹Yecu odok iye ni, “An pe atye ki cen; ento aworo Abana, wun pe wuwora.⁵⁰An pe ayenyo deyona pira kena; tye ŋat ma yenyo ma kakara, en aye biŋolo kop. ⁵¹Adada awacciwu ni, ka ŋat mo mako lokka, pe bito matwal.”⁵²Lujudaya gudokke iye ni, “Koni doŋ waniaŋ ni itye ki cen. Abraim yam oto, ki lunebi bene guto, ento in iwaco ni, ‘Ka ŋat mo mako lokka, ci pe bibilo to matwal’. ⁵³In i dit ikato kwarowa Abraim, ma ceŋ oto-ni? Lunebi bene guto, do! In ikette ni in aŋa?”⁵⁴Yecu ogamo ni, “Ka aketo deyo i koma kena, deyona mwa; Wora aye keto deyo i koma, en ma wun wuwaco ni Lubaŋawu-ni. ⁵⁵Wun pe wuŋeye; ento an aŋeye. Ka kono awaco ni pe aŋeye, kono adoko lagoba macalo wun; ento an aŋeye, amako lokke. ⁵⁶Kwarowu Abraim yam obedo ki yomcwiny ni ebineno ninona; ci oneno, cwinye obedo yom matek.”⁵⁷Lujudaya guwacce ni, “In ma mwakani bene peya oromo pyerabic-ci, ineno Abraim?” ⁵⁸Yecu ogamo doggi ni, “Adada awacciwu ni, ma Abraim pud pe, onoŋo doŋ an atye.” ⁵⁹Omiyo gukwanyo got me cele; ento Yecu okanne, ci okato woko ki i ot pa Lubaŋa.

¹Ka ceŋ en oekato ki i yo, oneno dano ma ginywale ma waŋe oto. ²Lupwonnyene gupenye ni, “Lapwony, aŋa ma obalo, laco man, kece nyo jo ma gunywale, ma omiyo ginywale ma waŋe oto?”³Yecu ogamo ni, “Laco man pe obalo, kadi jo ma gunywale, ento man otimme wek tic pa Lubaŋa onen i kome. ⁴Myero wati tic pa ŋat ma oora ma ceŋ pud tye; dyewor bibino ma ŋat mo pe twero tic. ⁵Ka pud atye i lobo, an a ceŋ me lobo.”⁶Ka oloko lok man, oŋulo laa piny, orubo ki ŋom, ci owiro ki waŋ laco-nu. ⁷Owacce ni, “Citi, ilwok i kut me Ciloam” (ma te lokke ni, Ma gioro). En ocito olwoko, ci odwogo ma waŋe doŋ neno piny.⁸Luwote ki jo ma yam ginene kun kwayo lim guwaco ni, “Man pe laco ma bedo kun kwayo lim-mi?” ⁹Jo mogo guwaco ni, “En kikome”; jo mukene ni, “Pe, ento cal kwede acala.” En ogamo ni, “An ennu, do.”¹⁰Gupenye ni, “Waŋi oyabbe niŋniŋ?” ¹¹En ogamo ni, “Dano ma gilwoŋo nyiŋe ni Yecu aye orubo ŋom, owiro ki waŋa, ci ocika ni, ‘Cit ilwok i Ciloam.’ Ci acito, alwoko, acako neno piny.” ¹²Dok gupenye ni, “En tye kwene?” Ogamo ni, “Pe aŋeyo.”¹³Gikelo dano ma yam waŋe oto-ni bot Luparicayo. ¹⁴Nino ma Yecu orubo ŋom iye, oyabo ki waŋe, onoŋo ceŋ cabit. ¹⁵Luparicayo dok gupenye ni, “Waŋi oyabbe niŋniŋ?” En odok ki gin iye ni, “En owiro ŋom i waŋa, alwoko, ci aneno piny.”¹⁶Luparicayo mogo guwaco ni, “Dano man pe oa ki bot Lubaŋa, pien pe gwoko cabit.” Ento jo mukene guwaco ni, “Dano ma labalo twero tiyo lanyut ma rom man?” Omiyo apokapoka obedo i kingi. ¹⁷Dok gupenyo dano ma yam onoŋo waŋe oto-ni ni, “In itamo lok aŋo i kome, pien oyabo waŋi?” En odok iye ni, “En lanebi.” ¹⁸Lujudaya pe guye ni en yam obedo lawaŋoto, dok ni giyabo waŋe, nio ka gilwoŋo jo ma gunywalo dano ma giyabo waŋe-ni.¹⁹Gipenyogi ni, “Man en latinwu ma wuwaco ni ginywale ma waŋe oto? Gin aŋo ma omiyo doŋ en neno piny koni?” ²⁰Jo ma gunywale gudok iye ni, “Waŋeyo ni man latinwa, dok yam ginywale ma waŋe oto. ²¹Ento kit ma en neno ki piny koni, pe waŋeyo; dok wan pe waŋeyo ŋat ma oyabo waŋe. Wupenye; en doŋ dit, en bilok pire kene.”²²Jo ma gunywale guwaco lok man pien gilworo Lujudaya, pien onoŋo Lujudaya guporo lok kacel ni, ka ŋat mo otuco ni Yecu en Kricito ma Lubaŋa oyero, ci gibiryeme woko ki i kacokke. ²³En aye gin mumiyo jo ma gunywale guwaco ni, “,En doŋ dit, wupenye.”²⁴Pi lok man omiyo gulwoŋo dano ma yam waŋe oto tyen me aryo, guwacce ni, “Mi deyo bot Lubaŋa; wan waŋeyo ni dano man labalo.” ²⁵En ogamo ni, “Ka en labalo, pe aŋeyo; gin acel keken ma aŋeyo, en aye ni, yam waŋa oto, ento koni doŋ aneno piny.”²⁶Gin gupenye ni, “En otimmi niŋniŋ? Oyabo waŋi niŋniŋ?” ²⁷En odokkigi iye ni, “Doŋ atittiwu con, wun pe wuwinyo. Piŋo pud wumito winyo? Wun bene wumito doko lupwonnyene, ce?”²⁸Ci guyete kun giwaco ni, “In giri aye lapwonnyene ento wan giwa lupwonnye pa Moses. ²⁹Waŋeyo ni Lubaŋa yam oloko ki Moses, ento dano man pe waŋeyo ka ma oa iye.”³⁰Dano ca odok iye ni, “Man lok me aura twatwal! Wun pe wuŋeyo ka ma en oa iye, kun en oyabo waŋa. ³¹Waŋeyo ni Lubaŋa pe winyo lubalo, ento ka ŋat ma woro Lubaŋa, dok tiyo gin ma en mito, Lubaŋa winye.³²Ma naka yam peya owinnye ni ŋat mo oyabo waŋ dano mo ma ginywale ma waŋe oto. ³³Ka kono dano man onoŋo pe oa ki bot lubaŋa, kono pe otwero timo gin mo wa acel.” ³⁴Gugamo doge ni, “In ma ginywali i bal keken-ni bene ipwonywa?” Ci guryeme woko.³⁵Yecu ka owinyo ni giryeme woko, onoŋe, openye ni, “In iye Wod pa dano?” ³⁶En odok iye ni, “En aŋa, ladit, wek aye en?” ³⁷Yecu owacce ni, “Doŋ inene, en aye ŋat ma tye ka lok kwedi-ni.” ³⁸En owaco ni, “Aye, Rwot”; owore.³⁹Yecu owacce ni, “An abino i lobo ka ŋolo kop, wek jo ma pe neno piny gunen, jo ma neno gudok luwaŋoto.” ⁴⁰Luparicayo mogo ma cok kwede guwinyo lok man. Gupenye ni, “Wan bene waŋwa oto?” ⁴¹Yecu odok iye ni, “Kono ka waŋwu oto, kono pe wutye ki bal; ento wun wuwaco ni, ‘Waneno’; pi meno balwu pud bedo gire.

