Salam¹Re Paulus, Rasul Kristus Yesus penekak Allah, ngau urang-urang kudus de Efesus, urang-urang pecayak lam Kristus Yesus. ²Kasih karunia ngau damai sejahteraa re Allah, Apai kita ngau ari Tuhan Yesus Kristus nyerta kitak.Kekaya urang-urang te tepilih ³Tepuji Allah ngau Apai Tuhan kita Yesus Kristus te alam Kristus dah ngarunia ke ngau kita semua berkat rohani alam sorga. ⁴Empadai alam Ya Allah dah milih kita sapan denia tuk depulah, isak ke kita kudus ngau ndai sih cacat cela dadap Ya.⁵Alam kasih Ya dah nentu ke kita re peruba ulih Yesus Kristus untuk jadi anak-anak Ya, sesuai penekak Ya, ⁶isak ke kasih karunia Ya te mulia tepuji, te deberik Ya ngau kita alam Ya (Yesus) te dekasih Ya (Allah).⁷Empadai alam Ya ngau darah Ya kita bulih penebusan, yak mek pengampunan dusa, menurut kekaya kasih karunia Ya, ⁸ te delimpah ke Ya ngau kita alam segala hikmat ngau pengertian.⁹Empadai Ya dah madah ke resia penekak Ya ngau kita, sesuai ngau rencana Ya, rencana penekak Ya re subak te udah detetap ke Ya alam Kristus ¹⁰ sebagai pesiapan kegenap waktu untuk nyutik ke alam Kristus sebagai Kepalak semua utai, baaik te desurga ngau te de bumi.¹¹Kupadah "alam Kristus", empadai alam Ya lah kami bulih bagian te dejanyi ke - kami te subak detente ke nerimak bagian yak sesuai ngau maksud Allah, te alam semua utai bekerja menurut keputusan penekak Ya - ¹²isak kami, te subak dah naaruh arapan ngau Kristus, tsu jadi puji-pujian bagi kemuliaanYa.¹³Alam Ya ugak - empadai kitak dah ninga firman kebenaran, Injil keselamatan kitak - alam Ya ugak rama kitak pecayak, demeterai ke ngau Roh Kudus, te dejanyi ke Ya yak. ¹⁴Roh Kudus yak mek jaminan bagian kita sampai kita bulih semua, penebusan te nyuruh kita empu Allah, untuk meuji kemuliaan Ya.Doa untuk pengertian tentang kemuliaan Kristus¹⁵NYaka nyuruh, seudah akau ninga atentang iman kitak alam Tuhan Yesus ngau tentang kasih kitak teradap semua urang kudus, ¹⁶aku ndai baduk-baduk ngucap sukur empadai kitak. Ngau aku ningat kitak seruntik alam doa,¹⁷mintak ngau Allah Tuhan kita Yesus Kristus, Apai te mulia yak, isak Ya merik ngau kitak Roh hikmat ngau wahyu untuk ngelala Ya ngau benar. ¹⁸Isak Ya nyadi ke mata kitak terang, isak ke kitak nyaruk arapan nama te bisik alam pengumaiYa: kaya benar kemuliaan te detentu ke Ya bagi urang-urang kudus,¹⁹matang hebat bebenar kuasa-Ya bagi urang te pecayak, sesuai ngau kuasa Ya, ²⁰te dekerja ke Ya alam Kristus ngau ngemangkit ke Ya dentara urang mati ngau nuduk ke Ya desepiak kanan Ya de surga, ²¹jauh lebih tingik re semua pemerintah ngau penguasa ngau kekuasaan ngau kerajaan ngau tiap-tiap nama te tau detelah, bukai cuma de denia tuk, tapi denia te kak datai.²²semua utai dah detaruh Ya de babah kaki Kristus, ngau Ya dah deberik ngau jemaat sebagai kepalak re semua te bisik. ²³Jemaat, tubuh Ya, kepenuh Ya, te menuh semua utai.

