Bible

Matthew

Chapter 1

¹كتاب لولادة تاع يسوع المسيح بن داود بن براهيم: ²ابراهيم جاب اسحاق. و اسحاق جاب يعقوب. و يعقوب جاب يهوذا و خاوتو. ³و يهوذا جاب فارص و زارح من ثامار. و فارص جاب حصرون. و حصرون جاب آرام.⁴و ارام جاب عميناداب. و عميناداب جاب نحشون. و نحشون جاب سلمون. ⁵و سلمون جاب بوعز من راحاب. و بوعز جاب عوبيد من راعوث. و عوبيد جاب يسى. ⁶و يسى جاب داود الملك. و داود الملك جاب سليمان من لمرى اللي كانت زوجة اوريا.⁷و سليمان جاب رحبعام. و رحبعام جاب ابيا. و ابيا جاب آسا. ⁸و آسا جاب يهوشافاط. و يهوشافاط جاب يورام. و يورام جاب عزيا.⁹و عزيا جاب يوثام. و يوثام جاب آحاز. وآحاز جاب حزقيّا. ¹⁰و حزقيّا جاب منسّى. و منسّى جاب آمون. و آمون جاب يوشيا. ¹¹و يوشيا جاب يكنيا و خاوتو وقت اللي داوهم للسبي لبابل.¹²و من ورى السبي تاع بابل جاب شألتيئيل. و شألتيئيل جاب زربابل. ¹³و زربابل جاب ابيهود. و ابيهود جاب ألياقيم. و ألياقيم جاب عازور. ¹⁴و عازور جاب صادوق. و صادوق جاب أخيم. و أخيم جاب أليود.¹⁵و أليود جاب أليعازر. و أليعازر جاب متّان. و متّان جاب يعقوب. ¹⁶و يعقوب جاب يوسف اللي تزوج بمريم التي تولد منها يسوع اللي يسموه المسيح. ¹⁷مجموع لجيال من براهيم لداود ربعطاش ن جيل, و من داود حتى لزمان السبي ربعطاش ن جيل, و من زمان السبي حتى للمسيح ربعطاش ن جيل. ولادة يسوع المسيح¹⁸اما لولادة تاع يسوع المسيح كانت هكا: في الوقت اللي كانت مريم امو مخطوبة ليوسف, و قبل ما يجيبها لدارو حبلت من الروح القدس. ¹⁹و كان يوسف راجلها يخاف ربي, ما حبش يفضحها, و نوى يخليها في السر.²⁰و كي كان يخمم في هاذي الامور, ظهر ليه الملاك تاع ربي في لمنام و قالو: "يا يوسف بن داود, ما تخافش تاخذ مريم مرتك. على خاطر اللي في كرشها هو من الروح القدس. ²¹راح تجيب طفل و تسميه يسوع. على خاطر هو اللي ينجي شعبو من الذنوب تاعهم".²²و هاذا الكل صرى باه يتم الشيء اللي تقال من عند ربي بالنبي اللي قال: ²³"هاي العذراء تهز بالكرش و تجيب طفل, و يسموه عمانوئيل" اللي معناتو: الله معانا.²⁴و كي ناض يوسف من النوم عمل كيما طلب منو الملاك تاع ربي, و جاب مرتو لدارو. ²⁵و ما مسهاش حتى ن ولدت و جابت وليدها البدري. و سماه يسوع.

Chapter 2

¹و كي تولد يسوع في بيت لحم في اليهودية, في وقت حكم الملك هيرودس, واحد الرجال حكماء من المشرق جاو لأورشليم ²وقالوا: "وين هو ملك ليهود اللي كي غير تولد؟ شفنا النجمة تاعو ضاوية في المشرق و احنا جينا باه نسجدوا ليه". ³و كي سمع هيرودس بهاذا لخبردخل في بعضاه هو و اورشليم كاملة معاه.⁴و راح لم رياس الكهنة الكل و الكتبة تاع الشعب, و سقساهم: "وين يولد المسيح؟". ⁵قالوا لو: "في بيت لحم اليهودية.على خاطر مكتوب في كتاب النبي: ⁶وانت يابيت لحم, ارض يهوذا, ما كيش صغيرة بين بلدان يهوذا, على خاطر منك يخرج رايس يرعى شعبي اسرائيل".⁷وقتها عيط هيرودس على حكماء المشرق بالدرقة, و تحقق منهم على الزمان الي ظهرت فيه النجمة. ⁸و من بعد بعثهم لبيت لحم, و قال لهم: "روحوا فركتوا مليح على الطفل. و كي تلقاوه خبروني باه نروح انا ثاني و نسجد ليه".⁹و من بعد ما هدروا مع الملك راحوا. و كانت هاذيك النجمة اللي شافوها في المشرق قدامهم حتى جات و وقفت فوق لبلاصة اللي كان فيها الطفل يسوع. ¹⁰و كي شافوا النجمة فرحوا ياسر خلاص.¹¹و كي دخلوا للبيت, و شافوا الطفل مع مريم امو. طابسوا و سجدو قدامو. و من بعد فتحوا لكنوز تاعهم و قدموا لو هدية: من ذهب و لبان و مر. ¹²و كي تكشفوا في لمنام باه ما يرجعوش لهيرودس, جابوا طريق اخرى و رجعوا لبلادهم. الهربة لمصر¹³و من بعد ما راحوا, وقف ملاك الرب على يوسف في لمنام و قالو: "نوض ادي الطفل وامو و اهرب لمصر, و ابقى لثم حتى نقولك. على خاطر هيرودس راه ناوي يحكم الطفل و يقتلو". ¹⁴ناض يوسف من النوم و هز الطفل و امو و خرج في الليل راح لمصر. ¹⁵و قعد لثمة حتى ن مات هيرودس. باه يتم الشيء اللي قال عليه النبي تاع ربي: "من مصر ناديت على وليدي".¹⁶و كي فاق هيرودس باللي الرجال الحكماء اللي من المشرق لعبولو اللعبة تغشش خلاص. و بعث قتل لولاد اللي في بيت لحم كاملة, من ولد عامين و هَبط, على حساب الزمان اللي تحقق منو من عند الرجال الحكماء.¹⁷و هكا تم الشيء اللي قال عليه النبي ارميا: ¹⁸"صوت طالع من الرامة, نواح وبكاء و غواث كبير. راحيل تبكي على اولادها و ما تحبش تتعزى, على خاطر فناو و ما عادوش كاينين". الرجوع للناصرة¹⁹و كي مات هيرودس, ظهر ملاك الرب ليوسف في لمنام و هو في مصر ²⁰و قالو: "نوض هز الطفل و امو وارجع ل ارض اسرائيل, على خاطر مات اللي كان حاب يقتل الطفل". ²¹ناض هز الطفل و امو و رجع ل ارض اسرائيل.²²بالصح كي سمع باللي ارخيلاوس حكم على اليهودية في بلاصة باباه هيرودس, خاف باه يروح لثمة. و كي زاد كلمو ربي في لمنام, ولى راح لجوايه الجليل. ²³و سكن في مدينة يقولولها ناصرة, باه يتم كلام لنبياء: "راه يتسمى ناصري".

Chapter 3

¹و في هاذيك ليام جا يوحنا المعمدان ينادي في الصحراء تاع اليهودية ²و يقول: "توبوا, على خاطر ملكوت السماوات قْرُبْ". ³و يوحنا هو اللي هدر عليه النبي اشعياء كي قال: صوت في الصحراء ينادي ويقول: وجْدوا طريق الرب. و اجعلوا مساربو مقدودة".⁴و يوحنا هذا كان لابس قشابية من لوبر, و متحزم في نصو بحزام تاع جلد, و كانت ماكلتو الجراد و لعسل البري. ⁵وقتها خرجولوا من اورشليم و من ليهودية كاملة و من لبلدان اللي دايرة بالاردن, ⁶و كان يعمد فيهم في واد الاردن, بعدما يستعرفوا بذنوبهم.⁷و كي شاف باللي ياسر من الفريسيين و الصدوقيين يجيو يتعمدوا عندو, قال لهم: "يا واحد لفاعي, شكون قالكم راح تمنعوا من الهول اللي جاي؟ ⁸ديروا اعمال تليق بالتوبة. ⁹و ما تقولوش لرواحكم: او عندنا بابانا ابراهيم. نقول لكم : الله قادر يقيم من هاذي لحجار اولاد لابراهيم.¹⁰الفاس راه تحط في الشِجر, و كل شجرة ما تجيبش ثمار مليحة تتقص و تترمى في النار. ¹¹انا نعمد فيكم بالماء على جال التوبة, بالصح اللي يجي بعدي اقوى مني, و انا ما نستاهلش حتى نهزلو صباتو. هو يعمدكم بالروح القدس و بالنار, ¹²و راه هاز المذرى في يدو, و راح يصفي الطرحة, يلم القمح للمخزن, و يحرق التبن بنار ما ططفاش". معمودية يسوع¹³و في هاذاك الوقت جا يسوع من الجليل للاردن عند يوحنا باه يتعمد على يدو. ¹⁴بالصح يوحنا ماحبش و قالو: "انا اللي محتاج ليك تعمدني, كيفاه تجي انت ليا نعمدك!". ¹⁵جاوبو يسوع: "معليش خلي هذا يصير ضرك, على خاطر هكا نكملو كل صلاح". عاد باه قبل يعمدو.¹⁶و كي تعمد يسوع و وقت اللي عاد خارج من الماء, تحل عليه باب السماء و شاف الروح نازل كيما حمامة و حط فوق منو, ¹⁷و جا صوت من السماوات يقول: " هذا هو وليدي لحبيب اللي رضيت عليه".

Chapter 4

¹و من بعد طلّع الروح يسوع للصحراء باه يجربو ابليس. ²و بعد ما صام ربعين يوم ليل و نهار, جاع. ³جا ليه المجرب و قال: "اذا كنت انت وليد الله قول لهاذي لحجار تولي خبز". ⁴قالو يسوع: "مكتوب: مش غير بالخبز يعيش العبد, بالصح يعيش بكل كلمة تخرج من فم الله".⁵و من بعد داه ابليس لمدينة القدس, و وقفو على جناح الهيكل, ⁶و قالو: "اذا كنت وليد الله ارمي روحك من هنا لتحت, على خاطر مكتوب: يوصي ملايكاتو بيك , على يديهم يهزوك و ما تدعثر بحجر رجليك".⁷قالو يسوع: "مكتوب ثاني: ما تجربش ربي إلهك". ⁸و من بعد زاد اداه ابليس فوق جبل عالي خلاص, و ورالو كل المماليك تاع الدنيا و الجاه تاعها, ⁹و قالو: "نمدلك هاذي الكل لوكان تسجد ليا".¹⁰و كي قال كيما هكا قالو يسوع: "اذهب يا شيطان! على خاطر مكتوب: غير لربي إلهك تسجد و هو وحدو اللي تعبد". ¹¹و من بعد راح عليه ابليس, و جاو ملايكة و بداو يخدمو فيه. يسوع يبدى الخدمة في الجليل¹²و كي سمع يسوع باللي يوحنا حكموه في الحبس, ولى راح للجليل. ¹³و خلى الناصرة وراح سكن في كفرناحوم اللي على البحر في جوايه زبولون و نفتاليم,¹⁴باه يتم واش قال اشعياء النبي: ¹⁵"بلاد زبولون, و بلاد نفتاليم, طريق لبحر, وراء الاردن من لهيه, جليل الامم, ¹⁶الشعب اللي في الظلمة قاعد شاف نور عظيم الشان, اللي ساكنين في بلاد الموت وظلالها طلع عليهم نور".¹⁷و من هاذاك الوقت بدا يسوع يبشر و يقول: "توبوا لله على خاطر الملكوت تاع السماوات قريب يجي". يسوع ينادي التلامذة لولين¹⁸و كي كان يسوع ماشي على شط لبحر شاف زوز خاوة: سمعان اللي يعيطولو بطرس, و اندراوس خوه يصيدوا بالشبكة في لبحر, على خاطر همّا صيادين تاع الحوت. ¹⁹قال لهم: "ارواحوا معايا تبعوني نجعلكم تصيدوا الناس". ²⁰ثم ثم خلاو الشبكة و تبعوه.²¹و من بعد و هو معدي من لثم شاف زوز خاوة اخرين: يعقوب ولد زبدي و يوحنا خوه, كانوا في وسط لفلوكة مع زبدي باباهم يرقعوا في الشبكة, عيط لهم. ²²ثم ثم خلاو لفلوكة و خلاو باباهم و تبعوه. يسوع يعلم و يشفي المرضى²³و كان يسوع يدور في جوايه الجليل كاملة و يعلم في الجوامع تاعهم, و يبشر ببشارة الملكوت. و يشفي كل مرض و ضعف وسط الغاشي. ²⁴و تنشرت اخبارو في سوريا الكل. و جابو ليه كل من كان مريض و كل من كان عندو علة و كل اللي عندو حاجة توجع فيه, و المهابل و المصروعين و المعوقين, و هو شفاهم الكل. ²⁵و ولى غاشي كبير يتبع فيه من الجليل و العشر مدن و اورشليم و اليهودية و لبلاد اللي وراء نهر الاردن من لهيه.

Chapter 5

¹و كي شاف الغاشي طلع للجبل, و كي قعد جاو ليه التلامذة قعدوا بهذاه. ²و بدي يهدر يعلم فيهم وقال: ³"يا سعدهم اللي مساكن في الروح, على خاطر ملكوت السماوات راح يكون ليهم. ⁴يا سعدهم اللي حازنين, على خاطر راح يفرحوا.⁵يا سعد الناس لملاح, على خاطر يورثوا لرض. ⁶يا سعد العطشانين و الجيعانين للعدل’ على خاطر راح يشبعوا. ⁷يا سعد اللي يرحموا, على خاطر راح يترحموا. ⁸يا سعد اللي قلوبهم صافية, على خاطر راح يشوفوا الله بعينيهم.⁹يا سعد اللي يسعاو باه يديروا المصالحة, على خاطر يتسماو ولاد الله. ¹⁰يا سعد المظلومين على جال العدل, على خاطر راح يكون ليهم ملكوت الله.¹¹يا سعدكم كان عايروكم و كرهوكم و قالوا عليكم كلام ما يصلحش على جالي, هكذاك بالكذب. ¹²افرحوا و زيدوا, على خاطر عندكم اجر كبير في السماوات, راهم هكا عملوا مع لنبياء اللي قبلكم. ملح لرض و نور العالم¹³"انتوما الملح تاع هاذي الدنيا, بالصح اذا كان فسد الملح باه نملحوا؟ يولي ما يصلح لحتى شيء, غير يسيحوه لبرى و يعفسوه الناس. ¹⁴انتوما النور اتاع هاذي الدنيا. و لمدينة المبنية على راس الجبل ما تخفاش على الناس,¹⁵و الناس ما يشعلوش الضوء و يحطوه تحت السرير, بالصح يحطوه لفوق في لمنارة باه يضوي للناس الكل اللي في الدار. ¹⁶خليو نوركم يضوي قدام الناس, باه يشوفوا الصلاح اللي تديروا فيه, و يمدوا المجد لباباكم اللي في السماوات. يسوع يتمم الشريعة¹⁷"ما تحسبوش باللي جيت باه نحي الشرع و الانبياء. لا انا ماجيتش باه ننحي جيت باه نكمل. ¹⁸نقول لكم الحق: حتى ن تفنى السماء و لرض ما يتنحى لا حرف واحد و لا نقطة واحدة من الشرع حتى ن يتم كلشي.¹⁹و اللي يكسر واحدة من هاذي لحكام الصغيرة و علّم غيرو يعمل كيما هو, يتسمى صغير في ملكوت السماوات. و اما من عمل بيها و علمها لغيرو, هذا يتسمى عظيم في ملكوت السماوات. ²⁰نقول لكم: لو كان ما يزيدش صلاحكم على صلاح الكتبة و الفريسيين ما تتدخلوش لملكوت السماوات. الغش²¹و سمعتوا باللي قالولناس زمان "ما تقتلش, و اللي يقتل الروح يجوز فيه القتل حتى هو. ²²اما انا نقول لكم: كل من يغضب على خوه باطل يجوز فيه الحكم, و كل اللي يقول لخوه: يا جاهل, يجوز فيه حكم الجماعة, و اللي يقول: يا هايشة, يستاهل نار جاهنامة.²³و اذا كان رحت باه تذبح الذبيحة تاعك, وثمة تفكرت باللي خوك عندو حاجة عليك, ²⁴خلي ذبيحتك لثم و روح قبل و رضي خوك, ومن بعد اذبح ذبيحتك على روحك.²⁵رضي هاذاك اللي متعارك معاه فيساع مادامك معاه في الطريق, قبل ما يوصلك للقاضي, و القاضي يوصلك للشرطي, و تعشي في لحبس. ²⁶نقول لكم الحق: اذا كان لحقت لثم ما تخرجش حتى تفلس على اخر سنتيم! الزنا²⁷و سمعتوا باللي قالوا للناس زمان: ما تزنيش. ²⁸و اما انا نقول لكم: كل من يخزر لمرى بخزرة تاع شهوة, يسمى زنى بيها في قلبو.²⁹اذا كان عينك ليمنى جعلاتك تغلط نحيها و ارميها عليك, على خاطر خير ليك تخسر واحد من اعضاك و ما تروحش انت بكلك لجاهنامة. ³⁰و اذا كان يدك ليمنى جعلاتك تغلط قطعها و ارميها عليك, على خاطر خيرليك تخسر واحد من اعضاك و ما تروحش انت بكلك لجاهنامة. الطلاق³¹" وقالوا: اللي يطلق مرتو يعطيها ورقة تاع طلاق. ³²اما انا نقول لكم: كل من يطلق مرتو من غير سبة الزنى يجعلها تزني, و اللي يتزوج بوحدة مطلقة يزنى. الحلف باليمين³³و ثاني سمعتوا باللي قالوا للناس زمان: ما تحلفش و تحنث, دير الشيء اللي حلفت عليه. ³⁴اما انا نقول لكم: ما تحلفوش خلاص, لا بالسماءعلى خاطرها العرش تاع الله, ³⁵و لا باللرض على خاطرها وين يحط رجليه, و لا باورشليم على خاطرها مدينة السلطان العظيم.³⁶ما تحلفش براسك, اك ما تقدرش تجعل شعرة واحدة كحلة و الا بيضاء. ³⁷بالصح خلوا كلامكم يكون نعم اذا كان نعم و يكون لا اذا كان لا. و كل ما زاد على هاذا الشيء راهو من عند الشرير.³⁸و سمعتوا باللي قالوا: العين بالعين و السنة بالسنة. ³⁹و اما انا نقول لكم: ما تعاندوش اللي يدير فيكم الشر, اللي يضربك على خدك ليمين زيد دوَرلو الخد لاخر ثاني.⁴⁰و اذا كان واحد حاب يشريلك لبلاء و ينحليلك ثوبك خليه يدي حتى البرنوس ثاني. ⁴¹و اللي كراك باه تمشي معاه ميل امشي معاه زوز. ⁴²و اللي طلبك اعطيه, و اللي يجيك طالب سلف ما تردوش خايب. محبة لعديان⁴³"سمعتوا باللي قالوا: تحبك قريبك و تكره عدوك. ⁴⁴و اما انا نقول لكم: حبوا عديانكم. باركوا اللي يلعنوكم. ديروا الخير في اللي يبغضوكم, و صلوا للناس اللي يديروا فيكم الشر و يسحتوكم, ⁴⁵باه تكونوا اولاد باباكم اللي في السماوات, اللي يشرق بالشمس على لخيار و الاشرار و يصب لمطر تاعو على الصالحين و الظالمين.⁴⁶على خاطر كان تحبوا غير اللي يحبوكم, واش من اجر عندكم؟ وعلاه السمسارة ما يحبوش بعضاهم هما ثاني؟ ⁴⁷و اذا كان تسلموا غير على خاوتكم برك, واش من مزية عندكم؟ علاه السمسارة ما يديروش هكا حتى هما؟ ⁴⁸كونوا انتوما كاملين كيما باباكم اللي في السماوات كامل.

Chapter 6

¹"عندكم لا تديروا الصداقة تاعكم باه يشوفوكم الناس, ما يكون عندكم حتى اجر عند باباكم اللي في السماوات. ²كي تحب تصدق على واحد ما تشنعش حتى يسمعوا بيك الناس الكل, كيما يديروا الناس المنافقين في المجامع و في الزنق. نقول لكم الحق: هاذوك اداو الاجر تاعهم خلاص!³اما انت كي تحب تصدق حتى يدك ليسرى ما تخليهاش تعرف واش دارت يدك ليمنى, ⁴كي تكون الصداقة تاعك في الستر. باباك اللي ما تخفى عليه خافية هو يجازيك قدام الناس الكل.الصلاة⁵و كي تحبوا تصيليِو ما تكونش كيما المنافقين, اللي يحبوا يوقفوا في وسط المجامع و في الطريق, باه ينعتوا ارواحهم و يشوفوهم الناس. نقول لكم الحق راهم ادّاو لجر تاعهم! ⁶و اما انت كي تجي تصلي ادخل لبيتك و اقفل بابك, و صلي لباباك اللي في لخفاء. و باباك اللي ما تخفى عليه خافية يكافيك جهار. ⁷و كي تصليو ما تعاودوش لكلام باطل كيما يديروا الناس لخرين, حاسبين باللي كي يكثروا من الهدرة يتقبل ربي صلاتهم.⁸ما تديروش كيما يديروا همّا. على خاطر باباكم يعرف الشيء اللي تحتاجوه قبل ما تطلبوه. ⁹"صلوا انتوما هكا" : بابانا الفوقاني يا اللي في السماء موجود, اسمك بالقداسة يجود. ملكوتك قريب يعود. ¹⁰خلي مشيئتك كيما اللي في السماء, في ارضنا تسود.¹¹ارزقنا خبز نهارنا اللي يكفينا, ¹²و اغفر ذنوبنا كيما نغفروا للغلطوا فينا. ¹³و في المحنة لا تعدينا, و من فاعل الشر نجينا. انت مولى الملك و القوة, ليك المجد على الدوام. امين.¹⁴اذا كان غفرتوا لغيركم يغفر لكم باباكم اللي في السماء. ¹⁵و اذا انتوما ما تسامحوش, حتى باباكم ما يسامحكمش. الصوم¹⁶و كي تصوموا ما تكونوش متغشين كيما الناس المنافقين, اللي يحبوا يبانوا للناس صايمين, نقول لكم الحق: هاذوك اداو لجر تاعهم. ¹⁷اما انت كي تصوم امشط شعرك و اغسل وجهك, ¹⁸باه ما تبانش للناس صايم, انت تصوم لباباك اللي في لخفاء, و باباك اللي ما تخفى عليه خافية يكافيك جهار. كنوز في السماء¹⁹ما تكنزوش كنوزكم في لرض و تبقى حتى ياكلها السوس و الصدأ, و الا تتسرق. ²⁰اكنزوا كنوزكم في السماء, لا يفسدها سوس و لا ياكلها صدأ, و واحد ما يقدر يسرقها, ²¹على خاطر وين يكون كنزك يكون قلبك ثاني.²²البصيرة هي النور تاع الانسان, اذا كانت البصيرة تاعك صحيحة يكون كل ما فيك منور, ²³و اذا كانت البصيرة تاعك مريضة يكون كل ما فيك ظلمة و الظلمة كيفاه تكون! ²⁴"الواحد ما يقدرش يخدم عند زوز اسياد, على خاطر اما راح يبغض واحد فيهم و يحب لاخر, و الا راح يقعد مع واحد فيهم و يحقر لاخر. ما تقدروش تخدموا الله والمال مع بعضاهم. ربي يتكفل بينا²⁵"على هاذيك نقول لكم: ما تقلقوش على معيشتكم واش تاكلوا و الا واش تشربوا. و لا على بدنكم واش تلبسوا. ياخي لحياة خير الماكلة, و البدن خير من اللبسة؟ ²⁶شوفوا لفراخ: لا تزرع لا تحصد و لا تخبي في المخزن, و باباكم اللي في السماء هو اللي يرزقها بالقوت. و علاه موش انتوما خير منها خلاص؟²⁷شكون منكم اذا تقلق يقدر يزيد في الطول تاعو حتى لو كان شبر واحد؟ ²⁸و علاش تتقلقوا على اللبسة؟ شوفوا النوّار في المرجة كيفاه ينبت لا يتعب لا يغزل. ²⁹نقول لكم: حتى سليمان في غزّو و جاهو كامل ما لبسش كيما واحدة منهم.³⁰اذا كان نوار المرجة اللي اليوم ينبت وغدوى يحرقوه, يلّبسو ربي كيما هكّا, كيفاه ما يلبسكمش انتوما يا ضعاف الايمان؟ ³¹ما تخموش هكا: واش ناكل؟ واش نشرب؟ واش نلبس؟³²هاذي لحوايج الكل تفركت عليها الناس اللي ما تامنش بربي. انتوما باباكم يعرف باللي تحتاجوا هاذي الكل. ³³اطلبوا قبل كل شيء الملكوت تاع الله و االعدل تاعو, و هاذي الكل يزيد هالكم. ³⁴ما تهزوش الهم تاع غدوى, غدوى يتوله بروحو. يكفي اليوم التعب تاعو.

Chapter 7

¹"ما تحكموش على الناس باه يتحكمش عليكم انتم ثاني, ²على خاطر بالحساب اللي بيه تحاسبوا تتحاسبوا انتم ثاني, و الميزان اللي بيه توزنوا لغيركم يوزنولكم بيه انتم ثاني.³علاش تشوف القشة في عين خوك, و ما تشوفش العود اللي في عينك انت؟ ⁴و كيفاه تقول لخوك خليني نحيلك القشة, و انت عندك عود في عينك؟ ⁵يا واحد المنافق, خرج قبل العود اللي في عينك, و كي تولي تشوف مليح عاد خرّج القشة من عين خوك!⁶ما تمدوش الحاجة لمقدسة للكلاب, و ما ترميوَش الويز تاعكم قدّام لحلالف, تعفسوا برجليها وتزيد تدور عليكم اننتوما تنطحكم. اطلبوا, ادعيوْ, دقوا على الباب⁷"اطلبوا تنالو. ادعيوْ تلقاو. دقوا على الباب يتحل في وجوهكم. ⁸كل اللي يطلب ينال, و كل اللي يدعي يلقى, و كل اللي يطبطب يفتح عليه. ⁹شكون منكم كان طلبو ولدو في طرف خبز, يعطيه حجرة؟ ¹⁰و الا كان طلبو في حوتة, يعطيه حنش؟¹¹و انتوما عباد مذنببن تعرفوا تمدوا لولادكم حوايج مليحة, مالا كيفاه باباكم اللي في السماوات, يرزق الخيرات للناس اللي يطلبوه! ¹²الشيء اللي تحبوا الناس يديروه لكم اعملوه انتوما للناس ثاني, هاذا هو الجوهر تاع الشرع و تاع لنبياء. الباب الضيق¹³ادخلوا من الباب الضيق, على خاطر الباب اللي يوصل للهلاك واسع و طريقو ساهلة, و ناس ياسر اللي يدخلوا منو! ¹⁴ما اضيق الباب و ما اصعب الطريق اللي يوصل للحياة, و قلال الناس اللي يلقاوه! الشجرة و ثمارها¹⁵"ردوا بالكم من الانبياء الكذابين اللي يجيوْكم في زي نعاج, بالصح همّا من داخل ذيوبة خطافين! ¹⁶من ثمارهم تعرفوهم, كاش ما كاين شوك يجيب لعنب, و لا الحسك يجيب الكرطوس؟ ¹⁷كل شجرة مليحة تجيب فاكية مليحة, و الشجرة الدونية تجيب فاكية دونية.¹⁸الشجرة لمليحة ما تجيبش فاكية دونية, و الشجرة الدونية ما تجيبش فاكية مليحة. ¹⁹و كل شجرة ما تجيبش فاكية مليحة تتقص و تتحرق في النار. ²⁰مالا من ثمارهم تعرفوهم.²¹"مش كل اللي يقول لي: يا ربي, يا ربي! يدخل لملكوت السماوات. يدخل غير اللي يعمل واش يطلب بابا اللي في السماوات. ²²في هاذاك النهار ياسر اللي راح يقولولي: يا رب, يارب! مش بإسمك اللي تنبأنا, و بإسمك خرجنا الجنون, و بإسمك درنا غرايب ياسر؟ ²³في هاذاك الوقت نقول لهم بصراحة: انا ما نعرفكمش خلاص! روحوا عليا يا مذنبين! البنايين الفايقين و البنايين الجاهلين²⁴كل من يسمع كلامي هذا و يعمل بيه. نشبهو براجل فايق, بنى دارو على الحجر. ²⁵صبت النو, و فاضت الويدان, و هبت لرياح القاوية, على هاذيك الدار بالصح ما طاحتش على خاطر كانت مبنية فوق لحجر.²⁶و كل من يسمع كلامي هذا و ما يعملش بيه, نشبهو لراجل جاهل, بنى دارو على الرمل. ²⁷و كي صبت النو, و فاضت الويدان, و هبت لرياح القاوية, على هاذيك الدار و رابت و طاحت طيحة كبيرة!".²⁸و كي كمّل يسوع كلامو حاروا الناس من التعليم تاعو, ²⁹على خاطر كان يعلّم فيهم كيما واحد عندو سلطان و مش كيما الكتبة.

Chapter 8

¹و كي نزل من الجبل تبعو غاشي كبير. ²و كان واحد مريض بالبرص جاه و سجد لو و قالو: "يا سيدي, كان حبيت تقدر تطهرني". ³مد يسوع يدو و مسو وقالو: "انا نحب, كون طاهر!". و ثم ثم برى من لبرص اللي فيه.⁴و قالو يسوع: "شوف ما تقول حتى لواحد. بالصح روح وري روحك للكاهن, و صدّق الشيء اللي قال عليه موسى ياه تشهد عليهم". الايمان تاع قايد مياة عسكري⁵و كي دخل يسوع ل كفرناحوم, جاءه واحد القايد تاع مياة عسكري باه يطلب من عندو حاجة ⁶و قال: "يا سيد, لخديم تاعي مطيش في الفراش مريض معوق و قاعد يتعذب ياسر". ⁷قال لو يسوع : "انا نجي معاك و نشفيه".⁸جاوبو القايد تاع مياة عسكري و قالو: "يا سيدي, انا ما نستاهلش باه تدخل لداري, بالصح قول كلمة برك يرتاح لخديم تاعي. ⁹على خاطر حتى انا عندي حكومة فوق مني, و عندي عسكر تحت يدي. اللي نقولو روح يروح و اللي نقلو يجي يجي, و لخديم كي نقولو يدير حاجة يديرها!". ¹⁰كي سمع يسوع لكلام تاعو تعجب منو, و قال للناس اللي كانوا يتبعوا فيه: "نقول لكم الحق: في اسرائيل كاملة ما لقيتش ايمان كيما هذا!¹¹نقول لكم: باللي ياسر اللي راح يجيوْ من الشرق و من الغرب و يقعدوا مع براهيم و اسحاق و يعقوب في ملكوت السماوات, ¹²و اما اولاد الملكوت همّا اللي يترماو لبرى في الظلمة. وين يكون غير لبكاء و النواح". ¹³و من بعد قال للقايد تاع مياة عسكري: "روح, الشيء اللي أمنت فيه بالنية يكون ليك". في هاذيك الساعة بالذات برى لخديم تاعو. نسيبة بطرس تنال الشفاء هي و وحايد اخرين¹⁴و كي وصل يسوع لبيت بطرس, شاف نسيبتو حاكمة لفراش و عندها السخانة, ¹⁵و كي مسها على يدها راحت السخانة, و ناضت من لفراش و بدات تخدم فيهم.¹⁶و كي عشّات لعشية جابولو مجانين ياسر, خرّج الجنون اللي فيهم بكلمة من عندو و رتّح كل من كان مريض, ¹⁷باه يتم الشيء اللي قال عليه النبي: "هو ادى همومنا و هز امراضنا". الشيء اللي تخلصو باه تتبع يسوع¹⁸و كي شاف يسوع ناس ياسر دايرين بيه, طلب من التلامذة باه يقطعوا للجيهة الاخرى. ¹⁹و جاء لو واحد الراجل من الكتبة و قالو: "يا معلم, انا نتبعك وين تروح". ²⁰قالو يسوع: "الثعالب عندها لمغاغر و لفراخ عندها لعشش, اما ابن الانسان ما عندوش حتى وين يسند راسو".²¹و قالو واحد من التلامذة ثاني: "يا سيد, سامحني نروح قبل ندفن بابا و نجي". ²²جاوبو يسوع: "انت تبعني, و خلي الموّاتى يدفنوا الموّاتى تاعهم". يسوع يركح لعجاج²³و كي دخل للفلوكة تبعوه النلامذة. ²⁴شوية ناض ريح كبير في وسط لبحر و قربت لمواج تغرق لفلوكة, و هو كان راقد. ²⁵جاوه التلامذة يجريو ونوضوه و قالولو: "يا سيدي منعنا, رانا نغرقوا!".²⁶قل لهم: "واشبيكم خايفين يا قلال ليمان؟". و من بعد وقف نهر الريح و البحر, و ركحت الحالة و صرى هدوء كبير. ²⁷تعجبوا الناس و قالوا: "شكون هذا؟ حتى لبحر و لرياح كلها تاخذ رايو و تطيعو!". يسوع يخرج الجنون.²⁸و كي وصل للشط في جيهة الجرجسيين. خرجوا زوز مجانين من الجبانة و كانوا هايجين خلاص, و ما كان حتى واحد يقدر يعدي على هاذيك الطريق. ²⁹و بداوْ يعيطوا و يقولوا: "واش كاين بيننا و بينك يا يسوع ابن الله؟ جيت هنا قبَل الوقت باه تعذبنا؟".³⁰و كانت واحدة المجموعة تاع حلالف مقابلتهم من بعيد تسرح. ³¹و الجنون هاذوك كانوا يحاولوا في يسوع و قالوا لو: "كي عدت راح تخرجنا من هنا, خلينا نروحوا ندخلوا في هاذوك للحلالف". ³²قالهم يسوع : "روحوا". خرجوا من الرجال في زوز و راحوا دخلوا في لحلالف, و رماو رواحهم من الجرف العالي للبحر, و ماتوا في الماء.³³و الناس اللي كانوا يسرحوا بالحلالف هربوا و دخلوا للمدينة, و حكاو على الشيء اللي صار كامل, و على المجانين في زوز. ³⁴تلموا اهل لمدينة الكل و خرجوا باه يقابلوا يسوع. و كي شافوه طلبوا منو يخرج من عندهم.

Chapter 9

¹ولى يسوع ركب في الفلوكة و قطَع للجيهة الاخرى و رجع للمدينة تاعو وين يسكن. ²و جابو لو واحد مشلول هازينو في الفراش. كي شاف يسوع الايمان تاعهم قال للراجل المشلول: "تشجع يا ولدي, ذنوبك مغفورة".³و كاين جماعة من تاع الكتبة قالوا في قلوبهم: "هذا الراجل راه يكفر!" ⁴و عرف يسوع واش قاعدين يخمموا في قلوبهم, و قال لهم: "وعلاه تخمموا غير في الشر في قلوبكم؟ ⁵واش هو الشيء اللي اسهل, كي نقول: ذنوبك مغفورة, و الا كي نقول: نوض امشي؟ ⁶بالصح باه تعرفوا باللي ابن الانسان عندو سلطان على لرض باه يغفر الذنوب". و قال لهاذاك المشلول: "نوض هز فراشك و روّح لدارك!".⁷وقف الراجل و روّح لدارو. ⁸و كي شافو الناس هذا الشيء تعجبوا و سبحوا الله اللي مد للناس سلطان كيما هذا. يسوع ينادي متى ⁹و كي كان يسوع معدي من لثم شاف واحد قاعد و يلم في لغرامة. اسمه متى. قالو: "تبعني". وقف و راح يتبع فيه.¹⁰و كي كان مريّح في الدار, جاو جماعة المكّاسين و ناس ياسر من المجرمين و قعدوا مع يسوع و التلامذة تاعو. ¹¹و كي شافوا الفريسيين هذا الشيء قالوا للتلامذة: "علاه المعلم تاعكم ياكل مع المكاسين و المجرمين؟".¹²كي سمعهم يسوع قال لهم: "لعباد الصحاح ما يحتاجوش للطبيب بالصح المرضى همّا اللي يحتاجوا للطبيب. ¹³روحوا افهموا واش يقصد كي قال: انا نحوس على الرحمة مش على الذبيحة, ما جيتش باه نقول للصالحين يتوبوا بالصح نقول للمذنبين يتوبوا". واحد يسقسي على الصوم¹⁴في هاذاك الوقت جاو عندو التلامذة تاع يوحنا و قالوا لو: "علاه احنا و الفريسيين نكثروا من الصوم, اما التلامذة تاعك ما يصوموش؟". قال لهم يسوع: "يقدروا امالين العرس يحزنوا كي يكون لعريس معاهم؟ ¹⁵بالصح تجي ايامات يترفع فيها العريس من وسطهم, في هاذاك الوقت يصوموا.¹⁶ما كانش اللي يطبب ثوب قديم بطبة جديدة, على خاطر تتكمش الطبة و تزيد تقطع الثوب, و تولي الرقعة اكبر من قبل.¹⁷و ما يحطوش الشراب الجديد في القربة لقديمة, لا تتشقق القربة, يسيح الشراب و تفسد القربة. بالصح يحطوا الشراب الجديد في قربة جديدة و هكا يربحوهم في زوز". بنت يايرس تقوم من الموت و مرى عندها نزيف تنال الشفاء¹⁸و كي كان يكلم فيهم بهذا لكلام, جاء عندو واحد القايد و سجد ليه و قال: "بنتي ماتت ضرك برك, ارواح معايا حط يدك عليها تحيا". ¹⁹وقف يسوع وراح معاه هو و التلامذة تاعو.²⁰و كانت واحد لمرى عندها نزيف دم من اثناش ن عام جات وراه و مست الحاشية تاع قشو, ²¹على خاطر قالت بينها و بين روحها: "لو كان نمس برك الحاشية تاع قشو نبرى". ²²تلفت لها يسوع وشافها, و قال لها: "ثيقي يا بنية, ايمانك شفاك". و في هاذيك الساعة بالذات ارتاحت لمرى من المرض اللي صابها.²³و كي وصل يسوع لدار القايد, شاف الناس يندبوا و الغاشي فوق بعضاه, ²⁴قال لهم: "بعدوا, الطفلة ما ماتتش راهي راقدة برك". ولاو يضحكوا عليه.²⁵خرْجوا الغاشي كامل برى و دخل يسوع و كي حكمها من يدها, حيات الطفلة. ²⁶و تنشر لخبر لهاذيك الجوايه كاملة. زوز عميان ينالوا الشفاء²⁷و كي كان يسوع معدي من لثم تبعوه زوز عميان و همّا يعيطوا و يقولوا: "ارحمنا يا بن داود!", ²⁸و كي وصل للدار دخلوا عندو, قال لهم يسوع: "تامنوا باللي نقدر ندير لكم هذا الشيء؟". جاوبوا و قالوا: "نعم, يا سيد نامنوا!".²⁹و مسهم يسوع على عينيهم و قال: "يكون لكم على حساب الايمان تاعكم". ³⁰و تفتحت عينيهم. و وصاهم يسوع و قال لهم: "عندكم, واحد ما يسمع بهذا الشيء اللي صرى!". ³¹بالصح همّا خرجوا من لثم و نشروا لخبر في هاذيك لبلاد كاملة. واحد بكوش ينال الشفاء³²و كي كانوا همّا خارجين من عندوا, ³³كاين وحايد جابولو راجل ساكنو جان و بكوش. و كي خرج منو الجان هدرْ و هو كان بكوش, تعجبوا منو الناس و قالوا: "هذا الشيء عمرو ما صرى في اسرائيل!". ³⁴اما الفريسيين قالوا: "هذا راه يخرج في الجنون والشواطن بالرايس تاع الشواطن!". الخدّامين راهم قلال³⁵و كان يسوع يجول في المدن الكل و الدواور و يعلم في المجامع, و يبشر في الناس ببشارة الملكوت, و يرتح كل مرض و كل ضعف في وسط الشعب. ³⁶و كي شاف الغاشي كيما هكذا حن عليهم, على خاطر كانوا مقلقين و مطيشين في لرض كي لغنم اللي بلا راعي.³⁷وقتها قال للتلامذة تاعو: "لحصاد ياسر بالصح لحصّادة قلال. ³⁸اطلبوا من مولى لحصاد يبعث حصادة للرزق تاعو".

Chapter 10

¹و من بعد عيط للتلامذة في الثناش و مدلهم القدرة على الجنون باه يخرجوها, و باه يشفيو كل مرض و كل ضعف.²و هاذي هي لسامي تاع الرسل في ثناش: لول سمعان اللي يعيطولو بطرس, و اندراوس خوه. و يعقوب بن زبدي, و خوه يوحنا. ³فيليبس, و برتلماوس, و توما, و متى السمسار. و يعقوب بن حلفي, و لبّاوس المعروف بإسم تداوس. ⁴سمعان القانوني, و يهوذا الاسخريوطي اللي باع يسوع.⁵و هاذوك الثناش بعثهم يسوع و وصاهم و قال لهم: "ما تحكموش الطريق للبلدان الاخرى, و ما تدخلوش لحتى مدينة تاع السامريين. ⁶روحوا قبل لخرفان بيت اسرائيل الهايمة. ⁷و انتوما رايحين بشروا و قولوا: المملكة تاع السماوات راهي قرْبّت.⁸اللي تلقاوهم مرضى اشفيوهم. و اللي تلقاوهم بالبرص رتحوهم. حييو الموتى. خرجوا الجنون. اديتوا بلاش, مدوا بلاش. ⁹ما تهزوش معاكم لا دراهم و لا فضة و لا نحاس في جيابكم. ¹⁰و ما تديروش حسابكم للطريق لا لبسة زايدة و لا سباط زايد و لا عصا, الخدّام عندو الحق في الماكلة تاعو.¹¹" و اي مدينة و الا قرية تدخلوها حوسوا فيها على اللي يستاهل. و ابقاو عندو حتى تروحوا من لثم. ¹²و كي تدخلوا لدار كاش واحد سلموا عليه. ¹³اذا كان يستاهل يحل السلام تاعكم عليه, و اذا كان ما يستاهلش يرجع السلام تاعكم ليكم.¹⁴و اذا ما قبلوكمش و ما سمعوش كلامكم اخرجوا من هاذيك الدار و من هاذيك لمدينة, انفضوا ترابها من رجليكم. ¹⁵نقول لكم الحق: يوم الدين راح تكون حالة سدوم و عمورة خير من حالتهم.¹⁶انا بعثكم كيما النعاج وسط الذيابة, كونوا فايقين كيما لحنوشة و مسالمين كيما لحمام. ¹⁷ردوا بالكم من الناس, راح يكتفوكم و يجروكم للمحاكم, و يلموا عليكم جماعة و يضربوكم. ¹⁸و يكركروكم للحكام و السلاطين على جال اسمي هذا الشيء اللي يشهد عليهم و على الامم اجمعين.¹⁹و كي يحكموكم ما تخموش واش تهدروا و واش تقولوا, في هاذيك الساعة يجيكم لكلام اللي راح تقولوه, ²⁰على خاطر مش انتوما اللي راح تهدروا الروح تاع باباكم هو اللي يتكلم فيكم.²¹الخو راح يسلم خوه للموت, و الاب يسلم ولدو, و لولاد يثوروا على والديهم و يقتلوهم, ²²و تكونوا مكروهين عند الناس الكل على جال اسمي. بالصح اللي يصبر حتى للخر هاذاك يمنع. ²³و كي يخرجزكم من مدينة روحوا لغيرها. نقول لكم الحق: و انتوما مازلتوا حتى ما كملتوش لمدن اللي في اسرائيل حتى يرجع ابن الانسان.²⁴" اللي يتعلم ما يكونش خير من المعلم, و العبد ما يكونش خير من سيدو. ²⁵شرف كبير كي يكون اللي يتعلم كيما المعلم تاعو, و كي يكون العبد كيما سيدو. اذا كان قالوا على مولى الدار بعلزبول, واش راح يقولوا مالا على اهلو!²⁶ما تخافوش منهم, ماكانش سر غير و يبان, و ما كانش مخبي غير و يظهر. ²⁷اللي نقول هولكم في ستر الليل قولوه انتوما في ضوء النهار, و اللي تتخالاو بيه في الوذن نادوا بيه فوق السطح,²⁸ما تخافوش من اللي يقتلوا لبدن و اما النفس ما يقدروش يقتلوها. بالصح الاولى بيكم تخافوا من هاذاك اللي يقدر يهلك لبدن و النفس في زوز في جاهنّامة. ²⁹ياخي زوز فراخ يتباعوا بفلس؟ و واحد فيهم ما يطيح في لرض بلا علم باباكم. ³⁰و اما انتوما حتى الشعر اللي في روسكم محسوب. ³¹مالا ما تخافوش! انتوما خير ياسر من لفراخ!³²كل من يستعرف بيا قدام الناس انا ثاني نستعرف قدام بابا اللي في السماوات, ³³بالصح اللي ينكرني قدام الناس ننكروا انا ثاني قدام بابا اللي في السماوات.³⁴ما تحطوش باللي جيت باه نخلي الدنيا هانية. ما جيتش باه يكون لهنى بالصح يكون السيف. ³⁵جيت نفرق الواحد على باباه, و البنت على امها, و الكنة على عجوزتها. ³⁶يوليو موالين الدار همّا العديان.³⁷اللي يحب باباه و الا امو اكثر مني ما يستاهلنيش, و اللي يحب ولدو والا بنتو اكثر مني ما يستاهلنيش. ³⁸و اللي ما يهزش الصليب تاعو و يتبعني ما يستاهلنيش. ³⁹اللي يربح حياتو يخسرها, و اللي يخسر حياتو على جالي يربحها.⁴⁰اللي يقبلكم يقبلني, و اللي يقبلني يقبل اللي بعثني. ⁴¹اللي يقبل نبي على خاطرو نبي ينال اجر تاع نبي, و اللي يقبل واحد صالح على خاطرو صالح ينال اجر تاع واحد صالح.⁴²كل من يمد لواحد من هاذوك الصغار حتى لو كان كاس ما بارد برك على خاطرو تلميذ تاعي, نقول لكم الحق: الاجر تاعو ما يضيعش".

Chapter 11

¹و كي كمّل يسوع كلامو مع التلامذة في ثناش, راح باه يعلم و يبشر في لمدن تاعهم. يسوع و يوحنا المعمدان اما يوحنا المعمدان ²و هو في الحبس كي سمع بالحوايج اللي يديرهم المسيح, بعثلو زوز من التلامذة اللي كانوا معاه, ³و قالوا: "انت هو اللي جاي و الا نسناو و احد آخر؟".⁴جاوبهم يسوع و قاللهم: "روحوا قولوا ليوحنا على الشيء اللي شفتوه و سمعتوه: ⁵العميان يشوفوا, العياب يمشيو, البُرص يبراو, الطرش يسمعوا, الموتى يقوموا, و المساكين يسمعوا بشارة الخير. ⁶يا سعدو اللي ما يشكش فيّا".⁷و بعد ما راحوا هاذوك في زوز قال يسوع للغاشي على يوحنا: "واش خرجتوا تشوفوا في الصحراء؟" قصبة يحرك فيها الريح؟ ⁸و الا واش خرجتوا تشوفوا؟ واحد لابس لحرير؟ الناس اللي يلبسوا لحرير راهم عايشين في قصور السلاطين.⁹واش خرجتوا تشوفوا؟ نبي؟ هذا صح, نقول لكم, و خير من نبي. ¹⁰هذا هو اللي قال عليه لكتاب: نبعث لملاك تاعي قبلك و هو اللي يوجد الطريق قدامك.¹¹نقول لكم الحق: ما كانش من بين اللي ولدتهم النساء اعظم من يوحنا المعمدان, بالصح اصغر واحد في الملكوت تاع السماوات اعظم منو. ¹²و من وقت يوحنا المعمدان حتى لليوم و ملكوت السماوات قاعد يتسلب, و المغتصبين قاعدين يخطفوا فيه.¹³على خاطر الشريعة و الانبياء الكل حتى ليوحنا تنبأؤوا. ¹⁴و اذا حبيتوا تقبلوا, هذا هو ايليا اللي كان راح يجي. ¹⁵و اللي يحب يسمع يسمع.¹⁶كيفاه نشبه الجيل هذا؟ نشبههم كيما ولاد صغار قاعدين في الطريق يعيطوا على اصحابهم ¹⁷و يقولوا: زمرنالكم ما شطحتوا! ندبنالكم ما بكيتوا!¹⁸جاكم يوحنا ما ياكل ما يشرب. قلتوا ساكنوا جن. ¹⁹جاكم ابن الانسان ياكل و يشرب, قلتوا: مكراش و سكارجي, يخالط العشارين و المذنبين. بالصح الرزانة يبينوها ناسها". المدن اللي ما تابتش²⁰و بدا يلوم على المدن اللي دار فيها ايات كبار بالصح اهلها ما تابوش: ²¹"يا ويلك يا كورزين! يا ويلك يا بيت صيدا! على خاطر لو كان لعجايب اللي نداروا فيكم نداروا في صور و صيداء بكري, لوكان تابوا و لبسوا الخيشة و ذراو الرماد على روسهم. ²²بالصح نقول لكم: حالة صور و صيداء يوم الدين راح تكون خير من حالتكم انتوما.²³و انت يا كفرناحوم اللي هازة راسك في السماء! راح تهودي للهاوية. على خاطر لوكان ندارت في سدوم الايات اللي ندارت فيك كانت بقات حتى لليوم. ²⁴بالصح نقول لكم: حالة سدوم يوم الدين راح تكون خير من حالتك انت". التعبانين يلقاو الراحة²⁵و في هاذاك الوقت تكلم يسوع و قال: "نحمدك يا بابا يا رب السماء و لرض, على خاطر حجبت هاذي الامور على الحكماء و الفاهمين و بينتها للصغار. ²⁶نعم يا بابا, هذا الشيء اللي حكمت بيه. ²⁷كل شيء جاني من عند بابا, و واحد ما يعرف الابن غير الاب. و واحد ما يعرف الاب غير الابن و اللي يحب هو يبينو ليه.²⁸ارواحوا ليا يا جميع التعبانين و اللي احمالكم ثقيلة, وانا نريحكم. ²⁹هزوا النير تاعي و تعلموا مني, على خاطرني وديع و متواضع, هكا تلقاو راحة لنفوسكم. ³⁰على خاطر نيري ساهل و حملي خفيف".

Chapter 12

¹في هاذاك الوقت كان يسوع يمشي في وسط الزرع هو و التلامذة تاعو و كان نهار سبت, و كي جاعوا التلامذة نحاو السبول و كلاو. ²و كي شافوهم الفريسيين قالوا: "شوف التلامذة تاعك يعملوا حوايج محرمة نهار السبت!".³قال لهم: "ما قريتوش واش دار داود كي جاع هو والناس اللي كانوا معاه؟ ⁴كيفاه دخل لبيت الله و كلى الخبز اللي مخصص للتقدمة اللي ما يحل لحتى واحد ياكل منو غير الكهنة وحدهم.⁵و الا ما قريتوش في التوراة باللي الكهنة في الهيكل نهار السبت يتعداو على السبت و هما ابرياء؟ ⁶بالصح نقول لكم: هاذا اللي قدامكم هنا شانو اعظم من شان الهيكل!⁷لو كان جيتو تعرفوا واش المقصود بهاذا لكلام: انا نطلب رحمة مش ذبيحة, ما كنتوش تحكموا على الناس الابرياء! ⁸على خاطر ابن الانسان هو رب السبت ثاني".⁹و من بعد خرج من هاذاك لمكان و راح للمجمع تاعهم, ¹⁰و لقى ثمة واحد الراجل يدوا يابسة, سقساوه و قالوا: "حلال واحد يشفي المرضى نهار السبت؟" قالوا هكا باه يشكِيو بيه.¹¹قال لهم: "شكون منكم اذا كان عندو غير خروف واحد برك, و يطيحلو نهار السبت في مطمور, يجبدوا والا لا؟ ¹²وكيفاه مالا الانسان اللي اعز من لخروف! مالا يجوز للواحد يدير الخير نهار السبت!".¹³و من بعد قال لهاذاك الراجل: "مد يدك". مدها و رجعت صحيحة كيما يدو لخرى. راجل الله المختار ¹⁴و كي خرجوا الفريسيين تفاهموا عليه باه يقتلوه,¹⁵و علم بيهم يسوع و خرج من لثم. و خرج وراه غاشي كبير و شفاهم كاملين. ¹⁶و وصاهم باه ما يبينوهش, ¹⁷باه يتم الشيء اللي قال عليه النبي اشعياء:¹⁸هاذا هو الشاب اللي خايرتو, حبيبي اللي نفسي راضية عليه. نحط روحي عليه باه يخبر الشعوب بالحق.¹⁹لا يعارك و لا يصيح, لبرى واحد ما يسمع صوتو. ²⁰قصبة مشقوقة ما يكسر, و فتيلة مدخنة ما يطفي, حتى ينصر الحق. ²¹و على اسمو هو يكون امل الشعوب". يسوع و بعلزبول²²في هاذاك الوقت جابولو واحد مجنون اعمى و بكوش شفاه, هاذاك لعمى لبكوش نطق و عاد يشوف. ²³والناس الكل حاروا فيه و قالوا: "ما يكونش هاذا ابن داود؟".²⁴بالصح الفريسيين كي سمعوا بهذا الشيء قالوا: "هذا ما يكون يخَرّج الشواطن غير على يد بعلربول سلطان الشواطن". ²⁵و كي عرف يسوع واش قاعدين يخمموا, قال لهم: "كل مملكة تتقسم على روحها تريب, و كل مدينة و الا بيت يتقسم على روحو ما يثبتش.²⁶اذا كان الشيطان يخَرج الشيطان يسمى دار على روحو. كيفاه راح يثبت المُلك تاعو؟ ²⁷و اذا كنت انا نخرج الشواطن بسلطان الشواطن, مالا ولادكم بشكون يخرجوهم؟ همّا اللي راح يحكموا عليكم!²⁸بالصح اذا كنت انا نخرج الشواطن بالروح تاع الله, يكون دهم عليكم الملكوت تاع الله! ²⁹كيفاه يقدر الواحد يدخل لدار واحد قاوى و يديلوا مالو, لو كان ما يربطوش قبَل. و من بعد ينهبلو دارو؟ ³⁰اللي ما يكونش معايا يكون ضدي, و اللي ما يلمش معايا يسمى قاعد يفرق.³¹على هذا نقول لكم: كل معصية و كل كذب يتغفر للناس, بالصح لكذب على الروح ما يتغفرش. ³²من قال كلمة على بن الانسان تتغفرلو, و اما اللي يقول على الروح القدس ما يتغفرلوش, لا في دار الدنيا و لا في دار لاخرة.³³كي تكون الشجرة مليحة تكون فاكيتها مليحة, و كي تكون الشجرة بيثر تكون فاكيتها بيثر, من الفاكية تتعرف الشجرة. ³⁴يا ولاد لفاعي! كيفاه تقدروا تتكلموا بالصلاح و انتوما شرور؟ الشيء اللي يفيض من القلب هاذاك ينطق بيه الفم. ³⁵و الانسان الصالح يخرج الصلاح من كنزو الصالح اللي في قلبو, و الانسان تاع الشر يخرج الشر من كنزو الشرير اللي في قلبو.³⁶بالصح نقول لكم: كل كلمة ماهيش مليحة يهدروها الناس يتحاسبوا عليها يوم الدين. ³⁷على خاطر بكلامك تتبرر و بكلامك يتحكم عليك". اية يونان³⁸وقتها ردوا عليه جماعة من الكتبة و الفريسيين و قالوا: "يا معلم, نطلبوا منك تعمل لنا اية". ³⁹جاوبهم و قال: "جيل شرير و فاسق يحوس على اية, و ما ينال حتى اية غير اية النبي يونان. ⁴⁰على خاطر كيما كان يونان في كرش الحوت ثلاثة ايام و ثلاثة ليالي, هكذاك يكون ابن الانسان في قلب لرض ثلاثة ايام و ثلاثة ليالي.⁴¹رجال نينوي راح يقوموا يوم الدين مع هذا الجيل و يحكموا عليه, على خاطر همّا تابوا كي سمعوا تحذير يونان, و هنا كاين قدامكم اللي شانوا اكبر من شان يونان!⁴²و الملكة تاع الجنوب راح تقوم يوم الدين مع هاذا الجيل و تحكم عليه, على خاطر هي جات من اخر الدنيا باه تسمع حكمة سليمان, و هنا كاين قدامكم اللي شانو اعظم من شان سليمان!⁴³و كي يخرج الروح المنجوس من العبد يبقى هايم في الصحاري, يحوس على الراحة و ما يلقاهاش. ⁴⁴من بعد يقول: نرجع لداري اللي خرجت منها. و كي يجي يلقاها فارغة و مكنوسة و مزينة. ⁴⁵يروح يزيد معاه سبعة ارواح انجس منو, تدخل و تسكن لثم, و تولى اخرة هذا العبد اشر من اللي كانت المرة لولى! هكذا تكون حالة هذا الجيل الفاسق". نعمل واش يطلب الله⁴⁶و هو مازال يهدر مع الغاشي جات امو و خاوتو و وقفوا لبرى عيطولوا حابين يهدروا معاه. ⁴⁷قالو واحد من الناس: "هاي امك و خاوتك واقفين لبرى حابين يهدروا معاك".⁴⁸جاوبو يسوع و قالو: "شكون هي يمّا و شكون همّا خاوتي؟". ⁴⁹و من بعد مد يدو جيهة التلامذة و قال: "هاذو همّا يمّا و خاوتي. ⁵⁰على خاطر اللي يعمل رضاية بابا اللي في السماوات هو خويا و اختي و يمّا".

Chapter 13

¹و في هاذاك النهار خرج يسوع من الدار و راح قعد على شط لبحر, ²و تلم عليه غاشي كبير, و كي شاف الناس يتزاحموا دخل للفلوكة و قعد. و الغاشي كامل كان قاعد على الشط مقابلو.³و كان يهدر معاهم غير بالمعاني و قال: "هاو الزارع خرج باه يزرع, ⁴و كي كان يزرع طاحت شوية زريعة في الطريق, و جات لفراخ و كلاتها. ⁵و طاح شوية منها فوق لحجار وين التربة قليلة و نبتت في ساع على خاطر التربة ما هيش غارقة. ⁶بالصح كي طلعت عليها الشمس ذبلت, ويبست على خاطر بلا اصل.⁷و طاحت شوية زريعة فوق الشوك, و كي نبتت نبت معاها الشوك و خنقها. ⁸و طاحت شوية زريعة فوق التربة الحرة و جابت الصابة الخير و البراكة, منها اللي جابت مئة و منها اللي جابت ستين و اخرى جابت ثلاثين, ⁹اللي يحب يسمع يسمع".¹⁰و جاو عندو التلامذة و قالوا: "علاه تهدر معاهم بالمعاني؟". ¹¹قال لهم: "على خاطر غير ليكم انتوما المعطى باه تفهموا ملكوت السماوات, بالصح هاذوك لا. ¹²اللي ليه يتزاد ليه, و اللي ما هوش ليه حتى اللي عندو يتنحالو.¹³على هذا الشيء نهدر معاهم بالمعاني, على خاطر عينيهم محلولة بالصح ما يشوفوش, و يسمعوا بالصح ما يفهموش. ¹⁴تمت فيهم النبوة تاع اشعياء اللي تقول: السمع يسمعوا بالصح ما يفهموش, و يخزروا بعينيهم بالصح ما يشوفوش.¹⁵على خاطر هذا الشعب قلبو قاسي, و وذنيهم ثقيلة. و عينيهم مغمضة, باه ما يسمعوا و ما يشوفوا, ما يفهموا في قلوبهم, باه يرجعوا و نشفيهم.¹⁶بالصح يا سعدهم اللي عينيهم تشوف, و اللي وذنيهم تسمع. ¹⁷نقول لكم الحق: انبياء ياسر و صالحين ياسر تمناو يشوفوا الشيء اللي انتم شفتوه و ما شافوش, و تمناو يسمعوا الشيء اللي انتم سمعتوه و ما سمعوش.¹⁸"اسمعوا انتوما هذا لمثل تاع الزارع اللي يزرع: ¹⁹كل من يسمع كلمة الملكوت و ما يفهمهاش, يجي الشرير و يخطف الشيء اللي تزرع في قلبو. و هذا هو الزرع اللي طاح في الطريق.²⁰و المزروع على لحجار هو هذاك اللي يسمع الكلمة, و يقبلها في ساعتها و يفرح بيها, ²¹بالصح ما عندوش اصل في ذاتو, غير مدة برك. و كان جاء ضيق و الا اضطهاد على جال الكلمة ثم ثم يطيح.²²و اللي تزرع في وسط الشوك هو هاذاك اللي يسمع الكلمة, بالصح الهم تاع هاذي الدنيا و الشهوة تاع المال يخنقوا الكلمة و ما يخلوهاش تجيب الثمرة تاعها. ²³اما هاذاك المزروع في التربة الحرة هو اللي يسمع الكلمة و يفهمها. و يجيب الثمار, اللي يجيب مئة و اخر ستين و اخر ثلاثين". لمثل تاع القمح و الزوان²⁴و زادهم مثل واحد اخر و قال: "يشبه ملكوت السماوات لواحد الراجل زرع شتلة مليحة في الجنان تاعو. ²⁵و اليوم و غدوا كي كانوا الناس راقدين جاء لعدو تاعو و زرع الزوان في وسط هاذاك الجنان و راح. ²⁶و كي نبت الزرع و دار الثمار, وقتها بان فيه حتى الزوان ثاني.²⁷و جاو الخدامة تاع مولى الدار و قالوا لو: يا سيد, ياخي زرعت شتلة مليحة في جنانك؟ منين جا الزوان؟. ²⁸قال لهم: هذا واحد عدو عمل هذا الشيء. قالوا الخدامة: تحب نروحوا نحيِوْه؟.²⁹قال لهم: لا! هكا نخاف تقلعوا لقمح مع الزوان. ³⁰خلِيوْهم يكبروا مع بعضاهم حتى يجي وقت لحصاد, و في هاذاك الوقت نوصي الحصادبن: يلموا الزوان هو لول و يديروه حزم حزم باه يحرقوه, اما القمح يلموه يحطوه في المخزن تاعي". لمثل تاع حبة الخردل و لمثل تاع لخميرة³¹و زاد قال لهم مثل واحد اخر قال: "يشابه ملكوت السماوات حبة تاع خردل هزها واحد و زرعها عندو في الجنان, ³²و هي اصغر واحدة في الزريعة الكل. بالصح نهار اللي تنبت تولي اكبر واحدة في الخضرة الكل, و تكبر حتى تولي شجرة, و تجي لفراخ تبيت فوق لعراف تاعها".³³و زاد قال لهم مثل واحد اخر: "يشبه ملكوت السماوات خميرة هزتها لمرى و فرقتها على ثلاثة كيلات تاع عجينة حتى تخمرت العجينة كاملة".³⁴هاذي لمعاني الكل هدر بيها يسوع مع الغاشي, و كان يهدر معاهم غير بالمعاني, ³⁵باه يتم اللي قال عليه النبي: "نخرج من فمي امثال, و من نهار اللي بدات الدنيا ننطق بالاسرار". يسوع يفسر المثل تاع القمح و الزوان³⁶و كي صرّف يسوع الغاشي و راح للدار. جاو ليه التلامذة و قالوا: "فسر لنا لمثل تاع القمح و الزوان اللي في الجنان". ³⁷قال لهم: "الزارع اللي يزرع شتلة مليحة هو ابن الانسان. ³⁸و الجنان هي الدنيا. و الشتلة لمليحة همّا اولاد الملكوت. و الزوان هو اولاد الشر. ³⁹و العدو اللي زرع الزوان هو ابليس. و لحصاد هو نهار اللي تفنى الدنيا. و الحصادة همّا لملايكات.⁴⁰و كيما يتلم الزوان و يتحرق بالنار, هكذاك يصرى نهار تفنى الدنيا: ⁴¹يبعث ابن الانسان لملايكات يلموا كل اللي يعثروا الناس و كل اللي يعملوا المعصية من الملكوت تاعو, ⁴²و يرميوهم في النار. وين يكون لبكاء و الخوف. ⁴³وقتها لبرار يضوِيوْ كي الشمس في الملكوت تاع باباهم. اللي يحب يحل وذنيه باه يسمع يسمع, لمثل تاع الكنز وتاع الجوهرة و تاع الشبكة⁴⁴و يشابه ثاني الملكوت تاع السماوات لكنز مدفون في واحد الجنان, لقاه واحد راح خزنو. و من الفرحة تاعو راح باع كل ما يملك و شرى هاذاك الجنان. ⁴⁵ثاني يشابه الملكوت تاع السماوات واحد تاجر يحوس على الجواهر الغالية, ⁴⁶و كي لقى جوهرة واحدة اغلى من اللي عندو الكل, راح باع كل شيء وشراها.⁴⁷ثاني يشابه الملكوت تاع السماوات شبكة منصوبة في لبحر و فيها من كل نوع. ⁴⁸و كي تعمرت الشبكة جبدوها للشط, و قعدوا يفرزوا فيها الحاجة لمليحة حطوها في الصنادق, و الحاجة اللي ما تصلحش رماوها بعيد.⁴⁹هكذا يكون نهار اللي تفنى الدنيا: يخرجوا الملايكة و يفرزوا الاشرار من بين الابرار, ⁵⁰و يرمِيوْهم في النار. وين يكون لبكاء و الخوف".⁵¹قال لهم يسوع: "راكم فاهمين هاذا الشيء كامل؟". قالوا: "نعم يا سيدي". ⁵²قال لهم: "على جال هذا الشيء كل واحد من الكتبة متعلم في ملكوت السماوات يشابه لراجل مولى بيت يخرج من كنزو الجديد و لقديم". ⁵³و كي كمل يسوع هاذي لمثال خرج من لثمة. الناصرة ما تقبلش يسوع⁵⁴و كي دخل يسوع لبلادو كان يعلم في وسط المجمع حتى حاروا فيه و قالوا: منين جاب هاذي الحكمة و هاذي الايات؟ ⁵⁵ياخي هذا هو ولد النجار؟ و امو اسمها مريم, و خاوتو يعقوب و يوسي و سمعان و يهوذا؟ ⁵⁶و خواتاتو لبنات الكل عندنا؟ منين جاب الحكمة هاذي كاملة؟".⁵⁷و كانوا كل واحد واش يقول عليه. اما يسوع قال لهم: "ما كانش نبي بلا قدَر غير في بلادو و في بيتو". ⁵⁸و ما دارش لثمة معجزات ياسر على خاطر ما امنوش بيه.

Chapter 14

¹و في هاذاك الوقت كي سمع هيرودس والي الربع لخبار تاع يسوع, ²قال للخدامين تاعو: "هاذا ما يكون غير يوحنا المعمدان حيا من بين الموتى! على هاذيك يصراو على يديه الايات".³و هيرودس قبل كان حكم يوحنا و كتفو و رماه في الحبس على جال هيروديا مرت فيليبس خوه, ⁴على خاطر يوحنا كان يقول لو: "ما يحلش ليك تدي مرت خوك". ⁵و كان حاب يقتلو بالصح خاف م الشعب, اللي كانوا حاطينوا كيما نبي.⁶و كي جاء نهار عيد ميلاد هيرودس, رقصت بنت هيروديا في الوسط و هيرودس عجبو الحال ياسر. ⁷و حلف لها بالعاهد يمدلها اي حاجة تطلبها.⁸و على خاطر هي موصيتها امها قالت: "اعطيني ضرك راس يوحنا المعمدان في طبق". ⁹حزن الملك. بالصح على جال العاهد اللي مدوا وسط الجماعة عطى امر باه يديرولها واش طلبت.¹⁰و بعث و نحى راس يوحنا في الحبس. ¹¹و جابوه للطفلة في طبق, و هي داتو لامها. ¹²و راحو التلامذة تاعو هزوا الجثة و دفنوها. و من بعد راحوا خبروا يسوع. يسوع يوكل خمسة الاف راجل¹³و كي سمع يسوع بالخبر خرج من لثمة و ركب في فلوكة و راح لواحد لمكان خالي و قعد وحدو. و كي سمعوا بيه الناس خرجوا من المدن تاعهم و تبعوه على رجليهم. ¹⁴و كي خرج يسوع و شاف غاشي كبير حن عليهم و رتح المرضى اللي معاهم.¹⁵و كي عشات لعشية جاو ليه التلامذة و قالوا: "لمكان هذا خالي و زاد راح الحال. صرف الغاشي باه يروحوا للمدن لقريبة يشرِيوْ ماكلة لرواحهم".¹⁶قال لهم يسوع: "ما همش محتاجين يروحوا. اعطِيوْهم انتوما ياكلوا". ¹⁷قالوا لو: "ما عندنا كان خمسة خبزات و زوز حوتات". ¹⁸قال لهم: "هاتوهم ليا هنا".¹⁹و طلب من الغاشي باه يقعدوا ف لحشيش. و من بعد هز الخمسة خبزات و الزوز حوتات, و هز عينيه للسماء و بارك و قسم الخبز و مدو للتلامذة, و التلامذو فرقوا على الغاشي. ²⁰الناس الكل كلاو حتى ن شبعوا. و من بعد لموا ثناش ن قفة مليانة من الخبز اللي فضال عليهم. ²¹و الناس اللي كلاو كانوا قريب خمسة الاف راجل بلا ما يحسبوا النساء و الاولاد الصغار. يسوع يمشي فوق الماء²²و حتم يسوع على التلامذة تاعو باه يركبوا ف الفلوكة و يسبقوه للجيهة لخرى حتى ن يصرف الغاشي. ²³و كي راحوا الناس طلع هو للجبل و قعد وحدو يصلي. و كي عشات لعشية كان غير هو وحدو لثم. ²⁴و الفلوكة اللي فيها التلامذة وصلت لوسط لبحر و كان الموج يضرب فيها. على خاطر الريح كان جايهم من لقدام.²⁵و ف الربع الرابع تاع الليل راح عندهم يسوع و هو يمشي فوق لبحر. ²⁶و كي شافوه التلامذة يمشي على لبحر خافوا وقالوا: "هذي روحانية". و من الخوف ياسر ولاو يعيطوا! ²⁷و ف هاذاك الوقت هدر معاهم يسوع و قال لهم: "تشجعوا! ما تخافوش اني انا هو".²⁸هدر معاه بطرس وقالو: "يا سيدي, كي عدت انت هو, قولي نجي عندك و انا نمشي فوق الماء". ²⁹قالو: "ارواح". هبط بطرس من لفلوكة و مشى فوق الماء باه يروح ليسوع. ³⁰بالصح كي شاف الريح قاوية خاف. و كي بدا يغرق ولى يعيط و قال: " يا ربي, منعني!".³¹و ثم ثم مد يسوع يدو و حكمو و قالو: "يا قليل ليمان, علاه شكّيت؟". ³²و كي دخلوا للفلوكة حبس الريح. ³³و اللي كانوا في لفلوكة جاو الكل و سجدوا ليه و قالوا: "انت صح ابن الله!".³⁴و كي عداو للجيهة لمقابلة وصلوا لارض جنيسارت, ³⁵و عرفوه الرجال اللي كانوا لثم. و بعثوا لهاذيك الجوايه الكل و جابوا ليه المرضى اللي عندهم كاملين, ³⁶و طلبوا منو يخليهم يمسوا برك الحاشية تاع لباسو. و جميع اللي مسوه نالوا الشفاء.

Chapter 15

¹الطاهر و المنجوس و في هاذاك الوقت جماعة من الكتبة و الفريسيين تاع اورشليم جاو ليسوع و قالوا: ²"علاه التلامذة تاعك يتعداو على عادة الشيوخ, و ما يغسلوش يديهم كي ياكلوا؟". ³قال لهم يسوع: "حتى انتوما ثاني علاه تتعداو على وصية الله بالعادات تاعكم؟⁴الله وصى و قال: قدّر باباك و امك, و اللي يسب باباه و الا امو يموت. ⁵بالصح انتوما تقولوا: اللي يقول لباباه و الا امو: الشيء اللي راح نمدهولكم صدقتو صداقة لبيت الله. و هكا ما يكرمش باباه و الا امو. ⁶انتوما بطلتوا الشيء اللي وصى بيه الله على جال العادات تاعكم!⁷يا منافقين عمل مليح كي تنبأ عليكم اشعياء و قال: ⁸هذا الشعب يقرّب ليا غير بالفم, و يقدّرني غير حد الشوارب برك. اما قلبو بعيد عليا خلاص. ⁹بالباطل يعبدوني و همّا يعلموا في حوايج هي عادات الناس".¹⁰و من بعد عيط للشعب و قال لهم: "اسمعوا و افهموا. ¹¹الحاجة اللي تدخل للجسم مش هي اللي تنجس الانسان, بالصح اللي يخرج من الفم هو اللي ينجس الانسان".¹²وقتها جاوه التلامذة و قالوا: "علابالك باللي الفريسيين كي سمعوا هاذي الهدرة ما عجبهمش الحال؟". ¹³قال لهم: "كل حاجة ما غرسهاش بابا اللي في السماء تتقلع. ¹⁴خلِيوْهم. راهم عميان و يمَشٍيوْ في عميان. و اذا كان اعمى يمَشي اعمى يطيحوا في زوز في حفرة".¹⁵قالو بطرس: "فسّر لنا هذا لمثل". ¹⁶قالو يسوع: "حتى انتوما مازالتوا ما فهمتوش؟ ¹⁷ما فهمتوش باللي الشيء اللي يدخل من الفم يروح للكرش و من بعد يتطرح برى؟¹⁸اما الشيء اللي يخرج من الفم هاذاك يخرج من القلب, و هاذاك هو اللي ينجس الانسان, ¹⁹على خاطر من القلب يخرجوا الافكار تاع الشر: لقتيلة, الزنى. الفسق, شهادة الباطل. الكفر. ²⁰و هاذي هي اللي تنجس الانسان. بالصح كي لواحد ياكل بلا ما يغسل يديه هاذي ما تنجسش الانسان". ايمان لمرى الكنعانية²¹و من بعد خرج يسوع من لثم و راح لجوايه صور و صيداء. ²²و كانت واحد لمرى كنعانية خارجة من هاذيك الناحية عيطتلو وقالتو: "ارحمني’ يا سيدي, يا بن داود! بنتي مجنونة ياسر خلاص". ²³و يسوع ما جاوبها حتى بكلمة. جاوه التلامذة تاعو و قالوا: "صرفها تروّح, علاه تخلاها تعيط ورانا!".²⁴قال لهم: "انا جيت للخرفان الضالة تاع بيت اسرائيل". ²⁵بالصح هي جات و سجدت ليه و قالتلو: "يا سيدي عاوني!" ²⁶قال لها يسوع: "مش مليح نهز الخبز تاع لولاد و نمدو للكلاب".²⁷قالت: "صح, يا سيدي! حتى لكلاب ياكلو من لفتات اللي يطيح من مايدة سيادها!" ²⁸وقتها جاوبها يسوع و قال لها: "يا مرى, قداه كبيرايمانك!على هذا الشيء اللي طلبتيه يكون ليك". و في هاذيك الساعة بالذات برات بنتها. يسوع يشبع ربعة الاف راجل²⁹و من بعد راح من لثم و كي وصل للحاشية تاع بحر الجليل طلع للجبل و قعد. ³⁰و جاه غاشي كبير, فيهم العيّاب و العميان و البكاكش و المشلولين و وحايد اخرين ياسر, و حطوهم عند رجلين يسوع. و هو شفاهم الكل ³¹حتى تعجبوا الناس كي شافوا لبكاكش ينطقوا, و المشلولين يبرَاوْ, و العميان يشوفوا. و مجّدوا اله اسرائيل.³²اما يسوع عيط على التلامذة و قال لهم: "غاظوني الناس, على خاطر ظرك عندهم ثلاثة ايام و همّا قاعدين معايا و ما عندهم واش ياكلوا, و ما نيش حاب نبعثهم يروْحوا صايمين لا يفشلوا في الطريق". ³³قالوا التلامذة: "و احنا منين راح نجيبوا في هذا الخلاء خبز يكفي هاذو الناس الكل؟". قال لهم يسوع: "قداه من خبزة عندكم هنا؟". ³⁴قالوا: "سبعة خبزات و شوية من الحوت الصغير". ³⁵و طلب منهم يقعدوا الغاشي في لرض,³⁶و هز السبعة خبزات و الحوتات, و شكر و قسم و مد للتلامذة و همّا فرقوا على الناس. ³⁷و كلاو الكل و شبعوا. و من بعد لموا الخبز اللي فضال عليهم في سبعة قفف مليانة, ³⁸و الناس اللي كلاو كانوا ربعة الاف راجل بلا ما يحسبوا النساء و الاولاد الصغار. ³⁹و بعد ما صرف الغاشي طلع للفلوكة و راح لجوايه مجدل.

Chapter 16

¹و جاو ليه الفريسيين و الصدوقيين باه يجربوه, و طلبوا منوا يوريلهم ايه من السماء. ²بالصح هو قال لهم: "كي تعشي لعشية: تقولوا غدوا يكون الحال صافي على خاطر السماء حمراء.³و في الصباح: تقولوا اليوم نهار بارد كي تشوفوا السماء حمراء مغيمة. يا واحد المنافقين! تعرفوا تميزوا وجه السماء, بالصح ما تعرفوش تميزوا العلامات تاع اوقات الله! ⁴جيل شرير و فاسد تحوسوا على اية, و ما تشوفوا حتى اية غير اية يونان النبي". و من بعد راح عليهم و خلاهم. لخميرة تاع الفريسيين و الصدوقيين⁵و كي جاو التلامذة للجيهة الاخرى وين كان يسوع باه يدِيوْ الخبز. ⁶قال لهم يسوع: "استحفظوا ردوا بالكم من لخميرة تاع الفريسيين و الصدوقيين". ⁷و بداو همّا يخموا بينهم و بين ارواحهم و قالوا: "بلاك على خاطر ما شريناش الخبز". ⁸علم بيهم يسوع واش كانوا يخمموا و قال لهم: "يا قلال ليمان علاه تخمموا بينكم و بيم ارواحكم باللي على خاطر ما جبتوش الخبز؟⁹ما زالتوا حتى لضرك ما فهمتوش؟ نسيتوا الخمسة خبزات اللي شبعت الخمسة الاف و قداه من قفة فضالت؟ ¹⁰و نسيتوا السبعة خبزات اللي شبعت الربعة الاف و قداه من قفة فضالت؟¹¹كيفاه ما فهمتوش باللي ما كنتش نهدر على الخبز كي قلت لكم تردوا بالكم من الخميرة تاع الفريسيين و تاع الصدوقيين؟. ¹²وقتها فهموا باللي ما كانش يقصد لخميرة تاع الخبز, بالصح كان يقصد التعليم اللي يعلموا بيه الفريسيين و الصدوقيين. بطرس يستعرف بالمسيح¹³و كي وصل يسوع لجواية قيصرية فيليبس سقسى التلامذة و قال لهم: "واش يقولوا الناس عليا انا ابن الانسان. شكون انا؟". ¹⁴قالوا: "جماعة: يقولوا باللي انت هو يوحنا المعمدان, و اخرين يقولوا: ايليا, و وحايد اخرين يقولوا: ارميا و الا نبي من الانبياء". ¹⁵قال لهم: "و انتوما واش تقولوا عليا, شكون انا؟". ¹⁶قال بطرس: "انت هو المسيح ابن الله الحي!".¹⁷قالو يسوع: "يا سعدك يا سمعان بن يونا, ما هوش دم و لحم اللي بَينلك هذا الشيء, بالصح بابا اللي في السماوات. ¹⁸و انا ثاني نقول لك: انت بطرس, و على هاذي الصخرة نبني كنيستي, و ابواب الجحيم ما تقدرش عليها.¹⁹و نعطيك لمفاتح تاع ملكوت السماوات, كل اللي تربطو على لرض يتربط في السماوات. و كل اللي تحلو على لرض يتحل في السماوات". ²⁰وقتها زاد وصى التلامذة باه ما يقولوا لحتى واحد باللي او هو يسوع المسيح. يسوع يخبر بالموت و الثيامة تاعو²¹و من هاذاك النهار بدى يسوع يبين للتلامذة باللي محتوم عليه يروح لاورشليم و يتعذب لثم على يد الشيوخة و رياس الكهنة و الكتبة, و يتقتل, و في ثالث نهار يقوم من بين الموتى. ²²داه بطرس وحدو على جنب و بدا يهدر معاه و قالو: "حاشاك يا رب! ما يصراش ليك هذا الشيء!". ²³تلفت يسوع و قال لبطرس: "بعّد علّيا يا شيطان! راك تعطل فيّا, على خاطر انت اللي يهمك الناس مش امر الله".²⁴وقتها قال يسوع للتلامذة: "اللي يحب يتبعني ينكر روحو و يهز الصليب تاعو و يتبعني, ²⁵اللي يحب يمنّع روحو يهلكها, و اللي يهلك روحو على جالي يمنعها. ²⁶واش الفايدة كي الواحد يربح الدنيا و ما فيها و يخسر روحو؟ و الا واش يقدر الواحد يمد باه يفدي روحو؟²⁷على خاطر ابن الانسان راح يرجع في مجد باباه مع الملايكة تاعو, وقتها يجازي كل واحد على حساب الفعل تاعو اللي دارو. ²⁸نقول لكم الحق: كاين ناس واقفين معانا هنا ما يشوفوش الموت حتى يشوفوا ابن الانسان جاي في الملكوت تاعو".

Chapter 17

¹و بعد ستة ايام راح يسوع للجبل و دا معاه بطرس ويعقوب و يوحنا خو يعقوب و قعدوا وحدهم. ²و تبدلت حالتو قدامهم, و وجهو ولى يضوي كي الشمس, و قشو ولى يضوي كي النور.³و ظهر موسى و ايليا و همّا يهدروا معاه. ⁴حتى ولى بطرس يقول ليسوع: "يا ربي, مليح نبقاو هنا! كان تحب ننصبوا ثلاثة خيَم: واحدة ليك, و واحدة لموسى, و واحدة لايليا".⁵و هو ما زال يهدر هبطت سحابة ضاوية و غطاتهم, و جا صوت من السماء يقول: "هذا هو وليدي لحبيب اللي رضيت عليه, اسمعوا ليه". ⁶و كي سمعوا التلامذة الصوت طاحوا على وجوههم و و خافوا ياسر. ⁷و جا يسوع و مسهم و قال لهم: "نوضوا, و ما تخافوش". ⁸و كي جاو يشوفوا ما لقاو حنى واحد غير يسوع وحدو.⁹و كي كانوا هابطين من الجبل وصاهم يسوع وقال لهم: "ما تقولوا لحتى واحد على الشيء اللي شفتوه حتى يقوم ابن الانسان من بين الموتى". ¹⁰و سقساوه التلامذة و قالوا: "علاه مالا الكتبة يقولوا باللي لازم ايليا هو اللي يجي لول؟".¹¹جاوبهم يسوع و قال: "ايليا يجي هو لول و يرد كل شيء. ¹²بالصح نقول لكم: جاهم ايليا بالصح ما عرفوهش, و داروا فيه ما داروا. هكذاك حتى ابن الانسان هو ثاني راح يتعذب على يديهم". ¹³عاد باه فهموا التلامذة باللي كان يهدر على يوحنا المعمدان. شفاء شاب ساكنو جن¹⁴و كي وصلوا للغاشي جاه راجل و سجدلو ¹⁵و قالو: "يا سيدي, ارحم وليدي راه يتوجع و يتصرع ياسر, و ديما ديما يطيحلي ف النار و ف الماء. ¹⁶جبتوا للتلامذة تاعك بالصح ما قدروش يشفوه".¹⁷قال لهم يسوع: "يا واحد الجيل اللي بلا ايمان و غير يتلوى, حتى لوقتاه نقعد معاكم؟ حتى لوقتاه نستحملكم؟ هاتوه عندي لهنا!". ¹⁸و كي نهر عليه يسوع, خرج منو الجن, و برى الطفل في هاذيك الساعة بالذات.¹⁹و من بعد جاو التلامذة عند يسوع كي كان وحدو و قالوا: "علاه احنا ما قدرناش نخرجوه؟". ²⁰قال لهم يسوع: "على خاطر ما عندكمش ايمان. نقول لكم الحق: لو كان جاء عندكم ايمان قد حبة الزريعة تاع الخردل لو كان كنتوا تقولوا لهاذا الجبل: هز روحك من هنا و روح لهيه كان يتهز و ما يكون حتى شيء صعيب عليكم. ²¹بالصح هذا النوع تاع الجنون ما يخرج غير بالصلاة و الصوم".²²و في الوقت اللي كانوا يروحوا و يجِيوْ فيه على الجليل قال لهم يسوع: "ابن الانسان راح يطيح في يدين الناس ²³و راح يقتلوه, و في ثالث يوم يحيا من بين الموتى". و كي سمعوا هذا لكلام حزنوا ياسر. لغرامة تاع الهيكل²⁴و كي وصلوا لكفرناحوم جاو جماعة المكس تاع زوز دراهم لبطرس و قالوا: "المعلم تاعكم ما يخلصش الزوز دراهم؟". ²⁵قال: "يخلص". و دخل للبيت بالصح يسوع سبقوا في لكلام و قال: "واش رايك ا سمعان؟ من عند شكون يدِيوْ ملوك الدنيا لغرامة و الا المكس, من عند اولاد لبلاد و الا من عند البرانية؟".²⁶قال بطرس: "من عند البرانية". قال يسوع: "مالا اولاد لبلاد راهم احرار ما يخلصوش. ²⁷بالصح باه ما نعثروهمش, روح للبحر و ارم الصنارة, و الحوتة لولا اللي تخرجها تلقى في فمها قطعة تاع دراهم , اداها و روح خلص عليّا و عليك".

Chapter 18

¹في هاذيك الساعة جاو التلامذة ليسوع و قالوا: "شكون هو اعظم واحد في ملكوت السماوات؟". ²عيط يسوع لواحد الطفل صغير و حطو في الوسط ³و قال: "نقول لكم الحق: لو كان ما ترجعوش و توليو كيما لولاد الصغار ما تدخلوش لملكوت السماوات.⁴اللي يهبط من روحو كيما هذا الطفل الصغير يكون هو اعظم واحد في ملكوت السماوات. ⁵و اللي يقبل طفل صغير كيما هذا على جال اسمي يسمى قبلني انا. ⁶و اللي يكون سبة على جالو يطيح واحد من هاذو الصغار المؤمنين بيّا خير ليه لو كان يروح يعلق رحى في رقبتو ويغرق في عمق لبحر.⁷يا ويل هاذي الدنيا من العثرات! لابد تجي العثرات, بالصح يا ويل الانسان اللي تجي العثرات على يدو! ⁸اذا كانت يدك و الا رجلك عثرة ليك قصهم و ارميهم عليك. خير تدخل لحياة او انت بلا رجل و الا بلا يد خير من تدخل للنار الدايمة و انت بيديك و رجليك.⁹اذا كانت عينك معثرة ليك قلعها و ارميها عليك. خير ليك تدخل للحياة اعمى خير من اللي تدخل لنار جهنامة و انت تشوف. لمثل تاع لخروف اللي همَل¹⁰شوفوا ما تحقروا حتى واحد من هاذوك الصغار, على خاطر نقول لكم باللي لملايكات تاعهم في السماوات كل وقت يشوفوا وجه بابا اللي في السماوات. ¹¹على خاطر ابن الانسان جا باه يمنّع الشيء اللي ضاع.¹²واش حاسبين مالا؟ لو كان واحد جا عندو مياة خروف, و راحلو واحد منهم, ياخي يخلي التسعة و تسعين خروف في الجبل و يروح يفركت على لخروف اللي راح؟ ¹³و لو كان يلقاه, نقول لكم الحق: راح يفرح بيه اكثر من التسعة و تسعين اللي ماراحوش. ¹⁴هكا حتى باباكم اللي في السماوات ما يحب حتى واحد من هاذوك الصغار يهلك. اذا خوك غلط في حقك¹⁵" و اذا كان خوك غلط معاك روح عندو و لوم عليه بينك و بينو وحدكم. اذا كان سمع لك تكون ربحت خوك. ¹⁶و اذا كان ما حبش يسمع لك, زيد ادي معاك ثاني واحد و الا زوز خاوة, على خاطر كل كلمة تقوم على زوز شهود و الا ثلاثة.¹⁷و اذا كان ما حبش يسمع لهم قول للكنيسية. و اذا ما حبش يسمع من الكنيسية يولي بالنسبة لك كيما الوثني و الا العشار.¹⁸نقول لكم الحق: كل ما تربطوه على لرض يكون مربوط في السماء, و كل ما تحلوه على لرض يكون محلول في السماء. ¹⁹و نزيد نقول لكم ثاني: اذا زوز منكم تفاهموا على اي شيء يطلبوه في لرض يكون ليهم من عند بابا اللي في السماوات, ²⁰على خاطر وين يتلموا زوز و الا ثلاثة باسمي انا نكون لثم في وسطهم". لمثل تاع العبد اللي ما يسامحش²¹وقتها قدّم ليه بطرس و قال: "يا ربي, قداه من مرة يغلط معايا خويا و انا نسامحو؟ سبعة خطرات؟" ²²قال يسوع: "لا ما نقولش لسبعة خطرات, بالصح سبعين مرة سبعة خطرات.²³على هذا الشيء يشابه ملكوت السماوات واحد الراجل مولى رزق حب يحاسب الخدامة تاعو. ²⁴و كي بدا يحاسب فيهم جابولو واحد مديون بعشرة الاف قطعة. ²⁵و على خاطر ما كانش عندو باه يخلص الدين حكم عليه مولى الرزق باه يتباع هو و اولادو و مرتو و كل ما يملك و يخلص الدين اللي عليه.²⁶ولى هاذاك لخديم طاح على ركايبو و سجد قدام سيدو وقالو: يا سيدي اصبر عليا و ضرك نخلصك في كل شيء. ²⁷حن عليه مولى الرزق و سيْبو, و سامحو في الدين اللي عليه.²⁸و كي خرج من لثم لقى واحد من صحابو الخدامين, و كان مديون ليه بمياة ن دينار, حكمو و خنقو و قالو: خلصني في دراهمي اللي نسالهملك ضرك بعد. ²⁹طاح الراجل على ركايبو قدام صاحبو و قالو: اصبر عليا ضرك نخلصك في كل شيء.³⁰بالصح هو ما حبش يسامحو و راح دخلو للحبس حتى يخلص الدين. ³¹و كي شافوا صحابو لخرين الشيء اللي صرى, ما عجبهمش الحال و راحوا حكاوْ الشيء اللي صرى لسيدهم مولى الرزق.³²و كي سمع مولى الرزق يالشيء اللي صرى عيطلو و قالو: يا واحد الشرير, انا هاذاك الدين كامل سامحتك فيه على خاطر حاولتني. ³³كان من المفروض انت ثاني ترحم صاحبك الخدام كيما رحمتك انا؟³⁴و غضب عليه سيدو و سلمو باه يعذبوه حتى يخلص الدين اللي عليه. ³⁵هكا ثاني بابا اللي في السماوات يدير لكم اذا انتوما ما تسامحوش من قلوبكم الغلطات كل واحد لخوه".

Chapter 19

¹و كي كمل يسوع هذا لكلام راح من الجليل و وصل لجوايه اليهودية من وراء الاردن. ²و تبعوه ناس ياسر حتى لثمة وهو شفاهم.³و جاو عندو الفريسيين باه يطيحوه في لكلام و قالوا: "حلال على الراجل يطلق مرتو لاي سبة؟". ⁴و هو جاوبهم و قال: "ما قريتوش اللي خلقهم من لول خلقهم ذكر وانثى؟⁵و قال: "على جال هذا الشيء يخلي الراجل باباه و امو و يلصق في مرتو, ⁶و يولِيوْ في زوز بدن واحد. و اللي يلموا الله ما يفرقوش العبد."⁷و زادوا قالوا: "علاه مالا موسى وصى باه نمدولها ورقة طلاق و تكون طالقة؟". ⁸قال لهم: "على جال قلوبكم القاسية سمحلكم موسى باه تطلقوا نساكم. بالصح من الاول ماكانش هكَا. ⁹و نقول لكم: " كل من يطلق مرتو بلا ما تكون السبًة الزنى و يتزوج من واحدة اخرى يزني, و اللي يتزوج بواحدة مطلقة يزني."¹⁰قالوا التلامذة تاعو: "مالا اذا كان كيما هكًا حالة الراجل مع لمرى, خيرلو كان ما يتزوجش." ¹¹قال لهم: "مش كل الناس يقبلوا هاذ لكلام بالصح غير اللي معطية ليهم, ¹²كاين اللي من نهار ولدوا و همًا عاجزين على الزواج, و كاين اللي الناس همَا اللي جعلوهم ماهمش قادرين على الزواج, و كاين اللي وحدهم ما يتزوجوش على جال ملكوت السماوات. اللي قادر يقبل هاذا الشئ يقبلوا". يسوع يبارك لولاد الصغار¹³وقتها جابولو ذراري صغار باه يحط يدو عليهم و يصلي, بالصح بخسوهم التلامذة. ¹⁴اما يسوع قال لهم" خلوا لولاد يجيو عندي ما تحَرموش عليهم على خاطر ملكوت السماوات يكون للناس اللي كيما هما". ¹⁵و حط يديه عليهم و من بعد راح من لثم. الشاب اللي عندو لمال¹⁶و جاه واحد و قالو: "يا المعلم الصالح, واش هو الصلاح اللي لازمني نديرو باه نربح لحياة الدايمة؟". ¹⁷قالو يسوع: " علاه تعيطلي صالح؟ كاين غير واحد برك صالح و هو الله. و اذا كان حبيت تنا ل لحياة الدايمة اعمل بالوصايا".¹⁸قال لو: "واش من وصايا؟". قال يسوع: "ما تقتلشز ما تزنيش. ما تسرقش. ما تشهدش بالزور. ¹⁹قدر باباك و امك, حب كيما تحب روحك".²⁰قال هاذاك الشاب: "هاذي الكل من صغري و انا نعمل بيها. واش يخصني نزيد ندير؟". ²¹قال يسوع: "اذا كان حبيت تولي كامل روح بيع كل واش تملك و صدق على الفقراء, و هكا يولي عندك كنز ف السماء, و من بعد ارواح تبعني". ²²و كي سمع الشاب هاذا لكلام راح روًح و هو حزين على خاطر كان عندو اموال ياسر.²³و قال يسوع للتلامذة تاعو: "نقول لكم الحق: صعيب ياسر على واحد غني باه يدخل لملكوت السماوات. ²⁴و نزيد نقول لكم ثاني: الجمل اسهل عليه كي يعدي من ثقبة لبرى من الغني باه يدخل لملكوت الله.²⁵و كي سمعوا التلامذة هاذا لكلام حاروا و قالوا: "مالا شكون يقدر يمنع؟". ²⁶تلفت لهم يسوع و قال لهم:" هاذا الشيء ماهوش مقدور عليه عند الناس, بالصح عند الله كل شيء مقدور عليه". ²⁷وقتها هدر بطرس و قال: "و احنا رانا سيبنا كل شيء و تبعاك. واش تمدلنا؟".²⁸قال لهم يسوع: "نقول لكم الحق: انتوما اللي تبعتوني, نهار اللي يتربع الابن على عرش المجد, وقت اللي يتجدد فيه كل شيء, انتم ثاني تقعدوا معاه على اثناش ن عرش باه تحكموا على عروش بني اسرائيل في ثناش.²⁹و كل من خلى ديار, و الا خاوة و الا خواتات و الا اب والا ام و الا زوجة و الا اولاد و الا جنانات على جال اسمي يرجعوا مياة مرة و يربح لحياة الدايمة. ³⁰بالصح ياسر من لوالى يولوا هما التوالى و التوالى يولوا هما لوالى.

Chapter 20

¹"يشابه ملكوت السماوات لواحد الراجل مولى رزق خرج الصباح بكري باه يكري خدامين للجنان تاعو, ²و تفاهم مع الخدامين باه يخلصهم دينار واحد في النهار, و هكا بعثهم للجنان.³و من بعد جوايه الثلاثة زاد خرج و لقى خدّامين واحد اخرين قاعدين في السوق بلا خدمة, ⁴قال لهم روحوا حتى انتم اخدموا في الجنان و نعطيكم حقكم. ولاو راحوا يخدموا.⁵و زاد خرج على الستة و على التسعة و دار كيما المرة لولى ثاني. ⁶و كي زاد خرج على لحداش لقى واحد اخرين قاعدين بلا خدمة, قال لهم: علاه راكم قاعدين بلا خدمة نهار كامل؟ ⁷قالوا: حتى واحد ما كرانا باه نخدموا عندو. قال لهم: روحوا انتم ثاني للجنان اخدموا و اديو حقكم.⁸و كي عشات لعشية قال مول الجنان للراجل اللي مكلفو باه يخلص الخدامين: عيط للخدامة و اعطيهم حقهم و ابدى من لخرين حتى توصل لل اولين. ⁹جاو تاع لحداش و اداو الكل دينار دينار. ¹⁰و كي وصلت دالة لولين كانوا حاسبين باللي راح يخلصهم اكثر من لخرين. بالصح اعطاهم حتى همّا دينار.¹¹و هو يخلص فيهم ما عجبهمش الحال من مولى الرزق ¹²و قالوا: هاذوك لخرين خدموا غير ساعة واحدة, و خلصتينا كيف كيف احنا واياهم و احنا نهار كامل واقفين للقايلة!¹³اما هو قال لواحد منهم: ا صاحيبي, انا ما ظلمتكش! ياخي تفاهمت معايا على دينار؟ ¹⁴خلاص ادي صواردك و روح, ما يهمكش فيّا انا حاب نخلص الخدّام لخر كيما انت.¹⁵و الا تسالني كيفاه نتصرف في مالي؟ و الا حاسدني على خاطر كريم؟ ¹⁶هكّا يكونوا لخرين همّا لوالى و لولين همّا لخرين, على خاطر المعروضين ياسر بالصح لمخيرين قلاّل". يسوع يخبر على الموت و القيامة تاعو من بين الموتى¹⁷و كي كان يسوع طالع لاورشليم دا التلامذة وحدهم على جيهة في الطريق و قال لهم: ¹⁸"رانا طالعين لاورشليم, وين يطيح ابن الانسان في يد رياس الكهنة و الكتبة, و همّا يحكموا عليه بالموت, ¹⁹و يسلموه للامم يستهزاو بيه و يضربوه و يصلبوه, و ثالث يوم يقوم من بين الموتى". الشيء اللي طلباتو ام ولاد زبدي من يسوع²⁰في هاذاك الوقت قدمت ام ولاد زبدي هي و اولادها و سجدت و حبت تطلب منو حاجة. ²¹قال لها: "واش تطلبي؟". قالت: "نطلب منك تخلي ولادي يقعدوا معاك في الملكوت تاعك واحد على ليمين و واحد على ليسار".²²رد عليها يسوع و قال: "ما علابالكمش و اش قاعدين تطلبوا. تقدروا تشربوا من لكاس اللي رايح نشربها انا, و تقدروا تتصبغوا بالصبغة اللي رايح نتصبغ بيها انا؟". قالوا "نعم نقدروا". ²³رد عليهم و قال: "الكاس تاعي تشربوه, و الصبغة تاعي تتصبغوا بيها. بالصح لقعاد على يميني و على يسارى منقدرش نمدوا غير للناس اللي بابا وجدو ليهم باه يقعدوا فيه". ²⁴و كي سمعوا التلامذة العشرة لخرين هذا لكلام غاظهم الحال من الخاوة ولاد زبدي.²⁵ولّى يسوع عيط لهم و قالهم: "راكم علابالكم باللي الرياس تاع هاذي الدنيا يسيطروا عليهم, و الزعماء يتسلطوا عليهم. ²⁶اما انتوما ما يكونش هاذا الشيء بيناتكم. بالصح اللي يحب يكون فيكم كبير يكون ليكم خديم, ²⁷و اللي يحب يكون فيكم لول يكون هو لخديم فيكم, ²⁸كيما ابن الانسان ما جاش باه يخدموا عليه بالصح جا باه يخدم, و باه يمد روحو فدية على ناس ياسر". يسوع يشفي زوز عميان في اريحا²⁹و كي كانوا خارجين من اريحا تبعوه ناس ياسر, ³⁰و كان واحد الزوز عميان قاعدين على حاشية الطريق. و كي سمعوا باللي يسوع معدي من لثم بداو يعيطوا و يقولوا: "ارحمنا يا سيدي, يا ولد داود!". ³¹و بداو الناس يبخصوا فيهم باه يسكتوا, بالصح همّا بقاو يعيطوا على طول اصواتهم و يقولوا: "ارحمنا يا سيدي, يا ولد داود!".³²ولى وقف يسوع و عيط لهم و قال لهم: "واش تستحقوا واش نديرلكم؟". ³³قالوا: "يا سيدي, افتح لنا عينينا!". ³⁴حن عليهم يسوع و مسهم على عينيهم, و في هاذاك الوقت بالذات تحلت عينيهم ولاو يشوفوا و و بداوْ يتبعوا في يسوع.

Chapter 21

¹و كي قربوا لاورشليم و وصلوا لبيت فاجي في جبل الزيتون, وقتها بعث يسوع زوز من التلامذة ²و قال لهم: "روحوا ادخلوا للقرية هاذي اللي مقابلتكم, راح تلقاو بهيمة موَحلة و معاها جحش, حلوها و جيبوهم. ³و اذا كاش واحد قالكم حاجة, قولولو: ربي يحتاجهم. ضرك يخليكم تدِيوهم".⁴و هاذا الشيء كامل صرى باه يتم واش قال النبي: ⁵"قولوا لبنت صهيون: سلطانك راح يجيك متواضع, راكب على بهيمة و جحش يتبع فيها".⁶و راحوا التلامذة في زوز و داروا الشيء اللي قاللهم عليه يسوع, ⁷و جابوا لبهيمة و الجحش معاها, و حطوا قشهم فوقها و قعد يسوع عليهم. ⁸و ناس ياسر فرشوا قشهم في الطريق. و وحايد اخرين قصوا اعراف الشجر و فرشوها في الطريق.⁹و الناس اللي كانوا يتبعوا فيه وراه و قدامو كانوا يعيطوا و يقولوا: "اوصانا لابن داود! مبارك اللي جاي بإسم ربي! اوصنا في لعلالي!". ¹⁰و كي دخل لاورشليم لمدينة كاملة دخلت في بعضاها و الناس الكل يسقسِيو: "شكون هو هاذا؟". ¹¹قالولهم: "هاذا هو يسوع النبي اللي من ناصرة الجليل". يسوع ينقي الهيكل¹²و دخل يسوع للهيكل تاع الله و سحت الناس الكل اللي كانوا يبيعوا و يشرِيوْ في الساحة تاع الهيكل, و قلب الميَد تاع الصرّافة و لكراسي تاع بياعة لحمام ¹³و قال لهم: "مكتوب: بيتي يسموه بيت الصلاة, و انتوما رجعتوه غار تاع سراقين!". ¹⁴و جاو ليه ناس عميان و عيَاب للهيكل و هو رتحهم.¹⁵و الكتبة و رياس الكهنة كي شافوا لعجايب اللي دارهم, و كي سمعوا لولاد يعيطوا في وسط الهيكل و يقولوا: "اوصنا لوليد داود!". تغششوا ¹⁶و قالوا لو: "اك تسمع فيهم واش قاعدين يقولوا؟". قال لهم يسوع: "نعم راني نسمع! علاه عمركم ما قريتوا: وجّدت تسبيح من فم لاولاد و الذراري؟". ¹⁷و من بعد خلاهم و راح خارج لمدينة لبيت عنيا و بات لثمة. شجرة الكرطوس تيبس¹⁸و في الصباح كي كان راجع للمدينة جاع, ¹⁹و شاف شجرة تاع كرطوس على حاشية الطريق, قصدها و كي وصل لها ما لقى فيها حتى شيء غير لورق برك. قال لها: "من ليوم عمرو ما يكون فيك ثمار!". و في وقتها بالذات يبست هاذيك الشجرة تاع الكرطوس.²⁰و كي شافوا التلامذة واش صرى تعجبوا و قالوا: "كيفاه يبست شجرة الكرطوس ثم ثم؟". ²¹قال لهم يسوع: "نقول لكم الحق: اذا كان عندكم ايمان و ما تشكوش, مش غير تعملوا امر الشجرة برك, بالصح حتى لو كان تقولوا لهاذا الجبل: اتهز و طيح في لبحر يصرى الشيء الي قلتوه. ²²كل ما تطلبوه في الصلاة و انتوما مآمنين باللي راح يكون تنالوه". منين جا سلطان يسوع²³و كي دخل للهيكل جاو ليه ريّاس الكهنة و الشيوخة تاع الشعب و هو كان يعلم و سقساوه: "بواش من سلطان راك تعمل في الشيء اللي تدير فيه؟". ²⁴جاوبهم يسوع و قال لهم: "و حتى انا ثاني نسقسيكم على حاجة واحدة, كي تجاوبوني نقول لكم بواش من سلطان ندير هذا الشيء:²⁵المعمودية تاع يوحنا المعمدان: من عند شكون كانت؟ من عند الله و الا من عند الناس؟". و كي خمموا مع ارواحهم قالوا: "لو كان نقولوا من عند الله, يقول لنا: علاش مالا ما تامنوش بيه؟ ²⁶و اذا قلنالو: من عند الناس, نخافوا لا ينوض فينا الشعب, على خاطر يوحنا كيما نبي عند الناس الكل". ²⁷و لاو ردوا على يسوع و قالوا: "ما نعرفوش". قال لهم هو ثاني: "حتى اما ما نقولش بواش من سلطان ندير الشيء اللي راني ندير فيه. لمثل تاع زوز اولاد²⁸"واش رايكم؟ كان واحد الراجل عندو زوز اولاد, راح لولدو لول و قالو: يا وليدي روح اليوم اخدم في الجنان. ²⁹قالو ولدو: ما نروحش. بالصح من بعد ندم و راح. ³⁰و راح لوليدو الثاني و قالو كيف كيف. قالو ولدو الثاني: معليش يا سيدي. ضرك نروح. و ما راحش.³¹شكون من هاذو في زوز عمل واش طلب منو باباه؟". قالوا: "لول". قال لهم يسوع نقول لكم الحق: السماسرة و اللي يزنيو راح يسبقوكم لملكوت الله, ³²على خاطر جاكم يوحنا في طريق الحق بالصح انتوما ما امنتوش بيه, اما السماسرة و اللي يزنيو امنوا بيه. و حتى للخر كي شفتوا بعينيكم ما ندمتوش و ما امنتوش بيه. لمثل تاع الخدامين و في جنان لعنب³³اسمعوا نزيدكم مثل واحد اخر: و كان واحد الراجل مولى رزق غرس جنان تاع كرم, و سيج عليه, و حفر فيه معصرة, و بنى فيه برج, و سلموا للكرامين و راح سافر. ³⁴و كي قرب وقت اللي يحصد فيه الثمار بعث الخدامين تاعو للكرامين باه يدي المحصول.³⁵راحوا الكرامين حكموا الخدامين اللي ضربوه ضربوه و اللي قتلوه قتلوه و اللي دمغوه دمغوه. ³⁶و من بعد زاد بعث خدامين اخرين اكثر من لولين, زادوا دارولهم كيف كيف. ³⁷و اخر حاجة بعث لهم ولدو قال: ضرك يخافوا من ولدي!³⁸اما الكرامين كي شافوا الابن تفاهموا بيناتهم و قالوا: هذا هو لوريث! ارواحوا نقتلوه و ندِيو احنا الورثة! ³⁹و اداوه و خرجوه من الجنان و قتلوه.⁴⁰و كي يجي مولى الرزق, واش يدير في هاذوك الكرامين؟". ⁴¹قالوا: "هاذوك الاشرار يقتلهم و شوية فيهم, و يسلم الجنان لكرامين اخرين يمدولو المحاصيل في وقتها".⁴²قال لهم يسوع: عمركم ما قريتوا في لكتب: الحجرة اللي رماوْها البنايين ولات هي راس الزاوية؟ هذا الشيء امر ربي و احنا نشوفوه حاجة غريبة!⁴³على هاذا الشيء نقول لكم: ملكوت الله يتنحى من عندكم و يتمد لامة تخدم الثمار تاعو. ⁴⁴و اللي يطيح على هاذي الحجرة يتكسر, و اللي تطيح عليه الحجرة تدقدقو!".⁴⁵و كي سمعوا رياس الكهنة و الفريسيين لمثال تاعو, فهموا باللي يهدر عليهم, ⁴⁶و كانوا حابين يقبضوا عليه, بالصح خافوا من الغاشي, على خاطر الناس كانوا حاطينوا نبي.

Chapter 22

¹و زاد كلمهم يسوع ثاني بأمثال و قال: ²"يشابه ملكوت السماوات لواحد السلطان دار عرس ولدو, ³و بعث الخدامين تاعو باه يعيطوا على الناس المعروضين للعرس, بالصح همّا ما حبوش يجِيوْ.⁴زاد بعث لهم خدامين اخرين وقال لهم قولوا للمعروضين: اني وجدت لغدا و ذبحت الثيران و لكباش المخزونة, و كل شيء راه واجد, ارواحوا للعرس!⁵بالصح هما رخفوا ارواحهم و راحوا كل واحد في حالو, اللي راح للجنان تاعو, و اللي راح للتجارة تاعو, ⁶و كاين حتى اللي حكموا الخدامين سبوهم و قتلوهم, ⁷و كي سمع السلطان بعث العسكر و قتل هاذوك القتّالين و حرق مدينتهم.⁸و من بعد قال للخدامين: العرس واجد, بالصح المعروضين ما كانوش يستاهلوا. ⁹روحوا اخرجوا للطرق, و جيبوا كل واحد تلقاوه اعرضوه للعرس. ¹⁰و خرجوا الخدامين للطرق و لموا كل من لقاوه يصلح و الا ما يصلحش.و تعبى هاذاك العرس بالمعروضين.¹¹و كي دخل السلطان باه يتفقد المعروضين, شاف واحد ما كانش لابس لبسة تاع فرح. ¹²قالّو: يا صحيبي كيفاه دخلت هنا و انت ماكش لابس لبسة العرس؟ سكت الراجل.¹³ولى السلطان قال للخدامين تاعو: كتفوه من يديه و رجليه, و هزوه ارموه لبرى في الظلمة. وين كاين لبكاء و الرجفة. ¹⁴على خاطر المعروضين ياسر بالصح لمخيرين قلال". المكس تاع قيصر¹⁵و من هاذيك الساعة راحوا الفريسيين و تشاوروا باه يصيدوه بكاش كلمة. ¹⁶و بعثولوا التلامذة تاعهم مع جماعة هيرودس قالوا: "يا معلم, احنا علابالنا باللي راك صادق و تعلم في الناس طريق ربي بالحق, و ما يهمك حتى واحد, و ما تشوفش للوجوه. ¹⁷قول لنا: واش تقول حلال نخلص المكس للقيصر و الا لا؟".¹⁸عرف يسوع لخبث تاعهم و قال: "وعلاه تجربوا فيّا يا واحد المنافقين؟ ¹⁹اعطوني دينار نشوفوا". جابولو دينار.²⁰قال لهم: "هاذي التصويرة و لكتيبة تاع شكون؟". ²¹قالوا: "تاع قيصر". قال لهم: "مالا مدوا حق قيصر لقيصر و مدوا حق الله لله". ²²و كي سمعوا كيفاه جاوبهم تعجبوا في الهدرة تاعو و خلاوه و راحوا. لقيامة تاع الموتى²³و في هاذاك النهار جاو ليه الصدوقيين, اللي ما يصدقوش لقيامة, و سقساوه ²⁴و قالوا: "يا معلم, قال موسى: لو كان واحد يموت و ما يخليش ذرية وراه, يزوج خوه بالمرى تاعو و يجيب ذرية على اسم خوه.²⁵كان عندنا سبعة خاوة, تزوج لول و مات. و ما خلاش ذرية, ولى خوه رجّع لمرى. ²⁶و حتى هو مات بلا ما يخلي ذرية و الثالث وهكا صرى حتى ماتوا في سبعة. ²⁷و من بعد زادت ماتت لمرى حتى هي. ²⁸نهار القيامة راح تكون مرة شكون فيهم؟ على خاطر كانت متزوجة بيهم في سبعة!"²⁹جاوبهم يسوع و قال: "راكم غالطين على خاطر ما تعرفوش لكتب ولا قوة الله. ³⁰على خاطر في القيامة لا يزوجوا لا يتزوجوا, بالصح يكونوا كيما الملايكة تاع الله في السماء.³¹اما من جيهة قيامة الموتى, ما قريتوش الشيء اللي قال عليه الله: ³²انا اله ابراهيم و اله اسحاق و اله يعقوب؟ و الله ما هوش اله تاع موتى هو اله ناس حيين". ³³و كي سمعوه الناس واش قال حاروا من التعليم تاعو. اعظم وصية³⁴اما الفريسيين كي سمعوا بيه كيفاه سكّت الصدوقيين تلموا مع بعضاهم و راحوا عندو, ³⁵و سقساه واحد منهم, و هو واحد من علماء الشرع, باه يجربو قالو: ³⁶"يا معلم, وش هي اعظم وصية في شرع الله؟".³⁷قال يسوع: "تحب ربي الهك من كل قلبك, و من كل روحك, و من كل فكرك. ³⁸هاذي هي لوصية لولى و الاعظم فيهم الكل.³⁹و الثانية كيما هي بالضبط: تحب قريبك كيما روحك. ⁴⁰بهاذو الزوز وصيات يتعلق كل شرع الله و الانبياء". المسيح و داود⁴¹و كي كانوا الفريسيين متلميين سقساهم يسوع ⁴²و قال: "واش قولكم في المسيح؟ هو ولد شكون؟" قالوا: "بن داود".⁴³قال لهم: "مالا كيفاه داود كي يكون في الروح يعيطلو ربي؟ وقت اللي قال: ⁴⁴"قال الرب لربي: اقعد على يميني حتى نحط عديانك تحت رجليك.⁴⁵اذا كان داود يعيطلو ربي, كيفاه يكون ولدو؟". ⁴⁶واحد فيهم ما قدر يرد عليه بكلمة. و من هاذاك النهار واحد ما عاد يتجرأ و يسقسيه في اي حاجة.

Chapter 23

¹وقتها كلّم يسوع الغاشي و التلامذة تاعو معاهم ²و قال لهم: "الكتبة و الفريسيين تربعوا على الكرسي تاع موسى, ³و كل شيء يقولوا لكم تحرسوا عليه احرسوا عليه و ديروه, بالصح ما تعملوش اعمالهم, على خاطر همّا يهدروا اما لفعال ما كانش.⁴يوجدوا احمال ثقيلة بالسيف ما تتهز و يحطوها على اكتاف الناس, و همّا ما يحركوش حتى شعرة باه يعاونوهم, ⁵و لعمال الكل اللي يعملوها غير باه ينعتوا ارواحهم للناس: يعرضوا في الشاش و يطولوا في البرنوس,⁶يحبوا ديما يقعدوا في اعز مكان في لعراس, و الصفوف لولى تاع المجالس, ⁷و يحبوا الناس تسلم عليهم في لسواق, و يحبوا الناس كي يعيطولهم: سيدي سيدي!⁸اما انتوما ما تقولوا لحتى واحد سيدي, على خاطر المعلم تاعكم واحد و هو المسيح, و انتوما الكل خاوة, ⁹و ما تعيطوا لحتى واحد فوق لرض اب, على خاطر باباكم واحد اللي هو في السماوات. ¹⁰و ما تعيطوا لحتى واحد معلم, على خاطر المعلم تاعكم واحد و هو المسيح.¹¹اكبر واحد فيكم يكون هو لخديم تاعكم. ¹²اللي يعلي في يروحو يهبط. و اللي يهبط من روحو يعلى. الويلات للكتبة و الفريسيين¹³"يا ويلكم يا الكتبة و الفريسيين المنافقين! على خاطر تقفلوا ملكوت السماوات في وجه الناس, لا انتوما تدخلوا و لا تخلِيوْ لخرين يدخلوا. ¹⁴يا ويلكم يا لكتبة و الفريسيين المنافقين! على خاطر تاكلوا مال ليتامى, و تلعبوها تطولوا في الصلاة, راح تتعذبوا عذاب شديد. ¹⁵يا ويلكم يا الكتبة و الفريسيين المنافقين! على خاطر تجولوا لبحر والبر باه تكسبوا مؤمن واحد للدين تاعكم, و كي يجي تجعلوه يستاهل جاهنامة اكثر منكم.¹⁶يا ويلكم يا القادة العميان! تقولوا: اللي يحلف بالهيكل ماهوش ملزم بالحلف تاعو, بالصح اللي يحلف بالذهب تاع الهيكل يكون ملزم بالحلف تاعو. ¹⁷يا جاهلين و يا عميان! شكون شانو اعظم من لاخر الذهب و الا الهيكل للي يقدس الذهب؟¹⁸و تقولوا: اللي يحلف بالمذبح ما هوش ملزم بالحلف تاعو, بالصح اللي يحلف بالذبيحة اللي تتذبح فوق المذبح يكون ملزم بالحلف تاعو. ¹⁹يا جاهلين و يا عميان! شكون اللي شانو اعظم من لاخر: الذبيحة و الا المذبح اللي يقدس الذبيحة؟²⁰ اللي يحلف بالمذبح يكون حلف بيه و بكل ما فيه! ²¹و اللي يحلف بالهيكل يكون حلف بيه و باللي ساكن فيه, ²²و اللي يحلف بالسماء يكون حلف بعرش الله و المتربع عليه.²³يا ويلكم يا الكتبة والفريسيين يا واحد المنافقين! تمدوا لعشور تاع النعناع و الشبث و الكمون, و خليتوا اثقل حاجة في الشرع: الحق و الرحمة و ليمان. كان لازم تديروا هاذي و ما فرطوش في هاذيك. ²⁴يا القادة العميان! يا اللي تصفوا ع الذبانة و تبلعوا الجمل.²⁵يا ويلكم يا الكتبة و الفريسيين يا واحد المنافقين! تنظفوا الكاس والصحفة من لبرى, و همّا مليانين من الداخل بالزنا و السرقة. ²⁶يا الفريسي الاعمى! نظف قبل الكاس و الصحفة من الداخل تنظاف من برى ثاني.²⁷يا ويلكم يا الكتبة و الفريسيين يا واحد المنافقين! على خاطر انتوما تشابهوا للقبورة المجيرة من برى تبان مليحة, بالصح من الداخل مليان بعظام الموتى و كل نجاسة. ²⁸حتى انتوما ثاني هكا: من لبرى تبانوا للناس صالحين, بالصح انتوما من الداخل مليانين بالنفاق و الاثم.²⁹يا ويلكم يا الكتبة و الفريسيين يا واحد المنافقين! على خاطر تبنِيوْ لقبورة تاع الانبياء و تزينوا لمدافن تاع الصالحين, ³⁰و تقولوا: لو كان جينا في زمان جدودنا ما كنّاش نشاركوا في دم الانبياء. ³¹راكم تشهدوا على ارواحكم باللي انتوما اولاد قتالين الانبياء.³²الشيء اللي بقى على جدودكم كملوه انتوما. ³³يا واحد لحنوشة اولاد لفاعي! كيفاه راح تمنعوا من عذاب جاهنامة؟³⁴على هاذيك انا راح نبعث لكم انبياء وحكماء و كتبة, اللي تقتلوه تقتلوه واللي تصلبوه تصلبوه, و منهم اللي تضربوهم في مجالسكم, و تحاوزوهم من بلاد لبلاد, ³⁵هكا تتحملوا مسؤولية الدم البريء اللي ساح على لرض, من دم هابيل الصدّيق حتى لدم زكريا بن برخيا اللي قتلتوه بين الهيكل و المذبح. ³⁶نقول لكم الحق: هذا الشيء كامل يصرى في هاذا الجيل! يسوع يبكي على اورشليم³⁷"اورشليم, يا اورشليم! يا قتالة ارواح لنبياء يا راجمة المرسولين اللي جاوك, قدّاه من مرة حبيت نلم اولادك كيما تلم الدجاجة لفلالس تحت جنحاها, بالصح انتوما ما حبيتوش! ³⁸هاي داركم تقعد لكم خربة. ³⁹نقول لكم: من اليوم ما تزيدوش تشوفوني حتى يجي النهار اللي تقولوا فيه: تبارك الله على اللي جاي باسم ربي!".

Chapter 24

¹و من بعد خرج يسوع من الهيكل و راح, جاو التلامذة عندو و وراولو البرج تاع الهيكل من بعيد. ²قال لهم يسوع: "شفتوا هاذي الكل؟ نقول لكم الحق: ما تبقى هنا حتى حجرة فوق حجرة غير و تريب!".³و كي كان قاعد في جبل الزيتون’ جاو ليه التلامذة وحدهم و قالوا: "قول لنا وقتاه يصرى هاذا الشيء؟ واش هي لمارة تاع الوقت اللي ترجع فيه و وقتاه تفنى الدنيا؟". ⁴رد عليهم يسوع و قال: "شوفوا! واحد ما يغلطكم. ⁵راح يجيو ياسر بإسمي و يقولوا: انا هو المسيح! و راح يغلطوا ناس ياسر.⁶و راح تسمعوا بالحروب و لخبار تاع الحروب. شوفوا ما تخافوش, هاذي الكل لازم تكون, بالصح ما زال مشها لاخرة. ⁷راح تجور الامم على بعضاها, و السلاطين على بعضاهم, و يكون الجوع و الامراض و زلازل في اماكن ياسر. ⁸بالصح هاذي الكل ما هي غير البدية تاع لوجاع.⁹في هاذاك الوقت يسلموكم للعذاب و يقتلوكم, و تكونوا مكروهين عند الناس الكل على جال اسمي. ¹⁰و قتها ياسر اللي يخلِيوْ الايمان و يبيعوا بعضاهم. ¹¹و يظهروا ياسر من الانبياء الكذبة و يغلطوا ناس ياسر.¹²و يكثر لفساد و تبرد لمحبة في قلوب اغلب الناس, ¹³بالصح اللي يصبر حتى للخر هاذاك يمنع. ¹⁴بالصح لاخرة تجي بعدما يسمعوا سكان لرض كاملين ببشارة الملكوت باه تكون شاهدة عليهم.¹⁵"نهار اللي تشوفوا "نجاسة لخراب" اللي قال عليها النبي دانيال قايمة في المضرب المقدس- باه اللي يقرى يفهم- ¹⁶وقتها الناس اللي في اليهودية يهربوا للجبال, ¹⁷و اللي في السطح ما ينزلش حتى للدار باه كاش ما يهز معاه, ¹⁸و اللي في الجنان ما يوليش وراه باه يهز قشو.¹⁹يا ويل للنساء اللي بلكرش و اللي يرضعوا في هاذيك ليام! ²⁰صلوا باه ما يصراش هاذا الشيء في الشتاء و الا نهار سبت, ²¹على خاطر راح يكون وقتها ضيق كبير عمرو ما صرى من اول ما بدات الدنيا و عمرو ما راح يزيد يصرى. ²²و لو كان مش هاذيك ليام نقصت واحد ما كان يمنع. بالصح على جال لمخيرين عند الله نقصت هاذيك ليام.²³وقتها كان قال لكم كاش واحد: او المسيح هنا! و الا: او لهيه! ما تصدقوش. ²⁴على خاطر راح يقوموا مسحاء كذابين و انبياء كذابين و يديروا ايات و عجايب كبيرة, حتى كان قدروا يغلطوا حتى المخيريين ثاني. ²⁵انا قلت لكم كل شيء و نبهتكم من قبل.²⁶و اذا كان قالوا: او في الصحراء! عندكم تروحوا. و الا راه في الديار الداخل! ما تقبلوهمش. ²⁷على خاطر كيما يخرج لبرق من الشرق و يبان في الغرب, كيما هكا يكون رجوع ابن الانسان. ²⁸على خاطر وين تكون الجيفة تتلم النسورة.²⁹"و من ورى الضيقة تاع هاذيك ليام تظلام الشمس, و يطفى ضوء القمرة, و تطيح النجوم من السماء, و تتزعزع السماوات.³⁰وقتها تظهر لمارة تاع ابن الانسان في السماء. وقتها راح تنوح كل لجناس اللي في الدنيا, و يشوفوا ابن الانسان جاي على سحاب السماء بقوة و بمجد كبير. ³¹و يبعث لملايكات تاعو بصوت البوق القاوي خلاص, و يلموا المختارين تاعو من الجوايه في ربعة, من اخر الدنيا لاخر السماوات.³²من الشجرة تاع الكرطوس تتعلموا لمثل: كي يكون عرفها طري و يخَرّج لورقة, تعرفوا باللي الصيف قرّب. ³³حتى انتوما ثاني هكا, وقت اللي تشوفوا هاذا كامل صرى اعرفوا باللي الوقت راه قريب و راه على الابواب.³⁴نقول لكم الحق: ما يفوتش هاذا الجيل حتى يصرى هاذا الشيء كامل. ³⁵السماء و لرض يفناو بالصح كلامي ما يفناش. كونوا ديما واجدين³⁶"اما هاذوك ليام و هاذيك الساعة واحد ما يعلم بيهم, حتى لملايكات تاع السماوات, غير الاب برك هو وحدو اللي يعلم.³⁷و كيما صرى في ايام نوح هكذاك ثاني يصرى كي يجي ابن الانسان. ³⁸على خاطر كيما كانوا الناس قبل الطوفان ياكلوا و يشربوا و يزوجوا و يتزوجوا, حتى للنهار اللي دخل فيه نوح للفلوكة, ³⁹و ما فاقوش حتى دهم عليهم الطوفان و ادّاهم الكل, هكذاك يكون رجوع ابن الانسان.⁴⁰وقتها يكونوا زوز من الناس في الجنان, يترفع واحد و يبقى لاخر. ⁴¹و زوز نساء يرحيو على الرحى, تترفع واحدة و تبقى الاخرى. ⁴²"مالا اسهروا على خاطر ما تعلموش واش من ساعة يجي فيها سيدكم.⁴³يكون في علمكم: لو كان جا مولى الدار يعرف وقتاه يجيه السرّاق, كان سهر و ما خلاهش يسرقو. ⁴⁴على هاذا الشيء كونوا انتم ثاني موجدين ارواحكم, على خاطر ابن الانسان يجي في ساعة ما تتوقعوهاش. لمثل تاع لخديم مولى لمانة⁴⁵شكون هو لخديم اللي مولى امانة و رزين اللي وكلو سيدو على الخدامين لخرين باه يعطيهم الماكلة في وقتها؟ ⁴⁶يا سعد هاذاك لخديم نهار اللي يرجع سيدو يلقاه يخدم في خدمتو كيما وصاه! ⁴⁷نقول لكم الحق: راح يزيد يوكلو على رزقو كامل.⁴⁸بالصح اذا كان هاذاك لخديم ماهوش ناس ملاح و قال في قلبو: سيدي راح يبطى باه يرجع. ⁴⁹و يبدى يضرب في خاوتو الخدامين و ياكل و يشرب مع السكارجية. ⁵⁰و يجي سيدو في نهار ما يتوقعوش و في ساعة ما يعرفهاش, ⁵¹راح يقطعوا و يجعلو مع المنافقين. وين يكون النواح و الرعدة.

