¹Tagarta ghǝ usuli Yesu Ɓorghǝn kǝ Cogn kuni Dauda, kuni Ibrahim. ²Ibrahim ta yi nǝ Daa Ishaku, Ishaku nǝ Daa Yakubu, Yakubu nǝ Daa Yahuda tǝ gyaa yeshi. ³ Yahuda ta yi nǝ Daa Farisa tǝ Zera a te ghǝ Tamar, Farisa nǝ Daa Hasuna, Hasuna ghǝn cinǝ murghǝ Daa Aram.⁴ Aram ta yi nǝ Daa Abinadab, Abinadaɓ nǝ Daa Naashon .Naashon nǝ Daa Salmon. ⁵ Salmon ta yi nǝ Daa Boaz, a te ghǝ Rahaɓ, Boaz ta yi nǝ Daa Obida a te Ruɗ. Obida nǝ Daa Jesse. ⁶ Jesse ta yi nǝ Daa guŋ Dauda, Dauda nǝ Daa Solomon a te lǝɓ kǝ gǝɗi Uriya.⁷Sulemanu ta yi nǝ Daa Rehobom, Rehobobm ghǝn nǝ Daa Abija, Abija ghǝn nǝ Daa Asa. ⁸ Asa ta yi nǝ Daa Johoshafaɗ, Johoshafaɗ ghǝn nǝ Daa Joram, Joram ta yi gos nǝ Daa Uziya.⁹Uziya ta yi nǝ Daa Jotam, Jotam nǝ Daa Ahaz, Ahaz nǝ Daa Hezikiya, ¹⁰ Hezikiya ta yi nǝ Daa Manassa, Manassa ghǝn nǝ Daa Amon, Amon nǝ Daa Josaya . ¹¹ Josaya ghǝn nǝ Daa Jekoniya tǝ gyaa yes wos. Aa kili yo ɗaŋ tǝ ta nyomshi tǝ tlǝǝri yaatl kǝ Babila.¹²Ɗaŋ tǝǝ sushi ɗi yaatl Babila, Jekoniya ta yi nǝ murghǝ ɓwaaghǝn sheltiyel , Sheltiyel ta yi gos nǝ Daa Zerubabel. ¹³Zerubabel ta yi nǝ Daa Abihudu, Abihudu ta yi nǝ Daa Eliyakim , Eliyakim nǝ Daa Azor. ¹⁴Azor ta yi nǝ Daa Zadok, Zadok nǝ Daa Akim, Akim ta yi gos nǝ Daa Alidu.¹⁵Eliuɗ ta yi nǝ Daa Eliyaza, Eliyaza ghǝn nǝ Daa Matan, Matan ta yi gos nǝ Daa Yakuɓ. ¹⁶ Yakuɓ ta yi nǝ Daa Isufu turghǝ Maremu, gyo ɗaŋ a te ghǝ lǝɓ wos kǝn tǝ ɓwaa Yesu ɗaŋ caa cim tǝ tu, Ɓorghǝn kǝ Cogn. ¹⁷ Ɓaandǝŋ usulin ngaɓ ɗi gha Ibrahim maaghǝnɗi a Dauda yi usuli dzuɓ tliiti wuɓsǝ, ngaɓkǝn ɗi a Dauda maaghen ɗi a tlǝǝrghǝn yaatl kǝ Babila usuli dzuɓ tliiti wuɓsǝ, saɗɗaɗa ngaɓkǝn ɗi gha tlǝǝrghǝn waasǝŋ yaatl kǝ Babila, manngǝn ɗi a Yesu Ɓorghǝn kǝ Cogn, yi usuli dzuɓ tliiti wuɓsǝ.¹⁸Gin nǝ tǝpm yo ɗaŋ ɓwaaghǝn Yesu Ɓorghǝn kǝ Cogn ta naa. Taa ta shiil naashi Maremu Isufu mǝn, beɗ tǝ gii annda tǝ tlǝ dǝn tuur, she tǝ ta tu tǝ tǝ ŋaa vwaa a te ghǝ zhipti var. ¹⁹ Tur ghǝ shiili wos Isufu ta yi nǝ zaar-ghǝ-zaari, nǝ gii a ta suu tǝ caa tǝ ndzuun a dlǝk zarsǝ hǝŋ, she a ta suu tǝ gǝm tii nǝ vik muuri.²⁰Ɗaŋ a ta yigha a ɓitalghǝn ngǝrshi gyaa gin she zhipti shinnghǝn Cogn ta bwaa tǝ mǝn ɗi a tluutn wul tǝ tu, "Isufu, kuni Dauda , vertǝ tǝ ngaɓkǝ a mbiighǝn Maryamu tǝ naa nǝ gǝɗi wa hǝŋ, durghǝ yo tu ngǝrshii ɗaŋ yigha vwaa woshii a tu tǝ a te ghǝ zhipti var. ²¹ Wo ɓwaa ŋaa won, ka cim tǝ tu, Yesu, durghǝ yo tu yaan ngǝn wo vum zarsǝ wos ɗi a gyaa kusǝŋsǝ ngǝtn waasǝŋ."²²Ɓuruk ngǝrshi gyaa gin wo man cik nǝ yungarghǝn ngǝtn yo ɗaŋ Daadǝn kon a teghǝ vik mǝn shinnghǝn Cogn tu, ²³ "Yelǝn ŋaa mǝǝtl wo mbii ŋaa vwaa ndǝr ɓwaa ŋaa mwaan, ta cim sǝm wos tu Immaniyel " - des tu ," Cogn ci ɓasmi"²⁴Ɗaŋ Isufu ta shishiɗi gha kuci, she a ta fi daɓak ɗaŋ gii ɗaŋ zhipti shinngǝn Cogn fuutii, she a ta mbi tii naai nǝ gǝɗi wos . ²⁵ Beɗ tǝ gii a ta mbuɗ ɓastǝ hǝŋ shǝ ɗaŋ a ta ɓwaa kunii. She a ta caa tǝ sǝm tu Yesu.

¹Ɗa kaari ɗaŋ tǝ ta ɓwaa Yesui giɓ Baitalaami kǝ Yahuda a mbuɗkǝni gii ghǝn Hiridus ta yi nǝ guŋ, mǝn yisǝŋngǝn, gyaa ngoci maalǝmci tǝ ta mbwaaɗi te banndi gǝshi tǝ ta man cigha wulghǝn tu, ² "Daashii ɗaŋ tǝ ɓwaa tǝ nǝ guŋ Yahudawai ci ɗo? Mǝ yel caar wos ɗi banndi gǝshi ghǝn mǝ man mǝ mbuu tǝ." ³ Ɗaŋ guŋ Hiridus ta wum cik ata vuui monnda tǝ zarsǝ mǝn Urshelima beɗ ɗaŋ.⁴Hiridus ta jwaam dǝllǝŋsǝ pǝris tǝ mǝn dlyaadkǝn ngǝtn kǝ zarsǝ, ceɗ shi tu, "Ɗo ghǝn tǝ ɓwaa Ɓorghǝn kǝ Coghǝi yo? ⁵ Tǝ ta wul tǝ tu "Giɓ Baitalami kǝ Yahuda, durghǝ yo tu cigkǝn murghǝ shighǝn Cogn a dlyaaɗ, ⁶'Kyan bed Baitalami kǝ yaatl Yahuda, kyaan ǝŋ da kinǝ kǝ njwaati a mǝn varaŋsǝ Yahuda hŋ , duryo tu a giɓ waan ghǝn gon murghǝ guŋndu wo nyolɗi, gyo ɗaŋ wo naa nǝ murghǝ lyaaghǝn zarsǝ Israʻila."⁷She Hiridus ta cim mǝn yisǝŋngǝnes ɗi nǝ mǝǝri ceɗ shi daɓak kili yo ɗaŋ caares ta mbwaaɗi ghai. ⁸ A ta shinndar shi Baitalami wul tu, "Tlǝn aa paŋǝn kunes mbun mbun, ǝŋ kyaa tu tii, aa wulǝm vii durghǝ yo tu myan ma mǝ tlǝn mbuu tǝ ɗaŋ."⁹Ɗa kaari ɗaŋ taa sǝǝ kǝǝm gunyes, tǝ ta ci ken tǝ riighǝn waasǝŋ, she caares ɗaŋ tǝ yel ɗi banndi gǝshii a ta ndashi ken, hal a ta man dlǝǝri a lǝɓ yo ɗaŋ ŋaa kunes cighai. ¹⁰Ɗaŋ tǝ ta yel cares, a ta polshi nyaŋ-nyaŋ.¹¹Tǝ ta ndai ɗa giɓ dǝnes she tǝ yel ŋaa kunes tǝ naagos Maremu. Tǝ ta zuɓni yaatl tǝ mbuu tǝ. Annda tǝ ta tǝrǝŋ gyaa jigha waasǝŋǝi tǝ vǝr tǝ jinaari, tǝ lubban, tǝ murr. ¹² Cogn ta caa shi yirr a tluun tu tǝ sushi gha Hiridus hǝŋ, nǝ gii tǝ ta sushi a yaatl waasǝŋ a datǝpi gon mari.¹³Ɗa kaari ɗaŋ tǝ ta tlii, zhipti shinngǝn Cogn a ta mbwaa Isufu mǝn ɗi a tluutn wul tu, "Shishi aa mbi ŋaa kunin tǝ naagos aa kir aa tlii Masar. Tsǝtn ɗa ɗan she mya wulghǝ vii, durghǝ tu Hiridus cigha durghǝ ŋalghǝn kunes tǝ ɗu tii." ¹⁴ Ɗa kaviɗi gies Isufu ta shishi mbii ŋaa kunes tǝ naagos tǝ ta tlii Masar. ¹⁵ A ta tsǝtn ɗa ɗan hal mǝskǝn ngǝ Hiridus. Gin ta yugngar ngǝtn yo ɗaŋ Daadǝn ta kon a vii ghǝ murghǝ shinnghǝn Cogn, "Giɓ Masar ghǝn mǝ cim kunetn ɗi."¹⁶Ɗaŋ Hiridus ta yel tu mǝn yisǝŋngǝnin tǝ kyamas tǝ, a ta tliitǝ nyaŋ nyaŋ . A ta shin tǝ tlaa ɓuruk mǝǝri monci ɗaŋ ci giɓ Baitalami tǝ vii lyaŋshi , gyaa gyo ɗaŋ ci voni mbǝlǝm tǝ gyaa gyo ɗaŋ taa tul hǝŋ, gyo ɗaŋ yi daɓak tǝ kili yo ɗaŋ a ta wumi a mǝn yisǝŋngǝnes.¹⁷A kiles kuŋ tǝ ta yugngar konghǝn ngǝ jaan kǝ murghǝ shinngǝn Cogn, Irmiya, ¹⁸ "Tǝ wum yer won ɗi Rama, cigha ngaarghǝn tǝ raa ghǝ jii nyaŋ-nyaŋ, Rahila ghǝn caa ngwaar nǝ mǝǝri wos, nǝ gii a nyaŋgas morghǝn raa wos, durghǝ yo tu cii ɗa hǝŋ.¹⁹Kili yo ɗaŋ Hiridus mǝshii, swaaɗ zhipti shinngǝn Cogn mbwaa Isufu mǝnɗi a tluutn ɗaŋ ci giɓ Masar wul tǝ tu, ²⁰ "Shishi aa mbii kunes tǝ naagos aa tlii yaatl kǝ Israila, durghǝ yo tu mǝn ŋalghǝn rai ghǝ kunes taa mǝǝshi." ²¹Isufu ta shishi mbii ŋaa kuneshii tǝ naagos, a ta man giɓ yaatl kǝ Israila.²²Beɗ tǝ gii ɗaŋ a ta wum tu, Akilayus kǝn a ci duul ghǝ guŋndu Yahuda, she vertǝ ta ngaɓ tii a tulghǝn ɗa ɗani. Cogn ta sǝǝɗ tǝ vii a tluutn, she a ta tlii yaatl Galili, ²³a ta tlǝn tsǝtn a dǝllǝ yaatl won ɗaŋ caa cim tu Naazaraɗ. Gin ngǝn nǝ yugngarghǝn, ngǝtn yo ɗaŋ mǝn shinngǝn Cogn tǝ kon tu, ta cim tǝ tu mǝn Naazareɗ.

¹ A mbuɗkǝn gyaa gii Yohanna murghǝ Baptisma ta man caa fuu shi vik Cogn dlǝk ndǝǝr ghǝ Yehudiya a ta ya wul tu, ² " Gaan kusuŋsǝ ngǝtii, durghǝ tu guŋndu ghǝ Cogn aa naa mel." ³ Gin yaan ci ngǝtn yo ɗaŋ murghǝ shinngǝn Cogn Ishaya ta ya kon tu, "Yer won caa wul ɗi dlǝk ndǝǝr tu, 'Ndǝrǝn datǝpm Daadǝn mǝnii, ndǝrǝn datǝpm woshii taŋ taŋ.'"⁴ Yohanna aa ta caa lǝŋsǝ wos ɗaŋ tǝ kǝɓ tǝ mbitlǝŋ raakuumi, aa ta ndǝr naɗ miis woshii tǝ woŋ miis kǝ laaɗ. Ngǝtn ngǝ cighǝn wos ta yi nǝ zai tǝ duum. ⁵ She mǝn Urshelima, ɓuruk tǝ mǝn Yahudiya, tǝ gyaa yaatl yo ɗaŋ ci ɓil rupm Urdun tǝ ta ya man ɓastǝ. ⁶ A ta fishi Baptisma mǝn rupm Urdun, ɗaŋ tǝ ta ya kwaan kusuŋsǝ ngǝtn waasǝŋ ɗi.⁷ Beɗ tǝ gii ɗaŋ a ta yel Farisawa tǝ Sadukiyawa monnda caa nywaal ɗi durghǝ yo tu tǝ fishi Baptisma mǝn, she a ta wul shi tu, "Kyaani mǝǝri ghǝ usuli ghǝ nyici. Nuu ghǝn a sǝǝɗ ki vii tu aa kiir tliiti yer ghǝ murghǝ manngǝn ɗii yo? ⁸Fin ngǝtn ngǝ ndaraani yo ɗaŋ wo giɗ tu kaa kaɓ ndaaɗkǝn waanii. ⁹ Ɓak mbii a raa waan tu, 'Ibrahim ngǝn ci dawaan hǝŋ. 'Myaa fuuki tu Cognvon citǝ vartǝ tǝ shisher mǝǝri Ibrahim mǝn ɗi a giɓkǝ gyaa puushi gyaa gin.¹⁰ Ɗaŋngǝni maa taa gaa romii a kǝtǝr gwaashes. Nǝ durghǝ cik gwaas yo ɗaŋ ya guur ndaraara hǝŋ she tǝ dzak tii tǝ gǝmii a wuɗ. ¹¹ Mǝ fi ki Baptisma mǝn tǝ zha tu nǝghǝ kaɓkǝn ndaaɗkǝn waan. Beɗ tǝ gii gyo ɗaŋ wo man a kaaratn a moɓm luughǝn, gyo ɗaŋ ko kwaate wos ma kǝǝm mǝ mbii hǝŋ. Yaani ghǝn wo fiki Baptisma mǝn tǝ zhipti var tǝ wuɗ. ¹² Koɗ kǝ foɗkǝn ngǝtn yigha taas wos, wo tuɗ tare shii ndaraara, wo jwaam alkama woshii shinii giɓ fuŋ wos, beɗ tǝ gii wo gǝǝpm wusulǝŋnyeshii tǝ wuɗ yo ɗaŋ ta ɗyaa ta mbǝtsǝ hǝŋ."¹³ She Yesu ta dlam ɗi yaatl kǝ Galili, a ta tlii rupm kǝ Urdun a Yohanna durghǝ tu tǝ fi tǝ Baptisma mǝn. ¹⁴ Beɗ tǝ gii Yohanna ta ŋal tu tǝ ɗak tǝ ghai, yi wul tu, Myan ɗaŋ mya suu aa fim Baptisma mǝn, kǝ mannda kǝ man ɓasǝm maa?" ¹⁵ Yesu ta sutǝɗa wul tu, " Gaa tǝ naa cik ɗaŋngǝni durghǝ yo tu tǝ yugngar zaari zaarii." She Yohanna ta kaɓii.¹⁶ Ɗa kaari ɗaŋ tǝ fi tǝ Baptisma mǝnii, Yesu ta nyolii ɗi ɗa giɓ zhes, she Tsogn gaami ta ŋǝǝr tǝ mǝnii . A yel zhipti ghǝ Cogn cigha shiighǝn ɗi ɗaŋ kumri a ta man tsǝtni a dulghǝ gaam wos. ¹⁷ Tǝ ta wum yer won ɗi tsogn gaami ca wul tu, "Gin yaan ci nǝ kunetn naa suughǝnetn gyo ɗaŋ ca polǝm ɓastǝ."

¹ A kiles zhipti var ta mbii tǝ tlǝǝri dlǝk ndǝǝr durghǝ tu Shetan tǝ diiɓ tǝ. ² Ɗaŋ a ngaɓ vii nǝghǝ mbuɗkǝn tashi wuɓsǝ dzaŋ tǝ kaviɗ, ɗa kaari kusuŋ ta ngaɓ tii. ³ She murghǝ diiɓkǝn woshes a ta mbwaaɗi, wul tǝ tu, "Yaan kinǝ kuni Cogn sular gya puusen tǝ naai nǝ dugn." ⁴ Beɗ tǝ gii Yesu suɗa a wul tu,"Nǝ dlyaaɗkǝn tu nǝ dugn kurum ghǝnnda yi fuɗ zaar hǝŋ, she tǝ vii gyo ɗaŋ a nyol ɗi a Cogn."⁵ She Shetan ta mbii tǝ tlǝǝrii a yaatl kǝ ndzǝkkǝn, a gaa tii gha ryaŋndi ghǝ dǝn ngǝ Cogn, ⁶ wul tǝ tu, "Ǝŋ yaan kinǝ kuni Cogn diim ɗi yaatl. Durghǝ yo tu yi nǝ dlyaaɗkǝn tu,'Wo gaa zhipti ghǝ shinngǝn wos tǝ yaal ɗaaghǝ; 'tǝ goɓ kǝi tǝ mbiighǝi gaami a giɓ taas waasǝŋ, durghǝ tu aa ɗu yaasǝŋ a puus hǝŋ."⁷ Yesu ta wul tǝ tu," Saɗ ɗa ɗa nǝ dlyaaɗkǝni, 'Ɓak diiɓ Daadǝn Cognvon waa hǝŋ." ⁸ Saɗ ɗa, Shetan ta mbii tǝ tlǝǝrii a dul ghǝ wuur won a ryaŋndies, a ta giɗ tǝ ɓuruk guŋndu ghǝ ɗǝgn tǝ ndaraarghǝn waasǝŋ. ⁹ A wul tǝ tu, "Ɓuruk ma vǝrghǝ ngǝrshi gyaa gin ǝŋ yaan ka zuɓ kǝ mbuum."¹⁰ She Yesu wul tǝ tu, "Gaa ɗuunii, Shetan! Durghǝ yo tu nǝ dlyaaɗkǝn, 'Daadǝn Cognvon wa ghǝn ka mbuu tǝ, yaan namboŋ wos ka fi tǝ laa mǝn." ¹¹ She Shetan ta gaa tii she zhipti shinngǝn Cogn tǝ ta man fi tǝ belak mǝn.¹² Ɗaŋ Yesu ta wumi tu taa ngaɓ Yohannai she a ta shishi tlii nǝghǝ yaatl kǝ Galili. ¹³ A ta gaa Nazaraɗii a ta sutǝ Kafarnahum tǝ tsǝtnngǝn te ɓil zha kǝ Galili a aari ghǝ yaatl kǝ Zabulun tǝ Naftali.¹⁴ Gin ta naa cik durghǝ tu tǝ yugnngar konngǝn ngǝ murghǝ shinngǝn Cogn Ishaya tu, ¹⁵"Yaatl kǝ Zabulun tǝ yaatl kǝ Naptali kǝ ɓil zhak var, tǝ te dlari rupm Urdum,Galiili kǝ mǝn yo ɗaŋ cinǝ Yehudawa hǝŋ. ¹⁶Zarsǝ mǝn tsǝtnngǝn a lǝɓ jii tǝ yel dǝlle ghǝ lǝɓ yaali, kǝnnda gyaa gyo ɗaŋ caa tsetn ɗa yaatli mel tǝ mǝskǝn, a dulgaam waasǝŋ lǝɓ yaali a mbwaa shi mǝn ɗi."¹⁷ A kili giies, Yesu ta ngaɓ fuughǝn vik wusni, wul tu, "Kaɓǝn ndaaɗkǝn waanii durghǝ tu guŋndu Cogn aa naa mel."¹⁸Ɗaŋ a ta yigha riighǝni a ɓil dǝllǝ ghǝ zha kǝ Galiili, she a ta yel gyaa yestǝ won mbǝtlǝm, Siman ɗaŋ caa cim tǝ tu Biturus tǝ yesashi Andarawus tǝ ta yigha gǝmngǝn shelle zǝri. Durghǝ tu cinǝ mǝn nyomngǝn gyaas. ¹⁹ Yesu ta wul shi tu, "Manǝn, laaɓemmǝn ɗi, ma sular ki waanii nǝ mǝn nyomngǝn zarsǝ. ²⁰ Swaaɗ kyaaɗ, she tǝ ta gaa shelle zǝreshii ɗa ɗan, tǝ laaɓ tǝ.²¹ Ɗaŋ Yesu ta ciken tǝ riighǝn, she a ta yel zarsǝ; gyaa gon mbǝtlǝm, yaŋshes beɗ cinǝ yestǝ, Yakubu kuni zabaɗi, tǝ yesashi Yohanna, cigha giɓkǝ zhuŋ zha tǝ murghǝ ɓwaaghǝn waasǝŋ, Zaɓaɗi, cigha ndǝrghǝn shelle zǝri waasǝŋ. A ta cim shi, ²² swaaɗ she tǝ ta gaa murghǝ ɓwaaghǝn waasǝŋǝi tǝ zhunyes tǝ laaɓ tǝ.²³ Yesu ta ngelaŋ yaatl kǝ Galilii ɓuruk, cigha giɗkǝn zarsǝ ghai a vik Cogn a gya viin laadi Yehudawa, ca fuu shi vik wusni ghǝ guŋndes, ca ndǝr fuɗ zarsǝ gyaa gyo ɗaŋ citǝ gonngǝni. ²⁴ Vii wos ta kaɓ lǝɓii yaatl kǝ Suriya ɓuruk. Zarsǝ tǝ ta lǝǝr tǝ mǝn gonngǝn mǝn ɗi, gyaa gyo ɗaŋ citǝ giir mari mari, tǝ mǝn buŋngǝn, tǝ mǝn mǝnndǝŋsǝ, tǝ gyaa gyo ɗaŋ ngǝtn ca ɗushi, tǝ mǝn pwaaghǝni. Yesu ta fuuɗ shi waashii. ²⁵ Gutuli zarsǝ tǝ ta laaɓ tǝ ɗi tun ɗi Galili, tǝ Dikafolis tǝ Urshelima, tǝ yaatl kǝ Yehudiya hal ma tǝ te ghǝ ken tǝ Urdun.

¹Ɗaŋ Yesu ta yel ɗaŋ zarsǝ taa jwaam shi, she a ta tai wuur. ²A ta ɗǝrǝ vii wos, giɗshi ghai, wul tu, ³"Shiɗshiɗi nǝghǝ mǝnyo ɗaŋ cinǝ mǝn dwaandǝ gha zhipti var, duryo tu guŋndǝ Cognvon nǝ gwaasǝŋ. ⁴Shiɗshiɗi nǝghǝ mǝnyo ɗaŋ cigha miitsǝ waaghǝni, durghǝ yo tu ta mbutarshi raa mǝnii.⁵Shiɗshiɗi nǝghǝ mǝn mbutarghǝn gaam, durghǝ yo tu yaŋshi ghǝn ta ci duul ghǝ ɗǝgn. ⁶ Shiɗshiɗi nǝghǝ mǝnyo ɗaŋ kusuŋ ca ɗushi tǝ zhak mbatlkǝni nǝ ngǝtn ngǝ mbuni, durghǝ gii vwaa waasǝŋ wo yughǝi. ⁷Shiɗshiɗi nǝghǝ mǝn yelghǝn gwaandǝ, durghǝ gii ta yel gwaandǝ waasǝŋ. ⁸Shiɗshiɗi nǝghǝ mǝnyo ɗaŋ cii tǝ raa ghǝ mbuni, durghǝ gii ta yel Cognvon.⁹Shiɗshiɗi nǝghǝ mǝnii ɗaŋ caa lǝǝr tsǝtngǝn wusni ɗi, durghǝ gii ta cim shi tu mǝǝri Cogn. ¹⁰Shiɗshiɗi nǝghǝ mǝn yo ɗaŋ caa vǝr shi forǝm, nǝ durghǝ fighǝn ngǝtn ngǝ mbuni, durghǝ gii guŋndu ghǝ Cognvon nǝ gwaasǝŋ.¹¹Shiɗshiɗi nǝ gwaan, ǝŋ yaan zarsǝ caa vyaar ki tǝǝ ndǝr tǝ vǝr ki forǝm ko tǝ caa ki vii, nǝ kusǝŋsǝ ngǝtn mari -mari kǝ mbemi, nǝ durghǝ myani. ¹² Tǝ polki nyaŋ-nyaŋ tǝ raaghǝ wusni, durghǝ yo tu ngǝtn yo ɗaŋ wo man ki mǝn ɗi tsogn yi monnda. Tǝ cik kǝn, zarsǝ tǝ ta vǝr forǝm mǝn varaŋsǝ shinngǝn kǝ ɓaandǝnyi.¹³Kyaani ghǝn ki maas kǝ ɗǝgn. Beɗ tǝ gii, ǝŋ wusǝŋngǝnes ya hamsalaghǝi, ta wurii ghǝnnda ta sular wusuŋngǝni wos ɗe? Wo naa tǝ laa ɗa hǝŋ, she de tǝ paashii, zarsǝ ta butuk tǝ yaasǝŋ. ¹⁴Kyaani ghǝn ki nǝ lǝɓ yaalghǝn kǝ ɗegn, yaatl yo ɗaŋ tǝ nal tǝ gha danndi, caayi waaɗ gos hǝŋ.¹⁵Zaarsǝ ta ngaɓ kuɓka wuɗ tǝ dlǝpm tii tǝ buŋli hǝŋ, she de tǝ gaa tǝ a duuli a lǝɓ gaaghǝn wos, durghǝ yo tu ko nuu tǝ yaal ghai. ¹⁶ Gaan lǝɓ yaali waan tǝ yaal a ken nge zarsǝ, nǝghǝ gyo ɗaŋ ta yel ngǝtn ngǝ mbuni waan, ta ndǝr ta luu Dawaan ɗaŋ ci gaami.¹⁷Kaɗ te vǝr ki tu , mǝ man tu mǝ malar ni mborki ko vii ghǝ mǝn shinngǝn Cogn hǝŋ, mǝ man tu mǝ malar shi ni hǝŋ, she de mǝ yugngar shi ni. ¹⁸ Durghǝ yo tu, jom- jomi mya fuu ki tu, hal gaami tǝ yaatl ta laatsǝi, beɗ tǝ gii ɗotɗi kǝ gaam vii namboŋ wo ɓan hǝŋ a durghǝ ɗǝǝlghǝn vii, she ko nii ya yugngarii.¹⁹Nǝ durgǝ cik, kaɓ muryo ɗaŋ ya tsal kǝ ɗaɗkǝn a giɓkǝ mborkin, ko a giɗ gyaa gon ngai tǝ ɗaŋ fi cig, ta cim tǝ tu murghǝ ɗaɗkǝn a giɓkǝ guŋgndu tsogn gaami. Beɗ tǝ gii, muryo ɗaŋ ya ɗakɗa nǝ yaŋshi ko a giɗ gyagon ngai, ta cim tǝ tu murghǝ luughǝn a giɓkǝ guŋndu tsogn gaami. ²⁰ Nǝ gii mya fuu ki tu, ǝŋ yan raa ghǝ wusni waan ya laatsǝ raa ghǝ mbuni kǝ mǝn dlyaaɗkǝn tǝ Farisawa hǝŋ , ka ɗyaa ka nda a giɓkǝ guŋndu tsogn gaami hǝŋ.²¹Kaa wumi, tǝǝ ta wul men ɓaandǝŋ tu, 'Ɓak ɗu zaar hǝŋ, hal tu muryo ɗaŋ ya ɗuu zaar, cigha giɓkǝ datǝpm ɗaŋ ta naɗ tii. ²²Beɗ tǝ gii, mya fuu ki tu, kaɓ muryo ɗaŋ ya tliitǝ a kamshi, cigha datǝpm ɗaŋ ta naɗ tii, hal tu, gon ya wul ŋaa ghǝ naa wos tu, ''Kinǝ zaar ghǝ ɓenndǝmi!' cigha giɓkǝ datǝpm dlǝǝrghǝn a ken ngǝ balgham ɗǝǝlghǝn vii; ko a wul ŋaa ghǝ naa wos tu, 'Ki nǝ ɗǝgǝr!' cigha datǝpm ghǝ ndaghǝn a giɓkǝ wuɗ kǝ zhaaɗ zhaaɗi.²³Nǝ durghǝ gii, ǝŋ yaan ka vǝr ngǝtn ngǝ nyaarghǝn waa Cogn dǝn ngǝ Cogn, she kǝ ɓital ghǝ tu, ngǝtn won aa mbii ki tǝ ŋaa ghǝ naa waa, ²⁴ to she aa gaa vǝrghǝn ngǝtn ngǝ nyaarghǝn waai ɗa dǝn ngǝ Cokes, aa tlii ngǝtn waa. Kyaɗ, wulǝn vieshii, aa ndǝǝrii tǝ zaar waai annda aa man vǝr ngǝtn ngǝ nyaarghǝni waai.²⁵Wulǝn vieshi , aa ndǝrii tǝ muryo ɗaŋ kǝ mara tǝ raa mǝn tun ɗaŋ kigha datǝpm tlǝǝghǝn a mǝn ɗǝǝlghǝn vi, durghǝ yo tu tǝǝ tlǝr ghǝi a mǝn ɗǝǝlghǝn vi hǝŋ, mǝn vares de wo gaaghǝi gha taas kǝ mǝn mborki ɗan ta tlǝǝr ghǝi jaarum. ²⁶ Jom -jomi mya fuughǝ tu, ka nyol ɗa ɗan hǝŋ she kya vǝr kaɓ wurɓa yo ɗaŋ caa laaɓkǝ.²⁷Kaa wum tǝ wul tu, 'Ɓak fi mbǝllǝ hŋ.' ²⁸Beɗ tǝ gii mya fuu ki tu, kaɓ muryo ɗaŋ ya yaal yel gǝɗ tǝ suughǝn mbǝllǝ, aa fi mbǝllǝi tǝ yaani ghǝnndi a raa wos.²⁹Ǝŋ yaan yiir waa kǝ zaari wo caaghǝ a ndaaɗkǝn ,dli tǝ a gǝmi ɗoongai . Duryo tu a moɓ namboŋ a giɓkǝ dlyaŋri dli waa tǝ naai ɓem ɗaŋ tǝ kur dli waa ɓuruk giɓkǝ wuɗ kǝ mburuŋ shetan. ³⁰Ko ǝŋ yaan taas waa kǝ zaari wo caa ghǝ ka ndaɗi ngyer tǝ aa gǝmi ɗoongai.A moɓ ndaraaghǝni a giɓkǝ dlyaŋri dli waa tǝ naai ɓem, ɗaŋ tǝ kur dli waa ɓuruk a giɓkǝ wuɗ kǝ mburuŋ shetan.³¹Tǝ man kon ɗa tu, 'Kaɓ muryo ɗaŋ wo gǝm gǝɗi woshii, to tǝ vǝrtǝ tagarta gǝmngǝni.' ³² Beɗ tǝ gii, mya fuu ki tu ko nuu ya gǝm gǝɗi woshii, ǝŋ yaan nǝ durghǝ mbǝllǝ hǝŋ, a sular tǝ nǝ murghǝ mbǝllǝ. Hal tu, ko nuu ya kaɓtǝ ɗaŋ taa gǝm tii a fi mbǝllǝ ghǝnndi.³³Ka wum, taa wul mǝn keni tu, ɓak ŋas puus waan tǝ sǝm Daadǝn hǝŋ. ³⁴ Beɗ tǝ gii mya fuu ki tu, ɓak ŋas puus hǝŋ, ko njwaantn, ko tǝ gaami durghǝ yo tu nǝ lǝɓ tsǝtnngǝn Cogn. ³⁵Ko a ɗǝgn durghǝ tu nǝ lǝɓ, gaaghǝn yaasǝŋ wos, ko tǝ Urshelima, durghǝ tu nǝ dǝllǝ yaatl guŋ vari.³⁶Ɓak a ŋas puus tǝ gama waan hǝŋ, durghǝ yo tu ka ɗyaa kǝ sular mbitlǝŋ gaam waan nǝ jii ko nǝ fyaali hǝŋ. ³⁷Gaan vii waan tǝ naa 'e, e,' ko, 'o,o,'. Kaɓ ngǝtn yo ɗaŋ ya laatsǝ ginni to a dlamɗi a shetan.³⁸Kya wumngǝn, tǝ wul tu, yir nǝ dulgaam yir, shin a dulgaam shin. ³⁹ Beɗ tǝ gii, mya fuu ki tu, a vuu tǝ kuskǝ zaar hǝŋ, bamvi cik gon ya dughǝ a koŋngaa te zaari, sutǝ kamshi mǝn ɗaŋ.⁴⁰Ǝŋ yaan gon yir ki ɗa raai ɗaŋ wo tlǝǝr ki gha mǝn ɗǝǝlghǝn vii duryo tu tǝ kaɓ luu waani, dashi gii, vǝrǝn tǝ gyaa luu waan ɗaŋ. ⁴¹Kaɓ muryo ɗaŋ ya caa ki a riighǝn fupm-fupm, ɓǝtarǝn tǝ riighǝnes mǝn ngai. ⁴² Vǝrǝn ko nuu, ǝŋ ya ceɗ ki, ɓak ɗaghar hǝŋ ǝŋ gon ya ŋal wak zhiil ɓaskǝ.⁴³Kya wumngǝn ngǝtn yo ɗaŋ tǝ kon, ka suu murghǝ tsǝtn ngǝn mel tǝ kyan, kǝ nyaŋas muryo ɗaŋ ca suughǝ hǝŋ. ⁴⁴ Beɗ tǝ gii, mya fuu ki, suun mǝn nyaŋngas kǝn waan, karan Cogn nǝ mǝni yo ɗaŋ caa vǝr ki forǝm. Aa suun mǝni yo ɗaŋ caa vǝrki forǝm aa fi gyaal gyaa gii mǝn ɗaŋ caa nyaŋngas ki hǝŋ. ⁴⁵Durghǝ tu aa naa nǝ mǝǝri Dawaan gii ɗaŋ ci tsogn gaamii . Durghǝ yo tu, ca caa dzaŋ ca nyolɗi nǝ kuskǝ zaar tǝ zaar ghǝ mbuni, hal lǝǝr von ɗi a mǝn mbuni tǝ kusuŋsǝ zarsǝ.⁴⁶Durghǝ tu, ǝŋ yaan kya suu ni mǝn yo ɗaŋ caa suu ki, nǝ shiɗshiɗi nii ghǝnnda ka tue? Mǝn kaɓkǝn wurɓa zhakka ma, cik kǝn caa fi hǝŋaa? ⁴⁷Yaan kyaa wuru ni gyaa ŋaa ghǝ naa waan ngǝtnwaasǝŋ, ka fini nii ɗaŋ a moɓ ɓances se? Cik kǝn mǝni yo ɗaŋ taa yisǝŋ Cogn hǝŋ kǝn caa fi hǝŋaa? ⁴⁸Durghǝ cik, aa naa ciɓ mǝ naa nǝ yuŋghǝni ɗaŋ gii ɗaŋ Dawaan tsogn gaami cinǝ yugnyughǝi.

