¹"انا ارسل رسولي قدام ²علميد يجهز لك الطريق"³صوت يصيح في البرية⁴وقد اقبل يحيى للصحراء بيقول للناس انهم يتوبو ويتغطسو في الاماء، علميد يغفر الله ذنوبهم. ⁵وسار له كل أهل البقعة حق يهوذا وكل شعب القدس، واعترفو بالذنوب حقهم ورجع غطسهم في نهر الأردن. ⁶وكان يحيى بيلبس ثوب من صوف الجمل وعلى احقاوه حزام جلد، وكان بياكل الجراد والعسل البري⁷وكانت هاذه رسالته: "عيجي واحد بعدي أعظم مني، وانا ما استحقش اني انزل وافك رباط جزمته. ⁸انا غطستكم بين الاماء، ولا ماهو عيعمدكم بالروح القدس".⁹وبعد هاذا اقبل عيسى من الناصرة اللي في منطقة الجليل، وغطسه يحيى في نهر الأردن ¹⁰ولاما خرج من بين الاماء، ابسر السماء بتقتسم والروح القدس بينزل عليه ساع حمامة. ¹¹واقبل صوت من السماء بيقول "انت ابني الحبيب اللي عيفرحني"¹²رجع بز الروح القدس عيسى للصحراء. ¹³وجلس بينها 40 يوم بقعة ما اختبره الشيطان، وكان مع الوحوش، وكانت الملايكة تنفعه.¹⁴وبعدما حبسو يحيى، خطى عيسى لمنطقة الجليل يداعي ببشرى الله. ¹⁵ويقول :"قده وقت ، وقد الله عيقيم مملكته، توبو وامنو بالبشرى".¹⁶ولاما كان خاطي على شاطئ بحيرة الجليل، ابسر صيادين هم ,سمعان ,واخوه اندراوس بيرجموا الشبكة في البحيرة. ¹⁷فقلهم عيسى تعالو معي وانا عد اخليكم تصيدو الناس. ¹⁸وفلتو شباكهم على طول ولحقوه.¹⁹وخطي شوية ، وابسر يعقوب ابن زبدي , واخوه يوحنا وهم في القارب بيجهزو الشباك ²⁰وصيح لهم، وفلتو ابوهم زبدي مع العمال في القارب ، وانضمو مع عيسى.²¹وبعدا سارو لكفر ناحوم، وفي يوم السبت سار عيسى لبيت العبادة وجلس يعلم الناس ²²واستغربو من تعليمه، لأنه كان يعلم بسلطان مش ساع الفقهاء.²³وكان به في بيت العباده اللي عندهم راقبلل بينه روح شرير، وجلس يصيح ²⁴مالك علينا ياعيسى الناصري؟ انا اعرفك! انت قدوس الله.

¹وخرج عيسى من هاناك واقبل لبلدة وطلابه معه . ²وفي السبت بدأ يعلم في بيت العبادة ، واستغرب اغلب الناس لاما سمعوه وقالو :من وين له هاذه؟ وايش هاذي الحكمه اللي معه وهاذي المعجزات اللي بتوقع على ايديه؟ ³هو النجار ابن مريم ، واخو يعقوب ويوسي ويهوذا وسمعان؟ مش اخوته هانا عندنا؟ وماقبلوش.⁴فقال لهم عيسى: مابش نبي بغير كرامة إلا في بلاده ووسط اقاربه وأهل بيته. ⁵وماقدرش عيسى انه يفعل أي معجزة هاناك، إلا شفى قليل مرضى ، طرح يده عليهم وشفاهم. ⁶وكان يستغرب من قلة ايمانهم.⁷وصيح للطلاب علميد يقبلو ورسلهم على اثنين اثنين علميد بيشرو، وادالهم سلطاناً على الأرواح النجسه.

¹واتجمعو هاذيك الأيام ناس خيرات، وما كان معاهم شيء ياكلوه، فصيح عيسى لطلابه وقال لهم ²انا راحم لهولا الناس قدلهم معي ثلاثة أيام، ومابش معاهم شي ياكلوه ³وإذا روحتهم بيوتهم بدون أكل عيضعفو في الطريق ، وبعضهم اقبلو من ⁴بقعه بعيده فجاوبوه طلابه: وكيف واحد عيشبع هولا الناس كلهم اكل هنا في البرية؟⁵وسألهم كم معكم خبز؟ ، قالو سبع ⁶فأمر عيسى الكل ان يجلسو على الأرض، وأخذ السبع الحبات الخبز وجلس يشكر الله ، وقسم الخبز ومكن طلابه علميد يوزعو على الناس كلهم، ووزعوها⁷وكان مع الطلاب سمك صغار، وباركهن عيسى وطلب من طلابه انهم يوزعوها والكل ⁸وأكلو الناس لاما شبعو، ورجعو رفعو الطلاب اللي بقي من الأكل سبع سلل ⁹وكانو تقريباً اربعه الف وبعدا خلاهم يرحولهم ¹⁰وطلع القارب مع طلابه وسارو قريب من دلمانوته¹¹واقبلو عنده بعض الفريسيين وجلسو يشارعوه يشتو منه اية من السماء علميد يجربوه ¹²وتنهد من قلبه وقال : للمه يجلسو يطلبو مني آية؟ اقول لكم الصدق : ما عتقعش للجيل هاذا ولا آية ¹³وفلتهم ورجع للقارب وسار للشاطئ في الجهة الثانية¹⁴ونسيو الطلاب انهم يشلو خبز ، وما كان معهم في القارب إلا خبزه واحده ¹⁵ووصاهم عيسى وقلهم انتبهو من خميرة الفريسيين وخميرة الملك هيرودس¹⁶وقالو بينهم البين مابش معنا خبز ¹⁷ ودرا عيسى وقالهم: للمه تقولو ان مابش معكم خبز؟ عادكم للان ما بتفهموش ولا تعرفو؟ ولا عاد قلوبكم مغلقه؟¹⁸ولا معاكم عيون ماتستضيش ، واذان ما بتسمعش ؟ ماتذكروش ¹⁹لاما قسمت الخمس حبات خبز للخمسة الف ، كم سله ببواقي الخبز رفعتو؟ قالو 12 سله²⁰قال: ولاما قسمة السبعه الحبات الخبز للأربعة الف ، كم سلة من بواقي الأكل رفعتو؟ قالو سبع سلال ²¹فقال لهم : وعادكم ماقد فهمتو؟²²ووصلو لقرية في بيت صيدا ، و ادو له رجال أعمى وتراشوه أنه يلمسه ²³وشل بيد الأعمى وبزه لخارج القرية ، وهاناك تفل في عينة وطرح يده عليه وسأله : بتبسر أي شيء؟²⁴ابسر،، وقال : بين ابسر الناس وهم بيمشو وكأنهم أشجار