¹“Adada awacciwu ni, ŋat ma pe donyo i dwol romo ki i doggola, ento ito ki ka mukene, dano meno lakwo ki layak; ²ento ŋat ma donyo ki i doggola, en lakwat romi.³Lagwok-doggola yabbe kika, romi winyo dwane; en lwoŋo romi ki nyiŋgi, ci terogi woko. ⁴“Ka doŋ ocwalo mere ducu woko, en woto i nyimgi, romi lube, pien giŋeyo dwane.⁵Pe gilubo welo, ento giriŋo woko ki bote, pien pe giŋeyo dwan welo.” ⁶Yecu oloko ki gin carolok man, ento pe guniaŋ lok ma en otito botgi.⁷Yecu dok owaco ki gin ni, “Adada awacciwu ni, an a doggola me romi. ⁸Jo ducu ma yam obino okwoŋo nyima, gin lukwo dok luyak; ento romi pe owinyo dwangi.⁹An a doggola; ka ŋatti mo odonyo ki bota, en bibwot, bidonyo, bikatti woko, binoŋo cam. ¹⁰Lakwo pe bino pi lok mo mukene, ento kono pi kwalo, pi neko ki pi tyeko; an abino wek gunoŋ kwo, gubed kwede madwoŋ.¹¹An lakwat maber. Lakwat maber miyo kwone pi romi. ¹²ŋat ma tiyo pi mucara, ma pe lakwat, ma romi pe mere kikome, ka oneno orudi bino, weko romi, riŋo woko; orudi makogi, keyogi. ¹³En riŋo woko pien tiyo pi mucara keken, pe paro pi romi.¹⁴An lakwat maber; aŋeyo romina, mera bene ŋeya, ¹⁵macalo Won ŋeya, an bene aŋeyo Won; amiyo kwona pi romi. ¹⁶Atye ki romi mukene bene, ma pe me dwol man; myero akelgi bene, gibiwinyo dwana. Kit meno bibedo lwak acel ki lakwat acel.¹⁷Gin mumiyo Won mara, pien amiyo kwona wek doki agam. ¹⁸Pe tye ŋatti mo ma mayo ki bota; amiyo gira pira kena. Atye ki twer me miyo kwona, dok atye ki twer me gamo doki; alimo cik man ki bot Wora.”¹⁹Apokapoka dok obedo i kin Lujudaya pi lok man. ²⁰Jo mapol ki i kingi guwaco ni, “En tye ki cen, opo apoya; piŋo wuwinyo lokke?” ²¹Jo mukene guwaco ni, “Lok man pe pa dano ma tye ki cen. Cen twero yabo waŋ dano ma waŋe oto?”²²I kare meno nino madit me kwero ot pa Lubaŋa obedo i Jerucalem. ²³Onoŋo piny cwir, Yecu onoŋo tye ka wot i ot pa Lubaŋa, i te baraja pa Solomon. ²⁴Lujudaya gucokke, gurume i dyere, gupenye ni, “Ibimiyo wakalo akala pi kare ma rom mene? Ka in i Kricito ma Lubaŋa oyero, tittiwa atir.”²⁵Yecu odokkigi iye ni, “Atyeko tittiwu, wun pe wuye. Tic ma atiyo i nyiŋ Wora gin cadenna. ²⁶Wun pe wuye, pien pe wutye i kin romina.²⁷Romina winyo dwana, an aŋeyogi, gin luba. ²⁸Amiyogi kwo ma pe tum; gin pe bito matwal, pe tye ŋatti mo ma bimayogi ki i ciŋa.²⁹Wora ma omiyogi bota dit makato ducu, pe tye ŋatti mo ma twero mayogi ki i ciŋ Won. ³⁰An ki Won wan acel.” ³¹Lujudaya dok gukwanyo got me cele.³²Yecu owaccigi ni, “Atyeko nyuttiwu tic mabeco mapol ma oa ki bot Won; wumito cela ki got pi tic mene?” ³³Lujudaya gudokke iye ni, “Pe waceli pi tic mo maber, ento pi yeto Lubaŋa; pien in i dano adana, ikette keni ni in Lubaŋa.”³⁴Yecu ogamo doggi ni, “Pe gicoyo i cik mewu ni, ‘An awaco ni wun lubaŋa’? ³⁵Ka en lwoŋo jo ma lok pa Lubaŋa obino botgi ni gin lubaŋa (ci ginacoya pe twero turre), ³⁶wun wuwaco bot ŋat ma Won olonyo, oore i lobo, ni, ‘Iyeto lubaŋa,’ pien an awaco ni, ‘An Wod pa Lubaŋa’?³⁷Ka pe atiyo tic pa Wora, ci pe myero wuye an; ³⁸ento ka atiyo ticce, kadi bed pe wuye an gira, myero wuye tic; wek wuŋe dok wuniaŋ ni Won tye i an, ki an i Won.” ³⁹Dok gutemo make, ento en opucce woko ki i ciŋgi.⁴⁰En dok ocito loka Jordan, i kabedo ka ma yam Jon okwoŋo batija dano iye, obedo kunnu. ⁴¹Jo mapol gubino bote; guwaco ni, “Jon yam pe otiyo lanyut mo ento lok ducu ma Jon otito i kom dano man obedo me ada.” ⁴²Jo mapol guye en ki kunnu.

¹Ceŋ tye dano mo ma kome lit i Betania ma nyiŋe Lajaro, i paco pa Maliam ki laminne Marita. ²En Maliam ma yam owiro Rwot ki moo, dok ojwayo tyene ki yer wiye, aye ominne kome lit-ti.³Nyimege gucwalo kwena bote kun giwaco ni, “Rwot, ŋat ma imaro kome lit.” ⁴Ento ka Yecu owinyo, owaco ni, “Two man pe obino pi neke, ento pi kelo deyo bot Lubaŋa, wek pire gimi deyo bot Wod pa Lubaŋa.”⁵Yecu yam maro marita ki laminne ki Lajaro. ⁶Ka owinyo ni kome lit, ci omedde ki ri doki nino aryo i kabedo ma yam en tye iye. ⁷Lacen owaco bot lupwonnyene ni, “Wadoku doki i Judaya.”⁸Lupwonnyene gudokke iye ni, “Lapwony, Lujudaya nene gimito celi ki got, in dok idok kunnu?” ⁹Yecu ogamo ni, “Cawa me dyeceŋ pe apar wiye aryo? Ka ŋatti mo woto i dyeceŋ, pe yokke, pien neno ceŋ me lobo man.¹⁰Ento ka ŋatti mo woto dyewor, yokke, pien ceŋ pe i iye.” ¹¹En owaco kit man, lacen owaco botgi ni, “Laremwa Lajaro doŋ onino, acito wek acicoye woko ki i waŋ nino.”¹²Lupwonnyene guwacce ni, “Rwot, ka onino, ci bicaŋ.” ¹³Yecu onoŋo loko pi to mere, ento gin gitamo ni oloko pi yweyo me nino. ¹⁴Lacen Yecu otittigi atir ni, “Lajaro doŋ oto.¹⁵cwinya yom piwu pien onoŋo pe atye kunnu, wek wun wuye. Ci doŋ wacitu bote.” ¹⁶Tomaci (ma te lokke ni, Baŋi) owaco bot lupwonnye luwote ni, “Wan bene wacitu, wek watoyu kacel kwede.”¹⁷Ka Yecu oo, onono ni Lajaro doŋ ori i lyel nino aŋwen. ¹⁸Betania onoŋo cok ki Jerucalem, mito romo mairo aryo; ¹⁹jo mapol i kin Lujudaya onoŋo gubino bot Marita ki Maliam pi kweyo cwinygi pi omingi. ²⁰Ka Marita owinyo ni Yecu oebino, en ocito, oromo kwede, ento Maliam odoŋ, obedo i ot.²¹Marita owaco bot Yecu ni, “Rwot, kono nene itye kany, kono omera pe oto. ²²Dok koni aŋeyo ni gin ducu ma ibilego ki bot Lubaŋa, Lubaŋa bimiyi.” ²³Yecu owacce ni, “Omeru bicer.”²⁴Marita ogamo doge ni, “Aŋeyo ni en bicer i cer me nino me agik.” ²⁵Yecu owacce ki, “An nicer ki kwo; ŋat ma ye an, nadi oto, dok bikwo; ²⁶dano ducu makwo ma ye an, pe bito matwal. In iye man?”²⁷En odok iye ni, “Iyo Rwot; doŋ aye ni in i Kricito ma Lubaŋa oyero, Wod pa Lubaŋa, ma bino i lobo.” ²⁸Ka Marita oloko lok man, ci ocito olwoŋo laminne Maliam, okwille ni, “Lapwony tye kany, lwoŋi.” ²⁹Ka en owinyo, ci oa oyotoyot, ocito bote.