¹Ɗaghǝn ɗa, aa fi ngǝtn ngǝ gyaal a ken ngǝ zarsǝ tu tǝ yel ki ɗa hǝŋ, ǝŋ kyaa fi cik wo maan ki mǝn taŋ-taŋ a ken ngǝ Dawaan ɗaŋ ci tsogn gaamii hǝŋ. ² Tǝ cik, ǝŋ yaan ka vǝr ngǝtn ngǝ nyaarghǝn waan, ɓak vuɗ mwaari ɗa ɗaŋ gii ɗaŋ kusǝŋsǝ zarsǝ caa fi giɓ viin laadi tu tǝ luushii hǝŋ. Jom-jomi, mya fuu ki taa tu ɓakmi waasǝŋǝi.³Beɗ tǝ gii ǝŋ yaan ka vǝr ngǝtn ghǝ nyarghǝn waan , taas waan kǝ napti tǝ yisǝŋ ngǝtn yo ɗaŋ kǝ zaari ca fi hǝŋ , ⁴Durghǝ yo tu, vǝrghǝn ngǝtn ghǝ nyaarghǝn waan tǝ naa ni waɗkǝni. Dawaan ɗaŋ cigha yelghǝni ngǝtn yo ɗaŋ kyaa fi nǝ waɗkǝni, wo taa ki ɓakmi waan.⁵Kǝn yaan ka kara Cogn, ɓak naa ɗaŋ kusǝŋsǝ zarsǝ hǝŋ , durghǝ tu, tǝ suu karaghǝn Cogn a dlǝǝrghǝn giɓ viin laadi Yehudawa waasǝŋ tǝ vik datǝpm, duryo tu zarsǝ tǝ yelshi. Jom-jomi mya fuu ki taa kaɓ ɓakmi waasǝŋ ngai ghǝndi. ⁶ Beɗ tǝ gii ǝŋ yaan ka kara Cogn she aa ndai giɓ vin, a lǝɓ jii , aa kara Cogn waan ɗaŋ cinǝ waɗkǝni, Dawaan ɗaŋ cigha yelghǝn ngǝtn yo kigha figǝni nǝ waɗkǝni, wo vǝr ki ɓakmi. ⁷ Ǝŋ yaan ka kara Cogn a yi kon ngǝtn ghǝ nambonyi hǝŋ, ɗaŋ gyo ɗaŋ mǝn ɗǝgn caa fi, a ɓitalghǝn waasǝŋ, ta wumshi waasǝŋǝi nǝ vii waasǝŋ kwaanngǝni monnda hǝŋ.⁸Durghǝ cik, ɓak naa ɗaŋ yaŋshi hǝŋ, durghǝ tu, Dawaan aa yisǝŋ ngǝtn yo ɗaŋ kyaa ŋal annda aa kara tǝ. ⁹ Tǝ cik, she a kara Cogn ɗaŋ gin: 'Daawom gii ɗaŋ ki gaami, mǝ gaa sǝm waa tǝ ndzǝkkǝn . ¹⁰Guŋndu waa tǝ shii ɗi, ngǝtn yo ɗaŋ kya suu, tǝ fi tǝ a ɗǝgn ɗaŋ gii ɗaŋ caa fi gaamii.¹¹Vǝrmi ngǝtn ngǝ cighǝni ghǝ vyaaghǝni yaawon. ¹²Dlaami loŋsǝ kusǝŋsǝ ngǝtn wopm mǝnii, ɗaŋ gyo ɗaŋ mya dlaa loŋsǝ gyaa gyo ɗaŋ caa fimi kusuŋsǝ ngǝtn mǝn . ¹³Ɓak tlǝǝr mi a lǝɓ yo ɗaŋ ta diiɓ mi ghai hǝŋ. Aa nyolarmi wopii ɗi gha murghǝ kuskǝ ngǝtii.¹⁴Durghǝ tu ǝŋ kya dlaa loŋsǝ kusǝŋsǝ ngǝtn gya gon mǝnii, Dawaan ɗaŋ ci gaamii, yaan ma wo dlaa ki gwaan mǝnii. ¹⁵Beɗ tǝ gii, ǝŋ kyaa dlaa loŋsǝ zarsǝ mǝn hǝŋ, Dawaan wo dlaa ki loŋsǝ waan mǝn hǝŋ ɗaŋ.¹⁶Cik ɗaŋ, ǝŋ yaan ka ngaɓ vii, ɓak fi tǝ ndzoŋngǝn tsogn ken ɗaŋ mǝn yo ɗaŋ cigha miitsǝ hǝŋ, ɗaŋ gyo ɗaŋ mǝn ɗǝgn caa fi hǝŋ, durghǝ tu caa ndzoŋ tsogn ken waasǝŋ tu zarsǝ tǝ yelshi tu cigha ngaɓkǝn vii. Jom-jomi mya fuu ki, taa tu ɓakmi waasǝŋ ghǝnnɗi. ¹⁷ Beɗ tǝ gii, ǝŋ yaan kigha ngaɓkǝn vii, kaɗǝn miir gha gaam, aa ndǝr aa coɓ tsogn ken waanii. ¹⁸ Durghǝ tu zarsǝ tǝ yisǝŋ tu kigha ngaɓkǝn vii hǝŋ, she de Dawaan ɗaŋ cinǝ waɗkǝni. Dawaan ɗaŋ ca yelghǝn ngǝtn yo ɗaŋ nǝ waaɗkǝni wo vǝr ki ɓakmi.¹⁹Ɓak jwaam ytughǝn gamawaan mǝn a ɗǝgn hǝŋ, gyo ɗaŋ dǝǝpm tǝ njirmi ta malarii, mǝrǝŋsǝ ta kwaɓtǝ ta nyomii. ²⁰ Nǝ gii, jwaamǝn tughǝn waan tsogn, gyo ɗaŋ dǝǝpm tǝ njirmi ta mara tǝ hǝŋ, lǝɓ yo ɗaŋ mǝrǝŋsǝ ghai hǝŋ ɗaŋ ta kwaaɓ tǝ ci mǝǝri. ²¹ Durghǝ tu, lǝɓ yo ɗaŋ tughǝn waa yi ghai, ɗan ghǝn raa wa yighai.²²Yir, yaan ci wuɗ kǝ kuɓka kǝ dli. Durghǝ cik, ǝŋ yaan yir waa yi ndaraara, kaɓ dli waa ci yaal-yaal. ²³Beɗ tǝ gii, ǝŋ yaan yir waa yi ndarara hǝŋ, kaɓ dli waa nǝ yuŋgǝni tǝ lǝɓ jii. Durghǝ cig, ǝŋ yaan lǝɓ yaales a giɓi waai nǝ jii, ta lǝɗkǝn lǝɓ jies yi monnda wurii? ²⁴Gon wo kǝǝm fi laa Daaktǝ mbǝlǝm mǝn hǝŋ, ko tǝ nyaŋngas gon tǝ suu gon, ko tǝ laaɓ gon tǝ kemas kamshi. Wo fi hǝŋ ɗaŋ a fi laa Cogn mǝn aa ndǝr a fi laa tughǝni mǝn hǝŋ.²⁵Nǝ gii mya fuu ki, ɓak vuu nǝ riighǝn waan hǝŋ nǝ ngǝtn yo ɗaŋ ka ci, tǝ ngǝtn yo ɗaŋ ka tlya ko nǝ durghǝ dli waan, ngǝtn yo ɗaŋ ka caa a dli waan.Tu ɓaa, rai a moɓ ngǝtn ngǝ caaghǝn hǝŋaa? ²⁶ Yelǝn yetli ɗaŋ ci tsogn gaami. Caa kǝɓ ngǝtn hǝŋ, annda aa kon tlaaghǝn, caa jwaam a fuŋ hǝŋ, beɗ tǝ gii Dawaan ɗaŋ ci gaami caa yaal ɗaashi.Tǝ cik, kǝ moɓshi zinzini hǝŋaa?²⁷Nǝ nuu a giɓi waan nǝ durghǝ vuughǝn wos, wo ɗyaa ɓǝtar ŋaa muɗkǝn wos kai njwaato? ²⁸Nii a caa kyaa vuu nǝ ngǝtn yo ɗaŋ ka caa a dli waane? Yellǝn byaatli ghǝ gyaa gwaas ndǝǝr ɓa, ɗaŋ caa luuɗ. Caa fi laa hǝŋ, caa kǝɓ pǝri hǝŋ. ²⁹ Kaɓ tǝ gii mya fuu ki ko Solomon a giɓkǝ tughǝn wos a ɗyaa fi tlǝɓǝr ɗaŋ gyaa gin hǝŋ.³⁰Ǝŋ Cogn ya caa lǝŋsǝ yaar mǝn ndǝǝr, ɗaŋ yaawon cii ɗa, jaan taa shaa wuɗ kai, ta ka ɗyaa kǝ kon lǝŋsǝ yo ɗaŋ wo caa ki mǝnnaa, kyaani mǝn caaghǝn raa njwaatn? ³¹ Durghǝ cik, ɓak vuu hǝŋ ki wul tu, 'Nii ghǝn ma cie?' ko, 'Nii ghǝn ma tlyae?' ko, 'Nǝ lǝŋsǝ gyo ǝŋ ma caa a dli wopo?'³²Mǝn ɗǝgn maa caa ŋalghǝn gyaa gin kaɓ, Dawaan ɗaŋ ci gaami de aa yisǝŋǝi tu kigha suughǝn waasǝŋ. ³³ Beɗ tǝ gii ŋalǝn guŋndu wos keni tǝ gyaal wos, kaɓ ngǝrshi gyaa gin ta vǝr ki. ³⁴ Durghǝ gii, aa vuun monnda hǝŋ nǝ ngǝtn ngǝ jaan, jaan wo vuu nǝ gamas. Ko dzanyi gyo citǝ buŋnghǝni wos.

¹ Ɗǝǝlǝn vii gon mǝn hǝŋ, kyaani ma ta ɗǝǝl ki mǝn hǝŋ. ² Durghǝ tu vii yo ɗaŋ kyaa ɗǝǝl zarsǝ mǝn, yaani ghuŋ ta ɗǝǝl ki mǝn ngai ɗaŋ. Cikkǝn tǝ ngǝtn yo ɗaŋ kyaa ɓǝǝɗ kai gii ghuŋ ta ɓǝǝɗ ki mǝn ngai.³ Wurii ghǝnnda kya yel yaarii ɗaŋ yigha yirr ghǝ ŋaa-ghǝ-naa waai, beɗ tǝ gii kǝ panyi mbun mbun ɗaŋ aa yel vii ŋamtsǝi ɗaŋ yigha yiri gwaai hǝŋǝǝ? ⁴ Wur ghannda ka wul yesa tu, 'Gaai mǝ mbii ghǝ ŋaa yaarii mǝn a yir waai ɗaŋ vii ŋamtsǝ yi a yiri gwaai ye? ⁵ Kyan murghǝ ryaaghǝn lǝɓ, mbii vii ŋamtsǝi a yiri gwaai gham, annda ka yaal mbun mbun kǝ yel ŋaa yaarii ɗaŋ yigha yir ghǝ yesaai.⁶ Vǝrǝn kaɗaŋshi ngǝtn yo ɗaŋ yi tǝ ndzǝkkǝni hǝŋ. Yaan cik hǝŋ ta daptsǝi a giɓ yaasǝŋ waasǝŋ, tǝ sushi tǝ taar ki waanii ngwashaklǝm.⁷ Karan, ta vǝr ki, Ŋalǝn, ka tui. Ɗun ken ɓiil, ta ɗǝrǝ ki mǝnii. ⁸ Nǝ durghǝ yo tu ɓuruk gyo ɗaŋ ya kara, ta vǝr tǝ; ɓuruk gyo ɗaŋ yaa ŋal wo tui, gyo ɗaŋ yaa ɗu ɓiil, ta ɗǝrǝ tǝ mǝnii. ⁹ Nǝ nuu a giɓi waan ǝŋ ŋaa wos yaa kara tǝ nǝ dugn wo vǝr tǝ puus so? ¹⁰ Ko yaa kara tǝ nǝ gyaas wo vǝr tǝ nyicio?¹¹ Nǝ dughǝ gii, yaan kyaani ɗaŋ ki nǝ kusuŋ shi kyaa yisǝŋ vǝrghǝni ngǝtn ngǝ mbuni mǝǝri waan, ta wur ghǝnnda Dawaan ɗaŋ ci gaami, wo vǝr ngǝtn mbuni mǝn yo ɗaŋ caa kara tǝ hǝŋe? ¹² Durghǝ gii ɓuruk ngǝrshi gyaa gii ɗaŋ kyaa suu zarsǝ tǝ fiki mǝnii, cik kǝn kyaani maa ka fishi mǝn, durghǝ yo tu ɓuruk gin ngǝn ci mborkes tǝ ngǝtn yo ɗaŋ mǝn shinngǝn Cogn tǝ giɗ.¹³ Ndan a ken ɓiili gii ɗaŋ yi meceghaɗ ɗii. Durghǝ yo tu ken ɓiili gii woŋ woŋǝi yi tǝ swaaɗ mbiighǝni ɗaŋ wo tlǝǝr ghǝ tlǝn datsǝi. Mǝn ndaghǝn ngai ci monnda. ¹⁴ Beɗ tǝ gii ɓiil yo ɗaŋ wo tlǝǝr ghǝ nǝghǝ tughǝn rai yi meceghaɗ. Mǝn tughǝn wos ɓeɗ ci ŋaa jwaatn.¹⁵ Ɗaghǝnɗa nǝ mǝn shinngǝn Cogn kǝ mberni, gyaa gyo ɗaŋ caa man ki mǝn tǝ laaɗ tǝmsa, beɗ tǝ gii, naa jom jomni cinǝ shewei mǝn basaŋngǝn tǝmsas. ¹⁶ A te guuri waasǝŋ ka yisǝŋ shi waasǝŋǝi. Zarsǝ caa ɗyaa tǝ ngaa gur darndu dǝn a yiɓka, ko caa ɗyaa tǝ ngaa gur gwaam a raɗia? ¹⁷ Cikkǝn ko gwaas mbuni gyo ca guur ni guuri mbuni. Beɗ tǝ gii kuskǝ gwaas ca yi guur ni kusuŋsǝ guuri.¹⁸ Gwaas kǝ mbuni wo guur ni kusuŋshi hǝŋ. Cikkǝn kǝnnda kuskǝ gwaas wo ɗyaa guur nǝ mbuni hǝŋ. ¹⁹ Ɗeɓaɗ gwaas yo ɗaŋ ya guur, guuri nǝ mbuni hǝŋ, ta dzak tǝ tǝ gǝmii giɓ wuɗ. ²⁰ Durghǝ gii a te guuri waasǝŋ ka yisǝŋ shi waashii.²¹ Nǝ ɓuruk muryo ɗaŋ ca wulum tu, 'Daadǝn, Daadǝn,' ghannda wo nda gha guŋndu Cogn hǝŋ, beɗ tǝ gii she muryo ɗaŋ ca fi ngǝtn yo ɗaŋ Daagǝn ɗaŋ ci gaamii ca suu. ²² Ɗa dzanyes zarsǝ monnda ta wulǝm tu, 'Daadǝn, Daadǝn, maa kon ngǝtn ngǝ jaan, mǝ nyolar mǝnndǝŋsǝ, mǝ fi dellǝŋsǝ laa monnda tǝ sǝm waa hǝŋaa? ²³ Durghǝ gii ma wulshi gha dadǝǝl tu, 'Maa yisǝŋ ki hǝŋ! Ɓǝǝlǝn ki ɓasǝm, kyaani mǝn fighǝn kusuŋsǝ ngǝtn!'²⁴ Nǝ durghǝ gii ɓuruk gyo ɗaŋ ca wum vie tii ndǝr fi laa ghai wo naa ɗaŋ murghǝ saghaɗkǝn gyo ɗaŋ a nal dǝn wos a dul ghǝ tari. ²⁵ Ɗaŋ von shii, zha man fal rupii, yetar shishi ɗi a man ɗu dǝnes, beɗ tǝ gii a ndaaɗ hŋ, durghǝ yo tu tǝ nal tǝ a dul ghǝ tari.²⁶ Beɗ tǝ gii gyo ɗaŋ ya wum vietn fi laa ghai hǝŋ, wo naa ɗaŋ muryo ɗaŋ nǝ ɗǝghǝr gyo ɗaŋ a nal dǝn wos a dulghǝ nyaatsa. ²⁷ Ɗaŋ von shii, zha man fal rupeshii, yetar vaɗ, a ɗu dǝnes, a ndaaɗii, ndaaɗkǝnes ta kuushii."²⁸ A ta naa kili yo ɗaŋ Yesu ta ɓan konngǝn vii gya ginnii, ngǝtn yo ɗaŋ a ta ya giɗ shi a ta kwasar zarsǝ ɗaŋ taa jwaamshi, ²⁹ durghǝ yo tu a ta ya giɗ shi ghai ɗaŋ muryo ɗaŋ citǝ vartǝ, ɗaŋ mǝn dlyaaɗkǝn ngǝtn yo ɗaŋ Musa ta kon hǝŋ.

¹Ɗaŋ Yesu ta shishiɗi ɗa wuures, she gutuli zarsǝ tǝ ta laaɓ tǝ. ²She ndomtsǝ won ata man ɓastǝ ata mbuu tǝ, wul tu, "Daadǝn, ǝŋ kya kaɓii, ka ɗyaa ka fuuɗ mii ." ³ Yesu ta taa taas wos tǝǝn tǝ ghai, wul tu, "Maa kaɓii, fuuɗii. "Swaaɗ she ata fuuɗii a gonngǝni ndomtsǝ woshes.⁴Yesu ta wul tǝ tu, ' Aa fuu gon ngǝtn won hǝŋ. She de aa tlǝn giɗ gama a pǝris aa ndǝr aa vǝr zhiɗkǝn nyaarghǝn ɗaŋ Musa kon, durghǝ yo tu tǝ naa nǝ ngǝtn ngǝ tlyaghǝn zha ɓashi.⁵Ɗaŋ Yesu ta ndai Kafarnahum, shǝ mǝnvar mǝn maandǝ won ata man ɓastǝ kara tǝ, ⁶ wul tu, "Daadǝn, monatn cigha mbuɗkǝn dǝn nǝ pwaaghǝn, cigha buŋngǝn nǝ ŋaanyi hǝŋ." ⁷ Yesu ta wul tǝ tu, "Ma tlǝn fuɗ tii."⁸She mǝnvar mǝn maandes ta wul tu, "Daadǝn, mǝ kǝǝm ɗaŋ hal aa man ɗaam dǝn hǝŋ, beɗ tǝ gii she aa wul vii kurum, monates wo fuɗii . ⁹ Durghǝ yo tu myani maa minǝ zaar tǝ vartǝ, ɗaŋ mi tǝ mǝn maande ɗaŋ tǝ ɗaɗi ɓasǝm. Mya wul gon tu, 'Tlǝ,' she tǝ tlǝ, mǝ wul gon beɗ tu, 'Mani,' she tǝ mani, mǝ wul monatn tu, 'Fi ngǝrshi gin,' she tǝ fii.'' ¹⁰ Ɗaŋ Yesu ta wum cighǝi, she ata kwasar tǝ, hal ata wul mǝn laaɓkǝn woshes tu, ''Jomi, mya fuuki, ko giɓ Isarʻila maa tu caaghǝn raa won tlyaa -tlyaa ɗaŋ gin hǝŋ.¹¹Myaa fuuki, monnda ta dlam ɗi te banndi gǝshi tǝ banndi gaami, ta tsǝtn tǝ ci ngǝtn ngǝ cighǝn tǝ gyaa Ibrahim tǝ Ishaku, tǝ Yakuɓ a giɓkǝ guŋndǝ, ghǝ tsogn gaami. ¹² Beɗ tǝ gii mǝǝri ghǝ guŋndes she tǝ gǝmshi waashii a giɓkǝ buŋngǝni a lǝɓ jii. Ɗani ta ngwaar tǝ ŋaaskǝn taas.'' ¹³ Yesu wul mǝnvar mǝn maandes tu, ''Tli! ɗaŋ kǝ caa raai, ta fighǝ mǝn a bamvii gii.'' Daɓak a kili gies mon woshes ata byaatlii.¹⁴Ɗaŋ Yesu ta ndai dǝn gyaa Biturus, she a ta tu kawa ghǝ Biturus cigha mbuɗkǝn nǝ gonngǝn dli vaaghǝn. ¹⁵ Yesu ta tǝǝn taas wos, gonngǝn dli vaaghǝnes ta gǝm tii, a ta ndǝǝr shishi ndashi fighǝn belak mǝn.¹⁶Ɗaŋ suutu ta fii, she zarshes tǝ ta lǝǝr gyaa gon Yesu mǝn ɗi monnda ɗaŋ ci tǝ mǝnndǝŋsǝ .Ɗaŋ ata wul vii kurum ata nyolar mǝndǝŋseshii, ata ndǝǝr fuɗ mǝn gonngǝneshii ɓuruk. ¹⁷ Tǝ cik kǝnnda vik murghǝ shinngǝn Cogn, Ishaya ata tu yungnngǝni tu, "Yaan tǝ gamashi ata nyolar gonngǝn wopii, ata nyolar mi giir wopm mǝnii.''¹⁸A kili yo ɗaŋ Yesu ta yel gutuli zarshes taa ngirǝŋ tii, she ata vǝr vii tǝ tlii tǝ sushi a te dlari gii kǝ dǝllǝ zhak Galiili. ¹⁹ She murghǝ dlyaaɗkǝn won a ta man wul tǝ tu, ''Mallǝm, ma laaɓkǝ ɗeɓaɗ lǝɓ yo ɗaŋ kya kok kai.'' ²⁰Yesu ta wul tǝ tu, ''Shewai cii tǝ giir waasǝŋ, yetli gaami cii tǝ viin waasǝŋ, beɗ tǝ gii ŋaa zaar citǝ lǝɓ yo ɗaŋ wo mbuɗkai hǝŋ.²¹Gon a giɓkǝ mǝǝri dǝn wos she a wul tǝ tu, ''Daadǝn gaam mǝ tlǝn gii murghǝ bwaaghǝne tii gham. ²²Beɗ tǝ gii Yesu ta wul tǝ tu, ''Gaan mǝn mǝǝskǝn tǝ gii mǝn mǝǝskǝn waasǝŋ.''²³Ɗaŋ ata ndai giɓ zhuŋ zha mǝǝri dǝn woshes tǝ taa laaɓ tǝ. ²⁴ She dǝllǝ daagurukɗi won ata shishiɗi ɗa rupes, hal tlǝrǝŋ zhes tǝ ta nguɓ tlyaaghǝn gaam zhuŋ zhes. Beɗ tǝ gii Yesu ta yigha kuci. ²⁵ She mǝǝri dǝn woshes tǝ taa tlǝn shisher tǝ, tǝ wul tu, ''Daadǝn, vummi wopii; ma mǝǝshii!''²⁶Yesu ta wulshi tu, "Nii ca ghǝnnda vǝrtǝ ngaɓki, cighǝi ye, kyaani mǝn ɗaɗkǝn caaghǝn raa?'' Daadǝn ata shishi, ata baŋ yetares tǝ zhes. She lǝɓes ɓuruk ta tsǝtii saɗ. ²⁷Ata kwasar zarshes, tǝ ta wul tu, ''Gin nǝ zaari gyo tsǝno, gyo ɗaŋ hal gyaa yetar tǝ zha ma caa wum tii yo?''²⁸Ɗaŋ Yesu ta man a te dlari gies kǝ yaatl Garasinawa, zarsǝ mbǝtlǝm tǝ ta nywaal ɗi tǝ tu tǝ . Caa nywaal ɗi a gyaa vii giir beɗ tǝ gii tǝ ta baŋ nǝ ŋaanyi hǝŋ, hal gon ca ɗyaa mbii ɗa te datǝpes hǝŋ. ²⁹She tǝ ta dlaar vii tǝ wul tu, ''Kyani kuni Cogn, nii mbii ghǝ tǝ myaane? Kǝ man ɗuun tu aa fiir mi forǝm annda kiles tǝ tul ɗyaa?''³⁰Gutuli gyaa kaŋshi dǝn won tayi ɗa ɗani monnda ɗaŋ cii ɓashi lyaaghǝn, tǝ ta fupm tǝ yaŋshi hǝŋ. ³¹She menmdǝŋshes tǝ ta kara Yesu tǝ wul tu, ''Ǝŋ kya nyolarmi wopii, shin mi a dlǝk gutuli gyaa kaŋshi dǝn.'' ³² Yesu ta wulshi tu, ''To, tlǝn,'' She mǝnndǝŋshes tǝ ta nywaalii, tǝ tlǝn shii a gutuli kaŋshi dǝn. She ɗeɓaɗ gutuli kaŋshes tǝ ta kir tǝ tlii, tǝ vum ɗi a gǝŋcigǝŋ, tǝ shii giɓ zhaes, tǝ mǝǝshii.³³Zarsǝ mǝn lyaaghǝn gyaa kaŋshi dǝnes tǝ ta kirii, tǝ ndai ɗa giɓ yaatles, tǝ ta kwaan ngǝrshes ɗeɓaɗ, ɗak-ɗak ngǝtn yo ɗaŋ a tu mǝn mǝnndǝŋshes . ³⁴ She ɗeɓaɗ zarsǝ ghǝ yaatles tǝ ta nywaal ɗi tǝ tu Yesu. Ɗaŋ tǝ ta yel tii, tǝ ta kara tǝ tu tǝ gaa yaatleshii.

¹Yesu ta ndai giɓ zhuŋ zha ata dlari tlii ɗaa tǝ yaatl. ²She tǝ ta lǝǝr tǝ murwon mǝn ɗi nǝ pwaaghǝni ata yigha mbuɗkǝn a lǝmmbuɗ . Ɗaŋ Yesu ta yel caaghǝn raa waasǝŋ, she ata wul murghǝ pwaaghǝnes tu, "Kuni, tǝ polghǝ. Taa dlaaghǝ loŋsǝ kusuŋsǝ ngǝtn waa mǝnii."³She mǝn dlyaaɗkǝn won tǝ ta wul a dlǝŋsǝ waasǝŋ tu, "Murin caa kyamas ni Cogn." ⁴ Yesu ɗaŋ aa yisǝŋ ɓitalghǝn waasǝŋǝi, a wul tu, "Nii caa annda kyaa fi kuskǝ ɓitalghǝn a raa waan ne? ⁵ Gyo ghǝn a moɓ swaaɗio, ɗaŋ tǝ wul tu, 'Taa dlaaghǝ loŋsǝ kusuŋsǝ ngǝtn waa mǝnii, ko tǝ wul tu, 'Shishi aa riinia?' ⁶Beɗ tǝ gii, durghǝ yo tu aa yisǝŋǝi ŋaa zaar ci tǝ vartǝ ghǝ dlaaghǝn loŋsǝ kusǝŋsǝ ngǝtii,..." she ata wul murghǝ pwaaghǝnes tu, "Shishi, mbii lǝmmbuɗ waai aa tlii dǝn."⁷She mures ta shishi tlii ɗaa tǝ dǝn. ⁸ Ɗaŋ gutuli zarshes tǝ ta yel cik she ata kwasarshi, tǝ ta luu Cogn, gyo ɗaŋ a vǝr zarsǝ ngǝtn ngǝ varti gii. ⁹ Ɗaŋ Yesu ta ɓǝɗ tǝ ken, ata yel murwon ɗaŋ semwos tu Matiyu ata yigha tsǝtnngǝn, cigha laa a lǝɓ kǝ kaɓkǝn zhakka. Ata wul tǝ tu, "Laaɓm ɗi." Ata shishi laaɓ tǝ.¹⁰A kiliyo ɗaŋ Yesu tayi a cighǝn ngǝtn ngǝ cighǝn ɗa dǝnes, she mǝn kaɓkǝn zhakka ghǝn cighǝni tǝ mǝn fighǝn kusuŋsǝ ngǝtn ɗaŋ ci monnda tǝ ta man, tǝ man tsǝtni tǝ ci ngǝtn ngǝ cighǝn cimshi tǝ mǝǝri dǝn wos. ¹¹ Ɗaŋ Farisawa tǝ yel cik, she tǝ ta wul mǝǝri dǝn woshes tu, "Nii ghǝn a caa ghǝnnda Mallǝm waanii ca ci ngǝtn tǝ gyaa mǝn kaɓkǝn zhakka tǝ mǝn fighǝn kusuŋsǝ ngǝte?"¹²Beɗ tǝ gii ɗaŋ Yesu ta wum cighǝi ata wul tu, "Ai mǝn yo ɗaŋ ci byaatl byaatl caa vuu nǝ murghǝ wugn hǝŋ, she mǝni gyaa gii ɗaŋ caa gonii. ¹³Ŋalǝn yisǝŋngǝn dyak kǝ ngǝrshi ginnii gham, myan ghǝn mya suuni zhiɗkǝn gwaanndǝ ba vaaghǝn ngǝtn ngǝ nyaarghǝn hǝŋ.' Nǝ durghǝ tu mǝ man mǝ ciim mǝn fighǝn ngǝtn ngǝ mbuni tǝǝ kaɓ ndaaɗkǝn waasǝŋ hǝŋ, she mǝn fighǝn kusuŋsǝ ngǝtn.¹⁴She mǝǝri dǝn ngǝ Yohanna tǝ ta man ɓastǝ, tǝ wul tu, "Nii caa myaani tǝ Farisawa myaa ngaɓ vii a duuli a duuli, beɗ tǝ gii mǝǝri dǝni gwaai caa fi cighǝi hǝŋei?" ¹⁵ She Yesu wul shi tu, "Mǝn laa ghǝ belak ta fi raaghǝ jii ɗaŋ murghǝ kaɓkǝn gǝɗ muures ci cim shaa? Ai, kiles ka manngǝnɗi ɗaŋ ta man mbii shi murghǝ kaɓkǝn gǝɗ muures mǝnii. A kili gii ngǝnnda ta ngaɓ vii.¹⁶Zaar won ɗa ɗaŋ wo caa lǝŋsǝ muuri a duuli kǝ gǝǝri hǝŋ, durghǝ yo tu luu ghǝ muures wo taari gaa kǝ gǝǝres, hal ma taarghǝnes wo moɓ gyo ɗaŋ ata yi.¹⁷Ko zarsǝ ta ɗyaa tǝ shin zhak darndu dǝn muuri a giɓ ndotsǝ jigha laaɗ hǝŋ. Ǝn yaa fi cik, she jigha laaɗes beɗ tǝ dlaatǝi zhak darndu dǝnes tǝ paashi, she jigha laaɗes tǝ laaɓ zha. A bamvi cik, caa yi shin zhak darndu dǝn muuri a giɓkǝ jigha laaɗ kǝ muuri, tǝ cik kǝnnda ta vumshi waashii beɗ mbǝlǝm kǝnndi."¹⁸Yesu ɗaŋ ci ɓashi wulghǝn vi she murwon ngǝni mǝnvar ghǝ zarshes ata man mbuu tǝ, wul tu, "Ɗaŋngǝni ghǝnnda nyietn mǝs, beɗ tǝ gii man aa gaa tǝ taas gaam, wo fuɗii." ¹⁹ She Yesu ta shishi laaɓtǝ tǝ gyaa mǝǝri dǝn wos.²⁰She gǝɗ won ngǝni gyo ɗaŋ aa fi vonii dzuɓ tliiti mbǝlǝm cigha dlaaghǝn voraŋ monnda, ata kok ɗi a te kaar ghǝ Yesu, ata tǝǝn vii laŋshi ghǝ lǝŋsǝ wos. ²¹ Durghǝ yo tu ata wul a raa wos tu, "Ko nǝ luu wos myaa tǝǝni, ma ɗyaa ma fuɗii." ²² She Yesu ta suu yir kaar, yaal yel tǝ wul tu, "Nyietn, tlyaa moɗ; caaghǝn raa waa aa fuɗkǝi. "Ɗa ɗan swaaɗ gǝɗes ta fuɗii.²³Ɗaŋ Yesu ta tulii ɗa dǝn ngǝ mǝnvar ghǝ zarshes, ata ndǝr yel mǝn vuɗkǝn myaaru tǝ gutuli zarsǝ cigha vuɗkǝn nyaŋ nyaŋ. ²⁴ She ata wul tu, "Ngaan lǝɓii!, Nyes aa mǝs hǝŋ, cini gha kuci." She tǝ ta gyomtlǝ tǝ gyomtlǝghǝn ryaaghǝni.²⁵Kili yo ɗaŋ tǝ nyolar gutuli zarshe shii ɓidlǝm, she ata ndai ɗa viini ngaɓ taas woshii, she nyies ta shishi. ²⁶ Vii a dulgaam gin ata kaɓ yaatleshii ɓuruk.²⁷Ɗaŋ Yesu ta ɓǝɗ tǝ ghai a ken, she doŋsǝ won ghǝnin mbǝlǝm tǝ ta laaɓ tǝ, ci dlaar vii, ci wul tu, "Kyan kuni Dauda, yel gwaandǝ wopm." ²⁸ Ɗaŋ Yesu ta ndai gha dǝnwon she doŋshes tǝ ta tlii ɗi ɓastǝ. Yesu ta wul shi tu, "Kaa caa raai tu mi tǝ vartǝ ghǝ fighǝn cighǝi yaa?" She tǝ wul tǝ tu, "Eh, Daadǝn."²⁹She Yesu tǝǝn yir waasǝŋ, wul tu, "Tǝ naa ki mǝn cik a bamvi caaghǝn raa waan." ³⁰ She yir waasǝŋes ta ɗǝrǝi.Yesu ta caa shi yir wul tu, "Gon tǝ wum vii gin hǝŋ. ³¹ Beɗ tǝ gii tǝ ta ŋalar cii kon vies ɗa yaatli ɓuruk.³²Ɗaŋ doŋshes mbǝlǝŋǝi tǝ ta tlii, she tǝ ta lǝǝr bǝnndǝŋ won Yesu mǝnndi ɗaŋ ci tǝ mǝnndǝŋsǝ. ³³Ɗa kaari ɗaŋ tǝ nyolar mǝnndǝŋsheshii, she bǝnndǝŋes ata wul vii, ata kwasar gutuli zarshes, tǝ ta wul tu, "Taa yi yel ngǝrshi gin giɓ Israila hǝŋ!" ³⁴ Beɗ tǝ gii Farisawa tǝ ta wul tu, "Ai, tǝ vartǝ ghǝ guŋ ngǝ mǝnndǝŋsǝ ghǝnnda caa nyolar mǝnndǝŋshes."³⁵She Yesu ta ngelaŋ dǝllǝŋsǝ yaatleshi ɓuruk tǝ gyaa mǝrǝ yaatl ata ci ken tǝ fuughǝn waasǝŋ vik Cogn a gyaa viin laadi waasǝŋes, yi fuushi vik guŋndǝ ghǝ Cognvon. Yi ndǝr fuɗ mǝn giir mari-mari tǝ gyaa mǝn gonngǝn. ³⁶Beɗ tǝ gii ɗaŋ ata yel gutuli zarsǝ monnda she ata yel gwaanndǝ waasǝŋ, durghǝ yo tu tǝ ta yigha buŋngǝn taa tsaali a raa beɗ, cini ɗaŋ tǝmsa yo ɗaŋ ci tǝ murghǝ lyaaghǝn hǝŋ.³⁷She ata wul mǝǝri dǝn wos tu, "Tlaaghǝnes yi monnda, beɗ tǝ gii mǝn laas ci njwaatn. ³⁸ Nǝ durghǝ cik she a fi motl-motl aa kara Daadǝn ngǝ tlaaghǝnes tǝ shin mǝn laa ɗi ɗa giɓes.