¹وقام عيسى من هاناك وسار لبلاد اليهودية من الأردن واقبلت لعنده الجماهير وكان يعلمهم ² وقرب له بعض الفريسيين وسألوه علميد يحرجوه: هو حلال ان الرجال يطلق مرته او ماشي ؟ ³فجاوبهم : ايش اوصاكم موسى؟ ⁴ قالو : موسى قال يجوز ان نكتب كتاب طلاق وتطلق المره⁵فقال لهم عيسى : علميد قساوة قلوبكم كتب لكم موسى هذي الوصية ⁶ولكن من بداية الخليقه خلاها الله ذكر وانثى⁷وعلميد هذا يفلت الرجال أبوه وامه ويتحد مع مرته ⁸ويوقع الأثنين جسم واحد ، ما يكونوش اثنين ولكن جسد واحد ⁹واللي يجمعه الله ما يفرقه الانسان¹⁰ولاما دخلو البيت سأله الطلاب على هذا الموضوع ¹¹فقال لهم : من طلق مرته وتزوج غيرها زنى عليها ¹²ولو طلقت مره زوجها وتزوجت غيره زنت¹³واقبلو عنده بعض الناس بالجهال علميد يطرح يده عليهم، وصيحو فوقهم الطلاب ¹⁴وابسر عيسى هذا وزعل وقال لهم : فلتو الأطفال يجو لي ولا تمنعوهمش ، لأن هولا ساع ملكوت الله¹⁵اقول لكم الصدق : اللي ما يقبلش ملكوت الله كأنه طفل ما يدخله ¹⁶وحضنهم وطرح يده عليهم وباركهم¹⁷وخرج للطريق واقبل له رجال مسرع وسجد له وسأله : ايها المعلم الصالح ، ايش اسوي علميد أورث الحياة الأبدية؟ ¹⁸فقال له عيسى : للمه تناديني صالحاً؟ لا صالح إلا الله وحده ¹⁹انت داري بالوصايا: لا تقتل ، لا تزني ، لا تسرق ، لا تشهد زور ، لا تظلم ، وأكرم ابوك وامك²⁰فجاوبه الرجال : يا معلم من لاما كنت صغير وانابين افعل هولا الوصايا كلها ²¹ وابسر له عيسى بمحبه وقال له : ناقصك شي واحد، سير وبيع كل ما عندك ووزع الزلط على الفقراء، وعيكون لك كنز في السماء وجي الحقني ²² وزعل الرجال من هذا الكلام ومشي غاثي، لأنه كان غني قوي²³وابسر عيسى حوله وقال للطلاب : ما أصعب دخول الأغنياء لملكوت الله ²⁴واستغرب الطلاب من كلامه فقال لهم : يا عيالي ما أصعب الدخول لملكوت الله ²⁵لأن مرور الجمل في خزق الأبره أسهل من دخول الغني لملكوت الله²⁶فزاد استغرابهم وجلسو يتسألو: من يقدر انه يفسر ؟ ²⁷وابسر لهم عيسى وقال : هذا حاجه مش ممكن عند الناس مش عند الله ، لأن عند الله كل شي ممكن ²⁸فقال له بطرس : ابسر احنا فلتنا كل شيء ولحقناك²⁹فجاوبه عيسى : اقول لكم الصدق مافي حد فلت بيت او اخوه او اخوات او ام او اب او اولاد او جرب علميدي ومن أجل البشارة ³⁰إلا وقع له في هذي الدنيا مع الاضطهادات مية ضعف من البيوت والإخوة والأخوات والأمهات والأولاد والجرب ووقع له في الأخره الحياة الأبدية ³¹وكثير من الأولين يوقعو في الأخير ، ومن الأخيرين يوقعو الأولين³²وكانو في الطريق ماشين إلى القدس وعيسى يتقدمهم ، وكان الطلاب محتارين، واللي بيتبعوه خايفين، فأنفرد بال12 مرة ثانية وقلهم ايش عيوقع ³³فقال هوذا احنا طالعين الى القدس، وعيسلم ابن الإنسان الى رؤساء الكهنة والفقهاء ، وعيحكمو عليه بالموت ويسلموه لحكام غرباء ³⁴وعيستهزئو به ، ويتفلو عليه ويجلدوه ويقتلوه، وبعد ثلاثة أيام يقوم³⁵وقدم له يعقوب ويوحنا ، عيال ربدي وقالو له : يا استاذ نشتي تعمل لنا طلب ³⁶ لهم : ايش تشتوني اسوي لكم؟ ³⁷وقالو : خلينا نجلس واحد على يمينك وواحد على شمالك في جلالك³⁸فقال لهم عيسى : انتم ما تعرفوش ايش تطلبو،، انتو تعرفو تشربو من الكأس اللي عد اشرب منها انا ، او تصبرو على الوجع اللي عيوقع؟ ³⁹فجاوبوه: نقدر،، فقال لهم : ايوه الكأس اللي عد اشرب منها عتشربو منها والوجع اللي عيوقع بي عيوقع بكم ⁴⁰ولكن الجلوس على يميني وشمالي ما يحقش لي اني اديه لكم ، لأنه للي هيأهم الله لي⁴¹وسمع الطلاب العشرة هذا الكلام وزعلو من يعقوب ويوحنا ⁴²وداعاهم عيسى وقال لهم : تعرفو ان رؤساء الأمم يحكموها وعظمائها يتسلطو عليها⁴³ولاتخلوش هذا فيكم ولكن من يشتي يكون عظيم فيكم عليه يوقع خادم لكم ⁴⁴ومن يشتي يوقع الأول بينكم لازم يوقع للكل عبد ⁴⁵لأن ابن الإنسان ما اقبلش علميد يخدمه الناس ، ولكن اقبل علميد يخدمهم ويفدي بحياته خيرات منهم⁴⁶ووصلو الى اريحا ، ولاما كان يشتي يخرج من اريحا ومعه طلابه وناس خيرات ، كان ابن تسماؤس شحات اعمى جالس على جنب الطريق ⁴⁷ولاما سمع ان اللي عيمر من هاناك هو عيسى الناصري ، جلس يصيح : يا عيسى ابن داؤد ارحمني ⁴⁸وصيحو فوقه ناس خيرات علميد يسكت ، ولكنه صاح قوي : يا ابن داؤد ارحمني⁴⁹فوقف عيسى وقال : داعوه.. وداعوه له وقالوا له : قم عيسى يشتيك ⁵⁰ورجم ثوبه وقفز واقبل لعيسى⁵¹فقال له عيسى : ايش تشتي ان اسوي لك ؟ فقال له : يا استاذ اشتي ابسر .. فقال له عيسى ⁵² سير ،، ايمانك شفاك . وابسر على طول وتبع عيسى في الطريق

¹لاما قربو من القدس ووصلوا لبيت فاجي وبيت عنيا عند جبل الزيتون، رسل عيسى اثنين من طلابه ²وقال لهم : سيرو للقريه اللي قدامكم واول ما تدخلوها عتلقو جحش مربوط ما ركبش عليه احد ، فكو رباطه وادوه لهانا ³ولو سألكم اي احد ليش بتفعلوا هذا ؟ قولو له الرب محتاج له ، وعيرجعه لهنا طوالي⁴وسارو الطلاب ولقيو الجحش مربوط عند باب على الطريق، وفكو رباطه ⁵وسألهم بعض اللي كانو هاناك : مالكم بتفكو رباط الجحش؟ ⁶فقالو لهم ساع ما وصاهم عيسى وفلتوهم⁷واقبل الطلاب بالجحش لا عند عيسى ، وطرحو ثوبهم عليه وركبه عيسى ⁸وطرحو خيرات من الناس ثيابهم على الطريق ، وقطع بعضهم اغصان من الجرب ⁹وكان اللي قدام عيسى واللي وراه يصيحو : المجد لله تبارك الآتي بأسم الرب ¹⁰تباركت المملكه الجاية ، مملكة ابونا داود ، المجد في الأعالي¹¹ودخل عيسى القدس والهيكل ، وابسر كل شيء فيه، وكان الوقت قد سار ، فخرج لبيت عنيا مع الطلاب ال12 ¹²ولاما خرجو اليوم الثاني من بيت عنيا حس بالجوع¹³وابسر من بعيد شجرة تين مورقه ، وسار لها علميد يمكن يلقا بينها ثمر، ولاما وصل لها ما لقي بينها غير الورق ، لأن موسم التين ماقد اقبلش ¹⁴فقال لها : محد عياكل منش للأبد ،، وسمع الطلاب ايش قال¹⁵ووصلمو للقدس وسار عيسى ودخل الهيكل وجلس يطرد البياعين والمشترين من هاناك ، وقلب مناضد الصيارف ومقاعد بياعين الحمام ¹⁶وماسمحش لأي احد يمشي من ساحة الهيكل ومعه بضاعة¹⁷وجلس يعلمهم ويقول : اقبل في الكتاب بيتي بيت صلاة لكل الأمم وانتو خليتوه مغارة للسرق ¹⁸وسمعو رؤساء الكهنة والفقهاء هذا الكلام ، وتشاورو كيف يقتلوه ، وكانو مفجوعين منه لأن الشعب كله كان عاجبه تعليمه ¹⁹وفي العشي خرجو من المدينة²⁰ولاما كانو راجعين الصبح ، ابسرو شجرة التين يابسة من قاعتها ²¹وتذكر بطرس كلام عيسى فقال له : ابسر يا استاذ التينة اللي لعنتها يبست²²فقلهم عيسى امنو بالله ²³اقول لكم الصدق : من قال لهذا الجبل قم واطرح في البحر وهو ما يشكش في قلبه ، وكان مؤمن ان ما يقوله عيوقع ، عيتم له هذا²⁴وعلميد هذا اقول لكم : كل ما تطلبوه في صلاتكم آمنوا انهو وقع لكم يتم هذا ²⁵واذا قمتو للصلاة وكان لكم شيء على احد اغفرو له ، علميد يغفر لكم ابوكم اللي في السماوات ذنوبكم ²⁶ولو انتو ما عتغفروش للناس ، ما عيغفرش لكم ابوكم الي في السماوات ذنوبكم²⁷ورجعو للقدس ولاما كان بيتمشى في الهيكل ، اقبل لعنده رؤساء الكهنة والفقهاء وشيوخ الشعب ²⁸وقالو له : بأي حق تفعل هذي الحاجات ، من ادالك السلطه علميد تفعلها؟²⁹فجاوبهم عيسى : وانا اسألكم سؤال واحد ردو لي عليه ،، بأية سلطة عد اسوي هذي الأعمال؟ ³⁰من اين ليوحنا سلطة العمودية ؟ من السماء ولا من الناس ؟³¹فقالو في انفسهم : ان قلنا من الله عيقول وليش امنتو به ³²اذاً نقول من الناس ؟ لكنهم كانوا يفجعو من الشعب ، لأن الشعب كله كان مقتنع بأن يوحنا نبي ³³فجاوبهو عيسى : مش احنا دارين فقال عيسى : وانا ما عاد اقولكم بأية سلطة بين أفعل هذي الأفعال