Chapter 25

¹"وقتها يكون ملكوت السماوات يشابه لعشرة صبايا, هزت كل وحدة فيهم كانكي يشعل بالزيت و خرجوا يعَرضوا للعريس. ²و كانوا خمسة منهم فايقات, و خمسة حايرات. ³هاذوك الحايرات هزوا الكانكيات تاعهم و ما هزوش معاهم الزيت, ⁴اما الفايقات هزوا الكانكيات تاعهم و زادوا هزوا معاهم الزيت.⁵شوية لعريس بطى ما جاش ولاو نعسوا كلهم و رقدوا بالنوم. ⁶ونص الليل سمعوا الحس و لعياط: هاو لعريس جاي, عرضولوا!⁷فاقوا هاذوك الصبايا من النوم و قدّوا الكانكيات تاعهم. ⁸و هاذوك الحايرات قالوا للفايقات: اعطونا شوية زيت معاكم الكانكيات تاعنا راح تطفى. ⁹قالوا لهم الصبايا لفايقات: بلاك احنا ما و يكفيناش بالصح, روحوا عند البيّاع و اشرِيوْ واش تحتاجوا خير.¹⁰و كي راحوا همّا باه يشرِيوْ جاء لعريس, و الصبايا اللي كانوا واجدين دخلوا معاه للعرس, و تقفل الباب وراهم. ¹¹و من بعد خلاص جاو الصبايا الحايرات و بداو يعيطوا و يقولوا: يا سيدي, يا سيدي, حل علينا الباب! ¹²جاوبهم و قال: الحق انا ما نعرفكمش. ¹³اسهروا على خاطر ما تعرفوش لا النهار و لا الساعة اللي يجي فيها ابن الانسان. لمثل تاع كيلة الدراهم¹⁴"و يشابه ملكوت السماوات ثاني لواحد الراجل كان راح يسافر عيط للخدامين تاعو و كلّفهم بواش يكسب من المال, ¹⁵مد لواحد فيهم خمسة كيلات, و مد للاخر زوز كيلات, و مد لواحد اخر كيلة. كل واحد على قد جهده. و من بعد سافر. ¹⁶و راح هاذاك اللي ادى الخمسة كيلات و تاجر بيهم, و ربح خمسة كيلات اخرين.¹⁷و حتى اللي ادى زوز كيلات هو ثاني دار كيما لول و ربح زوز كيلات اخرين. ¹⁸اما هاذاك اللي ادا الكيلة لواحدة راح و حفر حفرة في لرض و خبى دراهم سيدو.¹⁹و عدى زمان طويل و روّح الراجل و راح باه يتحاسب مع الخدامين تاعو, ²⁰جاه مولى الخمسة كيلات و زاد اعطاه خمسة كيلات اخرين معاهم و قال: اعطيتيني خمسة كيلات. هاي فوقهم خمسة كيلات اخرين ربحتهم. ²¹قالو سيدو: يعطيك الصحة انت خديم صالح و مولى امانة! على خاطر كنت مولى امانة على لقليل راح نكلفك على الكثير. ادخل للنعيم و الفرحة تاع سيدك.²²و من بعد جاه مولى الزوز كيلات و قال: يا سيدي, اعطيتيني زوز كيلات. هاي فوقهم زوز كيلات اخرين ربحتهم. ²³قالو سيدو: يعطيك الصحة انت خديم صالح مولى امانة! على خاطر كنت مولى امانة على لقليل راح نكلفك على الكثير. ادخل للنعيم و الفرحة تاع سيدك.²⁴و من بعد ثاني جا مولى الكيلة لواحدة و قال: يا سيدي, انا عارف باللي انت راجل صعيب, و تحب تحصد وين ما زرعتش, و تلم حتى وين ما غرستش. ²⁵وليت خفت و رحت خزنتلك الكيلة تاعك في لرض. و ضرك هاو رزقك.²⁶رد عليه السيد و قالو: انت خديم قلبك مش مليح و ماكش خدّام, كي علابالك باللي انا نحصد وين ما زرعتش, و نلم وين ما غرستش, ²⁷علاه مالا ما حطيتش الدراهم في البانكة, باه كي نجي نرجعهم مع الفايدة.²⁸و قال للخدّامين نحِيوْلو الكيلة اللي عندو و مدوها لمولى العشرة كيلات. ²⁹على خاطر اللي عندو يزيد عليه, و اللي ما عندوش ينَقص ليه. ³⁰و هاذا لخديم اللي بلا فايدة ارموه لبرى في الظلمة, وين يكون النواح و الرعدة. الخرفان و الجديان³¹" و نهار اللي يجي فيه ابن الانسان في الجاه تاعو و معاه الملايكة القديسين الكل, وقتها يتربع على عرشو المجيد. ³²و تتلم قدامو الشعوب الكل, و هو يفرزهم كيما يفرز الراعي الخرفان من الجديان, ³³يحط الخرفان على ليمين و الجديان على ليسار.³⁴و من بعد يقول السلطان للناس اللي واقفين على ليمين: ارواحوا يا اللي جعلكم بابا متباركين, اورثوا الملكوت اللي كان موَّجد لكم من نهار اللي خلقت فيه الدنيا. ³⁵على خاطر جعت و انتوما وكلتوني. عطشت و انتوما شربتوني. تغربت وانتوما لميتوني. ³⁶تعريت وانتوما كسيتوني. مرضت و انتوما تفقدتوني. تحبست و انتوما زرتوني.³⁷وقتها يقولوا هاذوك الناس الصالحين: ياربي وقتاه شفناك جيعان و وكلناك و الا عطشان و شربناك؟ ³⁸و وقتاه شفناك غريب و لميناك, و الا عريان و كسيناك؟ ³⁹و وقتاه شفناك مريض و الا محبوس و زرناك؟ يرد عليهم السلطان و يقول لهم: ⁴⁰نقول لكم الحق: على خاطر درتوا هاذا الخير في واحد من خاوتي هاذوك الصغار, تسماوْ درتو الخير فيا انا.⁴¹"و من بعد يقول لهاذوك اللي واقفين على ليسار: روحوا عليا يا واحد الملعونين للنار اللي ما تطفاش اللي موّجدة لابليس و الشواطن اللي يخدموا فيه, ⁴²على خاطر جعت ما وكلتوني. عطشت ما شربتوني. ⁴³كنت غريب ما لميتوني. كنت عريان ما كسيتوني. كنت مريض و محبوس و ما زرتوني.⁴⁴وقتها همّا ثاني يقولوا: يا ربي, و قتاه شفناك جيعان و الا عطشان و الا غريب و الا عريان و الا مريض و الا محبوس و ما خدمناكش؟ ⁴⁵يقول لهم: نقول لكم الحق: على خاطر انتوما ما درتوش الخير في واحد من خاوتي هاذوك الصغار, تسماوْ ليا انا اللي ما درتوش الخير. ⁴⁶و راحوا هاذوك الناس للعذاب الدايم و الناس الصالحين راحوا للحياة الدايمة".

Chapter 26

¹و كي كمّل يسوع كلامو حتى للخر قال لتلامذة تاعو: ²"علابالكم باللي بعد نهارين يجي عيد الفصح, و فيه يسلموا ابن الانسان باه يصلبوه".³في هاذاك الوقت تلموا ريّاس الكهنة و الكتبة و الشيوخة تاع الشعب و راحوا لدار قيافا رايس الكهنة, ⁴و تشاوروا بيناتهم باه يديروا حيلة و يحكموا يسوع و يقتلوه. ⁵بالصح قالوا: "ما نديروهاش نهار العيد باه تنوضش الفوضى في وسط الشعب". يسوع يدهنوه بالطيب⁶و كي كان يسوع في بيت عنيا في دار سمعان الابرص, ⁷جات ليه واحدة لمرى و كانت هازة في يدها قرعة تاع ريحة سومتها غالية, و سيحتها على راسو كي كان قاعد. ⁸و كي شافوا التلامذة الشيء اللي صار غاظهم الحال و قالوا: "علاش هذا التبذير؟ ⁹كنّا قادرين نبيعوا هاذي الريحة بالغلى و نفرقوا دراهمها على الفقراء".¹⁰و كي سمعهم يسوع قال لهم: "علاش تبخصوا في لمرى؟ هي دارت لي حاجة مليحة! ¹¹الفقراء ام معاكم ديما, اما انا ما نيش معاكم ديما.¹²و هي كي سيحت هاذي الريحة عليا اي دارت هكا توجد فيّا باه تكفنوني. ¹³نقول لكم الحق: وين ما يبشروا بهاذا الانجيل في الدنيا كاملة, يهدروا ثاني على الشيء اللي عملاتو هاذي لمرى و يبقاو متفكرينها". لخيانة تاع يهوذا¹⁴في هاذيك الساعة راح واحد من التلامذة الثناش, اللي اسمو يهوذا الاسخريوطي, للريّاس الكهنة ¹⁵و قال لهم: "قداه تمدولي كي نبيع لكم يسوع؟". و همّا خلصوه ثلاثين قطعة تاع فضة. ¹⁶و من هاذاك الوقت بدى يحوس على فرصة باه يبيّع بيه. عشاء الفصح مع التلامذة¹⁷و في اول يوم من ايام لفطير جاو التلامذة ليسوع و سقساوه: "وين تحب نوَّجدولك لعشاء تاع الفصح؟". ¹⁸قال لهم: "روحوا للمدينة عند فلان و قولولوا: قالك المعلم: ساعتي قربت. و في دارك انت نتعشى لعشاء تاع الفصح انا و التلامذة تاعي". ¹⁹وراحوا التلامذة داروا كيما قالهم يسوع و وجدوا لعشاء تاع الفصح.²⁰و في الليل و هو قاعد مع التلامذة في ثناش. ²¹و كي كانوا يتعشاو قال: "نقول لكم الحق: واحد منكم راح يخدعني". ²²و كي قالهم هاذي الكلمة حزنوا خلاص, و بداو يسقسِيوْ فيه بالواحد: " تهدر عليا انا يا رب؟".²³اما هو رد عليهم و قال: "اللي يدَّخل يدو معايا في المعجنة هو اللي يخدعني! ²⁴ابن الانسان راح يموت كيما مكتوب عليه, بالصح يا ويل هاذاك الراجل اللي يبيع ابن الانسان. كان خير لو كان ما خرجش من كرش امو!". ²⁵نطق يهوذا اللي باعو و قالو: "تهدر عليا انا يا سيدي؟". قال يسوع: "انت قلت". عشاء الرب²⁶و كي بداو ياكلوا هز يسوع الخبز, و بارك و قسم و فرق على التلامذة و قال: "هاكم كولوا. هاذا هو البدن تاعي".²⁷و هز الكاس و شكر و مدلهم و قال: "اشربوا منها كلكم, ²⁸على خاطر هاذا هو دم العاهد اللي يسيل على جال ناس ياسر باه تتغفر ذنوبهم. ²⁹و نقول لكم: انا من نهار اليوم ما نزيدش نشرب من منتوج الدالية هاذا حتى لنهار اللي نشربوا معاكم جديد في الملكوت تاع بابا".³⁰و من بعد سبحوا الله كلهم مع بعضاهم و خرجوا راحوا لجبل الزيتون. يسوع يقول على بطرس كيفاه راح ينكروا ³¹و قال لهم يسوع: "الليلة هاذي رايحين تشكوا فيا كلكم, على خاطر مكتوب: اضرب الراعي تتفرق لغنم. ³²بالصح من بعد ما نقوم من بين الموتى نسبقكم ل الجليل".³³نطقلو بطرس و قالو: "لو كان يشكوا فيك الكل لنا عمري ما نشك فيك". ³⁴قالو يسوع: "نقول لك الحق: في هاذي الليلة و قبل ما يعوعش السردوك تنكرني ثلاثة مرات". ³⁵قال بطرس: "لو كان يقتلوني معاك ما ننكرش!". و حتى التلامذة لخرين الكل قالوا نفس لكلام. في جثسيماني³⁶و من بعد راحوا لواحد الجنان يسموه جثسيماني, و قال للتلامذة:" اقعدوا هنا اني رايح لهيه نصلي و نجي". ³⁷و دى معاه بطرس و اولاد زبدي في زوز, و بدى الحزن يعصر فيه. ³⁸و قال لهم: "راني حزين راح يقتلني الحزن. اسناو هنا و اسهروا معايا".³⁹و بعد عليهم شوية و سجد على وجهو للرض, و كان يصلي ويقول: "يا بابا, لو كان غير يتهز عليا هاذا الكاس, بالصح مش كيما نحب انا دير انت واش تحب". ⁴⁰و من بعد جا للتلامذة و لقاهم راقدين, قال لبطرس: "هكا ما قدرتوش تزيدوا تسهروا معايا حتى ساعة واحدة؟". ⁴¹اسهروا و صلوا باه ما تدخلوش في محنة, الروح او ناشط بالصح البدن هو اللي ضعيف".⁴²و خلاهم و زاد راح يصلي وكان يقول:"يا بابا, لو كان غير تبعد عليا هاذا الكاس باه ما نشربوش بالصح دير واش تحب انت". ⁴³و من بعد كي جا زاد لقاهم راقدين, و النوم مثقل عليهم. ⁴⁴خلاهم و زاد راح يصلي مرة اخرى و قال هاذاك لكلام بالذات.⁴⁵و من بعد جا للتلامذة و قال لهم: "ارقدوا ضرك و ارتاحوا! هاي قربت الساعة, ضرك يتسلم ابن الانسان ليد المذنبين. ⁴⁶نوضوا هيا نروحوا! او وصل اللي خدعني!". القبض على يسوع⁴⁷و هو مازال يهدر, وصل يهوذا اللي كان واحد من الثناش و معاه غاشي كبير من جماعة رياس الكهنة و شيوخة الشعب هازين سيوفة و قرم. ⁴⁸واللي خدعو اعطاهم امارة و قال لهم: "اللي نبوسو او هاذاك هو. احكموه".⁴⁹و في ساع قدم ليسوع و قال: "عسلامة سيدي!" و سلم عليه و باسو. ⁵⁰قال لو يسوع: "يا صاحبي, علاه جيت؟". وقتها قدموا اللي معاه و حكموا يسوع قبضوا عليه.⁵¹و كان واحد من اللي مع يسوع سل السيف و ضرب بيه لخديم تاع رايس الكهنة, نحالو وذنو. ⁵²قال لو يسوع: "رد السيف وين كان. على خاطر اللي جاو بالسيف بالسيف يموتوا! ⁵³علاه تحساب باللي مانيش قادر نطلب من عند بابا يبعثلي اكثر من اثناش جيش تاع ملايكة؟ ⁵⁴كيفاه مالا نكملوا المكتوب: باللي لازم يصرى هاذا الشيء كامل؟".⁵⁵و في هاذيك الساعة قال يسوع للغاشي: "تقول عليكم خرجتوا باه تحكموا سارق جايين بالسيوفة و القرم باه تقبضوا عليا! و انا نهار كامل و انا قاعد معاكم نعلم في وسط الهيكل و ما حكمتونيش. ⁵⁶بالصح هاذا كامل صرى باه يتم المكتوب اللي قالوا عليه الانبياء". و في هاذيك الساعة خلاوه التلامذة الكل و هربوا. يسوع قدام المجلس تاع ليهود⁵⁷و الناس اللي حكموا يسوع داوْه لقيافا رايس الكهنة, و كانوا الكتبة و الشيوخة كلهم متلميين لثمة. ⁵⁸اما بطرس بقى يتبع فيهم من بعيد حتى ن وصلوا لدار قيافا, و دخل معاه لداخل و قعد في وسط الخدامين يسنى يشوف واش راح يصرى.⁵⁹و كانوا رياس الكهنة و الشيوخة و المجلس تاعهم كامل يحوسوا على تهمة باطلة يتهموا بيها يسوع باه يقتلوه, ⁶⁰بالصح ما لقاو باه يتهموه. و كانوا شهود باطل ياسر واقفين بالصح ما لقاوش ضده حتى حاجة. و في لخّر وقفوا زوز منهم و همّا شهود بالباطل ⁶¹و قالوا: "هاذا الراجل قال نقدر نريَّب الهيكل تاع الله, و نبنيه في ثلاثة ايام".⁶²وقف لو رايس الكهنة و قال: "كاش ما عندك حاجة تقولها؟ شوف باه شهدوا عليك هاذو في زوز؟". ⁶³اما يسوع بقى ساكت. وزاد قالو رايس الكهنة: "حلفتك بالله الحي تقول لنا: انت هو المسيح ابن الله؟". ⁶⁴قال لو يسوع: "راك قلتها! و نزيد نقول لكم: من اليوم راح تشوفوا ابن الانسان قاعد على يمين الله القدير, و جاي على السحاب من السماء".⁶⁵شرّق رايس الكهنة قشو و قال: "او كفر! واش نديروا بيهم الشهود؟ انتم سمعتوه واش قال! ⁶⁶واش رايكم؟". جاوبوا الكل و قالوا: "يستاهل الموت".⁶⁷و بصقوا على وجهو و ضربوه بالكف, واخرين ضربوه بالدبز ⁶⁸و كانوا يقولوا: "قول لنا طراه شكون ضربك يا واحد المسيح؟". بطرس ينكر⁶⁹و بطرس كان قاعد لبرى في وسط الدار, جات واحدة لخديمة و قالت: "انت ثاني كنت مع يسوع تاع الجليل!". ⁷⁰نكر قدام الناس الكل و قال: "ما علاباليش واش قاعدة تهدري!".⁷¹و خرج لبرى للحوش زادت شافاتو خديمة اخرى, و قالت للناس اللي لثمة: "حتى هاذا كان مع يسوع الناصري!". ⁷²زاد نكر مرة اخرى و حلف: "نحلف بربي باللي ما نعرفش هاذا الرجل!".⁷³و من بعد جاو الناس تلموا على بطرس و قالوا: "صح انت ثاني واحد منهم, من هدرتك باين!" ⁷⁴و بدى وقتها يسب و يحلف: "والله ما نعرف هاذا الراجل!". و في هاذيك الساعة بالذات عوعش السردوك. ⁷⁵و تفكر بطرس الهدرة اللي قالها يسوع: "قبل ما يعوعش السردوك تنكرني ثلاثة مرات". ولى خرج لبرى و بكى بالحريقة.

Chapter 27

¹و قبل ما يطلع النهار تشاوروا رياس الكهنة الكل و شيوخة الشعب على يسوع باه يقتلوه, ²و كتفوه و راحوا داوْه للوالي بيلاطس البنطي.³و كي شاف يهوذا اللي خدعو باللي حكموا عليه بالموت, ندم و رجّع الثلاثين قطعة تاع الفضة لرياس الكهنة و الشيوخة ⁴و قال لهم: "انا غلطت كي خليت واحد بريء يطيح بين يديكم". قالوا: "واش دخلنا فيك؟ دبر راسك!". ⁵ولى رمى لهم الفضة في الهيكل و خرج, و من بعد راح شنق روحو.⁶هزوا الكهنة هاذيك الفضة و قالوا: "ما يجوزش نحطوها في الصندوق تاع الهيكل على خاطرها دراهم تاع دم". ⁷و بعد ما تشاوروا راحوا شراو بيها جنان الفخاري و داروه جبانة للغريب, ⁸على هاذا سماوْ هاذاك الجنان "جنان الدم" حتى لليوم.⁹وقتها تم الشيء اللي قال عليه ارميا النبي: "هزوا ثلاثين دينار من الفضة, السومة اللي ساموني بيها بني اسرائيل, ¹⁰و خلصوا بيها جنان الفخاري, كيما طلب مني ربي ندير". يسوع قدام بيلاطس¹¹و كي وقف يسوع قدام الوالي سقساه و قالو: "انت هو الملك تاع ليهود"؟. رد عليه يسوع وقال: "راك تقول". ¹²و كي كانوا رياس ليهود و الكهنة يتهموا فيه ما جاوب بحتى حاجة. ¹³زاد قال بيلاطس: "راك تسمع فيهم كيفاه يشكِيو عليك؟". ¹⁴و هو ما جاوب حتى لو كان بكلمة واحدة, حتى حار فيه الوالي.¹⁵و كان من العادة تاع الوالي في العيد يسيْب لهم محابسي واحد, اللي يخايروه همّا. ¹⁶و كان وقتها واحد لمحابسي معروف اسمو باراباس.¹⁷وكي كانوا متجمعين قال لهم بيلاطس: "شكون تحبوا نسيْب لكم؟ باراباس و الا يسوع اللي يسموه المسيح؟". ¹⁸على خاطر كان علابالو باللي كانوا حاسدينوا على هاذيك سلموه. ¹⁹و هو قاعد فوق كرسي الولاية بعثتلو مرتو تقولو: "عندك لا تدور بهاذاك الراجل الصالح, البارح تعذبت على جالو في لمنام".²⁰بالصح رياس الكهنة و الشيوخة حرشوا الغاشي باه يخرجوا باراباس و يقتلوا يسوع. ²¹رد عليهم الوالي و قال: "شكون من هاذمّا في زوز تحبوا نسيب لكم؟". قالوا: "باراباس!". ²²اما بيلاطس قال لهم: "مالا واش ندير بيسوع اللي يسموه المسيح؟". قالوا كلهم: "اصلبو!".²³قال الوالي: "واش من شر دار؟". اما همّا زادوا في لعياط و قالوا: "اصلبو!". ²⁴و كي شاف بيلاطس باللي ما كانش فايدة معاهم, و خاف لا تصرى فوضى, طلب الماء و غسل يديه قدام الغاشي و قال: "انا بريء من دم هاذا الراجل الصالح! دبروا روسكم انتوما واش تديروا فيه!".²⁵الشعب كامل جاوب وقال: "دمو في رقبتنا و في رقبة اولادنا". ²⁶ولى سيَب لهم باراباس, اما يسوع اعطاه للعسكر سوطوه و داوه باه يصلبوه. العسكر يستهزاو بيسوع²⁷و داو العسكر يسوع لدار الولاية و تلموا عليه الكتبة الكل. ²⁸و عراوْه و لبسوه برنوس احمر, ²⁹و ضفروا تاج من الشوك و حطوه على راسو, و حطولو قصبة في يدو ليمنى, و كانوا يركعوا قدامو و همّا يستهزاو بيه و يقولوا: "السلام يا سلطان ليهود!".³⁰و بصقوا عليه, و هزوا القصبة و ضربوه باها على راسو. ³¹و من بعد ما تمسخروا بيه, نحاولو البرنوس و لبسوه قشو, و داوه باه يصلبوه. الصلب³²و كي كانوا رايحين لقاو واحد الراجل من القيروان اسمو سمعان, جابوه باه يهز الصليب تاع يسوع. ³³و كي وصلوا لواحد لمكان يقولو عليه جلجثة, و اللي يسموه "مضرب الجمجمة" ³⁴مدولو الخل مخلط بالمر باه يشربو. و كي ذاقو ما حبش يشرب منو.³⁵و علقوه على الصليب و داروا القرعة على قشو و قسموه بيناتهم, باه يتم الشيء اللي قال عليه النبي: "قشاتي بيناتهم قسموها, و على لباسي القرعة داروها". ³⁶و قعدوا ثمة يعسوا عليه. ³⁷و لصقوا عند راسو لفوق لوحة مكتوب فيها السبة اللي على جالها حكموا عليه: "هاذا هو يسوع الملك تاع ليهود".³⁸و صلبو معاه زو ز مجرمين, واحد على ليمين و واحد على ليسار. ³⁹و اللي كانوا معديين من ثمة يهزوا في روسهم ⁴⁰و يقولوا: "يا اللي تهدم الهيكل و تبنيه في ثلاثة ايام, منع روحك! كي عدت وليد الله اهبط من فوق الصليب!".⁴¹و حتى رياس الكهنة ثاني يستهزاو بيه همّا و الكتبة و الشيوخة و قالوا: ⁴²"لخرين يقدر يمنعهم اما روحو ما يقدرش يمنعها! كي عاد هو الملك تاع ليهود ينزل من الصليب و ضرك نامنوا بيه!⁴³راه توكل على الله و قال: انا ابن الله! يخلي الله يمنعو ضرك كي عاد راضي عليه!". ⁴⁴و حتى المجرمين اللي كانوا مصلوبين معاه كانوا يعايروا فيه بكلام كيما هاذا. الموت⁴⁵و من الظهر حتى لثلاثة خيمت الظلمة على الدنيا الكل. ⁴⁶و على جوايه الثلاثة عيط يسوع على قوة جهدو وقال: "ايلي, ايلي, علاه شبقتاني؟ اللي معناها: الهي, الهي, علاه خليتني؟ ⁴⁷و وحايد من لواقفين لثمة قالوا: "راه يعيط على ايليا".⁴⁸و واحد زرب و شمخ طبة و ملاها بالخل و حطها في القصبة و مدها ليسوع و شرّبو. ⁴⁹و لخرين قالوا: "خليه. نشوفوا كان يجي ايليا و يمنعوا!". ⁵⁰و عيط يسوع عيطة قاوية خلاص, و طلعت منو الروح.⁵¹و تقطع الحجاب تاع الهيكل على زوز من لفوق للتحت. و لرض تزلزلت, و لحجار تشقت, ⁵²و لقبورة تحلت, و ياسر من الناس القديسين اللي ماتوا عاودوا حياو ⁵³و خرجوا من لقبورة بعد القيامة تاعو, و دخلوا للمدينة المقدسة, و شافوهم ناس ياسر.⁵⁴اما القايد تاع مياة عسكري و الناس اللي معاه كي شافوا الزلزلة و كل واش صرى خافوا خلاص و قالوا: "صح كان هاذا ابن الله!". ⁵⁵و كانوا ثمة نساء ياسر يتفرجوا من بعيد, و همّا اللي كانوا يتبعوا في يسوع من الجليل باه يخدموه, ⁵⁶و منهو مريم المجدلية و مريم ام يعقوب و يوسي, و ام ولاد زبدي. الدفينة⁵⁷و في لعشية خلاص, جا واحد الراجل غني من الرامة اسمو يوسف, و هو ثاني كان من تلامذة يسوع. ⁵⁸راح لبيلاطس و طلب لبدن تاع يسوع. و عطاهم بيلاطس الاذن باه يخليوَه يدي لبدن.⁵⁹و ادى يوسف لبدن و لفوا في كتان طاهر, ⁶⁰و حطو في القبر الجديد تاعو اللي كان حفروا في الحجرة, و من بعد دز لحدة كبيرةعلى باب لقبر و راح. ⁶¹و كانت معاه مريم المجدلية و مريم لخرى قاعدين مقابلين لقبر. العساسة تاع لقبر⁶²و غدوة, بعدما وجّدوا للسبت تلموا رياس الكهنة و الفريسيين و راحوا لبيلاطس ⁶³و قالوا: "يا سيدي, تفكرنا باللي هاذاك الدجال قال كي كان حي: اني بعد ثلاثة ايام نحيا من بين الموتى. ⁶⁴لو كان تمد امر باه يعسوا على القبر ثلاثة ايام, لا يجيو التلامذة تاعو في الليل و يسرقوه, و يقولوا للناس او قام من بين الموتى, و تولي هاذي الخدعة لتالية اشر من لولى!".⁶⁵قال لهم بيلاطس: "عندكم العساسة. روحوا ديروا احتياطاتكم كيما تشوفوا". ⁶⁶ولاو راحو و حطوا عساسة على لقبر و شمعوا لحجر.

Chapter 28

¹و بعدما عدى السبت و عند الفجر تاع نهار الاحد, جات مريم المجدلية و مريم لخرى باه يزوروا لقبر. ²شوية ضربت زلزلة قاوية, و ظهر ملاك الرب من السماء و جا للحجرة دزها من قدام الباب و قعد عليها.³و كان وجهو يلمع كي لبرق, و اللبسة اللي لابسها بيضا كي الثلج. ⁴و العسكر اللي كانوا يعسوا كي شافوه داخوا من الخوف و طاحوا تقول عليهم موتى.⁵هدر الملاك مع النساء في زوز و قال لهم: "ما تخافوش, علابالي باللي تحوسوا على يسوع المصلوب. ⁶ما كانوش هنا, على خاطر راه حيا من بين الموتى كيما قال! ارواحوا نوريلكم وين كان محطوط. ⁷و روحوا في ساع قولوا للتلامذة: او حيا من بين الموتى و او راح يسبقكم للجليل. و ثمة تشوفوه. اني خبرتكم".⁸و خرجوا من لقبر و هما خايفين و فرحانين خلاص, و راحوا يجريو باه يقولوا للتلامذة. ⁹و هما رايحين باه يخبروا التلامذة تلاقاهم يسوع و قال لهم: "السلام عليكم". قدمولو و حكموه على رجليه و سجدوا لو. ¹⁰قال لهم يسوع: "ما تخافوش. روحوا قولوا لخاوتي يروحوا للجليل و ثمة يشوفوني". الشهادة تاع الحراس¹¹و كي كانوا همّا رايحين جاو جماعة من العسكر اللي كانوا يعسوا للمدينة و قالوا لرياس الكهنة على الشيء اللي صرى كامل. ¹²و تلموا همّا مع الشيوخة, و تشاوروا و تفاهموا بيناتهم, و مدوا رشوة كبيرة للعسكر ¹³و قالوا لهم: "قولوا باللي التلامذة تاعو جاو في الليل وسرقوه كي كنا احنا راقدين.¹⁴و كي توصل الهدرة للوالي احنا ندافعوا عليكم ما تخافوش". ¹⁵داو هاذاك المال و داروا واش قالولهم, و شاع هاذا لخبر عند ليهود حتى اليوم. يسوع يظهر للتلامذة تاعو¹⁶اما التلامذة في حداش راحوا للجليل و طلعوا للجبل في لمكان اللي قال لهم عليه يسوع. ¹⁷و كي شافوه سجدوا لو, بالصح كاين منهم وحايد شكوا فيه.¹⁸قرّب لهم يسوع و قال لهم: "نلت السلطان كامل اللي في السماء و اللي في لرض, ¹⁹روحوا لجميع لجناس و تلمذوهم و عمدوهم باسم الاب و الابن و الروح القدس.²⁰و علموهم يديروا الشيء اللي وصيتكم بيه كامل. و انا اني معاكم على طول الزمان حتى للخر". امين.

Mark

Chapter 1

¹البدية تاع انجيل يسوع المسيح ابن الله , ²كيما مكتوب في الكتب تاع لنبياء :" انا راح نبعث قدامك الرسول تاعي , اللي يوجد لك طريقك قدامك. ³صوت ينادي في الصحراء و يقول :" وجدوا طريق ربي , و اجعلوا مساربو مقدودة ".⁴كان يوحنا يعمد في الصحراء و يبشر للناس بالمعمودية تاع التوبة لغفران الذنوب . ⁵و جاو ليه من الجوايه الكل تاع اليهودية و القدس و تعمدوا كلهم على يديه في واد الاردن , مستعرفين بذنوبهم . ⁶و كان يوحنا يلبس وبر الجمال و متحزم بحزام تاع جلد على جنابو و ياكل في الجراد و لعسل البري .⁷و كان يبشر و يقول :" يجي بعدي اللي هو اقوى مني , اللي انا ما نستاهلش تنابس و نحل السيور تاع صباطو . ⁸انا عمدتكم بالماء , اما هو راح يعمدكم بالروح القدس" . المعمودية تاع يسوع المسيح و التجريبة تاعو⁹و في هاذيك ليام جا يسوع من الناصرة للجليل و تعمد على يد يوحنا المعمدان في الاردن . ¹⁰و في الوقت اللي كان طالع فيه من الماء , شاف السماوات تشقت ’ و الروح هابط عليه كي لحمامة . ¹¹و كان صوت من السماوات بقول:" انت وليدي لحبيب اللي بيه فرحت".¹²وفي هاذاك الوقت بالذات اداه الروح للصحراء , ¹³و كان لثمة في الصحراء مدة اربعين يوم يتجرب من ابليس . و كان في وسط الوحوش . و جات الملايكة تخدم فيه . المسيح ينادي التلامذة لولين¹⁴و بعد ما تقبض على يوحنا جاء يسوع للجليل و بدا يبشر بالبشارة تاع ملكوت الله ¹⁵و يقول :"الزمان كمل و ملكوت الله قرب , غير توبوا و امنوا بالانجيل ".¹⁶و كي كان يمشي على شط لبحر في الجليل شاف سمعان وخوه اندراوس يرميو في الشبكة في لبحر ’ على خاطر كانوا صيادة. ¹⁷قال ليهم يسوع :" ارواحوا تبعوني و انا نجعلكم صيادين للناس " ¹⁸و في هاذاك الوقت بالذات خلاو الشبكة و تبعوه.¹⁹و من بعد غير فات من لثمة شوية زاد شاف يعقوب بن زبدي و خوه يوحنا , في الفلوكة يخيطوا في الشبكة تاعهم . ²⁰عيطلهم و في هاذاك الوقت بالذات خلاو باباهم زبدي في الفلوكة مع الخدامة و مشاو وراه. الخروح تاع روح منجوس²¹و بعدها دخلوا كفرناحوم , و في هاذاك الوقت بالذات دخل للمجمع نهار السبت و بدا يقري. ²²و حاروا في التعليم تاعو على خاطر كان يقري فيهم كيما اللي عندو سلطان و مش كيما الكتبة .²³و كان في هاذاك المجمع راجل ساكنو روح منجوس , بدا يعيط ²⁴و يقول :" آو! واش كاين بيننا و بينك آ يسوع الناصري ؟ راك جاي باه تهلكنا ؟ انا نعرفك شكون انت : القدوس تاع الله !" ²⁵نهرو يسوع و قالو :" اسكت! و اخرج منو!". ²⁶الروح المنجوس صرعو و غيط بصوت عالي و خرج منو .²⁷الناس الكل حاروا و بداو يسقسيو في بعضاهم :" وش هذا ؟ وش هو هذا التعليم الجديد؟ على خاطر بسلطان يامر حتى على الارواح المنجوسة و تطيعو !". ²⁸و في هاذاك الوقت بالذات تنشر الخبر تاعو في كل الجوايه الدايرة بالجليل. نسيبة بطرس ترتاح هي و وحايد اخرين²⁹و في هاذاك الوقت بالذات كي خرجوا من المجمع راحوا لدار بطرس و اندراوس مع يعقوب و يوحنا, ³⁰و كانت نسيبة سمعان عندها السخانة و حاكمة لفراش, حكاولو عليها و في هاذاك الوقث بالذات . ³¹قرب ليها و حكمها من يدها و وقفها, ثم ثم راحت عليها السخانة و بدات تخدم فيهم .³²و كي عشات لعشية , و غربت الشمس, جابوا ليه كل الناس المرضى و اللي مسكونين , ³³و كانت المدينة كلها عند الباب . ³⁴و رتح ياسر اللي كانوا عندهم مروضات , و خرَّج شواطن ياسر , وما خلاش الشواطن تتكلم على خاطر عرفوه. التبشير في الجليل³⁵و ناض في الصباح بكري خلاص و خرج و راح لواحد المضرب خالي و كان لثم يصلي وحدو, ³⁶وراح سمعان والناس الي كانوا معاه يتبعوا فيه . ³⁷و كي لقاوه قالوا لو :" آم الناس الكل يحوسوا عليك ".³⁸وقال لهم :" هيا نروحوا للدشر لقريبة من هنا . باه نبشرهم هما ثاني على خاطر هاذي السبة اللي خرجت على جالها " . ³⁹و كان يبشر في المجامع في الجليل كلها و يخرج الشواطن . واحد ابرص يرتاح⁴⁰و جا ليه واحد ابرص و ركع قدامو و قال لو :" كان حبيت تقدر تجعلني طاهر". ⁴¹حن عليه يسوع و مد يدو و مسو وقالو :" نعم نحب , كون طاهر!" ⁴²و في هاذاك الوقت بالذات و هو مازال يهدر راح عليه لبرص و نظاف .⁴³و وصاه و بعثوا في هاذاك الوقت بالذات , ⁴⁴و قالو :" شوف , ما تقول لحتى واحد , بالصح روح وري روحك للكاهن و قدم الشيء اللي وصى بيه موسى , باه تشهد عليهم ".⁴⁵اما هو راح و بدا يهدر على طول صوتو وينشر في لخبر, حتى ولى يسوع ما يقدرش يدخل حتى مدينة وهو باين , وولى يقعد بعيد في الاماكن الخالية , و كانوا الناس يجيو ليه من كل جيهة.

Chapter 2

¹و ثاني دخل لكفرناحوم بعد ايامات , و سمعوا بيه انو في واحد الدار . ²و في هاذاك الوقت بالذات تلموا عليه ناس ياسر حتى الدار ما عادتش تهز و حتى لبرى معمرة . و كان يكلم فيهم بالكلام تاع الله.³و جاو ليه و جابولو واحد مشلول هازينوا ربعة . ⁴و كي ما قدروش يوصلوا بيه عند يسوع على خاطر الغاشي ياسر , عراو السطح وين كان قاعد و بعد ما نقبوه حبطوا السرير اللي كان راقد عليه الراجل المشلول .⁵و كي شاف يسوع الايمان تاعهم , قال للمشلول:" يا ولدي مغفورة ليك ذنوبك ". ⁶و كانوا جماعة من الكتبة قاعدين لثم خموا بينهم بين ارواحهم ⁷:" واش بيه يهدر هاذا كيما هكا بالكفر ؟ شكون يقدر يغفر الذنوب من غير الله وحدو؟ ".⁸و في هاذاك الوقت بالذات عرف يسوع بالروح تاعو واش قاعدين يخموا في قلوبهم , و قال لهم :" علاش تخموا في حاجة كيما هاذي في قلوبكم؟ ⁹واشي هو اللي اسهل , كي يتقال للمشلول : ذنوبك مغفورة , و الا كي يتقال : اوقف هز سريرك و امشي؟¹⁰وبالصح باه تعرفوا بلي ابن الانسان عندو سلطان على لرض باه يغفر الذنوب". قال للراجل المشلول : ¹¹"نقول ليك : اوقف و هز السرير تاعك و روح لدارك !". ¹²و في هاذاك الوقت بالذات ناض و هز السرير تاعو و خرج قدامهم الكل , حتى الناس الكل حاروا و مجدوا الله وقالوا :" عمرنا ما شفنا حاجة كيما هكا!". المسيح يستدعى لاوي¹³و من بعد زاد خرج للبحر. و جاو ليه الناس الكل باه يقريهم . ¹⁴و كي كان معدي شاف لاوي بن حلفى قاعد في المضرب وين يلم لغرامة , قال لو :" تبعني". وقف وراح يتبع فيه .¹⁵و كي كان يسوع و التلامذة تاعو قاعدين في دار لاوي و كانوا قاعدين معاه ياسر من العشارين والمجرمين , على خاطر كانوا ياسرو تبعوه هما ثاني. ¹⁶بالصح الكتبة و الفريسيين كي شافوه ياكل مع المكاسين و المجرمين , قالوا للتلامذة تاعو :" واشبيه ياكل ويشرب مع المكاسين تاع لغرامة و المجرمين؟".¹⁷و كي سمع يسوع قال لهم :"الصحاح مايحتاجوش للطبيب بالصح المرضى هما اللي يحتاجوا للطبيب. انا ماجيتش للاتقياء, جيت للمذنبين باه يتوبوا". الاستفسار على الصيام¹⁸و كانوا التلامذة تاع يوحنا المعمدان و التلامذة تاع الفريسيين يصوموا ,جاو ليه و سقساوه :" و علاش التلامذة تاع يوحنا و تاع الفريسيين يصوموا بالصح التلامذة تاعك ما يصوموش ؟". ¹⁹جاوبهم يسوع :" وعلاه صحاب العرس يصوموا كي يكون لعريس في وسطهم؟ ما دام لعريس معاهم ما يقدروش يصوموا .²⁰بالصح راح تجي ايامات يترفع لعريس من وسطهم , وقتها في هاذيك ليامات يصوموا, ²¹ماكانش واحد يرقع كسوة قديمة بطبة جديدة, تولي الطبَّة الجديدة تجبد من لقديمة و تزيد تتقطع اكثر من بكري .²²و ماكانش واحد يحط خمرجديد في قربة قديمة , على خاطر القربة تتشقق من الخمر الجديد ,و من بعد الخمر يسيح و القربة تفسد . بالصح الخمر الجديد يتحط في قربة جديدة". رب السبت²³و عدى نهار السبت في وسط الزرع , و بداو التلامذة تاعو ينحيو في السبول و ياكلوا و هما ماشيين . ²⁴قالوا لو الفريسيين :" شوف ! علاش راكم تديروا في الشيء اللي ماهش محلل تديروه نهار السبت ؟".²⁵قال لهم :" ما قريتوش خلاص على الشيء اللي عملو داود و اللي كانوا معاه كي احتاج و جاع ؟ ²⁶و كيفاه دخل لبيت الله في وقت ابياثار كبير الكهنة , و كلا خبز المهبة اللي ما يحل لحتى واحد باه ياكلو غير للكهنة , و مد للي كانوا معاه و كلاو هما ثاني ".²⁷و من بعد قال لهم :" السبت تجعل على جال الانسان , و مش الانسان على جال السبت. ²⁸و ابن الانسان هو الرب تاع السبت ثاني ".

Chapter 3

¹و من بعد زاد دخل ثاني للمجمع , و كان لثمة واحد الراجل يدو مكمشة . ²و بقاو يعسوا عليه : زعمة يرتحو في السبت والا لا؟ باه يروحوا يشكيو بيه.³وقال للراجل اللي يدو مكمشة ."ارواح اوقف في الوسط !". ⁴و من بعد قال لهم:" نهار السبت يحل لينا نعملوا الخير و الا نعملوا الشر؟ نمنعوا نفس والا نقتلوها؟" . الكل سكتوا .⁵خزر فيهم الكل و هو متغشش وحزين على قلوبهم القاسية , و قال للراجل :" مد يدك ". مدها و رجعت صحيحة كيما الاخرى . ⁶و في هاذاك الوقت بالذات خرجوا الفريسيين و معاهم الهيرودسيين و تفاهموا عليه باه يقتلوه. الغاشي يتبع في يسوع⁷و راح يسوع هو والتلامذة تاعو للبحر , و تبعوا غاشي كبيرمن الجليل و من اليهودية ⁸و من اورشليم و من ادومية ومن وراء الاردن . والناس اللي دايرين بصور و صيدا. غاشي كبير , على خاطركي سمعوا عليه واش دار جاو ليه الكل.⁹و طلب من التلامذة تاعو باه يبقى في فلوكة صغيرة باه الغاشي ما يدزوش , ¹⁰على خاطر كي رتح منهم ياسر .ولاو يطيحوا عليه باه كل اللي فيه داء يمسو.¹¹و الارواح المنجوسة كي شفاتو سجدت و عيطت و قالت :" انت هو ابن الله ". ¹²و وصاهم و اكد باه ما يبينوهش. اختيار الثناش ن رسول¹³ومن بعد طلع للجبل و هدر مع اللي خايرهم و بقاو معاه . ¹⁴و حط ثناش باه يكونوا دايما معاه و باه يبعثهم يبشروا, ¹⁵و مد لهم سلطة باه يشفيو الامراض و يخرجوا الشواطن . ¹⁶و سمى سمعان باسم بطرس.¹⁷و يعقوب بن زبدي و يوحنا خوه , سماهم بوانرجس اللي معناه ولاد الرعد . ¹⁸و اندراوس, و فيليبس, و برتلماوس, و متى, و توما, و يعقوب بن حلفي, و تداوس , و سمعان القانوني , ¹⁹و يهوذا الاسخريوطي اللي باعو , و من بعدها راحوا لدار . يسوع و بعلزبول²⁰و زاد تلم الغاشي ثاني و ما قدروش ياكلوا حتى لقمة تاع خبز. ²¹و كي سمعوا اماليه خرجوا باه يجيبوه, على خاطرهم قالوا :"او مهبول" . ²²و بالصح الكتبة اللي هبطوا من اورشليم قالوا :" راه معاه بعلزبول! وراه يخرج في الشواطن بالرايس تاع الشواطن".²³عيط لهم و قال لهم بالمعاني :" كيفاه يقدر شيطان يخرج شيطان ؟ ²⁴و الا كان مملكة تتقسم على روحها ما تقدرش تثبت . ²⁵و الا كان بيت يتفرق على ذاتو ما يقدرش هاذاك البيت ييثبت .²⁶و اذا قام الشيطان ضد روحو و تفرق ما يقدرش يثبت , بالصح يفني روحو. ²⁷ما يقدرش واحد يدخل لدار واحد قاوي باه يسرقو, لو كان موش في لول يكتف القاوي , بعدها يقدر يسرق لو دارو .²⁸نقول لكم الحق, الذنوب الكل يغفرها ربي للبشر, وحتى الكذب اللي يكذبوه . ²⁹بالصح اللي يكفر بالروح القدس هاذاك اللي عمرو ما يتغفرلو. بالصح يتحكم عليه بعذاب دايم ". ³⁰على خاطر هما قالوا :" او واقف معاه روح منجوس". عمل واش يطلب الله³¹وجات وقتها امو وخاوتو وقفوا لبرة وبعثوا يعيطولو. ³²وكان الغاشي ملموم بيه , قالولو:" هاي امك و خاوتك بره يعيطولك".³³جاوبهم و قال :" شكون يومى و خاوتي ؟". ³⁴و بعدها شاف مع اللي قاعدين وقال :" ها هما امي و خاوتي, ³⁵على خاطر اللي يعمل واش يحب ربي هو خويا واختي ويومى".

Chapter 4

¹و بدا ثاني يعلّم بحذا لبحر , و تلم عليه غاشي كبير حتان دخل للفلوكة و قعد في لبحر, و الغاشي الكل كانوا قاعدين على الشط . ²و كان يقري فيهم ياسر بالمعاني . و قال لهم في تعليمو:³"اسمعوا ! هاو الفلاح خرج باه يزرع , ⁴و هو يزرع طاحت شوية زريعة في عراض الطريق , وجات لفراخ و كلاتها . ⁵وطاحت شوية منها في الحصوانة , وين ماكانش التربة ياسر, و نبتت في ساع على خاطر ما كانش عندها عمق في لرض.⁶بالصح كي زرقت عليها الشمس تحرقت ,و على خاطر ماكانش عندها اصل يبست . ⁷و طاحت الزريعة الاخرى في الشوك , و كي طلع معاها الشوك خنقها و ما جابتش غلة .⁸و طاحت الزريعة الاخرى في لرض لمليحة , وجابت غلة تطلع و تكبر, فيها اللي جابت ثلاثين و اخرى ستين و اخرى مياة". ⁹وبعد قال لهم :"اللي عندو وذنين باه يسمع يسمع "¹⁰و كي كان وحدو سقساوه اللي كانوا معاه هما و التلامذة تاعو على المعنى تاع لمثل, ¹¹قال لهم :" انتوما من حقكم تعرفوا السر تاع ملكوت الله . بالصح اللي هما من برى كل شيء يكون لهم بالمعاني , ¹²يشوفوا بعينيهم بالصح مايميزوش, و يسمعوا بالصح ما يفهموش , باه ما يرجعوش و تتغفر ليهم ذنوبهم ".¹³و من بعد قال لهم :" ما فهمتوش هاذا لمثل ؟ كيفاه مالا تفهموا جميع المعاني ؟ ¹⁴الزارع يزرع الكلمة . ¹⁵وهاذوك اللي في عراض الطريق : كي تتزرع الكلمة , و كي يسمعوها يجي الشيطان في وقتها بعد و يخطف الكلمة من قلوبهم .¹⁶و هاذوك اللي تزرعوا على الحجار: هما الناس اللي كي يسمعوا الكلمة يفرحوا بيها و يقبلوها في ساع , ¹⁷بالصح ما عندهمش اصل في ذاتهم , غير وقتي برك . و من بعد في وقت الشدة و الا كي يجي اضطهاد على جال الكلمة في ساع يطيحوا و يتدعثروا.¹⁸و اللي تزرعوا في وسط الشوك : هاذوك هما اللي يسمعوا الكلمة , ¹⁹و الهموم تاع الدنيا وزيد يغرهم المال و الزهو وهاذي لحوايج كاملة تدخل و تخنق الكلمة و تولي بلا غلة . ²⁰و هاذوك اللي تزرعوا في لرض لمليحة : هما اللي يسمعوا الكلمة و يقبلوها , و يجيبوا الغلة . واحد ثلاثين و الاخر ستين و الاخر مياة". لمثل تاع المصباح²¹و من بعد زاد قال لهم :" كيفاه نجيبوا المصباح و نحطوه تحت القصعة والا تحت السرير؟ يخي يتحط على المنارة ؟ ²²على خاطر ما كانش مخفي و ما يظهرش . و ما كانش مخبي و ما يبانش. ²³و اللي عندو وذنين باه يسمع يسمع ".²⁴و قال لهم :" ثبتوا ف الشيء اللي تسمعوه! يا السامعين الكيل اللي بيه تكيلوا يكيلولكم بيه و زيادة. ²⁵على خاطر اللي عندو يتزادلو و اللي ما عندوش حتى اللي كان عندو يتنحالو ". لمثل تاع الزريعة اللي تكبر²⁶و قال :" هاكذا هو الملكوت تاع الله : كان واحد الراجل يزرع في الزريعة في الحرث , ²⁷و يرقد و ينوض ليل ونهار , و هاذيك الزريعة تطلع و تكبر,و هو ماعلابالوش كيفاه , ²⁸على خاطر لرض وحدها تجيب الغلة . يبدأ نبتة صغيرة, و من بعد يولي سبولة , ومن بعد يولي القمح مليان في السبول . ²⁹و كي يجي وقت الغلة , في هاذاك الوقت بالذات يبدى المنجل على خاطر لحق وقت الحصاد ". لمثل تاع حبة الخردل³⁰وقال :" واش من حاجة نشبهوا بيها الملكوت تاع الله؟ و وب واش من مثل نمثلوه ؟ ³¹كيما الزريعة تاع الخردل, كي تتزرع في التربة هي اصغر واحدة في الزريعة الموجودة على لرض. ³²بالصح كي تتزرع و تكبر تولي هي اكبر واحدة في الحبوب الكل, وتعمل اغصان كبيرة , حتى لفراخ يجيو و يتخزنوا تحت الظل تاعها".³³و بمعاني ياسركيما هاذي كان يكلمهم على حساب واش كانوا يقدروا يسمعوا , ³⁴و ما كانش يكلمهم بلا معاني , و اما كي يكون وحدوا مع التلامذة تاعوا كان يفسر لهم كل شيء. يسوع يهدي العاصفة³⁵و في هاذاك اليوم كي عشات لعشية قال لهم:" ايا نعديو للجيهة الاخرى". ³⁶وكي سرحوا الغاشي راح معاهم هو في الفلوكة و عداو للجيهة الاخرى . و كانوا معاه فلايك واحد اخرين صغار. ³⁷و جات النو و ريح قاوية, و كانت لموجة تضرب في الفلوكة حتى بدات تتعمر بالماء.³⁸و كان هو في الفلوكة من لوراء راقد على واحد المخدة , راحوا ليه نوضوه و قالوا لو :"يا معلم , احنا رانا قاعدين نغرقوا و انت ما علابالك بوالو؟" ³⁹و وقف و انهر الريح , و قال لبحر :"اسكت ! ابكم!". و حبست الريح و ولى هدوء كبير.⁴⁰و قال لهم:" واشبيكم خايفين كيما هكذا؟ كيفاه ما عندكمش ايمان ؟". ⁴¹خافوا خوف كبير , و قالوا لبعضاهم :" هاذا شكون ؟ حتى الريح و لبحر ثاني يسمعوا كلامو!".

Chapter 5

¹و كي عداو للجيهة الاخرى للدشرة تاع الجدريين . ²و كي هبط من الفلوكة في هاذاك الوقت بالذات خرجلو من الجبانة راجل مسكون بالجنون.³و كان يسكن في وسط لقبورة و ما قدروش يربطوه حتى لو كان بالسلاسل , ⁴و كي كانوا يربطوه بالسلاسل يقطعها و القيود يكسرها , و ما كان حتى واحد يقدرلو.⁵و كان ديما ليل و نهار في الجبال و في لقبورة , يعيط و يجرح في روحو بالحجار . ⁶و كي شاف يسوع من بعيد جا يجري و ركع ليه ,⁷و عيط بأعلى صوتو و قال :" واش كاين بيني و بينك آ يسوع ابن الله العالي؟ نحلفك بالله ما تعذبنيش!". ⁸على خاطر يسوع قالو :" اخرج من هاذا الراجل يا واحد الروح المنجوس ".⁹و سقساه :" واش اسمك؟". قالو:" اسمي لاجيون, احنا رانا في ياسر". ¹⁰و بقى يحاول فيه باه ما يخرجوش من الدشرة.¹¹و كان لثم عند الجبال قطيع تاع حلالف يرعاو , ¹²و طلبوا منو هاذوك الشواطن و قالولوا:" ابعثنا للحلالف خلينا نسكنوا فيهم". ¹³في ساع وافق لهم يسوع .و خرجت الجنون و راحت دخلت في لحلالف, و طاح القطيع من اعلى الجرف للبحر و غرقوا في لبحر و كانوا قريب الفين خنزير.¹⁴و اما هاذوك اللي كانوا يسرحوا بالحلالف هربوا يجريو و نشروا لخبر في لمدينة و في الدواور. و خرجوا الناس باه يشوفوا واش صرى. ¹⁵و جاو عند يسوع والمجنون اللي فيه الجيش تاع الجنون قاعد و لابس و عاقل , كي شافوا هذا الشيء كامل خافوا.¹⁶وخبروهم الناس اللي كانوا حاضرين على الشيء اللي صرى للمجنون و قالولهم على لحلالف. ¹⁷اما هما ولاو يحاولوا فيه باه يخرج من بلادهم .¹⁸و كي دخل للفلوكة جاه الراجل اللي كان مجنون و طلب باه يروح معاه, ¹⁹بالصح يسوع ما خلاهش, و قالو :" روح لبيتك و لاهلك و و خبرهم واش عمل ليك ربي و كيفاه رحمك". ²⁰ولى راح و بدا ينادي في المدن العشرة و يخبر بالشيء اللي عملو معاه يسوع . و الناس كلهم تعجبوا فيه . بنت يايرس تقوم من الموتى و المرى النازفة ترتاح²¹و كي عدى في لفلوكة للجيهة لخرى , تلم عليه غاشي كبير , و كان بحذى لبحر. ²²و واحد من الرياس تاع المجمع اسمو يايرس جاء. و كي شافوا ركع عند رجليه , ²³و كان يحاول فيه و يقول لو :" بنيتي الصغيرة قاعدة تطلع في الروح . يا ريت تجي و تحط يدك عليها باه ترتاح و تعيش!". ²⁴راح معاه يسوع وكان غاشي كبيريتبعوافيه و يحصروا فيه .²⁵و كانت واحد لمرى عندها ثناش ن سنة و هي تنزف و دمها يجري, ²⁶و تضرت خلاص عند طبَّة ياسر , و صرفت اللي عندها لكل و ما نفعها والو بالعكس زادت عليها الحالة اكثر من بكري. ²⁷و كي سمعت بيسوع , جات في وسط الغاشي من لورى , و مست الحاشية تاع قشو,²⁸على خاطر قالت :"اذا كان مسيت حتى لو كان قشاتوبرك نبرى". ²⁹و في هاذاك الوقت نشف دمها اللي كان يجري. و حست بروحها بلي برات من داها .³⁰في هاذاك الوقت بالذات تلفت يسوع بين الناس و كان حاس في روحو بلي خرجت منو قوة , و قال :"شكون مسني؟". ³¹قالوا لو التلامذة تاعو :" اك تشوف الغاشي يحصروا فيك , و تقول : شكون مسني؟". ³²و كان يفركت بعينيه باه يشوف شكون هي اللي عملت هاذا الشيء.³³بالصح لمرى جات و هي خايفة و تترعد , و عارفة بالشيء اللي صرالها , سجدت قدامو و قالت لو الحقيقة كاملة. ³⁴قال لها :" يا بنية , ايمانك شفاك , روحي متهنية و كوني صحيحة من مرضك".³⁵و هو مازال يهدر جاو وحايد من الدار تاع رايس المجمع و قالوا لو:" بنتك ماتت . ما كان لاه تتعب المعلم؟".³⁶و سمع يسوع الهدرة اللي تقالت , و قال للرايس تاع المجمع:" ما تخافش امن برك". ³⁷و ما خلى حتى واحد يتبعوا من غير بطرس و يعقوب و يوحنا خو يعقوب. ³⁸و كي وصل لدار الرايس تاع المجمع , شاف الغاشي يبكيو و يندبوا.³⁹دخل و قال لهم :"واش هاذا الحس علاش تبكيو؟ الطفلة ما ماتتش اي راقدة برك". ⁴⁰استهزاو بيه . اما هو خرجهم الكل, غير باب الطفلة و امها و الي كانوا معاه و دخل وين كانوا حاطين الطفلة ,⁴¹و حكم لها يدها و قال لها :" طليثا , نوضي!". اللي معناها : يا بنية , ليك نقول : نوضي! ⁴²و في هاذاك الوقت بالذات ناضت الطفلة وقفت على رجليها و مشات , على خاطر كانت بنت اثناش ن سنة . و هما حاروا و دهشوا دهشة كبيرة خلاص. ⁴³و وصاهم و نبه عليهم باه واحد ما يعلم بالشيء اللي صرى . و قال لهم مدولها تاكل .

Chapter 6

¹و خرج من لثم و رجع لبلادو و تبعوه التلامذة تاعو . ²و كي جا نهار السبت , بدا يعلم في المجمع . و كاين ناس ياسر كي سمعوه حاروا فيه وقالوا :"منين جاب هذا الكل واش هاذي الحكمة اللي عندو حتى تصرى على يديه عجايب كيما هاذي ؟ ³ماهوش هاذا هو النجار ولد مريم , خو يعقوب و يوسي و يهوذا و سمعان , و خواتو الكل راهم هنا عندنا ؟ . و كانوا يغلطوا فيه .⁴قال لهم يسوع : " ما كانش نبي بلا قيمة غير في بلادو و بين اهلو و اماليه ". ⁵و ما قدرش يدير لثم حتى اية واحدة , بالصح حط يديه على مرضى قلال و رتحهم . ⁶و تعجب منهم كي ما عندهمش ايمان . و ولى يدور في المدن القريبة و يعلم . يسوع يبعث الثناش⁷و عيط على الثناش و بدا يبعث فيهم زوز ب زوز , و مدلهم سلطة باه يخرجوا الجنون , ⁸و وصاهم باه ما يهزوش معاهم حتى شيء للطريق غير عصا برك , لا مزود و لا خبز و لا صرة تاع دراهم . ⁹يلبسوا غير سباط في رجليهم , و لبسة واحدة برك .¹⁰و قال لهم :" اذا دخلتوا لكاش دار ابقاو لثمة حتى ترحلوا . ¹¹و الناس اللي ما حبوش يقبلوكم و الا يسمعوكم , اخرجوا من ثم و انفضوا حتى التراب اللي في رجليكم باه تشهدوا عليهم . نقول لكم الحق :راح تكون حالة مدينة سدوم وعمورة خير من حالتهم نهار الحساب " .¹²و راحوا خرجوا و بداو يبشروا و يدعيو الناس باه يتوبوا. ¹³و طردوا جنون ياسر و دهنوا مرضى ياسربالزيت و رتحوهم . قطع راس يوحنا المعمدان¹⁴و سمع بيه هيرودس السلطان , على خاطر ولى مشهور . و قال :" هاذا ما يكون غير يوحنا المعمدان حيا من بين الموتى على هاذيك تصرى على يديه المعجزات ". ¹⁵و وحايد اخرين قالوا :" راهو ايليا ". وكاين اللي قالوا :"راه نبي و الا كيما واحد من الانبياء ".¹⁶بالصح كي سمع هيرودس قال :" هذا هو يوحنا اللي انا نحيتلوا راسو حيا من بين الموتى ". ¹⁷على خاطر هيرودس بذاتو بعث حكم يوحنا و كتفو و رماه في الحبس على جال هيروديا مرت خوه فيليبس , اللي تزوج بيها .¹⁸على خاطر يوحنا كان يقول لهيرودس :" ما يحلش ليك تدي مرت خوك ". ¹⁹و تحلفت فيه هيروديا و حبت تقتلو بالصح ما قدرتش , ²⁰على خاطر هيرودس كان يهاب من يوحنا و عارف بلي راه راجل بار وقديس , و كان يحامي عليه . وكي سمع عليه بلي يدير حوايج ياسر يحب حتى هو يسمع لو .²¹و جات الفرصة , نهار اللي عمل هيرودس في ذكرى ميلادو عشاء للعظماء و القياد الكبار و الناس اللي عندهم الجاه في الجليل, ²²دخلت بنت هيروديا و شطحت , هيرودس والجماعة اللي قاعدين معاه عجبهم الحال , و قال السلطان للطفلة :" واش تطلبي نمد لك".²³و حلف لها :" مهما واش طلبتي نمدلك حتى لو كان نص العرش تاعي" . ²⁴خرجت وقالت لامها :"واش نطلب؟" . قالت لها :" راس يوحنا المعمدان ". ²⁵دخلت في ساعتها للسلطان و طلباتو وقالت :" نحب تمد لي راس يوحنا المعمدان على طبق ".²⁶حزن السلطان ياسر . بالصح كي حلف قدام الجماعة ما قدرش يردها . ²⁷و في ساع بعث السلطان سياف باه يجيب لو راس يوحنا . ²⁸راح السياف للحبس ونحالو راسو. و حط الراس على طبق ومدو للطفلة , و الطفلة مداتو لامها . ²⁹و كي سمعوا التلامذة تاعو, جاو وهزوا الجثة و دفنوها في قبر . خمسة الاف راجل يشبعهم يسوع³⁰وتلموا المرسولين عند يسوع و خبروه بكل شيء ، كل واش داروا وكل واش علموا . ³¹قال لهم يسوع :" ارواحوا انتوما وحدكم لجيهة خالية و ارتاحوا شوية " على خاطر ياسر اللي راهم رايحيين وجايين ، وما لقاوش فرصة باه ياكلوا . ³²وراحوا في الفلوكة لواحد المكان خالي و قعدوا وحدهم ..³³وشافوهم الغاشي كي كانوا رايحين . وياسر اللي عرفوه .وخرجوا يجريو من كل المدن على رجليهم و سبقوهم لهاذاك المكان و اتلموا عليه . ³⁴و كي خرج يسوع شاف غاشي كبير، حن عليهم كي شافهم كي لغنم بلا راعي و بدا يعلم فيهم امور ياسر.³⁵و بعد ساعات طويلة جاوه التلامذة وقالوا :" هاذا المكان راه خالي و زيد فات الحال . ³⁶سرحهم خلي يروحوا للدواور والقرى القريبة يشريو خبز على ارواحهم ، على خاطر ما عندهمش واش ياكلوا ".³⁷جاوبهم وقال لهم :" مدولهم انتوما ياكلوا " . قالوا :" كيفاه نروحوا نشريو خبز بميتين دينار و نمدولهم ياكلوا ؟" . ³⁸قال لهم :" قداه من خبزة عندكم ؟ روحوا شوفوا " . كي شافوا قالوا:" خمسة خبزات وزوز حوتات".³⁹قال لهم يروحوا يقعدوا الغاشي جمايع جمايع فوق لحشيش لخضر . ⁴⁰راحوا قعدوهم في جمايع تاع مية مية وخمسين خمسين . ⁴¹حكم الخبزات في خمسة و الحوتات في زوز، و رفع عينيه للسماء ، و بارك وقسم الخبز، ومد للتلامذة تاعو باه يوزعوا على الغاشي ، و قسم الزوز حوتات ليهم الكل .⁴²كلاو كلهم وشبعوا . ⁴³و من بعد لموا اثناش ن قفة مليانة فضالت تاع خبز وحوت . ⁴⁴و كل اللي كلاو كانوا قريب خمسة الاف راجل . معجزة المشي على الماء⁴⁵و في ساع حتم على التلامذة تاعو يركبوا في الفلوكة ويسبقوه للجيهة المقابلة ، لبيت صيدا حتى يسرح هو الغاشي . ⁴⁶وبعد ما ودعهم راح للجبل باه يصلي . ⁴⁷و كي جات لعشية كانت لفلوكة في وسط لبحر، وكان هو على الشط وحدو.⁴⁸وشافهم يتعذبوا، على خاطر الريح كانت عاكستهم ، و في الربع الرابع تاع الليل جاهم ماشي على لبحر، و قرب يفوتهم . ⁴⁹وكي شافوه ماشي على لبحر، حسبوه خيال وبداو يعيطوا . ⁵⁰على خاطر كلهم كي شافوه خافوا . وقتها في ساع كلمهم و قال لهم :" اتشجعوا اني انا هو ما تخافوش".⁵¹وكي طلع لهم للفلوكة حبست الريح , بالصح هما حاروا وتعجبوا ياسر بينهم وبين ارواحهم , ⁵²و ما فهموش بالمعجزة تاع الخبز على خاطر كانت قلوبهم قاسية.⁵³و كي عداو للجيهة المقابلة وصلوا لارض جنيسارت ورساو لفلوكة لثم . ⁵⁴و كيما خرج من لفلوكة في ساع الناس عرفوه . ⁵⁵و طافوا كل هاذيك لبلاد الدايرة بيهم , و بداو يهزوا كل من كان مريض في لفراش و يديوهم للمكان اللي يسمعوا بلي راه موجود فيه.⁵⁶و وين ما كان يدخل للقرى و للمدن و الا الدواوير, حطولوا المرضى في الساحات العامة, وحاولوه يمسهم حتى لو كان بالحاشية تاع قشوا . وكان كل من يمسوا يبرى .

Chapter 7

¹و تلموا عليه الفريسيين و جماعة من الكتبة جايين من اورشليم .²و كي شافوا وحايد من التلامذة تاعو ياكلوا في الخبز بيدين مش نظيفة , يعني ماهيش مغسولة, لاموا عليهم . ³على خاطر الفريسيين وليهود الكل لو كان ما يغسلوش يديهم مليح ما ياكلوش , حاكمين في تقليد الشيوخة . ⁴و حتى كي يجيو من السوق ما ياكلوش لو كان مل يغسلوش . و حوايج وحايد اخرين ياسر تسلموها و بقاو حاكمين فيها كيما غسل الكيسان والبقارج و مواعن النحاس و السرة .⁵و سقساوه الفريسيين والكتبة :" علاه التلامذة تاعك ما يمشيوش على حساب تقليد الشيوخة , و ياكلوا الخبز بيدين ما هيش مغسولة ؟".⁶جاوبهم وقال لهم :" عمل مليح اشعياء كي تنبأ عليكم يا واحد المنافقين ! كيما راه مكتوب :هذا الشعب يكرمني حد الشوارب , بالصح قلبو بعد عليا بعيد , ⁷يعبدوني باطل و هما يعملوا في حوايج وصاوها الناس .⁸خليتوا وصية الله وحكمتوا في تقليد الناس : غسيل لبقارج و الكيسان , و تديروا امور اخرى ياسر كيما هاذي ". ⁹بعد قال لهم :" شوفوا ! رفضتوا وصية الله باه تراعيو تقليدكم انتوما ! ¹⁰على خاطر موسى قال : اكرم باباك وامك , و اللي يسب باباه و الا امو لازم يموت .¹¹بالصح انتوما تقولوا :" الا كاش واحد قال لباباه والا امو : الشيء اللي كنت نعاونك بيه مديتو صداقة . ¹²يولي ما هوش ملزم باه يعاون باباه والا امو . ¹³جعلتوا وصية الله باطلة بتقليدكم اللي حكمتوا فيه . و حوايج ياسر كيما هاذي راكم تديروا ".¹⁴و من بعد عيط على الغاشي و قال لهم : " اسمعوني كلكم وافهموا مني . ¹⁵ما كانش حاجة من بري اذا دخلت في جسم الانسان تقدر تنجسوا , بالصح الحوايج اللي تخرج منو هي اللي تنجس الانسان . ¹⁶و اللي عندو وذنين ويحب يسمع يسمع ".¹⁷و كي دخل من عند الغاشي للدار, سقساوه التلامذة على المثل . ¹⁸قال لهم :" حتى انتوما ماكومش فاهمين ؟ ما تعرفوش بلي كل ما يدخل للانسان من برى ما يقدرش ينجسو , ¹⁹على خاطر مايدخلش للقلب يدخل برك للكرش ومن بعد يخرج للخلاء , وهاذاك يطهر كل شيء ".²⁰و من بعد قال اللي يخرج من الانسان هو اللي ينجس الانسان . ²¹على خاطر من الداخل من قلوب الناس ، يخرج الشر : زنى , فسق , قتيلة , ²²سرقة , طمع , خبث , تمنكير , دعارة , حسد , كذب , تكبر , وجهل . ²³و هاذي الشرور كاملة تخرج من الداخل و تنجس الانسان ". ايمان لمرى اللي من كنعان²⁴من بعد ناض من لثمة وراح لجوايه صور وصيدا ، و دخل لواحد البيت وكان ما ذابيه واحد ما يعلم بيه ، بالصح ما قدرش يتخبى ، ²⁵على خاطر واحد لمرى عندها بنتها مسكونة بالجن سمعت بيه ، و جات عندو ورمات روحها ساجدة عند رجليه. ²⁶وكانت لمرى برانية . فينيقية من سوريا حاولاتو يخرج الشيطان من بنتها .²⁷اما يسوع قال لها :" خلي حتى يشبعوا لولاد هما لوالا, على خاطر ما يليقش خبزة لولاد تترمى للكلاب ". ²⁸جاوباتو وقالت :" نعم يا سيد حتى لكلاب راهم من تحت المايدة ياكلوا الفضلة تاع لولاد !".²⁹و قال لها :" على جال هاذي الكلمة , روحي .او خرج الشيطان من بنتك ". ³⁰و راحت لدارها ولقات الشيطان خرج , و الطفلة مطروحة فوق لفراش . شفاء اطرش ومعقود³¹ومن بعد خرج ثاني من جوايه صور وصيدا , و جاء لبحر الجليل في وسط الحدود تاع المدن العشر. ³²و جابوا ليه واحد اطرش ولسانو معقود , و طلبوا منو يحط عليه يديه .³³و اداه من وسط الغاشي على جيهة , و حط صوابعو في وذنيه وتفل ومس لسانو, ³⁴و هز عينيه للسماء , و توجع وقال :"افثا" . يعني اتحل . ³⁵و في ساع تحلت وذنيه , و تحلت عقدة لسانو, و هدر مسرح .³⁶ووصاهم باه ما يقولوا حتى لواحد , بالصح على قد ما هو يوصي يزيدوا يقولوا اكثر واكثر . ³⁷و بقاو حايرين فيه وقالوا :" لحوايج اللي دارها الكل مليحة! خلى الطرش يسمعوا و البكاكش يتكلموا " .

Chapter 8

¹في هاذيك ليامات كثر عليه الغاشي ياسر , و ماكانش عندهم واش ياكلوا , عيط يسوع للتلامذة وقال لهم :" ²هاذم الناس غاظوني , عندهم ضرك ثلاثة ايام و هما معايا و ما عندهمش واش ياكلوا. ³ولو كان نسرحهم لديارهم صايمين يفشلوا في الطريق على خاطر كاين فيهم اللي جاو من بعيد ". ⁴جاوبوه التلامذة :"منين يقدر الواحد يشبع هاذم الكل بالخبز هنا في الصحراء ؟" .⁵سقساهم :" قداه من خبزة عندكم ؟" قالوا :" سبعة " . ⁶طلب منهم يقعدوا الغاشي ف لرض و ادا الخبزات في سبعة و شكر وقسمهم , و مد للتلامذة باه يوزعوهم على الغاشي .⁷و كان عندهم شوية من الحوت هاذاك الصغير , بارك و قال لهم :" وزعوا هاذي ثاني " . ⁸كلاو حتى شبعوا . ولموا الكسور اللي فضالت : سبع قفف . ⁹و كانوا اللي كلاو قريب ربعة الاف واحد . و من بعد سرحهم . ¹⁰و في ساع دخل للفلوكة مع التلامذة تاعو و جاو لجوايه دلمانوثة .¹¹خرجوا الفريسيين وبداو يناقشوا فيه طالبين منو يعمل ايه من السماء , باه يجربوه , ¹²تنهد من قلبو وقال :" علاش هذا الجيل يطلب في اية ؟ نقول لكم الحق : هذا الجيل ما يشوف حتى اية " . خميرة الفريسيين وخميرة هيرودس ¹³و من بعد خلاهم و دخل للفلوكة و راح للجيهة لمقابلة.¹⁴و نساو يديو معاهم الخبز , و ما كانش عندهم في الفلوكة غير خبزة واحدة برك . ¹⁵و وصاهم وقال :" شوفوا ! ردوا بالكم من خميرة الفريسيين و خميرة هيرودس ".¹⁶تفكروا وقالوا لبعضاهم :" ما عندناش خبز". ¹⁷عرف يسوع كيفاه يفكروا وقال لهم : "علاش خممتوا بلي ماعندكمش خبز ؟ مازالتوا ما تفكروش وما تفهموش؟ حتى لضرك قلوبكم خشينة؟¹⁸كيفاه عندكم عينين وما تشوفوش , وعندكم وذنين وما تسمعوش, كيفاه ما تتفكروش؟ ¹⁹وقت اللي كسرت الخمسة خبزات للخمسة الاف, قداش من قفة مليانة خبز لميتوا؟". قالوا لو اثناش ".²⁰و وقت السبعة خبزات للاربعة الاف . قداش من قفة مليانة لميتوا؟". قالوا لو :"سبعة". ²¹قال لهم :" كيفاه مالا ما تفهموش؟". واحد اعمى يولي يشوف في بيت صيدا²²وجاء لبيت صيدا, وجابولو واحد اعمى و طلبوا منويمسوا , ²³حكم الاعمى من يدو و خرج بيه خارج القرية , وتفل في عينيه , و حط يديه عليه و سقساه : الا كاش ما شاف؟²⁴شاف وقالو :"راني نشوف ف الناس كيما خيالات الشجر". ²⁵و زاد حط يديه على عينيه , وخلاه يشوف, رجع صحيح ولى يشوف مليح, ²⁶بعثو لدارو ووصاه :"ما تدخلش للقرية,وما تقول لحتى واحد في القرية". بطرس يستعرف بالمسيح²⁷و من بعد خرج يسوع والتلامذة تاعو للقرى تاع قيصرية وفيليبس. و في الطريق سقسا التلامذة تاعو وقال لهم :" شكون يقولوا الناس اني انا؟". ²⁸جاوبوه:" يوحنا المعمدان. و وحايد اخرين يقولوا :ايليا , و اخرين : واحد من لنبياء".²⁹قال لهم :"و انتوما , واش تقولوا شكون انا؟". جاوب بطرس و قال لو :"انت المسيح". ³⁰حذرهم باه ما يقولوا لحتى واحد عليه. يسوع يخبر بموتو وقيامتو³¹و بدى يعلمهم بلي بن الانسان لازم يتألم ياسر, و يرفضوه الشيوخة و كبار الكهنة و الطلبة , ويتقتل , وبعد ثلاثة ايام يحيا من الموت. ³²وقال هاذي الهدرة جهار. اداه بطرس على جيهة وبدا ينهر فيه .³³تلفت وشاف التلامذة , بخص بطرس وقالو:"بعد عليا يا شيطان !على خاطر انت ما يهمكش امور الله بالصح امورالناس اللي تهمك". ³⁴و عيط للغاشي مع التلامذة و قال لهم :"اللي يحب يمشي ورايا ينكر روحو ويهز الصليب تاعو و يتبعني.³⁵على خاطر اللي يحب يخلص روحو يهلكها . واللي يهلك روحو على جالي و على جال الانجيل هاذاك يخلصها. ³⁶على خاطر واش يربح الانسان لو كان يربح الدنيا كاملة و يخسر روحو؟ ³⁷والا واش يمد الانسان باه يفدي نفسو؟³⁸على خاطر اللي يحشم بيا و بكلامي في هذا الجيل الفاسق المذنب , راه ابن الانسان يحشم بيه نهار اللي يجي بمجد باباه مع الملايكات المقدسين ".

Chapter 9

¹و قال لهم :"نقول لكم الحق : كاين ناس قاعدين معانا هنا ما يشوفوش الموت حتى يشوفوا الملكوت تاع الله جاء بقوة ". التجلي ²و بعد ستة ايام دا يسوع بطرس و يعقوب و يوحنا , و طلع معاهم لواحد الجبل عالي و كانوا غير هما برك وحدهم . و تبدلت هيأتو قدامهم , ³و ولى قشو يلمع ابيض كي الثلج , ما يقدر حتى صباغ في الدنيا يدير الحاجة بيضاء كيما هكذاك .⁴و ظهر لهم ايليا و معاه موسى , و كانوا يتكلموا مع يسوع. ⁵بدا بطرس يقول ليسوع :" يا سيدي مليح نبقاو لهنا . خلينا ننصبوا تلاثة خيم : ليك واحدة , و لموسى واحدة , و لايليا واحدة ". ⁶و ما كانش عارف واش راه يهدر على خاطر كانوا خايفين .⁷و كانت سحابة تظلل عليهم . و جاء صوت من السحابة و قال :" هذا هو وليدي لحبيب ليه اسمعوا " . ⁸و تلفتوا مخلوعين و ما شافوا حتى واحد من غير يسوع وحدو معاهم .⁹و كي كانوا نازلين من الجبل , وصاهم باه ما يخبروا حتى واحد بالشيء اللي شافوه , غير بعد ما يقوم بن الانسان من بين الموتى . ¹⁰و خلاو الكلمة في قلوبهم وو بقاو يسقسيو :" واش هو القيام من بين الموتى ؟" .¹¹و سقساوه هو و قالولو:" علاش الكتبة يقولوا: بلي ايليا هو اللي لازم يجي الاول؟". ¹²قال لهم :" ايليا يجي هو الاول ويرجع كل شيء . و كيفاه راه مكتوب على ابن الانسان بلي يتعذب ياسر و يتحقر. ¹³بالصح نقول لكم : ايليا حتى هو جاء, و عملوا فيه كل اللي حبوا , كيما راه مكتوب عليه ". يسوع يرتح طفل ساكنو روح منجوس¹⁴و كي جاء للتلامذة شاف جماعة كبيرة من الكتبة دايرين بيهم و يحاوروا فيهم . ¹⁵و في ساع الجماعة الكل كي شافوه حاروا, و راحوا يجريو و سلموا عليه . ¹⁶سقسا هو الكتبة :" على ماه قاعدين تحاوروا فيهم ؟"¹⁷قالو واحد من الجماعة :"يا شيخ , انا جبت لك وليدي ساكنو روح بكوش , ¹⁸و كل ما يحكمو يقطعو حتى يتصرع و يحك سنيه في بعضاهم و ييبس خلاص . و قلت للتلامذة تاعك باه يخرجوه و ما قدروش ". ¹⁹جاوب يسوع و قال لهم :" يا واحد الجيل اللي ما فيكمش ليمان , حتى لوقتاه نكون معاكم؟ لوقتاه نستحملكم؟ جيبوه عندي !".²⁰جابوه . و كي شافو في ساع صرعو الروح , و طاح في لرض يتمرغ ويتصرع. ²¹سقسى يسوع باباه :"من وقتاه و هو كيما هكا ؟". قالو :" ملي كان صغير. ²²و قداه من مرة يطيحو في النار و في الماء باه يقتله. بالصح الا كنت قادر تدير حاجة حن علينا و عاونا".²³و قالو يسوع :" الا كنت تقدر تامن . كل شيء مقدور عليه للمومن". ²⁴و في ساع عيط باباه و الدموع في عينيه وقال :" يا سيدي نامن , عاون قلة ايماني ". ²⁵و كي شاف يسوع بلي الغاشي هاربين يدزوا في بعضاهم , انهر الروح المنجوس و قالو:" اسمع يا الجن البكوش و الاطرش , انا نقلك : اخرج منو و ما تعاودش تدخل فيه خلاص!".²⁶رغى و صرعو بالقاوي و خرج . و طاح الطفل تقول عليه ميت , حتى كاين اللي حسبوه مات !". ²⁷حكمو يسوع من يديو و وقفو, و ناض.²⁸و كي دخل لواحد الدار سقساوه التلامذة تاعوا كي كانوا وحدهم : " علاه احنا ما قدرناش نخرجوه؟. ²⁹قال لهم :" هذا الجنس ما يخرج كان بالصلاة و الصوم " . يسوع يقول لهم على موتو و قيامتو من بين الموتى³⁰و خرجوا من لثم و عداو على الجليل , و ما حب ختى واحد يعلم بيه , ³¹على خاطر كان يعلم في التلامذة تاعو و يقول لهم :" بن الانسان راح يطيح في يدين الناس و يقتلوه . و من بعد ما يقتلوه يقوم في ثالث يوم من بين الموتى". ³²بالصح هما ما فهموش الهدرة . و خافوا باه يسقسيوه . شكون هو الاعظم ؟³³و جاء لكفرناحوم . و كي كان في الدار سقساهم :" كي كنا في الطريق واش كنتوا تهدروا بيناتكم ؟". ³⁴سكتوا , على خاطر كانوا يتخاطروا بيناتهم في الطريق في شكون هو اعظم واحد فيهم . ³⁵قعد و عيط على الثناش و قال لهم :"اذا كان واحد حاب يكون هو الاول لازم يكون هو الاخر فيهم الكل و خديم ليهم الكل ".³⁶جاب طفل صغير و حطوا في الوسط و حضنوا و قال لهم : ³⁷" اللي يقبل واحد من الصغار كيما هاذا باسمي يقبلني انا , و اللي يقبلني ما يساماش قبلني انا بالصح قبل اللي بعثني ". و اللي ماهوش ضدنا راه معانا³⁸جاوبو يوحنا وقالو :" يا معلم , شفنا واحد يخرج في الجنون باسمك و هو مايمشيش معانا , حَرمنا عليه على خاطر ما هوش يتبع فينا ". ³⁹قالو يسوع :" ما تحَرموش عليه , على خاطر ما كانش واحد يعمل معجزات باسمي و يقدر يهدر عليا في ساع بالشر .⁴⁰و اللي ماهوش علينا راه معانا . ⁴¹على خاطر من سقاكم بكاس ما باسمي على خاطر انتم للمسيح , نقول لكم الحق: اجرو ما يضيعش. تحذير للي تجي من عندو العثرات⁴²و اللي يعثر واحد من الصغار المومنين بيا , خير ليه لو كان يحط حجرة تاع رحى في رقبتو و يطيش روحو في لبحر . ⁴³و كان عثراتك يدك قصها. خير ليك تدخل الحياة بلا يد خير من اللي يكون عندك زوز يدين و تروح لجهناما, للنار اللي ما تطفاش. ⁴⁴وين دودهم ما يموتش والنارما تطفاش .⁴⁵و كان عثراتك رجلك قصها . خير ليك تدخل للحياة عايب ولا تكون بزوز رجلين و تروح لجهناما في النار اللي ما تطفاش . ⁴⁶وين دودهم ما يموتش و النار ما تطفاش .⁴⁷و كان عثراتك عينك نحاها. خير ليك تدخل لملكوت الله اعور من اللي يكون عندك عينين و تتطرح في جاهناما النار . ⁴⁸وين دودهم ما يموتش و النار ما تطفاش .⁴⁹على خاطر كل واحد يملح بالنار , وكل ذبيحة تتملح بالملح . ⁵⁰الملح مليح . بالصح اذا كان الملح ماهوش مالح , باه يعدلوه؟ خلي يكون ليكم في ارواحكم ملح , و سالموا بعضاكم ".

Chapter 10

¹و ناض من لثم و جاء لحدود اليهودية على جيهة الاردن . و زاد تلم عليه الغاشي ثاني , و كي العادة تاعو كان يعلم فيهم . ²قدموا الفريسيين وسقساوه:" حلال على الراجل كي يطلق مرتو؟". باه يجربوه . ³جاوب يسوع وقال :" واش وصاكم موسى؟". ⁴قالوا :"موسى سمح باه يكتب لها ورقة الطلاق , و تتطلق".⁵جاوب يسوع وقال لهم :"على جال قلوبكم القاسية كتب لكم موسى هاذي الوصية , ⁶بالصح من اول الدنيا . خلقهم الله انثى و ذكر.⁷على جال هذا يخلي الراجل باباه و امو و يلصق في مرتو, ⁸و يوليو في زوز بدن واحد . ما يبقاوش زوز يوليو واحد . ⁹واللي يجمعو الله ما يفرقوش الانسان".¹⁰و من بعد في الدار حتى التلامذة زادوا سقساوه, ¹¹قال لهم:" اللي يطلق مرتو و يتزوج بواحدة اخرى راه يزني عليها . ¹²و كان طلقت مرى راجلها و تزوجت بواحد اخر راهي تزني ". يسوع يبارك لولاد الصغار¹³و جابوا ليه اولاد صغار باه يحط يدو عليهم و يباركهم. بالصح التلامذة بخصوا الناس اللي جابوهم . ¹⁴و كي شافهم يسوع ما حبش فيهم وقال لهم :"خلوا لولاد يجيو عندي ما تحَرموش عليهم ,على خاطر ملكوت الله راه للناس اللي كيما هما .¹⁵نقول لكم الحق: اللي ما يقبلش الملكوت تاع الله كيما طفل صغير ما يدخلوش". ¹⁶و حضنهم و حط يديه عليهم و باركهم . الشاب الغني¹⁷و كي كان خارج في الطريق , جاء واحد يجري و ركع لو و سقساه : يا المعلم الصالح , واش ندير باه نورث الحياة الدايمة ؟". ¹⁸قال لو يسوع:" علاش تقول لي صالح ؟ ما كاين حتى واحد صالح غير واحد برك و هو الله. ¹⁹انت تعرف واش يعَلم الشرع: ما تزنيش. ما تقتلش. ما تسرقش. ما تشهدش بالباطل. ما تظلمش .اكرم باباك و امك ".²⁰جاوب وقال :"يا معلم , هاذي كلها من صغري وانا نعمل بيها". ²¹شاف فيه يسوع وحبو, وقالو:" تنقصك حاجة واحدة برك : روح بيع كل اللي عندك و مد للفقراء, يولي عندك كنز في السماء , و ارواح تبعني وهز الصليب". ²²تقلق على هاذي الهدرة ورجع حزين , على خاطر كان عندو المال ياسر .²³تلفت يسوع وقال للتلامذة تاعو:"قداه صعيب على مول المال يدخل للملكوت تاع الله !". ²⁴تحيروا التلامذة من الكلام تاعو . وزاد قال لهم ثاني :" يا ولدي , قداه صعيب للمتوكلين على مالهم باه يدخلوا للملكوت تاع الله! ²⁵اسهل للجمل يعدي من عين الابرة على مول المال باه يدخل للملكوت تاع الله ".²⁶دهشوا خلاص و قالوا لبعضاهم :"شكون مالا يقدر يمنع؟". ²⁷شاف فيهم يسوع وقال لهم :" عند الناس ما هوش مقدور عليه , بالصح مش عند الله , على خاطر كل شيء مقدور عليه عند الله". ²⁸و بدا بطرس يقول لو :" هاو احنا خلينا كل شيء وتبعناك ".²⁹جاوب يسوع وقال :"نقول لكم الحق :ماكانش واحد خلى بيت والا خاوة والا خواتات و الا اب والا ام و الا مرى و الا جنانات , على جالي وعلى جال الانجيل , ³⁰الا و يدي مياة ضعف ضرك في هذا الزمان , ديار و خاوة وخواتات و امهات و اولاد و جنانات , مع اضطهادات , و في الاخرة الحياة الدايمة. ³¹بالصح ياسر هما لولين يوليو لخرين , و لخرين يوليو لولين". يسوع يخبر بموتو و قيامتو من بين الموتى³²و كانوا في الطريق طالعين لاورشليم و يسوع ماشي قدامهم , و كانوا متحيرين . و كانوا خايفين كي عادوا رايحين معاه . حكم يسوع الثناش وبدى يحكي لهم على الشيء اللي راح يصرالو: ³³" ها نحنا طالعين لاورشليم ,و ابن الانسان يتسلم للرؤساء تاع الكهنة و الكتبة , و يحكموا عليه بالموت , و يسلموه للامم, ³⁴يستهزاو بيه و يضربوه و يبصقوا عليه و يقتلوه , و في ثالث يوم يقوم ". الطلبة تاع يعقوب ويوحنا³⁵وجاوه يعقوب ويوحنا اولاد زبدي و قال لو :"يا معلم , راح نطلبوك في حاجة نحبوا تدير ها لنا ". ³⁶قال لهم :" واش طالبين ندير لكم ؟". ³⁷قال لو :" اعطينا نقعدوا واحد على ليمين و واحد على ليسار في المجد تاعك ".³⁸قال لهم يسوع :"ما راكمش عارفين واش تطلبوا. تقدروا تشربوا الكاس اللي راح نشربها انا, و تتصبغوا بالسبغة اللي راح نتصبغ بيها ³⁹قالوا لو:" نقدروا". قال لهم يسوع :"الكاس اللي نشربها تشربوها, و الصبغة اللي راح نتصبغني تتصبغوا بيها. و قالوا لو: "نقدروا". قال لهم يسوع: "الكاس اللي نشربها تشربوها, و الصبغة اللي راح تصبغني تتصبغوا بيها. ⁴⁰بالصح الجلوس على يمين و اليسار تاعي ما نقدرش نمدوا غير لماليه".⁴¹و كي سمعوا الثناش غاضهم الحال من يعقوب و يوحنا. ⁴²عيط لهم يسوع و قال لهم: "راكم عارفين باللي اللي حاسبين ارواحهم رياس على اهل الدنيا يتسلطوا عليهم, و باللي العظماء يسيطروا عليهم.⁴³ما لازمش يكون هاذا بيناتكم. ⁴⁴اللي يحب يولي فيكم هو لول, لازم يكون لخديم تاع الناس الكل. ⁴⁵على خاطر ابن الانسان ما جاش باه يخدموا عليه بالصح جا باه يخدمو يمد حياتو دية على جال ناس ياسر". برتيماوس لعمى يبرى⁴⁶و وصلوا لاريحا. و كي كان خارج من اريحا هو والتلامذة تاعو و معاهم غاشي كبير, كان برتيماوس لعمى ولد تيماوس قاعد على جنب الطريق يطلب في صداقة. ⁴⁷و كي سمع باللي يسوع الناصري هو اللي معدي, بدا يعيط على طول صوته و يقول: "يايسوع ولد داود ارحمني" ⁴⁸و كاين ياسر اللي نهروه باه يسكت, بالصح هو زاد عيط اكثر و اكثر: "يا وليد داود ارحمني".⁴⁹وقف يسوع و قال لهم عيطولو. عيطوا على لعمى و قالوا لو: "اتشجع نوض او يعيط لك". ⁵⁰نحى عليه الرداء تاعو و قام يجري و جا عند يسوع.⁵¹سقساه يسوع و قالو: "واش تحب نعمل لك؟" قال لو الاعمى: "ياسيدي, نولي نشوف". ⁵²قال لو يسوع: "روح. ليمان تاعك شفاك". و في ساع ولى يشوف و يتبع يسوع في الطريق.

Chapter 11

¹و كي قربوا لاورشليم في جيهة بيت فاجي و بيت عنيا , بحذى جبل الزيتون , بعث زوز من التلامذة تاعو, ²و قال لهم :"روحوا للقرية اللي مقابلتكم و في الوقت اللي انتوما داخلين تلقاو جحش مربوط مازال ما ركب عليه حتى واحد من الناس. حلوا الرباط تاعو و جيبوه ليا. ³و كان كاش واحد قال لكم علاه والا واش راكم تديروا ؟ قولوا لو: الرب محتاج ليه . في ساعتو يبعثوا لهنا".⁴راحو كيما قال لهم و لقاو الجحش مربوط عند الباب واقف في نص الطريق , حلوه. ⁵و كاين ناس من اللي موجودين لثم قالوا لهم :"واش تعملوا علاش راكم تحلوا في الرباط تاع الجحش ؟". ⁶و كي جاوبوهم كيما وصاهم يسوع . خلاوهم.⁷جابوا الجحش ليسوع , و حطوا عليه قشهم باه يركب . ⁸و كاين ياسر من الناس اللي فرشوا قشهم في نص الطريق , و وحايد اخرين قصوا اعراف من الشِّجر و فرشوها في الطريق , ⁹و الناس اللي كانوا قدامو و وراه كانوا يعيطوا و يقولوا :" اوصنا! يتبارك اللي جاي باسم الرب ! ¹⁰تتبارك المملكة تاع بابانا داود باسم الرب! اوصانا في لعلالي!". يسوع يدعي على الشجرة تاع الكرطوس¹¹و دخل يسوع لاورشليم و للهيكل, و بعد ما شاف كل شيء كانت عشات لعشية , خرج من لثم و راح لبيت عنيا هو و التلامذة ف الثناش . ¹²و ليوم وغدوة كي خرجوا من بيت عنيا جاع ,¹³و شاف شجرة تاع كرطوس من بعيد معبية بالورق , وجاء كاش ما يلقى فيها حاجة , و كي وصل ما لقى غير لورق , على خاطر مازال ماهوش وقت كرطوس. ¹⁴تكلم يسوع و قال لها :"من اليوم ما يزيد حتى واحد ياكل من الفاكية تاعك!". و كانوا التلامذة يسمعوا فيه . تطهير الهيكل¹⁵و جاو لاورشليم . و كي دخل يسوع للهيكل بدا يخرج في هاذوك اللي كانوا يبيعوا و يشريو لثم , و قلب لمْيِد تاع الصرافة و لكراسي تاع اللي يبيعوا في لحمام . ¹⁶و ما خلى حتى واحد يدخل بالسلعة للهيكل .¹⁷و كان يعلم و يقول:" ياخي مكتوب : بيتي يتسمى بيت صلاة للشعوب الكل ؟ و انتوما قلبتوه غار تاع سراقين ". ¹⁸و كي سمعوا بيه الكتبة و الرياس تاع الكهنة بداو يخمموا كيفاه يقتلوه , على خاطر خافوا من الناس اللي حاروا في التعليم تاعو . ¹⁹و كي عشات لعشية خرج من لمدينة . شجرة الكرطوس اليابسة²⁰و في الصباح كي كانوا معديين شافوا الشجرة تاع الكرطوس يبست باها بعروقها , ²¹تفكر بطرس و قالو:" يا سيدي , شوف ! الشجرة اللي دعيت عليها يبست !".²²جاوب يسوع و قال لهم :" خلي عندكم ايمان بالله . ²³على خاطر نقول لكم الحق : لو كان واحد يقول لهاذا الجبل : اتهز و ارم روحك في لبحر! و ما يكونش عندو شك في قلبو بالصح يآمن بلي الشيء اللي يقولو يصرى , مهما واش يقول يكون ليه .²⁴علاها نقول لكم : كل واش تطلبوا كي تكونوا تصليو, كي تامنوا بلي راح تنالوه , يكون لكم . ²⁵و في الوقت اللي توقفوا باه تصليو , اغفروا اذا كان كاش واحد دار لكم حاجة , باه يغفر ليكم ثاني باباكم اللي في السماوات ذنوبكم . ²⁶و اذا كان انتوما ما تغفروش حتى باباكم اللي في السماوات ما يغفرش ليكم ذنوبكم". الشيوخة يسقسيو يسوع على السلطان تاعو²⁷و زادوا جاو ثاني لاورشليم , و كي كان يسوع يمشي في الهيكل , جاو ليه الرياس تاع الكهنة و معاهم الكتبة و الشيوخة , ²⁸و قالوا لو :" بواش من سلطان راك تعمل في هاذا الشيء؟ و شكون مدلك الحق باه تدير هكذا؟ ".²⁹جاوبهم يسوع و قال لهم :" و حتى انا نسقسيكم حاجة واحدة برك . كي تجاوبوني , نقول لكم انا بواش من سلطان راني نعمل هكذا ³⁰قولولي المعمودية تاع يوحنا : كانت من عند الله و الا من عند الناس ؟ ".³¹و كي خمموا مع ارواحهم قالوا :" كان قلنا : من عند الله , يقول لنا : علاش مالا ما تامنوش بيه؟ ³²و كان قلنا : من عند الناس ". يوليو يخافوا من الشعب . على خاطر كان يوحنا عند الناس الكل نبي تاع الصح . ³³ولاو جاوبوا يسوع و قالوا لو :"ما نعرفوش ". قال لهم يسوع :" حتى انا ما نقولش بواش من سلطان ندير واش راني ندير ".

Chapter 12

¹وبدا يعلم فيهم بالامثال و يقول : "كاين واحد الراجل غرس دوالي و سيج عليهم , و حفر حوض تاع معصرة , و بنى برج , و مدوا للكرامين و سافر . ²و من بعد بعث للكرامين واحد لخديم في الوقت باه يجيب العنب من عندهم , ³حكموه و عطاوه طريحة وبعثوه هكذاك يديه فارغين .⁴و زاد بعث ثاني خديم واحد اخر , حكموا رجموه و دمغوه على راسو و داروا فيه حالة و بعثوه يرَوْح . ⁵ولى بعث واحد اخر , زادوا قتلوه. و كل مرة يبعث لهم واحد , اللي قتلوه قتلوه, و اللي ضربوه ضربوه .⁶و كان عندو ثاني غير وليد فريد و عزيز عليه . على الاخر بعثوا هو , و قال :ضرك يهابوا من ولدي ! ⁷بالصح هاذوك الكرامين قالوا بيناتهم :هاذا هو الوريث ! ارواحوا نقتلوه و نديو احنا الورثة !⁸حكموه و قتلوه و رماوه برة الجنان تاع لكرم . ⁹و ضرك واش يدير مولى الجنان ؟ يجي و يقتل الكرامين , و يمد الجنان لوحايد اخرين.¹⁰ما قريتوش واش تكتب : الحجر اللي رفضوه البنايين , ولى هو الراس تاع الزاوية ¹¹و هذا الشيء جاء من عند ربي , ويبان لنا احنا عجب !". ¹²و حبوا باه يحكموه , بالصح خافوا من الغاشي , على خاطر علابالهم بلي هاذاك لمثل يهدر عليهم . ولاو خلاوه و راحوا . لغرامة تاع قيصر¹³و من بعد بعثوا لو ناس من الفريسييين و ناس من الهيرودسيين باه يطيحوه في الهدرة . ¹⁴و كي جاو ليه قالولو:" يا معلم , رانا عارفين بلي راك صادق و ما يهمك في حتى واحد ,على خاطر انت ما تشوفش للوجوه, بالصح بالحق تعلم طريق الله قول لنا يجوز لينا نخلصوا لغرامة تاع قيصر و الا لا ؟ نمدوها و الا لا؟ ¹⁵".علم بالنفاق تاعهم اللي في قلوبهم , و قال لهم :" وعلاش راكم تجربوا فيا ؟ اعطوني دينار نشوف ".¹⁶كي جابو لو دينار , قال لهم: "تاع شكون هاذي التصويرة و هاذي لكتيبة؟". قالوا :" تاع قيصر". ¹⁷جاوب يسوع وقال لهم :" امالا مدوا اللي لقيصر لقيصر و اللي لله لله ". بقاو حايرين في الجواب تاعو .¹⁸و جاو ليه جماعة من الصدوقيين . هاذوك اللي يقولوا القيامة ما كانش منها , و سقساوه و قالوا : ¹⁹" يا معلم , كتب لنا موسى : اذا كان واحد مات لو خوه و خلى مرى في رقبتو و هو مازال ما جابش لولاد, ياخذ خوه لمرى و يجيب منها اولاد على اسم خوه .²⁰كانوا عندنا سبعة خاوة . لول خذا مرى ومن بعد مات , بلا ما يخلي لولاد. ²¹ولى تزوج بيها الثاني , و حتى هو مات بلا ما يخلي لولاد . و زاد الثالث حتى هو مات . ²²و تزوجوا بيها الخاوة في سبعة بلا ما جابوا لولاد . و زيد في لخر ماتت لمرى ثاني . ²³نهار لقيامة , كي يقوموا , لمرى هاذي لشكون منهم راح تكون ؟ على خاطر كانت زوجة ليهم في سبعة ".²⁴جاوب يسوع و قال لهم :" على هاذا الشيء راكم في ضلال , على خاطر ما تعرفوش الكتب و لا القدرة تاع الله؟ ²⁵على خاطر كي يقوموا الناس من الموت لا يتزوجوا و لا يزوجوا , بالصح يكونوا كيما لملايكات في السماوات .²⁶و اما من جيهة لموتى راهم يقوموا : ما قريتوش في كتاب موسى , في لحكاية تاع شجرة العليق, كيفاه كلمو الله و قالو: انا الاله تاع ابراهيم و الاله تاع اسحاق و اله يعقوب؟ ²⁷الله ماهوش اله تاع موتى بالصح هو اله تاع حيين . و انتوما راكم في ضلال كبير!". الوصية لكبيرة فيهم الكل²⁸و جاء واحد من الكتبة و سمعهم يتكلموا , و كي شاف بلي جاوبهم مليح , سقساه:"واش هي لوصية لولى فيهم الكل؟" . ²⁹جاوبو يسوع و قالو :"اول وصية فيهم لكل هي : اسمع يا اسرائيل . الرب الاهنا هو اله واحد . ³⁰و تحب ربي الهك من كل قلبك , و من كل نفسك , و من كل فكرك , و من كل القدرة تاعك . هاذي هي لوصية لولى. ³¹و الثانية كيفها بالذات هي : تحب قريبك كيما تحب روحك . ماكانش وصية اخرى اكبر من هاذو في زوز ".³²قالو هاذاك اللي من الكتبة : " يعطيك الصحة يا معلم . قلت الحق, على خاطر الله واحد ما عندو حتى شريك . ³³و المحبة تاعو من كل القلب, و من كل الفكر,و من كل النفس , ومن كل القدرة , و لمحبة تاع لقريب كيما النفس بالذات ,هي خير من كل التقدمات و الذبايح ". ³⁴و كي شاف يسوع بلي جاوب برزانة. قال لو :"انت موش بعيد على الملكوت تاع الله ". ومن بعدها واحد ما قدر يزيد يسقسيه ! المسيح وسيدنا داود³⁵و كي كان يسوع يعلم في الهيكل قال:" كيفاه الكتبة يقولوا بلي المسيح بن داود؟". ³⁶على خاطر داود نفسو قال بالروح القدس: قال الله الرب لله ربي : اجلس على يميني . باه نحط عديانك تحت رجليك . ³⁷اذا كان داود في ذاتو يقلو ربي . كيفاه مالا يكون ولدو؟". و كانوا ناس ياسر يسمعوا فيه و هما فرحانين .³⁸و قال لهم في التعليم تاعو :" ردوا بالكم من الكتبة . اللي يحبوا يمشيو بالقنادر الطويلة و يسلموا على الناس في لسواق. ³⁹و يحبوا يكونوا هما لوالا في الجوامع , و في اي صايبة يكونوا هما قاعدين لقدام, ⁴⁰اللي ياكلوا مال الارامل, و يطولوا في الصلاة بالعاني . هاذوك ينالوا حساب اكبر". زوز دورو تاع الارملة⁴¹و قعد يسوع في الهيكل مقابل الصندوق اللي يلموا فيه الصدقة , و قعد يشوف كيفاه الناس يحطوا فيه الدراهم . و كان ناس ياسر من الاغنياء يجيو و يحطوا صرف ياسر. ⁴²و جات واحدة الارملة فقيرة و حطت زوز دراهم, قيمة قليلة .⁴³نادى للتلامذة تاعو و قال لهم:"نقول الحق : هاذي لمرى الفقيرة حطت في الصندوق اكثر منهم لكل , ⁴⁴ على خاطر هما الكل حطوا من الشيء اللي فضال عليهم , بالصح هي على قد حالها حطت من الاحتياج تاعها الشيء الي عندها , معيشتها كاملة ".

Chapter 13

¹و كي كان خارج من الهيكل, قالو واحد من التلامذة تاعو :" يا معلم شوف ! كيفاه هاذي لحجار! و كيفاه هاذا البني!". ²قالو يسوع :" راك تشوف في هاذي البنايات لكبيرة كاملة ؟ ما تقعد منها حتى حجرة فوق اختها غير و تتقرقع ".³و كي كان قاعد في جبل الزيتون , و متلفت لجيهة الهيكل , كي كانوا معاه بطرس و يعقوب و يوحنا و اندراوس وحدهم سقساوه : " ⁴قول لنا وقتاه يصرى هاذا الشيء ؟" و واش هي لمارة تاع الزمان الي يصرى فيه هاذا كامل ؟".⁵جاوبهم و قال لهم :" شوفوا! ما يضللكم حتى واحد. ⁶راح يجيو باسمي ناس ياسرو يقولوا : اني انا هو! وياسر اللي راح يصدقوهم .⁷و اذاكان سمعتوا بالحروب و اخبارها ما تخافوش, على خاطر هاذا كامل لازم يصرى . بالصح مازال ماهيش لاخرة . ⁸على خاطر تقوم امة على امة . و مملكة على مملكة , وتكون زلازل ياسر في بلدان , و يكون الجوع و الاهوال. و هاذي ماهي غير اول لوجاع .⁹شوفوا لرواحكم انتوما , على خاطر راح يسلموكم للمحاكم , و يضربوكم في الجوامع , وتوقفوا قدام رياس و سلاطين , على جالي, باه تشهدوا عليهم. ¹⁰بالصح قبل لازم يتنشر الانجيل بين جميع الامم .¹¹و كي يديوكم باه يسلموكم , ما تخموش من قبل واش راح تقولوا و ما تقلقوش , بالصح الشيء اللي يتمد لكم في هاذيك الساعة بيه اهدروا. على خاطر الروح القدس هو اللي يهدر فيكم و موش انتوما. ¹²و يولي الخو يسلم خوه للموت , و الاب يسلم وليدو, و يوقفوا لولاد لوالديهم و يقتلوهم . ¹³و تكونوا مكروهين عند الناس الكل على جال اسمي . بالصح اللي يصبر حتى للاخر هاذاك يمنع.¹⁴و نهار اللي تشوفوا " النجاسة تاع لخراب" اللي قال عليها النبي دانيال, قايمة وين ما لازمش تكون -باه اللي يقرى يفهم- وقتها الناس اللي في بلاد ليهودية يهربوا للجبال, ¹⁵و اللي فوق السطح ما يهبطش و ما يدخلش لداروا باه كاش ما يدي, ¹⁶واللي في الجنان ما يرجعش باه يدي لباسو.¹⁷يا ويلهم النساء اللي بلكرش و اللي يرضعوا في هاذيك ليامات! ¹⁸و ادعيو باه ما يكونش الوقت اللي تهربوا فيه في الشتاء . ¹⁹على خاطر في هاذيك ليام يكون ضيق كيما عمرو ما صرى من اللي بدات الدنيا حتى لضرك , و موش راح يكون . ²⁰و لو كان مش ربي قصر في هاذوك ليام , حتى واحد ما يمنع . بالصح قصر فيهم على جال الناس اللي خايرهم .²¹في هاذاك الوقت لو كان كاش واحد يقول لكم : اهو المسيح لهنا! ولا او لهيه!ما تقبلوش. ²²على خاطر راح يجيو مسحاء و انبياء كذابين, و يديروا ايات و عجايب, باه يدخلوا الشك لو كان يقدروا حتى في لمخيرين ثاني. ²³و انتم شوفوا . اني خبرتكم بكل شيء قبل الوقت .²⁴"و اما في هاذوك ليام بعد الضيقة , تظلام الشمس, و القمر ما يعودش يضوي, ²⁵و النجوم تطيح من السماء , و القوات اللي في السماء تتزعزع . ²⁶وقتها تشوفوا ابن الانسان جاي في السحاب بقوة كبيرة و مجد , ²⁷و يبعث لملايكات و يلم المختارين تاعو من اطراف الدنيا في اربعة , من لخر تاع لرض حتى للخر تاع السماء²⁸تعلموا لمثل من الشجرة تاع الكرطوس : كي يولي العود تاعها طري و يخرج لوراقي , تعلموا بلي الصيف قرب . ²⁹حتى انتوما كي تشوفوا هاذي لحوايج صايرة, اعرفوا بلي راه قريب على البيبان .³⁰نقول لكم الحق: ما يفضش هاذا الجيل حتى يصرى هاذا كامل . ³¹ السماء و لرض يزولوا بالصح كلامي ما يزولش . اسهروا ديما " ³²اما هاذاك اليوم و هاذيك الساعة واحد ما يعلم بيهم , حتى لملايكات اللي في السماء , و حتى الابن , غير الاب برك .³³شوفوا! اسهروا و صليو,على خاطر ما تعرفوش وقتاه يجي الوقت . ³⁴كان واحد الراجل مسافر خلى داروا, و مد للخدامين باه يتصرفوا في كل شيء . كل واحد و الخدمة تاعو, و وصى البواب باه يسهر .³⁵امالا اسهروا حتى انتوما , على خاطر ما تعرفوش وقتاه يجي مولى الدار , في لعشية , و الا في نص الليل, والا في الصباح بكري كي يعوعش السردوك و الا كي يطلع النهار . ³⁶لا يجي على غرادة و يلقاكم راقدين! ³⁷و الشيء اللي نقول لكم نقولوا للكل : اسهروا " .

Chapter 14

¹و بقاو يومين على عيد الفصح و ايام لفطير . و كانوا الرياس تاع الكهنة و الكتبة يفكروا كيفاه يحكموا يسوع بالحيلة و يقتلوه , ²بالصح قالوا :" ما نديروهاش نهار العيد باه ما يثورش علينا الشعب ". يصبوا الطيب على يسوع³و كي كان في بيت عنيا في دار سمعان لبرص , وهو متكي لثم , جات واحد لمرى هازة قرعة ريحة تاع الناردين الحر غالية ياسر في السومة. كسرت القرعة و صبتها على راس يسوع . ⁴و كاين وحايد اللي ما عجبهمش الحال و قالوا في قلوبهم :" علاش خسارة الريحة هكذاك ؟" ⁵كنا نقدروا نبيعوها حتى بثلاثمية دينار و الا اكثر و نصدقوا على المحتاجين ". و لاموا على لمرى .⁶اما يسوع قال :" خليوْها! علاش تقلقوا فيها ؟ ⁷عملت مليح! الفقراء معاكم في كل وقت. و تقدروا تعملوا فيهم الخير وقت اللي تحبوا . اما انا مانيش معاكم ديما . ⁸هي دارت اللي عليها. سبقت و دهنت بدني بالطيب توَّجد فيا باه نتكفن . ⁹نقول لكم الحق : وين ما يبشروا بهاذا الانجيل في العالم كامل , يخبروا ثاني على الشيء اللي عملاتو هاذي لمرى , شهادة ليها ". الخيانة تاع يهوذا¹⁰و من بعد يهوذا الاسخريوطي, واحد من الثناش, راح للرياس تاع الكهنة و نفاهم معاهم باه يسلم لهم يسوع . ¹¹و فرحوا كي سمعوا , و وعدوه باه يمدولو الدراهم . و كان يستنى في فرصة مواتية باه يسلموا . العشاء تاع الفصح مع التلامذة¹²و في النهار لول من ايامات لفطير . كي كانوا يذبحوا في الكبش تاع الفصح , قالوا لو التلامذة تاعو :"وين تحبنا نوجدولك الفصح باه تاكل؟". ¹³بعث زوز من التلامذة و قال لهم :" روحوا للمدينة , تلقاو راجل هاز جرة تاع ماء تبعوه. ¹⁴و كي يدخل ادخلوا وراه و قولوا لمولى الدار : او المعلم يقولك :ويني البيت اللي راح ناكل فيها الفصح انا و التلامذة تاعي ؟¹⁵ضرك يوريلكم واحد البيت في السطح مفرشة و ساجية . وجدولنا لعشاء لثم". ¹⁶و راحوا التلامذة في زوز ودخلوا لمدينة ولقاو كيما قال لهم . و وجدوا لعشاء تاع الفصح .¹⁷و كي عشات لعشية جا هو و التلامذة في ثناش . ¹⁸و كي كانوا قاعدين ياكلوا قال يسوع :" نقول لكم الحق : واحد منكم راح يبيعني . اللي قاعد ياكل معايا !". ¹⁹و بدا الحزن يبان عليهم , و بالواحد يسقسيو فيه :"انا هو ؟" . "انا هو ؟".²⁰جاوبهم وقال :"واحد منكم في ثناش , اللي يغمَّس معايا في الصحفة. ²¹هاو ابن الانسان رايح كيما راه مكتوب عليه . بالصح يا ويلو هاذاك الراجل اللي يسلم ابن الانسان . كان خير ليه لو كان ما ولدش خلاص!". لعشاء تاع الرب²²و كي قعدوا باه ياكلوا , هز يسوع الخبز و قسمو و باركو , و مد لهم و قال :"هاكم كولوا , هذا هو البدن تاعي ". ²³و من بعد هز الكاس و شكر و مدلهم, شربوا منها الكل. ²⁴و قال لهم :"هاذا هو الدم تاعي اللي للعاهد الجديد , اللي يسيح على خاطر ناس ياسر . ²⁵نقول لكم الحق : انا ما نزيدش نذوق المنتوج تاع الكرمة حتى يجي هاذاك النهار اللي نشربو جديد في الملكوت تاع الله ".²⁶و من بعد سبحوا مع بعضاهم و خرجوا للجبل تاع الزيتون . يسوع يتنبـأ بلي بطرس راح ينكروا ²⁷وقال لهم يسوع :"كلكم راح تشكوا فيا في هاذي الليلة ,على خاطر مكتوب : اضرب الراعي يتفرقوا الخرفان .²⁸بالصح من بعد كي نقوم من بين الموتى نسبقكم للجليل". ²⁹قال لو بطرس :"لو كان يشكوا فيك الكل انا عمري ما نشك فيك !".³⁰قال لو يسوع :"نقول لك الحق : اليوم في الليلة هاذي بالذات, قبل ما يعوعش السردوك مرتين , تنكرني انت ثلاثة مرات ". ³¹زاد قالو و اكد هالو :" حتى لو كان يقتلوني معاك ما ننكركش!". و هكذاك ثاني كلهم قالوا نفس الهدرة في جنان جثسيماني³²و راحوا لواحد الجنان اسمو جثسيماني , قال للتلامذة تاعو:" ابقاو هنا حتى نصلي". ³³و دا معاه بطرس و يعقوب و يوحنا , و بدى يتحير و يحزن , ³⁴و قال لهم :"نفسي حزينة حتى للموت ! ابقاو هنا و اسهروا".³⁵و بعد عليهم شوية و سجد في لرض , و كان يصلي باه لو كان تقدر تفوت عليه هاذي الساعة . ³⁶و قال :" يا آبا الآب . انت قادر على كل شيء . بعد عليا هاذا الكاس . بالصح مش الشيء اللي انا نحبو هو اللي يكون , خلي الشيء اللي تحبو انت هو اللي يصرى".³⁷و من بعد جا و لقاهم راقدين , قال لبطرس :"يا سمعان راك راقد ! ما قدرتش تزيد تسهر حتى ساعة وحدة ؟ ³⁸اسهروا و صلوا باه ما تدخلوش في لمحنة . البدن ضعيف , بالصح الروح ناشطة ". ³⁹و زاد راح يصلي و يقول في هاذاك لكلام بالذات .⁴⁰و زاد جاهم ثاني و لقاهم راقدين , و كانت عينيهم مغمضة , و ما قدروش يجاوبوه. ⁴¹و زاد جا لثالث مرة و قال لهم :"ارقدوا ضرك و ارتاحوا! خلاص ! اي وصلت الساعة ! الان ابن الانسان يتسلم ليد المذنبين , ⁴²نوضوا خليونا نروحوا! الي راح يسلمني او قرب !". القبض على يسوع⁴³و في هاذاك الوقت بالذات و هو مازال يهدر جا يهوذا, واحد من الثناش , وجاو معاه غاشي ياسر بالسيوفى و القرم مبعوثين من عند رياس الكهنة و الكتبة و الشيوخة . ⁴⁴و اللي كان راح يبيعو عطالهم امارة وقال :"اللي نبوسو او هذاك هو . احكموه , و اديوه و عندكم عليه". ⁴⁵و في هاذاك الوقت بالذات قدم ليه و قالو :" يا سيدي , يا سيدي!" . و باسو . ⁴⁶راحوا هما تلموا عليه و حكموه .⁴⁷و واحد من اللي كانوا حاضرين سل السيف , و ضرب لخديم تاع رايس الكهنة نحالو وذنو . ⁴⁸و يسوع قال لهم :" تقول عليكم خرجتوا على سراق بالسيوفة و القرم باه تحكموني ! ⁴⁹انا كنت معاكم كل يوم نعلم في وسط الهيكل و ما حكمتونيش ! بالصح باه يتم الشيء اللي جا في لكتب ". ⁵⁰و كلهم اللي كانوا معاه خلاوه و هربوا .⁵¹و تبعو واحد الشاب كان ساتر روحو بايزار, ⁵²كي حكموه خلى في يديهم الايزار و هرب عريان . قدام المجمع تاع ليهود⁵³و داو يسوع للرياس تاع الكهنة , و تلموا عليه الرياس تاع الكهنة الكل و الشيوخة و الكتبة . ⁵⁴و كان بطرس يتبع فيه من بعيد حتى ن دخل للدار تاع رايس الكهنة , و كان قاعد في وسط الخدامين يتدفى على النار.⁵⁵و كانوا الرياس تاع الكهنة و المجمع كامل يحوسوا على بيان على يسوع باه يقتلوه , و ما لقاوش . ⁵⁶على خاطر ياسر اللي شهدوا عليه بالكذب , و الهدرة تاعهم كانت متعاكسة .⁵⁷و من بعد وقفوا وحايد و شهدوا عليه بالزور و قالوا : ⁵⁸" احنا سمعناه يقول : انا نهدم هاذا الهيكل اللي مبني باليدين , و في ثلاثة ايام نبني واحد اخر ما بناتوش يدين ". ⁵⁹و حتى هكذا و ما جاتش الهدرة تاعهم متوافقة مع بعضاهم .⁶⁰وقف رايس الكهنة في الوسط و سقسى يسوع و قالو :"كاش ما عندك ما تجاوب ؟ هاذوا واش راهم يشهدوا عليك؟". ⁶¹بالصح هو كان ساكت و ما جاوب حتى بكلمة . و زاد سقساه رايس الكهنة ثاني و قالو :" انت هو المسيح ابن المبارك؟". ⁶²قال لو يسوع :" انا هو. و ضرك تشوفوا ابن الانسان قاعد على يمين القدرة , و جاي في السحاب تاع السماء ".⁶³الرايس تاع الكهنة قطع قشاتو وقال :" ما بقيناش محتاجين للشهود ضرك ؟ ⁶⁴راكم سمعتوا الكفر! واش رايكم ؟ و الناس الكل حكموا عليه بلي يستاهل حكم الموت. ⁶⁵و كاين وحايد بداو يبصقوا عليه , و يغطيولو في وجهوو يقولولو :"طلع شكون ضربك؟" . و كانوا الخدامين يضربوا فيه . بطرس ينكر⁶⁶و كي كان بطرس لتحت في الدار تاع رايس الكهنة جات واحد لخديمة . ⁶⁷و كي شافت بطرس يتدفى , بقات تخزر فيه و قالت :" و انت كنت مع يسوع الناصري!". ⁶⁸نكر بطرس و قال لها :" لا نعرف لا نفهم واش راكي تهدري!". و خرج لبرى لوسط الدار, وعوعش السردوك.⁶⁹بقات لخديمة تشوف معاه و تقول للحاضرين :" هاذا راه واحد منهم!". ⁷⁰زاد نكر ثاني . و بعدها بشوية زادوا الحاضرين قالوا لبطرس:" صح انت راك واحد منهم على خاطر انت من الجليل و حتى الهدرة تاعك تشابة لهدرتهم !".⁷¹بدا يلعن و يحلف :" انا ما نعرفش هاذا الراجل اللي راكم تهدروا عليه !". ⁷²و زاد عوعش السردوك مرة اخرى , وقتها تفكر بطرس الهدرة اللي قالها يسوع :"قبل ما يعوعش السردوك مرتين , تنكرني انت ثلاثة مرات ". و كي خمم في هاذا لكلام بكى .

Chapter 15

¹و في هاذاك الوقت في الصباح بكري تشاوروا الرياس تاع الكهنة و الشيوخة و الكتبة و والمجمع كاملين , و كتفوا يسوع و اداوه وسلموه لبيلاطس . ²سقساه بيلاطس :"انت هو الملك تاع ليهود؟". جاوب عليه يسوع و قالو :"راك انت تقول ". ³و كانوا رياس الكهنة يشكيو بيه في حوايج ياسر .⁴زاد سقساه بيلاطس ثاني :"ما تجاوب بحتى شيء؟ شوف كيفاه يشهدوا عليك!" . ⁵و يسوع ثاني ما زاد جاوب بحتى شيء تعجب بيلاطس و حار فيه .⁶و كان ديما في العيد يسيب لهم محابسي واحد , اللي يقولوا عليه . ⁷و كان واحد اسمو باراباس محكوم هو واصحابو على جال فتنة, صرات فيها قتيلة . ⁸و بدا الغاشي كامل يعيطوا و يطلبوا من بيلاطس باه يدير كيما موالف ديما في العيد .⁹رد عليهم بيلاطس و قال :" تحبوا نسيب لكم الملك تاع ليهود؟". ¹⁰على خاطر عرف بلي رياس الكهنة كانوا حاسدينو على هاذيك سلموك . ¹¹و لاو رياس الكهنة حرشوا الغاشي باه يسيب لهم باراباس خير .¹²زاد رد عليهم بيلاطس و قال :" واش تحبوني ندير بهاذا اللي تسميوه الملك تاع ليهود؟" ¹³كلهم ولاو يعيطوا :"اصلبو!".¹⁴قال لهم بيلاطس :"واش من شر دارو؟" زادوا عيطوا اكثر من لول :"اصلبو!". ¹⁵و على خاطر بيلاطس كان حاب يرضي الناس الكل , سيب لهم باراباس , و حكم على يسوع بعدما جلدو, داوه باه يتصلب . الجنود يستهزاو بيسوع¹⁶اداوه العسكر , و دخلوا بيه وسط دار الولاية , و تلمت عليه الكتيبة كاملة تاع العسكر. ¹⁷و لبسوه برنوس عنابي, و ضفرولو تاج من الشوك و حطوه على راسو, ¹⁸و بداو تحِيوْ فيه و يقولوا :" السلام يا الملك تاع ليهود!".¹⁹و كانوا يضربوا فيه على راسو بالقصبة , و يبصقوا عليه, ²⁰و من بعد يسجدوا ليه على ركايبهم, و بعدما استهزاو بيه , نحاو عليه البرنوس العنابي و لبسوه قشاتو , و من بعد اداوه باه يصلبوه . ²¹ومدوا لواحد الراجل كان معدي من لثم جاي من الجنان , اسمو سمعان القيرواني اولادو اسكندرس و روفس, باه يهز عليه الصليب الي راح يتصلب عليه . الصلب²²و جابوه لواحد لمكان اسمو "الجلجثة " اللي التفسير تاعو "جمجمة". ²³و مدولو خمرة مخلطة بالمرار باه يشربها , بالصح ما قبلش . ²⁴و كي صلبوه داروا القرعة على قشاتو : كل واحد واش يدي ؟.²⁵و كي صلبوه كانت الساعة الثلاثة . ²⁶و كانت التهمة تاعو مكتوبة :"الملك تاع ليهود". ²⁷وصلبوا معاه زوز مجرمين , واحد على ليمين و لاخر على ليسار . ²⁸و تم المكتوب اللي قال :" يتحسب مع المجرمين ".²⁹وكانوا الناس المعديين من لثم يتمسخروا بيه , و يهزوا في روسهم ويقولوا :"اه يا مهدم الهيكل و بانيه في ثلاثة ايام ! . ³⁰منع روحك و اهبط من فوق الصليب!".³¹و حتى رياس الكهنة والكتبة يستهزاو بيناتهم , وقالوا:" وحايد اخرين منعهم بالصح روحو ما يقدرش يمنعها!. ³²لو كان نشوفوا المسيح الملك تاع ليهود يهبط من فوق الصليب , نامنوا بيه!". و هاذوك اللي تصلبوا معاه كانوا يعايروا فيه . الموت³³و كي وصلت الساعة الستة , ظلامت الدنيا حتى للتسعة . ³⁴و على الساعة التسعة عيط يسوع بأعلى صوتو وقال :"ألوي , ألوي, لما شبقتني؟". الي معناها : الهي , الهي , علاش خليتني ؟ ³⁵و جماعة من الناس الحاضرين كي سمعوه قالوا :" راه يعيط على ايلياس".³⁶واحد منهم راح يجري و رنخ طبة في الخل و ربطها في قصبة و حطهالو في فمو و قال :" خلِيوه , نشوفوا كان يجي ايلياس و يهبطو!". ³⁷عيط يسوع بصوت عالي خلاص و طلَّع الروح . ³⁸وتشق الحجاب تاع الهيكل على زوز , من فوق لل تحت .³⁹و كي شاف القايد تاع المية اللي كان واقف مقابلو كيفاه عيط هاذيك العيطة و طلع الروح , قال:" هاذا الانسان كان صح وليد الله!" ⁴⁰و كانوا ثاني نساء يتفرجوا من بعيد , بينهم مريم المجدلية , و مريم ام يعقوب الصغير و يوسي, و سالومة , اللي كانوا معاه و خدموه كي كان في الجليل . ⁴¹و ياسر واحد اخرين من اللي طلعوا معاه لاورشليم . الدفينة⁴²و كي عشات لعشية , و كي كانوا يسجيو قبل ما يدخل السبت , ⁴³جاء يوسف اللي من الرامة , راجل رزين و شريف, وكان حتى هو يستنى في الملكوت تاع الله, تجرأ و دخل عند بيلاطس و طلب منو يخليه يدي الجسد تاع يسوع . ⁴⁴و تعجب بيلاطس كيفاه هكذا مات ليه ليه . و عيط على القايد تاع المية و سقساه :"عندو مدة من اللي مات ؟".⁴⁵و كي عرف من القايد بلي مات , مد الجسد ليوسف. ⁴⁶شرى كتان , و هبطو و كفنو, و راح دفنو في واحد لقبر كان محفور في حجرة , ودز حجرة كبيرة على باب لقبر . ⁴⁷و كانت مريم المجدلية و مريم ام يوسي يشوفوا وين حطوه.