Semua yak kasih karunia¹kitak subak dah mati empadai mayuh ngelangar ngau mayuh dusa. ²Kitak idup alam yak, empadai kitak nunak ke penguasa, roh te pituk ketengah bekerja dentara urang-urang neraka. ³Sebenar subak kami teritung dentara sidak, rama kami idup alam hawa nafsu dagin, nunak ke mayuh pengining ngau pemikir te jaik. Sebenar kami tuk kalah dukum (dimurkai) upa sidak bukai.⁴Tapi Allah te kaya ngau rahmat, empadai kebesai kasih Ya ngau kita, ⁵dah ngidup ke kita tamai Kristus, sekalikpun kita dah mati empadai kesalah-kesalah kita - ulih kasih karunia, kitak deselamat - ⁶alam Kristus Yesus ia dah ngemangkit ke kita ugak, ngau merik ke pengkerang tamai Ya de surga, ⁷isak page lusak Ya nunyuk ngau kita, kekaya kasih Ya sesuai ngau pemaik Ya teradap kita alam Kristus Yesus.⁸Empadai kasih karunia, kitak deselamat ke ulih iman; yak bukai usaha kitak, tapi pemerik Allah, ⁹yak bukai asil kitak, nang sampai bisik te ngagah ke dirik. ¹⁰Empadai kita tuk pempulah Allah, depulah Ya alam Yesus Kristus untuk ngereja pempulah te baik, te desiap ke Allah re subak. Ya kak isaka kita idup alam yak.Depesutik alam Kristus¹¹Maka kingat ke, subak kitak bukai urang Yahudi menurut dagin, te depadah sidak te besunat, urang-uraang te ndai besunat, secara lahir te dekerja ulih jaari mensia, - ¹²kitak te subak ndai sik Kristus, ndai temasuk urang-urang Israel, ndai bulih bagian alam ketentuan-ketentuan te dejan'yi ke, ndai sik pengarapan ngau ndai sik Allah alam denia.¹³Tapi pitok, alam Kristus Yesus, ulih darah-Ya, kitak te subak jauh, jadi damping. ¹⁴Empadai Ya yak mek damai sejahtera kita, te dah nyutik ke dua belah pihak, te dah ngerubuh ke sentara (tembok), pekelai pepadu (perseteruan), ¹⁵ Ngau pemati Ya sebagai mensia, dah depebalang Ya ukum Taurat ngau semua perintah peratur Ya, untuk mulah kedua jadi sutik mensia baru alam dirik Ya, ngau yak Ya mulah damai sejahtera, ¹⁶untuk ngedamai ke dua alam sutik tubuh, ngau Allah ulih salib, ngau ngayap ke pekelai (perseteruan) de salib.¹⁷Ya datai madah ke damai sejahtera ngau kitak te jauh, ngau damai sejahtera ngau sidak te damping, ¹⁸empaadai Ya kita kedua belah pihaak alam sutik Roh bulih jalai tamak ngai Apai.¹⁹Piyak mek kitak bukai agik urang penatai (asing), tapi kaban re urang-urang kudus ngau anggota keluarga Allah, ²⁰te depulah atau dasar bala rasul ngau nabi, ngau Yesus Kristus sebagaai batu penyuru. ²¹Alam Ya tumbuh semua bala bangunan, rapi tesusun, jadi bait Allah te kudus alam Tuhan. ²²Alam Ya kitak tamai debangun jadi pengkerang penugau Allah alam Roh.

Resia pengumai urang-urang bukai Yahudi¹Tuk mek nyuruh aku tuk, Paulus, urang te depenyara empadai Kristus Yesus untuk kitak urang-urang te ndai ngelala Allah ²- mimang kitak dah ninga tentang tugas pelaksana kasih karunia Allah, te depecayak ke ngau aku empadai kitak,³tipa resia depadah ngau aku, upa te kutulis panus datau. ⁴Antik kitak maca yak, kitak ketau reyak penyaruk aku ke resia Kristus, ⁵te zaman subak ndai depadah ngau bala mensia, tapi te pituk depadah alam roh ngau rasul-rasul, nabi-nabi Ya te kudus,⁶bahwa urang-urang bukai Yahudi, empadai berita Injil, tamai jadi ahli waris ngau anggota tubuh, ngau peserta alam jan'yi te deberik kalam Yesus Kristus. ⁷Re Injil yak aku dah jadi pelayan nunak ke pemerik kasih karunia Allah, te deberik ke ngau aku sesuai ngau kuasa Ya.⁸Ngau aku te palin hina dentara semua urang kudus, dah deberik kasih karunia tuk, untuk madah ngau urang-urang bukai Yahudi kekaya Kristus, te ndai desangkak-sangkak, ⁹ngau untuk madah ke isik tugas pelaksana resia te daah beabad-abad tepelabuk alam Allah, te mulah semua utai,¹⁰isak ke pituk ulih jemaat depadah ke mayuh macam hikmat Allah ngau pemerintah ngau penguasa de surga, ¹¹sesuai ngau maksud abadi, te dah delaksana ke Ya alam Kristus Yesus, Tuhan kita.¹²Alam Ya me kita bulih pemerani ngau jalai tamak ngau Allah penuh pecayak ulih iman kita ngau Ya. ¹³Maka aku mintaak ngau kitak, isak kitaak nang tabar ati medak kesesak aku empadai kitak, empadai kesesak aku, kemuliaan kitak.Doa Paulus¹⁴Nyak mek nyuruh aku sujud ngai Apai, ¹⁵te re Ya semua kenturun te lam surga ngau te datau bumi nerimak nama Ya. ¹⁶Aku bedoa, isak Ya, nunak ke pengaya kemuliaan Ya, nguat ngau neguh ke kitak ulih Roh alam batin kitak,¹⁷isak empadai iman kitak, Kristus nugau alam ati kitak ngau kitak berakar serta bedasar alam kasih. ¹⁸Aku bedoa, isak kitak tamai semua urang kudus tau maham, besar panyai dalam kasih Kristus, ¹⁹tau ngelala kasih yak sekalikpun ia ngilah semua pengetau. Aku bedoa, isak kitak penuh alam kepenuhan Allah.²⁰Bagi Ya mek, te tau kupulah jauh lebih mayuh repada nama te kita doa ngau pikir, upa te nyata re kuasa te bekerja alam kita, ²¹bagi Ya me kumuliaan alam jemaat ngau alam Kristus Yesus turun temurun sampai selamak-lamaknya. Amin.