¹لاما خرج من الهيكل قال له واحد من طلابه : يا استاذ ابسر ما احلى هذي الحجار وهذي المباني ²فجاوبهم عيسى : ابسرت هذي المباني الحالية ، ما عيبقاش منها هانا حجر على حجر ولكن عيتهدم كله³ولاما كان جالس في جبل الزيتون ومقابلة الهيكل ، سأله بطرس ويعقوب ويوحنا وأندراؤس لحالهم ⁴قلنا ايحين عيوقع هذا الخراب ، وماهي العلامات اللي عتوقع قبل ما يخرب⁵فجاوبهم عيسى : اوبهو يخدعكم احد ⁶عيجي خيرات من الناس يقولو انهم انا ، ويقولو أنا المسيح ويخدعو ناس خيرات⁷ولو سمعتو بالحروب واخبار الحروب لا تفتجعوش ، لأن هذا لازم يوقع ، ولكن مش هي الأخره ⁸عتقوم امة على امه ومملكة على مملكة ، وتوقع زلازل خيرات في بقع كثيرة ، وتوقع مجاعات وهذا كله بداية الأوجاع⁹واما انتو اوقعو منتبهين ، عيسلموكم للمحاكم ويضربوكم وسط الناس ، وعيبزوكم للحكام والملوك من سبتي علميد تشهدوا عندهم ¹⁰لأنه لازم قبل الأخرة إعلان البشارة لجميع الشعوب¹¹ولاما يشلوكم علميد يسلموكم لا تفكرو كيف عتتحاكو ، ولكن اتحاكو باللي يوحى لكم في وقته ، لأن الروح القدس هو اللي عيتحاكا مشو انتو ¹²عيسلم الأخ اخوه للموت ، والأب ابنه ، ويتمرد الأبنء على الأباء ويقتلوهم ¹³ويكرهكم كل الناس علميد اسمي ، ومن عيثبت للنهايه عيخلص¹⁴وإذا ابسرتو نجاسه الخراب جالسة في بقعه ما يوجبش انها تكون ، (إفهم هذا ياللي بتقرأ) فليهرب للجبال من كان في اليهودية ¹⁵ومن كان على الجبى ما ينزلش للبيت علميد ياحذ اي شي ¹⁶ومن كان في الجرب ، ما يرجعش علميد ياخذ ثوب¹⁷¹⁸صلو علميد ما يوقعش هذاالخراب في الشتاء ¹⁹لأنه عتنزل في هاذك الأيام نكبة ما وقعش قبلها من بداية خلق العالم اللي خلقه الله لليوم ، وما عيوقعش ²⁰ولولا أن الرب ما خلاش هاذك الأيام قصيرة ، ما كانش عينجي احد من البشر ، ولكن علميد اللي اختارهم قصر هاذك الأيام²¹وإذا قال لكم أحد : هوذا المسيح هانا أو المسيح هاناك لا تصدقوش ²²فعيظهر مسحاء كذابين وأنبياء كذابين يفعلو آيات ومعجزات ، ولو بيدهم لضللوا اللي اختارهم الله ²³فكونو انتو منتبهين ، انا حاكيتكم بكل شي²⁴وفي هاذك الأيام بعد هاذك الضيق ، عتظلم الشمس وما يضويش القم ²⁵وتتناكع النجوم من السماء ، وتتزعزع قوات السماء ²⁶وفي هاذاك الوقت عيبسر الناس ابن الانسان يجي في السحاب بكل عزة وجلال ²⁷فيرسل ملايكته لجهات الرياح الأربع علميد يجمعو مختاريه من اقصى الأرض الى اقصى السماء²⁸شلو من شجرة التين عبرة : اذا لانت اغصانها واورقت ، اعرفو ان الصيف قريب ²⁹وزد اذا ابسرتو هذا كله يوقع ، اعرفو ان الوقت قريب على الأبواب³⁰اقول لكم الصدق : كله هذا عيوقع في هذاالجيل ³¹السماء والأرض يختفين وكلامي ما يختفيش ³²اما هاذك اليوم وهاذك الساعه محد يعرفهم ، لا الملائكة في السماء ولا الابن ، إلا الأب.³³واقعو منتبهين واسهرو ، لأنكم ما تعرفوش متى عيجي الوقت ³⁴وهذا ساعما رجال مسافر وفلت بيته واداه لخدمه ، كل واحد وعمله ، ووصى البواب بالسهر³⁵فاسهرو لأنكم ماتعرفوش متى عيجي رب البيت ، في الليل أو نص الليل أو في الصباح ولا لا يصيح لديك ³⁶علميد لا يجي فجأة ويبسركم راقدين ³⁷واللي قلته لكم اقوله لكل الناس : اسهروا !