³⁰Yecu onoŋo peya oo i gaŋ-ŋu, ento onoŋo pud tye ka ma Marita oromo iye kwede. ³¹Ka Lujudaya ma onoŋo gitye bote i ot kun gikweyo cwinye guneno Maliam oa malo oyotoyot, okato woko, gulubo kore, kun gitamo ni en cito i wi lyel ka koko kunnu. ³²Ka Maliam oo ka ma Yecu tye iye, ka onene, ci opoto piny ka tyene, owacce ni, “Rwot, kono nene itye kany, kono omera pe oto.”³³Ka Yecu onene kun kok, ki Lujudaya ma gubino kwede bene gikok, cwinye opoto, iye owaŋ matek. ³⁴Openyo ni, “Wukete kwene?” Gudokke iye ni, “Rwot, bin inen.” ³⁵Yecu okok ki pig waŋe.³⁶Omiyo Lujudaya guwaco ni, “Nen, yam mare mada.” ³⁷Ento jo mogo i kingi guwaco ni, “En ma ceŋ oyabo waŋ lawaŋoto pe twero geŋo dano man to?”³⁸Yecu dok iye owaŋ matek, ojwat, ci obino i lyel; lyel meno onoŋo yam obedo boro got, ma giloro doge ki got. ³⁹Yecu owaco ni, “Kwanyu got woko.” Marita lamin dano ma oto-ni owaco ni, “Rwot, koni doŋ ŋwe, pien ori nino aŋwen.” ⁴⁰Yecu odokke iye ni, “Nakanen pe awacci ni, ka iye, ci ibineno deyo pa Lubaŋa?”⁴¹Ci gikwanyo got woko. Yecu otiŋo waŋe malo, owaco ni, “Aba, apwoyi pien doŋ iwinya. ⁴²An aŋeyo con ni iwinya kare ducu, ento awaco lok man pi lwak ma gucuŋ ka ŋeta, wek guye ni in yam iora.”⁴³Ka doŋ owaco lok man, ci odaŋŋe ki dwan madit ni, “Lajaro, katti woko!” ⁴⁴En ma ceŋ oto-ni okatti woko, kun ciŋe ki tyene giriyo ki boŋo, waŋe giboyo ki kitambara. Yecu ocikogi ni, “Wugonye, wuweke ociti.”⁴⁵Jo mapol i kin Lujudaya ma gubino kacel ki Maliam, ka guneno gin ma Yecu otiyo, guye en. ⁴⁶Ento jo mukene i kingi gucito bot Luparicayo, gutittigi gin ma Yecu otiyo.⁴⁷Omiyo ajwagi madito pa Lubaŋa ki Luparicayo gulwoŋo Lukiko, guwaco ni, “Wabitimo gin aŋo? Pien dano man tye ka tiyo lanyut mapol. ⁴⁸Ka waweke kit meno, ci dano biye en, Luroma bibino, gibiketo kabedowa maleŋ ki rokwa woko.”⁴⁹Ento ŋat acel i kingi, en Kayapa, ma en ajwaka madit i mwaka meno, owaco ki gin ni, “Wun pe wuŋeyo gin mo kadi matidi mo, ⁵⁰dok pe wutamo ni bibedo ber botwu ka dano acel oto pi lwak, wek pe gityek rokwa.”⁵¹En pe owaco lok man pire kene, ento pi bedo ajwaka madit i mwaka meno ceŋ en otito macalo lanebi ni Yecu bito pi rok meno; ⁵²pe pi rok meno keken, ento wek ocok litino pa Lubaŋa ma guket ata, gubed acel. ⁵³Cakke i nino meno guribo lok me neke.⁵⁴Pi meno Yecu pe dok obedo ka wot ka maleŋ i kin Lujudaya, ento oa ki kunnu, ocito i lobo ma cok ki tim, i gaŋ ma gilwoŋo Epraim; obedo kunnu ki lupwonnyene. ⁵⁵Kato (Paska) pa Lujudaya onoŋo doŋ tye cok. Jo mapol gia ki i kin pacci gicito Jerucalem ma peya Kato (Paska) oromo, wek gilonnye kengi.⁵⁶Giyenyo Yecu, kun giloko kekengi ma gicuŋ i ot pa Lubaŋa ni, “Wutamo niŋniŋ? Nyo en pe bibino pi nino madit?” ⁵⁷Ajwagi madito pa Lubaŋa ki Luparicayo onoŋo doŋ guciko dano ni, ka ŋat mo oŋeyo ka ma en tye iye, myero onyuttigi, wek gimake

¹Ka ceŋ odoŋ nino abicel me o i Kato (Paska), Yecu obino i Betania, ka ma Lajaro bedo iye, en ma ceŋ Yecu ocere ki i kin jo muto-ni. ²Gitedde cam me otyeno kunnu; Marita obedo ka poko cam, Lajaro onoŋo ŋat acel i kin jo ma obedo kwede i dog cam. ³Maliam okwanyo moo ma ŋwece kur me wel madwoŋ, moo nard magili, ma romo ratili acel, owiro ki tyen Yecu, ojwayo tyen Yecu ki yer wiye; ci ŋwec moo oromo i ot ducu.⁴Ento Juda me Keriot, ŋat acel i kin lupwonnyene, en ma bidobe, openyo ni, ⁵“Piŋo moo man pe gicato i wel me ciliŋ miya adek, wek gimi bot lucan?” ⁶En owaco lok man, pe ni en paro pi lucan, ento pien en yam lakwo, yam gwoko kicaa lim, ci kwanyo gin ma gibolo iye.⁷Yecu owaco ni, “Wuweke, wek en okan pi nino me yika. ⁸Lucan wutye kwedgi nino ducu, ento an pe abibedo kwedwu nino ducu.”⁹Ka lwak Lujudaya madwoŋ guniaŋ ni en tye kunnu, ci gubino, pe pi Yecu keken, ento bene pi neno Lajaro ma en ocero ki i kin jo muto. ¹⁰Pi meno ajwagi madito pa Lubaŋa guyubo lok me neko Lajaro bene, ¹¹pien pire Lujudaya mapol gua woko ki botgi, guye Yecu.¹²Orwone lwak jo mapol ma yam gubino i nino madit guwinyo ni Yecu bino i Jerucalem. ¹³Gukwanyo jaŋ otit, gukato ka jole, kun gidaŋŋe ni, “Ojana! Lubaŋa o mi gum i kom ŋat ma bino i nyiŋ Rwot, ma en Kabaka pa Icrael!”¹⁴Yecu onoŋo latin kana, obedo i wiye, kit macalo gicoyo ni, ¹⁵“Pe wulwor, wun jo Cion. Nen, kabakawu bino botwu, obedo i wi latin kana!”¹⁶Lupwonnyene pe guniaŋ man koŋ; ento ka doŋ giketo deyo i kom Yecu, ci gupo ni ceŋ gicoyo lok magi i kome, dok ni gitimo i kome.¹⁷Lwak ma yam onoŋo tye bote ka en lwoŋo Lajaro ki i lyel me cere ki i kin jo muto gutito pire. ¹⁸En aye mumiyo lwak ocito ka jole, pien guwinyo ni en otiyo lanyut man. ¹⁹Luparicayo guloko kekengi ni, “Doŋ wuneno ni pe wukonyo gin mo. Nen, lobo ducu doŋ owirre ka lube.”²⁰I kin jo ma yam gucito ka woro Lubaŋa i nino madit onoŋo jo mogo Lugrik. ²¹Jo-nu gucito bot Pilipo me Betecaida ma tye i Galilaya, guwacce ni, “Ladit, wamito neno Yecu.” ²²Pilipo ocito, otito bot Anderiya; Anderiya ocito kacel ki Pilipo, gutito bot Yecu.²³Yecu odokkigi iye ni, “Cawa doŋ oromo me keto deyo i kom Wod pa dano. ²⁴Adada awacciwu ni, nyig bel ka pe opoto i ŋom, oto, bedo kene; ento ka oto, ci ceko nyige mapol.²⁵ŋat ma maro kwo mere, birwenyone; ŋat ma kwero kwone i lobo man, bigwoko nio i kom kwo ma pe tum. ²⁶Ka ŋat mo tiyo pira, myero oluba; ka ma an abedo iye, laticca bene bibedo kunnu; ka ŋat mo tiyo pira, ci Won binyuto worone i kome.²⁷“Cwinya koni oŋabbe aŋaba. Abiwaco lok aŋo? Abana, lara i kom cawa man? Ento pi lok man omiyo ao i kom cawa-ni. ²⁸Abana, ket deyo i kom nyiŋi.” Dwan oa ki i polo ni, “Doŋ aketo deyo i kome, dok abiketo aye.” ²⁹Lwak ma gucuŋ ka ŋete guwinyo, ci guwaco ni, “Polo omor.” Jo mukene ni, “Lamalaika oloko kwede.”