Kesatuan jemaat ngau karunia te bemacam-macam¹Nyak nyuruh aku nasihat ke kitak, aku, urang te depenyara empadai Tuhan, isak idup kitak sebagai urang-urang te udah dekumai bepadan ngau pengumai yak. ²Kitak kalah rendah ati seruntik, lemah lembut, ngau sabar. Tunyuk ke kasih kitak alam hal saling nulung. ³Ngau berusaha nyaga kesatuan Roh ulih ikatan damai sejahtera:⁴sutik tubuh, sutik roh, upa kitak te dah dekumai ke ngau sutik pengarap te bisik alam panggilan kitak, ⁵sutik Tuhan, sutik iman, sutik baptisan, ⁶sutik Allah ngau Apai re semua, Allah datau semua, ngau ulih semua alam semua.⁷Tapi ngau kita masing-masing dah deanugerah ke kasih karunia menurut ukuran pemerik Kristus. ⁸Nyak nyuruh jekuh nas:"Rama Ya naik ke tempat tingik, Ya ngemaik tawanan-tawanan; Ya merik ke pemerik-pemerik ngau mensia."⁹Ndai mek "Ya dah naik" berete, YA turun ugak ke bumi te palin babah? ¹⁰Ya te udah turun, Ya augak te udah naik jauh lebih tingik re semua langit, untuk menuh ke semua utai.¹¹Ya mek te udah merik rasul-rasul, nabi-nabi, pemadah-pemadah Injil, gembala-gembala ngau pengajar-pengajar, ¹²untuk ngelengkap urang-urang kudus bagi pekerjaan pelayanan, bagi pembangunan tubuh Kristus, ¹³sampai kita semua encapai kesatuan iman ngau pengetahuan te benar tentang Anak Allah, kedewasaan penuh, ngau tingkat penumuh te sesuai ngau pemenuhan Kristus,¹⁴nyuruh kita tuk bukai agik anak-anak te de' umang-aming ulih upa ribut pengajaran, ulih permainan pelsu mensia alam kelicikan sidak te nyesat ke, ¹⁵tapi teguh bepegai ngau kebenar alam kasih kita tumbuh alam semua utai ke arah Ya, Kristus te Kepalak. ¹⁶Re Ya mek seluruh tubuh, - rapi tesusun dekebat jadi sutik ulih pelayanan bagi semua bagian, sesuai ngaua jatah pekerjaan bagi tiap-tiap anggota - nerimak penumuh, ngau membangun dirik alam kasih.Mensia Baru¹⁷Nyuruh kupadah ngau kutegas ke tuk ngau kitak alam Tuhan: Nang idup upa urang-urang te ndai ngelala Allah ngau pemikir te sia-sia ¹⁸ngau pemaham te keleman, jauh re idup persekutuan ngau Allah, empadai pemudu te bisik alam sidak, ngau empadai kedegilan ati sidak. ¹⁹Perasai sidak tumpul, nyuruh sidak nyerah ke dirik ngau hawa nafsu, ngau ngereja semua macam kecemaran ngau serakah.²⁰Tapi kitak ndai piak. Kitak dah belajar ngelala Kristus. ²¹Empadai kitak dah ninga tentang Ya ngau nerimak pengajaran aalam Ya menurut kebenaran te nyata alam Yesus, ²²kitak, pengidup kitak te subak, kalau kitak dudi ke mensia lamak, te benasa ulih nafsu te nyesat,²³isak kitak depebaru alam roh ngau pemikir, ²⁴ngau ngenak ke mensia baru, te udah depulah menurut penekak Allah alam kebenaran ngau kekudusan te sebenar.²⁵Nyak nyuruh kitak kalah muai pemulak, ngau banai te benar ngau urang bukai, empadai kitak sama anggota. ²⁶Antik kitak nyau luat, nang kitak mulah dusa: nang sampai mata panas padam, antik luat kitak pan padam ugak ²⁷ nang merik kesempatan ngau Iblis.²⁸Urang te ncuri, nang ncuri agik, tapi bekerja manting ngau mulah te baik ngau jari ya, isak ya tau magi utai ngau urang te kurang. ²⁹Nang bisik anai jaik keluar re mulut, tapi pengau me anai te baik untuk membangun, dini perlu, isak sidak te ninga bulih kasih karunia. ³⁰Nang kitak nyuruh Roh Kudus Allah sedih, te udah memeterai ke kitakdah damping ari penyelamatan.³¹Semua pedih, sau, luat, pekelai, sangkak, kalah debuai dentara kitak, piak ugak ngau semua pengenyaik. ³²Tapi kitak kalah sama ramah ngau pangan, penuh kasih ngau saaling ngampun, upa Allah alam Kristus dah ngampun kitak.