Chapter 16

¹و بعد ما فات السبت, مريم المجدلية و مريم ام يعقوب و يوسي و سالومة شراو الطيب و راحوا باه يدهنوه بيها. ²و في اول الاسبوع في الصباح بكري خلاص مع طلة الشمس راحوا للقبر.³و كانوا يقولوا بيناتهم :" شكون راح يزحزح لنا الحجرة على الباب تاع لقبر؟". ⁴و كي جاو يشوفوا لقاو الحجرة مزحزحة ! على خاطر كانت كبيرة ياسر .⁵و كي دخلوا للقبر لقاو واحد الشاب قاعد على ليمين و لابس قشات بيض, حكمتهم الدهشة من الشيء اللي شافوا . ⁶قال لهم :"علاش راكم حايرين! راكم تحوسوا على يسوع الناصري المصلوب . او قام من بين الموتى! ⁷بالصح روحوا و قولوا للتلامذة و لبطرس: هو راح يسبقكم للجليل. و لثمة تشوفوه كيما قال لكم ".⁸في ساع خرجوا يجريو و هربوا من لقبر, على خاطر جاتهم الحيرة و حكمتهم الرعدة , و ما قالوا لحتى واحد على خاطر كانوا خايفين . يسوع يظهر لمريم المجدلية⁹و كي قام في الصباح بكري ف اول الاسبوع اول ما ظهر ظهر لمريم المجدلية , اللي كان خرج منها سبعة شواطن. ¹⁰و هي راحت عند اللي كانوا معاه لقاتهم يبكيو و ينوحوا و خبرتهم بالشيء اللي صرى . ¹¹و هما كي سمعوا بلي راه حي , و بلي هي شافاتو. ما قبلوهاش. ظهورو لزوز من التلامذة¹²و من بعد ظهربهيئة اخرى ل زوز من التلامذة , و هما ماشيين في الطريق رايحيين للصحراء. ¹³و هما راحوا وخبروا لخرين , و هكذاك و ما قبلوهمش هما ثاني . يسوع يظهر للتلامذة¹⁴و في لخر ظهر للحداش و هما قاعدين , و لامهم على قلة ايمانهم و قساوة قلوبهم, على خاطر ما صدقوش اللي قالولهم بلي شافوه قام . ¹⁵وقال لهم :" روحوا للعالم اجمع و بشروا بالانجيل للخلق الكل . ¹⁶اللي يامن و يتعمد يمنع . و اللي ما يامنش يتحاسب .¹⁷و هاذي المعجزات تتبع المؤمنين : يخرجوا الشواطن بإسمي . و يهدروا بلغات جديدة . ¹⁸و يهزوا لحنوشة . و كي يشربوا سم قاتل ما يضرهمش , و يحطوا يديهم على المرضى يبراو ". الرب يسوع يطلع للسماء¹⁹و من بعد ما كلمهم الرب تهز للسماء, و جلس على يمين الله . ²⁰اما هما خرجوا وراحوا يبشروا في كل مكان , و الرب يعمل معاهم و يثبت الكلام بالايات التابعة . امين .

Luke

Chapter 1

¹على خاطر كاين ناس ياسر بداو يكتبوا على الشيء اللي صرى في وسطنا. ²كيما وصلوه الناس اللي كانوا من لول شهود و خدامين للكلمة, ³و انا ثاني, بعدما تبعت كل شيء من المصدر تاعو بالتدقيق, قلت باللي نكتب لك, يا مولى العزة تاوفيلس, ⁴باه تعرف باللي الكلام اللي وصلك صحيح. بشارة ميلاد يوحنا المعمدان⁵في ايامات هيرودس اللي كان سلطان على بلاد اليهودية كان واحد الكاهن اسمو زكريا من فرقة ابيا, و مرتو من سلالة هارون و اسمها اليصابات. ⁶و كانوا في زوز يخافوا الله, ويتبعوا الشيء اللي وصى بيه كامل في الشريعة بلا ما يقصرو في حتى حاجة. ⁷و كانوا ما يجيبوش لولاد, على خاطر اليصابات كانت عاقر. وكانوا في زوز شيّاب كبار في العمر.⁸و كي كان يخدم في الله في الدالة تاع الفرقة تاعو, ⁹على حساب العادة تاع الخدمة, طاحت عليه القرعة باه يدخل للهيكل و يبخّر. ¹⁰و كان الشعب يصلي لبرى وقت البخور.¹¹شوية ظهر لو ملاك الرب واقف على يمين المذبح تاع لبخور. ¹²و كي شافو زكريا دخل في بعضاه و خاف. ¹³قال لو الملاك: "ما تخافش يا زكريا, على خاطر ربي سمع دعوتك, و مرتك اليصابات راح تجيبلك طفل و تسميه يوحنا.¹⁴و راح تسعد و تفرح بيه, و ناس ياسر راح يفرحوا معاك بالزيادة تاعو, ¹⁵على خاطر راح يكون عظيم الشان عند الله, لا يشرب لا خمر و لا اي حاجة تسكر, و يتملى بالروح القدس و هو في مازال في كرش امو.¹⁶و راح يهدي ناس ياسر من بني اسرائيل لطريق الرب الههم. ¹⁷و يسير قدامو بالروح و القوة تاع ايليا, و يصلح بين الاباء و اولادهم, و يهدي الاشرار لحكمة لبرار, و يكوَّن للرب شعب واجد و مستعد".¹⁸قال زكريا للملاك: "كيفاه راح يصرى هاذا الشيء كامل, و انا شايب كبير و مرتي عزوزة و كبيرة في لعمر؟". ¹⁹رد عليه الملاك و قال: "انا جبريل الواقف ديما في حضرة الله, و بعثني باه نهدر معاك و نبشرك بهاذي البشارة. ²⁰بالصح انت راح تبكش و ما تقدرش تهدر حتى ن يجي النهار اللي يتحقق فيه هاذا الامر, على خاطر ما حبيتش تقبل كلامي اللي راح يصرى في الوقت تاعو بالضبط.".²¹و كان الشعب يستنى في زكريا باه يخرج لهم و همّا حايرين علاه بطى الداخل في الهيكل. ²²و كي خرج ما قدرش يهدر معاهم, و فهموا باللي تكَشّف على حاجة في وسط الهيكل. و كان برك يحرك في راسو و يشير لهم و قعد ساكت بكَشْ. ²³و كي كملت ايامات الخدمة تاعو رجع لدارو.²⁴و من بعدها بايامات هزت اليصابات مرتو بالكرش, و خبات روحا خمسة شهر و هي تقول: ²⁵"هاذا من فضل ربي نهار اللي شافلي باه نحي عليا عاري من بين الناس". بشارة الزيادة بيسوع²⁶و كي عادت في شهرها السادس بعث الله الملاك جبريل لواحد لمدينة في الجليل اسمها الناصرة, ²⁷عند واحد الصبية مخطوبة لراجل من سلالة داود اسمو يوسف, و اسم الصبية مريم. ²⁸دخل لها الملاك و قال لها: "السلام عليك يا اللي نعم عليها الله! ربي معاك. مبروكة انت من بين النساء". ²⁹و كي شافاتو خافت و حارت في كلامو, و قالت بينها بين روحها: "واش تكون زعمة هاذي التحية!"³⁰قال لها الملاك: "ما تخافيش يا مريم, راكي نلتي نعمة من عند الله. ³¹انت راح تحملي و تولدي طفل و تسميه يسوع. ³²و راح يكون عظيم الشان, و يسمّى ولد ربي العالي, و يعطيه الاله ربي كرسي داود جدو, ³³و يملك على بيت يعقوب على الدوام, و ما تكونش اخرة للملك تاعو".³⁴قالت مريم للملاك: "كيفاه يصرى هاذا الشيء و انا ما عنديش راجل؟". ³⁵رد عليها الملاك و قال: "الروح القدس يحل عليك, و قوة العالي تظلل عليك, على هاذيك ثاني حتى اللي يولد منك يسمى ابن الله.³⁶و هاي حتى اليصابات قريبتك في كرشها طفل ثاني و هي كبيرة في لعمر, و داخلة في شهرها السادس هاذيك اللي قالوا عليها عاقرة, ³⁷على خاطر ما كانش حاجة ما يقدرش يديرها الله". ³⁸قالت مريم: "انا لخديمة تاع الله. اللي تقول عليه يصرى". و راح الملاك من عندها. مريم العذراء تزور اليصابات³⁹و في هاذيك ليام وقفت مريم و حكمت الطريق في ساع للجبال لمدينة يهوذا, ⁴⁰و دخلت لبيت زكريا و سلمت على اليصابات. ⁴¹و كي سمعت اليصابات التسلام تاع مريم تحرك الصغير في كرشها, و تملات اليصابات بالروح القدس,⁴²و عيطت على طول صوتها و قالت: "متباركة انت في وسط النساء و متباركة ثمرة رحامك! ⁴³واش من قدر عندي حتى تجي ام ربي عندي؟ ⁴⁴انا كي سمعت صوت سلامك في وذني تحرك الصغير في رحامي. ⁴⁵من الفرحة. يا سعد اللي امنت باللي الشيء اللي قال عليه ربي كامل راح يصرى". تسبيحة مريم⁴⁶قالت مريم: "نفسي تعظم ربي, ⁴⁷و تفرح روحي بالله مخلصي,⁴⁸على خاطر شاف لتواضع خديمتو.من اليوم و جاي لجيال الكل تباركني, ⁴⁹على خاطر القدير دارلي حوايج عظيمة, و اسمو قدوس,⁵⁰و رحمته من جيل لجيل للناس اللي يخافوه. ⁵¹بذراعو صنع قوة. و المتكبرين فناهم على نية قلوبهم.⁵²نزَل صحاب العز من لمقامات العالية و طلّع المتواضعين. ⁵³الجيّاع شبعهم بالخيرات و رجع لمرفهين فارغين.⁵⁴وقف مع عبدو اسرائيل و تفكر رحمتو ليه, ⁵⁵كيما كلم جدودنا. ابراهيم و ذريتو على دوام الدهر".⁵⁶و قعدت مريم عند اليصابات قريب ثلاثة شهر, و من بعد رجعت لدارها. ميلاد يوحنا المعمدان ⁵⁷اما اليصابات وصلت ساعتها باه تولد, و ولدت جابت طفل. ⁵⁸و سمعوا جيرانها و اماليها باللي ربي عظّم رحمتو من جيهتها, و فرحوا معاها.⁵⁹و كي جاو باه يطهروا الطفل في الثامن, سموه زكريا على اسم باباه. ⁶⁰بالصح امو قالت: "لا! يسّمى يوحنا". ⁶¹قالوا لها: "ما كان حتى واحد في العرش تاعك تسمى بهاذا الاسم".⁶²و كي خزروا لباباه و سقسوه واش يحب يسميه. ⁶³طلب يجيبولو لوحة و كتب عليها: "اسمو يوحنا". كلهم تعجبوا من هاذا الشيء.⁶⁴و في هاذيك الساعة تطلق لسانو و هدر و بارك الله. ⁶⁵و الجيران الكل طاح عليهم الخوف, و الناس الكل ولات تهدر على هاذي الامور اللي صرات في جبال اليهودية, ⁶⁶و خباوها في قلوبهم و قالوا: "زعمى واش راح يولي هاذا الطفل؟". و كانت يد الله معاه. تسبيحة زكريا⁶⁷و تملى زكريا باباه بالروح القدس, و تنبأ و قال: ⁶⁸" تبارك الله اله اسرائيل على خاطر تفقد شعبو و دار له فداء,⁶⁹و جعل لنا مخلص قدير في بيت العبد تاعو داود. ⁷⁰كيما وعد من قديم الزمان على لسان الانبياء القديسين, ⁷¹باه يسلكنا من عدياننا و من يد جميع اللي يبغضونا.⁷²و رحمة منو لجدودنا باه يتمم معاهم العاهد المقدس, ⁷³اللي حلف بيه لبابانا ابراهيم: ⁷⁴باه يمنعننا من عدياننا, باه نعبدوه بلا خوف ⁷⁵و بقداسة و تقوى كل ايام حياتنا.⁷⁶و انت يا وليدي راح تكون نبي الله العالي, تسير قدام وجه الرب باه توجدلو الطريق. ⁷⁷و تعلم الشعب تاعو باللي السلاك ينالوه من غفران ذنوبهم,⁷⁸على خاطر الهنا اله رحيم و رؤوف بالرحمة تاعوتفقدنا و نوّر علينا من لعلالي, ⁷⁹باه يضوي بنورو على اللي قاعدين في الظلمة و ظل الموت, باه يهدي خطواتنا لطريق السلام".⁸⁰اما الطفل يوحنا كان يكبر و يتقوى بالروح, و كان عايش في الصحراء حتى للنهار اللي ظهر فيه لبني اسرائيل.

Chapter 2

¹و في هاذيك ليام صدر مرسوم من عند اوغسطس قيصر باه كل الناس يسجلو رواحهم في الاحصاء. ²و هاذا هو الاحصاء لول اللي صرى وقت اللي كان كيرينيوس والي على سوريا. ³و الناس الكل راحوا باه يسجلوا ارواحهم كل واحد للمدينة تاعو.⁴و طلع يوسف ثاني من الجليل من مدينة الناصرة و راح لليهودية, لمدينة داود اللي يقولولها بيت لحم. على خاطر هو من بيت داود و من العشيرة تاعو, ⁵باه يسجل روحو هو ومريم اللي كانت مخطوبة ليه و كانت بالكرش.⁶و كي كانوا لثمة وصل وقتها باه تولد. ⁷و ولدت و جابت وليدها البكر و قمطاتو و حطاتو في لمراح, على خاطر ما كانش عندهم مكان في الدار. الملايكة و السرّاح⁸و كان في هاذيك الجيهة سرّاح مخيمين يعسوا في الليل على الغنم تاعهم. ⁹و هما قاعدين وقف عليهم ملاك الرب و ضوى عليهم مجد الرب, اما هما خافوا خوف كبير خلاص.¹⁰قال لهم الملاك: "ما تخافوش! انا جيت نبشر فيكم بفرحة كبيرة راح تكون للناس الكل: ¹¹ولد لكم اليوم في مدينة داود مخلص هو المسيح الرب. ¹²و هاذي هي لمارة ليكم: تلقاو الطفل مقمط و راقد في لمراح".¹³و ظهر لهم على غرّادة مع الملاك غاشي كبير من جنود السماء و همّا يسبحوا في الله و يقولوا: ¹⁴"العزّة لله في لعلالي, و على لرض السلام. و بالناس الفرحة".¹⁵و كي راحو عليهم الملايكة و طلعوا للسماء, قالوا السرّاح لبعضاهم: "هيا نروحوا لبيت لحم و نشوفوا هاذا الامر اللي صرى و اللي خبرنا بيه الرب". ¹⁶و راحوا بالرزبة, و لقاو مريم و يوسف و الطفل في لمراح.¹⁷و كي شافوه خبروهم بالكلام كامل اللي تقال لهم على هاذا الطفل. ¹⁸و الناس الكل اللي سمعوا تعجبوا من الشيء اللي قالوه. ¹⁹اما مريم خبات هاذا لكلام كامل في قلبها و قعدت تتخمم فيه. ²⁰و رجعوا السرّاح و هما يسبحوا في الله و يحمدوا فيه على كل اللي شافوه و سمعوه كيما خبرهم الملاك. يسوع يطهروه و يقدموه للهيكل²¹و في كمالة ثمانية ايام اداو الطفل و طهروه و سموه يسوع, كيما سماه الملاك فبل ما تهز بيه مريم بالكرش.²²و كي تمت ايامها باه تتطهر, على حساب الشرع تاع موسى, طلعوه لاورشليم باه يقدموه للرب, ²³كيما مكتوب في شرع الله: كل من هو ذكر فاتح لرحام يتنذر قدوس للرب. ²⁴و باه يقدموا ذبيحة كيما قال الشرع: طيرين حجل و الا طيرين حمام.²⁵و كان واحد الراجل في اورشليم اسمو سمعان, كان صالح و يخاف الله و يستنى لفرج تاع الله لبني اسرائيل, و كان عليه الروح القدس. ²⁶وحى ليه الله بالروح القدس باللي ما يموتش حتى ن يشوف مسيح الرب.²⁷قادو الروح باه يجي للهيكل. و كي دخلوا والدين يسوع بالطفل, باه يعملوا حساب العادة تاع الشرع, ²⁸هزو في حضنتو و بارك الله و قال: ²⁹"ضرك تسَرح عبدك بالسلامة يا سيدي على حساب قولك,³⁰على خاطر شفت خلاصك بعينيا, ³¹اللي وجدتو للشعوب الكل. ³²نور يهدي الامم, و عزة لشعبك اسرائيل".³³و كان يوسف و مريم يتعجبوا م الشيء اللي تقال عليه. ³⁴و باركهم سمعان, و قال لمريم امو: "هاذا تجعل باه ياسر يطيحوا و ياسر يقوموا في اسرائيل, و اية تتقاوم, ³⁵و انتي ثاني يجوز عليك السيف يعدي في روحك, و ناس ياسر تتكشف نيات قلوبهم".³⁶و كانت واحدة النبية, اسمها حنة بنت فنوئيل من عرش اشير, و هي مرى كبيرة في لعمر خلاص, عاشت مع راجلها سبع سنين بعد زواجها و من بعد مات و خلاها. ³⁷قعدت هجالة قريب اربعة و ثمانين سنة, ما فارقتش الهيكل, تعبد و تصوم و تصلي ليل و نهار, ³⁸و في هاذيك الساعة وقفت تسبح في ربي, و هدرت عليه لكل الناس اللي كانوا يسناو في الفرج في اورشليم.³⁹و كي كملوا كل شيء حساب شرع الله, رجعوا ل الجليل ل مدينتهم الناصرة. ⁴⁰و كان الطفل يكبر و يتقوى بالروح, و يفيض بالحكمة, و كانت نعمة الله عليه. الطفل يسوع يبقى في الهيكل⁴¹و كانوا امو و باباه يروحوا مرة في العام لاورشليم في عيد الفصح. ⁴²و كي كان عمرو ثناش ن سنة طلعوا كيما العادة ل اورشليم في العيد. ⁴³و بعد ما كملوا ليامات و هما راجعين لاورشليم قعد الطفل يسوع في اورشليم, و يوسف وامو ما فاقوش بيه. ⁴⁴على خاطر كانوا حاسبينوا مع صحابو, و من بعد ما مشاو نهار كامل, جاو يحوسوا عليه بين العايلة و لمعارف.⁴⁵و كي ما لقاوهش رجعوا لاورشليم يحوسوا عليه. ⁴⁶و من بعد ثلاثة ايام لقاوه في الهيكل, قاعد في وسط المعلمين, يسمع لهم و يسقسي فيهم. ⁴⁷و الناس الكل اللي سمعوه حاروا في العلم تاعو و جواباتو.⁴⁸و كي شافوه لثمة حاروا. و قالت لو امو: "يا وليدي, علاش درت فينا كيما هكّا؟ انا و باباك تعذبنا و احنا نحوسوا عليك!". ⁴⁹قال لهم: "علاش كنتوا تحوسوا عليا؟ ما علاباكمش باللي لازم نكون في الامور اللي تخص بابا؟". ⁵⁰بالصح ما فهموش واش قال.⁵¹و من بعد هبط معاهم و راحوا للناصرة و كان طايعهم, و كانت امو تخبي هاذي الامور الكل في قلبها. ⁵²اما يسوع كان يكبر في الحكمة و الطول و النعمة, عند الله و عند الناس.

Chapter 3

¹و في العام الخمسطاش من حكم طيباريوس قيصر, وقت اللي كان بيلاطس قيصر والي على بلاد اليهودية, و هيرودس رايس ربوع على الجليل, و فيلبس خوه رايس ربوع على ايطورية و جوايه تراخونييتس, و ليسانيوس رايس ربوع على الابلية, ²في ايامات رايس الكهنة حنّان و قيافا, كانت كلمة الله ليوحنا بن زكريا في الصحراء,³و جا للجوايه الدايرة بنهر الاردن و بدى ينادي في وسط الناس بالمعمودية تاع التوبة باه يتغفروا ذنوبهم.⁴كيما مكتوب في كتاب النبي اشعياء اللي قال: "صوت ينادي في الصحراء و يقول: وجدوا طريق ربي, اجعلوا مساربو مقدودة.⁵كل حدرة واطية تعلى و كل جبل و كدية عالية توطى, و الطرق العوجة تتسقم, و الشعبة الواعرة تسهال, ⁶و سلاك الله لكل انسان يبان".⁷و كان يقول للناس اللي يجيو عندو باه يعمدهم: "يا ولاد لفاعي, شكون قالكم راح تمنعوا من الهول اللي جاي؟⁸اعملوا ثمار تليق بالتوبة. و ما تقولوش بينكم و بين ارواحكم: احنا بابانا ابراهيم. على خاطر نقول لكم: الله قادر يجعل من هاذي لحجار اولاد لابراهيم.⁹و ضرك الفاس تحط على اصل الشجرة, و كل شجرة ما تمدش ثمار صالحة تتقص و تتحرق بالنار".¹⁰و سقساوه الناس الكل و قالوا: "واش نديروا؟" ¹¹رد عليهم و قال: "اللي عندو زوز لبسات يمد للي ما عندوش, و اللي عندو ماكلة يمد للي ما عندوش".¹²و جاو عندو تاع المكس حتى هما باه يعمدهم و قالوا: "يا سيدي قلنا واش نديروا؟". ¹³قال لهم: "ما تطلبوش على الناس اكثر من الشيء اللازم عليهم".¹⁴و سقساوه العسكر ثاني و قالوا: "و احنا واش نديروا؟". قال لهم: "ما تظلمو حتى واحد, ما تحقروا حتى واحد, اقنعوا بالشيء اللي عندكم".¹⁵و على خاطر الشعب كامل كان يسنى, و الناس الكل كانوا بينهم وبين ارواحكم يخمموا في يوحنا بلاك يكون هو المسيح, ¹⁶بالصح يوحنا رد عليهم الكل و قال: "انا نعمد فيكم بالماء, بالصح يجي من بعدي اللي هو اقوى مني, اللي انا ما نستاهلش باه نحل سيور سباطو. و هو راح يعمدكم بالروح القدس و النار.¹⁷اللي هاز المذرى في يدو, و راح يصفي الطرحة, يلم القمح للمخزن, و التبن يحرقو بنار ما تطفاش".¹⁸و حوايج اخرى ياسر كان يوصي بيها الناس و كان يبشر فيهم. ¹⁹اما هيرودس رايس الربوع على خاطر وبخوا على جال هيروديا مرت خوه فيلبس و على جال المناكر الكل اللي كان يعمل فيها, ²⁰و زاد كملها كي دخّل يوحنا للحبس. معمودية يسوع المسيح²¹و بعد ما تعمدوا الناس الكل جا يسوع ثاني يتعمد. و كي كان يصلي تحلت السماء, ²²و نزل عليه الروح القدس في هيئة حمامة. و جا صوت من السماء يقول: "انت هو وليدي لحبيب, بيك رضيت". نسب يسوع المسيح²³و كي بدى يسوع الخدمة تاعو كان عمرو قريب ثلاثين سنة, و كانوا الناس يعتبروه ولد يوسف بن هالي, ²⁴بن متاثيا, بن لاوي, بن ملكي, بن ينّا, بن يوسف,²⁵بن مثانبا, بن عاموص, بن ناحوم, بن حسلي, بن نجاي, ²⁶بن مات, بن متاتيا, بن شمعي, بن يوسف, بن يهوذا,²⁷بن يوحنا, بن ريسا, بن زربابل, بن شألتيئيل, بن نيري, ²⁸بن ملكي, بن أدي, بن قصم, بن ألمودام, بن عير, ²⁹بن يوسي, بن أليعازر, بن يوريم, بن متثات, بن لاوي,³⁰بن شمعون, بن يهوذا, بن يوسف, بن يونان, بن ألياقيم, ³¹بن مليّا, بن مينان, بن متاثا, بن ناثان, بن داود, ³²بن يسى, بن عوبيد, بن بوعز, بن سلمون, بن نحشون,³³بن عميناداب, بن ارام, بن حصرون, بن فارص, بن يهوذا, ³⁴بن يعقوب, بن اسحاق, بن ابراهيم, بن تارح, بن ناحور, ³⁵بن سروج, بن رعو, بن فالح, بن عابر, بن شالح,³⁶بن فينان, بن ارفكشاد, بن سام, بن نوح, بن لامك, ³⁷بن متوشالح, بن اخنوخ, بن يارد, بن مهللئيل, بن قينان, ³⁸بن انوش, بن شيث, بن ادم, بن الله.

Chapter 4

¹و رجع يسوع من نهر الاردن و كان مليان بالروح القدس, و كان الروح يقود فيه في الصحراء ²لمدة ربعين يوم باه يجربو ابليس. و في هاذيك ليام ما دخل في فمو حتى شيء من الماكلة. و كي كملت ربعين يوما جاع.³و قال ليه ابليس: "اذا كنت ابن الله, قول لهاذي الحجرة تولي خبز". ⁴رد عليه يسوع و قال: "مكتوب: مش غير بالخبز وحدو يعيش الانسان, بالصح يعيش بكل كلمة تخرج من عند الله".⁵و من بعد طلعو ابليس لجبل عالى و وراه المماليك تاع الدنيا الكل في رمشة عين. و قال ليه ابليس: ⁶"نمد ليك هاذا الملك كامل بيه بالعز تاعو, على خاطر هاذا كامل تمد ليا, وانا نمدو للي تحب. ⁷لو كان تسجد لي هاذا كامل يكون ليك".⁸رد عليه يسوع و قال: "بعد عليا يا شيطان! على خاطر مكتوب: غير للرب الهك برك تسجد و غير هو وحدو برك اللي تعبد".⁹و من بعد اداه لاورشليم, و حط بيه على جناح الهيكل و قال ليه: "لو كان انت ابن الله صح ارمي روحك من هنا للتحت, ¹⁰على خاطر او مكتوب: يوصي ملايكاتو بيك في طريقك يعسو عليك ¹¹على يديهم يهزوك ما تدعثر بحجار رجليك".¹²رد عليه يسوع و قال: "بالصح قال: ما تجربش الرب الهك". ¹³و كي كمل ابليس التجربة كاملة راح عليه حتى وقت اخر. الناصرة ما تقبلش يسوع¹⁴و رجع يسوع بقوة الروح للجليل, و سمعوا باخبارو في هاذوك الجوايه كاملين. ¹⁵و كان يعلم في وسط المجامع تاعهم و الناس الكل كانت تقدروا.¹⁶و وصل للناصرة اللي تربى فيها. و دخل للمجمع كيما العادة نهار السبت و وقف باه يقرى في لكتاب, ¹⁷مدولوا كتاب اشعياء النبي. و حل لكتاب لقى وين مكتوب:¹⁸"روح ربي عليا,على خاطر دهنني باه المساكين بالخير نبشرهم, بعثني اللي قلوبهم مكسورة نداويهم, باه المأسورين للحرية نناديهم, والعميان النظر يرجع ليهم, و المظلومين للحرية نعديهم, ¹⁹و نعلن للناس وقت ربي للقبول".²⁰و من بعد طبق لكتاب و رجعو للخادم تاع المجمع, و قعد, بالصح الناس الكل بقاو يخزروا فيه. ²¹و هو قال لهم: "اليوم تم هاذا لكلام المكتوب اللي سمعتوه". ²²و كلهم شهدوا ليه و تعجبوا من لكلام تاع النعمة اللي كان يخرج من فمو, و قالوا: "مش هاذا هو وليد يوسف؟".²³قال لهم: "على كل حال راح تقولولي هاذا لمثل: يا طبيب داوي روحك! اعمل هنا في بلادك كيما سمعنا بيك تدير في كفرناحوم". ²⁴و قال: "نقول لكم الحق: ما كاين حتى نبي مقبول في بلادو.²⁵نقول لكم الحق: كانوا كاينين هجالات ياسر بكري في اسرائيل في وقت ايليا وقت اللي ما صبتش فيه النو ثلاثة سنين و ستة اشهر. و كي كانت المجاعة في لبلاد كاملة, ²⁶و ايليا ما راح لحتى واحدة منهم, بالصح بعثو الله لواحدة الهجّالة, ساكنة في صرفة صيداء. ²⁷و كانوا ناس ياسر مرضى بالبرص في اسرائيل في زمان النبي اليشع, بالصح واحد فيهم ما برى من مرضو غير نعمان السرياني".²⁸و الناس اللي كانوا في المجمع تغشوا عليه كي سمعوا هاذا لكلام, ²⁹وقفوا و خرجوه برى لمدينة, و جابوه للحاشية تاع الجبل اللي كانت مبنية عليه لمدينة و حبوا يرموه من لثمة. ³⁰اما هو عدى بيناتهم و خرج من وسطهم. راجل مسكون يبرى³¹و هبط لكفرناحوم, مدينة في الجليل, وكان يعلم لثمة ايامات السبت. ³²و الناس تعجبوا من التعليم تاعو, على خاطر كلامو كانت فيه قوة و سلطان.³³و كان في المجمع راجل ساكنو جن, عيط بصوت عالى ³⁴و قال: "اه! واش كاين بينّا و بينك يا يسوع الناصري؟ جيت باه تقضي علينا! انا نعرفك مليح شكون انت: انت القدوس تاع الله!".³⁵نهرو يسوع و قالو: "اسكت! و اخرج منو!". صرعو الجن و طيحو في لوسط و خرج منو و ما ضرو حتى بشيء. ³⁶و هاذوك الناس الكل حاروا, و كانوا يقولوا في بعضاهم: "وش هاذا لكلام؟ عندو قوة و سلطان يامر على الجنون تخرج!". ³⁷و شاعوا لخبار عليه في هاذيك الجوايه كاملة. نسيبة بطرس تبرى هي و اخرين³⁸و كي خرج من المجمع راح لدار سمعان. و كانت نسيبتو مريضة حكمتها سخانة كبيرة, كي طلبوا منو يشفاها. ³⁹قرب لها و نهر السخانة تناحت لها! و ثم ثم وقفت و بدات تخدم فيهم.⁴⁰و كي بدات الشمس تغرب, جميع اللي عندهم ناس مرضى بامراض مختلفة جابوهم ليسوع, و حط يديه على كل واحد فيهم و رتّحهم. ⁴¹و كانت الجنون ثاني تخرج من ناس ياسر مسكونين و هي تعيط و تقول: "انت المسيح ابن الله!". و اما هو نهرهم ما خلاهمش يهدروا, على خاطر عرفوه باللي هو المسيح.⁴²و كي طلع النهار خرج من الدار و راح لمكان خالي, و كانوا الناس يحوسوا عليه. و كي لقاوه حكموه و ما خلاوهش يروح و يخليهم. ⁴³قال لهم: "لازم عليا نبشر المدن الاخرى حتى همّا بالملكوت تاع الله, على خاطر هاذا هو الشيء اللي جيت على جالو". ⁴⁴و راح يبشر في لمجامع تاع الجليل.

Chapter 5

¹و كي كان الغاشي داير بيه باه يسمعوا كلمة الله, كان واقف وين البحيرة تاع جنيسارت. ²و شاف زوز فلايك راسيين, و الصيادة هبطوا منهم و غسلوا الشبكة تاعهم. ³طلع في فلوكة منهم و كانت تاع سمعان, و طلب منو يبعد شوية على البر. و من بعد قعد و بدا يعلم في الناس من لفلوكة.⁴و كي كمل كلامو قال لسمعان: "بعد للعمق و انصبوا الشبكة و صيدوا". ⁵قال لو سمعان: "يا معلم, تعبنا ليلة كاملة و ما صيدنا والو. بالصح على كلمتك نرمي الشبكة". ⁶و كي جبدوا الشبكة لقاوها معمرة بالحوت, حتى قربت تتقطع. ⁷ولاو عيطوا على صحابهم في لفلوكة لخرى باه يجيو و يعاونوهم. و جاو و عباو لفلايك في زوز حتى قربوا يغرقوا.⁸و كي شاف سمعان بطرس الشيء اللي صرى سجد على ركايبوا قدام يسوع و قال: "اخرج من لفولكة تاعي يا ربي, على خاطر انا واحد مذنب!". ⁹و هو و جميع اللي كانوا معاه حايرين في الحوت اللي صيدوه. ¹⁰و حتى يعقوب و يوحنا بن زبدي اللي كانوا شركاء مع سمعان. قال يسوع لسمعان: "ما تخافش! من اليوم و روح تولى تصيد الناس!". ¹¹و كي وصلوا باللفلايك في زوز للبر خلاو كل شيء و تبعوه. واحد عندو لبرص يبرى¹²و كان في واحد لمدينة من المدن, و كان واحد الراجل معمر بالبرص. كي شاف يسوع سجد ليه و حط وجهو على لرض و طلب منو و قال: "يا سيدي, كان تحب تقدر ترتحني". ¹³مد يسوع يدو و مسو وقال: "نحب, كون طاهر!". و في ساع راح عليه البرص.¹⁴و وصاه باه ما يخبر حتى واحد, و قال: "روح وري روحك للكاهن, و صدق الشيء اللي قال عليه موسى في الشرع باه تشهد عليهم".¹⁵و شاعت عليه لخبار اكثر. و تلموا عليه ناس ياسر باه يسمعوا و يبراو من الامراض اللي فيهم. ¹⁶و اما هو كان يروح يقعد في لخلى وحدو و يصلي. واحد مشلول يرتاح¹⁷و في واحد النهار كان يعلم, و كانوا الفريسيين و المعلمين تاع الشرع قاعدين يسمعوا فيه و كانوا جاو من كل قرية من الجليل و من اليهودية و من اورشليم. و كانت قوة الله تشفيهم.¹⁸شوية جاو جماعة هازين واحد على الفراش و كان معوق, و كانوا حابين يدخلوا بيه و يحطوه قدام يسوع. ¹⁹و كي ما لقاوش كيفاه يدخلوا بيه على خاطر كان غاشي ياسر, طلعوا للسطح ونحاو الياجور و هبطوه بالفراش تاعو بالحبال في الوسط قدام يسوع.²⁰و كي شاف الايمان تاعهم قال للراجل: "يا راجل مغفورة ليك ذنوبك". ²¹اما الكتبة و الفريسيين بداو يخمموا ويقولوا: "شكون هاذا اللي راه يهدر بهاذا لكلام تاع الكفر؟ شكون يقدر يغفر الذنوب من غير الله وحده؟".²²عرف يسوع واش قاعدين يخمموا, و قال لهم: "علاش تخمموا هكا في قلوبكم؟ ²³اما اسهل: كي نقول: مغفورة ليك ذنوبك, و الا كي نقول: هز فراشك و امش؟ ²⁴بالصح باه تعرفوا باللي لابن الانسان سلطان على الارض باه يغفر الذنوب". و قال للراجل المعوق: "نقول لك: اوقف وهز فراشك و روح لدارك!".²⁵و في ساع وقف قدامهم الكل, و هز فراشو اللي كان راقد عليه, و راح روّح لدارو و هو يحمد في الله. ²⁶و الناس الكل حكمتهم الدهشة و حمدوا الله, و خافوا خوف كبير و قالوا: "اليوم شفنا لعجب!". المسيح يستدعي لاوي²⁷و من بعد ما صرى هاذا الشيء خرج من لثمة و شاف واحد السمسار اسمو لاوي قاعد يخدم في لمكان اللي يلموا فيه المكس, و قالو: "تبعني". ²⁸ولى خلى كل شيء و راح وراه.²⁹و ضيفوا لاوي عندو في الدار و فرح بيه. و الناس اللي كانوا قاعدين معاه جماعة كبيرة من السماسرة و اخرين. ³⁰و الكتبة و الفريسيين كي شافوا هاذا الشيء تغشوا على التلامذة و قالولهم: "علاه تاكلوا و تشربوا مع السمسارة و المذنبين؟". ³¹جاوبهم يسوع و قال لهم: "الناس الصحاح ما يحتاجوش ل طبيب, بالصح المرضى همّا اللي يحتاجوا ل طبيب. ³²ما جيتش باه ننادي الناس لبرار بالصح باه ننادي المذنبين يتوبوا". الحوار على الصوم³³و زادوا قالوا: "علاه التلامذة تاع يوحنا يصوموا و يصلِيوْ و حتى التلامذة تاع الفريسيين ثاني, اما التلامذة تاعك راهم ياكلوا و يشربوا؟". ³⁴جاوبهم و قال: "تقدروا تصَوموا مالين العرس و لعريس في وسطهم؟ ³⁵بالصح راح تجي ايامات اللي راح يترفع فيها لعريس عليهم, وقتها يصوموا في هاذيك ليام".³⁶و قال لهم ثاني واحد لمثل: "واحد ما يرقع كسوة قديمة برقعة جديدة, على خاطر الجديد يقطع لقديم, و لقديم ما تجيش عليه رقعة من قماش جديد.³⁷واحد ما يحط الشراب الجديد في قربة قديمة على خاطر الشراب الجديد يشقق القربة لقديمة, تولي القربة تقطع و الشراب يسيح. ³⁸بالصح يحطوا الشراب الجديد في قربة جديدة, و يستحفظوا عليهم في زوز. ³⁹و اذا كان واحد شرب من الشراب لقديم ما يحوسش على الجديد, على خاطر يقول: لقديم ابَّن".

Chapter 6

¹و نهار السبت لاخر اللي بعد السبت لول عدى يسوع في وسط الزرَع. و كانوا التلامذة تاعو ينحِيوْ ف السبول و يفركوها بين يديهم و ياكلوا. ²و كي شافوهم جماعة الفريسيين قالوا لهم: "علاه تديروا هكا هاذا الشيء ما يحلش تديروه نهار السبت؟".³رد عليهم يسوع و قال: "و انتوما ما قريتوش على الشيء اللي داروا داود, كي جاع هو واللي كانوا معاه؟ ⁴كيفاه دخل لبيت الله و كلى من لخبز تاع الزيارة, و زاد مد للناس اللي كانوا معاه همّأ ثاني كلاو, وهاذاك لخبز ما كان يحل غير للكهنة برك". ⁵و قال لهم: "ابن الانسان هو ثاني رب السبت". يسوع يرتح واحد نهار السبت⁶و نهار سبت واحد اخر دخل للمجمع و بدى يعلم و كان ثمة واحد الراجل يدو ليمنى مكمشة, ⁷و كانوا الكتبة و الفريسيين يعسوا على يسوع باه يشوفوه يشفي نهار السبت و الا لا, باه يلقاو حاجة يحكموها عليه. ⁸اما يسوع كان عارف واش راهم يخمموا, و قال للراجل اللي يدو مكمشة: "نوض اوقف ف الوسط". ناض و وقف في النص.⁹و من بعد قال لهم يسوع: "نسقسيكم حاجة: نهار السبت يحل لنا نديروا الخير و الا نديروا الشر؟ نسلكوا نفس والا نقتلوها؟". ¹⁰و من بعد ما خزر فيهم الكل قال للراجل: "مد يدك". و كي مد يدو رجعت صحيحة كيما يدو لخرى. ¹¹تغشوا عليه الكل و بداو يتشاوروا بيناتهم واش يديروا مع يسوع. يسوع يخاير التلامذة ف ثناش¹²و في هاذيك ليام طلع للجبل باه يصلي. و قعد ليلة كاملة و هو يصلي لله. ¹³و كي طلع النهار جاب التلامذة و خاير منهم ثناش ن واحد, اللي سماهم من بعد ثاني "رسل" و همّا:¹⁴سمعان اللي سماه بطرس و اندراوس خوه. و يعقوب و يوحنا. فيليبس و برتولماوس. ¹⁵متى و توما. يعقوب بن حلفي و سمعان اللي يقولولوا الغيور. ¹⁶و يهوذا خو يعقوب, و يهوذا الاسخريوطي اللي خانو من بعد. بركات و ويلات¹⁷و هبط معاهم حتى ن وصلوا للسهل, و كان هو و التلامذة الكل و معاهم ناس ياسر من الشعب, من بلاد اليهودية الكل و اورشليم و الشط تاع صور و صيداء, اللي جاو باه يسمعوه واش يعلم و باه يبراو من امراضهم, ¹⁸و الناس اللي معذبين و مسكونين بالجنون. و كانوا يبراو. ¹⁹و الناس طلبوا منو يخليهم يمسوه, على خاطر كانت تخرج منو قوة و ترتح الناس الكل.²⁰و هز عينيه للتلامذة و قال لهم: "المساكين يا سعدكم, على خاطر ملكوت الله يكون ليكم. ²¹يا اللي اليوم جيعانين, يا سعدكم يجيكم نهار اللي تشبعوا فيه, يا اللي باكيين اليوم, يا سعدكم يجي نهار اللي تضحكوا فيه.²²يا سعدكم كان الناس كرهوكم, و طردوكم و عايروكم, و بغظوكم كيما العديان على جال ابن الانسان. ²³هاذاك النهار افرحوا وزيدوا, على خاطر اجركم كبير في السماء, هكذا كانوا جدودهم يديروا مع الانبياء.²⁴بالصح يا ويلكم يا الاغنياء, على خاطر نلتوا فرحتكم. ²⁵يا ويلكم يا اللي شبعانين, على خاطر راح تجوعوا, يا ويلكم يا اللي تضحكوا اليوم, على خاطر راح تحزنوا و تبكِيوْ.²⁶يا ويلكم اذا الناس الكل ذكروكم بالخير. على خاطر هكا كانوا جدودهم يديروا مع الانبياء المزورين. محبة العديان²⁷"بالصح انا نقول لكم يا السامعين: حبوا عديانكم, ديروا الخير في اللي يكرهوكم, ²⁸باركوا اللي يلعنوكم, صلوا للناس اللي يديروا فيكم الشر.²⁹اللي ضربك على خدك زيد لقيلو الخد لاخر, و اللي ادالك برنوسك ما تحكمش عليك ثوبك ثاني. ³⁰كل من يطلبك اعطيه, و اللي ادالك خليه.³¹و عاملوا الناس بالشيء اللي تحبوا الناس يعاملوكم بيه. ³²كان حبيتوا غير الناس اللي يحبوكم, واش من مزية عندكم؟ حتى المذنبين يحبوا اللي يحبوهم. ³³واذا عملتوا الخير غير في الناس اللي يديروا فيكم الخير, واش من مزية عندكم؟ حتى المذنبين هما ثاني يديروا هكا. ³⁴و كان تسلفوا برك غير للناس اللي راح يخلصوا. واش من مزية عندكم؟ حتى المذنبين همّا ثاني يسلفوا للمذنيين اللي عارفينهم يخلصوا الدين كامل.³⁵حبوا عديانكم, ديروا الخير و حلوا ضيقة المحتاج بلا ما تسناو منو يرجع, هكا يكون اجركم كبير و تكونوا ولاد العالي, اللي ينعم على نكارين الخير و الاشرار. ³⁶كونوا حتى انتوما رحماء كيما باباكم الرحيم. الحكم على لخرين³⁷"ما تطلبوا ما تكونوا مطلوبين. ما تحكموا على حتى واحد باه واحد ما يحكم عليكم. اغفروا يتغفر لبكم.³⁸كيما تمدو تلقاو, كيل مليح مدكوك مهزوز فايض تلقاو بين يديكم. على خاطر الميزان اللي توزنوا بيه لغيركم يتوزن بيه ليكم انتم ثاني"³⁹و زاد قال لهم هاذا لمثل: "كاش ما كاين اعمى بقدر يقود اعمى كيفو؟ في زوز يطيحوا في حفرة؟ ⁴⁰التلميذ عمرو ما يكون خير من لمعلم تاعو, بالصح التلميذ اللي يولي كامل يكون كيما المعلم بالذات.⁴¹علاه تشوف القشة اللي في عين خوك, بالصح اللوحة اللي في عينك ما تفيقش بيها؟ ⁴²كيفاه تقول لخوك: خليني نحيلك القشة اللي في عينك. و انت ما تشوفش اللوحة اللي في عينك انت؟ يا واحد المنافق! خرج الشيء اللي في عينك انت قبل. و من بعد كي تعود تشوف مليح خرج القشة من عين خوك. الشجرة و ثمارها⁴³على خاطر ما كانش شجرة صالحة و تجي ثمارها بيثر, و ما كانش شجرة بيثر تجي ثمارها صالحة. ⁴⁴على خاطر كل شجرة من ثمارها تتعرف. الشوك عمرو ما يجيب الكرطوس, و العليق عمرو ما يجيب لعنب.⁴⁵الواحد كي يكون ناس ملاح من صندوق قلبو لمليح يخرج الصلاح, اما الخايب من صندوق قلبو الخايب يخرج الشر. على خاطر من مكنون القلب يتكلم اللسان. البنّاية الفاهمين و البنّاية الجُهال⁴⁶"علاه تنادِيو لي: يا ربي, يا ربي. و انتوما ما تديروش الشيء اللي وصيتكم بيه؟ ⁴⁷كل من يجي عندي و يسمع كلامي و يخدم بيه نقول لكم لشكون يشابه. ⁴⁸يشابه لواحد الراجل بنى دار, حفر و غرّقْ و حط الساس على لحجار. نهار اللي جات الشتاء و فاض الواد على هاذيك الدار ما قدرش يزعزعها, على خاطر كان الساس تاعها مبني عل لحجار.⁴⁹اما اللي يسمع كلامي و ما يخدمش بيه, يشابه لواحد بنى دارو بلا ساس, نهار اللي فاض عليها الواد ثم ثم طاحت, و كانت طيحة خايبة!".

Chapter 7

¹و كي كمل كلامو كامل اللي قالو للشعب دخل لكفرناحوم²و قايد لمياة عسكري, كان عندو خدّام مريض وصل للموت, و كان عزيز عليه. ³و كي سمع بيسوع, بعث ليه الناس لكبار تاع ليهود باه يشوفوه يجي ويرتح الراجل اللي يخدم عندو. ⁴و كي راحوا ليسوع قالولو: "هو واحد يستاهل تقضيلو حاجتو, ⁵على خاطر يحب الامة تاعنا, و هو اللي بنى لنا المجمع".⁶و راح يسوع معاهم. و كي قرب يوصل للدار, بعث لو القايد مع صحابو و قالو: "يا سيدي, بلا ما تَّعب روحك. انا ما نتساهلش تدخل لداري. ⁷و على هاذا الشيء ما حطيتش في بالي حتى كان نقدر نجيك نوقف قدامك. بالصح قول برك كلمة يبرى الراجل اللي يخدم عندي. ⁸على خاطر انا ثاني عندي شكون فوق مني في المرتبة, و عندي عسكر تحت يدي. اللي نقولو روح يروح و اللي نقولو ارواح! يجي, و اللي نقولو يدير حاجة! يديرها".⁹و كي سمع يسوع هاذا لكلام تعجب فيه, و شاف ف الناس اللي كانوا معاه و قال: "نقول لكم: في اسرائيل كاملة ما لقيتش ايمان كيما هاذا!". ¹⁰و كي رجعوا صحابو للدار لقاو لخدّام برى. ابن ارملة نايين يقوم من الموت¹¹و اليوم وغدوة راح يسوع لواحد لمدينة اسمها نايين, و راحوا معاه تلامذة ياسر و غاشي كبير. ¹²و كي قرب يوصل للدخلة تاع لمدينة, شافوا جنازة تاع واحد الطفل, امو ما تسعاه كان هو, و كانت ارملة و معاها غاشي كبير من لمدينة. ¹³و كي شافها الرب حن علاها, و قال لها: "ما تبكيش". ¹⁴و قدم للنعش و حط يدو عليه, ولاو الناس اللي كانوا هازينو وقفوا. و قال: "يا شاب, نقول ليك قوم من لموت!". ¹⁵ناض الميت و قعد و بدى يهدر, و رجعو لامو.¹⁶الناس الكل خافوا, و مجدوا الله و قالوا: "قام في وسطنا نبي كبير, و الله تفقد الشعب تاعو". ¹⁷و شاع عليه هاذا لخبر في بلاد اليهودية كاملة و الجوايه الكل اللي دايرين بيها. يسوع و يوحنا المعمدان¹⁸و راحوا التلامذة تاع يوحنا و خبروه بهاذا الشيء كامل. ¹⁹ولى عيط لزوز من التلامذة تاعو, و بعثهم عند يسوع باه يسقسِيوْه: "انت هو اللي جاي و الا نسناو واحد اخر؟". ²⁰و كي وصلوا التلامذة عند يسوع و قالوا: "بعثنا ليك يوحنا المعمدان و راه يقولك: انت هو اللي جاي و الا نسناو واحد اخر؟".²¹و في هاذيك الساعة رتّح يسوع ناس ياسر من اللي كانوا مرضى و اللي كانت عندهم علة و اللي كانوا مسكونين بالجنون, و رجع النظر لناس ياسر كانوا عميان. ²²و رد يسوع على تلامذة يوحنا و قال: "روحوا ليوحنا و خبروه بالشيء اللي شفتوه و سمعتوه: العميان يشوفوا, العيّاب يمشيو, و اللي عندهم لبرص يبراو, و الطرُش يسمعوا, و الموتى يقوموا من الموت, و المساكين يسمعوا بشارة الخير. ²³يا سعد اللي ما يغلطش فيّا".²⁴و كي راحوا المرسولين تاع يوحنا, بدى يحكي للناس على يوحنا: "كي خرجتوا للصحراء واش كنتوا حابين تشوفوا؟ قصبة يدي فيها الريح؟ ²⁵و الا واش خرجتوا تشوفوا واحد لابس لحرير؟ اللي لابسين لحرير راهم يتنعموا في قصور السلاطين. ²⁶واش خرجتوا تشوفوا؟ نبي؟ نعم, نقول لكم" و خير حتى من نبي!²⁷هاذا هو اللي مكتوب عليه: "انا نرسل الملاك تاعي قبلك باه يوجدلك طريقك قدامك! ²⁸نقول لكم: من بين كل اللي جابتهم النساء ما كانش اعظم من يوحنا المعمدان, بالصح اصغر واحد في الملكوت تاع الله يكون اعظم منو".²⁹و كل الناس كي سمعوا و السمسارة تاع المكس اعطاو حق الله و تعمدوا بالمعمودية تاع يوحنا. ³⁰اما الفريسيين و علماء الشرع ما قبلوش واش حب لهم الله, و ماتعمدوش على يدو.³¹و من بعد قال لهم الرب: "باه نشبه اولاد هاذا الجيل؟ وش هي الحاجة اللي يشبهولها؟ ³²يشابهوا لذراري قاعدين في السوق يعيطوا على بعضاهم و يقولوا: زمرنالكم ما حبيتوش تشطحوا. ندبنالكم ما حبيتوش تبكِيوْ.³³على خاطر جا يوحنا المعمدان لا يوكل خبز و لا يشرب شراب, قلتوا عليه: ساكنوا جن. ³⁴جا ابن الانسان ياكل و يشرب, قلتواعليه: هاذا واحد مكراش و سكارجي, و يحب العشارين و المذنبين. ³⁵و الحكمة تظهر بناسها". يسوع يغفر لمرى زانية³⁶و عرضو واحد فريسي باه يجي يتغدى عندو, راحلو للدار و تضيَف عندو. ³⁷و واحدة لمرى في لمدينة كانت زانية, سمعت باللي يسوع معروض في دار الفريسي, جات و جابت قرعة تاع ريحة, ³⁸و قعدت عند رجلين يسوع من لورى و هي تبكي و الدموع تطيح على رجلين يسوع, و هي كانت تمسح فيها بشعرها, و كانت تبوس في رجليه و تدهن فيهم بالريحة.³⁹و كي شاف الفريسي اللي عرضو واش صرى, قال بينو بين روحو: "لو كان جا هاذا نبي, راو عرف واش تكون هاذي لمرى اللي تمس فيه و واش عاملة! راهي زانية". ⁴⁰رد عليه يسوع و قالو: "يا سمعان, عندي حاجة حاب نقولهالك".قال: "يا معلم, قول".⁴¹"كان و احد الراجل يسال زوز من الناس. واحد يسالو خمسمياة دينار و لوخر يسالو خمسين. ⁴²و على خاطر ما كانش عندهم باه يخلصوا الدين اللي عليهم سامحهم في زوز. شكون منهم كان يحبو اكثر من لاخر؟" ⁴³رد عليه سمعان و قال: "نضن اللي سامحو بالدين لكبير". قالو يسوع: "كلامك صواب".⁴⁴و من بعد خزر للمرى و قال لسمعان: "اك تشوف هاذي لمرى؟ انا دخلت لدارك, و انت ما جبتليش لماء باه نغسل رجليا. اما هي غسلت رجليا بالدموع و مسحتهم بشعرها. ⁴⁵انت ما سلمتش عليا حتى ببوسة واحدة, اما هي من اللي دخلت و هي تبوس في رجليا.⁴⁶انت ما صبيت حتى قطرة تاع زيت على راسي, اما هي دهنت رجليا بالريحة. ⁴⁷على جال هاذا الشيء كامل نقول لك: ذنوبها لكثيرة الكل تغفرت, على خاطر حبت ياسر. و اللي يتغفر لو لقليل يحب قليل".⁴⁸و من بعد قال لها: "ذنوبك مغفورة". ⁴⁹و بداو الناس اللي كانوا معاه يقولوا في قلوبهم: "شكون هاذا اللي حتى الذنوب و يغفرها؟". ⁵⁰و زاد قال للمرى: "ايمانك سلكك على خير, روحي متهنية".

Chapter 8

¹و من بعدها راح يسوع يدور في كل مدينة و قرية و هو يبشر بالملكوت تاع الله, و كانوا معاه النلامذة في ثناش. ²و نساء من اللي كان رتحهم من الجنون و من لمرض و همّا: مريم اللي يقولولها المجدلية اللي خرّج منها سبعة شواطن, ³و يوّنا مرة خوزي لوكيل تاع هيرودس, و سوسنة, و نساء اخرين ياسر كانوا يعاونوا فيه من مالهم. لمثل تاع الزارع و التفسير تاعو⁴و جاو ليه الناس من كل مدينة, و كي تلم الغاشي, كلمهم و قال: ⁵"خرج الفلاح يزرع في الزريعة تاعو, و هو يزرع طاحت شوية زريعة على حاشية الطريق عفسوها الناس و كلاتها الطيور, ⁶و طاحت شوية زريعة فوق لحجار, نبتت بالصح في ساع يبست على خاطر ما كانش ندى.⁷و طاحت شوية زريعة في وسط الشوك, و كي نبتت نبت معاها الشوك و خنقها. ⁸و طاحت زريعة اخرى في التربة الحرة, و كي نبتت طلعت سبول فيه الخير و البراكة مياة مرة قد اللي كان". قال هاذا لكلام و نادى: "اللي عندو وذنين يسمع بيهم غير يسمع!⁹و سقساوه التلامذة و قالوا: "واش بقصد بهاذا لمثل؟". ¹⁰جاوبهم و قال: "انتوما من حقكم تعرفوا لسرار تاع ملكوت الله اما الناس لخرين نهدروا معاهم على هاذي لسرار بالمعاني, على خاطر اذا شافوا ما يميزوش, واذا سمعوا ما يفهموش.¹¹و هاذا هو لمعنى تاع لمثل: الزريعة هي كلام الله, ¹²و اللي طاح منها على الطريق همّا الناس اللي يسمعوا الكلمة, و من بعد يجي ابليس و ينحي الكلمة من قلوبهم باه ما يامنوا و ما يمنعوا, ¹³و اللي على لحجار همّا الناس اللي يسمعوا الكلمة و يقبلوها ويفرحوا بيها, بالصح همّا ما عندهمش ساس, يامنوا وقت قصير, و كي تجيهم المحنة يرجعوا كيما كانوا قبل.¹⁴و اللي طاح وسط الشوك همّا الناس اللي يسمعوا, و من بعد يروحوا و كي تضيق عليهم هموم الدنيا و المال و اللذات, و ما يجيبوش ثمار. ¹⁵و اللي في لرض الحرة, همّا اللي يسمعوا الكلمة و يحفظوها بقلب طيب و صالح, و يصبروا حتى ن يجيبوا ثمار. لمثل تاع المصباح¹⁶ما كانش واحد يشعل كانكي و يغطيه بقصعة و الا يحطو تحت السرير, بالصح يتحط الفوق في لمنارة باه اللي يدخل يشوف الضوء. ¹⁷على خاطر ما كانش مستور غير و يتكشف, و لا سر مخبي غير يظهر و يبان. ¹⁸انتوما اتولهوا كيفاه تسمعوا كلام الله, على خاطر اللي عندو يتزاد لو, و اللي ما عندوش حتى اللي كان عندو يتنحالو". اللي يعمل واش يطلب الله¹⁹و جات ام يسوع و خاوتو عندو, بالصح ما قدروش يوصلو ليه على خاطر كان الغاشي ياسر. ²⁰ولاو بعثولوا يقولوا: "امك و خاوتك لبرى, حابين يشوفوك". ²¹جاوبهم و قال: "امي و خاوتي همّا اللي يسمعوا كلام الله, و يطيعوه". يسوع يهدي الريح القاوية²²و في واحد النهار ركب في فلوكة هو و التلامذة تاعو, و قالهم: "هيا نقطعوا للجيهة لخرى تاع البحر". قلعوا بالفلوكة. ²³و كي كانوا في نص لبحر رقد. و هبت ريح و صبت نو قاوية على لبحر, و تعمرت لفلوكة بالماء حتى قرّْبوا يغرقوا.²⁴راحوا عند يسوع و نوضوه و قالوا: "يا معلم, يا معلم, رانا نغرقوا!". ناض و نهر الريح و لمواج العالية, و رجع كل شيء كيما كان و هدات الحالة. ²⁵و من بعد قال لهم: "وين راح الايمان تاعكم؟". خافوا و تعجبوا و قالوا بيناهم: "شكون هو هاذا؟ يامر حتى على الريح و لمواج و يطيعوه!". واحد الراجل مسكون بالجنون يبرى²⁶و راحوا لبلاد الجدريين لمقابلة للجليل. ²⁷و كي نزل على الشط عرضلو واحد الراجل من لمدينة و كان مسكون بالجنون عندو مدة طويلة, و كان عريان هامل ف لخلى, ديما قاعد في الجبانة بين لقبورة.²⁸و كي شاف يسوع بدى يعيط و سجد على لرض, و قال بصوت عالى: "واش كاين بيني و بينك يا يسوع ابن الله العالي؟ نطلب منك ما تعذبنيش!". ²⁹وامر يسوع الجن باه يخرج من الراجل. على خاطر كان مسيطر عليه مدة طويلة, و حتى كي كانوا يربطوه بالسلاسل و يكتفوه, كان ديما يقطع السلاسل و هاذاك الجن يديه للخلى.³⁰و سقساه يسوع: "واش اسمك؟". جاوب و قال: "لجيون". على خاطر كان فيه جنون ياسر. ³¹و طلب منو باه ما يبعثهمش للهاوية.³²و كان قطيع كبير تاع حلالف يسرح ثمة ف الجبل, و هاذوك الجنون طلبوا من يسوع يخليهم يدخلوا في لحلالف, ³³و كي خلاهم. و خرجوا الجنون من الراجل و دخلوا في لحلالف, اللي راحو يجرِيو و طاحوا من راس الجرف للبحر و غرقوا.³⁴و الناس اللي كانوا سارحين بيهم كي شافوا الشيء اللي صرى راحوا يجريو للمدينة و للدواور لقريبة و خبروهم يكل شيء, ³⁵و الناس الكل خرجوا باه يشوفوا. و كي وصلوا عند يسوع لقَاوْ الراجل اللي كان مسكون بالجنون لابس و في عقلوا لاباس عليه, قاعد عند رجلين يسوع, و كي شافوا هاذا الشيء خافوا.³⁶و اللي كانوا حاضرين حكاو كيفاه يسوع سلك المجنون. ³⁷و الناس الكل تاع بلاد الجدريين قالوا ليسوع يخرج من بلادهم على خاطر خافوا خوف كبير. ولى ركب ف لفلوكة و رجع منين جاء.³⁸اما الراجل اللي خرجوا منوا الجنون طلب من يسوع باه يخليه يبقى معاه, بالصح يسوع ما خلاهش و قالو: ³⁹"ارجع لدارك و احكي على الشيء اللي عملو الله معاك". ولى راح و هو ينادي في لمدينة الكل يالشيء اللي دارو معاه يسوع. بنت يايرس تقوم من الموت و لمرى النازفة ترتاح⁴⁰وكي رجع يسوع عرضولوا الناس على خاطر الكل كانوا يسناو فيه. ⁴¹و كان واحد الراجل اسمو يايرس و هو رايس المجمع , جا ليسوع و طاح عند رجليه و حاولو باه يروح معاه للدار تاعو, ⁴²على خاطر كانت عندو طفلة واحدة عمرها قريب ثناش سنة, و كانت في الموت. و كي كان يسوع رايح معاه بداو الناس يحصروا فيه.⁴³و كانت واحدة لمرى عندها ثناش سنة و هي مريضة عندها نزيف تاع دم, و ما خلات حتى طبيب صرفت مالها الكل و ما ارتاحتش, ⁴⁴جات من ورى يسوع و مست الحاشية تاع الجبة تاعو. و في هاذاك الوقت بالذات حبس عليها الدم.⁴⁵نطق يسوع و قال: "شكون مسني؟". الناس الكل نكروا, ولى قالو بطرس و اللي معاه: "يا معلم الناس راهم يحصروا فيك و يتزاحموا, و تقول: شكون مسني؟". ⁴⁶رد يسوع و قال: "كاين واحد مسني, على خاطر حسيت بقوة خرجت مني".⁴⁷و كي شافت لمرى باللي تكشفت, جات و هي تترعد م سجدت ليه, و خبراتو قدام الناس الكل على السبة اللي خلاتها تمسو, و كيفاه ارتاحت في ساع. ⁴⁸قال لها: "يا بنتي , ايمانك شفاك, روحي متهنية".⁴⁹و هو مازال يهدر, جا واحد من دار يايرس رايس المجمع و قال: "بنتك ماتت. ما كان لاه تتعب المعلم". ⁵⁰و كي سمعو يسوع قال: "ما تخافش! امن برك, بنتك تبرى".⁵¹و كي وصل للدار ما خلى حتى واحد يدخل معاه غير بطرس و يعقوب و يوحنا, و ام الطفلة و باباها. ⁵²كانوا الناس يبكيو و يندبوا عليها. قال لهم: "ما تبكِيوْش. ما ماتتش اي راقدة برك". ⁵³ولاو يستهزاو بيه, على خاطر على بالهم باللي ماتت.⁵⁴و خرجهم الكل. و حكمها من يدها و قال لها: "يا طفلة, نوضي!". ⁵⁵و ثم ثم رجعت روحها و حيات في ساع. قال لهم يجيبولها تاكل. ⁵⁶و حاورا والداها في الشيء اللي صرى. و وصاهم يسوع باه ما يقولوا لحتى واحد.

Chapter 9

¹و عيط على التلامذة تاعو في ثناش, و مدلهم قوة و سلطان على جميع الشواطن و على الامراض, ²و بعثهم يبشروا بالملكوت تاع الله و باه يرتحوا الناس المرضى.³و قال لهم: "ما تهزوا معاكم حتى شيء و انتم رايحين: لا عصا لا مزود و لا خبز و لا دراهم, و كل واحد فيكم يروح غير بقشو اللي لابسو ما نهزوش معاكم تبديلة. ⁴و الدار اللي تدخلوها ابقاوْ فيها حتى تكملوا و تخرجوا.⁵و اذا كان ما قبلوكمش في مدينة اخرجوا منها, و حتى لغبار اللي في صبابتكم انفضوه باه يشهد عليهم". ⁶و كي راحوا كانوا يعدِيوْ على كل قرية و همّا يبشروا و يشفِيوْ الناس في كل مكان. حيرة هيرودس⁷و سمع الوالي هيرودس بالشيء اللي صرى الكل و دخل في بعضاه, على خاطر كاين اللي قالوا: "هاذا ما يكون غير يوحنا حيى من بين الموتى". ⁸و اخرين قالوا: "هاذا ايليا ظهر". و اخرين قالوا: "هاذا نبي من الانبياء لقدم حيى من بين الموتى". ⁹قال هيرودس: "يوحنا انا طيرت لو راسو. شكون هاذا اللي قاعد نسمع عليه هاذا الشيء كامل؟. و كان حاب يشوفو.يسوع يشبع خمسة الاف راجل¹⁰وكي رجعوا الرسل عند يسوع خبروه بالشيء كامل اللي داروه, اداهم وحدهم على جيهة في مكان خالي في مدينة بيت صيدا. ¹¹و كي سمعوا بيه الناس تبعوه, و هو استقبلهم و كلمهم على الملكوت تاع الله, و اللي كانوا محتاجين للشفاء رتحهم.¹²و كي بدى يروح النهار. جاوه التلامذة الثناش و قالوا: "صرف الغاشي يروحوا للقرى و الدواور القريبة يباتوا و يلقاو ما ياكلوا, على خاطر رانا في لخلى و ما كاين والو". ¹³قال لهم: "اعطوهم انتوما ياكلوا". قالوا: "ما عندنا كان خمسة خبزات و زوز حوتات, غير كان رحنا شرينا ماكلة لهاذا الشعب الكل". ¹⁴على خاطر كانوا قريب خمسة الاف راجل. قال للتلامذة :"قعدوهم و فرقوهم كل جماعة فيها خمسين خمسين".¹⁵داروا كيما قال لهم, و قعدوا الناس الكل. ¹⁶حكم يسوع الخمسة خبزات و الزوز حوتات, و هز عينيه للسماء و باركهم و قسمهم و اعطي للتلامذة باه يفرقوهم على الناس. ¹⁷كلهم كلاو و شبعوا. و زادوا لموا الشيء اللي فضال عليهم من الكسور اثناش ن قفة. بطرس يستعرف بالمسيح¹⁸و كان يصلي وحدو كانوا التلامذة معاه. سقساهم و قال: "واش يقولوا الناس عليّا شكون انا؟". ¹⁹قالوا: "كاين وحايد يقولوا يوحنا المعمدان. و اخرين يقولوا: ايليا. و اخرين يقولوا: نبي من الانبياء لقدم حيا من بين الموتى".²⁰قال لهم: " وانتوما واش تقولوا شكون انا؟" رد عليه بطرس و قال: "انت المسيح تاع الله!". ²¹وصّاهم مليح و حرص عليهم باه ما يقولوا هاذا الشيء حتى لواحد, ²²و قال: "لازم بن الانسان يتعذب ياسر, و يرفضوه الشيوخ و رياس الكهنة و الكتبة, و يتقتل, و في ثالث يوم يقوم من بين الموتى".²³و كلم الناس الكل و قال لهم: "اذا كان و احد حاب يتبعني, ينكر روحو و يهز الصليب تاعو فوق كتفو كل يوم, و يمشي ورايا. ²⁴اللي يحب يمنّع روحو يفناها, بالصح اللي يفني روحو على جالي هاذاك يمنّعها. ²⁵على خاطر واش ينال الواحد اذا ربّح العالم كامل و خسر و الا هلك روحو؟²⁶على خاطر اللي يحشم بيّا و بكلامي, ابن الانسان ثاني يحشم بيه نهار اللي يجي في المجد تاعو و المجد تاع الاب و الملايكة القديسين. ²⁷نقول لكم الحق: كاين ناس هنا بيناتكم ما يذوقوش الموت حتى ن يشوفوا الملكوت تاع الله". التجلي²⁸و بعد هاذا لكلام بثمانية ايام قريب, دا معاه بطرس و يعقوب و يوحنا و طلع للجبل باه يصلي. ²⁹و كي كان قاعد يصلي. تبدلت الهيئة تاع وجهو, و ولّى قشو ابيض و يلمع.³⁰و زوز رجال يهدروا معاه, و هما موسى و ايليا, ³¹اللي ظهروا بمجد, و كانوا يهدروا على الموت تاعو اللي رايح يكملو في اورشليم.³²اما بطرس و اللي معاه كان ثقل عليهم النوم. و كي فاقوا شافوه في المجد تاعو و شافوا الرجال في زوز اللي كانوا واقفين معاه. ³³و في الوقت اللي جاو باه يفارقوه قال بطرس ليسوع "يا معلم, مليح نقعدوا هنا. و ننصبوا ثلاثة خيم: واحدة ليك, و واحدة لموسى, و واحدة لايليا". و ما كانش علابالو بروحو واش يقول.³⁴و هو مازال يهدر جات سحابة و غطاتهم. و كي دخلوا في السحابة خافوا. ³⁵و جا صوت من السحابة يقول: "هاذا هو ابني لحبيب, اسمعوا ليه". ³⁶و بعدما تكلم الصوت لقاو يسوع وحدو, اما هما سكتوا و ما قالوا حتى لواحد في هاذيك ليام على الشيء اللي شافوه. شاب ساكنو جن ينال الشفاء³⁷اليوم وغدوة هبطوا من الجبل, و عرضوا لو غاشي كبير. ³⁸و واحد من الناس بدى يعيط و يقول: "يا معلم, نطلب منك. شوف لوليدي, ما عندي غير هو. ³⁹و كي يضربو الجن يبدى يعيط وحدو, يصرعو و يخليه يصكك في لرض, و ما يجي يسَيبو كان يرضرضو ما يخلي فيه والو. ⁴⁰و قلت للتلامذة تاعك باه يخرجوه منو و ما قدروش".⁴¹جاوب و قال: "يا واحد الجيل لمعوج اللي بلا ايمان حتى لوقتاه نقعد معاكم و نستحملكم؟ جيب وليدك هنا!". ⁴²و هو جايبو ضربو الشيطان وصرعو. نهر يسوع الروح المنجوس. و ارتاح الشاب و رجعوا لباباه.⁴³الناس لكل حاروا ف القدرة تاع الله. و كي كانوا الناس الكل مستغربين من الشيء اللي دارو يسوع كامل, قال للتلامذة: ⁴⁴"حلوا وذنيكم و اسمعوا انتوما هاذا لكلام مليح: ابن الانسان راح يسلموه للناس". ⁴⁵اما هما ما فهموش هاذا الكلام, و كان مخبي عليهم باه ما يفهموش, و خافوا لا يسقسيوه عليه. شكون هو الاعظم فيهم؟⁴⁶و بدات تدور في روسهم فكرة على شكون زعمة منهم اللي عندو شان كبير؟ ⁴⁷و علم يسوع واش قاعدين يخمموا, ولى جاب واحد الطفل صغير و وقفو في الوسط, ⁴⁸و قال لهم: "اللي يقبل هاذا الطفل باسمي يقبلني انا, و اللي قبلني يقبل اللي بعثني, على خاطر اصغر واحد فيكم هو اللي يكون شانو كبير".⁴⁹قال يوحنا: "يا معلم, لقينا واحد يخرج في الشواطن باسمك بالصح ما خليناهش, على خاطر ماهوش واحد منّا". ⁵⁰قالو يسوع: "ما تحَرموش عليه, على خاطر اللي ماهوش علينا يسمى معانا". قرية السامرة ترفض يسوع⁵¹و كي وصل الوقت اللي راح يترفع فيه للسماء قرر باه يروح لاورشليم, ⁵²و بعث رسل قدامو, كي راحوا و دخلوا للقرية تاع السامريين باه يوجدولو مكان يقعد فيه. ⁵³ما حبوش اهل السامرة يقبلوا على خاطر كان راح يروح لاورشليم.⁵⁴و كي شافوا كيما هكا قالوا لو التلامذة تاعو, يعقوب و يوحنا: "يا رب تحب نهبطوا عليهم نار من السماء تفنيهم, كيما دار ايليا؟". ⁵⁵تلفت لهم و بخسهم و قال لهم: "ما تعرفوش نتوما من واش من روح! ⁵⁶على خاطر ابن الانسان ما جاش باه يقتل, بالصح جا باه يسلك". ولاو خرجوا من قرية السامرة و راحوا لقرية اخرى. الثمن باه واحد يتبع يسوع⁵⁷و كي كانوا ماشيين في الطريق قالو واحد منهم: "يا سيدي, انا نتبعك وين تروح نروح". ⁵⁸جاوبو يسوع: "الثعالب عندها مغاغر, و لفراخ عندها لعشاش, اما ابن الانسان ما عندوش حتى وين يتكي راسو".⁵⁹و قال لواحد اخر: "تبعني". رد عليه وقال: "يا سيدي, سامحني نروح قبل ندفن بابا و نجي نتبعك". ⁶⁰جاوبو يسوع وقال: "خلي الموتى يدفوا الموتى, اما انت روح و نادي بالملكوت تاع الله".⁶¹و واحد اخر قال: "نتبعك يا سيدي, بالصح خليني نروح نبقي اماليّا على خير و نجي". ⁶²رد عليه يسوع و قال: "ما كانش واحد كي يحط يدو على المحراث و يتلفت وراه يصلح للملكوت تاع الله".

Chapter 10

¹و من بعد زاد خاير الرب سبعين واحد اخرين, و بعثهم زوز بزوز باه يروحوا يسبقوه لكل مدينة و كل مضرب ناوي يروح ليه. ²و قال لهم: "الصابة ياسر, و الحصادة قلال. اطلبوا من رب لحصاد باه يبعث حصّادة للصابة تاعو".³روحوا! انا نبعثكم كيما خرفان وسط الذيابة. ⁴لا تهزوا شكارة و لا مزود و لا سباط زايد و لا تسلموا على واحد في الطريق.⁵و اي دار تدخلوا ليها قولوا قبل: السلام لهاذا الدار. ⁶و اذا كان فيه ابن سلام السلام تاعكم يخيم عليه, و اذا ما كانش يرجع سلامكم ليكم. ⁷و اقعدوا في هاذاك الدار ماكلين شاربين من الشيء اللي عندهم, على خاطر الخدّام يستاهل الاجرة تاعو. ما تبقاوش تدوروا من دار لدار.⁸و اي مدينة تدخلوها و يقبلوكم فيها, كولوا من الشيء اللي يمدولكم, ⁹و اشفوا المرضى اللي فيها, و قولوا لهم: او قرّب منكم الملكوت تاع الله.¹⁰و اي مدينة تدخلوها و ما يقبلوكمش, اخرجوا لشوارع تاعها و قولوا: ¹¹حتى لغبار اللي لصق في رجلينا من مدينتكم ننفضوه. بالصح اعرفوا هاذا الشيء: او الملكوت تاع الله قَرّب منكم. ¹²و نقول لكم: في هاذاك اليوم راح تكون حالة سدوم و عمورة خير من حالة هاذيك لمدينة.¹³"يا ويلك يا كورزين! يا ويلك يا بيت صيدا! على خاطر لو كان داروا في صور و في صيداء المعجزات اللي داروها فيكم, راهم تابوا بكري و قعدوا فوق الرماد و لبسوا الخيشة. ¹⁴بالصح صور و صيداء تكون حالتهم نهار لاخرة خير من حالتكم. ¹⁵و انت يا كفرناحوم الطالعة في السماء! راح تهبطي للهاوية.¹⁶اللي يسمع منكم يسمع مني, و اللي يكرهكم يكرهني, و اللي يكرهني يكره اللي بعثني".¹⁷و كي رجعوا التلامذة السبعين رجعوا و هما فرحانين و قالوا: "يا رب, حتى الشواطن تطيع امرنا بأسمك!". ¹⁸قال لهم: "شفت الشيطان طايح من السماء كيما لبَرق. ¹⁹نعطيكم سلطان تعفسوا على الحنوشة و لعقارب و كل قوة العدو, و شيء ما يضركم. ²⁰بالصح مش بهاذا الشيء تفرحوا: باللي الجنون تخضع لكم, بالصح افرحوا باللي اساميكم تكتبت في السماوات".²¹و في هاذيك الساعة فرح يسوع بالروح القدس و قال: "نحمدك يا الاب, رب السماء و لرض, على خاطر حجبت هاذي الامور على الحكماء و الفهماء و كشفتها للصغار. نعم يا الاب, على خاطر هاكذا تكون رضايتك".²²و تلفت للتلامذة و قال لهم: "كل شيء جاني من عند بابا. واحد ما يعرف شكون هو الابن غير الاب, و واحد ما يعرف شكون هو الاب غير الابن, و اللي حب الابن يكشفلو عليه".²³و تلفت للتلامذة تاعو و قال لهم وحدهم: "يا سعد العينين اللي يشوفوا واش راكم تشوفوا! ²⁴على خاطر نقول لكم: انبياء و ملوك ياسر حبوا يشوفوا الشيء اللي انتوما شفتوه و ما شافوش, و حبوا يسمعوا الشيء اللي انتوما سمعتوه وما سمعوش". لمثل تاع السامري الصالح²⁵و وقف واحد من العلماء تاع الشريعة حب يجربو و قالو: "يا معلم, واش ندير باه نورث لحياة الدايمة؟". ²⁶رد عليه يسوع وقال: "واش مكتوب في الشريعة. كيفاه تفسرو؟". ²⁷جاوب و قال: "تحب الرب الهك من كل قلبك و من كل جوارحك, و من كل القدرة تاعك, ومن كل الفكر تاعك, و تحب قريبك كيما ذاتك". ²⁸قال يسوع: "هاذا هو الصواب. اعمل هاذا الشيء تحيا".²⁹اما هوعلى خاطر حاب ينجي روحو, قال ليسوع: "وشكون هو قريبي؟". ³⁰رد عليه يسوع و قال: "كان واحد الراجل هابط من اورشليم رايح لاريحا, شوية طاحو بيه سرارقة, عروه, و ضربوه, و هربوا و خلاوه بين الحياة و الموت.³¹و كان واحد الكاهن معدي من هاذيك الطريق, و كي شافو عدى عليه و خلاه. ³²و زاد عدى واحد لاوي من ثمة, و كي وصل بحذاه شافو و عدى عليه و خلاه.³³و كان واحد السامري من السامرة مسافر كي شافو, جا يجري و حن عليه, ³⁴قدملو و مسح لو لجراح تاعو, و صب عليها زيت و خمر و ركبو فوق لبهيم تاعو, و داه للفندق و تهلى فيه. ³⁵و غدوة كي جا رايح جبد زوز دينار و اعطاهم لمولى الفندق, و وصاه عليه و قالو: استحفظ بيه, و اي حاجة تصرفها كي نجي نخلصك.³⁶بين هاذوك في ثلاثة شكون منهم ولى يقرب لهاذاك اللي طاح في يد السرارقة؟". ³⁷قال: "اللي دار معاه الرحمة". قالو يسوع: "روح انت ثاني و اعمل هكّا". يسوع في دار مريم و مرثا³⁸و همّا ماشيين دخل لواحد القرية, عَرضاتو واحدة لمرى اسمها مريم لدارها. ³⁹و كانت عندها اختها اسمها مريم, جات قعدت عند رجلين يسوع و بقات تسمع فيه واش يقول.⁴⁰اما مرثا كانت مقلقة عندها خدمة ياسر. وقفت و قالت: "يا رب, ما تولهتيش باللي اختي خلاتني نخدم وحدي؟ قول لها توقف تعاونني!". ⁴¹رد عليها يسوع وقال: "ا مرثا, ا مرثا, انت تخممي و تقلقي على امور ياسر, ⁴²بالصح الحاجة غير لواحد برك. و مريم خايرت النصيب الي يصلح و اللي واحد ما ينحيه".

Chapter 11

¹و كان يصلي في واحد المضرب, و كي كمّل, سقساه واحد من التلامذة: "يا رب علمنا نصليو احنا ثاني كيما علم يوحنا التلامذة تاعو".²قال لهم: "كي تصليو قولوا: بابانا اللي في السماوات, يتقدس اسمك, يجي ملكوتك, تتحقق الرغبة تاعك في لرض كيما راهي في السماء.³ارزقنا خبزنا اللي يكفينا تاع كل نهار, و اغفر لنا ذنوبنا كيما نغفروا احنا للناس اللي يظلمونا, ⁴و ما دخلناش في محنة و نجبنا من الشيطان".⁵و زاد قال لهم: "شكون فيكم اللي عندو صاحب, و يجيه نص ليل, و يقولو يا صاحيبي, سلفني ثلاثة خبزات, ⁶على خاطر جاني واحد صاحبي كان مسافر, و ما عنديش واش نحطلو. ⁷يرد هاذاك اللي لداخل و يقول: ما تقلقنيش! اني قفلت الباب و انا راقد مع اولادي في لفراش. ما نقدرش نوقف و نمدلك. ⁸نقول لكم: اذا كان ما يونضش و يعطيه على خاطر هو صحيبو, ينوض و يعطيه واش يستحق على خاطر بقى يطبطب عليه.⁹و نقول لكم: ادعِيو تنالوا, اطلبوا تلقاو, طبطبوا يفتح عليكم. ¹⁰على خاطر كل من يدعي ينال, و كل من يطلب يلقى, و كل من يطبطب يفتح عليه.¹¹شكون منكم كي يكون عندو ولدو, يطلب منو خبز, يعطيه حجرة؟ والا يطلب منو حوتة, يعطيه افعى؟ ¹²و اذا طلبوا في حبة بيض, يعطيه عقرب؟ ¹³اذا كنتوا انتم الاشرار تعرفوا تمدوا لاولادكم الحاجة لمليحة, كيفاه مالا الاب اللي في السماء, مش راح يمد الروح القدس للناس اللي يطلبوه منو؟". يسوع و رايس الشواطن بعلزبول¹⁴و كان يسوع يخرج في جن من واحد بكوش, و كي خرج الجن تكلم البكوش, و تعجبت الناس من هاذا الشيء. ¹⁵بالصح كاين جماعة اللي قالوا: "او يسوع يخرج فالجنون بالملك تاع الجنون بعلزبول".¹⁶و اخرين كي حبوا يجربوه طلبوا منو يدير لهم اية من السماء. ¹⁷عرف واش قاعدين يخمموا, و قال لهم: "كل مملكة تتقسم على ذاتها تكون اخرتها لخراب, و تطيح دار بدار.¹⁸اذا كان الشيطان يتقسم على ذاتو, كيفاه تثبت المملكة تاعو؟ على خاطر تقولوا: اني نخرج فالجنون ببعزبزل. ¹⁹اذا كنت انا نخرج في الجنون بالملك تاع الجنون, اولادكم بشكون يخرجوهم؟ على هاذيك همّا اللي راح يحكموا عليكم! ²⁰بالصح اذا كنت انا نخرج فالجنون بإذن الله, يسمى دهم عليكم الملكوت تاع الله.²¹وقت اللي القاوي يحامي على دارو و هو مسلح, كانت اموالو في امان. ²²بالصح كي جا اللي اقوى منو و غلبو, و نحالو سلاحو كامل اللي كان معول عليه, و فرقلو الاموال تاعو. ²³اللي ما هوش معايا راه عليّا, و اللي ما يلمش معايا راه يفرق.²⁴و كي يخرج الروح المنجوس من الانسان, يروح يهوم في القفار يحوس على الراحة, و كي ما يلقاش يقول: نرجع لداري اللي خرجت منها. ²⁵يجي يلقاها مكنوسة و مزينة. ²⁶يروح يجيب سبعة ارواح اخرى اشر منو, و يدخل و يسكن لثم, و تولي لاخرة تاع هاذاك الانسان اشر من اللي كانت المرة لولى!".²⁷و كي كان يهدر في هاذا لكلام, واحدة لمرى رفعت صوتها من وسط الغاشي وقالت لو: "يا سعد الكرش اللي هزاتك, و الصدر اللي رضّعك". ²⁸اما هو قال لها: "يا سعد الناس اللي يسمعوا لكلام تاع الله و يطيعوه". الاية تاع يونان²⁹و كي كان الغاشي يدز في بعضاه, قال لهم: "هاذا الجيل الفاسد, يطلب في اية, بالصح ما يشوف حتى اية غير الاية تاع يونان النبي. ³⁰على خاطر كيما كان يونان اية لناس نينوى, هكا يكون ابن الانسان اية ثاني للجيل هاذا.³¹و الملكة تاع التيمن راح توقف نهار القيامة مع رجال هاذا الجيل و تحكم عليكم, على خاطر جات من اخر الدنيا باه تسمع الحكمة تاع سليمان, وهنا اليوم قدامكم اللي هو اعظم من سليمان!³²و الرجال تاع نينوى يوقفوا نهار القيامة مع هاذا الجيل و يحكموا عليه, على خاطر كي حذرهم يونان تابوا, و هنا اليوم قدامكم اللي هو اعظم من يونان! العين هي الضوء تاع لبدن³³ما كانش واحد يشعل كانكي و يخبيه, و الا يحطو تحت السرير, بالصح يحطو الفوق وين لمنارة, باه اللي يدخل يشوف الضوء. ³⁴الضوء تاع لبدن هو العين, اذا كانت عينك بسيطة يكون جسمك كامل منور, ³⁵و اذا كانت عينك مشرارة يكون بدنك كامل اظلم. اتوله باه ما يكونش الضوء اللي فيك ظلام. ³⁶اذا كان لبدن تاعك كامل منور ما يكونش فيه طرف اظلم, يكون كلو منور, كيما كي يضوي الكانكي بالضوء اللي فيه". يسوع يبخس الكهنة و الفريسيين³⁷و هو مازال يهدر جاء واحد فريسي و عرضو باه يتغدى عندو, راح معاه و كي دخل و قعد. ³⁸تعجب منو الفريسي كي شافو بالي ما غسلش قبل ما يتغدى.³⁹قال لو الرب: "انتم الفريسيين تنظفوا الكاس و القصعة من برى و اما قلوبكم معمرة بالسرقة و لخبث. ⁴⁰يا جهّال, هاذا اللي صنع من برى مش هو اللي صنع الداخل ثاني؟ ⁴¹صدقوا الشيء اللي عندكم, و هكا يكون كل شيء نظيف.⁴²بالصح يا ويلكم يا الفرسيين! على خاطر تمدوا لعشور تاع النعناع و الثبش و لحبوب الكل, و تتعداو على الحق و محبة الله. لو كان عملتوا هاذي و ما خليتوش هاذيك.⁴³يا ويلكم يا الفريسيين! على خاطر تحبوا تقعدوا انتوما لوالى في المجامع, و تحبوا التسلام ف لسواق. ⁴⁴يا ويلكم يا الكتبة و الفريسيين المنافقين! على خاطر انتما كيما لقبورة لمخبية. و اللي يمشيو فوقها ما علابهمش باللي قبر!".⁴⁵رد عليه واحد من علماء الشريعة وقالو: "يا معلم, كي قلت هكا راك طيحت فينا احنا ثاني!". ⁴⁶قال يسوع: "يا ويلكم يا علماء الشريعة! على خاطر تحطوا احمال ثقيلة على ظهور الناس اما انتم ما تمسوهاش حتى لو كان بطرف صوابعكم".⁴⁷يا ويلكم على خاطر تبنيو لقبورة تاع الانبياء, و جدودكم همّا اللي قتلوهم. ⁴⁸و تشهدوا و راضيين على الشيء اللي داروه جدودكم و تزيدوا تبنيو لهم لقبورة تاعهم.⁴⁹على هاذا الشيء قالت الحكمة تاع الله: انا نبعث لهم الانبياء و الرسل, اللي يقتلوه يقتلوه و اللي يسحتوه يسحتوه, ⁵⁰باه يتحاسب هاذا الجيل على لانبياء الكل اللي ساح دمهم من اللي بدات الدنيا, ⁵¹من دم هابيل لدم زكريا اللي تقتل بين المذبح و البيت. نعم, نقول لكم: هاذا الجيل هو اللي يتحاسب عليهم!⁵²يا ويلكم يا علماء الشريعة! عندكم المفتاح تاع العلم. لا انتم دخلتوا, و لا خليتوا غيركم يدخل".⁵³و كي عاد يهدر معاهم كيما هكّا, الكتبة و علماء الشريعة زادوا ولاو يحقدوا عليه اكثر من قبل, و بداو يستفزوا فيه في امور اخرى ياسر, ⁵⁴و يعسوا عليه يستناو يصيدوه ينطق بحاجة باه يشكيو بيه.

Chapter 12

¹و في هاذاك الوقت تلموا الوف الناس, و كان الغاشي فوق بعضاه, و بدى يسوع يهدر مع التلامذة و يقول لهم: "ردوا بالكم من لخميرة تاع علماء الشرع اللي هو النفاق,²ما كانش مستور غير و يتكشف, و ما كانش مخبي غير و يبان. ³كل شيء قلت لكم عليه في الظلمة يتسمع في النور, و كل ما كلمتكم بيه في الستر راح يناديو بيه جهار.⁴بالصح يا حبابي نقول لكم: ما تخافوش من اللي يقتلوا لبدن, و من بعد ما يقدروا يزيدوا يديروا والو. ⁵نقول لكم من شكون تخافوا: خافوا من اللي بعدما يقتل, يقدر يرمي في جاهنّامة, نعم, نقول لكم: هاذا اللي لازم تخافوا منو!⁶ياخي خمسة فراخ يتباعو بزوز دورو, و واحد منهم ما راه منسي عند الله؟ ⁷انتم حتى الشعر اللي في روسكم محسوب شعرة بشعرة. مالا ما تخافوش! انتم خير من الفراخ الكل!⁸و نقول لكم: اللي يستعرف بيّا قدام الناس, ابن الانسان يستعرف بيه قدام الملائكة تاع الله. ⁹و اللي ينكرني قدام الناس, ننكرو قدام الملايكة تاع الله. ¹⁰و كل من قال كلمة على ابن الانسان تتغفر ليه, اما اللي يكفر بالروح القدس هاذاك ما تتغفرش ليه.¹¹و كي يحكموا عليكم في لمجامع و قدام الرياس و السلاطين ما تخموش واش تجاوبوا و الا واش تقولوا, ¹²على خاطر الروح القدس يعلمكم في هاذيك الساعة واش لازم تقولوا". لمثل تاع الغني الغبي¹³نطق واحد من الناس و قال: " يا معلم, قول لخويا يقسم معايا الورث". ¹⁴قال لو يسوع: "يا راجل, شكون حطني قاضي و لا مفتي عليكم؟". ¹⁵و قال لهم: "شوفوا ردوا بالكم من الطمع, على خاطر اللي يملك مال ياسر حياتو ماهيش من مالو".¹⁶و عطاهم هاذا لمثل و قال: "واحد الراجل غني عندو اراضي جاه العام صابة, ¹⁷خمم بينو وبين روحو وقال: واش نعمل, ما عنديش وين نحط الغلة؟ ¹⁸و من بعد قال هكّا: نريب المخازن لقديمة و نبني واحد اخرين اكبر, و نلم فيها الغلة و الخيرات تاعي الكل, ¹⁹و نقول اروحي: عندك خيرات كبيرة, مخبية تاع سنين طويلة. ارتاحي كولي واشربي و افرحي!²⁰ياخي الله قالو: "يا جاهل! هاذي الليلة تطلع منك روحك, و هاذي الخيرات اللي لميتها لشكون تخلاها؟ ²¹هكا يكون حال اللي يكنز لروحو في لرض و هو فقير عند الله". الله يعتني بينا²²و قال للتلامذة تاعو: "على جال هاذا الشيء نقول لكم: ما تتقلقوش على معيشتكم واش تاكلوا, و لا على واش تلبسوا. ²³لحياة اهم من الطعام, و لبدن اهم من اللبسة.²⁴شوفوا لغراب: لا يزرع لا يحصد, لا عندو دار و لا مخزن, بالصح الله يرزقو بالقوت تاعو. ياخي انتم خير من الطيور! ²⁵شكون منكم اذا كان تقلق يقدر يزيد في الطول تاعو و لو كان ذراع؟ ²⁶اذا كنتوا ماكمش قادرين على الامور الصغيرة, كيفاه مالا تتقلقوا على الامور لخرى؟²⁷شوفو النوار تاع المرجة كيف ينبت: لا يتعب لا يغزل, بالصح نقول لكم: حتى سليمان في الجاه تاعو كامل ما لبسش كيما نوارة منهم. ²⁸اذا كان لحشيش اللي يكون ليوم في الجنان و غدوة يقدِيو بيه النار يلَبسو الله كيما هكا, كيفاه مالا يلَبسكم انتوما يا ضعاف ليمان؟²⁹انتم ما تطلبوش واش تاكلوا و الا واش تشربو و ما تتقلقوش, ³⁰هاذي لحوايج الكل يطلبوها اهل الدنيا. اما انتم باباكم يعلم باللي تحتاجو لهاذي الامور.³¹اطلبوا قبل كل شيء الملكوت تاع الله, و هاذي الكل تتزاد لكم. ³²"ما تخافش يا القطيع الصغير, على خاطر باباكم رضى باه يعطيكم الملكوت.³³بيعوا ما عندكم و صدقوا. ديروا رصيد ما يفناش و كنز ما يخلاص في السماوات, وين لا سارق يسرق و لا سوس يفسد, ³⁴على خاطر وين يكون الكنز تاعكم ثمة يكون قلبكم ثاني. لمثل تاع العبيد اللي واجدين³⁵كونوا واجدين اتحزموا و شعلوا المصباح تاعكم. ³⁶و كونوا كيما ناس يستناو في سيدهم يرجع من العرس, باه كي يجي و يطبطب في ساع يحلوا عليه.³⁷يا سعد هاذوك العبيد اللي يجي سيدهم و يلقاهم ساهرين. نقول لكم الحق: راح يوقف يتحزم هو و يقعدهم و يبدى يخدم فيهم. ³⁸اذا كان جا في النص الثاني تاع الليل و الا النص الثالث, و لقاهم يستناو فيه. يا سعدهم هاذوك العبيد.³⁹يكون في علمكم: لوكان جا مولى الدار عارف واش من ساعة يجي فيها السارق راه سهر, و ما خلاش دارو تتسرق. ⁴⁰مالا كونوا انتم واجدين, على خاطر ابن الانسان يجي في ساعة ما تتوقعوهاش". لمثل تاع لوكيل الامين⁴¹قال لو بطرس: "يا رب, تقول في هاذا لمثل لينا احنا برك و الا حتى للناس الكل؟ ⁴²قال الرب: "شكون هو الوكيل الامين الحكيم اللي يجعلو سيدو مسؤول على الخدامة الكل باه يعطيهم قسمتهم تاع الماكلة في وقتها؟ ⁴³يا سعد هاذاك العبد اللي كي يرجع سيدو و يلقاه يدير في الواجب! ⁴⁴نقول لكم الحق: راح يجعلو مسؤول على مالو كامل.⁴⁵بالصح اذا هاذاك العبد قال في قلبو: سيدي يبطى باه يرجع, و يبدى يضرب في الخدامة و الخديمات, و ياكل و يشرب و يسكر. ⁴⁶و يجي سيد هاذاك العبد في نهار ما يتوقعوش و في ساعة ما يتوقعهاش, يخرجو و يحطو مع الخاينين.⁴⁷اما هاذاك العبد اللي يعرف مليح واش يحب سيدو و ما يوجدش روحو و ما يديرش على حساب واش يحب سيدو, راح يخلصها غالية. ⁴⁸بالصح اللي ما يعرفش, و يدير الحاجة اللي تستاهل الضرب, يخلصها اقل. و كل اللي دا بالزايد, يطلبوا منوا يرجع بالزايد, و اللي متوكل على لكثير يرَجع لكثير. انقسام مش سلام⁴⁹جيت باه نشعل النار ف لرض, وقداه نتمنى تشعل؟ ⁵⁰عندي صبغة لازم نصبغ روحي بيها, و ما نتهنى غير كي تتم؟⁵¹راكم حاسبين باللي انا جيت باه يكون لهنى ف لرض؟ نقول لكم: جيت باه تكون التفرقة. ⁵²على خاطر من اليوم يكونوا خمسة في دار واحدة يتقسموا: ثلاثة على زوز, و زوز على ثلاثة. ⁵³يدور الاب على ولدو, و الولد على باباه, و الام على بنتها, و الطفلة على امها, العجوزة على كنتها, و الكنة على عجوزتها". كيفاه نعرفو الاوقات تاع الله⁵⁴و من بعد زاد قال للناس: "كي تشوفوا السحاب طالع مع لمغارب ثم ثم تقولوا: راح تصب النو, و هكا يصير. ⁵⁵و كي تهب عليكم الريح من الجنوب تقولوا: راح يجي شهيلي, و هكا يصير. ⁵⁶يا منافقين! تعرفوا تميزوا وجه لرض و السماء, و هاذا الزمان ما تقدروش تميزوه؟⁵⁷علاه ما تحكموش بالحق على ارواحكم قبل؟ ⁵⁸كي تروح مع الخصم تاعك للحاكم, دير الشيء اللي تقدر عليه و افراها و انت معاه في الطريق باه تتفك منو, لا بوصل للقاضي, و القاضي يوصلك للحاكم, و الحاكم يرميك في الحبس. ⁵⁹نقول لك: ما تجي تخرج من ثمة حتى تصرف صواردك الكل على اخر دورو".

Chapter 13

¹و في هاذاك الوقت جاوه جماعة و قالولوا على هاذوك الناس تاع الجليل اللي قتلهم بيلاطس و تخلط الدم تاعهم مع دم الذبايح اللي قدموها. ²رد عليهم يسوع و قال لهم: "راكم حاسبين باللي هاذوك الناس اللي من الجليل كانوا مذنبين اكثر من غيرهم على خاطر صرالهم هاذا الشيء؟ ³لا! نقول لكم: لو كان ما توبوش انتم ثاني كلكم تموتوا.⁴و الا هاذوك في ثمنطاش اللي طاح عليهم السور في سلوام و قتلهم, تحسبوا باللي كانوا مذنبين اكثر من الناس اللي ساكنين في اورشليم الكل؟ ⁵لا! نقول لكم: لو كان ما توبوش انتم ثاني كلكم تموتوا. لمثل تاع شجرة الكرطوس اللي بلا غلة⁶و قال لهم هاذا لمثل: "كان واحد الراجل عندو شجرة مغروسة في و سط الجنان, جا و ما لقى فيها حتى غلة. ⁷قال للجنايني: هاذي ضرك ثلاثة سنين و انا نجي لهاذي الشجرة و ما نلقاش فيها غلة. قصها! علاش معطلة لرض باطل؟⁸رد عليه و قال: "يا سيدي, زيد خليها هاذا العام ثاني, ضرك نهَواها و نحطلها تربة مليحة. ⁹كان جابت غلة جابت والا ماكنش نقصها". مرى ظهرها اعوج ترتاح¹⁰و كان قاعد يعلم نهار سبت في واحد المجمع, ¹¹و كانت لثم واحدة لمرى كان عندها روح الفشلة ثمنطاش ن سنة, و كانت مكهبة و ما تقدرش توقف على طولها خلاص.¹²كي شافها يسوع عيط لها و قال لها: "يا مرى, راكي محلولة من الضعف تاعك!" ¹³و حط عليها يدو, و في هاذاك الوقت بالذات وقفت على طولها و حمدت الله. ¹⁴جا الرايس تاع المجمع, و هو متغشش على خاطر يسوع رتّح نهار السبت, و قال للناس اللي كانوا حاضرين: "عندكم ستة ايام الخدمة فيها حلال, في هاذي ليام ارواحوا و ابراو على ارواحكم, بالصح مش ف نهار السبت!".¹⁵رد عليه الرب و قال: "يا واحد المنافق! كيفاه ما كنش فيكم اللي في نهار السبت يحل الرباط تاع الثور و الا لحمار تاعو و يخرجو من لمراح و يديه يشّربو؟ ¹⁶و هاذي لمرى راهي بنت ابراهيم, ربطها الشيطان ثمنطاش ن سنة, ما كانش لازم تتحل من الرباط تاعها حتى لو كان نهار سبت؟".¹⁷و كي قال هاذا لكلام حشّم الناس اللي كانوا يعاندوا فيه, اما الناس الحاضرين فرحوا بالاعمال العظيمة الكل اللي كان يدير فيها. لمثل تاع حبة الخردل و لمثل تاع لخميرة¹⁸و قال: "لواه يشابه الملكوت تاع السماء؟ و باه نشّبهوا؟ ¹⁹يشابه زريعة تاع خردل هزها واحد الراجل و رماها في الجنان تاعو, و كي نبتت كبرت حتى ولات شجرة كبيرة, و كانت لفراخ تبات بين لعراف تاعها".²⁰و زاد قال لهم: "باه نشّبه الملكوت تاع السماء؟ ²¹يشابه لطرف خميرة هزتها مرى و حطتها في ثلاثة كيلات تاع عجينة حتى تخمرت لعجينة الكل". الباب الضيق²²و هو رايح لاورشليم كان يعدي على المدن و القرى و هو يعلم, ²³جاه واحد و قال لو: "يا معلم, راح يكونوا غير شوية من الناس اللي يمنعوا؟. قال لهم: ²⁴"ديروا مجهودكم باه تدخلوا من الباب الضيق, نقول لكم: كاين ياسر اللي يحبوا يدخلوا بالصح ما يقدروش²⁵بعد ما يكون مولى الدار قام و قفل الباب وراه, و بديتوا تتلموا لبرى قدام الباب و تطبطبوا و تقولوا: يا رب! حل علينا الباب ندخلوا, يرد و يقول: ما نعرفكمش شكون انتوما! ²⁶وقتها تبداو تقولوا: كلينا و شرينا معاك, و علّمت في الاحياء تاعنا! ²⁷يقول: نقولكم الصح: انا ما نعرفكمش شكون انتوما, بعدوا عليا يا جميع الظالمين!²⁸وين يكون غير لبكاء و رعيد السنين, وقت اللي تشوفوا ابراهيم و اسحاق و يعقوب و الانبياء الكل في الملكوت تاع الله, و انتم مطيشين لبرى. ²⁹و يجيو ناس من الشرق و من الغرب من الشمال و من الجنوب, و يدخلوا للملكوت تاع الله. ³⁰لخرين يولِيو همّا لوالى, و لوالى يولِيو همّا لخرين". يسوع يبكي على اورشليم³¹في هاذاك اليوم جاو عندو جماعة من الفريسيين و قالوا ليه:"روح اخرج من هنا, على خاطر هيرودس حاب يقتلك". ³²قال لهم: "روحوا و قولوا لهاذاك الثعلب: انا نخرّج الجنون, و نشفي نهار اليوم و نهار غدوة, و النهار الثالث نكمّل. ³³لازم نمشي نهار اليوم و نهار غدوة و النهار اللي وراه, على خاطر ما كانش منها نبي يموت لبرى خارج اورشليم!³⁴يا اورشليم! يا اورشليم! يا قتالة لنبياء يا راجمة المرسولين ليها, قداه من مرة حبيت نلّم ولادك كيما تلم الدجاجة ولادها تحت جنحاها, بالصح ما حبيتوش! ³⁵هاي داركم تقعد لكم خربة! و نقول لكم الحق: ما تزيدوش تشوفوني حتى يجي وقت تقولوا فيه: مبارك اللي جاي باسم الرب!".

Chapter 14

¹و عرضو واحد الفريسي لدارو نهار السبت باه يتغدى عندو, و كانوا يعسوا فيه واش يدير. ²و كان واحد قاعد قدامو مريض بالاستقساء. ³قال يسوع للفريسيين و لعلماء الشريعة: "يحل الشفاء نهار السبت؟".⁴سكتوا الكل واحد ما رد عليه. ولّى يسوع رتّح الراجل و بعثو روّح. ⁵و من بعد قال لهم: "شكون منكم اللي يطيحلو لحمار و الا الثور تاعو في بير و ما يجبدوش ليه ليه حتى لو كان نهار سبت؟. ⁶و ما قدروش يجاوبوه على هاذا لكلام.⁷و قال للناس المعروضين هاذا لمثل, و هو يشوف فيهم كيفاه خايروا الاماكن لولى و قال لهم: ⁸"كي يعرضك واحد للعرس ما تروحش تخاير لمكان لول, بلاك يكون واحد اعلى منك في الشان معروض. ⁹و من بعد يجيك السيد اللي عرضكم في زوز انت وياه و يقولك: نوض خلي هاذا الراجل يقعد. وقتها تولي حاشم و تروح تقعد في مكان اخر مع لَخّرين.¹⁰بالصح كي يعرضك واحد روح و اقعد ف المضرب لخّر, و كي يجي السيد اللي عرضك يقول لك: يا صحايبي روح اطلع لفوق. وقتها يكون شرف ليك قدام المعروضين معاك. ¹¹على خاطر كل من يعلي روحو يهبط و كل من يهَبط روحو يعلى".¹²و زاد قال للراجل اللي عرضو: "كي تدير غداء و الا عشاء ما تعرضش صحابك و خاوتك و عايلتك و جيرانك الاغنياء, باه ما يخلفوهاش ويعرضوك همّا ثاني, و يرجعولك لمزية.¹³بالصح كي تدير لمّة اعرض: الفقراء, المشوهين, العيّاب, العميان, ¹⁴هكّا يكون عندك اجر على خاطر هما ماهمش راح يرجعولك باه يكافوك, بالصح تنال الجزاء تاعك نهار القيامة تاع الناس الصالحين". لمثل تاع الزردة لكبيرة¹⁵كي سمع واحد من القاعدين هاذا لكلام قال: "يا سعد اللي ياكل خبز في الملكوت تاع الله". ¹⁶رد عليه يسوع و قال: "واحد الراجل دار زردة كبيرة و عرض الناس ياسر, ¹⁷و بعث لخديم تاعو وقت لعشاء باه يقول للمعروضين: ارواحوا تتعشاو راه كل شيء واجد.¹⁸و بداو الكل يعتذروا. لول قال: اني شريت جنان, و لازم عليا نروح نتفقدو, ماذابيك تعذرني. ¹⁹و لاخر قال: شريت عشرة بقرات, و انا رايح نشوفها. ماذابيك تعذرني. و واحد اخر قال: ²⁰انا تزوجت كي غير, ما نقدرش نجي.²¹رجع هاذاك لخديم و خبر سيدو بالشيء اللي صرى كامل. وقتها تغشش مولى الدار, و قال للخديم: اخرج فيساع للشوارع و الزنق تاع لمدينة, و لم كل الفقراء و المشوهين و العياب و العميان. ²²راح الخديم و رجع و قال: يا سيدي اللي قلت عليه الكل صار, هكذاك و مازال كاين مكان.²³قال السيد للخديم: زيد اخرج للطرق و للساحات وحتّم على الناس اللي تلقاهم يجيو حتى تتعمر داري, ²⁴على خاطر نقول لكم : واحد من هاذوك الرجال اللي عرضتهم واحد منهم ما يذوق عشايا". الثمن باه تتبع يسوع²⁵و كانوا ناس ياسر ماشيين معاه. تلفت لهم و قال: ²⁶"اذا كان واحد يجيني و ما يبغضش باباه و الا امو و الا مرتو و اولادو و خاوتو و خواتاتو, حتى ذاتو ثاني, ما يقدرش يكون التلميذ تاعي. ²⁷و اللي ما يهزش الصليب تاعو على كتافو و يمشي ورايا ما يقدرش يكون التلميذ تاعي.²⁸شكون فيكم اللي يكون حاب يبني دار ما يقعدش قبل و يحسب قداه لازمو. و يشوف اذا عندو ما يلزم باه يكمل و الا لا؟ ²⁹مش يصب الساس و من بعد ما يقدرش يكمل, حتى يوليو الناس يضحكوا عليه, ³⁰و يقولوا: هاذا الراجل بدى و ما قدرش يكمل.³¹و اي ملك كي يعود رايح يدير حرب مع ملك واحد اخر, مش يقعد قبل و يتشاور: و يشوف اذا كان يقدر يقابل بعشرة الاف هاذاك اللي جاي عليه بعشرين الف و الا لا؟ ³²و اذا كان هاذاك مُحال يولي يبعث مرسول و يطلب الصلح. ³³هكا ثاني كل واحد منكم اللي ما يقدرش يخلي كل ما يملك وراه, ما يقدرش يولي التلميذ تاعي. لمثل تاع الملح³⁴"الملح مليح. بالصح كي يفسد الملح, وش الحاجة اللي تعدلو؟ ³⁵يولي لا يصلح لا للرض و لا للمزبلة, غير يتلوح في الطريق. اللي يحب يسمع يسمع".

Chapter 15

¹و كانوا المذنبين الكل و العشارين يقربوا ليسوع باه يسمعوه. ²العلماء تاع الشريعة و الكتبة ما عجبهمش الحال و قالوا: "هاذا يقبل المذنبين و ياكل معاهم!".³ولى يسوع هدر معاهم بالمثل هاذا و قال لهم: ⁴"شكون منكم اذا كان يكسب مياة خروف, و راح توَدر واحد منهم, مش يخلي التسعة و التسعين خروف وحدهم في الخلى, و يروح يفركت على هاذاك اللي توَدر حتى يلقاه؟ ⁵و كي يلقاه يحطو على كتافو و يفرح بيه.⁶و يروح لدارو و يعرض صحابو و جيرانو و يقول لهم: "افرحوا معايا, لقيت لخروف تاعي اللي توَدر! ⁷نقول لكم: كيما هكا تكون الفرحة في السماء بمذنب واحد يتوب اكثر من تسعة و تسعين بار ما يحتاجوش للتوبة. لمثل تاع الدرهم اللي راح⁸"نقولوا مرى عندها عشرة دراهم, و ريّحت واحد منهم, مشها تشعل الشمعة م تكنس الدار كاملة و تفركت مليح حتى تلقاه؟ ⁹و كي تلقاه تعرض صحاباتها و جاراتها و تقول لهم: افرحو معايا لقيت الدرهم اللي ريّحتو. ¹⁰نقول لكم: هكا ثاني تكون الفرحة قدام ملايكة الله بمذنب واحد يتوب. لمثل تاع الابن الضال¹¹و قال: " كان واحد الراجل عندو زوز ولاد. ¹²قال الصغيرفيهم لباباه: يا بابا اعطيني قسمتي من الورث. ولى قسم لهم كل ما يكسب.¹³و بعد مدة قليلة لم ولدو الصغير حوايجو الكل و سافر لارض بعيدة, و لثم بذر مالو و فسدو. ¹⁴و بعدما صرف كل شيء, صرات مجاعة في هاذيك لبلاد, و بدا يحتاج.¹⁵ولى راح و لصق ف واحد من هاذيك لبلاد, و بعثو يسرح بالحلالف ف الجنانات تاعو. ¹⁶و كان يسَخف حتى على الخروب اللي تاكل منو لحلالف, و واحد ما يمدلو.¹⁷و كي فاق مع روحو قال: قداه من خديم عند بابا يفضال عليه الخبز و انا هنا ميت بالجوع! ¹⁸ايا نوقف و نرجع عند بابا و نقول لو: يا بابا, غلطت للسماء و غلطت في حقك, ¹⁹ما نستاهلش حتى نكون ولدك. احسبني كيما واحد من الخدّامة تاعك.²⁰وقف و راح رجع عند باباه, و هو مازال ما وصلش شافو باباه من بعيد, حن عليه و راح يجري و نقز عليه و عنقو و باسو. ²¹قالو ولدو: يا بابا, غلطت للسماء و غلطت في حقك, و ما نستاهلش خلاص نكون ولدك.²²قال باباه للخدّامة: اجبدوا الكسوة لمخيرة و لبسوه, و حطولو خاتم في يدو, و لبسوه سباط في رجليه, ²³و جيبوا لعجل المخزون و اذبحوه خلونا ناكلوا و نفرحوا, ²⁴على خاطر ولدي هاذا كان ميت و اليوم حيا, و كان موّدر و اليوم لقيناه. ولاو فرحوا الكل.²⁵و كان ولدو لكبير ف الجنان. و هو راجع كي قرّب من الدار, سمع صوت لغناء و الطرب و الشطيح. ²⁶عيط على واحد من الخدامة و سقساه: واش كاين؟ ²⁷قالو: خوك رجع و باباك ذبح لعجل السمين, على خاطر رجعلو سالم.²⁸غضب و ما حبش يدخل للدار. خرج باباه يحاول فيه. ²⁹اما هو رد على باباه و قال: انا نخدم فيك قداه و قداه هاذي سنين, و عمري ما خالفتك في حاجة, و حتى جدّي ماعطيتنيش باه نفرح انا و صحابي. ³⁰بالصح نهار اللي جاء ولدك هاذا اللي كلا رزقك الكل ف الزنى, ذبحتلو العجل المخزون!³¹قالو: يا ولدي انت معايا دايما, و مالي الكل او ليك. ³²بالصح كان لازم نفرحوا و نزهاو, على خاطر خوك هاذا كان ميت و اليوم حيى, و وكان موّدر و اليوم لقيناه".

Chapter 16

¹و قال للتلامذة تاعو: "كان واحد الراجل غني عندو واحد موكلو على مالو, راحت بيه بيعة باللي قاعد يبذر و يفسد لو في رزقو. ²عيطلو و قال: وش هاذا اللي سمعت عليك؟ حاسبني على كل شيء و نفضوها ما تزيدش تتوكل عليّا.³خمم لوكيل بينو وبين روحو و قال: وش ندير؟ سيدي راح ينحي لي لوكالة. و انا ما نقدرش نفلّح, و نحشم نمد يدي. ⁴بالصح على بالي وش ندير, حتى كان نحالي لوكالة يقبلوني الناس في ديارهم.⁵عيط على كل واحد من الناس اللي يسالهم سيدو, و قال للاول :قداه يسالك سيدي؟ ⁶قال: مياة كيلة تاع زيت. رد عليه: اجبد الفاتورة تاعك و اقعد في ساع و اكتب خمسين. ⁷و زاد قال للاخر: و انت قداه يسالك؟ قال: مياة كيلة تاع قمح. قالو: اجبد الفاتورة و اكتب ثمانين.⁸و شكر السيد لوكيل تاعو الخاين على الحكمة تاعو, على خاطر اولاد هاذا الزمان افيق من اولاد النور في جيلهم. ⁹و انا نقول لكم: اربحوا صحاب بالمال تاع الباطل, نهار اللي يفض المال يقبلوكم في ديار دايمة.¹⁰اللي امين ف لقليل امين ثاني ف لكثير, و الظالم ف لقليل ظالم ثاني ف لكثير. ¹¹اذا ما كنتوش امناء في مال الباطل, شكون يامنكم على الحق؟ ¹²و اذا ما كنتوش امناء في تاع الغير, شكون يعطيكم تاعكم؟¹³ما يقدرش الواحد يخدم زوز اسياد, على خاطر يا اما يكره واحد و يحب لاخر, و الا يقعد مع واحد و يحقر لاخر. ما تقدروش تخدموا الله و المال". الطلاق¹⁴و كانوا العلماء تاع الشريعة يسمعوا ف هاذا لكلام كامل, و همّا معروف عليهم يحبوا المال, استهزاو بيه. ¹⁵قال لهم: " انتوما اللي تبرروا في ارواحكم قدام الناس! بالصح الله يعرف قلوبكم. على خاطر المتكبر عند الناس مكروه عند الله.¹⁶"بقات الشريعة و التعاليم تاع الانبياء حتى جا يوحنا. و من بعد بدى التبشير بالملكوت تاع الله, و بدى كل واحد يجاهد باه يدخل ليه. ¹⁷بالصح حتى لو كان تفنى السماء و لرض ما يبطلش حرف واحد من الشريعة.¹⁸كل من يطلق مرتو و يزوج بواحدة اخرى يزني, و كل من تزوج بملطقة من عند راجل يزني. الغني و لعازر¹⁹"كان واحد الراجل غني يلبس غير لحرير و القش الغالي و كل يوم يتنعم و يدير في الزرد. ²⁰و كان واحد الراجل زوالي مسكين اسمو لعازر, مطيش قدام بابو لحمو كامل مغطي بالحب, ²¹و يتمنى حتى لوكان يشبع غير من الفتات اللي يطيح من المايدة تع الغني, و حتى لكلاب تجي و تلحس الجروح اللي فيه.²²و مات المسكين و هزوه الملايكة لحضن ابراهيم. و مات الغني ثاني و دفنوه, ²³و هز عينيه و هو ف الجحيم في لعذاب, و شاف ابراهيم من بعيد و لعازر في الحضن تاعو.²⁴نادي و قال: يا بابا ابراهيم, ارحمني, و ابعث لعازر يجي يبل صبعو بالماء و يبرد لساني, اني تعذبت ف هاذا اللهيب.²⁵قال ابراهيم يا ولدي, اتفكر راك نلت حقك من الخيرات في حياتك و لعازر نال حقو من المحاين. هو اليوم يتعزى هنا و انت تتعذب ثمة. ²⁶و زيد على هاذا الكل, بيننا و بينكم هوة كبيرة واحد ما يقدر يعدي من عندنا و يجيكم, و واحد ما يقدر يعدي من عندكم و يجينا.²⁷قال: مالا نطلب منك حاجة, يا بابا, تبعث لعازر لبيت بابا, ²⁸على خاطر عندي خمسة خاوة, يقول لهم على الشيء اللي شافو باه يمنعو و ما يجيوش للعذاب هاذا.²⁹قالو ابراهيم: عندهم موسى و الانبياء, يسمعوا منهم. ³⁰قال: لا, يا بابا ابراهيم, كون يروح لهم واحد من الموتى يتوبوا. ³¹قالو: اذا كان ما سمعوش من موسى و الانبياء, حتى لو كان يقوم واحد من الموتى ما يقبلوش".

Chapter 17

¹و قال للتلامذة تاعو: "لا بد تجي المسببات اللي تخلي الناس يطيحوا ف المعصية, بالصح يا ويل اللي يكون سبب فيها! ²لو كان يحط حجرة تاع رحى في رقبتو و يرمي روحو ف لبحر, خير لو من اللي يكون سبة في طيحة هاذوك الصغار.³استحفظوا على ارواحكم. اذا كان خوك غلط في حقك لوم عليه, و اذا تاب سامحوا. ⁴و اذا غلط في حقك سبعة مرات ف النهار, و رجع ليك سبع مرات ف النهار و قالك: سامحني غلطت, سامحوا".⁵قالوا الرسل للرب: "زيد الايمان تاعنا!". ⁶قال لهم الرب: "لو كان يكون عندكم ايمان كيما حبة تاع خردل, كنتوا تقولوا لهاذي الشجرة اتقلعي من هنا و تغرسي ف لبحر تطيعكم. العبد و الواجب⁷"شكون منكم يكون عندو خديم يحرث و الا يسرح, كي يروّح من الجنان يقول لو: ايا ادخل في ساع و ارتاح اقعد. ⁸و الا يقول: وجدلي لعشاء, و تحزم اخدمني حتى ناكل و نشرب, و من بعد تاكل انت و تشرب؟⁹و هاذاك الخديم مزية من عندو اذا دار الشيء اللي طلبوه منو؟ ما نظنش. ¹⁰حتى انتوما ثاني, كي تديروا الشيء المطلوب منكم قولوا: احنا خداما عاطلين, على خاطر درنا برك الواجب تاعنا". العشرة رجال اللي مرضى بالبرص¹¹و كي كان رايح لاورشليم عدى على السامرة و الجليل. ¹²و قبل ما يدخل لواحد القرية عرضولو عشرة رجال مرضى بالبرص وقفوا من بعيد ¹³و يداو يعَيطوا و يقولوا: "يا يسوع, يا معلم, ارحمنا!".¹⁴دار وقال لهم: "روحوا ورِيوْ ارواحكم للكهنة". و همّا رايحين براو و تنحى منهم لبرص. ¹⁵و واحد منهم كي شاف روحو ارتاح, رجع و هو يحمد في الله على طول صوتو, ¹⁶و سجد عند رجليه و شكرو, و كان الراجل سامري.¹⁷رد عليه بسوع و قال: "مش الكل ف عشرة ارتاحوا؟ وينهم التسعة لخرين؟ ¹⁸ما كان حتى واحد يرجع و يحمد الله من غير هاذا لغريب على ليهود؟" ¹⁹و من بعد قالو: "اوقف و روح, ايمانك سلكك". وقتاه يجي الملكوت تاع الله؟²⁰و كي سقساوه العلماء تاع الشريعة: "وقتاه يجي الملكوت تاع الله؟". رد عليهم و قال: "الملكوت تاع الله ما يجيش بالمراقبة, ²¹و الا يقولوا: ها هو هنا, و الا هاو ليك لهيه! على خاطر الملكوت تاع الله او الداخل فيكم".²²و قال للتلامذة: "تجيكم ايام تتمناو تشوفوا نهار واحد برك من ايامات ابن الانسان و ما تشوفوهش. ²³و يقولوا لكم: ها هو هنا! و الا: هاو ليك لهيه! ما تروحوش و ما تبعوش, ²⁴على خاطر كيما لبرق ف السماء يشالي من جيهة و يضوي في جيهة اخرى, هكذاك ثاني النهار اللي يرجع فيه ابن الانسان.²⁵بالصح لازم قبل على ابن الانسان يتوجع و يترفض من هاذا الجيل. ²⁶و كيما كان ف ايام نوح يكون ثاني ف ايام ابن الانسان: ²⁷كانوا الناس ياكلوا و يشربوا, و يتزوجوا و يديروا لعراس, حتى للنهار اللي دخل فيه نوح للفلوكة, و جا الطوفان و فناهم الكل.²⁸و ثاني كيما صرى ف ايام لوط: كانوا يوكلوا و يشربوا, و يبيعوا و يشريو, و يغرسوا و يبنيو. ²⁹بالصح نهار اللي خرج لوط من سدوم, صب عليهم الكبريت و النار من السماء و افناهم الكل.³⁰حتى هكا يكون في النهار اللي يظهر فيه ابن الانسان. ³¹في هاذاك اليوم اللي يكون ف السطح و حوايجو ف البيت ما يهبطش باه يهزهم, و اللي يكون ف الجنان ما يرجعش للبيت.³²اتفكروا مرة لوط! ³³اللي طالب يمنّع روحو يفناها, و اللي يفناها يمنّعها.³⁴نقول لكم: ف هاذيك الليلة يكونوا زوز ف فراش واحد, يترفَع واحد و يبقى لخر. ³⁵يكونوا زوز نساء يرحيو مع بعضاهم, تترفع واحدة و تبقى لخرى, ³⁶يكونوا زوز ف الجنان, يترفَع واحد ويبقى لاخر".³⁷ردوا عليه و قالوا: "وين يا رب؟". قال لهم: "وين تكون الجيفة يتلموا النسورة".

Chapter 18

¹و زاد قال لهم مثل يوضح لهم فيه باللي لازم يصليو ف كل وقت و ما يملوش, ²قال: "كان ف واحد لمدينة قاضي ما يخافش الله و ما يهاب حتى من واحد.³و كان ف هاذيك لمدينة واحد لمرى راجلها ميت. و كانت تجي ليه و تقول: جيبلي حقي من الخصم تاعي! ⁴و كان ديما ما يحبش ينصفها. بالصح من بعد قال بينو و بين روحو: حتى لو كان ما نخافش ربي و ما نهاب حتى من واحد, ⁵برك على خاطر هاذي لمرى بقات تقلق فيّا, ضرك نجيبلها حقها, باه ما تزيدش تقهرني!".⁶و قال الرب: "اسمعوا واش يقول القاضي الظالم. ⁷كيفاه ما ينصفش الله المختارين تاعو, اللي يعيطوا لو نهار و ليل, و هو مطوَل عليهم؟ ⁸نقول لكم: راح ينصفهم ف ساع! بالصح زعما راح يلقى ابن الانسان الايمان ف لرض نهار اللي يرجع؟". لمثل تاع عالم الشريعة و السمسار⁹و قال هاذا لمثل للجماعة اللي يشوفوا ف رواحهم باللي همّا ابرار, و يحقروا في الناس لخرين: ¹⁰"زوز رجال طلعوا للهيكل باه يصليو, واحد كان من علماء الشريعة و لاخر كان سمسار.¹¹و هاذاك العالم تاع الشريعة وقف يصلي ف قلبو و قال: يا الله انا نشكرك على خاطر مانيش كيما الناس لخرين اللي يسرقوا و يزنيو, و مانيش كيما هاذا السمسار. ¹²نصوم زوز مرات ف السمانة, و نمد لعشور تاعي كاملة.¹³اما العشار و قف من بعيد, و ما حبش حتى يهز عينيه للسماء, وكان يضرب ف صدرو و يقول: يا ربي ارحمني, انا المذنب. ¹⁴نقول لكم: هاذا السمسار هو اللي روّح لدارو راضي عليه الله مش هاذاك العالم تاع الشريعة, على خاطر كل من يعلي روحو يهبط ف لرض و كل من يهبط روحو يعلى". يسوع يبارك لولاد الصغار¹⁵و زادوا جابولو اولاد صغار باه يحط يدو عليهم, و كي شافوهم التلامذة ماحبوش و بخصوهم. ¹⁶اما يسوع عيط لهم و قال: "خليو لولاد الصغار يجيو ليّا و ما تحَرموش عليهم, على خاطر الناس اللي كيما همّا يملكوا الملكوت تاع الله. ¹⁷نقول لكم الحق: اللي ما يقبلش الملكوت تاع الله كيما طفل صغير ما يدخلوش". الشاب لغني¹⁸و سقساه واحد من الناس المرفهين و قال: "يا المعلم الصالح, واش ندير باه نورث لحياة الدايمة؟" ¹⁹رد عليه يسوع و قال: "علاه تعيطلي صالح؟ ما كان حتى واحد صالح من غير الله برك. ²⁰انت تعرف الفرايض: ما تزنيش. ما تقتلش. ما تسرقش. ما تشهدش بالباطل. اكرم باباك و امك". ²¹قال: "هاذي كلها من صغري و انا نمشي بيها".²²و كي سمع يسوع كلامو قالو: "تنقصك حاجة برك: بيع كل ما تملك و فرقو على الفقراء, يولي عندك كنز ف السماء, و ارواح تبعني". ²³كي سمع الراجل هاذا لكلام حزن, على خاطر كان غني ياسر.²⁴و كي شافو يسوع حزين, قال: "ما اصعبها على الاغنياء الدخلة للملكوت تاع الله! ²⁵اسهل للجمل يعدي من ثقبة ابرة على الغني انو يدخل للملكوت تاع الله!²⁶و الناس اللي سمعوا هاذا لكلام قالوا: "شكون مالا يقدر يمنع؟" ²⁷قال لهم: "اللي مش مقدور عليه عند الناس مقدور عليه عند الله".²⁸نطق بطرس و قال: "احنا خلينا كل شيء و تبعناك". ²⁹قال لهم: "نقول لكم الحق: ما كانش واحد اذا خلى دار و الا والدين و الا خاوة و الا زوجة و اولاد على جال الملكوت تاع الله, ³⁰غير و ينال ف هاذي الدنيا اضعاف و اضعاف, و ينال ف لاخرة لحياة الدايمة". يسوع يخبر بموتو و قيامتو³¹و دا التلامذة ف ثناش على جيهة و قال لهم: "احنا طالعين لاورشليم, و راح يتم كل اللي مكتوب في كتب الانبياء على ابن الانسان, ³²راح يطيح ف يد الامم, و يستهزاو بيه, و يسبوه و يبصقوا عليه, ³³و يسوطوه بالشطرب, و يقتلوه, و ف ثالث يوم يقوم من بين الموتى".³⁴اما همّا ما فهموا حتى حاجة من الشيء اللي قالو, و كان هاذا الامر مستور عليهم, و ما قدروش يفسروا واش قال. اعمى من اريحا يرجعلو النظر³⁵و كي قربوا يوصلوا لاريحا كان واحد الراجل اعمى في الطريق يطلب. ³⁶و كي سمع الحس تاع الناس كي كانوا معديين سقساهم: "واش هاذا الحس وش كاين؟". ³⁷قالوا او يسوع الناصري معدي من هنا.³⁸بدى يعيط و يقول: "يا يسوع بن داود, ارحمني!". ³⁹و الناس اللي كانوا ماشيين من القدام بخصوه و حبوا يسكتوه, اما هو بقى يعيط اكثر و اكثر و يقول: "يا بن داود ارحمني!".⁴⁰وقف يسوع و قال لهم يجيبوه. و كي قرّب سقساه ⁴¹و قالو: "واش تحب نديرلك؟. قال: "يا سيدي, نولي نشوف!".⁴²قالو يسوع: "شوف. ايمانك شفاك". ⁴³و في ساع تحلوا عينيه ولى يشوف, و تبعو و هو يحمد ف الله. و الشعب اللي كانوا معاه و شافوا واش صرى ولاو الكل يحمدوا ف الله.