³⁰Yecu ogamo ni, “Dwan man pe obino pira, ento piwu. ³¹Koni gitye ka ŋolo kop i kom lobo man; koni lalo lobo man gibibole woko.³²An ka gitiŋa malo nia i lobo, ci abipeyo dano ducu bota.” ³³En oloko lok man pi nyuto kit to ma ebito kwede.³⁴Lwak gugamo doge ni, “Wan wawinyo ki i cik ni Kricito ma Lubaŋa oyero bedo nakanaka. In dok iwaco niŋniŋ ni Wod pa dano myero gitiŋe malo? Wod pa dano man en aŋa?” ³⁵Yecu owaccigi ni, “Ceŋ pud tye botwu pi kare manok. Wuwot ma kun wutye ki ceŋ, wek piny macol pe oŋukwu. ŋat ma woto i piny macol pe ŋeyo ka ma ecito iye. ³⁶Ka pud wutye ki ceŋ, wuye ceŋ, wek wudok litino me ceŋ.” Yecu ka oloko lok man, ci opokke ki botgi, okanne woko ki botgi.³⁷Kadi bed otiyo lanyut ma rom meno i nyimgi, pe guye en; ³⁸wek lok pa lanebi Icaya ocobbe kakare, ni, “Rwot, aŋa ma oye lok ma watito? Dok aŋa ma Rwot onyuto tekone bote?”³⁹Man en gin mumiyo pe gitwero ye, pien Icaya dok owaco ni, ⁴⁰“En oneko waŋgi, omiyo cwinygi odoko nwaŋ, wek pe gunen ki waŋgi, pe bene guniaŋ ki cwinygi, wek omi pe gulokke gudwog bota acaŋgi.”⁴¹Icaya owaco lok man pien oneno deyo mere, oloko pire, ⁴²Kadi bed kit meno, jo mapol ma i kin luloc bene guye en, ento pi lworo Luparicayo omiyo pe gituco, wek pe giryemgi woko ki i kacokke; ⁴³pien gimaro deyo ma dano keto i komgi makato ma Lubaŋa miyo.⁴⁴Yecu odaŋŋe, owacci, “ŋat ma ye an, pe oye an, ento oye ŋat ma oora. ⁴⁵ŋat ma onena, noŋo oneno ŋat ma oora.⁴⁶An abino i lobo pi bedo ceŋ me lobo, wek dano ducu ma ye an owek bedo i piny macol. ⁴⁷Ka dano mo winyo lokka ci pe mako, an pe aŋolo kop i kome; pien pe abino ka ŋolo kop i kom lobo, ento abino ka laro lobo.⁴⁸ŋat ma kwera, ma pe winyo lokka, tye ki ŋat ma biŋolo kop i kome; lok ma aloko biŋolo kop i kome i nino me agik. ⁴⁹Pien pe aloko pira kena: Won ma oora, en kikome aye omiya cik, i gin ma myero awaci ki ma myero aloki. ⁵⁰Aŋeyo ni cikke en kwo ma pe tum; pi meno gin ma awaco, awaco macalo Won oloko bota.”

¹Ma peya nino madit me Kato (Paska) oo, Yecu onoŋo ŋeyo ni cawane doŋ oromo me weko lobo man me dok bot Won; yam maro jone ma tye i lobo man; omarogi nio i agik, ²Ka pud gitye ka camo cam me otyeno, ma doŋ Catan oketo tam i cwiny Juda wod pa Cimon me Keriot me dobe.³Yecu onoŋo ŋeyo ni Won otyeko miyo jami ducu i ciŋe, dok ni ea ki bot Lubaŋa, dok edok bot Lubaŋa. ⁴Oa malo ki i dog cam, olunyo boŋŋine oketo teŋe, okwanyo taulo, otweyo i pyere. ⁵Oonyo pii i becen, ci ocako lwoko tyen lupwonnye, ojwayo ki taulo ma otweyo i pyere.⁶Ka en oo bot Cimon Petero, Petero openye ni, “Rwot, in kulu aye ilwoko tyena?” ⁷Yecu odokke iye ni, “In pe iŋeyo gin ma atye ka tiyo, ento ibiniaŋ lacen.” ⁸Petero owacce ni, “In pe ibilwoko tyena matwal.” Yecu odokke iye ni, “Ka pe alwoki, noŋo ribbe pe i kinwa.” ⁹Cimon Petero owacce ni, “Rwot, pe doŋ tyena keken, ento ciŋa ki wiya bene.”¹⁰Yecu owacce ni, “ŋat ma doŋ olwokke, pe doŋ myero olwok kome, ento kono tyene keken, pien noŋo kome ducu leŋ. Wun wuleŋ, ento pe wun ducu.” ¹¹En onoŋo oŋeyo ŋat ma bidobe; en aye gin mumiyo en owaco ni, “Pe wun ducu wuleŋ.”¹²Ka doŋ olwoko tyengi, okwanyo boŋŋine, odok i kabedone, openyogi ni, “Wuniaŋ gin ma atimo i komwu? ¹³Wulwoŋa ni Lapwony dok ni Rwot; meno ber, pien atye kit meno. ¹⁴Ka an a Rwotwu ki Lapwonywu, alwoko tyenwu, wun bene myero wulwok tyenwu kekenwu; ¹⁵pien an anyuttiwu lanen, wek wun bene wutim gin ma an atimo i komwu.¹⁶Adada awacciwu ni, latic pe bedo dit makato laditte, ŋat ma gioro pe dit kato ŋat ma oore. ¹⁷Ka wuŋeyo lok man, ci wubibedo ki yomcwiny ka wutiyogi. ¹⁸Pe aloko man i komwu ducu; aŋeyo jo ma doŋ ayero; ento wek ginacoya ocobbe kakare, ni, ‘ŋat ma camo kwon kacel kweda otiŋo opunye i koma.’¹⁹Koni atittiwu lok man ma peya otimme, wek ka bitime, wuye ni an atye. ²⁰Adada awacciwu ni, ŋat ma jolo dano ma an aoro, noŋo ojolo an; ŋat ma jolo an, ojolo ŋat ma oora.”²¹Ka Yecu oloko lok man, ci cwinye opoto, oloko atyer ni, “Adada awacciwu ni, ŋat acel i kinwu bidoba.” ²²Lupwonnye gunenne kekengi, pe guniaŋ ŋat ma en oloko i kome.²³ŋat acel i kin lupwonnye, en ma Yecu maro, onoŋo obuto cok ki kor Yecu. ²⁴Cimon Petero ogwele, owacce ni, “Tucciwa ŋat ma en oloko i kome.” ²⁵En ma ojeŋŋe i kor Yecu openye ni, “Aŋa, Rwot?”²⁶Yecu ogamo ni, “En aye ŋat ma abigweyo dek, amiyo bote.” Ka doŋ ogweyo dek, ci omiyo bot Juda wod pa Cimon me Keriot. ²⁷Ka doŋ ogamo, ci Catan odonyo i iye. Yecu owacce ni, “Gin ma imito timo, tim oyot.”²⁸Pe tye ŋat mo i dog cam ma oniaŋ gin ma omiyo oloko lok man bote. ²⁹Jo mogo gutamo ni, pien Juda onoŋo gwoko kicaa limgi, mumiyo Yecu owacce ni, “Wil jami ma mitte pi nino madit”; nyo ni myero omi gin mo bot lucan. ³⁰Ka en doŋ ocamo dek ma gigwene, ci okato woko cut; onoŋo piny doŋ col.³¹Ka doŋ okato woko, Yecu owaco ni, “Koni doŋ giketo deyo i kom Wod pa dano, dok giketo deyo i kom Lubaŋa pire. ³²Ka giketo deyo i kom Lubaŋa pire, Lubaŋa bene biketo deyo i kome pire kene, biketo deyo i kome oyotoyot. ³³Litino aduno, pud atye kwedwu pi kare manok. Wubiyenya, ento macalo ceŋ atito bot Lujudaya, kit meno atittiwu bene koni ni, ‘Ka ma acito iye, wun pe wutwero bino iye.’³⁴Amiyowu cik manyen, ni, wumarre kekenwu; wumarre kekenwu macalo ceŋ amarowu. ³⁵Pi man dano ducu biŋeyo ni wun lupwonnyena, ka mer tye i kinwu.”³⁶Cimon Petero openye ni, “Rwot, icito kwene?” Yecu ogamo ni, “Ka ma acito iye, pe itwero luba koni, ento ibiluba lacen.” ³⁷Petero dok openye ni, “Rwot, piŋo pe atwero lubi koni? Abimiyo kwona piri.” ³⁸Yecu ogamo ni, “Ibimiyo kwoni pira? Adada awacci ni, twon gweno pe bikok, nio ka koŋ ikwera tyen adek.