Idup sebagai anak-anak terang¹Jadi me penurut-penurut Allah, upa anak-anak te palin dekasih ²ngau idup alam kasih, upa Kristus Yesus dah ngasih kitak, ngau dah nyerah ke dirik untuk kita, sebagai silih (persembahan dan kurban) te baik nyaman bagi Allah.³Tapi cabul, mayuh macam te jaik (rupa-rupa kecemaran) ngau pengangkang (serakah), detelah pun ndai tau dentara kitak, upa sepatutnya bagi urang-urang kudus. ⁴Piak ugak anai jaik, barang are, ngau ngampur - empadai semua yak ndai pantas - kalah nelah anai sukur kebak.⁵Kingat ke tuk bebaik: ndai sik urang kanyi, urang cemar, atau pengangkang, penyemah berhala, te bulih jatah alam kerajaan Kristus ngau Allah. ⁶ Nang kitak desesat ke urang ngau anai puang, empadai te upa yak natai ke peluat Allah atas urang-urang neraka. ⁷Nyak nyuruh kitak nang bekaban ngau sidak.⁸Mimang subak kitak keleman, tapi pituk kitak dah terang alam Tuhan. Nyak nyuruh kitak kalah idup sebagai anak-anak terang, ⁹Terang cuma bebuah ke pemaik, pengadil, ngan pemenar, ¹⁰uji ke nama te bekenaan ngau Tuhan. ¹¹Nang tamai ngamik jatah pempulah-pempulak jaik te ndai bebuah ke nama-nama, tapi kalah dekupak (telanjangi) pempulah-pempulah yak. ¹²Baruk nelah na nama te depulah sidak de tempat te tepelabuk dah nyuruh malu.¹³Tapi semua utai te udah dekupak ulih terang jadi nampak, empadai semua te nampak yak mek terang. ¹⁴Yak mek nyuruh depaadah: "Angkat, kitak te tinuk, ngau bangkit re' entara urang mati, ngau Kristus bepenang atau kitak."¹⁵Perati ke bebuti tipa kitak idup, nang upa urang bebal, tapi kalah upa urang arif, ¹⁶guna ke waktu te bisik, empadai ari-ari tuk jaik. ¹⁷Nyuruh kitak nang budu, tapi usaha ke isak kitak nyaruk penekak Tuhan.¹⁸Nang kitak mabuk anggur, empadai anggur nimul ke hawa nafsu, kitak kalah penuh ngau Roh, ¹⁹banai am sikuk ngau pangan bukai alam mazmur, kidung puji-pujian ngau nyanyi rohani. Benyanyi ngau besurak am alam Tuhan ngau segenap ati. ²⁰Ucap ke sukur seruntik atas semua utai alam nama Tuhan kita Yesus Krisstus ngau Allah Apai kita ²¹rendah ati sikuk ngau pangan bukai ngau takut ke Kristus.Kasih Kristus dasar idup laki bini²²Bini, tunuk me ngau laki kitak, upa tunuk ngau Tuhan, ²³empadai laki yak kepalak bini, upa Kristus kepalak jemaat. Ya te nyelamat ke tubuh. ²⁴Upa jemaat tunuk ngau Kristus, piak ugak bini tunuk ngau laki alam semua utai.²⁵Laki, kasih bini kitak upa Kristus dah ngasih jemaat ngau dah nyerah ke dirik bagi sidak. ²⁶untuk ngudus ke sidak, udah Ya masuk ngau manik kesidak ngau aik ngau firman, ²⁷ngau upa yak Ya naruh jemaat ngau dirik Ya ndai sik cacat cela, isak jemaat kudus ndai becela.²⁸Piyak ugak laki kalah ngasih bini upa ya ngasih tubuh dirik: Sapa te kasih ke bini, kasih ngau dirik. ²⁹Empadai ndai suah urang bencik ngau tubuh dirik tapi masuk, ngerawat yak, upa Kristus teradap jemaat, ³⁰empadai kita anggota tubuh Ya.³¹Nyak nyuruh bakas nudi ke apai inai ya, sengkalik ngau bini ya, isak sedua jadi sutik. ³²Resia tuk besai, tapi te kumaksud yak hubungan Kristus ngau jemaat. ³³Biar lagu nama, bagi kitak masing-masing belaku: kasih ke bini kitak upa ngasih dirik, ngau bini, hormat ke laki kitak.

Taat ngau kasih¹Bala nemiak, kitak kalah taat ngau urang tuai alam Tuhan, empadai matang kalah piak. ²Hormati apai inai kitak - tuk perintah te penting, upa te nyata re jan'yi tuk: ³isak kitak bahagia ngau panyai umur de bumi.⁴Ngau kitak, bala apai-apai, nang kitak nimul ke peluat alam ati anak-anak kitak, tapi didik sidak alam ajaran ngau nasehat Tuhan.⁵bala anak buah (hamba), taat ngau tuak kitak de denia ngau takut, gentar, tulus ati, upa kitak taat ngau Kristus, ⁶jang cuma dadap sidak na, untuk nyenang ke ati urang, tapi sebagai hamba Kristus te ngaua segenap ati mulah penekak Allah, ⁷te ngau rela nyalai ke pelayanan upa urang-urang te ngelayan Tuhan, bukai ngelaayan mensia. ⁸Kitak ketau baik urang hamba atau pun urang merdeka, antik ya mulah utai te baik, ya bakal nerimak balasan re Tuhan.⁹Ngau kitak bala tuak, pulah piak ugak teradap sidak, jauh ke sidak re ancaman. Ingat, Tuhan sidak ngau Tuhaan kitak bisik de surga ngau Ya ndai medak mua.Pelengkapan Rohani¹⁰Udek, kitak kalah kuat alam Tuhan, alam kekuat kuasa Ya. ¹¹Ngau ke pelengkapan senjata Allah, isak kitak tan ngelawan tipu muslihat Iblis;¹²empadai pejuangan kita bukai ngelawan darah ngau dagin, tapi ngelawan pemerintah-pemerintah, penguasa-penguasa, pengulu dunia gelap, roh-roh jaik. ¹³Nyak nyuruh amik semua senjata pelengkapan Allah, isak kitak tau belawan ngau tetap bediri rama ari te jaik yak, udah kitak betemuk (menyelesaikan)semua utai (segala sesuatu).¹⁴Bediri tegap, beketang pungung kebenaran, bebaju jirah keadilan, ¹⁵kaki besanal ke kerelaan untuk madah Injil damai sejahtera; ¹⁶alam semua keadaan ngau perisai iman, empadai perisai yak, kitak tau madam ke semua panah api re te jaik (jahat),¹⁷terimak ke ketupung keselamatan ngau pedang Roh, yak firman Allah, ¹⁸alam semua doa ngau permohonan. Berdoalah setiap waktu alam Roh, bejaga-jaga alam doa kitak yak ngau permohonan te ndai putus-putus untuk semua urang kudus,¹⁹untuk aku ugak, isak aku antik aku mukak mulut, dekarunia ke anai te benar, isak ngau keberanian aku madah re resia Injil, ²⁰te kulayan sebagai utusan te depenyara. Bedoa isak ngau keberaanian aku madah yak sebagaimana aku kalah banai.Salam²¹Isak kitak ketau keadaan ngau hal ihwal aku, maka Tikhikus, menyadik ngau pelayan kita te dekasih alam Tuhan, bakal madah ke semua ngau kitak. ²²Ngau maksud tuk ya kusuruh ngau kitak, isak kitak ketau hal ihkwal kami, isak ya ngelimpau ati kitak.²³Damai sejahtera ngau kasih ngau iman re Allah, Apai ngai ari Tuhan Yesus Kristus nyerta kitak semua. ²⁴Kasih karunia nyerta semua urang, te ngasih Tuhan kita Yesus Kristus ngau kasih te ndai benasa.