Chapter 19

¹و من بعد دخل و عدى ف وسط اريحا. ²و كان واحد الراجل اسمو زكا, و هو مسؤول على العشارين اللي يلموا المكس و كان راجل غني,³و كان حاب يشوف شكون هو يسوع, بالصح ما قدرش على خاطر كانوا الناس ياسر, و هو كان قصير. ⁴راح يجري و طلع في واحدة الشجرة باه يقدر يشوفو, كي يعدي من ثمة.⁵و كي وصل يسوع قدامو, خزر لفوق وشافو, و قالو: "يا زكّا, اهبط ف ساع, على خاطر لازم نبات ف دارك اليوم". ⁶هبط يجري و استقبلو و فرح بيه. ⁷و الناس الكل كي شافوا الشيء اللي صرى ما عجبهمش الحال و قالوا: "او دخل لدار واحد مذنب راح يبات عندو".⁸وقف زكّا و قال للرب: "انا يا ربي نمد نص ما نملك للفقراء, و اذا كان ظلمت كاش واحد نرجعلو قد ما ديت ربعة مرات". ⁹قالو يسوع: "اليوم صرى الخلاص لهاذي الدار, انت ثاني ولد ابراهيم, ¹⁰على خاطر ابن الانسان جا يفركت على الهالكين باه يخلصهم".¹¹و كي كانوا يسمعوا فيه زاد قال لهم هاذا لمثل, على خاطر كان قريب من اورشليم, و همّا كانوا حاسبين باللي الملكوت تاع الله راح يظهر ثم ثم. لمثل تاع الخدامين الامناء ¹²قال: "كان واحد الراجل من الامراء سافر لبلاد بعيدة باه يتولى امور الملك و من بعد يرجع.¹³عيط على عشرة من الخدام تاعو و مد لكل واحد منهم صوارد دينار تاع ذهب, و قال لهم: تاجروا حتى نرجع. ¹⁴اما اهل لمدينة تاعو كانوا يكرهوه, بعثوا وراه جماعة يقولوا: ما نحبوش هاذا يكون ملك علينا. ¹⁵و بعدما قضى امورو وادى الملك رجع, و عيط على هاذوك الخدّام اللي اعطاهم الصوارد, باه يشوف كل واحد فيهم كيفاه تاجر.¹⁶جا لول فيهم و قال: يا سيدي الدينار تاعك جاب عشرة. ¹⁷رد عليه و قال: يعطيك الصحة انت عبد صالح! على خاطر كنت امين ف لقليل, نحطك سلطان على عشرة مدن.¹⁸و زاد جا الثاني و قال: يا سيدي الدينار تاعك جاب خمسة اخرين. ¹⁹رد عليه هو ثاني و قال: انت تكون سلطان على خمسة مدن.²⁰و من بعد زاد جا واحد اخر و قال: يا سيد, هاو الدينار تاعك اللي عندي خبيتو ف المحرمة, ²¹ انا خفت منك, على خاطر انت راجل واعر, تحب تدي بلا ما تمد, و تحب تحصد بلا ما تزرع.²²قالو: كيما قلت بفمك كيما تتحاسب يا واحد العبد الشرير. كي على بالك باللي انا واعر, و نحب ندي بلا ما نمد, و نحصد بلا ما نزرع, ²³علاه مالا ما حطيتش صواردي ف البانكة, كي نجي نرجعهم بالفايدة؟²⁴و من بعد قال للحاضرين: نحيولو الدينار واعطوه لمولى العشرة. ²⁵قالوا: يا سيدي بالصح هوعندو عشرة دنانير!²⁶على هاذيك نقول لكم: كل من عندو يزيد يدي, و اللي ما عندوش يزيد يتنحالو. ²⁷اما عدياني اللي ما يحبوش نولي ملك عليهم, جيبوهم هنا و اذبحوهم قدامي". يسوع يدخل لاورشليم²⁸و كي قال هاذا كمّل طريقو طالع لاورشليم.²⁹و كي قرّب من بيت فاجي و بيت عنيا, بحذى الجبل اللي يقولولوا جبل الزيتون, بعث زوز من التلامذة تاعو ³⁰و وصاهم: "روحوا للقرية اللي قدامكم, و كي تدخلولها تلقاو جحش مربوط ما ركب عليه حتى انسان من قبل حلوه و جيبوه هنا. ³¹و اذا كان سقساكم كاش واحد : علاه تحلوا فيه؟ قولوا: الرب محتاج ليه".³²كي راحوا لقاو كيما قال لهم, ³³و كي كانوا يحلوا في الرباط تاع الجحش جاو ماليه وقالوا: "علاه تحلوا ف الجحش؟". ³⁴جاوبوهم: "الرب محتاج ليه". ³⁵و جابوه ليسوع, و حطوا قشهم فوق الجحش, و ركبوا عليه يسوع. ³⁶و زادوا فرشوا قشهم ف الطريق اللي يمشي عليها.³⁷و كي وصل للهبطة تاع جبل الزيتون, بداو التلامذة الكل يسبحوا ف الله و يحمدوه بصوت عالي, على جال المعجزات الكل اللي شافوها, ³⁸و كانوا يقولوا: "تبارك الله على الملك اللي جا باسم ربي! سلام الله في السماوات و مجد الله ف لعلالي!".³⁹و كانوا ثمة جماعة من العلماء تاع الشريعة ف وسط الغاشي قالوا ليسوع: "يا معلم, سكّت التلامذة تاعك!". ⁴⁰رد عليهم و قال: "نقول لكم: حتى لو كان سكتوا همّا لحجار تنطق!". يسوع يبكي على اورشليم⁴¹و كي قرّب قابلاتو لمدينة شافها و بكى عليها ⁴²و قال: "يا ريت تعلمي انت ثاني اليوم طريق سلامك! بالصح ضرك محجوب على عينيك.⁴³تجيك ايام يدوروا بيك عديانك بالمركبات تاع لحديد, و يحصروك و يهجموا عليك من كل جيهة, ⁴⁴و يرّيبوا الديار على راس اولادك, و ما يخليو حجر راكب على حجر, على خاطر ما عرفتيش الزمان اللي تفقدك فيه الله". تطهير الهيكل⁴⁵و كي دخل للهيكل راح و بدى يخرج ف الناس اللي يبيعوا و يشريو لثمة ⁴⁶و قال لهم: "مكتوب: بيتي بيت صلاة. و انتوما قلبتوه غار تاع سرارقة!".⁴⁷و كان كل يوم يعَلم ف الهيكل, و كانوا رياس الكهنة و الكتبة و الزعماء تاع الشعب يحبوا يقتلوه, ⁴⁸بالصح ما قدروا يديروا والو, على خاطر الناس الكل كانوا متعلقين بيه و يحبوا يسمعوه.

Chapter 20

¹واحد النهار و هو قاعد يعلم الناس ف الهيكل و يبشر فيهم, وقفوا الرياس تاع الكهنة و الكتبة و الشيوخة, ²و سقساوه و قالوا: "قلنا: ب واش من سلطان راك تدير ف الشيء هاذا؟ شكون اعطاك هاذا السلطان؟".³رد عليهم و قال: "حتى انا نسقسيكم حاجة برك, قولوا لي: ⁴المعمودية تاع يوحنا: كانت من عند الله و الا من عند الناس".⁵تفاهموا بيناتهم و قالوا: "اذا قلنا من عند الله, يقول لنا:علاه مالا ما امنتوش بيه؟ ⁶و اذا قلنا: من عند الناس, يرجمنا الشعب, على خاطر هما مامنين باللي يوحنا نبي".⁷جاوبوه وقالوا باللي هما ما يعرفوش. ⁸قال لهم يسوع: "مالا حتى انا ما نقولش ب واش من سلطان ندير الشيء هاذا". لمثل تاع الخدّامين في الكرم⁹و بدى يهدر مع الناس و قال لهم هاذا لمثل: "واحد الراجل غرس جنان تاع دوالي و كلف عليه خدّامة و راح سافر مدة طويلة. ¹⁰و ف الوقت تاع لحصاد بعث واحد للخدامين تاع الجنان باه يعطوه الغلة. حكموه سوطوه و رجعوه فارغ.¹¹زاد عاود بعث واحد اخر, ضربوه هو ثاني و رجعوه فارغ. ¹²و زاد عاود بعث واحد ثالث, و هو ثاني ضربوه و سحتوه.¹³ولى قال مولى الجنان: واش ندير؟ نبعث ولدي لعزيز, بالاك كي يشوفوه يهابوا منو! ¹⁴اما همّا كي شافوه تفاهموا عليه وقالوا: هاذا هو لوريث! هيا نقتلوه و نديو احنا الورث!¹⁵و خرجوه من الجنان و قتلوه. و ضرك واش يدير مولى الجنان بهاذو الخدامين؟ ¹⁶يجي و يقتلهم و يمد الجنان لخدامين اخرين غيرهم". و كي سمعوا هاذا قالوا: "حاشا كان هاذا يصير!"¹⁷شاف معاهم وقال: "مالا واش معناها الاية اللي تقول: الحجر اللي رفضوه البناية يولي هو راس الزاوية؟ ¹⁸و كل من يطيح على هاذاك لحجر يترضرض و كل من يطيح عليه هاذاك لحجر يقتلو!".¹⁹و في هاذيك الساعة حبوا رياس الكهنة و الكتبة يقبضوا عليه, بالصح خافوا من الشعب, على خاطر علابالهم باللي كان يقصدهم بهاذا لمثل. الضريبة تاع قيصر ²⁰و بقاو يعسوا عليه و بعثوا ناس يراقبوا فيه يبينوا ارواحهم ناس ملاح غير باه يطيحوه بكاش كلمة, و من بعد يشكيو بيه و يسلموه ليد الوالي و هو يحكم عليه.²¹سقساوه و قالوا: "يا معلم, على بالنا باللي تهدر و تعلم قدقد, و ما تشوفش بالوجوه, بالصح تعلم الحق وطريق الله, ²²يجوز لنا نمدو الضريبة لقيصر والا لا؟".²³عرف يسوع الحيلة تاعهم و قال لهم: "علاه تجربوا فيّا؟ ²⁴اعطوني دينار. تاع شكون هاذي التصويرة وهاذي لكتيبة؟". ردوا عليه وقالوا: "تاع قيصر".²⁵قال لهم: "مالا اعطوا تاع قيصر لقيصر و اعطو تاع الله لله". ²⁶و ما قدروش يحكموه حتى بكلمة قدام الشعب, و تعجبوا من الجواب تاعو و سكتوا. القيامة تاع الموتى²⁷و جاو جماعة من الصدوقيين, هاذوك اللي ما يقولوش بالقيامة تاع الموتى, و سقساوه ²⁸و قالوا: "يا معلم, كتب لنا موسى: اذا واحد مات لو خوه و خلى مرى, بالصح ما خلاش لولاد, يتزوج خوه بالمرى و يجيب اولاد على اسم خوه.²⁹كانوا سبعة خاوة. لول تزوج بمرى و مات بلا ما يجيب اولاد, ³⁰تزوج بيها الثاني و مات بلا ما يجيب اولاد, ³¹و زاد تزوج بيها الثالث, و هكّا حتى تزوجوا بيها الخاوة الكل ف سبعة, و واحد منهم ما جاب اولاد وماتوا. ³²و من بعد ف لخر زادت ماتت لمرى. ³³نهار القيامة, لشكون منهم راح تكون زوجة؟ على خاطر كانت متزوجة بيهم ف سبعة!".³⁴رد عليهم يسوع و قال لهم: "اهل هاذي الدنيا يتزوجوا و يزوجوا, ³⁵بالصح الناس اللي راح يكونوا من اهل لاخرة و القيامة من بين الموتى, لا يتزوجوا و لا يزوجوا, ³⁶على خاطر راح يكونوا كيما لملايكة تاع الله ما يموتوش, و همّا اولاد الله, على خاطر همّا اولاد لقيامة.³⁷اما الموتى يقوموا, هاذا برهن عليه موسى ف كلامو على العليقة كيما يقول: الرب اله ابراهيم و اله اسحاق و اله يعقوب. ³⁸و هو اله تاع حيين مش اله تاع موتى, على خاطر كلهم حيين عند الله".³⁹جاوبوه جماعة من الكتبة و قالوا: "يا معلم, جاوبت مليح!". ⁴⁰و من هاذاك النهار ماقدروش يزيدوا يسقسيوه على حتى شيء. المسيح و داود⁴¹و قال لهم: "كيفاه يقولوا باللي المسيح ولد داود؟" ⁴²و داود ف ذاتو يقول ف كتاب المزامير: قال الرب لربي: اقعد على يميني ⁴³حتى نحط عديانك تحت رجليك. ⁴⁴اذا كان داود يسميه رب. كيفاه يكون ولدو؟". التحذير من العلماء تاع الشريعة⁴⁵و كي كان الشعب كامل يسمع قال للتلامذة تاعو: ⁴⁶"ردوا بالكم من الكتبة اللي يحبوا يمشيو بقنادر طويلة, و يحبوا التسلام ف لسواق, و المجالس لولى في المجامع, و يحبوا يقعدوا ف مكان الشرف ف العرضات. ⁴⁷اللي ياكلوا مال ليتامى, و يطولوا ف الصلاة باه يشوفوهم الناس. هاذوك راح يتحاسبوا اكثر من غيرهم!

Chapter 21

¹و خزر يسوع و شاف الاغنياء يحطوا التبرعات تاعهم في الخزنة تاع الهيكل, ²و شاف ثاني واحد الارملة فقيرة حطت زوز دورو. ³قال لهم: "نقول لكم الحق: هاذي الارملة الفقيرة تبرعت اكثر منهم الكل, ⁴على خاطر هاذوك مدوا من الفضلة تاعهم, اما هي مدت من الاحتياج تاعها و هي حطت اللي تكسبوا الكل". تدمير الهيكل و اخر الزمان⁵و كانوا جماعة ثمة يقولوا على الهيكل باللي مزين بالحجار و التحف المليحة, قال لهم: ⁶"هاذي اللي قاعدين تشوفوا فيها ضرك, تجي ايامات ما يبقى فيها حتى حجر فوق حجر غير و يطيح".⁷سقساوه و قالوا: "يا معلم, وقتاه يكون هاذا الشيء؟ و اعطينا لمارة تاعو؟". ⁸قال لهم: "شوفوا! واحد ما يغلطكم. على خاطرياسر اللي راح يجيو باسمي و يقولوا: اني انا هو! و باللي الزمان قرّب! ما تبعوهمش. ⁹اذا سمعتوا باخبار الحروب و الثورات ما تخافوش, لابد تكون هاذي الكل قبل, بالصح النهاية ما تكونش وراه ثم ثم".¹⁰و زاد قال لهم: "تقوم امة على امة و مملكة على مملكة, ¹¹و تكون زلازل كبيرة, و مجاعات و اوبئة في بلدان ياسر, و تصرى حوايج تخوف و تبان علامات ف السماء.¹²و قبل هاذا الكل يقبضوا عليكم الناس و يضطهدوكم, و يسلموكم للمجامع و يدخلوكم للحباس, و توقفوا قدام ملوك و حكام على جال اسمي. ¹³و تكون هاذي فرصة ليكم باه تشهدوا فيها.¹⁴بالصح ما تتقلقوش كيفاه تدافعوا على ارواحكم, ¹⁵على خاطر انا نعطيكم كلام و حكمة ما يقدروش عديانكم لا يقاوموها و لا يردوا عليها.¹⁶و راح يسلموكم والديكم و خاوتكم و اهلكم و صحابكمو و كاين منكم حتى االي يقتلوهم. ¹⁷و تكونوا مكروهين عند الناس الكل على جال اسمي. ¹⁸بالصح شعرة من روسكم ما تتمس. ¹⁹بالصبر و الثبات تمًنعوا ارواحكم.²⁰وقت اللي تشوفوا فيه اورشليم محاصرة بالعسكر اعرفوا باللي تدميرها قرًب. ²¹وقتها اللي في بلاد اليهودية يهربوا للجبال و اللي في وسطها يخرجوا منها, و اللي ف لخلى ما يدخلوهاش, ²²على خاطر راح تكون هاذي ايام نقمة من عند الله, باه يتم الشيء اللي تكتب ف الكتب المقدسة.²³يا ويلها اللي بالكرش واللي ترضع ف هاذيك ليام. راح تكون نكبة كبيرة على لرش الكل و سخط الله على هاذا الشعب. ²⁴يقتلوهم بحد السيف, و يدَيوهم اسرى لجميع الامم, و تتعفس اورشليم من الاجناس الكل, حتى يتم زمانهم.²⁵و تظهر امارات ف الشمس و القمرة و النجوم, و الامم تاع الدنيا الكل تحير واش تدير. لبحر يهيج و لمواج تعلى, ²⁶و يموتوا الناس من الخوف و همًا يستناوْ واش راح يصرى للدنيا. على خاطر قوات السماء تتزعزع.²⁷في هاذاك الوقت راح يشوفوا ابن الانسان جاي ف السحاب بقوة و جاه كبير. ²⁸كي يبدى هاذا الشيء يصير اوقفوا و هزوا روسكم على خاطر النجاة تاعكم قربت".²⁹و قال هاذا لمثل: "شوفوا الشجرة تاع الكرطوس و الشجر لخرين الكل. ³⁰كي تشوفوها فًرْختتعرفوا باللي الصيف قريب. ³¹انتم ثاني كي تشوفوا هاذي الامور صايرة اعرفوا باللي الملكوت تاع الله قريب يجي.³²نقول لكم الحق: ما يروحش هاذا الجيل حتى يكون هاذا الشيء كامل. ³³السما و لرض يفناو, اما كلامي ما يفناش. اسهروا و صلوا³⁴استحفظوا على ارواحكم باه ما تثقلش قلوبكم بالخمر و السكرة و هموم الدنيا, و يجيكم هاذاك النهار على غرادة. ³⁵على خاطر يكون كيما الفخة اللي تغدر سكان لرض الكل.³⁶اسهروا مالاو صلِيوْ في كل وقت, باه تكتب لكم النجاة من جميع هاذا الشيء كامل اللي راح يصرى, و باه توقفوا قدام ابن الانسان.³⁷و كان ف النهار يعلم ف الهيكل, و ف الليل يخرج يبات ف الجبل اللي يسموه جبل الزيتون. ³⁸و كانوا الناس الكل يبكروا ليه للهيكل باه يسمعوا لكلام تاعو.

Chapter 22

¹و قرّب عيد الفطير اللي يسموه عيد الفصح. ²و كانوا الرياس تاع الكهنة و العلماء تاع الشريعة يخموا كيفاه يلقاو فرصة و يقتلوه, على خاطر كانوا خايفين من الشعب.³و تلَبس الشيطان يهوذا اللي يسموه الاسخريوطي, و كان واحد من التلامذة الثناش. ⁴و راح هدر مع رياس الكهنة و القياد تاع العسكر كيفاه يوريلهم يسوع باه يحكموه.⁵فرحوا و حلفولوا باللي يخلصوه. ⁶ايا تفاهم معاهم, و كان يسنى ف الفرصة باه يسلمو بالدرقة على الشعب. التلامذة يوَجدوا للعيد⁷و جا نهار لفطير اللي كان لازم يذبحوا فيه الفصح. ⁸بعث يسوع بطرس و يوحنا و وقال لهم: "روحوا وجدوا لنا الفصح باه ناكلوا". ⁹قالوا: "وين تحب نوّجدوه؟".¹⁰قال لهم: "روحوا ادخلوا للمدينة ضرك تلقاو راجل هاز جرة تاع ماء. تبعوه للدار وين يدخل, ¹¹و قولوا لمولى الدار: المعلم يقول لك: ويني البيت اللي راح ناكل فيها الفصح انا والتلامذة تاعي؟¹²ضرك يوريلكم بيت كبيرة و مفرشة ف السطح. وجدولنا ثمة". ¹³و راحوا و لقاو كيما قال لهم, و وجّدوا الفصح. لعشاء تاع الرب¹⁴و كي وصل وقت لعشاء قعد يسوع و التلامذة ف ثناش, ¹⁵و قال لهم: "شهيت شهوة باه ناكل هاذا الفصح معاكم قبل ما نتألم, ¹⁶على خاطر نقول لكم: ما نزيدش ناكل منو حتى يكمل ف الملكوت تاع الله".¹⁷و من بعد هز كاس و شكر وقال: "هاكم هاذا اقسموه بيناتكم, ¹⁸على خاطر: ما نزيدش نشرب من ثمار الكرمة حتى ن يجي الملكوت تاع الله".¹⁹و هز الخبز و شكر و قسم و مدلهم وقال: "هاذا هو لبدن تاعي اللي نضحي بيه على جالكم. اعملوا هاذا الشيء باه تتفكروني". ²⁰و زاد هز الكاس بعد لعشاء و قال: "هاذا الكاس هو العاهد الجديد بالدم تاعي اللي سال على جالكم.²¹بالصح ها هي يد اللي راح يبيعني معايا فوق المايدة. ²²و ابن الانسان رايح يموت كيما مكتوب عليه, بالصح يا ويلو هاذاك الراجل اللي باعو!". ²³و بداو يسقسيو في بعضاهم: "زعمة شكون منهم اللي راح يدير هاذي العملة؟". شكون هو لكبير²⁴و تجادلوا بيناتهم على شكون منهم راح يكون اكثر واحد عندو الشان كبير. ²⁵اما يسوع قال لهم: "الملوك تاع الدنيا يسودوا على الامم, و اصحاب السلطة يحبوا الناس يشكروهم.²⁶اما انتم مايكونش هاذا الشيء بيناتكم, لكبير فيكم يحسب روحو هو الصغير فيكم, و الرايس فيكم يكون هو لخديم ليكم. ²⁷على خاطر شكون هو لكبير: اللي يقعد و الا اللي يخدم؟ ياخي اللي يخدم؟ على خاطر انا بيناتكم كيما اللي يخدم.²⁸انتم اللي وقفتوا معايا وقت المحاين, ²⁹انا راح نجعل لكم كيما جعلي بابا ملكوت, ³⁰تاكلوا و تشربوا على المايدة معايا ف الملكوت تاعي, و تقعدوا على كراسي و تحكموا على عروش بني اسرائيل ف ثناش". يسوع يخبرهم باللي بطرس راح ينكرو³¹و قال الرب : "سمعان, سمعان, هاو الشيطان طلبكم باه يغربلكم كيما يتصفى القمح! ³²بالصح انا نطلب على جالك باه ما يروحش الايمان تاعك. و انت وقت اللي ترجع ثبت خاوتك".³³قال بطرس: "يا ربي, انا واجد نروح معاك حتى للحبس و حتى للموت!". ³⁴قال: "نقولك ا بطرس: قبل ما يعوعش السردوك تكون انت نكرت باللي تعرفني ثلاثة مرات".³⁵و من بعد قال لهم: "وقت اللي بعثتكم بلا زاد و بلا سباط, كاش ما خصكم؟". قالوا: "لا". ³⁶قال لهم: "بالصح اليوم, نقول لكم اللي عندو زاد و زواد يهزوا معاه. و اللي ماعندوش يبيع واش يكسب و يشري سيف.³⁷على خاطر نقول لكم: لازم ثاني يتم الشيء المكتوب عليا: نتحسب مع المذنبين. و المكتوب عليّا لازم يتم". ³⁸قالوا: "يا رب عندنا هنا زوز سيوفة". قال: "يكفي!". يسوع يصلي ف جبل الزيتون³⁹و خرج و راح كيما العادة لجبل الزيتون, و راحوا معاه التلامذة تاعو. ⁴⁰و كي وصل للمكان قال لهم: "صلوا باه ما تدخلوش ف محنة".⁴¹و بعّد عليهم شوية و سجد على ركايبو وصلى ⁴²و قال: "يا بابا, اذا كان حبيت تفَوت عليّا هاذا الكاس. بالصح مش كيما نحب انا اللي تحبو انت هو اللي يصرى".⁴³و ظهر ليه ملاك من السماء كان يقوي فيه. ⁴⁴و كان يجاهد ف الصلاة و يدعي اكثر, و كان لعرق تاعو يقطر و يطيح على لرض كيما الدم.⁴⁵و من بعد وقف من الصلاة و جا للتلامذة و لقاهم راقدين من الحزن. ⁴⁶قال لهم: "واشبيكم راقدين؟ نوضوا وصلوا باه ما تعدوش ف محنة". القبض على يسوع⁴⁷و كي كان يهدر معاهم جاو جماعة, جابهم واحد اسمو يهوذا, واحد من التلامذة الثناش, و قدم ليسوع باه يسلم عليه. ⁴⁸قالو يسوع: "ا يهوذا, تسلم ابن الانسان ب بوسة؟".⁴⁹و كي شافوا التلامذة اللي كانوا معاه واش يصرى, قالوا: "با ربي, تحب نهجموا عليهم بالسيف؟". ⁵⁰و واحد منهم ضرب لخديم تاع رايس الكهنة و طيرلو وذنو ليمنى. ⁵¹و كي شافهم يسوع قال لهم: "جيبوه ليا هنا!". و مسو من وذنو و رتحو.⁵²و قال يسوع لرياس الكهنة و القياد تاع العسكر اللي يخدمو ف الهيكل و للشيوخة اللي جاو يقبضوا عليه: "تقول عليكم خرجتوا تقبضوا على سارق جايين بالسيوفة و العصي! ⁵³كنت كل يوم معاكم ف الهيكل و ما حبيتوش تحكموني. بالصح هاذي الساعة ساعتكم انتم و سلطان الظلمة". بطرس ينكر⁵⁴و حكموه و ساقوه و دخلوه لدار رايس الكهنة. و بطرس كان يتبع فيه من بعيد. ⁵⁵و كي شعلوا النار ف وسط الدار و قعدوا يتدفاو, قعد بطرس بيناتهم.⁵⁶و كي كان قاعد يتدفى معاهم شافاتو واحدة لخديمة و بقات تخزر معاه مليح و قالت: "هاذا ثاني كان معاه!". ⁵⁷نكر بطرس و قال: "انا ما نعرفوش ا مرى!". ⁵⁸و من بعد شوية زاد شافو واحد اخر و قال: "انت واحد منهم!". قال بطرس: "يا راجل, خاطي انا!".⁵⁹و من بعد واحد الساعة من الزمان جا واحد اخر وقال: "صح هاذا ثاني كان معاه, على خاطر هو ثاني من الجليل!". ⁶⁰قال بطرس: "يا راجل, ما علاباليش واش قاعد تقول!". و فهاذاك الوقت بالذات و هو ما زال يهدر عوعش السردوك.⁶¹دار يسوع و خزر لبطرس, و تفكر بطرس كلام الرب, كي قال: "قبل ما يعوعش السردوك تنكرني ثلاثة مرات". ⁶²و خرج بطرس لبرى و بكى بالحريقة. العسكر يستهزاو بيسوع⁶³و الرجال اللي كانوا يعسوا على يسوع قعدوا يضحكوا عليه و يضربوا فيه, ⁶⁴و غطاولوا راسو و ضربوه على وجهو و قالولوا: "طلع! شكون اللي ضربك؟". ⁶⁵و كانوا يقولوا عليه حوايج اخرى ياسر يتمسخروا بيه.⁶⁶و كي طلع النهار تلموا الشيوخة تاع الشعب: رياس الكهنة و العلماء تاع الشريعة, و اداوه للمجمع تاعهم ⁶⁷و قالولوا: "اذا كنت انت هو المسيح قلنا!". قال لهم: "لو كان نقول لكم ما تصدقوش, ⁶⁸و لو كان نسقسيكم ما تجاوبونيش و ما تسيبونيش.⁶⁹من الساعة هاذي يكون ابن الانسان قاعد على يمين القوة تاع الله". ⁷⁰قالوا الكل: "مالا انت ابن الله؟". قال لهم: "انتم تقولوا اني انا هو". ⁷¹قالوا: "ضرك واش نديروا بيها الشهادة؟ على خاطر هدرها بفمو".

Chapter 23

¹و تلم الغاشي الكل و اداو يسوع لبيلاطس, ²و شْكاو بيه و قالوا: "لقينا هاذا الراجل يفسد ف الامة, و يحرم على الناس يمدوا الضريبة للقيصر, و قال: باللي هو المسيح الملك".³سقساه بيلاطس وقال: "مالا انت هو الملك تاع ليهود؟". رد عليه يسوع و قال: "راك انت اللي تقول". ⁴ولى قال بيلاطس لرياس الكهنة و للشعب: "ما لقيت حتى ذنب في هاذا الراجل". ⁵اما هم بقاو حاكمين ف الهدرة تاعهم وقالوا: "راهو يهيج ف الشعب و يعلم ف بلاد اليهودية كاملة بدا من الجليل و وصل حتى لهنا".⁶و كي سمع بيلاطس كلمة الجليل, سقسى: "هاذا الراجل من الجليل؟" ⁷و كي عرف باللي هو من الولاية تاع هيرودس, بعثو لهيرودس, على خاطر كان هاذيك ليام ف اورشليم.⁸اما هيرودس كي شاف يسوع فرح ياسر, على خاطر كان حاب يشوفو هاذا زمان, كي سمع عليه حوايج ياسر, و تمنى يشوف منو معجزة يديرها قدامو. ⁹و كان يسقسي فيه على امور ياسر اما يسوع ما جاوبو بحتى شيء. ¹⁰و وقفوا رياس الكهنة و العلماء تاع الشريعة يشكيو بيه يتهموا فيه بتهم كبيرة,¹¹و حقرو هيرودس هو و العسكر تاعو و استهزاو بيه, و لبسو لبسة تلمع, و زاد رجعو ل بيلاطس. ¹²و في هاذاك النهار ولى بيلاطس و هيرودس اصحاب, على خاطر كانوا قبل متعاديين. الحكم بالموت¹³عيط بيلاطس على رياس الكهنة و الرجال لكبار اصحاب الجاه من الشعب, ¹⁴و قال لهم: "انتم جبتوا لي هاذا الراجل و قلتوا عليه قاعد يفسد ف الشعب. و انا تحققت معاه قدامكم و ما لقيت فيه حتى ذنب من الشيء اللي اتهمتوه بيه.¹⁵و حتى هيرودس ثاني ما لقى والو ف هاذا الراجل, على خاطر بعثتكم عندو. و هو ما دار حتى حاجة يستاهل عليها الحكم بالموت. ¹⁶ضرك نعاقبو و نسَيبو يرَّوح". ¹⁷و كان لازم يسيب لهم في كل عيد واحد من المحابسية.¹⁸ولاو كلهم يعيطوا و يقولوا: "احكم هاذا! و سيّب لنا باراباس!". ¹⁹و باراباس كان دخل للحبس على خاطر دار فتنة كبيرة و صرات قتيلة ف لمدينة.²⁰زاد قال لهم بيلاطس مرة اخرى و هو حاب يسيب يسوع, ²¹بداو يعيطوا و يقولوا: "اصلبو! اصلبو!". ²²زاد قال لهم للمرة الثالثة: "واش من شر عمل هاذا الراجل؟ ما لقيت فيه حتى ذنب يستاهل عليه الموت, نعاقبوا و نسَيبوا".²³و كانوا يعيطوا باصوات عالية طالبين باه يتصلب. و قْوَات اصواتهم و اصوات رياس الكهنة. ²⁴ولى حكم لهم بيلاطس كيما حبوا. ²⁵و سيَّب اللي كان محبوس على جال الفتنة و لقتيلة, دار لهم واش طلبوا, و سلم لهم يسوع يديروا فيه كيما حبوا. الصلب²⁶و كي كانوا ماديينوا يصلبوه لقاو ف الطريق واحد اسمو سمعان, راجل من القيروان كان راجع من الجنان, حطوا المادرية تاع الصليب فوق ظهروا باه يهزها و يمشي ورى يسوع.²⁷و مشى وراه غاشي كبير من الشعب, و النساء كانوا يندبوا و ينوحوا عليه. ²⁸تلفت لهم يسوع و قال: "يا بنات اورشليم ما تبكيوش عليّا انا ابكيو على ارواحكم و على اولادكم,²⁹على خاطر تجي ايامات يقولوا فيها: يا سعد اللي ما ولدت و ما جابت اولاد و ما رضعت! ³⁰وقتها يقولوا للجبل: طيح علينا! و يقولوا للكدية غطينا! ³¹اذا كان داروا هكا مع العرف الطري, كيفاه مالا يديروا مع العرف اليابس؟".³²و جابوا زوز مجرمين اخرين باه يقتلوهم معاه.³³و كي وصلوا بيه للمضرب اللي اسمو "جمجمة".صلبوه ثمة مع المجرمين, واحد على ليمين و واحد على ليسار. ³⁴و قال يسوع: "يا بابا, اغفر لهم, على خاطر ماعلبالهمش واش يديروا". و كي كانوا يقسموا في قشو بيناتهم داروا عليه القُرعة.³⁵و الشعب كامل واقفين يشوفوا, ومعاهم الرياس تاعهم و كانوا يستهزاو بيه و يقولولوا: "منّع ناس اخرين, يمنّع روحو ضرك اذا كان هو المسيح المختار تاع الله!".³⁶و العسكر ثاني كانوا يستهزاو بيه يجيو و يمدولوا ف الخل, ³⁷و يقولوا: "كي عدت انت هو الملك تاع ليهود منّع روحك!". ³⁸و كانت لوحة فوق منو مكتوبة بحروف يونانية و رومية و عبرية: "هاذا هو الملك تاع ليهود".³⁹و واحد من المجرمين اللي كانوا معلقين فوق الصليب بحذاه بدى يسب فيه و يقول: "كان انت هو المسيح منّع روحك و منعنا معاك!". ⁴⁰رد عليه المجرم لخر و بخسو و قال: "او انت ما تخافش ربي, راك قاعد تتعاقب كيما هو؟ ⁴¹بالصح احنا العقاب تاعنا عادل, نستاهلوا الشيء اللي يصرالنا, اما هو مادار حتى شر".⁴²و من بعد قال ليسوع: "اذكرني يا ربي نهار اللي تجي ف الملكوت تاعك". ⁴³قال لو يسوع: "نقول لك الحق: اليوم راح تكون معايا ف الفردوس". الموت⁴⁴و كانت قريب الساعة الستة, و لرض كاملة ظلامت حتى للتسعة. ⁴⁵ظلامت الشمس, و تقطع لحجاب تاع الهيكل من الوسط.⁴⁶و عيط يسوع على طول صوتو و قال: "يا بابا, في يدك نودع روحي". و كي قال هاذا طلع الروح. ⁴⁷و كي شاف القايد تاع لمياة عسكري واش صرى, مد المجد لله و قال: "صح كان هاذا الراجل صالح!".⁴⁸و الناس الكل اللي كانوا حاضرين لهاذا الشيء, كي شافوا واش صرى. رجعوا وهمّا يضربوا ف ارواحهم. ⁴⁹و كانوا جميع معارفو, و النساء جاو يتبعوا فيه من الجليل, و كانوا واقفين من بعيد و يتفرجوا. الدفينة⁵⁰و كان واحد الراجل اسمو يوسف, عضو ف المجلس و كان راجل صالح و يخاف الله. ⁵¹ما كانش موافق على الراي تاع المجلس و الشيء اللي داروه, و هو من الرامة لمدينة تاع ليهود. و هو ثاني كان يستنى ف الملكوت تاع الله يظهر.⁵²راح لبيلاطس و طلب منو يعطيه لبدن تاع يسوع باه يدفنو, ⁵³و هبطو من فوق الصليب, و لفو بالكتان, و اداه حطو ف قبر منحوت ما تدفن فيه حتى واحد من قبل.⁵⁴و كان اليوم هو النهار اللي يوجدوا فيه للسبت و كان السبت قريب يجي. ⁵⁵و تبعوه نساء ياسر جاو معاه من الجليل, و شافوا لقبر و وين دفنو. ⁵⁶رجعوا و وجدوا الطيب و الحنوط. و ارتاحوا نهار السبت كيما يقول الشرع.

Chapter 24

¹و من بعد ف اول نهار من الاسبوع, مع الفجر بكري, جاو للقبر و جابوا معاهم الحنوط و البخور اللي داروهم, و جاو معاهم ناس واحد اخرين. ²و لقاو الحجرة اللي كانت قافلة على لقبر مجبودة على الباب, ³و كي دخلوا ما لقاوش لبدن تاع الرب يسوع.⁴و بقاو مستغربين ف لشيء اللي صرى, شوية ظهروا لهم زوز رجال لابسين قش يبرق. ⁵على خاطر كانوا خايفين هبطوا روسهم, قالوا لهم: "علاه تفركتوا على الحي بين الموتى؟⁶هو ما هوش هنا, بالصح قام! اتفكروا واش قال لكم كي كان ف الجليل ⁷قال: باللي لازم على ابن الانسان يطيح ف يد ناس مذنبين, و يتصلب, و ف ثالث يوم يقوم من بين الموتى".⁸و كي تفكروا لكلام تاعو, ⁹رجعوا من لقبر, و راحوا قالوا للتلامذة ف حداش و للخرين الكل الشيء اللي صرى. ¹⁰و كانت مريم المجدلية و يونا و مريم ام يعقوب و النساء لخرين اللي كانوا معاهم, همّا اللي خبروا الرسل بهاذا الشيء.¹¹و بانت لهم هدرتهم تقول يهتوْروا و ما قبلوهمش. ¹²وقف بطرس و راح يجري للقبر, و كي طل شاف لكفن محطوط على جيهة وحدو, و رجع مستغرب من الشيء اللي صرى. ف طريق عمواس¹³و كانوا زوز منهم ف هاذاك النهار رايحين لواحد القرية بعيدة على اورشليم بسبعة اميال, اسمها "عمواس". ¹⁴و كانوا ماشيين و يهدروا مع بعضاهم على واش صرى الكل.¹⁵و كي كانوا يهدروا و يتناقشوا, قرّب لهم يسوع ف ذاتو و بدا يمشي معاهم. ¹⁶بالصح هما تقول عمات عينيهم ما قدروش يعرفوه.¹⁷قال لهم: "واش قاعدين تهدروا و انتم ماشيين و الحزن باين على وجوهكم؟". ¹⁸رد عليه واحد منهم, اللي كان اسمو كليوباس و قال: "مالا راك غير انت وحدك لغريب ف اورشليم و ما علابالك بوالو من الشيء اللي صرى ليامات هاذي؟".¹⁹قال لهم: "واش صرى؟". قالوا: "الشيء اللي صرى ليسوع الناصري, اللي كان انسان نبي قادر ف الافعال و الاقوال عند الله و عند الناس الكل. ²⁰و كيفاه حكموا عليه الرياس تاع الكهنة و الحكّام تاعنا بالموت و صلبوه.²¹و احنا كنّا نتمناو يكون هو اللي يخلص اسرائيل. بالصح, رغم هاذا الكل, اليوم عندها ثلاثة ايام من اللي صرى هاذا الكل.²²بالصح كاين نساء من جماعتنا راحوا الصباح بكري للقبر و جاو خبرونا , ²³باللي ما لقاوش لبدن تاعو وقالوا: باللي شافوا ملايكة قالولهم باللي راه حي. ²⁴و كي راحوا وحايد منا للقبر, لقاو كيما قالوا النساء بالذات, اما همّا ما شافوهش".²⁵قال لهم: "واشبيكم ما تفهموش و ثقيل ف قلوبكم الايمان بالحوايج الكل اللي قالوها الانبياء! ²⁶كيفاه ما كانش لازم على المسيح يقاسي لوجاع و هكا يدخل للمجد تاعو؟". ²⁷و بدى من موسى و من كل الانبياء و هو يفسر لهم الامور الخاصة بيه ف الكتب الكل.²⁸و كي قربوا للقرية اللي كانوا رايحيين ليها, حسب روحو رايح لمدينة ابعد. ²⁹بالصح هما عرضوه و حتموا عليه يبقى معاهم و قالوا: "اقعد معانا, او راح النهار, و قريب يطيح الليل". ولى دخل معاهم.³⁰و كي قعد معاهم, هز الخبز و بارك و كسر و مد لهم ياكلوا, ³¹وقتها تحلت عينيهم و عرفوه و من بعد راح عليهم, ³²و قالوا لبعضاهم: "ما كانتش قلوبنا شاعلة فينا و هو يهدر معانا ف الطريق و يشرح لنا ف الكتب؟".³³و وقفوا ف هاذيك الساعة و زادوا رجعوا لاورشليم, و لقاو التلامذة ف حداش متلميين, هما و الناس اللي كانوا معاهم ³⁴و قالولهم: "الرب صح قام من بين الموتى و ظهر لسمعان!". ³⁵و هما ثاني زادوا قالولهم على الشيء اللي صرى ف الطريق, و كيفاه عرفوه كي قسم الخبز. يسوع يظهر للتلامذة³⁶و همّا قاعدين يهدروا على هاذا الشيء شوية ظهر يسوع بذاتو ف وسطهم, و قال لهم: "السلام عليكم!". ³⁷خافوا و تخلعوا, و حسبوه روح.³⁸قال لهم: "واشبيكم خايفين, وعلاه بديتوا تشكوا ف قلوبكم؟ ³⁹شوفوا يديا و رجليّا: اني انا هو! مسوا و شوفوا, الروح ما عندو لا لحم و لا عظم كيما تشوفوا فيّا انا". ⁴⁰و كي قال هاذا لكلام ورالهم يديه و رجليه يشوفوهم.⁴¹و هما مازالوا ماهمش مصدقين من الفرحة, و مستغربين, قال لهم: "عندكم ماكلة هنا؟". ⁴²جابولوا شوية حوت مشوي, و شهدة تاع عسل. ⁴³حكمهم و كلى قدامهم.⁴⁴و قال لهم: "هاذا هو لكلام اللي قلت لكم عليه كي كنت معاكم: باللي لازم يتم الشيء كامل اللي تكتب عليّا ف الشريعة تاع موسى و الانبياء و المزامير".⁴⁵وقتها فتح اذهانهم باه يفهموا الكتب. ⁴⁶و قال لهم: "هكذا مكتوب, و هكذا كان لازم المسيح يقاسي لوجاع و يقوم ثالث يوم, ⁴⁷و يبشروا باسمو بالتوبة و غفران الذنوب لجميع الامم, من اورشليم و روح.⁴⁸و انتم شهود على هاذا. ⁴⁹و انا نبعث لكم اللي وعد بيه بابا. اقعدوا ف مدينة اورشليم حتى ن تلبسوا قوة من لعلالي". المسيح يطلع للسماء⁵⁰و خرجهم لبرى ل بيت عنيا, و هز يديه و باركهم. ⁵¹و هو قاعد يبارك فيهم, بعد عليهم شوية و طلع للسماء.⁵²سجدوا ليه و رجعوا لاورشليم و همّا فرحانين فرحة كبيرة, ⁵³و كانوا ف كل وقت يروحوا للهيكل يسبحوا و يباركوا الله. امين.

John

Chapter 1

¹ف البدية كان الكلمة, و الكلمة كان عند الله, و كان الكلمة الله. ²هاذا كان ف البدية عند الله. ³كل شيء بيه كان, و بلا بيه ما كان شيء من اللي كان.⁴فيه كانت لحياة, و لحياة كانت نور الناس, ⁵و النور يضوي ف الظلام, و الظلام ما يلحقش النور.⁶كان انسان مبعوث من عند الله اسمو يوحنا, ⁷جا باه يشهد للنور, باه يامنوا الناس الكل على يدو. ⁸ما كانش هو النور, بالصح جا باه يشهد للنور.⁹النور تاع الصح اللي ينوّر كل بشر كان جاي للعالم.¹⁰كان ف العالم, و بيه توجد العالم, بالصح العالم ما عرفوش. ¹¹جا لمواليه, بالصح مواليه ما عرفوهش.¹²اما كل اللي قبلوه عطاهم سلطان باه يوَليوْ اولاد الله, يعني المومنين باسمو. ¹³مش هاذوك اللي ولدوا من الدم, و لا برغبة جسد, و لا برغبة راجل, بالصح من عند الله.¹⁴و الكلمة ولّى جسد و جا بيناتنا, و احنا شفنا الجاه تاعو جاه تاع ابن فريد من الاب, مليان بالنعمة و الحق. ¹⁵شهد ليه يوحنا و نادى و قال: "هاذا هو اللي قلت عليه: اللي يجي ورايا يولّى قدامي, على خاطر كان قبلي".¹⁶من فيض نعمتو احنا الكل نلنا, نعمة فوق نعمة. ¹⁷على خاطر الشريعة جات على يد موسى, اما النعمة و الحق نلناها بيسوع المسيح. ¹⁸لا واحد عمرو شاف الله. بالصح الابن الفريد اللي ف حضن الاب هو اللي خبرنا عليه. يوحنا المعمدان يقول باللي هو مش المسبح¹⁹و هاذي هي الشهادة تاع يوحنا, وقت اللي بعثوا ليهود كهنة و لاويين من اورشليم باه يسقسيوه: "شكون انت؟". ²⁰استعرف و ما نكرش, و قال: "انا خاطي مش انا المسيح". ²¹سقساوه: "مالا شكون انت؟ انت ايليا؟". قال: "لا خاطي انا". "انت نبي؟". قال: "لا".²²قالوا: "شكون انت, باه نديو جواب للناس اللي بعثونا؟ واش تقول على روحك؟". ²³قال: "انا صوت ينادي ف الصحراء و يقول: اعدلوا طريق الرب, كيما قال اشعياء النبي".²⁴والناس المبعوثين كانوا من العلماء تاع الشريعة, ²⁵سقساوه و قالوا: "مالا علاه تعمد كي عدّت مش انت هو المسيح, و لا ايليا, و لا نبي؟".²⁶رد عليهم يوحنا وقال: "انا نعمد بالماء, بالصح كاين ف وسطكم اللي ما تعرفوهش. ²⁷هو اللي يجي من بعدي, صبّح قدامي, اللي انا ما نستاهلش نحل سيور السباط تاعو". ²⁸هاذا كامل صرى ف بيت عيرة ورى نهر الاردن من لهيه وين كان يوحنا يعمد. يسوع لخروف تاع الله²⁹و غدوة شاف يوحنا يسوع جاي عندو, قال: "هاذا هو لخروف تاع الله اللي راح يهز المعصية تاع العالم! ³⁰هاذا هو اللي قلت عليه: يجي من بعدي, راجل يولي هو قدامي, على خاطر كان قبلي. ³¹و انا ماكنتش نعرفو. بالصح انا جيت نعمد بالماء باه يظهر لاسرائيل".³²و شهد يوحنا وقال: "انا شفت الروح نازل عليه كيما لحمامة من السماء و حط عليه. انا ما كنتش نعرفو, ³³بالصح اللي بعثني نعمد بالماء, هو اللي قالي: اللي تشوف الروح نزل و حط عليه, هاذاك هو اللي يعمد بالروح القدس. ³⁴وانا شفت و نشهد باللي هاذا هو ابن الله". التلامذة لولين³⁵و اليوم وغدوة كان يوحنا واقف هو و زوز من التلامذة تاعو, ³⁶كي شاف يسوع ماشي, قال: "هاذا هو لخروف تاع الله".³⁷و كي سمعوه التلامذة, راحوا يتبعوا ف يسوع. ³⁸تلفت لهم يسوع و لقاهم يتبعوا فيه, قال لهم: "واش طالبين؟". قالوا: "ربي" اللي معناها: يا معلم. "وين تسكن؟". ³⁹قال لهم: "ارواحوا ضرك تشوفوا". راحوا معاه و شافوا وين يسكن, و قعدوا معاه هاذاك اليوم. و كانت الساعة قريب العشرة.⁴⁰و كان اندراوس خو سمعان بطرس واحد من التلامذة ف زوز اللي سمعوا يوحنا و تبعوه. ⁴¹هاذا لقى قبل خوه سمعان و قال لو: "لقينا المسيّا" اللي معناه: المسيح. ⁴²و جابو عند يسوع. شاف فيه يسوع وقال: "انت سمعان بن يونا. نسميك صفا" اللي معناه: بطرس. يسوع يعرض فيليبس و نثنائيل⁴³و اليوم و غدوة حب يسوع يروح للجليل, لقى فيليبس قال لو: "تبعني". ⁴⁴و كان فيليبس من بيت صيدا, من مدينة اندراوس و بطرس. ⁴⁵و فيليبس لقى نثنائيل و قال لو: "لقينا اللي كتب عليه موسى ف الشريعة و الانبياء يسوع بن يوسف اللي من الناصرة".⁴⁶قال لو نثنائيل: "كيفاه من الناصرة تخرج حاجة تصلح؟". قال لو فيليبس: "ارواح تشوف". ⁴⁷و كي شاف يسوع نثنائيل جاي ليه, قال عليه: "هاذا اسرائيلي حر ماهوش مخلط". ⁴⁸قال لو نثنائيل: "منين تعرفني؟". رد عليه يسوع وقال: "قبل ما يعيطلك فيليبس كي كنت تحت شجرة الكرطوس, شفتك".⁴⁹رد عليه نثنائيل و قال: "يا معلم, انت ابن الله! انت الملك تاع اسرائيل!". ⁵⁰قالو يسوع: "امنت كي قتلك شفتك تحت شجرة الكرطوس؟ راح تشوف ما اعظم من هاذا!". ⁵¹و قال لو: "نقولك الحق الحق: من اليوم تشوفوا السماء محلولة, و الملايكة تاع الله يطلعوا و يهبطوا على ابن الانسان".

Chapter 2

¹و ف ثالث يوم كان عرس ف قانا ف الجليل, و كانت ام يسوع معروضة ثمة. ²و كان يسوع و التلامذة تاعو همّا ثاني معروضين للعرس.³و كي فض عليهم الشراب, قالت ام يسوع ليسوع: "ما عندهمش شراب". ⁴قال لها يسوع: "واش تستحقي فيّا يا مرى؟ مازالت ما جاتش ساعتي". ⁵قالت امو للخدامين: "اللي يقول لكم عليه اعملوه".⁶و كانت ستة جرات تاع حجر محطوطة ثمة, يستعملوها ليهود للوضوء, كل واحدة فيهم تهز زوز كيلات و الا ثلاثة. ⁷قال لهم يسوع: "عمروها بالماء". عمروها حتى للغطاء. ⁸و من بعد قال لهم: "هزوا منها ضرك و مدوا للرايس تاع الوليمة". راحوا مدولوا.⁹و كي ذاق الرايس تاع الوليمة الماء اللي ولى شراب, و ماكانش علابالو منين جابوها, بالصح الخدامين اللي غرفوها من الجرة علابالهم, عيط على العريس ¹⁰و قالو: "الناس الكل تحط الشراب لمخير هو لول, و من بعد كي يسكروا الناس يحطولهم الشراب العادي, اما انت خليت الشراب لمخير حتى لضرك!".¹¹هاذي هي اول اية عملها يسوع ف قانا الجليل, و بيّن الجاه تاعو, و امنوا بيه التلامذة. تطهير الهيكل¹²و من بعدها هبط ل كفرناحوم, هو و امو و خاوتو و التلامذة تاعو, و قعدوا ثمة شوية ايامات.¹³و كي قرّب الفصح تاع ليهود, طلع يسوع لاورشليم, ¹⁴و لقى ف الهيكل الناس اللي كانوا يبيعوا ف لبقر و لغنم و لحمام, و شاف التجار اللي يصرفوا الدراهم قاعدين.¹⁵دار شطرب من لحبال و خرجهم الكل من الهيكل, لغنم و لبقر, و سيح دراهم الصرّافة و قلب لهم الطاولات تاعهم. ¹⁶و قال للتجار تاع لحمام: "هزوا هاذي من هنا ما تجعلوش بيت بابا بيت تاع تجارة!".¹⁷و تفكروا التلامذة باللي مكتوب: "كلاتني الغيرة على دارك". ¹⁸جاوه ليهود و قالوا: "واش من معجزة تديرها تبرر الفعل تاعك هاذا؟". ¹⁹قال لهم يسوع: "ريّبوا هاذا الهيكل و انا ف ثلاثة ايام نبنيه".²⁰ردوا عليه ليهود و قالوا: "تبنى هاذا الهيكل ف ستة و اربعين سنة, و انت تقول تبنيه ف ثلاثة ايام؟". ²¹بالصح هو كان يهدر على الجسد تاعو. ²²و كي قام من بين الموتى تفكروا التلامذة تاعو باللي قال هاذا لكلام, وامنوا بالكتاب و بالكلام اللي قالو يسوع.²³و كي كان ف اورشليم ف عيد الفصح, امنوا بيه ناس ياسر, كي شافوا المعجزات الكل اللي دارها. ²⁴بالصح يسوع ما عطاهمش لمان على روحو, على خاطر كان يعرفهم الكل. ²⁵و ما كانش محتاج لشكون يخبرو على حتى واحد, على خاطر كان عارف واش ف لقلوب.

Chapter 3

¹كان واحد الراجل من علماء الشريعة اسمو نيقوديموس, واحد من الرياس تاع ليهود. ²جا ليسوع ف الليل و قالو: "يا معلم, علابالنا باللي جيت من عند الله معلم, على خاطر واحد ما يقدر يدير المعجزات اللي تديرها انت غير اذا كان الله معاه".³رد عليه يسوع و قال: "نقول لك الحق الحق: لو كان الواحد ما يتولدش من فوق ما يقدرش يشوف الملكوت تاع الله". ⁴قالو نيقوديموس: "كيفاه يقدر الواحد يولد و هو شيخ كبير ف لعمر؟ بلاك يقدر يرجع لكرش امو و يعاود يتولد؟".⁵جاوبوا يسوع: "نقول لك الحق الحق: اذا كان الواحد ما يولدش من الماء و الروح ما يقدرش يدخل للملكوت تاع الله. ⁶اللي يولد من لبدن يكون بدن, و اللي يولد من الروح يكون روح.⁷ما تستغربش كي نقولك: لازم تولدوا من فوق. ⁸الريح تهب وين تحب, و تسمع صوتها, بالصح ما تعرفش لا منين تجي و لا وين تروح. هكا يكون كل من يتولد من الروح".⁹رد عليه نيقوديموس و قال: "كيفاه يقدر هاذا الشيء يصير؟". ¹⁰قالو يسوع: "انت المعلم تاع اسرائيل و ما تعرفش كيفاه! ¹¹نقول لك الحق الحق: احنا نقولوا الشيء اللي علابالنا بيه و نشهدوا بالشيء اللي شفناه, وما تقبلوش الشهادة تاعنا.¹²اذا كان هدرت معاكم بالامور تاع لرض و امنتوش, كيفاه مالا تامنوا كان هدرت معاكم بالامور تاع السماء؟ ¹³ماكان حتى واحد طلع للسماء غير اللي هبط منها, ابن الانسان اللي ف السماء.¹⁴" و كيما علق موسى الحية ف الصحراء هكذاك ثاني لازم يتعلق ابن الانسان, ¹⁵باه كل من يامن ما يموتش بالصح ينال لحياة الدايمة.¹⁶على خاطر هكا حب الله العالم حتى بذل ابنو لفريد, باه كل من يامن ما يموتش, بالصح ينال لحياة الدايمة. ¹⁷على خاطر الله ما بعثش ابنو للعالم باه يحكم على العالم, بالصح باه يمّنع بيه العالم. ¹⁸اللي يامن بيه ما يتحكمش عليه, و اللي ما يامنش بيه يتحكم عليه, على خاطر ما امنش باسم ابن الله لفريد.¹⁹و هاذا هو الحكم: النور جا للدنيا, بالصح الناس حبوا الظلمة اكثر من النور, على خاطر اعمالهم كانت اعمال شر. ²⁰على خاطر كل من يعمل المعاصي يكره النور, و ما يحبش يجي للنور باه ما تتكشفش عمايلو. ²¹بالصح اللي يعيش حساب الحق يجي للنور, باه تبان باللي افعالهم كانت ترضي الله". الشهادة تاع يوحنا المعمدان للمسيح²²و من بعد راح يسوع و التلامذة تاعو لبلاد اليهودية, و قعد معاهم ثمة, و كان يعمد. ²³و حتى يوحنا ثاني كان يعمد ف عين نون بحذى ساليم, على خاطر كان الماء ياسر ف هاذاك المضرب. ²⁴و كانوا الناس يروحوا يتعمدوا. و يوحنا وقتها مازال مادخلش للحبس.²⁵و صرات مناقشة بين تلامذة يوحنا و جماعة من اليهود على جال التطهير. ²⁶و جاو ليوحنا و قالولو: "يا معلم, هاذاك اللي جا ليك من ورى نهر الاردن, اللي شهدت ليه انت, راه يعمد, و الناس الكل يروحوا عندو".²⁷رد عليهم يوحنا و قال: "ما يقدر حتى واحد يدي حاجة لو كان ما جاتوش من السماء. ²⁸انتم بذاتكم تشهدوا علّيا باللي قلت: مانيش انا هو المسيح انا المرسول اللي يجي قبلو.²⁹اللي يدي لعروسة يكون هو لعريس, اما صاحب لعريس يوقف و يسمعو و يفرح بصوت لعريس. مالا انا الفرحة تاعي كملت. ³⁰لابد هاذاك يزيد و انا ننقص.³¹اللي يجي من فوق هو فوق الناس الكل, و اللي ف لرض هو من لرض, و يهدر بالكلام تاع لرض. اللي يجي من السماء هو فوق الناس الكل, ³²و يشهد بالشيء اللي سمعو و شافو, و واحد ما يقبلش واش يقول. ³³بالصح اللي يقبل واش يقول يشهد باللي الله صادق,³⁴على خاطر اللي بعثو الله يتكلم بكلام الله. على خاطر يمد الروح بلا قياس. ³⁵الاب يحب الابن و دفع كل شيء بين يديه. ³⁶اللي يامن بالابن تكون ليه حياة دايمة, و اللي ما يامنش بالابن ما يشوفش لحياة و يغضب عليه الله".

Chapter 4

¹و كي عرف يسوع باللي علماء الشريعة سمعوا بيه يعمد و يقري تلامذة اكثر من يوحنا, ²و زبد مش غير يسوع برك اللي يعمد بالصح حتى التلامذة تاعو يعمدوا, ³خرج من بلاد اليهودية و رجع للجليل.⁴و كان لازم عليه يعدي على السامرة. ⁵وصل لواحد المدينة من المدن تاع السامرة اسمها سوخار, قريب من الجنان اللي اعطاه يعقوب لولدو يوسف.⁶و كان ثمة البير تاع يعقوب. و كي تعب يسوع من الطريق, اتكى على البير, و كانت جوايه الساعة الستة. ⁷و جات وحدة لمرى من السامرة باه تعمر الماء, قال لها يسوع: "اعطيني نشرب". ⁸و التلامذة تاعو وقتها راحوا للمدينة يشريو حاجة ياكلوها.⁹ردت عليه لمرى السامرية و قالت: "كيفاه تطلب مني نعطيك تشرب, و انت يهودي و انا مرى سامرية؟". على خاطر ليهود ما يتعاملوش مع ناس السامرة. ¹⁰رد عليها يسوع و قال: "لو كان جيتي تعرفي المعطى تاع الله, و شكون اللي قالك اعطيني نشرب, كنتي انت تطلبي منو يعطيك الماء الحي".¹¹قالت لمرى: "يا سيدي, ما عندكش ماعون و البير غارق. كيفاه تعطيني الماء الحي؟ ¹²راح تجي انت اعظم من بابانا يعقوب, اللي اعطانا هاذا البير, و شرب منو هو و اولادو و السعي تاعو؟".¹³رد عليها يسوع وقال: "اللي يشرب من هاذا الماء يزيد يعطش. ¹⁴بالصح اللي يشرب من الماء اللي نمدو انا عمرو ما يزيد يعطش, بالعكس الماء اللي نعطيه يولي فيه منبع يفيض بالحياة الدايمة".¹⁵قالت لو لمرى: "يا سيدي, اعطيني هاذا الماء باه ما نزيدش نعطش و ما بقيتش نجي هنا نعمر الماء". ¹⁶قال لها يسوع: "روحي جيبي راجلك و ارواحي".¹⁷ردت عليه لمرى و قالت: "ما عنديش راجل". قال لها يسوع: "قلتي الحق: كي قلتي ما عنديش راجل, ¹⁸على خاطر كانوا عندك خمسة رجال, و اللي معاك ضرك ماهوش راجلك. صدقتي ف هاذا".¹⁹قالت لو لمرى: "يا سيدي, نشوف باللي راك نبي! ²⁰جدودنا عبدوا الله ف هاذا الجبل, و انتم تقولوا باللي اورشليم هي المضرب اللي لازم تكون فيه العبادة".²¹قال لها يسوع: "صدقيني يا مرى راح تجي الساعة, لا ف هاذا الجبل, و لا ف اورشليم يعبدوا الاب. ²²انتم ما تعرفوش شكون تعبدوا, اما احنا عارفين شكون نعبدوا. على خاطر الخلاص يجي من عند ليهود.²³بالصح تجي ساعة, و هي راهي اليوم, وين يسجد المومنين تاع الصح للاب بالروح و بالحق, على خاطر الاب طالب كيما هاذوك الساجدين ليه. ²⁴الله روح. و اللي يعبدوه لازم يعبدوه بالروح و الحق".²⁵قالت لمرى: "انا علابالي باللي المسيا, اللي يقولولوا المسيح, راح يجي. و كي يجي هو اللي يخبرنا بكل شيء". ²⁶قال لها يسوع: "اني انا هو اللي نهدر معاك".²⁷و ف هاذاك الوقت جاو التلامذة, و كانوا مستغرين كيفاه يهدر مع مرى. بالصح واحد منهم ما قدر يقول: "واش تستحق؟" و الا "علاه تهدر معاها؟".²⁸و لمرى خلات جرتها بحذى البير و رجعت للمدينة و قالت للناس: ²⁹"ارواحوا تشوفوا كاين راجل قال لي واش درت الكل. بلاك هاذا هو المسيح؟". ³⁰و خرجوا الناس م لمدينة و جاو ليه باه يشوفوه.³¹و ف هاذاك ااوقت قالوا التلامذة: "يا معلم, كول". ³²قال لهم: "انا عندي ماكلة ناكلها ما تعرفوهاش انتم". ³³قالوا التلامذة لبعضاهم: "بلاك كاش ما واحد جابلو حاجة ياكلها؟".³⁴قال لهم يسوع: "الطعام تاعي كي نعمل رضاية اللي بعثني و نتمم الخدمة تاعو. ³⁵ياخي تقولوا: بعد ربعة شهر يجي موسم لحصاد؟ انا نقول لكم: هزوا عينيكم و شوفوا الزرع بياض للحصاد. ³⁶و الحصّاد يدي الاجر و يلم ثمار للحياة الدايمة, و هكا يفرح اللي زرع و اللي حصد مع بعضاهم.³⁷صدق لمثل اللي يقول: واحد يزرع و واحد اخر يحصد. ³⁸انا نبعثكم باه تحصدوا الزرع اللي ما تعبتوش عليه. غيركم زرع و انتم تلموا الغلة". ناس ياسر من السامرة يامنوا³⁹و امنوا بيه من هاذيك لمدينة ناس ياسر من اهل السامرة على جال الهدرة تاع لمرى اللي كانت تشهد و تقول: "قال لي واش درت الكل". ⁴⁰و كي جاوه ناس السامرة عرضوه باه يقعد عندهم, و قعد عندهم نهارين.⁴¹و زادوا امنوا بيه الناس اكثر من قبل كي سمعو لكلام تاعو. ⁴²و قالوا للمرى: "احنا ضرك ما نامنوش بسبة كلامك, امنا على خاطر سمعنا و عرفنا باللي هاذا هو صح المسيح المخلص تاع البشرية". شفاء ولد الخادم تاع الملك⁴³و بعد نهارين خرج من السامرة و راح للجليل, ⁴⁴على خاطر يسوع ف ذاتو قال باللي: "ما كاين حتى نبي بقيمتو ف بلادو". ⁴⁵و كي وصل للجليل استقبلوه ناس الجليل, كي شافوا واش دار ف اورشليم وقت العيد, على خاطر همّا ثاني جاو للعيد.⁴⁶و زاد جا يسوع لقانا الجليل, وين حوّل الماء لشراب. و كان واحد يخدم عند الملك عندو ولدو مريض ف كفرناحوم. ⁴⁷كي سمع باللي يسوع جا من بلاد اليهودية للجليل, راح ليه و طلب منو يروح معاه و يشفي ولدو اللي وصل للموت.⁴⁸قال لو يسوع: "ما تامنوش لو كان ما تشوفوش الايات و العجايب". ⁴⁹قال لو لخديم تاع الملك: "يا سيدي, هيا تروح معايا قبل ما يموت وليدي". ⁵⁰قال لو يسوع: "روح. ولدك حي". امن الراجل بالكلمة اللي قالها يسوع, و راح.⁵¹و هو هابط مروح عرضولوا العبيد تاعو و قالوا: "ولدك حي". ⁵²سقساهم على الساعة اللي بدى يبرى فيها, قالوا: "البارح على السبعة راحت عليه السخانة".⁵³و فهم الراجل باللي هاذيك هي الساعة اللي قال فيها يسوع: "ولدك حي". و امن هو و اهلو كاملين. ⁵⁴حتى هاذي معجزة واحدة اخرى دارها يسوع كي جا من بلاد اليهودية للجليل.

Chapter 5

¹و بعد هاذا كان عيد عند ليهود, و طلع يسوع لاورشليم. ²و ف اورشليم كاين واحد البركة ف باب الضان يسموها بالعبرية "بيت حسدا" عندها خمسة ممرات. ³و كانوا ناس ياسر مرضى وعميان و عياب و معوقين قاعدين ثمة, يستناو وقتاه يتحرك الماء تاع البركة. ⁴على خاطر كان ملاك يجي ساعة ساعة و يحرك الماء. و اللي يهبط للماء هو لول يرتاح مهما واش كان لمرض تاعو.⁵و كان ثمة واحد الراجل عندو ثمنية و ثلاثين سنة و هومريض. ⁶كي شافو يسوع قاعد, و عرف باللي عندو مدة طويلة و هو يسنى, قال لو: "تحب تبرى؟".⁷رد عليه الراجل لمريض و قال: "يا سيدي, ما عندي حتى واحد يهبطني ف البركة كي يتحرك الماء. و كل ما نجي انا نهبط , يهبط واحد اخر قبلي". ⁸قال لو يسوع: "اوقف. هز فراشك و امشي".⁹و ثم ثم برى الراجل و هز فراشو و مشى. و كان هاذاك النهار نهار سبت.¹⁰و قالوا ليهود للراجل اللي برى: "اليوم سبت! ما يحلش ليك تهز فراشك". ¹¹رد عليهم و قال: "الراجل اللي رتحني هو اللي قالي: هز فراشك و امشي".¹²سقساوه قالولوا: "شكون هو الراجل اللي قالك هز فراشك و امشي؟". ¹³بالصح هاذاك الراجل اللي ارتاح ما كانش يعرف شكون هو, على خاطر يسوع خرج من ثمة, كي شاف الغاشي ياسر.¹⁴و من بعد لقاه يسوع ف الهيكل قال لو: "هاك ارتحت, ما تزيدش ترجع للمعصية, لا يصير فيك اكثر من اللي كان قبل". ¹⁵و راح الراجل لليهود و قال لهم باللي يسوع هو اللي رتحو. العمل تاع الاب و الابن¹⁶و على هاذا الشيء كانوا ليهود يقهروا ف يسوع, و حابين يقتلوه, على خاطر خدَم نهار السبت. ¹⁷رد عليهم يسوع وقال: "بابا حتى لليوم يخدم و انا نخدم". ¹⁸هاذا الشيء اللي زاد خلى ليهود يحبوا يقتلوه, مش على خاطر كسر السبت برك بالصح ثاني كي قال باللي الله هو باباه, و حط روحو متساوي مع الله.¹⁹جاوبهم يسوع وقال: "نقول لكم الحق: ما يقدرش الابن يعمل حاجة من راسو يخدم برك غير واش يشوف الاب يخدم. على خاطر مهما واش يعمل الاب يعمل الابن ثاني. ²⁰على خاطر الاب يحب الابن و يوريه كل حاجة يعملها, و مازال يزيد يوريه حوايج اعظم من هاذي تخليكم انتم تستغربوا.²¹و كيما الاب يقوّم الموتى و يحييهم, حتى الابن ثاني يحيي اللي يحب. ²²على خاطر الاب ما يحكم على حتى واحد, بالصح مد الحكم الكل للابن, ²³باه الناس الكل تقدر الابن كيما يقدروا الاب. و اللي ما يقدرش الابن يسمى ما قدّرش الاب اللي بعثوا.²⁴"نقول لكم الحق الحق: اللي يسمع كلامي و يامن باللي بعثني تكون ليه لحياة الدايمة ف لاخرة, و ما يحضرش للدينونة, على خاطر عدى من الموت للحياة.²⁵نقول لكم الحق الحق: راح تجي ساعة و هاي جات اليوم, الموتى يسمعوا صوت ابن الله, و كي يسمعوه يحياو.²⁶على خاطر كيما الاب فيه منبع لحياة ف ذاتو, مد للابن ثاني باه تكون فيه مصدر لحياة ف ذاتو, ²⁷و اعطاه سلطان ثاني باه يحكم. على خاطر هو ابن الانسان.²⁸ما تستغربوش من هاذا, على خاطر تجي الساعة اللي يسمعوا فيها الناس الكل اللي ف لقبورة صوتو, ²⁹و يخرجوا الناس اللي داروا الصالحات للقيامة تاع لحياة, و الناس اللي عملوا المعاصي للقيامة تاع لحساب.³⁰انا ما نجيب حتى حاجة من عندي. كيما نسمع نحكم, و الحكم تاعي قدقد, على خاطر ما نطلبش رضايتي نطلب رضاية اللي بعثني. الشهادة على الابن ³¹"اذا كنت نشهد لروحي تكون الشهادة تاعي باطلة. ³²بالصح كاين واحد اخر يشهد لي, و انا علابالي باللي الشهادة تاعو اللي يشهد بيها عليّا هي شهادة حق.³³كي بعثتوا مرسولين ليوحنا شهد للحق. ³⁴ما نعولش على الشهادة تاع انسان, بالصح نقول هاذا باه انتم تسلكوا. ³⁵كان هو المصباح الضاوي المنير, رضيتوا تفرحوا بالنور تاعو مدة قصيرة.³⁶بالصح انا عندي شهادة اقوى من الشهادة تاع يوحنا, على خاطر الاعمال اللي اعطاني الاب باه نتممها, هاذي الاعمال هي بالذات اللي تشهد باللي الاب هو اللي بعثني. ³⁷و الاب بالذات اللي بعثني هو يشهد لي. عمركم ما سمعتوا صوتو, و لا شفتوه كيفاه داير, ³⁸و لا كانت كلمتو ثابتة فيكم, على خاطر اللي بعثو هو انتم ما امنتوش بيه.³⁹فتشوا ف لكتب على خاطر تحسبوا باللي راح تلقاو فيها حياة دايمة. و هي اللي تشهد ليّا. ⁴⁰بالصح انتم ما تحبوش تجيو عندي باه تكون لكم حياة.⁴¹"انا ما نعوّلش على الجاه اللي يجيني من عند الناس, ⁴²على خاطر عرفتكم و عرفت باللي محبة الله ما هيش ف قلوبكم.⁴³انا جيت بإسم بابا و ما قبلتونيش. بالصح اللي يجيكم بإسم روحو هاذاك تقبلوه. ⁴⁴كيفاه تقدروا تامنوا و انتم تقبلوا الجاه من عند بعضاكم, بالصح ما تطلبوش الجاه اللي يجي من عند الاله الواحد؟⁴⁵ما تحسبوش باللي انا نشكي بيكم للاب. كاين شكون شكى بيكم و هو موسى, اللي حاطين عليه رجاكم. ⁴⁶على خاطر لو كان صدقتوا موسى كنتوا تصدقوني, على خاطر هو كتب عليّا. ⁴⁷اذا ما قبلتوش واش كتب هو, كيفاه تقبلوا مالا واش نقول انا؟".

Chapter 6

¹و من بعد راح يسوع للجوايه اللي ورى بحر الجليل, ل بحر طبرية. ²و راحوا ناس ياسر يتبعوا فيه على خاطر شافوا المعجزات اللي كان يديرها مع المرضى. ³و طلع يسوع للجبل و قعد ثمة هو التلامذة تاعو.⁴و كان عيد الفصح تاع ليهود قريب. ⁵هز يسوع عينيه و شاف ناس ياسر جايين عندو, قال لفيليبس: "منين نشريو الخبز باه نوكلوا هادوا الكل؟". ⁶و هو قال كيما هكا باه يجربو, على خاطر علابالو واش راح يدير.⁷رد عليه فيليبس وقال: "حتى لو كان نشريو الخبز بميتين دينار ما يكفيش حتى باه يدي كل واحد منهم طرف صغير". ⁸قال واحد من التلامذة, و هو اندراوس خو سمعان بطرس: ⁹"كاين طفل معانا هنا عندو خمسة خبزات شعير و زوز حوتات, بالصح هاذا الغاشي الكل واش يكفيه؟".¹⁰قال لهم يسوع: "قعدوا الناس". و كان لحشيش مغطي لرض, قعدوا الرجال و كانوا قريب خمسة الاف راجل. ¹¹و هز يسوع الخبزات و شكر, و فرقهم على التلامذة, و التلامذة فرقوا على الناس القاعدين. و زادوا فرقوا من هاذوك الزوز حوتات على قد ما حبوا. ¹²و كي شبعوا الناس الكل, قال للتلامذة: "لموا الخبز اللي فضال باه ما نضيعوا حتى شيء".¹³و لموا الخبز اللي فضال و كان ثناش ن قفة تاع خبز, فضالت على الناس, من خمسة خبزات شعير. ¹⁴و كي شافوا الناس المعجزة اللي دارها يسوع قالوا: "هاذا صح هو النبي اللي راح يجي للدنيا!". ¹⁵بالصح يسوع كان يعلم باللي راح يخطفوه باه يجعلوه ملك, زاد راح للجبل و قعد وحدو. المعجزة تاع المشي فوق الماء¹⁶و كي عشات لعشية هبطوا التلامذة للبحر, ¹⁷و ركبوا ف لفلوكة و كانوا رايحين ف لبحر لكفرناحوم. و طاح الليل, بالصح يسوع ما راحش معاهم. ¹⁸و هبت ريح قاوية وهاج عليهم لبحر.¹⁹و كانوا مشاو قريب ثلاثة و الا ربعة ميال, شافوا يسوع ماشي على لبحر و قريب يوصل للفلوكة, خافوا. ²⁰قال لهم يسوع: "اني انا هو ما تخافوش!". ²¹و كي حبوا يطّلعوه للفلوكة. ثم ثم لقاو ارواحهم وصلوا للمضرب اللي كانوا رايحين ليه.²²و اليوم و غدوة كي شافوا الناس اللي كانوا واقفين على شط لبحر باللي ما كانش فلوكة اخرى غير واحدة برك’ هاذيك اللي ركبوا فيها التلامذة, و باللي يسوع ما ركبش مع التلامذة ف الفلوكة بالصح التلامذة راحوا وحدهم. ²³و كي جات فلايك من طبرية للمضرب اللي كلاو فيه الخبز, وين شكر الرب.²⁴و كي شافوا الناس باللي يسوع ما هوش ثمة لا هو ولا التلامذة تاعو, ولاو ركبوا همّا ثاني ف الفلايك و راحوا لكفرناحوم يفركتوا على يسوع. انا هو خبز لحياة ²⁵و كي لقاوه على شط لبحر, قالوا لو: "يا معلم, وقتاه جيت هنا؟".²⁶رد عليهم يسوع و قال: "نقول لكم الحق الحق: انتم تحوسوا عليّا مش كي شفتوا المعجزات, بالصح على خاطر كليتوا و شبعتوا. ²⁷ما تعملوش للطعام الفاني, اعملوا للطعام الدايم للحياة الدايمة اللي يمدها لكم ابن الانسان, على خاطر هاذا هو اللي الله الاب ختم عليه".²⁸قالوا: "واش هي لعمال اللي نديروها باه يرضى علينا الله؟". ²⁹رد عليهم يسوع و قال: "هاذا هو لعمل تاع الله: كي تامنوا باللي بعثو".³⁰قالوا: "واش من معجزة تدير لنا نشوفوها و نامنوا بيك؟ واش تدير انت؟ ³¹جدودنا كلاو المن ف الصحراء, كيما مكتوب: اعطاهم خبز من السماء باه ياكلوا".³²قال لهم يسوع: "نقول لكم الحق الحق: ماهوش موسى اللي اعطاكم الخبز من السماء, بالصح بابا هو اللي يعطيكم الخبز تاع الصح من السماء. ³³على خاطر خبز الله هو اللي هابط من السماء و هو اللي يوهب حياة للعالم". ³⁴قالوا: "يا سيدي, اعطينا دايما هاذا الخبز".³⁵قال لهم يسوع: "انا هو خبز لحياة. اللي يجي عندي ما يجوعش, و اللي يامن بيّا عمرو ما يعطش حلاص. ³⁶بالصح انا قلت لكم: راكم شفتوني, و ما امنتوش. ³⁷كل واحد يمدهولي الاب يجي عندي, و اللي يجي عندي ما نخرجوش لبرى.³⁸انا هبطت من السماء, مش باه ندير رضايتي, بالصح باه ندير رضاية اللي بعثني. ³⁹و هاذي هي رضاية الاب اللي بعثني: باللي كل من مدهولي ما يضيع منو حتى شيء, بالصح نحييه ف نهار لاخرة. ⁴⁰على خاطر هاذي هي رضاية اللي بعثني: باللي كل من يشوف الابن و يامن بيه ينال لحياة الابدية, و انا نحييه نهار لاخرة".⁴¹و ليهود ما عجبهمش الحال كي قال: "اانا هو الخبز اللي نزل من السماء". ⁴²و قالوا: "ياخي هاذا هو يسوع بن يوسف, اللي نعرفو امو وباباه؟ كيفاه يقول مالا: اني نزلت من السماء؟".⁴³رد عليهم يسوع و قال لهم: "علاه ما عجبكمش الحال. ⁴⁴واحد ما يقدر يجي عندي لو كان ما يجبدوش الاب اللي بعثني, و انا نحييه نهار لاخرة. ⁴⁵على خاطر مكتوب ف كتب الانبياء: و يكونوا كلهم عارفين تعليم الله. و كل من سمع من عند الاب وتعلّم يجي عندي.⁴⁶واحد ما شاف الاب غير اللي من الاب. هاذا شاف الاب. ⁴⁷نقول لكم الحق الحق: كل من يامن بيّا تكون ليه لحياة الدايمة.⁴⁸انا هو الخبز تاع لحياة. ⁴⁹جدودكم كلاو المن ف الصحراء و ماتوا.⁵⁰هاذا هو الخبز اللي هبط من السماء, باه كل من ياكل منو ما يموتش. ⁵¹انا هو الخبز الحي اللي نزل من السماء. اللي ياكل من هاذا الخبز يحيا على الدوام. و الخبز اللي نمدو انا هو لبدن تاعي اللي نضحي بيه على جال حياة البشرية".⁵²و تجادلوا ليهود مع بعضاهم و قااوا: "كيفاه يقدر هاذا يعطينا لبدن تاعو ناكلوه؟". ⁵³قال لهم يسوع: "نقول لكم الحق الحق: اذا ما كليتوش البدن تاع ابن الانسان و ما شربتوش الدم تاعو, ما تكونش فيكم لحياة.⁵⁴اللي ياكل الجسد تاعي و يشرب الدم تاعي تكون ليه حياة دايمة, و انا نحييه ف نهار لاخرة, ⁵⁵على خاطر الجسد تاعي هو القوت تاع الصح و الدم تاعي هو الشراب تاع الصح. ⁵⁶اللي ياكل الجسد تاعي و يشرب الدم تاعي يثبت فيّا و انا فيه.⁵⁷كيما بعثني الاب الحي, و انا حي بالاب, اللي ياكلني يحيا بيّا. ⁵⁸هاذا هو الخبز اللي نزل من السماء. ماهوش كيما المن اللي كلاوه جدودكم و ماتوا. اللي ياكل هاذا الخبز يحيا بيه على الدوام". ⁵⁹قال هاذا لكلام ف المجمع و هو يعلم ف كفرناحوم. تلامذة ياسر يتخلاو على يسوع⁶⁰و كاين ياسر من التلامذة كي سمعوا هاذا لكلام قالوا: "هاذا لكلام صعيب! شكون يقدر يسمعو؟". ⁶¹و عرف يسوع باللي التلامذة تاعو ما عجبهمش الحال على هاذا لكلام, و قاللهم: "قاسكم كلامي اللي قلتو؟⁶²مالا كي تشوفوا ابن الانسان طالع وين كان من قبل! ⁶³الروح هو اللي يحيي. اما لبدن ما عندو ما يفيد. لكلام اللي نكلمكم بيه روح و حياة.⁶⁴بالصح كاين بينكم جماعة ما يامنوش". على خاطر يسوع من لول كان عارف شكون همّ اللي ما يامنوش, و عارف شكون هو اللي راح يبيعو. ⁶⁵و قال: "على هاذا قلت لكم: واحد ما يقدر يجي ليّا لو كان مش النعمة تاع الاب".⁶⁶من هاذا الوقت تلامذة ياسر اللي رجعوا لورى, و ما بقاوش يمشيو مع يسوع. ⁶⁷زاد قال يسوع للتلامذة ف ثناش: "بلاك انتم ثاني تحبوا تروحوا؟". ⁶⁸رد عليه سمعان و قال: "يا ربي, وين راح نروحوا؟ و لكلام تاع لحياه الدايمة عندك انت, ⁶⁹و احنّا امّنا و تيقنا باللي انت هو المسيح ابن الله الحي".⁷⁰رد عليهم يسوع و قال: "ياخي انا اللي خايرتكم, انتم ف ثناش؟ بالصح واحد منكم شيطان!" ⁷¹قال هاذا لكلام على يهوذا سمعان الاسخريوطي, على خاطر هاذا هو اللي راح يبيع بيه, و هو واحد م التلامذة ف ثناش.

Chapter 7

¹و كان يسوع بعد هاذا يمشي ف الجليل. و ما كانش يحب يروح لليهودية على خاطر ليهود كانوا حابين يقتلوه. ²و كان عيد المظال تاع ليهود قريب.³قالوا لو خاوتو: "روح لليهودية, باه يزيدوا يشوفوا التلامذة تاعك المعجزات اللي تعملها, ⁴ما كانش واحد يحب يظهر للناس و هو يخدم بالدرقة. كي تعمل هاذي لحوايج بيّن روحك للناس".⁵على خاطر حتى خاوتو ما كانوش يامنوا بيه. ⁶قال لهم يسوع: "ما زال ما جاش الوقت تاعي, بالصح الوقت تاعكم انتم ف كل ساعة حاضر. ⁷ما يقدرش العالم يكرهكم, بالصح انا يكرهني, على خاطر انا نشهد عليه باللي اعمالو الكل اعمال شر.⁸روحوا اطلعوا انتم عيدوا. انا مازال مانطلعش, على خاطر وقتي مازال ما وصلش". ⁹قال لهم كيما هكا و قعد ف الجليل.¹⁰و كي راحوا خاوتو, وقتها راح حتى هو للعيد, ما كانش مبين روحو بالصح راح بالدرقة. ¹¹و كانوا ليهود يفركتوا عليه لثمة, ويقولوا: "وينوهاذاك؟".¹²و كانوا الناس الكل يهدروا عليه. كاين اللي يقولوا: "او راجل صالح". و اخرين يقولوا: "لا, هاذا واحد يغلط ف الناس". ¹³بالصح حتى واحد ما كان يهدر جهار على خاطرالكل خايفين من اليهود.¹⁴و كي تناصف العيد, طلع يسوع للهيكل, و بدى يعلم. ¹⁵و استغربوا منو ليهود و قالوا: "كيفاه يعرف هاذا الكتب المقدسة, و هو ما قراش؟". ¹⁶رد عليهم يسوع وقال: "التعليم تاعي ماهوش من عندي التعليم هاذا من عند اللي بعثني.¹⁷و اللي يحب يعمل رضايتو يعرف اذا كان هاذا التعليم من عند الله, و الا انا نهدر من عندي. ¹⁸اللي يهدر من عندو يطلب المجد لذاتو هو, اما اللي يطلب المجد للي بعثو يكون صادق و ما فيه حتى ظلم.¹⁹ياخي اعطاكم موسى الشريعة؟ و ما كاين حتى واحد منكم يمشي بالشريعة! علاه حابين تقتلوني؟". ²⁰ردوا و قالوا: "انت مسكون. شكون اللي حاب يقتلك؟".²¹قال لهم يسوع: "درت حاجة برك استغربتوا الكل. ²²اعطاكم موسى الختانة, و ماهيش من عند موسى, هي من عند الجدود. و انتم تطهروا اولادكم نهار السبت.²³اذا كان الواحد يقبل يدير الطهور نهار السبت, باه ما يخالفش الشريعة تاع موسى, بالصح كي انا نشفي انسان بكلو نهار السبت ما يعجبكمش الحال؟ ²⁴ما تحكموش على الظاهر احكموا بالعدل". يسوع هو صح المسيح²⁵و قالوا جماعة من اهل اورشليم: "مش هاذا هو اللي حابين يقتلوه؟ ²⁶هاهو يهدر جهار نهار و ما قالوا لو حتى شيء! ما يكونش رياس الكهنة عرفوا باللي هو المسيح صح؟ ²⁷بالصح هاذا نعرفوه منين جا, اما المسيح واحد ما يعرف منين يجي".²⁸نادى يسوع كي كان يعلم ف الهيكل و قال: "تعرفوني و تعرفوا منين انا, ما جيتش من ذاتي, بالصح اللي بعثني هو الحق, و انتم ما تعرفوهش. ²⁹انا نعرفو على خاطر منو جيت, و هو اللي بعثني".³⁰و كانوا حابين يحكموه, بالصح واحد ما قدر يحط عليه يدو, على خاطر ساعتو مازالت ما حضرتش. ³¹و امنوا بيه ناس ياسر, و قالوا: "زعمة المسيح لو كان يجي راح يعمل معجزات اكثر من اللي دارها هاذا؟". ³²و سمعوا العلماء تاع الشريعة باللي الناس يهدروا امور كيما هاذي على يسوع, راحوا همّا و الرياس تاع الكهنة بعثوا خدام باه يحكموه.³³قال لهم يسوع: "مازال لي معاكم وقت قليل, و من بعد نرجع للي بعثني. ³⁴تحوسوا عليّا و ما تلقاونيش, و ما تقدروش تجيو وين نكون انا".³⁵قالوا ليهود بيناتهم: "وين ناوي يروح هاذا حتى ما نقدروش نلقاوه؟ بلاك حاب يروح لليهود المتغربين ف اليونان و يعلم اليونانيين؟ ³⁶وش هاذا لكلام او قال: تحوسوا عليّا و ما تلقاونيش, و ما تقدروش تجيو وين نكون انا؟".³⁷و ف اخر نهار تاع العيد اللي هو اكبر يوم وقف يسوع و نادى و قال: "اذا كان واحد عطش يجي ليّا و يشرب. ³⁸اللي يامن بيّا, كيما يقول لكتاب, تجري منو ويدان الماء الحي".³⁹قال هاذا على الروح القدس اللي راح يقبلوه المومنين بيه, وقتها الروح القدس مازال ما تمدش للمومنين, على خاطر يسوع مازال ما تمجدش.⁴⁰و ناس ياسر كي سمعوا هاذا لكلام قالوا: "صح هاذا هو النبي". ⁴¹و اخرين قالوا: "هاذا هو المسيح!". و وحايد اخرين قالوا: "بلاك المسيح يجي من الجليل؟ ⁴²ياخي لكتاب يقول باللي من سلالة داود, و من بيت لحم, القرية اللي كان يسكن فيها داود, يجي المسيح؟".⁴³و صرى انقسام بين الناس على جالو. ⁴⁴و كانوا جماعة منهم حابين يحكموه, بالصح واحد منهم ما قدر يحط عليه يدو. القياد تاع ليهود ما يامنوش⁴⁵و جاو الخدام للرياس تاع الكهنة و علماء الشريعة. اللي قالولهم: "علاه ما جبتوهش؟". ⁴⁶ردوا الخدام و قالوا: "ما كاين حتى بشر قال كلام كيما اللي قالو هاذا الراجل!".⁴⁷قالوا لهم علماء الشريعة: "بلاك غلطكم انتم ثاني؟ ⁴⁸كاش ما شفتو واحد من علماء الشريعة و الا من الرياس امنوا بيه؟ ⁴⁹غير هاذا الشعب الملعون اللي ما يفهمش الشريعة".⁵⁰قال لهم نيقوديموس, هاذاك اللي جا ليسوع ف الليل, و هو واحد منهم: ⁵¹"كاش ما نهار حكمت الشريعة تاعنا على واحد بلا ما نسمعوا منو قبل و نعرفوا واش دار؟". ⁵²ردوا عليه وقالوا: "بلاك انت ثاني من الجليل؟ اقرى و شوف! ما جا حتى نبي من الجليل".⁵³و راح كل واحد روح لدارو.

Chapter 8

¹و راح يسوع لجبل الزيتون. و ف الصبح زاد جا للهيكل, ²و جاو ليه ناس ياسر قعد و بدى يعلم فيهم. ³و جابوا ليه الكتبة و العلماء تاع الشريعة مرى حكموها تزني. و وقفوها ف الوسط⁴و قالوا: "يا معلم, هاذي لمرى تحكمت و هي تزني, ⁵و موسى ف الشريعة وصانا باللي وحدة كيما هاذي لازم تترجم بالحجار. وانت واش تقول؟". ⁶قالوا هاذا لكلام باه يجربوه, و باه يحكموا عليه حاجة يتهموه بيها. اما يسوع طابس راسو لتحت و بدى يكتب بصبعو على لرض.⁷و كي كثروا عليه, وقف على طولو وقال لهم: "شكون منكم اللي ما دار حتى غلطة يهز حجرة و يرجمها هو لول!". ⁸و زاد طابس و بدى يكتب على لرض.⁹اما همّا كي سمعوا واش قال تبخسوا و رجعوا على ارواحهم, و خرجوا واحد ورى واحد, بداو من الشيوخة حتى للخرين الكل. و بقى يسوع وحدو هو و لمرى واقفة ف الوسط. ¹⁰وقف على طولو و شاف كي ما لقى حتى واحد غير لمرى وحدها, قال لها: "يا مرى, وين راحوا الناس اللي كانوا يتهموا فيك؟ واحد ما حكم عليك؟". ¹¹قالت: "لا يا سيدي, حتى واحد!". قال لها يسوع: "حتى انا ما نحكمش عليك. روحي و ما تزيديش تغلطي". انا هو النور تاع العالم¹²و زاد كلمهم يسوع ثاني و قال: "انا هو النور تاع العالم. اللي يتبعني ما يمشيش ف الظلمة راح يكون ليه نور لحياة". ¹³قالوا لو العلماء تاع الشريعة: "راك تشهد لذاتك. الشهادة تاعك باطلة".¹⁴رد عليهم يسوع و قال: "حتى لو كان نشهد لذاتي الشهادة تاعي شهادة حق. على خاطر نعرف منين جيت و نعرف وين راح نروح. اما انتم لا تعرفوا لا منين جيت و لا وين راح نروح. ¹⁵انتم تحكموا على حساب لبدن, اما انا ما نحاسب حتى واحد. ¹⁶و حتى اذا كنت نحاسب يكون الحكم تاعي حق, على خاطر مانيش وحدي, انا مع الاب اللي بعثني.¹⁷و زيد ف الشريعة تاعكم مكتوب تثبت الشهادة بزوز شهود تاع حق: ¹⁸انا هو الشاهد لذاتي, و الاب اللي بعثني شاهد ليّا".¹⁹قالوا: "وين هو باباك؟". رد عليهم يسوع وقال: "انتم لا تعرفوني لا انا لا بابا. لو كان عرفتوني انا تكونوا عرفتوا بابا ثاني". ²⁰هاذا لكلام قالو يسوع قدام الصندوق تاع التبرعات و هو يعلّم ف الهيكل. و واحد ما حكمو على خاطر مازالت ساعتو ما حضرتش.²¹و زاد قال لهم يسوع: "انا رايح و انتم راح تطلبوني, و راح تموتوا ف المعصية تاعكم. المضرب اللي راح نروحلو ما تقدروش انتم تجيو ليه". ²²قالوا ليهود: "بلاك راح يقتل روحو حتى يقول: المضرب اللي راح نروح لو ما تقدروش انتم تجيو ليه؟".²³قال لهم: "انتم من لتحت, اما انا من لفوق, انتم من هاذي الدنيا, اما انا مانيش من هاذي الدنيا. ²⁴قلت لكم: راح تموتوا بذنوبكم, على خاطر لو كان ما تامنوش اني انا هو راح تموتوا بذنوبكم".²⁵قالوا لو: "شكون انت؟". قال لهم يسوع: "كيما قلت لكم من لول. ²⁶عندي حوايج ياسر نهدر بيها و نحكم بيها من جيهتكم, بالصح اللي بعثني هو حق. و انا نقول الشيء اللي سمعتو من عندو, هو اللي نقولو للعالم". ²⁷و ما فهموش باللي كان يهدر لهم على الاب.²⁸قال لهم يسوع: "نهار اللي تعلقوا ابن الانسان, وقتها تعرفوا باللي اني انا هو, و ما ندير حتى حاجة من عندي, نهدر برك كيما علمني بابا. ²⁹و اللي بعثني هو واقف معايا, و ما يخلينيش الاب وحدي, على خاطر دايما نعمل غير رضايتو". اولاد براهيم ³⁰و كي كان يهدر ف هاذا لكلام امنوا بيه ناس ياسر.³¹قال يسوع لليهود اللي امنوا بيه: "اذا كان بقيتوا ثابتين ف كلامي تكونوا التلامذة تاعي صح, ³²و تعرفوا الحق, و الحق هو اللي يجعلكم احرار". ³³ردوا عليه و قالوا: "احنا ولاد براهيم, عمرنا ما كنا عبيد لحتى واحد! كيفاه تقول: نوَليوْ احرار؟".³⁴رد عليهم يسوع وقال لهم: كل من يعمل المعصية يكون عبد للمعصية. ³⁵و العبد ما يبقاش ف البيت دايما. بالصح الابن هو اللي بيقى دايما. ³⁶اذا كان الابن هو اللي يعطيكم الحرية تكونوا احرار تاع الصح.³⁷انا علابالي بيكم باللي انتم ولاد ابراهيم. بالصح حابين تقتلوني على خاطر كلامي ما عندو حتى محل فيكم. ³⁸انا نهدر بالشيء اللي شفتو عند بابا, و انتم تعرفوا الشيء اللي سمعتوه من عند باباكم".³⁹ردوا عليه و قالوا: "بابانا هو ابراهيم". قال لهم يسوع: "لو كان جيتوا صح اولاد ابراهيم, كنتوا تعملوا اعمال ابراهيم! ⁴⁰بالصح انتم حابين تقتلوني, و انا انسان هدرت معاكم غير بالحق اللي سمعتو من عند الله. و هاذا الشيء ما داروش ابراهيم. ⁴¹انتم تعملوا ف عمايل باباكم". قالوا: "احنا ما راناش اولاد زنى. عندنا اب واحد و هو الله". اولاد ابليس⁴²قال لهم يسوع: "لو كان جا الله باباكم كنتوا تحبوني, على خاطر خرجت من عند الله و جيت. ما جبتش من ذاتي, بالصح هو اللي بعثني. ⁴³علاه ما تفهموش كلامي؟ على خاطر ما تقدروش تسمعوا كلامي. ⁴⁴انتم من اب هو ابليس, و تحبوا تديروا غير واش يحب باباكم. هاذاك اللي كان من لول قتال للناس, و ما ثبتش ف الحق على خاطر ما يتسعاش فيه الحق. و كي يهدر يقول غير لكذب و الكذب ف طبعو, على خاطرو كذّاب و بو الكذّاب.⁴⁵اما انا كي عدت نقول لكم ف الحق ما تامنوش بيّا. ⁴⁶شكون منكم اللي حكم عليّا غلطة؟ كي عدت نقول ف الحق علاه ما تامنوش بيّا؟ ⁴⁷اللي من عند الله يسمع كلام الله. بالصح انتم ما تسمعوش, على خاطر انتم ماكمش من عند الله". يسوع و ابراهيم⁴⁸ردوا عليه ليهود و قالوا: "مش عندنا الحق كي نقولوا عليك: انت سامري و ساكنك شيطان؟". ⁴⁹رد عليهم يسوع و قال: "ما نيش مسكون بالشيطان, بالصح انا نقدر ف بابا و اما انتم راكم تهينوا فيّا.⁵⁰انا مانيش طالب الجاه ليّا. كاين شكون يطلب و يحاسب. ⁵¹نقول لكم الحق الحق: اذا كان واحد يعمل بكلامي ما يشوفش الموت ابدا".⁵²قالوا ليهود: "ضرك تأكدنا باللي فيك شيطان. مات ابراهيم و ماتوا الانبياء الكل, و انت تقول: اللي يعمل بكلامي ما يذوقش الموت ابدا. ⁵³راح تجي انت اعظم من بابانا ابراهيم اللي مات؟ و الا خير من الانبياء اللي ماتوا. واش حاسب روحك؟".⁵⁴رد عليهم يسوع: "لو كان جيت نمجد في روحي المجد تاعي ما يكون عندو حتى معنى. بالصح بابا هو اللي يمجدني, اللي انتم تقولوا عليه باللي هو الاله تاعكم, ⁵⁵و انتم ما تعرفوهش. اما انا نعرفو. و اذا قلت باللي مانعرفوش نكون كذّاب كيما انتم, انا نعرفو و نعمل واش يقول. ⁵⁶باباكم ابراهيم كان متشوق باه يشوف نهاري هاذا و شاف و فرح".⁵⁷ردوا عليه ليهود و قالوا: "ما زال ما عندكش حتى خمسين سنة ف عمرك, و تقول شفت ابراهيم؟". ⁵⁸قال لهم يسوع: "نقول لكم الحق الحق: انا كاين من قبل ما يكون ابراهيم". ⁵⁹وقتها هزوا لحجار باه يرجموه. اما يسوع تخبى منهم و خرج من الهيكل و عدى ف وسطهم و راح هكّا.

Chapter 9

¹و كي كان معدي شاف واحد الراجل اعمى من نهار اللي ولد فيه, ²و سقساوه التلامذة و قالوا: "يا معلم, الذنب تاع شكون: تاعو هو و الا تاع والديه حتى خلق اعمى؟".³قال لهم يسوع: "لا ذنبو هو ولا ذنب والديه, بالصح باه تظهر فيه اعمال الله. ⁴لازم ندير لعمال تاع اللي بعثني ما دام الوقت نهار. قبل ما يجي الليل و حتى واحد ما يقدر يعمل. ⁵و ما دمت ف العالم انا هو النور تاع العالم".⁶قال هاذا لكلام و تفل على لرض و دار من هاذاك التفال طين و مسح بيه عينين الراجل لعمى. ⁷و قال لو: "روح اغسل ف بركة سلوام" اللي لمعنى تاع اسمها: مرسول, و راح الراجل ثمة و غسل و ولى يشوف.⁸و الجيران اللي كانوا يشوفوه من قبل اعمى, كي شافوه قالوا: "مش هاذا هو اللي كان يقعد و يطلب صدقة؟". ⁹و اخرين قالوا: "هاذا هو". و وحايد اخرين قالوا: "لا او واحد يشبهلو". بالصح هو قال لهم: "اني انا هو".¹⁰قالوا لو: "و كيفاه تحَلوا عينيك و وليت تشوف؟". ¹¹رد عليهم و قال: "واحد الراجل اسمو يسوع دار طين و طلاه على عينيا, و قال لي: روح لبركة سلوام و اغسل. و كي رحت غسلت وليت نشوف". ¹²قالوا: "و هو وين؟". قال لهم: "ما نعرف". علماء الشريعة يديروا تحقيق¹³و راحوا داو الراجل اللي كان اعمى عند علماء الشريعة. ¹⁴و كان نهار سبت وقت اللي يسوع دار الطين و حطو على عينين الراجل الاعمى. ¹⁵و زادوا سقساوه العلماء تاع الشريعة كيفاه حتى ولى يشوف, قال لهم: "حط الطين على عينيا و رحت غسلت, و انا ضرك نشوف".¹⁶و جماعة من العلماء تاع الشريعة قالوا: "هاذا الراجل ماهوش مبعوث من عند الله, على خاطر ما يحافظش على الشريعة تاع السبت". و اخرين قالوا: "كيفاه يقدر واحد مذنب يدير عجايب كيما هاذي؟". و صرى بينهم جدال. ¹⁷و زادوا قالوا للاعمى: "و انت واش تقول عليه مادام فتح ليك عينيك و وليت تشوف؟". قال: "او نبي!". ¹⁸و ليهود ما صدقوش باللي هاذاك الراجل كان اعمى و ولى يشوف حتى جابوا امو وباباه.¹⁹و سقساوهم و قالوا لهم: "هاذا هو ولدكم اللي تقولوا كان اعمى و ضرك ولى يشوف؟". ²⁰ردوا عليهم و قالوا: "احنا نعرفوا باللي هاذا ولدنا, و نعرفوا باللي ولد اعمى. ²¹بالصح كيفاه ولى اليوم يشوف ما نعرفوش. و الا شكون فتح عينيه ما نعرفوش. هو كبير ف العمر و يعرف. سقسيوه ضرك يهدر على نفسو".²²و امو باباه قالوا هاذا لكلام على خاطر كانوا خايفين من ليهود, على خاطر ليهود كانوا متحلفين باللي كل من يستعرف باللي يسوع هو المسيح يخرجوه من المجمع. ²³على هاذيك باباه و امو قالوا: "او كبير ف لعمر, سقسيوه".²⁴و زادوا عيطوا مرة اخرى على الراجل اللي كان اعمى, و قالوا لو: "احلف بالله. احنا عارفين باللي هاذا الراجل مذنب". ²⁵رد عليهم و قال: "هو مذنب و الا لا؟ هاذي ما علاباليش. علابالي بحاجة واحدة برك: باللي كنت اعمى و ضرك وليت نشوف".²⁶زادوا قالوا: "واش دار لك؟ كيفاه فتحلك عينيك؟". ²⁷رد عليهم و قال: "انا قلت لكم و ما حبيتوش تسمعوا. علاه تحبوا نزيد نقول لكم؟ بلاك انتم ثاني تحبوا توليو من التلامذة تاعو؟".²⁸سبوه وقالوا: "انت هو التلميذ تاع هاذاك, اما احنا التلامذة تاع موسى. ²⁹احنا نعرفوا باللي موسى كلمو الله, اما هاذا ما علابالناش منين جا".³⁰جاوب الراجل و قال لهم: "شوفوا لعجب! ما تعرفوش منين جا, و هو فتح لي عينياّ. ³¹و نعرفوا باللي الله ما يسمعش دعوة المذنبين. بالصح الله يسمع لواحد يتقيه و يعمل رضايتو.³²عمرها ما صرات واحد فتح عينين واحد اعمى من نهار اللي ولد. ³³لو كان ما جاش من عند الله ما كانش يقدر يعمل حتى شيء". ³⁴ردوا عليه و قالوا: "انت بكلك تولدت ف الذنوب, و جاي تعلّم فينا!". و خرجوه لبرى. لعمى الروحي³⁵و كي سمع يسوع باللي سحتوه و خرجوه, كي لقاه قالو: "تامن بابن الله؟". ³⁶رد عليه و قال: "شكون هو يا سيدي باه نامن بيه؟". ³⁷قالو يسوع: "اك تشوف فيه, اللي قاعد يهدر معاك هاذاك هو!". ³⁸رد عليه وقال: "نامن يا سيدي!". و سجد ليه.³⁹قال يسوع: "جيت باه يتحاسب هاذا العالم, باه يشوفوا العميان و يعماو اللي يشوفوا". ⁴⁰و سمعوا هاذا لكلام علماء الشريعة اللي كانوا معاه, و قالوا لو: "بلاك احنا ثاني عميان؟". ⁴¹قال لهم يسوع: "لو كان جيتوا عميان ما كان عليكم حتى ذنب. بالصح انتم تقولوا احنا نشوفوا, مالا الذنب تاعكم باقي كيما راه.

Chapter 10

¹"نقول لكم الحق الحق: اللي ما يدخلش للخرفان من الباب تاع لمراح, و يطلع من جيهة اخرى, هاذاك سارق و لص. ²اما اللي يدخل من الباب هاذاك هو الراعي تاع الخرفان.³على هاذا يحل عليه العساس, و الخرفان تسمع صوتو, و ينادي على الخرفان تاعو بالاسامي تاعها و يخّرجها. ⁴و كي يخّرج الخرفان تاعو يمشي هو قدامها, و الخرفان تتبع فيه, على خاطر تعرف صوتو.⁵اما كي يكون واحد غريب ما تمشيش وراه و تهرب منو, على خاطر ما تعرفش صوت البرانية". ⁶قال لهم يسوع هاذا لمثل بالصح هما ما فهموش واش كان يقصد بكلامو.⁷و زاد قال لهم يسوع ثاني: "نقول لكم الحق الحق: انا هو الباب تاع الخرفان. ⁸كل اللي جاو قبلي سرّاق و لصوص, بالصح الخرفان ما حبوش يسمعولهم.⁹انا هو الباب. اللي يدخل مني يمنع و يدخل و يخرج و يلقى مرعى. ¹⁰السارق يجي غير باه يسرق و يذبح و يقتل, اما انا جيت باه تكون لهم حياة و باه تكون لهم لحياة لمخيرة.¹¹انا هو الراعي الصالح, و الراعي الصالح هو اللي يضحي بحياتو على جال الخرفان. ¹²اما الخدّام اللي يخدم بالاجر, و مش كيما الراعي, الخرفان خاطياتو, هاذاك كي يشوف الذيب جاي يخلي الخرفان وحدها و يهرب, يخطفهم الذيب و يفرقهم. ¹³الخدّام بالاجر يهرب على خاطر يهموا الاجر, بالصح ما تهموش الخرفان.¹⁴بالصح انا هو الراعي الصالح, نعرف الخرفان تاعي و الخرفان تاعي تعرفني, ¹⁵كيما الاب يعرفني و انا نعرف الاب. و انا نضحي بحياتي على جال الخرفان. ¹⁶و عندي خرفان اخرين ماهيش ف لمراح هاذا, هي ثاني لازم نجيبها و تسمع صوتي, باه تكون رعية واحدة و راعي واحد.¹⁷على هاذا الاب يحبني, على خاطر نضحي بحياتي باه نزيد نرجعها. ¹⁸واحد ما ينحيلي حياتي مني, انا نضحي بيها برضايتي. عندي القدرة نحطها و عندي ثاني القدرة نرجعها. هاذي الوصية ديتها من عند بابا".¹⁹و تخالفوا ليهود مع بعضاهم على جال هاذا لكلام. ²⁰و ياسر منهم قالوا: "هاذا الراجل ساكنوا شيطان و راه يخرف, علاه تسمعوا ف كلامو؟". ²¹و اخرين قالوا: "هاذا لكلام مش تاع واحد ساكنو شيطان. علاه الشيطان يقدر يفتح عينين العميان؟". ليهود ما يامنوش²²و كي جا عيد التجديد ف اورشليم, و كان وقتها شتاء. ²³و كان يسوع يمشي ف الهيكل ف رواق سليمان, ²⁴تلموا عليه ليهود و قالوا لو: "حتى لوقتاع تخلينا معلقين؟ اذا كنت انت هو المسيح قول لنا جهار".²⁵رد عليهم يسوع و قال: "انا قلت لكم بالصح انتم ما تامنوش. و لحاجات اللي انا نديرها باسم بابا هي تشهد لي. ²⁶بالصح انتم ما تامنوش على خاطر انتم خاطيين الخرفان تاعي, كيما قلت لكم.²⁷الخرفان تاعي تسمع صوتي, و انا نعرفها و هي تتبعني. ²⁸و انا نمد لها لحياة الدايمة, و ما تموتش ابدا, و واحد ما يخطفها من يدي.²⁹بابا اللي وهبها لي هو اعظم من كل موجود, و واحد ما يقدر يخطفها من يد بابا. ³⁰انا والاب واحد". ³¹و زادوا هزوا ليهود مرة اخرى لحجار و حبوا يرجموه.³²قال لهم يسوع: "وريت لكم ياسر من الاعمال الصالحة من عند بابا. واش من حاجة منهم اللي على جالها ترجموني؟". ³³ردوا عليه ليهود و قالوا: "ما نرجموك على حتى حاجة تاع صلاح درتها, بالصح نرجموك على جال الكفر تاعك, انت بشر و تجعل ف روحك اله".³⁴قال لهم يسوع: "ياخي مكتوب في الشريعة تاعكم: انا قلت باللي راكم الهة؟ ³⁵اذا كان قال الهة على هاذوك اللي تكلموا بالوحي تاع الله, و الشريعة واحد ما يقدر يحَرفها, ³⁶كيفاه مالا تقولوا لي, انا اللي قدسني الاب و بعثني للعالم,: انت تكفر, على خاطر قلت: انا ابن الله؟³⁷لو كان ما جيتش نعمل ف اعمال بابا ما تامنوش بيّا. ³⁸بالصح انا نعمل ف اعمال بابا, اذا ما امنتوش بيّا انا امنوا بهاذي الاعمال, باه تعرفوا و تامنوا باللي الاب فيّا و انا فيه". ³⁹و زادوا حبوا يحكموه بالصح هو خرج من وسطهم.⁴⁰و زاد راح للجيهة لخرى تاع الاردن المضرب اللي كان يوحنا يعمد فيه قبل و قعد لثمة. ⁴¹و جاو ليه ناس ياسر و قالوا: "يوحنا ما دار حتى معجزة, بالصح الشيء كامل اللي قالو على هادا الراجل صحيح". ⁴²و امنوا بيه ناس ياسر لثمة.

Chapter 11

¹و كان واحد الراجل مريض اسمو لعازر, من بيت عنيا من القرية اللي تسكن فيها مريم و اختها مرثا. ²و لعازر اللي كان مريض هو خو مريم, اللي صبت الطيب على يسوع و دهنتلو رجليه بشعرها.³و بعثوا لخواتات ف زوز ليسوع يقولوا: "يا سيدي, اللي تحبو راه مريض". ⁴و كي سمع يسوع قال: هاذا لمرض ماهوش للموت, بالصح باه يتمجد بيه الله, و يتمجد بيه ابن الانسان".⁵و كان يسوع يحب مرثا و اختها و لعازر. ⁶و كي سمع باللي راه مريض زاد قعد ف المضرب اللي كان فيه نهارين اخرين. ⁷و من بعد قال للتلامذة تاعو: "هيا نزيدوا نروحوا لليهودية".⁸قالوا التلامذة: "يا معلم, كي غير كانوا اليهود حابين يرجموك, و تزيد تروح لثمة". ⁹رد عليهم يسوع و قال: "ياخي النهار فيه ثناش ن ساعة؟ و كي واحد يمشي ف الضوء تاع النهار ما يتدعثرش على خاطر يشوف ف الضوء تاع هاذا العالم,¹⁰بالصح هاذاك اللي يمشي ف الليل هو اللي يتدعثر,على خاطر ما فيهش الضوء". ¹¹قال هاذا, و من بعد زاد قال لهم: "لعازر حبيبنا رقد. بالصح انا رايح باه ننوضو".¹²قالوا التلامذة: "يا سيدي, اذا كان راقد ضرك يرتاح مالا". ¹³و كان يسوع يهدر على النوم تاع الموت, بالصح همّا حسبوه يهدر على النوم تاع الرقاد. ¹⁴وقتها قال يسوع جهار: لعازر مات.¹⁵و انا نفرح على جالكم على خاطر ما كنتش لثمة, باه تامنوا. هيا نروحوا!". ¹⁶و قال توما اللي يقولولو التومي للتلامذة خاوتو: "هيا نروحوا احنا ثاني معاه و نموتوا معاه!". انا هو لقيامة و لحياة¹⁷و كي وصل يسوع لقى باللي عندو ربعة ايام من اللي تدفن. ¹⁸و كانت بيت عنيا قريبة لاورشليم بزوز اميال. ¹⁹و كانوا يهود ياسر جاو لمرثا و مريم باه يعزيوهم ف خوهم. ²⁰و كي سمعت مرثا باللي يسوع جا راحت عرضتلو, اما مريم قعدت ف الدار.²¹و قالت مرثا ليسوع: "يا سيدي, لو كان جيت هنا راه ما ماتش خويا! ²²بالصح حتى ضرك على بالي مهما واش تطلب من عند الله يعطيك". ²³قال لها يسوع: "خوك راح يقوم".²⁴ردت عليه مرثا و قالت: "نعرف باللي راح يقوم نهار لقيامة نهار لاخرة". ²⁵قال لها يسوع: "انا هو لقيامة و لحياة. اللي يامن بيّا حتى لو كان يموت راح يحيا, ²⁶و كل من كان حي و امن بيّا ما يموتش ابدا. تامني بهاذا الشيء؟".²⁷قالت: "نعم يا سيدي, انا امنت انك انت هو المسيح ابن الله, اللي جا للعالم". لعازر يقوم من بين الموتى ²⁸و كي قالت هاذا لكلام راحت و عيطت على اختها مريم بالدرقة, و قالت لها: "المعلم او جا, و راه يعيطلك". ²⁹و هي كي سمعت وقفت تجري و راحت ليه.³⁰و مازال يسوع ما دخلش للقرية, بقى قاعد ف المضرب اللي لاقاتو فية مرثا. ³¹و هاذوك الناس اليهود اللي جاو باه يعزوا فيهم, كي شافوا مريم وقفت و خرجت تجري, تبعوها و قالوا: "اي رايحة للقبر تبكي على خوها". ³²و كي وصلت مريم عند يسوع و شافاتو, رمات روحها عند رجليه و قالت: "يا سيدي, لو كان جيت هنا راه خويا ما ماتش!".³³و كي شافها يسوع تبكي, و الناس اللي معاها يبكيو, توجَع و غاضو الحال, ³⁴و قال: "وين دفنتوه؟". قالوا: "يا سيدي, ارواح تشوف". ³⁵و بكى يسوع.³⁶قالوا ليهود: "شوفوا قداه كان يحبو!". ³⁷و جماعة منهم قالوا: "هاذا اللي فتح عينين العميان زعمى ما كانش قادر يرد الموت على لعازر؟".³⁸وزاد حزن يسوع ثاني مرة اخرى و جا للقبر, و هو مغارة و يقفلوها بحجرة كبيرة. ³⁹و قال يسوع: "هزوا الحجرة!". قالت لو مرثا اخت الميت: "يا سيدي, او عندو ربعة ايام من اللي مات راه نتان". ⁴⁰قال لها يسوع: "ياخي قلت لك: كان امنتي تشوفي المجد تاع الله؟".⁴¹و هزوا الحجرة وين كان محطوط الميت, و هز يسوع عينيه للسماء وقال: "نشكرك يا ابي, على خاطر سمعت لي, ⁴²و انا عارف باللي تسمعني دايما. بالصح على جال الناس اللي واقفين هنا قلت هاذا لكلام, باه يامنوا باللي انت هو اللي بعثتني".⁴³و كي قال هاذا لكلام عيط بصوت عالي و قال: "لعازر, ارواح لبرى!". ⁴⁴و خرج لهم الميت و يديه و رجليه مربوطين بالقماش, و وجهو مغطي بالمنديل تاع لكفن. قال لهم يسوع: "حلوه خلوه يروح". ليهود يتفاهموا باه يقتلوا يسوع⁴⁵و جماعة كبيرة من ليهود اللي جاو لمريم, و شافوا بعينيهم واش دار يسوع, و امنوا بيه. ⁴⁶و كاين منهم جماعة اللي راحوا للعلماء تاع الشريعة و قالوا لهم واش دار يسوع.⁴⁷و داروا الرياس تاع الكهنة و العلماء تاع الشريعة اجتماع و قالوا: "واش نديروا؟ هاذا الراجل يدير معجزات ياسر. ⁴⁸لو كان نخليوه ضرك الناس الكل يامنوا بيه, و يجيو الرومان يرَيْبوا الهيكل و يفنيو الامة تاعنا".⁴⁹قال واحد منهم, و هو قيافا, اللي كان رايس الكهنة ف هاذاك العام: "انتم ما تعرفوش واحدة الحاجة, ⁵⁰و ما تفهموش بالي خير لينا يموت راجل واحد من الشعب و ما تفناش الامة كاملة!".⁵¹و هو ما قالش هاذا الكلام من راسو, بالصح على خاطر حكم المنصب تاع رايس الكهنة ف هاذاك العام, تنبأ باللي يسوع راح يموت و يفدي الامة, ⁵²مش غير الامة برك بالصح ثاني باه يلم الشمل تاع ابناء الله المتفرقين و يجعلهم شعب واحد. ⁵³و من هاذاك اليوم تشاوروا باه يقتلوه.⁵⁴و حتى يسوع ما كانش يمشي جهار بين ليهود, و راح من ثمة للجوايه لقريبة للصحراء, لواحد لمدينة اسمها افرايم, و قعد هو و التلامذة تاعو لثمة. ⁵⁵و كي قرّب عيد الفصح تاع ليهود. طلعوا ناس ياسر من اهل القرى لاورشليم قبل الفصح باه يطهروا ارواحهم.⁵⁶و كانوا يفركتوا على يسوع و يقولوا بيناتهم, و همّا واقفين ف وسط الهيكل: "واش رايكم زعمى؟ يجي للعيد و الا لا؟". ⁵⁷و حتى رياس الكهنة و العلماء تاع الشريعة حطوا امر باللي كل من يعرف وين هو يخبر عليه, باه يحكموه.

Chapter 12

¹وقبل العيد تاع الفصح بستة ايام جا يسوع لبيت عنيا, المضرب اللي يسكن فيه لعازر اللي حيّاه من بين الموتى. ²و داروا لو لعشاء, و كانت مريم واقفة تخدم, و كان لعازر قاعد مع الناس و مع يسوع. ³هزت مريم قرعة تاع طيب حر غالي ياسر, وصبتها على يسوع و دهنتلو رجليه, و مسحتهم بشعرها, و فاحت ريحة الطيب ف الدار كاملة.⁴و قال واحد من التلامذة, و هو سمعان يهوذا الاسخريوطي, اللي راح يبيّع بيه و يسلمو ل ليهود: ⁵"لو كان بعنا هاذا الطيب بثلاثمياة دينار و فرقّناها على الفقراء خير؟". ⁶و هو قال كيما هكّا مش على خاطر يهموه الفقراء, بالصح على خاطر كان سارق, و كان هو اللي حاكم الخزنة تاع التبرعات و كان يهز منها.⁷قال يسوع: "خلوها! هي كانت مخبية هاذا الطيب لنهار الدفينة تاعي, ⁸اما الفقراء ام عندكم ف كل وقت, اما انا ما نكونش معاكم دايما".⁹و كي سمعوا الناس الكل باللي يسوع لثم, جاو مش باه يشوفوا يسوع برك, بالصح ثاني باه يشوفوا لعازر اللي حيّاه من بين الموتى. ¹⁰و تشاوروا رياس الكهنة باه يزيدوا يقتلوا حتى لعازر. ¹¹على خاطر بسبتو هو كانوا ناس ياسر يروحوا و يامنوا بيسوع. يسوع يدخل لاورشليم¹²و اليوم و غدوة سمعوا الناس الكل اللي جاو للعيد باللي يسوع راح يجي لاورشليم, ¹³ولاو هزوا السعف تاع النخل و خرجوا باه يعرضولو, و كانوا ينادوا و يقولوا: "اوصنا! تبارك الله على اللي جاي بأسم الرب! الملك تاع اسرائيل!".¹⁴و لقى يسوع ثمة واحد الجحش ركب عليه كيما جا ف لكتاب: ¹⁵" يا بنت صهيون ما تخافيش. هاو الملك تاعك يجي راكب فوق جحش".¹⁶و ما فهموش التلامذة هاذي الامور ف لول, بالصح كي تمجد يسوع, وقتها تفكروا بالي هاذي الاية كانت مكتوبة عليه هو, و بالي الناس داروا هاذا الشيء على جالو هو.¹⁷و كانوا الناس اللي معاه يشهدوا باللي عيط على لعازر من لقبر و حيّاه من بين الموتى. ¹⁸على هاذا الشيء ثاني جاو الناس باه يشوفوه, على خاطر سمعوا بيه باللي دار هاذي المعجزة. ¹⁹و قالوا علماء الشريعة لبعضاهم: "شوفوا كيفاه! ما فيكم حتى فايدة انتم! هاي الناس الكل راحت وراه!". يسوع يخبرهم على الموت تاعو²⁰و كانوا ثمة جماعة من اليونانيين بين الناس اللي جاو باه يسجدوا ف العيد. ²¹هاذوك جاو لفيليبس اللي من بيت صيدا ف الجليل, و سقساوه و قالوا لو: "يا سيدي, نحبوا نشوفوا يسوع". ²²راح فيليبس و قال لاندراوس, و راحوا مع بعضاهم و قالوا ليسوع.²³رد عليهم يسوع و قال لهم: "حضرت الساعة اللي راح يتمجد فيها ابن الانسان. ²⁴نقول لكم الحق الحق: لو كان الحبة تاع القمح ما تطيحش ف لرض و تموت تقعد وحدها. بالصح كي تموت تجيب ثمار اخرى ياسر.²⁵اللي يحب نفسو يفناها, و اللي يبغض نفسو ف هاذي الدنيا يربحها للحياة الدايمة. ²⁶اللي يحب يخدمني يتبعني, وين نكون انا يكون الخادم تاعي ثاني. و اللي يخدمني يكرمو الاب.²⁷نفسي متضايقة ضرك. واش نقول: يا بابا نجيني من هاذي الساعة؟ بالصح انا جيت على جال هاذا الشيء بالذات. ²⁸يا بابا مجّد اسمك!". و جا صوت من السماء يقول: "اعطيتلو المجد, و راح نزيد نمجدو!". ²⁹و الناس اللي كانوا حاضرين و سمعوا قالوا: "هاذا صوت الرعد!". و اخرين قالوا: "كان يهدر معاه ملاك!".³⁰قال لهم يسوع: "هاذا الصوت ما جاش على جالي انا, جا على جالكم انتم. ضرك راح يتحاسب هاذا العالم. ³¹و ضرك الرايس تاع هاذا العالم راح يتسحت لبرى.³²و انا نهار اللي نترفع من لرض نجبد ليّا الناس الكل". ³³قال هاذا لكلام يشير للميتة اللي راح يموتها.³⁴جاوبوه الناس و قالوا: "احنا سمعنا ف الشريعة بالي المسيح يبقى دايما, كيفاه انت تقول باللي لازم ابن الانسان يترفع؟ شكون هو هاذا ابن الانسان؟". ³⁵قال لهم يسوع: "النور ما زال معاكم مدة قليلة, امشيو مادام عندكم النور قبل ما تطيح عليكم الظلمة. على خاطر اللي يمشي ف الظلمة ما يعرفش وين يروح. ³⁶مادام عندكم النور امنوا بالنور باه توَليو اولاد النور". قال يسوع هاذا لكلام و من بعد راح و تخبى عليهم. ليهود يرفضوا الايمان بالمسيح³⁷و بالرغم اللي هو دار قدامهم معجزات ياسر, ما امنوش بيه, ³⁸باه يتم القول تاع النبي اشعياء: "يا ربي, شكون يصدق كلامنا؟ و لشكون ظهرت يد الرب؟".³⁹على هاذا الشيء ما قدروش يامنوا. على خاطر اشعياء قال ثاني: ⁴⁰"الله عمى عينيهم, و قسى قلوبهم, باه ما يشوفوش بعينيهم, و باه ما يحسوش بقلوبهم, و يتوبوا و نشفيهم".⁴¹قال اشعياء هاذا لكلام وقت اللي شاف المجد تاعو و تكلم عليه. ⁴²و رغم هاذا الكل امنوا بيه ناس ياسر حتى من رياس الشعب ثاني, بالصح كانوا خايفين من العلماء تاع الشريعة و ما قدروش يستعرفوا بيه, باه ما يخرجوهمش من المجمع, ⁴³على خاطر كانوا طالبين المجد تاع الناس اكثر من المجد تاع الله.⁴⁴نادى يسوع و قال: "اللي يامن بيّا, يأمن باللي بعثني. ⁴⁵و اللي يشوفني يشوف اللي بعثني.⁴⁶انا جيت للعالم نور, باه كل من يامن بيّا ما يبقاش ف الظلمة. ⁴⁷و اذا كان واحد سمع كلامي و ما امنش انا ما نحاسبوش, ما جيتش باه نحاسب العالم جيت باه نمنع العالم.⁴⁸و اللي ما يحبنيش و ما يقبلش كلامي عندو شكون يحاسبو. لكلام اللي قلتو هو اللي راح يحاسبو نهار لاخرة, ⁴⁹على خاطر انا ما نهدرش من راسي, بالصح الاب اللي بعثني هو وصاني بالشي اللي نقولو و الشيء اللي نهدر بيه". ⁵⁰و انا نعرف باللي لوصية تاعو هي حياة دايمة. الشيء اللي قاعد نهدر بيه, كيما قال لي الاب هكا نقول انا ثاني".