¹“Cwinywu owek ŋabbe aŋaba; wuye Lubaŋa, wuye an bene. ²I ot pa Abana tye iye kabedo mapol; kono pe kit meno, kono atittiwu ni acito ka yubo ki wun kabedo? ³Ka acito, ayubo ki wun kabedo, dok abidwogo ka omowu bota, wek ka ma an abedo iye, wun bene wubed iye.⁴Ka ma an acito iye, wun wuŋeyo yone.” ⁵Tomaci owacce ni, “Rwot, wan pe waŋeyo ka ma icito iye; watwero ŋeyo yone niŋniŋ?” ⁶Yecu odokke iye ni, “An a yo, ki ada, ki kwo: pe tye ŋat mo ma bino bot Won, kono ki i an keken. ⁷Kono ceŋ wuŋeya, kono wuŋeyo Wora bene; nia koni wuŋeye, doŋ wunene.”⁸Pilipo ogamo doge ni, “Rwot, nyuttiwa Won, ci biromowa.” ⁹Yecu odokke iye ni, “Doŋ ari kwedwu kare malac rom man, pud peya iŋeya, Pilipo? ŋat ma oneno an doŋ oneno Won: itwero waco niŋniŋ ni, ‘Nyuttiwa Won'?¹⁰In pe iye ni, an atye i Won, ki Won i an? Lok ma aloko botwu pe aloko pira kena, ento Won ma bedo i an aye tiyo ticce. ¹¹Wuye ni an atye i Won, ki Won i an; nyo ka pe kit meno, wuye an pi tic keken.¹²“Adada awacciwu ni, ŋat ma ye an, en bene bitiyo tic ma an atiyo; dok bitiyo tic madito makato man, pien acito bot Won. ¹³Gin ducu ma wubilego i nyiŋa, abitiyone, wek giket deyo i kom Won pi Wod; ¹⁴ka wubilego gin mo i nyiŋa, abitiyo.¹⁵“Ka wumara, ci wubigwoko cikka. ¹⁶Abilego Won, en bimiyowu Lacuŋudwar mukene ma bibedo kwedwu nakanaka, ¹⁷en Cwiny me ada, ma lobo pe twero limo, pien lobo pe nene, dok pe ŋeye. Wun wuŋeye, pien en bedo kwedwu, dok bibedo i iwu.¹⁸“Pe abiwekowu macalo litino kic; abidwogo botwu. ¹⁹Odoŋ kare manok, lobo pe dok binena, ento wun wubinena; pien an akwo, wun bene wubikwo. ²⁰I nino meno wubiŋeyo ni an atye i Won, ki wun i an, ki an i wun.²¹ŋat ma tye ki cikka, ma gwokogi, en aye ŋat ma mara; ŋat ma mara Wora bimare, an bene abimare, abinyutte kena bote.” ²²Juda ma pe me Keriot openye ni, “Rwot, man bibedo niŋniŋ, ni ibinyutte keni botwa, ento pe bot lobo?”²³Yecu odokke iye ni, “Ka ŋat mo mara, en bimako lok mera; Wora bimare, wabibino bote, wabiyubo kabedo piwa kenwa bote. ²⁴ŋat ma pe mara, pe mako lokka; lok ma wuwinyo pe mera, ento pa Won ma ceŋ oora.²⁵“Lok man atittiwu kun pud atye botwu. ²⁶Ento Lacuŋudwar, ma en Cwiny Maleŋ, ma Won bicwalo i nyiŋa, en bipwonyowu jami ducu, en bipoyo wiwu i lok ducu ma yam atittiwu. ²⁷Awekkiwu kuc, kuc mera amiyo botwu. Amiyowu, pe macalo lobo miyo. Cwinywu owek ŋabbe aŋaba, pe wulwor.²⁸Doŋ wuwinyo awacciwu ni, an abicito woko, dok abidwogo botwu. Kono wumara, kono cwinywu yom, pien acito bot Won; pien Won dit kata. ²⁹Koni atittiwu lok man ma peya otimme, wek ka bitimme, wuye.³⁰Pe dok abiduro lwak lok mapol kwedwu, pien lalo lobo man tye ka bino. En pe tye ki twer i koma; ³¹ento man timme wek lobo oŋe ni, an amaro Won, atiyo macalo Won ocika.“Ayu, wacitu.

¹“An aye olok me ada, Abana en lapur. ²Jaŋe ducu ma i koma ma pe nyak en lwero woko, ento jaŋa ducu ma nyak en lonyo, wek omedde, onyak mapol.³Wun doŋ gityeko lonyowu pi lok ma aloko botwu. ⁴Wubed i an, an bene i iwu. Macalo jaŋ olok pe twero nyak pire kene, ka pe tye i kom yatte, kit meno wun bene pe wutwero, ka pe wubedo i an.⁵An olok, wun jaŋe. ŋat ma bedo i an, ki an i en, en nyako nyige mapol, pien pe wutwero timo gin mo ka an a pe. ⁶Ka dano mo pe bedo i an, ci gibole woko macalo jaŋ yat, two woko. Gicokogi, gibologi i mac, giwaŋ woko. ⁷Ka wubedo i an, kun lokka bedo i wun, ci wuleg gin ducu ma wumito, gibitimo piwu.⁸Man bikelo deyo i kom Abana, ka wunyako nyig mapol; kit meno wubidoko lupwonnyena. ⁹Macalo Won ceŋ omara, an bene amarowu kit meno; wubed i marra.¹⁰Ka wugwoko cikka, wubibedo i marra, kit macalo ceŋ agwoko cik pa Abana, abedo i marre. ¹¹Lok man atittiwu wek yomcwinya obed i iwu, wek wupoŋ ki yomcwiny.¹²“Man aye cikka, ni wumarre kekenwu macalo ceŋ amarowu. ¹³Pe tye ŋat mo ma tye ki mar madit makato man, ni dano miyo kwone pi lureme.¹⁴Wun lurema ka wutiyo gin ducu ma acikowu. ¹⁵Pe dok alwoŋowu lutic, pien latic pe ŋeyo gin ma laditte tiyo; ento alwoŋowu lurema, pien gin ducu ma yam awinyo ki bot Wora doŋ atyeko nyuttiwu.¹⁶Pe wun aye wuyera, ento an aye ayerowu, dok aketowu wek wuciti, wunyak nyigwu, dok wek nyigwu ori; wek gin ducu ma wubilego ki bot Won i nyiŋa, en omiwu. ¹⁷Gin ma acikowu en ene ni, wumarre kekenwu.¹⁸“Ka lobo okwerowu, wuŋe ni yam okwoŋo kwera ma kun peya okwerowu. ¹⁹Kono wun jo me lobo, kono lobo omaro wun jone; ento wun pe me lobo, ento ayerowu ki i lobo; pi meno lobo kwerowu.²⁰Wupo i lok ma yam atito botwu ni, ‘Latic pe bedo dit makato laditte.’ Ka yam giliba, wun bene gibilibowu; ka yam gimako lokka, gibimako mewu bene. ²¹Gin magi ducu gibitimo i komwu pi nyiŋa, pien pe giŋeyo ŋat ma yam oora. ²²Kono pe nene abino, aloko botgi, kono pe gitye ki bal; ento koni doŋ pe gitye ki lok ma gibipido pi balgi.²³ŋat ma kwera, okwero Wora bene. ²⁴Kono yam pe atiyo i kingi tic ma dano mo mukene pe otiyo, kono pe gitye ki bal, ento koni doŋ guneno dok gukwero an ki Wora. ²⁵Ento man otimme wek lok ma gicoyo i cik megi ocobbe kakare, ni, ‘Gikwera nono.’²⁶Ento ka Lacuŋudwar bibino, ma abioro botwu nia ki bot Won, ma en aye Cwiny me ada ma a ki bot Won, en bibedo cadenna. ²⁷Wun bene wucaden, pien wubedo bota nia i acakki.