¹وقبل عيد الفصح والفطير بيومين ، كان رؤساء الكهنة والفقهاء يتشاورو كيف يمسكو عيسى بخدعة علميد يقتلوه ²لكنهم قالو : ما عنفلش هذا في العيد علميد ما يثورش الشعب³ولاما كان عيسى في بيت عنيا ، عند سمعان الأبرص وهو بياكل ، جت مره بيدها قارورة عطرغالي السعر من الناردين ، فكسرت القارورة وسكبته على رأسه ⁴وزعلو بعض الموجودين وقالو بيناتهم البين : ايش البوقه هذي في العطر ⁵كان يقدرو يبيعوه بأكثر من 300 دينار وي يوزعوها على الفقراء وجلسو يلومو المره⁶فقال عيسى : فلتوها ليش بتشغلوها ؟ هذا فعل خير فعلته لي ⁷لأن الفقراء عندكم في كل وقت ، ووقت ما تشتو تقدرو تتصدقو عليهم ، ولكن انا ما باجيش في كل وقت ⁸وهذي المره فعلت اللي تقدر عليه ، صبت العطر على جسمي تجهيز للدفن ⁹اقول لكم الصدق : وين ما تعلن البشارة في العالم كله ، يتحاكا الناس بعملها هذا ويتذكروها¹⁰وسار يهوذ القريوتي وهو واحد من ال12 الى رؤساء الكهنة علميد يسلم لهم عيسى ¹¹ولاما سمعوه فرحو بكلامه ، ووعدوه انهم يدو له زلط خيرات ، وجلس يراقب الفرصه علميد يسلمه¹²وفي اول يوم من عيد الفطر وقت ذبح الأطلى لعشاء الفصح سأله طلابه : وين تشتي تسير علميد نجهز لك عشاء الفصح علميد تاكله ¹³ورسل اثنين من طلابه وقال لهم : سيرو للمدينة وعيلاقيكم رجال شايل جرة ماء ، الحقوه ¹⁴ولاما يدخل أي بيت حاكو صاحب البيت : يقلك الاستاذ : وين غرفتي اللي اكل بينها عشاء الفصح مع طلابي¹⁵وعيوريكم فوق البيت غرفه كبيرة ومفروشة ومجهزه ، هاناك جهزوها لنا ¹⁶وسارو الطالبين ودخلو المدينة ، ولقيوا زي ما قالهم وجهزوا عشاء الفصح¹⁷لاما اقبل العشي ، جو الطلاب ال12 ¹⁸ولاما كانو اجالسين للأكل قال عيسى : اقول لكم الصدق ،، واحد منكم عيسلمني وهو ياكل معي ¹⁹ فزعلو الطلاب وجلسو يسألوه واحد واحد : هو انا ولا لا ؟²⁰فقال لهم : هو واحد من ال12 ، وهو اللي عيغمس يده في الصحن معي ²¹وابن الانسان عيموت زي ما اقبل عنه في الكتب المقدسة ، ولكن يا ويله من عيسلم ابن الانسان ! كان احسن له انه ما يولدش²²ولاما كانو ياكلو شل خبز وبارك وكسره وادالهم وقال شلو هذا هو جسمي ²³وبز قلص وشكر وناولهم وشربو منه كلهم ²⁴وقال لهم : هذا هو دمي ، دم العهد اللي عينسفك علميد ناس خيرات ²⁵اقولكم الصدق : ما عاد اشربش عصير الكرمة مره ثانيه ، لاما يجي يوم واشربة جديد في ملكوت الله²⁶وبعدا غنو اغنيه وخرجو لجبل الزيتون ²⁷فقال لهم عيسى : عتفلتوني كلكم ، لأن الكتاب يقول اخفع الراعي وتتناثر الأطلى²⁸ولكن بعد ما اقوم من الموت ، عد اسبقكم للجليل ²⁹فقال له بطرس : لو فلتولك كلهم انا ما بفلتكش³⁰فجاوب عيسى : اقول لك الصدق يا بطرس اليوم في هذي الليلة قبل ما يصيح الديك مرتين تنكرني ثلاث مرات ³¹وصمم بطرس على كلامه : ما انكركش ولو لازم اني اموت معك ، وهكذا قالو الطلاب كلهم³²واقبلو البقعه اسمها جتسيماني ، فقال لطلابه : اجلسو هانا لاما انا اصلي ³³وشل معه بطرس ويعقوب ويوحنا وبدأ يحس بالرهبة والكآبة ³⁴فقال لهم : نفسي حزينة لدرجة الموت ، ورعو هانا واسهرو³⁵وابتعد شويه وارتجم للأرض ، وكان يصلي علميد تمشي عليه ساعة الوجع لو ممكن ³⁶فقال : ابي ، يا ابي ! انت قادر على كل شيء ، ابعد مني هذه الكاس . ولكن مش ساع ما اشتي انا ، ولكن ساع ماتشتي انت³⁷ورجع ولقاهم راقدين فقال لبطرس : يا سمعان انت راقد ؟ ماقدرة تسهر ساعة واحده؟ ³⁸اسهرو وصلو علميد ماتوقعوش في مصيبه ، تشتو تفعلو الصح لكن الطبيعه البشريه ضعيفة ³⁹وابتعد مره ثانية ، وردد الكلام نفسه⁴⁰ورجع وزد ولقاهم راقدين ، لأن النعاس ثقل على جفونهم واحتارو بايش يجاوبوة ⁴¹ورجع في المرة الثالثة وقال لهم : عادكم راقدين ومفتهنين ؟ يكفي ! جت الساعة . ابسرو ابن الانسان عيسلموه ليد الخاطئين ⁴²قومو نرحلنا ! اقبل اللي خانني⁴³ولاما كان بيتحاكا وصل يهوذا ، وهو واحد من طلابه ال12 ، ومعه عصابهمعهم ⁴⁴سيوف واعصي ، رسلوهم رؤساء الكهنة والفقها⁴⁵ءوكان اللي خانه قد اتفق معاهم على اشارة وقال لهم : اللي اقبله هووسار مباشرة لعيسى وقال له : يا استاذ وقبله⁴⁶ومسكوه على طول⁴⁷وخرج واحد من الموجودين سيفه وضرب خادم رئيس الكهنة وقطع اذنه ⁴⁸وقال لهم عيسى : هل انا لص لاما خرجتم بسيوفكم وعصيكم علميد تمسكوني ⁴⁹كنت كل يوم بينكم اعلم في الهيكل ولما مسكتوني ، ولكن وقع هذاعلميد يتم كلام الكتاب ⁵⁰وفلتوه كلهم وهربو⁵¹ولحقه شاب مشو لابس الا عبايه ، فمسكوه ⁵²وترك عبايته وهرب مخلوس⁵³وشلو عيسى لرئيس الكهنة ، واجتمعو رؤساء الكهنة والشيوخ والفقهاء كلهم ⁵⁴ولحقه بطرس من بعيد لبيت رئيس الكهنة ، فدخل وجلس مع الحرس يتدفا جنب النار⁵⁵وكان رؤساء الكهنة وكل اعضاء المجلس يشتو شهادة على عيسى علميد يقتلوه وما يلقوش ⁵⁶لأن ناس خيرات شهدو عليه زور وشهاداتهم متناقضه⁵⁷فقام بعضهم وشهدو عليه زور وقالو ⁵⁸احنا سمعناه بيقول : شهدم الهيكل المصنوع بالأيدي ، وأبني في ثلاثة أيام هيكل ثاني مش مصنوع بالأيدي ⁵⁹وفي هذا والكل تناقضت شهاداتهم⁶⁰فقام رئيس الكهنة وسط المجلس وسأل عيسى : به عندك رد على هذي التهم اللي قالوها الناس عليك ؟ ⁶¹وجلس ساكت ما يردش ولا بيقول كلمة ، وسأله رئيس الكهنة مرة ثانية : هو انت المسيح ابن الله المبارك ولا لا ؟ ⁶² فجاوبة عيسى : انا هو ، وعتبسرو ابن الانسان اجلس يمين الله القدير ، ويجي على سحاب السماء⁶³فشطط رئيس الكهنة ملابسه وقال : ما عاد نحتاج شهود بعد هذا ⁶⁴سمعتو الكفر حقه ، ايش رأيكم! فحكمو عليه الكل انه يستحق الموت ⁶⁵وجلسو بعضهم يتفلو عليه ويغطو وجهه ولطموه ويقولو له : اتنبأ . وجلس الحرس يضربوه⁶⁸ولاما كان بطرس في الساحه حق الدار ، جت واحده من خادمات رئيس الكهنة ⁶⁷وابسرت بطرس جالس يتدفا وقالت له : انت كمان كنت مع عيسى الناصري؟ ⁶⁶وانكر وقال : ما اعرفش ولا انا فاهم ايش بتقولي! وخرج للزغط ، فصاح الديك⁶⁹وابسرته الجارية ، وجلست تقول للموجودين : هذا منهم ⁷⁰وانكر مره ثانية ، وبعد شويه قالو الموجودين لبطرس : شكلك واحد منهم لأنك من الجليل⁷¹وجلس يلعن نفسه ويحلف لهم ويقول : انا ما اعرفش هذا الادمي اللي تتحاكو علية ⁷²وعلى طول صاح الديك مره ثانية ، فتذكر بطرس قول عيسى : قبل ما يصيح الديك مرتين ، عتنكرني ثلاث مرات . وجلس يبكي