¹Yesu ta cim mǝǝri dǝn wos dzuɓ tliiti mbǝtlǝmi jwaam shi waashi vǝrshi vartǝ a dulgaam kusǝŋsǝ zhipti, tǝ nyolar shi waashii, tǝ ndǝr tǝ nyolar ko naa gonngǝn gyoi.²Ɗaŋngǝnnin sǝmndǝ gyaa mǝǝri dǝnnes dzuɓ tliiti mbǝtlǝm ghǝn cin. Kǝ kenes kǝn nǝ Siman (gyo ɗaŋ caa cim tǝ tu Biturus), tǝ yesashi Anndarawus, tǝ Yakuɓ kuni Zabaɗi, tǝ yesashi Yohana, ³Filibus.. tǝ Bartimawus, tǝ Toma, tǝ Matta murghǝ kaɓkǝn zhakka, tǝ Yakuɓ kuni Alfa, tǝ Taɗdawus, ⁴ tǝ Siman murghǝ maandǝ yaatl, tǝ Yahuza Iskaryoti gyo ɗaŋ wo vǝr vii woshii.⁵Dzuɓ tliiti mbǝtlǝmǝn Yesu ta shinshi. A ta sǝǝɗ shi vii tu, ''Aa tlǝn a lǝǝɓ yo ɗaŋ mǝn ɗǝgn cighai hǝŋ, ko a yaatl kǝ mǝn Samariya won hǝŋ. ⁶ A bamvi gii tlǝn a mǝǝri dǝn ngǝ Isar'ila ɗaŋ ta maalii. ⁷Kili yo ɗaŋ kigha tlǝghǝn, fuughǝn vik wusni aa wul tu, 'Guŋndu tsogn a naai mel.'⁸Fuuɗǝn mǝn gonngǝnii, aa shisherǝn mǝn mǝǝskǝnii, fuuɗǝn ndomtsaŋsǝi, aa ndǝr aa nyolar mǝnndǝŋsǝi. Kǝ kaɓ ɓem, vǝrǝn ɓem ɗaŋ. ⁹Mbiin jinaari, ko azurfa, ko tagulla a taraŋ taas waan hǝŋ. ¹⁰Aa mbiin jigha riighǝn nǝ durghẹ riighǝn waan hǝŋ, ko lǝŋsǝ mbǝtlǝm, ko kwaate, ko shirǝŋ hǝŋ, durghǝ yo tu murghǝ laa aa kaɓar ni ngǝtnngǝ cighǝn wos.¹¹Ko dǝllǝ yaatli gyo, ko nǝ ŋaa yaatli gyo ǝŋ kyaa nda ghai, ŋalǝn murghǝ mbuni ɗa giɓi a tsǝtǝn ɗa ɗan hal kili yo ɗaŋ ka shishi. ¹² Ǝŋ kyaa nda ɗa dǝni, wurun shi. ¹³Ǝŋ yaan nǝ dǝn ngǝ mbuni, gaan mbuni waan tǝ naa tǝ mǝn. Beɗ tǝ gii ǝŋ yaan mbuni ghai hǝŋ, gaan mbuni waan tǝ sutǝ ɓaski.¹⁴Ɓuruk gyaa gyo ɗaŋ tǝ nyaŋngas kaɓkǝn waan, ko wumngǝn waan, ǝŋ yaan ka nywaalii ɗa dǝnes ko yaatles, posǝn guɗ guɗ kǝ yaasǝŋ waanii. ¹⁵Jom jomi myaa fuu ki, dzaŋ ngǝ ɗǝǝlghǝn vii ta moɓ yelghǝn gwaandǝ yaatl kǝ Sodom tǝ Gomora moɓ yaatli gii.¹⁶Yelǝni, mǝ shinki ɗaŋ tǝmsa a dlei ghǝ shewei, nǝ gii, naan tǝ saghaɗkǝn ɗaŋ nyici, aa naa tǝ shiili ɗaŋ kumri. ¹⁷Ɗaghǝnɗa nǝ zarsǝ! Durghǝ yo tu taa voɗ ki waani a ken ngǝ mǝn balgham, ta voɗ ki waanii a gyaa viin laadi mǝn Yahudawa. ¹⁸Taa ndǝr ta tlǝǝr ki a ken ngǝ gyaa goɓna tǝ guŋsǝ nǝ durghǝ myani, tu a vǝr tlyaaghǝn zha a ken waasǝŋ tǝ ken ngǝ mǝn ɗǝgn.¹⁹Ǝŋ hal caa vǝrki waanii, ɓak vuu nǝ ngǝtn yo ɗaŋ ka kon hǝŋ, durghǝ yo tu ta vǝrki ngǝtn ngǝ konngǝn a kili gii. ²⁰Durghǝ yo tu nǝ kyaani ghǝn kyaa wul vii hǝŋ, beɗ tǝ gii nǝ zhipti var kǝ Dawaan ghǝn wo wul vii a giɓi waan.²¹Kundaktǝ wo vǝr kundashii woshii tǝ ɗuu tii, Daktǝ wo vǝr ŋaa woshii. Mǝǝri ta shisher gyaa mǝn ɓwaaghǝn waasǝŋ mǝn, ta ndǝr ta caa tǝ ɗuushi waasǝŋǝi. ²²Ko nuu beɗ wo nyaŋngaski nǝ durghǝ sǝmatn. Beɗ tǝ gii ɓuruk gyo ɗaŋ ya dumvwaa hal ɓanngǝni, daashi gii ghǝn wo tu vumngǝni. ²³Ǝŋ caa fiir ki forǝm a yaatli gin, kiirǝn aa tlii a kǝ keni. Jom jomi mya fuu ki, ǝnnda aa ɓan ngelaŋngǝn a ɓuruk yaatl kǝ Isar'ila ŋaa zaar wo man.²⁴Ŋaa ghǝ dǝn yi moɓ maalǝm wos hǝŋ, mon beɗ yi moɓ murghǝ dǝn wos hǝŋ. ²⁵A ndara ŋaaghǝ dǝn tǝ naa ɗaŋ maalǝm wos, mon beɗ ɗaŋ murghǝ dǝn wos. Ǝŋ yaan tǝ cim murghǝ dǝnes tu Ba'alzabuul, tǝ kusǝŋsǝ sǝǝm ghǝn ta ciim mǝǝri dǝn wos kai ye?²⁶Nǝ durghǝ gii, cin vǝrtǝ waasǝŋ hǝŋ, durghǝ yo tu baa ngǝtn ngǝ waaɗi won ɗa ɗaŋ ta gaa tǝ baa nǝ bǝǝrghǝni hǝŋ, baa ngǝtn ngǝ mǝǝri won ɗa ɗaŋ ta yisǝŋ tǝ hǝŋ. ²⁷ Ngǝtn yo ɗaŋ tǝ fuu ki nǝ vii muuri, konǝn tii a lǝɓ yaali, ngǝtn yo ɗaŋ kǝ wum shi nǝ naa mǝǝri a kǝǝm waan, konǝntii a gam viin.²⁸Ɓak ci vǝrtǝ gyaa gyo ɗaŋ ta ɗyaa ta ɗuu dlii waanii, beɗ tǝ gii ta ɗyaa ta ɗuu raai waan hǝŋ. A bamvi gii, cin vǝrtǝ gii ɗaŋ wo ɗyaa ɗu ɓuruk dlii waanii tǝ raai waan giɓ wuɗ kǝ shetan. ²⁹ Caa ɗiɓar naa paalǝm mbǝtlǝm a wurɓa njwaatn hǝŋaa? Beɗ tǝ cik gin waasǝŋ won caa ndaaɗ yaatl hǝŋ ɗaŋ yi tǝ yisǝŋngǝn Dawaan hǝŋ. ³⁰ Beɗ tǝ gii ko mbitlǝŋ gaam waan beɗ cinǝ kwaanngǝn. ³¹Cin vǝrtǝ hǝŋ, durghǝ tu zǝnzǝni waan a moɓ kǝ naapaalǝm monnda.³²Nǝ durghǝ gii ko nuu ɗaŋ ya tlyam zha mǝn a ken ngǝ zarsǝ, ma tlya tǝ zha mǝn a ken ngǝ Daagǝtn gyo ɗaŋ ci tsogn gaami. ³³ Beɗ tǝ gii gyo ɗaŋ yaa nyaŋngasǝm a ken ngǝ zarsǝ, ma nyaŋngas tǝ ɗaŋ a ken ngǝ Daagǝtn gii ɗaŋ ci tsogn gaami.³⁴Ɓitalǝn ki tu mǝ man mǝ lǝǝr ni tsǝtnngǝn wusni ɗi a ɗǝgn hǝŋ. Mǝ man tu mǝ lǝǝr ni tsǝtnngǝn wusni ɗi hǝŋ, she de gita. ³⁵ Durghǝ yo tu mǝ mani mǝ caa zaar tǝ nyaŋngas Daagos, ŋaa gǝɗ tǝ nyaŋngas naashi, gǝɗ viin tǝ nyaŋngas kawoshi. ³⁶Wo maan tu gyaa gyomtli ghǝ zaar ta naa nǝ mǝn ɗaashi dǝn.³⁷Gyo ɗaŋ ya suu daagos tǝ naagos moɓǝm a ndara tǝ naa nǝ gǝtn hǝŋ, beɗ tǝ gii gyo ɗaŋ yaa suu kuni wos ko nyii wos moɓǝm a ndara tǝ naa nǝ gǝtn hǝŋ. ³⁸ Gyo ɗaŋ ya mbii hǝmmbǝli wos laaɓǝm ɗi hǝŋ a ndara tǝ naa nǝ gǝtn hǝŋ. ³⁹ Ɓuruk gii ɗaŋ caa suu tǝ gaa raa woshii wo naa tii. Beɗ tǝ gii gyo ɗaŋ ya naa raa woshii nǝ duratn wo tuu tii.⁴⁰Ɓuruk gyo ɗaŋ ya kaɓki waanii a kaɓmi ghǝnndio, ɓuruk gyo ɗaŋ ya kaɓmi a kaɓni gyo ɗaŋ a shinǝm ɗi. ⁴¹Gyo ɗaŋ ya kaɓ murghǝ shinngǝn Coghǝi tu cinǝ murghǝ shinngǝn ngǝ Cogn, wo kaɓ mbuuni ghǝ murghǝ shinngǝn Cogn. Gyo ɗaŋ ya kaɓ zaar ghǝ zaari durghǝ yo tu cinǝ zaar ghǝ zaari, wo kaɓ mbuuni ghǝ zaar ghǝ zaari.⁴²Ɓuruk gyo ɗaŋ ya vǝr namboŋ a giɓkǝ ŋaa mǝǝrin, ko ci yi nǝ koɗ kǝ zha namboŋ kǝ zhak njiri tǝ tlya durghǝ yo tu cinǝ ŋaa ghǝ dǝnatn, jom jomi mya fuu ki, wo naa ɓakmi wos hǝŋ.''

¹ Ɗa kaari ɗaŋ Yesu a ta ɓan sǝǝɗkǝn vii mǝǝri dǝn woshii dzuɓ tliiti mbǝtlǝŋei, she a ta gaa lǝɓeshii durghǝ tu tǝ fuushi vii wusni gha gyaa yaatl waasǝŋ. ² Ɗaŋ Yohanna murghǝ baptisma a ta yi jaarum, a ta wum laa yo ɗaŋ Ɓorghǝn kǝ Cogn ca fi, a ta shinndar vii a te mǝǝri dǝn wos ³tǝ wul tǝ tu, "Nǝ kyan murghǝ manngǝn ɗi yaa, ko mǝ gaa yir gona?"⁴ Yesu ta suɗa, ata wul shi tu, "Tlǝn aa fuu Yohanna ngǝtn yo ɗaŋ kǝ yeli kǝ ndǝr kǝ wumi. ⁵ Doŋsǝ cigha yaalghǝn, gyaa gurumsǝ cigha riighǝn, ndomtsaŋsǝ taa naai ndzǝk ndzǝk, bǝnndǝŋsǝ cigha wumngǝn kǝǝm ɗaɗa, cigha shisherghǝn mǝn mǝǝskǝn, cigha fuughǝn gyaa naai kui vik wusni. ⁶Nǝ murghǝ shiɗshiɗi gyo ɗaŋ ca ngaa yaasǝŋ nǝ duratn hǝŋ."⁷ Ɗa kaari ɗaŋ mǝni gyaa gii tǝ ngaɓ datǝpm tǝ tlii, Yesu ta ngaɓ fuughǝn vii zarsǝ ɗaŋ taa jwaam shi a dulgaam Yohanna, "Nii ghǝn kǝǝ tlǝ ɗa yelghǝn ndǝǝre, nǝ yaar ɗaŋ yetar ca vaɗɗa? ⁸ Nǝ nii ɓar ghǝn kǝǝ nywaal ɗa yelghǝn ɗa ndǝǝre? Zaar yo ɗaŋ a ca lǝŋsǝ nyelagniya? Kǝrǝŋ kǝrǝŋ gyaa gyo ɗaŋ caa ca lǝŋsǝ ghǝ nyelakǝni caa tsǝtn dǝnsǝ ghǝ guŋsǝ.⁹ Beɗ tǝ gii kǝǝ nywaal nǝ yelghǝn nii- murghǝ shinngǝn Cogha? Eh! Mya wul ki tu a moɓ murghǝ shinngǝn Cogn. ¹⁰Gin nǝ muryo ɗaŋ tǝ ta dlyaaɗ a dul gamas tu, 'Yeli, migha shinndarghǝni murghǝ shinngǝnetn ɗi a ken waa, gyo ɗaŋ wo ndǝǝr datǝpm waa.'¹¹Ɗaŋ mya fuuki naa jom jomnin a giɓkǝ mǝn yo ɗaŋ guɗi tǝ ɓwaashi, gon wo tul Yohanna murghǝ baptisma vartǝ hǝŋ. Hal ghǝni gyo ɗaŋ a moɓm ɗaɗkǝni a giɓ guŋndu tsognvon a moɓ tǝ fonaa. ¹² Ɗaŋ a ngaɓ ɗi a mbuɗkǝn Yohanna murghǝ baptisma hal ɗan ɗaŋngǝni guŋndu tsogn cigha giɓkǝ vuughǝni, mǝn vuughǝn caa vum tǝ nǝ naa tlyaaghǝn.¹³ Durghǝ yo tu mǝn shinngǝn Cogn taa kon jaan tǝ mborki Musa kǝnnda kili ghǝ Yohanna; ¹⁴ tǝ cik ǝŋ yaan kyaa suu aa kaɓii, nǝ yaan ngǝn ci Iliya gyo ɗaŋ ata yi tu wo man. ¹⁵ Gyo ɗaŋ yir kǝǝm wumngǝn tǝ wumi.¹⁶ Nii ghǝn nǝ ngaɓi ghǝ usuli ginne? Yini ɗaŋ mǝǝri ɗaŋ caa lyaaghǝn lyaa a lǝɓ vǝǝn, gya gyo ɗaŋ caa tsǝtn cii cim dlǝŋsǝ waasǝŋ ¹⁷tǝ wul tu, 'Mǝ vuɗki busaŋndi mǝn, kǝ waa dlar hǝŋ. Mǝ waa miitsǝ, kǝ ngwaar hǝŋ.'¹⁸ Durghǝ tu Yohanna man ca ci dugn hǝŋ, ca tlya zhak darndu dǝn hǝŋ, tǝ wul tu, 'Citǝ mǝnndǝŋsǝ.' ¹⁹ Ŋaa zaar man, ca ci, ca tlya, tǝ wul tu, 'Yelǝn, murghǝ swaari tǝ murghǝ tlyaghǝn zhak baŋni, kamngǝ mǝn kaɓkǝn zhakka tǝ mǝn fighǝn kusuŋsǝ ngǝtn. Beɗ tǝ gii saghaɗkǝn caa kaɓ gamas a te laa wos."²⁰ Ɗani Yesu ta nda dlwaaghǝni yer dǝllǝŋsǝ yaatl yo ɗaŋ a fi laa wos kǝ vari ghai, durghǝ yo tu tǝ nyaŋngas kaɓkǝn ɗaɗkǝn waasǝŋ." ²¹ A gir ghǝ, Korasin. A gir ghǝ Besaida! Ǝŋ yaan taa yi fi dǝllǝŋsǝ ngǝtn ngǝ kwasarghǝn gyaa gin Taya tǝ Sidon ɗaŋ gyo ɗaŋ tǝ fi a dlei waanii ɓaandǝŋ taa yi kaɓ ndaaɗkǝn waasǝŋǝi tǝ ca lǝŋsǝ, tǝ fufuɗ ɓitlar ɓashi. ²² Beɗ tǝ gii ta moɓ kaɓkǝn Taya tǝ Sidon swaaɗ dzaŋ ɗǝǝlghǝn vii moɓki.²³ Kyan, Kafarnahum, ca vǝrghǝ tu taa dlurghǝi tsognvonaan? Yei! Ta shilarghǝi ɗi yaatl hal giir wuɗ. Durghǝ tu ǝŋ yaan ta yi ta fi dǝllǝŋsǝ ngǝtn ngǝ kwasarghǝn yo ɗaŋ tǝ fi ɗaaghǝ yaatl giɓ Sodom, daa cii yi ɗa hal ɗan ɗaŋngǝni. ²⁴ Beɗ tǝ gii, mya wul ki tu, yaatl kǝ Sodom ta tu tǝ ngǝi ngǝi dzaŋ ɗǝǝlghǝn vii ta moɓki."²⁵ A kili gii Yesu ta wul tu, "Mya luu ghǝ Daa, Daadǝn kǝ tsogn tǝ yaatl durghǝ tu kǝ waaɗ ngǝrshi gyaa ginnii a mǝn saghaɗkǝn tǝ mǝn yisǝŋngǝn, kǝ ɗǝrǝ tii a mǝn yo ɗaŋ taa giɗ shi a ngǝtn hǝŋ, ɗaŋ mǝrghǝ mǝǝri. ²⁶ Eh! Daa, durghǝ yo tu yaanes kǝn ata moɓkǝ ndaraaghǝn mǝn. ²⁷ Taa gaam mǝn taas ɓuruk ngǝtn yo ɗaŋ yi ɗi gha Daaghǝn: tǝ cik gon a yisǝŋ kunes hǝŋ, she Daa ngǝtnwos, cikkǝn gon a yisǝŋ Daa hǝŋ, she kunes ngǝtnwos, tǝ ɓuruk gyo ɗaŋ kunes ya bwaa tǝ zhiɗ tǝ.²⁸ Manǝn ɓasǝm, ɓuruk waan, mǝn buŋngǝn ɗaŋ kyaa vuu tǝ lamndǝ, ma caa ki ka ngaa laa. ²⁹ Mbii hǝmmbǝletii aa kuuɓ ɓasǝm, durghǝ yo tu a mbiim hǝŋ, mi tǝ mbitǝgaam hǝŋ, ka tu raa waan wo mbuɗni. ³⁰ Durghǝ yo tu hǝmmbǝletn yi kǝŋrǝŋ, lamndatn yi foptaŋ.

¹ A kili gii, Yesu ta tlii dzaŋ Wolngi, ata nyol a te kitn won. Kusuŋ aa ta ɗu mǝǝri dǝn woshii, she tǝ ta ngaɓ suurghǝn tsǝr ngǝrshes annda cii ci. ² Beɗ tǝ gii ɗaŋ Farisawa tǝ ta yelshi, tǝ ta wul Yesu tu, "Yeli, mǝǝri dǝn waa caa fi ngǝtn yo ɗaŋ yi waari fighǝn dzaŋ Wolngi."³ Beɗ tǝ gii Yesu ta wulshi tu, "Kaa yi kwaan ngǝtn yo ɗaŋ Dauda fi kili yo ɗaŋ kusuŋ ata ɗu tii tǝ zarsǝ yo ɗaŋ tǝ ta yi cimshi hǝŋaan? ⁴Ata ndai giɓ dǝn Cogn, ci dugn ɗaŋ taa waar tǝ gaa gyo ɗaŋ yinǝ waari ɓastǝ tǝ ci. Yi waari beɗ a mǝn yo ɗaŋ ci cimshi. She gya Pǝris kǝn mborki gaashi tǝ ci.⁵ Kaa kwaan a giɓ mborki Musa hǝŋaan, tu dzaŋ Wolngi gyaa pǝris giɓ dǝn ngǝ Cogn caa malar dzaŋ Wolngi, beɗ tǝ gii yi tu taa mal hǝŋaa? ⁶ Beɗ tǝ gii mya wul ki tu gyo ɗaŋ a moɓ dǝn ngǝ Cogn ci ɗuuni.⁷ Ǝŋ yaan ka yi yisǝŋ dyak kǝ ginni, 'Mǝ suu giɗkǝn gwaandǝ moɓ ngǝtn ngǝ vaaghǝn ngǝtn ngǝ nyaarghǝn,' daa kii ɗǝǝl vii daashii mǝn ɗaŋ aa mal hǝŋ. ⁸ Durghǝ tu Ŋaa zaar ghǝn ci Daaden kǝ dzaŋ Wolnges."⁹ Ɗani Yesu ta gaa lǝɓi gii tlǝn ndai giɓ viin laadi Yehudawas. ¹⁰She murwon ngǝni ɗaŋ taas wos ta yi nǝ pwaaghǝni. She Farisawaas tǝ ceɗ Yesu, cii wul tu, "Yi ɗa giiri tǝ fuɗ zaari dzaŋ Wolngia?" Durghǝ yo tu tǝ vyaar tǝ nǝ fighǝn kuskǝ ngǝtn.¹¹ Yesu ta wul shi tu, "Nǝ nuu a giɓi waan gyo ɗaŋ ǝŋ yaan yir tǝǝm namboŋ, tǝ cik tǝǝmes ndai giɓ giir zha shoŋni dzaŋ Wolngi, wo dli tii ɗi hǝŋo? ¹² Wurii ghǝnnda ka sur zinzini zaar tǝ kǝ tǝǝme? Nǝ durghǝ gii yi ɗa giiri tǝ fi ngǝtn ngǝ mbuni dzaŋ Wolngi."¹³ Nǝ gii Yesu ta wul mures tu, "Taa taas waa." Ata taa taas wos, she taashes ta sutǝɗi byaatl byaatl ɗaŋ kamshi taashi gii. ¹⁴ Beɗ tǝ gii Farisawa tǝ ta nywaalii tǝ ɓumtsǝ kuskǝ vii a dul gamas. Caa ŋal datǝpm yo ɗaŋ ta ɗu tii.¹⁵ Yesu ɗaŋ ata yisǝŋǝi cik ata gaa lǝɓeshii. Zarsǝ monnda tǝ ta laaɓtǝ ata fuuɗ shi waashii. ¹⁶ Ata ca shi yir tu tǝ fi ngǝtn yo ɗaŋ gyaa gon tǝ yisǝŋ tii hǝŋ, ¹⁷ durghǝ yo tu tǝ naa jomi a ngǝtn yo ɗaŋ tǝ kon a vik Ishaya murghǝ shinngǝn Cognvon tu,¹⁸ "Yelǝn, monatn gyo ɗaŋ mǝ bwaa; naa nyaaretn namboŋgyo ɗaŋ ca polǝmɓastǝ. Ma gǝm zhiptetnɓastǝ, wo nger vii mǝn ɗǝgn mǝn.¹⁹ Wo vuu ko tǝ shisher raa wos hǝŋ; gon wo wum yer wos a datǝpm giɓ yaatl hǝŋ. ²⁰ Wo tsal mbatlaŋ yo ɗaŋ aa ngomndǝi hǝŋ; wo mbǝtsǝ wuɗ kuɓka yo ɗaŋ aa naa mel tǝ mbǝtsǝi hǝŋ, she ya lǝǝr ngerghǝn vii fyaali ɗi, ²¹ nǝ gii mǝn yo ɗaŋ cinǝ Yehudawa hǝŋ a sǝm wos kǝn ta gaa raa waasǝŋ.²² Tǝ gii, murwon ɗaŋ ata yi nǝ dwaan nǝ bǝnndǝŋ beɗ, a ta yi tǝ mǝnndǝŋsǝ, tǝ ta lǝǝr tǝ ɗi a Yesu. Ata fuɗ tii. Ngǝtn yo ɗaŋ ata laaɓ kaari yaan ci tu bǝnndǝnyes ata wul viiyi ndǝr yaalii. ²³ Ata kwasar ɗeɓaɗ jwaamngǝn zarshes.Tǝ ta wul tu, "Ko gin ngǝn cinǝ kuni Dauda yaan?"²⁴ Beɗ tǝ gii ɗaŋ Farisawa tǝ ta wum ngǝtn ngǝ kwasarghǝn gin, tǝ ta wul tu, Ba'alzabul kuni guŋ mǝnndǝŋsǝ ghen ca vǝr tǝ dǝǝl annda ca nyolar mǝnndǝŋsǝ." ²⁵ Beɗ tǝ gii Yesu ta yisǝŋ bitalghǝn waasǝŋǝi, she a ta wul shi tu, "Ɓuruk guŋndu yo ɗaŋ yaa ɓǝǝlii ghǝnnda caa fi kashi tǝ gamas wo dlǝǝr hǝŋ.²⁶ Ǝŋ shetan ya nyolar shetanii, ca gaani gǝǝɓ tǝ gamas a ɓǝǝlii mbǝtlǝm ghǝnndi. Wurii ghǝnnda guŋndu wos wo dlǝǝre? ²⁷ Ǝŋ yaan mya nyolar mǝnndǝŋsǝ tǝ vartǝ ghǝ Ba'alzabul, tǝ nuu ghǝn mǝn waan caa nyolar shio? Nǝ durghǝ gii yaŋshi ghǝnnda ta ɗǝǝl ki vii mǝn.²⁸ Beɗ tǝ gii ǝŋ yaan mya nyolar mǝnndǝŋsǝ tǝ zhipti var ghǝ Cogn, to guŋnɗǝ ghǝ Cogn aa man a dulgamawaan. ²⁹ Wurii ghǝnnda zaar wo nda dǝn ngǝ murghǝ tlyaaghǝn nyom tǝ ngǝtii ɗaŋ aa ngaɓtǝ naɗi keni hǝŋe? Cik ghǝnnda wo ɗyaa nyom tǝ ngǝtii ɗaa tǝ dǝn. ³⁰ Gyo ɗaŋ ci ɓasǝm hǝŋ ca gaani gǝǝɓ tǝ myani ghǝnndi. Cikkǝn gyo ɗaŋ ca sommǝm ɗa jwaamngǝn hǝŋ, ca basaŋni ni.³¹ Nǝ durghǝ gii, mya wul ki tu, ko kuskǝ ngǝti gyo tǝ kemaskǝn Cogn gyo, ta dlaa loŋshes zaar mǝnii. Beɗ tǝ gii kemaskǝn zhipti var ta dlaa loŋshi hǝŋ. ³² Ɓuruk muryo ɗaŋ ya wul vii malarghǝn a Ŋaa zaar, gii ta dlaa tǝ loŋshes mǝnii. Beɗ tǝ gii ɓuruk gyo ɗaŋ ya wul vik kemaskǝn a dulgaam ngǝ zhipti var gii ta dlaa tǝ loŋshes mǝn hǝŋ, ko a ɗǝghǝn ko nǝghǝ zhaaɗ zhaaɗi.³³Sular gwaas ndaraara guuri wos maa tǝ ndara, ko aa sular gwaas nǝ kuushi guuri wos tǝ kuushii beɗ, durghǝ tu cii yisǝŋ gwaas a te ghǝ guuri wos. ³⁴ Kyaani usuli ghǝ kazar, ɗaŋ kinǝ kusuŋshi, wur ghǝnnda ka kon ngǝtn ngǝ mbune? Durghǝ yo tu ngǝtn yo ɗaŋ yigha giɓkǝ raa ghǝn ca nyol ki mǝn ɗi a vii. ³⁵ Zaar ghǝ mbuni a giɓkǝ ngǝtn yo ɗaŋ a jwaam a raa wos ghǝn ca nywaal ɗi. Cikkǝn kuskǝ zaar, a giɓkǝ ngǝtn yo ɗaŋ a jwaam a raa wos ghǝn caa nywaal ɗi nǝ kusuŋshi.³⁶ Mya wul ki tu dzaŋ ɗǝǝlghǝn vii zarsǝ ta vǝr ɓotsǝ ghǝ ko ngǝtn ngǝ ɓenndǝmi yo ɗaŋ taa wul. ³⁷ Durghǝ yo tu tǝ wulghǝni vii waan ka vum gamawaanii, tǝ konngǝn vii waan saɗ ɗa ta ɗǝǝl ki vii mǝn ngai."³⁸ Tǝ cik maalǝmci Attaura gyaa gon tǝ Farisawa tǝ ta su Yesu ɗa tǝ wul tu, "Maalǝm, myaa suu me yel ɓalaŋ won ɓaskǝ." ³⁹ Beɗ tǝ gii Yesu ta wul shi tu, "Usuli gin kǝ kuushi tǝ mbǝllǝ caa ŋal ɓalaŋ. Beɗ tǝ gii ɓalaŋ won ɗa ɗaŋ ta zhiɗ shi hǝŋ, she kǝ Yunana murghǝ shinngǝn Cogn. ⁴⁰ Ɗaŋ gii ɗaŋ Yunana fi vyaaghǝn maayi tǝ kaviɗ maayi a vwaa dellǝ ghǝ gyaashii, cikkǝn Ŋaa zaar wo fi vyaaghǝn maayi tǝ kaviɗ maayi a giɓkǝ raa ghǝ ɗǝgn.⁴¹ Mǝn Ninevi ta dlǝǝr dzaŋ ɗǝǝlghǝn vii tǝ usuli gin tǝ ɗǝǝl shi vii mǝn. Durghǝ yo tu tǝ ta kaɓ ndaaɗkǝn waasǝŋǝi ɗaŋ Yunana ta fuushi vik Cogn. Yelǝn, gyo ɗaŋ a ngaa Yunana ɗa ci ɗuuni.⁴² Gǝɗ yo ɗaŋ nǝ guŋ mǝn Banndi zaari wo shishi dzaŋ ɗǝǝlghǝn vii tǝ mǝn usuli gin ndǝr lii shi waasǝŋǝi. A dlamɗi a te ɓanci ɗǝgn tǝ wum saghaɗkǝn kǝ Solomon. Yelǝn gyo ɗaŋ a ngaa Solomon ɗa ci ɗuuni.⁴³ Kili yo ɗaŋ kuskǝ zhipti ya nyolii gha zaar, ca yi latsǝ a lǝɓ yo ɗaŋ zha yighai hǝŋ ca ŋal lǝɓ ngaaghǝn laa, beɗ tǝ gii ca tu hǝŋ. ⁴⁴ Ɗani ca wul tu, 'Ma sum a denatn ɗaŋ mǝ dlam ɗi ghai.' Tǝ sughǝn wos ɗi, a tu dǝnes nǝ dorghǝn kali kali. ⁴⁵ Wo tlǝn nyom kusuŋsǝ mǝnndǝŋsǝ gyaa gon ɗi wottsǝmai ɗaŋ tǝ moɓ tǝ kuuskǝni, ɗeɓaɗ waasǝŋ tǝ man tsǝtnni ɗa ɗǝni. Ɗani tsǝtnngǝn mures kǝ kaari wo kuus moɓ kǝ kenes. Cikkǝn wo naa tǝ kuskǝ usuli gin.⁴⁶ A kili yo ɗaŋ Yesu cigha wulghǝn vii tǝ zarsǝ ɗaŋ taa jwaam shi, she naashi tǝ gyaa yesashi tǝ man dlǝǝr ɓidlǝm, caa ŋal tǝ wul vii tǝ yaani. ⁴⁷ Gon ta wul tǝ tu, "Yeli, nana gwaa tǝ gyaa yesa cigha dlǝǝrghen ɓidlǝm, caa ŋal tǝ wulghǝ vii."⁴⁸ Beɗ tǝ gii Yesu ta suɗa ata wul daas yo ɗaŋ a fuu tii tu, "Nuu ghǝn ci naagǝtn tǝ gyaa nuu ghǝn cinǝ gyaa yesato?" ⁴⁹ She ata taa taas wos a te mǝǝri dǝn wos wul tu, "Yelǝn gyaa Naagǝtn tǝ gyaa yesatn ngen ci ghǝni! ⁵⁰ Durghǝ tu ɓuruk muryo ɗaŋ ca fi ngǝtn yo ɗaŋ Daagǝn gii ɗaŋ ci gaamii ca suu, daashi gii cinǝ yesatn, tǝ waatsatn, tǝ naagǝn."