Chapter 13

¹و يسوع قبل عيد الفصح, و هو عالم باللي ساعتو حضرت باه يترفع من هاذا العالم و يروح عند الاب, و على خاطر حب اتباعو اللي ف هاذا العالم, حبهم ع لخر. ²و قعد باه يتعشى مع التلامذة تاعو, و كان الشيطان حط ف قلب يهوذا سمعان الاسخريوطي باه يروح يسلمو لليهود,³و يسوع و هو عالم باللي الاب دفع كل شيء بين يديه, و باللي راه خرج من عند الله, و عند الله يرجع, ⁴وقف على لعشاء, و نحى البرنوس تاعو, و هز منشفة حطها ف نصو, ⁵و من بعد صب الماء ف القصعة, و بدى يغسل ف رجلين التلامذة و يمسح فيها بالمنشفة اللي كانت ف نصو.⁶و كي وصل لسمعان بطرس. قالو: "يا سيد, كيفاه انت تغسل لي رجليّا!". ⁷رد عليه يسوع و قالو: "انت ما تعرفش واش قاعد ندير ضرك, بالصح من بعد تفهم". ⁸قالو بطرس: "لا ما تغسلش رجليّا ابدا!". رد عليه يسوع و قال: "لو كان ما نغسل رجليك ما يكون ليك معايا حتى نصيب". ⁹قالو سمعان بطرس: "ياسيدي, مالا ما تغسلش رجليّا برك زيد اغسل حتى يديّا و راسي".¹⁰قالو يسوع: "اللي غسل ما يحتاج غير يغسل رجليه برك, على خاطر هو بكلو طاهر. و انتم طاهرين بالصح مش كلكم". ¹¹على خاطر كان عارف شكون راح يبيعو, على هاذا قال: "ما كمش الكل طاهرين".¹²و بعد ما غسل لهم رجليهم لبس لبرنوس و قعد هو ثاني, و قال لهم: "فهمتوا الشيء اللي عملت لكم؟ ¹³انتم تقولولي معلم و سيد, و هاذي حاجة مليحة, على خاطر انا معلم و سيد. ¹⁴و اذا كنت انا المعلم و السيد و غسلت لكم رجليكم, مالا انتم ثاني لازم تغسلوا رجلين بعضاكم, ¹⁵انا اعطيت لكم مثال, باه كيما درت انا تديروا انتم ثاني.¹⁶نقول لكم الحق الحق: ما كانش عبد اعظم من سيدو, و لا رسول اعظم من اللي بعثو. ¹⁷و ضرك كي عرفتوا هاذي الحقيقة يا سعدكم كي تعملوا بيها. يسوع يخبر التلامذة بالخيانة تاع يهوذا ¹⁸"ما نقولش هاذا لكلام عليكم الكل. انا نعرف اللي خايرتهم. باه يتم المكتوب: اللي ياكل معايا الملح دار عليّا.¹⁹نخبركم اليوم بالامر قبل ما يصير, باه نهار اللي يصرى تامنوا باللي انا هو. ²⁰نقول لكم الحق الحق: اللي يقبل الناس اللي نبعثهم يقبلني انا, و اللي يقبلني انا يقبل اللي بعثني".²¹و كي قال يسوع هاذا لكلام ضاقت نفسو, و قال لهم جهار: كاين واحد منكم راح يبيّع بيّا!". ²²و بقاو التلامذة يخزروا ف بعضاهم و همّا محيرين على من كان يهدر.²³و كان واحد من لتلامذة قاعد و يسوع محضنو, كان يسوع يحبو. ²⁴دارلو سمعان بطرس اشارة براسو باه يسقسيه على شكون يهدر. ²⁵و اتكى هاذاك التلميذ على صدر يسوع و قال لو: "يا سيدي, شكون هو؟".²⁶رد يسوع وقال: "هاذاك اللي نغمس اللقمة و نمدلو!". و غمّس اللقمة و اعطاها ليهوذا سمعان الاسخريوطي. ²⁷و كي كلاها دخل فيه الشيطان. و قالو يسوع: "روح ازرب دير واش راح تدير ما تبطاش".²⁸و ما كان حتى واحد من القاعدين فهم لهدرة اللي قالها لو, ²⁹و على خاطر كان الصندوق عند يهوذا, كاين جماعة اللي حسبوا يسوع بعثو و قالو: اشري واش نحتاجو للعيد, و الا وصاه يمد صدقة للفقراء. لوصية الجديدة ³⁰و هاذاك بعدما كلى اللقمة خرج ثم ثم. و كانت الدنيا ليل.³¹و كي خرج قال يسوع: "ضرك تمجد ابن الانسان و تمجد الله فيه. ³²و اذا كان الله تمجد فيه, يعني الله راح يمجدو ف ذاتو, و يمجدو بعد شوية. ³³يا ولادي, انا راح نبقى معاكم زمان قليل. راح تفركتوا عليا, و كيما قلت لليهود نزيد نقول لكم انتم: وين رايح ما تقدروش انتم تروحوا ضرك.³⁴انا نعطيكم وصية جديدة: تحبوا بعضاكم. كيما حبيتكم انا تحبوا انتم ثاني بعضاكم. ³⁵بهاذا يعرفوا الناس الكل باللي انتم التلامذة تاعي: اذا كان عندكم محبة لبعضاكم". يسوع يقول باللي بطرس راح ينكروا³⁶قالو سمعان بطرس: "يا سيدي وين رايح؟". رد عليه يسوع و قال: "المضرب اللي راح نروحلو ما تقدرش تتبعني ليه ضرك, بالصح يجي نهار و تتبعني". ³⁷قال لو بطرس: "يا سيدي علاه ما نقدرش نروح معاك ضرك؟ انا نضحي بحياتي على جالك!". ³⁸رد عليه يسوع وقال: "تضحي بروحك على جالي؟ نقول لك الحق الحق: قبل ما يعوعش السردوك تنكرني ثلاثة مرات.

Chapter 14

¹"ما تزعزع قلوبكم. انتم تامنوا بالله امنوا بيّا. ²في بيت بابا ديار ياسر, و الا ما كنتش نقول لكم. انا نروح باه نوّجد لكم مكان, ³و كي نروح و توّجد لكم مكان نزيد نجي و نديكم عندي, باه وين نكون انا تكونوا انتم ثاني.⁴و انتم عارفين وين رايح و تعرفوا الطريق". ⁵قال لو توما: "يا سيدي, احنا ما علابالناش انت وين رايح, كيفاه نقدروا نعرفوا الطريق؟". ⁶رد عليه يسوع و قال: "انا هو الطريق و الحق و الحياة. واحد ما يجي للاب غير بيّا. ⁷كان عرفوني تعرفوا بابا ثاني. و من اليوم تعرفوه و شفتوه".⁸قال لو فيليبس: "يا سيدي, وريلنا الاب و يكفينا". ⁹قال لو يسوع: "انا معاكم هاذي المدة الكل و ما تعرفنيش ا فيليبس! اللي شافني شاف الاب, كيفاه مالا تقول لي: وريلنا الاب؟¹⁰ تامن باللي انا ف الاب و الاب فيّا؟ الهدرة اللي هدرتها لكم ما قلتاش من عندي, الاعمال اللي نعملها يعملها الاب اللي فيّا. ¹¹صدقوني اذا قلت انا ف الاب و الاب فيّا, و الا صدقوني على جال هاذيك الاعمال.¹²نقول لكم الحق الحق: اللي يامن بيّا هو ثاني يعمل الاعمال اللي نديرها انا, و يعمل ما اعظم منها, على خاطر انا رايح عند الاب. ¹³مهما واش تطلبوا باسمي يكون لكم باه يتمجد الاب بالابن. ¹⁴كي تطلبوا حاجة باسمي انا نديرها لكم. الوعد بالروح القدس¹⁵اذا كنتوا تحبوني اعملوا بالوصايا تاعي, ¹⁶و انا نطلب من الاب يعطيكم معزي اخر يقعد معاكم على الدوام, ¹⁷اللي هو روح الحق اللي ما يقدرش العالم يقبلو, على خاطر لا يشوفوا و لا يعرفوا, اما انتم تعرفوه على خاطر قاعد معاكم و يكون فيكم.¹⁸ما نخليكمش ايتامى.اني نرجع لكم. ¹⁹بعد شوية حتى العالم ما يشوفنيش بالصح انتم تشوفوني, على خاطر انا حي انتم ثاني تحياو. ²⁰ف هذاك النهار تعرفوا اني انا ف بابا, و انتم فيّا, و انا فيكم.²¹اللي يعرف لوصايا تاعي و يطبقها هاذاك يحبني, و اللي يحبني يحبوا بابا, و انا نحبو, و نبين لو ذاتي". ²²قال لو يهوذا الاخر مش الاسخريوطي: "يا سيدي, كيفاه تبين ذاتك لينا احنا و ما تبينهاش للعالم؟".²³رد عليه يسوع و قال: "اللي يحبني يطبق كلامي, و بابا يحبو, و ليه نجيو, و عندو نديروا دار. ²⁴اللي ما يحبنيش ما يطبقش كلامي. لكلام اللي تسمعوا فيه ماهوش من عندي بالصح من عند الاب اللي يعثني.²⁵هاذا لكلام اللي قلتوا كي كنت عندكم. ²⁶اما المعزي. الروح القدس, اللي راح يبعثوا الاب باسمي, هو اللي راح يعلمكم كل شيء, و يفكركم بالكلام الكل اللي قلت لكم عليه. ²⁷"نخليلكم لهناء و السلام. نوهبكم لهناء تاعي. مش كيما يمد العالم انا نمدلكم. لا تخافوا لا تتزعزع قلوبكم.²⁸سمعتوني كي قلت لكم: انا رايح و راح نرجع لكم. لو كان جيتوا تحبوني كنتوا تفرحوا على خاطر قلت لكم اني رايح للاب, على خاطر بابا اعظم مني. ²⁹قلت لكم هاذا لكلام اليوم قبل ما يصرى, باه نهار اللي يصرى تامنوا.³⁰ما بقيتش نهدر معاكم ياسر, على خاطر رايس هاذي الدنيا راح يجي و ما عندو حتى قدرة عليًا. ³¹بالضح باه يفهم العالم باللي انا نحب الآب, و الشيء اللي وصاني عليه نديروا. نوضوا هيا نروحوا من هنا.

Chapter 15

¹"انا هو الكرمة تاع الصح و بابا هو الكرّام. ²و كل عرف فيّا ما يجيبش ثمار يقصو, و كل عرف يجيب ثمار ينقيه باه يزيد يجيب ثمار اكثر من قبل.³انتم اليوم طاهرين بسبة لكلام اللي قلت لكم عليه. ⁴اثبتوا فيّا و انا فيكم. كيما العرف ما يقدرش يجيب ثمار من ذاتو لو ما يكونش لاصق ف الكرمة, هكذاك انتم ثاني ما تجيبوش ثمار لو كان ما تثبتوش فيّا.⁵انا الكرمة و انتم لعراف. اللي يثبت فيّا و انا فيه هاذا يجيب ثمار ياسر, على خاطر بلا بيّا ما تقدروا تديروا حتى شيء. ⁶اللي ما يثبتش فيّا يطَيَش لبرى كي العرف, وييبس و يلموه و يرموه ف النار, و يتحرق. ⁷اذا ثبتّوا فيّا و ثبت كلامي فيكم تطلبوا واش تحبوا يكون لكم.⁸بهاذا يتمجد بابا: كي تجيبوا ثمار ياسر و تكونوا التلامذة تاعي. ⁹انا نحبكم كيما يحبني الاب. اثبتوا ف محبتي.¹⁰اذا طبقتوا الوصايا تاعي تثبتوا ف محبتي, كيما طبقت انا الوصايا تاع بابا و نثبت ف محبتو. ¹¹قلت لكم هاذا لكلام باه تثبت الفرحة تاعي فيكم و تتم الفرحة تاعكم.¹²"هاذي هي وصايتي ليكم تحبوا بعضاكم كيما حبيتكم انا. ¹³ما كان حتى محبة اعظم من هاذي: كي لواحد يضحي بحياتو على جال حبابو.¹⁴انتم همّا احبابي اذا كان درتوا كيما وصيتكم. ¹⁵ما نزيدش نسميكم عبيد, على خاطر العبد ما يعرفش واش راح يدير سيدو, بالصح انا سميتكم لحباب على خاطر خبرتكم بالشيء كامل اللي سمعتو من عند بابا.¹⁶مش انتم اللي خايرتوني انا اللي خايرتكم, و بعثتكم باه تروحوا و تجيبوا ثمار, و تدوم ثماركم, باه يعطيكم الاب كل ما تطلبوا باسمي. ¹⁷بهاذا انا نوصيكم تحبوا بعضاكم. العالم يكره يسوع و التلامذة تاعو¹⁸"اذا كان كرهكم العالم اتفكروا باللي كرهني انا قبلكم. ¹⁹لو كان جيتوا من اهل العالم العالم يحب اماليه. بالصح على خاطر انتم ماكمش من العالم, بالصح انا خايرتكم من وسط العالم, على هاذا يكرهكم العالم.²⁰اتفكروا كلامي اللي قلت لكم: ما يكونش العبد اعظم من سيدو. اذا كان اضطهدوني انا راح يضطهدوكم انتم ثاني و اذا كان طبقوا كلامي راح يطبقوا كلامكم انتم ثاني. ²¹بالصح راهم يديروا لكم هاذا الشيء كامل على جال اسمي, على خاطر ما يعرفوش اللي بعثني. ²²لو كان ما جيتش و ما كلمتهمش, ما يكون عندهم حتى ذنب, اما اليوم ما عندهم حتى عذر على ذنبهم.²³اللي يكرهني يكره بابا ثاني. ²⁴لو كان ما درتش قدامهم اعمال حتى واحد ما يديرها غيري, ما يكون عندهم ذنب, اما اليوم شافوا بعينيهم و كرهوني انا و بابا. ²⁵بالصح باه تتم الكلمة المكتوبة اللي ف الشريعة تاعهم: بلا سبة كرهوني.²⁶و كي يجي المعزي اللي راح نبعثهولكم انا من عند بابا, روح الحق, اللي ينبثق من عند الاب, و هو راح يشهد لي. ²⁷و انتم ثاني راح تشهدوا لي على خاطر كنتوا معايا من لول.

Chapter 16

¹"قلت لكم هاذا لكلام باه ما يضعافش الايمان تاعكم. ²راح يسحتوكم من لمجامع, يجي وقت يكون فيه كل من يقتلكم يحسب روحو يدير فريضة لله.³يديروا فيكم كيما هكا على خاطر لا عرفوا الاب و لا عرفوني انا. ⁴نقول لكم هاذا لكلام حتى كان جا الوقت تتفكروا باللي قلت لكم عليه. ما حبيتش تقول لكم من قبل على خاطر كنت معاكم. الخدمة تاع الروح القدس⁵ضرك انا رايح عند الاب اللي بعثني, و واحد منكم مايسقسيني: وين رايح؟ ⁶على خاطر كي قلت لكم قلوبكم حزنت. ⁷بالصح نقول لكم الحق: خير ليكم كي نروح, على خاطر لو كان ما نروحش ما يجيكمش المعزي, بالصح اذا رحت نبعثوا يجيكم.⁸و هو كي يجي يوَبّخ العالم على المعصية و على البر و على الدينونة: ⁹اما على المعصية على خاطر ما امنوش بيّا, ¹⁰و اما على البر على خاطر رايح عند بابا و ما تزيدوش تشوفوني, ¹¹و اما على الدينونة على خاطر رايس هاذا العالم تحكم عليه.¹²"عندي امور اخرى ياسر نقول لكم عليها, بالصح ما تقدروش تستحملوا ضرك. ¹³بالصح وقت اللي يجي هاذاك, روح الحق, هو يوجهكم للحق كامل, على خاطر ما يتكلمش من ذاتو, يتكلم بكل ما يسمع, و يخبركم بالامور الجاية. ¹⁴هاذاك يمجدني, على خاطر يدي من عندي و يخبركم.¹⁵كل اللي للاب هو ليّا. على هاذا قلت: هو يدي من عندي و يخبركم. ¹⁶بعد وقت قليل ما تشوفونيش, و من بعد وقت قليل ثاني تشوفوني, على خاطر انا رايح للاب". الحزن تاع التلامذة يتبدل يولي فرحة¹⁷جماعة من التلامذة تاعو هدروا بيناتهم و قالوا: "وش هاذا اللي يقول لنا فيه: بعد وقت قليل ما تشوفونيش, و من بعد وقت قليل ثاني تشوفوني,على خاطر انا رايح للاب؟". ¹⁸و قالوا: وش هو هاذا الوقت لقليل اللي يقول عليه؟ ماعلابالناش واش قاعد يهدر!".¹⁹و علم يسوع باللي كانوا حابين يسقسيوه, قال لهم: "قاعدين تسقسيو بيناتكم, على خاطر قلت: بعد وقت قليل ما تشوفونيش, و من بعد وقت قليل ثاني تشوفوني ²⁰نقول لكم الحق الحق: انتم راح تبكيو و تنوحوا و العالم يفرح. انتم راح تحزنوا, بالصح الحزن تاعكم يولي فرحة. ²¹لمرى كي تعود تولد تحزن على خاطر ساعة لولادة جات, بالصح كي تولد الفرحة تنساها لعذاب اللي تعذباتو, على خاطر جابت انسان للدنيا.²²حتى انتم ثاني, ضرك عندكم حزن. بالصح كي نزيد نشوفكم مرة اخرى تفرحوا من قلوبكم, و واحد ما يسرق لكم الفرحة تاعكم ²³ف هاذاك اليوم ما تسقسيوني على حتى حاجة. نقول لكم الحق الحق: كل ما تطلبوه من عند الاب باسمي يعطيكم. ²⁴و حتى لضرك ما طلبتوا حتى شيء باسمي. اطلبوا تنالوا, باه تكون الفرحة تاعكم كاملة.²⁵"هدرت معاكم بالمعاني, بالصح يجي وقت وين ما نزيدش نهدر معاكم بالمعاني, بالصح نخبركم على الاب بصراحة.²⁶ف هاذاك اليوم تطلبوا باسمي. و ما نقولش باللي انا نطلب الاب على جالكم, ²⁷على خاطر الاب ف ذاتو يحبكم, كي حبيتوني, و امنتوا باللي انا خرجت من عند الله. ²⁸خرجت من عند الاب, و جيت للعالم, و نزيد نخلي العالم و نروح عند الاب".²⁹قالوا التلامذة: "اك ضرك تهدر جهار و ما تهدرش بالمعاني. ³⁰ضرك عرفنا باللي على بالك بكل شيء, و ما تسناش واحد يسقسيك. على هاذا احنا نامنوا باللي راك من عند الله خرجت". ³¹رد عليهم يسوع وقال: "ضرك وين امنتوا؟³²راح تجي ساعة, و هي جات ضرك, تتفرقوا فيها كل واحد يروح ف حالو, و تخلوني وحدي. انا مانيش وحدي الاب معايا. ³³كلمتكم بهاذا لكلام باه تكونوا هانيين من جيهتي. ف العالم راح تلقاو لعذاب, بالصح تيقنوا: انا غلبت العالم".

Chapter 17

¹قال يسوع هاذا لكلام و من بعد هز عينيه للسماء و قال: "يا بابا, هاي حضرت الساعة. مجد ابنك باه حتى ابنك يمجّدك هو ثاني, ²كي عطيت لو السلطة على كل بشر باه يوهب لحياة الدايمة لكل من وهبتهم ليه.³و هاذي هي لحياة الدايمة: كي يعرفوك انت الاله الحقيقي وحدك و يسوع المسيح اللي بعثتو. ⁴انا مجدتك على الارض. وقت اللي كملت الخدمة اللي بعثتني باه نديرها. ⁵و ضرك مجدني انت يا بابا عند ذاتك بالمجد اللي كان ليّا عندك من قبل ما يتكون العالم. يسوع يصلي من اجل التلامذة⁶"انا بينت اسمك للناس اللي وهبتهم لي من العالم. كانوا ليك انت و وهبتهم لي, و هما طبقوا كلامك. ⁷و اليوم عرفوا باللي كل ما وهبتلي هو من عندك, ⁸على خاطر لكلام اللي وهبتني انا وهبتوا ليهم, و همّا قبلوه و تيقنوا باللي من عندك خرجت, و امنوا باللي انت اللي بعثتني.⁹على جالهم همّا نطلب. مش على جال العالم, بالصح على جال اللي وهبتهم ليّا على خاطرهم ليك. ¹⁰كل اللي ليّا انا هو ليك انت, و كل اللي ليك انت هو ليّا, وانا نتمجد فيهم. ¹¹انا ما نبقاش ف العالم اما همّا باقيين فيه, و انا جاي عندك. يا بابا القدوس, احفظهم ف اسمك الناس اللي وهبتهم ليّا, باه يكونوا واحد كيما انا واياك واحد.¹²كي كنت معاهم ف العالم كنت نحفظهم ف اسمك. الناس اللي وهبتهم ليّا انا حفظتهم, و ما خسرت حتى واحد منهم غير ابن لهلاك باه يتم لكلام المكتوب. ¹³اما انا راح نجي ليك. نتكلم هاذا لكلام و انا ف العالم باه تكون الفرحة تاعي كاملة فيهم. ¹⁴انا اعطيتهم كلامك, و العالم يبغضهم على خاطر ما همش من العالم, كيما انا مانيش من هاذا العالم.¹⁵ما نطلبش تهزهم من العالم بالصح نطلب تحفظهم من شر الشرير. ¹⁶ما همش من العالم كيما انا مانيش من العالم. ¹⁷قدسهم ف الحق تاعك. كلامك هو الحق.¹⁸كيما بعثتني للعالم انا ثاني نبعثهم للعالم, ¹⁹و على جالهم انا نقدس ذاتي, باه حتى همّا يكونوا مقدسين ف الحق. صلاة يسوع من اجل كل المومنين بيه²⁰"و ما نطلبش غير على جال هاذوك برك, بالصح نطلب ثاني على جال اللي رايحين يامنوا بيّا بسبة كلامهم, ²¹باه يكونوا كلهم واحد, كيما انت يا بابا فيّا و انا فيك, باه يكونوا همّا ثاني واحد فينا, باه يامن العالم باللي راك انت هو اللي بعثتني.²²انا اعطيتهم المجد اللي انت عطيتني, باه يكونوا واحد كيما انا و اياك واحد. ²³انا فيهم و انت فيّا باه تكون الوحدة تاعهم كاملة, و يعرف العالم باللي انت اللي بعثتني, و حبيتهم كيما حبيتني.²⁴يا بابا هاذوك اللي وهبتهم لي نحب يكونوا معايا وين نكون انا, باه يشوفوا المجد تاعي اللي مديتلي, على خاطر حبيتني قبل تكوين العالم.²⁵يا بابا البار, العالم ما عرفكش, اما انا عرفتك, و هاذوك عرفوا باللي انت اللي بعثتني. ²⁶و عَرّفتهم اسمك و راح نزيد نعرّفهم اكثر, اجعل ف قلوبهم الحب اللي حبيتني بيه. و نكون انا فيهم".

Chapter 18

¹قال يسوع هاذا لكلام و خرج هو والتلامذة و عداو للجيهة لخرى لواد قدرون, و كان ثمة واحد الجنان دخل ليه هو والتلامذة. ²و كان يهوذا اللي راح يخونو يعرف هاذاك المضرب على خاطر يسوع كان دايما يقعد فيه هو والتلامذة. ³و جاب يهوذا العسكر و رجال من عند رياس الكهنة و العلماء تاع الشريعة, و راحوا لهاذاك الجنان و هما هازين مصابيح و مشاعل و سلاح.⁴و خرج يسوع و هو عالم بكل واش راح يصرى لو. و قال لهم: "على شكون تحوسوا؟". ⁵قالوا: "يسوع الناصري". قال لهم يسوع: "انا هو". و كان يهوذا اللي راح يخونو هو ثاني واقف معاهم.⁶و كي قال لهم: "اني انا هو", ساخروا لورى و طاحوا على لرض. ⁷و زاد سقساهم: "على شكون تحوسوا؟". قالوا: "يسوع الناصري".⁸رد عليهم يسوع و قال: "قلت لكم اني انا هو. كي عدتوا تحوسوا عليّا انا خلِيو هاذوا يروحوا". ⁹باه يتم لكلام اللي مكتوب: "اللي وهبتهم لي ما خسرت منهم حتى واحد".¹⁰و سمعان بطرس كان عندو سيف, جبدو وضرب بيه لخديم تاع رايس الكهنة, و نحالو وذنو ليمنى. و كان اسم الراجل ملخس. ¹¹قال يسوع لبطرس: "رجع السيف تاعك وين كان! كيفاه ما نشربش كاس لعذاب اللي جعلهالي الاب؟". قدام حنّان¹²و العسكر و القايد و الخدّام تاع ليهود حكموا يسوع و كتفوه, ¹³و اداوه لحنّان هو لول, على خاطر كان نسيب قيافا اللي كان رايس للكهنة ف هاذاك العام. ¹⁴و قيافا هو اللي دبّر على ليهود باللي خير لهم يموت راجل واحد يفدي الشعب. بطرس ينكر يسوع¹⁵و كان سمعان بطرس هو و التلميذ لاخر يتبعوا ف يسوع, و كان هاذاك التلميذ معروف عند رايس الكهنة, و دخل مع يسوع لدار رايس الكهنة. ¹⁶اما بطرس كان واقف لبرى قدام الباب. و خرج التلميذ لاخر اللي كان معروف عند رايس الكهنة, و هدر مع البواب باه يدخل بطرس.¹⁷و قالت لخديمة اللي ف لباب لبطرس: "انت ثاني واحد من التلامذة تاع هاذا الراجل؟" و هو قال: "لا مانيش انا!" ¹⁸و كانوا العبيد و الخدّام واقفين, يتدفاو على خاطر كان الحال بارد شعلوا النار, و كان بطرس واقف يتدفى معاهم. قدام رايس الكهنة¹⁹سقسى رايس الكهنة يسوع على التلامذة تاعو و على التعليم تاعو. ²⁰رد عليه يسوع وقال: "انا كنت نهدر مع الناس الكل جهار. انا كنت نعلم دايما ف المجمع و ف الهيكل اللي يتلموا فيه ليهود. و ما هدرت حتى شيء بالدرقة. ²¹علاه تسقسي فيّا انا؟ سقسي الناس اللي سمعوا واش قلت. راهم يعرفوا واش قلت لهم".²²و كي قال يسوع كيما هكا واحد من الخدّام اللي كانوا واقفين ضرب يسوع على وجهو, و قالو: "كيما هكا نردوا على رايس الكهنة؟". ²³جاوبو يسوع و قال: "اذا كان غلطت ف كلامي قلي اك غالط, بالصح انا ما غلطش علاه مالا تضرب فيّا؟". ²⁴و زاد بعثو حنّان و هو مكتف عند قيافا رايس الكهنة. بطرس يزيد ينكر زوز مرات اخرين²⁵و كان سمعان بطرس واقف يتدفى. زادوا قالوا لو: "مش انت ثاني واحد من التلامذة تاعو؟". نكر و قال: "لا خاطي انا!". ²⁶و قال واحد من العبيد تاع رايس الكهنة, و هو نسيب الراجل اللي قصلو بطرس وذنو: "علاه ما شفتكش انا كي كنت معاه ف الجنان؟". ²⁷زاد نكر بطرس مرة اخرى. و ف هاذاك الوقت بالذات عوعش السردوك. قدام بيلاطس²⁸و من بعد جابو يسوع من عند قيافا و اداوه لدار الولاية, و قتها كان الصبح. و ما دخلوش همّا لدار الولاية باه ما يتنجسوش, و يقدروا ياكلوا الفصح. ²⁹خرج لهم بيلاطس و قال لهم: "وش التهمة اللي تتهموا بيها هاذا الراجل؟". ³⁰ردوا عليه و قالوا: "لو كان ماجاش عامل الشر ما كنّاش نجيبوه عندك!".³¹قال لهم بيلاطس: "ادوه انتومّا و احكموا عليه حساب واش تقول الشريعة تاعكم". ردوا عليه ليهود و قالوا: "احنا ما نقتلوا حتى واحد هاذا الشيء محرم علينا". ³²هاذا الكل باه يتم لكلام اللي قال عليه يسوع يشر للميتة اللي راح يموتها.³³و من بعد دخل بيلاطس لدار الولابة و عيط على يسوع, و قال لو: "انت هو الملك تاع ليهود؟". ³⁴رد عليه يسوع و قال: "لكلام هاذا تقول فيه من عندك, و الا ناس اخرين قالوا لك عليّا؟". ³⁵جاوبو بيلاطس: "علاه انا من ليهود؟ امتك و ريّاس الكهنة همّا اللي جابوك ليّا. واش درت؟".³⁶رد عليه يسوع وقال: "المملكة تاعي ماهيش من هاذا العالم, لو كان جات المملكة تاعي من هاذا العالم, راهم الخدام تاعي يحاربوا باه ما نطيحش ف يد ليهود. بالصح اليوم المملكة تاعي ماهيش من هنا". ³⁷قالو بيلاطس: "مالا انت ملك؟". رد عليه يسوع و قال: "انت تقول: باللي انا ملك. انا ولدت, و جيت للعالم باه نشهد للحق. و كل من كان من اولاد الحق هاذاك يسمع صوتي".³⁸قالو بيلاطس: "وش هو الحق؟". و كي قال هاذا لكلام زاد خرج لليهود و قال لهم: "انا ما لقيت حتى ذنب ف هاذا الراجل. ³⁹من عادتكم نسيب لكم ف كل فصح واحد. تحبوا نسيب لكم الملك تاع ليهود؟". ⁴⁰بداو الكل يصيحوا بصوت واحد و يقولوا: "لا ما تسيبش هاذا سيّّب لنا باراباس!" و كان باراباس سرّاق.

Chapter 19

¹وقتها عطى بيلاطس الامر باه يسوطوا يسوع على ضهرو. ²و ضفروا العسكر تاج تاع شوك و حطوه على راسو, و لبسوه برنوس ارجواني, ³و كانوا يقولوا: "السلام عليك يا ملك ليهود!".و كانوا يضربوا فيه على وجهو.⁴زاد خرج لهم بيلاطس وقال: "انا خرجتو باه تعرفوا باللي ما لقيت فيه حتى ذنب". ⁵خرج يسوع لبرى و التاج تاع الشوك فوق راسو و البرنوس الارجواني فوق كتافو. قال لهم بيلاطس: "ها هو الراجل!". ⁶كي شافوه ريّاس الكهنة و الخدّام بداو يصيحوا و يعيطوا و يقولوا: "اصلبو! اصلبو!". قال لهم بيلاطس: "ادوه انتم و اصلبوه, انا ما لقيت فيه حتى ذنب".⁷ردوا عليه ليهود: "عندنا الشريعة, و حساب الشريعة لازم يموت, على خاطر جعل روحو ابن الله". ⁸و كي زاد سمع بيلاطس هاذا لكلام زاد خاف. ⁹و زاد دخل لدار الولاية و قال ليسوع: "شكون انت؟". بالصح يسوع ما حبش يرد عليه.¹⁰قال لو بيلاطس: "ما تردش عليّا؟ ما تعرفش باللي عندي القدرة باه نصلبك و عندي القدرة باه نسيبك؟". ¹¹رد عليه يسوع: "لو كان ما جاتكش القدرة من لفوق, ما يكون ليك عليّا حتى قدرة. على هاذا اللي سلمني ليك هو اللي تتحسب عليه المعصية اكثر".¹²و كان بيلاطس حاب يسيبوا, بالصح ليهود كانوا يعيطوا و يقولوا: "لو كان تسيب هاذا الراجل معناها انت ما تحبش قيصر. اللي يجعل روحو ملك يكون عدو لقيصر!". ¹³و كي سمع بيلاطس هاذا لكلام خرّج لهم يسوع, و قعد على كرسي الولاية و ف المضرب اللي يسموه "البلاط" و بالعبرية "جبّاثّا".¹⁴و كانوا يوّجدوا للفصح, و الساعة قريب الستة. قال لليهود: "ها هو الملك تاعكم!". ¹⁵صاحوا الكل و قالوا: "اقتلو! اقتلو! اصلبو!". قال لهم بيلاطس: "كيفاه نصلب الملك تاعكم؟". ردوا عليه ريّاس الكهنة و قالوا: "ما عندنا حتى ملك من غير قيصر!". ¹⁶وقتها اعطاهم الامر باه يصلبوه. الصلب و اداو يسوع و راحوا بيه.¹⁷خرج من ثمة و هو هاز الصليب تاعو و اداوه لواحد المضرب اسمو "موضع الجمجمة" و بالعبرية يسموه "جلجثة". ¹⁸وين صلبوه, و صلبوا معاه زوز اخرين واحد منّا و لاخر منّا, و هو ف الوسط.¹⁹و علق بيلاطس لوحة فوق الصليب. مكتوب فيها: "يسوع الناصري الملك تاع ليهود". ²⁰و ناس ياسر من ليهود قراو واش مكتوب ف هاذي اللوحة, على خاطر المضرب اللي تصلب فيه يسوع كان قريب من لمدينة. و كان مكتوب بالعبرية و اليونانية و اللاتينية.²¹و قالوا ريّاس الكهنة لبيلاطس: "ما تكتبش ملك ليهود, اكتب: هاذا الراجل قال: انا الملك تاع ليهود!". ²²رد عليهم بيلاطس: "اللي تكتب تكتب".²³و العسكر بعدما صلبوا يسوع, داو القش تاعو اللي كان لابسو وقسموه بيناتهم هما ف اربعة. كل عسكري دا حاجة. و اداو ثاني القميص. و كان قطعة واحدة بلا خياطة, منسوج من فوق للتحت. ²⁴تفاهموا ف بعضاهم و قالوا: "ما نقطعوهش, نعملوا عليه القرعة لشكون يطيح". هاذا باه تتم الاية اللي تقول: "قسمو بيناتهم قشي, و داروا القرعة على لباسي". و هاذا الشيء اللي داروه العسكر.²⁵و كانت امو , و خالتو, مريم مرة كلوبا, و مريم المجدلية, واقفين عند الصليب تاع يسوع. ²⁶و كي شاف يسوع امو, و التلميذ اللي كان يحبو واقف, قال لامو: "يامرى, هاذا ولدك". ²⁷و زاد قال للتلميذ: "هاذي امك". و من هاذاك النهار اداها التلميذ لدارو. الموت²⁸و بعد هاذا شاف يسوع باللي كل شيء كمَل, و باه يتمم الاية اللي جات ف لكتاب قال: "انا عطشان". ²⁹و كان ثمة ماعون مليان بالخل, غطسوا طرف قماش ف الخل, و زادولها الزوفا و قربوها لفمو. ³⁰و كي ذاق يسوع الخل قال: "تم كل شيء". و طابس راسو و طلّع الروح.³¹و على خاطر كانوا يوّجدوا للعيد, و باه ما تبقاش الاجساد تاع المصلوبين فوق الصليب نهار السبت, بالخصوص هاذاك السبت كان يوم عظيم. طلبوا ليهود من بيلاطس باه يكسرولهم سيقانهم و يهزوهم. ³²و جاو العسكر و كسروا سيقان الراجل لول اللي مصلوب مع يسوع و زادوا كسروا لاخر اللي معاه. ³³و كي وصلو ا عند يسوع ما كسرولوش سيقانو على خاطر لقاوه مات.³⁴بالصح واحد من العسكر بعج يسوع بالسهم على جنبو, و ثم ثم خرج منو الدم و الماء. ³⁵واللي شاف هاذا الشيء بعينيه يشهد, يشهد بالحق, و هو عارف باللي يقول ف الحق باه انتم تامنوا.³⁶و صرى هاذا الشيء باه يتم قول لكتاب: "ما يتكسر منو حتى عظم". ³⁷و جاء ف اية اخرى: "راح يشوفوا للي طعنوه". الدفينة³⁸و يوسف اللي من الرامة, و هو واحد من التلامذة تاع يسوع, جا بالدرقة على خاطر كان خايف من ليهود, و طلب من بيلاطس باه يعطيه الجسد تاع يسوع, كي وافق بيلاطس, راح و هز الجسد تاع يسوع. ³⁹و جا معاه نيقوديموس, هاذاك اللي جا ليسوع المرة لولى ف الليل, وجاب معاه ما قيمتو مياة درهم من العود و المر مخلطين.⁴⁰و مع بعضاهم هزوا الجسد تاع يسوع و لفوه ف لكفن و حطو الطيب, حساب العادة تاع ليهود كيفاه يكفنوا. ⁴¹و كان ف المضرب اللي تصلب فيه جنان, و ف الجنان كاين قبر جديد واحد ما تدفن فيه من قبل, ⁴²حطوا يسوع ثمة على خاطر القبر كان قريب, و اليهود قاعدين يوّجدوا للسبت.

Chapter 20

¹و ف اول نهار من الاسبوع جات مريم المجدلية الصباح بكري للقبر, و الدنيا مازالت ظلمة. و شافت الحجرة منحية على باب لقبر. ²راحت تجري عند سمعان بطرس و للتلميذ لاخر اللي كان يسوع يحبو, و قالت لهم: "داو الرب من لقبر, و ما نعرفوش وين حطوه!".³خرج بطرس و التلميذ لاخر و راحو للقبر. ⁴و كانوا ف زوز يجريو مع بعضاهم. و سبق التلميذ لاخر بطرس و وصل هو لول للقبر, ⁵و طل و شاف لكفن محطوط بالصح ما دخلش.⁶و من بعد وصل سمعان بطرس وراه, و دخل للقبر و شاف لكفن محطوط. ⁷و لقماش اللي يغطيو بيه الراس محطوط وحدو بعيد على لكفن, ملموم وحدو على جيهة.⁸و زاد دخل التلميذ لاخر اللي كان وصل هو لول للقبر, و شاف و امن, ⁹على خاطر مازالوا ما فهموش واش جا ف لكتاب باللي لازم يسوع يقوم من بين لموتى. ¹⁰و من بعد رجعوا هاذوك الزوز تلامذة منين جاو. يسوع يظهر لمريم المجدلية¹¹و بقات مريم واقفة قدام لقبر لبرى تبكي. و كي كانت تبكي طلت على لقبر, ¹²شافت زوز ملايكة لابسين قش ابيض قاعدين واحد ف جيهة الراس و لاخر ف جيهة الرجلين, ف لمكان اللي كان فيه الجسد تاع يسوع. ¹³قالوا لها: "يا مرى, علاش تبكي؟". قالت لهم: "داو سيدي و ما نعرفش وين حطوه!".¹⁴و كي كانت تهدر تلفتت وراها, و شافت يسوع واقف, بالصح ما عرفتوش. ¹⁵قال لها يسوع: "يا مرى, علاش تبكي؟ على شكون تحوسي؟". و حسباتو الفلاح اللي يخدم ف الجنان, قالت لو: "يا سيدي, اذا كان انت هزيتو قل لي وين حطيتو, و انا نروح نديه".¹⁶قال لها يسوع: "يا مريم". تلفتت و قالت لو: "ربوني!" اللي معناها: يا معلم. ¹⁷قال لها يسوع: "ما تمسينيش على خاطر ما زلت ما طلعتش عند بابا. بالصح روحي لخاوتي قوليلهم: اني طالع لبابا و باباكم و الهي و الهكم". ¹⁸و راحت مريم المجدلية و خبرت التلامذة باللي هي شافت الرب, و باللي هاذا واش قال لها. يسوع يظهر للتلامذة تاعو¹⁹و ف هاذاك اليوم ف لعشية, و هو اول يوم من الاسبوع, كانوا التلامذة مجتمعين و كانت البيبان مقفولة على خاطر كانوا خايفين من ليهود, جا يسوع و وقف ف الوسط و قال لهم: "السلام عليكم!". ²⁰و كي قال هاذا ورالهم يديه و رجليه, و فرحوا التلامذة على خاطر شافوا الرب.²¹زاد قال لهم يسوع: "سلام ليكم! كيما بعثني الاب انا ثاني نبعثكم". ²²و كي قال هاذا لكلام نفخ و قال لهم: "اقبلوا الروح القدس. ²³اللي تغفرولهم ينالوا الغفران, و اللي ما تغفرولهمش ما ينالوش الغفران".²⁴اما توما, واحد من بين الثناش, اللي يسميوه التومي, ماكانش معاهم كي ظهر لهم يسوع. ²⁵و كي قالوا لو التلامذة لخرين: "شفنا الرب!". قال لهم: "لو كان ما نشوفش الجرح تاع لمسامر على يديه, و نحط صبعي في الجرح, و نحط يدي على جنبو, ما نامنش".²⁶و من بعد ثمانية ايام كانوا التلامذة قاعدين لداخل و كان معاهم توما, جا يسوع و البيبان مقفولة, و وقف ف الوسط و قال: "السلام عليكم!" ²⁷و من بعد قال لتوما: "هات صبعك هنا و شوف يدي, و هات يدك و حطها ف جنبي, و ما تكونش مشكاك كون مومن".²⁸رد عليه توما و قال: "ربي و الهي!". ²⁹قالو يسوع: "على خاطر شفتني يا توما امنت! يا سعد اللي امنوا و ما شافونيش".³⁰و دار يسوع معجزات اخرى ياسر قدام التلامذة تاعو ما تكتبتش ف هاذا لكتاب. ³¹و اما هاذي اللي تكتبت هنا غير باه تامنوا باللي يسوع المسيح هو ابن الله, باه تنالوا لحياة اذا امنتوا باسمو.

Chapter 21

¹و بعد هاذا زاد ظهر يسوع للتلامذة تاعو ف بحر طبرية. و هكّا كيفاه ظهر: ²كان سمعان بطرس, و توما اللي يسموه التومي, و نثنائيل اللي من قانا الجليل, و اولاد زبدي ف ثنين, و زوز من التلامذة لخرين كانوا مع بعضاهم. ³قال لهم سمعان بطرس: "انا اني رايح نصيد". قالوا: "حتى احنا نروحوا نصيدوا معاك". و خرجوا ركبوا ف لفلوكة. بالصح ما صيدوا والو ف هاذيك الليلة.⁴و كي وصل الصبح, وقف يسوع على شط لبحر. و التلامذة ما كانوش عارفين باللي او يسوع. ⁵قال لهم يسوع: "يا لولاد كاش ما عنكم مصيد؟". قالوا: "لا!". ⁶قال لهم: "ارموا الشبكة على الجيهة ليمنى تاع لفلوكة ضرك تصيدوا". و كي رماو الشبكة كيما قال لهم, ما قدروش يجبدوها من كثرة الحوت اللي فيها.⁷قال هاذاك التلميذ اللي كان يسوع يحبو لبطرس: " هاذا او الرب!". كي سمع سمعان بطرس باللي هو الرب, لبس قشو على خاطر كان عريان, و رمى روحو ف لبحر. ⁸اما التلامذة لخرين جاو بالفلوكة, على خاطر ما كانوش بعاد على الشط غير ميتين ذراع, و كانوا يجروا ف الشبكة تاع الحوت معاهم. ⁹و كي وصلوا للشط لقاو الجمر شاعل و فوقو حوت و معاه الخبز.¹⁰قال لهم يسوع: "هاتوا من الحوت اللي صيدتوه ضرك". ¹¹طلع سمعان بطرس و جبد الشبكة للرض, مليانة بالحوت لكبير, ميا و ثلاثة و خمسين حوتة. هاذا الكل و ما تقطعتش الشبكة.¹²قال لهم يسوع: "ارواحوا تاكلوا!". و واحد من التلامذة ما قدر يسقسيه: شكون انت؟ على خاطر كانوا عارفين باللي هو الرب. ¹³وقدم يسوع و هز الخبز و اعطاهم و زاد هز الحوت ثاني و اعطاهم. ¹⁴هاذي المرة الثالثة اللي ظهر فيها يسوع للتلامذة بعدما قام من بين الموتى. بطرس يرجع للمكانة تاعو لولى¹⁵و بعد ما كلاو قال يسوع لسمعان بطرس: "ا سمعان بن يونا, انت تحبني اكثر من هاذوك؟". قال لو: "نعم يا ربي, اك عارف باللي نحبك". قالو: "ارعى الخرفان تاعي". ¹⁶و زاد قالو للمرة الثانية: "ا سمعان بن يونا, تحبني؟". قالو: "نعم يا ربي, انت عارف باللي انا نحبك". قالو: "ارعى خرفاني".¹⁷زاد قالو ثالث مرة: "يا سمعان بن يونا, تحبني؟". حزن بطرس على خاطر زاد سقساه ثالث مرة: تحبني؟ قالو: "يا ربي, انت تعلم كل شيء. و تعرف باللي نحبك". قالو يسوع: "ارعى خرفاني. ¹⁸نقول لك الحق الحق: كي كنت صغير كنت تتحزم و تروح وين تحب. بالصح كي تولي شايب انت تمد يدك و واحد اخر يحزمك. و يديك وين ما تحبش تروح".¹⁹قال يسوع هاذا لكلام و كان يشر على الميتة اللي راح يموتها بطرس و بيها يمجد الله. و كي قال هاذا زاد قالو: "تبعني".²⁰تلفت بطرس و شاف التلميذ اللي كان يسوع يحبو يتبع فيه, و هو اللي كان متكي على صدرو وقت لعشاء, و قال: "يا سيدي, شكون راح يخونك؟". ²¹كي شافو بطرس يتبع فيهم , قال ليسوع: "يا ربي, و هاذا واش راح يكون لو؟"²²قالو يسوع: "لو كان نحب نخليه يبقى حتى نجي, واش يهمك؟ انت تبعني!". ²³و تنشر هاذا لكلام بين الخاوة: باللي هاذاك التلمبذ ماهوش راح يموت. بالصح يسوع ما قالش او مش راح يموت, بالصح قال: "اذا كان حبيت نخليه يبقى حتى نجي, انت وش يهمك؟".²⁴هاذا هو التلميذ اللي يشهد بهاذا و هو اللي كتب هاذا. و عارفين باللي الشهادة تاعو حق. ²⁵و حوايج اخرى ياسر دارها يسوع, لو كان تكتبت واحدة بوحدة, ما نضنش باللي العالم كامل ف ذاتو يقدر يهزها. امين

Acts

Chapter 1

¹لكلام لول كتبتوليك يا تاوفيلس, على كل اللي بدا يسوع يعمل فيه ويعلم بيه , ²حتى للنهار اللي طلع فيه للسماء, بعد ما قدم لوصية تاعو بالروح القدس للمرسولين اللي خايرهم. ³اللي ورالهم روحو ثاني حي ب بيانات ياسر , بعد ما تألم, و هو لمدة ربعين يوم يظهر لهم, و يتكلم على الامور تاع ملكوت الله .⁴و كي كان قاعد معاهم وصاهم باه ما يخرجوش من اورشليم, بالصح تستناو " العاهد تاع الاب اللي سمعتوه مني, ⁵على خاطر يوحنا عمد بالماء, و اما نتوما راح تتعمدوا بالروح القدس غير بعد ايامات قليلة ".⁶واللي كانوا قاعدين معاه سقساوه :" يا رب, هل في هذا الوقت راح ترجع الملك لاسرائيل؟". ⁷قال لهم :"ما تقدروش تعرفوا لوقات و المواعيد اللي جعلها الاب في السلطان تاعو, ⁸بالصح راح تنالوا قوة كي يحل عليكم الروح القدس , و تكونوا ليا شهود في اورشليم و في كل ليهودية و السامرة و لاخر الارض".⁹و كي قال هذا ترفع قدامهم و هما يشوفوا. وحجباتو سحابة على عينيهم. ¹⁰و كي كانوا هما يشوفوا للسماء و هو رايح لها ظهرولهم زوز رجال لابسين لبيض, ¹¹و قالوا:" يا رجال الجليل , واشبيكم واقفين تشوفوا للسماء؟ يسوع هذا اللي ترفع عليكم للسماء كيما شفتوه رايح ليها هكذاك راح يرجع منها ".¹²و في هذاك الوقت رجعوا لاورشليم بعد ما كانوا في الجبل اللي اسمو جبل الزيتون , الي قريب من اورشليم على طريق يقدروا يعديوها نهار السبت. ¹³و كي دخلوا لاورشليم طلعوا للسطح اللي كانوا ساكنين فيها : بطرس ويعقوب ويوحنا واندراوس و فيليبس و توما وبرتولماوس و متى ويعقوب بن حلفي و سمعان الغيورو يهوذا خو يعقوب. ¹⁴و كانوا كلهم يداوموا على الصلاة بقلب واحد , و النساء اللي كانوا معاهم , مريم ام يسوع, و خواتاتو. متياس يتحط في مكان يهوذا¹⁵و في هاذيك ليام وقف بطرس في وسط التلامذة, و كان قريب مية و عشرين واحد قاعد. و قال لهم : ¹⁶"يا خاوة يا رجال, كان لازم يصرى الشيء اللي مكتوب و اللي سبق الروح القدس و قال عليه على لسان داود, على يهوذا اللي ولى دليل للي حكموا يسوع .¹⁷كي كان محسوب بيناتنا وكانت عندو قسمة في هاذي الخدمة. ¹⁸وهذا راح شرى جنان بدراهم الخيانة , اللي فيه تكب على وجهو و تقسم من الوسط و طاحت مسارنو كاملة على برى. ¹⁹و الناس الكل تاع اورشليم سمعوا باللي صرى , و سماو الجنان باللغة تاعهم " جنان دمخ" يعني: جنان الدم .²⁰على خاطر مكتوب في كتاب المزامير: تخلى دارو و ما يسكن ساكن فيها. و خدمتوواحد اخريديها.²¹مالا لازم علينا نخايروا واحد من الرجال اللي كانوا متلميين معانا في كل المدة اللي قعد فيها الرب يسوع معانا . ²²من نهار اللي عمدو يوحنا حتى لليوم اللي ترفع فيه علينا, باه يولي واحد منهم شاهد معانا على قيامتو من بين الموتى ". ²³و خايروا زوز: يوسف اللي اسمو برسابا و يعيطولو يوستس, و متياس.²⁴و صلوا لله وقالوا :" يا ربي يا عارف قلوب الناس الكل, من هاذو في زوز وريلنا شكون هو اللي خيارتو , ²⁵باه يهز القرعة تاع هاذي الخدمة و الرسالة اللي تعدى عليها يهوذا اللي راح للمكان اللي يستاهلو". ²⁶و من بعد داروا القرعة تاعهم و جات على متياس, و تحسب مع الرسل الحداش.

Chapter 2

¹و كي وصل نهار الخمسين كانوا الخاوة الكل متلميين بنفس واحدة . ²و على غرادة جاء صوت من السماء تقول عليه ريح قاوية قاعدة تهب و ملىء الدار كاملة وين كانوا قاعدين , ³و ظهرت لهم لسانات كي اللي من النار و حطت على راس كل واحد فيهم . ⁴و كلهم تملاو بالروح القدس, و بداو يتكلموا بلغات اخرى حساب واش عطاهم الروح باه ينطقوا .⁵و كانوا رجال يخافوا ربي من ليهود من كل امة في العالم جاو لاورشليم في هاذاك الوقت. ⁶و كي صرى هاذاك الصوت , تلم الغاشي و تحيروا, على خاطر كل واحد كان يسمع فيهم يتكلموا باللغة تاعو. ⁷دهشوا و استغربوا وقالوا لبعضاهم : يا ترى هاذم الكل اللي يهدروا ما همش من الجليل؟⁸مالا كيفاه احنا نسمعوا كل واحد لغة لبلاد اللي تولد فيها؟ ⁹هاذوا فرتيين و ماديين و عيلاميين, و اللي ساكنين في بلاد ما بين الويدان و اليهودية و كبدوكية و بنتس و اسيا ¹⁰و فريجية و بمفيلية و مصر, و جوايه ليبيا اللي في جيهة القيروان , و الرومانيين المستوطنين يهود و برانية , ¹¹كريتيين وعرب, نسمعوا فيهم يتكلموا بلغتنا بعجايب الله !".¹²و تحيروا كلهم و خافوا وقالوا لبعضاهم :" واش زعمة يكون هاذا ؟". ¹³وكاين وحايد اخرين اللي يستهزاو بيهم قالوا :" هاذوا راهم سكرانين خابطينها". بطرس يهدر في وسط الغاشي¹⁴ووقف بطرس و معاه الاحداش و رفع صوتو و قال لهم :" يا خاوتي ليهود و اللي ساكنين في اورشليم كلكم , باه يكون في معلومكم و اصنتوا لكلامي, ¹⁵على خاطر هاذما ما همش سكرانين كيما راكم حاسبين , على خاطر راهي الثلاثة تاع النهار .¹⁶بالصح هذا واش قال عليه يوئيل النبي: ¹⁷يقول الله: و يكون في اخر ليام اني نسكب من روحي على كل بشر , يتنبأوا ولادكم و بناتكم , و شبابكم يشوفوا منامات و شيوختكم يحلموا حلمات .¹⁸وعلى الرجال و على النساء نسكب روحي في هاذيك ليامات يوليو يتنبأوا . ¹⁹و نمد عجايب في السماء من فوق و ايات على لرض من تحت : دم و نار و سحاب و دخان .²⁰و تظلام الشمس و القمرة تولي كي الدم , قبل ما يجي نهار الرب العظيم المعروف. ²¹و يكون كل من يدعي باسم الرب يمنع .²²" يا خاوتي الاسرائليين اسمعوا هاذي لقوال : يسوع الناصري راجل تبين لكم من عند الله بقوات و عجايب عملها الله على يديه في وسطكم , كيما راكم على بالكم ثاني . ²³هذا اديتوه مسلم بالمشورة تاع الله المحتمة و حساب علمه المسبق , و بيدين اثمين صلبتوه و قتلتوه . ²⁴اللي الله قومو معاكس اوجاع الموت , على خاطر الموت ما يقدرش يحكمو.²⁵على خاطر داود يقول فيه: كنت نشوف في ربي قدامي في كل وقت , راه على يميني باه ما نتزعزع. ²⁶على هاذيك يفرح قلبي و يتهلل لساني . و حتى بدني راح يرقد على رجاه .²⁷على خاطرك ما تخليش روحي في الهاوية و ما تخليش القدوس تاعك يقيسو فساد . ²⁸وريتلي مسارب لحياة و راح تفرحني كي نشوف وجهك.²⁹يا خاوتي, يجينا عادي كي نقولولكم جهار على رايس جدودنا داود بلي راه مات و تدفن, و القبر تاعو مازال عندنا حتى لليوم هذا . ³⁰و كي كان نبي , عرف بلي الله حلف ليه بالعاهد بلي من صلبه يجيب المسيح حساب الجسد باه يتربع على الكرسي تاعو, ³¹سبق و شاف و هدر على قيامة المسيح, انه ما يخليش روحو في الهاوية و لا يقيس الجسم تاعو فساد.³²يسوع اللي قومو الله من بين الموتى و احنا كلنا رانا شهود . ³³و كي ترفع على ليمين تاع الله, و ادا الوعد تاع الروح القدس من عند الاب , سكب هذا اللي انتم ضرك تشوفوا فيه و تسمعوا فيه .³⁴على خاطر داود ما طلعش للسماوات. و هو بذاتو يقول : قال الرب لربي : اجلس على ليمين تاعي ³⁵حتى نحط عديانك تحت رجليك . ³⁶مالا باه يكون في علمكم بالحق يا بني اسرائيل بلي الله جعل هذا يسوع , اللي صلبتوه انتوما , جعلو رب و مسيح ".³⁷و كي سمعوا هذا لكلام تقاسوا في قلوبهم , و قالوا لبطرس وللرسل كاملين :" واش نعملوا يا رجالة يا خاوتنا؟". ³⁸قال لهم بطرس:"توبوا و كل واحد منكم يتعمد على اسم يسوع على جال غفران الذنوب, وقتها تقبلوا المعطى تاع الروح القدس. ³⁹على خاطر العاهد هو ليكم ولاولادكم و لكل اللي راهم بعاد كل من يعيطلوا الرب الاهنا".⁴⁰و كان يشهد لهم باقوال اخرى ياسرو يشجع فيهم ويقول : " امنعوا من هذا الجيل المنافق". ⁴¹و قبلوا لكلام تاعو بالفرحة , و تعمدوا, و انضم في هاذاك اليوم قريب ثلاثة الاف نفس . المومنين متشاركين ⁴²و كانوا يداموا على التعليم تاع الرسل , واللمة تاع المومنين , وكسر الخبز, و الصلاوات .⁴³و استولات الرهبة على كل نفس. و كانت عجايب و معجزات كبار تصرى على يد الرسل. ⁴⁴و كل اللي امنوا كانوا مع بعضاهم , و كانوا متشاركين في كل شيء عندهم . ⁴⁵و كانوا يبيعوا املاكهم و الحوايج الغالية اللي عندهم و يقسموها بيناتهم الكل, كل واحد يدي واش يحتاج .⁴⁶وكانوا مداومين على الهيكل بنفس واحدة كل يوم . و حتى في الديار يكسروا الخبز و ياكلوا الماكلة و هما في البهجة والبساطة , ⁴⁷مسبحين الله, و الشعب كامل حن عليهم . وكان ربي كل يوم يزيد للكنيسية الناس الي يقبلوا الخلاص .

Chapter 3

¹و طلع بطرس ويوحنا مع بعضاهم للهيكل وقت صلاة التسعة . ²و كان واحد الراجل عايب من اللي تولد و كانوا يهزوه على كتافهم, و يحطوه كل يوم قدام الباب تاع الهيكل اللي يقولوا "باب الجميل" باه يطلب صداقة من عند الناس اللي يدخلوا للهيكل. ³و كي شاف بطرس و يوحنا داخلين للهيكل طلب من عندهم صداقة .⁴بقا بطرس هو ويوحنا يخزروا معاه , و قال لو بطرس :"شوف معانا!". ⁵شاف فيهم و بقى يستنى كاش ما يحنوا عليه بحاجة . ⁶قال لو بطرس :" ما عندي لا فضة ولا ذهب , بالصح نمدلك الشيء اللي نكسبو: باسم يسوع المسيح الناصري اوقف امشي !".⁷و حكمو من يدو ليمنى و وقفو, و في ساع الراجل تقوات رجليه و ركايبو, ⁸و نقز و وقف وولى يمشي , و دخل معاهم للهيكل وهو ينقز و يحمد في ربي.⁹و الناس الكل شافوه وهو يمشي ويسبح في ربي . ¹⁰و عرفوه بلي هاذاك اللي كان قاعد يطلب صداقة في باب الهيكل الجميل , و دهشوا خلاص و حاروا من الشيء اللي صرى لو. الخطبة تاع بطرس في وسط الهيكل¹¹و كان الراجل العايب الي رتاح مع بطرس و يوحنا ما سيَبهمش و جاو الناس يجريو للرواق اللي اسمو" رواق سليمان " وتلموا عليهم و الكل كانوا حايرين . ¹²و كي شافهم بطرس كيما هكذاك قال لهم :" يا رجال اسراييل, واشبيكم تتعجبوا من هاذا الشيء اللي صرى؟ و علاه راكم تخزروا فينا تقول بقوتنا والا بالتقوى تاعنا جعلنا هاذا الراجل يمشي؟¹³راه الاله تاع ابراهيم و اسحاق و يعقوب, اله جدودنا, مد المجد لفتاه يسوع, اللي انتوما سلمتوه و نكرتوه قدام بيلاطس, وهو كان حاب يسيْبو. ¹⁴بالصح انتوما نكرتوا القدوس البار, و طلبتو منو يخرج لكم واحد قتال ارواح.¹⁵و قتلتوا رايس لحياة , اللي الله قوْمو من بين الموتى, و احنا رانا شهود على هاذا الشيء. ¹⁶و بالايمان باسمو, هو اللي رجع القوة لهذا الراجل اللي تشوفوا فيه و اللي تعرفوه مليح, الايمان بيسوع هو اللي رتحو قدام عينيكم الكل .¹⁷بالصح يا خاوتي , انا علابالي باللي انتم و الرياس تاعكم عملتوا هاذا الشيء بلا ما تعرفوا . ¹⁸و الله تمم الشيء اللي قال عليه من قبل على فم الانبياء تاعو الكل , بلي المسيح راح يتألم .¹⁹امالا توبوا و ارجعوا باه تتمحى ذنوبكم, و باه يفرج عليكم ربي من عندو. ²⁰كي بيعث لكم المسيح اللي عينو من قبل ليكم انتوما.²¹اللي لازم يبقى في السماء, حتى يجي الزمان اللي يرجع فيه كل شيء, كيما قال الله من بكري خلاص على فم الانبياء تاعو الطاهرين. ²²قال موسى لجدودنا: راح بيعث لكم الرب الهكم نبي من خاوتكم كيما انا. اسمعوا ليه في كل ما يكلمكم بيه. ²³و اللي ما يسمعش ليه يفنى من وسط الشعب.²⁴و جميع لنبياء من صموئيل و روح, الي هدروا الكل و تنبأوا على هاذي ليامات. ²⁵و انتوما راكم اولاد لنبياء, و الله عاهد جدودنا بالعاهد كي قال لبراهيم: بالذرية تاعك راح يتباركوا الشعوب تاع لرض كاملة. ²⁶و في لول ليكم انتم, كي قوم الله فتاه يسوع من بين الموتى, بعثو براكة ليكم باه يرد كل واحد فيكم على الشرور اللي قاعد يدير فيها .

Chapter 4

¹و هما مازالوا يهدروا مع الغاشي, دخلوا عليهم الكهنة و قايد العسكر تاع الهيكل و معاهم الصدوقيين, ²و ماكانش عاجبهم الحال كي كانوا يعلموا ويقولوا للناس بلي يسوع قام من بين الموتى. ³حكموهم و بيتوهم في الحبس حتى لغدوة على خاطر قريب يطيح الليل. ⁴و كاين ياسراللي امنوا من الناس اللي سمعوا الكلمة, و وصلوا قريب لخمسة الاف راجل.⁵و اليوم وغدوة تلموا رياس ليهود و الشيوخة و الكتبة في اورشليم ⁶معاهم حنانيا رايس الكهنة و و قيافا و يوحنا و الاسكندر, و جميع الرياس تاع الكهنة. ⁷و كي حطوهم في الوسط و بداو يسقسِيو فيهم :"بواش من سلطة و بواش من اسم درتوا انتوما هاذا الشيء؟".⁸وقتها تملىء بطرس من الروح القدس و قال لهم :" يا رياس الشعب وشيوخة اسراييل, ⁹اذا راكم اليوم تسقسيو فينا على الخير اللي درناه لواحد مريض, و تحبوا تعرفوا كيفاه ارتاح, ¹⁰يكون في علمكم و في علم شعب اسراييل كامل, بلي باسم يسوع المسيح الناصري, اللي صلبتوه انتوما, و اللي قومو الله من بين الموتى, بيه هو اللي هاذا الراجل واقف قدامكم اليوم صحيح .¹¹هاذا هو: لحجر اللي حقرتوه نتوما البنايين, ولى هو راس الزاوية. ¹²من غيرو هو ما كان حتى واحد يقدر يخلص. على خاطر ما كان حتى اسم واحد اخر تحت السماء, تمد للناس اللي بيه يقدروا يمنعوا".¹³و كي شافوا الشجاعة تاع بطرس و يوحنا, و بلي هما ناس من عامة الشعب ماعندهم حتى علم, تعجبوا. وعرفوا بلي كانوا مع يسوع. ¹⁴بالصح كي زادوا شافوا هاذاك الراجل اللي ارتاح واقف معاهم, ما لقاو واش يقولوا.¹⁵و طلبوا منهم يخرجوا لبرة حتى يتشاوروا بيناتهم ¹⁶و قالوا:"كيفاه نديروا معاهم؟ على خاطر باينة للناس الكل بلي صرات معجزة على يديهم. و ما عندنا كيفاه ننكروا. ¹⁷بالصح باه ما تزيدش تتنشر بين الناس, نزَيْروا عليهم باه ما يزيدوش يهدروا مع حتى واحد على هاذا الاسم". ¹⁸عيطولهم و وصاوهم باه ما يزيدوش خلاص يجبدوا هاذا الاسم على فوامهم, و ما يعلموش باسم يسوع.¹⁹قال لهم بطرس ويوحنا:" احكموا و قولولنا من الاحسن نطيعوكم انتوما و الا نطيعوا الله. ²⁰على خاطر احنا ما نتكلموا كان بالشيء اللي شفناه و سمعناه".²¹و زادوا حذروهم و سيبوهم و و ما لقاو كيفاه يعاقبوهم على خاطر خافوا من الشعب, اللي كلهم كانوا يحمدوا في ربي على الشيء اللي صرى, ²²على خاطر الراجل الي صراتلو المعجزة هاذي, كان فايت الربعين سنة. صلاة المومنين²³و بعد ما سيبوهم رجعوا لصحابهم و خبروهم بالشيء اللي قالوه رياس الكهنة و الشيوخة. ²⁴كي سمعوهم , هزوا اصواتهم لله بقلب واحد وقالوا:"يا سيدي يا ربي, انت هو الاله اللي خلق السماء ولرضو لبحر و كل ما فيهم, ²⁵انت اللي قلت على فم داود عبدك:علاه ثارت الامم و الشعوب في الباطل تخمم؟²⁶سلاطين لرض, و رياس تتلم على الله و على مسيحو تتفاهم .²⁷على خاطر صح تلموا على فتاك القدوس تاعك يسوع, اللي جعلتو مسيح, و تفاهم هيرودس و بيلاطس البنطي وبني اسراييل والغرباء, ²⁸باه يعملوا الشيء اللي قضات بيه مشيئتك من قبل باه يكون.²⁹يا ربي شوف للتهديدات تاعهم, و امنحنا باه نتكلموا بكلامك بكل شجاعة, ³⁰و مد يدك للشفاء, و اعمل ايات و عجايب باسم فتاك القدوس يسوع". ³¹و كي كانوا يصليوْ تزعزع لمكان اللي كانوا متلميين فيه, و كلهم تملاو من الروح القدس, و كانوا يتكلموا بكلام ربي بشجاعة. المومنين يتشاركوا في الممتلكات تاعهم³²و الناس اللي امنوا كان عندهم قلب واحد و نفس واحدة, و ما كان حتى واحد يقول بلي الشيء اللي يملكو هو ليه وحدو, بالصح كان كلش شركة بيناتهم. ³³و كانوا الرسل يوصلوا الشهادة على القيامة تاع يسوع بقوة كبيرة, و كانت النعمة تاع ربي فايضة عليهم الكل,³⁴و ما كان بيناتهم حتى واحد محتاج, على خاطر كل اللي كانت عندهم ديارو جنانات كانوا يبيعوها, و يجيبو دراهمها, ³⁵و يحطوها عند رجلين الرسل, و تتوزع كل واحد على قد الاحتياج تاعو.³⁶وحتى يوسف اللي سماوه الرسل برنابا, اللي معناه ابن التشجيع, و هو من ذرية لاوي عندو الجنسية القبرصية, ³⁷كان عندو جنان باعو, وجاب دراهمو وحطهم عند رجلين الرسل.

Chapter 5

¹و كان واحد الراجل اسمو حاننيا, ومرتو اسمها سفيرة, باع واش كانوا يملكوا ²و نقَّص من الدراهم و كانت مرتو على بالها, و جاب الدراهم اللي بقاو وحطهم عند رجلين الرسل.³قالو بطرس:"قول لي يا حنانيا علاه دخل الشيطان في قلبك و حبيت تكذب على الروح القدس و تسرق من السومة تاع الجنان؟ ⁴موش لوكان قعد ما بعتوش يبقى لك؟ و حتى كي تباع, ما كنتش قادر تخلي دراهمو ليك؟ وعلاه خممت هكذا في قلبك واشبيك؟ راك ماكذبتش على الناس بالصح كذبت على الله". ⁵و كي سمع حنانيا هاذا لكلام طاح و طلعت روحو مات . و الناس اللي كانوا لثم كي سمعوا خافوا. ⁶و وقفوا وحايد من الشبان و كفنوه و خرجوا داوه دفنوه.⁷من بعد قريب مدة ثلاثة سوايع, دخلت مرتو, و ما كانتش عارفة بالشيء اللي صرى لراجلها. ⁸قال لها بطرس: " قولي لي هاذي هي السومة اللي بعتوا بيها الحقل؟". قالت لو: "نعم , هاذي هي سومتو".⁹قال لها بطرس: " وعلاه عليكم تفاهمتوا باه تجربوا الروح تاع الله؟ هاهما الرجال اللي دفنوا راجلك عند الباب, و راح يزيدوا يهزوك انتي ثاني". ¹⁰في دقيقتها طاحت عند رجليه و طلعت حتى هي روحها وماتت. و كي دخلوا الشبان لقاوها ميتة ,هزوها هي ثاني و كفنوها و داوها دفنوها بحذى راجلها. ¹¹و صرى خوف كبير في الكنيسية كلها و في الناس اللي سمعوا بالشيء اللي صرى. الرسل يشفيوْ ناس ياسر¹²وجرات على يد الرسل عجايب و معجزات ياسرفي سط الشعب. و كانوا كلهم يقعدوا بقلب واحد في رواق سليمان. ¹³وحتى واحد من برى ما قدر يدخل في وسطهم , وكانوا الناس الكل يقادروهم .¹⁴و كانوا المومنين بالمسيح يكثروا و يزيدوا , نساء ورجال, ¹⁵حتى ولاو الناس يهزوا في المرضى اللي عندهم بالفراشات و السرَّة و يحطوهم في الطريق, باه كي يعود بطرس معدي يظلل بالخيال تاعوعلى المرضى يبراو. ¹⁶و تلم الغاشي تاع المدن المجاورة لاورشليم جايبين معاهم المرضى و اللي مسكونين بالجنون و كانوا كلهم يرتاحوا. الرسل يتعرضوا للاضطهاد¹⁷و زاد الحقد تاع رايس الكهنة, هو و جماعة الصدوقيين اللي معاه , ¹⁸راحوا حكموا الرسل و رماوهم في الحبس لكبير.¹⁹بالصح ملاك الرب جاء في الليل و حل البيبان تاع الحبس و خرجهم ²⁰وقال لهم : "روحوا اوقفوا في وسط الهيكل و كلموا الشعب بكل لكلام تاع لحياة الجديدة". ²¹داروا واش قال لهم و دخلوا للهيكل مع الصباح بكري و بداو يعلموا. و رايس الكهنة و الناس اللي معاه, لموا المجلس و الشيوخة تاع الشعب, و بعثوا خدامين للحبس باه يجيبوا الرسل.²²و كي وصلوا للحبس ما لقاوهمش, رجعوا للمجلس ²³و قالوا لهم :" لقينا الحبس مقفول مليح و العساسة واقفين قدام البيبان تاع الحبس, و كي حلينا و دخلنا ما لقينا حتى واحد الداخل".²⁴و كي سمع الكاهن و قايد العسكر تاع الهيكل هاذا لكلام, دخلوا في بعضاهم وحاروا كيفاه هاذا الشيء يصرى؟ ²⁵و من بعد جاء واحد وقال لهم : " الرجال اللي حطيتوهم في الحبس راهم واقفين يعلموا في الشعب في الهيكل ".²⁶وقتها راح قايد العسكر مع رجالو, و جابوهم بشوية بلا عنف, على خاطر خافوا من الشعب لا يرجمهم. ²⁷و وقفوهم في وسط المجلس. وسقساهم رايس الكهنة ²⁸ و قال: "ياخي قلنا لكم ما تعلموش بهاذا الاسم خلاص؟ بالصح انتوما نشرتوا التعليم تاعكم في اورشليم كاملة, وتحبوا تلفقولنا التهمة بلي احنا قتلنا هاذا الراجل".²⁹تكلم بطرس و الرسل و قالوا: "لازم علينا نطيعوا ربي اكثر من الناس. ³⁰اله جدودنا قوَّم يسوع من الموت اللي انتوما قتلتوه و علقتوه على الخشبة. ³¹هو اللي الله رفعو و حطو على ليمين تاعو وجعلو رايس و مخلص, باه ينعم على اسراييل بالتوبة و مغفرة الذنوب. ³²و احنا رانا شهود على هاذي الامور, و يشهد ثاني حتى الروح القدس اللي مدو الله للناس اللي يطيعوه".³³و كي سمعوا هاذا لكلام زادوا تغشوا عليهم اكثر و قرروا باه يقتلوهم. ³⁴بالصح وقف واحد منهم راجل فريسي اسمو غمالاييل, معلم تاع الشريعة, و الناس الكل يقادروه, طلب من الرسل باه يخرجوا شوية حتى يتشاوروا بيناتهم.³⁵و قال لهم : " يا بني اسراييل ردوا بالكم تديروا الشيء اللي راكم تفكروا فيه مع هاذم الرجال. ³⁶شوفوا قبل جا توداس و قال على روحو: بلي هو حاجة كبيرة و تلموا عليه قريب اربعمية راجل, و من بعد تقتل و تفرقوا الناس اللي كانوا معاه و فضت حكايتهم وما بقات لهم حتى جرة . ³⁷و من بعد جا يهوذا الجليلي ايامات الاحصاء, و جر وراه ناس ياسر. و هاذاك ثاني تقتل, و تفرقت جماعتو.³⁸و انا نقول لكم: بعدوا على هاذم الناس و خليوْهم على ارواحهم! على خاطر كان هاذا الامرو الا هاذي الخدمة من عند الناس راح تزول, ³⁹و اذا كان من عند الله انتوما ما تقدروش تنحيوه, و الا تلقاو ارواحكم معاديين الله ثاني".⁴⁰ولاو خذاو برايو. و عيطوا على الرسل و جلدوهم, و حذروهم باه ما يزيدوش يتكلموا باسم يسوع, ⁴¹بالصح هما روْحوا من المجلس فرحانيين, على خاطر ربي لقاهم يستاهلوا باه يقبلوا الذل على جال اسمو. ⁴²و بقاو كل يوم يعلموا في الهيكل و في الديار و يبشروا بيسوع المسيح.

Chapter 6

¹و في هاذيك ليامات كي كثروا التلامذة ، صرى تذمر من جيهة اليونانيين على العبرانيين بلي الارامل تاعهم غافلين عليهم في الخدمة تاع كل يوم .²ولاو الثناش لموا جماعة التلامذة وقالولهم : " ما يصلحش نخليواحنا كلمة الله و نخدموا المايدة . ³يا الخاوة خايروا سبعة رجال منكم ، شاهدين ليهم و مليانين من الروح القدس و الرزانة ، يتهلاو في هذه الحاجة . ⁴واما نحنا نركزوا على الصلاة وخدمة الكلمة . "⁵هاذا الكلام عجب الجماعة كلها ، و خايروا ستيفانوس، راجل مليان بليمان و الروح القدس ، و فيليبس.وبروخورس نيكانور و تيمون و برمناس و نيكولاوس الي كان براني انطا كي . ⁶اللي جابوهم قدام المرسولين ، صلاو و حطوا عليهم يديهم .⁷وكانت كلمة الله تترعرع، و عدد التلامذة يتكاثر ياسر في اورشليم ، و جماعة كبيرة من الكهنة يطيعوا ليمان.⁸اما ستيفانوس كي كان مليان ايمان و قوة . كان يدير عجايب ومعجزات و ايات كبار في الشعب . القبض على استيفانوس ⁹ناضوا وحايد من الجماعة اللي يقوللها جماعة الليبرتينيين و القيروانيين و السكندريين، ومن اللي من كيليكيا و اسيا ، باه يناقشوا استيفانوس.¹⁰وماقدروش على الرزانة و القوة اللي كانت فيه والروح الي كان يتكلم بيها ¹¹وقتها جابوا رجال يقولوا سمعناه يهدر بكلام الكذب على موسى وعلى الله¹²وهيجوا الشعب و الشيوخة و الكتبة راحوا خطفوه وجابوه و لموا عليه جماعة ، ¹³وقام عليه شهود باطل يقولوا : "هذا الراجل نهار كامل وهو يتكلم في كلام كاذب على هذا المكان المقدس وعلى الشريعة ، ¹⁴على خاطر سمعناه يقول بلي هاذاك يسوع الناصري راح يهدم هذا الموضع و يغير لعوايد اللي مدها لينا موسى " . ¹⁵خزروا ليه جميع الي قاعدين في الجماعة و شافوا وجهو تقول عليه وجه تاع ملاك .

Chapter 7

¹قال كبير الكهنة : " صار الامور هي هكذا ؟ ." ²قال استيفانوس " يا رجال يا الخاوا يا الاباء اسمعوا ! ظهر اله المجد لبابانا ابراهيم و هو بين الويدان قبل ما يحط في حاران ³و قالو : اخرج من ارضك و من عرشك و ارواح للرض اللي نوريلك.⁴وقتها خرج من ارض الكلدانيين وسكن في حاران. و من لثم هزوا بعد ما توفى باباه ، لهذي لرض اللي راكم ساكنين فيها ضرك . ⁵و مامدلوفيها لا ورثة ولا حتى عفسة رجل . بالصح وعد باه يمدها لو ملك ليه ولذريتو من بعدو و هومازال حتى ما ضناش.⁶وهكذا تكلم الله: ذريته تتغرب في ارض غريبة يستعبدوهم ويذلوهم على مدة اربعميات سنة ، ⁷والامة التي تستعبدهم انا الي نحاسبها يقول الله ومن بعد هذا يجيو يعبدوني في هذا لمكان . ⁸ومد لو عاهد الطهارة ، و هكا ولد اسحاق و طهروا في ثامن يوم . و اسحاق جاب يعقوب و يعقوب جاب اولادو الثناش الي هما اباءنا لولين.⁹و الاباء لولين حسدوا يوسف وباعوه لمصر وكان الله معاه ، ¹⁰و منعو من كل ضيقاتو ، و مدلو نعمة وحكمة في عيين فرعون سلطان مصر ، حتى ولاه على مصر وعلى كل بيتو.¹¹و بعدها صرات مجاعة كبيرة على بلاد مصر و كل بلاد كنعان و قساو جدودنا من ضيقة كبيرة و ما لقاو واش ياكلوا ، ¹²و كي سمع يعقوب بلي كاين قمح في مصر، بعث جدودنا المرة لولى. ¹³و في المرة الثانية استعرف يوسف لخاوتوا و ظهر اصل يوسف لفرعون .¹⁴بعث يوسف و عرض باباه يعقوب وكل عايلته ، وكانوا خمسة وسبعين نفس . ¹⁵وهبط يعقوب لمصر و توفى هو و جدودنا لثم . ¹⁶و من بعد هزوهم لشكيم وحطوهم في القبراللي شراه براهيم و خلصو بالفضة من عند بني حمور والد شكيم .¹⁷وعلى قد ما كان يقرب وقت تحقيق العاهد اللي حلف عليه الله لابراهيم ، كان الشعب يزيد و يكثر في مصر. ¹⁸حتى جاء سلطان واحد اخر يحكم على مصرما يعرفش يوسف . ¹⁹تمنكر في شعبنا و ذل جدودنا حتى جعل صغاره منبوذين باه ما يعيشوش .²⁰ "و في هاذاك الوقت تولد موسى وكان مليح ياسر، و تربى في بيت باباه ثلاثة شهر . ²¹و كي تخلاو عليه اداتو بنت فرعون ورباتوعندها وداراتو ولدها .²²و تربى موسى على كل الحكمة تاع المصريين ، و كان متمكن في الاقوال و الافعال . ²³وفي كمالة الاربعين سنة جاء في بالو يروح يتفقد خاوتو بني سرائيل . ²⁴وكي شاف واحد مظلوم حامى عليه ودافع على المغلوب ، وقتل المصري . ²⁵و كان حاسب بلي خاوتو راح يفهموا بلي الله راح يسلكهم على يدو، بالصح هما ما فهموش .²⁶و في اليوم اللي من وراه خرج عليهم و هما يتعاركوا , صالح بيناتهم و قال لهم : يا ناس انتم راكم خاوة علاش تظلموا في بعضاكم؟ ²⁷هاذاك اللي كان يظلم في صاحبو دز موسى و قالو : شكون حطك زعيم و قاضي علينا ؟ ²⁸ولا حبيت تقتلني كيما قتلت المصري البارح ؟²⁹و على جال هذي الكلمة هرب موسى ، وتغرب في بلاد مديان ، ولثم جاب زوز اولاد . ³⁰" و كي فاتت عليه اربعين سنة. ظهر لو ملاك الرب في الصحراء تاع جبل سيناء في لهيب نار في عليقة شاعلة .³¹و كي شاف موسى هذا الشيء تعجب من المنظر. و كي قرب باه يشوف واش كاين ، اذا بيه يسمع صوت الرب يناديه : ³²انا اله جدودك ، انا اله براهيم و اله اسحاق و اله يعقوب . تهز موسى و تنفض وما عادش قادر يخزر.³³قالو الرب : نحي نعالتك من رجليك ، على خاطر لمكان الي راك واقف فيه راه ارض مقدسة . ³⁴راني شفت لمشقة اللي يعاني منها شعبي في مصر، و سمعت تكنديرهم و راني نزلت باه نمنعهم ، و ضرك ارواح نبعثك لمصر .³⁵هذا موسى اللي نكروه و قالولو : شكون حطك علينا زعيم و قاضي ؟ هذا اللي رسلواالله رايس و فادي بالمعينة تاع الملاك اللي ضهرلو في العليقة . ³⁶و خرجهم بواش دار من عجايب و غرايب في ارض مصر, و في البحر الاحمر, و في الصحراء مدة اربعين سنة ³⁷"هذا موسى بفسه اللي قال لبني اسرائيل راح يقيم لكم الرب الهكم نبي من بين خاوتكم . ليه تسمعوا.³⁸هذا هو اللي كان وسط جماعة بني اسرائيل في الصحراء يتوسط بين جدودنا و الملاك اللي كان يكلمو في جبل سيناء . اللي قبل اقوال حية باه يمد هالنا . ³⁹اللي رفضوا جدودنا باه يطيعوه . بالصح بعدوه و رجعوا بقلوبهم لارض مصر ⁴⁰و قالوا لهارون : اصنع لينا الهة تمشي قدامنا , على خاطر هاذاك موسى اللي خرجنا من ديار مصر ما نعرفوا واش صرالو!⁴¹و صنعوا في هاذاك الوقت صنم على صورةعجل و ذبحولو ذبيحة ، وفرحوا بالشيء اللي داروه بيديهم . ⁴²ورجع الله و سلمهم لهواهم باه يعبدوا النجوم في السماء . كيما راه مكتوب في كتاب الانبياء : يا بني اسرائيل علاه ليا انا اللي ذبحتوا الذبايح و القرابين في هاذي الاربعين سنة في الصحراء ؟⁴³بالصح راكم هزيتو الخيمة تاع مولوك ونجمة الهكم رمفان ، الصنوما اللي صنعتوهم باه تسجدوا لهم انا رايح ننفيكم ل ابعد من بابل .⁴⁴بالصح خيمة الشهادة كانت مع جدودنا في الصحراء ، هاذيك اللي عملها موسى كيما وصاه الله على حساب المثال الي نعتلو ، ⁴⁵و الي دخلوها جدودنا اللي تخلفوا عليها مع يشوع في ملك الشعوب اللي طردهم الله من قدام جدودنا ، و بقات لثم حتى ليامات داوود . ⁴⁶اللي لقى نعمة في عينين ربي , و طلب باه يبني سكنى لاله يعقوب .⁴⁷بالصح سليمان هو اللي بنالو بيت . ⁴⁸لكن الله العالي ما يسكنش في بيوت صنعتها اليدين , كيما يقول النبي : ⁴⁹السماء العرش تاعي , و لارض الوطى تحت رجليا , واش من دار تبنولي ؟ يقول الرب , وواش من مكان لراحتي ؟ ⁵⁰علاه ماشي انا اللي صنعت هاذي الحوايج كاملة ب يديا ؟⁵¹" يا اللي روسكم خشان , و قلوبكم و وذنيكم غير طاهرة ! انتم دايما تقاوموا الروح القدس . كيما كانوا جدودكم هكذاك انتم ثاني . ⁵²كاش ما كاين نبي ما اظطهدوهش جدودكم ؟ و قتلوا اللي سبق و خبروهم بقدوم الباري . اللي انتوما بعتوه وقتلتوه . ⁵³انتوما يا اللي ديتو شرع الله مرتب من عند الملايكات و بالصح ما عملتوش بيه" . رجم استيفانوس استشهادو⁵⁴و كي سمعوا اعضاء المجلس كلام استيفانوس تعبات قلوبهم بالحقد و حكوا عليه سنانهم . ⁵⁵اما هو خزر في السماء و هو مليان ب الروح القدس ، و شاف المجد تاع الله وشاف يسوع واقف على يمين الله . ⁵⁶و قال : " راني نشوف في السماوات مفتوحة وبن الانسان قايم على يمين الله " .⁵⁷صاحوا كلهم بأعلى صواتهم و قفلوا وذنيهم , و هجموا عليه كلهم مع بعضاهم , ⁵⁸و خرجوه برى لمدينة و رجموه . و الشهود الي كانوا لثم نحاو قشهم و حطوه عند رجلين واحد الشاب يقولولو شاول .⁵⁹و كانوا يرجموا في استيفانوس و هو يدعي ويقول : " يا ربي يسوع اقبل روحي " . ⁶⁰و سجد على ركايبوا و عيط بأعلى صوته : " يا ربي ما تحاسبهمش على هاذي الغلطة " . و كي قال هذا استشهد .

Chapter 8

¹و كان شاول راضي على قتل استيفانوس . و صرى في هاذاك اليوم إضطهاد كبير على الكنيسية اللي في اورشليم , و راحوا كلهم توزعوا في جوايه اليهودية و السامرة , بقاو غير الرسل . ²و جاو رجال يخافوا ربي و هزوا استيفانوس دفنوه و عملواعليه مناحة كبيرة . ³و اما شاول كان حاب يقضي على الكنيسية , و هو يدخل البيوت و يكركر الرجال والنساء و يرميهم في الحبس .⁴و هاذوك اللي تشتتوا راحوا من مكان لمكان يبشروا بكلمة الله . ⁵و هبط فيليبس لواحد لمدينة في السامرة و بدا يبشر ناسها بالمسيح .⁶و كانوا الناس يصنتوا لكلامو بقلوبهم كي سمعوا بالعجايب اللي دارها وزادوا شافوا بعينيهم , ⁷على خاطر ياسر منهم اللي كانوا مسكونين بالجنون كانت تخرج منهم و تصيح بصوت كبير . و ياسر من المشلولين و العايبين رتاحوا . ⁸و كانت فرحة كبيرة في الجوايه الكل تاع المدينة . سيمون السحار⁹و قبل كان واحد الراجل في لمدينة اسمه سيمون , يعمل السحور و ناس السامرة كانوا حايرين فيه . و كان حاسب روحو حاجة كبيرة . ¹⁰و من لكبيرحتى لصغير كلهم كانوا يتبعوا فيه و يقولوا : "هذا هو قدرة الله الكبيرة ". ¹¹و تبعوه على خاطر كانوا مخدوعين بالسحور تاعو هذي مدة طويلة .¹²و كي صدقوا لكلام تاع فيليبس و هو يبشر بالامور تاع ملكوت الله و باسم يسوع المسيح , تعمدوا رجال ونساء . ¹³و حتى سيمون في ذاتو امن . و كي تعمد كان دايما يقعد مع فيليبس , و شاف عجايب و ايات كبيرة تصرى و بقى حاير .¹⁴و كي سمعوا الرسل اللي في اورشليم باللي السامرة قبلت كلمة الله , بعثولهم بطرس ويوحنا, ¹⁵اللي كي راحولهم صلاو من اجلهم باه يقبلوا الروح القدس , ¹⁶على خاطر ما زال ما استقرش حتى على واحد فيهم , بالصح هما كانوا متعمدين باسم يسوع المسيح . ¹⁷و كي حطوا عليهم اليدين قبلوا الروح القدس .¹⁸و كي شاف سيمون اللي الحطان تاع يدين الرسل يمد الروح القدس جاب لهم صوارد ¹⁹و قال : " مدوا لي حتى انا هاذي القدرة , باه كل من نحط عليه يدي يقبل الروح القدس " .²⁰قالو بطرس : " خلي صواردك عندك يهلكوك , راك حاسب بلي تقدر تشري المهبة تاع الله بالدراهم ! ²¹لا عندك لا قسمة ولا نصيب في هذا الامر , على خاطر قلبك ماهوش صافي مع الله . ²²توب على شرك هذا , و اطلب من عند الله و لعل يسامحك على نية قلبك , ²³على خاطر نشوف فيك تتخبط في مرارة المر و رباطات الظلام " .²⁴جاوب سيمون وقال : " اطلبوا انتوما من ربي على جالي باه ما يصراليش واش راكم تقولوا " .²⁵و من بعد ماشهد بطرس و يوحنا و تكلموا بكلمة ربي , ولاو لاورشليم بعد ما بشروا مدن كثيرة في بلاد السامريين . فيليبس و لوصيف الاثيوبي²⁶أيا ملاك الرب كلم فيليبس و قالو : " نوض روح جيهة الجنوب , على الطريق الخالية المحدرة من اورشليم لغزة " . ²⁷ناض و راح و إذا واحد الراجل وصيف اثيوبي , وزير تاع كنداكة سلطانة اثيوبيا , متصرف على كل شؤون الخزنة , هذا كان حاج لاورشليم باه يسجد . ²⁸و كي كان راجع قاعد في الكروسة تاعو و هو يقرى في لكتاب تاع اشعياء .²⁹و قال الروح لفيليبس :" قدم و امش بحذى هاذي الكروسة ". ³⁰قرب ليه فيليبس , و سمعو يقرى في لكتاب تاع النبي اشعياء , و قالو :" كاش ما راك تفهم الشيء اللي راك تقرى فيه ؟" . ³¹قالو : " كيفاه نقدر نفهم لو كان واحد ما يشرحلي ؟". و طلب من فيليبس يطلع و بقعد معاه .³²اما جزء الكتاب اللي كان يقرى فيه كان هاذا : " كيما شاة يجرو فيها للذبيحة , و كيما خروف ساكت قدام اللي يجزوا فيه هكذا ما حلش فمو . ³³و هو ذليل فكولو حقه , و في جيله شكون يخبر عليه ؟ على خاطر حياتو تقصفت من لرض " .³⁴جاوب لوصيف فيليبس و قالو :" قول لي : على شكون يهدر النبي لهنا ؟ على روحو و الا على واحد اخر ؟ . ³⁵ و بدا فيليبس من هاذ الكتاب يهدرلو و يبشر فيه بيسوع .³⁶و كي كانوا ما شيين في الطريق وصلوا لواحد البقعة فيها ماء , قال الوصيف :" ها هو الماء . واش يمنع لو كان نتعمد ؟ " . ³⁷قالو فيليبس : " إذا راك تامن بكل قلبك يجوز " . جاوب و قال : " انا نامن بلي يسوع المسيح هو ابن الله " . ³⁸و حبس الكروسة , و هبطوا مع بعضاهم للماء , فيليبس و لوصيف , و عمدوا .³⁹و كي خرجوا من الماء , خطف روح الرب فيليبس , و من لثم ما زادش لوصيف شافو , و راح مشى في طريقو فرحان . ⁴⁰اما فيليبس لقاوه في مدينة اشدود . و هومعدي في طريقو كان يبشر كل المدن حتى وصل لمدينة قيصرية .

Chapter 9

¹شاول يتوب و حياتو تتبدل . اما شاول ما زال مليان بالتهديد و القتيلة على تلامذة الرب، راح عند كبير الكهنة ²و طلب منو يمد لو براوات ل دمشق ، لليهود اللي لثم ، حتى كان لقى ناس من الطريق ، رجال و الا نساء ، يسوقهم مكتفين لاورشليم .³وهو رايح و كي قرب يدخل لمدينة دمشق برق عليه من السماء على غرادة من السماء نور قاوي, ⁴طاح في لرض و سمع صوت يقولو :"يا شاول , يا شاول وعلاه راك تضطهد فيا ؟".⁵قالو: " يا سيدي شكون انت ؟ " قالو الرب :"أنا راني يسوع اللي انت راك تضطهد فيه . صعيب عليك ترحي النوى ". ⁶قالو وهو مرعوب وحاير :" يا ربي واش تحبني ندير ؟" قال لو الرب :" نوض و ادخل للمدينة ضرك يقوللك واش لازم تدير ". ⁷اما الرجال اللي كانوا مسافرين معاه وقفوا ساكتين , يسمعوا في الصوت بالصح ما شافواحتى واحد .⁸وقف شاول من لرض , و كانوا عينيه محلولين بالصح ما كان يشوف في حتى واحد . قادوه من يديه و دخلوه لدمشق . ⁹و كان مدة ثلاثة ايام ما يشوفش , و ما كلا وما شرب .¹⁰و كان في دمشق واحد من التلامذة اسمو حنانيا , و قالو الرب في المنام :" يا حنانيا " قال :" نعم يا رب " . ¹¹قالو الرب :" نوض و روح للزنقة اللي يقوللها المستقيم , روح لبيت يهوذا و عيط على واحد الراجل من طرسوس اسمو شاول . على خاطر كي كان يصلي , ¹²و شاف في المنام راجل اسمو حنانيا دخل وحط عليه يديه باه يولي يشوف ".¹³جاوب حنانيا :" يا ربي انا سمعت من عند ناس ياسر على هذا الراجل , و قداه من شر عمل في القديسين تاعك في اورشليم . ¹⁴و زيد لهنا عندو الاذن من عند كبار الكهنة باه يقبض على جميع اللي يدعيو باسمك ". ¹⁵قالو الرب:"روح ! على خاطر هاذاك ليا ماعون مخير باه يهز اسمي قدام شعوب وسلاطين و بني اسرائيل . ¹⁶على خاطر راح نوريه قداه لازم يتعذب على جال اسمي ".¹⁷مشالو حنانيا و دخل للدار و حط عليه يديه و قال :" يا خويا شاول , انا بعثني الرب يسوع اللي ظهرلك في الطريق اللي جيت منو , باه تولي تشوف و تتملى من الروح القدس ". ¹⁸و لثم بعد طاح من عينيه واحد الشيء كي لقشور , و في دقيقتها ولى يشوف , و ناض و تعمد . ¹⁹و جابولو ماكلة تقوى بيها . و قعد شاول مع التلامذة اللي في دمشق أيامات . شاول ف اورشليم²⁰و ثم ثم بدا يبشر في المجامع بالمسيح :" بلي هذا هو ابن الله ". ²¹وجميع اللي كانوا يسمعوه حاروا و قالوا :" ماشي هذا هو اللي قضى في اورشليم على اللي يدعيو بهذا الاسم ؟و جاء لهنا باه يسوقهم مكتفين قدام كبار الكهنة !". ²²بالصح شاول كان يزيد يتقوى , و يحير في ليهود اللي ساكنين ف دمشق و يأكد لهم " بلي هذا هو المسيح ".²³و بعد ما عدات ايامات ياسر تشاوروا عليه ليهود و تفاهموا باه يقتلوه , ²⁴و عرف شاول بالحيلة تاعهم . و كانوا يعسوا حتى في البيبان نهار وليل باه يقتلوه . ²⁵شوية داوه التلامذة ونزلوه في قفة من فوق السور تاع المدينة .²⁶و كي جاء شاول لاورشليم حب يبقى مع التلامذة , و كلهم كانوا يخافوا منو ما همش مصدقين بلي راه حتى هو ولى تلميذ . ²⁷ولى داه برنابا و جابو للرسل , و حكالهم كيفاه شاف الرب في الطريق و بلي راه تكلم معاه , و كيفاه تكلم جهار باسم يسوع ف دمشق .²⁸و بقى معاهم يدخل ويخرج في اورشليم و يجاهر باسم الرب يسوع . ²⁹و كان يتكلم و يتناقش مع اليونانيين , حتى حبوا يقتلوه . ³⁰و كي سمعوا الخاوة هبطوه ل قيصرية و من لثم بعثوه ل طرسوس .³¹و بالصح الكنيسية في كل اليهودية و الجليل كانت متهنية , و كانت تتبنى و تمشي في مخافة ربي , و ب موعينة الروح القدس كانت تكثر و تزيد. ³²و صرى كي كان بطرس يتفقد في كل الخاوة , راح حتى للقديسين اللي ساكنين ف لدة ,³³و لقى لثمة واحد الشخص اسمو اينياس حاكم لفراش هاذي مدة ثمانية سنين, و كان مشلول . ³⁴قالو بطرس :" يا اينياس , يسوع المسيح يشفيك . قوم وقد فراشك بيديك " ثم ثم وقف . ³⁵و شافوه كل الساكنين في لدة و سارون , اللي رجعوا للرب .³⁶وكان ف يافا واحدة من التلامذة اسمها طابيثا , اللي معناهاغزالة . هاذي كانت فايضة بفعل الصلاح و الحسنات اللي كانت تديرها . ³⁷و صرى ف هاذيك ليامات انها مرضت وتوفات , غسلوها و حطوها ف بيت في السطح .³⁸و على خاطر مدينة لدة قريبة من مدينة يافا , التلامذة سمعوا بلي بطرس راه لثمة ف لدة , بعثولو زوز رجال يطلبوا منو باه يعدي عليهم و ما يبطاش . ³⁹وقف بطرس و جاء معاهم . و كي وصل طلعوه للبيت اللي في السطح , و جاو عندو كل الارامل يبكيو و يورولو حوايج و قشات من اللي كانت غزالة تخيطهم كي كانت معاهم .⁴⁰و خرجهم بطرس كلهم ل برى , و سجد على ركايبو و صلى , و بعد تلفت للجثة و قال :" يا طابيثا , نوضي !" فتحت هي عينيها . و كي شافت بطرس تقعدت بالقاعدة , ⁴¹و مد لها هو يدو و نوضها . و من بعد عيط على القديسين و الارامل و جابها لهم حية . ⁴²و هذا الشيء سمعت بيه يافا كاملة , و ياسر اللي امنوا بالرب . ⁴³و قعد بطرس ف يافا ايامات ياسر , عند واحد دباغ الجلود اسمو سمعان .

Chapter 10

¹كرنيليوس يطلب باه يقابل بطرس و كان في مدينة قيصرية واحد الراجل اسمو كرنيليوس ,قايد ميئة من الكتيبة اللي اسمها الطليانية . ²و هو واحد تقي يخاف الله هو و كل اهل بيتو , يدير حسنات كبار للشعب و يصلي لله دايما .³واحد النهار جوايه الساعة تسعة تاع النهار شاف واحد المنام واضح , دخل عليه ملاك من عند الله و قالو :"يا كرنيليوس " . ⁴شاف مع الملاك و استولى عليه الخوف , و قال :" يا سيد واش كاين ؟" قالو :" صلاتك و صداقتك طلعت قدام الله تذكار . ⁵و ضرك ابعث ناس ل يافا و اعرض سمعان اللي اسمو بطرس . ⁶راه قاعد عند سمعان الدباغ اللي دارو حذى لبحر . و هو يقولك واش لازم تدير" .⁷و كي راح الملاك اللي كان يتكلم مع كرنيليوس , عيط على زوز من الخدامين تاعو واحد منهم عسكري من اللي كانوا دايما معاه , ⁸و خبرهم بكل شيء و بعثهم ل يافا . لمنام تاع بطرس⁹اليوم وغدوا وهما مسافرين كي قربوا يدخلوا للمدينة , طلع بطرس للسطح باه يصلي جوايه الساعة السته . ¹⁰جاع ياسر و حب ياكل , و في الوقت اللي كانوا يوجدو له , غفى و طاح عليه النوم , ¹¹و شاف السماء محلولة , و قصعة نازلة عليه تقول ملاية كبيرة مربوطة من اطرافها لربعة و تتدلى على لرض . ¹²و كان فيها كل الدواب تاع لرض و الوحوش و كل ما يزحف و كل طير من الطيور السماء كلها .¹³و جاء ليه صوت :" نوض يا بطرس اذبح و كول " . ¹⁴قال بطرس :"لا يا ربي انا عمري ما كليت حاجة منجوسة والا محرمة ". ¹⁵و زاد جاء ليه الصوت مرة اخرى :" اللي طهروا الله ما تنجسوش انت " . ¹⁶و كان هذا على ثلاثة مرات و من بعد ترفعت القصعة كيما كانت ل السماء .¹⁷تحير بطرس و بدا يسقسي في روحو : واش معناه هذا المنام اللي شافو ؟ , و اذا بيه الرجال اللي بعثهم كرنيليوس , كانوا سقساو على بيت سمعان و راهم واقفين قدام الباب ¹⁸و ناداو يسقسيو :" اذا كان سمعان اللي اسمو بطرس راه موجود لثم ؟"¹⁹و في الوقت اللي مازال بطرس يخمم في المنام , قالو الروح :" راهم ثلاث رجال يعيطولك . ²⁰نوض و اهبط و روح معاهم بلا ما تخمم على شيء , على خاطر راني انا اللي بعثتهم ". ²¹و نزل بطرس للرجال اللي جاوه من عند كرينيليوس , وقال :" راني انا اللي تحوسوا عليه . واش من سبة جابتكم ؟" .²²قالوا لو :" او كرنيليوس قايد تاع ميئة , راجل صالح , يخاف الله و كل امة ليهود شاهدة عليه , جاه الوحي من عند ملاك مقدس باه يستدعيك لبيتو و يسمع من عندك كلام ". ²³ولى بطرس استدعاهم لداخل و ضيفهم . و اليوم وغدوا راح معاهم و راحوا معاه ناس من الخاوة اللي ف يافا . بطرس يقابل كرنيليوس²⁴و بعد نهار دخلوا ل قيصرية , و اما كرنيليوس كان يسنى فيهم , و عرض نسابو و اصحابوا المقربين .²⁵و كي دخل بطرس استقبلو كرنيليوس و نزل ساجد على رجليه . ²⁶نوضو بطرس و قالو :" نوض حتى انا انسان زيك " .²⁷و بعد دخل وهو يهدر معاه و لقى ناس ياسر متلميين . ²⁸قال لهم :" راكم عارفين كيفاه محرم على راجل يهودي يقعد مع واحد براني و الا حتى يجي عندو . بالصح انا ورا لي الله باه ما نقول على حتى واحد انو محرم والا منجوس . ²⁹على هاذيك جيت بلا مناقشة كي عيطوا لي . و ضرك نستخبر منكم على واش من سبة استدعيتوني ؟".³⁰قالو كرنيليوس :" عندها اربعة ايام حتى لهاذي الساعة كنت صايم . و على الساعة التاسعة كنت نصلي في بيتي . و اذا واحد الراجل بلبسة ضاوية وقف قدامي ³¹و قال :" يا كرنيليوس , صلواتك تسمعت و صدقاتك تذكرت قدام الله . ³²ابعث ل يافا و استدعي سمعان اللي اسمو بطرس . راح قاعد في بيت سمعان راجل دباغ ساكن حذى لبحر . و هو كي يجي يكلمك . ³³بعثت لك ليه ليه . و انت راك عملت مليح كي جيت . و ضرك احنا كلنا رانا حاضرين قدام الله باه نسمعوا جميع اللي قال لك عليه . خطبة بطرس في دار كرنيليوس³⁴بدا بطرس يتكلم وقال :" الحق انا لقيت بلي الله ما يقبلش الناس بالوجوه . ³⁵بالصح في كل امة يقبل برك هاذوك اللي يخافوا اسموواللي يعملوا العدل .³⁶الكلمة اللي بعثها لبني اسرائيل يبشرهم بالسلام بيسوع المسيح . هذا اللي هو رب ل الناس الكل . ³⁷راكم عارفين الامر اللي صرى في بلاد اليهودية و بدا في الاول من الجليل , بعد المعمودية اللي بشر بيها يوحنا . ³⁸يسوع اللي من الناصرة و كيفاه مسحوالله بالروح القدس و القوة , و اللي راح يجول و يعمل الخير و يشفي كل المتسلط عليهم ابليس , على خاطر الله كان معاه .³⁹واحنا رانا شهود على كل واش عمل في بلاد ليهود و في اورشليم . واللي كذلك قتلوه معلق فوق مادرية . ⁴⁰هذا الله حياه من الموت في ثالث يوم , و خلاه يكون ظاهر , ⁴¹مشي لجميع الناس بالصح للشهود اللي سبق وخايرهم الله . لينا احنا اللي كلينا وشربنا معاه بعد قيامتو من بين الموتى .⁴²و وصانا باه نبشروا للشعب , و نشهدوا بلي هذا هو اللي حطو الله ديان للحيين و للموتى . ⁴³ليه يشهدوا كل الانبياء بلي كل من يامن بيه ينال باسمو الغفران تاع الذنوب ". الروح القدس يجي حتى على الامم⁴⁴و كي كان بطرس يتكلم بهاذي الامور جاء الروح القدس على كل اللي كانوا يسمعوا في الكلمة . ⁴⁵المومنين اللي من اهل الختانة حاروا , كل من جاء مع بطرس , على خاطر الوهبة تاع الروح القدس تدفقت حتى على الامم هما ثاني .⁴⁶على خاطر كانوا يسمعوا فيهم يتكلموا بلغات و يعظموا ف الله . وقتها جاوب بطرس : ⁴⁷" شكون ضرك يقدر يمنع عليهم المعمودية تاع الماء هاذوك اللي قبلوا الروح القدس كيما احنا بالذات ؟" . ⁴⁸و امر عليهم باه يتعمدوا باسم الرب يسوع . هكذا و طلبوا منو يبقى عندهم ايامات .

Chapter 11

¹و كي سمعوا الرسل و الخاوة اللي كانوا في بلاد اليهودية بلي حتى الامم قبلوا الكلمة تاع الله. ²و كي طلع بطرس لاورشليم, تعاركوا معاه اهل الختان, ³و قالوا لو: "كيفاه تدخل لديار ناس ماهمش مختنين و تاكل معاهم".⁴وبدى بطرس يشرح لهم واش صرى وقال : ⁵" كي كنت في مدينة يافا و انا نصلي, غفيت في النوم و شفت منام: شفت قصعة نازلة من السماء كيما ملاية تدلى من ربعة اطراف و تحطت قدامي. ⁶و كي شفتها مليح, لقيت فيها الدواب تاع لرض كاملة و الوحوش و كل ما يزحف و كل ما يطير.⁷و سمعت صوت من السماء قالي: بطرس اوقف, اذبح و كول. ⁸قلت لو: لا يا ربي! عمري ما دخلت في فمي حاجة محرمة والا ناجسة. ⁹زاد قالي الصوت اللي من السماء: اللي طهرو ربي ما تنجسوش انت. ¹⁰و تعاود هاذا الشيء ثلاثة مرات. و من بعد ترفع كل شيء للسماء كيما كان.¹¹و اذا بيه في هاذاك الوقت بالذات وقفوا ثلاثة رجال قدام الدار اللي كنت فيها, كانوا مبعوثين ليا من قيصرية. ¹²و قال لي الروح امشي معاهم و ما تخاف من حتى شيء. و رحت انا و الخاوة في ستة اللي كانوا معايا. و كي دخلنا لدار الراجل, ¹³حكالنا كيفاه شاف الملاك في دارو و كيفاه وقف عليه وقال لو: ابعث رجال ليافا, و عيط على سمعان اللي يقولولو بطرس, ¹⁴و هو راح يكلمك كلام تتخلص بيه انت واهل بيتك كاملين.¹⁵و كي بديت نهدر, جاء عليهم الروح القدس كيما جاء علينا نحنا في لول. ¹⁶و تفكرت كلام ربي كي قال: يوحنا عمد بالماء و اما انتوما راح توليوْ تعمدوا بالروح القدس.¹⁷اذا كان الله وهبهم كيما وهب لينا احنا نهار اللي امنا بالرب يسوع المسيح, واش نكون انا؟ نقدر نقول لله لا؟". ¹⁸و كي سمعوا الحاضرين هاذا لكلام سكتوا, و سبحوا الله و قالوا: "امالا حتى اللي ما همش يهود انعم عليهم الله هما ثاني بالتوبة باه ينالوا لحياة!". الكنيسية في انطاكية¹⁹اما المومنين اللي تفرقوا على جال المحنة اللي صرات بعدما تقتل استيفانوس راحوا قطّعوا ل فينيقية و قبرص و انطاكية, وكانوا مايبشروا حتى واحد بكلمة الله من غير ليهود برك. ²⁰بالصح كاين منهم ناس وهما رجال من قبرص والقيروان , اللي كي دخلوا لانطاكية كانوا يهدروا مع ناس اليونان ويبشروا فيهم بالرب يسوع. ²¹و كانت يد ربي معاهم, و ناس ياسر اللي امنوا و هداهم ربي لطريقو.²²و وصل لخبر تاعهم و سمعوا بيه في لكنيسية في اورشليم, ولاو بعثوا برنابا لانطاكية. ²³و كي جا وشاف نعمة ربي فرح, وشجعهم وصاهم الكل باه يثبتوا في ربي و يحكموا فيه بكل قلوبهم. ²⁴على خاطر هو كان راجل صالح و مليان من الروح القدس ومن الايمان. وزاد رجع غاشي كبير للرب.²⁵و من بعد راح برنابا ل طرسوس يحوس على شاول. و كي لقاه جابو معاه للكنيسية اللي في انطاكية. ²⁶و بقاو لثم يجتمعوا في الكنيسية مدة عام كامل و علموا ناس ياسر. ولثمة في انطاكية لاول مرة اللي التلامذة تاع المسيح تسماو "مسيحيين".²⁷و في هاذيك ليامات جاو انبياء من اورشليم ل انطاكية. ²⁸و وقف واحد من التلامذة واسمو اغابوس, و تنبأ بالوحي تاع الروح القدس بلي راح تصرى مجاعة كبيرة على لرض كاملة, هاذيك اللي صرات عهد القيصر كلوديوس.²⁹و على هاذاك قرروا التلامذة باه كل واحد يبعث الشيء اللي يقدرعليه, و يعاونوا الخاوة الساكنين في اليهودية. ³⁰و هاذاك واش داروا و بعثوا الشيء اللي لموه مع برنابا وشاول.

Chapter 12

¹و في هاذاك الوقت قرر الملك هيرودس يضطهد ناس من لكنيسية, ²و قتل يعقوب خو يوحنا طيرلو راسو بالسيف.³و كي شاف بلي هاذا الشيء يعجب ليهود, زاد قبض على بطرس ثاني. و صرى هاذا في ايامات لفطير. ⁴و كي حكمو رماه في الحبس, و حط اربعة فرق تاع عسكر يعسوا عليه, و كان ناوي يقدمو للشعب بعد عيد الفصح.⁵و كان بطرس محطوط في الحبس تحت العسة, و كانت لكنيسية تصلي على جالو ليل و نهاربلا ما يحبسوا. بطرس يخرج من الحبس ⁶و في الليلة اللي كان هيرودس ناوي يسلمو فيها, كان بطرس راقد بين زوز عساسة و كان مسلسل بالسلاسل, و كانوا العسكر يعسوا قدام الباب تاع الحبس.⁷و اذا ملاك الرب جاء, و ضوى النور في الحبس, و ضرب بطرس على جنبو و نوضو وقالو: "نوض ازرب!". و طاحوا السلاسل من يديه. ⁸و قال لو الملاك : " اتحزم و البس سباطك". كي كمل زاد قالو: " البس ثوبك و تبعني".⁹و خرج يتبع فيه. و هو ما علابالوش اذا كان هاذا الشيء صح, وكان حاط روحو يحلم. ¹⁰و عداو على العسة لولى و زادو الثانية, حتى وصلوا للباب تاع لحديد اللي يخرَّج على لمدينة, و وحدو وحدو تحل, خرجوا و مشاو غير زقاق واحد, و لثمة فارقو الملاك.¹¹وقال بطرس, بعد ما فاق مع روحو: "ضرك تأكدت بلي ربي بعث الملاك تاعو و منعني من يد هيرودس, و من كل شيء كانوا ليهود يحبوا يديروه فيا". ¹²ومن بعد خمم شوية وراح لدار مريم ام يوحنا اللي يعطيلو مرقس, و كان في هاذيك الدار جماعة كبيرة من المومنين قاعدين يصليو.¹³و كي طبطب بطرس على الباب تاع الدار جات واحدة الخديمة اسمها رودا باه تتصنت. ¹⁴و كي عرفت بطرس من الصوت تاعو من الفرحة ما حلتش الباب, بالصح راحت تجري لداخل و خبرتهم بلي بطرس راه جا و راه واقف قدام الباب. ¹⁵قالوا لها: " راكي تتخيلي برك!". واما هي بقات تأكد لهم بلي هو. قالوا لها: " بلاك ملايكاتو!".¹⁶و بقى بطرس لبرى يطبطب حتى حلوا عليه و كي شافوه حاروا. ¹⁷شار عليهم بيدو باه يسكتوا, و حكالهم كيفاه خرجو ربي من الحبس. و قال لهم: "خبروا يعقوب و الخاوة لخرين بالشيء اللي صرى". و من بعد خرج من لثمة و راح لمكان اخر.¹⁸و كي طلع النهار صرات فوضى كبيرة بين العسكر: زعمة واش صرى لبطرس؟ ¹⁹و كي طلب هيرودس باه يجيبوه و ما لقاهش استجوب العساسة, و صدر منو امر باه يقتلوهم . و من بعد هبط من اليهودية لقيصرية و سكن لثمة. موت هيرودس²⁰و كان هيرودس غاضب على اهل صور واهل صيدا, راحوا هما تلموا الكل مع بعضاهم و تفاهموا و ميلوا بلاستس الحاجب تاع الملك لصفهم و طلبوا الصلح على خاطر بلادهم تسترزق من المملكة تاع هيرودس. ²¹و في النهار اللي راح يتقابلوا فيه لبس هيرودس قشات المٌلك , و قعد على كرسي العرش و بدا يخطب عليهم .²²و الشعب كامل بداو يعيطوا: "هاذا صوت تاع اله ما هوش صوت انسان!". ²³و في دقيقتها ضربو ملاك الله على خاطر ما مدش المجد لله, و بدى الدود ياكل فيه و مات.²⁴اما كلمة الله كانت تتنشراكثر و تزيد. ²⁵و رجع برنابا و شاول من اورشليم بعد ما كملوا الخدمة تاعهم, و داو معاهم يوحنا اللي يعيطولو مرقس.

Chapter 13

¹و كان لثمة في لكنيسية في انطاكية معلمين و انبياء: برنابا, و سمعان اللي يعيطولو نيجر, و لوكيوس من القيروان, و مناين اللي تربى مع هيرودس الوالي, و شاول. ²و هما يخدموا في ربي و يصوموا, قال الروح القدس: " خليو برنابا و شاول على جيهة على خاطر نحتاجهم في واحد الخدمة". ³وقتها صاموا و صلاو و حطوا عليهم يديهم, و من بعد خلاوهم راحوا. برنابا و شاول في قبرص⁴و هما كي بعثهم الروح القدس هبطوا لسلوكية , و من ثمة سافروا في لبحر ل قبرص. ⁵و كي وصلوا لسلاميس بداو يناديوْ بالكلمة تاع الله في وسط لمجامع تاع ليهود. و كان معاهم يوحنا يعاون فيهم.⁶و كي فاتوا في الجزيرة كاملة حتى وصلوا لمدبنة بافوس, تلقاو مع واحد الراجل سحَّارحاسب روحو نبي بالكذب و هو يهودي اسمو باريشوع, ⁷و كان من لحاشية تاع سرجيوس بولس الحاكم تاع لمدينة, اللي كان راجل مثقف, عرض برنابا و شاول و طلب منهم باه يسمعوه كلام الله. ⁸بالصح هاذاك السحَّار عليم وهاذي الترجمة تاع اسمو, كان يعكس فيهم حاب يبعد الحاكم على الايمان.⁹و اما شاول اللي اسمو ثاني بولس, تملى من الروح القدس و خزر فيه ¹⁰و قالو: "يا واحد المعمر بالكذب و بالخبث الكل! يا ولد ابليس! يا عدو الخير! ما زالك برك تعوج في الطرق الله الصحيحة؟¹¹ضرك تجيك ضربة من عند ربي, تعمى و ما تشوفش ضو الشمس حتى يحب ربي". و في ساعتها طاحت عليه ضبابة و ظلامت عينيه, ولى يدور و يحوس على شكون يقودو من يدو. ¹²و الحاكم كي شاف واش صرى امن , و حار من التعليم تاع الرب. في انطاكية بيسيدية¹³و من بعد سافر بولس و اللي كانوا معاه من بافوس و راحوا ل برجة بمفيلية. بالصح يوحنا ماراحش معاهم هو رجع لاورشليم. ¹⁴و هما زادوا من برجة راحوا لانطاكية في بيسيدية, ودخلوا للمجمع نهار السبت و قعدوا. ¹⁵و من بعد ما قراو جزء من شريعة موسى و الانبياء, بعثولهم رياس المجمع وقالوا لهم: " يا لخاوة, اذا كان عندكم حاجة توعظوا بيها الشعب قولوا".¹⁶وقف بولس و شارعليهم بيدو وقال: "يا رجال اسراييل و يا اللي تخافوا ربي, اسمعوا! ¹⁷الاله تاع شعب اسراييل خاير جدودنا, و على من قدرو كي كان متغرب في ارض مصر, و من بعد خرجهم منها بقوة اعمالو. ¹⁸و استحملهم في الصحراء مدة ربعين سنة.¹⁹و محى سبع امم من ارض كنعان و قسم عليهم ارضهم بالقرعة. ²⁰وعلى مدة ربعمية وخمسين سنة جعل لهم قضاة حتى لعاهد النبي صموييل.²¹و من بعد طلبوا من الله يعين لهم ملك, حط لهم شاول بن قيس, واحد من عشيرة بنيامين, حكم عليهم مدة ربعين سنة. ²²و من بعد عزلو الله و حط في مكانو داوود ملك, اللي شهد ليه ثاني, كي قال: لقيت في داوود عبدي راجل على حساب قلبي, راح يدير كل واش نحب.²³و من الذرية تاع داوود, على حساب الوعد, جعل الله يسوع مخَلِص, لبني اسراييل. ²⁴و قبل ما يجي هو جا يوحنا قبلو وبشَّر بالمعمودية تاع التوبة لشعب اسراييل كامل. ²⁵و قبل ما يكمل المهمة تاعو قال: شكون تحسابوني أنا؟ انا خاطي هو, بالصح هو راح يجي بعدي وانا ما نستاهلش نحل حتى سيور سباطو اللي في رجليه²⁶يا خاوتي يا بني ابراهيم, ويا كل الناس اللي بيناتنا اللي تخافوا ربي, لينا احنا جات كلمة هاذا الخلاص. ²⁷على خاطر اهل اورشليم والرياس تاعهم ما عرفوش المسيح. و ما فهموش لقوال تاع الانبياء اللي يقراوها كل نهار سبت بالصح تموا بيها كي حكموا عليه بالموت.²⁸و مع انهم ما لقاو فيه حتى سبب واحد باه يحكموا عليه بالموت هكذاك و طلبوا من بيلاطس باه يقتلو. ²⁹و كي تتموا كل واش تكتب عليه, هبطوه من الصليب وحطوه في قبر.³⁰بالصح الله قومو من بين الموتى. ³¹وهو ظهر مرات ياسر للناس اللي طلعوا معاه من الجليل لاورشليم, و هما اللي ولاو الشهود تاعو عند الشعب.³²و احنا نبشروكم بالعاهد اللي تحقق للجدودنا, ³³و بلي الله حقق هاذا لينا احنا اولادهم, كي قوم يسوع من بين الموتى كيما راه مكتوب في المزمور الثاني: انت وليدي انا اليوم ولدتك. ³⁴و كي قومو من بين الموتى, باه ما يعاودش يفنى, وهاكذا قال: اني راح نعطيكم المراحم تاع داوود الصادقة.³⁵و ثاني زاد قال في مزمور واحد اخر: ما تخليش القدوس تاعك يموت ويفنى. ³⁶على خاطر داوود بعد ما عمل المشيئة تاع الله في حياتو, مات و تدفن بحذى جدودو, و تحلل الجسم تاعو و فنى. ³⁷بالصح اللي قومو الله من بين الموتى ما يفناش.³⁸يكون في علمكم يا الخاوة, بلي بيه هو نبشروكم بغفران الذنوب, ³⁹و هكذا كل اللي يامن يتبررمن كل حاجة ما قدرتش الشرع تاع موسى يبرركم منها .⁴⁰اتولهوا و عندكم يصرى لكم الشيء اللي قالوا عليه الانبياء: ⁴¹شوفوا, انتوما يا اللي ستهزاو! و تعجبوا و اهلكوا ارواحكم! على خاطر راح ندير حاجة في اياماتكم. لو كان يقولو لكم عليها ما تصدقوش".⁴²و من بعد ما خرجوا ليهود من المجمع بداو الناس تاع الامم الاخرى يحاولوا فيهم باه يزيدوا يكلموهم بهاذا لكلام نهار السبت الجاي. ⁴³و كي تفرقت الجماعة, ياسر من ليهود و الغرباء اللي يعبدوا الله تبعوا بولس وبرنابا, و هما كانوا يهدروا معاهم و يشجعوا فيهم باه يثبتوا في نعمة ربي.⁴⁴و نهار السبت لٌخرْ تلمت قريب لمدينة كاملة باه تسمع كلمة الله. ⁴⁵و كي شافوا ليهود الشيء اللي صرى غاروا, و بداو يعارضوا واش يقول بولس و يكذبوا فيه.⁴⁶قال لهم بولس وبرنابا بكل شجاعة: "كان لازم انتم اللوالى اللي تبشروا بكلة الله, بالصح انتوما رفضتوها, و بينتوا بلي راكم ما تستاهلوش الحياة الدايمة, علاها احنا ضرك نتوجهوا للامم, ⁴⁷على خاطر هذا واش وصانا الرب: جعلتك نور للامم, باه تهز الخلاص لاطراف الدنيا".⁴⁸و كي سمعوا الامم اللي ما همش يهود هذا لكلام فرحوا ومجدوا كلام الرب. و امنوا كل اللي كانوا معنيين بالحياة الدايمة. ⁴⁹و تنشرت كلمة ربي في كل هاذيك لبلاد.⁵⁰بالصح ليهود راحوا حرشوا النساء الشريفات اللي كانوا يعبدوا الله و الوجهاء تاع لمدينة, و داروا الفتنة على بولس وبرنابا وخرجوهم من بلادهم. ⁵¹بالصح هما نفضوا عليهم لغبار تاع رجليهم, و راحو ل ايقونية. ⁵²بالصح التلامذة كانوا مليانين بالفرحة و الروح القدس.

Chapter 14

¹و في ايقونية دخلوا مع بعضاهم في زوز للمجمع تاع ليهود و تكلموا,حتى امنوا ناس ياسر من ليهود و ناس اليونان. ²بالصح ليهود اللي ما حبوش يامنوا حرشوا الناس اللي من الامم على الخاوة و فسدوا لهم نية قلوبهم.³بالصح بولس وبرنابا سكنوا لثمة مدة طويلة كانوا يجاهروا بيسوع اللي كان يشهد لكلامهم على النعمة تاعو, و كان يأيد فيهم بآيات و عجايب تصرى على يديهم. ⁴و الناس تاع لمدينة تقسموا على زوز فرَق, منهم اللي تبعوا ليهود و منهم اللي تبعوا الرسل بولس و برنابا.⁵و كي صرى هجوم من جيهة الامم و ليهود و الرياس تاعهم على الرسل باه يطَيْحوا بيهم و يرجموهم, ⁶فاقوا بيهم, و هربوا ل ليكأونية لمدينة لسترة و دربة, و للجوايه الدايرة بيهم. ⁷و كانوا حتى لثمة يبشروا. في لسترة و دربة⁸و كان في لسترة واحد الراجل دايما قاعد لثمة عايب من رجليه من نهار اللي ولد , عمرو ما مشى. ⁹و كان يسمع في بولس و هو يتكلم, خزر فيه بولس, و كي شاف بلي عندو ايمان وقادر يبرى, ¹⁰قال بصوت عالى: "نوض اوقف على رجليك!". نقز الراجل وقف و ولى يمشي.¹¹و كي شافوا الناس واش عمل بولس, ناضوا الكل يعيطوا باللغة تاعهم تاع ليكأونية و قالوا: " الالهة تشبهوا بالناس ونزلوا لنا". ¹²و برنابا سماوه "زفس" و بولس سماوه "هرمس" على خاطر دايما هو اللي يتكلم لول. ¹³و جاهم كاهن زيوس اللي المعبد تاعو كان في الدخلة تاع لمدينة. و جاب لهم البقر و اكاليل تاع النوار و حطوها قدام البيبان هو والغاشي اللي معاه و كان حاب يذبح لهم الذبايح .¹⁴و كي سمع بولس و برنابا, قطعوا قشهم, و خرجوا للغاشي يجريو ويعيطوا ¹⁵و قال لهم: "يا ناس, واش راكم تديروا؟ احنا رانا عباد ضعفاء كيما انتوما, جينا نبشروا فيكم باه تخليوْ هاذا الباطل و تتوبوا للاله الحي اللي خلق لرض و السماء و البحار و كل ما فيها, ¹⁶اللي خلى الناس في لجيال الفايتة يمشيوْ على هواهم¹⁷بالصح هو دايما يشهد على روحو بالخير اللي يديروا مع الناس: ينزل لمطار من السماء و يجيب لمواسم في وقتها, و يرزقنا بالقوت و يملي قلوبنا بالفرحة". ¹⁸و بعد هاذا لكلام و بجهد كبير باه قدروا يمنعوا الناس ما يذبحوش الذبايح.¹⁹و من بعد زادوا جاو ليهود اللي من انطاكية و ايقونية و حرشوا عليهم الناس, و راحوا رجموا بولس و كركروه لبرى خارج لمدينة و رماوه, حاسبينوا بلي مات. ²⁰بالصح كي داروا بيه التلامذة, وقف ودخل للمدينة, و اليوم و غدوا خرج هو و برنابا و راحوا ل دربة.²¹و لثمة في دربة بشروا و لموا تلامذة ياسر. الرجوع لانطاكية في سورية و من بعد رجعوا ل لسترة, و من ثم راحوا لايقونية وانطاكية, ²²يشددوا في التلامذة و يشجعوا فيهم يثبتوا في الايمان, و يقولو لهم بلي لابد نعديو على صعوبات ياسر باه ندخلوا للملكوت تاع الله.²³و حطوا قساوسة في كل كنيسية, و صاموا و صلاو و خلاو الخاوة بين يدين الرب اللي امنوا بيه, ²⁴و كي كانوا جايين من بمفيلية عداو على بيسيدية. ²⁵و نشروا الكلمة في برجة, و من بعد هبطوا ل اتالية. ²⁶و من ثمة سافروا في لبحر ل انطاكية, اللي خرجوا منها في لول بالمهمة اللي داروها وكملوها بالنعمة تاع ربي.²⁷و كي وصلوا لموا لكنيسية كاملة, وحكاو لهم على الشيء اللي عملو ربي معاهم, و كيفاه فتح للامم باب للايمان هما ثاني. ²⁸و قعدوا لثمة مع التلامذة مدة .