¹وحين طلع الصبح ، اتخذ رؤساء الكهنة قرار مع الشيوخ والفقهاء والمجلس كله فقيدو عيسى وشلوه وسلموه الى بيلاطس ²فسأله بيلاطس : هل انت ملك اليهود ؟ فجاوبه : انت اللي قلت ³واتهموه رؤساء الكهنة اتهامات خيرات⁴فسأله بيلاطس مره ثانية : للمه ما تجاوب بأي شيء ؟ ابسر كم بيقولوا تهم عليك! ⁵وما جاوبش عيسى بشيء لاما استغرب منه بيلاطس⁶وكان بيلاطس في كل عيد يخرج واحد من المساجين يختاروه الشعب ⁷وكان به رجال اسمه عباس محبوس مع جماعه من الثوار اللي قتلو ايام الثورة ⁸وسارو الناس وطلبو من بيلاطس انه يسوي لهم ساعما عادتهم⁹فقال لهم : او تشتو اني اخرج لكم ملك اليهود ؟ ¹⁰لأنه كان داري ان رؤساء الكهنة من حسدهم سلمو له عيسى ¹¹ولكن رؤساء الكهنة خلو الشعب يختارو انه يخرج عباس¹²فقال لهم بيلاطس مره ثانية : وايش اسوي باللي تسموه ملك اليهود؟ ¹³ورجعو يصيحو اصلبه¹⁴فقال لهم : ايش الذنب اللي فعله ؟ وصاحو اقوى ( اصلبه) ¹⁵وكان يشتي بيلاطس انه يرضي الكل ، وخرج لهم عباس وخلاهم يجلدو عيسى وبعدا سلمه علميد يصلبوه¹⁶واخذوه العساكر داخل القصر قصر الولاية، وجمعو الكتيبة كلها ¹⁷وبعدا لبسوه مابس لونها ارجواني ، وضفرو له اكليل من الشوك وطرحوه على راسه ¹⁸وجلسو يحيوه ويقولو له : السلام عليك يا ملك اليهود¹⁹ويضربوه بقصبه على راسه ويتفلو عليه ، ويركعو على ركبهم ويسجدو له ²⁰وبعدما استهزؤ به ، بعدو منه الارجواني ولبسوه ثيابه وخرجوه علميد يصلبوه ²¹وكان سمعان القيرواني ابو اسكندر وروفا في الطريق راجعين من الريف فخلوه يشل صليب عيسى بالصميل²²وبزو عيسى لبقعه اسمها جلجثة ، يعني مكان الجمجمة ²³وادو له خمر مع مر ، وما رضيش انه يشربها ²⁴وبعدا صلبوه وقسمو ملابسه بينهم بالقرعة²⁵وكانت الساعه تسعه وقت ما صلبوه ²⁶وكتبو في عنوان الحكم عليه : ملك اليهود ²⁷وصلبو معه اثنين سرق على يمينه وشماله ²⁸وتم كلام الكتاب اللي يقول : حسبوه مع الأشرار²⁹وكان الناس يخطو من قدامه ويهزهزو رؤسهم ويسبوه ويقولو له : اه يا هادم الهيكل وبانيه في ثلاث ايام ³⁰خلص نفسك وانزل من الصليب³¹وكان رؤساء الكهنة والفقهاء يستهزؤ به كمان ، ويقولو لبعضهم : خلص غيره وما قدرش يخلص نفسه! ³²ينزل الان المسيح ملك اسرائيل من الصليب ، علميد نبسر ونؤمن ! وكان السرق اللي جنبه حتى هم يسبو فيه³³وفي الظهر ، نزل عليهم الظلام على الأرض كلها للساعه 3 العصر ³⁴وفي الساعه 3 صاح عيسى بصوت قوي : ايلوئي ايلوئي ، لاما سبكتاني؟ . يعني إلهي إلهي ليش فلتني؟

¹وفي هاذك الأيام طلع القيصر اوغسطس بيان بعد كل سكان الامبراطورية ²وقع هاذا الاحصاء الأول لاما كان كيرينيوس حاكم على سوريه ³وسار كل واحد لمدينته علميد يكتب فيها⁴وطلع يوسف من اجليل من مدينة الناصره الى اليهوديه لبيت لحم مدينة داؤد ، لأنه كان من بيت داؤد وعشيرته ⁵علميد يسجلوه هاناك مع مريم خطيبته وهي واحمه⁶ولاما كانو في بيت لحم ، جاء وقتها علميد تولد ⁷وولدت ابنها البكر وقمطته ونيمته في معلف البهايم ، لأنه ماكانش معاهم فندق يجلسو بينه⁸وكان به في هاذك البقعه رعية بيرقدو في الجرب ويتناوبو حراسة القطيع حقهم في الليل ⁹فبدا لهم ملاك الله ، وضوء جلال الله ، وافتجعو قوي¹⁰فقال لهم الملاك : لا تفتجعوش ! انا ابشركم بخبر عظيم يفرح له كل الشعب ¹¹اليوم ولد لكم مخلص في مدينة داؤد ، هو المسيح الرب ¹²وهذي علامة لكم ، عتبسرو وليد مقمط وراقد في معلف¹³وفجأة بدي مع الملاك جمهور من جند السماء ، يسبحو الله ويقولو ¹⁴المجد لله في العلى ، وفي الأرض السلام للفايزين برضاه¹⁵ولاما سارت الملائكة منهم ورجعت للسماء ، قالو الرعيه لبيناتهم البين : جو نسير لبيت لحم ونبسر هاذا الشيء اللي حاكانا به الله ¹⁶وسارو سريع ، ولقيو يوسف ومريم والولد راقد في المعلف¹⁷ولاما ابسروه ، اتحاكو باللي قلهم الملاك على هاذا الولد ¹⁸وكان كل من يسمع يستعجب من كلامهم ¹⁹وحفظت مريم هاذا كله وتأملت به في نفسها ²⁰ورجعو الرعيه وهم بيسبحو الله ويمجدوه على كل ما سمعو وابسرو ساع ما قلهم الملاك²¹ولاما وقع عمر الجاهل ثمانيه ايام وهو يوم ختانته ، سموه عيسى ، ساع ماسماه الملاك قبلما حملت به مريم²²ولاما جا وقت طهوره بحسب شريعة موسى ، بزوه يوسف ومريم لاورشليم علميد يقدموه الى الله ²³ساع ماهو مكتوب في شريعة الرب : كل بكر لازم انه يقدم للرب ²⁴وزد يفعلو الضحية اللي وردة في التوراه : يمامتين او حمامتين صغار²⁵وكان في اورشليم رجال صالح وتقي اسمه سمعان ، مراعي الخلاص لإسرائيل ، وكان الروح القدس عليه ²⁶وكان اوحى اليه انه ماعاد يموتش الا لاما يبسر مسيح الرب²⁷فجاء للهيكل بوحي من الروح ، ولاما دخل الابين ومعاهم الولد عيسى علميد يفعلو له بحسب الشريعه ²⁸شله سمعان لايديه وبارك الله وقال : ²⁹يارب : تميت الأن وعدك لي ، اطبق عبدك بسلام³⁰عيوني ابسرين المنقذ ³¹اللي هيئته للشعوب كلها ³²نور لهداية الأمم ، ومجد لشعبك إسرائيل³³واستغربو يوسف ومريم من الكلام اللي قاله سمعان في عيسى ³⁴وباركهما سمعان وقال لمريم امه : هاذا الجاهل اختاره الله علميد ينكع خيرات من الناس ويقوم خيرات منهم ، وهو علامه من الله يقاوموها ³⁵علميد تبان خفايا افكارهم ، وانتي سيف الأحزان عيدخل في قلبش³⁶وكان به هاناك نبيه كبيرة في العمر اسمها حنة ابنة فنوئيل ، تزوجت وهي بكر وجلست سبع سنين مع زوجها ³⁷وبعدا جلست ارمله ووصل عمرها اربعه وثمانين ، وما تفارقش الهيكل وتعبد الله بالصوم والصلاه ليل ونهار ³⁸وجت في هاذك الساعه واتقدمت لهم ، وجلست تسبح الله ، وتحاكت على الجاهل مع كل اللي كانو مريعين لتحرير مدينة اورشليم³⁹ولاما يوسف ومريم كل ماتفرضه الشريعه ، رجعو الى الجليل لمدينتهم الناصره ⁴⁰وكان الولد عيسى ينمو ويكبر ويمتلي بالحكمه ، وكانت نعمة الله عليه⁴¹وكان ابو عيسى وامه يسيرو كل سنه لاورشليم في عيد الفصح ⁴²ولاما وصل عيسى عمر 12 سنه ، سارو لاورشليم ساع كل مره في العيد ⁴³ولاما خلص العيد وقدهم راجعين ، جلس الولد عيسى في اورشليم ، وابوه وامه مشهم دارين ⁴⁴وكانو يظنو انهو مع المسافرين ، وجلسو مسافرين طوال اليوم ، وبعدا جلسو يدوروه بين الأقارب والمعارف⁴⁵ومالقيوش ، ورجعو لاورشليم يدورو عليه ⁴⁶وبعد ثلاثة أيام لقيوه في الهيكل ، جالس مع الفقهاء يستمع لهم ويسألهم ⁴⁷وكان كل اللي يسمعوه مستعجبين من فهمه واجوبته⁴⁸ولاما ابسروه ابويه استغربو ، وقالت له امه : يا ولدي ليش بتفعل بنا هكذا ؟ انا وابوك قد تعبنا واحنا بندور عليك ⁴⁹فجاوبهم : وليش بدورو عليا ؟ مش انتو دارين انهو لازم اجلس في بيت ابي ⁵⁰ومافهموش معنى كلامه⁵¹ورجع عيسى معاهم لالناصره وكان طايع لهم ، وحفظت امه كل هاذا في قلبها ⁵²وكان عيسى يكبر في القامه والحكمه والنعمه عند الله والناس