¹Ɗa dzanyi gii Yesu ta nyoii ɗi ɗa dǝnes ata tlǝn tsǝtni a ɓil dǝllǝ zha. ² Zarsǝ monnda tǝ ta jwaamshi ɗi tǝ ta ngirǝŋ tii, she ata ndai giɓ zhuŋ zha tsǝtni ghai ɗa giɓi, ɓuruk zarses tǝ ta dlǝǝr a ɓiil dǝllǝ ghǝ zhai.³She Yesu ta fuushi gyaa ngǝtn monnda tǝ yer ghǝ vii . Ata wul tu, "Murghǝ giighǝn kitn won ta tlǝ tǝ dlaa turshi ngǝtn. ⁴ Ɗaŋ cigha dlaaghǝni turshes gyaa gon tǝ ta shiii a datǝpm, she yetli tǝ ta man ɗaashi tǝ cii. ⁵Turshi gyaa gon tǝǝ ta shii a lǝɓ puus lǝɓ yo ɗaŋ yaatl kai monnda hǝŋ. Swaaɗ kyaaɗ tǝ ta mbwaai, durghǝ yo tu yaatles ta shoŋ hǝŋ. ⁶ Beɗ tǝ gii ɗaŋ dzaŋ ta nyolii ɗi tǝ ta lanndǝi durghǝ yo tu tlǝtǝri waasǝŋ nda giɓi hǝŋ, tǝ ta kuŋǝi.⁷Turshi gyaa gon tǝ ta shii dlǝk yiɓka, yiɓkas tǝ maghaɗ shi waasǝŋǝi. ⁸ Turshi gyaa gon tǝ shii a yaalt ndaraani tǝ ta fi tsǝǝrii, gyaa gon ta fi gwaasǝŋ buŋli kuuri namboŋ, gyaa gon tashi lim gyaa gon tashi maayi. ⁹ Muryo ɗaŋ yir kǝǝm ngǝ wumngǝni, tǝ wumi."¹⁰Mǝǝri dǝnes tǝ ta man tǝ wul Yesu tu, "Nii ghǝn a caa ghǝnnda kya wul vii zarsǝ ɗaŋ tǝ jwaamshi tǝ yerghǝ vie? ¹¹Yesu ta sushi ɗa, ata wul shi tu, "Kyaani taa vǝrki dei kǝ yisǝŋngǝn mbukshi guŋndǝ tsognvon, beɗ tǝ gii taa vǝrshi gwaasǝŋ hǝŋ. ¹² Durghǝ yo tu ɓuruk gyo ɗaŋ yir, taa daɗak tǝ mǝn ngai monnda. Beɗ tǝ gii ɓuruk gyo ɗaŋ yir hǝŋ ta kaɓii ɓastǝ, hal tǝ gyo ɗaŋ yir ta kaɓii ɓastǝ.¹³Dei yo ɗaŋ a caa mya wulshi vii tǝ yer ghǝ vii ghǝni, ko ɗaŋ tu cigha yaalghǝni, ta yeli hǝŋ, ko ɗaŋ tu cigha wumngǝni, ta yisǝŋ hǝŋ. ¹⁴Ɓashi ghuŋ ta yuŋngar konngǝn ngǝtn ngǝ jaan yo ɗaŋ Ishaya kon ɗaŋ ca wul tu, 'Ǝŋ yaan kiigha sǝǝghǝn kǝǝm ka wumi, beɗ tǝ gii ka yisǝŋ hǝŋ. Ǝŋ yaan kigha yaalghǝn ka yeli, beɗ tǝ gii ka ngaɓ gaami hǝŋ.¹⁵Durghǝ yo tu raa ghǝ zarsǝn aa diɓi, taa ndǝr tǝ nyaŋngas wumngǝn, tǝ ndǝr tǝ dlǝpm yir waasǝŋǝi, durghǝ yo tu tǝǝ yeli tǝ yir waasǝŋ hǝŋ, ko tǝǝ wumi tǝ kǝǝm waasǝŋ, ko tǝ yisǝŋǝi tǝ raa waasǝŋ, durghǝ yo tu tǝǝ sushi ɗi ɗa, tǝǝ tu vumngǝni waasǝŋǝi.¹⁶Beɗ tǝ gii a mbaa yir waan nǝ durghǝ yo tu taa yeli, tǝ kǝǝm waan nǝ durghǝ yo tu taa wumi. ¹⁷Mya fuuki naa jom-jomni tu mǝn shinngǝn Cogn tǝ zarsǝ ghǝ zaari monnda tǝǝ ta suu tǝǝ yel ngǝrshi gyaa gin ɗaŋ kyaa yelin, tǝǝ ta tu tǝ yelshi hǝŋ. Taa ta suu tǝǝ wum ngǝrshi gyaa gin ɗaŋ kyaa wumin tǝ ta tu tǝ wumi hǝŋ.¹⁸Sǝǝn kǝǝm a yer ghǝ viin kǝ murghǝ kitn gyo ɗaŋ a dlaa turshi ngǝtn wos. ¹⁹Ǝŋ gon ya wum vik guŋndes beɗ tǝ gii a yisǝŋ kari hǝŋ, she murghǝ kuskǝ ngǝtii man vum ngǝrsheshii ɗaŋ tǝǝ dlaa a raa woshii. Gin nguŋ ci turshi gyaa gyo ɗaŋ tǝ shii a datǝpm.²⁰Ngǝtn yo ɗaŋ tǝ dlaa a lǝɓ puus yaan cinǝ muryo ɗaŋ tǝ wumngǝn vies swaaɗ kyaaɗ a kaɓii tǝ polghǝni, ²¹ beɗ tǝ gii yir tlǝtǝri hǝŋ, caa dum vwaa nǝghǝ kili ŋaa jwaatn . Ǝŋ vuughǝn tǝ buŋngǝni caa shishiɗi nǝ durghǝ vietn, wo ndaaɗi kyaaɗ.²²Ngǝtn yo ɗaŋ tǝǝ dlaa dlǝk yiɓka gin ghuŋ cinǝ zaar gii ɗaŋ a wum vieshii beɗ tǝ gii, vuughǝn ɗǝgn tǝ tughǝn ɗaŋ caa mor tǝ, tǝǝ maghaɗ vie shii, hal a ɗyaa fi tsǝǝri hǝŋ. ²³ Ngǝtn yo ɗaŋ tǝǝ dlaa a yaatl mbuni yaan ci gyo ɗaŋ a wum vieshii ndǝr yisǝŋǝi . A guur ndǝr fi tsǝǝri, gyaa gon hal kuri namboŋ ɗaŋ kǝ dlaaghǝni wos, gyaa gon tashi lim, gyaa gon hal tashi maayi kǝ lǝǝɗkǝni wos.²⁴Yesu ta man fuushi yer ghǝ vii gon ɗa, ata wul tu, "Guŋndu ghǝ Cognvon yini ɗaŋ tu nǝ murwon ɗaŋ a kaɓ tursǝ ngǝtn kitn wos. ²⁵ Beɗ tǝ gii ɗaŋ zarsǝ tǝ shii kuci, she gyomtli wos, a man kǝɓ busa kaɗi ghai ɗa dlǝk alkamai, tlii ngǝtn wos. ²⁶ Kili yo ɗaŋ tǝǝ tai hal tǝǝ fi tsǝǝrii , she yaar tǝǝ giɗ gamawaasǝŋǝi ɗi ɗaŋ.²⁷Monsǝ murghǝ kites tǝǝ man tǝǝ wul tǝ tu, 'Maalǝm, nǝ turshi mbuni ghuŋ kǝ ta kǝɓ a kitn waai hǝŋaan? Wurii ghǝnnda ɗaŋngǝni yi tǝ busa kaɗe?' ²⁸ Ata wul shi tu, 'Nǝ gyomtletn ghuŋ a fi gini.' Monshes tǝǝ ta wul tǝ tu, 'Kyaa suu mǝ tlǝn nuul shi waashi yaa?'²⁹Murghǝ kites ta wul tu, 'Yei. Durghǝ yo tu kǝn yaan kyaa nuulghǝn busa kaɗes, tsǝn ta kǝ nuul gyaa alkameshi ghai beɗ. ³⁰ Gaan shi tǝ luuɗ vii namboŋ hal kili tlaaghǝni. A kili tlaaghǝnes ma wul mǝn tlaaghǝnes tu, "Nuulǝn busa kaɗeshii keni aa naaɗ shi waasǝŋǝi dǝni-dǝni tǝǝ gǝǝpm shi waasǝŋǝi, beɗ tǝ gii jwaamǝn alkameshii aa shin giɓ fuŋatn.""'³¹Yesu ta fuushi vii gon ɗa. Ata wul tu ,"Guŋndǝ tsognvon yini ɗaŋ tsǝr mastaɗ gyo ɗaŋ murwon mbii kǝɓ a kitn wos. ³² Turshi gin yaan ghuŋ a moɓ ɗaɗkǝn kaɓ a turshi gyaa ngǝtn. Beɗ tǝ gii ǝŋ ya luui, a moɓ fupmngǝn ɓuruk patsǝ ngǝtn ngǝ laares. Caa naai nǝ gwaas, durghǝ yo tu yetli caa man nal viin waasǝŋ a dlyaŋri wos.³³Yesu ta man fuushi vii gon ɗaɗa. "Gugndǝ Cognvon yini ɗaŋ yiis ɗaŋ gǝɗ won mbii nyoptǝ ɗaŋ a ɓumtsǝ a koɗ maayi mburii tǝ yiis she mbores shishi.³⁴Ɗeɓaɗ ngǝrshi gyaa gin Yesu ta fuu zarshes ɗaŋ ta jwaami tǝ yer ghǝ vii naa gin, ata fuushi ngǝtn won mari hǝŋ she tǝ yer ghǝ vies. ³⁵ Gin yinǝ tu ngǝtn yo ɗaŋ tǝ kon a te murghǝ shinngǝn Cogn wo naai jomi, ɗaŋ ata wul tu, "Ma wul vii ɗaŋ gin. Ma kon ngǝrshi gyaa gii ɗaŋ tǝǝ taa yi nǝ waaɗi ɓaandǝŋ a gǝmngǝn daɗi ghǝ ɗǝghǝi."³⁶She Yesu ta gaa zarshes ɗaŋ taa jwaamii ndai giɓ dǝn. Mǝǝri dǝn wos tǝǝ ta man ɓastǝ tǝǝ wul tǝ tu, "Fuumi dyak yer ghǝ viin a dulgaam busa kaɗi kǝ kites." ³⁷ Yesu ta suɗa ata wul tu, "Muryo ɗaŋ a dlaa turshi mbunes nǝ Ŋaa zaar. ³⁸Kites yaan nǝ ɗǝgn, turshi mbunes ghǝn cini mǝǝri guŋndes . Busa kaɗes kǝn cinǝ mǝǝri murghǝ kuskǝ ngetn, ³⁹ muryo ɗaŋ ca suum hǝŋǝi ɗaŋ a kǝɓ shi waasǝŋǝi yaan nǝ shetan. Tlaaghǝnes yaan nǝ ɓanngǝn ɗǝgn, mǝn tlaaghǝnes cinǝ zhipti shinnghǝn Cogn.⁴⁰Durghǝ gii, ɗaŋ gii ɗaŋ caa jwaam yaar tǝ caa wuɗ kai, cig ghannda wo naa a ɓanngǝn ɗǝgn. ⁴¹ Ŋaa zaar wo shinndar zhipti mǝn yo ɗaŋ caa lǝǝr ndaaɗkǝn ɗi a guŋndǝ wos, tǝ gyaa gyo ɗaŋ caa fi kusǝŋsǝ ngǝtn. ⁴² Taa shin shi waasǝŋǝi giɓ wuɗi gii ɗaŋ caa mbǝtsǝ tǝ hǝŋǝi ɗan ghannda ngwaarngǝn ɗa tǝ ŋaaskǝn gamvii. ⁴³ Kili gii zarsǝ ghǝ zaari ta zǝk ɗaŋ dzaŋ a giɓ guŋndǝ Dawaasǝŋ. Murghǝ kǝǝm wumghǝni tǝ wumi.⁴⁴Guŋndu Cogn yini ɗaŋ ngǝtn tughǝn yo ɗaŋ nǝ waaɗkǝn dlǝk kitn. Mur won tui, a waaɗii. Tǝ polghǝn, ata tlǝn ɗiɓar ɗeɓaɗ ngǝtn ngǝ taas woshii ɗiiɓ kiteshii. ⁴⁵ Saɗɗa, guŋndu Cognvon yini ɗaŋ murghǝ ɗiiɓkǝn tǝ ɗiɓarghǝn won, gyo ɗaŋ caa ŋal puus kǝ zǝnzǝni. ⁴⁶Ɗaŋ a tu puus kǝ zǝnzǝni gonnii namboŋ ɗaŋ ci tǝ zǝnzǝni naŋ, ata tlii tlǝn ɗiɓar ɗeɓaɗ ngǝtn ngǝ taas woshii ɗiiɓii ghai.⁴⁷Hal ghǝni, guŋndu Cognvon yini ɗaŋ shelle zǝri gyo ɗaŋ tǝ gǝm giɓ dǝllǝ ghǝ zha, gyo ɗaŋ a jwaam ngǝtn ngǝ zha mari-mari. ⁴⁸Daŋ a yughǝi, she mǝn nyomngǝn gyaashes tǝ ta nyolarii ɗi a laŋshi. She tǝ ta tsǝtni tǝ waar ngǝrshi gyaa gii ɗaŋ nǝ mbunii giɓ koɗ , tǝ su kǝ kusuŋshes tǝ dlaai.⁴⁹Cikkǝn wo naa a ɓanngǝn ɗǝgn. Zhipti ghǝ shinngǝn Cogn ta man waar mǝn kuuskǝni a dlei mǝn mbuni. ⁵⁰Ta shinshi waashii a giɓ wuɗi gii ɗaŋ caa mbǝtsǝ hǝŋǝi, lǝɓ yo ɗaŋ ta ngwaar ghai tǝ ŋaaskǝn taas.⁵¹Kǝǝ mbii dei ɗeɓaɗ ngǝrshi gyaa ginniyaa? Mǝǝri dǝnes tǝ wul tu. "Eh!". ⁵² She Yesu ta wul shi tu, "Nǝ durghǝ gii ɗeɓaɗ Maalǝm kǝ dlyaaɗkǝn yo ɗaŋ a naa nǝ murghǝ kuɓkǝn ngǝtn ngǝ guŋndu kǝ Cognvon cini ɗaŋ murghǝ dǝn, gyo ɗaŋ a nyolar gǝrǝŋsǝ ngǝtn tǝ ngǝtn ngǝ muuri ɗi a ngǝtn ngǝ tughǝn wos." ⁵³ A kili yo ɗaŋ Yesu ta pok yer ghǝ vii gyaa ginnii, ata gaa lǝɓi geshii.⁵⁴She Yesu ta sutǝɗi ɗaa tǝ yaatl yi fuu zarsǝ vik Cogn ɗaashi viin laadi Yahudawa. Nǝ gii, ata kwasarshi ghǝnnda cii wul tu," Ɗo ghannda muri gin tu saghaɗkǝn tǝ ngǝtn ngǝ kwasarghǝn gyaa gin ɗi ɗo? ⁵⁵ Muri giin ghǝn ci kuni kafintai hǝŋaan? Nǝ yaan ghǝn caa cim naashi tu Maremui hǝŋaan ? Gyaa yes wos kǝn nǝ gyaa, Yakuɓ, tǝ Isufu, tǝ Siman, tǝ Yahudai hǝŋaan? ⁵⁶ Gyaa waatsashi ɓuruk ghǝn mi cimshin hǝŋaan? Ghǝnnda a tu gos ɗeɓaɗ ngǝrshi gyaa gin ɗi ɗo?"⁵⁷Ata tliishi ɓastǝ. Beɗ tǝ gii Yesu ta wul shi tu, "Murghǝ shinngǝn Cogn yi tu luughǝn ɗaa tǝ yaatl tǝ giɓ dǝn wos hǝŋ." ⁵⁸Ata fi ngǝtn ngǝ kwasarghǝn monnda ɗani hǝŋ nǝ durghǝ ɗakkǝn caaghǝn raa waasǝŋ.

¹A kili gii, guŋ Hiridus ta wum vii a dulgaam ngǝ Yesu. ² Ata wul monsǝ wos tu, ''Gini nǝ Yohanna murghǝ baɓtismai ǝŋ a shishi ɗi a giɓkǝ mǝn mǝskǝn. Yaan a caa ca fi laa tǝ vartǝ cik.''³Yaan guŋ Hiridus ata yi ngaɓ Yohanna naɗii, gǝm tii giɓ dǝn garaŋ nǝ durghǝ Hirudiya gǝɗi kundaashi Filibus. ⁴Durghǝ yo tu Yohanna aa ta yi wul tǝ tu, ''A ndara hǝŋ ɗaŋ kǝ kaɓ gǝɗi kundai.'' ⁵Aa ta naa ɗa hǝŋ Hiridus tǝ ɗu Yohannai, beɗ tǝ gii ata ci vǝrtǝ zarsǝ nǝ durghǝ yo tu, tǝǝ ta ya mbii tǝ tu cinǝ murghǝ shinngǝn Cogn.⁶Beɗ tǝ gii dzaŋ gii ɗaŋ cigha ɓitalghǝn dzaŋ ngǝ ɓwaaghǝn Hiridus ɗaŋ ata tuluɗi, a fi belak nyii ngǝ Hiruduya ɗaŋ ata waa dlaar a kiles ata pol Hiridus kai. ⁷Nǝ durghǝ gii she ata mbii ɗa rai tǝ ŋaskǝn puus tu wo vǝrtǝ ɓuruk ngǝtn yo ɗaŋ ya ceɗ.⁸Ɗaŋ naashi ta wul tǝ, she ata wul tu, ''Vǝrǝm gaam ngǝ Yohanna murghǝ baɓtismai a dulghǝ piipiin.'' ⁹A ta tlii guŋes kai nyaŋ nyaŋ nǝ ngǝtn yo ɗaŋ nyies ata ceɗ, beɗ tǝ gii nǝ puus ɗaŋ a ŋas nǝ, nǝ durghǝ yo tu citǝ zarsǝ monnda ɗa lǝɓ belakes, she a ta vǝr vii tu tǝ fi cik.¹⁰Ata shin tǝ tlǝn dzak gaam ngǝ Yohanna ɗi giɓ dǝn garaŋ. ¹¹She tǝ ta lǝǝr gaames ɗi a piipii tǝ vǝr nyes she a ta tlǝǝr naashi mǝn. ¹²She mǝri dǝn wos tǝ ta man mbi gimmbǝlleshi she tǝ tlǝn gii. Ɗa kaari tǝ ta tlǝn fuu Yesu.¹³Ɗaŋ Yesu ta wum cik a ta nyolii ɗani tlǝn ndai giɓ ŋaa zhuŋ zha won tlii a lǝǝɓ won ngǝtn wos. Ɗaŋ zarsǝ monnda tǝ ta wum cik, tǝ ta laaɓ tǝ, tǝ yaasǝŋ ɗa giɓ yaatles. ¹⁴Ɗaŋ Yesu ta man a ken waasǝŋ ɗaŋ taa jwaamshi monndai, ata yel gwaandǝ waasǝŋ ata fuɗ mǝn gonngǝnnii a giɓi waasǝŋ.¹⁵Ɗaŋ suutu ta fii, mǝǝri dǝn wos tǝ ta man ɓastǝ tǝ wul tu, ''Lǝɓǝn nǝ ndǝǝr, dzaŋ aa ndai. Gaa zarsǝn tǝ tlǝn ŋal ngǝtn ngǝ cighǝn gamawaasǝŋ mǝn ɗi a mǝrǝ yaatl.''¹⁶Beɗ tǝ gii Yesu ta wulshi tu, ''Tǝ tlii cighǝi a ndara hǝŋ, vǝrǝnshi ngǝtn ɗi ɗaŋ ta ci'' ¹⁷Tǝ ta wul tǝ tu, ''Mǝ yir nini dugn nanndam tǝ gyaas mbǝtlǝm ɓasmi ɗuun.'' ¹⁸Yesu ta wul tu, ''Lǝǝrǝn ɗi ɓasǝm ɗuun.''¹⁹She Yesu ta wul shi tu tǝ tsǝtni a yaar. A mbii dukes nandam tǝ gyaas mbǝtlǝmes. A gǝm shiɗshiɗi ghai tsaalshi waashi vǝr mǝǝri dǝnnes. Mǝri dǝnnes tǝ ta ɓǝǝl zarshes. ²⁰ Tǝ ta ci ɗeɓaɗ waasǝŋ kǝǝm shi. She tǝ ta jwaam kwartsaŋsǝ dukes tǝ gyaashes buŋshi dzuɓ tliiti mbǝtlǝm; nǝ yugnngǝn. ²¹Mǝn yo ɗaŋ tǝ ta ci tǝ tulii zaŋngu nanndam mǝn monci ngǝnt waasǝŋ, guɗi tǝ mǝǝri ghai hǝŋ.²²Ɗani kyaaɗ ata caa mǝǝri dǝn wos tǝ ta ndai a ŋaa zhuŋ zha tǝǝ laatsǝi a ken wos a te dlari gii annda tǝ ɓǝǝlshi tǝ zarsǝi ɗaŋ tǝ jwaamii. ²³Ɗa kaari ɗaŋ ata ɓǝǝl tǝ tǝ zarshes, ata tlii dulghǝ wuur ngǝtnwos tu tǝ kara Daadǝn. Ɗaŋ sutu ta fii, ata yi ngǝtnwos ɗa ɗani. ²⁴Beɗ tǝ gii a kili gi ŋaa zhuŋ zhes ta yi ɗi ɗoongai ɗa dlǝk dǝllǝ ghǝ zhes nǝ durghǝ yo tu vuughǝn zha rupes tǝ yetar tǝ ta yi ɓashi vuughǝn nyaŋ nyaŋ.²⁵Dwaam wuɓsǝ kǝ taaghǝ ɓitlndi Yesu ta ngaɓ datǝpm maaghǝn ɗi ɓashi cigha riighǝn a dulghǝ zhes. ²⁶Ɗaŋ mǝǝri dǝn woshes tǝ ta yel tǝ a riighǝn a dulghǝ zhes, she vǝrtǝ ta ngaɓshi waasǝŋǝi tǝ wul tu, ''Gin nǝ liiri,'' tǝ gǝm riiŋ nǝ vǝrtǝ. ²⁷ Beɗ tǝ gii Yesu ta gǝmshi vii kyaaɗ wul shi tu, ''Tlyaan moɗ! Nǝ myani! Vǝrtǝ tǝ ngaɓki hǝŋ.''²⁸Biturus ta sutǝɗa wul tǝ tu, ''Daadǝn, ǝŋ yaan nǝ kyani, vǝrǝm dǝǝl mǝ man ɓaskǝ a dulghǝ zhes.'' ²⁹Yesu ta wul tǝ tu, ''Man.'' She Biturus ta nyolii ɗa ŋaa zhuŋ zhes ngaɓ riighǝn a dulghǝ zhes caa maan nga Yesu. ³⁰Beɗ tǝ gii ɗaŋ Biturus ta yel dǝllǝ ghǝ yetares vǝrtǝ ta ngaɓtii. Ata ngaɓ malghǝn ɗa zhes she ata gǝm riiŋ wul tu, ''Daadǝn, vummi!''³¹Yesu ta taa taas ngaɓ Biturushii wul tǝ tu, ''Kyani caaghǝn raa waa yi ŋaa njwaatn, nii a caa kǝ tsalii a raa wei? ³²Ɗa kaari ɗaŋ gyaa Yesu tǝ Biturus tǝ ta ndai giɓ zhuŋ zhes, she yetares ta gaa vuughǝn zheshii. ³³She mǝǝri dǝn woshes ɗa giɓ zhuŋ zhes tǝ ta mbuu Yesu tǝ wul tu, ''Jom jomi kinǝ ŋaa ghǝ Cogn.''³⁴Ɗaŋ tǝ ta dlaarii, tǝ tulii yaatl kǝ Janisarat. ³⁵Ɗaŋ mǝn yaatles tǝ ta yisǝŋǝi tu nǝ Yesu, she tǝ ta shin a mǝri yaatli gyaa gon tu tǝǝ lǝǝr gyaa mǝn gonngǝn ɗi ɓastǝ. ³⁶Tǝǝ ta kara tu tǝǝ tǝǝn ni ŋaa vii laŋshi ghǝ luu wos kurum, ɓuruk muryo ɗaŋ ata tǝǝni ata fuuɗii.

¹ She Farisawa tǝ gyaa Maalǝmci ghǝ giɗkǝn mborki ghǝ Musa tǝ ta dlam ɗi Urshelima tǝ man a Yesu wul tu, ² "Nii ghǝn a caa annda mǝǝri dǝn wa caa laaɓ giir yaasǝŋ ngǝ mǝnvaraŋsǝ hǝŋee? Durghǝ yo tu caa coɓ taas waasǝŋ annda tǝ ci ngǝtn ngǝ cighǝni hǝŋ." ³ Yesu ta sushi ɗa tu, "Nǝ nii ghǝn a caa kyaani kyaa ŋaŋngas laaɓkǝn mborki ghǝ Cognvon nǝ durghǝ duul riighǝn waane?⁴ Durghǝ yo tu Cognvon wul tu, ' Luu gyaa mǝn ɓwaaghǝni waa; muryo ɗaŋ ya wul kuskǝ vii mǝn ɓwaaghǝni wos wo mǝs ni shaŋtaŋ.' ⁵ Beɗ tǝ gii kǝ wul tu, 'Ɓuruk muryo ɗaŋ ya wul mǝn ɓwaaghǝn wos tu, "Ɗeɓaɗ ngǝtn yo ɗaŋ ka tu ɓasǝm ɗaŋngǝni nǝ ngǝtn yo ɗaŋ ta vǝr Cognvon,'' ⁶ tu zaar a ndara tǝ luu murghǝ ɓwaaghǝn wos hǝŋ. A te tǝpi gin nguŋ kǝ sular vik Cogn nǝ ngǝtn won hǝŋ nǝ durghǝ duul riighǝn waan.⁷ Kyaani mǝn ryaaghǝn lǝɓ, a ndaraani ɗaŋ Murghǝ shinngǝn Cogn Ishaya ta kon ngǝtn ngǝ jaan a dulgama waan ɗaŋ a wul tu, ⁸ "Zarsǝ gyaa gin caa luu mǝni tǝ laɗ vii waasǝsŋ kurum,beɗ tǝ gii raa waasǝŋ yi ɗi ɗoongai tǝ myaan. ⁹ Caa mbuumǝni a ɓenndǝmi, nǝ durghǝ yo tu caa giɗni gwaasǝŋ mborki ghǝ zarse.'"¹⁰She ata cim zarsǝ ɗaŋ taa jwaamshi ɗi ɓastǝ wul shi tu, "Sǝǝn kǝǝm aa wumi mbun mbun aa yisǝŋǝi- ¹¹ Ngǝtn yo ɗaŋ ca nda a vii zaar annda caa malar zaar hǝŋ. Nǝ ngǝtn yo ɗaŋ ca yi nyol ɗi a vii zaar annda ca malar zaar."¹² She mǝǝri dǝn wos tǝ ta man wul tǝ tu, "Kaa yisǝŋǝi tu a pol Farisawa a vii gini hǝŋaa?" ¹³ Yesu ta sushi ɗa tu, Ɗeɓaɗ gwaas yo ɗaŋ Daagǝn ǝŋ a dluur hǝŋ ta dli tǝ ta kurii. ¹⁴ Gaan shi kas ngǝtn waasǝŋ, yaŋshi ghǝn caa ngaɓ shirǝŋ doŋsǝ mǝn. Ǝŋ yaan dwaan ngǝn wo ngaɓ shirǝŋ dwaan mǝn ɗeɓaɗ waasǝŋ ta tlǝn shii giir."¹⁵ She Bitrus ta su Yesu ɗa tu, "Fuu mi vii gyaa gin mbun mbun." ¹⁶ Yesu ta wul tu, "Kyaani maa kaa yisǝŋ hǝŋaa? ¹⁷ Kaa yisǝŋ hǝŋaa tu ɗeɓaɗ ngǝtn yo ɗaŋ yaa nda a te vii nǝ tlǝghǝni giɓ vwaa wo tlǝŋ nyolii vunndai yaatlaa?¹⁸ Beɗ tǝ gii ngǝtn yo ɗaŋ ca nyo ɗi a vii yini ɗi a giɓkǝ raa. Yaŋshi ghǝn ci gyaa ngǝtn yo ɗaŋ caa malar zaar . ¹⁹ Nǝghǝ yo tu a giɓkǝ kusuŋsǝ ngǝtn ɗaŋ caa nywaal ɗi nǝ, ɗughǝni zaar, mbǝllǝ ghǝ mǝmmonci tǝ guɗ viin, mbǝllǝ ghǝ mǝrǝ monci tǝ mǝrǝ guɗi, mǝǝr, mbeerni tǝ vyaarghǝni zarsǝ. ²⁰ Gyaa gini ghǝn caa malar zaar. Beɗ tǝ gii, cighǝn ngǝtn tǝ taas nǝ mǝǝki ghǝn caa malar zaar hǝŋ."²¹ She Yesu ta shishi tlii te yaatl kǝ Taya tǝ Sidon. ²² Gǝɗ won ɗaŋ a tayi nǝ ŋaa mǝn Kan'ana ata dlam ɗi ɗaashi yaatl. Ata gǝm vii ata wul tu, "Yel gwaandatn, Daadǝn, Kuni Dauda; Ŋaa nyietn cigha buŋngǝni monnda ɗaŋ mǝnndǝŋsǝ caa daambar tǝ." ²³ Beɗ tǝ gii Yesu ta sutuɗa hǝŋ ko ŋaa njwaatn. Meeri dǝn wos tǝ ta man kara tǝ tu tǝ wul tǝ tu, "'Kaɗ tii, ca kur mi kǝǝm tǝ ngwaarghǝni."²⁴ Beɗ tǝ gii Yesu ta sushi ɗa wul tu, "Taa ta shinǝn a gon hǝŋ she a lǝɓ temsa yo ɗaŋ taa maalii dǝn Isar'ila." ²⁵ Beɗ tǝ gii ata man zuɓ tǝ mǝn a ken wos, yi wul tu, Daadǝn, sommǝm ɗa ɓa." ²⁶ Ata sutu ɗi wul tu, "A ndara hǝŋ ɗaŋ tǝ mbii dugn meeri tǝ kur mǝrǝ kaɗaŋshi mǝn.²⁷Ata wul tu, yi cighǝi Daadǝn, beɗ tǝ gii mǝrǝ kaɗaŋshi caa yi cini damvii ghǝ murghǝ dǝn ɗaŋ ca vumndaɗi. ²⁸She Yesu ta sutǝɗa wul tu, "Gǝɗin caaghǝn raa waa nǝ vari; Gaai tǝ naaghǝ mǝn ɗaŋ gii ɗaŋ kya suui." Ŋaanyi woshes ata fuɗi a kili gies.²⁹ Yesu ta gaa ɗanii tlii a ken mel tǝ dǝllǝ ghǝ zha ghǝ Galiili. She ata tai gha donnga won tsetni ɗa ɗani. ³⁰ Zarsǝ monnda tǝ ta man ɓastǝ. Tǝ ta lǝǝr tǝ gyaa gurumsǝ tǝ gyaa doŋsǝ tǝ gyaa bǝnndǝŋ, tǝ gyaa naa kui mǝnɗi, tǝ gyaa mǝn gonngǝni monnda. Tǝ ta lǝǝr shi ɗi a ken ngǝ Yesu, she ata fuuɗshi waasǝŋǝi. ³¹ Nǝ durghǝ gii ata kwasar zarse monnda ɗaŋ tǝ ta yel gyaa bǝnndeŋsǝ a wulghǝn vii. Mǝn gonngǝn tǝ fuuɗii, gyaa gurumsǝ tǝ ta riinii, doŋsǝ tǝ ta yaalii. She tǝ ta luu Cognvon kǝ Isar'ila.³²Yesu ta cim mǝǝri dǝn wos ɗi ɓastǝ wul shi tu, "Mya yel gwaandǝ mǝnin, mi cimshi mbuɗkǝn maayi ghǝni tǝ yir ngǝtn yo ɗaŋ ta ci hǝŋ. Mya suu mǝ gaa shi cik ɗaŋ taa ci ngǝtn nge cighǝn hǝŋ nǝ durghǝ yo tu tǝ ɗǝǝmii a datǝpm hǝŋ." ³³ Mǝǝri dǝn wos tǝ wul tǝ tu, "Ma tu dughǝs teɗo ɗaŋ wo kǝǝm zarsǝi a lǝɓi gin ɗaŋ gon ngai hǝŋo? ³⁴ Yesu ta wul shi tu, "Dugn wurii ghǝn kǝ yirre?" Tǝ ta wul tǝ tu, "Wottsǝmai tǝ mǝrǝ gyaas ŋaa njwaatn." ³⁵ She Yesu ta caa shi tǝ tsǝtni yaatl.³⁶ Ata nyom dugn wattsemayii tǝ gyaashi, ɗa kaari ɗaŋ ata nyaar Cogn, she ata tsaal dughe shii ata vǝr mǝǝri dǝnes tǝ ta ɓǝǝl zarshes mǝn. ³⁷ Zarse buruk tǝ ta ci vwaa ta yughǝi. Tǝ ta jwaam kotsaŋsǝ dughes buŋshi wottsǝmai. ³⁸ Mǝn yo ɗaŋ tǝ ta ci tǝ yi nǝ mǝnmonci zaŋngu wuɓsǝ, guɗi tǝ mǝǝri ghai hǝŋ. ³⁹ She Yesu ta gaa shi waashii ndai giɓ zhuŋ zha tlii te yaatl kǝ Magadan.

¹ She gyaa Faraisawa tǝ gyaa Sadukiyawa tǝ ta man tu tǝ diiɓ tǝ, tǝ ta kara tu tǝ zhiɗ shi ŋaa ɓalaŋ ɗi gaami. ² Beɗ tǝ gii ata sushi ɗa ata wul tu, "Ǝŋ suutu ya fii, kyaa wul tu, 'dzaŋ wo ndara, durghǝ yo tu kurvon nǝ zheli.'³ Yaan nǝ ɓitlndi, kǝ wul tu, 'dzaŋ ngǝ yaawonǝn a ndara hǝŋ, durghǝ yo tu gaami nǝ zheli, a ndǝr kaɓ lǝɓii.' Kaa yisǝŋ kwaanngǝn ngǝtn yo ɗaŋ kyaa yeli gha kurvon, beɗ tǝ gii kaa yisǝŋ kwaanngǝn ɓalaŋ ngǝ kili hǝŋ. ⁴Kuuskǝn tǝ mbǝllǝ ghǝ usuli caa yi ŋal ni ɓalaŋ, beɗ tǝ gii ta zhiɗ shi ɓalaŋ won hǝŋ she kǝ Yunanai." She Yesu ta gaa shi waasǝŋǝi, tlii.⁵ Ɗaŋ mǝǝri dǝnes tǝ ta tu tii te laŋshi dlari gii, laa ta malshi gha mbiighǝni dugn. ⁶ Yesu ta wul shi tu, "Ɗaghǝn ɗa nǝ yisti ghǝ Farisawa tǝ Sadukiyawai." ⁷ She mǝǝri dǝn Yesu tǝ ta ngaɓ wulghǝn vii tǝ dlǝŋsǝ waasǝŋ, tu, "Ko nǝ durghǝ yo tu mǝ lǝǝr dugn ɗi hǝŋaa?" ⁸ Yesu ɗaŋ ata yisǝŋ ginnii she ata wul tu, "Kyaani gyaa gyo ɗaŋ caaghǝn raa waan aa ɗaɗii, durghǝ nii ghǝnnda kyaa wul vii tǝ dlǝŋsǝ waan tu, ko nǝ nii ghǝnnda kǝ lǝǝr dugn ɗi hǝŋaa?⁹ Kǝ yisǝŋ kǝ ndǝr kǝ ɓitalki tu dugn nanndam ɗaŋ zarsǝ zaŋngu nanndam tǝ ta ci, kǝ jwaam damvii buŋli wurii hǝŋaa?" ¹⁰ Ko dugn wattsǝmai a zarsǝ zaŋngu wuɓsǝ, tǝ kortsaŋshi buŋli wurii kǝ ta nyom hǝŋaa?¹¹ Nǝ nii a caa kǝ ɗyaa yisǝŋ tu mya wul ki vii a dulgaam dugn hǝŋee? Ɓitalǝnki shoŋ shoŋ aa ɗakɗa nǝ yisti ghǝ Farisawa tǝ Sadukiyawai." ¹²Ɗani tǝ ta yisǝŋǝi tu caa wul shini vii a yisti gii ɗaŋ caa fi dugn ngai yi hǝŋ, beɗ tǝ gii she tu tǝ ɗakɗa nǝ ngǝtn ɗaŋ Farisawa tǝ Sadukiyawa caa giɗ.¹³ A kili gii ɗaŋ Yesu ta man te yaalt kǝ Kaisariya, Filibi, a ta ceɗ mǝǝri dǝn wos tu, "Zarsǝ caa wul tu, "Nǝ nuu ghǝn cinǝ Ŋaa Zaaro?" ¹⁴ Tǝ ta wul tu, "Gyaa gon caa wul tu nǝ Yohanna Murghǝ Baptismai; gyaa gon tu, Iliya; gyaa gon ɗa tu; nǝ Irmiya, ko namboŋ a giɓkǝ mǝn shinngǝn Cogn." ¹⁵ A ta wul shi tu, "Ta kyaani kyaa wul gwaan tu myaan minǝ nuu? ¹⁶ She Siman Biturus ata su ɗa ata wul tu, "Kyani ghǝn ki Ɓorghǝn kǝ Cogn, kuni Cogn gii ɗaŋ ci gaamii."¹⁷ Yesu ta sutu ɗa ata wul tu, "Shiɗshiɗi tǝ naa ghǝ mǝn, Siman kuni Yunana nǝ durghǝ yo tu tluu tǝ voraŋ ghǝn a fuughǝ ngǝrshi gin hǝŋ, beɗ tǝ gii nǝ Daagǝtii ɗaŋ ci tsogn gaamii ghǝn a fuughǝ. ¹⁸ Mya ndǝr mǝ fughǝ tu kyani ghǝn ki Biturus, a dulghǝ puusǝn ghuŋ ma nal zarsatn ngai. Gyaa ken ɓiil ghǝ girr mǝn mǝskǝn ta tlya gaam wos hǝŋ.¹⁹ Ma vǝrghǝ piis kǝ ɗǝrǝghǝn ɓiil ghǝ guŋndu ghǝ Tsogn gaami. Ko nii ɗaŋ kyaa naɗii gha ɗǝgn cinǝ naɗkǝn Tsognvon. Ko nii ɗaŋ kyaa tǝrǝŋǝi gha ɗǝgn, cinǝ tǝrǝŋngǝn Tsogn gaami." ²⁰ She Yesu ta fuu mǝǝri dǝn wos tu tǝ fuu gon tu yaani ghǝn ci Ɓorghǝn kǝ Coghǝi hǝŋ.²¹ A kili gii Yesu ta ngaɓ fuughǝni mǝǝri dǝn wos tu a naa ciɓ tǝ tlii Urshelima tǝ tlǝn tlya buŋngǝni monnda a taas kǝ mǝn varaŋsǝ, tǝ mǝn varaŋsǝ pǝris tǝ maalǝmci mborki kǝ Musa ta ɗu tii tǝ shisher tii gwaam a dzanyi kǝ maayi. ²² She Biturus ta jaalar tǝ gha laŋshi caa tǝ yirr tu, "Ngǝrshi gyaa gin tǝ tlǝ ɗoongai tǝ kyan, Daadǝn; ngǝrshi gin wo tughǝ vuŋ ɓar." ²³ Beɗ tǝ gii Yesu ta sutuɗa wul Biturus tu, "Sughǝ ɗaam kaar Shetan! Kinǝ dei ghǝ ngaaghǝni yaasǝŋ ɓasǝm, nǝ durghǝ yo tu kya vuu nǝ ngǝtn yo ɗaŋ nǝghǝ Cognvon hǝŋ, beɗ tǝ gii she gyaa ngǝtn yo ɗaŋ nǝghǝ ɗǝgn."²⁴ She Yesu ta wul mǝǝri dǝn wos tu, "Ɓuruk muryo ɗaŋ ca suu tǝ laaɓǝm, a naa ciɓ tǝ nyaŋngas gamas, tǝ mbii hǝmmbǝli wos tǝ laaɓǝm ɗi. ²⁵ Durghǝ tu ɓuruk muryo ɗaŋ ca suu tǝ vum gamashii, wo naa tii. Ɓuruk muryo ɗaŋ ya naa raai woshii nǝ duratn, wo tu tii. ²⁶ Nǝ durghǝ tu nǝ tughǝn yo ghǝn zaar wo tu ɗaŋ yaa tu ɗǝghǝi ɗeɓaɗ kǝnnda naa rai woshii ye? Nǝ nii ghǝnnda zaar wo ɗyaa vǝr a dulgaam bamvii raai woshe?²⁷ Yi tu Ŋaa ghǝ Zaar wo mani gha giɓkǝ vartǝ Daagos tǝ gyaa zhipti shinngǝni wos. A kili gii ghǝnnda wo taa ko zaari gyo ngǝtn yo ɗaŋ ata fi. ²⁸Jom jomi gyaa gon waan ɗaŋ cigha dlǝǝrghǝni ɗuuni ɗaŋ ta mǝǝs hǝŋ, she yaa yel Ŋaa zaar a maaghǝn ɗi gha giɓkǝ guŋndu wos."