¹“Atyeko tittiwu lok man wek pe komwu oryaŋŋe. ²Gibiryemowu woko ki i kacokke; kare bibino ma dano ducu ma nekowu bitamo ni etye ka tic pi Lubaŋa.³Gibitimo man i komwu pien pe giŋeyo Won, kadi an. ⁴Ento atittiwu lok magi wek ka karegi bio, wupo ni yam atittiwu pigi. “Yam pe atito lok man botwu i acakki, pien onoŋo pud atye kwedwu.⁵Ento koni adok bot ŋat ma ceŋ oora. Pe tye ŋat mo i kinwu ma penya ni. ‘Icito kwene?’ ⁶Cwinywu opoŋ ki kumu pien atittiwu lok man. ⁷Ento atye ka tittiwu lok ada, ni, bibedo ber botwu ka an acito; pien ka pe acito, ci Lacuŋudwar pe bibino botwu. Ento ka acito, ci abiore botwu.⁸En ka obino, bimiyo lobo niaŋ i kom bal, ki kit ma atir, ki ŋolo kop; ⁹i kom bal, pien pe giye an; ¹⁰i kom kit ma atir, pien adok bot Won, pe dok wubinena; ¹¹i kom ŋolo kop, pien laloc me lobo man doŋ giŋolle kop woko.¹²“Pud atye ki lok mapol me awaca botwu, ento pe wutwero kanyo koni. ¹³Ka Cwiny me ada bibino, en bitelowu i ada ducu; pien en pe bilok pire kene, ento gin ducu ma en biwinyo, biwaco botwu, bitittiwu gin ma bitimme anyim. ¹⁴En biketo deyo i koma, pien bikwanyo gin ma tuŋ bota, nyuttiwu.¹⁵Gin ducu ma Won tye kwede mega; en mumiyo awacciwu ni, en bikwanyo gin ma tuŋ bota, nyuttiwu. ¹⁶“Odoŋ kare manok, pe dok wubinena; dok odoŋ kare manok, wubinena.”¹⁷Lupwonnyene mogo guloko kekengi ni, “Man gin aŋo ma en waco botwa, ni, ‘Odoŋ kare manok, pe wubinena, dok odoŋ kare manok, wubinena’; dok ni, ‘Pien adok bot Won’?” ¹⁸Guwaco ni, “Man kono te lokke niŋo, ni, ‘Odoŋ kare manok’? Pe waniaŋ gin ma en tye ka waco.”¹⁹Yecu oŋeyo ni gin mito penye, omiyo en owaccigi ni, “Wutye ka pennye kekenwu pi lok ma nen awacciwu, ni, ‘odoŋ kare manok, pe dok wubinena; dok odoŋ kare manok, wabinena’? ²⁰Adada awacciwu ni, wubikok, wubikumo, ento lobo cwinye bibedo yom; cwinywu bicwer, ento cwercwinywu bilokke doko yomcwiny. ²¹Ka mwoc ogoyo dako, kumo, pien cawane doŋ oromo; ento ka doŋ onywal, pe po i can pien noŋo cwinye yom pi nywalo dano i lobo.²²Koni cwinywu cwer, ento abinenowu doki, ci cwinywu bibedo yom, pe tye ŋat mo ma bikwanyo yomcwinywu ki botwu. ²³I nino meno pe wubipenya lok mo. Adada awacciwu ni, ka wubilego gin mo bot Won, en bimiyowu i nyiŋa. ²⁴Nio koni yam pe wulego gin mo i nyiŋa; wulegi, wubinoŋo, wek wupoŋ ki yomcwiny.²⁵“Lok man atittiwu i carolok; kare bibino ma pe dok abilok kwedwu i carolok, ento abitittiwu ka maleŋ lok i kom Won.²⁶I nino meno wubilego i nyiŋa. Pe awacciwu ni abilego Won piwu, ²⁷pien Won kikome marowu, pien wun wumara, dok wuye ni an aa bot Won. ²⁸An aa bot Won, abino i lobo; doki aweko lobo, adok bot Won.”²⁹Lupwonnyene guwaco ni, “Nen, koni iloko ka maleŋ, pe i carolok. ³⁰Koni waŋeyo ni, in iŋeyo gin ducu, dok penyi pe dok mitte; pi man waye ni ia ki bot Lubaŋa.” ³¹Yecu odok iye ki gin ni, “Koni doŋ wuye?³²Kare bibino, bene doŋ oo, ma wubiket woko, ŋat acel acel i pacone, wubiweka kena. Ento pe atye kena, pien Won tye kweda. ³³Awaco lok man botwu wek wubed ki kuc i an I lobo wutye ki can; ento wudi cwinywu, an doŋ aloyo lobo.”

¹Yecu ka oloko man, otiŋo waŋe malo i polo, owaco ni, “Abana, kare doŋ oromo; ket deyo i kom Wodi, wek Wodi bene oket deyo i komi, ²macalo yam imiye twero i kom gin ducu ma tye ki kom, wek omi kwo ma pe tum bot jo ducu ma ceŋ imiyo bote.³Man en kwo ma pe tum, ni giŋe in Lubaŋa acel me ada, ki Yecu Kricito ma yam ioro. ⁴Doŋ aketo deyo i komi i lobo, kun acobo tic ma ceŋ imiya me atiya. ⁵Doŋ koni, Abana, ket deyo i koma i nyimi, ki deyo ma yam abedo kwede i nyimi ma peya iketo lobo.⁶“Atyeko nyuto nyiŋi bot jo ma ceŋ imiya ki i lobo. Gin ceŋ meri, in imiyogi bota, gin gugwoko lokki. ⁷Koni giŋeyo ni jami ducu ma imiya oa ki boti; ⁸pien doŋ amiyogi lok ma ceŋ imiya, gin doŋ gujolo, giŋeyo atikatika ni an aa ki boti; dok giye ni in iora.⁹Alego pi gin; pe alego pi lobo, ento pi jo ma ceŋ imiya, pien gin meri. ¹⁰Jamina ducu meri, ki meri ducu mera, alimo deyo pigi. ¹¹An pe dok abedo i lobo, ento gin gitye i lobo, an abino boti. Won Maleŋ, gwokgi i nyiŋi ma con imiya, wek gibed acel macalo wan acel.¹²Ka ceŋ atye kwedgi kacel, agwokogi i nyiŋi ma imiya; akurogi, pe tye mo ma orwenyo ki i kingi, kono dano ma myero orweny, wek ginacoya ocobbe kakare. ¹³Ento koni abino boti; lok man aloko i lobo, wek gubed ki yomcwiny mera, gupoŋ kwede. ¹⁴Atyeko miyogi lok meri; ci lobo okwerogi, pien gin pe jo me lobo, macalo an pe a dano me lobo.¹⁵pe alego ni myero ikwanygi woko ki i lobo, ento ni igwokgi ki i kom gin marac. ¹⁶Gin pe jo me lobo, macalo ceŋ an pe a dano me lobo. ¹⁷Lonygi i ada gibed maleŋ: lokki en ada.¹⁸Macalo iora i lobo, an bene aorogi i lobo. ¹⁹An alonnye kena pigi, wek gin bene gilonygi i ada.²⁰“Pe alego pi jo man keken, ento pi jo ma biye an pi lokgi, ²¹ni gin ducu gubed acel macalo in, Abana, ibedo i an, an bene i in, gin ducu gubed i wan, wek lobo oye ni in iora.²²Deyo ma ceŋ imiya, an amiyo botgi, wek gubed acel macalo wan acel, ²³an i gin ki in i an, gubed acel atika, wek lobo oŋe ni in iora, dok imarogi macalo imara.²⁴Abana, amito jo-ni, ma gin mot ma imiya, gibed bota ka ma an atye iye, wek ginen deyo mera ma imiya pi mar meri ma imara kwede ma ocakke ma peya icibo guti me lobo.²⁵Ai Won muporre, lobo con pe oŋeyi, ento an aŋeyi; jo man ŋeyo ni in iora. ²⁶Amiyo nyiŋi oŋene botgi, dok abimiyo ŋene, wek mar ma imara kwede obed i gin, ki an i igi.”