¹ورجع عيسى من نهر الأردن وهو ملان بالروح القدس ، وشله الروح للصحراء ²اربعين يوم وابليس بيجربه ، وما اكلش اي شي هاذك الأيام طول الفتره ولاما كملت جوع³فقال له ابليس : لو انت ابن الله ، قول لهذي الحجره توقع خبزه

¹وكان عيسى على شاطئ بحيرة جنيسارت ، واتزاحم الناس عليه علميد يسمعو كلام الله ²وابسر اثنين قوارب واقفين عند الشاطئ ، خرجو منها الصيادين علميد يغسلو شباكهم ³فطلع لواحد منهم وكان حق سمعان ، وقله يوخر شويه من البر ، وجلس عيسى في القارب يعلم الناس⁴ولاما ختم كلامه قال لسمعان : سير للعمق وارجمو شباككم للصيد ⁵فجاوبه سمعان : تعبنا الليل كله يا استاذ وما اصطدنا اي شي ، ولكني عد ارجم الشباك علميد طلبك ⁶ورجمو الشباك ومسكو اسمك خيرات ، وكان عتشتط شباكهم من كثرهن ⁷فداعو لشركائهم في القارب الثاني ان يجو ويساعدوهم ، فجو وملو القاربين لاما كانو عيغرقو⁸ولاما ابسر سمعان ما وقع رجم نفسه عند ركب عيسى وقال : وخرمعني يا سيدي ، لأني رجال مذنب ⁹وكان مستغربين هو واصحابه كلهم من زيادة السمك اللي اصطادوها ¹⁰ومثلهم يعقوب ويوحنا ابناء زبدي وشريكا سمعان ، فقالو لسمعان : لاتفتجعش ! عتكون من ذلحين صياد بشر

...

¹وخطى عيسى وسط الجرب في السبت وجلس طلابه يقطفو السنابل ويفركوها بيداتهم وياكلوها ²فقال لهم بعض الفريسيين : للمه بتفعلو اللي مايجوز في السبت؟³فجاوبهم عيسى : انتو دريتو ايش عمل داؤد لاما جوع هو ورجاله؟ ⁴كيف دخل بيت الله واكل خبز القربان وادا منه لرجاله ، مع ان اكله ما يجوز إلا للكهنة وحدهم ⁵وقال لهم عيسى : ابن الانسان هو سيد السبت.⁶وفي سبت ثاني سار لبيت العباده وجلس يعلم ، وكان به رجال يده اليمين يابسه ⁷وجلسو الفقهاء والفريسيين يراقبو عيسى يشتو يبسرو انهو عيشفي المريض في السبت او ماشي علميد يشتكو به ⁸وعرف عيسى ايش كان بيفكرو ، فقال للرجال اللي يده يابسه : قم وسنب في وسط المجمع. فقام الرجال وسنب⁹فقال لهم عيسى : اسألكم :يجوز في السبت عمل الخير ولا الشر ؟ انقاذ نفس ولا هلاكها ¹⁰وتلفت عليهم كلهم وقال للرجال: مد يدك، ومدها الرجال وشفيت يده تماماً ¹¹واقتهرو وتشاورو كيف يفعلو بعيسى¹²وفي هاذك الأيام طلع للجبل علميد يصلي ، وجلس الليل كله يصلي لله ¹³ولاما طلع الصبح صيح لطلابه واختر منهم 12 ، وسماهم رسل ، وهم¹⁴سمعان اللي سماه بطرس ، واندراوس اخوه ، ويعقوب ويوحنا ، وفيلبس وبرتولماوس ¹⁵ومتى وتوما ، ويعقوب ابن حلفي وسمعان الملقب بالوطني الغيور ¹⁶ويهوذا ابن يعقوب القريوتي اللي خانه¹⁷وبعدا نزل عيسى معاهم ووقف في بقعه سهله ، وكان به ناس خيرات من طلابه وناس خيرات من الناس من كل اليهوديه وساحل صور وصيدا ¹⁸جو علميد يسمعو ويشفيهم من امراضهم ، وكان اللي بيتعذبو من الأرواح النجسه يتشافو والكل ¹⁹وكان الكل يحاولو انهم يلمسوه ، لأن كانت قوة تخرج منه وتشفيهم كلهم²⁰وابسر عيسى لطلابه وقال يهنا لكم يا مساكين لأن لكم ملكوت الله! ²¹يهنا لكم يا جياع الأن لأنكم عتشبعو يهنا لكم ياللي بتبكو لأنكم عتضحكو²²يهنا لكم لو كرهوكم الناس وطردوكم وعيروكم ونبذوكم نبذ الأشرار علميد ابن الانسان افرحو في ²³هاذك اليوم وابتسمو لأن اجركم عظيم في السماء ، هكذا عمل اباؤهم بالأنبياء²⁴ولكن الويل لكم يالأغنياء ، لأنكم شليتو نعيمكم هانا ²⁵ويلكم ياللي بتشبعو الان لآنكم عتجوعو وويلكم ياللي بتضحكو الأن لأنكم عتزعلو وتبكون²⁶الويل لكم لو مدحكم كل الناس لأن هكذا فعل اباؤهم بالأنبياء الكذابين²⁷ولكني اقول لكم يا كل السامعين : حبو اعداءكم ، واحسنو لبعضكم ²⁸وباركو اللي بيلعنوكم ، وادعو للي يسيئو لكم²⁹من ضربك على صابرك، ادي له الصابر الثاني ومن شل لبسك لا تمنعه من ثوبك ³⁰ومن طلب منك شي ادي له ، ومن شل شي حقك لا تطالبه³¹وعاملو الناس ساع ما تشتو انهم يعاملوكم ³²فلو حبيتو من حبكم فين الفضل في هاذا؟ حتى الأشرار يحبو من يحبوهم ³³واذا احسنتوا للمحسين لكم فأي فضل يوقع لكم؟ لأن الأشرار بيفعلو هاذا كمان ³⁴وان سلفتو من تعرفو انه عيسدد الدين ، فأين الفضل لكم؟ لأن الخاطئين انفسهم يقرضون الأشرار علميد يردو لهم فلوسهم³⁵ولكن حبو اعدائكم ، احسنو واقرضو بدون ما تراعو لشي ، عيكون اجركم عظيم ، وتوقعو ابناء الله العلي ، لأنه ينعم حتى على اللي ما يشكروه ³⁶اوقعو رحما ساعما ابوكم رحيم³⁷لا حكمو على احد ، وهكذا ما يحكمش الله عليكم ، لا تحاسبوش احد وعلميد هاذا مايحاسبكمش الله ، سامحو الثانين فيغفر الله لكم³⁸اعطوا تعطوا ، في حجركم يصبون لكم كيلاً ملانا ومكبوس ومهزوز وفايض لأن الكيل اللي بتكيلو به للبقيه ، هو نفسه يكال به لكم³⁹وقال لهم عيسى هاذا المثل : هل يستر اعمى انه يسوق اعمى؟ مابلا ينكعو الأثنين في الحفره؟ ⁴⁰مابش تلميذ اعظم من استاذه ، كل طالب كمل علمه يوقع ساع استاذه⁴¹لاما تبسر القشه اللي في عين اخوك وما تبسرش لوح الخشب اللي في عينك ⁴²وكيف تستر انك تقول لأخوك : ياخي خليني اخرج القشه من عينك ، والخشبه اللي في عينك انت ماتبسرهاش ؟ يا منافق ، خرج اللوح من عينك اول شي ، وتستر بعدا انك تبسر علميد تخرج القشه من عين اخوك⁴³الشجره الحاليه ماتديش ثمار شوعات ، والشجره الشوعه ماتديش ثمار حاليات ⁴⁴كل شجره يعرفوها من ثمرها ، فأنت ماتجنيش من الشوك تين ولا من العليق عنب⁴⁵الانسان الصالح من الكنز الصالح في قلبه يخرج ما هو صالح ، والانسان الشرير من الكنز الشرير في قلبه يخرج ما هو شرير ، لأن من فيض القلب ينطق اللسان⁴⁶كيف بتدعوني : يارب ، يارب ، وما تعرفوش باللي اقول؟ ⁴⁷كل من يجي لي ويسمع كلامي ويفعل به اشبهه لكم ⁴⁸ساع رجال بنى بيت ، فحفر عميقاً وفعل الأساس على الصخر ، ولاما وقع فيضان صدم النهر على هاذك البيت لكنه ما قدرش انه يزعزعه من قوة بنايته⁴⁹وأما اللي بيسمع كلامي وما يفعلش به ، يشبه رجال بنى بيته على تراب بغير اساس ، فصدمه النهر ونكع البيت على طول ، وكأنه خراب عظيم