¹ Ɗa kaari tǝ mbuɗkǝn lim Yesu ta mbii gyaa Biturus tǝ Yakuɓ tǝ Yohanna yeshi ata tlǝǝr shi waashii wuur won nǝ fuɓni yaŋshi ngǝtn waasǝŋ. ² Dli wos ta sui mari a ken waasǝŋ. Tsognken wos ta yaal ɗaŋ dzaŋ, lǝŋsǝ wos tǝ ta naai nǝ felaŋshi pak pak.³ She gyaa Musa tǝ Iliya tǝ ta mbwaaɗi tǝ nguɓ wulghǝn vi cim tǝ. ⁴ Biturus ta sutǝɗa wul Yesu tu, "Daadǝn, a ndara ɗaŋ mi cimki ɗa ɗuunin. Ǝŋ kya suu ma nal mǝrǝ viin mbuughǝn Cogn maayi- namboŋ nǝ gwaa, namboŋ nǝghǝ Musa, namboŋ nǝghǝ Iliya."⁵ Ɗaŋ tǝ tayi gha wulghǝn vii, she kurvon won ngǝni nǝ fyaali pak pak, ata man dlǝpm shi waashii, she tǝ wum vii ɗi gha kurvones yi wul tu, "Gini nǝ Ŋaatn ɗaŋ mya suu tǝ nǝ ŋaanyi hǝŋ. Sǝǝn tǝ kǝǝm mbun mbun." ⁶ Ɗaŋ mǝǝri dǝn woshes tǝ ta wum cik, tǝ ta shin tsognken waasǝŋ yaatl nǝ durghǝ vǝrtǝ. ⁷ She Yesu ta man tǝǝn shi, wul shi tu, "Shinshin, vǝrtǝ tǝ ɗuki hǝŋ." ⁸ Ɗaŋ tǝ ta yaal beɗ tǝ gii tǝ ta yel gon hǝŋ she Yesu ngǝtnwos.⁹ Ɗaŋ tǝ ta yigha shiighǝn ɗi ɗa wuuri, Yesu ta vǝr shi vii wul tu, "Ɓak fuu gon zhiɗkǝn jaan gin hǝŋ, she dzaŋ gii ɗaŋ Ŋaa Zaar ya shishi ɗi a giɓkǝ mǝn mǝǝskǝni." ¹⁰ Mǝǝri dǝn wos tǝ ta ceɗ tǝ tu, "Nǝ nii ghǝn a caa mǝn dlyaaɗkǝn ngǝtn caa wul tu Iliya ghǝn wo mani kenie?"¹¹ Yesu ta sushi ɗa wul tu, "Jomi Iliya wo mani sular ngǝtn ɗi ɓuruk. ¹² Beɗ tǝ gii mya fuu ki, Iliya aa mani, beɗ tǝ gii taa yisǝŋ tǝ hǝŋ. Nǝ durghǝ gii cik, tǝ ta fitǝ ngǝtn yo ɗaŋ a polshi ghai. A te tǝpi gin ghǝn Ŋaa zaar wo buŋ a taas waasǝŋ." ¹³ Ɗani ghannda mǝǝri dǝn wos tǝ ta yisǝŋǝi tu ca wul ni vii a dulgaam ngǝ Yohanna Murghǝ Baptisma.¹⁴ Ɗaŋ tǝ ta sushi ɗi a dlǝk zarsǝ, murwon ta man ɓastǝ , ata zuɓni a ken wos wul tu, ¹⁵ "Daadǝn, yel gwaandatn, ŋaa kunetǝn ngǝtn ca ɗu tǝ ndǝr buŋ nǝ ŋaanyi hǝŋ. Dzaŋgon ca yi ɗu tǝ gǝm giɓ wuɗ ko giɓ zha. ¹⁶ Mǝ lǝǝr tǝ ɗi a mǝǝri dǝn wa, beɗ tǝ gii tǝ kǝǝm tǝ fuɗ tǝ hǝŋ."¹⁷ Yesu ta sushi ɗa ata wul tu, "Mǝn yo ɗaŋ caaghǝn raa ɗaɗki ɗa, kusuŋsǝ wusuli, hal dzaŋ gyo annda ma tsǝtn cim kio? Hal dzaŋ gyo ghǝnnda ma dum vwaa nǝ kyaanio? Lǝǝrǝn tǝ ɗi ɗuuni." ¹⁸ Yesu ta caa yir mǝnndǝes, she ata nyolii ɗi a kunes. She kunes ta fuɗii ɗa ɗani kyaaɗ.¹⁹ She mǝǝri dǝnes tǝ ta man a Yesu a lǝɓ waaɗi tǝ wul tu, Nǝ nii ghǝn a ca mǝǝ kǝǝm mǝǝ nyolar tǝ hǝŋe?" ²⁰ Yesu ta wul shi tu, "Nǝ durghǝ yo tu caaghǝn raa waan yi ŋaa njwaatn. Nǝghǝ gii mya fuu ki tu, ǝŋ yaan kitǝ caaghǝn raa ŋaa njwaatn ɗaŋ tsǝr mastaɗ, ka wul puusǝn tu, ɓǝɗ kǝ ghai aa sughǝ ɗan, wo ɗyaa ɓǝɗ tǝ ghai, ngǝtn won wo ɗyaa ɗak ki hǝŋ. ²¹Tursǝ mǝnndi gin yi nyol hǝŋ she tǝ karaghǝni tǝ zhak mbatlkǝni.²² Ɗaŋ ciigha tsǝtnngǝni Galilii, Yesu ta wul mǝǝri dǝn wos tu, "Ta vǝr Ŋaa zaarii a taas zarsǝ. ²³ Ta ndǝr ta ɗu tii, a dzaŋ ngǝ maayi wo shishi." She raa ghǝ jii ta ɗu mǝǝri dǝn wosheshii nǝ ŋaa nyi hǝŋ.²⁴ Ɗaŋ tǝ ta tuli ɗi Kafarnahum, mǝn kaaɓkǝni kumbai shekel kǝ zhakka tǝ ta man a Biturus tǝ wul tu, "Malǝm waanii ca yi vǝr kummbai ghǝ zhakka?" ²⁵ She ata wul tu, "Yi cik."Beɗ tǝ gii Biturus ta ndai giɓ dǝn, Yesu ta nguɓ tǝ wulghǝni keni vii tǝ yaan wul tu, "Ɓitalghǝni waa yini tu nii, Siman? Guŋsǝ ɗǝgn caa kaɓ zhakka tǝ wurɓa yo ɗaŋ caa kaɓ a gyaa nuu? A mǝn waasǝŋaa ko a sǝmmbǝrsa?"²⁶She Biturus ta wul tu, "A sǝmmbǝrsǝ." Yesu ta wul tu mǝn waan caa vǝr gwaasǝŋ hǝŋ ngǝnndi. ²⁷ Beɗ tǝ gii ɗaŋ mǝ ca mǝn kaɓkǝn zhakka tǝ fi kuskǝ ngǝtn hǝŋ, tlǝ a dǝllǝ ghǝ zhai aa caa ngomndi, aa ngaɓ gyaas yo ɗaŋ a man keni. Ǝŋ kya ɗǝrǝ vii wos ka tu (shekel) wurɓa. Mbii aa tlǝǝr mǝn kaɓkǝn zhakkas mǝn gǝtn tǝ gwaa.

¹Daɓak a kili gii mǝǝri dǝn wos tǝ ta man a Yesu, tǝ wul tǝ tu, "Nǝ nuu ghǝn a moɓ luughǝni a guŋndǝ tsognvono?" ²She Yesu ta cim ŋaawon ɗi njwaantn ɓastǝ, gǝm tii a dlei waasǝŋ, ³ wul shi tu, "Jom -jomi mya fuu ki tu, shaŋtaŋ she kyaa su ki kǝ naa ɗaŋ mǝrghǝ mǝǝri njwotn- njwotn yaan cik hǝŋ ka kǝǝm kǝ nda a guŋndughǝ Cogn hǝŋ.⁴Durghǝ gii, ɓuruk gyo ɗaŋ ya mbutar gamas ɗaŋ ŋaa -ŋaan, yaani ghǝn a moɓ luughǝn a guŋndu tsogn. ⁵ Ɓuruk gyo ɗaŋ ya kaɓ ŋaa-ŋaa nǝ durghǝ sǝǝmatn, myani ghǝn a kaɓǝm. ⁶ Beɗ tǝ gii gon ɗaŋ ya caa namboŋ a giɓ mǝrghǝ mǝǝrin ɗaŋ tǝ caa raa ɓasmi, a fi kuskǝ ngǝtn, a kǝǝm ɗaŋ tǝ gaa tǝ puus kǝ nyiighǝn nyoptǝ mǝn a yer tǝ gǝǝm tii a giɓ dǝllǝ zha shoŋ-shoŋ.⁷Laŋngǝn wo tu ɗǝgn nǝ durghǝ kili ghǝ ngaaghǝni yaasǝŋ. A naa ciɓ kili gyagin tǝ mani beɗ tǝ gii a girghǝ kyan muryo ɗaŋ te ɓastǝ ghǝn kili gya gin ta mani. ⁸Ǝŋ yaan taas ko yaasǝŋ waa ghǝn wo caa ghǝ malghǝn, dzak tǝ aa gǝmii wo moɓ kǝ ndaraaghǝni mǝn ɗaŋ a nda tǝ rai waa ɗaŋ te dli gon nǝ dzakkǝn, ɗaŋ tǝ gǝm ngǝi giɓ wuɗ nǝghǝ zhaaɗ zhaaɗi hǝŋ tǝ gyaa taas ko yaasǝŋ waa.⁹Yaan yir waa wo caaghǝ malghǝn, dli tǝ aa gǝmii. Wo moɓ ndaraaghǝn aa tu rai tǝ yir namboŋ, ɗaŋ tǝ gǝǝmnghǝi a giɓ wuɗ tǝ yir waa mbǝlǝm.¹⁰Ɓak kemas gon a giɓkǝ merghǝ mǝǝrin hǝŋ. Durghǝ tu, ko kili gyo zhipti shinnghǝn Cogn waasǝŋ caa yel Daagǝtn ɗaŋ ci tsogn . ¹¹"Ŋaa zaar man tu tǝ kaɓ ngǝtnyo ɗaŋ a mal."¹²Ne nii ghǝn nǝ ɓitalghǝn waane? Ǝŋ yaan zaar citǝ tǝǝmsa kuri, she namboŋ maalii wo gaa taashi toknanndam tliiti toknanndam ɗa laari tǝ tlǝn ŋaal gii ɗaŋ a malii hǝŋaa? ¹³ Ǝŋ ya tu tii jom-jomi mya fuu ki wo poltǝ ɗaŋ a tu nambonyi gii ɗaŋ a malii wo moɓ kǝ taashi toknanndam tliiti toknanndamii ɗaŋ ci ɗai. ¹⁴ Yi cik ɗaŋ nǝ suughǝn Daawan ɗaŋ ci tsogn, namboŋ a giɓkǝ mǝǝrin tǝ laaɓ zha hǝŋ.¹⁵Ǝŋ yessa ya fighǝ kuskǝ ngǝtn mǝn fuutǝ ɗaŋ ki mbǝtlǝm waan, ǝŋ ya wum ngǝi kǝ sular tǝ ɗi a datǝpm ghǝnndi. ¹⁶ Beɗ tǝ gii ǝŋ ya nyaŋngas kǝ wumngǝ, tlǝn tǝ yesa gon mbǝtlǝm ko maayi tǝ naa nǝ murghǝ tlyaghǝni zha waa mǝn, durghǝ tu tǝ tlyaghǝn zha zarsǝ mbǝlǝŋ ko maayi ghǝn tǝǝ kǝǝm tǝǝ kaɓ gǝgn ɓashi.¹⁷Ǝŋ ya nyaŋgas wumghǝni waasǝŋ, she aa tlǝǝr vieshii a mǝn laaɓkǝn, ǝŋ ya nyaŋgas wumngǝn mǝn laɓkǝn she a sular tii nǝ muryo ɗaŋ aa yisǝŋ Cogn hǝŋ tǝ naai ɗaŋ mǝn kaɓkǝn zhakka.¹⁸Jom -jom mya fuuki, ɓuruk ngǝtn yo ɗaŋ kǝ naɗ a ɗǝgn, yi nǝ naɗkǝn gaami, ngǝtn yo ɗaŋ kǝ tǝrǝŋ yinǝ tǝrǝŋngǝni gaami. ¹⁹ Mya fuuki tu zarsǝ ǝŋ yaa kaɓii ɓuruk a ngǝtn yo ɗaŋ ka kara, Daagǝtn gyo ɗaŋ ci gaami wo fiki mǝnii. ²⁰Lǝɓ yo ɗaŋ zarsǝ mbǝtlǝm ko maayi ya jwaam shi ghai a giɓkǝ sǝmatn mi ɗa ɗan a dlei waasǝŋ.²¹Bitrus ta man wul Yesu tu," Daadǝn tǝpm wurii ghǝn yesatn wo fim kuskǝ ngǝtn mǝn kǝnnda mǝ dlaa tǝ loŋsǝ mǝnii ye? Hal tǝ tuli tǝpm wattsǝmai ya?" ²² Yesu ta suɗa wul tu, "Mya fuughǝ tu tǝpm wattsǝmai hǝŋ, beɗ tǝ gii wattsǝmai hal taashi wattsǝmai.²³Nǝ durghǝ gii, ta giɗ ngaɓi guŋndu Cogn tǝ guŋ won ɗaŋ caa ŋaal tǝ kwaan ngǝtn ngǝ tughǝn ɗaŋ yir a taas kǝ monsǝ wos. ²⁴ Ɗaŋ a gǝǝm daaɗi vii she tǝ ta lǝr namboŋ ɗi a giɓkǝ moŋsǝ woshii ɗaŋ ca laɓtǝ wak zhiil talanti zaŋngu dzuɓ. ²⁵ Beɗ tǝ gii ɗaŋ citǝ ngǝtn yo ɗaŋ wo vǝr ɗa bashi hǝŋ, murghǝ dǝn wos a wul tu tǝ ɗiɓar tii, beɗ tǝ gyaa gǝɗi wos tǝ mǝǝri wos ɓuruk tǝ ngǝtn yo ɗaŋ yir.²⁶She mones a ndaɗi zuɓni yaatl a ken ngǝ murghǝ dǝnes, wul tu, "Murghǝ dǝnatn mbutar raa waa ma vǝrghǝ ɓuruk ngǝtn yo ɗaŋ mǝ kaɓ." ²⁷Nǝ durghǝ tu murghǝ dǝnes ata yel gwaandǝ wos ata wul tu, aa gaa tǝ ngǝtn yo ɗaŋ ca laaɓ tǝ mǝn, she ata gǝm moneshii.²⁸Beɗ tǝ gii ɗaŋ tǝ ta gǝǝm moneshii ɗaŋ a tlii tlǝn tu kamshi moni gon ɗaŋ yaan ma ca laaɓ tǝ dinari kuri namboŋ , she ata goɓ tii ngyak tii a yer wul tu, "Vǝrǝm ngǝtn yo ɗaŋ mya laaɓkǝi ɗi." ²⁹ Beɗ tǝ gii kamshi mones kara tǝ, a wul tu, 'Dumvwaa mǝn ma sular ghǝ ɓuruk ngǝtn yo ɗaŋ mǝ kaɓ ɓaskǝ mǝn.'³⁰Beɗ tǝ gii moni kǝ keneshii a nyaŋgas. A bam vii cik a caa tǝ gǝǝm moneshii dǝn garaŋ, durghǝ tu she ya vǝr ngǝtn yo ɗaŋ caa laaɓ tii. ³¹ Ɗaŋ monsǝ gyaa gii tǝ yel ngǝtn yo ɗaŋ tǝ fi, tǝ vuui monnda. She tǝ ta tlii tǝ tlǝn fuu murghǝ dǝn waasǝŋ ngǝtn yo ɗaŋ a fi ɓuruk.³²She murghǝ dǝnes ata cimtǝ ɗi wul tǝ tu, " Kyan kinǝ kuskǝ mon, maa gaa ghǝ ngǝtn yo ɗaŋ mya laaɓ kǝ mǝn ɓuruk, durghǝ tu kǝ karam. ³³ A ndara kyani aa giɗ mbutarghǝn raa kama monǝn mǝn ɗaŋ gii ɗaŋ mǝ mbutarghǝ raa mǝnii hǝŋaa."³⁴Murghǝ dǝnes ata tlǝn ngaɓtǝ vǝr mǝn vǝrghǝni forǝm, hal she ya sular ngǝtn yo ɗaŋ caa laaɓ tǝ ɓuruk. ³⁵ Cig kǝn ci, Daagǝtn ɗaŋ ci tsogn wo fiki mǝn cik. Ǝŋ yaan tu ko nuu waan ya dlaa loŋsǝ gyaa yeshi mǝn a giɓkǝ raa hǝŋ.

¹ Kili yo ɗaŋ Yesu ta ɓan vii gya ginnii, she a gaa Galilii a man a te aari waasǝŋ tǝ Yahudiya, kǝ dlarghǝn rupm Urdun. ² Zarsǝ monnda tǝ ta laaɓ tǝ, ata fuuɗ shi waasǝŋǝi.³ Farisawa tǝ ta man ɓastǝ caa suu tǝ diiɓ tǝ, tǝ ta wul tǝ tu, "A ndara a mborki Musa tu zaar tǝ gǝm gǝɗi woshii a dulgaam ko ngǝrshi gyoa?" ⁴ Yesu ta suɗa, ata wul tu, "Kaa kwaan hǝŋaan, tu gyo ɗaŋ a ndǝr shi ɓaandǝŋ mummwaan tǝ gǝɗ hǝŋaa?⁵ Gyo ɗaŋ a ndǝrshi a wul tu, 'Nǝ durghǝ dei gin zaar wo ɓǝǝl tǝ tǝ daagos tǝ naagos tǝ kaŋǝi tǝ gǝɗi wos, yaŋshi mbǝtlǝmii tǝ naai nǝ dli namboŋ hǝŋaa?" ⁶ Cii mbǝtlǝm ɗa hǝŋ, beɗ tǝ gii taa naai nǝ dli namboŋ. Nǝ durghǝ gii, ɓuruk ngǝtn yo ɗaŋ Cognvon ya ngaghǝi, gon tǝ ɓǝǝl tii hǝŋ."⁷ She tǝǝ ta wul tǝ tu, "Nii ghǝn ata ca annda Musa ta vǝr mi dǝǝl tu mǝ vǝr tagarta gǝmngǝni tǝ kaɗkǝni gǝɗe?" ⁸ Ata wul shi tu, "Nǝ durghǝ raa waan ɗaŋ nǝ datsǝghǝn, yaani ghǝn ata caa Musa ta kaɓki mǝnii tu aa dlaa guɗi waanii. Beɗ tǝ gii ata yi ɓaandǝŋ cik hǝŋ. ⁹ Mya fuu ki, kaɓ gyo ɗaŋ ya gǝm gǝɗi woshii, yaan nǝ durghǝ mbǝllǝ hǝŋ, a mannda kaɓ gǝɗi gon, ca fini mbǝllǝ ghǝnndi. Gyo ɗaŋ ya kaɓ gǝɗes gyo ɗaŋ tǝ gǝm tii, ca fini mbǝllǝ."¹⁰ Mǝǝri dǝn ngǝ Yesu tǝ ta wul tǝ tu, Ǝŋ yaan yi cik a dulgaam mummwaan tǝ gǝɗi wos to a ndara tǝ kaɓ dlǝŋsǝ waasǝŋ hǝŋ." ¹¹ Beɗ tǝ gii, Yesu ta wul shi tu, "Nǝ ko nuu ghǝn wo kaɓ ngǝrshi gin ɗaŋ caa giɗǝn hǝŋ, beɗ tǝ gii she gyaa gyo ɗaŋ caa gǝm shi dǝǝl mǝnii tu tǝ kaɓii. ¹² Gyaa gon ɗa ɗaŋ tǝ ɓwaashi nǝ puutlkǝni. Gyaa gon gwaasǝŋ zarsǝ ghǝn tǝ puutl shi. Hal ɗaŋngǝni gyaa gon gwaasǝŋ yaŋshi ghǝn tǝ sular gama waasǝŋ nǝ puutlkǝni nǝ durghǝ guŋndu ghǝ Tsognvon. Ɓuruk gyo ɗaŋ a kǝǝm tu wo kaɓ giɗkǝn gin nii, she tǝ kaɓii.¹³ She tǝ ta lǝǝr tǝ mǝrghǝ mǝǝri mǝn ɗi tu tǝ gaashi taas mǝn a gaam, tǝ kara Cogn, beɗ tǝ gii, mǝǝri dǝnes tǝ ta dlwaa shi yer. ¹⁴ Beɗ tǝ gii Yesu ta wul shi tu, "Gaan mǝrghǝ mǝǝri tǝ man ɓasǝm, ɗaghǝn shi ghai hǝŋ. Durghǝ tu guŋndu ghǝ Tsognvon nǝ gwaasǝŋ." ¹⁵ Ata gaashi taas mǝn a gaam, karashi Cogn mǝn, she ata tlii gaa lǝɓeshii.¹⁶ She murwon ta man a Yesu wul tu, "Maalǝm, nǝ ngǝtn ngǝ ndaraani yo ghǝn ma fi ghǝnnda mǝ tu raai kǝ zhaaɗ zhaaɗio?" ¹⁷ Yesu ta wul tǝ tu, "Nii ghǝn a caa annda kya ceɗǝm nǝ ngǝtn yo ɗaŋ yi ndaraarae? Nǝ gon namboŋ wos kǝn ci ndaraara. Beɗ tǝ gii ǝŋ yaan kya suu aa tu rai, laaɓ gyaa mborkin."¹⁸ Mures ta wul tǝ tu, Nǝ gyaa gyo ghǝn cii mborkesso?" Yesu ta wul tǝ tu, "Aa ɗu gon hǝŋ, Aa fi mbǝllǝ hǝŋ, aa ci mǝǝr hǝŋ, aa tlya zha mbeernigon mǝn hǝŋ, ¹⁹ luu gyaa daagwaa tǝ naagwa, aa suu ŋaa-ghǝ naa ɗaŋ kyani."²⁰ Ŋaa tlǝɓǝres ta wul tu, "Wui!, gyaa gin maa laaɓshi ɓuruk, nǝ ngǝrshi gyo ghǝn mya ŋal ɗie?" ²¹"Yesu ta wul tǝ tu, "Ǝŋ yaan kya suu aa naai taŋ taŋ, tlǝ aa tlǝn ɗiɓar ngǝtn yo ɗaŋ kǝ yir, aa vǝr gyaa naa kui, ka tu tughǝni Tsogn. She aa man aa laaɓǝm." ²² Beɗ tǝ gii ɗaŋ kun tlǝɓǝres ta wum ngǝtn yo ɗaŋ Yesu kon, ata sutu kaar tǝ raa malarghǝn, durghǝ tu cinǝ murghǝ tughǝn nǝ naa vik lyai vuŋ²³ Yesu ta wul mǝǝri dǝn wos tu, "Jom jom mya fuuki, wo naa tǝ ɗakkǝn murghǝ tughǝn tǝ nda gha guŋndu Cogn. ²⁴ Mya fuu ki ɗa ɗa tu, wo moɓ swaaɗi ɗaŋ raakumi tǝ laatsǝ a gir ghǝ aliɓra ɗaŋ murghǝ tughǝn tǝ nda a guŋndu Cogn.²⁵ Ɗaŋ mǝǝri dǝnes tǝ wum cik ngǝrshi ta kwasarshi nǝ naa vik lyaai hǝŋ. Tǝ ta wul tu, "Nǝ nuu ghǝnnda wo tu kaɓkǝnnio?" ²⁶ Yesu ta yaal yelshi, wul tu, "A zarsǝ gini wo fi hǝŋ, beɗ tǝ gii a Cogn ngǝtn won wo ɗak fighǝni hǝŋ." ²⁷ She Biturus ata suɗa, wul tǝ tu, "Yeli, maa gaa ko nii tǝ ko nii mǝ laaɓkǝ. Ta ma tuni nii?"²⁸ Yesu ta wul shi tu, "Jom jomi mya fuuki tu kyaani gyaa gyo ɗaŋ kǝ laaɓǝm, a ɗǝki kǝ muurii, kili gyo ɗaŋ Ŋaa zaar ya tsǝtni a daan kǝ zǝkkǝni kǝ guŋndu wos kyaani maa ka tsǝtni a daan guŋndu dzuɓ tliiti mbǝtlǝm kǝ yi ɗǝǝl vii giɓ dǝn dzuɓ tliiti mbǝtlǝm kǝ Isar'ila mǝn.²⁹ Ɓuruk gyo ɗaŋ ya gaa dǝnsǝ woshii, tǝ gyaa yeshi, tǝ gyaa waaci, tǝ daagos tǝ naagos, tǝ mǝǝri, ko vuɗi nǝ durghǝ sǝmatn, wo kaɓ kuri tǝm monnda ndǝr ci duul ghǝ rai kǝ zhaaɗ zhaaɗi. ³⁰Beɗ tǝ gii monnda ɗaŋ ciɗa keni ɗaŋngǝni, ta naai kaar, monnda ɗaŋ ci kaar ta naai ken.

¹ Yi tu guŋndu Cognvon yi ɗaŋ murghǝ kitn, gyo ɗaŋ a nyol tǝ ɓitlndi tǝ ŋal mǝn laa fighǝni a kitn wos. ²Ɗaŋ tǝ wul wurɓa yo ɗaŋ wo vǝr mǝn laai, wurɓas dinari namboŋ ko gyo waasǝŋ a vyaaghǝn, she ata shinshi a kitn wos tǝ fi tǝ laa mǝn.³ Ata man nyol ɗa a dwaami kǝ maayi she man yel mǝn laai gyaa gon ɗa a dlǝǝrghǝn ngǝ ɓenndǝmi a lǝɓ vǝǝn. ⁴ She ata wulshi tu, 'Kyaani maa ɗaŋ, manǝn aa fi laa ɗa kiti, kaɓ ngǝtn yo ɗaŋ ya ngaɓ ma vǝr ki.' She tǝ ta tlii nǝ laa ɗa kiti.⁵ She ata man nyol a dwaam kǝ lim ɗa, ata man nyol a dwaam kǝ toknanndam ata man fi cik ɗa. ⁶ A man fi cik ɗa a dwaam dzuɓ tliiti namboŋ, a yel gyaa gon nga dlǝǝrghǝn ɗaŋ cigha ngǝrshi gon fighǝni hǝŋ. Ata wulshi tu, "Nii ghǝn a ca kigha dlǝǝrghǝni kigha ngǝtn fighǝni hǝŋ kaɓ vyaaghǝnin ne? ⁷ She tǝ ta wul tǝ tu, "Gon aa mbiimi nǝ laa hǝŋ yaan a caa.' She ata wul shi tu, 'Kyaani ma tlǝn aa fi laa ɗa kiti ɗaŋ.'⁸Ɗaŋ sutu ta fii she ata wul murghǝ yaalghǝn ɗa nǝ kiti tu, "Ciim mǝn laa fighǝnes ɗi aa vǝrshi wurɓa waasǝŋ, nguɓ tǝ mǝnyo ɗaŋ tǝ man ɗa kaari ghǝnnda kǝ keni. ⁹ Kili yo ɗaŋ gyaa gii ɗaŋ tǝ man nguɓ laa suutu tǝ man, tǝ vǝrshi wurɓa waasǝŋ ɗaŋ gyo ɗaŋ caa vǝr gha vyaaghǝni. ¹⁰ Ɗaŋ gyaa gyo ɗaŋ tǝ nguɓ laa tǝ mbitlndi tǝ man, caa yel ɗaŋkutu ta vǝrshi moɓ kǝ mǝni yo ɗaŋ tǝ man ɗa kaari, she tǝ vǝr ko nuu dinaari namboŋ namboŋ.¹¹ Ɗaŋ tǝ ta kaɓ wurɓa waasǝŋǝi, tǝ ta nguɓ mbolghǝn murghǝ kiti mǝn. ¹² Tǝ ta wul tu, 'Gyaa gin ɗaŋ tǝ man ɗa kaari, kili namboŋ ngǝn tǝ fi laa, beɗ tǝ gii kǝ vǝrshi ngǝtn ngǝ nambonyi tǝ gopm, myaani ɗaŋ mǝ buŋ a dlǝk dzaŋ.'¹³ Beɗ tǝ gii murghǝ kiti wul namboŋ a giɓi waasǝŋ tu, 'Daa kaam, maa fiki kuskǝ ngǝtn mǝn hǝŋ. Ɓaandǝŋ maa wuli tu ma vǝr ki ngǝtn yo ɗaŋ caa vǝr gha vyaaghǝni. Yi cik hǝŋaa? ¹⁴ Kaɓǝn gyo ɗaŋ nǝ gwaan, aa tlii. Myan mǝ suu cik, mǝ vǝrshi nǝ ngǝtn ngǝ nambonyi tǝ kyaani.¹⁵ Ashe a ndarammǝn mǝ fi ngǝtn yo ɗaŋ ma fi tǝ tughǝnetn hǝŋaa? Ko kǝ fi kashi tǝ ngǝtn ngǝ mbunin ɗaŋ mǝ finaan?' ¹⁶ Yi cik tu kǝ kaari ta naai nǝ mǝn ken, kǝ keni ta naai nǝ mǝn kaar." "Taa cim monnda ɗi, beɗ tǝ gii njwaatn ngǝn tǝ waar."¹⁷ Ɗaŋ Yesu ta yigha tlǝghǝn Urshelima, ata jalar dzuɓ tliiti mbǝtlǝmes a laŋshi, ɗaŋ cigha riighǝn ata wulshi tu, ¹⁸ Yelǝn, migha tlǝghǝn Urshelima, hal ta vǝr Ŋaa zaar a taas kǝ mǝn varaŋsǝ Pǝris tǝ Maalǝmci ta caa tǝ vii tǝ voɗ tǝ. Ta nger tǝ vii ɗughǝn woshii ¹⁹ ta ndǝr ta vǝr tǝ a taas mǝn ɗǝgn durghǝ yo tu tǝ ryaa tǝ, tǝ voɗ tǝ, tǝ ndǝr ta hǝmmbal tii. Beɗ tǝ gii a dzaŋ kǝ maayi ta shisher tii."²⁰ She naaghǝ mǝǝri Zaɓaɗi ata man nga Yesu tǝ mǝǝri wos. Ata man zuɓni a ken wos ca ŋal ngǝtn won ɓastǝ. ²¹ Yesu ta wul tǝ tu, "Nii ghǝn kya suu mǝ fighǝ mǝnne?" Ata wul tǝ tu, "Mya suu a vǝr mǝǝretn dǝǝl tǝ tu ndaghǝnii a giɓkǝ guŋndu waa, namboŋ a taa ghǝ zaari waa, namboŋ a taa ghǝ naɓti waa."²² Beɗ tǝ gii Yesu ta sutuɗa, ata wul tǝ tu, "Kaa yisǝŋ ngǝtn yo ɗaŋ kya kara hǝŋ. Ka ɗyaa kǝ tlya gha giɓ kolaaɗ yo ɗaŋ ma tlya a ken njwaataa?" She tǝ ta wul tǝ tu, "Ma ɗyaai." ²³ She ata wul shi tu, "Kolaaɗ yo ɗaŋ ma tlya ghai, shaŋtaŋ kyaani ma ka tlya ghai ɗaŋ. Beɗ tǝ gii tsǝtnngǝn a taaghǝ zaaretn tǝ taaghǝ naɓtetn; nǝ myani ghǝn minǝ murghǝ vǝrghǝni hǝŋ, she de nǝghǝ mǝn yo ɗaŋ Daagǝtn ɓumtsǝ gaashi mǝn. ²⁴A Kili yo ɗaŋ ɓanci mǝǝri dǝnes dzuɓ tǝ wum cik, ata tlii shi gha gyaa yestǝi mbetlǝmii.²⁵ Beɗ tǝ gii Yesu ta cim shi ɗi ɓastǝ, ata wul shi tu, "Kigha yisǝŋngǝn tu guŋsǝ ghǝ mǝn ɗǝgn, caa zhiɗ shi guŋndǝ, mǝn varaŋsǝ yaatl caa zhiɗshi vartǝ. ²⁶ Beɗ tǝ gii tǝ naa cik a dlei waan hǝŋ. A dulgaam gii, kaɓ muryo ɗaŋ ca suu tǝ luui a giɓi waan tǝ naai nǝ mon. ²⁷ Gyo ɗaŋ ca suu tǝ naa ɗa keni a giɓi waan tǝ naa nǝ mon waan, ²⁸ ɗaŋ gyo ɗaŋ Ŋaa zaar man tu tǝǝ buŋ tǝni mǝn hǝŋ, shǝ dǝ tǝ buŋ shini mǝn, tǝ ndǝr tǝ vǝr rai wos nǝ zarsǝ monnda."²⁹ Ɗaŋ tǝ ta nywaalii ɗi Jeriko, gutuli zarsǝ tǝ ta laaɓ tǝ. ³⁰ She donsǝ won mbǝtlǝm tǝ ta yi gha tsǝtnngǝn a vii datǝpm. Ɗaŋ tǝ ta wum tu nǝ Yesu ghǝn cigha laatsǝghǝni, she tǝ ta dlaar vii, cii wul tu, " Daadǝn, Kuni Dauda, yel gwaandǝ wopm." ³¹ She gutuli zarshes tǝ ta dlwaashi yer tǝ wul shi tu tǝ mwaali, beɗ tǝ gii doŋshes tǝ ta dlaar vii ghai ɗa moɓ kǝ keni, tǝ wul tu, "Daadǝn, Kuni Dauda, yel gwaandǝ wopm."³² She Yesu ta dlǝǝrii, ata ca tǝ cimshi ɗi, ata wul shi tu, "Nǝ nii ghǝn kyaa suu mǝ fiki mǝnne?" ³³ She tǝ ta wul tǝ tu, "Daadǝn myaa suu mǝǝ yaalii." ³⁴ She Yesu ta yel gwaanndǝ waasǝŋ agiɓkǝ raa wos, ata tǝǝn yir waasǝŋ. Kyaaɗ, tǝ ta yaal tǝ yel ɗǝghǝi, she tǝ ta laaɓ tǝ.