SURAT PAULUS NGAU JEMAAT DE KOLOSESalam¹Ari Paulus, rasul Kristus Yesus, ulih penekak Allah. ngau Timotius menyadik kita, ²ngau menyadik-menyadik kita te kudus ngau pecayak alam Kristus de Kolose. Kasih karunia ngau damai sejahtera ari Allah, Apai kita, nyerta kitak.Ucapan sukur ngau doa³Kami ngucap sukur ngau Allah seruntik, Apai Tuhan kita Yesus Kristus, setiap kalik kami bedoa untuk kitak,⁴empadai kami dah ninga iman kitak alam Kristus Yesus ngau tentang kasih kitak teradap semua urang kudus, ⁵empadai pengarapan, te dah desiap ke bagi kitak de surga. Tentang pengarapan yak udah dulau kitak dinga alam firman kebenaran, yak mek Injil, ⁶te udah sampai ngau kitak. Injil yak bebuah ngau bekemang de seluruh denia, piak ugak dentara kitak, mulai re rama kitak ninga ngau ngelala kasih karunia Allah ngau kenak.⁷Semua yak dah kitak ketau re Epafras, kaban pelayan te kami kasih, te bagi kitak, yak pelayan Kristus te setia. ⁸Ya ugak me te madah kami, kasih kitak alam Roh.⁹Nyak nyuruh rama kami ninga, kami ndai baduk-baduk bedoa untuk kitak. Kami mintak, isak kitak nerimak segala hikmat ngau penumut te benar, untuk ngetau penekak Tuhan ngau sempurna, ¹⁰isak idup kitak layak ngau bekenan dadap Ya alam semua utai, ngau kitak merik buah alam semua kerja te baik, ngau tumuh alam penumut te benar tentang Allah,¹¹ngau dekuat ke ngau semua kekuatan ulih kuasa kemuliaan Ya untuk nangung semua utai ngau tekun ngau sabar, ¹²ngau ngucap sukur ngau sukacita ngau Apai, te mantas ke kitak untuk bulih bagi alam nama te detentu ke untuk urang-urang kudus alam kerajaan terang.¹³Ya dah ngelepas kitak re kuasa jaik (kegelapan) ngau minah ke kitak kalam kerajaan Anak-Ya te palin dekasih; ¹⁴alam Ya kita bulih penebusan kita, yak me pengampunan dosa.Keutamaan Kristus ¹⁵Ya yak gamar Allah te ndai kenak pedak, te palin tuai, lebih utama re semua te depulah, ¹⁶empadai alam Ya dah depulah semua utai, te bisik de surga ngau te debumi, te kenak pedak ngau te kenak pedak, baik singgasana, ataupun kerajaan, baik pemerintah, maupun penguasa; semua utai depulah ulih Ya untuk Ya. ¹⁷Ya dah bisik dulau re semua utai, ngau semua utai bisik alam Ya.¹⁸Ya mek kepalak tubuh jemaat. Ya me te tuai, te peruba bangkit re entara urang mati, nyuruh Ya mek te palin utama alam semua utai. ¹⁹Empadai semua kepenuh Allah bekenan nugau alam Ya, ²⁰ulih Allah, Yesus mempedamai ke semua utai alam dirik Ya, baik te bisik de bumi, maupun te bisik de surga, seudah Ya mulah pendamaian ulih darah salib Kristus.²¹Kitak te subak idup jauh re Allah, ngau ngemunsuh Allah alam ati ngau pemikir, upa te nyata re pempulah kitak te jaik, ²²pituk depedamai ke Ya ngau tubuh jasmani Kristus ulih pemati Ya, isak kitak kudus ngau ndai becela ngau cacat dadap Ya. ²³Nyak nyuruh kitak kalah betekun alam iman, teguh ndai mampu deguyu, nang kak dekansat re pengarapan Injil, te udah kitak dinga ngau kitak padah ke alam babah langit, ngau aku tuk, Paulus dah jadi pelayan.Pelayanan ngau penisa Paulus²⁴Pituk aku gaga empadai aku tau sisa empadai kitak, ngau ngenap ke alam dagin aku nama te kurang entang penisa Kristus, untuk tubuh Ya, jemaat. ²⁵Aku dah jadi pelayan umat yak sesuai ngau tugas te depecayak ke Allah ngau Aku untuk nerus ke firman Ya ngau sepenuhnya ngau kitak, ²⁶resia te tepelabuk re abad ke abad ngau kenturun-kenturun, tapi te pituk depadah ke ngau urang-urang kudus Ya. ²⁷Ngau sidak Allah kak madah, betapa kaya ngau mulia resia yak dentara bansa-bansa bukai, yak me: Kristus bisik detengah-tengah kitak, Kristus yak me pengarapan akan kemuliaan!²⁸Ya yak me te kami padah, apabila tiap-tiap urang kami padah ngau kami ajar alam semua hikmat, untuk mimpin tiap-tiap urang ngau kesempurnaan alam Kristus. ²⁹Yak mek te kuusaha ke ngau ku timang-timang (pergumulan) ngau semua tenaga sesuai ngau kuasa Ya, te bekerja ngau penguat alam aku.