Chapter 15

¹و هبطوا جماعة من اليهودية وبداو يعلموا في الخاوة بلي: " لو كان ما تتختنوش كيما قال موسى, ما تقدروش تتحصلوا على الخلاص". ²و صرى جدال و خلاف كبير و بين بولس و برنابا, و في لخر تفاهموا باه بولس و برنابا و و ناس اخرين معاهم يروحوا للرسل و للشيوخة اللي في اورشليم باه يفرزوا هاذا المشكل.³و شيْعتهم لكنيسية على خير و كي راحوا عداو على فينيقية و السامرة و خبروهم كيفاه حتى الامم هداهم ربي لطريقو, الشيء اللي فرحوا بيه الخاوة ياسر. ⁴و كي وصلوا لكنيسية اورشليم فرحوا بيهم و الرسل و الشيوخة, و زادوا خبروهم حتى هما بالشيء اللي عملوا ربي معاهم.⁵و قفولهم جماعة من المومنين اللي كانوا قبل يتبعوا في المذهب تاع الفريسيين, و قالوا لهم: "لازم على اللي ماهمش يهود يتختنوا و يعملوا بالشرع تاع موسى قبل". ⁶و تلموا الرسل و الشيوخة باه يلقاو حل.⁷و صرى بيناتهم جدال كبير و من بعد وقف بطرس و قال لهم: "يا الخاوة, راكم عارفين بلي الله قبل خلاص خايرني من بينكم باه انا اللي نخبر الامم على كلمة الانجيل و يامنوا. ⁸و الله اللي عارف لقلوب, شهد لهم حتى هما كي مدلهم الروح القدس كيما مد لنا احنا بالذات. ⁹و ما ميَّزش بينا و بينهم في حتى شيء, على خاطر هو اللي طهر قلوبهم بالايمان.¹⁰و ضرك علاه تجربوا في الله و تحطوا في رقبة التلامذة هاذا النير اللي عجزنا احنا و جدودنا باه نهزوه؟ ¹¹بالصح نامنوا بلي بالنعمة تاع ربنا يسوع المسيح احنا ننالوا الخلاص و حتى هما ثاني".¹²و لاو سكتوا الكل. و بقاو يسمعوا في برنابا و بولس و هما يتكلموا على كل الايات و العجايب اللي عملها الله على يديهم بين الامم.¹³و كي كملوا كلامهم تكلم يعقوب و قال: " يا خاوتي, اسمعوني. ¹⁴كيما قال سمعان بلي الله من لول كان حاب يدي من بين الامم شعب على اسمو.¹⁵و هاذا الشيء اللي جاء في كلام الانبياء, كيما راه مكتوب: ¹⁶نزيد نرجع من بعد لخيمة داوود اللي تهدمت و نبنيها, نزيد نبنيها من فوق الردم و نعليها, ¹⁷باه كل الناس ترجع لي, و حتى الامم اللي اسمي تحط عليها, هكذا يقول الله وهاذي الامور كلها يجريها. ¹⁸معروفة من بكري وجميع اعمالو خبر عليها.¹⁹على هاذيك انا نشوف بلي ما نزيدوش نثقلوا على الناس اللي رجعوا لله من الامم, ²⁰بالصح نكتبولهم و نوصيوْهم باه يمنعوا النجاسات تاع الاصنام, و الزنا, و الجيفة, و الدم. ²¹و شريعة موسى من قبل راهي منتشرة في كل مكان من لجيال لقديمة حتى لضرك, في كل مدينة كاين معلمين يقراوها كل سبت في لمجامع". رسالة لكنيسية للمومنين اللي من الامم²²وقتها تفاهموا الرسل و الشيوخة تاع لكنيسية باه يخايروا زوز رجال من وسطهم, و يبعثوهم لانطاكية مع بولس وبرنابا: خايروا يهوذا اللي يعيطولوا برسابا, و سيلا, و هما ناس عندهم مكانة كبيرة بين الخاوة. ²³و سلمولهم هاذي البرية اللي كتبوها بيديهم قالوا فيها: "سلام من عند الرسل و الشيوخة و الخاوة الكل للخاوة اللي من الامم في انطاكية وسورية و كليكية:²⁴رانا سمعنا بلي كاين ناس خرجوا من عندنا و جاو عندكم و قلقوكم و شوْشوا عليكم, كي طلبوا منكم تتختنوا و تعملوا على حساب الشرَع تاع موسى, و هاذو الناس احنا ما طلبناش منهم يعملوا هاذا الشيء, ²⁵على هاذيك تفاهمنا و خايرنا نبعثولكم زوز رجال مع خاوتنا لعزاز بولس وبرنابا, ²⁶رجال مدوا حياتهم على جال الاسم تاع ربنا يسوع المسيح.²⁷بعثنالكم يهوذا و سيلا, باه يخبروكم بنفس الامور اللي كتبناها. ²⁸على خاطر الروح القدس و احنا شفنا, بلي ما نزيدوش عليكم حمل واحد اخر, من غير هاذي الحاجات اللي واجبة: ²⁹تبطلوا الذبايح اللي تتذبح للاصنام, و الدم, و الجيفة, و الزنا, اذا كان صنتوا ارواحكم من هاذي الامور تعملوا الصواب, يعطيكم الصحة ".³⁰و راحوا في لول ل انطاكية, و لموا جماعة المومنين و سلمولهم لبرية. ³¹و كي قراوها فرحوا خلاص بالتشجيع اللي جاء فيها. ³²و على خاطر يهوذا هو و سيلا كانوا ثاني انبياء, وعظوا الخاوة لثمة بكلام ياسر و شجعوهم.³³و بقاو مدة من الزمان و من بعد سيبوهم على خير باه يرجعوا للرسل. ³⁴بالصح سيلا حب يبقى في انطاكية, ³⁵و بولس هو برنابا سكنوا في انطاكية و بقاو يعلموا و يبشروا مع الخاوة لخرين حتى هما بالكلمة تاع الرب. بولس و برنابا يتفارقوا³⁶و من بعد ايامات قال بولس لبرنابا: "هيا نرجعوا نروحوا نتفقدوا الخاوة في كل مدينة بشرنا فيها بكلمة ربي, و نشوفوا احوالهم كيفاه". ³⁷طلب منو برنابا باه يديو معاهم ثاني يوحنا اللي يقولولو مرقس, ³⁸بالصح بولس ما حبش على خاطر مرقس تفارق معاهم في بمفيلية و ما راحش معاهم للخدمة.³⁹و صرى بيناتهم نزاع حتى تفارقوا على بعضاهم. برنابا دا معاه مرقس وسافروا في لبحر لقبرس. ⁴⁰و بولس دا معاه سيلا و خرج من انطاكية بعدما ودَّع الخاوة و خلاهم للنعمة تاع ربي. ⁴¹و راح لسوريا و كليكية يشجع في الكنايس و يقوى فيهم .

Chapter 16

¹و من بعد كي وصل لدربة و لسترة, لقاو لثمة واحد التلميذ اسمو تيموتاوس, امو يهودية مومنة و باباه يوناني, ²و كانوا الخاوة في لسترة و في ايقونية يشهدوا لو شهادة مليحة. ³و حب بولس باه يديه معاه, ولى ختنو على خاطر ليهود اللي لثمة كلهم كانوا على بالهم بلي باباه يوناني.⁴و كانوا يروحوا عند المومنين في المدن اللي يعديو عليها و يبلغولهم الاوامر تاع الرسل اللي في اورشليم و الحكم تاعهم في القضايا الهامة باه يعملوا بيها. لمنامة تاع بولس على الراجل المكدوني ⁵و كانت الكنايس تتقوى في ليمان و يزيد العدد تاعها يوم بعد يوم.⁶و من بعد كي عداو في بلاد فيريجية و جوايه غلاطية, منَّع عليهم الروح القدس باه يبشروا بالكلمة لثمة في اسيا. ⁷و كي وصلوا لميسيا حبوا يروحوا ل بيثينية, وزاد منَّع الروح القدس ثاني عليهم باه يدخلوا. ⁸ولاو عداو على بيسية و هبطوا ل ترواس.⁹و كي كان بولس راقد في الليل شاف منامة: راجل من مقدونية واقف و يحاول فيه و يقولو: "عدي لمقدونية و عاونَّا!". ¹⁰و بعدما ما شاف بولس لمنامة لثمة بعد وجَّدنا ارواحنا باه نسافروا لمقدونية, و كنَّا متيقنين بلي الله دعانا باه نبشروا الناس لثمة. ايمان ليدية في فيليبي¹¹و ركبنا لبابور من ترواس و رحنا طول ل ساموتراكي, و اليوم وغدوة رحنا ل نيابوليس. ¹²و منها رحنا ل فيليبي, و هي اكبر مدينة في ولاية مكدونية, وكانت تابعة لروما. و قعدنا ايامات في هاذي لمدينة. ¹³و نهار السبت خرجنا و رحنا بحذى الواد, و من العادة كانوا ليهود يصليو صلاتهم لثمة, و لقينا جماعة تاع نساء مجتمعين قعدنا و بدينا نحكيو معاهم.¹⁴و كانت واحدة لمرى قاعدة تسمع فينا اسمها ليدية, بياعة تاع ارجوان من مدينة تياتيرا, ومومنة تعبد الله, فتح الله قلبها باه تقبل لكلام اللي كان بولس يقول فيه. ¹⁵تعمدت هي و اهل بيتها و حاولتنا وقالت: "اذا كان حكمتوا عليا بلي راني مومنة بالرب, ارواحوا ادخلوا لداري و اقعدوا عندي". و كي حتمت علينا رحنا. بولس و سيلا في الحبس في فيليبي¹⁶و واحد النهاركي كنا رايحين لاجتماع الصلاة, تلاقتنا واحد لخديمة فيها روح تاع كزّانة و كانت تكسب صوارد ياسر لاسيادها من الخدمة تاعها. ¹⁷بدات تتبع فينا و تعيط على طول صوتها و تقول: "هاذم الناس راهم يخدموا في الله العالي, و يبشروكم بطريق الخلاص". ¹⁸و كانت كل يوم تعمل كيما هكا. حتى واحد النهار قلق منها بولس و تلفت و قال للروح اللي فيها: " انا نقولك باسم يسوع المسيح باه تخرج منها!". و في ساعتها بعد خرج منها.¹⁹و كي شافوا مواليها بلي ما بقاوش يكسبوا منها مال كيما قبل, حكموا بولس و سيلا و كركروهم للساحة تاع لمدينة قدام الحكام, ²⁰و كي جابوهم للمحكمة قالوا: "هاذم الرجال راهم يديروا ف الفوضى في بلادنا, و راهم من ليهود, ²¹قاعدين يناديو بعادات ما يجوزش لينا احنا الرومانيين, نقبلوها و الا نعملوا بيها".²²و هاج عليهم الغاشي, و قطعولهم الحكام قشهم اللي فوق منهم و امروا العسكر باه يضربهم بالعصا. ²³كثروا عليهم بالضرب و رماوهم في الحبس, و وصَّاو مامور الحبس باه يحط عليهم العسة مليح. ²⁴و كي جا هاذا الامر للمأمور ولى حطهم في الحبس الداخل خلاص. و ربط لهم رجليهم في المقطرة.²⁵و عند نص الليل كان بولس وسيلا يصلِيو و يسبحوا في الله, والمحابسية كانوا يسمعوا فيهم. ²⁶و على غرادة صرى زلزال قاوي خلاص حتى ن الساس تاع الحبس تحرك, و تحلت البيبان الكل, و تفكت السلاسل تاع لمحابسية الكل.²⁷و كي فاق المأمور تاع الحبس من النوم و لقى البيبان الكل محلولة, جبد السيف و كان حاب يقتل روحو, على خاطر كان حاسب بلي لمحابسية هربوا. ²⁸عيط عليه بولس بأعلى صوتو و قالو: "ما تعمل في روحك حتى شيء! رانا الكل هنا!".²⁹طلب منهم يشعلوا الضوء و دخل يجري لداخل, و طاح على ركايبوا قدام بولس وسيلا و هو خايف يرتعد, ³⁰و من بعد خرَّجهم و قال: "يا سيادي, واش لازمني ندير باه نخْلص؟". ³¹قالوا لو: "امن بالرب يسوع المسيح تخْلص انت و اهل بيتك".³²و كلموه هو والناس الكل اللي في دارو بالكلمة تاع الرب. ³³و داهم في هاذاك الليل في هاذيك الساعة و نضف لهم الجروح تاعهم, واتعمد ثم ثم هو وكل اللي كانوا معاه في الدار. ³⁴و كي طلَّعهم لداروا عمل لهم عشاء, و فرح بيهم هو واهلوا الكل على خاطر امنوا بالله.³⁵و كي طلع النهار بعثوا الحكام العسكر و قالولهم: "سيب هاذوك الزوزالرجال". ³⁶خبَّر المأمور بولس بلي الحكام بعثوا امر باه نسَّيبكم, اخرجوا ضرك و روحوا في لمان.³⁷قالو بولس : "كيفاه يضربونا جهارو بلا محاكمة, و احنا عندنا الجنسية الرومانية, و زادوا رماونا في الحبس, و ضرك يطردونا في السر؟ لا! لازم هما اللي يجيو ويخرجونا". ³⁸رجعوا العسكر و خبروا الحكام بكلام بولس. و كي سمعوا بلي هما عندهم الجنسية الرومانية خافوا. ³⁹و جاو طلبوا منهم السماح و خرجوهم, و طلبوا منهم يخرجوا من لمدينة.⁴⁰و كي خرجوا من الحبس راحوا عند ليدية, و شافوا الخاوة لثمة و شجعوهم و من بعد راحوا.

Chapter 17

¹و عداو على امفيبوليس و ابولونية, و وصلوا لتسالونيكي وين كاين المجمع تاع ليهود. ²دخل عندهم بولس كيما العادة وقعد يتحاجج معاهم من الكتب المقدسة ثلاث سبوت وراء بعضاهم.³كان يشرح لهم و يبين بلي كان لازم على المسيح يتألم و يقوم من بين الموتى, و بلي راه هاذا المسيح هو يسوع اللي انا قاعد نبشر لكم بيه. ⁴و كاين منهم جماعة اقتنعت و جات في صف بولس وسيلا, و من بينهم ياسر من اليونانيين اللي يعبدوا ربي, و ثاني نساء ياسر من لكبار في لعمر.⁵و غاروا منهم ليهود اللي ما همش مومنين و راحوا كراو عصابة تاع اشرار من السوق داروا الفوضى و الشغب في لمدينة, و راحوا لدار ياسون يحوسوا على بولس و سيلا باه يسلموهم للشعب. ⁶و كي ما لقاوهمش كركروا ياسون و معاه خاوة اخرين للحكام تاع لمدينة و هما يعَّيطوا: "هاذم هما اللي داروا الفتنة ف لرض كاملة و زادوا جاو لهنا ثاني. ⁷و راه مضَّيفهم ياسون عندو. و هما كاملين يخالفوا الامر تاع قيصر ويقولوا بلي عندهم ملك واحد اخر هو : يسوع!".⁸و الناس الكل و الحكام تاع لمدينة تقلقوا و ما عجبهمش الحال كي سمعوا هاذي الهدرة. ⁹و طلبوا كفالة من عند ياسون و لخرين و سَّيبوهم. في بيرية¹⁰حكموا الخاوة خرجوا بولس وسيلا ثم ثم و بعثوهم ل بيرية. و كي وصلوا دخلوا للمجمع تاع ليهود. ¹¹و كانوا ناس ملاح خير من ناس تسالونيكي, و قبلوا الكلمة برغبة كبيرة وكل يوم يفركتوا في الكتب المقدسة: باه يشوفوا اذا كانت هاذي الامور صحيحة؟ ¹²و امنوا منهم ياسر, منهم ياسر من النساء اللي يخافوا ربي, و ياسر ثاني من الرجال.¹³و كي سمعوا ليهود الي في تسالونيكي بلي بولس يبشر ثاني بالكلمة في بيرية, لحقوه لثمة وبداو يحرشوا عليه في الناس. ¹⁴ولاو الخاوة ركَّبوا بولس في لبابور و بعثوه, اما سيلا و تيموتاوس بقاو في تسالونيكي. ¹⁵و اللي راحوا مع بولس وصلوه حتى ل اثينا, و رجعوا و وصاهم بولس باه يقولوا ل سيلا وتيموتاوس يلحقوا عليه في اقرب وقت. في اثينا¹⁶و كي كان بولس يستنى فيهم ف اثينا تقَّلَق و ما قدرش يستحمل, كي شاف لمدينة مليانة بالاصنام. ¹⁷و كان يكلم ليهود اللي يجيو يعبدوا الله في المجمع, وحتي هاذوك اللي يتلاقى بيهم في السوق كل يوم.¹⁸و تجادلوا معاه جماعة من الفلاسفة الابيكوريين و الرواقيين, وحايد منهم قالوا: "يا درى واش يحب يقول لنا هذا الهدَّار؟". و وحايد اخرين قالوا: "الظاهر عليه قاعد ينادي بالهة غريبة". بالصح هو كان يبشر فيهم بيسوع و قيامتو من بين الموتى.¹⁹و داو بولس للمجلس تاع لمدينة في اريوس باغوس, و قالوا لو: "نحبوا نعرفوا واش هو هاذا التعليم الجديد اللي قاعد تتكلم عليه. ²⁰على خاطر راك تقول في امور غريبة علينا, مادابينا نفهموها". ²¹و كانوا ناس اثينا الكل بالمواطن بالغريب, كلهم ما عندهم حتى حاجة اخرى يديروها في الوقت الفارغ تاعهم, غير يهدروا و الا يسمعوا حاجة جديدة.²²وقف بولس في وسط المجلس اريوس باغوس و قال: " يا ناس اثينا! راني نشوف فيكم متدينين ياسر من الجوايه الكل, ²³على خاطركي كنت ندور في لمدينة و نشوف في المعابد تاعكم, شفت واحد المذبح مكتوب عليه:"ل الاله المجهول". و هاذا اللي تعبدوا فيه بلا ما تعرفوه, هاذا هو اللي انا ننادي لكم بيه.²⁴الاله اللي خلق الدنيا و كل ما فيها, هاذا, هو رب السماء و لرض, ما يسكنش في معبد مبني باليدين, ²⁵و ماهوش هو اللي الناس يخدموه بيديهم كي اللي راه محتاج ليهم, على خاطر هو اللي يمد للناس الكل حياة و نفس و كل شيء.²⁶و خلق البشر الكل اللي على وجه لرض من اصل واحد, و عطاهم الزمان و لمكان اللي يسكنوا فيه, ²⁷باه يطلبوه لعلهم يحوسوا عليه ويلقاوه, و هو ماهو بعيد على حتى واحد.²⁸على خاطر بيه نحيا و نتحرك و نكون, كيما قالوا وحايد من الشعراء تاعكم ثاني: حتى نحنا رانا من الذرية تاعو. ²⁹و اذا كنا احنا اولاد الله, ما لازمش نحسبوا االاولوهية كيما الذهب والفضة و الا حجرة منقوشة من الشيء اللي يصنعو الانسان.³⁰الله ضرك يامر الناس الكل في كل مكان يتوبوا, و يغمض عينو على زمانات الجهل. ³¹على خاطر حدد نهار راح يحكم فيه على المسكونة كاملة بالعدل, على يد واحد الراجل خايرو هو, و الدليل بلي خايرو هو كي قومو من بين الموتى".³²و كي سمعوه يهدر على القيامة من بين الموتى ولاو وحايد يستهزاو بيه, و قالوا وحايد اخرين: "لازم نزيدوا نسمعوك تكلمنا على هاذا الامر ثاني!". ³³و كيما هكذا خرج بولس من وسطهم. ³⁴و كاين اللي امنوا وبقاو معاه ما حبوش يخلِوه, و منهم ديونسيوس الاريوباغي, و مرى اسمها دامرس و معاهم وحايد اخرين.

Chapter 18

¹وبعد هاذا خرج بولس من اثينا و راح لكورنتوس, ²و لثمة تلاقى مع واحد الراجل يهودي اسمو اكيلا, بنطي من اهل البنط, و كان كي غير جا من ايطاليا, هو ومرتو برسكيلا, على خاطر القيصر كلوديوس قال لازم على ليهود الكل يخرجوا من روما. جاهم بولس. ³و كي كان مولى صنعة كيما هما قعد عندهم و ولى يخدم معاهم في الصنعة تاع لخيَّم.⁴و كان كل نهار سبت يجادل ليهود و اليونانيين في المجمع و يقنع فيهم. ⁵و كي هبطوا سيلا و تيموتاوس من مكدونية, و كان بولس حاصر انشغالو كامل في التبشير بالمسيح يسوع لليهود. ⁶و كي ما حبوش وسبوه نفض يديه منهم و قال لهم : " ذنوبكم في رقبتكم! انا بري منكم. من ليوم نروح نبشر غيركم من الامم".⁷و راح من لثمة و سكن عند واحد الراجل اسمو يوستس, كان يعبد الله, و كانت دارو لاصقة في المجمع. ⁸و كريسبس الرايس تاع المجمع امن هو ثاني بالرب هو واهل بيتو الكل, و ناس ياسر من كورنتوس سمعوا و تعمدوا.⁹و كلم الرب بولس في منامة في الليل و قالو: "ما تخافش, اهدر و ما تسكتش, ¹⁰على خاطر راني معاك , واحد ما ياذيك, على خاطر عندي شعب كبير في هاذي لمدينة". ¹¹و قعد عام ونص بيناتهم يعلم بالكلمة تاع الله.¹²و كي كان غاليون والي على اخائية, ليهود الكل مع بعضاهم تفاهموا على بولس, و جابوه للمحكمة ¹³و قالوا: "هاذا الراجل يميل في الناس باه يعبدوا الله عبادة تخالف الشيء اللي في الشرع تاع موسى".¹⁴و كي جا بولس راح يبدى يهدر قال غاليون لليهود: " يا ليهود لو كان جات لحكاية حكاية ظلم و الا جريمة خطيرة, كنت نقضيلكم بالحق و نستحملكم. ¹⁵بالصح كي عادت المسألة مسألة كلام, و اسامي, في الشريعة تاعكم, انتوما تدبروا روسكم. على خاطر انا ما نحبش نكون قاضي لهاذي الامور".¹⁶و سحتهم من لمحكمة. ¹⁷و حكموا ناس اليونان سوستانس الرايس تاع المجمع, و ضربوه قدام المحكمة, و اما غاليون ما هموش الامر خلاص. بريسكلا و اكيلا و ابولس¹⁸و قعد بولس لثمة مدة طويلة في كورنتوس, ومن بعد ودَّع الخاوة و سافر في البابور ل سوريا, و راحوا معاه بريسكلا و اكيلا, بعدما حفف شعرو في كنخريا على جال وعد كان عليه. ¹⁹و كي وصل ل افسس خلاهم لثمة. و دخل هو للمجمع تاع ليهود باه يتجادل معاهم.²⁰و طلبوا منو يزيد يقعد عندهم اكثر بالصح ما حبش. ²¹و ودعهم وقال لهم: " لازم نعيد العيد الجاي في اورشليم, بالصح نرجع لكم مرة اخرى ان شاالله". و ركب في البابور من افسس وسافر.²²و كي هبط في قيصرية راح سلم على الكنيسية, وبعد هوَّد ل انطاكية. ²³و بعد ما قعد لثمة مدة خرج و راح في جوايه غلاطية و فريجية يشجع في التلامذة و يقوي العزيمة تاعهم.²⁴و من بعد جا واحد الراجل ل افسس اسمو ابولس يهودي, من اهل الاسكندرية, يعرف يهدر مليح و فاهم الكتب المقدسة. ²⁵و كان يعرف مليح طريق الرب. وكان عندو حماس يتكلم و يعلم تعليم صحيح كل واش يخص يسوع. و كان يعرف غير المعمودية تاع يوحنا برك. ²⁶و بدا يجاهر في المجمع. و كي سمعوه اكيلا و برسكيلا داوه عندهم, و زادوا شرحولو طريق الرب بالتدقيق.²⁷و كي كان حاب يروح ل اخائية, شجعوه الخاوة و بعثوا برية للتلامذة لثمة و وصاوهم باه يستقبلوه و يرحبوا بيه. و كي وصل كان بالنعمة يعاون ياسر الناس اللي امنوا, ²⁸على خاطر يتحاجج مع ليهود و يسكتهم جهار, و يبين لهم بلي يسوع هو هو المسيح.

Chapter 19

¹و في الوقت اللي كان ابولس في كورنتوس, وصل بولس ل افسس بعدما عدى على الجوايه اللي لفوق الكل. و كي تلاقى مع التلامذة ²قال لهم: "كي امنتوا قبلتوا المعمودية تاع الروح القدس؟". قالوا لو:" عمرنا ما سمعنا بلي كاينة معمودية تاع الروح القدس".³قال لهم. "مالا بواش من معمودية تعمدتوا؟". قالوا: "بالمعمودية تاع يوحنا". ⁴قال لهم بولس: "يوحنا كان يعمد بالمعمودية تاع التوبة, وقال للشعب باه يامنوا باللي يجي من بعدو, يتكلم على المسيح يسوع".⁵و كي سمعوا ولاو تعمدوا باسم يسوع المسيح. ⁶و كي حط بولس يديه عليهم نزل عليهم الروح القدس, و بداو يتكلموا بلغات جديدة و يتنبأوا. ⁷وكانوا قريب اثناش ن راجل.⁸و من بعد دخل للمجمع, و قعد يجادل و يقنع في الناس بالامور تاع ملكوت الله لمدة ثلاثة شهر. ⁹و كي شاف بولس بلي كاين وحايد من اللي ماحبوش يامنوا قاعدين يطيحوا في لكلام و يسبوا في طريق الرب للناس, ولى بعَّد عليهم و ادا التلامذة و بدا كل يوم يعلم فيهم في مدرسة واحد الراجل اسمو تيرانس. ¹⁰و بقى يعمل هكذاك مدة عامين, حتى الناس اللي ساكنين في اسيا الكل يهود و يونانيين سمعوا كلمة الرب يسوع.¹¹وكان الله يعمل على يد بولس معجزات عجيبة. ¹²حتى ولاو الناس يديوْ لمحارم و لقمايج اللي تمس البدن تاع بولس و يحطوها على المرضى, يروح عليهم لمرض و الي فيهم جنون يخرجوا منهم.¹³و كاين جماعة من ليهود اللي يطوفوا و يعَّزموا على الناس ويخَّرجوا في الجنون باسم يسوع المسيح, و يقولوا: "نحلفوك تخرج بالاسم تاع يسوع المسيح اللي يبشر بيه بولس!". ¹⁴و اللي عملوا هذا الشيء هما اولاد سيكاوا في سبعة, و معاهم واحد يهودي رايس تاع كهنة.¹⁵جاوبهم هاذاك الجن و قال لهم: " انا نعرف يسوع, و نعرف شكون هو بولس, بالصح انتوما واش تكونوا؟". ¹⁶وهجم عليهم الراجل المسكون بالجن, و غلبهم و دار فيهم حالة, حتى هربوا من هاذيك الدار عريانين و مجروحين. ¹⁷وهاذا الشيء اللي صرى سمعوا بيه الناس الكل ليهود و اليونانيين الساكنين في افسس. و خافوا خوف كبير و كان اسم الرب يسوع يتعظم.¹⁸و كانوا ناس ياسر من اللي امنوا يجيو يتوبوا و يستعرفوا بالشيء اللي داروه, ¹⁹و ياسر من اللي يديروا السحور لموا الكتبَّة تاعهم و حرقوها قدام الناس الكل. و كي حسبوا السومة تاعها لقاوها خمسين الف تاع فضة. ²⁰و كيما هكذا كانت كلمة ربي تتنشر و تتقوي في النفوس. الشغب اللي جرى في افسس²¹و كي فاتت هاذي الامور الكل, خمم بولس باه يعدي على مكدونية واخائية و من لثمة يروح لاورشليم, و قال: " و بعدما نكمل من لثمة لازمني نروح حتى لروما ثاني". ²²و بعث ل مكدونية زوز من اللي كانوا يخدموا معاه: و هما تيموتاوس وارسطوس, و قعد هو في اسيا مدة من الزمان.²³و صرات في هاذيك ليام فتنة و اعمال شغب بسبة طريق الرب, ²⁴على خاطر كان واحد الراجل اسمو ديمتريوس, صايغي و يخدم في تماثيل تاع الالهة ارطاميس بالفضة و يبيع فيهم و كان يكسب منهم مال ياسر. ²⁵تلم هو و الصياغ و اصحاب المهنة و قال لهم: "يا رجال راكم عارفين باللي لمعيشة تاعنا من هاذي الحرفة.²⁶و راكم تشوفوا و تسمعوا كيفاه بولس قنَّع وميَّل ناس ياسر مش برك في افسس بالصح في جوايه اسيا الكل و قاعد يقول لهم: "الالهة اللي تتصنع باليد ماهيش الهة. ²⁷و ما بقاش برك رزقنا احنا اللي مهدد, حتى الهيكل تاع الالهة ارطاميس, الالهة العظيمة, مهدد تروح الهيبة تاعو, و يولي ما عندو حتى قيمة, و هي اللي يعبدوها كل الناس في اسيا و في الدنيا الكل".²⁸و كي سمعوا هاذا لكلام تغشوا و بداو كلهم يعيطوا و يقولوا: " عظيمة ارطاميس الالهة تاع ناس افسس!". ²⁹و دخلت لمدينة كاملة في بعضاها, و راحوا الكل هجموا على غايوس و ارسترخس اللي كانوا مع بولس في الرحلة تاعو و هما من مكدونية و كركروهم للمعلب.³⁰و كي حب بولس يدخل في وسط الشعب, ما خلاوهوش التلامذة. ³¹و ناس اصحابو من الوجهاء تاع لمدينة, بعثوا و وصاوهم باه ما يسلمش روحو و ما يروحش للملعب. ³²والناس كانوا كل واحد ينادي بحاجة من زي, على خاطر الملعب كان خايض, و اكثر الناس ماعلابالهمش علاش تلموا!³³و خرجوا اسكندر من وسط الغاشي, و كانوا ليهود يدزوا فيه. شار ليهم بيدو كان حاب يهدر معاهم. ³⁴و كي عرفوا بلي هو يهودي, ولاو الكل يعيطوا بصوت واحد لمدة قريب ساعتين و يقولوا: "عظيمة ارطاميس الالهة تاع ناس افسس!".³⁵و من بعد جا الكاتب حاكم لمدينة و هدى الناس و قال: " يا ناس افسس, شكون ما يعرفش بلي مدينة افسس تعبد في الالهة العظيمة ارطاميس و للتمثال اللي نزل من زفس؟ ³⁶و هاذي حاجة ما فيهاش حتى هدرة, على هاذا لازم عليكم تكونوا هاديين و ما تتهوروش. ³⁷و انتوما جبتوا هاذوا الرجال في زوز اللي لاهما سراقين تاع معابد و لا قاسوا الحرمة تاع الهتكم.³⁸و اذا كان ديمتريوس و الصنَّاع اللي معاه عندهم شكاية على كاش واحد, كاين محكمة و كاين قضاة يروحولهم. ³⁹و اذا كان عندكم شكاية في اي امور اخرى, عندنا القانون. ⁴⁰على خاطر التجمع تاعنا اليوم ماهوش قانوني و نتحاسبوا على الفتنة و الشغب و ما عندنا حتى سبة نقدموها". ⁴¹و صرَّف الناس راحوا روْحوا.

Chapter 20

¹و كي فضت الفوضى, عيط بولس للتلامذة و بقَّاهم على خير, و خرج في طريق مكدونية. ²وعدى على الخاوة اللي في طريقو و شجعهم ياسر, حتى ن وصل ل هلاَّس, ³و قعد فيها ثلاثة اشهر. و كي كان معول يطلع لسوريا, تفاهموا عليه ليهود باه يقتلوه, ولى رجع على الطريق تاع مكدونية.⁴و راح معاه ل اسيا سوباترس اللي من بيرية, و راحوا معاه من تسالونيكي: ارسترخس و سكوندس و غايوس اللي من دربة و تيموتاوس. و من اسيا راحوا معاه: تيخيكس و تروفيمس. ⁵اللي سبقونا لترواس و بقاو يستناو فينا لثمة. ⁶واحنا كي فاتوا ايامات لفطير ركبنا في البابور من فيليبي و لحقنا عليهم ل ترواس بعد خمسة ايام, و قعدنا لثمة سبعة ايام. اقامة افتيخوس من الموت في ترواس⁷و نهار الاحد كي كانوا التلامذة مجتمعين باه يكسروا الخبز مع بعضاهم, و وقف بولس يوعظ فيهم على خاطر كان ناوي يسافر اليوم وغدوة, و طوَّل في كلامو حتى نص الليل. ⁸و كانوا قاعدين في الغرفة اللي في السطح و مكثرين من الضوء.⁹و كان واحد الشاب اسمو افخيتوس قاعد بحذى الطاقة طاح عليه النعاس. و كي بقى بولس يهدريهدر غلبو النوم و طاح من الطاقة من الطابق الثالث حتى للرض, و هزوه ميت. ¹⁰هود بولس يجري ورمي روحو عليه و عنْقو و قال لهم: "ما تخافوش! او مازال فيه النفس!".¹¹و من بعد طلع و كسر الخبز وكلى و زاد بقى يشجع فيهم حتى للفجر. بعدها خرج. ¹²و هما جابوا الشاب حي, وفرحوا فرحة كبيرة خلاص. من ترواس ل ميليتس¹³و اما احنا سبقنا للبابور و قلعنا رحنا ل اسوس, باه نديو بولس من لثمة و على خاطر هو حاب يسافر في البر. ¹⁴و كي عرَّضنالو ل اسوس اديناه معانا في البابور و رحنا ل ميتيليني.¹⁵قعدنا نهار لثمة و اليوم وغدوة زدنا عدينا على خيوس. و بعدها بنهار وصلنا ل ساموس, و قعدنا في تروجيليون, و نهار من بعد رحنا ل ميليتس, ¹⁶على خاطر بولس حب يفوت على افسس في لبحر باه ما يبطاش في اسيا, وكان حاب يزرب باه يقدر يكون في اورشليم يوم الخمسين. بولس يودع لكنيسية في افسس¹⁷و كي كنا في ميليتس بعث و عيط على القسوس تاع لكنيسية في افسس. ¹⁸و كي جاو قال لهم: "راكم عارفين كيفاه من اول يوم دخلت فيه ل اسيا, ¹⁹كيفاه كنت في هاذيك المدة كاملة اللي عقبتها معاكم. نخدم في ربي بتواضع كبير و دموع ما تفضش, و قاسيت لمحاين الكل من عند ليهود. ²⁰و كيفاه ما قصرت معاكم في حتى حاجة تفيدكم بالعكس كنت نقول لكم و نعلم فيكم جهار لبرى و في الديَّار, ²¹نناشد في ليهود و في اليونانيين باه يتوبوا لله و يامنوا بربنا يسوع المسيح.²²و ضرك انا راه يدفع فيا الروح القدس باه نروح لاورشليم, و ما علاباليش واش يسنى فيَّا لثمة. ²³بالصح الروح القدس راه خبرني بلي في كل مدينة كاين السلاسل و لمحاين تستنى فيا. ²⁴بالصح ما نعمل حساب حتى لشيء, و حياتي ما عندها حتى قيمة, حتى نتمم المهمة و الخدمة اللي تحطت امانة في رقبتي من عند الرب يسوع المسيح, و هي باه ننادي ببشارة النعمة تاع الله.²⁵و راني علابالي بلي ما تزيدوش تشوفوني, انتوما الكل اللي مشيت في وسطكم نبشر فيكم بالملكوت تاع الله. ²⁶على هاذيك نشهد اليوم قدامكم بلي راني بريء من دمكم الكل, ²⁷على خاطر ما قصرتش معاكم باه نخبركم بالمشورة تاع الله.²⁸استحفظوا مالا على ارواحكم و على الرعية اللي حطكم الروح القدس اساقفة عليها, باه ترعاو لكنيسية تاع الله اللي شراها بالدم تاعو. ²⁹على خاطر علابالي باللي بعد ما نروح انا عليكم يدخلوا بيناتكم الذيابة الخطافين ما يرفقوش بالرعية. ³⁰و حتى من بينكم انتوما يخرجوا ناس يتكلموا بالكذوبات باه يجبدوا التلامذة وراهم.³¹على هاذيك مالا اتولهوا, و اتفكروا بلي وانا بيناتكم ثلاثة سنين ليل و نهار, نبكي بالدموع و انا ننصح في كل واحد منكم. ³²و ضرك يا خاوتي نستودعكم لله و لكلمة نعمتو, القادرة باه تبنيكم و تعطيكم ميراث بين كل القديسين.³³عمري ما طمعت في ذهب و لا في فضة و لا في حوايج تاع اي واحد. ³⁴و راكم علابالكم باللي كنت نخدم بيديا هاذو و بعرق جبيني باه نوفي حاجتي وحاجة اللي يخدموا معايا. ³⁵وريت لكم في كل شيء كيفاه لازم نتعبوا و نعاونوا الضعفاء, و اتفكروا ديما كلام الرب يسوع كي قال: اللي يمد يتبارك اكثر من اللي يدي".³⁶و كي كمل كلامو ركع على ركايبو قدامهم الكل و صلى. ³⁷وكانوا كلهم يبكيو, و يعنقوا فيه و يسلموا عليه ³⁸و اكثر حاجة وجعتهم, كي قال لهم:ما عدتوش تشوفوا وجهي مرة اخرى. و راحوا معاه شيعوه حتى للبابور.

Chapter 21

¹و كي تفارقنا معاهم قلّعنا و رحنا طول ل كوس, و اليوم و غدوا رحنا لرودس, و منها رحنا لباترا. ²و لقينا بابور خارج ل فينيقية ركبنا فيه و قلَّعنا.³و من ثمة طلعنا لقبرس, و خليناها على ليسار و سافرنا ل سورية, و كي وصلنا ل صور نزلنا على خاطر البابور راح يفرغ السلعة اللي فيه. ⁴و لثمة تلاقينا تلامذة قعدنا معاهم سبعة ايام. و كانوا يقولوا لبولس بالوحي تاع الروح القدس باه ما يطلعش لاورشليم.⁵بالصح احنا كملنا هاذوك ليامات معاهم و من بعد حكمنا الطريق, و جاو معانا هما الكل بنساهم و ولادهم و شّيعونا حتى للخرجة تاع لمدينة. و كي وصلنا للشط ركعنا على ركايبنا و صلينا. ⁶و سلمنا عليهم احنا طلعنا للبابور. و هما رجعوا لديارهم.⁷و رحنا من صور, و كي وصلنا ل بتولماوس, سلمنا على الخاوة لثمة وقعدنا معاهم نهار واحد. ⁸و من بعد احنا اللي كنا مع بولس خرجنا اليوم و غدوة و رحنا ل قيصرية, عند فيليبّس المبشر, على خاطر كان واحد من السبعة و قعدنا عندو. ⁹و كان عندو ربعة بنات صبايا و كانوا يتنبأوا.¹⁰و بعد ما قعدنا عندو مدة ايامات ياسر, واحد النبي اسمو أغابوس هبط من بلاد اليهودية. ¹¹وجاء عندنا, و هز لحزام تاع بولس, و كتّف بيه يديه و رجليه و قال: " الروح القدس يقول لكم: الراجل مولى هاذا لحزام راح يكتفوه ليهود في اورشليم و يسلموه للناس اللي من الامم".¹²و كي سمعنا واش قال اغابوس قعدنا نحاولو فيه احنا والناس اللي من قيصرية باه ما يروحش لاورشليم. ¹³قال لهم بولس: " واش بيكم تبكيوْ و توَجعولي في قلبي, راني واجد موش غير للسلاسل برك, بالصح حتى للموت ثاني ف اورشليم على جال الاسم تاع الرب يسوع المسيح". ¹⁴و كي ما قدرناش نقنعوه سكتنا و قلنا: " اللي عاملها ربي تتعمل".¹⁵و بعدها بأيامات وجّدنا رواحناو طلعنا لاورشليم. ¹⁶و جاو معانا ثاني تلامذة من قيصرية ورحنا قعدنا عند مناسون راجل من قبرص و تلميذ قديم. بولس يوصل ل اورشليم¹⁷و كي وصلنا لاورشليم فرحوا بينا الخاوة اللي لثمة ياسر. ¹⁸و اليوم و غدوة راح معانا بولس لدار يعقوب, و كانوا الشيوخة الكل حاضرين. ¹⁹سلّم عليهم بولس و بدى يحكيلهم على كل شيء اللي عملو ربي معاه و على يديه بين الامم.²⁰و كي سمعوا هاذا الشيء كامل حمدوا ربي و مجدوه. و قالوا لبولس: " راك تشوف يا خونا بولس باللي كاين ياسر من ليهود اللي امنوا, وهما كلهم متعصبين للشرع تاع موسى. ²¹و راهم سمعوا بيك باللي انت تعلم في ليهود اللي متغربين بين الشعوب لخرى باه مايعملوش بالشيء اللي جا بيه موسى, و تقول لهم ما يطهروش اولادهم و ما يديروش كيما موالفين حساب العوايد.²²و كيفاه نديروا ضرك؟ على خاطر راح يسمعوا بيك باللي راك هنا, ولابد يلموا عليك الغاشي. ²³مالا اعمل هاذا الشيء اللي نقولوا لك عليه: عندنا ربعة رجال عليهم نذْر. ²⁴اديهم و اغسل انت و ياهم حساب الشرع و خلص عليهم يحجموا روسهم, باه كي يشوفوك الناس يعرفوا باللي الشيء اللي سمعوه عليك ما هوش صحيح و باللي انت ثاني تمشي على حساب الشرع تاع موسى.²⁵و اما من جيهة اللي امنوا من الامم, كتبنا لهم احنا و قلنالهم ما يثقلوش ارواحهم بالشرع تاع موسى, بالصح برك يحفظوا ارواحهم من الذبايح تاع الاوثان, و من الدم, و من الجيفة, و من الزنى". ²⁶ولى بولس اليوم و غدوة دى الرجال في ربعة, و راح غسل حساب الشرع و دخل للهيكل, و خبّر وقتاه تفُض ليام تاع التطهير, باه يجيو و يقدموا الضحية على كل واحد. القبض على بولس²⁷و كي قرّبت ليامات السبعة تفض, شافوه ليهود اللي من بلاد اسيا في الهيكل, و هيْجوا عليه الناس و حكموه ²⁸وهما يعيطوا: " يا رجال اسراييل, اجريو لينا! هاذا هو الراجل اللي يعلّم في الناس الكل تعليم يعادي شعبنا و الشرع تاعنا ويعادي هاذا لمكان, و ضرك زاد دخّل اليونانيين ثاني للهيكل و دنس هاذا البيت المقدس". ²⁹على خاطر شافوا معاه في لمدينة تروفيمس اللي من افسس, و حسبوا باللي بولس دخْلوا معاه للهيكل.³⁰و هاجت لمدينة كاملة, و الشعب يجري و يدزوا في بعضاهم و حكموا بولس و كركروه لبرى. و ثم ثم قفلوا البيبان. ³¹و في الوقت اللي كانوا حابين يقتلوه, سمع القايد تاع كتيبة العسكر الروماني باللي اورشليم كاملة مقلبة.³²ثم ثم لم العسكر جنود و ضباط و جا يجري,والغاشي كي شافوا القايد و العسكر معاه سيْبوا بولس. ³³و قدملو القايد و حكموا, و عطا امر باه يكتفوه بزوز سلاسل, و بدى يدير في تحقيق عليه شكون هو؟ و واش دار؟³⁴و كان كل واحد واش يقول. و ما قدرش يوصل للصح على خاطر كانت فوضى ياسر, ولى عطى امر للعسكر باه يديوَه للكزرنة, ³⁵و كي وصلوا بيه للدروج هزوه على خاطر خافوا لا يطيح في يد الشعب, ³⁶اللي كانوا يتبعوا فيهم و هما يعيطوا: " اديوه اقتلوه!". بولس يدافع على روحو³⁷و كي قرب بولس يدخل للكزرنة قال للقايد: "معليش نقول حاجة؟" قالو: "تعرف اللغة اليونانية؟ ³⁸ماكش انت هو المصري اللي دار الفتنة قبل بايامات, و خرّج معاه للصحراء اربعة الاف راجل قتالين ارواح؟".³⁹قالو بولس: "انا راجل يهودي من طرسوس, من واحد لمدينة ماهيش بعيدة على كيليكية. من فضلك كان تقدر تخليني نهدر مع الشعب". ⁴⁰سمح لو القايد باه يهدر, وقف بولس على الدروج و مد اشارة بيدو للشعب, كلهم سكتوا خلاص: و بدى بولس يهدر باللغة العبرية و قال:

Chapter 22

¹"يا خاوتي الرجال و يا سيادي اللي مقامكم في مقام بابا, خلوني ندافع على روحي قدامكم". ²و كي سمعوه يهدر باللغة العبرية سكتوا خلاص. وقال لهم:³" انا يهودي مولود في طرسوس في كيليكية ,بالصح تربيت هنا في هاذي لمدينة و قريت شرع جدودنا قراية صحيحة عند غمالائيل. و كنت كيفكم انتوما اليوم الكل نغير على الشرع تاع ربي. ⁴و كنت نعادي طريق يسوع و نقتل اللي يتبعوه, و حكمت منهم رجال و نساء و كتفتهم و وصلتهم للحباس, ⁵و رايس الكهنة و الشيوخة تاع الشعب كلهم يشهدوا عليا, و من عندهم هما اللي ديت بريات للخاوة ليهود اللي في دمشق, و رحت لثمة باه نحكم اللي امنوا بيسوع و نكتفهم و نكركرهم لاورشليم باه يتحاسبوا لهنا.⁶و كي كنت رايح و انا قريب نوصل لدمشق جوايه نص النهار, برَق عليا من السماء نور قاوي. ⁷حتى ن طحت في لرض, و سمعت صوت يقول لي: شاول, شاول! علاه راك تضطهد فيا؟ ⁸جاوبتو و قلت: شكون انت يا سيدي؟ قال لي: انا يسوع الناصري اللي راك تضطهد فيه.⁹و الرجال اللي كانوا معايا شافوا النور وكانوا خايفين, بالصح ما سمعوش الصوت اللي كلمني. ¹⁰قلت لو: يا ربي واش تحبني ندير؟ قال لي الرب: نوض و ادخل لدمشق ضرك يقولوا لك واش لازم تدير. ¹¹و على خاطر عينيا عماو من قوة هاذاك الضوء, قوْدوني الناس اللي كانوا معايا من يدي حتى دخلت لدمشق.¹²و من بعد واحد الراجل يخاف ربي و يمشي حساب الشرع تاعو. و يشهدوا لو ليهود الكل اللي في دمشق ¹³جاء عندي, و قال لي: يا خويا شاول, حل عينيك! و في ساعتها تحلوا عينيا خزرت معاه و و عدْتْ نشوف.¹⁴و قالي: الاه جدودنا خايرك باه تتعرف على واش حاب يدير, و تشوف البار, و تسمعو يكلمك. ¹⁵على خاطر راح تكون شاهد ليه عند الناس الكل بالشيء اللي شفتو و سمعتو. ¹⁶و ضرك خف روحك نوض اتعمد و اغسل ذنوبك و ادعي باسمو.¹⁷و من بعد ايامات كي رجعت لاورشليم, و انا نصلي في الهيكل, صرات لي واحد الغفوة رحت في النوم, ¹⁸وانا نشوف فيه يقول لي: ازرب! اخرج من اورشليم في ساع, على خاطر الناس لهنا ما يقبلوش الشهادة تاعك عليا.¹⁹قلت لو: يا ربي, راهم عارفين كيفاه كنت في كل مجمع نضرب الناس اللي يامنوا بيك و ندخلهم للحبس. ²⁰و نهار اللي قتلوا استفانوس الشهيد تاعك و كنت حاضر لثمة و راضي على الشيء اللي داروه. و كنت نعس على قشات الناس اللي قتلوه. ²¹قال لي: هيا روح, انا راح نبعثك بعيد لشعوب واحايد اخرين من غير ليهود".²²و كان الغاشي يسمع فيه و كي وصل للكلمة هاذي, بداو يعيطوا على طول اصواتهم و يقولوا: "افْنِيوْ هاذا الراجل من الدنيا, حرام يعيش!". ²³و كي كانوا الكل يعيطوا و و ينحِوْ في قشاتهم و يرمِوْ في التراب ف لهواء, ²⁴اعطا الرايس تاع الكتيبة امر للعسكر باه يدِيوَه للكزرنة, و طلب منهم يضربوه حتى ن يقول على واش من سبّة الناس هاجوا عليه كيما هكذا. بولس مواطن روماني²⁵و كي حطوه في لرض و ربطوه باه يضربوه, قال بولس للقايد الواقف لثمة: "عنكم الحق باه تضربوا مواطن عندو الجنسية الرومانية بلا ما يعدي على المحكمة؟". ²⁶و كي سمع هاذا القايد واش قال بولس راح للقايد تاع الكزرنة و قالو: "على بالك واش كنت راح تدير؟ هاذا الراجل عندو الجنسية الرومانية".²⁷جاء عندو يجري و سقساه: "قول لي: انت روماني؟". قال بولس: "نعم". ²⁸ولى القايد قالو: "انا باه وصلت اديت الجنسية حتى ن خلصت سومة غالية خلاص". قالوا بولس: "اما انا من اللي ولدت وانا عندي الجنسية". ²⁹و ثم ثم بعدوا عليه هاذوك اللي كانوا راح يستجوبوه. و خاف القايد كي عرف باللي بولس مواطن روماني, و هو كتفو. قدام الرياس تاع ليهود³⁰و اليوم و غدوة القايد كان حاب يفهم: وعلاه ليهود شكَاو بيه؟ جابوا و حلوا من يديه, وامر باه يجيبوا رياس الكهنة هما و المجمع تاعهم كامل, و من بعد جابلهم بولس.

Chapter 23

¹خزر بولس في الناس اللي قاعدين في المجمع و قال لهم: "يا خاوتي, راني عشت صافي مع ربي حتى لهاذا اليوم". ²كي قال هكّا ولى حنانيا الرايس تاع الكهنة طلب من اللي واقفين بحذاه باه يضربوه على فمو. ³قالو بولس: " يضربك ربي انشالله يا واحد السور المطلي بالجير! انت قاعد تحكم عليا حساب الشرَع و انت تخالف في الشرَع كي تقولهم يضربوني؟".⁴قالوا لو الناس اللي لثمة لكل: "كيفاه تسب في رايس الكهنة تاع ربي؟" قال بولس: ⁵"ما كنتش على بالي يا خاوتي باللي راه الرايس تاع الكهنة, على خاطر مكتوب: ما تحكيش بالسوء على الرايس تاع شعبك".⁶و كي عرف بولس باللي النص فيهم صدوقيين و النص لاخر فريسيين, قال على طول صوتو في المجمع: "يا خاوتي, انا فريسي و بن فريسي. و انا ضرك نتحاكم على خاطر نامن بالقيامة تاع الموتى". ⁷و غير كي هدر هاذي الهدرة صرات عركة بين الفريسيين و الصدوقيين, و تقسمت الجماعة على زوز, ⁸على خاطر الصدوقيين يقولوا: ما كانش قيامة من بين الموتى و ما كانش لا ملاك و لا روح, اما الفريسيين يقولوا العكس و يامنوا بالقيامة و الملايكة و الروح.⁹و صرات فوضى كبيرة, و ناضوا الكتبة تاع الفريسيين وبداو يعاركوا و يقولوا: "ما لقينا حتى تهمة على هاذا الراجل! و بلاك هدر معاه ملاك و الا روح احنا ما نحاربوش الله". ¹⁰و كبرت العركة خلاص حتى خاف القايد لا يقسمو بولس على زوز, و قال للعسكر باه يهبطوا و يخطفوه من وسطهم و يرجعوه للكزرنة.¹¹و في الليلة لخرى ظهر الرب لبولس و قال لو: " بولس اتشجع! على خاطر كيما شهدت ليا في اورشليم, هكذاك ثاني راح تشهد ليا حتى في روما". المؤامرة لقتل بولس¹²و كي طلع النهار كاين جماعة من ليهود تفاهموا بيناتهم, و حلفوا ما ياكلوا ما يشربوا حتى يقتلوا بولس. ¹³و كانت الجماعة فيها قريب اربعين واحد.¹⁴و راحوا عند رياس الكهنة و الشيوخة و قالوا لهم: "حلفنا ما ناكلوا و ما نشربوا حتى نقتلوا بولس. ¹⁵برك عليكم انتوما جماعة المجمع تقولوا للقايد يزيد يجيبهولكم غدوا, كي اللي راكم حابين تزيدوا تتحققوا من الشيء اللي راه يقول فيه. و احنا, مستعدين باه تقتلوه قبل ما يوصل عندكم".¹⁶و سمع ولد اخت بولس بالخطة, و راح للكزرنة و قال لبولس على كل شيء. ¹⁷عيط بولس على واحد من الضباط و قال لو: روح ادي هاذا الشاب للقايد, على خاطر عندو حاجة يحب يقولها لو".¹⁸و داه وصلوا للقايد و قال: " عيطلي لمحابسي بولس, و قال لي نجيبلك هاذا الشاب, و هو عندو حاجة يحب يقولها لك". ¹⁹حكموا القايد من يدو و اداه وحدو بعيد, و سقساه: "واش الحاجة اللي عندك تقولها لي؟".²⁰قالو: "ام ليهود تفاهموا باه يطلبوا منك تهبط لهم بولس غدوة للمجمع, زعمى حابين يتحققوا من الشيء اللي قاعد يقول فيه. ²¹ما تاخذش رايهم, على خاطر كاين اكثر من ربعين راجل حاطين عليه بالعين, و حلفوا بليمين ما ياكلوا ما يشربوا حتى يقتلوه. و راهم يستناو فيك ترد عليهم". بولس يديوه عند فيليكس في قيصرية²²صرّف القايد الشاب و وصّاه: "واحد ما يعلم باللي راك قلت لي على هاذا الشيء". ²³و من بعد عيّط على زوز من الضبّاط و قال لهم: "وجدوا ميتين جندي, وسبعين فارس و ميتين جندي مسلحي, باه يروحوا لقيصرية على الثلاثة تاع الليل. ²⁴و وجْدا حصان لبولس باه توصلوه سالم عند الوالي فيليكس".²⁵و كتب برية قال فيها: ²⁶"كلوديوس ليسانس, يبلَغ السلام للعزيز فيلكس الوالي: ²⁷هاذا الراجل حكموه ليهود و كانوا رايحين يقتلوه, و جيت انا مع العسكر و منعتو, كي سمعت بيه باللي روماني.²⁸و كي حبيت نفهم السبة اللي على جالها حبوا يقتلوه,هبطتوا للمجمع, ²⁹و لقيت باللي همّا يشكيو عليه على امور تخص الشرْع تاعهم. بالصح من جيهة القانون ما عندو حتى مخالفة تستاهل الاعدام و الا الحبس. ³⁰و كي سمعت باللي داروا خطة باه يقتلوه, بعثتو عندك في ساع, و قلت لليهود اللي يشكيو بيه يجيو عندك انت و يشكيو. يعطيك الصحة".³¹و اداو العسكر بولس و راحوا بيه في الليل ل انتيباتريس. ³²واليوم وغدوة رجعوا من لثمة و خلاوه برك مع الفرسان يكملوا بيه و همّا رجعوا للكزرنة. ³³و كي وصلوا الفرسان لقيصيرية, دخّلوا بولس للوالي و مدولوا لبرية.³⁴و كي قرى لبرية سقسى بولس واش من ولاية هو, و كي قالو من كيليكية, ³⁵قالو الوالي: "كي يحضروا الناس اللي يشكيو بيك نسمع لكم".و حطوا في لقصر تاع هيرودس و حط عليه العسة.

Chapter 24

¹و من بعد خمسة ايام هبط حنانيا رايس الكهنة و معاه الشيوجة و واحد المحامي اسمو ترتلّس. وشكاو على بولس للوالي. ²وكي جابوا بولس, بدا المحامي ترتلّس يهدر و قال: ³"يا سيدي لعزيز فيلكس, قدرك عالي, راه بفضلك انت اللي رانا عايشين في لهناء, و راك تخدم على مصلحة الامة بحسن تدبيرك و حكمتك, و راك داير فينا خير كبير و ونحنا نشكروك ديما في كل مكان و زمان.⁴ما نحبش نطول عليك اكثر من هكا, ماذابيك تصبر علينا و تسمعنا نكلموك باختصار علاش جينا: ⁵احنا لقينا هاذا الراجل مفسد و يدير في الفتنة بين جماعة ليهود في كل بقعة يروح لها, و راهو قايد على بدعة النصارى, ⁶و زيد فوق هاذا الكل كان حاب يدنس الهيكل ثاني, على هاذا الشيء حكمناه و حبينا نحكموا عليه كيما يقول الشرَع تاعنا.⁷بالصح جاء ليسياس القايد و فكوا من يدينا بالقوة, ⁸و قال اللي عندو شكاية عليه يطلع ليك انت يا سيدي. و انت تقدر تتحقق من هاذا الشيء كامل كي تسقسيه". ⁹و وافقوا ليهود على هاذي الهدرة كاملة و قالوا: "هاذي الامور صحيحة". الدفاع تاع بولس على روحو قدام الوالي فيلكس¹⁰و مد الوالي الامر لبولس باه يهدر, و قال: "انا على بالي باللي من سنوات طويلة وانت قاضي على هاذي الامة, على هاذا راح ندافع على روحي وانا متهني. ¹¹تقدر تتحقق باللي هبطت باه نعبد ربي في اورشليم ما عنديش اكثر من ثناش ن يوم. ¹²و واحد فيهم ما شافني نلم في الغاشي و نعمل في الفوضى لا في الهيكل, و لا في المجامع و لا في المدينة. ¹³و نتحداهم الا كان يقدروا يمدولك دليل على الشيء اللي يقولوا فيه.¹⁴بالصح نستعرف لك بهاذا: باللي انا نعبد في اله جدودي حساب المذهب اللي همّا يقولوا عليه "بدعة", و نامن بكل اللي مكتوب في الشرَع و لكتب تاع لنبياء. ¹⁵و عندي رجاء في الله كيما هما ثاني: باللي راح تكون قيامة للموتى الكل, اللي داروا الخير و اللي داروا الشر كيف كيف. ¹⁶و على هاذا انا نجاهد مع روحي ديما باه نكون نيتي صافية من جيهة ربي و عبادو.¹⁷و جيت هنا لشعبي و لأمتي بعد غربة سنين طويلة و جبت معايا مساعدات و باه نقدم القرابين. ¹⁸و هكا لقاوني جماعة من يهود اسيا في وسط الهيكل, و كنت قاعد نغسل حساب الشرع, ما كنت ندير لا في تجمع ولا في فتنة, ¹⁹و همّا اللي لازم يجيو يشكيوعندك اذا كان عندهم واش يقولوا.²⁰و هاذمَّ الحاضرين هنا خلي يقولوا لك واش من ذنب لقاوه فيّا, كي كنت قدامهم في المجمع, ²¹غير من جيهة هذا الشيء للي ناديت بيه : باللي اني قاعد نتحاكم اليوم على خاطر نامن بالقيامة تاع الموتى". بولس في الحبس تاع قيصرية²²و بعد ما سمع فيلكس هاذا لكلام, اعطاهم فرصة اخرى, على خاطر كان يعرف امور ياسر على هاذا الطريق, و قال لهم: "نزيد نتحقق من الامور تاعكم كي يحضر القايد ليسياس". ²³ومد امر لواحد من الضبّاط باه يعس على بولس, و يمدلو رخصة, و يخلي اصحابو اذا حبوا يزوروه و الا يخدموه.²⁴و من بعد ايامات جاء القايد فيلكس هو و دروسلا مرتو, و هي كانت يهودية, و عيط على بولس و سمع منو لكلام على الايمان بالمسيح. ²⁵و كي هدرلو بولس على الصلاح و العفة و يوم لحساب اللي راح يجي, خاف فيلكس, و قالو: "خلاص ضرك روح, و كي يكون عندي وقت نزيد نعيطلك".²⁶و كان فيلكس يستنى كاش ما يعطيه بولس دراهم و يسيبو, علاها كان ديما يعيطلو ويهدر معاه. ²⁷و كي كمْلوا عامين, جاء في المنصب تاع فيلكس واحد اسمو بوركيوس فستوس. وهاذا على خاطر كان حاب يكسب ليهود في صفو, خلى بولس مرمي في الحبس.

Chapter 25

¹و كي ولّى فستوس والي طلع من قيصرية لاورشليم بعد ثلاثة ايام. ²و جاوه الزعماء تاع ليهود و رايس الكهنة معاهم وزادوا شكاولو على بولس, وترجاوه ³و طلبوا منو يعمل فيهم مزية, يجيبهولهم لاورشليم, و همّا كانوا عاملين خطة باه يقتلوه في الطريق.⁴قال لهم فستوس يبقى بولس في الحبس في قيصرية, و باللي هو او قريب يهبط لثمة. ⁵و قال: "يجِيوْ معايا الزعماء تاعكم اللي قادرين. و اذا كان هاذا الراجل مٌذنب في حاجة يشكيو بيه لثمة".⁶و قعد الوالي في اورشليم اكثر من عشرة ايام و من بعد هوَد لقيصرية. و اليوم و غدوة قعد في المجلس على كرسي الولاية ومد امر باه يجيبولو بولس. ⁷و كي جاء بولس, داروا بيه ليهود اللي جاو من اورشليم, و اتهموه بتهم كبيرة و ثقيلة بلا ما عندهم حتى دليل باه يثبتوها. ⁸و كان هو يدافع على روحو و يقول: "ما غلطت حتى في حاجة, لا في حق الشَرْع تاع ليهود و لا في حق الهيكل و لا في حق قيصر".⁹و على خاطر فستوس كان حاب يرضاو عليه ليهود, قال لبولس: "تحب تروح لاورشليم و تتحاكم لثمة على هاذي الامور؟". ¹⁰قال بولس: " انا قابلت قدام المحكمة تاع قيصر و نتحاكم في المحكمة تاع قيصر. وانت تعرف مليح باللي ما ظلمت ليهود في حتى شيء.¹¹و اذا كان عندهم اثبات باللي انا مذنب, و الا درت حاجة نستاهل عليها الموت, ما نتهربش من الموت. بالصح هما يتهموا فيا بالباطل, و ما يجوز لحتى واحد يسلمني ليهم. انا نرفع القضية تاعي لقيصير!". ¹²ولى فستوس تشاور مع القضاة تاعو, و قالو: " انت رفَعت القضية تاعك للقيصير, مالا تروح تتحاكم عند قيصير!". فستوس يشاور الملك اغريباس¹³و بعد مدة جاء الملك اغريباس هو برنيكي ل قيصرية باه يسلموا على فستوس. ¹⁴و بعد ايامات, حكى فستوس للملك على الامر تاع بولس, و قالو: "كاين هنا واحد الراجل خلاه فيلكس في الحبس, ¹⁵شاكيين بيه رياس الكهنة تاع ليهود و الشيوخة تاعهم وكي رحت لاورشليم و طلبوا مني نحكم عليه. ¹⁶قلت لهم باللي مش من العادة تاع الرومانيين يسلموا واحد للموت بلا ما يمدولو فرصة يدافع على روحو قدام الناس اللي يشكيو بيه.¹⁷و كي جاو لهنا فتحت القضية بلا ما نستنى, و طلبت يجيبو الراجل من الحبس. ¹⁸و كي وقفوا الناس اللي شكاو عليه و هدروا, ما لقيت فيه حتى تهمة من اللي كنت نتوقعها. ¹⁹بالصح كانت التهمة تاعو الكل على جال امور في الدين تاعهم, و على واحد اسمو يسوع كان مات, و بالصح بولس يقول: باللي راه حي, ²⁰و كي حرت في هاذي لحكاية قلت: بلاك يحب يروح لاورشليم, و يتحاكم لثمة على هاذي الامور الكل؟²¹بالصح بولس رفع القضية تاعو للقيصير اغسطس باه يحكم ليه, وليت خليتو في الحبس حتى ن نبعثوه لقيصير". ²²قال اغريباس لفستوس: "مادابيا انا ثاني نسمع هاذا الراجل واش يقول". قال فستوس: "غدوا تسمعو". بولس يقابل قدام اغريباس²³و اليوم و غدوة جاء اغريباس و برنيكي في وسط محفل و جاه كبير, و دخلوا للدار اللي يعملوا فيها الجلسات و معاهم الامراء و الوجهاء تاع لمدينة, و بعث فستوس وجاب بولس. ²⁴و قال فستوس: " حضارات الملك اغريباس و الحاضرين الكل, راكم تشوفوا في هاذا اللي ليهود الكل في اورشليم و لهنا حاولوني, و هما يعيطوا باللي مالازمش يزيد يعيش حتى نهار واحد اخر.²⁵بالصح كي لقيت باللي ما دار حتى حاجة يستاهل عليها الحكم بالاعدام, و زيد هو رفع القضية تاعو ل اوغسطس قيصير, قررت نبعثو ليه. ²⁶و ما عنديش حاجة ثابتة من جيهتو باه نكتبها لجلالة القيصر.على هاذا الشيء جبتو اليوم قدامكم, و خصوصا قدام حضرتك الملك اغريباس, حتى تتحقق و تقول لي واش نكتب. ²⁷على خاطر كيفاه نبعث محابسي و ما نبعثش معاه بيان بالتهمة تاعو".

Chapter 26

¹و قال اغريباس لبولس: "مسموح ليك تهدر و تدافع على روحك". دار بولس اشارة بيدو وبدا يهدر و يدافع على روحو و قال: ²"حضرات الملك اغريباس انا فرحان اليوم, على خاطر راح ندافع على روحي قدامك و نرد على الشيء اللي يتهموني بيه ليهود. ³حضرتك تعرف العادات و الامور الكل اللي بين ليهود, على هاذا نترجاك تصبر عليا و تسمعني للخر.⁴ليهود الكل يعرفوا السيرة تاعي من صغري و كيفاه تربيت في اورشليم و عشت في وسط اهلي وناسي, ⁵و علابالهم من بكري, لو كان حبوا يشهدوا عليا بالحق, كيفاه كنت نتبع اصعب مذهب في العبادة تاعنا كي كنت فريسي.⁶و انا ضرك واقف نتحاكم على جال الوعد اللي مدوا ربي لجدودنا, ⁷و اللي العشاير تاع بني اسراييل في تناش يستناو باه يتحقق لهم و ينالوه, يعبدوا في ربي ليل ونهار. و انا على جال هاذا الرجاء ليهود اليوم يتهموا فيا حضرات الملك اغريباس. ⁸علاه ما تصدقوش باللي الله يحيي الموتى؟⁹و انا كنت حاسب روحي قادر ندير امور ياسر معادية للاسم تاع يسوع الناصري. ¹⁰و بديت حتى في اورشليم, و دخلت ياسر من المومنين بيه للحباس, و كنت ندي الاذن من عند الرياس تاع الكهنة. و كي كانوا يقتلوهم كنت موافق. ¹¹و في كل مجمع كنت نعاقبهم و نعذبهم بلا حساب, و نحتم عليهم ينكروا الايمان تاعهم. و كنت من كثر ما نكرههم نزيد نحاوزهم حتى و هما خارج من اليهودية في مدن اخرى.¹²و رحت لدمشق نفركت على اتباع هاذا الطريق, و انا هاز معايا الاذن من عند رياس الكهنة, ¹³و في نص النهار و انا مسافر في الطريق, حضرات الملك, واحد النور اقوى و ابهى من النور تاع الشمس, برَق علينا انا و الناس اللي كانوا معايا. ¹⁴طحنا الكل على لرض, و سمعت صوت يهدر معايا باللغة العبرية و يقول: شاول! علاه تضطاهد فيا؟ النوى صعيب يترحى.¹⁵قلت لو: شكون انت يا سيدي؟ رد عليا و قال: انا يسوع اللي راك تضطاهد فيه. ¹⁶بالصح نوض و اوقف على رجليك على خاطر ظهرت لك على هاذي السبة, خايرتك باه تكون خادم ليّا و شاهد على الشيء اللي شفتو و الشيء اللي راح نزيد نبينو ليك. ¹⁷و راح نمنعك من ليهود و من الامم اللي راح نبعثك ليهم, ¹⁸باه تتفتح البصيرة تاعهم و يرجعوا من الظلمة للنور, ومن سيادة الشيطان عليهم للسيادة تاع الله, حتى ينالوا كي يآمنوا بيا الغفران لذنوبهم و يكون عندهم حتى هما قسمة مع القديسين.¹⁹"و من هاذاك النهار حضارات الملك اغريباس ماعصيتش هاذي الرؤيا اللي من السماء, ²⁰و خبرت في الاول الناس اللي في دمشق, و اللي في اورشليم و اللي في الجوايه تاع بلاد ليهود كاملة, و من بعد الامم, باه يتوبوا و يرجعوا لله و يعملوا اعمال تليق بالتوبة. ²¹و على جال هاذا الشيء حكموني ليهود في الهيكل و كانوا حابين يقتلوني.²²بالصح الله عاونني , حتى لليوم هاذا, و انا نشهد للصغير و للكبير. و انا ما نقول في حتى الشيء اخر من غير اللي قالوه لنبياء و موسى وتنبأوا بيه راح يصرى. ²³باللي المسيح راح يتوجع, و يكون هو اول واحد يقوم من بين الموتى, و تجي لبشارة لليهود و للامم بالنور تاع الخلاص".²⁴و كي كان بولس يدافع على روحو بهاذا لكلام, قال فستوس بصوت عالي: "راك هبلت يا بولس! هبلاتك كثرة لكتب!". ²⁵قالو بولس: "ما نيش مهبول يا لعزيز فستوس, انا نقول في كلام الحق و الصواب. ²⁶و الملك اللي قاعد اليوم نكلم فيه جهار, يعلم بهاذي الامور الكل, و ما نظنش باللي راح تخفى عليك حاجة كيما هاذي, على خاطر هاذا الشيء ما صرات في ركن اظلم, واحد ما علابالو بيه.²⁷حضرات الملك اغريباس تامن بالانبياء؟ على بالي بيك تامن". ²⁸قال اغريباس لبولس: "مازال شوية برك و تقنعني نولي مسيحي!". ²⁹قالو بولس: " بالقليل و الا بالكثير, صلاتي لله ليك و لجميع اللي يسمعوا فيا اليوم, يوليو كيما انا, بالصح بلا سلاسل".³⁰و كي قال هاذا وقف الملك و الوالي و برنيكي و الناس اللي كانوا حاضرين معاهم, ³¹و خرجوا و هما يهدروا بيناتهم و يقولوا: " هذا الراجل ما عندو ما دار مش حاجة يستاهل عليها الموت و الا الحبس". ³²و قال اغريباس لفستوس: " كنا قادرين نسيبوه لوكان ما رفعش القضية تاعو للقيصر".

Chapter 27

¹و كي تمت المفاهمة باللي يديونا لايطاليا في البابور, سلموا بولس و محابسية اخرين كانوا معاه لواحد الضابط من كتيبة اوغسطس اسمو يوليوس. ²و ركبنا في بابور من ادراميت, و قلعنا و كنا معولين نعديو على كل الشواطي تاع اسيا. و كان معانا واحد الراجل مقدوني من تسالونيكي اسمو ارسترخس.³و النهار اللي من وراه وصلنا ل صيداء, كان يوليوس يحن على بولس, و خلاه يروح يشوف اصحابو باه يعاونوه و يتهلاو فيه. ⁴و من بعد خرجنا في البابور وسافرنا وعدينا بحذى قبرس, على خاطر الريح كانت معاكستنا. ⁵و من بعد عدينا في لبحر بحذى كليكية و بمفيلية, و هبطنا في ميراليكية. ⁶و كي لقى الضابط بابورمن الاسكندرية رايح لايطاليا طلّعنا فيه.⁷و مشا بينا البابور وحدة وحدة لمدة ايامات ياسر, وبالسيف ما وصلنا لمدينة كنيدس, بالصح الريح كان قاوي و ما قدرناش ندخلوا لها, ولينا مشينا بحذى جزيرة كريت قريب لسلموني. ⁸و بالسيف ثاني ما عديناها حتى ن وصلنا لواحد البقعة اسمها "المواني الصالحة" اللي قريبة من مدينة لسائية.⁹و هكا عدى علينا وقت طويل, حتى ن فات الصيام تاع الكفارة, و ولى لبحر هايج و السفر صعيب, قعد بولس يحذر فيهم و يقول لهم: ¹⁰"يا جماعة او السفر خطير علينا في هاذا الوقت و راح نتضرروا و نخسروا ياسر, مش غير في السلعة والبابور برك, بلاك نخسروا حتى حياتنا ثاني". ¹¹بالصح الضابط كان مقنع بهدرة القبطان و مولى البابور اكثر من الهدرة تاع بولس.¹²و على خاطر حتى المرسى ما كانش صالح باه يفتوا فيه الشتاء, الاغلبية تاعهم شافوا باللي لازم يقلعوا من لثمة, بلاك يقدروا يوصلوا ل فينكس و يشتِيوْ فيها. وهي مرسى متلفتة للجنوب الغربي و الشمال الغربي. ¹³و كي نسْمت ريح الجنوب حسبوا باللي نالوا مقصودهم, طلعوا المرساة وبقاو يسيروا بحذى الشط تاع كريت مش بعاد ياسر. العاصفة¹⁴بالصح من بعد غير شوية ثار عليهم ريح شمالي شرقي في عاصفة يقولوا لها "اوروكليدون". ¹⁵وضربت البابور وما قدرناش نقاوموا الريح, ستسلمنا, وخلينا لبحر هازنا. ¹⁶و عدينا تحت واحد الجزيرة يقولولها "كلودي" و بالسيف ما قدرنا نمّنعوا لفلوكة تاع النجاة.¹⁷و كي دخلوها للبابور ولاو يستعملوا في الالواح و ربطوها مليح, على خاطر خافوا لا يطيح البابور في الرمال المتحركة, و هبطوا القلوع, و خلاو البابور تهز فيه لمواج. ¹⁸و قوات الريح خلاص, واليوم و غدوة بداو يفرغوا السلعة في لبحر.¹⁹و النهار اللي من وراه رمينا الادوات تاع البابور. ²⁰و عدّات علينا ايامات ياسر ما شفنا لا الشمس و لا النجوم, و بقات الريح تهب بقوة, حتى قطعنا الامل خلاص في لحياة.²¹و كانوا الرجال لا ياكلو ولا يشربوا من مدة طويلة, وقتها وقف بولس في وسطهم وقال: " كون سمعتوا لي من النهار لول, و ما خرجتوش خلاص من كريت, كنا نمنعوا من هاذي المضرة ولخساير. ²²و ضرك نطلب منكم تتشجعوا و تفرحوا, على خاطر واحد منا ما راح يموت نمنعوا الكل , غير البابور.²³على خاطر البارح جاني ملاك من عند ربي اللي انا ليه و نعبد فيه, و قالي: ²⁴ما تخافش يا بولس. لازم توقف قدام قيصر. و هاو الله وهبلك لحياة انت و جميع اللي مسافرين معاك. ²⁵افرحوا يا جماعة, على خاطر عندي ثقة في الله انو يكون كيما قال لي. ²⁶بالصح لمواج تدينا و ترمينا على جزيرة". البابور يغرق²⁷و في الليلة الربعطاش, كنا تايهين في لبحر تاع ادريا و لمواج هازة البابور, و عند نص الليل, لبحاّرة حسبوا بلي وصلنا على الشط, ²⁸قاسوا الماء لقاوه عشرين وحدة . و زادوا قدموا شوية وقاسوه لقاوه خمستاش وحدة. ²⁹و كي خافوا لا يدخل البابور في لوعر, رماو من لوراء المراسي في اربعة, و بقاو يسناو في النهار وقتاه يطلع.³⁰و حبوا البحارة يهربوا وحدهم و يخليونا في البابور, هبّطوا لفلوكة للبحر و داروا رواحهم راح يمدوا المرساة من لقدام, ³¹شوية بولس قال للضابط و العسكر تاعو: "لو كان تخليوْهم يهبطوا من لبابور واحد فينا ما يمنع". ³²وقتها ولاو العسكرقطعوا لحبال تاع لفلوكة و خلاوها طاحت في الماء.³³و كان بولس يحاول في الجماعة الكل ياكلوا شوية حتى ن قريب يطلع النهار, قال لهم: "هاذا النهار الرابعطاش وانتوما تستناو صايمين على رياقكم ما كليتوا حتى شيء. ³⁴كولوا حتى شوية, باه يكون عندكم الجهد و تقدروا حتى نمنّعوا ارواحكم, و ما تخافوش شعرة منكم ما تتقاس". ³⁵و كي قالهم هاذا لكلام هز الخبز وشكر ربي و قسم قدامهم و بدا ياكل.³⁶ولاو الكل فرحوا و كلاو هما ثاني. ³⁷و كانوا كلهم اللي في البابور ميتين و ستة و سبعين واحد. ³⁸و من بعد ما كلاو رماو القمح في لبحر باه يخففوا على البابور.³⁹و كي طلع النهار ما شافوا حتى بر, بالصح شافوا واحد الشط صغير, و تفاهموا باه يجبدوا البابور و يوصلوه لثمة اذا كان قدروا. ⁴⁰قطّعوا المراسي خلاوها تطيح في لبحر, و زادوا حلوا لحبال اللي في الدفة ثاني, و حلوا الشراع للريح اللي تهب, و توجهوا للشط. ⁴¹بالصح البابور حصُل في الرمل اللي في القاع, من لقدام ما يقدرش يتحرك. و من لورى تكسر من قوة لمواج.⁴²و العسكر كانوا حابين يقتلوا المحابسية على خاطر خافوا لا يعوموا حتى للشط و يهربولهم.ْ ⁴³بالصح الضابط, كان حاب يمنع بولس, قال للي قادرين يعوموا يرميو ارواحهم و يعوموا حتى يوصلوا للشط, ⁴⁴و لخرين اللي يحكم في لوحة و الا اي حاجة من الطروفة تاع البابور, و هكا منعوا الكل و وصلوا للشط سالمين.

Chapter 28

¹و كي منعنا لقينا باللي الجزيرة اسمها مليطة. ²و اهلها من البربر داروا فينا واحد الخير اللي ماكانش خلاص, فرحوا بينا وشعلوا لنا النار ودفاونا من البرد.³و راح بولس يلم في اللوح من لرض ويحط فيه في النار, شوية خرجت افعى من قوة السخانة و لصقت في يد بولس. ⁴و كي شافوا الناس اللي من البربرالافة لاصقة في يد بولس, ولاو يقولوا: "هاذا الراجل باين عليه قاتل روح, حتى و لو منع من لبحر ما خلاتوش العدالة تاع ربي".⁵بالصح بولس نفض لفعى من يدو في النار و ما صرالو والو ⁶و اما همّا قعدوا يسناو فيه يتنفخ و الا يطيح يموت على غرادة. و قعدوا يستناو و يستناوْ و كي ما صرالو والو , ولاو بدلوا رايهم و قالوا: "هاذا ما يكون غير اله!".⁷و كان في هاذيك الجوايه جنانات تاع يوليوس الحاكم تاع الجزيرة. اللي فرح بينا و ضيفنا ثلاثة ايام. ⁸و كان باباه مريض عندو سخانة وحاكم لفراش. دخل ليه بولس وصلى و حط عليه يديه و شفاه. ⁹و كي شافوا السكان تاع الجزيرة اللي صرى ولاو همّا ثاني جابوا المرضى اللي عندهم وكانوا ينالوا الشفاء. ¹⁰و كرمونا اكرام كبير. و كي خرجنا من الجزيرة مدولنا الشيء اللي نحتاجوا ليه. الوصول الى روما¹¹و من بعد ثلاثة شهرْ ركبنا في بابور من الاسكندرية كان عقب الشتاء في الجزيرة, عليه الرمز تاع الجوزاء. ¹²و نزلنا في سراكوسا و قعدنا فيها ثلاثة ايام.¹³و بعد دُرْنا وحكمنا الطريق ل ريغون. و احنا في لبحر بعد يوم واحد هبت علينا ريح من الجنوب, و وصلنا ثاني نهار ل بوطيولي, ¹⁴و تلاقينا بالخاوة اللي كانوا لثمة و حكمونا عندهم و ضيفونا سبعة ايام, و من بعدها رحنا لروما. ¹⁵و كي سمعوا بينا الخاوة لخرين خرجوا عرضولنا في فورن ابيوس و الثلاثة حوانيت. و كي شافهم بولس حمد ربي و تشجع.¹⁶و كي وصلنا لروما وصّل الضابط لمحابسية للكزرنة, بالصح بولس سمحلو باه يسكن وحدو هو و العسكري اللي كان يعس عليه. بولس يوعظ في روما و هو تحت العسة ¹⁷و من بعد ثلاثة ايام عيط بولس الوجهاء تاع ليهود. و كي تلموا قال لهم: "يا جماعة يا خاوتي, انا ما عملت حتى شيء ضد الشعب و الا ضد العادات تاع جدودنا, ورغم هاذا كتفوني وسلموني ليد الرومانيين, ¹⁸اللي كي داروا التحقيق في الموضوع كانوا حابين يسيبوني, على خاطر ما لقاو فيّا حتى تهمة صحيحة نستاهل عليها حكم الموت.¹⁹و بالصح كي ليهود ما حبوش يقبلوا بنتيجة التحقيق, ما لقيت حتى حل اخر غير اني نرفع القضية تاعي للقيصر, موش على خاطر حاب نشكي حاجة على الشعب تاعي و على امتي. ²⁰و على هاذا السبب حبيت نشوفكم و نهدر معاكم, على خاطر راني مسلسل بهاذي السلاسل على جال الرجاء تاع بني اسراييل".²¹قالوا لو: "ما وصلتنا عليك حتى برية من عند ليهود, و ما كان حتى واحد من الخاوة جانا و خبرّنا عليك بحاجة خايبة. ²²بالصح مليح كي نسمعوا منك انت, على خاطر احنا عارفين باللي الناس في كل مكان تقاوم هاذا المذهب".²³و تفاهموا على نهار, جاو عندو جماعة كبيرة من ليهود للدار وين يسكن, و قعد يشهد لهم على الملكوت تاع الله, و يقنع فيهم بالامر تاع يسوع من لكتب تاع موسى, من الصباح للعشية. ²⁴و منهم اللي امن و منهم اللي ما امنش.²⁵و راحوا وهمّا ما همش متفاهمين مع بعضاهم, كي قال لهم بولس هاذي الكلمة برك: "عمل الروح القدس مليح كي كلّم جدودنا على لسان اشعياء النبي ²⁶و قال لو: روح لهاذا الشعب و قل لهم: بوذنيكم تسمعوا بالصح ما تفهموش, و بعينيكم تخزروا بالصح ما تشوفوش.²⁷هاذا الشعب راسو خشين, و ثقلت وذنيهم, و غمضوا عينيهم. باه ما يسمعوا بوذنيهم, و ما يشوفوا بعينيهم, و ما يفهموا في قلوبهم حتى يرجعوا و يتوبوا, و نشفيهم.²⁸يكون في علمكم باللي الخلاص تاع الله توجه للامم, و همّا راح يسمعوا ليه و يقبلوه!" ²⁹و كي قال هاذا الشيء كامل راحوا ليهود روْحوا وهما بيناتهم نقاش كبير.³⁰و سكن بولس مدة عامين كاملين في الدار اللي كراها. و كان يفرح بكل واحد يجيه و يدخْلو للدار, ³¹و يبشر بالملكوت تاع الله, و يعلم بالامر تاع يسوع المسيح جهار, بلا ما تمنعو حاجة.

Romans

Chapter 1

¹بولس, العبد تاع يسوع المسيح, المسمي مرسول, المختار للانجيل تاع الله , ²اللي وعد بيه من بكري بالانبياء و ف الكتب المقدسة , ³على وليدو اللي جاء من ذرية داود من جيهة الجسد,⁴و تعين وليد الله من جيهة روح القداسة . بالقيامة من بين الموتى : يسوع المسيح ربنا . ⁵اللي بيه, وعلى جال اسمو, قبلنا نعمة و رسالة باه الامم الكل يجيو لطاعة ليمان , ⁶اللي بينهم انتوما ثاني المعروضين تاع يسوع المسيح.⁷ل جميع اللي موجودين ف روما, حباب الله, اللي مسميين مقدسين: ليكم النعمة و السلام من عند الله بابانا و الرب يسوع المسيح. بولس متشوق باه يزور روما⁸اول حاجة , نشكر الهي بيسوع المسيح من جيهتكم الكل , بلي ايمانكم يحكيو بيه ف كل العالم ⁹, راه الله اللي نعبد فيه بروحي, ف انجيل وليدو , شاهد عليا كيفاه نخمم فيكم دايما, ¹⁰نطلب دايما ف صلاتي كاش ما تصلح لي حتى لو كان مرة اذا كان حب الله نجي عندكم .¹¹غلى خاطر راني متوحش نشوفكم, باه نمد لكم براكة روحية تثبتكم, ¹²باه نتشجعوا بيناتكم بليمان اللي فينا كلنا , ايمانكم و ايماني .¹³و زيد مانحبش يخفى عليكم خاوتي بلي راني قداه من مرة قصدت باه نجيكم , وراني معطل حتى لضرك , باه تكون عندي فاكية فيكم حتى انتوما كيما مع كل الامم . ¹⁴راني مديون لناس اليونان و البربر, للحكماء و الجاهلين . ¹⁵و هكذا انا بكل ما عندي واجد باه نبشركم حتى انتوما اللي ف روما ,¹⁶راني ما نحشمش بانجيل المسيح ,على خاطرهو قدرة الله للخلاص لكل من يامن: لليهودي قبل و من بعد لليوناني , ¹⁷على خاطر يظهر فيه برالله بليمان , للايمان , كيما راه مكتوب :"اما البار راه بليمان يعيش".الغضب تاع الله على الجنس البشري¹⁸على خاطر غضب الله ظاهر من السماء على الفجور تاع الناس و الاثم تاعهم, للي يحجبوا الحق بالباطل . ¹⁹هاذاك على خاطرمعرفة الله باينة بيناتهم , على خاطر الله بينها لهم ,²⁰على خاطر الامور تاعو اللي ما تتشافش ظاهرة من نهار اللي خلق الدنيا نلقاوها في المخلوقات , قدرتو الدايمة و لاهوتو, و ما بقى لهم حتى عذر. ²¹على خاطر هما كي عرفوا الله لا مجدوه و لا شكروه كيما الاه, بالصح جهلوا بافكارهم, و ظلامت قلوبهم بالجهل.²²و كي كانوا حاسبين ارواحهم حكماء ظهروا جهال, ²³و بدلوا مجد الله اللي ما يفناش بتصويرة تشابه للانسان الفاني , والطيور , والدواب , واللوايف .²⁴على هاذيك سلمهم الله لشهوة قلوبهم للنجاسة , باه يذلوا اجسادهم في بعضاهم. ²⁵هاذوك اللي بدلوا الحق تاع الله بالباطل, و خافوا من المخلوق و عبدوه هو و خلاو الله الخالق , اللي راه للابد متبارك . امين .²⁶على هاذيك سلمهم الله لهواهم في الذل , على خاطر الاناث تاعهم بدلوا الطبيعة تاعهم اللي خلقهم الله عليها بهاذيك اللي مخالفة للطبيعة , ²⁷و حتى الذكورة ثاني خلاو الطبيعة اللي تخلقت عليها الانثى, و ولات عندهم شهوة لبعضاهم, يديروا الفاحشة , وداو في نفوسهم العقاب تاع ضلالهم الكبير .²⁸و كيما ما حبوش يخليو الله في معرفتهم , سلمهم الله لتفكير مرفوض باه يديروا حوايج ما تليقش .²⁹مليانين بكل ذنوب و زنا و شر و طمع و خبث , فايضين بالحسد و القتيلة و العراك و الحيلة و السوء, ³⁰نمامين ظالمين , يكرهوا الله , شتامين متكبرين , متفاخرين , يتفننوا في الشرور, و ماهمش طايعين للوالدين , ³¹لا عندهم لا فهامة و لا امانة و لا حنانة ولا رضاية و لا رحمة .³²اللي راهم عارفين حكم الله بلي كل اللي يعملوا امور كيما هاذي يحق فيهم الموت , و هما ماشي برك يديروها بالصح يفرحوا بالناس اللي يعملوها .

Chapter 2

¹على هاذيك ما عندك حتى عذر يا اللي تحاسب في غيرك . على خاطرالشيء اللي تحكم بيه على غيرك تحكم بيه على روحك . على خاطر انت اللي تدين راك تعمل في هاذيك الامور بالذات! ²واحنا رانا عارفين حساب الله الحقاني على الناس اللي يديروا هاذي الامورالكل .³و انت يا اللي تحاسب ف اللي يديروا هاذي الامور, وانت تديرها, راك حاسب بلي راح تمنع من الحساب تاع الله؟ ⁴والا راك حاقر كثرة لطفو و صبرو بالو الواسع, و ما كش عارف بلي لطف الله يدفعك باه تتوب ؟⁵بالصح انت على خاطرك قاسي وقلبك ماهوش تايب , قاعد تخزن لروحك سخط نهار الغضب ونهار اللي يبان فيه حساب الله العادل , ⁶اللي راح يجازي كل واحد حساب عمالو . ⁷اما الناس اللي يعملوا ف الخير وهما صابرين طالبين المجد و الكرامة و الخلود , يجازيهم بالحياة الدايمة .⁸اما اللي راهم من اهل الخصومات, وما يطيعوش الحق بالصح للاثم تلقاهم طايعين , ينزل عليهم السخط و الغضب تاع الله, ⁹الشدة والضيق على كل واحد يعمل ف الشر: اليهودي هو الاول و من بعد اليوناني.¹⁰ومجد و كرامة وسلام لكل من يعمل الصلاح: ليهودي لول من بعد اليوناني. ¹¹على خاطر الله ما عندوش حيالة. ¹²على خاطر اللي يغلط و هو ما عندوش شرع بلا شرع يتحاسب. و اللي يغلط وعندو الشرع بالشرع يتحاسب.¹³على خاطر مش اللي يسمعوا للشرع همّا اللي راهم ابرار عند الله , بالصح اللي يعملوا بواش مكتوب في الشرع هما لبرار. ¹⁴على خاطر الامم اللي ما عندهمش شرع, وقت اللي يديروا بالطبيعة واش كاين في الشرع, وهاذوك كي ما عندهمش شرع داروا شرع لرواحهم ,¹⁵اللي يبينوا بلي الشرع مكتوب في قلوبهم, شاهد عليهم ضميرهم و تخمامهم ساعات تحكم عليهم و ساعات تبرءهم , ¹⁶في النهار اللي يحاسب فيه الله الناس حساب انجيلي بيسوع المسيح. ليهود و الشريعة¹⁷إذا كنت تقول بلي راك يهودي و معول على شرع الله, و تفخر بالله, ¹⁸و تعرف واش يحب و تميز الامور المتخالفة اللي تعلمتها من الشرع. ¹⁹و شايف روحك راك قايد للعميان و ضوء للناس الي ف الظلمة , ²⁰و مربي للجهال, و معلم للاولاد, و عندك في الشرع تاع الله تصويرة العلم و الحق.²¹و انت مالا يا اللي تعلم ف غيرك, ما تعلمش روحك ؟ اللي تعلم: ما تسرقش, تسرق انت ؟ ²²يا اللي تنهي على الزنى, تزني انت؟ انت يا اللي ما ترضاش بالاصنام, تسرق المعابد؟²³انت يا اللي تفخر بالشرع, تحقر الله كي تخالف الشرع تاعو؟ ²⁴على خاطر اسم الله يكفروا بيه بين لمم على جالكم, كيما راه مكتوب.²⁵الطهارة تنفعك اذا كان مشيت حساب شرع الله. بالصح الا كنت متعدي على شرع الله, تولي الطهارة تاعك كي اللي ما هيش طهارة! ²⁶اذا كان اللي ماهوش مطهر يمشي باحكام الشرع, ماشي يتحسب كي اللي مطهر؟ ²⁷و تولى عدم طهارتو بالطبيعة وهي تكمل ف الشرع , تحكم عليك انت اللي عندك الكتاب والطهارة بالصح انت تتعدى على الشرع؟²⁸ماهوش يهودي من كان يبان من برى يهودي, ولا الطهارة اللي باينة في اللحم تتسمى طهارة, ²⁹بالصح ليهودي اللي ما يبانش هو ليهودي و الطهارة هي طهارة القلب بالروح ماشي اللي بالكتاب, و هذا ينال الشكر ماشي من عند الناس بالصح الله يرضى عليه.

Chapter 3

¹مالا فاش خير ليهودي, و واش الفايدة تاع الطهارة؟ ²ياسر على كل حال! اما اول حاجة على خاطر الله حط اقوالو امانة بين يديهم.³وش لو كان كاين منهم اللي ماهومش امناء؟ و لعل كي هما ماهمش امناء هذا يعطل الامانة تاع الله؟ ⁴حاشا! بالصح يكون الله صادق و كل انسان كذاب. كيما راه مكتوب:" باه تتبرى في كلامك, و تغلب كي تشارع".⁵بالصح كي عاد الاثم تاعنا يبين عدالة الله مالا واش نقولوا؟ و لعل الله الي يجيب العقاب راه اله ظالم؟ راني نتكلم بحساب العقلية تاع البشر. ⁶حاشا! مالا كيفاه الله يحاسب الناس؟⁷على قد ما انا نزيد نكذب يبان الصدق تاع الله و المجد تاعو, علاش مالا يحاسبني كلي راني غالط؟ ⁸ولى رانا مظلومين, ولى كيما يقولوا وحايد:" كي نعملوا الشرور تجينا الخيرات "؟ هاذوك يتعاقبوا على حساب الحق. ما كاين حتى واحد بار⁹مالا واش؟ احنا خير من غيرنا؟ لا ما كانش منها خلاص! احنا قبل قلنا بلي ليهود و اليونانيين كلهم تحت المعصية.¹⁰كيما راه مكتوب: "ما كانش حتى واحد بار حتى واحد".¹¹ما كانش شكون يفهم. ما كانش شكون يطلب الله. ¹²كلهم ضلوا وفسدوا كاملين. ما كانش شكون يعمل الصلاح ما كاين حتى واحد.¹³قراجمهم قبورة معرية. بلسانتهم يمكروا. سم لفاعي تحت شواربهم . ¹⁴و فامهم مليانة دعاوي ومرارة .¹⁵رجليهم تجري باه تسيح الدم. ¹⁶في جرتهم الظلم والعنف. ¹⁷و طريق السلام ما يعرفوه. ¹⁸و مخافة ربي ما تجيش بين عينيهم خلاص".¹⁹رانا عارفين بلي كل ما تقولو الشريعة تتكلم بيه للناس الي تحت الشريعة, باه كل لفام تتسد, و يولي العالم كامل تحت عقاب الله. ²⁰على خاطر بالاعمال اللي في الشرع تاع الله ما يتبرر حتى واحد قدامو. على خاطر الشرع يزيد يخليك تعرف المعصية. البراءة وليمان²¹بالصح ضرك بانت العدالة تاع الله بلا شرع, و شرع الله ولنبياء راهم شاهدين ليه, ²²العدالة تاع الله بليمان بيسوع المسيح, لجميع و على جميع من بامنوا بيه . على خاطر ما كاين حتى فرق .²³على خاطرالكل غلطوا و راهم محتاجين للمجد تاع الله، ²⁴يديو البراءة بلاش بالنعمة تاعو بالدية اللي خلصها بيسوع المسيح،²⁵اللي بالايمان بيه مد الله كفارة الذنوب بالدم تاعو, باه يبين العدالة تاعو، و يغفرالذنوب اللي فاتت في الوقت اللي الله كان يتأنى على الناس، ²⁶باه يبين العدل تاعو في الزمان الحاضر ، باه يكون عادل و يبرئ كل اللي عندو ليمان بيسوع.²⁷مالا وين راهي الفخرة؟ ما كانش تنحات. بواش من شرع؟ بالشرع تاع لفعال؟ لا ابدا. بالصح بالشرع تاع ليمان. ²⁸مالا نحسبوا بلي الانسان يتبرى بليمان بلا ما يعمل لفعال الي يطلبها الشرع.²⁹والا الله غير لليهود وحدهم؟ علاش ماشي للامم ثا ني؟ نعم, الله حتى للامم ثاني. ³⁰على خاطر لله واحد, و هو اللي يبرر لمختنين بليمان واللي ماهمش مختنين باليمان ثاني.³¹مالا نعطلوا الشرع بالايمان؟ حاشا بالصح هكذا نثبتوا الشرع .

Chapter 4

¹مالا واش نقولوا على بابانا في الجسد ابراهيم؟ ²على خاطر اذا كان تبرر على حساب لعمال عندو الحق يفخر, بالصح موش قدام الله. ³على خاطر واش يقول في لكتاب؟ "كي امن ابراهيم بالله تحسب ليه التبرير".⁴اما اللي يعمل لعمال تاع الشرع ما يتحسبش ليه الاجر بالنعمة, بالصح من حقو يدي الاجر تاعو. ⁵و اما اللي ما عملش باعمال الشرع, بالصح يامن بهاذاك اللي يبرر الفاجر. الايمان تاعو يتحسب ليه تبرير.⁶و هاذا واش يقول داود و هو يمدح في الانسان اللي يحسبلو الله التبرير بلا ما يعمل لعمال تاع الشرع: ⁷يا سعدهم الي ذنوبهم تغفرت و اثامهم تسترت. ⁸يا سعد الراجل اللي ما يحاسبوش ربي على معاصيه".⁹و هاذي الفرحة هي للناس اللي مطهرين برك و الا حتى للناس اللي ما همش مطهرين؟ على خاطر احنا نقولوا: باللي الله حسب الايمان تاع ابراهيم تبرير. ¹⁰وقتاه حسبلو؟ كي كان مطهر و الا مازال ما تطهرش وقتها؟ حسبلو هاذا التبرير وهو ما زال ماهوش مطهر!¹¹و دار الطهارة كيما امارة على البر اللي يجي من الايمان اللي كان عندو قبل ما يتطهر, باه يقدر يكون اب للمومنين الكل اللي ماهمش مطهرين, و يتحسب لهم هما ثاني التبرير. ¹²و اب للي مطهرين موش برك على جال الطهارة, بالصح ثاني على خاطر تبعوا طريق بابانا ابراهيم اللي كان ماشي عليه حتى قبل الطهارة.¹³على خاطر موش بالشرع جاء العاهد لابراهيم و لذريتو باه يورثوا العالم, بالصح بالايمان اللي تبرر بيه. ¹⁴على خاطر لو كان جاو الوراثة همّا اهل الشرع, يتعطل الايمان و يبطل العاهد: ¹⁵على خاطر الشرع يجيب السخط تاع الله, على خاطر كي ما يكونش شرع ما تكونش معصية.¹⁶على هاذا الورثة تجي من الايمان, باه يكون نعمة من عند ربي, و هكذا يتحقق العاهد للذرية كاملة. موش برك لاهل الشرع, بالصح ثاني للناس اللي تبعوا الايمان تاع ابراهيم, اللي هو بابانا الكل. ¹⁷كيما مكتوب: "انا جعلتك اب لامم ياسر". قدام الله اللي امن بيه, وهواللي يحيي الموتى, و هو اللي يقول للشيء اللي موش موجود كون فيكون.¹⁸و الوقت اللي غاب فيه الامل, امن ابراهيم و صدّق باللي راح يكون اب لشعوب ياسر, حساب الشيء اللي جا في لكتب "قد هكا راح تكون الذرية تاعك". ¹⁹و ما ضعفش في الايمان و ما دارش حساب لعمرو اللي فات لمياة سنة و ما دارش حساب لرحام زوجتو سارة اللي ذبال.²⁰وما شكش في العاهد تاع الله, بالصح ثبّت روحو بالايمان ومد المجد لله. ²¹و صدّق باللي الله قادر يتمم العاهد تاعو معاه ثاني. ²²و على هاذيك زاد: تحسبلو التبرير".²³و ما كانش هاذا لكلام تكتب على ابراهيم وحدو هو برك, ²⁴بالصح على جالنا, راح يتحسب لنا احنا ثاني, على خاطر امنا باللي قوم يسوع المسيح ربنا من بين الموتى, ²⁵اللي مات على جال ذنوبنا و حيا من بين الموتى على جال تبريرنا.

Chapter 5

¹و احنا كي تبررنا بالايمان ولّينا في امان مع الله بيسوع المسيح ربنا, ²اللي دخلنا بالايمان بيه, لهاذي النعمة اللي رانا ساكنين فيها, و عندنا فُخرة باه نشاركوا في المجد تاع الله.³و موش هاذا برك, تزيد الفخرة تاعنا حتى في الصعوبات, عارفين باللي الشدّة تعلم الصبر, ⁴و الصبر امتحان, و الامتحان رجاء, ⁵و رجانا ما يخيب, على خاطر لمحبة تاع الله تصبت في قلوبنا بالروح القدس اللي عطانا الله.⁶على خاطر و احنا مازلنا في الضعف, مات المسيح في الوقت المطلوب على جال المذنبين. ⁷و قليل وين يموت واحد على جال واحد تقي. و بلاك يقدر واحد يموت على جال واحد صالح.⁸بالصح الله بيّن لمحبة تاعو لينا, حتى واحنا مازلنا في الذنوب مات المسيح على خاطرنا. ⁹و بالخصوص ضرك كي زدنا تبررنا بالدم تاعو راح نمنعوا بيه من السخط تاع الله.¹⁰على خاطر و احنا كنّا لعديان تاع الله صالحنا بالموت تاع ابنو, مالا كيفاه راح يكون ضرك و احنا متصالحين معاه, راه نمنعوا بحياتو! ¹¹و موش هاذا برك, بالصح نزيدوا نفخروا بالله ثاني, بربنا يسوع المسيح, اللي بيه هو نلنا المصالحة ضرك. الموت من ادم و الحياة بالمسيح¹²و على هاذا كيما دخلت المعصية بانسان واحد للعالم, و بالمعصية دخل الموت, و هكذا عدّى الموت للناس الكل, على خاطر كلهم غلطوا. ¹³و المعصية كانت في العالم قبل ما يكون شرع الله لموسى. و بالصح على خاطر ما كانش الشرع موجود المعصية ما تتحسبش.¹⁴و الموت ساد على الناس من ادم حتى لموسى, و حتى الناس اللي ماداروش معصية كيما المعصية تاع ادم, و كان ادم هو المثال على اللي راح يجي من بعدو. ¹⁵بالصح المفعول تاع المعصية ماهوش كيما المفعول تاع الهِبة. على خاطر اذا كان الموت ساد على الناس بالمعصية تاع راجل واحد, مالا كيفاه تفيض النعمة تاع الله, و المعطى اللي وهبها بالنعمة بالانسان الواحد يسوع المسيح تفيض على ناس ياسر!¹⁶و النتيجة تاع معصية انسان واحد ما هيش كيما نتيجة المعطى تاع الله. على خاطر الحكم على المعصية يجيب لهلاك, اما الهبة تاع الله جابت التبرير على ذنوب ياسر. ¹⁷اذا كان الموت ساد على جال المعصية تاع راجل واحد, مالا كيفاه تفيض النعمة تاع الله للناس اللي ينالوا فيض النعمة و المعطى تاع التبرير, راح يملكوا لحياة بالواحد يسوع المسيح!¹⁸مالا كيما بمعصية واحدة جاء الحكم بالهلاك على الناس الكل, ثاني بالبر تاع واحد صرات الهبة للناس الكل, التبرير اللي يمد لحياة. ¹⁹على خاطر كيما المعصية تاع الانسان الاول جعلت الناس الكل مذنبين, هكذاك ثاني الطاعة تاع الواحد راح تجعل ناس ياسر ابرار.²⁰و كي توجد الشرع كثرت المعصية. بالصح وين كثرت المعصية زادت النعمة اكثر و اكثر. ²¹حتى كيما ملكت المعصية في الموت, ثاني تملك النعمة في البر, للحياة الدايمة, بيسوع المسيح ربنا.

Chapter 6

¹مالا واش نقول؟ نبقاو نديروا في المعصية باه تكثر النعمة؟ ²حاشا! احنا اللي متنا على المعصية, كيفاه نزيدوا نعيشوا فيها؟ ³و الا ما علابالكمش باللي احنا اللي تعمدنا واتحدنا مع المسيح تعمدنا باه نموتوا معاه,⁴و تدفننا معاه بالمعمودية و اتحدنا معاه في موتو, باه كيما قام المسيح من بين الموتى, بالمجد تاع الآب, حتى احنا ثاني نقوموا للحياة الجديدة؟ ⁵على خاطر اذا كان اتحدنا بالمسيح في موت يشابه للموت تاعو, هكذاك ثاني نتحدوا بيه في قيامتو.⁶و احنا عارفين هاذا الشيء: باللي الانسان لقديم اللي فينا تصلب مع المسيح باه ينحي السيادة تاع المعصية اللي فينا. ⁷على خاطر اللي مات تحرر من المعصية.⁸و اذا كنا متنا مع المسيح, نامنوا باللي راح نحياوْ معاه. ⁹عارفين باللي المسيح بعد ما قام من بين الموتى ما يزيدش يعاود يموت. و الموت ما بقاتش عندو سيادة عليه.¹⁰على خاطر الموت اللي ماتها ماتها مرة واحدة على المعصية, و الحياة اللي يحياها يحياها لله. ¹¹حتى انتوما ثاني احسبوا ارواحكم موتى على الذنوب, بالصح حيين لله بالمسيح يسوع ربنا.¹²مالا ما تخليوْش المعصية تسود على اجسادكم الفانية و تبعوها في الشهوات تاعو, ¹³و ما تقدموش الاعضاء تاعكم الات اثم للمعصية, بالصح قدموا ارواحكم كي اللي قاموا من بين الموتى حيين لله و الاعضاء تاعكم الات للخير لله. ¹⁴و هكذا ما تسودش عليكم المعصية, على خاطرانتوما ماكمش تحت حكم الشرع بالصح تحت الحكم تاع النعمة. عبيد للخير¹⁵مالا كيفاه؟ نبقاو نغلطوا على خاطر احنا تحت النعمة و ماناش تحت الحكم تاع الشرع؟ حاشا! ¹⁶علاه ما علابالكمش باللي اللي تطيعوه, تولِيوْ عبيد ليه: اما للمعصية توصلكم للموت و الا الطاعة للخير؟¹⁷بالصح الحمد لله, حتى كي كنتوا عبيد للمعصية, تبعتوا التعاليم اللي تسلمتوها من كل قلوبكم. ¹⁸و تحررتوا من المعصية و وليتوا عبيد للخير.¹⁹و هنا نهدر هدرة كيما تاع الناس على جال الضعف الجسدي اللي فيكم. على خاطر كيما قدمتوا الاعضاء تاعكم للنجاسة و الاثم و خدمتوا بيها الشر, حتى ضرك ثاني قدموا اعضاءكم للقداسة و اخدموا بيها الخير. ²⁰في الوقت اللي كنتوا عبيد للمعصية, كنتوا احرار تديروا واش تحبوا. ²¹و شوفوا واش جابت لكم غير حوايج اللي تحشموا بيها ضرك؟ على خاطر هاذيك الامور اخرتها توصل للموت.²²و ضرك كي تحررتوا من المعصية, و وليتوا عبيد الله, ولات عندكم ثمار تاع قداسة, اللي توَصل للحياة الدايمة. ²³على خاطر اجرة المعصية هي الموت, بالصح هدية الله هي لحياة الدايمة بالمسيح يسوع ربنا.

Chapter 7

¹ما يخفاش عليكم يا خاوتي- اني نهدر مع ناس عارفين مليح الشرع تاع الله - ياخي الشرع يسود على الواحد مادام مازال عايش؟²لمرى اللي متزوجة براجل يربطها الشرع بالراجل مادامو مازال حي, بالصح لو كان يموت الراجل يولي الشرع ما يربطهاش بيه. ³و كون تتزوج بواحد اخر وراجلها حي تولي زانية. بالصح اذا كان مات راجلها هي حرة من الشرع, و كان تزوجت بواحد اخر ما تسماش زانية.⁴هكذاك يا خاوتي انتم ثاني راكم متّوا على الشرع بالجسد تاع المسيح, باه توليو ملك لواحد اخر, لهاذاك اللي قام من بين الموتى, و نوليو نثمروا لله. ⁵على خاطر كيما كنا نعيش حياة بالجسد كان الشر تاع الذنوب اللي بينها الشرع تخدم بالاعضاء تاعنا باه نثمروا للموت.⁶و ضرك رانا تحررنا من الشرع, و متنا على الحاجة اللي كانت رابطتنا, حتى نقدروا نعبدوا الله بالنظام الروحي الجديد موش بالنظام الحرفي لقديم. الجهاد ضد المعصية⁷مالا واش نقولوا؟ قادر الشرع يكون هو المعصية؟ حاشا! ما عرفنا المعصية غير كي عرفنا الشرع. و لو كان الشرع ما قالش :" ما تحسدش" ما كنتش نعرف الحسد. ⁸بالصح المعصية لقات فرصة في الوصية و زادت خلقت فيا حسد اكثر من اللي كان. على خاطر بلا شرع المعضية ميتة.⁹و كي كان ما عنديش شرع كنت عايش ما نيش ميت. بالصح كي جات لوصية عاشت المعصية, و انا متت, ¹⁰و ولات الوصية اللي توصل للحياة , هي نفسها سبب تاع موت.¹¹على خاطر المعصية, لقات الوصية فرصة, ييها خدعتني وقتلتني. ¹²الشرع في ذاتو مقدس, و الوصية مقدسة و صحيحة و صالحة.¹³كيفاه الحاجة الصالحة تولي سبب للموت؟ حاشا! بالصح المعصية باه تبان معصية هي اللي خلقت لي الموت من حاجة صالحة. وهكذا تولي المعصية معصية تاع الصح. ¹⁴ونحنا نعرفوا باللي الشرع حاجة روحية, بالصح الانسان تباع عبد للمعصية.¹⁵و على خاطر ما نعرفش واش ندير, نولي نعمل الشيء اللي مانيش حاب نديرو, الشيء اللي نكرهو هو اللي نديرو. ¹⁶وكان عملت الشيء اللي مانيش حاب نديرو, معناها اني موافق باللي الشرع عندو الحق.¹⁷مالا مانيش انا اللي ندير في الشيء اللي ما نحبوش, بالصح المعصية اللي ساكنة قيا هي اللي عملاتو, ¹⁸معناها ما يسكن في جسمي حتى شيء صالح. على خاطر الارادة حاضرة عندي, بالصح باه نديرالحاجة لمليحة ما نقدرش.¹⁹على خاطر الصلاح اللي حاب نديروا ما نقدرش نديرو, بالصح الشر اللي مانيش حاب نديروا نلقى القدرة باه نديروا. ²⁰و اذا كان الشيء اللي ما نحبوش هو بالذات اللي نديرو, مالا مانيش انا اللي ندير فيه, بالصح المعصية اللي ساكنة فيا. ²¹و هكذا نلقى في الحكم تاع الشرع باللي انا حاب ندير الخير بالصح ما نقدر ندير غير الشر.²²و انا لداخل في روحي كانسان نفرح بالشرع تاع ربي. ²³بالصح كاين في اعضاءي شرع واحد اخر يحارب الشرع الي في عقلي, و يخليني نولي عبد للشرع تاع المعصية اللي ساكن في اعضاءي.²⁴يا ويلي انا الانسان المسكين! شكون يمنّعني من هاذا البدن تاع الموت؟ ²⁵نشكر الله بيسوع المسيح ربنا! على خاطر انا بعقلي نخدم في الشرع تاع الله, بالصح بالبدن نخدم في الشرع تاع المعصية.

Chapter 8

¹من ضرك ما كاين حتى حكم على الناس اللي راهم في المسيح يسوع, اللي يمشيو بالروح و ما يمشوش بالجسد. ²على خاطر شرع روح لحياه في المسيح يسوع حررني من شرع المعصية و الموت.³و الشيء اللي عجز عليه الشرع, عجز عليه على خاطر الجسد ضعيف. و كي بعث الله وليدو في جسم يشابه للجسم تاع المعصية, باه يكون كفارة على المعصية, حكَم على المعصية في الجسد, ⁴باه يتم فينا الحكم الشرعي, احنا اللي ماشيين بالروح موش بالجسد. ⁵على خاطر اللي هما في الجسد يهمهم الجسد, و اللي هما في الروح تهمهم الروح.⁶و الاهتمام تاع الجسد هو موت, و الاهتمام تاع الروح هو حياة وهناء. ⁷اهتمام الجسد هو عداوة لله, على خاطر ماهوش خاضع لشرع الله, و ثاني ما يقدرش يكون خاضع ليه. ⁸و الناس اللي يمشيو بالجسد ما يقدروش يرضيو الله.⁹واذا كان الروح تاع الله ساكن فيكم, انتوما ما كمش في الجسد, انتوما في الروح. بالصح اذا كان واحد ما فيهوش الروح تاع المسيح, هاذاك ماهوش للمسيح. ¹⁰و اذا كان المسيح فيكم, الجسد راح يموت بسبة المعصية, اما الروح تكون لها حياة بسبة التبرير.¹¹و اذا كان الروح تاع اللي قوَّم المسيح من بين الموتى ساكن فيكم, مالا اللي قوّم المسيح من بين الموتى راح يحييكم انتم ثاني بالروح تاعو اللي ساكن فيكم.¹²مالا يا خاوتي ما ناش ملزمين بالجسد باه نعيشوا حساب الجسد. ¹³على خاطر كان عشتوا للجسد راح تموتوا, بالصح اذا كنتوا بالروح تقتلوا لعمال تاع الجسد رايحين تحياو.¹⁴على خاطر كل اللي يقودهم الروح تاع الله, هاذوك هما اولاد الله. ¹⁵و انتوما ما ديتوش روح العبودية باه تخافوا, انتوما ديتوا روح التبني اللي بيه ننادي: "يا آب الآب".¹⁶و الروح بذاتو يشهد للارواح تاعنا باللي رانا اولاد الله. ¹⁷و اذا كنا احنا اولاد نكونوا احنا همّا الوراثة و وارثين مع المسيح. اذا كنا نتعذبوا معاه هذا الكل باه نتمجدوا ثاني معاه. المجد اللي راح يجي¹⁸و نشوف باللي لعذاب تاع هاذي لحياة ما يتقاسش بالجاه الي راح يظهر فينا. ¹⁹على خاطر الدنيا كاملة تستنى غير وقتاه يظهروا اولاد الله.²⁰على خاطر الدنيا كاملة تحطت في الباطل - بلا ما كانت حابة, بالصح على جال اللي حطتها - حتى يجي الوقت, ²¹على خاطر الدنيا في ذاتها راح تتحرر من العبودية تاع لفساد و يبان فيها الجاه تاع اولاد الله. ²²رانا عارفين كلنا كيفاه الخليقة كاملة قاعدة تتوجع اوجاع كيما تاع لولادة.²³و موش هاذا برك, حتى احنا اللي لينا الباكورة تاع الروح, احنا ثاني نتوجعوا في ارواحنا, نستناو في التبني باه تتفدى اجسامنا. ²⁴على خاطر منعنا بالرجاء. و الرجاء اللي نشوفوه ما بقاش رجاء, على خاطر الواحد ما يرجاش حاجة يشوف فيها قدامو؟ ²⁵بالصح الرجاء تاعنا مازال ما بانش و رانا صابرين نستناو فيه.²⁶و حتى الروح ثاني يعاوننا على ضعفنا, على خاطر احنا ما نعرفوش كيفاه نصلِيوْ كيما لازم. بالصح الروح في ذاتو هو اللي يشفع فينا عند الآب بواحد الانّات ما تتوصفش. ²⁷على خاطر الله هو كاشف لقلوب و عارف واش هو الاهتمام تاع الروح. و كيفاه يشفع في القديسين حساب واش يحب الله.²⁸و احنا عارفين باللي لحوايج الكل مع بعضاها تعمل للخير للناس اللي يحبوا ربي. اللي ناداهم على حساب قصدو. ²⁹على خاطر اللي خايرهم من قبل خصصهم باه يكونوا مشابهين للصورة تاع وليدو, اللي هو البكر بين خاوة ياسر. ³⁰و اللي خايرهم من قبل, هاذوك ناداهم ثاني. واللي ناداهم, برّرهم , واللي برّرهم, مدلهم الجاه ثاني. شكون راح يفصلنا على محبة المسيح³¹واش نزيدوا نقولوا بعد هاذا الكل؟ اذا كان الله معانا, شكون يقدر يكون ضدنا؟ ³²الله اللي ما شفقش على وليدو. بالصح سلْموا للموت على جالنا احنا الكل, كيفاه ما يمدلناش معاه كلشيء؟³³شكون يقدر يشكي على اللي خايرهم الله؟ الله هو اللي يبرر. ³⁴شكون اللي يقدر يدين؟ المسيح هو اللي مات, و هو ثاني اللي قام, و هو ثاني اللي على ليمين تاع الله. و هو ثاني اللي يشفع فينا.³⁵شكون يفصلنا على لمحبة تاع المسيح؟ الشدّة و الا الضيق و الا القهرو الا الجوع و الا لعرى و الا الخطر و الا السيف؟ ³⁶كيما مكتوب: "على جالك كل يوم نتقتلوا. و كي لغنم نتذبحوا ".³⁷و بالصح في هاذي الصعوبات الكل نصرتنا كبيرة باللي حبْنا. ³⁸و انا مثبت باللي لا لموت ولا لحياة, و لا ملايكات ولا سلاطين و لا قوات, و لا الحاضر ولا اللي جاي, ³⁹ولا علو و لا عمق, و لا اي خليقة واحدة اخرى, تقدر تفصلنا على محبة الله اللي في المسيح يسوع ربنا.

Chapter 9

¹نقول لكم الحق في المسيح, و ما نكذبش, و الضمير تاعي شاهد عليا بالروح القدس: ²انا حزين ياسر و قلبي يوجع فيا خلاص.³كنت نتمنى لو كان جيت انا محروم من المسيح على جال خاوتي اولاد شعبي, ⁴اللي همّا بني اسراييل, اللي مدلهم الله التبني و الجاه و العهود و الشرَع و العبادة و الوعود, ⁵و اللي منهم جاو جدودنا الانبياء, و منهم جاء المسيح حساب الجسد, و هو الكاين على كل شيء اله يتبارك اسمو للابد. امين.⁶و مانيش نقول باللي كلمة الله خابت. على خاطر مش كل بني اسراييل هما اسرائيليين, ⁷و موش على خاطر همّا من اولاد ابراهيم يعني همّا كلهم اولاد, بالصح الله قال: " تكون عندك ذرية من اسحاق".⁸يعني باللي اولاد الجسد ما همش اولاد الله, بالصح لولاد اللي جاو بالعاهد تاع ربي همّا اللي يكونوا الذرية. ⁹على خاطر هاذي هي كلمة العاهد: "نجي في هاذا الوقت العام الجاي وتكون سارة عندها طفل".¹⁰و موش هاذا برك, حتى رفقة ثاني, كانت بالكرش من راجل واحد و هو جدنا اسحاق. ¹¹و قبل ما يولدوا التوام اللي في كرشها, و لا داروا لا خير ولا شر, باه يثبت ربي القصد تاعو حساب الاختيار, وموش على حساب لعمال بالصح اللي يناديه ربي هاذاك هو, ¹²و قال لرفقة: " لكبير يولي هو لخديم للصغير". ¹³كيما جاء في لكتاب: " حبيت يعقوب وكرهت عيسو".¹⁴مالا كيفاه؟ ربي زعمى يظلم؟ حاشاه! ¹⁵يقول لموسى: "نرحم اللي نرحم و نشفق على من نشفق". ¹⁶مالا الامر موش للي هو يحب و الا للي يسعى باه يترحم, ربي هو اللي يرحم.¹⁷على خاطر في لكتاب قال الله لفرعون: " انا حطيتك في هاذا المنصب باه نبين فيك القوة تاعي, و باه في كل الدنيا الناس يدعيو باسمي". ¹⁸هو يرحم اللي يحب, و يقسي قلب اللي يحب.¹⁹بلاك واحد يقول: "مالا علاه يلومنا الله ويحاسبنا؟ على خاطر شكون يقدر يقول لا لله؟" ²⁰شكون انت يا انسان حتى تعارض الله؟ لعل الطين يقول للملاس: "علاه صنعتني هكا؟". ²¹و الا الملاس ما يتصرفش في الطين, ياخي من عجنة واحدة يخدم ماعون شريف ويخدم واحد اخر دوني؟²²كيفاه؟ اذا كان الله و هو حاب يبين سخطو و قوتو, استحمل بصبر مواعن السخط المخدومة للهلاك. ²³باه يبين فيض الجاه تاعو على مواعن الرحمة اللي وَجدْها قبل للجاه, ²⁴و خايرنا احنا ثاني باه نكونوا مواعن تاع رحمة, موش من ليهود برك بالصح حتى من الامم ثاني.²⁵كيما قال ثاني على لسان النبي هوشع: " الشعب اللي ما كانش ليا راح يولي هو الشعب تاعي, و اللي ماهيش محبوبة راح تولي هي المحبوبة تاعي. ²⁶و يكون وين قالوا لهم: انتوما ماكمش الشعب تاعي. لثمة بالذات يتسماو اولاد الله الحي".²⁷و اشعياء ينادي ويقول من جيهة اسراييل: "حتى لو كانوا بني اسراييل على قد الرمل تاع لبحر, راح يمنعوا منهم غير شوية. ²⁸على خاطر ربي راح يتمم امر محكوم بيه على لرض. يقضيه بالعدل و يتم بيه". ²⁹و كيما قال اشعياء من قبل: " لو كان موش اله الجيوش خلى لنا ذرية, ولينا كيما سدوم وشابهنا عمورة". اسراييل ما تامنش³⁰مالا واش نقولوا؟ الشعوب اللي ما كانوش يحوسوا على التبرير لقاو التبرير, التبرير اللي بالايمان. ³¹بالصح امة اسراييل, اللي كانوا يسعاو للتبرير بالشرع, ما وصلوش للتبرير اللي المفروض يكون بالشرع!³²علاه؟ على خاطركانوا يسعاو باه يوصلوا للتبرير بالاعمال تاع الشرع, و مش بالايمان. و دعثروا في حجرة عثرة, ³³كيما راه مكتوب: "انا راح نحط في صهيون حجرة في طريق الشعب و صخرة عثرة, و كل من يامن بيه ما يخزاش".

Chapter 10

¹يا خاوتي, الحاجة اللي يفرّح بيها قلبي و ديما ندعي لله على جال بني اسراييل باه ينالوا الخلاص. ²نشهد عليهم باللي عنهم غيرة على الله, بالصح مش بمعرفة صحيحة. ³على خاطر اذا كانوا ما يعرفوش كيفاه الله يبرر الناس, و يحبوا يثبتوا برهم همّا بالطريقة تاعهم, و ما استعرفوش بالتبرير اللي عملوا الله.⁴و الغاية من الشريعة اللي هي: كل من امن بالمسيح ينال التبرير من عند الله. الخلاص هو للناس الكل ⁵على خاطر موسى كتب كيفاه يتبرر الواحد بالشريعة: " كل من يعمل بالاحكام اللي جات في الشريعة يحيا بيها".⁶اما البر اللي بالايمان هاذا واش يقول: " ما تقولش في قلبك: شكون اللي يطلع للسماء؟" يقصد باه يهبّط المسيح, ⁷"والا: شكون يهبط لاعماق الهاوية؟" يقصد باه يحيي المسيح من بين الموتى.⁸بالصح واش يقول؟ "الكلمة قريبة ليك, هي في فمك و في قلبك" يقصد الكلمة تاع الايمان اللي قاعدين نبشروا بيها: ⁹باللي اذا كان استعرفت بفمك بالرب يسوع المسيح, و امنت بيه في قلبك باللي الله لرجعلو لحياه و قوْموا من بين الموتى, تنال الخلاص. ¹⁰على خاطر الايمان تاع القلب ينال بيه التبرير, و اللي يستعرف بفمو ينال بيه للخلاص.¹¹على خاطر مكتوب في كلام الله: " كل من يامن بيه ما يخزاش". ¹²و ما كاين حتى فرق بين ليهودي واليوناني, و كاين اله واحد للناس الكل, كريم يجود يخيراتو على كل اللي يدعيو ليه. ¹³على خاطر " كل من يدعي باسم ربي يمنع".¹⁴بالصح كيفاه يدعيو لواحد ما امنوش بيه؟ و كيفاه يامنوا بلا ما يسمعوا؟ و كيفاه يسمعوا بلا ما واحد يبشرهم؟ ¹⁵و كيفاه يروحوا يديو لخبارتاع الخير لو كان واحد ما يبعثهم؟ كيما يقول لكتاب: "ما بهاها خطوات اللي يبشروا بالخير, الي يبشروا بالهناء".¹⁶بالصح ماهمش الناس الكل قبلوا الانجيل, على خاطر اشعياء يقول: "ياربي, شكون اللي امن بالشيء اللي قلناه؟". ¹⁷مالا الايمان يجي كي يسمعوا بالخبر, و الخبر يتنشر كي يبشروا بكلمة الله".¹⁸بالصح نقول : بلاك ما سمعوش؟ بالعكس سمعوا! "للدنيا الكل وصلت اصواتهم, و لاطراف لرض تهزت اقوالهم".¹⁹بالصح نقول: لعل بني اسراييل ما فهموش؟ قال موسى من قبل: " نخليكم تحسدوا اللي ما كانت محسوبة امة. و نغّيركم باللي ما كان محسوب شعب".²⁰و يزيد لهم اشعياء ويقول: "لقاوني الناس اللي ما فركتوش عليا, و بينت روحي للي ما كانوش يحوسوا عليا". ²¹و من جيهة اسراييل يقول: " النهار بطولو وانا نمد في يدي لشعب متمرد ومعاند".