¹وكان عيسى يصلي في بقعه ، ولاما تم الصلاة قال له واحد من طلابه : يا استاذ ، علمنا ان نصلي ساع ما علم يوحنا طلابه²فقال لهم عيسى : متى ما صليتو فقولو أيها الأب ليتقدس اسمك علميد يجي ملكوتك³ارزقنا كل يوم ما يكفينا من خبز ⁴واغفر لنا خطايانا

¹وكان جباة الضرايب والمخطين يقربو من عيسى علميد يسمعوه ²فقال الفريسيين والفقهاء : هاذا الرجال يسلم على الخاطئين وياكل معهم!³فجابرهم بهاذا المثل : ⁴من منكم لو معه مية طلي وضاع واحد منها ، مش عيفلت التسعه والتسعين علميد يدور على الطلي الضايع لاما يلقاه؟ ⁵ولاما يلقاه يشله على كتفه فرحان⁶ويداعي اصحابه وجيرانه ويقول لهم افرحو معي لقيت الطلي الضايع ⁷اقول لكم : سعما هذا الفرح في السماء لاما يتوب خاطئ واحد اكثر من الفرحه بتسعه وتسعين من الصالحين ما يحتاجوش توبه⁸او لو مره عندها 10 دراهم وضاع عليها درهم واحد ، مش عتجلس تولع الفانوس وتكنس البيت ودور بأجتهاد لاما تلقاه؟ ⁹ولاما تلقاه تداعي الأصدقاء والجيران وتقول لهم افرحو معي لقيت درهمي الضايع ¹⁰اقول لكم : سعما هذا يفرحو ملائكة الله بتوبة أي خاطئ¹¹وقال عيسى : كان به رجال معه ولدين ¹²فقال الصغير : يابه اديلي ورثي من الأملاك ، فقسم لهم الأملاك¹³وبعد ايام قليله ، جمع الأبن الصغير كل ما يملك ، وسافر بلاد بعيده ، وجلس ياكل الورث ويصرفه بدون حساب ¹⁴وبعدما صرف كل اللي معه وقع في هاذك البلاد مجاعه قاسيه ، ووقع في ضيق¹⁵فسار يشتغل عند رجال من اصحاب هاذك البلاد ، فرسله للأرض حقه علميد يرعى خنازير ¹⁶وكان يشتهي انه يشبع من الخرنوب اللي كانت الخنازير تاكله ، ومحد يدي له¹⁷فرجع قال في نفسه : كل العمال اللي عند ابي يفضل لهم الأكل ، وانا هانا أموت من الجوع! ¹⁸اقوم واسير لأبي واقول له : يابه انا غلطت في حق الله وفي حقك ¹⁹انا ما استحقش اني اوفع ابنك ، خليني ساع واحد من عمالك²⁰فقام وسار لأبوه ، ولاما كان عاده بعيد ابسره ابوه ورحمه ، وحمل لعنده وحضنه وحببه قوي ²¹فقال له الأبن : يابه ، انا غلطت للسماء ولك ، وما استاهلش ان يداعوني لك ابن²²فقال الأب لعماله : اسرعو ادوا احلى ثوب ولبسوه وادو له خاتم في اصبعه وحذاء في ارجيله ²³وهاتو العجل السمين واذبحوه ، ناكل ونفرح ²⁴لأن ابني هاذا كان ميت والآن عاش ، وكان ضايع ولقيناه ، فجلسو معه فرحين²⁵وكان الأبن الكبير في الجربه ، ولاما رجع وقرب من البيت ، سمع صوت الغناء والرقص ²⁶فصيح لواحد من العمال وسأله ايش الخبر؟ ²⁷فجاوبه : رجع اخوك ، وابوك ذبح له العجل السمين ، علميد انه رجع له بصحه وسلامه²⁸فزعل ومارضيش انه يدخل ، وخرج له ابوه وجلس يتراشاه ²⁹فقال لأبوه : خدمتك كل هاذي السنين وما عصيت لك كلمه ، وما اديت لي حتى طلي واحد علميد افرح به مع أصحابي ³⁰ولكن لاما رجع ابنك هاذا ، بعد ما أكل زلطك مع الصعاليك ذبحت له العجل السمين!³¹فجاوبه ابوه : يابني ، انت معي في كل وقت ، وكل ماهو لي فهو لك ³²ولكن كان علينا اننا نفرح لأن اخوك هاذا كان ميت والان عاش وكان ضايع ولقيناه

¹وقال كمان لطلابه : كان به رجال غني وكان معه وكيل ، وجاء له من قله ان وكيله عيكمل ثروته ²فصيح لوكيله وقال له : ايش هاذا اللي اسمعه عنك؟ اديلي حساب وكالتك ، انت ماعتنفعش وكيل بعد اليوم³فقال الوكيل في نفسه : عيشل الوكاله مني ، ايش اسوي؟ ما استرش اشقى في الفلاحه ، وما استرش اشحت هاذا عيب! ⁴وبعدا قال عرفت ايش اسوي حتى لو شل مني الوكاله ، عيقبلني الناس في بيوتهم⁵فصيح لكل اللي عليهم دين لسيده ، وسأل الأول : كم عليك لسيدي؟ ⁶فقال له : 100 برميل من زيت الزيتون. فقال الوكيل : شل السند اللي عليك واجلس سريع واكتب 50 ⁷وسأل اللي بعده : وانت كم عليك لسيدي؟ قال له : 100 كيس قمح . فقال له الوكيل : شل الصكوك حقك واكتب 80⁸فمدح السيد وكيله الخاين على ذكائه ، لأن ابناء هاذا العالم اكثر ذكاء من ابناء النور في معاملة امثالهم ⁹وانا اقول لكم : خلو لكم اصحاب بالمال الباطل ، حتى لو سارو عليكم قبلوكم في المساكن الأبديه¹⁰من كان امين على القليل عيكون امين على الكثير ، ومن أساء الأمانه في القليل عيخون الأمانه في الكثير ¹¹ولو كنتو مش امناء في المال الباطل ، فمن اللي يأتمنكم في الغنى الحق؟ ¹²ولو كنتو مش امناء في اللي هو لغيركم ، فمن اللي عيديلكم اللي هو لكم؟¹³مابش احد يقدر يخدم سيدين ، لأنه اما يكره الأول ويحب الثاني ، او يكون مخلص للأول ويحتقر الثاني ، فأنتو ما تستروش تخدمو الله والمال¹⁴وكان الفريسيين يسمعو كل هاذا الكلام ويستهزؤ بعيسى لأنهم يحبو الزلط ¹⁵فقال لهم عيسى : انتوا تفعلو نفسكم طاهرين في نظر الناس ، لكن الله يعرف قلوبكم ، واللي يبسره الناس حاجه ضخمه هو مكروه في نظر الله¹⁶بقيت الشريعه وتعاليم الأنبياء لاما جا يوحنا ، وبعدا بدأت البشاره بملكوت الله ، وكل من يدخلها يلاقي العداء ¹⁷ولكن نهاية السماء والأرض اهون من انها تنكع نقطه واحده من الكتاب¹⁸من طلق مرته وتزوج غيرها زنى ، ومن تزوج مره طلقها زوجها زنى¹⁹وقال عيسى : كان رجال غني يلبس الثياب الغاليه ويعيش في نعيم وبفعل عزايم كل يوم ²⁰وكان به رجال فقير اسمه لعازر ، مطروح عند باب الرجال الغني وقد كانت القروح غطت جسمه ²¹وكان يتمنى ان ياكل ولو من البواقي من مايدة الرجال الغني ، وكانت الكلاب تجي تلحس قروحه²²ومات الفقير وشلته الملائكه جوار ابراهيم ، ومات الغني كمان واندفن ²³ورفع الغني عيونه بيتعذب في عالم الأموات ، وابسر من بعيد ابراهيم ولعازر جنبه²⁴فنادى : ارحمني يا ابه ابراهيم ، ورسل لعازر علميد يبلل طرف اصبعه في الماء ويبرد لساني ، لأني تعبت قوي من اللهيب²⁵فقال له ابراهيم : تذكر يا ابني انك شليت نصيبك من الخيرات في حياتك ، وشل لعازر نصيبه من البلايا ، والأن هو يتعزز هانا وانت بتتعذب هاناك ²⁶وفوق كل هاذا بيننا وبينكم هوه عميقه ما يسترش احد من عندنا يسير لكم ولا من عندكم حد يجي عندنا²⁷فقال الغني : يا منعاه يابه ابراهيم انك ترسل لعازر لبيت ابي ²⁸لأن معي 5 اخوه علميد يسير ويحذرهم انهم ما يوقعوش في هذا العذاب²⁹فقال له ابراهيم : معاهم موسى والأنبياء وعليهم يعلمو ايش فيها ³⁰فجاوبه الغني : لا يابه ابراهيم ، ولكن لو قام واحد من الأموات وسار لهم يتوبو ³¹فقال له ابراهيم : لو كانو ما يستمعوش موسى والأنبياء ، فهم ما عيقتنعوش ولو قام حد من الأموات