¹Aku kak kitak ketau, berat nar pejuangan aku untuk kitak, ngau untuk sidak te de Laodikia ngau untuk semua, te apan ngelala aku pribadi, ²isak ati kitak telimpau, ngau sidak besatu alam kasih, empadai sidak bulih semua kekaya ngau penumut, ngau ngelala resia Allah, yak me Kristus, ³ empadai alam Ya yak tepelabuk semua reta hikmat ngau penumut.⁴Hal tuk kupadah, isak nang bisik te memperdaya kitak ngau anai-anai te baik. ⁵Empadai walaupun aku kedirik ndai sik detengah2 kitak, tapi alam roh, aku aku tamai ngau kitak ngau aku medak ngau sukacita tertib idup kitak ngau keteguhaan iman kitak alaam Kristus.Kepenuhan idup alam Kristus⁶KItak dah nerimak Kristus Yesus Tuhan kita. Nyak nyuruh idup kitak kalau nugau alam Ya . ⁷ Nyak nyuruh kitak berakar alam Ya ngau debangun atau Ya, kitak kalah betamah teguh alam iman te dah dajar ke ngau kitak, ngau ati kitak kalah melimpah ngau sukur.⁸Ati-ati, nang sampai bisik te ngasut (menawan) kitak ngau filsafat te puang ngau pelsu menurut ajaran kenturun ngau roh-roh deni, Tpi ndai menurut Kristus. ⁹Empadai alam Ya nugau secara jasmaniah seluruh kepenuhan keAllahan,¹⁰ngau kitak dah depenuh alam Ya. Ya yak mek kepalak semua pemerintah ngau penguasa. ¹¹Alam Ya kitak dah desunat, bukai ngau sunat te depulah mensia, taapi ngau sunat Kristus, penangal akan tubuh te berdosa, ¹²empadai ngau Ya kitak dekubur alam baptisan, adal Ya kitak tamai debangkit ke ugak ulih kepercayaan kitak ngau kerja kuasa Allah, te udah ngemangkit ke Ya are urang mati.¹³Piak ugak kitak, subak mati empadai ngelangar ngau ndai desunat secara lahiriah, dah diidup ke Allah tamai Ya (Yesus), udah Ya ngampun semua pelangar kita, ¹⁴ngapus ke surat utang, empadai ketentuan-ketentuan ukum te ngancam kita. Semua yak dah nisik agik ngau cara maku ke Ya (Yesus) de kayu salib: ¹⁵ Ya nyadi ke bala penguasa ngau pemerintah tuntunan umum alam pemenang Ya atas sidak.¹⁶Gegak pekara te datauNyak nyuruh kitak nang ngisak ke urang ngukum kitak tekenak (mengenai) bala pemakai pengempak ngau ari raya, bulan baru, atau ari Sabat; ¹⁷semua tuk kemayang re nama te kalah datai, sedang ke wujud e yak Kristus.¹⁸Nang kitak isak ke pemenang kitak degagal ke ulih urang te purak-purak ngerendah ke dirik ngau beribadah ngau malaikat, ngau te ndai sik sebab ngemesai kedirek ulih pemikir ya te deniawi, ¹⁹sedang ya ndai bepegai teguh ngau kepalak, re ni te semua tubuh te detunyang ngau dekebat ngau urat-urat , nerimak penumbuh ilahi.²⁰Antik kitak dah mati tamai Kristus ngau bebas re roh denia-denia, nama kitak naluk ke dirik ngau peratur, s'ulah-ulah kitak agik idup de denia: ²¹ nang nyaapai yak, nang ngasai tuk, nang neguk yak; ²²semua yak bah cuma ngenak (mengenai) ke barang te benasa ulih pemengau ngau cuma nurut perintah-perintah ngan ajaran-ajaran mensia. ²³Peratur-pewratur yak, walaupun nampak penuh hikmat ngau ibadah pempulah dirik, upa te ngeren'ah kedirek, nyiksa direk, ndai sik guna selain re untuk muas ke idup deniawi.