Chapter 11

¹نقول: بلاك ربي رفض الشعب تاعو لقديم؟ على خاطر انا ثاني واحد منهم و من ذرية ابراهيم من عرش بنيامين. ²الله ما نكرش شعبو اللي خايرو من لول. و ما يخفاش عليكم واش قال لكتاب على ايليا؟ كيفاه كان يشكي من شعب اسراييل لله وقالو: ³"يا ربي, قتلوا الانبياء تاعك و ريْبوا المذابح تاعك, وبقيت غير انا وحدي, و ها همّا حابين يقتلوني!".⁴بالصح واش جاوب عليه الوحي تاع الله؟ "خليت لروحي سبعة الاف راجل عمرهم ما ركعوا على ركايبهم لبعل". ⁵و حتى في الزمان تاعنا الحاضر ثاني خلى الله جماعة مخصصة ليه خايرها بالنعمة تاعو.⁶اذا كان خايرهم بالنعمة معناها خايرهم موش على حساب اعمالهم, و الا النعمة ما بقاتش نعمة. و اذا كان خايرهم على حساب لعمال و موش بالنعمة, تولي لعمال ماهيش اعمال. مالا كيفاه؟ ⁷اللي كان يحوس عليه شعب اسراييل ما نالهش. بالصح المختارين منهم نالوه. اما لخرين اللي بقاو قساو قلوبهم, ⁸كيما قال لكتاب: "عطالهم ربي روح باردة, وعينين ما تبصرش, و وذنين ما تسمعش, حتى لليوم هاذا".⁹و داود يقول عليهم: "اجعل مايدتهم فخة ليهم و منداف و حجرة عثرة بيها تجازيهم. ¹⁰باه ما يشوفوا ظلّمْ عينيهم, و احمال على ظهورهم ديما تعييهم". الخلاص تاع الامم¹¹و انا نقول: زعمى الطيحة هاذي تاع بني اسراييل باه يفناو خلاص؟ حاشا! بالصح بالطيحة تاعهم همّا ولات الشعوب لخرى مقبولة باه يغيروا. ¹²اذا كان الطيحة تاعهم فيها فايدة كبيرة للعالم, و نقصانهم فيه زيادة للشعوب, مالا واش نقولوا على الفايدة اللي راح تكون لو كان همّا يثبتوا؟¹³و انا هنا نقول للناس اللي ما همش من ليهود: على خاطر انا رسول للشعوب من غير ليهود عندي فخرة بالخدمة تاعي بيناتهم, ¹⁴كاش ما يغيروا اهلي واماليا و يمنعوا حتى لو كان شوية منهم.¹⁵اذا كان رفضهم همّا مد مصالحة للعالم, قبولهم ما راح يكون غير حياة من بين الموتى؟ ¹⁶و اذا كانت لخميرة مقدسة حتى لعجينة تكون مقدسة! و اذا كانت الجدرة مقدسة حتى لعراف تكون مقدسة!¹⁷و اذا كان قص شوية عراف, و جابك انت من زيتونة برية و طعمك فيها, و وليت شريك في الاصل تاع الزيتونة و في زيتها, ¹⁸مالا ما تهزش روحك على لعراف لمنحية. كي تتكبر, مشك انت اللي هاز الاصل, او الاصل هو اللي هازّك!¹⁹راح تقول: "تقصت هاذيك لعراف باه انا نتطعم!". ²⁰مليح! هي تقصت على خاطر ما عندهاش ايمان, وانت ثبتت على خاطر عندك ايمان. مالا ما تتكبرش خيرلك خاف على روحك! ²¹اذا كان الله ما شفقش على لعراف الاصلانية قادر حتى انت ثاني و ما يشفقش عليك!²²و هنا يبان اللطف تاع الله و السخط تاعو: السخط تاعو على الناس اللي طاحوا, و اما اللطف تاعو عليك انت, مالا اثبت في اللطف لا تتنحى انت ثاني.²³و همّا لو كان يرجعوا للايمان راح يطَّعمهم, على خاطر الله قادر يزيد يطَّعمهم مرة اخرى. ²⁴اذا كنت انت نحاك من زيتونة بيثر و طعّمك على خلاف العادة في زيتونة حرة, و هما عندهم الحق اكثر منك باه يطّعمهم في زيتونتهم الحرة؟ رحمة ربي واسعة للناس الكل²⁵ما دابيا ما يخفاش عليكم هاذا السر, باه ما تحسبوش ارواحكم فاهمين خير من لخرين: باللي مجموعة من بني اسراييل قسّاو قلوبهم حتى ن يدخلوا الشعوب لخرين الكل.²⁶و من بعد عاد يخْلصوا بني اسراييل الكل. كيما جاء في لكتاب: " من صهيون يخرج المخلص و ينحي الكفر من بني يعقوب. ²⁷و يكون هاذا هو العاهد تاعي معاهم كي نمحي ذنوبهم".²⁸من الجيهة تاع الانجيل همّا ولاو عديان على جالكم. و اما من جيهة الاختيار همّا احباب على جال الجدود, ²⁹و الهبات تاع الله و الاختيار تاعو همّا بلا ندامة.³⁰انتوما قبل ما كنتوش طايعين لله, و رحمكم بالعصيان تاعهم همّا, ³¹و بالصح همّا ضرك ماهمش طايعين باه يترحموا كيما ترحمتوا انتم, ³²على خاطر الله خلى الناس الكل محبوسين في العصيان, باه كي يرحم يرحم الناس الكل. تسبيح لله³³قداه واسع الغنى تاع الله و حكمتو و العلم تاعو! و قداه صعيب علينا باه نعرفوا احكامو و باه نفهموا الطُرق تاعو! ³⁴"على خاطر شكون عرف تخمام الله؟ و الا شكون كان يدبّر عليه؟³⁵و الا شكون دار فيه مزية و يستنى فيه يرجعلو الخير؟". ³⁶على خاطر منو هو و بيه هو و ليه هو لحوايج الكل. ليه المجد للابد. امين.

Chapter 12

¹نطلب منكم يا خاوتي على وجه لحنانة تاع ربي قدموا اجسادكم ذبيحة حية مقدسة مقبولة عند ربي, اللي هي عبادتكم الروحية. ²و ما تكونوش كيما اهل هاذي الدنيا, بالصح بدّلوا العقلية تاعكم, باه تقدروا تعرفوا واش يحب الله: لحوايج تاع الصلاح و اللي ترضيه و اللي ما فيها حتى شوهة.³بالنعمة اللي مد هالي ربي نقول لكم, لكل واحد فيكم: ما يكَبّرش روحو اكثر من اللازم, و يرَزن روحو, على قد واش قسَملو ربي من الايمان.⁴و كيما عندنا اعضاء ياسر في بدن واحد, بالصح موش كل الاعضاء تخدم نفس الخدمة, ⁵هكذاك احنا على قد ما رانا ياسر: بالصح نبقاو بدن واحد في المسيح, و اعضاء تاع بعضانا, كل واحد فينا يكمل لاخر.⁶و عندنا مواهب متنوعة حساب النعمة اللي عطاهالنا ربي: اللي عندو الموهبة تاع النبوءة يتنبأ بالايمان , ⁷و اللي عندو الموهبة تاع الخدمة, يخدم, واللي عندو الموهبة تاع التعليم يعلّم, ⁸و اللي عندو الموهبة تاع الوعظ يوعظ, و اللي يحب يمد يكون كريم, و اللي يسَيَر يكون مجتهد, و اللي يرحم يرحم و هو فرحان. لمحبة⁹خليوْ لمحبة تكون بلا نفاق. بعْدوا على الشر, و الصقوا في الخير. ¹⁰ودّوا بعضاكم بالمحبة كيما الخاوة تاع الصح, قدْروا بعضاكم.¹¹ما تفْشلوش اخدموا باجتهاد, كونوا في الروح شاعلين, لله عابدين , ¹²في الرجاء كونوا فرحانين, وقت الضيق كونوا صابرين, متعودين على الصلاة, ¹³متعاونين مع بعضاكم باه تساعدوا الخاوة القديسين, ضيْفوا دايما الغرباء.¹⁴باركوا اللي يقهروكم. باركوهم و ما تدعيوش عليهم. ¹⁵افرحوا مع اللي يفرحوا و ابكِيوْ مع اللي يبكيوْ. ¹⁶كونوا متفاهمين الكل ما بعضاكم, ما تشوفوش للامور اللي لفوق بالصح كونوا متواضعين, ما تحسبوش ارواحكم حكماء.¹⁷ما تكافيش الشر بالشر. اعملوا غير لحوايج لمليحة قدام الناس. ¹⁸و اذا كان قدرتوا سالموا الناس الكل على قد ما تقدروا.¹⁹يا لحباب, ما تفدِيوْش الثار تاعكم, وكّلوا ربي, على خاطر قال في لكتاب: "خليوْ النقمة ليّا انا و انا نجازي, يقول الرب". ²⁰"كان عدوك جاع وكّلو. و كان عطش ارويه. كي تدير كيما هاكذا تلم لو الجمر فوق راسو". ²¹ما تخليش الشر يغلبك بالصح بالخير اغلب الشر.

Chapter 13

¹على كل واحد منكم يكون طايع للسلطات, ما كانش سلطة ماهيش قايمة من عند ربي, و كل سلطة هي مرتبة من عند ربي, ²واللي يعاند اللسلطات يسمى يعاند في التدبير تاع ربي, و يستاهل العقوبة.³و اللي يعمل الخير ما عندو من واه يخاف واللي يعمل الشر هو اللي يخاف. تحب ما تخافش من السلطات؟ اعمل الصلاح راح يشكروك عليه, ⁴على خاطر السلطات كي تخدم ليك الصلاح تسمى قاعدة تخدم في ربي! بالصح كان عملْت الشر خاف, على خاطر السلطة ما تعاقبش هكاك باطل و هي الخادمة تاع الله, وتعاقب على الشر. ⁵على هاذيك طاعة السلطات لازمة, موش برك خوف من العقاب و بالصح حتى على جال الضميرثاني.⁶و على هاذا تخلصوا لغرامة ثاني, و اصحاب السلطة راهم يخدموا في الله كي يعملوا هاذا الشيء. ⁷كل واحد مدولوا حقو: لغرامة في الحاجة الواجبة فيها لغرامة. و الضريبة وين واجب الضريبة. و الهيبة للي لازم تكون ليه هيبة. و الاكرام للي لازم يكون ليه الاكرام. احكموا في لمحبة على خاطر نهار الرب قريب⁸ما تكونوش مديونين لحتى واحد بحتى شيء غير بالمحبة لبعضاكم, على خاطر اللي يحب غيرو راهو تمم الشريعة كاملة. ⁹على خاطر الوصية اللي تقول "ما تزنيش, ما تقتلش, ما تسرقش, ما تشهدش بالزور, ما تحسدش". و اي وصية واحدة اخرى, كلها مجمولة في هاذي الكلمة: "تحب قريبك كيما نفسك". ¹⁰لمحبة ما تديرش الشر للقريب, والمحبة هي كمالة الشريعة.¹¹هاذا و راكم عارفين الوقت اللي احنا فيه, وصل الوقت باه تفيقوا من النوم, و الخلاص تاعنا ولى اقرب لينا ضرك من النهار اللي امنا فيه. ¹²الليل قاعد يتسل و قريب يطلع النهار, خلينا نطرحوا علينا اعمال الظلمة و نلبسوا سلاح النور.¹³باه نمشيو كيما يليق بينا في النهار: موش بالتفرعين والشراب, و لا بالفجور و الفاحشة, ولا بالعراك و الحسد. ¹⁴بالصح البسوا الرب يسوع المسيح, و ما تهتموش بالجسد و تبعوا الشهوة تاعو.

Chapter 14

¹و كي يكون واحد فيكم ضعيف في الايمان اقبلوه, و ما تحاسبوهش على افكارو, ²كاين اللي قادر ياكل كل شيء و اما الضعيف ياكل برك الحبوب.³و كي يكون واحد ياكل كل شيء ما يستهزاش باللي ما يقدرش ياكل, و اللي ما ياكلش ما يلومش اللي ياكل, على خاطر هو مقبول عند الله. ⁴شكون انت باه تحكم على غيرك؟ يثبت والا يسقط بينو و بين مولاه, بالصح راح يثبت, على خاطر الله قادر باه يثبتو.⁵كاين اللي حاط نهار مهم على الايام لخرى, و كاين اللي بالنسبة ليه الايام الكل كيف بعضاها. كل واحد حر في رايو: ⁶اللي يراعي نهارعلى كل الايامات لخرى, هو يراعيه على جال الله. واللي ما يراعي حتى نهار, على جال الله ثاني, و اللي ياكل, يكرم في الله و يشكرو. و اللي ما ياكلش, ما ياكلش يكرم الله و يشكرو ثاني.⁷ما كانش واحد منا يعيش لنفسو هو, و ما كانش واحد يموت لنفسو هو. ⁸على خاطر كان عشنا للرب نعيشوا, و كان متنا للرب نموتوا. عشنا و الا متنا احنا للرب. ⁹على خاطر على هاذا الشيء مات المسيح و قام من بين الموتى, باه يسود على الحيين و الميتين.¹⁰كيفاه مالا انت, تحكم على خوك؟ و كيفاه تستهزى بخوك؟ احنا الكل راح نوقفوا قدام العرش تاع المسيح, ¹¹على خاطر جاء في لكتاب: "انا حي يقول الرب, ليّا تسجد كل ركبة, و بحمد الله يسبح كل لسان".¹²كل واحد منا راح يتحاسب على نفسو قدام الله. ما تكونش سبب لخوك باه يطيح, ¹³و ما نحكموش على بعضانا, و اذا حكمنا نحكموا بهاذا الشيء: واحد ما يكون عثرة لخوه.¹⁴و انا عارف و متأكد باللي في الرب يسوع ما كانش حاجة ناجسة في ذاتها, غير اذا اعتبرتها انت ناجسة, تكون ناجسة ليك. ¹⁵اذا كان سببت الحزن لخوك بسبة الماكلة تاعك, معناها انت ما مشيتش بالمحبة. ما تسببش بالماكلة تاعك لهلاك لخوك اللي على جالو مات المسيح.¹⁶ما تخليوش الناس يهدروا بالسوء على الصلاح تاعكم, ¹⁷على خاطر الملكوت تاع الله ماهوش ماكلة وشراب, بالصح هو عدل وسلام و فرحة في الروح القدس.¹⁸و اللي يخدم المسيح في هاذا الشيء يرضى عليه ربي وعبادو. ¹⁹خلينا مالا نخدموا الحاجة اللي فيها السلام, و اللي تبنينا مع بعضانا.²⁰ما تهدّمش الشيء اللي عملو الله على جال الماكلة. لحوايج الكل طاهرة, بالصح موش مليح تكون عثرة لكاش واحد بالماكلة اللي تاكلها. ²¹مليح ما تاكلش لحم و ما تشربش خمرو لا اي حاجة تعثر خوك و تضعفو.²²عندك ايمان بالشيء الي راك تدير؟ خلي هاذا بينك و بين نفسك قدام الله! يا سعدو اللي ما يحكمش على روحو في الشيء اللي يشوفو مليح ليه. ²³بالصح كي واحد يشك يولي يحكم على روحو, على خاطر ما دارش هاذاك الشيء بالايمان. و اي حاجة ما هيش من الايمان تولي معصية.

Chapter 15

¹لازم علينا احنا القاويين في الايمان نستحملوا الضعف تاع الضعفاء في الايمان, و ما نحوسوش نرضيو ارواحنا. ²كل واحد منا يعمل مجهود و باه يرّضي خوه للخير باه نبنيو بعضانا.³على خاطر المسيح ثاني ما طلبش الشيء اللي يرضيه هو و كيما جاء في الكتاب: "لمعايرة اللي عايروك بيها جات فيا انا". ⁴و كل حاجة تكتبت قبل تكتبت باه نتعلموا منها, كيفاه يكون عندنا رجاء بالصبر و التشجيع.⁵و اله الصبر و التشجيع يعطينا نكونوا بيناتنا موحدين في الراي, كيما تعلمنا من يسوع المسيح, ⁶باه تمدوا المجد لله الاب تاع يسوع المسيح. بقلب واحد و فم واحد. ⁷مالا اقبلوا بعضاكم كيما قبلنا المسيح, باه نمدوا المجد لله.⁸نقول لكم : باللي المسيح يسوع ولى الخادم لاهل الختان, حتى يبين باللي الله صادق, و يوفي بالعاهد تاعو اللي وعدو لجدودنا. ⁹واما الشعوب لخرين مجدوا الله على جال الرحمة, كيما جاء في الكتاب: "على هاذيك نسبح بحمدك بين الشعوب و نرتل لاسمك".¹⁰و يزيد يقول: "يا شعوب الارض افرحوا مع شعب الله". ¹¹وثاني: "يا كل الشعوب سبحوا ربي, وامدحوه يا كل الامم".¹²و يزيد يقول على لسان اشعياء: "يخرج عرق من اصل يسى ويقوم باه يسود على الامم, و عليه يكون رجاء الشعوب".¹³و اله الرجاء يملاكم بكل فرحة و سلام في الايمان, باه تزيدوا في الرجاء بالقوة تاع الروح القدس. الخدمة تاع بولس الرسول بين الامم¹⁴و انا من جيهتكم ثاني متأكد, يا خاوتي, باللي راكم معمرين بالخير, و فايضين بالعلم, قادرين تنصحوا بعضاكم.¹⁵بالصح كتبت لكم بعض الامور لهنا بجرأة اكثر, برك باه نفكركم, بالنعمة اللي عطاهالي ربي, ¹⁶باه نكون خادم تاع المسيح للشعوب, و انا نبشر بالانجيل تاع الله كيما كاهن, باه يوليوْ الشعوب اللي من غير ليهود قربان مقدس مقبول عند الله بالروح القدس.¹⁷عندي الحق نفخر في المسيح يسوع بالخدمة تاعي لله. ¹⁸على خاطر ما نقدرش نهدر على حاجة ما دارهاش المسيح بيّا باه الامم يطيعوا الله بالقول و بالفعل, ¹⁹بقوة معجزات و آيات, بالقوة تاع روح الله. من اورشليم و ما داير بيها و وصلت حتى ل الليريكون, و كمّلت التبشير بانجيل المسيح.²⁰و كنت ديما نحرص باه نبشر بالطريقة هاذي: وين الناس مازالوا ما سمعوش بالمسيح, باه ما نبنيش على ساس حطو واحد اخر. ²¹ندير كيما جاء في لكتاب: "اللي عمرهم ما جاهم خبر عليه راح يشوفوه, و اللي عمرهم ما سمعوا بيه راح يفهموه".²²على هاذيك كنت نتعطل قداه من مرة باه نجي عندكم. بولس حاب يزور روما ²³و انا ضرك ماعنديش خدمة في هاذيك الجوايه, بالصح من قداه من سنة و انا متشوق باه نجي عندكم.²⁴و انشالله كي نعود رايح لاسبانيا نجيكم. نعدي عليكم وتشايعوني من لثمة. بعد ما ننعم بشوفتكم حتى لو كان شوية. ²⁵بالصح انا ضرك رايح لاورشليم باه نخدم الخاوة القديسين,²⁶على خاطر اهل مكدونية و اخائية حبوا يتبرعوا ويعاونوا الخاوة المحتاجين اللي في اورشليم, ²⁷هما حبوا يعاونوا, و زيد هو دين في رقبتهم! على خاطر كي شاركوا جميع الامم في الخيرات الروحية, راح يزيدوا يشاركوهم في الخيرات الارضية ثاني.²⁸و كي نكمل هاذي الخدمة, و نسلم لهم المعاونة تاع الخاوة, نعدي عليكم في طريقي لاسبانيا. ²⁹وانا عارف باللي كي نجي عندكم نجي بالفيض تاع البراكة تاع المسيح.³⁰نطلب منكم يا خاوتي, بجاه ربنا يسوع المسيح, و بالمحبة تاع الروح, تجاهدوا معايا في الصلاة لله على جالي, ³¹باه ربي يمنّعني من الناس اللي ماهمش مومنين في اليهودية, و ثاني باه تكون الخدمة تاعي على خاطر اورشليم مقبولة عند الخاوة القديسين, ³²حتى ن نجي عندكم و انا فرحان ان شاء الله, و نرتاح عندكم.³³و الاله تاع السلام يكون معاكم اجمعين. امين.

Chapter 16

¹نوصيكم على اختنا فيبي, اللي تخدم في الكنيسية تاع كنخريا, ²تقبلوها في المسيح كيما يليق بالخاوة القديسين, و تعاونوها في اي شيء تحتاجو منكم, على خاطر عاونت خاوة ياسر وعاوْنَتْني حتى انا ثاني.³سلموا على بريسكلا و اكيلا اللي يعاونوا فيّا في المسيح يسوع, ⁴اللي عرّضوا حياتهم للخطر باه يمنعوني, و مش غير انا وحدي نشكرهم جميع الكنايس تشكرهم ثاني, ⁵و سلموا على الكنيسية اللي في دارهم. سلموا على لحبيب ابينتوس, اول واحد قبل المسيح في اخائية.⁶سلموا على مريم اللي تعبت ياسر على جالنا. ⁷سلموا على اندرونكوس و يونياس اللي هما من العايلة تاعي, و اللي كانوا معايا في الحبس, ومعروفين في وسط الرسل, بالصح همّا امنوا قبلي بالمسيح. ⁸سلموا على اميلياس الحبيب في المسيح.⁹سلموا على اوربانوس اللي يعاون فينا في خدمة المسيح, و على استاخيس لحبيب. ¹⁰سلموا على ابّولس اللي تزكى في المسيح. سلموا على اهل ارستوبولس كاملين. ¹¹سلموا على هيروديون اللي من العايلة تاعي. سلموا على اهل نركيسوس اللي همّا في الرب.¹²سلموا على ترفينا و تريفوسا اللي يتعبوا ياسر في خدمة الرب. سلموا على برسيس المحبوبة اللي تعّبت روحها ياسر في الخدمة تاع المسيح. ¹³سلموا على روفس المختار في الرب, و سلموا على امو اللي هي كيما يوما. ¹⁴سلموا على ااسينكريتس, و فليغون, وهرماس, و بتروباس, و هرميس, و على كل الخاوة اللي معاهم.¹⁵سلموا على فليلوغس و جوليا, و نيريوس و اختو, و اولمباس, و على كل الخاوة القديسين اللي معاهم. ¹⁶سلموا على بعضاكم ببوسة مقدسة. تسلم عليكم الكنايس تاع المسيح كاملة. توصيات ختامية¹⁷نوصيكم يا خاوتي تديِوْ حذركم من الناس اللي يديروا المشاكل و الفُرقة, ويخرجوا على التعليم اللي تعلموه, هاذو الناس بعدوا عليهم. ¹⁸على خاطر اللي كيما هاذوك ما يخدموش ربنا المسيح يسوع بالصح يخدموا كروشهم. بكلامهم المعسول و اقوالهم اللي تبان مليحة يخدعوا الناس الطيبين.¹⁹ما كانش واحد ما سمعش بالطاعة تاعكم, و انا فرحان بيكم, كونوا حكماء في الخير و ابرياء من جيهة الشر. ²⁰والاله تاع السلام ثم ثم يعّفس على الشيطان ويحطوا تحت رجليكم. النعمة تاع ربنا يسوع المسيح تكون معاكم اجمعين. امين.²¹يسلم عليكم تيموتاوس اللي يخدم معايا, و يسلم عليكم لوكيوس و ياسون و سوسيباترس اللي من العايلة تاعي. ²²انا ترتيوس اللي كتبت هاذي الرسالة بخط يدي, نسلم عليكم الكل في الرب.²³يسلم عليكم غايس اللي مضَيفنا عندو احنا ولكنيسية كاملة. يسلم عليكم اراستس الخزناجي, و خونا كوارتس. ²⁴النعمة تاع ربنا يسوع المسيح معاكم كاملين. امين. تسبيح ختامي²⁵نحمد ربي اللي قادر يثبتكم, على حساب الانجيل اللي سمعتوه مني و المناداة بيسوع المسيح, و كشف السر اللي كان مخبي من بكري خلاص, ²⁶ ضرك ظهر و بان, و سمعوا بيه الشعوب الكل من الكتب تاع الانبياء كيما حب الله الدايم الوجود, حتى يطيعوه و يآمنوا بيه.²⁷المجد لله الحكيم وحدو, بيسوع المسيح. -تْكتْبت لناس روما من كورنتوس على يد فيبي الخادمة تاع الرب في لكنيسية تاع كنخريا-

1 Corinthians

Chapter 1

¹بولس, المسمي رسول تاع يسوع المسيح كيما حب الله, والاخ سوستانس, ²للكنيسية تاع الله اللي في كورنتوس, المقدسين في يسوع المسيح, المسميين قديسين مع جميع من يدعي باسم ربنا يسوع المسيح في كل مكان, ليهم و لينا: ³نعمة ليكم و سلام من الله بابانا و الرب يسوع المسيح. الشكر⁴نشكر الهي دايما من جيهتكم على النعمة تاع الله اللي تمدت ليكم في يسوع المسيح , ⁵راكم في كل شيء استغنيتوا فيه ف كل كلمة و كل علم , ⁶كيما تثبتت فيكم االشهادة تاع المسيح ,⁷و زيد ما راكمش ناقصين في اي موهبة, ف الوقت اللي فيه تستناو يظهرربنا يسوع المسيح , ⁸اللي مزال يثبتكم حتى للآخر بلا لوم ف نهار ربنا يسوع المسيح. ⁹الله راه مولى امانة اللي بيه عرضكم باه تدخلوا ف شركة ابنه يسوع المسيح ربنا. الانقسامات ف الكنيسية¹⁰بالصح انا نطلب منكم يا خاوتي , باسم ربنا يسوع المسيح , باه كلكم تكونوا كلمة واحدة , و ما يكونش بيناتكم فرقة , بالصح كونوا كاملين ف تخمام واحد و راي واحد , ¹¹على خاطر سمعت عليكم يا خاوتي من عايلة خلوي بلي كاين بيناتكم عراك.¹²هذا واش راني نقصد: بلي كل واحد منكم يقول: " انا راني مع بولس", و" انا راني مع ابولس", و" انا مع صفا", و"انا مع المسيح". ¹³واش مالا المسيح تفرق؟ بلاك بولس هو اللي تصلب على جالكم, والا باسم بولس تعمدتم؟¹⁴الحمدلله انا ما عمدت حتى واحد منكم غير كريسبس و غايس, ¹⁵باه ما يقول حتى واحد اني عمدت الناس باسمي. ¹⁶و عمدت ثاني بيت استيفانوس. فوق هاذوا مانيش عارف الا عمدت واحد اخر,¹⁷على خاطر المسيح ما بعثنيش باه نعمد بالصح بعثني باه نبشر, مش بالحكمة تاع الهدرة باه ما يتعطلش الصليب تاع المسيح. المسيح هو الحكمة تاع الله و القوة تاعو¹⁸على خاطر كلمة الصليب جهل عند الهالكين, بالصح عندنا احنا المسلكين راهي قوة الله, ¹⁹على خاطر مكتوب: " نفني حكمة الحكماء, و نرفض فهامة الفاهمين".²⁰وين راه الحكيم؟ وين راه الكاتب؟ وين راه اللي يجادل في هذا الزمان؟ مش الله يجهل الحكمة تاع هذا العالم؟ ²¹على خاطرالعالم في حكمة الله ما عرفش الله بالحكمة, الله شاف بلي خير يخلص المؤمنين بالجهالة تاع التبشير.²²على خاطر ليهود يحوسوا على اية, و اليونانيين يطلبوا في الحكمة, ²³بالصح احنا رانا نبشروا بالمسيح مصلوب: عثرة لليهود, و جهالة لليونانيين!²⁴بالصح للمدعوين: يهود و يونانيين, راه بالمسيح قوة الله و حكمة الله. ²⁵على خاطر جهالة الله احكم من الناس! و ضعف الله راه اقوى من الناس!²⁶شوفوا للدعوة تاعكم يا خاوتي, ماكانش ياسر اللي راهم حكماء حساب الجسد, ماكانش ياسر الي راهم قويين, ما كانش ياسر الي راهم شرفاء, ²⁷بالصح الله خاير الجهال تاع هذي الدنيا باه يحشم الحكماء. و خاير الله الضعفاء تاع هاذي الدنيا باه يحشم القاويين.²⁸و الله خايرالضعفاء تاع هاذي الدنيا و المحقورين و اللي غير موجود باه يبطل الموجود, ²⁹باه ما يفخر حتى واحد قدامو.³⁰و منو انتم بالمسيح يسوع, الي ولى لنا حكمة من عند الله وبر و قداسة و فداء. ³¹حتى كيما راه مكتوب: " اللي يحب يفخريفخربالرب".

Chapter 2

¹و انا كي جيتكم يا خاوتي , جيت بالصح مش بالكلام المزوق ولفهامة باه ننادي بيناتكم بالشهادة تاع الله, ²على خاطر كنت عازم باه ما نعرف بيناتكم غير يسوع المسيح و زيد نعرفو مصلوب.³و انا كنت عندكم بالضعف و بالخوف و رعدة كبيرة. ⁴و كلامي وتبشيري ما كانوش بكلام لفهامة تاع الناس بالصح بالقوة تاع الله. ⁵باه ما يكونش ايمانكم مبني على الحكمة تاع الناس بالصح بالقوة تاع الله. الحكمة اللي من الروح القدس⁶بالصح رانا نتكلموا بالحكمة بين الفاهمين, بالصح ماهيش الحكمة تاع هذا الزمان, و لا هي من عند المتعظمين تاع هاذا الزمان اللي بلا فايدة. ⁷بالصح رانا نتكلموا بالحكمة تاع الله في سر: الحكمة المخبية, اللي وجدها الله من قبل الدهور على جال مجد نا احنا.⁸اللي واحد من عظماء هذا الزمان ما علم بيها, على خاطر لو كان جاو عارفين ما كانوش يصلبو رب المجد. ⁹بالصح كيما راه مكتوب: " الشيء اللي عمرو ما تسمع و اللي عمرو ما جا على بال بشر: الشيء اللي وجدوالله للناس اللي يحبوه".¹⁰و بينو لينا احنا بالروح تاعو. على خاطر الروح يميز كل شيء حتى اعماق الله. ¹¹على خاطر شكون من الناس يعرف امور الانسان غير الروح تاع الانسان اللي فيه؟ هكذاك امور الله مايعرفها حتى واحد غيرالروح تاع الله.¹²و احنا ما ديناش روح هذا العالم, بالصح ادينا الروح اللي من عند الله. باه نعرفوا لحوايج اللي تمدت لنا من عند الله, ¹³اللي نتكلم بيها ثاني, مش بهدرة تعلمها الحكمة تاع الناس, بالصح بالشيء اللي يعلمو الروح القدس, قارنين الحوايج تاع الروح بالحوايج الروحية.¹⁴بالصح الانسان الطبيعي ما يقبلش الحاجات التي جاية من عند الروح تاع الله على خاطر يشوفها جهل, و ما يقدرش يعرفها على خاطر الشيء اللي يحكم فيها شيء روحي. ¹⁵بالصح الروحي يحكم في كل شيء, بالصح هو واحد ما يحكم عليه. ¹⁶" على خاطر شكون اللي يعرف فكر الله باه يعلمو للناس؟". بالصح بالنسبة لينا احنا عندنا فكر المسيح .

Chapter 3

¹و انا يا خاوتي ما قدرتش نكلمكم كيما ناس روحيين, بالصح نهدر معاكم كيما ناس جسديين كي اللي راكم اولاد صغار في المسيح, ²شربتكم لحليب مش الماكلة, على خاطر مازلتوا ما تقدروش, و مازالكم حتى لضرك ما تقدروش,³و مازال راكم جسديين.على خاطر فيكم الحسد و العراك و التحزب, و الا ماراكمش جسديين وتمشيو حساب الناس؟ ⁴على خاطروقت اللي واحد يقول : "انا مع بولس" و واحد اخر يقول : "انا مع ابولوس" ماتكونوش جسديين هكذا؟ ⁵شكون هو بولس؟ و شكون هو ابولوس؟ هما برك خدام امنتوا على يديهم, و كيما مد ربي لكل واحد فيهم:⁶انا غرست و ابولوس سقى, بالصح الله هو اللي ينبت, ⁷لا اللي يغرس راه حاجة ولا اللي يسقي, بالصح الله اللي ينبت.⁸كي الغارس كي الساقي, بالصح كل واحد يدي اجرو على حساب التعب تاعو. ⁹احنا رانا خدامين مع الله وانتم راكم الفلاحة تاع الله, البنية تاع الله.¹⁰حساب النعمة تاع الله اللي مد هالي كيما بناي عندو لفهامة انا حطيت الساس, و واحد اخر يبني عليه. بالصح يتوله كل واحد كيفاه يبني عليه. ¹¹ما يقدرش واحد يحط ساس اخر غير هاذاك اللي تحط, يسوع المسيح.¹²بالصح اذا كان واحد يبني على هذا الساس: ذهب, فضة, جوهر, لوح, حشيش, قش, ¹³كل واحد الخدمة تاعو راح تبان في يوم الحق. على خاطر بالنار راح يظهر, و النار هي اللي تخبرنا واش هي الخدمة تاع كل واحد.¹⁴و اذا واحد بقات الخدمة تاعو اللي بناها راح يدي عليها الاجر. ¹⁵و اذا تحرقت الخدمة تاع كاش واحد راح يخسر اما هو يمنع, بالصح كي اللي بالنار.¹⁶ما علابالكمش بلي انتوما الهيكل تاع الله, و باللي الله يسكن فيكم؟ ¹⁷و الا كان واحد يفسد الهيكل تاع الله الله يفسدو, على خاطر الهيكل تاع الله مقدس اللي هو انتوما.¹⁸واحد ما يخدع روحو. اذا كان واحد بيناتكم حاسب روحو فاهم في هذا الزمان, خير يكون جاهل باه يولي فاهم! ¹⁹على خاطر الحكمة تاع هذا الدنيا راهي جهل عند الله, على خاطر مكتوب:" اللي يدي الفاهمين بحيلتهم". ²⁰و ثاني:" ربي عارف تخمام الحكماء بلي راه باطل".²¹مالا حتى واحد من الناس ما يفخر! الحوايج الكل راهي ليكم: ²²بولس, و الا ابولوس, و الا صفا, و الا الدنيا, و الا الحياة, و الاالموت, و الا الحاجات الحاضرة, و الا الجاية. كل شيء راهو ليكم. ²³و اما انتوما راكم للمسيح, و المسيح لله.

Chapter 4

¹هكذا الانسان يحسبنا كيما الخدامين تاع المسيح, و المتوكلين على اسرار الله, ²و المطلوب من المتوكلين يكونوا امناء.³و اما انا اقل حاجة عندي كي يتحكم عليا من جيهتكم, و الا من جيهة اي بشر, و حتى انا ما نحكمش على روحي. ⁴على خاطرانا في ذاتي ما نحس بحتى شيء. مارانيش نتبرربهذا. بالصح اللي يحكم عليا هو الرب.⁵ما تحكموا على حتى حاجة قبل الوقت, حتى يجي الرب اللي ينور اعماق الظلام و يبين واش في القلوب. وقتها يكون الشكر لكل واحد من عند الله.⁶و هذا يا خاوتي جبتوا تشبيه على روحي وعلى ابولوس على جالكم, باه تتعلموا فينا احنا:" باه ما تحوسوش تفكروا فوق الشيء المكتوب", باه واحد ما ينفخ روحو على الاخر. ⁷على خاطر واش يميزك انت؟ واش الحاجة اللي عندك و ما تمدلكش؟ و اذا كنت اديت, علاش مالا تفخر كي اللي ما ديتش؟⁸راكم شبعتوا! تغنيتوا! ملكتوا بلا بينا! و يا ريتكم ملكتوا باه نملكوا حتى احنا معاكم! ⁹و راني نشوف بلي الله خلانا احنا الرسل لخرين, تقول محكوم علينا بالموت. على خاطر ولينا فرجة في العالم, عند الملايكة و عند الناس.¹⁰احنا جاهلين على جال المسيح, اما انتوما راكم حكماء في المسيح! احنا الضعاف, اما انتوما قاويين ! انتوما مكرمين, اما احنا رانا بلا كرامة! ¹¹حتى الساعة هاذي نعطشوا و نجوعوا ونتعراو و نتضربوا وما عندناش وين نسكنوا,¹²و نتعبوا خدامين بذراعاتنا. كي يسبونا نباركوا. و كي يقهرونا نستحملوا . ¹³و كي يكذبوا علينا نوضحوا, ولينا كي الخماج تاع الدنيا والوسخ تاع كل شيء حتى لضرك.¹⁴ما كتبتش هذا باه نحشمكم, بالصح كيما اولادي لعزاز عليا نوصيكم. ¹⁵على خاطر حتى لو كان عندكم الاف المرشدين في المسيح, بالصح ما عندكمش اباء ياسر. على خاطر انا ولدتكم في المسيح يسوع بالانجيل. ¹⁶و نطلب منكم تكونوا متشبهين بيا.¹⁷على هاذيك بعثت لكم تيموتاوس, اللي راهو وليدي لحبيب و الامين في الرب, الي يفكركم بالطرق تاعي في المسيح كيما راني نعلم في كل مكان, و في كل كنيسية. ¹⁸و ناس منكم نفخوا ارواحهم حسبوا بلي مانيش راح نجيهم.¹⁹بالصح انا قريب نجيكم ان شاء الله. و نشوف القوة تاع الناس الي نفخوا ارواحهم موش لكلام تاعهم. ²⁰على خاطر ملكوت الله ماهوش بالهدرة, راه بالقوة. ²¹واش حابين؟ نجيكم بالعصا والا بالمحبة والعقالة؟.

Chapter 5

¹راه شاع لخبر بلي بيناتكم كاين زنى. و زنى كيما هذا ماكانش منو حتى في وسط الامم, بلي راجل منكم يعاشر في مرت باباه. ²و هكذاك راكم تنفخوا في رواحكم و تتكبروا, كان خير ليكم تنوحوا حتى يتنحى من وسطكم اللي عمل هذا الشيء؟³و انا كان كنت غايب عليكم, بالصح راني حاضر معاكم بالروح, و كي اللي راني حاضر حكمت على اللي عمل هذا الشيء, هكذا: ⁴باسم ربنا يسوع المسيح -كي تتلموا انتم مع بعضاكم و روحي معاكم مع القوة تاع ربنا يسوع المسيح - ⁵يتسلم هذا الشخص للشيطان باه يهلك جسمو, بالصح الروح تاعو تخلص في النهار تاع يسوع.⁶الفخرة تاعكم ماهيش مليحة. علاه ما علابالكمش بلي "خميرة صغيرة تخمر العجينة كاملة؟ " ⁷امالا نقيو من ارواحكم لخميرة لقديمة, باه تكونوا عجينة جديدة كيما راكم انتوما فطير. على خاطر الفصح تاعنا المسيح حتى هو تذبح على جالنا. ⁸خلينا نعيدوا امالا ماشي بخميرة قديمة, و لا بخميرة الشر و لخبث, بالصح بفطير الامانة و الحق.⁹كتبت لكم في لبرية لولى باه ما تخالطوش الزانيين. ¹⁰و مانيش خلاص نحكي على الزانيين تاع هاذا العالم, و الا الطماعين, والا السراقين, و الا اللي راهم يعبدوا في الاوثان, لو كان هكذا لازمكم مالا تخرجوا من العالم!¹¹بالصح انا هذا واش كتبت لكم: اذا كان واحد مسمي اخ و هو زاني و الا طماع و الا عابد اوثان و الا شتام و الا يشرب والا سراق, هاذوا باه ما تخالطوهمش و حتى الماكلة ما تاكلوش معاهم. ¹²على خاطر واش يهمني حتى نحاسب الناس اللي برى؟ ياخي انتوما تحاسبوا الناس اللي من الداخل؟ ¹³اما اللي من بري الله هواللي يحاسبهم."امالا اعزلوا الخبيث من بيناتكم ".

Chapter 6

¹كيفاه يقدر الواحد منكم اللي عندو دعوة على خوه يروح يشارع عند الظالمين, و مش عند القدبسين؟ ²ما علابالكمش بلي القديسين هما اللي راح يحكموا على العالم؟ اذا كان العالم راح يتحكم عليه بيكم, كيفاه ما تكونوش قادرين على الشروعات الصغيرة؟ ³ما علابالكمش بلي احنا راح نحكموا حتى على الملايكات؟ نبداو قبل بأمور هاذي الدنيا!⁴اذا كان عندكم شروعات في هاذي الدنيا, قعدوا آخرالناس في الكنيسية باه يكونوا هما الجواج! ⁵و باه نزيد نحشمكم نقول. كيفاه هكا ماكانش بيناتكم حتى واحد حكيم, حتى واحد يقدر يقضي بين خاوتوا؟ ⁶بالصح راه الخو يشارع خوه, و زيد عند الغير مومنين!⁷راه عيب كبير, على خاطر عندكم شروعات بيناتكم. علاش مالا ما تزيدوش تظلموا و خلاص؟ علاه ما تزيدوش تسرقوا؟ ⁸بالصح انتوما تظلوا و تسرقوا في خاوتكم!⁹علاه ما علابالكمش بلي الظالمين ما يورثوش الملكوت تاع الله؟ ما تغلطوش. لا اللي زانيين و لا اللي يغبدوا في لوثان و لا اللي فاسقين ولا الي مأبونين ولا اللي شواذ, ¹⁰و لا السراقين ولا الطماعين و لا اللي يسكروا و لا اللي يسبوا و لا اللي يخطفوا يورثوا ملكوت الله. ¹¹و كاين ناس منكم كانوا هكذا. بالصح تغسلتوا, و زيد تقدستوا, و اكثر من هاذا تبررتوا بإسم الرب يسوع و بالروح تاع إلاهنا. مجدوا ربي في ابدانكم و في أرواحكم¹²"الحوايج كاملة حلال عليا", بالصح مش كل الحوايج تليق بيا. "الحوايج كاملة حلال عليا", بالصح حتى حاجة ما تتسلط عليا. ¹³الطعام للكرش و الكرش للطعام, و الله راح يفني هاذا و هاذاك. البدن ماهوش للزنا بالصح لله. و الله للبدن.¹⁴والله قوّم الرب من الموت, و راح يقيمنا احنا ثاني بالقوة تاعو. ¹⁵ما علابالكمش بلي اجسادكم هي لعضاء تاع المسيح؟ كيفاه ندي انا اعضاء المسيح و نجعلها اعضاء زانية؟ حاشا!¹⁶كيفاه ما تعرفوش بلي اللي يلصق بواحدة زانية بولي جسد واحد هو و ياها؟ على خاطر يقول:" يكونوا لثنين جسد واحد". ¹⁷و اما من لصق بربي يولي هو و ياه روح واحد.¹⁸اهربوا من الزنا. كل معصية يديرها الانسان هي بعيدة على البدن. بالصح اللي يزني يغلط في حق بدنو.¹⁹و الا ما علابالكمش بلي البدن تاعكم هو هيكل للروح القدس اللي راه فيكم, و اللي تمد لكم من عند الله و بلي راكم ما كمش ملك ارواحكم؟ ²⁰على خاطرتشريتوا بثمن. مالا مجدوا الله في اجسامكم و في ارواحكم اللي هي لله.

Chapter 7

¹واما من جيهة الامور اللي كتبت لكم عليها: يكون مليح للراجل كي ما يمس حتى مرى. ²بالصح على جال سبة الزنا, مليح كل واحد تكون عندو المرى تاعو, و كل واحدة يكون عندها راجلها.³على الراجل يمد لمرتو حقها اللازم, ⁴وحتى لمرى ثاني تمد حق راجلها. لمرى ما عندهاش حق على جسمها بالصح راجلها هو اللي عندو الحق هاذا و حتى الراجل ما عندوش هو ثاني حق على جسمو بالصح مرتو هي اللي عندها الحق هاذا.⁵واحد ما يتعدى على الحق تاع لاخر, غير كي تكونوا متفقين, لمدة باه تفرغوا ارواحكم للصوم و الصلاة, و بعدها ترجعوا لعلاقتكم كيما موالفين باه ما يجربكمش الشيطان في النزاهة تاعكم. ⁶بالصح هاذا الشيء انا نقولوا برك كيما نصيحة ما هوش امر. ⁷انا ما دابيا الناس الكل كيما انا. بالصح كل واحد و الموهبة اللي مدهالو الله. كل واحد كيفاه.⁸بالصح نقول للناس اللي ما همش متزوجين و للناس الارامل, مليح لوكان يبقاو كيما انا. ⁹بالصح الا ما قدروش يتحكموا في ارواحهم, يتزوجوا خير. على خاطر الواحد يتزوج خير من يبقى محروق.¹⁰بالصح الناس المتزوجين, نوصيهم, موش من عندي لكن من عند ربي, ما تفارقش لمرى راجلها, ¹¹و الا كان فارقاتو, تبقى بلا زواج, و الا تتصالح مع راجلها. و الراجل ما يخليش المرى تاعو.¹²اما الي بقاو, انا نقول لكم, ماشي الرب: اذا كان واحد اخ مؤمن و عندو مرتو ماهيش مآمنة, بالصح راضية تبقى معاه, ما يسمحش فيها. ¹³و لمرى اللي راجلها ماهوش مآمن, بالصح هو راضي يبقى معاها, ما تسمحش فيه. ¹⁴على خاطر الراجل اللي ماهوش مآمن يتقدس في مرتو المومنة, و لمرى اللي ماهيش مآمنة, تتقدس في راجلها المومن. و لو كان ما يكونش هكذا يوليو لولاد منجسين, بالصح ضرك راهم مقدسين.¹⁵بالصح اللي ما هوش مومن منهم و حاب يفارق, يفارق. الاخ و الاخت ما همش ملزمين في احوال كيما هاذي, وبالصح الله هو اللي نادى علينا في السلام. ¹⁶على خاطر كيفاه تعرفي اختي لمرى بلي انتي تكوني سبة باه يتخلص راجلك؟ و لا كيفاه تعلم خويا الراجل بلي انت تكون سبة باه تتخلص مرتك؟¹⁷بالصح كل واحد, يمشي على حساب واش كتبلو ربي كيما ناداه. و هكا انا نوصي كل الكنائس. ¹⁸اذا كان واحد ناداه ربي و هو مختن. ما يرجعش اغلف. و اذا كان واحد ناداه ربي وهو اغلف, ما يتختنش. ¹⁹على خاطرما هيش حاجة مهمة لا الطهارة و لا غيرها, بالصح كي نحفظوا لوصية تاع الله.²⁰كل واحد يثبت على الدعوة اللي دعاه الله عليها. ²¹اذا ناداك ربي و انت عبد ما يهمكش. بالصح اذا كان قدرت تولي حر خيرلك تديرها. ²²على خاطر اللي ناداه ربي وهو عبد. يولي متحرر من عند ربي. و ثاني حتى الحر اللي ناداه ربي وهو عبد المسيح, راح حر بالرب. ²³راكم تشريتوا بثمن, ما توليوش عبيد عند الناس. ²⁴و كل واحد كيما ناداه الله يا خاوتي يثبت كيما راه مع الله, اللي ماهمش متزوجين و الارامل²⁵بالصح للصبايا, ماعندي حتى حاجة من عند الرب نقولها فيهم, بالصح نمد رايي على خاطر ربي رحمني و جعلني امين. ²⁶انا نظن على حساب الضروف اللي نعيشوها ضرك, خير لو كان الواحد يكون هكذا:²⁷اذا راك متزوج! ما تطلبش الانفصال. و اذا راك منفصل بلا مرى! ما تحوسش على مرى. ²⁸بالصح الا كان تتزوج ما تكونش غالط. و الا كان تتزوج الصبية ثاني ما هيش غالطة. بالصح هكذا يكون لهم ضيق في اجسامهم. وبالصح انا نحن عليهم برك.²⁹يا خاوتي هذا واش نقول لكم: راه الوقت يٌقرب, على هذا الناس اللي عندهم نساء يتصرفوا كي اللي ما عندهمش, ³⁰و اللي يبكيو كي اللي راهم ما يبكيوش, و اللي يفرحوا كي اللي راهم ما يفرحوش, و اللي يشريو كي اللي راهم ما يملكوش, ³¹و اللي عندهم في هاذي الدنيا كي اللي ماعندهمش. على خاطر هاذي الدنيا فانية.³²و ما دابيا ما تكونوش مقلقين, اللي ماهوش متزوج يخمم في لحوايج تاع ربي و كيفاه يرضي ربي, ³³بالصح المتزوج يخمم في هموم الدنيا و كيفاه يرضي مرتو. ³⁴و المرى المتزوجة ما هيش كي الصبية: اللي ما هيش مزوجة تخمم في لحوايج تاع ربي و كيفاه تكون مقدسة روح و جسد. و المتزوجة تخمم في الدنيا و كيفاه ترضي راجلها.³⁵هذا نقولو على جال الفايدة تاعكم, مش باه ندير لكم فخة, بالصح باه توصلوا للشيء اللي يليق بيكم و تخليو اهتمامكم كامل بربي وبلا تشويش.³⁶بالصح اذا كان الواحد شايف بلي راه يغلط في حق روحو اذا كان فاتو الوقت, و شاف بلي لازم, خير يعمل واش حاب, على خاطر ما يغلطش كان تزوج. ³⁷بالصح اللي معول في قلبو, وماهوش مضطر, و يقدر يتحكم في روحو, و عول على هذا في قلبو باه يبقى بلا زواج, يعمل مليح. ³⁸أمالا, اللي يتزوج يعمل مليح, و اللي يبقى بلا زواج خير و خير.³⁹لمرى مرتبطة بالشرع ما دام راجلها حي. بالصح اذا كان مات راجلها, هي حرة باه تتزوج بلي تحب, بالصح برك في الرب. ⁴⁰بالصح تكون مرتاحة لو بقات كيما راهي, حساب رايي. و نضن بلي حتى انا عندي الروح تاع الله.

Chapter 8

¹الماكلة اللي يقدموها ذبيحة للاوثان و من جيهة الشيء اللي يتذبح للاوثان: معلوم باللي كلنا عندنا لفهامة. الفهامة تنفخ, بالصح لمحبة تبني. ²اذا كان واحد حاسب روحو باللي عارف حاجة او مازال ما عارف والو كيما لازم. ³بالضح اذا كان واحد يحب الله, هاذا او معروف عندو.⁴من جيهة الماكلة تاع لحوايج اللي تذبحت للاوثان: احنا نعلموا باللي ما كاين حتى وثن في هاذا العالم, و باللي ما كاين حتى اله واحد اخر غير واحد. ⁵على خاطر كان وجدت اللي تتسمى آلهة, كان في السماء و الا فوق لرض, كيما كاين آلهة ياسر و ارباب ياسر. ⁶بالصح لينا احنا الله واحد: الاب اللي منو كل شيء, و احنا ليه. و رب واحد يسوع المسيح اللي بيه جميع الاشياء, و احنا بيه.⁷بالصح مش العلم عند الناس الكل. كاين ناس عتندهم ضمير من جيهة الوثن و همَا ياكلوا كيما اللي تذبح للوثن, و على خاطر ضميرهم ضعيف يتنجس.⁸على خاطر الماكلة ما توثلناش لله, كان كلينا ما عندنا ما نزيدوا و كان ما كليناش ما عندنا ما ننقصوا. ⁹بالصح اتولهوا باه ما تكونش الحرية تاعكم هاذي فخة للناس الضعاف. ¹⁰على خاطر لو كان واحد ما يعرفش و يشوفك قاعد تاكل في ماكلة تاع الاوثان, يتشجع و هو ضعيف و ياكل من الشيء تاع الاوثان؟¹¹يولي خوك الضعيف اللي مات المسيح على جالو يتهلك بسبتك انت. ¹²و هكا تغلطوا في حق خاوتكم و تجرحوا شميرهم الضعيف, و تغلطوا في حق المسيح. ¹³على هاذا اذا كانت الماكلة تطيح خويا ما ناكلش اللحم خلاص, باه ما نعثرش خويا.

Chapter 9

¹علاه مانيش انا رسول؟ مانيش حر أنا؟ علاه أنا ماشفتش يسوع المسيح ربنا؟ وانتم مش الخدمة تاعي في الرب؟ ²اذا كنت مانيش رسول للاخرين, أنا ليكم انتم رسول! على خاطر انتوما هما الختم تاع رسالتي في الرب.³هذا هو دفاعي عند اللي حاطين عليا بالعين: ⁴بلاك تحسبوا بلي احنا ما عندناش الحق ناكلوا و نشربوا؟ ⁵بلاك حاسبين ما عندناش الحق نجولوا باخت تكون زوجة لينا كيما الرسل لخرين و خاوة الرب و بطرس؟ وإلا ⁶غير أنا و برنابا ما عندناش الحق باه ما نخدموش؟⁷شكون اللي يتجند في حاجة و يكون مصروفو على حسابو هو؟ شكون اللي يغرس كرمة ومن فاكيتها ما ياكلش؟ شكون اللي يرعى رعية و من حليبها ما يشربش؟ ⁸بلاك راني هنا نتكلم كيما انسان؟ و علاه ماشي حتى الشرع يقول هكا؟⁹راه مكتوب في الشرع تاع موسى:" ما تحطش كمامة على فم الثوروهو يدرس". بلاك الله تهمو الثيران؟ ¹⁰ولا ما قالش هذا على جالنا؟ راه مكتوب على جالنا احنا. اللي يحرث يحرث وهو يامل, و اللي يدرس يامل باه يكون شريك في الرجاء. ¹¹اذا كنا أحنا زرعنا لكم حوايج روحية, يكون ياسر علينا نحصدوا منكم حوايج مادية؟¹²حتى لو كان كاين وحايد اخرين عندهم حق عليكم, مش أحنا اولى؟ بالصح أحنا ما استعملناش هذا الحق, و استحملنا كل شيء باه ما نكونوش عثرة لإنجيل المسيح. ¹³علاه ما علابالكمش بلي اللي يخدموا في الحوايج المقدسة, ياكلوا من الهيكل؟ و اللي يلازموا المذبح يشاركوا في الذبايح؟ ¹⁴و حتى هكذا ثاني جاء أمر ربي: اللي يخبروا بالإنجيل. من الإنجيل يعيشوا.¹⁵بالصح انا ما استعملت حتى حق من هذا. و لا كتبت هذا باه يولي عندي حق. على خاطر نخير نموت و ما يحكي حتى واحد عليا بحاجة موش مليحة. ¹⁶و إذا كنت نبشر موش باه نَّعت روحي, بالصح على خاطرها حاجة لازمة عليا نديرها, و يا ويلي لو كان ما نبشرش.¹⁷ؤ إذا كنت ندير هذا بجونتي عندي أجر, بالصح إلا بالسيف عليا يولي كاين شكون وكلني على أمانة. ¹⁸إمالا واش هو الأجر تاعي؟ حتى و أنا نبشر جعلت إنجيل المسيح بلا نفقة, و حتى ما استعملتش حقي في الإنجيل.¹⁹و أنا على خاطر حر نفسي من الناس الكل, جعلت نفسي عبد للناس الكل باه نربح ناس ياسر. ²⁰وليت لليهود يهودي باه نربح ليهود. و للناس اللي تحت حكم الشريعة كي اللي راني كيفهم تحت الشريعة باه نربحهم.²¹و للناس اللي بلا شريعة كي اللي راني بلا شريعة -رغم اللي أنا مانيش بلا شرع الله, بالصح راني تحت شريعة المسيح - باه نربح اللي ماعندهمش شريعة. ²²وليت ضعيف للضعاف باه نربحهم, وليت لكل الناس كلشيء, باه كاش ما جماعة تتخلص. ²³و هذا الشيء أنا نديروا على خاطر الإنجيل, باه نكون شريك فيه.²⁴ياخي على بالكم بلي اللي يشاركوا في السباق كلهم يجريو, بالصح غير واحد برك اللي يفوز؟ هكا انتم ثاني اجريو باه تنالوا. ²⁵و كل واحد يجاهد تلقاه يسيطر على روحو في كل شيء. بالصح هاذوك تاع السباق يديو تاج يفنى, بالصح التاج تاعنا احنا ما يفناش, ²⁶امالا انا نجري هكا كي اللي عندي ضمان. و هكا نتضارب كي اللي ما نضربش في الهواء. ²⁷و نقمح جسمي و نذلو, باه مانوليش انا مرفوض بعد ما بشرت للخرين.

Chapter 10

¹ما دابيا يا خاوتي ما يخفاش عليكم بلي جدودنا الكل كانوا تحت السحابة, و بلي كلهم عداو في لبحر, ²و كلهم تعمدوا على يد موسى في السحابة وفي لبحر, ³و جميعهم كلاو ماكلة روحية واحدة, ⁴و جميعهم شربوا شربوا شراب روحي واحد, على خاطر كانوا يشربوا من حجرة روحية كانت تَّبع فيهم, وهاذي الحجرة كانت هي المسيح.⁵بالصح الاغلبية منهم ما رضاش الله عليهم, على خاطر طرحهم في الصحراء. ⁶و هاذي الامور كلها صرات باه تكون مثَل لينا احنا, باه مانكونوش احنا عندنا شهوة للشرور كيما كانت عند هم هما.⁷ماتكونوش من اللي يعبدوا الاوثان كيما كانوا وحايد منهم, كيما راه مكتوب :"قعد الشعب للماكلة والشراب, ومن بعد وقفوا للزهو". ⁸و ما تزنيش كيما زناو ناس منهم, حتى فنى في نهار واحد ثلاثة وعشرين ألف منهم.⁹و ما نجربوش المسيح كيما جربوه ناس منهم, حتى هلكتهم الحنوشة. ¹⁰و ما تتدمروش عليه كيما داروا وحايد منهم, حتى اداهم الهلاك.¹¹وهاذي الامورالكل اللي صابتهم هي دروس لينا, و تكتبت باه تحذرنا أحنا اللي وصلت لينا آخرة الزمان. ¹²مالا اللي حاسب روحو ثابت, يحرز لا يطيح. ¹³ما تصيبكم حتى محنة الا و كانت بشرية. بالصح الله امين, ما يخليكمش تتجربوا فوق جهدكم, على خاطر يجعل مع المحنة مخرج, باه تقدروا تستحملوا.¹⁴علاها يا لحباب اهربوا من العبادة تاع الاوثان. الزردة تاع لوثان و لعشاء تاع الرب ¹⁵اللي نقولو كيما للناس الفاهمين: احكموا انتوما في واش نقول: ¹⁶الكاس تاع البراكة اللي نباركوها, ماهيش هي الشركة تاع دم المسيح؟ و الخبز اللي نقسموه, ماهوش هو البدن تاع المسيح؟ ¹⁷و احنا اللي رانا ياسر خبز واحد, بدن واحد. على خاطر كلنا نتشاركوا في الخبز الواحد.¹⁸شوفوا لاسرائيل على حساب الجسد. اللي ياكلوا الذبايح ماهمش شركاء تاع المذبح؟ ¹⁹واش نقول مالا؟ الصنم عندو قيمة, و الا الشيء اللي تذبح للصنم عندو قيمة؟!²⁰و زيد الشيء اللي يذبحوه الامم راهم يذبحوه للشواطن, مش لربي. و انا ما نحبش تكونوا شركاء تاع الشواطن. ²¹ما تقدروش تشربوا كاس ربي و كاس الشواطن. و ما تقدروش تشاركوا في مايدة ربي و مايدة الشواطن. ²²و الا نحبوا نغيروا ربي؟ بلاك رانا اقوى منو؟ الحرية تاع المومن²³"كل شيء حلال عليا", بالصح ماشي كل لحوايج تصلح." كل شيء حلال عليا", بالصح ماش كل لحوايج تبني. ²⁴ما يحوسش الواحد غير على روحو برك, بالصح خلي كل واحد يشوف واش يساعد لخرين.²⁵كل ما يتباع عند الجزار كلوه بلا ما تحوسوا تفهموا, على جال الضمير ²⁶على خاطر"ربي ليه لرض و ما فيها". ²⁷و اذا كان واحد من غير المومنين استدعاكم, و حبيتوا تروحوا, كول من الشيء اللي يحطلك بلا ما تحوس تفهم, على جال الضمير.²⁸بالصح اذا كان قاللكم واحد: "هاذا مذبوح للوثن" ما تاكلوش على جال هاذاك اللي خبركم, وعلى جال الضمير. على خاطر" ربي ليه لرض و ما فيها". ²⁹و كي نقول" الضمير"ما نحكيش على ضميرك انت, بالصح الضمير تاع لاخر. على خاطر و علاش يحكم فيا ضمير تاع واحد اخ؟ ³⁰اذا كنت انا ناكل و نشكر, علاش واحد اخر يحاسبني على الشيء اللي نشكر عليه؟³¹و اذاكنتوا تاكلوا و الا تشربوا و مهما واش كنتوا تعملوا, اعملوا كل شيء للمجد تاع الله. ³²كونوا بلا غلطة لليهود و لليونانيين و للكنيسية تاع ربي. ³³كيما انا راني نرضي في الناس الكل في كل شيء, و ما نشوفش واش يساعدني انا بالصح واش يساعد لخرين, باه يتخلصوا حتى هما.

Chapter 11

¹اتمثلوا بيا كيما راني أنا متمثل بالمسيح. العبادة كيما تليق ²يا خاوتي انا راني نشكر فيكم على خاطر ديما تتفكروني في كل شيء, و تعملوا بالتعليم اللي سلمتهولكم. ³بالصح ما دابيا تعرفوا بلي الراس تاع كل راجل هو المسيح, و الراس تاع لمرى هو الراجل, و راس المسيح هو الله. ⁴لو كان الراجل يصلي و الا يتنبأ و هو مغطي راسو, يطيح بروحو.⁵و اما كل مرى تصلي ؤ الا تتنبأ و راسها عريان, تتطيح بروحها, على خاطركيما هي كيما اللي محفة شعرها خلاص. ⁶و المرى اذا كانت ما تغطيش راسها مالا تقص شعرها, و على خاطر عيب على المرى تقص شعرها و الا تحفوا خلاص, مالا تغطيه.⁷و الراجل مالازمش يغطي راسو على خاطرو يمثل الصورة تاع الله و المجد تاعو. بالصح لمرى هي المجد تاع الراجل. ⁸على خاطر الراجل ما تخلقش من لمرى بالصح لمرى هي اللي تخلقت من الراجل.⁹و على خاطر الراجل ما تخلقش على جال لمرى, بالصح لمرى هي اللي تخلقت على جال الراجل. ¹⁰على هذا لازم على لمرى تحط حاجة على راسها, على جال لملايكات.¹¹بالصح الراجل ماهوش اقل من لمرى, و لا لمرى اقل من الراجل في الرب. ¹²على خاطر كيما راهي لمرى من الراجل, و ثاني الراجل هو بالمرى. بالصح لحوايج الكل هي من عند ربي.¹³احكوا انتوما وحَّدكم: يليق بالمرى تصلي لله وهي راسها مكشوف؟ ¹⁴شوفوا هاي الطبيعة وحدها تعلمكم بلي عيب على الراجل كي يطول شعرو و الا لا؟ ¹⁵بالصح لمرى الا كانت تطول شعرها يولي فخرة ليها, على خاطر الشعر تمد في عوض غطاء. ¹⁶بالصح كان واحد يحب يتخاصم, احنا ماناش موالفين على هذا الشيء, و لا حتى الكنيسية تاع الله. لعشاء تاع الرب¹⁷و بالصح انا كي نوصيكم على هاذا, ما نيش نشكر فيكم, على خاطر كي تتلموا مش باه تديروا حاجة مليحة بالصح بالعكس. ¹⁸على خاطر اول حاجة كي تتلموا في الكنيسية, نسمع بلي بيناتكم انقسامات, و نصدق شوية, ¹⁹على خاطر لابد يكون بيناتكم حتى البدع ثاني, باه يكونوا المخيرين فيكم باينين.²⁰و كي تتلقاو مع بعضاكم مش باه تاكلوا لعشاء تاع الرب, ²¹على خاطر كل واحد يسبق و يدي عشاه من الماكلة, الواحد يجوع و لاخر يسكر. و ²²علاه ماعندكمش ديار تاكلوا و تشربوا فيها؟ و الا تحقروا الكنيسية تاع الله و تحشموا الناس اللي ما عندهمش؟ واش نقول لكم؟ تحبوا نشكركم على هاذا الشيء؟ لا ما نشكركمش!²³على خاطر الشيء اللي تسلمتو من عند ربي نسلمهولكم ثاني: بلي الرب يسوع في الليلة اللي سلموه فيها. هز خبز ²⁴و صلى و قسم, و قال: "هاكم كولوا هاذا هو الجسد تاعي المكسور على جالكم. اعملوا هاذا باه تتفكروني".²⁵و ثاني حتى الكاس بعد ما تعشاو, و قال: " الكاس هاذي هي العاهد الجديد بالدم تاعي. اعملوا هاذا كلما شربتوا باه تتفكروني". ²⁶على خاطر كل ما كليتوا هاذا الخبز و شربتوا هاذا الكاس, تخبروا بالموت تاع الرب حتان يجي.²⁷امالا كل من كلا من هذا الخبز, و الا شرب من الكاس تاع الرب, بلا ما يستاهل, يكون مذنب في حق جسد الرب و الدم تاعو. ²⁸بالصح على كل واحد يفحص روحو, و من بعد يقدر ياكل من الخبز و يشرب من الكاس. ²⁹على اللي ياكل و يشرب بلا ما يستاهل ياكل و يشرب دينونة على روحو, بلا ما يميز الجسد تاع الرب. ³⁰على جال هذا فيكم ياسر مرضي و ياسر راقدين.³¹على خاطر كان حكمنا احنا على ارواحنا واحد ما يحكم علينا, ³²و بالصح كي فات منو وتحكم علينا, نترباو من عند الرب باه ما نتحاسبوش مع الناس لخرين.³³امالا يا خاوتي, وقت اللي تتلموا باه تاكلوا, استناو بعضاكم. ³⁴واذا واحد يجوع ياكل في دارو, باه كي تتلموا ما تحكموش على بعضاكم. و الامور لخرى الي بقات كي نجي نفرزها.

Chapter 12

¹ومن جيهة المواهب الروحية يا خاوتي ما دابيا ما يخفاش عليكم. ²علابالكم بلي قبل كنتوا من الامم تمشيو وراء الاصنام الي ما تهدرش, كيما كنتوا تتبعوا. ³على هاذيك نخبركم بلي ما كانش واحد و هو يتكلم بالروح تاع الله يقول: " يسوع اناثيما". و ماكانش واحد يقدر يقول: " يسوع رب" غير بالروح القدس.⁴كاين انواع تاع المواهب, بالصح الروح واحد. ⁵و كاين انواع تاع خدمات, بالصح الرب واحد. ⁶و كاين انواع تاع اعمال, بالصح الله واحد, و هو اللي يعمل الكل في الكل.⁷و بالصح لكل واحد يمدلو كيفاه يظهر فيه الروح على جال المنفعة. ⁸يمد لواحد كلام تاع الحكمة بالروح, و يمد لواحد اخر كلام تاع العلم حساب الروح الواحد.⁹و لواحد اخر يمد الايمان بالروح الواحد, و لاخر مواهب تاع الشفاء بالروح الواحد, ¹⁰و لواحد اخر يمدلو يدير المعجزات. و اخر نبوءة, و واحد اخر يمدلو كيفاه يميز الارواح, و اخر انواع تاع لغات, و واحد يمدلو الترجمة تاع اللغات. ¹¹بالصح هاذي كلها يعملها الروح الواحد بذاتو, كيما يحب. جسم واحد و اعضاء ياسر¹²على خاطر كيما الجسم هو واحد بالصح عندو اعضاء ياسر, و الاعضاء تاع الجسم الواحد حتى لو كانت ياسر هي جسم واحد, هكذاك المسيح ثاني. ¹³على خاطر كلنا بروح واحد تعمدنا كلنا لجسم واحد, يهود و الا يونانيين, عبيد و الا احرار, كلنا شربنا روح واحد.¹⁴و حتى الجسم ثاني ماهوش عضو واحد بالصح هو اعضاء ياسر. ¹⁵و اذا كان الرجل قالت: "على خاطر مانيش يد, مالا انا مانيش من الجسد". مالا هكذا تقدر ما تكونش من الجسد؟ ¹⁶و اذا الوذن قالت: "على خاطر مانيش عين, ما نيش من الجسد" مالا هكذا تقدر ما تكونش من الجسد؟ ¹⁷لو كان جاء الجسم كامل عين, وينو السمع؟ و لو كان جاء الكل سمع, وينو الشم؟¹⁸بالصح الله حط الاعضاء في الجسم كل واحد منها كيما حب. ¹⁹بالصح لو كان تكون كلها عضو واحد, وينو الجسم؟ ²⁰على هذا كاين اعضاء ياسر بالصح الجسم واحد.²¹ما تقدرش العين تقول لليد: "انا ما نحتاجش ليك!". و الا الراس يقول للرجلين: "انا ما نحتاجكمش!". ²²و زيد الاعضاء تاع الجسم اللي تبان هي الضعيفة هي اللي ضرورية. ²³و الاعضاء تاع الجسم اللي نحسبوها ما عندها حتى قيمة هي اللي نمدولها قيمة اكبر. و الاعضاء اللي ما هيش مليحة فينا عندها جمال احسن. ²⁴و هاذيك اللي مليحة ما نحتاجوش ليها. بالصح الله خلط الجسم, و الناقص هو اللي اعطاه قيمة خير على الاخرين.²⁵باه ما يكونش انقسام في الجسم, بالصح كل الاعضاء يكون عندها اهتمام واحد مع بعضاها. ²⁶و اذا كان واحد يتألم كل الاعضاء تتألم معاه. و اذا كان عضو واحد يزيد شانو كل الاعضاء تفرح معاه. ²⁷بالصح انتوما راكم الجسد تاع المسيح و الاعضاء تاعو بالواحد.²⁸ربي حط ناس في الكنيسية: في لول, الرسل, ومن بعدهم لنبياء, و من بعدهم المعلمين, و من بعدها تاع المعجزات, و بعدهم تاع مواهب الشفاء, و خدام, و مدبرين, و انواع تاع لغات. ²⁹يا ترى كلهم رسل؟ يا ترى كلهم انبياء؟ يا ترى كلهم معلمين؟ يا ترى كلهم يعملوا المعجزات؟³⁰يا ترى كلهم عندهم المواهب تاع الشفاء؟ يا ترى كلهم يتكلموا بلغات؟ يا ترى كلهم يترجموا؟ ³¹بالصح مليح تجتهدوا في المواهب. و نزيد نوريلكم طريق ما خير.

Chapter 13

¹لو كان جيت نهدر بجميع لغات الناس و الملايكات و انا ما عنديش محبة, نولي كي النحاس يقربع وكي الصنج يرن. ²و لو كان جات عندي النبوة. و نعرف جميع لسرار و العلم بكلو, و لو كان جا عندي ليمان حتى نزعزع لجبال, بالصح ما عنديش محبة, ما نسوى والو. ³و لو كان صدقت مالي كامل, ورميت روحي في النار, و انا ما عنديش محبة, ما راح نربح والو.⁴لمحبة تصبر و تشفق. لمحبة لا تحسد. لمحبة لا تفخر لا تتكبر, ⁵لا تتقبح و لا تطلب مصلحتها. و لا تتعصب, ولا تقرى لحيلة, ⁶و للشر ما تفرح بالصح للحق تفرح, ⁷و تستحمل كلشيء, و تصدق كلشيء, و تتوقع كلشيء. و تصبر على كلشيء.⁸لمحبة عمرها ما تطيح. بالصح النبوات يجي نهار وتحبس, واللغات راح تزول, والعلم راح يفض. ⁹على خاطر رانا نعرفوا من العلم غيرالقليل و نتنبؤوا غير على القليل, ¹⁰بالصح كي يجي الكامل يبطل لقليل.¹¹كي كنت طفل صغير كنت نتكلم و نعمل ونفكر كيما طفل صغير. بالصح نهار اللي وليت راجل حبست لحوايج تاع طفل صغير, ¹²و ضرك رانا نشوفوا لحوايج كي اللي في مراية, ماهيش مفهومة, بالصح يجي نهار نشوفوها قدامنا. ضرك نعرف معرفة قليلة, بالصح في هاذاك الوقت نولي نعرف كيما لازم. ¹³و بالصح ضرك هاذم في ثلاثة يدوموا: ليمان و الرجاء ولمحبة, بالصح لمحبة هي الاعظم فيهم.

Chapter 14

¹تبعوا لمحبة, بالصح اجتهدوا للمواهب تاع الروح, و بالخصوص باه تتنبأوا. ²على خاطر اللي يتكلم بلغة مايتكلمش مع الناس راه يتكلم مع الله. على خاطر واحد ما يفهمها بالصح هو بالروح يتكلم بالاسرار تاع الله. ³و اللي يتنبأ , يكلم الناس باه يبنيهم بالتشجيع و التعزية. ⁴اللي يتكلم بلغة يبني روحو, واللي يتنبأ يبني الكنيسية.⁵انا ما ذابيا كلكم تتكلموا بلغات, بالصح يكون خير كي تتنبأوا. على خاطر اللي يتنبأ اعظم من اللي يتكلم بلغة, غير كان لقى شكون يترجم لو, باه الكنيسية تتبنى. ⁶و ضرك يا لخاوة, كان جيتكم و انا متكلم بلسانات غريبة, باه راح ننفعكم, لو كان ما نكلمكمش اما باعلان, و الا بكلام علم, و الا بنبوة, و الا بتعليم؟⁷الحاجات اللي ما عندهاش روح الي تمد اصوات: زمارة و الا قيتارة, بالصح بالرغم من هاذا تمد صوت مخالف. كيفاه تعرفوا صوت الزمارة و الا الحاجة اللي عزفوا بيها؟ ⁸و حتى البوق لو كان يمد صوت ماهوش باين, شكون يوجد روحو للحرب؟ ⁹حتى انتوما ثاني كيفاه تمدوا بالالسنة كلام يتفهم, و كيفاه الناس يعرفوا واش راكم تقولوا؟ و الا تروح هدرتكم في لهواء.¹⁰بلاك كاين انواع تاع لغات ياسر خلاص في الدنيا, و ما كان حتى واحد منها بلا معنى. ¹¹واذا كنت ما نعرفش اللغة نكون غريب عند المتكلم, و حتى المتكلم يكون غريب عندي.¹²هكذا انتم ثاني, و اذا راكم تطلبوا المواهب الروحية, اطلبوا على جال البنيان تاع الكنيسية باه تزيدوا. ¹³على هاذا اللي يتكلم بلغة يصلي باه يترجمولو, ¹⁴على خاطر كان كنت نصلي بلغة, معناها الروح تاعي قاعدة تصلي, بالصح في فكري ما كاين حتى ثمار.¹⁵امالا كيفاه؟ نصلي بالروح, ونصلي ثاني بالفكر. نرتل بالروح, و نرتل ثاني بالفكر. ¹⁶على خاطر اذا انت باركت بالروح, كيفاه الشخص العادي يقول: "امين" كي انت تشكر؟ على خاطر ما يفهمش واش راك تقول!¹⁷حاجة مليحة كي انت تشكر, بالصح لاخر ما يتبناش. ¹⁸نشكر ربي اني نتكلم بلغات اكثر منكم الكل. ¹⁹بالصح, في الكنيسية, ما ذابيا نتكلم خمسة كلمات بفكري باه حتى لخرين ثاني يتعلموا, اكثر من اللي نقول عشر الاف كلمة بلغة اخرى.²⁰يا لخاوة, ما تكونوش صغارفي تفكيركم, بالصح كونوا اولاد في الشر, و في الفكر كونوا كاملين. ²¹مكتوب في الشرع: "راح نكلم هاذا الشعب بلسان و لغة اخرى غريبة, و حتى كيما هاكذا ما يسمعوليش, يقول الرب".²²امالا الهدرة ياللغات هي معجزة, موش للمومنين بالصح للي ما هومش مومنين. ²³اذا كان تلمت الكنيسية كاملة في مكان واحد, و كانوا الناس الكل يتكلموا بلغات, و دخل عليكم شخص عادي و الا شخص ما هوش مومن, ماهمش راح يقولوا عليكم راكم تخرفوا؟²⁴بالصح اذا كانوا كلهم يتنبأوا, و دخل واحد ما هوش مومن والا واحد عادي, راح يتلام من عند الناس الكل, و راح يحكموا عليه الكل. ²⁵و هكذا تولي الحوايج الي مخباها في قلبو باينة. و هكذا يركع و يسجد لله, و ينادي: ان الله بالحق فيكم. النظام في العبادة²⁶امالا يا لخاوة كيفاه: كي تتلموا للعبادة خلي يكون لكل واحد منكم مزمور, و عندو تعليم, و عندو لغة, وعندو اعلان, و عندو ترجمة. خلي كل شيء يكون للبنيان. ²⁷اذا كان واحد يتكلم بلغة, كل زوز مع بعضاهم, و الا ثلاثة ثلاثة, و بنظام و واحد يترجم. ²⁸بالصح الا ما كانش كاين مترجم يسكت هاذاك الي يهدر بلغة, و يهدر بينو وبين روحو و الله.²⁹بالصح الانبياء يتكلموا زوز والا ثلاثة, و لخرين يحكموا. ³⁰بالصح اذا كاين واحد اخر قاعد وجاه كلام من عند الله يسكت هاذاك لول و يخليه يتكلم.³¹على خاطر تتقدروا تتنبأوا بالواحد بالواحد, باه الكل يتعلموا و يتشجعوا. ³²و لنبياء يقدروا يسيطروا على ارواحهم. ³³على خاطر الله ماهوش اله فوضى هو اله تاع سلام. هكذاك ثاني في جميع لكنايس تاع القديسين,³⁴النساء يسكتوا في لكنايس, مايجوزش ليهم يتكلموا, لازم عليهم يخضعوا كيما وصى الشرع. ³⁵بالصح اذا كان حبوا يتعلموا حاجة, يسقسيو رجالهم في الدار, على خاطر عيب لمرى تتكلم في لكنيسية. ³⁶و الا من عندكم انتوما خرجت الكلمة تاع الله؟ و الا عندكم انتوما برك و فضت؟³⁷و اذا كاش واحد حاسب روحو نبي والا انسان روحي, يكون في علمو بلي الشيء اللي كتبتو هو لوصية تاع الله. ³⁸و اذا دار روحو ما علابالوش, انتم ثاني ماعلابلكمش بيه!³⁹امالا يا خاوتي اسعاو للتنبؤ, و ما تمنعوش التكلم بلغات. ⁴⁰بالصح ديروا كل شيء كيما يليق وبنظام.

Chapter 15

¹نحب نفكركم يا لخاوة بالانجيل اللي بشرتكم بيه, و قبلتوه, و اللي راكم فيه ثابتين, ²و بيه ثاني تتخلصوا, لو كان تعملوا بالكلام الي بيه بشرتكم. و الا راح يكون ايمانكم باطل!³من لول سلمت لكم الشيء اللي انا ثاني قبلتو: بلي المسيح مات على جال ذنوبنا حساب واش جا في لكتب, ⁴و بلي راه تتدفن, و بلي قام من الموتى في ثالث يوم حساب واش جا في لكتب,⁵و بلي راه ظهر لبطرس و من بعد للثناش. ⁶و من بعد ظهر لاكثر من خمسمياة اخ دفعة واحدة, معظمهم ما زالوا حيين لضرك. بالصح كاين فيهم اللي ماتوا. ⁷و بعد هاذا ظهر ليعقوب, ومن بعد ظهر للرسل اجمعين.⁸و اخر واحد _كي اللي لواحد مرمي _ ظهر ليا انا. و ما انا غيراصغر الرسل, و مانيش حاط روحي نستاهل خلاص باه يسموني رسول, ⁹على خاطر اضطهدت لكنيسية تاع الله.¹⁰و اذا انا على الشيء اللي راني عليه اليوم غير بالنعمة تاع الله. و نعمتو اللي انعم بيها عليا ما كانتش باطل, بالصح انا تعبت اكثر منهم الكل. و مش انا اللي جاهدت بالصح النعمة تاع الله الي كانت معايا. ¹¹و سواء انا و الا هما, هاذا هو الشيء اللي احنا نبشروا بيه و هذا هو اللي انتم بيه امنتوا. قيامة الموتى¹²بالصح اذا كنا نبشروا بلي المسيح قام من بين الموتى, كيفاه امالا كاين بيناتكم ناس يقولوا: " ماكانش قيامة تاع الموتى" ¹³اذا كان الموتى ما يقوموش امالا حتى المسيح ما قامش! ¹⁴و اذا كان المسيح ما قامش يكون تبشيرنا باطل و يكون ايمانكم ثاني باطل,¹⁵و نوليو احنا شهود تاع زور على الله, على خاطر شهدنا عليه بلي هو قوم المسيح و هو ما قوموش, كي عادوا الموتى ما يقوموش. ¹⁶على خاطر اذا كان الموتى ما يقوموش حتى المسيح ما يكونش قام. ¹⁷و اذا كان المسيح ما قامش يكون ايمانكم باطل. و انتم راكم باقيين في ذنوبكم!¹⁸و حتى اللي ماتوا وهما مسيحيين تهلكوا! ¹⁹اذا كان الرجاء تاعنا في المسيح غير في هاذي لحياة برك, نوليو احنا اكثر وحايد في الشقاء نعانيو.²⁰بالصح في الحقيقة المسيح قام من بين الموتى و هو الباكورتاع الموتى. ²¹اذا كان الموت جاء على يد انسان واحد, حتى القيامة ثاني تجي على يد انسان واحد.²²على خاطر اذا كان في آدم الناس الكل يموتوا, حتى في المسيح ثاني راح يحياو الناس الكل. ²³بالصح كل واحد و المنزلة تاعو: المسيح هو الاول, و من بعد الناس اللي هما للمسيح في الرجوع تاعو.²⁴و من بعد تكون لاخرة وين يسلم المسيح الملك لله الآب, بعدما يقضي على كل سيادة و كل سلطة و كل قوة. ²⁵على خاطر لابد عليه يملك باه "يحط العديان تاعو كاملين تحت رجليه". ²⁶و يكون الموت هو اخر عدو يقضي عليه.²⁷على خاطر حط كل شيء تحت رجليه. بالصح كي يقول: "بلي كل شيء تحط تحت رجليه" باين بلي يستثني الله الي كل شيء خاضع ليه. ²⁸و كي يحط كل شيء تحت رجليه, وقتها حتى الابن في ذاتو يخضع لله اللي كل شيء خاضع ليه, و يكون الله هو الكل في الكل.²⁹و الا كيفاه يعملوا المعمودية على جال الموتى؟ اذا كانوا الموتى ما يقوموش خلاص, و علاش امالا يتعمدوا من اجلهم؟ ³⁰و احنا علاش رانا نواجهوا الصعوبات في كل وقت؟³¹كل يوم نشوف الموت بعينيا غير باه تكونوا انتم هما الفخرة تاعي في المسيح يسوع ربنا. ³²لو كان كي حاربت الوحوش في افسس كان عندي هدف باه نرضي الناس, واش الفايدة تاعي؟ لو كان جاو لموات ما يقوموش, "خلي امالا ناكلوا و نشربوا واخرتها موت!".³³ما تغلطوش ارواحكم: "الخلطة البالية تفسد لخلاق العالية". ³⁴فيقوا و ما تغلطوش, على خاطر كاين ناس ما يعرفوش ربي خلاص. نقول هذا الشيء باه تحشموا على ارواحكم! البدن تاع لقيامة³⁵لو كان كاش واحد يقول: "كيفاه يقوموا لموتى؟ و بواش من بدن يجيو؟". ³⁶يا جاهل! الشيء اللي يتزرع ما يعاودش يحيا الا اذا كان مات.³⁷و الشيء الي تزرعو هو غير حبة برك نقولوا مثلا حبة تاع حنطة و الا اي زريعة واحدة اخرى, ماهوش هاذاك النبات اللي راح ينبت و يظهر من بعد. ³⁸بالصح الله هو اللي يمدلها جسم كيما يحب هو. و كل زريعة تجيب النبات تاعها. ³⁹و الاجساد كلها ماهيش كيف كيف, الانسان عندو جسم, و الحيوان عندو جسم, و الحوت عندو جسم, و الطير عندو جسم.⁴⁰و كاين اجسام تاع سماء, و كاين اجسام تاع لرض, تاع السماءعندها لبهاوة تاعها, و تاع لرض عندها لبهاوة تاعها. ⁴¹بهاوة الشمس حاجة, و بهاوة القمرة حاجة, و بهاوة النجوم حاجة. كل هاذا و عندو لبهاوة تاعو.⁴²و هكذاك يكون في قيامة الموتى: يتزرع جسم فاني و يقوم جسم يخلد. ⁴³يتزرع بالذل و يقوم بالعز, يتدفن بالضعف و يقوم بالقوة. ⁴⁴يتزرع جسم بشري و يقوم جسم روحاني. يكون جسم بشري و يولي جسم روحاني.⁴⁵و مكتوب ثاني: "ولى آدم, الانسان لول نفس حية ", و كان آدم لخر روح يحيي. ⁴⁶بالصح الروحاني ما يكونش سابق على البشري, يجي في لول الجسم البشري, و عاد من بعد يجي الجسم الروحاني.⁴⁷الانسان لول تخلق من التراب على خاطرو ارضي. و الانسان لخر اللي هو الرب جا من السماء. ⁴⁸و كيما اللي تخلق من التراب اهل لرض كلهم يكونوا كيفوهو, و كيما اللي من السماء اهل السماء كاملين يكونوا كيفوهو. ⁴⁹و كيما لبسنا صورة اللي جاي من التراب, نلبسوا ثاني صورة اللي جاي من السماء.⁵⁰نقول لكم يا خاوتي: بلي الدم و اللحم ما يقدروش يورثوا الملكوت تاع الله. و الفاني ما يقدرش يورث لحياة الدايمة. ⁵¹و هاذا سر نقول لكم عليه: ما نموتوش كلنا, بالصح كلنا نتبدلوا,⁵²في لحظة في رمشة عين, كي نسمعوا البوق لخر, على خاطر راح ينفخوا في البوق, الموتى يقوموا بجسم الخلود, و احنا الحيين تتبدل الهيئة تاعنا. ⁵³على خاطر هاذا الجسم الفاني لازم يلبس اللي ما يفناش, و هاذا اللي يموت يلبس اللي ما يموتش.⁵⁴و كي يلبس هاذا الفاني اللي ما يفناش, و يلبس اللي يموت هاذاك اللي ما يموتش. وقتها تتحقق الكلمة المكتوبة: "تبلع الموت في النصرة". ⁵⁵"وين شوكتك يا موت؟ وين غلبتك يا هاوية؟"⁵⁶و شوكة الموت هي الذنوب, و قوة الذنوب تجي من الشرع. ⁵⁷بالصح الحمد لله اللي دايما ينصرنا بربنا يسوع المسيح.⁵⁸امالا يا خاوتي لعزاز عليا, كونوا ثابتين, راسخين, متحمسين ديما في لخدمة تاع الله, و اعلموا بلي التعب تاعكم ما راحش يروح باطل.

Chapter 16

¹و اما من جيهة كيفاه نعاونوا القديسين, كيما وصيت في الكنايس تاع غلاطية هكذا انتم ثاني اعملوا عندكم. ²في اول تاع كل اسبوع, كل واحد يحط الشيء اللي القادر عليه, باه كي نجي نلقاهم واجدين ما نبقاوش نلموا.³و كي نجي, نبعث الناس اللي خايرتوهم باه يوصلوا الشيء اللي لميتوه لاورشليم. ⁴و اذا كان لزم باه نروح انا ثاني, يروحوا معايا. طلبات خاصة⁵بعد ما نعدي على مكدونية نجي عندكم. على خاطر غير نعدي عليها ليه ليه. ⁶و بلاك نبقى عندكم نشتي معاكم و من بعد تشايعوني باه نكمل طريقي.⁷و ما نيش حاب نشوفكم شوفة تاع زربة, انا حاب نقعد عندكم مدة طويلة كان حب ربي. ⁸بالصح ضرك اني قاعد هنا في افسس حتى للعيد تاع يوم الخمسين ⁹,على خاطر ربي فتح باب واسع و فعال للخدمة, حتى واذا كاين المعارضين ياسر.¹⁰و اذا جاكم تيموتاوس, ما دابيكم يكون مرتاح عندكم. على خاطر حتى هو ثاني راح يخدم في الخدمة تاع الرب كيما انا. ¹¹و ما تحقروهش, سهلولوا و ابعثوه على خير باه يجيني, على خاطر انا نسنى فيه مع الخاوة. ¹²و من جيهة الاخ ابولس, نحاول فيه باه يجيكم هو و الخاوة, بالصح ماهوش حاب يجي ضرك, يجيكم وقت اللي تكون الفرصة مواتية.¹³تيقضوا. اثبتوا في ليمان. كونوا رجال. قووا ارواحكم. ¹⁴وخلي كل اموركم تكون بمحبة.¹⁵يا خاوتي راكم تعرفوا العيلة تاع استفاناس هم اول ناس امنوا بالمسيح في اخائية وراهم سلموا ارواحهم باه يخدموا الخاوة القديسين, ¹⁶نطلب منكم تسمعوا لهم, و لكل من يخدم و يتعب معاهم.¹⁷فرحت كي جاني استيفاناس و فرتوناتوس واخائيكوس, على خاطر هما عوضوني على غيابكم, ¹⁸و فرحوا قلبي و قلوبكم. اعرفوا كيفاه تكرموهم. تحيات ختامية¹⁹تسلم عليكم الكنايس في اسيا. يسلم عليكم ياسر في الرب اكيلا و برسكلا هما و الكنيسية اللي في دارهم كلهم يسلموا عليكم. ²⁰الخاوة كلهم يسلموا عليكم. سلموا على بعضاكم ب بوسة مقدسة.²¹هذا السلام بخط يدي انا بولس. ²²و اللي ما يحبش الرب يسوع المسيح راه اناثيما! ماران اثا. ²³النعمة تاع ربنا يسوع المسيح معاكم. ²⁴و محبتي ليكم اجمعين في المسيح يسوع. امين

2 Corinthians

Chapter 1

¹من عند بولس الرسول تاع يسوع المسيح كيما حب الله, و من عند تيموتاوس الاخ, للكنيسية اللي في كورنتوس, لجميع القديسين اللي في اخائية الكل: ²ليكم نعمة و سلام من عند الله بابانا و الرب يسوع المسيح. الله تاع كل التعزية³يتبارك الله الاب تاع ربنا يسوع المسيح, الاب الرحيم و اله كل عزاء, ⁴اللي يشجعنا في وسط الصعوبات اللي نعديو بيها الكل, باه نكونوا حتى احنا قادرين نشجعوا الناس اللي يكونوا في محنة, كيما عزانا الله نعزيوهم.⁵على خاطر على قد ما تكثر لوجاع تاع المسيح فينا, تكثر فينا ثاني التعزيات تاعو. ⁶اذا كنا احنا في المحنة باه تتشجعوا انتم و تخلصوا, و اذا كان تعزينا على خاطر انتم تشجعتوا و ربحتوا الخلاص. ⁷يبقى دايما الرجاء تاعنا من حيهتكم ثابت. عارفين باللي كيما كنتوا شركاء تاع المسيح في لوجاع تاعو, هكا راح تكونوا شركاء في التعزية ثاني.⁸ما نحبوش نخبِيو عليكم يا الخاوة المشاكل اللي صرات لنا كي كنا في اسيا, و كيفاه كانت صعيبة علينا ياسر اكثر من اللي نقدروا نستحملوا, حتى يأسنا من لحياة, ⁹و كنا حاطين ارواحنا راح نموتوا, باه ما نتكلوش على ارواحنا بالصح نكونوا متوكلين على الله اللي يحيي الموتى, ¹⁰اللي منعنا من هذا الموت و مازال يزيد يمنعنا. نعم عندنا فيه رجاء انو مازال يزيد يمنعنا.¹¹و انتم ثاني من جيهتكم تعاونوا فينا بالصلاة, و كي يباركنا الله باستجابة صلاة ناس ياسر, راح يكونوا ناس ياسر اللي يشكروا الله على جالنا. بولس يبدل الخطط تاعو¹²بهاذا احنا نعتزوا: الضمير تاعنا يشهد لنا باللي سلوكنا في هاذي الدنيا كان في البساطة و التقوى حساب النعمة تاع الله, مش بالحكمة تاع البشر, بالخصوص من جيهتكم انتم. ¹³و احنا ما نكتبوا لكم غير الشيء اللي كي تقراوه تفهموه. و نتمنى تفهموا مليح حتى للخر, ¹⁴كيما فهمتونا شوية احنا ثاني, احنا نعتزوا بيكم و انتم ثاني تعتزوا بينا في نهار الرب يسوع.¹⁵اول حاجة حبيت نجيكم بهاذي الثقة, و ثاني باه تزيد تكون لكم نعمة اخرى. ¹⁶كي نعدي عليكم في طريقي لمكدونية, و ثاني حتى كي نرجع من مكدونية, باه نشبع منكم و من لثم تسافر لليهودية.¹⁷بلاك نكون متسرع كي حبيت ندير هاذا الشيء؟ و الا بلاك نخمم تخمام تاع بشر؟ و نكون بين هيه و لا لا في وقت واحد؟ ¹⁸بالصح الله شاهد باللي كلامنا ماهوش بين البينين.¹⁹على خاطر يسوع المسيح ابن الله, اللي بشرنا بيه في وسطكم, انا و سلوانس و تيموتاوس. ما كانش نعم و لالا, بالصح كان كله نعم. ²⁰على خاطر مهما كانت الوعود تاع الله هو دايما فيه "النعم" و "الامين", للمجد تاع الله.²¹بالصح الله هو اللي يثبتنا احنا و اياكم في المسيح, و هو اللي اعطانا المسحة ²²و هو اللي ختم علينا ثاني, و اعطالنا عربون الروح في قلوبنا.²³بالصح الله شاهد عليا, باللي ما جيتش لكورنتوس على خاطر شفقت عليكم, ²⁴ما نحبوش نكونوا مسيطرين على الايمان تاعكم, بالصح نخدموا معاكم باه تكونوا فرحانين. راكم ثابتين في الايمان.

Chapter 2

¹بالصح عزمت ما نزيدش نجيكم باه ما تحزنوش مرة اخرى. ²على خاطر كان سببت لكم الحزن, شكون راح يفرحني انا غير اللي سببت لهم الحزن؟³و كتبت لكم هاذا الشيء بالذات باه كي نجي ما نحزنش على الناس اللي كان لازم نفرح بيهم, متيقن فيكم الكل باللي الفرحة تاعي هي الفرحة تاعكم الكل. ⁴على خاطر كتبت لكم و قلبي مليان بالحزن و عينيا بالدموع, باه ما تحزنوش, بالصح باه تعرفوا لمحبة اللي عندي بالخصوص من جيهتكم. المذنب سامحوه⁵و اللي كان سبب في الحزن, ما سببش الحزن غير ليا انا وحدي, بالصح سبب الحزن ليكم الكل حتى و لو قليل. ⁶واحد كيما هاذا يكفيه العقاب اللي نالوا من عند الاغلبية, ⁷و من الافضل ضرك تسامحوه و تشجعوه, باه ما تقضيش عليه كثرة الحزن.⁸نوصيكم تزيدوا تحبوه. ⁹كتبت لكم هاذا الشيء باه نشوف تطيعوني في كل شيء و الا لا؟¹⁰اللي تسامحوه انتم انا ثاني نسامحو, على خاطر كان غفرت في حاجة تستاهل يكون على جالكم في حضرة المسيح, ¹¹باه واحد ما يطمع فيه الشيطان, على خاطر ما تخفاش علينا مقاصدو. الفوز في المسيح¹²بالصح كي جيت لترواس, على جال التبشير بالمسيح, و كي فتح لي ربي الباب لثم, ¹³ما كنتش مرتاح, على خاطر ما لقيتش خويا تيطس. و ليت بقيتهم على خير و خرجت رحت لمكدونية.¹⁴بالصح نشكر الله اللي دايما يقودنا في المحفل تاع الانتصار في المسيح يسوع, و ينشر بينا ريحة المعرفة تاعو في كل مكان. ¹⁵على خاطر احنا الريحة الطيبة تاع المسيح لله, في الناس اللي يمنعوا و في الناس اللي يهلكوا.¹⁶لهاذوك ريحة موت توصل للموت, لهاذوك ريحة حياة توصل للحياة. شكون قادر يدير هاذي الامور؟ ¹⁷احنا ما نتاجروش بكلام الله كيما ناس ياسر, بالصح نتكلم كلام ناس صادقين, كلام الرسل تاع الله قدام الله.

Chapter 3

¹بدينا نشكروا في ارواحنا؟ و الا نحتاجوا كيما واحد الناس تتوسطولنا ببريات من عندكم و الا ليكم؟ ²انتم همّا لبرية تاعنا, المكتوبة في قلوبنا, معروفة و مقرية عند الناس الكل. ³باينين باللي انتم لبرية تاع المسيح, مخدومة بينا احنا, مكتوبة بروح الله مش بالحبر, في لقلوب تاع اللحم مش في اللوحة تاع الحجر.⁴هاذي ثقتنا في المسيح عند الله. ⁵مش على خاطر حاسبين ارواحنا عندنا القدرة, بالصح القدرة تاعنا جات من عند الله, ⁶و هو اللي جعلنا قادرين نكونوا الخدّام تاع العاهد الجديد. العاهد تاع الروح مش تاع الحرف. على خاطر الحرف يقتل اما الروح يحيي. المجد تاع العاهد الجديد⁷اذا كانت الخدمة تاع الموت اللي حروفها منقوشة في الواح من لحجار, مغطية بالمجد, حتى انو بني اسرائيل ما قدروش يخزروا في وجه موسى بسبة المجد الفاني, ⁸كيفاه مالا يكون المجد تاع خدمة الروح؟⁹اذا كانت الخدمة اللي تدين البشر مجد, مالا الخدمة اللي تبرر البشر تعداها في المجد! ¹⁰الحاجة اللي كانت من قبل عندها مجد كبير يزول المجد تاعها كي تجي اللي اكثر منها في المجد. ¹¹على خاطر اذا كان الفاني عندو مجد, كيفاه مالا يكون المجد تاع الدايم!¹²على خاطر عندنا رجاء كيما هاذا احنا نسلكوا بجرأة كبيرة. ¹³مش كيما موسى اللي كان يغطي وجهو بقناع باه بني اسرائيل ما يشوفوش لاخرة تاع الفاني.¹⁴اما همّا زادت عمات البصيرة تاعهم, على خاطر حتى لليوم مازال هاذاك الحجاب ماهوش مكشوف كي يقراو العاهد لقديم, اللي ما ينحيه غير المسيح. ¹⁵بالصح حتى اليوم, ما زال هاذا الحجاب على قلوبهم وقت اللي يقراو شريعة موسى. ¹⁶و ما ينحي هاذا الحجاب غير الاهتداء للرب.¹⁷اما الرب هو الروح, و وين يكون الروح تاع الرب تكون الحرية. ¹⁸و احنا الكل نعكسو تصويرة المجد تاع الرب بوجه مكشوف, كي شغل في لمراية, نتبدلو لهاذيك التصويرة بالذات, و هي تزيد مجد على مجد, من فضل الرب اللي هو الروح.

Chapter 4

¹على جال هاذا الشيء الله مدلنا هاذي الخدمة ـبالرحمة تاعوـ مالا ما نفشلوش, ²بالعكس رفضنا كل تصرف مخبي و يحّشم, و ما مشيناش بالحيلة, و ما حرفناش كلمة الله, بالصح ظهّرنا الحق, و علِّينا قدرنا في ضمير الناس الكل قدام الله.³بالصح اذا كان الانجيل تاعنا مكتوم, يكون مكتوم برك عند الهالكين, ⁴عند غير المومنين اللي الاله تاع هاذا الزمان عمى البصيرة تاعهم, باه ما يشوفوش النور اللي يضوي, النور تاع انجيل مجد المسيح, اللي هو تصويرة الله بالذات.⁵احنا ماناش قاعدين نبشروا بأرواحنا احنا نبشروا بالمسيح يسوع رب, و رانا غير الخدامين تاعكم على جال يسوع. ⁶على خاطر الله اللي قال: "من الظلمة يخرج النور", هو اللي ضوى في قلوبنا, باه تشرق معرفة مجد الله اللي في وجه يسوع المسيح.⁷بالصح عندنا هاذا الكنز في ماعون فخّار, باه تكون القوة اللي فينا من فضل الله مش منا احنا. ⁸تضياق علينا من الجوانب الكل, بالصح ما نتدمروش. نحيروا في امورنا واش نديروا, بالصح ما نيأسوش. ⁹الناس يضطهدونا, بالصح الله ما يخليناش. نطيحوا في لرض, بالصح ما نموتوش. ¹⁰في كل وقت هازين الموت تاع المسيح في اجسامنا, باه تظهر فينا ثاني حياة المسيح في اجسامنا.¹¹و مادام مازلنا في هاذي لحياة, دايما نتسلموا للموت على جال المسيح, باه تظهر حياة المسيح في اجسادنا الفانية حتى هي. ¹²مالا الموت يخدم فينا احنا, و لحياة تخدم فيكم انتوما.¹³و على خاطر عندنا روح الايمان بالذات, على حساب واش مكتوب: "امنت على هاذيك تكلمت", حتى احنا نامنوا على هاذيك نهدروا ثاني. ¹⁴عارفين اللي حيّا الرب يسوع من بين الموتى راح بحببنا احنا ثاني بيسوع, و يجعلنا احنا و اياكم بين ايديه. ¹⁵على خاطر هاذي لحوايج الكل هي على جالكم, باه على قد ما تكثر النعمة يكثروا الشاكرين للمجد تاع الله.¹⁶مالا ما نفشلوش, حتى وان كان الانسان اللي ظاهر من لبرى يفنى و يموت, بالصح من الداخل يتجدد يوم ورى يوم. ¹⁷و هاذي الشدة الوقتية اللي نقاسِيو فيها راح تعدي و تفوت بالصح توجدلنا مجد دايم ما يفناش. ¹⁸ما نسناوش في لحوايج اللي تتشاف ضرك, بالصح نسناو لحوايج اللي ما تتشافش. على خاطر اللي نشوفوها وقتية برك, اما اللي ما نشوفوهاش هاذيك هي الدايمة.

Chapter 5

¹رانا عارفين باللي نهار اللي تتهدم فيه خيمتنا اللي احنا ساكنين فيها في لرض, راح تكون لنا في السماوات سكنة, دار دايمة ماهيش مخدومة باليدين. ²و احنا ضرك مشتاقين نستناو غير وقتاه نلبسوا فوقها دارنا اللي من السماء. ³على خاطر كي نلبوسوها ما نبقاوش عرايا.⁴و مادام احنا في وسط الخيمة تاع لرض مازلنا نتوجعوا تحت احمالنا الثقيلة, على خاطر ما نحبوش ننحيوها نحبوا نلبسوا فوق منها, حتى تبلع الحياة الفاني اللي فينا. ⁵بالصح الله هو اللي دارنا لهاذا الشيء, و زاد اعطالنا العربون تاع الروح.⁶رانا متاكدين و عارفين باللي واحنا مستوطنين في الجسد, نسماو متغربين على الرب. ⁷و على خاطر نمشِيو بالايمان مش بالشيء اللي نشوفوه بالعين. ⁸و عندنا ثقة و ما دابينا نتغربوا على هاذا الجسد باه نسكنوا عند الرب.⁹و سواء كنا مستوطنين و الا متغربين نحرصوا دايما ـباه ننالوا رضاية الرب ـ ¹⁰على خاطر لابد لينا الكل نوقفوا قدام عرش المسيح باه كل واحد ينال الجزاء تاعو حساب واش دار كي كان في الجسد خير و الا شر. خدمة المصالحة¹¹و على خاطر نعرفوا مخافة الرب نقنعوا الناس. اما الله يعرفنا مليح, و نتمنى انتم ثاني تعرفونا مليح في الضماير تاعكم. ¹²و احنا مش القصد تاعنا ننفخوا ارواحنا قدامكم, بالصح نحبوا نزيدوا نمدوا لكم سبة باه تفتخروا بينا, و باه يكون عندكم جواب على الناس اللي يفخروا بالمظاهر مش بالشيء اللي في القلب.¹³اذا كنّا مهابل هاذا على جال لله, و اذا كنا بعقولنا هاذا على جالكم. ¹⁴على خاطر محبة المسيح تحصرنا. بعدما ما فهمنا باللي اذا كان واحد مات على جال الناس الكل, معناه الناس الكل ماتوا. ¹⁵و هو مات على جال الناس الكل باه منّا و جاي الحيين ما يعيشوش لارواحهم همّا, بالصح يعيشوا للي مات و قام من بين الموتى على جالهم.¹⁶مالا احنا من اليوم ما نعرفوا حتى واحد على حساب الجسد. و اذا كان عرفنا المسيح على حساب الجسد, احنا من ضرك ما نعرفوهش كيما هكذاك. ¹⁷على خاطر اذا كان واحد في المسيح هو مخلوق جديد: لحوايج لقديمة راحت, و كل شيء ولّى جديد.¹⁸و هاذا الكل من عند الله, اللي صالحنا مع ذاتو بيسوع المسيح, و اعطانا احنا الخدمة تاع هاذي المصالحة, ¹⁹يعني الله صالح العالم مع ذاتو في المسيح , و ما حاسبهمش على ذنوبهم, و مد لنا احنا باه نوصلوا خبر هاذي المصالحة.²⁰احنا كيما سفراء تاع المسيح, تقول الله ذاتو يهدر على فوامنا. نطلبوا منكم باسم المسيح: تصالحوا مع الله. ²¹على خاطر هاذاك اللي بلا معصية جعلو معصية على جالنا, باه نولِيوْ احنا البر تاع الله فيه.

Chapter 6

¹و هكا في الخدمة تاعنا مع الله نطلبوا منكم باه ما يكونش القبول تاعكم لنعمة الله بلا فايدة. ²على خاطر يقول: "في وقت الرضى سمعتك, و في يوم السلاك عاونتك". هاو هاذا وقت مقبول. و هاذا اليوم يوم سلاك. الضيقات تاع بولس ³ما نحبوش نكونوا عائق في طريق حتى واحد باه ما تتلامش الخدمة.⁴بالصح في كل شيء نبينوا باللي احنا الخدام تاع الله, بالصبر تاعنا: في الصعوبات, في الاحتياج, في الضيق, ⁵في الضرب, في لحبس, في الاهوال, في التعب, في السهر, في الصوم, ⁶في الصفاء, في العلم, في وسع البال, في اللطف, في الروح القدس, في لمحبة بلا نفاق, ⁷في كلام الحق, في قدرة الله بالسلاح تاع الحق في الهجوم و في الدفاع.⁸بالجاه و بالمذلة, بالسمعة لخايبة و لمليحة, الناس يحسبونا كذّابين و احنا صادقين, ⁹يحسبونا بلا اصل واحنا معروفين, ميتين و احنا حيين, متعذبين و احنا ماناش مقتولين, ¹⁰حازنين و احنا دايما فرحانين, فقراء بالصح نجعلوا ناس ياسر اغنياء, تقول ما عندنا حتى شيء و احنا نملكوا كل شيء.¹¹هدرنا معاكم بكل صراحة يا ناس كورنتوس, و فتحنا لكم قلبنا لكبير. ¹²ما تضَيقوش علينا احنا بالصح الضيق راه في قلوبكم انتوما, ¹³نهدر معاكم كيما نهدر مع اولادي: ديروا معانا كيما درنا معاكم, افتحوا لنا قلوبكم انتم ثاني! ما تكونوش تحت نير واحد مع اللي ماهمش مومنين¹⁴ما تكونوش تحت نير واحد مع اللي ماهمش مومنين, على خاطر واش من خلطة كاينة بين الخير و الشر؟ و واش من علاقة بين النور و الظلمة؟ ¹⁵واش من مفاهمة بين ابليس و المسيح؟ واش من شركة بين المومن و اللي مش مومن؟ ¹⁶واش من توافق للهيكل تاع الله مع الاوثان؟ راكم انتوما همّا الهيكل تاع الله الحي, كيما قال الله: "راح نسكن فيهم و نمشي في وسطهم, و نكون ليهم اله, و همّا يكونوا ليّا شعب.¹⁷على هاذيك اخرجوا من وسطهم اعزلوا ارواحكم, يقول الرب. ما تمسوا حتى حاجة منجوسة باه نقبلكم, ¹⁸و نكون ليكم اب, و انتوما تكونوا ليّا بنات و اولاد, يقول الرب, اللي على كل شيء قدير".

Chapter 7

¹كي عادت عندنا هاذي الوعود الكل يا لحباب مالا نطهروا ارواحنا من كل ما ينجس الجسد و الروح, و نكملوا القداسة في مخافة الله. الفرحة تاع بولس²اعطونا مكان في قلوبكم. ما ظلمنا حتى واحد, و ما ضرينا حتى واحد, و ما طمعنا في حتى واحد. ³ما نقولش هاذا لكلام باه نحاسبكم, على خاطر قلت لكم من قبل باللي راكم في قلوبنا, نعيشوا مع بعضانا و الا نموتوا مع بعضانا. ⁴عندي ثقة كبيرة فيكم و فخر كبير بيكم. رغم كل الصعوبات اللي نعدِيو بيها قلبي فايض بالفرحة و متعزي بيكم ياسر.⁵على خاطر ملي وصلنا لمكدونية ما ذقناش الراحة كانت الصعوبات تجينا من كل جيهة: من لبرى الخصومات, و من الداخل الخوف, ⁶بالصح الله اللي يعزي المتواضعين عزّانا كي جا لنا تيطس. ⁷و ما فرحناش برك كي جاء بالصح فرحنا ثاني بالتشجيع اللي انتوما كنتوا سبة فيه, و كي قال لنا كيفاه توحشتوني و كيفاه حزنتوا و غاظكم الحال عليّا, و هاذا الشيء اللي زاد من الفرحة تاعي اكثر.⁸حتى اذا كان سببت لكم الحزن بالبرّية اللي بعثتها, ما ندمتش, بالصح ندمت في لول كي شفتكم حزنتوا. ⁹ضرك انا فرحان, مش على جال الحزن تاعكم, بالصح على خاطر الحزن وصلكم للتوبة. و الحزن تاعكم كان من عند الله باه ما تنالوا منا حتى خسارة. ¹⁰على خاطر الحزن اللي يجي من عند الله يوصل للتوبة اللي فيها الخلاص و ما عليها حتى ندامة. اما الحزن تاع هاذي الدنيا يوصل للموت.¹¹الحزن تاعكم هاذا بالذات هو من عند الله, شوفوا قداه خلق فيكم من اهتمام, و من اعتذار, و من ندم, و من خوف, ومن شوق, و من غيرة, و من عقاب. في كل شيء بينتوا باللي انتوما ابرياء في الامر اللي صرى. ¹²مالا انا ما كتبتش لكم على جال الظالم و لا على جال المظلوم, بالصح كتبت لكم باه يبان قدام الله التعب تاعنا على جالكم.¹³و احنا تشجعنا كي انتم تشجعتوا. بالصح زدنا فرحنا اكثر بالفرحة تاع تيطس, على خاطر لقى فيكم الكل الشيء اللي ريّح بالو. ¹⁴و اذا كان فخرت ليه بحاجة من جيهتكم ما حشمتونيش, و كيما هدرنا معاكم انتوما بكل صراحة, ثاني حتى كان فخرنا بيكم قدام تيطس كنّا صادقين.¹⁵و تزيد لمحبة تاعكم في قلبو, كي يزيد يتفكر الطاعة تاعكم الكل, و كيفاه قبلتوه بخوف و رعدة. ¹⁶انا فرحان كي حطيت ثيقتي فيكم في كل شيء.

Chapter 8

¹و نحب نخبركم يا خاوتي بالشيء اللي داراتو النعمة تاع الله في مكدونية, ²همّا و رغم كثرة الصعوبات لكبيرة فاضت الفرحة تاعهم و الفقر الشديد تاعهم ولى غنى بسبة الكرم تاعهم,³على خاطر مدوا على قد جهدهم, و فوق من جهدهم, و انا شاهد عليهم, من ارواحهم, ⁴و يحاولوا فينا, ياسر, باه نقبلوا النعمة و المشاركة في الخدمة للقديسين. ⁵مش كيما توقعنا, مدوا رواحهم قبل للرب, و لينا احنا, بالمشيئة تاع الله.⁶و طلبنا من تيطس انو يتمم عندكم هاذي النعمة كيما بداها قبل. ⁷باه تتباركوا في كل شيء: في الايمان و لكلام و العلم و كل اجتهاد و في محبتكم لينا, يا ريتكم تزيدوا تتباركوا في هاذي النعمة ثاني.⁸ما نقولش هاذا لكلام باه نأمركم, بالصح باه نشوف اذا انتوما مخلصين ثاني في لمحبة تاعكم كيما الحماس تاع لخرين و الا لا. ⁹راكم تعرفوا النعمة تاع ربنا يسوع المسيح, اللي فقر روحو على جالكم و هو الغني, باه تستغناو انتوما بالفقر تاعو.¹⁰هاذا رايي انا في الامر, و هو ينفعكم انتم لولين اللي بديتوا تديروا فيه من العام اللي فات, و زيد اول من حب يديروا. ¹¹كملوا اليوم في هاذي الخدمة, باه يكون قد النية قد لعمل ¹²على خاطر كي يظهر النشاط في الخدمة, يكون الرضى تاع الله على الانسان على حساب الشيء اللي عندو مش على حساب واش ما عندوش.¹³ما نقصدش باه تكونوا انتم محتاجين و غيركم يكون مرتاح, ¹⁴نقصد تكونوا متساويين, الزايد عليكم يغطي احتياجهم, و الزايد عليهم هما يغطي احتياجكم. ¹⁵كيما مكتوب: "اللي يلم ياسر ما يفضال عليه حتى شيء, و اللي يلم قليل ما ينقصو حتى شيء". الخدمة تاع تيطس في كورنتوس¹⁶بالصح الحمد لله اللي جعل هاذا الاهتمام على جالكم انتم بالذات في قلب تيطس, ¹⁷اللي مش غير قبل واش طلبنا منو. بالصح من اهتمامو ياسر بيكم جاء عندكم وحدو بلا ما واحد يطلب منو.¹⁸و بعثنا معاه الاخ اللي الكنائس الكل تشكر فيه على خدمتو للانجيل. ¹⁹مش هاذا برك الكنايس خايراتو باه يرافقنا في السفر, مع هاذي النعمة اللي نديروا فيها على جال المجد تاع الرب الواحد بالذات, و على جالكم اتنوما.²⁰و نحرصوا باه واحد ما يلومنا على كيفاه نديروا مع هاذي الهبة لكبيرة. ²¹على خاطر الهدف تاعنا نديروا الصلاح, مش قدام الله برك بالصح حتى قدام الناس.²²و بعثنا معاهم خونا, اللي جربناه في امور ياسر قداه من مرة و لقيناه خدّام. و ضرك زاد ولى متحمس اكثر على الثقة الكبيرة اللي درتوها فيه. ²³اما من جيهة تيطس هو شريك ليّا و خدّام معايا على جالكم. اما خاوتنا لخرين في زوز همّا الرسل تاع الكنايس, و بيهم يبان المجد تاع المسيح. ²⁴ورولهم و للكنايس الدليل على محبتكم, و بينوا ياللي كي شكرناكم كنّا صادقين.

Chapter 9

¹من جيهة مساعدة الخاوة, يسمى فضول من جيهتي كي نكتب لكم على هاذا الموضوع. ²على خاطر نعرف كيفاه راكم متحمسين و انا نشكر فيكم لناس مكدونية, باللي اخائية واجدة من العام اللي فات. و الحماس تاعكم شجع ناس ياسر.³بالصح بعثت الخاوة باه ما يكونش الشكر تاعنا ليكم باطل من هاذي الجيهة, باه تكونوا واجدين كيما قلت. ⁴باه كي يجيو معايا ناس مكدونية و لقاوكم مازال مش واجدين ما تحشموناش احنا ـ باه ما نقولش انتم ـ كي شكرناكم ياسر. ⁵على هاذا شفت باللي ضروري يسبقونا الخاوة عندكم, و يوجدوا البراكة اللي قلتوا عليها من قبل. باه تكون ساجية من عند ناس كرماء مش بخلاء.⁶و تفكروا هاذا اللي يزرع قليل يحصد لقليل, و اللي يزرع الخير و البراكة يحصد الخير و البراكة. ⁷كل واحد واش نوى في قلبو, مش تاع بالسيف و يندم على واش مد. على خاطر اللي يمد و هو فرحان يحبو الله.⁸و الله قادر يزيدكم من كل نعمة, باه تكونوا مكفيين دايما في كل شيء, و تزيدوا اكثر في كل صلاح. ⁹كيما مكتوب: "فرق على الفقراء و كان كريم. الجود تاعو بيقى للدوام".¹⁰و الله اللي يمد الزريعة للفلاح و الخبز للجيعان, يبارك لكم في زرعكم و يكثروا و يزيد ثمار الجود تاعكم. ¹¹و يغنيكم في كل شيء كل كرم منكم يخلق فينا الشكر لله.¹²على خاطر كي تديروا هاذي الخدمة مش تسدوا احتياج القديسين برك, ¹³بالصح يزيد يفيض الحمد و الشكر لله, و زيد برهان على ايمانكم, و يمجدوا الله على الطاعة تاعكم واعترافكم بانجيل المسيح, و على الكرم تاعكم ليهم و للناس الكل. ¹⁴و يدعيو لكم بالخير, و يتوحشوكم على جال النعمة تاع الله الظاهرة فيكم, ¹⁵الحمد لله على المعطى تاعو اللي ما نقدروش نوصفوه.

Chapter 10

¹نطلب منكم بالوداعة و الصبر تاع المسيح, انا الذليل كي نكون حاضر معاكم, بالصح جريء كي نكون بعيد عليكم. ²نتمنى باه كي نكون في وسطكم ما تخلونيش نحكي معاكم بهاذيك الجرأة اللي نشوفها مناسبة للناس اللي يحسبوا فينا نمشيو بالجسد.³حتى اذا كنا نعيشوا بالجسد, بالصح ما نحاربوش بالجسد. ⁴على خاطر السلاح تاعنا في الحرب ما هوش جسدي, بالصح يطيح الحصون بالقدرة تاع الله.⁵نهدم كل شكوك و كل عقبة تعلى على حساب معرفة الله, و نأسروا كل تخمام لطاعة المسيح, ⁶واجدين باه نعاقبوا كل معصية, وقت اللي تكون فيه الطاعة تاعكم كاملة.⁷تواجهوا الامور بالحقيقة؟ اللي واثق من روحو انو للمسيح, بينو و بين روحو يدير في حسابو: كيما هو راه في المسيح, احنا ثاني رانا في المسيح! ⁸ما نحشمش اذا كان زدت شوية و فخرت بالسلطان اللي مد هو لنا الرب, مش باه نهدموكم بالصح باه نبنِيوكم.⁹باه ما نبانش كي شغل راني نخوف فيكم بالبريات تاعي. ¹⁰على خاطر كاين اللي يقول: "في البريات كلامو عنيف و قاسي, اما كي يكون حاضر هنا ضعيف, و كلامو تافه".¹¹واحد كيما هاذا يدير في بالو: احنا في لكلام تاعنا بالبريات و احنا غايبين, كيما لكلام تاعنا بالفم و احنا حاضرين. ¹²ما نحطوش ارواحنا مع الناس اللي يشكروا في ارواحهم, و ما نقارنوش ارواحنا بيهم. على خاطر همّا يقيسوا في ارواحهم على ارواحهم, و يقارنوا في ارواحهم مع ارواحهم, ناس ما يفهموش.¹³و احنا ما نفخروش بالشيء اللي يعدي حدود خدمتنا, بالصح على قد القانون اللي قسمهولنا الله, على قد الشيء اللي وصلنا لو معاكم ثاني. ¹⁴احنا ما نقولوش الشيء اللي ما صراش تقول ما وصلناش عندكم. على خاطر وصلنا عندكم صح و معانا انجيل المسيح.¹⁵و ما نتعداوش هاذيك الحدود و نفخروا بالخدمة تاع غيرنا, بالصح متمنيين ـ يزيد الايمان تاعكم ـ و تزيد تتوسع خدمتنا في وسطكم في الحدود تاعنا, ¹⁶و نزيدوا نروحوا حتى لأبعد من بلادكم. باه ما نفخروش بالخدمة اللي دارها غيرنا في الحدود تاع خدمتهم.¹⁷بالصح: "اللي يحب يفخر يفخر بالرب". ¹⁸على خاطر اللي يشكرو الله هو اللي يكون مقبول عند الله مش اللي يشكر روحو.

Chapter 11

¹يا ريت تستحملوني حتى كان بينت شوية غباء! نعم استحملوني. ²انا نغير عليكم كيما يغير عليكم الله, على خاطر خطبتكم لراجل واحد و هو المسيح, باه نقدمكم ليه عذراء عفيفة.³بالصح نخاف تبعد البصيرة تاعكم على الحق و الولاء للمسيح, كيما خدعت الحية بالمكر تاعها حواء. ⁴على خاطر كان جاكم واحد و هو يبشر بمسيح واحد اخر مش اللي بشرناكم بيه احنا, و الا يعرض عليكم روح واحد اخر غير الروح اللي ديتوه, و الا انجيل اخر مش كيما اللي قبلتوه. كنتوا تستحملوه مليح!⁵و انا ما يخصني حتى شيء على الرسل العظماء. ⁶و اذا كان خصتني الفصاحة في لكلام ما يخصنيش العلم, و هاذا اللي ظاهر علينا في كل شيء عند الناس الكل.⁷و الا غلطت غلطة كي طيحت من روحي باه نعليكم, على خاطر جبت لكم لبشارة تاع الانجيل بلاش؟ ⁸حرمت كنايس اخرين و اديت من عندهم اجرة باه نخدمكم انتوما, و كي كنت عندكم و كنت محتاج ما ثقلت على حتى واحد. ⁹على خاطر الخاوة اللي جاو من مكدونية عاونوني في الاحتياج تاعي. و في كل شيء صنت روحي باه ما نكونش ثقيل عليكم, و مازال نصونها.¹⁰و بحق المسيح اللي فيّا. واحد ما يسلب مني هاذا الافتخار في بلاد اخائية. ¹¹قولولي علاه؟ على خاطر ما نحبكمش؟ الله يعلم قداه نحبكم.¹²و الشيء اللي نعمل فيه عملتو باه نقص الدعاية تاع الناس اللي قاعدين يفخروا و يقولوا باللي راهم يديروا كيما نديروا احنا. ¹³على خاطر ناس كيما هاذوك همّا رسل مزورين, خدّامين خدّاعين, يبدلوا في زيّهم باه يتشبهوا بالرسل تاع المسيح.¹⁴و ما تجيكمش عجب. على خاطر الشيطان في ذاتو بدّل زيّو ولى يشابه للملاك تاع النور! ¹⁵و ماهيش حاجة كبيرة كي الخدّام تاعو ثاني يبدلوا زيّهم و يولِيو كيما الخدّام تاع البر. اللي اخرتهم راح تكون على حساب اعمالهم. بولس يفخر بالصعوبات اللي يعاني فيها¹⁶نزيد نقول لكم: واحد ما يظن باللي راني جاهل. و الا اقبلوني كي واحد جاهل, باه نفخر انا ثاني شوية. ¹⁷الشيء اللي نقول فيه هنا ما نقولوش حساب الرب, بالصح نقول فيه كلام تاع واحد جاهل تجرأ و بدى يزوخ. ¹⁸مادام كاين ياسر اللي يفخروا بالامور تاع البشر. مالا حتى انا ثاني نفخر.¹⁹انتوما تستحملوا الناس الجهلاء بقلب واسع, على خاطر انتم بعقولكم! ²⁰انتم تستحملوا: كان واحد حقركم! كان واحد كلالكم حقكم! كان واحد نهبكم! كان واحد تكبر عليكم! كان واحد ضربكم على وجوهكم! ²¹حشومة: كيفاه كنّا ضعفاء! بالصح الشيء اللي يقدر يزوخ بيه اي واحد, نقول كيما واحد جاهل: حتى انا نقدر نزوخ بيه.²²هما عبرانيين؟ انا ثاني. هما من بني اسرائيل؟ انا ثاني. هما من سلالة ابراهيم؟ انا ثاني. ²³همّا الخدام تاع المسيح؟ كي المهبول نقول, انا خير منهم: كان في التعب تعبت اكثر منهم, كان في الضرب تضربت اكثر منهم, كان في لحباس تحبست اكثر منهم, و كان في الموت وصلت للموت قداه من مرة.²⁴على يد ليهود سوطوني على ظهري خمسة مرات ربعين جلدة غير مرة واحدة تسعة وثلاثين ضربة. ²⁵ضربوني ثلاثة مرات بالعصى, مرة رجموني, تكسر بيّا البابور ثلاثة مرات, ليلة و نهار و انا في قلب لبحر. ²⁶في كل مرة نسافر, هاذا خطر الويدان, و هاذا خطر السراقين, وتهديد من اهلي لحمي و دمي, تهديد من البرانية, خطر في لمدينة, و خطر في البر, و خطر في لبحر, و خطر من اللي حاسبين ارواحهم خاوة بالكذب.²⁷في التعب و في لمقاسية, نبات قاعد مرّات و مرّات, في الجوع و العطش, في الصيام دايما, في البرد و العرى. ²⁸زيد على هاذا الكل: الشيء اللي نقاسي فيه كل يوم متوله بالكنايس الكل. ²⁹شكون اللي يضعف و انا ما نكونش معاه؟ و شكون اللي يطيح و انا ما يحرقنيش عليه قلبي؟³⁰اذا كان لازم نفخر, راح نفخر بالضعف تاعي. ³¹الله بو ربنا يسوع المسيح, يتبارك على الدوام, هو اللي عالم بيّا اني ما نكذبش.³²في دمشق, و الوالي الحارث اللي كان ملك على دمشق عطى امر باه يحطو العسة في لمدينة و يحكموني, ³³بالصح هربت هبطوني في زنبيل من الطاقة في السور تاع لمدينة, و منعت من شرو.