¹Ka Yecu doŋ oloko man, ocito kacel ki lupwonnyene, guŋolo nota me Kidron, ka ma onoŋo tye iye poto; odonyo iye kacel ki lupwonnyene. ²Juda, ma ceŋ odobe, bene onoŋo ŋeyo kabedo meno, pien Yecu ki lupwonnyene yam gimaro cokke kunnu. ³Juda ogamo lwak askari ki ludito tic mogo ki bot ajwagi madito pa Lubaŋa ki Luparicayo, gucito kunnu ki tara ki mac raa ki jami lweny.⁴Yecu onoŋo ŋeyo gin ducu ma bitimme i kome; okato botgi, openyogi ni, “Wuyenyo aŋa?” ⁵Gudokke iye ni, “Yecu me Najaret.” Yecu ogamo ni, “An a en.” Juda ma odobe onoŋo ocuŋ kacel kwedgi.⁶Ka Yecu owaco ki gin ni, “An a en,” gujer ki ŋegi, gupoto piny. ⁷Dok openyogi ni, “Wuyenyo aŋa?” Gudokke iye ni, “Yecu me Najaret.”⁸Yecu owaco ni, “Atyeko tittiwu ni an a en; ka wuyenya, wuwek jo man guciti.” ⁹Man otimme wek lok ma ceŋ en oloko ocobbe kakare, ni, “I kin jo ma ceŋ imiya, pe tye mo ma orwenyo.”¹⁰Cimon Petero onoŋo tye ki pala lucwan; ci owoto, otoŋo ki opii pa ajwaka madit, oŋuno ite malacuc. Nyiŋ opii meno Maliko. ¹¹Yecu ociko Petero ni, “Dwok palani i akurane. Kikopo ma Abana omiya pe abimato?”¹²Lwak askari ki laditgi ki lutic pa Lujudaya gumako Yecu, gutweye. ¹³Gukwoŋo tere bot Anac, ma Kayapa onyomo nyare, ma onoŋo en ajwaka madit i mwaka meno. ¹⁴Kayapa en aye ceŋ omiyo tam bot Lujudaya ni ber dano acel oto pi lwak.¹⁵Cimon Petero olubo kor Yecu, kacel ki lapwonnye meno mukene. Lapwonnye man onoŋo ŋeyo ajwaka madit, omiyo en odonyo i dyekal pa ajwaka madit kacel ki Yecu; ¹⁶ento Petero ocuŋ woko i doggaŋ. Lapwonnye meno ma ajwaka madit ŋeyo ocito, oloko ki aŋeca ma gwoko doggaŋ, ci okelo Petero i gaŋ.¹⁷Aŋeca ma gwoko doggaŋ openyo Petero ni, “In bene pe itye i kin lupwonnye pa dano man?” En ogamo ni, “An a pe i kingi.” ¹⁸Lutic ki ludito tic onoŋo gumoko mac miri, pien piny onoŋo ŋic, ci gicuŋ kun gioyo mac. Petero bene onoŋo ocuŋ kacel kwedgi ka oyo mac.¹⁹Ajwaka madit openyo Yecu pi lupwonnyene, ki i kom lok ma en pwonyo. ²⁰Yecu odokke iye ni, “Yam aloko ka maleŋ bot lobo; nino ducu abedo ka pwony i kacokke ki i ot pa Lubaŋa, ka ma Lujudaya ducu gicokke iye. Pe aloko lok mo i muŋ. ²¹Ipenya piŋo? Peny jo ma yam guwinyo lok ma awaco botgi; gin ŋeyo lok ma awaco.”²²Ka oloko lok man, ci ŋat acel i kin ludito tic ma ocuŋ i ŋete odoŋo lem Yecu, kun waco ni, “Igamo dog ajwaka madit kumeno?” ²³Yecu ogamo ni, “Ka aloko marac, nyut caden me gin marac; ento ka aloko maber, ci idoŋa piŋo?” ²⁴Lacen Anac ocwale bot Kayapa, ajwaka madit, kun pud gitweye.²⁵Cimon Petero onoŋo ocuŋ kun oyo mac. Gupenye ni, “In bene pe i ŋat acel i kin lupwonnyene?” En okwero woko, owaco ni, “An ko.” ²⁶ŋat acel i kin opii pa ajwaka madit, wat pa dano ma Petero oŋuno ite-ni, openye ni, “Nanen pe aneni kacel kwede i poto?” ²⁷Petero dok okwero; ci twon gweno otugi kok cut.²⁸Lacen gikwanyo Yecu ki i ot pa Kayapa, gitere i Praitorion. Onoŋo piny doŋ cok ru. Gin kikomgi pe gudonyo i Praitorion, pien pe gimito balle, ento koŋ gicam Kato (Paska). ²⁹Pi man omiyo Pilato okato woko botgi, openyogi ni, “Wudoto dano man pi kop aŋo?” ³⁰Gudokke iye ni, “Kono dano man pe latim marac, kono pe wakele boti.”³¹Pilato owaccigi ni, “Wun kikomwu wutere, wuŋolle kop kun wulubo cikwu.” Lujudaya gudokke iye ni, “Pe giye wan wanek dano mo.” ³²Man otimme wek lok ma Yecu owaco ocobbe kakare, kun nyuto kit to ma ebito kwede.³³Pilato dok odonyo i Praitorion, olwoŋo Yecu, openye ni, “In i Kabaka pa Lujudaya?” ³⁴Yecu ogamo ni, “In iwaco lok man piri keni, kece mono jo mukene aye gutitti?” ³⁵Pilato odok iye ni, “An Lajudaya? Rokki ki ajwagi madito pa Lubaŋa gukeli bota. In itimo gin aŋo?”³⁶Yecu ogamo ni, “Kerra pe me lobo man. Kono kerra me lobo man, kono jona gulwenyo pira, wek pe gimiya i ciŋ Lujudaya; ento kerra pe me lobo man.” ³⁷Pilato openye ni, “In doŋ i kabaka, bo?” Yecu ogamo ni, “In iwaco ni an a kabaka. Ginywala pi man, abino i lobo bene pi man, pi bedo caden me lok ada. Dano ducu me ada winyo dwana.”³⁸Pilato openye ni. “Ada en gin aŋo?” Ka owaco lok man, ci okato woko bot Lujudaya, otittigi ni, “An gira pe anoŋo kop mo i kome. ³⁹Ento wun wutye ki kitwu ni myero agonnyiwu ŋat acel i kare me Kato (Paska). Wumito agonnyiwu Kabaka pa Lujudaya?” ⁴⁰Gin dok guwo ni, “Pe en, ento Baraba.” Baraba kono ceŋ layak.

¹Pilato otero Yecu, ogoye ki anino. ²Askari gucweyo lalukana okuto, gurwako i wiye, dok guruke ki boŋo makwar. ³Gibino bote kun guwaco ni, “Amoti, Kabaka pa Lujudaya!” gidoŋe.⁴Pilato dok okato woko botgi, owaco ki gin ni, “Nen, akelo en botwu, wek wuŋe ni pe anoŋo kop mo i kome.” ⁵Yecu okatti woko botgi kun oruko lalukana okuto ki boŋo makwar. Pilato owaccigi ni, “Nenu dano man.” ⁶Ka ajwagi madito pa Lubaŋa ki ludito tic gunene, guwo ni. “Gure kom yat! Gure kom yat!” Pilato owaco botgi ni, “Wun wutere, wugure kom yat, pien an gira pe anoŋo kop mo i kome.”⁷Lujudaya gugamo doge ni, “Wan watye ki cik; pi cik meno en myero oto, pien okette kene ni en Wod pa Lubaŋa.” ⁸Ka Pilato owinyo lok man, lworo omedde i kome. ⁹Dok odok i Praitorion, openyo Yecu ni, “In ia ki kwene?” Ento Yecu pe ogamo doge.¹⁰Omiyo Pilato owacce ni, “Pe igamo doga? Pe iŋeyo ni atye ki twer me gonyi, ki twer me guri kom yatariya?” ¹¹Yecu odokke iye ni, “Kono nene pe gimiyi twer ma oa ki malo kono pe ibedo ki twer i koma; pi meno ŋat ma omiya boti tye ki bal madit makato.”¹²Nia i kare meno Pilato ocako yenyo yo me gonye, ento Lujudaya guwo ni, “Ka igonyo dano man, ci in pe larem Cecar. Dano ducu ma kette kene bedo kabaka, noŋo pyem ki Cecar.” ¹³Ka Pilato owinyo lok man, okelo Yecu woko, obedo i wi kom me ŋolo kop i kabedo ma gicano iye got; i leb Ibru gilwoŋo ni, Gabbata.¹⁴Onoŋo nino ca nino me Yubbe me Kato (Paska), cawa cok romo abicel. En owaco bot Lujudaya ni, “Nenu, Kabakawu en!” ¹⁵Dano guwo ni, “Tere woko! Tere woko! Gure i kom yatariya!” Pilato openyogi ni, “Agur kabakawu i kom yatariya?” Ajwagi madito pa Lubaŋa gudok iye ni, “Wan pe watye ki kabaka, kono Cecar keken.” ¹⁶Omiye botgi wek gigure i kom yatariya.