¹وفي يوم من الأيام لاما كان عيسى يعلم الناس في بيت الله ويبشر ، جو له رؤساء الكهنة والفقهاء مع الشيوخ ²وقالوا له : قلنا ، بأي سلطه بتعلم تيه الحاجات؟ ومن ادا لك السلطه علميد تعلمها؟³فجاوبهم عيسى : وانا كمان اسألكم سؤال : قولوا لي ⁴من اين ليوحنا سلطه علميد يغطس؟ من السماء ولا من الناس؟⁵فقالوا في نفسهم : لو قلنا من السماء عيقول فليش امنتوا به؟ ⁶وان قلنا من الناس فالشعب كله يرجمونا ، لأنهم مقتنعين ان يوحنا نبي⁷فقالوا انهم مش دارين من اين هي

¹وقام الناس كلهم وشلوه عند بيلاطس ²وجلسوا يتهموه ويقولوا : لقينا هاذا الرجال بيفعل فتنه في الشعب ، ويمنعهم انهم يدفعوا الضريبه للقيصر ، ويقول انه المسيح يعني ملك³فسأله بيلاطس : انت ملك اليهود؟ فجاوبه عيسى : انت قلت ⁴فقال بيلاطس للكهنة والناس : ما لقيت اي شي في هاذا الرجال للشكوى عليه ⁵ولكنهم صمموا على كلامهم وقالوا : انه يخلي الناس تثور بتعليمه في اليهوديه كلها ، من الجليل لهانا⁶ولاما سمع بيلاطس هاذا الكلام عن الجليل ، سأل لو كان الرجال من هاناك ⁷فلاما درا انه من ولاية هيرودس رسله لهيرودس ، وهو في ذيك الوقت في اورشليم⁸ولاما ابسر هيرودس عيسى فرح خيرات ، لأنه كان يشتي من زمان انه يبسره من كثر ما سمع عنه ، ويتمنى انه عيسى يفعل معجزه قدامه ⁹فسأله عن حاجات خيرات وما جاوبه على اي شي ¹⁰فقاموا رؤساء الكهنة والفقهاء يتهموه ويزيدوا عليه التهم¹¹فهانه هيرودس وعساكره ، واستهزأ به ، ولبسوه ثوب روعه ورجعه لبيلاطس ¹²وتصالح هيرودس وبيلاطس في ذيك الوقت ، وكانوا من قبل متزاعلين¹³فدعا بيلاطس رؤساء الكهنه وقيادة الشعب ¹⁴وقال لهم : اديتوا لي هاذا الرجال وقلتوا انه بيغوي الشعب وفحصته قدامكم ، وما ليت شي من اللي تتهموه به¹⁵ولا هيرودس ما لقى شي لأنه رجعه لنا ، مابش شي فعله هاذا الآدمي يخلينا نقتله ¹⁶عد اجلده واخرجه من السجن ¹⁷وكان بيلاطس يطلق واحد من السجناء في كل عيد¹⁸فصاحوا كلهم : اقتل هاذا الرجال وخرج لنا باراباس ¹⁹وكان باراباس مسجون لأنه اشترك في فتنه وقعت في المدينه ، علميد ارتكب جريمة قتل²⁰فحاكاهم بيلاطس مره ثانيه لأنه كان يشتي يخرج عيسى ²¹فصاحوا : اصلبه ، اصلبه ²²فقال لهم مره ثالثه : ايش الجريمه اللي فعلها هاذا الرجال؟ ما لقتش اي شي يخلينا نحكم عليه بالموت ، عد اجلده واخرجه !²³وجلسوا كلهم يصيحوا بصلب عيسى ، وزاد صياحهم ²⁴فحكم بيلاطس انه يعمل طلبهم ²⁵وخرج الرجال اللي طلبوه ، وكان في السجن لجريمة قتل واثارة شغب ، وسلم عيسى لمطالبهم²⁶ولاما كانوا سايرين ، مسكوا سمعان ، وهو رجال قيريني كان راجع من الجربه ، فطرحوا عليه الصليب علميد يشله وراء عيسى²⁷ولحقه ناس خيرات من الشعب ، ومن نسوان كان يلطمين على صدورهن ويولولين عليه ²⁸وابسر لهن عيسى وقال : لا تبكينش عليا يا نسوان اورشليم ، ولكن ابكين على على نفسكن وعلى اولادكن²⁹عتجي ايام يقووا فيها : يهنا للي ما حبلينش ولا رضعين ³⁰ويقولوا للجبال انكعي فوقنا ، وللتلال غطينا ³¹فلو هم بيفعلوا كهاذا بالغصن الأخضر ، فكيف عيعملوا بالغصن اليابس؟³²وشلوا معه للقتل اثنين من المجرمين³³ولاما وصلوا للمكان اللي اسمه الجمجمه ، صلبوه هاناك مع المجرمين ، واحد من يمينه والثاني على شماله ³⁴فقال عيسى : اغفر لهم يابه لأنهم مش دارين ايش بيفعلوا ، وتقاسموا ثيابه بينهم القرعه³⁵ووقف الشعب هاناك مريعين ، ورؤساء الكهنة يقولوا وهم متكبرين : نجى غيره ! ينجي نفسه ، لو هو مسيح الله³⁶واستهزأ به العساكر كمان ، وقربوا منه وهم بيدو له حل ³⁷وقالوا له : لو انت ملك اليهود نجي نفسك ³⁸وطرحوا فوق راسه لوحه مكتوب عليها : هاذا ملك اليهود³⁹وكان واحد من المجرمين يسبه ويقول له : انت بتقول انك المسيح ! هيا نجي نفسك ونجينا ! ⁴⁰وصيح فوقه المجرم الثاني وقال له : ما تخفش الله ؟ انت بتشل نفس العقاب مثله ⁴¹احنا عقابنا عدل على ما فعلنا ، اما هاذا الرجال ما فعلش اي خطأ⁴²وقال : اتذكرني يا عيسى ايحين ما جيت في ملكوتك ⁴³فجاوبه عيسى : اقول لك الحق : عتكون اليوم معي في الفردوس⁴⁴وفي وقت الظهر ، وقع ظلام على الأرض كلها للساعه الثالثه عصر ⁴⁵واختفت الشمس وتشططت الستاره الموجوده في الهيكل نصين⁴⁶وصاح عيسى صيحه قويه : يا ابي في يدك استودع روحي ، قال تيه العباره وسلم الروح ⁴⁷ولاما ابسر الضابط حق الحرس ايش اللي وقع سبح الله وقال : الصدق كان هاذا الرجال صالح⁴⁸وكل الناس اللي تجمعوا علميد يبسروا هاذا المشهد ، رجعوا وهم يلطموا في انفسهم ⁴⁹اما اصحابه والنسوان اللي لحقينه من الجليل ، كانوا واقفين من بعيد يبسروا تيه الحاجات⁵⁰وجا عضوا في مجلس اليهود اسمه يوسف وهو رجال تقي وصالح ⁵¹ما وافقش على قرارهم وفعلتهم ، وكان من قريه اسمها الرامه وهي قريه في يهوذا ، وكان مريع ظهور ملكوت الله⁵²فدخل على بيلاطس وطلب منه جثة عيسى ⁵³ونزله من الصليب ولفه بكفن من الكتان ، ودفنه في قبر منحوت من الصخر ، ماقد اندفن فيه أي حد من قبل⁵⁴وكان ذيك اليوم هو يم التهيئه ليوم السبت ⁵⁵وكانت النسوان اللي لحقين عيسى من الجليل يلحقين يوسف ، وابسرين القبر وكيف طرح بينه جثة عيسى ⁵⁶وبعدا رجعين وعملين طيب وحنطه واسترحين في السبت حسب الشريعه