¹Nyak nyuruh, antik kitak debangkit ke tamai Kristus, gegak pekara te datau, dini Kristus bisik, duduk desepiak kanan Allah. ²Pikirke pekara te datau, bukai te de bumi. ³Empadai kitak dah mati ngau idup kitak tepelabuk tamai ngau Kristus alam Allah. ⁴Antik Kristus, te adalah idup kita, madah ke direk page lusak, kitak bakal madah kedirek tamai Ya alam kemuliaan.Mensia baru⁵Nyak nyuruh, mati ke alam dirik kitak semua utai te deniawi, cabul, najis, hawa nafsu, nafsu jaik, ngau perangkak (serakah), te sama ngau penyemah berhala, ⁶semua yak natai ke peluat Allah (atas urang-urang neraka). ⁷Subak kitak mulah te lagu yak ugak, rama kitak idup alam yak. ⁸Tapi pitok buai semua yak, bala peluat, regigit, pengenyaik, sangkak, anai-anai kutur te keluar re mulut kitak.⁹Nang kitak ngemulak pangan (saling mendustai), empadai kitak dah nangal ke mensia lama ngau pempulah e, ¹⁰te udah ngau mensia baru, te depebaru seruntik untuk bulih penumut te benar menurut gamar Khalik; ¹¹alam hal tuk ndai sik agik urang Yunani atau urang Yahudi, urang besunat atau ndai besunat, urang Barbar atau urang Skit, budak atau urang merdeka, tapi Krisstus yaak me semua ngau alam semua utai.¹²Nyak nyuruh, sebagai urang-urang pilihan Allah te dekudus ngau dekasih Ya, pengau ke belas kasih, kemurahan, kerendahan hati, kelemahlembutan ngau kesabaran. ¹³KItak kalah sabar ngau siskuk surang, ngampun sikuk surang antik bisik urang te den'am ngau pangan bukai, upa Tuhan dah ngampun kitak, kitak pulah piak ugak. ¹⁴ Datau semua yak: pengau ke kasih sebagai pengebat te nyutik ngau nyempurna ke.¹⁵Damai sejahtera Kristus kalah merintah alam ati kitak, nyak mek nyuruh kitak dekumai alam sutik tubuh. Ngau kalah berukur. ¹⁶Anai Kristus kalau nugau dentara kitak alam semua kekaya, isak kitak ngau semua hikmat ngajar ngau ngerara sikuk surang samil nyan'yi ke mazmur, ngau puji-pujian nyan'yian rohani, kitaak ngucap sukur ngau Allah alam ati kitak. ¹⁷Ngau semua utai te kitak kerja ngau anai tutur, ngau pempulah, kerja ke semua yak alam nama Tuhan Yesus, samil ngucap sukur ulih Ya ngau Allah, Apai kita.Hubungan antara anggota-anggota rumah tangak¹⁸Bala bini, tun'uk ngau laki kitak, upa se'arusnya aalam Tuhan. ¹⁹Bala laki, bini kitak kalah dekasih, nang kasar ngau sidak. ²⁰Bala nemiak, kalah patuh ngau urangtuai kitak alam semua hal, empadai yak mek te baik alam Tuhan. ²¹Bala apai, nang medih anak kitak, isak ati kitak ndai tabar.²²Bala hamba, taat ngau tuak kitak de denia alam semua hal, nang cuma dadap mua sidak na untuk nyenang ke'ati sidak, tapi kalah tulus ati empadai takut ngau Tuhan. ²³Nama semua te kitak pulah, kerja'ke ngau segenap ati upa untuk Tuhan ngau bukai untuk mensia. ²⁴kitak ketau, bahwa re Tuhan mek kitak nerimak bage te dah detentu ke Ya untuk kitak sebagai upah. Kristus yak mek tuan, ngau kitak hamba Ya. ²⁵Barangsapa mulah kesalah, ya nang'ung kesalah yak, empadai Tuhan ndai milih urang.

¹Bala tuak-tuak, kitak kalah belaku adil ngau jujur teradap hamba kitak; ingat ke, kitak sik bisisk tuan de surga.²Betekun alam doa ngau bejaga-jaga samil ngucap sukur. ³Bedoa ugak untuk kami, isak Allah mukak lawang untuk pemadah kami, isak kami tau banai tentang resia Kristus, te empadai yak aku depenyara. ⁴Ngau upa yak, aku tau madah upa se'arusnya.⁵Idup me ngau penuh hikmat teradap urang-urang luar, peguna ke waktu te bisik. ⁶Kata-kata kitak kalah penuh kasih, nang tabar, isak kitak ketau, tipa kitak kalah merik saut ngau setiap urang.Penutup ngau salam⁷Semua hal ihwalku bakal depadah ngau kitak ulih Tikhikus, menyadik kita te dekasih, hamba te setia ngau kaban pelayan Tuhan. ⁸Ya kusuruh ngau kitak isak kitak ketau hal ikwal kami, ngau isak ya ngelimpau ati kitak. ⁹Ya kusuruh tamai ngau Onesimus, menyadik kita te setia ngau te dekasih, siskuk dentara kitak. Sidak bakal madah ngau kitak semua utai te tejadi dituk.¹⁰Salam ngau kitak ari Aristarkhus, kaban ku depenyara ngau ari Markus, anak menyadik Barnabas - tentang ya kitak dah bulih pesan; terimak ya, antik ya datai ngau kitak - ¹¹ngau ari Yesus, te dekumai Yustus. Cuma sidak tiga tuk dentara sidak te besunat te jadi kaban aku sekerja untuk Kerajaan Allah; sidak yak dah jadi pengibur aku.¹²Salam ari Epafras ngau kitak; ya sikuk re'entara kitak, hamba Krisstus Yesus, te seruntik begumul alam doa ya untuk kitak, isak kitak bediri teguh, sebagai urang-urang te dewasa ngau te bekeyakinan penuh ngau semua utai te dekedekak Allah. ¹³Empadai aku tau merik kesaksian tentang ya, kalau ya susah payah nar untuk kitak ngau untuk sidak te de Laodikia ngau Hierapolis. ¹⁴Salam ngau kitak re tabib Lukas te dekasih ngau re Demas.¹⁵Padah ke salam kami ngau bala menyadik de Laodikia; ngau Nimfa Kedak, ngau jemaat te bisik derumah. ¹⁶Antik surat tuk debaca dentara kitak, usaha ke debaca ke ugak untuk jemaat de Laodikia, surat te untuk de Laodikia debaca ke'ugak untuk kitak diak. ¹⁷Padah ke ngau Arkhipus: Perati ke isak pelayanan te mih terimaak alam Tuhan dejalai ke sepenuh penuh.¹⁸Salam re aku Paulus. Salam tuk kutulis ngau jari aku. Kingat ke penisa (belenggu) ku. Kasih karunia nyerta kitak.