¹Ɗaŋ Yesu tǝ mǝǝri dǝn wos tǝ ta naa mel tǝ Urshelima she tǝ ta man Betafaji kǝ wuur zaitun, she Yesu ta shin mǝǝri dǝn wos mbǝtlǝm, ² wulshi tu, "Ndan a ŋaa yaatl kǝ kenii ka yel ŋaa zhwaaki won nǝ naɗkǝn ɗa ɗan, tǝ ŋaawos mel ɓastǝ. Tǝrǝŋǝn shi waasǝŋǝi aa lǝǝrǝmshi mǝn ɗi. ³ Ǝŋ gon ya wulki ngǝtn won a dulgaam gii wulǝn tǝ tu, 'Daadǝn ǝŋ caa suu,' She Dashes wo shindarshi ɗi tǝ kyaani swaaɗ."⁴Tǝ fi giin nǝ durghǝ yo tu tǝ yunngar konngǝn ngǝ murghǝ shinngǝn Coghǝi. Ata wul tu, ⁵ "Fuun nyighǝ Sihiyona, 'Yel guŋ waa cigha manngǝnɗi ɓaskǝ tǝ mbutarghǝn gaam cigha dulghǝ ŋaa zhwaaki."'⁶She mǝǝri dǝnes tǝ ta tlii tǝ fi ɗaŋ gii ɗaŋ Yesu fuushi waasǝŋǝi. ⁷ Tǝ ta lǝǝr zhwaakes ɗi tǝ ŋaa nyiiwos tǝ tatl gyaa luu waasǝŋ ngai, annda Yesu ta tsǝtn a dulghǝ lǝŋshǝs. ⁸ Monnda waasǝŋ tǝ ta tatl lǝŋsǝ waasǝŋ a datǝpm, gyaa gon waasǝŋ tǝ ta ngyaar dlyaŋri ghǝ gwaas tǝ tatl ɗa datǝpi.⁹She gutuli zarshes ɗaŋ tǝ nda Yesu ken tǝ gyaa gyo ɗaŋ cigha kaar wos tǝ nguɓ dlaarghǝn vii tu, "Luughǝn nǝghǝ kuni Dauda! Nǝ murghǝ mbuni daashi gyo ɗaŋ ca man a giɓkǝ sǝm ngǝ Daadǝn ! Luughǝni tǝ naa Cogn mǝn gaami." ¹⁰A kili yo ɗaŋ Yesu ta ndai giɓ Urshelima she ɓuruk yaatli ta zhighǝɗii, cii wul tu ,"Gin nǝ nuu?" ¹¹ Gutuli zarshes tǝ ta suɗa tu, "Gin nǝ Yesu murghǝ shinngǝn Cogn a dlamɗi Nazaraɗ kǝ Galiili.¹²She Yesu ta ndai dǝn ngǝ Cogn. Ata nyolar ɓuruk gyaa gyo ɗaŋ caa ɗiiɓ tǝ ɗiɓar ɗa giɓ dǝn ngǝ Cokes ndǝr paɗ dakci viin kǝ mǝn shiimngǝn wurɓai dlaai, tǝ gyaa lǝɓ tsǝtnngǝn ngǝ mǝn ɗiɓarghǝn hummbur dǝn. ¹³ Ata wulshi tu," yi nǝ dlyaaɗkǝn, 'Ta cim dǝnatn tu dǝn ngǝ karaghǝn Cogn; beɗ tǝ gii kaa sular tii nǝ tuur ghǝ mǝŋrǝŋsǝ." ¹⁴She dwaaŋsǝ tǝ gyaa gurum tǝ ta man ɓastǝ ɗa dǝn ngǝ Cokes, a ta fuuɗ shi waasǝŋǝi.¹⁵Beɗ tǝ gii ɗaŋ gyaa dǝllǝŋsǝ pǝris tǝ maalǝmci mborki tǝ ta yel gyaa ngǝtngǝ kwasarghǝn yo ɗaŋ a fi, tǝ kili yo ɗaŋ tǝ wum mǝǝri caa dlaar vii ɗa giɓ dǝn ngǝ Cokes caa wultu, "Luughǝn nǝghǝ kuni Dauda," she raa ta wumshi nyaŋ -nyaŋ. ¹⁶ Tǝ ta wul tǝ tu," Kya wum ngǝrshi gyaa gini ɗaŋ zarsǝ caa wuliya?" Yesu ta wulshi tu, "Eh! beɗ tǝ gii kaa yi kwaan hǝŋaa, 'A vik kǝ ŋaa mǝǝri tǝ gyaa naabartu kaaghǝnetn ŋaa? ¹⁷She Yesu ta gaa shi waasǝŋǝi, nyolii ɗa dǝllǝ yaatli, tlii Betanya tlǝn mbuɗi ɗa ɗan.¹⁸Ɗaŋ lǝɓ ta tlaai tǝ ɓitlndi ɗaŋ a tayi ɓastǝ sughǝn ɗa dǝllǝ yaatli, she kusuŋ ta ngaɓ tii. ¹⁹ Ɗaŋ ata yel gwaas gwaam won a datǝpm ata tlii ɗa ɗan beɗ tǝ gii ata tu ngǝtn won ngai hǝŋ she paaci kurum. Ata wul tǝ tu, "Guuri won tǝ nyol ɗi ɓaskǝ ɗa hǝŋ hal zhaaɗ zhaaɗ." Swaaɗ gwaas kǝ gwaames ta kuŋǝi.²⁰Ɗaŋ mǝǝri dǝnes tǝ yel cik ata kwasarshi, tǝ ta wultu, "Wurii ghǝnnda gwaas gwaames a kuŋǝi swaaɗe? ²¹ Yesu ta suɗa wulshi tu, "Jomi myaa fuu ki, ǝŋ yaan kitǝ caaghǝn raa kǝ fi shiktǝki hǝŋ, ngǝtn yo ɗaŋ tǝ fi gwaas gwaamǝn wo ɗak ki fighǝni hǝŋ, beɗ tǝ gii ka ɗyaa ka wul wuurǝn tu, 'Dlii gamai a ndaaɗ a dǝllǝ giɓ zha; she cighes wo fii. ²² Ɓuruk ngǝtn yo ɗaŋ kyaa kara a giɓkǝ karaghǝn Cogn, hal ǝŋ kyaa caa raai ka tu tii.²³A kili yo ɗaŋ Yesu ta ndai ɗa giɓ dǝn ngǝ Cokes dǝllǝŋsǝ pǝris tǝ mǝn varaŋsǝ kǝ zarsǝ tǝ ta man ɓastǝ a kiles ɗaŋ ata yigha giɗkǝn tǝ wul tu, "Tǝ vartǝ gyo ghǝn kyaa fi nghǝrshi gyaa ginno?" ²⁴ Yesu ta suɗa ata wulshi tu, "Myaan ma, ma ceɗki ngǝtn namboŋ. Ǝŋ kyaa fuum, ma fuu ki ko tǝ vartǝ gyo ghǝn myaa fi ngǝrshi gyaa ginno.²⁵Batisma ghǝ Yohannai a mɓwaaɗi gha nuu? Tsogn gaamiya ko a zarsa?" She tǝ ta wul a dlei waasǝŋ, tǝ wul tu, "Ǝŋ myaa wul tu, " Tsogn gaami; wo wul mi tu, 'Ta nii ghǝn caa mǝ caa raa ghai hǝŋe?' ²⁶Beɗ tǝ gii ǝŋ myaa wul tu, 'A lǝɓ zarsǝ; myaa ci vǝrtǝ gutuli zarsǝn, durghǝ yo tu taa yisǝŋǝi tu Yohanna nǝ murghǝ shinnghǝn Cogn." ²⁷ She tǝ ta su Yesu ɗa tǝ wul tǝ tu, "Maa yisǝŋ hǝŋ." Yaani ma ata wul shi tu, "Myani maa ma fuu ki ko tǝ vartǝ yo ghǝn mya fi ngǝrshi gyaa gin ngai hǝŋ.²⁸Beɗ tǝ gii kyaa ɓital kini wurii? Murwon ci tǝ mǝǝri monci mbǝtlǝm. Ata tlii a kaɓkǝ vares wul tǝ tu, 'Kuni, tlǝ aa tlǝn fi laa yaawon a kitn ngǝ daardu dǝnatn.' ²⁹Kunes ta kaɓ tǝ ghai tu, 'Ma tlǝ hǝŋ,' beɗ tǝ gii ɗa kaari ata sughuɗ ɓitalghǝn woshii, she tlii ɗa kites. ³⁰She mures ta tlii gha kuni kǝ mbǝtlǝmi wul tǝ cik ɗaŋ kǝ keneshii, ata kaɓ tǝ ghai tu, 'Ma tlii, Daa; beɗ tǝ gii ata tlǝ hǝŋ.³¹Nǝ gyo a giɓkǝ mǝri moncin mbǝtlǝmǝn ǝŋ a fi ngǝtn yo ɗaŋ daagos kono?" Tǝ ta wul tu, "Nǝ kaɓkǝ kenes." Yesu ta wulshi ɗa tu, "Jom -jomi myaa fuu ki, mǝn kaɓkǝn zhakka tǝ mǝn mbǝllǝ ta nda guŋndu Cogn keni annda kyaani. ³² Durghǝ yo tu Yohanna man ki mǝn a datǝpm zaari, beɗ tǝ gii mǝn kaɓkǝn zhakka tǝ mǝn mbǝllǝ tǝ ta caa raai ɓastǝ. Kyaani gwaan ko ɗan tu ɗa kaari ɗaŋ kǝ yel gin kǝ caa raa ɓastǝ hǝŋ.³³Wumǝn yerghǝ vii gon ɗa. Murwon ɗaŋ ciɗa ata yi tǝ kitn wos . Ata kǝɓ kiteshii, lyaa tii tǝ kǝŋ, ndǝr ɓǝl giir tsaɗkǝn dardu dǝn ngai ɗa giɓ kites, nal dakci kǝ yaalghǝn ɗa nǝ kiti ngai she vǝr kites a taas gyaa gon tǝ yaal tǝ mǝn ɗa, tlii a yaatl won. ³⁴ Ɗaŋ kili ghǝ ngaaghǝn guur ghǝ dardu dǝni fii, a shin monsǝ wos tǝ kaɓ tǝ guures mǝn ɗi.³⁵Beɗ tǝ gii mǝn kites tǝ nyom monsǝ woshes tǝ voɗ namboŋeshii, tǝ ta ɗu kamsheshii, tǝ liiɗ kamshi gon tǝ puus. ³⁶ Murghǝ kiti ta shin monsǝ gyaa gon saɗ ɗaɗa, ɗaŋ tǝ ta moɓ kǝ keni, beɗ tǝ gii mǝn yaalghǝn ɗa nǝ kites tǝ ta firshi daɓak ɗaŋ gii ɗaŋ tǝ fi mǝn kenii. ³⁷ Ɗa kaari murghǝ kiti ta shin kuni wos, wul ta tu,"Ta sǝǝ kǝǝm kunetn.'³⁸Beɗ tǝ gii ɗaŋ mǝn yaalghǝn ɗa nǝ kiti tǝ ta yel kunes tǝ ta wul dlǝŋsǝ waasǝŋ tu, 'Gin ngǝn nǝ murghǝ cighǝn duules mǝ ɗuun tii mǝ ci duleshii. ³⁹She tǝ ta ngaɓ tǝ tǝǝ nyolarii ɗi ɗa kiti tǝ ɗu tii.⁴⁰Ta ǝŋ murghǝ kites yaa man, nǝ nii ghǝn wo fi mǝn yaalghǝn ɗa nǝ kiteshe? ⁴¹ Tǝ ta wul tǝ tu, " "Wo tlaa kusǝŋsǝ mǝn yaalghǝn ɗa nǝ kites ate kuskǝ datǝpm, ndǝr vǝr kiteshii a taas kǝ mǝn yaalghǝn ɗa gyaa gon, zarsǝ yo ɗaŋ ta vǝrtǝ guures a kili ghǝ ngaaghǝni."⁴²Yesu ta wul shi tu, "Kaa yi kwaan a giɓkǝ vik Cogn hǝŋaan, 'Puus yo ɗaŋ mǝn nalghǝn dǝn tǝ nyaŋngas, yaani ghǝn a naa nǝ puus kǝ getle viin. Gin yini gha Daadǝn, nǝ gii, nǝ ngǝtn ngǝ kwasarghǝn a yir wopm hǝŋaa'?⁴³Nǝ durghǝ gii myaa wul ki tu, ta kaɓ guŋndu Coghǝi ɓaski tǝ vǝr yaatl yo ɗaŋ wo nyolar guuri ɗi. ⁴⁴ Ɓuruk gyo ɗaŋ yaa ndaaɗ a puusǝn wo tsaali ngoshak shak.Beɗ tǝ gii ǝŋ puushi yaa ndaaɗ a gon wo ɓirghaɗii."⁴⁵Ɗaŋ dǝllǝŋsǝ pǝris tǝ Farisawa tǝ ta wum yerghǝ vii gin, she tǝ ta yisǝŋǝi tu caa wulshi ni yaŋshi. ⁴⁶ Ɗaŋ tǝ ta ŋal tǝ ngaɓtii, she tǝ ta ci vǝrtǝ zarsǝ, durghǝ yo tu zarshes taa ta mbii tǝ nǝ murghǝ shinngǝn Cogn.

¹Yesu ta wulshi vii saɗ ɗaɗa a giɓkǝ yerghǝ vii ata wul tu, ²"Guŋndu Cogn yini ɗaŋ tu nǝ guŋ won ɗaŋ a ɓumtsǝ bellak kǝ kaɓkǝ gǝɗ kuni wos mǝn . ³ A shin monsǝ wos tǝ ciim gyaa gyo ɗaŋ tǝ wul shi tu tǝ man nǝ bellakes, beɗ tǝ gii tǝ nyaŋngas manngǝnɗi.⁴She Guŋyes ata man shin monse gyaa gon ɗa wul tu," "Yelǝn, maa ɓumtsǝ belagha tii, taa ngyaar dǝllǝŋsǝ galtsatn gyaa gii laaɓ-laaɓii, buruk ko nii nǝ ɓumtsǝghǝn. Manǝn nǝ belak kǝ kaɓkǝn gǝɗes."⁵Beɗ tǝ gii tǝ sǝǝ shi kǝǝm hǝŋ tǝ tlii ngǝtn waasǝŋ, gon tlii a kitn wos, gon a lǝɓ vǝǝn wos. ⁶A Ɓamvii waasǝŋ tǝ ta nyom monsǝ guŋnyeshi tǝ firshi forǝm tǝ tlaashi waasǝŋǝi. ⁷ Raa ta wum guŋnyes, ata shin mǝn maandǝ wos, tǝ ta tlaa mǝn tlaaghǝn zarsheshii tǝ caa wuɗ a yaatl waasǝŋ.⁸She ata wul monsǝ wos tu, 'Belakes nǝ ɓumtsǝghǝn, beɗ tǝ gii gyaa gyo ɗaŋ tǝ ta ciimshi ɗa, tǝ kǝǝm hǝŋ. ⁹ Nǝ durghǝ gii tlǝn a gyaa vii datǝpm aa ciim ɓuruk zarsǝ yo ɗaŋ kǝ ɗyaa ka tushi tǝ man nǝ belakes. ¹⁰Monses tǝ ta nywaal tǝ tlii gha gyaa vii datǝpm, tǝ jwaam ɓuruk zarsǝ gyaa gyo ɗaŋ tǝ tushi ɗi vii namboŋ, ɓuruk kǝ kusǝŋshi tǝ ghǝ mbuni. Tǝ cik dǝn ghǝ belakes ta yughǝi patl tǝ sǝmmbǝrsǝ.¹¹Beɗ tǝ gii ɗaŋ guŋnyes ta man tǝ yel sǝmbǝrses, ata yel murwon ɗa ɗan ɗaŋ aa caa lǝŋsǝ belak kaɓkǝn gǝɗes hǝŋ. ¹²Guŋnyes ta wul tǝ tu, 'Kamatn wurii ghǝnnda kǝ man ɗuun tǝ lǝŋsǝ belakes hǝŋnye?' Beɗ tǝ gii mures ta tu ngǝtn konngǝn hǝŋ.¹³She guŋnyes ta wul monsǝ wos tu, 'Naaɗǝn murinnii taas tǝ yaasǝŋ aa gǝm tii a giɓkǝ lǝɓ jii kuɗuk kuɗughǝi, lǝɓ yo ɗaŋ wo ngwaar tǝ ŋaaskǝn taas.' ¹⁴Durghǝ yo tu tǝ cim zarsǝ ɗi monnda, beɗ tǝ gii njwaatn ghǝn tǝ waarshi."¹⁵She Farisawa tǝ ta tlii tǝ ta ŋal datǝpm gyo ɗaŋ ta ngaɓ Yesui a vii wos ɗaŋ ca wul. ¹⁶ She tǝ ta shinndar tǝ mǝǝri dǝn waasǝŋ mǝn, mǝn ngǝ Hiridus. Tǝ ta wul Yesu tu, "Maalǝm, maa yisǝŋǝi tu kinǝ zaar ghǝ zaari, nǝ gii kya giɗ datǝpm ngǝ Cogn a giɓkǝ jom-jomni. Kyaa vuu tǝ ɓitalghǝn gon hǝŋ, kyaa ndǝr kǝ zhiɗ suughǝn gaam hǝŋ kǝ ndǝr kǝ byak a zarsǝ hǝŋ. ¹⁷ Nǝ gii, fuumi, nii ghǝn nǝ ɓitalghǝn wae? A ndara mǝ vǝr zhakka Kaisara, ko cik hǝŋaa?¹⁸Beɗ tǝ gii Yesu ta yisǝŋ kuskǝ ɓitalghǝn raa waasǝŋǝi, ata wul tu, "Kyaani mǝn ryaaghǝni lǝɓ nii ghǝn a caa ghanna kyaa diiɓ me? ¹⁹ Zhiɗǝm mǝn wurɓa zhakkas." She tǝ ta lǝǝr tǝ dinari mǝn ɗi.²⁰Yesu ta wul shi tu, "Nǝ zhipti tǝ sǝm ngǝ nuu ghǝn cighai yo?" ²¹ Tǝ ta wul tǝ tu, "Nǝ ghǝ Kaisar." Nǝ gii Yesu ta wul shi tu, "To vǝrǝn Kaisar ngǝtn yo ɗaŋ nǝghǝ Kaisar, aa vǝrǝn Cogn ngǝtn yo ɗaŋ nǝghǝ Cogn." ²² Ɗaŋ tǝ ta wum cik ata kwasarshi, she tǝ ta gaa tii tǝ tlii ngǝtn waasǝŋ.²³A dzaŋyi gii Sadukiyawa won ɗaŋ caa wul tu shishighǝn ngǝ mǝn mǝǝskǝn ɗa hǝŋ, tǝ man ɓastǝ . ²⁴ Tǝ ta ceɗ tǝ tu, "Maalǝm, Musa wul tu, 'Ǝŋ mwummwaan ya mǝshii ɗaŋ citǝ mǝǝri hǝŋ, a naa ciɓ yesashi tǝ kaɓ gǝɗeshii tǝ ɓwaa tǝ mǝǝri mǝn ngai.²⁵Gyaa yestǝ won wattsǝmai tǝ tayi ɗa. Kǝ kenes a ta kaɓ gǝɗ, a mǝshi a gaa mǝǝri hǝŋ, gǝɗi wos ta naa gyaa yesashi mǝn. ²⁶ She yes wos kǝ mbǝtlǝmi ata kaɓtii ɗaŋ, kǝ maayes maa ɗaŋ, shiighǝn ɗi hal a yeshi kǝ wattsǝmai. ²⁷ A kaar waasǝŋ ɓuruk gǝɗes ta mǝshii ɗaŋ. ²⁸Ta a shishighǝn ngǝ mǝn mǝǝskǝn, wo naa nǝ gǝɗi nuu a gyaa yesashii wattsǝmaiyi yo? Durghǝ yo tu ɓuruk waasǝŋ taa ta kaɓ tǝ."²⁹Beɗ tǝ gii Yesu ta suɗa ata wul shi tu, "Kaa maalii, duryo tu kaa yisǝŋ gyaa tagarta tǝ vartǝ Cogn hǝŋ. ³⁰ Durghǝ yo tu a shishighǝn ngǝ mǝn mǝǝskǝn kaɓkǝn gǝɗ tǝ tuur ɗa hǝŋ. A bamvii gii, cini ɗaŋ tu nǝ zhipti shinngǝn Cognvon.³¹Beɗ tǝ gii a dulgaam shishighǝn ghǝ mǝn mǝǝskǝn kaa kwaan ngǝtn yo ɗaŋ Cogn fuu ki hǝŋaan tu, ³² 'Myaan ghǝn minǝ Cogn ghǝ Ibrahim, Cogn ngǝ Ishaku, tǝ Cogn kǝ Yakubu hǝŋaa? Cogn ba nǝ Cogn ngǝ mǝn mǝǝskǝn hǝŋ, beɗ tǝ gii nǝghǝ mǝn yo ɗaŋ cii gwaam." ³³ Ɗaŋ gutuli zarshes tǝ ta wumi cik, ata kwasarshi a ngǝtn yo ɗaŋ ca giɗ.³⁴Beɗ tǝ gii ɗaŋ Farisawa tǝ ta wum tu Yesu aa kaɗ Sadukiyawa caai, she tǝ ta jwaamshi waasǝŋǝi a lǝɓ namboŋ. ³⁵ Namboŋ a giɓi waasǝŋ, murghǝ yisǝŋngǝn mborki ghǝ Musa, ata ceɗ tǝ, tǝ diiɓ tǝ- ³⁶ "Maalǝm, nǝ mborki gyo ghǝn a moɓ luughǝn ɓurughǝi yo?"³⁷Yesu ta wul tǝ tu, "Suu Daadǝn Cogn waa tǝ ɓuruk raa waa, tǝ ɓitalghǝn waa ɓuruk.' ³⁸Gin ngǝn nǝ mborki kǝ vari tǝ kaɓkǝ keni.³⁹Mborki kǝ mbǝtlǝmmes beɗ yi ɗaŋ gin- 'Suu mǝn tsǝtnngǝn mel tǝ kyan ɗaŋ gama.' ⁴⁰ A mborki gyaa gin mbǝtlǝmǝn ngǝn ɓuruk mborki tǝ konngǝn jaan tǝ dlǝǝr ghai."⁴¹Ɗaŋ Farisawos tǝ ta yi nǝ jwaamngǝn a lǝɓ namboŋ, Yesu ta ceɗ, ceɗkǝn won, wul tu, ⁴² "Nii ghǝn kyaa ɓital a dulgaam yan ɗaŋ nǝ Ɓorghǝn kǝ Coghe? Cinǝ kuni nuu? " Tǝ ta wul tǝ tu, "Nǝ kuni Dauda."⁴³Yesu ta wul shi tu, "Ta nii ta ca Dauda a giɓkǝ zhipti var ata cim tǝ tu Daadǝn, wul tu, ⁴⁴ 'Tsǝtni a taaghǝ zaaretn hal she myaa sular gyaa gyomtli waai nǝ ngǝtn ngǝ daptsǝghǝn a yaasǝnye '''?⁴⁵Yaan Dauda ta cim Ɓorghǝn kǝ Cogn tu 'Daadǝn,' wurii ghǝnnda cinǝ kuni Daudae?" ⁴⁶ Gon won ta ɗyaa sutǝ ɗa hǝŋ, gon won ta ɗyaa ceɗ tǝ ɗa hǝŋ ngaɓkǝn ɗi a dzanyi gii.

¹She Yesu ta wul vii tǝ zarshes tǝ mǝǝri dǝnwos, ²ata wul tu, ''Mǝn dlyaaɗkǝn mborki Musa tǝ Farisawa caa tsǝtnngǝn gha lǝǝɓ tsǝtnngǝn Musa. ³Kaɓ ngǝtn yo ɗaŋ caa wul tu aa fii, fin ngǝrshe shii aa ndǝr aa ɗakɗa. Beɗ tǝ gii ɓak kuuɓ riighǝn waasǝŋ hǝŋ. Yi tu, ngǝtn yo ɗaŋ caa kon ngǝn caa fi hǝŋ.⁴Yi cik, caa gaaghǝn ngǝtn ngǝ laaɓkǝn, kǝ ɗakkǝn mbiighǝn, she tǝ mbii tǝ duuɗ zarsǝ mǝn nga koɓti. Beɗ tǝ gii, gwaasǝŋ, ko tǝ ŋaa taas caa tǝǝni tu tǝ mbii hǝŋ. ⁵Kaɓ laa waasǝŋ caa fi tu zarsǝ tǝ yelshi. Taa riiɓ taa luu waasǝŋ woŋ woŋ, caa ndǝr tǝ fi vii laŋshi luu waasǝŋ nǝ varaŋshi.⁶Caa suu lǝɓ tsǝtnngǝn mbuni a dǝn belak, tǝ lǝɓ tsǝtnngǝn mbuni viin laadi Yehudawa, ⁷ tǝ wurushi ɗaŋ mǝn varaŋsǝ gha lǝɓ vǝǝn, tǝǝ ndǝr tǝǝ wul shi tu, 'Maalǝm'.⁸Beɗ tǝ gii, she yaa cim shi tu 'Malǝm' hǝŋ, durghǝ yo tu, kini tǝ Malǝm namboŋ, ɗeɓaɗ waan kii nǝ gya yestǝ. ⁹Ɓak cim gon tu Daadǝn a ɗǝgn hǝŋ, durghǝ yo tu, Daadǝn namboŋ ǝŋ kǝǝ yir, yaan ghǝn ci gaami. ¹⁰Gon tǝ cim ki tu Maalǝm hǝŋ, durghǝ yo tu Maalǝm waan ci namboŋ, Ɓorghǝn kǝ Coghǝi.¹¹Beɗ tǝ gii, gyo ɗaŋ cinǝ kǝ vari a giɓi waan tǝ naa nǝ mon. ¹²Kaɓ muryo ɗaŋ ya mbii gamashi, ta kyamas tǝ. Kaɓ muryo ɗaŋ ca mbutar gamashi ta luu tii.¹³Beɗ tǝ gii, kyaani mǝn dlyaaɗkǝni tǝ Farisawa, mǝn ryaaghǝni lǝɓ! Kaa dlǝpm ɓiil guŋndu Tsogn gaami zarsǝ mǝnii kǝ nda hǝŋ, kǝ gaa mǝn yo ɗaŋ caa suu ndaghǝni tǝ nda hǝŋ. ¹⁴A gir ki kyaani mǝn dlyaaɗkǝn mborki Musa tǝ Farisawa, durghǝ yo tu kyaa tlaa gurǝŋshi. ¹⁵Kyaani mǝn dlyaaɗkǝn tǝ Farisawa, kusǝŋsǝ zarsǝ! Kya dlaar dǝllǝŋsǝ zha kǝ tlii gha yaatli gyaa gon nǝ durghǝ ŋalghǝn ŋaaghǝ dǝn namboŋ, kili yo ɗaŋ kyaa tui, kyaa sular tǝ nǝ nǝ murghǝ ndaghǝn wuɗ tǝpm mbǝtlǝm.¹⁶A gir k kyaani mǝn ngaɓkǝn shirǝŋ doŋsǝ mǝn, kyaani ɗaŋ kyaa wul tu, ko nuu ya ŋas puus tǝ viin laadi, wo fi ngǝtn hǝŋ. Beɗ tǝ gii gon ya ŋas puus tǝ jinaari ghǝ dǝn ngǝ Cogn, ŋaskǝn puus wos a ngaɓ tii. ¹⁷Kyaani ɗǝghǝrsǝ doŋsǝ! Nǝ gyo ghǝn a moɓɓo, jinaarissa ko dǝn ngǝ Cogn ɗaŋ a ca jinaares ndzǝkkǝniya?¹⁸Hal tu, gon ya ŋas puus tǝ lǝɓ dlǝǝrghǝn mǝn varaŋsǝ dǝn ngǝ Cogn, nǝ ngǝtn won hǝŋ. Beɗ tǝ gii kaɓ muryo ɗaŋ ya ŋas puus tǝ ngǝtn yo ɗaŋ tǝ gaa ɗa duules, she ŋaskǝn puus wos wo ngaɓ tii. ¹⁹Kyaani doŋsǝ! Nǝ gyo ghǝn a moɓ luughǝnio, vǝrghǝn ngǝtn ngǝ nyaarghǝni ya ko lǝɓ dlǝǝrghǝn mǝn varaŋsǝ dǝn ngǝ Cokes ɗaŋ caa gaa ngǝtn ngǝ nyaarggǝn Cogn ngayi yaa?²⁰Durghǝ cik, kaɓ muryo ɗaŋ a ŋas puus tǝ lǝɓ tsǝtnngǝn ndzǝkkǝni kǝ dǝn ngǝ Cogn, a ŋas puus tǝ yaan tǝ kaɓ ngǝtn yo ɗaŋ yi ɗa duuli. ²¹ Muryo ɗaŋ ya ŋas puus dǝn ngǝ Cogn, a ŋas puus tǝ yaani tǝ muryo ɗaŋ cigha giɓi. ²² Muryo ɗaŋ ya ŋas puus tǝ tsogn gaami, a ŋas puus tǝ daan ngǝ guŋndu Cognvon tǝ muryo ɗaŋ ca tsǝtn ɗa duuli.²³A girki, kyaani Farisawa tǝ mǝn dlyaaɗkǝn mborki Musa, mǝn ryaaghǝn lǝɓ, kusǝŋsǝ zarsǝ! Kyaa nyolar namboŋ a giɓkǝ dzuɓ kǝ ngǝtn ngǝ miisǝŋ monnda, beɗ tǝ gii kyaa vuu hǝŋ nǝ mborki Musa ɗaŋ yi tǝ ɗakkǝn-ɗǝǝlghǝn vii ɗa giiri tǝ yelghǝn gwaandǝ tǝ caaghǝn raa. Nǝ gyaa gin ngǝn a ndara aa fi, ɓak dlaa gyaa gii hǝŋ. ²⁴ Mǝn ngaɓkǝn shirǝŋ doŋsǝ mǝn, kyaa vaa mǝrǝ zheti tǝ mǝrǝ ngǝtn ngǝ lǝǝɗkǝn beɗ tǝ gii kyaa ɗǝǝɗ Rakumi!²⁵A girki, kyaani mǝn dlyaaɗkǝn mborki ghǝ Musa tǝ Farisawa, mǝn ryaaghǝn lǝɓ! Kyaa coɓ kar kolaɗii tǝ kolakda, beɗ tǝ gii, giɓi kinǝ yugnngǝn tǝ raaghǝn, tǝ mwaaɓkǝn lǝɓ tǝ kuskǝ raa. ²⁶Kyan dwan ghǝ Farisawa! she aa coɓ giɓkǝ koɗii keni tǝ kolakda durghǝ tu kaares tǝ coɓii kaɗ kaɗ.²⁷A girki, kyaani mǝn dlyaaɗkǝn mborki Musa tǝ Farisawa, mǝn ryaaghǝn lǝɓ! Kini ɗaŋ vii giiri gii ɗaŋ tǝ kaɗ tǝ mbor mǝn,kya yel ɗi ɓidlǝm yi ndaraara, ɗa giɓi she moɗ kǝ mǝn mǝǝskǝn tǝ zhoŋngǝnni mari mari. ²⁸Ki cik a yir ghǝ zarsǝ, kinǝ mǝn gyaal, beɗ tǝ gii kinǝ kusǝŋshi tǝ ryaaghǝn lǝɓ.²⁹A girki, kyaani mǝn dlyaaɗkǝn mborki Musa tǝ Farisawa, kyaa nal vii giir mǝn varaŋsǝ ghǝ shinngǝn Cogn, hal kyaa ndǝr vii giir ghǝ zarsǝ ghǝ zaari mǝn ndaraara. ³⁰Kyaa wul tu, ɓaandǝŋ a kili ghǝ gyaa Daada gopm, mǝ ta laaɓ kaar waasǝŋ hǝŋ a dlaaghǝn voraŋ ngǝ dǝllǝŋsǝ mǝn shinngǝnCogn. ³¹Durghǝ gii, kaa kaɓi tu, kyaani ghǝn kinǝ mǝǝri mǝn tlaaghǝn dǝllǝŋsǝ mǝn shinngǝn Cokes.³²She kǝ yugn kolaɗ kǝ ɓǝǝɗkǝn ngǝtn ngǝ gyaa Daawanii. ³³ Kyaani nyici! Kinǝ mǝǝri ghǝ kazar, ka fi wur annda ka nyolii a ndaghǝn giɓ wuɗe?³⁴Durghǝ cik, yeli, migha shinndarghǝn dǝllǝŋsǝ mǝn shinngǝn, tǝ mǝn saghaɗkǝn tǝ mǝn dlyaaɗkǝn mborki Musa. Kaa tlaa gyaa gon waasǝŋǝi kǝǝ ndǝr kǝ hǝmmbal shi waasǝŋǝi kaa ndǝr kǝ voɗ gyaa gon giɓ viin laadi Yehudawa, kii laaɓshi yaatl yaatl kǝ kaɗ shi waasǝŋǝi. ³⁵ Ngǝtn yo ɗaŋ wo laaɓ kaari ɗi, voraŋ ghǝ zarsǝ ghǝ zaari ɗaŋ kǝ dlaa gha ɗǝgn wo sutuɗi ɓaski, tun a voraŋ Habila, zaar ghǝ zaari hal a Zakariya kuni Barakiya, gyo ɗaŋ kǝ ɗu tǝ a dlei ghǝ lǝɓ kǝ vaaghǝn ngǝtn ngǝ nyaarghǝn tǝ lǝɓ ndzǝk nzǝki ghǝ dǝn ngǝ Cogn. ³⁶Jom jomi mya fuu ki, ɗeɓaɗ ngǝrshi gyaa gin ta man a gaam ngǝ mǝn kili gini.³⁷Urshelima, Urshelima, kyan ɗaŋ kya tlaa dǝllǝŋsǝ mǝn shinngǝn Cogn kǝ ndǝr kǝ kuur gyaa gon tǝ puus gyaa gyo ɗaŋ tǝ shinshiɗi ɓaskǝ. Tǝpm wurii mya suu mǝ jwaamki ɗaŋ gyo ɗaŋ geri ca jwaam mǝǝri gha giɓkǝ gyomtli wos, beɗ tǝ gii kǝ nyaŋngas. ³⁸ Yaaghǝnni taa gaa ki dǝn waan mǝn nǝ pǝŋtǝnyi! ³⁹Mya fuu ki, ka man yelǝm ɗa hǝŋ, she dzaŋ gii ɗaŋ kya wul tu, 'Shiɗshiɗi tǝ naa ɗeɓaɗ ka murghǝ manngǝn ɗi a giɓkǝ sǝm ngǝ Daadǝn.'''

¹Yesu ta nyolii gaa dǝn Coghǝi she a ta yi a tlǝghǝn ngǝtn wos. Mǝǝri dǝn wos tǝǝ ta man ɓastǝ tǝǝ mbwaa tǝ taas a dǝn ngǝ Cogn. ²Beɗ tǝ gii ata sushiɗa wul shi tu, ''Kaa yel ɓuruk ngǝrshi gyaa gin hǝŋaa? Jom jomi mya fuu ki, puus won namboŋ ɗaŋ ta gaa a duuli kamshi ɗaŋ ta paɗ tǝ ta gǝm hǝŋ.''³A kili yo ɗaŋ a ta tsǝtnni a wuur ghǝ zaitun, mǝǝri dǝnes tǝǝ ta man ɓastǝ nǝ mǝǝri tǝ wul tǝ tu, ''Fuumi, kili gyo ghǝn ngǝrshi gyaa gin ta fio? Nii ghǝn wo naa nǝ ɓalaŋ maaghǝn waa ɗi tǝ ɓanngǝn ɗǝghe?'' ⁴ Yesu ta sushi ɗa wul shi tu, ''Ɗaghǝnɗa, gon tǝ caa ki aa maalii hǝŋ.'' ⁵Durghǝ yo tu zarsǝ monnda ta man tǝ sǝmatn, ta wul tu, ''Myaani ghǝn mi nǝ Ɓorghǝnni kǝ Cogn.'' Beɗ tǝ gii ta caa monnda ta maalii.⁶Kaa wum vik durghǝ gyaa maandǝ beɗ tǝ shesheɓi vik maandǝ. Ɗaghǝnɗa vǝrtǝ tǝ ngaɓ ki hǝŋ, durghǝ yo tu yini ciɓ tu ngǝrshi gyaa gin ta tlaa ɗi, beɗ tǝ gii ɓanngǝni ɗǝkes ɗyaghas. ⁷ Durghǝ yo tu yaatl wo shisher yaatl mǝn, tǝ guŋndu wo shisher guŋndu mǝn. Kusuŋ wo ndai tǝ zhighǝɗkǝn yaatl a lǝɓ mari mari. ⁸Beɗ tǝ gii ɓuruk gyaa gin cinǝ gǝmngǝn daɗi ghǝ cighǝn vwaa ɓwaaghǝn kurum.⁹A kaar ghǝ gii ta gǝm ki a kuskǝ buŋngǝn ta ndǝr ta tlaa ki waanii nǝ durghǝ sǝmatn. ¹⁰Nǝ gii monnda ta ngaa yaasǝŋ ta ndǝr ta vǝr vii dlǝŋsǝ waasǝŋ tǝ nyaŋngaskǝn dlǝŋsǝ waasǝŋ. ¹¹Mǝn shinngǝn Cogn kǝ mbeerni monnda ta mbwaaɗi beɗ ta maalar zarsǝ monnda.¹²Nǝ durghǝ yo tu kuskǝ raa wo lǝǝɗi, suughǝn kǝ zarsǝ monnda wo njirǝi. ¹³Beɗ tǝ gii ɓuruk gyo ɗaŋ ya duumvwaa hal ɓanngǝn, wo tu vumngǝnii. ¹⁴Vik wusni gin kǝ guŋndu ta tlǝǝr ko te ɗo a giɓkǝ ɗǝgn durghǝ yo tu tǝ naai nǝ ngǝtn ngǝ tlyaghǝn zha a ko yaatl gyo. Annda ɓanngǝnes wo man.¹⁵Nǝ durghǝ gii, ǝŋ kyaa yel ngǝtn ngǝ nyaŋ kǝ malarghǝn lǝɓ gyo ɗaŋ Daniyel murghǝ shinngǝn Cogn, ɗaŋ ata wul vii a dulgamashi, dlǝǝr a lǝɓ kǝ ndzǝkkǝn'' (she murghǝ kwanngǝn tǝ yisǝŋǝi), ¹⁶gyaa gyo ɗaŋ ci Yahudiya tǝǝ kir tǝǝ tai a gyaa wuur, ¹⁷gyo ɗaŋ cigha gam viin tǝ shii ɗi tu ca mbii ngǝtn won ɗaatǝ dǝn hǝŋ, ¹⁸ gyo ɗaŋ cigha kitn tǝ sutǝɗi nǝ mbiighǝn lukvari wos hǝŋ.¹⁹Beɗ tǝ gii wo gir gyaa gyo ɗaŋ citǝ nŋaavwaa tǝ gyaa gyo ɗaŋ cigha vǝrghǝn maam gyaa naabartu a mbuɗkǝnni gyaa gies! ²⁰ Karan Cogn tu kitar waan tǝmbwaaɗi a kili ghǝ yetar ko dzaŋ wolngi hǝŋ. ²¹ Nǝ durghǝ tu ta fi kuskǝ vuughǝn, ɗaŋ gyo ɗaŋ taa yi fii ɓanndǝŋ ɗa ɗǝkes hǝŋ she ɗaŋngǝnnin, o' oi ta man fi gii ɗa hǝŋ. Yaan tu mbuɗkǝn gyaa gies ta lǝǝɗ hǝŋ, gon wo nyol hǝŋ. ²²Beɗ tǝ gii nǝ durghǝ gyaa gyo ɗaŋ ta ɓwaa shi, ta ngaar mbuɗkǝn gyaa gii.²³Ɓuruk gyo ɗaŋ ya wulghǝ tu, 'Yeli, Ɓorghǝn kǝ Coghǝi ghǝncin!' ko, Ɓorghǝn kǝ Coghǝi ghǝn ci ɗii' ɓak caan raa ghai hǝŋ. ²⁴Durghǝ yo tu gyaa Ɓorghǝn kǝ Cogn kǝ mbeerni tǝ mǝn shinngǝn Cogn naa mberni ta man ta zhiɗ ɓalaŋ dǝllǝŋsǝ gyaa ngǝtn ngǝ kosarghǝn, durghǝ yo tu tǝ maalar zarsǝi, ǝŋ yaan wo fi, beɗ tǝ gyaa mǝn yo ɗaŋ taa waarshi. ²⁵ Yelǝni, maa fuu ki annda kiles tǝ tul ɗi.²⁶Nǝ durghǝ gii, ǝŋ caa wulghǝ tu, 'Yelǝn, ci dlǝk ndǝǝr ɓak nywaal tu ka tlii ɗa ndǝǝri hǝŋ. ²⁷Ɗaŋ gii ɗaŋ falaŋ caa tlaa ɗi banndi gǝshi caa mbaa hal tlǝghǝn ɓuruk ɓuruk banndi gaamii, cik kǝn manngǝnɗi ŋaa zaar wo naa. ²⁸Ɓuruk lǝɓ yo ɗaŋ gǝmmbǝli ghǝ tluu ghai, ɗan ghǝn ka tu gyaa koɗak ta jwaamshi ghai.²⁹Beɗ tǝ gii kyaaɗ a kaar ghǝ vuughǝn kǝ mbuɗkǝn gyaa gii dzaŋ wo diɓii, lǝpm wo man mbaa ɗa hǝŋ, gyaa caar ta ndaaɗii ɗi gaami, tǝ gyaa ghǝ tsogn gaami ta zhighǝɗii.³⁰Annda ɓalaŋ ngǝ Ŋaa zaar wo mbwaaɗi gaami a kurvon, ɗeɓaɗ zarsǝ ghǝ ta waa miitsǝ. Ta yel Ŋaa ghǝ zaar a maag ³¹Wo shin gyaa zhipti shinngǝn Cogn tǝ vuɗ tǝ mwaari tlyaa tlyaa, tǝ cik taa jwaam gyaa gyo ɗaŋ cinnǝ bwaaghǝn wos a te banndi wuɓsǝi ɓuruk ngaɓkǝn ɗi a tsogn gaami a te gin hal a te gii.³²Kuuɓǝn ngǝrshi gin a gwaas kǝ gwaam. Kyaaɗ kǝn dlyaŋri wos ya luuɗi ɗaŋ paaci nguɓ ɗǝǝlghǝni, kaa yisǝŋǝi tu kili vii von aa naai mel. ³³ Cik kǝn, kyaa yel ngǝrshi gyaagin caa naa mel ɓuruk, a ndara aa yisǝŋǝi tu ci mel, hal a ken ɓidlǝm.³⁴Jom jomi mya wul ki tu, usuli gin wo laatsǝ hǝŋ, she ɓuruk ngǝrshi gyaa gin caa fii. ³⁵ Tsogn gaami tǝ ɗǝgn ta man laatsǝi beɗ tǝ gii gyaa gǝghatn ta laatsǝ hǝŋ.³⁶Beɗ tǝ gii a dulgaam ngǝ dzaŋǝi tǝ kiles gon aa yisǝŋ hǝŋ, hal tǝ ɓuruk gyaa zhipti shinngǝn Cogn, ko ;Kunes, beɗ tǝ gii she Daashi ngǝtn wos.³⁷Ɗaŋ gyo ɗaŋ kili ghǝ Nuhu tǝ ta yi, cik kǝn wo naa a mbuɗkǝn ngǝ manngǝnɗi Ŋaa ghǝ zaar. ³⁸Ɗaŋ kaɓkǝ mbuɗkǝn gyaa gii annda von kǝ jinndi Nuhu tǝ ta yigha cighǝn tǝ tlyaghǝn, cigha kaɓkǝn guɗi, guɗi cigha kaɓkǝn tuur hal dzaŋ yo ɗaŋNuhu wo nda ɗa zuŋ zha, ³⁹ tǝ ta yisǝŋ ngǝtn won hǝŋ she ɗaŋ zha ta man nyomshi waashii ɓuruk- cikkǝn wo naa a manngǝnɗi Ŋaa zaar.⁴⁰ Wo naai tu zarsǝ mbǝtlǝm cigha kitn- ta mbii namboŋǝi ta gaa namboŋ. ⁴¹Guɗi mbǝtlǝm cigha nyiighǝn nyoptǝ a vuun ta mbii namboŋǝi, ta gaa namboŋ. ⁴²Nǝ durghǝ cik she aa naa yir gwaam, durghǝ yo tu kaa yisǝŋ dzaŋ gyo ghǝn Daadǝn waan wo man ngai hǝŋ.⁴³Beɗ tǝ gii yisǝŋǝn ɗaŋngǝnin, tu ǝŋ yaan murghǝ dǝn aa yisǝŋ ko a kili ghǝ kaviɗi gyo ǝŋ mǝǝr wo man ngai wo tsǝtn ɓumtsǝ tii baa wo gaa hal tǝ man kwaaɓ dǝnii tǝ ndai ghai hǝŋ. ⁴⁴Nǝ durghǝ gii she aa ɓumtsǝn ki waanii, durghǝ yo tu Ŋaa zaar wo man a kili yo ɗaŋ kaa ɓital ghai hǝŋ.⁴⁵To nǝ zaar ghǝ zaari tǝ saghaɗkǝn gyo ghǝn murghǝ dǝn wos wo gaa tǝ, tǝ yaal tǝ mǝn ɗa nǝ dǝn durghǝ yo tu tǝ taa tǝ ngǝtn ngǝ cighǝn a kili yo ɗaŋ a ndarao? ⁴⁶Shiɗshiɗi nǝghǝ mon yo ɗaŋ murghǝ dǝn wos wo man, man tu tǝ a laa wos a kili ghǝ sughǝn wos ɗi. ⁴⁷ Jom jomi mya wulki tu murghǝ dǝnes wo gaa tǝ ɓuruk ko nii ɗaŋ yir mǝn.⁴⁸Beɗ tǝ gii ǝŋ yaan kuskǝ mon ya wul a giɓkǝ raa wos tu, 'Murghǝ dǝnatn aa naai ɗi,' ⁴⁹she a nguɓ voɗkǝn gyaa kamci monsǝ, ndǝr fi tǝ cighǝn tǝ tlyaghǝn tǝ mǝn tlyaghǝn ɗuu hal ɗu shi waasǝŋǝi, ⁵⁰she murghǝ dǝn ngǝ mones wo man a dzaŋ yo ɗaŋ mones aa gaa raa ghai ko kili yo ɗaŋ aa ɓital hǝŋ. Murghǝ dǝn wos wo ⁵¹dzak tii dǝni dǝni wo sular tsǝtnngǝn wos ɗaŋ kǝ mǝn ryaaghǝn lǝɓ. Ta gǝm tǝ a lǝɓ ɗaŋ caa ngwaar tǝ ŋaas taas kai.