Chapter 12

¹ما يليقش بيّا نفخر. نهدر ضرك على لمنامات اللي عطاهالي الرب و الاعلانات تاعو. ²نعرف واحد الراجل مومن بالمسيح قبل ربعطاش ن سنة. طلع للسماء الثالثة. كان بالبدن؟ ما نعرف, كان من غير بدن؟ ما نعرف. الله هو اللي يعلم.³و نعرف هاذا الراجل ـ كان في لبدن و الا خرج من لبدن تاعو؟ ما نعرف. الله هو اللي يعلم ـ ⁴انو الله طلعو للفردوس, و سمع كلام ما يقدر حتى بشر ينطق بيه, و ما يجوزش لحتى واحد يتكلم بيه. ⁵من هاذي الجيهة نفخر. بالصح من جيهة نفسي ما نفخر غير بالضعفات تاعي.⁶حتى كان حبيت نفخر ما نكونش جاهل, على خاطر نقول في الحق. بالصح ما نحبش نهدر عليه باه واحد ما يظن فيّا حاجة اكثر من الشيء اللي يشوفو و يسمعو مني. ⁷و حتى باه ما نتنفخش و نتكبر من الجاه تاع الشيء اللي شفتو, صابتني شوكة في البدن تاعي, تقول عليها رسول من عند الشيطان يضربني باه ما نتكبرش.⁸و صليت لله ثلاثة مرات باه يرفعها عليّا. ⁹قالي: "نعمتي تكفيك, في ضعفك تظهر قوتي كاملة فيك". مالا انا نفخر راضي فرحان بالضعف تاعي, حتى تضللني القوة تاع المسيح. ¹⁰على هاذيك انا نفرح بالضعفات و الاهانات و الضيقات و الاضطهادات و الصعوبات على جال المسيح. على خاطر في الوقت اللي نكون فيه ضعيف انا قاوي. العلامات تاع الرسول¹¹وليت كي الجاهل, و انتوما اللي حتمتوا عليّا! كان من المفروض انتوما اللي تشكروني, على خاطر ما ينقصني حتى شيء على الرسل لخرين, رغم اللي ما نسوى شيء. ¹²العلامات تاع الرسول بينتها في وسطكم بالصبر, و بالايات و العجايب و المعجزات. ¹³وش الحاجة اللي خصتكم على بقية الكنايس, كي ما ثقلتش عليكم؟ سامحوني هنا ظلمتكم!¹⁴انا مستعد باه نزيد نجي عندكم هاذي ثالث مرة و ما نثقلش عليكم. على خاطر انا نحوس عليكم انتم ما نحوسش على مالكم. مش لولاد اللي يخبيو لوالديهم, بالصح الوالدين هما اللي يذخروا لولادهم. ¹⁵اما انا نمد لكم كل اللي عندي و انا راضي فرحان, تجي منها على قد ما تكثر محبتي ليكم تنقص محبتكم انتوما لياّ!¹⁶نعم. انا ما ثقلتش عليكم, بالصح هل كنت حيلي معاكم و مكّار! ¹⁷هل طمعت فيكم وحكمت من عندكم حاجة مع الناس اللي بعثهتم؟ ¹⁸طلبت من تيطس و بعث معاه هاذاك الاخ. طمع فيكم تيطس؟ ياخي مشينا بروح واحد؟ و طريق واحدة بالذات؟¹⁹و الا حاسبين نلوموا عليكم؟ قدام الله في المسيح نهدروا. بالصح كل شيء يا لحباب باه انتم تتبناو.²⁰على خاطر نخاف لا نجيكم و ما نلقاكمش كيما تمنيت, و انتم ما تلقاونيش كيما تمنيتو. نخاف يكون بيناتكم خصام و حسد و سخط و انقسام و مذمة و نميمة و تكبر و تشويش. ²¹نخاف كي نجي مرة اخرى بيناتكم يذلني الله عندكم, و نبكي على ياسر منكم اللي غلطوا من قبل و ما تابوش على النجاسة و على الزنا و الدعارة اللي داروها.

Chapter 13

¹هاذي المرة الثالثة اللي راح نجيكم. "على فم زوز شهود و الا ثلاثة تثبت الشهادة". ²قلت قبل, و قلت كي كنت حاضر معاكم المرة الثانية, و انا اليوم غايب, نكتب للناس اللي غلطوا قبل, و للخرين الكل: اذا كان زدت جيت ثاني راني ما نشفقش.³مادام تطلبوا في دليل باللي المسيح هو اللي يتكلم فيّا, المسيح مش ضعيف بالصح قوي فيكم. ⁴حتى و ان كان تصلب بالضعف تاعو على الصليب, بالصح هو حي بالقوة تاع الله. حتى احنا ضعفاء فيه, بالصح بالقوة تاع الله راح نحياو من جيهتكم.⁵جربوا شوفوا ارواحكم, اذا انتم في الايمان؟ جربوا ارواحكم. و الا ما تعرفوش ارواحكم, و بالي يسوع المسيح هو اللي ساكن فيكم, غير اذا كنتوا مرفوضين؟ ⁶بالصح نتمنى تكونوا عارفين باللي احنا ماناش مرفوضين.⁷و ندعي الله باه ما تديروش حاجة مش مليحة, مش على جالنا احنا باه نبانو ناجحين, بالصح باه انتوما تعملوا الصلاح, و احنا نكونوا كي الموفوضين. ⁸على خاطر ما نقدروش نديروا حاجة ضد الحق, بالصح نخدمو على جال الحق.⁹نفرحوا كي نكونوا احنا ضعاف و انتم اقوياء. و هاذا اللي نطلبوا من عند الله: تكونوا كاملين. ¹⁰نكتب اكم هنا و انا غايب, باه ما نكونش صعيب معاكم و انا حاضر, بالسلطان اللي مد هولي الرب باه تتبناو مش باه تتهدموا. تحية الختام¹¹اخر حاجة يا خاوتي كونوا فرحانين. كونوا كاملين. كونوا متشجعين. اهتموا اهتمام واحد. عيشوا بالسلام, و الاله تاع السلام و لمحبة يكون معاكم. ¹²سلموا على بعضاكم ببوسة مقدسة.¹³جميع القديسين يسلموا عليكم. ¹⁴النعمة تاع ربنا يسوع المسيح, و لمحبة تاع الله, و الشركة تاع الروح القدس تكون معاكم الكل. امين.

Hebrews

Chapter 1

¹الله, بعد ما كلم جدودنا قبل بالانبياء, و ثاني بطرق اخرى ياسر, ²كلمنا احنا اليوم في هذا الحين لخر بولدو, اللي جعلو وارث لكل شيء, ³و اللي بيه ثاني كوّن العالمين, اللي هو بهاوة الجاه تاعو, و التصويرة تاعو هو بالذات, لحوايج الكل هازها بكلمة قدرتو, بعدما دارلنا هو بذاتو تطهير لذنوبنا, قعد على يمين العظيم الجاه في لعلالي,⁴و لى عظيم اكثر خلاص من كل الملايكات على قد ما ورث اسم خير منهم. ⁵على خاطر لشكون من لملايكات قال الله: "انت وليدي, انا ليوم ولدتك"؟ و ثاني: "انا نكون باباه, و هو يكون ولدي"؟⁶و كي بعث ولدو البدري للدنيا قال ثاني: "كل ملايكات الله تسجد ليه". ⁷و قال على لملايكات: "الي صنع ملايكاتو من الريح, و خدامو من لهيب النار".⁸بالصح على الابن قال: " عرشك يا الله يدوم على دهر الدهور. و صولجان العدل صولجان ملكك. ⁹تحب الحق, و تكره الباطل. على هاذيك مسحك الله بزيت الفرحة اكثر من كل صحابك".¹⁰و" انت يا ربي من لول خلاص درت لرض, و السماوات عملتها بيديك. ¹¹هي تفنى وانت تدوم, كلها ترشى كي الجرود, ¹²و كيما لغطاء كي تطبقها تتبدل. و انت هو هو, وسنينك ما تفناش".¹³و زيد لشكون من لملايكات ربي عمرو قال: " اقعد على يميني حتى نحط عديانك تحت رجليك"؟ ¹⁴ياخي كلهم ارواح خدّامة مبعوثة باه تخدم الناس اللي راح يورثوا الخلاص!.

Chapter 2

¹على هاذيك لازم علينا نكونوا متولهين اكثر للشيء اللي سمعناه باه ما يفوتش علينا,²على خاطر لكلام اللي قالوه لملايكات ثبّت, و كل من تعدى عليه و عصاه تحاسب عليه حساب حقاني, ³كيفاه مالا نمنعوا احنا كان سبّلنا في خلاص كيما هذا؟ ثبتو ربي بذاتو في لول, و زادوا ثبتوه الناس اللي سمعوه, ⁴و حتى الله كان شاهد معاهم بآيات و عجايب ومعجزات ياسر و مواهب من الروح القدس, يوزعها كيما يحب هو. يسوع يشابه لخاوتو⁵على خاطر العالم تاع المستقبل اللي نهدروا عليه ماهوش راح يكون خاضع للملايكات. ⁶و كاين واحد الشاهد في الكتب المقدسة يقول: "واش يكون الانسان حتى تذكرو؟ و الا واش يكون ابن الانسان حتى تسال عليه؟⁷نقصت من قيمتو اقل من الملايكات مدة قليلة. و من يعد كللتو بالجاه و الكرامة, ⁸و حطيت كل شيء تحت رجليه". و اذا كان الله حطلو كل شيء تحت السلطان تاعو ما خلاش حاجة ما هيش خاضعة ليه. بالصح في هذا الزمان ما نشوفوش باللي كل شيء خاضع ليه.⁹بالصح هاذاك اللي قيمتو هبطت شوية على لملايكات, نقصد يسوع, نشوفوه مكلل بالجاه و الكرامة, على خاطر استحمل لوجاع تاع الموت, و ذاق الموت على جال كل واحد بالنعمة تاع الله. ¹⁰على خاطر بيه اللي يليق يكمل رايس خلاصهم بالاوجاع, اللي كل شيء ليه هو و بيه هو, و هو اللي يجيب اولاد ياسر للجاه.¹¹على خاطر اللي تقدس و اللي يتقدس الكل ليهم اصل واحد, هاذي هي السبة اللي على جالها ما يحشمش بيهم و يسميهم خاوة, ¹²كي قال: "نخبر خاوتي على اسمك, و في وسط لكنيسية نسبحلك".¹³و قال ثاني: "انا متوكل على الله". و ثاني: "راني انا والاولاد اللي عطاهم لي الله". ¹⁴و على خاطر لولاد متشاركين في الدم و اللحم تشارك هو ثاني معاهم في الطبيعة تاعهم, باه الموت يفني هاذاك اللي عندو السلطان على الموت, اللي هو ابليس, ¹⁵و يحرر هاذوك اللي كانوا طول حياتهم عايشين في العبودية على خاطر خايفين من الموت.¹⁶على خاطر ما جاش باه يحكم لملايكات, بالصح جاء باه يحكم ذرية براهيم. ¹⁷و على هاذا كان لازم يكون كيما خاوتو في كل شيء, باه يكون رحيم, و رايس تاع كهنة امين في كل واش يخص الله حتى يكفر على الذنوب تاع الشعب. ¹⁸على خاطر كيما هو تعذب و جرب كل شيء يقدر يعاون الناس المتعذبين.

Chapter 3

¹مالا يا خاوتي القديسين لمشاركين في اللمة تاع الله, شوفوا ليسوع المسيح رسول اعترافنا و رايس الكهنة تاعنا, ²كيفاه كان مولى امانة للي خايرو, كيما كان موسى ثاني مولى امانة على جميع بيت الله. ³بالصح يسوع يستاهل جاه اكثر من تاع موسى, كيما الجاه اللي يديه الواحد اللي يبني الدار اكثر من جاه الدار في ذاتها. ⁴على خاطر كل بيت كاين شكون بناه, و اللي بنا كل شيء هو الله.⁵موسى كان مولى امانة على جميع بيت الله على خاطر كان يخدم و يشهد على الشيء الجاي اللي راح يبينو الله. ⁶اما المسيح هو مولى امانة على خاطر هو ابن الله في بيت الله. و احنا همّا البيت تاعو اذا كان حكمنا بثقة في الرجاء و فخرة ما تتزعزعش حتى للاخر. التحذير من عدم الايمان⁷على هاذيك كيما يقول الروح القدس: "اليوم, اذا كان سمعتوا صوتو, ⁸ما تقسِيوْش قلوبكم, كيما درتوا نهار العصيان, نهار المحنة في الصحراء⁹وين جربوني جدودكم. جربوني وشافوا اعمالي مدة ربعين سنة. ¹⁰على هاذيك غضبت على الجيل تاعهم, و قلت: ديما كاين الكفر ف قلوبهم, و عمرهم ما عرفوا طريقي. ¹¹و حلفت عليهم باليمين وقت الغُش: باه مايدخلوش في لهناء تاعي".¹²اتولهوا يا خاوتي, ما يكونش بينكم اللي قلبو معمر بالشر و بالكفر واللي يبعد على الله الحي. ¹³بالصح كل يوم شجعوا بعضاكم, ما دامنا مازلنا نقولوا اليوم, باه ما تغركمش المعصية و تقسي قلوبكم.¹⁴على خاطر ولينا متشاركين مع المسيح, اذا كان حكمنا حتى للاخر في الثقة تاع لمرة لولى, ¹⁵كيما يقول لكتاب: " اليوم, اذا كان سمعتوا صوتو, ما تقسِيوْش قلوبكم. كيما درتوا نهار المحنة".¹⁶و شكون همّا اللي عصاوه بعدما سمعوا صوتو؟ مش هاذوك الكل اللي خرج بيهم موسى من مصر؟ ¹⁷و على من غضب الله مدة ربعين سنة؟ مش على هاذوك اللي داروا المعصية, حتى طاحوا في الصحراء ميتين؟ ¹⁸و على من حلف باليمين: "ما يدخلوش في لهناء تاعو", غير على هاذوك اللي ما حبوش يطيعوا؟ ¹⁹و نشوفوا باللي ما قدروش يدخلوا على خاطر ما عندهمش ايمان.

Chapter 4

¹وحتى اذا كان الوعد باه ندخلوا للراحة تاع الله مازال قايم هكذاك و نخافوا لا نلقاو رواحنا تحرمنا منو! ²على خاطر احنا ثاني سمعنا لبشارة كيما سمعوها همّا, بالصح لكلام اللي سمعوه ما نفع فيهم والو. على خاطر ما كانش ايمان في الناس اللي سمعوه.³اما احنا المومنين راح ندخلوا في الراحة تاع الله, كيما قال: "حتى حلفت عليهم باليمين وقت الغُش باه ما يدخلوش للراحة تاعي" رغم اللي لعمال الكل كمْلت من الوقت اللي بدات فيه الدنيا. ⁴و قال هذا لكلام كي تكلم على سابع يوم: "وريَّحْ الله من جميع اعمالو في سابع يوم". ⁵و ثاني قال: "ما يدخلوش في الراحة تاعي".⁶و اذا كان الناس اللي سمعوا لبشارة في لول ما دخلوش على جال العصيان تاعهم, كاين ناس واحد اخرين راح يدخلولها. ⁷على هاذيك يرجع الله ويعمل يوم كي يقول على لسان داود: "اليوم" بعد هذا الزمان كامل, كيما قال: "اليوم, اذا كان سمعتوا صوتو, ما تقسِيوْش قلوبكم".⁸على خاطر لو كان جا يشوع رتحهم ما يزيدش يهدر على نهار واحد اخر. ⁹مالا ما زالت كاينة راحة لشعب الله! ¹⁰على خاطر اللي يدخل في الراحة تاع الله يرتاح هو ثاني من اعمالو, كيما ريَّح الله من اعمالو. ¹¹مالا خلي نديروا مجهودنا باه ندخلوا في هاذيك الراحة, باه واحد ما يطيح في عصيان كيما هاذاك بالذات.¹²على خاطر كلمة ربي حية و قادرة في فعالها و امضى من كل سيف بجيهتين, و تدخل في لعماق لمفرق النفس والروح ولمفاصل و حتى للمخ تاع لعظام, وتميز افكار القلب و نيتو. ¹³و ما كاين حتى مخلوق يخفى عليه, كل شيء عريان و مكشوف قدامو اللي امرنا بيديه. يسوع المسيح هو اعظم رايس كهنة¹⁴و على خاطر عندنا رايس تاع كهنة عظيم عدى في السماوات, يسوع ابن الله, نبقاو حاكمين في الايمان تاعنا. ¹⁵على خاطر رايس الكهنة تاعنا ماهوش عاجز باه يحن على ضعفنا, هو تجرب في كل شيء كيما احنا بالذات بالصح هو بلا معصية. ¹⁶خلونا تقدموا للعرش تاع النعمة بكل ثقة باه ننالوا رحمة و نلقاو نعمة تعاوننا وقت اللي نحتاجولها.

Chapter 5

¹و كل رايس تاع كهنة يدِيوه من بين الناس و يحطوه يقدم خدمة للناس في الامور اللي تخص الله, باه يقدم قربان و ذبايح يكفر بيها على الذنوب, ²و يكون قادر باه يرفق بالجاهلين و بالضالين, على خاطر هو ثاني عندو ضعوفات كيما لخرين. ³و على هاذا الشيء ملزم يمد كفارة على روحو هوثاني كيما يمد كفارة على الشعب .⁴و واحد ما يقدر يحط روحو بروحو في هاذي الخدمة, غير اذا كان دعاه الله كيما هارون. ⁵هكذاك ثاني المسيح ما اداش الجاه هو لروحو باه يولي رايس تاع كهنة, بالصح الله هو اللي قالو: "انت ولدي, انا اليوم ولدتك".⁶كيما يقول ثاني في موضع واحد اخر: "انت كاهن على طول الزمان في مرتبة ملكي صادق".⁷و هو اللي كان في ايام حياتو البشرية يرفع في الصلاوات والدعاء و يعيط بالدموع لله القادر باه يمنعو من الموت, و استجاب لو على جال التقوى تاعو, ⁸حتى وهو ابن تعلم الطاعة بالشيء اللي توجع بيه.⁹و كي وصل لدرجة الكمال ولى سبب خلاص ما يفناش للناس اللي يطيعوه, ¹⁰مرَّسم من عند الله كاهن على مرتبة ملكي صادق. التحذير من الارتداد ¹¹و عندنا كلام ياسر من جيهة هذا الموضوع, بالصح التفسير تاعو صعيب باه نهدروه, على خاطر وليتو ثقال باه تسمعوا.¹²على حساب المدة انتوما كان من المفروض تكونوا معلمين بالصح راكم مازلتوا تحتاجوا لشكون يعلمكم الاركان لولى تاع اقوال الله, و وليتوا محتاجين للحليب, مش للماكلة القاوية. ¹³على خاطر كل واحد مازال يشرب في لحليب ماعندوش خبرة في كلام البر على خاطرو مازال طفل صغير, ¹⁴اما الماكلة القاوية للناس البالغين, اللي دربوا الحواس تاعهم باه يعرفوا كيفاه يميزوا بين الخير و الشر.

Chapter 6

¹على هاذيك احنا رانا ماشيين للقدام للكمال وما نرجعوش للكلام على الاركا ن لولى اللي قايمة على ساس التوبة من الاعمال الميتة, و الايمان بالله, ²و المعمودية, و لحطان تاع ليدين, و قيامة الموتى, و لحساب الابدي, ³و هذا الشيء اللي رايحيين نديروه بإذن الله.⁴على خاطر الناس اللي فات منهم تفتحت البصيرة تاعهم, و ذاقوا الموهبة الفوقانية, ولاو شركاء مع الروح القدس, ⁵و ذاقوا كلمة الله الصالحة و المعجزات تاع الدنيا لخرى اللي جاية, ⁶و من بعد طاحوا, ماهوش ممكن يتجددوا بالتوبة مرة اخرى, على خاطر بالخسارة تاعهم يزيدوا يصلبوا ابن الله و يحَّشموا بيه.⁷و كل ارض روَات قداه من مرة من الماء تاع النو اللي صب عليها, و مدت زرع صالح للناس اللي فلحوها, تنال براكة من عند الله. ⁸بالصح اذا كان خرجّت غير الشوك و الحسك, تكون محقورة و تلحقها دعاوي الشر, و تكون اخرتها للنار تاكلها.⁹حتى واذا كنا نتكلموا كلام كيما هاذا يا لخاوة, احنا متيقنين من جيهتكم باللي عندكم امور على الخلاص تاعكم خير ياسر من غيرها. ¹⁰على خاطر الله ماهوش ظالم حتى ينسى واش درتوا و اعمال لمحبة اللي بينتوها على جال اسمو, وقت اللي خدمتوا الخاوة القديسين و مازلتوا تخدموا فيهم.¹¹بالصح احنا نتمناو باه كل واحد فيكم يبين هذا الحماس حتى للآخر, ¹²حتى ن يتحقق الرجاء تاعكم. باه ما تفشلوش و ديروا كيما هاذوك اللي امنوا وصبروا حتى نالوا الوعود تاع الله. وعد الله الصادق¹³نهار اللي الله وعد براهيم, ماكانش حتى واحد اعظم من هو, ولّى حلف بروحو هو بالذات, ¹⁴و قال: "راح نباركك بالبركة و نكثْرك ياسر خلاص". ¹⁵و هكا صبر براهيم و نال الوعد من عند ربي.¹⁶و الناس يحلفوا بالشيء اللي اعظم منهم, و الحلف هو اللي يثبت اقوالهم و هو اللي يفض كل عركة بيناتهم. ¹⁷هكذاك الله كي حب يبين للي راح ينالوا الوعد تاعو باللي هو صادق باه يوفي الشيء اللي وعد بيه, ثبتو كي حلف, ¹⁸و كان لنا الوعد و العاهد في زوز ما يتبدلوش, و عمرو الله ما يكذب فيهم, الشيء اللي يشجعنا ياسر, احنا اللي حاكمين في الله على جال الرجاء اللي دارهولنا.¹⁹هذا الرجاء اللي هو لنفوسنا كيما المرسى الآمن و الثابت, اللي يدخل لداخل خلاص وراء الحجاب, ²⁰وين دخل يسوع قبلنا و على جالنا, و ولّي رايس تاع كهنة بمرتبة ملكي صادق على طول الزمان.

Chapter 7

¹كان ملكي صادق, الملك تاع ساليم, و كاهن لله العالي, كي عاد ابراهيم راجع بعدما غلب الملوك و كسر شوكتهم, عرّضلو ملكي صادق و تلاقى بيه و باركو, ²و مدلو ابراهيم لعشور من كل حاجة. و المعنى تاع اسمو من لول "ملك العدل", و ثاني "ملك ساليم" يعني "ملك السلام" ³و هو لا عندو لا أب و لا أم, و لا جدود, ولا بدية أيام و لا آخرة حياة, بالصح مشابه لابن الله بالذات. يبقى كاهن على طول الزمان.⁴شوفوا قداه الجاه تاعو حتى ن ابراهيم وهو الرايس تاع الجدود الكل مدلو لعشور من خيار لغنم اللي عندو! ⁵بالصح الكهنة اللي من بني لاوي تطلب منهم الشريعة باه يدِيوْ لعشور من عند الشعب, يعني من عند خاوتهم, حتى و لو كانوا من ذرية ابراهيم. ⁶و ملكي صادق ما كانش من بني لاوي بالصح حكم لعشور على ابراهيم وباركو و هو اللي ادا الوعد من عند الله في ذاتو!⁷و هاذي حاجة ما فيهاش هدرة: لكبير هو اللي يبارك الصغير, ⁸و الناس اللي اداو لعشور هما ناس فانيين, و اما هاذاك يشهد عليه لكتاب باللي راه حي. ⁹و نقدر نقول: باللي حتى لاوي اللي هو يدي لعشور تاع الشعب هو ثاني مد لعشور تاعو مع ابراهيم. ¹⁰على خاطر كان في صلب باباه ابراهيم نهار اللي جا ملكي صادق وقابلو. الرب يسوع و ملكي صادق¹¹لو كان جا الكهنوت تاع لاوي كامل - و هو الساس تاع الشريعة عند الشعب - ما كانش لازم يقوم كاهن واحد اخر على مرتبة ملكي صادق؟ و ما قالش على مرتبة هارون. ¹²على خاطر اذا كان تبدل الكهنوت, تولي حتى الشريعة تتبدل ثاني.¹³و هاذا اللي قاعدين نهدروا عليه راه من عشيرة واحدة اخرى عمرو ما واحد منها خدم في المذبح. ¹⁴و الشيء اللي ظاهر باللي ربنا جا من عشيرة يهوذا, اللي عمرو موسى ما قال حاجة عليها من جيهة الكهنوت.¹⁵و الحاجة اللي تزيد تبين اكثر باللي ظهر كاهن واحد آخر كيما ظهر ملكي صادق, ¹⁶و مش كيما تطلب الشريعة من جيهة النسب, بالصح عل ساس قوة لحياة اللي ما تفناش. ¹⁷على خاطر يشهد عليه لكتاب ويقول: "انت كاهن على طول الزمان على مرتبة ملكي صادق".¹⁸و هكا تبطل لوصية تاع قبل على جال ضعفها و قلة فايدتها, ¹⁹على خاطر شريعة موسى ما وَصْلتش الناس للكمال. و جاء في عوضها رجاء خير منها اللي بيه نتقربوا لله.²⁰و هاذا الشيء ماتمش بلا ما يحلف عليه الله باليمين, ²¹الكهنة اللاويين ولاو كهنة بلا أي يمين, و اما يسوع ولى كاهن و حلفلو الله باليمين و قال: "حلف الرب و عمرو ما يندم, راك كاهن على طول الزمان على مرتبة ملكي صادق".²²و هكا ولى يسوع ضامن لعاهد خير من لعاهد لول. ²³و هاذوك الكهنة كثروا ياسر خلاص على خاطر كل مرة يموتوا و يجيو وراهم وحايد اخرين, ²⁴اما يسوع على خاطر يبقى حي طول الزمان, عندو كهنوت ما يفناش.²⁵و هو قادر باه يخلص للتمام الناس اللي يتقربوا بيه لله, و هو حي ديما في كل حين باه يشفع فيهم. ²⁶على خاطر كان لازم لنا رايس تاع كهنة كيما هذا. قدوس بلا شر و بلا عيب, فْصَلْ روحو على المذنبين و طلع في العالي اعلى من السماوات.²⁷اللي ماهوش محتاج باه كل يوم يقدم ذبايح على ذنوبو هو و من بعد على ذنوب الشعب كيما رياس الكهنة. على خاطر هو دار هاذا الشيء مرة واحدة, كي قدم روحو ذبيحة. ²⁸على خاطر الشريعة تنَصب ناس ضعاف همّا رياس الكهنة. اما الكلمة تاع الحلف باليمين تنَصب ابنا كامل على طول الدهر.

Chapter 8

¹اما راس الكلام كامل هو: باللي عندنا رايس تاع كهنة بهاذا الجاه كامل, قاعد على يمين عرش العظيم الجاه في السماوات, ²يخدم في قدس لقداس تاع الله و في الخيمة تاع الصح اللي نصبها الله مش اللي نصبها العبد.³على خاطر كل رايس تاع كهنة يتحط باه يقدم ذبايح و قرابين. و هو ثاني لازم يكون عندو واش يقدم لله. ⁴و لو كان جا يسوع في الارض مايكونش كاهن, على خاطر كاين الكهنة اللي يديروا هاذا الشيء وعلى حساب الشريعة, ⁵و همّا يورولنا المثال للشيء اللي كاين في السماوات, كيما موسى نهار اللي جاء ينصب الخيمة, وحى ليه الله و قالو: "اعمل كل شيء كيما المثال اللي وريتهولك الفوق في الجبل".⁶بالصح المسيح نال خدمة خير ياسر على قد ما هو وسيط لعاهد اعظم من العاهد لول, على خاطر تثبت على ساس وعود خير وخير. ⁷على خاطر لو كان جا العاهد لول بلا عيب, ما كانش لازم يكون عاهد واحد اخر.⁸و الله يلوم في شعبو و يقول لهم: "راح تجي ايامات, نعاهد فيها بني اسراييل و بني يهوذا بعاهد جديد. ⁹مش كيما العاهد اللي عملتوا مع جدودهم نهار حكمتهم من ايديهم و خرجتهم من ارض مصر, و كي ما كانوش ثابتين على عهدي, انا سيّبتهم يقول الله.¹⁰على خاطر هاذا هو العاهد اللي نعاهد بيه بني اسرائيل في ليامات الجاية , يقول الله: نجعل الشريعة تاعي في روسهم, ونكتبها على قلوبهم, وانا نكون لهم الها, و همّا يكونوا ليا شعب.¹¹و واحد ما يعلّم صاحبو و واحد ما يقول لخوه: اَعرف ربي, على خاطر كلهم راح يعرفوني من الصغير للكبير. ¹²راح نغفر لهم ذنوبهم, و ما نزيدش نذكر معاصيهم و اثامهم.¹³و اذا كان قال: "جديد", معناها العاهد لول ولى قديم, و الشيء اللي يقدام و يعَّجز تسمى قرب يفض.

Chapter 9

¹و زيد العاهد لول كان عندو ثاني شعاير دينية و قدس ارضي, ²على خاطر كاين البيت لول منصوب اللي يسميوه: "القدس", اللي كانت فيه لمنارة و المايدة و الخبز اللي يقدموه.³و وراء الحجاب الثاني بيت واحد اخر يسميوه: "قدس لقداس", ⁴فيه مبخرة تاع ذهب, و ثابوت العاهد اللي مرصع بالذهب من كل جيهة, و في وسطو ماعون تاع ذهب حاطين فيه المن, و فيه ثاني لعصا تاع هارون اللي خرجت لورق, و فيه اللوحات تاع الشريعة في زوز, ⁵و فوق منو الملايكة تاع الجاه مظللين بجنحيهم على لغطاء. حوايج ما نقدروش نهدروا عليها الكل بالتفصيل.⁶و كي تعمَل كل شيء كيما هكا ولات الخيمة واجدة, يدخلوا الكهنة للبيت لول في كل وقت, على جال الخدمة اللي يعملوها. ⁷و اما للبيت الثاني اللي لداخل يدخل ليه برك غير رايس الكهنة مرة واحد في العام, و ما يقدرش يدخل غير بالدم اللي يقدموا على روحو هو وعلى ذنوب الشعب اللي داروها و همّا جاهلين بيها,⁸و بهاذا الشيء يبين لْنا الروح القدس باللي الطريق لقدس لقداس ما زالت ماهيش باينة, ⁹و هاذا الترتيب يرمز للوقت الحالي, و مادام البيت لول مازال قايم, اللي فيه يذبحوا الذبايح و يقدموا القربان, و حتى هكذا و ما تخليش الكاهن كامل, ¹⁰على خاطر هي شعاير تخص لبدن و خاصة برك بالماكلة والشراب وكل انواع لوضوء, محطوطة حتى ن يجي الوقت اللي يتعدل فيه كل شيء. المسيح هو الوسيط تاع العاهد الجديد¹¹بالصح المسيح, و هو رايس الكهنة اللي جاء و جاب معاه الخيرات اللي راح تكون في المستقبل, و عدى في خيمة اعظم و اكمل من الخيمة لولى, خيمة ماهيش مخدومة باليد, اللي ماهيش من هاذي الدنيا, ¹²و ما دخلش بدم عتارس و عجول, بالصح دخل بدمو هو, دخل مرة واحدة لقدس لقداس, و فدانا بواحد الفداء لا يفنى لا يزول.¹³على خاطر اذا كان الدم تاع لعجول ولعتارس ورماد تاع عجلة كي يترش على المنجوسين, يقدس و يطهر لبدن, ¹⁴قداه مالا يكون الدم تاع المسيح, اللي بروح ما يفناش قدم نفسو لله قربان ما فيه حتى حاجة تعيبو, قادر يطهر قلوبنا من لعمال الميتة باه نعبدوا الله الحي! ¹⁵و على جال هاذا هو الوسيط تاع العاهد الجديد, باه الناس اللي دعاهم ربي ينالوا الوعد تاع الورث الدايم, على خاطر الموت تاعو كان كفارة على الذنوب اللي صرات وقت العاهد لول.¹⁶و كي تعود كاينة وصية, لازم بيان يثبت باللي مولاها توفى. ¹⁷على خاطر لوصية تثبت غير على الموتى, و كي يكون مولى لوصية حي تولي ماعندها حتى مفعول.¹⁸و العاهد لول ما تخصصش بلا دم, ¹⁹على خاطر موسى بعد ما كلم الشعب كامل بالوصايا الكل اللي في شرع الله, هز الدم تاع العجول و العتارس, و خلطهم بالماء و صوف احمر و نبات الزوفا, و رش على لكتاب في ذاتو و على الشعب الكل, ²⁰و قال: "هاذا هو الدم تاع العاهد اللي وصاكم بيه الله".²¹و البيت و المواعن تاع الخدمة الكل رشهم ثاني بالدم. ²²وكل حاجة تقريب تتطهر بالدم على حساب الشرع تاع الله, و بلا ما يسيح الدم ما تكونش مغفرة للذنوب!²³و كان يلزم على هاذي لحوايج اللي تشابه للحوايج اللي في السماء تتطهر كيما هكا, و اما لحوايج اللي في السماوات صح, لازمها تتطهر بذبايح خير من هاذي. ²⁴على خاطر المسيح ما دخلش لقداس مخدومة باليد و تشابه برك لهاذيك تاع الصح, بالصح هو دخل للسماء بالذات, باه يوقف اليوم في حضرة الله على جالنا.²⁵و هو ما يقدمش نفسو في كل مرة, كيما يعمل رايس الكهنة كي يدخل لقدس لقداس كل عام بالصح بالدم تاع واحد اخر. ²⁶على خاطر هاذاك كان لازم يتوجع و يعاود يتوجع قداه من مرة من اللي بدات الدنيا, بالصح اليوم ظهر مرة واحدة في كمال الدهر باه يبْطل المعصية بذبيحة نفسو هو.²⁷و كيما جعل الله للناس يموتوا مرة واحدة و من بعد يجي يوم لحساب, ²⁸هكا ثاني المسيح مات مرة واحدة باه ينحي الذنوب على ناس ياسر, و راح يزيد يظهر مرة اخرى مش على جال الذنوب بالصح على جال الخلاص للناس اللي يستناو فيه.

Chapter 10

¹و على خاطر الشريعة ما هيش هي الصورة بذاتها تاع هاذي لحوايج هي ظل برك للخيرات اللي جاية, و الذبايح اللي يذبحوها في كل عام لله ما تجعلهمش كاملين. ²و لو كان جعلتهم كاملين كانوا يحبسوا ومابقاوْش يذبحوا, على خاطر اللي يعبدوا الله كان تنقاو مرة واحدة يروح عليهم الشعور بالمعصية. ³بالصح هاذيك الذبايح كل عام تزيد تفكرهم بذنوبهم. ⁴على خاطر الدم تاع الثيران و تاع لعتارس ما ينحيش المعصية.⁵على هاذيك كي جا المسيح للدنيا قال لله: "ما طلبت لا ذبيحة و لا قربان, بالصح وجدّت ليا بدن انسان. ⁶لا ترضيك ذبيحة المعصية و لا الذبيحة المحروقة بالنار. ⁷وليت قلت: "انا نجي, في لكتاب تقال عليا. ندير مشيئتك يا الله اللي تكتبت عليا".⁸على خاطر قال قبل: "لا حبيت ذبيحة و لا قربان و لا ذبيحة معصية ترضيك". هاذي الكل تتقدم كيما يقول الشرَع. ⁹و من بعد زاد قال: "انا نجي باه ندير مشيئتك اللتي تكتبت عليا يا الله". و هكا يتنحى الترتيب لول و يثبت الثاني. ¹⁰و هاذي هي المشيئة اللي تقدسنا بالبدن تاع يسوع المسيح اللي قدموا مرة واحدة.¹¹و كل كاهن يخدم و يقدم في هاذيك الذبايح بالذات كل يوم على الدوام, هاذي الذبايح اللي ما تقدرش تنحي منا الذنوب. ¹²بالصح المسيح بعد ما قدّم ذبيحة واحدة فْريدة كفارة على الذنوب الكل, و من بعد جلس على يمين الله, ¹³حتى ن يجي النهار اللي عديانوا الكل يتحطوا تحت رجليه. ¹⁴على خاطر بذبيحة واحدة جعل الناس اللي قدّسهم كاملين بالتمام.¹⁵و حتى الروح القدس ثاني يشهد لنا. بعد ما قال قبل: ¹⁶"هاذا هو العاهد اللي نعاهدهم بيه في ليامات الجاية, يقول الرب, نحط الشرع تاعي في قلوبهم و نكتبه في عقولهم,¹⁷و منّا و جاي ما نزيدش نذكر ذنوبهم ومعاصيهم". ¹⁸على خاطر كي يكون السماح على هذا الكل ما لازمش يكون قربان نقدموه كفارة على ذنوبنا. دعوة للثقة¹⁹و احنا عندنا اليوم هاذي الثقة باللي نقدروا ندخلوا ل "قدس لقداس" بالدم تاع يسوع, ²⁰طريق حي جديد فتحو بالحجاب, اللي هو الجسد تاعو, ²¹و عندنا اليوم كاهن عظيم الجاه قايم على بيت الله, ²²نتقدموا بقلب صافي وايمان صادق, نطهروا قلوبنا من النية اللي ما هيش مليحة, ونغسلوا اجسادنا بماء طاهر نقي .²³و نَحكموا في رجانا اللي ثابت فيه, على خاطر اللي وعدنا مولى امانة. ²⁴و نحْرسوا على بعضانا في المحبة وعمال الخير, ²⁵و ما نخلِوْش لجتماع تاعنا كيما العادة تاع واحد الناس, بالصح ديما نشجعوا بعضانا, على قد ما نشوفوا هاذاك النهار قاعد يقرب.²⁶و اذا كان خايرنا باه نغلطوا بالعاني بعدما عرفنا الحق, ما بقاتش حتى ذبيحة تنفع للذنوب, ²⁷بالصح يَخَوف لقْضاء تاع الله, و النار اللي راح تاكل العاصيين.²⁸اللي يخالف الشريعة تاع موسى و يشهدوا عليه زوز شهود والا ثلاثة كان يتقتل بلا شفقة ولا رحمة. ²⁹مالا كيفاه يكون لعذاب للي حاسب روحو قادر يحط ابن الله تحت رجليه, و يقول على الدم اللي نتقدسوا بيه باللي ناجس, ويستهزى بروح النعمة؟³⁰نعرفوا شكون اللي قال: "انا اللي نفدي الثار, وانا اللي نجازي, يقول الرب". و ثاني يقول: "ربي يحاسب شعبوا". ³¹و يا ويل اللي يطيح في يدين الله الحي!³²بالصح اتفكروا ليامات الفايتة اللي بعدما تنورتوا فيها زدتوا صبرتوا واستحملتوا محاين كبّار. ³³من جيهة جاتكم لمحاين و لمعايرة و من جيهة اخرى وليتوا شركاء مع اللي صرالهم كيما انتوما. ³⁴غاضكم الحال عليا انا ثاني كي عدت في الحبس, و قبلتوا و انتوما فرحانين كي سلبولكم اموالكم, عارفين في قلوبكم باللي عندكم مال لا يفنى لا يزول محفوظ ليكم في السماوات.³⁵مالا ما تفرطوش في الثقة تاعكم اللي عندها اجر كبير. ³⁶على خاطر تحتاجوا للصبر باه نهار اللي تعملوا واش يحب ربي تنالوا الوعد تاعو. ³⁷على خاطر غير شوية برك "و اللي جاي يجي و ما يبطاش".³⁸اما البار يحيا بالايمان, و اذا كان راح ارتد ما نرضاش عليه". ³⁹اما احنا ماناش من الناس اللي يرجعوا للهلاك, احنا من اهل الايمان اللي يسلك النفس.

Chapter 11

¹اما ليمان هو الثقة في الشيء اللي نستناو فيه و نصدقوا امور ما تتشافش. ²وبيه هو اللي شهد الله لناس زمان. ³بالايمان نعرفوا باللي ربي خلق الدنيا بكلمة من عندو, و خرج لنا حوايج نشوفوها من حوايج ما نشوفوهاش.⁴بالايمان ذبح هابيل ذبيحة لله خير من ذبيحة قايين. و بالايمان شهد عليه ربي باللي راه بار من لبرار, و رضى عليه. و حتى لو كان مات مازال ليمان تاعو يهدر!⁵بالايمان رفع الله اخنوخ بلا ما يموت, و واحد ما زاد شافو على خاطر ربي رفعو عندو. وشهد عليه لكتاب باللي قبل ما يرفعو الله عندو كان راضي عليه. ⁶على خاطر بلا ايمان ما نقدروش نرضيو الله, اللي يجي عند الله لازم قبل يامن باللي راه موجود, و باللي يكافي الناس اللي يطلبوه.⁷بالايمان نوح نهار اللي وحى ليه الله على امور راح تصرى خاف, و بنى فلوكة باه يمنع عايلتو, و جاء لهلاك للعالم الكل, اما هو ورث البر اللي كان الثمرة تاع الايمان.⁸بالايمان ابراهيم نهار اللي دعاه الله باه يخرج من ارضو اللي كان راح يورثها, خرج و هو ما علابالوش وين يروح. ⁹و تغرب في لرض للي وعدو بيها الله تقول عليه في الغربة, و سكن في القيطون مع اسحاق و يعقوب الشركاء تاعو في العاهد تاع الله بالذات. ¹⁰على خاطر كان يرجى في مدينة مبنية على الساس اللي ربي هو صانعها و بانيها.¹¹و بالايمان حتى سارة, وهي العاقرة و زاد فاتها لعمر, جعلها تهز بالكرش و تولد, على خاطر عرفت باللي هاذاك اللي وعد صادق. ¹²و جابت من واحد قرب يموت, ذرية قد نجوم السماء, و قد الرمل اللي في شط لبحر من كثرتها ما تتحسبش.¹³و كلهم ماتوا و هما في الايمان, و ما نالوش لمور اللي وعد بيها الله, بالصح شافوها من بعيد و صدقوها و حياوها, و استعرفوا باللي راهم غرباء و ما همش دايمين في الدنيا. ¹⁴و اللي يقولوا كيما هكا يبينوا باللي راهم طالبين وطن.¹⁵و لو كان جاو يهدروا على لبلاد اللي خرجوا منها, كانت عندهم الفرصة باه يرجعولها. ¹⁶بالصح همّا يرجاو وطن اخر خير وخير, وطن سماوي. على هذا الشيء الله ما يحشمش بيهم كي يكون هو الاله تاعهم. و هو اللي وجّد لهم مدينة.¹⁷بالايمان قدم ابراهيم وليدو لفريد اسحاق ذبيحة نهار اللي جربو الله. قدم هاذاك اللي اعطاه الله العاهد, ¹⁸اللي قال عليه: "من اسحاق يكون ليك نسل". ¹⁹على خاطر عارف باللي الله قادر يعاود يحييه من بين الموتى, و على هذا رجع ليه وليدو اسحاق, و هذا الشيء فيه معنى.²⁰بالايمان اسحاق بارك يعقوب و عيسو من جوايه ياسر. ²¹و بالايمان يعقوب قبل ما يموت بارك ولاد يوسف في زوز كل واحد وحدو, و سجد لله و هو متكي على العكاز تاعو. ²²و بالايمان يوسف و هو قاعد يموت ذكر خروج بني اسرائيل من ارض مصر و وصاهم باه يهزوا لعظام تاعو معاهم.²³و بالايمان موسى, بعد ما ولد خزنوه والديه ثلاثة شهر, على خاطر شافوه طفل مليح, و ما خافوش من امر السلطان. ²⁴و موسى كي كبر ما حبش يتسمى ولد بنت فرعون, ²⁵وخاير يكون في الذل مع شعب الله و ما يكونش في المتعة اللي مادومش تاع المعصية, ²⁶عندو هو العار تاع المسيح اغنى من كنوز مصر, على خاطر كان يشوف في الاجر اللي يسنى فيه.²⁷و بالايمان خلى مصر وما كانش خايف من السلطان لا يغضب عليه, و عقد العزم و ثبت روحو, تقول عليه كان يشوف في حوايج ما تشوفهاش العين. ²⁸بالايمان دار الفصح و رش الدم باه كي يعدي ملاك الموت اللي يهلك كل بدري, ما يمس حتى واحد من بني اسرائيل.²⁹بالايمان عداو في لبحر تقول عليه بر, و كي حبوا المصريين يلحوقهم غرقوا. ³⁰بالايمان طاحت لسوار تاع اريحا بعد ما طافوا عليها سبعة ايام. ³¹بالايمان منعت راحاب الزانية من لهلاك اللي لحق المذنبين, كي ضيفت عندها الجواسيس في زوز.³²واش نزيد نقول ثاني؟ ما يكفيش الوقت كان خبرتكم على جدعون, و باراق, و شمشون, و يفتاح, و داود, و صموئيل, و لنبياء, ³³اللي بالايمان قهروا مماليك, داروا العدل, و نالوا وعود الله, و سدوا للصيودة فوامهم, ³⁴طفاو قوة النار, و منعوا من السيف, و تقووا من الضعف, و ولاو في الحرب ابطال, و غلبوا جيوش البرانية.³⁵نساء رجعوا اللي ماتولهم بالقيامة. و اخرين تعذبوا و ما رضاوش يمنْعوا ارواحهم على خاطر حابين ينالوا قيامة اخرى خير. ³⁶و اخرين قاساو العار و الجلد, و سلاسل وحباس, ³⁷ترجموا, قصوهم بالمنشار, نحاو لهم روسهم تشردوا في البلدان هاربين في جلود لغنم ولمعيز محرومين مقهورين مظلومين, ³⁸هاذي الدنيا ما تستاهلش وحايد كيما هما. هاملين في الصحاري و في الجبال ولمغاغر و الكيفان.³⁹هاذوك الكل مشهود ليهم بالايمان, ما نالوش العاهد, ⁴⁰على خاطر وجّد لنا احنا ما خير, و راد الله باه ما يتكملوش غير بينا.

Chapter 12

¹و احنا اليوم على خاطر هاذي السحابة لكبيرة تاع الشهود دايرة بينا, ما لازم علينا غير نطرحوا كل ثقل, و كل معصية لاسقة فينا, و نجريو في الميدان تاع الجهاد اللي يستنى فينا بالصبر, ²نشوفوا لرايس ايماننا و مكملو يسوع, اللي استحمل الصليب ماهموش العار على جال الفرحة اللي تستنى فيه و جلس على يمين عرش الله. ³تفكروا في هذا اللي استحمل من المذنبين عداوة كيما هاذي باه ما تملوش وتفشلوش.⁴ما زال ما قاومتوش حتى ن يسيح الدم وانتوما تجاهدوا في المعصية, ⁵و بلاك نسيتوا لكلام اللي قلناهولكم تقول عليكم اولادنا: "يا ولدي, ما تحقرش ضربة ربي, و ما تفشلش اذا كان عزْرّك. ⁶على خاطر اللي يحبو ربي يربيه, و يجلد اللي راضي عليه".⁷استحملوا التأديب على خاطر ربي يعامل فيكم كيما ولادو. و كاش ما كاين ابن ما يربيهش باباه؟ ⁸بالصح اذا ما كانش عندكم قسمة في التأديب اللي هو غير للولاد, مالا انتوما ولاد زنى ما كمش ولادو صح.⁹واذا كان والدينا تاع الدنيا يربونا, و نهابوا منهم. مايكونش اولى بينا نخضعوا لبابانا في الروح, باه ننالوا لحياة؟ ¹⁰هاذوك كانوا يربيو فينا ساعة ساعة و كيما يحبوا همّا, اما الله يأدبنا لمصلحتنا, باه نشاركوه في القداسة تاعو. ¹¹بالصح التأديب الكل في ساعتو يحزّن ما يفرّحش. بالصح في لخر يخرج للناس اللي عاناو منو ثمار الصلاح و لهناء.¹²على هاذيك زيْروا يديكم المرخوفة وركايبكم الضعيفة, ¹³و اعملوا لرجليكم طرق مقدودة, باه العايب ما يكْوَعش بالصح يبرى. عندكم لا ترفضوا الله.¹⁴تبعوا السلام مع الناس الكل, و عيشوا حياة القداسة اللي بلا بيها واحد ما يقدر يشوف ربي. ¹⁵عسوا ارواحكم باه واحد منكم ما يخيب من نعمة الله. عندكم لا ينبت فيكم عرق تاع مرارة يجيب التقلاق و يتنجسوا بيه ناس ياسر. ¹⁶و ما يكونش فيكم واحد زاني و الا سفيه كيما عيسو اللي باع حقو في الورثة على جال كرشو. ¹⁷و راكم عارفين من بعد كي حب يورث البرَكة خاب, و ما لقاش كيفاه يتوب, رغم اللي طلبها و هو يبكي بالدموع.¹⁸على خاطر انتوما ما جيتوش لجبل تاع الصح شاعل بالنار, و ضبابة و ظلمة و ريح قاوية. ¹⁹و صوت بوق و صوت هدرة, الناس اللي سمعوه طلبوا ما يزيد لهم حتى كلمة اخرى, ²⁰على خاطر ما قدروش يستحملوا واش طلب منهم: "و حتى الحيوان اللي يمس الجبل, يترجم الا يتقتل بالسهم". ²¹و كان هاذاك المنظر مرعب يخوف حتى قال موسى: "راني خايف نترعد".²²بالصح انتوما قربتوا من جبل صهيون, و من مدينة الله الحي, اورشليم السماوية والاف لملايكات في محفل كبير, ²³قربتوا من كنيسية لبكار المكتوبين في السماوات, و لله ديان العالمين, قربتوا من لرواح تاع لبرار لكاملين, ²⁴و قربتوا للوسيط تاع العاهد الجديد, يسوع, قربتوا من دم مرشوش كلامو فصيح اكثر من دم هابيل.²⁵عندكم لا ترفضوا المتحدث. اذا كان اللي رفضوا المتحدث بكلام الوحي في لرض ما منعوش من العقاب, كيفاه مالا نمنعوا احنا كان رفضنا المتحدث اللي من السماء! ²⁶اللي صوته زعزع لرض في هاذاك الوقت. اما اليوم وعد و قال: "مرة اخرى راح نزيد نزلزل مش لرض برك حتى السماء ثاني".²⁷و كي قال: "مرة اخرى", دليل باللي لحوايج المخلوقة تزعزع و تفني و تبقى لحوايج اللي ما تتزعزعش. ²⁸نكونوا شاكرين ديما على خاطر نلنا ملكوت ما يتزعزعش, بالشكر نعبدوا الله عبادة يرضى عليها بخشوع و تقوى. ²⁹على خاطر: "الهنا نار آكلة".

Chapter 13

¹حافظوا على لمحبة تاع الخاوة بيناتكم. ²ما تنساوش تضَيفوا البرّانية الغرباء, على خاطر بيها اللي ناس بكري ضَيفوا الملايكات بلا ما يعرفوا.³اذكروا المحبوسين كي شغل راكم محبوسين معاهم, و اذكروا المتعذبين كي شغل راكم انتوما اللي قاعدين تتعذبوا. ⁴الزواج لازم يكون مكرْم عند كل واحد, و فراش الزواج لازم يكون طاهر. اما الناس الفاسقين و اللي يزنيو يحاسبهم الله.⁵اجعلوا سيرتكم بعيدة على محبة المال. كونوا قانعين بالشيء اللي عندكم, على خاطر قال: "ما نسبلش فيك و ما نخليكش", ⁶حتى نقدروا نقولوا بكل ثقة: "ربي معايا ما عندي من واش نخاف. واش يقدر يديري بنادم؟".⁷اذكروا المعلمين تاعكم اللي كلموكم بالكلمة تاع الله. ادِيوْ العبرة من حياتهم و موتهم و تمثلوا بالايمان تاعهم. ⁸يسوع المسيح هو هو البارح و اليوم و على طول الزمان.⁹ما تبعوش الظلال و ما تروحوش ورى تعاليم اخرى غريبة, على خاطر خير لكم تتقوى قلوبكم بالنعمة, مش بالماكلة اللي ما عندها ماتنفع. ¹⁰عندنا مذبح ما يحقش للناس اللي يخدموا في خيمة العاهد باه ياكلوا منو. ¹¹على خاطر الحيوانات اللي يدخل رايس الكهنة بالدم تاعها لقدس لقداس كفارة على المعصية تاكلها النار لبرى خارج المحل.¹²على هاذيك حتى يسوع ثاني, باه يقدس الشعب بالدم تاعو, تعذب و مات لبرى خارج الباب تاع لمدينة. ¹³هيا مالا نخرجوا ليه, لبرى من المحل و نهزوا العار تاعو. ¹⁴على خاطر ما عندناش مدينة دايمة لهنا, رانا نسعاو للمدينة تاع المستقبل.¹⁵هيا نتقدموا لله بالمسيح ذبيحة الحمد في كل وقت, نقولوا كلام ثمار الفم المستعرف باسمو. ¹⁶ما تنساوش اعمال الخير و الصدقة, على خاطر هاذي الذبايح يرضى بيها ربي. ¹⁷اسمعوا كلام المرشدين تاعكم وطيعوهم, على خاطر يسهروا على نفوسكم تقول يحاسبهم الله عليها, يخدموا فيكم و هما فرحانين, موش بالحسرة , على خاطر هذا ما ينفعكمش.¹⁸صلوا لنا, احنا واثقين و ضميرنا مرتاح, و ماذابينا نحسنوا في كل شيء. ¹⁹بالصح نطلب منكم و نحاولكم اكثر تصلِيوْ باه يرجعني ربي ليكم في اقرب وقت. صلاة²⁰و الالاه تاع السلام اللي قوّم راعي الخرفان العظيم الجاه, ربنا يسوع من بين الموتى, بدم العاهد اللي ما يفناش, ²¹يجعلكم كاملين في كل حاجة صالحة باه تتمموا واش يحب الله, و يعمل فيكم الشيء اللي يرضيه بيسوع المسيح ليه المجد على طول الزمانات الكل. امين. تحية ختامية²²نطلب منكم يا خاوتي توسعوا بالكم و تستحملوا كلام الوعظ, على خاطر كتبت لكم بكلام قليل. ²³نخبركم باللي خونا تيموتاوس خرج من لحبس, و كي يجيني عن قريب نجيو عندكم انا وياه.²⁴سلموا على جميع المعلمين تاعكم و على كل القديسين. ناس ايطاليا يبلغولكم السلام. ²⁵النعمة تكون معاكم الكل. امين. -للعبرانيين, تكتبت من ايطاليا, على يد تيموتاوس-

Revelation

Chapter 1

¹الاعلان تاع يسوع المسيح اللي وهبو الله باه يكشف لعبادو الشيء اللي راح يصرى عن قريب, بعث الملاك تاعو باه يخبر بيه العبد تاعو يوحنا, ²اللي شهد بكلمة الله و بشهادة يسوع المسيح بالشيء اللي شافو كامل. ³يا سعد الناس اللي يقراو و اللي يسمعوا اقوال النبوة, و يطبقوا الشيء المكتوب فيها, على خاطر قرّب الوقت. سلام للكنايس السبعة⁴من عند يوحنا, للكنايس السبعة اللي ف اسيا: عليكم النعمة و السلام من الكاين و اللي كان و اللي جاي, و من عند السبعة ارواح اللي قدام العرش تاعو, ⁵و من عند يسوع المسيح الشاهد الامين, البكر اللي حيا من بين الموتى, و رايس ملوك لرض: اللي حبنا, و غسلنا من ذنوبنا بالدم تاعو, ⁶و جعلنا ملوك و كهنة لله باباه, ليه الجاه و القدرة على دوام الدهور. امين.⁷ها هو جاي فوق السحاب, و راح يشوفوه الناس الكل, و حتى الناس اللي طعنوه, و تنوح عليه القبايل الكل تاع الدنيا. نعم امين. ⁸"انا هو الالف و الياء, البدية و التمام" يقول الرب الكاين و اللي كان و اللي جاي, القادر على كل شيء. واحد يشابه لابن الانسان⁹انا يوحنا خوكم و شريككم ف المحنة و ف الملكوت تاع يسوع المسيح و الصبر تاعو. كنت ف الجزيرة اللي يسموها بطمس منفي على جال كلمة الله, و على جال الشهادة اللي شهدت بيها ليسوع المسيح. ¹⁰كنت ف الروح ف يوم الرب, و سمعت من ورايا صوت عظيم تقول عليه صوت تاع بوق ¹¹يقول: "انا هو الالف و الياء. لول و لاخر. و الشيء اللي راح تشوفوا اكتبوا ف كتاب و ابعثو للكنايس ف سبعة اللي ف اسيا: لكنيسية افسس, و لكنيسية سميرنا, و لكنيسية برغامس, و لكنيسية تياتيرا, و لكنيسية ساردس, و لكنيسية فيلادلفيا, و لكنيسية لاودكية".¹²تلفتت باه نشوف الصوت اللي هدر معايا. و كي تلفتت شفت سبع مناير تاع ذهب, ¹³و ف وسطهم كاين واحد يشابه لابن الانسان, لابس ثوب ابيض يوصل حتى لرجليه, و محزم صدرو بحزام تاع ذهب.¹⁴اما راسو وشعرو كانوا ابيض من الصوف تقول عليهم ثلج, و عينيه كيما اللهيب تاع النار. ¹⁵و رجليه يشابهوا للنحاس الصافي, تقول عليهم مصقولين ف السامور. و صوتو تقول عليه صوت الماء لغزير. ¹⁶و ف ايدو ليمنى سبعة كواكب, و من فمو يخرج سيف مسنون من لجيهتين, و وجهو كي الشمس كي تعود ضاوية ف عز قوتها.¹⁷كي شفتو طحت عند رجليه تقول عليّا ميت, حط عليّا ايدو ليمنى و قال لي: "ما تخافش, انا هو لول و لاخر, ¹⁸و الحي. كنت ميت, و انا اليوم حي على دوام الدهور! امين. و بيدي مفاتح الموت و الهاوية.¹⁹اكتب الشيء اللي شفتو, و الشيء اللي كاين ضرك و الشيء اللي راح يكون من بعد. ²⁰السر تاع الكواكب السبعة اللي شفتها على ايدي ليمنى, و السر تاع مناير الذهب السبعة: الكواكب السبعة هي الملايكة تاع الكنايس السبعة, المناير السبعة اللي شفتها هي الكنايس السبعة".

Chapter 2

¹اكتب للملاك تاع كنيسية افسس: "هاذا واش يقول اللي حاكم الكواكب ف سبعة في ايدو ليمنى, اللي يمشي وسط مناير الذهب ف سبعة: ²انا عارف لعمال و التعب و الصبر تاعك, و عارف انك ما تقدرش تستحمل شر لشرار, و تحققت من الناس اللي قالوا باللي راهم رسل بالصح ماهمش رسل, و لقيتهم كذّابين.³و استحملت و صبرت, و تعبت على جال اسمي و ما مليتش. ⁴بالصح نلوم عليك ف حاجة: انت خليت محبتك لولى. اتفكر منين طحت و توب, و ارجع للاعمال تاعك لولى, ⁵ما كانش نجي عن قريب و نزحزح لمنارة تاعك من مضربها, لو كان ما تتوبش.⁶بالصح هاذا الشيء اللي يعجبني فيك: انت تكره لعمال تاع النيقولاويين اللي نكرها انا ثاني. ⁷اللي يحب يسمع يسمع واش يقول الروح للكنايس. اللي يغلب راح نعطيه ياكل من شجرة لحياة اللي ف وسط الفردوس تاع الله". ل الكنيسية ف سميرنا⁸و اكتب للملاك ف كنيسية سميرنا: "هاذا واش يقول لول و لاخّر, اللي كان ميت و حيا: ⁹انا عارف اعمالك و محنتك و فقرك بالرغم اللي انت غني. و النفاق تاع الناس اللي يقولوا: همّا يهود بالصح ماهمش يهود, همّا مجمع تاع الشيطان.¹⁰ما تخافش خلاص من لعذاب اللي رايح يعدي عليك. الشيطان راح يدّخل جماعة منكم للحبس باه يجربكم, و تكونوا ف شدّة مدة عشرة ايام. كون امين حتى للموت و راح نعطيك تاج لحياة. ¹¹اللي يحب يسمع يسمع واش يقول الروح للكنايس. اللي يغلب ما يضروش الموت الثاني". ل الكنيسية ف برغامس¹²اكتب للملاك ف كنيسية برغامس: "هاذا واش يقول مول السيف المسنون من الجيهتين: ¹³انا عارف اعمالك, و عارف وين تسكن وين كرسي الشيطان. و انت حاكم ف اسمي, و ما نكرتش الايمان بيّا حتى ف الوقت اللي استشهد فيه الشهيد الامين ليّا اللي تقتل عندكم وين يسكن الشيطان.¹⁴بالصح نلوم عليك ف الحاجة هاذي: عندك ثمة جماعة مازالوا حاكمين ف تعليم بلعام, اللي كان ينصح بالاق باه ينصب شبكة لبني اسرائيل: يخليهم ياكلوا من الذبايح المذبوحة للاصنام, و يزنِيوْ. ¹⁵و عندك ثاني جماعة حاكمين ف التعليم تاع النيقولاويين اللي نبغضو.¹⁶توب ما كانش نجيك عن قريب و نحاربهم بالسيف اللي ف فمي. ¹⁷اللي يحب يسمع يسمع واش يقول الروح للكنايس. اللي يغلب نعطيه ياكل من المن المخبي, و نعطيه حصوة بيضاء, و على الحصوة البيضاء منقوش اسم جديد واحد ما يعرفو غير اللي ينالو". ل الكنيسية ف ثياتيرا¹⁸و اكتب للملاك اللي ف كنيسية ثياتيرا: "هاذا واش يقول ابن الله, اللي عينيه تقول عليهم لهيب نار, و رجليه كيما النحاس المصقول: ¹⁹انا عارف الاعمال تاعك وعارف قداه عندك من محبة و خدمة و ايمان و صبر, و عارف باللي اعمالك التالية اكثر من اعمالك لولى.²⁰بالصح عندي واش نلوم عليك: انت مسيّب لمرى ايزابل اللي حاسبة روحها نبية, تعلّم و تغوي ف عبادي باه يزنيو وياكلوا الذبايح المذبوحة للاوثان. ²¹انا عطيتها مهلة باه تتوب على الزنا تاعها بالصح هي ما حبتش تتوب.²²راح نرميها ف فراش لعذاب, و نرمي اللي قاعدين يزنيو معاها ف ضيقة كبيرة, لو كان ما يتوبوش على اعمالهم. ²³و نقتل اولادها قتل. باه الكنايس الكل تعرف باللي انا هو كاشف النوايا و لقلوب, و نجازي كل واحد منكم على حساب اعمالو.²⁴بالصح نقول لك و للاخرين اللي ف ثياتيرا, انتم اللي لا تبعتوا هاذا التعليم, و لا عرفتوا الشيء اللي يقولوا عليه, اسرار الشيطان: ما نزيديش نثقل عليهم ب حمل اخر, ²⁵بالصح احكموا مليح ف الشيء اللي عندكم حتى نجي.²⁶كل من يغلب و يحافظ على خدمتي حتى للاخر نعطيه سلطان على الامم, ²⁷يرعاهم بعصا تاع حديد, كيما ماعون الفخّار يتكسروا, كيما الشيء اللي نلتو انا من عند بابا. ²⁸و راح نعطيه كوكب الصبح. ²⁹اللي يحب يسمع يسمع واش يقول الروح للكنايس".

Chapter 3

¹و اكتب للملاك اللي ف كنيسية ساردس: "هاذا واش يقول اللي ليه ارواح الله السبعة و ليه لكواكب السبعة: انا عارف اعمالك, مسمي حي بالصح انت ميت. ²اسهر و منّع لقليل تاع لحياة اللي بقالك, قبل ما يخطفو الموت, على خاطر ما لقيتش اعمالك كاملة قدام الله.³اتفكر التعليم كيفاه سمعت بيه و كيفاه قبلت بيه, و اعمل بيه و توب, لو كان ما تسهرش, نجيك كيما السارق, و ما تعرفش الساعة اللي راح نجي فيها. ⁴بالصح عندك جماعة قليلة ف ساردس ما نجسوش قشهم, و راح يمشيو معايا ف المحفل تاعي و همّا لابسين لبسة بيضاء على خاطر يستاهلوا.⁵اللي يغلب يلبس اللبسة البيضاء, و ما نمحيش اسمو من كتاب لحياة, و نستعرف بأسمو قدام بابا و قدام الملايكة تاعو. ⁶اللي يحب يسمع يسمع واش يقول الروح للكنايس". ل الكنيسية ف فيلادلفيا⁷و اكتب للملاك اللي ف كنيسية فيلادلفيا: "هاذا واش يقول القدوس الحق, اللي يملك مفاتح داود, اللي كي هو يفتح واحد ما يقدر يقفل, و اللي كي هو يقفل واحد ما يقدر يفتح: ⁸انا عارف اعمالك. انا جعلت قدامك باب مفتوح واحد ما يقدر يقفلو, على خاطر حتى ف ضعف قوتك, حافظت على كلمتي و ما نكرتش اسمي.⁹راح نجعل هاذوك الناس اللي من مجمع الشيطان, اللي يقولوا باللي راهم يهود بالصح ما همش يهود, راهم يكذبوا, راح نخليهم يجيو و يسجدوا قدام رجليك, و يعرفوا باللي انا حبيتك. ¹⁰و على خاطر صبرت كيما وصيتك, و انا ثاني راح نحميك ف ساعة المحنة اللي راح تجي على العالم كامل باه تجرب سكان الارض الكل. ¹¹انا قريب نجي. احكم مليح ف الشيء اللي عندك باه واحد ما يديلك تاجك.¹²اللي يغلب نجعلو عرصة ف الهيكل تاع الهي, و ما يزيدش يخرج لبرى, و ننقش عليه اسم الهي, و اسم مدينة الهي, اورشليم الجديدة النازلة من السماء من عند الهي, و ننقش اسمي الجديد. ¹³اللي يحب يسمع يسمع واش يقول الروح للكنايس". ل الكنيسية ف لاودكية¹⁴و اكتب للملاك اللي ف كنيسية اللاودوكيين: "هاذا واش يقول الامين, الشاهد الامين الصادق, راس خليقة الله: ¹⁵انا عارف اعمالك, انت لا بارد لا سخون, يا ريتك كنت بارد و الا سخون! ¹⁶على خاطر انت ملذلذ, لا بارد و لا سخون, انا راح نردك من فمي.¹⁷على خاطر تقول: انا اني غني و استغنيت, و ما نحتاج حتى شيء, و ما علابالكش باللي انت البائس المسكين الفقير لعريان لعمى. ¹⁸ننصحك تشري من عندي ذهب مصفي بالنار باه تستغنى صح, و تشري من عندي قش ابيض باه تتكسى, و تستر روحك و ما يبانش عارك. و تشري من عندي كحل تكحل بيه عينيك باه تولي تشوف.¹⁹اللي نحبو هاذاك هو اللي نلوم عليه و نربيه. دير قلب و توب. ²⁰انا اني واقف قدام الباب نطبطب. اللي سمع صوتي و حل الباب, ندخل ليه و نتعشى معاه و هو معايا.²¹اللي يغلب راح نعطيه يقعد معايا ف العرش تاعي, كيما غلبت انا و قعدت مع بابا ف العرش تاعو. ²²اللي يحب يسمع يسمع واش يقول الروح للكنايس".

Chapter 4

¹و من بعد شفت لقيت باب محلول ف السما, و الصوت لول اللي سمعتو اللي تقول عليه صوت بوق هدر معايا وقالي: "اطلع هنا باه نوريك الشيء اللي لابد يصير من بعد". ²و ف ساع خطفني الروح, شفت عرش محطوط ف السماء, و على العرش قاعد واحد. ³ف المنظر تقول عليه حجر اليشب و العقيق لحمر, داير بالعرش قوس قزح ف لون الزمرد.⁴و دايرين بالعرش ربعة و عشرين عرش. و على العروش ربعة و عشرين شيخ قاعدين و لابسين كساوي بيُض, و فوق روسهم تيجان ذهب. ⁵و يخرج من وسط العرش اصوات و برق و رعد. و سبعة ضواو شاعلة تقدي قدام العرش. هي ارواح الله السبعة.⁶و قدام العرش بحر تاع قزاز تقول عليه بلور. و ف وسط العرش و دايرة بيه ربعة حيوانات مليانة بالعينين من قدام و من لورى:⁷الحيوان لول يشابه للصيد, و الحيوان الثاني يشابه للعجل, و الحيوان الثالث يشابه وجه الانسان, و الحيوان الرابع يشابه للنسر الطاير. ⁸و لربعة حيوانات لكل واحد منها ستة جنحين, مرصعة بالعينين من داخل و من برى, و ها تحبسش من التسبيح ليل و نهار و هي تقول: "قدوس, قدوس, قدوس, الرب الاله القادر على كل شيء, اللي كان و الكائن و اللي يجي".⁹و ف الوقت اللي الحيوانات نقدم فيه التمجيد و الاكرام و الحمد للقاعد على العرش, الحي على دوام الدهور للابد, ¹⁰الربعة و عشرين شيخ يهَبطوا روسهم قدام المتربع على العرش, و يسجدوا للحي على دوام الدهر للابد, و يطرحوا تيجانهم قدام العرش و همّا يقولوا: ¹¹"يا ربنا و الاهنا, بيك يليق التمجيد و الاكرام و القدرة, على خاطر انت اللي خلقت لحوايج الكل, و هي بمشيئتك تخلقت و توجدت".

Chapter 5

¹و شفت على يمين المتربع على العرش كتاب مكتوب من الجيهتين, مشمّع بسبعة اقفال. ²و شفت ملاك جبّار ينادي بصوت عالي ويقول: "شكون يستاهل يحل هاذا لكتاب و يفك عليه الاقفال؟".³و ما كان حتى واحد قدر يحل لكتاب و لا يشوف فيه لا ف السماء و لا على لرض و لا تحت لرض. ⁴و بكيت بالحريقة على خاطر ما كان حتى واحد يستاهل باه يحل لكتاب و يقراه و لا يشوف فيه. ⁵نطق واحد من الشيوخة و قال لي: "ما تبكيش. او غلب الصيد اللي من عشيرة يهوذا, نسل داود, باه يحل لكتاب و يفك عليه الاقفال السبعة".⁶و شفت و اذا خروف تقول عليه مذبوح ف وسط العرش و الحيوانات ف ربعة و الشيوخة, هاذاك لخروف عندو سبعة قرون و سبعة عينين, هي لرواح تاع الله ف سبعة اللي بعثها للرض كاملة. ⁷جا و هز لكتاب من يمين المتربع على العرش.⁸و كي هز لكتاب سجدوا الحيوانات ف ربعة و الاربعة و عشرين شيخ للخروف, و كل واحد فيهم كانت عندو قيتارة و كاس تاع ذهب معمر بالبخور اللي هي الصلوات تاع القديسين.⁹و همّا يرنموا ف ترنيمة جديدة يقولوا فيها: "انت هو اللي تستاهل تدي لكتاب و تحل الاقفال, على خاطر تذبحت و دمك سال و بدمك شريتنا لله من كل شعب و امة و كل قبيلة و لسان. ¹⁰و جعلت منا ملوك و كهنة لالهنا, باه نكونوا ملوك على لرض".¹¹و شفت و سمعت صوت ملايكة ياسر بلا حساب دايرين بالعرش و الحيوانات و الشيوخ, و كانوا الاف الاف مؤلفة, ¹²و هما ينشدوا باعلى اصواتهم: "يستاهل الخروف المذبوح باه ينال القدرة و الغنى والحكمة و الجبروت و الاكرام و الجاه و البراكة!".¹³و كل خليقة من اللي ف السماء و اللي على لرض و اللي تحت لرض, و اللي ف لبحار, الكون كامل و ما فيه, سمعتها تقول: "البراكة و الاكرام و الجاه و السلطان للمتربع على العرش و للخروف ل ابد الدهور و دوامها". ¹⁴و كانت الحيوانات ف اربعة تقول: "امين" و الشيوخة الاربعة و عشرين ركعوا ساجدين للحي ل ابد الدهور و دوامها.

Chapter 6

¹و شفت لخروف كي فك واحد من الاقفال ف السبعة, سمعت واحد من الحيوانات الاربعة و هو يقول بصوت عظيم تقول عليه رعد: "ارواح تشوف!". ²و شفت حصان ابيض, و كان راكب فوقو واحد هاز قوس, نال تاج, و خرج و هو غالب و باه يغلب.³و كي فك الختم الثاني, سمعت الحيوان الثاني يقول: "ارواح تشوف!". ⁴و شفت حصان اخر احمر خرج, و اللي كان راكب فوقو عندو القدرة باه ينحي السلام من لرض, و يجعل الناس يقتلوا بعضاهم. و نال سيف كبير.⁵ كي فك الختم الثالث, سمعت الحيوان الثالث يقول: "ارواح تشوف!". و كي شفت لقيت حصان اكحل, و راكب فوقو واحد هاز ف يدو ميزان. ⁶و سمعت صوت ف وسط الحيوانات الاربعة يقول: "كيلة القمح بدينار, و ثلاثة كيلات شعير بدينار. اما الزيت و الشراب ما تفسدهمش".⁷و كي فك الختم الرابع, سمعت صوت الحيوان الرابع يقول: "ارواح تشوف!". ⁸و كي شفت لقيت حصان اخضر, و كان فوق منو واحد اسمه الموت, و الهاوية تتبع فيه, و نالوا القدرة على ربع سكان لرض باه يقتلوهم بالسيف و بالجوع و ب الموت و بالوحوش البرية.⁹و كي فك الختم الخامس, شفت تحت المذبح النفوس تاع المذبوحين ف سبيل كلمة الله, و ف سبيل الشهادة اللي شهدوا بيها, ¹⁰و عيطوا بصوت عظيم و قالوا: " وقتاه يا صاحب السيادة القدوس والحق, تقضي و تنتقم لينا على دمنا من الساكنين ف لرض؟" ¹¹و نال كل واحد منهم كسوة بيضاء و طلبوا منهم يرتاحوا زمان قليل حتى يزيدوا يلحقوا خاوتهم و رفاقهم, اللي رايحين يموتوا كيما همّا.¹²و كي فك الختم السادس, شفت و اذا زلزلة كبيرة صرات, و الشمس ولات كحلة كيما لبسة الحزن, و القمرة ولات حمرا كي الدم, ¹³و طاحت نجوم السماء على لرض كيما تطَيح شجرة الكرطوس الحب اليابس اللي فيها وقت اللي تهزها الريح القاوية. ¹⁴و تتلم السماء كي اللفافة, و كل الجبال و الجزر تتزحزح من مضاربها.¹⁵و الملوك تاع لرض و العظماء و الاغنياء و الاقوياء و الزعماء و العبيد و الاحرار كلهم هربوا للغيران و للكيفان تاع الجبال, ¹⁶و همّا يقولوا للجبال و للحجار: "طيحي علينا و خزنينا من وجه المتربع على العرش و من الغضب تاع لخروف, ¹⁷على خاطر حل بينا نهار الغضب العظيم, شكون يقدر يوقف على رجليه؟".

Chapter 7

¹و بعد هاذا شفت اربعة ملايكة واقفين على اطراف لرض ف اربعة, حاكمين الرياح تاع الجوايه ف اربعة باه ما تهبش لاعلى لرض, و لا على لبحر, و لا على الشجر. ²و شفت ملاك اخر جاي من المشرق تاع الشمس و هو هاز الختم تاع الله الحي, و نادى بصوت عظيم على الملايكة ف اربعة, اللي نالوا القدرة باه يضروا لرض و لبحر, ³و قال لهم: "ما تضروا لا لرض و لا لبحر و لا الشجر, حتى نختم العباد تاع الهنا كل واحد فيهم على جبهتو".⁴و سمعت باللي الناس اللي ختم عليهم ف جبهتهم كانوا اربعة و اربعين الف, مختومين من كل عشيرة من عشاير بني اسرائيل: ⁵من عشيرة يهوذا اتناش الف مختوم, و من عشيرة راوبين اثناش الف مختوم, و من عشيرة جاد اثناش الف مختوم. ⁶و من عشيرة اشير اثناش الف مختوم. و من عشيرة نفتالي اثناش الف مختوم. و من عشيرة منسى اثناش الف مختوم.⁷و من عشيرة شمعون اثناش الف مختوم. و من عشيرة لاوي اثناش الف مختوم. و من عشيرة يساكر اثناش الف مختوم. ⁸و من عشيرة زبولون اثناش الف مختوم. و من عشيرة يوسف اثناش الف مختوم, و من عشيرة بنيامين اثناش الف مختوم. ناس ياسر ب القش ابيض⁹و من بعد شفت غاشي كبير واحد ما يقدر يحسبو, من كل الامم و القبايل و الشعوب و اللهجات, واقفين قدام العرش و قدام لخروف, لابسين قش ابيض و هازين ف ايديهم سعف تاع نخل ¹⁰و هما يعيطوا بصوت عظيم و يقولوا: "الخلاص لالهنا المتربع على العرش و للخروف".¹¹و الملايكة الكل كانوا واقفين دايرين بالعرش, و معاهم الشيوخة و الحيوانات ف اربعة, كلهم ركعوا على وجوههم قدام العرش وسجدوا لله ¹²و همّا يقولوا: "امين! لالهنا الحمد و المجد و الحكمة و الشكر و الاكرام و القدرة و القوة على دوام الدهور للابد. امين!".¹³تكلم واحد من الشيوخة و قالي: "هاذوك اللي لابسين لبيض, شكون همّا؟ و منين جاو؟". ¹⁴رديت عليه و قلت: "يا سيدي, انت اعلم". قال لي: "هاذوك همّا اللي منعوا من المحنة لكبيرة, غسلوا قشهم و جعلوه ابيض بالدم تاع لخروف¹⁵على جال هاذا الشيء همّا اليوم قدام العرش تاع الله, ف الهيكل تاعو يحمدوا فيه نهار و ليل, و المتربع على العرش يظللهم و يخيّم عليهم. ¹⁶لا يجوعوا, و لا يعطشوا, و لا تضربهم الشمس و لا تقيسهم سخانة, ¹⁷على خاطر لخروف اللي ف وسط العرش يرعاهم, و يهديهم للينابيع تاع ماء لحياة, و يمسح الله كل دمعة من عينيهم".

Chapter 8

¹و كي فك الختم السابع ساد السكات ف السماء قريب نص ساعة. ²و شفت الملايكة السبعة اللي واقفين قدام الله, و كل واحد منهم عندو بوق.³و جاء ملاك واحد اخر و وقف عند المذبح و كان هاز كانون تاع ذهب, و اعطاوه بخور ياسر باه يقدموا مع الصلوات تاع القديسين الكل على المذبح تاع الذهب اللي قدام العرش. ⁴و طلع دخان لبخور مع الصلوات تاع القديسين من يد الملاك قدام الله. ⁵و من بعد هز الملاك الكانون تاع لبخور و عباه من النار تاع المذبح و صبها على لرض, كي صبها صرات اصوات و رعود و بروق و زلزلة. الابواق السبعة⁶و من بعد هاذوك الملايكة ف سبعة اللي عندهم الابواق وجدوا ارواحهم باه ينفخوا ف الابواق, ⁷و كي نفخ الملاك لول, صب البرد و النار مخلطين بالدم على لرض, و تحرقت بيهم الثلث تاع الشجر, و كل عشبة خضرا.⁸و كي نفخ الملاك الثاني ف البوق اللي عندو, طاح ف لبحر شيء تقول عليه جبل كبير يقدي بالنار, و الثلث تاع لبحر ولى دم, ⁹و ثلث المخلوقات الحية اللي ف لبحر ماتت, و ثلث السفن اللي ف لبحر تكسرت.¹⁰و كي نفخ الملاك الثالث ف البوق اللي عندو, هبط من السماء كوكب كبير يقدي تقول عليه شعلة تاع نار, و طاح فوق الينابيع تاع الماء. ¹¹و اسم هاذاك الكوكب "العلقم". و تحول ثلث الماء لعلقم, و ناس ياسر ماتوا كي شربوا منو على خاطر ولى مرّ.¹²و كي نفخ الملاك الرابع ف البوق اللي عندو, ضرب ثلث الشمس و القمر و ثلث النجوم, حتى ظلام الثلث منها, و النهار و الليل راح ثلث الضوء اللي كان فيهم.¹³و شفت و سمعت ملاك طاير ف وسط السماء و هو ينادي بصوت عظيم و يقول: "يا ويلهم! يا ويلهم! يا ويلهم سكان لرض كي يزيدوا ينفخوا الملايكة الثلاثة لخرين ف الابواق اللي ما زالت!".

Chapter 9

¹و من بعد زاد نفخ الملاك الخامس ف البوق اللي عندو, و شفت واحد الكوكب طاح من السماء على لرض, و كان عندو مفتاح بير الهاوية. ²و كي حل بير الهاوية, طلع دخان من البير تقول دخان تاع سامور كبير ياسر, و تحجبت الشمس و ظلام الحال من هاذاك الدخان.³و من الدخان خرج جراد غطى لرض كاملة, و كانت عندو القدرة يلسع كيما لعقارب تاع لرض. ⁴و ادى الامر باه ما يضرش العشب تاع لرض, و ما يمس حتى شجرة و لا اي نبات اخضر, يضر برك الناس اللي ما عندهمش الختم تاع الله على جبهتهم.⁵و ادى الامر باه ما يقتلهمش بالصح يعذبهم مدة خمسة شهر. و لعذاب تاعو كيما لعذاب تاع العقرب كي تلسع الانسان. ⁶و ف هاذيك ليام يحوسوا الناس على الموت و ما يلقاوهاش, و يتمناو يموتوا بالصح الموت تهرب منهم.⁷و الهيأة تاع الجراد كان تقول عليه خيل واجد باه يدخل للحرب, و فوق روسها حاجة تقول عليها تاج ذهب, و وجهها تقول عليه وجه تاع بشر. ⁸و عندها شعر طويل كي شعر النساء و سنيها تقول عليها سنين الصيودة, ⁹و كان عندها درع كيما الدروع تاع لحديد, و صوت جنحاها تقول عليه الحس تاع مركبات لحديد اللي داخلة تجري للحرب.¹⁰و عندها ذيل كيما تاع لعقارب, فيه اباري, و عندها القدرة باه تاذي الناس مدة خمسة شهر. ¹¹و الملاك تاع الهاوية هو السلطان تاعها, اسمو بالعبرية "ابدون", و يسموه باليونانية "ابوليون". ¹²هاذا الويل لول عدى و مازالوا زوز واحد اخرين.¹³و كي نفخ الملاك السادس ف البوق اللي عندو, سمعت صوت خرج من لقرون الاربعة تاع مذبح الذهب اللي قدام الله, ¹⁴و قال الصوت للملاك السادس اللي عندو البوق: "روح اطلق الملايكة ف اربعة اللي مكتفين ف واد الفرات العظيم". ¹⁵و تفكت السلاسل تاع الملايكة الاربعة اللي واجدين للساعة و للنهار و للشهر و للعام, باه يقتلوا الثلث تاع سكان لرض.¹⁶سمعت باللي جيوش الخيالة كانو ميتين الف الف. ¹⁷و هكا بانت لي الخيل و فرسانها ف الرؤيا, كان عندهم دروع من النار, و من الياقوت لصفر و من الكبريت, و رؤوس الخيل كيما رؤوس الصيودة, و يخرج من افوامها نار و دخان و كبريت.¹⁸و ماتوا ثلث البشر بهاذي الثلاثة حوايج, النار و الدخان و الكبريت اللي خارجة من افوامها, ¹⁹على خاطر كانت قوة الخيل ف افوامها و ف اذيالها, و اذيالها كانت تقول عليها حنوشة , عندها رؤوس تضر بيها الناس.²⁰اما الناس اللي منعوا ما ماتوش بهاذي الضربات, و ما تابوش على افعالهم, و بقاو يسجدوا للشواطن و للاصنام تاع الذهب و الفضة و النحاس و لحجر و اللوح اللي لا تشوف و لا تسمع و لا تمشي, ²¹و لا تابوا على القتيلة و لا على السحر و لا على الزنا و لا على السرقة.

Chapter 10

¹و من بعد شفت ملاك اخر جبار هابط من السماء, لابس سحابة و فوق راسو قوس قزح, و وجهو كيما الشمس, و رجليه كيما زوز عُرص تاع نار, ²و كان هاز ف يدو كتاب صغير مفتوح. حط رجلو ليمنى على لبحر و ليسرى على لرض,³و عيط بصوت عظيم كيما يزأر الصيد. و بعد ما عيط هو تكلمت الرعود السبعة بأصواتها. ⁴و بعد ما تكلمت الرعود السبعة بأصواتها, و كنت راح نكتب بالصح سمعت صوت من السماء يقول لي: "اكتم لكلام اللي تكلمت بيه الرعود السبعة و ما تكتبوش".⁵و الملاك اللي شفتو واقف على لبحر و على لرض, هز يدو للسماء, ⁶و حلف بالحي على دوام الدهور للابد, اللي خلق السماء و ما فيها, و لرض و ما فيها, و لبحر و ما فيه: بالي ما بقاش يزيد يبطى! ⁷غير يجي الوقت اللي ينفخ فيه الملاك السابع ف البوق اللي عندو, يتم سر الله حتى هو, كيما بشّر بيه عبادو الانبياء.⁸و الصوت اللي سمعتو من قبل ف السماء زاد كلمني و قال: "روح هز لكتاب الصغير اللي ف يد الملاك الواقف على لبحر و على لرض". ⁹رحت للملاك و قلت: "اعطيني لكتاب الصغير". قال لي: "هاك هزو و ابلعو راح تلقاه ف جوفك مر, بالصح ف فمك يكون حلو عسل".¹⁰هزيت هاذاك لكتاب الصغير من يد الملاك و بلعتو, و كان ف فمي حلو كي لعسل. و بعد ما بلعتو ولى ف كرشي مر. ¹¹قال لي: "لازم تزيد تتنبأ مرة اخرى على شعوب و امم و لهجات و ملوك ياسر".

Chapter 11

¹و من بعد اعطاني واحد منهم قصبة كيما لعصا, و وقف الملاك و قالي: "نوض و قيس الهيكل تاع الله و المذبح و الناس الساجدين فيه. ²اما الدار اللي ف الهيكل من برى, خلاها ما تقيسهاش, على خاطر هي للامم, و راح يعفسوا على المدينة المقدسة ثنين و اربعين شهر.³و راح نبعث زوز شهود, باه يتنبأوا الف و ميتين و ستين يوم, و همّا لابسين المسوح". ⁴هاذوما الزوز شهود همّا الزوز زيتونات و المنارتين المنصوبين قدام رب لرض. ⁵و كي واحد يحب ياذيهم, تخرج من فمهم نار و تاكل عديانهم. هكا لازم يموت كل من يحب ياذيهم.⁶و عندهم القدرة باه يقفلوا السماء باه ما تصبش النو ف ليامات اللي يتنبؤوا فيها. و عندهم القدرة باه يبدلوا الماء يولي دم, و باه يضربوا لرض بكل انواع المصايب كيما يحبوا همّا. ⁷و كي يكملوا الشهادة تاعهم, يجي الوحش اللي خرج من الهاوية و يدخل معاهم ف حرب و يغلبهم و يقتلهم.⁸و تكون الجثة تاعهم مرمية ف شوارع لمدينة لعظيمة اللي اسمها الروحي سدوم و مصر, المضرب اللي مات فيه ربنا مصلوب. ⁹و يشوفوا ناس ياسر من الشعوب و من لقبايل و اللهجات و الامم الجثث تاعهم مدة ثلاثة ايام و نص, و ما يخليو حتى واحد يدفنهم و يحطهم ف لقبورة.¹⁰و يشمتوا فيهم سكان لرض و يفرحوا, و يبعثوا يهنيو بعضاهم بالهدايا على خاطر هاذوا الانبياء ف زوز عذبوا سكان لرض عذاب شديد. ¹¹وف كمالة الثلاثة ايام و نص, تدخل فيهم لحياة من عند الله, و يوقفوا على رجليهم. و الناس اللي كانوا يشوفوا فيهم خافوا خوف كبير. ¹²و سمعوا صوت عظيم من السماء يقول لهم: "اطلعوا لهنا". و طلعوا للسماء ف السحابة, و كانوا العديان تاعهم يشوفوا فيهم.¹³و ف هاذيك الساعة صرى زلزال كبير, طاح العشر تاع لمدينة, و مات من الناس سبعة الاف بشر, و لخرين الكل خافوا خوف عظيم, و بداو يمجدوا ف اله السماء. ¹⁴هاذا الويل الثاني فات, و راح يجي الويل الثالث من وراه ف ساع.¹⁵و من بعد نفخ الملاك السابع ف البوق اللي عندو, و علات اصوات عظيمة ف السماء تقول: "ولى مُلك العالم لربنا و للمسيح تاعو, و راح يملك لأبد الابدين".¹⁶و الشيوخة الاربعة و العشرين اللي قاعدين على لعروش تاعهم قدام الله, و ركعوا على وجوههم و سجدوا لله, ¹⁷و قالوا: "نشكرك ياربنا الاله القدير على كل شيء, الكاين و اللي كان و اللي راح يجي, على خاطر بينت الجبروت تاعك و ملكت.¹⁸غضبت الامم و جات ساعة الغضب تاعك و ساعة الحكم على الموتى, باه تكافي عبادك الانبياء و القديسين و الناس اللي يخافوا اسمك, الصغار و لكبار, و يهلك الناس اللي كانوا يهلكوا ف لرض".¹⁹و تفتح الهيكل تاع الله ف السماء, و ظهر الثابوت تاع العاهد ف الهيكل, و صرى برق و رعد و اصوات و زلزلة و برد عظيم.

Chapter 12

¹و ظهرت ف السماء معجزة كبيرة: مرى لابسة الشمس, و القمر تحت رجليها, و فوق راسها تاج فيه ثناش ن كوكب, ²و كانت بالكرش و كانت تصيح حكمها لوجاع تاع لولادة.³و ظهرت اية اخرى ف السماء: تنين عظيم احمر, عندو سبعة روس و عشرة قرون, و فوق كل راس تاج. ⁴و بالذيل تاعو كان يجر ثلث نجوم السماء و رماها ف لرض. و وقف التنين قدام لمرى اللي راح تولد, باه كي تولد يبلع ولدها.⁵و ولدت جابت طفل ذكر و هو اللي يحكم ف الامم الكل بعصا تاع حديد. بالصح ولدها تخطف لله و للعرش تاعو, ⁶و لمرى هربت للصحراء, وين وجّد لها الله ملجأ تقعد فيه مدة الف و ميتين و ستين يوم.⁷و صرات حرب ف السماء: بين ميخائيل و الملايكة تاعو و بين التنين, وحاربهم التنين بالملايكة تاعو ⁸بالصح ما قدرش عليهم, و خسروا المكانة تاعهم ف السماء. ⁹و طرحوا التنين العظيم, الحية لقديمة اللي اسمو ابليس و الشيطان, اللي ينشر الضلال ف العالم كامل, طرحوه للرض, هو و الملايكة اللي معاه.¹⁰و سمعت صوت عظيم ف السماء يقول: "اليوم تم النصر و العزة و الملك لالاهنا و السلطان للمسيح تاع الله, على خاطر اللي كان يتهم ف خاوتنا رماوه للرض, اللي كان يشكي بيهم لله نهار و ليل.¹¹غلبوه بالدم تاع لخروف و بالكلمة اللي شهدوا بيها ليه, و ما حبوش يمنعوا حياتهم و واجهوا حتى الموت. ¹²على جال هاذا افرحي يا سماوات و افرحوا يا الساكنين فيها. الويل للبر و للبحر, على خاطر هبط عليهم ابليس و هو غاضب غضب عظيم! على خاطر عارف باللي ايامو قصيرة".¹³و كي شاف التنين روحو باللي تطرح للرض, ولى يضطهد ف لمرى اللي ولدت الطفل الذكر, ¹⁴اما لمرى اعطاوها جنحين تاع نسر عظيم باه تطير للصحراء للمضرب تاعها, وين كانت تكمن من وجه الحية, زمان و زمانين و نص زمان.¹⁵¹⁸و سيبت الحية من فمها ماء يجري كي الواد باه يغَرّق لمرى و يديها. ¹⁶و عاونت لرض لمرى, و حلت فمها و بلعت الواد تاع الماء اللي سيبو التنين من فمو. ¹⁷و غضب التنين من لمرى, و راح باه يحارب الذرية تاعها اللي بقات اللي يطبقوا الوصايا تاع الله, و عندهم شهادة يسوع المسيح.

Chapter 13

¹و من بعد وقفت على شط لبحر, و شفت وحش طالع من لبحر عندو سبعة روس و عشرة قرون, و فوق كل راس منهم تاج, و على الروس تاعو اسم الكفر. ²و الوحش اللي شقتو كان يشابه للنمر, و قوايمو كيما تاع الدب, و فمو كيما فم الصيد. و اعطاه التنين القدرة و العرش تاعو و سلطان واسع.³و شفت كيما واحد من الروس تاعو تقول مذبوح للموت, بالصح الجرح تاعو برى. وتعجبت منو لرض كلها و راحت تتبع ف الوحش, ⁴و سجدوا للتنين اللي اعطى القدرة للوحش, و سجدوا للوحش و قالوا: "شكون كيما الوحش؟ شكون يقدر يحاربو؟".⁵و نال الوحش فم ينطق بكلام التكبر و الكفر على الله, و عندو القدرة باه يخدم مدة اثنين و اربعين شهرا. ⁶و بدى يكفر على الله, و يكفر على اسمو و على مقامو, و على اللي ساكنين ف السماء.⁷و نال القدرة باه يحارب القديسين و يغلبهم, و نال القدرة على كل قبيلة و لغة و امة. ⁸و جميع سكان لرض راح يسجدوا ليه, الناس اللي اساميهم ماهيش مكتوبة من نهار اللي بدات الدنيا ف كتاب حياة لخروف اللي تذبح.⁹اللي يحب يسمع يسمع! ¹⁰اللي تكتب عليه يتساق للاسر, يروح للاسر. و اللي تكتب عليه يتقتل بالسيف, لازم يتقتل بالسيف. هنا الصبر تاع القديسين و الايمان تاعهم. الوحش اللي خارج من لرض¹¹و من بعد شفت وحش اخر طالع من لرض, و كان عندو زوز قرون كيما تاع لخروف, و كان ينطق كيما التنين, ¹²و يمارس القدرة تاع الوحش لول و هو يشوف, و يجعل لرض و سكانها يسجدوا للوحش لول اللي شفى من الجرح القاتل.¹³و يعمل معجزات كبار, و قادر حتى يجعل النار تنزل من السماء على لرض قدام الناس, ¹⁴و يضلل سكان لرض بالايات اللي نال القدرة باه يديرها قدام الوحش, و اعطى امر للناس باه يصنعوا تصويرة للوحش اللي تذبح بالسيف و رغم هاذا عاش.¹⁵و نال القدرة باه يعطي الروح ف التصويرة تاع الوحش, حتى تولي تهدر, و يقتل الناس الكل اللي ما يحبوش يسجدوا للتصويرة تاع الوحش. ¹⁶و يجعل الناس الكل كبار وصغار, اغنياء و فقراء, عبيد و احرار, يعملولهم امارة على ايديهم ليمنى و الا على جبهتهم, ¹⁷و حتى واحد ما يقدر لا يشري و لا يبيع لو كان ما تكونش عندو لمارة تاع الوحش و الا العدد تاع اسمو.¹⁸و هنا الحكمة لازمة! اللي يكون ذكي يحسب العدد تاع اسم الوحش, هو عدد تاع اسم بشر, و العدد تاعو: ستة ميا و ستة و ستين.

Chapter 14

¹و من بعد شفت خروف واقف على جبل صهيون, و معاه مية و اربعة و اربعين الف, و اسم باباه مكتوب على جبهة كل واحد فيهم. ²و سمعت صوت من السماء كيما لهدير تاع المياه الغزيرة و كيما صوت الرعد القاوي. و سمعت صوت كيما صوت انغام يعزفوا فيها على القيتارة.³و هما يرنموا ف ترنيمة جديدة قدام العرش و قدام الحيوانات الاربعة و الشيوخة, و ما قدر حتى واحد يتعلم الترنيمة غير المية و اربعة و اربعين الف المفديين من لرض. ⁴هاذوك همّا اللي ما تنجسوش مع النساء على خاطر طاهرين. هاذوك همّا اللي يتبعوا ف لخروف وين يروح يروحوا. هاذوك اللي فداهم من بين البشر باكورة لله و للخروف. ⁵و ما نطق لسانهم بالكذب, و لا فيهم عيب قدام عرش الله. الثلاثة ملايكة⁶و من بعد شفت ملاك واحد اخر طاير ف السماء و هو هاز بشارة ابدية, راح يبشر بيها سكان لرض من كل امة و قبيلة و لغة و شعب, ⁷و قال بصوت عظيم: "خافوا الله, و مجدوه, على خاطر جات ساعة لحساب, اسجدوا للي خلق السماء و لرض اسجدوا للي خلق لبحر و ينابيع الماء".⁸و من بعد جا وراه ملاك واحد اخر و هو يصيح و يقول: "طاحت! طاحت بابل لمدينة العظيمة, على خاطر شربت جميع الامم من فورة لغضب تاع الزنى اللي زناتو!".⁹و من بعد تبعهم ملاك واحد اخر و هو يقول بصوت عظيم: "اللي يسجد للوحش و للتصويرة تاعو, و يقبل لمارة تاعو على جبهتو والا على يدو, ¹⁰حتى هو راح يشرب من كاس الغضب تاع الله, و يتعذب بالنار و الكبريت ف محضر الملايكة القديسين و ف محضر لخروف.¹¹و يطلع دخان لعذاب تاعهم لابد الابدين, و ما يلقاو راحة لا ليل ولا نهار لكل من يسجد للوحش و للتصويرة تاعو و لكل من يقبل لمارة تاع اسمو". ¹²هنا يبان الصبر تاع القديسين. اللي يحفظوا لوصايا تاع الله و الايمان بيسوع.¹³و سمعت صوت من السماء يقول لي: "اكتب: يا سعد الموتى اللي يموتوا ف الرب من ليوم". "نعم" يقول الروح: "باه يرتاحوا من التعب تاعهم, على خاطر اعمالهم فيها التعب". حصاد لرض¹⁴و من بعد شفت سحابة بيضاء, و على السحابة قاعد واحد يشبه لابن الانسان, فوق راسو تاج تاع ذهب, و ف يدو منجل ماضي. ¹⁵و خرج ملاك اخر من الهيكل, و هو يصرخ بصوت عظيم يهدر مع القاعد فوق السحابة: "ابعث المنجل تاعك و احصد, على خاطر جات ساعة لحصاد, و المحصول تاع لرض يبس". ¹⁶و رمي القاعد على السحابة المنجل تاعو على لرض, و حصد لرض.¹⁷و من بعد خرج ملاك اخر من الهيكل اللي ف السماء, و هو ثاني هاز منجل ماضي. ¹⁸و خرج ملاك اخر من المذبح عندو القدرة على النار, و عيط بصوت عظيم على الملاك اللي عندو المنجل الماضي, و قال: "ابعث المنجل الماضي اللي ف يدك و اقطف لعناقد تاع الدوالي اللي ف لرض, على خاطر لعنب طاب".¹⁹و رمى الملاك المنجل اللي ف يدو على لرض و قطف لعنب اللي ف لرض, و ارماه ف المعصرة تاع الغضب العظيم تاع الله. ²⁰و تعفست المعصرة خارج لمدينة, و خرج منها دم حتى وصل ل اللجام تاع الخيل, مسافة ميتين ميل.

Chapter 15

¹و من بعد زدت شفت معجزة اخرى عظيمة و عجيبة ف السماء: سبعة ملايكة هازين سبعة ضربات و هي اخر الصربات اللي راح تكون على خاطر بيها يتم الغضب تاع الله.²و شفت كيما لبحر تاع قزاز مخلط بالنار, و شفت الناس اللي غلبوا الوحش و التصويرة تاعو و العدد تاع اسمو, شفتهم واقفين على لبحر تاع لقزاز, و كانت عندهم قيتارات تاع الله,³و كانوا يرتلوا ف النشيد تاع موسى عبد الله, و النشيد تاع لخروف و كانوا يقولوا: "اعمالك عظيمة اعمالك عجيبة, يا ربي الاله القادر على كل شيء! طريقك صحيحة و قويمة, يا ملك القديسين! ⁴شكون اللي منك ما يخاف شكون ما يمجد اسمك؟ انت القدوس وحدك, كل الامم تجيك و تسجد بين يديك, على خاطر عدل احكامك ظهر و بان لكل عين".⁵و من بعد تلفتت و شفت الهيكل تاع خيمة الشهادة يتفتح ف السماء, ⁶و خرجوا الملايكة ف سبعة من الهيكل و معاهم الضربات السبعة, و همّا لابسين كتان نقي يلمع, و على صدورهم حزمات تاع ذهب.⁷و واحد من الحيوانات الاربعة مد للملايكة السبعة سبعة كيسان تاع ذهب معمرين بالغضب تاع الله الحي لابد الابدين. ⁸و تملى الهيكل من دخان مجد الله و من القدرة تاعو, و ما كان حتى واحد يقدر يدخل للهيكل حتى يكملوا الملايكة ف السبعة الضربات السبعة.

Chapter 16

¹و سمعت صوت عظيم ف الهيكل يقول للملايكة ف سبعة: "روحوا صبوا كيسان غضب الله على لرض".²راح الملاك لول و صب الكاس اللي ف يدو على لرض, ة ظهرت جراح مقيحة لونها وردي على الناس اللي عندهم لمارة تاع الوحش و اللي يسجدوا للتصويرة تاعو.³و من بعد صب الملاك الثاني الكاس اللي ف يدو على لبحر, تحول الماء تاعو لدم كيما دم الميت. و ماتت كل نفس حية ف لبحر.⁴و من بعد صب الملاك الثالث الكاس اللي ف يدو على الوديان و ينابيع الماء الكل, و لات دم. ⁵و سمعت الملاك تاع الماء يقول: "انت عادل ف احكامك يا القدوس الكائن و اللي يكون. ⁶على خاطر سيحوا دم القديسين و الانبياء, شَرّبتهم الدم. يستاهلوا واش يصرالهم!". ⁷و سمعت واحد اخر من المذبح يقول: "نعم ا الرب الاله القادر على كل شيء! احكامك عدل و حق".⁸و من بعد صب الملاك الرابع الكاس اللي ف يدو على الشمس, و نالت القدرة باه تحرق الناس بالنار, ⁹و تحرقوا الناس بالسخانة القاوية, و ما تابوش و ما مجدوش اسم الله, بالصح سبوا اسم الله اللي عندو السلطان على هاذي الضربات الكل.¹⁰و من بعد صب الملاك الخامس الكاس اللي ف يدو على العرش تاع الوحش, و ظلامت المملكة تاعو ولاو الناس يعضوا ف لسانتهم من لعذاب. ¹¹و ما تابوش على اعمالهم, بالصح سبوا اله السماء من كثرة ما كانت لجراح تاعهم توجع فيهم.¹²و من بعد صب الملاك السادس الكاس اللي ف يدو على نهر الفرات لكبير, و نشف الماء تاعو باه يولي طريق للملوك تاع المشرق. ¹³و شفت ثلاثة ارواح شريرة تخرج من فم التنين, و من فم الوحش, و من فم النبي الكذّاب, تشابه للجران, ¹⁴و هي ارواح تاع شواطن عندها القدرة باه تدير المعجزات, تخرج على الملوك تاع الارض الكل و و تلمهم للحرب ف اليوم العظيم, اليوم تاع الله القادر على كل شيء.¹⁵" انا راح نجي كيما يجي السارق! يا سعد اللي يسهر و يوجد قشو باه ما يمشيش عريان و يشوفوه الناس". ¹⁶و جمعهم الكل ف واحد المضرب اسمو بالعبرية "هرمجدّون".¹⁷و من بعد صب الملاك السابع الكاس تاعو على لهواء, و خرج صوت عظيم من هيكل السماء من العرش يقول: "تم الامر!". ¹⁸و صرات اصوات و رعد و برق. و زلزلة قاوية, عمرها لا صرات زلزلة قاوية كيما هاذي من نهار اللي توْجدوا فيه البشر على لرض, ¹⁹و تقسمت لمدينة العظيمة لثلاثة اقسام, و طاحت المدن تاع العالم, و تذكر الله بابل لقديمة باه يسقيها كاس تغلي بمرارة الغضب تاعو.²⁰و هربت الجزر الكل, وتخبات لجبال. ²¹و صب من السماء برد كبير وثقيل على قد الوزنة طاح على الناس. حتى ولاو يسبوا ف الله على هاذي المصيبة لكبيرة.

Chapter 17

¹و من بعد جا واحد من الملايكة السبعة اللي عندهم الكيسان السبعة, و تكلم معايا و قال لي: "ارواح نوريلك العقاب تاع الزانية العظيمة القايمة على جنب لمياه لكثيرة, ²اللي ملوك لرض زناو معاها, و اللي سكان لرض سكروا من خمر الزنى تاعها".³و داني الروح للصحراء, و ثمة شفت مرى راكبة على وحش احمر مليان بالاسامي تاع الكفر, عندو سبعة روس و عشرة قرون. ⁴و لمرى اللي كانت لابسة الارجوان و القرمز, و متحلية بالذهب و اللولو و الجوهر, وعندها كاس ذهب ف يدها مليان برجاسة الزنا تاعها و نجاستو. ⁵و على جبهتها اسم مكتوب: "سر. بابل العظيمة ام الزواني و رجاسات لرض".⁶و شفت لمرى سكرانة من الدم تاع القديسين ومن الدم تاع شهداء يسوع. و كي شفتها حرت فيها و تعجبت منها ياسر! ⁷و من بعد قال لي الملاك: "علاه تعجبت؟" اانا نقولك سر لمرى و الوحش اللي راكبة عليه اللي عندو سبعة روس و عشرة قرون:⁸الوحش اللي شفتو, كان قبل بالصح ضرك ما عادش كاين, بعد شوية يطلع من لهاوية و يروح للهلاك. و يتعجتوا سكان لرض, اللي اساميهم ماهيش مكتوبة ف كتاب لحياة من اول ما تخلقت الدنيا, كي يشوفوا الوحش اللي كان و من بعد ما عادش كاين, و راح يزيد يظهر.⁹و هنا لابد من الحكمة و الذكاء! السبعة روس هي سبعة جبال قاعدة عليها لمرى. ¹⁰و سبعة ملوك: خمسة طاحوا, و واحد مازال يملك, و لخر ما زال ما جاش. و كي يجي لازم يبقى غير شوية.¹¹و الوحش اللي كان و ما عادش كاين هو ملك ثامن, رغم انو مع السبعة, و يروح للهلاك.¹²و العشرة قرون اللي شفتها هي عشرة ملوك ما زالوا ما ملكوش, بالصح يملكوا غير ساعة واحدة مع الوحش. ¹³و يكون عندهم راي واحد, و يمدوا القدرة و السلطان تاعهم للوحش. ¹⁴هاذوك هما اللي راح يحاربوا لخروف بالصح لخروف يغلبهم, على خاطر هو رب الارباب و ملك الملوك, و الناس اللي معاه مدعوين و مختارين و مومنين".¹⁵و زاد قال لي: "الماء اللي شفتيه وين كانت الزانية قاعدة, هي شعوب و اجناس و امم و لغات.¹⁶و هاذيك العشرة قرون اللي شفتها على الوحش همّا اللي راح يبغضوا الزانية, و يعزلوها و يعروها, و ياكلوا اللحم تاعها و يحرقوها بالنار. ¹⁷على خاطر الله جعل ف قلوبهم باه يديروا امرو, و يتفاهموا باه يمدوا للوحش سلطان ملكهم حتى تكمل اقوال الله.¹⁸و لمرى اللي شفتها هي لمدينة العظيمة اللي تتسلط على ملوك لرض".

Chapter 18

¹و من بعد شفت ملاك واحد اخر هابط من السماء, و عندو قدرة كبيرة. و ضوات لرض من بهاه. ²و عيط بصوت قاوي وقال: "طاحت! طاحت بابل العظيمة! ولات سكنى للشواطن و ملجأ لكل روح شرير, و لكل طير ناجس و مكروه, ³على خاطر جميع الامم شربت من الخمر الزنا تاعها, و ملوك لرض زناو معاها, و تجار لرض استغناو من كثرة النعيم تاعها".⁴و من بعد زدت سمعت صوت اخر من السماء يقول: "اخرجوا منها يا شعبي, باه ما تشاركوش ف ذنوبها, و باه ما تتقاسوش بنكباتها. ⁵على خاطر ذنوبها وصلت للسماء, و ذكر الله الشر تاعها. ⁶ديروا فيها كيما دارت فيكم, و زيدوها قد ما دارت فيكم زوز مرات. ف الكاس اللي شربتهالكم, زيدوها لها اضعاف.⁷على قد ما مجدت روحها و تنعمت, اعطوها لعذاب و الحزن. على خاطر تقول ف قلبها: انا قاعدة هنا ملكة, مانيش ارملة, ما نذوقش الحزن. ⁸على جال هاذا ف نهار واحد تجي ضرباتها: موت و حزن و جوع, و تتحرق بالنار, على خاطر اللي يحاسبها هو الرب الاله القدير.⁹و راح يبكيو و ينوحوا عليها ملوك لرض, اللي زناو و تنعموا معاها, كي يشوفوا دخان لهيبها طالع, ¹⁰واقفين من بعيد خايفين من عذابها, يقولوا: يا ويلها! يا ويلها! لمدينة لعظيمة بابل! لمدينة الجبارة! على خاطر ف ساعة واحدة جا لحساب تاعك.¹¹و يبكيو و ينوحوا عليها تجار لرض, على خاطر واحد ما عاد يشري سلعتهم, ¹²سلعة تاع ذهب و فضة و حجار كريمة و لولو و در و ارجوان و حرير و قرمز, و انواع الطيب و مصنوعات لخشب و النحاس و لحديد و الرخام, ¹³و القرفة و البخور و الطيب و اللبان و الخمر و الزيت و السميد و القمح, و الحيوانات و لغنم و الخيل, و عربات, واجساد عبيد و نفوس بشر.¹⁴راحت عليك الثمار اللي فيها شهوتك, و يروح عليك كل الترف و لبهاء, و ما بقيتيش تشوفيه.¹⁵التجار تاع هاذي لحوايج اللي استغناو منها, واقفين من بعيد خايفين من عذابها, يبكيو و ينوحوا, ¹⁶و يقولوا: يا ويلها! يا ويلها! لمدينة العظيمة اللي كانت تلبس الكتان و الارجوان و القرمز, و تتحلى بالذهب و لحجر الكريم و اللولو! ¹⁷على خاطر ف ساعة واحدة راح هاذاك الغنى كامل. و ريّاس الفلايك, و البحارة و كل من يخدم ف لبحر, وقفوا من بعيد,¹⁸و ولاو يصيحوا و يعيطوا كي شافوا الدخان تاع لهيبها طالع, و هما يقولوا: واش من مدينة عظيمة كيما هاذي؟ ¹⁹و ذراو التراب على روسهم, و بداو يبكيو و ينوحوا و يصيحوا و يقولوا: يا ويلها! يا ويلها! لمدينة لعظيمة اللي فيها استغناو صحاب لفلايك ف لبحر! ف ساعة واحدة راح كل ما فيها! ²⁰افرحي يا سماء, و الرسل و القديسين و الانبياء, على خاطر الله عاقبها على الشيء اللي داراتو فيكم".²¹و هز ملاك واحد اخر جبار حجرة كبيرة كيما الحجرة تاع الرحى, و رماها ف لبحر و قال: "هكا تتطيش بابل لمدينة العظيمة بعنف, و ما تبقالها حتى ذاكرة. ²²و الصوت تاع العازفين بالقيتارة و المغنيين و النافخين ف الابواق, ما يزيدش يتسمع فيك. و كل صاحب صنعة ما يزيدش يكون فيك, و صوت رحى ما يزيدش يتسمع فيك.²³و ما يزيد يضوي فيك ضوء مصباح. و لا يتسمع فيك صوت عروسة و عريس. على خاطر التجار تاعك كانوا عظماء ف لرض. على خاطر بالسحر تاعك غويتي كل الامم. ²⁴و فيها ساح دم انبياء و قديسين, و كل اللي تقتلوا ف لرض".

Chapter 19

¹و من بعد سمعت صوت جبار صادر من ناس ياسر ف السماء يقولوا: "هاليلويا! الخلاص و المجد و الكرامة و القدرة للرب الهنا, ²على خاطر احكامو حق و عادلة, على خاطر حاسب الزانية لكبيرة اللي فسدت لرض بالزنا تاعها, و انتقم منها للدم تاع عبادو".³و زادوا قالوا: "هاليلويا! دخانها يبقى يدخن لابد الابدين". ⁴و ركعوا لاربعة و عشرين شيخ و الحيوانات الاربعة و سجدوا لله المتربع على العرش و قالوا: "امين! هاليلويا!".⁵و خرج من العرش صوت يقول: "سبحوا الهنا يا جميع عبادو, اللي يخافوه كبار و صغار!".⁶و سمعت كيما صوت غاشي كبير, و كيما صوت مياه غزيرة, و صوت رعود قاوية تقول: "هاليلويا! الملك للرب الاله القادر على كل شيء.⁷نفرحوا و نهللوا و نمدولوا المجد! على خاطر جا عرس لخروف, و عروستو وجدّت روحها. ⁸و راح يلبسوها الكتان لبيض النقي, و الكتان هو اعمال القديسين الصالحة".⁹و قال لي: "اكتب: يا سعد المعروضين للعشاء ف عرس لخروف!". و قال: "هاذي هي اقوال الله الصادقة". ¹⁰و ركعت قدام رجليه باه نسجدلو, قال لي: "لا! ما تسجدش ليّا! انا عبد كيما انت و كيما خاوتك اللي عندهم شهادة يسوع. اسجد لله! على خاطر شهادة يسوع هي روح النبوة". الراكب على لحصان لبيض¹¹و من بعد شفت السماء مفتوحة, و شفت حصان ابيض اللي راكب عليه اسمو الامين الصادق, و بالعدل يحكم و يحارب. ¹²و عينيه كيما لهيب النار, و فوق راسو تيجان ياسر, و عندو اسم مكتوب واحد ما يعرفو غير هو. ¹³و كان لابس ثوب مغطس ف الدم, اسمو "كلمة الله".¹⁴و العسكر تاع السماء كانوا يتبعوا فيه راكبين فوق خيل بيضاء, لابسين كتان ابيض صافي. ¹⁵و من فمو يخرج سيف ماضي باه يضرب بيه الامم. و هو اللي راح يرعاهم بعصا تاع حديد, و يعفس معصرة خمر نقمة غضب الله القادر على كل شيء. ¹⁶و على فخذو و على لبستو اسم مكتوب: "ملك الملوك و رب الارباب".¹⁷و شفت ملاك واقف ف الشمس, و صاح بصوت عظيم و قال لجميع الطيور الطايرة ف السماء: "ارواحي اتلمي هنا ف وسط لعشاء العظيم تاع الاله, ¹⁸باه تاكلي لحم الملوك, و لحم الرياس, و لحم الزعماء, و لحم الخيل و اللي راكبين فوقها, و لحم جميع الناس: عبيد واحرار, صغار و كبار".¹⁹و شفت الوحش و الملوك تاع لرض و العسكر تاعهم الكل مجتمعين باه يحاربوا االراكب على لحصان مع العسكر تاعو. ²⁰و حكموا الوحش و حكموا معاه النبي الكذاب, اللي كان يدير المعجزات اللي بيها ضلل الناس و جعلهم يقبلوا لمارة تاع الوحش و يسجدوا للتصويرة تاعو. و رماهم ف زوز حيين ف وسط قلتة النار القادية بالكبريت.²¹و اللي بقاو قتلهم بالسيف الخارج من فم الراكب على لفرس, و الطيور الكل شبعت من اللحم تاعهم.

Chapter 20

¹و شفت ملاك نازل من السماء و عندو المفتاح تاع الهاوية, و سلسلة كبيرة ف يدو. ²و قبض على التنين, الحية لقديمة, اللي هو ابليس و الشيطان, و كتفو لمدة الف سنة, ³و رماه ف الهاوية و قفل عليه, و ختم عليه باه ما بقاش يضللش الامم, حتى كمالة الف سنة. و من بعد لابد يسيبوه لمدة قليلة.⁴و شفت عروش تربعوا عليها الناس اللي عندهم سلطة القضاء. و شفت النفوس تاع الناس اللي ماتوا على جال الشهادة تاع يسوع و على جال الكلمة تاع الله. و الناس اللي ما سجدوش للوحش و لا للتصويرة تاعو, و اللي ما قبلوش لمارة تاعو على جبهتهم و لا على يديهم, و عاشوا و ملكوا مع المسيح الف سنة.⁵اما الموتى لخرين ما يعيشوش حتى تتم الالف سنة. هاذي هي لقيامة لولى. ⁶مبارك و مقدس كل من كان ليه نصيب ف لقيامة لولى. هاذوك اللي الموت الثاني ما عندوش القدرة عليهم, بالصح راح يكونوا كهنة لله و للمسيح, و راح يملكوا معاه الف سنة. الحكم على الشيطان⁷و ف كمالة الالف سنة يتسيب الشيطان من الحبس تاعو, ⁸و يخرج باه يضلل الامم اللي ف الجوايه الاربعة تاع لرض: جوج و ماجوج, باه يجمعهم للحرب, و كان العدد تاعهم قد الرمل تاع لبحر.⁹و طلعوا على وجه لرض و حاصروا المعسكر تاع القديسين و المدينة المحبوبة, و نزلت نار من السماء من عند الله و كلاتهم. ¹⁰و ابليس اللي كان يضلل فيهم تطرح ف قلتة النار و الكبريت, وين كاين الوحش و النبي الكذّاب. و راح يتعذبوا نهار و ليل لابد الابدين. الدينونة تاع الموتى¹¹و من بعد شفت عرش ابيض عظيم, و القاعد عليه, اللي من وجهو هربت لرض و السماء, و ما بقى لهم حتى اثر! ¹²و شفت الموتى صغار و كبار واقفين قدام الله, و تحلت الكتب, و تحل كتاب اخر هو كتاب لحياة, و تحاسبوا الموتى على الشيء اللي مكتوب ف لكتب حساب اعمالهم.¹³و خرج لبحر الموتى اللي فيه, و سلمت الموت والهاوية الموتى اللي فيهم. و كل واحد تعاقب على حساب اعمالو. ¹⁴و تطرح الموت و الهاوية ف قلتة النار. هاذا هو الموت الثاني. ¹⁵و كل اللي ما كانش اسمو مكتوب ف كتاب لحياة يتطرح ف قلتة النار.

Chapter 21

¹و من بعد شفت سماء جديدة و ارض جديدة, على خاطر السماء لولى و لرض لولى فناو, و البحر ما بقاش موجود. ²و انا يوحنا شفت لمدينة المقدسة اورشليم الجديدة نازلة من السماء من عند الله واجدة كيما لعروسة المزينة لراجلها.³و سمعت صوت عظيم من السماء يقول: "ها هو المسكن تاع الله مع الناس, و هو يسكن معاهم, و همّا يكونوا ليه شعب, و الله ف ذاتو يكون معاهم اله ليهم. ⁴و راح يمسح الله كل دمعة تسيل من عينيهم, و ما راح يكون لا موت و لا حزن و لا بكى و لا وجاع, على خاطر الامور لقديمة راحت".⁵و قال المتربع على العرش: "انا راح نجعل كل شيء جديد!". و قال لي: "اكتب: هاذا لكلام صدق و حق". ⁶و زاد قال لي: "تم كل شيء! انا هو الالف و الياء, البداية و النهاية. انا نسقي العطشان من المنبع تاع ماء لحياة بلاش.⁷اللي يغلب يورث هاذا الكل, و نكون ليه اله و هو يكون ليّا ابن. ⁸اما الجبناء و اللي ماهمش مومنين و الاوغاد و القتالين و الزانيين و السحارين و اللي يعبدوا الاوثان و جميع الكذّابين, هاذوك النصيب تاعهم يكون ف القلتة الشاعلة بالنار و الكبريت اللي هو الموت الثاني". اورشليم الجديدة⁹و من بعد جاء واحد من السبعة ملايكة اللي عندهم الكيسان السبعة المعمرة من الضربات السبعة لخرة, و تكلم معايا و قالي : "ارواح نوريلك لعروسة مراة لخروف". ¹⁰و هزني بالروح لواحد الجبل عالي, و ورالي لمدينة العظيمة اورشليم المقدسة نازلة من السماء من عند الله,¹¹و عليها هالة تاع مجد الله, و كانت تلمع كيما حجر كريم نادر يشابه لليشب النقي كيما لقزاز. ¹²و كان عندها سور عظيم و عالي, و عندها اثناش ن باب, و ف قدام كل باب واقف ملاك, و مكتوبة اسامي تاع عشاير بني اسرائيل ف اثناش. ¹³من جيهة الشرق ثلاثة بيبان, و من جيهة الشمال ثلاثة بيبان, و من جيهة الجنوب ثلاثة بيبان, و من جيهة الغرب ثلاثة بيبان.¹⁴و سور لمدينة كان عندو ثناش ن عرصة, مكتوب عليها اسامي الرسل تاع لخروف ف ثناش. ¹⁵و الملاك اللي كان يهدر معايا عندو ف يدو قصبة تاع ذهب باه يقيس بيها لمدينة و البيبان تاعها و السور تاعها.¹⁶و لمدينة كانت مربعة, قد طولها قد عرضها. و كي قاس لمدينة لقاها الف و خمسمياة ميل. الطول والعرض و العلو كلها قد بعضاها. ¹⁷و قاس السور لقاه: مية و اربعة و اربعين قيس ذراع بشر كيما قاس الملاك.¹⁸و كان السور مبني من اليشب, و لمدينة بالذهب الخالص تقول عليه قزاز صافي. ¹⁹و الساسات و السور مزينين بالاحجار الكريمة على كل نوع. الساس لول من اليشب. و الثاني من الياقوت لزرق. و الثالث من لعقيق لبيض. الرابع من الزمرد الذبابي ²⁰و الخامس من لعقيق الغامق. و السادس من لعقيق لحمر. و السابع من زبرجد. و الثامن من الزمرد السلقي. و التاسع ياقوت اصفر. و العاشر عقيق اخضر. الحادش فيروز. الثانش جمشت.²¹و البيبان ف ثناش كانوا عبارة عن ثناش حبة تاع لولو, كل باب من البيبان هو حبة لولي واحدة. و سوق لمدينة ذهب خالص كيما لقزاز الصافي. ²²و ما شفتش فيها هيكل, على خاطر الرب الله القادر على كل شيء, هو و لخروف همّا الهيكل تاعها.²³و لمدينة ما تحتاجش للشمس و لا للقمر باه يضوِيوْ فيها, على خاطر الجاه تاع الله نوّرها, و لخروف هو المصباح تاعها. ²⁴و تمشي شعوب المخلصين ف النور تاعها, و يجيوها الملوك تاع لرض بالمجد و الكرامة تاعهم. ²⁵و بيبانها ما تقفل لا ليل و لا نهار, على خاطر ما يكونش فيها ليل.²⁶و يجيو ليها بالمجد تاع الامم و الكرامة تاعهم. ²⁷و ما يدخل ليها حتى شيء منجوس و لا من يعمل الرجس و الكذب, غير الناس اللي اساميهم مكتوبة ف كتاب حياة لخروف.

Chapter 22

¹و زاد ورالي واد صافي يجري بالماء تاع لحياة يلمع كي لقزاز, خارج من العرش تاع الله و لخروف. ²و في وسط السوق تاعها و على جوانب الواد منا و منّا, شجرة حياة تخَرج ثناش ن ثمرة, و كل شهر تخّرج ثمارها, و لورق تاع الشجرة فيه الشفاء للامم.³و ما تزيدش تكون حتى لعنة. و عرش الله و لخروف يكونوا فيها, و العباد تاعو يخدمو فيه. ⁴و راح يشوفوا الوجه تاعو, و يكون اسمو على جباههم. ⁵و ثمة ما يكونش ليل, و ما يحتاجوش لا للمصباح و لا للضوء تاع الشمس, على خاطر الرب الاله ينّور عليهم, و راح يملكوا لابد الابدين.⁶و من بعد قال لي: "هاذي الاقوال امينة و صادقة. و الرب الاله تاع لنبياء و القديسين يعث الملاك تاعو باه يكشف لعبادو واش لازم يصير ف لقريب العاجل". المسيح راح يجي ف لقريب العاجل ⁷"انا راح نجي ف لقريب العاجل. يا سعد اللي يعمل باقوال النبوة اللي ف هاذا لكتاب".⁸و انا يوحنا اللي يشوف و يسمع ف هاذا الكلام. و كي سمعت و شفت, ركعت باه نسجد عند رجلين الملاك اللي كان يوريلي ف هاذا الشيء كامل. ⁹بالصح هو قال لي: "لا ما تسجد ليّا! انا عبد كيما انت كيما خاوتك الانبياء, اللي يعملوا بالاقوال تاع هاذا لكتاب. اسجد لله!".¹⁰و قال لي: "ما تخبيش اقوال النبوة اللي ف هاذا لكتاب, على خاطر الوقت قريب. ¹¹اللي كان يظلم يداوم على الظلم. و اللي كان منجوس يبقى ف نجاستو. و اللي كان صالح يداوم على الصلاح. و اللي كان قديس يبقى ف قداستو".¹²" و انا اني جاي عن قريب و معايا الجزاء باه نجازي كل واحد على حساب اعمالو. ¹³انا هو الالف و الياء, البدية و التمام, لول و لاخر".¹⁴يا سعد الناس اللي يعملوا بالوصية باه يكون عندهم سلطان على شجرة لحياة, و يدخلوا للمدينة من البيبان, ¹⁵على خاطر خارج لمدينة كاين لكلاب و السحارين و الناس الزانيين و القتالين و عبادين لوثان, وكل كذّاب يحب لكذب.¹⁶"انا يسوع, بعثت الملاك تاعي باه يشهد بهاذي الامور ف الكنايس. انا اصل داود و ذريتو. انا كوكب الصبح الضاوي".¹⁷و الروح و العروسة يقولوا: "تعالى!". و كل من يسمع يقول: "تعالى!". و من كان عطشان يجي. و كل من يحب يدي ماء لحياة بلاش.¹⁸انا ننبه كل من يسمع هاذي لقوال تاع النبوة اللي ف هاذا لكتاب: كل من يزيد عليه, يزيدو الله على الضربات المكتوبة ف هاذا لكتاب. ¹⁹و كل من ينقص منو, ينحي الله نصيبو من كتاب لحياة, و من لمدينة لمقدسة, و من الشيء اللي مكتوب ف هاذا لكتاب.²⁰الشاهد على هاذي الامور يقول: "نعم! انا راني جاي ف لقريب العاجل". امين. تعالى يا ربي يسوع. ²¹النعمة تاع ربنا يسوع المسيح تكون معاكم اجمين. امين.

Formatted for Translators

Matthew

Mark

Luke

John

Acts

Romans

1 Corinthians

2 Corinthians

Galatians

Ephesians

Philippians

Colossians

1 Thessalonians

2 Thessalonians

1 Timothy

2 Timothy

Titus

Philemon

Hebrews

James

1 Peter

2 Peter

1 John

2 John

3 John

Jude

Revelation