Salam¹Ari Yudas, hamaba Yesus Kristus ngau menyadik Yakobus, salam ngaua sidak te dekumai, dekasih alam nama Allah Apai, ngau te dintu untuk Yesus Kristus, ²Rahmat, damai sejahtera ngau kasih menuh ke kitak.Ukum atas guru-guru pelsu³Bala menyadik te dekasih, sementara aku benar-benar berusaha nulis ngau kitak tentang keselamatan kita semua, aku asai te dejuk nulis tuk ngau kitak, nasihat ke kitak, isak kitak tetap bejuang, mempertahan ke iman te udah depadai ngau urang-urang kudus. ⁴Empadai bisik urang te nyelusup ketengah-tengah kitak, sidak te dah lamak dententu ke untuk dukum. Sidak yak urang-urang fasik te nguna ke karunia Allah untuk muas ke hawa nafsu sidak ngau te udah nyangkal penguasa Tuhan kita Yesus Kristus.⁵Tapi, sekalikpun kitak dah ketau semua yak, ngau ndai ragu agik, tapi aku ngingat ke kitak bahwa mimang Tuhan te nyelamat ke umat Ya re tanah Mesir, tapi sekalik agik, ngeminasa ke urang te ndai pecayak. ⁶Bahwa Ya ngetan bala malaikat te ndai taat ngau batas2 kekuasaan sidak, tapi te nudi ke penugau sidak ngau petuk abadi alam denia te keleman sampai pengakiman pada ari besai,⁷upa Sodom ngau Gomora ngau bala kuta sekamat yak, te ngau cara sama mulah cabul, ngejar kepuasan te ndai patut, udah nangung penisa api kekal, sebagai peringatan ngau semua urang. ⁸Walau piyak, urang te bemimpi-mimpi tuk, ngutur ke tubuh sidak ugak, ngehina kekuasaan Allah serta ngujat semua te mulia de Surga.⁹Tapi pengulu malaikat, Mikhael, rama beselisih betangkap ngau Iblis mengenai mayat Musa, ndai berani ngakim Iblis yak ngau anai jaik, tapi banai: "Sekira nyak Tuhan te nganuk dirik!" ¹⁰Tapi sidak ngujat semua te ndai sidak ketau, justru nama te sidak ketau ngau naluri sidak, upa benatang te ndai berakal, yak mek te nyuruh sidak benasa. ¹¹Celaka sidak, empadai sidak nunak jalai te dekelalu Kain, ngau sidak, empadai upah, namak ke dirik kalam kesesatan Bileam, sidak benasa empadai neraka upa Korah.¹²Sidak yak mek noda alam pejamauan kasih kitak, dini sidak ndai malu-malu ngelahap ngau menting ke dirik kedirik; sidak upa awan ndai beraik, te ngelalu desepu ribut; sidak upa pun kayu rama belayar (gugur) ndai ngasil ke buah, pun-pun kayu te tebantun ngau akar-akar, mati sama sekalik. ¹³Sidak upa gelumang laut te ganas, te mupuk (buih) ke pengeyaik (aib) sidak kedirik; sidak upa bintang te udah bisik tempat de denia te keleman untuk selamak-lamaknya.¹⁴Tentang Henokh ugak, kenturun ketujuh Adam, udah benubuat, jekuh ya: "Benar (sesungguhnya) Tuhan datai ngau beribu-ribu urang kudus Ya, ¹⁵kak ngakin semua urang, ngau nyatuk ke ukuman ngau urang fasik, empadai semua pempulah fasik sidak, kata-kata nista, te ducap ke urang bedosa te fasik yak ngau Tuhan." ¹⁶Sidak yak urang te ngerungut, betanguh tentang nasib sidak, idup menurut hawa nafsu, tapi mulut sidak ngeluar ke anai te ndai-ndai, sidak nilat urang untuk bulih untung.Nasihat-nasihat untuk neguh ke iman¹⁷Tapik kitak, bala menyadik te kukasih, kingat ke nama te subak dah depadah bala Rasul Tuhan kita Yesus Kristus ngau kitak. ¹⁸Sidak udah madah ngau kitak: "Pengabis zaman bakal tampil bala pemejah (pengejek) te idup nunak ke hawa nafsu kefasikan sidak." ¹⁹Sidak yak mek pemecah belah te te idup ndai sik Roh Kudus.²⁰Tapi kitak, bala menyadik te kukasih, susun (bangun) ke dirik kitak atau dasar iman te palin suci, ngau bedoa lah alam Roh Kudus. ²¹Intu dirik kitak alam kasih Allah samil nunguk rahmat Tuhan kita Yesus Kristus, untuk idup te kekal.²²Tunyuk ke belas kasih kitak, ngau sidak te ragu-ragu, ²³selamat ke sidak ngau cara ngerampas sidak re api. Tapi tunyuk ke belas kasih deserta ngau takut ke urang bukai ugak, bencik ke ngau pengau sidak te decemar ulih keining-keeining dosa.Penutup²⁴Bagi Ya, te bekuasa nyaga isak kitak nang tesentuk, ngau te ngemaik kitak ngau ndai benoda, penuh pengaga dadap kemuliaan Ya, ²⁵Allah te Esa, Juruselamat kita ulih Yesus Kristus, Tuhan kita, bagi Ya kemuliaan, kebesai, kekuatan, ngau kuasa, seapan segala abad, pituk, sampai selamaknya. Amin.