¹Kili gin guŋndu ghǝ Tsogn wo naa ɗaŋ bǝtǝrsǝ dzuɓ gyo ɗaŋ tǝ mbii gyaa kuuɓka wuɗ waasǝŋ tǝ tlii tu tǝ tsal murghǝ kaɓkǝn gǝɗ muuri. ²Nanndam a giɓi waasǝŋ tǝ ta yi tǝ saghaɗkǝn hǝŋ, nanndam a dlei waasǝŋ tǝ ta yi tǝ saghaɗkǝn. ³Ɗaŋ a kili yo ɗaŋ ɗǝghǝrsǝ bǝtǝrsǝi tǝ mbii ɓanci miir waasǝŋ tǝ kǝǝndarshi hǝŋ. ⁴Beɗ tǝ gii bǝtǝrsǝ kǝ saghaɗkǝnnes tǝ ta mbii gyaa fon miir tǝ numii tǝ gyaa kuuɓka wuɗ waasǝŋ.⁵Ɗaŋ tuur muures ta naai ɗi, ɓuruk waasǝŋ tǝ ta ɗǝǝmii hal tǝ ta daɓ tǝ shii kuci. ⁶Beɗ tǝ gii ɗa dlǝk kaviɗ ɗi she tǝ ta wum dlaarghǝn vii, Yelǝn, tuur muures! 'Nywaalǝn ɗi aa tlǝn tsalǝn tǝ.'⁷She ɓuruk bǝtǝrshes tǝ ta shishii tǝ ndǝr gyaa kuuɓka wuɗ waasǝŋǝi. ⁸Ɗǝghǝrshes tǝ ta wul mǝn saghaɗkǝnnes tu, 'Ngaamǝn mi miir waanii gon durghǝ yo tu kuuɓka wuɗ wopm cigha mbǝtsǝghǝni.' ⁹Beɗ tǝ gii mǝn saghaɗkǝnnes tǝ ta sushi ɗa tu, 'Ɓaanndǝŋ maa wo tul mi beɗ tǝ kyaani hǝŋ, a bamvii gii tlǝn a mǝn ɗiɓarghǝn aa tlǝn ɗiiɓ kǝ gamawaan mǝn ɗi.'¹⁰Ɗaŋ tǝ ta nywaaalii tǝ tlǝ tu tǝ ɗiiɓ ɗi, tuur muures ta tuliiɗi, she gyaa gyo ɗaŋ taa ta ɓumtsǝshi waashii tǝ ta nywaal cimshi tǝ tlii a lǝǝɓ belak kǝ kaɓkǝn gǝɗes, she tǝǝ ta yetl ken ɓiileshii. ¹¹Ɗa kaari ɓancighǝ bǝtǝrshes tǝ ta man tǝ wul tu, 'Murghǝ dǝn, Murghǝ dǝn, ɗǝrǝ mi mǝnii.' ¹²Beɗ tǝ gii ata suɗa she wulshi tu, 'Jom jomi mya fuu ki maa yisǝŋ ki hǝŋ.' ¹³Nǝ durghǝ gii ɗaghǝnɗa, kaa yisǝŋ dzaŋ ko kili hǝŋ.¹⁴Nǝ durghǝ gii, yini ɗaŋ tu nǝ zaar ɗaŋ caa suu tǝ tlii a dlari yaatli gon. Ata cim monsǝ wos she vǝrshi tughǝn wos. ¹⁵Namboŋ waasǝŋ ata vǝr tǝ talanti ghǝ wurɓa nanndam, gon gos ata taa tǝ mbǝtlǝm, kǝ nambonyi waasǝŋ ata vǝr tǝ talanti namboŋ. Ko gyo waasǝŋ ata kaɓ ɗa giiri tlyaaghǝn wos, she mures ta tlii riighǝn wos. ¹⁶Gyo ɗaŋ ata kaɓ talanti nanndam ata tlii kyaaɗ tlǝn sughǝɗ taas kai she ata tu nanndam ngai ɗa.¹⁷Cikkǝn gyo ɗaŋ ata kaɓ talanti mbǝtlǝm ata tu mbǝtlǝmi gon ngai ɗa. ¹⁸ Beɗ tǝ gii moni gyo ɗaŋ ata kaɓ talanti namboŋǝi ata tlii ngǝtn wos, ata ɓǝl giir yaatl, she ata waaɗ wurɓa murghǝ dǝn wosheshii ghai.¹⁹Ɗaŋ a gǝrǝi monnda murghǝ dǝn ngǝ gyaa monsǝi ata sutǝɗi, durghǝ yo tu tǝ kwaan wurɓa waasǝŋǝi. ²⁰Mon yo ɗaŋ ata kaɓ talanti wurɓa nanndam. Ata wul tu, 'Murghǝ dǝn maa tu ɓakmi ɗa duuli nanndam. ²¹Murghǝ dǝn wos ata wul tǝ tu, ' Annu monnda, mon ngǝ mbuuni tǝ fighǝn zaar! Kǝ giɗ zaar a ngǝtn ŋaa njwaatn. Ma gaaghǝ a dulghǝ gyaa ngǝtn monnda. Ndai a giɓkǝ polghǝn ngǝ murghǝ dǝn waa.'²²Monni gii ɗaŋ a kaɓ talanti wurɓa mbǝtlǝmii ata man ata wul tu, 'Murghǝ dǝn, kǝ vǝrǝm talanti mbǝtlǝm. Yeli, maa tu mbǝtlǝmi gon ɗi ghai ɗa.' ²³Murghǝ dǝn wos ta wul tǝ tu, 'Annu monnda, kyan monngǝ mbuni, kaa fi zaar a ngǝtn ŋaa njwatn. Ma gaa ghǝ a duul ghǝ ngǝtn monnda. Ndai a polghǝn ngǝ murghǝ dǝn waa.'²⁴She monni gii ɗaŋ ata kaɓ talanti namboŋǝi ata man ata wul tu, ' Murghǝ dǝn. maa yisǝŋǝi tu kinǝ murghǝ ɗakkǝn. Kya tlaa ngǝtn a lǝɓ yo ɗaŋ kaa kǝɓ kai hǝŋ, cikkǝn kya nyom ngǝtn a lǝǝɓ yo ɗaŋ kaa gii ghai hǝŋ. ²⁵ Vǝrtǝ ta ɗumii, nǝ gii mǝ ta kiir mǝ waaɗ talanti waai giɓ yaatl. Yeli, kaɓ ngǝtn waai.'²⁶Beɗ tǝ gii murghǝ dǝn wos ta sutǝɗa ata wul tu, 'Kyan mon murghǝ kuskǝ raa tǝ shaaɓ mon, kaa yisǝŋǝi tu mya tlaa a lǝǝɓ yo ɗaŋ ma kǝɓ kai hǝŋ mǝ nyom ngǝtn yo ɗaŋ ma gii ghai hǝŋ. ²⁷ Nǝ durghǝ gii kii vǝr wurɓan mǝn gaaghǝn wurɓa, ɗaŋ mǝ mannǝn mii kaɓ wurɓan tǝ ŋaa zhai.²⁸Nǝ durghǝ gii kaɓǝn talanteshii ɓastǝ aa vǝr monni gii ɗaŋ yir talanti dzuɓii. ²⁹Durghǝ yo tu ɓuruk gyo ɗaŋ yir ngǝtn monna ta vǝr tǝ monnda bakdas. Beɗ gyo ɗaŋ yir ngǝtn hǝŋ, beɗ tǝ ŋaa ngǝtn yo ɗaŋ yir ta kaɓii ɓastǝ. ³⁰ Dlaan kusǝŋsǝ monsǝ ɓenndǝmii a giɓkǝ lǝɓ jii, lǝɓ yo ɗaŋ ta ngwaar tǝ ŋaaskǝn taas kai.'³¹Dzaŋ gyo ɗaŋ Ŋaa zaar wo man tǝ luughǝn wos tǝ ɓuruk zhipti shinngǝn Cogn, she wo tsǝtn a daan ngǝ guŋndu wos. ³²A ken wos kǝn ta jwaam ɓuruk mǝn ɗǝgn, wo ndǝr ɓǝǝl shi waashii mari mari, ɗaŋ gyo ɗaŋ murghǝ lyaaghǝn maaɗ ca ɓǝǝl timsai a maaɗ. ³³Wo gaa timsa a taaghǝ zaari wos, beɗ tǝ gii maaɗ a taaghǝ naɓti wos.³⁴She Gunyes wo wul gyaa gii a zaari woshii tu, ' Manǝn, kyaani Daagǝtn aa gǝm ki shiɗshiɗi mǝn, ciin duul ghǝ guŋndu yo ɗaŋ tǝ ɓumtsǝ nǝ dur waan ɓaandǝŋ tun ndǝrghǝn ngǝ ɗǝgn. ³⁵Durghǝ yo tu kusǝŋ ata ɗumii kǝǝ ta taam ngǝtn ngǝ cighǝn; zhak mbatlkǝn ta ɗumii kǝǝ ta taam zha; Mǝ ta yi nǝ sǝmmbǝr kǝǝ ta vǝrǝm lǝɓ; ³⁶Mǝ ta yi nǝ muli kǝǝ ta caam lǝŋsǝ mǝn; Mǝ ta gon kǝǝ ta yaal ɗam; Mǝ ta yi giɓ dǝ ngǝ garaŋ kǝǝ ta man ɓasǝm.'³⁷She zarsǝ mbunes ta suɗa ta wul tu, 'Daadǝn, dzaŋgyo ghǝn mǝǝ yelghǝ a kusǝŋ mǝǝ vǝrghǝ ngǝtn ngǝ cighǝnio? Ko a zhak mbatlkǝn mǝǝ vǝrghǝ zho? ³⁸Dzaŋgyo annda mǝ yelghǝ nǝ sǝmmbǝr mǝǝ vǝrghǝ viino? Ko nǝ muli mǝǝ caaghǝ lǝŋsǝ mǝno? ³⁹ Dzaŋ gyo ghǝn mǝǝ yelghǝ a gonngǝn ko dǝn garaŋ annda mǝ tlǝ ɓasko?' ⁴⁰She guŋyes wo suɗa wo wulshi tu, 'Jom jomi mya fuu ki, ngǝtn yo ɗaŋ kyaa fi namboŋ a guɓkǝ gyaa ŋaa ghǝ naatǝn, kǝǝ fi ni myani mǝn ghǝnndi.'⁴¹Wo wul gyaa gyo ɗaŋ ci gha taaghǝ napti wos tu, 'Ɓǝǝlǝnki tǝ myan, kyaani mǝn laŋngǝn, tlǝnni giɓkǝ wuɗ kǝ Hadis gyo ɗaŋ taa ɓumtsǝ tǝ gaa shetan mǝn tǝ gyaa kusuŋsǝ zhipti wos, ⁴² durghǝ yo tu kusuŋ ta ɗum kǝ ta vǝrǝm ngǝtn ngǝ cighǝn hǝŋ; zha ta mbatlǝm kǝǝ ta vǝrǝm zha mǝ tlya hǝŋ; ⁴³Mǝ ta tlǝ sǝmmbǝr beɗ tǝ gii kǝǝ ta vǝrǝm lǝɓ tsǝtnngǝn hǝŋ; mǝ ta yi nǝ muli, kǝǝ ta caam lǝŋsǝ mǝn hǝŋ; mǝ ta yigha gonngǝn beɗ tǝ gii giɓ dǝn ngǝ garaŋ kǝǝ ta tlǝn paŋǝm hǝŋ.'⁴⁴She yaŋshi beɗ ta suɗa ta wul tǝ tu, 'Daadǝn, dzaŋ gyo ghǝn mǝ yelghǝ ɗaŋ kusuŋ aa ɗughǝi, ko zha aa mbatlkǝn, ko kinǝ sǝmmbǝr, ko kinǝ muli, ko a gonngǝni, ko giɓ dǝn ngǝ garaŋ, ǝŋ mǝ fighǝ zaar mǝn hǝŋo? ⁴⁵She wo sushi ɗa wul tu, 'Mya fuu ki jom jomi ngǝtn yo ɗaŋ kǝ ɗyaa kǝ fi kǝ mbasakni a dlei ghǝ gyaa gin hǝŋ, kǝ fim mǝn hǝŋ.' ⁴⁶Gyaa gin ta tlii giɓkǝ buŋngǝn kǝ ndok ndoki beɗ tǝ gii zarsǝ ndzǝkkǝn ta tlii raai kǝ ndok ndoki.''

¹A tuli ɗi a kili yo ɗaŋ Yesu ɓan ɓuruk gǝki gyaa ginni, a wul mǝǝri dǝn wos tu, ² ''Kaa yisǝŋ tu mbuɗkǝn mbǝtlǝm yaa laatsǝi belak kǝ tlǝǝghǝni a manngǝnɗi, ta vǝr Ŋaa zaarii tǝǝ hǝmmbal tii.''³She pǝris vares tǝ mǝnvaraŋsǝ zarsǝ taa ta jwaam a balgham ngǝ pǝris vares, gyo ɗaŋ sǝǝm wos ta yi tu Kaifas. ⁴Tǝǝ ɓumtsǝ vii namboŋ tu tǝǝ ngaɓ Yesui nǝ mǝǝri tǝǝ ɗuu tii. ⁵Durghǝ yo tu tǝǝ ta yi a wulghǝn tu, '' A kili ghǝ belak hǝŋ, durghǝ yo tu shisherghǝn raa tǝ shishi a dlei zarshes hǝŋ.''⁶Kili yo ɗaŋ Yesu ci Baitanya dǝn gya Siman ndomtsǝi, ⁷Daɓak kili yo ɗaŋ a tsǝtnni a laŋsǝ dakces nǝ cighǝn ngǝtn ngǝ cighǝn, she gǝɗ won ta ndaɗi tǝ puŋndi miir, kǝ wurɓa monnda, ata shin Yesu mǝn a gaam wos. ⁸Beɗ tǝ gii ɗaŋ mǝǝri dǝn wos tǝ yel cik, she ata tliishi ghai tǝ wul tu, ''Dei ghǝ malarghǝn ngǝrshi gin yini tu nii? ⁹A moɓ ndaraaghǝn aa ɗiɓar miiri gin tǝ wurɓa monndan a ɓǝǝl gyaa naa-kui mǝn.''¹⁰Beɗ tǝ gii Yesu ɗaŋ ata yisǝŋǝi, ata wulshi tu, ''Nii ghǝn a caa annda kyaa vuu raa gǝɗin mǝn ne? Durghǝ yo tu a fim ngǝtn ngǝ ndaraaghǝn mǝn. ¹¹Kii tǝ mǝn dwaandǝ ko dzaŋ gyo, beɗ tǝ gii nǝ ko dzaŋ gyo ghǝn mi cim ki hǝŋ.¹²Durghǝ yo tu ɗaŋ a kaɗǝm miirǝn mǝn a dlietn, a kaɗni nǝ durghǝ giighǝnetn. ¹³ Jomi mya wul ki tu, ɓuruk lǝɓ yo ɗaŋ vii wusni gin caa wul ghai a ɗǝgn, ngǝtn yo ɗaŋ gǝɗin fi beɗ ta kon nǝ ɓitalghǝn wos.''¹⁴She namboŋ a giɓkǝ dzuɓ tliiti mbǝtlǝmes, ɗaŋ sǝm wos tu Yahuda Iskaryoti, ata tlii a dǝllǝŋsǝ pǝrist, ¹⁵ata wul tu, ''Nii ghǝn kyaa suu aa taam ghǝnnda mǝ vǝr tii ɓaskie?'' Tǝ ɓǝǝɗ tǝ zurfa tashi maayi. ¹⁶A kiles annda ata ŋal datǝpm yo ɗaŋ wo vǝr tii ɓashi.¹⁷To ɗa dzaŋ ngǝ keni kǝ belak kǝ dugn ɗaŋ yiis kai hǝŋ dlaarghǝn mǝǝri dǝn woshes tǝ ta tlii ɗi a Yesu tǝ wul tu, ''Ɗo ghǝn kya suu mǝ ɓumtsǝ lǝɓ yo ɗaŋ ka ci ngǝtn ngǝ cighǝn ngǝ belak kǝ tlǝǝghǝnes kai yo?'' ¹⁸Ata wul tu, ''Ndan ɗa giɓkǝ yaatles ka tu murwon she aa wul tǝ tu, 'Maalǝm wul tu, ''Kili wos aa naa mel. Ma ci belak kǝ tlǝǝghǝni ɗaaghǝ dǝn, tǝ mǝǝri dǝnnatn.''''' ¹⁹Mǝǝri dǝn woshes tǝ ta fi ɗaŋ gii ɗaŋ Yesu fuu shi waashii, tǝ ta ndǝr lǝɓ yo ɗaŋ ta ci ngǝtn ngǝ cighǝn ghǝ belak kǝ tlǝǝghǝnes kai.²⁰Ɗaŋ suutu ta fii, she ata tsǝtni durghǝ yo tu tǝ ci tǝ gyaa mǝǝri dǝn woshes dzuɓ tliiti mbǝtlǝmi. ²¹Kili yo ɗaŋ cigha cighǝn, ata wul tu, ''Jomi mya fuu ki, namboŋ a giɓi waan wo vǝr vietii.'' ²² Raaghǝ jii ta ngaɓ shi waashii, tǝ ta nda tǝ ceɗkǝn namboŋ namboŋ, ''Ciɓ nǝ myani hǝŋaa, Daadǝn?''²³She ata sushiɗa tu, ''Gyo ɗaŋ mya caa taas koɗ namboŋ mi cimtǝ ngǝnnda wo vǝr vietn. ²⁴Ŋaa zaar wo tli, ɗaŋ gii ɗaŋ tǝ dlyaaɗ a gamashi. Beɗ tǝ gii wo gir daashi gii ɗaŋ te ɓastǝ annda ta vǝr Ŋaa zaar! A moɓ ndaraaghǝn ɗaŋ cii ɓwaa daashes hǝŋ.'' ²⁵Yahuda gii ɗaŋ wo vǝr tii ata wul tu, ''Maalǝm ko nǝ myannan?'' ata wul tǝ tu, ''Kaa konii tǝ gamawa.''²⁶Ɗaŋ tǝǝ ta yi a cighǝnes, Yesu ta mbii dugn, gǝm shiɗshiɗi ghai, she ata tsaalii. Ata vǝr mǝǝri dǝn woshes she wul tu, "Kaaɓǝm, cin. Gin nǝ dlietn.''²⁷She ata mbii koɗes ata nyaar, ata vǝrshi ata wul tu, ''Tlen, ɓuruk waan. ²⁸''Durghǝ yo tu gin nǝ voraŋatn kǝ mbighǝn ɗa raai gyo ɗaŋ tǝ dlaa nǝ durghǝ dlaaghǝn loŋsǝ ghǝ kusuŋsǝ ngǝtn ngǝ zarsǝ monnda. ²⁹Beɗ tǝ gii mya fuu ki, ma man tlya zhak darndu dǝnnǝn ɗa hǝŋ, she dzaŋ gii ɗaŋ ma tlya kǝ muures cimki a giɓkǝ guŋndǝ ghǝ Daagǝtn.''³⁰Ɗaŋ tǝ ta waa ngil, she tǝ ta tai wuur ghǝ zaitun. ³¹She Yesu ta wulshi tu, ''Ɓuruk waan ka nga yaasǝŋ ɗa kaviɗin nǝ durghǝ myan, duryo tu yini dlyaaɗkǝn tu, ''Ma ɗuu murghǝ lyaaghǝn tǝmsashii, gutuli tǝmsas ta basaŋǝi.' ³²Beɗ tǝ gii ɗa kaari ɗaŋ yaa shisher mii, ma tul ki Galiili keni.''³³Beɗ tǝ gii Biturus ta wul tu, ''Ko yaan yini tu ɓuruk ta ndaaɗi nǝ dur waa, myan gǝtn ma ndaaɗ hǝŋ.'' ³⁴Yesu ta wul tǝ tu, ''Jomi mya fuughǝ, ɗa kaviɗin ka ci vii tu kaa yisǝŋǝm hǝŋ tǝpm maayi annda daturshi tǝ gǝm vii.'' ³⁵Biturus ta wul tǝ tu, ''Ko yaan yini tu ciɓ ma mǝǝs mi cimngǝ ma ci vii nǝ kyan hǝŋ.'' She mǝǝri dǝn woshes ɗaŋ tǝ ɓan tǝ naai tǝ wul cik ɗaŋ.³⁶A kiles Yesu tǝǝ ta tlii ci cimshi a lǝɓ yo ɗaŋ caa cim tu Getsaimani she ata wul mǝǝri dǝn woshes tu, ''Tsǝɗǝnni ɗuun myan ma ɓǝɗǝm a ken mǝ kara Cogn.'' ³⁷Ata mbii gyaa Biturus tǝ mǝǝri Zaɓaɗi mbǝtlǝm tǝ yaan ngai she ata ngaɓ vuughǝn nǝ raa ghǝ jii. ³⁸She ata wulshi tu, ''Raatn cigha giɓkǝ vuughǝn monnda hal nǝghǝ mǝskǝn. Tsǝtǝn ɗuun mǝ sǝǝn kǝǝm.³⁹Ata ngaa ɓǝɗ tǝ ghai ken njwaatn, she ata zuɓnii tǝ tsogn ken wos yaatl, ata kara Cogn. Ata wultu, Daagǝtn, ǝŋ kya kaɓii, gaa koɗǝn tǝ laatsǝmmǝnii. Beɗ tǝ gii, nǝ suughǝnnetn ghǝn ka laaɓ hǝŋ, she suughǝnni gwaai.'' ⁴⁰Ata sutǝ a gyaa mǝǝri dǝn wos ata tushi cigha kuci, she ata wul Biturus tu, ''Aiye, ka ɗyaa kǝ ɓuɓǝm ko nǝghǝ kili namboŋ hǝŋaa? ⁴¹Tsǝtǝn gwaam, karan Cogn durghǝ yo tu aa tu gamawaan a giɓkǝ diiɓkǝn hǝŋ. Raai aa kaɓii beɗ tǝ gii dlies nǝ lyaghaɓi.''⁴²She ata sutu kǝ mbǝtlǝmi tǝ kara Cogn, ata wul tu, ''Daagǝtn, ǝŋ yaan koɗǝn wo laatsǝ hǝŋ tu she mya tlei, gaa tǝ naa nǝ a suughǝn waa.'' ⁴³Ata sutǝ ɗi ɗa, ata tushi cigha kuci, durghǝ yo tu yir waasǝŋ aa ta ɗǝǝmii. She ata gaashi waasǝŋǝi ɗeɓaɗ tlii. ⁴⁴Ɗaŋ ata sutǝ kǝ maayes cigha karaghǝn Cogn ata ya kwaan vies gyaa gon nǝ ngǝtn ngǝ nambonyi.⁴⁵She Yesu ta man a mǝǝri dǝnnes ata wul shi tu, 'Hal ɗaŋngǝnin kiigha kuci tǝ ngaaghǝn laa? Yelǝni, dǝǝles a tuliiɗi, taa vǝr vii Ŋaa zaarii a taas kǝ mǝn kuskǝ ngǝtn. ⁴⁶Shinshin, mǝǝ tlǝnnii. Yaalǝn, gyo ɗaŋ ca vǝr vietn aa tulii ɗi mel.''⁴⁷A kili yo ɗaŋ ata yi a vies wulghǝni Yahuza, namboŋ a giɓkǝ dzuɓ tliiti mbǝtlǝmes, ata tuliiɗi. Tǝ ta man tǝ gyaa gutuli zarshes ɗaŋ tǝ dlamɗi tǝ gyaa mǝn varaŋsǝ firistoci tǝ mǝn varaŋsǝ zarshes. Tǝ ta yir gyaa gita tǝ gyaa nanngole. ⁴⁸To daashes ɗaŋ wo vǝr Yesues aa ta giɗ shi ngǝtn yo ɗaŋ wo fi tu, ''Gyo ɗaŋ mya ngaɓtǝ rumtsǝk to, nǝ yaan. Ngaɓǝntii.''⁴⁹Ɗa ɗan ɗa ɗan ata man a Yesu ata wul tu, ''Annu, Maalǝm!'' she a ngaɓtii rumtsǝk. ⁵⁰Yesu ta wul tǝ tu, ''Kaam, fi ngǝtn yo ɗaŋ kǝ man ɗa.'' She tǝǝ man ngaɓ Yesui, tǝ tlǝǝr tii.⁵¹Swaaɗ, namboŋ a giɓkǝ gyaa gii ɗaŋ citǝ gyaa Yesui ata taa taas wos, ata dlii gita wos ɗi, ata dzak kǝǝm mon ngǝ dǝllǝ ghǝ Pǝrishes mǝnii. ⁵²She Yesu ta wul tu, ''Sular gita waa a giɓ kǝǝpi wos, durghǝ yo tu ɓuruk gyaa gyo ɗaŋ tǝ mbii gita yaŋshi ma a te gita ghǝnnda ta mǝǝs. ⁵³Ko kya yel ɗan tu ma ɗyaa mǝ cim Daagǝtn hǝŋaa, tǝ ndǝr tǝ shinndar gutuli zhipti mǝn shinngǝn wos ɗi ɗaŋ tǝ moɓ goɓri dzuɓ tlii mbǝtlǝm hǝŋaa? ⁵⁴ Beɗ tǝ gii wurii ghǝnnda ta yugngar vik Coghe, tu ciɓ yaa fii ginne?''⁵⁵A kiles Yesu ta wul guutuli zarshes tu, '' Kǝǝ man tǝ gyaa gita tǝ gya shirǝŋ a ngaɓǝm ngai ɗaŋkutu tu minǝ mǝǝr naa tlyaaghǝnniya? Mya tsǝtn ko dzaŋ gyo mii cim ki dǝn ngǝ Cogn migha zhiɗkǝn zarsǝ ghai, kǝǝ ngaɓm hǝŋ. ⁵⁶Beɗ tǝ gii ɓuruk ngǝrshi gin ɗaŋ tǝ fin tu tǝ yugngar ngǝtn yo ɗaŋ mǝn shinngǝn Cogn tǝ dlyaaɗ.'' She ɓuruk mǝǝri dǝnnes tǝ ta gaa tii tǝ kirii.⁵⁷Gyaa gyo ɗaŋ tǝ ngaɓ Yesues tǝ ta tlǝr tǝ a Kaifas dǝllǝ ghǝ pǝris, lǝɓ yo ɗaŋ mǝn yisǝŋngǝn mborki ghǝ Musa tǝ mǝn varaŋsǝ yaatl tǝ jwaam ngai. ⁵⁸Beɗ tǝ gii Biturus ta laaɓ tǝ ŋaa ɗoongai tǝ diidlǝŋ kǝ pǝris vares. Ata ndai giɓ dǝn ata tsǝtnni tǝ mǝn paŋngǝn tu tǝ yel ngǝtn ɗaŋ wo laaɓ kaari ɗi.⁵⁹A kiles mǝn varaŋsǝ pǝris tǝ ɗeɓaɗ mǝn balghames tǝ nda ŋalghǝn mǝn tlyaghǝn zha kǝ mbeerni a dulgam Yesu, durghǝ yo tu tǝǝ tu tǝ ɗu tii. ⁶⁰Tǝǝ ta tu ko namboŋ hǝŋ, ko ɗaŋ tu taa ta tu mǝn tlyaghǝn zha ɗaŋ taa mbwaaɗi kǝ mberni monnda ghǝn ci ɗa keni. Beɗ tǝ gii ɗa kaari she gyaa gon mbǝtlǝm tǝǝ ta nywaal ɗi. ⁶¹Tǝǝ ta wul tu, ''Muri gin wul tu, Ma ɗyaa ma wuu viin ngǝ Coghǝi mǝ ndǝr mǝ nal tii a giɓkǝ mbuɗkǝn maayi.''⁶²Dǝllǝ pǝrishes dlǝǝr wul tǝ tu, ''Ki tǝ ngǝtn ngǝ sughǝn ɗa hǝŋaa? Nii ghǝn caa kon a gama cighǝi?'' ⁶³ Beɗ tǝ gii Yesu ta mwaali kuɓ. Dǝllǝ pǝrishes ta wul tǝ tu, ''Mya ceɗkǝ tǝ sǝmngǝ Cogn murghǝ raai, fuu mi ko kyani ghǝn ki Ɓorghǝnni kǝ Cogn, Kuni Coghaan?'' ⁶⁴Yesu ta sutǝ ɗa tu, ''Kaa konii ngǝtn waa. Beɗ tǝ gii mya fuughǝ, ɗaŋ ɗaŋngǝni ka yel Ŋaa zaar a tsǝtnngǝn a taaghǝ zaari ghǝ vartǝ, cigha manngǝn ɗi a tsogn gaami giɓ kurvon.''⁶⁵She pǝris vares ta dlaatǝ luu woshii she wul tu, ''Aa kon ngǝtn ngǝ kemaskǝn! Nii caa kyaa ŋal ngǝtn yo ɗaŋ wo tlyaki zha mǝn ɗae? Yellǝn, ɗaŋngǝnin ka wum kemaskǝnneshii. ⁶⁶Nii ghǝn nǝ ɓitalghǝn waane?'' Tǝǝ ta suɗa tǝ wul tu, ''A kǝǝm mǝskǝni.''⁶⁷She tǝǝ ta pyaatsǝ tǝ nyognvii tǝǝ naɗtǝ yirii tǝǝ voɗtǝ, tǝǝ dlii tǝ taas, tǝǝ ⁶⁸ wul tu, '' Fuu mi, kyan ɗaŋ kinǝ Ɓorghǝn kǝ Coghǝi. Nuu ghǝn a ɗugho?''⁶⁹Ɗaŋ Biturus ta yi a tsǝtnngǝn ɓidlǝm, she nyi won ɗaŋ ata yi nǝ mon ata man ɓastǝ ata wul tu, ''Kyani maa kǝ tayi tǝ Yesu mǝn Galilii.'' ⁷⁰ Njiɓ tǝ gii ata ci vii ghai a ken waasǝŋ ɓuruk, yi wul tu, ''Ma yisǝŋ ngǝtn yo ɗaŋ kya wul vii ɗa hǝŋ.''⁷¹Ɗaŋ ata nyolii ɗi ɗa ɓiiles, kamshi monni gon ŋaa gǝɗ ata yeltǝ she ata wul gyaa gyo ɗaŋ ciɗa ɗan tu, ''Murin ata yi tǝ Yesu mǝn Nazareɗ ɗaŋ.'' ⁷²Ata ci vii ghai tǝ cimngǝn sǝǝm Cogn tu, 'Ma yisǝŋ mures hǝŋ!''⁷³Ata ngaa laai njwaatn gyaa gii ɗaŋ cigha dlǝǝrghǝn a laŋshes tǝ ta man tǝǝ wul Biturus tu, Kǝrǝŋ kǝrǝŋ ki namboŋ a giɓi waasǝŋ, durghǝ yo tu vii yo ɗaŋ kya wul a vii a zhiɗ cik.'' ⁷⁴She ata nguɓ laŋngǝn gamas tǝ ŋaskǝn puus tu, ''Ma yisǝŋ mures hǝŋ,'' ɗa ɗan kyaaɗ daaturshi ta gǝm vii. ⁷⁵Biturus ta ɓital a ngǝtn yo ɗaŋ Yesu ata yi kon tu, "Ǝnnda daaturshi tǝ gǝm vii ka ci vii ghai tǝpm maayi tu kaa yisǝŋǝm hǝŋ." She ata nyolii ɓǝdlǝm tlǝn ngwaar nyaŋ nyaŋ.