¹⁷Gitero Yecu, okato woko kun tiŋo yatariyane, ocito i kabedo ma gilwoŋo Cogo Wic; i leb Ibru gilwoŋo ni, Golgota. ¹⁸Gigure i kom yatariya kunnu, ki jo mukene aryo kacel kwede, acel tuŋcel, acel tuŋcel, kun Yecu tye i dyere.¹⁹Pilato ocoyo lok, oguro i wi yatariya; gicoyo ni, “Yecu me Najaret, Kabaka pa Lujudaya.” ²⁰Lujudaya mapol gukwano lok man, pien ka ma giguro iye Yecu onoŋo tye cok ki gaŋ, dok gicoyo i leb Ibru, i leb Roma ki i leb Grik.²¹Ajwagi madito pa Lubaŋa pa Lujudaya guwaco bot Pilato ni, “Pe ico ni, ‘Kabaka pa Lujudaya,’ ento ni, ‘Dano man owaco ni, An Kabaka pa Lujudaya.’ ” ²²Ento Pilato odok iye ni, “Gin ma acoyo, doŋ acoyo.”²³Ka askari gutyeko guro Yecu i kom yatariya, gukwanyo ginarukane, gupoko i dul aŋwen, dul acel pi askari acel acel; ki kanyine bene. Kanyine onoŋo pe gikwoyo akwoya, ento gicweyo acweya, cakke ki malo. ²⁴Guloko kekengi ni, “Pe myero wayecu, ento wabol kwir iye, wek wanen ŋat ma bitero.” Man otimme wek ginacoya ocobbe kakare, ni, “Gipoko ginarukana i kingi, gibolo kwir i kom boŋona.”²⁵Askari gutimo man; ento min Yecu ki lamin minne, Maliam dako pa Kelopa, ki Maliam Lamagdala onoŋo gucuŋ i te yatariyane. ²⁶Ka Yecu oneno minne, ki lapwonnye meno ma en maro kun gucuŋ i ŋete, owaco bot minne ni, “Maa, nen wodi!” ²⁷Ka dok owaco bot lapwonnye meno ni, “Nen meni.” Nia i cawa meno lapwonnye meno otere paco, ogwoke.²⁸Lacen ka man otum, Yecu oŋeyo ni ducu doŋ otum; wek ginacoya ocobbe kakare, owaco ni, “Orwo neka.” ²⁹Agulu koŋo vino mawac onoŋo gicibo kunnu; girwako amor ma opoŋ iye koŋo vino mawac i wi anyero, giketo i doge. ³⁰Ka Yecu doŋ omato koŋo vino mawac, owaco ni, “Doŋ otum.” Okulo wiye, omiyo cwinye.³¹Nino meno obedo ceŋ me Yubbe, omiyo Lujudaya gukwayo Pilato ni myero gitur tyen dano ma gigurogi, gitergi woko, wek komgi pe ori i wi yat i ceŋ cabit, pien cabit meno en nino madit. ³²Askari gubino, guturo tyen dano mukwoŋo, ki tyen dano me aryone ma ceŋ giguro kacel kwede; ³³ento ka guo i kom Yecu, guneno ni doŋ otyeko to woko, ci pe dok guturo tyene.³⁴Ento ŋat acel i kin askari ocobo lakŋete ki toŋ; ci oyotoyot oa iye remo ki pii. ³⁵ŋat ma ceŋ oneno obedo caden, lok ma en obolo tye ada, en ŋeyo ni ebolo lok ada, wek wun bene wuye.³⁶Pien meno ducu otimme wek ginacoya ocobbe kakare, ni, “Cogone mo pe gibituro.” ³⁷Dok dul ginacoya mukene owaco ni, “Gibineno ŋat ma gicobo.”³⁸Ka man otum, Yucepu me Arimataya, ma onoŋo en lapwonnye pa Yecu, ento i muŋ, pi lworo Lujudaya, olego Pilato ni myero eter kom Yecu; ci Pilato oye. Obino, otero kome. ³⁹Nikodemo bene, ma yam ocito bot Yecu dyewor, obino kun okelo murra ma girubo ki atakarac, ma pekke mito romo ratili miya.⁴⁰Gutero kom Yecu, guboyo ki boŋo camanini, kacel ki aŋwece, macalo kit me yik pa Lujudaya tye. ⁴¹Ka ma gigure iye onoŋo tye poto, i poto meno onoŋo tye iye lyel manyen ka ma yam peya giyiko iye ŋat mo. ⁴²Pi ceŋ me Yubbe pa Lujudaya, dok pien lyel meno obedo cok, omiyo giyiko Yecu kunnu.

¹I nino mukwoŋo me cabit, Maliam Lamagdala opuk i lyel odiko con ma piny pud col oneno ni gikwanyo got woko ki i dog lyel. ²En oriŋo, ocito bot Cimon Petero, ki bot lapwonnye meno mukene ma Yecu maro, otittigi ni, “Gikwanyo Rwot woko ki i lyel, pe waŋeyo ka ma gikete iye.”³Petero ki lapwonnye meno mukene gumako yo, gucito i lyel. ⁴Gin aryo ducu guriŋo kacel, lapwonnye meno oyomo Petero ki ŋwec, okwoŋo o i lyel. ⁵Oguŋo, oŋiyo iye, oneno boŋŋi camanini ma giboye kwede gudoŋ kakare; ento pe odonyo iye.⁶Cimon Petero obino kun lube, odonyo i lyel, oneno boŋŋi camanini gudoŋ kakare, ⁷ki kitambara ma ceŋ tye i wiye, pe tye kacel ki boŋŋi camanini, ento odolle, tye kene pat.⁸Lacen lapwonnye meno mukene ma okwoŋo o i lyel bene odonyo iye; oneno, ci oye. ⁹Pien ceŋ peya giniaŋ ginacoya, ni myerone ocer ki i kin jo muto. ¹⁰Lupwonnye meno gudok paco.¹¹Ento Maliam ocuŋ i ŋet lyel kun kok; ka tye ka koko, ci oguŋo, oŋiyo i lyel. ¹²Oneno lumalaika aryo ma rukgi tar, kun gubedo ka ma gipyelo kom Yecu iye, acel tuŋ wiye, acel tuŋ tyene. ¹³Gupenye ni, “Dako, ikok piŋo?” Odok iye ki gin ni, “Gikwanyo Rwoda woko, pe aŋeyo ka ma gikete iye.”¹⁴Ka doŋ oloko lok man, ci olokke, oneno Yecu kun ocuŋ i ŋeye, ento pe oŋeyo ni en Yecu. ¹⁵Yecu openye ni, “Dako, ikok piŋo? Iyenyo aŋa?” Otamo ni gwok nyo en lapur-poto, owacce ni, “Ladit, ka in aye itere, titta ka ma ikete iye, wek acikwanye.”¹⁶Yecu olwoŋe ni, “Maliam.” En olokke, owacce i leb Ibru ni, “Rabboni!” ma te lokke ni, Lapwony. ¹⁷Yecu owacce ni, “Wek maka, pien peya acito bot Won. Ento cit bot utmega, itittigi ni, acito bot Wora ki bot Wonwu, bot Lubaŋa na ki bot Lubaŋawu.” ¹⁸Maliam Lamagdala ocito, owaco bot lupwonnye ni. “Aneno Rwot”; otittigi ni en owaco lok man bote.¹⁹Otyeno me nino meno, ma en nino mukwoŋo me cabit, ma kun gicego doggola ka ma lupwonnye gucokke iye, pi lworo Lujudaya, Yecu obino, ocuŋ i dyegi, owaco ki gin ni, “Kuc obed botwu.” ²⁰Ka owaco lok man, ci onyuttigi ciŋe ki lakŋete. Lupwonnye cwinygi obedo yom ka guneno Rwot.²¹Yecu dok owaco ki gin ni, “Kuc obed botwu. Macalo Won ceŋ oora, an bene aorowu.” ²²Ka en owaco man, ci oywe i komgi, owaco ki gin ni, “Wugam Cwiny Maleŋ. ²³Ka wugonyo bal pa ŋat mo, ci doŋ gigonyo; ka pe wugonyo bal pa ŋat mo, ci doŋ pe gigonyo.”²⁴Tomaci, ŋat acel i kin jo apar wiye aryo, ma gilwoŋo ni Baŋi, onoŋo pe botgi i kare ma Yecu obino. ²⁵Lupwonnye mukene gutitte ni, “Waneno Rwot.” Ento en odok iye ki gin ni, “Ka pe aneno poyo me cumar i ciŋe, ki keto nyig ciŋa i waŋ poyo me cumar, ki keto ciŋa i lakŋete, pe abiye kadi matidi mo.”²⁶Ka nino aboro okato, lupwonnyene doki gubedo i ot, Tomaci bene onoŋo tye kwedgi. Onoŋo gucego doggola, ento Yecu obino, ocuŋ i dyegi, owaco ni, “Kuc obed botwu.” ²⁷Lacen owaco bot Tomaci ni, “Cwal nyig ciŋi kany, inen ciŋa; rye ciŋi, iket i lakŋeta; iwek bedo ma pe iye, ento ma ye.”²⁸Tomaci ogamo ni, “In i Rwoda ki Lubaŋana” ²⁹Yecu openye ni, “Pien inena omiyo iye? Tye ki gum dano ma pe guneno, ma guye.”³⁰Yecu otiyo lanyut mapol i nyim lupwonnyene, ma pe gicoyogi i buk man. ³¹Ento magi gicoyo wek wuye ni, Yecu en Kricito ma Lubaŋa oyero, Wod pa Lubaŋa, ci ka wuye, wek wubed ki kwo i nyiŋe.