¹Ɗaŋ lǝɓ ta tlaai she mǝn varaŋsǝ yaatl, tǝ dǝllǝŋsǝ pǝris ɓuruk tǝ ta kaŋ vii a dulgaam Yesu tu tǝǝ ɗu tii. ² Tǝǝ ta naɗ tii , tǝ tlǝǝr tii, tǝ vǝrtǝ gwamna Bilatus.³She ɗaŋ Yahuda ɗaŋ a vǝr vii woshii, ɗaŋ ata yel taa ngyer vii ɗuughǝni Yesu mǝnii, she ata kaɓ ndaaɗkǝni woshii, ata sular wurɓa zurfa tashi maayes, dǝllǝŋsǝ pǝris tǝ mǝn varaŋsǝ yaatl mǝn, ata wul tu, ⁴ "Maa fi kuskǝ ngǝtn ɗaŋ mǝ vǝr vii zaar ɗaŋ ngǝtn mbii tǝ hǝŋ. Beɗ tǝ gii tǝ wul tǝ tu, "Gii nǝ nii ɓasme? Wularghai ngǝtn waa" ⁵She ata kur wurɓa zurfa shi ɗa giɓ dǝn kǝ Coki ata gaa lǝɓǝshii nyolii tlǝn dluu yer woshii hal mǝshii.⁶She dǝllǝŋsǝ pǝris tǝǝ ta mbii wurɓa zurfashii tǝǝ wul tu, "Yi ɗa giiri mǝǝ gaa gin a taraŋ ngǝ wurɓa hǝŋ, nǝ durghǝ yo tu nǝ wurɓa voraŋ. ⁷ Tǝǝ ta wulii a dlei waasǝŋ, tǝ wurɓai tǝǝ ta ɗyiiɓ lǝɓ kai a murghǝ nalghǝn gurnga ata naa nǝ lǝɓ giighǝni sǝmmbǝrsǝ. ⁸ Nǝ durghǝ gii, lǝɓes caa cim tu, "Dǝǝl ghǝ voraŋ" hal ɗaŋ yaawon.⁹Ɗaŋ gyo ɗaŋ murghǝ shinngǝn Cognvon Irmiya ta konii a yuŋnngarii, ca wul tu, "Tǝǝ nyom zurfa tashi maayeshii, wurɓa yo ɗaŋ mǝn Isar'ila tǝǝ ngyer a dulgaamas , ¹⁰ kǝnnda tǝ vǝrii nǝghǝ lǝɓkǝ murghǝ gurnga nalghǝni ɗaŋ gii ɗaŋ Daadǝn ta fuumii."¹¹She Yesu ta dlǝǝrni a ken goɓna, she goɓna ta ceɗ tǝ tu, " Kinǝ guŋ Yahudawaa?" Yesu ta sutuɗa tu, "Kǝ kon cik." ¹²Beɗ tǝ gii ɗaŋ mǝn varaŋsǝ yaatl tǝ dǝllǝŋsǝ pǝris caa caa tǝ vii, ata suɗa hǝŋ. ¹³She Bilatus ta wul tǝ tu, "Kya wum ngǝtn yo ɗaŋ caa ngyer adulgama ɓuruk hǝŋaa?" ¹⁴ Beɗ tǝ gii ata suɗa tǝ vii won ko namboŋ hǝŋ, gii ta kwasar goɓmna nǝ naa vik lyaai hǝŋ.¹⁵Yaasǝŋ waares ta yi ɗa tu, a kili belakes goɓmna ta yi gǝm gon ɗaŋ zarsǝ yaa bwaa. ¹⁶ A kiles tǝǝ ta yir fotarfoi won dǝn ngǝ garaŋ ɗaŋ sǝm wos ta yi tu Barabbas.¹⁷She ɗaŋ tǝǝ jwaashi a lǝɓ nambonyi Bilatus ata wul shi tu, "Nǝ nuu ghǝn kyaa suu mǝ gǝm ki mǝno?Barabbasa ko Yesu Ɓorghǝn kǝ Cogha?", ¹⁸Aa ta yisǝŋǝi tu tǝǝ vǝr Yesu ɓastǝ nǝ durghǝ kashi. ¹⁹Ɗaŋ ata yi a tsǝtngǝni a daan ngǝ vii ɗǝǝlghǝni, gǝɗi wos ta shin ɗi tǝ wul tǝ tu, "Dli taas waai a muuri ɗaŋ nǝ zaar ghǝ zaarii. Durghǝ tu a dulgaam wos tluutn a yi vuum raa mǝn monnda yaawon."²⁰She dǝllǝŋsǝ pǝris tǝ mǝn varaŋsǝ yaatl tǝǝ ta tlya gaam zarshes ɗaŋ taa jwaamshi monndai tu tǝǝ kara nǝ Barabbas, yaan nǝ Yesu, tǝ ɗuu tii. ²¹ Goɓna ata ceɗ shi tu, "A giɓkǝ mbǝlǝŋǝn gyo ghǝn mǝ gǝm ki mǝno? Tǝ ta wul tu, "Barabbas." ²²Bilatus ta wul shi tu, "Mǝ fi wurii tǝ Yesu Ɓorghǝn kǝ Coghe?" Tǝǝ ta wul ɓuruk waasǝŋ tu, "Hǝmmbalǝn tii."²³She ata wulshi tu, "Nǝ nii, nǝ kuskǝ nii ghǝn a fie?" Beɗ tǝ gii tǝ ta dlaar vii tlyaa tlyaa moɓ gii ɗaŋ a yii, "Hǝmmbalǝn tii." ²⁴Ɗaŋ Bilatus ta yel wo kǝǝm fi ngǝtn won hǝŋ, beɗ ɗaŋ tu tǝǝ ta yi a durghǝ shisherghǝni raa, a ta ngaa zha coɓ taas woshii ghai a ken ngǝ zarshes ɗaŋ taa jwaam monndai ata wul tu, "A mbim ngai a voraŋ ngǝ murin ɗaŋ nǝ zaar ghǝ zaarin hǝŋ. Wularǝn ngai tǝ gaama waan."²⁵Zarshes ɓuruk tǝ ta wul tu, "Voraŋ wos tǝ naa ɓasmi tǝ mǝǝri wopm." ²⁶Annda ata gǝm shi Barabbas mǝn, beɗ tǝ gii ata voɗ Yesu mbun -mbun annda ata vǝrshi tǝǝ hǝmmbal tǝ.²⁷Kǝnnda mǝn maandǝ kǝ goɓna tǝ taa ndar Yesui dǝllǝ dǝn ngǝ goɓnati kǝnnda tǝ jwaam mǝn maandǝ kǝ dǝneshi ɓuruk. ²⁸ Tǝǝ ta dlii tǝ lǝŋsǝ mǝnii ɓuruk kǝnnda tǝǝ caa tǝ luu naa guŋshi mǝn. ²⁹Tǝǝ ta ndǝr kur gaam kǝ yiɓka tǝǝ caa tǝ mǝn gaam tǝǝ vǝr tǝ shirǝŋ tǝ ngaɓ a zaari. Tǝǝ zuuɓni a ken wos kǝnnda tǝǝ ryaa tǝ cigha wulghǝni tu, "Cogn tǝ gaa guŋ Yahudawa ɗa!"³⁰Tǝ pyaatsǝ tǝ nyogn vii, tǝǝ kaɓ shirǝnyeshii a taas wos tǝǝ voɗ tǝ ghai a gaam, tǝ man voɗ tǝ ghai a gaam ɗa. ³¹ Ɗaŋ taa ryaa tii, tǝ ta dlii luuos ɗaŋ tǝǝ caa tǝ mǝnii , tǝǝ caa tǝ luu goshii mǝn tǝ tlǝǝr tii tǝ hǝmmbal tii.³²Ɗaŋ tǝ ta nywaalii ɗi, she tǝǝ ta tu mǝn Sarina won ɗaŋ sǝm wos tu Siman, gyo ɗaŋ tǝǝ ta caa tǝ ghai tu tǝ laaɓshi, nǝ durghǝ tu tǝ kǝǝn hǝmmbǝli wos . ³³Tǝ ta tulii a lǝɓ won ɗaŋ caa cim tu Golgota, dyak sǝmes yi tu, "Lǝɓ moɗ gaam." ³⁴Tǝǝ ta vǝr tǝ zhak dlarndu dǝn ɗaŋ nǝ lǝǝghǝni tǝ ngǝtn ngǝ ndzaŋni tu tǝ tlya. Beɗ tǝ gii ɗaŋ ata ɓǝǝɗi wumi, ata nyaŋngas tlyaaghǝni.³⁵Ɗaŋ taa ta hǝmmbal tii she tǝǝ ta ɓǝǝl lǝŋsǝ woshii a ɗughǝni bwagha, ³⁶ she tǝǝ ta tsǝtni annda cii yaal ɗaa tǝ. ³⁷ Gaami a gaam wos tǝ ta dlyaaɗ ngǝtn yo ɗaŋ a fi, gyo ɗaŋ yi tu, "Gin nǝ Yesu, guŋ ngǝ Yahudawa."³⁸Zarsǝ mbǝlǝŋ ɗaŋ caa cini mǝǝr naa tlyaaghǝnii, tǝ ta hǝmmbal shi cimshi, namboŋ a taaghǝ zaari, namboŋ a taaghǝ naɓti wos. ³⁹Gyaa gon ɗaŋ tǝ ta ya laatsǝ cii vyaar tǝ annda cii righǝɗ gaam. ⁴⁰Cii wul tu, "Kyan ɗaŋ kǝ wul tu ka dluuɗ dǝn ngǝ Coghǝi, ka ndǝr kǝ nalii a mbuɗkǝn maayi vuum gamaai ǝŋ yaan kinǝ kuni Cognvon, shii ɗi ɗa hǝmmbǝles."⁴¹Cik ɗaŋ, dǝllǝŋsǝ pǝris ci ɓastǝ ryaaghǝni ci tǝ gyaa maalǝmci kǝ mborki ghǝ Musa tǝ mǝn varaŋsǝ yaatl tǝ wul tu, ⁴² "A vuum gyaa gonnii, beɗ tǝ gii wo kǝǝm vum gamas hǝŋ. Cinǝ guŋ ngǝ Israila. Tǝ shii ɗi ɗa hǝmmbǝles, kǝnnda mǝ caa vwaa wos.⁴³A gaa ni gamas a Cognvon, gaan Cognvones tǝ vum tii ɗaŋngǝni, ǝŋ Cognvon yaa kaɓii tǝ vum tii ɗi. Yaan tu hal a wul tu, "Minǝ kuni ghǝ Cognvon." ⁴⁴Cik ɗaŋ mǝŋrǝŋsǝ ɗaŋ tǝ hǝmmbal shi cimshi, tǝǝ ta wul tǝ kuskǝ vii.⁴⁵Tun ɗi dwaam kǝ limi lǝɓ ta diɓii ɓuruk ɗa yaatli hal dwaam kǝ twoknanndami. ⁴⁶Ɗaŋ dwaam kǝ twoknanndami ta naa mel, Yesu ta gǝǝm riiŋ tǝ yer tlyaa-tlyaa ata wul tu, "Eli, Eli, lama sabachthani?" gyo ɗaŋ deis yi tu,"Cognvonatn, Cognvonatn nii ghǝn a caa kǝ gǝmmii ghwai?" ⁴⁷ Ɗaŋ gyaa gon ɗaŋ tǝ ta yi a dlǝǝrghǝni ɗa ɗani tǝ wum cik, tǝ ta wul tu, "Caa cim ni Iliya."⁴⁸Swaaɗ kyaaɗ gon waasǝŋ ta kir mbii lǝtsǝmbǝr yugn tii tǝ zhak ndzaŋni, dloɓii a shirǝŋ, gaa tǝ mǝn a vii tu tǝ tlyaa. ⁴⁹Gyaa gon waasǝŋ tǝ ta wultu, "Gaan tǝ saɗ ngǝtn wos. Dlǝǝrǝnii mǝǝ yeli ko Iliya wo man vum tii." ⁵⁰She Yesu ta man gǝm riiŋ tlyaa -tlyaa ɗa she ata dlii raa taai, she ata gǝm zhipti woshii.⁵¹She lampiɗi kǝ dǝn Cogn ta hǝrɗii mbǝlǝŋ ngaɓkǝnɗi gaami hal yaatl, ɗǝgn ta zhighǝɗi, gyaa tari tǝǝ ta taarii. ⁵² Gyaa vii giir tǝ ɗǝrǝi, dlii ghǝ zarsǝ ghǝ Cognvon monnda ɗaŋ taa ta shii kuci tǝǝ ta shishershi waasǝŋǝi. ⁵³ Tǝǝ ta nywaalii ɗi a vii giir waasǝŋ, ɗaŋ tǝǝ shishi ɗi a mǝn mǝǝskǝni, tǝǝ ndai a giɓ yaatl kǝ ndzǝk ndzǝki, tǝ mbwaaɗi a zarsǝ monnda.⁵⁴Ɗaŋ mǝnvar kǝ mǝn maandǝ tǝ gyaa gyo ɗaŋ tǝ ta yigha yaalghǝn ɗa nǝ Yesu ɗaŋ tǝ ta yel yaatli zhighǝɗi tǝ ngǝtn yo ɗaŋ taa fi, she vǝrtǝ ta ɗuushi waasǝŋǝi monnda she tǝ wul tu ," Jom-jomi gin tayi nǝ kuni Cognvon." ⁵⁵Guɗi monnda gyaa gyo ɗaŋ tǝǝ ta laaɓ Yesu ɗi Galiili ɗaŋ tǝ ta ya fitǝ laa mǝn tǝ dlǝǝrɗi ɗooŋngai annda cii yaal ɗi. ⁵⁶ A giɓi waasǝŋ tǝǝ ta yinǝ gyaa Maremu Magadaliya, Maremu naa gyaa Yakubu tǝ Isufu tǝ naa mǝǝri ghǝ Zaɓaɗi.⁵⁷Ɗaŋ sutu ta fii, she murghǝ tughǝni won ta man, mǝn Aramatiya, ɗaŋ sǝm wos tu Isufu, gyo ɗaŋ a raa cinǝ ŋaa ghǝ dǝn ngǝ Yesu ɗaŋ. ⁵⁸Ata tlii a Bilatus, ceɗ tǝ nǝ gǝmmbǝli ghǝ Yesu. She ata caa tǝ vǝrtǝ gǝmmbǝles.⁵⁹Isufu ta mbii gǝmmbǝles karghaɗii a pǝri linin ɗaŋ yi kaɗ-kaɗ, ⁶⁰ ata mbutar tii a vii giir wos ɗaŋ nǝ muuri gyo ɗaŋ ata com a tari, annda ata kuruŋ dǝllǝ puus gaa ɗa ken ɓiil kǝ vii giiiri annda ata tlii ngǝtn wos. ⁶¹ Maremu magadaliya tǝ Maremu gii tǝǝ ta yi ɗa ɗan a tsǝtngǝni nǝ taaghǝ luui te vii giiri.⁶²Ɗaŋ lǝɓ ta tlaai gyo ɗaŋ caa laaɓ dzaŋ ghǝ mbǝrghǝni nǝ belak kǝ tlǝǝghǝni, she dǝllǝŋsǝ pǝris tǝ Farisawa tǝ ta jwaamshi waashii a lǝɓ nambonyi tǝ gyaa Bilatus. ⁶³ Tǝ ta wul tu, "Mǝnvar mǝǝ ɓitali tu yaan ɗaŋ ata ya mor zarsǝ ɗaŋ ata yi ɗa gwaam, a ta wul tu, "Mbuɗkǝni maayi ya laatsǝi ma shishiɗi saɗ ɗa ɗa.' ⁶⁴Nǝ durghǝ gii caa tǝ yaal ɗa nǝ vii giiri mbun-mbun, she mbuɗkǝn maayes ya laatsǝi yaan cik hǝŋ mǝǝri dǝnwos ta man ci mǝǝr woshii kǝnnda ta wul zarsǝ tu, 'Aa shishiɗi a mǝni gyaa gyo ɗaŋ taa mǝǝshii,' morghǝn kǝ kaares wo kuus moɓ kǝ kenes."⁶⁵Bilatus ta wul shi tu, "Mbiin murghǝ yaalghǝni ɗa, Tlǝn aa sular tii nǝ lǝɓ yaalghǝn ɗa mbun-mbun ɗaŋ gyo ɗaŋ ka ɗyaa." ⁶⁶ She tǝǝ ta tlǝn lyaa vii giireshii mbun-mbun, she tǝ ɗuu rǝtsǝghǝn kǝ vartǝ waasǝŋ ɗa puushi, kǝnnda tǝ gaa murghǝ yaalghǝni ghai ɗa.

¹Ɗaŋ dzaŋ ngǝ wolnges ata laatsǝi, ɗaŋ taaghǝ mbintli aa naa mel kǝ dzaŋ kǝ keni kǝ mbuɗkǝn wottsǝmai, Maremu Magadaliya tǝ kamshi Maremu gii tǝ ta man tǝ yel vii giires. ²She yaatl ta zhighǝɗ monnda, yaan tu zhipti shinngǝn Daadǝn ta shii ɗi tsogn man kurǝŋ puusheshii tsǝtni ɗa duuli.³Ata yaal ɗaŋ falaŋ laŋsǝ wos nǝ fyaali ɗaŋ mbwaapm. ⁴Mǝn yaalghǝn ɗa nǝ vii giires tǝǝ ta kuŋǝi nǝ vǝrtǝ, tǝǝ ta naai ɗaŋ gyaa gyo ɗaŋ taa mǝǝshii.⁵Zhipti shinngǝn Cokes ata wul vii guɗes, ata wulshi tu, ''Kaɗ vǝrtǝ tǝ ngaɓki hǝŋ, yaan tu maa yisǝŋǝi tu kyaa ŋal ni Yesu ɗaŋ tǝ hǝmmbaltii. ⁶Ciɗa ɗuuni hǝŋ, aa shishi ɗaŋ gii ɗaŋ ata konii. Manǝn aa yel lǝɓ yo ɗaŋ Daadǝn ta mbuɗ kai. ⁷Vaan ki motl motl aa tlǝn fuu mǝǝri dǝn wos tu, 'Aa shishi ɗi a gyaa gii ɗaŋ taa mǝǝshii. Yelǝni, wo nda ki ken a tlǝghǝn Galiili. Ɗan ghǝn ka yel tǝ.' Yelǝn, maa fuu ki.''⁸Guɗes tǝǝ ta vaashi motl motl tǝ gaa vii gireshii tǝ vǝrtǝ tǝ polghǝn nyaŋ nyaŋ, tǝǝ ta kir tǝ fuu mǝǝri dǝn woshes. ⁹She Yesu taa tushi, wulshi tu, "Myaa wuru ki.'' Guɗes tǝǝ ta man ngaɓtii a yaasǝŋ tǝǝ mbuu tǝ. ¹⁰She Yesu ta wulshi tu, ''Vǝrtǝ tǝ ɗuki hǝŋ. Tlǝn aa fuu gyaa yesatn tu tǝ tlǝ Galiili. Ɗan ta yelǝm.''¹¹A kili yo ɗaŋ guɗes ciga tlǝghǝni, she gyaa gyo ɗaŋ caa yaal ɗa nǝ vii giiri tǝǝ ta ndai ɗa yaatli annda tǝǝ fuu dǝllǝŋsǝ pǝris ko nii ɓuruk ɗaŋ a fi. ¹²Ɗaŋ gyaa pǝrishes tǝǝ ta jwaamshi waashi tǝǝ mǝn varaŋsǝ yaatl, tǝǝ ta wul vii a ngǝrshes, she tǝǝ vǝr wurɓa mǝn maandes monnda, ¹³tǝǝ fuushi tu, ''Fuun gyaa zarsǝ tu, mǝǝri dǝn ngǝ Yesu, tǝǝ man kaviɗ tǝǝ man ci mǝǝr dlii woshii ɗaŋ miigha kuci.'¹⁴Ǝŋ vii gin ya tulii a goɓna, ma fi mǝǝ mbutar raa woshii, ma mbii ki vuughǝn waan mǝnii ɓaski.'' ¹⁵Nǝ durghǝ gii mǝn maandes tǝǝ ta kaɓ wurɓeshii, tǝǝ fi ɗaŋ gii ɗaŋ tǝ fuushi waashii. Vii gin ta basaŋǝi a dlek Yahudawa gyo ɗaŋ a ci ken ngai hal ɗaŋ yaawonnǝn.¹⁶Beɗ tǝ gii mǝǝri dǝnnes dzuɓ tliiti namboŋǝi tǝ ta tlii Galiili, a wuur yo ɗaŋ Yesu fuu ta shi. ¹⁷Ɗaŋ tǝ ta yel tǝ, tǝǝ ta mbuutǝ, beɗ tǝ gii gyaa gon waasǝŋ ta kaɓ hǝŋ.¹⁸Yesu ta man ɓashi ata wulshi vii she wul tu, ''Ɓuruk vartǝ ta taam gaami tǝ ɗǝgn. ¹⁹Tlǝn nǝ durghǝ gii aa sular zarsǝ kǝ yaatl mari mari tǝǝ naai nǝ mǝǝri dǝnatn. Fin shi baɓtisma mǝn a giɓkǝ sǝm ngǝ Daashǝs, tǝ kǝ Kunes, tǝ kǝ Zhipti vares.²⁰Giɗǝn shi ghai tǝǝ laaɓ ko nii ɓuruk ɗaŋ mǝ fuu ki. Yelǝni, mi ɓaski a ko kili gyo hal ɓanngǝnni ghǝ ɗǝgn.''

¹Ɗaŋ tǝ dlari dǝllǝ zhai gyo ɗaŋ yi yaatl kǝ Gerasinawa. ²Kili yo ɗaŋ Yesu ta shii ɗi ɗa giɓ zhirgi zhes she murwon ngǝni gyo ɗaŋ ci tǝ mǝnndǝŋsǝ a dli wos a nyolɗi a viigiir nǝ dur yo tu tǝ tsal tǝ.³Mures ca tsǝtn nga viigiir, ca naɗ tǝ tǝ maraŋgusa,beɗ tǝ gii ca dzaak maraŋgusas shii.⁴ Taa naɗ tǝ tǝ maraŋgusa giiri beɗ tǝ gii ca dzaag maraŋgusashii.Hal nǝ dur yo tu gon ca man kǝǝm naɗ tǝ ɗa hŋ.⁶Ɗa vii giires tǝ gya wuures mures ca tsǝtn ɗa ɗani yi dlaar vi dzaŋ tǝ kaviɗ anda yi ngyaar dli wos tǝ paal pus.⁵Ɗaŋ a yel Yesu ɗi ɗongai akili gies, she a tsal tǝ tlǝn zuɓni a ken wos.⁷A ngwaar tlyaa tlyaa a wul tu, "Nii ghǝn a mbiim tǝ kyaane, Yesu kuni Cogn Murghǝ luughǝn? Mya karaghǝ firǝm forǝm hŋ." ⁸She Yesu wul mǝndǝes tu, "nyoli ɓastǝ!"⁹She a cet tǝ tu, "Sǝm waa tu nuu?" A wul tu, "Sǝmatn tu mii monnda."¹⁰ A kara tu ɓak nyolar mii gha yaatli gin vuŋ.¹¹Mel tǝ wuures murghǝ lyaaghǝn gutuli kaŋshi dǝn won ɗa ɗani,¹² she tǝ kara tǝ tǝ wul tu, "Gaa mi mǝ shii a dli ghǝ kaŋshi dǝnii."¹³She a kaɓshi ghai a cighes. Mǝnndǝŋses tǝ ta nywaalii a dli mures tǝ tlin shii gha kaŋshi dǝnes ɗaŋ lǝɗkǝnes tayi zaŋngu.Kaŋshi dǝnes zaŋngu mbǝtlǝmi tǝ ta vum ɗi a gǝŋcigǝŋ tǝ shii zha.'¹⁴Mǝn lyaaghǝn kaŋshi dǝnes tǝ ta kir tǝ tlii dǝn tǝ ta fuu zarsǝ ngǝtn ɗaŋ a tu shi. ¹⁵Zarsǝ tǝ ta man tu Yesu citǝ mures ɗaŋ yir mǝnndǝŋsǝi cigha tsǝtnngǝni a giɓkǝ ɓitalghǝn wos aa caa lǝŋsǝ, vǝrt ta ngaɓshi waashii.¹⁶Gyagyo ɗaŋ tǝ ta man tǝ yel ngǝtn yo ɗaŋ a tu murghǝ mǝnndǝŋsǝi tǝ sushi tǝ tlǝn fuushi ngǝtn yo ɗaŋ a tu kaŋshi dǝnes.¹⁷Zarsǝes tǝ ta kara tǝ tu tǝ nyol tǝ gaa yaatleshii.¹⁸Mures ɗaŋ ata yi tǝ mǝnndǝŋsǝ a dli woshes, a kili gii ɗaŋ a yel Yesu wo ndai giɓ zhirgi zhes wo tlii, ata kara tǝ tu wo laaɓ tǝ. ¹⁹Beɗ tǝ gii Yesu ta kaɓ tǝ mǝn hŋ. A wul tǝ tu, "Sughǝ dǝn a zarsǝ waa aa fuushi gyaal yo ɗaŋ Daadǝn fighǝ mǝn." ²⁰Mures ta ndai giɓ Dikafolis ca fuushi dǝllǝŋsǝ ngetn yo ɗaŋ Yesu fitǝ mǝn, ngǝrshi ta naa shi mǝn nǝ ngǝtngǝ kwasarghǝn.²¹A kili gii Yesu ta sutǝ tlii a te dlari rupes,ɗaŋ ciɗa giɓ zhirgies zarsǝ tǝ man ngirǝŋ tii ɗa ɓill zhes. ²²She gon a giɓkǝ mǝn varaŋsǝ viin laades ɗaŋ sǝm wos tu Yayirus, ata man a ken wos man zuɓni.²³A ta kara tǝ wul tu, "A byaatl nyietn hŋ, a naa mel tǝ mǝshii. Mǝ tlǝ ɗaam dǝn mya karaghǝ a gaa tǝ taas gaam nǝ durghǝ yo tu tǝ fuɗii."²⁴ Tǝ ta tlii cim tǝ nǝ dur yo tu zarsǝ monnda tǝ ta laɓ shi hal cii matsǝ tǝ.²⁵She geɗ won ngǝni ɗaŋ aa fi voni dzuɓ tliiti mbǝtlǝm cigha dlaaghǝn voraŋ. ²⁶Aa buŋ nǝghǝ naa vik lyai vuŋ, aa ɗu wurɓa monda nǝghǝ tlǝghǝn a lǝɓ wugn,beɗ tǝ gii gonngǝnes ca cini ken. ²⁷Ɗaŋ a wum durghǝ Yesu. A kokɗi te ɗaa tǝ kaar ɗaŋ cigha dlǝk zarsǝ, a tǝǝn luu wos²⁸A wul tu, "Hal ǝŋ mya tǝǝn luu wos ma byaatlii."²⁹Ɗaŋ a tǝǝn tǝ tsǝn she shiighǝn voraŋes ta ɓanii, vuughǝn wos ta ɓanii ata byaatlii wum dli wos tlyaa tlyaa.³⁰A ngaa laa hŋ Yesu wum vartǝ nyol ɓastǝ a wul tu, "Nuu ghǝn a tǝǝn luo to?" ³¹Mǝǝridǝn wos tǝ ta wul tu, "A zarsǝn ɗaŋ taa man ngirǝŋngǝ tsǝnin anda ka wul tu nuu ghǝn a tǝǝn ngaa?" ³²Beɗ tǝ gii Yesu ta yaal kaar wos nǝ durghǝ yo tu tǝ yisǝŋ nuu ghǝn a tǝǝn tǝ.³³Gǝɗes ta man tǝ vǝrtǝ tǝ waaghǝn dla-dlar nǝ durghe yo tu aa yisǝŋ ngǝtn yo ɗaŋ ci ɗa man zuɓni a ken ngǝ Yesu fuu tǝ nǝghǝ naa jom jomni. ³⁴A wul gǝɗes tu, "Nyietn, caaghǝn raa yo ɗaŋ kǝ yir ghǝnda a fuɗkǝ. Tlǝ byaatl byaatl gonngǝn waai aa ɓanii."Kili yo ɗaŋ cigha wulghǝn vi tǝ gǝɗes she mǝnwon ngǝn cin tǝ dlamɗi dǝn gya mǝnvar ghǝ viin laadi tǝ wul tu, "Vuu raa Malǝm mǝn hŋ, nyi waa aa mǝshii."³⁶Beɗ tǝ gii kili yo ɗaŋ Yesu wum ɗaŋ tǝ kon a wul menvar ghǝ viin laades tu, "Caa raa waa ɓasǝm vǝrtǝ tǝ ngaɓkǝ hŋ." ³⁷A dlǝlar zarsǝi ɓuruk nǝ durghǝ yo tu Bitrus tǝ Yakubu tǝ Yohanna yeskǝ Yakubu kǝnda tǝ ta laaɓ tǝ. ³⁸Ɗaŋ tǝ tuli ɗa dǝn gya menvar ghǝ viin laades a yel zarsǝ cigha raaghǝ jii, cigha waaghǝn miitsǝ.³⁹Kili yo ɗaŋ a ndai ɗa dǝnes a wul zarsǝ tu, " Kya ngwaar nǝnii? Nyies aa mǝs hŋ a ndani kuci."⁴⁰ Tǝ gyomtlǝ tǝ nyaŋ nyaŋ. Beɗ tǝ gii a nyolar shi waasǝŋǝi ɗeɓaɗ ɓidlǝŋ. A cim daa nyies tǝ naa nyies tǝ zarsǝ gyagon ngai tǝ ndai a lǝɓ yo ɗŋ tǝ gaa nyies kai.⁴¹A ngaɓ taas nyieshii a wul tǝ tu, "Talitha koum," yan yi tu, "Ɲaa nyiin shishi, mǝ wul ghǝ tu, shishi." ⁴²Swaaɗ kyaaɗ nyies shishi nguɓ riighǝn (durghǝ tu voni wos aa ta fii dluɓ tliiti mbǝtlǝm). A ngaa laa hŋ ngǝrshi ta kwasar zarsǝ nǝghǝ naa vik lyai hŋ. ⁴³A caa shi yir mbun mbun tu gon tǝ yisǝŋ hŋ. A wul shi tu tǝ vǝr tǝ ngetn ngǝ cighen tǝ ci.

¹ ɗan dzaŋ kə waingi ta latsəi, maryamu magadaliya tə maryamu murgha ɓwaghən yakub, tə salomi, tə ta ɗiib miir kaɗkəndi, naa zhoŋni tu tə tiəən kad dlii ghə Yesu mən. ²Tə taghə bintli a dzaŋ kə keni kə watsəmayes,tə ta tlii ɗa vii giires ɗan dzaŋ ta ŋyoliɖi.³Tə ta yawulghən diəŋsəwasəŋ tu,"Nughən ɗa wo kuruŋmi puushes mən ɗan təɖ ɖan tə diəmp vii giires ghaiyo?" ⁴Ɗaŋ tə yaal gami,she tə yel puushes nə kurungən gaaghen a iyaŋshi,durghə tu puushi nə vari.⁵Ɗaŋ tə nɗai ɗa vii giires, she tə yel kuntləɓər won tə lukfyali, cigha tsətngən a te taghǝ zaari, ngəshi ta kwasarshi. ⁶A wulshi tu,"vərtə tə ɗuki hŋ. Kya ŋal ni Yesu mən Nazaret, gyo ɗan tə ta ghəmbəli. Aa shishi, ci ɗuuni hŋ, yeiən ləəɓ yo ɗaŋ tə ta gaa tə ghai. ⁷Beɗ tə gii tlən, wulən gya məəri dənwos tə Biturus tu, wo nɗaki ken tləghən Galili. ɗani ghən ka yel tə ɗan gyo ɗan a fuuki wanii.⁸Tə ta kir tə nyaali ɗi ɗa vii giires tə dladlar nə durghə kwasarghəni. Tə ta wul gon vii won hŋ durghə tu vərtə ta ngaɓshi nyaŋ-nyaŋ.⁹Tə taghə ɓitlndi a dzaŋ kə keni kə watsəmayes, ɗa kaari ɗaŋ a ta shishi, a ta zhiɗ gamashi keni a Maryamu magadaliya, gyo ɗan aa ta yi ŋyolar mənɗəŋsə wattsəmai ɗi ɓastə. ¹⁰She a ta tlii tləəŋ fuu gya gyo ɗaŋ tə ta yi cimshi, ɗan tə ta yi a miitsə, tə ngwarghəni. ¹¹Tə ta wum tu ci gwaam durghə tu a yeltə, beɗ tə gi tə ta caa raa ghai hŋ.¹²A kaari ngərshi gya gin ɓuruk, a ta nyol zaarsə mɓətləŋ mənɗi tə dlii gon mari, ɗan tə ta yi a righən a datəpm. ¹³Tə ta tlii tə tləəŋ fuu ɓanci məəri dənwos, beɗ tə gii tə ta caa raa a kongən waasəŋ hŋ.¹⁴Ɗa kaari Yesu ta nyol dzub tliiti nambonyes mən ɗi, a ta caa shi yir nə ɗaɗkən caaghən raa, tə tlaaghən raa wasənyi durghə tu tə ta caa raa a ngətn yo ɗan gya gon ɗaŋ tə yeltə tə kon hŋ. ¹⁵Ɗa kaari ɗəgn a fuu vik wusni buruk ngətn yo ɗaŋ Cogn ndər. ¹⁶Ɓuruk gyo ɗaŋ ya caa raai, tə nɗǝr tə fi tə baftisma mənii, wo tu fuuɗkəni. ɓuruk gyo ɗaŋ ya nyaŋngas caaghən raa, wo məəsni zhaaɗ-zhaaɗ.¹⁷Ngərshi gyagin wo rii tə mən yo ɗaŋ citə caaghən raa: A giɓkə səmatn ta nyolar mənɗəŋsə. Ta wul vii tə riisəŋ mari-mari. ¹⁸Ta mbi nyici tə taas waasəŋ wo fishi ngətn hŋ. Ko caa tlya ni wugn, wo fishi ngətn hŋ. Ta gaa taas waasəŋ a mən gonngən, ta byatlii."¹⁹Ɗa kaari ɗaŋ Daadən ta ɓan wulghən vii tə yaŋshi, tə mɓi tii gaami Tsognvon, a ləəɓ yo ɗaŋ wo tsətnnghai a taaghə zaari Cogn. ²⁰Məəri dənes tə ta tlii ko te ɗo, tə yi kon vik wusni Cogn. Daadən ta fi laa tə yaŋshi, yi yungar vii wos tə ngətn kwasarghən yo ɗaŋ a ta ya rii tə yaŋshi.

¹Ɗaŋ ngalai tə mbuɗkən maai, balak kə kabkən gəd gib Kana kə Galili, she naa ghə Yesu tayi ɗa ɗan. ²Yesu tə mərə dən wos taa ta fushi belak kə kabkəngəɗes.³Ɗaŋ zhak ɗarduɗən ata pokghəi, naa ghə Yesu ta wul tə tu "ci tə zhak darnduɗən hŋ". ⁴Yesu ta wultə tu, "Gəɗən, nighən caa kə man basme." kilen a dab tuldi hŋ." ⁵Nana gwos a wul montsəi tu "Buruk ngətn yo daŋ ya fuki, fin nii."⁶Ɗaŋin gya bənnɗə ghə puus ɗaŋ ci lim ɗa ləɓi gyo daŋ Yahudawa caa fi laghai nə belak kə cobkən, ɗaŋ ko gyo wo dya mbi dəromi. ⁷Yesu wul shi tu, "Yughənngarən gya bən ndai shi tə zha." she təta yugngar gya bənndai shi fek. ⁸she ata wul mən laitu," Nyomən ɗa giɓi a sən vərən mənvar ghə belakes." cik kən təta fi.⁹Mənvar belakes ata wum zhes ɗaŋ a naa nə darndudən, beɗ təcik a yisəŋ ləb yo ɗaŋ a mbwaɗi ai hŋ ( beɗ tə gi mən lai ɗaŋ tə nga zhes taa yisəŋəi } She a cim tures. ¹⁰she wul tə tu, "ko zaari gyo caayi səl zhak darndudən kə mbuni keni, əŋnda kə benndəmi a kar yoɗaŋ taa tlya kə mbuneshi. Beɗ tə gi kyani kə gaa kə ɓuneshi she daŋnin."¹¹Gin nə gidkən kə keni ɗaŋ Yesu a fi gib kana kə Galili, tə cik a zhid lughən woshi, she məən dən was təta caa raai ɓastə¹²Akarghə gin Yesu, tə nashi, tə yestə was tə məəri dən was təta tlii Kafarnahum tə cik təta tsətn nəghə mbuɗkən ǰwatn ɗa ɗan.¹³Ɗaŋnin ɗaŋ Idi dlarghən kə Yahudawa ata nayi mel, she Yesu ta tai Urshelima. ¹⁴Ata tu mən ndiɓarghən galtsə tə gya timsa tə gya vumɓurdən mən kwabkən wurba beɗ təta yi a tsətnngən ɗa ɗan.¹⁵Ata myer ɓobtsə ghə tlərəŋ she kadshi ghai ɓuruk ɗa dən cogkes, hal tə gya timsa tə gya galtsə. Ata bazaŋ gya tsər wurba tə mən kwaɓkən wurba ndər pad gya dakci ghə vin dlai yatl. ¹⁶Ata wul gya mən ɗiɓarghən kad bara, "Nyolarən ngəshi gya ginni ɗuun. Ganən naalarghən dən ngə Daadən ləɓ dibarghon ngətn."¹⁷Məəri dən was təta ɓital tu yinə dlyaɗkən, "Raa ghə fighən nədurghə dənwa wo cimi." ¹⁸She mənkaraŋsə Yahudawa təta suɗa təta wul tətu, "Nə zhidkəni gyo ghən ka zhid mighai yo, ɗaŋ duryo tu kya fi ngəshi gya gino?" ¹⁹Yesu a suɗa, "Ɗluɗən vin ladi gineshi, beɗ tə gi a gib kə mbudkən maai ma nal fi."²⁰She mənvaraŋsə Yawudawa tə wul tu," Tə mbi voni tashi wubsə tliti lim əŋnda tə nal vin ladi gines, ka mɓi mbudkən maăi a nalghən vin ladi ginesa?" ²¹Beɗ tə gi ata ya wul nin vi adulgam vinladi ghə dli wos. ²²A karyo daŋ ata shishi di ŋyamri, she məəridənwas təta ɓital tu ayi kon cik, təta caa raai a vikcogn tə vi gin daŋ Yesu ta kon.²³Ɗaŋ ata yi Urshelima a belak kə Idi dlarghən, zarsə monnda təta ca raai a səm was akili yo ɗaŋ tə yel gya ngətn yo ɗaŋ a fii. ²⁴Beɗ tə gi Yesu ata caa raa ɓashi hŋnə ɗuryo tu ata yisəŋ shi washi ɓuruk. ²⁵Ɗuryo tu ɓak ata ya ngal gon won tə tlya tə zhamən a dulgam zaar hŋ duryo to ata yisəŋəi nighən yi a zaar.